Asianet Suvarna News

ದೀಪಾವಳಿಗೆ ನಿಮ್ಮವರಿಗೊಂದು ಅದ್ಭುತ ಗಿಫ್ಟ್ ನೀಡಿ! ₹12 ಸಾವಿರದಿಂದ ಸಿಗುವ 3 ಬೆಸ್ಟ್ 5G ಫೋನ್‌ಗಳು

Pavna Das — Wed, 28 Oct 2026 13:46:03 +0530

Best 5G Smartphones: ಈ ದೀಪಾವಳಿಗೆ ಸಿಹಿತಿಂಡಿ, ಡ್ರೈ ಫ್ರೂಟ್ಸ್‌ ಬದಲಿಗೆ ನಿಮ್ಮ ಕುಟುಂಬದವರಿಗೆ ಏನಾದರೂ ವಿಶೇಷವಾದ ಉಡುಗೊರೆ ನೀಡಲು ಬಯಸುತ್ತಿದ್ದೀರಾ? ಹಾಗಾದರೆ ಹೊಸ 5G ಸ್ಮಾರ್ಟ್‌ಫೋನ್ ಅತ್ಯುತ್ತಮ ಆಯ್ಕೆ. ಕಡಿಮೆ ಬಜೆಟ್‌ನಲ್ಲಿಯೇ ಅತ್ಯುತ್ತಮ ಫೀಚರ್ಸ್ ಹೊಂದಿರುವ ಹಲವು ಫೋನ್‌ಗಳು ಲಭ್ಯವಿವೆ.

ದೀಪಾವಳಿ ಹಬ್ಬಕ್ಕೆ ಇನ್ನು ಕೆಲವೇ ದಿನಗಳು ಬಾಕಿ ಉಳಿದಿವೆ. ದೇಶಾದ್ಯಂತ ಈ ಹಬ್ಬದ ಸಂಭ್ರಮ ಕಳೆಗಟ್ಟಿದ್ದು, ಎಲ್ಲೆಡೆ ದೀಪಗಳ ಬೆಳಕು ಕಂಗೊಳಿಸುತ್ತಿದೆ. ದೀಪಾವಳಿಯ ಸಂದರ್ಭದಲ್ಲಿ ಅನೇಕರು ತಮ್ಮ ಸ್ನೇಹಿತರು, ಪ್ರೀತಿಪಾತ್ರರು ಮತ್ತು ಸಂಬಂಧಿಕರಿಗೆ ಉಡುಗೊರೆಗಳನ್ನು ನೀಡುತ್ತಾರೆ. ಉಡುಗೊರೆ ಎಂದರೆ ಸಿಹಿತಿಂಡಿಗಳ ಬಾಕ್ಸ್ ಅಥವಾ ಡ್ರೈ ಫ್ರೂಟ್ಸ್ ನೀಡುವ ಕಾಲ ಈಗ ಬದಲಾಗುತ್ತಿದೆ. ಇಂದಿನ ದಿನಗಳಲ್ಲಿ ದಿನನಿತ್ಯದ ಕೆಲಸಗಳಿಗೆ ಉಪಯೋಗವಾಗುವ ಮತ್ತು ಉಡುಗೊರೆ ಸ್ವೀಕರಿಸುವವರ ಮುಖದಲ್ಲಿ ನಗು ಮೂಡಿಸುವಂತಹ ಗಿಫ್ಟ್ ನೀಡಲು ಹಲವರು ಬಯಸುತ್ತಾರೆ.

ನೀವು ಗಿಫ್ಟ್ ನೀಡಲು ಬಯಸಿದರೆ ಹೊಸ 5G ಸ್ಮಾರ್ಟ್‌ಫೋನ್ ಅತ್ಯುತ್ತಮ ಆಯ್ಕೆಯಾಗಬಹುದು. ಒಳ್ಳೆಯ ಸ್ಮಾರ್ಟ್‌ಫೋನ್ ಖರೀದಿಸಲು ಈಗ ಹೆಚ್ಚು ಹಣ ಖರ್ಚು ಮಾಡುವ ಅಗತ್ಯವಿಲ್ಲ. ಹಬ್ಬದ ಆಫರ್‌ಗಳ ಸಂದರ್ಭದಲ್ಲಿ ಆನ್‌ಲೈನ್ ಮತ್ತು ಆಫ್‌ಲೈನ್ ಮಾರುಕಟ್ಟೆಗಳಲ್ಲಿ ಸುಮಾರು ₹12,000ರಿಂದ ₹15,000ರ ಬಜೆಟ್‌ನಲ್ಲಿ ಉತ್ತಮ ಫೀಚರ್ಸ್ ಹೊಂದಿರುವ ಸ್ಮಾರ್ಟ್‌ಫೋನ್‌ಗಳು ಸಿಗುತ್ತವೆ. ಈ ದೀಪಾವಳಿಗೆ ಗಿಫ್ಟ್ ನೀಡಲು ಸೂಕ್ತವಾಗಿರುವ ಮೂರು ಫೋನ್‌ಗಳ ವಿವರ ಇಲ್ಲಿದೆ.

ನಿಮ್ಮ ಪರಿಚಯದವರಿಗೆ ವಿಭಿನ್ನ ವಿನ್ಯಾಸ ಮತ್ತು ಸ್ಟೈಲಿಶ್ ಫೋನ್ ಇಷ್ಟವಾಗುತ್ತಿದ್ದರೆ, Nothing ಕಂಪನಿಯ ಸಬ್‌ಬ್ರ್ಯಾಂಡ್ ಆಗಿರುವ CMFನ CMF Phone 1 ಉತ್ತಮ ಉಡುಗೊರೆ. ಇದರ ವಿಶೇಷ ಸ್ಕ್ರೂ ವಿನ್ಯಾಸ ಮತ್ತು ಬದಲಾಯಿಸಬಹುದಾದ ಬ್ಯಾಕ್ ಪ್ಯಾನೆಲ್ ಫೋನ್‌ಗೆ ವಿಭಿನ್ನ ಲುಕ್ ನೀಡುತ್ತದೆ. ಮಾರುಕಟ್ಟೆಯಲ್ಲಿರುವ ಇತರ ಫೋನ್‌ಗಳಿಗಿಂತ ಇದರ ವಿನ್ಯಾಸ ಆಕರ್ಷಕವಾಗಿದೆ.

CMF Phone 1 ಪ್ರಮುಖ ಫೀಚರ್ಸ್:

ಡಿಸ್‌ಪ್ಲೇ: 6.67 ಇಂಚಿನ Super AMOLED ಸ್ಕ್ರೀನ್.
ರಿಫ್ರೆಶ್ ರೇಟ್: 120Hz.
ಬ್ರೈಟ್‌ನೆಸ್: 2000 ನಿಟ್ಸ್ ಗರಿಷ್ಠ ಬ್ರೈಟ್‌ನೆಸ್.
ಪ್ರೊಸೆಸರ್: MediaTek Dimensity 7300 5G.
ಹಿಂಬದಿಯ ಕ್ಯಾಮೆರಾ: 50MP Sony ಮುಖ್ಯ ಕ್ಯಾಮೆರಾ.
ಸೆಲ್ಫಿ ಕ್ಯಾಮೆರಾ: 16MP ಫ್ರಂಟ್ ಕ್ಯಾಮೆರಾ.
ಬ್ಯಾಟರಿ: 5000mAh.
ವಿನ್ಯಾಸ: ಬದಲಾಯಿಸಬಹುದಾದ ಬ್ಯಾಕ್ ಪ್ಯಾನೆಲ್ ಮತ್ತು ವಿಶಿಷ್ಟ ಸ್ಕ್ರೂ ವಿನ್ಯಾಸ.
ಬೆಲೆ: ಅಂದಾಜು ಬೆಲೆ ₹14,999.
ಈ ಫೋನ್ ದಿನನಿತ್ಯದ ಬಳಕೆ, ಮಲ್ಟಿಟಾಸ್ಕಿಂಗ್ ಮತ್ತು ಗೇಮಿಂಗ್‌ಗೆ ಸೂಕ್ತವಾಗಿರಬಹುದು. ಉತ್ತಮ ಡಿಸ್‌ಪ್ಲೇ ಮತ್ತು ವಿಭಿನ್ನ ವಿನ್ಯಾಸವನ್ನು ಇಷ್ಟಪಡುವವರಿಗೆ ಇದು ಆಕರ್ಷಕ ಆಯ್ಕೆಯಾಗಿದೆ.

ಉಡುಗೊರೆಯಾಗಿ ನೀಡುವ ಫೋನ್ ನೋಡಲು ಪ್ರೀಮಿಯಂ ಆಗಿದ್ದರೆ ಅದರ ಆಕರ್ಷಣೆ ಇನ್ನಷ್ಟು ಹೆಚ್ಚುತ್ತದೆ. ಈ ವಿಷಯದಲ್ಲಿ Motorolaದ Moto G85 5G ಗಮನ ಸೆಳೆಯುತ್ತದೆ. ಕಡಿಮೆ ಬೆಲೆಯಲ್ಲಿಯೇ ದುಬಾರಿ ಫ್ಲ್ಯಾಗ್‌ಶಿಪ್ ಫೋನ್‌ಗಳಂತಿರುವ ಕರ್ವ್ಡ್ ಡಿಸ್‌ಪ್ಲೇ ಮತ್ತು ಪ್ರೀಮಿಯಂ ವೀಗನ್ ಲೆದರ್ ಫಿನಿಶ್ ಇದರ ವಿಶೇಷತೆಗಳಾಗಿವೆ.

Moto G85 5G ಪ್ರಮುಖ ಫೀಚರ್ಸ್:

ಡಿಸ್‌ಪ್ಲೇ: 6.67 ಇಂಚಿನ 3D ಕರ್ವ್ಡ್ pOLED ಸ್ಕ್ರೀನ್.
ರಿಫ್ರೆಶ್ ರೇಟ್: 120Hz.
ಸ್ಕ್ರೀನ್ ಪ್ರೊಟೆಕ್ಷನ್: Corning Gorilla Glass 5.
ಪ್ರೊಸೆಸರ್: Qualcomm Snapdragon 6s Gen 3.
ಮುಖ್ಯ ಕ್ಯಾಮೆರಾ: 50MP Sony LYTIA 600 ಕ್ಯಾಮೆರಾ.
ಕ್ಯಾಮೆರಾ ವಿಶೇಷತೆ: OIS ಇಮೇಜ್ ಸ್ಟೆಬಿಲೈಸೇಶನ್ ಸಪೋರ್ಟ್.
ಅಲ್ಟ್ರಾ-ವೈಡ್ ಕ್ಯಾಮೆರಾ: 8MP.
ಸೆಲ್ಫಿ ಕ್ಯಾಮೆರಾ: 32MP.
ಸ್ಪೀಕರ್: Dolby Atmos ಸಪೋರ್ಟ್.
ಬ್ಯಾಟರಿ: 5000mAh.
ವಿನ್ಯಾಸ: ಪ್ರೀಮಿಯಂ ವೀಗನ್ ಲೆದರ್ ಫಿನಿಶ್.
ಬೆಲೆ: ಅಂದಾಜು ಹಬ್ಬದ ಆಫರ್ ಬೆಲೆ ₹15,999.
ಕರ್ವ್ಡ್ ಡಿಸ್‌ಪ್ಲೇ, ಆಕರ್ಷಕ ವಿನ್ಯಾಸ ಮತ್ತು ಕ್ಯಾಮೆರಾ ವೈಶಿಷ್ಟ್ಯಗಳನ್ನು ಬಯಸುವವರಿಗೆ ಈ ಫೋನ್ ಉತ್ತಮ ಆಯ್ಕೆಯಾಗಬಹುದು. OIS ಸಪೋರ್ಟ್ ಕ್ಯಾಮೆರಾ ಅಲುಗಾಡುವಿಕೆಯನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.

ನಿಮ್ಮ ಮನೆಯ ಹಿರಿಯರು, ತಂದೆ-ತಾಯಿ ಅಥವಾ ದಿನವಿಡೀ ಮೊಬೈಲ್‌ನಲ್ಲಿ ವಿಡಿಯೋ ನೋಡುವವರಿಗೆ ಫೋನ್ ಖರೀದಿಸುತ್ತಿದ್ದರೆ Vivo T3x 5G ಉತ್ತಮ ಆಯ್ಕೆಯಾಗಬಹುದು. ಪದೇಪದೇ ಫೋನ್ ಚಾರ್ಜ್ ಮಾಡಲು ಸಮಯವಿಲ್ಲದವರಿಗೆ ಇದರ ದೊಡ್ಡ ಬ್ಯಾಟರಿ ವಿಶೇಷವಾಗಿ ಉಪಯುಕ್ತವಾಗಿದೆ.

Vivo T3x 5G ಪ್ರಮುಖ ಫೀಚರ್ಸ್:

ಡಿಸ್‌ಪ್ಲೇ: 6.72 ಇಂಚಿನ Full HD+ ಸ್ಕ್ರೀನ್.
ರಿಫ್ರೆಶ್ ರೇಟ್: 120Hz.
ಪ್ರೊಸೆಸರ್: Qualcomm Snapdragon 6 Gen 1.
ಮುಖ್ಯ ಕ್ಯಾಮೆರಾ: 50MP ಬ್ಯಾಕ್ ಕ್ಯಾಮೆರಾ.
ಬ್ಯಾಟರಿ: 6000mAh ದೊಡ್ಡ ಬ್ಯಾಟರಿ.
ಫಾಸ್ಟ್ ಚಾರ್ಜಿಂಗ್: 44W ಚಾರ್ಜಿಂಗ್ ಸಪೋರ್ಟ್.
ಸ್ಪೀಕರ್: ಡ್ಯುಯಲ್ ಸ್ಟೀರಿಯೋ ಸ್ಪೀಕರ್‌ಗಳು.
ದಪ್ಪ: ಸುಮಾರು 7.99 ಮಿಮೀ.
ಬೆಲೆ: ಅಂದಾಜು ಆರಂಭಿಕ ಬೆಲೆ ₹12,499.
ಬ್ಯಾಟರಿ ಲೈಫ್ ಹೆಚ್ಚು ಇರುವುದರಿಂದ ವಿಡಿಯೋ ನೋಡುವುದು, ಕರೆ ಮಾಡುವುದು ಮತ್ತು ದಿನನಿತ್ಯದ ಕೆಲಸಗಳಿಗೆ ಫೋನ್ ಬಳಸುವವರಿಗೆ ಇದು ಅನುಕೂಲಕರವಾಗಿದೆ. 44W ಫಾಸ್ಟ್ ಚಾರ್ಜಿಂಗ್ ಸಪೋರ್ಟ್ ಚಾರ್ಜಿಂಗ್ ಸಮಯವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.

ಟರ್ಕಿ ಸಮುದ್ರದಾಳದಲ್ಲಿ 2100 ವರ್ಷಗಳ ಪ್ರಾಚೀನ ರೋಮನ್ ಹಡಗು ಪತ್ತೆ, ಪ್ಯಾಕಿಂಗ್ ಟೆಕ್ನಿಕ್‌ಗೆ ವಿಜ್ಞಾನಿಗಳೇ ಫಿದಾ!

Gowthami K — Mon, 26 Oct 2026 17:07:30 +0530

ಟರ್ಕಿಯ ಅದ್ರಾಸನ್ ಕರಾವಳಿಯ ಆಳಸಮುದ್ರದಲ್ಲಿ ಸಾಗರ ಪುರಾತತ್ತ್ವಜ್ಞರು ಅತ್ಯಂತ ಅಪರೂಪದ ಹಾಗೂ ರೋಚಕ ಐತಿಹಾಸಿಕ ಆವಿಷ್ಕಾರ ಒಂದನ್ನು ಮಾಡಿದ್ದಾರೆ. ಸುಮಾರು 2,100 ವರ್ಷಗಳ ಹಿಂದೆ ರೋಮ್ ನಗರದತ್ತ ಪ್ರಯಾಣಿಸುತ್ತಿದ್ದ ಪ್ರಾಚೀನ ಸರಕು ಹಡಗಿನ ಅವಶೇಷಗಳು ಪತ್ತೆಯಾಗಿವೆ. ಮೆಡಿಟರೇನಿಯನ್ ಸಮುದ್ರದ ತಳದಲ್ಲಿದ್ದ ಈ ಹಡಗಿನಲ್ಲಿ ಆ ಕಾಲದ ರೋಮನ್ ಗಣ್ಯರು ಬಳಸುತ್ತಿದ್ದ, ಅತ್ಯಂತ ಬೇಡಿಕೆಯಲ್ಲಿದ್ದ ಸಾವಿರಾರು ಸೆರಾಮಿಕ್ ಊಟದ ಟೇಬಲ್‌ ಐಟಂಗಳು, ತಟ್ಟೆಗಳು ಅತ್ಯಂತ ಸುರಕ್ಷಿತ ಸ್ಥಿತಿಯಲ್ಲಿ ಪತ್ತೆಯಾಗಿವೆ.

ಟರ್ಕಿಯ ಸಂಸ್ಕೃತಿ ಮತ್ತು ಪ್ರವಾಸೋದ್ಯಮ ಇಲಾಖೆ ನೀಡಿರುವ ಪ್ರಕಟಣೆಯ ಪ್ರಕಾರ, ಈ ಮುಳುಗಿದ ಹಡಗಿನ ಉತ್ಖನನ ಕೆಲಸವು 2025 ರಲ್ಲಿ ಪ್ರಾರಂಭವಾದವು. ಸಮುದ್ರದ 140 ರಿಂದ 180 ಅಡಿ ಆಳದಲ್ಲಿ ಹಡಗು ಬಿದ್ದಿದ್ದರಿಂದ, ಸಂಶೋಧಕರು ನೀರೊಳಗಿನ ನೂತನ ರೊಬೊಟಿಕ್ ತಂತ್ರಜ್ಞಾನವನ್ನು ಬಳಸಿ ಸಾವಿರಾರು ಸೆರಾಮಿಕ್ ತುಣುಕುಗಳನ್ನು ಆಚೆಗೆ ತೆಗೆದು ಅಂಟಲ್ಯ ವಸ್ತುಸಂಗ್ರಹಾಲಯ ಹಾಗೂ ಸಂರಕ್ಷಣಾ ಪ್ರಯೋಗಾಲಯಗಳಿಗೆ ರವಾನಿಸಿದ್ದಾರೆ.

122 ಪ್ರತ್ಯೇಕ ಮಾದರಿಯ ಅಪರೂಪದ ಪಾತ್ರೆಗಳು

ಸಮುದ್ರದಾಳದಲ್ಲಿ ಸಿಕ್ಕಿರುವ ಈ ಸರಕು ಹಡಗಿನಲ್ಲಿ ಒಟ್ಟು 122 ವಿಭಿನ್ನ ವಿನ್ಯಾಸ ಮತ್ತು ಗಾತ್ರದ ತಟ್ಟೆಗಳು, ಬಟ್ಟಲುಗಳು ಹಾಗೂ ಆಕರ್ಷಕ ಬಡಿಸುವ ಭಕ್ಷ್ಯಗಳು ಪತ್ತೆಯಾಗಿವೆ. ಪ್ರಾಚೀನ ಕಾಲದಲ್ಲಿದ್ದ ರೋಮನ್ನರ ಅಡುಗೆಮನೆ ಹಾಗೂ ಊಟದ ಮೇಜಿನ ವೈವಿಧ್ಯಮಯ ಸಂಸ್ಕೃತಿಯನ್ನು ತಿಳಿದುಕೊಳ್ಳಲು ಈ ಆವಿಷ್ಕಾರ ಅತ್ಯಂತ ಪ್ರಮುಖ ಸಾಕ್ಷಿಯಾಗಿದೆ.

ಇಲ್ಲಿ ಪತ್ತೆಯಾದ ಸರಕು ಇಂದಿನ ಟರ್ಕಿಯ ಅರ್ಸುಜ್‌ನಲ್ಲಿರುವ 'ರೋಸಸ್' ಎಂಬ ಪ್ರಾಚೀನ ಬಂದರು ನಗರದಲ್ಲಿ ತಯಾರಾಗಿರಬಹುದು ಎಂದು ಪುರಾತತ್ತ್ವಜ್ಞರು ಅಂದಾಜಿಸಿದ್ದಾರೆ. ಆ ಕಾಲದಲ್ಲಿ ರೋಸಸ್ ನಗರವು ಗಣ್ಯರು ಬಳಸುವ ಅತ್ಯುನ್ನತ ಗುಣಮಟ್ಟದ ಸೆರಾಮಿಕ್ ಪಾತ್ರೆಗಳ ತಯಾರಿಕೆಗೆ ಹೆಸರುವಾಸಿಯಾಗಿತ್ತು.

ಪ್ರಾಚೀನ ಪ್ಯಾಕಿಂಗ್ ತಂತ್ರಜ್ಞಾನಕ್ಕೆ ವಿಜ್ಞಾನಿಗಳು ಫಿದಾ!

ಈ ಹಡಗು ಧ್ವಂಸದ ಅಧ್ಯಯನ ನಡೆಸಿದ ವಿಜ್ಞಾನಿಗಳಿಗೆ ಅತ್ಯಂತ ಆಶ್ಚರ್ಯ ತಂದ ವಿಷಯವೆಂದರೆ ಆ ಕಾಲದ ನಿಕಟವಾದ ಪ್ಯಾಕಿಂಗ್ ಶೈಲಿ. ಸಮುದ್ರದ ಭೋರ್ಗರೆತಕ್ಕೆ ಪಾತ್ರೆಗಳು ಪರಸ್ಪರ ಅಪ್ಪಳಿಸಿ ಒಡೆದುಹೋಗಬಾರದೆಂದು, ಪೆಟ್ಟಿಗೆಗಳಲ್ಲಿ ಪಾತ್ರೆಗಳನ್ನಿಡುವಾಗ ಅವುಗಳ ನಡುವೆ ಒದ್ದೆಯಾದ ವಿಶೇಷ ಜೇಡಿಮಣ್ಣನ್ನು ತುಂಬಿ ಭದ್ರಪಡಿಸಲಾಗಿತ್ತು. ಇದೇ ಕಾರಣಕ್ಕೆ ಹಡಗು ಮುಳುಗಿ 2,000 ವರ್ಷಗಳಿಗಿಂತಲೂ ಹೆಚ್ಚು ಸಮಯ ಕಳೆದರೂ ಇಂದಿಗೂ ಆ ಪಾತ್ರೆಗಳು ಸವೆಯದೆ ಹಾಗೆಯೇ ಉಳಿದುಕೊಂಡಿವೆ.

ಇತಿಹಾಸದ ದಾಖಲೆಗಳಲ್ಲಿದ್ದ ಸಿಸೆರೊ ಪತ್ರಕ್ಕೆ ಸಿಕ್ಕ ಜೀವಂತ ಸಾಕ್ಷಿ

ರೋಮನ್ ಇತಿಹಾಸದಲ್ಲಿ 'ರೋಸಸ್' ಪಾತ್ರೆಗಳಿಗೆ ಎಷ್ಟೊಂದು ಬೇಡಿಕೆಯಿತ್ತೆಂದರೆ, ಪ್ರಸಿದ್ಧ ರೋಮನ್ ರಾಜಕಾರಣಿ ಹಾಗೂ ವಾಗ್ಮಿ ಮಾರ್ಕಸ್ ಟುಲಿಯಸ್ ಸಿಸೆರೊ ಬಿಟ್ಟುಹೋದ ದಾಖಲೆಗಳಲ್ಲಿಯೂ ಇದರ ಉಲ್ಲೇಖವಿದೆ. ಕ್ರಿ.ಪೂ 50 ರಲ್ಲಿ ಸಿಲಿಸಿಯಾದ ಗವರ್ನರ್ ಆಗಿದ್ದಾಗ ತಮ್ಮ ಆಪ್ತ ಸ್ನೇಹಿತ ಟೈಟಸ್ ಪೊಂಪೋನಿಯಸ್ ಅಟಿಕಸ್ ಎಂಬುವವರಿಗೆ ಬರೆದ ಪತ್ರದಲ್ಲಿ, ತಾವು ರೋಸಸ್‌ನಿಂದ 'ರೋಸಿಕಾ ವಾಸಾ' ರೋಸಸ್ ನಗರದ ವಿಶಿಷ್ಟ ಭಕ್ಷ್ಯಗಳು) ಆರ್ಡರ್ ಮಾಡಿದ್ದಾಗಿ ಬರೆದುಕೊಂಡಿದ್ದರು. ಸಿಸೆರೊ ಉಲ್ಲೇಖಿಸಿದ್ದ ಅದೇ ಮಾದರಿಯ 'ಈಸ್ಟರ್ನ್ ಸಿಗಿಲ್ಲಟಾ ಎ' ವರ್ಗಕ್ಕೆ ಸೇರಿದ ಜೇಡಿಮಣ್ಣಿನ ಭಕ್ಷ್ಯಗಳು ಈಗ ಲಭ್ಯವಾಗಿರುವುದು ಇತಿಹಾಸಕಾರರ ಕುತೂಹಲವನ್ನು ಇಮ್ಮಡಿಗೊಳಿಸಿದೆ.

ಟರ್ಕಿ ಜಲ ಗಡಿಯಲ್ಲಿ ಈ ಹಿಂದೆಯೂ 10,000 ಸೆರಾಮಿಕ್ ತಟ್ಟೆಗಳನ್ನು ಹೊತ್ತ 1,500 ವರ್ಷಗಳಷ್ಟು ಹಳೆಯ ಹಡಗು ಹಾಗೂ 1,100 ವರ್ಷಗಳಷ್ಟು ಹಳೆಯ ಆಲಿವ್ ಎಣ್ಣೆಯ ಜಗ್‌ಗಳಿದ್ದ ಹಡಗುಗಳು ಪತ್ತೆಯಾಗಿದ್ದವು. ಆದರೆ, ಪ್ರಸ್ತುತ ಸಿಕ್ಕಿರುವ ಈ 2,100 ವರ್ಷ ಹಳೆಯ ಹಡಗು ಪ್ರಾಚೀನ ಸಮುದ್ರ ವಾಣಿಜ್ಯ ಹಾಗೂ ಸಾರಿಗೆ ವ್ಯಾಪಾರಕ್ಕೆ ಸಿಕ್ಕ ಅತ್ಯಂತ ಅಪರೂಪದ ಪುರಾವೆಯಾಗಿದೆ.

ರಾಯಚೂರಿನಿಂದ 8 ಗಂಟೆ ಜರ್ನಿ ಮಾಡಿ ಈ ಹಳ್ಳಿಗೆ ಬಂದ್ರೆ ಇಲ್ಲಿನ ಬೋರ್‌ವೆಲ್‌ನಲ್ಲಿ 365 ದಿನವೂ ಕೊತಕೊತ ಕುದಿಯುವ ನೀರು ಬರುತ್ತೆ..!

Naveen Kodase — Wed, 28 Oct 2026 12:46:17 +0530

ಭದ್ರಾದ್ರಿ ಕೊತ್ತಗುಡೆಂ: ಸಾಮಾನ್ಯವಾಗಿ ಬೋರ್‌ವೆಲ್ ಕೊರೆದರೆ ತಂಪಾದ ನೀರು ಸಿಗುತ್ತದೆ. ಆದರೆ, ತೆಲಂಗಾಣದ ಒಂದು ಹಳ್ಳಿಯಲ್ಲಿ ಬೋರ್‌ವೆಲ್‌ಗಳಿಂದ ಸುಮಾರು 60 ಡಿಗ್ರಿ ಸೆಲ್ಸಿಯಸ್ ಉಷ್ಣಾಂಶದ ಬಿಸಿ ನೀರು ನಿರಂತರವಾಗಿ ಚಿಮ್ಮುತ್ತಿದೆ. ಕಳೆದ ನಾಲ್ಕು ದಶಕಗಳಿಂದ ಈ ವಿದ್ಯಮಾನ ಮುಂದುವರಿದಿದ್ದು, ಭೂಮಿಯೊಳಗಿನಿಂದ ನೈಸರ್ಗಿಕ ಒತ್ತಡದಲ್ಲಿ ಹೊರಬರುವ ಬಿಸಿ ನೀರು ಸ್ಥಳೀಯ ರೈತರ ಪಾಲಿಗೆ ವರದಾನವಾಗಿದೆ. ಈ ನೀರಿನ ಮೂಲವೇನು ಎಂಬ ಕುತೂಹಲದ ಜತೆಗೆ, ವಿದ್ಯುತ್ ಉತ್ಪಾದನೆಗೂ ಇದನ್ನು ಬಳಸಿಕೊಳ್ಳುವ ಪ್ರಯತ್ನ ನಡೆಯುತ್ತಿದೆ.

