Asianet Suvarna News

2030ರ ಕಾಮನ್‌ವೆಲ್ತ್‌ ಗೇಮ್ಸ್‌ನ ಆಯೋಜನಾ ಸಮಿತಿಯಲ್ಲಿ ರಾಹುಲ್‌ ದ್ರಾವಿಡ್‌ಗೆ ಸ್ಥಾನ!

Kannadaprabha News — Sat, 31 Oct 2026 09:38:37 +0530

ನವದೆಹಲಿ(ಅ.31): ಅಹಮದಾಬಾದ್‌ನಲ್ಲಿ ನಡೆಯಲಿರುವ 2030ರ ಕಾಮನ್‌ವೆಲ್ತ್‌ ಗೇಮ್ಸ್‌ನ ಆಯೋಜನಾ ಸಮಿತಿಗೆ ಕೇಂದ್ರ ಕ್ರೀಡಾ ಇಲಾಖೆಯು ಅಥ್ಲೀಟ್‌ಗಳ ಪ್ರತಿನಿಧಿಗಳಾಗಿ ದಿಗ್ಗಜ ಕ್ರಿಕೆಟಿಗ ರಾಹುಲ್‌ ದ್ರಾವಿಡ್‌ ಹಾಗೂ ಬ್ಯಾಡ್ಮಿಂಟನ್‌ ತಾರೆ ಸೈನಾ ನೆಹ್ವಾಲ್‌ ಅವರ ಹೆಸರನ್ನು ನಾಮನಿರ್ದೇಶನಗೊಳಿಸಿದೆ.

ಈ ಸಂಘಟನಾ ಸಮಿತಿಯ ನೇತೃತ್ವವವನ್ನು ಗುಜರಾತ್‌ ಕ್ರೀಡಾ ಸಚಿವ, ಡಿಸಿಎಂ ಹರ್ಷ ಸಂಘವಿ ವಹಿಸಿಕೊಳ್ಳುವ ಸಾಧ್ಯತೆಯಿದೆ. ಖಾಸಗಿ ವಲಯದಿಂದ ಜಿನಲ್ ಮೆಹ್ತಾ ಮತ್ತು ಆರ್‌ಸಿಬಿ ಒಡತಿ ಅನನ್ಯಾ ಬಿರ್ಲಾ ಅವರ ಹೆಸರುಗಳನ್ನು ಇಲಾಖೆ ಶಿಫಾರಸು ಮಾಡಿದೆ ಎಂದು ಮೂಲಗಳಿಂದ ತಿಳಿದು ಬಂದಿದೆ.

ಅಲ್ಲದೇ ಡಿಸೆಂಬರ್‌ನಲ್ಲಿ ಚುನಾವಣೆ ಎದುರಿಸಲಿರುವ ಇಂಡಿಯನ್ ಒಲಿಂಪಿಕ್ ಅಸೋಸಿಯೇಷನ್''ನ ಪ್ರತಿನಿಧಿಗಳು, ಕಾಮನ್‌ವೆಲ್ತ್ ಗೇಮ್ಸ್ ಅಸೋಸಿಯೇಷನ್ ಆಫ್ ಇಂಡಿಯಾದ ಪ್ರತಿನಿಧಿಯಾಗಿ ಲೆಫ್ಟಿನೆಂಟ್ ಜನರಲ್ ಹರ್ಪಾಲ್ ಸಿಂಗ್ ಅವರು ಇದರಲ್ಲಿ ಭಾಗಿಯಾಗಲಿದ್ದಾರೆ.

ಇಂದಿನಿಂದ 14 ದಿನ ಯುವ ಒಲಿಂಪಿಕ್ಸ್‌

ಡಾಕಾರ್‌: ಕಿರಿಯರ ಒಲಿಂಪಿಕ್‌ ಕ್ರೀಡಾಕೂಟ ಶನಿವಾರ ಸೆನೆಗಲ್‌ನ ಡಾಕಾರ್‌ನಲ್ಲಿ ಆರಂಭಗೊಳ್ಳಲಿದೆ. ಕೂಟವು ನ.13ರ ವರೆಗೂ ನಡೆಯಲಿದ್ದು, 207 ರಾಷ್ಟ್ರಗಳ ಸುಮಾರು 2700 ಕ್ರೀಡಾಪಟುಗಳು ಕೂಟದಲ್ಲಿ ಭಾಗವಹಿಸಲಿದ್ದಾರೆ. ಭಾರತದ 17 ಕ್ರೀಡಾಪಟುಗಳು 11 ಕ್ರೀಡೆಗಳಲ್ಲಿ ಸ್ಪರ್ಧಿಸಲಿದ್ದಾರೆ. ಕರ್ನಾಟಕದ ತಾರಾ ಈಜುಪಟು ಧಿನಿಧಿ ದೇಸಿಂಘು ಕೂಡಾ ಕಣದಲ್ಲಿದ್ದಾರೆ.

ಸಿಂಧು ಸೆಮೀಸ್‌ ಪ್ರವೇಶ

ಸಾರ್ಬ್ರುಕೆನ್(ಜರ್ಮನಿ): ಹೈಲೋ ಓಪನ್‌ ಬ್ಯಾಡ್ಮಿಂಟನ್‌ ಟೂರ್ನಿಯ ಮಹಿಳಾ ಸಿಂಗಲ್ಸ್‌ ಕ್ವಾರ್ಟರ್‌ ಫೈನಲ್‌ನಲ್ಲಿ ಭಾರತದ ಪಿ.ವಿ. ಸಿಂಧು ಜರ್ಮನಿಯ ಅಮಾಲಿ ಶುಲ್ಜ್ ವಿರುದ್ಧ 21-12, 21-10 ಅಂಕಗಳಿಂದ ಗೆದ್ದಿದ್ದು, ಸೆಮೀಸ್‌ ಪ್ರವೇಶಿಸಿದ್ದಾರೆ. ಅವರು ಸೆಮಿಫೈನಲ್‌ನಲ್ಲಿ ಭಾರತದ ಅನ್ಮೋಲ್‌ ಖರ್ಬ್‌ರನ್ನು ಎದುರಿಸಲಿದ್ದಾರೆ. ಅನ್ಮೋಲ್‌, ಉನ್ನತಿ ಹೂಡಾರನ್ನು ಮಣಿಸಿ ಸೆಮೀಸ್‌ ಪ್ರವೇಶಿಸಿದ್ದಾರೆ.

ಹಾಕಿಯಲ್ಲಿ ಭಾರತಕ್ಕೆ 4-1 ಜಯ

ಜಲಾಂಧರ್‌: ಪುರುಷರ ಏಷ್ಯನ್‌ ಚಾಂಪಿಯನ್ಸ್ ಟ್ರೋಫಿ ಹಾಕಿ ಟೂರ್ನಿಯಲ್ಲಿ ಭಾರತ ಹ್ಯಾಟ್ರಿಕ್‌ ಗೆಲುವು ಸಾಧಿಸಿದೆ. 5 ಸಲದ ಚಾಂಪಿಯನ್‌ ಭಾರತ, ಶುಕ್ರವಾರ ಜಪಾನ್‌ ವಿರುದ್ಧ 4-1 ಅಂಕಗಳ ಅಂತರದಿಂದ ಗೆಲುವು ಸಾಧಿಸಿದೆ. ಭಾರತದ ಪರ ಅಭಿಷೇಕ್‌ 2 ಗೋಲು ಬಾರಿಸಿದರು.

ಬೆಂಗಳೂರಲ್ಲಿ ನಡೆದ ರಾಷ್ಟ್ರೀಯ ರೊಟಾಕ್ಸ್‌ ಕಾರ್ಟಿಂಗ್‌ ಚಾಂಪಿಯನ್‌ಶಿಪ್‌, ಕೃಷ್ ಗುಪ್ತಾ ಚಾಂಪಿಯನ್

Chethan Kumar — Wed, 21 Oct 2026 18:46:06 +0530

ಬೆಂಗಳೂರು (ಅ.21) : ಬೆಂಗಳೂರಿನ ಕಾರ್ಟೋಪಿಯಾ ಸರ್ಕ್ಯೂಟ್‌ನಲ್ಲಿ ನಡೆದ ಮೆಕೊ ಎಫ್‌ಎಂಎಸ್‌ಸಿಐ ರಾಷ್ಟ್ರೀಯ ರೊಟಾಕ್ಸ್ ಕಾರ್ಟಿಂಗ್ ಚಾಂಪಿಯನ್‌ಶಿಪ್‌ನ ಆರನೇ ಹಾಗೂ ಅಂತಿಮ ಸುತ್ತಿನಲ್ಲಿ ಹಿರಿಯರ ವಿಭಾಗದಲ್ಲಿ ರಾಯೋ ರೇಸಿಂಗ್‌ನ ಕೃಷ್ ಗುಪ್ತಾ ಪೋಡಿಯಂ ಸ್ಥಾನ ಪಡೆದಿದ್ದಾರೆ. ಈ ಮೂಲಕ ಚೊಚ್ಚಲ ರಾಷ್ಟ್ರೀಯ ರೊಟಾಕ್ಸ್ ಕಾರ್ಟಿಂಗ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿದ್ದಾರೆ.

ಕಮ್‌ಬ್ಯಾಕ್ ಮಾಡಿದ ಕೃಷ್

ಮುಂಬೈನ ಕೃಷ್ ಈ ಅಂತಿಮ ಸುತ್ತನ್ನು ಅತ್ಯಂತ ಕಳಪೆಯಾಗಿ ಆರಂಭಿಸಿದರು. ಕಳಪೆ ಕ್ವಾಲಿಫೈಯಿಂಗ್‌ನಿಂದಾಗಿ ಅವರು ಹದಿನಾರನೇ ಸ್ಥಾನಕ್ಕೆ ಕುಸಿದಿದ್ದರು. ಆದರೂ ಕೃಷ್ ಅದ್ಭುತವಾಗಿ ಚೇತರಿಸಿಕೊಂಡು, ಎರಡು ಹೀಟ್‌ಗಳಲ್ಲೂ 10 ಓವರ್‌ಟೇಕ್‌ಗಳನ್ನು ಮಾಡುವ ಮೂಲಕ ಎರಡರಲ್ಲೂ ಆರನೇ ಸ್ಥಾನ ಪಡೆದರು.ಚಾಂಪಿಯನ್‌ಶಿಪ್ ಅಂಕಗಳನ್ನು ಹೊಂದಿರುವ ನಿರ್ಣಾಯಕ ಪ್ರಿ-ಫೈನಲ್‌ನಲ್ಲಿ ಕೃಷ್ ಆರನೇ ಸ್ಥಾನದಿಂದ ಆರಂಭಿಸಿದರು. ಕೆಲ ಕ್ಷಣದಲ್ಲೇ ಮೂರನೇ ಸ್ಥಾನಕ್ಕೆ ಜಿಗಿದ ಕೃಷ್‌, ಆ ಬಳಿಕ 2ನೇ ಸ್ಥಾನ ಪಡೆದು ಕೊನೆ ವರೆಗೂ ಅದೇ ಸ್ಥಾನ ಕಾಯ್ದುಕೊಂಡರು. ಚೆನ್ನೈನ ಎಸ್‌ಪೋರ್ಟ್ಸ್‌ನ ಇಶಾಂತ್ ವೆಂಕಟೇಶನ್ ಪ್ರಿ-ಫೈನಲ್ ಗೆದ್ದರು.

ಕೃಷ್ ಫೈನಲ್ ಅನ್ನು ಎರಡನೇ ಸ್ಥಾನದಿಂದ ಆರಂಭಿಸಿದರೂ, ಆರಂಭದಲ್ಲೇ ಮೂರನೇ ಸ್ಥಾನಕ್ಕೆ ಕುಸಿದರು. ನಂತರ ಅವರನ್ನು ಬೆಂಗಳೂರಿನ ಇಶಾನ್ ಮಾದೇಶ್ ಹಿಂದಿಕ್ಕಿದರು. ಆದರೆ ಅಂತಿಮವಾಗಿ ವೆಂಕಟೇಶನ್ ಮತ್ತು ಬೆಂಗಳೂರಿನ ಎಸ್‌ಪೋರ್ಟ್ಸ್‌ನ ರುಹಾನ್‌ ಆಳ್ವಾ ಅವರ ನಂತರ ಮೂರನೇ ಸ್ಥಾನ ಪಡೆದರು. ಕೃಷ್ ಪ್ರಿ-ಫೈನಲ್ ಮತ್ತು ಫೈನಲ್ ಎರಡರಲ್ಲೂ ತಮ್ಮ ಹತ್ತಿರದ ಚಾಂಪಿಯನ್‌ಶಿಪ್ ಪ್ರತಿಸ್ಪರ್ಧಿಗಳಿಗಿಂತ ಉತ್ತಮ ಸ್ಥಾನ ಪಡೆದರು. ಇದು ಕೃಷ್ ಅವರಿಗೆ ತಮ್ಮ ಚಾಂಪಿಯನ್‌ಶಿಪ್ ಮುನ್ನಡೆಯನ್ನು ವಿಸ್ತರಿಸಲು ಮತ್ತು ಪುಣೆಯ ಕ್ರೆಸ್ಟ್ ಮೋಟಾರ್‌ಸ್ಪೋರ್ಟ್ಸ್‌ನ ಅರ್ಜುನ್ ಛೇಡಾ ಹಾಗೂ ಬೆಂಗಳೂರಿನ ಅಕ್ಷತ್ ಮಿಶ್ರಾ ಅವರನ್ನು ಹಿಂದಿಕ್ಕಿ ಪ್ರಶಸ್ತಿ ಗೆಲ್ಲಲು ಅವಕಾಶ ಮಾಡಿಕೊಟ್ಟಿತು.

ರಾಯೋ ರೇಸಿಂಗ್‌ನ ಕೃಷ್ ಚಾಂಪಿಯನ್‌ಶಿಪ್‌ನಲ್ಲಿ ಎರಡು ಗೆಲುವುಗಳು ಮತ್ತು ಎರಡು ಮೂರನೇ ಸ್ಥಾನಗಳು ಸೇರಿದಂತೆ ಒಟ್ಟು ನಾಲ್ಕು ಪೋಡಿಯಂಗಳೊಂದಿಗೆ ಅತ್ಯುತ್ತಮ ಪ್ರದರ್ಶನ ನೀಡಿದರು. ಅವರು 428 ಅಂಕಗಳೊಂದಿಗೆ ಪ್ರಶಸ್ತಿಯನ್ನು ಗೆದ್ದುಕೊಂಡರೆ, ಛೇಡಾ 415 ಅಂಕಗಳೊಂದಿಗೆ ಮತ್ತು ಮಿಶ್ರಾ 414 ಅಂಕಗಳೊಂದಿಗೆ ನಂತರದ ಸ್ಥಾನಗಳಲ್ಲಿದ್ದಾರೆ.

ವಿಶ್ವ ಫೈನಲ್ಸ್‌ಗೆ ಅರ್ಹತೆ

ರಾಷ್ಟ್ರೀಯ ಟ್ರೋಫಿಯ ಜೊತೆಗೆ, ರಾಯೋ ರೇಸಿಂಗ್ ಚಾಲಕ ಕೃಷ್ ಪೋರ್ಚುಗಲ್‌ನ ಪೋರ್ಟಿಮಾವೊದಲ್ಲಿ ನಡೆಯಲಿರುವ ರೊಟಾಕ್ಸ್ ವಿಶ್ವ ಫೈನಲ್ಸ್‌ನಲ್ಲಿ ಭಾರತವನ್ನು ಅಧಿಕೃತವಾಗಿ ಪ್ರತಿನಿಧಿಸುವ ಅವಕಾಶ ಪಡೆದಿದ್ದಾರೆ. ಅಲ್ಲಿ 56ಕ್ಕೂ ಹೆಚ್ಚು ದೇಶಗಳ ಚಾಂಪಿಯನ್‌ಗಳು ವಿಶ್ವ ಪ್ರಶಸ್ತಿಗಾಗಿ ಸ್ಪರ್ಧಿಸಲಿದ್ದಾರೆ.

‘ನನ್ನ ಮೊದಲ ರಾಷ್ಟ್ರೀಯ ಪ್ರಶಸ್ತಿಯು ನಾನು ಬಯಸಿದ್ದಕ್ಕಿಂತ ಹೆಚ್ಚು ಸಮಯ ತೆಗೆದುಕೊಂಡಿದೆ. ಅಂತಿಮವಾಗಿ ರಾಷ್ಟ್ರೀಯ ಚಾಂಪಿಯನ್ ಆಗಿರುವುದು ತುಂಬಾ ಸಂತೋಷ ತಂದಿದೆ. ನನ್ನ ಪೋಷಕರು, ನನ್ನ ತಂಡ ಮತ್ತು ಮೆಕ್ಯಾನಿಕ್‌ಗಳಿಗೆ ನಾನು ಧನ್ಯವಾದ ಹೇಳಲು ಬಯಸುತ್ತೇನೆ’ ಎಂದು ಕೃಷ್ ಹೇಳಿದರು.

ಎಂಟು ಬಾರಿಯ ರಾಷ್ಟ್ರೀಯ ಚಾಂಪಿಯನ್ ರಾಯೋಮಂಡ್ ಬನಾಜಿ ಮಾತನಾಡಿ, ‘ಕೃಷ್ ಕೆಲವು ವರ್ಷಗಳಿಂದ ಸತತ ಪ್ರಯತ್ನ ನಡೆಸುತ್ತಿದ್ದರು. ಕೊನೆಗೂ ಅವರಿಗೆ ರಾಷ್ಟ್ರೀಯ ಪ್ರಶಸ್ತಿ ಸಿಕ್ಕಿದೆ. ಈ ಪ್ರಶಸ್ತಿಗೆ ಅವರು ಅರ್ಹರು’ ಎಂದರು.

ಏಷ್ಯನ್ ಗೇಮ್ಸ್ 2026: ಒಂದೇ ದಿನ ಆರು ಚಿನ್ನಕ್ಕೆ ಭಾರತ ‘ಪಂಚ್‌’; ಪದಕ ಪಟ್ಟಿಯಲ್ಲೀಗ ಭಾರತಕ್ಕೆ ಎಷ್ಟನೇ ಸ್ಥಾನ?

Kannadaprabha News — Sat, 03 Oct 2026 08:24:31 +0530

ಕಕಮಿಗಹರ/ನಗೋಯಾ: ಈ ಬಾರಿ ಏಷ್ಯನ್‌ ಗೇಮ್ಸ್‌ ಮುಗಿಯುವ ಹಂತಕ್ಕೆ ತಲುಪಿರುವಾಗಲೇ ಭಾರತ ಚಿನ್ನದ ಬೇಟೆಯನ್ನು ಹೆಚ್ಚಿಸಿದೆ. ಶುಕ್ರವಾರ ಒಂದೇ ದಿನ ಭಾರತ 6 ಚಿನ್ನ ಸೇರಿ ಬರೋಬ್ಬರಿ 10 ಪದಕಗಳನ್ನು ಬಾಚಿಕೊಂಡಿದೆ. ಈ ಪೈಕಿ ಹಾಕಿಯಲ್ಲಿ ಮಹಿಳಾ ತಂಡ ಐತಿಹಾಸಿಕ ಚಿನ್ನ ಗೆದ್ದರೆ, ಬಾಕ್ಸಿಂಗ್‌ನಲ್ಲಿ ಮೂವರು ಚಿನ್ನಕ್ಕೆ ಪಂಚ್‌ ಮಾಡಿದರು. ಉಳಿದಂತೆ ಆರ್ಚರಿಯಲ್ಲಿ ಚಿನ್ನ ಸೇರಿ 3 ಪದಕ ಬಂದರೆ, ಸೆಪಾಕ್‌ಟೆಕ್ರಾ, ಸೇಲಿಂಗ್‌ನಲ್ಲೂ ಭಾರತಕ್ಕೆ ಮೆಡಲ್‌ ಹರಿದುಬಂದವು. ಸದ್ಯ ಭಾರತ ಪದಕ ಗಳಿಕೆ 75ಕ್ಕೆ ಏರಿಕೆಯಾಗಿದ್ದು, ಪಟ್ಟಿಯಲ್ಲಿ 5ನೇ ಸ್ಥಾನಕ್ಕೆ ಜಿಗಿದಿದೆ.

1984ರ ಬಳಿಕ ಮೊದಲ ಚಿನ್ನ

ಏಷ್ಯಾಡ್‌ 1951ರಲ್ಲೇ ಆರಂಭಗೊಂಡಿದ್ದರೂ, ಮಹಿಳಾ ಹಾಕಿಯನ್ನು ಕ್ರೀಡಾಕೂಟದಲ್ಲಿ ಮೊದಲ ಬಾರಿ ಆಡಿಸಿದ್ದು 1984ರಲ್ಲಿ. ಆ ವರ್ಷ ಭಾರತ ಚಾಂಪಿಯನ್‌ ಆಗಿತ್ತು. ಅದಾಗಿ 44 ವರ್ಷಗಳ ಬಳಿಕ ಭಾರತ ಮತ್ತೊಮ್ಮೆ ಚಿನ್ನದ ಪದಕ ಗೆದ್ದಿದೆ. ಶುಕ್ರವಾರ ನಡೆದ ಫೈನಲ್‌ನಲ್ಲಿ ಭಾರತ ತಂಡ ಕಳೆದ ಬಾರಿಯ ಚಾಂಪಿಯನ್‌, ಒಲಿಂಪಿಕ್ಸ್‌ನ ಬೆಳ್ಳಿ ವಿಜೇತ ಚೀನಾ ವಿರುದ್ಧ 1-0 ಗೋಲಿನಿಂದ ಗೆಲುವು ಸಾಧಿಸಿತು.

ಭಾರತ ಪರ 200ನೇ ಪಂದ್ಯ ಆಡಿದ ಲಾಲ್ರೆಮ್‌ಸಿಯಾಮಿ, ಪಂದ್ಯದ 10ನೇ ನಿಮಿಷದಲ್ಲೇ ಆಕರ್ಷಕ ಗೋಲು ಬಾರಿಸಿದರು. ಆ ಬಳಿಕ ಭಾರತಕ್ಕೆ ಕೆಲ ಪೆನಾಲ್ಟಿ ಕಾರ್ನರ್‌ ಅವಕಾಶ ಸಿಕ್ಕರೂ ಗೋಲು ದಾಖಲಾಗಲಿಲ್ಲ. ಪ್ರಮುಖವಾಗಿ, ಭಾರತ ಡಿಫೆನ್ಸ್‌ ಹಾಗೂ ಗೋಲ್‌ಕೀಪಿಂಗ್‌ನಲ್ಲಿ ಅತ್ಯದ್ಭುತ ಆಟ ಪ್ರದರ್ಶಿಸಿತು. ಗೋಲ್‌ಕೀಪರ್‌ ಬಿಚು ದೇವಿ ಬಂಡೆಯಂತೆ ನಿಂತು ಚೀನಾದ ಗೋಲು ಅವಕಾಶಗಳನ್ನು ತಡೆದರು. 24ನೇ ನಿಮಿಷದಲ್ಲಿ ಚೀನಾಗೆ ಪೆನಾಲ್ಟಿ ಸ್ಟ್ರೋಕ್‌ ಅವಕಾಶ ಸಿಕ್ಕಿತಾದರೂ, ಅದನ್ನು ಅನುಭವಿ ಗೋಲ್‌ಕೀಪರ್‌ ಸವಿತಾ ಪೂನಿಯಾ ತಡೆದು ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.

2028ರ ಒಲಿಂಪಿಕ್ಸ್‌ಗೆ ಅರ್ಹತೆ

ಭಾರತ ಈ ಗೆಲುವಿನೊಂದಿಗೆ 2028ರ ಲಾಸ್‌ ಏಂಜಲೀಸ್‌ ಒಲಿಂಪಿಕ್ಸ್‌ಗೆ ನೇರ ಅರ್ಹತೆ ಪಡೆದುಕೊಂಡಿತು. ಇತ್ತೀಚೆಗಷ್ಟೇ ವಿಶ್ವಕಪ್‌ನಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿ 5ನೇ ಸ್ಥಾನಿಯಾಗಿದ್ದ ಭಾರತ, ಈಗ ಏಷ್ಯಾಡ್‌ನಲ್ಲಿ ಗೆಲ್ಲುವುದರೊಂದಿಗೆ ಒಲಿಂಪಿಕ್ಸ್‌ಗೂ ಮುನ್ನ ಆತ್ಮವಿಶ್ವಾಸವನ್ನು ಹೆಚ್ಚಿಸಿಕೊಂಡಿದೆ.

ಸೇಲಿಂಗ್‌ನಲ್ಲಿ ಭಾರತಕ್ಕೆ ಒಟ್ಟು ಮೂರು ಮೆಡಲ್‌

ಸೇಲಿಂಗ್‌ನಲ್ಲಿ ಭಾರತ 3ನೇ ಪದಕ ಗೆದ್ದಿದೆ. ಕ್ರೀಡೆಯ ದಿಂಘಿ ವಿಭಾಗದಲ್ಲಿ ಭಾರತದ ನೇತ್ರಾ ಕುಮಣನ್‌ ಕಂಚಿನ ಪದಕ ಗೆದ್ದಿದ್ದಾರೆ. 4ನೇ ಬಾರಿ ಏಷ್ಯಾಡ್‌ ಆಡುತ್ತಿರುವ ನೇತ್ರಾಗೆ ಇದು ಚೊಚ್ಚಲ ಪದಕ. 2 ಬಾರಿ ಒಲಿಂಪಿಯನ್‌, ಚೆನ್ನೈನ 29 ವರ್ಷದ ನೇತ್ರಾ ಅವರು ಸ್ಪರ್ಧೆಯಲ್ಲಿ ಒಟ್ಟು 14 ಅಂಕಗಳೊಂದಿಗೆ 3ನೇ ಸ್ಥಾನಿಯಾದರು. ಇನ್ನು, ಕಳೆದ ಏಷ್ಯಾಡ್‌ನಲ್ಲಿ ಕಂಚಿನ ಪದಕ ಗೆದ್ದಿದ್ದ ವಿಷ್ಣು ಸರವಣನ್‌ ಅವರು ಈ ಬಾರಿ ಪದಕ ತಪ್ಪಿಸಿಕೊಂಡರು. ಗುರುವಾರ ಸೇಲಿಂಗ್‌ನ ಪುರುಷರ ಸ್ಕಿಫ್‌ ವಿಭಾಗದಲ್ಲಿ ಮನು ಫ್ರಾನ್ಸಿನ್‌-ಪ್ರಿನ್ಸ್‌ ಬೆಳ್ಳಿ, ಮಹಿಳಾ ವಿಭಾಗದಲ್ಲಿ ಹರ್ಷಿತಾ ತೋಮರ್‌-ಶೀತಲ್‌ ವರ್ಮಾ ಕಂಚು ಗೆದ್ದಿದ್ದರು.

