Asianet Suvarna News

WWE ಸ್ಟಾರ್ ದಿ ಗ್ರೇಟ್ ಖಲಿ ಪ್ರಯಾಣಿಸುತ್ತಿದ್ದ ಕಾರು ಅಪಘಾತ, ಹೆಲ್ತ್ ಅಪ್‌ಡೇಟ್ ಕೊಟ್ಟ ರಸ್ಲಿಂಗ್ ಪಟು

Chethan Kumar — Sun, 30 Aug 2026 19:12:15 +0530

ಹರ್ಯಾಣ (ಆ.30) WWE ರಸ್ಲಿಂಗ್ ರಿಂಗ್‌ನಲ್ಲಿ ವಿದೇಶಿಯರ ನಡುವೆ ಭಾರತದ ಕೀರ್ತಿ ಪತಾಕೆ ಹಾರಿಸಿದ ಸ್ಟಾರ್ ಪಟು ದಿ ಗ್ರೇಟ್ ಖಲಿ ಅಲಿಯಾಸ್ ದಲೀಪ್ ಸಿಂಗ್ ರಾಣಾ ಕಾರು ಅಪಘಾತಕ್ಕೀಡಾಗಿದೆ. ಖಲಿ ಸಂಚರಿಸುತ್ತಿದ್ದ ಕಾರು ಹರ್ಯಾಣದ ಪಾಣಿಪತ್ ಬಳಿ ಮತ್ತೊಂದು ಕಾರಿಗೆ ಡಿಕ್ಕಿಯಾಗಿ ಅಪಘಾತಕ್ಕೀಡಾಗಿದೆ. ಅಪಘಾಕದ ಬಳಿಕ ಖಲಿ ಕಾರಿನ ವಿಡಿಯೋ, ಫೋಟೋಗಳು ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡಿತ್ತು. ಹೀಗಾಗಿ ಅಭಿಮಾನಿಗಳಲ್ಲಿ ಆತಂಕ ಮನೆ ಮಾಡಿತ್ತು. ಆದರೆ ಅಪಘಾತವಾಗಿದೆ, ಆದರೆ ತಾನು ಸುರಕ್ಷಿತವಾಗಿದ್ದೇನೆ ಎಂದು ವಿಡಿಯೋ ಸಂದೇಶವನ್ನು ದಿ ಗ್ರೇಟ್ ಖಲಿ ರವಾನಿಸಿದ್ದಾರೆ.

ಟೋಲ್ ಪ್ಲಾಜಾ ಬಳಿ ನಡೆದ ಅಪಘಾತ

ಪಾಣಿಪತ್ ಟೋಲ್ ಪ್ಲಾಜಾ ಬಳಿ ಅಪಘಾತ ನಡೆದಿದೆ. ಖಲಿ ಸಂಚರಿಸುತ್ತಿದ್ದ ಕಾರು ಹಾಗೂ ಮತ್ತೊಂದು ಕಾರಿನ ನಡುವೆ ಅಪಘಾತವಾಗಿದೆ. ಅಪಘಾತದಲ್ಲಿ ಎರಡೂ ಕಾರುಗಳು ಜಖಂಗೊಂಡಿದೆ. ಅದೃಷ್ಠವಶಾತ್ ಯಾವುದೇ ಪ್ರಾಣ ಹಾನಿ ಸಂಭವಿಸಿಲ್ಲ. ಸಣ್ಣ ಅಪಘಾತವಾಗಿದ್ದ ಕಾರಣ ಪರಿಸ್ಥಿತಿ ತಿಳಿಗೊಂಡಿದೆ. ಹೀಗಾಗಿ ದಿ ಗ್ರೇಟ್ ಖಲಿ ಈ ಕುರಿತು ಸುಮ್ಮನಾಗಿದ್ದರು. ಆದರೆ ಖಲಿ ಕಾರು ಅಪಘಾತ ಅನ್ನೋ ಸುದ್ದಿ ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡಿತ್ತು. ಹೀಗಾಗಿ ಅಭಿಮಾನಿಗಳು, ಆಪ್ತರು ಖಲಿಗೆ ಮೆಸೇಜ್, ಫೋನ್ ಮೂಲಕ ಸಂಪರ್ಕಿಸುವ ಪ್ರಯತ್ನ ಮಾಡಿದ್ದಾರೆ.

ವಿಡಿಯೋ ಮೂಲಕ ಹೆಲ್ತ್ ಅಪ್‌ಡೇಟ್ ಕೊಟ್ಟ ಖಲಿ

ಅಭಿಮಾನಿಗಳು, ಆಪ್ತರ ಫೋನ್, ಮೆಸೇಜ್ ತೀವ್ರಗೊಳ್ಳುತ್ತಿದ್ದಂತೆ ದಿ ಗ್ರೇಟ್ ಖಲಿ ತಮ್ಮ ಸೋಶಿಯಲ್ ಮೀಡಿಯಾ ಮೂಲಕ ಹೆಲ್ತ್ ಅಪ್‌ಡೇಟ್ ನೀಡಿದ್ದಾರೆ. ಸಣ್ಣ ಅಪಘಾತವಾಗಿದ್ದ ಕಾರಣ ಈ ಕುರಿತು ಯಾವುದೇ ಪ್ರತಿಕ್ರಿಯೆ ನೀಡಲು ಹೋಗಿರಲಿಲ್ಲ. ಆದರೆ ನೀವು ತೋರಿದ ಪ್ರೀತಿ, ಕಾಳಜಿಗೆ ಋಣಿಯಾಗಿದ್ದೇನೆ. ಹಲವರು ಆತಂಕ ವ್ಯಕ್ತಪಡಿಸಿ ಸಂದೇಶ ಕಳುಹಿಸಿದ್ದಾರೆ. ಹೀಗಾಗಿ ವಿಡಿಯೋ ಮೂಲಕ ಸ್ಪಷ್ಟನೆ ನೀಡುತ್ತಿದ್ದೇನೆ ಎಂದಿದ್ದಾರೆ. ಕಾರು ಅಪಘಾತವಾಗಿದ್ದು ನಿಜ. ಆದರೆ ಘಟನೆಯಲ್ಲಿ ಯಾರಿಗೂ ಹಾನಿಯಾಗಿಲ್ಲ. ನಾನು ಸಂಪೂರ್ಣವಾಗಿ ಸುರಕ್ಷಿತವಾಗಿದ್ದೇನೆ ಎಂದು ದಿ ಗ್ರೇಟ್ ಖಲಿ ಹೇಳಿದ್ದಾರೆ. ಯಾರೂ ಆತಂಕ ಪಡುವ ಅವಶ್ಯಕತೆ ಇಲ್ಲ ಎಂದಿದ್ದಾರೆ.

ಅಪಘಾತದ ಬಳಿಕ ಹಲವು ದೃಶ್ಯಗಳು ವೈರಲ್ ಆಗಿತ್ತು. ಪಾಣಿಪತ್ ಅಪಘಾತದಲ್ಲಿ ಖಲಿ ಗಾಯಗೊಂಡಿದ್ದಾರೆ ಅನ್ನೋ ಮಾಹಿತಿಗಳು ಹರಿದಾಡಿತ್ತು. ಈ ರೀತಿಯ ಯಾವ ಘಟನೆಯೂ ನಡೆದಿಲ್ಲ ಎಂದು ಖಲಿ ಸ್ಪಷ್ಟಪಡಿಸಿದ್ದಾರೆ. ಖಲಿ ಸ್ವತ ವಿಡಿಯೋ ಮೂಲಕ ಸ್ಪಷ್ಟನೆ ನೀಡಿದ ಬೆನ್ನಲ್ಲೇ ಅಭಿಮಾನಿಗಳ ಆತಂಕ ದೂರವಾಗಿದೆ.

ಚೀನಾ ತವರಲ್ಲೇ ಅವರ ಫ್ಯಾನ್ಸ್ ಸೈಲೆನ್ಸ್ ಮಾಡಿದ ಸಾತ್ವಿಕ್-ಚಿರಾಗ್ ಜೋಡಿ..! ಚೀನಾ ಮಾಸ್ಟರ್ಸ್ ಗೆದ್ದು ಬೀಗಿದ ಭಾರತದ ಶಟ್ಲರ್

Kannadaprabha News — Mon, 07 Sep 2026 10:35:26 +0530

ಶೆನ್ಜೆನ್‌(ಚೀನಾ): ಚೀನಾ ಮಾಸ್ಟರ್ಸ್‌ ಸೂಪರ್‌ 750 ಬ್ಯಾಡ್ಮಿಂಟನ್‌ ಟೂರ್ನಿಯಲ್ಲಿ ಭಾರತದ ತಾರಾ ಪುರುಷ ಡಬಲ್ಸ್‌ ಜೋಡಿ ಸಾತ್ವಿಕ್‌ ಮತ್ತು ಚಿರಾಗ್‌ ಶೆಟ್ಟಿ ಚೊಚ್ಚಲ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿದೆ.

ಭಾನುವಾರ ನಡೆದ ಫೈನಲ್‌ನಲ್ಲಿ ಭಾರತೀಯ ಜೋಡಿಯು ಚೀನಾದ ಹೆ ಜಿ ಟಿಂಗ್ ಮತ್ತು ರೆನ್ ಕ್ಸಿಯಾಂಗ್ ಯು ಅವರನ್ನು 11-21, 21-13, 21-17 ಅಂಕಗಳ ಅಂತರದಲ್ಲಿ ಸೋಲಿಸಿದರು. ಮೊದಲೆರಡು ಗೇಮ್‌ನಲ್ಲಿ ಸಮಬಲಗೊಂಡ ಬಳಿಕ ಕೊನೆ ಗೇಮ್‌ನಲ್ಲಿ ಉಭಯ ಜೋಡಿಗಳಿಂದ ಭಾರೀ ಪೈಪೋಟಿ ಕಂಡುಬಂತು. ಆದರೆ ಕೊನೆ ಕ್ಷಣದ ರೋಚಕತೆಯಲ್ಲಿ ಭಾರತೀಯ ಜೋಡಿಗೆ ಗೆಲುವು ಲಭಿಸಿತು. ಇದು ಮೂರನೇ ಪ್ರಯತ್ನದಲ್ಲಿ ಸಾತ್ವಿಕ್‌-ಚಿರಾಗ್‌ಗೆ ಲಭಿಸಿದ ಮೊದಲ ಚೀನಾ ಮಾಸ್ಟರ್ಸ್‌ ಕಿರೀಟ. ಈ ಹಿಂದೆ 2023, 2025ರಲ್ಲಿ ರನ್ನರ್‌ ಅಪ್‌ ಸ್ಥಾನಕ್ಕೆ ತೃಪ್ತಿ ಪಟ್ಟುಕೊಂಡಿದ್ದರು.

2ನೇ ಪ್ರಶಸ್ತಿ:

ಮಾಜಿ ವಿಶ್ವ ನಂ.1 ಜೋಡಿಯಾಗಿರುವ ಸಾತ್ವಿಕ್‌-ಚಿರಾಗ್‌ ಈ ಆವೃತ್ತಿಯಲ್ಲಿ 2ನೇ ಬಿಡಬ್ಲ್ಯುಎಫ್‌ ಕಿರೀಟ ತನ್ನದಾಗಿಸಿಕೊಂಡಿದೆ. ಇತ್ತೀಚೆಗಷ್ಟೇ ಸಿಂಗಾಪುರ ಓಪನ್‌ ಸೂಪರ್‌ 750 ಟೂರ್ನಿಯಲ್ಲಿ ಚಾಂಪಿಯನ್‌ ಆಗಿತ್ತು. ಥಾಯ್ಲೆಂಡ್‌ ಓಪನ್‌ ಸೂಪರ್‌ 500 ಟೂರ್ನಿಯಲ್ಲಿ ರನ್ನರ್‌-ಅಪ್‌ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತ್ತು.

11ನೇ ಬಿಡಬ್ಲ್ಯುಎಫ್‌ ಕಿರೀಟ

ಸಾತ್ವಿಕ್‌-ಚಿರಾಗ್‌ಗೆ ಇದು 11ನೇ ಬಿಡಬ್ಲ್ಯುಎಫ್‌ ಕಿರೀಟ. 2018ರಲ್ಲಿ ಈ ಜೋಡಿ ಮೊದಲ ಬಾರಿ ಹೈದರಾಬಾದ್‌ ಓಪನ್‌ ಗೆದ್ದಿತ್ತು. 2019ರಲ್ಲಿ ಥಾಯ್ಲೆಂಡ್‌ ಓಪನ್‌, 2022ರಲ್ಲಿ ಇಂಡಿಯಾ ಓಪನ್‌, ಫ್ರೆಂಚ್‌ ಓಪನ್‌, 2023ರಲ್ಲಿ ಸ್ವಿಸ್‌, ಇಂಡೋನೇಷ್ಯಾ, ಕೊರಿಯಾ ಓಪನ್‌, 2024ರಲ್ಲಿ ಫ್ರೆಂಚ್‌, ಥಾಯ್ಲೆಂಡ್‌ ಓಪನ್‌, 2026ರಲ್ಲಿ ಇಂಡೋನೇಷ್ಯಾ, ಚೀನಾ ಮಾಸ್ಟರ್ಸ್‌ ಗೆದ್ದಿದ್ದಾರೆ.

ಇಂಡೋನೇಷ್ಯಾ ಮಾಸ್ಟರ್ಸ್‌: ಗೆದ್ದ ಬೆಳ್ಳಿ ಭಾರತದ ಮಾನ್ಸಿ

ಜಕಾರ್ತ: ಇಲ್ಲಿ ನಡೆದ ಇಂಡೋನೇಷ್ಯಾ ಮಾಸ್ಟರ್ಸ್‌ ಸೂಪರ್ 100 ಬ್ಯಾಡ್ಮಿಂಟನ್‌ ಟೂರ್ನಿಯಲ್ಲಿ ಭಾರತದ ಯುವ ಆಟಗಾರ್ತಿ ಮಾನ್ಸಿ ಸಿಂಗ್‌ ಬೆಳ್ಳಿಗೆ ತೃಪ್ತಿ ಪಟ್ಟುಕೊಂಡರು. ಮಹಿಳೆಯರ ಸಿಂಗಲ್ಸ್‌ ಫೈನಲ್‌ನಲ್ಲಿ 21 ವರ್ಷದ ಮಾನ್ಸಿ, ಚೀನಾದ ವಿಶ್ವ ನಂ.81 ಆಟಗಾರ್ತಿ ಕ್ಸು ವೆನ್ ಜಿಂಗ್ ಅವರ ವಿರುದ್ಧ 16-21, 8-21 ಅಂಕಗಳ ಅಂತರದಲ್ಲಿ ಸೋತು ರಜತ ಪದಕ ಗೆದ್ದರು. ಸೆಮಿಫೈನಲ್‌ನಲ್ಲಿ ವಿಶ್ವ ನಂ.76 ಮಾನ್ಸಿ ಸಿಂಗ್‌, ಕೆನಡಾದ ರಾಚೆಲ್‌ ಚಾನ್‌ ವಿರುದ್ಧ ಗೆದ್ದಿದ್ದರು. ಫೆಬ್ರವರಿಯಲ್ಲಿ ಅವರು ಉಗಾಂಡ ಇಂಟರ್‌ನ್ಯಾಷನಲ್‌ ಚಾಲೆಂಜ್‌ನಲ್ಲಿ ರನ್ನರ್‌-ಅಪ್‌ ಆಗಿದ್ದರು.

Asian Games 2026: ಭಾರತಕ್ಕೆ ಒಂದೇ ದಿನ 4 ಪದಕ; ಶೂಟರ್‌ಗಳ ಅಬ್ಬರ, ಮೆಡಲ್‌ ಟ್ಯಾಲಿ 6ಕ್ಕೆ!

Kannadaprabha News — Tue, 22 Sep 2026 10:02:31 +0530

ನಗೋಯಾ(ಜಪಾನ್‌): 20ನೇ ಆವೃತ್ತಿ ಏಷ್ಯನ್‌ ಗೇಮ್ಸ್‌ನಲ್ಲಿ ಭಾರತ ಮತ್ತೆ 4 ಪದಕ ತನ್ನದಾಗಿಸಿಕೊಂಡಿದೆ. ಮೊದಲ ದಿನ 2 ಪದಕ ಜಯಿಸಿದ್ದ ಶೂಟರ್‌ಗಳು ಸೋಮವಾರ ಮತ್ತೆ 3 ಪದಕಕ್ಕೆ ಗುರಿ ಇಟ್ಟರು. ಇದರೊಂದಿಗೆ ಕ್ರೀಡಾಕೂಟದಲ್ಲಿ ಭಾರತದ ಶೂಟರ್‌ಗಳು ಗೆದ್ದ ಪದಕ ಸಂಖ್ಯೆ 5ಕ್ಕೆ ಏರಿಕೆಯಾಗಿದೆ. ಮತ್ತೊಂದು ಪದಕ ಮಿಶ್ರ ಮಾರ್ಷಲ್‌ ಆರ್ಟ್ಸ್‌(ಎಂಎಂಎ)ನಲ್ಲಿ ಸುಚಿಕಾ ಅವರಿಗೆ ಬಂತು. ಅವರು ಕಂಚಿಗೆ ತೃಪ್ತಿಪಟ್ಟುಕೊಂಡರು.

ಶೂಟಿಂಗ್‌ನಲ್ಲಿ ಮುಂದುವರೆದ ಪದಕ ಬೇಟೆ

ಶೂಟಿಂಗ್‌ನ ಪುರುಷರ 10 ಮೀ. ಏರ್ ರೈಫಲ್‌ ಸ್ಪರ್ಧೆಯಲ್ಲಿ ಹಿಮಾನ್ಶು ಧಿಲ್ಲೋನ್‌, ರುದ್ರಾಂಕ್ಷ್‌ ಪಾಟೀಲ್‌ ಹಾಗೂ ಪಾರ್ಥ್‌ ಮಾನೆ ಅವರಿದ್ದ ತಂಡ 1890.1 ಅಂಕಗಳೊಂದಿಗೆ ಬೆಳ್ಳಿ ಪದಕ ಗೆದ್ದಿತು. ಚೀನಾ ತಂಡ 1899.0 ಅಂಕಗಳೊಂದಿಗೆ ಚಿನ್ನಕ್ಕೆ ಮುತ್ತಿಟ್ಟರೆ, ದಕ್ಷಿಣ ಕೊರಿಯಾ ತಂಡ 1884.2 ಸಂಪಾದಿಸಿ ಕಂಚಿನ ಪದಕಕ್ಕೆ ತೃಪ್ತಿಪಟ್ಟುಕೊಂಡತು.

ಭಾರತದ ಈ ಮೂವರು ಶೂಟರ್‌ಗಳ ಪೈಕಿ ಇಬ್ಬರು ವೈಯಕ್ತಿಕ ವಿಭಾಗದ ಸ್ಪರ್ಧೆಯಲ್ಲಿ ಡಬಲ್‌ ಪೋಡಿಯಂ ಫಿನಿಶ್‌ ಸಾಧನೆ ಮಾಡಿದರು. 21ನೇ ಹುಟ್ಟುಹಬ್ಬದ ದಿನವೇ ಉತ್ತಮ ಪ್ರದರ್ಶನ ತೋರಿದ ಹಿಮಾನ್ಶು, 252.4 ಅಂಕಗಳೊಂದಿಗೆ ಬೆಳ್ಳಿ ಪದಕವನ್ನು ಕೊರಳಿಗೇರಿಸಿಕೊಂಡರು. ಉತ್ತಮ ಆರಂಭ ಪಡೆದು ಚಿನ್ನದ ಮೇಲೆ ಕಣ್ಣಿಟ್ಟಿದ್ದ ರುದ್ರಾಂಕ್ಷ್‌ ಕೊನೆಗೆ 230.9 ಅಂಕಗಳೊಂದಿಗೆ ಕಂಚಿನ ಪದಕಕ್ಕೆ ತೃಪ್ತರಾದರು. ಚೀನಾದ ಶೆಂಗ್‌ ಲಿಹಾವೊ 254.2 ಅಂಕಗಳೊಂದಿಗೆ ಏಷ್ಯನ್‌ ದಾಖಲೆ ನಿರ್ಮಿಸಿ ಚಿನ್ನ ಪಡೆದರು. ಇದಕ್ಕೂ ಮುನ್ನ ಅರ್ಹತಾ ಸುತ್ತಿನಲ್ಲಿ ಪಾರ್ಥ್‌ ಮಾನೆ ಅಗ್ರ-8ರಲ್ಲಿ ಸ್ಥಾನ ಪಡೆಯಲು ವಿಫಲರಾಗಿ, ಫೈನಲ್‌ಗೇರುವ ಅವಕಾಶ ತಪ್ಪಿಸಿಕೊಂಡಿದ್ದರು.

ರುಚಿಕಾಗೆ ಕಂಚು:

ಮಿಶ್ರ ಮಾರ್ಷಲ್‌ ಆರ್ಟ್ಸ್‌ನ ಮಹಿಳೆಯರ ಸಾಂಪ್ರದಾಯಿಕ 60 ಕೆ.ಜಿ. ವಿಭಾಗದ ಸ್ಪರ್ಧೆಯಲ್ಲಿ ಸುಚಿತಾ ತಾರಿಯಲ್‌ ಅವರು ಕಂಚಿನ ಪದಕಕ್ಕೆ ತೃಪ್ತಿಪಟ್ಟುಕೊಂಡರು. ಅವರು ಸೆಮಿಫೈನಲ್‌ನಲ್ಲಿ ಸಿಂಗಾಪುರದ ಹ್ಯು ಹೂನ್‌ ಟಿಯೊ ವಿರುದ್ಧ ಸೋಲನುಭವಿಸಿದರು.

ಸದ್ಯ ಭಾರತ ಗೇಮ್ಸ್‌ನಲ್ಲಿ 4 ಬೆಳ್ಳಿ, 2 ಕಂಚು ಸೇರಿದಂತೆ ಒಟ್ಟು 6 ಪದಕ ಗೆದ್ದಿದೆ. ಆದರೆ ಪಟ್ಟಿಯಲ್ಲಿ 12ನೇ ಸ್ಥಾನಕ್ಕೆ ಕುಸಿದಿದೆ.

US Open 2026: ಆಲ್ಕರಜ್‌ಗೆ ಬಿಗ್‌ ಶಾಕ್‌; 4.5 ಗಂಟೆ ಹೋರಾಡಿ ಶೆಲ್ಟನ್‌ ಸೆಮೀಸ್‌ಗೆ ಲಗ್ಗೆ!

Kannadaprabha News — Thu, 10 Sep 2026 09:17:10 +0530

ನ್ಯೂಯಾರ್ಕ್: ಯುಎಸ್‌ ಓಪನ್‌ ಗ್ರ್ಯಾನ್‌ಸ್ಲಾಂ ಟೆನಿಸ್‌ ಟೂರ್ನಿಯಲ್ಲಿ ಮತ್ತೊಂದು ಅಚ್ಚರಿಯ ಫಲಿತಾಂಶ ಹೊರಬಿದ್ದಿದೆ. ಹಾಲಿ ಚಾಂಪಿಯನ್‌, ಕಳೆದ 4 ವರ್ಷಗಳಲ್ಲಿ 7 ಗ್ರ್ಯಾನ್‌ಸ್ಲಾಂ ಕಿರೀಟ ಗೆದ್ದಿರುವ ಸ್ಪೇನ್‌ನ ಯುವ ಸೂಪರ್‌ಸ್ಟಾರ್ ಕಾರ್ಲೊಸ್‌ ಆಲ್ಕರಜ್‌ರನ್ನು ಅಮೆರಿಕದ ಯುವ ಟೆನಿಸಿಗ ಬೆನ್‌ ಶೆಲ್ಟನ್‌ ಸೋಲಿಸಿದ್ದಾರೆ. ಈ ಮೂಲಕ 3 ವರ್ಷಗಳ ಬಳಿಕ ಶೆಲ್ಟನ್ ಟೂರ್ನಿಯಲ್ಲಿ ಸೆಮಿಫೈನಲ್‌ ಪ್ರವೇಶಿಸಿದರೆ, ಕಳೆದ ವರ್ಷ ಗೆದ್ದಿದ್ದ ಟ್ರೋಫಿಯನ್ನು ಉಳಿಸಿಕೊಳ್ಳಲು ಆಲ್ಕರಜ್‌ ವಿಫಲರಾಗಿದ್ದಾರೆ.

