Asianet Suvarna News

Premada Oorali ಸಿನಿಮಾದಲ್ಲಿ ನಾಯಕಿಯರಿಗೆ ರುಕ್ಮಿಣಿ, ವಸಂತ ಹೆಸರಿಟ್ಟಿದ್ದು ಏಕೆ? ನಿರ್ದೇಶಕ ರಿವೀಲ್

Suchethana D — Sun, 18 Oct 2026 12:12:38 +0530

ಕೇವಲ ಎರಡು ಕೋಟಿ ಬಜೆಟ್ನಲ್ಲಿ ಯಾವುದೇ ಗದ್ದಲವಿಲ್ಲದೇ ಆರಂಭವಾಗಿದ್ದ ಪ್ರೇಮದ ಊರಲಿ (Premada Oorali Movie) ಸಿನಿಮಾ 85 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡುವ ಮೂಲಕ ಚಿಕ್ಕ ಬಜೆಟ್ನ ಸಿನಿಮಾವೊಂದನ್ನು ಜನರು ಹೇಗೆ ಮೆಚ್ಚಿಕೊಳ್ಳುತ್ತಾರೆ ಎನ್ನುವುದನ್ನು ಸಾಬೀತು ಪಡಿಸಿದೆ. ಸ್ಟಾರ್ ನಟರಿಲ್ಲದೇ, ಪ್ರಚಾರದ ಅಬ್ಬರವಿಲ್ಲದೇ, ಹೀರೋ ಕೈಯಲ್ಲಿ ಲಾಂಗು, ಮಚ್ಚು ಕೊಡಿಸದೇ, ರಕ್ತಪಾತವಿಲ್ಲದೇ, ಇಂದಿನ ಜನರು ಬಯಸೋದು ಇದನ್ನೇ ಎಂದು ಹೇಳಿ ಅತಿ ಎನ್ನಿಸುವಷ್ಟು ಅಶ್ಲೀಲತೆ ತುಂಬದೆ, ಸೀದಾ ಸಾದಾ ಲವ್ ಸ್ಟೋರಿಯನ್ನೇ ವಿಭಿನ್ನವಾಗಿ ತೋರಿಸಿದರೆ ಜನರಿಂದ ಜನರ ಬಾಯಿಗೆ ಹೋಗಿಯೇ ಚಿತ್ರ ಯಾವ ಪರಿಯಲ್ಲಿ ಸಕ್ಸಸ್ ಕಾಣಬಹುದು ಎನ್ನುವುದಕ್ಕೆ ಸಾಕ್ಷಿಯಾಗಿ ನಿಂತಿರುವುದೇ ಪ್ರೇಮದ ಊರಲಿ.

ನಟಿ ರುಕ್ಮಿಣಿ ವಸಂತಾ ಪ್ರೇರಣೆನಾ?

ಅಷ್ಟಕ್ಕೂ ಈ ಸಿನಿಮಾದಲ್ಲಿ ಯಾರೂ ಅಷ್ಟೊಂದು ಹೆಚ್ಚಾಗಿ ಗಮನಿಸದ ಅಂಶವೊಂದಿದೆ. ಅದೇ ನಾಯಕಿಯರ ಹೆಸರು. ಒಬ್ಬಾಕೆಯ ಹೆಸರು ರುಕ್ಮಿಣಿ, ಇನ್ನೊಬ್ಬಳು ವಸಂತಾ. ಎರಡೂ ಸೇರಿದರೆ ರುಕ್ಮಿಣಿ ವಸಂತಾ. ಹಾಗಿದ್ದರೆ ನಟಿ ರುಕ್ಮಿಣಿ ವಸಂತಾಗೂ, ಈ ಎರಡೂ ಹೆಸರಿಗೂ ಲಿಂಕ್ ಇದ್ಯಾ ಎಂದು ಕೇಳಿದರೆ, ಒಂದರ್ಥದಲ್ಲಿ ಹೌದು, ಇನ್ನೊಂದರ್ಥದಲ್ಲಿ ಹಾಗೇನೂ ಇಲ್ಲ ಎಂದು ಈ ಹೆಸರಿನ ಕುತೂಹಲವನ್ನು ತೆರೆದಿಟ್ಟಿದ್ದಾರೆ ನಿರ್ದೇಶಕ ಮನೋಜ್. ಸದ್ಯ ಇವರು ಈಗ ಸೂಪರ್ಸ್ಟಾರ್ ಆಗಿದ್ದು, ಇವರಿಗೆ ಸಕತ್ ಡಿಮಾಂಡ್ ಬಂದಿದೆ. ಈ ಸಿನಿಮಾದ ಬಗ್ಗೆ ಪ್ರಶ್ನೆಗಳ ಸುರಿಮಳೆಯನ್ನೇ ಮಾಡಲಾಗುತ್ತಿದ್ದು, ಎಲ್ಲದ್ದಕ್ಕೂ ನಿರ್ದೇಶಕ ಮನೋಜ್ ಅವರು ಅಷ್ಟೇ ಸೈಲೆಂಟ್ ಆಗಿ, ಯಾವುದೇ ಬಿಗುಮಾನವಿಲ್ಲದೇ ಉತ್ತರಿಸುವುದು ಕೂಡ ಜನರಿಗೆ ಇಷ್ಟವಾಗುತ್ತಿದೆ.

ಅಷ್ಟಕ್ಕೂ ಈ ಸಿನಿಮಾಕ್ಕೆ ನಟಿ ರುಕ್ಮಿಣಿ ವಸಂತ್ ಅವರನ್ನು ತರಬೇಕು ಎನ್ನುವುದು ತಂಡದ ಆಶಯವಾಗಿದ್ದು ನಿಜ. ಆದರೆ ಆ ಸಮಯದಲ್ಲಿ ನಟಿ ಹೈದರಾಬಾದ್ನಲ್ಲಿ ಶೂಟಿಂಗ್ನಲ್ಲಿ ಇದ್ದರು. ಅವರನ್ನು ನಾವು ಅಪ್ರೋಚ್ ಮಾಡಲಿಲ್ಲ ಎಂದಿದ್ದಾರೆ ಮನೋಜ್. ಇದು ಕಡಿಮೆ ಬಜೆಟ್ ಸಿನಿಮಾ ಆಗಿತ್ತು. ಸಿನಿಮಾ ಸ್ಟೋರಿ ಕೇಳಿದ ಮೇಲೆ ರುಕ್ಮಿಣಿ ವಸಂತ್ ಅವರು ನಾವು ಕೊಡುವ ಹಣಕ್ಕೆ ಬರುತ್ತಿದ್ದರು ಎನ್ನುವುದರಲ್ಲಿ ಸಂದೇಹವಿಲ್ಲ. ಆದರೂ ಅವರು ಇದಾಗಲೇ ದೊಡ್ಡ ಸ್ಟಾರ್ ಆಗಿರುವ ಹಿನ್ನೆಲೆಯಲ್ಲಿ, ಕಡಿಮೆ ಬಜೆಟ್ ಸಿನಿಮಾಕ್ಕೆ ಕರೆಸುವುದು ಕೂಡ ಮುಜುಗರವಾಗಿತ್ತು ಎನ್ನುತ್ತಲೇ, ಮನೋಜ್ ಅವರು, ಯಾವುದೇ ನಟ-ನಟಿಯರು ಸಂಭಾವನೆ ಕಡಿಮೆ ಕೊಟ್ಟ ಮಾತ್ರಕ್ಕೆ ಸಿನಿಮಾ ಒಪ್ಪಲ್ಲ ಎಂದು ಹೇಳುವುದಿಲ್ಲ. ಕಥೆ ಇಷ್ಟವಾದರೆ ಒಪ್ಪಿಯೇ ಒಪ್ಪುತ್ತಾರೆ. ಹಾಗೆ ನಟಿ ರುಕ್ಮಿಣಿ ವಸಂತ್ ಅವರೂ ಒಪ್ಪುತ್ತಿದ್ದರು. ಆದರೆ ನಾವು ಅವರನ್ನು ಅಪ್ರೋಚ್ ಮಾಡಲಿಲ್ಲ, ಆದರೆ ಅವರನ್ನು ಸಿನಿಮಾಕ್ಕೆ ಹಾಕುವ ಯೋಚನೆ ಇದ್ದದ್ದು ನಿಜ ಎಂದಿದ್ದಾರೆ.

ವಸಂತಾ ಹೆಸರಿಡಲು ಕಾರಣ...

ಅದೇ ಕಾರಣಕ್ಕೆನೇ ನಾಯಕಿಯರಿಗೆ ಈ ಹೆಸರಾ ಕೇಳಿದಾಗ, ಆ ಹೆಸರು ಚೆನ್ನಾಗಿತ್ತು ಎಂದು ನಾಯಕಿಯರಿಗೆ ಇಟ್ಟಿದ್ದು ನಿಜನೇ. ಆದರೆ ವಸಂತಾ ಹೆಸರಿನ ಹಿಂದೆ ಇನ್ನೊಂದು ವಿಶೇಷತೆ ಕೂಡ ಇದೆ ಎಂದಿದ್ದಾರೆ ಮನೋಜ್. ವಸಂತ ಎಂದರೆ ಅದೊಂದು ಸುಗ್ಗಿಯ ಕಾಲ. ಒಂದಷ್ಟು ದಿನಗಳು ಎಲ್ಲರ ಮನಸ್ಸಿಗೆ ಮುದ ನೀಡುವ ವಸಂತ ಕಾಲ ಕೊನೆಗೆ ಮರೆಯಾಗುತ್ತದೆ. ಇಲ್ಲಿ ವಸಂತಾಳ ಪಾತ್ರ ಕೂಡ ಅದೇ ರೀತಿ ಇದೆ. ಆಕೆ ಎಲ್ಲರ ಮನಸ್ಸಿನಲ್ಲಿಯೂ ಶಾಶ್ವತವಾಗಿ ಉಳಿಯುವಂಥವಳು. ಇದೇ ಕಾರಣಕ್ಕೆ ವಸಂತಾ ಎಂದು ಹೆಸರಿಟ್ವಿ ಎಂದಿದ್ದಾರೆ.

ಪತಿ ಶರತ್ ಬಗ್ಗೆ ಮನದಾಳದ ಮಾತು ಬಿಚ್ಚಿಟ್ಟ 'ಕಾಮಿಡಿ ಕಿಲಾಡಿಗಳು' ನಯನಾ: ಆ ಮಾತಿನ ಹಿಂದಿದೆ ಈ ಕಥೆ

Govindaraj S — Mon, 19 Oct 2026 16:31:29 +0530

ಕನ್ನಡ ಕಿರುತೆರೆಯ ಕಾಮಿಡಿ ಶೋಗಳ ಮೂಲಕ ಪ್ರೇಕ್ಷಕರ ಮನ ಗೆದ್ದಿರುವ ಕಾಮಿಡಿ ಕಿಲಾಡಿಗಳು ಖ್ಯಾತಿಯ ನಟಿ ನಯನಾ ಇದೀಗ ತಮ್ಮ ವೈಯಕ್ತಿಕ ಜೀವನದ ವಿಚಾರವಾಗಿ ಸುದ್ದಿಯಲ್ಲಿದ್ದಾರೆ. ಸದಾ ನಗಿಸುತ್ತಾ, ಪ್ರೇಕ್ಷಕರನ್ನು ರಂಜಿಸುವ ನಯನಾ, ತಮ್ಮ ದಾಂಪತ್ಯ ಜೀವನದ ಬಗ್ಗೆ ಮಾತನಾಡುತ್ತಾ ಮನದಾಳದ ನೋವನ್ನು ಹಂಚಿಕೊಂಡಿದ್ದಾರೆ. ಪತಿ ಶರತ್ ಅವರೊಂದಿಗಿನ ಸಂಬಂಧ, ವೃತ್ತಿಜೀವನದ ಒತ್ತಡ ಹಾಗೂ ಅವರಿಗೆ ಸಾಕಷ್ಟು ಸಮಯ ನೀಡಲು ಸಾಧ್ಯವಾಗದಿರುವ ಬಗ್ಗೆ ಅವರು ಹೇಳಿಕೊಂಡಿರುವ ಮಾತುಗಳು ಗಮನ ಸೆಳೆಯುತ್ತಿವೆ.

ಪತಿಗೆ ಸಮಯ ಕೊಡಲಾಗಲಿಲ್ಲ; ನಯನಾ ಮನದಾಳದ ಮಾತು

‘ಕಾಫಿ ವಿತ್ ಮೋನಿಕಾ’ ಸಂದರ್ಶನದಲ್ಲಿ ಮಾತನಾಡಿರುವ ನಯನಾ, ತಮ್ಮ ದಾಂಪತ್ಯ ಜೀವನದ ಹಲವು ವಿಚಾರಗಳನ್ನು ಮುಕ್ತವಾಗಿ ಹಂಚಿಕೊಂಡಿದ್ದಾರೆ. ಜೀವನ ಸಂಗಾತಿಯಾಗಿ ಶರತ್ ಅವರನ್ನು ಆಯ್ಕೆ ಮಾಡಿಕೊಂಡ ವಿಚಾರದ ಬಗ್ಗೆ ಮಾತನಾಡುತ್ತಾ, ತಮ್ಮಿಂದಾಗಿ ಅವರು ಸಾಕಷ್ಟು ನೋವು ಮತ್ತು ಕಷ್ಟಗಳನ್ನು ಅನುಭವಿಸಿದ್ದಾರೆ ಎಂಬ ಬೇಸರವನ್ನು ವ್ಯಕ್ತಪಡಿಸಿದ್ದಾರೆ.

ನಯನಾ ಜನಪ್ರಿಯ ನಟಿಯಾಗಿರುವುದರಿಂದ ಎಲ್ಲಿಗೆ ಹೋದರೂ ಜನರು ಗುರುತಿಸುತ್ತಾರೆ. ಹೀಗಾಗಿ ಪತಿ ಶರತ್ ಅವರೊಂದಿಗೆ ಎಲ್ಲೆಂದರಲ್ಲಿ ಮುಕ್ತವಾಗಿ ಓಡಾಡಲು, ಸಾಮಾನ್ಯ ದಂಪತಿಗಳಂತೆ ನೆಮ್ಮದಿಯಿಂದ ಸಮಯ ಕಳೆಯಲು ಸಾಧ್ಯವಾಗುತ್ತಿರಲಿಲ್ಲವಂತೆ. ಈ ಸಂಗತಿಯೇ ತಮ್ಮ ವೈಯಕ್ತಿಕ ಜೀವನದ ಮೇಲೆ ಪರಿಣಾಮ ಬೀರಿದೆ ಎಂಬ ನೋವನ್ನು ಅವರು ಹಂಚಿಕೊಂಡಿದ್ದಾರೆ.

ವೃತ್ತಿಜೀವನದ ನಡುವೆ ದಾಂಪತ್ಯಕ್ಕೆ ಸಮಯದ ಕೊರತೆ!

ನಟನೆಯ ಕೆಲಸ, ನಿರಂತರ ಶೂಟಿಂಗ್ ಹಾಗೂ ಬಿಡುವಿಲ್ಲದ ವೇಳಾಪಟ್ಟಿಯ ನಡುವೆ ಪತಿಗೆ ಬೇಕಾದಷ್ಟು ಸಮಯ ನೀಡಲು ಸಾಧ್ಯವಾಗಲಿಲ್ಲ ಎಂಬುದು ನಯನಾ ಅವರ ಪ್ರಮುಖ ಬೇಸರ. ಹೆಂಡತಿಯಾಗಿ ಪತಿಯನ್ನು ನೋಡಿಕೊಳ್ಳಬೇಕಾದ ರೀತಿಯಲ್ಲಿ ತಾವು ನಡೆದುಕೊಳ್ಳಲು ಸಾಧ್ಯವಾಗಲಿಲ್ಲ ಎಂಬ ಅಪರಾಧ ಪ್ರಜ್ಞೆ ತಮ್ಮನ್ನು ಕಾಡುತ್ತದೆ ಎಂದು ಅವರು ಹೇಳಿದ್ದಾರೆ.

ಶರತ್ ಒಳ್ಳೆಯ ವ್ಯಕ್ತಿಯಾಗಿದ್ದು, ಅವರಿಗೆ ತಮ್ಮನ್ನು ಮೀರಿದ ಕಾಳಜಿ ವಹಿಸುವ ಸಂಗಾತಿ ಸಿಗಬೇಕಿತ್ತು ಎಂಬ ಅಭಿಪ್ರಾಯವನ್ನೂ ನಯನಾ ವ್ಯಕ್ತಪಡಿಸಿದ್ದಾರೆ. ಅವರ ಈ ಮಾತುಗಳು ತಮ್ಮ ಪತಿಯ ಬಗ್ಗೆ ಅವರಿಗಿರುವ ಗೌರವ ಹಾಗೂ ತಾವು ಮಾಡಲಾಗದ ಕೆಲವು ಸಂಗತಿಗಳ ಕುರಿತಾದ ಪಶ್ಚಾತ್ತಾಪವನ್ನು ಪ್ರತಿಬಿಂಬಿಸುತ್ತವೆ.

ಆರ್ಥಿಕ ಬೆಂಬಲ ನೀಡಿದೆ, ಆದರೆ ಮಾನಸಿಕ ನೆಮ್ಮದಿ ಕೊಡಲಾಗಲಿಲ್ಲ!

ತಮ್ಮ ದಾಂಪತ್ಯ ಜೀವನದ ಬಗ್ಗೆ ಮಾತನಾಡುವಾಗ ನಯನಾ ಹಂಚಿಕೊಂಡ ಮತ್ತೊಂದು ವಿಚಾರ ಭಾವುಕವಾಗಿದೆ. ಪತಿಗೆ ಆರ್ಥಿಕವಾಗಿ ಬೆಂಬಲ ನೀಡಲು ಸಾಧ್ಯವಾಯಿತಾದರೂ, ಅವರಿಗೆ ಅಗತ್ಯವಿದ್ದ ಮಾನಸಿಕ ನೆಮ್ಮದಿ ಮತ್ತು ಸಮಯವನ್ನು ನೀಡಲು ಸಾಧ್ಯವಾಗಲಿಲ್ಲ ಎಂಬ ಬೇಸರವನ್ನು ಅವರು ವ್ಯಕ್ತಪಡಿಸಿದ್ದಾರೆ.

ದಂಪತಿಗಳ ಜೀವನದಲ್ಲಿ ಪ್ರೀತಿ ಮಾತ್ರವಲ್ಲದೆ, ಪರಸ್ಪರ ಸಮಯ ನೀಡುವುದು, ಒಬ್ಬರನ್ನೊಬ್ಬರು ಅರ್ಥಮಾಡಿಕೊಳ್ಳುವುದು ಹಾಗೂ ಜೊತೆಯಾಗಿ ಕ್ಷಣಗಳನ್ನು ಕಳೆಯುವುದೂ ಅಷ್ಟೇ ಮುಖ್ಯ. ಆದರೆ ವೃತ್ತಿಜೀವನದ ಒತ್ತಡದ ನಡುವೆ ಈ ಸಮತೋಲನವನ್ನು ಕಾಯ್ದುಕೊಳ್ಳಲು ಸಾಧ್ಯವಾಗಲಿಲ್ಲ ಎಂಬ ಭಾವನೆ ನಯನಾ ಅವರ ಮಾತುಗಳಲ್ಲಿ ವ್ಯಕ್ತವಾಗಿದೆ.

ಶರತ್ ಜೊತೆಗಿನ ದಾಂಪತ್ಯ ಜೀವನದ ಬಗ್ಗೆ ಚರ್ಚೆ

ನಯನಾ ಅವರು 2018ರ ಏಪ್ರಿಲ್ 19ರಂದು ಬೆಂಗಳೂರಿನ ಉದ್ಯಮಿ ಶರತ್ ಅವರೊಂದಿಗೆ ಧರ್ಮಸ್ಥಳದಲ್ಲಿ ವಿವಾಹವಾಗಿದ್ದರು. ಈ ದಂಪತಿಗೆ ಹೆಣ್ಣು ಮಗುವಿದ್ದು, ಮಗುವಿಗೆ ಅವಿನ್ಯಾ ಶ್ರೇಯಾ ಶೆಟ್ಟಿ ಎಂದು ಹೆಸರಿಡಲಾಗಿದೆ. ಕಿರುತೆರೆಯಲ್ಲಿ ತಮ್ಮ ಹಾಸ್ಯದಿಂದ ಜನರನ್ನು ನಗಿಸುವ ನಯನಾ, ವೈಯಕ್ತಿಕ ಜೀವನದ ಬಗ್ಗೆ ಇಷ್ಟು ಮುಕ್ತವಾಗಿ ಮಾತನಾಡಿರುವುದು ಇದೀಗ ಗಮನ ಸೆಳೆಯುತ್ತಿದೆ. ಅವರ ಹೇಳಿಕೆಗಳು ದಾಂಪತ್ಯದಲ್ಲಿ ಸಮಯ ಮತ್ತು ಪರಸ್ಪರ ಕಾಳಜಿಯ ಮಹತ್ವದ ಬಗ್ಗೆಯೂ ಚರ್ಚೆಗೆ ಕಾರಣವಾಗಿವೆ.

ಇನ್ನು ಪರದೆಯ ಮೇಲೆ ನಗುವಿನ ಅಲೆ ಎಬ್ಬಿಸುವ ನಟಿ ನಯನಾ ಅವರ ಮನದಾಳದ ಮಾತುಗಳು ಅವರ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿವೆ. ತಮ್ಮ ದಾಂಪತ್ಯದ ಏಳುಬೀಳುಗಳ ಬಗ್ಗೆ ಅವರು ಹಂಚಿಕೊಂಡಿರುವ ಅನುಭವಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿಯೂ ಚರ್ಚೆಯಾಗುತ್ತಿವೆ.

ಗಂಡನ 'ಲಕ್ಷ್ಮೀಪುತ್ರ' ಸಿನಿಮಾ ಪ್ರಮೋಷನ್ ಮಾಡಿ ಅಂದ್ರೆ, ಕಥೆನೇ ರಿವೀಲ್ ಮಾಡಿದ ಚಿಕ್ಕಣ್ಣನ ಹೆಂಡ್ತಿ ಪಾವನಾ!

Sathish Kumar KH — Sun, 18 Oct 2026 16:30:09 +0530

ಕನ್ನಡ ಚಿತ್ರರಂಗದ ಹಾಸ್ಯ ನಟ ಚಿಕ್ಕಣ್ಣ ಅವರು ನಾಯಕ ನಟನಾಗಿ ನಟಿಸಿರುವ ಲಕ್ಷ್ಮೀಪುತ್ರ ಸಿನಿಮಾ ಮದುವೆಯಾದ ನಂತರ ಬೆಳ್ಳಿತೆರೆಗೆ ಬರುತ್ತಿದೆ. ಇನ್ನು ಹೊಸದಾಗಿ ಮದುವೆಯಾದ ಚಿಕ್ಕಣ್ಣನ ಹೆಂಡತಿ ಪಾವನಾ ಕೂಡ ಗಂಡನ ಸಿನಿಮಾ ಲಕ್ಷ್ಮೀಪುತ್ರ ಪ್ರಚಾರ ಕಾರ್ಯಕ್ರಮಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಮಾಧ್ಯಮಗಳ ಮುಂದೆ ಸಿನಿಮಾದ ಪ್ರಮೋಷನ್ ಮಾಡಿ ಅಂದರೆ ಕಥಾವಸ್ತುವನ್ನೇ ರಿವೀಲ್ ಮಾಡಿದ್ದಾರೆ.

ಹೌದು, ಚಿಕ್ಕಣ್ಣ ಅವರ ಹೆಂಡತಿ ಪಾವನಾ ಅವರು ಗಂಡನ ಸಿನಿಮಾ ಕಾರ್ಯಕ್ರಮಗಳಲ್ಲಿ ತೊಡಗಿಕೊಂಡು ಅವರಿಗೆ ಬೆನ್ನುಲುಬಾಗಿ ನಿಂತಿದ್ದಾರೆ. ಗಂಡನ ಸಿನಿಮಾವನ್ನು ಗೆಲ್ಲಿಸಲು ತಮ್ಮ ಕೈಲಾದಷ್ಟು ಕೊಡುಗೆ ನೀಡಲು ಮುಂದಾಗಿದ್ದಾರೆ. ಆದರೆ, ಸಿನಿಮಾ ನಟ, ನಟಿಯರು, ನಿರ್ದೇಶಕರು ಹಾಗೂ ನಿರ್ಮಾಪಕರಿಗಿಂತ ಮಾಧ್ಯಮಗಳಿಗೆ ಚಿಕ್ಕಣ್ಣ ಅವರ ಹೆಂಡತಿ ಪಾವನಾ ಅವರ ಮಾತಿನ ಮೇಲೆಯೇ ಆಸಕ್ತಿ. ಏಕೆಂದರೆ ಸಿನಿಮಾ ರಂಗಕ್ಕೆ ಅವರು ಹೊಸಬರು. ಗಂಡನ ಗೆಲುವಿಗಾಗಿ ಶ್ರಮಿಸಲು ಮುಂದಾದ ಅವರ ನಡೆಗೆ ಪ್ರೋತ್ಸಾಹ ನೀಡುವುದು ಕೂಡ ಮಾಧ್ಯಮಗಳ ಉದ್ದೇಶವಾಗಿದೆ.