ಆರ್ಚರಿಯಲ್ಲಿ ಮತ್ತೆ 1 ಚಿನ್ನ, 2 ಬೆಳ್ಳಿ

ಆರ್ಚರಿಯಲ್ಲಿ ಭಾರತ ಮತ್ತೆ 3 ಪದಕ ಗೆದ್ದಿದೆ. ಇದರೊಂದಿಗೆ ಕ್ರೀಡಾಕೂಟದ ಆರ್ಚರಿಯಲ್ಲಿ ಭಾರತದ ಪದಕ ಗಳಿಕೆ 7ಕ್ಕೆ ಏರಿಕೆಯಾಗಿದೆ. ಇದರಲ್ಲಿ 4 ಚಿನ್ನ, 2 ಬೆಳ್ಳಿ, 1 ಕಂಚು ಇವೆ.

ರೀಕರ್ವ್‌ ಮಹಿಳಾ ವಿಭಾಗದಲ್ಲಿ ಅಂಕಿತಾ ಭಕತ್‌, ಕೀರ್ತಿ ಶರ್ಮಾ ಹಾಗೂ 17 ವರ್ಷದ ಕುಮ್ಕುಮ್‌ ಅನಿಲ್‌ ಮೊಹೊದ್‌ ಅವರನ್ನೊಳಗೊಂಡ ತಂಡ 10 ಬಾರಿ ಒಲಿಂಪಿಕ್‌ ಚಾಂಪಿಯನ್‌ ದಕ್ಷಿಣ ಕೊರಿಯಾವನ್ನು ಸೋಲಿಸಿ ಚಿನ್ನಕ್ಕೆ ಮುತ್ತಿಟ್ಟಿತು. ಹಾಲಿ ಚಾಂಪಿಯನ್‌ ವಿರುದ್ಧ ಫೈನಲ್‌ನಲ್ಲಿ ಭಾರತಕ್ಕೆ 5-3 ಅಂತರದಲ್ಲಿ ಗೆಲುವು ಲಭಿಸಿತು.

ಬಳಿಕ ಕುಮ್ಕುಮ್‌ ಅವರು ಧೀರಜ್‌ ಬೊಮ್ಮದೇವರ ಜೊತೆಗೂಡಿ ಮಿಶ್ರ ರೀಕರ್ವ್‌ ತಂಡ ವಿಭಾಗದಲ್ಲಿ ಬೆಳ್ಳಿ ಗೆದ್ದರು. ಫೈನಲ್‌ನಲ್ಲಿ ಈ ಜೋಡಿಗೆ ಚೀನಾ ವಿರುದ್ಧ ಸೋಲು ಎದುರಾಯಿತು.

ಇನ್ನು, ರೀಕರ್ವ್‌ ಪುರುಷರ ವಿಭಾಗದಲ್ಲಿ ಧೀರಜ್‌, ಸಂಜಯ್‌ ಭೋಗೆ ಹಾಗೂ ನೀರಜ್‌ ಚೌಹಾಣ್‌ ಅವರಿದ್ದ ತಂಡ ಕೊರಿಯಾ ವಿರುದ್ಧ 1-5 ಅಂತರದಲ್ಲಿ ಸೋತು ಬೆಳ್ಳಿಗೆ ತೃಪ್ತಿಪಟ್ಟುಕೊಂಡಿತು.

20ನೇ ನಗೋಯಾ ಏಷ್ಯಾಡ್‌ಗೆ ವರ್ಣರಂಜಿತ ತೆರೆ; ಭಾರತ ಗೆದ್ದ ಪದಕಗಳೆಷ್ಟು?

Naveen Kodase — Mon, 05 Oct 2026 09:28:46 +0530

ನಗೋಯಾ: 2 ವಾರಗಳ ಕಾಲ ಏಷ್ಯನ್‌ ದೇಶಗಳ ಕ್ರೀಡಾ ಪ್ರತಿಭೆಗಳನ್ನು ಒಗ್ಗೂಡಿಸಿ, ಅವರ ಸಾಮರ್ಥ್ಯ ಪ್ರದರ್ಶನಕ್ಕೆ ವೇದಿಕೆ ಕಲ್ಪಿಸಿದ್ದ 20ನೇ ಆವೃತ್ತಿಯ ಏಷ್ಯನ್‌ ಗೇಮ್ಸ್‌ಗೆ ಭಾನುವಾರ ತೆರೆ ಬಿದ್ದಿದೆ.

ನಗೋಯಾದ ಪಲೋಮಾ ಮಿಝುಹೊ ಕ್ರೀಡಾಂಗಣದಲ್ಲಿ ವರ್ಣರಂಜಿತ ಸಮಾರೋಪ ಸಮಾರಂಭದ ಮೂಲಕ ಗೇಮ್ಸ್‌ ಮುಕ್ತಾಯಗೊಂಡಿತು. ಒಲಿಂಪಿಕ್‌ ಕೌನ್ಸಿಲ್‌ ಆಫ್‌ ಏಷ್ಯಾ(ಒಸಿಎ) ಮುಖ್ಯಸ್ಥ ಶೇಕ್‌ ಜೊಆನ್‌ ಬಿನ್‌ ಹಮದ್‌ ಅಲ್‌ ಥಾನಿ ಅವರು 20ನೇ ಆವೃತ್ತಿಯ ಏಷ್ಯನ್ ಗೇಮ್ಸ್‌ ಮುಕ್ತಾಯಗೊಂಡಿರುವುದಾಗಿ ಅಧಿಕೃತವಾಗಿ ಘೋಷಿಸಿದರು. ಇದೇ ವೇಳೆ, 2030ರ ಏಷ್ಯಾಡ್‌ಗೆ ಆತಿತ್ಯ ವಹಿಸಲಿರುವ ಕತಾರ್‌ ದೇಶದ ದೋಹಾ ನಗರದ ಪ್ರತಿನಿಧಿಗಳಿಗೆ ಗೇಮ್ಸ್‌ನ ಕ್ರೀಡಾಜ್ಯೋತಿಯನ್ನು ಹಸ್ತಾಂತರಿಸಲಾಯಿತು. ಸಮಾರಂಭದಲ್ಲಿ ನೃತ್ಯ ಪ್ರದರ್ಶನ, ಸಂಗೀತ ಕಾರ್ಯಕ್ರಮ ಕೂಡಾ ನಡೆಯಿತು.

ಭಾರತಕ್ಕೆ ಪದಕ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನ:

20ನೇ ಆವೃತ್ತಿಯ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತ ತಂಡದ ಅಥ್ಲೀಟ್‌ಗಳು ಅಧ್ಭುತ ಪ್ರದರ್ಶನ ತೋರುವ ಮೂಲಕ 21 ಚಿನ್ನ, 27 ಬೆಳ್ಳಿ ಹಾಗೂ 37 ಕಂಚು ಸಹಿತ 85 ಪದಕಗಳನ್ನು ಗೆಲ್ಲುವ ಮೂಲಕ ಪದಕ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನ ಪಡೆಯಿತು. ಇನ್ನು 169 ಚಿನ್ನ 89 ಬೆಳ್ಳಿ, 83 ಕಂಚಿನ ಪದಕ ಸಹಿತ 341 ಪದಕ ಗೆದ್ದ ಚೀನಾ ಮೊದಲ ಸ್ಥಾನ ಪಡೆದರೆ, ಆತಿಥೇಯ ಜಪಾನ್ 83 ಚಿನ್ನ, 95 ಬೆಳ್ಳಿ ಹಾಗೂ 91 ಕಂಚು ಸಹಿತ 269 ಪದಕಗಳೊಂದಿಗೆ ಎರಡನೇ ಸ್ಥಾನ ಪಡೆಯಿತು. ದಕ್ಷಿಣ ಕೊರಿಯಾ 39 ಚಿನ್ನ, 43 ಬೆಳ್ಳಿ ಹಾಗೂ 68 ಕಂಚಿನ ಪದಕಗಳೊಂದಿಗೆ ಟಾಪ್ 3 ಪಟ್ಟಿಯಲ್ಲಿ ಸ್ಥಾನ ಪಡೆಯುವಲ್ಲಿ ಯಶಸ್ವಿಯಾಯಿತು.

ನೀರು ಧಾಂಡಾ ಭಾಗಿ:

ಭಾರತದ ಟ್ರ್ಯಾಪ್‌ ಶೂಟಿಂಗ್‌ ತಾರೆ ನೀರು ಧಾಂಡಾ ಅವರು ಸಮಾರೋಪ ಸಮಾರಂಭದ ಪಥಸಂಚಲನದಲ್ಲಿ ತ್ರಿವರ್ಣ ಧ್ವಜ ಹಿಡಿದು ಮುನ್ನಡೆಸಿದರು. ಭಾರತದ ಕೆಲ ಅಥ್ಲೀಟ್‌ಗಳೂ ಸಮಾರಂಭದಲ್ಲಿ ಭಾಗಿಯಾದರು.

ಪ್ರಣವಿಗೆ ಐಜಿಯು ₹10 ಲಕ್ಷ ನಗದು

ನವದೆಹಲಿ: ಏಷ್ಯಾಡ್‌ನಲ್ಲಿ ಐತಿಹಾಸಿಕ ಚಿನ್ನ ಗೆದ್ದ ಮಹಿಳಾ ಗಾಲ್ಫರ್‌, ಮೈಸೂರಿನ ಪ್ರಣವಿ ಅರಸ್‌ ಅವರಿಗೆ ಇಂಡಿಯನ್‌ ಗಾಲ್ಫ್‌ ಯೂನಿಯನ್(ಐಜಿಯು) ₹10 ಲಕ್ಷ ನಗದು ಬಹುಮಾನ ಘೋಷಿಸಿದೆ. ಬೆಳ್ಳಿ ವಿಜೇತ ತಂಡದಲ್ಲಿದ್ದ ದೀಕ್ಷಾ ಡಾಗರ್‌ ಹಾಗೂ ಅದಿತಿ ಅಶೋಕ್‌ಗೆ ತಲಾ ₹3 ಲಕ್ಷ ನೀಡುವುದಾಗಿಯೂ ತಿಳಿಸಿದೆ.

ಹಾಕಿ ತಾರೆಗಳಿಗೆ ಅದ್ಧೂರಿ ಸ್ವಾಗತ

ಏಷ್ಯಾಡ್‌ನಲ್ಲಿ ಚಿನ್ನದ ಪದಕ ಗೆದ್ದ ಭಾರತದ ಮಹಿಳಾ ಹಾಕಿ ಆಟಗಾರ್ತಿಯರು ಭಾನುವಾರ ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಆಗಮಿಸಿದರು. ಈ ವೇಳೆ ಅವರಿಗೆ ಹೂಹಾರ ಹಾಕಿ ಅಭಿಮಾನಿಗಳು, ಹಾಕಿ ಸಂಸ್ಥೆ ಪದಾಧಿಕಾರಿಗಳು, ಮಾಜಿ ಹಾಕಿ ಪಟುಗಳು ಸ್ವಾಗತ ಕೋರಿದರು.

ಜಾಗತಿಕ ಕ್ರೀಡಾ ಕ್ಷೇತ್ರದಲ್ಲಿ ಭಾರತ ಮಿಂಚಿಂಗ್: 85 ಪದಕ ತಂದ ಕ್ರೀಡಾಪಟುಗಳು- ಪ್ರಧಾನಿ ಮೋದಿ ವಿಶೇಷ ಭೇಟಿ

Suchethana D — Thu, 15 Oct 2026 20:38:40 +0530

ದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ಇಂದು ದೆಹಲಿಯಲ್ಲಿ, ಜಪಾನ್‌ನ ಐಚಿ-ನಗೋಯಾದಲ್ಲಿ ಏಷ್ಯನ್ ಗೇಮ್ಸ್‌ 2026ರಲ್ಲಿ ಭಾಗವಹಿಸಿದ ಭಾರತೀಯ ಕ್ರೀಡಾಪಟುಗಳನ್ನು ಭೇಟಿಯಾದರು. ಈ ಸಂದರ್ಭದಲ್ಲಿ ಯುವ ವ್ಯವಹಾರಗಳು ಮತ್ತು ಕ್ರೀಡಾ ಸಚಿವ ಡಾ. ಮನ್ಸುಖ್ ಮಾಂಡವಿಯಾ, ಯುವ ವ್ಯವಹಾರಗಳು ಮತ್ತು ಕ್ರೀಡಾ ಖಾತೆಯ ರಾಜ್ಯ ಸಚಿವೆ ರಕ್ಷಾ ಖಡ್ಸೆ ಹಾಗೂ ಭಾರತೀಯ ಒಲಿಂಪಿಕ್ ಸಂಘದ ಅಧ್ಯಕ್ಷೆ ಪಿ.ಟಿ. ಉಷಾ ಸೇರಿದಂತೆ ಮುಂತಾದವರು ಉಪಸ್ಥಿತರಿದ್ದರು.

ಏಷ್ಯನ್ ಗೇಮ್ಸ್‌ನಲ್ಲಿ ಭಾರತವು 21 ಚಿನ್ನ, 27 ಬೆಳ್ಳಿ ಮತ್ತು 37 ಕಂಚು ಸೇರಿದಂತೆ ಒಟ್ಟು 85 ಪದಕಗಳನ್ನು ಗೆಲ್ಲುವ ಮೂಲಕ ಪದಕ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನ ಪಡೆಯಿತು. ಏಷ್ಯನ್ ಗೇಮ್ಸ್‌ನಲ್ಲಿ ಭಾರತವು ಸತತ ಎರಡನೇ ಬಾರಿಗೆ ಅಗ್ರ ಐದು ರಾಷ್ಟ್ರಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿದೆ.

ಬಳಿಕ ಪ್ರಧಾನಿ, ಏಷ್ಯನ್ ಕ್ರೀಡಾಕೂಟದಲ್ಲಿನ ನಮ್ಮ ಯಶಸ್ಸು, ದೇಶದ ಬದಲಾಗುತ್ತಿರುವ ಮನಸ್ಥಿತಿಗೆ ಒಂದು ಉದಾಹರಣೆಯಾಗಿದೆ. ಇಂದಿನ ಯುವಜನರು ಹೊಸ ಎತ್ತರಗಳನ್ನು ತಲುಪಲು ಎಷ್ಟು ಉತ್ಸುಕರಾಗಿದ್ದಾರೆ ಎಂಬುದನ್ನು ಇದು ತೋರಿಸುತ್ತದೆ. ಭಾರತದ ಯುವಜನರ ದೃಢನಿಶ್ಚಯದ ಮುಂದೆ ಯಾವುದೇ ಮೈಲಿಗಲ್ಲು ಅಸಾಧ್ಯವಲ್ಲ; ಹಾಗೆಯೇ, ನಮ್ಮ ಯುವ ಪೀಳಿಗೆಯ ಸಾಮರ್ಥ್ಯಕ್ಕೆ ಮೀರಿದ ಯಾವುದೇ ಗುರಿ ಇಲ್ಲ ಎನ್ನುವುದನ್ನು ತೋರಿಸುತ್ತದೆ ಎಂದರು.

ಕ್ರೀಡೆಯ ಬಗ್ಗೆ ಪ್ರಧಾನಿ ಮಾತು

ಕ್ರೀಡೆಯ ಪಾತ್ರವು ಕೇವಲ ಆಟದ ಮೈದಾನಕ್ಕೆ ಮಾತ್ರ ಸೀಮಿತವಾಗಿಲ್ಲ. ಕ್ರೀಡೆಯು ನಮಗೆ ಶಿಸ್ತನ್ನು ಕಲಿಸುತ್ತದೆ. ಗುರಿಯನ್ನು ತಲುಪುವ ಹಾದಿಯಲ್ಲಿ ದೃಢವಾಗಿ ನಿಲ್ಲುವುದು ಹೇಗೆ ಮತ್ತು ಬದಲಾಗುತ್ತಿರುವ ಸನ್ನಿವೇಶಗಳಿಗೆ ಅನುಗುಣವಾಗಿ ಹೊಂದಿಕೊಳ್ಳುವುದು ಹೇಗೆ ಎಂಬುದನ್ನು ಅದು ನಮಗೆ ತೋರಿಸಿಕೊಡುತ್ತದೆ. ಕ್ರೀಡೆಯ ಮೂಲಕ, ಈ ಪಾಠಗಳು ನಮ್ಮ ದೈನಂದಿನ ಜೀವನದ ಅವಿಭಾಜ್ಯ ಅಂಗಗಳಾಗುತ್ತವೆ. ಇಂತಹ ಕ್ರೀಡಾ ಮನೋಭಾವವು ನಮ್ಮ ಇಡೀ ಜೀವನದುದ್ದಕ್ಕೂ ನಮಗೆ ಮಾರ್ಗದರ್ಶಕವಾಗುತ್ತದೆ ಎಂದು ಪ್ರಧಾನಿ ಹೇಳಿದರು.

ಇಷ್ಟೊಂದು ಪದಕ ವಿಜೇತರನ್ನು ಒಟ್ಟಿಗೆ ಭೇಟಿಯಾಗುವುದು ಸಾಮಾನ್ಯ ಸಂಗತಿಯಲ್ಲ; ಇದೊಂದು ಅತ್ಯಂತ ಸಂತೋಷದಾಯಕ ಅನುಭವ ಎಂದ ಪ್ರಧಾನಿ, ಉತ್ಸಾಹ ಮತ್ತು ಛಲವು ಗೆಲುವಾಗಿ ಪರಿವರ್ತನೆಗೊಂಡಾಗ, ಅದು ಕೇವಲ ಪದಕಗಳನ್ನು ತರುವುದಲ್ಲದೆ, ಎಲ್ಲರ ಮುಖಗಳಲ್ಲಿ ಒಂದು ವಿಶೇಷವಾದ ಹೊಳಪನ್ನೂ ಮೂಡಿಸುತ್ತದೆ. ನಿಮ್ಮ ಈ ಸಾಧನೆಯಿಂದ ಇಡೀ ದೇಶವೇ ಬೆಳಗುತ್ತದೆ ಎಂದು ಕ್ರೀಡಾಪಟುಗಳನ್ನು ಪ್ರಧಾನಿ ಶ್ಲಾಘಿಸಿದರು.

ಮಹಿಳೆಯರಿಗೆ ಶ್ಲಾಘನೆ

ಭಾರತವು ಗೆದ್ದ ಒಟ್ಟು 85 ಪದಕಗಳಿಗೆ ಮಹಿಳಾ ಕ್ರೀಡಾಪಟುಗಳು ನೀಡಿದ ಕೊಡುಗೆಯನ್ನು ಇದೇ ವೇಳೆ ಪ್ರಧಾನಿ ನರೇಂದ್ರ ಮೋದಿ ಶ್ಲಾಘಿಸಿದರು; ಅವರು 11 ಚಿನ್ನದ ಪದಕಗಳು ಸೇರಿದಂತೆ ಒಟ್ಟು 38 ಪದಕಗಳನ್ನು ಗೆದ್ದಿರುವುದು ಇಂದು ಎಲ್ಲಾ ಕ್ಷೇತ್ರಗಳಲ್ಲಿಯೂ ಮಹಿಳೆಯರು ಮಿಂಚುತ್ತಿರುವುದಕ್ಕೆ ಸಾಕ್ಷಿಯಾಗಿದೆ ಎಂದರು.

ಅಸಹ್ಯ ಕೋತಿ ಥರ ಇದ್ಯಾ ಎಂದವರ ಎದುರೇ ಕ್ರೀಡೆಯಲ್ಲಿ ವಿಶ್ವ ದಾಖಲೆ ಮಾಡಿ ಬಾಯಿ ಮುಚ್ಚಿಸಿದ ಭಾರತದ ಕುವರಿ ದೀಪ್ತಿ

Suchethana D — Sun, 04 Oct 2026 12:46:14 +0530

ತೆಳ್ಳಗೆ, ಬೆಳ್ಳಗೆ ಇದ್ದು, ಹೆಣ್ಣಿನ ಪ್ರತಿಯೊಂದು ಅಂಗ ಇಷ್ಟಿಷ್ಟು ಇಂಚು ಇದ್ದರೇನೇ ಆಕೆ ಸೌಂದರ್ಯವತಿ, ರೂಪವತಿ ಎಂದೂ, ಆಕೆಯ ದೇಹದಲ್ಲಿ ಸ್ವಲ್ಪ ಏರುಪೇರಾದರೂ ಬಾಡಿ ಷೇಮಿಂಗ್ ಮಾಡುವವರಿಗೇನೂ ಕಡಿಮೆಯಿಲ್ಲ. ಇದು ಸಿನಿಮಾ ಸೇರಿದಂತೆ ಹಲವು ಕ್ಷೇತ್ರಗಳ ಸೆಲೆಬ್ರಿಟಿ ಮಾತ್ರವಲ್ಲದೇ ಸಾಮಾನ್ಯ ಹೆಣ್ಣನ್ನೂ ಬಿಡದ ಕೆಟ್ಟ ನಡವಳಿಕೆ ಇದಾಗಿದೆ. ಹೆಣ್ಣಿನ ರೂಪದ ಮೇಲೆ ಆಕೆಯ ವ್ಯಕ್ತಿತ್ವ ಅಳೆಯುವುದು, ಚೆಂದ ಇದ್ದರಷ್ಟೇ ಸಾಧನೆ ಮಾಡುವವರ ಪಟ್ಟಿಗೆ ಸೇರಿಸುವುದು ಇವೆಲ್ಲವೂ ಚಿಕ್ಕಪುಟ್ಟ ಹಳ್ಳಿಗಳಿಂದ ಹಿಡಿದು ಮಹಾನಗರಗಳವರೆಗಿನ ಅದೆಷ್ಟೋ ಹೆಣ್ಣುಮಕ್ಕಳು ಪಡುತ್ತಿರುವ ನೋವಿನ ಪಾಡು ಕೂಡ. ಇದೇ ರೀತಿ ಬೌದ್ಧಿಕ ದೌರ್ಬಲ್ಯದಿಂದ ಕೆಲವರ ಬಾಯಲ್ಲಿ ಕೇಳಬಾರದ ಮಾತುಗಳನ್ನು ಕೇಳಿ, ಕೋತಿ ಥರ ಇದ್ಯಾ, ಅಹಸ್ಯ ಇದ್ಯಾ ಎಂಬೆಲ್ಲಾ ಮಾತುಗಳನ್ನು ಕೇಳಿಸಿಕೊಂಡ ಹೆಣ್ಣುಮಗಳೊಬ್ಬಳು ಇಂದು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಕ್ರೀಡೆಯಲ್ಲಿ ಗುರುತಿಸಿಕೊಂಡಿದ್ದಾರೆ. ಚುಚ್ಚು ಮಾತನಾಡಿದವರು ಅದರಲ್ಲಿಯೇ ಮುಂದುವರೆದಿದ್ದರೆ, ಈ ಹೆಣ್ಣುಮಗಳು ಮಾತ್ರ ಭಾರತದ ಕೀರ್ತಿಯನ್ನು ಅಂತರರಾಷ್ಟ್ರೀಯ ಮಟ್ಟಕ್ಕೆ ಕೊಂಡೊಯ್ದಿದ್ದಾರೆ.

ಅವರೇ ತೆಲಂಗಾಣದ ದೀಪ್ತಿ ಜೀವಂಜಿ (Deepthi Jeevanji). ಈಕೆ ನೋಡಲು ಸುಂದರವಾಗಿಲ್ಲ, ನಿಮಗೆ ಈಕೆಯನ್ನು ಸಾಕುವುದು ಕಷ್ಟ. ಅನಾಥಾಶ್ರಮಕ್ಕೆ ಸೇರಿಸಿ ಎನ್ನುವ ಮಾತು ಅಕ್ಕಪಕ್ಕದ ಮನೆಯವರಿಂದ ಬಂದಾಗ, ತಮ್ಮ ಮಗಳು ಮುಂದೊಂದು ದಿನ ದೇಶದ ಹೆಸರನ್ನು ಬೆಳಗೇ ಬೆಳಗುತ್ತಾಳೆ ಎಂದು ಆಕೆಯನ್ನು ಜತನದಿಂದ ಕಾಪಾಡಿದ್ದ ಅಪ್ಪ-ಅಮ್ಮನ ಮಾತನ್ನು ನಿಜವಾಗಿಸಿದ್ದಾರೆ ಜೀಪ್ತಿ. ಪ್ಯಾರಾ-ಅಥ್ಲೀಟ್ (ಓಟಗಾರ್ತಿ) ವಿಭಾಗದಲ್ಲಿ ಐತಿಹಾಸಿಕ ಸಾಧನೆ ಮಾಡಿದ್ದಾರೆ ಈಕೆ. 2024ರ ಪ್ಯಾರಿಸ್ ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟದ ಮಹಿಳೆಯರ 400 ಮೀಟರ್ ಓಟದ ಸ್ಪರ್ಧೆಯಲ್ಲಿ (T20 ವಿಭಾಗ) ದೀಪ್ತಿ ಅವರು ಕಂಚಿನ ಪದಕ ಗೆದ್ದು ಇತಿಹಾಸ ನಿರ್ಮಿಸಿದ್ದಾರೆ. ಬೌದ್ಧಿಕ ದೌರ್ಬಲ್ಯ ಹೊಂದಿರುವ ವಿಭಾಗದಲ್ಲಿ ಭಾರತದ ಪರ ಪ್ಯಾರಾಲಿಂಪಿಕ್ಸ್ ಪದಕ ಗೆದ್ದ ಮೊದಲ ಅಥ್ಲೀಟ್ ಇವರಾಗಿದ್ದಾರೆ.

