Asianet Suvarna News

Reservation ಇಸ್ಲಾಂಗೆ ಮತಾಂತರಗೊಂಡರೆ ಮೀಸಲಾತಿ ಇಲ್ಲ: ಸುಪ್ರೀಂ ಕೋರ್ಟ್ ತೀರ್ಪು

Gowthami K — Fri, 16 Oct 2026 06:46:06 +0530

ನವದೆಹಲಿ: ಹಿಂದುಳಿದ ವರ್ಗಗಳಿಗೆ ಸೇರಿದ ಹಿಂದೂಗಳು ಇಸ್ಲಾಂಗೆ ಮತಾಂತರಗೊಂಡ ನಂತರ, ತಾವು ಸೇರಿದ ಹಿಂದಿನ ವರ್ಗದ ಮೀಸಲಾತಿ ಸೌಲಭ್ಯಗಳನ್ನು ಪಡೆಯಲು ಅರ್ಹರಲ್ಲ ಎಂದು ಸುಪ್ರೀಂ ಕೋರ್ಟ್ ಗುರುವಾರ ಮಹತ್ವದ ತೀರ್ಪು ನೀಡಿದೆ.

‘ಹಿಂದಿನ ಸಾಮಾಜಿಕ ವ್ಯವಸ್ಥೆಯಲ್ಲಿ ಅನುಭವಿಸಿದ ಹಿಂದುಳಿದಿರುವಿಕೆಯನ್ನು ಮತಾಂತರದ ನಂತರವೂ ಮುಂದುವರಿಸಿಕೊಂಡು ಹೋಗಲು ಸಾಧ್ಯವಿಲ್ಲ. ಹಿಂದೂ, ಸಿಖ್ ಅಥವಾ ಬೌದ್ಧ ಧರ್ಮವನ್ನು ಹೊರತುಪಡಿಸಿ ಬೇರೆ ಧರ್ಮವನ್ನು ಅನುಸರಿಸುವ ವ್ಯಕ್ತಿಯನ್ನು ಪರಿಶಿಷ್ಟ ಜಾತಿಯ ಸದಸ್ಯರೆಂದು ಪರಿಗಣಿಸಲು ಸಾಧ್ಯವಿಲ್ಲ’ ಎಂದು ಕೋರ್ಟ್ ಸ್ಪಷ್ಟಪಡಿಸಿದೆ.

‘ಹಿಂದುಳಿದ ವರ್ಗಕ್ಕೆ ಸೇರಿದ ವ್ಯಕ್ತಿಯೊಬ್ಬ ಇಸ್ಲಾಂಗೆ ಮತಾಂತರಗೊಂಡ ನಂತರ ಮೀಸಲಾತಿ ಪಡೆಯುವಂತಿಲ್ಲ’ ಎಂದು ಮದ್ರಾಸ್‌ ಹೈಕೋರ್ಟ್‌ ತೀರ್ಪು ನೀಡಿತ್ತು. ಇದನ್ನು ಪ್ರಶ್ನಿಸಿ ತಮಿಳುನಾಡು ಸರ್ಕಾರ ಸುಪ್ರೀಂಗೆ ಅರ್ಜಿ ಸಲ್ಲಿಸಿತ್ತು. ಇದರ ವಿಚಾರಣೆ ನಡೆಸಿದ ನ್ಯಾ. ಪ್ರಶಾಂತ್‌ ಕುಮಾರ್‌ ಮಿಶ್ರಾ ಹಾಗೂ ನ್ಯಾ. ಚಂದ್ರಶೇಖರ್‌ ಅವರ ಪೀಠ ಅರ್ಜಿಯನ್ನು ವಜಾಗೊಳಿಸಿದೆ ಹಾಗೂ ಹೈಕೋರ್ಟ್‌ ಆದೇಶವನ್ನು ಎತ್ತಿ ಹಿಡಿದಿದೆ.

ಸಂವಿಧಾನದ 16(4)ನೇ ವಿಧಿ ಉಲ್ಲೇಖ:

‘ಹಿಂದೂ, ಸಿಖ್ ಅಥವಾ ಬೌದ್ಧ ಧರ್ಮವನ್ನು ಹೊರತುಪಡಿಸಿ ಬೇರೆ ಧರ್ಮವನ್ನು ಅನುಸರಿಸುವ ವ್ಯಕ್ತಿಯನ್ನು ಪರಿಶಿಷ್ಟ ಜಾತಿಯ ಸದಸ್ಯನೆಂದು ಪರಿಗಣಿಸಲು ಸಾಧ್ಯವಿಲ್ಲ. ಬೇರೆ ಧರ್ಮಕ್ಕೆ ಮತಾಂತರಗೊಂಡಾಗ, ಅಂತಹ ವ್ಯಕ್ತಿಯು ತನ್ನ ಹಿಂದಿನ ಜಾತಿಯೊಂದಿಗೆ ಸಂಬಂಧ ಹೊಂದಿದ್ದ ‘ಪರಿಶಿಷ್ಟ ಜಾತಿ’ಯ ಸ್ಥಾನಮಾನವನ್ನು ಕಳೆದುಕೊಳ್ಳುತ್ತಾನೆ. ಅಲ್ಲದೆ, ಸಂವಿಧಾನದ 16(4)ನೇ ವಿಧಿಯ ಅಡಿಯಲ್ಲಿ ಹಿಂದುಳಿದ ವರ್ಗಗಳಿಗೆ ದೊರೆಯುವ ಯಾವುದೇ ವಿಶೇಷ ಸೌಲಭ್ಯಗಳನ್ನು ಪಡೆಯಲು ಆತ ಅರ್ಹನಾಗುವುದಿಲ್ಲ. ಏಕೆಂದರೆ, ಈ ಸೌಲಭ್ಯಗಳು ಆ ವ್ಯಕ್ತಿಯು ಪರಿಶಿಷ್ಟ ಜಾತಿಗೆ ಸೇರಿದವನಾಗಿರುವುದರ ಮೇಲೆ ಆಧರಿತವಾಗಿರುತ್ತವೆ’ ಎಂದು ಪೀಠ ಸ್ಪಷ್ಟಪಡಿಸಿದೆ.

‘ಒಬ್ಬ ವ್ಯಕ್ತಿಯು ಮತಾಂತರಗೊಳ್ಳುವ ಮೊದಲು ಹೊಂದಿದ್ದ ಜಾತಿ ಅಥವಾ ಸಮುದಾಯದ ಸ್ಥಾನಮಾನವನ್ನು, ಕೇವಲ ಮತಾಂತರಗೊಂಡ ಕಾರಣದಿಂದಾಗಿ, ಮತಾಂತರದ ನಂತರದ ಸಾಮಾಜಿಕ ವ್ಯವಸ್ಥೆಯಲ್ಲಿ ಒಂದು ನಿರ್ದಿಷ್ಟ ಅಧಿಸೂಚಿತ ಹಿಂದುಳಿದ ವರ್ಗದ ಸಮುದಾಯದ ಸದಸ್ಯತ್ವವನ್ನಾಗಿ ಪರಿವರ್ತಿಸಲು ಸಾಧ್ಯವಿಲ್ಲ. ಮತಾಂತರಗೊಳ್ಳುವ ಮೊದಲು ಹೊಂದಿದ್ದ ಹಿಂದುಳಿದಿರುವಿಕೆಯು, ಮತಾಂತರದ ನಂತರ ಆತನಿಗೆ ಬೇರೊಂದು ಅಧಿಸೂಚಿತ ಹಿಂದುಳಿದ ವರ್ಗದ ಸಮುದಾಯದ ಸದಸ್ಯತ್ವವನ್ನು ನೀಡಲು ಏಕೈಕ ಕಾನೂನು ಆಧಾರವಾಗಲಾರದು’ ಎಂದು ತಿಳಿಸಿದೆ.

ಘರ್‌ ವಾಪ್ಸಿ ಬಗ್ಗೆ ಸ್ಪಷ್ಟನೆ:

‘ಒಬ್ಬ ವ್ಯಕ್ತಿಯು ಹಿಂದೂ ಸಾಮಾಜಿಕ ವ್ಯವಸ್ಥೆಯಿಂದ ಹಿಂದೂಯೇತರ ಸಾಮಾಜಿಕ ವ್ಯವಸ್ಥೆಗೆ ಮತಾಂತರಗೊಂಡ ನಂತರ, ಪುನಃ ಹಿಂದೂ ಸಾಮಾಜಿಕ ವ್ಯವಸ್ಥೆಗೆ ಮರಳಿದ ಸಂದರ್ಭದಲ್ಲಿ (ಘರ್‌ ವಾಪ್ಸಿ), ಸಂವಿಧಾನದ 16(4)ನೇ ವಿಧಿಯ ಅಡಿಯಲ್ಲಿ ಆ ವ್ಯಕ್ತಿಗೆ ವಿಶೇಷ ಸೌಲಭ್ಯಗಳನ್ನು ಪಡೆಯುವ ಹಕ್ಕಿದೆಯೇ ಎಂಬುದನ್ನು, ಕೇವಲ ಆತನ ಹಿಂದಿನ ಸ್ಥಿತಿಯನ್ನು ಆಧರಿಸಿ ನಿರ್ಧರಿಸಲು ಸಾಧ್ಯವಿಲ್ಲ. ಅಂತಹ ಅರ್ಹತೆಗೆ, ಘರ್‌ ವಾಪ್ಸಿ ಆದ ನಂತರ ಆತ ತನ್ನ ಮೂಲ ಜಾತಿಯನ್ನು ಒಪ್ಪಿಕೊಂಡಿದ್ದಾನೋ ಇಲ್ಲವೋ ಎಂಬುದರ ಕುರಿತು ಸಕ್ಷಮ ಪ್ರಾಧಿಕಾರದಿಂದ ದೃಢೀಕರಣದ ಅಗತ್ಯವಿರುತ್ತದೆ’ ಎಂದು ತಿಳಿಸಿದೆ.

ಹೈಕೋರ್ಟ್‌ ತೀರ್ಪಿಗೆ ಅನುಮೋದನೆ:

‘ಆದ್ದರಿಂದ, ನಾವು ಹೈಕೋರ್ಟ್‌ನ ತೀರ್ಮಾನವನ್ನು ಅನುಮೋದಿಸುತ್ತೇವೆ. ಇಸ್ಲಾಂಗೆ ಮತಾಂತರಗೊಳ್ಳುವ ವ್ಯಕ್ತಿಯೊಬ್ಬ, ಕೇವಲ ಆ ಕಾರಣದಿಂದಲೇ ರಾಜ್ಯದಲ್ಲಿ ಗುರುತಿಸಲಾದ 7 ಹಿಂದುಳಿದ ಸಮುದಾಯಗಳ ಪೈಕಿ ಒಂದರ ಸದಸ್ಯನಾಗಲು ಸಾಧ್ಯವಿಲ್ಲ. ಒಬ್ಬ ವ್ಯಕ್ತಿಯ ಹಿಂದಿನ ಜಾತಿ ಅಥವಾ ಸಮುದಾಯದ ಸ್ಥಿತಿಯನ್ನು ಸ್ವಯಂಚಾಲಿತವಾಗಿ ಮುಸ್ಲಿಂ ಹಿಂದುಳಿದ ವರ್ಗಗಳ ವರ್ಗಕ್ಕೆ ವರ್ಗಾಯಿಸಲು ಬರುವುದಿಲ್ಲ. ಅಲ್ಲದೆ, ಯಾವುದೇ ಖಾಸಗಿ ಧಾರ್ಮಿಕ ಸಂಸ್ಥೆಯು ಇಂತಹ ಶಾಸನಬದ್ಧ ಹಕ್ಕನ್ನು ನಿರ್ಣಾಯಕವಾಗಿ ನಿರ್ಧರಿಸಲು ಸಾಧ್ಯವಿಲ್ಲ’ ಎಂದು ಅಂತಿಮ ಸುಪ್ರೀಂ ಅಂತಿಮ ತೀರ್ಪು ನೀಡಿದೆ.

ಮದುಮಗಳಾಗಿ ಮಿಂಚಿದ 'ಸತ್ಯ' ಸೀರಿಯಲ್ ನಟಿ ಪ್ರಿಯಾಂಕಾ ಶಿವಣ್ಣ: ಏನಿದು ಗುಡ್ನ್ಯೂಸ್

Suchethana D — Thu, 15 Oct 2026 20:24:18 +0530

ಸತ್ಯ ಸೀರಿಯಲ್ ಮುಗಿದು ವರ್ಷವೇ ಕಳೆದಿದ್ದರೂ ಸೀರಿಯಲ್ ಪ್ರೇಮಿಗಳಿಗೆ ಈ ಸೀರಿಯಲ್ ಮನಸ್ಸಿನಲ್ಲಿ ಸದಾ ನೆಲೆಸಿರುತ್ತದೆ. ಅದಕ್ಕೆ ಸತ್ಯಳ ಅಕ್ಕನಾಗಿ, ನೆಗೆಟಿವ್ ರೋಲ್ ದಿವ್ಯಾಳ ಪಾತ್ರವನ್ನು ವಿಭಿನ್ನ ಶೇಡ್ಗಳಲ್ಲಿ ತೋರಿಸುತ್ತಲೇ ಎಲ್ಲರ ಮನಸ್ಸನ್ನು ಗೆದ್ದವರು ಪ್ರಿಯಾಂಕಾ ಶಿವಣ್ಣ. ಇವರು ತೆಲುಗು ಸೀರಿಯಲ್ಗಳಲ್ಲಿ ಸಕ್ರಿಯರಾಗಿದ್ದಾರೆ. ಕನ್ನಡಿಗರಿಗೆ ಪರಿಚಯವಾದದ್ದು ಅಗ್ನಿಸಾಕ್ಷಿಯ ವಿಲನ್ ಪ್ರಿಯಾಂಕಾ ಮೂಲಕ. ಮೊದಲು ಈ ಪಾತ್ರದಲ್ಲಿ ನಟಿಸುತ್ತಿದ್ದಾಕೆ ಅರ್ಧಕ್ಕೆ ಬಿಟ್ಟಾಗ ಆ ಅವಕಾಶ ಪ್ರಿಯಾಂಕಾ ಅವರಿಗೆ ಒದಗಿ ಬಂತು. ಈ ಸೀರಿಯಲ್ನಲ್ಲಿ ನೆಗೆಟಿವ್ ರೋಲ್ ಮೂಲಕ ಎಲ್ಲರ ಮನೆ ಮಾತಾದರು ಪ್ರಿಯಾಂಕಾ. ಕೊನೆಗೆ ಸತ್ಯ ಸೀರಿಯಲ್ನಲ್ಲಿಯೂ ನೆಗೆಟಿವ್ ರೋಲ್ನಲ್ಲಿ ಕಾಣಿಸಿಕೊಂಡಿದ್ದಾರೆ.

ಮದುಮಗಳಾಗಿ ನಟಿ ಪ್ರಿಯಾಂಕಾ

ಇಂತಿಪ್ಪ ನಟಿ ಪ್ರಿಯಾಂಕಾ ಈಗ ಮದುಮಗಳ ಲುಕ್ನಲ್ಲಿ ಮಿಂಚಿದ್ದಾರೆ. ವಿಡಿಯೋ ಒಂದನ್ನು ಅವರು ಶೇರ್ ಮಾಡಿಕೊಂಡಿದ್ದಾರೆ. ಅದರಲ್ಲಿ ಅವರು ಏನೂ ಬರೆದಿಲ್ಲ. ಆದರೆ ಈ ವಿಡಿಯೋ ನೋಡಿದವರು, ಪ್ರಿಯಾಂಕಾ ಮದುವೆಯಾಗುತ್ತಿದೆ, ಎಂಗೇಜ್ಮೆಂಟ್ ಆಗುತ್ತಿದೆ ಎಂದೆಲ್ಲಾ ತಿಳಿದು ಕಮೆಂಟ್ಸ್ ಸುರಿಮಳೆಯನ್ನೇಗೈಯುತ್ತಿದ್ದಾರೆ. ಆದರೆ ಅಭಿಮಾನಿಗಳು ಇಷ್ಟೆಲ್ಲಾ ಕಮೆಂಟ್ಸ್ ಹಾಕಿದರೂ ನಟಿ ಪ್ರಿಯಾಂಕಾ ಮಾತ್ರ ಯಾರ ಕಮೆಂಟ್ಸ್ಗೂ ರಿಪ್ಲೈ ಮಾಡಲಿಲ್ಲ.

ಅಸಲಿಗೆ ಇದು ಪ್ರಿಯಾಂಕಾ ಅವರ ಮದುವೆ ಅಥವಾ ಎಂಗೇಜ್ಮೆಂಟ್ ವಿಡಿಯೋ ಇದ್ದಂತೆ ತೋರುತ್ತಿಲ್ಲ. ಅವರು ಇದಾಗಲೇ ಸಾಕಷ್ಟು ಪ್ರಮೋಷನ್ ಜಾಹೀರಾತುಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇದು ಕೂಡ ಜ್ಯುವೆಲ್ಲರಿ ಒಂದು ಪ್ರಮೋಷನ್ ಜಾಹೀರಾತು ಅಷ್ಟೇ. ಮದುವೆಗೆ ಆಭರಣ ಖರೀದಿ ಮಾಡಬೇಕು ಎಂದರೆ ಈ ಅಂಗಡಿಯಲ್ಲಿ ಖರೀದಿಸಿ, ಇಂತಿಷ್ಟು ಆಫರ್ ಇದೆ ಎಂದು ಇನ್ನೊಂದು ವಿಡಿಯೋ ಮಾಡಿದ್ದಾರೆ ನಟಿ. ಅದನ್ನು ನೋಡಿದವರಿಗೆ ಹಾಗೂ ನಟಿ ಏನೆಂದು ಹೇಳಿದ್ದಾರೆ ಎಂದು ಕೇಳಿಸಿಕೊಳ್ಳುವ ಪೇಷನ್ಸ್ ಇದ್ದವರಿಗೆ ಇದು ಕೇವಲ ಜಾಹೀರಾತು ಎಂದು ಗೊತ್ತಾಗುತ್ತದೆ. ಅಷ್ಟಕ್ಕೂ ಇನ್ಸ್ಟಾಗ್ರಾಮ್ ಅಥವಾ ಸೋಷಿಯಲ್ ಮೀಡಿಯಾದಲ್ಲಿ ಬರುವ ಫೋಟೋಗಳನ್ನು, ವಿಡಿಯೋಗಳನ್ನು ಪೂರ್ತಿ ನೋಡಿ ಅದು ಏನು ಎಂದು ತಿಳಿದುಕೊಳ್ಳುವಷ್ಟು ತಾಳ್ಮೆ ಬಹಳ ಜನಕ್ಕಿಲ್ಲ. ಆದ್ದರಿಂದ ಫೋಟೋ ನೋಡಿದತಕ್ಷಣ, ಕಂಗ್ರಾಟ್ಸ್ ಎಂದು ಹಾಕಿಬಿಡುತ್ತಾರೆ. ಆದರೆ ಇಲ್ಲಿ ಅಸಲಿಯತ್ತೇ ಬೇರೆ ಇದೆ.

ನಟಿಯ ಕುರಿತು

ಇನ್ನು ನಟಿ ಪ್ರಿಯಾಂಕಾ ಕುರಿತು ಹೇಳುವುದಾದರೆ, ಅಗ್ನಿಸಾಕ್ಷಿ, ತೆಲುಗಿನ ಕೃಷ್ಣ ತುಳಸಿ, ತಮಿಳಿನ ಪಿರಿಯಾದ್ ವರಂ ವೆಂಡಂ ಮುಂತಾದ ಸೀರಿಯಲ್‌ಗಳಲ್ಲಿ ನಟಿಸಿದ್ದು, ಜೂಮ್ ಹಾಗೂ ಫ್ಯಾಂಟಸಿ ಎಂಬ ಸಿನಿಮಾದಲ್ಲೂ ನಟಿಸಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ 500ಕ್ಕೂ ಹೆಚ್ಚು ಫಾಲೋವರ್‌ಗಳನ್ನು ಹೊಂದಿರುವ ಇವರು ಮಾಡೆಲ್ ಕೂಡ. ಹಲವು ಪ್ರಸಿದ್ಧ ಬ್ರಾಂಡ್‌ಗಳಲ್ಲಿ ಅವರು ಕಾಣಿಸಿಕೊಂಡಿದ್ದಾರೆ. ಇನ್ನು ಇವರ ಶಿಕ್ಷಣದ ಕುರಿತು ಹೇಳುವುದಾದರೆ, ಬೆಂಗಳೂರಿನ ಕೇಂಬ್ರಿಡ್ಜ್ ಗಲ್ಸ್‌ ಸ್ಕೂಲ್‌ನಲ್ಲಿ ಪ್ರಾಥಮಿಕ ಶಿಕ್ಷಣ ಮುಗಿಸಿ ಬಳಿ ಅಳ್ವಾಸ್‌ ಕಾಲೇನಲ್ಲಿ ಓದಿರುವ ಪ್ರಿಯಾಂಕಾ, ಎಸ್‌ಡಿಎಂ ಕಾಲೇಜಿನಿಂದ ಬ್ಯುಸಿನೆಸ್ ಮ್ಯಾನೇಜ್ಮೆಂಟ್ ವಿಷಯದಲ್ಲಿ ಪದವಿ ಪಡೆದಿದ್ದಾರೆ. ಇದರ ಜೊತೆಗೆ ಬಿಗ್‌ಬಾಸ್ ಕನ್ನಡ ಸೀಸನ್ 7ರಲ್ಲಿ ಸ್ಪರ್ಧಿಯಾಗಿಯೂ ಅವರು ಭಾಗವಹಿಸಿದ್ದರು. 2013ರಲ್ಲಿ ಅಗ್ನಿಸಾಕ್ಷಿ ಸೀರಿಯಲ್‌ ಮೂಲಕ ಕಿರುತೆರೆ ಲೋಕಕ್ಕೆ ಕಾಲಿರಿಸಿದ ಇವರು ಇದೀಗ ಸೀರಿಯಲ್ಗಳಲ್ಲಿ ಸಕತ್ ಡಿಮಾಂಡ್ ಇರುವ ನಟಿ. 19 ವರ್ಷಕ್ಕೆ ಮಾಡೆಲಿಂಗ್ ಆರಂಭಿಸಿದ ಪ್ರಿಯಾಂಕಾಗೆ ಕಲರ್ಸ್‌ ಕನ್ನಡದಲ್ಲಿ ಪ್ರಸಾರವಾಗುತ್ತಿದ್ದ ಅಗ್ನಿಸಾಕ್ಷಿ ಸೀರಿಯಲ್ ಒಳ್ಳೆ ಬ್ರೇಕ್ ನೀಡಿದೆ.

ಪತ್ನಿಗೆ ಗಂಡ ಕೊಟ್ಟಿದ್ದು ಬರೀ ಲಾಟರಿ ಟಿಕೆಟ್, ಅದೃಷ್ಟ ಖುಲಾಯಿಸಿ ಸಿಕ್ಕಿದ್ದೇ 5 ಕೋಟಿ ರೂ.!

Sushma Hegde — Sun, 18 Oct 2026 14:35:26 +0530

ಗಂಡ ಹೆಂಡತಿಗೆ ಪ್ರೀತಿಯಿಂದ ಉಡುಗೊರೆ ನೀಡುವುದು ಸಾಮಾನ್ಯ. ಆದರೆ ಅಮೆರಿಕದ ವ್ಯಕ್ತಿಯೊಬ್ಬರು ತಮ್ಮ ಪತ್ನಿಗೆ ಉಡುಗೊರೆಯಾಗಿ ನೀಡಿದ ಲಾಟರಿ ಟಿಕೆಟ್ ಅವರ ಅದೃಷ್ಟವನ್ನೇ ಬದಲಿಸಿದೆ. ಪತಿ ಪ್ರೀತಿಯಿಂದ ನೀಡಿದ ಟಿಕೆಟ್ ಅನ್ನು ಸ್ಕ್ರ್ಯಾಚ್ ಮಾಡಿದ ಪತ್ನಿಗೆ ಬರೋಬ್ಬರಿ 577,777 ಡಾಲರ್ ಬಹುಮಾನ ಲಭಿಸಿದೆ. ಭಾರತೀಯ ರೂಪಾಯಿ ಲೆಕ್ಕದಲ್ಲಿ ಇದು ಸುಮಾರು 5 ಕೋಟಿ ರೂ.ಗೂ ಅಧಿಕ ಮೊತ್ತವಾಗಿದ್ದು, ದಂಪತಿಯ ಪಾಲಿಗೆ ಮರೆಯಲಾಗದ ಕ್ಷಣವಾಗಿ ಪರಿಣಮಿಸಿದೆ.