ರಾಯಚೂರಿನಿಂದ ಸುಮಾರು ಎಂಟು ಗಂಟೆಗಳ ಪ್ರಯಾಣದ ದೂರದಲ್ಲಿರುವ ತೆಲಂಗಾಣದ ಭದ್ರಾದ್ರಿ ಕೊತ್ತಗುಡೆಂ ಜಿಲ್ಲೆಯ ಮಣುಗೂರು ಮಂಡಲದ ಪಗಿಡೇರು ಗ್ರಾಮ ಈ ಅಪರೂಪದ ವಿದ್ಯಮಾನಕ್ಕೆ ಸಾಕ್ಷಿಯಾಗಿದೆ. ಇಲ್ಲಿನ ಬೋರ್‌ವೆಲ್‌ಗಳಿಂದ ಹೊಗೆಯಾಡುವಷ್ಟು ಬಿಸಿಯಾದ ನೀರು ಹೊರಬರುತ್ತಿದ್ದು, ಯಾವುದೇ ಮೋಟಾರ್, ಆಯಿಲ್ ಎಂಜಿನ್ ಅಥವಾ ವಿದ್ಯುತ್ ಸಹಾಯವಿಲ್ಲದೆ ನೈಸರ್ಗಿಕ ಒತ್ತಡದಿಂದಲೇ ನೀರು ಚಿಮ್ಮುತ್ತಿರುವುದು ವಿಶೇಷ.

ಭೂಮಿಯೊಳಗಿನಿಂದ ಉಕ್ಕಿ ಬರುತ್ತಿದೆ ಬಿಸಿ ನೀರು

ಸಾಮಾನ್ಯವಾಗಿ ಅಂತರ್ಜಲಕ್ಕಾಗಿ ಬೋರ್‌ವೆಲ್ ಕೊರೆದಾಗ ತಂಪಾದ ನೀರು ಸಿಗುತ್ತದೆ. ಕೆಲವು ಪ್ರದೇಶಗಳಲ್ಲಿ ಉಪ್ಪು ಮಿಶ್ರಿತ ನೀರು ದೊರೆಯುತ್ತದೆ. ಆದರೆ, ಪಗಿಡೇರು ಗ್ರಾಮದಲ್ಲಿ ಮಾತ್ರ ಬೋರ್‌ವೆಲ್‌ಗಳಿಂದ ಬಿಸಿನೀರು ಹೊರಬರುತ್ತಿದೆ. ಕಳೆದ ಸುಮಾರು 40 ವರ್ಷಗಳಿಂದ ವರ್ಷದ 365 ದಿನವೂ ಈ ನೀರು ನಿರಂತರವಾಗಿ ಹರಿಯುತ್ತಿದೆ.

ಸುಮಾರು ನಾಲ್ಕು ದಶಕಗಳ ಹಿಂದೆ ಗಣಿಗಾರಿಕೆಗೆ ಸಂಬಂಧಿಸಿದ ಭೂಗರ್ಭ ಸಮೀಕ್ಷೆಯ ಭಾಗವಾಗಿ ಅಧಿಕಾರಿಗಳು ಒಂದು ಕಿಲೋಮೀಟರ್‌ಗಿಂತಲೂ ಹೆಚ್ಚು ಆಳದ ಬೋರ್‌ವೆಲ್ ಕೊರೆದಿದ್ದರು. ಈ ಸಂದರ್ಭದಲ್ಲಿ ಭೂಮಿಯೊಳಗಿನಿಂದ ಬಿಸಿನೀರು ಹೊರಬರಲು ಆರಂಭಿಸಿತ್ತು. ಭೂಗರ್ಭದ ಹೆಚ್ಚಿನ ಉಷ್ಣಾಂಶ ಮತ್ತು ಗಂಧಕದ ಪ್ರಭಾವದಿಂದಾಗಿ ಸುಮಾರು 60 ಡಿಗ್ರಿ ಸೆಲ್ಸಿಯಸ್ ಉಷ್ಣಾಂಶದ ನೀರು ನಿರಂತರವಾಗಿ ಹೊರಬರುತ್ತಿದೆ ಎಂದು ವರದಿಯಾಗಿದೆ. ಯಾವುದೇ ಪಂಪ್ ಅಥವಾ ವಿದ್ಯುತ್ ಚಾಲಿತ ವ್ಯವಸ್ಥೆಯಿಲ್ಲದೆ ನೈಸರ್ಗಿಕ ಒತ್ತಡದಲ್ಲಿ ನೀರು ಮೇಲಕ್ಕೆ ಚಿಮ್ಮುತ್ತಿರುವುದು ಈ ಗ್ರಾಮದ ಪ್ರಮುಖ ವೈಶಿಷ್ಟ್ಯವಾಗಿದೆ.

ಬಿಸಿನೀರಿನಿಂದಲೇ 200 ಎಕರೆ ಭೂಮಿಯಲ್ಲಿ ಕೃಷಿ

ಪಗಿಡೇರು ಗ್ರಾಮದ ರೈತರಿಗೆ ಈ ಬಿಸಿನೀರಿನ ಸೆಲೆ ವರದಾನವಾಗಿದೆ. ಗ್ರಾಮದ ಸುಮಾರು 200 ಎಕರೆ ಕೃಷಿ ಭೂಮಿಗೆ ಇದೇ ನೀರು ಆಸರೆಯಾಗಿದೆ. ಹಿಂದೆ ನೀರಿನ ಕೊರತೆಯಿಂದಾಗಿ ಒಂದು ಬೆಳೆ ಬೆಳೆಯುವುದೂ ಕಷ್ಟವಾಗಿತ್ತು. ಆದರೆ, ಈಗ ನೀರಿನ ಲಭ್ಯತೆಯಿಂದ ರೈತರು ವರ್ಷಕ್ಕೆ ಎರಡು ಬೆಳೆಗಳನ್ನು ಬೆಳೆಯಲು ಸಾಧ್ಯವಾಗಿದೆ. ಆದರೆ, ಬೋರ್‌ವೆಲ್‌ನಿಂದ ಹೊರಬರುವ ಬಿಸಿನೀರನ್ನು ರೈತರು ನೇರವಾಗಿ ಬೆಳೆಗಳಿಗೆ ಹರಿಸುವುದಿಲ್ಲ. ಮೊದಲು ನೀರನ್ನು ಸಮೀಪದ ಹೊಂಡಗಳಿಗೆ ನೀರನ್ನು ತುಂಬಿಸುತ್ತಾರೆ. ಅಲ್ಲಿ ಒಂದು ದಿನದವರೆಗೆ ನೀರನ್ನು ತಣ್ಣಗಾಗಲು ಬಿಡುತ್ತಾರೆ. ನೀರು ಸಂಪೂರ್ಣವಾಗಿ ತಂಪಾದ ಬಳಿಕ ಅದನ್ನು ಭತ್ತದ ಗದ್ದೆಗಳಿಗೆ ಹರಿಸಲಾಗುತ್ತದೆ. ಈ ವಿಧಾನದಿಂದ ಬಿಸಿನೀರನ್ನು ಕೃಷಿಗೆ ಬಳಸಿಕೊಳ್ಳಲಾಗುತ್ತಿದೆ. ನೀರಿನ ಕೊರತೆಯಿಂದ ಸಂಕಷ್ಟ ಎದುರಿಸುತ್ತಿದ್ದ ರೈತರಿಗೆ ಈ ನೈಸರ್ಗಿಕ ಜಲಮೂಲ ಕೃಷಿ ಚಟುವಟಿಕೆಗಳನ್ನು ಮುಂದುವರಿಸಲು ನೆರವಾಗಿದೆ.

ಸಣ್ಣ ಭೂಕಂಪದಿಂದ ಎರಡು ಬೋರ್‌ವೆಲ್‌ಗಳು ಬಂದ್

ಗ್ರಾಮದಲ್ಲಿ ಈ ಹಿಂದೆ ಸಂಭವಿಸಿದ ಸಣ್ಣ ಭೂಕಂಪದ ಪರಿಣಾಮವಾಗಿ ಎರಡು ಬೋರ್‌ವೆಲ್‌ಗಳು ಮುಚ್ಚಿಹೋಗಿವೆ ಎಂದು ಸ್ಥಳೀಯರು ತಿಳಿಸಿದ್ದಾರೆ. ಇದರಿಂದ ಬಿಸಿನೀರಿನ ಲಭ್ಯತೆಯ ಮೇಲೆ ಪರಿಣಾಮ ಬೀರಿದ್ದು, ಉಳಿದ ಬೋರ್‌ವೆಲ್‌ಗಳನ್ನು ದುರಸ್ತಿಗೊಳಿಸುವಂತೆ ಹಾಗೂ ಹೊಸ ಬೋರ್‌ವೆಲ್‌ಗಳನ್ನು ಕೊರೆಸುವಂತೆ ರೈತರು ಸಂಬಂಧಪಟ್ಟ ಅಧಿಕಾರಿಗಳಿಗೆ ಮನವಿ ಮಾಡುತ್ತಿದ್ದಾರೆ. ಭೂಮಿಯೊಳಗಿನಿಂದ ನಿರಂತರವಾಗಿ ಬಿಸಿನೀರು ಹೊರಬರುವ ಈ ಅಪರೂಪದ ವಿದ್ಯಮಾನವನ್ನು ಕಣ್ತುಂಬಿಕೊಳ್ಳಲು ಬೇರೆ ಬೇರೆ ಪ್ರದೇಶಗಳಿಂದಲೂ ಪ್ರವಾಸಿಗರು ಪಗಿಡೇರು ಗ್ರಾಮಕ್ಕೆ ಭೇಟಿ ನೀಡುತ್ತಿದ್ದಾರೆ. ಇದರಿಂದ ಗ್ರಾಮವು ತನ್ನದೇ ಆದ ವಿಶೇಷ ಗುರುತನ್ನು ಪಡೆದುಕೊಂಡಿದೆ.

ಬಿಸಿನೀರಿನಿಂದ 20 ಕಿಲೋವ್ಯಾಟ್ ವಿದ್ಯುತ್ ಉತ್ಪಾದನೆಗೆ ಸಿದ್ಧತೆ

ಪಗಿಡೇರು ಗ್ರಾಮದ ಬಿಸಿನೀರಿನ ಸೆಲೆಯನ್ನು ಕೃಷಿಗೆ ಮಾತ್ರವಲ್ಲದೆ ವಿದ್ಯುತ್ ಉತ್ಪಾದನೆಗೂ ಬಳಸಿಕೊಳ್ಳುವ ಯೋಜನೆ ರೂಪಿಸಲಾಗಿದೆ. ಸಿಂಗರೇಣಿ ಸಂಸ್ಥೆಯು ಭೂಗರ್ಭದ ಉಷ್ಣಶಕ್ತಿಯನ್ನು ಬಳಸಿಕೊಂಡು ವಿದ್ಯುತ್ ಉತ್ಪಾದಿಸುವ ಪ್ರಯೋಗಕ್ಕೆ ಮುಂದಾಗಿದೆ.

ದೆಹಲಿಯ ವಿಜ್ಞಾನ ಸಂಸ್ಥೆಯ ನೆರವಿನೊಂದಿಗೆ 20 ಕಿಲೋವ್ಯಾಟ್ ವಿದ್ಯುತ್ ಉತ್ಪಾದಿಸುವ ಪ್ರಾಯೋಗಿಕ ಯೋಜನೆ ಸಿದ್ಧಪಡಿಸಲಾಗುತ್ತಿದೆ. ಭೂಮಿಯೊಳಗಿನ ಉಷ್ಣಶಕ್ತಿಯನ್ನು ಬಳಸಿಕೊಂಡು ವಿದ್ಯುತ್ ಉತ್ಪಾದಿಸುವ ಈ ಪ್ರಯತ್ನ ಯಶಸ್ವಿಯಾದರೆ, ಪಗಿಡೇರು ಗ್ರಾಮದಲ್ಲಿ ನೈಸರ್ಗಿಕ ಉಷ್ಣಶಕ್ತಿಯ ಬಳಕೆಗೆ ಹೊಸ ಅವಕಾಶಗಳು ತೆರೆದುಕೊಳ್ಳಲಿವೆ. ಯೋಜನೆಯಡಿ ಉತ್ಪಾದನೆಯಾಗುವ ವಿದ್ಯುತ್ ಅನ್ನು ಮೊದಲಿಗೆ ಗ್ರಾಮದ ಬೀದಿ ದೀಪಗಳಿಗೆ ಬಳಸಬೇಕು ಎಂಬುದು ಸ್ಥಳೀಯರ ಒತ್ತಾಯವಾಗಿದೆ. ಈ ಯೋಜನೆ ಯಶಸ್ವಿಯಾದರೆ, ಕೃಷಿಗೆ ನೆರವಾಗುತ್ತಿರುವ ನೈಸರ್ಗಿಕ ಬಿಸಿನೀರಿನ ಮೂಲವು ವಿದ್ಯುತ್ ಉತ್ಪಾದನೆಗೂ ಉಪಯುಕ್ತವಾಗಲಿದೆ.

ಒಟ್ಟಿನಲ್ಲಿ, ಕಳೆದ ನಾಲ್ಕು ದಶಕಗಳಿಂದ ಭೂಮಿಯೊಳಗಿನಿಂದ ನಿರಂತರವಾಗಿ ಬಿಸಿನೀರು ಚಿಮ್ಮುತ್ತಿರುವ ಪಗಿಡೇರು ಗ್ರಾಮವು ತನ್ನ ವಿಶಿಷ್ಟ ಭೂಗರ್ಭದ ವಿದ್ಯಮಾನದಿಂದ ಗಮನ ಸೆಳೆಯುತ್ತಿದೆ. ಕೃಷಿಗೆ ಆಸರೆಯಾಗಿರುವ ಈ ನೀರನ್ನು ವಿದ್ಯುತ್ ಉತ್ಪಾದನೆಗೂ ಬಳಸಿಕೊಳ್ಳುವ ಪ್ರಯತ್ನ ಫಲ ನೀಡುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.

ಭಾರತೀಯ ಅಂತರಿಕ್ಷ್‌ ಸ್ಟೇಷನ್‌ಗೆ ಇರಲಿದೆ ಎರಡು ರೋಬೋಟಿಕ್‌ ಆರ್ಮ್‌, ಭೂಮಿಯಿಂದ 450 ಕಿ.ಮೀ ಎತ್ತರದಲ್ಲಿರಲಿದೆ 54 ಟನ್‌ ತೂಕದ ನಿಲ್ದಾಣ!

Santosh Naik — Thu, 29 Oct 2026 22:30:06 +0530

ನವದೆಹಲಿ (ಅ.29): ಬಾಹ್ಯಾಕಾಶದಲ್ಲಿ ಸ್ವತಂತ್ರ ಮಾನವ ಸಹಿತ ನೌಕೆಯ ಮೂಲಸೌಕರ್ಯವನ್ನು ಹೊಂದುವ ಭಾರತದ ಕನಸು ಇದೀಗ ಮತ್ತಷ್ಟು ಹತ್ತಿರವಾಗಿದೆ. ಭಾರತ ನಿರ್ಮಿಸಲು ಉದ್ದೇಶಿಸಿರುವ ‘ಭಾರತೀಯ ಅಂತರಿಕ್ಷ ಸ್ಟೇಷನ್’ (BAS) ನಿಲ್ದಾಣವು ಅತ್ಯಾಧುನಿಕ ರೋಬೋಟಿಕ್ ಸಾಮರ್ಥ್ಯಗಳನ್ನು ಹೊಂದಿರಲಿದ್ದು, ಬಾಹ್ಯಾಕಾಶ ನಿಲ್ದಾಣದ ಹೊರಭಾಗದಲ್ಲಿ ಗಗನಯಾತ್ರಿಗಳು ಕೈಗೊಳ್ಳುವ ಪ್ರಮುಖ ಕಾರ್ಯಾಚರಣೆಗಳು, ಸ್ಟೇಷನ್‌ನ ರಚನಾತ್ಮಕ ತಪಾಸಣೆಗಳು ಹಾಗೂ ಮುಂಬರುವ ವಿಸ್ತರಣಾ ಕಾಮಗಾರಿಗಳಿಗೆ ನೆರವಾಗಲಿದೆ.

ನವದೆಹಲಿಯಲ್ಲಿ ನಡೆದ ‘ESTIC 2026’ ಸಮಾವೇಶದ ಸ್ಪೇಸ್ ಸೈನ್ಸ್ ಆಂಡ್ ಟೆಕ್ನಾಲಜೀಸ್ ಸೇಶನ್‌ನಲ್ಲಿ ಇಸ್ರೋದ ಬಿಎಎಸ್ (BAS) ಯೋಜನೆ ನಿರ್ದೇಶಕಿ (Project Director) ಕೆ. ಕಲ್ಪನಾ ಅವರು ಗುರುವಾರ (ಅಕ್ಟೋಬರ್ 29) ಈ ಮಹತ್ವದ ತಾಂತ್ರಿಕ ಬ್ಲೂಪ್ರಿಂಟ್ ಅನ್ನು ಅನಾವರಣಗೊಳಿಸಿದರು. ಈ ಮಾಹಿತಿಯ ಪ್ರಕಾರ, ನಿಲ್ದಾಣವು ಆಂತರಿಕ ಮತ್ತು ಬಾಹ್ಯ ರೋಬೋಟಿಕ್ ಹಸ್ತಗಳ ಜೊತೆಗೆ, ಸ್ವತಂತ್ರವಾಗಿ ಹಾರಾಡುವ ‘ಫ್ರೀ-ಫ್ಲೈಯಿಂಗ್ ವ್ಯವಸ್ಥೆಗಳು’ (Free-flying systems) ಹಾಗೂ ಮಾನವನಂತೆಯೇ ಕಾರ್ಯನಿರ್ವಹಿಸುವ ‘ಹ್ಯೂಮನಾಯ್ಡ್ ರೋಬೋಟ್‌ಗಳನ್ನು’ (Humanoid Robots) ಹೊಂದಿರಲಿದೆ.

5 ಮಾಡ್ಯೂಲ್‌ಗಳು ಹಾಗೂ 54 ಟನ್ ತೂಕದ ಮೆಗಾ ಸ್ಟೇಷನ್

ಇಸ್ರೋ ಪ್ರಸ್ತುತಪಡಿಸಿದ ವಿವರಣೆಯ ಪ್ರಕಾರ, ಈ ಸ್ವದೇಶಿ ಬಾಹ್ಯಾಕಾಶ ನಿಲ್ದಾಣವು ಒಟ್ಟು 5 ಪ್ರತ್ಯೇಕ ಮಾಡ್ಯೂಲ್‌ಗಳನ್ನು ಹೊಂದಿರಲಿದ್ದು, ಭೂಮಿಯ ಕೆಳ ಕಕ್ಷೆಯಲ್ಲಿ (Low Earth Orbit) ಸುಮಾರು 450 ಕಿಲೋಮೀಟರ್ ಎತ್ತರದಲ್ಲಿ ಹಾಗೂ 51.5 ಡಿಗ್ರಿ ವಾಲುವಿಕೆಯಲ್ಲಿ ಭೂಮಿಯನ್ನು ಪ್ರದಕ್ಷಿಣೆ ಹಾಕಲಿದೆ. ಈ ಸಂಪೂರ್ಣ ಸ್ಪೇಸ್ ಸ್ಟೇಷನ್ ಸುಮಾರು 54 ಟನ್ ತೂಕವನ್ನು ಹೊಂದಿರಲಿದ್ದು, 27 ಮೀಟರ್ ಉದ್ದ ಹಾಗೂ 20 ಮೀಟರ್ ಅಗಲದ ಬೃಹತ್ ಆಯಾಮಗಳನ್ನು ಹೊಂದಿರಲಿದೆ. ಈ ನಿಲ್ದಾಣದಲ್ಲಿ 3 ರಿಂದ 4 ಗಗನಯಾತ್ರಿಗಳು ನಿರಂತರವಾಗಿ ದೀರ್ಘಕಾಲ ನೆಲೆಸಲು ವ್ಯವಸ್ಥೆ ಮಾಡಲಾಗುತ್ತಿದ್ದು, ಕಿರು ಅವಧಿಯ ಮಿಷನ್‌ಗಳ ಸಂದರ್ಭದಲ್ಲಿ ಹೆಚ್ಚುವರಿಯಾಗಿ ಮತ್ತಿಬ್ಬರು/ಮೂವರು ಗಗನಯಾತ್ರಿಗಳಿಗೆ ಜಾಗ ಕಲ್ಪಿಸಲಾಗುತ್ತದೆ.

ವಾಸಯೋಗ್ಯ ಆವರಣವು (Habitable volume) ಸುಮಾರು 100 ಕ್ಯೂಬಿಕ್ ಮೀಟರ್‌ಗಳಷ್ಟು ಇರಲಿದ್ದು, ನಿಲ್ದಾಣದ ಕಾರ್ಯಾಚರಣೆಗೆ 60 ಕಿಲೋವ್ಯಾಟ್ ವಿದ್ಯುತ್ ಉತ್ಪಾದನಾ ಸಾಮರ್ಥ್ಯವನ್ನು ವಿನ್ಯಾಸಗೊಳಿಸಲಾಗಿದೆ.

ಸ್ಟೇಷನ್‌ನ 5 ಮಾಡ್ಯೂಲ್‌ಗಳು ಮತ್ತು ಅವುಗಳ ವಿಶಿಷ್ಟ ಪಾತ್ರಗಳು

BAS-01 (ಬೇಸ್ ಮಾಡ್ಯೂಲ್): ಇದು ತಂತ್ರಜ್ಞಾನಗಳ ಪರೀಕ್ಷಾ ವೇದಿಕೆಯಾಗಿ (Test bed) ಕಾರ್ಯನಿರ್ವಹಿಸಲಿದ್ದು, ನಿಲ್ದಾಣದ ಸೇವೆಗಳು, ಗಗನಯಾತ್ರಿಗಳ ವಸತಿ ಅಗತ್ಯಗಳು ಹಾಗೂ ಉಪಕರಣಗಳ 'ಪೇಲೋಡ್ ರಾಕ್‌'ಗಳನ್ನು ಬೆಂಬಲಿಸುತ್ತದೆ.

BAS-02 (ಕೋರ್ ಮಾಡ್ಯೂಲ್): ಇದು ಪ್ರಮುಖ ಕೇಂದ್ರ ಘಟಕವಾಗಿದ್ದು, ಡಾಕಿಂಗ್ ಮೂಲಸೌಕರ್ಯ, ಪೇಲೋಡ್ ರಾಕ್‌‌ಗಳು ಹಾಗೂ ಶೂನ್ಯ ಗುರುತ್ವಾಕರ್ಷಣೆಯಲ್ಲಿ ಗಗನಯಾತ್ರಿಗಳ ಆರೋಗ್ಯ ರಕ್ಷಣೆಗೆ ಬೇಕಾದ ವ್ಯಾಯಾಮ ಉಪಕರಣಗಳನ್ನು ಹೊಂದಿರಲಿದೆ.

BAS-03 (ಸೈನ್ಸ್ ಮಾಡ್ಯೂಲ್): ಈ ಘಟಕವು ಗಗನಯಾತ್ರಿಗಳ ಸ್ಪೇಸ್‌ವಾಕ್ (Spacewalks), ಪೇಲೋಡ್‌ಗಳು ಹಾಗೂ ಮರುಬಳಕೆಯ ಪರಿಸರ ನಿಯಂತ್ರಣ ಮತ್ತು ಜೀವ ರಕ್ಷಣಾ ವ್ಯವಸ್ಥೆಗಳನ್ನು (Regenerative ECLSS) ಬೆಂಬಲಿಸುತ್ತದೆ.

BAS-04 (ಲ್ಯಾಬ್ ಮಾಡ್ಯೂಲ್): ಇದು ಭೂಮಿಯನ್ನು ವೀಕ್ಷಿಸಲು 'ಕುಪೋಲಾ' (Cupola) ಕಿಟಕಿ ವ್ಯವಸ್ಥೆ, ಹೆಚ್ಚುವರಿ ಗಗನಯಾತ್ರಿಗಳ ಕೊಠಡಿಗಳು ಹಾಗೂ ಪ್ರಯೋಗಾಲಯದ ಸೌಲಭ್ಯಗಳನ್ನು ಒಳಗೊಂಡಿರುತ್ತದೆ.

BAS-05 (ಬರ್ತಿಂಗ್ ಮಾಡ್ಯೂಲ್): ಇದು ಕಾಮನ್ ಬರ್ತಿಂಗ್ ಮೆಕಾನಿಸಂ ಒದಗಿಸಲಿದ್ದು, ಭವಿಷ್ಯದ ವಿಸ್ತರಣೆಗಳು ಹಾಗೂ ಕಾರ್ಗೋ (ಸರಕು) ಮಾಡ್ಯೂಲ್‌ಗಳು ಬಂದು ಸಂಪರ್ಕ ಸಾಧಿಸಲು (Docking) ನೆರವಾಗುತ್ತದೆ.

ರೋಬೋಟಿಕ್ ಕಾರ್ಯಾಚರಣೆ ಮತ್ತು ಸೂಕ್ಷ್ಮ ಗುರುತ್ವಾಕರ್ಷಣೆ ಸಂಶೋಧನೆ

ಬಾಹ್ಯಾಕಾಶ ನಿಲ್ದಾಣದ ಐದೂ ಮಾಡ್ಯೂಲ್‌ಗಳಲ್ಲೂ ನೌಕೆಗಳು ಬಂದು ಕನೆಕ್ಟ್ ಆಗಲು 'ಡಾಕಿಂಗ್' ವ್ಯವಸ್ಥೆ ನೀಡಲಾಗಿದೆ. ವಿಕಿರಣ (Radiation), ಭಾರಿ ತಾಪಮಾನ ವೈಪರೀತ್ಯ, ಹಾಗೂ ಆಕಾಶದಲ್ಲಿ ತಲೆಯೆತ್ತುವ 'ಮೈಕ್ರೋಮೆಟಿಯೋರಾಯ್ಡ್' (ಉಲ್ಕಾಪಾತ) ಮತ್ತು ಬಾಹ್ಯಾಕಾಶ ತ್ಯಾಜ್ಯಗಳಿಂದ (Orbital debris) ನಿಲ್ದಾಣವನ್ನು ರಕ್ಷಿಸಲು ಅತ್ಯಾಧುನಿಕ ಕವರ್ ವ್ಯವಸ್ಥೆಯನ್ನು ರೂಪಿಸಲಾಗುತ್ತಿದೆ. ಈ ನಿಲ್ದಾಣವು ಸೂಕ್ಷ್ಮ ಗುರುತ್ವಾಕರ್ಷಣೆಯ (Microgravity) ವಾತಾವರಣದಲ್ಲಿ ವೈಜ್ಞಾನಿಕ ಪ್ರಯೋಗಗಳನ್ನು ನಡೆಸಲು ಅತ್ಯುತ್ತಮ ವೇದಿಕೆಯಾಗಲಿದೆ. ಮುಖ್ಯವಾಗಿ ಜೀವ ವಿಜ್ಞಾನ, ಔಷಧೀಯ ಸಂಶೋಧನೆ (Pharmaceuticals), ವಸ್ತು ವಿಜ್ಞಾನ (Materials science) ಹಾಗೂ ಸುಧಾರಿತ ಉತ್ಪಾದನಾ ತಂತ್ರಜ್ಞಾನಗಳ ಕ್ಷೇತ್ರದಲ್ಲಿ ಸಂಶೋಧನೆ ನಡೆಸಲು ಕೇಂದ್ರ ಸರ್ಕಾರ ಆದ್ಯತೆ ನೀಡಿದೆ.

ಉಡಾವಣಾ ಗುರಿ ಹಾಗೂ ಬಜೆಟ್ ವಿವರ

ಭಾರತವು ತನ್ನ ಗಗನಯಾತ್ರಿ ನೌಕೆ ಯೋಜನೆ 'ಗಗನಯಾನ್‌'ನಿಂದ (Gaganyaan) ಮುನ್ನಡೆದು ಬಾಹ್ಯಾಕಾಶದಲ್ಲಿ ಸ್ಥಿರ ಉಪಸ್ಥಿತಿ ಕಾಯ್ದುಕೊಳ್ಳಲು ಸಜ್ಜಾಗಿದೆ. ಈ ಯೋಜನೆಯಡಿ ತನ್ನ ಮೊದಲ ಮಾಡ್ಯೂಲ್ ‘BAS-01’ ಅನ್ನು 2028 ರ ವೇಳೆಗೆ ಉಡಾವಣೆ ಮಾಡುವ ಹಾಗೂ ಸಂಪೂರ್ಣ 5 ಮಾಡ್ಯೂಲ್‌ಗಳ ಸ್ಪೇಸ್ ಸ್ಟೇಷನ್ ಅನ್ನು 2035 ರ ವೇಳೆಗೆ ಪೂರ್ಣಪ್ರಮಾಣದಲ್ಲಿ ಕಾರ್ಯಾಚರಣೆಗೆ ತರುವ ಬೃಹತ್ ಗುರಿಯನ್ನು ಭಾರತ ಹೊಂದಿದೆ.

