Asianet Suvarna News

ವಯಸ್ಸು 75 ಆದರೂ ಅದೇ ಜೋಶ್: ಯಂಗ್ ಹೀರೋಗಳಿಗೂ ಶಾಕ್ ಕೊಡ್ತಿದೆ ರಜನಿಕಾಂತ್ ಆ ಸ್ಪೀಡ್!

Govindaraj S — Thu, 29 Oct 2026 19:26:56 +0530

ವಯಸ್ಸು ಹೆಚ್ಚಾಗುತ್ತಿದ್ದರೂ ಸೂಪರ್‌ಸ್ಟಾರ್ ರಜನಿಕಾಂತ್ ಅವರ ವೇಗ ಮಾತ್ರ ಕೊಂಚವೂ ಕಡಿಮೆಯಾಗಿಲ್ಲ. ಯುವ ನಟರಿಗೂ ಪೈಪೋಟಿ ನೀಡುವ ರೀತಿಯಲ್ಲಿ ಸಾಲು ಸಾಲು ಸಿನಿಮಾಗಳಲ್ಲಿ ಬ್ಯುಸಿಯಾಗಿರುವ ತಲೈವಾ, ಬಾಕ್ಸ್ ಆಫೀಸ್‌ನಲ್ಲೂ ತಮ್ಮದೇ ಆದ ಛಾಪು ಮೂಡಿಸುತ್ತಿದ್ದಾರೆ. ಒಂದೆಡೆ ಚಿತ್ರಮಂದಿರಗಳಲ್ಲಿ ಭರ್ಜರಿ ಕಲೆಕ್ಷನ್ ಮೂಲಕ ಸದ್ದು ಮಾಡುತ್ತಿದ್ದರೆ, ಮತ್ತೊಂದೆಡೆ ಕೈಯಲ್ಲಿರುವ ಸಿನಿಮಾಗಳ ಚಿತ್ರೀಕರಣವನ್ನು ವೇಗವಾಗಿ ಮುಗಿಸುತ್ತಾ ಅಭಿಮಾನಿಗಳಿಗೆ ಒಂದರ ಹಿಂದೆ ಒಂದರಂತೆ ಸರ್ಪ್ರೈಸ್ ನೀಡುತ್ತಿದ್ದಾರೆ.

‘ಜೈಲರ್ 2’ ಮೂಲಕ ಮತ್ತೆ ಬಾಕ್ಸ್ ಆಫೀಸ್‌ನಲ್ಲಿ ತಲೈವಾ ಅಬ್ಬರ!

ಸೂಪರ್‌ಸ್ಟಾರ್ ರಜನಿಕಾಂತ್ ಮತ್ತು ನಿರ್ದೇಶಕ ನೆಲ್ಸನ್ ದಿಲೀಪ್‌ಕುಮಾರ್ ಕಾಂಬಿನೇಷನ್‌ನಲ್ಲಿ ಮೂಡಿಬಂದಿದ್ದ ‘ಜೈಲರ್’ ಸಿನಿಮಾ ಯಾವ ಮಟ್ಟದ ಯಶಸ್ಸು ಕಂಡಿತ್ತು ಎಂಬುದು ಎಲ್ಲರಿಗೂ ಗೊತ್ತೇ ಇದೆ. ಇದೀಗ ಈ ಚಿತ್ರದ ಸೀಕ್ವೆಲ್ ‘ಜೈಲರ್ 2’ ಕೂಡ ಬಾಕ್ಸ್ ಆಫೀಸ್‌ನಲ್ಲಿ ಅದೇ ಮ್ಯಾಜಿಕ್ ಪುನರಾವರ್ತಿಸುತ್ತಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ.

ಚಿತ್ರದ ಆ್ಯಕ್ಷನ್ ದೃಶ್ಯಗಳು, ರಜನಿಕಾಂತ್ ಅವರ ಸ್ಟೈಲ್ ಹಾಗೂ ಮುತ್ತುವೇಲ್ ಪಾಂಡಿಯನ್ ಪಾತ್ರದಲ್ಲಿನ ಅವರ ಖದರ್ ಪ್ರೇಕ್ಷಕರ ಗಮನ ಸೆಳೆಯುತ್ತಿವೆ. ಬಿಡುಗಡೆಯಾದ ಕೇಂದ್ರಗಳಲ್ಲಿ ಸಿನಿಮಾ ಉತ್ತಮ ಗಳಿಕೆ ಮಾಡುತ್ತಿದೆ ಎಂಬ ವರದಿಗಳ ನಡುವೆ, ತಲೈವಾ ಅವರ ಬಾಕ್ಸ್ ಆಫೀಸ್ ಸಾಮರ್ಥ್ಯದ ಬಗ್ಗೆ ಮತ್ತೆ ಚರ್ಚೆ ಶುರುವಾಗಿದೆ. ಸೂಪರ್‌ಸ್ಟಾರ್ ಪರದೆಯ ಮೇಲೆ ಕಾಣಿಸಿಕೊಳ್ಳುವ ರೀತಿಯೇ ಅಭಿಮಾನಿಗಳಿಗೆ ಹಬ್ಬವಾಗಿದ್ದು, ಅವರ ಸ್ವಾಗ್‌ಗೆ ಯುವ ಪ್ರೇಕ್ಷಕರೂ ಫಿದಾ ಆಗುತ್ತಿದ್ದಾರೆ.

‘ಧರ್ಮನ್’ ಚಿತ್ರದ ಚಿತ್ರೀಕರಣ ಅಂತಿಮ ಹಂತಕ್ಕೆ!

‘ಜೈಲರ್ 2’ ಯಶಸ್ಸಿನ ಸಂಭ್ರಮದ ನಡುವೆಯೇ ರಜನಿಕಾಂತ್ ತಮ್ಮ ಮುಂದಿನ ಸಿನಿಮಾಗಳ ಕೆಲಸದಲ್ಲೂ ಬ್ಯುಸಿಯಾಗಿದ್ದಾರೆ. ಅವರ ಮುಂದಿನ ಪ್ರಾಜೆಕ್ಟ್‌ಗಳಲ್ಲಿ ಒಂದಾದ ‘ಧರ್ಮನ್’ ಚಿತ್ರದ ಚಿತ್ರೀಕರಣ ಅಂತಿಮ ಹಂತ ತಲುಪಿದೆ ಎನ್ನಲಾಗಿದೆ. ಪವರ್‌ಫುಲ್ ಆ್ಯಕ್ಷನ್ ಡ್ರಾಮಾ ಎಂದು ಹೇಳಲಾಗುತ್ತಿರುವ ಈ ಸಿನಿಮಾದ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳನ್ನೂ ವೇಗವಾಗಿ ಪೂರ್ಣಗೊಳಿಸಲು ಚಿತ್ರತಂಡ ಸಿದ್ಧತೆ ನಡೆಸುತ್ತಿದೆ.

ಸಾಮಾನ್ಯವಾಗಿ ಒಂದು ಸಿನಿಮಾ ಮುಗಿದ ಬಳಿಕ ಮತ್ತೊಂದು ಚಿತ್ರಕ್ಕೆ ಸಿದ್ಧರಾಗಲು ನಟರು ಸಮಯ ತೆಗೆದುಕೊಳ್ಳುತ್ತಾರೆ. ಆದರೆ, ರಜನಿಕಾಂತ್ ಮಾತ್ರ ಯಾವುದೇ ದೊಡ್ಡ ವಿರಾಮವಿಲ್ಲದೆ ಬ್ಯಾಕ್ ಟು ಬ್ಯಾಕ್ ಪ್ರಾಜೆಕ್ಟ್‌ಗಳನ್ನು ಕೈಗೆತ್ತಿಕೊಳ್ಳುತ್ತಿರುವುದು ಗಮನ ಸೆಳೆಯುತ್ತಿದೆ. ಅವರ ಈ ವೇಗ ಕೋಲಿವುಡ್‌ನ ಟ್ರೇಡ್ ವಲಯದಲ್ಲೂ ಕುತೂಹಲ ಮೂಡಿಸಿದೆ.

ದಶಕಗಳ ಬಳಿಕ ಒಂದಾಗಲಿದ್ದಾರೆ ರಜನಿಕಾಂತ್-ಕಮಲ್ ಹಾಸನ್!

ರಜನಿಕಾಂತ್ ಅವರ ಮುಂದಿನ ಸಿನಿಮಾಗಳ ಪಟ್ಟಿಯಲ್ಲಿ ಅಭಿಮಾನಿಗಳು ಅತ್ಯಂತ ಕಾತರದಿಂದ ಕಾಯುತ್ತಿರುವ ಪ್ರಾಜೆಕ್ಟ್ ಎಂದರೆ ಕಮಲ್ ಹಾಸನ್ ಮತ್ತು ರಜನಿಕಾಂತ್ ಅಭಿನಯದ ಮೆಗಾ ಮಲ್ಟಿಸ್ಟಾರರ್. ಭಾರತೀಯ ಚಿತ್ರರಂಗದ ಇಬ್ಬರು ದಿಗ್ಗಜ ನಟರು ಮತ್ತೆ ಒಂದೇ ಸಿನಿಮಾದಲ್ಲಿ ತೆರೆ ಹಂಚಿಕೊಳ್ಳಲಿದ್ದಾರೆ ಎಂಬ ಸುದ್ದಿ ಸಿನಿಪ್ರಿಯರಲ್ಲಿ ಭಾರೀ ನಿರೀಕ್ಷೆ ಹುಟ್ಟಿಸಿದೆ.

ವರದಿಗಳ ಪ್ರಕಾರ, ಈ ಬಹುನಿರೀಕ್ಷಿತ ಸಿನಿಮಾ ನವೆಂಬರ್‌ನಿಂದ ಸೆಟ್ಟೇರಲಿದೆ. ‘ಧರ್ಮನ್’ ಚಿತ್ರದ ಚಿತ್ರೀಕರಣ ಪೂರ್ಣಗೊಂಡ ಬಳಿಕ ರಜನಿಕಾಂತ್ ಈ ಮೆಗಾ ಪ್ರಾಜೆಕ್ಟ್‌ನ ತಂಡವನ್ನು ಸೇರಿಕೊಳ್ಳುವ ಯೋಜನೆಯಲ್ಲಿದ್ದಾರೆ ಎನ್ನಲಾಗಿದೆ. ದಶಕಗಳ ಅನುಭವ ಹೊಂದಿರುವ ಈ ಇಬ್ಬರು ಸೂಪರ್‌ಸ್ಟಾರ್‌ಗಳು ಒಂದೇ ಸಿನಿಮಾದಲ್ಲಿ ಕಾಣಿಸಿಕೊಂಡರೆ ಅಭಿಮಾನಿಗಳ ಸಂಭ್ರಮ ಹೇಗಿರಬಹುದು ಎಂಬುದನ್ನು ಊಹಿಸಿಕೊಳ್ಳುವುದೇ ಕಷ್ಟ. ಕಥೆ, ತಾರಾಗಣ ಹಾಗೂ ಇಬ್ಬರು ದಿಗ್ಗಜರ ತೆರೆಯ ಮೇಲಿನ ಕೆಮಿಸ್ಟ್ರಿ ಹೇಗಿರಲಿದೆ ಎಂಬ ಕುತೂಹಲ ಈಗಿನಿಂದಲೇ ಹೆಚ್ಚಾಗಿದೆ.

ಯುವ ಹೀರೋಗಳಿಗೂ ಪೈಪೋಟಿ ನೀಡುತ್ತಿರುವ ತಲೈವಾ!

ಇನ್ನು ರಜನಿಕಾಂತ್ ಅವರ ಸಿನಿಮಾ ಲೈನ್‌ಅಪ್ ನೋಡಿದರೆ ಅವರ ಉತ್ಸಾಹ ಮತ್ತು ಕೆಲಸದ ವೇಗ ಎಷ್ಟಿದೆ ಎಂಬುದು ಅರ್ಥವಾಗುತ್ತದೆ. ‘ಜೈಲರ್ 2’ ಮೂಲಕ ಬಾಕ್ಸ್ ಆಫೀಸ್‌ನಲ್ಲಿ ಸದ್ದು ಮಾಡುತ್ತಿರುವ ತಲೈವಾ, ‘ಧರ್ಮನ್’ ಹಾಗೂ ಕಮಲ್ ಹಾಸನ್ ಜೊತೆಗಿನ ಮೆಗಾ ಮಲ್ಟಿಸ್ಟಾರರ್ ಮೂಲಕ ಮುಂದಿನ ದಿನಗಳಲ್ಲೂ ಪ್ರೇಕ್ಷಕರನ್ನು ರಂಜಿಸಲು ಸಜ್ಜಾಗಿದ್ದಾರೆ.

ಒಂದೆಡೆ ತಮ್ಮ ಸ್ಟಾರ್‌ಡಮ್ ಉಳಿಸಿಕೊಂಡು, ಮತ್ತೊಂದೆಡೆ ಹೊಸ ಪ್ರಾಜೆಕ್ಟ್‌ಗಳ ಮೂಲಕ ಅಭಿಮಾನಿಗಳ ನಿರೀಕ್ಷೆ ಹೆಚ್ಚಿಸುತ್ತಿರುವ ರಜನಿಕಾಂತ್ ಅವರ ಈ ಜೋಶ್ ನಿಜಕ್ಕೂ ಗಮನಾರ್ಹ. ಈಗ ಎಲ್ಲರ ಕಣ್ಣು ಕಮಲ್ ಹಾಸನ್-ರಜನಿಕಾಂತ್ ಕಾಂಬಿನೇಷನ್‌ನ ಸಿನಿಮಾ ಮೇಲಿದೆ. ಈ ಇಬ್ಬರು ದಿಗ್ಗಜರು ಒಟ್ಟಾಗಿ ಬಾಕ್ಸ್ ಆಫೀಸ್‌ನಲ್ಲಿ ಯಾವ ರೀತಿಯ ದಾಖಲೆ ಬರೆಯಲಿದ್ದಾರೆ ಎಂಬುದನ್ನು ಕಾದು ನೋಡಬೇಕು.

ಸ್ನೇಹಿತರ ಜೊತೆ ನೋಡಿದರೆ ಬೋರಿಂಗ್‌ ಸಿನಿಮಾ, ಒಂಟಿಯಾಗಿ ನೋಡಿದರೆ ಜೀವನಪಾಠ: ಪುನೀತ್‌ ಪರಮಾತ್ಮದೊಳಗಿದೆ ಬದುಕಿನ ಸತ್ಯ!