ಪತಿ ಕೊಟ್ಟ ಉಡುಗೊರೆ, ಪತ್ನಿಗೆ ಬಂಪರ್ ಅದೃಷ್ಟ!

ಈ ಘಟನೆ ಅಮೆರಿಕದ ವರ್ಜೀನಿಯಾದಲ್ಲಿ ನಡೆದಿದೆ. ಬೆಡ್‌ಫೋರ್ಡ್ ಕೌಂಟಿಯಲ್ಲಿ ವಾಸಿಸುವ ಮಹಿಳೆಯೊಬ್ಬರಿಗೆ ಅವರ ಪತಿ ನೀಡಿದ ಲಾಟರಿ ಟಿಕೆಟ್‌ನಿಂದ ಭರ್ಜರಿ ಬಹುಮಾನ ಸಿಕ್ಕಿದೆ. ವರ್ಜೀನಿಯಾ ಲಾಟರಿ ಅಧಿಕಾರಿಗಳು ನೀಡಿದ ಮಾಹಿತಿಯ ಪ್ರಕಾರ, ಮಹಿಳೆಯ ಪತಿ ವರ್ಜೀನಿಯಾದ ಫಾರೆಸ್ಟ್‌ನ ವಾಟರ್‌ಲಿಕ್ ರಸ್ತೆಯಲ್ಲಿರುವ ಕ್ವಿಕ್-ಇ ಫುಡ್ಸ್ ಅಂಗಡಿಯಿಂದ ಎರಡು 'ಗೋಲ್ಡ್ 7s' ಸ್ಕ್ರ್ಯಾಚ್-ಆಫ್ ಲಾಟರಿ ಟಿಕೆಟ್‌ಗಳನ್ನು ಖರೀದಿಸಿದ್ದರು.

ಬಳಿಕ ಮನೆಗೆ ಬಂದ ಅವರು ಆ ಎರಡೂ ಟಿಕೆಟ್‌ಗಳನ್ನು ಮೇಜಿನ ಮೇಲಿಟ್ಟು ಪತ್ನಿಗೆ ಉಡುಗೊರೆಯಾಗಿ ನೀಡಿದರು. ಸಾಮಾನ್ಯ ಉಡುಗೊರೆಯೆಂದು ಭಾವಿಸಿದ್ದ ಪತ್ನಿ, ಟಿಕೆಟ್‌ಗಳನ್ನು ಸ್ಕ್ರ್ಯಾಚ್ ಮಾಡಿ ತನ್ನ ಅದೃಷ್ಟ ಪರೀಕ್ಷಿಸಲು ಮುಂದಾದರು. ಆದರೆ, ಟಿಕೆಟ್ ಸ್ಕ್ರ್ಯಾಚ್ ಮಾಡಿದಾಗ ಅವರಿಗೆ ಕಾದಿದ್ದು ದೊಡ್ಡ ಅಚ್ಚರಿ! ಟಿಕೆಟ್‌ಗಳಲ್ಲಿ ಒಂದು ಆಟದ ಅತ್ಯುನ್ನತ ಬಹುಮಾನವಾದ 577,777 ಡಾಲರ್ ಗೆದ್ದಿರುವುದನ್ನು ಬಹಿರಂಗಪಡಿಸಿತು. ಇದರಿಂದ ದಂಪತಿಯ ಸಂತೋಷಕ್ಕೆ ಪಾರವೇ ಇಲ್ಲದಂತಾಯಿತು.

ಸುಮಾರು 5 ಕೋಟಿ ರೂ. ಗೆದ್ದ ಪತ್ನಿ ಮಾಡಿದ್ದೇನು ಗೊತ್ತಾ?

ಪತಿಯ ಸಣ್ಣ ಉಡುಗೊರೆಯೊಂದು ಇಷ್ಟು ದೊಡ್ಡ ಮೊತ್ತದ ಬಹುಮಾನ ತಂದುಕೊಡುತ್ತದೆ ಎಂದು ಆ ಮಹಿಳೆ ನಿರೀಕ್ಷಿಸಿರಲಿಲ್ಲ. ಲಾಟರಿ ಅಧಿಕಾರಿಗಳೊಂದಿಗೆ ತಮ್ಮ ಅನುಭವ ಹಂಚಿಕೊಂಡ ಅವರು, ಗೆದ್ದ ಹಣದ ಒಂದು ಭಾಗವನ್ನು ಪ್ರಯಾಣಕ್ಕಾಗಿ ಬಳಸುವ ಆಸೆಯನ್ನು ವ್ಯಕ್ತಪಡಿಸಿದ್ದಾರೆ. ಹೀಗೆ, ಸ್ಥಳೀಯ ಅಂಗಡಿಯಿಂದ ಖರೀದಿಸಿದ ಎರಡು ಲಾಟರಿ ಟಿಕೆಟ್‌ಗಳು ದಂಪತಿಯ ಜೀವನದಲ್ಲಿ ವಿಶೇಷ ನೆನಪಾಗಿ ಉಳಿದಿವೆ. ಪತ್ನಿಗೆ ಪ್ರೀತಿಯಿಂದ ನೀಡಿದ ಉಡುಗೊರೆ ಕೋಟ್ಯಂತರ ರೂಪಾಯಿ ಮೌಲ್ಯದ ಬಹುಮಾನವಾಗಿ ಬದಲಾಗಿರುವುದು ಈ ಘಟನೆಯ ವಿಶೇಷ.

ಸಣ್ಣ ಉಡುಗೊರೆ, ದೊಡ್ಡ ಅಚ್ಚರಿ!

ಕೆಲವೊಮ್ಮೆ ನಾವು ಪ್ರೀತಿಪಾತ್ರರಿಗೆ ನೀಡುವ ಸಣ್ಣ ಉಡುಗೊರೆಗಳೇ ದೊಡ್ಡ ಸಂತೋಷಕ್ಕೆ ಕಾರಣವಾಗುತ್ತವೆ. ವರ್ಜೀನಿಯಾದ ಈ ದಂಪತಿಯ ಪಾಲಿಗೆ ಲಾಟರಿ ಟಿಕೆಟ್ ಅಂಥದ್ದೇ ಉಡುಗೊರೆಯಾಗಿದೆ. ಪತಿಯ ಪ್ರೀತಿಯ ಉಡುಗೊರೆಯನ್ನು ಸ್ಕ್ರ್ಯಾಚ್ ಮಾಡಿದ ಪತ್ನಿಗೆ ಬರೋಬ್ಬರಿ 5 ಕೋಟಿ ರೂ.ಗೂ ಅಧಿಕ ಮೊತ್ತದ ಬಹುಮಾನ ಸಿಕ್ಕಿರುವ ಸುದ್ದಿ ಇದೀಗ ಅಚ್ಚರಿಯ ಸಂಗತಿಯಾಗಿ ಗಮನ ಸೆಳೆಯುತ್ತಿದೆ.

ಆದರೆ, ಲಾಟರಿಯಲ್ಲಿ ಬಹುಮಾನ ಗೆಲ್ಲುವುದು ಸಂಪೂರ್ಣ ಅದೃಷ್ಟವನ್ನು ಅವಲಂಬಿಸಿರುತ್ತದೆ. ಇಂತಹ ಗೆಲುವುಗಳು ಅಪರೂಪವಾಗಿದ್ದು, ಲಾಟರಿ ಖರೀದಿಸುವುದರಿಂದ ಬಹುಮಾನ ಖಚಿತವಾಗುವುದಿಲ್ಲ.

ಕರೀನಾ ಕಪೂರ್ ಮಾಡೋ ಅದೊಂದು ಕೆಲಸ ಹೇಳಿ ಇಡೀ ಶೋಗೆ ಶಾಕ್ ಕೊಟ್ಟ ಸೈಫ್ ಅಲಿ ಖಾನ್!

Shriram Bhat — Sun, 18 Oct 2026 12:23:18 +0530

ಬೆಡ್‌ರೂಮ್‌ನಲ್ಲಿ ಡಾಬಾದ ವಾಸನೆ! ಕರೀನಾ ಕಪೂರ್ ರಹಸ್ಯ ಬಿಚ್ಚಿಟ್ಟ ಸೈಫ್ ಅಲಿ ಖಾನ್

ಬಾಲಿವುಡ್‌ನ ಮುದ್ದಾದ ಜೋಡಿಗಳಲ್ಲಿ ಸೈಫ್ ಅಲಿ ಖಾನ್ ಮತ್ತು ಕರೀನಾ ಕಪೂರ್ ಖಾನ್ ಜೋಡಿಗೆ ವಿಶೇಷ ಸ್ಥಾನವಿದೆ. ವರ್ಷಗಳು ಕಳೆದರೂ ಈ ಜೋಡಿಯ ನಡುವಿನ ಪ್ರೀತಿ, ಆತ್ಮೀಯತೆ ಮಾತ್ರ ಕಡಿಮೆಯಾಗಿಲ್ಲ. ಪತಿ ಸೈಫ್ ಅಲಿ ಖಾನ್ ಹೆಸರು ಕೇಳಿದರೂ ಕರೀನಾ ಮುಖದಲ್ಲಿ ನಾಚಿಕೆಯ ನಗು ಮೂಡುತ್ತದೆ. ಇದೀಗ ಈ ತಾರಾ ಜೋಡಿ ತಮ್ಮ 14ನೇ ವಿವಾಹ ವಾರ್ಷಿಕೋತ್ಸವದ ಸಂಭ್ರಮದಲ್ಲಿದ್ದು, ಅವರ ವೈಯಕ್ತಿಕ ಜೀವನದ ಸ್ವಾರಸ್ಯಕರ ಸಂಗತಿಯೊಂದು ಅಭಿಮಾನಿಗಳನ್ನು ನಗೆಗಡಲಲ್ಲಿ ತೇಲಿಸಿದೆ.

ದಾಂಪತ್ಯ ಜೀವನದ 14 ವರ್ಷಗಳನ್ನು ಪೂರೈಸಿದ ಸೈಫ್ ಮತ್ತು ಕರೀನಾ

ಅಕ್ಟೋಬರ್ 16ರಂದು ತಮ್ಮ ದಾಂಪತ್ಯ ಜೀವನದ 14 ವರ್ಷಗಳನ್ನು ಪೂರೈಸಿದ ಸೈಫ್ ಮತ್ತು ಕರೀನಾ, ಈ ವಿಶೇಷ ಸಂದರ್ಭದ ಸಂಭ್ರಮವನ್ನು ‘ದಿ ಗ್ರೇಟ್ ಇಂಡಿಯನ್ ಕಪಿಲ್ ಶೋ’ನಲ್ಲಿ ಹಂಚಿಕೊಂಡಿದ್ದಾರೆ. ಕಾರ್ಯಕ್ರಮದಲ್ಲಿ ನಿರೂಪಕ ಕಪಿಲ್ ಶರ್ಮಾ ಕೇಳಿದ ಪ್ರಶ್ನೆಗಳಿಗೆ ಉತ್ತರಿಸುತ್ತಾ, ತಮ್ಮ ಮನೆಯಲ್ಲಿನ ಒಂದು ತಮಾಷೆಯ ವಿಚಾರವನ್ನು ಸೈಫ್ ಬಹಿರಂಗಪಡಿಸಿದ್ದಾರೆ.

ಕರೀನಾ ಯಾವಾಗಲೂ ಇಷ್ಟು ಫ್ರೆಶ್ ಆಗಿ, ಉಲ್ಲಾಸದಿಂದ ಕಾಣಿಸಿಕೊಳ್ಳಲು ಏನು ತಿನ್ನುತ್ತಾರೆ ಎಂದು ಕಪಿಲ್ ಪ್ರಶ್ನಿಸಿದ್ದಾರೆ. ಇದಕ್ಕೆ ಉತ್ತರಿಸಿದ ಸೈಫ್, ಇತ್ತೀಚಿನ ದಿನಗಳಲ್ಲಿ ತಮ್ಮ ಮನೆಗೆ ಸಾಕಷ್ಟು ತುಪ್ಪ ಬರುತ್ತಿದೆ ಎಂದಿದ್ದಾರೆ. ತಕ್ಷಣವೇ ಕರೀನಾ, ‘ಗೋವರ್ಧನ್ ತುಪ್ಪ’ ಎಂದು ಸೇರಿಸಿದ್ದಾರೆ. ಇದಕ್ಕೆ ಕಾರಣವೂ ಇದೆ. ಸೈಫ್ ಅಲಿ ಖಾನ್ ಅವರು ‘ಕೌನ್ ಬನೇಗಾ ಕರೋಡ್‌ಪತಿ’ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದಾಗ ಎರಡು ವರ್ಷಗಳ ಕಾಲ ಉಚಿತ ತುಪ್ಪದ ಪೂರೈಕೆಯನ್ನು ಗೆದ್ದಿದ್ದರು.

ತಮ್ಮ ಮನೆಯಲ್ಲಿ ತುಪ್ಪದ ಬಳಕೆ ಹೆಚ್ಚಾಗಿದೆ ಎಂದು ಕರೀನಾ ಹೇಳಿದಾಗ ಕಪಿಲ್ ಆಶ್ಚರ್ಯಪಟ್ಟಿದ್ದಾರೆ. ಮನೆಯ ಮಕ್ಕಳು ಮಾತ್ರವಲ್ಲ, ತಾವೂ ತುಪ್ಪ ಸೇವಿಸುತ್ತೇವೆ ಎಂದು ನಟಿ ತಿಳಿಸಿದ್ದಾರೆ. ಆದರೆ ಸೈಫ್ ಹೇಳಿದ ಮುಂದಿನ ವಿಚಾರವೇ ಕಾರ್ಯಕ್ರಮದ ಹೈಲೈಟ್ ಆಗಿದೆ!

ಸೈಫ್ ತಮಾಷೆ

ಕರೀನಾ ತುಪ್ಪವನ್ನು ತಿನ್ನುವುದಕ್ಕಿಂತ ಹೆಚ್ಚಾಗಿ ಪ್ರತಿ ರಾತ್ರಿ ತಮ್ಮ ಪಾದಗಳಿಗೆ ಹಚ್ಚಿಕೊಳ್ಳುತ್ತಾರೆ ಎಂದು ಸೈಫ್ ತಮಾಷೆ ಮಾಡಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿದ ಕರೀನಾ, ತುಪ್ಪ ಹಚ್ಚುವುದರಿಂದ ನೆಮ್ಮದಿಯ ನಿದ್ರೆ ಬರುತ್ತದೆ ಎಂದಿದ್ದಾರೆ. ಅಷ್ಟಕ್ಕೇ ನಿಲ್ಲದ ಸೈಫ್, “ನಮ್ಮ ಬೆಡ್‌ರೂಮ್ ಪ್ರತಿ ರಾತ್ರಿ ಧಾಬಾದಂತೆ ಪರಿಮಳ ಬೀರುತ್ತದೆ” ಎಂದು ಹೇಳಿ ಎಲ್ಲರನ್ನೂ ನಗೆಗಡಲಲ್ಲಿ ಮುಳುಗಿಸಿದ್ದಾರೆ.

ಇನ್ನು ವಿವಾಹ ವಾರ್ಷಿಕೋತ್ಸವದ ಪ್ರಯುಕ್ತ ಕರೀನಾ ತಮ್ಮ ಇನ್‌ಸ್ಟಾಗ್ರಾಂನಲ್ಲಿ ಡೇಟಿಂಗ್ ದಿನಗಳು, ಮದುವೆ, ಪ್ರವಾಸಗಳು ಹಾಗೂ ಮಕ್ಕಳೊಂದಿಗಿನ ಸುಂದರ ಕ್ಷಣಗಳ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ. ಕೆಂಪು ಹೃದಯ ಮತ್ತು ಕಾಮನಬಿಲ್ಲಿನ ಎಮೋಜಿಗಳೊಂದಿಗೆ ಪತಿ ಸೈಫ್ ಅವರನ್ನು ಟ್ಯಾಗ್ ಮಾಡಿದ್ದಾರೆ.

2012ರಲ್ಲಿ ವಿವಾಹವಾದ ಈ ಜೋಡಿಗೆ ತೈಮೂರ್ ಮತ್ತು ಜಹಾಂಗೀರ್ ಎಂಬ ಇಬ್ಬರು ಪುತ್ರರಿದ್ದಾರೆ. ಸೈಫ್‌ಗೆ ಮೊದಲ ಪತ್ನಿ ಅಮೃತಾ ಸಿಂಗ್ ಅವರಿಂದ ಸಾರಾ ಅಲಿ ಖಾನ್ ಮತ್ತು ಇಬ್ರಾಹಿಂ ಅಲಿ ಖಾನ್ ಎಂಬ ಇಬ್ಬರು ಮಕ್ಕಳೂ ಇದ್ದಾರೆ. ಪ್ರೀತಿ, ತುಂಟಾಟ ಮತ್ತು ಪರಸ್ಪರ ಆತ್ಮೀಯತೆಯ ಮೂಲಕ ಅಭಿಮಾನಿಗಳನ್ನು ರಂಜಿಸುತ್ತಿರುವ ಸೈಫ್-ಕರೀನಾ ಜೋಡಿಯ ಈ ಹೊಸ ಸಂಗತಿ ಇದೀಗ ಗಮನ ಸೆಳೆಯುತ್ತಿದೆ.

'ರಾಕಿ' ಭಾಯ್ ಯಶ್ ಲೈಫ್‌ನ ಬಹುದೊಡ್ಡ ಸೀಕ್ರೆಟ್ ಬಿಚ್ಚಿಟ್ಟ 'ಹಾಗೇ ಸುಮ್ಮನೇ' ಕಿರಣ್.. ಅಂದು ಹಾಗೆ ಮಾಡಿದ್ರು ರಾಕಿಂಗ್ ಸ್ಟಾರ್..!

Shriram Bhat — Sun, 18 Oct 2026 10:33:41 +0530

ಗ್ಲೋಬಲ್ ಐಕಾನ್ ಯಶ್ ಹಳೆಯ ಸೀಕ್ರೆಟ್ ರಿವೀಲ್! ನೋಡಿ ಅದೇನು ಅಂತ!

ಇಡೀ ವಿಶ್ವವೇ 'ರಾಕಿ ಭಾಯ್' ಎಂದು ಗುರುತಿಸುವ ಕನ್ನಡದ ನಟ ಯಶ್ (Rocking Star Yash) ಅವರು ಇಮದು ಏರಿರುವ ಎತ್ತರ, ಪಡೆದಿರುವ ಜನಪ್ರಿಯತೆ ಎಂತದ್ದು ಎಂಬುದು ಎಲ್ಲರಿಗೂ ಗೊತ್ತು. ಕನ್ನಡ ಹಾಗೂ ಭಾರತದ ಗಡಿಯನ್ನು ದಾಟಿ ನಟ ಯಶ್ ಅವರು ಇಂದು ಗ್ಲೋಬಲ್ ಐಕಾನ್ ಆಗಿ ಮಿಂಚುತ್ತಿದ್ದಾರೆ. 'ಟಾಕ್ಸಿಕ್‌' ಸಿನಿಮಾಗೆ ಬಂದ ಮಿಶ್ರ ಪ್ರತಿಕ್ರಿಯೆ ಏನೇ ಆಗಿದ್ದರೂ, ಇಂದು ಇಡೀ ವಿಶ್ವವೇ ಯಶ್ ಅವರನ್ನು ಗುರುತಿಸಿ ಗೌರವಿಸುತ್ತದೆ, ಅವರು ಬೆಳೆದಿರುವ ಎತ್ತರಕ್ಕೆ 'ಸಲಾಂ; ಎನ್ನುತ್ತದೆ. ಇಂಥ ನಟ ಯಶ್ ಬಗ್ಗೆ ಇದೀಗ ಅಪರೂಪದ ಸಂಗತಿಯೊಂದು ಹೊರಬಿದ್ದಿದೆ. ಅದೇನು ಅಂತ ಮುಂದೆ ನೋಡಿ..

ಮೊಗ್ಗಿನ ಮನಸ್ಸು ಅಲ್ಲ, ರಾಕಿ!

ಯಶ್ ಅವರು ಪೂರ್ಣ ಪ್ರಮಾಣದ ನಾಯಕರಾಗಿ ನಟಿಸಿರುವ ಸಿನಿಮಾ 'ರಾಕಿ' ಬಗ್ಗೆ ಎಲ್ಲಾ ಕನ್ನಡಿಗರಿಗೆ ಗೊತ್ತಿದೆ. 'ಮೊಗ್ಗಿನ ಮನಸ್ಸು' ಸಿನಿಮಾದಲ್ಲಿ ನಟ ಯಶ್ ಅವರು ಕ್ಲೈಮ್ಯಾಕ್ಸ್ ಹಾಡಿನಲ್ಲಿ ಆ ಚಿತ್ರದ ನಾಯಕಿ ನಟಿ ರಾಧಿಕಾ ಪಂಡಿತ್ ಅವರೊಂದಿಗೆ ಹೆಜ್ಜೆ ಹಾಕಿ ಫೇಮಸ್ ಆಗಿದ್ದರೂ ಅವರನ್ನು ಆ ಚಿತ್ರದಲ್ಲಿ ನಾಯಕರು ಎನ್ನಲಾಗುವುದಿಲ್ಲ. 'ರಾಕಿ' ಚಿತ್ರದ ಮೂಲಕ ಕನ್ನಡದಲ್ಲಿ ನಾಯಕರಾಗಿ ಯಶ್ ಅವರು ಹವಾ ಸೃಷ್ಟಿಸಿದ್ದನ್ನು ಯಾರೂ ಅಲ್ಲಗೆಳೆಯಲಾಗದು. ಅದೇ ಸಿನಿಮಾ ಬಿಡುಗಡೆ ಸಮಯದಲ್ಲಿ ನಡೆದಿರುವ ಘಟನೆಯೊಂದನ್ನು ಸಂದರ್ಶನವೊಂದರಲ್ಲಿ ಕನ್ನಡದ ಮತ್ತೊಬ್ಬ ನಟ, 'ಹಾಗೇ ಸುಮ್ಮನೆ' ಸಿನಿಮಾದ ಖ್ಯಾತಿಯ ಕಿರಣ್ ಶ್ರೀನಿವಾಸ್ ಅವರು ಹಂಚಿಕೊಂಡಿದ್ದಾರೆ. ಅದೀಗ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ.

'ರಾಕಿ' ಯಶ್ ಬಗ್ಗೆ 'ಹಾಗೇ ಸುಮ್ಮನೇ' ಕಿರಣ್ ಶ್ರೀನಿವಾಸ್ ಹೇಳಿದ್ದು:- ಯಶ್ ಫೋನ್ ಮಾಡಿದ ನಂಗೆ.. ಹೊಸ ನಟ ಅಂತ ಗೊತ್ತಿದೆ ನಂಗೆ.. ಮೀಟ್ ಮಾಡಿರ್ಲಿಲ್ಲ ಯಾವತ್ತೂ, ನಂಬರ್ ಕೂಡ ಇರ್ಲಿಲ್ಲ ನನ್ ಹತ್ರ.. ಕಾಲ್ ಬಂತು ಎತ್ತಿದೆ.. 'ಕಿರಣ್ ಅಣ್ಣಾ, ನಾನು ಯಶ್ ಮಾತಾಡ್ತಾ ಇರೋದು.. ಎಲ್ಲಿದಿಯಾ?' ಅಂದ.. ನಂಗೆ ಶಾಕ್ ಆಯ್ತು.. ನಮಗಿಬ್ಬರಿಗೂ ಪರಸ್ಪರ ಪರಿಚಯ ಇತ್ತು, ಆದ್ರೆ ಯಾವತ್ತೂ ಭೇಟಿ ಅಗಿರ್ಲಿಲ್ಲ ಅಷ್ಟೇ.. ನಾನು 'ಮನೆಲ್ಲೇ ಇದೀನಿ ಅಂದೆ'.. ಅದಕ್ಕೆ, 'ಒಂದ್ ಕೆಲ್ಸ ಮಾಡು, ಇನ್ನು ಒಂದ್ ಗಂಟೆಲಿ ಕಬ್ಬನ್ ಪಾರ್ಕ್ ಹತ್ರ ಬಾ, ಓಲ್ಡ್ ಹೈಕೋರ್ಟ್ ಹತ್ರ ಬಾ..' ಅಂದ.. ನಾನು 'ಯಾಕೆ?' ಅಂದಿದ್ದಕ್ಕೆ 'ನಾನು ಹೇಳ್ತಿನಿ, ಬಾ..' ಅಂದ..