ಬುಧವಾರ 4.30 ಗಂಟೆಗಳ ಕಾಲ ನಡೆದ ಪುರುಷರ ಸಿಂಗಲ್ಸ್‌ ಕ್ವಾರ್ಟರ್‌ ಫೈನಲ್‌ನಲ್ಲಿ 8ನೇ ಶ್ರೇಯಾಂಕಿತ ಶೆಲ್ಟನ್‌ 6-7(5-7), 6-1, 6-3, 1-6, 7-6(10-7) ಸೆಟ್‌ಗಳಲ್ಲಿ ರೋಚಕ ಗೆಲುವು ಸಾಧಿಸಿದರು. ಮೊದಲ ಸೆಟ್‌ನ ರೋಚಕ ಕಾದಾಟದ ಬಳಿಕ 2 ಮತ್ತು 3ನೇ ಸೆಟ್‌ನಲ್ಲಿ ಶೆಲ್ಟನ್ ಭರ್ಜರಿ ಜಯಗಳಿಸಿದರು. 4ನೇ ಸೆಟ್‌ನಲ್ಲಿ ಅವರಿಗೆ ಹಿನ್ನಡೆಯಾದರೂ, ಕೊನೆ ಸೆಟ್‌ನಲ್ಲಿ ಇಬ್ಬರಿಂದಲೂ ತೀವ್ರ ಪೈಪೋಟಿ ಕಂಡುಬಂತು. ಪಂದ್ಯದ ಆರಂಭದಲ್ಲೇ 146 ಕಿ.ಮೀ. ವೇಗದಲ್ಲಿ ಸರ್ವ್‌ ಮಾಡುವ ಮೂಲಕ ಗಮನಸೆಳೆದಿದ್ದ ಶೆಲ್ಟನ್‌, ಕೊನೆಯಲ್ಲಿ ಮತ್ತಷ್ಟು ಆಕ್ರಮಣಕಾರಿ ಆಟ ಪ್ರದರ್ಶಿಸಿ ಗೆಲುವು ತಮ್ಮದಾಗಿಸಿಕೊಂಡರು. ಕೊನೆ ಸೆಟ್‌ನ ಟೈ ಬ್ರೇಕರ್‌ನಲ್ಲಿ ಅವರು 2-5ರಿಂದ ಹಿನ್ನಡೆಯಲ್ಲಿದ್ದರೂ ಬಳಿಕ 10-7ರಲ್ಲಿ ಗೆಲುವು ಸಾಧಿಸಿ ಸೆಮೀಸ್‌ ತಲುಪಿದರು. ಅವರು ಇದೇ ಮೊದಲ ಬಾರಿ ಗ್ರ್ಯಾನ್‌ಸ್ಲಾಂ ಫೈನಲ್‌ಗೇರುವ ವಿಶ್ವಾಸದಲ್ಲಿದ್ದು, ಸೆಮೀಸ್‌ನಲ್ಲಿ ಅಮೆರಿಕದ ಫ್ರಾನ್ಸೆಸ್‌ ಟಿಯಾಫೊ ವಿರುದ್ಧ ಆಡಲಿದ್ದಾರೆ.

ಮಧ್ಯರಾತ್ರಿ 3.30ಕ್ಕೆ ಕೊನೆಗೊಂಡ ಪಂದ್ಯ!

ಈ ಪಂದ್ಯ ಅಮೆರಿಕ ಕಾಲಮಾನ ರಾತ್ರಿ 11 ಗಂಟೆಗೆ ಆರಂಭಗೊಂಡಿತು. ಸುಮಾರು 4.30 ಗಂಟೆಗಳ ಕಾಲ ನಡೆದ ಪಂದ್ಯ ಮಧ್ಯರಾತ್ರಿ 3.30ಕ್ಕೆ ಕೊನೆಗೊಂಡಿತು. ಮಧ್ಯರಾತ್ರಿಯಾದರೂ ಪ್ರೇಕ್ಷಕರ ಗ್ಯಾಲರಿ ತುಂಬಿತ್ತು. ಆಲ್ಕರಜ್‌ಗೆ ಹೆಚ್ಚಿನ ಪ್ರಮಾಣದಲ್ಲಿ ಅಭಿಮಾನಿಗಳ ಬೆಂಬಲವಿದ್ದರೆ, ತವರಿನ ಪ್ರೇಕ್ಷಕರ ಬೆಂಬಲ ಶೆಲ್ಟನ್‌ಗೆ ಲಭಿಸಿತು.

ಸೋಲಿಸಿದ ಎದುರಾಳಿಯನ್ನೇ ಬಿಗಿದಪ್ಪಿ ಕಣ್ಣೀರಿಟ್ಟ ಆಟಗಾರ!

ನ್ಯೂಯಾರ್ಕ್: ಮಂಗಳವಾರ ರಾತ್ರಿ ಯುಎಸ್ ಓಪನ್‌ ಟೆನಿಸ್‌ ಟೂರ್ನಿ ಭಾವನಾತ್ಮಕ ಕ್ಷಣಕ್ಕೆ ಸಾಕ್ಷಿಯಾಯಿತು. ಪುರುಷರ ಸಿಂಗಲ್ಸ್‌ ಕ್ವಾರ್ಟರ್ ಫೈನಲ್‌ನಲ್ಲಿ ತಮ್ಮನ್ನು ಸೋಲಿಸಿದ ಫ್ರಾನ್ಸೆಸ್‌ ಟಿಯಾಫೋ ಅವರನ್ನು ಪಂದ್ಯದ ಬಳಿಕ ಅಲೆಕ್ಸ್ ಮೈಕಲ್‌ಸನ್‌ ಬಿಗಿದಪ್ಪಿ ಕಣ್ಣೀರಿಟ್ಟಿದ್ದು, ಈ ದೃಶ್ಯ ಭಾರೀ ವೈರಲ್‌ ಆಗಿದೆ.

ಇವರಿಬ್ಬರೂ ಅಮೆರಿಕದ ಆಟಗಾರರು. ಮೊದಲೆರಡು ಸೆಟ್‌ನಲ್ಲಿ ಅಲೆಕ್ಸ್ ಗೆದ್ದರೂ, ಕೊನೆ 3 ಸೆಟ್‌ನಲ್ಲಿ ಅದ್ಭುತ ಕಮ್‌ಬ್ಯಾಕ್‌ ಮಾಡಿದ ಫ್ರಾನ್ಸೆಸ್‌ ಪಂದ್ಯವನ್ನು 5-7, 3-6, 7-5, 6-3, 7-6(10-6) ಅಂತರದಲ್ಲಿ ತಮ್ಮದಾಗಿಸಿಕೊಂಡರು. ಗೆದ್ದ ಸಂಭ್ರಮದ ನಡುವೆ ಅಲೆಕ್ಸ್‌ರತ್ತ ಬಂದು ಫ್ರಾನ್ಸೆಸ್‌ ಆಲಂಗಿಸಿದರು. ಈ ವೇಳೆ ಫ್ರಾನ್ಸೆಸ್‌ ಭುಜಕ್ಕೆ ಮುಖ ಒತ್ತಿದ ಅಲೆಕ್ಸ್‌ ಕೆಲ ಕಾಲ ಕಣ್ಣೀರಾದರು. ಅವರನ್ನು ಫ್ರಾನ್ಸೆಸ್‌ ಸಂತೈಸುವ ದೃಶ್ಯ ವ್ಯಾಪಕವಾಗಿ ಹರಿದಾಡುತ್ತಿದೆ.

ಸಬಲೆಂಕಾ ಸೆಮಿಫೈನಲ್‌ಗೆ

ಮಹಿಳಾ ಸಿಂಗಲ್ಸ್‌ನಲ್ಲಿ ಹಾಲಿ ಚಾಂಪಿಯನ್‌ ಸಬಲೆಂಕಾ ಸೆಮಿಫೈನಲ್‌ ಪ್ರವೇಶಿಸಿದರು. ಕ್ವಾರ್ಟರ್‌ ಫೈನಲ್‌ನಲ್ಲಿ ಅವರು ಜೆಕ್‌ ಗಣರಾಜ್ಯದ ಲಿಂಡಾ ನೊಸ್ಕೋವಾ ವಿರುದ್ಧ ಒಂದು ಹಂತದಲ್ಲಿ ಸೋಲಿನ ಸುಳಿಯಲ್ಲಿ ಸಿಲುಕಿದ್ದರೂ, ಪುಟಿದೆದ್ದ ಅವರು 7-6(7-1), 3-6, 7-6(10-7) ಸೆಟ್‌ಗಳಲ್ಲಿ ರೋಚಕ ಗೆಲುವು ಸಾಧಿಸಿದರು. ಸೆಮೀಸ್‌ನಲ್ಲಿ ಸಬಲೆಂಕಾಗೆ ಜೆಸ್ಸಿಕಾ ಪೆಗುಲಾ ಸವಾಲು ಎದುರಾಗಲಿದೆ.

ಹಾಲಿ ಚಾಂಪಿಯನ್‌ ಕಾರ್ಲೋಸ್‌ ಆಲ್ಕರಜ್‌, ಅರೈನಾ ಸಬಲೆಂಕಾ ಅಬ್ಬರ; US Open 3ನೇ ಸುತ್ತಿಗೆ ಲಗ್ಗೆ

Kannadaprabha News — Fri, 04 Sep 2026 09:11:28 +0530

ನ್ಯೂಯಾರ್ಕ್‌: ಯುಎಸ್‌ ಓಪನ್‌ ಗ್ರ್ಯಾನ್‌ಸ್ಲಾಂ ಟೆನಿಸ್‌ ಟೂರ್ನಿಯಲ್ಲಿ ಹಾಲಿ ಚಾಂಪಿಯನ್‌ ಕಾರ್ಲೋಸ್‌ ಆಲ್ಕರಜ್‌ ಹಾಗೂ ಅರೈನಾ ಸಬಲೆಂಕಾ ಅವರು ಕ್ರಮವಾಗಿ ಪುರುಷ ಹಾಗೂ ಮಹಿಳಾ ಸಿಂಗಲ್ಸ್‌ನಲ್ಲಿ 3ನೇ ಸುತ್ತು ಪ್ರವೇಶಿಸಿದ್ದಾರೆ.

ಇತ್ತೀಚೆಗಷ್ಟೇ ಗಾಯದಿಂದ ಚೇತರಿಸಿಕೊಂಡಿದ್ದ ಸ್ಪೇನ್‌ನ ಯುವ ಸೂಪರ್‌ಸ್ಟಾರ್‌ ಆಲ್ಕರಜ್ ಅವರು 2ನೇ ಸುತ್ತಿನ ಪಂದ್ಯದಲ್ಲಿ ಪೋರ್ಚುಗಲ್‌ನ ಜೈಮೀ ಫಾರಿಯಾ ವಿರುದ್ಧ 4-6, 6-0, 6-3, 6-2 ಸೆಟ್‌ಗಳಲ್ಲಿ ಜಯಭೇರಿ ಬಾರಿಸಿದರು. ಇದೇ ವೇಳೆ 2021ರ ಚಾಂಪಿಯನ್‌, ರಷ್ಯಾದ ಡ್ಯಾನಿಲ್‌ ಮೆಡ್ವೆಡೆವ್‌ ಅವರು ಅಮೆರಿಕದ ಸೆಬಾಸ್ಟಿಯನ್‌ ಗೊರ್ನಿ ವಿರುದ್ಧ ಗೆದ್ದು 3ನೇ ಸುತ್ತು ತಲುಪಿದರು. ಅಮೆರಿಕದ 8ನೇ ಶ್ರೇಯಾಂಕಿತ ಬೆನ್‌ ಶೆಲ್ಟನ್‌, ಆಸ್ಟ್ರೇಲಿಯಾದ 6ನೇ ಶ್ರೇಯಾಂಕಿತ ಅಲೆಕ್ಸ್ ಡೆ ಮಿನೌರ್‌ ಕೂಡಾ 3ನೇ ಸುತ್ತಿಗೇರಿದರು. ಆದರೆ ಯುವ ಆಟಗಾರ ಆ್ಯಂಡ್ರೆ ರುಬ್ಲೆವ್‌ ಸೋತು ಹೊರಬಿದ್ದರು.

ಸಬಲೆಂಕಾ ಜಯಭೇರಿ:

ಮಹಿಳೆಯರ ವಿಶ್ವ ನಂ.1 ಆಟಗಾರ್ತಿ, ಬೆಲಾರಸ್‌ನ ಸಬಲೆಂಕಾ ಅವರು ರಷ್ಯಾದ ಪೋಲಿನಾ ಲಾಟ್ಚೆಂಕೊ ವಿರುದ್ಧ ಕೇವಲ 53 ನಿಮಿಷಗಳಲ್ಲೇ 6-1, 6-1 ಸೆಟ್‌ಗಳಲ್ಲಿ ಭರ್ಜರಿ ಜಯಭೇರಿ ಬಾರಿಸಿದರು. ಇತ್ತೀಚೆಗೆ ವಿಂಬಲ್ಡನ್‌ ಟೆನಿಸ್‌ನಲ್ಲಿ ಫೈನಲ್‌ ತಲುಪಿದ್ದ ಜೆಕ್‌ ಗಣರಾಜ್ಯದ ಕ್ಯಾರೊಲಿನಾ ಮುಕೋವಾ ಅವರು ಬ್ರಿಟನ್‌ನ ಕ್ಯಾಟೀ ಬೌಲ್ಟರ್ ವಿರುದ್ಧ 6-1, 6-0 ಸೆಟ್‌ಗಳಲ್ಲಿ ಗೆದ್ದರು. ಉಕ್ರೇನ್‌ 9ನೇ ಶ್ರೇಯಾಂಕಿತೆ ಎಲಿನಾ ಸ್ವಿಟೋಲಿನಾ, 2024ರಲ್ಲಿ ಫ್ರೆಂಚ್ ಓಪನ್‌ ಹಾಗೂ ವಿಂಬಲ್ಡನ್‌ ಫೈನಲ್‌ಗೇರಿದ್ದ ಇಟಲಿಯ ಜಾಸ್ಮೀನ್‌ ಪೌಲಿನಿ ಕೂಡಾ 3ನೇ ಸುತ್ತು ತಲುಪಿದರು.

ಭಾರತದ ಶ್ರೀರಾಮ್‌, ಯೂಕಿ ಭಾಂಬ್ರಿ ಸ್ಪರ್ಧೆ

ಈ ಬಾರಿ ಸಿಂಗಲ್ಸ್‌ನಲ್ಲಿ ಭಾರತೀಯರು ಸ್ಪರ್ಧಿಸದಿದ್ದರೂ, ಪುರುಷರ ಡಬಲ್ಸ್‌ನಲ್ಲಿ ಭಾರತದ ಇಬ್ಬರು ಕಣಕ್ಕಿಳಿಯಲಿದ್ದಾರೆ. ತಮಿಳುನಾಡಿನ ಶ್ರೀರಾಮ್‌ ಬಾಲಾಜಿ ಅವರು ಅಮೆರಿಕದ ಎವಾನ್‌ ಕಿಂಗ್ ಜೊತೆಗೂಡಿ ಆಡಲಿದ್ದು, ಯೂಕಿ ಭಾಂಬ್ರಿ ನ್ಯೂಜಿಲೆಂಡ್‌ನ ಮೈಕಲ್‌ ವೆನಸ್‌ ಜೊತೆಗೂಡಿ ಸ್ಪರ್ಧಿಸಲಿದ್ದಾರೆ.

ಮೆಸ್ಸಿಗೆ ಗೌರವ ಸೂಚಿಸಲು ಅರ್ಜೆಂಟೀನಾ ದೇಶದೆಲ್ಲೆಡೆ ಫುಟ್ಬಾಲ್‌ ಪಂದ್ಯದ 10ನೇ ನಿಮಿಷ ವೇಳೆ ಪಂದ್ಯ ಸ್ಥಗಿತ!

ಬ್ಯೂನಸ್‌ ಐರಿಸ್‌: ದಿಗ್ಗಜ ಫುಟ್ಬಾಲ್‌ ಆಟಗಾರ, ಅರ್ಜೆಂಟೀನಾದ ಲಿಯೋನಲ್‌ ಮೆಸ್ಸಿ ಇತ್ತೀಚೆಗಷ್ಟೇ ಅಂತಾರಾಷ್ಟ್ರೀಯ ಫುಟ್ಬಾಲ್‌ಗೆ ನಿವೃತ್ತಿ ಪ್ರಕಟಿಸಿದ್ದು, ಅವರಿಗೆ ಗೌರವ ಸಲ್ಲಿಸಲು ಅರ್ಜೆಂಟೀನಾ ಫುಟ್ಬಾಲ್‌ ಒಕ್ಕೂಟ(ಎಎಫ್‌ಎ) ವಿಶೇಷ ಹೆಜ್ಜೆ ಇಟ್ಟಿದೆ. ದೇಶದೆಲ್ಲೆಡೆ ಪುರುಷ, ಮಹಿಳೆಯರ ಡಿವಿಷನ್‌ ಸೇರಿದಂತೆ ಎಲ್ಲಾ ವಿಭಾಗದಲ್ಲೂ ಪ್ರತಿ ತಂಡಗಳ ಮುಂಬರುವ ಪಂದ್ಯದಲ್ಲಿ 10ನೇ ನಿಮಿಷದಲ್ಲಿ ಪಂದ್ಯವನ್ನು 1 ನಿಮಿಷ ಕಾಲ ಸ್ಥಗಿತಗೊಳಿಸಿ, ಮೆಸ್ಸಿಯ ವೃತ್ತಿಜೀವನವನ್ನು ಗೌರವಿಸುವ ಸಲುವಾಗಿ ಚಪ್ಪಾಳೆ ತಟ್ಟಬೇಕು ಎಂದು ಎಎಫ್‌ಎ ನಿರ್ದೇಶಿಸಿದೆ. ಅಲ್ಲದೆ, ಕ್ರೀಡಾಂಗಣಗಳಲ್ಲಿ ಪಂದ್ಯ ಆರಂಭಕ್ಕೂ ಮುನ್ನ ಮೆಸ್ಸಿಗೆ ಗೌರವ ಸಲ್ಲಿಸುವ ವಿಡಿಯೋ ಪ್ರದರ್ಶಿಸಬೇಕೆಂದು ತಿಳಿಸಿದೆ.

ಬೆಂಗಳೂರಲ್ಲಿ ಟೆಕ್ ಮಹೀಂದ್ರ ಗ್ಲೋಬಲ್ ಟೆಸ್ ಲೀಗ್ ಉದ್ಘಾಟನೆ, ಮ್ಯಾಗ್ನಸ್, ವಿಶ್ವನಾಥನ್ ಭಾಗಿ

Chethan Kumar — Sat, 05 Sep 2026 18:00:47 +0530

ಬೆಂಗಳೂರು (ಸೆ.04): ಟೆಕ್ ಮಹೀಂದ್ರಾ ಮತ್ತು ಫಿಡೆ ಜಂಟಿಯಾಗಿ ಆಯೋಜಿಸುತ್ತಿರುವ ಗ್ಲೋಬಲ್ ಚೆಸ್ ಲೀಗ್‌ನ ನಾಲ್ಕನೇ ಆವೃತ್ತಿ ಬೆಂಗಳೂರಿನಲ್ಲಿ ಉದ್ಘಾಟನೆಗೊಂಡಿದೆ. ವಿಶ್ವದ ನಂಬರ್ ಒನ್ ಆಟಗಾರ ಮ್ಯಾಗ್ನಸ್ ಕಾರ್ಲ್ಸನ್, ಭಾರತದ ದಿಗ್ಗಜ ಚೆಸ್ ಪಟು ವಿಶ್ವನಾಥನ್ ಆನಂದ್ ಸೇರಿದಂತೆ ಪ್ರಮುಖ ಚೆಸ್ ಪಟುಗಳು ಪಾಲ್ಗೊಂಡಿದ್ದರು. ಒಂಬತ್ತು ದಿನಗಳ ಕಾಲ ನಡೆಯುವ ಈ ಪಂದ್ಯಾವಳಿಯಲ್ಲಿ ವಿಶ್ವದ ಅಗ್ರ ಚೆಸ್ ತಾರೆಗಳು ಭಾಗವಹಿಸಲಿದ್ದಾರೆ.

ಚೆಸ್ ಲೀಗ್ ಹಬ್ಬ ಆರಂಭ

ವಿಶ್ವದ ನಂಬರ್ ಒನ್ ಆಟಗಾರ ಮ್ಯಾಗ್ನಸ್ ಕಾರ್ಲ್ಸನ್ ಒಂದು ವರ್ಷದ ವಿರಾಮದ ಬಳಿಕ ಮರಳಿದ್ದು, ಹಾಲಿ ಚಾಂಪಿಯನ್ ಅಲ್ಪೈನ್ ಎಪಿಎಲ್ ಪೈಪರ್ಸ್ ತಂಡವನ್ನು ಸೇರಿದ್ದಾರೆ. ಎರಡು ಬಾರಿ ಚಾಂಪಿಯನ್ ತ್ರಿವೇಣಿ ಕಾಂಟಿನೆಂಟಲ್ ಕಿಂಗ್ಸ್ ತಂಡವು ತನ್ನ ಪ್ರಮುಖ ಆಟಗಾರರನ್ನು ಉಳಿಸಿಕೊಂಡು ಮೂರನೇ ಪ್ರಶಸ್ತಿ ಗೆಲ್ಲುವ ಗುರಿ ಹೊಂದಿದೆ. ಉದ್ಘಾಟನಾ ಪಂದ್ಯದಲ್ಲಿ ಪಿಬಿಜಿ ಅಲಾಸ್ಕನ್ ನೈಟ್ಸ್ ಮತ್ತು ಫೈಯರ್ಸ್ ಅಮೆರಿಕನ್ ಗ್ಯಾಂಬಿಟ್ಸ್ ತಂಡಗಳು ಮುಖಾಮುಖಿಯಾಗಲಿವೆ. ಒಟ್ಟು 32 ಪಂದ್ಯಗಳು ನಡೆಯಲಿದ್ದು, ಅಗ್ರ ಎರಡು ತಂಡಗಳು ಸೆಪ್ಟೆಂಬರ್ 13ರಂದು ನಡೆಯುವ ಗ್ರ್ಯಾಂಡ್ ಫಿನಾಲೆಗೆ ಅರ್ಹತೆ ಪಡೆಯಲಿವೆ.

ಜವೋಖಿರ್ ಸಿಂದರೋವ್, ಅಲಿರೆಜಾ ಫಿರೋಜಾ, ಮ್ಯಾಕ್ಸಿಮ್ ವಾಶಿಯೆರ್-ಲಾಗ್ರಾವ್, ವಿಶ್ವನಾಥನ್ ಆನಂದ್ ಮತ್ತು ಇಯಾನ್ ನೆಪೊಮ್ನಿಯಾಶ್ಚಿ ಅವರು ತಮ್ಮ ತಂಡಗಳನ್ನು ಐಕಾನ್ ಆಟಗಾರರಾಗಿ ಮುನ್ನಡೆಸಲಿದ್ದಾರೆ. 15 ವರ್ಷದ ಟರ್ಕಿಶ್ ಗ್ರ್ಯಾಂಡ್ ಮಾಸ್ಟರ್ ಯಾಗಿಜ್ ಕಾನ್ ಎರ್ಡೋಗ್ಮುಶ್ ಅಲಾಸ್ಕನ್ ನೈಟ್ಸ್ ತಂಡದ ಪರ ಪದಾರ್ಪಣೆ ಮಾಡಲಿದ್ದಾರೆ. ದುಬೈ ಮತ್ತು ಲಂಡನ್‌ನಲ್ಲಿನಡೆದ ಮೊದಲ ಎರಡು ಋುತುಗಳಲ್ಲಿಕಾರ್ಲ್‌ಸನ್‌ ಪೈಪರ್ಸ್‌ ತಂಡದ ಪರ ಆಡಿದ್ದರು. ಆದರೆ ಮುಂಬೈನಲ್ಲಿನಡೆದ ಕಳೆದ ಸೀಸನ್‌ನಿಂದ ಅವರು ಹಿಂದೆ ಸರಿದಿದ್ದರು. ಆ ಸೀಸನ್‌ನಲ್ಲಿಪೈಪರ್ಸ್‌ ತಂಡವು ತ್ರಿವೇಣಿ ಕಾಂಟಿನೆಂಟಲ್‌ ಕಿಂಗ್ಸ್‌ ತಂಡಕ್ಕೆ ಸತತ ಮೂರನೇ ಪ್ರಶಸ್ತಿ ಗೆಲ್ಲುವ ಅವಕಾಶವನ್ನು ನಿರಾಕರಿಸಿತ್ತು.