ತಾಯಿ ಇಷ್ಟಪಡುವವರಿಗೆ ಸಿನಿಮಾ ಇಷ್ಟವಾಗುತ್ತೆ

ಈ ವೇಳೆ ಮಾಧ್ಯಮಗಳು ಅವರ ಟಿವಿ ಚಾನೆಲ್‌ಗಳ ಲೋಗೋಗಳನ್ನು ಹಿಡಿದು ಸಿನಿಮಾ ಬಗ್ಗೆ ಮಾತನಾಡಿ ಎಂದು ಕೇಳುತ್ತಾರೆ. ಆಗ ಧೈರ್ಯದಿಂದಲೇ ಮಾತನಾಡಿದ ಪಾವನಾ ಚಿಕ್ಕಣ್ಣ ಅವರು, ಎಲ್ಲರಿಗೂ ನಮಸ್ಕಾರ, ನವೆಂಬರ್ 27ರಂದು ಚಿಕ್ಕಣ್ಣ ಅವರ ಹೊಸ ಸಿನಿಮಾ ರಿಲೀಸ್ ಆಗ್ತಿದೆ. ಎಲ್ಲ ಪ್ರೇಕ್ಷಕರು ಕೂಡ ಚಿತ್ರಮಂದಿರಕ್ಕೆ ಬಂದು ಸಿನಿಮಾ ನೋಡಿ ಹರಸಿ ಹಾರೈಸಬೇಕು. ಮೂವಿ ತುಂಬಾ ಚೆನ್ನಾಗಿದೆ. ಯಾರಾರಿಗೆ ಅವರ ತಾಯಿ ಎಂದರೆ ತುಂಬಾ ಇಷ್ಟವೋ ಅವರೆಲ್ಲರೂ ಈ ಲಕ್ಷ್ಮೀಪುತ್ರ ಸಿನಿಮಾವನ್ನು ನೋಡಿ ಚೆನ್ನಾಗಿದೆ ಎಂದು ಹೇಳೇ ಹೇಳುತ್ತಾರೆ.

ಇನ್ನು ಚಿಕ್ಕಣ್ಣ ಅವರಿಗೆ ಮದುವೆಯಾದ ನಂತರ ಮೊದಲ ಸಿನಿಮಾ. ಹೀಗಾಗಿ ನಾನು ಸಿನಿಮಾದ ಬಗ್ಗೆ ಭಾರೀ ಎಕ್ಸೈಟೆಡ್ ಆಗಿದ್ದೇನೆ, ಜೊತೆಗೆ ಒಂದಷ್ಟು ನರ್ವಸ್ ಕೂಡ ಆಗ್ತಿದೆ. ಮೊದಲ ಸಿನಿಮಾ ಜನರು ಹೇಗೆ ಸ್ವೀಕಾರ ಮಾಡುತ್ತಾರೆ ಎನ್ನುವ ಕುತೂಹಲ ಜಾಸ್ತಿಯಿದೆ. ಆದರೆ, ನಾನು ಸಿನಿಮಾ ನೋಡಿದ್ದೇನೆ, ನಂಗೆ ತುಂಬಾ ಇಷ್ಟವಾಯ್ತು. ಜೊತೆಗೆ ಸಿನಿಮಾ ನೋಡುವ ಎಲ್ಲರಿಗೂ ತುಂಬಾ ಇಷ್ಟ ಆಗುತ್ತದೆ. ಯಾರಾರು ತಮ್ಮ ತಾಯಿಯನ್ನು ಇಷ್ಟಪಡುತ್ತಾರೋ ಅವರೆಲ್ಲರಿಗೂ ಇಷ್ಟ ಆಗುತ್ತದೆ ಎಂದು ಹೇಳಿದರು.

ಚಿಕ್ಕಣ್ಣ ಅವರು ಹಾಸ್ಯನಟ ಅಂತಲೇ ಹೇಳ್ತಾರೆ, ಅದ್ರೆ ಅವರು ಎಲ್ಲ ಪಾತ್ರಗಳಿಗೂ ಸೂಟ್ ಆಗ್ತಾರೆ. ಯಾವ ಪಾತ್ರಗಳನ್ನು ಕೊಟ್ಟರೂ ಅದಕ್ಕೆ ಜೀವ ತುಂಬುವ ಕಲೆ ಅವರಲ್ಲಿದೆ. ಲಕ್ಷ್ಮೀ ಪುತ್ರ ಸಿನಿಮಾವನ್ನು ನೋಡಿದರಿಗೆ ಚಿಕ್ಕಣ್ಣ ಅವರು ಒಬ್ಬ ಹೀರೋ ಮೆಟೀರಿಯಲ್ ಎನ್ನುವುದು ತಿಳಿಯುತ್ತದೆ.

ಇದರಲ್ಲಿ ಕಥೆ ರಿವೀಲ್ ಎಲ್ಲಿ ಮಾಡಿದ್ರು?

ಪಾವನಾ ಅವರು ತುಂಬಾ ಜಾಣೆ. ಸಿನಿಮಾದ ಬಗ್ಗೆ ಅನುಭವ ಇಲ್ಲದಿದ್ದರೂ ಗಂಡನ ಸಿನಿಮಾಗಾಗಿ ಮಾಧ್ಯಮಗಳ ಕ್ಯಾಮೆರಾವನ್ನು ಧೈರ್ಯವಾಗಿ ಎದುರಿಸಿದ್ದಾರೆ. ಸ್ವಲ್ಪ ಭಯ ಎನ್ನುವುದು ಮನಸ್ಸಿನಲ್ಲಿದ್ದರೂ ಅದನ್ನು ತೋರಿಸಿಕೊಳ್ಳದೇ ಮಾತನಾಡಿದ್ದು, ಮಾಧ್ಯಮಗಳು ಕೇಳಿದ ಪ್ರಶ್ನೆಗಳಿಗೆ ಉತ್ತರಿಸಿದ್ದಾರೆ. ಇಲ್ಲಿ ಅವರು ಸಿನಿಮಾ ಕಥೆಯನ್ನು ರಿವೀಲ್ ಮಾಡಿಲ್ಲ, ಕಥಾವಸ್ತುವನ್ನು ಬಿಚ್ಚಿಟ್ಟಿದ್ದಾರೆ. ಸಿನಿಮಾ ನೋಡುಗರಿಗೆ ತಾಯಿ-ಮಗನ ವಿಷಯವಸ್ತು ಇರುವುದನ್ನು ರಿವೀಲ್ ಮಾಡಿದ್ದು, ಪ್ರೇಕ್ಷಕರು ಚಿತ್ರಮಂದಿರಕ್ಕೆ ಬರುವಂತೆ ಕುತೂಹಲ ಮೂಡಿಸಿದ್ದಾರೆ.

ಕನ್ನಡ ಚಿತ್ರರಂಗದಲ್ಲಿ ಈಗಾಗಲೇ ಹಲವು ನಟರ ಪತ್ನಿಯರು ಗಂಡನಿಗೆ ಬೆನ್ನುಲುಬಾಗಿ ನಿಂತಿದ್ದಾರೆ. ಅದಕ್ಕೆ ಉದಾಹರಣೆ ಎಂದರೆ ಡಾ.ರಾಜ್ ಕುಮಾರ್ ಅವರಿಗೆ ಪಾರ್ವತಮ್ಮ ಅವರಿಂದ ಹಿಡಿದು, ಈಗ ಶಿವರಾಜ್ ಕುಮಾರ್ ಅವರಿಗೆ ಗೀತಾ ಅವರು, ಯಶ್ ಅವರಿಗೆ ರಾಧಿಕಾ, ಉಪೇಂದ್ರ ಅವರಿಗೆ ಪ್ರಿಯಾಂಕಾ, ಪ್ರೇಮ್‌ಗೆ ರಕ್ಷಿತಾ, ತರುಣ್ ಸುಧೀರ್‌ಗೆ ಸೋನಲ್, ವಶಿಷ್ಠ ಸಿಂಹ ಅವರಿಗೆ ನಟಿ ಹರಿಪ್ರಿಯಾ ಮುಂತಾದವರು ಇದಕ್ಕೆ ಉತ್ತಮ ಉದಾಹರಣೆ ಆಗಿದ್ದಾರೆ. ಈ ಸಾಲಿಗೆ ಇದೀಗ ಹೊಸದಾಗಿ ಚಿಕ್ಕಣ್ಣನಿಗೆ ಸಾಥ್ ಕೊಡಲು ಪಾವನಾ ಅವರು ಸೇರಿಕೊಂಡಿದ್ದಾರೆ.

'ಯಾವ ನಾಯಿ-ನರಿಗಳು ಕುತಂತ್ರ ಮಾಡಿದ್ರೂ ಡಿ ಬಾಸ್‌ನ ಏನೂ ಮಾಡೋಕಾಗಲ್ಲ, ಹೊರಗೆ ಬಂದೇ ಬರ್ತಾರೆ': ನಟ ಧನ್ವೀರ್!

Sathish Kumar KH — Sun, 18 Oct 2026 23:37:34 +0530

ಚಾಮರಾಜನಗರ (ಅ.18): ಗಡಿ ಜಿಲ್ಲೆ ಚಾಮರಾಜನಗರದಲ್ಲಿ ಅದ್ದೂರಿಯಾಗಿ ನಡೆಯುತ್ತಿರುವ ದಸರಾ ಮಹೋತ್ಸವದ ವೇದಿಕೆಯಲ್ಲಿ ಚಾಲೆಂಜಿಂಗ್ ಸ್ಟಾರ್ ದರ್ಶನ್ (Darshan Thoogudeepa) ಅವರ ಪರವಾಗಿ ಜಯಘೋಷಗಳು ಮುಗಿಲು ಮುಟ್ಟಿವೆ. ಕಾರ್ಯಕ್ರಮಕ್ಕೆ ವಿಶೇಷ ಅತಿಥಿಯಾಗಿ ನಟ ಧನ್ವೀರ್ (Actor Dhanveerah) ಆಗಮಿಸುತ್ತಿದ್ದಂತೆ, ಅಭಿಮಾನಿಗಳು 'ಡಿ ಬಾಸ್... ಡಿ ಬಾಸ್...' ಎಂದು ಕೂಗಿ ಜೈಕಾರ ಹಾಕಿದ್ದು, ಈ ವೇಳೆ ದರ್ಶನ್ ಬಗ್ಗೆ ಧನ್ವೀರ್ ಆಡಿದ ಮಾತುಗಳು ಭಾರೀ ಚರ್ಚೆಗೆ ಗ್ರಾಸವಾಗಿವೆ.

ವೇದಿಕೆ ಏರುತ್ತಿದ್ದಂತೆ ಡಿ ಬಾಸ್ ಕಹಳೆ!

ಚಾಮರಾಜನಗರ ದಸರಾ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಸ್ಯಾಂಡಲ್‌ವುಡ್ ಯುವ ನಟ ಧನ್ವೀರ್ ಗೌಡ ವೇದಿಕೆಗೆ ಆಗಮಿಸಿದರು. ಅವರು ಮೈಕ್ ಕೈಗೆತ್ತಿಕೊಳ್ಳುತ್ತಿದ್ದಂತೆ ನೆರೆದಿದ್ದ ಸಹಸ್ರಾರು ಅಭಿಮಾನಿಗಳು ದರ್ಶನ್ ಅವರ ಪರವಾಗಿ ಘೋಷಣೆ ಕೂಗಲಾರಂಭಿಸಿದರು. ಅಭಿಮಾನಿಗಳ ಪ್ರೀತಿಯನ್ನು ಕಂಡು ಭಾವುಕರಾದ ಧನ್ವೀರ್, ಎಲ್ಲರಿಗೂ ದಸರಾ ಹಬ್ಬದ ಶುಭಾಶಯ ಕೋರಿದರು. 'ಎಲ್ಲರಿಗೂ ದಸರಾ ಹಬ್ಬದ ಹಾರ್ದಿಕ ಶುಭಾಶಯಗಳು. ನಾಡದೇವತೆ ತಾಯಿ ಚಾಮುಂಡೇಶ್ವರಿಯ ಆಶೀರ್ವಾದ ಎಲ್ಲರ ಮೇಲೂ ಇರಲಿ. ನಿಮ್ಮ ಪ್ರೀತಿ ಮತ್ತು ಪ್ರೋತ್ಸಾಹ ನಮ್ಮ ಮೇಲೆ ಸದಾ ಹೀಗೇ ಇರಲಿ. ನನಗೂ ಮತ್ತು ಚಾಮರಾಜನಗರಕ್ಕೂ ಅವಿನಾಭಾವ ಸಂಬಂಧವಿದೆ, ಏಕೆಂದರೆ ನಾನು ಯಾವಾಗಲೂ ನನ್ನ ಸಿನಿಮಾಗಳ ಪ್ರಮೋಷನ್ ಇಲ್ಲಿಂದಲೇ ಆರಂಭಿಸುತ್ತೇನೆ. ಈ ಜಿಲ್ಲೆಯಲ್ಲಿ ನನಗೆ ಮಾದಪ್ಪನ ಬೆಟ್ಟ ಎಂದರೆ ತುಂಬಾ ಇಷ್ಟ' ಎಂದು ಹೇಳಿದರು.

'ಯಾವ ನಾಯಿ-ನರಿಗಳ ಕುತಂತ್ರವೂ ನಡೆಯಲ್ಲ: ಧನ್ವೀರ್ ಖಡಕ್ ಮಾತು!

ಈ ಸಂದರ್ಭದಲ್ಲಿ ನೆರೆದಿದ್ದ ಯುವಕರು ಮತ್ತೆ 'ಡಿ ಬಾಸ್' ಪರ ಘೋಷಣೆಗಳನ್ನು ಕೂಗುತ್ತಾ ಧನ್ವೀರ್ ಅವರ ಗಮನ ಸೆಳೆದರು. ಆಗ ಮಾತನಾಡಿದ ಧನ್ವೀರ್, ದರ್ಶನ್ ವಿರೋಧಿಗಳಿಗೆ ವೇದಿಕೆ ಮೇಲಿಂದಲೇ ಖಡಕ್ ಸಂದೇಶ ರವಾನಿಸಿದರು. 'ಯಾವ ನಾಯಿ-ನರಿಗಳು ಎಷ್ಟೇ ಕುತಂತ್ರ ಮಾಡಿದ್ರೂ ಸಹ ಅವರನ್ನು (ದರ್ಶನ್) ಏನೂ ಮಾಡಲಿಕ್ಕೆ ಆಗಲ್ಲ. ನಿಮ್ಮೆಲ್ಲರ ಪ್ರೀತಿ, ಆಶೀರ್ವಾದ ಅವರ ಮೇಲಿದೆ. ದರ್ಶನ್ ಅವರು ಜೈಲಿನಿಂದ ಹೊರಗಡೆ ಬಂದೇ ಬರ್ತಾರೆ' ಎಂದು ಗರ್ಜಿಸಿದರು. ಧನ್ವೀರ್ ಅವರ ಈ ಮಾತನ್ನು ಕೇಳಿದ ದರ್ಶನ್ ಅಭಿಮಾನಿಗಳು ಚಪ್ಪಾಳೆ, ಶಿಳ್ಳೆ ಹೊಡೆದು ಸಂಭ್ರಮಿಸಿದರು.

ಸದ್ಯ ಪರಪ್ಪನ ಅಗ್ರಹಾರ ಜೈಲಿನಲ್ಲಿರುವ ನಟ ದರ್ಶನ್‌ಗೆ ಆಪ್ತರಾಗಿರುವ ನಟ ಧನ್ವೀರ್, ಮೊದಲಿನಿಂದಲೂ ದರ್ಶನ್ ಪರವಾಗಿ ಗಟ್ಟಿಯಾಗಿ ನಿಂತುಕೊಂಡಿದ್ದಾರೆ. ಇದೀಗ ಚಾಮರಾಜನಗರ ದಸರಾ ವೇದಿಕೆಯಲ್ಲೂ ಬಹಿರಂಗವಾಗಿ ದರ್ಶನ್ ಪರ ಬ್ಯಾಟ್ ಬೀಸಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ವೈರಲ್ ಆಗುತ್ತಿದ್ದು, ಅಭಿಮಾನಿಗಳ ಮನಗೆದ್ದಿದೆ.

ಪ್ರೇಮದ ಊರಲಿ ಸಿನಿಮಾ ಭರ್ಜರಿ ಸಕ್ಸಸ್ ಬೆನ್ನಲ್ಲೇ ಲಕ್ಕಿ ಚಾನ್ಸ್ ಗಿಟ್ಟಿಸಿಕೊಂಡ ತಪಸ್ವಿನಿ ಪೂಣಚ್ಚ!

Sathish Kumar KH — Mon, 19 Oct 2026 22:19:42 +0530

'ಪ್ರೇಮದ ಊರಲಿ' ಚಿತ್ರದ ನಟಿ ತಪಸ್ವಿನಿ ಪೂಣಚ್ಚ ಅವರಿಗೆ ಮತ್ತೊಂದು ಸಿನಿಮಾದಲ್ಲಿ ನಾಯಕಿಯಾಗಿ ಅವಕಾಶ ಒಲಿದುಬಂದಿದೆ. ಹೌದು, ‘ಪ್ರೇಮದ ಊರಲಿ’ ಭರ್ಜರಿ ಸಕ್ಸಸ್ ಬೆನ್ನಲ್ಲೇ ಲಕ್ಕಿ ಚಾನ್ಸ್: ‘ಫಸ್ಟ್ ರ‍್ಯಾಂಕ್ ರಾಜು’ ಗುರುನಂದನ್‌ಗೆ ನಾಯಕಿಯಾದ ತಪಸ್ವಿನಿ! ‘ಮಿ.ಜಾಕ್’ ರಿಲೀಸ್ ಯಾವಾಗ? ವಿವರ ಇಲ್ಲಿದೆ.

ಕನ್ನಡ ಚಿತ್ರರಂಗದಲ್ಲಿ ಇತ್ತೀಚೆಗೆ ಸದ್ದು ಮಾಡುತ್ತಿರುವ ಬಹುನಿರೀಕ್ಷಿತ ಹಾಗೂ ಯಶಸ್ವಿ ಚಿತ್ರಗಳಲ್ಲಿ ‘ಪ್ರೇಮದ ಊರಲಿ’ ಕೂಡ ಒಂದು. ಈ ಚಿತ್ರದ ಮೂಲಕ ಪ್ರೇಕ್ಷಕರ ಮನಗೆದ್ದಿರುವ ಪ್ರತಿಭಾವಂತ ನಟಿ ತಪಸ್ವಿನಿ ಪೂಣಚ್ಚ (Tapaswini Poonacha) ಅವರಿಗೆ ಸ್ಯಾಂಡಲ್‌ವುಡ್‌ನಲ್ಲಿ ಮತ್ತೊಂದು ಭರ್ಜರಿ ಅವಕಾಶ ಹುಡುಕಿಕೊಂಡು ಬಂದಿದೆ. ತಮ್ಮ ಸಹಜ ಅಭಿನಯ ಹಾಗೂ ಮುಗ್ಧ ಸೌಂದರ್ಯದಿಂದ ಸಿನಿಪ್ರಿಯರ ಗಮನ ಸೆಳೆದಿರುವ ತಪಸ್ವಿನಿ, ಇದೀಗ ‘ಫಸ್ಟ್ ರ‍್ಯಾಂಕ್ ರಾಜು’ ಖ್ಯಾತಿಯ ಗುರುನಂದನ್ ಜೊತೆ ನಾಯಕಿಯಾಗಿ ತೆರೆ ಹಂಚಿಕೊಳ್ಳಲು ಸಜ್ಜಾಗಿದ್ದಾರೆ.

ಗುರುನಂದನ್ ನಾಯಕರಾಗಿ ನಟಿಸಿರುವ ಬಹುನಿರೀಕ್ಷಿತ ಕಾಮಿಡಿ-ಡ್ರಾಮಾ ಚಿತ್ರ ‘ಮಿ.ಜಾಕ್’ (Mr. Jack) ನಲ್ಲಿ ತಪಸ್ವಿನಿ ಪೂಣಚ್ಚ ನಾಯಕಿಯಾಗಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಚಿತ್ರವು ಇದೇ ಡಿಸೆಂಬರ್ 4 ರಂದು ರಾಜ್ಯಾದ್ಯಂತ ಅದ್ಧೂರಿಯಾಗಿ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ ಎಂದು ಚಿತ್ರತಂಡ ಮಾಹಿತಿ ಹಂಚಿಕೊಂಡಿದೆ. ‘ಪ್ರೇಮದ ಊರಲಿ’ ಸಿನಿಮಾದ ಸಕ್ಸಸ್ ಬೆನ್ನಲ್ಲೇ ಈ ಹೊಸ ಸುದ್ದಿ ಹೊರಬಿದ್ದಿದ್ದು, ನಟಿಯ ಅಭಿಮಾನಿಗಳಲ್ಲಿ ಕುತೂಹಲ ದುಪ್ಪಟ್ಟಾಗಿದೆ.

‘ಫಸ್ಟ್ ರ‍್ಯಾಂಕ್ ರಾಜು’, ‘ರಾಜು ಕನ್ನಡ ಮೀಡಿಯಂ’ ಚಿತ್ರಗಳ ಮೂಲಕ ಕನ್ನಡಿಗರನ್ನು ನಗೆಗಡಲಿನಲ್ಲಿ ತೇಲಿಸಿದ್ದ ಗುರುನಂದನ್, ಈ ಚಿತ್ರದಲ್ಲಿ ಜಾನಕಿರಾಮ ಅಲಿಯಾಸ್ 'ಮಿಸ್ಟರ್ ಜಾಕ್' ಎಂಬ ವಿಶಿಷ್ಟ ಸ್ಟ್ಯಾಂಡ್-ಅಪ್ ಕಾಮಿಡಿಯನ್ (Stand-up Comedian) ಪಾತ್ರದಲ್ಲಿ ಪ್ರೇಕ್ಷಕರ ಮುಂದೆ ಬರಲಿದ್ದಾರೆ. ಚಿತ್ರವು ಪಕ್ಕಾ ಮನರಂಜನೆಯಿಂದ ಕೂಡಿದ್ದು, ತಪಸ್ವಿನಿ ಮತ್ತು ಗುರುನಂದನ್ ಕಾಂಬಿನೇಷನ್ ಬೆಳ್ಳಿತೆರೆಯ ಮೇಲೆ ಹೊಸ ಮೋಡಿ ಮಾಡುವ ನಿರೀಕ್ಷೆಯಿದೆ.

ನಿರ್ದೇಶನ: ಯುವ ಪ್ರತಿಭೆ ಸುಮಂತ್ ಗೌಡ ಈ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳಿದ್ದಾರೆ.

ನಿರ್ಮಾಣ: ‘ಮಂಡಿಮನೆ ಟಾಕೀಸ್’ ಬ್ಯಾನರ್ ಅಡಿಯಲ್ಲಿ ನಟ ಗುರುನಂದನ್ ಹಾಗೂ ಅವರ ಆತ್ಮೀಯ ಸ್ನೇಹಿತರು ಅತ್ಯಂತ ಅದ್ದೂರಿಯಾಗಿ ನಿರ್ಮಿಸಿದ್ದಾರೆ.

ಸಂಗೀತ: ಕಿರಣ್ ರವೀಂದ್ರನಾಥ್ ಅವರ ಸುಮಧುರ ಸಂಗೀತ ಸಂಯೋಜನೆ ಚಿತ್ರಕ್ಕಿದೆ.

ಛಾಯಾಗ್ರಹಣ: ಶಿವಸೇನ ಅವರ ಕ್ಯಾಮೆರಾ ಕೈಚಳಕವಿದೆ.

ಬಲಿಷ್ಠ ತಾರಾಗಣ: ಚಿತ್ರದಲ್ಲಿ ಖ್ಯಾತ ನಟರಾದ ಗೋಪಾಲಕೃಷ್ಣ ದೇಶಪಾಂಡೆ, ಗಿರಿ, ಧರ್ಮಣ್ಣ ಕಡೂರು, ಮಿತ್ರ, ಸುಶ್ಮಿತಾ ಮುಂತಾದ ಪ್ರತಿಭಾವಂತ ಕಲಾವಿದರ ದಂಡೇ ಇದೆ.

ತಮ್ಮ ಮೊದಲ ಯಶಸ್ಸಿನ ಖುಷಿಯಲ್ಲಿರುವ ಕೊಡಗಿನ ಬೆಡಗಿ ತಪಸ್ವಿನಿ ಪೂಣಚ್ಚ, 'ಮಿ.ಜಾಕ್' ಸಿನಿಮಾದ ಮೂಲಕ ಗಲ್ಲಾಪೆಟ್ಟಿಗೆಯಲ್ಲಿ ಮತ್ತೊಂದು ಹಿಟ್ ದಾಖಲಿಸುತ್ತಾರಾ ಎಂಬುದನ್ನು ಕಾದು ನೋಡಬೇಕಿದೆ.