ಫಸ್ಟ್ ಸಿನಿಮಾ ಬೇರೆ!

ನಾನು ಫಸ್ಟ್‌ ಆಪ್‌ ಆಲ್ ಅವ್ನ ಯಾವತ್ತೂ ಮೀಟ್ ಮಾಡಿಯೇ ಇಲ್ಲ.. ಜೊತೆಗೆ, ಫಸ್ಟ್ ಸಿನಿಮಾ ಬೇರೆ.. ಆದ್ರೂ ಸರಿ, ಮೀಟ್ ಮಾಡೋಣ ಅಂತ ಹೋದೆ.. ಅಲ್ಲಿ ಹೋಗಿ ನೋಡಿದ್ರೆ, ಯಾವುದೋ ಮೀಡಿಯಾದವ್ರನ್ನ ಕರೆಸಿ 2 ಕ್ಯಾಮೆರಾ ಸೆಟ್‌ಅಪ್ ಮಾಡ್ಸಿ ಇಟ್ಟಿದಾನೆ.. ನನ್ ನೋಡಿದ ತಕ್ಷಣ, 'ನೋಡು ಕಿರಣ್‌.. ನಾನು ನಿನ್ನ 'ಹಾಗೇ ಸುಮ್ಮನೇ' ಸಿನಿಮಾ ಪ್ರಮೋಟ್ ಮಾಡ್ತೀನಿ, ನೀನು ನನ್ನ 'ರಾಕಿ' ಸಿನಿಮಾ ಪ್ರಮೋಟ್ ಮಾಡು.. ನಾವಿಬ್ರೂ ಇಲ್ಲಿ ಕೂತ್ಕೊಂಡು, ನೀನು ನನ್ನ ರಾಕಿ ಸಿನಿಮಾ ಬಗ್ಗೆ ಮಾತಾಡು, ನಾನು ನಿನ್ನ ಹಾಗೇ ಸುಮ್ಮನೇ ಸಿನಿಮಾ ಬಗ್ಗೆ ಮಾತಾಡ್ತೀನಿ' ಅಂದ.. ನಂಗೆ ಏನೂ ಅಂದ್ರೆ ಏನೂ ಗೊತ್ತಿಲ್ಲ.. ಆದ್ರೂ ಇಬ್ರೂ ಮಾತಾಡಿದ್ವಿ..

ಕ್ಲಾರಿಟಿ ಅದ್ರಲ್ಲೇ ಇದೆ ನೋಡಿ.. 'ನಾನು ನನ್ ಸಿನಿಮಾ ರಿಲೀಸ್ ಆಗಿರೋ ಖುಷಿನಲ್ಲಿ ಫ್ಯಾಮಿಲಿ, ಫ್ರೆಂಡ್ಸ್‌, ಪಾರ್ಟಿ ಅಂತ ಮಜಾ ಮಾಡ್ತಾ ಇದೀನಿ.. ಆದ್ರೆ ಅವ್ನು? ನಾನು ಈ ಸಿನಿಮಾನ ಜನರಿಗೆ ಮುಟ್ಟಿಸಬೇಕು, ಇದ್ರಿಂದ ಬೆಳೀಬೇಕು ನಾನು ಅನ್ನೊ ಕ್ಲಾರಿಟಿ, ಮೆಂಟಾಲಿಟಿ, ಪ್ರಬುದ್ಧತೆ ಯಶ್‌ಗೆ ಆಗ್ಲೇ ಇತ್ತು..' ಎಂದಿದ್ದಾರೆ ನಟ ಕಿರಣ್ ಶ್ರೀನಿವಾಸ್.

ಹೌದು, ನಟ ಯಶ್ ಅವರು ತಮ್ಮ ಸಿನಿಮಾ ವೃತ್ತಿಜೀವನದಲ್ಲಿ ಸೋಲು-ಗೆಲುವು ಎರಡನ್ನೂ ನೋಡಿದ್ದಾರೆ. ಆದ್ರೆ ಅವರಿಗೊಂದು ಕ್ಲಿಯರ್ ವಿಷನ್ ಇದೆ ಅನ್ನೋ ಮಾತನ್ನ ಅವರ ಆಪ್ತರು, ಸಹನಟರಲ್ಲಿ ಬಹಳಷ್ಟು ಜನರು ಹೇಳುತ್ತಾರೆ. ಇಂದು ನಟ ಯಶ್ ಅವರು ಜಾಗತಿಕ ನಟ ಪಟ್ಟವನ್ನು ಅಲಂಕರಿಸಿದ್ದಾರೆ. ಕನ್ನಡದ ನಟರೊಬ್ಬರು ಇಷ್ಟು ಎತ್ತರಕ್ಕೆ ಏರಿದ್ದು, ಇಡೀ ಭಾರತದ ಪ್ರತಿನಿಧಿಯಾಗಿ ಪ್ರಪಂಚದ ತುಂಬೆಲ್ಲಾ ಕನ್ನಡನಾಡಿನ, ಭಾರತದ ಹಿರಿಮೆಯನ್ನು ಪಸರಿಸುತ್ತಿದ್ದಾರೆ ನಟ ಯಶ್ ಎಂಬ ಮಾತನ್ನು ಹೇಳಲೇಬೇಕು.

ಯಶ್ ಕನಸಿನ ಸಿನಿಮಾ 'ಟಾಕ್ಸಿಕ' ಅಂದುಕೊಂಡಷ್ಟು ಸೂಪರ್ ಹಿಟ್ ದಾಖಲಿಸಿಲ್ಲ ಎಂಬ ಮಾತು ಇದ್ದರೂ, ಇದೀಗ ಮತ್ತೆ 'ರಾಮಾಯಣ' ಸಿನಿಮಾದ 'ರಾವಣ' ಪಾತ್ರದ ಮೂಲಕ ರಾಕಿಂಗ್ ಸ್ಟಾರ್ 05 ನವೆಂಬರ್ 2026ರಂದು ಮತ್ತೆ ಜಗತ್ತಿನ ಪ್ರೇಕ್ಷಕರ ಮುಂದೆ ಬರುತ್ತಿದ್ದಾರೆ. ಯಶ್ ರಾವಣನ ಪಾತ್ರವನ್ನು ಸಿನಿಪ್ರೇಕ್ಷಕರು ಈಗಾಗಲೇ ಮೆಚ್ಚಿದ್ದು, 'ರಾವಣಾಸುರ'ನಾಗಿ ತೆರೆಯ ಮೇಲೆ ಅಬ್ಬರಿಸುವುದನ್ನು ಕಣ್ತುಂಬಿಕೊಳ್ಳಲು ಕಾತರದಿಂದ ಕಾಯುತ್ತಿದ್ದಾರೆ. ಯಶ್ 'ವಿಷನ್ ಕ್ಲಾರಿಟಿ' ಅವರನ್ನು ಇನ್ನೂ ಎಷ್ಟು ಎತ್ತರಕ್ಕೆ ಕರೆದುಕೊಂಡು ಹೋಗಬಹುದು ಎಂಬುದನ್ನು ಇಡೀ ಜಗತ್ತು ಅಚ್ಚರಿಯಿಂದ ನೋಡುತ್ತಿದೆ!

ಡಿವೋರ್ಸ್ ಇಲ್ಲದೇ 35 ವರ್ಷ ಪ್ರತ್ಯೇಕವಾಗಿದ್ರು.. ನಾನಾ ಪಾಟೇಕರ್ ದಾಂಪತ್ಯದ ಸಿಕ್ಕಾಪಟ್ಟೆ ಸೀಕ್ರೆಟ್ ಬಿಚ್ಚಿಟ್ಟ ಮಗ!

Shriram Bhat — Sat, 17 Oct 2026 12:22:40 +0530

Nana Patekar: ನಟ ನಾನಾ ಪಾಟೇಕರ್ ಮತ್ತು ಅವರ ಪತ್ನಿ ನೀಲಕಾಂತಿ ಪಾಟೇಕರ್ ಅವರ ದಾಂಪತ್ಯ ಜೀವನದ ಕುರಿತು ಹಲವು ವರ್ಷಗಳಿಂದ ಚಿತ್ರರಂಗದಲ್ಲಿ ನಾನಾ ರೀತಿಯ ಚರ್ಚೆಗಳು ನಡೆಯುತ್ತಿವೆ. ಇಬ್ಬರೂ ಪ್ರತ್ಯೇಕವಾಗಿ ವಾಸಿಸುತ್ತಿದ್ದರೂ ವಿಚ್ಛೇದನ ಪಡೆದಿರಲಿಲ್ಲ. ಇದೀಗ ಈ ಸಂಬಂಧದ ಬಗ್ಗೆ ಮಾತನಾಡಿರುವ ಅವರ ಪುತ್ರ ಮಲ್ಹಾರ್ ಪಾಟೇಕರ್, ಕುಟುಂಬದ ಒಳಗಿನ ಪ್ರೀತಿ ಮತ್ತು ಭಾವನಾತ್ಮಕ ಬಾಂಧವ್ಯವನ್ನು ಹೊರಗಿನವರು ಸುಲಭವಾಗಿ ಅರ್ಥಮಾಡಿಕೊಳ್ಳಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ನಾನಾ ಪಾಟೇಕರ್ ಮತ್ತು ನೀಲಕಾಂತಿ 1978ರಲ್ಲಿ ವಿವಾಹವಾಗಿದ್ದರು. ಈ ದಂಪತಿಗೆ ದೂರ್ವಾಸ ಮತ್ತು ಮಲ್ಹಾರ್ ಎಂಬ ಇಬ್ಬರು ಪುತ್ರರಿದ್ದರು. ಆದರೆ ದುರದೃಷ್ಟವಶಾತ್, ದೂರ್ವಾಸ ಬಾಲ್ಯದಲ್ಲೇ ಮೃತಪಟ್ಟಿದ್ದರು. ಕುಟುಂಬದಲ್ಲಿ ಹಲವು ನೋವುಗಳು ಎದುರಾದರೂ ತಂದೆ-ತಾಯಿ ತಮಗೆ ಧೈರ್ಯ, ಆತ್ಮವಿಶ್ವಾಸ ಮತ್ತು ಜೀವನವನ್ನು ಎದುರಿಸುವ ಶಕ್ತಿಯನ್ನು ಕಲಿಸಿದ್ದಾರೆ ಎಂದು ಮಲ್ಹಾರ್ ನೆನಪಿಸಿಕೊಂಡಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ಕುಟುಂಬದವರು ಒಟ್ಟಿಗೆ ಇರುವ ಫೋಟೋಗಳನ್ನು ಹಂಚಿಕೊಳ್ಳದ ಮಾತ್ರಕ್ಕೆ ಅವರ ನಡುವೆ ಪ್ರೀತಿ ಇಲ್ಲ ಎಂದು ಭಾವಿಸುವುದು ಸರಿಯಲ್ಲ ಎಂಬುದು ಮಲ್ಹಾರ್ ಅಭಿಪ್ರಾಯ. ತಂದೆ-ತಾಯಿ ಪ್ರತ್ಯೇಕವಾಗಿ ವಾಸಿಸುತ್ತಿದ್ದರೂ ಪರಸ್ಪರ ಉತ್ತಮ ಸಂಬಂಧ ಹೊಂದಿದ್ದರು. ಕುಟುಂಬದ ವೈಯಕ್ತಿಕ ವಿಚಾರಗಳ ಸಂಪೂರ್ಣ ಮಾಹಿತಿ ಹೊರಗಿನವರಿಗೆ ತಿಳಿದಿರುವುದಿಲ್ಲ. ಹೀಗಾಗಿ ಊಹಾಪೋಹಗಳ ಆಧಾರದಲ್ಲಿ ಸಂಬಂಧಗಳ ಬಗ್ಗೆ ತೀರ್ಪು ನೀಡಬಾರದು ಎಂದು ಅವರು ಹೇಳಿದ್ದಾರೆ.

ನಾನಾ ಪಾಟೇಕರ್ ಅವರ ಕೊನೆಯ ದಿನಗಳಲ್ಲಿ ಅವರು ಒಂಟಿಯಾಗಿದ್ದರು ಎಂಬ ಸುದ್ದಿಗಳನ್ನೂ ಮಲ್ಹಾರ್ ನಿರಾಕರಿಸಿದ್ದಾರೆ. ಗೋವಾದಲ್ಲಿದ್ದ ತಂದೆಯನ್ನು ಮುಂಬೈಗೆ ಕಳುಹಿಸುವ ವ್ಯವಸ್ಥೆಯನ್ನು ಸಂಬಂಧಿ ಪ್ರಸಾದ್ ನಾನಾ ಮಾಡಿದ್ದರು. ಮರುದಿನ ಮಾಧುರಿ ದೀಕ್ಷಿತ್ ಅವರೊಂದಿಗೆ ಕೆಬಿಸಿ ಮರಾಠಿ ಕಾರ್ಯಕ್ರಮದ ಚಿತ್ರೀಕರಣ ನಿಗದಿಯಾಗಿದ್ದ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿತ್ತು ಎಂದು ವಿವರಿಸಿದ್ದಾರೆ.

ತಂದೆಯ ನಿಧನದ ಸುದ್ದಿ ತಿಳಿದ ಕ್ಷಣವನ್ನು ನೆನಪಿಸಿಕೊಂಡ ಮಲ್ಹಾರ್, ತಾವು ಪುಣೆಯಲ್ಲಿದ್ದಾಗ ಬೆಳಗಿನ ಜಾವ ಸುಮಾರು ಐದು ಗಂಟೆಗೆ ತಾಯಿ ಕರೆ ಮಾಡಿ ವಿಷಯ ತಿಳಿಸಿದರು ಎಂದಿದ್ದಾರೆ. ಆ ಕ್ಷಣದಲ್ಲಿ ಇಡೀ ಜಗತ್ತೇ ಸ್ತಬ್ಧವಾದ ಅನುಭವವಾಯಿತು ಎಂದು ದುಃಖ ಹಂಚಿಕೊಂಡಿದ್ದಾರೆ.

ಇನ್ನು 75ನೇ ವಯಸ್ಸಿನಲ್ಲಿಯೂ ನಾನಾ ಪಾಟೇಕರ್ ಪ್ರತಿದಿನ ಸುಮಾರು ಎರಡೂವರೆ ಗಂಟೆಗಳ ಕಾಲ ಜಿಮ್‌ನಲ್ಲಿ ವ್ಯಾಯಾಮ ಮಾಡುತ್ತಿದ್ದರು. ಒಂದೇ ರೀತಿಯ ಪಾತ್ರಗಳಿಗೆ ಸೀಮಿತವಾಗದೆ ಹೊಸ ಕಥೆಗಳಲ್ಲಿ ನಟಿಸುವ ಆಸೆ ಅವರಿಗಿತ್ತು. ಜೊತೆಗೆ ರೈತರ ನೆರವು ಮತ್ತು ಕಾಶ್ಮೀರದ ಶಿಕ್ಷಣ ಯೋಜನೆಗಳಲ್ಲಿಯೂ ಅವರು ಸಕ್ರಿಯರಾಗಿದ್ದರು ಎಂದು ಮಲ್ಹಾರ್ ತಿಳಿಸಿದ್ದಾರೆ.

ನಾನಾ ಪಾಟೇಕರ್ ವಿರುದ್ಧ ಮೀ-ಟೂ ಎಂದ ತನುಶ್ರೀ ದತ್ತಾ! ಪುತ್ರ ಕಿಡಿ; ಅಪ್ಪನ ಸಾವಿನ ಸಂದೇಹಕ್ಕೆ ಮಗ ಮೌನವೇಕೆ

Suchethana D — Sat, 17 Oct 2026 16:20:32 +0530

ಹಿರಿಯ ನಟ ನಾನಾ ಪಾಟೇಕರ್ ಅವರ ನಿಧನದ ಬಳಿಕ ನಟಿ ತನುಶ್ರೀ ದತ್ತಾ ಸದ್ದು ಮಾಡುತ್ತಿದ್ದಾರೆ. ನಟ ನಾನಾ ಪಾಟೇಕರ್ ಸತ್ತಿಲ್ಲ. ಅವರು ಬದುಕಿದ್ದಾರೆ. ಸುಟ್ಟಿದ್ದು ಅವರ ಶವವಲ್ಲ, ಡಿಎನ್ಎ ಪರೀಕ್ಷೆ ಮಾಡಿಸಬೇಕು ಎಂದು ತನುಶ್ರೀ ದತ್ತಾ ಹೇಳುತ್ತಿದ್ದಾರೆ. ಹಿಂದೂ ಸಂಸ್ಕೃತಿ ವಿರುದ್ಧವಾಗಿ ಮಧ್ಯರಾತ್ರಿ ಶವ ಸಂಸ್ಕಾರ ಮಾಡಲಾಗಿದೆ. ಶವವನ್ನು ಬಾಲಿವುಡ್ನ ಯಾರಿಗೂ ತೋರಿಸಿಲ್ಲ, ಪ್ರಾರ್ಥನೆಗೂ ಅವಕಾಶ ಕಲ್ಪಿಸಲಿಲ್ಲ ಎನ್ನುವುದು ತನುಶ್ರೀ ಆರೋಪ. ಆದರೆ ಇದೇ ನಟಿ ತನುಶ್ರೀ ದತ್ತಾ ಅವರು ನಾನಾ ಪಾಟೇಕರ್ ವಿರುದ್ಧ ಲೈಂ*ಗಿಕ ದೌರ್ಜನ್ಯದ ಕೇಸ್ ದಾಖಲು ಮಾಡಿದ್ದರು! ಅವರ ಸಾವಿನ ಬಳಿಕವೂ ನಟಿ ಇದೇ ವಿಷಯವನ್ನು ಪ್ರಸ್ತಾಪಿಸಿದ್ದರು. ನಾನು ಅವರಿಗೆ ತುಂಬಾ ಹಿಂಸೆ ಅನುಭವಿಸಿದ್ದೆ ಎಂದು 2008ರಲ್ಲಿ ನಡೆದ ಘಟನೆಯನ್ನು ತನುಶ್ರೀ ದತ್ತಾ ವಿವರಿಸಿದ್ದರು.

ಮೀ ಟೂ ಆರೋಪ- ಅಂದು ಆಗಿದ್ದೇನು?

ನಟಿ ಮತ್ತು ಮಾಜಿ 'ಮಿಸ್ ಇಂಡಿಯಾ ಯೂನಿವರ್ಸ್' ತನುಶ್ರೀ ದತ್ತಾ, 2009ರ 'ಹಾರ್ನ್ 'ಓಕೆ' ಪ್ಲೀಸ್' (Horn 'Ok' Pleassss) ಚಿತ್ರದ ಚಿತ್ರೀಕರಣದ ವೇಳೆ ನಾನಾ ಪಾಟೇಕರ್ ತಮಗೆ ಲೈಂಗಿಕ ಕಿರುಕುಳ ನೀಡಿದ್ದಾರೆ ಮತ್ತು ಬೆದರಿಸಿದ್ದಾರೆ ಎಂದು ಆರೋಪಿಸಿದ್ದರು. 2018ರಲ್ಲಿ ಅವರು ಮಾಡಿದ ಈ ಆರೋಪಗಳು, ಭಾರತದ '#MeToo' ಚಳವಳಿಯಲ್ಲಿ ಮುನ್ನೆಲೆಯಲ್ಲಿ ಇತ್ತು. ನಾನಾ ಪಾಟೇಕರ್ ಈ ಆರೋಪಗಳನ್ನು ನಿರಾಕರಿಸಿದರು. 2018ರಲ್ಲಿ ನಟನ ವಿರುದ್ಧ ಎಫ್‌ಐಆರ್ ದಾಖಲಿಸಲಾಗಿತ್ತು. ಆದರೆ, ಸಾಕ್ಷ್ಯಾಧಾರಗಳ ಕೊರತೆಯಿಂದಾಗಿ 2019ರಲ್ಲಿ ಈ ಪ್ರಕರಣವನ್ನು ಮುಕ್ತಾಯಗೊಳಿಸಲಾಯಿತು.

ಇದೀಗ ತನುಶ್ರೀ ಅವರ ಆರೋಪಕ್ಕೆ ಪ್ರತಿಕ್ರಿಯೆ ನೀಡಿರುವ ನಾನಾ ಪಾಟೇಕರ್ ಪುತ್ರ, ಪುತ್ರ ಮಲ್ಹಾರ್ ಪಾಟೇಕರ್ ಕಿಡಿ ಕಾರಿದ್ದಾರೆ. ಈ ವಿಷಯವು ಕಾನೂನುಬದ್ಧವಾಗಿ ಬಗೆಹರಿದಿದೆ. ಇದನ್ನೇಕೆ ಮತ್ತೆ ಮುನ್ನೆಲೆಗೆ ತರಲಾಗುತ್ತಿದೆ ಎಂದು ಪ್ರಶ್ನಿಸಿದ್ದಾರೆ. ನುಶ್ರೀ ದತ್ತಾ ಅವರು ಆರೋಪಗಳು ಬೆಳಕಿಗೆ ಬಂದಾಗಿನಿಂದಲೂ ತಮಗೆ ಬೆದರಿಕೆ ಸೇರಿದಂತೆ ಹಲವು ರೀತಿಯ ತೊಂದರೆಗಳು ಎದುರಾಗಿವೆ ಎಂದು ಹೇಳಿಕೊಂಡಿದ್ದಾರೆ. 'ಯಾರ ಹೆಸರನ್ನೂ ಪ್ರಸ್ತಾಪಿಸದೆ ನಾನು ಹೇಳುವುದೇನೆಂದರೆ, ಜನರು ಅನಗತ್ಯವಾಗಿ ಎತ್ತುತ್ತಿರುವ ಪ್ರಕರಣವು ಈಗಾಗಲೇ ಮುಗಿದುಹೋಗಿದೆ. ನ್ಯಾಯಾಂಗವು ಅವರಿಗೆ ಕ್ಲೀನ್ ಚಿಟ್ ನೀಡಿದೆ, ಪ್ರಕರಣ ಮುಗಿದಿದೆ, ಆದರೂ ಜನರು ಇನ್ನೂ ಮಾತನಾಡುತ್ತಲೇ ಇದ್ದಾರೆ. ಅಂತಹ ಜನರಿಗೆ ನಾನು ಏನನ್ನೂ ಹೇಳುವುದಿಲ್ಲ; ದೇವರು ಅವರಿಗೆ ಒಳ್ಳೆಯದನ್ನು ಮಾಡಲಿ' ಎಂದಿದ್ದಾರೆ.

ಆದರೆ ಸಾವಿನ ಬಗ್ಗೆ ಮಗನ ಪ್ರತಿಕ್ರಿಯೆ ಬಂದಿಲ್ಲ!