Santosh Naik — Thu, 29 Oct 2026 19:11:53 +0530

ಬೆಂಗಳೂರು (ಅ.29): ಕನ್ನಡ ಚಿತ್ರರಂಗದ ಅಚ್ಚಳಿಯದ ನೆನಪು, ಕೋಟ್ಯಂತರ ಕನ್ನಡಿಗರ ನೆಚ್ಚಿನ 'ಅಪ್ಪು' ಪುನೀತ್ ರಾಜ್‌ಕುಮಾರ್ (Puneeth Rajkumar) ಅವರು ಭೌತಿಕವಾಗಿ ನಮ್ಮನ್ನು ಅಗಲಿ ಇಂದಿಗೆ (ಅಕ್ಟೋಬರ್ 29) ಭರ್ತಿ ಐದು ವರ್ಷಗಳು ಸಂದಿವೆ. ಕಾಲ ಎಷ್ಟೇ ಉರುಳಿದರೂ ಅವರ ಆಕರ್ಷಕ ನಗು, ಅದ್ಭುತ ವ್ಯಕ್ತಿತ್ವ ಹಾಗೂ ಅವರು ಬಿಟ್ಟುಹೋದ ಸಿನಿಮಾಗಳು ಪ್ರತಿಯೊಬ್ಬ ಕನ್ನಡಿಗನ ಹೃದಯದಲ್ಲಿ ಇಂದಿಗೂ ಅಮರ.

ಯೋಗರಾಜ್ ಭಟ್ ನಿರ್ದೇಶನದಲ್ಲಿ ಅಪ್ಪು ನಟಿಸಿದ್ದ 'ಪರಮಾತ್ಮ' (Paramathma) ಸಿನಿಮಾ ಬಿಡುಗಡೆಯಾದಾಗ ಅದೊಂದು ತಮಾಷೆಯ, ಜಾಲಿಯಾದ ಲವ್ ಸ್ಟೋರಿ ಎಂದೇ ಜನ ಭಾವಿಸಿದ್ದರು. ಆದರೆ, ಕಾಲ ಕಳೆದಂತೆ ಆ ಸಿನಿಮಾ ನೀಡುವ ಆಳವಾದ ಸಂದೇಶ, ಬದುಕಿನ ತತ್ವ ಮತ್ತು 'ಅಗಲಿಕೆ'ಯ ನೋವನ್ನು ಬಿಂಬಿಸುವ ರೀತಿ ನಿಜಕ್ಕೂ ಬೆರಗುಗೊಳಿಸುವಂತದ್ದು. ಅಪ್ಪು ಅವರ 5ನೇ ಪುಣ್ಯತಿಥಿಯಂದು, ಪ್ರತಿಯೊಬ್ಬ ಸಿನೆಮಾ ಪ್ರೇಮಿಯೂ 'ಪರಮಾತ್ಮ' ಚಿತ್ರವನ್ನು ಮತ್ತೆ ಏತಕ್ಕಾಗಿ ನೋಡಬೇಕು ಎಂಬುದಕ್ಕೆ ಇಲ್ಲಿದೆ ಉತ್ತರ. ,ಮೊದಲೇ ಹೇಳಿಬಿಡುತ್ತೇನೆ. ಪರಮಾತ್ಮ ಸಿನಿಮಾ ಫ್ರೆಂಡ್ಸ್‌ ಎಲ್ಲಾ ಕುಳಿತು ಜಾಲಿಯಾಗಿ ನೋಡುವ ಚಿತ್ರವಲ್ಲ, ಏಂಕಾಂಗಿಯಾಗಿ ಕುಳಿತು ನೋಡಿದರೆ ಕಾಡುವಂಥ ಸಿನಿಮಾ.

ಹಣ, ಪ್ರತಿಭೆ, ಸ್ವಾತಂತ್ರ್ಯ ಎಲ್ಲವೂ ಇದ್ದರೂ ನೆಲೆಗಾಗಿ ಹುಡುಕಾಟ!

'ಪರಮಾತ್ಮ' ಚಿತ್ರದ ನಾಯಕ 'ಪರಮ'ನಿಗೆ (ಪುನೀತ್ ರಾಜ್‌ಕುಮಾರ್) ಜೀವನದಲ್ಲಿ ಯಾವುದಕ್ಕೂ ಕೊರತೆಯಿಲ್ಲ. ಕೈತುಂಬಾ ಹಣ, ಅಪಾರ ಪ್ರತಿಭೆ, ಪೂರ್ಣ ಸ್ವಾತಂತ್ರ್ಯ ಮತ್ತು ಮಗನನ್ನು ಅಪಾರವಾಗಿ ಪ್ರೀತಿಸುವ, ಮಕ್ಕಳ ವೈದ್ಯರಾದ ತಂದೆ ಜಯಂತ್ ರಾವ್ ಬೆಂಬಲ ಕೂಡ ಇದೆ. ಬಿ.ಎಸ್ಸಿ ಯಲ್ಲಿ ಗೋಲ್ಡ್ ಮೆಡಲ್ ಪಡೆಯುವಷ್ಟು ಬುದ್ಧಿವಂತನಾಗಿದ್ದ ಪರಮ್‌, ಎಂ.ಎಸ್ಸಿ ಮುಗಿಸಲು ಬರೋಬ್ಬರಿ ಆರು ಎಟೆಂಪ್ಟ್‌ ಮಾಡ್ತಾನೆ. ಹಾಗಂತ ಎಂಎಸ್‌ಸಿ ಕಷ್ಟ ಅಂತಲ್ಲ. ಬದಲಿಗೆ ಜಗತ್ತನ್ನು ಅನುಭವಿಸಲು, ಅಲೆಯಲು, ತಮಾಷೆ ಮಾಡಲು ಹಾಗೂ ತನಗೇ ತಿಳಿಯದ ಯಾವುದೋ ಒಂದನ್ನು ಹುಡುಕಲು ಆತ ಬ್ಯುಸಿಯಾಗಿದ್ದ.

ಮುಂಬೈನಲ್ಲಿ ಶೇರ್ ಬ್ರೋಕರ್ ಆದ, ಕುಂಗ್‌ಫೂ ಕಲಿತ, ಒಂದಾದ ಮೇಲೊಂದರಂತೆ ವಿಭಿನ್ನ ಹಾದಿಗಳನ್ನು ತುಳಿದ. ಆದರೆ, ಯಾವುದೂ ಆತನಿಗೆ ಸ್ವಂತ ಮನೆ ಎಂಬ ಭಾವ ಮೂಡಿಸಲಿಲ್ಲ. ಏಕೆಂದರೆ, ಪರಮ್‌ ಹುಡುಕುತ್ತಿದ್ದದ್ದು ಕೇವಲ ವೃತ್ತಿಯನ್ನಲ್ಲ. ಬದಲಿಗೆ ತಾನು ಒಂದೆಡೆ ನಿಲ್ಲಲು ಬೇಕಾದ ಅರ್ಥಪೂರ್ಣ ಕಾರಣ.

ಯಾವಾಗ ಪರಮ್‌ ಸಿನಿಮಾ ಥಿಯೇಟರ್‌ನಲ್ಲಿ ದೀಪಾಳನ್ನು (ದೀಪಾ ಸನ್ನಿಧಿ) ಕಾಣ್ತಾನೋ, ಆ ಒಂದು ನೋಟ, ಆ ಒಂದು ನಗು ಆ ಚಂಚಲ ಮನಸ್ಸಿನ ಯುವಕನಿಗೊಂದು ಸ್ಪಷ್ಟ ಗುರಿ ನೀಡುತ್ತದೆ. ಆಕೆಯನ್ನರಸಿ ತೀರ್ಥಹಳ್ಳಿಗೆ ತಲುಪುವ ಪರಮ್‌, ಆಕೆಯನ್ನು ಒಲಿಸಿಕೊಳ್ಳಲು ಯತ್ನಿಸುತ್ತಾನೆ. ಆದರೆ, ದೀಪಾಳ ಕಟ್ಟುನಿಟ್ಟಿನ ಕುಟುಂಬ, ತಾತ ಅಪ್ಪಣ್ಣನ ಖಡಕ್ ನಿರ್ಧಾರಗಳ ಮುಂದೆ ಪರಮನ ಚೇಷ್ಟೆಗಳು ನಡೆಯುವುದಿಲ್ಲ. ದೀಪಾ ಆತನ ಮದುವೆ ಪ್ರಸ್ತಾವನೆಯನ್ನು ನಿರಾಕರಿಸಿದಾಗ, ಪರಮ ತನ್ನ ಜೀವನದಲ್ಲೇ ಮೊದಲ ಬಾರಿಗೆ ತಮಾಷೆಯಿಂದ ದಾಟಲು ಸಾಧ್ಯವಾಗದ 'ಇಲ್ಲ' ಎಂಬ ನಿರಾಕರಣೆಯನ್ನು ಎದುರಿಸುತ್ತಾನೆ. ಆ ಕ್ಷಣದಲ್ಲಿ ಆತ ತೋರಿಸುವ ನಿಷ್ಕಲ್ಮಶ ಪ್ರೀತಿ ಆತನ ವ್ಯಕ್ತಿತ್ವದ ನಿಜ ಸೌಂದರ್ಯವನ್ನು ಹೊರಹಾಕುತ್ತದೆ.

ಸಾನ್ವಿಯ ನಿಸ್ವಾರ್ಥ ಪ್ರೇಮ

ಮತ್ತೊಂದೆಡೆ, ಸಾನ್ವಿ (ಐಂದ್ರಿತಾ ರೇ) ಪರಮ್‌ನನ್ನು ಮೌನದಿಂದ ಪ್ರೀತಿ ಮಾಡ್ತಾಳೆ. ಆತನಲ್ಲಿ ಎಷ್ಟೇ ಲೋಪದೋಷಗಳಿದ್ದರೂ ಆತನ ಜೊತೆಗೇ ನಿಲ್ಲುವ ನೈಜ ಗೆಳತಿ ಆಕೆ. ಆದರೆ ಪರಮ್‌ ಆಕೆಗೆ ಯಾವುದೇ ಸುಳ್ಳು ಭರವಸೆ ನೀಡದೆ, ತಾನು ದೀಪಾಳನ್ನು ಮಾತ್ರ ಪ್ರೀತಿಸುತ್ತಿರುವುದಾಗಿ ಸ್ಪಷ್ಟಪಡಿಸುತ್ತಾನೆ. ಸಾನ್ವಿ ಏಕಮುಖ ಪ್ರೀತಿಯನ್ನು ಹೊತ್ತು ನಡೆಯುವ ರೀತಿ, ನಿರಾಕರಣೆಗಿಂತಲೂ ಹೆಚ್ಚು ಕಣ್ಣೀರು ತರಿಸುತ್ತದೆ.

ಅಂತಿಮವಾಗಿ, ಪರಮ್‌ ಮತ್ತು ದೀಪಾ ಮದುವೆಯಾಗುತ್ತಾರೆ. ಅವರಿಗೊಂದು ಮಗು ಹುಟ್ಟುತ್ತದೆ. ಜೀವನ ಸಂಪೂರ್ಣ ಸುಂದರವಾಯಿತಂದಲ್ಲ, ಬದಲಿಗೆ ತಾನು ಉಳಿದುಕೊಳ್ಳಲು ಅರ್ಹವಾದ ವ್ಯಕ್ತಿ ಸಿಕ್ಕಿದ್ದಕ್ಕೆ ಆ Restless ಹುಡುಗ ಕೊನೆಗೂ ತನಗೊಂದು 'ಮನೆ' ಕಂಡುಕೊಳ್ಳುತ್ತಾನೆ.

ಕಾಡುವ ದುರಂತ ಮತ್ತು 'ಪರಮಾತ್ಮ'ನ ನಿಜವಾದ ಹೃದಯ

ಸಂತೋಷದ ಬದುಕಿಗೆ ವಿಧಿ ಹಠಾತ್ತನೆ ತಡೆಯೊಡ್ಡುತ್ತದೆ. ದೀಪಾ ಸಾಯುತ್ತಾಳೆ. ಜವಾಬ್ದಾರಿಗಳಿಂದ ಓಡುತ್ತಿದ್ದ ಯುವಕ, ತಾಯಿಯಿಲ್ಲದ ಮಗು, ಮುರಿದುಬಿದ್ದ ಮನೆ ಮತ್ತು ಭೀಕರ ಮೌನವನ್ನು ಹಿಡಿದು ಒಂಟಿಯಾಗಿ ನಿಲ್ಲುತ್ತಾನೆ. ಅಲ್ಲಿಗೆ ಆ ಚಿತ್ರದಲ್ಲಿದ್ದ ಹಾಸ್ಯ ಕರಗಿಹೋಗಿ, 'ಪರಮಾತ್ಮ'ನ ನಿಜವಾದ ಹೃದಯ ಬಯಲಾಗುತ್ತದೆ.

ದೀಪಾಳ ಅಗಲಿಕೆಯ ನಂತರ ಸಾನ್ವಿ ಮತ್ತೆ ಬಂದು ಪರಮ್‌ನನ್ನು ಮದುವೆಯಾಗಲು ಬಯಸುತ್ತಾಳೆ. ಹಲವು ವರ್ಷಗಳ ನಂತರವೂ ಆಕೆ ಆತನನ್ನೇ ಪ್ರೀತಿಸುತ್ತಿರುತ್ತಾಳೆ. ಆದರೆ, ಪರಮ್‌ ಅತ್ಯಂತ ಮೃದುವಾಗಿ, ತಮಾಷೆಯಾಗಿಯೇ ಆಕೆಯನ್ನು ನಿರಾಕರಿಸುತ್ತಾನೆ. ಏಕೆಂದರೆ, ಪರಮ್‌ನ ಹೃದಯದಿಂದ ದೀಪಾ ಎಂದಿಗೂ ದೂರವಾಗಿರುವುದಿಲ್ಲ! ಆಕೆ ಅವರ ಮಗುವಿನಲ್ಲಿ, ಆತನ ನೆನಪುಗಳಲ್ಲಿ ಮತ್ತು ಆಕೆಯಿಂದಾಗಿ ಆತ ಬದಲಾದ ಹಾದಿಯಲ್ಲಿ ಜೀವಂತವಾಗಿದ್ದಳು.

ನಾವು ಮತ್ತೆ 'ಪರಮಾತ್ಮ' ಏಕೆ ನೋಡಬೇಕು?

