Asianet Suvarna News

ಪುನರ್ಜನ್ಮದ ಸರಾಸರಿ ಅವಧಿ 16 ತಿಂಗಳು, ಅಧ್ಯಯನದಲ್ಲಿ ದಿಢೀರ್ ಸಾವು-ಮರು ಹುಟ್ಟಿನ ಸ್ಫೋಟಕ ಮಾಹಿತಿ

Chethan Kumar — Fri, 23 Oct 2026 14:52:38 +0530

ವರ್ಜಿನಿಯಾ (ಅ.23) ಮನುಷ್ಯನ ಸಾವಿನ ಬಳಿಕ ಪುನರ್ಜನ್ಮ ಕುರಿತು ಹಲವು ಘಟನೆಗಳು, ಪೌರಾಣಿಕ ಕತೆಗಳು, ಇತ್ತೀಚೆಗಿನ ಕೆಲ ಊಹೆಗೂ ನಿಲುಕದ ಘಟನೆಗಳು ಹಲವರನ್ನು ಅಚ್ಚರಿಗೊಳಿಸಿದೆ. ಪ್ರಮುಖವಾಗಿ ಭಾರತದಲ್ಲಿ ಪುನರ್ಜನ್ಮ, ಕರ್ಮಫಲ ಸೇರಿದಂತೆ ಹಲವು ಘಟನೆಗಳು ಹೊಸದೇನಲ್ಲ. ಇದೀಗ ಪುನರ್ಜನ್ಮ ಕುರಿತು ಅಮೆರಿಕದ ವರ್ಜಿನಿಯಾ ವಿಶ್ವವಿದ್ಯಾಲಯ ಮಹತ್ವದ ಅಧ್ಯಯನವೊಂದನ್ನು ಕೈಗೊಂಂಡಿದೆ. ಸಂಶೋಧಕರು ಹಲವರ ಅಂಕಿ ಅಂಶಗಳು, ಜನನ-ಮರಣ, ಕುಟುಂಬಸ್ಥರು, ಆಪ್ತರು, ಸ್ಥಳೀಯರ ಮಾಹಿತಿಗಳನ್ನು ಆಧರಿಸಿ ಅಧ್ಯಯನ ನಡೆಸಿ ಸ್ಫೋಟಕ ವರದಿ ನೀಡಿದೆ. ಈ ವರದಿ ಪ್ರಕಾರ ಪುನರ್ಜನ್ಮದ ಸರಾಸರಿ ಅವಧಿ 16 ತಿಂಗಳು. ಪುನರ್ಜನ್ಮ ಮನುಷ್ಯನಿಗೆ ಗೊತ್ತಾಗುತ್ತಾ? ಈ ಕುರಿತು ಹಲವು ವಿಚಾರಗಳನ್ನು ಈ ಅಧ್ಯಯನ ವರದಿಯಲ್ಲಿ ಹೇಳಲಾಗಿದೆ.

ಹಠಾತ್ ಸಾವಿನ ಬಳಿಕ ಅವರ ಆತ್ಮ ಮತ್ತೊಬ್ಬರ ಮೂಲಕ ಪುನರ್ಜನ್ಮ ಪಡೆಯುತ್ತದೆ ಅನ್ನೋ ನಂಬಿಕೆ ಇದೆ. ಇನ್ನು ಹಲವು ಬಾರಿ ನಿಧನದ ವ್ಯಕ್ತಿಯ ಹಲವು ಗುಣಗಳನ್ನು ಇತರರಲ್ಲಿ ಕಾಣುತ್ತಾರೆ. ಹಲವು ಹೋಲಿಕೆಗಳನ್ನು ಮಾಡುತ್ತಾರೆ. ಕೆಲ ಸಂದರ್ಭಗಳಲ್ಲಿ ತನಗೆ ನಿಧನ ಹೊಂದಿದೆ ಈ ವ್ಯಕ್ತಿಯ ಹಲವು ನೆನಪುಗಳಿವೆ ಎನ್ನುತ್ತಾರೆ. ಈ ಮೂಲಕ ಪುನರ್ಜನ್ಮದ ಕತಗಳಿಗೆ ಪುಷ್ಠಿ ನೀಡುವ ಹಲವು ಘಟನೆಗಳಿರುತ್ತದೆ. ಅಧ್ಯಯನ ವರದಿ ಪ್ರಕಾರ ಸಾವಿನ ನಂತರ ಆ ವ್ಯಕ್ತಿಯ ಪುನರ್ಜನ್ಮಕ್ಕೆ ಕಡಿಮೆ ತಿಂಗಳ ಅವಧಿ ಇರುತ್ತದೆ. ಸರಿಸುಮಾರು 16 ತಿಂಗಳು ಎಂದು ವರ್ಜಿನಿಯಾ ವಿಶ್ವವಿದ್ಯಾಲಯದ ಅಧ್ಯಯನ ವರದಿ ಹೇಳುತ್ತಿದೆ.

ಸತ್ತ ಹಾಗೂ ಪುನರ್ಜನ್ಮದ ಸರಾಸರಿ ಅವಧಿ

ವರ್ಜಿನಿಯಾ ವಿಶ್ವವಿದ್ಯಾಲದ ಸಂಶೋಧಕರು ಈ ರೀತಿ ಪುನರ್ಜನ್ಮ ಎಂದು ಗುರುತಿಸಿಕೊಂಡಿದ್ದ, ಹೇಳಿಕೊಂಡಿದ್ದ, ಸ್ಥಳೀಯರು, ಆಪ್ತರು ಹೋಲಿಕೆ ಮಾಡಿದ್ದ 1678 ಮಂದಿಯ ಡೇಟಾ ಪರಿಶೀಲಿಸಲಾಗಿದೆ. ಇನ್ನು ಈ ವ್ಯಕ್ತಿಗಳು ಯಾವ ವ್ಯಕ್ತಿಗಳ ಪುನರ್ಜನ್ಮ ಎಂದು ಹೇಳುವ ವ್ಯಕ್ತಿಗಳ ಡೇಟಾವನ್ನು ಕಲೆ ಹಾಕಿ ಅಧ್ಯಯನ ಮಾಡಲಾಗಿದೆ. ಈ ವೇಳೆ ಪುನರ್ಜನ್ಮದ ಅವಧಿ ಸರಾಸರಿ 16 ತಿಂಗಳು ಎಂಬುದು ಗೊತ್ತಾಗಿದೆ. ಆದರೆ ಇದು ಪುನರ್ಜನ್ಮ ಎಂದು ಹೇಳಲು ನಿಖರ ಕಾರಣಗಳಿಲ್ಲ ಎಂದು ಅಧ್ಯಯನ ವರದಿ ಹೇಳಿದೆ.

ಅತೀ ಅನಿರೀಕ್ಷಿತ ಸಾವಿನ ಪುನರ್ಜನ್ಮ ಅವಧಿ ಮತ್ತಷ್ಟು ಕಡಿಮೆ

ಕೇವಲ ಜನನ ಹಾಗೂ ನಿಧನ ಅಂಕಿ ಅಂಶ ಮಾತ್ರವಲ್ಲ, ಹಠಾತ್, ಅಸಹಜ ಸೇರಿದಂತೆ ದಿಢೀರ್ ಸಾವಾಗಿತ್ತಾ ಅನ್ನೋದು ಪರಿಶೀಲಿಸಲಾಗಿದೆ. ಈ ವೇಳೆ ಹಠಾತ್ ಸಾವಿನ ಬಳಿಕ ಪುನರ್ಜನ್ಮದ ಸಾಧ್ಯತೆಗಳು ಹೆಚ್ಚಾಗಿ ಕಂಡು ಬಂದಿದೆ. ಇದರಲ್ಲಿ ಅತೀ ಅನಿರೀಕ್ಷಿತ ಸಾವುಗಳ ಸಂಭವಿಸಿದ ಬಳಿಕ ಪುನರ್ಜನ್ಮದ ಅವಧಿ ಮತ್ತಷ್ಟು ಕಡಿಮೆಯಾಗಲಿದೆ ಎಂದಿದೆ. ಅತೀ ಅನಿರೀಕ್ಷಿತ ಸಾವು ಹಾಗೂ ಪುನರ್ಜನ್ಮದ ಅವಧಿ ಸರಾಸರಿ 16 ತಿಂಗಳಿಗಿಂತ ಶೇಕಡಾ 40ರಷ್ಟು ಕಡಿತಗೊಳ್ಳಲಿದೆ ಎಂದಿದೆ. ಅಂದರೆ ಅತೀ ಅನಿರೀಕ್ಷಿತ ಸಾವಿನ ಬಳಿಕ ಪುನರ್ಜನ್ಮದ ಅವಧಿ 8 ರಿಂದ 10 ದಿನ. ಈ ದಿನದ ಒಳಗೆ ಪುನರ್ಜನ್ಮವೆತ್ತಿ ಮತ್ತೆ ಬರಲಿದ್ದಾರೆ.

ಪುನರ್ಜನ್ಮದ ಕುರಿತು ಅಧ್ಯಯನ ಏನು ಹೇಳುತ್ತೆ

ಪುನರ್ಜನ್ಮದ ಕುರಿತು ಅಂಕಿ ಅಂಶಗಳು, ಡೇಟಾಗಳ ಪರಿಶೀಲಿಸಿ ಸರಾಸರಿ ಅವಧಿಯನ್ನು ಅಧ್ಯಯನ ತಂಡ ಹೇಳಿದೆ. ಆದರೆ ಇದು ಪುನರ್ಜನ್ಮ ಸಾಬೀತುಪಡಿಸುವ ಅಧ್ಯಯನವಲ್ಲ ಎಂದಿದೆ. ಪುನರ್ಜನ್ಮ ನಂಬಕದ ಹಲವು ಕುಟುಂಬಗಳಲ್ಲಿ ಬಲವಾದ ಕಾರಣಗಳು ಗೋಚರಿಸಿದೆ. ಆದರೆ ಇದ್ಯಾವುದು ಪುನರ್ಜನ್ಮವನ್ನು ಸಾಬೀತುಪಡಿಸುವ ಅಂಶಗಳಲ್ಲ ಎಂದು ವರ್ಜಿನಿಯಾ ವಿಶ್ವವಿದ್ಯಾಲಯ ತಂಡ ಸ್ಪಷ್ಟಪಡಿಸಿದೆ. ಇದೇ ವೇಳೆ ಪುನರ್ಜನ್ಮ ಕುರಿತು ಅಧ್ಯಯನ ಮುಂದುವರಿದಿದೆ. ಪುನರ್ಜನ್ಮ ಕಟ್ಟು ಕತೆ ಎಂದು ತಳ್ಳಿ ಹಾಕುವುದು ಕಷ್ಟ ಎಂದು ತಜ್ಞರು ಅಧ್ಯಯನದ ಬಳಿಕ ಹೇಳಿದ್ದಾರೆ.ಮುಂದಿನ ಅಧ್ಯಯನ ವರದಿಯಲ್ಲಿ ಒಂದಷ್ಟು ಸ್ಪಷ್ಟತೆ ಸಿಗುವ ಸಾಧ್ಯತೆ ಇದೆ ಎಂದು ಅಧ್ಯಯನ ತಂಡ ಹೇಳಿದೆ.

ಅಮೆರಿಕದ ವಿಶ್ವವಿದ್ಯಾಲಯದ ಪುನರ್ಜನ್ಮ ಅಧ್ಯಯನ ಇದೀಗ ಭಾರತದಲ್ಲಿ ಈಗಾಗಲೇ ಲಭ್ಯವಿರುವ ಹಲವು ಪುರಾಣ, ಪೌರಾಣಿಕ ಕತೆಗಳ, ಗ್ರಂಥಗಳಲ್ಲಿನ ಉಲ್ಲೇಖಕ್ಕೂ ಹಲವು ಸಾಮ್ಯತೆಗಳು ಕಾಣಿಸುತ್ತಿದೆ. ಮುಂದಿನ ಅಧ್ಯಯನ ಪುನರ್ಜನ್ಮ ಕುರಿತು ಹಲವು ರೋಚಕ ಮಾಹಿತಿಗೆ ಸಾಕ್ಷಿಯಾಗುವ ಸಾಧ್ಯತೆ ಇದೆ.

ಟರ್ಕಿ ಸಮುದ್ರದಾಳದಲ್ಲಿ 2100 ವರ್ಷಗಳ ಪ್ರಾಚೀನ ರೋಮನ್ ಹಡಗು ಪತ್ತೆ, ಪ್ಯಾಕಿಂಗ್ ಟೆಕ್ನಿಕ್‌ಗೆ ವಿಜ್ಞಾನಿಗಳೇ ಫಿದಾ!

Gowthami K — Mon, 26 Oct 2026 17:07:30 +0530

ಟರ್ಕಿಯ ಅದ್ರಾಸನ್ ಕರಾವಳಿಯ ಆಳಸಮುದ್ರದಲ್ಲಿ ಸಾಗರ ಪುರಾತತ್ತ್ವಜ್ಞರು ಅತ್ಯಂತ ಅಪರೂಪದ ಹಾಗೂ ರೋಚಕ ಐತಿಹಾಸಿಕ ಆವಿಷ್ಕಾರ ಒಂದನ್ನು ಮಾಡಿದ್ದಾರೆ. ಸುಮಾರು 2,100 ವರ್ಷಗಳ ಹಿಂದೆ ರೋಮ್ ನಗರದತ್ತ ಪ್ರಯಾಣಿಸುತ್ತಿದ್ದ ಪ್ರಾಚೀನ ಸರಕು ಹಡಗಿನ ಅವಶೇಷಗಳು ಪತ್ತೆಯಾಗಿವೆ. ಮೆಡಿಟರೇನಿಯನ್ ಸಮುದ್ರದ ತಳದಲ್ಲಿದ್ದ ಈ ಹಡಗಿನಲ್ಲಿ ಆ ಕಾಲದ ರೋಮನ್ ಗಣ್ಯರು ಬಳಸುತ್ತಿದ್ದ, ಅತ್ಯಂತ ಬೇಡಿಕೆಯಲ್ಲಿದ್ದ ಸಾವಿರಾರು ಸೆರಾಮಿಕ್ ಊಟದ ಟೇಬಲ್‌ ಐಟಂಗಳು, ತಟ್ಟೆಗಳು ಅತ್ಯಂತ ಸುರಕ್ಷಿತ ಸ್ಥಿತಿಯಲ್ಲಿ ಪತ್ತೆಯಾಗಿವೆ.

ಟರ್ಕಿಯ ಸಂಸ್ಕೃತಿ ಮತ್ತು ಪ್ರವಾಸೋದ್ಯಮ ಇಲಾಖೆ ನೀಡಿರುವ ಪ್ರಕಟಣೆಯ ಪ್ರಕಾರ, ಈ ಮುಳುಗಿದ ಹಡಗಿನ ಉತ್ಖನನ ಕೆಲಸವು 2025 ರಲ್ಲಿ ಪ್ರಾರಂಭವಾದವು. ಸಮುದ್ರದ 140 ರಿಂದ 180 ಅಡಿ ಆಳದಲ್ಲಿ ಹಡಗು ಬಿದ್ದಿದ್ದರಿಂದ, ಸಂಶೋಧಕರು ನೀರೊಳಗಿನ ನೂತನ ರೊಬೊಟಿಕ್ ತಂತ್ರಜ್ಞಾನವನ್ನು ಬಳಸಿ ಸಾವಿರಾರು ಸೆರಾಮಿಕ್ ತುಣುಕುಗಳನ್ನು ಆಚೆಗೆ ತೆಗೆದು ಅಂಟಲ್ಯ ವಸ್ತುಸಂಗ್ರಹಾಲಯ ಹಾಗೂ ಸಂರಕ್ಷಣಾ ಪ್ರಯೋಗಾಲಯಗಳಿಗೆ ರವಾನಿಸಿದ್ದಾರೆ.

122 ಪ್ರತ್ಯೇಕ ಮಾದರಿಯ ಅಪರೂಪದ ಪಾತ್ರೆಗಳು

ಸಮುದ್ರದಾಳದಲ್ಲಿ ಸಿಕ್ಕಿರುವ ಈ ಸರಕು ಹಡಗಿನಲ್ಲಿ ಒಟ್ಟು 122 ವಿಭಿನ್ನ ವಿನ್ಯಾಸ ಮತ್ತು ಗಾತ್ರದ ತಟ್ಟೆಗಳು, ಬಟ್ಟಲುಗಳು ಹಾಗೂ ಆಕರ್ಷಕ ಬಡಿಸುವ ಭಕ್ಷ್ಯಗಳು ಪತ್ತೆಯಾಗಿವೆ. ಪ್ರಾಚೀನ ಕಾಲದಲ್ಲಿದ್ದ ರೋಮನ್ನರ ಅಡುಗೆಮನೆ ಹಾಗೂ ಊಟದ ಮೇಜಿನ ವೈವಿಧ್ಯಮಯ ಸಂಸ್ಕೃತಿಯನ್ನು ತಿಳಿದುಕೊಳ್ಳಲು ಈ ಆವಿಷ್ಕಾರ ಅತ್ಯಂತ ಪ್ರಮುಖ ಸಾಕ್ಷಿಯಾಗಿದೆ.

ಇಲ್ಲಿ ಪತ್ತೆಯಾದ ಸರಕು ಇಂದಿನ ಟರ್ಕಿಯ ಅರ್ಸುಜ್‌ನಲ್ಲಿರುವ 'ರೋಸಸ್' ಎಂಬ ಪ್ರಾಚೀನ ಬಂದರು ನಗರದಲ್ಲಿ ತಯಾರಾಗಿರಬಹುದು ಎಂದು ಪುರಾತತ್ತ್ವಜ್ಞರು ಅಂದಾಜಿಸಿದ್ದಾರೆ. ಆ ಕಾಲದಲ್ಲಿ ರೋಸಸ್ ನಗರವು ಗಣ್ಯರು ಬಳಸುವ ಅತ್ಯುನ್ನತ ಗುಣಮಟ್ಟದ ಸೆರಾಮಿಕ್ ಪಾತ್ರೆಗಳ ತಯಾರಿಕೆಗೆ ಹೆಸರುವಾಸಿಯಾಗಿತ್ತು.

ಪ್ರಾಚೀನ ಪ್ಯಾಕಿಂಗ್ ತಂತ್ರಜ್ಞಾನಕ್ಕೆ ವಿಜ್ಞಾನಿಗಳು ಫಿದಾ!

ಈ ಹಡಗು ಧ್ವಂಸದ ಅಧ್ಯಯನ ನಡೆಸಿದ ವಿಜ್ಞಾನಿಗಳಿಗೆ ಅತ್ಯಂತ ಆಶ್ಚರ್ಯ ತಂದ ವಿಷಯವೆಂದರೆ ಆ ಕಾಲದ ನಿಕಟವಾದ ಪ್ಯಾಕಿಂಗ್ ಶೈಲಿ. ಸಮುದ್ರದ ಭೋರ್ಗರೆತಕ್ಕೆ ಪಾತ್ರೆಗಳು ಪರಸ್ಪರ ಅಪ್ಪಳಿಸಿ ಒಡೆದುಹೋಗಬಾರದೆಂದು, ಪೆಟ್ಟಿಗೆಗಳಲ್ಲಿ ಪಾತ್ರೆಗಳನ್ನಿಡುವಾಗ ಅವುಗಳ ನಡುವೆ ಒದ್ದೆಯಾದ ವಿಶೇಷ ಜೇಡಿಮಣ್ಣನ್ನು ತುಂಬಿ ಭದ್ರಪಡಿಸಲಾಗಿತ್ತು. ಇದೇ ಕಾರಣಕ್ಕೆ ಹಡಗು ಮುಳುಗಿ 2,000 ವರ್ಷಗಳಿಗಿಂತಲೂ ಹೆಚ್ಚು ಸಮಯ ಕಳೆದರೂ ಇಂದಿಗೂ ಆ ಪಾತ್ರೆಗಳು ಸವೆಯದೆ ಹಾಗೆಯೇ ಉಳಿದುಕೊಂಡಿವೆ.

ಇತಿಹಾಸದ ದಾಖಲೆಗಳಲ್ಲಿದ್ದ ಸಿಸೆರೊ ಪತ್ರಕ್ಕೆ ಸಿಕ್ಕ ಜೀವಂತ ಸಾಕ್ಷಿ

ರೋಮನ್ ಇತಿಹಾಸದಲ್ಲಿ 'ರೋಸಸ್' ಪಾತ್ರೆಗಳಿಗೆ ಎಷ್ಟೊಂದು ಬೇಡಿಕೆಯಿತ್ತೆಂದರೆ, ಪ್ರಸಿದ್ಧ ರೋಮನ್ ರಾಜಕಾರಣಿ ಹಾಗೂ ವಾಗ್ಮಿ ಮಾರ್ಕಸ್ ಟುಲಿಯಸ್ ಸಿಸೆರೊ ಬಿಟ್ಟುಹೋದ ದಾಖಲೆಗಳಲ್ಲಿಯೂ ಇದರ ಉಲ್ಲೇಖವಿದೆ. ಕ್ರಿ.ಪೂ 50 ರಲ್ಲಿ ಸಿಲಿಸಿಯಾದ ಗವರ್ನರ್ ಆಗಿದ್ದಾಗ ತಮ್ಮ ಆಪ್ತ ಸ್ನೇಹಿತ ಟೈಟಸ್ ಪೊಂಪೋನಿಯಸ್ ಅಟಿಕಸ್ ಎಂಬುವವರಿಗೆ ಬರೆದ ಪತ್ರದಲ್ಲಿ, ತಾವು ರೋಸಸ್‌ನಿಂದ 'ರೋಸಿಕಾ ವಾಸಾ' ರೋಸಸ್ ನಗರದ ವಿಶಿಷ್ಟ ಭಕ್ಷ್ಯಗಳು) ಆರ್ಡರ್ ಮಾಡಿದ್ದಾಗಿ ಬರೆದುಕೊಂಡಿದ್ದರು. ಸಿಸೆರೊ ಉಲ್ಲೇಖಿಸಿದ್ದ ಅದೇ ಮಾದರಿಯ 'ಈಸ್ಟರ್ನ್ ಸಿಗಿಲ್ಲಟಾ ಎ' ವರ್ಗಕ್ಕೆ ಸೇರಿದ ಜೇಡಿಮಣ್ಣಿನ ಭಕ್ಷ್ಯಗಳು ಈಗ ಲಭ್ಯವಾಗಿರುವುದು ಇತಿಹಾಸಕಾರರ ಕುತೂಹಲವನ್ನು ಇಮ್ಮಡಿಗೊಳಿಸಿದೆ.

ಟರ್ಕಿ ಜಲ ಗಡಿಯಲ್ಲಿ ಈ ಹಿಂದೆಯೂ 10,000 ಸೆರಾಮಿಕ್ ತಟ್ಟೆಗಳನ್ನು ಹೊತ್ತ 1,500 ವರ್ಷಗಳಷ್ಟು ಹಳೆಯ ಹಡಗು ಹಾಗೂ 1,100 ವರ್ಷಗಳಷ್ಟು ಹಳೆಯ ಆಲಿವ್ ಎಣ್ಣೆಯ ಜಗ್‌ಗಳಿದ್ದ ಹಡಗುಗಳು ಪತ್ತೆಯಾಗಿದ್ದವು. ಆದರೆ, ಪ್ರಸ್ತುತ ಸಿಕ್ಕಿರುವ ಈ 2,100 ವರ್ಷ ಹಳೆಯ ಹಡಗು ಪ್ರಾಚೀನ ಸಮುದ್ರ ವಾಣಿಜ್ಯ ಹಾಗೂ ಸಾರಿಗೆ ವ್ಯಾಪಾರಕ್ಕೆ ಸಿಕ್ಕ ಅತ್ಯಂತ ಅಪರೂಪದ ಪುರಾವೆಯಾಗಿದೆ.

200 ವರ್ಷದ ಬಳಿಕ ಹೊರಬಂತು ಅಬ್ಬೆಯ ಅಸಲಿ ಕಥೆ, ಕಲ್ಲಿನ ಶವಪೆಟ್ಟಿಗೆಯಲ್ಲಿನ ಅಸ್ಥಿಪಂಜರ ಶ್ರೀಮಂತನದ್ದಲ್ಲ, ಸನ್ಯಾಸಿಯದ್ದು!

Gowthami K — Sat, 24 Oct 2026 16:26:44 +0530

ಲಂಡನ್: ಲಂಡನ್‌ನ ಪ್ರಸಿದ್ಧ ವೆಸ್ಟ್‌ಮಿನಿಸ್ಟರ್ ಅಬ್ಬೆಯಲ್ಲಿರುವ ಪ್ರಾಚೀನ ರೋಮನ್ ಕಲ್ಲಿನ ಶವಪೆಟ್ಟಿಗೆಯ (ಸಾರ್ಕೊಫಾಗಸ್) ಒಳಗಿದ್ದ ಅಸ್ಥಿಪಂಜರದ ಕುರಿತು ಶತಮಾನಗಳಿಂದಲೂ ಇದ್ದ ರಹಸ್ಯಕ್ಕೆ ಕೊನೆಗೂ ಆಧುನಿಕ ವಿಧಿವಿಜ್ಞಾನ ಹಾಗೂ ಪುರಾತತ್ತ್ವ ಶಾಸ್ತ್ರದ ಸಂಶೋಧಕರು ತೆರೆ ಎಳೆದಿದ್ದಾರೆ. ಶವಪೆಟ್ಟಿಗೆಯ ಮೇಲಿರುವ ಹೆಸರಿನಂತೆ ಇದು ರೋಮನ್ ಕಾಲದ ಶ್ರೀಮಂತ ವ್ಯಕ್ತಿಯ ಸಮಾಧಿಯಲ್ಲ, ಬದಲಾಗಿ 11ನೇ ಶತಮಾನದ ಉನ್ನತ ಶ್ರೇಣಿಯ ಮಧ್ಯಕಾಲೀನ ಸನ್ಯಾಸಿಯ ಅಸ್ಥಿಪಂಜರ ಎಂಬುದು ಸಂಶೋಧನೆಯಿಂದ ಸಾಬೀತಾಗಿದೆ.

ಶವಪೆಟ್ಟಿಗೆ ಸಿಕ್ಕಿದ್ದೇ ರೋಚಕ!

'ಡೈಲಿ ಮೇಲ್' ಮತ್ತು ವೆಸ್ಟ್‌ಮಿನಿಸ್ಟರ್ ಅಬ್ಬೆಯ ಅಧಿಕೃತ ವೆಬ್‌ಸೈಟ್ ನೀಡಿರುವ ವರದಿಗಳ ಪ್ರಕಾರ, ಈ ಸುಣ್ಣದ ಕಲ್ಲಿನ ಶವಪೆಟ್ಟಿಗೆಯನ್ನು 1820 ರಲ್ಲಿ ವೆಸ್ಟ್‌ಮಿನಿಸ್ಟರ್ ಅಬ್ಬೆಯ ಉತ್ತರ ಭಾಗದಲ್ಲಿ ಕಾಮಗಾರಿ ನಡೆಸುತ್ತಿದ್ದಾಗ ಕಾರ್ಮಿಕರು ಆಕಸ್ಮಿಕವಾಗಿ ಪತ್ತೆಹಚ್ಚಿದ್ದರು. ಆ ವೇಳೆ ಶವಪೆಟ್ಟಿಗೆಯ ಮುಚ್ಚಳ ಆರು ತುಂಡುಗಳಾಗಿ ಮುರಿದುಬಿದ್ದಿತ್ತು. ನಂತರ 1869 ರಲ್ಲಿ ಇದನ್ನು ಅಧಿಕೃತವಾಗಿ ಉತ್ಖನನ ಮಾಡಿ ಹೊರತೆಗೆಯಲಾಯಿತು.

ಈ ಶವಪೆಟ್ಟಿಗೆಯ ಮೇಲಿದ್ದ ಲ್ಯಾಟಿನ್ ಶಾಸನದಲ್ಲಿ 'ವ್ಯಾಲೇರಿಯಸ್ ಅಮಂಡಿನಸ್' ಎಂಬ ಹೆಸರು ಕೆತ್ತಲಾಗಿತ್ತು. ಈತ ಕ್ರಿಸ್ತಶಕ 300 ರಿಂದ 400 ರ ಸುಮಾರಿಗೆ ಲಂಡನ್‌ನಲ್ಲಿ ವಾಸಿಸುತ್ತಿದ್ದ ಅತ್ಯಂತ ಶ್ರೀಮಂತ ರೋಮನ್ ಪ್ರಜೆ ಎಂದು ಭಾವಿಸಲಾಗಿತ್ತು. ಹೀಗಾಗಿ, ಇಷ್ಟು ವರ್ಷಗಳ ಕಾಲ ಈ ಸಮಾಧಿ ವ್ಯಾಲೇರಿಯಸ್‌ಗೇ ಸೇರಿದ್ದು ಎಂದು ನಂಬಲಾಗಿತ್ತು.