ಆದರೆ ಕುತೂಹಲದ ವಿಷ್ಯ ಏನೆಂದರೆ, ನಾನಾ ಪಾಟೇಕರ್ ಅವರು ಸತ್ತಿಲ್ಲ ಎಂದು ಒಂದಷ್ಟು ಘಟನೆಗಳನ್ನು ತನುಶ್ರೀ ದತ್ತಾ ಹೇಳುತ್ತಿದ್ದರೂ, ಮಗ ಈ ಬಗ್ಗೆ ಯಾವುದೇ ಪ್ರತಿಕ್ರಿಯೆ ನೀಡಲಿಲ್ಲ. ತನುಶ್ರೀ ಕೆಲವೊಂದುಪ್ರಶ್ನೆಗಳನ್ನು ಎತ್ತಿದ್ದು, ಅದಕ್ಕೆ ಉತ್ತರ ಸಿಗಲಿ ಎನ್ನುವುದು ನಾನಾ ಪಾಟೇಕರ್ ಅಭಿಮಾನಿಗಳ ಆಸೆಯಾಗಿದೆ.

ಬಾಯ್‌ಫ್ರೆಂಡ್ ಜೊತೆ ಮದುವೆಗೆ ಸಿದ್ಧಳಾಗಿದ್ದ ಯುವತಿ; ತಾಯಿಯ ಒಂದೇ ಒಂದು ಮಾತಿನಿಂದ ಬದಲಾಯ್ತು ನಿರ್ಧಾರ!

Chandrashekar GS — Thu, 15 Oct 2026 13:04:55 +0530

ಕೆಲವೇ ತಿಂಗಳ ಪ್ರೀತಿ, ಮದುವೆಯ ನಿರ್ಧಾರ! ಬೆಂಗಳೂರಿನ ಯುವತಿಗೆ ತಾಯಿ ನೀಡಿದ ಸಲಹೆಯಿಂದ ಶುರುವಾಯ್ತು ಗೊಂದಲ

ಪ್ರೀತಿಯೇ ಮದುವೆಗೆ ಸಾಕೇ?

ಮದುವೆ ಎನ್ನುವುದು ಜೀವನದ ಮಹತ್ವದ ನಿರ್ಧಾರ. ಪ್ರೀತಿ, ಹೊಂದಾಣಿಕೆ, ಕುಟುಂಬದ ಒಪ್ಪಿಗೆ ಹಾಗೂ ಭವಿಷ್ಯದ ಯೋಜನೆಗಳು ಈ ನಿರ್ಧಾರದಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಆದರೆ ಕೆಲವೊಮ್ಮೆ ಪ್ರೀತಿಯಲ್ಲಿರುವಾಗ ಕಾಣದ ಕೆಲವು ಪ್ರಶ್ನೆಗಳು ಮದುವೆಯ ನಿರ್ಧಾರ ತೆಗೆದುಕೊಳ್ಳುವ ಸಮಯದಲ್ಲಿ ಎದುರಾಗುತ್ತವೆ. ಬೆಂಗಳೂರಿನ 27 ವರ್ಷದ ಯುವತಿಯೊಬ್ಬಳ ಅನುಭವ ಈಗ ಇದೇ ಕಾರಣಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಯಾಗುತ್ತಿದೆ.

ಪ್ರಮುಖ ತಂತ್ರಜ್ಞಾನ ಕಂಪನಿಯಲ್ಲಿ ಕೆಲಸ ಮಾಡುತ್ತಿರುವ ಈ ಯುವತಿ, ತನ್ನದೇ ಕಂಪನಿಯಲ್ಲಿ ಕೆಲಸ ಮಾಡುವ 30 ವರ್ಷದ ಯುವಕನನ್ನು ಪ್ರೀತಿಸುತ್ತಿದ್ದಾಳೆ. ಇಬ್ಬರೂ ಬೇರೆ ತಂಡಗಳಲ್ಲಿ ಕೆಲಸ ಮಾಡುತ್ತಿದ್ದು, ಕೆಲವೇ ತಿಂಗಳುಗಳ ಕಾಲ ಡೇಟಿಂಗ್ ಮಾಡಿದ ಬಳಿಕ ಮದುವೆಯಾಗುವ ಬಗ್ಗೆ ನಿರ್ಧರಿಸಿದ್ದರು ಎಂದು ವರದಿಯಾಗಿದೆ.

ತಾಯಿಯ ಸಲಹೆಯಿಂದ ಹೆಚ್ಚಾದ ಗೊಂದಲ

ಯುವತಿ ದಕ್ಷಿಣ ಭಾರತದ ಹಿನ್ನೆಲೆಯವಳಾಗಿದ್ದು, ಆಕೆಯ ಪ್ರಿಯಕರ ಬಿಹಾರ ಮೂಲದವನು. ಇಬ್ಬರ ಕುಟುಂಬದವರೂ ಪರಸ್ಪರ ಭೇಟಿಯಾಗಿದ್ದು, ಮದುವೆಗೆ ಒಪ್ಪಿಗೆ ಸೂಚಿಸಿದಂತೆ ಕಂಡುಬಂದಿದೆ. ಆದರೆ ಯುವತಿಯ ತಾಯಿಗೆ ಈ ಸಂಬಂಧದ ಬಗ್ಗೆ ಕೆಲವು ಆತಂಕಗಳಿದ್ದವು.

ಬೇರೆ ಭಾಷೆ, ಸಂಸ್ಕೃತಿ ಮತ್ತು ಜೀವನಶೈಲಿಯ ಕಾರಣದಿಂದ ಭವಿಷ್ಯದಲ್ಲಿ ಸಮಸ್ಯೆಗಳು ಎದುರಾಗಬಹುದು ಎಂದು ತಾಯಿ ಎಚ್ಚರಿಸಿದ್ದರಂತೆ. ಉದ್ಯೋಗದ ಕಾರಣದಿಂದ ಮುಂದೆ ಬೇರೆ ಊರಿಗೆ ಸ್ಥಳಾಂತರವಾಗಬೇಕಾದ ಪರಿಸ್ಥಿತಿ ಬಂದರೆ, ಯುವತಿ ತನ್ನ ಪರಿಚಿತ ವಾತಾವರಣವನ್ನು ಬಿಟ್ಟು ಹೊಸ ಭಾಷೆ ಮತ್ತು ಸಂಸ್ಕೃತಿಗೆ ಹೊಂದಿಕೊಳ್ಳಬೇಕಾಗಬಹುದು ಎಂಬುದು ಅವರ ಮುಖ್ಯ ಕಳವಳವಾಗಿತ್ತು.

ತಾಯಿಯ ಮಾತುಗಳು ಯುವತಿಯನ್ನು ತನ್ನ ನಿರ್ಧಾರದ ಬಗ್ಗೆ ಮತ್ತೊಮ್ಮೆ ಯೋಚಿಸುವಂತೆ ಮಾಡಿವೆ. ತನ್ನ ಪ್ರಿಯಕರನೊಂದಿಗೆ ಮಾತನಾಡಲು ಸುಲಭವಾಗುತ್ತದೆ ಮತ್ತು ಆತನೊಂದಿಗೆ ಸುರಕ್ಷಿತ ಭಾವನೆ ಮೂಡುತ್ತದೆ ಎಂದು ಆಕೆ ಹೇಳಿಕೊಂಡಿದ್ದಾಳೆ. ಆದರೆ ಆತನನ್ನು ಆಳವಾಗಿ ಪ್ರೀತಿಸುತ್ತಿದ್ದೇನೆಯೇ ಎಂಬ ಬಗ್ಗೆ ತನಗೇ ಸ್ಪಷ್ಟತೆ ಇಲ್ಲ ಎಂದು ಒಪ್ಪಿಕೊಂಡಿದ್ದಾಳೆ.

ರೆಡ್ಡಿಟ್‌ನಲ್ಲಿ ವಿಭಿನ್ನ ಅಭಿಪ್ರಾಯಗಳು

ಈ ವಿಚಾರವನ್ನು ಯುವತಿ ರೆಡ್ಡಿಟ್‌ನಲ್ಲಿ ಹಂಚಿಕೊಂಡ ಬಳಿಕ ಅನೇಕರು ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದಾರೆ. ಕೆಲವರು ಕೆಲವೇ ತಿಂಗಳ ಪರಿಚಯದ ನಂತರ ಮದುವೆಯ ನಿರ್ಧಾರಕ್ಕೆ ಧಾವಿಸುವುದು ಸರಿಯಲ್ಲ ಎಂದಿದ್ದಾರೆ. ಪ್ರೀತಿಯ ಬಗ್ಗೆ ಸ್ಪಷ್ಟತೆ ಇಲ್ಲದಿದ್ದರೆ ಮದುವೆಯನ್ನು ಮುಂದೂಡುವುದು ಉತ್ತಮ ಎಂಬ ಸಲಹೆಯನ್ನೂ ನೀಡಿದ್ದಾರೆ.

ಇನ್ನೂ ಕೆಲವರು ತಾಯಿಯ ಆತಂಕವನ್ನೇ ಅಂತಿಮ ನಿರ್ಧಾರಕ್ಕೆ ಆಧಾರವಾಗಿಸಿಕೊಳ್ಳಬಾರದು ಎಂದು ಹೇಳಿದ್ದಾರೆ. ಪ್ರಿಯಕರನ ಕುಟುಂಬ, ಜೀವನಶೈಲಿ, ಭವಿಷ್ಯದ ಯೋಜನೆಗಳು ಮತ್ತು ಪರಸ್ಪರ ನಿರೀಕ್ಷೆಗಳನ್ನು ಚೆನ್ನಾಗಿ ತಿಳಿದುಕೊಂಡ ನಂತರವೇ ನಿರ್ಧಾರ ತೆಗೆದುಕೊಳ್ಳಬೇಕು ಎಂಬ ಅಭಿಪ್ರಾಯವೂ ವ್ಯಕ್ತವಾಗಿದೆ.

ಮದುವೆಗೆ ಮುನ್ನ ಯೋಚಿಸುವುದು ಮುಖ್ಯ

ಪ್ರೀತಿವಿವಾಹವಾಗಲಿ ಅಥವಾ ನಿಶ್ಚಿತಾರ್ಥದ ಮೂಲಕ ನಡೆಯುವ ಮದುವೆಯಾಗಲಿ, ಇಬ್ಬರ ನಡುವೆ ನಂಬಿಕೆ, ಗೌರವ ಮತ್ತು ಮುಕ್ತ ಸಂಭಾಷಣೆ ಅಗತ್ಯ. ಭಾಷೆ ಹಾಗೂ ಸಂಸ್ಕೃತಿಯ ವ್ಯತ್ಯಾಸಗಳು ಸವಾಲಾಗಬಹುದು; ಆದರೆ ಪರಸ್ಪರ ಹೊಂದಾಣಿಕೆ ಮತ್ತು ಸಹಕಾರದಿಂದ ಅವುಗಳನ್ನು ನಿಭಾಯಿಸಲು ಸಾಧ್ಯ.

ಅಂತಿಮವಾಗಿ, ಮದುವೆಯ ನಿರ್ಧಾರವನ್ನು ಆತುರದಲ್ಲಿ ಅಥವಾ ಇತರರ ಒತ್ತಡದಲ್ಲಿ ತೆಗೆದುಕೊಳ್ಳದೆ, ತಮ್ಮ ಭಾವನೆಗಳು ಮತ್ತು ಭವಿಷ್ಯದ ನಿರೀಕ್ಷೆಗಳನ್ನು ಅರ್ಥಮಾಡಿಕೊಂಡು ನಿರ್ಧರಿಸುವುದು ಮುಖ್ಯ ಎಂಬ ಚರ್ಚೆಗೆ ಈ ಘಟನೆ ಕಾರಣವಾಗಿದೆ.

ಪ್ರೇಯಸಿಯನ್ನು ಭೇಟಿಯಾಗಲು 2,000 ಕಿ.ಮೀ ಪ್ರಯಾಣ, ಆಸ್ತಿ ಮಾರಿ ಹೋದ 49ರ ವ್ಯಕ್ತಿಗೆ ಕಾದಿತ್ತು ಶಾಕ್!

Chandrashekar GS — Mon, 19 Oct 2026 11:13:21 +0530

ಪ್ರೀತಿಸಿದವಳನ್ನು ಭೇಟಿಯಾಗಲು 2,000 ಕಿ.ಮೀ ಪ್ರಯಾಣ! ಕೊನೆಗೆ ಆಕೆ AI ಸೃಷ್ಟಿಸಿದ ಪಾತ್ರ ಎಂದು ತಿಳಿದು ಆಘಾತ

ಪ್ರೀತಿ ಮತ್ತು ಹೊಸ ಜೀವನದ ಕನಸು ಕಂಡ 49 ವರ್ಷದ ವ್ಯಕ್ತಿಯೊಬ್ಬರು, ತಾವು ಪ್ರೀತಿಸುತ್ತಿದ್ದ ಮಹಿಳೆಯನ್ನು ಭೇಟಿಯಾಗಲು ಸುಮಾರು 2,000 ಕಿಲೋಮೀಟರ್ ಪ್ರಯಾಣಿಸಿದ್ದಾರೆ. ಆದರೆ ಗಮ್ಯಸ್ಥಾನ ತಲುಪಿದಾಗ ಅವರಿಗೆ ಕಾದಿದ್ದು ದೊಡ್ಡ ಆಘಾತ. ಆನ್‌ಲೈನ್‌ನಲ್ಲಿ ತಾವು ಪ್ರೀತಿಸಿದ್ದ ಮಹಿಳೆ ನಿಜವಾದ ವ್ಯಕ್ತಿಯಲ್ಲ, ಕೃತಕ ಬುದ್ಧಿಮತ್ತೆ (AI) ಬಳಸಿ ಸೃಷ್ಟಿಸಿದ ಪಾತ್ರ ಎಂಬುದು ಅವರಿಗೆ ತಿಳಿದುಬಂದಿದೆ.

ತಾಯಿಯ ನಿಧನದ ಬಳಿಕ ಕಾಡಿದ ಒಂಟಿತನ

ಬ್ರೆಜಿಲ್‌ನ ಇಟ್ಟಿಗೆ ಕೆಲಸಗಾರ ಎಡಿಮಾರ್ ರೋಚಾ ಮಾರ್ಟಿನ್ಸ್ ಅವರಿಗೆ 49 ವರ್ಷ. ತಾಯಿಯ ನಿಧನದ ಬಳಿಕ ಅವರು ಒಂಟಿತನ ಅನುಭವಿಸುತ್ತಿದ್ದರು. ಈ ಸಂದರ್ಭದಲ್ಲಿ ಸಾಮಾಜಿಕ ಜಾಲತಾಣದಲ್ಲಿ ‘ಜೆಸಿಕಾ ಒಲಿವೇರಾ’ ಎಂಬ ಹೆಸರಿನ ಮಹಿಳೆಯ ಖಾತೆಯನ್ನು ಕಂಡಿದ್ದರು. ಆ ಖಾತೆಯಲ್ಲಿ ಗ್ರಾಮೀಣ ಜೀವನಕ್ಕೆ ಸಂಬಂಧಿಸಿದ ವಿಡಿಯೋಗಳು ಪ್ರಕಟವಾಗುತ್ತಿದ್ದವು.

ಆ ಮಹಿಳೆಯೇ ತಮ್ಮ ಜೀವನ ಸಂಗಾತಿಯಾಗಬಹುದು ಎಂದು ಅವರು ನಂಬಿದ್ದರು. ಒಟ್ಟಿಗೆ ವಾಸಿಸುವುದು, ಮನೆ ಮತ್ತು ಆರ್ಥಿಕ ನೆರವು ದೊರೆಯಬಹುದು ಎಂಬ ಭರವಸೆಯೂ ಅವರ ನಿರೀಕ್ಷೆಯನ್ನು ಹೆಚ್ಚಿಸಿತ್ತು ಎಂದು ವರದಿಗಳು ತಿಳಿಸಿವೆ.

ಎಲ್ಲವನ್ನೂ ಮಾರಿ 2,000 ಕಿ.ಮೀ ಪ್ರಯಾಣ

ಮಹಿಳೆಯನ್ನು ನೇರವಾಗಿ ಭೇಟಿಯಾಗಿ ಹೊಸ ಜೀವನ ಆರಂಭಿಸಬೇಕೆಂಬ ಆಸೆಯಿಂದ ಮಾರ್ಟಿನ್ಸ್ ತಮ್ಮಲ್ಲಿದ್ದ ವಸ್ತುಗಳನ್ನು ಮಾರಾಟ ಮಾಡಿ ಪ್ರಯಾಣಕ್ಕೆ ಹೊರಟರು. ಉತ್ತರ ಬ್ರೆಜಿಲ್‌ನ ಇಂಪೆರಾಟ್ರಿಜ್ ನಗರದಿಂದ ಬೆಲೊ ಹೋರಿಜಾಂಟೆ ನಗರಕ್ಕೆ ಬಸ್‌ನಲ್ಲಿ ಸುಮಾರು 2,000 ಕಿಲೋಮೀಟರ್ ಪ್ರಯಾಣಿಸಿದರು. ಈ ಪ್ರಯಾಣಕ್ಕೆ 36 ಗಂಟೆಗೂ ಹೆಚ್ಚು ಸಮಯ ಬೇಕಾಯಿತು ಎಂದು ವರದಿಯಾಗಿದೆ.

ಅಕ್ಟೋಬರ್ 11ರಂದು ಅಲ್ಲಿಗೆ ತಲುಪಿದ ಬಳಿಕ, ಮಹಿಳೆಯ ಫೋಟೋ ಹಿಡಿದು ಆಕೆಯ ಬಗ್ಗೆ ಸ್ಥಳೀಯರನ್ನು ವಿಚಾರಿಸಿದರು. ಆದರೆ ಯಾರಿಗೂ ಆಕೆಯ ಪರಿಚಯವಿರಲಿಲ್ಲ. ಆಕೆ ಎಲ್ಲಿ ವಾಸಿಸುತ್ತಾಳೆ ಎಂಬ ಮಾಹಿತಿಯೂ ಸಿಗಲಿಲ್ಲ.

ಕೊನೆಗೆ ತಿಳಿಯಿತು ಆಘಾತಕಾರಿ ಸತ್ಯ

ತಾವು ಭೇಟಿಯಾಗಲು ಬಂದಿದ್ದ ಮಹಿಳೆ ನಿಜ ಜೀವನದಲ್ಲಿ ಅಸ್ತಿತ್ವದಲ್ಲಿಲ್ಲ ಎಂಬುದು ನಂತರ ಅವರಿಗೆ ತಿಳಿಯಿತು. ಆಕೆಯ ಸಾಮಾಜಿಕ ಜಾಲತಾಣದ ವ್ಯಕ್ತಿತ್ವವನ್ನು AI ಬಳಸಿ ಸೃಷ್ಟಿಸಲಾಗಿತ್ತು ಎಂದು ವರದಿಗಳು ಹೇಳಿವೆ. ಖಾತೆಯನ್ನು ನಿರ್ವಹಿಸುತ್ತಿದ್ದ ವ್ಯಕ್ತಿಯೂ AI ಬಳಸಿ ಆ ಪಾತ್ರವನ್ನು ರೂಪಿಸಿದ್ದಾಗಿ ಒಪ್ಪಿಕೊಂಡಿದ್ದಾರೆ ಎಂದು ವರದಿಯಾಗಿದೆ.

ಪ್ರಯಾಣಕ್ಕಾಗಿ ತಮ್ಮ ಹಣವನ್ನೆಲ್ಲ ಖರ್ಚು ಮಾಡಿದ್ದರಿಂದ ಮಾರ್ಟಿನ್ಸ್ ಸಂಕಷ್ಟಕ್ಕೆ ಸಿಲುಕಿದರು. ಊರಿಗೆ ಮರಳಲು ಸಹಾಯದ ಅಗತ್ಯವೂ ಉಂಟಾಯಿತು.

AI ಯುಗದಲ್ಲಿ ಆನ್‌ಲೈನ್ ಪ್ರೀತಿಯ ಬಗ್ಗೆ ಎಚ್ಚರಿಕೆ ಅಗತ್ಯ

ಈ ಘಟನೆ ಆನ್‌ಲೈನ್‌ನಲ್ಲಿ ಪರಿಚಯವಾಗುವವರ ಗುರುತನ್ನು ಪರಿಶೀಲಿಸುವುದು ಎಷ್ಟು ಮುಖ್ಯ ಎಂಬುದನ್ನು ನೆನಪಿಸುತ್ತದೆ. ಸುಂದರವಾದ ಚಿತ್ರಗಳು ಮತ್ತು ಭಾವನಾತ್ಮಕ ಸಂದೇಶಗಳು ಮಾತ್ರ ವ್ಯಕ್ತಿಯ ನೈಜ ಗುರುತಿಗೆ ಸಾಕ್ಷಿಯಲ್ಲ. ಹಣ ಖರ್ಚು ಮಾಡುವ ಅಥವಾ ದೂರ ಪ್ರಯಾಣಿಸುವ ಮೊದಲು ವಿಡಿಯೋ ಕರೆ, ವಿಶ್ವಾಸಾರ್ಹ ಮಾಹಿತಿಯ ಪರಿಶೀಲನೆ ಮತ್ತು ಸ್ವತಂತ್ರ ದೃಢೀಕರಣಕ್ಕೆ ಆದ್ಯತೆ ನೀಡಬೇಕು.

ತಂತ್ರಜ್ಞಾನವು ಹೊಸ ಸಂಪರ್ಕಗಳಿಗೆ ಅವಕಾಶ ನೀಡಿದರೂ, ಅದರ ದುರುಪಯೋಗದಿಂದ ಭಾವನಾತ್ಮಕ ಹಾಗೂ ಆರ್ಥಿಕ ನಷ್ಟ ಉಂಟಾಗಬಹುದು ಎಂಬುದಕ್ಕೆ ಈ ಘಟನೆ ಉದಾಹರಣೆಯಾಗಿದೆ.

EX LOVER: ಗುಂಡಿನ ದಾಳಿ ಬೆನ್ನಲ್ಲೇ ಟೈಗರ್ ಶ್ರಾಫ್ ಮನೆಗೆ ಓಡೋಡಿ ಬಂದ ಮಾಜಿ ಲವರ್ ದಿಶಾ ಪಟಾನಿ ಮಾಡಿದ್ದೇನು?

Shriram Bhat — Mon, 19 Oct 2026 18:55:34 +0530

ಗುಂಡಿನ ದಾಳಿಯ ಬಳಿಕ ಮಾಜಿ ಪ್ರಿಯಕರ ಟೈಗರ್ ಶ್ರಾಫ್ ಮನೆಗೆ ದೌಡಾಯಿಸಿದ ದಿಶಾ ಪಟಾಣಿ!

ಬಾಲಿವುಡ್ ನಟ ಟೈಗರ್ ಶ್ರಾಫ್ (Tiger Shroff) ಅವರ ಮುಂಬೈನ ಜುಹು ನಿವಾಸದ ಸಮೀಪ ನಡೆದ ಗುಂಡಿನ ದಾಳಿ ಚಿತ್ರರಂಗದಲ್ಲಿ ಆತಂಕ ಮೂಡಿಸಿದೆ. ಈ ಘಟನೆ ತಿಳಿಯುತ್ತಿದ್ದಂತೆ ನಟಿ ದಿಶಾ (Disha Patani) ಪಟಾಣಿ ತಕ್ಷಣವೇ ಟೈಗರ್ ಅವರ ಮನೆಗೆ ಭೇಟಿ ನೀಡಿ ಸಾಂತ್ವನ ಹೇಳಿದ್ದಾರೆ ಎನ್ನಲಾಗಿದೆ. ಪಾಪರಾಜಿಗಳ ಕ್ಯಾಮೆರಾಗಳತ್ತ ಗಮನ ಹರಿಸದೆ, ಗಂಭೀರ ಮುಖಭಾವದೊಂದಿಗೆ ಮನೆಯೊಳಗೆ ತೆರಳುತ್ತಿರುವ ದಿಶಾ ಅವರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಟೈಗರ್ ಕಾರಿನ ಮೇಲೆ ಗುಂಡಿನ ದಾಳಿ

ಭಾನುವಾರ ಸಂಜೆ ಜುಹುವಿನ ಪುಷ್ಪಾ ಪಾರ್ಕ್ ಸಮೀಪದ ಫುಟ್‌ಬಾಲ್ ಕ್ಲಬ್‌ನಿಂದ ಹಿಂದಿರುಗುತ್ತಿದ್ದ ವೇಳೆ ಟೈಗರ್ ಶ್ರಾಫ್ ಅವರ ಕಾರಿನ ಮೇಲೆ ಬೈಕ್‌ನಲ್ಲಿ ಬಂದ ಮೂವರು ದುಷ್ಕರ್ಮಿಗಳು ಗುಂಡು ಹಾರಿಸಿದ್ದಾರೆ ಎಂದು ವರದಿಯಾಗಿದೆ. ಈ ಘಟನೆಯಲ್ಲಿ ಟೈಗರ್ ಯಾವುದೇ ಗುಂಡೇಟಿನ ಗಾಯಗಳಿಲ್ಲದೆ ಪಾರಾಗಿದ್ದಾರೆ. ಆದರೆ, ಅವರ ಚಾಲಕ ಗಾಯಗೊಂಡಿದ್ದು, ಮತ್ತೊಬ್ಬ ಆಟೋರಿಕ್ಷಾ ಚಾಲಕನಿಗೂ ಗಾಯಗಳಾಗಿವೆ ಎನ್ನಲಾಗಿದೆ.