ಅಕ್ಟೋಬರ್ 23ಕ್ಕೆ ನಟಿ ಚೈತ್ರಾ ಆಚಾರ್ ಮನೆಮನೆಗೂ ಬರೋ ಸುದ್ದಿ ನಿಜವೇ? ಪಡ್ಡೆ ಹುಡುಗ್ರು ಫುಲ್ ಖುಷ್!

Shriram Bhat — Sat, 17 Oct 2026 17:23:08 +0530

ಪಡ್ಡೆ ಹುಡುಗ್ರು ಫುಲ್ ಖುಷಿಯಾಗೋ ಈ ಸುದ್ದಿ ನೋಡಿ..!

ಅಕ್ಟೋಬರ್ 23ಕ್ಕೆ ನಟಿ ಚೈತ್ರಾ ಆಚಾರ್ ಮನೆಮನೆಗೂ ಬರೋ ಸುದ್ದಿ ನಿಜವೇ? ಪಡ್ಡೆ ಹುಡುಗ್ರು ಫುಲ್ ಖುಷಿಯಾಗೋ ಈ ಸುದ್ದಿಯ ಅಸಲಿಯತ್ತು ನೋಡಿ..

2017ರಲ್ಲಿ ಬಿಡುಗಡೆಯಾಗಿ ಯುವ ಪ್ರೇಕ್ಷಕರ ಮನಗೆದ್ದಿದ್ದ ‘ಮೀಸಯ ಮುರುಕ್ಕು’ (Meesaya Murukku 2) ಚಿತ್ರದ ಮುಂದುವರಿದ ಭಾಗ ‘ಮೀಸಯ ಮುರುಕ್ಕು 2’ ಇದೀಗ ಒಟಿಟಿ ಬಿಡುಗಡೆಯ ಮೂಲಕ ಪ್ರೇಕ್ಷಕರನ್ನು ರಂಜಿಸಲು ಸಜ್ಜಾಗಿದೆ. ಸಂಗೀತ, ಪ್ರೀತಿ, ಹಾಸ್ಯ ಮತ್ತು ಜೀವನದ ಹೋರಾಟಗಳನ್ನು ಒಳಗೊಂಡಿರುವ ಈ ತಮಿಳು ಮ್ಯೂಸಿಕಲ್ ಕಾಮಿಡಿ-ಡ್ರಾಮಾ ಸಿನಿಮಾ ಡಿಜಿಟಲ್ ವೇದಿಕೆಯಲ್ಲಿ ಗಮನ ಸೆಳೆಯುವ ನಿರೀಕ್ಷೆಯಿದೆ.

ಕನ್ನಡದ ನಟಿ ಚೈತ್ರಾ ಆಚಾರ್

ಜನಪ್ರಿಯ ಗಾಯಕ ಹಾಗೂ ಸಂಗೀತ ನಿರ್ದೇಶಕ ಹಿಪ್‌ಹಾಪ್ ತಮಿಳ ಆದಿ ಈ ಚಿತ್ರದ ನಿರ್ದೇಶನದ ಜವಾಬ್ದಾರಿ ಹೊತ್ತಿದ್ದು, ಸಂಗೀತ ಸಂಯೋಜನೆಯನ್ನೂ ಮಾಡಿದ್ದಾರೆ. ಮೊದಲ ಭಾಗದ ಯಶಸ್ಸಿನ ಬಳಿಕ ಬಂದಿರುವ ಈ ಸೀಕ್ವೆಲ್‌ನಲ್ಲಿ ಆದಿ ಜೊತೆಗೆ ಕೇತಿಕಾ ಶರ್ಮಾ, ಕನ್ನಡದ ನಟಿ ಚೈತ್ರಾ ಆಚಾರ್ (Chaithra J Achar), ರಮ್ಯಾ ರಂಗನಾಥನ್, ನಾಸರ್ ಮತ್ತು ಕರುಣಾಸ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.

ಲಭ್ಯವಾಗಿರುವ ಮಾಹಿತಿಯ ಪ್ರಕಾರ, ‘ಮೀಸಯ ಮುರುಕ್ಕು 2’ ಅಕ್ಟೋಬರ್ 23ರಿಂದ ಸೋನಿಲಿವ್‌ನಲ್ಲಿ ಸ್ಟ್ರೀಮಿಂಗ್ ಆಗುವ ನಿರೀಕ್ಷೆಯಿದೆ. ವೀಕ್ಷಕರು ನಿಖರವಾದ ಬಿಡುಗಡೆ ಸಮಯ ಮತ್ತು ಲಭ್ಯತೆಯ ಕುರಿತು ಅಧಿಕೃತ ವೇದಿಕೆಯಲ್ಲಿ ಪರಿಶೀಲಿಸಬಹುದು.

ಚಿತ್ರದ ಕಥೆ ತನ್ನ ಸಂಗೀತ ಪ್ರತಿಭೆಯನ್ನು ಜಗತ್ತಿನಾದ್ಯಂತ ಪರಿಚಯಿಸಿ, ತಕ್ಕ ಮನ್ನಣೆ ಗಳಿಸಬೇಕೆಂಬ ಕನಸು ಕಾಣುವ ಯುವ ಸಂಗೀತಗಾರನ ಸುತ್ತ ಸಾಗುತ್ತದೆ. ಆತನ ಕನಸುಗಳು, ಪ್ರಯತ್ನಗಳು, ಸಂಬಂಧಗಳು ಮತ್ತು ಎದುರಾಗುವ ಸವಾಲುಗಳು ಕಥೆಗೆ ಜೀವ ತುಂಬುತ್ತವೆ. ಚಿತ್ರದ ಹಾಡುಗಳು ಮತ್ತು ಸಂಗೀತವೂ ಪ್ರಮುಖ ಆಕರ್ಷಣೆಗಳಾಗಿವೆ.

ನೇರ ನುಡಿಯ ಮಹಿಳೆಯ ಪಾತ್ರ

ಇನ್ನು ಕನ್ನಡದ ನಟಿ ಚೈತ್ರಾ ಆಚಾರ್ ಲಚ್ಚುಮಿ ಎಂಬ ನೇರ ನುಡಿಯ ಮಹಿಳೆಯ ಪಾತ್ರದಲ್ಲಿ ನಟಿಸಿದ್ದಾರೆ. ಗಾಯಕ ದಾಸ್ ಪಾತ್ರ ನಿರ್ವಹಿಸಿರುವ ಆದಿ ಅವರ ಪತ್ನಿಯಾಗಿ ಕಾಣಿಸಿಕೊಳ್ಳುವ ಲಚ್ಚುಮಿ, ತನ್ನ ಗಂಡನ ಬೆಂಬಲಕ್ಕೆ ಸದಾ ನಿಲ್ಲುವ ವ್ಯಕ್ತಿ. ಅಗತ್ಯ ಬಿದ್ದರೆ ಆತನ ತಪ್ಪುಗಳನ್ನು ನೇರವಾಗಿ ಪ್ರಶ್ನಿಸುವ ಧೈರ್ಯವೂ ಆಕೆಯಲ್ಲಿದೆ.

ಒಟ್ಟಿನಲ್ಲಿ, ಸಂಗೀತದ ಮೋಡಿ, ಪ್ರೇಮಕಥೆ ಮತ್ತು ಹಾಸ್ಯದ ಸಮ್ಮಿಶ್ರಣವಾಗಿರುವ ‘ಮೀಸಯ ಮುರುಕ್ಕು 2’ ಒಟಿಟಿ ಪ್ರೇಕ್ಷಕರಿಗೆ ಮನರಂಜನೆಯ ಹೊಸ ಅನುಭವ ನೀಡಲು ಸಜ್ಜಾಗಿದೆ.

ಯಶಸ್ಸಿನ ಓಟದಲ್ಲಿರುವ ಪ್ರೇಮದ ಊರಲಿ ಸಿನಿಮಾ ನಟಿ ಭಾವುಕ, ಕ್ಷಮಿಸಿ ಎಂದು ಕಣ್ಣೀರಿಟ್ಟ ಇಳಾ ವಿಟ್ಲ

Chethan Kumar — Tue, 20 Oct 2026 18:58:49 +0530

ಬೆಂಗಳೂರು (ಅ.20) ಪ್ರೇಮದ ಊರಲಿ ಸಿನಿಮಾ ಸ್ಯಾಂಡಲ್‌ವುಡ್ ಮಾತ್ರವಲ್ಲ, ಕಡಿಮೆ ಬಜೆಟ್‌ನಲ್ಲಿ ಭರ್ಜರಿ ಗಳಿಕೆ ಕಂಡ ದೇಶದ ಸಿನಿಮಾ ಪಟ್ಟಿಯಲ್ಲಿ ಸ್ಥಾನ ಪಡೆದಿದೆ. ರಾಜ್ಯದೆಲ್ಲೆಡೆ ಉತ್ತಮ ಪ್ರದರ್ಶನ ಕಾಣುತ್ತಿರುವ ಪ್ರೇಮದ ಊರಲಿ ಸಿನಿಮಾಗೆ ಮೆಚ್ಚುಗೆ ಸುರಿಮಳೆ ವ್ಯಕ್ತವಾಗುತ್ತಿದೆ. ಸಿನಿಮಾ ಯಶಸ್ಸಿನ ಹಿಂದೆ ಅವಿರತ ಪ್ರಯತ್ನ, ಪರಿಶ್ರಮ, ಹಲವು ತ್ಯಾಗಗಳಿವೆ. ಪ್ರೇಮದ ಊರಲಿ ಸಿನಿಮಾ ಶೂಟಿಂಗ್, ಹಿಂದಿನ ನೋವಿನ ಘಟನೆಗಳನ್ನು ನೆನೆದು ನಟಿ ಇಳಾ ವಿಟ್ಲಾ ಭಾವುಕರಾಗಿದ್ದಾರೆ. ತಾಳಿ ಅಡವಿಟ್ಟ ಪರಿಸ್ಥಿತಿ ನೆನೆದು ಇಳಾ ವಿಟ್ಟಾ ಕಣ್ಣೀರಿಟ್ಟಿದ್ದಾರೆ.

ತಾಳಿ ಅಡವಿಟ್ಟ ಘಟನೆ ನೆನದು ಭಾವುಕರಾದ ಇಳಾ ವಿಟ್ಲಾ

ಏಷ್ಯಾನೆಟ್ ಸುವರ್ಣನ್ಯೂಸ್‌ಗೆ ನೀಡಿದ ಸಂದರ್ಶನದಲ್ಲಿ ಇಳಾ ವಿಟ್ಲಾ ತೆರೆ ಹಿಂದಿನ ಘಟನೆಗಳನ್ನು ಹಂಚಿಕೊಂಡಿದ್ದಾರೆ. ನಿರ್ದೇಶಕ ಮನೋಜ್ ಪ್ರೇಮದ ಊರಲಿ ಸಿನಿಮಾಗೆ ಕೈಯಲ್ಲಿರುವ ಹಣ, ಸಾಲ ಪಡೆದು, ಕೊನೆಗೆ ತಾಳಿ ಅಡವಿಟ್ಟು ಶೂಟಿಂಗ್ ಮಾಡಬೇಕಾದ ಪರಿಸ್ಥಿತಿ ಎದುರಾಗಿತ್ತು ಅನ್ನೋ ನೋವಿನ ಘಟನೆಯನ್ನು ಸಿನಿಮಾದಲ್ಲಿ ಅಜ್ಜಿ ಪಾತ್ರ ಮಾಡಿದ ಇಳಾ ವಿಟ್ಲಾ ನೆನೆದು ಭಾವುಕರಾಗಿದ್ದಾರೆ. ಶೂಟಿಂಗ್ ವೇಳೆ ಮನೋಜ್ ಅವರ ಆರ್ಥಿಕ ಪರಿಸ್ಥಿತಿ ಕುರಿತು ನನಗೆ ಗೊತ್ತಿರಲಿಲ್ಲ. ಆದರೆ ಸೆಟ್‌ನಲ್ಲಿ ಅವರು ಅತೀವವಾಗಿ ಟೆನ್ಶನ್ ಆಗಿದ್ದರು. ಹಲವು ಬಾರಿ ರೇಗಾಡುತ್ತಿದ್ದರು. ನಿಂತಲ್ಲೇ ನಿಲ್ಲುತ್ತಿರಲಿಲ್ಲ. ಆದರೆ ಇದರ ಹಿಂದೆ ತಾಳಿ ಅಡವಿಟ್ಟ ಘಟನೆ ಇತ್ತು ಅನ್ನೋದು ಅಂದು ಗೊತ್ತಿರಲಿಲ್ಲ ಎಂದು ಇಳಾ ವಿಟ್ಟ ಹೇಳಿದ್ದಾರೆ.

ಈ ಪರಿಸ್ಥಿತಿ ಯಾರಿಗೂ ಬರಬಾರದು

ಪ್ರೇಮದ ಊರಲಿ ಕೊನೆಯ ಸೀನ್ ಶೂಟಿಂಗ್ ಮಾಡಲು ನಿರ್ದೇಶಕ ಮನೋಜ್ ಕುಮಾರ್ ತನ್ನ ತಾಯಿಯ ತಾಳಿಯನ್ನೇ ಅಡವಿಟ್ಟಿದ್ದರು. ಈ ಕುರಿತು ಮನೋಕ್ ಕುಮಾರ್ ಅವರ ಸಂದರ್ಶನದಲ್ಲೇ ನೋಡಿ ತಿಳಿಯಿತು. ವಿಚಾರ ತಿಳಿದ ತೀವ್ರವಾಗಿ ಬೇಸರವಾಯಿತು ಎಂದು ಇಳಾ ವಿಟ್ಲ ಹೇಳಿದ್ದಾರೆ. ಅಂತಹ ತಂದೆ ತಾಯಿ ಸಿಗಲು ಪುಣ್ಯ ಮಾಡಿರಬೇಕು. ಕಾರಣ ದುಡ್ಡು ಖರ್ಚು ಮಾಡುವ ಯಾವುದೇ ವಿಚಾರಕ್ಕೂ ತಂದೆ ತಾಯಿ ಬೇಡ ಎನ್ನುತ್ತಾರೆ. ಅದರಲ್ಲಿ ತನ್ನ ತಾಳಿಯನ್ನೇ ಅಡವಿಟ್ಟು ಮಗನ ಸಿನಿಮಾ ಶೂಟಿಂಗ್‌ಗೆ ದುಡ್ಡು ನೀಡುತ್ತಾರೆ ಎಂದರೆ ಕೇಳಿ ನೋವಾಯಿತು. ಈ ಪರಿಸ್ಥಿತಿ ಯಾರಿಗೂ ಬರಬಾರದು. ತಾಯಿ ಮನಸ್ಸು, ಮಕ್ಕಳು..ಎಂದು ಇಳಾ ವಿಟ್ಲಾ ಭಾವುಕರಾಗಿ ಕಣ್ಣೀರಿಟ್ಟಿದ್ದಾರೆ.

ತಾಯಿಗೆ ತಾಳಿ ಅತ್ಯಂತ ಮುಖ್ಯ. ಮಗ ಮುಂದಿನ ದಿನ ಏನೋ ಆಗುತ್ತಾನೆ, ಬೆಳೆಯುತ್ತಾನೆ ಎಂಬ ಆತ್ಮವಿಶ್ವಾಸದ ಮುಂದೆ ಅವರ ತಾಳಿಯೂ ದೊಡ್ಡ ವಿಚಾರವಾಗಿ ಆಕೆಗೆ ಕಾಣಲಿಲ್ಲ. ಮಗನ ಸಾಧನೆಗೆ ಅಡವಿಡಲು ಕೊಟ್ಟಿದ್ದಾರೆ. ಶೂಟಿಂಗ್ ಸೆಟ್‌ನಲ್ಲಿ ಒದ್ದಾಡುವುದನ್ನು ನಾನು ನೋಡಿದ್ದೇನೆ. ಸಿನಿಮಾ ರಿಲೀಸ್ ದಿನ ನನಗೆ ಬೇರೆ ಶೂಟಿಂಗ್ ಇತ್ತು . ಹಾಗಾಗಿ ಥಿಯೇಟರ್‌ನಲ್ಲಿ ಇರಲು ಸಾಧ್ಯವಾಗಲಿಲ್ಲ. ಮನೋಜ್ ಕುಮಾರ್ ನನಗೆ ಕರೆ ಮಾಡಿ, ನಮ್ಮ ಸಿನಿಮಾ ಮೇಡಂ ಇದು, ನೀವು ಇರಬೇಕಿತ್ತು ಎಂದಿದ್ದರು. ಮನೋಜ್ ಕುಮಾರ್‌ಗೆ ಆರೋಗ್ಯ ಸರಿ ಇಲ್ಲದಿದ್ದರೂ ಅವರು ಖುದ್ದು ತಮ್ಮ ಸಿನಿಮಾ ಯಶ್ಸಸಿಗೆ ಕಾದು ಕುಳಿತಿದ್ದರು ಎಂದು ಇಳಾ ವಿಟ್ಲಾ ಹೇಳಿದ್ದಾರೆ.

'ರಾಕಿ' ಭಾಯ್ ಯಶ್ ಲೈಫ್‌ನ ಬಹುದೊಡ್ಡ ಸೀಕ್ರೆಟ್ ಬಿಚ್ಚಿಟ್ಟ 'ಹಾಗೇ ಸುಮ್ಮನೇ' ಕಿರಣ್.. ಅಂದು ಹಾಗೆ ಮಾಡಿದ್ರು ರಾಕಿಂಗ್ ಸ್ಟಾರ್..!

Shriram Bhat — Sun, 18 Oct 2026 10:33:41 +0530

ಗ್ಲೋಬಲ್ ಐಕಾನ್ ಯಶ್ ಹಳೆಯ ಸೀಕ್ರೆಟ್ ರಿವೀಲ್! ನೋಡಿ ಅದೇನು ಅಂತ!

ಇಡೀ ವಿಶ್ವವೇ 'ರಾಕಿ ಭಾಯ್' ಎಂದು ಗುರುತಿಸುವ ಕನ್ನಡದ ನಟ ಯಶ್ (Rocking Star Yash) ಅವರು ಇಮದು ಏರಿರುವ ಎತ್ತರ, ಪಡೆದಿರುವ ಜನಪ್ರಿಯತೆ ಎಂತದ್ದು ಎಂಬುದು ಎಲ್ಲರಿಗೂ ಗೊತ್ತು. ಕನ್ನಡ ಹಾಗೂ ಭಾರತದ ಗಡಿಯನ್ನು ದಾಟಿ ನಟ ಯಶ್ ಅವರು ಇಂದು ಗ್ಲೋಬಲ್ ಐಕಾನ್ ಆಗಿ ಮಿಂಚುತ್ತಿದ್ದಾರೆ. 'ಟಾಕ್ಸಿಕ್‌' ಸಿನಿಮಾಗೆ ಬಂದ ಮಿಶ್ರ ಪ್ರತಿಕ್ರಿಯೆ ಏನೇ ಆಗಿದ್ದರೂ, ಇಂದು ಇಡೀ ವಿಶ್ವವೇ ಯಶ್ ಅವರನ್ನು ಗುರುತಿಸಿ ಗೌರವಿಸುತ್ತದೆ, ಅವರು ಬೆಳೆದಿರುವ ಎತ್ತರಕ್ಕೆ 'ಸಲಾಂ; ಎನ್ನುತ್ತದೆ. ಇಂಥ ನಟ ಯಶ್ ಬಗ್ಗೆ ಇದೀಗ ಅಪರೂಪದ ಸಂಗತಿಯೊಂದು ಹೊರಬಿದ್ದಿದೆ. ಅದೇನು ಅಂತ ಮುಂದೆ ನೋಡಿ..

ಮೊಗ್ಗಿನ ಮನಸ್ಸು ಅಲ್ಲ, ರಾಕಿ!

ಯಶ್ ಅವರು ಪೂರ್ಣ ಪ್ರಮಾಣದ ನಾಯಕರಾಗಿ ನಟಿಸಿರುವ ಸಿನಿಮಾ 'ರಾಕಿ' ಬಗ್ಗೆ ಎಲ್ಲಾ ಕನ್ನಡಿಗರಿಗೆ ಗೊತ್ತಿದೆ. 'ಮೊಗ್ಗಿನ ಮನಸ್ಸು' ಸಿನಿಮಾದಲ್ಲಿ ನಟ ಯಶ್ ಅವರು ಕ್ಲೈಮ್ಯಾಕ್ಸ್ ಹಾಡಿನಲ್ಲಿ ಆ ಚಿತ್ರದ ನಾಯಕಿ ನಟಿ ರಾಧಿಕಾ ಪಂಡಿತ್ ಅವರೊಂದಿಗೆ ಹೆಜ್ಜೆ ಹಾಕಿ ಫೇಮಸ್ ಆಗಿದ್ದರೂ ಅವರನ್ನು ಆ ಚಿತ್ರದಲ್ಲಿ ನಾಯಕರು ಎನ್ನಲಾಗುವುದಿಲ್ಲ. 'ರಾಕಿ' ಚಿತ್ರದ ಮೂಲಕ ಕನ್ನಡದಲ್ಲಿ ನಾಯಕರಾಗಿ ಯಶ್ ಅವರು ಹವಾ ಸೃಷ್ಟಿಸಿದ್ದನ್ನು ಯಾರೂ ಅಲ್ಲಗೆಳೆಯಲಾಗದು. ಅದೇ ಸಿನಿಮಾ ಬಿಡುಗಡೆ ಸಮಯದಲ್ಲಿ ನಡೆದಿರುವ ಘಟನೆಯೊಂದನ್ನು ಸಂದರ್ಶನವೊಂದರಲ್ಲಿ ಕನ್ನಡದ ಮತ್ತೊಬ್ಬ ನಟ, 'ಹಾಗೇ ಸುಮ್ಮನೆ' ಸಿನಿಮಾದ ಖ್ಯಾತಿಯ ಕಿರಣ್ ಶ್ರೀನಿವಾಸ್ ಅವರು ಹಂಚಿಕೊಂಡಿದ್ದಾರೆ. ಅದೀಗ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ.

'ರಾಕಿ' ಯಶ್ ಬಗ್ಗೆ 'ಹಾಗೇ ಸುಮ್ಮನೇ' ಕಿರಣ್ ಶ್ರೀನಿವಾಸ್ ಹೇಳಿದ್ದು:- ಯಶ್ ಫೋನ್ ಮಾಡಿದ ನಂಗೆ.. ಹೊಸ ನಟ ಅಂತ ಗೊತ್ತಿದೆ ನಂಗೆ.. ಮೀಟ್ ಮಾಡಿರ್ಲಿಲ್ಲ ಯಾವತ್ತೂ, ನಂಬರ್ ಕೂಡ ಇರ್ಲಿಲ್ಲ ನನ್ ಹತ್ರ.. ಕಾಲ್ ಬಂತು ಎತ್ತಿದೆ.. 'ಕಿರಣ್ ಅಣ್ಣಾ, ನಾನು ಯಶ್ ಮಾತಾಡ್ತಾ ಇರೋದು.. ಎಲ್ಲಿದಿಯಾ?' ಅಂದ.. ನಂಗೆ ಶಾಕ್ ಆಯ್ತು.. ನಮಗಿಬ್ಬರಿಗೂ ಪರಸ್ಪರ ಪರಿಚಯ ಇತ್ತು, ಆದ್ರೆ ಯಾವತ್ತೂ ಭೇಟಿ ಅಗಿರ್ಲಿಲ್ಲ ಅಷ್ಟೇ.. ನಾನು 'ಮನೆಲ್ಲೇ ಇದೀನಿ ಅಂದೆ'.. ಅದಕ್ಕೆ, 'ಒಂದ್ ಕೆಲ್ಸ ಮಾಡು, ಇನ್ನು ಒಂದ್ ಗಂಟೆಲಿ ಕಬ್ಬನ್ ಪಾರ್ಕ್ ಹತ್ರ ಬಾ, ಓಲ್ಡ್ ಹೈಕೋರ್ಟ್ ಹತ್ರ ಬಾ..' ಅಂದ.. ನಾನು 'ಯಾಕೆ?' ಅಂದಿದ್ದಕ್ಕೆ 'ನಾನು ಹೇಳ್ತಿನಿ, ಬಾ..' ಅಂದ..

ಫಸ್ಟ್ ಸಿನಿಮಾ ಬೇರೆ!