ಪ್ರೀತಿ ಎಂದರೆ ಕೇವಲ ಒಲಿದ ಹುಡುಗಿಯನ್ನು ಪಡೆಯುವುದಷ್ಟೇ ಅಲ್ಲ, ಆಕೆಯನ್ನು ಕಳೆದುಕೊಂಡ ಮೇಲೆಯೂ ಆಕೆಯ ನೆನಪಿನಲ್ಲಿ ನಗುತ್ತಾ ಬದುಕುವುದು ಎಂಬುದನ್ನು ಈ ಚಿತ್ರ ತಿಳಿಸುತ್ತದೆ. ಮಜಾವಾಗಿ ಬದುಕುವ ಯುವಕನಿಂದ ಹಿಡಿದು, ಮಗುವಿಗಾಗಿ ಬಾಳುವ ಜವಾಬ್ದಾರಿಯುತ ತಂದೆಯಾಗಿ ಅಪ್ಪು ಅಭಿನಯ ಅವರ ವೃತ್ತಿಜೀವನದ ಶ್ರೇಷ್ಠ ಅಭಿನಯಗಳಲ್ಲೊಂದು.'ಕೆಲವರು ಜಗತ್ತನ್ನು ಬಿಟ್ಟು ಹೋಗಬಹುದು... ಆದರೆ ತಮ್ಮನ್ನು ಪ್ರೀತಿಸಿದವರ ಮನಸ್ಸನ್ನು ಎಂದಿಗೂ ಬಿಟ್ಟು ಹೋಗುವುದಿಲ್ಲ' ಎಂಬ ಸಂದೇಶ, ಇಂದು ಅಪ್ಪು ಅವರ ಅಗಲಿಕೆಯಿಂದ ನೊಂದಿರುವ ನಮಗೆಲ್ಲರಿಗೂ ಸಾಂತ್ವನ ನೀಡುತ್ತದೆ. ದೀಪಾ ಭೌತಿಕವಾಗಿ ಇಲ್ಲದಿರಬಹುದು, ಆದರೆ ಪರಮನ ಹೃದಯದಲ್ಲಿ ಆಕೆ ಸದಾ ಮಾರ್ಗದರ್ಶಕಿಯಾಗಿ, ಪ್ರೀತಿಯ ಬೆಳಕಾಗಿ ಇರುತ್ತಾಳೆ.

ಅಪ್ಪು ಇಂದು ನಮ್ಮೊಂದಿಗಿಲ್ಲದಿರಬಹುದು, ಆದರೆ 'ಪರಮಾತ್ಮ'ನ ಪರಮ್‌ನಂತೆ, ಅವರು ನೀಡಿಹೋದ ನೆನಪುಗಳು, ಸಿನಿಮಾಗಳು ಮತ್ತು ನಗು ನಮ್ಮನ್ನು ಸದಾ ಮುನ್ನಡೆಸುತ್ತವೆ. ಅಪ್ಪು ಅವರ 5ನೇ ಪುಣ್ಯಸ್ಮರಣೆಯ ಈ ದಿನದಂದು 'ಪರಮಾತ್ಮ' ಚಿತ್ರವನ್ನು ಮತ್ತೊಮ್ಮೆ ನೋಡಿ, ಆ ಪ್ರೀತಿ ಮತ್ತು ಬದುಕಿನ ಸತ್ಯವನ್ನು ಅನುಭವಿಸುವುದೇ ನಾವು ಸಲ್ಲಿಸುವ ನಿಜವಾದ ನಮನ.

ಕಾಫಿ ವಿತ್ ಕರಣ್ ಶೋನಲ್ಲಿ 'ಟಾಕ್ಸಿಕ್' ನಟಿಗೆ ಟಾಂಗ್ ಕೊಟ್ಟ ಜಾನ್ವಿಗೆ ನೆಟ್ಟಿಗರ ತರಾಟೆ: ಅಷ್ಟಕ್ಕೂ ಏನಾಯ್ತು?

Govindaraj S — Thu, 29 Oct 2026 18:30:22 +0530

ಜಾನ್ವಿ ಕಪೂರ್ ಸದ್ಯ ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ಟ್ರೋಲ್ ಆಗುತ್ತಿದ್ದಾರೆ. ಇತ್ತೀಚೆಗೆ ಪ್ರಸಾರವಾದ 'ಕಾಫಿ ವಿತ್ ಕರಣ್ 9' ಶೋನಲ್ಲಿ ತಾರಾ ಸುತಾರಿಯಾ ಬಗ್ಗೆ ಅವರು ಮಾಡಿದ ಕಮೆಂಟ್ ಇದಕ್ಕೆ ಕಾರಣ. ರ್ಯಾಪಿಡ್-ಫೈರ್ ರೌಂಡ್‌ನಲ್ಲಿ ತಾರಾ ಬಗ್ಗೆ ಜಾನ್ವಿ ಆಡಿದ ಮಾತುಗಳು ನೆಟ್ಟಿಗರ ಕೋಪಕ್ಕೆ ಗುರಿಯಾಗಿವೆ.

ಅಕ್ಟೋಬರ್ 28, 2026ರಂದು ಜಿಯೋ ಹಾಟ್‌ಸ್ಟಾರ್‌ನಲ್ಲಿ ಈ ಶೋ ಪ್ರೀಮಿಯರ್ ಆಗಿತ್ತು. ವರುಣ್ ಧವನ್ ಜೊತೆ ಶೋಗೆ ಬಂದಿದ್ದ ಜಾನ್ವಿ, ತಮ್ಮ ಬಾಯ್‌ಫ್ರೆಂಡ್ ಶಿಖರ್ ಪಹಾರಿಯಾ ಸಹೋದರ ವೀರ್ ಪಹಾರಿಯಾಗೆ ಡೇಟಿಂಗ್ ಟಿಪ್ಸ್ ಕೊಟ್ಟಿದ್ದರು. ಈ ವೇಳೆ ಅವರು ಹೇಳಿದ 'ಕನ್ಸರ್ಟ್' ಕಮೆಂಟ್ ಈಗ ವಿವಾದದ ಕಿಡಿ ಹೊತ್ತಿಸಿದೆ.

ವಿವಾದ ಸೃಷ್ಟಿಸಿದ ಆ 'ಕನ್ಸರ್ಟ್' ಕಮೆಂಟ್

"ಅವಳನ್ನು ಎಂದಿಗೂ ಕನ್ಸರ್ಟ್‌ಗೆ ಕರೆದುಕೊಂಡು ಹೋಗಬೇಡ" ಎಂದು ರ್ಯಾಪಿಡ್-ಫೈರ್ ರೌಂಡ್‌ನಲ್ಲಿ ಜಾನ್ವಿ ಠಕ್ ಅಂತ ಉತ್ತರಿಸಿದ್ದರು. ವೀರ್ ಪಹಾರಿಯಾಗೆ ಡೇಟಿಂಗ್ ಟಿಪ್ಸ್ ಕೊಡುವಂತೆ ನಿರೂಪಕ ಕರಣ್ ಜೋಹರ್ ಕೇಳಿದಾಗ ಜಾನ್ವಿ ಈ ರೀತಿ ಹೇಳಿದ್ದರು. ವೀರ್ ಅವರ ಎಕ್ಸ್-ಗರ್ಲ್‌ಫ್ರೆಂಡ್ ತಾರಾ ಸುತಾರಿಯಾಗೆ ಜಾನ್ವಿ ನೇರವಾಗಿ ಟಾಂಗ್ ಕೊಟ್ಟಿದ್ದಾರೆ ಎಂದೇ ವೀಕ್ಷಕರು ಇದನ್ನು ವಿಶ್ಲೇಷಿಸುತ್ತಿದ್ದಾರೆ. ನ್ಯಾಷನಲ್ ಟಿವಿಯಲ್ಲಿ ಸಹ ನಟಿಯನ್ನು ಕೀಳಾಗಿ ಕಂಡಿದ್ದು ಹಲವರ ಅಸಮಾಧಾನಕ್ಕೆ ಕಾರಣವಾಗಿದೆ.

ಅಸಲಿಗೆ ಈ ಘಟನೆ ನಡೆದಿದ್ದು ಡಿಸೆಂಬರ್ 2025ರಲ್ಲಿ. ಮುಂಬೈನಲ್ಲಿ ನಡೆದ ಗಾಯಕ ಎಪಿ ಧಿಲ್ಲೋನ್ ಕನ್ಸರ್ಟ್‌ನಲ್ಲಿ ತಾರಾ ಸುತಾರಿಯಾ ಸ್ಟೇಜ್ ಹತ್ತಿದ್ದರು. ಈ ವೇಳೆ ಧಿಲ್ಲೋನ್ ಅವರು ತಾರಾ ಅವರನ್ನು ತಬ್ಬಿಕೊಂಡು ಕೆನ್ನೆಗೆ ಮುತ್ತಿಟ್ಟ ವಿಡಿಯೋ ವೈರಲ್ ಆಗಿತ್ತು. ಅಲ್ಲೇ ಇದ್ದ ವೀರ್ ಪಹಾರಿಯಾ ಮುಖದಲ್ಲಿ ಮುಜುಗರ ಎದ್ದು ಕಾಣುತ್ತಿತ್ತು ಎಂದು ಆಗ ವರದಿಯಾಗಿತ್ತು. ಜನ ಕೂಡ ಈ ಹಳೆಯ ವಿಚಾರವನ್ನು ಬಹುತೇಕ ಮರೆತೇ ಬಿಟ್ಟಿದ್ದರು.

ಜನವರಿ 2026ರಲ್ಲಿ ತಾರಾ ಮತ್ತು ವೀರ್ ಬ್ರೇಕಪ್ ಮಾಡಿಕೊಂಡರು. ಈ ವಿವಾದದ ಬಗ್ಗೆ ಇಬ್ಬರೂ ಈ ಹಿಂದೆ ಸ್ಪಷ್ಟನೆ ನೀಡಿದ್ದರು. "ಸುಳ್ಳು ಸುದ್ದಿಗಳು, ಎಡಿಟ್ ಮಾಡಿದ ವಿಡಿಯೋಗಳು ಹಾಗೂ ಪೇಯ್ಡ್ ಪಿಆರ್ ಕ್ಯಾಂಪೇನ್‌ಗಳ ಮೂಲಕ ವಿನಾಕಾರಣ ಸುದ್ದಿ ಮಾಡಲಾಗುತ್ತಿದೆ" ಎಂದು ತಾರಾ ತಳ್ಳಿಹಾಕಿದ್ದರು. "ನನ್ನ ರಿಯಾಕ್ಷನ್ ಬೇರೊಂದು ಹಾಡಿಗೆ ಸಂಬಂಧಿಸಿದ್ದು, ಜನ ಅದನ್ನು ತಪ್ಪಾಗಿ ಅರ್ಥೈಸಿಕೊಂಡಿದ್ದಾರೆ" ಎಂದು ವೀರ್ ಕೂಡ ಸ್ಪಷ್ಟಪಡಿಸಿದ್ದರು. ತಣ್ಣಗಾಗಿದ್ದ ಈ ಹಳೆಯ ವಿವಾದವನ್ನು ಜಾನ್ವಿ ಈಗ ಮತ್ತೆ ಕೆದಕಿದ್ದಾರೆ.

ಜಾನ್ವಿ ವಿರುದ್ಧ ತಿರುಗಿಬಿದ್ದ ನೆಟ್ಟಿಗರು

ಕಾಫಿ ವಿತ್ ಕರಣ್ 9 ಶೋನಲ್ಲಿ ಜಾನ್ವಿ ಕಪೂರ್ ಆಡಿದ ಮಾತುಗಳು ನೆಟ್ಟಿಗರ ಆಕ್ರೋಶಕ್ಕೆ ಕಾರಣವಾಗಿವೆ. ಎಕ್ಸ್ (ಟ್ವಿಟರ್) ಹಾಗೂ ಇನ್‌ಸ್ಟಾಗ್ರಾಮ್‌ನಲ್ಲಿ ಅವರನ್ನು ಸಿಕ್ಕಾಪಟ್ಟೆ ಟ್ರೋಲ್ ಮಾಡಲಾಗುತ್ತಿದೆ. ತಾರಾ ಸುತಾರಿಯಾ ಅವರನ್ನು ಸಾರ್ವಜನಿಕವಾಗಿ ಕೀಳಾಗಿ ಕಂಡಿದ್ದಕ್ಕೆ ಜಾನ್ವಿಯನ್ನು 'ಮೀನ್' (mean) ಮತ್ತು 'ಬಿಚ್ಚಿ' (bitchy) ಎಂದು ಕರೆಯುತ್ತಿದ್ದಾರೆ. ತಾರಾ ಮತ್ತು ವೀರ್ ಈಗಾಗಲೇ ಸ್ಪಷ್ಟನೆ ನೀಡಿರುವಾಗ, ಜಾನ್ವಿ ಈ ರೀತಿ ಕಮೆಂಟ್ ಮಾಡಬಾರದಿತ್ತು ಎಂದು ಹಲವರು ಕಿಡಿಕಾರಿದ್ದಾರೆ.

ಜಾನ್ವಿ ಅವರ ಇಬ್ಬಗೆಯ ನೀತಿಯನ್ನು ನೆಟ್ಟಿಗರು ಪ್ರಶ್ನಿಸುತ್ತಿದ್ದಾರೆ. ತಮ್ಮ 'ಪೆಡ್ಡಿ' (Peddi) ಸಿನಿಮಾದ ಬಗ್ಗೆ ಜನ ಕಮೆಂಟ್ ಮಾಡಿದಾಗ, ಅದು ತಮಗೆ 'ಹಿಂಸೆ ನೀಡಿದ ಅನುಭವ' ಎಂದು ಜಾನ್ವಿ ಹೇಳಿಕೊಂಡಿದ್ದರು. ಬೇರೆಯವರಿಗೆ ಸಹಾನುಭೂತಿಯ ಪಾಠ ಮಾಡುವ ಜಾನ್ವಿ, ಈಗ ತಾವೇ ಇನ್ನೊಬ್ಬರ ಬಗ್ಗೆ ಕೀಳಾಗಿ ಮಾತನಾಡಿರುವುದು ಅವರ ದ್ವಂದ್ವ ನಿಲುವನ್ನು ತೋರಿಸುತ್ತದೆ ಎಂದು ಟೀಕಿಸುತ್ತಿದ್ದಾರೆ.

ಇನ್ನು ಸಾರ್ವಜನಿಕವಾಗಿ ಇಂತಹ 'ಮೀನ್' ಅಥವಾ 'ದ್ವಂದ್ವ' ನಡವಳಿಕೆಗಳನ್ನು ಜನ ಈಗ ಸುಲಭವಾಗಿ ಒಪ್ಪಿಕೊಳ್ಳುವುದಿಲ್ಲ ಎಂಬುದಕ್ಕೆ ಜಾನ್ವಿ ವಿರುದ್ಧದ ಟ್ರೋಲ್‌ಗಳೇ ಸಾಕ್ಷಿ. ಜಾನ್ವಿ ಇದನ್ನು ತಮಾಷೆಗೆ ಹೇಳಿರಬಹುದು. ಆದರೆ, ತಮ್ಮನ್ನು ಸಮರ್ಥಿಸಿಕೊಳ್ಳಲು ಅಲ್ಲಿ ಇಲ್ಲದ ವ್ಯಕ್ತಿಯೊಬ್ಬರನ್ನು ಬೇಕೆಂತಲೇ ಕೀಳಾಗಿ ಕಾಣುವುದನ್ನು ಜನ ಖಂಡಿತಾ ಸಹಿಸುವುದಿಲ್ಲ.

‘ಟಾಕ್ಸಿಕ್’ ಬಳಿಕ ಯಶ್‌ಗೆ ಅಗ್ನಿಪರೀಕ್ಷೆ: ರಾವಣನಾಗಿ ರಾಕಿಂಗ್ ಸ್ಟಾರ್ ಮಾಡ್ತಾರಾ ಕಮ್‌ಬ್ಯಾಕ್?