ಈ ಪೈಕಿ ಮೊದಲ ಮಾಡ್ಯೂಲ್‌ನ (BAS-01) ಅಭಿವೃದ್ಧಿ ಹಾಗೂ ಉಡಾವಣೆಗಾಗಿ 2025-2028 ರ ಅವಧಿಗೆ ಕೇಂದ್ರ ಸರ್ಕಾರವು ಈಗಾಗಲೇ ₹1,763 ಕೋಟಿ ಅನುಮೋದಿತ ಬಜೆಟ್ ಕಾಯ್ದಿರಿಸಿದೆ. ಈ ಬಾಹ್ಯಾಕಾಶ ಔಟ್‌ಪೋಸ್ಟ್ ನಿರ್ಮಾಣ ಹಾಗೂ ನಿರ್ವಹಣೆಯಲ್ಲಿ ರೋಬೋಟಿಕ್ ಸಿಸ್ಟಮ್‌ಗಳು ಅತ್ಯಂತ ಪ್ರಮುಖ ಪಾತ್ರ ವಹಿಸಲಿವೆ.

ಜಿಯೋ ಐಪಿಒ ಸಮಾರಂಭದಲ್ಲಿ ಅಂಬಾನಿ ಮೊಮ್ಮಕ್ಕಳ ತುಂಟಾಟದ ಜತೆಗೆ ಕೈನಲ್ಲಿ ಇದ್ದ ಆ ಸಾಧನದ್ದೇ ಚರ್ಚೆ, ಇದು ಮೊಬೈಲ್ ಅಲ್ಲ!

Gowthami K — Fri, 30 Oct 2026 14:57:26 +0530

ಮುಂಬೈ: ಸಾಮಾನ್ಯವಾಗಿ ಕೋಟ್ಯಧಿಪತಿಗಳ ಮನೆಯ ಮಕ್ಕಳು ಅತಿ ದುಬಾರಿ ಸ್ಮಾರ್ಟ್‌ಫೋನ್‌ಗಳು, ಹೊಳೆಯುವ ಐಪ್ಯಾಡ್‌ಗಳು ಅಥವಾ ಗೇಮಿಂಗ್ ಟ್ಯಾಬ್ಲೆಟ್‌ಗಳಲ್ಲಿ ಮುಳುಗಿರುವುದನ್ನು ನಾವು ನೋಡುತ್ತೇವೆ. ಆದರೆ ಭಾರತದ ಅತ್ಯಂತ ಪ್ರಭಾವಿ ಉದ್ಯಮಿ ಕುಟುಂಬದ ಕುರಿತಾದ ದೃಶ್ಯವೊಂದು ಸಾರ್ವಜನಿಕರು ಹಾಗೂ ನೆಟ್ಟಿಗರ ಗಮನವನ್ನು ವಿಶೇಷವಾಗಿ ಸೆಳೆದಿದೆ.

ದೇಶದ ಬೃಹತ್ ತಂತ್ರಜ್ಞಾನ ಹಾಗೂ ಟೆಲಿಕಾಂ ಸಂಸ್ಥೆಯಾದ ಜಿಯೋ ಪ್ಲಾಟ್‌ಫಾರ್ಮ್ಸ್ ಲಿಮಿಟೆಡ್‌ನ ಐತಿಹಾಸಿಕ ಇನೀಷಿಯಲ್ ಪಬ್ಲಿಕ್ ಆಫರಿಂಗ್ (IPO) ಶೇರು ಮಾರುಕಟ್ಟೆ ಪಟ್ಟಿ ಸಮಾರಂಭವು ಅಕ್ಟೋಬರ್ 28 ರಂದು ಅದ್ಧೂರಿಯಾಗಿ ನೆರವೇರಿತು. ಕಂಪನಿಯು ಪ್ರತಿ ಶೇರಿಗೆ ₹1,119 ಬೆಲೆ ನಿಗದಿಪಡಿಸಿ ಬರೋಬ್ಬರಿ 27 ಕೋಟಿ ಹೊಸ ಶೇರುಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡುವ ಮೂಲಕ ಹೊಸ ಇತಿಹಾಸ ಬರೆಯಿತು. ಈ ಸಮಾರಂಭದಲ್ಲಿ ರಿಲಯನ್ಸ್ ಸಮೂಹದ ಮುಖ್ಯಸ್ಥ ಮುಕೇಶ್ ಅಂಬಾನಿ, ನೀತಾ ಅಂಬಾನಿ, ಆಕಾಶ್ ಅಂಬಾನಿ, ಇಶಾ ಅಂಬಾನಿ, ಅನಂತ್ ಅಂಬಾನಿ ಹಾಗೂ ಶ್ಲೋಕಾ ಮೆಹ್ತಾ ಸೇರಿದಂತೆ ಅಂಬಾನಿ ಕುಟುಂಬದ ಎಲ್ಲಾ ಸದಸ್ಯರು ಉಪಸ್ಥಿತರಿದ್ದರು. ಆದರೆ, ಈ ಅದ್ಧೂರಿ ಉದ್ಯಮ ಸಮಾರಂಭದಲ್ಲಿ ಎಲ್ಲರ ಗಮನ ಸೆಳೆದದ್ದು ಅಂಬಾನಿ ಕುಟುಂಬದ ಮುದ್ದಾದ ಮಕ್ಕಳ ಓಡಾಟ, ಜೋಡಿಸಿದ್ದ ಹೂವಿನ ಕುಂಡದ ಮೇಲೆ ಬಿದ್ದು ಹೊರಳಾಡುವ ತರ್ಲೆ ತುಂಟಾಟ. ಜೊತೆಗೆ ಮಕ್ಕಳ ಕೈನಲ್ಲಿ ಇದ್ದ ಆ ಒಂದು ಸಾಧನ. ಏನದು ಇಲ್ಲಿದೆ ಅದರ ಬಗ್ಗೆ ಸಂಫೂರ್ಣ ಮಾಹಿತಿ.

ಗಮನಸೆಳೆದ ಮಕ್ಕಳ ಸಾಧನ, ಸಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆ

ಅಂಬಾನಿ ಕುಟುಂಬದ ಮಕ್ಕಳು ಸಾರ್ವಜನಿಕ ಸಮಾರಂಭದಲ್ಲಿ ಯಾವುದೇ ರೀತಿಯ ಡಿಜಿಟಲ್ ಸಾಧನಗಳ ಗೊಂದಲವಿಲ್ಲದೆ, ತಮ್ಮ ಕೈಯಲ್ಲಿದ್ದ ಮೊಬೈಲ್ ನಂತಹ ವಸ್ತುವಿನಲ್ಲಿ ಬರೆಯುವುದು, ಅಕ್ಷರಗಳನ್ನು ಅಭ್ಯಾಸ ಮಾಡುವುದು ಹಾಗೂ ಚಿಕ್ಕ ಚಿಕ್ಕ ಚಿತ್ರಗಳನ್ನು ಬಿಡಿಸುವುದರಲ್ಲಿ ನಿರತರಾಗಿದ್ದರು. ಎಲ್ಲರಿಗೂ ಮಕ್ಕಳ ಕೈನಲ್ಲಿ ಏನಿದು ವಸ್ತು ಎಂಬುದೇ ಕುತೂಹಲವಿತ್ತು. ಇದು ಮೊಬೈಲ್, ಐಪ್ಯಾಡ್ ಅಲ್ಲ ಬದಲಾಗಿ ಅದರ ಹೆಸರು ಎಲ್‌ಸಿಡಿ. ಇದು ಮಕ್ಕಳ ಬುದ್ದಿ ಚುರುಕಾಗಲು, ಅಕ್ಷರಗಳ ಅಭ್ಯಾಸ ಮಾಡಲು ಉಪಯೋಗ ಆಗುವ ಸಾಧನ. ಅದಲ್ಲದೆ ಈ ಅಪರೂಪದ ಕ್ಷಣದ ವೀಡಿಯೊ ಹಾಗೂ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ, ಮಕ್ಕಳ ಬೆಳವಣಿಗೆಯಲ್ಲಿ 'ಸ್ಕ್ರೀನ್-ಫ್ರೀ' ಅಥವಾ ಪರದೆರಹಿತ ವಾತಾವರಣದ ಮಹತ್ವದ ಕುರಿತು ಆನ್‌ಲೈನ್‌ನಲ್ಲಿ ವ್ಯಾಪಕ ಚರ್ಚೆ ಆರಂಭವಾಗಿದೆ. ಸಣ್ಣ ವಯಸ್ಸಿನಲ್ಲೇ ಮಕ್ಕಳಿಗೆ ಮೊಬೈಲ್ ಅಭ್ಯಾಸ ಮಾಡಿಸದೆ, ಸೃಜನಶೀಲತೆಗೆ ಒತ್ತು ನೀಡುತ್ತಿರುವ ಅಂಬಾನಿ ಕುಟುಂಬದ ಪೋಷಕತ್ವದ ಶೈಲಿಗೆ ಸಾರ್ವಜನಿಕರು ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.

ಏನಿದು LCD ಬರವಣಿಗೆ ಪ್ಯಾಡ್? ಇದರ ವಿಶೇಷತೆಗಳೇನು?

ಈ ಸಾಧನಗಳು ಮಕ್ಕಳಿಗೆ ಗೊಂದಲ-ಮುಕ್ತ, ಕಾಗದರಹಿತ ಹಾಗೂ ಸುರಕ್ಷಿತ ಕಲಿಕೆಯ ಅನುಭವವನ್ನು ನೀಡುತ್ತವೆ. ಸಾಮಾನ್ಯ ಟ್ಯಾಬ್ಲೆಟ್‌ಗಳಂತೆ ಇವುಗಳಿಂದ ಕಣ್ಣಿಗೆ ಹಾನಿಕಾರಕವಾದ ಬೆಳಕು ಅಥವಾ ವಿಕಿರಣಗಳು ಹೊರಹೊಮ್ಮುವುದಿಲ್ಲ. ಇವುಗಳಲ್ಲಿ ಪ್ರತ್ಯೇಕ ಸ್ಟೈಲಸ್ ಪೆನ್ ನೀಡಲಾಗಿದ್ದು, ಪೆನ್ನಿನ ಒತ್ತಡಕ್ಕೆ ಅನುಗುಣವಾಗಿ ಪರದೆಯ ಮೇಲೆ ತೆಳುವಾದ ಅಥವಾ ದಪ್ಪಗಿನ ಗೆರೆಗಳು ಮೂಡುತ್ತವೆ. ಮಗು ಬಿಡಿಸಿದ ಚಿತ್ರ ಅಥವಾ ಬರೆದ ಅಕ್ಷರಗಳನ್ನು ಒಂದು ಸಿಂಗಲ್-ಟಚ್ ಅಳಿಸುವ ಬಟನ್ ಒತ್ತುವ ಮೂಲಕ ತಕ್ಷಣವೇ ತೆರವುಗೊಳಿಸಿ, ಮತ್ತೆ ಮತ್ತೆ ಬಳಸಬಹುದು.

ಮಾರುಕಟ್ಟೆಯಲ್ಲಿ ಲಭ್ಯತೆ ಮತ್ತು ಕೈಗೆಟುಕುವ ದರಗಳು:

ಇಂತಹ ಮರುಬರಹ ಮಾಡಬಹುದಾದ ಎಲೆಕ್ಟ್ರಾನಿಕ್ ಸ್ಲೇಟ್‌ಗಳು ಪ್ರಸ್ತುತ ಸ್ಥಳೀಯ ಮಾರುಕಟ್ಟೆಗಳಲ್ಲಿ ಹಾಗೂ ಆನ್‌ಲೈನ್ ಶಾಪಿಂಗ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಅತ್ಯಂತ ಕಡಿಮೆ ಬೆಲೆಗೆ ಲಭ್ಯವಿವೆ/ ಆರಂಭಿಕ ಹಂತದ ಜೆನೆರಿಕ್ LCD ರೈಟಿಂಗ್ ಪ್ಯಾಡ್‌ಗಳು ಕೇವಲ ₹197 ಬೆಲೆಗೆ ದೊರೆಯುತ್ತವೆ. ಪೆನ್ಸಿಲ್ ಕೇಸ್ ಮತ್ತು ಕ್ಯಾಲ್ಕುಲೇಟರ್ ಒಳಗೊಂಡಿರುವ 'AMB 3 in 1' ನಂತಹ ಬಹುಪಯೋಗಿ ಪ್ಯಾಡ್‌ಗಳು ಸುಮಾರು ₹276 ಕ್ಕೆ ಲಭ್ಯವಿವೆ. 'ಪೋರ್ಟ್ರೋನಿಕ್ಸ್ ರಫ್‌ಪ್ಯಾಡ್ 8.5E' ನಂತಹ ಗುಣಮಟ್ಟದ ಬ್ರಾಂಡೆಡ್ ಪುನಃ ಬರೆಯಬಹುದಾದ ಪ್ಯಾಡ್‌ಗಳಿಗೆ ಮಾರುಕಟ್ಟೆಯಲ್ಲಿ ಭಾರಿ ಬೇಡಿಕೆಯಿದೆ.

ಸಾಂಪ್ರದಾಯಿಕ ಶೈಲಿಯ ಕಲಿಕೆಗೆ ಹೊಸ ಮೆರುಗು:

ಡಿಜಿಟಲ್ ತಂತ್ರಜ್ಞಾನದ ಯುಗದಲ್ಲಿಯೂ ಸಾಂಪ್ರದಾಯಿಕ ಹಾಗೂ ಪ್ರಾಯೋಗಿಕ ಚಟುವಟಿಕೆಗಳು ಮಕ್ಕಳ ಆರಂಭಿಕ ಕಲಿಕೆಗೆ ಎಷ್ಟು ಸಹಕಾರಿ ಎಂಬುದಕ್ಕೆ ಈ ಘಟನೆ ಪ್ರತ್ಯಕ್ಷ ಸಾಕ್ಷಿಯಾಗಿದೆ. ಚಿಕ್ಕ ಮಕ್ಕಳಲ್ಲಿ ಮೊಬೈಲ್ ಪರದೆಯ ಮಾನ್ಯತೆ ಕಡಿಮೆ ಮಾಡಿ, ಅವರಲ್ಲಿ ಹೊಸ ಕಲ್ಪನೆ, ಬರವಣಿಗೆ ಅಭ್ಯಾಸ ಹಾಗೂ ಚಿತ್ರಕಲೆಯ ಆಸಕ್ತಿಯನ್ನು ಹೆಚ್ಚಿಸಲು ಇಂತಹ ಸರಳ ಹಾಗೂ ಕೈಗೆಟುಕುವ ಸಾಧನಗಳು ಪೋಷಕರಿಗೆ ಅತ್ಯುತ್ತಮ ಆಯ್ಕೆಯಾಗಿ ಹೊರಹೊಮ್ಮಿವೆ.

ನೀತಾ ಮತ್ತು ಮುಖೇಶ್ ಅಂಬಾನಿ ಮೊಮ್ಮಕ್ಕಳು

ನೀತಾ ಅಂಬಾನಿ ಮತ್ತು ಮುಖೇಶ್ ಅಂಬಾನಿ ಅವರಿಗೆ ನಾಲ್ವರು ಮೊಮ್ಮಕ್ಕಳಿದ್ದಾರೆ. ಆಕಾಶ್ ಅಂಬಾನಿ ಮತ್ತು ಶ್ಲೋಕಾ ಮೆಹ್ತಾ ಅವರ ಪೃಥ್ವಿ ಆಕಾಶ್ ಅಂಬಾನಿ ಮತ್ತು ವೇದಾ ಆಕಾಶ್ ಅಂಬಾನಿ. ಇಶಾ ಅಂಬಾನಿ ಮತ್ತು ಆನಂದ್ ಪಿರಾಮಲ್ ಅವರ ಅವಳಿ ಮಕ್ಕಳಾದ ಆದಿಯಾ ಶಕ್ತಿ ಪಿರಾಮಲ್ ಮತ್ತು ಕೃಷ್ಣ ಪಿರಮಾಲ್.

ನವೆಂಬರ್ 1 ರಿಂದ ಹೊಸ ನಿಯಮ, CNAP ಅಂದರೆ ಏನು? ಮೊಬೈಲ್ ಬಳಕೆದಾರರಿಗೆ ಗುಡ್‌ನ್ಯೂಸ್

Ganesh Mabla Gowda — Fri, 30 Oct 2026 14:13:41 +0530

ಬೆಂಗಳೂರು: ಮೊಬೈಲ್ ಬಳಕೆ ವಿಚಾರದಲ್ಲಿ ನವೆಂಬರ್ 1 ರಿಂದ ಹೊಸ ನಿಯಮ ಜಾರಿಗೆ ಬರಲಿದೆ. ಕೋಟ್ಯಾಂತರ ಮೊಬೈಲ್ ಬಳಕೆದಾರರಿಗೆ ಈ ಹೊಸ ನಿಯಮವು ಉಪಯೋಗ ಆಗಲಿದೆ.

ಏನಿದು ಹೊಸ ನಿಯಮ?

ಈ ಹಿಂದೆ ನಿಮಗೆ ಯಾವುದೋ ಅಪರಿಚಿತ ಕರೆ ಬಂದರೆ.. ಯಾರು ಕರೆ ಮಾಡಿದ್ದಾರೆ ಅನ್ನೋದು ಗೊತ್ತಾಗುತ್ತಿರಲಿಲ್ಲ. ಟ್ರೂಕಾಲರ್ ಆನ್ ಆಗಿದ್ದರೂ..ಅಧಿಕೃತವಾಗಿ ಕರೆ ಮಾಡಿದ್ದು ಯಾರೆಂದು ಗೊತ್ತೇ ಆಗುತ್ತಿಲಿಲ್ಲ. ನವೆಂಬರ್ ಒಂದರಿಂದ ಹಾಗೆ ಆಗೋದಿಲ್ಲ. ಅಪರಿಚಿತ ಕರೆಗಳು ನಿಮ್ಮ ಮೊಬೈಲ್‌ಗೆ ಬಂದರೆ.. ಸಿಮ್ ಯಾರ ಹೆಸರಲ್ಲಿದೆ ಅನ್ನೋದನ್ನ ಸ್ಪಷ್ಟವಾಗಿ ನಿಮ್ಮ ಮೊಬೈಲ್‌ನಲ್ಲಿ ಡಿಸ್‌ಪ್ಲೇ ಆಗಲಿದೆ. ಭಾರತ ಸರ್ಕಾರದ ದೂರಸಂಪರ್ಕ ಇಲಾಖೆ ಟೆಲಿಕಾಂ ಸೇವಾ ಪೂರೈಕೆದಾರರಿಗೆ ಈ ಸಂಬಂಧ ಕಟ್ಟುನಿಟ್ಟಿನ ಮಾರ್ಗಸೂಚಿ ಹೊರಡಿಸಿದೆ.

ಹೊಸ ನಿಯಮಗಳ ಪ್ರಕಾರ.. ನವೆಂಬರ್ 1 ರಿಂದ ಎಲ್ಲಾ ಟೆಲಿಕಾಂ ಸೇವಾ ಪೂರೈಕೆದಾರರು ಕಾಲರ್ ನೇಮ್ ಪ್ರೆಸೆಂಟೇಶನ್ (CNAP) ಪರಿಚಯಿಸಲಿದ್ದಾರೆ. CNAP ಭಾರತದ ಪರಿಶೀಲಿಸಿದ ಕಾಲರ್ ಸಿಸ್ಟಮ್ ಆಗಿದೆ. ಇದು ಕರೆ ಮಾಡುವವರ ಸಂಖ್ಯೆಯನ್ನು ಪ್ರದರ್ಶಿಸಲು ಮತ್ತಯ ಅವರ ಹೆಸರನ್ನು ಡಿಸ್‌ಪ್ಲೇನಲ್ಲಿ ಪ್ರದರ್ಶಿಸಲು ಅನುವು ಮಾಡಿಕೊಡುತ್ತದೆ.

DoT ಆದೇಶದ ಪ್ರಕಾರ.. 4G ಪೀಳಿಗೆಗಿಂತ ಹೆಚ್ಚಿನ ಸೇವೆಗಳ ಎಲ್ಲಾ ಬಳಕೆದಾರರಿಗೆ CNAP ಸೇವೆಯನ್ನು ಸಕ್ರಿಯಗೊಳಿಸಲಾಗುವುದು. CNAP ಸೇವೆಯನ್ನು 2G ಮತ್ತು 3G ಸೇವಾ ಬಳಕೆದಾರರಿಗೆ ಶೀಘ್ರದಲ್ಲೇ ಬಿಡುಗಡೆ ಆಗಲಿದೆ. ಈ ಸಂಬಂಧ ಪ್ರತ್ಯೇಕ ಪ್ರಕಟಣೆ ಮಾಡೋದಾಗಿ ತಿಳಿಸಿದೆ.

ಕಾಲರ್ ಐಡಿ ಹೇಗೆ ಕೆಲಸ ಮಾಡುತ್ತದೆ?

DoT ಆದೇಶದ ಪ್ರಕಾರ.. ಒಬ್ಬ ವ್ಯಕ್ತಿಯು ತಮ್ಮ ಸ್ಮಾರ್ಟ್‌ಫೋನ್‌ಗೆ ಕರೆ ಸ್ವೀಕರಿಸಿದಾಗಲೆಲ್ಲಾ ಕರೆ ಮಾಡಿದವರ ಸಂಖ್ಯೆ ಸ್ಮಾರ್ಟ್‌ಫೋನ್ ಡಿಸ್‌ಪ್ಲೇಯ ಮೇಲ್ಭಾಗದಲ್ಲಿ ಗೋಚರಿಸುತ್ತದೆ. ನಂತರ ಕರೆ ಮಾಡಿದವರ ಹೆಸರು ನಿಮ್ಮ ಕಾಂಟ್ಯಾಕ್ಟ್ ಲಿಸ್ಟ್‌ನಲ್ಲಿ ಸೇರಿಸುತ್ತದೆ. ಒಂದು ವೇಳೆ ನೀವು ಆ ನಂಬರ್‍ ಅನ್ನು ಸೇವ್ ಮಾಡಿಕೊಳ್ಳದಿದ್ದರೆ.. ಟೆಲಿಕಾಂ ಸರ್ವರ್‌ನಲ್ಲಿ ಸೇವ್ ಆಗಿರುವ ಹೆಸರನ್ನೇ ನಿಮ್ಮ ಮೊಬೈಲ್‌ನಲ್ಲೂ ತೋರಿಸುತ್ತದೆ.

ಅಷ್ಟೇ ಅಲ್ಲದೇ CNAP ಸೇವೆಯು ಅಂತಾರಾಷ್ಟ್ರೀಯ ಕರೆಗಳ ಬಗ್ಗೆ ಮಾಹಿತಿ ನೀಡಲಿದೆ. ಅದಕ್ಕಾಗಿ ಡೇಟಾ ಬೇಸ್ ರಚಿಸುವಂತೆ ಟೆಲಿಕಾಂ ಕಂಪನಿಗಳಿಗೆ DoT ಹೇಳಿದೆ. ಸದ್ಯ ಇದರ ಮೇಲೆ ಪ್ರಯೋಗ ನಡೆಯುತ್ತಿದ್ದು, ಶೀಘ್ರದಲ್ಲೇ ಅಂತಾರಾಷ್ಟ್ರೀಯ ಕರೆಗಳ ಬಗ್ಗೆಯೂ ನಿಮಗೆ ಮಾಹಿತಿ ಸಿಗಲಿದೆ.

ಇನ್ನು ಯಾಕೆ CNAP ಸೇವೆ ಪರಿಚಯ ಮಾಡಲಾಗುತ್ತಿದೆ ಅಂದರೆ.. ಅದರ ಮೂಲ ಉದ್ದೇಶ ಸೈಬರ್ ವಂಚಕರಿಂದ ದೂರ ಇರೋದಾಗಿದೆ. ಸೈಬರ್ ಅಪರಾಧ ಮತ್ತು ಕರೆ ವಂಚನೆಗಳನ್ನ ನಿಗ್ರಹಿಸುವುದು DoTಯ ಪ್ರಮುಖ ಗುರಿಯಾಗಿದೆ. ಸಾರ್ವಜನರಿಕರಿಗೆ ಜಾಗೃತಿ ಮೂಡಿಸಲು ಮತ್ತು ಮುನ್ನೆಚ್ಚರಿಕೆ ತೆಗೆದುಕೊಳ್ಳಲು CNAP ಜಾರಿಗೆ ತರುತ್ತಿದೆ.

ಸ್ನಾನ ಮಾಡಿಸುವ ವಾಷಿಂಗ್ ಮಷಿನ್: ಒಳಗೆ ಕೂತ್ರೆ ಸಾಕು, ಕ್ಲೀನ್ ಮಾಡಿ ಒರೆಸಿಯೂ ಕಳಿಸತ್ತೆ- ಪ್ರಯೋಗ ಯಶಸ್ವಿ

Suchethana D — Fri, 30 Oct 2026 13:09:39 +0530

ಒಸಾಕಾ (ಜಪಾನ್): ಕೆಲವರಿಗೆ ಯಾವುದೇ ಕೆಲಸ ಮಾಡಲೂ ಬೇಜಾರು. ಮತ್ತೆ ಕೆಲವರಿಗೆ ಕೆಲವೊಂದು ದಿನ ಯಾಕೋ, ಏನೋ ಏನೂ ಮಾಡುವುದು ಬೇಡ, ಸುಮ್ಮನೇ ಇದ್ದುಬಿಡೋಣ ಎನ್ನಿಸುವುದು ಇದೆ. ಅದೆಷ್ಟರ ಮಟ್ಟಿಗೆ ಎಂದರೆ ಸ್ನಾನ ಮಾಡುವುದಕ್ಕೂ ಬೋರ್ ಎನ್ನಿಸುವುದು ಇದೆ. ಇನ್ನು ಸೋಮಾರಿಗಳ ವಿಷ್ಯ ಬಿಟ್ಟುಬಿಡಿ. ಎಲ್ಲವೂ ಕೂತಲ್ಲೇ ಆಗಬೇಕು ಎನ್ನುವವರಿಗೆ ಸ್ನಾನವನ್ನು ತಾವೇಮಾಡಬೇಕಲ್ಲಾ ಎನ್ನುವ ಬೇಸರವೂ ಇರುತ್ತದೆ. ಕಾರಣ ಏನೇ ಇರಲಿ. ಇನ್ಮುಂದೆ ಬಟ್ಟೆ ಮಾತ್ರವಲ್ಲ, ವಾಷಿಂಗ್ ಮಷಿನ್ನಲ್ಲಿ ಸ್ನಾನವನ್ನೂ ಮಾಡಬಹುದು. ಮನುಷ್ಯರು ಆಲಸ್ಯವಾಗಲು ಏನೇನು ಬೇಕೋ ಎಲ್ಲವನ್ನೂ ಈಗ ಸಂಶೋಧನೆ ಮಾಡಲಾಗುತ್ತಿದೆ. ಇದೀಗ ಸ್ನಾನಕ್ಕೂ ವಾಷಿಂಗ್ ಮಷಿನ್ ಬಂದಿದೆ.

ವೇಟ್, ವೇಟ್ ಹಾಗೆಂದು ವಾಷಿಂಗ್ ಮಷಿನ್ ಖರೀದಿಗೆ ಈಗಲೇ ಹೋಗಬೇಡಿ. ಸದ್ಯ ಇದು ಯಶಸ್ವಿ ಪ್ರಯೋಗ ಕಂಡಿರೋದು ಜಪಾನ್ನಲ್ಲಿ ಮಾತ್ರ. ಅಲ್ಲಿಂದ ಭಾರತಕ್ಕೆ ಬರಲು ತುಂಬಾ ಟೈಮ್ ಏನೂ ಇಲ್ಲ ಬಿಡಿ. ಜಪಾನ್ನ ಒಸಾಕಾದಲ್ಲಿ ನಡೆದ ವರ್ಲ್ಡ್ ಎಕ್ಸ್‌ಪೋದಲ್ಲಿ ಗಮನ ಸೆಳೆದ ಮುಂದಿನ ಪೀಳಿಗೆಯ "ಮಾನವ ತೊಳೆಯುವ ಯಂತ್ರ"ಇದಾಗಿದ್ದು, ಇದಾಗಲೇ ಇದು ಜಪಾನ್‌ ಮಾರುಕಟ್ಟೆಗೆ ಬಂದಿದ್ದು ಸಿಕ್ಕಾಪಟ್ಟೆ ಬೇಡಿಕೆ ಇದೆಯಂತೆ! ಜಪಾನಿನ ತಂತ್ರಜ್ಞಾನ ಕಂಪೆನಿ ಸೈನ್ಸ್ ಅಭಿವೃದ್ಧಿಪಡಿಸಿದ ಈ ಕ್ಯಾಪ್ಸುಲ್ ಶೈಲಿಯ ಸಾಧನವು ಬಳಕೆದಾರರಿಗೆ ಒಳಗೆ ಮಲಗಲು, ಮುಚ್ಚಳವನ್ನು ಮುಚ್ಚಲು ಮತ್ತು ನೂಲುವಿಕೆಯನ್ನು ಹೊರತುಪಡಿಸಿ ಪೂರ್ಣ ದೇಹವನ್ನು ಸ್ವಚ್ಛಗೊಳಿಸುವುದನ್ನು ಆನಂದಿಸಲು ಅನುವು ಮಾಡಿಕೊಡುತ್ತದೆ, ಜೊತೆಗೆ ಹಿತವಾದ ಸಂಗೀತವೂ ಸೇರಿದೆ.

ಭವಿಷ್ಯದ ಮಾನವ ತೊಳೆಯುವ ಯಂತ್ರ- ರೇಟ್ ಎಷ್ಟು?

