Asianet Suvarna News

ಚೀನಾ ಹೂಡಿದ ರಹಸ್ಯ ಜಾಲದಲ್ಲಿ ಅಮೆರಿಕದ AI ತಂತ್ರಜ್ಞಾನ ಲೋಕದ 63ರ ಸಿಇಒ, ಡೇಟಿಂಗ್ ನೆರಳಲ್ಲಿ ಗೂಢಚಾರಿಕೆ!

Gowthami K — Mon, 09 Nov 2026 14:47:14 +0530

ವಾಷಿಂಗ್ಟನ್ / ಬೀಜಿಂಗ್: ಜಾಗತಿಕ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನ ಕ್ರಾಂತಿಯ ಹರಿಕಾರ, ಎನ್‌ವಿಡಿಯಾ (Nvidia) ಸಂಸ್ಥೆಯ ಸಿಇಒ 63 ವರ್ಷದ ಜೆನ್ಸನ್ ಹುವಾಂಗ್ ಚೀನಾದ ಗೂಢಚಾರಿಕೆ ಕಾರ್ಯಾಚರಣೆಯ ಗುರಿಯಾಗಿದ್ದಾರೆ ಎಂಬ ಆಘಾತಕಾರಿ ವರದಿ ಹೊರಬಿದ್ದಿದೆ. ಬೀಜಿಂಗ್‌ನ ಗುಪ್ತಚರ ಸಂಸ್ಥೆಗಳ ಪರ ಕೆಲಸ ಮಾಡುತ್ತಿದ್ದಾರೆಂದು ಶಂಕಿಸಲಾದ ಚೀನಾದ ಉದ್ಯಮಿ ಆಲಿಸ್ ಹುವಾಂಗ್ ಅವರೊಂದಿಗೆ ಜೆನ್ಸನ್ ಹುವಾಂಗ್ ನಿಕಟ ಪ್ರೇಮ- ಪ್ರಣಯ ಸಂಬಂಧ ಹೊಂದಿದ್ದು, ಈ ಮೂಲಕ ಜಾಗತಿಕ AI ಉದ್ಯಮದ ಮೇಲೆ ಪ್ರಭಾವ ಬೀರಲು ಚೀನಾ ಯತ್ನಿಸುತ್ತಿದೆ ಎಂದು ಅಮೆರಿಕದ ಗುಪ್ತಚರ ಸಂಸ್ಥೆಗಳು ಶಂಕೆ ವ್ಯಕ್ತಪಡಿಸಿವೆ.

ಅಮೆರಿಕದ ಅತ್ಯಂತ ಪ್ರಭಾವಶಾಲಿ ತಂತ್ರಜ್ಞಾನ ದಿಗ್ಗಜನ ಸುತ್ತ ಹೆಣೆದುಕೊಂಡಿರುವ ಈ ಗೂಢಚಾರಿಕಾ ಜಾಲವು ತಂತ್ರಜ್ಞಾನ ವಲಯದಲ್ಲಿ ತೀವ್ರ ಸಂಚಲನ ಮೂಡಿಸಿದೆ.

ಅಮೆರಿಕನ್ ಪತ್ರಿಕೆಯಿಂದ ಗೌಪ್ಯ ಮೌಲ್ಯಮಾಪನ ವರದಿ

ಅಮೆರಿಕ ಪ್ರಕಟಿಸಿರುವ ತನಿಖಾ ವರದಿಗಳ ಪ್ರಕಾರ, ಅಮೆರಿಕದ ಗುಪ್ತಚರ ಸಂಸ್ಥೆಗಳು ಜೆನ್ಸನ್ ಹುವಾಂಗ್ ಹಾಗೂ ಆಲಿಸ್ ಹುವಾಂಗ್ ನಡುವಿನ ನಿಕಟ ಸಂಬಂಧವನ್ನು ವಿವರಿಸುವ ವರ್ಗೀಕೃತ ಜ್ಞಾಪಕ ಪತ್ರವನ್ನು ಸಿದ್ಧಪಡಿಸಿವೆ. ಈ ರಹಸ್ಯ ವರದಿಯನ್ನು ಯುಎಸ್ ಸರ್ಕಾರದ ಉನ್ನತ ಮಟ್ಟದ ಅತ್ಯಂತ ಸಣ್ಣ ಅಧಿಕಾರಿಗಳ ಬಳಗಕ್ಕೆ ಪ್ರಸಾರ ಮಾಡಲಾಗಿದೆ.

ಜೂನ್ 2024 (ತೈಪೆ): ತೈವಾನ್‌ನ ತೈಪೆಯಲ್ಲಿ ನಡೆದ ಬಿಸಿನೆಸ್ ಟ್ರೇಡ್ ಶೋ ಒಂದರ ನಂತರ ಬಾರ್‌ನಲ್ಲಿ ಇಬ್ಬರೂ ಒಟ್ಟಿಗೆ ವಿಸ್ಕಿ ಕುಡಿಯುತ್ತಿರುವ ಛಾಯಾಚಿತ್ರಗಳು 'ನೆಟ್‌ಥಂಡರ್' ಸಂಸ್ಥೆಯ ಲಿಂಕ್ಡ್‌ಇನ್ ಪ್ರೊಫೈಲ್‌ನಲ್ಲಿ ಕಂಡುಬಂದಿದ್ದವು.

ಮೇ 2025 (ಕಂಪ್ಯೂಟೆಕ್ಸ್): ತೈಪೆಯ ಪ್ರಸಿದ್ಧ 'ಕಂಪ್ಯೂಟೆಕ್ಸ್' ತಂತ್ರಜ್ಞಾನ ಮೇಳದ ವೇಳೆ ಜೆನ್ಸನ್ ಹುವಾಂಗ್ ಆಯೋಜಿಸಿದ್ದ ಭೋಜನಕೂಟದಲ್ಲಿ ಆಲಿಸ್ ಹುವಾಂಗ್ ಸಿಇಒ ಪಕ್ಕದಲ್ಲೇ ಕುಳಿತು, ಅತ್ಯಂತ ನಿಕಟವಾಗಿ ಬೆರೆತಿರುವುದು ಹಾಗೂ ಕಾರ್ಯಕ್ರಮದ ನಂತರ ಇಬ್ಬರೂ ಒಂದೇ ಕಾರಿನಲ್ಲಿ ತೆರಳಿರುವುದು ವಿಡಿಯೋ ಮತ್ತು ಫೋಟೋ ಸಾಕ್ಷ್ಯಗಳಿಂದ ತಿಳಿದುಬಂದಿದೆ.

ಯಾರು ಈ ಆಲಿಸ್ ಹುವಾಂಗ್? ಮೆಗಾಸ್ಪೀಡ್ ಸಂಸ್ಥೆಯ ಚೀನಾ ಲಿಂಕ್!

ಆಲಿಸ್ ಹುವಾಂಗ್ (ಹುವಾಂಗ್ ಲೆ) ಆರಂಭದಲ್ಲಿ ಚೀನಾದ ಸರ್ಕಾರಿ ಸುದ್ದಿ ವಾಹಿನಿಗಳಾದ CCTV, ಹುನಾನ್ ಟಿವಿ ಹಾಗೂ HSBC ಬ್ಯಾಂಕ್‌ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ನಂತರ ಅವರು ಸಿಂಗಾಪುರ ಮೂಲದ 'ಮೆಗಾಸ್ಪೀಡ್ ಇಂಟರ್ನ್ಯಾಷನಲ್' ಸಂಸ್ಥೆಯ ಹಿರಿಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ ಆಯ್ಕೆಯಾದರು.

ಮೆಗಾಸ್ಪೀಡ್ ಸಂಸ್ಥೆಯು ಏಷ್ಯಾ-ಪೆಸಿಫಿಕ್ ಪ್ರದೇಶದಲ್ಲಿ ಎನ್‌ವಿಡಿಯಾದ ಪ್ರಮುಖ ಕ್ಲೌಡ್ ಕಂಪ್ಯೂಟಿಂಗ್ ಪಾಲುದಾರ ಸಂಸ್ಥೆಯಾಗಿದೆ. ಈ ಕಂಪನಿಯು ಕೇವಲ ಎರಡೇ ವರ್ಷಗಳಲ್ಲಿ ಅಂದಾಜು ₹40,000 ಕೋಟಿಗೂ ಹೆಚ್ಚು ಮೌಲ್ಯದ ಎನ್‌ವಿಡಿಯಾ AI ಚಿಪ್‌ಗಳನ್ನು ಖರೀದಿಸಿದೆ.

ಯುಎಸ್ ನಿರ್ಬಂಧ ಮತ್ತು ಅಕ್ರಮ ಚಿಪ್ ಸರಬರಾಜು ಆರೋಪ

ಚೀನಾದ ಮಿಲಿಟರಿ ಸಾಮರ್ಥ್ಯ ಮತ್ತು ತಾಂತ್ರಿಕ ಪ್ರಗತಿಯನ್ನು ತಡೆಯುವ ಉದ್ದೇಶದಿಂದ ವಾಷಿಂಗ್ಟನ್ ಆಡಳಿತವು ತನ್ನ ಅತ್ಯಾಧುನಿಕ AI ಪ್ರೊಸೆಸರ್ ಹಾಗೂ ಚಿಪ್‌ಗಳ ರಫ್ತಿನ ಮೇಲೆ ತೀವ್ರ ನಿರ್ಬಂಧ ಹೇರಿದೆ. ಆದರೆ, ಮೆಗಾಸ್ಪೀಡ್ ಸಂಸ್ಥೆಯು ಈ ನಿಯಮಗಳನ್ನು ಉಲ್ಲಂಘಿಸಿ ಎನ್‌ವಿಡಿಯಾ ಪ್ರೊಸೆಸರ್‌ಗಳನ್ನು ಕದ್ದುಮುಚ್ಚಿ ಚೀನಾಕ್ಕೆ ಸರಬರಾಜು ಮಾಡುತ್ತಿದೆ ಎಂಬ ಗಂಭೀರ ಅನುಮಾನ 2024ರಿಂದಲೇ ಅಮೆರಿಕನ್ ಏಜೆನ್ಸಿಗಳಿಗಿತ್ತು.

ಈ ತನಿಖೆಯ ಭಾಗವಾಗಿ 2025ರಲ್ಲಿ ಸಿಂಗಾಪುರ ತನಿಖಾಧಿಕಾರಿಗಳು ಆಲಿಸ್ ಹುವಾಂಗ್ ಅವರನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದ್ದರು. ಸದ್ಯ ಮೆಗಾಸ್ಪೀಡ್ ಹಾಗೂ ಎನ್‌ವಿಡಿಯಾ ಕಂಪನಿಗಳು ಈ ಎಲ್ಲಾ ಅಕ್ರಮ ನಿಯಮ ಉಲ್ಲಂಘನೆಯ ಆರೋಪಗಳನ್ನು ತಳ್ಳಿಹಾಕಿವೆಯಾದರೂ, ಯುಎಸ್ ಗುಪ್ತಚರ ಸಂಸ್ಥೆಗಳು ಈ ಚೀನೀ ಗೂಢಚಾರಿಕೆಯ ಜಾಲವನ್ನು ಅತ್ಯಂತ ಗಂಭೀರವಾಗಿ ಪರಿಶೀಲಿಸುತ್ತಿವೆ.

Amurthadhaare ಅಂತಿಮ ಅಧ್ಯಾಯ ಪ್ರೊಮೋ ರಿಲೀಸ್: ಇದು ತುಂಬಾ ಅನ್ಯಾಯ- ಸೀರಿಯಲ್ ಫ್ಯಾನ್ಸ್ ಕಣ್ಣೀರು

Suchethana D — Mon, 09 Nov 2026 16:56:20 +0530

ಮೂರೂವರೆ ವರ್ಷಗಳವರೆಗೆ ಜನರನ್ನು ರಂಜಿಸಿದ್ದ, ಟ್ವಿಸ್ಟ್ ಮೇಲೆ ಟ್ವಿಸ್ಟ್ ಕೊಡುತ್ತಾ ಸಾಗಿದರೂ, ಇನ್ನೇನು ಮುಗಿಯತ್ತೆ ಎನ್ನುವಾಗಲೇ ಮತ್ತೊಂದಿಷ್ಟು ಕಥೆಯನ್ನು ಸೇರಿಸಿ ಸೀರಿಯಲ್ ಎಳೆದರೂ, ಕೊನೆಯವರೆಗೂ ಅದೇ ಖುಷಿ, ಅದೇ ಪ್ರೀತಿಯನ್ನು ಉಳಿಸಿಕೊಂಡಿರುವ ಕೆಲವೇ ಕೆಲವು ಸೀರಿಯಲ್ಗಳ ಪೈಕಿ ಅಮೃತಧಾರೆ ಸೀರಿಯಲ್ (Amruthadhaare Serial). ಸಾಮಾನ್ಯವಾಗಿ ಸೀರಿಯಲ್ ಆರಂಭದಲ್ಲಿ ಚೆನ್ನಾಗಿರುವ ಕಥೆಯ ಜೊತೆ ಶುರುವಾದರೂ, ಬರುಬರುತ್ತಾ ಅದನ್ನು ಎಳೆಯುವುದು ಹೆಚ್ಚಾದಂತೆ, ಅದು ತನ್ನ ಸೌಂದರ್ಯವನ್ನೇ ಕಳೆದುಕೊಂಡು ಬಿಡುತ್ತದೆ. ವೀಕ್ಷಕರಿಗೂ ಅದನ್ನು ನೋಡಲು ಬೋರ್ ಎನ್ನಿಸುವುದು ಇದೆ. ಆದರೆ ಅಮೃತಧಾರೆ ಮಟ್ಟಿಗೆ ಹೇಳುವುದಾದರೆ, ಹಾಗಾಗಲೇ ಇಲ್ಲ. ಅದರಲ್ಲಿಯೂ ಪೈಪೋಟಿಗೆ ಬಿದ್ದವರಂತೆ ಕಣ್ಣಿನಲ್ಲಿಯೇ ನಟಿಸುವ ನಾಯಕ ರಾಜೇಶ್ ನಟರಂಗ ಮತ್ತು ನಾಯಕಿ ಛಾಯಾ ಸಿಂಗ್ ಅವರ ಅಭಿನಯಕ್ಕೆ ಮಾರು ಹೋಗದವರೇ ಇಲ್ಲ. ಇವರಿಬ್ಬರ ಜೋಡಿಯನ್ನು ಹಾಡಿ ಕೊಂಡಾಡಿದವರು ಅದೆಷ್ಟೋ ಮಂದಿ.

ಇದೀಗ ಎಲ್ಲದಕ್ಕೂ ಒಂದು ಅಂತ್ಯ ಎನ್ನುವಂತೆ ಕೊನೆಗೂ ಸೀರಿಯಲ್ ನಿಜಕ್ಕೂ ಮುಗಿಯುತ್ತಿದೆ. ಇದಾಗಲೇ ಸ್ಟೋರಿ ಏನಾಗಬಹುದು ಎನ್ನುವುದು ಎಲ್ಲರಿಗೂ ತಿಳಿದದ್ದೇ. ಆದರೂ ಕೊನೆಯ ಕ್ಷಣದವರೆಗೂ ಸೀರಿಯಲ್ ರೋಚಕತೆ ಉಳಿಸಿಕೊಳ್ಳುತ್ತಿದೆ. ಇದರ ಶೂಟಿಂಗ್ ಮೊನ್ನೆ ಮುಗಿದಿದ್ದು, ಸೀರಿಯಲ್ಮುಗಿಯತ್ತೆ ಎಂದು ಖುದ್ದು ಗೌತಮ್ ಪಾತ್ರಧಾರಿ ರಾಜೇಶ್ ನಟರಂಗ (Rajesh Nataranga) ಅವರು ಬಂದು ಹೇಳಿದ್ದರು. ಇದೀಗ ಸೀರಿಯಲ್ನ ಅಂತಿಮ ಅಧ್ಯಾಯ ಎಂದು ಪ್ರಮೋ ರಿಲೀಸ್ ಮಾಡಲಾಗಿದೆ.

ಅಂತಿಮ ಅಧ್ಯಾಯದ ಪ್ರೊಮೋ

ಸೋಷಿಯಲ್ ಮೀಡಿಯಾದಲ್ಲಿ ವಾಹಿನಿ ಹಂಚಿಕೊಂಡಿರುವ ಪ್ರೊಮೋದಲ್ಲಿ, ಅಂತಿಮ ಅಧ್ಯಾಯ ಎಂದು ಹೇಳಲಾಗಿದೆ. ಇದರಲ್ಲಿ ಇಡೀ ಮೂರೂವರೆ ವರ್ಷದ ಕಥೆಯನ್ನು ನಾಲ್ಕೈದು ಸೆಕೆಂಡ್ಗಳಲ್ಲಿ ತೋರಿಸಲಾಗಿದೆ. ಆರಂಭದಿಂದ ಈಗ ಈ ಸೀರಿಯಲ್ ಹೇಗೆ ಬಂದಿದೆ ಎನ್ನುವುದನ್ನು ಇದರಲ್ಲಿ ನೋಡಬಹುದಾಗಿದೆ. ಇದೀಗ ಕ್ಲೈಮ್ಯಾಕ್ಸ್ ಹಂತಕ್ಕೆ ನಿಂತಿದೆ.