ಚಾಲಕನಿಗೆ ಗಾಯವಾದ ತಕ್ಷಣ ಟೈಗರ್ ಸ್ವತಃ ಕಾರಿನ ಸ್ಟೀರಿಂಗ್ ಹಿಡಿದು ನಾನಾವತಿ ಆಸ್ಪತ್ರೆಗೆ ಕರೆದೊಯ್ದರು ಎಂಬ ವರದಿಗಳು ಈ ಹಿಂದೆ ಗಮನ ಸೆಳೆದಿದ್ದವು. ಗಾಯಾಳುಗಳಿಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.

ಮಾಜಿ ಪ್ರಿಯಕರನಿಗಾಗಿ ಬಂದ ದಿಶಾ ಪಟಾಣಿ!

ಟೈಗರ್ ಶ್ರಾಫ್ ಮತ್ತು ದಿಶಾ ಪಟಾಣಿ ಹಲವು ವರ್ಷಗಳ ಕಾಲ ಪ್ರೀತಿಯಲ್ಲಿದ್ದರು ಎಂಬುದು ಬಾಲಿವುಡ್‌ನಲ್ಲಿ ಬಹುಚರ್ಚಿತ ವಿಚಾರ. ಆದರೆ, 2022ರಲ್ಲಿ ಈ ಜೋಡಿ ಬೇರ್ಪಟ್ಟಿರುವುದಾಗಿ ವರದಿಗಳು ಪ್ರಕಟವಾಗಿದ್ದವು. ಇದೀಗ ಟೈಗರ್ ಅವರ ಮೇಲೆ ದಾಳಿ ನಡೆದ ಸುದ್ದಿ ತಿಳಿದ ಬಳಿಕ ದಿಶಾ ಅವರ ನಿವಾಸಕ್ಕೆ ಭೇಟಿ ನೀಡಿದ್ದಾರೆ ಎನ್ನಲಾದ ಬೆಳವಣಿಗೆ ಅಭಿಮಾನಿಗಳ ಗಮನ ಸೆಳೆದಿದೆ.

ದಿಶಾ ಕಾರಿನಿಂದ ಇಳಿದ ಬಳಿಕ ಪಾಪರಾಜಿಗಳ ಪ್ರಶ್ನೆಗಳಿಗೆ ಪ್ರತಿಕ್ರಿಯಿಸದೆ ನೇರವಾಗಿ ಮನೆಯೊಳಗೆ ತೆರಳಿರುವ ದೃಶ್ಯ ಚರ್ಚೆಗೆ ಕಾರಣವಾಗಿದೆ. ಮಾಜಿ ಪ್ರಿಯಕರನ ಕಷ್ಟದ ಸಮಯದಲ್ಲಿ ದಿಶಾ ಭೇಟಿ ನೀಡಿರುವುದು ಅವರ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ.

ತನಿಖೆ ಚುರುಕುಗೊಳಿಸಿದ ಮುಂಬೈ ಪೊಲೀಸರು

ಘಟನೆಯ ಬಳಿಕ ಮಹಾರಾಷ್ಟ್ರ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್ ಮತ್ತು ಉಪಮುಖ್ಯಮಂತ್ರಿ ಏಕನಾಥ್ ಶಿಂಧೆ ಅವರು ಟೈಗರ್ ಅವರ ಯೋಗಕ್ಷೇಮ ವಿಚಾರಿಸಿದ್ದಾರೆ ಎನ್ನಲಾಗಿದೆ. ಆರೋಪಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ಇದೇ ವೇಳೆ, ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್‌ಗೆ ಸಂಬಂಧ ಹೊಂದಿರುವುದಾಗಿ ಹೇಳಿಕೊಳ್ಳುವ ಕೆಲವರು ಸಾಮಾಜಿಕ ಜಾಲತಾಣಗಳಲ್ಲಿ ದಾಳಿಯ ಹೊಣೆ ಹೊತ್ತಿದ್ದಾರೆ ಎನ್ನಲಾಗಿದೆ. ಅನಿಲ್ ಪಂಡಿತ್ ಮತ್ತು ಹರ್ಮನ್ ಸಂಧು ಅವರ ಹೆಸರുകളും ವರದಿಗಳಲ್ಲಿ ಪ್ರಸ್ತಾಪವಾಗಿವೆ. ಆದರೆ, ದಾಳಿಯ ಹಿಂದಿನ ನಿಖರ ಕಾರಣ ಹಾಗೂ ಆರೋಪಿಗಳ ಪಾತ್ರವನ್ನು ಪೊಲೀಸರು ತನಿಖೆಯ ಮೂಲಕ ದೃಢಪಡಿಸಬೇಕಿದೆ.

ಗುಂಡಿನ ದಾಳಿಯ ಬಳಿಕ ಟೈಗರ್ ಅವರ ಸುರಕ್ಷತೆ ಬಗ್ಗೆ ಅಭಿಮಾನಿಗಳು ಆತಂಕ ವ್ಯಕ್ತಪಡಿಸುತ್ತಿರುವ ನಡುವೆ, ದಿಶಾ ಪಟಾಣಿ ಅವರ ಭೇಟಿ ಈಗ ಬಾಲಿವುಡ್‌ನ ಪ್ರಮುಖ ಚರ್ಚೆಯ ವಿಷಯವಾಗಿದೆ.

ಅಮೆರಿಕ, ಇಟಲಿ, ಫ್ರಾನ್ಸ್ ಎಲ್ಲೇ ಹೋದ್ರೂ ನನ್ನನ್ನು ರಶ್ಮಿಕಾ ಹೀಗೆ ಕುಣಿಸ್ತಾಳೆ: ಆ್ಯಂಕರ್ ಅನುಶ್ರೀ ಎದುರು ಗುಟ್ಟು ರಟ್ಟು

Suchethana D — Thu, 15 Oct 2026 19:48:04 +0530

ನಟಿ ರಶ್ಮಿಕಾ ಮಂದಣ್ಣ ಹಾಗೂ ನಟ ವಿಜಯ್ ದೇವರಕೊಂಡ ಸದ್ಯ ತಮ್ಮ ಮುಂಬರುವ ಸಿನಿಮಾ ‘ರಣಬಾಲಿ’ ಪ್ರಚಾರದಲ್ಲಿ ಬ್ಯುಸಿಯಾಗಿದ್ದಾರೆ. ಇದೀಗ ಸಿನಿಮಾ ಪ್ರಚಾರದ ವೇಳೆ ಅವರು ವಿವಿಧ ಮಾಧ್ಯಮಗಳ ಮುಂದೆ ತಮ್ಮ ಫ್ಯಾಮಿಲಿ ಲೈಫ್ ಅನುಭವ ಹಂಚಿಕೊಳ್ಳುತ್ತಿದ್ದಾರೆ. ತಾವು ಭೇಟಿಯಾದದ್ದು, ಮದುವೆಯಾದ ಮೇಲಿನ ಸಂಬಂಧ ಇತ್ಯಾದಿಗಳ ಬಗ್ಗೆ ಮಾತನಾಡಿದ್ದಾರೆ. ಇದೀಗ ರಶ್ಮಿಕಾ ಮತ್ತು ವಿಜಯ ದೇವರಕೊಂಡ ಅವರು ಮೊದಲ ಬಾರಿಗೆ ಆ್ಯಂಕರ್ ಅನುಶ್ರೀ (Anchor Anushree) ಅವರ ಯುಟ್ಯೂಬ್ ಚಾನೆಲ್ಗೆ ನೀಡಿರುವ ಸಂದರ್ಶನದಲ್ಲಿ ಹಲವಾರು ವಿಷಯಗಳನ್ನು ಹೇಳಿದ್ದಾರೆ. ಇದರಲ್ಲಿ ರಶ್ಮಿಕಾ ಅವರು ಬಹುತೇಕ ಕನ್ನಡದಲ್ಲಿಯೇ ಮಾತನಾಡಿದ್ದು ವಿಶೇಷವಾಗಿದೆ. ವಿಜಯ್ ಕೂಡ ಕೆಲವೊಂದು ಶಬ್ದಗಳನ್ನು ಕನ್ನಡದಲ್ಲಿ ಹೇಳುವ ಮೂಲಕ ಕನ್ನಡಿಗರ ಮನಸ್ಸನ್ನು ಗೆದ್ದಿದ್ದಾರೆ.

ರಶ್ಮಿಕಾ ಕುಣಿಸ್ತಾಳೆ

ಈ ಸಂದರ್ಶನದಲ್ಲಿ ಆ್ಯಂಕರ್ ಅನುಶ್ರೀ ಅವರು ಕೊಡವ ಡಾನ್ಸ್ ಬಗ್ಗೆ ಪ್ರಶ್ನಿಸಿದ್ದಾರೆ. ನೀವು ಕೊಡಗಿನವರಾಗಿರುವ ಕಾರಣ, ಎಲ್ಲಿ ಹೋದರೂ ಕೊಡವ ಡಾನ್ಸ್ ಮಾಡ್ತೀರಾ,ಇದನ್ನು ಪತಿ ವಿಜಯ್ಗೆ ಹೇಳಿಕೊಟ್ಟಿದ್ದೀರಾ ಎಂದು ಪ್ರಶ್ನಿಸಿದಾಗ, ವಿಜಯ್ ಅವರು ಕುಳಿತಲ್ಲಿಯೇ ಡಾನ್ಸ್ ಮಾಡಿಸಿ ತೋರಿಸಿದ್ದಾರೆ. ಅಮೆರಿಕ, ಇಟಲಿ, ಫ್ರಾನ್ಸ್ ಎಲ್ಲೇ ಹೋದ್ರೂ ನನ್ನನ್ನು ಕೊಡವ ಡಾನ್ಸ್ನಲ್ಲಿ ರಶ್ಮಿಕಾ ಕುಣಿಸ್ತಾಳೆ. ಈ ಡಾನ್ಸ್ ಇದ್ದೇ ಇರಬೇಕು. ಅದನ್ನು ನನಗೆ ಚೆನ್ನಾಗಿ ಹೇಳಿಕೊಟ್ಟಿದ್ದಾಳೆ ಎನ್ನುವ ಮೂಲಕ ರಶ್ಮಿಕಾರ ಕರ್ನಾಟಕದ ಪ್ರೀತಿಯನ್ನು ತಿಳಿಸಿದ್ದಾರೆ.

ಇದೇ ಪಾಡ್ಕಾಸ್ಟ್ನಲ್ಲಿ ರಶ್ಮಿಕಾ ಮತ್ತು ವಿಜಯ್ ದೇವರಕೊಂಡ (Rashmika Mandanna and Vijaya Devarakonda) ಹಲವಾರು ವಿಷಯಗಳನ್ನು ಹಂಚಿಕೊಂಡಿದ್ದಾರೆ. ವಿಜಯ್ ದೇವರಕೊಂಡ ಕನ್ನಡದಲ್ಲಿ ಮಾತನಾಡಿದ್ದಾರೆ. ನಮಸ್ಕಾರ ನಿಮಗೆ, ಎಲ್ಲರಿಗೂ ಎನ್ನುತ್ತಲೇ ಮಾತು ಶುರು ಮಾಡಿದ ವಿಜಯ್ ದೇವರಕೊಂಡ ಅನುಶ್ರೀ ಅವರನ್ನು ಹೊಗಳಿದ್ದಾರೆ. ನೀವು ತುಂಬಾ ಮುದ್ದಾಗಿದ್ದೀರಿ ಎಂದಿದ್ದಾರೆ. ಅಷ್ಟೇ ಅಲ್ಲ ಅನುಶ್ರೀ ಕೇಳ್ತಿದ್ದ ಎಲ್ಲ ಕನ್ನಡ ಪ್ರಶ್ನೆಗಳನ್ನು ಅರ್ಥ ಮಾಡ್ಕೊಂಡು ಅದಕ್ಕೆ ಉತ್ತರ ನೀಡುವ ಪ್ರಯತ್ನವನ್ನು ವಿಜಯ್ ದೇವರಕೊಂಡ ಮಾಡಿದ್ದಾರೆ. ಅವರು ಕನ್ನಡದಲ್ಲಿ ಮಾತು ಶುರು ಮಾಡ್ತಿದ್ದಂತೆ ಅನುಶ್ರೀ ಅಚ್ಚರಿ ವ್ಯಕ್ತಪಡಿಸಿದ್ದಾರೆ.

ತಪಸ್ವಿನಿ ಜೊತೆ ಮಾತು

ಪಾಡ್ಕಾಸ್ಟ್ ಸಮಯದಲ್ಲಿ ಪ್ರೇಮದ ಊರಲಿ ನಟಿ ತಪಸ್ವಿನಿ ಜೊತೆ ಫೋನ್ನಲ್ಲಿ ರಶ್ಮಿಕಾ ಮಾತನಾಡಿದ್ದಾರೆ. ಈ ವೇಳೆ ಮೈಸೂರಿಗೆ ಅಥವಾ ಕೊಡಗಿಗೆ ಬಂದಾಗ ಖಂಡಿತವಾಗಿಯೂ ಭೇಟಿಯಾಗುವುದಾಗಿ ರಶ್ಮಿಕಾ ತಪಸ್ವಿನಿಗೆ ಭರವಸೆ ನೀಡಿದ್ದಾರೆ. ಇದರ ನಡುವೆ ತಪಸ್ವಿನಿ ಅಭಿನಯದ ‘ಪ್ರೇಮದ ಊರಲಿ’ ಸಿನಿಮಾ ಕೂಡ ಮಾತಿನ ವಿಷಯವಾಗಿದೆ. ಚಿತ್ರವನ್ನು ವಿಜಯ್ ನೋಡಬೇಕೆಂಬ ಆಸೆಯನ್ನು ವ್ಯಕ್ತಪಡಿಸಿದ್ದಾರೆ. ‘ಸಿನಿಮಾ ನೋಡುತ್ತೇನೆ’ ಎಂದು ಹೇಳಿದಾಗ, ತಪಸ್ವಿನಿ ಚಿತ್ರ ತೆಲುಗಿನಲ್ಲಿ ರಿಲೀಸ್ ಆಗಿದ್ದು ಹೈದರಾಬಾದ್‌ನಲ್ಲಿ ವೀಕ್ಷಿಸಬಹುದು ಎಂದು ತಿಳಿಸಿದ್ದಾರೆ.

Anirudh-Kaviya Marraige: ಅನಿರುದ್ಧ್ ಫಸ್ಟ್‌ ಗರ್ಲ್‌ಫ್ರೆಂಡ್‌ ಗೊತ್ತಲ್ವಾ? 6 ವರ್ಷ ದೊಡ್ಡವಳು.. ಬೇರೆ ಯಾರೆಲ್ಲಾ ಇದಾರೆ 'ಲವ್‌ ಲಿಸ್ಟ್‌'ನಲ್ಲಿ..?

Shriram Bhat — Mon, 19 Oct 2026 15:31:13 +0530

ಕಾವ್ಯ ಮಾರನ್ ಜೊತೆ ಅನಿರುದ್ಧ್ ಮದುವೆ? ಗ್ರೀಸ್‌ನಲ್ಲಿ ಅದ್ಧೂರಿ ವಿವಾಹದ ಸುದ್ದಿ ವೈರಲ್!

ಸಂಗೀತ ನಿರ್ದೇಶಕ ಅನಿರುದ್ಧ್ ರವಿಚಂದರ್ ಹಾಗೂ ಕಾವ್ಯಾ ಮಾರನ್ (Anirudh Ravichander and Kaviya Maran) ಅವರ ಮದುವೆಯ ವಿಚಾರ ಈಗ ಸಿನಿಮಾ ಲೋಕದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ. ಸನ್ ನೆಟ್‌ವರ್ಕ್ ಮುಖ್ಯಸ್ಥ ಕಲಾನಿಧಿ ಮಾರನ್ ಅವರ ಪುತ್ರಿ ಕಾವ್ಯ ಮಾರನ್ ಜೊತೆ ಅನಿರುದ್ಧ್ ಹಸೆಮಣೆ ಏರಲಿದ್ದಾರೆ ಎಂಬ ಸುದ್ದಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಈ ಹಿಂದೆ ಇವರಿಬ್ಬರ ನಡುವೆ ಪ್ರೀತಿಯಿದೆ ಎಂಬ ಮಾತುಗಳು ಕೇಳಿಬಂದಿದ್ದರೂ, ಇದೀಗ ಮದುವೆಯ ಆಹ್ವಾನ ಪತ್ರಿಕೆಗಳ ಫೋಟೋಗಳು ವೈರಲ್ ಆಗಿರುವುದು ಅಭಿಮಾನಿಗಳ ಕುತೂಹಲ ಹೆಚ್ಚಿಸಿದೆ.

ಗ್ರೀಸ್‌ನಲ್ಲಿ ಅದ್ಧೂರಿ ವಿವಾಹ?

ಮೂಲಗಳ ಪ್ರಕಾರ, ಅನಿರುದ್ಧ್ ಮತ್ತು ಕಾವ್ಯ ಮಾರನ್ ಅವರ ವಿವಾಹ ಮುಂದಿನ ತಿಂಗಳು ಗ್ರೀಸ್‌ನಲ್ಲಿ ಅದ್ಧೂರಿಯಾಗಿ ನಡೆಯಲಿದೆ ಎನ್ನಲಾಗಿದೆ. ನವೆಂಬರ್ 21ರಂದು ಚೆನ್ನೈನಲ್ಲಿ ಗಣ್ಯರಿಗಾಗಿ ವಿಶೇಷ ವಿವಾಹ ಆರತಕ್ಷತೆ ಆಯೋಜಿಸಲಾಗುತ್ತದೆ ಎಂಬ ಸುದ್ದಿಯೂ ಹರಿದಾಡುತ್ತಿದೆ. ಆದರೆ ಈ ಮದುವೆಯ ಕುರಿತು ಅಧಿಕೃತ ದೃಢೀಕರಣ ಲಭ್ಯವಾಗುವವರೆಗೆ ಇದನ್ನು ವರದಿಯಾಗಿರುವ ಮಾಹಿತಿಯಾಗಿಯೇ ಪರಿಗಣಿಸಬೇಕಿದೆ.

ತೆಲಂಗಾಣ ಮುಖ್ಯಮಂತ್ರಿ ರೇವಂತ್ ರೆಡ್ಡಿ, ಬಿಆರ್‌ಎಸ್ ನಾಯಕ ಕೆಟಿಆರ್, ಆಂಧ್ರಪ್ರದೇಶ ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಹಾಗೂ ಸಚಿವ ನಾರಾ ಲೋಕೇಶ್ ಅವರಿಗೆ ಆಹ್ವಾನ ನೀಡಲಾಗಿದೆ ಎನ್ನಲಾದ ಫೋಟೋಗಳು ವೈರಲ್ ಆಗಿವೆ. ಕಲಾನಿಧಿ ಮಾರನ್ ಅವರ ಕುಟುಂಬದ ಅಪಾರ ಉದ್ಯಮ ಸಾಮ್ರಾಜ್ಯ ಮತ್ತು ಕಾವ್ಯ ಮಾರನ್ ಅವರ ಹಿನ್ನೆಲೆಯಿಂದಾಗಿ ಈ ಮದುವೆಯ ಸುದ್ದಿ ಮತ್ತಷ್ಟು ಗಮನ ಸೆಳೆಯುತ್ತಿದೆ.

ಅನಿರುದ್ಧ್ ಹಳೆಯ ಪ್ರೇಮದ ಸುದ್ದಿಗಳೂ ಮುನ್ನೆಲೆಗೆ!

ಮದುವೆಯ ವದಂತಿಗಳ ಬೆನ್ನಲ್ಲೇ ಅನಿರುದ್ಧ್ ಅವರ ಹಿಂದಿನ ವೈಯಕ್ತಿಕ ಜೀವನದ ಕುರಿತ ಚರ್ಚೆಗಳೂ ಆರಂಭವಾಗಿವೆ. ನಟಿ ಆಂಡ್ರಿಯಾ ಜೆರೆಮಿಯಾ ಜೊತೆ ಅನಿರುದ್ಧ್ ಹೆಸರು ಹಿಂದೆ ತಳುಕುಹಾಕಿಕೊಂಡಿತ್ತು. ಇಬ್ಬರೂ ಹಲವು ವರ್ಷಗಳ ಕಾಲ ಸಂಬಂಧದಲ್ಲಿದ್ದರು ಎಂಬ ವದಂತಿಗಳು ಆಗ ಸಿನಿಮಾ ವಲಯದಲ್ಲಿ ಸದ್ದು ಮಾಡಿದ್ದವು. ಆದರೆ ಅವರ ಸಂಬಂಧದ ಕುರಿತು ಕೇಳಿಬಂದ ಎಲ್ಲ ಮಾಹಿತಿಗಳೂ ಅಧಿಕೃತವಾಗಿ ದೃಢಪಟ್ಟಿಲ್ಲ.

ಇದಲ್ಲದೆ, ನಟಿಯರಾದ ಪ್ರಿಯಾ ಆನಂದ್ ಮತ್ತು ಕೀರ್ತಿ ಸುರೇಶ್ ಹಾಗೂ ಗಾಯಕಿ ಜೋನಿತಾ ಗಾಂಧಿ ಜೊತೆಗೂ ಅನಿರುದ್ಧ್ ಹೆಸರು ಕೇಳಿಬಂದಿತ್ತು. ಈ ವಿಚಾರಗಳೂ ಹೆಚ್ಚಾಗಿ ವದಂತಿಗಳ ರೂಪದಲ್ಲೇ ಚರ್ಚೆಯಾಗಿದ್ದವು.

ಅಭಿಮಾನಿಗಳಲ್ಲಿ ಹೆಚ್ಚಿದ ಕುತೂಹಲ

‘ವೈ ದಿಸ್ ಕೊಲವೆರಿ ಡಿ’ ಸೇರಿದಂತೆ ಹಲವು ಜನಪ್ರಿಯ ಹಾಡುಗಳ ಮೂಲಕ ದೇಶಾದ್ಯಂತ ಅಭಿಮಾನಿಗಳನ್ನು ಗಳಿಸಿರುವ ಅನಿರುದ್ಧ್, ತಮ್ಮ ಸಂಗೀತದ ಮೂಲಕವೇ ಸದಾ ಸುದ್ದಿಯಲ್ಲಿರುತ್ತಾರೆ. ಇದೀಗ ಅವರ ಮದುವೆಯ ವಿಚಾರ ಅಭಿಮಾನಿಗಳ ಗಮನ ಸೆಳೆದಿದೆ. ಕಾವ್ಯ ಮಾರನ್ ಜೊತೆಗಿನ ವಿವಾಹದ ಸುದ್ದಿ ನಿಜವೇ ಎಂಬುದನ್ನು ತಿಳಿಯಲು ಅಭಿಮಾನಿಗಳು ಅಧಿಕೃತ ಪ್ರಕಟಣೆಯ ನಿರೀಕ್ಷೆಯಲ್ಲಿದ್ದಾರೆ.