Govindaraj S — Thu, 29 Oct 2026 17:36:55 +0530

ಕೆಜಿಎಫ್ ಸರಣಿಯ ಮೂಲಕ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಭರ್ಜರಿ ಖ್ಯಾತಿ ಗಳಿಸಿದ್ದ ರಾಕಿಂಗ್ ಸ್ಟಾರ್ ಯಶ್, ‘ಟಾಕ್ಸಿಕ್’ ಚಿತ್ರದ ಬಳಿಕ ಇದೀಗ ‘ರಾಮಾಯಣ’ದ ಮೇಲೆ ಭಾರೀ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಗೀತು ಮೋಹನ್‌ದಾಸ್ ನಿರ್ದೇಶನದ ‘ಟಾಕ್ಸಿಕ್’ ಸಿನಿಮಾ ನಿರೀಕ್ಷಿತ ಮಟ್ಟದಲ್ಲಿ ಯಶಸ್ಸು ಕಾಣದ ಹಿನ್ನೆಲೆಯಲ್ಲಿ, ಯಶ್ ಅವರ ಮುಂದಿನ ಹೆಜ್ಜೆಯತ್ತ ಅಭಿಮಾನಿಗಳ ಕಣ್ಣು ನೆಟ್ಟಿದೆ. ಈ ನಡುವೆ ‘ರಾಮಾಯಣ’ದಲ್ಲಿ ರಾವಣನಾಗಿ ಕಾಣಿಸಿಕೊಳ್ಳುತ್ತಿರುವ ಯಶ್, ನಟನೆಯ ಜೊತೆಗೆ ನಿರ್ಮಾಣ ಹಾಗೂ ವಿತರಣೆಯ ಜವಾಬ್ದಾರಿಯನ್ನೂ ಹೊತ್ತುಕೊಂಡಿದ್ದಾರೆ. ಹಾಗಾದರೆ, ‘ಟಾಕ್ಸಿಕ್’ನಿಂದ ಉಂಟಾದ ಹಿನ್ನಡೆಯನ್ನು ‘ರಾಮಾಯಣ’ ಸರಿದೂಗಿಸಲಿದೆಯೇ? ಕಳೆದುಕೊಂಡ ಮಾರುಕಟ್ಟೆ ವರ್ಚಸ್ಸನ್ನು ಯಶ್ ಮರಳಿ ಪಡೆಯಲಿದ್ದಾರೆಯೇ?

‘ರಾಮಾಯಣ’ದ ಮೇಲೆ ಯಶ್‌ಗೆ ಭಾರೀ ನಿರೀಕ್ಷೆ!

‘ಕೆಜಿಎಫ್’ ಸರಣಿಯ ಯಶಸ್ಸಿನ ಬಳಿಕ ಯಶ್ ಅವರ ಮುಂದಿನ ಸಿನಿಮಾ ಯಾವುದು ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಮನೆಮಾಡಿತ್ತು. ಸುದೀರ್ಘ ವಿರಾಮದ ಬಳಿಕ ಘೋಷಣೆಯಾದ ‘ಟಾಕ್ಸಿಕ್’ ಚಿತ್ರದ ಮೇಲೆ ದೊಡ್ಡ ಮಟ್ಟದ ನಿರೀಕ್ಷೆಗಳಿದ್ದವು. ಆದರೆ, ಚಿತ್ರಕ್ಕೆ ಸಿಕ್ಕ ಪ್ರತಿಕ್ರಿಯೆ ನಿರೀಕ್ಷೆಗೆ ತಕ್ಕಂತೆ ಇರಲಿಲ್ಲ ಎಂಬ ಚರ್ಚೆ ನಡೆಯುತ್ತಿದೆ. ಹೀಗಾಗಿ, ಮುಂದಿನ ಪ್ರಾಜೆಕ್ಟ್‌ಗಳ ಆಯ್ಕೆ ಹಾಗೂ ಅವುಗಳ ನಿರ್ವಹಣೆಯಲ್ಲಿ ಯಶ್ ಹೆಚ್ಚು ಜಾಗರೂಕರಾಗಿದ್ದಾರೆ ಎನ್ನಲಾಗುತ್ತಿದೆ.

ಈಗ ಅವರ ಸಂಪೂರ್ಣ ಗಮನ ‘ರಾಮಾಯಣ’ದ ಮೇಲಿದೆ. ಚಿತ್ರದಲ್ಲಿ ರಾವಣನ ಪಾತ್ರದಲ್ಲಿ ನಟಿಸುತ್ತಿರುವ ಯಶ್, ನಿರ್ಮಾಪಕರಾಗಿಯೂ ಪ್ರಮುಖ ಜವಾಬ್ದಾರಿ ನಿಭಾಯಿಸುತ್ತಿದ್ದಾರೆ. ತೆರೆಮೇಲೆ ತಮ್ಮ ಅಭಿನಯದ ಮೂಲಕ ಪ್ರೇಕ್ಷಕರನ್ನು ಸೆಳೆಯುವ ಜೊತೆಗೆ, ತೆರೆಮರೆಯಲ್ಲೂ ಚಿತ್ರದ ಯಶಸ್ಸಿಗಾಗಿ ಶ್ರಮಿಸುತ್ತಿದ್ದಾರೆ. ‘ಟಾಕ್ಸಿಕ್’ನಿಂದ ಎದುರಾದ ಹಿನ್ನಡೆಯನ್ನು ಮರೆಸುವಂತಹ ದೊಡ್ಡ ಗೆಲುವು ‘ರಾಮಾಯಣ’ದಿಂದ ಸಿಗುತ್ತದೆಯೇ ಎಂಬುದೇ ಸದ್ಯದ ಕುತೂಹಲ.

‘ರಾಮಾಯಣ’ ಕರ್ನಾಟಕ ವಿತರಣಾ ಹಕ್ಕು ಯಶ್ ಪಾಲಿಗೆ!

‘ರಾಮಾಯಣ’ದ ಕರ್ನಾಟಕ ವಿತರಣಾ ಹಕ್ಕುಗಳನ್ನು ಯಶ್ ಪಡೆದುಕೊಂಡಿದ್ದಾರೆ ಎನ್ನಲಾಗಿದ್ದು, ತಮ್ಮದೇ ಆದ ಮಾನ್‌ಸ್ಟರ್ ಮೈಂಡ್ ಕ್ರಿಯೇಷನ್ಸ್ ಬ್ಯಾನರ್ ಮೂಲಕ ಚಿತ್ರವನ್ನು ರಾಜ್ಯದಲ್ಲಿ ಬಿಡುಗಡೆ ಮಾಡಲು ಸಿದ್ಧತೆ ನಡೆಸುತ್ತಿದ್ದಾರೆ. ಇದರಿಂದಾಗಿ, ಈ ಪ್ರಾಜೆಕ್ಟ್‌ನಲ್ಲಿ ಯಶ್ ಅವರ ಪಾತ್ರ ಕೇವಲ ನಟ ಮತ್ತು ನಿರ್ಮಾಪಕನಿಗೆ ಸೀಮಿತವಾಗಿಲ್ಲ ಎಂಬುದು ಸ್ಪಷ್ಟವಾಗುತ್ತದೆ.

ನಿರ್ದೇಶಕ ನಿತೇಶ್ ತಿವಾರಿ ಹಾಗೂ ನಿರ್ಮಾಪಕ ನಮಿತ್ ಮಲ್ಹೋತ್ರಾ ಅವರೊಂದಿಗೆ ಕೈಜೋಡಿಸಿರುವ ಯಶ್, ಈ ಬೃಹತ್ ಸಿನಿಮಾದ ಯಶಸ್ಸಿಗೆ ತಮ್ಮದೇ ಆದ ಕೊಡುಗೆ ನೀಡುತ್ತಿದ್ದಾರೆ. ಚಿತ್ರದ ವ್ಯಾಪಾರ, ವಿತರಣೆ ಹಾಗೂ ಪ್ರಚಾರದ ವಿಚಾರಗಳಲ್ಲೂ ಅವರು ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ ಎನ್ನಲಾಗುತ್ತಿದೆ. ಹೀಗಾಗಿ, ‘ರಾಮಾಯಣ’ ಯಶ್ ಅವರ ವೃತ್ತಿಜೀವನದಲ್ಲಿ ಮಹತ್ವದ ತಿರುವು ನೀಡುವ ಸಿನಿಮಾ ಆಗುವ ನಿರೀಕ್ಷೆಯಿದೆ.

ರಾವಣನಾಗಿ ಯಶ್; ರಾಮನಾಗಿ ರಣಬೀರ್, ಸೀತೆಯಾಗಿ ಸಾಯಿ ಪಲ್ಲವಿ!

‘ರಾಮಾಯಣ’ ಚಿತ್ರದ ತಾರಾಗಣವೇ ಸಿನಿಪ್ರಿಯರ ಗಮನ ಸೆಳೆಯುತ್ತಿದೆ. ಬಾಲಿವುಡ್ ನಟ ರಣಬೀರ್ ಕಪೂರ್ ಶ್ರೀರಾಮನ ಪಾತ್ರದಲ್ಲಿ ಕಾಣಿಸಿಕೊಂಡರೆ, ಸಾಯಿ ಪಲ್ಲವಿ ಸೀತೆಯಾಗಿ ನಟಿಸುತ್ತಿದ್ದಾರೆ. ಸನ್ನಿ ಡಿಯೋಲ್ ಹನುಮಂತನ ಪಾತ್ರಕ್ಕೆ ಜೀವ ತುಂಬಲಿದ್ದಾರೆ. ಇನ್ನು ಯಶ್ ರಾವಣನಾಗಿ ತೆರೆಮೇಲೆ ಅಬ್ಬರಿಸಲು ಸಜ್ಜಾಗಿದ್ದಾರೆ. ಎ.ಆರ್. ರೆಹಮಾನ್ ಹಾಗೂ ಹ್ಯಾನ್ಸ್ ಜಿಮ್ಮರ್ ಸಂಗೀತ ಸಂಯೋಜಿಸುತ್ತಿರುವುದು ಚಿತ್ರದ ಮೇಲಿನ ನಿರೀಕ್ಷೆಗಳನ್ನು ಮತ್ತಷ್ಟು ಹೆಚ್ಚಿಸಿದೆ.

ಅದ್ಧೂರಿ ತಾರಾಗಣ, ಭರ್ಜರಿ ದೃಶ್ಯ ವೈಭವ ಹಾಗೂ ಅಂತರರಾಷ್ಟ್ರೀಯ ಮಟ್ಟದ ತಾಂತ್ರಿಕ ತಂಡದೊಂದಿಗೆ ಮೂಡಿಬರುತ್ತಿರುವ ಈ ಸಿನಿಮಾ, ಭಾರತೀಯ ಚಿತ್ರರಂಗದ ಬಹುನಿರೀಕ್ಷಿತ ಪ್ರಾಜೆಕ್ಟ್‌ಗಳಲ್ಲಿ ಒಂದಾಗಿದೆ. ವಿಶೇಷವೆಂದರೆ, ರಾವಣನ ಪಾತ್ರಕ್ಕೆ ಚಿತ್ರದಲ್ಲಿ ಹೆಚ್ಚಿನ ಪ್ರಾಮುಖ್ಯತೆ ಸಿಗುವ ನಿರೀಕ್ಷೆಯಿದ್ದು, ಯಶ್ ಅವರ ಅಭಿನಯವನ್ನು ನೋಡಲು ಅಭಿಮಾನಿಗಳು ಕಾತರರಾಗಿದ್ದಾರೆ. ಈ ಪಾತ್ರದ ಮೂಲಕ ಅವರು ಮತ್ತೊಮ್ಮೆ ತಮ್ಮ ಪ್ಯಾನ್ ಇಂಡಿಯಾ ವರ್ಚಸ್ಸನ್ನು ಸಾಬೀತುಪಡಿಸುತ್ತಾರೆಯೇ ಎಂಬುದನ್ನು ಕಾದು ನೋಡಬೇಕಿದೆ.

ಎರಡು ಭಾಗಗಳಲ್ಲಿ ‘ರಾಮಾಯಣ’; 40 ಭಾಷೆಗಳಲ್ಲಿ ಬಿಡುಗಡೆ ಗುರಿ!

‘ರಾಮಾಯಣ’ವನ್ನು ಎರಡು ಭಾಗಗಳಲ್ಲಿ ತೆರೆಗೆ ತರಲು ಚಿತ್ರತಂಡ ಯೋಜಿಸಿದೆ ಎನ್ನಲಾಗುತ್ತಿದೆ. ವಿಶ್ವದಾದ್ಯಂತ 40 ಭಾಷೆಗಳಲ್ಲಿ ಹಾಗೂ ಭಾರತದಲ್ಲಿ ಐದು ಭಾಷೆಗಳಲ್ಲಿ ಸಿನಿಮಾ ಬಿಡುಗಡೆ ಮಾಡುವ ಗುರಿ ಹೊಂದಿದೆ ಎಂಬ ವರದಿಗಳೂ ಕೇಳಿಬರುತ್ತಿವೆ. ಚಿತ್ರದ ಬೃಹತ್‌ ಪ್ರಮಾಣ ಮತ್ತು ಜಾಗತಿಕ ಮಾರುಕಟ್ಟೆಯನ್ನು ಗಮನಿಸಿದರೆ, ಬಾಕ್ಸ್ ಆಫೀಸ್‌ನಲ್ಲಿ ದೊಡ್ಡ ಮೊತ್ತದ ಗಳಿಕೆಯ ನಿರೀಕ್ಷೆ ಇರುವುದು ಸಹಜ. ಚಿತ್ರದ ಒಟ್ಟಾರೆ ಗಳಿಕೆ ₹1,500 ಕೋಟಿ ತಲುಪಬಹುದು ಎಂಬ ಅಂದಾಜುಗಳೂ ಹರಿದಾಡುತ್ತಿವೆ. ಆದರೆ, ಇಂತಹ ಅಂದಾಜುಗಳು ನಿಜವಾಗುತ್ತವೆಯೇ ಎಂಬುದು ಸಿನಿಮಾ ಬಿಡುಗಡೆಯಾದ ಬಳಿಕವೇ ತಿಳಿಯಲಿದೆ.