ಈ ಬಾರಿ ಹೊಸ ಆವಿಷ್ಕಾರಗಳನ್ನು ಪರಿಚಯಿಸಲಾಗಿದ್ದು, ಪ್ರೇಕ್ಷಕರು ವೈಯಕ್ತಿಕ ಹೆಡ್‌ಸೆಟ್‌ಗಳ ಮೂಲಕ ಕಾಮೆಂಟರಿ ಕೇಳಬಹುದು. ಪಂದ್ಯಗಳ ವೇಳೆ ತಂಡದ ಕೋಚ್‌ಗಳು ಮತ್ತು ನಾಯಕರ ಹೃದಯ ಬಡಿತವನ್ನು ಮಾನಿಟರ್ ಮಾಡಲಾಗುತ್ತದೆ. ಭಾರತೀಯ ಪ್ರೇಕ್ಷಕರಿಗಾಗಿ ಮೊದಲ ಬಾರಿಗೆ ಹಿಂದಿ ಭಾಷೆಯ ಕಾಮೆಂಟರಿ ಲಭ್ಯವಿರಲಿದೆ.

ದೇಶಕ್ಕಾಗಿ 4 ಚಿನ್ನದ ಪದಕ ಗೆದ್ದ ಕ್ರೀಡಾಪಟುವಿನ ಕಣ್ಣೀರ ಕಥೆ: ಕುಟುಂಬ ಸಾಕಲು ಹಗಲಲ್ಲಿ ಕ್ಯಾಬ್ ಚಾಲನೆ, ಸಂಜೆ ತರಕಾರಿ ವ್ಯಾಪಾರ!

Naveen Kodase — Thu, 03 Sep 2026 14:44:35 +0530

ಬೆಂಗಳೂರು: ರಾಂಚಿಯ ಅರ್ಗೊರಾ ಚೌಕಿಯಲ್ಲಿ ಅಮರ್‌ದೀಪ್ ಕುಮಾರ್, ಕೈಯಲ್ಲಿ ತಕ್ಕಡಿ ಹಿಡಿದು ತರಕಾರಿ ವ್ಯಾಪಾರ ಮಾಡುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಈ ವೀಡಿಯೊದಲ್ಲಿ, ಒಂದು ಕಡೆ ಅಮರ್‌ದೀಪ್ ಗ್ರಾಹಕರಿಗಾಗಿ ತರಕಾರಿಗಳನ್ನು ತೂಗುತ್ತಿರುವುದು ಕಂಡುಬಂದರೆ, ಇನ್ನೊಂದು ಕಡೆ ಅವರ ಹಿಂದಿನ ಗೋಡೆಯ ಮೇಲೆ ದೇಶಕ್ಕಾಗಿ ಗೆದ್ದ ಹಲವಾರು ಪದಕಗಳು ನೇತಾಡುತ್ತಿರುವುದು ಕಾಣಿಸುತ್ತದೆ. ಈ ಚಿತ್ರವು ಕ್ರೀಡಾಪಟುವಿನ ಅಸಹಾಯಕತೆಯನ್ನು ತೋರಿಸುವುದಲ್ಲದೆ, ಹೋರಾಟ, ಧೈರ್ಯ ಮತ್ತು ವ್ಯವಸ್ಥೆಯ ನಡುವೆ ಇರುವ ಕಟು ಸತ್ಯವನ್ನೂ ಪ್ರತಿಬಿಂಬಿಸುತ್ತದೆ.

ಅಮರ್‌ದೀಪ್ ಓರ್ವ ಪ್ರತಿಭಾನ್ವಿತ ಥ್ರೋಬಾಲ್ ಆಟಗಾರ:

ಅಂದಹಾಗೆ ಅಮರ್‌ದೀಪ್ ಸಾಮಾನ್ಯ ತರಕಾರಿ ವ್ಯಾಪಾರಿಯಲ್ಲ. ಅವರು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಭಾರತವನ್ನು ಪ್ರತಿನಿಧಿಸಿರುವ ಥ್ರೋಬಾಲ್ ಆಟಗಾರರಾಗಿದ್ದಾರೆ. ಅವರು ದೇಶಕ್ಕಾಗಿ ಚಿನ್ನದ ಪದಕವನ್ನು ಗೆದ್ದಿದ್ದಾರೆ. ಕ್ರೀಡಾಂಗಣದಲ್ಲಿ ಒಮ್ಮೆ ತ್ರಿವರ್ಣ ಧ್ವಜವನ್ನು ಎತ್ತಿ ಹಿಡಿದಿದ್ದ ಅಮರ್‌ದೀಪ್, ಈಗ ತಮ್ಮ ಕುಟುಂಬದ ಅಗತ್ಯಗಳನ್ನು ಪೂರೈಸಿಕೊಳ್ಳಲು ತರಕಾರಿ ಮಾರಾಟ ಮಾಡುತ್ತಿದ್ದಾರೆ.

ದೇಶಕ್ಕಾಗಿ ಪದಕಗಳನ್ನು ಗೆದ್ದ ನಂತರ ಕ್ರೀಡಾಪಟುಗಳ ಜೀವನ ಎಷ್ಟು ಸುರಕ್ಷಿತವಾಗಿರುತ್ತದೆ ಎಂಬುದರ ಕುರಿತು ಆತನ ಕಥೆಯು ಯೋಚಿಸುವಂತೆ ಮಾಡುತ್ತದೆ. ಪರಿಸ್ಥಿತಿಯು ಅವನನ್ನು ತಕ್ಕಡಿ ಹಿಡಿಯುವಂತೆ ಮಾಡಿದ್ದರೂ, ಕ್ರೀಡೆಯ ಮೇಲಿನ ಅವನ ಒಲವು ಮತ್ತು ದೇಶಕ್ಕಾಗಿ ಏನಾದರೂ ಮಾಡುವ ಅವನ ಬಯಕೆ ಇಂದಿಗೂ ಹಾಗೆಯೇ ಉಳಿದಿವೆ.

बहुत दुख होता है जब ऐसा कुछ सामने आता है ये हैं अमरदीप कुमार जिन्होंने चार बार विदेश यात्रा की, भारत का प्रतिनिधित्व किया, मलेशिया में थ्रोबॉल में गोल्ड मेडल जीता और गर्व से तिरंगा फहरायाइन्होंने झारखंड और भारत का मान बढ़ाया और आज अमरदीप को रांची के अरगोडा चौक पर धनिया और… pic.twitter.com/cjUhLgFgsw

— Singh'am (@ASD24X7) August 30, 2026

2015ರಲ್ಲಿ ಭಾರತಕ್ಕಾಗಿ ಪದಕ ಗೆದ್ದ ಅಮರ್‌ದೀಪ್:

ಅಮರ್‌ದೀಪ್ 2013ರಲ್ಲಿ ಥ್ರೋಬಾಲ್ ಆಡಲು ಪ್ರಾರಂಭಿಸಿದರು. ಸೀಮಿತ ಸಂಪನ್ಮೂಲಗಳನ್ನು ಬಳಸಿಕೊಂಡು, ಯಾವುದೇ ಪ್ರಮುಖ ಸಂಸ್ಥೆಗಳ ಬೆಂಬಲ ವ್ಯವಸ್ಥೆಯಿಲ್ಲದಿದ್ದರೂ, ಅವರು ಕಠಿಣ ಪರಿಶ್ರಮ ಹಾಗೂ ಬದ್ಧತೆಯ ಮೂಲಕ ತಮ್ಮ ಆಟವನ್ನು ಉತ್ತಮಪಡಿಸಿಕೊಂಡರು. ಅವರ ಕಠಿಣ ಪರಿಶ್ರಮದ ಫಲವು 2015ರಲ್ಲಿ ಸಿಕ್ಕಿತು; ಆ ವರ್ಷ ಅವರು ಜೂನಿಯರ್ ಏಷ್ಯನ್ ಚಾಂಪಿಯನ್‌ಶಿಪ್‌ಗೆ ಆಯ್ಕೆಯಾದರು. ಥ್ರೋ ಬಾಲ್ ಸ್ಪರ್ಧೆಯಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ ಅಮರ್‌ದೀಪ್ ಭಾರತಕ್ಕಾಗಿ ಚಿನ್ನದ ಪದಕವನ್ನು ಗೆದ್ದರು. ಈ ಸಾಧನೆಯು ಅವರ ಜೀವನದ ಒಂದು ಮಹತ್ವದ ತಿರುವಾಯಿತು. ಇದಾದ ನಂತರ ಅವರು ಎಂದಿಗೂ ಹಿಂತಿರುಗಿ ನೋಡಲಿಲ್ಲ. ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಆಡುವಾಗ, ಅವರು ಅನೇಕ ಬಾರಿ ತ್ರಿವರ್ಣ ಧ್ವಜವನ್ನು ಹಾರಿಸಿ, ಜಾರ್ಖಂಡ್‌ನೊಂದಿಗೆ ದೇಶಕ್ಕೂ ಕೀರ್ತಿ ತಂದರು.

ಆದರೆ ಪದಕಗಳನ್ನು ಗೆದ್ದ ಸಂಭ್ರಮದ ನಡುವೆಯೂ, ಆರ್ಥಿಕ ಸಂಕಷ್ಟ ಮಾತ್ರ ಹಾಗೆಯೇ ಮುಂದುವರಿಯಿತು. ಅಮರ್‌ದೀಪ್ ಅವರ ಪೋಷಕರು ಈಗಲೂ ತರಕಾರಿ ಮಾರಾಟ ಮಾಡುವ ಮೂಲಕವೇ ಜೀವನೋಪಾಯ ನಡೆಸುತ್ತಿದ್ದಾರೆ. ಅವರ ತಂದೆಯ ಪ್ರಕಾರ, ತಮ್ಮ ಮಗನನ್ನು ಸ್ಪರ್ಧೆಗಳಿಗೆ ಕಳುಹಿಸಲು ಕುಟುಂಬವು ಆಗಾಗ್ಗೆ ಸಾಲ ಮಾಡಬೇಕಾಗುತ್ತಿತ್ತು. ದೇಶಕ್ಕಾಗಿ ಆಡುವ ಮಗನ ಉತ್ಸಾಹಕ್ಕೆ ಅವರು ಎಂದಿಗೂ ಅಡ್ಡಿಪಡಿಸಲಿಲ್ಲವಾದರೂ, ಪ್ರತಿ ಸ್ಪರ್ಧೆಯ ಮುನ್ನವೂ ಹಣದ ಚಿಂತೆ ಅವರನ್ನು ಸದಾ ಕಾಡುತ್ತಿತ್ತು.

ನೇಪಾಳದಲ್ಲಿ ನಡೆಯಬೇಕಿದ್ದ ಹಿರಿಯರ ಥ್ರೋಬಾಲ್ ಚಾಂಪಿಯನ್‌ಶಿಪ್‌ಗಾಗಿ ಅಮರ್‌ದೀಪ್ ಭಾರತೀಯ ತಂಡಕ್ಕೆ ಆಯ್ಕೆಯಾಗಿದ್ದರು. ನೇಪಾಳದ ಬದಲಾಗಿ, ಈ ಸ್ಪರ್ಧೆಯು ಜೂನ್ ತಿಂಗಳಲ್ಲಿ ರಾಂಚಿಯಲ್ಲಿ ನಡೆಯಿತು. ಈ ಸ್ಪರ್ಧೆಯಲ್ಲೂ ಅಮರ್‌ದೀಪ್ ಚಿನ್ನದ ಪದಕವನ್ನು ಗೆದ್ದರು. ತರಕಾರಿ ಮಾರಾಟ ಮಾಡುವ ಮೂಲಕ ತಮ್ಮ ಕೌಟುಂಬಿಕ ಜವಾಬ್ದಾರಿಗಳನ್ನು ನಿರ್ವಹಿಸುತ್ತಲೇ, ಕ್ರೀಡೆಯೊಂದಿಗೆ ಸಂಪರ್ಕವನ್ನು ಉಳಿಸಿಕೊಳ್ಳುವ ಮತ್ತು ದೇಶಕ್ಕಾಗಿ ಮತ್ತೆ ಪದಕಗಳನ್ನು ಗೆಲ್ಲುವ ಕನಸನ್ನು ಅಮರ್‌ದೀಪ್ ಕಾಣುತ್ತಿದ್ದಾರೆ. ಅವರ ದೃಢನಿಶ್ಚಯ ಮತ್ತು ಹೋರಾಟವು ಯುವಜನರಿಗೆ ಸ್ಫೂರ್ತಿಯಾಗಿದೆ; ಕಠಿಣ ಪರಿಸ್ಥಿತಿಗಳು ಗುರಿಯತ್ತ ಸಾಗುವ ಹಾದಿಗೆ ಅಡ್ಡಿಯಾಗಬಲ್ಲವೇ ಹೊರತು, ಕನಸುಗಳಿಗಲ್ಲ ಎಂಬುದನ್ನು ಇದು ಸಾಬೀತುಪಡಿಸುತ್ತದೆ.

ಒಟ್ಟಾರೆಯಾಗಿ, ಅಮರ್‌ದೀಪ್ ನಾಲ್ಕು ಅಂತಾರಾಷ್ಟ್ರೀಯ ಚಿನ್ನದ ಪದಕಗಳನ್ನು ಗೆದ್ದಿದ್ದಾರೆ. ಮೊದಲನೆಯದನ್ನು ಅವರು 2015ರ ಏಷ್ಯನ್ ಥ್ರೋಬಾಲ್ ಚಾಂಪಿಯನ್‌ಶಿಪ್‌ನಲ್ಲಿ ಪಡೆದರು. ಎರಡು ವರ್ಷಗಳ ನಂತರ, ಕಠ್ಮಂಡುವಿನಲ್ಲಿ ನಡೆದ ಇಂಡೋ-ನೇಪಾಳ ಥ್ರೋಬಾಲ್ ಚಾಂಪಿಯನ್‌ಶಿಪ್‌ನಲ್ಲಿ ಅವರು ಯಶಸ್ಸು ಸಾಧಿಸಿದರು. ಅಲ್ಲದೆ, 2019 ಮತ್ತು 2026ರಲ್ಲಿ ಗೆದ್ದ ಎರಡು ದಕ್ಷಿಣ ಏಷ್ಯನ್ ಥ್ರೋಬಾಲ್ ಚಾಂಪಿಯನ್‌ಶಿಪ್‌ಗಳೂ ಅವರ ಹೆಸರಿನಲ್ಲಿವೆ.

ತರಕಾರಿ ಮಾರಾಟ ಮಾಡುವುದರ ಜೊತೆಗೆ, ಅಮರ್‌ದೀಪ್ ತಮ್ಮ ಕುಟುಂಬದ ಅಗತ್ಯಗಳನ್ನು ಪೂರೈಸಲು ಕ್ಯಾಬ್ ಕೂಡ ಓಡಿಸುತ್ತಾರೆ. ಅಮರ್‌ದೀಪ್ ಅವರು ಬೆಂಬಲ ಕೋರಿ ಜಾರ್ಖಂಡ್ ಸರ್ಕಾರ, ಕ್ರೀಡಾ ನಿರ್ದೇಶನಾಲಯ ಮತ್ತು ಕ್ರೀಡಾ ಇಲಾಖೆಗೆ ಪತ್ರ ಬರೆದಿದ್ದಾರೆ. ಥ್ರೋಬಾಲ್‌ನಂತಹ ಕ್ರೀಡೆಗಳನ್ನು ಸಾಮಾನ್ಯವಾಗಿ ನಿರ್ಲಕ್ಷಿಸಲಾಗುತ್ತದೆ ಎಂದು ಅವರು ಹೇಳಿದ್ದಾರೆ. ಇನ್ನು ಇಲಾಖಾ ಮಟ್ಟದಲ್ಲಿ, ಥ್ರೋಬಾಲ್ ಒಲಿಂಪಿಕ್ ಕ್ರೀಡೆಯಲ್ಲದಿರುವುದರಿಂದ ಅದಕ್ಕೆ ಸೀಮಿತ ಆದ್ಯತೆ ನೀಡಲಾಗುತ್ತದೆ ಎಂದು ಹೇಳಿ ಈ ವಿಷಯವನ್ನು ಆಗಾಗ್ಗೆ ತಳ್ಳಿಹಾಕಲಾಗುತ್ತದೆ.

ಮತ್ತೊಂದೆಡೆ, ಝಾರ್ಖಂಡ್ ರಾಜ್ಯ ಸರ್ಕಾರದಲ್ಲಿ ಈ ಕ್ರೀಡೆಗೆ ಸಂಬಂಧಿಸಿದಂತೆ ಕೆಲವು ನಿಬಂಧನೆಗಳಿವೆಯೆಂದು ಕ್ರೀಡಾ ನಿರ್ದೇಶನಾಲಯವು ತಿಳಿಸಿದೆ; ಅಲ್ಲದೆ, ಆಟಗಾರರಿಗೆ ಸೌಲಭ್ಯಗಳನ್ನು ಒದಗಿಸಲು ಯಾವ ನಿಧಿಯನ್ನು ಬಳಸಬಹುದು ಎಂಬುದರ ಕುರಿತು ಚರ್ಚೆಗಳು ನಡೆಯುತ್ತಿವೆ.

ಆದರೆ ಪ್ರಶ್ನೆ ಹಾಗೆಯೇ ಉಳಿದಿದೆ: ಕ್ರೀಡಾಪಟುಗಳು ಅಂತರರಾಷ್ಟ್ರೀಯ ವೇದಿಕೆಯಲ್ಲಿ ಭಾರತಕ್ಕಾಗಿ ಪದಕಗಳನ್ನು ಗೆಲ್ಲುತ್ತಿರುವಾಗ, ಅವರು ಸಹಾಯಕ್ಕಾಗಿ ವರ್ಷಗಟ್ಟಲೆ ಏಕೆ ಕಾಯಬೇಕಾಗುತ್ತದೆ? ಅಮರ್‌ದೀಪ್ ಅವರ ಕಥೆಯು ಸರ್ಕಾರ ಮತ್ತು ಕ್ರೀಡಾ ವ್ಯವಸ್ಥೆಗೆ ಒಂದು ಕನ್ನಡಿಯಂತಿದೆ. ಪದಕವೊಂದನ್ನು ಗೆದ್ದ ನಂತರವೂ ತಮ್ಮ ಕುಟುಂಬದ ನಿರ್ವಹಣೆಗಾಗಿ ಕ್ರೀಡಾಪಟುವೊಬ್ಬರು ತರಕಾರಿ ಮಾರಾಟ ಮಾಡಬೇಕಾದ ಪರಿಸ್ಥಿತಿ ಎದುರಾದರೆ ಮತ್ತು ಮುಂದಿನ ಅಂತಾರಾಷ್ಟ್ರೀಯ ಸ್ಪರ್ಧೆಯಲ್ಲಿ ಭಾಗವಹಿಸಲು ಹಣದ ಬಗ್ಗೆ ಚಿಂತಿಸಬೇಕಾದರೆ, ವ್ಯವಸ್ಥೆಯ ಆದ್ಯತೆಗಳ ಕುರಿತು ಪ್ರಶ್ನೆಗಳು ಏಳುವುದು ಸಹಜ.

ಭಿಕ್ಷಾಟನೆಯಲ್ಲಿದ್ದ ಇಂಡಿಯಾನಾ ಮಾಜಿ ಫುಟ್ಬಾಲ್ ತಾರೆ ಬದುಕು ಬದಲಿಸಿದ ಆ ಬ್ಯಾಗ್, ಹೊಸ ಮನೆ ಕೊಡಿಸಿದ ಯೂಟ್ಯೂಬರ್!

Gowthami K — Wed, 16 Sep 2026 18:20:11 +0530

ಕೆಲವೊಮ್ಮೆ ತೀರಾ ಸಣ್ಣ ವಿಷಯಗಳೂ ಸಹ ವ್ಯಕ್ತಿಯೊಬ್ಬರ ಜೀವನದಲ್ಲಿ ಊಹಿಸಲಾಗದ ದೊಡ್ಡ ಬದಲಾವಣೆಯನ್ನು ತಂದು ಕೊಡುತ್ತದೆ. ಅಮೆರಿಕದ ಇಂಡಿಯಾನಾ ವಿಶ್ವವಿದ್ಯಾಲಯದ ಮಾಜಿ ಫುಟ್‌ಬಾಲ್ ಆಟಗಾರ ಸ್ಯಾಂಪ್ಸನ್ ಜೇಮ್ಸ್ (Sampson James) ಅವರ ಜೀವನದಲ್ಲಿ ಕೂಡ ಇದೇ ರೀತಿ ನಡೆದಿದೆ. ಸುಮಾರು ಎಂಟು ತಿಂಗಳಿನಿಂದ ನಿರಾಶ್ರಿತರಾಗಿ ಟೆಕ್ಸಾಸ್‌ನ ಆಸ್ಟಿನ್ ಬೀದಿಗಳಲ್ಲಿ ವಾಸಿಸುತ್ತಿದ್ದ ಈ ಮಾಜಿ ಕ್ರೀಡಾಪಟುವಿಗೆ, ಕೇವಲ ಒಂದು ಬ್ಯಾಗ್ ಅವರ ಕತ್ತಲೆಯಾಗಿದ್ದ ಜೀವನದಲ್ಲಿ ಹೊಸ ಭರವಸೆಯನ್ನು ಮೂಡಿಸಿದೆ.

ಆಕಸ್ಮಿಕ ಭೇಟಿ ಮತ್ತು ಹಳೆಯ ನೆನಪು

ಅಂದು ಆಸ್ಟಿನ್ ನಗರದ ರಸ್ತೆಯಲ್ಲಿ ಸಾಗುತ್ತಿದ್ದ ಇತ್ತೀಚೆಗಷ್ಟೇ ಇಂಡಿಯಾನಾ ವಿಶ್ವವಿದ್ಯಾಲಯದಿಂದ ಪದವಿ ಪಡೆದ ಜಾಸ್ಪರ್ ಸ್ಟೈನ್ಮೆಟ್ಜ್ (Jasper Steinmetz), ನಿರಾಶ್ರಿತ ವ್ಯಕ್ತಿಯೊಬ್ಬನ ಬಳಿ ಇದ್ದ ಕೆಂಪು ಬಣ್ಣದ ಐಯು ಅಥ್ಲೆಟಿಕ್ ಬ್ಯಾಗ್ ಅನ್ನು ನೋಡಿದರು. ತಮ್ಮದೇ ವಿಶ್ವವಿದ್ಯಾಲಯದ ಲೋಗೋ ಹೊಂದಿದ್ದ ಆ ಬ್ಯಾಗ್‌ ನೋಡಿ ಕುತೂಹಲಗೊಂಡ ಜಾಸ್ಪರ್, ಆ ವ್ಯಕ್ತಿಯನ್ನು ಮಾತನಾಡಿಸಲು ಮುಂದಾದರು.

ಅವರ ಮಾತುಕತೆ ವೇಳೆ ಜಾಸ್ಪರ್ ಅವರಿಗೆ ಶಾಕಿಂಗ್ ಸತ್ಯವೊಂದು ಗೊತ್ತಾಯ್ತು. ತಮ್ಮೆದುರು ನಿಂತಿದ್ದ ಆ ನಿರಾಶ್ರಿತ ವ್ಯಕ್ತಿ ಬೇರಾರೂ ಅಲ್ಲ, ಒಂದು ಕಾಲದಲ್ಲಿ ಇಂಡಿಯಾನಾ ಫುಟ್‌ಬಾಲ್ ತಂಡದ ಅಪ್ರತಿಮ ಆಟಗಾರನಾಗಿದ್ದ ಸ್ಯಾಂಪ್ಸನ್ ಜೇಮ್ಸ್ ಎಂಬುದು ಅವರಿಗೆ ತಿಳಿಯಿತು.