ಆನುಮಾನಕ್ಕೆ ಕಾರಣವಾದ ಲ್ಯಾಟಿನ್ ಶಿಲುಬೆ:

ಆದರೆ, ಶವಪೆಟ್ಟಿಗೆಯ ಮುಚ್ಚಳದ ಮೇಲೆ ಕೆತ್ತಲಾಗಿದ್ದ ದೊಡ್ಡ ಲ್ಯಾಟಿನ್ ಶಿಲುಬೆಯ ಶೈಲಿಯನ್ನು ಪರಿಶೀಲಿಸಿದಾಗ ಪುರಾತತ್ವಜ್ಞರಿಗೆ ಅನುಮಾನ ಮೂಡಲು ಆರಂಭವಾಯಿತು. ಏಕೆಂದರೆ ಆ ಶಿಲುಬೆಯ ಕೆತ್ತನೆಯು 10 ನೇ ಅಥವಾ 11 ನೇ ಶತಮಾನದ ವಿನ್ಯಾಸಕ್ಕೆ ಸೇರಿತ್ತು. ಅಂದರೆ, ವ್ಯಾಲೇರಿಯಸ್ ಅಮಂಡಿನಸ್ ಮರಣ ಹೊಂದಿದ ನೂರಾರು ವರ್ಷಗಳ ನಂತರ ಈ ಶಿಲುಬೆಯನ್ನು ಕೆತ್ತಲಾಗಿತ್ತು. ಇದು ರೋಮನ್ ಶವಪೆಟ್ಟಿಗೆಯನ್ನು ನಂತರದ ಕಾಲದಲ್ಲಿ ಯಾರೋ ಮರುಬಳಕೆ ಮಾಡಿದ್ದಾರೆ ಎಂಬ ಸುಳಿವು ನೀಡಿತು.

ರೇಡಿಯೋ ಕಾರ್ಬನ್ ಡೇಟಿಂಗ್ ಮತ್ತು ಅಸ್ಥಿಪಂಜರದ ತಪಾಸಣೆ:

ಸತ್ಯಾಸತ್ಯತೆ ತಿಳಿಯಲು ಅಸ್ಥಿಪಂಜರದ ಮೂಳೆಯ ಮಾದರಿಯನ್ನು ಸ್ಕಾಟಿಷ್ ವಿಶ್ವವಿದ್ಯಾಲಯಗಳ ಪರಿಸರ ಸಂಶೋಧನಾ ಕೇಂದ್ರಕ್ಕೆ ಕಳುಹಿಸಿ 'ರೇಡಿಯೋ ಕಾರ್ಬನ್ ಡೇಟಿಂಗ್' ಪರೀಕ್ಷೆಗೆ ಒಳಪಡಿಸಲಾಯಿತು. ಪರೀಕ್ಷೆಯ ವರದಿಯಂತೆ, ಈ ಅಸ್ಥಿಪಂಜರವು ಕ್ರಿಸ್ತ ಶಕ 987 ರಿಂದ 1052 ರ ನಡುವಿನ ಅವಧಿಗೆ ಸೇರಿದ್ದು ಎಂಬುದು ಸ್ಪಷ್ಟವಾಯಿತು. ಇದರಿಂದಾಗಿ ಶವಪೆಟ್ಟಿಗೆಯಲ್ಲಿದ್ದ ವ್ಯಕ್ತಿ ರೋಮನ್ ಯುಗದ ವ್ಯಾಲೇರಿಯಸ್ ಅಲ್ಲ, ಬದಲಾಗಿ ಸ್ಯಾಕ್ಸನ್ ಯುಗದ ಕೊನೆಯಲ್ಲಿ ವಾಸಿಸುತ್ತಿದ್ದ ವ್ಯಕ್ತಿ ಎಂಬುದು ದೃಢಪಟ್ಟಿತು.

ಪ್ರಿ-ಕನ್ಸ್ಟ್ರಕ್ಟ್ ಆರ್ಕಿಯಾಲಜಿಯ ಮಾನವ ಮೂಳೆ ತಜ್ಞ ಜೇಮ್ಸ್ ಯಂಗ್ ಲ್ಯಾಂಗ್‌ಥಾರ್ನ್ ಅವರ ವಿಶ್ಲೇಷಣೆಯಂತೆ, ಈ ಅಸ್ಥಿಪಂಜರವು ಸುಮಾರು 5 ಅಡಿ 9 ಇಂಚು ಎತ್ತರವಿದ್ದ ಹಾಗೂ 35 ರಿಂದ 49 ವರ್ಷ ವಯಸ್ಸಿನ ನಡುವೆ ಮೃತಪಟ್ಟ ಗಂಡಸಿನದ್ದಾಗಿದೆ. 19 ನೇ ಶತಮಾನದಲ್ಲಿ ಮಾಡಲಾಗಿದ್ದ ಅಂದಾಜಿನಲ್ಲಿ ಇದನ್ನು 30 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಯುವಕನದ್ದು ಎಂದು ಭಾವಿಸಲಾಗಿತ್ತು, ಆದರೆ ಹೊಸ ಸಂಶೋಧನೆ ಅದನ್ನು ತಳ್ಳಿಹಾಕಿದೆ.

ಇಬ್ಬರು ಮಠಾಧೀಶರ ಮೇಲೆ ಸಂಶೋಧಕರ ಕಣ್ಣು:

ವೆಸ್ಟ್‌ಮಿನಿಸ್ಟರ್ ಅಬ್ಬೆಯ ಪ್ರಮುಖ ಪುರಾತತ್ವಶಾಸ್ತ್ರಜ್ಞ ಪ್ರೊಫೆಸರ್ ವಾರ್ವಿಕ್ ರಾಡ್‌ವೆಲ್ ಅವರ ಪ್ರಕಾರ, ಈ ಅಸ್ಥಿಪಂಜರವು 11ನೇ ಶತಮಾನದಲ್ಲಿದ್ದ ಬೆನೆಡಿಕ್ಟೈನ್ ಮಠದ ಅಬ್ಬೆಯ ಮಠಾಧೀಶರಾಗಿದ್ದ ( ಕ್ರೈಸ್ತ ಗುರು) 'ಆಲ್ಫ್ವಿಗ್' ಅಥವಾ ಅವರ ಉತ್ತರಾಧಿಕಾರಿ 'ವುಲ್ನೋತ್' ಎಂಬ ಇಬ್ಬರಲ್ಲಿ ಒಬ್ಬರದ್ದಾಗಿರಬಹುದು.

ಆಲ್ಫ್ವಿಗ್: 1020 ರ ಸುಮಾರಿಗೆ ನಿಧನ

ವುಲ್ನೋತ್: 1049 ರಲ್ಲಿ ನಿಧನರಾಗಿದ್ದು, ಅವರನ್ನು ಅಬ್ಬೆಯಲ್ಲಿ ಸಮಾಧಿ ಮಾಡಲಾಗಿತ್ತು. ಈ ಇಬ್ಬರೂ ವ್ಯಕ್ತಿಗಳು ರೇಡಿಯೋ ಕಾರ್ಬನ್ ಡೇಟಿಂಗ್ ಸಮಯ ಮತ್ತು ಮೂಳೆಗಳ ವಯಸ್ಸಿನ ಅಂದಾಜಿಗೆ ಸರಿಯಾಗಿ ಹೊಂದಾಣಿಕೆಯಾಗುತ್ತಾರೆ.

ಕೊಳೆತು ಹೋದ ಮರದ ಶವಪೆಟ್ಟಿಗೆಯ ಗುರುತುಗಳು:

ಸಮಾಧಿಯ ರಚನೆಯು ಮತ್ತೊಂದು ಕುತೂಹಲಕಾರಿ ಸಂಗತಿಯನ್ನು ಬಹಿರಂಗಪಡಿಸಿದೆ. ಮಧ್ಯಕಾಲೀನ ಯುಗದಲ್ಲಿ ಅತ್ಯಂತ ಪ್ರಭಾವಿ ಹಾಗೂ ಗೌರವಾನ್ವಿತ ವ್ಯಕ್ತಿಗೆ ಮಾತ್ರ ಇಂತಹ ಅದ್ದೂರಿ ಸಮಾಧಿಯನ್ನು ನೀಡಲಾಗುತ್ತಿತ್ತು. ಪ್ರಾಚೀನ ರೋಮನ್ ಕಲ್ಲಿನ ಶವಪೆಟ್ಟಿಗೆಯೊಳಗೆ ಮೊದಲು ಮರದ ಶವಪೆಟ್ಟಿಗೆಯನ್ನು ಇರಿಸಿ, ಅದರ ಮೇಲೆ ಹೊಸ ಶಿಲುಬೆ ಕೆತ್ತಿದ ಕಲ್ಲಿನ ಮುಚ್ಚಳವನ್ನು ಮುಚ್ಚಲಾಗಿತ್ತು. ಶವಪೆಟ್ಟಿಗೆಯ ಸುತ್ತಲೂ ಕಂಡುಬಂದ ಬಿಳಿ ಸುಣ್ಣದ ಆಯತಾಕಾರದ ಕುರುಹುಗಳು, ಕಾಲಕ್ರಮೇಣ ಮರದ ಶವಪೆಟ್ಟಿಗೆ ಸಂಪೂರ್ಣವಾಗಿ ಕೊಳೆತು ಹೋಗಿರುವುದನ್ನು ತೋರಿಸುತ್ತವೆ.

ಒಟ್ಟಾರೆಯಾಗಿ, ವಿಜ್ಞಾನ ಮತ್ತು ಇತಿಹಾಸದ ಆಧುನಿಕ ತಂತ್ರಜ್ಞಾನಗಳು ಒಂದಾಗುವ ಮೂಲಕ, ಶತಮಾನಗಳಿಂದ ವೆಸ್ಟ್‌ಮಿನಿಸ್ಟರ್ ಅಬ್ಬೆಯಲ್ಲಿ ಮುಚ್ಚಿಹೋಗಿದ್ದ ಕಲ್ಲಿನ ಸಮಾಧಿಯ ನೈಜ ಇತಿಹಾಸವನ್ನು ಜಗತ್ತಿನ ಮುಂದೆ ತೆರೆದಿಟ್ಟಿವೆ.

ರಾಯಚೂರಿನಿಂದ 8 ಗಂಟೆ ಜರ್ನಿ ಮಾಡಿ ಈ ಹಳ್ಳಿಗೆ ಬಂದ್ರೆ ಇಲ್ಲಿನ ಬೋರ್‌ವೆಲ್‌ನಲ್ಲಿ 365 ದಿನವೂ ಕೊತಕೊತ ಕುದಿಯುವ ನೀರು ಬರುತ್ತೆ..!

Naveen Kodase — Wed, 28 Oct 2026 12:46:17 +0530

ಭದ್ರಾದ್ರಿ ಕೊತ್ತಗುಡೆಂ: ಸಾಮಾನ್ಯವಾಗಿ ಬೋರ್‌ವೆಲ್ ಕೊರೆದರೆ ತಂಪಾದ ನೀರು ಸಿಗುತ್ತದೆ. ಆದರೆ, ತೆಲಂಗಾಣದ ಒಂದು ಹಳ್ಳಿಯಲ್ಲಿ ಬೋರ್‌ವೆಲ್‌ಗಳಿಂದ ಸುಮಾರು 60 ಡಿಗ್ರಿ ಸೆಲ್ಸಿಯಸ್ ಉಷ್ಣಾಂಶದ ಬಿಸಿ ನೀರು ನಿರಂತರವಾಗಿ ಚಿಮ್ಮುತ್ತಿದೆ. ಕಳೆದ ನಾಲ್ಕು ದಶಕಗಳಿಂದ ಈ ವಿದ್ಯಮಾನ ಮುಂದುವರಿದಿದ್ದು, ಭೂಮಿಯೊಳಗಿನಿಂದ ನೈಸರ್ಗಿಕ ಒತ್ತಡದಲ್ಲಿ ಹೊರಬರುವ ಬಿಸಿ ನೀರು ಸ್ಥಳೀಯ ರೈತರ ಪಾಲಿಗೆ ವರದಾನವಾಗಿದೆ. ಈ ನೀರಿನ ಮೂಲವೇನು ಎಂಬ ಕುತೂಹಲದ ಜತೆಗೆ, ವಿದ್ಯುತ್ ಉತ್ಪಾದನೆಗೂ ಇದನ್ನು ಬಳಸಿಕೊಳ್ಳುವ ಪ್ರಯತ್ನ ನಡೆಯುತ್ತಿದೆ.

ರಾಯಚೂರಿನಿಂದ ಸುಮಾರು ಎಂಟು ಗಂಟೆಗಳ ಪ್ರಯಾಣದ ದೂರದಲ್ಲಿರುವ ತೆಲಂಗಾಣದ ಭದ್ರಾದ್ರಿ ಕೊತ್ತಗುಡೆಂ ಜಿಲ್ಲೆಯ ಮಣುಗೂರು ಮಂಡಲದ ಪಗಿಡೇರು ಗ್ರಾಮ ಈ ಅಪರೂಪದ ವಿದ್ಯಮಾನಕ್ಕೆ ಸಾಕ್ಷಿಯಾಗಿದೆ. ಇಲ್ಲಿನ ಬೋರ್‌ವೆಲ್‌ಗಳಿಂದ ಹೊಗೆಯಾಡುವಷ್ಟು ಬಿಸಿಯಾದ ನೀರು ಹೊರಬರುತ್ತಿದ್ದು, ಯಾವುದೇ ಮೋಟಾರ್, ಆಯಿಲ್ ಎಂಜಿನ್ ಅಥವಾ ವಿದ್ಯುತ್ ಸಹಾಯವಿಲ್ಲದೆ ನೈಸರ್ಗಿಕ ಒತ್ತಡದಿಂದಲೇ ನೀರು ಚಿಮ್ಮುತ್ತಿರುವುದು ವಿಶೇಷ.

ಭೂಮಿಯೊಳಗಿನಿಂದ ಉಕ್ಕಿ ಬರುತ್ತಿದೆ ಬಿಸಿ ನೀರು

ಸಾಮಾನ್ಯವಾಗಿ ಅಂತರ್ಜಲಕ್ಕಾಗಿ ಬೋರ್‌ವೆಲ್ ಕೊರೆದಾಗ ತಂಪಾದ ನೀರು ಸಿಗುತ್ತದೆ. ಕೆಲವು ಪ್ರದೇಶಗಳಲ್ಲಿ ಉಪ್ಪು ಮಿಶ್ರಿತ ನೀರು ದೊರೆಯುತ್ತದೆ. ಆದರೆ, ಪಗಿಡೇರು ಗ್ರಾಮದಲ್ಲಿ ಮಾತ್ರ ಬೋರ್‌ವೆಲ್‌ಗಳಿಂದ ಬಿಸಿನೀರು ಹೊರಬರುತ್ತಿದೆ. ಕಳೆದ ಸುಮಾರು 40 ವರ್ಷಗಳಿಂದ ವರ್ಷದ 365 ದಿನವೂ ಈ ನೀರು ನಿರಂತರವಾಗಿ ಹರಿಯುತ್ತಿದೆ.

ಸುಮಾರು ನಾಲ್ಕು ದಶಕಗಳ ಹಿಂದೆ ಗಣಿಗಾರಿಕೆಗೆ ಸಂಬಂಧಿಸಿದ ಭೂಗರ್ಭ ಸಮೀಕ್ಷೆಯ ಭಾಗವಾಗಿ ಅಧಿಕಾರಿಗಳು ಒಂದು ಕಿಲೋಮೀಟರ್‌ಗಿಂತಲೂ ಹೆಚ್ಚು ಆಳದ ಬೋರ್‌ವೆಲ್ ಕೊರೆದಿದ್ದರು. ಈ ಸಂದರ್ಭದಲ್ಲಿ ಭೂಮಿಯೊಳಗಿನಿಂದ ಬಿಸಿನೀರು ಹೊರಬರಲು ಆರಂಭಿಸಿತ್ತು. ಭೂಗರ್ಭದ ಹೆಚ್ಚಿನ ಉಷ್ಣಾಂಶ ಮತ್ತು ಗಂಧಕದ ಪ್ರಭಾವದಿಂದಾಗಿ ಸುಮಾರು 60 ಡಿಗ್ರಿ ಸೆಲ್ಸಿಯಸ್ ಉಷ್ಣಾಂಶದ ನೀರು ನಿರಂತರವಾಗಿ ಹೊರಬರುತ್ತಿದೆ ಎಂದು ವರದಿಯಾಗಿದೆ. ಯಾವುದೇ ಪಂಪ್ ಅಥವಾ ವಿದ್ಯುತ್ ಚಾಲಿತ ವ್ಯವಸ್ಥೆಯಿಲ್ಲದೆ ನೈಸರ್ಗಿಕ ಒತ್ತಡದಲ್ಲಿ ನೀರು ಮೇಲಕ್ಕೆ ಚಿಮ್ಮುತ್ತಿರುವುದು ಈ ಗ್ರಾಮದ ಪ್ರಮುಖ ವೈಶಿಷ್ಟ್ಯವಾಗಿದೆ.

ಬಿಸಿನೀರಿನಿಂದಲೇ 200 ಎಕರೆ ಭೂಮಿಯಲ್ಲಿ ಕೃಷಿ

ಪಗಿಡೇರು ಗ್ರಾಮದ ರೈತರಿಗೆ ಈ ಬಿಸಿನೀರಿನ ಸೆಲೆ ವರದಾನವಾಗಿದೆ. ಗ್ರಾಮದ ಸುಮಾರು 200 ಎಕರೆ ಕೃಷಿ ಭೂಮಿಗೆ ಇದೇ ನೀರು ಆಸರೆಯಾಗಿದೆ. ಹಿಂದೆ ನೀರಿನ ಕೊರತೆಯಿಂದಾಗಿ ಒಂದು ಬೆಳೆ ಬೆಳೆಯುವುದೂ ಕಷ್ಟವಾಗಿತ್ತು. ಆದರೆ, ಈಗ ನೀರಿನ ಲಭ್ಯತೆಯಿಂದ ರೈತರು ವರ್ಷಕ್ಕೆ ಎರಡು ಬೆಳೆಗಳನ್ನು ಬೆಳೆಯಲು ಸಾಧ್ಯವಾಗಿದೆ. ಆದರೆ, ಬೋರ್‌ವೆಲ್‌ನಿಂದ ಹೊರಬರುವ ಬಿಸಿನೀರನ್ನು ರೈತರು ನೇರವಾಗಿ ಬೆಳೆಗಳಿಗೆ ಹರಿಸುವುದಿಲ್ಲ. ಮೊದಲು ನೀರನ್ನು ಸಮೀಪದ ಹೊಂಡಗಳಿಗೆ ನೀರನ್ನು ತುಂಬಿಸುತ್ತಾರೆ. ಅಲ್ಲಿ ಒಂದು ದಿನದವರೆಗೆ ನೀರನ್ನು ತಣ್ಣಗಾಗಲು ಬಿಡುತ್ತಾರೆ. ನೀರು ಸಂಪೂರ್ಣವಾಗಿ ತಂಪಾದ ಬಳಿಕ ಅದನ್ನು ಭತ್ತದ ಗದ್ದೆಗಳಿಗೆ ಹರಿಸಲಾಗುತ್ತದೆ. ಈ ವಿಧಾನದಿಂದ ಬಿಸಿನೀರನ್ನು ಕೃಷಿಗೆ ಬಳಸಿಕೊಳ್ಳಲಾಗುತ್ತಿದೆ. ನೀರಿನ ಕೊರತೆಯಿಂದ ಸಂಕಷ್ಟ ಎದುರಿಸುತ್ತಿದ್ದ ರೈತರಿಗೆ ಈ ನೈಸರ್ಗಿಕ ಜಲಮೂಲ ಕೃಷಿ ಚಟುವಟಿಕೆಗಳನ್ನು ಮುಂದುವರಿಸಲು ನೆರವಾಗಿದೆ.

ಸಣ್ಣ ಭೂಕಂಪದಿಂದ ಎರಡು ಬೋರ್‌ವೆಲ್‌ಗಳು ಬಂದ್

ಗ್ರಾಮದಲ್ಲಿ ಈ ಹಿಂದೆ ಸಂಭವಿಸಿದ ಸಣ್ಣ ಭೂಕಂಪದ ಪರಿಣಾಮವಾಗಿ ಎರಡು ಬೋರ್‌ವೆಲ್‌ಗಳು ಮುಚ್ಚಿಹೋಗಿವೆ ಎಂದು ಸ್ಥಳೀಯರು ತಿಳಿಸಿದ್ದಾರೆ. ಇದರಿಂದ ಬಿಸಿನೀರಿನ ಲಭ್ಯತೆಯ ಮೇಲೆ ಪರಿಣಾಮ ಬೀರಿದ್ದು, ಉಳಿದ ಬೋರ್‌ವೆಲ್‌ಗಳನ್ನು ದುರಸ್ತಿಗೊಳಿಸುವಂತೆ ಹಾಗೂ ಹೊಸ ಬೋರ್‌ವೆಲ್‌ಗಳನ್ನು ಕೊರೆಸುವಂತೆ ರೈತರು ಸಂಬಂಧಪಟ್ಟ ಅಧಿಕಾರಿಗಳಿಗೆ ಮನವಿ ಮಾಡುತ್ತಿದ್ದಾರೆ. ಭೂಮಿಯೊಳಗಿನಿಂದ ನಿರಂತರವಾಗಿ ಬಿಸಿನೀರು ಹೊರಬರುವ ಈ ಅಪರೂಪದ ವಿದ್ಯಮಾನವನ್ನು ಕಣ್ತುಂಬಿಕೊಳ್ಳಲು ಬೇರೆ ಬೇರೆ ಪ್ರದೇಶಗಳಿಂದಲೂ ಪ್ರವಾಸಿಗರು ಪಗಿಡೇರು ಗ್ರಾಮಕ್ಕೆ ಭೇಟಿ ನೀಡುತ್ತಿದ್ದಾರೆ. ಇದರಿಂದ ಗ್ರಾಮವು ತನ್ನದೇ ಆದ ವಿಶೇಷ ಗುರುತನ್ನು ಪಡೆದುಕೊಂಡಿದೆ.

ಬಿಸಿನೀರಿನಿಂದ 20 ಕಿಲೋವ್ಯಾಟ್ ವಿದ್ಯುತ್ ಉತ್ಪಾದನೆಗೆ ಸಿದ್ಧತೆ

ಪಗಿಡೇರು ಗ್ರಾಮದ ಬಿಸಿನೀರಿನ ಸೆಲೆಯನ್ನು ಕೃಷಿಗೆ ಮಾತ್ರವಲ್ಲದೆ ವಿದ್ಯುತ್ ಉತ್ಪಾದನೆಗೂ ಬಳಸಿಕೊಳ್ಳುವ ಯೋಜನೆ ರೂಪಿಸಲಾಗಿದೆ. ಸಿಂಗರೇಣಿ ಸಂಸ್ಥೆಯು ಭೂಗರ್ಭದ ಉಷ್ಣಶಕ್ತಿಯನ್ನು ಬಳಸಿಕೊಂಡು ವಿದ್ಯುತ್ ಉತ್ಪಾದಿಸುವ ಪ್ರಯೋಗಕ್ಕೆ ಮುಂದಾಗಿದೆ.

ದೆಹಲಿಯ ವಿಜ್ಞಾನ ಸಂಸ್ಥೆಯ ನೆರವಿನೊಂದಿಗೆ 20 ಕಿಲೋವ್ಯಾಟ್ ವಿದ್ಯುತ್ ಉತ್ಪಾದಿಸುವ ಪ್ರಾಯೋಗಿಕ ಯೋಜನೆ ಸಿದ್ಧಪಡಿಸಲಾಗುತ್ತಿದೆ. ಭೂಮಿಯೊಳಗಿನ ಉಷ್ಣಶಕ್ತಿಯನ್ನು ಬಳಸಿಕೊಂಡು ವಿದ್ಯುತ್ ಉತ್ಪಾದಿಸುವ ಈ ಪ್ರಯತ್ನ ಯಶಸ್ವಿಯಾದರೆ, ಪಗಿಡೇರು ಗ್ರಾಮದಲ್ಲಿ ನೈಸರ್ಗಿಕ ಉಷ್ಣಶಕ್ತಿಯ ಬಳಕೆಗೆ ಹೊಸ ಅವಕಾಶಗಳು ತೆರೆದುಕೊಳ್ಳಲಿವೆ. ಯೋಜನೆಯಡಿ ಉತ್ಪಾದನೆಯಾಗುವ ವಿದ್ಯುತ್ ಅನ್ನು ಮೊದಲಿಗೆ ಗ್ರಾಮದ ಬೀದಿ ದೀಪಗಳಿಗೆ ಬಳಸಬೇಕು ಎಂಬುದು ಸ್ಥಳೀಯರ ಒತ್ತಾಯವಾಗಿದೆ. ಈ ಯೋಜನೆ ಯಶಸ್ವಿಯಾದರೆ, ಕೃಷಿಗೆ ನೆರವಾಗುತ್ತಿರುವ ನೈಸರ್ಗಿಕ ಬಿಸಿನೀರಿನ ಮೂಲವು ವಿದ್ಯುತ್ ಉತ್ಪಾದನೆಗೂ ಉಪಯುಕ್ತವಾಗಲಿದೆ.

ಒಟ್ಟಿನಲ್ಲಿ, ಕಳೆದ ನಾಲ್ಕು ದಶಕಗಳಿಂದ ಭೂಮಿಯೊಳಗಿನಿಂದ ನಿರಂತರವಾಗಿ ಬಿಸಿನೀರು ಚಿಮ್ಮುತ್ತಿರುವ ಪಗಿಡೇರು ಗ್ರಾಮವು ತನ್ನ ವಿಶಿಷ್ಟ ಭೂಗರ್ಭದ ವಿದ್ಯಮಾನದಿಂದ ಗಮನ ಸೆಳೆಯುತ್ತಿದೆ. ಕೃಷಿಗೆ ಆಸರೆಯಾಗಿರುವ ಈ ನೀರನ್ನು ವಿದ್ಯುತ್ ಉತ್ಪಾದನೆಗೂ ಬಳಸಿಕೊಳ್ಳುವ ಪ್ರಯತ್ನ ಫಲ ನೀಡುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.

ಭಾರತೀಯ ಅಂತರಿಕ್ಷ್‌ ಸ್ಟೇಷನ್‌ಗೆ ಇರಲಿದೆ ಎರಡು ರೋಬೋಟಿಕ್‌ ಆರ್ಮ್‌, ಭೂಮಿಯಿಂದ 450 ಕಿ.ಮೀ ಎತ್ತರದಲ್ಲಿರಲಿದೆ 54 ಟನ್‌ ತೂಕದ ನಿಲ್ದಾಣ!

Santosh Naik — Thu, 29 Oct 2026 22:30:06 +0530

ನವದೆಹಲಿ (ಅ.29): ಬಾಹ್ಯಾಕಾಶದಲ್ಲಿ ಸ್ವತಂತ್ರ ಮಾನವ ಸಹಿತ ನೌಕೆಯ ಮೂಲಸೌಕರ್ಯವನ್ನು ಹೊಂದುವ ಭಾರತದ ಕನಸು ಇದೀಗ ಮತ್ತಷ್ಟು ಹತ್ತಿರವಾಗಿದೆ. ಭಾರತ ನಿರ್ಮಿಸಲು ಉದ್ದೇಶಿಸಿರುವ ‘ಭಾರತೀಯ ಅಂತರಿಕ್ಷ ಸ್ಟೇಷನ್’ (BAS) ನಿಲ್ದಾಣವು ಅತ್ಯಾಧುನಿಕ ರೋಬೋಟಿಕ್ ಸಾಮರ್ಥ್ಯಗಳನ್ನು ಹೊಂದಿರಲಿದ್ದು, ಬಾಹ್ಯಾಕಾಶ ನಿಲ್ದಾಣದ ಹೊರಭಾಗದಲ್ಲಿ ಗಗನಯಾತ್ರಿಗಳು ಕೈಗೊಳ್ಳುವ ಪ್ರಮುಖ ಕಾರ್ಯಾಚರಣೆಗಳು, ಸ್ಟೇಷನ್‌ನ ರಚನಾತ್ಮಕ ತಪಾಸಣೆಗಳು ಹಾಗೂ ಮುಂಬರುವ ವಿಸ್ತರಣಾ ಕಾಮಗಾರಿಗಳಿಗೆ ನೆರವಾಗಲಿದೆ.