ಹೀಗಾಗಬಾರದಿತ್ತು, ಸೀರಿಯಲ್ ಪ್ರೇಮಿಗಳ ಕಣ್ಣೀರು

ಈ ಸೀರಿಯಲ್ ಮುಗಿಯುತ್ತದೆ ಎಂದು ವೀಕ್ಷಕರಿಗೆ ತಿಳಿದಿದ್ದರೂ, ಈ ಮೊದಲು ಅನೇಕ ಬಾರಿ ಅಂದುಕೊಂಡಂತೆಮತ್ತಷ್ಟು ಟ್ವಿಸ್ಟ್ ಸೇರಿಸುವ ಆಸೆ ಹಲವರಿಗೆ ಇತ್ತು. ಏಕೆಂದರೆ ಈ ಸೀರಿಯಲ್ ಅನ್ನು ಅಷ್ಟು ಪ್ರೀತಿಯಿಂದ ನೋಡುತ್ತಿದ್ದರು ವೀಕ್ಷಕರು. ಆದರೆ ಇದೀಗ ಖುದ್ದು ವಾಹಿನಿಯೇ ಅಂತಿಮ ಅಧ್ಯಾಯ ಎಂದು ತೋರಿಸಿ ಸೀರಿಯಲ್ ಪ್ರೊಮೋ ಬಿಡುಗಡೆ ಮಾಡಿದ್ದರಿಂದ ಈಗ ಸೀರಿಯಲ್ಮುಗಿಯುವುದು ಖಚಿತವಾಗಿ, ಹೀಗಾಗಬಾರದಿತ್ತು ಎಂದು ಅಭಿಮಾನಿಗಳು ನೋವು ತೋಡಿಕೊಳ್ಳುತ್ತಿದ್ದಾರೆ. ನಿಮ್ಮನ್ನು ತುಂಬಾಮಿಸ್ ಮಾಡಿಕೊಳ್ಳುತ್ತಿದ್ದೇವೆ, ಸೀರಿಯಲ್ಮುಗಿಯಬಾರದಿತ್ತು, ನೀವು ಸದಾ ನಮ್ಮ ಮನದಲ್ಲಿ ಇರುತ್ತೀರಿ, ಸೀರಿಯಲ್ ಅನ್ನು ಮತ್ತಷ್ಟು ತಿಂಗಳು ಮುಂದುವರೆಸಬಹುದಿತ್ತು, ಸೀರಿಯಲ್ಮುಗಿಯುತ್ತೆ ಎಂದರೆ ನಂಬಲು ಆಗುತ್ತಿಲ್ಲ, ಮಿಸ್ ಯು, ಮಿಸ್ ಯು ಎಂದೆಲ್ಲಾ ಕಮೆಂಟ್ಸ್ ಸುರಿಮಳೆಯಾಗುತ್ತಿದೆ. ಒಂದು ಸೀರಿಯಲ್ ಅನ್ನು ಪ್ರೇಕ್ಷಕರು ಹೇಗೆ ಒಪ್ಪಿಕೊಳ್ಳುತ್ತಾರೆ, ಹೇಗೆ ಅದಕ್ಕೆ ಆಪ್ತರಾಗಿಬಿಡುತ್ತಾರೆ ಎನ್ನುವುದಕ್ಕೆ ಉದಾಹರಣೆಯಾಗಿ ಅಮೃತಧಾರೆ ಸೀರಿಯಲ್ ತನ್ನ ಅಧ್ಯಾಯ ಮುಗಿಸುತ್ತಿದೆ.

ರಷ್ಯಾ ಗಂಡನ ಎದುರೇ ಹೆಂಡ್ತಿ ಶ್ರಿಯಾ ಶರಣ್ ಬಗ್ಗೆ ನಾಚಿಕೆ ಬಿಟ್ಟು ಮಾತಾಡಿದ ಅಭಿಮಾನಿ; ಮುಂದಾಗಿದ್ದು ಶಾಕಿಂಗ್!

Shriram Bhat — Sun, 08 Nov 2026 10:18:41 +0530

ನಟಿ ಶ್ರಿಯಾ ಶರಣ್ ಬಗ್ಗೆ ಅಸಭ್ಯ ಕಾಮೆಂಟ್; ಪತಿ ಆ್ಯಂಡ್ರಿ ಕೊಟ್ಟ ತಮಾಷೆಯ ಉತ್ತರಕ್ಕೆ ನೆಟ್ಟಿಗರು ಫಿದಾ!

ಸೋಷಿಯಲ್ ಮೀಡಿಯಾದಲ್ಲಿ ಸೆಲೆಬ್ರಿಟಿಗಳ ಬಗ್ಗೆ ಅಭಿಮಾನಿಗಳು ಮೆಚ್ಚುಗೆಯ ಮಾತುಗಳನ್ನು ಹಂಚಿಕೊಳ್ಳುವುದು ಸಾಮಾನ್ಯ. ಆದರೆ, ಕೆಲವರು ಲೈವ್ ಚಾಟ್‌ಗಳ ವೇಳೆ ಮಿತಿ ಮೀರಿ ಅಸಭ್ಯವಾಗಿ ವರ್ತಿಸುವುದು ಮಾತ್ರ ಅಚ್ಚರಿಯ ಸಂಗತಿ. ಇದೀಗ ದಕ್ಷಿಣ ಭಾರತದ ಖ್ಯಾತ ನಟಿ ಶ್ರಿಯಾ ಶರಣ್ ಅವರ ಹಳೆಯ ಲೈವ್ ವಿಡಿಯೋವೊಂದು ಮತ್ತೆ ವೈರಲ್ ಆಗಿದ್ದು, ಅಭಿಮಾನಿಯೊಬ್ಬನ ಕೆಟ್ಟ ಕಾಮೆಂಟ್‌ಗೆ ಅವರ ಪತಿ ನೀಡಿದ ಪ್ರತಿಕ್ರಿಯೆ ಎಲ್ಲರ ಗಮನ ಸೆಳೆಯುತ್ತಿದೆ.

ಕನ್ನಡ ಸೇರಿದಂತೆ ಹಲವು ದಕ್ಷಿಣ ಭಾರತೀಯ ಸಿನಿಮಾಗಳಲ್ಲಿ ನಟಿಸಿ ಅಪಾರ ಅಭಿಮಾನಿಗಳನ್ನು ಗಳಿಸಿರುವ ಶ್ರಿಯಾ ಶರಣ್, ತಮ್ಮ ನಟನೆಯ ಜೊತೆಗೆ ಸೋಷಿಯಲ್ ಮೀಡಿಯಾ ಚಟುವಟಿಕೆಗಳಿಂದಲೂ ಸುದ್ದಿಯಲ್ಲಿರುತ್ತಾರೆ. ಕೆಲವು ವರ್ಷಗಳ ಹಿಂದೆ ಅವರು ನಡೆಸಿದ್ದ ಲೈವ್ ಚಾಟ್‌ನಲ್ಲಿ ಅಭಿಮಾನಿಯೊಬ್ಬ ಅಸಭ್ಯವಾಗಿ ಕಾಮೆಂಟ್ ಮಾಡಿದ್ದ. ನಟಿಯ ದೇಹದ ಕುರಿತು ಆ ವ್ಯಕ್ತಿ ಕೆಟ್ಟದಾಗಿ ಮಾತನಾಡಿದ್ದು, ಮುಜುಗರದ ವಾತಾವರಣ ಸೃಷ್ಟಿಸಿತ್ತು.

ಶ್ರಿಯಾ ಪತಿ, ರಷ್ಯಾದ ಉದ್ಯಮಿ ಆ್ಯಂಡ್ರಿ ಕೊಶ್ಚೀವ್ ಕೂಡ ಪಕ್ಕದಲ್ಲೇ ಇದ್ದರು

ಆ ಸಂದರ್ಭದಲ್ಲಿ ಶ್ರಿಯಾ ಅವರ ಪತಿ, ರಷ್ಯಾದ ಉದ್ಯಮಿ ಆ್ಯಂಡ್ರಿ ಕೊಶ್ಚೀವ್ ಕೂಡ ಪಕ್ಕದಲ್ಲೇ ಇದ್ದರು. ಪತ್ನಿಯ ಬಗ್ಗೆ ಇಂತಹ ಅಸಭ್ಯ ಮಾತು ಕೇಳಿದಾಗ ಆ್ಯಂಡ್ರಿ ಕೋಪಗೊಳ್ಳಬಹುದು ಅಥವಾ ಕಾಮೆಂಟ್ ಮಾಡಿದ ವ್ಯಕ್ತಿಗೆ ತಿರುಗೇಟು ನೀಡಬಹುದು ಎಂದು ಹಲವರು ನಿರೀಕ್ಷಿಸಿದ್ದರು. ಆದರೆ, ಅವರು ಆಯ್ಕೆ ಮಾಡಿಕೊಂಡ ಪ್ರತಿಕ್ರಿಯೆ ಮಾತ್ರ ಎಲ್ಲರನ್ನೂ ಅಚ್ಚರಿಗೊಳಿಸಿತ್ತು.

ಅಸಭ್ಯ ಕಾಮೆಂಟ್‌ಗೆ ಪತಿ ಹೇಳಿಕೆ ವೈರಲ್!

ಅಸಭ್ಯ ಕಾಮೆಂಟ್‌ಗೆ ಕೋಪದಿಂದ ಪ್ರತಿಕ್ರಿಯಿಸುವ ಬದಲು, ಆ್ಯಂಡ್ರಿ ಹಾಸ್ಯದ ಧಾಟಿಯಲ್ಲಿ, 'ನೀವು ಹೇಳಿದ್ದು ನಿಜಕ್ಕೂ ಸತ್ಯ' ಎಂದು ಉತ್ತರಿಸಿದ್ದರು. ಅವರ ಈ ತಮಾಷೆಯ ಮಾತು ಮುಜುಗರದ ಸನ್ನಿವೇಶವನ್ನೇ ನಗುವಿನ ಕ್ಷಣವನ್ನಾಗಿ ಬದಲಿಸಿತ್ತು. ಇದೀಗ ಈ ವಿಡಿಯೋ ಮತ್ತೆ ವೈರಲ್ ಆಗಿದ್ದು, ಪತಿಯ ಕೂಲ್ ವರ್ತನೆಗೆ ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.

2018ರಲ್ಲಿ ಶ್ರಿಯಾ ಮತ್ತು ಆ್ಯಂಡ್ರಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು. ಈ ದಂಪತಿಗೆ ಮುದ್ದಾದ ಮಗುವಿದೆ. ಕನ್ನಡದ 'ಅರಸು' ಚಿತ್ರದಲ್ಲಿ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ಶ್ರಿಯಾ, 'ಚಂದ್ರ' ಮತ್ತು 'ಕಬ್ಜ' ಸಿನಿಮಾಗಳಲ್ಲೂ ನಟಿಸಿದ್ದಾರೆ. ಒಟ್ಟಿನಲ್ಲಿ, ಅಸಭ್ಯ ಕಾಮೆಂಟ್‌ಗೆ ಹಾಸ್ಯದ ಮೂಲಕ ಉತ್ತರಿಸಿದ ಆ್ಯಂಡ್ರಿ ಅವರ ನಡೆ ಇದೀಗ ಸೋಷಿಯಲ್ ಮೀಡಿಯಾದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ.

IIT ಫಲಿತಾಂಶ ಬಂದಾಗ ಕಣ್ಣೀರಿಟ್ಟಿದ್ದ ವಿದ್ಯಾರ್ಥಿ, 21 ವರ್ಷಗಳ ಬಳಿಕ ಅದೇ ಶಿಕ್ಷಕರ ಮುಂದೆ ನಿಂತಾಗ ಭಾವುಕ ಕ್ಷಣ!

Chandrashekar GS — Mon, 09 Nov 2026 08:45:44 +0530

21 ವರ್ಷಗಳ ಬಳಿಕ ಗಣಿತ ಶಿಕ್ಷಕರನ್ನು ಭೇಟಿಯಾದ ಉದ್ಯಮಿ ಶಂತನು ದೇಶಪಾಂಡೆ: ಅಂದು ಹೇಳಿದ್ದ ಮಾತು ಇಂದಿಗೂ ನೆನಪು!

ಶಿಕ್ಷಕ ಎಂದರೆ ಕೇವಲ ಪಾಠ ಹೇಳಿಕೊಡುವ ವ್ಯಕ್ತಿಯಲ್ಲ, ಕಷ್ಟದ ಸಮಯದಲ್ಲಿ ಧೈರ್ಯ ತುಂಬುವ ಮಾರ್ಗದರ್ಶಿಯೂ ಹೌದು. ಕೆಲವೊಮ್ಮೆ ಶಿಕ್ಷಕರು ಹೇಳುವ ಒಂದೇ ಒಂದು ಮಾತು ವಿದ್ಯಾರ್ಥಿಯ ಮನಸ್ಸಿನಲ್ಲಿ ಜೀವನಪೂರ್ತಿ ಉಳಿಯುತ್ತದೆ. ಇದಕ್ಕೆ ಉದ್ಯಮಿ ಶಂತನು ದೇಶಪಾಂಡೆ ಅವರ ಜೀವನದ ಒಂದು ಘಟನೆ ಸಾಕ್ಷಿಯಾಗಿದೆ. ಬರೋಬ್ಬರಿ 21 ವರ್ಷಗಳ ಬಳಿಕ ತಮ್ಮ ನೆಚ್ಚಿನ ಗಣಿತ ಶಿಕ್ಷಕರನ್ನು ಭೇಟಿಯಾದ ಅವರು, ಹಳೆಯ ನೆನಪುಗಳನ್ನು ಮೆಲುಕು ಹಾಕಿ ಭಾವುಕರಾಗಿದ್ದಾರೆ.

ಐಐಟಿ ಫಲಿತಾಂಶದ ದಿನ ಧೈರ್ಯ ತುಂಬಿದ್ದ ಗುರು!

ಬಾಂಬೆ ಶೇವಿಂಗ್ ಕಂಪನಿಯ ಸಂಸ್ಥಾಪಕರಾದ ಶಂತನು ದೇಶಪಾಂಡೆ 2005ರಲ್ಲಿ ಐಐಟಿ ಪ್ರವೇಶ ಪರೀಕ್ಷೆಯ ಫಲಿತಾಂಶಕ್ಕಾಗಿ ಕಾಯುತ್ತಿದ್ದ ವಿದ್ಯಾರ್ಥಿಯಾಗಿದ್ದರು. ಫಲಿತಾಂಶ ಪ್ರಕಟವಾದ ದಿನ ಅವರು ತೀವ್ರ ಬೇಸರದಲ್ಲಿದ್ದರು. ಆ ಸಮಯದಲ್ಲಿ ಮೊದಲು ಕರೆ ಮಾಡಿದ್ದು ಕೋಲ್ಟಾದಲ್ಲಿ ತಮ್ಮ ಗಣಿತ ಶಿಕ್ಷಕರಾಗಿದ್ದ ಜೆಜೆ ಸರ್ ಅವರಿಗೆ.

ಆಗ ಶಂತನು ಎಷ್ಟು ಬೇಸರಗೊಂಡಿದ್ದರು ಎಂದರೆ ತಮ್ಮನ್ನು ತಾವು ಸಮಾಧಾನಪಡಿಸಿಕೊಳ್ಳಲು ಸಾಧ್ಯವಾಗುತ್ತಿರಲಿಲ್ಲ. ಆದರೆ ಶಿಕ್ಷಕರ ಧ್ವನಿ ಮತ್ತು ಮಾತುಗಳು ಅವರಿಗೆ ಧೈರ್ಯ ತುಂಬಿದ್ದವು.

'ನಿನ್ನ ಪ್ರಯತ್ನ ನೀನು ಮಾಡು, ಉಳಿದಿದ್ದನ್ನು ಮರೆತುಬಿಡು'

ಆ ಸಂದರ್ಭದಲ್ಲಿ ಜೆಜೆ ಸರ್ ಹೇಳಿದ್ದ ಮಾತುಗಳು ಶಂತನು ಅವರ ಮನಸ್ಸಿನಲ್ಲಿ ಇಂದಿಗೂ ಅಚ್ಚಳಿಯದೆ ಉಳಿದಿವೆ. 'ಈಗ ನಿನಗೆ ಈ ವಿಷಯ ತುಂಬಾ ದೊಡ್ಡದಾಗಿ ಕಾಣಿಸಬಹುದು. ಆದರೆ ಜೀವನದಲ್ಲಿ ನಿನ್ನ ಅತ್ಯುತ್ತಮ ಪ್ರಯತ್ನ ಮಾಡು, ಉಳಿದಿದ್ದನ್ನು ಮರೆತುಬಿಡು. ಎಲ್ಲವೂ ಒಳ್ಳೆಯದಾಗುತ್ತದೆ' ಎಂದು ಅವರು ಸಮಾಧಾನ ಹೇಳಿದ್ದರು.

ಈ ಸರಳ ಸಲಹೆ ಪರೀಕ್ಷೆಯ ಫಲಿತಾಂಶಕ್ಕಿಂತ ಜೀವನ ದೊಡ್ಡದು ಎಂಬುದನ್ನು ಶಂತನು ಅವರಿಗೆ ಅರ್ಥಮಾಡಿಸಿತ್ತು.

21 ವರ್ಷಗಳ ಬಳಿಕ ಮತ್ತೆ ಅದೇ ಧ್ವನಿ!

ಇತ್ತೀಚೆಗೆ ಶಂತನು ತಮ್ಮ ಗಣಿತ ಶಿಕ್ಷಕ ಜೆಜೆ ಸರ್ ಅವರನ್ನು ಭೇಟಿಯಾಗುವ ಅವಕಾಶ ಪಡೆದುಕೊಂಡರು. ಅವರು ಶಿಕ್ಷಕರ ಕಚೇರಿಗೆ ಪ್ರವೇಶಿಸುತ್ತಿದ್ದಂತೆ, 'ಅರೆ ಶಂತನು, ಬಾ' ಎಂಬ ಪರಿಚಿತ ಧ್ವನಿ ಸ್ವಾಗತಿಸಿತು. ಈ ಒಂದು ಮಾತು 2005ರ ನೆನಪುಗಳನ್ನೆಲ್ಲ ಮತ್ತೆ ಜೀವಂತಗೊಳಿಸಿತು.

ಆಗ ಬನ್ಸಾಲ್ ಕ್ಲಾಸಸ್‌ನಲ್ಲಿ ಯುವ ಗಣಿತ ಶಿಕ್ಷಕರಾಗಿದ್ದ ಜೆಜೆ ಸರ್, ಈಗ ಅಲೆನ್ ಸಂಸ್ಥೆಯಲ್ಲಿ ಹಿರಿಯ ವಿಭಾಗದ ಮುಖ್ಯಸ್ಥರಾಗಿದ್ದಾರೆ. ಆದರೆ ಅವರ ಧ್ವನಿ ಮತ್ತು ಆತ್ಮೀಯತೆ ಮಾತ್ರ ಬದಲಾಗಿರಲಿಲ್ಲ. ಈ ಭೇಟಿಯಿಂದ ತಾನು ಮತ್ತೆ 18 ವರ್ಷದವನಾದಂತೆ ಭಾಸವಾಯಿತು ಎಂದು ಶಂತನು ಬರೆದುಕೊಂಡಿದ್ದಾರೆ.

ಶಿಕ್ಷಕರ ಪ್ರಭಾವ ಎಂದಿಗೂ ಅಳಿಯುವುದಿಲ್ಲ!

ಬಾಂಬೆ ಶೇವಿಂಗ್ ಕಂಪನಿಯ ಸಂಸ್ಥಾಪಕರಾಗಿರುವ ಶಂತನು ದೇಶಪಾಂಡೆ ಅವರು ವಿಎನ್‌ಐಟಿ ನಾಗಪುರ ಮತ್ತು ಐಐಎಂ ಲಖನೌನಲ್ಲಿ ಶಿಕ್ಷಣ ಪಡೆದಿದ್ದಾರೆ. ಆನಂದಿ ಫೆಲೋಶಿಪ್ ಮತ್ತು ಅಲೆನ್ ಸಂಸ್ಥೆಯ ಸಹಯೋಗದಿಂದ ತಮ್ಮ ನೆಚ್ಚಿನ ಶಿಕ್ಷಕರನ್ನು ಮತ್ತೆ ಭೇಟಿಯಾಗಲು ಸಾಧ್ಯವಾಯಿತು.