ತಾರಾಪಟ್ಟದಿಂದ ರಸ್ತೆಪಾಲಾಗುವವರೆಗೆ ಜೇಮ್ಸ್ ಜೀವನ

ಇಂಡಿಯಾನಾದ ಏವನ್ ಹೈಸ್ಕೂಲ್‌ನಿಂದ 'ಫೋರ್-ಸ್ಟಾರ್' ಆಟಗಾರನಾಗಿ ಹೊರಹೊಮ್ಮಿದ್ದ ಜೇಮ್ಸ್, 2019 ರಲ್ಲಿ ದೊಡ್ಡ ಕನಸುಗಳೊಂದಿಗೆ ಇಂಡಿಯಾನಾ ವಿಶ್ವವಿದ್ಯಾಲಯದ ಫುಟ್‌ಬಾಲ್ ತಂಡವನ್ನು 'ರನ್ನಿಂಗ್ ಬ್ಯಾಕ್' ಆಗಿ ಸೇರಿಕೊಂಡಿದ್ದರು. ಆದರೆ, ಕ್ರೀಡಾ ಜೀವನದ ಉತ್ತುಂಗದಲ್ಲಿದ್ದಾಗಲೇ ಅವರಿಗೆ ಎದುರಾದ ತೀವ್ರ ಸ್ವರೂಪದ ಮೊಣಕಾಲು ಗಾಯ ಅವರ ವೃತ್ತಿಜೀವನಕ್ಕೆ ಕಂಟಕವಾಯಿತು.

ಇದರ ಬೆನ್ನಲ್ಲೇ ಅವರಿಗೆ 'ಬೈಪೋಲಾರ್ ಡಿಸಾರ್ಡರ್' (Bipolar Disorder) ಎಂಬ ಮಾನಸಿಕ ಆರೋಗ್ಯ ಸಮಸ್ಯೆ ಇರುವುದು ತಿಳಿದುಬಂತು. ದೈಹಿಕ ಹಾಗೂ ಮಾನಸಿಕ ಸವಾಲುಗಳನ್ನು ತಡೆಯಲಾಗದೆ ಜೇಮ್ಸ್ 2023 ರಲ್ಲಿ ಶಿಕ್ಷಣವನ್ನು ಅರ್ಧಕ್ಕೇ ಮೊಟಕುಗೊಳಿಸುವ ಅನಿವಾರ್ಯತೆ ಎದುರಾಯ್ತು. ಮಾತ್ರವಲ್ಲ ಅವನ ಸಹೋದರ ಅವನನ್ನು ಹೂಸ್ಟನ್‌ನಲ್ಲಿನಲ್ಲಿರುವ ಮನೆಯಿಂದ ಹೊರ ಹಾಕಿದ. ಆತನ ಮಾನಸಿಕ ಆರೋಗ್ಯ ಸಮಸ್ಯೆಯಿಂದ ಕೆಲಸವೂ ಹೋಯ್ತು. ಆಶ್ರಯವಿಲ್ಲದೆ, ಕ್ರೀಡಾ ಕನಸುಗಳೆಲ್ಲ ನುಚ್ಚುನೂರಾಗಿ ಅಂತಿಮವಾಗಿ ಆಸ್ಟಿನ್ ಬೀದಿಗಳಲ್ಲಿ ನಿರಾಶ್ರಿತರಾಗಿ ಬಿಕ್ಷೆ ಬೇಡಲು ಆರಂಭಿಸಿದ್ದರು. ಎಲ್ಲವನ್ನು ಕಳೆದುಕೊಂಡ ಅವರ ಜೊತೆ ಉಳಿದಿದ್ದು ಆ ಕೆಂಪು ಬ್ಯಾಗ್ ಮಾತ್ರ.

17,000 ಡಾಲರ್ ದೇಣಿಗೆಯಿಂದ ಹೊಸ ಬದುಕು

ಜೇಮ್ಸ್ ಅವರ ದುರಂತ ಕಥೆಯನ್ನು ತಿಳಿದ ಜಾಸ್ಪರ್ ಸ್ಟೈನ್ಮೆಟ್ಜ್ ಸುಮ್ಮನೆ ಕುಳಿತುಕೊಳ್ಳಲಿಲ್ಲ. ತಮ್ಮ ವಿಶ್ವವಿದ್ಯಾಲಯದ ಹಳೆಯ ವಿದ್ಯಾರ್ಥಿಗೆ ಸಹಾಯ ಮಾಡಲು ಆನ್‌ಲೈನ್‌ನಲ್ಲಿ ನಿಧಿಸಂಗ್ರಹಣೆ ಅಭಿಯಾನವನ್ನು ಪ್ರಾರಂಭಿಸಿದರು. ಕ್ರೀಡಾಭಿಮಾನಿಗಳು ಹಾಗೂ ಸಾರ್ವಜನಿಕರಿಂದ ಅಭೂತಪೂರ್ವ ಸ್ಪಂದನೆ ದೊರೆತು, ಕೆಲವೇ ದಿನಗಳಲ್ಲಿ ಸುಮಾರು ಅಂದಾಜು ₹14 ಲಕ್ಷಕ್ಕೂ ಹೆಚ್ಚು ಹಣ ಸಂಗ್ರಹವಾಯಿತು. ಸಂಗ್ರಹವಾದ ಹಣದಿಂದ ಜಾಸ್ಪರ್ ಅವರು ಜೇಮ್ಸ್‌ಗೆ ಹೊಸ ಅಪಾರ್ಟ್‌ಮೆಂಟ್ ಬಾಡಿಗೆಗೆ ಕೊಡಿಸಿ, ಮನೆಗೆ ಅಗತ್ಯವಿದ್ದ ಎಲ್ಲಾ ವಸ್ತುಗಳನ್ನು ಖರೀದಿಸಿಕೊಟ್ಟರು. ಅವನಿಗೆ ವಾಸಿಸಲು ಒಂದು ಸ್ಥಳ ಮಾತ್ರವಲ್ಲ ಉದ್ಯೋಗ ಸಿಗುವಂತೆ ನಾವು ಸಹಾಯ ಮಾಡಲಿದ್ದೇವೆ. ಆತ ಈಗ ಚೆನ್ನಾಗಿದ್ದಾನೆ. ಪದವಿ ಇದೆ. ಅವನು ಯಾವುದೇ ದುರಾಭ್ಯಾಸಗಳನ್ನು ಕೂಡ ಹೊಂದಿಲ್ಲ ಎಂದು ಜಾಸ್ಪರ್ ತಮ್ಮ ವಿಡಿಯೋದಲ್ಲಿ ಹೇಳಿದ್ದಾರೆ. ಜೊತೆಗೆ ಜೇಮ್ಸ್ ಬಾಡಿಗೆ ಮನೆಯನ್ನು ನೋಡಿ ಅತ್ಯಂತ ಖುಷಿ ಪಟ್ಟಿದ್ದಾರೆ.

ವರ್ಷಗಳ ಕಾಲ ನಿರಾಶ್ರಿತರಾಗಿ ಭವಿಷ್ಯವೇ ಇಲ್ಲದೆ ಬಳಲುತ್ತಿದ್ದ ಸ್ಯಾಂಪ್ಸನ್ ಜೇಮ್ಸ್‌ಗೆ ಈಗ ಸ್ವಂತ ಮನೆಯಿದೆ, ಅವರನ್ನು ಪ್ರೀತಿಸುವ ಮತ್ತು ಬೆಂಬಲಿಸುವ ಜನರಿದ್ದಾರೆ. ನನ್ನ ಮೇಲೆ ನಂಬಿಕೆಯಿಟ್ಟು ಸಹಾಯ ಮಾಡಿದ ಜನರನ್ನು ನಾನು ಎಂದಿಗೂ ನಿರಾಸೆಗೊಳಿಸುವುದಿಲ್ಲ ಎಂದು ಜೇಮ್ಸ್ ಭರವಸೆಯಿಂದ ಹೇಳುತ್ತಾರೆ. ಒಂದು ಸಣ್ಣ ಬೆನ್ನಿನ ಬ್ಯಾಗ್‌ನಿಂದ ಆರಂಭವಾದ ಈ ಆಕಸ್ಮಿಕ ಸಂಭಾಷಣೆ, ಕತ್ತಲಲ್ಲಿ ಕಳೆದುಹೋಗಿದ್ದ ಜೀವನಕ್ಕೀಗ ಎರಡನೇ ಅವಕಾಶವನ್ನು ನೀಡಿದೆ.

ಯುಎಸ್‌ ಓಪನ್‌ ಗ್ರ್ಯಾನ್‌ಸ್ಲಾಂ: ಆಲ್ಕರಜ್‌, ಸಬಲೆಂಕಾ, ಇಗಾ ಶುಭಾರಂಭ

Kannadaprabha News — Wed, 02 Sep 2026 10:56:30 +0530

ನ್ಯೂಯಾರ್ಕ್‌: ಕಳೆದ ಏಪ್ರಿಲ್‌ನಿಂದ ಗಾಯದ ಸಮಸ್ಯೆ ಎದುರಿಸುತ್ತಿದ್ದ ಸ್ಪೇನ್‌ ಯುವ ಸೂಪರ್‌ಸ್ಟಾರ್‌ ಕಾರ್ಲೋಸ್‌ ಆಲ್ಕರಜ್‌ ಅವರು ಈ ಬಾರಿ ಯುಎಸ್‌ ಓಪನ್‌ ಗ್ರ್ಯಾನ್‌ಸ್ಲಾಂ ಟೆನಿಸ್‌ ಟೂರ್ನಿಯಲ್ಲಿ ಶುಭಾರಂಭ ಮಾಡಿದ್ದಾರೆ.

2022, 2025ರ ಯುಎಸ್‌ ಓಪನ್‌ ಸೇರಿ ಒಟ್ಟು 7 ಗ್ರ್ಯಾನ್‌ಸ್ಲಾಂ ಟ್ರೋಫಿ ಗೆದ್ದಿರುವ 23 ವರ್ಷದ ಆಲ್ಕರಜ್‌ ಅವರು ಪುರುಷರ ಸಿಂಗಲ್ಸ್‌ ಮೊದಲ ಸುತ್ತಿನಲ್ಲಿ ರಷ್ಯಾದ ರೋಮನ್ ಸಫಿಯುಲ್ಲಿನ್ ವಿರುದ್ಧ 6-4, 6-4, 6-4 ಸೆಟ್‌ಗಳಲ್ಲಿ ಜಯಭೇರಿ ಬಾರಿಸಿದರು. ಆದರೆ 2016ರ ಚಾಂಪಿಯನ್‌, ಸ್ವಿಜರ್‌ಲೆಂಡ್‌ನ ಸ್ಟ್ಯಾನ್‌ ವಾಂವ್ರಿಕಾ ಅವರು ಇಟಲಿಯ ಬೆರೆಟಿನಿ ವಿರುದ್ಧ ಸೋತು, ಗ್ರ್ಯಾನ್‌ಸ್ಲಾಂ ವೃತ್ತಿಬದುಕಿಗೆ ವಿದಾಯ ಹೇಳಿದರು.

ಬೆಲಾರಸ್‌ನ ಅರೈನಾ ಸಬಲೆಂಕಾ ಶುಭಾರಂಭ

ಇದೇ ವೇಳೆ ಮಹಿಳಾ ಸಿಂಗಲ್ಸ್‌ನ ವಿಶ್ವ ನಂ.1, ಕಳೆದೆರಡು ಬಾರಿ ಯುಎಸ್‌ ಓಪನ್‌ ಗೆದ್ದಿರುವ ಬೆಲಾರಸ್‌ನ ಅರೈನಾ ಸಬಲೆಂಕಾ ಅವರು ಮೊದಲ ಸುತ್ತಿನಲ್ಲಿ ಕೊಲಂಬಿಯಾದ ಕ್ಯಾಮಿಲಾ ಒಸೋರಿಯೋ ವಿರುದ್ಧ 6-4, 6-4 ನೇರ ಸೆಟ್‌ಗಳಲ್ಲಿ ಗೆದ್ದರು. 2022ರ ಟ್ರೋಫಿ ವಿಜೇತೆ, ಪೋಲೆಂಡ್‌ನ ಇಗಾ ಸ್ವಿಯಾಟೆಕ್‌ಗೆ ಮೊದಲ ಸುತ್ತಿನಲ್ಲಿ ಚೀನಾದ ವಾಂಗ್‌ ಕ್ಷಿಯು ವಿರುದ್ಧ 6-2, 6-3 ಸೆಟ್‌ಗಳಲ್ಲಿ ಗೆಲುವು ಲಭಿಸಿತು. 2018, 2020ರ ಚಾಂಪಿಯನ್‌, ಮಾಜಿ ವಿಶ್ವ ನಂ.1, ಜಪಾನ್‌ನ ನವೊಮಿ ಒಸಾಕಾ ಕೂಡಾ ಶುಭಾರಂಭ ಮಾಡಿದರು.

ಜೂ. ಟೆನಿಸ್: ಶ್ರೀನಿತಿ ಪ್ರಿಕ್ವಾರ್ಟರ್‌ಗೆ

ಬೆಂಗಳೂರು: ಕರ್ನಾಟಕದ 15 ವರ್ಷದ ಶ್ರೀನಿತಿ ಚೌಧರಿ ಅವರು ಕೆಎಸ್‌ಎಲ್‌ಟಿಎ ವಿಶ್ವ ಟೆನಿಸ್‌ ಟೂರ್‌ ಜೂನಿಯರ್‌ ಜೆ30 ಟೂರ್ನಿಯಲ್ಲಿ ಪ್ರಿ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ್ದಾರೆ. ಅವರು ಮೊದಲ ಸುತ್ತಿನಲ್ಲಿ ಅನಿಹಾ ರೆಡ್ಡಿ ವಿರುದ್ಧ ಗೆದ್ದರು.

ಬಾಲಕರ ವಿಭಾಗದಲ್ಲಿ ತೇಜಸ್‌ ರವಿ ಕರ್ನಾಟಕದವರೇ ಆದ ಶ್ರೇಯಾಂತ್‌ ಮಹಾಂತೇಶ ವಿರುದ್ಧ ಗೆದ್ದರೆ, ಇಶಾನ್‌ ಅವರು ಅಥರ್ವ ವಿರುದ್ಧ ಜಯಗಳಿಸಿದರು. 2ನೇ ಶ್ರೇಯಾಂಕಿತ ಅಹಾನ್‌ ಶೆಟ್ಟಿ, 7ನೇ ಶ್ರೇಯಾಂಕಿತ ಅಯಾನ್‌ ಶೆಟ್ಟಿ ಕೂಡಾ ಮುಂದಿನ ಸುತ್ತಿಗೇರಿದರು.

ಯುಎಸ್ ಓಪನ್ ಟೆನಿಸ್: ಅಲೆಕ್ಸಾಂಡರ್ ಜ್ವೆರೆವ್ ಚಾಂಪಿಯನ್; 23ರ ಶೆಲ್ಟನ್‌ ಕನಸು ಭಗ್ನ

Kannadaprabha News — Wed, 16 Sep 2026 09:31:30 +0530

ನ್ಯೂಯಾರ್ಕ್‌: ಜರ್ಮನಿಯ ತಾರಾ ಟೆನಿಸಿಗ ಅಲೆಕ್ಸಾಂಡರ್‌ ಜ್ವೆರೆವ್‌ ಅವರು ಯುಎಸ್‌ ಓಪನ್‌ ಗ್ರ್ಯಾನ್‌ಸ್ಲಾಂ ಟೆನಿಸ್‌ ಟೂರ್ನಿಯಲ್ಲಿ ಚೊಚ್ಚಲ ಕಿರೀಟ ತಮ್ಮದಾಗಿಸಿಕೊಂಡಿದ್ದಾರೆ. ಇದು ಅವರ 2ನೇ ಗ್ರ್ಯಾನ್‌ಸ್ಲಾಂ ಟ್ರೋಫಿ ಆಗಿದೆ. ಇತ್ತೀಚೆಗೆ ಫ್ರೆಂಚ್‌ ಓಪನ್‌ನಲ್ಲಿ ಚಾಂಪಿಯನ್‌ ಆಗಿದ್ದ ಅವರು, ಕೆಲ ತಿಂಗಳಲ್ಲೇ ಮತ್ತೊಮ್ಮೆ ಗ್ರ್ಯಾನ್‌ಸ್ಲಾಂ ಟೂರ್ನಿಯಲ್ಲಿ ಪ್ರಶಸ್ತಿ ಗೆದ್ದಿದ್ದಾರೆ.

23ರ ಶೆಲ್ಟನ್‌ ಕನಸು ಭಗ್ನ

ಭಾನುವಾರ ನ್ಯೂಯಾರ್ಕ್‌ನಲ್ಲಿ ನಡೆದ ಪುರುಷರ ಸಿಂಗಲ್ಸ್‌ ಫೈನಲ್‌ನಲ್ಲಿ 29 ವರ್ಷದ ಜ್ವೆರೆವ್‌ ಅವರು ಅಮೆರಿಕದ ಬೆನ್ ಶೆಲ್ಟನ್‌ ವಿರುದ್ಧ 6-3, 7-6(7-2), 5-7, 6-2 ಅಂತರದಲ್ಲಿ ಜಯಭೇರಿ ಬಾರಿಸಿದರು. ಇದರೊಂದಿಗೆ ಚೊಚ್ಚಲ ಗ್ರ್ಯಾನ್‌ಸ್ಲಾಂ ಗೆಲ್ಲುವ 23ರ ಶೆಲ್ಟನ್‌ ಕನಸು ಭಗ್ನಗೊಂಡಿತು. ಟೂರ್ನಿಯ ಕ್ವಾರ್ಟರ್‌ ಫೈನಲ್‌ನಲ್ಲಿ ಕಾರ್ಲೋಸ್‌ ಆಲ್ಕರಜ್‌ಗೆ ಶೆಲ್ಟನ್‌ ಆಘಾತ ನೀಡಿ ಸೋಲಿಸಿದ್ದರು. ಆದರೆ ಫೈನಲ್‌ಗೆ ಅವರಿಗೆ ಜ್ವೆರೆವ್‌ ವಿರುದ್ಧ ಗೆಲ್ಲಲಾಗಲಿಲ್ಲ.

ಈ ಬಾರಿ ಟೂರ್ನಿಗೆ ನಂ.1 ಶ್ರೇಯಾಂಕಿತರಾಗಿ ಕಾಲಿಟ್ಟಿದ್ದ ಜ್ವೆರೆವ್‌ಗೆ ಫೈನಲ್‌ವರೆಗೂ ಪ್ರಬಲ ಎದುರಾಳಿಗಳು ಸಿಕ್ಕಿರಲಿಲ್ಲ. ಆರಂಭಿಕ ಸುತ್ತಿನಿಂದ ಸೆಮಿಫೈನಲ್‌ವರೆಗಿನ 6 ಪಂದ್ಯಗಳ ಪೈಕಿ ನಾಲ್ಕರಲ್ಲಿ ಶ್ರೇಯಾಂಕರಹಿತ ಆಟಗಾರರು ಸಿಕ್ಕಿದ್ದರೆ, 2 ಪಂದ್ಯಗಳಲ್ಲಿ 20ಕ್ಕಿಂತ ಕೆಳ ಶ್ರೇಯಾಂಕದ ಆಟಗಾರರು ಎದುರಾಗಿದ್ದರು. ಆದರೆ ಫೈನಲ್‌ನಲ್ಲಿ 8ನೇ ಶ್ರೇಯಾಂಕಿತ ಶೆಲ್ಟನ್‌ ಸವಾಲು ಎದುರಾಗಿತ್ತು. 2 ಮತ್ತು 3ನೇ ಸೆಟ್‌ನಲ್ಲಿ ಜ್ವೆರೆವ್‌ಗೆ ಶೆಲ್ಟನ್‌ ಪ್ರಬಲ ಪೈಪೋಟಿ ನೀಡಿದರೂ, ಜ್ವೆರೆವ್‌ರನ್ನು ಸೋಲಿಸಲು ಸಾಧ್ಯವಾಗಲಿಲ್ಲ.

2003ರ ಬಳಿಕ ಕಪ್‌ ಇಲ್ಲ:

ಯುಎಸ್‌ ಓಪನ್‌ನಲ್ಲಿ ಅಮೆರಿಕದ ಟೆನಿಸಿಗರು ಕಪ್ ಗೆಲ್ಲದೇ ಬರೋಬ್ಬರಿ 23 ವರ್ಷಗಳಾಯಿತು. ಈ ಬಾರಿ ಆ ಅವಕಾಶ ಶೆಲ್ಟನ್‌ಗೆ ಇತ್ತಾದರೂ ಅದನ್ನು ಅವರು ಬಳಸಿಕೊಳ್ಳಲಿಲ್ಲ. ಕೊನೆಯದಾಗಿ ಅಮೆರಿಕದ ಆ್ಯಂಡ್ರಿ ರೋಡಿಕ್‌ ಅವರು 2003ರಲ್ಲಿ ಚಾಂಪಿಯನ್‌ ಆಗಿದ್ದರು. ಆ ಬಳಿಕ ಬೇರೆ ದೇಶದವರೇ ಪ್ರಶಸ್ತಿ ಗೆಲ್ಲುತ್ತಿದ್ದಾರೆ.

₹52.58 ಕೋಟಿ: ಚಾಂಪಿಯನ್‌ ಅಲೆಕ್ಸಾಂಡರ್‌ ಜ್ವೆರೆವ್‌ಗೆ ಸಿಕ್ಕ ಪ್ರಶಸ್ತಿ ಮೊತ್ತ.

₹26.75 ಕೋಟಿ: ರನ್ನರ್‌-ಅಪ್‌ ಆದ ಬೆನ್‌ ಶೆಲ್ಟನ್‌ಗೆ ದೊರೆತ ಪ್ರಶಸ್ತಿ ಮೊತ್ತ.

ಏಷ್ಯನ್‌ ಗೇಮ್ಸ್‌ 2026: ಭಾರತ ಪದಕ ಖಾತೆ ಓಪನ್‌; ಇಳವೆನಿಲ್‌ ವಲರಿವನ್‌ಗೆ ಡಬಲ್‌ ಸಿಲ್ವರ್‌!

Kannadaprabha News — Mon, 21 Sep 2026 08:49:09 +0530

ನಗೋಯಾ: 20ನೇ ಆವೃತ್ತಿಯ ಏಷ್ಯನ್‌ ಗೇಮ್ಸ್‌ನಲ್ಲಿ ಭಾರತ ಪದಕ ಖಾತೆ ತೆರೆದಿದೆ. ಭಾನುವಾರ ಶೂಟಿಂಗ್‌ನಲ್ಲಿ 2 ಬೆಳ್ಳಿ ಪದಕ ಗೆದ್ದಿದ್ದು, ಮಿಶ್ರ ಮಾರ್ಷಲ್‌ ಆರ್ಟ್ಸ್‌ನಲ್ಲಿ ಐತಿಹಾಸಿಕ ಪದಕ ಖಚಿತಪಡಿಸಿಕೊಂಂಡಿದೆ. ಮಹಿಳಾ ಕ್ರಿಕೆಟ್‌ನಲ್ಲಿ ಭಾರತ ಸತತ 2ನೇ ಚಿನ್ನದ ಸನಿಹ ತಲುಪಿದ್ದು, ಹಾಕಿ ತಂಡಗಳು ಅಬ್ಬರದ ಆರಂಭ ಪಡೆದಿವೆ. ಆದರೆ ಟೆಕ್‌ಬಾಲ್‌ನಲ್ಲಿ ಐತಿಹಾಸಿಕ ಪದಕ ಗೆಲ್ಲುವ ಕನಸು ಭಗ್ನಗೊಂಡಿತು.