"ಭವಿಷ್ಯದ ಮಾನವ ತೊಳೆಯುವ ಯಂತ್ರ" ಎಂದು ಅಡ್ಡಹೆಸರು ಪಡೆದ ಈ ಸಾಧನವು ಆರು ತಿಂಗಳ ಅವಧಿಯ ಎಕ್ಸ್‌ಪೋದಲ್ಲಿ ಭಾರಿ ಜನಸಂದಣಿಯನ್ನು ಸೆಳೆದಿದೆ. ಇದು 27 ಮಿಲಿಯನ್‌ಗಿಂತಲೂ ಹೆಚ್ಚು ಸಂದರ್ಶಕರನ್ನು ಆಕರ್ಷಿಸಿದ್ದು, ಇದೀಗ ಮುಕ್ತಾಯಗೊಂಡಿದೆ. ಈ ಪರಿಕಲ್ಪನೆಯು 1970 ರ ಒಸಾಕಾ ಎಕ್ಸ್‌ಪೋದಲ್ಲಿ ಕಾಣಿಸಿಕೊಂಡ ಇದೇ ರೀತಿಯ ಆವಿಷ್ಕಾರವನ್ನು ಇನ್ನೂ ಹೆಚ್ಚಿನ ಕಂಪೆನಿಗಳು ಮಾಡುತ್ತಿವೆ. ಕಂಪೆನಿಯ ವಕ್ತಾರ ಸಚಿಕೊ ಮೇಕುರಾ ಪ್ರಕಾರ, ಹೊಸ ಯಂತ್ರವು ದೇಹವನ್ನು ಸ್ವಚ್ಛಗೊಳಿಸುವುದಲ್ಲದೆ "ಆತ್ಮವನ್ನು ತೊಳೆಯುತ್ತದೆ", ಪ್ರಕ್ರಿಯೆಯ ಉದ್ದಕ್ಕೂ ಬಳಕೆದಾರರ ಹೃದಯ ಬಡಿತ ಮತ್ತು ಪ್ರಮುಖ ಚಿಹ್ನೆಗಳನ್ನು ಮೇಲ್ವಿಚಾರಣೆ ಮಾಡಲು ಸಂವೇದಕಗಳನ್ನು ಬಳಸುತ್ತದೆ ಎಂದಿದ್ದಾರೆ.

ಸದ್ಯ ಕಂಪೆನಿಯು 50 ಯೂನಿಟ್‌ಗಳನ್ನು ಮಾತ್ರ ಉತ್ಪಾದಿಸಿದೆ. ಆದರೆ ಸಿಕ್ಕಾಪಟ್ಟೆ ಬೇಡಿಕೆ ಬರುತ್ತಿದೆಯಂತೆ! ಅಂದಹಾಗೆ ಸಲು ಯೋಜಿಸಿದೆ. ಸ್ಥಳೀಯ ಮಾಧ್ಯಮ ವರದಿಗಳು ಇದರ ಬೆಲೆಯನ್ನು ಸುಮಾರು 60 ಮಿಲಿಯನ್ ಯೆನ್ (ಸುಮಾರು $385,000) ಎಂದು ಅಂದಾಜಿಸುತ್ತವೆ. ಭಾರತದ ರೂಪಾಯಿಯಲ್ಲಿ ಎಷ್ಟು ಗೊತ್ತಾ? ಹೆಚ್ಚೇನೂ ಇಲ್ಲ. ಕೇವಲ 3.63 ಕೋಟಿ ರೂಪಾಯಿ! ಈ ರೇಟ್ ಕೇಳಿದ ಮೇಲೆ ನಾವೇ ಸ್ನಾನ ಮಾಡ್ತೇವಪ್ಪ, ಇದರ ಉಸಾಬರಿ ಬೇಡ ಎಂದು ಅಂದುಕೊಂಡೀರಲ್ವಾ?

ಹೇಗೆ ಕಾರ್ಯನಿರ್ವಹಿಸುತ್ತದೆ?

ಇದರಲ್ಲಿ, 2.3 ಮೀಟರ್ ಉದ್ದದ ಸುತ್ತುವರಿದ ಪಾಡ್ ಇದ್ದು ಅದರ ಒಳಗೆ ಮಲಬೇಕು. ಯಂತ್ರವು ಮೈಕ್ರೋಬಬಲ್‌ಗಳು ಮತ್ತು ಉತ್ತಮವಾದ ಮಂಜು ಶವರ್ ಅನ್ನು ಬಳಸಿಕೊಂಡು ಇಡೀ ದೇಹವನ್ನು ನಿಧಾನವಾಗಿ ಸ್ವಚ್ಛಗೊಳಿಸುತ್ತದೆ. ಅಂತರ್ನಿರ್ಮಿತ ಸಂವೇದಕಗಳು ತೊಳೆಯುವ ಸಮಯದಲ್ಲಿ ಬಳಕೆದಾರರ ಪ್ರಮುಖ ಚಿಹ್ನೆಗಳನ್ನು ಟ್ರ್ಯಾಕ್ ಮಾಡುತ್ತವೆ, ಸುರಕ್ಷತೆಯನ್ನು ಖಚಿತಪಡಿಸುತ್ತವೆ. ಸ್ನಾನದ ಸಮಯದಲ್ಲಿ, ಕ್ಯಾಪ್ಸುಲ್ ಒಳಗೆ ಶಾಂತಗೊಳಿಸುವ ದೃಶ್ಯಗಳು ಮತ್ತು ಹಿತವಾದ ಸಂಗೀತವನ್ನು ನುಡಿಸಲಾಗುತ್ತದೆ. ಸ್ನಾನದ ನಂತರ, ಯಂತ್ರವು ಬಳಕೆದಾರರನ್ನು ಸ್ವಯಂಚಾಲಿತವಾಗಿ ಒಣಗಿಸುತ್ತದೆ, ಸುಮಾರು 15 ನಿಮಿಷಗಳಲ್ಲಿ ಸಂಪೂರ್ಣ ಅನುಭವವನ್ನು ಪೂರ್ಣಗೊಳಿಸುತ್ತದೆ.

ಇಂಗ್ಲಿಷ್ನಲ್ಲಿ 2 O' Clock, 3 O'Clock ಎನ್ನುತ್ತೇವಲ್ಲ, ಈ 'ಓ' ಅಂದ್ರೇನು, ಅದು ಎಲ್ಲಿಂದ ಬಂತು ಗೊತ್ತಾ

Suchethana D — Wed, 28 Oct 2026 19:26:43 +0530

ಇಂಗ್ಲಿಷ್ನಲ್ಲಿ ಮಾತನಾಡುವಾಗ ನಾವು 2 ಗಂಟೆ, 3 ಗಂಟೆಗೆ 2 ಓ ಕ್ಲಾಕ್, 3 ಓ ಕ್ಲಾಕ್ (2 O'clock, 3 O'clock) ಅಂತ ಹೇಳ್ತೇವೆ ಅಲ್ವಾ. ಆದರೆ ಒಮ್ಮೆಯಾದರೂ ಈ 'O' ಎಲ್ಲಿಂದ, ಯಾಕೆ ಬಂತು ಎಂದು ಯೋಚನೆ ಮಾಡಿದ್ದೀರಾ. 3 ಕ್ಲಾಕ್, 4 ಕ್ಲಾಕ್ ಅನ್ನಬಹುದಿತ್ತು. ಆದರೆ 'ಓ' ಅಂತ ಮಧ್ಯೆ ಸೇರಿಸೋದು ಯಾಕೆ ಅನ್ನೋದು ಬಹುತೇಕ ಮಂದಿ ವಿಚಾರ ಮಾಡಲಿಕ್ಕಿಲ್ಲ. ಅದು ಬಂದ್ರೆ ನಮಗೇನು, ಅದು ಇರೋದೇ ಹಾಗೆ, ಹೇಳಿದ್ರೆ ಆಯ್ತು ಎಂದೇ ಹೆಚ್ಚಿನ ಮಂದಿ ಅಂದುಕೊಳ್ತಾರೆ. ಮತ್ತೆ ಕೆಲವರಿಗೆ ಇದರ ಬಗ್ಗೆ ಯೋಚನೆ ಬಂದರೂ ಉತ್ತರ ಹೊಳೆದಿರುವುದಿಲ್ಲ. ಯೋಚನೆ ಬಂದಿರಲಿ, ಬಿಟ್ಟಿರಲಿ. ಆದರೆ ಇಲ್ಲಿ ಇದರ ರೋಚಕ ಸ್ಟೋರಿ ಹೇಳ್ತೇವೆ ಕೇಳಿ.

ಬಂದದ್ದು ಎಲ್ಲಿಂದ?

14 ರಿಂದ 15ನೇ ಶತಮಾನದಲ್ಲಿ ಅರ್ಥಾತ್ Middle English ಕಾಲದಲ್ಲಿ, ಯಾಂತ್ರಿಕ ಗಡಿಯಾರಗಳು ಹೊಸದಾಗಿ ಚಾಲ್ತಿಗೆ ಬಂದಿತ್ತು. ಅಲ್ಲಿಯವರೆಗೂ ಜನರು ಸೂರ್ಯನ ಬೆಳಕು, ನೆರಳಿನ ಆಧಾರದ ಮೇಲೆ ಟೈಮ್ ನೋಡ್ತಿರೋದು ಗೊತ್ತೇ ಇದೆ. ಆ ಸಮಯದಲ್ಲಿ ಗಡಿಯಾರಗಳು ಚಾಲ್ತಿಗೆ ಬಂದಾಗ, ಸೂರ್ಯನ ಸಮಯಕ್ಕೂ, ಗಡಿಯಾರ ತೋರಿಸುವ ಸಮಯದಲ್ಲಿ ಸುಮಾರು ವ್ಯತ್ಯಾಸ ಇರುತ್ತಿತ್ತು. ಈ ಹಿನ್ನೆಲೆಯಲ್ಲಿ, ಯಾವ ಟೈಮ್ ಹೇಳ್ತಿರೋದು ಎಂದು ಸರಿಯಾಗಿ ಸೂಚಿಸಲು ಒಂದು ಶಬ್ದ ಬೇಕಿತ್ತು. ಆಗಲೇ ಹುಟ್ಟಿರೋದು ಈ 'ಓ'. ಇದರ ಅರ್ಥ 2 ಗಂಟೆಯಾಗಿದೆ ಅಂದುಕೊಳ್ಳಿ. ಆಗ ಜನರು 2 ಕ್ಲಾಕ್ ಎಂದರೆ ಅದು ಸೂರ್ಯನ ಟೈಮ್ ಆಗಿತ್ತು. ಆದರೆ ಅದನ್ನು ಹೊರತುಪಡಿಸಿ ಬೇರೆಯ ಸಮಯ ಎಂದು ಹೇಳಲು Off the Clock ಅಂದರೆ ಇದನ್ನು ಬಿಟ್ಟು ಮತ್ತೊಂದು ಟೈಮ್ (ಯಾಂತ್ರಿಕ ಗಡಿಯಾರದ ಟೈಂ) ಎಂದು ಹೇಳಲು 2 ಆಪ್ ದಿ ಟೈಮ್, 3 ಆಫ್ ದಿ ಟೈಂ ಎಂದು ಹೇಳಲು ಶುರು ಮಾಡಿದ್ರು.

ಕ್ರಮೇಣ ಇದು ಆಫ್ ಬದಲು ಷಾರ್ಟ್ ಫಾಮ್ಆಗಿ ಓ ಅಷ್ಟೇ ಉಳಿದುಕೊಂಡಿತು. 2 ಓ ಕ್ಲಾಕ್, 3 ಓ ಕ್ಲಾಕ್ಗೆ ಬಂದು ನಿಂತಿತು. ಸೂರ್ಯನ ಬೆಳಕಿನಿಂದ ಸಮಯ ಹೇಳೋದು ಬಿಟ್ಟು ಶತಮಾನ ಕಳೆದರೂ ಆ ಓ ಕ್ಲಾಕ್ ಮಾತ್ರ ಹಾಗೆಯೇ ಉಳಿದುಕೊಂಡಿದೆ!

ಕಾಲು, ಅರ್ಧ ಗಂಟೆಗೆ 'ಓ' ಬಳಸಲಿಲ್ಲ ಏಕೆ?

ಇಲ್ಲೊಂದು ಪ್ರಶ್ನೆಕೆಲವರನ್ನು ಕಾಡಬಹುದು. 3 ಓ ಕ್ಲಾಕ್ ಅಂತಾರೆಯೇ ವಿನಾ 3.15 ಓ ಕ್ಲಾಕ್ ಅನ್ನಲ್ಲ ಏಕೆ? ಆಗ ಏನು ಹೇಳ್ತಾ ಇದ್ದರು ಎನ್ನುವ ಡೌಟ್ ಕೂಡ ಬರಬಹುದು. ಇದಕ್ಕೂ ಉತ್ತರವಿದೆ. ಮೊದಲಿಗೆ ಗಡಿಯಾರ ಆವಿಷ್ಕಾರ ಮಾಡಿದ್ದಾಗ ಅಲ್ಲಿ ನಿಮಿಷದ ಮುಳ್ಳು ಇರಲಿಲ್ಲ. ಆದ್ದರಿಂದ 2, 3, 4, 5 ಅಷ್ಟೇ ಹೇಳುತ್ತಿದ್ದಂತೆ. ಹಾಗೆ ಹೇಳುವಾಗ ಓ ಕ್ಲಾಕ್ ಬಳಸುತ್ತಿದ್ದರು. ಕಾಲಕ್ರಮೇಣ ನಿಮಿಷಗಳ ಮುಳ್ಳನ್ನು ಸಂಶೋಧಿಸಲಾಯಿತು. ಆ ಸಮದಯಲ್ಲಿಯೇ ಜನರು ಈ ಯಾಂತ್ರಿಕ ಗಡಿಯಾರಕ್ಕೆ ಒಗ್ಗಿಕೊಂಡಿದ್ದರು. ಆದ್ದರಿಂದ ಮೂರು ಕಾಲು ಆದ್ರೆ, ತ್ರೀ ಫಿಫ್ಟೀನ್ ಎಂದೋ, quarter past three ಎಂದೋ ಹೇಳಲು ಆರಂಭಿಸಿದರು.

ಸೀಲಿಂಗ್ ಫ್ಯಾನ್ ರೆಕ್ಕೆಗಳು ಫ್ಲಾಟ್ ಆಗಿರದೆ ಓರೆಯಾಗಿರುವುದು ಯಾಕೆ? ಕರೆಂಟ್‌ ಬಿಲ್‌ಗೂ ಇದಕ್ಕೂ ಇದೆ ನೇರ ಸಂಬಂಧ

Ashwini HR — Tue, 27 Oct 2026 13:33:08 +0530

ಮನೆಯಲ್ಲಿ ತಿರುಗುವ ಸೀಲಿಂಗ್ ಫ್ಯಾನ್‌ನ ರೆಕ್ಕೆಗಳನ್ನು (Blades) ನೀವು ಎಂದಾದರೂ ಸೂಕ್ಷ್ಮವಾಗಿ ಗಮನಿಸಿದ್ದೀರಾ? ಅವು ಎಂದಿಗೂ ಸಂಪೂರ್ಣ ಚಪ್ಪಟೆಯಾಗಿ (Flat) ಇರುವುದಿಲ್ಲ. ಬದಲಿಗೆ ಕೊಂಚ ಬಾಗಿದಂತೆ ಅಥವಾ ಒಂದು ನಿರ್ದಿಷ್ಟ ಕೋನದಲ್ಲಿ ಓರೆಯಾಗಿರುತ್ತವೆ. ಫ್ಯಾನ್ ರೆಕ್ಕೆಗಳಿಗೆ ಈ ರೀತಿ ವಿಶಿಷ್ಟ ಆಕಾರ ನೀಡಿರುವುದು ಕೇವಲ ಅಂದಕ್ಕಾಗಿ ಮಾಡಿದ ಡಿಸೈನ್ ಅಂದುಕೊಂಡರೆ ನಿಮ್ಮ ಅನಿಸಿಕೆ ತಪ್ಪು! ಇದರ ಹಿಂದೆ ಗಾಳಿಯ ಹರಿವಿಗೆ ಸಂಬಂಧಿಸಿದ ಅದ್ಭುತ ವಿಜ್ಞಾನ ಹಾಗೂ ತಂತ್ರಜ್ಞಾನ ಅಡಗಿದೆ.

ಗಾಳಿಯ ಸಂಚಾರವೇ ಇರಲ್ಲ

ತಾಂತ್ರಿಕ ಭಾಷೆಯಲ್ಲಿ ಫ್ಯಾನ್ ರೆಕ್ಕೆಗಳ ಈ ಓರೆ ಅಥವಾ ಕೋನವನ್ನು 'ಬ್ಲೇಡ್ ಪಿಚ್' (Blade Pitch) ಎಂದು ಕರೆಯಲಾಗುತ್ತದೆ. ಒಂದು ವೇಳೆ ಸೀಲಿಂಗ್ ಫ್ಯಾನ್ ರೆಕ್ಕೆಗಳು ಸಂಪೂರ್ಣವಾಗಿ ಫ್ಲಾಟ್ ಆಗಿದ್ದರೆ, ಫ್ಯಾನ್ ಎಷ್ಟೇ ವೇಗವಾಗಿ ತಿರುಗಿದರೂ ಅದು ಗಾಳಿಯನ್ನು ಕೇವಲ ಚಾಕುವಿನಂತೆ ಸೀಳುತ್ತಾ ತಿರುಗುತ್ತದೆಯೇ ಹೊರತು, ಗಾಳಿಯನ್ನು ಕೆಳಮುಖವಾಗಿ ತಳ್ಳಲು (Push) ಸಾಧ್ಯವಾಗುವುದಿಲ್ಲ. ಇದರಿಂದ ಕೋಣೆಯಲ್ಲಿ ಗಾಳಿಯ ಸಂಚಾರವೇ ಇರುವುದಿಲ್ಲ. ಅಷ್ಟೇ ಅಲ್ಲದೆ, ಚಪ್ಪಟೆ ರೆಕ್ಕೆಗಳು ಮೋಟಾರ್ ಮೇಲೆ ಅನಗತ್ಯ ಒತ್ತಡವನ್ನು ಹಾಕಿ ಅದರ ಆಯಸ್ಸನ್ನು ಕಡಿಮೆ ಮಾಡುತ್ತವೆ.

ಅದಕ್ಕಾಗಿಯೇ ಫ್ಯಾನ್ ರೆಕ್ಕೆಗಳನ್ನು ಕೊಂಚ ಓರೆಯಾಗಿ ವಿನ್ಯಾಸಗೊಳಿಸಲಾಗುತ್ತದೆ. ಈ ವಿಶಿಷ್ಟ ಕೋನವು ಫ್ಯಾನ್ ತಿರುಗುವಾಗ ಮೇಲಿನ ಗಾಳಿಯನ್ನು ಸೆಳೆದುಕೊಂಡು ನಿರಂತರವಾಗಿ ಕೆಳಮುಖವಾಗಿ ತಳ್ಳುತ್ತದೆ. ಈ ವಿಶೇಷ ಏರೋಡೈನಾಮಿಕ್ (Aerodynamic) ಆಕಾರವು ಗಾಳಿಯ ಪ್ರತಿರೋಧವನ್ನು ಕಡಿಮೆ ಮಾಡಿ, ಶಬ್ದವಿಲ್ಲದೆ (Silent) ಕೋಣೆಯ ಮೂಲೆ ಮೂಲೆಗೂ ಸರಾಗವಾಗಿ ತಂಪಾದ ಗಾಳಿ ಹರಡುವಂತೆ ಮಾಡುತ್ತದೆ.

ರೆಕ್ಕೆಗಳನ್ನು ಹೆಚ್ಚು ಬಗ್ಗಿಸಿದರೆ ಹೆಚ್ಚು ಗಾಳಿ ಬರುತ್ತದೆಯೇ?

ರೆಕ್ಕೆಗಳ ಕೋನ (Pitch) ಹೆಚ್ಚಾದಷ್ಟೂ ಗಾಳಿಯ ಹರಿವು ಹೆಚ್ಚಾಗುವುದು ನಿಜ. ಆದರೆ, ರೆಕ್ಕೆಗಳನ್ನು ಅತಿಯಾಗಿ ಬಗ್ಗಿಸಿದರೆ ಗಾಳಿಯ ತಡೆತ ಹೆಚ್ಚಾಗಿ ಮೋಟಾರ್ ಮೇಲೆ ಭಾರಿ ಹೊರೆ ಬೀಳುತ್ತದೆ. ಇದರಿಂದ ಫ್ಯಾನ್ ನಿಧಾನವಾಗುವುದಲ್ಲದೆ, ವಿದ್ಯುತ್ ಬಿಲ್ ಕೂಡ ಜಾಸ್ತಿ ಬರುತ್ತದೆ!

ಅದಕ್ಕಾಗಿಯೇ ಫ್ಯಾನ್ ತಯಾರಿಕಾ ಕಂಪನಿಗಳು ಗಾಳಿಯ ಹರಿವು, ಮೋಟಾರ್‌ನ ಸಾಮರ್ಥ್ಯ ಮತ್ತು ವಿದ್ಯುತ್ ಉಳಿತಾಯ ಈ ಮೂರರ ನಡುವೆ ಸರಿಯಾದ ಸಮತೋಲನ (Balance) ಕಾಪಾಡಿಕೊಳ್ಳಲು ರೆಕ್ಕೆಗಳನ್ನು ಒಂದು ನಿಖರವಾದ ಕೋನದಲ್ಲಿ (ಸಾಮಾನ್ಯವಾಗಿ 12 ರಿಂದ 15 ಡಿಗ್ರಿ) ಬಾಗಿಸಿ ತಯಾರಿಸುತ್ತವೆ.

ಭಾರತದಲ್ಲಿ 3 ರೆಕ್ಕೆಗಳು, ವಿದೇಶಗಳಲ್ಲಿ 4 ಅಥವಾ 5 ರೆಕ್ಕೆಗಳು ಏಕೆ? (3 Blades vs 4-5 Blades)

ಭಾರತದಲ್ಲಿ: ನಮಗೆ ನೇರವಾಗಿ ಮೈಮೇಲೆ ವೇಗವಾಗಿ ಗಾಳಿ ಬೀಸಬೇಕು (High Air Delivery). 3 ರೆಕ್ಕೆಗಳಿರುವ ಫ್ಯಾನ್ ಕಡಿಮೆ ಭಾರ ಹೊಂದಿದ್ದು, ಮೋಟಾರ್ ವೇಗವಾಗಿ ತಿರುಗಿ ಹೆಚ್ಚಿನ ಗಾಳಿ ಕೊಡುತ್ತದೆ.

ಅಮೆರಿಕ/ಯುರೋಪ್‌ನಲ್ಲಿ: ಅಲ್ಲಿ ಈಗಾಗಲೇ ಎಸಿ (AC) ಇರುತ್ತದೆ. ಫ್ಯಾನ್ ಕೇವಲ ರೂಮಿನಲ್ಲಿ ಗಾಳಿ ಹರಡಲು ಮತ್ತು ಯಾವುದೇ ಶಬ್ದವಿಲ್ಲದೆ (Silent) ಕೆಲಸ ಮಾಡಲು ಮಾತ್ರ ಬಳಕೆಯಾಗುತ್ತದೆ. ಹಾಗಾಗಿ ಅಲ್ಲಿ 4 ಅಥವಾ 5 ರೆಕ್ಕೆಗಳ ಫ್ಯಾನ್ ಬಳಸುತ್ತಾರೆ.

ಬೇಸಿಗೆ ಮತ್ತು ಚಳಿಗಾಲದ ಮೋಡ್ (ದಿಕ್ಕು ಬದಲಾವಣೆ)

ಬೇಸಿಗೆಯಲ್ಲಿ ಫ್ಯಾನ್ ಆಂಟಿ-ಕ್ಲಾಕ್‌ವೈಸ್ (Anti-clockwise - ಎಡದಿಂದ ಬಲಕ್ಕೆ) ತಿರುಗಬೇಕು, ಆಗ ಮಾತ್ರ ಗಾಳಿ ಕೆಳಗೆ ಬರುತ್ತದೆ.

ಚಳಿಗಾಲದಲ್ಲಿ ಫ್ಯಾನ್ ಕ್ಲಾಕ್‌ವೈಸ್ (Clockwise) ತಿರುಗಿದರೆ, ನೆಲದ ಮೇಲಿನ ತಣ್ಣನೆ ಗಾಳಿಯನ್ನು ಮೇಲೆಳೆದುಕೊಂಡು, ಮೇಲಿರುವ ಬೆಚ್ಚನೆಯ ಗಾಳಿಯನ್ನು ಕೋಣೆಯ ಸುತ್ತಲೂ ಹರಡುತ್ತದೆ (ಇದಕ್ಕಾಗಿ ಕೆಲವು ಮಾಡರ್ನ್ ಫ್ಯಾನ್‌ಗಳಲ್ಲಿ ಸ್ವಿಚ್ ಇರುತ್ತದೆ).

ವೇಗವಾಗಿ ತಿರುಗುವ ಫ್ಯಾನ್ ಮೇಲೂ ಧೂಳು ಕೂರುವುದು ಏಕೆ?

ಫ್ಯಾನ್ ತಿರುಗುವಾಗ ರೆಕ್ಕೆಗಳ ತುದಿಗಳು ಗಾಳಿಯ ಘರ್ಷಣೆಯಿಂದಾಗಿ ‘ಸ್ಥಿರ ವಿದ್ಯುತ್’ (Static Electricity) ಉತ್ಪಾದಿಸುತ್ತವೆ. ಇದು ಗಾಳಿಯಲ್ಲಿರುವ ಸಣ್ಣ ಧೂಳಿನ ಕಣಗಳನ್ನು ಆಯಸ್ಕಾಂತದಂತೆ ತನ್ನತ್ತ ಸೆಳೆದುಕೊಳ್ಳುತ್ತದೆ.

ದೀಪಾವಳಿಗೂ ಮುನ್ನ ಸ್ಯಾಮ್‌ಸಂಗ್ ಗ್ಯಾಲಕ್ಸಿ S25 ಮೇಲೆ ಭರ್ಜರಿ ಡಿಸ್ಕೌಂಟ್: 25,900 ರೂ. ಬೆಲೆ ಇಳಿಕೆ!

Ashwini HR — Thu, 29 Oct 2026 11:09:16 +0530

ದೀಪಾವಳಿಗೂ ಮುನ್ನ ಫ್ಲಿಪ್‌ಕಾರ್ಟ್‌ನಲ್ಲಿ ಸ್ಮಾರ್ಟ್‌ಫೋನ್ ಖರೀದಿಸಲು ಬಯಸುವ ಗ್ರಾಹಕರಿಗೆ ಭರ್ಜರಿ ಆಫರ್ ಸಿಕ್ಕಿದೆ. ಹೌದು. ಇ-ಕಾಮರ್ಸ್ ಪ್ಲಾಟ್‌ಫಾರ್ಮ್‌ನ 'ಬಿಗ್ ಬ್ಯಾಂಗ್ ದೀಪಾವಳಿ ಸೇಲ್' ಆರಂಭವಾಗುವ ಮೊದಲೇ Samsung Galaxy S25 5G ಸ್ಮಾರ್ಟ್‌ಫೋನ್ ಮೇಲೆ ಭಾರಿ ರಿಯಾಯಿತಿ ನೀಡಲಾಗುತ್ತಿದೆ. ಈ ಪ್ರಮುಖ (ಫ್ಲ್ಯಾಗ್‌ಶಿಪ್) ಸ್ಮಾರ್ಟ್‌ಫೋನ್‌ನ 12GB RAM ಮತ್ತು 128GB ಸ್ಟೋರೇಜ್ ಮಾದರಿಯನ್ನು ಬ್ಯಾಂಕ್ ಆಫರ್‌ಗಳೊಂದಿಗೆ ಅತ್ಯಂತ ಕಡಿಮೆ ಬೆಲೆಗೆ ಖರೀದಿಸಬಹುದು. ವಿಶೇಷವೆಂದರೆ, ಫೋನ್ ಬಿಡುಗಡೆಯಾದ ಬೆಲೆಗೆ ಹೋಲಿಸಿದರೆ ಪ್ರಸ್ತುತ ಬೆಲೆಯಲ್ಲಿ ಸಾವಿರಾರು ರೂಪಾಯಿಗಳ ವ್ಯತ್ಯಾಸವಿದೆ.

Samsung Galaxy S25 5G ಬೆಲೆ ಮತ್ತು ಆಫರ್‌ಗಳು

Samsung Galaxy S25 5G (12GB RAM + 128GB ಸ್ಟೋರೇಜ್) ಮಾದರಿಯು ಫ್ಲಿಪ್‌ಕಾರ್ಟ್‌ನಲ್ಲಿ 57,999 ರೂ.ಗೆ ಲಿಸ್ಟ್ ಆಗಿದೆ. ಎಸ್‌ಬಿಐ (SBI) ಕ್ರೆಡಿಟ್ ಕಾರ್ಡ್ ಬಳಸಿ ಪಾವತಿಸಿದರೆ 2,900 ರೂ. ತಕ್ಷಣದ ರಿಯಾಯಿತಿ (Instant Discount) ಸಿಗಲಿದೆ. ಈ ರಿಯಾಯಿತಿಯ ನಂತರ ಫೋನಿನ ಅಂತಿಮ ಬೆಲೆ 55,099 ರೂ. ಆಗುತ್ತದೆ.