ಈ ಭಾವುಕ ಕ್ಷಣವನ್ನು ಲಿಂಕ್ಡ್‌ಇನ್‌ನಲ್ಲಿ ಹಂಚಿಕೊಂಡಿರುವ ಅವರು, ಸರಿಯಾದ ಸಮಯದಲ್ಲಿ ಶಿಕ್ಷಕರು ನೀಡುವ ಪ್ರೋತ್ಸಾಹ ವಿದ್ಯಾರ್ಥಿಯ ಬದುಕಿನ ಮೇಲೆ ದೊಡ್ಡ ಪ್ರಭಾವ ಬೀರುತ್ತದೆ ಎಂದು ಹೇಳಿದ್ದಾರೆ. ನಿಜಕ್ಕೂ, ಪಾಠ ಮರೆತರೂ ಶಿಕ್ಷಕರು ನೀಡಿದ ಧೈರ್ಯ ಮತ್ತು ಪ್ರೋತ್ಸಾಹದ ಮಾತುಗಳು ಎಂದಿಗೂ ಮರೆಯಾಗುವುದಿಲ್ಲ.

ಮಗನ ಜೊತೆ ಮುದ್ದಾದ ಫೋಟೋಶೂಟ್ ಮಾಡಿಸಿಕೊಂಡ ಮಹಾಲಕ್ಷ್ಮಿ- ರವೀಂದರ್ ದಂಪತಿ: ಟ್ರೋಲಿಗರಿಗೆ ಛಡಿಯೇಟು

Suchethana D — Sun, 08 Nov 2026 19:57:11 +0530

ಚೆನ್ನೈ: ತಮಿಳು ಚಿತ್ರರಂಗದ ಖ್ಯಾತ ನಿರ್ಮಾಪಕ ರವೀಂದರ್ ಚಂದ್ರಶೇಖರ್ (Ravindra Chandrasekaran) ಮತ್ತು ಕಿರುತೆರೆ ನಿರೂಪಕಿ ಮಹಾಲಕ್ಷ್ಮಿ ನೆನಪಿರಬಹುದು. ರೂಪವೇ ಎಲ್ಲ ಎನ್ನುವವರ ಮಧ್ಯೆ, ಈ ಜೋಡಿ ವಿಭಿನ್ನವಾಗಿ ಕಾಣಿಸಿಕೊಂಡು ಸಾಕಷ್ಟು ಟ್ರೋಲ್ಗೆ ಒಳಗಾಗಿತ್ತು. ಸುಂದರಿಯಂತಿರುವ ಮಹಾಲಕ್ಷ್ಮಿ ಅವರು ರವೀಂದರ್ ಅವರನ್ನು ಮದುವೆಯಾಗಿದ್ದು ಹಲವರ ಕೆಂಗಣ್ಣಿಗೆ ಗುರಿಯಾಗಿತ್ತು. ಇವರಿಬ್ಬರ ದಾಂಪತ್ಯ ಹೆಚ್ಚು ದಿನ ನಿಲ್ಲಲ್ಲ ಎಂದವರೇ ಹೆಚ್ಚು. ಮಹಾಲಕ್ಷ್ಮಿ ಅವರು ಹಣಕ್ಕಾಗಿ ಮದುವೆಯಾಗಿದ್ದಾರೆ, ಸ್ವಲ್ಪ ದಿನದಲ್ಲಿಯೇ ಡಿವೋರ್ಸ್ ಕೊಟ್ಟು ಇಡೀ ಆಸ್ತಿ ಲಪಟಾಯಿಸುತ್ತಾರೆ ಎಂದೆಲ್ಲಾ ಇಲ್ಲಸಲ್ಲದ ಮಾತುಗಳನ್ನು ಆಡಿಕೊಂಡವರಿಗೇನೂ ಕಮ್ಮಿ ಇಲ್ಲ. ಸೆಲೆಬ್ರಿಟಿಗಳು ಹೇಗಿರಬೇಕು, ಯಾರನ್ನು ಆಯ್ಕೆ ಮಾಡಿಕೊಳ್ಳಬೇಕು ಎನ್ನುವುದು ಕೂಡ ಅವರ ಅಭಿಮಾನಿಗಳೇ ಡಿಸೈಡ್ ಮಾಡುವಷ್ಟರ ಮಟ್ಟಿಗೆ ನಮ್ಮ ಸಮಾಜ ಬೆಳೆದಿದ್ದರಿಂದ, ಸ್ಫುರದ್ರೂಪಿ ಅಲ್ಲ ಎನ್ನಿಸಿದವರನ್ನು ಮದುವೆಯಾದರೆ, ವಿಕೃತ ಮನಸ್ಥಿತಿಯವರಿಗೆ ಮೊದಲು ಬರುವುದೇ ಹಣದ ಚಿಂತೆ. ಹಣಕ್ಕಾಗಿಯೇಮದುವೆಯಾಗಿದ್ದಾರೆ ಎನ್ನುವುದು.

ಆದರೆ, ಇವೆಲ್ಲವನ್ನೂ ಮೀರಿ ಈ ಜೋಡಿ ಸುಖವಾಗಿ ಸಂಸಾರ ಮಾಡುತ್ತಿದೆ. ಕೆಲ ದಿನಗಳ ಹಿಂದಷ್ಟೇ ನಾಲ್ಕು ವರ್ಷದ ವೈವಾಹಿಕ ಜೀವನದ ವಾರ್ಷಿಕೋತ್ಸವದ ಕುರಿತು ಜೋಡಿ ತಿರುಪತಿಯಲ್ಲಿ ತೆಗೆದ ಫೋಟೋ ಶೇರ್ ಮಾಡಿಕೊಂಡಿತ್ತು. ನಾಲ್ಕು ವರ್ಷಗಳ ಹಿಂದೆ ಇಲ್ಲಿಯೇ ಮೀಟ್ ಆಗಿದ್ದು, ಇಂದು ಅಲ್ಲಿಗೆ ಬಂದಿದ್ದೇವೆ ಎಂದಿದ್ದರು ದಂಪತಿ. ಇದೀಗ ಮಗನ ಜೊತೆ ಜೋಡಿ ಕಾಣಿಸಿಕೊಂಡಿದೆ.

ಮಹಾಲಕ್ಷ್ಮಿ ಮಗ

ಅಂದಹಾಗೆ ಮಹಾಲಕ್ಷ್ಮಿ ಅವರಿಗೆ ಇದು ಎರಡನೆಯ ಮದುವೆ. ಮೊದಲ ಮದುವೆ ಅನಿಲ್ ನೆರೆಡಿಮಿಲ್ಲಿ (Anil Neradimilli) ಅವರ ಜೊತೆ ಆಗಿತ್ತು. ಈ ದಾಂಪತ್ಯದಿಂದ ಇವರಿಗೆ ಮಗ ಇದ್ದಾನೆ. ದಂಪತಿ 2019ರಲ್ಲಿ ವಿಚ್ಛೇದನ ಪಡೆದಿದ್ದಾರೆ. ಮಗನ ಹೆಸರು ಸಚಿನ್. 2022ರಲ್ಲಿ ರವೀಂದರ್ ಜೊತೆ ಮಹಾಲಕ್ಷ್ಮಿ ಮದುವೆಯಾದರು. ಮದುವೆಯಾದಾಗಿನಿಂದಲೂ ಸಾಕಷ್ಟು ಏಳುಬೀಳುಗಳನ್ನು ಜೋಡಿ ಕಂಡಿದ್ದು, ಟ್ರೋಲರ್ಸ್ ಕಾಟ ಇನ್ನೊಂದೆಡೆ. ಇವರಿಬ್ಬರ ಮೇಲೆ ಮಾಡಿದ ಮೀಮ್ಸ್ಗಳು ಅದೆಷ್ಟೋ, ಅಸಹ್ಯ ಎನ್ನುವ ಕಮೆಂಟ್ಸ್ ಅವೆಷ್ಟೋ. ಇವೆಲ್ಲವುಗಳ ಹೊರತಾಗಿಯೂ ಆಡಿದವರ ಮಾತು ಅವರ ಬಾಯಲ್ಲೇ ಎನ್ನುವಂತೆ ಸುಖಮಯವಾಗಿ ದಾಂಪತ್ಯ ಜೀವನ ನಡೆಸುತ್ತಿದೆ.

ಫೋಟೋ ಶೇರ್

ಇದೀಗ ಮಗ ಸಚಿನ್ ಜೊತೆ ಜೋಡಿ ಫೋಟೋ ತೆಗೆಸಿಕೊಂಡಿದ್ದು, ಅದನ್ನು ಮಹಾಲಕ್ಷ್ಮಿ ಅವರು ಶೇರ್ ಮಾಡಿದ್ದಾರೆ. ಅಂದು ಆಡಿಕೊಂಡವರೇ ಇಂದು ಈ ಜೋಡಿಯನ್ನು ಹೊಗಳುತ್ತಿದ್ದಾರೆ. ಅಷ್ಟಕ್ಕೂ ರೂಪ, ಬಣ್ಣ ಎಲ್ಲಾ ನೋಡಿ ಭರ್ಜರಿಯಾಗಿ ಮದುವೆಯಾದವರು ಒಂದೇ ವರ್ಷದಲ್ಲಿ ಡಿವೋರ್ಸ್ ಮಾಡಿಕೊಂಡ ಸಾಕಷ್ಟು ಉದಾಹರಣೆ ನಮ್ಮ ಕಣ್ಣ ಮುಂದೆಯೇ ಇವೆ. ಅವರ ನಡುವೆ ಈ ಜೋಡಿ ಉದಾಹರಣೆಯಾಗಿ ನಿಂತಿದ್ದಾರೆ. ಮಗನ ಜೊತೆ ನೂರ್ಕಾಲ ಸುಖವಾಗಿ ಬಾಳಿ ಎಂದು ಹಿತೈಷಿಗಳು ಹಾರೈಸುತ್ತಿದ್ದಾರೆ.

ಮಹಾಲಕ್ಷ್ಮಿ ಕೇವಲ ನಿರೂಪಕಿ ಜೊತೆ ಕಿರುತೆರೆ ನಟಿ ಕೂಡ. ರವೀಂದರ್ ಅವರ ಜೊತೆಯಲ್ಲಿ ಅನೇಕ ಧಾರಾವಾಹಿಗಳನ್ನು ನಿರ್ಮಾಣ ಮಾಡಿದ್ದಾರೆ. ರವೀಂದರ್ ನಿರ್ಮಾಣ ಮಾಡಿದ ಧಾರಾವಾಹಿಯಲ್ಲಿ ಮಹಾಲಕ್ಷ್ಮಿ ನಟಿಸಿದ್ದಾರೆ. ಸೆಟ್ನಲ್ಲಿಯೇ ಇವರ ಲವ್ ಶುರುವಾಗಿ, ಮದುವೆಯವರೆಗೆ ಬಂದಿದೆ. ಇದೇ ಸಂದರ್ಭದಲ್ಲಿ ದಂಪತಿಗಳು ಬೇರ್ಪಟ್ಟಿದ್ದಾರೆ ಎಂಬ ಸುಳ್ಳು ಸುದ್ದಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ. ಇದ್ಯಾವುದಕ್ಕೂ ತಲೆಕೆಡಿಸಿಕೊಳ್ಳದ ಮಹಾಲಕ್ಷ್ಮೀ ಮತ್ತು ರವೀಂದರ್ ಒಟ್ಟಿಗೆ ಇರುವ ಫೋಟೋಗಳನ್ನು ಪೋಸ್ಟ್ ಮಾಡುವ ಮೂಲಕ ಸುಳ್ಳು ಸುದ್ದಿ ಹರಡುವವರಿಗೆ ತಿರುಗೇಟು ನೀಡಿದ್ದಾರೆ.

ಸಚಿನ್‌ಗೆ ಮೊದಲ ದುಬಾರಿ ಕ್ರಿಕೆಟ್ ಶೂ ಕೊಡಿಸಿದ್ದ ಗೆಳೆಯನ ಮನೆಗೆ ಮಾಸ್ಟರ್ ಬ್ಲಾಸ್ಟರ್ ಭೇಟಿ, ಹಳೆಯ ನೆನಪುಗಳ ಮೆಲುಕು!

Chandrashekar GS — Mon, 09 Nov 2026 09:46:08 +0530

ಬಾಲ್ಯದ ಗೆಳೆಯನ ಫಾರ್ಮ್‌ಹೌಸ್‌ನಲ್ಲಿ ಸಚಿನ್ ತೆಂಡೂಲ್ಕರ್: ಹಳೆಯ ನೆನಪುಗಳನ್ನು ಮೆಲುಕು ಹಾಕಿದ ಕ್ರಿಕೆಟ್ ದಿಗ್ಗಜರು!

ಕೆಟ್ ಅಂಗಳದಲ್ಲಿ ಎಷ್ಟೇ ಎತ್ತರಕ್ಕೆ ಬೆಳೆದರೂ ಬಾಲ್ಯದ ಸ್ನೇಹ ಮತ್ತು ಹಳೆಯ ನೆನಪುಗಳು ಎಂದಿಗೂ ಮರೆಯಾಗುವುದಿಲ್ಲ. ಇದಕ್ಕೆ ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡೂಲ್ಕರ್ ಮತ್ತು ಅವರ ಬಾಲ್ಯದ ಗೆಳೆಯ, ಮಾಜಿ ಟೀಂ ಇಂಡಿಯಾ ಆಟಗಾರ ಪ್ರವೀಣ್ ಅಮ್ರೆ ಅವರ ಸ್ನೇಹವೇ ಸಾಕ್ಷಿ. ಹಲವು ವರ್ಷಗಳ ಬಳಿಕ ಈ ಇಬ್ಬರು ಕ್ರಿಕೆಟ್ ಗೆಳೆಯರು ಮಹಾರಾಷ್ಟ್ರದ ರತ್ನಗಿರಿಯಲ್ಲಿರುವ ಪ್ರವೀಣ್ ಅಮ್ರೆ ಅವರ ಫಾರ್ಮ್‌ಹೌಸ್‌ನಲ್ಲಿ ಭೇಟಿಯಾಗಿದ್ದು, ಈ ಸುಂದರ ಕ್ಷಣಗಳ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ಗಮನ ಸೆಳೆದಿವೆ.

ಬಾಲ್ಯದ ಗೆಳೆಯನ ಜೊತೆ ಮತ್ತೆ ಒಂದಾದ ಸಚಿನ್!

ಇತ್ತೀಚೆಗೆ ಸಚಿನ್ ತೆಂಡೂಲ್ಕರ್ ಅವರು ಮಹಾರಾಷ್ಟ್ರದ ಕೊಂಕಣ ಪ್ರದೇಶದ ರತ್ನಗಿರಿಗೆ ಭೇಟಿ ನೀಡಿದ್ದರು. ಈ ಸಂದರ್ಭದಲ್ಲಿ ತಮ್ಮ ಹಳೆಯ ಗೆಳೆಯ ಹಾಗೂ ಮಾಜಿ ಸಹ ಆಟಗಾರ ಪ್ರವೀಣ್ ಅಮ್ರೆ ಅವರ ಫಾರ್ಮ್‌ಹೌಸ್‌ಗೆ ತೆರಳಿದ್ದರು. ಸಚಿನ್ ಇದೇ ಮೊದಲ ಬಾರಿಗೆ ಕೊಂಕಣ ಪ್ರದೇಶಕ್ಕೆ ಭೇಟಿ ನೀಡಿದ್ದರು ಎಂದು ಪ್ರವೀಣ್ ಅಮ್ರೆ ತಮ್ಮ ಸಾಮಾಜಿಕ ಜಾಲತಾಣದ ಪೋಸ್ಟ್‌ನಲ್ಲಿ ತಿಳಿಸಿದ್ದಾರೆ.

ಇಬ್ಬರೂ ಒಟ್ಟಿಗೆ ಕುಳಿತು ಹಳೆಯ ಕ್ರಿಕೆಟ್ ದಿನಗಳನ್ನು ಮೆಲುಕು ಹಾಕಿದ್ದಾರೆ. ಈ ಭೇಟಿಯ ಫೋಟೋಗಳನ್ನು ಹಂಚಿಕೊಂಡಿರುವ ಅಮ್ರೆ, ಒಮ್ಮೆ ಒಂದೇ ಡ್ರೆಸ್ಸಿಂಗ್ ರೂಂ ಹಂಚಿಕೊಂಡು, ಭಾರತದ ಜೆರ್ಸಿ ಧರಿಸಿ ಒಂದೇ ಕನಸಿಗಾಗಿ ಆಡಿದ್ದೆವು. ಹಲವು ವರ್ಷಗಳ ಬಳಿಕ ಕೊಂಕಣದ ಸುಂದರ ವಾತಾವರಣದಲ್ಲಿ ಮತ್ತೆ ಒಂದಾಗಿದ್ದೇವೆ ಎಂಬ ಅರ್ಥದಲ್ಲಿ ತಮ್ಮ ಸಂತೋಷವನ್ನು ವ್ಯಕ್ತಪಡಿಸಿದ್ದಾರೆ.

ಸಚಿನ್‌ಗೆ ಮೊದಲ ದುಬಾರಿ ಕ್ರಿಕೆಟ್ ಶೂ ಉಡುಗೊರೆ ನೀಡಿದ್ದ ಗೆಳೆಯ!

ಸಚಿನ್ ಮತ್ತು ಪ್ರವೀಣ್ ಅಮ್ರೆ ಅವರ ಸ್ನೇಹದ ಹಿಂದೆ ಒಂದು ವಿಶೇಷ ನೆನಪಿದೆ. ಇಬ್ಬರೂ ಮುಂಬೈನ ಶಾರದಾಶ್ರಮ ವಿದ್ಯಾಮಂದಿರ ಶಾಲೆಯಲ್ಲಿ ಓದುತ್ತಿದ್ದವರು. ಪ್ರವೀಣ್ ಅಮ್ರೆ ಸಚಿನ್‌ಗಿಂತ ಒಂದು ವರ್ಷ ಹಿರಿಯರಾಗಿದ್ದರು.

ಸಚಿನ್ ಬಾಲ್ಯದಲ್ಲಿ ಕ್ರಿಕೆಟ್‌ನಲ್ಲಿ ಶತಕ ಗಳಿಸಿದರೆ ಒಳ್ಳೆಯ ಕ್ರಿಕೆಟ್ ಶೂಗಳನ್ನು ಉಡುಗೊರೆಯಾಗಿ ನೀಡುವುದಾಗಿ ಅಮ್ರೆ ಹೇಳಿದ್ದರು. ಸಚಿನ್ ಶತಕ ಗಳಿಸಿದ ಬಳಿಕ ತಮ್ಮ ಮಾತಿನಂತೆ ಅಮ್ರೆ ಅವರಿಗೆ ಉತ್ತಮ ಗುಣಮಟ್ಟದ ಕ್ರಿಕೆಟ್ ಶೂಗಳನ್ನು ಉಡುಗೊರೆಯಾಗಿ ನೀಡಿದ್ದರು. ಈ ಘಟನೆ ಸಚಿನ್ ಅವರ ಮನಸ್ಸಿನಲ್ಲಿ ಇಂದಿಗೂ ಅಚ್ಚಳಿಯದೆ ಉಳಿದಿದೆ.