ಇಲ್ಲಿಗೇ ಮುಗಿದಿಲ್ಲ ಸಾಧನೆ

2024 ರಲ್ಲಿ ಜಪಾನ್‌ನ ಕೋಬೆಯಲ್ಲಿ ನಡೆದ ವಿಶ್ವ ಪ್ಯಾರಾ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್‌ನ 400 ಮೀಟರ್ ಓಟವನ್ನು ಕೇವಲ 55.06 ಸೆಕೆಂಡುಗಳಲ್ಲಿ ಪೂರ್ಣಗೊಳಿಸುವ ಮೂಲಕ ವಿಶ್ವ ದಾಖಲೆಯೊಂದಿಗೆ ಚಿನ್ನದ ಪದಕ ಮುಡಿಗೇರಿಸಿಕೊಂಡಿದ್ದರು. ಇದಕ್ಕೂ ಮುನ್ನ 2022 ರ ಹ್ಯಾಂಗ್‌ಝೌ ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲೂ ಇವರು ಚಿನ್ನದ ಪದಕ ಗಳಿಸಿದ್ದರು, ಕ್ರೀಡಾ ಕ್ಷೇತ್ರದಲ್ಲಿ ಇವರ ಅದ್ಭುತ ಸಾಧನೆಯನ್ನು ಗುರುತಿಸಿ ಭಾರತ ಸರ್ಕಾರ ಇವರಿಗೆ ಪ್ರತಿಷ್ಠಿತ ಅರ್ಜುನ ಪ್ರಶಸ್ತಿ ನೀಡಿ ಗೌರವಿಸಿದೆ.

ತೆಲಂಗಾಣದ ಯುವ ಕ್ರೀಡಾಪಟು, ತನ್ನ ಬೌದ್ಧಿಕ ದೌರ್ಬಲ್ಯದಿಂದ ಉಂಟಾಗುವ ಸವಾಲುಗಳನ್ನು ನಿವಾರಿಸಿಕೊಂಡು ಪ್ಯಾರಾ ಅಥ್ಲೆಟಿಕ್ಸ್ ಜಗತ್ತಿನಲ್ಲಿ ಉದಯೋನ್ಮುಖ ತಾರೆಯಾಗಿ ಹೊರಹೊಮ್ಮಿದ್ದಾರೆ. 15 ನೇ ವಯಸ್ಸಿನಲ್ಲಿ ಭಾರತೀಯ ಕ್ರೀಡಾ ಪ್ರಾಧಿಕಾರದ (SAI) ತರಬೇತುದಾರ ಎನ್ ರಮೇಶ್ ಅವರು ರಾಜ್ಯ ಮಟ್ಟದ ಅಥ್ಲೆಟಿಕ್ಸ್ ಕ್ರೀಡಾಕೂಟದಲ್ಲಿ ಇದನ್ನು ಕಂಡುಹಿಡಿದರು, ಜೀವನ್ಜಿಯವರ ಸಾಮರ್ಥ್ಯವು ಬೇಗನೆ ಗುರುತಿಸಲ್ಪಟ್ಟಿತು. ರಮೇಶ್ ಅವರನ್ನು ತಮ್ಮ ಮಾರ್ಗದರ್ಶನದಲ್ಲಿ ತೆಗೆದುಕೊಂಡರು, ಇದು ಪ್ಯಾರಾ ಅಥ್ಲೆಟಿಕ್ಸ್‌ನಲ್ಲಿ ಅವರ ಪ್ರಯಾಣದ ಆರಂಭವನ್ನು ಗುರುತಿಸಿತು.

ಕ್ರೀಡಾ ಕ್ಷೇತ್ರದಲ್ಲಿ ಸಾಧನೆಯ ಹಾದಿ

2019 ರಲ್ಲಿ ಹಾಂಗ್ ಕಾಂಗ್‌ನಲ್ಲಿ ನಡೆದ ಏಷ್ಯನ್ ಯೂತ್ ಚಾಂಪಿಯನ್‌ಶಿಪ್‌ನಲ್ಲಿ ಈಕೆ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಪದಾರ್ಪಣೆ ಮಾಡಿದರು, ಅಲ್ಲಿ ಅವರು ಕಂಚಿನ ಪದಕವನ್ನು ಗೆದ್ದರು, ಕ್ರೀಡೆಯಲ್ಲಿ ಅವರ ಭರವಸೆಯನ್ನು ಸೂಚಿಸಿದರು. ಅವರ ಬೌದ್ಧಿಕ ದೌರ್ಬಲ್ಯದಿಂದಾಗಿ ತಮ್ಮನ್ನು ತಾವು ವ್ಯಕ್ತಪಡಿಸುವಲ್ಲಿ ಅವರು ಎದುರಿಸುತ್ತಿರುವ ತೊಂದರೆಗಳ ಹೊರತಾಗಿಯೂ, ಅವರ ಯಶಸ್ಸಿನ ದೃಢಸಂಕಲ್ಪ ಎಂದಿಗೂ ಅಲುಗಾಡಲಿಲ್ಲ. ಅವರು ಕಠಿಣ ತರಬೇತಿಯನ್ನು ಮುಂದುವರೆಸಿದರು ಮತ್ತು 2019 ಮತ್ತು 2022 ರ ನಡುವೆ ಅಥ್ಲೆಟಿಕ್ಸ್ ಫೆಡರೇಶನ್ ಆಫ್ ಇಂಡಿಯಾ (AFI) ಆಯೋಜಿಸಿದ ಹಲವಾರು ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದರು.

ಅವರ ಸಮರ್ಪಣೆಗೆ ಗುವಾಹಟಿಯಲ್ಲಿ ನಡೆದ ಖೇಲೋ ಇಂಡಿಯಾ ಯೂತ್ ಗೇಮ್ಸ್ 2020 ರಲ್ಲಿ ಫಲ ಸಿಕ್ಕಿತು, ಅಲ್ಲಿ ಅವರು 100 ಮೀ ಮತ್ತು 200 ಮೀ ಎರಡರಲ್ಲೂ ಚಿನ್ನದ ಪದಕಗಳನ್ನು ಗೆದ್ದರು. ಈ ಯಶಸ್ಸಿನ ನಂತರ ರಾಷ್ಟ್ರೀಯ ಜೂನಿಯರ್ ಮತ್ತು ಯೂತ್ ಚಾಂಪಿಯನ್‌ಶಿಪ್‌ಗಳಲ್ಲಿ ಅನೇಕ ಪದಕಗಳನ್ನು ಗೆದ್ದರು, ಇದರಿಂದಾಗಿ ಅವರು ಖೇಲೋ ಇಂಡಿಯಾ ಅಥ್ಲೀಟ್ ಎಂಬ ಪ್ರಶಸ್ತಿಯನ್ನು ಗಳಿಸಿದರು.

ದೀಪ್ತಿ ಅವರ ಅತ್ಯಂತ ಗಮನಾರ್ಹ ಸಾಧನೆ 2023 ರ ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ ಬಂದಿತು, ಅಲ್ಲಿ ಅವರು ಗೇಮ್ಸ್ ದಾಖಲೆ, ಏಷ್ಯನ್ ದಾಖಲೆಯನ್ನು ಮುರಿದರು ಮತ್ತು ನಂತರ 2024 ರ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ 55.07 ಸೆಕೆಂಡುಗಳ ಸಮಯದೊಂದಿಗೆ ವಿಶ್ವ ದಾಖಲೆಯನ್ನು ಸ್ಥಾಪಿಸಿದರು. ಈ ಅಸಾಧಾರಣ ಪ್ರದರ್ಶನವು ಅವರಿಗೆ ಚಿನ್ನದ ಪದಕವನ್ನು ಗಳಿಸಿಕೊಟ್ಟಿತು, ಪ್ಯಾರಾ ಅಥ್ಲೆಟಿಕ್ಸ್‌ನಲ್ಲಿ ಉದಯೋನ್ಮುಖ ಶಕ್ತಿಯಾಗಿ ಅವರ ಸ್ಥಾನಮಾನವನ್ನು ಗಟ್ಟಿಗೊಳಿಸಿತು. ಪ್ಯಾರಿಸ್ ಪ್ಯಾರಾಲಿಂಪಿಕ್ಸ್ ಸಮಯದಲ್ಲಿ ದಾಖಲೆಯನ್ನು ಮುರಿಯಲಾಗಿದ್ದರೂ, ದೀಪ್ತಿ ಅಥ್ಲೆಟಿಕ್ಸ್ ಜಗತ್ತಿನಲ್ಲಿ ತನ್ನ ಆರೋಹಣವನ್ನು ಮುಂದುವರೆಸಿದ್ದಾರೆ ಮತ್ತು ಇನ್ನೂ ಲೆಕ್ಕಿಸಬೇಕಾದ ಶಕ್ತಿಯಾಗಿ ಉಳಿದಿದ್ದಾರೆ.

ದಸರಾ ಸಂಭ್ರಮ ನಡುವೆ ಮೈಸೂರು ರಾಯಲ್ಸ್ ತಂಡಕ್ಕೆ ಪಿಕ್ಕಲ್‌ಬಾಲ್ ಲೀಗ್ ಮೊದಲ ಟ್ರೋಫಿ ಗರಿ

Chethan Kumar — Tue, 13 Oct 2026 15:28:01 +0530

ಬೆಂಗಳೂರು (ಅ.13) : ಕರ್ನಾಟಕ ಪಿಕ್ಕಲ್‌ಬಾಲ್ ಪ್ರೀಮಿಯರ್ ಲೀಗ್ (ಕೆಪಿಪಿಎಲ್) ಮೊದಲ ಆವೃತ್ತಿಯು ರೋಚಕ ಅಂತ್ಯ ಕಂಡಿದೆ. ಅತ್ಯಂತ ರೋಮಾಂಚಕಾರಿ ಫೈನಲ್ ಪಂದ್ಯದಲ್ಲಿ ತುಮಕೂರು ಟೈಟಾನ್ಸ್ ತಂಡವನ್ನು ಮಣಿಸಿ 'ಮೈಸೂರು ರಾಯಲ್ಸ್' ತಂಡವು ಚಾಂಪಿಯನ್ ಪಟ್ಟಕ್ಕೇರಿದೆ. ಮೈಸೂರು ದಸರಾ ಹಬ್ಬದ ಸಂಭ್ರಮದಲ್ಲಿ ಮೈಸೂರು ರಾಯಲ್ಸ್ ತಂಡ ಮೊದಲ ಕೆಪಿಪಿಎಲ್ ಟ್ರೋಫಿ ಗೆದ್ದುಕೊಂಡಿದೆ.

ತುಮಕೂರು ಟೈಟಾನ್ಸ್-ಮೈಸೂರು ರಾಯಲ್ಸ್ ನಡುವೆ ಫೈನಲ್

ಬೆಂಗಳೂರಿನ ಜಿಕೆವಿಕೆ ಕ್ರೀಡಾಂಗಣದಲ್ಲಿ 3 ದಿನಗಳ ಕಾಲ ನಡೆದ ಈ ರೋಮಾಂಚಕ ಟೂರ್ನಿಯಲ್ಲಿ ರಾಜ್ಯದ ವಿವಿಧ ನಗರಗಳ ಪ್ರಮುಖ ಫ್ರ್ಯಾಂಚೈಸಿಗಳು ಪಾಲ್ಗೊಂಡಿದ್ದವು. 45 ಗಂಟೆಗಳಿಗೂ ಅಧಿಕ ಕಾಲ ನಡೆದ ಈ ಪಂದ್ಯಾವಳಿಯಲ್ಲಿ ದೇಶದ 50ಕ್ಕೂ ಹೆಚ್ಚು ಶ್ರೇಷ್ಠ ಆಟಗಾರರು ತಮ್ಮ ಚುರುಕಿನ ಆಟದ ಮೂಲಕ ಕ್ರೀಡಾಭಿಮಾನಿಗಳನ್ನು ರಂಜಿಸಿದರು. ಕೇವಲ ಒಂದು ಎಸೆತ ಬಾಕಿ ಇರುವಂತೆ ನಡೆದ ಫೈನಲ್ ಪಂದ್ಯವು ಪ್ರೇಕ್ಷಕರಲ್ಲಿ ಭಾರೀ ರೋಮಾಂಚನ ಮೂಡಿಸಿತು. ಫೈನಲ್ ಪಂದ್ಯದಲ್ಲಿ ತುಮಕೂರು ಟೈಟಾನ್ಸ್ ಹಾಗೂ ಮೈಸೂರು ರಾಯಲ್ಸ್ ನಡುವಿನ ಹೋರಾಟ ಅಭಿಮಾನಿಗಳಿಗೆ ಮನರಂಜನೆ ನೀಡಿದೆ.

ಕಳೆದ ಮೂರು ದಿನಗಳಿಂದ ಪಿಕ್ಕಲ್‌ಬಾಲ್ ಪ್ರೀಮಿಯರ್ ಲೀಗ್ ಬೆಂಗಳೂರಿನಲ್ಲಿ ಕಳೆಗಟ್ಟಿತ್ತು. ಅಪಾರ ಅಭಿಮಾನಿ ಬಳಗ ಸೃಷ್ಟಿಸಿರುವ ಪಿಕ್ಕಲ್‌ಬಾಲ್ ಇದೀಗ ದೇಶಾದ್ಯಂತ ಹೊಸ ಸಂಚಲನ ಸೃಷ್ಟಿಸಿದೆ. ಟೂರ್ನಿಯಲ್ಲಿ ಏಳು ತಂಡಗಳು ಪಾಲ್ಗೊಂಡಿತ್ತು. ಬಳ್ಳಾರಿ ಟೈಗರ್ಸ್, ಬೆಂಗಳೂರು ಚಾರ್ಜರ್ಸ್, ಮಂಗಳೂರು ರೋರರ್ಸ್, ಕೂರ್ಗ್ ಒರಿಜಿನಲ್ಸ್, ಬೆಳಗಾವಿ ಬ್ಯಾರನ್ಸ್, ತುಮಕೂರು ಟೈಟನ್ಸ್ ಮತ್ತು ಮೈಸೂರು ರಾಯಲ್ಸ್ ತಂಡ ಸಕ್ರಿಯವಾಗಿ ಪಾಲ್ಗೊಂಡಿತ್ತು.

ಸಮಾರೋಪ ಸಮಾರಂಭದಲ್ಲಿ ಕನ್ನಡದ ಖ್ಯಾತ ನಟ, ರೋರಿಂಗ್ ಸ್ಟಾರ್ ಶ್ರೀಮುರಳಿ ಅವರು ವಿಜೇತರಿಗೆ ಗೌರವ ಸಲ್ಲಿಸಿ ಪ್ರಶಸ್ತಿ ಪ್ರದಾನ ಮಾಡಿದರು. ಅತ್ಯುತ್ತಮ ಪುರುಷ ಆಟಗಾರರಾಗಿ ಅರ್ಥವ್ ನೀಮಾ, ಮಹಿಳಾ ಆಟಗಾರ್ತಿಯಾಗಿ ಆಲ್ಯಕಾ ಎಬ್ರಾಹಿಂ ಹಾಗೂ ಮೈಸೂರು ರಾಯಲ್ಸ್ ತಂಡದ ವಂಶಿಕ್ ಕಪಾಡಿಯಾ 'ಮ್ಯಾನ್ ಆಫ್ ದಿ ಟೂರ್ನಮೆಂಟ್' ಪ್ರಶಸ್ತಿ ಪಡೆದರು. ಕರ್ನಾಟಕ ರಾಜ್ಯ ಪಿಕ್ಕಲ್‌ಬಾಲ್ ಅಸೋಸಿಯೇಷನ್ ಸಹಯೋಗದಲ್ಲಿ ನಡೆದ ಈ ಲೀಗ್ ರಾಜ್ಯದಲ್ಲಿ ಹೊಸ ಕ್ರೀಡಾ ಸಂಸ್ಕೃತಿಗೆ ನಾಂದಿ ಹಾಡಿದೆ.

ಏಷ್ಯಾಡ್‌ ಚಿನ್ನ ವಿಜೇತ ಕನ್ನಡಿಗರಿಗೆ ಸರ್ಕಾರ ₹1ಕೋಟಿ! ಸರ್ಕಾರಿ ಹುದ್ದೆ ಘೋಷಣೆ

Naveen Kodase — Wed, 07 Oct 2026 09:44:48 +0530

Asian Games Medal Winners Get Big Reward From Karnataka ಬೆಂಗಳೂರು: ವಿಧಾನಸೌಧದಲ್ಲಿ ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯಿಂದ ಆಯೋಜಿಸಿದ್ದ ಸಮಾರಂಭದಲ್ಲಿ ಏಷ್ಯಾಡ್‌ ಪದಕ ವಿಜೇತ ರಾಜ್ಯದ 8 ಕ್ರೀಡಾಪಟುಗಳ ಪೈಕಿ 7 ಮಂದಿಯನ್ನು ಸನ್ಮಾನಿಸಿದ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‌ ಅವರು, ಒಟ್ಟು ₹8 ಕೋಟಿ ನಗದು ಬಹುಮಾನ ಘೋಷಿಸಿದರು. ಗಾಲ್ಫರ್‌ ಪ್ರಣವಿ ಅರಸ್‌ ಸನ್ಮಾನ ಕಾರ್ಯಕ್ರಮಕ್ಕೆ ಗೈರಾದರು.

ಈ ಹಿಂದೆ ಏಷ್ಯಾಡ್‌ ಚಿನ್ನ ವಿಜೇತರಿಗೆ ₹35 ಲಕ್ಷ, ಬೆಳ್ಳಿ ವಿಜೇತರಿಗೆ ₹25 ಹಾಗೂ ಕಂಚು ವಿಜೇತರಿಗೆ ₹15 ಲಕ್ಷ ನೀಡಲಾಗುತ್ತಿತ್ತು. ಇದೀಗ ಅದನ್ನು ಕ್ರಮವಾಗಿ ₹1 ಕೋಟಿ, ₹75 ಲಕ್ಷ ₹50 ಲಕ್ಷಕ್ಕೆ ಹೆಚ್ಚಳ ಮಾಡಲಾಗಿದೆ. ಜೊತೆಗೆ, ಏಷ್ಯಾಡ್‌ಗೆ ಆಯ್ಕೆಯಾಗಿದ್ದ 20 ಕ್ರೀಡಾಪಟುಗಳಿಗೆ ತಲಾ ₹5 ಲಕ್ಷ ಪ್ರೋತ್ಸಾಹ ಧನ ಮಂಜೂರು ಮಾಡಲಾಗಿದೆ.

ಅಲ್ಲದೆ, ಏಷ್ಯನ್ ಮತ್ತು ಕಾಮನ್‌ವೆಲ್ತ್ ಗೇಮ್ಸ್ ಪದಕ ವಿಜೇತರಿಗೆ ಗ್ರೂಪ್‌-ಬಿ ಹುದ್ದೆಗಳಿಗೆ ನೇರ ನೇಮಕಾತಿ ಮಾಡಿಕೊಳ್ಳಲು ಸರ್ಕಾರ ಅವಕಾಶ ಕಲ್ಪಿಸಿದ್ದು, ಮುಖ್ಯ ಕಾರ್ಯದರ್ಶಿ ಅಧ್ಯಕ್ಷತೆ ಆಯ್ಕೆ ಸಮಿತಿ ಮೂಲಕ ನೇಮಕಾತಿ ಮಾಡಿಕೊಳ್ಳಲಾಗುವುದು. ಸಾಧಕ ಕ್ರೀಡಾಪಟುಗಳಿಗೆ ರಾಜ್ಯ ಸರ್ಕಾರದ ನೇರ ನೇಮಕಾತಿಗಳಲ್ಲಿ ಶೇ.2 ರಷ್ಟು ಮೀಸಲಾತಿ ಜಾರಿಗೆ ತರಲಾಗಿದೆ. ಗ್ರೂಪ್‌-ಎ, ಬಿ, ಸಿ ಮತ್ತು ಡಿ ಹುದ್ದೆಗಳ ನೇರ ನೇಮಕಾತಿಯಲ್ಲಿ ಈ ಮೀಸಲಾತಿ ಅನ್ವಯವಾಗಲಿದೆ.

ಈ ಸಂದರ್ಭದಲ್ಲಿ ಉಪ ಮುಖ್ಯಮಂತ್ರಿ ಡಾ.ಜಿ.ಪರಮೇಶ್ವರ್‌, ಕರ್ನಾಟಕ ರಾಜ್ಯ ಒಲಿಂಪಿಕ್ಸ್‌ ಸಂಸ್ಥೆ ಅಧ್ಯಕ್ಷ ಡಾ. ಕೆ.ಗೋವಿಂದರಾಜು, ವಾರ್ತಾ ಇಲಾಖೆ ಆಯಕ್ತ ಅನುಚೇತ್‌ ಮತ್ತಿತರರು ಉಪಸ್ಥಿತರಿದ್ದರು.

ಯಾರ್ಯಾರಿಗೆ ಎಷ್ಟು ಮೊತ್ತ ?

ಕ್ರೀಡಾಪಟು ಕ್ರೀಡೆ ಗೆದ್ದ ಪದಕ ಸಿಕ್ಕ ನಗದು

ಶ್ರೇಯಾಂಕಾ ಕ್ರಿಕೆಟ್‌ ಚಿನ್ನ ₹1 ಕೋಟಿ

ಪೂವಮ್ಮ ಅಥ್ಲೆಟಿಕ್ಸ್‌ ಚಿನ್ನ, ಬೆಳ್ಳಿ ₹1.75 ಕೋಟಿ

ಪ್ರಣವಿ ಅರಸ್ ಗಾಲ್ಫ್‌ ಚಿನ್ನ, ಬೆಳ್ಳಿ ₹1.75 ಕೋಟಿ

ಮೋಹಿತ್‌ ಹಾಕಿ ಚಿನ್ನ ₹1 ಕೋಟಿ

ತಿಲೋತ್ತಮಾ ಶೂಟಿಂಗ್‌ ಬೆಳ್ಳಿ ₹75 ಲಕ್ಷ

ಅದಿತಿ ಅಶೋಕ್ ಗಾಲ್ಫ್‌ ಬೆಳ್ಳಿ ₹75 ಲಕ್ಷ

ಆಯುಷ್ ಶೆಟ್ಟಿ ಬ್ಯಾಡ್ಮಿಂಟನ್‌ ಕಂಚು ₹50 ಲಕ್ಷ

ಸ್ನೇಹಾ ಅಥ್ಲೆಟಿಕ್ಸ್‌ ಕಂಚು ₹50 ಲಕ್ಷ

ಭಾವನಾತ್ಮಕವಾಗಿ ಮಾತನಾಡಿದ್ದೆ

ಏಷ್ಯನ್‌ ಗೇಮ್ಸ್‌ನಲ್ಲಿ ಪದಕ ಪಡೆದ ಬಳಿಕ ತಮಗೆ ಕರೆಗಳು ಬಾರದಿರುವುದಕ್ಕೆ ಭಾವನಾತ್ಮಕವಾಗಿ ಮಾತನಾಡಿದ್ದೆ. ಆದರೆ ನನ್ನನ್ನು ಸಂಪರ್ಕಿಸಲು ಮುಖ್ಯಮಂತ್ರಿ ಸೇರಿ ಹಲವು ನಾಯಕರು ಪ್ರಯತ್ನಿಸಿದ್ದರು ಎಂಬುದು ಬಳಿಕ ತಿಳಿಯಿತು. ಅಂತಾರಾಷ್ಟ್ರೀಯ ರೋಮಿಂಗ್‌ ಸೌಲಭ್ಯ ಇಲ್ಲದಿರುವುದರಿಂದ ಹೀಗಾಗಿದೆ. ಆದರೆ ಭಾರತಕ್ಕೆ ಬಂದಿಳಿಯುತ್ತಿದ್ದಂತೆ ಸಿಎಂ, ಡಿಸಿಎಂ, ಕೇಂದ್ರ ಸಚಿವರು, ಸಂಸದರು, ಶಾಸಕರು ಸೇರಿ ಬಹಳಷ್ಟು ಗಣ್ಯರು ಅಭಿನಂದನೆ ಸಲ್ಲಿಸಿದ್ದಾರೆ. ಈ ಹಿಂದೆ ಪ್ರಧಾನಿ ಮೋದಿ ಅವರನ್ನು ಭೇಟಿ ಮಾಡಿದಾಗ ರೋಮಾಂಚನ ಉಂಟಾದಂತೆ ಈಗಲೂ ಆಯಿತು.

- ಎಂ.ಆರ್‌.ಪೂವಮ್ಮ, ಅಥ್ಲೀಟ್‌.

Asian Games; ಇತಿಹಾಸ ನಿರ್ಮಿಸಿದ ಮೈಸೂರಿನ ಚಿನ್ನದ ಹುಡುಗಿ ಪ್ರಣವಿ ಅರಸ್; ಗಾಲ್ಫ್‌ನಲ್ಲಿ ಸ್ವರ್ಣ ಗೆದ್ದ ಭಾರತದ ಮೊದಲ ಮಹಿಳೆ!

Bhimasi M Koleppanavar — Sat, 03 Oct 2026 12:03:14 +0530

ಏಷ್ಯನ್ ಕ್ರೀಡಾಕೂಟ 2026ರಲ್ಲಿ ಭಾರತದ ಕ್ರೀಡಾಪಟುಗಳು ಹೊಸ ಚರಿತ್ರೆ ಸೃಷ್ಟಿಸುವುದನ್ನು ಮುಂದುವರಿಸಿದ್ದಾರೆ. ಶನಿವಾರ ನಡೆದ ರೋಮಾಂಚಕ ಪಂದ್ಯಾವಳಿಯಲ್ಲಿ ಮೈಸೂರಿನ ಉದಯೋನ್ಮುಖ ಗಾಲ್ಫ್ ಆಟಗಾರ್ತಿ ಪ್ರಣವಿ ಶರತ್ ಅರಸ್, ಏಷ್ಯನ್ ಗೇಮ್ಸ್‌ನಲ್ಲಿ ಚಿನ್ನದ ಪದಕ ಗೆದ್ದ ಮೊದಲ ಭಾರತೀಯ ಮಹಿಳಾ ಗಾಲ್ಫ್ ಆಟಗಾರ್ತಿ ಎಂಬ ಐತಿಹಾಸಿಕ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಅಂತಿಮ ಸುತ್ತಿನಲ್ಲಿ ಅತ್ಯಂತ ಧೈರ್ಯ ಹಾಗೂ ತಾಳ್ಮೆಯ ಆಟ ಪ್ರದರ್ಶಿಸಿದ ಅವರು, ತಮ್ಮ ಹತ್ತಿರದ ಸ್ಪರ್ಧಿಗಳಿಗಿಂತ ಒಂದು ಸ್ಟ್ರೋಕ್ ಅಂತರದ ರೋಮಾಂಚಕ ಮುನ್ನಡೆ ಸಾಧಿಸಿ ಸ್ವರ್ಣ ಪದಕಕ್ಕೆ ಮುತ್ತಿಕ್ಕಿದರು. ಪ್ರಣವಿ ಅವರ ಈ ಅದ್ಭುತ ಪ್ರದರ್ಶನವು ಭಾರತಕ್ಕೆ ವೈಯಕ್ತಿಕ ಚಿನ್ನ ತಂದುಕೊಟ್ಟಿದ್ದಷ್ಟೇ ಅಲ್ಲದೆ, ಮಹಿಳಾ ತಂಡ ವಿಭಾಗದಲ್ಲಿ ಬೆಳ್ಳಿ ಪದಕ ಗೆಲ್ಲಲು ಬಹುಮುಖ್ಯ ನೆರವಾಯಿತು. ಈ ಕುರಿತು ಕಂಪ್ಲೀಟ್‌ ಸ್ಟೋರಿ ಇಲ್ಲಿದೆ.