ಏಷ್ಯಾಡ್‌ ಇತಿಹಾಸದಲ್ಲಿ ಭಾರತ ಅಥ್ಲೆಟಿಕ್ಸ್‌ ಬಳಿಕ ಗರಿಷ್ಠ ಪದಕ ಗೆದ್ದಿದ್ದು ಶೂಟಿಂಗ್‌ನಲ್ಲಿ. ಈ ಕ್ರೀಡೆಯಲ್ಲೇ ಭಾರತ ಈ ಬಾರಿ ಪದಕ ಖಾತೆ ತೆರೆಯಿತು. ತಮಿಳುನಾಡಿನ ಇಳವೆನಿಲ್‌ ವಲರಿವನ್‌ ವೈಯಕ್ತಿಕ ಹಾಗೂ ತಂಡ ವಿಭಾಗದಲ್ಲಿ ಬೆಳ್ಳಿ ಸಾಧನೆ ಮಾಡಿದರು. ಮೊದಲು 10 ಮೀ. ಏರ್‌ ರೈಫಲ್‌ ತಂಡ ವಿಭಾಗದಲ್ಲಿ ಸೋನಮ್‌ ಮಸ್ಕರ್‌ ಹಾಗೂ ವಿದರ್ಶ ವಿನೋದ್‌ ಜೊತೆಗೂಡಿ ಬೆಳ್ಳಿ ಗೆದ್ದರು. ಈ ತಂಡ 1898.0 ಅಂಕ ಸಂಪಾದಿಸಿ 2ನೇ ಸ್ಥಾನಿಯಾಯಿತು.

ಚೀನಾ ತಂಡ 1904.2 ಅಂಕಗಳೊಂದಿಗೆ ವಿಶ್ವದಾಖಲೆ ಬರೆದು ಚಾಂಪಿಯನ್‌ ಆಯಿತು. 1897.1 ಅಂಕ ಗಳಿಸಿದ ಜಪಾನ್‌, ಭಾರತಕ್ಕಿಂತ ಕೇವಲ 0.9 ಅಂಕಗಳ ಹಿನ್ನಡೆ ಅನುಭವಿಸಿ 2ನೇ ಸ್ಥಾನ ಪಡೆದುಕೊಂಡಿತು. ತಂಡ ವಿಭಾಗದಲ್ಲಿ ಮೂವರು ಶೂಟರ್‌ಗಳು ಅರ್ಹತಾ ಸುತ್ತಿನಲ್ಲಿ ಗಳಿಸಿದ ಒಟ್ಟು ಅಂಕಗಳ ಆಧಾರದಲ್ಲಿ ವಿಜೇತರನ್ನು ನಿರ್ಧರಿಸಲಾಗುತ್ತದೆ. ಸೋನಮ್‌ 634.1, ಇಳವೆನಿಲ್‌ 633.5 ಹಾಗೂ ವಿದರ್ಶ 630.4 ಅಂಕ ಗಳಿಸಿ ತಮ್ಮ ತಂಡಕ್ಕೆ ಬೆಳ್ಳಿ ತಂದುಕೊಟ್ಟರು.

ಡಬಲ್‌ ಧಮಾಕಾ:

ತಂಡ ವಿಭಾಗದಲ್ಲಿ ಪದಕ ಸಾಧನೆ ಬಳಿಕ ಇಳವೆನಿಲ್‌ ವೈಯಕ್ತಿಕ ವಿಭಾಗದಲ್ಲೂ ಪೋಡಿಯಂ ಫಿನಿಶ್‌ ಮಾಡಿದರು. 2025ರ ವಿಶ್ವ ಚಾಂಪಿಯನ್‌ಶಿಪ್‌ ಕಂಚು ವಿಜೇತ ಇಳವೆನಿಲ್‌ ಅವರು 10 ಮೀ. ಏರ್‌ ರೈಫಲ್‌ನಲ್ಲಿ 252.4 ಅಂಕಗಳೊಂದಿಗೆ ಬೆಳ್ಳಿ ಪಡೆದರು. ಜಪಾನ್‌ನ ಹಿನಟಾ ತೈಚಿ 253.0 ಅಂಕದೊಂದಿಗೆ ಚಿನ್ನ ಸಂಪಾದಿಸಿದರು. ದ.ಕೊರಿಯಾದ ಬಾನ್‌ ಹ್ಯೊ-ಜಿನ್‌(230.4 ಅಂಕ) ಕಂಚಿಗೆ ತೃಪ್ತಿಪಟ್ಟುಕೊಂಡರು. 17 ಶಾಟ್‌ಗಳ ಬಳಿಕ ಇಳವೆನಿಲ್‌ 1.4 ಅಂಕದಿಂದ ಮುನ್ನಡೆಯಲ್ಲಿದ್ದರೂ, ಕೊನೆಯಲ್ಲಿ ತೈಚಿ ಅಮೋಘ ಆಟವಾಡಿ ಚಿನ್ನ ಪಡೆದರು. ಕೊನೆ 2 ಶಾಟ್‌ಗಳಿರುವಾಗ ಇಳವೆನಿಲ್‌ 0.3 ಅಂಕದ ಹಿನ್ನಡೆಯಲ್ಲಿದ್ದರು. ಆ ಬಳಿಕ ಜಪಾನಿ ಶೂಟರನ್ನು ಮಣಿಸಲು ಇಳವೆನಿಲ್‌ಗೆ ಸಾಧ್ಯವಾಗಲಿಲ್ಲ.

ಪದಕ ಪಟ್ಟಿ

ಸ್ಥಾನ ದೇಶ ಚಿನ್ನ ಬೆಳ್ಳಿ ಕಂಚು ಒಟ್ಟು

1 ಚೀನಾ 11 6 3 20

2 ಜಪಾನ್‌ 6 7 7 20

3 ದ.ಕೊರಿಯಾ 4 3 7 14

4 ಕಜಕಸ್ತಾನ 4 0 2 6

5 ಥಾಯ್ಲೆಂಡ್‌ 3 1 0 4

10 ಭಾರತ 0 2 0 2

ಬ್ಯಾಡ್ಮಿಂಟನ್‌: ಭಾರತಕ್ಕೆ 3-0 ಜಯ

ಕ್ರೀಡಾಕೂಟದ ಬ್ಯಾಡ್ಮಿಂಟನ್‌ನಲ್ಲಿ ಭಾರತ ಮಹಿಳಾ ತಂಡ ಕಜಕಸ್ತಾನ ವಿರುದ್ಧ 3-0 ಗೆಲುವು ಸಾಧಿಸಿದ್ದು, ಇನ್ನು ಜಪಾನ್‌ ವಿರುದ್ಧ ಕ್ವಾರ್ಟರ್‌ ಫೈನಲ್‌ನಲ್ಲಿ ಸೆಣಸಾಡಲಿದೆ. ಪಿ.ವಿ.ಸಿಂಧು, ಉನ್ನತಿ ಹೂಡಾ ಹಾಗೂ ತಾನ್ವಿ ಶರ್ಮಾ ತಮ್ಮ ಪಂದ್ಯಗಳಲ್ಲಿ ಒಂದೂ ಗೇಮ್‌ ಬಿಟ್ಟುಕೊಡದೆ ಸುಲಭದಲ್ಲಿ ಜಯಗಳಿಸಿದರು. ಈ ಪೈಕಿ ಸಿಂಧು ಕೇವಲ 24 ನಿಮಿಷಗಳಲ್ಲೇ ಪಂದ್ಯ ಗೆದ್ದರು.

20ನೇ ಏಷ್ಯನ್ ಗೇಮ್ಸ್ ಶುರು: ಕದನದ ನಡುವೆ ‘ಹೃದಯ’ ಗೆದ್ದ ಏಷ್ಯನ್‌ ಗೇಮ್ಸ್‌

Kannadaprabha News — Sun, 20 Sep 2026 11:13:32 +0530

ನಗೋಯಾ(ಜಪಾನ್‌): ಮಿನಿ ಒಲಿಂಪಿಕ್ಸ್‌ ಖ್ಯಾತಿಯ, 20ನೇ ಆವೃತ್ತಿಯ ಏಷ್ಯನ್‌ ಗೇಮ್ಸ್‌ಗೆ ಶನಿವಾರ ಜಪಾನ್‌ನ ನಗೋಯಾದಲ್ಲಿರುವ ಪಲೋಮಾ ಮಿಜುಹೊ ಕ್ರೀಡಾಂಗಣದಲ್ಲಿ ಅದ್ಧೂರಿ ಚಾಲನೆ ಲಭಿಸಿತು. ವಿಶ್ವದೆಲ್ಲೆಡೆ ಯುದ್ಧದ ಕರಿನೆರಳು ಆವರಿಸಿರುವುದರ ನಡುವೆ ಜಪಾನ್‌ ಪ್ರೀತಿ, ಶಾಂತಿಯ ಸಂದೇಶ ಸಾರುವ ನಿಟ್ಟಿನಲ್ಲಿ ಉದ್ಘಾಟನಾ ಸಮಾರಂಭವನ್ನು ಹೃದಯಮಯಗೊಳಿಸಿತು. ವೇದಿಕೆಯ ಆಕಾರ, ಥೀಮ್‌, ಸಂಕೇತ, ವಿಮಾನ ಹಾರಾಟದ ಮೂಲಕ ವಿಶ್ವದ ಹೃದಯ ಗೆಲ್ಲುವ ಪ್ರಯತ್ನ ಮಾಡಿತು.

ಭಾರತೀಯ ಕಾಲಮಾನ ಶನಿವಾರ ಮಧ್ಯಾಹ್ನ 2.30ಕ್ಕೆ ಉದ್ಘಾಟನಾ ಸಮಾರಂಭ ಆರಂಭಗೊಂಡಿತು. ಸುಮಾರು 2 ಗಂಟೆಗಳ ಕಾಲ ನಡೆದ ಸಮಾರಂಭವು ಸಾಂಪ್ರದಾಯಿಕ ಜಪಾನ್‌ ಸಂಸ್ಕೃತಿ, ಸ್ಥಳೀಯ ಐಚಿ-ನಗೋಯಾ ಇತಿಹಾಸ ಮತ್ತು ಹೈಟೆಕ್ ತಂತ್ರಜ್ಞಾನದ ಮಿಶ್ರಣದಿಂದ ಕೂಡಿತ್ತು. ‘ಹಾರ್ಮೋನಿಕ್ ಹಾರ್ಟ್ ಬೀಟ್’(ಲಯಬದ್ಧ ಹೃದಯ ಬಡಿತ) ಎಂಬ ಥೀಮ್‌ ಬಳಸಿ, ಏಷ್ಯಾದ ಕ್ರೀಡಾಪಟುಗಳು ಮತ್ತು ಜನರು ‘ಹೃದಯದಿಂದ ಹೃದಯಕ್ಕೆ’ ಒಂದಾಗುವುದನ್ನು ಸಂಕೇತಿಸಲು ಹೃದಯಾಕಾರದ ಮುಖ್ಯ ವೇದಿಕೆಯನ್ನು ಬಳಸಲಾಗಿತ್ತು.

ಅಧಿಕೃತ ಉದ್ಘಾಟನೆ:

ಜಪಾನ್‌ನ ಚಕ್ರವರ್ತಿ ನರುಹಿತೊ ಅವರು ಕ್ರೀಡಾಕೂಟವನ್ನು ಅಧಿಕೃತವಾಗಿ ಉದ್ಘಾಟಿಸಿದ್ದಾಗಿ ಘೋಷಿಸಿದರು. ರಾಣಿ ಮಸಾಕೊ, ಒಲಿಂಪಿಕ್‌ ಕೌನ್ಸಿಲ್‌ ಆಫ್‌ ಏಷ್ಯಾದ ಮುಖ್ಯಸ್ಥ ಶೇಖ್ ಜೊಆನ್ ಬಿನ್ ಹಮದ್ ಅಲ್ ಥಾನಿ, ಅಂತಾರಾಷ್ಟ್ರೀಯ ಒಲಿಂಪಿಕ್‌ ಒಕ್ಕೂಟದ ಮುಖ್ಯಸ್ಥೆ ಕಿರ್ಸ್ಟಿ ಕೊವೆಂಟ್ರಿ ಸಮಾರಂಭದಲ್ಲಿ ಪಾಲ್ಗೊಂಡರು.

ಜಪಾನ್ ಭದ್ರತಾ ಪಡೆಯ ಬ್ಲೂ ಇಂಪಲ್ಸ್ ವಿಮಾನಗಳು ಕ್ರೀಡಾಂಗಣದ ಮೇಲೆ ಹೃದಯಾಕಾರದಲ್ಲಿ ಹಾರಾಟ ನಡೆಸಿದವು. ವಯೊಲಿನ್ ವಾದಕ ತಾರೋ ಹಕಾಸೆ ಹೃದಯಾಕಾರದ ವೇದಿಕೆಯ ಮೇಲೆ ಸೊಲೋ ನುಡಿಸಿದರು. 240 ನೃತ್ಯಪಟುಗಳು ‘ವೆಲ್‌ಕಮ್‌’ ಎಂಬ ಪದವನ್ನು ರೂಪಿಸಿದರು. ಗಾಯಕಿ ಕೆಯ್ಕೊ ತೋದಾ ಅವರು ಜಪಾನ್ ರಾಷ್ಟ್ರಗೀತೆಯನ್ನು ಹಾಡಿದರು. ಜಪಾನ್ ಭದ್ರತಾ ಪಡೆಯ 9 ಸದಸ್ಯರು ಧ್ವಜವನ್ನು ತಂದು ಹಾರಿಸಿದರು.

ಸಾಂಸ್ಕೃತಿಕ ಮತ್ತು ತಾಂತ್ರಿಕ ಪ್ರದರ್ಶನ:

ದೈತ್ಯ ಕ್ಯಾಸಲ್ ಬಲೂನ್, ಕಬುಕಿ ನಟರಿಂದ ಹಾರುವ ಸಿಂಹ ನೃತ್ಯ, ಬಿಸಿನೆಸ್ ಸೂಟ್‌ನಲ್ಲಿರುವ ನೃತ್ಯಗಾರರು, ತಂತ್ರಜ್ಞಾನದ ಪ್ರದರ್ಶನ ಗಮನಸೆಳೆಯಿತು. 3ಡಿ ಪ್ರೊಜೆಕ್ಷನ್ ಮ್ಯಾಪಿಂಗ್, ಸಾಂಪ್ರದಾಯಿಕ ಸಂಗೀತ ಮತ್ತು ಡಿಜಿಟಲ್ ಬೀಟ್‌ಗಳ ಮಿಶ್ರಣ ಕಾರ್ಯಕ್ರಮದ ಮೆರುಗು ಹೆಚ್ಚಿಸಿತು.

ಆಕರ್ಷಕ ಪಥಸಂಚಲನ:

ಗೇಮ್ಸ್‌ನಲ್ಲಿ ಪಾಲ್ಗೊಳ್ಳುವ 45 ದೇಶಗಳ ಕ್ರೀಡಾಪಟುಗಳಿಂದ ಆಕರ್ಷಕ ಪಥಸಂಚಲನ ನಡೆಯಿತು. ಅಫ್ಘಾನಿಸ್ತಾನ ತಂಡ ಮೊದಲು ವೇದಿಕೆಗೆ ಆಗಮಿಸಿತು. ಬಳಿಕ ಇತರ ತಂಡಗಳು ತಮ್ಮ ದೇಶಗಳ ಧ್ವಜದೊಂದಿಗೆ ಸಮಾರಂಭಕ್ಕೆ ಆಗಮಿಸಿದವು. ಜಪಾನ್‌ನ ಒಲಿಂಪಿಕ್ಸ್‌ ಪದಕ ವಿಜೇತರಾದ ಆಯುಮಿ ತಾನಿಮೊಟೊ, ನಾಒಕೊ ತಕಾಹಾಶಿ, ಕೊಸುಕೆ ಹಗಿನೊ ಮತ್ತು ಇತರರು ಏಷ್ಯನ್‌ ಗೇಮ್ಸ್‌ ಧ್ವಜವನ್ನು ಹೊತ್ತು ತಂದರು. ಒಲಿಂಪಿಕ್ಸ್‌ನ ಹ್ಯಾಮರ್‌ ಥ್ರೋ ಚಾಂಪಿಯನ್ ಮುರೊಫುಶಿ ಕೊಜಿ ಮತ್ತು ಅವರ ತಂದೆ ಶಿಗೆನೊಬು (5 ಬಾರಿಯ ಏಷ್ಯನ್ ಚಾಂಪಿಯನ್) ಜಂಟಿಯಾಗಿ ಜ್ಯೋತಿಯನ್ನು ಬೆಳಗಿಸಿದರು. ಗೇಮ್ಸ್‌ನ ಮಸ್ಕಾಟ್ ಹೊನೊಹೊನ್ ಕೂಡ ಸಮಾರಂಭದಲ್ಲಿ ಸಕ್ರಿಯವಾಗಿ ಭಾಗವಹಿಸಿತು.

ಮುಂದಿನ 15 ದಿನಗಳ ಕಾಲ ಏಷ್ಯಾದ 45 ದೇಶಗಳ 11000ದಷ್ಟು ಕ್ರೀಡಾಪಟುಗಳು 43 ಕ್ರೀಡೆಗಳಲ್ಲಿ ಸ್ಪರ್ಧಿಸಲಿದ್ದು, ಅ.4ರಂದು ಗೇಮ್ಸ್‌ಗೆ ತೆರೆ ಬೀಳಲಿದೆ.

ಕಿಟ್‌ ಸಿಗದೆ ತೂರ್ ಗೈರು: ಧ್ವಜ ಹಿಡಿದ ಮನು, ಪವನ್

ಸಮಾರಂಭದ ಪಥಸಂಚಲನದಲ್ಲಿ ಭಾರತದ ಧ್ವಜಧಾರಿಗಳಾಗಿ ಒಲಿಂಪಿಕ್ಸ್‌ ಪದಕ ವಿಜೇತ ಶೂಟರ್ ಮನು ಭಾಕರ್‌ ಹಾಗೂ ಏಷ್ಯನ್‌ ಗೇಮ್ಸ್‌ನ 2 ಬಾರಿ ಶಾಟ್‌ಪುಟ್‌ ಚಾಂಪಿಯನ್‌ ತೇಜಿಂದರ್‌ಪಾಲ್‌ ತೂರ್‌ ಪಾಲ್ಗೊಳ್ಳಬೇಕಿತ್ತು. ಆದರೆ ಗೇಮ್ಸ್‌ನ ಅಧಿಕೃತ ಕಿಟ್‌ ಸಿಗದ ಕಾರಣ ತೂರ್‌ ಸಮಾರಂಭಕ್ಕೆ ಗೈರಾದರು. ಅವರ ಅನುಪಸ್ಥಿತಿಯಲ್ಲಿ ತಾರಾ ಕಬಡ್ಡಿ ಆಟಗಾರ ಪವನ್‌ ಶೆರಾವತ್‌ ಅವರು ಮನು ಜೊತೆಗೂಡಿ ತ್ರಿವರ್ಣ ಧ್ವಜ ಹಿಡಿದು ಪಥಸಂಚಲನದಲ್ಲಿ ಭಾರತದ 158 ಸದಸ್ಯರ ತಂಡವನ್ನು ಮುನ್ನಡೆಸಿದರು.

ಯುಎಸ್ ಓಪನ್: ಕ್ವಾರ್ಟರ್‌ ಫೈನಲ್‌ಗೇರಿದ ಕಾರ್ಲೊಸ್‌ ಆಲ್ಕರಜ್‌, ಅರೈನಾ ಸಬಲೆಂಕಾ

Kannadaprabha News — Tue, 08 Sep 2026 11:06:15 +0530

ನ್ಯೂಯಾರ್ಕ್‌: ಯುಎಸ್‌ ಓಪನ್ ಗ್ರ್ಯಾನ್‌ಸ್ಲಾಂ ಟೆನಿಸ್‌ ಟೂರ್ನಿಯಲ್ಲಿ ಹಾಲಿ ಚಾಂಪಿಯನ್‌ಗಳಾದ ಕಾರ್ಲೊಸ್‌ ಆಲ್ಕರಜ್‌ ಹಾಗೂ ಅರೈನಾ ಸಬಲೆಂಕಾ ಕ್ರಮವಾಗಿ ಪುರುಷ ಹಾಗೂ ಮಹಿಳಾ ಸಿಂಗಲ್ಸ್‌ ವಿಭಾಗಗಳಲ್ಲಿ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ್ದಾರೆ. ಟೂರ್ನಿಯಲ್ಲಿ 3ನೇ ಟ್ರೋಫಿ ಮೇಲೆ ಕಣ್ಣಿಟ್ಟಿರುವ ಇವರಿಬ್ಬರಿಗೂ ಇನ್ನು ಕೇವಲ 3 ಗೆಲುವು ಅಗತ್ಯವಿದೆ.

ಪುರುಷರ ವಿಭಾಗದ ಪ್ರಿ ಕ್ವಾರ್ಟರ್‌ ಫೈನಲ್‌ನಲ್ಲಿ ಸ್ಪೇನ್‌ನ ಆಲ್ಕರಜ್‌ಗೆ ಅಮೆರಿಕದ ಟಾಮಿ ಪೌಲ್‌ ವಿರುದ್ಧ 6-4, 6-3, 6-4 ಸೆಟ್‌ಗಳಲ್ಲಿ ಸುಲಭ ಗೆಲುವು ಲಭಿಸಿತು. ಕ್ವಾರ್ಟರ್‌ನಲ್ಲಿ ಅವರಿಗೆ ಯಾರ ಸವಾಲು ಎದುರಾಗಲಿದೆ ಎಂಬುದು ಇನ್ನಷ್ಟೇ ಗೊತ್ತಾಗಬೇಕಿದೆ. ಇದೇ ವೇಳೆ ಮಾಜಿ ಚಾಂಪಿಯನ್‌, ರಷ್ಯಾದ ಡ್ಯಾನಿಲ್‌ ಮೆಡ್ವೆಡೆವ್‌ ಅವರು ಪ್ರಿ ಕ್ವಾರ್ಟರ್ ಫೈನಲ್‌ನಲ್ಲಿ ಅಮೆರಿಕದ ಫ್ರಾನ್ಸೆಸ್‌ ಟಿಯಾಫೋ ವಿರುದ್ಧ ಸೋತು ಹೊರಬಿದ್ದರು. ಗ್ರೀನ್‌ಕ ಸ್ಟೆಫಾನೊಸ್‌ ಸಿಟ್ಸಿಪಾಸ್‌ ಸವಾಲು ಕೂಡಾ ಮುಕ್ತಾಯಗೊಂಡಿತು.

ಸಬಲೆಂಕಾಗೆ ಜಯ:

ಮಹಿಳಾ ವಿಭಾಗದಲ್ಲಿ ವಿಶ್ವ ನಂ.1 ಆಟಗಾರ್ತಿ, ಬೆಲಾರಸ್‌ನ ಸಬಲೆಂಕಾ ಅವರು ಅಮೆರಿಕದ ಟೇಲರ್‌ ಟೌನ್‌ಸೆಂಡ್‌ ವಿರುದ್ಧ 6-4, 6-3 ಸೆಟ್‌ಗಳಲ್ಲಿ ಸುಲಭವಾಗಿ ಗೆದ್ದರು. 5ನೇ ಗ್ರ್ಯಾನ್‌ಸ್ಲಾಂ ಮೇಲೆ ಕಣ್ಣಿಟ್ಟಿರುವ ಸಬಲೆಂಕಾಗೆ ಕ್ವಾರ್ಟರ್‌ ಫೈನಲ್‌ನಲ್ಲಿ ಜೆಕ್‌ ಗಣರಾಜ್ಯದ ಲಿಂಡಾ ನೊಸ್ಕೋವಾ ಸವಾಲು ಎದುರಾಗಲಿದೆ. 3ನೇ ಶ್ರೇಯಾಂಕಿತೆ, ಅಮೆರಿಕದ ಜೆಸ್ಸಿಕಾ ಪೆಗುಲಾ, 26ನೇ ಶ್ರೇಯಾಂಕಿತೆ ಎಮ್ಮಾ ನವಾರೊ ಕೂಡಾ ಕ್ವಾರ್ಟರ್‌ ಫೈನಲ್‌ ತಲುಪಿದರು.