ಪ್ರವೀಣ್ ಅಮ್ರೆ ಕೂಡ ಭಾರತದ ಪರ ಆಡಿದ್ದ ಪ್ರತಿಭಾವಂತ ಆಟಗಾರ!

ಪ್ರವೀಣ್ ಅಮ್ರೆ ಕೇವಲ ಸಚಿನ್ ಅವರ ಗೆಳೆಯ ಮಾತ್ರವಲ್ಲ, ಭಾರತದ ಪರ ಅಂತರರಾಷ್ಟ್ರೀಯ ಕ್ರಿಕೆಟ್ ಆಡಿದ ಪ್ರತಿಭಾವಂತ ಬ್ಯಾಟರ್ ಕೂಡ ಹೌದು. 1991ರಿಂದ 1994ರವರೆಗೆ ಭಾರತ ತಂಡವನ್ನು ಪ್ರತಿನಿಧಿಸಿದ ಅವರು 11 ಟೆಸ್ಟ್ ಮತ್ತು 37 ಏಕದಿನ ಪಂದ್ಯಗಳನ್ನು ಆಡಿದ್ದಾರೆ. 1992ರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ತಮ್ಮ ಚೊಚ್ಚಲ ಟೆಸ್ಟ್ ಪಂದ್ಯದಲ್ಲೇ ಶತಕ ಸಿಡಿಸಿದ್ದರು.

ನಿವೃತ್ತಿಯ ಬಳಿಕ ಕೋಚಿಂಗ್ ಕ್ಷೇತ್ರದಲ್ಲೂ ಗುರುತಿಸಿಕೊಂಡಿರುವ ಅಮ್ರೆ, ಮುಂಬೈ ತಂಡಕ್ಕೆ ಮೂರು ರಣಜಿ ಟ್ರೋಫಿ ಪ್ರಶಸ್ತಿಗಳನ್ನು ಗೆಲ್ಲಲು ಮಾರ್ಗದರ್ಶನ ನೀಡಿದ್ದಾರೆ.

ಸ್ನೇಹಕ್ಕೆ ವಯಸ್ಸಿನ ಅಂತರವಿಲ್ಲ!

ಸಚಿನ್ ತಮ್ಮ ಆತಿಥ್ಯಕ್ಕೆ ಧನ್ಯವಾದ ತಿಳಿಸಿದ್ದು, ಉತ್ತಮ ಊಟ, ಆತಿಥ್ಯ ಹಾಗೂ ಗೆಳೆಯರ ಜೊತೆ ಕಳೆದ ಸಮಯ ಗಣಪತಿಪುಳೆ ಪ್ರವಾಸವನ್ನು ಮತ್ತಷ್ಟು ಸ್ಮರಣೀಯವಾಗಿಸಿತು ಎಂದು ಹೇಳಿದ್ದಾರೆ.

ಒಟ್ಟಿನಲ್ಲಿ, ಕ್ರಿಕೆಟ್ ಸಾಧನೆಗಳಾಚೆಗೂ ಉಳಿಯುವ ಬಾಲ್ಯದ ಸ್ನೇಹ ಎಷ್ಟು ಅಮೂಲ್ಯ ಎಂಬುದನ್ನು ಸಚಿನ್ ಮತ್ತು ಪ್ರವೀಣ್ ಅಮ್ರೆ ಅವರ ಈ ಭೇಟಿಯು ಮತ್ತೊಮ್ಮೆ ನೆನಪಿಸಿದೆ.

ಕತ್ರಿನಾ- ವಿಕ್ಕಿ ಪುತ್ರನಿಗೆ ಒಂದು ವರ್ಷ: ಮೊದಲ ಬಾರಿಗೆ ಮಗನ ಮುಖ ರಿವೀಲ್ ಮಾಡಿದ ತಾರಾ ಜೋಡಿ

Suchethana D — Sun, 08 Nov 2026 19:04:03 +0530

ಮುಂಬೈ: ಬಾಲಿವುಡ್‌ನ ಜನಪ್ರಿಯ ಜೋಡಿ ಕತ್ರಿನಾ ಕೈಫ್ (Katrina Kaif) ಮತ್ತು ವಿಕ್ಕಿ ಕೌಶಲ್ (Vicky Kaushal) ಕಳೆದ ವರ್ಷದ ನವೆಂಬರ್ 7ರಂದು ತಂದೆ-ತಾಯಿಯಾಗಿದ್ದಾರೆ! ನಿನ್ನೆ ಅರ್ಥಾತ್ ನವೆಂಬರ್ 7 ಅವರ ಮಗ ವಿಹಾನ್ಗೆ ಒಂದು ವರ್ಷದ ಸಂಭ್ರಮ. ಆದರೆ ಈವರೆಗೂ ಇವರು ತಮ್ಮ ಮಗನನ್ನು ಸಾರ್ವಜನಿಕವಾಗಿ ಪರಿಚಯಿಸಿರಲಿಲ್ಲ. ಇದೀಗ ದೀಪಾವಳಿಯ ಸಂಭ್ರಮದಂದು ಮೊದಲ ಬಾರಿ ಮಗನ ಮುಖವನ್ನು ರಿವೀಲ್ ಮಾಡಿದ್ದಾರೆ. ಫೋಟೋದಲ್ಲಿ ವಿಹಾನ್ ತನ್ನ ತಂದೆ-ತಾಯಿಯ ನಡುವೆ ನಿಂತು ಮುದ್ದಾಗಿ ನಗುತ್ತಿದ್ದಾನೆ. ತಾಯಿ ಕತ್ರಿನಾ ಅವರ ಹಳದಿ ಅನಾರ್ಕಲಿ ಉಡುಪಿಗೆ ಹೊಂದಿಕೆಯಾಗುವ ಹಳದಿ ಜಾಕೆಟ್ ಹಾಗೂ ತಂದೆ ವಿಕ್ಕಿ ಅವರ ಉಡುಪಿನ ಮಾದರಿಯ ಐವರಿ ಕುರ್ತಾ ಪೈಜಾಮ ಧರಿಸಿದ್ದಾನೆ. ಮಗನನ್ನು ಇಬ್ಬರೂ ಪ್ರೀತಿಯಿಂದ ಅಪ್ಪಿಕೊಂಡಿರುವ ದೃಶ್ಯ ಮನಮೋಹಕವಾಗಿದೆ.

ಕಳೆದ ವರ್ಷ ಪೋಸ್ಟ್

ಕಳೆದ ವರ್ಷ ಇದೇ ಸಂದರ್ಭದಲ್ಲಿ ಜೋಡಿ, "ನಮ್ಮ ಆನಂದದ ಸಮಯ ಬಂದಿದೆ. ಅಪಾರ ಪ್ರೀತಿ ಮತ್ತು ಕೃತಜ್ಞತೆಯೊಂದಿಗೆ, ನಾವು ನಮ್ಮ ಮಗುವನ್ನು ಸ್ವಾಗತಿಸುತ್ತೇವೆ. ನವೆಂಬರ್ 7, 2025 – ಕತ್ರಿನಾ ಮತ್ತು ವಿಕ್ಕಿ" ಎಂದು ಬರೆದು ಒಂದು ಸುಂದರ ಚಿತ್ರವನ್ನು ಹಂಚಿಕೊಂಡಿದ್ದಾರೆ. ವಿಕ್ಕಿ ತಮ್ಮ ಪೋಸ್ಟ್‌ಗೆ 'ಧನ್ಯ' ಎಂದು ಬರೆದು ತಮ್ಮ ಸಂತಸವನ್ನು ವ್ಯಕ್ತಪಡಿಸಿದ್ದರು. ಕತ್ರಿನಾ ಮತ್ತು ವಿಕ್ಕಿ ದಂಪತಿ ಮಗು ವಿಹಾನ್ ಕೌಶಲ್‌ ಹೆಸರಿಗೂ ವಿಕ್ಕಿ ಅವರ ವೃತ್ತಿಜೀವನದೊಂದಿಗೆ ವಿಶೇಷ ಸಂಬಂಧ ಹೊಂದಿದೆ. ಬ್ಲಾಕ್‌ಬಸ್ಟರ್ ಚಿತ್ರ 'ಉರಿ: ದಿ ಸರ್ಜಿಕಲ್ ಸ್ಟ್ರೈಕ್'ನಲ್ಲಿನ ಅವರ ಪಾತ್ರ ಮೇಜರ್ ವಿಹಾನ್ ಸಿಂಗ್ ಶೆರ್ಗಿಲ್‌ನಿಂದ ಈ ಹೆಸರನ್ನು ಪ್ರೇರೇಪಿಸಲಾಗಿದೆ.

ಕತ್ರಿನಾ ಕೈಫ್ ಮತ್ತು ವಿಕ್ಕಿ ಕೌಶಲ್ 2021ರ ಡಿಸೆಂಬರ್ 9ರಂದು ರಾಜಸ್ಥಾನದಲ್ಲಿ ಆತ್ಮೀಯ ಸಮಾರಂಭದಲ್ಲಿ ವಿವಾಹವಾಗಿದ್ದರು. ಮದುವೆಯ ಬಳಿಕವೂ ತಮ್ಮ ವೈಯಕ್ತಿಕ ಬದುಕಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡುತ್ತಾ ಬಂದಿರುವ ಈ ಜೋಡಿ, ಇದೀಗ ಮಗನ ಮೊದಲ ಹುಟ್ಟುಹಬ್ಬದ ಸಂದರ್ಭದಲ್ಲಿ ಅಭಿಮಾನಿಗಳೊಂದಿಗೆ ಸಂತಸದ ಕ್ಷಣ ಹಂಚಿಕೊಂಡಿದ್ದಾರೆ.

ಕತ್ರಿನಾ ಸಿನಿಮಾ

ಕತ್ರಿನಾ ಕೈಫ್ ಕೊನೆಯದಾಗಿ ವಿಜಯ್ ಸೇತುಪತಿ ಜೊತೆ 'ಮೆರ್ರಿ ಕ್ರಿಸ್‌ಮಸ್' ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ವಿಕ್ಕಿ ಕೌಶಲ್ ಕೊನೆಯದಾಗಿ 'ಛಾವಾ' ಚಿತ್ರದಲ್ಲಿ ನಟಿಸಿದ್ದು, ಇದು 2025ರ ಅತಿದೊಡ್ಡ ಬಾಕ್ಸ್ ಆಫೀಸ್ ಯಶಸ್ಸುಗಳಲ್ಲಿ ಒಂದಾಗಿದೆ. ಅವರು ಮುಂದೆ ಸಂಜಯ್ ಲೀಲಾ ಬನ್ಸಾಲಿಯ 'ಲವ್ & ವಾರ್' ಮತ್ತು ಅಮರ್ ಕೌಶಿಕ್ ಅವರ 'ಮಹಾವತಾರ್' ಚಿತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಯಾವುದೇ ಸಿನಿಮಾಕ್ಕೆ ಆಫರ್ ಬಂದ್ರೂ ರಕ್ಷಿನೇ ಫೈನಲ್ ಮಾಡೋದು: ಈ ವಿಡಿಯೋದಲ್ಲಿ ರಶ್ಮಿಕಾ ಏನ್ ಹೇಳಿದ್ರು ಕೇಳಿ

Suchethana D — Sun, 08 Nov 2026 18:45:12 +0530

ನ್ಯಾಷನಲ್ ಕ್ರಷ್ ರಶ್ಮಿಕಾ ಮಂದಣ್ಣ ಮತ್ತು ಬಹುಕಾಲದ ಗೆಳೆಯ ವಿಜಯ ದೇವರಕೊಂಡ (Rashmika Mandanna and Vijaya Devarakonda marriage) ಮದುವೆಯಾಗಿ ಸುಖಿ ದಾಂಪತ್ಯ ಜೀವನ ನಡೆಸುತ್ತಿದ್ದಾರೆ. ಇದಾಗಲೇ ಇಬ್ಬರೂ ಸಿನಿಮಾಕ್ಕೆ ವಾಪಸ್ ಕೂಡ ಆಗಿದ್ದು, ಸಕತ್ ಬಿಜಿ ಇದ್ದಾರೆ. ಆದರೆ ರಶ್ಮಿಕಾ ಮಂದಣ್ಣ ಹೆಸರು ಬಂದಾಗಲೆಲ್ಲಾ, ಸ್ಯಾಂಡಲ್ವುಡ್ ಸ್ಟಾರ್ ರಕ್ಷಿತ್ ಶೆಟ್ಟಿ ಅವರ ಹೆಸರು ಬರುತ್ತಲೇ ಇರುತ್ತವೆ. ಇದಕ್ಕೆ ಕಾರಣ, ಈ ಹಿಂದೆ ರಶ್ಮಿಕಾ ಮತ್ತು ರಕ್ಷಿತ್ ಶೆಟ್ಟಿ ಎಂಗೇಜ್ಮೆಂಟ್ ಆಗಿತ್ತು. ಆದರೆ ಅವರು ಮದುವೆಯಾಗಿರಲಿಲ್ಲ. ಆದ್ದರಿಂದ ರಕ್ಷಿತ್ ಶೆಟ್ಟಿ ಹೆಸರು ಮತ್ತೆ ಕೇಳಿಬರುತ್ತಿದೆ.

ಆ ಸಮಯದಲ್ಲಿ ರಶ್ಮಿಕಾ ಮಂದಣ್ಣ ಪ್ರತಿಯೊಂದನ್ನೂ ರಕ್ಷಿತ್ ಶೆಟ್ಟಿ ಬಳಿ ಕೇಳಿಯೇ ಡಿಸೈಡ್ ಮಾಡುತ್ತಿದ್ದರು ಎನ್ನುವಂಥ ವಿಡಿಯೋ ಒಂದು ಮತ್ತೀಗ ವೈರಲ್ ಆಗುತ್ತಿದೆ. ಅದರಲ್ಲಿ ರಶ್ಮಿಕಾ ಮಂದಣ್ಣ, ನಾನು ಯಾವುದೇ ಸ್ಕ್ರಿಪ್ಟ್ ಬಂತು ಎಂದೂ ರಕ್ಷಿಯನ್ನೇ ಕೇಳೋದು. ಅವನೇ ಪ್ರೊಡ್ಯೂಸರ್ ಯಾರು, ಡೈರೆಕ್ಟರ್ ಯಾರು, ನಟ ಯಾರು, ನಿನಗೆ ಕನ್ಫರ್ಟ್ ಇದ್ಯಾ ಎಂದೆಲ್ಲಾ ಕೇಳ್ತಾನೆ. ಆಮೇಲೆ ನಾನು ಒಪ್ಪಿಕೊಳ್ಳುವುದು ಎಂದಿದ್ದಾರೆ. ಇಷ್ಟೆಲ್ಲಾ ಇದ್ದ ಮೇಲೆ ಇವರಿಬ್ಬರ ನಡುವೆ ಬಿರುಕು ಏಕೆ ಬಿಟ್ಟಿತು ಎನ್ನೋದೇ ಎಲ್ಲರ ಪ್ರಶ್ನೆಯಾಗಿದೆ.

ರಶ್ಮಿಕಾ ಕೊಟ್ಟಿದ್ದರು ಈ ಕಾರಣ

ಅದಕ್ಕೂ ಮುನ್ನ, ರಕ್ಷಿತ್ ಶೆಟ್ಟಿ ಅವರ ಎಂಗೇಜ್ಮೆಂಟ್ ಮುರಿದು ಬಿದ್ದಾಗ, ಇವರಿಬ್ಬರ ಬಗ್ಗೆ ಸಾಕಷ್ಟು ಚರ್ಚೆಯಾಗಿತ್ತು. ರಶ್ಮಿಕಾ ತಮ್ಮ ಪೋಷಕರೊಂದಿಗೆ ಸಮಾಲೋಚಿಸಿ ತಮ್ಮ ವೃತ್ತಿಜೀವನವನ್ನು ಗಮನದಲ್ಲಿಟ್ಟುಕೊಂಡು ಈ ನಿರ್ಧಾರವನ್ನು ತೆಗೆದುಕೊಂಡಿದ್ದಾರೆ ಎಂದೇ ಹೇಳಲಾಗಿತ್ತು. ಆದರೆ, ಕಾರಣ ಕೊನೆಗೂ ಬಹಿರಂಗಗೊಳ್ಳಲಿಲ್ಲ. ಆದರೆ, ರಶ್ಮಿಕಾ ಅವರು ಸ್ಯಾಂಡಲ್ವುಡ್ನಲ್ಲಿ ಎಂಟ್ರಿ ಪಡೆಯುವುದಕ್ಕಾಗಿ ರಕ್ಷಿತ್ ಅವರನ್ನು ದಾಳವಾಗಿ ಬಳಸಿಕೊಂಡರು ಎನ್ನುವ ಮಾತು ಬಹಳ ಕೇಳಿಬರತೊಡಗಿತ್ತು. ರಕ್ಷಿತ್ ಮತ್ತು ರಶ್ಮಿಕಾ ಜುಲೈ 2017 ರಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. ಸೂಪರ್‌ಹಿಟ್ ಚಿತ್ರ ಕಿರಿಕ್ ಪಾರ್ಟಿಯಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದರು. ಇದು ರಶ್ಮಿಕಾ ಅವರು ಕನ್ನಡ ಚಿತ್ರರಂಗದಲ್ಲಿ ನೆಲೆಯೂರಲು ಸಾಧ್ಯವಾಗಿತ್ತು. ಆದರೆ, ಕೊನೆಗೆ ಸಂಬಂಧ ಮುರಿದು ಹೋಯ್ತು.