ನವದೆಹಲಿಯಲ್ಲಿ ನಡೆದ ‘ESTIC 2026’ ಸಮಾವೇಶದ ಸ್ಪೇಸ್ ಸೈನ್ಸ್ ಆಂಡ್ ಟೆಕ್ನಾಲಜೀಸ್ ಸೇಶನ್‌ನಲ್ಲಿ ಇಸ್ರೋದ ಬಿಎಎಸ್ (BAS) ಯೋಜನೆ ನಿರ್ದೇಶಕಿ (Project Director) ಕೆ. ಕಲ್ಪನಾ ಅವರು ಗುರುವಾರ (ಅಕ್ಟೋಬರ್ 29) ಈ ಮಹತ್ವದ ತಾಂತ್ರಿಕ ಬ್ಲೂಪ್ರಿಂಟ್ ಅನ್ನು ಅನಾವರಣಗೊಳಿಸಿದರು. ಈ ಮಾಹಿತಿಯ ಪ್ರಕಾರ, ನಿಲ್ದಾಣವು ಆಂತರಿಕ ಮತ್ತು ಬಾಹ್ಯ ರೋಬೋಟಿಕ್ ಹಸ್ತಗಳ ಜೊತೆಗೆ, ಸ್ವತಂತ್ರವಾಗಿ ಹಾರಾಡುವ ‘ಫ್ರೀ-ಫ್ಲೈಯಿಂಗ್ ವ್ಯವಸ್ಥೆಗಳು’ (Free-flying systems) ಹಾಗೂ ಮಾನವನಂತೆಯೇ ಕಾರ್ಯನಿರ್ವಹಿಸುವ ‘ಹ್ಯೂಮನಾಯ್ಡ್ ರೋಬೋಟ್‌ಗಳನ್ನು’ (Humanoid Robots) ಹೊಂದಿರಲಿದೆ.

5 ಮಾಡ್ಯೂಲ್‌ಗಳು ಹಾಗೂ 54 ಟನ್ ತೂಕದ ಮೆಗಾ ಸ್ಟೇಷನ್

ಇಸ್ರೋ ಪ್ರಸ್ತುತಪಡಿಸಿದ ವಿವರಣೆಯ ಪ್ರಕಾರ, ಈ ಸ್ವದೇಶಿ ಬಾಹ್ಯಾಕಾಶ ನಿಲ್ದಾಣವು ಒಟ್ಟು 5 ಪ್ರತ್ಯೇಕ ಮಾಡ್ಯೂಲ್‌ಗಳನ್ನು ಹೊಂದಿರಲಿದ್ದು, ಭೂಮಿಯ ಕೆಳ ಕಕ್ಷೆಯಲ್ಲಿ (Low Earth Orbit) ಸುಮಾರು 450 ಕಿಲೋಮೀಟರ್ ಎತ್ತರದಲ್ಲಿ ಹಾಗೂ 51.5 ಡಿಗ್ರಿ ವಾಲುವಿಕೆಯಲ್ಲಿ ಭೂಮಿಯನ್ನು ಪ್ರದಕ್ಷಿಣೆ ಹಾಕಲಿದೆ. ಈ ಸಂಪೂರ್ಣ ಸ್ಪೇಸ್ ಸ್ಟೇಷನ್ ಸುಮಾರು 54 ಟನ್ ತೂಕವನ್ನು ಹೊಂದಿರಲಿದ್ದು, 27 ಮೀಟರ್ ಉದ್ದ ಹಾಗೂ 20 ಮೀಟರ್ ಅಗಲದ ಬೃಹತ್ ಆಯಾಮಗಳನ್ನು ಹೊಂದಿರಲಿದೆ. ಈ ನಿಲ್ದಾಣದಲ್ಲಿ 3 ರಿಂದ 4 ಗಗನಯಾತ್ರಿಗಳು ನಿರಂತರವಾಗಿ ದೀರ್ಘಕಾಲ ನೆಲೆಸಲು ವ್ಯವಸ್ಥೆ ಮಾಡಲಾಗುತ್ತಿದ್ದು, ಕಿರು ಅವಧಿಯ ಮಿಷನ್‌ಗಳ ಸಂದರ್ಭದಲ್ಲಿ ಹೆಚ್ಚುವರಿಯಾಗಿ ಮತ್ತಿಬ್ಬರು/ಮೂವರು ಗಗನಯಾತ್ರಿಗಳಿಗೆ ಜಾಗ ಕಲ್ಪಿಸಲಾಗುತ್ತದೆ.

ವಾಸಯೋಗ್ಯ ಆವರಣವು (Habitable volume) ಸುಮಾರು 100 ಕ್ಯೂಬಿಕ್ ಮೀಟರ್‌ಗಳಷ್ಟು ಇರಲಿದ್ದು, ನಿಲ್ದಾಣದ ಕಾರ್ಯಾಚರಣೆಗೆ 60 ಕಿಲೋವ್ಯಾಟ್ ವಿದ್ಯುತ್ ಉತ್ಪಾದನಾ ಸಾಮರ್ಥ್ಯವನ್ನು ವಿನ್ಯಾಸಗೊಳಿಸಲಾಗಿದೆ.

ಸ್ಟೇಷನ್‌ನ 5 ಮಾಡ್ಯೂಲ್‌ಗಳು ಮತ್ತು ಅವುಗಳ ವಿಶಿಷ್ಟ ಪಾತ್ರಗಳು

BAS-01 (ಬೇಸ್ ಮಾಡ್ಯೂಲ್): ಇದು ತಂತ್ರಜ್ಞಾನಗಳ ಪರೀಕ್ಷಾ ವೇದಿಕೆಯಾಗಿ (Test bed) ಕಾರ್ಯನಿರ್ವಹಿಸಲಿದ್ದು, ನಿಲ್ದಾಣದ ಸೇವೆಗಳು, ಗಗನಯಾತ್ರಿಗಳ ವಸತಿ ಅಗತ್ಯಗಳು ಹಾಗೂ ಉಪಕರಣಗಳ 'ಪೇಲೋಡ್ ರಾಕ್‌'ಗಳನ್ನು ಬೆಂಬಲಿಸುತ್ತದೆ.

BAS-02 (ಕೋರ್ ಮಾಡ್ಯೂಲ್): ಇದು ಪ್ರಮುಖ ಕೇಂದ್ರ ಘಟಕವಾಗಿದ್ದು, ಡಾಕಿಂಗ್ ಮೂಲಸೌಕರ್ಯ, ಪೇಲೋಡ್ ರಾಕ್‌‌ಗಳು ಹಾಗೂ ಶೂನ್ಯ ಗುರುತ್ವಾಕರ್ಷಣೆಯಲ್ಲಿ ಗಗನಯಾತ್ರಿಗಳ ಆರೋಗ್ಯ ರಕ್ಷಣೆಗೆ ಬೇಕಾದ ವ್ಯಾಯಾಮ ಉಪಕರಣಗಳನ್ನು ಹೊಂದಿರಲಿದೆ.

BAS-03 (ಸೈನ್ಸ್ ಮಾಡ್ಯೂಲ್): ಈ ಘಟಕವು ಗಗನಯಾತ್ರಿಗಳ ಸ್ಪೇಸ್‌ವಾಕ್ (Spacewalks), ಪೇಲೋಡ್‌ಗಳು ಹಾಗೂ ಮರುಬಳಕೆಯ ಪರಿಸರ ನಿಯಂತ್ರಣ ಮತ್ತು ಜೀವ ರಕ್ಷಣಾ ವ್ಯವಸ್ಥೆಗಳನ್ನು (Regenerative ECLSS) ಬೆಂಬಲಿಸುತ್ತದೆ.

BAS-04 (ಲ್ಯಾಬ್ ಮಾಡ್ಯೂಲ್): ಇದು ಭೂಮಿಯನ್ನು ವೀಕ್ಷಿಸಲು 'ಕುಪೋಲಾ' (Cupola) ಕಿಟಕಿ ವ್ಯವಸ್ಥೆ, ಹೆಚ್ಚುವರಿ ಗಗನಯಾತ್ರಿಗಳ ಕೊಠಡಿಗಳು ಹಾಗೂ ಪ್ರಯೋಗಾಲಯದ ಸೌಲಭ್ಯಗಳನ್ನು ಒಳಗೊಂಡಿರುತ್ತದೆ.

BAS-05 (ಬರ್ತಿಂಗ್ ಮಾಡ್ಯೂಲ್): ಇದು ಕಾಮನ್ ಬರ್ತಿಂಗ್ ಮೆಕಾನಿಸಂ ಒದಗಿಸಲಿದ್ದು, ಭವಿಷ್ಯದ ವಿಸ್ತರಣೆಗಳು ಹಾಗೂ ಕಾರ್ಗೋ (ಸರಕು) ಮಾಡ್ಯೂಲ್‌ಗಳು ಬಂದು ಸಂಪರ್ಕ ಸಾಧಿಸಲು (Docking) ನೆರವಾಗುತ್ತದೆ.

ರೋಬೋಟಿಕ್ ಕಾರ್ಯಾಚರಣೆ ಮತ್ತು ಸೂಕ್ಷ್ಮ ಗುರುತ್ವಾಕರ್ಷಣೆ ಸಂಶೋಧನೆ

ಬಾಹ್ಯಾಕಾಶ ನಿಲ್ದಾಣದ ಐದೂ ಮಾಡ್ಯೂಲ್‌ಗಳಲ್ಲೂ ನೌಕೆಗಳು ಬಂದು ಕನೆಕ್ಟ್ ಆಗಲು 'ಡಾಕಿಂಗ್' ವ್ಯವಸ್ಥೆ ನೀಡಲಾಗಿದೆ. ವಿಕಿರಣ (Radiation), ಭಾರಿ ತಾಪಮಾನ ವೈಪರೀತ್ಯ, ಹಾಗೂ ಆಕಾಶದಲ್ಲಿ ತಲೆಯೆತ್ತುವ 'ಮೈಕ್ರೋಮೆಟಿಯೋರಾಯ್ಡ್' (ಉಲ್ಕಾಪಾತ) ಮತ್ತು ಬಾಹ್ಯಾಕಾಶ ತ್ಯಾಜ್ಯಗಳಿಂದ (Orbital debris) ನಿಲ್ದಾಣವನ್ನು ರಕ್ಷಿಸಲು ಅತ್ಯಾಧುನಿಕ ಕವರ್ ವ್ಯವಸ್ಥೆಯನ್ನು ರೂಪಿಸಲಾಗುತ್ತಿದೆ. ಈ ನಿಲ್ದಾಣವು ಸೂಕ್ಷ್ಮ ಗುರುತ್ವಾಕರ್ಷಣೆಯ (Microgravity) ವಾತಾವರಣದಲ್ಲಿ ವೈಜ್ಞಾನಿಕ ಪ್ರಯೋಗಗಳನ್ನು ನಡೆಸಲು ಅತ್ಯುತ್ತಮ ವೇದಿಕೆಯಾಗಲಿದೆ. ಮುಖ್ಯವಾಗಿ ಜೀವ ವಿಜ್ಞಾನ, ಔಷಧೀಯ ಸಂಶೋಧನೆ (Pharmaceuticals), ವಸ್ತು ವಿಜ್ಞಾನ (Materials science) ಹಾಗೂ ಸುಧಾರಿತ ಉತ್ಪಾದನಾ ತಂತ್ರಜ್ಞಾನಗಳ ಕ್ಷೇತ್ರದಲ್ಲಿ ಸಂಶೋಧನೆ ನಡೆಸಲು ಕೇಂದ್ರ ಸರ್ಕಾರ ಆದ್ಯತೆ ನೀಡಿದೆ.

ಉಡಾವಣಾ ಗುರಿ ಹಾಗೂ ಬಜೆಟ್ ವಿವರ

ಭಾರತವು ತನ್ನ ಗಗನಯಾತ್ರಿ ನೌಕೆ ಯೋಜನೆ 'ಗಗನಯಾನ್‌'ನಿಂದ (Gaganyaan) ಮುನ್ನಡೆದು ಬಾಹ್ಯಾಕಾಶದಲ್ಲಿ ಸ್ಥಿರ ಉಪಸ್ಥಿತಿ ಕಾಯ್ದುಕೊಳ್ಳಲು ಸಜ್ಜಾಗಿದೆ. ಈ ಯೋಜನೆಯಡಿ ತನ್ನ ಮೊದಲ ಮಾಡ್ಯೂಲ್ ‘BAS-01’ ಅನ್ನು 2028 ರ ವೇಳೆಗೆ ಉಡಾವಣೆ ಮಾಡುವ ಹಾಗೂ ಸಂಪೂರ್ಣ 5 ಮಾಡ್ಯೂಲ್‌ಗಳ ಸ್ಪೇಸ್ ಸ್ಟೇಷನ್ ಅನ್ನು 2035 ರ ವೇಳೆಗೆ ಪೂರ್ಣಪ್ರಮಾಣದಲ್ಲಿ ಕಾರ್ಯಾಚರಣೆಗೆ ತರುವ ಬೃಹತ್ ಗುರಿಯನ್ನು ಭಾರತ ಹೊಂದಿದೆ.

ಈ ಪೈಕಿ ಮೊದಲ ಮಾಡ್ಯೂಲ್‌ನ (BAS-01) ಅಭಿವೃದ್ಧಿ ಹಾಗೂ ಉಡಾವಣೆಗಾಗಿ 2025-2028 ರ ಅವಧಿಗೆ ಕೇಂದ್ರ ಸರ್ಕಾರವು ಈಗಾಗಲೇ ₹1,763 ಕೋಟಿ ಅನುಮೋದಿತ ಬಜೆಟ್ ಕಾಯ್ದಿರಿಸಿದೆ. ಈ ಬಾಹ್ಯಾಕಾಶ ಔಟ್‌ಪೋಸ್ಟ್ ನಿರ್ಮಾಣ ಹಾಗೂ ನಿರ್ವಹಣೆಯಲ್ಲಿ ರೋಬೋಟಿಕ್ ಸಿಸ್ಟಮ್‌ಗಳು ಅತ್ಯಂತ ಪ್ರಮುಖ ಪಾತ್ರ ವಹಿಸಲಿವೆ.

ಇಂಗ್ಲಿಷ್ನಲ್ಲಿ 2 O' Clock, 3 O'Clock ಎನ್ನುತ್ತೇವಲ್ಲ, ಈ 'ಓ' ಅಂದ್ರೇನು, ಅದು ಎಲ್ಲಿಂದ ಬಂತು ಗೊತ್ತಾ

Suchethana D — Wed, 28 Oct 2026 19:26:43 +0530

ಇಂಗ್ಲಿಷ್ನಲ್ಲಿ ಮಾತನಾಡುವಾಗ ನಾವು 2 ಗಂಟೆ, 3 ಗಂಟೆಗೆ 2 ಓ ಕ್ಲಾಕ್, 3 ಓ ಕ್ಲಾಕ್ (2 O'clock, 3 O'clock) ಅಂತ ಹೇಳ್ತೇವೆ ಅಲ್ವಾ. ಆದರೆ ಒಮ್ಮೆಯಾದರೂ ಈ 'O' ಎಲ್ಲಿಂದ, ಯಾಕೆ ಬಂತು ಎಂದು ಯೋಚನೆ ಮಾಡಿದ್ದೀರಾ. 3 ಕ್ಲಾಕ್, 4 ಕ್ಲಾಕ್ ಅನ್ನಬಹುದಿತ್ತು. ಆದರೆ 'ಓ' ಅಂತ ಮಧ್ಯೆ ಸೇರಿಸೋದು ಯಾಕೆ ಅನ್ನೋದು ಬಹುತೇಕ ಮಂದಿ ವಿಚಾರ ಮಾಡಲಿಕ್ಕಿಲ್ಲ. ಅದು ಬಂದ್ರೆ ನಮಗೇನು, ಅದು ಇರೋದೇ ಹಾಗೆ, ಹೇಳಿದ್ರೆ ಆಯ್ತು ಎಂದೇ ಹೆಚ್ಚಿನ ಮಂದಿ ಅಂದುಕೊಳ್ತಾರೆ. ಮತ್ತೆ ಕೆಲವರಿಗೆ ಇದರ ಬಗ್ಗೆ ಯೋಚನೆ ಬಂದರೂ ಉತ್ತರ ಹೊಳೆದಿರುವುದಿಲ್ಲ. ಯೋಚನೆ ಬಂದಿರಲಿ, ಬಿಟ್ಟಿರಲಿ. ಆದರೆ ಇಲ್ಲಿ ಇದರ ರೋಚಕ ಸ್ಟೋರಿ ಹೇಳ್ತೇವೆ ಕೇಳಿ.

ಬಂದದ್ದು ಎಲ್ಲಿಂದ?

14 ರಿಂದ 15ನೇ ಶತಮಾನದಲ್ಲಿ ಅರ್ಥಾತ್ Middle English ಕಾಲದಲ್ಲಿ, ಯಾಂತ್ರಿಕ ಗಡಿಯಾರಗಳು ಹೊಸದಾಗಿ ಚಾಲ್ತಿಗೆ ಬಂದಿತ್ತು. ಅಲ್ಲಿಯವರೆಗೂ ಜನರು ಸೂರ್ಯನ ಬೆಳಕು, ನೆರಳಿನ ಆಧಾರದ ಮೇಲೆ ಟೈಮ್ ನೋಡ್ತಿರೋದು ಗೊತ್ತೇ ಇದೆ. ಆ ಸಮಯದಲ್ಲಿ ಗಡಿಯಾರಗಳು ಚಾಲ್ತಿಗೆ ಬಂದಾಗ, ಸೂರ್ಯನ ಸಮಯಕ್ಕೂ, ಗಡಿಯಾರ ತೋರಿಸುವ ಸಮಯದಲ್ಲಿ ಸುಮಾರು ವ್ಯತ್ಯಾಸ ಇರುತ್ತಿತ್ತು. ಈ ಹಿನ್ನೆಲೆಯಲ್ಲಿ, ಯಾವ ಟೈಮ್ ಹೇಳ್ತಿರೋದು ಎಂದು ಸರಿಯಾಗಿ ಸೂಚಿಸಲು ಒಂದು ಶಬ್ದ ಬೇಕಿತ್ತು. ಆಗಲೇ ಹುಟ್ಟಿರೋದು ಈ 'ಓ'. ಇದರ ಅರ್ಥ 2 ಗಂಟೆಯಾಗಿದೆ ಅಂದುಕೊಳ್ಳಿ. ಆಗ ಜನರು 2 ಕ್ಲಾಕ್ ಎಂದರೆ ಅದು ಸೂರ್ಯನ ಟೈಮ್ ಆಗಿತ್ತು. ಆದರೆ ಅದನ್ನು ಹೊರತುಪಡಿಸಿ ಬೇರೆಯ ಸಮಯ ಎಂದು ಹೇಳಲು Off the Clock ಅಂದರೆ ಇದನ್ನು ಬಿಟ್ಟು ಮತ್ತೊಂದು ಟೈಮ್ (ಯಾಂತ್ರಿಕ ಗಡಿಯಾರದ ಟೈಂ) ಎಂದು ಹೇಳಲು 2 ಆಪ್ ದಿ ಟೈಮ್, 3 ಆಫ್ ದಿ ಟೈಂ ಎಂದು ಹೇಳಲು ಶುರು ಮಾಡಿದ್ರು.

ಕ್ರಮೇಣ ಇದು ಆಫ್ ಬದಲು ಷಾರ್ಟ್ ಫಾಮ್ಆಗಿ ಓ ಅಷ್ಟೇ ಉಳಿದುಕೊಂಡಿತು. 2 ಓ ಕ್ಲಾಕ್, 3 ಓ ಕ್ಲಾಕ್ಗೆ ಬಂದು ನಿಂತಿತು. ಸೂರ್ಯನ ಬೆಳಕಿನಿಂದ ಸಮಯ ಹೇಳೋದು ಬಿಟ್ಟು ಶತಮಾನ ಕಳೆದರೂ ಆ ಓ ಕ್ಲಾಕ್ ಮಾತ್ರ ಹಾಗೆಯೇ ಉಳಿದುಕೊಂಡಿದೆ!

ಕಾಲು, ಅರ್ಧ ಗಂಟೆಗೆ 'ಓ' ಬಳಸಲಿಲ್ಲ ಏಕೆ?

ಇಲ್ಲೊಂದು ಪ್ರಶ್ನೆಕೆಲವರನ್ನು ಕಾಡಬಹುದು. 3 ಓ ಕ್ಲಾಕ್ ಅಂತಾರೆಯೇ ವಿನಾ 3.15 ಓ ಕ್ಲಾಕ್ ಅನ್ನಲ್ಲ ಏಕೆ? ಆಗ ಏನು ಹೇಳ್ತಾ ಇದ್ದರು ಎನ್ನುವ ಡೌಟ್ ಕೂಡ ಬರಬಹುದು. ಇದಕ್ಕೂ ಉತ್ತರವಿದೆ. ಮೊದಲಿಗೆ ಗಡಿಯಾರ ಆವಿಷ್ಕಾರ ಮಾಡಿದ್ದಾಗ ಅಲ್ಲಿ ನಿಮಿಷದ ಮುಳ್ಳು ಇರಲಿಲ್ಲ. ಆದ್ದರಿಂದ 2, 3, 4, 5 ಅಷ್ಟೇ ಹೇಳುತ್ತಿದ್ದಂತೆ. ಹಾಗೆ ಹೇಳುವಾಗ ಓ ಕ್ಲಾಕ್ ಬಳಸುತ್ತಿದ್ದರು. ಕಾಲಕ್ರಮೇಣ ನಿಮಿಷಗಳ ಮುಳ್ಳನ್ನು ಸಂಶೋಧಿಸಲಾಯಿತು. ಆ ಸಮದಯಲ್ಲಿಯೇ ಜನರು ಈ ಯಾಂತ್ರಿಕ ಗಡಿಯಾರಕ್ಕೆ ಒಗ್ಗಿಕೊಂಡಿದ್ದರು. ಆದ್ದರಿಂದ ಮೂರು ಕಾಲು ಆದ್ರೆ, ತ್ರೀ ಫಿಫ್ಟೀನ್ ಎಂದೋ, quarter past three ಎಂದೋ ಹೇಳಲು ಆರಂಭಿಸಿದರು.

ಸೀಲಿಂಗ್ ಫ್ಯಾನ್ ರೆಕ್ಕೆಗಳು ಫ್ಲಾಟ್ ಆಗಿರದೆ ಓರೆಯಾಗಿರುವುದು ಯಾಕೆ? ಕರೆಂಟ್‌ ಬಿಲ್‌ಗೂ ಇದಕ್ಕೂ ಇದೆ ನೇರ ಸಂಬಂಧ

Ashwini HR — Tue, 27 Oct 2026 13:33:08 +0530

ಮನೆಯಲ್ಲಿ ತಿರುಗುವ ಸೀಲಿಂಗ್ ಫ್ಯಾನ್‌ನ ರೆಕ್ಕೆಗಳನ್ನು (Blades) ನೀವು ಎಂದಾದರೂ ಸೂಕ್ಷ್ಮವಾಗಿ ಗಮನಿಸಿದ್ದೀರಾ? ಅವು ಎಂದಿಗೂ ಸಂಪೂರ್ಣ ಚಪ್ಪಟೆಯಾಗಿ (Flat) ಇರುವುದಿಲ್ಲ. ಬದಲಿಗೆ ಕೊಂಚ ಬಾಗಿದಂತೆ ಅಥವಾ ಒಂದು ನಿರ್ದಿಷ್ಟ ಕೋನದಲ್ಲಿ ಓರೆಯಾಗಿರುತ್ತವೆ. ಫ್ಯಾನ್ ರೆಕ್ಕೆಗಳಿಗೆ ಈ ರೀತಿ ವಿಶಿಷ್ಟ ಆಕಾರ ನೀಡಿರುವುದು ಕೇವಲ ಅಂದಕ್ಕಾಗಿ ಮಾಡಿದ ಡಿಸೈನ್ ಅಂದುಕೊಂಡರೆ ನಿಮ್ಮ ಅನಿಸಿಕೆ ತಪ್ಪು! ಇದರ ಹಿಂದೆ ಗಾಳಿಯ ಹರಿವಿಗೆ ಸಂಬಂಧಿಸಿದ ಅದ್ಭುತ ವಿಜ್ಞಾನ ಹಾಗೂ ತಂತ್ರಜ್ಞಾನ ಅಡಗಿದೆ.

ಗಾಳಿಯ ಸಂಚಾರವೇ ಇರಲ್ಲ

ತಾಂತ್ರಿಕ ಭಾಷೆಯಲ್ಲಿ ಫ್ಯಾನ್ ರೆಕ್ಕೆಗಳ ಈ ಓರೆ ಅಥವಾ ಕೋನವನ್ನು 'ಬ್ಲೇಡ್ ಪಿಚ್' (Blade Pitch) ಎಂದು ಕರೆಯಲಾಗುತ್ತದೆ. ಒಂದು ವೇಳೆ ಸೀಲಿಂಗ್ ಫ್ಯಾನ್ ರೆಕ್ಕೆಗಳು ಸಂಪೂರ್ಣವಾಗಿ ಫ್ಲಾಟ್ ಆಗಿದ್ದರೆ, ಫ್ಯಾನ್ ಎಷ್ಟೇ ವೇಗವಾಗಿ ತಿರುಗಿದರೂ ಅದು ಗಾಳಿಯನ್ನು ಕೇವಲ ಚಾಕುವಿನಂತೆ ಸೀಳುತ್ತಾ ತಿರುಗುತ್ತದೆಯೇ ಹೊರತು, ಗಾಳಿಯನ್ನು ಕೆಳಮುಖವಾಗಿ ತಳ್ಳಲು (Push) ಸಾಧ್ಯವಾಗುವುದಿಲ್ಲ. ಇದರಿಂದ ಕೋಣೆಯಲ್ಲಿ ಗಾಳಿಯ ಸಂಚಾರವೇ ಇರುವುದಿಲ್ಲ. ಅಷ್ಟೇ ಅಲ್ಲದೆ, ಚಪ್ಪಟೆ ರೆಕ್ಕೆಗಳು ಮೋಟಾರ್ ಮೇಲೆ ಅನಗತ್ಯ ಒತ್ತಡವನ್ನು ಹಾಕಿ ಅದರ ಆಯಸ್ಸನ್ನು ಕಡಿಮೆ ಮಾಡುತ್ತವೆ.

ಅದಕ್ಕಾಗಿಯೇ ಫ್ಯಾನ್ ರೆಕ್ಕೆಗಳನ್ನು ಕೊಂಚ ಓರೆಯಾಗಿ ವಿನ್ಯಾಸಗೊಳಿಸಲಾಗುತ್ತದೆ. ಈ ವಿಶಿಷ್ಟ ಕೋನವು ಫ್ಯಾನ್ ತಿರುಗುವಾಗ ಮೇಲಿನ ಗಾಳಿಯನ್ನು ಸೆಳೆದುಕೊಂಡು ನಿರಂತರವಾಗಿ ಕೆಳಮುಖವಾಗಿ ತಳ್ಳುತ್ತದೆ. ಈ ವಿಶೇಷ ಏರೋಡೈನಾಮಿಕ್ (Aerodynamic) ಆಕಾರವು ಗಾಳಿಯ ಪ್ರತಿರೋಧವನ್ನು ಕಡಿಮೆ ಮಾಡಿ, ಶಬ್ದವಿಲ್ಲದೆ (Silent) ಕೋಣೆಯ ಮೂಲೆ ಮೂಲೆಗೂ ಸರಾಗವಾಗಿ ತಂಪಾದ ಗಾಳಿ ಹರಡುವಂತೆ ಮಾಡುತ್ತದೆ.

ರೆಕ್ಕೆಗಳನ್ನು ಹೆಚ್ಚು ಬಗ್ಗಿಸಿದರೆ ಹೆಚ್ಚು ಗಾಳಿ ಬರುತ್ತದೆಯೇ?

ರೆಕ್ಕೆಗಳ ಕೋನ (Pitch) ಹೆಚ್ಚಾದಷ್ಟೂ ಗಾಳಿಯ ಹರಿವು ಹೆಚ್ಚಾಗುವುದು ನಿಜ. ಆದರೆ, ರೆಕ್ಕೆಗಳನ್ನು ಅತಿಯಾಗಿ ಬಗ್ಗಿಸಿದರೆ ಗಾಳಿಯ ತಡೆತ ಹೆಚ್ಚಾಗಿ ಮೋಟಾರ್ ಮೇಲೆ ಭಾರಿ ಹೊರೆ ಬೀಳುತ್ತದೆ. ಇದರಿಂದ ಫ್ಯಾನ್ ನಿಧಾನವಾಗುವುದಲ್ಲದೆ, ವಿದ್ಯುತ್ ಬಿಲ್ ಕೂಡ ಜಾಸ್ತಿ ಬರುತ್ತದೆ!

ಅದಕ್ಕಾಗಿಯೇ ಫ್ಯಾನ್ ತಯಾರಿಕಾ ಕಂಪನಿಗಳು ಗಾಳಿಯ ಹರಿವು, ಮೋಟಾರ್‌ನ ಸಾಮರ್ಥ್ಯ ಮತ್ತು ವಿದ್ಯುತ್ ಉಳಿತಾಯ ಈ ಮೂರರ ನಡುವೆ ಸರಿಯಾದ ಸಮತೋಲನ (Balance) ಕಾಪಾಡಿಕೊಳ್ಳಲು ರೆಕ್ಕೆಗಳನ್ನು ಒಂದು ನಿಖರವಾದ ಕೋನದಲ್ಲಿ (ಸಾಮಾನ್ಯವಾಗಿ 12 ರಿಂದ 15 ಡಿಗ್ರಿ) ಬಾಗಿಸಿ ತಯಾರಿಸುತ್ತವೆ.