ಎಲ್ಲಾ ಭಾರತೀಯರು ಟೂರ್ನಿಯಿಂದ ಔಟ್‌

ಈ ಬಾರಿ ಟೂರ್ನಿಯಲ್ಲಿ ಭಾರತದ ನಾಲ್ವರು ಆಟಗಾರರು ಪುರುಷರ ಡಬಲ್ಸ್‌ನಲ್ಲಿ ಕಣಕ್ಕಿಳಿದಿದ್ದರು. ಆದರೆ ಎಲ್ಲರೂ ಸೋತು ಹೊರಬಿದ್ದಿದ್ದಾರೆ. ನಿಕಿ ಪೂಣಚ್ಚ, ಅನಿರುದ್ಧ್‌ ಚಂದ್ರಶೇಖರ್‌, ಯೂಕಿ ಭಾಂಬ್ರಿ ಜೋಡಿಗಳು ಮೊದಲ ಸುತ್ತಿನಲ್ಲೇ ಹೊರಬಿದ್ದಿದ್ದರೆ, ಅಮೆರಿಕದ ಎವಾನ್‌ ಕಿಂಗ್ ಜೊತೆಗೂಡಿ ಕಣಕ್ಕಿಳಿದಿದ್ದ ಶ್ರೀರಾಮ್‌ ಬಾಲಾಜಿ 2ನೇ ಸುತ್ತಿನಲ್ಲಿ ಸೋಲನುಭವಿಸಿದರು.

ವಿಶ್ವನಾಥನ್‌ ಆನಂದ್‌ ಎದುರು ವಿಶ್ವ ನಂ.1 ಕಾರ್ಲ್‌ಸನ್‌ಗೆ ಜಯ

ಬೆಂಗಳೂರು: 4ನೇ ಆವೃತ್ತಿಯ ಗ್ಲೋಬಲ್‌ ಚೆಸ್‌ ಲೀಗ್‌ನಲ್ಲಿ ಹಾಲಿ ಚಾಂಪಿಯನ್‌ ಅಲ್ಫೈನ್‌ ಎಪಿಎಲ್ ಪೈಪರ್ಸ್‌ ತಂಡ 3ನೇ ಗೆಲುವಿನೊಂದಿಗೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಕಾಯ್ದುಕೊಂಡಿದೆ.

ಅಲ್ಫೈನ್‌ ತಂಡ ಸೋಮವಾರ 2 ಪಂದ್ಯಗಳನ್ನಾಡಿತು. ದಿನದ ಆರಂಭಿಕ ಪಂದ್ಯದಲ್ಲಿ ಅಲ್ಫೈನ್ಸ್‌ಗೆ ಅಲಸ್ಕನ್‌ ನೈಟ್ಸ್‌ ಸವಾಲು ಎದುರಾಯಿತು. ಅಲಸ್ಕನ್‌ ತಂಡದ ವಿಶ್ವನಾಥನ್‌ ಆನಂದ್ ವಿರುದ್ಧ ವಿಶ್ವ ನಂ.1 ಆಟಗಾರ, ನಾರ್ವೆಯ ಮ್ಯಾಗ್ಸನ್‌ ಕಾರ್ಲ್‌ಸನ್‌ ಗೆಲುವು ಸಾಧಿಸಿದರು. ಆದರೆ ಈ ಗೆಲುವು ಅಲಸ್ಕನ್‌ ವಿರುದ್ಧ ಅಲ್ಫೈನ್‌ಗೆ ಸೋಲು ತಪ್ಪಿಸಲು ನೆರವಾಗಲಿಲ್ಲ. ಅಲಸ್ಕನ್‌ಗೆ 9-7 ಅಂತರದಲ್ಲಿ ಗೆಲುವು ಲಭಿಸಿತು. ಬಳಿಕ ಅಲ್ಫೈನ್‌ ತಂಡ ಅಮೆರಿಕನ್‌ ಗ್ಯಾಂಬಿಟ್ಸ್‌ ವಿರುದ್ಧ 15-3 ಅಂತರದಲ್ಲಿ ಗೆದ್ದು, ಅಗ್ರಸ್ಥಾನಕ್ಕೇರಿತು. ತ್ರಿವೇಣಿ ಕಾಂಟಿನೆಂಟಲ್‌ ಕಿಂಗ್ಸ್‌ ಆಡಿರುವ 4 ಪಂದ್ಯಗಳಲ್ಲಿ ಕೇವಲ 1ರಲ್ಲಿ ಗೆದ್ದಿದ್ದು, ಅಂಕಪಟ್ಟಿಯಲ್ಲಿ ಕೊನೆ ಸ್ಥಾನದಲ್ಲಿದೆ.

ಏಷ್ಯನ್ ಗೇಮ್ಸ್‌ಗೂ ಮುನ್ನ ಭಾರತಕ್ಕೆ ಬಿಗ್ ಶಾಕ್; ನೀರಜ್ ಚೋಪ್ರಾ ಟೂರ್ನಿಯಿಂದ ಔಟ್!

Naveen Kodase — Sat, 29 Aug 2026 19:28:39 +0530

ನವದೆಹಲಿ: ಏಷ್ಯನ್ ಗೇಮ್ಸ್ ಜಾವೆಲಿನ್ ಥ್ರೋನಲ್ಲಿ ಭಾರತದ ಚಿನ್ನದ ಪದಕದ ಭರವಸೆಯಾಗಿದ್ದ ಒಲಿಂಪಿಕ್ ಪದಕ ವಿಜೇತ ನೀರಜ್ ಚೋಪ್ರಾ, ಈ ಸೀಸನ್‌ನ ಉಳಿದ ಎಲ್ಲಾ ಪಂದ್ಯಗಳಿಂದ ಹೊರಗುಳಿದಿದ್ದಾರೆ. ಪಾದದ ಗಾಯದ ಕಾರಣ, ಜಪಾನ್‌ನಲ್ಲಿ ನಡೆಯಲಿರುವ ಏಷ್ಯನ್ ಗೇಮ್ಸ್ ಸೇರಿದಂತೆ ಮುಂಬರುವ ಪ್ರಮುಖ ಟೂರ್ನಿಗಳಿಂದ ಹಿಂದೆ ಸರಿಯುತ್ತಿರುವುದಾಗಿ ನೀರಜ್ ಘೋಷಿಸಿದ್ದಾರೆ. ಲಾಸೇನ್ ಡೈಮಂಡ್ ಲೀಗ್‌ನಲ್ಲಿ 88.05 ಮೀಟರ್ ದೂರ ಜಾವೆಲಿನ್ ಎಸೆದು ಈ ಸೀಸನ್‌ನ ಅತ್ಯುತ್ತಮ ಪ್ರದರ್ಶನ ನೀಡಿದ ಬೆನ್ನಲ್ಲೇ ನೀರಜ್‌ಗೆ ಈ ಗಾಯವಾಗಿದೆ.

ಸ್ವತಃ ಮಹತ್ವದ ಅಪ್‌ಡೇಟ್ಸ್ ಕೊಟ್ಟ ನೀರಜ್ ಚೋಪ್ರಾ

ಈ ಸೀಸನ್‌ನಿಂದ ಹೊರಗುಳಿಯುವ ಬಗ್ಗೆ ನೀರಜ್ ಚೋಪ್ರಾ ತಮ್ಮ ಇನ್‌ಸ್ಟಾಗ್ರಾಂ ಪೇಜ್‌ನಲ್ಲಿ ಕ್ರೀಡಾಭಿಮಾನಿಗಳಿಗೆ ಮಾಹಿತಿ ನೀಡಿದ್ದಾರೆ. "ಕಠಿಣ ಪರಿಶ್ರಮದ ನಂತರ ಲಾಸೇನ್‌ನಲ್ಲಿ ಸೀಸನ್‌ನ ಅತ್ಯುತ್ತಮ ದೂರವನ್ನು ದಾಖಲಿಸಿ, ಮತ್ತೆ ಫಾರ್ಮ್‌ಗೆ ಮರಳುತ್ತಿದ್ದೇನೆ ಎಂದು ನನಗೆ ಅನಿಸಿತ್ತು. ಆದರೆ ದುರದೃಷ್ಟವಶಾತ್, ತರಬೇತಿ ವೇಳೆ ನನ್ನ ಪಾದದ ಲಿಗಮೆಂಟ್‌ಗೆ ಗಾಯವಾಗಿದೆ. ವೈದ್ಯರು ಮತ್ತು ತಂಡದ ಸದಸ್ಯರೊಂದಿಗೆ ಚರ್ಚಿಸಿದ ನಂತರ, ಈ ಸೀಸನ್‌ನ ಉಳಿದ ಪಂದ್ಯಗಳಿಂದ ದೂರವಿರಲು ನಿರ್ಧರಿಸಿದ್ದೇನೆ. ಸರಿಯಾದ ಲಯ ಸಿಗುತ್ತಿರುವ ಸಮಯದಲ್ಲಿ ಈ ರೀತಿ ಆಗಿದ್ದು ನಿರಾಸೆ ತಂದಿದೆ. ಆದರೂ, ಹಿನ್ನಡೆಗಳು ಕ್ರೀಡಾಜೀವನದ ಒಂದು ಭಾಗ. ಸಂಪೂರ್ಣ ಫಿಟ್‌ನೆಸ್ ಮರಳಿ ಪಡೆದು, ಇನ್ನಷ್ಟು ಬಲಿಷ್ಠವಾಗಿ ಕಮ್‌ಬ್ಯಾಕ್ ಮಾಡುವುದೇ ನನ್ನ ಮುಂದಿನ ಗುರಿ," ಎಂದು ನೀರಜ್ ಬರೆದುಕೊಂಡಿದ್ದಾರೆ.

pic.twitter.com/LwounijYk7

— Neeraj Chopra (@Neeraj_chopra1) August 29, 2026

ಈ ನಿರ್ಧಾರದಿಂದಾಗಿ, ನೀರಜ್ ಚೋಪ್ರಾ ಏಷ್ಯನ್ ಗೇಮ್ಸ್ ಜೊತೆಗೆ, ಈಗಾಗಲೇ ಅರ್ಹತೆ ಪಡೆದಿದ್ದ ಡೈಮಂಡ್ ಲೀಗ್ ಫೈನಲ್‌ನಿಂದಲೂ ಹೊರಗುಳಿಯಲಿದ್ದಾರೆ. ಏಷ್ಯನ್ ಗೇಮ್ಸ್ ಅಥ್ಲೆಟಿಕ್ಸ್‌ನಲ್ಲಿ ಭಾರತದ ಖಚಿತ ಪದಕದ ನಿರೀಕ್ಷೆಗೆ ನೀರಜ್ ಅವರ ಈ ನಿರ್ಧಾರ ದೊಡ್ಡ ಹೊಡೆತ ನೀಡಿದೆ. ಕಳೆದ ಎರಡು ಏಷ್ಯನ್ ಗೇಮ್ಸ್‌ಗಳಲ್ಲೂ ನೀರಜ್ ಭಾರತಕ್ಕೆ ಚಿನ್ನದ ಪದಕ ತಂದುಕೊಟ್ಟಿದ್ದರು.

ಏಷ್ಯನ್‌ ಗೇಮ್ಸ್‌ನಲ್ಲಿ ಕ್ರಿಕೆಟಿಗರಿಗೆ ಸೌಲಭ್ಯದ ಬಗ್ಗೆ ಬಿಸಿಸಿಐ ಅತೃಪ್ತಿ

ನವದೆಹಲಿ: ಮುಂದಿನ ತಿಂಗಳು ಜಪಾನ್ನಲ್ಲಿ ನಡೆಯಲಿರುವ ಏಷ್ಯನ್‌ ಗೇಮ್ಸ್‌ನಲ್ಲಿ ಭಾಗಿಯಾಗುತ್ತಿರುವ ಕ್ರಿಕೆಟಿಗರಿಗೆ ಒದಗಿಸಲಾದ ಮೂಲಸೌಕರ್ಯಗಳ ಬಗ್ಗೆ ಬಿಸಿಸಿಐ ತೀವ್ರ ಅತೃಪ್ತಿ ಹೊಂದಿದೆ. ಇದಕ್ಕಾಗಿ ಮುಖ್ಯ ತಂಡದ ಬದಲಿಗೆ ಭಾರತ ‘ಬಿ’ ತಂಡವನ್ನು ಕ್ರೀಡಾಕೂಟಕ್ಕೆ ಕಳುಹಿಸುವ ಬಗ್ಗೆಯೂ ಯೋಚಿಸುತ್ತಿದೆ ಎಂದು ವರದಿಯಾಗಿದೆ.

ಏಷ್ಯನ್ ಗೇಮ್ಸ್‌ನ ಮಹಿಳಾ ಕ್ರಿಕೆಟ್ ಸೆ.17ರಿಂದ, ಪುರುಷರ ಕ್ರಿಕೆಟ್‌ ಸೆ.24ರಿಂದ ಆರಂಭಗೊಳ್ಳಲಿದೆ. ಆದರೆ ಕ್ರಿಕೆಟಿಗರಿಗೆ ಗೇಮ್ಸ್‌ ನಗರದಲ್ಲಿ ಸೌಲಭ್ಯಗಳ ಬಗ್ಗೆ ಬಿಸಿಸಿಐ ಮತ್ತು ಇತರ ಕೆಲ ದೇಶಗಳ ಕ್ರಿಕೆಟ್‌ ಸಂಸ್ಥೆಗಳು ಅತೃಪ್ತವಾಗಿವೆ ಎಂದು ವರದಿಯಾಗಿದೆ. ಅಲ್ಲಿನ ಪಿಚ್‌, ಕ್ರಿಕೆಟಿಗರು ಉಳಿದುಕೊಳ್ಳುವ ಕೋಣೆ, ಶೌಚಾಲಯ ವ್ಯವಸ್ಥೆ ಸಮರ್ಪಕವಾಗಿಲ್ಲ ಎಂದು ಹೇಳಲಾಗುತ್ತಿದೆ. ಹೀಗಾಗಿ ಇದರ ಬಗ್ಗೆ ಪರಿಶೀಲನೆಗೆ ಬಿಸಿಸಿಐ ವೀಕ್ಷಕರನ್ನು ಜಪಾನ್‌ಗೆ ಕಳುಹಿಸಿದ್ದು, ಅವರ ವರದಿ ಬಳಿಕ ಮುಂದಿನ ನಿರ್ಧಾರ ಕೈಗೊಳ್ಳಲಿದೆ ಎಂದು ಹೇಳಲಾಗುತ್ತಿದೆ.

ವೆಲ್‌ಕಮ್‌ ಟು ನಗೋಯಾ; ನಿಮಗೆ ಗೊತ್ತಾ, ಏಷ್ಯನ್‌ ಗೇಮ್ಸ್‌ನ ಮೊದಲ ಮಾಸ್ಕಾಟ್‌ ಹೆಸರು ‘ಅಪ್ಪು’!

Kannadaprabha News — Sat, 19 Sep 2026 09:30:40 +0530

ಮಿನಿ ಒಲಿಂಪಿಕ್ಸ್‌ ಖ್ಯಾತಿಯ, ಏಷ್ಯಾಡ್‌ ಎಂದೂ ಕರೆಯಲ್ಪಡುವ ಏಷ್ಯನ್‌ ಗೇಮ್ಸ್‌ ಮತ್ತೆ ಬಂದಿದೆ. ಏಷ್ಯಾದ ರಾಷ್ಟ್ರಗಳು ಒಟ್ಟುಗೂಡಿ ಆಡುವ ಈ ಕ್ರೀಡಾಕೂಟಕ್ಕೆ ಈ ಬಾರಿ ಜಪಾನ್‌ ಆತಿಥ್ಯ ವಹಿಸಲಿದೆ. ಭಾರೀ ಅವ್ಯವಸ್ಥೆಗಳ ನಡುವೆಯೂ 20ನೇ ಆವೃತ್ತಿಯ ಕ್ರೀಡಾಕೂಟವನ್ನು ಯಶಸ್ವಿಯಾಗಿ ನಡೆಸಲು ಅಲ್ಲಿನ ಐಚಿ, ನಗೋಯಾ ನಗರಗಳು ಸಜ್ಜಾಗಿದೆ. ಈ ಕ್ರೀಡಾಕೂಟ ಆರಂಭಗೊಂಡಿದ್ದು ಯಾವಾಗ? ಯಾಕೆ?, ಈವರೆಗೂ ಎಲ್ಲೆಲ್ಲಿ ಗೇಮ್ಸ್‌ ಆಯೋಜನೆಗೊಂಡಿವೆ? ಅತಿ ಹೆಚ್ಚು ಪದಕ ಗೆದ್ದ ದೇಶಗಳು ಯಾವುವು? ಭಾರತದ ಸಾಧನೆ ಏನು ಎಂಬುದರ ಬಗ್ಗೆ ಮಾಹಿತಿಯನ್ನು ‘ಕನ್ನಡಪ್ರಭ’ ನಿಮ್ಮ ಮುಂದಿಡುತ್ತಿದೆ.

ಭಾರತೀಯನಿಂದ ಹುಟ್ಟಿದ ಗೇಮ್ಸ್‌ ಕಲ್ಪನೆ, ಭಾರತದ ಡೆಲ್ಲಿಯಲ್ಲಿ ಮೊದಲ ಗೇಮ್ಸ್‌

ಜಾಗತಿಕ ಮಟ್ಟದಲ್ಲಿ ಒಲಿಂಪಿಕ್ಸ್‌ ಇರುವ ಹಾಗೆ, ಏಷ್ಯಾ ದೇಶಗಳ ನಡುವೆ ಏಷ್ಯನ್‌ ಗೇಮ್ಸ್‌ ನಡೆಯುತ್ತದೆ. 2ನೇ ಮಹಾಯುದ್ಧದ ನಂತರ ಏಷ್ಯಾದ ದೇಶಗಳ ನಡುವೆ ಸ್ನೇಹ, ಏಕತೆ ಮತ್ತು ಕ್ರೀಡಾ ಮನೋಭಾವ ಬೆಳೆಸುವ ಉದ್ದೇಶದಿಂದ ಈ ಗೇಮ್ಸ್‌ ಆರಂಭಿಸಲಾಯಿತು. 1948ರಲ್ಲಿ ಲಂಡನ್‌ ಒಲಿಂಪಿಕ್‌ ಸಮಯದಲ್ಲಿ, ಅಂತಾರಾಷ್ಟ್ರೀಯ ಒಲಿಂಪಿಕ್‌ ಕೌನ್ಸಿಲ್‌ನ ಭಾರತದ ಪ್ರತಿನಿಧಿ ಗುರು ದತ್ತ್‌ ಸೊಂಧಿ ಅವರಿಂದ ಗೇಮ್ಸ್‌ನ ಕಲ್ಪನೆ ಮೂಡಿಬಂತು.

ಅದಕ್ಕೂ ಮೊದಲು ‘ಫಾರ್‌ ಈಸ್ಟರ್ನ್‌ ಚಾಂಪಿಯನ್‌ಶಿಪ್‌ ಗೇಮ್ಸ್‌’ (1913–1938) ಮತ್ತು ‘ವೆಸ್ಟ್‌ ಏಷ್ಯನ್‌ ಗೇಮ್ಸ್‌’ ಎಂಬ ಸಣ್ಣ ಪ್ರಾದೇಶಿಕ ಕ್ರೀಡಾಕೂಟಗಳು ಇದ್ದವು. ಅವು ನಿಂತುಹೋದ ನಂತರ ಇಡೀ ಏಷ್ಯಾಕ್ಕೆ ಒಂದು ದೊಡ್ಡ ಕ್ರೀಡಾಕೂಟ ಬೇಕೆಂದು ಯೋಚಿಸಲಾಯಿತು. ಹೀಗಾಗಿ 1949ರಲ್ಲಿ ಏಷ್ಯನ್‌ ಗೇಮ್ಸ್‌ ಫೆಡರೇಷನ್‌ ಸ್ಥಾಪನೆಯಾಯಿತು. ಮೊದಲ ಏಷ್ಯನ್‌ ಗೇಮ್ಸ್‌ 1951ರಲ್ಲಿ ನವದೆಹಲಿಯಲ್ಲಿ ನಡೆಯಿತು.

ಏಷ್ಯನ್‌ ಗೇಮ್ಸ್‌ನ ಮೊದಲ ಮಾಸ್ಕಾಟ್‌ ಹೆಸರು ‘ಅಪ್ಪು’!

ಯಾವುದೇ ಕ್ರೀಡಾಕೂಟದ ವೇಳೆ ಸಂಪೂರ್ಣ ಗೇಮ್‌ನ ಪ್ರತಿನಿಧಿಸುವ ರೀತಿ, ಗೊಂಬೆ ಆಕಾರದಲ್ಲಿ ‘ಮಾಸ್ಕಾಟ್‌’ ಇರುತ್ತದೆ. ಏಷ್ಯನ್‌ ಕ್ರೀಡಾಕೂಟದಲ್ಲಿ ಮೊದಲ ಬಾರಿ ಮಾಸ್ಕಾಟ್‌ ಪರಿಚಯಿಸಿದ್ದು 1982ರಲ್ಲಿ. ನವದೆಹಲಿಯಲ್ಲಿ ನಡೆದಿದ್ದ ಆ ಗೇಮ್ಸ್‌ನಲ್ಲಿ ಮುದ್ದಾದ ಭಾರತೀಯ ಆನೆಯ ಮರಿಯ ರೂಪದ ಮಾಸ್ಕಾಟ್‌ಗೆ ‘ಅಪ್ಪು’ ಎಂದು ಹೆಸರಿಡಲಾಗಿತ್ತು. ಈ ಬಾರಿ ಗೇಮ್ಸ್‌ನ ಮಾಸ್ಕಾಟ್ ಹೊನೊಹೊನ್. ಇದು ನಗೋಯಾ ಕೋಟೆಯ ಸಂಕೇತವಾದ ಶಚಿಹೊಕೊ (ಹುಲಿ ತಲೆ) ಮತ್ತು ಕ್ರೀಡಾಪಟುಗಳ ಹೃದಯದಲ್ಲಿರುವ ಉತ್ಸಾಹದ ಜ್ವಾಲೆಯನ್ನು ಸಂಯೋಜಿಸಿ ರಚಿಸಲಾಗಿದೆ. ಕೆಂಪು ಬಣ್ಣ ಮತ್ತು ದೊಡ್ಡ ಕಣ್ಣುಗಳು ಇದರ ವಿಶೇಷತೆ.

ಭಾರತ ಈವರೆಗೂ ಗೆದ್ದಿದ್ದು 779 ಪದಕ

ಈವರೆಗಿನ ಪ್ರತಿ ಕ್ರೀಡಾಕೂಟದಲ್ಲೂ ಪಾಲ್ಗೊಂಡಿರುವ ಭಾರತ ಒಟ್ಟು 779 ಪದಕ ಗೆದ್ದಿದೆ. ಇದರಲ್ಲಿ 183 ಚಿನ್ನ, 239 ಬೆಳ್ಳಿ ಹಾಗೂ 357 ಕಂಚು ಒಳಗೊಂಡಿವೆ. ಗರಿಷ್ಠ ಪದಕ ಗೆದ್ದ ದೇಶಗಳ ಪೈಕಿ ಭಾರತಕ್ಕೆ 5ನೇ ಸ್ಥಾನ. 1674 ಚಿನ್ನ ಸೇರಿದಂತೆ 3,570 ಪದಕ ಗೆದ್ದಿರುವ ಚೀನಾ ಅಗ್ರಸ್ಥಾನದಲ್ಲಿದ್ದರೆ, 1084 ಚಿನ್ನ ಸೇರಿ 3,242 ಪದಕ ಪಡೆದಿರುವ ಜಪಾನ್‌ 2ನೇ ಸ್ಥಾನದಲ್ಲಿದೆ. ದಕ್ಷಿಣ ಕೊರಿಯಾ 787 ಚಿನ್ನ ಸೇರಿ 2,425 ಪದಕ ಗೆದ್ದಿದ್ದು, ಇರಾನ್‌ 192 ಚಿನ್ನ ಸೇರಿದಂತೆ 611 ಪದಕ ತನ್ನದಾಗಿಸಿಕೊಂಡಿವೆ.