ಸೋಷಿಯಲ್ ಮೀಡಿಯಾದಿಂದ ದೂರ

2018ರಲ್ಲಿ ಇವರಿಬ್ಬರೂ ಬೇರೆಯಾಗಿದ್ದ ಸಂದರ್ಭದಲ್ಲಿ ರಕ್ಷಿತ್ ಶೆಟ್ಟಿ (Rakshit Shetty) ಸೋಷಿಯಲ್ ಮೀಡಿಯಾದಿಂದ ಭಾರಿ ದೂರ ಉಳಿದಿದ್ದರು. ಅಷ್ಟಕ್ಕೂ ಈಗಲೂ ಅದೇಸ್ಥಿತಿ ಇದೆ. 2018ರಲ್ಲಿ ಈ ಬಗ್ಗೆ ಸಾಕಷ್ಟು ಚರ್ಚೆಯಾಗಿದ್ದಾಗ ರಕ್ಷಿತ್ ಅವರು ಮಾಡಿರುವ ಪೋಸ್ಟ್ ಇದೀಗ ಮತ್ತೊಮ್ಮೆ ವೈರಲ್ ಆಗುತ್ತಿದೆ. ರಶ್ಮಿಕಾ-ವಿಜಯ್ ಮದುವೆಯ ಸುದ್ದಿ ಸದ್ದು ಮಾಡಿದಾಗಿನಿಂದ ಇಂದಿನವರೆಗೂ ಈ ಪೋಸ್ಟ್ ವೈರಲ್ ಆಗುತ್ತಲೇ ಇರುತ್ತದೆ. ಇದರಲ್ಲಿ, ರಕ್ಷಿತ್ ಶೆಟ್ಟಿ ಅವರು, ನಾನು ನನ್ನ ಕೆಲಸದ ಮೇಲೆ ಕೇಂದ್ರೀಕರಿಸಲು ಬಯಸಿದ್ದರಿಂದ ಸಾಮಾಜಿಕ ಮಾಧ್ಯಮದಿಂದ ದೂರವಿದ್ದೇನೆ. ಇದಕ್ಕೂ, ರಶ್ಮಿಕಾ ಮಂದಣ್ಣ ಸಂಬಂಧಕ್ಕೆ ಯಾವುದೇ ಲಿಂಕ್ ಇಲ್ಲ. ದಯವಿಟ್ಟು ಎರಡನ್ನೂ ಒಟ್ಟಿಗೇ ಸೇರಿಸಬೇಡಿ. ನೀವೇ ಏನೋ ಒಂದನ್ನು ನಿರ್ಣಯಿಸಬೇಡಿ ಎಂದಿದ್ದರು.ಗೌರವಾನ್ವಿತ ಜನರೇ, ನಾನು ಇತರ ವಿಷಯಗಳ ಮೇಲೆ ಗಮನಹರಿಸಲು ಸಾಮಾಜಿಕ ಮಾಧ್ಯಮದಿಂದ ಹೊರಗುಳಿಯುತ್ತೇನೆ ಎಂದು ಘೋಷಿಸಿದ್ದೆ. ಆದರೆ ಕೆಲವು ವಿಷಯಗಳನ್ನು ಸ್ಪಷ್ಟಪಡಿಸಲು ನಾನು ಹಿಂತಿರುಗಬೇಕಾಯಿತು ಎನ್ನುವ ಮೂಲಕ ಈ ಸ್ಪಷ್ಟನೆ ಕೊಟ್ಟಿದ್ದರು. ಇದೇ ವೇಳೆ, ಅವರು ಇದೇ ಪೋಸ್ಟ್ನಲ್ಲಿ ನನ್ನನ್ನು ಶಾಂತಿಯಿಂದ ಬದುಕಲು ಬಿಟ್ಟುಬಿಡಿ. ಏನನ್ನೂ ಪ್ರಶ್ನಿಸಬೇಡಿ ಎನ್ನುವ ಮೂಲಕ, ತಾವು ನೋವಿನಲ್ಲಿ ಇರುವ ಬಗ್ಗೆ ಪರೋಕ್ಷವಾಗಿ ತಿಳಿಸಿದ್ದರು.

ಕ್ರಿಕೆಟ್‌ನಲ್ಲಿ ವೇಗದ ದಾಖಲೆ, ಪ್ರೀತಿಯಲ್ಲಿ ಹೊಸ ಅಧ್ಯಾಯ! ಜಾವಗಲ್ ಶ್ರೀನಾಥ್ ಎರಡನೇ ಪತ್ನಿ ಯಾರು ಗೊತ್ತಾ?

Chandrashekar GS — Sun, 08 Nov 2026 14:02:54 +0530

ಪತ್ನಿಯಿಂದ ವಿಚ್ಛೇದನ, ಪತ್ರಕರ್ತೆ ಜೊತೆ ಎರಡನೇ ಮದುವೆ!

ಭಾರತೀಯ ಕ್ರಿಕೆಟ್‌ನಲ್ಲಿ ತಮ್ಮ ವೇಗದ ಬೌಲಿಂಗ್ ಮೂಲಕ ಬ್ಯಾಟರ್‌ಗಳ ನಿದ್ದೆಗೆಡಿಸಿದ್ದ ಆಟಗಾರ ಜಾವಗಲ್ ಶ್ರೀನಾಥ್. 'ಮೈಸೂರು ಎಕ್ಸ್‌ಪ್ರೆಸ್' ಎಂದೇ ಖ್ಯಾತರಾಗಿರುವ ಇವರು ಕ್ರಿಕೆಟ್ ಮೈದಾನದಲ್ಲಿ ಅನೇಕ ದಾಖಲೆಗಳನ್ನು ನಿರ್ಮಿಸಿದ್ದಾರೆ. ಆದರೆ ಅವರ ಕ್ರಿಕೆಟ್ ಸಾಧನೆಗಳಷ್ಟೇ ಕುತೂಹಲ ಮೂಡಿಸುವುದು ಅವರ ವೈಯಕ್ತಿಕ ಜೀವನ. ಮೊದಲ ಪತ್ನಿ ಜ್ಯೋತ್ಸ್ನಾ ಅವರಿಂದ ವಿಚ್ಛೇದನ ಪಡೆದ ಬಳಿಕ ಪತ್ರಕರ್ತೆ ಮಾಧವಿ ಪಟವಾಲಿ ಅವರನ್ನು ಎರಡನೇ ಮದುವೆಯಾದ ಶ್ರೀನಾಥ್ ಅವರ ಜೀವನದ ಕೆಲವು ಅಪರೂಪದ ಸಂಗತಿಗಳು ಇಲ್ಲಿವೆ.

ಮೈಸೂರು ಎಕ್ಸ್‌ಪ್ರೆಸ್ ವೇಗಕ್ಕೆ ಬೆರಗಾಗಿದ್ದ ವಿಶ್ವ ಕ್ರಿಕೆಟ್!

ಕರ್ನಾಟಕದ ಮೈಸೂರಿನವರಾದ ಜಾವಗಲ್ ಶ್ರೀನಾಥ್ ಭಾರತದ ಅತ್ಯಂತ ಪ್ರತಿಭಾವಂತ ವೇಗದ ಬೌಲರ್‌ಗಳಲ್ಲಿ ಒಬ್ಬರು. 1990ರ ದಶಕದ ಕೊನೆಯ ಭಾಗದಿಂದ 2003ರವರೆಗೆ ಭಾರತೀಯ ಕ್ರಿಕೆಟ್ ತಂಡದ ಪ್ರಮುಖ ವೇಗದ ಅಸ್ತ್ರವಾಗಿದ್ದರು. ಗಂಟೆಗೆ 145ರಿಂದ 150 ಕಿ.ಮೀ. ವೇಗದಲ್ಲಿ ಬೌಲಿಂಗ್ ಮಾಡುವ ಸಾಮರ್ಥ್ಯ ಹೊಂದಿದ್ದ ಇವರು ಎದುರಾಳಿ ಬ್ಯಾಟರ್‌ಗಳಿಗೆ ಸವಾಲಾಗಿದ್ದರು.

1999ರ ವಿಶ್ವಕಪ್‌ನಲ್ಲಿ ಪಾಕಿಸ್ತಾನದ ವಿರುದ್ಧ ಗಂಟೆಗೆ 154.5 ಕಿ.ಮೀ. ವೇಗದಲ್ಲಿ ಎಸೆದ ಚೆಂಡು ಅವರ ಹೆಸರಿನಲ್ಲಿರುವ ಪ್ರಮುಖ ಏಕದಿನ ಕ್ರಿಕೆಟ್ ದಾಖಲೆಯಾಗಿದೆ. ಏಕದಿನ ಪಂದ್ಯಗಳಲ್ಲಿ ಭಾರತದ ಪರ 315 ವಿಕೆಟ್‌ಗಳನ್ನು ಕಬಳಿಸಿರುವ ಇವರು, ಅನಿಲ್ ಕುಂಬ್ಳೆ ನಂತರ ಅತಿ ಹೆಚ್ಚು ವಿಕೆಟ್ ಪಡೆದ ಭಾರತೀಯ ಬೌಲರ್ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ದಾರೆ.

ಕ್ರಿಕೆಟ್‌ಗೆ ಮಾತ್ರ ಸೀಮಿತರಾಗದ ಶ್ರೀನಾಥ್ ಇಂಜಿನಿಯರಿಂಗ್ ಪದವಿಯನ್ನೂ ಪಡೆದಿದ್ದಾರೆ. ಮೈಸೂರಿನ ಎಸ್‌ಜೆಸಿಇ ಕಾಲೇಜಿನಲ್ಲಿ ಇನ್‌ಸ್ಟ್ರುಮೆಂಟೇಶನ್ ಎಂಜಿನಿಯರಿಂಗ್ ವ್ಯಾಸಂಗ ಮಾಡಿದ್ದರು.

ಮೊದಲ ಪತ್ನಿ ಜ್ಯೋತ್ಸ್ನಾ ಜೊತೆಗಿನ ದಾಂಪತ್ಯ ಜೀವನಕ್ಕೆ ಅಂತ್ಯ

ಜಾವಗಲ್ ಶ್ರೀನಾಥ್ ಅವರು ಮೊದಲಿಗೆ ಜ್ಯೋತ್ಸ್ನಾ ಎಂಬುವವರನ್ನು ವಿವಾಹವಾಗಿದ್ದರು. ವರದಿಗಳ ಪ್ರಕಾರ, ಈ ದಂಪತಿಗೆ ಕೈ ಶ್ರೀನಾಥ್ ಎಂಬ ಮಗ ಮತ್ತು ರಿಯಾ ಶ್ರೀನಾಥ್ ಎಂಬ ಮಗಳಿದ್ದಾರೆ. ಸುಮಾರು ಹತ್ತು ವರ್ಷಗಳ ಕಾಲ ಜೊತೆಯಾಗಿದ್ದ ಈ ದಂಪತಿ ಬಳಿಕ ವೈವಾಹಿಕ ಜೀವನದಿಂದ ದೂರವಾಗಲು ನಿರ್ಧರಿಸಿದರು.

2008ರಲ್ಲಿ ಇವರ ವಿಚ್ಛೇದನ ನಡೆದಿತ್ತು ಎಂದು ವರದಿಗಳು ಉಲ್ಲೇಖಿಸಿವೆ. ಆದರೆ ಇವರಿಬ್ಬರು ಬೇರ್ಪಡಲು ನಿಖರವಾದ ಕಾರಣವೇನು ಎಂಬುದರ ಬಗ್ಗೆ ಸಾರ್ವಜನಿಕವಾಗಿ ಹೆಚ್ಚಿನ ಮಾಹಿತಿ ಲಭ್ಯವಿಲ್ಲ.

ಆ ಸಮಯದಲ್ಲಿ ಶ್ರೀನಾಥ್ ಕ್ರಿಕೆಟ್ ವೃತ್ತಿಜೀವನದ ಉತ್ತುಂಗದಲ್ಲಿದ್ದರು. ವೈಯಕ್ತಿಕ ಜೀವನದಲ್ಲಿ ಏರುಪೇರುಗಳಿದ್ದರೂ ಕ್ರಿಕೆಟ್ ಮೇಲಿನ ಗಮನವನ್ನು ಮುಂದುವರಿಸಿದ್ದರು.

ಪತ್ರಕರ್ತೆ ಮಾಧವಿ ಪಟವಾಲಿ ಜೊತೆ ಎರಡನೇ ಮದುವೆ

ಜ್ಯೋತ್ಸ್ನಾ ಅವರಿಂದ ವಿಚ್ಛೇದನ ಪಡೆದ ಬಳಿಕ ಶ್ರೀನಾಥ್ ಅವರ ಜೀವನದಲ್ಲಿ ಮಾಧವಿ ಪಟವಾಲಿ ಪ್ರವೇಶಿಸಿದರು. ಅವರು ಪತ್ರಕರ್ತೆಯಾಗಿದ್ದು, ಟೈಮ್ಸ್ ಆಫ್ ಇಂಡಿಯಾ ಪತ್ರಿಕೆಯಲ್ಲಿ ಕೆಲಸ ಮಾಡುತ್ತಿದ್ದರು ಎಂದು ವರದಿಗಳು ತಿಳಿಸಿವೆ.

2008ರಲ್ಲಿ ಜಾವಗಲ್ ಶ್ರೀನಾಥ್ ಮತ್ತು ಮಾಧವಿ ವಿವಾಹವಾದರು. ಇವರ ಮದುವೆ ಸರಳ ಹಾಗೂ ಖಾಸಗಿ ಸಮಾರಂಭದಲ್ಲಿ ನಡೆದಿತ್ತು. ಅಂದಿನಿಂದಲೂ ಈ ದಂಪತಿ ಮಾಧ್ಯಮಗಳ ಗಮನದಿಂದ ದೂರವಾಗಿ ತಮ್ಮ ವೈಯಕ್ತಿಕ ಜೀವನವನ್ನು ನಡೆಸುತ್ತಿದ್ದಾರೆ.

ಮಾಧವಿ ಮತ್ತು ಶ್ರೀನಾಥ್ ಅವರಿಗೆ ಮಕ್ಕಳಿದ್ದಾರೆಯೇ ಎಂಬ ಬಗ್ಗೆ ಸಾರ್ವಜನಿಕವಾಗಿ ಸ್ಪಷ್ಟ ಮಾಹಿತಿ ಲಭ್ಯವಿಲ್ಲ.

ಈಗ ಏನು ಮಾಡುತ್ತಿದ್ದಾರೆ ಜಾವಗಲ್ ಶ್ರೀನಾಥ್?

ಕ್ರಿಕೆಟ್‌ನಿಂದ ನಿವೃತ್ತರಾದ ಬಳಿಕವೂ ಶ್ರೀನಾಥ್ ಕ್ರೀಡಾ ಕ್ಷೇತ್ರದೊಂದಿಗೆ ತಮ್ಮ ನಂಟನ್ನು ಮುಂದುವರಿಸಿದ್ದಾರೆ. ಪ್ರಸ್ತುತ ಅವರು ಐಸಿಸಿ ಎಲೈಟ್ ಪ್ಯಾನೆಲ್‌ನ ಮ್ಯಾಚ್ ರೆಫರಿಯಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಆಟಗಾರನಾಗಿ ಮೈದಾನದಲ್ಲಿ ಮಿಂಚಿದ್ದ ಅವರು ಈಗ ಅಂತರರಾಷ್ಟ್ರೀಯ ಪಂದ್ಯಗಳ ಜವಾಬ್ದಾರಿಯನ್ನು ನಿರ್ವಹಿಸುತ್ತಿದ್ದಾರೆ.

ಒಟ್ಟಿನಲ್ಲಿ, ಜಾವಗಲ್ ಶ್ರೀನಾಥ್ ಅವರ ಜೀವನ ಕ್ರಿಕೆಟ್ ಸಾಧನೆಗಳು, ವೈಯಕ್ತಿಕ ಜೀವನದ ಬದಲಾವಣೆಗಳು ಮತ್ತು ಹೊಸ ಆರಂಭಗಳ ಕಥೆಯಾಗಿದೆ.

ಗರ್ಲ್‌ಫ್ರೆಂಡ್ ಜೊತೆ ಸಮೋಸಾ, ಟೀ ಸವಿಯುತ್ತಿದ್ದ ಪತಿ; ದಿಢೀರ್ ಬಂದ ಪತ್ನಿ ಇಬ್ಬರಿಗೂ ಕೊಟ್ಟ ಶಾಕ್, ಮುಂದೇನಾಯ್ತು?

Chandrashekar GS — Mon, 09 Nov 2026 11:15:55 +0530

ಹೋಟೆಲ್‌ನಲ್ಲಿ ಪ್ರೇಯಸಿ ಜೊತೆ ಸಮೋಸಾ, ಟೀ ಸವಿಯುತ್ತಿದ್ದ ಪತಿ: ದಿಢೀರ್ ಬಂದ ಪತ್ನಿ ಮಾಡಿದ್ದೇನು?

ಪತಿ-ಪತ್ನಿಯ ನಡುವಿನ ವೈಯಕ್ತಿಕ ವಿಚಾರಗಳು ಕೆಲವೊಮ್ಮೆ ಸಾರ್ವಜನಿಕವಾಗಿ ದೊಡ್ಡ ಹೈಡ್ರಾಮಾಕ್ಕೆ ಕಾರಣವಾಗುತ್ತವೆ. ಇದೀಗ ಇಂತಹದ್ದೇ ಘಟನೆಯ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಭಾರಿ ಚರ್ಚೆಗೆ ಕಾರಣವಾಗಿದೆ. ರೆಸ್ಟೋರೆಂಟ್‌ನಲ್ಲಿ ತನ್ನ ಪ್ರೇಯಸಿ ಜೊತೆ ಕುಳಿತು ಸಮೋಸಾ ಮತ್ತು ಟೀ ಸವಿಯುತ್ತಿದ್ದ ಪತಿಗೆ ದಿಢೀರ್ ಪತ್ನಿಯ ಎಂಟ್ರಿಯಾಗಿದ್ದು, ನಂತರ ನಡೆದ ಗಲಾಟೆ ಎಲ್ಲರ ಗಮನ ಸೆಳೆದಿದೆ.

ಪ್ರೇಯಸಿ ಜೊತೆ ಹೋಟೆಲ್‌ಗೆ ಬಂದಿದ್ದ ಪತಿ!

ವರದಿಯಲ್ಲಿನ ಮಾಹಿತಿಯ ಪ್ರಕಾರ, ವ್ಯಕ್ತಿಯೊಬ್ಬ ತನ್ನ ಪ್ರೇಯಸಿ ಜೊತೆ ರೆಸ್ಟೋರೆಂಟ್‌ಗೆ ತೆರಳಿದ್ದ. ಇಬ್ಬರೂ ಆರಾಮವಾಗಿ ಕುಳಿತು ತಿಂಡಿ ತಿನ್ನುತ್ತಾ ಸಮಯ ಕಳೆಯುತ್ತಿದ್ದರು. ಈ ಸಂದರ್ಭದಲ್ಲಿ ಅಲ್ಲಿಗೆ ದಿಢೀರನೆ ಬಂದ ಪತ್ನಿ ತನ್ನ ಪತಿಯನ್ನು ಮತ್ತೊಬ್ಬ ಮಹಿಳೆಯ ಜೊತೆ ನೋಡಿದ್ದಾಳೆ. ಇದರಿಂದ ಆಕೆ ತೀವ್ರ ಆಕ್ರೋಶಗೊಂಡಿದ್ದಾಳೆ.