ಇದಲ್ಲದೆ, ಹಳೆಯ ಸ್ಮಾರ್ಟ್‌ಫೋನ್ ಎಕ್ಸ್‌ಚೇಂಜ್ ಮಾಡುವ ಮೂಲಕ ಅದರ ಮಾಡೆಲ್ ಮತ್ತು ಸ್ಥಿತಿಯ ಆಧಾರದ ಮೇಲೆ ಹೆಚ್ಚುವರಿ ರಿಯಾಯಿತಿ ಪಡೆಯಬಹುದು. ಎಕ್ಸ್‌ಚೇಂಜ್‌ನಲ್ಲಿ ಗರಿಷ್ಠ 46,150 ರೂ.ವರೆಗೆ ರಿಯಾಯಿತಿ ಸಿಗಲಿದೆ ಎಂದು ಹೇಳಲಾಗಿದ್ದರೂ, ಇದು ಹಳೆಯ ಫೋನಿನ ಮೇಲೆ ನಿರ್ಧಾರವಾಗುತ್ತದೆ. ಜನವರಿಯಲ್ಲಿ ಈ ಫೋನ್ 80,999 ರೂ. ಆರಂಭಿಕ ಬೆಲೆಯೊಂದಿಗೆ ಬಿಡುಗಡೆಯಾಗಿತ್ತು. ಈ ಲೆಕ್ಕಾಚಾರದ ಪ್ರಕಾರ, ಬಿಡುಗಡೆ ಬೆಲೆಗಿಂತ ಈಗ 23,000 ರೂ. ನೇರ ಕಡಿತವಾಗಿದೆ. ಬ್ಯಾಂಕ್ ಆಫರ್ ಸೇರಿಸಿದರೆ ಒಟ್ಟು 25,900 ರೂ. ರಿಯಾಯಿತಿ ಸಿಕ್ಕಂತಾಗುತ್ತದೆ. ಖರೀದಿಸುವ ಮುನ್ನ ಫ್ಲಿಪ್‌ಕಾರ್ಟ್‌ನಲ್ಲಿ ನಿಯಮಗಳು ಮತ್ತು ಅಂತಿಮ ಬೆಲೆಯನ್ನು ಖಚಿತಪಡಿಸಿಕೊಳ್ಳಿ.

Samsung Galaxy S25 5G ವೈಶಿಷ್ಟ್ಯಗಳು (Features)

ಡಿಸ್‌ಪ್ಲೇ: 6.2 ಇಂಚಿನ Full HD+ Dynamic AMOLED 2X ಡಿಸ್‌ಪ್ಲೇ (1080×2340 ಪಿಕ್ಸೆಲ್ಸ್), 120Hz ರಿಫ್ರೆಶ್ ರೇಟ್ ಮತ್ತು 2,600 ನಿಟ್ಸ್ ಪೀಕ್ ಬ್ರೈಟ್‌ನೆಸ್ ಹೊಂದಿದೆ.

ತೂಕ ಮತ್ತು ಗಾತ್ರ: 162 ಗ್ರಾಂ ತೂಕ ಹಾಗೂ 7.2 ಎಂಎಂ ದಪ್ಪವಿದೆ.

ಕ್ಯಾಮೆರಾ: ಹಿಂಭಾಗದಲ್ಲಿ ಟ್ರಿಪಲ್ ಕ್ಯಾಮೆರಾ ಸೆಟಪ್ ಇದ್ದು, OIS ಬೆಂಬಲದೊಂದಿಗೆ 50MP ಮುಖ್ಯ ಕ್ಯಾಮೆರಾ, 10MP ಟೆಲಿಫೋಟೋ ಮತ್ತು 12MP ಅಲ್ಟ್ರಾ-ವೈಡ್ ಕ್ಯಾಮೆರಾ ಒಳಗೊಂಡಿದೆ. ಸೆಲ್ಫಿಗಾಗಿ 12MP ಮುಂಭಾಗದ ಕ್ಯಾಮೆರಾ ನೀಡಲಾಗಿದೆ.

ಪ್ರೊಸೆಸರ್: ಅತ್ಯುತ್ತಮ ಕಾರ್ಯಕ್ಷಮತೆಗಾಗಿ Qualcomm Snapdragon 8 Elite ಪ್ರೊಸೆಸರ್ ನೀಡಲಾಗಿದೆ.

ಬ್ಯಾಟರಿ: 4,000mAh ಬ್ಯಾಟರಿ ಹಾಗೂ 25W ವೈರ್ಡ್ ಫಾಸ್ಟ್ ಚಾರ್ಜಿಂಗ್ ಸೌಲಭ್ಯವಿದೆ.

ಕನೆಕ್ಟಿವಿಟಿ: 5G, ಡ್ಯುಯಲ್ ಸಿಮ್, ಬ್ಲೂಟೂತ್ 5.4, NFC, ವೈ-ಫೈ ಹಾಗೂ USB Type-C 3.2 ಪೋರ್ಟ್ ಹೊಂದಿದೆ.

ವಿಶೇಷ ಸೌಲಭ್ಯಗಳು

ಕೇವಲ ಬೆಲೆ ಕಡಿತವಷ್ಟೇ ಅಲ್ಲದೆ, ಈ ಫೋನ್ ಖರೀದಿಸುವವರಿಗೆ ಭವಿಷ್ಯದ ದೃಷ್ಟಿಯಿಂದ ಹಲವು ಲಾಭಗಳಿವೆ. ಇದರಲ್ಲಿರುವ ಪ್ರಬಲ ‘Galaxy AI’ ಫೀಚರ್‌ಗಳು ದೈನಂದಿನ ಕೆಲಸಗಳನ್ನು ಸುಲಭಗೊಳಿಸುತ್ತವೆ. ಜೊತೆಗೆ ಸ್ಯಾಮ್‌ಸಂಗ್ ಸಂಸ್ಥೆಯು ಈ ಫೋನ್‌ಗೆ ಬರೋಬ್ಬರಿ 7 ವರ್ಷಗಳ ಕಾಲ ಆಂಡ್ರಾಯ್ಡ್ ಮತ್ತು ಭದ್ರತಾ ಅಪ್‌ಡೇಟ್‌ಗಳನ್ನು ನೀಡುವುದಾಗಿ ತಿಳಿಸಿದೆ. ಫೋನ್ IP68 ವಾಟರ್ ರೆಸಿಸ್ಟೆಂಟ್ ರೇಟಿಂಗ್ ಹೊಂದಿದ್ದು, ನೀರಿನಲ್ಲಿ ಬಿದ್ದರೂ ಸುರಕ್ಷಿತವಾಗಿರುತ್ತದೆ. ಬಜೆಟ್ ಕೊರತೆ ಇರುವ ಗ್ರಾಹಕರಿಗೆ ಬ್ಯಾಂಕ್ ಕ್ರೆಡಿಟ್ ಕಾರ್ಡ್‌ಗಳ ಮೂಲಕ ಬಡ್ಡಿ ರಹಿತ ಮಾಸಿಕ ಕಂತುಗಳ (No-Cost EMI) ಸೌಲಭ್ಯವೂ ಲಭ್ಯವಿದೆ.

ದೀಪಾವಳಿ ಸೇಲ್‌ನಲ್ಲಿ Samsung Galaxy S25 ಖರೀದಿಸುವುದು ಉತ್ತಮವೇ?

ನೀವು ಅತ್ಯುತ್ತಮ ಫ್ಲ್ಯಾಗ್‌ಶಿಪ್ ಕಾರ್ಯಕ್ಷಮತೆ (Performance), ಅತ್ಯಾಕರ್ಷಕ AMOLED ಡಿಸ್‌ಪ್ಲೇ ಮತ್ತು ಅತ್ಯುತ್ತಮ ಕ್ಯಾಮೆರಾ ಹೊಂದಿರುವ ಕಾಂಪ್ಯಾಕ್ಟ್ (ಕೈಗೆ ಸುಲಭವಾಗಿ ಹಿಡಿಸುವಂತಹ) ಫೋನ್ ಹುಡುಕುತ್ತಿದ್ದರೆ, ಈ ಆಫರ್ ಖಂಡಿತವಾಗಿಯೂ ಉತ್ತಮ ಆಯ್ಕೆಯಾಗಿದೆ. ಆದಾಗ್ಯೂ, ಖರೀದಿಸುವ ಮುನ್ನ ಬ್ಯಾಂಕ್ ಆಫರ್‌ಗಳು, ಎಕ್ಸ್‌ಚೇಂಜ್ ಮೌಲ್ಯ ಮತ್ತು ಅಂತಿಮ ಪಾವತಿ ಮೊತ್ತವನ್ನು ಸರಿಯಾಗಿ ಪರಿಶೀಲಿಸಿ.

India News Live: ಜಿಯೋ ಐಪಿಒ ಸಮಾರಂಭದಲ್ಲಿ ಅಂಬಾನಿ ಮೊಮ್ಮಕ್ಕಳ ತುಂಟಾಟದ ಜತೆಗೆ ಕೈನಲ್ಲಿ ಇದ್ದ ಆ ಸಾಧನದ್ದೇ ಚರ್ಚೆ, ಇದು ಮೊಬೈಲ್ ಅಲ್ಲ!

Asianet News — Fri, 30 Oct 2026 14:57:27 +0530

ಶ್ರೀಹರಿಕೋಟಾ: ಭಾರತದ ದಿಕ್ಸೂಚಿ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುವ ಗುರಿ ಹೊಂದಿರುವ ಎನ್‌ವಿಎಸ್‌-03 ದಿಕ್ಸೂಚಿ ಉಪಗ್ರಹವನ್ನು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯಾದ ಇಸ್ರೋ ಶುಕ್ರವಾರ ಉಡ್ಡಯನ ಮಾಡಲಿದೆ. ಆಂಧ್ರಪ್ರದೇಶದ ಶ್ರೀಹರಿಕೋಟಾದ ಉಡ್ಡಯನ ನೆಲೆಯಿಂದ ರಾತ್ರಿ 11.51ಕ್ಕೆ ಉಪಗ್ರಹ ಹಾರಿಬಿಡಲು ನಿರ್ಧರಿಸಲಾಗಿದೆ.

ಇದು ಹೊಸ ತಲೆಮಾರಿನ ದಿಕ್ಸೂಚಿ ಉಪಗ್ರಹವಾಗಿದ್ದು, ಐಆರ್‌ಎನ್‌ಎಸ್‌ಎಸ್‌ (ಭಾರತೀಯ ವಲಯ ದಿಕ್ಸೂಚಿ ಉಪಗ್ರಹ ವ್ಯವಸ್ಥೆ)ನ ಭಾಗವಾಗಿ ನಭಕ್ಕೆ ಹಾರಲಿದೆ. ಎನ್‌ವಿಎಸ್‌-03 ಸ್ಥಳೀಯವಾಗಿ ತಯಾರಿಸಿದ ಪರಮಾಣು ಗಡಿಯಾರವನ್ನು ಹೊಂದಿದೆ.

ಇದು ಭಾರತೀಯ ಭೂಪ್ರದೇಶ ಮತ್ತು ಭಾರತೀಯ ಭೌಗೋಳಿಕ ಗಡಿಯ ಸುತ್ತಲೂ 1500 ಕಿ.ಮೀ ವಿಸ್ತಾರವಾದ ಪ್ರದೇಶದ ಮೇಲೆ ವ್ಯಾಪ್ತಿಯನ್ನು ಹೊಂದಿರಲಿದೆ

ನೆಲದಿಂದ 100 ಅಡಿ ಆಳದಲ್ಲಿ ನಿಲ್ದಾಣ, ಸಮುದ್ರದ ಕೆಳಗೆ 7KM ಸುರಂಗ! ದೇಶದ ಮೊದಲ ಬುಲೆಟ್ ರೈಲು ಬಗ್ಗೆ ಕೇಂದ್ರದಿಂದ ಬಿಗ್‌ ಅಪ್‌ಡೇಟ್ಸ್

Ganesh Mabla Gowda — Sun, 25 Oct 2026 16:40:50 +0530

ನವದೆಹಲಿ: ದೇಶದ ಮೊದಲ ಬುಲೆಟ್ ಟ್ರೈನ್ ಬಗ್ಗೆ ಕೇಂದ್ರ ಸರ್ಕಾರ ಬಿಗ್ ಅಪ್‌ಡೇಟ್ಸ್ ನೀಡಿದೆ. ಬುಲೆಟ್ ಟ್ರೈನ್ ಉದ್ಘಾಟನೆಗೆ ಸಮರೋಪಾದಿಯಲ್ಲಿ ಕೆಲಸಗಳು ನಡೆಯುತ್ತಿದ್ದು, 2027ರ ವೇಳೆಗೆ ಅತೀ ವೇಗದ ರೈಲು ಸಂಚಾರ ನಡೆಸುವ ನಿರೀಕ್ಷೆಗಳಿವೆ. ಈ ಬಗ್ಗೆ ಕೇಂದ್ರ ರೈಲ್ವೇ ಸಚಿವ ಅಶ್ವಿನಿ ವೈಷ್ಣವ್ ಅವರು ದೇಶದ ಮೊದಲ ಬುಲೆಟ ಟ್ರೈನ್ ಈಗ ಆಕಾರ ಪಡೆಯುತ್ತಿದೆ ಎಂದು ಮಾಹಿತಿ ನೀಡಿದ್ದಾರೆ.

ಈ ಬಗ್ಗೆ ಸುದೀರ್ಘವಾಗಿ ಕೇಂದ್ರ ಸಚಿವರು ಮಾಹಿತಿ ನೀಡಿದ್ದಾರೆ. ಭಾರತದ ಬುಲೆಟ್ ರೈಲು ಉದ್ಘಾಟನೆ ಬಗ್ಗೆ ಇನ್ನೂ ಘೋಷಣೆ ಆಗಿಲ್ಲ.ಇದು ಒಟ್ಟು 508 ಕಿಲೋ ಮೀಟರ್ ದೂರದ ನಿರ್ಮಾಣ ಕಾರ್ಯ. ತಂಬಾ ವೇಗವಾಗಿ ಇದರ ಕಾರ್ಯಗಳು ನಡೆಯುತ್ತಿವೆ. ಇದರ ಮೊದಲ ಸೇವೆ 2027ರ ಕೊನೆಯ ತ್ರೈಮಾಸಿಕದಲ್ಲಿ ಶುರುವಾಗಲಿದೆ ಎಂದು ತಿಳಿಸಿದ್ದಾರೆ. ಮೊದಲ ಬುಲೆಟ್‌ ಟ್ರೈನ್ ಅಹಮದಾಬಾದ್‌ ಟು ಮುಂಬೈಗೆ ಹೈಸ್ಪೀಡ್ ಮಾರ್ಗದಲ್ಲಿ ಸಂಚಾರ ಮಾಡಲಿದೆ.

ವಿಶೇಷತೆ ಏನು?

ಬುಲೆಟ್ ಟ್ರೈನ್‌ ಯೋಜನೆಯ ಮುಂದುರಿದ ಭಾಗವಾಗಿ ಮುಂಬೈನಲ್ಲಿ ಬೃಹತ್ ರೈಲ್ವೇ ನಿರ್ಮಾಣ ಮಾಡಲಾಗುತ್ತಿದೆ.ಬಾಂದ್ರಾ-ಕುರ್ಲಾ ಸಂಕಿರಣದಲ್ಲಿ 100 ಅಡಿ ಕೆಳಗೆ ಅಂದರೆ 10 ಅಂತಸ್ತಿನ ಕಟ್ಟಡಕ್ಕಿಂತ ಆಳವಾಗಿದೆ. ಮುಂಬೈನ ಹೃದಯಭಾಗವಾಗಿರುವ ಬಿಕೆಸಿಯಲ್ಲಿ ನಾವು ಹೈ-ಸ್ಪೀಡ್ ರೈಲು ಕಾರಿಡಾರ್ ನಡೆಯುತ್ತಿದೆ. ಈ ಕಾರಿಡಾರ್‍‌ನಲ್ಲಿ ನಾವು ಏಕೈಕ ಭೂಗತ ನಿಲ್ದಾಣ ನಿರ್ಮಾಣ ಮಾಡುತ್ತಿದ್ದೇವೆ. ರೈಲ್ವೇ ನಿಲ್ದಾಣದ ಎಂಜಿನಿಯರಿಂಗ್ ಅದ್ಭುತವಾಗಿದೆ ಎಂದು ತಿಳಿಸಿದ್ದಾರೆ.

ಕೇಂದ್ರ ಸಚಿವರು ನೀಡಿರುವ ಮಾಹಿತಿ ಪ್ರಕಾರ.. ಭೂಮಿಯ ಆಳದಲ್ಲಿ ರೈಲ್ವೇ ನಿಲ್ದಾಣ ಮಾಡುವ ಉದ್ದೇಶದಿಂದ 32 ಮೀಟರ್ ಆಳದಲ್ಲಿ ಉತ್ಖನ ನಡೆಯುತ್ತಿದೆ. ಪ್ಲಾಟ್‌ಫಾರ್ಮ್‌ಗಳು, ಕಾನ್ಕೋರ್ಸ್‌ಗಳು ಮತ್ತು ಸೇವಾ ಪ್ರದೇಶಗಳನ್ನು ಒಳಗೊಳ್ಳಲಿದೆ. ಈ ಆಳದಲ್ಲಿ ಒಟ್ಟು ಮೂರು ಹಂತಗಳನ್ನ ನಿರ್ಮಿಸಲಾಗುತ್ತದೆ. 400 ಮೀಟರ್‌ಗಿಂತ ಹೆಚ್ಚು ಉದ್ದದ ಒಟ್ಟು ಆರು ಪ್ಲಾಟ್ ಫಾರ್ಮ್‌ ನಿರ್ಮಾಣ ಮಾಡಲಾಗುತ್ತಿದೆ ಎಂಬ ವಿಚಾರವನ್ನು ತಿಳಿಸಿದ್ದಾರೆ.

ಜೊತೆಗೆ ನೀರಿನೊಳಗೆ ರೈಲು ಸುರಂಗ ನಿರ್ಮಿಸಲು 3200 ಟನ್ ತೂಕದ ಯಂತ್ರವು ಥಾಣೆ ಕ್ರೀಕ್‌ನ ಕೆಳಗೆ ಬಂಡೆಗಳನ್ನ ಸೆವೆಸುತ್ತಿದೆ. ಬುಲೆಟ್ ಟ್ರೈನ್ ಅದರ ಮೂಲಕ ಹೆಚ್ಚಿನ ವೇಗದಲ್ಲಿ ಚಲಿಸಲಿದೆ. ಈ ಬುಲೆಟ್ ಟ್ರೈನ್ ಕಾರಿಡಾರ್‍‌ ಒಟ್ಟು 21 ಕಿಲೋ ಮೀಟರ್ ಉದ್ದದ ಸುರಂಗದ ಮೂಲಕ ಚಲಿಸಲಿದೆ. ಅದರಲ್ಲಿ 7 ಕಿಲೋ ಮೀಟರ್ ಥಾಣೆ ಕ್ರಿಕ್‌ನಡಿ ಹಾದು ಹೋಗುತ್ತದೆ. ಇದು ದೇಶದ ಮೊದಲ ಸಾಗರದೊಳಗಿನ ಸುರಂಗ ಆಗಲಿದೆ ಎಂದು ಅವರು ತಿಳಿಸಿದ್ದಾರೆ.

ರೈಲ್ವೇ ಸಚಿವರು ನೀಡಿದ ಹೆಚ್ಚಿನ ಮಾಹಿತಿ

ಕಳೆದ ಜುಲೈನಲ್ಲಿ ವಿಖ್ರೋಲಿ ಮತ್ತು ಸಾವ್ಲಿಯಿಂದ 2 ಸುರಂಗ ಕೊರೆಯುವ ಯಂತ್ರಗಳ ಉಡಾವಣೆ
ಭಾರತದಲ್ಲಿ ಇದುವರೆಗೆ ಸ್ಥಾಪಿಸಲಾದ ಅತಿದೊಡ್ಡ ಸುರಂಗ ಕೊರೆಯವ ಯಂತ್ರಗಳಲ್ಲಿ ಒಂದಾಗಿದೆ
ಪ್ರತಿ ಯಂತ್ರವು 13.6 ಮೀಟರ್ ವ್ಯಾಸದ ಕಟ್ಟರ್‌ಹೆಡ್ ಅನ್ನು ಹೊಂದಿದೆ ಎಂದು ತಿಳಿದುಬಂದಿದೆ
ಅಂದರೆ ನಾಲ್ಕು ಅಂತಸ್ತಿನ ಕಟ್ಟಡದಷ್ಟು ಎತ್ತರ, ಪ್ರತಿ ಯಂತ್ರವು 3,000 ಟನ್‌ಗಳಿಗಿಂತ ಹೆಚ್ಚು ತೂಕ
ಅಂದರೆ ಸುಮಾರು 500 ಏಷ್ಯನ್ ಆನೆಗಳಿಗೆ ಸಮಾನ, ಯಂತ್ರವು 96 ಮೀಟರ್ ಉದ್ದವಾಗಿದೆ.
ಬುಲೆಟ್ ರೈಲು ಪೂರ್ಣ ವೇಗದಲ್ಲಿ ಚಲಿಸಿದಾಗ ಗಂಟೆಗೆ 320 ಕಿ.ಮೀ ವೇಗದಲ್ಲಿ ಇರುತ್ತದೆ

2028ರ ಚಂದ್ರಯಾನದ ರೇಸ್‌ನಲ್ಲಿ ಮಸ್ಕ್ vs ಬೆಜೋಸ್, ನಾಸಾಗೆ ಕೈಜೋಡಿಸಿದ ಸ್ಪೇಸ್‌ಎಕ್ಸ್ , ಚೀನಾಗೆ ಅಮೆರಿಕ ಸೆಡ್ಡು!

Gowthami K — Mon, 26 Oct 2026 16:33:48 +0530

ಮಾನವ ಕುಲವನ್ನು ಮತ್ತೆ ಚಂದ್ರನ ಅಂಗಳಕ್ಕೆ ತಲುಪಿಸುವ ನಾಸಾದ ಮಹತ್ವಾಕಾಂಕ್ಷೆಯ 'ಆರ್ಟೆಮಿಸ್' ಯೋಜನೆಯು ಹೊಸ ವೇಗ ಪಡೆದುಕೊಂಡಿದೆ. 2028 ರಲ್ಲಿ ಗಗನಯಾತ್ರಿಗಳನ್ನು ಚಂದ್ರನ ಮೇಲೆ ಯಶಸ್ವಿಯಾಗಿ ಇಳಿಸುವ ಬೃಹತ್ ಸಾಹಸಕ್ಕೆ ಮುನ್ನ, 2027 ರಲ್ಲಿ ಅತ್ಯಂತ ಸಂಕೀರ್ಣವಾದ 'ಆರ್ಟೆಮಿಸ್ III' ಬಾಹ್ಯಾಕಾಶ ಪರೀಕ್ಷಾ ಕಾರ್ಯಾಚರಣೆಯನ್ನು ಕೈಗೊಳ್ಳಲು ನಾಸಾ ಅಂತಿಮ ಹಂತಹ ಸಿದ್ಧತೆಗಳನ್ನು ನಡೆಸುತ್ತಿದೆ.

ಈ ನಿರ್ಣಾಯಕ ಕಾರ್ಯಾಚರಣೆಗಾಗಿ ವಿಶ್ವದ ಇಬ್ಬರು ದೈತ್ಯ ಉದ್ಯಮಿಗಳಾದ ಎಲಾನ್ ಮಸ್ಕ್ ನೇತೃತ್ವದ 'ಸ್ಪೇಸ್‌ಎಕ್ಸ್' ಮತ್ತು ಜೆಫ್ ಬೆಜೋಸ್ ಅವರ 'ಬ್ಲೂ ಒರಿಜಿನ್' ಕಂಪನಿಗಳು ತಯಾರಿಸುತ್ತಿರುವ ಚಂದ್ರನ ಲ್ಯಾಂಡರ್‌ಗಳನ್ನು ಭೂಮಿಯ ಕಕ್ಷೆಯಲ್ಲಿ ಕಠಿಣ ಪರೀಕ್ಷೆಗೆ ಒಳಪಡಿಸಲಾಗುವುದು.

2027 ರ ಕಕ್ಷೀಯ ಪರೀಕ್ಷೆ ಮತ್ತು ಗಗನಯಾತ್ರಿಗಳ ತಂಡ

ನಾಸಾದ ಅಧಿಕೃತ ಪ್ರಕಟಣೆಯ ಪ್ರಕಾರ, ಆರ್ಟೆಮಿಸ್ III ಕಾರ್ಯಾಚರಣೆಯು 14 ದಿನಗಳ ಕಾಲ ತಳಮಟ್ಟದ ಭೂಮಿಯ ಕಕ್ಷೆಯಲ್ಲಿ ನಡೆಯಲಿದೆ. ನಾಸಾದ ಪ್ರಸಿದ್ಧ 'ಓರಿಯನ್' ಬಾಹ್ಯಾಕಾಶ ನೌಕೆಯಲ್ಲಿ ನಾಸಾ ಗಗನಯಾತ್ರಿಗಳಾದ ರಾಂಡಿ ಬ್ರೆಸ್ನಿಕ್, ಫ್ರಾಂಕ್ ರುಬಿಯೊ ಮತ್ತು ಆಂಡ್ರೆ ಡೌಗ್ಲಾಸ್ ಅವರೊಂದಿಗೆ ಯುರೋಪಿಯನ್ ಬಾಹ್ಯಾಕಾಶ ಸಂಸ್ಥೆಯ ಲುಕಾ ಪರ್ಮಿಟಾನೊ ಪ್ರಯಾಣಿಸಲಿದ್ದಾರೆ.

ಈ 14 ದಿನಗಳ ಕಕ್ಷೀಯ ಪಯಣದಲ್ಲಿ ಗಗನಯಾತ್ರಿಗಳು ಹಾಗೂ ಫ್ಲೈಟ್ ಕಂಟ್ರೋಲರ್‌ಗಳು, ಸ್ಪೇಸ್‌ಎಕ್ಸ್ ಮತ್ತು ಬ್ಲೂ ಒರಿಜಿನ್ ಕಂಪನಿಗಳು ಅಭಿವೃದ್ಧಿಪಡಿಸುತ್ತಿರುವ ಲ್ಯಾಂಡರ್‌ಗಳ ಮಾದರಿಗಳೊಂದಿಗೆ ಬಾಹ್ಯಾಕಾಶ ನೌಕೆಯ ಜೋಡಣೆ, ವಾಸಸ್ಥಳ ನಿರ್ವಹಣೆ ಹಾಗೂ ಕಾರ್ಯಾಚರಣೆಯ ಪ್ರಕ್ರಿಯೆಗಳನ್ನು ಪ್ರಾಯೋಗಿಕವಾಗಿ ಪರೀಕ್ಷಿಸಲಿದ್ದಾರೆ. 2028 ರ 'ಆರ್ಟೆಮಿಸ್ IV' ಮಾನವಸಹಿತ ಚಂದ್ರಯಾನಕ್ಕೆ ಯಾವ ಕಂಪನಿಯ ಲ್ಯಾಂಡರ್ ಅತ್ಯಂತ ಸುರಕ್ಷಿತ ಮತ್ತು ಸಿದ್ಧವಾಗಿದೆ ಎಂಬುದನ್ನು ನಿರ್ಧರಿಸಲು ಈ ಪರೀಕ್ಷೆ ಅತ್ಯಂತ ಪ್ರಮುಖವಾಗಿದೆ.

ತಾಂತ್ರಿಕ ಸವಾಲುಗಳ ನಡುವೆಯೂ ನಾಸಾ ಕಟ್ಟುನಿಟ್ಟಿನ ಹೆಜ್ಜೆ

ಎರಡೂ ಖಾಸಗಿ ಬಾಹ್ಯಾಕಾಶ ಸಂಸ್ಥೆಗಳು ಕೆಲವು ತಾಂತ್ರಿಕ ತೊಡಕುಗಳನ್ನು ಎದುರಿಸುತ್ತಿದ್ದರೂ, ನಿಗದಿಪಡಿಸಿದ ಸಮಯಕ್ಕೇ ಪರೀಕ್ಷಾ ಕಾರ್ಯಾಚರಣೆ ನಡೆಸಲಾಗುವುದು ಎಂದು ನಾಸಾ ಆಡಳಿತಾಧಿಕಾರಿ ಜೇರೆಡ್ ಐಸಾಕ್‌ಮನ್ ಸ್ಪಷ್ಟಪಡಿಸಿದ್ದಾರೆ. ಹೆಚ್ಚಿನ ಸಮಯ ಅಥವಾ ಹೆಚ್ಚಿನ ಹಣ ವ್ಯಯಿಸುವುದರಿಂದ ಮಾತ್ರವೇ ಸುರಕ್ಷತೆ ಸಿಗುತ್ತದೆ ಎಂಬ ಭ್ರಮೆಯಲ್ಲಿ ನಾವಿಲ್ಲ. ಕಟ್ಟುನಿಟ್ಟಾದ ಪರೀಕ್ಷೆಗಳೇ ನಮಗೆ ನೈಜ ಯಶಸ್ಸು ನೀಡಲಿವೆ ಎಂದು ಅವರು ತಿಳಿಸಿದ್ದಾರೆ. 1972 ರ ಅಪೋಲೋ ಕಾರ್ಯಕ್ರಮದ ನಂತರ ಮಾನವ ಮತ್ತೆ ಚಂದ್ರನ ಮೇಲೆ ಹೆಜ್ಜೆಯಿಡುತ್ತಿರುವುದು ಇದೇ ಮೊದಲ ಬಾರಿಯಾಗಿದೆ.