42ರ ವರನಿಗೆ 28ರ ಯುವತಿಯೇ ಬೇಕಂತೆ! ಆರೋಗ್ಯವಂತ ಮಕ್ಕಳು ಬೇಕೆಂದವನಿಗೆ ಮ್ಯಾಚ್‌ಮೇಕರ್ ಕೊಟ್ಟ ಖಡಕ್ ಉತ್ತರ

Chandrashekar GS — Sat, 17 Oct 2026 18:22:41 +0530

42 ವರ್ಷದ ವರನಿಗೆ 28 ವರ್ಷದ ವಧು ಬೇಕಂತೆ! ಮ್ಯಾಚ್‌ಮೇಕರ್ ಪ್ರಶ್ನೆಗೆ ಕಾರಣವೇನು?

ಮದುವೆಗೆ ಸಂಗಾತಿಯನ್ನು ಹುಡುಕುವಾಗ ವಯಸ್ಸು, ಶಿಕ್ಷಣ, ಉದ್ಯೋಗ ಮತ್ತು ಕುಟುಂಬದ ಹಿನ್ನೆಲೆಯಂತಹ ಅಂಶಗಳನ್ನು ಅನೇಕರು ಗಮನಿಸುತ್ತಾರೆ. ಆದರೆ ಆರೋಗ್ಯವಂತ ಮಕ್ಕಳು ಬೇಕೆಂಬ ಕಾರಣಕ್ಕೆ ತಮಗಿಂತ ಬಹಳ ಕಿರಿಯ ಮಹಿಳೆಯನ್ನೇ ಮದುವೆಯಾಗಬೇಕು ಎಂದು ಬಯಸಿದ ವ್ಯಕ್ತಿಯೊಬ್ಬರ ವಿಚಾರ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿದೆ.

ಮ್ಯಾಚ್‌ಮೇಕರ್ ಒಬ್ಬರು ಹಂಚಿಕೊಂಡ ಅನುಭವದ ಪ್ರಕಾರ, 42 ವರ್ಷದ ವ್ಯಕ್ತಿಯೊಬ್ಬರು ತನಗೆ 28 ವರ್ಷದ ಮಹಿಳೆಯನ್ನು ಸಂಗಾತಿಯಾಗಿ ಹುಡುಕಿಕೊಡುವಂತೆ ಕೇಳಿದ್ದರು. ಈ ಬೇಡಿಕೆಯ ಹಿಂದೆ ಅವರು ನೀಡಿದ ಕಾರಣವೇ ಮ್ಯಾಚ್‌ಮೇಕರ್ ಅವರನ್ನು ಪ್ರಶ್ನೆ ಮಾಡುವಂತೆ ಮಾಡಿತು.

ವಯಸ್ಸಿನ ಅಂತರದ ಬಗ್ಗೆ ವ್ಯಕ್ತಿಯ ವಾದವೇನು?

ವರದಿಯ ಪ್ರಕಾರ, ಆ ವ್ಯಕ್ತಿ ವಿದೇಶಿ ವಿಶ್ವವಿದ್ಯಾಲಯದಿಂದ ಸ್ನಾತಕೋತ್ತರ ಪದವಿ ಪಡೆದಿದ್ದ ಎಂಜಿನಿಯರ್. ಟೆಕ್ ಕಂಪನಿಯೊಂದರಲ್ಲಿ ಉನ್ನತ ಹುದ್ದೆಯಲ್ಲಿಯೂ ಕೆಲಸ ಮಾಡುತ್ತಿದ್ದರು. ವೃತ್ತಿಜೀವನದಲ್ಲಿ ಉತ್ತಮ ಸ್ಥಾನದಲ್ಲಿದ್ದರೂ, ಸಂತಾನೋತ್ಪತ್ತಿ ಮತ್ತು ವಯಸ್ಸಿನ ನಡುವಿನ ಸಂಬಂಧದ ಬಗ್ಗೆ ಅವರ ನಿಲುವು ಮ್ಯಾಚ್‌ಮೇಕರ್‌ಗೆ ಅಚ್ಚರಿ ಮೂಡಿಸಿತು ಎಂದು ಅವರು ತಿಳಿಸಿದ್ದಾರೆ.

40 ವರ್ಷ ದಾಟಿದ ಕೆಲವು ಪುರುಷರು 20ರ ಕೊನೆಯ ಅಥವಾ 30ರ ಆರಂಭದ ವಯಸ್ಸಿನ ಮಹಿಳೆಯರನ್ನು ಹುಡುಕುವಾಗ, ಆರೋಗ್ಯವಂತ ಮಕ್ಕಳು ಬೇಕೆಂಬ ಕಾರಣವನ್ನು ನೀಡುತ್ತಾರೆ ಎಂದು ಮ್ಯಾಚ್‌ಮೇಕರ್ ಹೇಳಿದ್ದಾರೆ. ಈ ವ್ಯಕ್ತಿಯೂ ಅದೇ ಕಾರಣವನ್ನು ಮುಂದಿಟ್ಟಿದ್ದರು ಎನ್ನಲಾಗಿದೆ.

‘ಪುರುಷರ ವಯಸ್ಸೂ ಮುಖ್ಯವಲ್ಲವೇ?’

ಮಹಿಳೆಯ ವಯಸ್ಸಿನ ಬಗ್ಗೆ ಗಮನಹರಿಸುವ ವ್ಯಕ್ತಿ, ತನ್ನದೇ ಸಂತಾನೋತ್ಪತ್ತಿ ಆರೋಗ್ಯದ ಬಗ್ಗೆ ಯೋಚಿಸಿದ್ದಾರೆಯೇ ಎಂದು ಮ್ಯಾಚ್‌ಮೇಕರ್ ಪ್ರಶ್ನಿಸಿದ್ದಾರೆ. ಪುರುಷರು 60 ವರ್ಷ ವಯಸ್ಸಿನಲ್ಲಿಯೂ ತಂದೆಯಾಗಿರುವ ಉದಾಹರಣೆಗಳನ್ನು ಉಲ್ಲೇಖಿಸಿ, ತಡವಾಗಿ ಮಕ್ಕಳನ್ನು ಪಡೆಯುವುದು ಸಾಧ್ಯ ಎಂದು ಆ ವ್ಯಕ್ತಿ ಹೇಳಿದ್ದರಂತೆ.

ಇದಕ್ಕೆ ಪ್ರತಿಕ್ರಿಯಿಸಿದ ಮ್ಯಾಚ್‌ಮೇಕರ್, ತಂದೆಯಾಗುವ ಸಾಧ್ಯತೆ ಇರುವುದರಿಂದ ಮಾತ್ರ ವಯಸ್ಸಿನ ಪರಿಣಾಮವೇ ಇಲ್ಲ ಎಂದು ಅರ್ಥವಲ್ಲ ಎಂದು ವಿವರಿಸಿದ್ದಾರೆ. ಪುರುಷರ ವಯಸ್ಸು ಹೆಚ್ಚಾದಂತೆ ವೀರ್ಯದ ಗುಣಮಟ್ಟದಲ್ಲಿ ಬದಲಾವಣೆಗಳಾಗಬಹುದು. ಹೆಚ್ಚಿನ ತಂದೆಯ ವಯಸ್ಸು ಮಕ್ಕಳಲ್ಲಿ ಕೆಲವು ಆರೋಗ್ಯ ಸಮಸ್ಯೆಗಳ ಅಪಾಯದೊಂದಿಗೆ ಸಂಬಂಧ ಹೊಂದಿರಬಹುದು ಎಂದು ವೈದ್ಯಕೀಯ ಅಧ್ಯಯನಗಳು ಸೂಚಿಸಿವೆ.

‘ಮೊದಲು ನಿಮ್ಮ ಆರೋಗ್ಯವನ್ನೂ ಪರೀಕ್ಷಿಸಿಕೊಳ್ಳಿ’

ಕಳೆದ ಹತ್ತು ವರ್ಷಗಳಲ್ಲಿ ಸಂತಾನೋತ್ಪತ್ತಿ ಆರೋಗ್ಯಕ್ಕೆ ಸಂಬಂಧಿಸಿದ ಪರೀಕ್ಷೆಗಳನ್ನು ಮಾಡಿಸಿಕೊಂಡಿದ್ದೀರಾ ಎಂದು ಮ್ಯಾಚ್‌ಮೇಕರ್ ಆ ವ್ಯಕ್ತಿಯನ್ನು ಕೇಳಿದ್ದಾಗಿ ವರದಿಯಾಗಿದೆ. ಆರೋಗ್ಯವಂತ ಮಕ್ಕಳೇ ಗುರಿಯಾಗಿದ್ದರೆ, ಸಂಗಾತಿಯ ವಯಸ್ಸಿಗೆ ಮಾತ್ರ ಷರತ್ತು ವಿಧಿಸುವ ಬದಲು ಇಬ್ಬರೂ ತಮ್ಮ ಆರೋಗ್ಯದ ಬಗ್ಗೆ ಗಮನಹರಿಸಬೇಕು ಎಂಬುದು ಅವರ ಅಭಿಪ್ರಾಯವಾಗಿತ್ತು.

ಮೊದಲಿಗೆ ಯೋಚಿಸುವುದಾಗಿ ಹೇಳಿದ್ದ ಆ ವ್ಯಕ್ತಿ, ಮರುದಿನ 26 ವರ್ಷದ ಮಹಿಳೆಯೊಂದಿಗೆ ಸಂಬಂಧ ಸಾಧ್ಯವೇ ಎಂದು ಮತ್ತೆ ಕೇಳಿದ್ದರಂತೆ.

ಸಂಗಾತಿಯ ಆಯ್ಕೆಯಲ್ಲಿ ಆರೋಗ್ಯದ ಹೊಣೆ ಇಬ್ಬರಿಗೂ

ಮಕ್ಕಳನ್ನು ಹೊಂದುವ ಆಸೆ ಮತ್ತು ಅದಕ್ಕೆ ಹೊಂದುವ ಸಂಗಾತಿಯನ್ನು ಹುಡುಕುವುದು ಸಹಜ. ಆದರೆ ಸಂತಾನೋತ್ಪತ್ತಿ ಆರೋಗ್ಯವು ಮಹಿಳೆಯ ವಯಸ್ಸಿನಿಂದ ಮಾತ್ರ ನಿರ್ಧಾರವಾಗುವುದಿಲ್ಲ. ಪುರುಷರ ಆರೋಗ್ಯ, ಮಹಿಳೆಯ ಆರೋಗ್ಯ, ಇಬ್ಬರ ವೈದ್ಯಕೀಯ ಹಿನ್ನೆಲೆ ಸೇರಿದಂತೆ ಹಲವು ಅಂಶಗಳು ಮುಖ್ಯವಾಗಿವೆ.

ಈ ಘಟನೆ ಸಂಗಾತಿಯ ವಯಸ್ಸಿನ ಬಗ್ಗೆ ಇರುವ ನಿರೀಕ್ಷೆಗಳು, ಸಂತಾನೋತ್ಪತ್ತಿ ಕುರಿತ ಅರಿವು ಮತ್ತು ಮದುವೆಯಲ್ಲಿ ಇಬ್ಬರಿಗೂ ಸಮಾನ ಜವಾಬ್ದಾರಿ ಇರಬೇಕೆಂಬ ವಿಷಯಗಳ ಬಗ್ಗೆ ಚರ್ಚೆ ಹುಟ್ಟುಹಾಕಿದೆ.

View this post on Instagram

A post shared by The Date Crew | India’s #1 MatchMakers (@thedatecrew)

ಶ್ರೇಯಸ್ರನ್ನು ಕೊಂದು, ಅಭಿಷೇಕ್ರನ್ನು ಮದ್ವೆಯಾಗಿ, ಶುಭಮನ್ ಜೊತೆ ಹುಕ್ಅಪ್: ಅನಯಾ ಬಂಗಾರ್ ಹೇಳಿದ್ದೇನು

Suchethana D — Sun, 18 Oct 2026 19:27:22 +0530

ದೆಹಲಿ: ಭಾರತದ ಮಾಜಿ ಕ್ರಿಕೆಟಿಗ ಸಂಜಯ್ ಬಂಗಾರ್ ಅವರ ಪುತ್ರಿ ಅನಯಾ ಬಂಗಾರ್ ಅವರು ಟೀಂ ಇಂಡಿಯಾ ಆಟಗಾರರ ಬಗ್ಗೆ ಸ್ಫೋಟಕ ಹೇಳಿಕೆ ನೀಡಿದ್ದು, ಅವರ ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ಭಾರೀ ವೈರಲ್ ಆಗುತ್ತಿದೆ. ಅಷ್ಟಕ್ಕೂ, ಅನಯಾ ಅವರು ಲಿಂಗ ಪರಿವರ್ತನೆಯಿಂದ ಹಲ್ಚಲ್ ಸೃಷ್ಟಿಸಿದವರು. ಒಂದು ಕಾಲದಲ್ಲಿ ಆರ್ಯನ್ ಬಾಂಗರ್ ಆಗಿ ಗುರುತಿಸಿಕೊಂಡಿದ್ದ ಇವರು, ಮುಂಬೈ ಪರ ವಯೋಮಿತಿ ಕ್ರಿಕೆಟ್‌ನಲ್ಲಿ ಸರ್ಫರಾಜ್ ಖಾನ್ ಮತ್ತು ಮುಶೀರ್ ಖಾನ್ ಅವರಂತಹ ದಿಗ್ಗಜರ ಜೊತೆ ಮೈದಾನ ಹಂಚಿಕೊಂಡವರು. ಆದರೆ, ತಮ್ಮ ಅಂತರಾತ್ಮದ ಕರೆಗೆ ಓಗೊಟ್ಟು ಈ ವರ್ಷದ ಮಾರ್ಚ್‌ನಲ್ಲಿ ಲಿಂಗ ಬದಲಾವಣೆ ಶಸ್ತ್ರಚಿಕಿತ್ಸೆಗೆ ಒಳಗಾದರು.

ಇದೀಗ ಅವರು, ಕೃಷ್ಣಾಂಕ್ ಅಟ್ರೆ ಅವರ ಯುಟ್ಯೂಬ್ ಚಾನೆಲ್ಗೆ ನೀಡಿರುವ ಸಂದರ್ಶನದಲ್ಲಿ, ಭಾರತೀಯ ಕ್ರಿಕೆಟಿಗರಾದ ಶುಭಮನ್ ಗಿಲ್, ಅಭಿಷೇಕ್ ಶರ್ಮಾ ಮತ್ತು ಶ್ರೇಯಸ್ ಅಯ್ಯರ್ ಅವರೊಂದಿಗೆ 'ಕಿಲ್, ಮ್ಯಾರಿ, ಹುಕ್ಅಪ್' ಆಡುವಂತೆ ಹೇಳಲಾಗಿತ್ತು. ಇದಕ್ಕೆ ಅನಯಾ ಅವರು "ಶ್ರೇಯಸ್ ಅಯ್ಯರ್ ಅವರನ್ನು ಕೊಂದು, ಅಭಿಷೇಕ್ ಶರ್ಮಾ ಅವರನ್ನು ಮದುವೆಯಾಗಿ, ಶುಭಮನ್ ಗಿಲ್ ಅವರೊಂದಿಗೆ ಹುಕ್ಅಪ್ ಮಾಡಿ" ಎಂದು ಹೇಳಿದ್ದಾರೆ. ಅವರ ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿದೆ.

ಲಿಂಗ ಪರಿವರ್ತನೆಯಿಂದ ಸುದ್ದಿ

ಮುಂಬೈನಲ್ಲಿ ವಯೋಧಾರಿತ ಕ್ರಿಕೆಟ್ ಆಡಿದ್ದ ಅನಯಾ, ತಮ್ಮ ಲಿಂಗ ಪರಿವರ್ತನೆಯ ನಂತರ ಕ್ರಿಕೆಟ್‌ನಿಂದ ದೂರ ಉಳಿಯಬೇಕಾಗಿ ಬಂದಿತ್ತು. ನಾನು ಮಹಿಳಾ ಕ್ರಿಕೆಟ್ ಗೆ ಅರ್ಹಳು ಎಂದು ಬಿಸಿಸಿಐಗೆ ಮನವಿ ಮಾಡಿಕೊಂಡಿದ್ದರೂ ಅವರಿಗೆ ಆಡುವ ಅವಕಾಶ ದೊರೆತಿರಲಿಲ್ಲ. ಇದೀಗ ಆಸ್ಟ್ರೇಲಿಯಾ ಅವರಿಗೆ ಅವಕಾಶ ನೀಡಿದೆ ಎಂದು ಅನಯಾ ಹೇಳಿಕೊಂಡಿದ್ದಾರೆ. ಆದರೆ ಕ್ರಿಕೆಟ್ ಆಸ್ಟ್ರೇಲಿಯಾ ಈ ಬಗ್ಗೆ ಯಾವುದೇ ಹೇಳಿಕೆ ನೀಡಿಲ್ಲ.

2027ರ ಮಾರ್ಚ್‌ನಿಂದ ಆಸ್ಟ್ರೇಲಿಯಾದ ಮಹಿಳಾ ಬಿಗ್ ಬ್ಯಾಷ್ ಲೀಗ್ (WBBL) ಆಡಲು ನನಗೆ ಅರ್ಹತೆ ಸಿಕ್ಕಿದೆ. ಒಂದು ಹಂತದಲ್ಲಿ ಕ್ರಿಕೆಟ್ ಜೀವನವೇ ಮುಗಿದುಹೋಯಿತು ಎಂದು ಭಾವಿಸಿದ್ದ ನನಗೆ ಇದು ಅತ್ಯಂತ ಭಾವುಕ ವಿಷಯ ಎಂದು ಅನಯಾ ಇತ್ತೀಚಿಗೆ ಹೇಳಿದ್ದರು.

ವೃತ್ತಿ ಜೀವನದಲ್ಲಿ ಮತ್ತೊಂದು ಅವಕಾಶ

ಲಿಂಗ ದೃಢೀಕರಣ ಶಸ್ತ್ರಚಿಕಿತ್ಸೆಗೆ ಒಳಗಾದ ನಂತರ, ಕ್ರಿಕೆಟ್ ವೃತ್ತಿ ಜೀವನ ಮುಗಿದೇ ಹೋಯ್ತು ಎಂದುಕೊಂಡಿದ್ದರು. ಈ ಕುರಿತು ಈ ಹಿಂದೆ ಸಂದರ್ಶನವೊಂದರಲ್ಲಿ ತಮ್ಮ ನೋವನ್ನು ಹಂಚಿಕೊಂಡಿದ್ದ ಅನಯಾ, ನಾನು ಮತ್ತೆ ಕ್ರಿಕೆಟ್ ಆಡುತ್ತೇನೆ ಎಂಬ ನಂಬಿಕೆಯೇ ಇರಲಿಲ್ಲ. ಆಟಕ್ಕೆ ವಿದಾಯ ಹೇಳುವ ಹಂತ ತಲುಪಿದ್ದೆ. ಆದರೆ ಕ್ರಿಕೆಟ್ ಆಸ್ಟ್ರೇಲಿಯಾ ನನಗೆ ಮತ್ತೊಂದು ಅವಕಾಶ ನೀಡಿದೆ. ಇದು ನನ್ನ ಪಾಲಿಗೆ ಅತ್ಯಂತ ಸಂತಸದ ದಿನ ಎಂದು ಭಾವುಕರಾಗಿ ಹೇಳಿದ್ದರು. ಆಸ್ಟ್ರೇಲಿಯಾದಲ್ಲಿ 'ಕಮ್ಯುನಿಟಿ ಕ್ರಿಕೆಟ್' (ಸ್ಥಳೀಯ ಕ್ರಿಕೆಟ್) ಆಡಲು ಅನಯಾ ಅವರಿಗೆ ಈಗ ಅಧಿಕೃತ ಅನುಮತಿ ಸಿಕ್ಕಿದೆ.

ಅಂತರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ICC) ಟ್ರಾನ್ಸ್‌ಜೆಂಡರ್ ಆಟಗಾರರ ಮೇಲೆ ಕೆಲವು ನಿರ್ಬಂಧಗಳನ್ನು ಹೇರಿದ್ದರೂ ಆಸ್ಟ್ರೇಲಿಯಾ ಕ್ರಿಕೆಟ್ ಮಂಡಳಿಯು ಅನಯಾ ಅವರ ಕನಸಿಗೆ ಬೆಂಬಲವಾಗಿ ನಿಂತಿದೆ. ಉನ್ನತ ಮಟ್ಟದ 'ಎಲೈಟ್ ಕ್ರಿಕೆಟ್' (ಬಿಗ್ ಬ್ಯಾಷ್ ಲೀಗ್ ನಂತಹ ಪಂದ್ಯಾವಳಿ) ಆಡಬೇಕೆಂದರೆ ಅವರು ಕೆಲವು ನಿಯಮಗಳನ್ನು ಪಾಲಿಸಬೇಕಿದೆ. 2027ರ ಹೊತ್ತಿಗೆ ಅವರ ದೇಹದಲ್ಲಿನ ಟೆಸ್ಟೋಸ್ಟೆರಾನ್ ಮಟ್ಟವು ನಿಗದಿತ ಪ್ರಮಾಣಕ್ಕಿಂತ (10 nmol/L) ಕಡಿಮೆ ಇರಬೇಕು ಎಂಬ ಷರತ್ತನ್ನು ವಿಧಿಸಲಾಗಿದೆ.

ತನ್ನ ಅಸ್ಮಿತೆಯನ್ನು ಹುಡುಕುತ್ತಲೇ ಪ್ರೀತಿಯ ಕ್ರಿಕೆಟ್ ಅನ್ನು ಉಳಿಸಿಕೊಳ್ಳಲು ಅನಯಾ ನಡೆಸಿದ ಹೋರಾಟ ನಿಜಕ್ಕೂ ಸ್ಫೂರ್ತಿದಾಯಕ. ಸದ್ಯಕ್ಕೆ ಅವರು ಆಸ್ಟ್ರೇಲಿಯಾದ ಕ್ಲಬ್ ಕ್ರಿಕೆಟ್‌ನಲ್ಲಿ ಮೈದಾನಕ್ಕಿಳಿಯಲಿದ್ದಾರೆ. ಮಗಳ ಪ್ರತಿ ಹೋರಾಟದಲ್ಲೂ ಬೆನ್ನೆಲುಬಾಗಿ ನಿಂತಿರುವ ತಂದೆ ಸಂಜಯ್ ಬಾಂಗರ್ ಅವರ ಬೆಂಬಲವೂ ಇಲ್ಲಿ ಅನನ್ಯವಾಗಿದೆ. ಅನಯಾರ ಈ ಎರಡನೇ ಇನ್ನಿಂಗ್ಸ್ ಯಶಸ್ವಿಯಾಗಲಿ ಎಂಬುದು ಅಭಿಮಾನಿಗಳ ಹಾರೈಕೆ.

‘ನೀವು ನಮ್ಮ ಕುಟುಂಬದವರು, ನಿಮ್ಮಿಂದ ಹಣ ಪಡೆಯಲ್ಲ’… ಮೃತ ಸ್ನೇಹಿತನ ಮಗನಿಗೆ ಅಂಗಡಿ ಮಾಲೀಕ ತೋರಿದ ಪ್ರೀತಿ

Sushma Hegde — Fri, 16 Oct 2026 14:37:18 +0530

ಕೆಲವು ಸಂಬಂಧಗಳಿಗೆ ರಕ್ತಸಂಬಂಧದ ಅಗತ್ಯವಿಲ್ಲ. ನಿಜವಾದ ಪ್ರೀತಿ, ವಿಶ್ವಾಸ ಮತ್ತು ಸ್ನೇಹವಿದ್ದರೆ ಸಾಕು, ಆ ಬಂಧ ಜೀವನಪೂರ್ತಿ ಉಳಿಯುತ್ತದೆ. ಇದಕ್ಕೆ ಸಾಕ್ಷಿಯೆಂಬಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಹೃದಯಸ್ಪರ್ಶಿ ವಿಡಿಯೋವೊಂದು ವೈರಲ್ ಆಗಿದೆ. 13 ವರ್ಷಗಳ ಹಿಂದೆ ಮೃತಪಟ್ಟ ಸ್ನೇಹಿತನ ಕುಟುಂಬದವರಿಂದ ತರಕಾರಿ ಹಣ ಪಡೆಯಲು ಅಂಗಡಿ ಮಾಲೀಕರೊಬ್ಬರು ನಿರಾಕರಿಸಿರುವ ಘಟನೆ ನೆಟ್ಟಿಗರ ಮನಗೆದ್ದಿದೆ. ಬರೋಬ್ಬರಿ 35 ವರ್ಷಗಳ ಸ್ನೇಹದ ಈ ಕಥೆ ಹಲವರ ಕಣ್ಣಂಚಿನಲ್ಲಿ ನೀರು ತರಿಸಿದೆ.