ಭಾರತದಲ್ಲಿ 3 ರೆಕ್ಕೆಗಳು, ವಿದೇಶಗಳಲ್ಲಿ 4 ಅಥವಾ 5 ರೆಕ್ಕೆಗಳು ಏಕೆ? (3 Blades vs 4-5 Blades)

ಭಾರತದಲ್ಲಿ: ನಮಗೆ ನೇರವಾಗಿ ಮೈಮೇಲೆ ವೇಗವಾಗಿ ಗಾಳಿ ಬೀಸಬೇಕು (High Air Delivery). 3 ರೆಕ್ಕೆಗಳಿರುವ ಫ್ಯಾನ್ ಕಡಿಮೆ ಭಾರ ಹೊಂದಿದ್ದು, ಮೋಟಾರ್ ವೇಗವಾಗಿ ತಿರುಗಿ ಹೆಚ್ಚಿನ ಗಾಳಿ ಕೊಡುತ್ತದೆ.

ಅಮೆರಿಕ/ಯುರೋಪ್‌ನಲ್ಲಿ: ಅಲ್ಲಿ ಈಗಾಗಲೇ ಎಸಿ (AC) ಇರುತ್ತದೆ. ಫ್ಯಾನ್ ಕೇವಲ ರೂಮಿನಲ್ಲಿ ಗಾಳಿ ಹರಡಲು ಮತ್ತು ಯಾವುದೇ ಶಬ್ದವಿಲ್ಲದೆ (Silent) ಕೆಲಸ ಮಾಡಲು ಮಾತ್ರ ಬಳಕೆಯಾಗುತ್ತದೆ. ಹಾಗಾಗಿ ಅಲ್ಲಿ 4 ಅಥವಾ 5 ರೆಕ್ಕೆಗಳ ಫ್ಯಾನ್ ಬಳಸುತ್ತಾರೆ.

ಬೇಸಿಗೆ ಮತ್ತು ಚಳಿಗಾಲದ ಮೋಡ್ (ದಿಕ್ಕು ಬದಲಾವಣೆ)

ಬೇಸಿಗೆಯಲ್ಲಿ ಫ್ಯಾನ್ ಆಂಟಿ-ಕ್ಲಾಕ್‌ವೈಸ್ (Anti-clockwise - ಎಡದಿಂದ ಬಲಕ್ಕೆ) ತಿರುಗಬೇಕು, ಆಗ ಮಾತ್ರ ಗಾಳಿ ಕೆಳಗೆ ಬರುತ್ತದೆ.

ಚಳಿಗಾಲದಲ್ಲಿ ಫ್ಯಾನ್ ಕ್ಲಾಕ್‌ವೈಸ್ (Clockwise) ತಿರುಗಿದರೆ, ನೆಲದ ಮೇಲಿನ ತಣ್ಣನೆ ಗಾಳಿಯನ್ನು ಮೇಲೆಳೆದುಕೊಂಡು, ಮೇಲಿರುವ ಬೆಚ್ಚನೆಯ ಗಾಳಿಯನ್ನು ಕೋಣೆಯ ಸುತ್ತಲೂ ಹರಡುತ್ತದೆ (ಇದಕ್ಕಾಗಿ ಕೆಲವು ಮಾಡರ್ನ್ ಫ್ಯಾನ್‌ಗಳಲ್ಲಿ ಸ್ವಿಚ್ ಇರುತ್ತದೆ).

ವೇಗವಾಗಿ ತಿರುಗುವ ಫ್ಯಾನ್ ಮೇಲೂ ಧೂಳು ಕೂರುವುದು ಏಕೆ?

ಫ್ಯಾನ್ ತಿರುಗುವಾಗ ರೆಕ್ಕೆಗಳ ತುದಿಗಳು ಗಾಳಿಯ ಘರ್ಷಣೆಯಿಂದಾಗಿ ‘ಸ್ಥಿರ ವಿದ್ಯುತ್’ (Static Electricity) ಉತ್ಪಾದಿಸುತ್ತವೆ. ಇದು ಗಾಳಿಯಲ್ಲಿರುವ ಸಣ್ಣ ಧೂಳಿನ ಕಣಗಳನ್ನು ಆಯಸ್ಕಾಂತದಂತೆ ತನ್ನತ್ತ ಸೆಳೆದುಕೊಳ್ಳುತ್ತದೆ.

ವಿಷಕಾರಿ ಹಾವುಗಳ ಮೈಮೇಲಿನ ಆ ಕಣ್ಣು ಕುಕ್ಕುವ ಬಣ್ಣಗಳ ರಹಸ್ಯವೇನು? ರೋಮಾಂಚನಕಾರಿ ವೈಜ್ಞಾನಿಕ ವರದಿ ಇಲ್ಲಿದೆ

Chandrashekar GS — Tue, 20 Oct 2026 13:51:12 +0530

ವಿಷಕಾರಿ ಹಾವುಗಳ ಬಣ್ಣವೇ ಅಪಾಯದ ಎಚ್ಚರಿಕೆಯೇ? ಹೊಸ ಅಧ್ಯಯನದಲ್ಲಿ ಕುತೂಹಲಕಾರಿ ಮಾಹಿತಿ

ಹಾವು ಎಂದಾಕ್ಷಣ ಅದು ಶತ್ರುಗಳಿಂದ ತಪ್ಪಿಸಿಕೊಳ್ಳಲು ಮರೆಮಾಚಿಕೊಳ್ಳುತ್ತದೆ ಎಂಬ ಕಲ್ಪನೆ ಸಾಮಾನ್ಯ. ಆದರೆ ಕೆಲವು ಹಾವುಗಳ ವಿಷಯದಲ್ಲಿ ಇದಕ್ಕೆ ವಿರುದ್ಧವಾದ ಸಂಗತಿ ಕಂಡುಬಂದಿದೆ. ವಿಷಕಾರಿ ಹಾವುಗಳು ವಿಷಕಾರಿಯಲ್ಲದ ಹಾವುಗಳಿಗಿಂತ ತಮ್ಮ ಸುತ್ತಲಿನ ಪರಿಸರದಲ್ಲಿ ಹೆಚ್ಚು ಎದ್ದು ಕಾಣುವ ಬಣ್ಣ ಮತ್ತು ವಿನ್ಯಾಸಗಳನ್ನು ಹೊಂದಿರುವ ಸಾಧ್ಯತೆ ಹೆಚ್ಚಿದೆ ಎಂದು ಹೊಸ ಸಂಶೋಧನೆ ತಿಳಿಸಿದೆ. ಈ ಬಣ್ಣಗಳು ಪರಭಕ್ಷಕಗಳಿಗೆ ಅಪಾಯದ ಸೂಚನೆ ನೀಡುವಲ್ಲಿ ಪಾತ್ರ ವಹಿಸಿರಬಹುದು ಎಂದು ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದಾರೆ.

450ಕ್ಕೂ ಹೆಚ್ಚು ಹಾವುಗಳ ಅಧ್ಯಯನ

ಐರ್ಲೆಂಡ್‌ನ ಗಾಲ್ವೇ ವಿಶ್ವವಿದ್ಯಾಲಯದ ಸಂಶೋಧಕರು ನಡೆಸಿದ ಈ ಅಧ್ಯಯನವು Journal of Animal Ecology ಎಂಬ ವೈಜ್ಞಾನಿಕ ನಿಯತಕಾಲಿಕದಲ್ಲಿ ಪ್ರಕಟವಾಗಿದೆ. ಜಗತ್ತಿನ ವಿವಿಧ ಪ್ರದೇಶಗಳ 450ಕ್ಕೂ ಹೆಚ್ಚು ಹಾವುಗಳ ಚಿತ್ರಗಳನ್ನು ಪರಿಶೀಲಿಸಿ ಸಂಶೋಧನೆ ನಡೆಸಲಾಗಿದೆ. ಇದಕ್ಕಾಗಿ iNaturalist ಎಂಬ ನಾಗರಿಕ ವಿಜ್ಞಾನ ವೇದಿಕೆಯಲ್ಲಿ ಸಂಗ್ರಹಿಸಲಾದ ಚಿತ್ರಗಳನ್ನು ಬಳಸಲಾಗಿದೆ.

ಈ ಅಧ್ಯಯನದ ವಿಶೇಷವೆಂದರೆ ಹಾವುಗಳ ಬಣ್ಣವನ್ನು ಪ್ರತ್ಯೇಕವಾಗಿ ಪರಿಗಣಿಸಿಲ್ಲ. ಅವು ವಾಸಿಸುವ ನೈಸರ್ಗಿಕ ಪರಿಸರದ ಹಿನ್ನೆಲೆಯಲ್ಲಿ ಹಾವುಗಳು ಎಷ್ಟು ಸ್ಪಷ್ಟವಾಗಿ ಕಾಣುತ್ತವೆ ಎಂಬುದನ್ನು ಸಂಶೋಧಕರು ಗಮನಿಸಿದ್ದಾರೆ. ಈ ವಿಶ್ಲೇಷಣೆಯಲ್ಲಿ ವಿಷಕಾರಿ ಹಾವುಗಳು ವಿಷಕಾರಿಯಲ್ಲದ ಹಾವುಗಳಿಗಿಂತ ಸರಾಸರಿಯಾಗಿ ಪರಿಸರದಿಂದ ಹೆಚ್ಚು ಭಿನ್ನವಾಗಿ ಕಾಣುವ ಪ್ರವೃತ್ತಿ ಹೊಂದಿರುವುದು ಕಂಡುಬಂದಿದೆ.

ಕೆಂಪು, ಹಳದಿ ಬಣ್ಣಗಳ ಹಿಂದಿನ ರಹಸ್ಯವೇನು?

ಪ್ರಕೃತಿಯಲ್ಲಿ ಬಣ್ಣಗಳು ಹಲವು ಉದ್ದೇಶಗಳನ್ನು ಪೂರೈಸುತ್ತವೆ. ಕೆಲವು ಪ್ರಾಣಿಗಳು ಪರಿಸರದಲ್ಲಿ ಬೆರೆತು ಶತ್ರುಗಳಿಂದ ತಪ್ಪಿಸಿಕೊಳ್ಳುತ್ತವೆ. ಇನ್ನು ಕೆಲವು ಪ್ರಾಣಿಗಳು ತಮ್ಮ ಬಣ್ಣ ಮತ್ತು ವಿನ್ಯಾಸಗಳ ಮೂಲಕ ಅಪಾಯದ ಸೂಚನೆ ನೀಡುತ್ತವೆ. ಇದನ್ನು ವಿಜ್ಞಾನದಲ್ಲಿ ‘ಎಚ್ಚರಿಕೆಯ ಬಣ್ಣ ವಿನ್ಯಾಸ’ (Warning Colouration) ಎಂದು ಕರೆಯಲಾಗುತ್ತದೆ.

ಕೆಂಪು, ಹಳದಿ ಹಾಗೂ ಸ್ಪಷ್ಟವಾಗಿ ಎದ್ದು ಕಾಣುವ ಬಣ್ಣದ ವಿನ್ಯಾಸಗಳು ಕೆಲವು ವಿಷಕಾರಿ ಹಾವುಗಳಲ್ಲಿ ಕಂಡುಬರುತ್ತವೆ. ಇಂತಹ ಬಣ್ಣಗಳನ್ನು ಗಮನಿಸಿದ ಪರಭಕ್ಷಕಗಳು ಆ ಹಾವು ಅಪಾಯಕಾರಿ ಇರಬಹುದು ಎಂದು ಗುರುತಿಸಿ ದಾಳಿ ಮಾಡುವುದರಿಂದ ಹಿಂದೆ ಸರಿಯಬಹುದು ಎಂಬುದು ಸಂಶೋಧಕರ ಊಹೆ. ಹೀಗಾಗಿ ಕೆಲವು ಹಾವುಗಳಿಗೆ ಮರೆಮಾಚಿಕೊಳ್ಳುವುದಕ್ಕಿಂತ ಎದ್ದು ಕಾಣುವುದೇ ಬದುಕುಳಿಯಲು ಸಹಾಯ ಮಾಡಿರಬಹುದು.

ಎಲ್ಲ ವಿಷಕಾರಿ ಹಾವುಗಳೂ ಬಣ್ಣಬಣ್ಣವಾಗಿರುವುದಿಲ್ಲ!

ಆದರೆ ಈ ಅಧ್ಯಯನವು ಎಲ್ಲ ವಿಷಕಾರಿ ಹಾವುಗಳೂ ಗಾಢ ಅಥವಾ ಆಕರ್ಷಕ ಬಣ್ಣಗಳನ್ನು ಹೊಂದಿರುತ್ತವೆ ಎಂದು ಹೇಳುವುದಿಲ್ಲ. ಅನೇಕ ವಿಷಕಾರಿ ಹಾವುಗಳು ಪರಿಸರದಲ್ಲಿ ಸುಲಭವಾಗಿ ಗುರುತಿಸಲಾಗದಂತೆ ಮರೆಮಾಚಿಕೊಳ್ಳುತ್ತವೆ. ಹಾಗೆಯೇ, ಬಣ್ಣದ ಆಧಾರದ ಮೇಲೆ ಮಾತ್ರ ಹಾವು ವಿಷಕಾರಿಯೇ ಅಥವಾ ಅಲ್ಲವೇ ಎಂದು ನಿರ್ಧರಿಸಲು ಸಾಧ್ಯವಿಲ್ಲ.

ಒಟ್ಟಿನಲ್ಲಿ, ಹಾವುಗಳ ಬಣ್ಣವು ಅವುಗಳ ಬದುಕುಳಿಯುವ ತಂತ್ರದ ಒಂದು ಭಾಗವಾಗಿರಬಹುದು ಎಂಬುದಕ್ಕೆ ಈ ಸಂಶೋಧನೆ ಹೊಸ ಸುಳಿವು ನೀಡಿದೆ. ಆದರೆ ಹಾವು ಎದುರಾದಾಗ ಅದರ ಬಣ್ಣ ನೋಡಿ ಅಪಾಯವನ್ನು ಅಂದಾಜಿಸುವ ಬದಲು ಸುರಕ್ಷಿತ ಅಂತರ ಕಾಯ್ದುಕೊಳ್ಳುವುದು ಮತ್ತು ತಜ್ಞರ ನೆರವು ಪಡೆಯುವುದೇ ಸೂಕ್ತ.

1,800 ರೂ.ಗೆ 'ದೇಸಿ AC' ತಯಾರಿಸಿದ 16ರ ಬಾಲೆ: ಐಐಟಿ ದೆಹಲಿಯಲ್ಲೂ ಆಯ್ಕೆ- ಇದರ ಕಾರ್ಯವೈಖರಿ ಹೀಗಿದೆ

Suchethana D — Fri, 23 Oct 2026 12:23:30 +0530

ಝಾನ್ಸಿ: ಇಂದು ಬಹುತೇಕ ಕಡೆಗಳಲ್ಲಿ ಫ್ಯಾನ್ಸ್ಗಳ ಜಾಗವನ್ನು ಏರ್ ಕೂಲರ್ (AC) ಆವರಿಸಿಕೊಂಡಿದೆ. ಕಚೇರಿಗಳಲ್ಲಿಯೂ ಇದು ಮಾಮೂಲಾಗಿದೆ. ಆದರೆ ಇದನ್ನು ಹೆಚ್ಚಾಗಿ ಬಳಸಿದರೆ ಅದರಿಂದ ಸಿಕ್ಕಾಪಟ್ಟೆ ಅಪಾಯ ಎನ್ನುವುದು ಇದಾಗಲೇ ಸಾಬೀತು ಕೂಡ ಆಗಿದ್ದರೂ, ಬಿಸಿಲಿನ ಝಳಕ್ಕೆ ಎಸಿ ಹಲವರಿಗೆ ತಂಪನ್ನು ಒದಗಿಸುತ್ತವೆ. ಇಂದು ಬಹುತೇಕಮನೆಗಳಲ್ಲಿ ಕೂಡ ಎಸಿ ಆವರಿಸಿಕೊಂಡಿದ್ದರೂ, ಅವುಗಳ ಬೆಲೆ ಮತ್ತು ವಿದ್ಯುತ್ ವೆಚ್ಚಗಳು ಎಲ್ಲರ ಬಜೆಟ್‌ಗೆ ಸರಿಹೊಂದುವುದಿಲ್ಲ. ಕೆಲವರಿಗೆ ಎಸಿಯ ಆಸೆ ಇದ್ದರೂ, ಕೈಗೆಟುಕುವ ದರದಲ್ಲಿ ಸಿಗದ ಕಾರಣ ಅದನ್ನು ಅಳವಡಿಸಿಕೊಳ್ಳುವುದಿಲ್ಲ. ಇಂಥವರನ್ನು ಗಮನದಲ್ಲಿ ಇಟ್ಟುಕೊಂಡೇ ಉತ್ತರ ಪ್ರದೇಶದ ಝಾನ್ಸಿಯ 16 ವರ್ಷದ ಕಲ್ಯಾಣಿ ಶ್ರೀವಾಸ್ತವ, ತನ್ನ ಜಾಣ್ಮೆ ಮತ್ತು ಕಠಿಣ ಪರಿಶ್ರಮವನ್ನು ಬಳಸಿಕೊಂಡು, ಕೇವಲ 1,800 ರೂಪಾಯಿಗಳ ಬೆಲೆಯ ದೇಸಿ ಎಸಿಯನ್ನು ರಚಿಸಿದ್ದಾರೆ.

'ದೇಸಿ ಎಸಿ'

ವರದಿಗಳ ಪ್ರಕಾರ, ಕಲ್ಯಾಣಿ ತನ್ನ ಯೋಜನೆಗೆ 'ದೇಸಿ ಎಸಿ' ಎಂದು ಹೆಸರಿಸಿದ್ದಾರೆ. ಇದು ಸಾಂಪ್ರದಾಯಿಕ ಹವಾನಿಯಂತ್ರಣಗಳಿಗಿಂತ ಸಾಕಷ್ಟು ಭಿನ್ನವಾಗಿದೆ. ಇದು ಥರ್ಮೋಕೋಲ್‌ನಿಂದ ಮಾಡಿದ ಐಸ್ ಬಾಕ್ಸ್ ಅನ್ನು ಬಳಸುತ್ತದೆ ಮತ್ತು 12-ವೋಲ್ಟ್ ಡಿಸಿ ಫ್ಯಾನ್ ಅನ್ನು ಹೊಂದಿದೆ. ಫ್ಯಾನ್ ಸಹಾಯದಿಂದ, ಪೆಟ್ಟಿಗೆಯೊಳಗಿನ ತಂಪಾದ ಗಾಳಿಯು ಮುಂದಕ್ಕೆ ಚಲಿಸುತ್ತದೆ ಮತ್ತು ಮೊಣಕೈ ಪೈಪ್ ಮೂಲಕ ನಿರ್ಗಮಿಸುತ್ತದೆ. ಸುಮಾರು ಒಂದು ಗಂಟೆ ಬಳಸಿದ ನಂತರ, ಕೋಣೆಯ ಉಷ್ಣತೆಯು ಸುಮಾರು 4 ರಿಂದ 5 ಡಿಗ್ರಿಗಳಷ್ಟು ಕಡಿಮೆಯಾಗಬಹುದು. ಆದಾಗ್ಯೂ, ನಿಜವಾದ ಪರಿಣಾಮವು ಕೋಣೆಯ ಗಾತ್ರ, ಹೊರಗಿನ ತಾಪಮಾನ ಮತ್ತು ಬಳಕೆಯ ಪರಿಸ್ಥಿತಿಗಳನ್ನು ಅವಲಂಬಿಸಿರುತ್ತದೆ. ಕಲ್ಯಾಣಿಯ ನಾವೀನ್ಯತೆ ಕೇವಲ ಕಡಿಮೆ ಬೆಲೆಯಿಂದಾಗಿ ವಿಶೇಷವಲ್ಲ. ವರದಿಗಳ ಪ್ರಕಾರ, ಈ ಮಾದರಿಯು ಸೌರಶಕ್ತಿಯ ಮೇಲೆ ಕಾರ್ಯನಿರ್ವಹಿಸಬಲ್ಲದು, ಇದು ವಿದ್ಯುತ್ ವೆಚ್ಚವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಇದಲ್ಲದೆ, ಇದು ಸಾಂಪ್ರದಾಯಿಕ ಎಸಿಗಳಂತೆ ಸಿಎಫ್‌ಸಿ ಆಧರಿತ ಕೂಲಿಂಗ್ ವ್ಯವಸ್ಥೆಯನ್ನು ಹೊಂದಿಲ್ಲ.

ಐಐಟಿ ದೆಹಲಿಗೆ ತಲುಪಿದ ಎಸಿ

ಕಲ್ಯಾಣಿಯ ಕಠಿಣ ಪರಿಶ್ರಮವನ್ನು ಸಹ ಗುರುತಿಸಲಾಗಿದೆ. ಅವರ 'ದೇಸಿ ಎಸಿ' ಮಾದರಿಯನ್ನು ಐಐಟಿ ದೆಹಲಿಯ ರಾಷ್ಟ್ರೀಯ ಮಟ್ಟದ ಮಾದರಿ ಸ್ಪರ್ಧೆಗೆ ಆಯ್ಕೆ ಮಾಡಲಾಗಿದೆ. ಕಲ್ಯಾಣಿಯ ಪ್ರತಿಭೆ ವಿಜ್ಞಾನಕ್ಕೆ ಸೀಮಿತವಾಗಿಲ್ಲ. ಅವರು ಉತ್ತಮ ಗಾಯಕಿಯೂ ಹೌದು ಮತ್ತು ಇಂಡಿಯನ್ ಐಡಲ್‌ನ ಮೂರನೇ ಸುತ್ತನ್ನು ತಲುಪಿದ್ದಾರೆ. ಲಖನೌ, ಆಗ್ರಾ ಮತ್ತು ಕಾನ್ಪುರದಲ್ಲಿ ನಡೆದ ವಿವಿಧ ಸ್ಪರ್ಧೆಗಳಲ್ಲಿ 50 ಕ್ಕೂ ಹೆಚ್ಚು ಟ್ರೋಫಿಗಳನ್ನು ಗೆದ್ದಿದ್ದಾರೆ.

ಬುಂದೇಲ್‌ಖಂಡ್‌ನಲ್ಲಿನ ತೀವ್ರವಾದ ಶಾಖ ಮತ್ತು ದುಬಾರಿ ಎಸಿಗಳು ಕೈಗೆಟುಕುವ ಕೂಲಿಂಗ್ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಲು ಪ್ರೇರೇಪಿಸಿದವು ಎಂದು ಕಲ್ಯಾಣಿ ವಿವರಿಸಿದರು. ಅವರ ಕುಟುಂಬ ಮತ್ತು ಶಿಕ್ಷಕರ ಬೆಂಬಲದೊಂದಿಗೆ, ಅವರು ಅದನ್ನು ವಾಸ್ತವಕ್ಕೆ ತಂದರು. ಸೀಮಿತ ಸಂಪನ್ಮೂಲಗಳ ಹೊರತಾಗಿಯೂ, ನವೀನ ಚಿಂತನೆ ಮತ್ತು ಕಠಿಣ ಪರಿಶ್ರಮವು ಉಪಯುಕ್ತ ತಂತ್ರಜ್ಞಾನವನ್ನು ರಚಿಸಬಹುದು ಎಂದು ಅವರ ಪ್ರಯತ್ನಗಳು ತೋರಿಸುತ್ತವೆ.

ಕೇವಲ 1 ಬೆಳ್ಳುಳ್ಳಿ ಇದ್ರೆ ಸಾಕು.. ಮನೆ, ತೋಟದತ್ತ ಬರುವ ಹಾವುಗಳು ದಿಕ್ಕು ಬದಲಿಸಿ ತಕ್ಷಣ ಕಾಲ್ಕಿಳುತ್ತವೆ!

Ashwini HR — Wed, 21 Oct 2026 16:43:34 +0530

ಮಳೆಗಾಲದಲ್ಲಿ ಅಥವಾ ಬೇಸಿಗೆಯ ಸೆಖೆಗೆ ತಂಪು ಹುಡುಕಿಕೊಂಡು ಮನೆ, ಕಾಂಪೌಂಡ್ ಹಾಗೂ ಅಂಗಳಕ್ಕೆ ಹಾವುಗಳು ಬರುವುದು ಸಾಮಾನ್ಯ. ಮನೆಯಲ್ಲಿ ಚಿಕ್ಕ ಮಕ್ಕಳು, ಸಾಕುಪ್ರಾಣಿಗಳು ಇರುವಾಗ ಇದು ತೀವ್ರ ಆತಂಕ ಹುಟ್ಟಿಸುತ್ತದೆ. ಹಾವುಗಳಿಗೆ ತೊಂದರೆ ಕೊಡದೆ, ಅವು ಮನೆ ಅಥವಾ ಅಂಗಳದ ಆಸುಪಾಸಿಗೂ ಸುಳಿಯದಂತೆ ತಡೆಯಲು ಈ ಕೆಳಗಿನ ನೈಸರ್ಗಿಕ ವಿಧಾನಗಳನ್ನು ಅನುಸರಿಸಬಹುದು.

1. ಹಾವುಗಳು ಬರದಂತೆ ತಡೆಯಲು ಮೊದಲ ಮುನ್ನೆಚ್ಚರಿಕೆ

ಆಹಾರದ ತ್ಯಾಜ್ಯ ಎಸೆಯಬೇಡಿ: ಮನೆ ಸುತ್ತಮುತ್ತ ಉಳಿದ ಊಟ, ಕಸ ಎಸೆಯುವುದರಿಂದ ಇಲಿ, ಹೆಗ್ಗಣ ಮತ್ತು ಕಪ್ಪೆಗಳು ಹೆಚ್ಚಾಗುತ್ತವೆ. ಇವುಗಳನ್ನು ಬೇಟೆಯಾಡಲು ಹಾವುಗಳು ಸುಲಭವಾಗಿ ಮನೆಯೊಳಗೆ ನುಗ್ಗುತ್ತವೆ.

ರಂಧ್ರ ಮತ್ತು ಬಿರುಕುಗಳನ್ನು ಮುಚ್ಚಿ: ಕಾಂಪೌಂಡ್ ಗೋಡೆ, ಮೆಟ್ಟಿಲು ಅಥವಾ ಅಂಗಳದಲ್ಲಿರುವ ಬಿರುಕು ಹಾಗೂ ಇಲಿ ಬಿದ್ದಿರುವ ರಂಧ್ರಗಳನ್ನು ಮೊದಲಿಗೆ ಸಿಮೆಂಟ್ ಹಾಕಿ ಮುಚ್ಚಿ.

2. ಹಾವುಗಳನ್ನು ಓಡಿಸುವ ನೈಸರ್ಗಿಕ ಸ್ಪ್ರೇ ಮತ್ತು ಮನೆಮದ್ದುಗಳು

ಹಾವುಗಳಿಗೆ ವಾಸನೆಯ ಗ್ರಹಣ ಶಕ್ತಿ (Smell Sense) ತುಂಬಾ ತೀಕ್ಷ್ಣವಾಗಿರುತ್ತದೆ. ಈ ಕೆಳಗಿನ ತೀವ್ರ ವಾಸನೆಗೆ ಅವು ಹತ್ತಿರವೂ ಸುಳಿಯುವುದಿಲ್ಲ

ದಾಲ್ಚಿನ್ನಿ ಎಣ್ಣೆ (Cinnamon Oil): ದಾಲ್ಚಿನ್ನಿ ಎಣ್ಣೆಯನ್ನು ನೀರಿನೊಂದಿಗೆ ಬೆರೆಸಿ ಮನೆ ಸುತ್ತ ಮತ್ತು ಬಾಗಿಲುಗಳ ಬಳಿ ಸ್ಪ್ರೇ ಮಾಡಿದರೆ ಹಾವುಗಳು ಆ ದಿಕ್ಕಿಗೆ ಬರುವುದಿಲ್ಲ.

ಬಿಳಿ ವಿನೆಗರ್ (White Vinegar): ವಿನೆಗರ್ ಅನ್ನು ನೀರಿನೊಂದಿಗೆ ಮಿಕ್ಸ್ ಮಾಡಿ ಮನೆ ಸುತ್ತಮುತ್ತ ಸ್ಪ್ರೇ ಮಾಡಿ. ಇದರ ತೀಕ್ಷ್ಣ ಹುಳಿ ವಾಸನೆ ಹಾವುಗಳಿಗೆ ಇಷ್ಟವಾಗುವುದಿಲ್ಲ.