ಇನ್ನು ‘ಟಾಕ್ಸಿಕ್’ ಬಳಿಕ ಯಶ್ ಅವರ ಮುಂದಿನ ನಡೆ ಏನಾಗಿರಲಿದೆ ಎಂಬ ಕುತೂಹಲಕ್ಕೆ ‘ರಾಮಾಯಣ’ ಉತ್ತರ ನೀಡುವ ಸಾಧ್ಯತೆಯಿದೆ. ನಟನೆಯ ಜೊತೆಗೆ ನಿರ್ಮಾಣ ಮತ್ತು ವಿತರಣೆಯಲ್ಲೂ ತೊಡಗಿಸಿಕೊಂಡಿರುವ ಯಶ್‌ಗೆ ಈ ಸಿನಿಮಾ ದೊಡ್ಡ ಸವಾಲು ಮಾತ್ರವಲ್ಲ, ತಮ್ಮ ಮಾರುಕಟ್ಟೆ ವರ್ಚಸ್ಸನ್ನು ಮತ್ತಷ್ಟು ವಿಸ್ತರಿಸಿಕೊಳ್ಳುವ ಅವಕಾಶವೂ ಹೌದು. ಹಾಗಾದರೆ, ರಾವಣನಾಗಿ ಯಶ್ ಮಾಡುವ ಮ್ಯಾಜಿಕ್ ಬಾಕ್ಸ್ ಆಫೀಸ್‌ನಲ್ಲಿ ಹೊಸ ದಾಖಲೆ ಬರೆಯಲಿದೆಯೇ? ‘ಟಾಕ್ಸಿಕ್’ನಿಂದ ಎದುರಾದ ಹಿನ್ನಡೆಯನ್ನು ‘ರಾಮಾಯಣ’ ಮರೆಸಲಿದೆಯೇ? ಉತ್ತರಕ್ಕಾಗಿ ಸಿನಿಮಾ ಬಿಡುಗಡೆಯವರೆಗೆ ಕಾಯಲೇಬೇಕು.

'ಬದಲಾವಣೆಗೆ ಪ್ರಯತ್ನಿಸುವುದೇ ಆತ್ಮಾವಲೋಕನ': ರಾವಣನ ಬಗ್ಗೆ ಸಾಯಿ ಪಲ್ಲವಿ ಹೀಗ್ಯಾಕಂದ್ರು?

Govindaraj S — Thu, 29 Oct 2026 16:48:09 +0530

ಬಹುನಿರೀಕ್ಷಿತ ‘ರಾಮಾಯಣ’ ಸಿನಿಮಾದ ಪ್ರೀಮಿಯರ್ ಪ್ರದರ್ಶನ ಲಾಸ್ ಏಂಜಲೀಸ್‌ನಲ್ಲಿ ಅದ್ಧೂರಿಯಾಗಿ ನಡೆದಿದೆ. ಈ ವೇಳೆ ಸೀತೆಯ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವ ನಟಿ ಸಾಯಿ ಪಲ್ಲವಿ, ರಾಮಾಯಣ ಮಹಾಕಾವ್ಯದ ಸಂದೇಶದ ಬಗ್ಗೆ ಮಾತನಾಡಿದ್ದಾರೆ. ‘ರಾವಣ ಸಂಪೂರ್ಣ ಕೆಟ್ಟವನಲ್ಲ’ ಎಂಬ ಅವರ ಮಾತು ಇದೀಗ ಗಮನ ಸೆಳೆಯುತ್ತಿದೆ.

ಭಾರತೀಯ ಚಿತ್ರರಂಗದ ಬಹುನಿರೀಕ್ಷಿತ ಸಿನಿಮಾಗಳಲ್ಲಿ ಒಂದಾಗಿರುವ ‘ರಾಮಾಯಣ’ ಬಿಡುಗಡೆಗೆ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ. ನಿತೇಶ್ ತಿವಾರಿ ನಿರ್ದೇಶನದ ಈ ಮಹತ್ವಾಕಾಂಕ್ಷಿ ಚಿತ್ರವು ತನ್ನ ಅದ್ಧೂರಿ ಮೇಕಿಂಗ್ ಹಾಗೂ ತಾರಾಗಣದಿಂದಲೇ ಭಾರೀ ನಿರೀಕ್ಷೆ ಹುಟ್ಟುಹಾಕಿದೆ. ಇತ್ತೀಚೆಗೆ ಅಮೆರಿಕದ ಲಾಸ್ ಏಂಜಲೀಸ್‌ನಲ್ಲಿ ನಡೆದ ಚಿತ್ರದ ವಿಶೇಷ ಪ್ರೀಮಿಯರ್ ಪ್ರದರ್ಶನದಲ್ಲಿ ರಣಬೀರ್ ಕಪೂರ್, ಸಾಯಿ ಪಲ್ಲವಿ, ರಾಕಿಂಗ್ ಸ್ಟಾರ್ ಯಶ್ ಸೇರಿದಂತೆ ಚಿತ್ರತಂಡದ ಪ್ರಮುಖರು ಭಾಗವಹಿಸಿದ್ದರು.

‘ನಮ್ಮೊಳಗಿನ ರಾವಣನನ್ನು ಗುರುತಿಸಬೇಕು’

ಲಾಸ್ ಏಂಜಲೀಸ್‌ನ ಅಕಾಡೆಮಿ ಮ್ಯೂಸಿಯಂ ಆಫ್ ಮೋಷನ್ ಪಿಕ್ಚರ್ಸ್‌ನಲ್ಲಿ ನಡೆದ ಕಾರ್ಯಕ್ರಮದ ರೆಡ್ ಕಾರ್ಪೆಟ್‌ನಲ್ಲಿ ಸಾಯಿ ಪಲ್ಲವಿ ಮಾಧ್ಯಮಗಳೊಂದಿಗೆ ಮಾತನಾಡಿದರು. ಭಾರತೀಯ ಮಹಾಕಾವ್ಯಗಳ ಬಗ್ಗೆ ಆಸಕ್ತಿ ಹೊಂದಿರುವ ಜಾಗತಿಕ ಪ್ರೇಕ್ಷಕರಿಗೆ ‘ರಾಮಾಯಣ’ ಹೊಸ ಅನುಭವ ನೀಡಲಿದೆ ಎಂಬ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದರು. ಅತ್ಯಾಧುನಿಕ ವಿಎಫ್‌ಎಕ್ಸ್ ತಂತ್ರಜ್ಞಾನ ಹಾಗೂ ಪ್ರತಿಭಾವಂತ ತಂತ್ರಜ್ಞರ ಪರಿಶ್ರಮದಿಂದ ಚಿತ್ರವನ್ನು ರೂಪಿಸಲಾಗಿದೆ ಎಂದು ತಿಳಿಸಿದರು.

ಇದೇ ವೇಳೆ, ರಾಮಾಯಣದಿಂದ ಪ್ರತಿಯೊಬ್ಬರೂ ಕಲಿಯಬೇಕಾದ ಜೀವನಪಾಠದ ಬಗ್ಗೆಯೂ ಸಾಯಿ ಪಲ್ಲವಿ ಮಾತನಾಡಿದರು. ನಮ್ಮಲ್ಲಿರುವ ಒಳ್ಳೆಯ ಮತ್ತು ಕೆಟ್ಟ ಗುಣಗಳನ್ನು ನಾವೇ ಗುರುತಿಸಿಕೊಳ್ಳಬೇಕು. ತಪ್ಪುಗಳನ್ನು ಅರಿತುಕೊಂಡು, ಅವುಗಳನ್ನು ತಿದ್ದಿಕೊಳ್ಳುತ್ತಾ ಸಾಗುವುದು ಜೀವನದಲ್ಲಿ ಬಹಳ ಮುಖ್ಯ ಎಂಬುದು ಅವರ ಅಭಿಪ್ರಾಯ.

‘ರಾವಣನಲ್ಲೂ ಒಳ್ಳೆಯ ಗುಣಗಳಿದ್ದವು’

ರಾವಣನ ಪಾತ್ರವನ್ನು ಸಂಪೂರ್ಣವಾಗಿ ಕೆಟ್ಟತನದ ಪ್ರತಿರೂಪವಾಗಿ ನೋಡುವುದಕ್ಕಿಂತ, ಆತನ ವ್ಯಕ್ತಿತ್ವದ ವಿವಿಧ ಆಯಾಮಗಳನ್ನು ಅರ್ಥಮಾಡಿಕೊಳ್ಳಬೇಕು ಎಂಬ ಸಂದೇಶವನ್ನು ಸಾಯಿ ಪಲ್ಲವಿ ಅವರ ಮಾತುಗಳು ನೆನಪಿಸುತ್ತವೆ. ಪ್ರತಿಯೊಬ್ಬರೊಳಗೂ ಒಂದಲ್ಲ ಒಂದು ರೂಪದಲ್ಲಿ ನಕಾರಾತ್ಮಕ ಗುಣಗಳು ಇರಬಹುದು. ಅವುಗಳನ್ನು ಗುರುತಿಸಿ ಬದಲಾವಣೆಗೆ ಪ್ರಯತ್ನಿಸುವುದೇ ನಿಜವಾದ ಆತ್ಮಾವಲೋಕನ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ರಾಮಾಯಣ ಕೇವಲ ರಾಮ ಮತ್ತು ರಾವಣನ ನಡುವಿನ ಸಂಘರ್ಷದ ಕಥೆಯಲ್ಲ. ಮನುಷ್ಯನ ಗುಣ, ದೋಷ, ನೈತಿಕತೆ ಹಾಗೂ ಜೀವನದ ಆಯ್ಕೆಗಳ ಬಗ್ಗೆಯೂ ಚಿಂತನೆಗೆ ಹಚ್ಚುವ ಮಹಾಕಾವ್ಯ. ಈ ಅಂಶಗಳನ್ನು ಇಂದಿನ ಪೀಳಿಗೆಗೂ ತಲುಪಿಸುವಲ್ಲಿ ಸಿನಿಮಾ ಮಹತ್ವದ ಪಾತ್ರ ವಹಿಸಲಿದೆ ಎಂಬ ನಿರೀಕ್ಷೆಯನ್ನು ಸಾಯಿ ಪಲ್ಲವಿ ವ್ಯಕ್ತಪಡಿಸಿದ್ದಾರೆ.

ರಾಮನಾಗಿ ರಣಬೀರ್, ರಾವಣನಾಗಿ ಯಶ್

ನಿತೇಶ್ ತಿವಾರಿ ನಿರ್ದೇಶನದ ‘ರಾಮಾಯಣ’ ಸಿನಿಮಾ ಎರಡು ಭಾಗಗಳಲ್ಲಿ ಬಿಡುಗಡೆಯಾಗಲಿದೆ. ಚಿತ್ರದಲ್ಲಿ ರಣಬೀರ್ ಕಪೂರ್ ಶ್ರೀರಾಮನಾಗಿ, ಸಾಯಿ ಪಲ್ಲವಿ ಸೀತೆಯಾಗಿ ಹಾಗೂ ಯಶ್ ರಾವಣನಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಹನುಮಂತನ ಪಾತ್ರದಲ್ಲಿ ಸನ್ನಿ ಡಿಯೋಲ್ ಮತ್ತು ಲಕ್ಷ್ಮಣನ ಪಾತ್ರದಲ್ಲಿ ರವಿ ದುಬೆ ನಟಿಸಿದ್ದಾರೆ.

ಇನ್ನು ನಮಿತ್ ಮಲ್ಹೋತ್ರಾ ಮತ್ತು ಯಶ್ ನಿರ್ಮಾಣದ ಈ ಚಿತ್ರಕ್ಕೆ ಎ.ಆರ್. ರೆಹಮಾನ್ ಹಾಗೂ ಹ್ಯಾನ್ಸ್ ಝಿಮ್ಮರ್ ಸಂಗೀತ ಸಂಯೋಜಿಸುತ್ತಿದ್ದಾರೆ. ಭಾರತೀಯ ಮಹಾಕಾವ್ಯವನ್ನು ಜಾಗತಿಕ ಮಟ್ಟದಲ್ಲಿ ಪ್ರಸ್ತುತಪಡಿಸುವ ಉದ್ದೇಶ ಹೊಂದಿರುವ ಈ ಸಿನಿಮಾ, ತನ್ನ ದೃಶ್ಯ ವೈಭವದ ಜತೆಗೆ ಕಥೆಯ ಸಂದೇಶದ ಮೂಲಕವೂ ಪ್ರೇಕ್ಷಕರನ್ನು ಸೆಳೆಯುವ ನಿರೀಕ್ಷೆಯಿದೆ.

ಜೈಲಿನಿಂದಲೇ ಹೆಂಡತಿ ರಕ್ಷಣೆಗೆ ನಿಂತ ದರ್ಶನ್, ಧನ್ವೀರ್ ವಿರುದ್ಧ ಕೋರ್ಟ್ ಮೆಟ್ಟಲೇರಿದ ಆರೋಪಿ ನಟ!

Gowthami K — Thu, 29 Oct 2026 16:43:53 +0530

ಬೆಂಗಳೂರು: ಚಿತ್ರದುರ್ಗದ ರೇಣುಕಾಸ್ವಾಮಿ ಪ್ರಕರಣದ ಆರೋಪಿಯಾಗಿರುವ ನಟ ದರ್ಶನ್ ಕುಟುಂಬ ಹಾಗೂ ನಟ ಧನ್ವೀರ್ ನಡುವಿನ ಗಲಾಟೆ ಈಗ ನ್ಯಾಯಾಲಯದ ಮೆಟ್ಟಿಲೇರಿದೆ. ತಮ್ಮ ಹಾಗೂ ತಮ್ಮ ಪತ್ನಿಯ ತೇಜೋವಧೆ ಮಾಡುತ್ತಿದ್ದಾರೆ ಎಂದು ಆರೋಪಿಸಿರುವ ನಟ ದರ್ಶನ್, ಪತ್ನಿ ವಿಜಯಲಕ್ಷ್ಮಿ ಆಗಲಿ ನನ್ನ ಕುಟುಂಬದ ವಿರುದ್ಧವಾಗಲಿ ಯಾವುದೇ ಹೇಳಿಕೆ ನೀಡಬಾರದೆಂದು ತಡೆ ಕೋರಿ ಧನ್ವೀರ್ ವಿರುದ್ಧ ಬೆಂಗಳೂರಿನ ಸಿಟಿ ಸಿವಿಲ್ ಮತ್ತು ಸೆಷನ್ಸ್ ನ್ಯಾಯಾಲಯದಲ್ಲಿ ಮಾನನಷ್ಟ ಮೊಕದ್ದಮೆ ಸಲ್ಲಿಕೆ ಮಾಡಿದ್ದಾರೆ.

ತಮ್ಮ ಪರ ವಕೀಲರಾದ ರಂಗನಾಥ ರೆಡ್ಡಿ ಅವರ ಮೂಲಕ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿರುವ ದರ್ಶನ್, ಧನ್ವೀರ್ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳುವಂತೆ ಹಾಗೂ ತಮ್ಮ ಕುಟುಂಬದ ಕುರಿತು ಯಾವುದೇ ಮಾಧ್ಯಮಗಳಲ್ಲಿ ಅಥವಾ ಸಾರ್ವಜನಿಕವಾಗಿ ಹೇಳಿಕೆ ನೀಡದಂತೆ ನಿರ್ಬಂಧ ವಿಧಿಸಬೇಕೆಂದು ಮನವಿ ಮಾಡಿದ್ದಾರೆ.