ನಾನು ಫಸ್ಟ್‌ ಆಪ್‌ ಆಲ್ ಅವ್ನ ಯಾವತ್ತೂ ಮೀಟ್ ಮಾಡಿಯೇ ಇಲ್ಲ.. ಜೊತೆಗೆ, ಫಸ್ಟ್ ಸಿನಿಮಾ ಬೇರೆ.. ಆದ್ರೂ ಸರಿ, ಮೀಟ್ ಮಾಡೋಣ ಅಂತ ಹೋದೆ.. ಅಲ್ಲಿ ಹೋಗಿ ನೋಡಿದ್ರೆ, ಯಾವುದೋ ಮೀಡಿಯಾದವ್ರನ್ನ ಕರೆಸಿ 2 ಕ್ಯಾಮೆರಾ ಸೆಟ್‌ಅಪ್ ಮಾಡ್ಸಿ ಇಟ್ಟಿದಾನೆ.. ನನ್ ನೋಡಿದ ತಕ್ಷಣ, 'ನೋಡು ಕಿರಣ್‌.. ನಾನು ನಿನ್ನ 'ಹಾಗೇ ಸುಮ್ಮನೇ' ಸಿನಿಮಾ ಪ್ರಮೋಟ್ ಮಾಡ್ತೀನಿ, ನೀನು ನನ್ನ 'ರಾಕಿ' ಸಿನಿಮಾ ಪ್ರಮೋಟ್ ಮಾಡು.. ನಾವಿಬ್ರೂ ಇಲ್ಲಿ ಕೂತ್ಕೊಂಡು, ನೀನು ನನ್ನ ರಾಕಿ ಸಿನಿಮಾ ಬಗ್ಗೆ ಮಾತಾಡು, ನಾನು ನಿನ್ನ ಹಾಗೇ ಸುಮ್ಮನೇ ಸಿನಿಮಾ ಬಗ್ಗೆ ಮಾತಾಡ್ತೀನಿ' ಅಂದ.. ನಂಗೆ ಏನೂ ಅಂದ್ರೆ ಏನೂ ಗೊತ್ತಿಲ್ಲ.. ಆದ್ರೂ ಇಬ್ರೂ ಮಾತಾಡಿದ್ವಿ..

ಕ್ಲಾರಿಟಿ ಅದ್ರಲ್ಲೇ ಇದೆ ನೋಡಿ.. 'ನಾನು ನನ್ ಸಿನಿಮಾ ರಿಲೀಸ್ ಆಗಿರೋ ಖುಷಿನಲ್ಲಿ ಫ್ಯಾಮಿಲಿ, ಫ್ರೆಂಡ್ಸ್‌, ಪಾರ್ಟಿ ಅಂತ ಮಜಾ ಮಾಡ್ತಾ ಇದೀನಿ.. ಆದ್ರೆ ಅವ್ನು? ನಾನು ಈ ಸಿನಿಮಾನ ಜನರಿಗೆ ಮುಟ್ಟಿಸಬೇಕು, ಇದ್ರಿಂದ ಬೆಳೀಬೇಕು ನಾನು ಅನ್ನೊ ಕ್ಲಾರಿಟಿ, ಮೆಂಟಾಲಿಟಿ, ಪ್ರಬುದ್ಧತೆ ಯಶ್‌ಗೆ ಆಗ್ಲೇ ಇತ್ತು..' ಎಂದಿದ್ದಾರೆ ನಟ ಕಿರಣ್ ಶ್ರೀನಿವಾಸ್.

ಹೌದು, ನಟ ಯಶ್ ಅವರು ತಮ್ಮ ಸಿನಿಮಾ ವೃತ್ತಿಜೀವನದಲ್ಲಿ ಸೋಲು-ಗೆಲುವು ಎರಡನ್ನೂ ನೋಡಿದ್ದಾರೆ. ಆದ್ರೆ ಅವರಿಗೊಂದು ಕ್ಲಿಯರ್ ವಿಷನ್ ಇದೆ ಅನ್ನೋ ಮಾತನ್ನ ಅವರ ಆಪ್ತರು, ಸಹನಟರಲ್ಲಿ ಬಹಳಷ್ಟು ಜನರು ಹೇಳುತ್ತಾರೆ. ಇಂದು ನಟ ಯಶ್ ಅವರು ಜಾಗತಿಕ ನಟ ಪಟ್ಟವನ್ನು ಅಲಂಕರಿಸಿದ್ದಾರೆ. ಕನ್ನಡದ ನಟರೊಬ್ಬರು ಇಷ್ಟು ಎತ್ತರಕ್ಕೆ ಏರಿದ್ದು, ಇಡೀ ಭಾರತದ ಪ್ರತಿನಿಧಿಯಾಗಿ ಪ್ರಪಂಚದ ತುಂಬೆಲ್ಲಾ ಕನ್ನಡನಾಡಿನ, ಭಾರತದ ಹಿರಿಮೆಯನ್ನು ಪಸರಿಸುತ್ತಿದ್ದಾರೆ ನಟ ಯಶ್ ಎಂಬ ಮಾತನ್ನು ಹೇಳಲೇಬೇಕು.

ಯಶ್ ಕನಸಿನ ಸಿನಿಮಾ 'ಟಾಕ್ಸಿಕ' ಅಂದುಕೊಂಡಷ್ಟು ಸೂಪರ್ ಹಿಟ್ ದಾಖಲಿಸಿಲ್ಲ ಎಂಬ ಮಾತು ಇದ್ದರೂ, ಇದೀಗ ಮತ್ತೆ 'ರಾಮಾಯಣ' ಸಿನಿಮಾದ 'ರಾವಣ' ಪಾತ್ರದ ಮೂಲಕ ರಾಕಿಂಗ್ ಸ್ಟಾರ್ 05 ನವೆಂಬರ್ 2026ರಂದು ಮತ್ತೆ ಜಗತ್ತಿನ ಪ್ರೇಕ್ಷಕರ ಮುಂದೆ ಬರುತ್ತಿದ್ದಾರೆ. ಯಶ್ ರಾವಣನ ಪಾತ್ರವನ್ನು ಸಿನಿಪ್ರೇಕ್ಷಕರು ಈಗಾಗಲೇ ಮೆಚ್ಚಿದ್ದು, 'ರಾವಣಾಸುರ'ನಾಗಿ ತೆರೆಯ ಮೇಲೆ ಅಬ್ಬರಿಸುವುದನ್ನು ಕಣ್ತುಂಬಿಕೊಳ್ಳಲು ಕಾತರದಿಂದ ಕಾಯುತ್ತಿದ್ದಾರೆ. ಯಶ್ 'ವಿಷನ್ ಕ್ಲಾರಿಟಿ' ಅವರನ್ನು ಇನ್ನೂ ಎಷ್ಟು ಎತ್ತರಕ್ಕೆ ಕರೆದುಕೊಂಡು ಹೋಗಬಹುದು ಎಂಬುದನ್ನು ಇಡೀ ಜಗತ್ತು ಅಚ್ಚರಿಯಿಂದ ನೋಡುತ್ತಿದೆ!

ವಿಜಯದಶಮಿ ದಿನ ವಿಜಯಲಕ್ಷ್ಮಿ ಚಮತ್ಕಾರ.. ದರ್ಶನ್ ಹಾಗೂ ಜವಾಬ್ದಾರಿ ಬಗ್ಗೆ ಮಾತು; ಯಾರಿಗೆ ಕೌಂಟರ್ ?

Shriram Bhat — Tue, 20 Oct 2026 18:58:31 +0530

ಧನ್ವೀರ್ ಗೌಡ ಖಡಕ್ ಮಾತು, ಆ ಬೆನ್ನಲ್ಲೇ ವಿಜಯಲಕ್ಷ್ಮಿ ಪೋಸ್ಟ್ ವೈರಲ್! ಏನಿದು ಚಮತ್ಕಾರ!

ನಾಡಿನಾದ್ಯಂತ ಆಯುಧಪೂಜೆ ಮತ್ತು ವಿಜಯದಶಮಿಯ ಸಂಭ್ರಮ ಮನೆಮಾಡಿರುವ ಬೆನ್ನಲ್ಲೇ, ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ವಿಚಾರ ಮತ್ತೆ ಚರ್ಚೆಗೆ ಬಂದಿದೆ. ಒಂದೆಡೆ ದರ್ಶನ್ ಪತ್ನಿ ವಿಜಯಲಕ್ಷ್ಮಿ ದರ್ಶನ್ ಅವರು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ಸಂದೇಶ ಗಮನ ಸೆಳೆದಿದ್ದರೆ, ಮತ್ತೊಂದೆಡೆ ಚಾಮರಾಜನಗರದ ದಸರಾ ಕಾರ್ಯಕ್ರಮದಲ್ಲಿ ನಟ ಧನ್ವೀರ್ ಗೌಡ ನೀಡಿದ ಹೇಳಿಕೆ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ.

ವಿಜಯದಶಮಿ ಶುಭಾಶಯದೊಂದಿಗೆ ವಿಜಯಲಕ್ಷ್ಮಿ ಸಂದೇಶ

ಪತಿ ದರ್ಶನ್ ಅವರೊಂದಿಗಿನ ಫೋಟೋ ಹಂಚಿಕೊಂಡಿರುವ ವಿಜಯಲಕ್ಷ್ಮಿ, ಅಭಿಮಾನಿಗಳಿಗೆ ವಿಜಯದಶಮಿಯ ಶುಭಾಶಯಗಳನ್ನು ತಿಳಿಸಿದ್ದಾರೆ. ಆದರೆ, ಫೋಟೋ ಜೊತೆಗೆ ಬರೆದಿರುವ ಅವರ ಮಾತುಗಳು ಇದೀಗ ವಿಶೇಷ ಚರ್ಚೆಗೆ ಕಾರಣವಾಗಿವೆ.

“ಬಾಸ್ ಹೆಸರು ಮೆಚ್ಚುಗೆಗಿರಲಿ, ಟೀಕೆಗಿರಲಿ, ಸ್ವಹಿತ ಸಾಧನೆಯ ಸಾಧನವಾಗದಂತೆ ನೋಡಿಕೊಳ್ಳುವುದು ಎಲ್ಲರ ಜವಾಬ್ದಾರಿ. ಅಭಿಪ್ರಾಯದಲ್ಲಿ ಪ್ರಾಮಾಣಿಕತೆ ಇರಲಿ, ಮಾತಿನಲ್ಲಿ ಗೌರವವಿರಲಿ. ಎಲ್ಲರಿಗೂ ವಿಜಯದಶಮಿಯ ಹಾರ್ದಿಕ ಶುಭಾಶಯಗಳು” ಎಂದು ಅವರು ಬರೆದುಕೊಂಡಿದ್ದಾರೆ.

ದರ್ಶನ್ ಪರ ಮತ್ತು ವಿರೋಧದ ಚರ್ಚೆಗಳು ನಡೆಯುತ್ತಿರುವ ಸಂದರ್ಭದಲ್ಲಿ ವಿಜಯಲಕ್ಷ್ಮಿ ಹಂಚಿಕೊಂಡಿರುವ ಈ ಸಂದೇಶದ ಬಗ್ಗೆ ಅಭಿಮಾನಿಗಳು ಗಮನ ಹರಿಸಿದ್ದಾರೆ. ಫೋಟೋದಲ್ಲಿ ವಿಜಯಲಕ್ಷ್ಮಿ ಕೆಂಪು ಬಣ್ಣದ ಸಲ್ವಾರ್ ಧರಿಸಿ ಸರಳವಾಗಿ ಕಾಣಿಸಿಕೊಂಡಿದ್ದಾರೆ. ದರ್ಶನ್ ಬೂದು ಬಣ್ಣದ ಶರ್ಟ್ ಮತ್ತು ಬಿಳಿ ಪ್ಯಾಂಟ್ ಧರಿಸಿದ್ದು, ಪತ್ನಿಯ ಹೆಗಲ ಮೇಲೆ ಕೈ ಹಾಕಿರುವ ಚಿತ್ರವೂ ಗಮನ ಸೆಳೆಯುತ್ತಿದೆ.

ಚಾಮರಾಜನಗರ ದಸರಾದಲ್ಲಿ ಧನ್ವೀರ್ ಗೌಡ ಹೇಳಿದ್ದೇನು?

ಇನ್ನು ಚಾಮರಾಜನಗರದ ದಸರಾ ಸಂಭ್ರಮದಲ್ಲೂ ಡಿ ಬಾಸ್ ಅಭಿಮಾನಿಗಳ ಉತ್ಸಾಹ ಜೋರಾಗಿತ್ತು. ಕಾರ್ಯಕ್ರಮದ ವೇಳೆ ದರ್ಶನ್ ಪರವಾಗಿ ಘೋಷಣೆಗಳನ್ನು ಕೂಗಿದ ಅಭಿಮಾನಿಗಳಿಗೆ ನಟ ಧನ್ವೀರ್ ಗೌಡ ಪ್ರತಿಕ್ರಿಯಿಸಿದ್ದಾರೆ.

“ನಿಮ್ಮ ಪ್ರೀತಿ, ಪ್ರೋತ್ಸಾಹ ನಮ್ಮ ಮೇಲಿರಲಿ. ತಾಯಿ ಚಾಮುಂಡೇಶ್ವರಿ ಆಶೀರ್ವಾದ ಎಲ್ಲರ ಮೇಲಿರಲಿ” ಎಂದು ಅಭಿಮಾನಿಗಳಿಗೆ ಧನ್ಯವಾದ ಹೇಳಿದ್ದಾರೆ. ಇದೇ ವೇಳೆ, “ನಂಗೆ ಮಾದಪ್ಪನ ಬೆಟ್ಟ ಅಂದ್ರೆ ತುಂಬಾ ಇಷ್ಟ” ಎಂದು ಚಾಮರಾಜನಗರದ ಬಗ್ಗೆಯೂ ತಮ್ಮ ಅಭಿಮಾನವನ್ನು ವ್ಯಕ್ತಪಡಿಸಿದ್ದಾರೆ.

ದರ್ಶನ್ ವಿರೋಧಿಗಳಿಗೆ ಧನ್ವೀರ್ ತಿರುಗೇಟು

ದರ್ಶನ್ ಬಗ್ಗೆ ಮಾತನಾಡಿದ ಧನ್ವೀರ್ ಗೌಡ, ಅವರ ವಿರೋಧಿಗಳಿಗೆ ಖಡಕ್ ಸಂದೇಶ ನೀಡಿದ್ದಾರೆ. “ಎಷ್ಟೇ ಕೂಗ್ರಿ, ಏನೇ ಮಾಡ್ರಿ. ಯಾವ ನಾಯಿ ನರಿಗಳು ಏನೇ ಕುತಂತ್ರ ಮಾಡಿದ್ರೂ ಅವರನ್ನು ಏನು ಮಾಡಲಿಕ್ಕೆ ಆಗಲ್ಲ” ಎಂದು ಹೇಳುವ ಮೂಲಕ ತಮ್ಮ ಆಕ್ರೋಶ ಹೊರಹಾಕಿದ್ದಾರೆ.

ಇಷ್ಟೇ ಅಲ್ಲದೆ, “ನಟ ದರ್ಶನ್ ಆದಷ್ಟು ಬೇಗ ಹೊರಗಡೆ ಬಂದೇ ಬರ್ತಾರೆ. ನಿಮ್ಮ ಪ್ರೀತಿ, ಆಶೀರ್ವಾದ, ಬೆಂಬಲ ಅವರ ಮೇಲೆ ಸದಾ ಹೀಗೆ ಇರಲಿ” ಎಂದು ಅಭಿಮಾನಿಗಳಲ್ಲಿ ಮನವಿ ಮಾಡಿದ್ದಾರೆ. ಈ ಮಾತುಗಳ ಬೆನ್ನಲ್ಲೇ ಅಭಿಮಾನಿಗಳು ‘ಡಿ ಬಾಸ್, ಡಿ ಬಾಸ್’ ಎಂದು ಜೋರಾಗಿ ಘೋಷಣೆ ಕೂಗಿದ್ದಾರೆ.

ಒಟ್ಟಿನಲ್ಲಿ, ವಿಜಯಲಕ್ಷ್ಮಿ ದರ್ಶನ್ ಅವರ ಸಂದೇಶ ಮತ್ತು ಧನ್ವೀರ್ ಗೌಡ ಅವರ ಹೇಳಿಕೆ ಹಬ್ಬದ ಸಂಭ್ರಮದ ನಡುವೆಯೂ ದರ್ಶನ್ ಅಭಿಮಾನಿಗಳ ಗಮನ ಸೆಳೆದಿವೆ. ಈ ಇಬ್ಬರ ಮಾತುಗಳು ಇದೀಗ ಸ್ಯಾಂಡಲ್‌ವುಡ್ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿವೆ.

ಪಾತ್ರದಿಂದ ನೀವೇ? ನಿಮ್ಮಿಂದ ಪಾತ್ರವೇ? ‘ಪ್ರೇಮದ ಊರಲಿ’ ನಟಿಯ ಪಾತ್ರ ಕಂಡು ಕಣ್ಣೀರಾದ ಪೂಜಾ ಗಾಂಧಿ

Govindaraj S — Mon, 19 Oct 2026 15:34:56 +0530

ರಾಜ್ಯಾದ್ಯಂತ ಚಿತ್ರಮಂದಿರಗಳಲ್ಲಿ ಭರ್ಜರಿ ಪ್ರದರ್ಶನ ಕಾಣುತ್ತಿರುವ ‘ಪ್ರೇಮದ ಊರಲಿ’ ಸಿನಿಮಾಗೆ ಮತ್ತೋರ್ವ ಖ್ಯಾತ ತಾರೆಯ ಮೆಚ್ಚುಗೆಯ ಮಾತುಗಳು ಸಿಕ್ಕಿವೆ. ‘ಮಳೆ ಹುಡುಗಿ’ ಎಂದೇ ಖ್ಯಾತರಾಗಿರುವ ನಟಿ ಪೂಜಾ ಗಾಂಧಿ, ಸಿನಿಮಾ ವೀಕ್ಷಿಸಿ ಚಿತ್ರತಂಡದ ಪ್ರಯತ್ನಕ್ಕೆ ಮನಸಾರೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ವಿಶೇಷವಾಗಿ ಚಿತ್ರದ ನಾಯಕಿ ರಮಿಕಾ ಶಿವು ಅವರ ಅಭಿನಯಕ್ಕೆ ಪೂಜಾ ಗಾಂಧಿ ಫಿದಾ ಆಗಿದ್ದು, ಸಾಮಾಜಿಕ ಜಾಲತಾಣದಲ್ಲಿ ಬರೆದಿರುವ ಮೆಚ್ಚುಗೆಯ ಮಾತುಗಳು ಇದೀಗ ಗಮನ ಸೆಳೆಯುತ್ತಿವೆ.

ಕಥೆಯನ್ನೇ ನಂಬಿ ಗೆದ್ದ ಸಿನಿಮಾ

ಅತ್ಯುತ್ತಮವಾದ ಕಥೆ, ಕಥೆಯನ್ನೇ ನಂಬಿ ಬಂಡವಾಳ ಹೂಡುವ ನಿರ್ಮಾಪಕರಿದ್ದಾಗ ನಿರ್ಮಾಣವಾಗುವ ಸಿನಿಮಾ ‘ಪ್ರೇಮದ ಊರಲಿ’ ಎಂದು ಸಿನಿಮಾ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿರುವ ಪೂಜಾ ಗಾಂಧಿ, ಚಿತ್ರದ ಪ್ರತಿಯೊಂದು ವಿಭಾಗವನ್ನೂ ಪ್ರಶಂಸಿಸಿದ್ದಾರೆ. ರಂಗಾಯಣ ರಘು ಅವರ ಮನೋಜ್ಞ ಅಭಿನಯ, ನಾಯಕ ನಟ ಶ್ರೀರಾಮ್ ಅವರ ಪಾತ್ರ ಪೋಷಣೆ ಹಾಗೂ ನಿರ್ದೇಶಕ ಮನೋಜ್ ಕುಮಾರ್ ಅವರ ಕಥೆಯನ್ನು ತೆರೆಯ ಮೇಲೆ ಕಟ್ಟಿಕೊಟ್ಟಿರುವ ರೀತಿಯನ್ನು ಅವರು ಮೆಚ್ಚಿಕೊಂಡಿದ್ದಾರೆ. ಗಿಡ, ಮರ, ನದಿ, ಚೆಕ್‌ಡ್ಯಾಮ್, ಮಳೆ ಸೇರಿದಂತೆ ಫ್ರೇಮ್‌ನಲ್ಲಿ ಕಾಣಿಸಿಕೊಳ್ಳುವ ಪ್ರತಿಯೊಂದು ಅಂಶವನ್ನೂ ನಿರ್ದೇಶಕರು ಪರಿಣಾಮಕಾರಿಯಾಗಿ ಬಳಸಿಕೊಂಡಿರುವುದನ್ನು ಪೂಜಾ ಗಾಂಧಿ ವಿಶೇಷವಾಗಿ ಉಲ್ಲೇಖಿಸಿದ್ದಾರೆ. ಆದರೆ, ಅವರ ಪೋಸ್ಟ್‌ನಲ್ಲಿ ಹೆಚ್ಚು ಗಮನ ಸೆಳೆದಿದ್ದು ರಮಿಕಾ ಶಿವು ಅವರ ಅಭಿನಯದ ಕುರಿತಾದ ಮಾತುಗಳು.

'ಎಲ್ಲಿದ್ದೆ ಇಲ್ಲೀತನಕ, ಎಲ್ಲಿಂದ ಬಂದ್ಯವ್ವ, ನಿನ್ನ ಕಂಡು ನಾನಿಂದು ಕರಗಿದೆನು… ಓಹ್… ರಮಿಕಾ ಶಿವು, ಪಾತ್ರದಿಂದ ನೀವೇ??? ನಿಮ್ಮಿಂದ ಪಾತ್ರವೇ????' ಎಂದು ಬರೆದಿರುವ ಪೂಜಾ ಗಾಂಧಿ, ರಮಿಕಾ ಪಾತ್ರದಲ್ಲಿ ಅಷ್ಟು ಆವರಿಸಿಕೊಂಡಿದ್ದಾರೆ ಎಂಬುದನ್ನು ಮೆಚ್ಚಿಕೊಂಡಿದ್ದಾರೆ. 'ಬೇರ್ಪಡಿಸಲಾಗದಷ್ಟು ಆವರಿಸಿ, ಕಣ್ಣೀರಾಗಿಸಿದ್ದೀರಿ' ಎಂದು ರಮಿಕಾ ಅಭಿನಯಕ್ಕೆ ಭಾವುಕರಾಗಿ ಪ್ರತಿಕ್ರಿಯಿಸಿದ್ದಾರೆ. ಅಷ್ಟೇ ಅಲ್ಲದೆ, ‘ಪ್ರೇಮದ ಊರಲಿ’ ಚಿತ್ರಕ್ಕಾಗಿ ದುಡಿದಿರುವ ಪ್ರತಿಯೊಬ್ಬರಿಗೂ ಸಲಾಂ! ಎಂದು ಇಡೀ ಚಿತ್ರತಂಡಕ್ಕೆ ಶುಭಾಶಯ ತಿಳಿಸಿದ್ದಾರೆ.

ಪೂಜಾ ಗಾಂಧಿಗೆ ರಮಿಕಾ ಶಿವು ಧನ್ಯವಾದ

ತಮ್ಮ ಅಭಿನಯಕ್ಕೆ ಪೂಜಾ ಗಾಂಧಿ ಅವರಂತಹ ಹಿರಿಯ ಹಾಗೂ ಖ್ಯಾತ ಕಲಾವಿದರಿಂದ ಮೆಚ್ಚುಗೆ ಸಿಕ್ಕಿರುವುದಕ್ಕೆ ರಮಿಕಾ ಶಿವು ಕೂಡ ಸಂತಸ ವ್ಯಕ್ತಪಡಿಸಿದ್ದಾರೆ. 'ಇದು ನಿಜವಾಗಿಯೂ ನನ್ನ ದಿನವನ್ನೇ ಸುಂದರವಾಗಿಸಿದೆ ಮೇಡಂ! ನಿಮ್ಮಂತಹ ದೊಡ್ಡ ಕಲಾವಿದರಿಂದ ನನ್ನ ಕೆಲಸಕ್ಕೆ ಮತ್ತು ನನ್ನ ಪಾತ್ರಕ್ಕೆ ಮೆಚ್ಚುಗೆ ಸಿಕ್ಕಿರುವುದು ನನಗೆ ತುಂಬಾ ದೊಡ್ಡ ವಿಷಯ. ನೀವು ನನಗಾಗಿ ಸಮಯ ತೆಗೆದುಕೊಂಡು ನನ್ನನ್ನು ಮೆಚ್ಚಿ ಬರೆದಿರುವುದಕ್ಕೆ ಹೃದಯಪೂರ್ವಕ ಧನ್ಯವಾದಗಳು ಮೇಡಂ. ನಿಮ್ಮ ಈ ಪ್ರೋತ್ಸಾಹ ನನಗೆ ತುಂಬಾ ಅಮೂಲ್ಯವಾದದ್ದು' ಎಂದು ರಮಿಕಾ ಶಿವು ಪ್ರತಿಕ್ರಿಯಿಸಿದ್ದಾರೆ.