ಸಲ್ಫರ್ ಪೌಡರ್ (ಗಂಧಕದ ಪುಡಿ): ಹಳದಿ ಬಣ್ಣದ ಸಲ್ಫರ್ ಪುಡಿಯನ್ನು ಕಾಂಪೌಂಡ್ ಗಡಿಯ ಸುತ್ತ ಗೆರೆಯಂತೆ ಹಾಕಿದರೆ, ಅದರ ರಾಸಾಯನಿಕ ವಾಸನೆಗೆ ಹಾವುಗಳು ಗಡಿ ದಾಟಿ ಒಳಗೆ ಬರುವುದಿಲ್ಲ.

ಮನೆಯಲ್ಲೇ ತಯಾರಿಸುವ ಬೆಳ್ಳುಳ್ಳಿ ಸ್ಪ್ರೇ: ಬೆಳ್ಳುಳ್ಳಿ ಎಸಳುಗಳನ್ನು ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿ. ರುಬ್ಬಿದ ಬೆಳ್ಳುಳ್ಳಿ ಪೇಸ್ಟ್‌ಗೆ ಸಾಕಷ್ಟು ನೀರನ್ನು ಹಾಕಿ ಚೆನ್ನಾಗಿ ಕಲಸಿ. ನಂತರ ಟೀ ಸೋಸುವ ಜಾಲರಿ (Tea Strainer) ಅಥವಾ ತೆಳುವಾದ ಹತ್ತಿ ಬಟ್ಟೆಯ ಮೂಲಕ ಆ ನೀರನ್ನು ಸೋಸಿ (ಫಿಲ್ಟರ್ ಮಾಡಿ). ಆಗ ಬೆಳ್ಳುಳ್ಳಿಯ ಸಿಪ್ಪೆ, ತಿರುಳು (ಚರಟ) ಜಾಲರಿಯಲ್ಲೇ ಉಳಿಯುತ್ತದೆ ಮತ್ತು ಕೇವಲ ಘಾಟು ವಾಸನೆಯುಳ್ಳ ಶುದ್ಧ ನೀರು ಮಾತ್ರ ಕೆಳಗೆ ಬಟ್ಟಲಿಗೆ ಬೀಳುತ್ತದೆ. ಆ ನೀರನ್ನು ಸ್ಪ್ರೇ ಬಾಟಲಿಗೆ ತುಂಬಿಸಬೇಕು. ಇದನ್ನು ಕತ್ತಲೆಯ ಮೂಲೆಗಳು, ಪೊದೆಗಳು ಮತ್ತು ಕಾಂಪೌಂಡ್ ಬಳಿ ಸ್ಪ್ರೇ ಮಾಡಿದರೆ ಬೆಳ್ಳುಳ್ಳಿಯ ಖಾರವಾದ ವಾಸನೆಗೆ ಹಾವುಗಳು ಕಾಲ್ಕಿಳುತ್ತವೆ.

3. ಮನೆ ಸುತ್ತಮುತ್ತ ಬೆಳೆಸಬೇಕಾದ 'ಹಾವು ನಿರೋಧಕ ಗಿಡಗಳು' (Snake Repellent Plants)

ಈ ಗಿಡಗಳನ್ನು ಅಂಗಳದಲ್ಲಿ ಅಥವಾ ಕುಂಡಗಳಲ್ಲಿ ಬೆಳೆಸಿದರೆ ಹಾವುಗಳು ಬರುವುದಿಲ್ಲ

ಲೆಮನ್‌ಗ್ರಾಸ್ (Lemongrass - ನಿಂಬೆ ಹುಲ್ಲು): ಇದರ ಸಿಟ್ರಸ್ ಪರಿಮಳವು ಹಾವುಗಳಿಗೆ ತೀವ್ರ ಕಿರಿಕಿರಿ ಉಂಟುಮಾಡುತ್ತದೆ.

ಚೆಂಡು ಹೂವಿನ ಗಿಡ (Marigold): ಚೆಂಡು ಹೂವಿನ ಗಿಡದ ಬೇರುಗಳು ಮತ್ತು ಹೂವಿನ ಘಾಟು ವಾಸನೆಗೆ ಹಾವುಗಳು ಹತ್ತಿರ ಸುಳಿಯುವುದಿಲ್ಲ.

ಸರ್ಪಗಂಧ (Snake Root): ಆಯುರ್ವೇದದಲ್ಲಿ ಪ್ರಸಿದ್ಧವಾಗಿರುವ ಸರ್ಪಗಂಧ ಗಿಡದ ವಾಸನೆಗೆ ಹಾವುಗಳು ಹೆದರಿ ದೂರ ಓಡುತ್ತವೆ.

ಬೆಳ್ಳುಳ್ಳಿ ಬಳ್ಳಿ (Garlic Creeper): ಈ ಬಳ್ಳಿಯ ಎಲೆಗಳನ್ನು ಉಜ್ಜಿದರೆ ತೀವ್ರ ಬೆಳ್ಳುಳ್ಳಿಯ ವಾಸನೆ ಬರುತ್ತದೆ, ಇದು ಹಾವುಗಳಿಗೆ ಅಲರ್ಜಿ.

ನಾಗದಾಳಿ / ನಾಗದಮನಿ ಗಿಡ: ಸಾಂಪ್ರದಾಯಿಕ ಆಯುರ್ವೇದ ಗಿಡವಾಗಿದ್ದು, ಹಾವು ನಿರೋಧಕ ಶಕ್ತಿ ಹೊಂದಿದೆ.

ಸ್ನೇಕ್ ಪ್ಲಾಂಟ್ & ಕಳ್ಳಿ ಗಿಡಗಳು (Cactus): ಇವುಗಳ ಮೊನಚಾದ ಎಲೆಗಳು ಮತ್ತು ಮುಳ್ಳುಗಳಿರುವ ಕಾರಣ ಹಾವುಗಳು ಇವುಗಳ ಮೇಲೆ ತೆವಳಲು ಇಷ್ಟಪಡುವುದಿಲ್ಲ.

ಕೆಂಪು ಸಮುದ್ರದಲ್ಲಿ ಮುಳುಗಿಸಿದ ಯುದ್ಧ ಟ್ಯಾಂಕ್‌ಗಳಲ್ಲೀಗ ಹವಳದ ದಿಬ್ಬಗಳ ಕಾರುಬಾರು! ಜಗತ್ತು ಮೆಚ್ಚಿದ ಪ್ರಯೋಗ

Gowthami K — Sat, 24 Oct 2026 16:58:21 +0530

ಕೈರೋ : ಪ್ರಾಕೃತಿಕ ಸೌಂದರ್ಯ ಹಾಗೂ ಅಪರೂಪದ ಹವಳದ ದಿಬ್ಬಗಳಿಗೆ ಹೆಸರಾಗಿರುವ ಕೆಂಪು ಸಮುದ್ರದ ಜಲಚರ ಪರಿಸರವನ್ನು ಸಂರಕ್ಷಿಸಲು ಈಜಿಪ್ಟ್ ಸರ್ಕಾರ ಅತ್ಯಂತ ವಿನೂತನ ಯೋಜನೆಯೊಂದನ್ನು ಯಶಸ್ವಿಯಾಗಿ ಅನುಷ್ಠಾನಗೊಳಿಸಿದೆ. 2023 ರಲ್ಲಿ ಸಮುದ್ರದ ಅಡಿಯಲ್ಲಿ ಮುಳುಗಿಸಿದ 15 ನಿಷ್ಕ್ರಿಯ ಮಿಲಿಟರಿ ಯುದ್ಧ ಟ್ಯಾಂಕ್‌ಗಳು ಹಾಗೂ ವಿಮಾನಗಳು, ಈಗ ಜೀವಂತ ಕೃತಕ ಹವಳದ ಆವಾಸಸ್ಥಾನಗಳಾಗಿ (Artificial Reefs) ಮಾರ್ಪಟ್ಟಿದ್ದು, ಸಾವಿರಾರು ಸಮುದ್ರ ಜೀವಿಗಳಿಗೆ ಸುರಕ್ಷಿತ ಆಶ್ರಯ ನೀಡುತ್ತಿವೆ.

ಪರ್ಯಾಯ ಡೈವಿಂಗ್ ತಾಣಗಳ ಅಗತ್ಯ ಏಕಿತ್ತು?

ಹುರ್ಘಾಡಾ ಪರಿಸರ ಸಂಘ (HEPCA), ಕೆಂಪು ಸಮುದ್ರ ಗವರ್ನರೇಟ್ ಮತ್ತು ಈಜಿಪ್ಟ್‌ನ ಪರಿಸರ ಸಚಿವಾಲಯ ಜಂಟಿಯಾಗಿ ಈ ಯೋಜನೆಯನ್ನು ರೂಪಿಸಿದ್ದವು. ಹುರ್ಘಾಡಾ ಕರಾವಳಿಯ ನೈಸರ್ಗಿಕ ಹವಳದ ದಿಬ್ಬಗಳನ್ನು ವೀಕ್ಷಿಸಲು ಪ್ರತಿವರ್ಷ ಸುಮಾರು 2 ಲಕ್ಷಕ್ಕೂ ಹೆಚ್ಚು ಸ್ಕೂಬಾ ಡೈವರ್‌ಗಳು ಭೇಟಿ ನೀಡುತ್ತಿದ್ದರು. ಆದರೆ ಪರಿಸರ ವಿಜ್ಞಾನಿಗಳ ಪ್ರಕಾರ, ಒಂದು ನೈಸರ್ಗಿಕ ಹವಳದ ತಾಣಕ್ಕೆ ವಾರ್ಷಿಕ ಗರಿಷ್ಠ 22,000 ಡೈವ್‌ಗಳು ಮಾತ್ರ ಸುರಕ್ಷಿತ. ಮಿತಿಮೀರಿದ ಪ್ರವಾಸಿಗರ ಭೇಟಿಯಿಂದ ನೈಸರ್ಗಿಕ ಹವಳಗಳಿಗೆ ತೀವ್ರ ಹಾನಿಯಾಗುತ್ತಿತ್ತು. ಈ ಒತ್ತಡವನ್ನು ಕಡಿಮೆ ಮಾಡಲು ಮತ್ತು ಪ್ರವಾಸಿಗರನ್ನು ಇತರ ತಾಣಗಳತ್ತ ಆಕರ್ಷಿಸಲು ಪರ್ಯಾಯ ಡೈವಿಂಗ್ ಕೇಂದ್ರಗಳ ಅಗತ್ಯವಿತ್ತು.

ಇದಕ್ಕಾಗಿ 2023 ರ ಆಗಸ್ಟ್‌ನಲ್ಲಿ, ಹುರ್ಘಾಡಾದ ಹೊರಭಾಗದಲ್ಲಿ ಸುಮಾರು 11 ರಿಂದ 15 ಮೀಟರ್ ಆಳದ ನೀರಿನಲ್ಲಿ 15 ನಿಷ್ಕ್ರಿಯ ಮಿಲಿಟರಿ ಉಪಕರಣಗಳನ್ನು ನಿಖರವಾಗಿ ಮುಳುಗಿಸಲಾಯಿತು.

ಯುದ್ಧ ಸಜ್ಜುಗಳಿಂದ ಕೃತಕ ಜೀವಗೋಳಕ್ಕೆ ರೂಪಾಂತರ

ಅಲ್-ಅಹ್ರಾಮ್ ವೀಕ್ಲಿ ವರದಿಯ ಪ್ರಕಾರ, ಸಮುದ್ರದಾಳದಲ್ಲಿ ಮುಳುಗಿಸಲಾದ ಈ ಲೋಹದ ರಚನೆಗಳು ಕೆಲವೇ ವರ್ಷಗಳಲ್ಲಿ ಜೀವ ತಳೆದಿವೆ. HEPCA ಯ ಸಮುದ್ರ ಜೀವಶಾಸ್ತ್ರಜ್ಞ ಮಹಮೂದ್ ಹನಾಫಿ ನೀಡಿರುವ ಮಾಹಿತಿಯಂತೆ, ಮುಳುಗಿದ ಟ್ಯಾಂಕ್‌ಗಳು ಹಾಗೂ ಯುದ್ಧ ವಿಮಾನಗಳ ಮೇಲ್ಮೈನಲ್ಲಿ ಮೃದು ಹವಳಗಳು ದಟ್ಟವಾಗಿ ಬೆಳೆಯಲು ಆರಂಭಿಸಿವೆ. ಈ ಉಪಕರಣಗಳಲ್ಲಿರುವ ಸಣ್ಣಸಣ್ಣ ಅಂತರಗಳು ಮತ್ತು ಕುಳಿಗಳು ಸಾವಿರಾರು ಮೀನುಗಳಿಗೆ ತಂಗದಾಣ ಹಾಗೂ ಆಶ್ರಯ ತಾಣಗಳಾಗಿ ಮಾರ್ಪಟ್ಟಿವೆ.

ಈ ಕೃತಕ ಆವಾಸಸ್ಥಾನಗಳು ನೈಸರ್ಗಿಕ ಹವಳದ ದಿಬ್ಬಗಳಿಗೆ ಸಂಪೂರ್ಣ ಪರ್ಯಾಯವಲ್ಲ. ಏಕೆಂದರೆ ಗಟ್ಟಿ ಹವಳಗಳು ಸಂಪೂರ್ಣವಾಗಿ ಬೆಳೆದು ನೈಸರ್ಗಿಕ ಪರಿಸರ ವ್ಯವಸ್ಥೆ ರೂಪುಗೊಳ್ಳಲು ದಶಕಗಳೇ ಬೇಕಾಗುತ್ತವೆ. ಆದರೆ ಪ್ರಸ್ತುತ ಇವು ಜಲಚರಗಳ ಸಂತಾನೋತ್ಪತ್ತಿಗೆ ಮತ್ತು ಬೆಳವಣಿಗೆಗೆ ಉತ್ತಮ ತಲಾಧಾರವಾಗಿ ಕಾರ್ಯನಿರ್ವಹಿಸುತ್ತಿವೆ.

ಪ್ರವಾಸೋದ್ಯಮದ ಹಂಚಿಕೆ :

ಇತ್ತೀಚಿನ ವರದಿಗಳ ಪ್ರಕಾರ, ಈ ಹೊಸ ನೀರೊಳಗಿನ ಮಿಲಿಟರಿ ವಸ್ತುಸಂಗ್ರಹಾಲಯದ ತಾಣಗಳು ಈಗ ವಾರ್ಷಿಕವಾಗಿ ಸುಮಾರು 3 ಲಕ್ಷ ಡೈವ್‌ಗಳನ್ನು ಆಕರ್ಷಿಸುತ್ತಿವೆ. ಇದರಿಂದಾಗಿ ನೈಸರ್ಗಿಕ ಹವಳದ ದಿಬ್ಬಗಳ ಮೇಲಿದ್ದ ಪ್ರವಾಸಿಗರ ಸಾಂದ್ರತೆ ಗಣನೀಯವಾಗಿ ಹಂಚಿಕೆಯಾಗಿದೆ.

ಪರಿಸರ ಸಂರಕ್ಷಣೆಯ ಈ ಹಂತ ಹಂತದ ವಿಸ್ತರಣೆಯ ಭಾಗವಾಗಿ, HEPCA ಈ ಪ್ರದೇಶದಲ್ಲಿ ಇನ್ನೂ ನಾಲ್ಕು ಹೊಸ ಪರ್ಯಾಯ ಡೈವಿಂಗ್ ತಾಣಗಳನ್ನು ಸೇರ್ಪಡೆಗೊಳಿಸಲು ಯೋಜಿಸಿದೆ. ಈ ಮೂಲಕ ಸೂಕ್ಷ್ಮ ನೈಸರ್ಗಿಕ ಹವಳದ ದಿಬ್ಬಗಳಿಗೆ ಯಾವುದೇ ಹಾನಿಯಾಗದಂತೆ ಜಲ ಪ್ರವಾಸೋದ್ಯಮವನ್ನು ಸಮರ್ಥವಾಗಿ ನಿರ್ವಹಿಸಲು ಈಜಿಪ್ಟ್ ನಿರ್ಧರಿಸಿದೆ.

2028ರ ಚಂದ್ರಯಾನದ ರೇಸ್‌ನಲ್ಲಿ ಮಸ್ಕ್ vs ಬೆಜೋಸ್, ನಾಸಾಗೆ ಕೈಜೋಡಿಸಿದ ಸ್ಪೇಸ್‌ಎಕ್ಸ್ , ಚೀನಾಗೆ ಅಮೆರಿಕ ಸೆಡ್ಡು!

Gowthami K — Mon, 26 Oct 2026 16:33:48 +0530

ಮಾನವ ಕುಲವನ್ನು ಮತ್ತೆ ಚಂದ್ರನ ಅಂಗಳಕ್ಕೆ ತಲುಪಿಸುವ ನಾಸಾದ ಮಹತ್ವಾಕಾಂಕ್ಷೆಯ 'ಆರ್ಟೆಮಿಸ್' ಯೋಜನೆಯು ಹೊಸ ವೇಗ ಪಡೆದುಕೊಂಡಿದೆ. 2028 ರಲ್ಲಿ ಗಗನಯಾತ್ರಿಗಳನ್ನು ಚಂದ್ರನ ಮೇಲೆ ಯಶಸ್ವಿಯಾಗಿ ಇಳಿಸುವ ಬೃಹತ್ ಸಾಹಸಕ್ಕೆ ಮುನ್ನ, 2027 ರಲ್ಲಿ ಅತ್ಯಂತ ಸಂಕೀರ್ಣವಾದ 'ಆರ್ಟೆಮಿಸ್ III' ಬಾಹ್ಯಾಕಾಶ ಪರೀಕ್ಷಾ ಕಾರ್ಯಾಚರಣೆಯನ್ನು ಕೈಗೊಳ್ಳಲು ನಾಸಾ ಅಂತಿಮ ಹಂತಹ ಸಿದ್ಧತೆಗಳನ್ನು ನಡೆಸುತ್ತಿದೆ.

ಈ ನಿರ್ಣಾಯಕ ಕಾರ್ಯಾಚರಣೆಗಾಗಿ ವಿಶ್ವದ ಇಬ್ಬರು ದೈತ್ಯ ಉದ್ಯಮಿಗಳಾದ ಎಲಾನ್ ಮಸ್ಕ್ ನೇತೃತ್ವದ 'ಸ್ಪೇಸ್‌ಎಕ್ಸ್' ಮತ್ತು ಜೆಫ್ ಬೆಜೋಸ್ ಅವರ 'ಬ್ಲೂ ಒರಿಜಿನ್' ಕಂಪನಿಗಳು ತಯಾರಿಸುತ್ತಿರುವ ಚಂದ್ರನ ಲ್ಯಾಂಡರ್‌ಗಳನ್ನು ಭೂಮಿಯ ಕಕ್ಷೆಯಲ್ಲಿ ಕಠಿಣ ಪರೀಕ್ಷೆಗೆ ಒಳಪಡಿಸಲಾಗುವುದು.

2027 ರ ಕಕ್ಷೀಯ ಪರೀಕ್ಷೆ ಮತ್ತು ಗಗನಯಾತ್ರಿಗಳ ತಂಡ

ನಾಸಾದ ಅಧಿಕೃತ ಪ್ರಕಟಣೆಯ ಪ್ರಕಾರ, ಆರ್ಟೆಮಿಸ್ III ಕಾರ್ಯಾಚರಣೆಯು 14 ದಿನಗಳ ಕಾಲ ತಳಮಟ್ಟದ ಭೂಮಿಯ ಕಕ್ಷೆಯಲ್ಲಿ ನಡೆಯಲಿದೆ. ನಾಸಾದ ಪ್ರಸಿದ್ಧ 'ಓರಿಯನ್' ಬಾಹ್ಯಾಕಾಶ ನೌಕೆಯಲ್ಲಿ ನಾಸಾ ಗಗನಯಾತ್ರಿಗಳಾದ ರಾಂಡಿ ಬ್ರೆಸ್ನಿಕ್, ಫ್ರಾಂಕ್ ರುಬಿಯೊ ಮತ್ತು ಆಂಡ್ರೆ ಡೌಗ್ಲಾಸ್ ಅವರೊಂದಿಗೆ ಯುರೋಪಿಯನ್ ಬಾಹ್ಯಾಕಾಶ ಸಂಸ್ಥೆಯ ಲುಕಾ ಪರ್ಮಿಟಾನೊ ಪ್ರಯಾಣಿಸಲಿದ್ದಾರೆ.

ಈ 14 ದಿನಗಳ ಕಕ್ಷೀಯ ಪಯಣದಲ್ಲಿ ಗಗನಯಾತ್ರಿಗಳು ಹಾಗೂ ಫ್ಲೈಟ್ ಕಂಟ್ರೋಲರ್‌ಗಳು, ಸ್ಪೇಸ್‌ಎಕ್ಸ್ ಮತ್ತು ಬ್ಲೂ ಒರಿಜಿನ್ ಕಂಪನಿಗಳು ಅಭಿವೃದ್ಧಿಪಡಿಸುತ್ತಿರುವ ಲ್ಯಾಂಡರ್‌ಗಳ ಮಾದರಿಗಳೊಂದಿಗೆ ಬಾಹ್ಯಾಕಾಶ ನೌಕೆಯ ಜೋಡಣೆ, ವಾಸಸ್ಥಳ ನಿರ್ವಹಣೆ ಹಾಗೂ ಕಾರ್ಯಾಚರಣೆಯ ಪ್ರಕ್ರಿಯೆಗಳನ್ನು ಪ್ರಾಯೋಗಿಕವಾಗಿ ಪರೀಕ್ಷಿಸಲಿದ್ದಾರೆ. 2028 ರ 'ಆರ್ಟೆಮಿಸ್ IV' ಮಾನವಸಹಿತ ಚಂದ್ರಯಾನಕ್ಕೆ ಯಾವ ಕಂಪನಿಯ ಲ್ಯಾಂಡರ್ ಅತ್ಯಂತ ಸುರಕ್ಷಿತ ಮತ್ತು ಸಿದ್ಧವಾಗಿದೆ ಎಂಬುದನ್ನು ನಿರ್ಧರಿಸಲು ಈ ಪರೀಕ್ಷೆ ಅತ್ಯಂತ ಪ್ರಮುಖವಾಗಿದೆ.

ತಾಂತ್ರಿಕ ಸವಾಲುಗಳ ನಡುವೆಯೂ ನಾಸಾ ಕಟ್ಟುನಿಟ್ಟಿನ ಹೆಜ್ಜೆ

ಎರಡೂ ಖಾಸಗಿ ಬಾಹ್ಯಾಕಾಶ ಸಂಸ್ಥೆಗಳು ಕೆಲವು ತಾಂತ್ರಿಕ ತೊಡಕುಗಳನ್ನು ಎದುರಿಸುತ್ತಿದ್ದರೂ, ನಿಗದಿಪಡಿಸಿದ ಸಮಯಕ್ಕೇ ಪರೀಕ್ಷಾ ಕಾರ್ಯಾಚರಣೆ ನಡೆಸಲಾಗುವುದು ಎಂದು ನಾಸಾ ಆಡಳಿತಾಧಿಕಾರಿ ಜೇರೆಡ್ ಐಸಾಕ್‌ಮನ್ ಸ್ಪಷ್ಟಪಡಿಸಿದ್ದಾರೆ. ಹೆಚ್ಚಿನ ಸಮಯ ಅಥವಾ ಹೆಚ್ಚಿನ ಹಣ ವ್ಯಯಿಸುವುದರಿಂದ ಮಾತ್ರವೇ ಸುರಕ್ಷತೆ ಸಿಗುತ್ತದೆ ಎಂಬ ಭ್ರಮೆಯಲ್ಲಿ ನಾವಿಲ್ಲ. ಕಟ್ಟುನಿಟ್ಟಾದ ಪರೀಕ್ಷೆಗಳೇ ನಮಗೆ ನೈಜ ಯಶಸ್ಸು ನೀಡಲಿವೆ ಎಂದು ಅವರು ತಿಳಿಸಿದ್ದಾರೆ. 1972 ರ ಅಪೋಲೋ ಕಾರ್ಯಕ್ರಮದ ನಂತರ ಮಾನವ ಮತ್ತೆ ಚಂದ್ರನ ಮೇಲೆ ಹೆಜ್ಜೆಯಿಡುತ್ತಿರುವುದು ಇದೇ ಮೊದಲ ಬಾರಿಯಾಗಿದೆ.

ಸ್ಪೇಸ್‌ಎಕ್ಸ್ vs ಬ್ಲೂ ಒರಿಜಿನ್: ಯಾರ ತಂತ್ರಜ್ಞಾನ ಹೇಗಿದೆ?

ಚೀನಾ ಸವಾಲು ಮತ್ತು ನಾಸಾದ ಭವಿಷ್ಯದ ಯೋಜನೆ

2030 ರ ವೇಳೆಗೆ ತನ್ನ ದೇಶದ ಗಗನಯಾತ್ರಿಗಳನ್ನು ಚಂದ್ರನ ಮೇಲೆ ಇಳಿಸಲು ಚೀನಾ ಕೂಡ ಶರವೇಗದಲ್ಲಿ ಯೋಜನೆ ರೂಪಿಸುತ್ತಿದೆ. ಅಮೆರಿಕ ಮತ್ತು ಚೀನಾ ನಡುವಿನ ಈ ಬಾಹ್ಯಾಕಾಶ ಸ್ಪರ್ಧೆಯ ಹಿನ್ನೆಲೆಯಲ್ಲಿ, ನಾಸಾ ತನ್ನ ಬಾಹ್ಯಾಕಾಶ ಸೂಟ್‌ಗಳು, ಸ್ಪೇಸ್ ಲಾಂಚ್ ಸಿಸ್ಟಮ್ (SLS) ರಾಕೆಟ್ ಹಾಗೂ ಓರಿಯನ್ ನೌಕೆಯ ವಿನ್ಯಾಸಗಳನ್ನು ಮತ್ತಷ್ಟು ಸರಳೀಕರಿಸಿ ವೇಗವಾಗಿ ಕೆಲಸ ನಿರ್ವಹಿಸುತ್ತಿದೆ. 2028 ರ ಕೊನೆಯಲ್ಲಿ ಅಥವಾ 2029 ರ ಆರಂಭದಲ್ಲಿ ನಡೆಯಲಿರುವ ಆರ್ಟೆಮಿಸ್ IV ಚಂದ್ರಯಾನಕ್ಕಾಗಿ ಸ್ಪೇಸ್‌ಎಕ್ಸ್ ಅಥವಾ ಬ್ಲೂ ಒರಿಜಿನ್ ಈ ಎರಡರಲ್ಲಿ ಯಾವ ಕಂಪನಿಯ ಲ್ಯಾಂಡರ್ ಮೊದಲು ಸಂಪೂರ್ಣ ಸುರಕ್ಷತೆಯೊಂದಿಗೆ ಸಿದ್ಧವಾಗಲಿದೆಯೋ, ಅದನ್ನೇ ಬಳಸಿಕೊಳ್ಳಲು ನಾಸಾ ತೀರ್ಮಾನಿಸಿದೆ.

ವಿಜ್ಞಾನ ಲೋಕಕ್ಕೆ ಅಚ್ಚರಿ ಮೂಡಿಸಿದ ಹಾವು; ಎಲ್ಲ ಹಾವುಗಳಂತೆ ತೆವಳೋದಿಲ್ಲ, ಸೈಕಲ್ ಚಕ್ರದಂತೆ ಉರುಳುತ್ತದೆ?

Sathish Kumar KH — Sun, 25 Oct 2026 19:53:02 +0530

ಹಾವುಗಳು ಎಂದಾಕ್ಷಣ ನಮ್ಮ ಕಣ್ಣ ಮುಂದೆ ಬರುವುದು ಅವುಗಳ ಅಂಕುಡೊಂಕಾದ ತೆವಳುವ ಶೈಲಿ (Slithering). ಆದರೆ, ಭೂಮಿಯ ಮೇಲೆ ಅಪಾಯ ಎದುರಾದಾಗ ತೆವಳುವ ಬದಲು ಸೈಕಲ್ ಚಕ್ರದಂತೆ ಗಿರಗಿರನೆ ಉರುಳಿಕೊಂಡು ಓಡುವ ವಿಚಿತ್ರ ಹಾವೊಂದಿದೆ ಎಂದರೆ ನೀವು ನಂಬುತ್ತೀರಾ?

ಹೌದು, ಆಗ್ನೇಯ ಏಷ್ಯಾದ ಕಾಡುಗಳಲ್ಲಿ ಕಂಡುಬರುವ ಪುಟ್ಟ ಗಾತ್ರದ ‘ಡ್ವಾರ್ಫ್ ರೀಡ್‌ಸ್ನೇಕ್’ (Dwarf Reedsnake - Pseudorabdion) ಎಂಬ ಹಾವುಗಳು ಶತ್ರುಗಳಿಂದ ಪಾರಾಗಲು ಈ ಅಸಾಧಾರಣ ‘ರೋಲಿಂಗ್’ (ಉರುಳುವ) ಕಸರತ್ತನ್ನು ಮಾಡುತ್ತವೆ. ಇವು ಸಾಮಾನ್ಯವಾಗಿ ತೆವಳುವುದಕ್ಕಿಂತಲೂ ಬರೋಬ್ಬರಿ ನಾಲ್ಕು ಪಟ್ಟು ಹೆಚ್ಚು ವೇಗವಾಗಿ ಉರುಳಬಲ್ಲವು ಎಂಬುದನ್ನು ವಿಜ್ಞಾನಿಗಳು ಇದೀಗ ಅಧ್ಯಯನದ ಮೂಲಕ ಸಾಬೀತುಪಡಿಸಿದ್ದಾರೆ!