'ನನ್ನ ಬೆನ್ನಿಗೆ ಚೂರಿ ಹಾಕಿದ್ದಾನೆ': ದರ್ಶನ್ ಆಕ್ರೋಶ

ಅರ್ಜಿಯಲ್ಲಿ ನಟ ಧನ್ವೀರ್ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿರುವ ದರ್ಶನ್, ನನ್ನ ಅಭಿಮಾನಿಗಳ ಬೆಂಬಲದಿಂದ ಧನ್ವೀರ್ ಬೆಳೆದಿದ್ದಾನೆ. ಈಗ ನನ್ನ ಮತ್ತು ನನ್ನ ಪತ್ನಿಯ ಮರ್ಯಾದೆಯನ್ನು ಹರಾಜು ಹಾಕುತ್ತಿದ್ದಾನೆ. ನನ್ನ ಹೆಸರನ್ನು ಬಳಸಿಕೊಂಡು ಬೆಳೆದು, ಕೊನೆಗೆ ನನ್ನ ಕುಟುಂಬದ ಬೆನ್ನಿಗೇ ಚೂರಿ ಹಾಕುವ ಕೆಲಸ ಮಾಡಿದ್ದಾನೆ ಎಂದು ಗಂಭೀರ ಆರೋಪ ಮಾಡಿದ್ದಾರೆ.

ಪತ್ನಿಯ ತೇಜೋವಧೆ ಹಾಗೂ ಸುಳ್ಳು ಆರೋಪಗಳಿಗೆ ಖಂಡನೆ

ಪ್ರದೋಷ್ ವಿಷಯಕ್ಕೆ ಸಂಬಂಧಿಸಿದಂತೆ ತಮ್ಮ ಪತ್ನಿಯ ಮೇಲೆ ಧನ್ವೀರ್ ಮಾಡಿರುವ ಎಲ್ಲಾ ಆರೋಪಗಳು ಸಂಪೂರ್ಣವಾಗಿ ಆಧಾರರಹಿತ ಮತ್ತು ಸುಳ್ಳು ಎಂದು ದರ್ಶನ್ ತನ್ನ ಅರ್ಜಿಯಲ್ಲಿ ಉಲ್ಲೇಖಿಸಿದ್ದು. ಧನ್ವೀರ್ ನೀಡುತ್ತಿರುವ ಬೇಜವಾಬ್ದಾರಿ ಹೇಳಿಕೆಗಳಿಂದಾಗಿ ತಮ್ಮ ಪತ್ನಿಯ ಚಾರಿತ್ರ್ಯ ಹರಣವಾಗುತ್ತಿದ್ದು, ತೀವ್ರ ಮಾನಸಿಕ ನೆಮ್ಮದಿ ಹಾಳಾಗಿದೆ ಎಂದು ಕೋರ್ಟ್‌ಗೆ ತಿಳಿಸಿದ್ದಾರೆ.

ನ್ಯಾಯಾಲಯದಲ್ಲಿ ಮಾಡಲಾಗಿರುವ ಮುಖ್ಯ ಮನವಿಗಳು:

ನಟ ಧನ್ವೀರ್ , ದರ್ಶನ್ ಆಗಲಿ ಪತ್ನಿ, ಕುಟುಂಬದ ವಿರುದ್ಧವಾಗಲಿ ಯಾವುದೇ ರೀತಿಯ ಹೇಳಿಕೆಗಳನ್ನು ಮಾಧ್ಯಮಗಳಲ್ಲಾಗಲಿ, ಸಾಮಾಜಿಕ ಜಾಲತಾಣಗಳಲ್ಲಾಗಲಿ ನೀಡದಂತೆ ತಡೆಯಾಜ್ಞೆ ನೀಡಬೇಕು.

ಪ್ರದೋಷ್ ಹಾಗೂ ಕುಟುಂಬಕ್ಕೆ ಸಂಬಂಧಿಸಿದ ವಿಚಾರಗಳಲ್ಲಿ ಸುಳ್ಳು ಆರೋಪಗಳನ್ನು ಮಾಡಿ ತೇಜೋವಧೆ ಮಾಡುವುದನ್ನು ತಕ್ಷಣವೇ ತಡೆಯಬೇಕು.

ನಂಬಿಕೆದ್ರೋಹ ಎಸಗಿ, ಕುಟುಂಬದ ಗೌರವಕ್ಕೆ ಧಕ್ಕೆ ತಂದಿರುವುದಕ್ಕಾಗಿ ಮಾನನಷ್ಟ ಮೊಕದ್ದಮೆಯಡಿ ಕಾನೂನುಬದ್ಧ ಶಿಕ್ಷೆ ವಿಧಿಸಬೇಕು.

ವಕೀಲ ರಂಗನಾಥ ರೆಡ್ಡಿ ಅವರ ಮೂಲಕ ಸಲ್ಲಿಕೆಯಾಗಿರುವ ಈ ಅರ್ಜಿಯ ವಿಚಾರಣೆಯನ್ನು ನ್ಯಾಯಾಲಯ ಶೀಘ್ರದಲ್ಲೇ ಕೈಗೆತ್ತಿಕೊಳ್ಳುವ ನಿರೀಕ್ಷೆಯಿದೆ. ಈ ಬೆಳವಣಿಗೆಯಿಂದಾಗಿ ಕಳೆದ ಒಂದು ವಾರದಿಂದ ದರ್ಶನ್ ಪತ್ನಿ ಮತ್ತು ಧನ್ವೀರ್ ನಡುವಿನ ಜಗಳ ಎಲ್ಲಿಗೆ ಬಂದು ನಿಲ್ಲುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ.

ಮಲ್ಟಿಪ್ಲೆಕ್ಸ್‌ಗೆ ಹೋಗುವಾಗ ರೆಡ್ ಕಾರ್ಪೆಟ್, ಗೋಲ್ಡನ್ ಲೈಟ್ಸ್; ಹೊರಬರುವಾಗ ಮಾತ್ರ ಅಸಹ್ಯ ಕಾಂಕ್ರೀಟ್ ಮೆಟ್ಟಿಲುಗಳು, ಯಾಕೆ ಹೀಗೆ?

Santosh Naik — Thu, 29 Oct 2026 15:52:10 +0530

ಬೆಂಗಳೂರು (ಅ.29): ನೀವು ಎಂದಾದರೂ ಮಲ್ಟಿಪ್ಲೆಕ್ಸ್ ಅಥವಾ ಸಿನೆಮಾ ಹಾಲ್‌ಗಳಿಗೆ ಹೋದಾಗ ಒಂದು ವಿಷಯವನ್ನು ಗಮನಿಸಿದ್ದೀರಾ? ಥಿಯೇಟರ್ ಒಳಗೆ ಹೋಗುವ ದಾರಿಯುದ್ದಕ್ಕೂ ಕಣ್ಣು ಕೋರೈಸುವ ಗೋಲ್ಡನ್ ಲೈಟ್‌ಗಳು, ನಮ್ಮ ಕಾಲುಗಳಿಗೆ ನೋವೇ ಆಗದ ಮಾದರಿಯ 'ರೆಡ್ ಕಾರ್ಪೆಟ್' (Red Carpet) ಹಾಗೂ ಮೂಗಿಗೆ ಮತ್ತು ತರಿಸುವಂಥ ಪಾಪ್‌ಕಾರ್ನ್‌ ಫ್ಲೇವರ್‌ಗಳು ಇರುತ್ತದೆ. ಆದರೆ, ಸಿನಿಮಾ ಮುಗಿದ ತಕ್ಷಣ ನಿಮ್ಮನ್ನು ಕರೆದೊಯ್ಯುವ 'ಎಕ್ಸಿಟ್' (Exit) ದಾರಿ ಮಾತ್ರ ಅತ್ಯಂತ ಕಿರಿದಾದ, ದೀಪಗಳಿಲ್ಲದ, ಉಸಿರು ಕಟ್ಟುವ ಹಾಗೂ ಗಿಜಿಗಿಜಿ ಎನ್ನುವ ಕಾಂಕ್ರೀಟ್ ಮೆಟ್ಟಿಲುಗಳಿಂದ ಕೂಡಿರುತ್ತದೆ!

ಇದು ಕೇವಲ ಕಟ್ಟಡ ನಿರ್ಮಾಣದ ದೋಷ ಅಥವಾ ವೆಚ್ಚ ಕಡಿಮೆ ಮಾಡಲು ಮಾಡಿದ ವಿನ್ಯಾಸ ಎಂದು ನೀವು ಭಾವಿಸಿದ್ದರೆ ಅದು ನಿಮ್ಮ ಭ್ರಮೆ. ಪ್ರೇಕ್ಷಕರ ಮೆದುಳನ್ನು ನಿಯಂತ್ರಿಸಿ ಜೇಬಿನಿಂದ ಹಣ ಕೀಳಲು ಮತ್ತು ಸಿನಿಮಾ ಮುಗಿದ ಮೇಲೆ ತಕ್ಷಣ ಹೊರಗಟ್ಟಲು ಥಿಯೇಟರ್ ಮಾಲೀಕರು ಸೈಕಾಲಜಿ ಆಧಾರದ ಮೇಲೆ ರೂಪಿಸಿರುವ ಮಾಸ್ಟರ್ ಪ್ಲಾನ್ ಇದು!

ಏನಿದು ‘ಹ್ಯಾಲೋ ಎಫೆಕ್ಟ್’ (Halo Effect) ತಂತ್ರಜ್ಞಾನ?

ನೀವು ಥಿಯೇಟರ್ ಒಳಗೆ ಹೆಜ್ಜೆ ಇಡುತ್ತಿದ್ದಂತೆಯೇ ಅಲ್ಲಿರುವ ಕಾಸ್ಟ್ಲಿ ಲೈಟಿಂಗ್ಸ್ ಮತ್ತು ಆಡಂಬರದ ವಾತಾವರಣವನ್ನು ನೋಡಿ ನಿಮ್ಮ ಮೆದುಳು (Brain) ಮೊದಲ ನೋಟದಲ್ಲೇ "ಇಲ್ಲಿರುವ ಪ್ರತಿಯೊಂದೂ ಅತ್ಯಂತ ಪ್ರೀಮಿಯಂ ಹಾಗೂ ಐಷಾರಾಮಿ" ಎಂಬ ತೀರ್ಮಾನಕ್ಕೆ ಬಂದುಬಿಡುತ್ತದೆ. ಮನೋವಿಜ್ಞಾನದ ಭಾಷೆಯಲ್ಲಿ ಇದನ್ನು ‘ಹ್ಯಾಲೋ ಎಫೆಕ್ಟ್’ (Halo Effect) ಎಂದು ಕರೆಯಲಾಗುತ್ತದೆ.

ಅಂದರೆ, ಒಂದು ವಾತಾವರಣ ಅತ್ಯಂತ ಬೆಲೆಬಾಳುವಂತದ್ದು ಎಂದು ನಿಮ್ಮ ಮೆದುಳು ನಂಬಿದ ತಕ್ಷಣ, ಅಲ್ಲಿ ಸಿಗುವ ಪ್ರತಿಯೊಂದು ವಸ್ತುವಿನ ಬೆಲೆಯನ್ನೂ ನಿಮ್ಮ ಮೆದುಳು ಸಮರ್ಥಿಸಿಕೊಳ್ಳಲು ಆರಂಭಿಸುತ್ತದೆ. ಇದೇ ಕಾರಣಕ್ಕೆ ನೀವು ಹೊರಗೆ ಕೇವಲ ₹30-₹40 ಕ್ಕೆ ಸಿಗುವ ಪಾಪ್‌ಕಾರ್ನ್‌ ಥಿಯೇಟರ್ ಒಳಗೆ ₹700 ಹಾಗೂ ಕೇವಲ ₹20 ರ ಕೂಲ್ ಡ್ರಿಂಕ್ಸ್‌ಗೆ ₹500 ಇರುತ್ತದೆ. ಆಗ ಯೋಚನೆಯೇ ಮಾಡದೇ ಅತ್ಯಂತ ಖುಷಿಯಿಂದ ಜೇಬಿನಿಂದ ಹಣ ತೆಗೆದು ಕೊಡುತ್ತೀರಿ. ನಿಮ್ಮನ್ನು ಆ ರೀತಿ ಯೋಚಿಸುವಂತೆ ಮಾಡಲು ಆ ಅದ್ದೂರಿ ಎಂಟ್ರಿ ವಿನ್ಯಾಸಗೊಂಡಿರುತ್ತದೆ.

ಸಿನಿಮಾ ಮುಗಿದ ತಕ್ಷಣ ನೀವು 'ಫೈನಾನ್ಷಿಯಲ್ ವೇಸ್ಟ್'!

ಆದರೆ, ಒಮ್ಮೆ ಸಿನಿಮಾ ಮುಗಿದು ಎಂಡ್ ಕ್ರೆಡಿಟ್ಸ್ ಬೀಳುತ್ತಿದ್ದಂತೆಯೇ, ಆ ಥಿಯೇಟರ್ ಆಡಳಿತ ಮಂಡಳಿಗೆ ನಿಮ್ಮಿಂದ ಸಿಗಬೇಕಾದ ಹಣವೆಲ್ಲಾ ಬಂದಾಗಿರುತ್ತದೆ. ಅಂದರೆ, ಆ ಕ್ಷಣದಿಂದ ನೀವು ಆ ಥಿಯೇಟರ್‌ಗೆ ಆರ್ಥಿಕವಾಗಿ ಯಾವುದೇ ಲಾಭವಿಲ್ಲದ ಪ್ರೇಕ್ಷಕ (Financially Useless) ಅಷ್ಟೇ. ಸಿನಿಮಾ ಮುಗಿದ ಮೇಲೆ ಅದೇ ಆಡಂಬರದ ದಾರಿಯಲ್ಲಿ ನಿಮ್ಮನ್ನು ಕಳುಹಿಸಿದರೆ ನೀವು ಅಲ್ಲೇ ನಿಂತು ಫೋಟೋ ತೆಗೆದುಕೊಳ್ಳುತ್ತಾ ಸಮಯ ವ್ಯರ್ಥ ಮಾಡುತ್ತೀರಿ. ಇದರಿಂದ ಮುಂದಿನ ಶೋಗೆ ಬರುವ ಹೊಸ ಬ್ಯಾಚ್ ಗ್ರಾಹಕರಿಗೆ ತೊಂದರೆಯಾಗುತ್ತದೆ. ಇದಕ್ಕಾಗಿಯೇ, ನಿಮ್ಮನ್ನು ತಕ್ಷಣ ಹೊರಗಟ್ಟಲು ಅತ್ಯಂತ ಕಿರಿಕಿರಿಯುಂಟು ಮಾಡುವ ಕಾಂಕ್ರೀಟ್ ಮೆಟ್ಟಿಲುಗಳು, ಕೆಟ್ಟ ಬೆಳಕು ಹಾಗೂ ಸಹ್ಯವಲ್ಲದ ವಾತಾವರಣವಿರುವ 'ಎಕ್ಸಿಟ್' ಹಾದಿಯಲ್ಲಿ ಕಳುಹಿಸಲಾಗುತ್ತದೆ.