ಬಿಗ್ ಬಜೆಟ್ ಸಿನಿಮಾಗಳ ನಡುವೆ ‘ಪ್ರೇಮದ ಊರಲಿ’ ಸದ್ದು

ಮನೋಜ್ ಕುಮಾರ್ ನಿರ್ದೇಶನದಲ್ಲಿ, ವೆನಿಲ್ಲಾ ಎಂಟರ್‌ಟೈನ್‌ಮೆಂಟ್ ಬ್ಯಾನರ್ ಅಡಿಯಲ್ಲಿ ಮೂಡಿಬಂದಿರುವ ‘ಪ್ರೇಮದ ಊರಲಿ’ ಚಿತ್ರದಲ್ಲಿ ರಂಗಾಯಣ ರಘು, ಶ್ರೀರಾಮ್, ತಪಸ್ವಿನಿ ಪೂಣಚ್ಚ ಹಾಗೂ ರಮಿಕಾ ಶಿವು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಭಾವನಾತ್ಮಕ ಕಥಾಹಂದರ ಹಾಗೂ ಕಲಾವಿದರ ಅಭಿನಯದಿಂದ ಪ್ರೇಕ್ಷಕರ ಮನ ಗೆದ್ದಿರುವ ಸಿನಿಮಾ, ಇದೀಗ ಬಾಯಿಮಾತಿನ ಪ್ರಚಾರದ ಮೂಲಕವೇ ಮತ್ತಷ್ಟು ಪ್ರೇಕ್ಷಕರನ್ನು ಚಿತ್ರಮಂದಿರದತ್ತ ಸೆಳೆಯುತ್ತಿದೆ.

ಇನ್ನು ವಿಶೇಷವೆಂದರೆ, ‘ಜೈಲರ್ 2’ ಹಾಗೂ ‘ರಣಬಾಲಿ’ಯಂತಹ ಬಿಗ್ ಬಜೆಟ್ ಸಿನಿಮಾಗಳ ಪೈಪೋಟಿಯ ನಡುವೆಯೂ ಕೇವಲ ಸುಮಾರು 2 ಕೋಟಿ ರೂ. ಬಜೆಟ್‌ನಲ್ಲಿ ನಿರ್ಮಾಣವಾಗಿರುವ ‘ಪ್ರೇಮದ ಊರಲಿ’ ತನ್ನ ಅಬ್ಬರವನ್ನು ಮುಂದುವರಿಸಿದೆ. ಪರಭಾಷೆ ಹಾಗೂ ಸ್ವಭಾಷೆಯ ಹಲವು ಸಿನಿಮಾಗಳ ಪೈಪೋಟಿಯ ನಡುವೆಯೂ ರಾಜ್ಯಾದ್ಯಂತ ಹೌಸ್‌ಫುಲ್ ಪ್ರದರ್ಶನ ಕಾಣುತ್ತಿರುವುದು ಚಿತ್ರತಂಡದ ಉತ್ಸಾಹವನ್ನು ಮತ್ತಷ್ಟು ಹೆಚ್ಚಿಸಿದೆ.

ಸ್ಟಾರ್‌ಗಳ ಮೆಚ್ಚುಗೆ; ಹೆಚ್ಚುತ್ತಿರುವ ಸಿನಿಮಾದ ಕ್ರೇಜ್

ಬಾಕ್ಸ್ ಆಫೀಸ್‌ನಲ್ಲಿ ಸದ್ದು ಮಾಡುತ್ತಿರುವ ‘ಪ್ರೇಮದ ಊರಲಿ’ಗೆ ಚಿತ್ರರಂಗದ ತಾರೆಯರಿಂದಲೂ ಮೆಚ್ಚುಗೆಯ ಮಾತುಗಳು ಕೇಳಿಬರುತ್ತಿವೆ. ಶಿವರಾಜ್‌ಕುಮಾರ್, ರಿಷಬ್ ಶೆಟ್ಟಿ ಹಾಗೂ ರಮೇಶ್ ಅರವಿಂದ್ ಸೇರಿದಂತೆ ಹಲವು ಪ್ರಮುಖರು ಸಿನಿಮಾದ ಬಗ್ಗೆ ಮೆಚ್ಚುಗೆ ಸೂಚಿಸಿದ್ದಾರೆ. ನಟ ವಸಿಷ್ಠ ಎನ್. ಸಿಂಹ ಹಾಗೂ ಅವರ ಪತ್ನಿ ಹರಿಪ್ರಿಯಾ ಕೂಡ ಸಿನಿಮಾ ವೀಕ್ಷಿಸಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಇನ್ನು ನಟಿ ರಶ್ಮಿಕಾ ಮಂದಣ್ಣ ಕೂಡ ಸಾಮಾಜಿಕ ಜಾಲತಾಣದಲ್ಲಿ ಚಿತ್ರದ ಬಗ್ಗೆ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದು, ಚಿತ್ರದ ನಟಿ ತಪಸ್ವಿನಿ ಪೂಣಚ್ಚ ಅವರ ಅಭಿನಯದ ಕುರಿತು ಮಾತನಾಡಲು ವೈಯಕ್ತಿಕವಾಗಿ ಕರೆ ಮಾಡಿದ್ದಾರೆ ಎನ್ನಲಾಗಿದೆ.

ಇನ್ನು ದೊಡ್ಡ ಸ್ಟಾರ್‌ಗಳ ಸಿನಿಮಾಗಳ ನಡುವೆಯೂ ತನ್ನದೇ ಕಥೆ, ಭಾವನೆ ಮತ್ತು ಅಭಿನಯದ ಮೂಲಕ ಪ್ರೇಕ್ಷಕರನ್ನು ಸೆಳೆಯುತ್ತಿರುವ ‘ಪ್ರೇಮದ ಊರಲಿ’, ಸ್ಯಾಂಡಲ್‌ವುಡ್‌ನಲ್ಲಿ ಸದ್ಯದ ಗಮನಾರ್ಹ ಸಿನಿಮಾಗಳ ಪಟ್ಟಿಗೆ ಸೇರ್ಪಡೆಯಾಗಿದೆ.

Premada Oorali ತಂಡ ಶಿವಣ್ಣನ ಮನೆಯಲ್ಲಿ: ನಟ ಏನಂದ್ರು? ಸುಂದರ ಕ್ಷಣಗಳ ಫೋಟೋಸ್ ಇಲ್ಲಿವೆ

Suchethana D — Tue, 20 Oct 2026 19:11:20 +0530

ಕೇವಲ ಎರಡು ಕೋಟಿ ರೂಪಾಯಿ ಬಜೆಟ್ನಲ್ಲಿ ಮಾಡಿದ್ದ ಪ್ರೇಮದ ಊರಲಿ ತಂಡ, ಕೇವಲ ಜನರ ಬಾಯಿಯಿಂದ ಬಾಯಿ ಪ್ರಚಾರದಿಂದಾಗಿಯೇ 100 ಕೋಟಿ ದಾಟುವತ್ತ ದಾಪುಗಾಲು ಹಾಕಿದೆ. ನಟ ಶಿವರಾಜ್ ಕುಮಾರ್ ಅವರು ಇಡೀ ಚಿತ್ರ ತಂಡವನ್ನು ತಮ್ಮ ಮನೆಗೆ ಕರೆಸಿಕೊಂಡು ಹಾರೈಸಿದ್ದಾರೆ. ನಟ ಹೇಳಿದ್ದೇನು?

ಕೇವಲ ಎರಡು ಕೋಟಿ ರೂಪಾಯಿ ಬಜೆಟ್ನಲ್ಲಿ ಮಾಡಿದ್ದ ಪ್ರೇಮದ ಊರಲಿ ತಂಡ, ಕೇವಲ ಜನರ ಬಾಯಿಯಿಂದ ಬಾಯಿ ಪ್ರಚಾರದಿಂದಾಗಿಯೇ 100 ಕೋಟಿ ದಾಟುವತ್ತ ದಾಪುಗಾಲು ಹಾಕಿದೆ. ಒಂದೊಳ್ಳೆ ಚಿತ್ರ, ಮನೆಮಂದಿಯೆಲ್ಲಾ ಕುಳಿತು ನೋಡುವ ಚಿತ್ರವನ್ನು ಕೊಟ್ಟರೆ, ಜನರು ಅದನ್ನು ಹೇಗೆ ಸ್ವೀಕರಿಸುತ್ತಾರೆ, ಪ್ರಚಾರಕ್ಕೆ ಕೋಟಿ ಕೋಟಿ ಸುರಿಯದಿದ್ದರೂ, ಜನರ ಬಾಯಿಯಿಂದ ಬಾಯಿ ಪ್ರಚಾರದಿಂದಲೇ ಹೇಗೆ ಸಿನಿಮಾ ಒಂದು ಸಕ್ಸಸ್ ಆಗಬಹುದು ಎನ್ನುವುದಕ್ಕೆ ಸಾಕ್ಷಿಯಾಗಿ ನಿಂತಿರೋದು ಪ್ರೇಮದ ಊರಲಿ ಮೂವಿ (Premada Oorali Kannada Movie)

ಪ್ರೇಮದ ಊರಲಿ ಸಕ್ಸಸ್ ಬಗ್ಗೆ ಇದಾಗಲೇ ಕೆಲವು ನಟರು ಶ್ಲಾಘಿಸಿ ಮಾತನಾಡಿದ್ದಾರೆ. ಇದೀಗ ನಟ ಶಿವರಾಜ್ ಕುಮಾರ್ ಅವರು ಇಡೀ ಚಿತ್ರ ತಂಡವನ್ನು ತಮ್ಮ ಮನೆಗೆ ಕರೆಸಿಕೊಂಡಿದ್ದರು. ಚಿತ್ರದ ನಾಯಕಿ ರಮಿಕಾ ಶಿವು, ನಾಯಕ ಶ್ರೀರಾಮ್, ನಿರ್ಮಾಪಕ ದೇವೇಂದ್ರ ನಾಯ್ಡು ಹೀಗೆ ಎಲ್ಲರೂ ಶಿವಣ್ಣನ ಮನೆಗೆ ಹೋಗಿದ್ದಾರೆ.

ಅಪ್ಪಾಜಿ ಕಾಲದಿಂದಲೂ ಕನ್ನಡ ಸಿನಿಮಾಗಳಿಗೆ ಬೆಲೆ ಇದ್ದೇ ಇದೆ. ಪ್ರತಿ 10 ವರ್ಷಕ್ಕೆ ಒಂದು ಈ ರೀತಿಯ ಚಿತ್ರ ಬರುತ್ತದೆ. ಪ್ರೇಮದ ಊರಲಿ ಸಿನಿಮಾ ಆ ರೀತಿಯ ಚಿತ್ರವೇ ಆಗಿದೆ ಎಂದು ಶಿವಣ್ಣ ಹೇಳಿದ್ದಾರೆ.

ನಿಮ್ಮ ಚಿತ್ರದ ಗೆಲುವು ತುಂಬಾನೆ ಖುಷಿ ಕೊಟ್ಟಿದೆ. ಕನ್ನಡ ಸಿನಿಮಾ ಹೋಗ್ತಿರೋದಕ್ಕೆ ತುಂಬಾನೆ ಸಂತೋಷ್ ಇದೆ. ದೊಡ್ಡ ಬಜೆಟ್ ಚಿತ್ರಗಳಷ್ಟೇ ಅಲ್ಲ, ಚಿಕ್ಕ ಬಜೆಟ್‌ನ ಸಿನಿಮಾಗಳು ಬರಬೇಕು ಎಂದು ಇದೇ ವೇಳೆ ಚಿತ್ರತಂಡವನ್ನು ನಟ ಕೊಂಡಾಡಿದ್ದಾರೆ.

10 ದಿನಗಳ ಹಿಂದೆಯೇ ಭೇಟಿಯಾಗಬೇಕಿತ್ತು. ನನಗೆ ಬಹಳ ಖುಷಿಯಾಗುತ್ತಿದೆ. ನಮ್ಮ ಕನ್ನಡ ಸಿನಿಮಾ ಉತ್ತಮ ಪ್ರದರ್ಶನ ನೀಡುತ್ತಿದೆ. ಹೈ ಬಜೆಟ್ ಸಿನಿಮಾಗಳೇ ಓಡೋದು ಅನ್ನೋ ಯುಗದಲ್ಲಿ ಉತ್ತಮ ಸಿನಿಮಾಗಳು ಗೆಲ್ಲುತ್ತಿವೆ. ನಮ್ಮ ಭಾಷೆ, ನಮ್ಮ ಚಿತ್ರಗಳು ಸದಾ ಉನ್ನತ ಮಟ್ಟದಲ್ಲಿರಬೇಕು ಎಂದು ನಟ ಹೇಳಿದ್ದಾರೆ.

ಇಲ್ಲಿಯವರೆಗೆ, ಪ್ರೇಮದ ಊರಲಿ ಚಿತ್ರದ 24 ದಿನಗಳ ಒಟ್ಟು ಕಲೆಕ್ಷನ್ ಹೀಗಿದೆ: ಗ್ಲೋಬಲ್ ಕಲೆಕ್ಷನ್: 93.07 ಕೋಟಿ ರೂಪಾಯಿ; ಭಾರತದ ಗ್ರಾಸ್ ಕಲೆಕ್ಷನ್: 90.57 ಕೋಟಿ ರೂಪಾಯಿ ಹಾಗೂ ಇಂಡಿಯಾ ನೆಟ್ ಕಲೆಕ್ಷನ್: 77.52 ಕೋಟಿ ರೂಪಾಯಿ.

ಜೈಲರ್ 2 ಅಬ್ಬರದ ನಡುವೆಯೂ ಕನ್ನಡ ಸಿನಿಮಾದ ಕಮಾಲ್: ‘ಪ್ರೇಮದ ಊರಲಿ’ ಕಲೆಕ್ಷನ್ ಆಗಿದ್ದೆಷ್ಟು?

Govindaraj S — Sun, 18 Oct 2026 15:40:55 +0530

ಬಾಕ್ಸ್ ಆಫೀಸ್‌ನಲ್ಲಿ ದೊಡ್ಡ ಸಿನಿಮಾಗಳ ಅಬ್ಬರ ಜೋರಾಗಿರುವ ಸಮಯದಲ್ಲೇ, ಯಾವುದೇ ಅದ್ಧೂರಿ ಪ್ರಚಾರದ ಮೊರೆ ಹೋಗದೆ ಒಂದು ಕನ್ನಡ ಸಿನಿಮಾ ಸದ್ದಿಲ್ಲದೆ ದೊಡ್ಡ ಮಟ್ಟದ ಗೆಲುವು ದಾಖಲಿಸುತ್ತಿದೆ. ಅದೇ ಮನೋಜ್ ಕುಮಾರ್ ನಿರ್ದೇಶನದ ‘ಪ್ರೇಮದ ಊರಲಿ’. ರಜನಿಕಾಂತ್ ಅಭಿನಯದ ಬಹುನಿರೀಕ್ಷಿತ ‘ಜೈಲರ್ 2’ ಅಕ್ಟೋಬರ್ 15ರಂದು ತೆರೆಕಂಡು ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಸದ್ದು ಮಾಡುತ್ತಿರುವ ನಡುವೆಯೂ, ‘ಪ್ರೇಮದ ಊರಲಿ’ ತನ್ನದೇ ಪ್ರೇಕ್ಷಕರನ್ನು ಹಿಡಿದಿಟ್ಟುಕೊಂಡು ಮುನ್ನುಗ್ಗುತ್ತಿದೆ.

ಕೇವಲ ₹2ರಿಂದ ₹3 ಕೋಟಿ ಬಜೆಟ್‌ನಲ್ಲಿ ನಿರ್ಮಾಣವಾಗಿದೆ ಎನ್ನಲಾಗುತ್ತಿರುವ ಈ ಫೀಲ್ ಗುಡ್ ಲವ್ ಸ್ಟೋರಿ, ಬಿಡುಗಡೆಯಾಗಿ 23 ದಿನಗಳ ಬಳಿಕವೂ ಬಾಕ್ಸ್ ಆಫೀಸ್‌ನಲ್ಲಿ ತನ್ನ ಓಟವನ್ನು ಮುಂದುವರಿಸಿದೆ. ಸ್ಯಾಕ್ನಿಲ್ಕ್ ವರದಿ ಪ್ರಕಾರ, 23ನೇ ದಿನವಾದ ಶನಿವಾರ ಚಿತ್ರ ಸುಮಾರು ₹4.15 ಕೋಟಿ ಗ್ರಾಸ್ ಕಲೆಕ್ಷನ್ ಮಾಡಿದೆ. ಇದರೊಂದಿಗೆ ಚಿತ್ರದ ವಿಶ್ವದಾದ್ಯಂತ ಒಟ್ಟು ಗ್ರಾಸ್ ಗಳಿಕೆ ₹86.72 ಕೋಟಿಗೂ ಅಧಿಕವಾಗಿದೆ.

ಕರ್ನಾಟಕದಲ್ಲಿ ₹72 ಕೋಟಿ ದಾಟಿದ ಕಲೆಕ್ಷನ್

‘ಪ್ರೇಮದ ಊರಲಿ’ ಸಿನಿಮಾದ ಅಸಲಿ ಬಲ ಕರ್ನಾಟಕ ಬಾಕ್ಸ್ ಆಫೀಸ್‌ನಲ್ಲೇ ಕಾಣಿಸುತ್ತಿದೆ. ಲಭ್ಯವಿರುವ ಬಾಕ್ಸ್ ಆಫೀಸ್ ಲೆಕ್ಕಾಚಾರದ ಪ್ರಕಾರ, ರಾಜ್ಯದಲ್ಲಿ ಚಿತ್ರ ಈಗಾಗಲೇ ₹72.52 ಕೋಟಿಗೂ ಅಧಿಕ ಗ್ರಾಸ್ ಕಲೆಕ್ಷನ್ ಮಾಡಿದೆ. ಚಿತ್ರದ ವೇಗ ಇದೇ ರೀತಿ ಮುಂದುವರಿದರೆ, ₹100 ಕೋಟಿ ಗ್ರಾಸ್ ಕ್ಲಬ್ ತಲುಪುವ ಸಾಧ್ಯತೆಗಳ ಬಗ್ಗೆ ಸಿನಿಪ್ರೇಮಿಗಳ ವಲಯದಲ್ಲಿ ಚರ್ಚೆ ಶುರುವಾಗಿದೆ. ಕೆಲ ಬಾಕ್ಸ್ ಆಫೀಸ್ ಅಂದಾಜುಗಳ ಪ್ರಕಾರ, ಇನ್ನೂ ಕೆಲವೇ ದಿನಗಳಲ್ಲಿ ಈ ಮೈಲಿಗಲ್ಲು ತಲುಪುವ ಸಾಧ್ಯತೆಯೂ ಇದೆ.

ಸ್ಟಾರ್‌ಗಳ ಮೆಚ್ಚುಗೆ; ಹೆಚ್ಚಿದ ಸಿನಿಮಾದ ಕ್ರೇಜ್

ಬಾಕ್ಸ್ ಆಫೀಸ್ ಗಳಿಕೆಯ ಜೊತೆಗೆ ‘ಪ್ರೇಮದ ಊರಲಿ’ಗೆ ಕನ್ನಡ ಚಿತ್ರರಂಗದ ಪ್ರಮುಖ ತಾರೆಯರಿಂದಲೂ ಮೆಚ್ಚುಗೆ ವ್ಯಕ್ತವಾಗಿದೆ. ಶಿವರಾಜ್‌ಕುಮಾರ್, ರಿಷಬ್ ಶೆಟ್ಟಿ ಹಾಗೂ ರಮೇಶ್ ಅರವಿಂದ್ ಸೇರಿದಂತೆ ಹಲವು ಪ್ರಮುಖರು ಸಿನಿಮಾದ ಬಗ್ಗೆ ಮೆಚ್ಚುಗೆ ಸೂಚಿಸಿದ್ದಾರೆ. ನಟ ವಸಿಷ್ಠ ಎನ್. ಸಿಂಹ ಹಾಗೂ ಅವರ ಪತ್ನಿ ಹರಿಪ್ರಿಯಾ ಕೂಡ ಚಿತ್ರವನ್ನು ವೀಕ್ಷಿಸಿ ಮೆಚ್ಚಿಕೊಂಡಿದ್ದಾರೆ. ಇನ್ನು ನಟಿ ರಶ್ಮಿಕಾ ಮಂದಣ್ಣ ಕೂಡ ಸಾಮಾಜಿಕ ಜಾಲತಾಣದಲ್ಲಿ ಸಿನಿಮಾದ ಬಗ್ಗೆ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದು, ಚಿತ್ರದ ನಟಿ ತಪಸ್ವಿನಿ ಪೂಣಚ್ಚ ಅವರ ಅಭಿನಯದ ಕುರಿತು ಮಾತನಾಡಲು ವೈಯಕ್ತಿಕವಾಗಿ ಕರೆ ಮಾಡಿದ್ದಾರೆ ಎನ್ನಲಾಗಿದೆ.

60 ಶೋಗಳಿಂದ ಆರಂಭವಾದ ಸಿನಿಮಾ ಈಗ 1,300ಕ್ಕೂ ಹೆಚ್ಚು ಸ್ಕ್ರೀನ್‌ಗಳಲ್ಲಿ!

‘ಪ್ರೇಮದ ಊರಲಿ’ ಸಿನಿಮಾದ ಬಾಕ್ಸ್ ಆಫೀಸ್ ಜರ್ನಿಯಲ್ಲೇ ಈ ಬೆಳವಣಿಗೆ ಅತ್ಯಂತ ಗಮನ ಸೆಳೆಯುತ್ತಿದೆ. ಸೆಪ್ಟೆಂಬರ್ 25ರಂದು ಕೇವಲ 60 ಶೋಗಳೊಂದಿಗೆ ಆರಂಭವಾಗಿದ್ದ ಸಿನಿಮಾ, ಪ್ರೇಕ್ಷಕರ ಬಾಯಿಮಾತಿನ ಪ್ರಚಾರದಿಂದ ಹಂತಹಂತವಾಗಿ ಶೋ ಹಾಗೂ ಸ್ಕ್ರೀನ್‌ಗಳ ಸಂಖ್ಯೆಯನ್ನು ಹೆಚ್ಚಿಸಿಕೊಂಡಿದೆ. ಇದೀಗ ಚಿತ್ರ 1,300ಕ್ಕೂ ಅಧಿಕ ಸ್ಕ್ರೀನ್‌ಗಳಲ್ಲಿ ಪ್ರದರ್ಶನ ಕಾಣುತ್ತಿದೆ ಎನ್ನಲಾಗಿದ್ದು, ಹಲವು ಕಡೆ ಹೌಸ್‌ಫುಲ್ ಶೋಗಳನ್ನು ಕಾಣುತ್ತಿದೆ. ದೊಡ್ಡ ಸ್ಟಾರ್‌ಗಳ ಸಿನಿಮಾಗಳಿಗೆ ಹೋಲಿಸಿದರೆ ಕಡಿಮೆ ಬಜೆಟ್‌ನಲ್ಲಿ ಬಂದ ಈ ಚಿತ್ರಕ್ಕೆ ಸಿಕ್ಕಿರುವ ಪ್ರತಿಕ್ರಿಯೆ ಸ್ಯಾಂಡಲ್‌ವುಡ್‌ನಲ್ಲಿ ಗಮನ ಸೆಳೆಯುತ್ತಿದೆ.

‘ಪ್ರೇಮದ ಊರಲಿ’ಗೆ ಪ್ರೇಕ್ಷಕರೇ ಪ್ರಚಾರದ ಶಕ್ತಿ

ಇನ್ನು ಅದ್ದೂರಿ ಪ್ರಚಾರ, ಭಾರೀ ಬಜೆಟ್ ಅಥವಾ ದೊಡ್ಡ ಮಟ್ಟದ ಓಪನಿಂಗ್‌ಗಿಂತಲೂ ಪ್ರೇಕ್ಷಕರ ಪ್ರತಿಕ್ರಿಯೆಯನ್ನೇ ನೆಚ್ಚಿಕೊಂಡು ಸಾಗುತ್ತಿರುವ ಸಿನಿಮಾ ‘ಪ್ರೇಮದ ಊರಲಿ’. ಚಿತ್ರಮಂದಿರದಿಂದ ಹೊರಬಂದ ಪ್ರೇಕ್ಷಕರೇ ಸಿನಿಮಾದ ಬಗ್ಗೆ ಮಾತನಾಡಿದ್ದು, ಅದೇ ಬಾಯಿಮಾತಿನ ಪ್ರಚಾರ ಚಿತ್ರಕ್ಕೆ ಮತ್ತಷ್ಟು ಶೋಗಳು ಹಾಗೂ ಸ್ಕ್ರೀನ್‌ಗಳನ್ನು ತಂದುಕೊಟ್ಟಿದೆ. ಇದೀಗ ₹86 ಕೋಟಿಗೂ ಅಧಿಕ ಗ್ರಾಸ್ ಕಲೆಕ್ಷನ್ ಮಾಡಿರುವ ಸಿನಿಮಾ, ₹100 ಕೋಟಿ ಮೈಲಿಗಲ್ಲಿನತ್ತ ಹೆಜ್ಜೆ ಇಟ್ಟಿದೆ. ಜೈಲರ್ 2 ಸೇರಿದಂತೆ ದೊಡ್ಡ ಚಿತ್ರಗಳ ಪೈಪೋಟಿಯ ನಡುವೆಯೂ ‘ಪ್ರೇಮದ ಊರಲಿ’ ತನ್ನ ಓಟವನ್ನು ಮುಂದುವರಿಸಿರುವುದು ಸ್ಯಾಂಡಲ್‌ವುಡ್‌ನ ಈ ವರ್ಷದ ಗಮನಾರ್ಹ ಬಾಕ್ಸ್ ಆಫೀಸ್ ಕಥೆಗಳಲ್ಲಿ ಒಂದಾಗಿ ಕಾಣಿಸುತ್ತಿದೆ.