ಅಂತಿಮ ಸುತ್ತಿನ ರೋಮಾಂಚನ ಮತ್ತು ಕಂಬ್ಯಾಕ್!

ಅಂತಿಮ ಸುತ್ತಿನ ಪಂದ್ಯವು ತೀವ್ರ ಕುತೂಹಲದಿಂದ ಕೂಡಿತ್ತು. ಪಂದ್ಯದ ಮೂರನೇ ಹೋಲ್‌ನಲ್ಲಿ ಟ್ರಿಪಲ್ ಬೋಗಿ ಅನುಭವಿಸಿದ ಪ್ರಣವಿ, ತಮ್ಮ ಮೂರು-ಸ್ಟ್ರೋಕ್‌ಗಳ ಮುನ್ನಡೆಯನ್ನು ಕಳೆದುಕೊಂಡು ಹಿನ್ನಡೆ ಅನುಭವಿಸಿದರು. ಆದರೆ, ಸವಾಲುಗಳಿಗೆದೊಡ್ಡಿದ ಪ್ರಣವಿ ಅತ್ಯಂತ ವೇಗವಾಗಿ ಚೇತರಿಸಿಕೊಂಡರು. ತಕ್ಷಣವೇ ಮೂರು ಭರ್ಜರಿ ಬರ್ಡಿಗಳನ್ನು ಬಾರಿಸುವ ಮೂಲಕ ಪಂದ್ಯದಲ್ಲಿ ಮತ್ತೆ ಹಿಡಿತ ಸಾಧಿಸಿದರು. ಅಂತಿಮ ಸುತ್ತಿನಲ್ಲಿ 70 ಅಂಕ ಗಳಿಸಿದ ಅವರು, ನಾಲ್ಕು ದಿನಗಳ ಪಂದ್ಯಾವಳಿಯಲ್ಲಿ ಒಟ್ಟು 15-ಅಂಡರ್ 265 ಅಂಕಗಳೊಂದಿಗೆ ಅಗ್ರಸ್ಥಾನ ಪಡೆದು ಚಿನ್ನದ ಪದಕಕ್ಕೆ ಭಾಜನರಾದರು. 2002ರಲ್ಲಿ ಶಿವ ಕಪೂರ್ ಪುರುಷರ ವೈಯಕ್ತಿಕ ವಿಭಾಗದಲ್ಲಿ ಚಿನ್ನ ಗೆದ್ದ ನಂತರ, ಏಷ್ಯನ್ ಗೇಮ್ಸ್ ಗಾಲ್ಫ್‌ನಲ್ಲಿ ಭಾರತಕ್ಕೆ ಸಿಕ್ಕ ಮೊದಲ ಚಿನ್ನದ ಪದಕ ಇದಾಗಿದೆ.

ಭಾರತದ ಮಹಿಳಾ ತಂಡಕ್ಕೆ ಐತಿಹಾಸಿಕ ಬೆಳ್ಳಿ ಪದಕ!

ಪ್ರಣವಿ ಅವರ ವೈಯಕ್ತಿಕ ಸಾಧನೆಯ ಜೊತೆಗೆ, ಭಾರತದ ಮಹಿಳಾ ಗಾಲ್ಫ್ ತಂಡವೂ ಬೆಳ್ಳಿ ಪದಕ ಮುಡಿಗೇರಿಸಿಕೊಂಡು ಇತಿಹಾಸ ಬರೆದಿದೆ. ಪ್ರಣವಿ ಉರ್ಸ್, ಅದಿತಿ ಅಶೋಕ್ ಮತ್ತು ದೀಕ್ಷಾ ದಾಗರ್ ಅವರನ್ನೊಳಗೊಂಡ ಭಾರತೀಯ ಮಹಿಳಾ ತಂಡವು ಒಟ್ಟು 14-ಅಂಡರ್ 546 ಅಂಕಗಳೊಂದಿಗೆ ದ್ವಿತೀಯ ಸ್ಥಾನ ಪಡೆದು ಬೆಳ್ಳಿ ಪದಕಕ್ಕೆ ತೃಪ್ತಿಪಟ್ಟುಕೊಂಡಿತು. ಅಂತಿಮ ಸುತ್ತಿನಲ್ಲಿ ಅದಿತಿ ಅಶೋಕ್ 67 ಅಂಕ ಹಾಗೂ ದೀಕ್ಷಾ ದಾಗರ್ 77 ಅಂಕ ಗಳಿಸಿ ತಂಡದ ಸ್ಕೋರ್ ಹೆಚ್ಚಿಸಲು ಕೊಡುಗೆ ನೀಡಿದರು. ಈ ವಿಭಾಗದಲ್ಲಿ ಚೀನಾ ತಂಡವು 22-ಅಂಡರ್ 538 ಅಂಕಗಳೊಂದಿಗೆ ಚಿನ್ನದ ಪದಕವನ್ನು ತನ್ನದಾಗಿಸಿಕೊಂಡಿತು.

ಯಾರೀ ಪ್ರಣವಿ ಶರತ್ ಅರಸ್?

1998ರಲ್ಲಿ ಬೆಂಗಳೂರಿನಲ್ಲಿ ಜನಿಸಿದ ಮೈಸೂರು ಮೂಲದ ಪ್ರಣವಿ ಶರತ್‌ ಅರಸ್‌, ತಮ್ಮ 5 ನೇ ವಯಸ್ಸಿನಲ್ಲಿ ಗಾಲ್ಫ್‌ ಅಂಗಳಕ್ಕೆ ಕಾಲಿಟ್ಟಿರು. ಚಿಕ್ಕ ವಯಸ್ಸಿನಲ್ಲೇ ಅದ್ಭುತ ಪ್ರತಿಭೆ ತೋರಿದ ಪ್ರಣತಿ, ಭಾರತದ ಅತ್ಯಂತ ಭರವಸೆಯ ಆಟಗಾರ್ತಿಯಾಗಿ ಹೊರಹೊಮ್ಮಿದರು. 2015ರಲ್ಲಿ 'ಲೇಡೀಸ್ ಬ್ರಿಟಿಷ್ ಅಮೆಚೂರ್ ಸ್ಟ್ರೋಕ್ ಪ್ಲೇ ಚಾಂಪಿಯನ್‌‌ಶಿಪ್' ಗೆದ್ದ ಮೊದಲ ಭಾರತೀಯ ಆಟಗಾರ್ತಿ ಎಂಬ ಸಾಧನೆ ಮಾಡಿದ್ದ ಪ್ರಣವಿ, 2016ರಲ್ಲಿ ವೃತ್ತಿಪರ ಗಾಲ್ಫ್ ಆಟಗಾರ್ತಿಯಾಗಿ ಬಡ್ತಿ ಪಡೆದರು.

ಏಷ್ಯನ್ ಗೇಮ್ಸ್ 2026ರಲ್ಲಿ ಭಾರತದ ಸುವರ್ಣ ಓಟ!

ಈ ಬಾರಿಯ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತೀಯ ಕ್ರೀಡಾಪಟುಗಳು ಸರಣಿ ಯಶಸ್ಸು ಕಾಣುತ್ತಿದ್ದಾರೆ. ಪ್ರಣವಿ ಅವರ ಗಾಲ್ಫ್ ಚಿನ್ನದ ಜೊತೆಗೆ, ಮಹಿಳಾ ಹಾಕಿಯಲ್ಲಿ ಭಾರತ ತಂಡ ಚೀನಾವನ್ನು ಮಣಿಸಿ ಚಿನ್ನ ಗೆದ್ದು, 2028ರ ಲಾಸ್ ಏಂಜಲೀಸ್ ಒಲಿಂಪಿಕ್ಸ್‌ಗೆ ನೇರ ಅರ್ಹತೆ ಪಡೆದುಕೊಂಡಿದೆ. ಅಲ್ಲದೆ, ಕುಸ್ತಿ ಹಾಗೂ ಬಾಕ್ಸಿಂಗ್‌ನಲ್ಲಿ ಸುಜೀತ್, ಪರ್ವೀನ್, ಅಂಕುಶ್ ಮತ್ತು ಲೊವ್ಲಿನಾ ಬೊರ್ಗೊಹೈನ್ ಚಿನ್ನದ ಪದಕಗಳನ್ನು ಗೆಲ್ಲುವ ಮೂಲಕ ಭಾರತದ ಕ್ರೀಡಾ ಇತಿಹಾಸದಲ್ಲಿ ಹೊಸ ಸುವರ್ಣ ಅಧ್ಯಾಯ ಬರೆದಿದ್ದಾರೆ.

ಸಾನಿಯಾ ಮಿರ್ಜಾ ಕಿವಿಯಲ್ಲಿ ಗುಟ್ಟು ಹೇಳಿದ ಮಗ ಇಝಾನ್, ತಲೆ ಚಚ್ಚಿಕೊಂಡ ಟೆನಿಸ್ ಪಟು

Chethan Kumar — Sat, 31 Oct 2026 18:45:58 +0530

ಹೈದರಾಬಾದ್ (ಅ.31) ಟೆನಿಸ್ ಪಟು ಸಾನಿಯಾ ಮಿರ್ಜಾ ಸೋಶಿಯಲ್ ಮೀಡಿಯಾಗಳಲ್ಲಿ ತಮ್ಮ ವೈಯುಕ್ತಿಕ ವಿಚಾರ, ಪ್ರೊಫೆಶನಲ್ ಲೈಫ್ ಕುರಿತ ಮಾಹಿತಿ ಹಂಚಿಕೊಳ್ಳುತ್ತಾರೆ. ಇದೀಗ ಮಗ ಹೇಳಿದ ಗುಟ್ಟೊಂದನ್ನು ಬಹಿರಂಗಪಡಿಸಿದ್ದಾರೆ. ಮಗ ಕಿವಿಯಲ್ಲಿ ಹೇಳಿದ ಗುಟ್ಟು ಕೇಳಿ ಸಾನಿಯಾ ಮಿರ್ಜಾ ತಲೆ ಚಚ್ಚಿಕೊಂಡಿದ್ದಾರೆ. ಸೀಕ್ರೆಟ್ ಒಂದನ್ನು ಹೇಳುತ್ತೇನೆ ಎಂದು ಸಾನಿಯಾ ಕಿವಿಯಲ್ಲಿ ಏನನ್ನೋ ಹೇಳಿದ್ದಾನೆ. ಆದರೆ ಈ ಗುಟ್ಟು ಕೇಳಿಸಿಕೊಂಡ ಸಾನಿಯಾ ತಲೆನೋವು ಹೆಚ್ಚಾಗಿದೆ. ಇದೇ ವೇಳೆ ಮಗನ ಗುಟ್ಟಿನ ರಹಸ್ಯವನ್ನು ಸಾನಿಯಾ ಬಹಿರಂಗಪಡಿಸಿದ್ದಾರೆ.

ಸಾನಿಯಾ ಮಿರ್ಜಾ ಮಗನ ಗುಟ್ಟು ರಟ್ಟು

ಮಗನ ಜೊತೆ ಕಾಲ ಕಳೆಯುತ್ತಿರುವ ವಿಡಿಯೋ ಒಂದನ್ನು ಸಾನಿಯಾ ಮಿರ್ಜಾ ಹಂಚಿಕೊಂಡಿದ್ದಾರೆ. ಈ ವಿಡಿಯೋದಲ್ಲಿ ಸಾನಿಯಾ ಮಿರ್ಜಾ ತನ್ನ ಪುತ್ರ ಹೇಳುವ ಗುಟ್ಟಿನ ರಹಸ್ಯ ಬಿಚ್ಚಿಟ್ಟಿದ್ದಾರೆ. ನನ್ನ ಮಗ ಹೇಳುವ ಸೀಕ್ರೆಟ್ ಎಂದಿರುವ ಸಾನಿಯಾ ಮಿರ್ಜಾ, ಆತ ಕಿವಿಯಲ್ಲಿ ಹೇಳುವಾಗ ಅದರಲ್ಲಿ ಶೇಕಡಾ 50ರಷ್ಟು ಗಾಳಿ ಇರುತ್ತೆ. ಇನ್ನು ಶೇಕಡಾ 49ರಷ್ಟು ಎಂಜಲು ಕಿವಿಗೆ ಬಂದಿರುತ್ತೆ. ಸೀಕ್ರೆಟ್ ಮಾಹಿತಿ ಕೇವಲ ಒಂದು ಪರ್ಸೆಂಟ್ ಮಾತ್ರ ಎಂದು ಸಾನಿಯಾ ಮಿರ್ಜಾ ಹೇಳಿದ್ದಾರೆ.

ತಮಗೂ ಅನುಭವವಾಗಿದೆ ಎಂದ ಪೋಷಕರು

ಸಾನಿಯಾ ಮಿರ್ಜಾ ಹಾಗೂ ಮಗನ ಪ್ರೀತಿಯ ವಿಡಿಯೋ ಭಾರಿ ಸದ್ದು ಮಾಡುತ್ತಿದೆ. ಈ ವಿಡಿಯೋಗೆ ಹಲವರು ಪ್ರತಿಕ್ರಿಯಿಸಿದ್ದಾರೆ. ಪ್ರಮುಖವಾಗಿ ಪೋಷಕರು ಈ ಕುರಿತು ಪ್ರತಿಕ್ರಿಯಿಸಿದ್ದಾರೆ. ಸಾನಿಯಾ ಮಿರ್ಜಾ ಹೇಳಿದ್ದು ಸತ್ಯ. ಮಕ್ಕಳು ಗುಟ್ಟು ಹೇಳುವಾಗ ಈ ಅನುಭವವಾಗಿದೆ ಎಂದಿದ್ದಾರೆ. ಇದೇ ವೇಳೆ ಹಲವರು ಕಿವಿಮಾತುಗಳನ್ನು ಹೇಳಿದ್ದಾರೆ. ಮಕ್ಕಳು ಗುಟ್ಟು ಹೇಳಲು ಬರುವಾಗ ನಿರಾಸೆ ಮಾಡಬೇಡಿ, ಅವರ ಗುಟ್ಟನ್ನು ಆಲಿಸಿ. ಇದರಿಂದ ಮಕ್ಕಳು ಖುಷಿಯಾಗುತ್ತಾರೆ. ಈ ರೀತಿಯ ಪ್ರೀತಿಯ ಮಾತುಕತೆ, ಆಟಗಳು ಸಂಬಂಧಕ್ಕೆ ಮೌಲ್ಯ ನೀಡುತ್ತದೆ. ಜೊತೆಗೆ ಸಂಬಂಧವನ್ನು ಗಟ್ಟಿಗೊಳಿಸುತ್ತದೆ ಎಂದಿದ್ದಾರೆ. ಈ ತಾಯಂದಿರ ಅನುಭವದ ಮುದ್ದಾದ ವೀಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ವೈರಲ್ ಆಗಿದೆ.

ಭೂಮಿ ದಾನ ಕುರಿತು ಸಾನಿಯಾ ತಂದ ಸ್ಪಷ್ಟನೆ

ಇತ್ತೀಚೆಗೆ ಸಾನಿಯಾ ಮಿರ್ಜಾ ಮಸೀದಿ ನಿರ್ಮಾಣಕ್ಕಾಗಿ ಭೂಮಿ ದಾನ ಮಾಡಿದ್ದಾರೆ ಅನ್ನೋ ಮಾಹಿತಿ ಹರಿದಾಡಿತ್ತು. ಆದರೆ ಇದು ಸತ್ಯಕ್ಕೆ ದೂರವಾಗಿದೆ ಎಂದು ಸಾನಿಯಾ ಮಿರ್ಜಾ ತಂದೆ ಸ್ಪಷ್ಟಡಿಸಿದ್ದಾರೆ. ಹೈದರಾಬಾದ್‌ನಲ್ಲಿರುವ ಸಾನಿಯಾ ಮಿರ್ಜಾ ಟೆನಿಸ್ ಅಕಾಡೆಮಿ ಜಾಗದಲ್ಲಿ ಮಸೀದಿ ನಿರ್ಮಾಣಕ್ಕಾಗಿ ಭೂಮಿ ದಾನ ಮಾಡಿದ್ದಾರೆ ಎಂಬ ವದಂತಿ ಎಲ್ಲೆಡೆ ಹರಿದಾಡಿತ್ತು. ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಸಾನಿಯಾ ಅವರ ತಂದೆ ಇಮ್ರಾನ್ ಮಿರ್ಜಾ, ಈ ವರದಿಗಳು ಆಧಾರರಹಿತ ಎಂದಿದ್ದಾರೆ.

ಅಲ್ಲದೆ, ಭಾರತದ ಮಾಜಿ ಕ್ರಿಕೆಟ್ ನಾಯಕ ಮೊಹಮ್ಮದ್ ಅಜರುದ್ದೀನ್ ಅವರೊಂದಿಗೆ ಸಾನಿಯಾ ಇರುವಂತೆ ವೈರಲ್ ಆಗಿರುವ ಫೋಟೋ ಸಂಪೂರ್ಣವಾಗಿ ಎಐ (AI Generated) ಮೂಲಕ ಸೃಷ್ಟಿಸಿರುವ ನಕಲಿ ಚಿತ್ರವಾಗಿದೆ ಎಂದು ಇಮ್ರಾನ್ ಮಿರ್ಜಾ ತಿಳಿಸಿದ್ದಾರೆ. ಸಾನಿಯಾ ತಮ್ಮ ಖಾಸಗಿ ಮತ್ತು ಸಮಾಜಸೇವೆಯನ್ನು ಪ್ರಚಾರಕ್ಕೋಸ್ಕರ ಬಳಸಿಕೊಳ್ಳುವುದಿಲ್ಲ, ಅಧಿಕೃತವಲ್ಲದ ವದಂತಿಗಳನ್ನು ನಂಬಬೇಡಿ ಎಂದು ಮನವಿ ಮಾಡಿದ್ದು, ಸಾನಿಯಾ ಕೂಡ ಈ ಸ್ಪಷ್ಟನೆಯನ್ನು ತಮ್ಮ ಇನ್‌ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಹಂಚಿಕೊಂಡಿದ್ದಾರೆ.

ಏಷ್ಯನ್ ಗೇಮ್ಸ್: ಹಾಕಿ, ಕ್ರಿಕೆಟ್‌ನಲ್ಲಿ ಭಾರತ ಫೈನಲ್‌ಗೆ ಲಗ್ಗೆ, ಚಿನ್ನದ ಪದಕ ಮುಂದಿನ ಟಾರ್ಗೆಟ್!

Kannadaprabha News — Fri, 02 Oct 2026 11:30:49 +0530

ನಗೋಯಾ: ಈ ಬಾರಿ ಏಷ್ಯನ್‌ ಗೇಮ್ಸ್‌ನಲ್ಲಿ ಭಾರತ ಪುರುಷರ ತಂಡಗಳು ಹಾಕಿ ಹಾಗೂ ಕ್ರಿಕೆಟ್‌ನಲ್ಲಿ ಫೈನಲ್‌ ಪ್ರವೇಶಿಸಿವೆ. ಈ ಮೂಲಕ ದೇಶಕ್ಕೆ ಮತ್ತೆರಡು ಚಿನ್ನದ ಪದಕಗಳ ನಿರೀಕ್ಷೆ ಮೂಡಿವೆ. ಉಳಿದಂತೆ ಗುರುವಾರ ಭಾರತ ಸೇಲಿಂಗ್‌, ಕುಸ್ತಿ, ಸ್ಕ್ವಾಶ್‌ ಮತ್ತು ಆರ್ಚರಿಯಲ್ಲಿ ಭಾರತ ಪದಕ ಸಾಧನೆ ಮಾಡಿದ್ದು, ಪದಕ ಗಳಿಕೆ 64ಕ್ಕೆ ಏರಿಕೆಯಾಗಿದೆ.

ಹಾಕಿ ಸೆಮಿಫೈನಲ್‌ನಲ್ಲಿ ಭಾರತ ತಂಡ ಪಾಕಿಸ್ತಾನ ವಿರುದ್ಧ ಕೊನೆ ಕ್ಷಣದ ಮ್ಯಾಜಿಕ್‌ನಿಂದಾಗಿ 4-3 ಗೋಲುಗಳಿಂದ ರೋಚಕ ಗೆಲುವು ಸಾಧಿಸಿತು. 5 ಮತ್ತು 13ನೇ ನಿಮಿಷದಲ್ಲಿ ನಾಯಕ ಹರ್ಮನ್‌ಪ್ರೀತ್‌ ಸಿಂಗ್‌ ಪೆನಾಲ್ಟಿ ಕಾರ್ನರ್‌ಗಳನ್ನು ಗೋಲಾಗಿ ಪರಿವರ್ತಿಸಿದರು. ಸುಖ್‌ಜೀತ್‌ 23ನೇ ನಿಮಿಷದಲ್ಲಿ ಬಾರಿಸಿದ ಗೋಲಿನಿಂದಾಗಿ 3-0 ಮುನ್ನಡೆ ಪಡೆಯಿತು.

ಬಳಿಕ ಪಾಕ್‌ ತಿರುಗೇಟು ನೀಡಿತು. ಅಬು ಮಹ್ಮೂದ್‌(30ನೇ ನಿಮಿಷ), ಹನ್ನಾನ್‌ ಶಾಹಿದ್(45) ಹಾಗೂ ವಹೀದ್‌ ರಾಣಾ(49) ಗೋಲು ಬಾರಿಸಿ ಪಂದ್ಯವನ್ನು ಮತ್ತಷ್ಟು ರೋಚಕಗೊಳಿಸಿದರು. ಇನ್ನೇನು ಪಂದ್ಯ ಪೆನಾಲ್ಟಿ ಶೂಟೌಟ್‌ಗೆ ಹೋಗಲಿದೆ ಎನ್ನುವಷ್ಟರಲ್ಲಿ 60ನೇ ನಿಮಿಷದಲ್ಲಿ ಅಭಿಷೇಕ್‌ ಗೆಲುವಿನ ಗೋಲು ಬಾರಿಸಿದರು. ಕೊನೆ 45 ಸೆಕೆಂಡ್‌ಗಳಿರುವ ಅಭಿಷೇಕ್‌ ಬಾರಿಸಿದ ಚೆಂಡು ಪಾಕ್‌ ಡಿಫೆಂಡರ್‌ ಸುಫ್ಯಾನ್‌ ಕಾಲಿಗೆ ತಾಗಿ ಗೋಲು ಪೆಟ್ಟಿಗೆ ಸೇರಿತು. ಇದರೊಂದಿಗೆ ಭಾರತ ಗೆಲುವಿನೊಂದಿಗೆ ಸಂಭ್ರಮಿಸಿತು.

ನಾಳೆ ಮಲೇಷ್ಯಾ ವಿರುದ್ಧ ಫೈನಲ್

ಏಷ್ಯಾಡ್‌ನ ಹಾಲಿ ಹಾಗೂ ಒಟ್ಟಾರೆ 4 ಬಾರಿ ಚಾಂಪಿಯನ್‌ ಭಾರತ ತಂಡ ಈ ಬಾರಿ ಫೈನಲ್‌ನಲ್ಲಿ ಶನಿವಾರ ಮಲೇಷ್ಯಾ ವಿರುದ್ಧ ಸೆಣಸಾಡಲಿದೆ. ಮಲೇಷ್ಯಾ ಸೆಮೀಸ್‌ನಲ್ಲಿ ದಕ್ಷಿಣ ಕೊರಿಯಾ ವಿರುದ್ಧ ಗೆದ್ದು ಫೈನಲ್‌ಗೇರಿದೆ. ಮಲೇಷ್ಯಾ 2010, 2018ರಲ್ಲಿ ಬೆಳ್ಳಿ ಗೆದ್ದಿತ್ತು.

ಭಾರತ-ಪಾಕ್‌ ಆಟಗಾರರ ಹಸ್ತಲಾಘವ, ಆಲಿಂಗನ

ಹಾಕಿ ಸೆಮಿಫೈನಲ್‌ ಬಳಿಕ ಭಾರತ ಹಾಗೂ ಪಾಕಿಸ್ತಾನ ತಂಡದ ಆಟಗಾರರು ಪರಸ್ಪರ ಹಸ್ತಲಾಘವ ಮಾಡಿದರು. ಕೆಲ ಆಟಗಾರರು ಆಲಂಗಿಸಿ, ಅಭಿನಂದನೆಯನ್ನೂ ಸಲ್ಲಿಸಿದರು. ಭಾರತದ ಕ್ರಿಕೆಟಿಗರು ಪಾಕ್‌ ಆಟಗಾರರ ಜೊತೆ ಹಸ್ತಲಾಘವ ಮಾಡಲು ನಿರಾಕರಿಸುತ್ತಿರುವ ನಡುವೆಯೇ, ಹಾಕಿ ಹಾಗೂ ಇತರ ಕ್ರೀಡೆಗಳ ಸ್ಪರ್ಧಿಗಳು ಹಸ್ತಲಾಘವ, ಆಲಿಂಗನದ ಮೂಲಕ ಗಮನ ಸೆಳೆಯುತ್ತಿದ್ದಾರೆ.

ವನಿತಾ ಹಾಕಿ ಫೈನಲ್‌ನಲ್ಲಿ ಇಂದು ಭಾರತ vs ಚೀನಾ

ಕಕಮಿಗಹರ: ಏಷ್ಯಾಡ್‌ ಮಹಿಳಾ ಹಾಕಿ ಫೈನಲ್‌ ಶುಕ್ರವಾರ ನಡೆಯಲಿದ್ದು, ಭಾರತ ತಂಡ ಚೀನಾ ವಿರುದ್ಧ ಸೆಣಸಾಡಲಿದೆ. ಈ ಮೂಲಕ ಬರೋಬ್ಬರಿ 44 ವರ್ಷಗಳ ಬಳಿಕ ಭಾರತ ಚಿನ್ನ ಗೆಲ್ಲುವ ನಿರೀಕ್ಷೆಯಲ್ಲಿದೆ.