ಈ ಕಿರಿಕಿರಿಯ ಜಾಗದಿಂದ ನಿಮ್ಮ ಮೆದುಳು ಎಷ್ಟು ಸಾಧ್ಯವೋ ಅಷ್ಟು ಬೇಗ ಹೊರಬರಲು ಬಯಸುತ್ತದೆ. ಪರಿಣಾಮವಾಗಿ, ನೂರಾರು ಜನರಿರುವ ಇಡೀ ಪ್ರೇಕ್ಷಕರ ಗುಂಪು ಕೇವಲ ಕೆಲವೇ ಸೆಕೆಂಡುಗಳಲ್ಲಿ ಥಿಯೇಟರ್‌ನಿಂದ ಹೊರಗೆ ಓಡಿಬರುತ್ತದೆ! ಥಿಯೇಟರ್ ಕೂಡ ತಕ್ಷಣವೇ ಮುಂದಿನ ಬ್ಯಾಚ್‌ನಿಂದ ಹಣ ಪೀಕಲು ಸಿದ್ಧವಾಗುತ್ತದೆ. ಸರಳವಾಗಿ ಹೇಳಬೇಕೆಂದರೆ; ಸಿನೆಮಾ ಹಾಲ್‌ನ ಎಂಟ್ರಿಯನ್ನು ನಿಮ್ಮ ಜೇಬಿನಿಂದ ಹಣ ಹೊರತೆಗೆಯಲು ವಿನ್ಯಾಸಗೊಳಿಸಿದ್ದರೆ, ಎಕ್ಸಿಟ್ ಅನ್ನು ನಿಮ್ಮನ್ನು ಬಯಲಿಗೆ ಅಟ್ಟಲು ವಿನ್ಯಾಸಗೊಳಿಸಲಾಗಿದೆ.

ಯಶ್ 'ರಾಮಾಯಣ'ವನ್ನು ಹಾಲಿವುಡ್‌ನ ಈ ಸಿನಿಮಾಗೆ ಹೋಲಿಸುತ್ತಿರುವ ಪ್ರೇಕ್ಷಕರು: ಹೈಲೈಟ್ ಇದೇನಾ?

Govindaraj S — Thu, 29 Oct 2026 15:32:18 +0530

‘ರಾಮಾಯಣ: ರೈಸ್ ಆಫ್ ಎ ಲೆಜೆಂಡ್’ ಚಿತ್ರದ 3ಡಿ ಪ್ರೀಮಿಯರ್ ಪ್ರದರ್ಶನದಲ್ಲಿ ಪಾಲ್ಗೊಂಡ ವಿಮರ್ಶಕರು ಹಾಗೂ ಅತಿಥಿಗಳು ಚಿತ್ರದ ಭವ್ಯತೆಗೆ ಮನಸೋತಿದ್ದಾರೆ. ಹಾಲಿವುಡ್‌ನ ಖ್ಯಾತ ‘ದಿ ಲಾರ್ಡ್ ಆಫ್ ದಿ ರಿಂಗ್ಸ್’ ಚಿತ್ರಕ್ಕಿಂತಲೂ ಮಿಗಿಲಾದ ದೃಶ್ಯವೈಭವ ಇಲ್ಲಿದೆ ಎಂದು ಪ್ರೇಕ್ಷಕರು ಬಣ್ಣಿಸಿದ್ದಾರೆ.

ಪ್ರಮುಖ ಸಿನಿ ವಿಮರ್ಶಕ ರಾಮಾ ಎಂಬುವವರು ಎಕ್ಸ್‌ನಲ್ಲಿ , ‘ರಾಮಾಯಣ ಒಂದು ಅದ್ಭುತ ದೃಶ್ಯ ವೈಭವ. ಚಿತ್ರದ ವಿಎಫ್‌ಎಕ್ಸ್, ನೃತ್ಯ, ಸಂಗೀತ ಮತ್ತು ಆ್ಯಕ್ಷನ್ ದೃಶ್ಯಗಳು ದೈತ್ಯ ಸ್ವರೂಪದಲ್ಲಿವೆ. ರಣಬೀರ್ ಕಪೂರ್ ನಟನೆ ಅತ್ಯಂತ ದೈವಿಕವಾಗಿದ್ದರೆ, ರಾವಣನ ಪಾತ್ರದಲ್ಲಿ ಯಶ್ ಅಯಸ್ಕಾಂತೀಯವಾಗಿ ಸೆಳೆಯುತ್ತಾರೆ’ ಎಂದು ಶ್ಲಾಘಿಸಿದ್ದಾರೆ.

ಯಶ್ ಅಭಿನಯವೇ ಚಿತ್ರದ ಅತಿದೊಡ್ಡ ಹೈಲೈಟ್

ರಾವಣನಾಗಿ ನಟಿಸಿರುವ ಯಶ್ ಅವರ ಅಬ್ಬರದ ಸ್ಕ್ರೀನ್ ಪ್ರೆಸೆನ್ಸ್ ಮತ್ತು ಖಳನಾಯಕನ ಗಾಂಭೀರ್ಯ ಪ್ರೇಕ್ಷಕರನ್ನು ದಿಗ್ಮೂಢಗೊಳಿಸಿದೆ. ಹಲವು ಮಂದೆ, ಇಡೀ ಸಿನಿಮಾದಲ್ಲಿ ಯಶ್ ಅವರ ಪಾತ್ರ ಮತ್ತು ಅವರ ನಟನಾ ಶೈಲಿಯೇ ಚಿತ್ರದ ಅತಿದೊಡ್ಡ ಪ್ಲಸ್ ಪಾಯಿಂಟ್ ಹಾಗೂ ಹೈಲೈಟ್ ಆಗಿ ಮೂಡಿಬಂದಿದೆ ಎಂದಿದ್ದಾರೆ. ‘ಸಿನಿಮಾದ ಪೋಸ್ಟ್ ಕ್ರೆಡಿಟ್ ಸೀನ್‌ನಲ್ಲಿ ವಿಶಿಷ್ಟ ಪಾತ್ರದ ಝಲಕ್ ತೋರಿಸಲಾಗಿದೆ. 2028ರಲ್ಲಿ ಬಿಡುಗಡೆಯಾಗಲಿರುವ ಎರಡನೇ ಭಾಗವನ್ನು ಕಣ್ತುಂಬಿಕೊಳ್ಳಲು ಅತೀವ ನಿರೀಕ್ಷೆ ಹುಟ್ಟುಹಾಕಿದೆ’ ಎಂದು ಸಿನಿಪ್ರಿಯರು ಕೌತುಕ ವ್ಯಕ್ತಪಡಿಸಿದ್ದಾರೆ.

ಕಥನ ಶೈಲಿಗೆ ಮಿಶ್ರ ಪ್ರತಿಕ್ರಿಯೆ

ಒಂದೆಡೆ ಚಿತ್ರದ ಮೇಕಿಂಗ್ ಮತ್ತು ನಟನೆಗೆ ಭಾರಿ ಪ್ರಶಂಸೆ ವ್ಯಕ್ತವಾಗುತ್ತಿದ್ದರೂ, ಕಥನ ಶೈಲಿಯ ವಿಚಾರದಲ್ಲಿ ಕೆಲವರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಚಿತ್ರತಂಡ ರಾಮಾಯಣದ ಮೂಲ ಕಥೆಗೆ ನಿಷ್ಠವಾಗಿದ್ದರೂ, ಭಾವನೆ ಮತ್ತು ನಾಟಕೀಯತೆಗಿಂತ ಹೆಚ್ಚಾಗಿ ಆ್ಯಕ್ಷನ್ ಹಾಗೂ ದೃಶ್ಯವೈಭವಕ್ಕೇ ಆದ್ಯತೆ ನೀಡಿದೆ ಎಂದು ವಿಮರ್ಶಕರೊಬ್ಬರು ಉಲ್ಲೇಖಿಸಿದ್ದಾರೆ.

4,000 ಕೋಟಿ ರೂ. ಬಜೆಟ್‌

ಎರಡು ಭಾಗಗಳಲ್ಲಿ ಮೂಡಿಬರುತ್ತಿರುವ ‘ರಾಮಾಯಣ’ ಸಿನಿಮಾದ ಒಟ್ಟು ಬಜೆಟ್ ಬರೋಬ್ಬರಿ 4000 ಕೋಟಿ ರೂಪಾಯಿಗಳಿಗೂ ಅಧಿಕವಾಗಿದ್ದು, ಈ ಚಿತ್ರದ ಮೊದಲ ಭಾಗ ಭಾರತದಲ್ಲಿ ನವೆಂಬರ್ 5ರಂದು ಬಿಡುಗಡೆಯಾಗುತ್ತಿದೆ.

‘ನಮಸ್ಕಾರ’.. ಈ ಕಾರಣಕ್ಕೆ ಕನ್ನಡದ ಬೇರುಗಳನ್ನು ಹೆಮ್ಮೆಯಿಂದ ಸ್ಮರಿಸಿಕೊಂಡ ನಟ ಯಶ್!

Govindaraj S — Thu, 29 Oct 2026 15:10:50 +0530

ಯಶ್ ರಾವಣನಾಗಿ ನಟಿಸುತ್ತಿರುವ ಅದ್ದೂರಿ ‘ರಾಮಾಯಣ: ರೈಸ್ ಆಫ್ ಎ ಲೆಜೆಂಡ್’ ಸಿನಿಮಾದ ಜಾಗತಿಕ ಪ್ರೀಮಿಯರ್ ಅಮೆರಿಕಾದ ಲಾಸ್ ಏಂಜಲೀಸ್‌ನಲ್ಲಿ ಅದ್ದೂರಿಯಾಗಿ ನೆರವೇರಿದೆ. ಪ್ರತಿಷ್ಠಿತ ಅಕಾಡೆಮಿ ಮ್ಯೂಸಿಯಂ ಆಫ್ ಮೋಷನ್ ಪಿಕ್ಚರ್ಸ್‌ನ ಡೇವಿಡ್ ಗೆಫೆನ್ ಥಿಯೇಟರ್‌ನಲ್ಲಿ ಆಯೋಜಿಸಲಾಗಿದ್ದ ಈ ಸಮಾರಂಭದಲ್ಲಿ ಹಾಲಿವುಡ್ ತಾರೆಯರು, ಅಂತರರಾಷ್ಟ್ರೀಯ ಚಿತ್ರನಿರ್ಮಾಪಕರು ಹಾಗೂ ಜಾಗತಿಕ ಮಾಧ್ಯಮ ಪ್ರತಿನಿಧಿಗಳು ಪಾಲ್ಗೊಂಡಿದ್ದರು.

ರೆಡ್ ಕಾರ್ಪೆಟ್ ಮೇಲೆ ಆಗಮಿಸಿದ ಅತಿಥಿಗಳಿಗೆ ಭಾರತೀಯ ಸಾಂಪ್ರದಾಯಿಕ ಉಡುಗೆಯ ಡ್ರೆಸ್‌ಕೋಡ್ ನಿಗದಿಪಡಿಸಿದ್ದು ಕಾರ್ಯಕ್ರಮಕ್ಕೆ ಅಪ್ಪಟ ದೇಸಿ ಕಳೆಯನ್ನು ತಂದುಕೊಟ್ಟಿತ್ತು. ಮಂಗಳವಾರ ರಾತ್ರಿ ನಡೆದ ಈ ಗಾಲಾ ಈವೆಂಟ್‌ನಲ್ಲಿ ಶ್ರೀರಾಮನಾಗಿ ನಟಿಸಿರುವ ರಣಬೀರ್ ಕಪೂರ್, ಸೀತೆಯ ಪಾತ್ರಧಾರಿ ಸಾಯಿ ಪಲ್ಲವಿ, ರಾವಣನ ಪಾತ್ರದಲ್ಲಿ ಅಬ್ಬರಿಸುವುದರ ಜತೆಗೆ ಸಹ-ನಿರ್ಮಾಪಕರೂ ಆಗಿರುವ ರಾಕಿಂಗ್ ಸ್ಟಾರ್ ಯಶ್, ಅವರ ಪತ್ನಿ ರಾಧಿಕಾ ಪಂಡಿತ್, ನಿರ್ದೇಶಕ ನಿತೇಶ್ ತಿವಾರಿ ಹಾಗೂ ನಿರ್ಮಾಪಕ ನಮಿತ್ ಮಲ್ಹೋತ್ರಾ ಪಾಲ್ಗೊಂಡಿದ್ದರು.

ಕನ್ನಡದ ಬೇರು ಮರೆಯದ ರಾಕಿಂಗ್ ಸ್ಟಾರ್

ಸಾಂಪ್ರದಾಯಿಕ ಶೈಲಿಯಲ್ಲಿ ‘ನಮಸ್ಕಾರ’ ಎನ್ನುತ್ತಲೇ ಮಾತು ಆರಂಭಿಸಿದ ಯಶ್, ಜಾಗತಿಕ ವೇದಿಕೆಯಲ್ಲೂ ಕನ್ನಡದ ಬೇರುಗಳನ್ನು ಹೆಮ್ಮೆಯಿಂದ ಸ್ಮರಿಸಿಕೊಂಡರು. ‘ನೀವು ಎಲ್ಲಿಂದ ಪ್ರಯಾಣ ಆರಂಭಿಸುತ್ತೀರಿ ಎಂಬುದು ನೀವು ಎಷ್ಟು ದೂರ ಸಾಗುತ್ತೀರಿ ಎಂಬುದನ್ನು ನಿರ್ಧರಿಸುವುದಿಲ್ಲ. ಇಂದು ಕನ್ನಡ ಚಿತ್ರರಂಗದ ಪ್ರತಿನಿಧಿಯಾಗಿ, ನಮ್ಮ ನೆಲದ ಮಹಾನ್ ಕತೆಯನ್ನು ಜಗತ್ತಿಗೆ ಹೇಳುವುದಕ್ಕೆ ನನಗೆ ಅಪಾರ ಹೆಮ್ಮೆಯಿದೆ. ಭಾರತದಲ್ಲಿ ನಾವು ರಾಮಾಯಣವನ್ನು ಕೇವಲ ಕಥೆಯಾಗಿ ಹೇಳುವುದಿಲ್ಲ, ಅದನ್ನು ಸ್ಮರಿಸುತ್ತೇವೆ ಮತ್ತು ಮುಂದಿನ ತಲೆಮಾರುಗಳಿಗೆ ದಾಟಿಸುತ್ತೇವೆ. ಸಹಸ್ರಾರು ವರ್ಷಗಳಿಂದ ಸಂಚರಿಸಿರುವ ಈ ಮಹಾಕಾವ್ಯವನ್ನು ವಿಶ್ವದ ಮುಂದೆ ಪ್ರಸ್ತುತಪಡಿಸುತ್ತಿರುವುದು ನಮಗೆ ಹೆಮ್ಮೆಯ ಕ್ಷಣ’ ಎಂದರು.