ಪ್ರಾಣಿಗಳಿಗೆ ಚಕ್ರದಂತೆ ಉರುಳುವುದು ಏಕೆ ಕಷ್ಟಸಾಧ್ಯ?

ಸಾಮಾನ್ಯವಾಗಿ ವಾಹನಗಳಲ್ಲಿ ಚಕ್ರ ತಿರುಗಲು ಒಂದು ಆಕ್ಸಲ್ (Axle) ಅಥವಾ ಕಡ್ಡಿ ಇರುತ್ತದೆ. ಇದರಿಂದಾಗಿ ಚಕ್ರ ತಿರುಗಿದರೂ ವಾಹನದ ಮೇಲ್ಭಾಗ ಸ್ಥಿರವಾಗಿರುತ್ತದೆ. ಆದರೆ ಜೀವಿಗಳಲ್ಲಿ ಅಂತಹ ಯಾವುದೇ ಪ್ರತ್ಯೇಕ ಯಾಂತ್ರಿಕ ವ್ಯವಸ್ಥೆ ಇರುವುದಿಲ್ಲ.

ಯಾವುದೇ ಪ್ರಾಣಿ ಇಡೀ ದೇಹವನ್ನು ಉರುಳಿಸಿದರೆ, ಅದರ ತಲೆ ಮತ್ತು ಕಣ್ಣುಗಳು ಕೂಡ ಒಟ್ಟಿಗೇ ಗಿರಗಿರನೆ ತಿರುಗುತ್ತವೆ. ಇದರಿಂದ ವಿಪರೀತ ತಲೆತಿರುಗುವಿಕೆ (Dizziness) ಉಂಟಾಗಿ, ದೃಷ್ಟಿ ಮಂಜಾಗಿ, ಯಾವ ದಿಕ್ಕಿಗೆ ಹೋಗುತ್ತಿದ್ದೇವೆ ಎಂಬ ನಿಯಂತ್ರಣವೇ ತಪ್ಪಿಹೋಗುತ್ತದೆ. ಆದರೆ ಈ ರೀಡ್‌ಸ್ನೇಕ್‌ಗಳು ಈ ಜೈವಿಕ ಮಿತಿಯನ್ನೇ ಬುಡಮೇಲು ಮಾಡಿವೆ!

ವಿಜ್ಞಾನಿಗಳನ್ನೇ ನಿಬ್ಬೆರಗಾಗಿಸಿದ ಹಾವಿನ ಜಾದೂ!

ಸಂಶೋಧಕರು ಹೈ-ಸ್ಪೀಡ್ ಕ್ಯಾಮೆರಾಗಳನ್ನು ಬಳಸಿ ವಿವಿಧ ಕೋನಗಳಿಂದ ಈ ಹಾವುಗಳ ಚಲನವಲನಗಳನ್ನು ಸೂಕ್ಷ್ಮವಾಗಿ ಸೆರೆಹಿಡಿದು ಅಧ್ಯಯನ ಮಾಡಿದ್ದಾರೆ. ಈ ವೇಳೆ ಬಯಲಾದ ಅಚ್ಚರಿಯ ಅಂಶಗಳಿವು:

ಹಾರುವ ವೇಗ: ಉರುಳುವಾಗ ಈ ಹಾವುಗಳು ಪ್ರತಿ ಸೆಕೆಂಡಿಗೆ 1.72 ರಿಂದ 3.69 ಮೀಟರ್‌ಗಳಷ್ಟು ಗರಿಷ್ಠ ವೇಗವನ್ನು (ಅಂದರೆ ಪ್ರತಿ ಗಂಟೆಗೆ 10 ರಿಂದ 13 ಕಿ.ಮೀ ವೇಗ) ತಲುಪುತ್ತವೆ. ಇದು ಅವುಗಳ ಸಾಮಾನ್ಯ ಚಲನೆಗಿಂತ 4 ಪಟ್ಟು ಹೆಚ್ಚು ವೇಗವಾಗಿ ಉರುಳುತ್ತವೆ.

ಸ್ಥಿರವಾಗಿರುವ ತಲೆ (Head Stability): ಹಾವಿನ ಇಡೀ ಹಿಂದಿನ ದೇಹವು ಆಕಾಶ-ಭೂಮಿ ಸುತ್ತುತ್ತಾ ವೇಗವಾಗಿ ಉರುಳುತ್ತಿದ್ದರೂ, ಅದರ ತಲೆ ಮಾತ್ರ ಗಿರಕಿ ಹೊಡೆಯುವುದಿಲ್ಲ! ತಲೆಯನ್ನು ನೆಲದಿಂದ ಒಂದೇ ಸಮಾನ ಎತ್ತರದಲ್ಲಿ ನೇರವಾಗಿ ಮುಂಭಾಗಕ್ಕೆ ಇಟ್ಟುಕೊಂಡು, ಕಣ್ಣುಗಳನ್ನು ತಾನು ಹೋಗುವ ದಿಕ್ಕಿನತ್ತಲೇ ನೆಟ್ಟಿರುತ್ತದೆ.

ಅದ್ಭುತ ನಿಯಂತ್ರಣ: ಇದು ಕೇವಲ ನಿಯಂತ್ರಣವಿಲ್ಲದೆ ಬೆಟ್ಟದಿಂದ ಉರುಳುವ ಕಲ್ಲಿನಂತಲ್ಲ. ಈ ಹಾವುಗಳು ಕೇವಲ 20 ಸೆಂಟಿಮೀಟರ್ ಅಗಲದ ಕಿರಿದಾದ ಟ್ರ್ಯಾಕ್‌ನಲ್ಲಿಯೂ ಅತ್ತಿತ್ತ ವಾಲದೆ ನಿಖರವಾಗಿ ಉರುಳಿಕೊಂಡು ಹೋಗುವ ಅದ್ಭುತ ದೇಹನಿಯಂತ್ರಣ ಹೊಂದಿವೆ.

ಹೇಗೆ ಸಾಧ್ಯವಾಗುತ್ತದೆ ಈ ಅಕ್ರೋಬ್ಯಾಟಿಕ್ ಚಲನೆ?

ಸಂಶೋಧಕರು ಕಂಡುಕೊಂಡಂತೆ, ಈ ಹಾವು ಇಡೀ ದೇಹವನ್ನು ಒಟ್ಟಿಗೆ ತಿರುಗಿಸುವುದಿಲ್ಲ. ಬದಲಾಗಿ, ದೇಹವನ್ನು ಸಣ್ಣ ಸಣ್ಣ ಭಾಗಗಳಾಗಿ ವಿಂಗಡಿಸಿ, ಒಂದು ಭಾಗವನ್ನು ನೆಲಕ್ಕೆ ಒತ್ತಿ ಇನ್ನೊಂದು ಭಾಗವನ್ನು ಪಕ್ಕಕ್ಕೆ ಬೀಸುವ (Stroke) ರೀತಿಯ ಸಂಕೀರ್ಣ ಮಾದರಿಯನ್ನು ಎಡ ಮತ್ತು ಬಲಕ್ಕೆ ಬದಲಾಯಿಸುತ್ತಾ ಸಾಗುತ್ತದೆ. ಇದರಿಂದಾಗಿ ತಲೆಗೆ ಹೊಡೆತ ಬೀಳದೆ, ಇಡೀ ದೇಹವು ಮುನ್ನುಗ್ಗುವ ಶಕ್ತಿಯನ್ನು ಪಡೆಯುತ್ತದೆ.

ವಿಕಾಸವಾದದ (Evolution) ಮಹಾ ವಿಸ್ಮಯ!

ಪ್ರಾಣಿಗಳ ದೇಹರಚನೆಯಷ್ಟೇ ಅವುಗಳ ಸಾಮರ್ಥ್ಯವನ್ನು ನಿರ್ಧರಿಸುವುದಿಲ್ಲ, ಬದಲಿಗೆ ಸ್ನಾಯುಗಳ ಹೊಂದಾಣಿಕೆ ಮತ್ತು ಅಸಾಮಾನ್ಯ ನಡವಳಿಕೆಗಳು ಅಸಾಧ್ಯವಾದುದನ್ನು ಸಾಧ್ಯವಾಗಿಸುತ್ತವೆ ಎಂಬುದಕ್ಕೆ ಈ ಹಾವುಗಳೇ ಜೀವಂತ ಸಾಕ್ಷಿ. ತಮ್ಮ ಜೀವ ಉಳಿಸಿಕೊಳ್ಳಲು ನಿಸರ್ಗ ರೂಪಿಸಿರುವ ಇಂತಹ ತಂತ್ರಜ್ಞಾನ ನಿಜಕ್ಕೂ ಪ್ರಕೃತಿಯ ಇಂಜಿನಿಯರಿಂಗ್ ಅದ್ಭುತಗಳಲ್ಲಿ ಒಂದಾಗಿದೆ.

Mobile ಸ್ಕ್ರೀನ್‌ಲ್ಲೇ ಈಗ ಹಾವಿನ ವಿಷ ಪತ್ತೆ! 4 ನಿಮಿಷದಲ್ಲೇ ಜೀವ ಉಳಿಸಬಲ್ಲ AI ಸೆನ್ಸಾರ್ ಆವಿಷ್ಕಾರ!

Bhimasi M Koleppanavar — Tue, 20 Oct 2026 13:39:36 +0530

ಹಾವಿನ ವಿಷದ ಪ್ರಕಾರವನ್ನು ತ್ವರಿತ ಗುರುತಿಸುವುದರಿಂದ ವೈದ್ಯರು ಕಚ್ಚಿದ ನಂತರ ಸರಿಯಾದ ಚಿಕಿತ್ಸೆ ಆಯ್ಕೆ ಮಾಡಲು ಸಹಾಯ ಮಾಡುತ್ತದೆ. ಸಂಶೋಧಕರು ಕೃತಕ ಬುದ್ಧಿಮತ್ತೆ ಸಹಾಯದಿಂದ ನಾಗರಹಾವು ಮತ್ತು ವೈಪರ್ ವಿಷದ ನಡುವೆ ವ್ಯತ್ಯಾಸ ಗುರುತಿಸುವ ಪ್ರಯೋಗಾಲಯ ಉಪಕರಣವನ್ನು ಅಭಿವೃದ್ಧಿಪಡಿಸಿದ್ದಾರೆ. 4 ನಿಮಿಷಗಳ ಮಾಹಿತಿ ರವಾನಿಸಲು ತೆಗೆದುಕೊಳ್ಳುವ ಕಾಲಾವಧಿ ಎರಡು ರೀತಿಯ ವಿಷವನ್ನು ಗುರುತಿಸುವಲ್ಲಿ, ಈ ವ್ಯವಸ್ಥೆಯು 95% ನಿಖರತೆ ಸಾಧಿಸಿದೆ. ಅದು ಹೇಗೆ ಕೆಲಸ ಮಾಡುತ್ತದೆ. ಅದರ ಸಂಪೂರ್ಣ ವಿವರ ಇಲ್ಲಿದೆ.

ಕೃತಕ ಬುದ್ಧಿಮತ್ತೆ ಆಧಾರಿತ ಸೆನ್ಸರ್ ಅಭಿವೃದ್ಧಿ!

ವಿಜ್ಞಾನಿಗಳು ಹಾವು ಕಚ್ಚಿದಾಗ ಅದರ ವಿಷವನ್ನು ಪತ್ತೆಹಚ್ಚಲು ಸುಧಾರಿತ AI ಸೆನ್ಸರ್ ಒಂದನ್ನು ಅಭಿವೃದ್ಧಿಪಡಿಸಿದ್ದಾರೆ.ಈ ಹೊಸ ತಂತ್ರಜ್ಞಾನವು ಕೇವಲ 4 ನಿಮಿಷಗಳಲ್ಲಿ ಹಾವಿ ನ ವಿಷ ಯಾವುದು ಎಂಬುದನ್ನು ಪತ್ತೆ ಮಾಡುತ್ತದೆ. ಪ್ರಾಥಮಿಕ ಪ್ರಯೋಗಗಳಲ್ಲಿ ಈ ಸೆನ್ಸರ್ ನಾಗರಹಾವು ಮತ್ತು ಕೊಳಕು ಮಂಡಲ ಹಾವುಗಳ ವಿಷವನ್ನು 95% ನಿಖರತೆಯೊಂದಿಗೆ ಯಶಸ್ವಿಯಾಗಿ ಗುರುತಿಸಿದೆ.

ಕಾರ್ಯನಿರ್ವಹಿಸುವ ವಿಧಾನ (ಲಿಕ್ವಿಡ್ ಕ್ರಿಸ್ಟಲ್ಸ್)!

ಈ ಸೆನ್ಸರ್‌ನಲ್ಲಿ ದ್ರವ ಹರಳುಗಳನ್ನು ಬಳಸಲಾಗಿದೆ. ಸೆನ್ಸರ್‌ಗೆ ಹಾವಿನ ವಿಷ ತಗುಲಿದಾಗ, ಅದರಲ್ಲಿನ ಕಣಗಳ ಜೋಡಣೆ ಬದಲಾಗಿ ಸೂಕ್ಷ್ಮದರ್ಶಕದಲ್ಲಿ ವಿಶಿಷ್ಟವಾದ ಬೆಳಕಿನ ಮಾದರಿಗಳು ಗೋಚರಿಸುತ್ತವೆ. ಈ ಬದಲಾವಣೆಗಳನ್ನು AI ಮಾದರಿಯು ವಿಶ್ಲೇಷಿಸಿ ವಿಷದ ಪ್ರಕಾರವನ್ನು ಪತ್ತೆ ಮಾಡುತ್ತದೆ.

ಅತ್ಯಂತ ಕಡಿಮೆ ಪ್ರಮಾಣದ ವಿಷವೂ ಪತ್ತೆ!

ಪ್ರತಿ ಮಿಲಿ ಲೀಟರ್‌ಗೆ ಕೇವಲ 45 ಮೈಕ್ರೋಗ್ರಾಂನಷ್ಟು ಕಡಿಮೆ ಪ್ರಮಾಣದಲ್ಲಿ ವಿಷ ಇದ್ದರೂ ಸಹ ಇದು ಪತ್ತೆಹಚ್ಚುವ ಸಾಮರ್ಥ್ಯ ಹೊಂದಿದೆ. ಹಾವು ಕಚ್ಚಿದ ತಕ್ಷಣ ಸೂಕ್ತವಾದ ಆಂಟಿ-ವೆನಮ್ ಚಿಕಿತ್ಸೆ ನೀಡಲು ಇದು ವೈದ್ಯರಿಗೆ ನೆರವಾಗುತ್ತದೆ. ತಪ್ಪು ಚಿಕಿತ್ಸೆಯಿಂದಾಗುವ ಅಡ್ಡಪರಿಣಾಮಗಳನ್ನು ಇದು ತಪ್ಪಿಸುತ್ತದೆ. ಅಲ್ಲದೇ ಸಾಂಪ್ರದಾಯಿಕ ಪದ್ಧತಿಗಳಿಗೆ ಹೋಲಿಸಿದರೆ ಈ ಪ್ಲಾಟ್‌ಫಾರ್ಮ್ ಅತ್ಯಂತ ಸರಳ, ಸುಲಭ ಮತ್ತು ಕಡಿಮೆ ವೆಚ್ಚದ್ದಾಗಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ. ಈ ಸಂಶೋಧನೆಯು ಭರವಸೆ ಮೂಡಿಸಿದ್ದರೂ, ಆಸ್ಪತ್ರೆಗಳಲ್ಲಿ ಅಥವಾ ತುರ್ತು ಚಿಕಿತ್ಸಾ ಸಂದರ್ಭಗಳಲ್ಲಿ ಅಧಿಕೃತವಾಗಿ ಬಳಸುವ ಮುನ್ನ ಇನ್ನು ಹೆಚ್ಚಿನ ವೈದ್ಯಕೀಯ ಪರೀಕ್ಷೆಗಳು ಮತ್ತು ಸುಧಾರಣೆಗಳ ಅಗತ್ಯವಿದೆ.

ಇರಾನ್ ದೇಶದ ಅಧ್ಯಯನ ವರದಿ!

ಸಂಶೋಧಕರ ಪ್ರಕಾರ ಇರಾನ್‌ನಲ್ಲಿ ಪ್ರತಿ ವರ್ಷ ಸುಮಾರು 4,500 ರಿಂದ 7,000 ಹಾವು ಕಚ್ಚುವ ಪ್ರಕರಣಗಳು ದಾಖಲಾಗುತ್ತವೆ. ಇಂತಹ ಗ್ರಾಮೀಣ ಮತ್ತು ಕೃಷಿ ಪ್ರಧಾನ ಪ್ರದೇಶಗಳಲ್ಲಿ ಈ ತಂತ್ರಜ್ಞಾನವು ಜೀವ ಉಳಿಸಲು ಹೆಚ್ಚು ಸಹಕಾರಿಯಾಗಲಿದೆ. ಈ ತಂತ್ರಜ್ಞಾನದ ಪ್ರಮುಖ ವಿಶಿಷ್ಟತೆಯೆಂದರೆ, ಇದು ವಿಷವನ್ನು ಗುರುತಿಸಲು ಸಾಂಪ್ರದಾಯಿಕ ವೈದ್ಯಕೀಯ ಪದ್ಧತಿಗಳಂತೆ ಯಾವುದೇ ಹಾವಿನ ವಿಷ-ನಿಶ್ಚಿತ ಆಂಟಿಬಾಡಿಗಳನ್ನು ಬಳಸುವುದಿಲ್ಲ. ಕೇವಲ ದ್ರವ ಹರಳುಗಳ ಭೌತಿಕ ಬದಲಾವಣೆಗಳ ಆಧಾರದ ಮೇಲೆ ಕೆಲಸ ಮಾಡುತ್ತದೆ.

ಪಾಲಿವೆಲೆಂಟ್ ಚಿಕಿತ್ಸೆಯ ಅಡ್ಡಪರಿಣಾಮಗಳಿಗೆ ಬ್ರೇಕ್!

ಪ್ರಸ್ತುತ ಯಾವ ಹಾವು ಕಚ್ಚಿದೆ ಎಂದು ತಿಳಿಯದಿದ್ದಾಗ ವೈದ್ಯರು ಸಾಮಾನ್ಯ ಆಂಟಿ-ವೆನಮ್ ನೀಡುತ್ತಾರೆ, ಇದು ಕೆಲವೊಮ್ಮೆ ರೋಗಿಗಳಲ್ಲಿ ತೀವ್ರ ಅಲರ್ಜಿ ಅಥವಾ ಅಡ್ಡಪರಿಣಾಮಗಳನ್ನು ಉಂಟುಮಾಡುತ್ತದೆ. ಆದರೆ ಈ ಸೆನ್ಸರ್ ನಿರ್ದಿಷ್ಟ ಹಾವನ್ನು ಪತ್ತೆ ಹಚ್ಚುವುದರಿಂದ ಸೂಕ್ತ ಚಿಕಿತ್ಸೆ ನೀಡಿ ಅಡ್ಡಪರಿಣಾಮಗಳನ್ನು ಕಡಿಮೆ ಮಾಡಬಹುದು.

ಬೆಂಗ್ಳೂರಿನಿಂದ 7 ಗಂಟೆ ದೂರದಲ್ಲಿ ಮಂಗಳ ಗ್ರಹದ ಭೂ ವಿನ್ಯಾಸ ಪತ್ತೆ ಹಚ್ಚಿದ ವಿಜ್ಞಾನಿಗಳು

Mahmad Rafik — Wed, 21 Oct 2026 09:26:12 +0530

ನವದೆಹಲಿ: ಕೇರಳ ವಿಶ್ವವಿದ್ಯಾಲಯದ ಭೂವಿಜ್ಞಾನ ವಿಭಾಗದ ಸಂಶೋಧಕರ ತಂಡ ಮಂಗಳ ಗ್ರಹದ ವಾಸಯೋಗ್ಯತೆ ಮತ್ತು ನೀರಿನ ಚಟುವಟಿಕೆಯನ್ನು ಅರ್ಥಮಾಡಿಕೊಳ್ಳಲು ಸಹಾಯ ಮಾಡುವ ಪ್ರಮುಖ ಭೂವೈಜ್ಞಾನಿಕ ತಾಣಗಳನ್ನು ಗುರುತಿಸಿದೆ. ಡಾ. ಸಜಿನ್ ಕುಮಾರ್ ಕೆ.ಎಸ್. ನೇತೃತ್ವದ ತಂಡವು ತಮಿಳುನಾಡಿನ ನೆಯ್ವೇಲಿ (Neyveli Tamil Nadu), ತಿರುಚಿರಾಪಳ್ಳಿ ಬ್ಯಾಡ್ಲ್ಯಾಂಡ್ಸ್ (Tiruchirappalli Badlands) ಹಾಗೂ ಚಿಲಿಯ ಅಟಕಾಮಾ ಮರುಭೂಮಿಯಲ್ಲಿ (Chile’s Atacama Desert) ಮಂಗಳ ಗ್ರಹದ ಪರಿಸರವನ್ನು ಹೋಲುವ ವಾತಾವರಣವನ್ನು ಪತ್ತೆಹಚ್ಚಿದೆ.

ಈ ತಾಣಗಳಲ್ಲಿ ಮಂಗಳದ ಮೇಲ್ಮೈಯಲ್ಲಿ ಕಂಡುಬರುವಂತಹ ಭೌಗೋಳಿಕ, ರಾಸಾಯನಿಕ ಮತ್ತು ಭೌತಿಕ ಗುಣಲಕ್ಷಣಗಳು ಇರುವುದು ದೃಢಪಟ್ಟಿದೆ. ಮಿಳುನಾಡಿನ ನೆಯ್ವೇಲಿ ಪ್ರದೇಶ ಬೆಂಗಳೂರಿನಿಂದ 260 ಕಿ.ಮೀ ದೂರದಲ್ಲಿದೆ.

ಖನಿಜಗಳ ಪತ್ತೆ ಮತ್ತು ತಂತ್ರಜ್ಞಾನ

ಸಂಶೋಧಕರು ನಯ್ವೇಲಿಯಲ್ಲಿ ಮೆಲಂಟರೈಟ್ (Melanterite) ಮತ್ತು ಚಿಲಿಯಲ್ಲಿ ಜಿಪ್ಸಮ್ (gypsum) ಎಂಬ ಎರಡು ಹೈಡ್ರಸ್ ಸಲ್ಫೇಟ್ ಖನಿಜಗಳನ್ನು ಗುರುತಿಸಿದ್ದಾರೆ. ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆಯ (DST- Department of Science and Technology) FIST ಕಾರ್ಯಕ್ರಮದ ಬೆಂಬಲದೊಂದಿಗೆ, ಸುಧಾರಿತ ಲೇಸರ್ ರಾಮನ್ ಸ್ಪೆಕ್ಟ್ರೋಮೀಟರ್ ಉಪಕರಣವನ್ನು ಬಳಸಿ ಈ ಖನಿಜಗಳ ವಿಶಿಷ್ಟ ರೋಹಿತದ ಸಹಿಗಳನ್ನು ವಿಶ್ಲೇಷಿಸಲಾಗಿದೆ. ಕೇವಲ ಉಪಗ್ರಹ ಅಥವಾ ಕಕ್ಷೀಯ ಅವಲೋಕನಗಳಿಂದ ಮಂಗಳವನ್ನು ಸಂಪೂರ್ಣವಾಗಿ ಅಧ್ಯಯನ ಮಾಡಲು ಸಾಧ್ಯವಿಲ್ಲದಿರುವುದರಿಂದ, ಇಂತಹ ನಿಖರತೆಯ ಉಪಕರಣಗಳು ಭೂಮಿಯ ಮೇಲಿನ ಖನಿಜಗಳನ್ನು ದೃಢೀಕರಿಸಲು ಅತ್ಯಗತ್ಯವಾಗಿವೆ.

ಮಂಗಳ ಗ್ರಹದ ಇತಿಹಾಸಕ್ಕೆ ಖನಿಜಗಳ ಮಹತ್ವ

ಈ ಹೈಡ್ರಸ್ ಸಲ್ಫೇಟ್‌ಗಳು ನೀರು ಮತ್ತು ಬಂಡೆಗಳ ನಡುವಿನ ಪುರಾತನ ಪರಸ್ಪರ ಕ್ರಿಯೆಯನ್ನು ನಿರೂಪಿಸುತ್ತವೆ. ಮೆಲಂಟರೈಟ್ ಖನಿಜವು ತಾತ್ಕಾಲಿಕ ಆರ್ದ್ರ, ಆಮ್ಲೀಯ ಮತ್ತು ಆಕ್ಸಿಡೀಕರಣ ಪರಿಸ್ಥಿತಿಗಳಲ್ಲಿ ರೂಪುಗೊಳ್ಳಲಿದ್ದು, ಮಂಗಳದಲ್ಲಿ ಸಂಭವಿಸಿದ ಅಲ್ಪಾವಧಿಯ ನೀರಿನ ಪ್ರಕ್ರಿಯೆಗಳನ್ನು ಸೂಚಿಸುತ್ತದೆ. ಮತ್ತೊಂದೆಡೆ, ಜಿಪ್ಸಮ್ ಖನಿಜವು ಸುದಿರ್ಘ ಜಲೀಯ ಪರಿಸರವನ್ನು ದಾಖಲಿಸುವುದಲ್ಲದೆ, ತನ್ನ ಖನಿಜ ರಚನೆಯೊಳಗೆ ಸಂಭಾವ್ಯ ಜೈವಿಕ ಸಹಿಗಳನ್ನು (biosignatures) ಸಂರಕ್ಷಿಸಿಡುತ್ತದೆ. ಇದು ಪ್ರಾಚೀನ ಜೀವ ಜಾಲದ ಕುರುಹುಗಳನ್ನು ಹುಡುಕುವ ಖಗೋಳ ಜೀವವಿಜ್ಞಾನದ (Astrobiology) ಅಧ್ಯಯನಕ್ಕೆ ಮಹತ್ವದ ದಾರಿಯಾಗಿದೆ.

ಭವಿಷ್ಯದ ಪರಿಶೋಧನೆಗಳು

ಈ ಮಹತ್ವದ ಸಂಶೋಧನೆಗಳನ್ನು ಜರ್ನಲ್ ಆಫ್ ಜಿಯೋಫಿಸಿಕಲ್ ರಿಸರ್ಚ್: ಪ್ಲಾನೆಟ್ಸ್ ಎಂಬ ವೈಜ್ಞಾನಿಕ ನಿಯತಕಾಲಿಕೆಯಲ್ಲಿ ಎರಡು ಪ್ರಬಂಧಗಳಾಗಿ ಪ್ರಕಟಿಸಲಾಗಿದೆ. ಈ ಸಂಶೋಧನೆಯು ಭವಿಷ್ಯದ ಮಂಗಳ ಗ್ರಹದ ಬಾಹ್ಯಾಕಾಶ ಕಾರ್ಯಾಚರಣೆಗಳಿಗೆ (Space missions) ಜೀವದ ಕುರುಹುಗಳು ಸಿಗಬಹುದಾದ ಸೂಕ್ತ ಸ್ಥಳಗಳನ್ನು ಆಯ್ಕೆ ಮಾಡಲು ಮಾರ್ಗದರ್ಶನ ನೀಡಲಿದೆ.