ಹಾಲಿ ಚಾಂಪಿಯನ್‌ ಚೀನಾ ವಿಶ್ವ ರ್‍ಯಾಂಕಿಂಗ್‌ನಲ್ಲಿ 4ನೇ, ಭಾರತ 8ನೇ ಸ್ಥಾನದಲ್ಲಿದೆ. ಆದರೆ ಇತ್ತೀಚೆಗೆ ವಿಶ್ವಕಪ್‌ನಲ್ಲಿ ಚೀನಾ ವಿರುದ್ಧ 2-2 ಡ್ರಾ ಸಾಧಿಸಿದ್ದ ಭಾರತ, ಈಗ ಫೈನಲ್‌ನಲ್ಲಿ ಇನ್ನಷ್ಟು ಸುಧಾರಿತ ಆಟವಾಡುವ ವಿಶ್ವಾಸದಲ್ಲಿದೆ. ಭಾರತ ಏಷ್ಯಾಡ್‌ನಲ್ಲಿ ಏಕೈಕ ಚಿನ್ನ ಗೆದ್ದಿದೆ. ಮೊದಲ ಬಾರಿ ಮಹಿಳಾ ಹಾಕಿ ಆಡಿಸಿದ್ದ 1982ರಲ್ಲಿ ಭಾರತ ಚಾಂಪಿಯನ್‌ ಆಗಿತ್ತು. ಆ ಬಳಿಕ 1998, 2018ರಲ್ಲಿ ಫೈನಲ್‌ಗೇರಿದ್ದರೂ ಬೆಳ್ಳಿಗೆ ತೃಪ್ತಿಪಟ್ಟುಕೊಂಡಿತ್ತು. ಇನ್ನು, 5ನೇ ಬಾರಿ ಚಿನ್ನ ಗೆಲ್ಲುವ ನಿರೀಕ್ಷೆಯಲ್ಲಿದೆ.

Asian Games 2026: ಏಷ್ಯನ್ ಗೇಮ್ಸ್‌ನಲ್ಲಿ ಚಿನ್ನದ ಬೇಟೆ: ಪದಕ ಪಟ್ಟಿಯಲ್ಲಿ ಭಾರತಕ್ಕೆ ಐದನೇ ಸ್ಥಾನ

Naveen Kodase — Fri, 02 Oct 2026 17:07:29 +0530

ಐಚಿ-ನಗೋಯಾ (ಜಪಾನ್): ಏಷ್ಯನ್ ಗೇಮ್ಸ್‌ನ 13ನೇ ದಿನವೂ ಭಾರತದ ಕ್ರೀಡಾಪಟುಗಳು ಅಬ್ಬರಿಸಿದ್ದಾರೆ. ಮಹಿಳೆಯರ ಬಾಕ್ಸಿಂಗ್, ಆರ್ಚರಿ, ಪುರುಷರ ಕುಸ್ತಿ ಹಾಗೂ ಬಾಕ್ಸಿಂಗ್‌ನಲ್ಲಿ ಒಟ್ಟು ನಾಲ್ಕು ಚಿನ್ನ ಗೆದ್ದಿರುವ ಭಾರತ, ತನ್ನ ಒಟ್ಟು ಚಿನ್ನದ ಪದಕಗಳ ಸಂಖ್ಯೆಯನ್ನು 15ಕ್ಕೆ ಏರಿಸಿಕೊಂಡಿದೆ. ಇದರೊಂದಿಗೆ ಪದಕ ಪಟ್ಟಿಯಲ್ಲಿ 5ನೇ ಸ್ಥಾನಕ್ಕೆ ಜಿಗಿದಿದೆ. ಸದ್ಯ ಭಾರತದ ಖಾತೆಯಲ್ಲಿ 75 ಪದಕಗಳಿವೆ (15 ಚಿನ್ನ, 25 ಬೆಳ್ಳಿ, 35 ಕಂಚು).

ಪರ್ವೀನ್ ಹೂಡಾ ಮುಡಿಗೆ ಚಿನ್ನದ ಪದಕ

ಮಹಿಳೆಯರ 65 ಕೆಜಿ ವಿಭಾಗದ ಬಾಕ್ಸಿಂಗ್ ಫೈನಲ್‌ನಲ್ಲಿ ಪರ್ವೀನ್ ಹೂಡಾ ಅವರು ಚೈನೀಸ್ ತೈಪೆಯ ಚೆನ್ ನಿಯೆನ್-ಚಿನ್ ಅವರನ್ನು ಸೋಲಿಸಿ 13ನೇ ಚಿನ್ನ ಗೆದ್ದರು. ಪ್ಯಾರಿಸ್ ಒಲಿಂಪಿಕ್ಸ್‌ನಲ್ಲಿ ಕಂಚು ಗೆದ್ದಿದ್ದ ಚೆನ್ ನಿಯೆನ್-ಚಿನ್ ಅವರನ್ನು ಪರ್ವೀನ್ ಮಣಿಸಿದ್ದು ವಿಶೇಷ. ಒಂದೇ ಏಷ್ಯನ್ ಗೇಮ್ಸ್‌ನಲ್ಲಿ ಇಬ್ಬರು ಭಾರತೀಯ ಮಹಿಳಾ ಬಾಕ್ಸರ್‌ಗಳು ಚಿನ್ನ ಗೆದ್ದಿರುವುದು ಇತಿಹಾಸದಲ್ಲೇ ಮೊದಲು. ಇದಕ್ಕೂ ಮುನ್ನ 75 ಕೆಜಿ ವಿಭಾಗದಲ್ಲಿ ಲವ್ಲಿನಾ ಬೊರ್ಗೊಹೈನ್ ಅವರು ಚೀನಾದ ಬಾವೊ ಜಿಯೆ ಅವರನ್ನು 5-0 ಅಂತರದಿಂದ ಮಣಿಸಿ 12ನೇ ಚಿನ್ನ ಗೆದ್ದಿದ್ದರು. ದಿಗ್ಗಜ ಬಾಕ್ಸರ್ ಎಂ.ಸಿ. ಮೇರಿ ಕೋಮ್ ಬಳಿಕ ಏಷ್ಯನ್ ಗೇಮ್ಸ್‌ನಲ್ಲಿ ಚಿನ್ನ ಗೆದ್ದ ಎರಡನೇ ಭಾರತೀಯ ಮಹಿಳಾ ಬಾಕ್ಸರ್ ಎಂಬ ಹೆಗ್ಗಳಿಕೆಗೆ ಲವ್ಲಿನಾ ಪಾತ್ರರಾಗಿದ್ದಾರೆ.

ಫ್ರೀಸ್ಟೈಲ್ ಕುಸ್ತಿಯಲ್ಲಿ ಸುಜೀತ್ ಕಲ್ಕಲ್‌ಗೆ ಒಲಿದ ಚಿನ್ನ

ಪುರುಷರ 65 ಕೆಜಿ ಫ್ರೀಸ್ಟೈಲ್ ಕುಸ್ತಿಯಲ್ಲಿ ಭಾರತದ ಸುಜೀತ್ ಕಲ್ಕಲ್ ಚಿನ್ನದ ಪದಕಕ್ಕೆ ಮುತ್ತಿಟ್ಟಿದ್ದಾರೆ. ತಜಕಿಸ್ತಾನದ ಅಬ್ದುಲ್ಮಝಿದ್ ಕುದಿಯೆವ್ ಅವರನ್ನು 10-9 ಅಂತರದಿಂದ ಸುಜೀತ್ ರೋಚಕವಾಗಿ ಸೋಲಿಸಿದರು. ಇತ್ತ ಪುರುಷರ 80 ಕೆಜಿ ವಿಭಾಗದ ಬಾಕ್ಸಿಂಗ್‌ನಲ್ಲಿ ಕೊರಿಯಾದ ಮಿನ್ಸಿಯೊಂಗ್ ಅವರನ್ನು ಮಣಿಸಿದ ಅಂಕುಶ್, ಭಾರತಕ್ಕೆ 15ನೇ ಚಿನ್ನ ತಂದುಕೊಟ್ಟರು.

ಮಹಿಳೆಯರ ರಿಕರ್ವ್ ಆರ್ಚರಿ ಟೀಮ್ ಇವೆಂಟ್‌ನಲ್ಲಿ ಅಂಕಿತಾ ಭಗತ್, ಕೀರ್ತಿ ಮತ್ತು ಕುಂಕುಮ್ ಮೊಹೋದ್ ಅವರನ್ನೊಳಗೊಂಡ ಭಾರತ ತಂಡ, ಒಲಿಂಪಿಕ್ ಚಾಂಪಿಯನ್ ದಕ್ಷಿಣ ಕೊರಿಯಾವನ್ನು ಮಣಿಸಿ ಇತಿಹಾಸದಲ್ಲೇ ಮೊದಲ ಬಾರಿಗೆ ಚಿನ್ನ ಗೆದ್ದಿದೆ. ಇನ್ನೊಂದೆಡೆ, ಪುರುಷರ ರಿಕರ್ವ್ ತಂಡ ಮತ್ತು ರಿಕರ್ವ್ ಮಿಕ್ಸೆಡ್ ತಂಡ ಬೆಳ್ಳಿ ಪದಕಗಳಿಗೆ ತೃಪ್ತಿಪಟ್ಟಿವೆ. ಪುರುಷರ ಸೆಪಾಕ್‌ಟಾಕ್ರೊ ಕ್ವಾಡ್ರಂಟ್ ಟೀಮ್ ಇವೆಂಟ್‌ನಲ್ಲಿ ಭಾರತ ಕಂಚಿನ ಪದಕ ಗೆದ್ದಿದೆ. ಮಹಿಳಾ ಹಾಕಿ ಫೈನಲ್‌ನಲ್ಲಿ ಭಾರತ ತಂಡ ಬಲಿಷ್ಠ ಚೀನಾ ವಿರುದ್ಧ ಸೆಣಸಲಿದೆ. ಪದಕಗಳ ಬೇಟೆ ಹೀಗೆಯೇ ಮುಂದುವರಿದರೆ ಭಾರತ ಇನ್ನಷ್ಟು ಚಿನ್ನದ ಪದಕಗಳನ್ನು ತನ್ನದಾಗಿಸಿಕೊಳ್ಳುವ ವಿಶ್ವಾಸದಲ್ಲಿದೆ.

ಟೆನಿಸ್‌ ಟ್ರೇನಿಂಗ್‌ ಸೆಂಟರ್‌ಗಾಗಿ ಮೀಸಲಿಟ್ಟ ಜಾಗವನ್ನು ಮಸೀದಿ ಕಟ್ಟಲು ನೀಡಿದ್ರಾ ಸಾನಿಯಾ ಮಿರ್ಜಾ? ಅಜರುದ್ದೀನ್‌ ಶಂಕುಸ್ಥಾಪನೆ ಮಾಡಿದ್ದು ನಿಜವೇ?

Santosh Naik — Thu, 29 Oct 2026 15:24:28 +0530

ಹೈದರಾಬಾದ್ (ಅ.28): ಭಾರತೀಯ ಟೆನಿಸ್ ರಂಗದ ಪೋಸ್ಟರ್ ಗರ್ಲ್, 6 ಗ್ರ್ಯಾಂಡ್ ಸ್ಲ್ಯಾಮ್‌ಗಳ ಒಡತಿ ಸಾನಿಯಾ ಮಿರ್ಜಾ (Sania Mirza) ವೃತ್ತಿಪರ ಟೆನಿಸ್‌ನಿಂದ ನಿವೃತ್ತರಾಗಿದ್ದರೂ, ಸದಾ ಒಂದಲ್ಲ ಒಂದು ವಿಷಯಕ್ಕೆ ಸುದ್ದಿಯಲ್ಲಿರುತ್ತಾರೆ. ಇದೀಗ ಹೈದರಾಬಾದ್‌ ಟೆನಿಸ್ ಸುಂದರಿ ಮತ್ತೊಂದು ಪ್ರಮುಖ ವಿಚಾರದಿಂದಾಗಿ ಹೈಲೈಟ್‌ ಆಗಿದ್ದಾರೆ.. ಸಾನಿಯಾ ಕೈಗೊಂಡಿರುವ ನೂತನ ಕಾರ್ಯ ಒಂದೆಡೆ ಅವರ ಧರ್ಮನಿಷ್ಠೆಗೆ ಮೆಚ್ಚುಗೆ ತಂದಿದ್ದರೆ, ಇನ್ನೊಂದೆಡೆ ತೀವ್ರ ಟೀಕೆ ಹಾಗೂ ವಿವಾದಕ್ಕೂ ಗುರಿಯಾಗಿದೆ. ಹೈದರಾಬಾದ್‌ನಲ್ಲಿ ತಮಗೆ ಸೇರಿದ ಜಾಗದಲ್ಲಿ ಸ್ವಂತ ಖರ್ಚಿನಲ್ಲಿ ಬೃಹತ್ ಮಸೀದಿಯೊಂದನ್ನು (Mosque Construction) ನಿರ್ಮಿಸಲು ಸಾನಿಯಾ ಮುಂದಾಗಿದ್ದಾರೆ ಎನ್ನುವ ಸುದ್ದಿಯೇ ಚರ್ಚೆಗೆ ಕಾರಣವಾಗಿದೆ. ಆದರೆ, ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿರುವ ಫೋಟೋದ ಹಿಂದಿನ ಸತ್ಯವೇ ಬೇರೆ ಇದೆ.

ಸ್ಪಷ್ಟನೆ: ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿರುವ ಸುದ್ದಿಗೆ ಪ್ರತಿಕ್ರಿಯೆ ನೀಡಿರುವ ಸಾನಿಯಾ ಮಿರ್ಜಾ ತಂದೆ ಇಮ್ರಾನ್‌ ಮಿರ್ನಾ, ಮಸೀದಿ ನಿರ್ಮಾಣಕ್ಕೆ ಸಾನಿಯಾ ಮಿರ್ಜಾ ತಮ್ಮ ಸ್ಥಳವನ್ನು ನೀಡಿದ್ದಾರೆ ಅನ್ನೋದು ಸುಳ್ಳು ಸುದ್ದಿ. ಇನ್ನು ಅಜರುದ್ದೀನ್‌ ಶಂಕುಸ್ಥಾಪನೆ ನೆರವೇರಿಸಿದ್ದಾರೆ ಅನ್ನೋದು ಎಐ ಚಿತ್ರ ಎಂದು ಹೇಳಿದ್ದಾರೆ.ಸೋಶಿಯಲ್‌ ಮೀಡಿಯಾದಲ್ಲಿ ಈ ವಿಚಾರ ಕೆಲ ದಿನಗಳಿಂದ ವೈರಲ್‌ ಆಗುತ್ತಿರುವ ಹಿನ್ನಲೆಯಲ್ಲಿ ಸ್ಪಷ್ಟನೆ ನೀಡುತ್ತಿದ್ದೇನೆ ಎಂದಿದ್ದಾರೆ.

ಭಾಗ್ಯನಗರ ಹೈದರಾಬಾದ್‌ನಲ್ಲಿ ಸಾನಿಯಾ ಮಿರ್ಜಾ ಅವರಿಗೆ ಹಲವು ಸ್ಥಿರಾಸ್ತಿಗಳಿವೆ. ನಗರದ ಹೃದಯಭಾಗದಲ್ಲಿ ಸಾನಿಯಾ ಒಡೆತನದ ಶಾಪಿಂಗ್ ಸೆಂಟರ್ ಒಂದಿದ್ದು, ಅದರ ಪಕ್ಕದಲ್ಲೇ ಅವರಿಗೆ ಸೇರಿದ ಖಾಲಿ ನಿವೇಶನವೂ ಇದೆ. ಮೂಲತಃ ಈ ಜಾಗದಲ್ಲಿ ಅತ್ಯಾಧುನಿಕ ಟೆನಿಸ್ ತರಬೇತಿ ಕೇಂದ್ರವನ್ನು (Tennis Training Academy) ತೆರೆಯಲು ಸಾನಿಯಾ ಯೋಜನೆ ರೂಪಿಸಿದ್ದರು. ಆದರೆ ನಾನಾ ರೀತಿಯ ತಾಂತ್ರಿಕ ಹಾಗೂ ಆಡಳಿತಾತ್ಮಕ ತೊಡಕುಗಳಿಂದಾಗಿ ಅಕಾಡೆಮಿ ನಿರ್ಮಿಸಲು ಅವರಿಗೆ ಸಾಧ್ಯವಾಗಿರಲಿಲ್ಲ. ಇದೀಗ ಅದೇ ಖಾಲಿ ಜಾಗವನ್ನು ಸಾನಿಯಾ ಮಸೀದಿ ನಿರ್ಮಾಣಕ್ಕಾಗಿ ದಾನ ಮಾಡಿದ್ದು, ಕಟ್ಟಡ ನಿರ್ಮಾಣದ ಸಂಪೂರ್ಣ ವೆಚ್ಚವನ್ನೂ ತಾವೇ ಭರಿಸುವುದಾಗಿ ಪ್ರಕಟಿಸಿದ್ದಾರೆ ಎಂದು ಸೋಶಿಯಲ್‌ ಮೀಡಿಯಾ ವರದಿಗಳು ಬಂದಿದ್ದವು.

ಅಜರುದ್ದೀನ್ ಅವರಿಂದ ಶಂಕುಸ್ಥಾಪನೆ?

ಇತ್ತೀಚೆಗೆ ಭಾರತೀಯ ಕ್ರಿಕೆಟ್ ತಂಡದ ಮಾಜಿ ನಾಯಕ ಹಾಗೂ ಪ್ರಸ್ತುತ ತೆಲಂಗಾಣ ಕಾಂಗ್ರೆಸ್ ಸರ್ಕಾರದ ಸಚಿವರಾಗಿರುವ 'ಮೊಹಮ್ಮದ್ ಅಜರುದ್ದೀನ್' (Mohammad Azharuddin) ಅವರು ಈ ನೂತನ ಮಸೀದಿಯ ಶಂಕುಸ್ಥಾಪನೆಯನ್ನು (Foundation Stone) ನೆರವೇರಿಸಿದ್ದಾರೆ ಎಂದೂ ತಿಳಿಸಲಾಗಿತ್ತು. ಸಾನಿಯಾ ಮಿರ್ಜಾ ಅವರೊಂದಿಗೆ ಸುದೀರ್ಘ ಒಡನಾಟ ಹಾಗೂ ಆಪ್ತತೆ ಹೊಂದಿರುವ ಅಜರುದ್ದೀನ್ ಈ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು. ಮಸೀದಿ ನಿರ್ಮಿಸುತ್ತಿರುವ ಸ್ಥಳದ ಸುತ್ತಮುತ್ತ ಪ್ರಸ್ತುತ ಯಾವುದೇ ದೊಡ್ಡ ಮಸೀದಿಗಳಿಲ್ಲ. ಹೀಗಾಗಿ ಸ್ಥಳೀಯ ಮುಸ್ಲಿಮರು ನಮಾಜ್ ಮಾಡಲು ದೀರ್ಘ ದೂರ ಪ್ರಯಾಣಿಸಬೇಕಾಗಿತ್ತು. ಈ ಸಮಸ್ಯೆಯನ್ನು ಗಮನಿಸಿ ಸ್ಥಳೀಯ ನಿವಾಸಿಗಳ ಅನುಕೂಲಕ್ಕಾಗಿ ಸಾನಿಯಾ ಮಿರ್ಜಾ ತಮ್ಮ ಸ್ವಂತ ಖರ್ಚಿನಲ್ಲಿ ಮಸೀದಿ ನಿರ್ಮಿಸಿಕೊಡಲು ಮುಂದಾಗಿದ್ದಾರೆ ಎನ್ನುವ ವರದಿಗಳಿದ್ದವು. ಆದರೆ, ಇದೆಲ್ಲವೂ ಸುಳ್ಳು ಎನ್ನುವುದು ಗೊತ್ತಾಗಿದೆ.

ನೆಟ್ಟಿಗರ ಪ್ರಶ್ನೆ

ಆದರೆ, ಕ್ರೀಡಾ ತರಬೇತಿಗಾಗಿ ಸರ್ಕಾರದಿಂದ ಅಥವಾ ಕ್ರೀಡಾ ಉದ್ದೇಶಕ್ಕಾಗಿ ಖರೀದಿಸಿದ ಭೂಮಿಯಲ್ಲಿ ಮಸೀದಿಯನ್ನು ಯಾವ ಆಧಾರದ ಮೇಲೆ ನಿರ್ಮಿಸಲಾಗುತ್ತಿದೆ ಎಂದು ನೆಟ್ಟಿಗರು ಕಟುವಾಗಿ ಪ್ರಶ್ನಿಸುತ್ತಿದ್ದಾರೆ. ಸೋಶಿಯಲ್‌ ಮೀಡಿಯಾದಲ್ಲಿ ವ್ಯಾಪಕ ವಿರೋಧ ವ್ಯಕ್ತಪಡಿಸುತ್ತಿರುವ ನೆಟ್ಟಿಗರು, ಒಂದು ವೇಳೆ ಅಲ್ಲಿ ಟೆನಿಸ್ ಅಕಾಡೆಮಿ ನಿರ್ಮಿಸಲು ಸಾಧ್ಯವಾಗದಿದ್ದರೆ, ಸಾರ್ವಜನಿಕರ ಅನುಕೂಲಕ್ಕಾಗಿ ಬಡವರಿಗೆ ನೆರವಾಗುವ ಶಾಲೆ (School) ಅಥವಾ ಆಸ್ಪತ್ರೆಯನ್ನು (Hospital) ನಿರ್ಮಿಸಬಹುದಿತ್ತಲ್ಲವೇ? ಮಸೀದಿಯನ್ನೇ ಏಕೆ ನಿರ್ಮಿಸಬೇಕು? ಎಂದು ಸಾನಿಯಾ ನಡೆಯನ್ನು ತೀವ್ರವಾಗಿ ಪ್ರಶ್ನಿಸಿದ್ದಾರೆ. ಆದರೆ, ಸಂಪ್ರದಾಯವಾದಿ ಹಾಗೂ ಧರ್ಮನಿಷ್ಠ ಮುಸ್ಲಿಂ ಸಮುದಾಯದವರು ಸಾನಿಯಾ ಮಿರ್ಜಾ ಅವರ ಈ ನಿರ್ಧಾರವನ್ನು ಬೆಂಬಲಿಸಿ ಅವರ ಪರವಾಗಿ ನಿಂತಿದ್ದಾರೆ.

ಸದಾ ವಿವಾದಗಳ ಸುಳಿಯಲ್ಲೇ ಇರುವ ಸಾನಿಯಾ ಮಿರ್ಜಾ

ಸಾನಿಯಾ ಮಿರ್ಜಾ ಅವರಿಗೆ ವಿವಾದಗಳು ಹೊಸದೇನಲ್ಲ. 2010 ರಲ್ಲಿ ಪಾಕಿಸ್ತಾನಿ ಕ್ರಿಕೆಟಿಗ ಶೋಯೆಬ್ ಮಲಿಕ್ (Shoaib Malik) ಅವರನ್ನು ವಿವಾಹವಾಗುವ ಮೂಲಕ ಅವರು ಭಾರಿ ವಿವಾದ ಸೃಷ್ಟಿಸಿದ್ದರು. ಈ ದಂಪತಿಗೆ ಇಝಾನ್ (Izhaan) ಎಂಬ ಮಗನಿದ್ದಾನೆ. ಆದರೆ 2024 ರಲ್ಲಿ ಸಾನಿಯಾ ಹಾಗೂ ಶೋಯೆಬ್ ಮಲಿಕ್ ಅಧಿಕೃತವಾಗಿ ವಿಚ್ಛೇದನ (Divorce) ಪಡೆದು ಪ್ರತ್ಯೇಕಗೊಂಡರು. ತರುವಾಯ ಶೋಯೆಬ್ ಮಲಿಕ್ ಪಾಕಿಸ್ತಾನಿ ನಟಿ ಸನಾ ಜಾವೇದ್ ಅವರನ್ನು ಮದುವೆಯಾಗಿದ್ದರು.

ಪ್ರಸ್ತುತ ಸಾನಿಯಾ ಮಿರ್ಜಾ ತಮ್ಮ ಹೆಚ್ಚಿನ ಸಮಯವನ್ನು ಹೈದರಾಬಾದ್‌ನಲ್ಲೂ ಕಳೆಯುತ್ತಿದ್ದಾರೆ. ಭಾರತದ ಪರ 6 ಗ್ರ್ಯಾಂಡ್ ಸ್ಲ್ಯಾಮ್‌ಗಳನ್ನು ಗೆದ್ದು ಸುದೀರ್ಘ ಕಾಲದ ಹಿಂದೆಯೇ ವೃತ್ತಿಪರ ಟೆನಿಸ್‌ಗೆ ವಿದಾಯ ಹೇಳಿರುವ ಅವರು, ವಿಚ್ಛೇದನದ ನಂತರವೂ ವರ್ಷದ ಬಹುಪಾಲು ಸಮಯವನ್ನು ದುಬೈನಲ್ಲಿ ಕಳೆಯುತ್ತಾರೆ. ದುಬೈನಲ್ಲಿ ಸ್ವಂತ ಟೆನಿಸ್ ಅಕಾಡೆಮಿ ಹೊಂದಿರುವ ಸಾನಿಯಾ, ದುಬೈ ಸ್ಪೋರ್ಟ್ಸ್ ಸಂಸ್ಥೆಯ ರಾಯಭಾರಿಯಾಗಿಯೂ ಕೆಲಸ ಮಾಡುತ್ತಿದ್ದಾರೆ. ಅವರ ಪುತ್ರ ಇಝಾನ್ ಸಹ ದುಬೈನಲ್ಲೇ ಶಿಕ್ಷಣ ಪಡೆಯುತ್ತಿದ್ದಾನೆ.