AR Rahman Secret: ಎಆರ್ ರೆಹಮಾನ್ ಸೀಕ್ರೆಟ್ ಬಿಚ್ಚಿಟ್ಟ ಯಶ್.. ಬೆಂಗಳೂರಲ್ಲಿ 'ಸಂಗೀತ ಮಾಂತ್ರಿಕ'ನ ಗುಟ್ಟು ರಟ್ಟು!

Shriram Bhat — Sat, 17 Oct 2026 14:11:55 +0530

ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹುನಿರೀಕ್ಷಿತ ‘ರಾಮಾಯಣ’ ಸಿನಿಮಾ ಈಗಾಗಲೇ ಹಲವು ಕಾರಣಗಳಿಂದ ಸದ್ದು ಮಾಡುತ್ತಿದೆ. ಇದೀಗ ಈ ಚಿತ್ರದ ಕಾರ್ಯಕ್ರಮವೊಂದರಲ್ಲಿ ಯಶ್ ಹಂಚಿಕೊಂಡಿರುವ ಸಂಗೀತ ನಿರ್ದೇಶಕ ಎ.ಆರ್. ರೆಹಮಾನ್ ಅವರ ಕುರಿತಾದ ಆಸಕ್ತಿದಾಯಕ ಸಂಗತಿಗಳು ಗಮನ ಸೆಳೆಯುತ್ತಿವೆ. ಕನ್ನಡ ಚಿತ್ರರಂಗದೊಂದಿಗೆ ರೆಹಮಾನ್ ಹೊಂದಿರುವ ಹಳೆಯ ನಂಟು ಮತ್ತು ಅವರ ಸಂಗೀತ ಪಯಣದ ಹಿಂದಿನ ಕೆಲವು ವಿಚಾರಗಳನ್ನು ಯಶ್ ಬಹಿರಂಗಪಡಿಸಿದ್ದಾರೆ.

80ರ ದಶಕದಲ್ಲಿ ಜನಪ್ರಿಯತೆ ಗಳಿಸಿದ್ದ ‘ಡ್ಯಾನ್ಸ್ ಡ್ಯಾನ್ಸ್ ರಾಜ ಡ್ಯಾನ್ಸ್’ ಚಿತ್ರದ ಸಂಗೀತದ ಹಿಂದಿನ ಕಥೆಯನ್ನು ಯಶ್ ಇಲ್ಲಿ ಪ್ರಸ್ತಾಪಿಸಿದ್ದಾರೆ. ದ್ವಾರಕೀಶ್ ನಿರ್ದೇಶನದ ಈ ಚಿತ್ರದ ಹಾಡಿನ ಕುರಿತು ಮಾತನಾಡಿದ ಅವರು, ‘ರಾಮಾಯಣ’ ಚಿತ್ರದ ಕೆಲಸದ ವೇಳೆ ಎ.ಆರ್. ರೆಹಮಾನ್ ಅವರಿಂದ ಈ ಕುತೂಹಲಕಾರಿ ವಿಚಾರ ತಿಳಿದುಕೊಂಡಿದ್ದಾಗಿ ಹೇಳಿದ್ದಾರೆ. ಈ ವಿಷಯವನ್ನು ಹಂಚಿಕೊಳ್ಳುವಾಗ ರೆಹಮಾನ್ ಕೂಡ ಅಲ್ಲಿಯೇ ಉಪಸ್ಥಿತರಿದ್ದು, ಸಂತೋಷದಿಂದ ಮಾತುಗಳನ್ನು ಆಲಿಸುತ್ತಿದ್ದರು.

ಇದರ ಜೊತೆಗೆ ಕನ್ನಡ ಚಿತ್ರರಂಗದ ಕೊಡುಗೆಯನ್ನೂ ರೆಹಮಾನ್ ಸ್ಮರಿಸಿಕೊಂಡಿದ್ದಾರೆ. ತಮ್ಮ ಆರಂಭಿಕ ದಿನಗಳಲ್ಲಿ ಕರ್ನಾಟಕಕ್ಕೆ ಬಂದು ಕನ್ನಡ ಸಿನಿಮಾಗಳಿಗಾಗಿ ಕೆಲಸ ಮಾಡುತ್ತಿದ್ದೆ. ಆ ಕೆಲಸಗಳಿಂದ ಬಂದ ಹಣವನ್ನು ತಮ್ಮ ಸ್ಟುಡಿಯೋ ನಿರ್ಮಾಣಕ್ಕೆ ಬಳಸಿಕೊಂಡಿದ್ದಾಗಿ ಅವರು ಯಶ್ ಅವರೊಂದಿಗೆ ಹಂಚಿಕೊಂಡಿದ್ದಾರೆ. ಸಂಗೀತ ಲೋಕದಲ್ಲಿ ದೊಡ್ಡ ಹೆಸರು ಗಳಿಸಿರುವ ರೆಹಮಾನ್ ಅವರ ಯಶಸ್ಸಿನ ಪಯಣದಲ್ಲಿ ಕನ್ನಡ ಚಿತ್ರರಂಗದ ಪಾತ್ರವೂ ಇತ್ತು ಎಂಬ ವಿಚಾರ ಅಭಿಮಾನಿಗಳಿಗೆ ವಿಶೇಷ ಆಸಕ್ತಿ ಮೂಡಿಸಿದೆ.

ಇನ್ನು ‘ರಾಮಾಯಣ’ ಸಿನಿಮಾದ ಮತ್ತೊಂದು ವಿಶೇಷವೆಂದರೆ, ಈ ಚಿತ್ರಕ್ಕೆ ಎ.ಆರ್. ರೆಹಮಾನ್ ಜೊತೆಗೆ ಹಾಲಿವುಡ್‌ನ ಖ್ಯಾತ ಸಂಗೀತ ನಿರ್ದೇಶಕ ಹ್ಯಾನ್ಸ್ ಜಿಮ್ಮರ್ ಕೂಡ ಸಂಗೀತ ಸಂಯೋಜಿಸುತ್ತಿದ್ದಾರೆ. ಇಬ್ಬರು ಅಂತರರಾಷ್ಟ್ರೀಯ ಮಟ್ಟದ ಸಂಗೀತ ದಿಗ್ಗಜರು ಒಂದೇ ಚಿತ್ರಕ್ಕಾಗಿ ಕೈಜೋಡಿಸಿರುವುದು ಸಿನಿಪ್ರೇಮಿಗಳ ಕುತೂಹಲವನ್ನು ಹೆಚ್ಚಿಸಿದೆ.

ಈ ವಿಭಿನ್ನ ಪ್ರಯೋಗದ ಕುರಿತು ಮಾತನಾಡಿದ ಯಶ್, ಭಾರತೀಯ ಸಂಗೀತದ ವೈಶಿಷ್ಟ್ಯವನ್ನು ಜಾಗತಿಕ ಸಂಗೀತದ ಅನುಭವದೊಂದಿಗೆ ಬೆಸೆಯುವ ಪ್ರಯತ್ನ ಇದಾಗಿದೆ ಎಂದು ವಿವರಿಸಿದ್ದಾರೆ. ಪರಸ್ಪರರ ಸಂಗೀತ ಶೈಲಿಯಿಂದ ಹೊಸದನ್ನು ಕಲಿಯುವ ಉದ್ದೇಶದಿಂದ ಇಬ್ಬರು ಸಂಗೀತ ನಿರ್ದೇಶಕರನ್ನು ಆಯ್ಕೆ ಮಾಡಲಾಗಿದೆ ಎಂಬುದು ಅವರ ಮಾತಿನ ಸಾರ.

ನಿತೇಶ್ ತಿವಾರಿ ನಿರ್ದೇಶನದ ಈ ಚಿತ್ರದಲ್ಲಿ ರಣಬೀರ್ ಕಪೂರ್ ರಾಮನಾಗಿ ಮತ್ತು ಯಶ್ ರಾವಣನಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಯಶ್ ಹಾಗೂ ನಮಿತ್ ಮಲ್ಹೋತ್ರಾ ನಿರ್ಮಾಣದ ‘ರಾಮಾಯಣ’ ನವೆಂಬರ್ 5ರಂದು ವಿಶ್ವದಾದ್ಯಂತ ಬಿಡುಗಡೆಯಾಗಲು ಸಜ್ಜಾಗಿದೆ. ಬಹುಭಾಷೆಗಳಲ್ಲಿ ತೆರೆಕಾಣಲಿರುವ ಈ ಮಹತ್ವಾಕಾಂಕ್ಷೆಯ ಚಿತ್ರವು ಭಾರತೀಯ ಸಿನಿಮಾ ಜಗತ್ತಿನಲ್ಲಿ ದೊಡ್ಡ ನಿರೀಕ್ಷೆ ಮೂಡಿಸಿದೆ.

Bigg Bossಗೆ ಹೋಗ್ತೇನೆಂದು ಸಿನಿಮಾ ಆಫರ್‌ ಕೊಟ್ಟೋರೆಲ್ಲಾ ಕೈಬಿಟ್ರು: ಸುಧಾರಾಣಿ ನೋವಿನ ಮಾತು

Suchethana D — Mon, 19 Oct 2026 20:18:27 +0530

ಬಿಗ್‌ಬಾಸ್‌ ಇನ್ನೇನು ಶುರುವಾಗತ್ತೆ ಎಂದು ಸುದ್ದಿಯಾಗುತ್ತಲೇ, ಪ್ರತಿ ಸೀಸನ್‌ನಲ್ಲಿಯೂ ಇವರು ಹೋಗ್ತಾರೆ, ಅವರು ಹೋಗ್ತಾರೆ ಎನ್ನುವ ಸುದ್ದಿ ಸದ್ದು ಮಾಡುತ್ತದೆ. ಅದರಲ್ಲಿಯೂ ಹಲವು ಯುಟ್ಯೂಬ್‌ ಚಾನೆಲ್‌ನವರು ಖ್ಯಾತ ಸೆಲೆಬ್ರಿಟಿಗಳ ಹೆಸರು ಹಾಕಿ, ಅವರು ಹೋಗುತ್ತಿದ್ದಾರೆ ಎನ್ನುವ ರೀತಿಯಲ್ಲಿ ಹೇಳಿಕೆ ಕೊಟ್ಟು, ಲೈಕ್ಸ್‌, ಶೇರ್‌ಗಳನ್ನು ಹೆಚ್ಚಿಸಿಕೊಳ್ಳುತ್ತಾರೆ. ಇದು ಹಲವು ಸೆಲೆಬ್ರಿಟಿಗಳಿಗೆ ಪದೇ ಪದೇ ಕಿರಿಕಿರಿ ಉಂಟು ಮಾಡುವ ವಿಷಯವಾಗುತ್ತದೆ. ಅಷ್ಟಕ್ಕೂ ದೊಡ್ಡ ಮಟ್ಟದಲ್ಲಿ ಹೆಸರು ಮಾಡಿರುವ ಸೆಲೆಬ್ರಿಟಿಗಳ ಪೈಕಿ ಹಲವರು ಬಿಗ್‌ಬಾಸ್ ಆಫರ್‌ ಬಂದರೂ ಅದನ್ನು ಎಕ್ಸೆಪ್ಟ್‌ ಮಾಡುವುದಿಲ್ಲ. ಬಿಗ್‌ಬಾಸ್‌ಗೆ ಹೋಗಿ ತಮ್ಮ ಮರ್ಯಾದೆ ತೆಗೆದುಕೊಳ್ಳಲು ತಮಗೆ ಇಷ್ಟವಿಲ್ಲ ಎಂದು ಕೆಲವರು ಹೇಳಿದ್ರೆ, ತಮಗೆ ಡೇಟ್ಸ್‌ ಇಲ್ಲ, ಇಂಟರೆಸ್ಟ್‌ ಇಲ್ಲ ಇತ್ಯಾದಿ ಹೇಳಿಕೆ ಕೊಟ್ಟು ರಿಜೆಕ್ಟ್‌ ಮಾಡುವುದು ಇದ್ದೇ ಇದೆ.

ಬಿಗ್‌ಬಾಸ್‌ ಬಂದಾಗೆಲ್ಲಾ ಸುಧಾರಾಣಿ ಹೆಸರು

ಪ್ರತಿಬಾರಿಯೂ ಕೆಲವು ನಟ-ನಟಿಯರು ಹೆಸರು ಮುನ್ನೆಲೆಗೆ ಬರುವುದು ಇದೆ. ಅಂಥವರಲ್ಲಿ ಒಬ್ಬರು ನಟಿ ಸುಧಾರಾಣಿ. ಶ್ರೀಮಸ್ತು ಶುಭಮಸ್ತು ಸೀರಿಯಲ್‌ ಮುಗಿದ ಬಳಿಕ ಬಿಗ್‌ಬಾಸ್‌ 13 ಹವಾ ಜೋರಾದ ಕಾರಣದಿಂದ ನಟಿ ಬಿಗ್‌ಬಾಸ್‌ಗೆ ಹೋಗ್ತಾರೆ ಎನ್ನುವ ಸುದ್ದಿ ಸದ್ದು ಮಾಡಿತ್ತು. ಅದಕ್ಕೆ ಸಿಕ್ಕಾಪಟ್ಟೆ ಗರಂ ಆಗಿದ್ದ ನಟಿ, ಹೀಗೆ ಸುಳ್ಳು ಸುದ್ದಿ ಹರಿಬಿಟ್ಟವರು ಮುಟ್ಟಿಕೊಳ್ಳುವ ಉತ್ತರ ನೀಡಿದ್ದರು. ಯಾರ್ ಹೇಳಿದ್ದು ಎನ್ನುವ ಕ್ಯಾಪ್ಶನ್ ಕೊಟ್ಟಿ‌ದ್ದ ನಟಿ, ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿರುವ ಪೋಸ್ಟ್ ಗಳ ಜೊತೆಗೆ ವಾಸ್ತು ಪ್ರಕಾರ ಸಿನಿಮಾದ ಒಂದೆರಡು ಸೀನ್ ಗಳನ್ನು ಕೂಡ ಸೇರಿಸಿ, ಫನ್ನಿಯಾಗಿ ವಿಡಿಯೋ ಎಡಿಟ್ ಮಾಡಿ ಹಂಚಿಕೊಂಡಿದ್ದರು. . ವಿಡೀಯೋದ ಆರಂಭದಲ್ಲಿ ಸುಧಾರಾಣಿ ಬಿಗ್ ಬಾಸ್ ಕನ್ಫರ್ಮ್ ಎನ್ನುವ ಪೋಸ್ಟ್ ಇದ್ದು, ಬಳಿಕ ನಟಿ ಯಾರ್ ಹೇಳಿದ್ದು ಎನ್ನುವ ಅವರದ್ದೇ ಡೈಲಾಗ್ ವಿಡೀಯೋ ಹಾಕಿದ್ದಾರೆ, ನಂತರ ಮತ್ತೊಂದು ವೈರಲ್ ಪೋಸ್ಟ್ ಹಾಕಿ, ಯಾವ… ಬೋ… ಎನ್ನುವ ಅರ್ಧ ಡೈಲಾಗ್ ಹಾಕಿ, ಟ್ರೋಲ್ ಪೇಜ್ ಗಳೇ ಬೆಜ್ಜಿ ಬೀಳುವಂತೆ ಟ್ರೋಲ್ ಮಾಡಿ, ಅಭಿಮಾನಿಗಳು ನಕ್ಕು ನಗುವಂತೆ ಮಾಡಿದ್ದರು.

ಸಿನಿಮಾ ಆಫರ್‌ ತಪ್ಪಿ ಹೋಗಿತ್ತು

ಇದರ ಬಗ್ಗೆ ಇದೀಗ ಮಾಧ್ಯಮವೊಂದಕ್ಕೆ ಮಾತನಾಡಿರುವ ನಟಿ, ನನಗೆ ಪ್ರತಿಸಲ ಬಿಗ್‌ಬಾಸ್‌ನಲ್ಲಿಯೂ ಇದೇ ಸಮಸ್ಯೆ ಉಂಟಾಗುತ್ತದೆ ಎನ್ನುವ ಮೂಲಕ ಈ ಫೇಕ್‌ ನ್ಯೂಸ್‌ನಿಂದ ಈ ಹಿಂದೆ ಕೆಲವು ಸಿನಿಮಾಗಳು ತಮ್ಮ ಕೈಬಿಟ್ಟ ಬಗ್ಗೆ ವಿವರಿಸಿದ್ದಾರೆ. ಮೂರ್ನಾಲ್ಕು ವರ್ಷಗಳ ಹಿಂದೆ ಇದೇ ರೀತಿ ಸುದ್ದಿಯಾಗಿತ್ತು. ಆಗ ನನಗೆ 3-4 ಒಳ್ಳೊಳ್ಳೆ ಸಿನಿಮಾ ಆಫರ್ಸ್ ಬಂದಿದ್ವು. ಕೆಲವೊಂದಕ್ಕೆ ಅಡ್ವಾನ್ಸ್‌ ಕೂಡ ಕೊಟ್ಟಿದ್ದರು.

ಆದರೆ ಅದೇ ವೇಳೆ ಬಿಗ್‌ಬಾಸ್‌ಗೆ ಹೋಗುತ್ತಿದ್ದೇನೆ ಎನ್ನುವ ಸುದ್ದಿಯನ್ನೇ ನಂಬಿದ ನಿರ್ಮಾಪಕ, ನಿರ್ದೇಶಕರು, ಪ್ರಾಜೆಕ್ಟ್‌ನಿಂದ ನನ್ನನ್ನು ಕೈಬಿಟ್ಟರು. ಒಬ್ಬರು ತಾವು ಸಿನಿಮಾ ಮಾಡ್ತಿಲ್ಲ ಎಂದು ಹೇಳಿ ಅಡ್ವಾನ್ಸ್‌ ಕೂಡ ವಾಪಸ್‌ ತೆಗೆದುಕೊಂಡರು. ಆಮೇಲೆ ಬೇರೆಯವರು ನಟಿಸಿದ್ದರು. ಇದ್ಯಾಕೆ ಆಯಿತು ಎಂದು ನನಗೆ ಶಾಕ್‌ ಆಗಿ ಆಮೇಲೆ ವಿಚಾರ ಮಾಡಿದಾಗ, ಬಿಗ್‌ಬಾಸ್‌ ಸುದ್ದಿಯನ್ನು ಅವರು ನಂಬಿದ್ದೇ ಇದಕ್ಕೆ ಕಾರಣವಾಗಿತ್ತು. ಆದ್ದರಿಂದ ನನಗೆ ಒಳ್ಳೊಳ್ಳೆ ಪ್ರಾಜೆಕ್ಟ್‌ಗಳು ಈ ಫೇಕ್‌ನ್ಯೂಸ್‌ನಿಂದ ಕೈತಪ್ಪಿದ್ದರಿಂದ ಈ ಸಲ ಹಾಗೆ ಸ್ಪಷ್ಟಪಡಿಸಿದ್ದೆ ಎಂದಿದ್ದಾರೆ.

ಮುಂಗಾರುಮಳೆ ನಂತ್ರ ಪ್ರೇಕ್ಷಕರನ್ನು ಭಾವುಕರನ್ನಾಗಿಸಿ ಕೋಟಿ ಕೋಟಿ ಲಾಭ ಗಳಿಸಿದ ಸಿನಿಮಾ

Mahmad Rafik — Mon, 19 Oct 2026 13:34:09 +0530

2008ರಲ್ಲಿ ಬಿಡುಗಡೆಯಾಗಿ ಕೋಟಿ ಕೋಟಿ ಲಾಭ ಗಳಿಸಿದ ಸಿನಿಮಾ ಪ್ರೇಕ್ಷಕರನ್ನು ಭಾವುಕರನ್ನಾಗಿಸುವ ಕ್ಲೈಮ್ಯಾಕ್ಸ್ ಹೊಂದಿದೆ. ಹಳ್ಳಿಯಿಂದ ಬಂದ ಹುಡುಗನೊಬ್ಬ ಅಪರಿಚಿತ ಸೂಟ್‌ಕೇಸ್ ಮೂಲಕ ನಾಯಕಿಯೊಂದಿಗೆ ಫೋನ್‌ನಲ್ಲಿ ಪ್ರೀತಿಯಲ್ಲಿ ಬೀಳುವ ಕಥೆ ಇದರಲ್ಲಿದೆ.

ಒಂದು ಸಿನಿಮಾ ಗೆದ್ರೆ, ಗೆಲುವಿಗೆ ಹಲವು ಕಾರಣಗಳಿರುತ್ತವೆ. ಕಥೆ, ಸಂಗೀತ, ನಟನೆ ಹೀಗೆ ಅನೇಕ ಅಂಶಗಳು ಸಿನಿಮಾ ಸಕ್ಸಸ್‌ಗೆ ಕಾರಣವಾಗುತ್ತವೆ. ಇದೆಲ್ಲದರ ಜೊತೆಗೆ ಕ್ಲೈಮ್ಯಾಕ್ಸ್ ಸಹ ಪ್ರಮುಖವಾಗುತ್ತದೆ. 2008ರಲ್ಲಿ ಬಿಡುಗಡೆಯಾದ ಸಿನಿಮಾದ ಕ್ಲೈಮ್ಯಾಕ್ಸ್ ವೀಕ್ಷಕರ ಹೃದಯಕ್ಕೆ ಶೋಕವನ್ನುಂಟು ಮಾಡಿ ಭಾವುಕರನ್ನಾಗಿಸಿತ್ತು. ಬಾಕ್ಸ್‌ಆಫಿಸ್‌ನಲ್ಲಿ ಗೆದ್ದ ಸಿನಿಮಾಗೆ ವಿಮರ್ಶಕರಿಂದಲೂ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿತ್ತು.

100 ದಿನಗಳ ಪ್ರದರ್ಶನ ಕಂಡಿದ್ದ ಸಿನಿಮಾಗೆ ನಿರ್ಮಾಪಕರಿಗೆ 10 ಕೋಟಿಗೂ ಹೆಚ್ಚಿನ ಲಾಭವನ್ನು ನೀಡಿತ್ತು. ಚಿತ್ರದ ಭಾವನಾತ್ಮಕ ಕತೆಗೆ ಹಾಡುಗಳು ಮತ್ತು ಸಂಗೀತ ಪ್ಲಸ್ ಪಾಯಿಂಟ್ ಆಗಿತ್ತು. ಆರ್ ಚಂದ್ರು ನಿರ್ದೇಶನದ ಈ ಸಿನಿಮಾ 25ನೇ ಜುಲೈ 2008ರಂದು ಬಿಡುಗಡೆಯಾಗಿತ್ತು. ಹಳ್ಳಿಯಿಂದ ಓದಲು ನಗರಕ್ಕೆ ಬರೋ ಹುಡುಗ ಪ್ರೀತಿಯಲ್ಲಿ ಸಿಲುಕಿ ಹೇಗೆ ಬದಲಾಗುತ್ತಾನೆ ಅನ್ನೋದು ಸಿನಿಮಾದ ಒನ್‌ಲೈನ್ ಕತೆ.

ಅಜಯ್ ರಾವ್ ಮತ್ತು ಪೂಜಾ ಗಾಂಧಿ ನಟನೆಯ 'ತಾಜ್‌ ಮಹಲ್'ಚಂದನವನದ ಸೂಪರ್ ಹಿಟ್ ಸಿನಿಮಾಗಳಲ್ಲಿ ಒಂದಾಗಿದೆ. ಅಜಯ್‌ಗೆ ಅಪರಿಚಿತ ಸೂಟ್‌‌ಕೇಸ್‌ ಸಿಗುತ್ತದೆ. ಸೂಟ್‌ಕೇಸ್ ಪೊಲೀಸರಿಗೆ ಹಸ್ತಾಂತರಿಸಿದ ಬಳಿಕ ತನ್ನ ಹೆಸರು ಕುಮಾರ್ ಎಂದು ಸುಳ್ಳು ಹೇಳಿ ಮೊಬೈಲ್ ನಂಬರ್ ನೀಡಿ ಹೋಗುತ್ತಾನೆ. ಸೂಟ್‌ಕೇಸ್ ಸಿಕ್ಕ ಖುಷಿಯಲ್ಲಿ ನಾಯಕಿ ಶೃತಿ, ಪೊಲೀಸರಿಂದ ನಂಬರ್ ಪಡೆದು, ಕುಮಾರ್‌ಗೆ ಥ್ಯಾಂಕ್ ಯು ಹೇಳುತ್ತಾಳೆ.

ತನ್ನೊಂದಿಗೆ ಓದುತ್ತಿರುವಮ ಅಜಯ್‌ನೇ ಕುಮಾರ್ ಎಂಬ ವಿಷಯ ತಿಳಿಯದೇ ಶೃತಿ ಫೋನ್‌ನಲ್ಲಿ ಮಾತನಾಡುತ್ತಿರುತ್ತಾಳೆ. ಈ ಮಾತು ಮುಂದೆ ಪ್ರೀತಿಯಾಗಿ ಬದಲಾಗುತ್ತದೆ. ಶೃತಿಗಾಗಿ ಪರೀಕ್ಷೆ ಬರೆಯೋದನ್ನು ಸಹ ಕುಮಾರ್ ಮಿಸ್ ಮಾಡಿಕೊಳ್ಳುತ್ತಾನೆ. ಮುಂದೆ ಅಜಯ್‌ ಏನು ಮಾಡ್ತಾನೆ? ಕುಮಾರ್ ಯಾರು ಅನ್ನೋ ವಿಷಯ ಶೃತಿಗೆ ಹೇಗೆ ಗೊತ್ತಾಗುತ್ತೆ ಅನ್ನೋದನ್ನು ಸಿನಿಮಾ ನೋಡಿಯೇ ತಿಳಿದುಕೊಳ್ಳಿ.