ಪತಿಯನ್ನು ಪ್ರಶ್ನಿಸುವುದರ ಜೊತೆಗೆ ಆತನ ಜೊತೆಗಿದ್ದ ಮಹಿಳೆಯ ಮೇಲೂ ಕೋಪ ವ್ಯಕ್ತಪಡಿಸಿದ್ದಾಳೆ. ಮಾತಿನ ಚಕಮಕಿ ಕ್ಷಣಾರ್ಧದಲ್ಲಿ ದೊಡ್ಡ ಗಲಾಟೆಯಾಗಿ ಬದಲಾಗಿದೆ. ಪರಿಸ್ಥಿತಿ ಕೈಮೀರಿ ಇಬ್ಬರ ಮೇಲೂ ಹಲ್ಲೆ ನಡೆದಿರುವುದಾಗಿ ವರದಿಯ ಶೀರ್ಷಿಕೆ ತಿಳಿಸಿದೆ.

ರೆಸ್ಟೋರೆಂಟ್‌ನಲ್ಲಿ ನಡೆದ ಗಲಾಟೆ ಕ್ಯಾಮೆರಾದಲ್ಲಿ ಸೆರೆ!

ಈ ಘಟನೆಯ ದೃಶ್ಯಗಳು ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ. ರೆಸ್ಟೋರೆಂಟ್‌ನಲ್ಲಿದ್ದ ಇತರ ಗ್ರಾಹಕರು ಮತ್ತು ಸ್ಥಳೀಯರು ಈ ಗಲಾಟೆಯನ್ನು ನೋಡಿ ಅಚ್ಚರಿಗೊಂಡಿದ್ದಾರೆ. ಸಾಮಾನ್ಯವಾಗಿ ತಿಂಡಿ ತಿನ್ನಲು ಬಂದಿದ್ದ ಸ್ಥಳದಲ್ಲಿ ಏಕಾಏಕಿ ಇಂತಹ ಘಟನೆ ನಡೆದಿರುವುದು ಚರ್ಚೆಗೆ ಕಾರಣವಾಗಿದೆ.

ಕೊನೆಗೆ ಏನಾಯಿತು? ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆ!

ವಿಡಿಯೋ ವೈರಲ್ ಆದ ಬಳಿಕ ನೆಟ್ಟಿಗರು ನಾನಾ ರೀತಿಯ ಪ್ರತಿಕ್ರಿಯೆಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ. ಕೆಲವರು ಪತ್ನಿಯ ಆಕ್ರೋಶಕ್ಕೆ ಕಾರಣವಾಗಿರಬಹುದಾದ ಪರಿಸ್ಥಿತಿಯ ಬಗ್ಗೆ ಮಾತನಾಡುತ್ತಿದ್ದರೆ, ಇನ್ನು ಕೆಲವರು ವೈಯಕ್ತಿಕ ಸಮಸ್ಯೆಗಳನ್ನು ಸಾರ್ವಜನಿಕವಾಗಿ ಹಲ್ಲೆ ನಡೆಸುವ ಮೂಲಕ ಬಗೆಹರಿಸಿಕೊಳ್ಳುವುದು ಸರಿಯಲ್ಲ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಆದರೆ ಈ ಘಟನೆಯ ನಿಖರ ಸ್ಥಳ, ಪೊಲೀಸ್ ಕ್ರಮ ಹಾಗೂ ಪ್ರಕರಣದ ಅಂತಿಮ ಫಲಿತಾಂಶದ ಬಗ್ಗೆ ಲಭ್ಯವಿರುವ ಮಾಹಿತಿಯಲ್ಲಿ ಸ್ಪಷ್ಟ ದೃಢೀಕರಣವಿಲ್ಲ. ಹಾಗಾಗಿ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವ ವಿಡಿಯೋ ಮತ್ತು ವರದಿಯಲ್ಲಿರುವ ವಿವರಗಳನ್ನು ಮಾತ್ರ ಆಧರಿಸಿ ಘಟನೆಗೆ ಸಂಬಂಧಿಸಿದ ತೀರ್ಮಾನಕ್ಕೆ ಬರುವುದು ಸೂಕ್ತವಲ್ಲ.

ಒಟ್ಟಿನಲ್ಲಿ, ದಾಂಪತ್ಯ ಸಂಬಂಧಗಳಲ್ಲಿನ ಸಮಸ್ಯೆಗಳು ಹೇಗೆ ಸಾರ್ವಜನಿಕ ಗಲಾಟೆಗೆ ತಿರುಗಬಹುದು ಎಂಬುದಕ್ಕೆ ಈ ವೈರಲ್ ವಿಡಿಯೋ ಮತ್ತೊಂದು ಉದಾಹರಣೆಯಾಗಿದೆ. ಯಾವುದೇ ವೈಯಕ್ತಿಕ ವಿವಾದವಿದ್ದರೂ ಹಿಂಸೆಯ ಬದಲು ಕಾನೂನುಬದ್ಧವಾಗಿ ಪರಿಹಾರ ಕಂಡುಕೊಳ್ಳುವುದು ಮುಖ್ಯ.

पति और पति की गर्लफ्रेंड चाय और समोसा रेस्टोरेंट में खा रहे थे।

फिर क्या था ? अचानक से पत्नी आ गई और पत्नी ने अपने पति और उसकी गर्लफ्रेंड की मरम्मत कर दी।

पूरा रेस्टोरेंट तमाशा देख रहा है, आखिरकार यह हो क्या रहा हैं? https://t.co/5OHM5KJMw4

— Uzma Parveen (@UzmaParveen94) November 7, 2026

ಸಾರಾ ತೆಂಡೂಲ್ಕರ್ ಮದುವೆ ಸುಳಿವು ಕೊಟ್ಟ ಅತ್ತಿಗೆ ಸಾನಿಯಾ, ಈಗ ಏನೂ ಹೇಳಲ್ಲ ಎಂದ ಸಚಿನ್

Chethan Kumar — Mon, 09 Nov 2026 16:21:16 +0530

ಮುಂಬೈ (ನ.09) ಸಚಿನ್ ತೆಂಡೂಲ್ಕರ್ ಪುತ್ರಿ ಸಾರಾ ತೆಂಡೂಲ್ಕರ್ ಮದುವೆಯಾಗುತ್ತಿದ್ದರಾ? ಹುಡುಗ ಯಾರು? ಇದೀಗ ಮತ್ತೆ ಈ ಪ್ರಶ್ನೆಗಳು ಹುಟ್ಟಿಕೊಂಡಿದೆ. ಈಗಾಲೇ ಹಲವು ಬಾರಿ ಸಾರಾ ಮದುವೆ, ಡೇಟಿಂಗ್, ರಿಲೇಶನ್‌ಶಿಪ್ ಕುರಿತು ಸೋಶಿಯಲ್ ಮೀಡಿಯಾದಲ್ಲಿ ಚರ್ಚೆಯಾಗಿದೆ. ಆದರೆ ಇದೇ ಮೊದಲ ಬಾರಿಗೆ ಸಚಿನ್ ಕುಟುಂಬಸ್ಥರೇ ಮದುವೆ ಸುಳಿವು ನೀಡಿದ್ದಾರೆ. ಸಾರಾ ತೆಂಡೂಲ್ಕರ್ ಹಂಚಿಕೊಂಡ ವಿಡಿಯೋದಲ್ಲಿ ಈ ಸುಳಿವು ಸಿಕ್ಕಿದೆ. ಸಾರಾ ತೆಂಡೂಲ್ಕರ್ ಅತ್ತಿಗೆ ಸಾನಿಯಾ ಚಂದೋಕ್ ಈ ಕುರಿತು ಸುಳಿವು ನೀಡಿದ್ದಾರೆ. ಸಾರಾ ಹುಡುಗನ ಅಡ್ರೆಸ್ ರಿವೀಲ್ ಮಾಡಿದ್ರಾ ಅನ್ನೋ ಚರ್ಚೆಗಳು ಶುರುವಾಗಿದೆ.

ಸಚಿನ್ ಹಾಗೂ ಸಾನಿಯಾ ಮಾತಿನಲ್ಲಿದೆ ಸುಳಿವು

ಸಾರಾ ತೆಂಡೂಲ್ಕರ್ ಹುಟ್ಟುಹಬ್ಬದ ಸಂಭ್ರಮದಲ್ಲಿ ಈ ವಿಡಿಯೋ ರೆಕಾರ್ಡ್ ಮಾಡಲಾಗಿತ್ತು. ಆದರೆ ವಿಳಂಬವಾಗಿ ಪೋಸ್ಟ್ ಮಾಡಿದ್ದಾರೆ. ಸಾರಾ ತೆಂಡೂಲ್ಕರ್ ಹುಟ್ಟಹಬ್ಬಕ್ಕೆ ಕುಟುಂಬಸ್ಥರು ಒಬ್ಬೊಬ್ಬರಾಗಿ ಬಂದು ಕೇಕ್ ಮೇಲೆ ದೀಪದ ಕಡ್ಡಿ ಬೆಳಗಿ ಶುಭಕೋರುತ್ತಾ ಇಟ್ಟಿದ್ದಾರೆ. ಸಾರಾ ತೆಂಡೂಲ್ಕರ್ ಎಲ್ಲಾ ಕನಸುಗಳು ನನಸಾಗಲಿ, ಸಾರಾ ತೆಂಡೂಲ್ಕರ್ ಉದ್ಯಮ, ಹೊಸ ಕಚೇರಿಯಲ್ಲಿ ಯಶಸ್ಸು ಸಿಗಲಿ ಎಂದು ಒಬ್ಬೊಬ್ಬರೇ ಹಾರೈಸಿದ್ದಾರೆ. ಇದರಲ್ಲಿ ಸಾರಾ ತೆಂಡೂಲ್ಕರ್ ಅತ್ತಿಗೆ ಸಾನಿಯಾ ಚಂದೋಕ್ ಹಾಗೂ ತಂದೆ ಸಚಿನ್ ತೆಂಡೂಲ್ಕರ್ ಶುಭ ಹಾರೈಕೆ ಹಾಗೂ ಮಾತುಗಳು ತೀವ್ರ ಕುತೂಹಲಕ್ಕೆ ಹಾಗೂ ಸಾರಾ ಮದುವೆ ಕುರಿತು ಚರ್ಚೆಗೆ ನಾಂದಿ ಹಾಡಿದೆ.

ಸಾನಿಯಾ ನೀಡಿದ ಸುಳಿವೇನು

ಸಹೋದರ ಅರ್ಜುನ್ ತೆಂಡೂಲ್ಕರ್ ಪತ್ನಿ ಸಾನಿಯಾ ಚಂದೋಕ್ ಸರದಿ ಆಗಮಿಸುತ್ತಿದ್ದಂತೆ ಕಡ್ಡಿ ಬೆಳಗಿ ಕೇಕ್ ಮೇಲೆ ಚುಚ್ಚಿ ಶುಭಕೋರಿದ್ದಾರೆ. ಈ ವೇಳೆ ಈ ವರ್ಷ ಸಾರಾಗೆ ಬಾಂದ್ರಾದ ಪೆರಿ ಕ್ರಾಸ್ ರಸ್ತೆಯಲ್ಲಿ ವಾಸವಿರುವ ಒಳ್ಳೆಯ ಪಾರ್ಟ್ನರ್ ಸಿಗಲಿ. ಮದುವೆಯಾದ ಬಳಿಕ ನಾವು ಹಾಗೂ ಸಾರಾ ಹತ್ತಿರದಲ್ಲೇ ಇರಬಹುದು ಎಂದು ಶುಭಕೋರಿದ್ದಾರೆ. ಸಾರಾ ತೆಂಡೂಲ್ಕರ್ ಶುಭಕೋರುವಾಗ ಅಚಾನಕ್ಕಾಗಿ ಸಾರಾ ತೆಂಡೂಲ್ಕರ್ ಹುಡುಗನ ಅಡ್ರೆಸ್ ರಿವೀಲ್ ಮಾಡಿದ್ರಾ, ಈ ಕುರಿತು ಗೊತ್ತಿದ್ದೇ ಸುಳಿವು ನೀಡಿದ್ರಾ ಅನ್ನೋ ಮಾತುಗಳು ಕೇಳಿಬರುತ್ತಿದೆ. ಇತರರಂತೆ ಇದು ಶುಭ ಹಾರೈಕೆ ಎಂದು ಎಲ್ಲರು ಅಂದುಕೊಂಡಿದ್ದರು. ಆದರೆ ಕೊನೆಯದಾಗಿ ಸಚಿನ್ ಶುಭಾಶಯದಲ್ಲಿ ಇದರ ರಹಸ್ಯ ಅಡಗಿತ್ತು

ಸಚಿನ್ ಶುಭಾಶಯದ ನಡುವೆ ರಹಸ್ಯ

ಸಚಿನ್ ತೆಂಡೂಲ್ಕರ್ ಪುತ್ರಿ ಸಾರಾಗೆ ಶುಭಾಶಯ ತಿಳಿಸಿದ್ದಾರೆ. ಇದೇ ವೇಳೆ ಈ ವರ್ಷ ಉತ್ತಮ ಒಬ್ಬ ಎಂದು ಮಾತು ಆರಂಭಿಸಿ ತಕ್ಷಣವೇ ಈ ಎಲ್ಲಾ ಮಾತುಗಳನ್ನು ಇಲ್ಲಿಗೆ ಬಿಡುತ್ತೇನೆ. ಈ ಕುರಿತು ಹೆಚ್ಚಿನ ಚರ್ಚೆ, ಮಾತುಗಳು ಬೇಡ ಎಂದು ಸಚಿನ್ ತೆಂಡೂಲ್ಕರ್ ಹೇಳಿದ್ದಾರೆ. ಸಾರಾ ಸಂಭ್ರಮದ ವಿಡಿಯೋ ರೆಕಾರ್ಡ್ ಆಗುತ್ತಿದೆ ಅನ್ನೋ ಅರಿವಿದ್ದ ಸಚಿನ್ ತೆಂಡೂಲ್ಕರ್ ತಕ್ಷಣವೇ ಚರ್ಚೆಗಳಿಗೆ ತೆರೆ ಏಳೆದಿದ್ದಾರೆ. ಈ ಮೂಲಕ ಮಾಧ್ಯಮಗಳ ಮುಂದೆ ಚರ್ಚಿಸುವ ಬದಲು ಕುಟುಂಬದಲ್ಲಿ ಈ ಕುರಿತು ಮಾತುಕತೆ ನಡೆಸಲು ಸಚಿನ್ ಆಗ್ರಹಿಸಿದ್ದಾರೆ. ಸಚಿನ್ ತೆಂಡೂಲ್ಕರ್ ಕುಟುಂಬ ಸಾರಾ ತೆಂಡೂಲ್ಕರ್ ಮದುವೆ ಕುರಿತ ಮಾತುಕತೆಯಲ್ಲಿದೆ ಅನ್ನೋ ಮಾತುಗಳು ಕೇಳಿಬರುತ್ತಿದೆ.

ಸಾರಾ ತೆಂಡೂಲ್ಕರ್ ಸ್ವಂತ ಉದ್ಯಮ ಆರಂಭಿಸಿದ್ದಾರೆ. ದೀಪಾವಳಿ ಹಬ್ಬದ ಸಂಭ್ರಮದಲ್ಲಿ ತಮ್ಮ ಸ್ವಂದ ಉದ್ಯಮದ ಕಚೇರಿಯಲ್ಲಿ ದೀಪಾವಳಿ ಆಚರಿಸಿದ್ದಾರೆ. ಸಚಿನ್ ತೆಂಡೂಲ್ಕರ್, ಕುಟುಂಬಸ್ಥರು ಸೇರಿದಂತೆ ಸಹೋದ್ಯೋಗಿಗಳ ಜೊತೆ ಸಾರಾ ತೆಂಡೂಲ್ಕರ್ ದೀಪಾವಳಿ ಆಚರಿಸಿದ್ದಾರೆ. ಇತ್ತ ಸಾರಾ ಮದುವೆ ಕುರಿತು ಶೀಘ್ರದಲ್ಲೇ ಅಧಿಕೃತ ಮಾಹಿತಿಗಳು ಹೊರಬೀಳುವ ಸಾಧ್ಯತೆ ಇದೆ ಎನ್ನಲಾಗಿದೆ.

39ನೇ ವಯಸ್ಸಿನಲ್ಲಿ ಮತ್ತೆ ಮದುವೆಯಾಗ್ತಾರಾ ಸಾನಿಯಾ ಮಿರ್ಜಾ? 'ನಾನು ನಿಜವಾಗಿಯೂ ಸಿಂಗಲ್' ಎಂದ ಟೆನಿಸ್ ತಾರೆ!

Chandrashekar GS — Mon, 09 Nov 2026 15:00:19 +0530

ಸಾನಿಯಾ ಮಿರ್ಜಾ ಎರಡನೇ ಮದುವೆಯಾಗ್ತಾರಾ? 39ನೇ ವಯಸ್ಸಿನಲ್ಲಿ ವೈಯಕ್ತಿಕ ಜೀವನದ ಬಗ್ಗೆ ಟೆನಿಸ್ ತಾರೆ ಹೇಳಿದ್ದೇನು?

ಭಾರತದ ಖ್ಯಾತ ಮಾಜಿ ಟೆನಿಸ್ ಆಟಗಾರ್ತಿ ಸಾನಿಯಾ ಮಿರ್ಜಾ ಅವರ ವೈಯಕ್ತಿಕ ಜೀವನದ ಬಗ್ಗೆ ಮತ್ತೆ ಚರ್ಚೆ ಶುರುವಾಗಿದೆ. ಪಾಕಿಸ್ತಾನದ ಕ್ರಿಕೆಟಿಗ ಶೋಯೆಬ್ ಮಲಿಕ್ ಜೊತೆಗಿನ ವಿಚ್ಛೇದನದ ಬಳಿಕ ಸಾನಿಯಾ ಎರಡನೇ ಮದುವೆಯಾಗುತ್ತಾರಾ ಎಂಬ ಪ್ರಶ್ನೆ ಅಭಿಮಾನಿಗಳಲ್ಲಿ ಮೂಡಿದೆ. ಇದೀಗ ಟಾಕ್ ಶೋವೊಂದರಲ್ಲಿ ಸಾನಿಯಾ ತಮ್ಮ ಪ್ರಸ್ತುತ ಸಂಬಂಧದ ಸ್ಥಿತಿಯ ಬಗ್ಗೆ ನೀಡಿರುವ ಉತ್ತರಗಳು ಈ ಚರ್ಚೆಗೆ ಮತ್ತಷ್ಟು ಕಾವು ನೀಡಿವೆ.

‘ನಾನು ನಿಜವಾಗಿಯೂ ಸಿಂಗಲ್’ ಎಂದ ಸಾನಿಯಾ

ನಟಿ ನೇಹಾ ಧೂಪಿಯಾ ಮತ್ತು ಅಂಗದ್ ಬೇಡಿ ನಡೆಸಿಕೊಡುವ ‘ಡಬಲ್ ಡೇಟ್’ ಟಾಕ್ ಶೋಗೆ ಸಾನಿಯಾ ಮಿರ್ಜಾ ಅತಿಥಿಯಾಗಿ ಆಗಮಿಸಿದ್ದರು. ಅವರ ಜೊತೆ ನಿರ್ದೇಶಕಿ ಹಾಗೂ ಸಾನಿಯಾ ಅವರ ಆಪ್ತ ಗೆಳತಿ ಫರಾ ಖಾನ್ ಕೂಡ ಭಾಗವಹಿಸಿದ್ದರು. ಕಾರ್ಯಕ್ರಮದಲ್ಲಿ ಸಾನಿಯಾ ಅವರ ವೈಯಕ್ತಿಕ ಜೀವನ ಮತ್ತು ಡೇಟಿಂಗ್ ವಿಚಾರವಾಗಿ ಮಾತುಕತೆ ನಡೆಯಿತು.