ಮಾಲ್ಗುಡಿ ಡೇಸ್ ಸ್ವಾಮಿಯ ಮಗ ಈಗ ನ್ಯಾಷನಲ್ ಸ್ವಿಮ್ಮಿಂಗ್‌ ಚಾಂಪಿಯನ್: ಪುತ್ರ ವೇದಾಂತ್ ಸಾಧನೆಗೆ ಮಾಸ್ಟರ್ ಮಂಜುನಾಥ್ ಖುಷ್

Santosh Naik — Mon, 05 Oct 2026 18:36:20 +0530

ಬೆಂಗಳೂರು (ಅ.5): ಭಾರತೀಯ ಕಿರುತೆರೆಯ ಸಾರ್ವಕಾಲಿಕ ಶ್ರೇಷ್ಠ ಕಾವ್ಯ 'ಮಾಲ್ಗುಡಿ ಡೇಸ್' (Malgudi Days) ಧಾರಾವಾಹಿಯ ಮುಗ್ಧ ಹಾಗೂ ತುಂಟ ಬಾಲಕ 'ಸ್ವಾಮಿ' ಪಾತ್ರದ ಮೂಲಕ ಕೋಟ್ಯಂತರ ವೀಕ್ಷಕರ ಮನಗೆದ್ದಿದ್ದ ಮಾಸ್ಟರ್ ಮಂಜುನಾಥ್ (Master Manjunath) ಅವರ ಮನೆಯಲ್ಲಿ ಈಗ ಸುವರ್ಣ ಸಂಭ್ರಮ ಮನೆಮಾಡಿದೆ. ದಶಕಗಳ ಹಿಂದೆ ಪುಟ್ಟ ಬಾಲನಟನಾಗಿ ಬೆಳ್ಳಿಪರದೆ ಹಾಗೂ ಕಿರುತೆರೆಯಲ್ಲಿ ಮಿಂಚಿದ್ದ ಮಂಜುನಾಥ್, ಇದೀಗ ಕ್ರೀಡಾರಂಗದಲ್ಲಿ ಅತ್ಯುತ್ತಮ ಸಾಧನೆ ಮಾಡಿರುವ ಪುತ್ರನನ್ನು ಕಂಡು ಹೆಮ್ಮೆಯ ತಂದೆಯಾಗಿ ಕ್ರೀಡಾಭಿಮಾನಿಗಳ ಗಮನ ಸೆಳೆದಿದ್ದಾರೆ.

ಆರ್.ಕೆ. ನಾರಾಯಣ್ ಅವರ 'ಸ್ವಾಮಿ ಆಂಡ್ ಫ್ರೆಂಡ್ಸ್' ಕಾದಂಬರಿ ಆಧಾರಿತ ಧಾರಾವಾಹಿಯಲ್ಲಿ ಶಾಲಾ ಹುಡುಗನ ದೈನಂದಿನ ತುಂಟಾಟ, ತರಗತಿಯ ಒಡನಾಟ ಹಾಗೂ ಮುಗ್ಧ ಬಾಲ್ಯವನ್ನು ಜೀವಂತಗೊಳಿಸಿದ್ದ ಮಾಸ್ಟರ್ ಮಂಜುನಾಥ್, ಇದೀಗ ತಮ್ಮ ಮಗ ರಾಷ್ಟ್ರೀಯ ಮಟ್ಟದ ಕ್ರೀಡಾಕೂಟದಲ್ಲಿ ಬ್ಯಾಕ್ ಟು ಬ್ಯಾಕ್ ಚಾಂಪಿಯನ್ ಆಗಿ ಹೊರಹೊಮ್ಮಿರುವುದನ್ನು ಸಂಭ್ರಮಿಸಿದ್ದಾರೆ.

ಪುಣೆಯಲ್ಲಿ ನಡೆದ 'ಐಎಸ್‌ಎಸ್‌ಒ' ನ್ಯಾಷನಲ್ ಸ್ವಿಮ್ಮಿಂಗ್‌ ಚಾಂಪಿಯನ್‌ಷಿಪ್‌ನಲ್ಲಿ ಸಾಧನೆ

ಮಾಸ್ಟರ್ ಮಂಜುನಾಥ್ ಅವರ ಪುತ್ರ ವೇದಾಂತ್, ತಮ್ಮ ಶಾಲೆಯ ಈಜು ರಿಲೇ ತಂಡದ ಜೊತೆಗೂಡಿ ಸತತ ಎರಡನೇ ಬಾರಿಗೆ ರಾಷ್ಟ್ರೀಯ ಈಜು ಚಾಂಪಿಯನ್‌ಷಿಪ್ ಕಿರೀಟವನ್ನು ಉಳಿಸಿಕೊಂಡಿದ್ದಾರೆ. ಮಹಾರಾಷ್ಟ್ರದ ಪುಣೆಯಲ್ಲಿ ನಡೆದ ಪ್ರತಿಷ್ಠಿತ ಐಎಸ್‌ಎಸ್‌ಒ ರಾಷ್ಟ್ರೀಯ ಈಜು ಚಾಂಪಿಯನ್‌ಷಿಪ್‌ನಲ್ಲಿ (ISSO National Swimming Championship) 'ನೀವ್ ಅಕಾಡೆಮಿ'ಯನ್ನು (Neev Academy) ಪ್ರತಿನಿಧಿಸಿದ್ದ ವೇದಾಂತ್, ತಮ್ಮ ಸಹ-ಸ್ಪರ್ಧಿಗಳಾದ ತನಯ್, ಕಬೀರ್ ಹಾಗೂ ಅಯಾನ್ ಅವರೊಂದಿಗೆ ತಂಡವಾಗಿ ಕಣಕ್ಕಿಳಿದಿದ್ದರು. ಈ ಕಠಿಣ ಸ್ಪರ್ಧೆಯಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಈ ಯುವ ಈಜುಪಟುಗಳ ತಂಡವು 4x100m ಮೆಡ್ಲೆ ರಿಲೇ (Medley Relay) ಹಾಗೂ 4x100m ಫ್ರೀಸ್ಟೈಲ್ ರಿಲೇ (Freestyle Relay) ಎರಡೂ ವಿಭಾಗಗಳಲ್ಲಿ ಅಗ್ರಸ್ಥಾನ ಪಡೆದು ಬಂಗಾರದ ಪದಕಗಳಿಗೆ ಮುತ್ತಿಕ್ಕಿದೆ.

2025 ರ ಯಶಸ್ಸು 2026 ರಲ್ಲೂ ರಿಟರ್ನ್‌

ಈಜುಪಟುಗಳ ಬಳಗ ರಾಷ್ಟ್ರೀಯ ಚಿನ್ನ ಗೆದ್ದಿದ್ದು ಇದೇ ಮೊದಲೇನಲ್ಲ. ಕಳೆದ 2025 ರ ರಾಷ್ಟ್ರೀಯ ಟೂರ್ನಿಯಲ್ಲೂ ಇದೇ ಬಲಿಷ್ಠ ನಾಲ್ವರ ತಂಡವು ರಾಷ್ಟ್ರೀಯ ಮಟ್ಟದಲ್ಲಿ ಇಂತಹುದೇ ಚಿನ್ನದ ಪದಕ ಜಯಿಸಿತ್ತು. ತಮ್ಮ ಮಗ ಹಾಗೂ ಅವರ ತಂಡದ ಈ ಅದ್ಭುತ 'ಬ್ಯಾಕ್ ಟು ಬ್ಯಾಕ್' (Back-to-Back) ಸಾಧನೆಯನ್ನು ಸೋಶಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡ ಮಾಸ್ಟರ್ ಮಂಜುನಾಥ್ ತಮ್ಮ ಸಂತಸವನ್ನು ತಡೆಹಿಡಿಯಲಾಗದೆ, "ಎರಡನೇ ಬಾರಿಗೆ ಚಿನ್ನ ಗೆದ್ದಾಗ ಅದರ ಖುಷಿ ಹಾಗೂ ಅನುಭವ ಇನ್ನಷ್ಟು ಅದ್ಭುತವಾಗಿರುತ್ತದೆ!" ಎಂದು ಬರೆದುಕೊಂಡಿದ್ದಾರೆ. ಯುವ ಅಥ್ಲೀಟ್‌ಗಳ ಸಾಧನೆಯನ್ನು ಅವರು ಶ್ಲಾಘಿಸಿದ್ದಾರೆ.

ಹಳೆಯ ಯಶಸ್ಸಿನಲ್ಲೇ ತೃಪ್ತಿಪಡದೆ, 2025 ಮತ್ತು 2026 ರ ಸತತ ಗೆಲುವನ್ನು ಎತ್ತಿಹಿಡಿದಿರುವ ಮಂಜುನಾಥ್, ಮುಂಬರುವ ದಿನಗಳಿಗೆ ಬೋಲ್ಡ್ ಆದ ಗುರಿ ನೀಡಿದ್ದಾರೆ. ತಮ್ಮ ಮಗ ಇರುವ ಟೀಮ್‌ಗೆ ಸವಾಲು ನೀಡಿರುವ ಅವರು, "ಮುಂದಿನ ವರ್ಷ ಸತತ ಮೂರನೇ ಬಾರಿ ಗೆದ್ದು 'ಹ್ಯಾಟ್ರಿಕ್' (Hattrick Next Year) ಬಾರಿಸುವುದನ್ನು ನೋಡಲು ನಾನು ಈಗಿನಿಂದಲೇ ಕಾತರನಾಗಿದ್ದೇನೆ!" ಎಂದು ಬರೆದುಕೊಂಡಿದ್ದಾರೆ.

ಮಾಲ್ಗುಡಿಯ 'ಸ್ವಾಮಿ'ಯ ಹೊಸ ಪಯಣ

ದೇಶದ ಕೋಟ್ಯಂತರ ವೀಕ್ಷಕರಿಗೆ ಮಾಲ್ಗುಡಿಯ ಧೂಳು ತುಂಬಿದ ರಸ್ತೆಗಳಲ್ಲಿ ಅಡ್ಡಾಡುತ್ತಿದ್ದ ಪುಟ್ಟ 'ಸ್ವಾಮಿ'ಯ ಚಿತ್ರಣ ಇಂದಿಗೂ ಸದಾ ನೆನಪಿನಲ್ಲಿ ಉಳಿಯುವಂತಹದ್ದು. ಆದರೆ ಸಮಯ ಉರುಳಿದಂತೆ, ಆ ಮಾಲ್ಗುಡಿ ಹುಡುಗ ಭಾರತೀಯ ಕಿರುತೆರೆ ಇತಿಹಾಸದ ಸವಿನೆನಪಿನ ಅಧ್ಯಾಯವಾಗಿ ಉಳಿದುಕೊಂಡಿದ್ದಾರೆ. ಪ್ರಸ್ತುತ, ಮಾಸ್ಟರ್ ಮಂಜುನಾಥ್ ತಮ್ಮ ಮಗ ವೇದಾಂತ್ ಕ್ರೀಡಾಂಗಣದಲ್ಲಿ ರಾಷ್ಟ್ರೀಯ ಮಟ್ಟದ ವೇದಿಕೆಯಲ್ಲಿ ಚಿನ್ನದ ಪದಕಗಳನ್ನು ಹಿಡಿದು ನಿಂತಿರುವುದನ್ನು ಸಂಭ್ರಮಿಸುತ್ತಿದ್ದಾರೆ.

ಟೆನಿಸ್ ಕೋರ್ಟ್‌ಗೆ ಮೀಸಲಿಟ್ಟ ಜಾಗದಲ್ಲಿ ಮಸೀದಿ ಕಟ್ಟಲು ಅಜರುದ್ದೀನ್ ಜತೆ ಸಾನಿಯಾ ಮಿರ್ಜಾ ಶಂಕುಸ್ಥಾಪನೆ? ವಿವಾದ ಬೆನ್ನಲ್ಲೇ ಮೌನ ಮುರಿದ ಟೆನಿಸ್ ತಾರೆ

Naveen Kodase — Thu, 29 Oct 2026 15:31:38 +0530

ಹೈದರಾಬಾದ್‌(ಅ.29): ಮಸೀದಿ ನಿರ್ಮಾಣಕ್ಕಾಗಿ ಜಮೀನು ದಾನ ಮಾಡಿದ್ದಾರೆ ಎಂಬ ಆರೋಪದ ಹಿನ್ನೆಲೆಯಲ್ಲಿ ಮಾಜಿ ಭಾರತೀಯ ಟೆನಿಸ್ ತಾರೆ ಸಾನಿಯಾ ಮಿರ್ಜಾ ವಿವಾದಕ್ಕೆ ಸ್ಪಷ್ಟನೆ ನೀಡಿದ್ದಾರೆ. ಈ ಸಂಬಂಧ ತಮ್ಮ ತಂದೆ ಇಮ್ರಾನ್ ಮಿರ್ಜಾ ನೀಡಿರುವ ಹೇಳಿಕೆಯನ್ನು ಅವರು ಇನ್‌ಸ್ಟಾಗ್ರಾಂ ಸ್ಟೋರಿಯಲ್ಲಿ ಹಂಚಿಕೊಂಡಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಸುದ್ದಿಗಳು ಸುಳ್ಳು ಎಂದು ಇಮ್ರಾನ್ ಮಿರ್ಜಾ ಸ್ಪಷ್ಟಪಡಿಸಿದ್ದಾರೆ.

ಸಾನಿಯಾ ಮಿರ್ಜಾ ಟೆನಿಸ್ ಅಕಾಡೆಮಿ ನಿರ್ಮಿಸಿರುವ ಜಾಗದ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಹಲವು ರೀತಿಯ ಊಹಾಪೋಹಗಳು ಹರಿದಾಡುತ್ತಿದ್ದವು. ಈ ಜಾಗದಲ್ಲಿ ಮಸೀದಿ ನಿರ್ಮಾಣವಾಗುತ್ತಿದೆ ಎಂಬ ಆರೋಪವೂ ಚರ್ಚೆಗೆ ಕಾರಣವಾಗಿತ್ತು. ಸಾನಿಯಾ ಮಿರ್ಜಾ ಟೆನಿಸ್ ಟ್ರೇನಿಂಗ್‌ ಸೆಂಟರ್‌ಗಾಗಿ ಮೀಸಲಿಟ್ಟ ಜಾಗವನ್ನು ಮಸೀದಿ ಕಟ್ಟಲು ದಾನ ನೀಡಿದ್ದಾರೆ. ಈಗಾಗಲೇ ಮಾಜಿ ಕ್ರಿಕೆಟಿಗ ಅಜರುದ್ದೀನ್ ಜತೆ ಸೇರಿ ಸಾನಿಯಾ ಮಿರ್ಜಾ ಶಂಕುಸ್ಥಾಪನೆ ಕೂಡಾ ಮಾಡಿದ್ದಾರೆ ಎಂದು ವರದಿಯಾಗಿತ್ತು. ಇದೀಗ ಸಾನಿಯಾ ಅವರ ತಂದೆ ಈ ಆರೋಪಗಳನ್ನು ನಿರಾಕರಿಸಿದ್ದು, ಅಕಾಡೆಮಿ ಇರುವ ಜಾಗದಲ್ಲಿ ಯಾವುದೇ ಮಸೀದಿ ನಿರ್ಮಿಸಲಾಗುತ್ತಿಲ್ಲ ಎಂದು ತಿಳಿಸಿದ್ದಾರೆ.

ವೈರಲ್ ಸುದ್ದಿಗಳು ಸುಳ್ಳು ಎಂದ ಸಾನಿಯಾ ತಂದೆ

ಕಳೆದ ಕೆಲವು ದಿನಗಳಿಂದ ಸಾನಿಯಾ ಮಿರ್ಜಾ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ತಪ್ಪು ಮಾಹಿತಿ ಹರಿದಾಡುತ್ತಿದೆ ಎಂದು ಇಮ್ರಾನ್ ಮಿರ್ಜಾ ತಮ್ಮ ಹೇಳಿಕೆಯಲ್ಲಿ ಸ್ಪಷ್ಟಪಡಿಸಿದ್ದಾರೆ. “ಕಳೆದ ಕೆಲವು ದಿನಗಳಿಂದ ಸಾನಿಯಾ ಮಿರ್ಜಾ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ತಿರುಚಲಾದ ಸುಳ್ಳು ಸುದ್ದಿ ಹರಿದಾಡುತ್ತಿದೆ. ಈ ಬಗ್ಗೆ ಸ್ಪಷ್ಟನೆ ನೀಡಲು ಬಯಸುತ್ತೇನೆ” ಎಂದು ಅವರು ಹೇಳಿದ್ದಾರೆ.

ಇದೇ ವೇಳೆ, ಸಾನಿಯಾ ಮಿರ್ಜಾ ಮತ್ತು ಭಾರತದ ಮಾಜಿ ಕ್ರಿಕೆಟ್ ನಾಯಕ ಮೊಹಮ್ಮದ್ ಅಜರುದ್ದೀನ್ ಒಟ್ಟಿಗೆ ಇರುವಂತೆ ತೋರಿಸುವ ವೈರಲ್ ಚಿತ್ರದ ಬಗ್ಗೆಯೂ ಅವರು ಪ್ರತಿಕ್ರಿಯಿಸಿದ್ದಾರೆ. ಈ ಚಿತ್ರವನ್ನು ಕೃತಕ ಬುದ್ಧಿಮತ್ತೆ (ಎಐ) ಬಳಸಿ ಸೃಷ್ಟಿಸಲಾಗಿದೆ ಎಂದು ಇಮ್ರಾನ್ ಮಿರ್ಜಾ ಹೇಳಿದ್ದಾರೆ. “ಶ್ರೀ ಅಜರುದ್ದೀನ್ ಮತ್ತು ಸಾನಿಯಾ ಅವರದ್ದು ಎಂದು ವೈರಲ್ ಆಗಿರುವ ಚಿತ್ರವನ್ನು ಎಐ ಮೂಲಕ ಸೃಷ್ಟಿಸಲಾಗಿದೆ” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

View this post on Instagram

A post shared by Imran Mirza (@imranmirza58)

ಟೆನಿಸ್ ಅಕಾಡೆಮಿ ಇರುವ ಜಾಗದಲ್ಲಿ ಮಸೀದಿ ನಿರ್ಮಾಣವಾಗುತ್ತಿಲ್ಲ

ವಿವಾದಕ್ಕೆ ಕಾರಣವಾಗಿರುವ ಜಮೀನಿನ ಕುರಿತು ಸ್ಪಷ್ಟನೆ ನೀಡಿರುವ ಇಮ್ರಾನ್ ಮಿರ್ಜಾ, ಸಾನಿಯಾ ಮಿರ್ಜಾ ಟೆನಿಸ್ ಅಕಾಡೆಮಿ ನಿರ್ಮಿಸಿರುವ ಜಾಗದಲ್ಲಿ ಮಸೀದಿ ನಿರ್ಮಾಣವಾಗುತ್ತಿಲ್ಲ ಎಂದು ಹೇಳಿದ್ದಾರೆ. “ಸಾನಿಯಾ ಅಥವಾ ಅವರ ಕುಟುಂಬ ಖರೀದಿಸಿರುವ ಜಮೀನನ್ನು ತಮಗೆ ಸೂಕ್ತವೆನಿಸಿದ ರೀತಿಯಲ್ಲಿ ಬಳಸುವ ಸಂಪೂರ್ಣ ಹಕ್ಕು ಸಾನಿಯಾ ಅವರಿಗೆ ಇದೆ. ಆದರೆ, ಸಾನಿಯಾ ಮಿರ್ಜಾ ಟೆನಿಸ್ ಅಕಾಡೆಮಿ ನಿರ್ಮಿಸಲಾಗಿರುವ ಜಾಗದಲ್ಲಿ ಯಾವುದೇ ಮಸೀದಿ ನಿರ್ಮಿಸಲಾಗುತ್ತಿಲ್ಲ ಎಂಬುದನ್ನು ಸ್ಪಷ್ಟಪಡಿಸಲು ಬಯಸುತ್ತೇನೆ” ಎಂದು ಅವರು ತಮ್ಮ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಈ ಮೂಲಕ ಸಾನಿಯಾ ಅವರು ಮಸೀದಿಗಾಗಿ ಜಮೀನು ದಾನ ಮಾಡಿದ್ದಾರೆ ಎಂಬ ಆರೋಪವನ್ನು ಅವರ ತಂದೆ ತಳ್ಳಿಹಾಕಿದ್ದಾರೆ.

ब्रेकिंग न्यूज़ ♥️

सानिया मिर्ज़ा ने अपने ख़ुद के खर्चे पर मस्ज़िद बनाने का ऐलान किया है।

भारतीय टैनिस सुपरस्टार सानिया मिर्ज़ा ने अपनी ख़ुद कि ज़मीन जिसपे उनका टेनिस सेंटर था उस ज़मीन को सानिया मिर्ज़ा ने मस्जिद के लिए वक़्फ़ कर दी।

पूर्व भारती क्रिकेट टीम के कप्तान और विस्फोटक बल्लेबाज मोहम्मद अजहरुद्दीन ने रखी मस्ज़िद की संग-ए -बुनियाद!

— Mr_cool77777 (@MR_COOL77777) October 28, 2026

ಸಾನಿಯಾ ಅವರ ಸಮಾಜಸೇವೆಯು ವೈಯಕ್ತಿಕ ವಿಚಾರ

“ಸಾನಿಯಾ ಈ ಹಿಂದೆ ಮಾಡಿರುವ, ಈಗ ಮಾಡುತ್ತಿರುವ ಅಥವಾ ಭವಿಷ್ಯದಲ್ಲಿ ಮಾಡುವ ಯಾವುದೇ ಸಾಮಾಜಿಕ ಅಥವಾ ದತ್ತಿ ಕಾರ್ಯಗಳು ಅವರ ಖಾಸಗಿ ಮತ್ತು ವೈಯಕ್ತಿಕ ವಿಚಾರಗಳಾಗಿವೆ. ವಿಶೇಷವಾಗಿ ಸಾನಿಯಾ ಅವರೇ ಕನ್ಫರ್ಮ್ ಮಾಡದೇ ಇರುವ ಮಾಹಿತಿಯನ್ನು ಸಾರ್ವಜನಿಕಗೊಳಿಸುವ ಹಕ್ಕು ಯಾರಿಗೂ ಇಲ್ಲ” ಎಂದು ಅವರು ಹೇಳಿದ್ದಾರೆ. ಇನ್ನು ಇದೇ ವೇಳೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುವ ಮಾಹಿತಿಯನ್ನು ಪರಿಶೀಲಿಸದೆ ನಂಬಬಾರದು ಎಂಬ ಸಂದೇಶವನ್ನೂ ರವಾನಿಸಿದ್ದಾರೆ. ಸಾನಿಯಾ ಅವರ ತಂದೆಯ ಸ್ಪಷ್ಟನೆಯ ಬಳಿಕ, ಟೆನಿಸ್ ಅಕಾಡೆಮಿ ಇರುವ ಜಾಗದಲ್ಲಿ ಮಸೀದಿ ನಿರ್ಮಾಣವಾಗುತ್ತಿದೆ ಎಂಬ ಆರೋಪವನ್ನು ಕುಟುಂಬ ನಿರಾಕರಿಸಿದೆ.

2023ರಲ್ಲಿ ವೃತ್ತಿಪರ ಟೆನಿಸ್‌ಗೆ ವಿದಾಯ ಹೇಳಿದ್ದ ಸಾನಿಯಾ

ಭಾರತದ ಅತ್ಯಂತ ಪ್ರಸಿದ್ಧ ಕ್ರೀಡಾಪಟುಗಳಲ್ಲಿ ಒಬ್ಬರಾಗಿರುವ ಸಾನಿಯಾ ಮಿರ್ಜಾ, 2023ರಲ್ಲಿ ವೃತ್ತಿಪರ ಟೆನಿಸ್‌ಗೆ ವಿದಾಯ ಹೇಳಿದ್ದರು. ತಮ್ಮ ವೃತ್ತಿಜೀವನದಲ್ಲಿ ಆರು ಗ್ರ್ಯಾಂಡ್ ಸ್ಲ್ಯಾಮ್ ಪ್ರಶಸ್ತಿಗಳನ್ನು ಗೆದ್ದಿರುವ ಅವರು, ಭಾರತೀಯ ಟೆನಿಸ್‌ಗೆ ಮಹತ್ವದ ಕೊಡುಗೆ ನೀಡಿದ್ದಾರೆ. ನಿವೃತ್ತಿಯ ಬಳಿಕವೂ ಸಾನಿಯಾ ಸಾರ್ವಜನಿಕ ಜೀವನದಲ್ಲಿ ಗಮನ ಸೆಳೆಯುತ್ತಿದ್ದು, ಇದೀಗ ಅವರ ಹೆಸರಿನಲ್ಲಿ ಹರಿದಾಡಿದ ಜಮೀನು ದಾನ ವಿವಾದಕ್ಕೆ ತಂದೆ ನೀಡಿರುವ ಸ್ಪಷ್ಟನೆ ಚರ್ಚೆಯ ವಿಷಯವಾಗಿದೆ. ಅಕಾಡೆಮಿ ಇರುವ ಜಾಗದಲ್ಲಿ ಮಸೀದಿ ನಿರ್ಮಿಸಲಾಗುತ್ತಿದೆ ಎಂಬ ಆರೋಪವನ್ನು ಇಮ್ರಾನ್ ಮಿರ್ಜಾ ನಿರಾಕರಿಸಿದ್ದಾರೆ.

ಪ್ಯಾರಾ ಏಷ್ಯಾಡ್‌: ಭಾರತ ಸಾರ್ವಕಾಲಿಕ ದಾಖಲೆ! ಕಡಿಮೆ ಸ್ಪರ್ಧಿಗಳಿದ್ದರೂ ಶ್ರೇಷ್ಠ ಪ್ರದರ್ಶನ ತೋರಿದ ಟೀಮ್ ಇಂಡಿಯಾ

Kannadaprabha News — Sat, 24 Oct 2026 09:11:03 +0530

ನಗೋಯಾ: 2026ರ ಪ್ಯಾರಾ ಏಷ್ಯನ್‌ ಗೇಮ್ಸ್‌ ಅಭಿಯಾನವನ್ನು ಭಾರತ ದಾಖಲೆಯ ಪದಕ ಗಳಿಕೆಯೊಂದಿಗೆ ಮುಕ್ತಾಯಗೊಳಿಸಿದೆ. ಕೂಟಕ್ಕೆ ಶನಿವಾರ ಅಧಿಕೃತವಾಗಿ ತೆರೆ ಬೀಳಲಿದೆಯಾದರೂ, ಭಾರತದ ಸ್ಪರ್ಧೆಗಳು ಶುಕ್ರವಾರವೇ ಕೊನೆಗೊಂಡಿತು. ಕೂಟದ 5ನೇ ದಿನ ಭಾರತ 9 ಚಿನ್ನ ಸೇರಿ 25 ಪದಕಗಳನ್ನು ಪಡೆಯಿತು. ಇದರೊಂದಿಗೆ 30 ಚಿನ್ನ, 35 ಬೆಳ್ಳಿ, 49 ಕಂಚು ಸೇರಿ ಒಟ್ಟು 114 ಪದಕ ಬಾಚಿಕೊಂಡಿತು.