ಉಲ್ಟಾ ಆಗುತ್ತಾ ಭೂಮಿ? ಪೃಥ್ವಿಯ ನಾರ್ತ್ ಹಾಗೂ ಸೌತ್ ಪೋಲ್ ಸ್ಥಾನ ಬದಲು ಪತ್ತೆ ಹಚ್ಚಿದ ಅಧ್ಯಯನ

Chethan Kumar — Wed, 21 Oct 2026 11:23:58 +0530

ಭೂಮಿ ತಿರುಗುತ್ತದೆ ಅನ್ನೋದು ಎಲ್ಲರಿಗೂ ತಿಳಿದಿದೆ. ಆದರೆ ಭೂಮಿ ತನ್ನ ಸ್ಥಾನ ಬದಲಿಸುತ್ತಾ? ಭೂಮಿಯ ನಾರ್ತ್ ಫೋಲ್ ಹಾಗೂ ಸೌತ್ ಪೋಲ್ ಸ್ಥಾನ ಬದಲಿಸುತ್ತಾ? ಈ ಕುರಿತು ಹಲವು ಕುತೂಹಲಕ್ಕೆ ವಿಜ್ಞಾನಿಗಳ ಅಧ್ಯಯನ ತಂಡ ಖಚಿತ ಮಾಹಿತಿ ನೀಡಿದೆ. ಟ್ರು ಪೋಲಾರ್ ವ್ಯಾಂಡರ್ ಎಂದು ವಿಜ್ಞಾನಿಗಳು ಈ ಚಲನೆಯನ್ನು ಕರೆದಿದ್ದಾರೆ. ಬರೋಬ್ಬರಿ ನಾಲ್ಕು ಬಾರಿ ಭೂಮಿಯ ಉತ್ತರ ಧ್ರುವ ಹಾಗೂ ದಕ್ಷಿಣ ಧ್ರುವ ಸ್ಥಾನ ಬದಲಿಸಿದೆ. ಈ ಮೂಲಕ ಭೂಮಿ ಕುರಿತು ಮಹತ್ವದ ಮಾಹಿತಿಯೊಂದನ್ನು ವಿಜ್ಞಾನಿಗಳು ನೀಡಿದ್ದಾರೆ. ಭೂಮಿಯಲ್ಲಿ ಆಗುತ್ತಿರುವ ಪ್ರಾಕೃತಿಕ ಬದಲಾವಣೆಗೂ ಧ್ರುವ ಚಲನೆಗೂ ಸಂಬಂಧ ಇದೆ.

320 ದಶಲಕ್ಷ ವರ್ಷಗಳ ಭೂಮಿ ಚಲನೆ ಅಧ್ಯಯನ

ಕಳೆದ 320 ದಶಲಕ್ಷ ವರ್ಷಗಳಲ್ಲಿ ಭೂಮಿಯ ಚಲನೆಯನ್ನು ಅಧ್ಯಯನ ಮಾಡಲಾಗಿದೆ. ವಿಶೇಷ ಅಂದರೆ 320 ದಶಲಕ್ಷ ವರ್ಷಗಳಲ್ಲಿ ಭೂಮಿ ನಾಲ್ಕು ಬಾರಿ ಸೌತ್ ಪೋಲ್ ಹಾಗೂ ನಾರ್ತ್ ಪೋಲ್ ಸ್ಥಾನ ಬದಲಿಸಿದೆ. ಈ ಕುರಿತು ಅಕ್ಟೋಬರ್ 19 ರಂದು ಸ್ಮಿತ್‌ಸೋನಿಯನ್ ಮ್ಯಾಗಜಿನ್‌ನಲ್ಲಿ ಅಧ್ಯಯನ ವರದಿ ಪ್ರಕಟಿಸಲಾಗಿದೆ. ಜರ್ನಲ್ ಸೈನ್ಸ್ ನಡೆಸಿದ ಈ ಅಧ್ಯಯನ ವರದಿ ಹಲವು ಅಚ್ಚರಿಗೆ ಕಾರಣವಾಗಿದೆ.

10 ಸೆಂಟಿಮೀಟರ್ ವೇಗದಲ್ಲಿ ಚಲನೆ

ಸೌತ್ ಹಾಗೂ ನಾರ್ತ್ ಪೋಲ್ ಸ್ಥಾನ ಬದಲಾವಣೆ ಪತ್ತೆ ಹಚ್ಚುವುದು ಅತ್ಯಂತ ಸವಾಲಿನ ಕೆಲಸವಾಗಿತ್ತು. ಸಮುದ್ರ ಮಟ್ಟದ ಬದಲಾವಣೆಯನ್ನು ಪ್ರಮುಖ ಆಧಾರವಾಗಿಟ್ಟುಕೊಂಡು ಭೂಮಿಯ ಅಧ್ಯಯನ ನಡೆಸಲಾಗಿದೆ. ಭೂಮಿಯ ಧ್ರುವಗಳು ವರ್ಷಕ್ಕೆ 10 ಸೆಂಟಿಮೀಟರ್ ವೇಗದಲ್ಲಿ ಚಲಿಸುತ್ತದೆ. ಹೀಗಾಗಿ ಧ್ರುವಗಳ ಸ್ಥಾನ ಬದಲಾವಣೆ ವೇಗ ಅತೀ ಕಡಿಮೆಯಾದರೂ ಬದಲಾವಣೆ ಖಚಿತ. ಕೊನೆಯ ಬಾರಿಗೆ ಭೂಮಿಯ ಪೋಲಾರ್ ವ್ಯಾಂಡರ್ ಬದಲಾವಣೆ 48 ರಿಂದ 56 ದಶಲಕ್ಷ ವರ್ಷಗಳ ಹಿಂದೆ ಸಂಭವಿಸಿದೆ. ಮುಂದೆಯೂ ಸಂಭವಿಸಲಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.

ಧ್ರುವ ಸ್ಥಾನ ಬದಲಾವಣೆಯಿಂದ ಆಗೋ ಪರಿಣಾಮವೇನು?

ಭೂಮಿಯ ಸ್ಥಾನ ಅತ್ಯಂತ ಪ್ರಮುಖವಾಗಿದೆ. ಸೌರಮಂಡಲದಲ್ಲಿನ ಪ್ರತಿಯೊಂದು ಗ್ರಹಗಳ ಸ್ಥಾನ ಪಲ್ಲಟ ಭಾರಿ ಪರಿಣಾಮ ಬೀರಲಿದೆ. ತನ್ನ ಅಕ್ಷೆಯಲ್ಲಿ ಗ್ರಹಗಳು ಸುತ್ತುತ್ತವೆ. ಆದರೆ ಸ್ಥಾನ ಪಲ್ಲಟವಾದಾಗ ಇತರ ಗ್ರಹಗಳ ಮೇಲೂ ಪರಿಣಾಮ ಬೀರಲಿದೆ. ಭೂಮಿಯ ದಕ್ಷಿಣ ಧ್ರುವ ಹಾಗೂ ಉತ್ತರ ಧ್ರುವಗಳ ಸ್ಥಾನ ಬದಲಾವಣೆಯಿಂದ ಭೂಮಿಯ ಸಮುದ್ರ ಮಟ್ಟದಲ್ಲಿ ಭಾರಿ ಏರಿಳಿತಗಳಾಗುತ್ತದೆ. ಈ ಏರಿಳಿತಗಳು ಅಪಾಯಕ್ಕೂ ಕಾರಣವಾಗಲಿದೆ.

ಸಮುದ್ರ ಮಟ್ಟದಲ್ಲಿ ಆದ ಏರಿಳಿತಗಳಿಂದ ಪ್ರಾಕೃತಿಕ ವಿಕೋಪಗಳು ಸಂಭವಿಸಿದೆ. ಇವೆಲ್ಲವೂ ಭೂಮಿಯ ಸ್ಥಾನ ಪಲ್ಲಟನೆಯಿಂದ ಆಗಿರುವ ಅನಾಹುತಗಳು ಎಂದು ಹೇಳಲು ಸಾಧ್ಯವಿಲ್ಲ. ಆದರೆ ನಾರ್ತ್ ಫೋಲ್ ಹಾಗೂ ಸೌತ್ ಪೋಲ್ ಸ್ಥಾನ ಬದಲಾವಣೆಗಳಿಂದ ಸಮುದ್ರ ಮಟ್ಟದಲ್ಲಿ ಏರಿಳಿತ ಉಂಟಾಗಲಿದೆ ಅನ್ನೋದು ಖಚಿತ.

Elon Musk AI Warning: ಎಐ ಕಂಪನಿಗಳು ಮುಚ್ಚಿಹೋಗುತ್ತಾ? ಇಲಾನ್ ಮಸ್ಕ್ ಅಚ್ಚರಿ ಭವಿಷ್ಯ!

Naveen Kodase — Mon, 26 Oct 2026 18:40:46 +0530

ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ವಲಯಕ್ಕೆ ಈಗ ಕೋಟಿ ಕೋಟಿ ಹರಿದುಬರುತ್ತಿದೆ. ಆದರೆ, ಸಣ್ಣ ಎಐ ಕಂಪನಿಗಳಿಗೆ ಇಲಾನ್ ಮಸ್ಕ್ ದೊಡ್ಡದೊಂದು ಎಚ್ಚರಿಕೆ ನೀಡಿದ್ದಾರೆ. ಎಐ ಚಿಪ್‌ಗಳನ್ನು ಬಾಡಿಗೆಗೆ ನೀಡುವ ನೂರಾರು ಕ್ಲೌಡ್ ಕಂಪನಿಗಳು ಮುಂದಿನ ದಿನಗಳಲ್ಲಿ ತೀವ್ರ ಆರ್ಥಿಕ ಮುಗ್ಗಟ್ಟಿಗೆ ಸಿಲುಕಲಿವೆ ಎಂದು ಮಸ್ಕ್ ಭವಿಷ್ಯ ನುಡಿದಿದ್ದಾರೆ. ಇದೇ ವೇಳೆ, ಜಿಪಿಯು (GPU) ಖರೀದಿಸಲು ತಮ್ಮದೇ ಒಡೆತನದ 'ಸ್ಪೇಸ್ ಎಕ್ಸ್' ಕಂಪನಿಯು 40 ಬಿಲಿಯನ್ ಡಾಲರ್ ಸಾಲದ ಒಪ್ಪಂದವನ್ನು ಮುಗಿಸಿದೆ ಎಂದು ಅವರು ಹೇಳಿದ್ದಾರೆ.

200ಕ್ಕೂ ಹೆಚ್ಚು ಕಂಪನಿಗಳಿಗೆ ಸಂಕಷ್ಟ?

'ಎಕ್ಸ್' (X) ಪ್ಲಾಟ್‌ಫಾರ್ಮ್‌ನಲ್ಲಿ ನಡೆದ ಚರ್ಚೆಯೊಂದರಲ್ಲಿ ಮಸ್ಕ್ ಈ ವಿಚಾರ ಹಂಚಿಕೊಂಡಿದ್ದಾರೆ. ಎಐ ಮೂಲಸೌಕರ್ಯ ವಲಯದಲ್ಲಿ ಎದುರಾಗಲಿರುವ ಬಿಕ್ಕಟ್ಟಿನ ಬಗ್ಗೆ ಅವರು ಮಾತನಾಡಿದ್ದಾರೆ. ಅರ್ಧಕ್ಕೆ ನಿಂತಿರುವ ಡೇಟಾ ಸೆಂಟರ್‌ಗಳಲ್ಲಿ ಕಂಪ್ಯೂಟಿಂಗ್ ಸಾಮರ್ಥ್ಯವು ಬಳಕೆಯಾಗದೆ ಹಾಗೇ ಉಳಿಯುವ ಸಾಧ್ಯತೆ ಹೆಚ್ಚಿದೆ ಎಂದು ಅವರು ವಿವರಿಸಿದ್ದಾರೆ. ಕೇವಲ ಎಐ ಡೇಟಾ ಸೆಂಟರ್‌ಗಳನ್ನು ನಂಬಿ ಕೂತಿರುವ ಕಂಪನಿಗಳಿಗೆ ಸಾಲ ನೀಡಲು ಬ್ಯಾಂಕ್‌ಗಳು ಹಾಗೂ ಹಣಕಾಸು ಸಂಸ್ಥೆಗಳು ಈಗ ಹಿಂದೇಟು ಹಾಕುತ್ತಿವೆ. ಇದರಿಂದಾಗಿ, ಬೇರೆ ಕಂಪನಿಗಳಿಗೆ ಎಐ ಚಿಪ್‌ಗಳನ್ನು ಬಾಡಿಗೆಗೆ ಕೊಡುವ 200ಕ್ಕೂ ಹೆಚ್ಚು ನಿಯೋ-ಕ್ಲೌಡ್ ಕಂಪನಿಗಳು ಮುಚ್ಚಿಹೋಗುವ ಅಥವಾ ವಿಲೀನಗೊಳ್ಳುವ ಪರಿಸ್ಥಿತಿ ಬರಲಿದೆ ಎಂದು ಮಸ್ಕ್ ಅಂದಾಜಿಸಿದ್ದಾರೆ.

ಡೇಟಾ ಸೆಂಟರ್‌ಗಳಿಗೆ ಬೇಕು ಕೋಟಿ ಕೋಟಿ ಹಣ

ಎಐ ಡೇಟಾ ಸೆಂಟರ್‌ಗಳನ್ನು ನಿರ್ಮಿಸಲು ದೊಡ್ಡ ಮಟ್ಟದ ಬಂಡವಾಳ ಬೇಕು. ಅತ್ಯಾಧುನಿಕ ಗ್ರಾಫಿಕ್ಸ್ ಪ್ರೊಸೆಸಿಂಗ್ ಯೂನಿಟ್‌ಗಳನ್ನು (GPU) ಖರೀದಿಸಲು ಮತ್ತು ಅವುಗಳನ್ನು ನಡೆಸಲು ಬೇಕಾದ ವಿದ್ಯುತ್ ಪೂರೈಕೆಗೆ ಅತಿ ಹೆಚ್ಚು ಹಣ ಖರ್ಚಾಗುತ್ತದೆ. ಆದರೆ, ಇಂತಹ ಪ್ರಾಜೆಕ್ಟ್‌ಗಳಿಗೆ ಸಾಲ ಕೊಡುವ ಮುನ್ನ, ಆ ಕಂಪನಿಗಳಿಗೆ ಬೇರೆ ಯಾವುದಾದರೂ ಸ್ಥಿರ ಆದಾಯದ ಮೂಲವಿದೆಯೇ ಎಂದು ಸಾಲ ನೀಡುವವರು ಪರಿಶೀಲಿಸುತ್ತಿದ್ದಾರೆ. ಕೇವಲ ಎಐ ವಲಯದ ಆದಾಯವನ್ನೇ ನಂಬಿಕೊಂಡಿರುವ ಸಂಸ್ಥೆಗಳಿಗೆ ಮುಂದಿನ ಹಾದಿ ಸುಲಭವಿಲ್ಲ ಎಂಬುದನ್ನು ಇದು ತೋರಿಸುತ್ತದೆ.

ಸ್ಪೇಸ್ ಎಕ್ಸ್‌ಗೆ 40 ಬಿಲಿಯನ್ ಡಾಲರ್ ಸಾಲ

ಸಣ್ಣ ಕಂಪನಿಗಳು ಹಣ ಹೊಂದಿಸಲು ಪರದಾಡುತ್ತಿರುವಾಗಲೇ, ಜಿಪಿಯು ಖರೀದಿಸಲು ಸ್ಪೇಸ್ ಎಕ್ಸ್ 40 ಬಿಲಿಯನ್ ಡಾಲರ್ ಸಾಲ ಪಡೆದಿದೆ ಎಂದು ಮಸ್ಕ್ ಸ್ಪಷ್ಟಪಡಿಸಿದ್ದಾರೆ. ಸ್ಪೇಸ್ ಎಕ್ಸ್ ಕಂಪನಿಯ ಕ್ರೆಡಿಟ್ ರೇಟಿಂಗ್, ಸ್ಟಾರ್‌ಲಿಂಕ್ ಸ್ಯಾಟಲೈಟ್ ಇಂಟರ್ನೆಟ್ ಸೇವೆ ಮತ್ತು ರಾಕೆಟ್ ಉಡಾವಣೆಗಳಿಂದ ಬರುತ್ತಿರುವ ಆದಾಯವು ಈ ಸಾಲ ಸಿಗಲು ಸಹಾಯ ಮಾಡಿದೆ. ಬೇರೆ ವಲಯಗಳಿಂದಲೂ ಸ್ಥಿರವಾದ ಆದಾಯ ಬರುತ್ತಿರುವುದರಿಂದ, ಸ್ಪೇಸ್ ಎಕ್ಸ್ ಮೇಲೆ ಹೂಡಿಕೆ ಮಾಡುವುದು ಸುರಕ್ಷಿತ ಎಂದು ಸಾಲ ನೀಡುವವರು ಭಾವಿಸಿದ್ದಾರೆ.

2027 ನಿರ್ಣಾಯಕ ವರ್ಷವಾಗಲಿದೆಯಾ?

ವೆಂಚರ್ ಕ್ಯಾಪಿಟಲಿಸ್ಟ್ ಚಮತ್ ಪಲಿಹಪಿಟಿಯ (Chamath Palihapitiya) ಕೂಡ ಎಐ ಮೂಲಸೌಕರ್ಯ ವಲಯದ ಬಿಕ್ಕಟ್ಟಿನ ಬಗ್ಗೆ ಎಚ್ಚರಿಸಿದ್ದಾರೆ. ಕೆಟ್ಟ ಹೂಡಿಕೆಗಳು ಮತ್ತು ಸಾಕಷ್ಟು ಬಂಡವಾಳವಿಲ್ಲದ ಕಂಪನಿಗಳು ಮಾರುಕಟ್ಟೆಯಿಂದ ಹೊರಬೀಳಲಿದ್ದು, 2027ರ ವರ್ಷವು ತೀವ್ರ ಏರಿಳಿತಗಳಿಂದ ಕೂಡಿರಲಿದೆ ಎಂದು ಅವರು ವಿಶ್ಲೇಷಿಸಿದ್ದಾರೆ. ವಿದ್ಯುತ್ ಕೊರತೆ, ಸಾರ್ವಜನಿಕರ ವಿರೋಧ ಮತ್ತು ಆಡಳಿತಾತ್ಮಕ ಅಡೆತಡೆಗಳಿಂದಾಗಿ ಡೇಟಾ ಸೆಂಟರ್‌ಗಳ ನಿರ್ಮಾಣ ವಿಳಂಬವಾಗುತ್ತಿದೆ. ವಿದ್ಯುತ್ ಸಿಗದೆ ದುಬಾರಿ ಎಐ ಚಿಪ್‌ಗಳು ಮೂಲೆಗುಂಪಾಗುವ ಸಾಧ್ಯತೆಯೂ ಇದೆ. ದೊಡ್ಡ ಮಟ್ಟದಲ್ಲಿ ಹೂಡಿಕೆ ಮಾಡುವ ಸಾಮರ್ಥ್ಯ ಮತ್ತು ಸ್ಥಿರ ಆದಾಯ ಇರುವ ಕಂಪನಿಗಳು ಮಾತ್ರ ಈ ರೇಸ್‌ನಲ್ಲಿ ಗೆಲ್ಲಲಿವೆ. ಸಣ್ಣ ಸಂಸ್ಥೆಗಳಿಗೆ ಎಐ ಪೈಪೋಟಿಯಲ್ಲಿ ಉಳಿಯುವುದು ಕಷ್ಟವಾಗಲಿದೆ.

ಇಟಲಿಯ ಬೂದಿಯೊಳಗಿಂದ ಎದ್ದುಬಂದ 2000 ವರ್ಷಗಳ ರೋಮನ್ ವೈಭವ, 1980ರಿಂದ ಸಾರ್ವಜನಿಕರಿಗೆ ನೋ ಎಂಟ್ರಿ ಇದ್ದ ನಿಗೂಢ ಅರಮನೆ

Gowthami K — Thu, 22 Oct 2026 17:25:29 +0530

ಪಾಂಪೆ (ಇಟಲಿ): ಪ್ರಾಚೀನ ಇಟಲಿಯ ಪಾಂಪೆ ಪುರಾತತ್ತ್ವ ಶಾಸ್ತ್ರದ ಅತ್ಯಂತ ಭವ್ಯ ಹಾಗೂ ಐತಿಹಾಸಿಕ ನಿವಾಸಗಳಲ್ಲಿ ಒಂದಾದ ‘ಮಾರ್ಕಸ್ ಫೇಬಿಯಸ್ ರುಫಸ್’ ಭವನಕ್ಕೆ ನೂತನ ಕಳೆ ಬರಲಿದೆ. ಸುಮಾರು 1.4 ಮಿಲಿಯನ್ ಯುರೋ ವೆಚ್ಚದಲ್ಲಿ ಈ ಪಾರಂಪರಿಕ ಕಟ್ಟಡವನ್ನು ಪುನಃಸ್ಥಾಪಿಸಲಾಗುತ್ತಿದ್ದು, ಇದರ ಸಂಪೂರ್ಣ ವೆಚ್ಚವನ್ನು ಖಾಸಗಿ ಉದ್ಯಮಿಯೊಬ್ಬರು ಭರಿಸುತ್ತಿದ್ದಾರೆ. ಬರುವ ಕ್ರಿಸ್‌ಮಸ್ ವೇಳೆಗೆ ಈ ಬೃಹತ್ ಅರಮನೆಯ ಒಂದು ಭಾಗವನ್ನು ಮಾರ್ಗದರ್ಶಿ ಪ್ರವಾಸಿ ಗುಂಪುಗಳಿಗೆ ವೀಕ್ಷಣೆಗೆ ಮುಕ್ತಗೊಳಿಸಲಾಗುವುದು ಎಂದು ಪಾಂಪೆ ಪುರಾತತ್ವ ಉದ್ಯಾನವನದ ಅಧಿಕಾರಿಗಳು ಅಧಿಕೃತವಾಗಿ ಪ್ರಕಟಿಸಿದ್ದಾರೆ.

ಕ್ರಿ.ಶ. 79 ರ ಜ್ವಾಲಾಮುಖಿ ಮತ್ತು ಅರಮನೆ ಇತಿಹಾಸ:

ಕ್ರಿಸ್ತಶಕ 79 ರಲ್ಲಿ ಸಂಭವಿಸಿದ ಮೌಂಟ್ ವೆಸುವಿಯಸ್ ಜ್ವಾಲಾಮುಖಿಯ ಭಯಾನಕ ಸ್ಫೋಟದಲ್ಲಿ ಇಡೀ ಪಾಂಪೆ ನಗರವೇ ಬೂದಿಯಡಿಯಲ್ಲಿ ಹೂತು ಹೋಗಿತ್ತು. ರೋಮ್‌ನ ಸಾಮ್ರಾಜ್ಯಶಾಹಿ ಅರಮನೆಗಳ ಮಾದರಿಯಲ್ಲೇ ನಿರ್ಮಿತವಾಗಿದ್ದ ಈ 'ಮಾರ್ಕಸ್ ಫೇಬಿಯಸ್ ರುಫಸ್' ನಿವಾಸವೂ ಅಂದು ಸರ್ವನಾಶವಾಗಿತ್ತು. ಪಾಂಪೆ ನಗರದ ರಕ್ಷಣಾ ಗೋಡೆಗಳ ಮೇಲೆ ನಾಲ್ಕು ಮಹಡಿಗಳಲ್ಲಿ ನಿರ್ಮಿಸಲಾಗಿದ್ದ ಈ ನಿವಾಸದಲ್ಲಿ ಸಂಕೀರ್ಣ ಕಾರಿಡಾರ್‌ಗಳು, ಜಟಿಲ ಮೆಟ್ಟಿಲುಗಳು ಹಾಗೂ ಐಷಾರಾಮಿ ಕೊಠಡಿಗಳಿವೆ. ಈ ಭವನದ ಮಾಲೀಕರು ಅಂದಿನ ರೋಮನ್ ಸಾಮ್ರಾಜ್ಯದ ಪ್ರಭಾವಿ ಮ್ಯಾಜಿಸ್ಟ್ರೇಟ್ ಆಗಿರಬಹುದು ಎಂದು ಇತಿಹಾಸಕಾರರು ನಂಬುತ್ತಾರೆ. 1980 ರಿಂದೀಚೆಗೆ ಭದ್ರತಾ ಕಾರಣಗಳಿಂದ ಈ ಕಟ್ಟಡಕ್ಕೆ ಸಾರ್ವಜನಿಕರ ಪ್ರವೇಶವನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿತ್ತು.

3,000 ಚದರ ಮೀಟರ್ ವಿಸ್ತೀರ್ಣ ಮತ್ತು ಅಲೆಕ್ಸಾಂಡರ್ ಮೊಸಾಯಿಕ್ ವೈಭವ:

ಪಾಂಪೆಯಲ್ಲಿರುವ ಮತ್ತೊಂದು ಸುಪ್ರಸಿದ್ಧ ತಾಣ 'ಹೌಸ್ ಆಫ್ ದಿ ಫೌನ್' ನಂತೆ ಈ ನಿವಾಸವೂ ಸುಮಾರು 3,000 ಚದರ ಮೀಟರ್‌ಗಿಂತಲೂ ಹೆಚ್ಚಿನ ವಿಸ್ತೀರ್ಣ ಹೊಂದಿದೆ. ಇಲ್ಲಿರುವ ಸುಂದರ ಅಂಗಳಗಳು, ಔಪಚಾರಿಕ ಸ್ವಾಗತ ಕೊಠಡಿಗಳು ಹಾಗೂ ಕಾರಂಜಿಗಳು ಅಂದಿನ ಶ್ರೀಮಂತ ಜೀವನಶೈಲಿಗೆ ಕನ್ನಡಿ ಹಿಡಿಯುತ್ತವೆ.

ಇಲ್ಲಿ ಪತ್ತೆಯಾಗಿದ್ದ ಪ್ರಸಿದ್ಧ 'ಅಲೆಕ್ಸಾಂಡರ್ ಮೊಸಾಯಿಕ್' ಪ್ರಾಚೀನ ಕರಕುಶಲತೆಯ ಮೇರುಕೃತಿಯಾಗಿದೆ. ಮಹಾನ್ ಅಲೆಕ್ಸಾಂಡರ್ ಮತ್ತು ಪರ್ಷಿಯನ್ ರಾಜ ಡೇರಿಯಸ್ III ನಡುವೆ ನಡೆದ ಇಸಸ್ ಕದನವನ್ನು ಬಿಂಬಿಸುವ ಈ ಕಲಾಕೃತಿಯನ್ನು 10 ಲಕ್ಷಕ್ಕೂ ಹೆಚ್ಚು ಸಣ್ಣ ಸಣ್ಣ ತೈಲವರ್ಣ ಕಲ್ಲುಗಳಿಂದ ನಿರ್ಮಾಣ ಮಾಡಲಾಗಿದೆ. ಮೂಲ ಮೊಸಾಯಿಕ್ ಪ್ರಸ್ತುತ ನೇಪಲ್ಸ್ ರಾಷ್ಟ್ರೀಯ ಪುರಾತತ್ವ ವಸ್ತುಸಂಗ್ರಹಾಲಯದಲ್ಲಿದ್ದರೂ, ಅದರ ಅತ್ಯಂತ ನಿಖರವಾದ ಪ್ರತಿಕೃತಿಯನ್ನು ಮೂಲ ಸ್ಥಳದಲ್ಲೇ ವೀಕ್ಷಕರಿಗಾಗಿ ಕಾಯ್ದಿರಿಸಲಾಗಿದೆ.

ಜರ್ಮನ್ ಉದ್ಯಮಿಯಿಂದ $1.6 ಮಿಲಿಯನ್ ದೇಣಿಗೆ:

ಈ ಐತಿಹಾಸಿಕ ಪುನರುಜ್ಜೀವನ ಯೋಜನೆಯ ಸಂಪೂರ್ಣ ವೆಚ್ಚವನ್ನು ಜರ್ಮನಿಯ ಉದ್ಯಮಿ ಫ್ರಾಂಕ್ ಹೋಫರ್ ವಹಿಸಿಕೊಂಡಿದ್ದಾರೆ. ಪಾಂಪೆ ಉದ್ಯಾನವನದ ಸುಪರಿಂಟೆಂಡೆಂಟ್ ಗೇಬ್ರಿಯಲ್ ಜುಚ್ಟ್ರಿಗೆಲ್ ಅವರು ಬರೆದ "ಪಾಂಪೆ: ದಿ ಎನ್‌ಚ್ಯಾಂಟೆಡ್ ಸಿಟಿ" ಪುಸ್ತಕದಿಂದ ಪ್ರೇರಿತರಾಗಿ ಹೋಫರ್ ಈ ನವೀಕರಣಕ್ಕೆ ಆರ್ಥಿಕ ನೆರವು ನೀಡಲು ಮುಂದೆ ಬಂದಿದ್ದಾರೆ.

ಇಂತಹ ಐತಿಹಾಸಿಕ ಪಾರಂಪರಿಕ ತಾಣವನ್ನು ಪುನರುಜ್ಜೀವನಗೊಳಿಸುವ ಯೋಜನೆಯ ಭಾಗವಾಗಿರುವುದು ನನಗೆ ಅತ್ಯಂತ ರೋಮಾಂಚನ ತಂದಿದೆ ಎಂದು ಹೋಫರ್ ಹರ್ಷ ವ್ಯಕ್ತಪಡಿಸಿದ್ದಾರೆ.

ಆಧುನಿಕ ತಂತ್ರಜ್ಞಾನ ಮತ್ತು 'ಪಾಂಪೆ ವೀನಸ್' ಹಸಿಚಿತ್ರದ ರಕ್ಷಣೆ:

2021 ರಿಂದ 2023 ರ ಅವಧಿಯಲ್ಲಿ ಕಟ್ಟಡದ ಬಲವರ್ಧನೆಗೆ ಪ್ರಾಥಮಿಕ ಕಾರ್ಯಗಳನ್ನು ಕೈಗೊಳ್ಳಲಾಗಿತ್ತು. ಪ್ರಸ್ತುತ ನವೀಕರಣ ಹಂತದಲ್ಲಿ ನಿವಾಸದ ಪ್ರಾರ್ಥನಾ ಮಂದಿರದಲ್ಲಿರುವ ಜಗತ್ಪ್ರಸಿದ್ಧ 'ಪಾಂಪೆ ವೀನಸ್' ವರ್ಣಚಿತ್ರಗಳು ಮತ್ತು ಇತರ ಹಸಿಚಿತ್ರಗಳನ್ನು ಮೂಲ ರೂಪಕ್ಕೆ ತರಲಾಗುತ್ತಿದೆ.