ಸ್ಪೇಸ್‌ಎಕ್ಸ್ vs ಬ್ಲೂ ಒರಿಜಿನ್: ಯಾರ ತಂತ್ರಜ್ಞಾನ ಹೇಗಿದೆ?

ಚೀನಾ ಸವಾಲು ಮತ್ತು ನಾಸಾದ ಭವಿಷ್ಯದ ಯೋಜನೆ

2030 ರ ವೇಳೆಗೆ ತನ್ನ ದೇಶದ ಗಗನಯಾತ್ರಿಗಳನ್ನು ಚಂದ್ರನ ಮೇಲೆ ಇಳಿಸಲು ಚೀನಾ ಕೂಡ ಶರವೇಗದಲ್ಲಿ ಯೋಜನೆ ರೂಪಿಸುತ್ತಿದೆ. ಅಮೆರಿಕ ಮತ್ತು ಚೀನಾ ನಡುವಿನ ಈ ಬಾಹ್ಯಾಕಾಶ ಸ್ಪರ್ಧೆಯ ಹಿನ್ನೆಲೆಯಲ್ಲಿ, ನಾಸಾ ತನ್ನ ಬಾಹ್ಯಾಕಾಶ ಸೂಟ್‌ಗಳು, ಸ್ಪೇಸ್ ಲಾಂಚ್ ಸಿಸ್ಟಮ್ (SLS) ರಾಕೆಟ್ ಹಾಗೂ ಓರಿಯನ್ ನೌಕೆಯ ವಿನ್ಯಾಸಗಳನ್ನು ಮತ್ತಷ್ಟು ಸರಳೀಕರಿಸಿ ವೇಗವಾಗಿ ಕೆಲಸ ನಿರ್ವಹಿಸುತ್ತಿದೆ. 2028 ರ ಕೊನೆಯಲ್ಲಿ ಅಥವಾ 2029 ರ ಆರಂಭದಲ್ಲಿ ನಡೆಯಲಿರುವ ಆರ್ಟೆಮಿಸ್ IV ಚಂದ್ರಯಾನಕ್ಕಾಗಿ ಸ್ಪೇಸ್‌ಎಕ್ಸ್ ಅಥವಾ ಬ್ಲೂ ಒರಿಜಿನ್ ಈ ಎರಡರಲ್ಲಿ ಯಾವ ಕಂಪನಿಯ ಲ್ಯಾಂಡರ್ ಮೊದಲು ಸಂಪೂರ್ಣ ಸುರಕ್ಷತೆಯೊಂದಿಗೆ ಸಿದ್ಧವಾಗಲಿದೆಯೋ, ಅದನ್ನೇ ಬಳಸಿಕೊಳ್ಳಲು ನಾಸಾ ತೀರ್ಮಾನಿಸಿದೆ.

ವಿಜ್ಞಾನ ಲೋಕಕ್ಕೆ ಅಚ್ಚರಿ ಮೂಡಿಸಿದ ಹಾವು; ಎಲ್ಲ ಹಾವುಗಳಂತೆ ತೆವಳೋದಿಲ್ಲ, ಸೈಕಲ್ ಚಕ್ರದಂತೆ ಉರುಳುತ್ತದೆ?

Sathish Kumar KH — Sun, 25 Oct 2026 19:53:02 +0530

ಹಾವುಗಳು ಎಂದಾಕ್ಷಣ ನಮ್ಮ ಕಣ್ಣ ಮುಂದೆ ಬರುವುದು ಅವುಗಳ ಅಂಕುಡೊಂಕಾದ ತೆವಳುವ ಶೈಲಿ (Slithering). ಆದರೆ, ಭೂಮಿಯ ಮೇಲೆ ಅಪಾಯ ಎದುರಾದಾಗ ತೆವಳುವ ಬದಲು ಸೈಕಲ್ ಚಕ್ರದಂತೆ ಗಿರಗಿರನೆ ಉರುಳಿಕೊಂಡು ಓಡುವ ವಿಚಿತ್ರ ಹಾವೊಂದಿದೆ ಎಂದರೆ ನೀವು ನಂಬುತ್ತೀರಾ?

ಹೌದು, ಆಗ್ನೇಯ ಏಷ್ಯಾದ ಕಾಡುಗಳಲ್ಲಿ ಕಂಡುಬರುವ ಪುಟ್ಟ ಗಾತ್ರದ ‘ಡ್ವಾರ್ಫ್ ರೀಡ್‌ಸ್ನೇಕ್’ (Dwarf Reedsnake - Pseudorabdion) ಎಂಬ ಹಾವುಗಳು ಶತ್ರುಗಳಿಂದ ಪಾರಾಗಲು ಈ ಅಸಾಧಾರಣ ‘ರೋಲಿಂಗ್’ (ಉರುಳುವ) ಕಸರತ್ತನ್ನು ಮಾಡುತ್ತವೆ. ಇವು ಸಾಮಾನ್ಯವಾಗಿ ತೆವಳುವುದಕ್ಕಿಂತಲೂ ಬರೋಬ್ಬರಿ ನಾಲ್ಕು ಪಟ್ಟು ಹೆಚ್ಚು ವೇಗವಾಗಿ ಉರುಳಬಲ್ಲವು ಎಂಬುದನ್ನು ವಿಜ್ಞಾನಿಗಳು ಇದೀಗ ಅಧ್ಯಯನದ ಮೂಲಕ ಸಾಬೀತುಪಡಿಸಿದ್ದಾರೆ!

ಪ್ರಾಣಿಗಳಿಗೆ ಚಕ್ರದಂತೆ ಉರುಳುವುದು ಏಕೆ ಕಷ್ಟಸಾಧ್ಯ?

ಸಾಮಾನ್ಯವಾಗಿ ವಾಹನಗಳಲ್ಲಿ ಚಕ್ರ ತಿರುಗಲು ಒಂದು ಆಕ್ಸಲ್ (Axle) ಅಥವಾ ಕಡ್ಡಿ ಇರುತ್ತದೆ. ಇದರಿಂದಾಗಿ ಚಕ್ರ ತಿರುಗಿದರೂ ವಾಹನದ ಮೇಲ್ಭಾಗ ಸ್ಥಿರವಾಗಿರುತ್ತದೆ. ಆದರೆ ಜೀವಿಗಳಲ್ಲಿ ಅಂತಹ ಯಾವುದೇ ಪ್ರತ್ಯೇಕ ಯಾಂತ್ರಿಕ ವ್ಯವಸ್ಥೆ ಇರುವುದಿಲ್ಲ.

ಯಾವುದೇ ಪ್ರಾಣಿ ಇಡೀ ದೇಹವನ್ನು ಉರುಳಿಸಿದರೆ, ಅದರ ತಲೆ ಮತ್ತು ಕಣ್ಣುಗಳು ಕೂಡ ಒಟ್ಟಿಗೇ ಗಿರಗಿರನೆ ತಿರುಗುತ್ತವೆ. ಇದರಿಂದ ವಿಪರೀತ ತಲೆತಿರುಗುವಿಕೆ (Dizziness) ಉಂಟಾಗಿ, ದೃಷ್ಟಿ ಮಂಜಾಗಿ, ಯಾವ ದಿಕ್ಕಿಗೆ ಹೋಗುತ್ತಿದ್ದೇವೆ ಎಂಬ ನಿಯಂತ್ರಣವೇ ತಪ್ಪಿಹೋಗುತ್ತದೆ. ಆದರೆ ಈ ರೀಡ್‌ಸ್ನೇಕ್‌ಗಳು ಈ ಜೈವಿಕ ಮಿತಿಯನ್ನೇ ಬುಡಮೇಲು ಮಾಡಿವೆ!

ವಿಜ್ಞಾನಿಗಳನ್ನೇ ನಿಬ್ಬೆರಗಾಗಿಸಿದ ಹಾವಿನ ಜಾದೂ!

ಸಂಶೋಧಕರು ಹೈ-ಸ್ಪೀಡ್ ಕ್ಯಾಮೆರಾಗಳನ್ನು ಬಳಸಿ ವಿವಿಧ ಕೋನಗಳಿಂದ ಈ ಹಾವುಗಳ ಚಲನವಲನಗಳನ್ನು ಸೂಕ್ಷ್ಮವಾಗಿ ಸೆರೆಹಿಡಿದು ಅಧ್ಯಯನ ಮಾಡಿದ್ದಾರೆ. ಈ ವೇಳೆ ಬಯಲಾದ ಅಚ್ಚರಿಯ ಅಂಶಗಳಿವು:

ಹಾರುವ ವೇಗ: ಉರುಳುವಾಗ ಈ ಹಾವುಗಳು ಪ್ರತಿ ಸೆಕೆಂಡಿಗೆ 1.72 ರಿಂದ 3.69 ಮೀಟರ್‌ಗಳಷ್ಟು ಗರಿಷ್ಠ ವೇಗವನ್ನು (ಅಂದರೆ ಪ್ರತಿ ಗಂಟೆಗೆ 10 ರಿಂದ 13 ಕಿ.ಮೀ ವೇಗ) ತಲುಪುತ್ತವೆ. ಇದು ಅವುಗಳ ಸಾಮಾನ್ಯ ಚಲನೆಗಿಂತ 4 ಪಟ್ಟು ಹೆಚ್ಚು ವೇಗವಾಗಿ ಉರುಳುತ್ತವೆ.

ಸ್ಥಿರವಾಗಿರುವ ತಲೆ (Head Stability): ಹಾವಿನ ಇಡೀ ಹಿಂದಿನ ದೇಹವು ಆಕಾಶ-ಭೂಮಿ ಸುತ್ತುತ್ತಾ ವೇಗವಾಗಿ ಉರುಳುತ್ತಿದ್ದರೂ, ಅದರ ತಲೆ ಮಾತ್ರ ಗಿರಕಿ ಹೊಡೆಯುವುದಿಲ್ಲ! ತಲೆಯನ್ನು ನೆಲದಿಂದ ಒಂದೇ ಸಮಾನ ಎತ್ತರದಲ್ಲಿ ನೇರವಾಗಿ ಮುಂಭಾಗಕ್ಕೆ ಇಟ್ಟುಕೊಂಡು, ಕಣ್ಣುಗಳನ್ನು ತಾನು ಹೋಗುವ ದಿಕ್ಕಿನತ್ತಲೇ ನೆಟ್ಟಿರುತ್ತದೆ.

ಅದ್ಭುತ ನಿಯಂತ್ರಣ: ಇದು ಕೇವಲ ನಿಯಂತ್ರಣವಿಲ್ಲದೆ ಬೆಟ್ಟದಿಂದ ಉರುಳುವ ಕಲ್ಲಿನಂತಲ್ಲ. ಈ ಹಾವುಗಳು ಕೇವಲ 20 ಸೆಂಟಿಮೀಟರ್ ಅಗಲದ ಕಿರಿದಾದ ಟ್ರ್ಯಾಕ್‌ನಲ್ಲಿಯೂ ಅತ್ತಿತ್ತ ವಾಲದೆ ನಿಖರವಾಗಿ ಉರುಳಿಕೊಂಡು ಹೋಗುವ ಅದ್ಭುತ ದೇಹನಿಯಂತ್ರಣ ಹೊಂದಿವೆ.

ಹೇಗೆ ಸಾಧ್ಯವಾಗುತ್ತದೆ ಈ ಅಕ್ರೋಬ್ಯಾಟಿಕ್ ಚಲನೆ?

ಸಂಶೋಧಕರು ಕಂಡುಕೊಂಡಂತೆ, ಈ ಹಾವು ಇಡೀ ದೇಹವನ್ನು ಒಟ್ಟಿಗೆ ತಿರುಗಿಸುವುದಿಲ್ಲ. ಬದಲಾಗಿ, ದೇಹವನ್ನು ಸಣ್ಣ ಸಣ್ಣ ಭಾಗಗಳಾಗಿ ವಿಂಗಡಿಸಿ, ಒಂದು ಭಾಗವನ್ನು ನೆಲಕ್ಕೆ ಒತ್ತಿ ಇನ್ನೊಂದು ಭಾಗವನ್ನು ಪಕ್ಕಕ್ಕೆ ಬೀಸುವ (Stroke) ರೀತಿಯ ಸಂಕೀರ್ಣ ಮಾದರಿಯನ್ನು ಎಡ ಮತ್ತು ಬಲಕ್ಕೆ ಬದಲಾಯಿಸುತ್ತಾ ಸಾಗುತ್ತದೆ. ಇದರಿಂದಾಗಿ ತಲೆಗೆ ಹೊಡೆತ ಬೀಳದೆ, ಇಡೀ ದೇಹವು ಮುನ್ನುಗ್ಗುವ ಶಕ್ತಿಯನ್ನು ಪಡೆಯುತ್ತದೆ.

ವಿಕಾಸವಾದದ (Evolution) ಮಹಾ ವಿಸ್ಮಯ!

ಪ್ರಾಣಿಗಳ ದೇಹರಚನೆಯಷ್ಟೇ ಅವುಗಳ ಸಾಮರ್ಥ್ಯವನ್ನು ನಿರ್ಧರಿಸುವುದಿಲ್ಲ, ಬದಲಿಗೆ ಸ್ನಾಯುಗಳ ಹೊಂದಾಣಿಕೆ ಮತ್ತು ಅಸಾಮಾನ್ಯ ನಡವಳಿಕೆಗಳು ಅಸಾಧ್ಯವಾದುದನ್ನು ಸಾಧ್ಯವಾಗಿಸುತ್ತವೆ ಎಂಬುದಕ್ಕೆ ಈ ಹಾವುಗಳೇ ಜೀವಂತ ಸಾಕ್ಷಿ. ತಮ್ಮ ಜೀವ ಉಳಿಸಿಕೊಳ್ಳಲು ನಿಸರ್ಗ ರೂಪಿಸಿರುವ ಇಂತಹ ತಂತ್ರಜ್ಞಾನ ನಿಜಕ್ಕೂ ಪ್ರಕೃತಿಯ ಇಂಜಿನಿಯರಿಂಗ್ ಅದ್ಭುತಗಳಲ್ಲಿ ಒಂದಾಗಿದೆ.

ಚಿನ್ನ, ಬೆಳ್ಳಿ, ವಜ್ರ ಇದ್ಯಾವುದೂ ಅಲ್ಲ.. ಭವಿಷ್ಯದಲ್ಲಿ ಈ ವಸ್ತುವೇ ಅತ್ಯಂತ ದುಬಾರಿ ಎಂದ ವಿಶ್ವದ ಶ್ರೀಮಂತ Elon musk!

Santosh Naik — Tue, 27 Oct 2026 18:39:39 +0530

ನ್ಯೂಯಾರ್ಕ್‌ (ಅ.27): ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಹಾಗೂ ಪ್ರಸ್ತುತ ತಂತ್ರಜ್ಞಾನ ರಂಗದಲ್ಲಿ ಕೃತಕ ಬುದ್ಧಿಮತ್ತೆ ಆಧಾರಿತ ಡೇಟಾ ಸೆಂಟರ್‌ಗಳ (AI Data Centers) ಭಾರಿ ಬೇಡಿಕೆಯಿಂದಾಗಿ 'ಮೆಮೊರಿ ಚಿಪ್ಸ್' (Memory Chips) ಜಗತ್ತಿನಾದ್ಯಂತ ಅತ್ಯಂತ ಮೌಲ್ಯಯುತ ವಸ್ತುವಾಗಿ ಮಾರ್ಪಟ್ಟಿವೆ. ಇದರ ಪರಿಣಾಮವಾಗಿ ಸ್ಮಾರ್ಟ್‌ಫೋನ್‌, ಲ್ಯಾಪ್‌ಟಾಪ್ ಸೇರಿದಂತೆ ಇತರ ಎಲೆಕ್ಟ್ರಾನಿಕ್ ಸಾಧನಗಳ ಬೆಲೆಗಳು ನಿರಂತರವಾಗಿ ಏರಿಕೆಯಾಗುತ್ತಿವೆ. ಒಂದು ವೇಳೆ ಈ ಬೆಲೆ ಏರಿಕೆಯ ಹಂತ ಶೀಘ್ರದಲ್ಲೇ ಕೊನೆಗೊಳ್ಳಬಹುದು ಎಂದು ನೀವು ಭಾವಿಸಿದ್ದರೆ ಅದು ಸಂಪೂರ್ಣ ತಪ್ಪು!

'ಎಕ್ಸ್' (X) ಮಾಲೀಕ ಹಾಗೂ ಟೆಕ್ ದಿಗ್ಗಜ el ಮಸ್ಕ್ (Elon Musk) ಅವರ ಪ್ರಕಾರ, ಜಗತ್ತಿನಲ್ಲಿ ಹ್ಯೂಮನಾಯ್ಡ್ ರೋಬೋಟ್‌ಗಳ (Humanoid Robots - ಮನುಷ್ಯನಂತೆ ಕಾಣುವ ಮತ್ತು ಕೆಲಸ ಮಾಡುವ ರೋಬೋಟ್‌ಗಳು) ಬೃಹತ್ ಪ್ರಮಾಣದ ಉತ್ಪಾದನೆ (Mass Production) ಆರಂಭವಾದಾಗ ಈ ಪರಿಸ್ಥಿತಿ ಇನ್ನಷ್ಟು ಭೀಕರವಾಗಲಿದೆ. ಅಂದರೆ, ಮುಂದಿನ ದಿನಗಳಲ್ಲಿ ಕಂಪ್ಯೂಟರ್ ರಾಮ್‌ (RAM) ಮತ್ತು ಮೆಮೊರಿ ಚಿಪ್‌ಗಳ ಬೇಡಿಕೆಯು ಜಗತ್ತಿನಲ್ಲಿರುವ ಇತರ ಯಾವುದೇ ವಸ್ತುವಿಗಿಂತಲೂ ಗರಿಷ್ಠ ಮಟ್ಟವನ್ನು ತಲುಪಲಿದೆ ಎಂದು ಮಸ್ಕ್ ಎಚ್ಚರಿಸಿದ್ದಾರೆ.

20 ಪಟ್ಟು ಹೆಚ್ಚಾಗಲಿದೆ ಡಿಆರ್‌ಎಎಮ್ (DRAM) ಬೇಡಿಕೆ

ಸಾಮಾಜಿಕ ಜಾಲತಾಣ 'ಎಕ್ಸ್' (X) ನಲ್ಲಿ ಹಂಚಿಕೊಳ್ಳಲಾದ ಸುದೀರ್ಘ ಚರ್ಚೆಯೊಂದಕ್ಕೆ (Thread) ಪ್ರತಿಕ್ರಿಯಿಸಿದ ಎಲನ್ ಮಸ್ಕ್, ಮೆಮೊರಿ ಚಿಪ್‌ಗಳ ಭವಿಷ್ಯದ ಬೇಡಿಕೆಯ ಕುರಿತು ಈ ಪ್ರಮುಖ ವಿಷಯಗಳನ್ನು ಹಂಚಿಕೊಂಡಿದ್ದಾರೆ. ಪ್ರಸಿದ್ಧ ಸಂಶೋಧನಾ ಸಂಸ್ಥೆ 'ಕೌಂಟರ್‌ಪಾಯಿಂಟ್ ರಿಸರ್ಚ್' (Counterpoint Research) ಇತ್ತೀಚೆಗೆ ಬಿಡುಗಡೆ ಮಾಡಿದ ವರದಿಯೊಂದರ ಪ್ರಕಾರ, ಮುಂಬರುವ ವರ್ಷಗಳಲ್ಲಿ ಕಂಪ್ಯೂಟರ್ ಮೆಮೊರಿಗಳ ಬೇಡಿಕೆ ಅತ್ಯಂತ ವೇಗವಾಗಿ ಹೆಚ್ಚಾಗಲಿದೆ. ಮನುಷ್ಯರಂತೆಯೇ ಕಾರ್ಯನಿರ್ವಹಿಸುವ ಹ್ಯೂಮನಾಯ್ಡ್ ರೋಬೋಟ್‌ಗಳ ಕಾರಣದಿಂದಾಗಿ 2030 ರ ವೇಳೆಗೆ ಪ್ರಪಂಚದಾದ್ಯಂತ ಡಿಆರ್‌ಎಎಮ್ (DRAM) ಅಗತ್ಯವು ಬರೋಬ್ಬರಿ 20 ಪಟ್ಟು ಹೆಚ್ಚು ಹೆಚ್ಚಾಗಲಿದೆ!

ವರದಿಯ ಲೆಕ್ಕಾಚಾರದಂತೆ, 2026 ರ ಪ್ರಸಕ್ತ ಸಾಲಿನಲ್ಲಿ ರೋಬೋಟಿಕ್ಸ್ ಕ್ಷೇತ್ರಕ್ಕೆ ಸುಮಾರು 8,300 ಟೆರಾಬೈಟ್ (TB) ರ‍್ಯಾಮ್ ಅಗತ್ಯವಿದ್ದರೆ, 2030 ರ ವೇಳೆಗೆ ಈ ಬೇಡಿಕೆಯು ಬರೋಬ್ಬರಿ 1,72,000 ಟೆರಾಬೈಟ್‌ಗೆ (TB) ಜಿಗಿಯಲಿದೆ.

ಕೌಂಟರ್‌ಪಾಯಿಂಟ್ ವರದಿಯನ್ನು 'ಹೋಲಿಕೆಗೂ ಬಾರದ ಸಣ್ಣ ಲೆಕ್ಕಾಚಾರ' ಎಂದ ಮಸ್ಕ್

ಆದರೆ, ಕೌಂಟರ್‌ಪಾಯಿಂಟ್ ರಿಸರ್ಚ್ ನೀಡಿದ ಈ 20 ಪಟ್ಟು ಏರಿಕೆಯ ವರದಿಯನ್ನು ಎಲನ್ ಮಸ್ಕ್ ಸಂಪೂರ್ಣವಾಗಿ ತಿರಸ್ಕರಿಸಿದ್ದಾರೆ. ಭವಿಷ್ಯದಲ್ಲಿ ರೋಬೋಟ್‌ಗಳಿಗೆ ಅಗತ್ಯವಿರುವ ರ‍್ಯಾಮ್ ಪ್ರಮಾಣವು ಈ ವರದಿಯಲ್ಲಿ ಅಂದಾಜಿಸಿರುವುದಕ್ಕಿಂತಲೂ ನೂರಾರು ಪಟ್ಟು ಹೆಚ್ಚಿರಲಿದೆ ಎಂದು ಮಸ್ಕ್‌ ಖಚಿತವಾಗಿ ಹೇಳಿದ್ದಾರೆ.

"ವರದಿಯಲ್ಲಿ ಹೇಳಲಾದ ಲೆಕ್ಕಾಚಾರ ತೀರಾ ಚಿಕ್ಕದು. ಭೌತಿಕ ನೈಜ ಜಗತ್ತಿನಲ್ಲಿ ಪ್ರತ್ಯಕ್ಷವಾಗಿ ಉಪಸ್ಥಿತರಿದ್ದು, ವಸ್ತುಗಳನ್ನು ಸ್ಪರ್ಶಿಸಿ, ಅವುಗಳಿಗೆ ನಿರ್ದಿಷ್ಟ ಆಕಾರ ನೀಡಿ ಸಂಕೀರ್ಣ ಕೆಲಸಗಳನ್ನು ನಿರ್ವಹಿಸುವ ರೋಬೋಟ್‌ಗಳಿಗೆ ಭಾರಿ ಪ್ರಮಾಣದ 'ರಿಯಲ್-ಟೈಮ್ ರ‍್ಯಾಮ್' (RAM) ಅಗತ್ಯವಿರುತ್ತದೆ. ಡಿಜಿಟಲ್ ಜಗತ್ತಿನಲ್ಲಿ ಕೆಲಸ ಮಾಡುವ ತಂತ್ರಜ್ಞಾನಗಳು ಇಂತಹ ಭೌತಿಕ ಕಾರ್ಯಗಳನ್ನು ಮಾಡಲು ಸಾಧ್ಯವಿಲ್ಲ" ಎಂದು ಮಸ್ಕ್ ಬರೆದುಕೊಂಡಿದ್ದಾರೆ.

ಅಲ್ಲದೆ, ಸೂಪರ್ ಇಂಟೆಲಿಜೆನ್ಸ್ (Super Intelligence) ತಂತ್ರಜ್ಞಾನದ ಅಗತ್ಯಗಳು ಈ ರೋಬೋಟ್‌ಗಳಿಗಿಂತಲೂ ನೂರಾರು ಪಟ್ಟು ಹೆಚ್ಚಿರುತ್ತವೆ. ಆದರೆ ಸೂಪರ್ ಇಂಟೆಲಿಜೆನ್ಸ್‌ನ ಶೇಕಡಾ 100 ರಷ್ಟು ಕಂಪ್ಯೂಟೇಷನ್ (ಲೆಕ್ಕಾಚಾರಗಳು) ಬಾಹ್ಯಾಕಾಶದಲ್ಲಿರುವ ಕಕ್ಷೀಯ ಸೂಪರ್‌ಕಂಪ್ಯೂಟರ್‌ಗಳಲ್ಲಿ (Deep Space Supercomputers) ನಡೆಯಲಿದೆ" ಎಂದು ಮಸ್ಕ್ ಸುಳಿವು ನೀಡಿದ್ದಾರೆ.

ದುಬಾರಿಯಾಗಲಿವೆ ಸ್ಮಾರ್ಟ್‌ಫೋನ್‌ಗಳು ಹಾಗೂ ಭಾರತೀಯ ಉದ್ಯಮಕ್ಕೆ ಹೊಡೆತ

ಎಐ ಡೇಟಾ ಸೆಂಟರ್‌ಗಳ ಕಡೆಯಿಂದ ರ‍್ಯಾಮ್‌ಗೆ ಬಂದಿರುವ ಭಾರಿ ಬೇಡಿಕೆಯು ಈಗಾಗಲೇ ಜಾಗತಿಕ ಎಲೆಕ್ಟ್ರಾನಿಕ್ಸ್ ಉದ್ಯಮದಲ್ಲಿ ಭಾರಿ ಸಂಚಲನ ಮೂಡಿಸಿದೆ. ಕಳೆದ ಒಂದು ವರ್ಷದ ಅವಧಿಯಲ್ಲಿ ರ‍್ಯಾಮ್ ಬೆಲೆಗಳು ಗಗನಕ್ಕೇರಿದ್ದು, ಪರಿಣಾಮವಾಗಿ ಗ್ರಾಹಕರು ಬಳಸುವ ಸ್ಮಾರ್ಟ್‌ಫೋನ್‌ಗಳು, ಲ್ಯಾಪ್‌ಟಾಪ್‌ಗಳು ಹಾಗೂ ಟ್ಯಾಬ್ಲೆಟ್‌ಗಳು ಅತ್ಯಂತ ದುಬಾರಿಯಾಗಿವೆ.

ಈ ಮೆಮೊರಿ ಚಿಪ್ಸ್‌ಗಳ ತೀವ್ರ ಅಭಾವದ ಬಿಸಿ ಕೇವಲ ಜಾಗತಿಕ ಮೊಬೈಲ್ ತಯಾರಿಕಾ ಕಂಪನಿಗಳಿಗೆ ಮಾತ್ರವಲ್ಲದೆ, ಭಾರತೀಯ ಉದ್ಯಮ ವಲಯಕ್ಕೂ ತಟ್ಟಿದೆ. ರ‍್ಯಾಮ್ ಕೊರತೆಯಿಂದಾಗಿ ಭಾರತದಲ್ಲೂ ಎಲೆಕ್ಟ್ರಾನಿಕ್ಸ್ ಉಪಕರಣಗಳ ಉತ್ಪಾದನಾ ವೆಚ್ಚ ಹೆಚ್ಚಾಗಿದ್ದು, ಮುಂದಿನ ದಿನಗಳಲ್ಲಿ ಸ್ಮಾರ್ಟ್‌ಫೋನ್ ಬೆಲೆಗಳು ಇನ್ನುಷ್ಟು ದುಬಾರಿಯಾಗುವುದು ಅನಿವಾರ್ಯವಾಗಿದೆ.

Phone charging mistakes: ಮೊಬೈಲ್ ಹಾಳಾಗಲು ದೊಡ್ಡ ಕಾರಣ ಬೇಕಿಲ್ಲ; ನೀವು ಮಾಡುವ ಈ ಸಣ್ಣ ತಪ್ಪುಗಳೇ ಸಾಕು!