2023ರಲ್ಲಿ ಚೀನಾದ ಹಾಂಗ್ಝೂನಲ್ಲಿ ನಡೆದಿದ್ದ 4ನೇ ಆವೃತ್ತಿಯ ಪ್ಯಾರಾ ಏಷ್ಯಾಡ್‌ನಲ್ಲಿ ಭಾರತ 108 ಪದಕ ಜಯಿಸಿತ್ತು. ಆ ದಾಖಲೆ ಪತನಗೊಂಡಿದೆ. ವಿಶೇಷ ಎಂದರೆ, 2023ರಲ್ಲಿ ಭಾರತ ಬರೋಬ್ಬರಿ 309 ಕ್ರೀಡಾಪಟುಗಳನ್ನು ಕಳುಹಿಸಿತ್ತು. ಆದರೆ ಈ ಸಲ 168 ಸ್ಪರ್ಧಿಗಳಷ್ಟೇ ತೆರೆಳಿದ್ದರು. 141 ಮಂದಿ ಕಡಿಮೆ ಸ್ಪರ್ಧಿಗಳಿದ್ದರೂ, ಭಾರತ ಪದಕ ಗಳಿಕೆಯಲ್ಲಿ ದಾಖಲೆ ಬರೆದಿದೆ. ಸದ್ಯ ಪದಕ ಪಟ್ಟಿಯಲ್ಲಿ ಭಾರತ 4ನೇ ಸ್ಥಾನದಲ್ಲಿದ್ದು, ಕೂಟ ಮುಕ್ತಾಯಗೊಳ್ಳುವ ವೇಳೆಗೆ ಸ್ಥಾನ ಬದಲಾಗಬಹುದು.

ಬ್ಯಾಡ್ಮಿಂಟನ್‌ನಲ್ಲಿ ಮಿಂಚು:

ಶನಿವಾರ ಬ್ಯಾಡ್ಮಿಂಟನ್‌ನಲ್ಲಿ ಭಾರತಕ್ಕೆ 3 ಚಿನ್ನ ದೊರೆಯಿತು. ಪುರುಷರ ಎಸ್‌ಎಲ್‌ 3 ವಿಭಾಗದ ಫೈನಲ್‌ನಲ್ಲಿ ಭಾರತದವರೇ ಆದ ಪ್ರಮೋದ್‌ ಭಗತ್‌ರನ್ನು ಸೋಲಿಸಿ ನಿತೇಶ್‌ ಕುಮಾರ್‌ ಚಿನ್ನ ಗೆದ್ದರೆ, ಎಸ್‌ಎಲ್‌ 4 ವಿಭಾಗದಲ್ಲಿ ನವೀನ್‌ ಶಿವಕುಮಾರ್‌ ಸ್ವರ್ಣಕ್ಕೆ ಮುತ್ತಿಟ್ಟರು. ಮಹಿಳಾ ಡಬಲ್ಸ್‌ ಎಲ್‌ಎಲ್‌3-ಎಸ್‌ಯು5 ವಿಭಾಗದಲ್ಲಿ ಮಾನ್ಸಿ ಜೋಶಿ ಹಾಗೂ ತುಳಸಿಮತಿ ಮುರುಗೇಶನ್‌ ಚಿನ್ನಕ್ಕೆ ಕೊರಳೊಡ್ಡಿದರು. ಭಾರತೀಯ ಶಟ್ಲರ್‌ಗಳು 3 ಚಿನ್ನ ಸೇರಿ ಒಟ್ಟು 16 ಪದಕಗಳೊಂದಿಗೆ ಅಭಿಯಾನ ಮುಕ್ತಾಯಗೊಳಿಸಿದರು.

ಜಾವೆಲಿನ್‌ನಲ್ಲಿ ಕ್ಲೀನ್‌ಸ್ವೀಪ್‌:

ಪುರುಷರ ಎಫ್‌ 42-44/61-62 ವಿಭಾಗದ ಜಾವೆಲಿನ್‌ ಎಸೆತದಲ್ಲಿ ಭಾರತ ಪದಕಗಳನ್ನು ಕ್ಲೀನ್‌ ಸ್ವೀಪ್‌ ಮಾಡಿತು. ಚಿನ್ನ ಗೆದ್ದ ಹಾಲಿ ವಿಶ್ವ ಚಾಂಪಿಯನ್‌ ಸುಮಿತ್‌ ಅಂತಿಲ್‌. 72.46 ದೂರಕ್ಕೆ ಜಾವೆಲಿನ್‌ ಎಸೆದ ಸುಮಿತ್‌ ಚಿನ್ನ ಗೆದ್ದರು. ಮಹೇಂದ್ರ ಗುರ್ಜಾರ್‌ ಹಾಗೂ ಸಂದೀಪ್‌ ಸರ್ಗಾರ್‌ಗೆ ಕ್ರಮವಾಗಿ ಬೆಳ್ಳಿ, ಕಂಚು ಸಿಕ್ಕಿತು.

ಮೋನಾಗೆ 2ನೇ ಚಿನ್ನ: ಪ್ಯಾರಾ ಶೂಟರ್‌ ಮೋನಾ ಅಗರ್‌ವಾಲ್‌ ಕೂಟದಲ್ಲಿ 2ನೇ ಚಿನ್ನ ಜಯಿಸಿದರು. ಮಹಿಳೆಯರ 50 ಮೀ. ರೈಫಲ್‌ 3 ಪೊಸಿಷನ್‌ ಎಸ್‌ಎಚ್‌1 ವಿಭಾಗದಲ್ಲಿ ಚಿನ್ನ ಗೆದ್ದರು. ಈ ಮೊದಲು 10 ಮೀ. ಏರ್‌ ರೈಫಲ್‌ ವಿಭಾಗದಲ್ಲೂ ಮೋನಾ ಚಿನ್ನ ಗೆದ್ದಿದ್ದರು.

ಹರ್ವಿಂದರ್‌ಗೆ ಸ್ವರ್ಣ: ಪ್ಯಾರಾಲಿಂಪಿಕ್‌ ಚಾಂಪಿಯನ್‌ ಹರ್ವಿಂದರ್‌ ಸಿಂಗ್‌ ಹಾಗೂ ವಿನಯ್‌ ಸುಂದಿ ರೀಕರ್ವ್‌ ಆರ್ಚರಿಯ ಪುರುಷರ ಡಬಲ್ಸ್ ವಿಭಾಗದಲ್ಲಿ ಚಿನ್ನ ಜಯಿಸಿದರು. ಫೈನಲ್‌ನಲ್ಲಿ ಚೀನಾ ಜೋಡಿಯನ್ನು ಸೋಲಿಸಿದರು.

ಯಾವ್ಯಾವ ಕ್ರೀಡೆಯಲ್ಲಿ ಭಾರತಕ್ಕೆ ಎಷ್ಟೆಷ್ಟು ಪದಕ?

--

ಕ್ರೀಡೆ ಚಿನ್ನ ಬೆಳ್ಳಿ ಕಂಚು ಒಟ್ಟು

--ಅಥ್ಲೆಟಿಕ್ಸ್‌ 22 19 24 65

ಬ್ಯಾಡ್ಮಿಂಟನ್‌ 3 5 8 16

ಆರ್ಚರಿ 3 3 0 6

ಶೂಟಿಂಗ್‌ 2 2 1 5

ಈಜು 0 3 8 11

ಪವರ್‌ಲಿಫ್ಟಿಂಗ್‌ 0 2 0 2

ಜುಡೋ 0 1 1 2

ಟೇಬಲ್‌ ಟೆನಿಸ್‌ 0 0 7 7

ಒಟ್ಟು 30 35 49 114

04 ಕ್ರೀಡಾಪಟುಗಳು

ಈ ಕೂಟದಲ್ಲಿ ಭಾರತದ 4 ಕ್ರೀಡಾಪಟುಗಳು ತಲಾ 3 ಪದಕ ಗೆದ್ದರು. ಆರ್ಚರಿಯಲ್ಲಿ ಶೀತಲ್‌ ದೇವಿಗೆ 2 ಚಿನ್ನ, 1 ಬೆಳ್ಳಿ, ಬ್ಯಾಡ್ಮಿಂಟನ್‌ನಲ್ಲಿ ತುಳಸಿಮತಿಗೆ 1 ಚಿನ್ನ, 2 ಬೆಳ್ಳಿ, ಈಜಿನಲ್ಲಿ ರವಿ ಬುದಿಗಿನಾಗೆ 2 ಬೆಳ್ಳಿ, 1 ಕಂಚು, ಈಜಿನಲ್ಲಿ ಹಿಮಾನ್ಶು ನಂದಲ್‌ಗೆ 3 ಕಂಚು ದೊರೆಯಿತು.

ಆಧುನಿಕತೆ ಮತ್ತು ಸಂಪ್ರದಾಯದ ಸುಂದರ ಸಂಗಮ , ಪಿ.ವಿ. ಸಿಂಧು ಅವರ ಬೆಂಗಳೂರಿನ ಮನೆ ಹೇಗಿದೆ ಗೊತ್ತಾ?

Roopa Hegde — Mon, 26 Oct 2026 11:21:13 +0530

ಒಂದು ಒಳ್ಳೆ ಮನೆ ಅಂದ್ರೆ ಕೇವಲ ಐಷಾರಾಮಿ ಸೌಲಭ್ಯಗಳಿರುವ ಜಾಗವಲ್ಲ. ಅಲ್ಲಿ ನೆಮ್ಮದಿ ಇರಬೇಕು, ನೆನಪುಗಳಿರಬೇಕು. ಮನೆಯವರ ವ್ಯಕ್ತಿತ್ವವೂ ಪ್ರತಿಯೊಂದು ಮೂಲೆಯಲ್ಲೂ ಕಾಣಬೇಕು. ಇದಕ್ಕೆ ಪಿ.ವಿ. ಸಿಂಧು ಮನೆ ಉತ್ತಮ ನಿದರ್ಶನ.

ಇತ್ತೀಚೆಗೆ ಬಾಲಿವುಡ್ ನಿರ್ದೇಶಕಿ ಫರಾ ಖಾನ್ ತಮ್ಮ ಯೂಟ್ಯೂಬ್ ಸರಣಿಗಾಗಿ ಬ್ಯಾಡ್ಮಿಂಟನ್ ಚಾಂಪಿಯನ್ ಪಿ.ವಿ. ಸಿಂಧು ಅವರ ಮನೆಗೆ ಭೇಟಿ ನೀಡಿದ್ದರು. ತಮ್ಮ ಅಡುಗೆ ಸಹಾಯಕ ದಿಲೀಪ್ ಜೊತೆ ಫರಾ, ಸಿಂಧು ಮನೆಗೆ ಬಂದಿದ್ದರು. ಎರಡು ಬಾರಿ ಒಲಿಂಪಿಕ್ಸ್ನಲ್ಲಿ ಪದಕ ಗೆದ್ದಿರುವ ಪಿ.ವಿ. ಸಿಂಧು, ಭಾರತಕ್ಕೆ ಹಲವು ಹೆಮ್ಮೆಯ ಕ್ಷಣಗಳನ್ನು ನೀಡಿದ್ದಾರೆ. ಕ್ರೀಡಾಂಗಣದ ಹೊರಗೂ ತಮ್ಮದೇ ಆದ ಸುಂದರ ಬದುಕನ್ನು ಕಟ್ಟಿಕೊಂಡಿದ್ದಾರೆ. ಬೆಂಗಳೂರಿನಲ್ಲಿ ಪತಿ ವೆಂಕಟ ದತ್ತ ಸಾಯಿ ಅವರೊಂದಿಗೆ ವಾಸಿಸುತ್ತಿರುವ ಸಿಂಧು ಅವರ ಮದುವೆ 2024ರ ಡಿಸೆಂಬರ್ 22ರಂದು ಉದಯಪುರದಲ್ಲಿ ನಡೆದಿತ್ತು. ಪಿ.ವಿ. ಸಿಂಧು ಅವರ ಮನೆಗೆ ಭೇಟಿ ನೀಡ್ತಿದ್ದಂತೆ ದೊಡ್ಡ ಮರದ ಮುಂಭಾಗದ ಬಾಗಿಲು ಅತಿಥಿಗಳನ್ನು ಸ್ವಾಗತಿಸುತ್ತದೆ. ಫರಾ ಖಾನ್‌ ಅವರನ್ನು ಸಿಂಧು, ಅವರ ಪತಿ ಹಾಗೂ ಮುದ್ದಿನ ಸಾಕು ನಾಯಿ ಅತಿಥಿಗಳನ್ನು ಬರಮಾಡಿಕೊಂಡರು.

ಮನೆಯ ಒಳಗೆ ಪ್ರವೇಶಿಸುತ್ತಿದ್ದಂತೆ, ಸುಂದರವಾದ ಚಿತ್ರಗಳು, ಒಳಾಂಗಣ ಸಸ್ಯಗಳು ಮತ್ತು ರಗ್ಗುಗಳಿಂದ ಅಲಂಕರಿಸಲಾದ ಹಾಲ್ ಗಮನ ಸೆಳೆಯುತ್ತದೆ. ಮನೆಯ ಗೋಡೆಯೊಂದರಲ್ಲಿ ಕಪ್ಪು-ಬಿಳುಪು ಛಾಯಾಚಿತ್ರಗಳ ಸಂಗ್ರಹವಿದೆ. ಸಿಂಧು ಅವರ ಬ್ಯಾಡ್ಮಿಂಟನ್ ವೃತ್ತಿಜೀವನದ ಪ್ರಮುಖ ಕ್ಷಣಗಳ ಚಿತ್ರಗಳ ಜೊತೆಗೆ ಮದುವೆಯ ಫೋಟೋ ಕೂಡ ಇಲ್ಲಿದೆ. ಹೀಗಾಗಿ, ಈ ಜಾಗ ಕೇವಲ ಒಂದು ಹಾದಿಯಂತೆ ಕಾಣುವುದಿಲ್ಲ. ಬದಲಿಗೆ, ಸಿಂಧು ಅವರ ಜೀವನದ ಪ್ರಮುಖ ನೆನಪುಗಳನ್ನು ಸಾರುವ ಪುಟ್ಟ ಸಂಗ್ರಹಾಲಯದಂತಿದೆ. ಮನೆಯ ಇತರ ಸಣ್ಣಪುಟ್ಟ ಅಲಂಕಾರಗಳೂ ಅಲ್ಲಿನ ಆತ್ಮೀಯತೆಯನ್ನು ಹೆಚ್ಚಿಸಿವೆ.

ಮನೆಯ ಹಾಲ್ನಿಂದ ಒಳಗೆ ಹೋದರೆ ವಿಶಾಲವಾದ ಲಿವಿಂಗ್ ರೂಮ್ ಕಾಣಿಸುತ್ತದೆ. ನೆಲದಿಂದ ಚಾವಣಿಯವರೆಗೆ ಇರುವ ದೊಡ್ಡ ಕಿಟಕಿಗಳ ಮೂಲಕ ನೈಸರ್ಗಿಕ ಬೆಳಕು ಒಳಗೆ ಬರುತ್ತದೆ. ಮೃದುವಾದ ಪಾಸ್ಟೆಲ್ ಬಣ್ಣಗಳೇ ಈ ಕೋಣೆಯ ಪ್ರಮುಖ ಆಕರ್ಷಣೆ. ತಿಳಿ ಹಸಿರು ಬಣ್ಣದ ಆರಾಮದಾಯಕ ಸೋಫಾಗಳು, ಕಾಂಟ್ರಾಸ್ಟ್ ಬಣ್ಣದ ಹೊದಿಕೆ ಮತ್ತು ಕಸೂತಿ ವಿನ್ಯಾಸದ ಕುಶನ್ಗಳು ಕೋಣೆಗೆ ಸುಂದರವಾದ ಲುಕ್ ನೀಡುತ್ತವೆ. ಅತಿಯಾದ ಅಲಂಕಾರಗಳಿಂದ ಕೋಣೆಯನ್ನು ತುಂಬಿಸುವ ಬದಲು, ಕೆಲವೇ ವಿಶೇಷ ವಸ್ತುಗಳಿಗೆ ಇಲ್ಲಿ ಆದ್ಯತೆ ನೀಡಲಾಗಿದೆ. ವಿಭಿನ್ನ ವಿನ್ಯಾಸದ ಉದ್ದನೆಯ ಲ್ಯಾಂಪ್ ಕೂಡ ಕೋಣೆಗೆ ಬೆಚ್ಚಗಿನ ಬೆಳಕನ್ನು ನೀಡುವುದರ ಜೊತೆಗೆ ಅದರ ಸೌಂದರ್ಯವನ್ನು ಹೆಚ್ಚಿಸುತ್ತದೆ.

ಸಿಂಧು ಅವರ ಮನೆಯಲ್ಲಿರುವ ಅತ್ಯಂತ ವಿಶೇಷ ವಸ್ತು ಎಂದರೆ ಮಹಾಭಾರತದ ಕಥೆಯನ್ನು ನೆನಪಿಸುವ ಚೆಸ್ ಬೋರ್ಡ್. ಗಾಜು ಮತ್ತು ಮಾರ್ಬಲ್ನಿಂದ ವಿನ್ಯಾಸಗೊಳಿಸಿರುವ ಈ ಚೆಸ್ ಬೋರ್ಡ್ನಲ್ಲಿ ಪಾಂಡವರು ಮತ್ತು ಕೌರವರನ್ನು ಪ್ರತಿನಿಧಿಸುವ ಕಾಯಿಗಳಿವೆ. ಎರಡು ಅಂತಸ್ತಿನ ವಿಶೇಷ ವಿನ್ಯಾಸದ ಬೋರ್ಡ್ನಲ್ಲಿ ಮಹಾಭಾರತದ ದೃಶ್ಯಗಳನ್ನು ಕೆತ್ತಲಾಗಿದೆ. ಆಧುನಿಕ ವಿನ್ಯಾಸದ ಮನೆಯ ನಡುವೆ ಈ ಸಾಂಪ್ರದಾಯಿಕ ಕಲಾಕೃತಿ ವಿಭಿನ್ನವಾಗಿ ಕಾಣಿಸುತ್ತದೆ. ಮನೆಯ ಅಲಂಕಾರಕ್ಕೆ ಭಾರತೀಯ ಸಂಸ್ಕೃತಿಯ ಸ್ಪರ್ಶ ನೀಡುವುದರ ಜೊತೆಗೆ, ಮನೆಗೆ ಬರುವ ಅತಿಥಿಗಳ ಗಮನವನ್ನೂ ಸೆಳೆಯುತ್ತದೆ. ಮನೆ ಅಂದರೆ ಕೇವಲ ಸುಂದರವಾಗಿ ಕಾಣುವ ಜಾಗವಲ್ಲ, ಮನೆಯವರ ಆಸಕ್ತಿ ಮತ್ತು ವ್ಯಕ್ತಿತ್ವವನ್ನು ಪ್ರತಿಬಿಂಬಿಸುವ ಸ್ಥಳವೂ ಹೌದು ಎನ್ನುವುದಕ್ಕೆ ಈ ಚೆಸ್ ಬೋರ್ಡ್ ಉತ್ತಮ ಉದಾಹರಣೆ.

ಲಿವಿಂಗ್ ರೂಮ್ನ ಪಕ್ಕದಲ್ಲೇ ಡೈನಿಂಗ್ ಏರಿಯಾ ಇದೆ. ಇಲ್ಲಿ ಗಾಢ ಬಣ್ಣದ ಮರದ ಡೈನಿಂಗ್ ಟೇಬಲ್ ಮತ್ತು ಅದಕ್ಕೆ ಹೊಂದಿಕೆಯಾಗುವ ಕುರ್ಚಿಗಳನ್ನು ಇರಿಸಲಾಗಿದೆ. ಕುರ್ಚಿಗಳ ತಿಳಿ ಕಂದು ಬಣ್ಣದ ಮೆತ್ತನೆಯ ಆಸನಗಳು ಗಾಢ ಮರದ ಬಣ್ಣಕ್ಕೆ ಕಾಂಟ್ರಾಸ್ಟ್ ಲುಕ್ ನೀಡುತ್ತವೆ. ಡೈನಿಂಗ್ ಏರಿಯಾದ ಪಕ್ಕದಲ್ಲೇ ಮಾಡ್ಯುಲರ್ ಕಿಚನ್ ಇದ್ದು, ಕೌಂಟರ್ ಮೇಲೆ ಬಿಳಿ ಮಾರ್ಬಲ್ ಫಿನಿಶ್ ನೀಡಲಾಗಿದೆ. ಮರದ ವಿನ್ಯಾಸ ಮತ್ತು ತಿಳಿ ಬಣ್ಣಗಳ ಸಂಯೋಜನೆ ಮನೆಯ ಈ ಭಾಗಕ್ಕೆ ಸರಳವಾದ, ಆಧುನಿಕ ನೋಟವನ್ನು ನೀಡುತ್ತದೆ.

ಸಿಂಧು ಅವರ ಮನೆಯ ಮತ್ತೊಂದು ಆಕರ್ಷಣೆ ಎಂದರೆ ಈಜುಕೊಳ ಮತ್ತು ಹಸಿರಿನಿಂದ ಕೂಡಿದ ಗಾರ್ಡನ್. ಡೈನಿಂಗ್ ಏರಿಯಾದಿಂದಲೇ ತೆಳುವಾದ ಪರದೆಗಳ ಮೂಲಕ ಹೊರಗಿನ ಈಜುಕೊಳ ಮತ್ತು ಉದ್ಯಾನವನವನ್ನು ನೋಡಬಹುದು. ಇದರಿಂದ ಮನೆಯೊಳಗೆ ಕುಳಿತಿದ್ದರೂ ಹೊರಗಿನ ಹಸಿರು ವಾತಾವರಣ ಕಣ್ಣಿಗೆ ಬೀಳುತ್ತದೆ. ಈಜುಕೊಳದ ಪಕ್ಕದಲ್ಲಿ ಬೂದು ಬಣ್ಣದ ಸೋಫಾಗಳು ಮತ್ತು ಸೆಂಟರ್ ಟೇಬಲ್ ಹೊಂದಿರುವ ವಿಶ್ರಾಂತಿ ಸ್ಥಳವಿದೆ. ಬಿಡುವಿನ ಸಮಯದಲ್ಲಿ ಕುಳಿತುಕೊಳ್ಳಲು ಅಥವಾ ಕುಟುಂಬದವರೊಂದಿಗೆ ಸಮಯ ಕಳೆಯಲು ಇದು ಸೂಕ್ತವಾದ ಜಾಗವಾಗಿದೆ. ಮನೆಯ ಒಳಭಾಗದಲ್ಲಿರುವ ಗಾಜು, ಮಾರ್ಬಲ್ ಮತ್ತು ಪಾಲಿಶ್ ಮಾಡಿದ ಪೀಠೋಪಕರಣಗಳ ನಡುವೆ ಸಸ್ಯಗಳ ಹಸಿರು ಬಣ್ಣ ವಿಶೇಷ ಆಕರ್ಷಣೆ ನೀಡುತ್ತದೆ. ಒಳಾಂಗಣ ಮತ್ತು ಹೊರಾಂಗಣದ ನಡುವೆ ಸುಂದರವಾದ ಸಂಪರ್ಕವನ್ನೂ ಕಲ್ಪಿಸುತ್ತದೆ. ಒಟ್ಟಿನಲ್ಲಿ, ಪಿ.ವಿ. ಸಿಂಧು ಅವರ ಮನೆ ಆಧುನಿಕ ವಿನ್ಯಾಸ, ಸಾಂಪ್ರದಾಯಿಕ ಕಲಾಕೃತಿಗಳು, ವೈಯಕ್ತಿಕ ನೆನಪುಗಳು ಮತ್ತು ಹಸಿರಿನ ಸುಂದರ ಸಂಯೋಜನೆಯಾಗಿದೆ.

ಏಷ್ಯನ್ ಪ್ಯಾರಾ ಗೇಮ್ಸ್ ಚಿನ್ನದ ಪದಕ ವಿಜೇತ ಜಾವಲಿನ್ ಪಟು ನೀರಜ್ ಯಾದವ್ ಶವವಾಗಿ ಪತ್ತೆ

Chethan Kumar — Wed, 28 Oct 2026 15:57:32 +0530

ನವದೆಹಲಿ (ಅ.28) ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ ಅದ್ವೀತಿಯ ಸಾಧನೆ ಮೂಲಕ ಮೂರು ಚಿನ್ನದ ಪದಕ ಗೆದ್ದ ಜಾವಲಿನ್ ಪಟು ನೀರಜ್ ಯಾದವ್ ದುರಂತ ಅಂತ್ಯಕಂಡಿದ್ದಾರೆ. ನೀರಜ್ ಯಾದವ್ ಸಾವನ್ನು ಕೋಚ್ ಎಸ್ ಸತ್ಯನಾರಾಯಣ ಖಚಿತ ಪಡಿಸಿದ್ದಾರೆ. 42ರ ಹರೆಯದ ನೀರಜ್ ಯಾದವ್ ತಮ್ಮ ಮನೆಯಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ. ಪ್ರಜ್ಞಾಹೀನ ಸ್ಥಿತಿಯಲ್ಲಿ ಪತ್ತೆಯಾದ ನೀರಜ್ ಯಾದವ್ ಅವರನ್ನು ಆಸ್ಪತ್ರೆ ದಾಖಲಿಸಲಾಗಿತ್ತು. ಆದರೆ ಪರೀಕ್ಷೆ ನಡೆಸಿದ ವೈದ್ಯರು ಮೃತಪಟ್ಟಿರುವುದಾಗಿ ಖಚಿತಪಡಿಸಿದ್ದಾರೆ.