ಮೃತ ಸ್ನೇಹಿತನ ಮಗನಿಂದ ಹಣ ಪಡೆಯಲು ನಿರಾಕರಿಸಿದ ಅಂಗಡಿ ಮಾಲೀಕ!

ಇನ್‌ಸ್ಟಾಗ್ರಾಮ್ ಬಳಕೆದಾರ ಭವೇಶ್ (@anchor.bhavesh) ಹಂಚಿಕೊಂಡಿರುವ ವಿಡಿಯೋದಲ್ಲಿ ಈ ಹೃದಯಸ್ಪರ್ಶಿ ಘಟನೆ ಕಾಣಿಸಿಕೊಂಡಿದೆ. ಭವೇಶ್ ತಮ್ಮ ತಂದೆಯ ದೀರ್ಘಕಾಲದ ಸ್ನೇಹಿತನ ರಸ್ತೆಬದಿಯ ಅಂಗಡಿಗೆ ತೆರಳಿ, ಸ್ಕೂಟರ್‌ನ ಬೂಟ್‌ ತುಂಬುವಷ್ಟು ತರಕಾರಿಗಳನ್ನು ಖರೀದಿಸಿದ್ದಾರೆ. ಆದರೆ, ತರಕಾರಿಗಳ ಹಣ ನೀಡಲು ಮುಂದಾದಾಗ ಅಂಗಡಿ ಮಾಲೀಕರು ಹಣ ಸ್ವೀಕರಿಸಲು ನಿರಾಕರಿಸಿದ್ದಾರೆ. ತರಕಾರಿಗಳನ್ನು ಖರೀದಿಸಿದ ಬಳಿಕ ಭವೇಶ್ ಹಣ ನೀಡಲು ಮುಂದಾಗುತ್ತಾರೆ. ಆಗ ಅಂಗಡಿ ಮಾಲೀಕರು, ಇದು ತಮ್ಮ ಕುಟುಂಬದವರಿಗಾಗಿ ಎಂದು ಹೇಳಿ ಹಣ ಪಡೆಯುವುದಿಲ್ಲ. ಸ್ನೇಹಿತನ ಮಗನನ್ನು ತಮ್ಮ ಕುಟುಂಬದ ಸದಸ್ಯನಂತೆ ಕಾಣುವ ಅವರ ನಡೆ ಎಲ್ಲರ ಮನಮುಟ್ಟಿದೆ.

13 ವರ್ಷಗಳ ಹಿಂದೆಯೇ ತಂದೆ ಸಾವು, ಆದರೂ ಸ್ನೇಹಕ್ಕೆ ಮಾತ್ರ ಸಾವಿಲ್ಲ!

ಭವೇಶ್ ಅವರ ತಂದೆ 2013ರಲ್ಲಿ ನಿಧನರಾಗಿದ್ದರು. ಆದರೆ, ತಂದೆ ಮತ್ತು ಅಂಗಡಿ ಮಾಲೀಕರ ನಡುವಿನ ಸ್ನೇಹದ ಬಂಧ ಇಂದಿಗೂ ಹಾಗೆಯೇ ಉಳಿದಿದೆ. ಇಬ್ಬರೂ ಸುಮಾರು 30ರಿಂದ 35 ವರ್ಷಗಳ ಕಾಲ ಸ್ನೇಹಿತರಾಗಿದ್ದರು. ಭವೇಶ್ ಅವರ ತಂದೆ ಅಂಗಡಿಯ ಎದುರಿನಲ್ಲೇ ತಮ್ಮದೇ ಅಂಗಡಿ ಹೊಂದಿದ್ದರು. ಹೀಗೆ ಆರಂಭವಾದ ಪರಿಚಯ ಕಾಲಕ್ರಮೇಣ ಆತ್ಮೀಯ ಸ್ನೇಹವಾಗಿ ಬೆಳೆದಿತ್ತು. ತಂದೆ ನಿಧನರಾದ ಬಳಿಕವೂ ಅವರ ಸ್ನೇಹಿತ ಕುಟುಂಬದೊಂದಿಗಿನ ಸಂಬಂಧವನ್ನು ಕಡಿದುಕೊಳ್ಳಲಿಲ್ಲ. ಬದಲಾಗಿ, ಭವೇಶ್ ಅವರನ್ನು ತಮ್ಮ ಮನೆಯವರಂತೆಯೇ ನೋಡುತ್ತಿದ್ದಾರೆ. ತರಕಾರಿ ಖರೀದಿಸಿದ ಹಣವನ್ನು ಪಡೆಯಲು ನಿರಾಕರಿಸಿರುವುದೇ ಇದಕ್ಕೆ ಸಾಕ್ಷಿಯಾಗಿದೆ.

ವಿಡಿಯೋದಲ್ಲಿ ಭವೇಶ್ ಹಣ ನೀಡಲು ಪ್ರಯತ್ನಿಸುತ್ತಿರುವುದು ಕಂಡುಬರುತ್ತದೆ. ಆದರೆ, ಅಂಗಡಿ ಮಾಲೀಕರು ತಮ್ಮ ನಿರ್ಧಾರದಿಂದ ಹಿಂದೆ ಸರಿಯುವುದಿಲ್ಲ. ಸ್ನೇಹಿತನ ಕುಟುಂಬದಿಂದ ಹಣ ಪಡೆಯಲು ಸಾಧ್ಯವಿಲ್ಲ ಎಂಬ ಅವರ ಮಾತುಗಳು ನೋಡುಗರ ಮನಸ್ಸನ್ನು ಗೆದ್ದಿವೆ.

ಸ್ನೇಹಿತನಿಗೆ ಇಷ್ಟವಾದ ಖಾದ್ಯವನ್ನೇ ತೆಗೆದುಕೊಂಡು ಹೋದ ಮಗ!

ಈ ಘಟನೆಯ ಮತ್ತೊಂದು ಭಾವನಾತ್ಮಕ ಸಂಗತಿಯೆಂದರೆ, ಭವೇಶ್ ತಮ್ಮ ತಂದೆಯ ಸ್ನೇಹಿತನಿಗೆ ಇಷ್ಟವಾದ 'ಕಧಿ ಚಾವಲ್' ಖಾದ್ಯವನ್ನು ತೆಗೆದುಕೊಂಡು ಅಂಗಡಿಗೆ ಮರಳಿದ್ದಾರೆ. ಸ್ನೇಹದ ನೆನಪುಗಳು ಮತ್ತು ಪರಸ್ಪರ ಗೌರವದ ನಡುವೆ ಬೆಳೆದಿರುವ ಈ ಸಂಬಂಧ, ನಿಜವಾದ ಸ್ನೇಹಕ್ಕೆ ಕಾಲದ ಮಿತಿಯಿಲ್ಲ ಎಂಬುದನ್ನು ನೆನಪಿಸುತ್ತದೆ. ತಂದೆ ಬದುಕಿಲ್ಲದಿದ್ದರೂ, ಅವರ ಸ್ನೇಹಿತನ ಪ್ರೀತಿ ಮತ್ತು ಆತ್ಮೀಯತೆ ಭವೇಶ್ ಅವರ ಕುಟುಂಬದೊಂದಿಗೆ ಮುಂದುವರಿದಿದೆ. ರಕ್ತಸಂಬಂಧವಿಲ್ಲದಿದ್ದರೂ ಕುಟುಂಬದವರಂತೆ ಜೊತೆಯಾಗಿ ನಿಲ್ಲುವ ಇಂತಹ ವ್ಯಕ್ತಿಗಳು ಜೀವನದಲ್ಲಿ ಎಷ್ಟು ಅಮೂಲ್ಯ ಎಂಬುದನ್ನು ಈ ಘಟನೆ ತೋರಿಸುತ್ತದೆ.

'ನಿಜವಾದ ಸ್ನೇಹ ಅಂದರೆ ಹೀಗಿರಬೇಕು': ನೆಟ್ಟಿಗರ ಮೆಚ್ಚುಗೆ

ಈ ವಿಡಿಯೋ ಒಂದು ಮಿಲಿಯನ್‌ಗೂ ಅಧಿಕ ವೀಕ್ಷಣೆಗಳನ್ನು ಪಡೆದುಕೊಂಡಿದ್ದು, ಸಾವಿರಾರು ಜನರು ಕಾಮೆಂಟ್‌ಗಳ ಮೂಲಕ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ಅಂಗಡಿ ಮಾಲೀಕರ ನಡೆಗೆ ಮೆಚ್ಚುಗೆ ವ್ಯಕ್ತಪಡಿಸಿರುವ ಅನೇಕರು, ಇಂತಹ ಸ್ನೇಹ ಸಂಬಂಧಗಳು ಇಂದಿನ ಕಾಲದಲ್ಲಿ ಅಪರೂಪ ಎಂದು ಹೇಳಿದ್ದಾರೆ. 'ನಿಜವಾದ ಸ್ನೇಹ ಅಂದರೆ ಹೀಗಿರಬೇಕು' ಎಂದು ಒಬ್ಬರು ಕಾಮೆಂಟ್ ಮಾಡಿದ್ದಾರೆ. ಮತ್ತೊಬ್ಬರು, ತಂದೆಯನ್ನು ಕಳೆದುಕೊಂಡ ಬಳಿಕವೂ ಅವರ ಸ್ನೇಹಿತ ಕುಟುಂಬದ ಬೆಂಬಲಕ್ಕೆ ನಿಂತಿರುವುದು ನಿಜಕ್ಕೂ ಶ್ಲಾಘನೀಯ ಎಂದು ಬರೆದಿದ್ದಾರೆ.

ಇನ್ನೊಬ್ಬ ನೆಟ್ಟಿಗರು, ಸ್ನೇಹಿತನ ಮಗನಿಂದ ಹಣ ಪಡೆಯಲು ನಿರಾಕರಿಸಿರುವ ಅಂಗಡಿ ಮಾಲೀಕರ ಮಾತುಗಳಲ್ಲಿ ನಿಜವಾದ ಆತ್ಮೀಯತೆ ಕಾಣುತ್ತದೆ ಎಂದು ಹೇಳಿದ್ದಾರೆ. ಇನ್ನೂ ಕೆಲವರು, ಇಂತಹ ಸ್ನೇಹ ಎಲ್ಲರಿಗೂ ಸಿಗಲಿ ಎಂದು ಹಾರೈಸಿದ್ದಾರೆ.

ಸ್ನೇಹಕ್ಕೆ ಸಾವಿಲ್ಲ, ಸಂಬಂಧಕ್ಕೆ ಬೆಲೆ ಕಟ್ಟಲಾಗದು!

ಇಂದಿನ ವೇಗದ ಬದುಕಿನಲ್ಲಿ ಸಂಬಂಧಗಳು ಬದಲಾಗುತ್ತಿರಬಹುದು. ಆದರೆ, ನಿಜವಾದ ಸ್ನೇಹವು ಕಾಲದ ಪರೀಕ್ಷೆಯನ್ನೂ ಗೆಲ್ಲುತ್ತದೆ ಎಂಬುದನ್ನು ಈ ಘಟನೆ ಸಾಬೀತುಪಡಿಸಿದೆ. ಸ್ನೇಹಿತ ಬದುಕಿಲ್ಲದಿದ್ದರೂ, ಅವರ ಕುಟುಂಬದೊಂದಿಗೆ ಹೊಂದಿರುವ ಬಾಂಧವ್ಯವನ್ನು ಉಳಿಸಿಕೊಂಡಿರುವ ಅಂಗಡಿ ಮಾಲೀಕರ ನಡೆ ಎಲ್ಲರಿಗೂ ಮಾದರಿಯಾಗಿದೆ. 35 ವರ್ಷಗಳ ಸ್ನೇಹ, 13 ವರ್ಷಗಳ ವಿರಹ, ಆದರೂ ಕಡಿಮೆಯಾಗದ ಆತ್ಮೀಯತೆ — ಈ ಕಥೆ ಹೇಳುವುದೊಂದೇ, ನಿಜವಾದ ಸ್ನೇಹವೆಂದರೆ ಒಬ್ಬರು ಇಲ್ಲದಿದ್ದರೂ ಅವರ ಕುಟುಂಬದ ಕೈ ಬಿಡದಿರುವುದು.

Amruthadhaare: ಯಾರೀ ದೀಪಿಕಾ? ಹುಟ್ಟಿನ ಗುಟ್ಟು ರಟ್ಟಾಯ್ತು- ಅಮ್ಮನ ಮಡಿಲು ಸೇರೊ ಕಾಲ ಬಂದಾಯ್ತು

Suchethana D — Thu, 15 Oct 2026 21:00:57 +0530

ಅಮೃತಧಾರೆಯಲ್ಲಿ ಇದೀಗ ದೀಪಿಕಾ ಮತ್ತು ಭೂಮಿಕಾ ಒಂದಾಗಿ ಶತ್ರು ಸಂಹಾರಕ್ಕೆ ಮುಂದಾಗಿದ್ದಾರೆ. ಅದೇ ಇನ್ನೊಂದೆಡೆ, ದೀಪಿಕಾಗೆ ತನ್ನ ಹುಟ್ಟಿನ ಗುಟ್ಟು ಬಯಲಾಗಿದೆ. ಅಜ್ಜಿಯಿಂದ ದೀಪಿಕಾಗೆ ಹುಟ್ಟಿನ ವಿಷಯ ತಿಳಿದಿದೆ.ಏನಿದು ರೋಚಕ ಟ್ವಿಸ್ಟ್?

ಅಮೃತಧಾರೆಯಲ್ಲಿ ಇದೀಗ ದೀಪಿಕಾ ಮತ್ತು ಭೂಮಿಕಾ ಒಂದಾಗಿ ಶತ್ರು ಸಂಹಾರಕ್ಕೆ ಮುಂದಾಗಿದ್ದಾರೆ. ಅದೇ ಇನ್ನೊಂದೆಡೆ, ದೀಪಿಕಾಗೆ ತನ್ನ ಹುಟ್ಟಿನ ಗುಟ್ಟು ಬಯಲಾಗಿದೆ.

ಅವಳ ಅಜ್ಜಿ, ದೀಪಿಕಾಗೆ ಅವಳು ಸಿಕ್ಕಿದ್ದು ಹೇಗೆ ಎನ್ನುವ ಬಗ್ಗೆ ತಿಳಿಸಿದ್ದಾಳೆ. ನಾನು, ನನ್ನ ಮಗಳು ಮತ್ತು ಅಳಿಯ ದೇವಸ್ಥಾನಕ್ಕೆ ಮಕ್ಕಳ ಕೊರಗು ನೀಗಿಸಲು ಬೇಡಿಕೊಳ್ಳಲು ಹೋದ ಸಮಯದಲ್ಲಿ ದೀಪಿಕಾ ಸಿಕ್ಕ ವಿಷಯವನ್ನುಹೇಳಿದ್ದಾಳೆ.

ಅಲ್ಲಿ ದೀಪಿಕಾ ಅಮ್ಮ ಬಂದು ಮಗುವನ್ನು ಇಟ್ಟು, ಈ ಮಗುವಿನಿಂದ ನನ್ನ ಗಂಡನ ಪ್ರಾಣಕ್ಕೆ ಅಪಾಯ ಇದೆ ಎಂದು ಹೇಳಿದ್ದಾರೆ. ಆದ್ದರಿಂದ ನೀನೇ ಕಾಪಾಡು ಎಂದು ಮಗುವನ್ನು ದೇವರ ಎದುರು ಇಟ್ಟು ಹೋದ ವಿಷಯ ತಿಳಿಸಿದ್ದಾಳೆ.

ಆ ಮಗುವಿನ ಬಳಿ ದುಡ್ಡು ಇಟ್ಟು ಹೋಗಿದ್ದರು. ಕೊನೆಗೆ ನನ್ನ ಮಗಳು ಅಳಿಯ ನಿನ್ನನ್ನು ಕರೆದುಕೊಂಡು ಬಂದರು. ಆದರೆ ಕೆಲವು ದಿನಗಳ ನಂತರ ನಿನ್ನ ಅಮ್ಮ ಬಂದು ಮಗುವನ್ನು ಕೊಡುವಂತೆ ಹೇಳಿದಳು ಎಂದು ವಿಷಯ ತಿಳಿಸಿದ್ದಾಳೆ.

ಆದರೆ ಮಗುವನ್ನು ಕರೆದುಕೊಂಡು ಹೋದರೆ ಪ್ರಾಣಕ್ಕೆ ಅಪಾಯ ಇದೆ ಎಂದು ಹೇಳಿದ್ದೀರಲ್ಲ. ಅದಕ್ಕಾಗಿ ನಾವೇ ಮಗುವನ್ನು ಸಾಕುತ್ತೇವೆ ಎಂದು ನಿನ್ನ ಸಾಕು ಅಪ್ಪ, ಅಮ್ಮ ಹೇಳಿ ನಿನ್ನನ್ನು ಆ ಊರಿನಿಂದ ಬೇರೆ ಕಡೆ ಕರೆದುಕೊಂಡು ಬಂದರು ಎಂದಿದ್ದಾಳೆ.

ಅಲ್ಲಿಗೆ ದೀಪಿಕಾ ಗುಟ್ಟು ರಟ್ಟಾಗಿದೆ. ಇದನ್ನು ಅವಳು ಕೇಳಿ ಭೂಮಿಕಾನೇ ತನ್ನ ಅಕ್ಕ ಎಂದು ತಿಳಿಯುವ ಕಾಲ ಬಂದಿದೆ. ಇಷ್ಟಾದರೆ ಅಲ್ಲಿಗೆ ಅಮೃತಧಾರೆ ಸೀರಿಯಲ್ ಮುಗಿದಂತೆ!

ಮದ್ವೆ ಸಂಭ್ರಮದ ನಡುವೆ Amruthadhaare ನಟ ರಾಣವ್ ಗೌಡ- ರಾಧಾ ಭಗವತಿ ಕ್ಯೂಟ್ ಫೋಟೋಶೂಟ್

Suchethana D — Fri, 16 Oct 2026 20:13:11 +0530

ಅಮೃತಧಾರೆ ಸೀರಿಯಲ್ನಲ್ಲಿ (Amruthadhaare Serial) ಜೈದೇನ ಪಾತ್ರವನ್ನು ಮೆಚ್ಚಿಕೊಳ್ಳದ ವೀಕ್ಷಕರೇ ಇಲ್ಲ. ಅಸಲಿಗೆ ಇದು ವಿಲನ್ ರೋಲ್ ಆದರೂ ನಟ ರಾಣವ್ ಗೌಡ ಅವರ ನಟನೆಯ ಜೊತೆ ಸ್ಯಾಂಡ್ಸಮ್ ನಟನನ್ನು ನೋಡಿ, ವಿಲನ್ಗೇ ಸಪೋರ್ಟ್ ಮಾಡ್ತಿರೋರು ಹೆಚ್ಚುಮಂದಿ. ಇದೀಗ ಅವರ ಮದುವೆ ಇದೇ ಸೀರಿಯಲ್ ಹಿಂದಿನ ಮಲ್ಲಿ ಹಾಗೂ ಭಾರ್ಗವಿ ಎಲ್ಎಲ್ಬಿ ಸೀರಿಯಲ್ ಭಾರ್ಗವಿಯಾಗಿದ್ದ ರಾಧಾ ಭಗವತಿ ಜೊತೆಗೆ ನಡೆಯಲಿದೆ. ಇವರಿಬ್ಬರೂ ಮದುವೆಯ ಡೇಟ್ ಇನ್ನೂ ಅನೌನ್ಸ್ ಮಾಡಿಲ್ಲವಾದರೂ ಶೀಘ್ರದಲ್ಲಿಯೇ ಮದುವೆ ಎನ್ನುವುದು ತಿಳಿದಿದೆ.

ಇದೀಗ ಈ ಜೋಡಿ ಮದುಮಕ್ಕಳ ರೂಪದಲ್ಲಿ ಫೋಟೋಶೂಟ್ ಮಾಡಿಸಿಕೊಂಡಿದ್ದಾರೆ. ಅಸಲಿಗೆ ಈ ಫೋಟೋಶೂಟ್ ಸೀರೆ ಮಳಿಗೆಯೊಂದರ ಪೇಯ್ಡ್ ಪ್ರಮೋಷನ್ದ್ದು. ಇದರಲ್ಲಿ ಈ ಜೋಡಿ ಸಕತ್ ಮಿಂಚುತ್ತಿದ್ದು, ಶೀಘ್ರದಲ್ಲಿಯೇ ಮದುವೆಯ ಸುದ್ದಿ ಕೊಡಿ ಎಂದು ಅಭಿಮಾನಿಗಳು ಹೇಳುತ್ತಿದ್ದಾರೆ. ಇವರು ಇನ್ನೂ ತಮ್ಮ ಮದುವೆಯ ಡೇಟ್ ಅನೌನ್ಸ್ ಮಾಡಲಿಲ್ಲ. ರಾಧಾ ಭಗವತಿ ಅವರ ಭಾರ್ಗವಿ ಎಲ್ಎಲ್ಬಿ ಸೀರಿಯಲ್ ಮುಗಿದಿದ್ದು, ಸಿನಿಮಾದಲ್ಲಿ ಬಿಜಿಯಾಗಿದ್ದರೆ, ರಾಣವ್ ಕೂಡ ಅಮೃತಧಾರೆಯಲ್ಲಿ ಮಿಂಚುತ್ತಿದ್ದಾರೆ. ಈ ಸೀರಿಯಲ್ ಕೂಡ ಶೀಘ್ರ ಮುಗಿಯುವ ಹಂತದಲ್ಲಿದ್ದು, ಸೀರಿಯಲ್ ಮುಗಿದ ಮೇಲೆ ಮದುವೆಯೇ ಎನ್ನುವುದು ನೋಡಬೇಕಿದೆ.

ಇಂಟರೆಸ್ಟಿಂಗ್ ಲವ್ ಸ್ಟೋರಿ

ಅಷ್ಟಕ್ಕೂ ಇವರ ಲವ್ಸ್ಟೋರಿ ತುಂಬಾ ಇಂಟರೆಸ್ಟಿಂಗ್ ಆಗಿದೆ. ಇದೀಗ ಆರಂಭದಲ್ಲಿ ನಟಿ ರಾಧಾ ಭಗವತಿ ಅವರು ಪ್ರಪೋಸ್‌ ಮಾಡಿದಾಗ, ರಾಣವ್‌ ಬೇಡ ಎಂದ ಬಗ್ಗೆ ನಟಿ ಮಾತನಾಡಿದ್ದಾರೆ. ಸುಮನ್ ಟಿವಿಗೆ ನೀಡಿರುವ ಸಂದರ್ಶನದಲ್ಲಿ ನಟಿ, ನನಗೆ ಗೊತ್ತಿಲ್ಲದೇ ಅವರ ಮೇಲೆ ಲವ್‌ ಆಯ್ತು, ಅವರ ಕ್ಯೂಟ್‌ನೆಸ್‌ ನನ್ನನ್ನ ಅಟ್ರ್ಯಾಕ್ಟ್‌ ಮಾಡಿತು. ಆದರೆ ಅವರ ಹಿನ್ನೆಲೆ ಏನೂ ಗೊತ್ತಿರಲಿಲ್ಲ. ಅವರು ಹಣವಂತರಾ, ಕಾರು, ಬಂಗ್ಲೆ ಇದ್ಯಾ ಏನೂ ಅರಿವು ಇರಲಿಲ್ಲ. ಮನಸ್ಸು ಅವರನ್ನು ಕೇಳುತ್ತಿತ್ತು ಅಷ್ಟೇ ಎಂದು ತಮಗೆ ಆರಂಭದಲ್ಲಿ ಆದ ಲವ್‌ ಫೀಲಿಂಗ್ಸ್‌ ಬಗ್ಗೆ ಹೇಳಿದ್ದಾರೆ.