Sushma Hegde — Sun, 25 Oct 2026 13:34:50 +0530

ನಾವು ಪ್ರತಿದಿನ ಮೊಬೈಲ್ ಫೋನ್ ಬಳಸುತ್ತೇವೆ. ಕರೆ ಮಾಡುವುದು, ಮೆಸೇಜ್ ಕಳುಹಿಸುವುದು, ಫೋಟೋ ತೆಗೆಯುವುದು, ವಿಡಿಯೋ ನೋಡುವುದು ಸೇರಿದಂತೆ ಬಹುತೇಕ ಎಲ್ಲ ಕೆಲಸಗಳಿಗೂ ಸ್ಮಾರ್ಟ್‌ಫೋನ್ ಬೇಕೇ ಬೇಕು. ಆದರೆ, ಮೊಬೈಲ್ ಬಳಸುವಾಗ ಅದರ ಸರಿಯಾದ ಆರೈಕೆಯ ಬಗ್ಗೆ ಹೆಚ್ಚಿನವರು ಗಮನ ಹರಿಸುವುದಿಲ್ಲ. ನಮ್ಮ ಕೆಲವು ಸಣ್ಣ ಅಭ್ಯಾಸಗಳೇ ಫೋನ್‌ನ ಬ್ಯಾಟರಿ ಸಾಮರ್ಥ್ಯ ಕಡಿಮೆಯಾಗಲು ಕಾರಣವಾಗಬಹುದು.

1. ಬಿಸಿಲಿನಲ್ಲಿ ಮೊಬೈಲ್ ಇಡುವ ಅಭ್ಯಾಸ

ಕೆಲವರು ಕಾರಿನ ಡ್ಯಾಶ್‌ಬೋರ್ಡ್ ಮೇಲೆ ಅಥವಾ ಕಿಟಕಿಯ ಪಕ್ಕದಲ್ಲಿ ನೇರ ಬಿಸಿಲು ಬೀಳುವ ಜಾಗದಲ್ಲಿ ಮೊಬೈಲ್ ಇಡುತ್ತಾರೆ. ಸ್ವಲ್ಪ ಸಮಯ ಇಟ್ಟರೆ ಏನೂ ಆಗುವುದಿಲ್ಲ ಎಂದುಕೊಳ್ಳಬಹುದು. ಆದರೆ, ಅತಿಯಾದ ಬಿಸಿಯು ಮೊಬೈಲ್‌ನ ಬ್ಯಾಟರಿ ಆರೋಗ್ಯದ ಮೇಲೆ ಪರಿಣಾಮ ಬೀರಬಹುದು. ಪದೇಪದೇ ಹೆಚ್ಚಿನ ತಾಪಮಾನಕ್ಕೆ ಒಡ್ಡಿಕೊಳ್ಳುವುದರಿಂದ ಬ್ಯಾಟರಿ ಸಾಮರ್ಥ್ಯ ಕುಸಿಯುವ ಸಾಧ್ಯತೆಯಿದೆ. ವಿಶೇಷವಾಗಿ ಬಿಸಿಲಿನಲ್ಲಿ ನಿಲ್ಲಿಸಿರುವ ಕಾರಿನೊಳಗೆ ಮೊಬೈಲ್ ಬಿಟ್ಟು ಹೋಗುವುದು ಅಪಾಯಕಾರಿ.

2. ದಿಂಬಿನ ಕೆಳಗೆ ಇಟ್ಟು ಮೊಬೈಲ್ ಚಾರ್ಜ್ ಮಾಡುವುದು

ರಾತ್ರಿ ಮಲಗುವಾಗ ಮೊಬೈಲ್ ಅನ್ನು ಹಾಸಿಗೆಯ ಮೇಲೆ ಇಟ್ಟು ಚಾರ್ಜ್ ಮಾಡುವ ಅಭ್ಯಾಸ ಹಲವರಿಗಿದೆ. ಕೆಲವರು ಫೋನ್ ಅನ್ನು ದಿಂಬಿನ ಕೆಳಗೆ ಅಥವಾ ಹೊದಿಕೆಯೊಳಗೆ ಇಟ್ಟುಕೊಂಡೇ ಚಾರ್ಜ್ ಮಾಡುತ್ತಾರೆ. ಆದರೆ, ಇದು ಅಪಾಯಕಾರಿಯಾದ ಅಭ್ಯಾಸವಾಗಬಹುದು. ದಿಂಬು ಮತ್ತು ಹೊದಿಕೆಗಳು ಮೊಬೈಲ್‌ನಿಂದ ಹೊರಬರುವ ಶಾಖವನ್ನು ಹಿಡಿದಿಟ್ಟುಕೊಳ್ಳಬಹುದು. ಇದರಿಂದ ಫೋನ್ ಹೆಚ್ಚು ಬಿಸಿಯಾಗುವ ಸಾಧ್ಯತೆಯಿದ್ದು, ಬ್ಯಾಟರಿ ಮೇಲೆ ಪರಿಣಾಮ ಬೀರಬಹುದು.

3. ಚಾರ್ಜಿಂಗ್ ಪೋರ್ಟ್‌ನಲ್ಲಿರುವ ಧೂಳನ್ನು ನಿರ್ಲಕ್ಷಿಸುವುದು

ನಿಮ್ಮ ಮೊಬೈಲ್ ಚಾರ್ಜರ್ ಸರಿಯಾಗಿ ಸಂಪರ್ಕವಾಗುತ್ತಿಲ್ಲವೇ? ಕೇಬಲ್ ಸ್ವಲ್ಪ ಅಲುಗಾಡಿಸಿದಾಗ ಮಾತ್ರ ಚಾರ್ಜ್ ಆಗುತ್ತಿದೆಯೇ? ಹಾಗಾದರೆ, ಚಾರ್ಜಿಂಗ್ ಪೋರ್ಟ್‌ನಲ್ಲಿ ಧೂಳು ಅಥವಾ ಬಟ್ಟೆಯ ನಾರುಗಳು ಸೇರಿಕೊಂಡಿರುವ ಸಾಧ್ಯತೆಯಿದೆ. ಮೊಬೈಲ್ ಅನ್ನು ಜೇಬಿನಲ್ಲಿ ಅಥವಾ ಬ್ಯಾಗ್‌ನಲ್ಲಿ ಇಟ್ಟುಕೊಂಡು ಓಡಾಡುವಾಗ ಸಣ್ಣ ಧೂಳಿನ ಕಣಗಳು ಚಾರ್ಜಿಂಗ್ ಪೋರ್ಟ್‌ನಲ್ಲಿ ಸೇರಿಕೊಳ್ಳಬಹುದು. ಕಾಲಕ್ರಮೇಣ ಇದು ಚಾರ್ಜಿಂಗ್ ಸಂಪರ್ಕಕ್ಕೆ ಅಡ್ಡಿಯಾಗಬಹುದು. ಇಂತಹ ಸಂದರ್ಭದಲ್ಲಿ ಬಲವಂತವಾಗಿ ಕೇಬಲ್ ತೂರಿಸುವುದರಿಂದ ಪೋರ್ಟ್ ಹಾನಿಗೊಳಗಾಗುವ ಸಾಧ್ಯತೆಯಿದೆ.

4. ಸಾಫ್ಟ್‌ವೇರ್ ಅಪ್‌ಡೇಟ್‌ಗಳನ್ನು ಪದೇಪದೇ ಮುಂದೂಡುವುದು

ಮೊಬೈಲ್‌ನಲ್ಲಿ ಸಾಫ್ಟ್‌ವೇರ್ ಅಪ್‌ಡೇಟ್ ಸೂಚನೆ ಬಂದಾಗ ಅನೇಕರು ಅದನ್ನು ಮುಂದೂಡುತ್ತಲೇ ಇರುತ್ತಾರೆ. ಅಪ್‌ಡೇಟ್ ಮಾಡಿದರೆ ಸಮಯ ಹಿಡಿಯುತ್ತದೆ ಅಥವಾ ಫೋನ್ ನಿಧಾನವಾಗಬಹುದು ಎಂಬ ಭಯವೂ ಕೆಲವರಲ್ಲಿರುತ್ತದೆ. ಆದರೆ, ಅಧಿಕೃತ ಅಪ್‌ಡೇಟ್‌ಗಳನ್ನು ದೀರ್ಘಕಾಲ ನಿರ್ಲಕ್ಷಿಸುವುದು ಸರಿಯಾದ ಅಭ್ಯಾಸವಲ್ಲ. ಸಾಫ್ಟ್‌ವೇರ್ ಅಪ್‌ಡೇಟ್‌ಗಳಲ್ಲಿ ಭದ್ರತಾ ದೋಷಗಳನ್ನು ಸರಿಪಡಿಸುವ ವ್ಯವಸ್ಥೆಗಳು ಮತ್ತು ಸಾಫ್ಟ್‌ವೇರ್ ಸಮಸ್ಯೆಗಳಿಗೆ ಪರಿಹಾರಗಳು ಇರಬಹುದು. ಅವುಗಳನ್ನು ಇನ್‌ಸ್ಟಾಲ್ ಮಾಡದಿದ್ದರೆ ನಿಮ್ಮ ಸಾಧನವು ಕೆಲವು ಭದ್ರತಾ ಅಪಾಯಗಳಿಗೆ ಹೆಚ್ಚು ಒಳಗಾಗಬಹುದು.

5. ಮೊಬೈಲ್‌ಗೆ ಕವರ್ ಮತ್ತು ಸ್ಕ್ರೀನ್ ಪ್ರೊಟೆಕ್ಟರ್ ಬಳಸದೇ ಇರುವುದು

ಮೊಬೈಲ್ ಕೈಯಿಂದ ಜಾರಿಬೀಳುವುದು ಸಾಮಾನ್ಯ. ನಡೆಯುವಾಗ, ಕಾರಿನಿಂದ ಇಳಿಯುವಾಗ ಅಥವಾ ಅವಸರದಲ್ಲಿ ಫೋನ್ ಬಳಸುವಾಗ ಅದು ಕೆಳಗೆ ಬೀಳಬಹುದು. ಸ್ಕ್ರೀನ್ ಒಡೆಯದಿದ್ದರೂ ಬಲವಾದ ಹೊಡೆತದಿಂದ ಒಳಗಿನ ಭಾಗಗಳಿಗೆ ಹಾನಿಯಾಗುವ ಸಾಧ್ಯತೆಯಿದೆ. ಇನ್ನು, ಮೊಬೈಲ್ ಅನ್ನು ಕೀಲಿ ಅಥವಾ ಇತರ ಗಟ್ಟಿಯಾದ ವಸ್ತುಗಳ ಜೊತೆ ಒಂದೇ ಜೇಬಿನಲ್ಲಿ ಇಟ್ಟುಕೊಂಡರೆ ಸ್ಕ್ರೀನ್ ಮತ್ತು ಫೋನ್‌ನ ಹೊರಭಾಗದಲ್ಲಿ ಗೀರುಗಳು ಬೀಳಬಹುದು.

10 ನಿಮಿಷ ಹುಡುಕಿದ್ರೂ ಸಿಗದ ಇಯರ್‌ಬಡ್, ChatGPTಗೆ ಕೇಳಿದ್ದೇ ತಡ; 5 ನಿಮಿಷದಲ್ಲಿ ಪತ್ತೆ!

Sushma Hegde — Tue, 27 Oct 2026 12:07:52 +0530

ತಂತ್ರಜ್ಞಾನವನ್ನು ಸರಿಯಾಗಿ ಬಳಸಿಕೊಂಡರೆ ಎಂತಹ ಸಮಸ್ಯೆಯನ್ನು ಸುಲಭವಾಗಿ ಪರಿಹರಿಸಬಹುದು ಎಂಬುದಕ್ಕೆ ಈ ಘಟನೆ ಸಾಕ್ಷಿ. ಜೇಬಿನಿಂದ ಜಾರಿ ಬಿದ್ದ ಪುಟ್ಟ ವೈರ್‌ಲೆಸ್ ಇಯರ್‌ಬಡ್‌ಗಾಗಿ ವ್ಯಕ್ತಿ ಸುಮಾರು 10 ನಿಮಿಷಗಳ ಕಾಲ ಹುಡುಕಾಡಿದ್ದಾರೆ. ಅದು ಸಿಗದಿದ್ದಾಗ ಕೊನೆಗೆ ChatGPT ಸಹಾಯ ಪಡೆದು ಕೇವಲ ಐದು ನಿಮಿಷಗಳೊಳಗೆ ಇಯರ್‌ಬಡ್ ಪತ್ತೆಹಚ್ಚಿದ್ದಾರೆ.

ರೆಡ್ಡಿಟ್‌ನಲ್ಲಿ ತನ್ನ ಅನುಭವವನ್ನು ಹಂಚಿಕೊಂಡಿರುವ ಇತ, ತಮ್ಮ ಬೋಸ್ (Bose) ಕಂಪನಿಯ ವೈರ್‌ಲೆಸ್ ಇಯರ್‌ಬಡ್‌ಗಳಲ್ಲಿ ಒಂದು ಹುಡಿಯಿಂದ ಜಾರಿ ಬಿದ್ದು, ಜಲ್ಲಿಕಲ್ಲುಗಳ ನಡುವೆ ಬಿದ್ದಿತ್ತು ಎಂದು ಹೇಳಿದ್ದಾರೆ. ಸುತ್ತಮುತ್ತ ಹುಡುಕಿದರೂ ಅದು ಸಿಗಲಿಲ್ಲ. ಬಿಳಿ ಬಣ್ಣದ ಸಣ್ಣ ಇಯರ್‌ಬಡ್‌ ಬಿಳಿ ಜಲ್ಲಿಕಲ್ಲುಗಳ ನಡುವೆ ಬಿದ್ದಿದ್ದರಿಂದ ಅದನ್ನು ಗುರುತಿಸುವುದೇ ಕಷ್ಟವಾಗಿತ್ತು.

ಬ್ಲೂಟೂತ್ ಮೂಲಕವೂ ಹುಡುಕಲು ಸಾಧ್ಯವಾಗಲಿಲ್ಲ

ಸಾಮಾನ್ಯವಾಗಿ ಇಯರ್‌ಬಡ್ ಕಳೆದುಹೋದಾಗ ಮೊಬೈಲ್‌ನಿಂದ ಹಾಡು ಹಾಕಿ ಹುಡುಕುವ ಪ್ರಯತ್ನ ಮಾಡಬಹುದು. ಆದರೆ ಈ ಸಂದರ್ಭದಲ್ಲಿ ಅದು ಸಾಧ್ಯವಾಗಿರಲಿಲ್ಲ . ಈ ಇಯರ್‌ಬಡ್ ಕಿವಿಗೆ ಹಾಕಿದ ತಕ್ಷಣ ಆನ್‌ ಆಗುವುದರಿಂದ ಈ ಟ್ರೀಕ್‌ ಬಳಸಲು ಬರಲಿಲ್ಲ. ಸುಮಾರು 10 ನಿಮಿಷಗಳ ಹುಡುಕಾಟದ ಬಳಿಕ ಬೇರೆ ದಾರಿ ಕಾಣದೆ ಅವರು ChatGPT ಮೊರೆ ಹೋದರು. ತಾವು ತೆಗೆದಿದ್ದ ಸ್ಥಳದ ಫೋಟೋವನ್ನು ChatGPTಗೆ ಅಪ್‌ಲೋಡ್ ಮಾಡಿ, ಇಯರ್‌ಬಡ್ ಎಲ್ಲಿದೆ ಎಂದು ಗುರುತಿಸಲು ಸಹಾಯ ಕೇಳಿದರು.

ಫೋಟೋದಲ್ಲೇ ಇಯರ್‌ಬಡ್ ಪತ್ತೆಹಚ್ಚಿದ ChatGPT

ಫೋಟೋವನ್ನು ಪರಿಶೀಲಿಸಿದ ChatGPT, ಜಲ್ಲಿಕಲ್ಲುಗಳ ನಡುವೆ ಬಿದ್ದಿದ್ದ ಇಯರ್‌ಬಡ್ ಇರುವ ನಿರ್ದಿಷ್ಟ ಸ್ಥಳವನ್ನು ಗುರುತಿಸಿ ತೋರಿಸಿತು. ಅದರ ಸೂಚನೆಯಂತೆ ಹುಡುಕಿದಾಗ ಇಯರ್‌ಬಡ್ ಸಿಕ್ಕಿದೆ ಎಂದು ಬಳಕೆದಾರರು ತಿಳಿಸಿದ್ದಾರೆ. “ಐದು ನಿಮಿಷವೂ ಬೇಕಾಗಲಿಲ್ಲ. ChatGPT ನಿಜವಾಗಿಯೂ ಅದನ್ನು ಪತ್ತೆಹಚ್ಚಿತು. ಅದರ ಸಹಾಯವಿಲ್ಲದೆ ನನಗೆ ಅದು ಸಿಗುತ್ತಿರಲಿಲ್ಲ ಎಂದು ಪ್ರಾಮಾಣಿಕವಾಗಿ ಹೇಳಬಲ್ಲೆ” ಎಂಬ ಅರ್ಥದಲ್ಲಿ ಅವರು ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ.

ಫೋಟೋ ಅಪ್‌ಲೋಡ್ ಮಾಡುವುದರಿಂದ ಹಿಡಿದು ಇಯರ್‌ಬಡ್‌ನ್ನು ಮರಳಿ ಪಡೆದುಕೊಳ್ಳುವವರೆಗಿನ ಸಂಪೂರ್ಣ ಪ್ರಕ್ರಿಯೆ ಐದು ನಿಮಿಷಗಳಿಗಿಂತ ಕಡಿಮೆ ಸಮಯದಲ್ಲಿ ಮುಗಿದಿತ್ತು.

ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆ

ಈ ಘಟನೆ AI ತಂತ್ರಜ್ಞಾನವು ಕೇವಲ ಬರವಣಿಗೆ, ಮಾಹಿತಿ ಹುಡುಕಾಟ ಅಥವಾ ಪ್ರಶ್ನೆಗಳಿಗೆ ಉತ್ತರ ನೀಡುವುದಕ್ಕೆ ಮಾತ್ರ ಸೀಮಿತವಾಗಿಲ್ಲ ಎಂಬುದನ್ನು ತೋರಿಸಿದೆ. ಚಿತ್ರದಲ್ಲಿರುವ ಸಣ್ಣ ವಸ್ತುಗಳನ್ನು ಗುರುತಿಸುವಂತಹ ದೈನಂದಿನ ಕೆಲಸಗಳಲ್ಲಿಯೂ ಇದು ಸಹಾಯಕವಾಗಬಹುದು ಎಂಬ ಚರ್ಚೆಗೆ ಕಾರಣವಾಗಿದೆ.

ಆದರೆ ಇಂತಹ ಫಲಿತಾಂಶಗಳು ಫೋಟೋದ ಗುಣಮಟ್ಟ, ಬೆಳಕು, ವಸ್ತುವಿನ ಬಣ್ಣ ಮತ್ತು ಸುತ್ತಮುತ್ತಲಿನ ಪರಿಸರವನ್ನು ಅವಲಂಬಿಸಿರುತ್ತವೆ. ಪ್ರತಿಯೊಂದು ಸಂದರ್ಭದಲ್ಲೂ AI ನಿಖರವಾಗಿ ವಸ್ತುವನ್ನು ಪತ್ತೆಹಚ್ಚುತ್ತದೆ ಎಂಬ ಖಾತರಿ ಇಲ್ಲ. ಆದರೂ, ಕಳೆದುಹೋದ ಪುಟ್ಟ ಇಯರ್‌ಬಡ್‌ಗಾಗಿ ಹುಡುಕಾಡುತ್ತಿದ್ದ ವ್ಯಕ್ತಿಗೆ ChatGPT ನೆರವಾಗಿದ್ದು ಅಚ್ಚರಿಯ ಅನುಭವವಾಗಿದೆ.

Elon Musk AI Warning: ಎಐ ಕಂಪನಿಗಳು ಮುಚ್ಚಿಹೋಗುತ್ತಾ? ಇಲಾನ್ ಮಸ್ಕ್ ಅಚ್ಚರಿ ಭವಿಷ್ಯ!

Naveen Kodase — Mon, 26 Oct 2026 18:40:46 +0530

ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ವಲಯಕ್ಕೆ ಈಗ ಕೋಟಿ ಕೋಟಿ ಹರಿದುಬರುತ್ತಿದೆ. ಆದರೆ, ಸಣ್ಣ ಎಐ ಕಂಪನಿಗಳಿಗೆ ಇಲಾನ್ ಮಸ್ಕ್ ದೊಡ್ಡದೊಂದು ಎಚ್ಚರಿಕೆ ನೀಡಿದ್ದಾರೆ. ಎಐ ಚಿಪ್‌ಗಳನ್ನು ಬಾಡಿಗೆಗೆ ನೀಡುವ ನೂರಾರು ಕ್ಲೌಡ್ ಕಂಪನಿಗಳು ಮುಂದಿನ ದಿನಗಳಲ್ಲಿ ತೀವ್ರ ಆರ್ಥಿಕ ಮುಗ್ಗಟ್ಟಿಗೆ ಸಿಲುಕಲಿವೆ ಎಂದು ಮಸ್ಕ್ ಭವಿಷ್ಯ ನುಡಿದಿದ್ದಾರೆ. ಇದೇ ವೇಳೆ, ಜಿಪಿಯು (GPU) ಖರೀದಿಸಲು ತಮ್ಮದೇ ಒಡೆತನದ 'ಸ್ಪೇಸ್ ಎಕ್ಸ್' ಕಂಪನಿಯು 40 ಬಿಲಿಯನ್ ಡಾಲರ್ ಸಾಲದ ಒಪ್ಪಂದವನ್ನು ಮುಗಿಸಿದೆ ಎಂದು ಅವರು ಹೇಳಿದ್ದಾರೆ.

200ಕ್ಕೂ ಹೆಚ್ಚು ಕಂಪನಿಗಳಿಗೆ ಸಂಕಷ್ಟ?

'ಎಕ್ಸ್' (X) ಪ್ಲಾಟ್‌ಫಾರ್ಮ್‌ನಲ್ಲಿ ನಡೆದ ಚರ್ಚೆಯೊಂದರಲ್ಲಿ ಮಸ್ಕ್ ಈ ವಿಚಾರ ಹಂಚಿಕೊಂಡಿದ್ದಾರೆ. ಎಐ ಮೂಲಸೌಕರ್ಯ ವಲಯದಲ್ಲಿ ಎದುರಾಗಲಿರುವ ಬಿಕ್ಕಟ್ಟಿನ ಬಗ್ಗೆ ಅವರು ಮಾತನಾಡಿದ್ದಾರೆ. ಅರ್ಧಕ್ಕೆ ನಿಂತಿರುವ ಡೇಟಾ ಸೆಂಟರ್‌ಗಳಲ್ಲಿ ಕಂಪ್ಯೂಟಿಂಗ್ ಸಾಮರ್ಥ್ಯವು ಬಳಕೆಯಾಗದೆ ಹಾಗೇ ಉಳಿಯುವ ಸಾಧ್ಯತೆ ಹೆಚ್ಚಿದೆ ಎಂದು ಅವರು ವಿವರಿಸಿದ್ದಾರೆ. ಕೇವಲ ಎಐ ಡೇಟಾ ಸೆಂಟರ್‌ಗಳನ್ನು ನಂಬಿ ಕೂತಿರುವ ಕಂಪನಿಗಳಿಗೆ ಸಾಲ ನೀಡಲು ಬ್ಯಾಂಕ್‌ಗಳು ಹಾಗೂ ಹಣಕಾಸು ಸಂಸ್ಥೆಗಳು ಈಗ ಹಿಂದೇಟು ಹಾಕುತ್ತಿವೆ. ಇದರಿಂದಾಗಿ, ಬೇರೆ ಕಂಪನಿಗಳಿಗೆ ಎಐ ಚಿಪ್‌ಗಳನ್ನು ಬಾಡಿಗೆಗೆ ಕೊಡುವ 200ಕ್ಕೂ ಹೆಚ್ಚು ನಿಯೋ-ಕ್ಲೌಡ್ ಕಂಪನಿಗಳು ಮುಚ್ಚಿಹೋಗುವ ಅಥವಾ ವಿಲೀನಗೊಳ್ಳುವ ಪರಿಸ್ಥಿತಿ ಬರಲಿದೆ ಎಂದು ಮಸ್ಕ್ ಅಂದಾಜಿಸಿದ್ದಾರೆ.

ಡೇಟಾ ಸೆಂಟರ್‌ಗಳಿಗೆ ಬೇಕು ಕೋಟಿ ಕೋಟಿ ಹಣ

ಎಐ ಡೇಟಾ ಸೆಂಟರ್‌ಗಳನ್ನು ನಿರ್ಮಿಸಲು ದೊಡ್ಡ ಮಟ್ಟದ ಬಂಡವಾಳ ಬೇಕು. ಅತ್ಯಾಧುನಿಕ ಗ್ರಾಫಿಕ್ಸ್ ಪ್ರೊಸೆಸಿಂಗ್ ಯೂನಿಟ್‌ಗಳನ್ನು (GPU) ಖರೀದಿಸಲು ಮತ್ತು ಅವುಗಳನ್ನು ನಡೆಸಲು ಬೇಕಾದ ವಿದ್ಯುತ್ ಪೂರೈಕೆಗೆ ಅತಿ ಹೆಚ್ಚು ಹಣ ಖರ್ಚಾಗುತ್ತದೆ. ಆದರೆ, ಇಂತಹ ಪ್ರಾಜೆಕ್ಟ್‌ಗಳಿಗೆ ಸಾಲ ಕೊಡುವ ಮುನ್ನ, ಆ ಕಂಪನಿಗಳಿಗೆ ಬೇರೆ ಯಾವುದಾದರೂ ಸ್ಥಿರ ಆದಾಯದ ಮೂಲವಿದೆಯೇ ಎಂದು ಸಾಲ ನೀಡುವವರು ಪರಿಶೀಲಿಸುತ್ತಿದ್ದಾರೆ. ಕೇವಲ ಎಐ ವಲಯದ ಆದಾಯವನ್ನೇ ನಂಬಿಕೊಂಡಿರುವ ಸಂಸ್ಥೆಗಳಿಗೆ ಮುಂದಿನ ಹಾದಿ ಸುಲಭವಿಲ್ಲ ಎಂಬುದನ್ನು ಇದು ತೋರಿಸುತ್ತದೆ.

ಸ್ಪೇಸ್ ಎಕ್ಸ್‌ಗೆ 40 ಬಿಲಿಯನ್ ಡಾಲರ್ ಸಾಲ

ಸಣ್ಣ ಕಂಪನಿಗಳು ಹಣ ಹೊಂದಿಸಲು ಪರದಾಡುತ್ತಿರುವಾಗಲೇ, ಜಿಪಿಯು ಖರೀದಿಸಲು ಸ್ಪೇಸ್ ಎಕ್ಸ್ 40 ಬಿಲಿಯನ್ ಡಾಲರ್ ಸಾಲ ಪಡೆದಿದೆ ಎಂದು ಮಸ್ಕ್ ಸ್ಪಷ್ಟಪಡಿಸಿದ್ದಾರೆ. ಸ್ಪೇಸ್ ಎಕ್ಸ್ ಕಂಪನಿಯ ಕ್ರೆಡಿಟ್ ರೇಟಿಂಗ್, ಸ್ಟಾರ್‌ಲಿಂಕ್ ಸ್ಯಾಟಲೈಟ್ ಇಂಟರ್ನೆಟ್ ಸೇವೆ ಮತ್ತು ರಾಕೆಟ್ ಉಡಾವಣೆಗಳಿಂದ ಬರುತ್ತಿರುವ ಆದಾಯವು ಈ ಸಾಲ ಸಿಗಲು ಸಹಾಯ ಮಾಡಿದೆ. ಬೇರೆ ವಲಯಗಳಿಂದಲೂ ಸ್ಥಿರವಾದ ಆದಾಯ ಬರುತ್ತಿರುವುದರಿಂದ, ಸ್ಪೇಸ್ ಎಕ್ಸ್ ಮೇಲೆ ಹೂಡಿಕೆ ಮಾಡುವುದು ಸುರಕ್ಷಿತ ಎಂದು ಸಾಲ ನೀಡುವವರು ಭಾವಿಸಿದ್ದಾರೆ.

2027 ನಿರ್ಣಾಯಕ ವರ್ಷವಾಗಲಿದೆಯಾ?