ಈ ವೇಳೆ ಅಂಗದ್ ಬೇಡಿ, ನಿಮ್ಮ ಸ್ನೇಹಿತರಲ್ಲಿ ಯಾರಾದರೂ ನಿಮ್ಮನ್ನು ಕಾಫಿ ಡೇಟ್ಗೆ ಆಹ್ವಾನಿಸಿದ್ದಾರೆಯೇ ಎಂದು ಪ್ರಶ್ನಿಸಿದರು. ಅದಕ್ಕೆ ಸಾನಿಯಾ, ತಮ್ಮ ಪುರುಷ ಸ್ನೇಹಿತರು ತಮ್ಮನ್ನು ಹುಡುಗರ ಪ್ರವಾಸಕ್ಕೆ ಕರೆಯುತ್ತಾರೆ ಮತ್ತು ಹುಡುಗನಂತೆಯೇ ನೋಡುತ್ತಾರೆ ಎಂದು ಹಾಸ್ಯಭರಿತವಾಗಿ ಉತ್ತರಿಸಿದರು.

ನಂತರ ಫರಾ ಖಾನ್, ತಮ್ಮ ಕೆಲವು ಸ್ನೇಹಿತರು ಕರೆ ಮಾಡಿ ಸಾನಿಯಾ ನಿಜವಾಗಿಯೂ ಸಿಂಗಲ್ ಆಗಿದ್ದಾರೆಯೇ ಎಂದು ವಿಚಾರಿಸುತ್ತಾರೆ ಎಂದು ಹೇಳಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಸಾನಿಯಾ, ತಾನು ನಿಜವಾಗಿಯೂ ಸಿಂಗಲ್ ಎಂದು ಸ್ಪಷ್ಟಪಡಿಸಿದರು.

ಭವಿಷ್ಯದಲ್ಲಿ ಹೊಸ ವ್ಯಕ್ತಿ ಬರಬಹುದು ಎಂದರಾ?

ಮಾತುಕತೆ ಮುಂದುವರಿದಾಗ ಅಂಗದ್, ಒಬ್ಬ ಪುರುಷನ ಜೊತೆ ಸುಂದರ ಕ್ಷಣಗಳನ್ನು ಕಳೆಯಬೇಕು ಎಂದು ನಿಮಗೆ ಅನಿಸುವುದಿಲ್ಲವೇ ಎಂದು ಕೇಳಿದರು. ಆಗ ಫರಾ ಖಾನ್ ಮಧ್ಯಪ್ರವೇಶಿಸಿ, ಸಾನಿಯಾ ಜೀವನವನ್ನು ಹೇಗೆ ಆನಂದಿಸುತ್ತಿದ್ದಾರೆ ಎಂಬುದು ಹೊರಗಿನವರಿಗೆ ತಿಳಿದಿಲ್ಲ ಎಂದು ತಮಾಷೆಯಾಗಿ ಹೇಳಿದರು.

ಫರಾ ಮಾತಿಗೆ ಬೆಂಬಲ ಸೂಚಿಸಿದ ಸಾನಿಯಾ, ತಮ್ಮ ಜೀವನದಲ್ಲಿ ಈಗ ಯಾವುದೇ ಪುರುಷನಿಲ್ಲ. ಮುಂದೆ ಇರಬಹುದೇ ಇಲ್ಲವೇ ಎಂಬುದು ಗೊತ್ತಿಲ್ಲ ಎಂದು ಹೇಳಿದರು. ಈ ಮಾತುಗಳಿಂದ ಅವರ ಎರಡನೇ ಮದುವೆ ಬಗ್ಗೆ ಕುತೂಹಲ ಹೆಚ್ಚಾಗಿದೆ. ಆದರೆ ಸಾನಿಯಾ ಮದುವೆಯಾಗುವ ನಿರ್ಧಾರ ಪ್ರಕಟಿಸಿಲ್ಲ.

ಶೋಯೆಬ್ ಮಲಿಕ್ ಜೊತೆಗಿನ ದಾಂಪತ್ಯ ಜೀವನ

ಸಾನಿಯಾ ಮಿರ್ಜಾ 2010ರಲ್ಲಿ ಪಾಕಿಸ್ತಾನದ ಕ್ರಿಕೆಟಿಗ ಶೋಯೆಬ್ ಮಲಿಕ್ ಅವರನ್ನು ವಿವಾಹವಾಗಿದ್ದರು. ಈ ದಂಪತಿಗೆ ಒಬ್ಬ ಮಗನಿದ್ದಾನೆ. ಹಲವು ವರ್ಷಗಳ ದಾಂಪತ್ಯದ ಬಳಿಕ 2023ರಲ್ಲಿ ಇಬ್ಬರೂ ಬೇರ್ಪಟ್ಟರು. ಬಳಿಕ ಶೋಯೆಬ್ ಮಲಿಕ್ ಪಾಕಿಸ್ತಾನಿ ನಟಿ ಸನಾ ಜಾವೇದ್ ಅವರನ್ನು ಮದುವೆಯಾದರು.

ವಿಚ್ಛೇದನದ ಬಳಿಕ ಸಾನಿಯಾ ತಮ್ಮ ಮಗನೊಂದಿಗೆ ಜೀವನ ಮುಂದುವರಿಸಿದ್ದಾರೆ. ಸದ್ಯಕ್ಕೆ ಅವರು ಸಿಂಗಲ್ ಆಗಿರುವುದಾಗಿ ಹೇಳಿಕೊಂಡಿದ್ದು, ಎರಡನೇ ಮದುವೆಯ ಬಗ್ಗೆ ಯಾವುದೇ ಖಚಿತ ಘೋಷಣೆ ಮಾಡಿಲ್ಲ. ಹೀಗಾಗಿ ಅವರ ಮಾತುಗಳನ್ನು ಮದುವೆಯ ಸುಳಿವು ಎಂದು ನಿರ್ಧರಿಸುವುದಕ್ಕಿಂತ, ತಮ್ಮ ವೈಯಕ್ತಿಕ ಜೀವನದ ಬಗ್ಗೆ ಅವರು ಮುಕ್ತವಾಗಿ ಹಂಚಿಕೊಂಡ ಅಭಿಪ್ರಾಯವೆಂದು ನೋಡುವುದು ಸೂಕ್ತ.

'ನಾನು - ಶಿವಣ್ಣ ಹೋಗೋ.. ಬಾರೇ ಅಂತಲೇ ಮಾತಾಡೋದು, ಪಾರ್ವತಮ್ಮ ಬೈಯೋರು': ನಟಿ ತಾರಾ ಮೆಲುಕು!

Sathish Kumar KH — Sun, 08 Nov 2026 11:47:21 +0530

'ನನ್ನ ಮತ್ತು ಶಿವರಾಜ್‌ಕುಮಾರ್ ನಡುವೆ ಅದೆಷ್ಟೋ ವರ್ಷಗಳ ಅಪಾರವಾದ ಸ್ನೇಹವಿದೆ. ನಾವಿಬ್ಬರೂ ಪರಸ್ಪರ ‘ಹೋಗೋ.. ಬಾರೇ..’ ಎಂದೇ ಏಕವಚನದಲ್ಲೇ ಮಾತನಾಡಿಕೊಳ್ಳುವುದು. ಒಮ್ಮೆ ನಾವು ಹೀಗೆ ಮಾತಾಡೋದನ್ನು ನೋಡಿ ಪಾರ್ವತಮ್ಮ ರಾಜ್‌ಕುಮಾರ್ ಅವರು, 'ಏನ್ರೀ ಇದು.. ಇಬ್ಬರೂ ಹೀಗೆ ಮಾತಾಡ್ತಿದ್ದೀರಾ?' ಎಂದು ನಟಿ ತಾರಾ ಅವರು ಹಳೆಯ ನೆನಪುಗಳನ್ನು ಬಿಚ್ಚಟ್ಟಿದ್ದಾರೆ.

ಕನ್ನಡ ಚಿತ್ರರಂಗದ 'ಹ್ಯಾಟ್ರಿಕ್ ಹೀರೋ ಡಾ. ಶಿವರಾಜ್‌ಕುಮಾರ್' ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿ ಯಶಸ್ವಿ 40 ವರ್ಷಗಳನ್ನು ಪೂರೈಸಿದ್ದಾರೆ. ಈ ಸಂಭ್ರಮದ ಪ್ರಯುಕ್ತ ಮಾಧ್ಯಮವೊಂದಕ್ಕೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಹಿರಿಯ ನಟಿ ತಾರಾ, ಶಿವಣ್ಣನೊಂದಿಗಿನ ತಮ್ಮ ನಾಲ್ಕು ದಶಕಗಳ ಅವಿನಾಭಾವ ಸ್ನೇಹ ಮತ್ತು ಶೂಟಿಂಗ್ ಸೆಟ್‌ನ ರೋಚಕ ಘಟನೆಗಳನ್ನು ಮೆಲಕು ಹಾಕಿದ್ದಾರೆ. ಶಿವಣ್ಣ ಅವರ ಚೊಚ್ಚಲ ಚಿತ್ರ ‘ಆನಂದ್‌’ನಿಂದ ಹಿಡಿದು, ಮುಂಬರುವ ‘ಎ ಫಾರ್ ಆನಂದ್‌’ವರೆಗೂ ಹತ್ತಾರು ಚಿತ್ರಗಳಲ್ಲಿ ಜೊತೆಯಾಗಿ ಅಭಿನಯಿಸಿರುವ ತಾರಾ, ತಮ್ಮಿಬ್ಬರ ನಡುವಿನ ಆತ್ಮೀಯತೆ ಹಾಗೂ ಅಂದು ನದಿಯಲ್ಲಿ ಕೊಚ್ಚಿ ಹೋಗುತ್ತಿದ್ದಾಗ ಶಿವಣ್ಣ ತಮ್ಮ ಪ್ರಾಣ ಉಳಿಸಿದ ಆ ಭಯಾನಕ ಕ್ಷಣವನ್ನು ನೆನಪಿಸಿಕೊಂಡು ಭಾವುಕರಾಗಿದ್ದಾರೆ.

'ನಾನು-ಶಿವಣ್ಣ ಹೋಗೋ.. ಬಾರೇ ಅನ್ತೀವಿ, ಪಾರ್ವತಮ್ಮ ಬೈಯೋರು!

ಶಿವಣ್ಣನ ಜೊತೆಗಿನ ಒಡನಾಟದ ಬಗ್ಗೆ ಮಾತನಾಡಿದ ತಾರಾ, "ನನ್ನ ಮತ್ತು ಶಿವರಾಜ್‌ಕುಮಾರ್ ನಡುವೆ ಅದೆಷ್ಟೋ ವರ್ಷಗಳ ಅಪಾರವಾದ ಸ್ನೇಹವಿದೆ. ನಾವಿಬ್ಬರೂ ಪರಸ್ಪರ ‘ಹೋಗೋ.. ಬಾರೇ..’ ಎಂದೇ ಏಕವಚನದಲ್ಲೇ ಮಾತನಾಡಿಕೊಳ್ಳುವುದು. ಒಮ್ಮೆ ನಾವು ಹೀಗೆ ಮಾತಾಡೋದನ್ನು ನೋಡಿ ಪಾರ್ವತಮ್ಮ ರಾಜ್‌ಕುಮಾರ್ ಅವರು, 'ಏನ್ರೀ ಇದು.. ಇಬ್ಬರೂ ಹೀಗೆ ಮಾತಾಡ್ತಿದ್ದೀರಾ?' ಎಂದು ಗದರಿ ನಮಗೆ ಬೈದಿದ್ದರು" ಎಂದು ತಾರಾ ಮುಗುಳುನಗೆಯೊಂದಿಗೆ ಹಳೆಯ ದಿನಗಳನ್ನು ಹಂಚಿಕೊಂಡಿದ್ದಾರೆ.

‘ಗಂಧದ ಗುಡಿ-2’ ಸೆಟ್‌ನಲ್ಲಿ ನದಿಗೆ ಕೊಚ್ಚಿ ಹೋಗುತ್ತಿದ್ದೆ: ಶಿವಣ್ಣ ಕಾಪಾಡಿದರು!

ಇದೇ ವೇಳೆ ಶೂಟಿಂಗ್ ವೇಳೆ ನಡೆದ ಜೀವನ್ಮರಣದ ಘಟನೆಯೊಂದನ್ನು ಬಿಚ್ಚಿಟ್ಟ ತಾರಾ, 'ಅದು ‘ಗಂಧದ ಗುಡಿ - 2’ ಚಿತ್ರದ ಶೂಟಿಂಗ್ ಸಮಯ. ನದಿಯಲ್ಲಿ ತೆಪ್ಪದ ಮೇಲೆ ದೃಶ್ಯವೊಂದನ್ನು ಚಿತ್ರೀಕರಿಸಲಾಗುತ್ತಿತ್ತು. ಆ ವೇಳೆ ನೀರಿನ ರಭಸಕ್ಕೆ ತೆಪ್ಪದ ನಿಯಂತ್ರಣ ತಪ್ಪಿ ನಾನು ನದಿಯಲ್ಲಿ ನಿಜವಾಗಿಯೂ ಕೊಚ್ಚಿ ಹೋಗುತ್ತಿದ್ದೆ! ಎಲ್ಲರೂ ಗಾಬರಿಯಾಗಿದ್ದರು. ಆ ಕ್ಷಣದಲ್ಲಿ ಶಿವಣ್ಣ ತಕ್ಷಣವೇ ಧೈರ್ಯದಿಂದ ಮುನ್ನುಗ್ಗಿ ರಿಯಲ್ ಆಗಿಯೇ ನನ್ನನ್ನು ನೀರಿನಿಂದ ರಕ್ಷಿಸಿ, ನನ್ನ ಪ್ರಾಣ ಉಳಿಸಿದರು' ಎಂದು ಕೃತಜ್ಞತೆಯಿಂದ ಆ ಕ್ಷಣವನ್ನು ನೆನೆದಿದ್ದಾರೆ.

ಡಾ. ರಾಜ್ ಕುಟುಂಬದ ಮೇಲಿನ ಅಪಾರ ಭಕ್ತಿ:

'ನಾನು ಕೇವಲ ಶಿವಣ್ಣನ ಜೊತೆ ಮಾತ್ರವಲ್ಲ, ಅಣ್ಣಾವ್ರ ಕುಟುಂಬದ ಎಲ್ಲರೊಂದಿಗೂ ನಟಿಸಿದ ಅದೃಷ್ಟವಂತೆ. ನನಗೆ ಡಾ. ರಾಜ್‌ಕುಮಾರ್ ಅವರ ಮೇಲೆ ಎಷ್ಟು ಗೌರವ ಮತ್ತು ಭಕ್ತಿಯಿತ್ತೆಂದರೆ, ನಾನು ಎಂಎಲ್‌ಸಿ (ವಿಧಾನ ಪರಿಷತ್ ಸದಸ್ಯೆ) ಆಗಿ ಪ್ರಮಾಣವಚನ ಸ್ವೀಕರಿಸಿದ್ದೇ ಪೂಜ್ಯ ಡಾ. ರಾಜ್‌ಕುಮಾರ್ ಅವರ ಹೆಸರಿನಲ್ಲಿ' ಎಂದು ತಾರಾ ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ. ಶಿವರಾಜ್‌ಕುಮಾರ್ ಅವರ 40 ವರ್ಷಗಳ ಸಿನಿಪಯಣದ ಈ ಸಂಭ್ರಮದಲ್ಲಿ ತಾರಾ ಹಂಚಿಕೊಂಡಿರುವ ಈ ರೋಚಕ ಮತ್ತು ಭಾವುಕ ನೆನಪುಗಳು ಇದೀಗ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿವೆ.

ಅಂದು ಕೊಟ್ಟ ಸೋಪ್ನಿಂದ ಶುರುವಾದ ಲವ್, ಇಂದು ಮದ್ವೆವರೆಗೆ; ಶಿಶಿರ್-ಐಶ್ವರ್ಯಾ ರೋಚಕ ಪ್ರೇಮ ಕಥೆ

Suchethana D — Sun, 08 Nov 2026 16:55:51 +0530

ಬಿಗ್‌ಬಾಸ್‌ ಮನೆಯಲ್ಲಿ ಲವ್‌, ರೊಮಾನ್ಸ್‌ ಅಲ್ಲಿಂದ ಹೊರಕ್ಕೆ ಬರುತ್ತಿದ್ದಂತೆಯೇ ಕಿತ್ತಾಟ, ನಾನ್ಯಾರೋ ನೀನ್ಯಾರೋ ಎಂದುಕೊಳ್ಳುವುದೆಲ್ಲ ಸರ್ವೇ ಸಾಮಾನ್ಯ. ಇದು ಎಲ್ಲಾ ಭಾಷೆಗಳ ಬಿಗ್‌ಬಾಸ್‌ನಲ್ಲಿ ಕೇಳಿ ಬರುವುದೇ. ಆದರೆ ಹಾಗೆ ಮಾಡದೇ ʼಬಿಗ್‌ ಬಾಸ್‌ ಕನ್ನಡ ಸೀಸನ್‌ 11 ರಿಂದ ಹೊರಕ್ಕೆ ಬಂದ ಮೇಲೂ ಅದೇ ರೀತಿ ಫ್ರೆಂಡ್‌ಷಿಪ್‌ ಉಳಿಸಿಕೊಂಡವರು ಐಶ್ವರ್ಯ ಸಿಂಧೋಗಿ (Aishwarya Sindhogi) ಮತ್ತು ಶಿಶಿರ್‌ ಶಾಸ್ತ್ರಿ (Shishir Shastry). ಈ ಜೋಡಿ ಹೊರಗಡೆ ಸಾಕಷ್ಟು ಬಾರಿ ಕಾಣಿಸಿಕೊಂಡಿದ್ದರಿಂದ, ಜೊತೆಗೆ ಒಟ್ಟಾಗಿ ವಿವಿಧ ಸ್ಥಳಗಳಿಗೆ ಹೋಗಿ ಬರುತ್ತಿದ್ದುದರಿಂದ ಇವರಿಬ್ಬರ ಬಾಂಡಿಂಗ್‌ ಬಗ್ಗೆ ಸಿಕ್ಕಾಪಟ್ಟೆ ಚರ್ಚೆಯಾಗುತ್ತಿತ್ತು. ಇವರಿಬ್ಬರೂ ನಿಜ ಜೀವನದಲ್ಲಿ ಒಂದಾಗಲಿ, ಮದುವೆಯಾಗಲಿ ಎಂದು ಅಭಿಮಾನಿಗಳು ಹಾರೈಸುತ್ತಿದ್ದರು. ಆದರೆ ನೀವಿಬ್ಬರೂ ಮದ್ವೆಯಾಗ್ತೀರಾ ಎಂದು ಕೇಳಿದಾಗ ಜೋಡಿ, ನಮಗಿಬ್ಬರಿಗೂ ಸಾಕಷ್ಟು ಮದುವೆ ಪ್ರಪೋಸಲ್‌ ಬಂದಿವೆ. ನಾವಿಬ್ಬರೂ ಬ್ಯುಸಿನೆಸ್‌ ಪಾರ್ಟನರ್‌ ಆಗಬಹುದು ಅಷ್ಟೇ, ಆದರೆ ಸಂಗಾತಿಗಳಾಗಲ್ಲ ಎಂದು ಸ್ಪಷ್ಟನೆ ನೀಡಿದ್ದರು. ಹೀಗಾಗಿ ಈ ಮೂಲಕ ನಾವು ಪ್ರೇಮಿಗಳಲ್ಲ, ಮದುವೆ ಆಗಲ್ಲ ಎಂದಿದ್ದರು.