ಇದನ್ನೂ ಓದಿ: 2009ರಲ್ಲೇ 70 ಕೋಟಿ ದೋಚಿದ ಕನ್ನಡತಿಯ ಫ್ಯಾಂಟಸಿ ಹಾರರ್, ಥ್ರಿಲ್ಲರ್ ನಿಗೂಢ ಸಿನಿಮಾ

'ತಾಜ್ ‌ಮಹಲ್' ಸಿನಿಮಾವನ್ನು Sun NXT, JioTV ಮತ್ತು Airtel Xstream Play ಓಟಿಟಿ ಪ್ಲಾಟ್‌ಫಾರಂನಲ್ಲಿ ನೋಡಬಹುದು. ಯುಟ್ಯೂಬ್‌ನಲ್ಲಿಯೂ ತಾಜ್ ಮಹಲ್ ಸಿನಿಮಾವನ್ನು ಉಚಿತವಾಗಿ ನೋಡಿ.

ಈ ಮೊದಲು 2006ರಲ್ಲಿ ಬಿಡುಗಡೆಯಾದ ಮುಂಗಾರುಮಳೆ ಸಿನಿಮಾ ಸಹ ಇಂತಹವುದೇ ಕ್ಲೈಮ್ಯಾಕ್ಸ್ ಹೊಂದಿತ್ತು. ಕ್ಲೈಮ್ಯಾಕ್ಸ್ ನೋಡುಗರನ್ನು ಭಾವುಕರನ್ನಾಗಿ ಮಾಡುತ್ತದೆ.

ಇದನ್ನೂ ಓದಿ: ಪುನೀತ್ ರಾಜ್‌ಕುಮಾರ್ ನಟನೆಯ ಈ ಸಿನಿಮಾವನ್ನು ಒಂಟಿಯಾಗಿ ಕುಳಿತು ನೋಡಿ, ಕಥೆಯಲ್ಲಿ ಕಳೆದುಹೋಗ್ತೀರಿ

RAMAYANA: ಬಿಗ್ ಬಜೆಟ್‌ 'ರಾಮಾಯಣ' ಸಿನಿಮಾದ ಅಡ್ವಾನ್ಸ್ ಬುಕಿಂಗ್ ಶುರು, ಜಗತ್ತಿನಾದ್ಯಂತ ಹೇಗಿದೆ ರೆಸ್ಪಾನ್ಸ್?

Shriram Bhat — Tue, 20 Oct 2026 11:31:14 +0530

ನಿತೇಶ್ ತಿವಾರಿ ನಿರ್ದೇಶನ, ರಣಬೀರ್ ಕಪೂರ್, ಯಶ್ ಹಾಗೂ ಸಾಯಿ ಪಲ್ಲವಿ ನಟನೆಯ 'ರಾಮಾಯಣ' ಚಿತ್ರವು 05 ನವೆಂಬರ್ 2026ರಂದು ವಿಶ್ವಾದ್ಯಂತ ಬಿಡುಗಡೆಯಾಗಲಿದೆ. ಚಿತ್ರದ ಮುಂಗಡ ಬುಕಿಂಗ್ ಇಂದಿನಿಂದ ಶುರುವಾಗಿದ್ದು, ಜಗತ್ತಿನಾದ್ಯಂತ ರೆಸ್ಪಾನ್ಸ್ ಹೇಗಿದೆ ನೋಡಿ..!

₹4000 ಕೋಟಿ ‘ರಾಮಾಯಣ’ ಸಿನಿಮಾದ ಅಡ್ವಾನ್ಸ್ ಬುಕಿಂಗ್ ಶುರು!

ಭಾರತೀಯ ಚಿತ್ರರಂಗದ ಬಹುನಿರೀಕ್ಷಿತ ಸಿನಿಮಾಗಳಲ್ಲಿ ಒಂದಾದ ‘ರಾಮಾಯಣ’ ಬಿಡುಗಡೆಯ ದಿನ ಹತ್ತಿರವಾಗುತ್ತಿದ್ದಂತೆ ಅಭಿಮಾನಿಗಳ ಕುತೂಹಲವೂ ಹೆಚ್ಚುತ್ತಿದೆ. ನಿತೇಶ್ ತಿವಾರಿ ನಿರ್ದೇಶನದ ಈ ಭವ್ಯ ಚಿತ್ರದಲ್ಲಿ ರಣಬೀರ್ ಕಪೂರ್, ರಾಕಿಂಗ್ ಸ್ಟಾರ್ ಯಶ್ ಮತ್ತು ಸಾಯಿ ಪಲ್ಲವಿ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇದೀಗ ಚಿತ್ರದ ಮುಂಗಡ ಟಿಕೆಟ್ ಬುಕಿಂಗ್ ಆರಂಭವಾಗಿರುವುದು ಸಿನಿಪ್ರಿಯರ ಗಮನ ಸೆಳೆದಿದೆ.

ನವೆಂಬರ್ 5, 2026ರಂದು ವಿಶ್ವಾದ್ಯಂತ ತೆರೆಕಾಣಲಿರುವ ‘ರಾಮಾಯಣ’ ಸಿನಿಮಾವನ್ನು ದೊಡ್ಡ ಪರದೆಯಲ್ಲಿ ಕಣ್ತುಂಬಿಕೊಳ್ಳಲು ಅಭಿಮಾನಿಗಳು ಕಾತುರರಾಗಿದ್ದಾರೆ. ಐಮ್ಯಾಕ್ಸ್ ಸೇರಿದಂತೆ ವಿವಿಧ ಪ್ರೀಮಿಯಂ ಸ್ವರೂಪಗಳಲ್ಲಿ ಚಿತ್ರ ಬಿಡುಗಡೆಯಾಗಲಿದ್ದು, ಭಾರತೀಯ ಮಹಾಕಾವ್ಯದ ಕಥೆಯನ್ನು ಜಾಗತಿಕ ಪ್ರೇಕ್ಷಕರಿಗೆ ಅದ್ಧೂರಿಯಾಗಿ ಪರಿಚಯಿಸಲು ಚಿತ್ರತಂಡ ಸಿದ್ಧವಾಗಿದೆ.

ಎ.ಆರ್. ರೆಹಮಾನ್ ಜೊತೆ ಹ್ಯಾನ್ಸ್ ಜಿಮ್ಮರ್ ಸಂಗೀತದ ಮೋಡಿ!

ಈ ಸಿನಿಮಾದ ಮತ್ತೊಂದು ಪ್ರಮುಖ ಆಕರ್ಷಣೆ ಎಂದರೆ ಸಂಗೀತ. ಆಸ್ಕರ್ ಪ್ರಶಸ್ತಿ ವಿಜೇತ ಭಾರತೀಯ ಸಂಗೀತ ನಿರ್ದೇಶಕ ಎ.ಆರ್. ರೆಹಮಾನ್ ಮತ್ತು ಹಾಲಿವುಡ್‌ನ ಖ್ಯಾತ ಸಂಗೀತ ಸಂಯೋಜಕ ಹ್ಯಾನ್ಸ್ ಜಿಮ್ಮರ್ ಒಟ್ಟಾಗಿ ‘ರಾಮಾಯಣ’ಕ್ಕೆ ಸಂಗೀತ ನೀಡುತ್ತಿದ್ದಾರೆ. ಈ ಇಬ್ಬರು ದಿಗ್ಗಜರ ಸಂಗಮ ಚಿತ್ರಕ್ಕೆ ಮತ್ತಷ್ಟು ನಿರೀಕ್ಷೆ ಮೂಡಿಸಿದೆ.

ಪ್ರೈಮ್ ಫೋಕಸ್ ಸ್ಟುಡಿಯೋಸ್‌ನ ನಮಿತ್ ಮಲ್ಹೋತ್ರಾ ಮತ್ತು ಯಶ್ ಅವರ ಮಾನ್ಸ್ಟರ್ ಮೈಂಡ್ ಕ್ರಿಯೇಷನ್ಸ್ ಸಹಯೋಗದಲ್ಲಿ ನಿರ್ಮಾಣವಾಗುತ್ತಿರುವ ಈ ಚಿತ್ರ ಎರಡು ಭಾಗಗಳಲ್ಲಿ ಬಿಡುಗಡೆಯಾಗಲಿದೆ. ಮೊದಲ ಭಾಗ ನವೆಂಬರ್ 5ರಂದು ತೆರೆಕಂಡರೆ, ಎರಡನೇ ಭಾಗವು 2027ರ ದೀಪಾವಳಿಗೆ ಬಿಡುಗಡೆಯಾಗುವ ನಿರೀಕ್ಷೆಯಿದೆ. ಹಿಂದಿ, ಕನ್ನಡ, ತಮಿಳು, ತೆಲುಗು ಮತ್ತು ಮಲಯಾಳಂ ಭಾಷೆಗಳಲ್ಲಿ ಚಿತ್ರ ಪ್ರೇಕ್ಷಕರ ಮುಂದೆ ಬರಲಿದೆ.

ಎ.ಆರ್. ರೆಹಮಾನ್ ಹಾಡುಗಳಿಗೆ ಹೆಜ್ಜೆ ಹಾಕಿದ್ದ ಯಶ್!

‘ರಾಮಾಯಣ’ದ ಸಂಗೀತದ ಕುರಿತು ಮಾತನಾಡಿದ ಯಶ್, ಎ.ಆರ್. ರೆಹಮಾನ್ ಅವರ ಹಾಡುಗಳೊಂದಿಗಿನ ತಮ್ಮ ಬಾಲ್ಯದ ನೆನಪುಗಳನ್ನು ಹಂಚಿಕೊಂಡಿದ್ದಾರೆ. ಶಾಲೆ ಮತ್ತು ಕಾಲೇಜು ದಿನಗಳಲ್ಲಿ ರೆಹಮಾನ್ ಅವರ ಅನೇಕ ಹಾಡುಗಳಿಗೆ ತಾವು ನೃತ್ಯ ಮಾಡುತ್ತಿದ್ದುದನ್ನು ಸ್ಮರಿಸಿದ್ದಾರೆ.

ವಿಶೇಷವಾಗಿ ‘ಚಿಕ್ಕುಬುಕ್ಕು ಚಿಕ್ಕುಬುಕ್ಕು ರೈಲು’ ಹಾಡು ತಮ್ಮ ನೆನಪಿನಲ್ಲಿ ಉಳಿದಿದೆ ಎಂದು ಹೇಳಿದ್ದಾರೆ. ಕನ್ನಡ ಚಿತ್ರರಂಗಕ್ಕೂ ರೆಹಮಾನ್ ಅವರ ಕೊಡುಗೆ ಅಪಾರವಾಗಿದ್ದು, ಅವರೊಂದಿಗೆ ಕೆಲಸ ಮಾಡುತ್ತಿರುವುದು ಸಂತೋಷದ ಸಂಗತಿ ಎಂದು ಯಶ್ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಅಂದಹಾಗೆ, ಭರ್ಜರಿ ತಾರಾಗಣ, ಅಂತರರಾಷ್ಟ್ರೀಯ ಮಟ್ಟದ ತಾಂತ್ರಿಕ ತಂಡ ಮತ್ತು ದಿಗ್ಗಜರ ಸಂಗೀತದೊಂದಿಗೆ ಮೂಡಿಬರುತ್ತಿರುವ ‘ರಾಮಾಯಣ’ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಯಾವ ರೀತಿಯ ದಾಖಲೆ ಬರೆಯಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

ಬಹಳ ದಿನಗಳ ಬಳಿಕ ಯೂಟ್ಯೂಬ್‌ಗೆ ನಟಿ ಕೃಷಿ ತಾಪಂಡ ಎಂಟ್ರಿ.. ಇಶಾ ಫೌಂಡೇಶನ್‌ನಿಂದ ಬಂತು 'ಗೆಟ್ ರೆಡಿ ವಿತ್ ಮಿ' Vlog

Ashwini HR — Tue, 20 Oct 2026 18:20:31 +0530

ಕನ್ನಡ ಚಿತ್ರರಂಗದ ಜನಪ್ರಿಯ ನಟಿ ಹಾಗೂ ಬಿಗ್ ಬಾಸ್ ಖ್ಯಾತಿಯ ಕೃಷಿ ತಾಪಂಡ ಬಹಳ ದಿನಗಳ ಗ್ಯಾಪ್ ನಂತರ ಮತ್ತೆ ಯೂಟ್ಯೂಬ್ ಜಗತ್ತಿಗೆ ಮರಳಿದ್ದಾರೆ. ಸದ್ಯ ತಮ್ಮ ಆಪ್ತರಾದ ಅನುಪಮಾ ಗೌಡ, ನೇಹಾ ಗೌಡ ಜೊತೆ ಇಶಾ ಫೌಂಡೇಶನ್‌ಗೆ ತೆರಳಿರುವ ನಟಿ, ಅಲ್ಲಿಂದಲೇ ತಮ್ಮ ಅಭಿಮಾನಿಗಳಿಗಾಗಿ ವಿಶೇಷವಾದ 'ಗೆಟ್ ರೆಡಿ ವಿತ್ ಮಿ' (GRWM) ವ್ಲಾಗ್ ಹಂಚಿಕೊಳ್ಳುವ ಮೂಲಕ ಭರ್ಜರಿ ಕಮ್‌ಬ್ಯಾಕ್ ಮಾಡಿದ್ದಾರೆ.

ಇಶಾ ಫೌಂಡೇಶನ್‌ನಲ್ಲಿ ಗೋಶಾಲೆಗೆ ಭೇಟಿ

ವ್ಲಾಗ್‌ನಲ್ಲಿ ಮಾತನಾಡಿರುವ ಕೃಷಿ ತಾಪಂಡ, ಇದು ಇಶಾ ಫೌಂಡೇಶನ್‌ನಲ್ಲಿ ತಮ್ಮ 2ನೇ ದಿನವಾಗಿದ್ದು, ಬೆಳಗ್ಗಿನಿಂದ ರಿಲ್ಯಾಕ್ಸ್ ಆಗಿ ಸಮಯ ಕಳೆದಿದ್ದೇವೆ ಎಂದು ತಿಳಿಸಿದ್ದಾರೆ. ಮಧ್ಯಾಹ್ನ 1:30 ರ ಸುಮಾರಿಗೆ ಗೋಶಾಲೆಗೆ ತೆರಳಲು ಸಿದ್ಧರಾದ ನಟಿ, ಪ್ರಯಾಣದ ನಡುವೆ ಕೇವಲ 5 ರಿಂದ 10 ನಿಮಿಷಗಳಲ್ಲಿ ಯಾವುದೇ ಆಡಂಬರವಿಲ್ಲದೆ ನ್ಯಾಚುರಲ್ ಆಗಿ ಹೇಗೆ ರೆಡಿಯಾಗಬಹುದು ಎಂಬುದನ್ನು ಅಭಿಮಾನಿಗಳಿಗೆ ತೋರಿಸಿಕೊಟ್ಟಿದ್ದಾರೆ.

ಮೈಸೂರಿನ ಬುಟೀಕ್ ಕುರ್ತಾ & ಫ್ರೆಂಡ್ಸ್ ಜೊತೆ ಒಡನಾಟ

ವ್ಲಾಗ್‌ನಲ್ಲಿ ಕೃಷಿ ಧರಿಸಿದ್ದ ತಿಳಿ ಹಸಿರು ಬಣ್ಣದ ಚಿಕನ್‌ಕರಿ ಕುರ್ತಾ ಸೆಟ್ ನೆಟ್ಟಿಗರ ಗಮನ ಸೆಳೆದಿದೆ. "ಇದನ್ನು ನಾನು ಮೈಸೂರಿನ 'ಕಹಾಳೆ' ಎಂಬ ಲೋಕಲ್ ಬುಟೀಕ್‌ನಲ್ಲಿ ಖರೀದಿಸಿದ್ದೆ. ನನ್ನ ಸೈಜ್ ಸಿಗದ ಕಾರಣ ಲಾರ್ಜ್ ಸೈಜ್ ತೆಗೆದುಕೊಂಡು ಟೈಲರ್ ಬಳಿ ಆಲ್ಟರ್ ಮಾಡಿಸಿಕೊಂಡು ಹಾಕಿಕೊಂಡಿದ್ದೇನೆ" ಎಂದು ತಿಳಿಸಿದ್ದಾರೆ. ತರಾತುರಿಯಲ್ಲಿ ಹೊರಟಿದ್ದರಿಂದ ಒಡವೆ ತರಲು ಮರೆತಿದ್ದ ಕೃಷಿ, ತಮ್ಮ ಜೊತೆಯಲ್ಲಿದ್ದ ಸ್ನೇಹಿತೆ ಅನು ಅವರ ಸಿಲ್ವರ್ ಆಕ್ಸಿಡೈಸ್ಡ್ ಕಿವಿಯೋಲೆಗಳನ್ನು ಧರಿಸಿ 'ಶೇರಿಂಗ್ ಈಸ್ ಕೇರಿಂಗ್' ಎಂದು ತಮಾಷೆ ಮಾಡಿದ್ದಾರೆ.

ಅಭಿಮಾನಿಗಳಿಗೆ ಕೃಷಿ ನೀಡಿದ ಬ್ಯೂಟಿ ಟಿಪ್ಸ್

ಯಾವುದೇ ಹೀಟಿಂಗ್ ಮಷಿನ್ ಬಳಸದೆ ಕೇವಲ ಹೇರ್ ಮೂಸ್ ಮೂಲಕ ಕೂದಲಿಗೆ 'ನ್ಯಾಚುರಲ್ ವೇವಿ ಲುಕ್' ನೀಡಿದ ಕೃಷಿ, ಬಿಸಿಲಿಗೆ ನೈಸರ್ಗಿಕ ಗ್ಲೋ ನೀಡುವ ಸನ್‌ಸ್ಕ್ರೀನ್ ಹಚ್ಚಿಕೊಂಡಿದ್ದಾರೆ. ಕಣ್ಣುಗಳು ದೊಡ್ಡದಾಗಿ ಕಾಣಲು ಮಸ್ಕರಾವನ್ನು ಹೊರಭಾಗದ ರೆಪ್ಪೆಗೂದಲುಗಳಿಗೆ ಹೇಗೆ ಲಿಫ್ಟ್ ಮಾಡಿ ಹಚ್ಚಬೇಕೆಂಬ 'ಪ್ರೋ ಟಿಪ್' ಅನ್ನು ಸಹ ಹಂಚಿಕೊಂಡಿದ್ದಾರೆ.

ಪುಟ್ಟ ಶಾರದಾ ಜೊತೆ ಮುದ್ದಾದ ಕ್ಷಣಗಳು

ವಿಡಿಯೋದಲ್ಲಿ ನೇಹಾ ಗೌಡ ಪುಟ್ಟ ಮಗು ಶಾರದಾ ಜೊತೆಗಿನ ಕೃಷಿ ಅವರ ಮಾತುಕತೆ ನೋಡುಗರ ಮನಗೆದ್ದಿದೆ. ಮಗುವಿನ ಡ್ರೆಸ್ ಬಗ್ಗೆ ಪ್ರಶಂಸಿಸುತ್ತಾ, "ಮಗುವಿಗೆ ಯಾರ ದೃಷ್ಟಿಯೂ ಬೀಳಬಾರದು" ಎಂದು ತಮ್ಮ ಆರ್ಗಾನಿಕ್ ಕಾಡಿಗೆಯಿಂದ ದೃಷ್ಟಿ ಬೊಟ್ಟು ಇಟ್ಟ ಕ್ಷಣ ವ್ಲಾಗ್‌ನ ಹೈಲೈಟ್ ಆಗಿದೆ.

ವ್ಲಾಗ್‌ನ ಕೊನೆಯಲ್ಲಿ ಅಭಿಮಾನಿಗಳಿಗೆ ಧನ್ಯವಾದ ತಿಳಿಸಿದ ನಟಿ, ಇನ್ಮುಂದೆ ಯೂಟ್ಯೂಬ್‌ನಲ್ಲಿ ಆಕ್ಟಿವ್ ಆಗಿದ್ದು, ನಿರಂತರವಾಗಿ ಹೊಸ ಹೊಸ ವಿಡಿಯೋಗಳನ್ನು ಅಪ್‌ಲೋಡ್ ಮಾಡುವುದಾಗಿ ಪ್ರಾಮಿಸ್ ಮಾಡಿದ್ದಾರೆ. ಸದ್ಯ ಈ ಮುದ್ದಾದ ವ್ಲಾಗ್ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ.

2016ರಲ್ಲಿ ತೆರೆಕಂಡ ಸೂಪರ್ ಹಿಟ್ ಚಿತ್ರ 'ಅಕಿರಾ' (Akira) ಮೂಲಕ ಕನ್ನಡ ಚಿತ್ರರಂಗಕ್ಕೆ ನಾಯಕಿಯಾಗಿ ಭರ್ಜರಿ ಎಂಟ್ರಿ ಕೊಟ್ಟ ಕೃಷಿ ಮೊದಲ ಚಿತ್ರದಲ್ಲೇ ತಮ್ಮ ಮುಗ್ಧ ಹಾಗೂ ಲವಲವಿಕೆಯ ಅಭಿನಯಕ್ಕಾಗಿ 'ಸೈಮಾ' (SIIMA) ಅತ್ಯುತ್ತಮ ನಟಿ ಪ್ರಶಸ್ತಿಗೆ ನಾಮನಿರ್ದೇಶನಗೊಂಡಿದ್ದರು. ಕಲರ್ಸ್ ಕನ್ನಡದ ಜನಪ್ರಿಯ ರಿಯಾಲಿಟಿ ಶೋ 'ಬಿಗ್ ಬಾಸ್ ಕನ್ನಡ ಸೀಸನ್ 5'ರಲ್ಲಿ ಸ್ಪರ್ಧಿಯಾಗಿಯೂ' ಭಾಗವಹಿಸಿದ್ದರು.

ಈಗ ಸಿನಿಮಾಗಳ ಜೊತೆಗೆ ತಮ್ಮದೇ ಯೂಟ್ಯೂಬ್ ಚಾನೆಲ್ ನಡೆಸುತ್ತಿರುವ ಕೃಷಿ, ಟ್ರಾವೆಲ್, ಫ್ಯಾಷನ್, ಬ್ಯೂಟಿ ಮತ್ತು ಲೈಫ್‌ಸ್ಟೈಲ್ ವ್ಲಾಗ್‌ಗಳ ಮೂಲಕ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ಆಕ್ಟಿವ್ ಆಗಿದ್ದಾರೆ.

ಕಿಚ್ಚ ಸುದೀಪ್ ಮದುವೆ ವಾರ್ಷಿಕೋತ್ಸವದಲ್ಲಿ 3 ಕ್ಷೇತ್ರದ ದಿಗ್ಗಜರ ಸಮಾಗಮ, ವೆಂಕಿ ಹಂಚಿದ ಬೆಂಕಿ ಫೋಟೋ

Chethan Kumar — Sun, 18 Oct 2026 18:07:40 +0530

ಕಿಚ್ಚ ಸುದೀಪ್ ದಂಪತಿಗೆ 25ನೇ ವರ್ಷದ ವೆಡ್ಡಿಂಗ್ ಆ್ಯನಿವರ್ಸರಿ. ಈ ಸಮಾರಂಭದಲ್ಲಿ ಮೂರು ಕ್ಷೇತ್ರದ ದಿಗ್ಗಜರು ಒಂದೇ ಫ್ರೇಮ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಸಂಭ್ರಮದ ಫೋಟೋವನ್ನು ವೆಂಕಟೇಶ್ ಪ್ರಸಾದ್ ಹಂಚಿಕೊಂಡಿದ್ದಾರೆ.