ಮೊದಲ ಗೇಮ್ಸ್‌ನಲ್ಲಿ 6, ಈ ಸಲ 43 ಕ್ರೀಡೆಗಳು

1952ರಲ್ಲಿ ನಡೆದ ಚೊಚ್ಚಲ ಏಷ್ಯನ್‌ ಗೇಮ್ಸ್‌ನಲ್ಲಿ ಕೇವಲ 6 ಕ್ರೀಡೆಗಳಿದ್ದವು. ಅಥ್ಲೆಟಿಕ್ಸ್‌, ಈಜು, ಬಾಸ್ಕೆಟ್‌ಬಾಲ್‌, ಸೈಕ್ಲಿಂಗ್‌, ಫುಟ್ಬಾಲ್‌ ಹಾಗೂ ವೇಟ್‌ಲಿಫ್ಟಿಂಗ್‌ ಸ್ಪರ್ಧೆಗಳನ್ನು ನಡೆಸಲಾಗಿತ್ತು. 57 ಪದಕ ಸ್ಪರ್ಧೆಗಳು ನಡೆದಿದ್ದವು. 489 ಅಥ್ಲೀಟ್‌ಗಳು ಪಾಲ್ಗೊಂಡಿದ್ದರು. ಈ ಬಾರಿ ಗೇಮ್ಸ್‌ನಲ್ಲಿ 43 ಕ್ರೀಡೆಗಳಿವೆ. ಒಟ್ಟು 71 ವಿಭಾಗಗಳ್ಲಿ 469 ಪದಕ ಸ್ಪರ್ಧೆಗಳು ನಡೆಯಲಿವೆ. 10 ಸಾವಿರಕ್ಕೂ ಹೆಚ್ಚು ಸ್ಪರ್ಧಿಗಳಿದ್ದಾರೆ.

1982ರಿಂದಲೂ ಚೀನಾ ಪದಕ ಪಟ್ಟಿಯಲ್ಲಿ ನಂ.1

ಗೇಮ್ಸ್‌ನಲ್ಲಿ 40ಕ್ಕೂ ಹೆಚ್ಚು ದೇಶಗಳು ಪಾಲ್ಗೊಳ್ಳುತ್ತಿದ್ದರೂ ಪದಕ ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆಯುತ್ತಿರುವುದು ಜಪಾನ್‌ ಮತ್ತು ಚೀನಾ ಮಾತ್ರ. ಮೊದಲ 8 ಆವೃತ್ತಿಗಳಲ್ಲಿ ಜಪಾನ್‌ ಸತತವಾಗಿ ನಂ.1 ಆಗಿತ್ತು. ಆದರೆ 1982ರಿಂದ 2022ರ ವರೆಗಿನ ಏಲ್ಲಾ ಗೇಮ್ಸ್‌ಗಳಲ್ಲಿ ಚೀನಾ ಪದಕ ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದಿದೆ.

ಏಷ್ಯನ್‌ ಗೇಮ್ಸ್‌ ಮಾಹಿತಿ

ಎಲ್ಲಿ?: ಜಪಾನ್‌ನ ಐಚಿ, ನಗೋಯಾ

ಎಷ್ಟು ದಿನ?: ಸೆ.19ರಿಂದ ಅ.4

ಎಷ್ಟು ಕ್ರೀಡೆ?: ಒಟ್ಟು 43 ಕ್ರೀಡೆಗಳು

ಎಷ್ಟು ಪದಕ?: 469 ಪದಕ ಸ್ಪರ್ಧೆಗಳು.

ಎಷ್ಟು ಅಥ್ಲೀಟ್ಸ್?: 10000+

43 ಕ್ರೀಡೆ

ಕ್ರೀಡಾಕೂಟದಲ್ಲಿ ಒಟ್ಟು 43 ಕ್ರೀಡೆಗಳನ್ನು ಆಡಿಸಲಾಗುತ್ತದೆ.

54 ಸ್ಥಳ

ಐಚಿ, ನಗೋಯಾದ 54 ಕಡೆಗಳಲ್ಲಿ ಗೇಮ್ಸ್‌ ಆಯೋಜನೆ.

45 ದೇಶ

ಕ್ರೀಡಾಕೂಟದಲ್ಲಿ ಪಾಲ್ಗೊಳ್ಳುತ್ತಿರುವ ಒಟ್ಟು ದೇಶಗಳ ಸಂಖ್ಯೆ 45

37 ಕ್ರೀಡೆ

ಈ ಬಾರಿ 37 ಕ್ರೀಡೆಗಳಲ್ಲಿ ಭಾರತದ ಅಥ್ಲೀಟ್‌ಗಳು ಸ್ಪರ್ಧಿಸಲಿದ್ದಾರೆ

------

ಇಂದಿನಿಂದ ಯುಎಸ್ ಓಪನ್ ಗ್ರ್ಯಾನ್‌ಸ್ಲಾಮ್‌ ಟೆನಿಸ್‌ ಟೂರ್ನಿ; ಸಿಂಗಲ್ಸ್‌ನಲ್ಲಿ ಗೆದ್ದರೆ ಸಿಗುತ್ತೆ ₹52.6 ಕೋಟಿ!

Kannadaprabha News — Sun, 30 Aug 2026 09:43:44 +0530

ನ್ಯೂಯಾರ್ಕ್: ವರ್ಷದ ಕೊನೆ ಗ್ರ್ಯಾನ್ ಸ್ಲಾಂ ಟೂರ್ನಿಯಾಗಿರುವ ಯುಎಸ್ ಓಪನ್ ಟೆನಿಸ್‌ಗೆ ಭಾನುವಾರ ಚಾಲನೆ ಸಿಗಲಿದೆ. ಈ ಮೂಲಕ ವಿಶ್ವದೆಲ್ಲೆಡೆಯ ದಿಗ್ಗಜ ಹಾಗೂ ತಾರಾ ಟೆನಿಸಿಗರ ಸಮಾಗಮಕ್ಕೆ ಮತ್ತೊಮ್ಮೆ ವೇದಿಕೆ ಸಜ್ಜಾಗಿದೆ.

2024ರ ಯುಎಸ್ ಓಪನ್ ಸೇರಿ 5 ಗ್ರ್ಯಾನ್‌ಸ್ಲಾಮ್ ಟ್ರೋಫಿ ಗೆದ್ದಿರುವ ವಿಶ್ವ ನಂ.1 ಆಟಗಾರ ಯಾನಿಕ್ ಸಿನ್ನರ್ ಈ ಬಾರಿ ಗಾಯದಿಂದಾಗಿ ಆಡುತ್ತಿಲ್ಲ. ಹಾಲಿ ಚಾಂಪಿಯನ್, ಸ್ಪೇನ್‌ನ ಯುವ ಸೂಪರ್‌ಸ್ಟಾರ್‌ ಕಾರ್ಲೋಸ್ ಆಲ್ಕರಜ್, 4 ಬಾರಿ ಟ್ರೋಫಿ ವಿಜೇತ ದಿಗ್ಗಜ ಟೆನಿಸಿಗ, ಸರ್ಬಿಯಾದ ನೊವಾಕ್ ಜೋಕೋವಿಚ್, 2021ರ ಚಾಂಪಿಯನ್ ಡ್ಯಾನಿಲ್ ಮೆಡ್ವೆಡೆವ್, ಇತ್ತೀಚೆಗಷ್ಟೇ ಫ್ರೆಂಚ್ ಓಪನ್ ಚಾಂಪಿಯನ್ ಆಗಿದ್ದ ಅಲೆಕ್ಸಾಂಡರ್ ಜ್ವೆರೆವ್ ಸೇರಿ ಪ್ರಮುಖರು ಈ ಬಾರಿ ಕಣದಲ್ಲಿದ್ದಾರೆ.ಮಹಿಳಾ ಸಿಂಗಲ್ಸ್ ವಿಭಾಗದಲ್ಲೂ ಹಲವು ಘಟಾನುಘಟಿಗಳು ಸ್ಪರ್ಧಿಸಲಿದ್ದಾರೆ. ಕಳೆದೆರಡು ಆವೃತ್ತಿಗಳ ಚಾಂಪಿಯನ್, ವಿಶ್ವ ನಂಬರ್ 1 ಆಟಗಾರ್ತಿ, ಬೆಲಾರಸ್‌ನ ಅರೈನಾ ಸಬಲೆಂಕಾ, 2022ರ ಯುಎಸ್ ಓಪನ್ ಸೇರಿ 6 ಗ್ರ್ಯಾನ್ ಸ್ಲಾಮ್ ವಿಜೇತೆ, ಪೋಲೆಂಡ್‌ನ ಇಗಾ ಸ್ವಿಯಾಟೆಕ್, ಅಮೆರಿಕದ ಯುವ ತಾರೆ, 2023ರ ಟ್ರೋಫಿ ವಿಜೇತೆ ಕೊಕೊ ಗಾಫ್, 2018, 2020ರ ಚಾಂಪಿಯನ್, ಜಪಾನಿನ ನವೊಮಿ ಒಸಾಕ ಸೇರಿ ಪ್ರಮುಖರು ಈ ಬಾರಿ ಪ್ರಮುಖ ಆಕರ್ಷಣೆ ಎನಿಸಿಕೊಳ್ಳಲಿದ್ದಾರೆ.

ಈ ಸಲ ಟೂರ್ನಿಯಲ್ಲಿ ಭಾರತೀಯರು ಇಲ್ಲ

ಈ ಬಾರಿ ಯುಎಸ್ ಓಪನ್ ಸಿಂಗಲ್ಸ್ ವಿಭಾಗದಲ್ಲಿ ಯಾವುದೇ ಭಾರತೀಯರು ಸ್ಪರ್ಧಿಸಲ್ಲ. ಸುಮಿತ್ ನಗಾಲ್ ಅರ್ಹತಾ ಸುತ್ತಿನಲ್ಲಿ ಆಡಿದ್ದು, ಮುಖ್ಯ ಸುತ್ತು ಪ್ರವೇಶಿಸಲು ವಿಫಲರಾಗಿದ್ದಾರೆ. ಪುರುಷರ ಡಬಲ್ಸ್ ವಿಭಾಗದ ಆಟಗಾರರ ಪಟ್ಟಿ ಇನ್ನಷ್ಟೇ ಪ್ರಕಟಗೊಳ್ಳಬೇಕಿದೆ.

ಸಿಂಗಲ್ಸ್‌ನಲ್ಲಿ ಗೆದ್ದರೆ ಸಿಗುತ್ತೆ ₹52.6 ಕೋಟಿ!

ಈ ಬಾರಿ ಸಿಂಗಲ್ಸ್‌ ವಿಭಾಗಗಳಲ್ಲಿ ಗೆದ್ದವರಿಗೆ 5.5 ಮಿಲಿಯನ್‌ ಯುಎಸ್‌ ಡಾಲರ್(ಸುಮಾರು 52.65 ಕೋಟಿ ರು.) ನಗದು ಬಹುಮಾನ ಲಭಿಸಲಿದೆ. ಇದು ಗ್ರ್ಯಾನ್‌ಸ್ಲಾಂ ಟೆನಿಸ್‌ನಲ್ಲೇ ಅತ್ಯಧಿಕ. ಕಳೆದ ಬಾರಿ ಗೆದ್ದವರಿಗೆ ₹42.87 ಕೋಟಿ ಲಭಿಸಿತ್ತು. ಈ ಬಾರಿ ಒಟ್ಟಾರೆ ಟೂರ್ನಿಯ ಬಹುಮಾನ ಮೊತ್ತವನ್ನು 1033 ಕೋಟಿ ರು.ಗೆ ಹೆಚ್ಚಿಸಲಾಗಿದೆ. ಇದು ಕಳೆದ ಬಾರಿಗಿಂತ ಶೇ.20ರಷ್ಟು ಹೆಚ್ಚು. ರನ್ನರ್‌-ಅಪ್‌ ಆದವರಿಗೆ ₹26.80 ಕೋಟಿ, ಸೆಮಿಫೈನಲ್‌ ಪ್ರವೇಶಿಸಿದವರಿಗೆ ತಲಾ ₹13.88 ಕೋಟಿ ನಗದು ಲಭಿಸಲಿದೆ. ಟೂರ್ನಿಯಲ್ಲಿ ಆಡಲು ಅವಕಾಶ ಪಡೆದ ಪ್ರತಿ ಆಟಗಾರರೂ ಕನಿಷ್ಠ ₹1.34 ಕೋಟಿ ನಗದು ಬಹುಮಾನ ಪಡೆದುಕೊಳ್ಳಲಿದ್ದಾರೆ.

ಒಲಿಂಪಿಕ್ಸ್‌ ಬಳಿಕ ಏಷ್ಯಾಡ್‌ನಲ್ಲೂ ಭಾರತಕ್ಕೆ ಚಿನ್ನ ತಪ್ಪಿಸಿದ ‘ತೂಕ’!

Kannadaprabha News — Tue, 22 Sep 2026 10:29:33 +0530

ನಗೋಯಾ: 2024ರ ಪ್ಯಾರಿಸ್‌ ಒಲಿಂಪಿಕ್ಸ್‌ನಲ್ಲಿ ಭಾರತದ ಕುಸ್ತಿಪಟು ವಿನೇಶ್‌ ಫೋಗಟ್‌ ತಮ್ಮ ಫೈನಲ್‌ ಪಂದ್ಯಕ್ಕೂ ಮುನ್ನ 100 ಗ್ರಾಂ ಹೆಚ್ಚು ತೂಕ ಹೊಂದಿದ್ದಕ್ಕೆ ಅನರ್ಹಗೊಂಡು ಐತಿಹಾಸಿಕ ಚಿನ್ನದ ಪದಕದಿಂದ ವಂಚಿತರಾಗಿದ್ದರು. ಈಗ ಏಷ್ಯನ್‌ ಗೇಮ್ಸ್‌ನಲ್ಲೂ ಭಾರತ ತೂಕದ ಕಾರಣದಿಂದ ಮತ್ತೊಂದು ಸಂಭಾವ್ಯ ಚಿನ್ನವನ್ನು ತಪ್ಪಿಸಿಕೊಂಡಿದೆ.

ಮಿಶ್ರ ಮಾರ್ಷಲ್‌ ಆರ್ಟ್ಸ್‌ನಲ್ಲಿ ಚಿನ್ನದ ಪದಕ ಮಿಸ್

ಮಿಶ್ರ ಮಾರ್ಷಲ್‌ ಆರ್ಟ್ಸ್‌ನ ಮಹಿಳೆಯರ 60 ಕೆ.ಜಿ. ವಿಭಾಗದ ಸೆಮಿಫೈನಲ್‌ ಸೋಮವಾರ ನಡೆಯಿತು. ಭಾರತದ ಸುಚಿಕಾ-ಸಿಂಗಾಪುರದ ಹ್ಯು ಹ್ಯೂನ್‌ ಟಿಯೊ ಸ್ಪರ್ಧಿಸಿದರು. ನಿಗದಿತ ಅವಧಿ ಮುಕ್ತಾಯಕ್ಕೆ ಫಲಿತಾಂಶ ಹೊರಬೀಳದ ಕಾರಣ, ಹೆಚ್ಚುವರಿ ಸಮಯ ನೀಡಲಾಯಿತು. ಅದರಲ್ಲಿ ಸುಚಿತಾ ಉತ್ತಮ ಆಟದ ಹೊರತಾಗಿಯೂ ಅವರು ಸೋತಿದ್ದಾಗಿ ಮೂವರು ಜಡ್ಜ್‌ಗಳು ತೀರ್ಪು ನೀಡಿದರು.

ಇದನ್ನು ಒಪ್ಪದ ಭಾರತ, ₹95800 ಮೊತ್ತ ಪಾವತಿಸಿ ತೀರ್ಪಿನ ವಿರುದ್ಧ ಮೇಲ್ಮನವಿ ಸಲ್ಲಿಸಿತು. ಆಗ ಇತರ ಮೂವರು ಸೇರಿ ಒಟ್ಟು 6 ಜಡ್ಜ್‌ಗಳು ಪರಿಶೀಲನೆ ನಡೆಸಿ, ಪಂದ್ಯದಲ್ಲಿ ಇಬ್ಬರೂ ಸಮಾನ ಅಂಕ ಪಡೆದಿದ್ದಾರೆ. ಹೀಗಾಗಿ ಡ್ರಾ ಎಂದು ಘೋಷಿಸಿದರು.

ಡ್ರಾ ಆಗಿದ್ದರಿಂದ ಫಲಿತಾಂಶ ನಿರ್ಧರಿಸಲು ನಿಯಮ ಪ್ರಕಾರ ಇಬ್ಬರ ತೂಕ ಪರಿಶೀಲನೆಯನ್ನು ಆಧಾರವಾಗಿ ತೆಗೆದುಕೊಳ್ಳಲಾಯಿತು. ಸ್ಪರ್ಧೆಗೂ ಮುನ್ನ ಬೆಳಗ್ಗೆ ನಡೆಸಿದ್ದ ತೂಕದಲ್ಲಿ ಸುಚಿಕಾ 59.2 ಕೆ.ಜಿ. ಇದ್ದರೆ, ಟಿಯೊ 58.5 ಕೆ.ಜಿ. ಇದ್ದರು. ಸುಚಿಕಾಗಿಂತ ಟಿಯೊ 700 ಗ್ರಾಂ ಕಡಿಮೆ ಇದ್ದ ಕಾರಣ, ಟಿಯೊ ವಿಜೇತ ಎಂದು ಘೋಷಿಸಲಾಯಿತು. ಸುಚಿಕಾ ಕಂಚಿನ ಪದಕಕ್ಕೆ ತೃಪ್ತಿಪಟ್ಟುಕೊಂಡರೆ, ಟಿಯೊ ಫೈನಲ್‌ಗೇರಿದರು. ಇದರ ಬಗ್ಗೆ ಸುಚಿಕಾ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದು, ಈ ಫಲಿತಾಂಶದಿಂದ ಅನ್ಯಾಯವಾಗಿದೆ ಎಂದು ಟೀಕಿಸಿದರು.

ವುಶು, ಈಜಿನಲ್ಲಿ ಭಾರತಕ್ಕೆ ಪದಕವಿಲ್ಲ

ಟೋಕಿಯೊ: ಏಷ್ಯಾಡ್‌ನ ವುಶು, ಈಜು ಸ್ಪರ್ಧೆಗಳಲ್ಲಿ ಮಂಗಳವಾರ ಭಾರತ ಪದಕ ಗೆಲ್ಲಲು ವಿಫಲವಾಗಿದೆ. ವುಶು ಮಹಿಳೆಯರ ಚಾಂಗ್‌ಕ್ವಾನ್‌ ಫೈನಲ್‌ನಲ್ಲಿ ನ್ಯೆಮನ್ ವಾಂಗ್ಸು 15ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು. ಮಹಿಳೆಯರ 60 ಕೆ.ಜಿ. ವಿಭಾಗದಲ್ಲಿ ರೋಶಿಬಿನಾ ದೇವಿ, ಪುರುಷರ 56 ಕೆ.ಜಿ. ವಿಭಾಗದಲ್ಲಿ ಆರ್ಯನ್‌ ಕ್ವಾರ್ಟರ್‌ ಫೈನಲ್‌ಗೇರಿದರು.

ಈಜು ಸ್ಪರ್ಧೆಯ 50 ಮೀ. ಬ್ಯಾಕ್‌ಸ್ಟ್ರೋಕ್‌ನ ಫೈನಲ್‌ನಲ್ಲಿ ಬೆಂಗಳೂರಿನ ಶ್ರೀಹರಿ ನಟರಾಜ್‌ 10ನೇ ಸ್ಥಾನಿಯಾದರು. 50 ಮೀ. ಫ್ರೀಸ್ಟೈಲ್‌ನಲ್ಲಿ ಆಕಾಶ್‌, ಗಿತೇಶ್‌ ಶಾ, 100 ಮೀ. ಬ್ರೆಸ್ಟ್‌ಸ್ಟ್ರೋಕ್‌ನಲ್ಲಿ ಧನುಶ್ ಸುರೇಶ್‌ ಫೈನಲ್‌ಗೇರಲಿಲ್ಲ. ಇನ್ನು, ನಟ ಮಾಧವನ್‌ ಅವರ ಪುತ್ರ ವೇದಾಂತ್‌ ಮಾಧವನ್‌ ಹಾಗೂ ಸಾಜನ್‌, ಧಕ್ಷಣ್‌, ಅನೀಶ್‌ ಇದ್ದ ತಂಡ 4*200 ಫ್ರೀಸ್ಟೈಲ್‌ನಲ್ಲಿ ಫೈನಲ್‌ಗೇರಲು ವಿಫಲವಾಯಿತು.

ಪ್ರಿ ಕ್ವಾರ್ಟರ್‌ಗೆ:

ಪುರುಷರ 70 ಕೆ.ಜಿ. ವಿಭಾಗದ ಬಾಕ್ಸಿಂಗ್‌ನಲ್ಲಿ ಸುಮಿತ್‌ ಪ್ರಿ ಕ್ವಾರ್ಟರ್‌ ಫೈನಲ್‌ಗೇರಿದರು. ಸ್ಕೀಟ್‌ ಶೂಟಿಂಗ್‌ನ ಅರ್ಹತಾ ಸುತ್ತಿನಲ್ಲಿ ಅನಂತ್‌ಜೀತ್‌ ಸಿಂಗ್‌ ನರುಕಾ 21ನೇ, ಮೈರಾಜ್ ಖಾನ್‌ 26ನೇ, ಭವ್‌ತೇಜ್‌ ಸಿಂಗ್‌ 27ನೇ ಸ್ಥಾನಿಯಾದರು.

ಯುಎಸ್‌ ಓಪನ್‌ ಮುಡಿಗೇರಿಸಿಕೊಂಡ ಎಲೆನಾ ರಬೈಕೆನಾ; ವಿಶ್ವ ನಂ.1 ಪಟ್ಟದ ಜೊತೆಗೆ ₹52.58 ಕೋಟಿ ನಗದು ಬಹುಮಾನ!

Sathish Kumar KH — Mon, 14 Sep 2026 11:41:35 +0530

ನ್ಯೂಯಾರ್ಕ್‌: ಕಜಕಸ್ತಾನದ ಎಲೆನಾ ರಬೈಕೆನಾ ವರ್ಷದ ಕೊನೆಯ ಗ್ರ್ಯಾನ್‌ಸ್ಲಾಂ ಟೆನಿಸ್‌ ಟೂರ್ನಿಯಾದ ಯುಎಸ್‌ ಓಪನ್‌ನ ಮಹಿಳಾ ಸಿಂಗಲ್ಸ್‌ ಚಾಂಪಿಯನ್‌ ಆಗಿ ಹೊರಹೊಮ್ಮಿದ್ದಾರೆ. ಫೈನಲ್‌ನಲ್ಲಿ ಈ ಹಿಂದಿನ ಷ್ಬಾರಿ ಚಾಂಪಿಯನ್‌, ಬೆಲಾರುಸ್‌ನ ಅರೈನಾ ಸಬಲೆಂಕಾ ವಿರುದ್ಧ 6-4, 5-7, 6-2 ಸೆಟ್‌ಗಳಲ್ಲಿ ಜಯಗಳಿಸಿದರು. ಇದರೊಂದಿಗೆ ಸತತ 3 ಬಾರಿ ಯುಎಸ್‌ ಓಪನ್‌ ಗೆಲ್ಲುವ ಸಬಲೆಂಕಾ ಕನಸು ಭಗ್ನಗೊಂಡಿತು.

ಸಬಲೆಂಕಾ ಯುಎಸ್‌ ಓಪನ್‌ನಲ್ಲಿ ಸತತ 19 ಪಂದ್ಯ ಜಯಿಸಿದ್ದರು. 2023ರ ಫೈನಲ್‌ನಲ್ಲಿ ಕೊಕೊ ಗಾಫ್‌ ವಿರುದ್ಧದ ಸೋಲಿನ ಬಳಿಕ ಅವರು ಸೋತಿರಲಿಲ್ಲ. ಆದರೆ, ಗೆಲುವಿನ ಓಟಕ್ಕೆ ರಬೈಕೆನಾ ತಡೆಯೊಡ್ಡಿದರು. ಈ ವರ್ಷ ಆಸ್ಟ್ರೇಲಿಯನ್‌ ಓಪನ್‌ ಫೈನಲ್‌ನಲ್ಲಿ ಸಬಲೆಂಕಾಗೆ ಸೋಲುಣಿಸಿದ್ದ ರಬೈಕೆನಾ, ಯುಎಸ್‌ ಓಪನ್‌ನಲ್ಲೂ ಜಯಿಸಿ, ಈ ವರ್ಷದ 2ನೇ ಹಾಗೂ ಒಟ್ಟಾರೆ 3ನೇ ಟ್ರೋಫಿ ಗೆದ್ದರು.