ವೆಂಚರ್ ಕ್ಯಾಪಿಟಲಿಸ್ಟ್ ಚಮತ್ ಪಲಿಹಪಿಟಿಯ (Chamath Palihapitiya) ಕೂಡ ಎಐ ಮೂಲಸೌಕರ್ಯ ವಲಯದ ಬಿಕ್ಕಟ್ಟಿನ ಬಗ್ಗೆ ಎಚ್ಚರಿಸಿದ್ದಾರೆ. ಕೆಟ್ಟ ಹೂಡಿಕೆಗಳು ಮತ್ತು ಸಾಕಷ್ಟು ಬಂಡವಾಳವಿಲ್ಲದ ಕಂಪನಿಗಳು ಮಾರುಕಟ್ಟೆಯಿಂದ ಹೊರಬೀಳಲಿದ್ದು, 2027ರ ವರ್ಷವು ತೀವ್ರ ಏರಿಳಿತಗಳಿಂದ ಕೂಡಿರಲಿದೆ ಎಂದು ಅವರು ವಿಶ್ಲೇಷಿಸಿದ್ದಾರೆ. ವಿದ್ಯುತ್ ಕೊರತೆ, ಸಾರ್ವಜನಿಕರ ವಿರೋಧ ಮತ್ತು ಆಡಳಿತಾತ್ಮಕ ಅಡೆತಡೆಗಳಿಂದಾಗಿ ಡೇಟಾ ಸೆಂಟರ್‌ಗಳ ನಿರ್ಮಾಣ ವಿಳಂಬವಾಗುತ್ತಿದೆ. ವಿದ್ಯುತ್ ಸಿಗದೆ ದುಬಾರಿ ಎಐ ಚಿಪ್‌ಗಳು ಮೂಲೆಗುಂಪಾಗುವ ಸಾಧ್ಯತೆಯೂ ಇದೆ. ದೊಡ್ಡ ಮಟ್ಟದಲ್ಲಿ ಹೂಡಿಕೆ ಮಾಡುವ ಸಾಮರ್ಥ್ಯ ಮತ್ತು ಸ್ಥಿರ ಆದಾಯ ಇರುವ ಕಂಪನಿಗಳು ಮಾತ್ರ ಈ ರೇಸ್‌ನಲ್ಲಿ ಗೆಲ್ಲಲಿವೆ. ಸಣ್ಣ ಸಂಸ್ಥೆಗಳಿಗೆ ಎಐ ಪೈಪೋಟಿಯಲ್ಲಿ ಉಳಿಯುವುದು ಕಷ್ಟವಾಗಲಿದೆ.

Dark Matter Study: ಡಾರ್ಕ್ ಮ್ಯಾಟರ್ ರಹಸ್ಯ ಭೇದಿಸಿದ ವಿಜ್ಞಾನಿಗಳು, ಬ್ಲಾಕ್ ಹೋಲ್ ಬಗ್ಗೆ ಹೊಸ ಅಪ್ಡೇಟ್

Naveen Kodase — Sun, 25 Oct 2026 19:38:24 +0530

ಬ್ರಹ್ಮಾಂಡದ ಅತಿದೊಡ್ಡ ನಿಗೂಢಗಳಲ್ಲಿ ಒಂದಾದ ಡಾರ್ಕ್ ಮ್ಯಾಟರ್ ರಹಸ್ಯವನ್ನು ಭೇದಿಸುವಲ್ಲಿ ವಿಜ್ಞಾನಿಗಳು ಮಹತ್ವದ ಸುಳಿವು ಕಂಡುಕೊಂಡಿದ್ದಾರೆ. ಗ್ಯಾಲಕ್ಸಿಗಳಿಗಿಂತಲೂ ದೊಡ್ಡದಾದ ಮತ್ತು ಹೆಚ್ಚು ದ್ರವ್ಯರಾಶಿ (mass) ಹೊಂದಿರುವ ಬೃಹತ್ ಬ್ಲಾಕ್ ಹೋಲ್‌ಗಳು ಡಾರ್ಕ್ ಮ್ಯಾಟರ್‌ನ ಮುಖ್ಯ ಭಾಗವಲ್ಲ ಎಂದು ಸಂಶೋಧಕರು ಪತ್ತೆಹಚ್ಚಿದ್ದಾರೆ. ಬ್ರಹ್ಮಾಂಡದ ಆರಂಭಿಕ ಕಾಲದ ಬೆಳಕನ್ನು ವಿಶ್ಲೇಷಿಸಿ ವಿಜ್ಞಾನಿಗಳು ಈ ನಿರ್ಧಾರಕ್ಕೆ ಬಂದಿದ್ದಾರೆ. ಬ್ರಹ್ಮಾಂಡದ ಬಹುಪಾಲು ದ್ರವ್ಯವನ್ನು ಆವರಿಸಿರುವ ಡಾರ್ಕ್ ಮ್ಯಾಟರ್ ಅಸಲಿಗೆ ಏನು ಎಂಬ ಪ್ರಶ್ನೆಗೆ ಉತ್ತರ ಹುಡುಕುವ ನಿಟ್ಟಿನಲ್ಲಿ ಈ ಅಧ್ಯಯನ ಹೊಸ ತಿರುವು ನೀಡಿದೆ.

ಏನಿದು ಡಾರ್ಕ್ ಮ್ಯಾಟರ್?

ಗ್ಯಾಲಕ್ಸಿಗಳು ಅತಿ ವೇಗವಾಗಿ ಸುತ್ತುತ್ತಿದ್ದರೂ ಅವುಗಳು ಚದುರಿ ಹೋಗದಂತೆ ಹಿಡಿದಿಟ್ಟುಕೊಳ್ಳುವುದು ಇದೇ ಡಾರ್ಕ್ ಮ್ಯಾಟರ್‌ನ ಗುರುತ್ವಾಕರ್ಷಣ ಶಕ್ತಿ ಎಂದು ವಿಜ್ಞಾನಿಗಳು ನಂಬಿದ್ದಾರೆ. ಬ್ರಹ್ಮಾಂಡದ ಒಟ್ಟು ದ್ರವ್ಯರಾಶಿಯಲ್ಲಿ ಆರನೇ ಐದು ಭಾಗದಷ್ಟು (5/6) ಡಾರ್ಕ್ ಮ್ಯಾಟರ್ ತುಂಬಿಕೊಂಡಿದೆ ಎಂಬುದು ಲೆಕ್ಕಾಚಾರ. ಆದರೆ, ಇದರ ನೈಜ ಸ್ವರೂಪ ಏನು ಎಂಬುದು ಇಂದಿಗೂ ನಿಗೂಢ. ಬ್ಲಾಕ್ ಹೋಲ್‌ಗಳು ಅಪಾರ ದ್ರವ್ಯರಾಶಿ ಹೊಂದಿರುವುದರಿಂದ ಮತ್ತು ಅವುಗಳನ್ನು ನೇರವಾಗಿ ನೋಡಲು ಕಷ್ಟವಿರುವುದರಿಂದ, ಇವೇ ಡಾರ್ಕ್ ಮ್ಯಾಟರ್‌ನ ಭಾಗವಾಗಿರಬಹುದೇ ಎಂದು ಸಂಶೋಧಕರು ಪರಿಶೀಲಿಸುತ್ತಿದ್ದಾರೆ.

ಗ್ಯಾಲಕ್ಸಿಗಳಿಗಿಂತಲೂ ಭಾರವಾದ ಬ್ಲಾಕ್ ಹೋಲ್‌ಗಳು

ಸೂರ್ಯನ ದ್ರವ್ಯರಾಶಿಗಿಂತ 100 ಬಿಲಿಯನ್ ಪಟ್ಟು ಹೆಚ್ಚು ದ್ರವ್ಯರಾಶಿ ಹೊಂದಿರುವ ಬ್ಲಾಕ್ ಹೋಲ್‌ಗಳ ಮೇಲೆ ಈ ಹೊಸ ಅಧ್ಯಯನ ಗಮನಹರಿಸಿದೆ. ಇದಕ್ಕಿಂತಲೂ ದೊಡ್ಡದಾದ ಕೆಲವು ಬ್ಲಾಕ್ ಹೋಲ್‌ಗಳು ಇಡೀ ಗ್ಯಾಲಕ್ಸಿಗಳಿಗಿಂತ ಹೆಚ್ಚು ಭಾರ ಹೊಂದಿರಬಹುದು ಎಂದು ಅಂದಾಜಿಸಲಾಗಿದೆ. ಆದರೆ, ಖಗೋಳಶಾಸ್ತ್ರಜ್ಞರು ಈವರೆಗೆ ಇಂತಹ ಯಾವುದೇ ಬೃಹತ್ ಬ್ಲಾಕ್ ಹೋಲ್‌ಗಳನ್ನು ಪತ್ತೆ ಮಾಡಿಲ್ಲ. ಪ್ರಸ್ತುತ ನಮಗೆ ತಿಳಿದಿರುವ ಅತಿ ದೊಡ್ಡ ಬ್ಲಾಕ್ ಹೋಲ್ ಸುಮಾರು 36 ಬಿಲಿಯನ್ ಸೂರ್ಯನಷ್ಟು ದ್ರವ್ಯರಾಶಿಯನ್ನು ಹೊಂದಿದೆ.

ಬ್ರಹ್ಮಾಂಡದ ಆರಂಭಿಕ ಬೆಳಕಿನ ಪರಿಶೀಲನೆ

ಜರ್ಮನಿಯ ಮೈಂಜ್ ಇನ್‌ಸ್ಟಿಟ್ಯೂಟ್ ಫಾರ್ ಥಿಯರೆಟಿಕಲ್ ಫಿಸಿಕ್ಸ್‌ನ (Mainz Institute for Theoretical Physics) ಸಂಶೋಧಕರು ಈ ಅಧ್ಯಯನ ನಡೆಸಿದ್ದಾರೆ. ಬಿಗ್ ಬ್ಯಾಂಗ್ (Big Bang) ಆದ ಸುಮಾರು 3,80,000 ವರ್ಷಗಳ ನಂತರ ಬ್ರಹ್ಮಾಂಡ ತಂಪಾಯಿತು. ಆಗ ಬೆಳಕು ಮುಕ್ತವಾಗಿ ಚಲಿಸಲು ಸಾಧ್ಯವಾಯಿತು. ಈ ಕಾಲಘಟ್ಟದ ಬೆಳಕಿನ ಉಳಿಕೆಯನ್ನು 'ಕಾಸ್ಮಿಕ್ ಮೈಕ್ರೋವೇವ್ ಬ್ಯಾಕ್‌ಗ್ರೌಂಡ್' (Cosmic Microwave Background) ಎಂದು ಕರೆಯುತ್ತಾರೆ. ಈ ವಿಕಿರಣದಲ್ಲಿನ ತಾಪಮಾನದ ವ್ಯತ್ಯಾಸಗಳನ್ನು ವಿಶ್ಲೇಷಿಸಿದಾಗ, ಬೃಹತ್ ಬ್ಲಾಕ್ ಹೋಲ್‌ಗಳು ಸೃಷ್ಟಿಸಬಹುದಾದ ಯಾವುದೇ ಲಕ್ಷಣಗಳು ವಿಜ್ಞಾನಿಗಳಿಗೆ ಕಂಡುಬಂದಿಲ್ಲ. ಹಾಗಾಗಿ, ಇವು ಡಾರ್ಕ್ ಮ್ಯಾಟರ್‌ನ ದೊಡ್ಡ ಭಾಗವಾಗಿರಲು ಸಾಧ್ಯವಿಲ್ಲ ಎಂದು ಸಂಶೋಧಕರು ತೀರ್ಮಾನಿಸಿದ್ದಾರೆ.

ಸಣ್ಣ ಬ್ಲಾಕ್ ಹೋಲ್‌ಗಳ ಸಾಧ್ಯತೆ ಇನ್ನೂ ಇದೆ

ಬ್ರಹ್ಮಾಂಡದಲ್ಲಿ ಬೃಹತ್ ಬ್ಲಾಕ್ ಹೋಲ್‌ಗಳು ಅಸ್ತಿತ್ವದಲ್ಲಿಯೇ ಇಲ್ಲ ಎಂದು ಈ ಅಧ್ಯಯನ ಹೇಳುತ್ತಿಲ್ಲ. ಬದಲಾಗಿ, ಅವು ಡಾರ್ಕ್ ಮ್ಯಾಟರ್‌ನ ಮುಖ್ಯ ಭಾಗವಲ್ಲ ಎಂಬುದನ್ನಷ್ಟೇ ಸ್ಪಷ್ಟಪಡಿಸಿದೆ. ಕ್ಷುದ್ರಗ್ರಹಗಳ (asteroids) ಗಾತ್ರದ ಸಣ್ಣ ಬ್ಲಾಕ್ ಹೋಲ್‌ಗಳು ಡಾರ್ಕ್ ಮ್ಯಾಟರ್‌ನ ಭಾಗವಾಗಿರಬಹುದೇ ಎಂಬ ಬಗ್ಗೆ ಸಂಶೋಧಕರು ಈಗಲೂ ಅಧ್ಯಯನ ನಡೆಸುತ್ತಿದ್ದಾರೆ.

ಅಂಟಾರ್ಕ್ಟಿಕಾದ ಹಿಮ ಸಾಗರ ಕರಗಿದ ಬೆನ್ನಲ್ಲೇ ಸಾಗರ ಗರ್ಭದಲ್ಲಿ ಭಾರಿ ಹವಾಮಾನ ವ್ಯತ್ಯಾಸ: ಬೆಂಗಳೂರಿನ IISc ಅಧ್ಯಯನದಲ್ಲಿ ಆಘಾತಕಾರಿ ಸತ್ಯ ಬಯಲು

Santosh Naik — Thu, 29 Oct 2026 16:59:36 +0530

ನವದೆಹಲಿ (ಅ.29): ಅಂಟಾರ್ಕ್ಟಿಕಾದಿಂದ ಹಿಂದೂ ಮಹಾಸಾಗರಕ್ಕೆ ಹರಿಯುವ ಬೃಹತ್ ಜಲರಾಶಿಯು ಕಳೆದ ಒಂದು ದಶಕದಲ್ಲಿ ತನ್ನ ಮೂಲ ಗುಣಲಕ್ಷಣಗಳನ್ನೇ ಸಂಪೂರ್ಣವಾಗಿ ಬದಲಾಯಿಸಿಕೊಂಡಿದ್ದು, ಇದು ಇಡೀ ಜಾಗತಿಕ ಹವಾಮಾನ ವ್ಯವಸ್ಥೆಯ (Global Climate System) ಮೇಲೆ ಭಾರಿ ಪರಿಣಾಮ ಬೀರುವ ಮುನ್ಸೂಚನೆ ನೀಡಿದೆ ಎಂದು ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆ (IISc) ಹಾಗೂ ಯುಕೆಯ ವಿಜ್ಞಾನಿಗಳು ಬುಧವಾರ ಎಚ್ಚರಿಸಿದ್ದಾರೆ.

ಕಳೆದ 20 ಕ್ಕೂ ಹೆಚ್ಚು ವರ್ಷಗಳ ಸಾಗರ ಮತ್ತು ಉಪಗ್ರಹ ದತ್ತಾಂಶಗಳನ್ನು (Satellite Data) ಆಳವಾಗಿ ವಿಶ್ಲೇಷಿಸಿರುವ ವಿಜ್ಞಾನಿಗಳು, ಅಂಟಾರ್ಕ್ಟಿಕಾ ಹಿಮದ ಭಾರಿ ನಷ್ಟವು ಸಾಗರದ ಆಳದಲ್ಲಿ ಹಿಂದೆಂದೂ ಕಾಣದ ಭಾರಿ ಪಲ್ಲಟವನ್ನು ಉಂಟುಮಾಡುತ್ತಿದೆ ಎಂಬುದನ್ನು ಸಾಬೀತುಪಡಿಸಿದ್ದಾರೆ. ಹಿಮಾವೃತ ದಕ್ಷಿಣ ಖಂಡವನ್ನು ಜಗತ್ತಿನ ಇತರ ಭಾಗಗಳಿಗೆ ಜೋಡಿಸುವ ಬೃಹತ್ ಜಲರಾಶಿಯಲ್ಲಿ ಕಳೆದ ಕೆಲವು ದಶಕಗಳಿಂದ ನಡೆಯುತ್ತಿದ್ದ ಬದಲಾವಣೆಗಳು 2016 ರ ನಂತರ ತದ್ವಿರುದ್ಧವಾಗಿ ತಿರುಗಿವೆ ಎಂದಿದ್ದಾರೆ.

"ಈ ಜಲರಾಶಿಯು ದಶಕಗಳ ಕಾಲ ಅತ್ಯಂತ ಸ್ಥಿರವಾಗಿತ್ತು (Super-stable). ಆದರೆ 2016 ರ ನಂತರ ಈ ಪ್ರವೃತ್ತಿ ಸಂಪೂರ್ಣವಾಗಿ ಉಲ್ಟಾ ಆಗಿದೆ. ಅಂಟಾರ್ಕ್ಟಿಕಾ ಸಮುದ್ರದ ಹಿಮದ ಕ್ಷಿಪ್ರ ಕರಗುವಿಕೆಯಿಂದಾಗಿ ಸಾಗರದ ಆಳದ ನೀರು ಹೆಚ್ಚು ಉಪ್ಪು, ಸಾಂದ್ರ ಹಾಗೂ ಆಳವಾಗಿ ಮಾರ್ಪಟ್ಟಿದೆ" ಎಂದು ಸಂಶೋಧನಾ ತಂಡದ ಪ್ರಮುಖ ಸದಸ್ಯ, ಐಐಎಸ್‌ಸಿಯ ಬೈಶಾಖ್‌ದತ್ತ ಗಾಯೇನ್ ತಿಳಿಸಿದ್ದಾರೆ.

ಅಲ್ಲದೆ, "ಈ ಬೃಹತ್ ಜಲರಾಶಿಯಲ್ಲಿ ಇಂತಹ ಪ್ರಮುಖ ಬದಲಾವಣೆಗಳು ಹಿಂದೆ ಸಾವಿರಾರು ವರ್ಷಗಳ ಅವಧಿಯಲ್ಲಿ ನಡೆಯುತ್ತಿದ್ದ ನೀರ್ಗಲ್ಲು-ನೀರ್ಗಲ್ಲಂತರ ಚಕ್ರಗಳಲ್ಲಿ (Glacial-interglacial cycles) ಸಂಭವಿಸುತ್ತಿದ್ದವು. ಆದರೆ, ಪ್ರಸ್ತುತ ನಾವು ಕೇವಲ ಒಂದೇ ದಶಕದ ಅವಧಿಯಲ್ಲಿ ಇಂತಹ ಆಘಾತಕಾರಿ ಪುನರ್ರಚನೆಯನ್ನು ಕಣ್ಣಾರೆ ಕಾಣುತ್ತಿದ್ದೇವೆ" ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ.

ಏನಿದು 'ಅಂಟಾರ್ಕ್ಟಿಕ್ ಇಂಟರ್ಮೀಡಿಯೇಟ್ ವಾಟರ್'?

ಭೂಮಿಯ ತಾಪಮಾನ ಏರಿಕೆಯಿಂದಾಗಿ (Global Warming) ವಾತಾವರಣದಲ್ಲಿ ಸಂಗ್ರಹವಾಗುವ ಶೇಕಡಾ 90 ರಷ್ಟು ಹೆಚ್ಚುವರಿ ಶಾಖವನ್ನು ಸಾಗರಗಳು ತಮ್ಮೊಳಗೆ ಹೀರಿಕೊಳ್ಳುತ್ತವೆ. ಹೀಗಾಗಿ ಸಾಗರಗಳ ಗುಣಲಕ್ಷಣಗಳಲ್ಲಿ ಉಂಟಾಗುವ ಯಾವುದೇ ಪ್ರಮುಖ ಬದಲಾವಣೆಯು ಇಡೀ ಜಗತ್ತಿನ ಹವಾಮಾನದ ಮೇಲೆ ನೇರ ಪರಿಣಾಮ ಬೀರುತ್ತದೆ.

ಭೂಮಿಯ ಹವಾಮಾನ ವ್ಯವಸ್ಥೆಯ 'ಎಂಜಿನಿಯರಿಂಗ್ ಕೊಠಡಿ' ಎಂದೇ ಕರೆಯಲ್ಪಡುವ ದಕ್ಷಿಣ ಮಹಾಸಾಗರವು (Southern Ocean) ಅಂಟಾರ್ಕ್ಟಿಕ್ ಹಿಮದ ಹೊದಿಕೆಯನ್ನು ಹೊಂದಿದ್ದು, ಜಾಗತಿಕ ಸಾಗರಗಳ ಆಳ ಹಾಗೂ ರಚನೆಯನ್ನು ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಇದು ಜಗತ್ತಿನಾದ್ಯಂತ ಭಾರಿ ಪ್ರಮಾಣದ ಶಾಖ ಮತ್ತು ಇಂಗಾಲವನ್ನು ರವಾನಿಸುವ ಪ್ರಮುಖ ಜಲರಾಶಿಗಳನ್ನು ಹೊಂದಿದೆ.

ಐಐಎಸ್‌ಸಿಯ ವಾತಾವರಣ ಮತ್ತು ಸಾಗರ ವಿಜ್ಞಾನ ಕೇಂದ್ರದ (CAOS) ವಿಜ್ಞಾನಿಗಳಾದ ಬೈಶಾಖ್‌ದತ್ತ ಗಾಯೇನ್, ಕೌಶಿಕ್ ಮಿಶ್ರಾ ಹಾಗೂ ಸೌತಾಂಪ್ಟನ್ ವಿಶ್ವವಿದ್ಯಾಲಯದ ಆಲ್ಬರ್ಟೊ ನವೇರಾ ಗ್ಯಾರಬಾಟೊ ಅವರು ಅಂಟಾರ್ಕ್ಟಿಕಾ ಬಳಿಯ ಸಾಗರ ಪರಿಚಲನೆಯ ಮಾದರಿಗಳನ್ನು ಅಧ್ಯಯನ ಮಾಡುತ್ತಿದ್ದಾಗ ಈ ಭಾರಿ ವ್ಯತ್ಯಾಸ ಬೆಳಕಿಗೆ ಬಂದಿದೆ.

ಅವರು ಅಧ್ಯಯನ ಮಾಡಿದ ಜಲರಾಶಿಯನ್ನು 'ಅಂಟಾರ್ಕ್ಟಿಕ್ ಇಂಟರ್ಮೀಡಿಯೇಟ್ ವಾಟರ್' (Antarctic Intermediate Water) ಎಂದು ಕರೆಯಲಾಗುತ್ತದೆ. ಇದು ಸಾಗರ ಮೇಲ್ಮೈಯಿಂದ 700 ರಿಂದ 1200 ಮೀಟರ್ ಆಳದಲ್ಲಿದ್ದು, ಶಾಖವನ್ನು ಹೀರಿಕೊಳ್ಳುವ ಮೇಲ್ಭಾಗದ ಸಾಗರವನ್ನು ಆಳದ ಕೆಳಭಾಗದ ಸಾಗರದಿಂದ ಪ್ರತ್ಯೇಕಿಸುತ್ತದೆ. ಈ ನೀರು ದಕ್ಷಿಣ ಮಹಾಸಾಗರದಿಂದ ಉತ್ತರಕ್ಕೆ ಅಟ್ಲಾಂಟಿಕ್, ಹಿಂದೂ ಮತ್ತು ಪೆಸಿಫಿಕ್ ಮಹಾಸಾಗರಗಳಿಗೆ ಹರಿಯುತ್ತದೆ ಮತ್ತು ಅಂಟಾರ್ಕ್ಟಿಕಾ ಬಳಿ ತಾನು ಪಡೆದ ಗುಣಲಕ್ಷಣಗಳನ್ನು ಸಾವಿರಾರು ಕಿಲೋಮೀಟರ್ ದೂರದಲ್ಲಿರುವ ಉಷ್ಣವಲಯದ ಮಹಾಸಾಗರಗಳಿಗೆ ಕೊಂಡೊಯ್ಯುತ್ತದೆ.

2016 ರಲ್ಲಿ ಬದಲಾದ ಸಮುದ್ರದ ಸಮತೋಲನ

ಪ್ರತಿ ವರ್ಷ ವಸಂತ ಮತ್ತು ಬೇಸಿಗೆಯಲ್ಲಿ ಹಿಮ ಕರಗಿದಾಗ, ಅದು ಸಾಗರ ಮೇಲ್ಮೈಗೆ ಸಿಹಿ ನೀರನ್ನು (Fresh Water) ಸೇರಿಸುತ್ತದೆ. 1970 ರ ದಶಕದಿಂದ 2015 ರವರೆಗೆ ಈ ಜಲರಾಶಿಯು ನಿರಂತರವಾಗಿ ಸಿಹಿಯಾಗಿ ಮತ್ತು ಹಗುರವಾಗಿ ಮಾರ್ಪಟ್ಟಿತ್ತು. ಆದರೆ, 2016 ರಿಂದೀಚೆಗೆ ಸಮುದ್ರದಲ್ಲಿ ಹಿಮದ ಪ್ರಮಾಣ ಭಾರಿ ಕುಸಿತ ಕಂಡಿದ್ದರಿಂದ ಪರಿಸ್ಥಿತಿ ಸಂಪೂರ್ಣವಾಗಿ ಬದಲಾಗಿದೆ.

ಸಾಗರದ ತಾಪಮಾನ ಮತ್ತು ಲವಣಾಂಶವನ್ನು ದಾಖಲಿಸುವ ಅಂತರರಾಷ್ಟ್ರೀಯ ರೋಬೋಟಿಕ್ ನೆಟ್‌ವರ್ಕ್ ಆದ 'ಆರ್ಗೋ' (Argo) ದ 20 ವರ್ಷಗಳ ಮಾಪನಗಳನ್ನು, ಉಪಗ್ರಹ ವೀಕ್ಷಣೆಗಳು ಹಾಗೂ 2004 ರಿಂದ 2024 ರವರೆಗಿನ ಸಾಗರ ವಿಶ್ಲೇಷಣೆಗಳೊಂದಿಗೆ ವಿಜ್ಞಾನಿಗಳು ಪರಿಶೀಲಿಸಿದ್ದಾರೆ. ಈ ಎಲ್ಲಾ ಮೂರು ದತ್ತಾಂಶಗಳು 2015 ರವರೆಗೆ ನೀರು ಸಿಹಿಯಾಗುತ್ತಿದ್ದುದನ್ನು ತೋರಿಸಿದ್ದರೆ, 2016 ರಿಂದೀಚೆಗೆ ಅಂಟಾರ್ಕ್ಟಿಕ್ ಇಂಟರ್ಮೀಡಿಯೇಟ್ ನೀರು ಹೆಚ್ಚು ಉಪ್ಪು, ಸಾಂದ್ರ ಹಾಗೂ ಆಳವಾಗುತ್ತಿರುವುದನ್ನು ಖಚಿತಪಡಿಸಿವೆ. ಈ ಪೈಕಿ ಅತ್ಯಂತ ಪ್ರಬಲವಾದ ಬದಲಾವಣೆಗಳು ದಕ್ಷಿಣ ಅಟ್ಲಾಂಟಿಕ್ ಮಹಾಸಾಗರದಲ್ಲಿ ಕಂಡುಬಂದಿವೆ.

ಭಾರತೀಯ ಮುಂಗಾರಿನ ಮೇಲೆ ಪ್ರಭಾವದ ಭೀತಿ!

ಈ ಸಾಗರ ಬದಲಾವಣೆಯ ಅಂತಿಮ ಪರಿಣಾಮಗಳು ಇನ್ನು ಸಂಪೂರ್ಣವಾಗಿ ತಿಳಿದುಬಂದಿಲ್ಲವಾದರೂ, ಇದು ಭಾರತ ಹಾಗೂ ದಕ್ಷಿಣ ಏಷ್ಯಾದ ಮುಂಗಾರಿನ (South Asian Monsoon) ಮೇಲೆ ತೀವ್ರ ಪರಿಣಾಮ ಬೀರುವ ಸಾಧ್ಯತೆಯಿದೆ. "ದಕ್ಷಿಣ ಮಹಾಸಾಗರವು ಹೀರಿಕೊಳ್ಳುವ ಶಾಖಕ್ಕೂ ದಕ್ಷಿಣ ಏಷ್ಯಾದ ಮುಂಗಾರು ಮಾರುತಗಳ ಚಲನೆಗೂ ನಿಕಟ ಸಂಬಂಧವಿದೆ ಎಂದು ಹಿಂದಿನ ಸಂಶೋಧನೆಗಳು ಸಾಬೀತುಪಡಿಸಿವೆ. ಹೀಗಾಗಿ ಮುಂಬರುವ ಕನಿಷ್ಠ 10 ವರ್ಷಗಳ ಕಾಲ ನಾವು ಈ ಬದಲಾವಣೆಯ ಪ್ರವೃತ್ತಿಯನ್ನು ಅತ್ಯಂತ ಸೂಕ್ಷ್ಮವಾಗಿ ಗಮನಿಸಬೇಕಾಗಿದೆ" ಎಂದು ಗಾಯೇನ್ ಹೇಳಿದ್ದಾರೆ. ವಿಜ್ಞಾನಿಗಳ ಈ ಮಹತ್ವದ ಹಾಗೂ ಆತಂಕಕಾರಿ ಸಂಶೋಧನಾ ಪ್ರಬಂಧವು ಜಗತ್ಪ್ರಸಿದ್ಧ 'ನೆಚರ್ ಕ್ಲೈಮೇಟ್ ಚೇಂಜ್' (Nature Climate Change) ನಿಯತಕಾಲಿಕೆಯಲ್ಲಿ ಪ್ರಕಟವಾಗಿದೆ.