ಸಾಕಷ್ಟು ರೀಲ್ಸ್

ಇದಾದ ನಂತರವೂ ಇವರಿಬ್ಬರೂ ಮೈಚಳಿ ಬಿಟ್ಟು ಸಾಕಷ್ಟು ರೀಲ್ಸ್ಗಳಲ್ಲಿ ಕಾಣಿಸಿಕೊಂಡಿದ್ದರಿಂದ ಇವರಿಬ್ಬರ ನಡುವೆ ಏನೋ ಇದೆ ಎಂದು ಅಭಿಮಾನಿಗಳು ಹೇಳಿದ್ದುಂಟು. ಕೊನೆಗೆ ಎಲ್ಲದ್ದಕ್ಕೂ ತೆರೆ ಎಳೆದಿದ್ದ ಜೋಡಿ, ಈಚೆಗೆ ತಾವು ಎಂಗೇಜ್ ಆಗಿರುವ ವಿಷ್ಯ ರಿವೀಲ್ ಮಾಡಿದ್ದರು. 'ಊಹೆಗಳ ಹಿಂದೆ ಒಂದು ಕಥೆಯಿತ್ತು. ನಗುವಿನ ಹಿಂದೆ ಒಂದು ಪ್ರೀತಿಯಿತ್ತು.Comments ಹಿಂದೆ ನಿಮ್ಮ ಕುತೂಹಲವಿತ್ತು. ಇಂದು ಆ ಕಥೆಗೆ ಒಂದು ಸುಂದರವಾದ ಹೆಸರಿದೆ — AISHIR. ಇಷ್ಟು ದಿನ ನಮ್ಮ ಕಥೆಯನ್ನು ನಿಮ್ಮದೇ ಕಥೆಯಂತೆ ಪ್ರೀತಿಸಿದ ಎಲ್ಲರಿಗೂ ಧನ್ಯವಾದಗಳು. From all the speculations to a lifetime of celebrations. Not just a rumour anymore. It’s our forever beginning' ಎಂದು ಅವರು ತಮ್ಮ ವಿಡಿಯೋಗೆ ಬರೆದುಕೊಳ್ಳುವ ಮೂಲಕ ಎಂಗೇಜ್ಮೆಂಟ್ ಆಗಿರುವ ವಿಷ್ಯವನ್ನು ಹೇಳಿಕೊಂಡಿದ್ದರು.

ಸೋಪ್ನಿಂದ ಶುರುವಾದ ಲವ್

ಇದೀಗ ನ್ಯೂಸೋ ನ್ಯೂಸು ಚಾನೆಲ್ಗೆ ನೀಡಿರುವ ಸಂದರ್ಶನದಲ್ಲಿ ಅವರು, ತಮ್ಮಿಬ್ಬರ ಲವ್ ಸ್ಟೋರಿ ಎಲ್ಲಿಂದ ಶುರುವಾಗಿದ್ದು ಎನ್ನುವ ಬಗ್ಗೆ ಮಾತನಾಡಿದ್ದಾರೆ. ಈ ಕುರಿತು ಮಾತನಾಡಿರುವ ಐಶ್ವರ್ಯ ಸಿಂಧೋಗಿ, ತಮ್ಮ ಅಪ್ಪ ಹೋದಮೇಲೆ ಅವರ ಬಿಜಿನೆಸ್ ಹ್ಯಾಂಡ್ಓವರ್ ಮಾಡಿ ನಾನು ಹ್ಯಾಂಡ್ಮೇಡ್ ಸೋಪ್ ಮತ್ತು ಇತರ ಪರ್ಫ್ಯೂಮ್ ಬಿನಿನೆಸ್ ಶುರು ಮಾಡಿದ್ದೆ. ಅಮೆರಿಕದಲ್ಲಿ ಈ ಬಗ್ಗೆ ಕೋರ್ಸ್ ಕೂಡ ಮಾಡಿದ್ದೆ. ಮಾಲ್ಗಳಲ್ಲಿ ಹಾಗೂ ಇತರ ಕಡೆಗಳಲ್ಲಿ ಮಳಿಗೆಗಳನ್ನು ಇಟ್ಟುಕೊಂಡು ಬಿಜಿನೆಸ್ ಮಾಡುತ್ತಿದ್ದೆ. ಈಗಲೂ ಅದನ್ನು ಮಾಡುತ್ತಿದ್ದೇನೆ' ಎಂದಿದ್ದಾರೆ.

ಆ ಸಮಯದಲ್ಲಿ ಶಿಶಿರ್ ನನ್ನ ಕ್ಲೈಂಟ್ ಆಗಿದ್ದರು. ಅವರಿಗೂ ನಾನು ಸೋಪ್ ತೆಗೆದುಕೊಳ್ಳುವಂತೆ ಹೇಳಿದ್ದೆ. ಅದರ ಜೊತೆ ಫೋಟೋ ಕ್ಲಿಕ್ಕಿಸಿ ಪ್ರಮೋಟ್ ಮಾಡಲು ಹೇಳಿದ್ದೆ. ಆಗ ಅವರು ಅದೇ ರೀತಿ ಮಾಡಿದ್ದರು ಎಂದಿದ್ದಾರೆ ನಟಿ. ಹೀಗೆ ಸೋಪ್ನಿಂದ ನಮ್ಮಿಬ್ಬರ ಪರಿಚಯವಾಗಿ, ಅದಾದ ಬಳಿಕ ಪ್ರೀತಿಗೆ ತಿರುಗಿ ಈಗ ಮದುವೆಯವರೆಗೂ ಅದು ಬಂದು ನಿಂತಿದೆ.

ಸುಂದರಿಯ ಹನಿಟ್ರ್ಯಾಪ್ ಬಲೆಗೆ ಬಿದ್ದ ಚಿಪ್ ದೈತ್ಯ Nvidia ಸಿಇಒ! ಚೀನಾದ ಕಿತಾಪತಿಗೆ ಅಮೆರಿಕ ಅಲ್ಲೋಲ ಕಲ್ಲೋಲ

Suchethana D — Sun, 08 Nov 2026 17:55:48 +0530

ವಾಷಿಂಗ್ಟನ್: ಕರ್ನಾಟಕದಲ್ಲಿ ಸ್ಟಿಂಗ್ ಆಪರೇಷನ್ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದ್ದರೆ, ಅತ್ತ ಅಮೆರಿಕವು ಹನಿಟ್ರ್ಯಾಪ್ನಿಂದ ಅಲ್ಲೋಲ ಕಲ್ಲೋಲವಾಗಿದೆ. ವಿಶ್ವದ ಪ್ರಮುಖ ಸೆಮಿಕಂಡಕ್ಟರ್ ಮತ್ತು ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನ ಕಂಪನಿಯಾದ ಎನ್ವಿಡಿಯಾ (NVIDIA) ದ ಸಹ-ಸ್ಥಾಪಕರು, ಅಧ್ಯಕ್ಷರು ಮತ್ತು ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (CEO) ಆಗಿರುವ ಚಿಪ್ ದೈತ್ಯ ಎಂದೇ ಫೇಮಸ್ ಆಗಿರುವ ಎನ್ವಿಡಿಯಾದ ಸಿಇಒ ಅಮೆರಿಕದ ಜೆನ್ಸನ್ ಹುವಾಂಗ್ ಈಗ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದ್ದಾರೆ. ಚೀನಾ ಮಾಡಿದ ಕಿತಾಪತಿಗೆ ಅರಿಯದೇ ಸುಂದರಿಯ ಮೋಹದ ಜಾಲದೊಳಗೆ ಸಿಲುಕಿ ಈಗ ಒದ್ದಾಡುತ್ತಿರುವುದಾಗಿ ನ್ಯೂಯಾರ್ಕ್ ಟೈಮ್ಸ್ ವರದಿ ಮಾಡಿದೆ. ಅಷ್ಟಕ್ಕೂ ಈ ಹನಿಟ್ರ್ಯಾಪ್ ಮಾಡಿಸಿದ್ದು ಚೀನಾ. 2025 ರಲ್ಲಿ ಚೀನಾದ ಮೇಲೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಯೋಜಿಸಿರುವ ಚಿಪ್ ನಿಷೇಧವನ್ನು ತಪ್ಪಿಸಲು ಚೀನಾ ಈ ಬುದ್ಧಿವಂತ ಮಾರ್ಗ ಕಂಡುಕೊಂಡಿದೆ. ಜೆನ್ಸನ್ ಮೇಲೆ ಕಣ್ಣಿಡುವುದಕ್ಕಾಗಿ ಚೀನಾ ತನ್ನ ಗುಪ್ತಚರ ಸಂಸ್ಥೆಯಿಂದ ಸುಂದರಿಯೊಬ್ಬಳನ್ನು ಕಳುಹಿಸಿ, ಜೆನ್ಸನ್ ಅವರಿಗೆ ಅರಿವಿಲ್ಲದೇ ಮೋಹದ ಬಲೆಯಲ್ಲಿ ಬೀಳಿಸಿ ಹನಿಟ್ರ್ಯಾಪ್ ಮಾಡಿರುವುದಾಗಿ ವರದಿಯಾಗಿದೆ.

ವರದಿಯ ಪ್ರಕಾರ, ಅಮೆರಿಕದ ಗುಪ್ತಚರ ಸಂಸ್ಥೆಗಳು ಈ ಹಿಂದೆ ಟ್ರಂಪ್ ಆಡಳಿತದಲ್ಲಿನ ನೀತಿ ನಿರೂಪಕರಿಗೆ ಈ ಪಿತೂರಿಯ ಬಗ್ಗೆ ಜ್ಞಾಪಕ ಪತ್ರದಲ್ಲಿ ತಿಳಿಸಿದ್ದವು ಎನ್ನಲಾಗಿದೆ. ಆದರೆ, ಈ ಬಗ್ಗೆ ಅವರು ಅಷ್ಟಾಗಿ ತಲೆ ಕೆಡಿಸಿಕೊಂಡಿರಲಿಲ್ಲ. ಅಷ್ಟಕ್ಕೂ, ಚೀನಾದ ರಾಜ್ಯ ಭದ್ರತಾ ಸಚಿವಾಲಯ (MSS) ಜೆನ್ಸನ್ ಮೇಲೆ ಕಣ್ಣಿಡಲು ಆಲಿಸ್ ಹುವಾಂಗ್ ಎಂಬ ರಹಸ್ಯ ಸುಂದರಿಯೊಬ್ಬರನ್ನು ಏಜೆಂಟ್ ಆಗಿ ನೇಮಿಸಿಕೊಂಡಿದೆ. ಆಲಿಸ್ ಸಿಂಗಪುರ ಮೂಲದ ಕಂಪೆನಿ ಮೆಗಾಸ್ಪೀಡ್‌ನಲ್ಲಿ ಹಿರಿಯ ಕಾರ್ಯನಿರ್ವಾಹಕರಾಗಿ ಕೆಲಸ ಮಾಡುತ್ತಿದ್ದಳು. ಈ ಪ್ರೊಫೈಲ್‌ನ ಸೋಗಿನಲ್ಲಿ, ಈಕೆ ಎನ್‌ವಿಡಿಯಾ ಮುಖ್ಯಸ್ಥರನ್ನು ಸಂಪರ್ಕಿಸಿ ಅವರನ್ನು ಬಲೆಗೆ ಬೀಳಿಸಿದ್ದಾಳೆ!

ಚೀನಾದ ನಿಜವಾದ ಉದ್ದೇಶವೇನು?

ಅಮೆರಿಕ ಸರ್ಕಾರವು ಎನ್‌ವಿಡಿಯಾ, ತನ್ನ ಅತ್ಯಾಧುನಿಕ AI ಚಿಪ್‌ಗಳನ್ನು ಚೀನಾಕ್ಕೆ ಮಾರಾಟ ಮಾಡುವುದನ್ನು ನಿರ್ಬಂಧಿಸಿದೆ. ಅಮೆರಿಕ -ಚೀನಾ ತಂತ್ರಜ್ಞಾನ ಸ್ಪರ್ಧೆಯ ಮಧ್ಯೆ, ಎನ್ವಿಡಿಯಾದ ಚಿಪ್‌ಗಳು ಪ್ರಪಂಚದಾದ್ಯಂತ AI ವ್ಯವಸ್ಥೆಗಳಿಗೆ ಶಕ್ತಿ ತುಂಬುತ್ತಿವೆ. ಈ ಗುಪ್ತಚರ ಕಾರ್ಯಾಚರಣೆಯ ಮೂಲಕ, ಚೀನಾದ ಬೇಹುಗಾರಿಕೆ ಸಂಸ್ಥೆ ಅಮೆರಿಕದ AI ಚಿಪ್‌ಗಳ ಬಗ್ಗೆ ಆಂತರಿಕ ಮಾಹಿತಿಯನ್ನು ಸಂಗ್ರಹಿಸಲು ಬಯಸಿತ್ತು. ಹೆಚ್ಚುವರಿಯಾಗಿ, ನಿಷೇಧದ ಹೊರತಾಗಿಯೂ ಚೀನಾಕ್ಕೆ ಎನ್ವಿಡಿಯಾದ ಅತ್ಯಾಧುನಿಕ ಪ್ರೊಸೆಸರ್‌ಗಳನ್ನು ಪೂರೈಸಲು ಜೆನ್ಸನ್ ಹುವಾಂಗ್ ಅವರನ್ನು ದಾರಿ ತಪ್ಪಿಸುವುದು ಪ್ರಮುಖ ಗುರಿಯಾಗಿತ್ತು. ಅದಕ್ಕಾಗಿ ರಹಸ್ಯ ಏಜೆಂಟ್ ಅನ್ನು ಕಳುಹಿಸಿ ಬಲೆ ಬೀಳಿಸಲಾಗಿದೆ.

ಇದೀಗ ಇದು ಬಹಿರಂಗಗೊಂಡಿದೆ. ಅಮೆರಿಕದಲ್ಲಿ ಕೋಲಾಹಲ ಸೃಷ್ಟಿಯಾಗಿದೆ. ವಿಷಯದ ಗಂಭೀರತೆಯನ್ನು ಗಮನದಲ್ಲಿಟ್ಟುಕೊಂಡು, ಯುಎಸ್ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ನಲ್ಲಿರುವ ಮೂರು ಪ್ರಭಾವಿ ಸಮಿತಿಗಳ ರಿಪಬ್ಲಿಕನ್ ನಾಯಕರು ಈ ತಿಂಗಳ ಕೊನೆಯಲ್ಲಿ ಜೆನ್ಸನ್ ಹುವಾಂಗ್ ಅವರನ್ನು ಕರೆಸಿದ್ದಾರೆ. ಆಲಿಸ್ ಹುವಾಂಗ್ ಅವರೊಂದಿಗಿನ ಸಂವಹನ ಮತ್ತು ಸಂಬಂಧದ ಬಗ್ಗೆ ಅವರನ್ನು ಪ್ರಶ್ನಿಸಲಾಗುವುದು ಎನ್ನಲಾಗಿದೆ.

ಯುಎಸ್ ಮೇಲೆ ಬೇಹುಗಾರಿಕೆ ನಡೆಸುತ್ತಿರುವ ಚೀನೀ ಸಂಸ್ಥೆ ಎಂಎಸ್ಎಸ್ ಎಂದರೇನು?

ಸುಂದರಿ ಆಲಿಸ್ ಹುವಾಂಗ್ಳನ್ನು ಕಳುಹಿಸಿದ ಚೀನಾದ ರಾಜ್ಯ ಭದ್ರತಾ ಸಚಿವಾಲಯ (ಎಂಎಸ್ಎಸ್) ದೇಶದ ಉನ್ನತ ಗುಪ್ತಚರ ಸಂಸ್ಥೆಯಾಗಿದೆ. 1983 ರಲ್ಲಿ ಸ್ಥಾಪನೆಯಾದ ಈ ಸಂಸ್ಥೆ ದೇಶೀಯ ರಾಜಕೀಯ ಭದ್ರತೆ ಮತ್ತು ಅಂತರರಾಷ್ಟ್ರೀಯ ಗುಪ್ತಚರ ಎರಡನ್ನೂ ನಿರ್ವಹಿಸುತ್ತದೆ. ಯುಎಸ್ ಗುಪ್ತಚರ ಸಂಸ್ಥೆ, ಸಿಐಎಗೆ ಪ್ರಮುಖ ಪ್ರತಿಸ್ಪರ್ಧಿ ಎಂದು ಪರಿಗಣಿಸಲಾದ ಎಂಎಸ್ಎಸ್ ಹಲವಾರು ಪ್ರಮುಖ ಬೇಹುಗಾರಿಕೆ ಪ್ರಕರಣಗಳಲ್ಲಿ ಭಾಗಿಯಾಗಿದೆ. ಇತ್ತೀಚೆಗೆ, ಸಂಭಾವ್ಯ ಗುರಿಗಳನ್ನು ಗುರುತಿಸಲು ಮತ್ತು ಅವುಗಳನ್ನು ನಿರೂಪಿಸಲು ಸಂಸ್ಥೆಯು AI ತಂತ್ರಜ್ಞಾನವನ್ನು ವ್ಯಾಪಕವಾಗಿ ಬಳಸುತ್ತಿದೆ. ಇದು ವಿಶ್ವಾದ್ಯಂತ ಲಕ್ಷಾಂತರ ಗುಪ್ತಚರ ಏಜೆಂಟ್‌ಗಳನ್ನು ಹೊಂದಿದೆ ಎಂದು ಅಂದಾಜಿಸಲಾಗಿದೆ.