ಕಿಚ್ಚ ಸುದೀಪ್ ಸಿನಿ ಸ್ಯಾಂಡಲ್‌ವುಡ್, ಹಾಲಿವುಡ್ ಸೇರಿದಂತೆ ಪ್ರಮುಖ ಸಿನಿ ರಂಗದಲ್ಲಿ ಗುರುತಿಸಿಕೊಂಡಿದ್ದಾರೆ. ದೇಶದ ಬಹುತೇಕ ಸಿನಿಮಾ ಇಂಡಸ್ಟ್ರೀಯ ದಿಗ್ಗಜರು, ಪ್ರಮುಖರು ಕಿಚ್ಚ ಸುದೀಪ್ ಜೊತೆ ಆತ್ಮೀಯರಾಗಿದ್ದಾರೆ. ವಿಶೇಷ ಅಂದರೆ ಕಿಚ್ಚ ಸುದೀಪ್ ಆತ್ಮೀಯತೆ ಕೇವಲ ಸಿನಿಮಾಗೆ ಮಾತ್ರ ಸೀಮಿತವಾಗಿಲ್ಲ. ಕ್ರಿಕೆಟ್, ರಾಜಕೀಯ ಸೇರಿದಂತೆ ಹಲವು ಕ್ಷೇತ್ರದ ಗಣ್ಯರು ಕಿಚ್ಚ ಸುದೀಪ್ ಜೊತೆ ಆತ್ಮೀಯರಾಗಿದ್ದಾರೆ. ಇದೀಗ ಕಿಚ್ಚ ಸುದೀಪ್ ಹಾಗೂ ಪ್ರಿಯಾ ದಂಪತಿ 25ನೇ ಮದುವೆ ವಾರ್ಷಿಕೋತ್ಸವ ಸಂಭ್ರಮದಲ್ಲಿದ್ದಾರೆ. ಕಿಚ್ಚ ಸುದೀಪ್ ವೈಯುಕ್ತಿಕ ಬದುಕಿನ ಪ್ರಮುಖ ಘಟ್ಟದಲ್ಲಿ ಕನ್ನಡದ ಮೂರು ಕ್ಷೇತ್ರದ ದಿಗ್ಗಜರು ಒಂದೇ ಕಡೆ ಕಾಣಿಸಿಕೊಂಡಿದ್ದಾರೆ.

ಕಿಚ್ಚ ಸುದೀಪ್ ಹಾಗೂ ಪ್ರಿಯಾ ದಂಪತಿ 25ನೇ ಮದುವೆ ವಾರ್ಷಿಕೋತ್ಸವದಲ್ಲಿ ಕನ್ನಡದ ಮೂರು ಕ್ಷೇತ್ರದ ದಿಗ್ಗಜರು ಒಂದೇ ಫ್ರೇಮ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಹೌದು ಒಂದೆಡೆ ಸಿನಿಮಾ ದಿಗ್ಗಜ ಕಿಚ್ಚ ಸುದೀಪ್, ಮತ್ತೊಂದೆಡೆ ಕ್ರಿಕೆಟ್ ದಿಗ್ಗಜ ವೆಂಕಟೇಶ್ ಪ್ರಸಾದ್, ಇನ್ನೊಂದು ಮ್ಯೂಸಿಕ್ ದಿಗ್ಗಜ ವಿಜಯ್ ಪ್ರಕಾಶ್.

ಕಿಚ್ಚ ಸುದೀಪ್ ಹಾಗೂ ಪ್ರಿಯಾ 25ನೇ ವರ್ಷದ ಮದುವೆ ವಾರ್ಷಿಕೋತ್ಸವದಲ್ಲಿ ಪಾಲ್ಗೊಂಡ ವೆಂಕಟೇಶ್ ಪ್ರಸಾದ್ ಹಾಗೂ ಕುಟುಂಬ ನಟನಿಗೆ ಶುಭ ಕೋರಿದ್ದಾರೆ. ಕಿಚ್ಚ ಸುದೀಪ್ ಪಯಣ ನೋಡುವುದು ನನಗೆ ಹೆಮ್ಮೆಯಾಗಿದೆ. ಒಬ್ಬ ಕಲಾವಿದನಾಗಿ, ಆಪ್ತ ಗೆಳೆಯನಾಗಿ ಬಾಂಧವ್ಯ ಮತ್ತಷ್ಟು ಗಟ್ಟಿಯಾಗಿದೆ. ಕಿಚ್ಚ ಸುದೀಪ್ ಹಾಗೂ ಪ್ರಿಯಾಗೆ 25ನೇ ಮದುವೆ ವಾರ್ಷಿಕೋತ್ಸವ ಶುಭಾಶಯಗಳು ಎಂದು ವೆಂಕಟೇಶ್ ಪ್ರಸಾದ್ ಶುಭ ಕೋರಿದ್ದಾರೆ.

ಕಿಚ್ಚ ಸುದೀಪ್ 25ನೇ ಮದುವೆ ವಾರ್ಷಿಕೋತ್ಸವದಲ್ಲಿ ಹಲವು ಗಣ್ಯರು ಪಾಲ್ಗೊಂಡಿದ್ದರು. ಮಾಜಿ ಸಂಸದೆ ಸುಮಲತಾ ಅಂಬರೀಷ್ ಕೂಡ ಪಾಲ್ಗೊಂಡಿದ್ದಾರೆ. ಇದೇ ವೇಳೆ ಸೋಶಿಯಲ್ ಮೀಡಿಯಾಗಳಲ್ಲಿ ಕಿಚ್ಚ ಸುದೀಪ್ ದಂಪತಿಗೆ ಹಲವು ಪ್ರಮುಖರು, ಸಿನಿ ತಾರೆಯರು ಶುಭಕೋರಿದ್ದಾರೆ.

ಸಾಂಪ್ರದಾಯಿಕ ಉಡುಗೆಯಲ್ಲಿ ಕಿಚ್ಚ ಸುದೀಪ್ ಹಾಗೂ ಪ್ರಿಯಾ ಎಲ್ಲರ ಗಮನ ಸೆಳೆದಿದ್ದಾರೆ. ಮದುವೆ ವಾರ್ಷಿಕೋತ್ಸವದ ಪೂಜೆ ಸೇರಿದಂತೆ ವಿಶೇಷ ಕಾರ್ಯಕ್ರಮದ ಕೆಲ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ. ಅಭಿಮಾನಿಗಳು ಕಿಚ್ಚ ಸುದೀಪ್ ದಂಪತಿಗೆ ಶುಭಕೋರಿದ್ದಾರೆ. ಫೋಟೋಗಳು ಇದೀಗ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಸದ್ದು ಮಾಡುತ್ತಿದೆ.

ಕಿಚ್ಚ ಸುದೀಪ್-ಪ್ರೇಮ್ ಹೊಸ ಚಿತ್ರದ ಟೈಟಲ್ ಟೀಸರ್ ಮುಂದೂಡಿಕೆ: ಬರ್ತ್‌ಡೇ ಆಚರಣೆಗೂ 'ಪ್ರೇಮ್' ಬ್ರೇಕ್; ಕಾರಣವೇನು?

Sathish Kumar KH — Mon, 19 Oct 2026 20:05:53 +0530

ಸ್ಯಾಂಡಲ್‌ವುಡ್‌ನ ‘ಶೋಮ್ಯಾನ್’ ಎಂದೇ ಖ್ಯಾತರಾಗಿರುವ ನಿರ್ದೇಶಕ ಪ್ರೇಮ್ (Director Prem) ಹಾಗೂ ‘ಅಭಿನಯ ಚಕ್ರವರ್ತಿ’ ಕಿಚ್ಚ ಸುದೀಪ್ (Kichcha Sudeep) ಕಾಂಬಿನೇಷನ್‌ನಲ್ಲಿ ಹೊಸ ಸಿನಿಮಾವೊಂದು ಸೆಟ್ಟೇರುತ್ತಿರುವುದು ಎಲ್ಲರಿಗೂ ತಿಳಿದಿರುವ ವಿಚಾರ. ‘ದಿ ವಿಲನ್’ ಚಿತ್ರದ ಬಳಿಕ ಈ ಜೋಡಿ ಮತ್ತೊಮ್ಮೆ ಕೈಜೋಡಿಸುತ್ತಿರುವುದು ಅಭಿಮಾನಿಗಳಲ್ಲಿ ಭಾರೀ ಕುತೂಹಲ ಮೂಡಿಸಿದೆ. ಆದರೆ, ಈ ಬಹುನಿರೀಕ್ಷಿತ ಸಿನಿಮಾದ ಅಪ್‌ಡೇಟ್‌ಗಾಗಿ ಕಾಯುತ್ತಿದ್ದ ಫ್ಯಾನ್ಸ್‌ಗೆ ಚಿತ್ರತಂಡ ಸಣ್ಣ ನಿರಾಸೆ ಮೂಡಿಸಿದೆ.

ದಸರಾ ಹಬ್ಬದ ನಂತರವೇ ಕಿಚ್ಚ-ಪ್ರೇಮ್ ಧಮಾಕಾ!

ಅಕ್ಟೋಬರ್ 20 ರಂದು (ನಾಳೆ) ರಿಲೀಸ್ ಆಗಬೇಕಿದ್ದ ಸುದೀಪ್ ಮತ್ತು ಪ್ರೇಮ್ ಕಾಂಬಿನೇಷನ್‌ನ ಹೊಸ ಸಿನಿಮಾದ ಫಸ್ಟ್ ಲುಕ್ ಹಾಗೂ ಟೈಟಲ್ ಟೀಸರ್ ಅನೌನ್ಸ್‌ಮೆಂಟ್ ಕಾರಣಾಂತರಗಳಿಂದ ಮುಂದೂಡಲ್ಪಟ್ಟಿದೆ. ಈ ಕುರಿತು ನಿರ್ದೇಶಕ ಪ್ರೇಮ್ ತಮ್ಮ ಅಧಿಕೃತ ಸೋಶಿಯಲ್ ಮೀಡಿಯಾ ಖಾತೆಯಲ್ಲಿ ಸುದೀಪ್ ಅವರೊಂದಿಗಿನ ಫೋಟೋ ಹಂಚಿಕೊಂಡು ಅಧಿಕೃತ ಪ್ರಕಟಣೆ ಹೊರಡಿಸಿದ್ದಾರೆ.

'ಎಲ್ಲರಿಗೂ ನಮಸ್ಕಾರ, ಅಕ್ಟೋಬರ್ 20 ರಂದು ನಡೆಯಬೇಕಿದ್ದ PREM'S & KICHCHA SUDEEP ಫಸ್ಟ್ ಲುಕ್ ಮತ್ತು ಟೈಟಲ್ ಟೀಸರ್ ಅನೌನ್ಸ್‌ಮೆಂಟ್ ಅನ್ನು ಕಾರಣಾಂತರಗಳಿಂದ ದಸರಾ ಹಬ್ಬದ ನಂತರ ನಿಮ್ಮೆಲ್ಲರ ಮುಂದೆ ತರುತ್ತೇವೆ' ಎಂದು ಪೋಸ್ಟರ್ ಮೂಲಕ ತಿಳಿಸಿದ್ದಾರೆ. ಪೋಸ್ಟರ್‌ನಲ್ಲಿ 'A NEW WORLD, A NEW CHAPTER, A NEW BEGINNING' (ಹೊಸ ಪ್ರಪಂಚ, ಹೊಸ ಅಧ್ಯಾಯ, ಹೊಸ ಆರಂಭ) ಎಂಬ ಅಡಿಬರಹ ನೀಡಲಾಗಿದ್ದು, ಇದು ಸುದೀಪ್ ಅಭಿಮಾನಿಗಳಲ್ಲಿ ಚಿತ್ರದ ಕಥಾವಸ್ತುವಿನ ಬಗ್ಗೆ ಬೆಟ್ಟದಷ್ಟು ನಿರೀಕ್ಷೆ ಹುಟ್ಟುಹಾಕಿದೆ.

ಹುಟ್ಟುಹಬ್ಬದ ಆಚರಣೆಗೂ ಪ್ರೇಮ್ ಬ್ರೇಕ್: ಮನೆಯಲ್ಲಿ ಸಿಗಲ್ಲ 'ಜೋಗಿ'!

ಇದೇ ವೇಳೆ ಅಕ್ಟೋಬರ್ 22 ರಂದು ನಿರ್ದೇಶಕ ಪ್ರೇಮ್ ಅವರ ಜನ್ಮದಿನವಿದ್ದು, ಈ ಬಾರಿ ಬರ್ತ್‌ಡೇ ಆಚರಣೆಯಿಂದ ದೂರ ಉಳಿಯುವುದಾಗಿ ಅಭಿಮಾನಿಗಳಲ್ಲಿ ಮನವಿ ಮಾಡಿದ್ದಾರೆ. 'ಅಲ್ಲದೆ, ನನ್ನ ಹುಟ್ಟುಹಬ್ಬದ ದಿನವಾದ ಅಕ್ಟೋಬರ್ 22 ರಂದು ನಾನು ಮನೆ ಮತ್ತು ಆಫೀಸ್‌ನಲ್ಲಿ ನಿಮ್ಮನ್ನು ಭೇಟಿಯಾಗಲು ಸಾಧ್ಯವಾಗುವುದಿಲ್ಲ. ನೀವಿದ್ದಲ್ಲೇ ನನಗೆ ಹಾಗೂ ನಮ್ಮ ಮುಂದಿನ ಚಿತ್ರಕ್ಕೆ ಆಶೀರ್ವದಿಸಿ. ನಿಮ್ಮೆಲ್ಲರ ಪ್ರೀತಿ, ವಿಶ್ವಾಸ ಮತ್ತು ಬೆಂಬಲಕ್ಕೆ ಹೃದಯಪೂರ್ವಕ ಧನ್ಯವಾದಗಳು' ಎಂದು ತಿಳಿಸಿದ್ದಾರೆ.

ಸದ್ಯ ಕಿಚ್ಚ ಸುದೀಪ್ ಅವರು 'ಬಿಲ್ಲಾ ರಂಗ ಬಾಶಾ (ಬಿಆರ್‌ಬಿ) ಹಾಗೂ ಕೃಷ್ಣದೇವರಾಯ' ಸಿನಿಮಾದಲ್ಲಿ ಬ್ಯೂಸಿಯಾಗಿದ್ದು, ಈ ಸಿನಿಮಾಗಳ ಬಿಡುಗಡೆಗೆಗೆ ಅಭಿಮಾನಿಗಳು ಎದುರು ನೋಡುತ್ತಿದ್ದಾರೆ. ಇದರ ಬೆನ್ನಲ್ಲೇ ಪ್ರೇಮ್ ನಿರ್ದೇಶನದ ಸಿನಿಮಾದ ಶೂಟಿಂಗ್ ಆರಂಭವಾಗುವ ಸಾಧ್ಯತೆಯಿದೆ. ದಸರಾ ಹಬ್ಬ ಮುಗಿದ ಕೂಡಲೇ ಈ ಚಿತ್ರದ ಟೈಟಲ್ ಹಾಗೂ ಫಸ್ಟ್ ಲುಕ್ ಅದ್ದೂರಿಯಾಗಿ ಅನಾವರಣಗೊಳ್ಳಲಿದೆ.

ಕಳೆದ ತಿಂಗಳು ತೆರೆಗೆ ಬಂದ ಈ ಬ್ಲಾಕ್‌ಬಸ್ಟರ್ ಸಿನಿಮಾ ನಟಿ ಸುಧಾರಾಣಿಗೂ ಇಷ್ಟವಾಯ್ತು.. ಯಾವ್ದು ಗೆಸ್ ಮಾಡಿ?

Ashwini HR — Tue, 20 Oct 2026 12:24:36 +0530

ಸಿನಿಮಾರಂಗದಲ್ಲಿ ದಿನಕ್ಕೊಂದು ಹೊಸ ಸಿನಿಮಾ ತೆರೆಕಂಡರೂ, ಪ್ರೇಕ್ಷಕರ ಮನಸ್ಸಿನಲ್ಲಿ ದೀರ್ಘಕಾಲ ನೆನಪುಳಿಯುವುದು ಭಾವನಾತ್ಮಕ ಕಥಾಹಂದರವಿರುವ ಚಿತ್ರಗಳು ಮಾತ್ರ. ಇಂದಿನ ಕಮರ್ಷಿಯಲ್ ಯುಗದಲ್ಲಿ ಕೇವಲ ಅಬ್ಬರದ ಆಕ್ಷನ್ ಮತ್ತು ಕೃತಕ ಬಿಲ್ಡಪ್‌ಗಳಿಗೇ ಹೆಚ್ಚು ಒತ್ತು ನೀಡಲಾಗುತ್ತಿದೆ ಎಂಬ ಮಾತಿದೆ. ಇಂತಹ ಸಂದರ್ಭದಲ್ಲಿ, ಇತ್ತೀಚೆಗೆ ನಡೆದ ಸಂದರ್ಶನವೊಂದರಲ್ಲಿ ಸುಧಾರಾಣಿ ತಮಗೆ ಇಷ್ಟವಾದ ಇತ್ತೀಚಿನ ಸಿನಿಮಾಗಳ ಬಗ್ಗೆ ಮುಕ್ತವಾಗಿ ಮಾತನಾಡಿ, ಚಿತ್ರಮಂದಿರ ಹಾಗೂ ಒಟಿಟಿಯಲ್ಲಿ (OTT) ತಮ್ಮ ಮನಗೆದ್ದ ಅತ್ಯುತ್ತಮ ಚಿತ್ರಗಳನ್ನು ಪರಿಚಯಿಸಿದ್ದಾರೆ.

ಪ್ರಶಂಸೆ ವ್ಯಕ್ತಪಡಿಸಿದ ಸುಧಾರಾಣಿ

ಚಿತ್ರಮಂದಿರಗಳಲ್ಲಿ ಪ್ರಸ್ತುತ ಪ್ರದರ್ಶನ ಕಾಣುತ್ತಿರುವ 'ಪ್ರೇಮದ ಊರಲಿ' ಚಿತ್ರದ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ ಅವರು, ಚಿತ್ರರಂಗದಲ್ಲಿ ಒಂದು ಹೊಸ ಬಗೆಯ ಬದಲಾವಣೆ ತರಲು ಇದೊಂದು ಅತ್ಯುತ್ತಮ ಮತ್ತು ಪ್ರಾಮಾಣಿಕ ಪ್ರಯತ್ನವಾಗಿದೆ. ಇಂದಿನ ಟ್ರೆಂಡ್‌ಗೆ ತಕ್ಕಂತೆ ಹೊಸತನದ ಕಥೆಯನ್ನು ಪ್ರೇಕ್ಷಕರ ಮುಂದೆ ಇಟ್ಟಿರುವ ಚಿತ್ರತಂಡದ ಶ್ರಮ ಮೆಚ್ಚುವಂತದ್ದು. ಹೊಸ ಆಲೋಚನೆಗಳೊಂದಿಗೆ ಸಿನಿಮಾ ತುಂಬಾ ಅಚ್ಚುಕಟ್ಟಾಗಿ ಮೂಡಿಬಂದಿದ್ದು, ಪ್ರೇಕ್ಷಕರನ್ನು ಆಕರ್ಷಿಸುತ್ತಿದೆ ಎಂದು ಚಿತ್ರದ ಹೊಸತನವನ್ನು ಮುಕ್ತಕಂಠದಿಂದ ಶ್ಲಾಘಿಸಿದರು.

'ವಿಶ್ವನಾಥ್ ಅಂಡ್ ಸನ್ಸ್'

ಇನ್ನು ಒಟಿಟಿ (OTT) ಪ್ಲಾಟ್‌ಫಾರ್ಮ್‌ನಲ್ಲಿ ಇತ್ತೀಚೆಗೆ ನೋಡಿ ತಮ್ಮ ಕಣ್ಣಂಚಲಿ ನೀರು ತರಿಸಿದ ಚಿತ್ರ 'ವಿಶ್ವನಾಥ್ ಅಂಡ್ ಸನ್ಸ್' ಎಂದು ಅವರು ತಿಳಿಸಿದರು. ಈ ಚಿತ್ರ ತಮಗೆ ಅಷ್ಟೊಂದು ಇಷ್ಟವಾಗಲು ಪ್ರಮುಖ ಕಾರಣ ಅದರಲ್ಲಿರುವ ಕುಟುಂಬದ ಬಾಂಧವ್ಯ. ಚಿತ್ರದಲ್ಲಿ ತಾಯಿ ಮತ್ತು ಮಗನ ನಡುವಿನ ಎಮೋಷನಲ್ ಬಾಂಡಿಂಗ್ ಅತ್ಯಂತ ನೈಜವಾಗಿ ಮೂಡಿಬಂದಿದೆ. ಎಲ್ಲಕ್ಕಿಂತ ಮುಖ್ಯವಾಗಿ, ಕಮರ್ಷಿಯಲ್ ಸಿನಿಮಾಗಳಲ್ಲಿ ಹೀರೋಯಿಸಂ ಅನ್ನು ಮಿತಿಮೀರಿ (Overboard) ತೋರಿಸುವುದು ಸಾಮಾನ್ಯ. ಆದರೆ ಈ ಚಿತ್ರದಲ್ಲಿ ನಾಯಕನ ಹೀರೋಯಿಸಂ ಅನ್ನು ಸುಂದರ ಭಾವನೆಗಳೊಂದಿಗೆ ಬೆರೆಸಿ ಅತ್ಯಂತ ತೂಕವಾಗಿ ತೋರಿಸಲಾಗಿದೆ. ಚಿತ್ರದಲ್ಲಿ ಬರುವ ಒಂದು ಟಿವಿ ಇಂಟರ್ವ್ಯೂ ದೃಶ್ಯ ಹಾಗೂ ಅಪ್ಪ-ಮಗನ ನಡುವಿನ ಗೌರವಯುತ ಸಂಬಂಧ ಪ್ರತಿಯೊಬ್ಬರ ಮನಸ್ಸನ್ನು ತಟ್ಟುತ್ತದೆ ಎಂದರು.

ನಟಿಯ ಸಿನಿಮಾ ವಿಶ್ಲೇಷಣೆ

ಯಾವುದೇ ಒಂದು ಸಂಬಂಧದಲ್ಲಾದರೂ ಪರಸ್ಪರ ಮೂಲಭೂತ ಗೌರವವನ್ನು ಕಾಪಾಡಿಕೊಳ್ಳುವುದು ಎಷ್ಟು ಮುಖ್ಯ ಎಂಬುದನ್ನು ಈ ಸಿನಿಮಾ ಸರಳವಾಗಿ ಹೇಳಿಕೊಟ್ಟಿದೆ. ಕೇವಲ ಮನರಂಜನೆಯಷ್ಟೇ ಅಲ್ಲದೆ, ಪ್ರತಿಯೊಬ್ಬರ ಕುಟುಂಬಕ್ಕೂ ಕನೆಕ್ಟ್ ಆಗುವ ಭಾವನೆಗಳಿಗೆ ಇಲ್ಲಿ ನ್ಯಾಯ ಒದಗಿಸಲಾಗಿದೆ ಎಂದು ಅವರು ಮೆಚ್ಚುಗೆ ವ್ಯಕ್ತಪಡಿಸಿದರು. ನಟಿಯ ಈ ಸಿನಿಮಾ ವಿಶ್ಲೇಷಣೆ ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಸಿನಿಪ್ರಿಯರ ಗಮನ ಸೆಳೆದಿದೆ.

ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಕಮಾಯಿ ಮಾಡುತ್ತಿರುವ 'ಪ್ರೇಮದ ಊರಲಿ'

ಶ್ರೀ ರಾಮ್ ಮತ್ತು ರಂಗಾಯಣ ರಘು ಮುಖ್ಯಭೂಮಿಕೆಯಲ್ಲಿ ನಟಿಸಿರುವ, ಮನೋಜ್ ಕುಮಾರ್ ನಿರ್ದೇಶನದ ಕನ್ನಡ ಕೌಟುಂಬಿಕ ಚಿತ್ರ 'ಪ್ರೇಮದ ಊರಲಿ' ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಕಮಾಯಿ ಮಾಡುತ್ತಿದೆ. ಗ್ರಾಮೀಣ ಸೊಗಡಿನ ತಂದೆ-ಮಗನ ಬಾಂಧವ್ಯದ ಈ ಚಿತ್ರವು ನಾಲ್ಕನೇ ವಾರಕ್ಕೆ ಕಾಲಿಟ್ಟಿದ್ದು, 22 ದಿನಗಳಲ್ಲಿ ಕರ್ನಾಟಕದಲ್ಲಿ ಬರೋಬ್ಬರಿ ₹90.40 ಕೋಟಿ ಒಟ್ಟು ಕಲೆಕ್ಷನ್ ದಾಖಲಿಸಿದೆ. 22ನೇ ದಿನ ₹4.31 ಕೋಟಿ ಗಳಿಸಿರುವ ಈ ಸಿನಿಮಾ, ₹100 ಕೋಟಿ ಮೈಲಿಗಲ್ಲು ತಲುಪಲು ಇನ್ನು ಕೇವಲ ₹9.60 ಕೋಟಿ ಬಾಕಿಯಿದೆ. ತಪಸ್ವಿನಿ ಪೂಣಚ್ಚ, ರಮಿಕಾ ಶಿವು ನಾಯಕಿಯಾಗಿರುವ ಈ ಚಿತ್ರವನ್ನು ವನಿಲಾ ಎಂಟರ್ಟೈನ್ಮೆಂಟ್ಸ್ ಬ್ಯಾನರ್ ಅಡಿಯಲ್ಲಿ ಮಮತಾ ದೇವೇಂದ್ರ ನಿರ್ಮಿಸಿದ್ದು, ಸುನಾದ್ ಗೌತಮ್ ಸಂಗೀತ ನೀಡಿದ್ದಾರೆ. ಪ್ರೇಕ್ಷಕರ ಪ್ರೀತಿಯೊಂದಿಗೆ 23ನೇ ದಿನಕ್ಕೆ ಕಾಲಿಟ್ಟಿರುವ ಈ ಚಿತ್ರವು ಶತಕೋಟಿ ಕ್ಲಬ್ ಕಡೆಗೆ ದಾಪುಗಾಲು ಹಾಕುತ್ತಿದೆ.