ಅಲ್ಲದೆ, ಪ್ರವಾಸಿಗರು ಈ ನಾಲ್ಕು ಮಹಡಿಗಳ ಜಟಿಲ ಚಕ್ರವ್ಯೂಹದಂತಹ ಅರಮನೆಯನ್ನು ಸುಲಭವಾಗಿ ಅರ್ಥೈಸಿಕೊಳ್ಳಲು ಡಿಜಿಟಲ್ ತಂತ್ರಜ್ಞಾನ ಮತ್ತು 3D ಗೈಡಿಂಗ್ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ. ಪುರಾತತ್ವ ಇಲಾಖೆಯ ಪ್ರಕಾರ, "ಈ ಅರಮನೆಯೊಳಗೆ ಹೆಜ್ಜೆಯಿಟ್ಟಾಗ ನೀವು 19ನೇ ಶತಮಾನದ ನೇಪಲ್ಸ್ ಅರಮನೆಯಲ್ಲಿದ್ದೀರಿ ಎನಿಸಬಹುದು, ಆದರೆ ಇದು ನಿಜವಾಗಿ 2,000 ವರ್ಷಗಳ ಹಿಂದಿನ ರೋಮನ್ ವೈಭವ!"

Dark Matter Study: ಡಾರ್ಕ್ ಮ್ಯಾಟರ್ ರಹಸ್ಯ ಭೇದಿಸಿದ ವಿಜ್ಞಾನಿಗಳು, ಬ್ಲಾಕ್ ಹೋಲ್ ಬಗ್ಗೆ ಹೊಸ ಅಪ್ಡೇಟ್

Naveen Kodase — Sun, 25 Oct 2026 19:38:24 +0530

ಬ್ರಹ್ಮಾಂಡದ ಅತಿದೊಡ್ಡ ನಿಗೂಢಗಳಲ್ಲಿ ಒಂದಾದ ಡಾರ್ಕ್ ಮ್ಯಾಟರ್ ರಹಸ್ಯವನ್ನು ಭೇದಿಸುವಲ್ಲಿ ವಿಜ್ಞಾನಿಗಳು ಮಹತ್ವದ ಸುಳಿವು ಕಂಡುಕೊಂಡಿದ್ದಾರೆ. ಗ್ಯಾಲಕ್ಸಿಗಳಿಗಿಂತಲೂ ದೊಡ್ಡದಾದ ಮತ್ತು ಹೆಚ್ಚು ದ್ರವ್ಯರಾಶಿ (mass) ಹೊಂದಿರುವ ಬೃಹತ್ ಬ್ಲಾಕ್ ಹೋಲ್‌ಗಳು ಡಾರ್ಕ್ ಮ್ಯಾಟರ್‌ನ ಮುಖ್ಯ ಭಾಗವಲ್ಲ ಎಂದು ಸಂಶೋಧಕರು ಪತ್ತೆಹಚ್ಚಿದ್ದಾರೆ. ಬ್ರಹ್ಮಾಂಡದ ಆರಂಭಿಕ ಕಾಲದ ಬೆಳಕನ್ನು ವಿಶ್ಲೇಷಿಸಿ ವಿಜ್ಞಾನಿಗಳು ಈ ನಿರ್ಧಾರಕ್ಕೆ ಬಂದಿದ್ದಾರೆ. ಬ್ರಹ್ಮಾಂಡದ ಬಹುಪಾಲು ದ್ರವ್ಯವನ್ನು ಆವರಿಸಿರುವ ಡಾರ್ಕ್ ಮ್ಯಾಟರ್ ಅಸಲಿಗೆ ಏನು ಎಂಬ ಪ್ರಶ್ನೆಗೆ ಉತ್ತರ ಹುಡುಕುವ ನಿಟ್ಟಿನಲ್ಲಿ ಈ ಅಧ್ಯಯನ ಹೊಸ ತಿರುವು ನೀಡಿದೆ.

ಏನಿದು ಡಾರ್ಕ್ ಮ್ಯಾಟರ್?

ಗ್ಯಾಲಕ್ಸಿಗಳು ಅತಿ ವೇಗವಾಗಿ ಸುತ್ತುತ್ತಿದ್ದರೂ ಅವುಗಳು ಚದುರಿ ಹೋಗದಂತೆ ಹಿಡಿದಿಟ್ಟುಕೊಳ್ಳುವುದು ಇದೇ ಡಾರ್ಕ್ ಮ್ಯಾಟರ್‌ನ ಗುರುತ್ವಾಕರ್ಷಣ ಶಕ್ತಿ ಎಂದು ವಿಜ್ಞಾನಿಗಳು ನಂಬಿದ್ದಾರೆ. ಬ್ರಹ್ಮಾಂಡದ ಒಟ್ಟು ದ್ರವ್ಯರಾಶಿಯಲ್ಲಿ ಆರನೇ ಐದು ಭಾಗದಷ್ಟು (5/6) ಡಾರ್ಕ್ ಮ್ಯಾಟರ್ ತುಂಬಿಕೊಂಡಿದೆ ಎಂಬುದು ಲೆಕ್ಕಾಚಾರ. ಆದರೆ, ಇದರ ನೈಜ ಸ್ವರೂಪ ಏನು ಎಂಬುದು ಇಂದಿಗೂ ನಿಗೂಢ. ಬ್ಲಾಕ್ ಹೋಲ್‌ಗಳು ಅಪಾರ ದ್ರವ್ಯರಾಶಿ ಹೊಂದಿರುವುದರಿಂದ ಮತ್ತು ಅವುಗಳನ್ನು ನೇರವಾಗಿ ನೋಡಲು ಕಷ್ಟವಿರುವುದರಿಂದ, ಇವೇ ಡಾರ್ಕ್ ಮ್ಯಾಟರ್‌ನ ಭಾಗವಾಗಿರಬಹುದೇ ಎಂದು ಸಂಶೋಧಕರು ಪರಿಶೀಲಿಸುತ್ತಿದ್ದಾರೆ.

ಗ್ಯಾಲಕ್ಸಿಗಳಿಗಿಂತಲೂ ಭಾರವಾದ ಬ್ಲಾಕ್ ಹೋಲ್‌ಗಳು

ಸೂರ್ಯನ ದ್ರವ್ಯರಾಶಿಗಿಂತ 100 ಬಿಲಿಯನ್ ಪಟ್ಟು ಹೆಚ್ಚು ದ್ರವ್ಯರಾಶಿ ಹೊಂದಿರುವ ಬ್ಲಾಕ್ ಹೋಲ್‌ಗಳ ಮೇಲೆ ಈ ಹೊಸ ಅಧ್ಯಯನ ಗಮನಹರಿಸಿದೆ. ಇದಕ್ಕಿಂತಲೂ ದೊಡ್ಡದಾದ ಕೆಲವು ಬ್ಲಾಕ್ ಹೋಲ್‌ಗಳು ಇಡೀ ಗ್ಯಾಲಕ್ಸಿಗಳಿಗಿಂತ ಹೆಚ್ಚು ಭಾರ ಹೊಂದಿರಬಹುದು ಎಂದು ಅಂದಾಜಿಸಲಾಗಿದೆ. ಆದರೆ, ಖಗೋಳಶಾಸ್ತ್ರಜ್ಞರು ಈವರೆಗೆ ಇಂತಹ ಯಾವುದೇ ಬೃಹತ್ ಬ್ಲಾಕ್ ಹೋಲ್‌ಗಳನ್ನು ಪತ್ತೆ ಮಾಡಿಲ್ಲ. ಪ್ರಸ್ತುತ ನಮಗೆ ತಿಳಿದಿರುವ ಅತಿ ದೊಡ್ಡ ಬ್ಲಾಕ್ ಹೋಲ್ ಸುಮಾರು 36 ಬಿಲಿಯನ್ ಸೂರ್ಯನಷ್ಟು ದ್ರವ್ಯರಾಶಿಯನ್ನು ಹೊಂದಿದೆ.

ಬ್ರಹ್ಮಾಂಡದ ಆರಂಭಿಕ ಬೆಳಕಿನ ಪರಿಶೀಲನೆ

ಜರ್ಮನಿಯ ಮೈಂಜ್ ಇನ್‌ಸ್ಟಿಟ್ಯೂಟ್ ಫಾರ್ ಥಿಯರೆಟಿಕಲ್ ಫಿಸಿಕ್ಸ್‌ನ (Mainz Institute for Theoretical Physics) ಸಂಶೋಧಕರು ಈ ಅಧ್ಯಯನ ನಡೆಸಿದ್ದಾರೆ. ಬಿಗ್ ಬ್ಯಾಂಗ್ (Big Bang) ಆದ ಸುಮಾರು 3,80,000 ವರ್ಷಗಳ ನಂತರ ಬ್ರಹ್ಮಾಂಡ ತಂಪಾಯಿತು. ಆಗ ಬೆಳಕು ಮುಕ್ತವಾಗಿ ಚಲಿಸಲು ಸಾಧ್ಯವಾಯಿತು. ಈ ಕಾಲಘಟ್ಟದ ಬೆಳಕಿನ ಉಳಿಕೆಯನ್ನು 'ಕಾಸ್ಮಿಕ್ ಮೈಕ್ರೋವೇವ್ ಬ್ಯಾಕ್‌ಗ್ರೌಂಡ್' (Cosmic Microwave Background) ಎಂದು ಕರೆಯುತ್ತಾರೆ. ಈ ವಿಕಿರಣದಲ್ಲಿನ ತಾಪಮಾನದ ವ್ಯತ್ಯಾಸಗಳನ್ನು ವಿಶ್ಲೇಷಿಸಿದಾಗ, ಬೃಹತ್ ಬ್ಲಾಕ್ ಹೋಲ್‌ಗಳು ಸೃಷ್ಟಿಸಬಹುದಾದ ಯಾವುದೇ ಲಕ್ಷಣಗಳು ವಿಜ್ಞಾನಿಗಳಿಗೆ ಕಂಡುಬಂದಿಲ್ಲ. ಹಾಗಾಗಿ, ಇವು ಡಾರ್ಕ್ ಮ್ಯಾಟರ್‌ನ ದೊಡ್ಡ ಭಾಗವಾಗಿರಲು ಸಾಧ್ಯವಿಲ್ಲ ಎಂದು ಸಂಶೋಧಕರು ತೀರ್ಮಾನಿಸಿದ್ದಾರೆ.

ಸಣ್ಣ ಬ್ಲಾಕ್ ಹೋಲ್‌ಗಳ ಸಾಧ್ಯತೆ ಇನ್ನೂ ಇದೆ

ಬ್ರಹ್ಮಾಂಡದಲ್ಲಿ ಬೃಹತ್ ಬ್ಲಾಕ್ ಹೋಲ್‌ಗಳು ಅಸ್ತಿತ್ವದಲ್ಲಿಯೇ ಇಲ್ಲ ಎಂದು ಈ ಅಧ್ಯಯನ ಹೇಳುತ್ತಿಲ್ಲ. ಬದಲಾಗಿ, ಅವು ಡಾರ್ಕ್ ಮ್ಯಾಟರ್‌ನ ಮುಖ್ಯ ಭಾಗವಲ್ಲ ಎಂಬುದನ್ನಷ್ಟೇ ಸ್ಪಷ್ಟಪಡಿಸಿದೆ. ಕ್ಷುದ್ರಗ್ರಹಗಳ (asteroids) ಗಾತ್ರದ ಸಣ್ಣ ಬ್ಲಾಕ್ ಹೋಲ್‌ಗಳು ಡಾರ್ಕ್ ಮ್ಯಾಟರ್‌ನ ಭಾಗವಾಗಿರಬಹುದೇ ಎಂಬ ಬಗ್ಗೆ ಸಂಶೋಧಕರು ಈಗಲೂ ಅಧ್ಯಯನ ನಡೆಸುತ್ತಿದ್ದಾರೆ.

ಅಂಟಾರ್ಕ್ಟಿಕಾದ ಹಿಮ ಸಾಗರ ಕರಗಿದ ಬೆನ್ನಲ್ಲೇ ಸಾಗರ ಗರ್ಭದಲ್ಲಿ ಭಾರಿ ಹವಾಮಾನ ವ್ಯತ್ಯಾಸ: ಬೆಂಗಳೂರಿನ IISc ಅಧ್ಯಯನದಲ್ಲಿ ಆಘಾತಕಾರಿ ಸತ್ಯ ಬಯಲು

Santosh Naik — Thu, 29 Oct 2026 16:59:36 +0530

ನವದೆಹಲಿ (ಅ.29): ಅಂಟಾರ್ಕ್ಟಿಕಾದಿಂದ ಹಿಂದೂ ಮಹಾಸಾಗರಕ್ಕೆ ಹರಿಯುವ ಬೃಹತ್ ಜಲರಾಶಿಯು ಕಳೆದ ಒಂದು ದಶಕದಲ್ಲಿ ತನ್ನ ಮೂಲ ಗುಣಲಕ್ಷಣಗಳನ್ನೇ ಸಂಪೂರ್ಣವಾಗಿ ಬದಲಾಯಿಸಿಕೊಂಡಿದ್ದು, ಇದು ಇಡೀ ಜಾಗತಿಕ ಹವಾಮಾನ ವ್ಯವಸ್ಥೆಯ (Global Climate System) ಮೇಲೆ ಭಾರಿ ಪರಿಣಾಮ ಬೀರುವ ಮುನ್ಸೂಚನೆ ನೀಡಿದೆ ಎಂದು ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆ (IISc) ಹಾಗೂ ಯುಕೆಯ ವಿಜ್ಞಾನಿಗಳು ಬುಧವಾರ ಎಚ್ಚರಿಸಿದ್ದಾರೆ.

ಕಳೆದ 20 ಕ್ಕೂ ಹೆಚ್ಚು ವರ್ಷಗಳ ಸಾಗರ ಮತ್ತು ಉಪಗ್ರಹ ದತ್ತಾಂಶಗಳನ್ನು (Satellite Data) ಆಳವಾಗಿ ವಿಶ್ಲೇಷಿಸಿರುವ ವಿಜ್ಞಾನಿಗಳು, ಅಂಟಾರ್ಕ್ಟಿಕಾ ಹಿಮದ ಭಾರಿ ನಷ್ಟವು ಸಾಗರದ ಆಳದಲ್ಲಿ ಹಿಂದೆಂದೂ ಕಾಣದ ಭಾರಿ ಪಲ್ಲಟವನ್ನು ಉಂಟುಮಾಡುತ್ತಿದೆ ಎಂಬುದನ್ನು ಸಾಬೀತುಪಡಿಸಿದ್ದಾರೆ. ಹಿಮಾವೃತ ದಕ್ಷಿಣ ಖಂಡವನ್ನು ಜಗತ್ತಿನ ಇತರ ಭಾಗಗಳಿಗೆ ಜೋಡಿಸುವ ಬೃಹತ್ ಜಲರಾಶಿಯಲ್ಲಿ ಕಳೆದ ಕೆಲವು ದಶಕಗಳಿಂದ ನಡೆಯುತ್ತಿದ್ದ ಬದಲಾವಣೆಗಳು 2016 ರ ನಂತರ ತದ್ವಿರುದ್ಧವಾಗಿ ತಿರುಗಿವೆ ಎಂದಿದ್ದಾರೆ.

"ಈ ಜಲರಾಶಿಯು ದಶಕಗಳ ಕಾಲ ಅತ್ಯಂತ ಸ್ಥಿರವಾಗಿತ್ತು (Super-stable). ಆದರೆ 2016 ರ ನಂತರ ಈ ಪ್ರವೃತ್ತಿ ಸಂಪೂರ್ಣವಾಗಿ ಉಲ್ಟಾ ಆಗಿದೆ. ಅಂಟಾರ್ಕ್ಟಿಕಾ ಸಮುದ್ರದ ಹಿಮದ ಕ್ಷಿಪ್ರ ಕರಗುವಿಕೆಯಿಂದಾಗಿ ಸಾಗರದ ಆಳದ ನೀರು ಹೆಚ್ಚು ಉಪ್ಪು, ಸಾಂದ್ರ ಹಾಗೂ ಆಳವಾಗಿ ಮಾರ್ಪಟ್ಟಿದೆ" ಎಂದು ಸಂಶೋಧನಾ ತಂಡದ ಪ್ರಮುಖ ಸದಸ್ಯ, ಐಐಎಸ್‌ಸಿಯ ಬೈಶಾಖ್‌ದತ್ತ ಗಾಯೇನ್ ತಿಳಿಸಿದ್ದಾರೆ.

ಅಲ್ಲದೆ, "ಈ ಬೃಹತ್ ಜಲರಾಶಿಯಲ್ಲಿ ಇಂತಹ ಪ್ರಮುಖ ಬದಲಾವಣೆಗಳು ಹಿಂದೆ ಸಾವಿರಾರು ವರ್ಷಗಳ ಅವಧಿಯಲ್ಲಿ ನಡೆಯುತ್ತಿದ್ದ ನೀರ್ಗಲ್ಲು-ನೀರ್ಗಲ್ಲಂತರ ಚಕ್ರಗಳಲ್ಲಿ (Glacial-interglacial cycles) ಸಂಭವಿಸುತ್ತಿದ್ದವು. ಆದರೆ, ಪ್ರಸ್ತುತ ನಾವು ಕೇವಲ ಒಂದೇ ದಶಕದ ಅವಧಿಯಲ್ಲಿ ಇಂತಹ ಆಘಾತಕಾರಿ ಪುನರ್ರಚನೆಯನ್ನು ಕಣ್ಣಾರೆ ಕಾಣುತ್ತಿದ್ದೇವೆ" ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ.

ಏನಿದು 'ಅಂಟಾರ್ಕ್ಟಿಕ್ ಇಂಟರ್ಮೀಡಿಯೇಟ್ ವಾಟರ್'?

ಭೂಮಿಯ ತಾಪಮಾನ ಏರಿಕೆಯಿಂದಾಗಿ (Global Warming) ವಾತಾವರಣದಲ್ಲಿ ಸಂಗ್ರಹವಾಗುವ ಶೇಕಡಾ 90 ರಷ್ಟು ಹೆಚ್ಚುವರಿ ಶಾಖವನ್ನು ಸಾಗರಗಳು ತಮ್ಮೊಳಗೆ ಹೀರಿಕೊಳ್ಳುತ್ತವೆ. ಹೀಗಾಗಿ ಸಾಗರಗಳ ಗುಣಲಕ್ಷಣಗಳಲ್ಲಿ ಉಂಟಾಗುವ ಯಾವುದೇ ಪ್ರಮುಖ ಬದಲಾವಣೆಯು ಇಡೀ ಜಗತ್ತಿನ ಹವಾಮಾನದ ಮೇಲೆ ನೇರ ಪರಿಣಾಮ ಬೀರುತ್ತದೆ.

ಭೂಮಿಯ ಹವಾಮಾನ ವ್ಯವಸ್ಥೆಯ 'ಎಂಜಿನಿಯರಿಂಗ್ ಕೊಠಡಿ' ಎಂದೇ ಕರೆಯಲ್ಪಡುವ ದಕ್ಷಿಣ ಮಹಾಸಾಗರವು (Southern Ocean) ಅಂಟಾರ್ಕ್ಟಿಕ್ ಹಿಮದ ಹೊದಿಕೆಯನ್ನು ಹೊಂದಿದ್ದು, ಜಾಗತಿಕ ಸಾಗರಗಳ ಆಳ ಹಾಗೂ ರಚನೆಯನ್ನು ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಇದು ಜಗತ್ತಿನಾದ್ಯಂತ ಭಾರಿ ಪ್ರಮಾಣದ ಶಾಖ ಮತ್ತು ಇಂಗಾಲವನ್ನು ರವಾನಿಸುವ ಪ್ರಮುಖ ಜಲರಾಶಿಗಳನ್ನು ಹೊಂದಿದೆ.

ಐಐಎಸ್‌ಸಿಯ ವಾತಾವರಣ ಮತ್ತು ಸಾಗರ ವಿಜ್ಞಾನ ಕೇಂದ್ರದ (CAOS) ವಿಜ್ಞಾನಿಗಳಾದ ಬೈಶಾಖ್‌ದತ್ತ ಗಾಯೇನ್, ಕೌಶಿಕ್ ಮಿಶ್ರಾ ಹಾಗೂ ಸೌತಾಂಪ್ಟನ್ ವಿಶ್ವವಿದ್ಯಾಲಯದ ಆಲ್ಬರ್ಟೊ ನವೇರಾ ಗ್ಯಾರಬಾಟೊ ಅವರು ಅಂಟಾರ್ಕ್ಟಿಕಾ ಬಳಿಯ ಸಾಗರ ಪರಿಚಲನೆಯ ಮಾದರಿಗಳನ್ನು ಅಧ್ಯಯನ ಮಾಡುತ್ತಿದ್ದಾಗ ಈ ಭಾರಿ ವ್ಯತ್ಯಾಸ ಬೆಳಕಿಗೆ ಬಂದಿದೆ.

ಅವರು ಅಧ್ಯಯನ ಮಾಡಿದ ಜಲರಾಶಿಯನ್ನು 'ಅಂಟಾರ್ಕ್ಟಿಕ್ ಇಂಟರ್ಮೀಡಿಯೇಟ್ ವಾಟರ್' (Antarctic Intermediate Water) ಎಂದು ಕರೆಯಲಾಗುತ್ತದೆ. ಇದು ಸಾಗರ ಮೇಲ್ಮೈಯಿಂದ 700 ರಿಂದ 1200 ಮೀಟರ್ ಆಳದಲ್ಲಿದ್ದು, ಶಾಖವನ್ನು ಹೀರಿಕೊಳ್ಳುವ ಮೇಲ್ಭಾಗದ ಸಾಗರವನ್ನು ಆಳದ ಕೆಳಭಾಗದ ಸಾಗರದಿಂದ ಪ್ರತ್ಯೇಕಿಸುತ್ತದೆ. ಈ ನೀರು ದಕ್ಷಿಣ ಮಹಾಸಾಗರದಿಂದ ಉತ್ತರಕ್ಕೆ ಅಟ್ಲಾಂಟಿಕ್, ಹಿಂದೂ ಮತ್ತು ಪೆಸಿಫಿಕ್ ಮಹಾಸಾಗರಗಳಿಗೆ ಹರಿಯುತ್ತದೆ ಮತ್ತು ಅಂಟಾರ್ಕ್ಟಿಕಾ ಬಳಿ ತಾನು ಪಡೆದ ಗುಣಲಕ್ಷಣಗಳನ್ನು ಸಾವಿರಾರು ಕಿಲೋಮೀಟರ್ ದೂರದಲ್ಲಿರುವ ಉಷ್ಣವಲಯದ ಮಹಾಸಾಗರಗಳಿಗೆ ಕೊಂಡೊಯ್ಯುತ್ತದೆ.

2016 ರಲ್ಲಿ ಬದಲಾದ ಸಮುದ್ರದ ಸಮತೋಲನ

ಪ್ರತಿ ವರ್ಷ ವಸಂತ ಮತ್ತು ಬೇಸಿಗೆಯಲ್ಲಿ ಹಿಮ ಕರಗಿದಾಗ, ಅದು ಸಾಗರ ಮೇಲ್ಮೈಗೆ ಸಿಹಿ ನೀರನ್ನು (Fresh Water) ಸೇರಿಸುತ್ತದೆ. 1970 ರ ದಶಕದಿಂದ 2015 ರವರೆಗೆ ಈ ಜಲರಾಶಿಯು ನಿರಂತರವಾಗಿ ಸಿಹಿಯಾಗಿ ಮತ್ತು ಹಗುರವಾಗಿ ಮಾರ್ಪಟ್ಟಿತ್ತು. ಆದರೆ, 2016 ರಿಂದೀಚೆಗೆ ಸಮುದ್ರದಲ್ಲಿ ಹಿಮದ ಪ್ರಮಾಣ ಭಾರಿ ಕುಸಿತ ಕಂಡಿದ್ದರಿಂದ ಪರಿಸ್ಥಿತಿ ಸಂಪೂರ್ಣವಾಗಿ ಬದಲಾಗಿದೆ.

ಸಾಗರದ ತಾಪಮಾನ ಮತ್ತು ಲವಣಾಂಶವನ್ನು ದಾಖಲಿಸುವ ಅಂತರರಾಷ್ಟ್ರೀಯ ರೋಬೋಟಿಕ್ ನೆಟ್‌ವರ್ಕ್ ಆದ 'ಆರ್ಗೋ' (Argo) ದ 20 ವರ್ಷಗಳ ಮಾಪನಗಳನ್ನು, ಉಪಗ್ರಹ ವೀಕ್ಷಣೆಗಳು ಹಾಗೂ 2004 ರಿಂದ 2024 ರವರೆಗಿನ ಸಾಗರ ವಿಶ್ಲೇಷಣೆಗಳೊಂದಿಗೆ ವಿಜ್ಞಾನಿಗಳು ಪರಿಶೀಲಿಸಿದ್ದಾರೆ. ಈ ಎಲ್ಲಾ ಮೂರು ದತ್ತಾಂಶಗಳು 2015 ರವರೆಗೆ ನೀರು ಸಿಹಿಯಾಗುತ್ತಿದ್ದುದನ್ನು ತೋರಿಸಿದ್ದರೆ, 2016 ರಿಂದೀಚೆಗೆ ಅಂಟಾರ್ಕ್ಟಿಕ್ ಇಂಟರ್ಮೀಡಿಯೇಟ್ ನೀರು ಹೆಚ್ಚು ಉಪ್ಪು, ಸಾಂದ್ರ ಹಾಗೂ ಆಳವಾಗುತ್ತಿರುವುದನ್ನು ಖಚಿತಪಡಿಸಿವೆ. ಈ ಪೈಕಿ ಅತ್ಯಂತ ಪ್ರಬಲವಾದ ಬದಲಾವಣೆಗಳು ದಕ್ಷಿಣ ಅಟ್ಲಾಂಟಿಕ್ ಮಹಾಸಾಗರದಲ್ಲಿ ಕಂಡುಬಂದಿವೆ.

ಭಾರತೀಯ ಮುಂಗಾರಿನ ಮೇಲೆ ಪ್ರಭಾವದ ಭೀತಿ!

ಈ ಸಾಗರ ಬದಲಾವಣೆಯ ಅಂತಿಮ ಪರಿಣಾಮಗಳು ಇನ್ನು ಸಂಪೂರ್ಣವಾಗಿ ತಿಳಿದುಬಂದಿಲ್ಲವಾದರೂ, ಇದು ಭಾರತ ಹಾಗೂ ದಕ್ಷಿಣ ಏಷ್ಯಾದ ಮುಂಗಾರಿನ (South Asian Monsoon) ಮೇಲೆ ತೀವ್ರ ಪರಿಣಾಮ ಬೀರುವ ಸಾಧ್ಯತೆಯಿದೆ. "ದಕ್ಷಿಣ ಮಹಾಸಾಗರವು ಹೀರಿಕೊಳ್ಳುವ ಶಾಖಕ್ಕೂ ದಕ್ಷಿಣ ಏಷ್ಯಾದ ಮುಂಗಾರು ಮಾರುತಗಳ ಚಲನೆಗೂ ನಿಕಟ ಸಂಬಂಧವಿದೆ ಎಂದು ಹಿಂದಿನ ಸಂಶೋಧನೆಗಳು ಸಾಬೀತುಪಡಿಸಿವೆ. ಹೀಗಾಗಿ ಮುಂಬರುವ ಕನಿಷ್ಠ 10 ವರ್ಷಗಳ ಕಾಲ ನಾವು ಈ ಬದಲಾವಣೆಯ ಪ್ರವೃತ್ತಿಯನ್ನು ಅತ್ಯಂತ ಸೂಕ್ಷ್ಮವಾಗಿ ಗಮನಿಸಬೇಕಾಗಿದೆ" ಎಂದು ಗಾಯೇನ್ ಹೇಳಿದ್ದಾರೆ. ವಿಜ್ಞಾನಿಗಳ ಈ ಮಹತ್ವದ ಹಾಗೂ ಆತಂಕಕಾರಿ ಸಂಶೋಧನಾ ಪ್ರಬಂಧವು ಜಗತ್ಪ್ರಸಿದ್ಧ 'ನೆಚರ್ ಕ್ಲೈಮೇಟ್ ಚೇಂಜ್' (Nature Climate Change) ನಿಯತಕಾಲಿಕೆಯಲ್ಲಿ ಪ್ರಕಟವಾಗಿದೆ.