ಅವರೇ ನನ್ನ ಗಂಡ ಎಂದು ಫಿಕ್ಸ್‌ ಆಗಿಬಿಟ್ಟಿದ್ದೆ

ಮನಸ್ಸು ಕೇಳದೇ ನಾನೇ ಒಂದು ದಿನ ನಾನು ಅವರಿಗೆ ಹೋಗಿ ಹೇಳಿಬಿಟ್ಟೆ. ಆದರೆ ಅವರು ಅದಕ್ಕೆ ಒಪ್ಪಲಿಲ್ಲ. ಈಗ ಸದ್ಯಕ್ಕೆ ಅದರ ಬಗ್ಗೆ ಏನೂ ಪ್ಲ್ಯಾನ್ಸ್‌ ಇಲ್ಲ, ಸಾರಿ ಅಂತ ಹೇಳಿಬಿಟ್ಟರು. ನನಗೆ ಆಗ ಏನು ಮಾತಾಡಬೇಕು ಅಂತ ಗೊತ್ತಾಗಿರ್ಲಿಲ್ಲ. ಕಂಪ್ಲೀಟ್‌ ಆಗಿ ಬ್ಲ್ಯಾಂಕ್‌ ಆಗಿಬಿಟ್ಟೆ. ಅದು ನನಗೆ ಹರ್ಟ್‌ ಆಯ್ತು ಎಂದು ನಟಿ ಹೇಳಿದ್ದಾರೆ.ಅವರು ನನ್ನ ಪ್ರೀತಿಯನ್ನ ರಿಜೆಕ್ಟ್‌ ಮಾಡಿದ್ದಾರೆ ಅಂತ ಗೊತ್ತಿದ್ರೂ ಕೂಡ, ಅವರ ಮೇಲೆ ಇದ್ದ ಪ್ರೀತಿ ಹೋಗ್ತಾನೆ ಇರ್ಲಿಲ್ಲ. ಮದುವೆ ಆದರೆ ಇವರನ್ನೇ ಆಗ್ತೀನಿ. ಇಲ್ಲದೇ ಇದ್ರೆ ಆ ಮದುವೆ ಅನ್ನೋ ಕಾನ್ಸೆಪ್ಟ್‌ ಬೇಡ ನನ್ನ ಜೀವನದಲ್ಲಿ ಅಂತ ನಾನು ಫಿಕ್ಸ್‌ ಅಗಿಬಿಟ್ಟಿದ್ದೆ. ಆದರೂ ಶೂಟಿಂಗ್‌ನಲ್ಲಿ ಏನೂ ಗೊತ್ತಿಲ್ಲದವರ ರೀತಿ ಭಾಗಿಯಾಗಿದ್ದೆ ಎಂದು ಆ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ.

ರಾಣವ್ ಏನಂದ್ರು?

ಇದಕ್ಕೆ ರಾಣವ್‌ ಅವರು, ಮೊದಲು ಪಾತ್ರದ ಪರಿಚಯ ಆಗಿತ್ತು ಬಿಟ್ರೆ, ನಮ್ಮಿಬ್ಬರ ವ್ಯಕ್ತಿತ್ವದ ಪರಿಚಯ ಅಗಿರ್ಲಿಲ್ಲ. ಅವರಿಗೆ ಯಾವಾಗ ನನ್ನ ವ್ಯಕ್ತಿತ್ವದ ಪರಿಚಯ ಆಯ್ತೋ ಅವರಿಗೆ ನನ್ನ ಮೇಲೆ ಆಸೆ ಆಗೋಕೆ ಶುರುವಾಯ್ತು. ಅವರ ವ್ಯಕ್ತಿತ್ವದ ಪರಿಚಯ ನನಗೆ ಆಗಿದ್ರೂ ಕೂಡ ನಾನು ಅದರ ಮೇಲೆ ಗಮನ ಕೊಟ್ಟಿರಲಿಲ್ಲ. ಬಹುಶಃ ಗಮನ ಕೊಟ್ಟಿದಿದ್ರೆ ನನಗೇ ಮೊದಲು ಇವರ ಮೇಲೆ ಫೀಲಿಂಗ್ಸ್‌ ಶುರುವಾಗುತ್ತಿತ್ತೋ ಗೊತ್ತಿಲ್ಲ. ಅಷ್ಟಕ್ಕೂ ಇಂಥ ನಿರ್ಧಾರ ಏಕಾಏಕಿ ತೆಗೆದುಕೊಳ್ಳುವುದು ಅಲ್ಲವಲ್ಲ ಎಂದಿದ್ದಾರೆ. ಆದಕ್ಕೆ ಅವರು ಪ್ರಪೋಸ್‌ ಮಾಡಿದಾಗ ನಾನು ಒಪ್ಪಿಕೊಂಡಿರಲಿಲ್ಲ. ಆದರೆ, ಈಕೆಯ ವ್ಯಕ್ತಿತ್ವ ಬದಲಾಗಲಿಲ್ಲ ಅನ್ನೋದು ಗೊತ್ತಾಯ್ತು. ಆಮೇಲೆ ನಾನೇ ಇದಕ್ಕೆ ಒಪ್ಪಿಕೊಂಡೆ ಎಂದಿದ್ದಾರೆ. ಮುಂಚೆ ನನ್ನ ಜೊತೆಗೆ ಇವರ ಒಡನಾಟ ಹೇಗಿತ್ತೋ ಹಾಗೆ ಇತ್ತು. ಅದು ನನಗೆ ಇಷ್ಟ ಆಯ್ತು. ಅಲ್ಲಿಗೆ ನಮ್ಮ ಮದುವೆ ಫಿಕ್ಸ್‌ ಆಯ್ತು ಎಂದರು.

ಆಯುಧ ಪೂಜೆಗೆ ದೇವರಂತೆ ಪೂಜಿಸುವ ಕಾರಿನ ಬಾನೆಟ್ ಮೇಲೆ ಪ್ರೇಯಸಿ ಹೆಜ್ಜೆ ಗುರುತು; ನೋಡಿ ಮುಂದೇನಾಯ್ತು..!

Sathish Kumar KH — Mon, 19 Oct 2026 16:30:29 +0530

ಇತ್ತೀಚಿನ ದಿನಗಳಲ್ಲಿ ಇನ್‌ಸ್ಟಾಗ್ರಾಮ್ ರೀಲ್ಸ್ ಮತ್ತು ಸೋಶಿಯಲ್ ಮೀಡಿಯಾದಲ್ಲಿ ವ್ಯೂವ್ಸ್ (Views), ಲೈಕ್ಸ್‌ಗಳಿಗಾಗಿ ಜನರು ಎಂತಹ ವಿಚಿತ್ರ ಕೆಲಸಗಳನ್ನು ಮಾಡಲೂ ಹೇಸುವುದಿಲ್ಲ. ಹುಡುಗಿಯನ್ನು ಇಂಪ್ರೆಸ್ ಮಾಡಲು ಹುಡುಗರು ಮಾಡುವ ಹುಚ್ಚಾಟಗಳಂತೂ ಕೆಲವೊಮ್ಮೆ ಎಲ್ಲೆ ಮೀರಿಬಿಡುತ್ತವೆ. ಇದೀಗ ಅಂತಹದ್ದೇ ಒಂದು ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಕಿಡಿಹೊತ್ತಿಸಿದೆ!

ಆಗಿದ್ದೇನು?

ಹೊಸ ಕಾರೊಂದನ್ನು ಖರೀದಿ ಮಾಡಿದ ವ್ಯಕ್ತಿ ತನ್ನ ಪ್ರೇಯಸಿಯನ್ನು ಎತ್ತಿಕೊಂಡು ಆಕೆಯ ಕಾಲಿಗೆ ಕೆಂಪು ಬಣ್ಣವನ್ನು ಹಚ್ಚಿ ಕಾಲಿನ ಹೆಜ್ಜೆ ಗುರುತನ್ನು ಕಾರು ಇಂಜಿನ್‌ನ ಬಾನೆಟ್ (Engine Hood) ಮೇಲೆ ಇಡಿಸುತ್ತಾನೆ. ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ವೈರಲ್ ಆಗಿದೆ. ಈ ದೃಶ್ಯವನ್ನು ಮಾನವ ಹಕ್ಕುಗಳ ಹೋರಾಟಗಾರ ಸ್ಯಾಮ್ ಸಿಫ್ (Sam Siff) ಎಂಬುವವರು ತಮ್ಮ 'X' (ಟ್ವಿಟರ್) ಖಾತೆಯಲ್ಲಿ ಹಂಚಿಕೊಂಡು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

'ಇದು ಅತ್ಯಂತ ದಯನೀಯ! ಆಕೆಯನ್ನು ಇಂಪ್ರೆಸ್ ಮಾಡಲು ಇಂಜಿನ್ ಬಾನೆಟ್ ಮೇಲೆ ಕಾಲಿಡಿಸುವುದಾ? ನಿಜವಾದ ಯಾವುದೇ ಕಾರ್ ಪ್ರೇಮಿ (Car Lover) ಇಂತಹ ಕೃತ್ಯವನ್ನು ಮೆಚ್ಚುವುದಿಲ್ಲ. ಈ ಡ್ರಾಮಾ ಮಾಡಲು ಆತ ಕಾರಿನ ಬಾಗಿಲು ಬಳಸಬಹುದಿತ್ತು, ಆದರೆ ಇಂಜಿನ್ ಇರುವಂತಹ ಬಾನೆಟ್‌ಗೆ ಅಗೌರವ ತೋರಿದ್ದಾರೆ. ಇದು ಯಾವುದೇ ಸ್ವಾಭಿಮಾನವಿಲ್ಲದ ನಾಚಿಕೆಗೇಡು ಕೃತ್ಯ. ಕಾರಿನ ಬಗ್ಗೆ ಗೌರವವೂ ಇಲ್ಲ, ತನ್ನ ಬಗ್ಗೆ ತನಗೇ ಗೌರವವಿಲ್ಲದ ವರ್ತನೆ' ಎಂದು ಸ್ಯಾಮ್ ಸಿಫ್ ತೀವ್ರವಾಗಿ ಖಂಡಿಸಿದ್ದಾರೆ.

Pathetic. ‍♂️

Putting her foot on the engine hood just to impress her?

No real car lover will ever appreciate this kind of simping.

He could have used the car door for this drama, but no — he had to disrespect the engine hood.

Shameless simp. Zero self-respect, zero respect for the car. https://t.co/IYPGRVFe1s

— The Forgotten ‘Man’ ‍⚖️ (@SamSiff) October 19, 2026

ನೆಟ್ಟಿಗರ ಮಿಶ್ರ ಪ್ರತಿಕ್ರಿಯೆ: ಪರ-ವಿರೋಧದ ದೊಡ್ಡ ಚರ್ಚೆ!

ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಕಮೆಂಟ್ ಬಾಕ್ಸ್‌ನಲ್ಲಿ ಪರ-ವಿರೋಧ ಚರ್ಚೆ ಆರಂಭಿಸಿದ್ದಾರೆ.

ಕಾರು ಪ್ರೇಮಿಗಳ ಆಕ್ರೋಶ: 'ಒಬ್ಬ ಒಳ್ಳೆಯ ಕಾರ್ ಲವರ್ಸ್ ಎಂದಿಗೂ ಕಾರಿನ ಮೇಲೆ ಕಾಲಿಡಲು ಬಿಡುವುದಿಲ್ಲ. ಬರೀ ಇನ್‌ಸ್ಟಾಗ್ರಾಮ್ ವ್ಯೂವ್ಸ್‌ಗಾಗಿ ಇಷ್ಟೊಂದು ಕೀಳು ಮಟ್ಟಕ್ಕೆ ಇಳಿಯಬೇಕಾ? ಇಂದಿನ ಪೀಳಿಗೆಯಲ್ಲಿ ಹುಡುಗಿಯರನ್ನು ಓಲೈಸಲು ಹುಡುಗರು ಇಂತಹ ಕೃತ್ಯಗಳನ್ನು ಎಸಗುತ್ತಾರೆ' ಎಂದು ಹಲವರು ಕಿಡಿಕಾರಿದ್ದಾರೆ.

ವೈಯಕ್ತಿಕ ಸ್ವಾತಂತ್ರ್ಯ: 'ಗಾಡಿ ಅವನದ್ದು, ಹುಡುಗಿ ಅವನವಳು, ಡ್ರಾಮಾ ಅವರದ್ದು... ನಡುವೆ ಇವರಿಗೇಕೆ ಉಸಾಬರಿ? ಆತನ ಕಾರನ್ನು ಆತ ಹೇಗೆ ಬೇಕಾದರೂ ಬಳಸಿಕೊಳ್ಳಲಿ, ಬೇರೆಯವರಿಗೆ ಏನು ನಷ್ಟ?' ಎಂದು ಕೆಲವರು ಯುವಕನ ಪರವಾಗಿ ಬ್ಯಾಟ್ ಬೀಸಿದ್ದಾರೆ.

ಸಂಸ್ಕೃತಿ ನೆನಪಿಸಿದ ಕೆಲವರು: 'ಭಾರತದಲ್ಲಿ ಹೆಣ್ಣುಮಕ್ಕಳನ್ನು ದೇವಿಯಂತೆ ಕಂಡು ಗೌರವಿಸುವ ಸಂಪ್ರದಾಯವಿದೆ. ಇದು ಆಕೆಯ ಮೇಲಿನ ಪ್ರೀತಿ ಇರಬಹುದು' ಎಂದು ಕಾರಿನ ಮೇಲೆ ಕಾಲಿಟ್ಟಿದ್ದನ್ನು ಸಮರ್ಥಿಸಿಕೊಂಡಿದ್ದಾರೆ.

ರೀಲ್ಸ್ ಹುಚ್ಚಿಗೆ ಟಾಂಗ್: 'ಕಾರಿನ ಎಂಜಿನ್ ಎನ್ನುವುದು ದೈವಿಕ ಸ್ವರೂಪ. ಅದನ್ನು ದೇವರ ಮುಂದೆ ಪೂಜಿಸುತ್ತೇವೆ. ಆದರೆ, ಇಲ್ಲಿ ಕೇವಲ ನಾಲ್ಕು ಲೈಕ್‌ಗಳಿಗಾಗಿ ಮನುಷ್ಯರು ಇಷ್ಟೊಂದು ಕೀಳು ಮಟ್ಟಕ್ಕೆ ಇಳಿಯುತ್ತಾರೆ ಅನ್ನೋದಕ್ಕೆ ಈ ರೀಲ್ಸ್ ಸಾಕ್ಷಿ' ಎಂದು ಹಲವರು ವ್ಯಂಗ್ಯವಾಡಿದ್ದಾರೆ.

ಒಟ್ಟಿನಲ್ಲಿ, ಯುವತಿಯೊಬ್ಬಳು ಕಾರಿನ ಬಾನೆಟ್ ಮೇಲೆ ಕಾಲಿಟ್ಟ ಈ ಒಂದು ಘಟನೆ, ಪ್ರೀತಿ ಮತ್ತು ಕಾರ್ ಕ್ರೇಜ್ ನಡುವಿನ ದೊಡ್ಡ ಚರ್ಚೆಗೆ ಕಾರಣವಾಗಿ ಸಾಮಾಜಿಕ ಜಾಲತಾಣದಲ್ಲಿ ಟ್ರೆಂಡಿಂಗ್ ಟಾಪಿಕ್ ಆಗಿದೆ.

ಪ್ರೇಯಸಿ ಕುಟುಂಬದವರ ಮನವೊಲಿಸಲು ಮೊಣಕಾಲ ಮೇಲೆ 1,100 ಹೆಜ್ಜೆ ಹಾಕಿದ ಯುವಕ! ಮುಂದೇನಾಯ್ತು

Suchethana D — Fri, 16 Oct 2026 19:56:33 +0530

ದಾಮೋಹ್ (ಮಧ್ಯ ಪ್ರದೇಶ): ಪ್ರೀತಿ ಕುರುಡು, ಕಿವುಡು ಎಲ್ಲವೂ ಹೌದು. ಪ್ರೀತಿಯಲ್ಲಿ ಒಮ್ಮೆ ಬಿದ್ದರೆ, ಅದರಿಂದ ತಪ್ಪಿಸಿಕೊಳ್ಳುವುದು ಹಲವರಿಗೆ ಸಾಧ್ಯವಾಗದ ಮಾತು. ಕೆಲವರಿಗೆ ಇದೊಂದು ಜಸ್ಟ್ ಫನ್ ಆದರೆ, ಮತ್ತೆ ಕೆಲವರಿಗೆ ಇದೇ ಜೀವನದ ದಾರಿ ಆಗಿಬಿಡುತ್ತದೆ. ಕೆಲವೊಮ್ಮೆ ಯುವಕನೋ, ಯುವತಿಯೋ ಜಸ್ಟ್ ಟೈಮ್ಪಾಸ್ಗಾಗಿ ಪ್ರೀತಿಯ ನೆಪದಲ್ಲಿ ಸುತ್ತಾಡುವುದು ಇದೆ. ಆದರೆ, ಅದನ್ನೇ ನಿಜವೆಂದು ನಂಬಿಕೊಳ್ಳುವ ಆ ಯುವಕನೋ, ಯುವತಿಯೋ ಇದರಿಂದ ಮನನೊಂದು ಜೀವವನ್ನೇ ಕಳೆದುಕೊಳ್ಳುವ ಮಟ್ಟಿಗೆ ಹೋಗುತ್ತಾರೆ. ಪ್ರೀತಿಸಿದ ಹುಡುಗನೋ, ಹುಡುಗಿಯೋ ಓಕೆ ಅಂದ್ರೆ ಆಗಿಲ್ಲವಲ್ಲ. ಅವರ ಮನೆಯವರನ್ನು ಒಪ್ಪಿಸುವುದು ಕೂಡ ದೊಡ್ಡ ಸವಾಲಿನ ಕೆಲಸವೇ. ಅದರಲ್ಲಿಯೂ ಜಾತಿ ಬೇರೆಯಾದರೆ, ಹುಡುಗನಿಗೆ ಸರಿಯಾದ ಕೆಲಸ ಇಲ್ಲದಿದ್ದರೆ, ಹುಡುಗಿಯ ಮನೆಯವರ ದೊಡ್ಡ ದೊಡ್ಡ ಬೇಡಿಕೆಗಳನ್ನು ಈಡೇರಿಸುವುದು ಹುಡುಗನಿಗೆ ಕಷ್ಟವಾದರೆ ಅಥವಾ ಅದೇ ಇನ್ನೊಂದೆಡೆ ಹುಡುಗಿ ಹೀಗೆಯೇ ಇರಬೇಕು ಎಂದು ಹುಡುಗನ ಮನೆಯವರು ಕಂಡ ಕನಸು ಈ ಪ್ರೇಯಸಿಯಲ್ಲಿ ಇಲ್ಲದೇ ಹೋದರೆ... ಹೀಗೆ ರೇ... ರೇ... ಗಳ ಮಧ್ಯೆ ಪ್ರೇಮ ತುಂಡಾಗುವುದು ಇದೆ.

ಇದೇ ಕಾರಣಕ್ಕೆ ಇಲ್ಲೊಬ್ಬ ಯುವಕ, ತಾನು ಯುವತಿಯನ್ನು ಎಷ್ಟು ಪ್ರೀತಿಸ್ತೇನೆ ಎಂದು ಸಾಬೀತು ಮಾಡಲು, ಆಕೆಯ ಮನೆಯವರಿಗೆ ಇದನ್ನು ತೋರಿಸುವುದಕ್ಕಾಗಿ ಮೊಣಕಾಲುಗಳ ಮೇಲೆ 1,100 ಕಡಿದಾದ ಮೆಟ್ಟಿಲುಗಳನ್ನು ಹತ್ತಿದ್ದಾನೆ. ಇದರ ಫೋಟೋಗಳು ಈಗ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿವೆ. ಮಧ್ಯಪ್ರದೇಶದ ಯುವಕನೊಬ್ಬ ಮೈಹಾರ್‌ನಲ್ಲಿರುವ ಮಾ ಶಾರದಾ ದೇವಿ ದೇವಸ್ಥಾನದಲ್ಲಿ ಹೀಗೆ ಮಾಡಿದ್ದು, ಅದರ ಬಗ್ಗೆ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ಚರ್ಚೆಯಾಗುತ್ತಿದೆ.

1,100 ಮೆಟ್ಟಿಲು ಏರಿದ

ಈತ ಮಧ್ಯಪ್ರದೇಶದ ದಾಮೋಹ್ ಜಿಲ್ಲೆಯ ಕಿಯೋಲಾರಿ ಗ್ರಾಮದ ಯುವಕ ಎನ್ನಲಾಗಿದೆ. ಮಧ್ಯಪ್ರದೇಶದ ಮೈಹಾರ್‌ನಲ್ಲಿರುವ ಮಾ ಶಾರದಾ ದೇವಿ ದೇವಸ್ಥಾನದಲ್ಲಿ ಸುಮಾರು 1,100 ಮೆಟ್ಟಿಲುಗಳು ಇದ್ದು, ಪ್ರೀತಿಯನ್ನು ಸಾಬೀತು ಪಡಿಸಲು ಮೊಣಕಾಲಿನ ಮೇಲೆ ದೀಪ ಹಿಡಿದು ನಡೆದು ಹೋಗಿದ್ದಾನೆ. ಮದುವೆಗೆ ತನ್ನ ಗೆಳತಿಯ ಕುಟುಂಬದಿಂದ ಅನುಮೋದನೆಯನ್ನು ಪಡೆಯಲು ಸಂಪೂರ್ಣವಾಗಿ ಮೊಣಕಾಲುಗಳ ಮೇಲೆ ಮೆಟ್ಟಿಲುಗಳನ್ನು ಹತ್ತುವುದಾಗಿ ಅವನು ಪ್ರತಿಜ್ಞೆ ಮಾಡಿದ್ದನಂತೆ.

ನೆಟ್ಟಿಗರ ಸಲಹೆ

ಇದು ಆನ್‌ಲೈನ್‌ನಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ. ಆ ಹುಡುಗನ ತಪಸ್ಸು ಫಲಿಸಿತೋ ಇಲ್ಲವೋ ಗೊತ್ತಿಲ್ಲ. ಆದರೆ ಸೋಷಿಯಲ್ ಮೀಡಿಯಾದಲ್ಲಿ ಮಾತ್ರ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದ್ದಾನೆ. ಕೆಲವರು ಟ್ರೂ ಲವ್ ಎಂದಿದ್ದರೆ, ಮತ್ತೆ ಕೆಲವರು ಯಾವುದೋ ಹುಡುಗಿಗಾಗಿ ಜೀವನ ಹಾಳುಮಾಡಿಕೊಳ್ಳಬೇಡ ಗುರೂ. ಅವಳು ಎಂಥವಳು ಎಂದು ಮೊದಲು ನೋಡು, ಈಗಿನ ಹೆಚ್ಚಿನ ಹುಡುಗಿಯರಿಗೆ ಲವ್ ಎನ್ನೋದು ಟೈಮ್ಪಾಸ್ ಆಗಿರುತ್ತದೆ. ನೀನು ನಿನ್ನ ಜೀವನವನ್ನು ಹಾಳುಮಾಡಿಕೊಳ್ಳಬೇಡ ಎಂದು ಸಲಹೆ ಕೊಡುತ್ತಿದ್ದಾರೆ. ಒಟ್ಟಿನಲ್ಲಿ ಈತ ಈಗ ಸದ್ಯ ಹೀರೋ ಆಗಿದ್ದಾನೆ.