₹52.58 ಕೋಟಿ: ಚಾಂಪಿಯನ್‌ ಆದ ರಬೈಕೆನಾಗೆ ಸಿಕ್ಕ ಪ್ರಶಸ್ತಿ ಮೊತ್ತ.

₹26.75 ಕೋಟಿ: ರನ್ನರ್‌-ಅಪ್‌ ಆದ ಸಬಲೆಂಕಾಗೆ ದೊರೆತ ಪ್ರಶಸ್ತಿ ಮೊತ್ತ.

ಸಬಲೆಂಕಾರನ್ನು ಹಿಂದಿಕ್ಕಿ ರಬೈಕೆನಾ ವಿಶ್ವ ನಂ.1!

ಯುಎಸ್‌ ಓಪನ್‌ ಗೆಲುವಿನೊಂದಿಗೆ ರಬೈಕೆನಾ ವಿಶ್ವ ರ್‍ಯಾಂಕಿಂಗ್‌ ಪಟ್ಟಿಯಲ್ಲಿ ನಂ.1 ಸ್ಥಾನಕ್ಕೇರಲಿದ್ದಾರೆ. ಸೋಮವಾರ ಪರಿಷ್ಕೃತ ಪಟ್ಟಿ ಪ್ರಕಟಗೊಳ್ಳಲಿದೆ. ಸತತ 99 ವಾರ (ಸುಮಾರು 2 ವರ್ಷ) ಅಗ್ರಸ್ಥಾನ ಕಾಯ್ದುಕೊಂಡಿದ್ದ ಸಬಲೆಂಕಾ, 2ನೇ ಸ್ಥಾನಕ್ಕೆ ಕುಸಿಯಲಿದ್ದಾರೆ.

ಘಟಾನುಘಟಿಗಳನ್ನು ಸೋಲಿಸಿ ಚಾಂಪಿಯನ್‌ ಆದ ರಬೈಕೆನಾ

ಎಲೆನಾ ರಬೈಕೆನಾ ಪ್ರಶಸ್ತಿ ಹಾದಿ ಸುಲಭವಾಗಿರಲಿಲ್ಲ. ಅವರಿಗೆ ಪ್ರತಿ ಹಂತದಲ್ಲೂ ಕಠಿಣ ಸವಾಲು ಎದುರಾಯಿತು. ಆದರೆ, ರಬೈಕೆನಾ ಎಲ್ಲವನ್ನೂ ಸಲೀಸಾಗಿ ಎದುರಿಸಿ ಮುಂದೆ ಸಾಗಿದರು. ಪ್ರಶಸ್ತಿ ಹಾದಿಯಲ್ಲಿ ಅವರು ಮೂವರು ಮಾಜಿ ಗ್ರ್ಯಾನ್‌ ಸ್ಲಾಂ ಚಾಂಪಿಯನ್ನರಾದ ಜಪಾನ್‌ನ ನವೊಮಿ ಒಸಾಕ, ಅಮೆರಿಕದ ಕೊಕೊ ಗಾಫ್‌ ಹಾಗೂ ಅರೈನಾ ಸಬಲೆಂಕಾರನ್ನು ಸೋಲಿಸಿದರು. ಇನ್ನು, 2024ರ ಪ್ಯಾರಿಸ್‌ ಒಲಿಂಪಿಕ್ಸ್‌ನಲ್ಲಿ ಚಿನ್ನ ಗೆದ್ದಿದ್ದ ಚೀನಾದ ಕಿನ್‌ವೆನ್‌ ಝೆಂಗ್‌ ವಿರುದ್ಧವೂ ಜಯಿಸಿದರು.

4 ವರ್ಷದಲ್ಲಿ ಮೊದಲ ಸಲ ಸಬೆಲಂಕಾಗೆ ಪ್ರಶಸ್ತಿ ಇಲ್ಲ!

4 ಗ್ರ್ಯಾನ್‌ಸ್ಲಾಂಗಳ ಒಡತಿ ಅರೈನಾ ಸಬಲೆಂಕಾ 2022ರ ಬಳಿಕ ಮೊದಲ ಬಾರಿಗೆ ಒಂದು ವರ್ಷದಲ್ಲಿ ಒಂದೂ ಗ್ರ್ಯಾನ್‌ ಸ್ಲಾಂ ಗೆದ್ದಿಲ್ಲ. 2023, 2024ರಲ್ಲಿ ಆಸ್ಟ್ರೇಲಿಯನ್‌ ಓಪನ್‌, 2024, 2025ರಲ್ಲಿ ಯುಎಸ್‌ ಓಪನ್‌ ಜಯಿಸಿದ್ದರು.

ಸಿಟ್ಟಲ್ಲಿ ರಾಕೆಟ್‌ ಒಡೆದು ಹಾಕಿದ ಸಬಲೆಂಕಾ: ವೈರಲ್‌!

ಅಂಕಣದಲ್ಲಿ ಹಾಗೂ ಅಂಕಣದಾಚೆ ತಮ್ಮ ಭಾವನೆಗಳನ್ನು ಮುಕ್ತವಾಗಿ ವ್ಯಕ್ತಪಡಿಸುವುದಕ್ಕೆ ಸಬಲೆಂಕಾ ಹೆಸರುವಾಸಿ. ಅದೇ ರೀತಿ, ರಬೈಕೆನಾ ವಿರುದ್ಧ ಸೋಲುತ್ತಿದ್ದಂತೆ ಹತಾಶೆಯಿಂದ ಸಬಲೆಂಕಾ ಅಂಕಣದಲ್ಲೇ ತಮ್ಮ ರಾಕೆಟ್‌ ಒಡೆದು ಹಾಕಿದರು. ಬಳಿಕ ಕ್ಯಾಮೆರಾಮನ್‌ಗೆ ಅವಾಶ್ಚ್ಯ ಶಬ್ಧದಿಂದ ನಿಂದಿಸಿದರು. ಈ ವಿಡಿಯೋಗಳು ವೈರಲ್‌ ಆಗಿವೆ. ಈ ಹಿಂದೆಯೂ ಸಬಲೆಂಕಾ ಇಂತಹ ವರ್ತನೆಗಳಿಂದ ವಿವಾದಕ್ಕೀಡಾಗಿದ್ದರು.

ಸ್ಟೆಫಿ ಗ್ರಾಫ್‌ ದಾಖಲೆ ಸರಿಗಟ್ಟಿದ ರಬೈಕೆನಾ!

ಒಂದು ವರ್ಷದಲ್ಲಿ ಗ್ರ್ಯಾನ್‌ ಸ್ಲಾಂ ಫೈನಲ್‌ನಲ್ಲಿ 2 ಬಾರಿ ವಿಶ್ವ ನಂ.1 ಆಟಗಾರ್ತಿಯನ್ನು ಸೋಲಿಸಿದ ಕೇವಲ 2ನೇ ಆಟಗಾರ್ತಿ ಎಲೆನಾ ರಬೈಕೆನಾ. 1995ರಲ್ಲಿ ಜರ್ಮನಿಯ ಸ್ಟೆಫಿ ಗ್ರಾಫ್‌ ಈ ಸಾಧನೆ ಮಾಡಿದ್ದರು.

ಏಷ್ಯನ್ ಗೇಮ್ಸ್‌ 2026: ನನಸಾಗುತ್ತಾ ಭಾರತದ ಟಾಪ್‌-3 ಗುರಿ..? 100+ ಪದಕ ಗೆಲ್ಲುವ ಭರವಸೆ

Kannadaprabha News — Sat, 19 Sep 2026 10:12:35 +0530

ನಗೋಯಾ: ಕಳೆದ ಬಾರಿ ಪದಕ ಗಳಿಕೆಯಲ್ಲಿ 100ರ ಗಡಿ ದಾಟಿದ್ದ ಭಾರತ ಈ ಬಾರಿ ಆ ದಾಖಲೆಯನ್ನೂ ಮುರಿಯುವ ವಿಶ್ವಾಸದಲ್ಲಿದೆ. ಒಟ್ಟು 503 ಕ್ರೀಡಾಪಟುಗಳು ಭಾರತವನ್ನು ಪ್ರತಿನಿಧಿಸಲಿದ್ದಾರೆ. ಇದರಲ್ಲಿ 269 ಪುರುಷ, 234 ಮಹಿಳಾ ಅಥ್ಲೀಟ್‌ಗಳಿದ್ದಾರೆ. ಉಳಿದಂತೆ 265 ಸಹಾಯಕ ಸಿಬ್ಬಂದಿ ಕೂಡಾ ಇದ್ದಾರೆ. ಒಟ್ಟಾರೆ 768 ಭಾರತೀಯರು ಜಪಾನ್‌ಗೆ ತೆರಳಿದ್ದಾರೆ. ಕರ್ನಾಟಕದಿಂದ ಈಜುಪಟು ಶ್ರೀಹರಿ ನಟರಾಜ್‌, ಗಾಲ್ಫರ್‌ ಅದಿತಿ ಅಶೋಕ್‌, ಅಥ್ಲೀಟ್‌ಗಳಾದ ಸ್ನೇಹಾ, ಯಶಸ್‌ ಪಿ., ಎಂ.ಆರ್‌.ಪೂವಮ್ಮ, ಸಿಂಧುಶ್ರೀ, ಶಟ್ಲರ್‌ ಆಯುಷ್‌ ಶೆಟ್ಟಿ, ಕ್ರಿಕೆಟರ್‌ ಶ್ರೇಯಾಂಕಾ ಪಾಟೀಲ್‌ ಸೇರಿ 24 ಮಂದಿ ಸ್ಪರ್ಧಿಸಲಿದ್ದಾರೆ.

ಕಳೆದ ಬಾರಿ ಭಾರತದ 661 ಮಂದಿ ಚೀನಾದ ಹ್ಯಾಂಗ್ಝೋ ಏಷ್ಯನ್‌ ಗೇಮ್ಸ್‌ನಲ್ಲಿ ಪಾಲ್ಗೊಂಡಿದ್ದರು. ಭಾರತ 28 ಚಿನ್ನ ಸೇರಿ 106 ಪದಕ ಗೆದ್ದಿತ್ತು. ಅದು ಏಷ್ಯಾಡ್‌ ಇತಿಹಾಸದಲ್ಲೇ ಭಾರತ ಗೆದ್ದ ಅತಿ ಹೆಚ್ಚು ಪದಕ. ಆದರೂ ಭಾರತ ಪದಕ ಪಟ್ಟಿಯಲ್ಲಿ ಅಗ್ರ-3ರಲ್ಲಿ ಸ್ಥಾನ ಪಡೆದುಕೊಂಡಿರಲಿಲ್ಲ. 4ನೇ ಸ್ಥಾನಿಯಾಗಿತ್ತು. ಈ ಬಾರಿಯೂ ಭಾರತ ಅಗ್ರ-3ರ ಗುರಿ ಇಟ್ಟುಕೊಂಡೇ ಗೇಮ್ಸ್‌ನಲ್ಲಿ ಪಾಲ್ಗೊಳ್ಳಲಿದೆ. ಅಂದಹಾಗೆ, ಭಾರತ ಈವರೆಗಿನ 19 ಆವೃತ್ತಿಗಳ ಪೈಕಿ ಅಗ್ರ-3ರಲ್ಲಿ ಸ್ಥಾನ ಪಡೆದಿದ್ದು 2 ಬಾರಿ ಮಾತ್ರ. 1951ರಲ್ಲಿ 2ನೇ, 1962ರಲ್ಲಿ 3ನೇ ಸ್ಥಾನಿಯಾಗಿತ್ತು.

ಪದಕ ಭರವಸೆಗಳು:

ಭಾರತ ಈ ಬಾರಿಯೂ ಕೆಲ ಅಥ್ಲೀಟ್‌ಗಳ ಮೇಲೆ ಹೆಚ್ಚಿನ ಭರವಸೆ ಇಟ್ಟುಕೊಂಡಿದೆ. ಬ್ಯಾಡ್ಮಿಂಟನ್‌ನಲ್ಲಿ ಪಿ.ವಿ.ಸಿಂಧು, ಲಕ್ಷ್ಯ ಸೇನ್‌, ಸಾತ್ವಿಕ್‌-ಚಿರಾಗ್‌, ಆಯುಷ್‌, ಅಥ್ಲೆಟಿಕ್ಸ್‌ನಲ್ಲಿ ಅವಿನಾಶ್‌ ಸಾಬ್ಳೆ, ತೇಜಿಂದರ್‌ ಪಾಲ್‌, ಪಾರುಲ್‌ ಚೌಧರಿ, ಅನಿಮೇಶ್‌, ಬಾಕ್ಸಿಂಗ್‌ನಲ್ಲಿ ಲವ್ಲೀನಾ ಬೊರ್ಗೊಹೈನಾ, ಸಾಕ್ಷಿ ಚೌಧರಿ, ಅಂಕುಶ್‌, ಪ್ರಿಯಾ, ಪ್ರೀತಿ ಪವಾರ್‌, ಸಚಿನ್‌ ಸಿವಾಚ್‌, ಕುಸ್ತಿಯಲ್ಲಿ ಅಮನ್‌, ಅಂತಿಮ್‌ ಪಂಘಲ್‌, ನಿಶಾ ದಹಿಯಾ, ವೇಟ್‌ಲಿಫ್ಟಿಂಗ್‌ನಲ್ಲಿ ಮೀರಾಬಾಯಿ ಚಾನು, ಶೂಟಿಂಗ್‌ನಲ್ಲಿ ಮನು ಭಾಕರ್‌, ಇಶಾ ಸಿಂಗ್‌ ಸೇರಿ ಪ್ರಮುಖರು ಪದಕ ರೇಸ್‌ನಲ್ಲಿ ಮುಂಚೂಣಿಯಲ್ಲಿದ್ದಾರೆ. ಭಾರತದ ಕ್ರಿಕೆಟ್‌, ಕಬಡ್ಡಿ ತಂಡಗಳು ಚಿನ್ನದ ಪದಕ ಗೆಲ್ಲುವ ನೆಚ್ಚಿನ ತಂಡಗಳೆನಿಸಿವೆ.

ಏಷ್ಯಾಡ್‌: ಟೆಕ್‌ಬಾಲ್‌ನಲ್ಲಿ ಭಾರತಕ್ಕೆ ಪದಕ ನಿರೀಕ್ಷೆ!

ನಗೊಯಾ (ಜಪಾನ್‌): ಏಷ್ಯನ್‌ ಗೇಮ್ಸ್‌ ಟೆಕ್‌ಬಾಲ್‌ನಲ್ಲಿ ಭಾರತಕ್ಕೆ ಐತಿಹಾಸಿಕ ಪದಕದ ನಿರೀಕ್ಷೆ ಮೂಡಿದೆ. ಮಹಿಳಾ ಸಿಂಗಲ್ಸ್‌ನಲ್ಲಿ ಕ್ವಿಮ್ಸಿ ಜವೊಕಿಮ್‌ ಡಿಸೋಜಾ ಸೆಮಿಫೈನಲ್‌ ಪ್ರವೇಶಿಸಿದ್ದಾರೆ. ಗುಂಪು ಹಂತದಲ್ಲಿ ಎರಡೂ ಪಂದ್ಯಗಳನ್ನು ಗೆದ್ದು ಅಗ್ರಸ್ಥಾನ ಪಡೆದ ಕ್ವಿಮ್ಸಿಗೆ ಕ್ವಾರ್ಟರ್‌ ಫೈನಲ್‌ನಲ್ಲಿ ಬೈ ಸಿಕ್ಕಿತು. ಶನಿವಾರ ಸೆಮೀಸ್‌ನಲ್ಲಿ ಗೆದ್ದರೆ ಪದಕ ಖಚಿತವಾಗಲಿದೆ. ಸೋತರೂ, ಭಾನುವಾರ ಕಂಚಿನ ಪದಕಕ್ಕಾಗಿ ಸೆಣಸುವ ಅವಕಾಶ ಇರಲಿದೆ.

ಇದೇ ವೇಳೆ ಕ್ವಿಮ್ಸಿ ಹಾಗೂ ಮೊಹಮದ್‌ ಬೇಗ್‌ ಜೋಡಿ ಮಿಶ್ರ ಡಬಲ್ಸ್‌ನ ಕ್ವಾರ್ಟರ್‌ ಫೈನಲ್‌ನಲ್ಲಿ ಸೋಲುಂಡಿತು. ಆದರೆ ರಿಪಿಕೇಜ್‌ ಸುತ್ತು ಪ್ರವೇಶಿಸಿದ್ದು, ಕಂಚಿನ ಪದಕ ಗೆಲ್ಲುವ ಅವಕಾಶವಿದೆ.

ಏನಿದು ಟೆಕ್‌ಬಾಲ್‌?

ಇದು ಫುಟ್ಬಾಲ್‌ ಹಾಗೂ ಟೇಬಲ್‌ ಟೆನಿಸ್‌ ಮಿಶ್ರಿತ ಆಟ. ಟೇಬಲ್‌ ಟೆನಿಸ್‌ನಲ್ಲಿ ಬಳಸುವ ರೀತಿಯ ಟೇಬಲ್‌ ಮೇಲೆ ಫುಟ್ಬಾಲ್ ರೀತಿ ಚೆಂಡನ್ನು ಪರಸ್ಪರ ಅಂಕಣಗಳಿಗೆ ತಲುಪಿಸಿ ಆಡುವ ಆಟ. ಚೆಂಡನ್ನು ಹೊಡೆಯಲು ಕೈ, ತೋಳು ಬಿಟ್ಟು ದೇಹದ ಇನ್ನುಳಿದ ಭಾಗಗಳನ್ನು ಬಳಸಬಹುದು.

US Open Final 2026: ಅರೈನಾ ಸಬಲೆಂಕಾ vs ಎಲೆನಾ ರಬೈಕೆನಾ ಪ್ರಶಸ್ತಿಗಾಗಿ ಹೋರಾಟ

Kannadaprabha News — Sat, 12 Sep 2026 10:56:33 +0530

ನ್ಯೂಯಾರ್ಕ್‌: ವರ್ಷದ ಕೊನೆ ಗ್ರ್ಯಾನ್‌ಸ್ಲಾಂ ಟೆನಿಸ್‌ ಟೂರ್ನಿಯಾಗಿರುವ ಯುಎಸ್‌ ಓಪನ್‌ನಲ್ಲಿ ಈ ಬಾರಿ ಹಾಲಿ ಚಾಂಪಿಯನ್ ಅರೈನಾ ಸಬಲೆಂಕಾ ಹಾಗೂ ಹಾಲಿ ಆಸ್ಟ್ರೇಲಿಯನ್‌ ಓಪನ್‌ ಚಾಂಪಿಯನ್‌ ಎಲೆನಾ ರಬೈಕೆನಾ ನಡುವೆ ಫೈನಲ್‌ ಕಾದಾಟ ನಡೆಯಲಿದೆ. ಈ ಪಂದ್ಯ ಭಾನುವಾರ ನಿಗದಿಯಾಗಿದೆ.

ಮಹಿಳಾ ಸಿಂಗಲ್ಸ್‌ ಸೆಮಿಫೈನಲ್‌ನಲ್ಲಿ ವಿಶ್ವ ನಂ.1 ಆಟಗಾರ್ತಿ, ಕಳೆದೆರಡು ಬಾರಿಯ ಟ್ರೋಫಿ ವಿಜೇತೆ, ಬೆಲಾರಸ್‌ನ ಸಬಲೆಂಕಾ ಅವರು 3ನೇ ಶ್ರೇಯಾಂಕಿತೆ, ಅಮೆರಿಕದ ಜೆಸ್ಸಿಕಾ ಪೆಗುಲಾ ವಿರುದ್ಧ 7-5, 6-2 ಸೆಟ್‌ಗಳಲ್ಲಿ ಸುಲಭ ಗೆಲುವು ದಾಖಲಿಸಿದರು. ಈ ಮೂಲಕ ಟೂರ್ನಿಯಲ್ಲಿ ಸತತ 4ನೇ, ಒಟ್ಟಾರೆ ಗ್ರ್ಯಾನ್‌ಸ್ಲಾಂನಲ್ಲಿ 9ನೇ ಬಾರಿ ಫೈನಲ್‌ಗೇರಿದರು.

ಕೊಕೊ ಗಾಫ್‌ ಎದುರು ಗೆದ್ದ ರಬೈಕೆನಾ

ಮತ್ತೊಂದು ಸೆಮಿಫೈನಲ್‌ನಲ್ಲಿ 2ನೇ ಶ್ರೇಯಾಂಕಿತೆ, ಕಜಕಸ್ತಾನದ ರಬೈಕೆನಾ ಅವರು ಅಮೆರಿಕದ ಯುವ ತಾರೆ, 2023ರ ಚಾಂಪಿಯನ್‌ ಕೊಕೊ ಗಾಫ್‌ ವಿರುದ್ಧ 3-6, 6-4, 6-4 ಗೇಮ್‌ಗಳಲ್ಲಿ ಜಯಭೇರಿ ಬಾರಿಸಿದರು. ಈ ಮೂಲಕ ಯುಎಸ್‌ ಓಪನ್‌ನಲ್ಲಿ ಚೊಚ್ಚಲ, ಒಟ್ಟಾರೆ ಗ್ರ್ಯಾನ್‌ಸ್ಲಾಂನಲ್ಲಿ 4ನೇ ಬಾರಿ ರಬೈಕೆನಾ ಫೈನಲ್‌ ತಲುಪಿದರು.

ಸದ್ಯ ವಿಶ್ವ ರ್‍ಯಾಂಕಿಂಗ್‌ನಲ್ಲಿ ಸಬಲೆಂಕಾ ಅಗ್ರಸ್ಥಾನದಲ್ಲಿದ್ದು, ರಬೈಕೆನಾ 2ನೇ ಸ್ಥಾನದಲ್ಲಿದ್ದಾರೆ. ಸಬಲೆಂಕಾ ಅವರು ಈ ಪಂದ್ಯದಲ್ಲಿ ಸೋತರೆ ಅಗ್ರಸ್ಥಾನ ಕಳೆದುಕೊಳ್ಳಲಿದ್ದು, ರಬೈಕೆನಾ ಮೊದಲ ಸ್ಥಾನ ಪಡೆಯಲಿದ್ದಾರೆ.

ಆಸ್ಟ್ರೇಲಿಯಾದಲ್ಲಿ ರಬೈಕೆನಾ ವಿರುದ್ಧ ಸೋತಿದ್ದ ಅರೈನಾ

ಇದು ಸಬಲೆಂಕಾ ಹಾಗೂ ರಬೈಕೆನಾ ನಡುವೆ 3ನೇ ಗ್ರ್ಯಾನ್‌ಸ್ಲಾಂ ಫೈನಲ್‌ ಮುಖಾಮುಖಿ. 2023ರಲ್ಲಿ ಆಸ್ಟ್ರೇಲಿಯನ್‌ ಓಪನ್‌ ಫೈನಲ್‌ನಲ್ಲಿ ರಬೈಕೆನಾ ವಿರುದ್ಧ ಸಬಲೆಂಕಾ ಗೆದ್ದಿದ್ದರು. ಆದರೆ ಈ ವರ್ಷ ಆಸ್ಟ್ರೇಲಿಯನ್‌ ಓಪನ್‌ ಫೈನಲ್‌ನಲ್ಲಿ ಸಬಲೆಂಕಾರನ್ನು ಸೋಲಿಸಿ ರಬೈಕೆನಾ ಟ್ರೋಫಿ ಎತ್ತಿಹಿಡಿದಿದ್ದರು. ಈಗ ಮತ್ತೊಮ್ಮೆ ಇವರಿಬ್ಬರು ಮುಖಾಮುಖಿಯಾಗುತ್ತಿದ್ದಾರೆ.

04ನೇ ಫೈನಲ್‌

ಸಬಲೆಂಕಾ ಯುಎಸ್‌ ಓಪನ್‌ನಲ್ಲಿ ಸತತ 4ನೇ ಫೈನಲ್‌ಗೇರಿದರು. 2023ರಲ್ಲಿ ರನ್ನರ್‌ಅಪ್‌, 2024, 2025ರಲ್ಲಿ ಟ್ರೋಫಿ ಗೆದ್ದಿದ್ದಾರೆ.