ದುಡುಕಿನ ನಿರ್ಧಾರ

ಮಂಗಳವಾರ ರಾತ್ರಿ (ಅ.27) ನೀರಜ್ ಯಾದವ್ ತಮ್ಮ ಮನೆಯಲ್ಲಿ ಶವವಾಗಿ ಪತ್ತೆಯಾಗಿದ್ದರು. ನೀರಜ್ ಯಾದವ್ ಮರಣೋತ್ತರ ಪರೀಕ್ಷೆ ನಡೆಸಿ ಕುಟುಂಬಕ್ಕೆ ಮೃತದೇಹ ಹಸ್ತಾಂತರಿಸಲಾಗಿದೆ. ಸಾವಿಗೆ ನಿಖರ ಕಾರಣ ತಿಳಿದುಬಂದಿಲ್ಲ. ಮೂರು ಬಾರಿ ಚಿನ್ನದ ಪದಕ ಗೆದ್ದು ಭಾರತಕ್ಕೆ ಕೀರ್ತಿ ತಂದ ಕ್ರೀಡಾಪಟು ಈ ನಿರ್ಧಾರ ತೆಗೆದುಕೊಳ್ಳಬಾರದು. ಘಟನೆಯಿಂದ ತೀವ್ರ ನೋವಾಗಿದೆ. ನೀರಜ್ ನಿರ್ಧಾರಕ್ಕೆ ಕಾರಣವೇನು ಅನ್ನೋದು ತಿಳಿದುಬಂದಿಲ್ಲ. ಕ್ರೀಡೆಯಲ್ಲಿ ಸೋಲು ಗೆಲುವು, ಹಲವು ಏರಿಳಿತಗಳು ಸಾಮಾನ್ಯ. ಇವೆಲ್ಲವನ್ನು ಕ್ರೀಡಾಪಟು ನಿಭಾಯಿಸಬೇಕು. ಆದರೆ ನೀರಜ್ ಯಾದವ್ ದುಡುಕಿನ ನಿರ್ಧಾರ ತೆಗೆದುಕೊಂಡಿದ್ದಾರೆ ಎಂದು ಕೋಚ್ ಎಸ್ ಸತ್ಯನಾರಾಣಯ ಹೇಳಿದ್ದಾರೆ.

ದೆಹಲಿ ಪೊಲೀಸರು ಹೇಳಿದ್ದೇನು

ಘಟನೆ ಮಾಹಿತಿ ಬಂದ ತಕ್ಷಣವೇ ಪೊಲೀಸ್ ತಂಡ ಸ್ಥಳಕ್ಕೆ ಧಾವಿಸಿದೆ. ನೀರಜ್ ಯಾದವ್ ಅವರನ್ನು ದೆಹಲಿಯ ತೇಜ್ ಬಹದ್ದೂರ್ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಆಸ್ಪತ್ರೆ ದಾಖಲಿಸುವ ಮುನ್ನವೇ ನೀರಜ್ ಯಾದವ್ ಮೃತಪಟ್ಟಿದ್ದರು. ಸಾವಿಗೆ ಕಾರಣ ಕುರಿತು ತನಿಖೆ ನಡೆಯುತ್ತಿದೆ. ನೀರಜ್ ಯಾದವ್ ಮನೆ ಪರಿಶೋಧನೆ ಮಾಡಲಾಗಿದೆ ಎಂದು ದೆಹಲಿ ಪೊಲೀಸ್ ಹೇಳಿದೆ.

ಡೋಪಿಂಗ್ ಪ್ರಕರಣದಿಂದ ಬೇಸತ್ತಿದ್ದ ನೀರಜ್

ಇತ್ತೀಚೆಗೆ ಜಪಾನ್‌ನಲ್ಲಿ ನಜೆಗ ಏಷ್ಯನ್ ಪ್ಯಾರಾ ಗೇಮ್ಸ್ ಕ್ರೀಡಾಕೂಟಕ್ಕೆ ನೀರಜ್ ಯಾದವ್ ಆಯ್ಕೆಯಾಗಿರಲಿಲ್ಲ. ಡೋಪಿಂಗ್ ಪ್ರಕರಣದಿಂದ ಅಮಾನತ್ತುಗೊಂಡಿದ್ದ ಕಾರಣ ನೀರಜ್ ಯಾದವ್ ಆಯ್ಕೆಯಾಗಿರಲಿಲ್ಲ. ಇದರಿಂದ ನೀರಜ್ ಯಾದವ್ ತೀವ್ರವಾಗಿ ಮನನೊಂದಿದ್ದರು ಎಂದು ಹೇಳಲಾಗುತ್ತಿದೆ. ತನ್ನದಲ್ಲದ ತಪ್ಪಿಗೆ ಏಷ್ಯನ್ ಪ್ಯಾರಾ ಗೇಮ್ಸ್ ಅವಕಾಶ ತಪ್ಪಿಸಿಕೊಂಡೆ ಎಂದು ನೀರಜ್ ಯಾದವ್ ನಿರಾಸೆಯಾಗಿದ್ದರು ಎಂದು ಹೇಳಲಾಗುತ್ತಿದೆ. ಆದರೆ ದುಡುಕಿನ ನಿರ್ಧಾರಕ್ಕೆ ಇದೇ ಕಾರಣವೇ ಅನ್ನೋದು ಸ್ಪಷ್ಟವಾಗಿಲ್ಲ.

ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ 3 ಚಿನ್ನದ ಪದಕ

ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ F55 ಕ್ಯಾಟಗರಿಯಲ್ಲಿ ಚಿನ್ನದ ಪದಕ ಸಾಧನೆ ಮಾಡಿದ್ದಾರೆ. 2018ರ ಏಷ್ಯನ್ ಪ್ಯಾರ ಗೇಮ್ಸ್ ಜಾವಲಿನ್ ಥ್ರೋನಲ್ಲಿ ಚಿನ್ನದ ಪದಕ ಸಾಧನೆ ಮಾಡಿದ್ದರು. 2023ರ ಪ್ಯಾರಾ ಏಷ್ಯನ್ ಗೇಮ್ಸ್ ಕ್ರೀಡಾಕೂಟದಲ್ಲಿ ನೀರಜ್ ಯಾದವ್ ಜಾವಲಿನ್ ಹಾಗೂ ಡಿಸ್ಕಸ್ ಥ್ರೋ ಎರಡಲ್ಲೂ ಚಿನ್ನದ ಪದಕ ಗೆದ್ದುಕೊಂಡಿದ್ದರು. ಈ ಮೂಲಕ ಮೂರು ಚಿನ್ನದ ಪದಕ ಸಾಧನೆ ಮಾಡಿದ್ದರು. 2026ರ ಏಷ್ಯನ್ ಗೇಮ್ಸ್‌ನಲ್ಲೂ ಚಿನ್ನದ ಪದಕ ಗೆಲ್ಲೋ ವಿಶ್ವಾಸದಲ್ಲಿದ್ದರು.

ಕರ್ನಾಟಕ ಪಿಕಲ್‌ಬಾಲ್ ಪ್ರೀಮಿಯರ್ ಲೀಗ್ ಜೆರ್ಸಿ ಅನಾವರಣಗೊಳಿಸಿದ ನಟ ಶ್ರೀಮುರಳಿ

Chethan Kumar — Tue, 06 Oct 2026 18:19:02 +0530

ಬೆಂಗಳೂರು (ಅ.06): ಲೀಗ್ ಟೂರ್ನಿಗಳು ಹೆಚ್ಚು ಜನಪ್ರಿಯಗೊಳ್ಳುತ್ತಿರುವ ನಡುವೆ ಕ್ರೀಡಾ ಪ್ರೇಮಿಗಳಿಗೆ ಪಿಕಲ್‌ಬಾಲ್ ಲೀಗ್ ಹಬ್ಬ ಆರಂಭಗೊಳ್ಳುತ್ತಿದೆ. ಕರ್ನಾಟಕ ಸ್ಟೇಟ್ ಪಿಕಲ್‌ಬಾಲ್ ಅಸೋಸಿಯೇಷನ್ (KSPA) ಮತ್ತು ಎಂಟ್ರೋಪಿ ಸ್ಪೋರ್ಟ್ಸ್ ಅಂಡ್ ಇವೆಂಟ್ಸ್ (ESE) ಸಹಯೋಗದಲ್ಲಿ ನಡೆಯುತ್ತಿರುವ ಪ್ರಥಮ ಆವೃತ್ತಿಯ 'ಕರ್ನಾಟಕ ಪಿಕಲ್‌ಬಾಲ್ ಪ್ರೀಮಿಯರ್ ಲೀಗ್' (KPPL) ಟೂರ್ನಿಯ ಅಧಿಕೃತ ಜೆರ್ಸಿ ಬಿಡುಗಡೆ ಸಮಾರಂಭವು ಇತ್ತೀಚೆಗೆ ಬೆಂಗಳೂರಿನ ಫೀನಿಕ್ಸ್ ಮಾರ್ಕೆಟ್‌ಸಿಟಿಯಲ್ಲಿ ಅದ್ಧೂರಿಯಾಗಿ ನಡೆದಿದೆ.

7 ಫ್ರಾಂಚೈಸಿಗಳ ಜೆರ್ಸಿ ಅನಾವರಣ

ಈ ವರ್ಣರಂಜಿತ ಕಾರ್ಯಕ್ರಮದಲ್ಲಿ ಟೂರ್ನಿಯಲ್ಲಿ ಪಾಲ್ಗೊಳ್ಳಲಿರುವ ಎಲ್ಲಾ ಏಳು ಪ್ರಾಂಚೈಸಿಗಳಾದ ಬಳ್ಳಾರಿ ಟೈಗರ್ಸ್, ಬೆಂಗಳೂರು ಚಾರ್ಜರ್ಸ್, ಮಂಗಳೂರು ರೋರರ್ಸ್, ಕೂರ್ಗ್ ಒರಿಜಿನಲ್ಸ್, ಬೆಳಗಾವಿ ಬ್ಯಾರನ್ಸ್, ತುಮಕೂರು ಟೈಟನ್ಸ್ ಮತ್ತು ಮೈಸೂರು ರಾಯಲ್ಸ್ ತಂಡಗಳ ಆಟಗಾರರು ತಮ್ಮ ತಂಡದ ಜೆರ್ಸಿಗಳನ್ನು ಅನಾವರಣಗೊಳಿಸಿದರು.

ಕಾರ್ಯಕ್ರಮದಲ್ಲಿ KPPL ನಾಯಕರೊಂದಿಗೆ, ತಂಡಗಳ ಮಾಲೀಕರು, ತರಬೇತುದಾರರು ಹಾಗೂ ಕ್ರೀಡಾಭಿಮಾನಿಗಳು ಭಾಗವಹಿಸಿದ್ದರು. ಈ ಕೂಟದ ಪ್ರಮುಖ ಆಕರ್ಷಣೆಯಾಗಿ ಕನ್ನಡ ಚಿತ್ರರಂಗದ ಖ್ಯಾತ ನಟ ಹಾಗೂ KPPL ಬ್ರ್ಯಾಂಡ್ ಅಂಬಾಸಿಡರ್ ಶ್ರೀಮುರಳಿ ಜೆರ್ಸಿ ಅನಾವರಣಗೊಳಿಸಿ ಶುಭ ಹಾರೈಸಿದರು. KPPL ಟೂರ್ನಿ ಆರಂಭಕ್ಕೆ ಕೆಲ ದಿನಗಳು ಮಾತ್ರ ಬಾಕಿ ಇವೆ. ಇದೀಗ ಭರ್ಜರಿ ತಯಾರಿಗಳು ನಡೆಯುತ್ತಿದೆ.

ತಂಡಗಳ ಹರಾಜು ಮತ್ತು ಆಟಗಾರರ ಆಯ್ಕೆ ಪ್ರಕ್ರಿಯೆಯ ನಂತರ ನಡೆದ ಈ ಜೆರ್ಸಿ ಬಿಡುಗಡೆ ಕಾರ್ಯಕ್ರಮವು, ರಾಜ್ಯದಲ್ಲಿ ಪಿಕಲ್‌ಬಾಲ್ ಕ್ರೀಡೆಯ ಜಾಗೃತಿಯನ್ನು ಹೆಚ್ಚಿಸುವ ಜೊತೆಗೆ ಮೊದಲ ಆವೃತ್ತಿಯ ಪಂದ್ಯಾವಳಿಗೆ ಬಿರುಸಿನ ಚಾಲನೆ ನೀಡಿದೆ.

ಈ ಜರ್ಸಿ ಬಿಡುಗಡೆ ಸಮಾರಂಭದಲ್ಲಿ ಕೆಎಸ್‌ಪಿಎ ಸಂಸ್ಥಾಪಕ ಪ್ರಧಾನ ಕಾರ್ಯದರ್ಶಿ ರಜತ್ ಕಾಂಕರ್, ನಟ ಶ್ರೀಮುರಳಿ, ಎಂಟ್ರೋಪಿ ಸ್ಪೋಟ್ಸ್ನ ಆಶೀಶ್ ಸೇರಿ ಉಳಿದವರು ಉಪಸ್ಥಿತರಿದ್ದರು.

ಥ್ಯಾಂಕ್ಯೂ, ಗುಡ್‌ಬೈ ಮೆಸ್ಸಿ...! ದಿಗ್ಗಜ ಫುಟ್ಬಾಲಿಗನ ವಿದಾಯದ ಪಂದ್ಯದಲ್ಲಿ ಬಿಕ್ಕಿ ಬಿಕ್ಕಿ ಅತ್ತ ಆಟಗಾರರು, ಕೋಚ್‌

Kannadaprabha News — Thu, 08 Oct 2026 09:01:17 +0530

Lionel Messi Retires: Emotional Farewell After 21 Years: ಸಾರ್ವಕಾಲಿಕ ಶ್ರೇಷ್ಠ ಫುಟ್ಬಾಲ್‌ ಆಟಗಾರರಲ್ಲಿ ಓರ್ವರಾಗಿರುವ, ಈ ಯುಗದ ಫುಟ್ಬಾಲ್‌ ಅಭಿಮಾನಿಗಳ ಪಾಲಿನ ಹೀರೋ ಲಿಯೋನಲ್‌ ಮೆಸ್ಸಿ ತಮ್ಮ 21 ವರ್ಷಗಳ ವರ್ಣರಂಜಿತ ಅಂತಾರಾಷ್ಟ್ರೀಯ ವೃತ್ತಿ ಬದುಕಿಗೆ ತೆರೆ ಎಳೆದಿದ್ದಾರೆ.

ಬುಧವಾರ ಮುಂಜಾನೆ ಪಶ್ಚಿಮ ಆಫ್ರಿಕಾದ ದೇಶ, ಬೆನಿನ್‌ ವಿರುದ್ಧ ಪಂದ್ಯದಲ್ಲಿ ಅರ್ಜೆಂಟೀನಾದ 39 ವರ್ಷದ ಮೆಸ್ಸಿ ಕೊನೆ ಬಾರಿ ಅಂತಾರಾಷ್ಟ್ರೀಯ ಪಂದ್ಯವಾಡಿದರು. ಪಂದ್ಯದಲ್ಲಿ 2 ಬಾರಿ ಗೋಲು ಗಳಿಸಲು ನೆರವಾದ(ಅಸಿಸ್ಟ್‌) ಅವರು, 71ನೇ ನಿಮಿಷದಲ್ಲಿ ಪೆನಾಲ್ಟಿ ಕಿಕ್‌ ಮೂಲಕ ಗೋಲನ್ನೂ ಬಾರಿಸಿದರು. ಈ ಮೂಲಕ ತಮ್ಮ ಕೊನೆ ಪಂದ್ಯದಲ್ಲೂ ಅರ್ಜೆಂಟೀನಾದ ಗೆಲುವಿನ ರೂವಾರಿಯಾಗಿ ಕಂಗೊಳಿಸಿದರು.

2005ರಲ್ಲಿ ತಮ್ಮ 18ನೇ ವಯಸ್ಸಿನಲ್ಲೇ ಅರ್ಜೆಂಟೀನಾ ಪರ ಪಾದಾರ್ಪಣೆ ಮಾಡಿದ್ದ ಮೆಸ್ಸಿ, ಈವರೆಗೂ 207 ಪಂದ್ಯಗಳನ್ನಾಡಿದ್ದು, 126 ಗೋಲು ಬಾರಿಸಿ, 66 ಅಸಿಸ್ಟ್‌ ಮಾಡಿದ್ದಾರೆ. ಇವೆಲ್ಲವೂ ಅರ್ಜೆಂಟೀನಾ ಪರ ದಾಖಲೆ ಎನಿಸಿಕೊಂಡಿದೆ. ಅವರು 2 ಬಾರಿ ಕೋಪಾ ಅಮರಿಕ, ಒಂದು ಬಾರಿ ಫಿಫಾ ವಿಶ್ವಕಪ್‌ ಗೆದ್ದಿದ್ದಾರೆ. ಆದರೆ 2026ರ ಫಿಫಾ ವಿಶ್ವಕಪ್‌ ಫೈನಲ್‌ನಲ್ಲಿ ಸ್ಪೇನ್‌ ವಿರುದ್ಧ ಮೆಸ್ಸಿ ನಾಯಕತ್ವದ ಅರ್ಜೆಂಟೀನಾ ಸೋತಿತ್ತು. ಬಳಿಕ ಇತ್ತೀಚೆಗೆ ಅವರು ತಮ್ಮ ಅಂತಾರಾಷ್ಟ್ರೀಯ ವೃತ್ತಿ ಬದುಕಿಗೆ ನಿವೃತ್ತಿ ಘೋಷಿಸಿದ್ದರು.

ತುಂಬಿ ತುಳುಕಿದ ಸ್ಟೇಡಿಯಂ:

ಮೆಸ್ಸಿಯ ಕೊನೆ ಪಂದ್ಯ ವೀಕ್ಷಿಸಲು ಅರ್ಜೆಂಟೀನಾ ರಾಜಧಾನಿ ಬ್ಯೂನಸ್‌ ಐರಿಸ್‌ನಲ್ಲಿರುವ ಕ್ರೀಡಾಂಗಣದಲ್ಲಿ 85000 ಪ್ರೇಕ್ಷಕರು ನೆರೆದಿದ್ದರು. ಟಿಕೆಟ್‌ ಮೊತ್ತ ₹2.5 ಲಕ್ಷದವರೆಗೂ ಇದ್ದರೂ 90 ನಿಮಿಷಗಳಲ್ಲೇ ಎಲ್ಲಾ ಟಿಕೆಟ್‌ಗಳು ಮಾರಾಟಗೊಂಡಿದ್ದವು. 1978, 1986 ಹಾಗೂ 2022ರಲ್ಲಿ ವಿಶ್ವಕಪ್‌ ಗೆದ್ದ ಅರ್ಜೆಂಟೀನಾ ತಂಡಗಳಲ್ಲಿದ್ದ ಆಟಗಾರರು ಮೆಸ್ಸಿಯ ವಿದಾಯ ಪಂದ್ಯ ವೀಕ್ಷಿಸಲು ಕ್ರೀಡಾಂಗಣಕ್ಕೆ ಆಗಮಿಸಿದ್ದರು.

10ನೇ ನಿಮಿಷಕ್ಕೆ ಪಂದ್ಯ ಸ್ಥಗಿತ, 85000 ಫ್ಯಾನ್ಸ್‌ ಎದ್ದು ನಿಂತು ಚಪ್ಪಾಳೆ!

ಲಿಯೋನಲ್‌ ಮೆಸ್ಸಿಯ ಜೆರ್ಸಿ ಸಂಖ್ಯೆ 10. ಹೀಗಾಗಿ, ಅವರಿಗೆ ಗೌರವ ಸಲ್ಲಿಸುವ ನಿಟ್ಟಿನಲ್ಲಿ ಬುಧವಾರದ ಪಂದ್ಯವನ್ನು 10ನೇ ನಿಮಿಷಕ್ಕೆ ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಯಿತು. ಈ ವೇಳೆ ಕ್ರೀಡಾಂಗಣದಲ್ಲಿ ನೆರೆದಿದ್ದ 85000ಕ್ಕೂ ಹೆಚ್ಚು ಅಭಿಮಾನಿಗಳು ಎದ್ದು ನಿಂತು, ಚಪ್ಪಾಳೆ ತಟ್ಟಿ ದಿಗ್ಗಜ ಫುಟ್ಬಾಲಿಗನಿಗೆ ಗೌರವ ಸಲ್ಲಿಸಿದರು.

ಪಂದ್ಯದ ಬಳಿಕ ಮೆಸ್ಸಿಗೆ ಗೌರವಾರ್ಥ ರೆಡ್, ಹಳದಿ ಕಾರ್ಡ್‌ಗಳ ನೀಡಿದ ರೆಫ್ರಿ!

ಸಾಮಾನ್ಯವಾಗಿ ಫುಟ್ಬಾಲ್‌ ಪಂದ್ಯದಲ್ಲಿ ಫೌಲ್‌ ಮಾಡಿದರೆ ರೆಫ್ರಿಗಳು ಆಟಗಾರರಿಗೆ ಎಚ್ಚರಿಕೆ ನೀಡಲು ಹಳದಿ, ಬಳಿಕ ರೆಡ್ ಕಾರ್ಡ್‌ ನೀಡುತ್ತಾರೆ. ಆದರೆ ಮೆಸ್ಸಿಗೆ ಗೌರವ ಸೂಚಿಸಲು ಪಂದ್ಯದ ಬಳಿಕ ರೆಫ್ರಿ ತಮ್ಮಲ್ಲಿದ್ದ ರೆಡ್‌ ಹಾಗೂ ಯೆಲ್ಲೋ ಕಾರ್ಡ್‌ಗಳನ್ನು ಮೆಸ್ಸಿಗೆ ನೀಡಿದರು. ಕಾರ್ಡ್‌ಗಳನ್ನು ಪಡೆದ ಮೆಸ್ಸಿ ಅದನ್ನು ತಮ್ಮಲ್ಲೇ ಇಟ್ಟುಕೊಂಡರು.

ಅಪ್ಪ, ಜೆರ್ಸಿ, ಟೀಂ ಬಗ್ಗೆ

ಮೆಸ್ಸಿ ಭಾವುಕ ಮಾತುಪಂದ್ಯದ ಬಳಿಕ ಮಾತನಾಡಿದ ಮೆಸ್ಸಿ, ತಮ್ಮ ತಂದೆಯನ್ನು ನೆನೆದು ಭಾವುಕರಾದರು. ‘ಈಗ ಮಾತನಾಡುವುದೇ ಕಷ್ಟವಾಗುತ್ತಿದೆ. ನನ್ನೊಳಗೆ ಬಹಳಷ್ಟು ಭಾವನೆಗಳು ಓಡಾಡುತ್ತಿವೆ. ನಾನು ಹೇಳಬೇಕಾದ ಅನೇಕ ವಿಷಯಗಳನ್ನು ಮರೆತಿದ್ದೇನೆ. ಏಕೆಂದರೆ ಇದು ನನಗೆ ತುಂಬಾ ಕಠಿಣ ಕ್ಷಣ. ಈಗ ಮೊದಲು ನನ್ನ ಮನಸ್ಸಿಗೆ ಬರುವುದು ನನ್ನ ತಂದೆ. ಅರ್ಜೆಂಟೀನಾ ಜೆರ್ಸಿ ಧರಿಸಲು ಅವಕಾಶ ಸಿಕ್ಕಿದ್ದಕ್ಕೆ ಧನ್ಯವಾದಗಳನ್ನಷ್ಟೇ ಹೇಳಲು ನನ್ನಿಂದ ಸಾಧ್ಯ’ ಎಂದರು.

--ನಾನು ಹಿಂದೆಂದಿಗಿಂತಲೂ ಹೆಚ್ಚು ಈಗ ಮಾತನಾಡುತ್ತಿದ್ದೇನೆ. ನಾನು ಇಲ್ಲಿಂದ ಹೊರಡಲು ಬಯಸುವುದಿಲ್ಲ. ಈ ಮೈದಾನವನ್ನು ಬಿಟ್ಟು ಹೋಗಲು ನನಗೆ ಇಷ್ಟವಿಲ್ಲ. ಇನ್ನು ಮುಂದೆ ಈ ಕ್ರೀಡಾಂಗಣಕ್ಕೆ ಬರಲಾಗದು ಮತ್ತು ಅರ್ಜೆಂಟೀನಾ ರಾಷ್ಟ್ರೀಯ ತಂಡದ ಭಾಗವಾಗಲು ಸಾಧ್ಯವಿಲ್ಲ ಎಂಬುದನ್ನು ನೆನೆಯುವುದೂ ಕಷ್ಟವಾಗುತ್ತಿದೆ. ನಾನು ನಿಮ್ಮೆಲ್ಲರನ್ನು ಮಿಸ್ ಮಾಡುತ್ತೇನೆ. ಆದರೆ ನಾನು ಯಾವಾಗಲೂ ನಿಮ್ಮ ಜೊತೆಗೇ ಇರುತ್ತೇನೆ. ನಾನು ನಿಮ್ಮೆಲ್ಲರನ್ನು ಪ್ರೀತಿಸುತ್ತೇನೆ ಮತ್ತು ಅರ್ಜೆಂಟೀನಾದವ ಆಗಿರುವುದಕ್ಕೆ ಹೆಮ್ಮೆಪಡುತ್ತೇನೆ. ಇಲ್ಲಿಂದ ಹೆಮ್ಮೆಯಿಂದ ಮತ್ತು ನೆಮ್ಮದಿಯಿಂದ ಹೊರಡುತ್ತಿದ್ದೇನೆ. ಎಲ್ಲರಿಗೂ ಧನ್ಯವಾದಗಳು.

- ಲಿಯೋನಲ್‌ ಮೆಸ್ಸಿ

ಬಿಕ್ಕಿ ಬಿಕ್ಕಿ ಅತ್ತ ಆಟಗಾರರು, ಕೋಚ್‌

ಪಂದ್ಯದ ಬಳಿಕ ಮೆಸ್ಸಿ ಮಾತನಾಡುತ್ತಿದ್ದಾಗ ಕೋಚ್‌ ಲಿಯೋನಲ್‌ ಸ್ಕಲೋನಿ ಕೂಡಾ ಕಣ್ಣೀರಾದರು. ಸಹ ಆಟಗಾರ ಎನ್ಜೊ ಫೆರ್ನಾಂಡಿಜ್‌ ಬಿಕ್ಕಿ ಬಿಕ್ಕಿ ಅಳುತ್ತಿದ್ದ ದೃಶ್ಯಗಳು ಕಂಡುಬಂತು. ಈ ವೇಳೆ ಮೈದಾನದಲ್ಲಿ ಮೆಸ್ಸಿ ಪತ್ನಿ, ಮಕ್ಕಳು ಕೂಡಾ ಹಾಜರಿದ್ದರು.