ಯಶ್ ಇಲ್ಲದಿದ್ದರೆ ‘ರಾಮಾಯಣ’ ಸಾಧ್ಯವೇ ಇರುತ್ತಿರಲಿಲ್ಲ: ನಮಿತ್ ಮಲ್ಹೋತ್ರಾ

ನಿರ್ಮಾಪಕ ನಮಿತ್ ಮಲ್ಹೋತ್ರಾ, ರಾಕಿಂಗ್ ಸ್ಟಾರ್ ಕೊಡುಗೆಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದರು. ‘ಯಶ್ ಕೇವಲ ಈ ಚಿತ್ರದ ಸೂಪರ್‌ಸ್ಟಾರ್ ಮಾತ್ರವಲ್ಲ, ನನ್ನ ಪ್ರಮುಖ ಸಹ-ನಿರ್ಮಾಪಕ. ಅವರು ಜತೆಗಿಲ್ಲದಿದ್ದರೆ ಈ ಬೃಹತ್ ಪ್ರಾಜೆಕ್ಟ್ ಕಾರ್ಯರೂಪಕ್ಕೆ ಬರಲು ಸಾಧ್ಯವೇ ಇರುತ್ತಿರಲಿಲ್ಲ. ನಾವು ಮೊದಲ ದಿನ ಲಾಸ್ ಏಂಜಲೀಸ್‌ನಲ್ಲಿ ಭೇಟಿಯಾದ ಕ್ಷಣದಿಂದಲೇ ಅವರ ಅದಮ್ಯ ವಿಶ್ವಾಸ ಹಾಗೂ ನನ್ನ ದೂರದೃಷ್ಟಿ ಒಂದಾಗಿ ಇಷ್ಟೆಲ್ಲವನ್ನೂ ಸಾಧ್ಯವಾಗಿಸಿತು’ ಎಂದರು.

ಚಿನ್ನದ ದಶಮುಖ ರಾವಣನನ್ನು ಧರಿಸಿ ಮಿಂಚಿದ ಯಶ್

ಯಶ್ ಈ ಸಂದರ್ಭದಲ್ಲಿ ಕಡುಗಪ್ಪು ಬಣ್ಣದ ಸೂಟ್‌ನಲ್ಲಿ ಕಂಗೊಳಿಸಿದರು. ಈ ಸೂಟಿನ ಮೇಲೆ ಅವರು ಧರಿಸಿದ್ದ ರಾವಣನ ಹತ್ತು ತಲೆಗಳ ವಿನ್ಯಾಸದ, ಚಿನ್ನದ ಸರಗಳು ನೇತಾಡುವ ಆಕರ್ಷಕ ಚಿನ್ನದ ಬ್ರೂಚ್ ಎಲ್ಲರ ಗಮನ ಸೆಳೆಯಿತು. ಇದರೊಂದಿಗೆ ಡಾರ್ಕ್ ಸನ್‌ಗ್ಲಾಸ್, ಕಿವಿಯಲ್ಲಿ ಹೂಪ್ ಇಯರಿಂಗ್ಸ್ ಧರಿಸಿ ಆಕರ್ಷಕವಾಗಿ ಕಂಡುಬಂದರು. ಈ ವೇಳೆ ಯಶ್ ಅವರಿಗೆ ಪತ್ನಿ ರಾಧಿಕಾ ಪಂಡಿತ್ ಸಾಥ್ ನೀಡಿದರು.

4,000 ಕೋಟಿ ರೂ. ಬಜೆಟ್‌

ಗಣೇಶ್ ಸಿನಿಮಾ ನಟಿ ಈಗ ದುಬೈನಲ್ಲಿ ವಜ್ರದ ವ್ಯಾಪಾರಿ; ವಯಸ್ಸು 40, ಇನ್ನೂ ಸಿಂಗಲ್!

Mahmad Rafik — Thu, 29 Oct 2026 14:18:45 +0530

ಗೋಲ್ಡನ್ ಸ್ಟಾರ್ ಗಣೇಶ್ ಜೊತೆ ನಟಿಸಿದ್ದ ನಟಿ 2021ರ ಬಳಿಕ ಚಿತ್ರರಂಗದಿಂದ ಕಣ್ಮರೆಯಾಗಿದ್ದಾರೆ. ಪ್ರಸ್ತುತ ಅವರು ದುಬೈನಲ್ಲಿ ನೆಲೆಸಿದ್ದು, ತಮ್ಮ ಕುಟುಂಬದ ವಜ್ರದ ವ್ಯಾಪಾರವನ್ನು ನೋಡಿಕೊಳ್ಳುತ್ತಿದ್ದಾರೆ. ಈ ದಿಢೀರ್ ಅಜ್ಞಾತವಾಸಕ್ಕೆ ಕಾರಣ ಏನು?

2008ರಲ್ಲಿ ಬಿಡುಗಡೆಯಾದ 'ಅರಮನೆ' ಸಿನಿಮಾ ಗೋಲ್ಡನ್ ಸ್ಟಾರ್‌ ಗಣೇಶ್ ನಟನೆಯ ಸೂಪರ್ ಹಿಟ್ ಫಿಲಂಗಳಲ್ಲಿ ಒಂದಾಗಿದೆ. ಬರೋಬ್ಬರಿ 100 ದಿನ ಪ್ರದರ್ಶನಗೊಂಡ ಅರಮನೆ ಸಿನಿಮಾ, ಮ್ಯೂಸಿಕಲ್ ಹಿಟ್ ಚಿತ್ರವಾಗಿತ್ತು. ಈ ಚಿತ್ರದ ಮೂಲಕ ಕನ್ನಡಕ್ಕೆ ಪರಿಚಯವಾದವರು ನಟಿ ರೋಮಾ ಅಸ್ರಾನಿ. ಕನ್ನಡದಲ್ಲಿ ಮಾಡಿರೋದು ಒಂದೇ ಸಿನಿಮಾವಾದ್ರೂ ರೋಮಾ ಅಸ್ರಾನಿ ಕನ್ನಡಿಗರಿಗೆ ಚಿರಪರಿಚಿತ ಚಹರೆ.

ತಮಿಳುನಾಡಿನ ಸಿಂಧಿ ಕುಟುಂಬದಲ್ಲಿ ಜನಿಸಿದ ನಟಿ ರೋಮಾ, 2021ರವರೆಗೆ ಸಿನಿಮಾ ಮತ್ತು ಸೋಶಿಯಲ್ ಮೀಡಿಯಾಗಳಲ್ಲಿ ಸಕ್ರಿಯರಾಗಿದ್ದರು. 2021ರ ಬಳಿಕ ರೋಮಾ ಅಸ್ರಾನಿ ಎಲ್ಲಿ ಹೋದ್ರು ಎಂದು ಅಭಿಮಾನಿಗಳು ಹುಡುಕಾಟ ನಡೆಸುತ್ತಿದ್ದಾರೆ. ಮಲಯಾಳಂ ಮತ್ತು ತಮಿಳು ಸಿನಿಮಾಗಳಲ್ಲಿ ನಟಿಸಿರುವ ನಟಿ ರೋಮಾ ಅಸ್ರಾನಿ ದುಬೈನಲ್ಲಿ ಸೆಟೆಲ್ ಆಗಿದ್ದಾರೆ ಎಂದು ವರದಿಗಳು ಪ್ರಕಟವಾಗಿವೆ.

ಮಲಯಾಳಿಗಳು ನಟಿ ರೋಮಾ ಅವರನ್ನು 'ಕಾಂತರಿ' ನಾಯಕಿ ಎಂದೇ ಗುರುತಿಸುತ್ತಾರೆ. ಚಾಕೊಲೇಟ್, ಲಾಲಿಪಾಪ್, ಮಿನ್ನಮಿನ್ನಿಕೂಟಂ, ಕಲರ್ಸ್, ಜುಲೈ 4, ಟ್ರಾಫಿಕ್, ಕ್ಯಾಸನೋವಾ, ಗ್ರ್ಯಾಂಡ್‌ಮಾಸ್ಟರ್, ಚಪ್ಪಕುರಿಸ್ ಸೇರಿದಂತೆ ಹಲವು ಮಲಯಾಳಂ ಸಿನಿಮಾಗಳಲ್ಲಿ ರೋಮಾ ನಟಿಸಿದ್ದಾರೆ. ಹಾಗೆಯೇ ತೆಲಗು ಮತ್ತು ತಮಿಳು ಭಾಷೆಯ ಸಿನಿಮಾಗಳಲ್ಲಿ ನಟಿಸಿರುವ ರೋಮಾ, ಮ್ಯೂಸಿಕ್ ಅಲ್ಬಂಗಳಲ್ಲಿಯೂ ಮಿಂಚಿದ್ದಾರೆ. ಇಷ್ಟೆಲ್ಲಾ ಜನಪ್ರಿಯತೆ ಹೊಂದಿರುವಾಗಲೇ ರೋಮಾ ತೆರೆಯ ಹಿಂದೆ ಸರಿದಿದ್ಯಾಕೆ ಎಂಬ ಪ್ರಶ್ನೆಗೆ ಉತ್ತರವಿಲ್ಲ.

40 ವರ್ಷದ ಆಸುಪಾಸಿನಲ್ಲಿರುವ ರೋಮಾ ಅವಿವಾಹಿತರಾಗಿದ್ದು, ದುಬೈನಲ್ಲಿ ನೆಲೆಸಿದ್ದಾರೆ ಎಂದು ಹೇಳಲಾಗುತ್ತಿದೆ. ರೋಮಾ ಪೋಷಕರು ವಜ್ರದ ವ್ಯಾಪಾರಿಗಳಾಗಿದ್ದು, ಕುಟುಂಬದ ವ್ಯವಹಾರವನ್ನು ನಟಿ ಮುಂದುವರಿಸಿಕೊಂಡು ಹೋಗುತ್ತಿದ್ದಾರೆ ಎಂದು ಹೇಳಲಾಗುತ್ತಿದೆ. ಕೆಲ ವರದಿಗಳ ಪ್ರಕಾರ, ನಟಿ ಕುಟುಂಬಸ್ಥರು ದಕ್ಷಿಣ ಆಫ್ರಿಕಾದಲ್ಲಿ ವಜ್ರದ ಗಣಿಗಳನ್ನು ಹೊಂದಿದೆಯಂತೆ. ತಮಿಳುನಾಡು ಮತ್ತು ಕರ್ನಾಟಕದಲ್ಲಿ ವಜ್ರದ ಮಳಿಗೆ ಹೊಂದಿದ್ದಾರೆ ಎನ್ನಲಾಗುತ್ತಿದೆ.

"ಟೋಟಲ್ ಫಾರ್ ಯು" ಆರ್ಥಿಕ ವಂಚನೆ ಪ್ರಕರಣದಲ್ಲಿ ನಟಿ ರೋಮಾ ಹೆಸರು ಕೇಳಿ ಬಂದಿತ್ತು. ಇಲ್ಲಿಂದ ನಟಿ ತೆರೆಯ ಹಿಂದೆ ಸರಿದ್ರು ಎಂದು ಅಭಿಮಾನಿಗಳು ಮಾತನಾಡಿಕೊಳ್ಳುತ್ತಾರೆ. ಆದ್ರೆ ಇದ್ಯಾವುದಕ್ಕೂ ರೋಮಾ ಉತ್ತರ ನೀಡಿಲ್ಲ. 2015 ಮತ್ತು 2017ರಲ್ಲಿ ಬಿಡುಗಡೆಯಾದ ನಮಸ್ತೆ ಬಾಲಿ, ಸತ್ಯ ಸಿನಿಮಾಗಳು ಬಾಕ್ಸ್‌ ಆಫಿಸ್‌ನಲ್ಲಿ ಸದ್ದು ಮಾಡುವಲ್ಲಿ ವಿಫಲವಾದವು.

ದರ್ಶನ್ ಕೊಟ್ಟ '₹10 ಕೋಟಿ ಆಡಿಯೋ' ಹಿಂದಿನ ಅಸಲಿ ರಹಸ್ಯ ರಿವೀಲ್ ಮಾಡಿದ ನಟ ಧನ್ವೀರ್ ಪರ ವಕೀಲರು!

Sathish Kumar KH — Thu, 29 Oct 2026 12:11:55 +0530

ಬೆಂಗಳೂರು (ಅ.29): ಕನ್ನಡ ಚಿತ್ರರಂಗದ ನಟ ದರ್ಶನ್ ಅವರ ಜೈಲುವಾಸ ಹಾಗೂ ಜಾಮೀನು ಪ್ರಕ್ರಿಯೆಗಳ ನಡುವೆ, ನಟ ಧನ್ವೀರ್ ಗೌಡ ಹೆಸರು ತಳುಕು ಹಾಕಿಕೊಂಡಿರುವ ₹10 ಕೋಟಿ ಹಣಕಾಸಿನ ವ್ಯವಹಾರ ಮತ್ತು ವೈರಲ್ ಆಡಿಯೋ ವಿವಾದಕ್ಕೆ ಸಂಬಂಧಿಸಿದಂತೆ ಧನ್ವೀರ್ ಪರ ವಕೀಲ ಪ್ರಜ್ವಲ್ ಮಾಧ್ಯಮಗಳ ಮುಂದೆ ಬಂದು ಸ್ಪಷ್ಟನೆ ನೀಡಿದ್ದಾರೆ.

ಧನ್ವೀರ್ ವಿರುದ್ಧ ಕೇಳಿಬರುತ್ತಿರುವ ಎಲ್ಲಾ ಆರೋಪಗಳನ್ನು ತಳ್ಳಿಹಾಕಿರುವ ವಕೀಲರು, 'ವೈರಲ್ ಆಗಿರುವ ಆಡಿಯೋ ಸಂಪೂರ್ಣವಾಗಿ ಸೃಷ್ಟಿಸಲ್ಪಟ್ಟಿದ್ದು (Fabricated), ನಾವು ಯಾವುದೇ ರೀತಿಯ ತನಿಖೆಗೂ ಸಿದ್ಧರಿದ್ದೇವೆ' ಎಂದು ಸವಾಲು ಹಾಕಿದ್ದಾರೆ.

ಇಡಿ ಅಥವಾ ಸಿಬಿಐ ತನಿಖೆಗೂ ನಾವು ರೆಡಿ

ಹಣಕಾಸಿನ ವ್ಯವಹಾರದ ಆರೋಪಗಳ ಬಗ್ಗೆ ಮಾತನಾಡಿದ ವಕೀಲ ಪ್ರಜ್ವಲ್, '10 ಕೋಟಿ ವ್ಯವಹಾರದ ವಿಚಾರ ಸಂಬಂಧ ಜನರಲ್ಲಿ ಗೊಂದಲ ಮೂಡಿಸಲಾಗುತ್ತಿದೆ. ನಮಗೆ ಪ್ರತಿಯೊಬ್ಬರಿಗೂ ಅವರದ್ದೇ ಆದ ಸಾಮಾಜಿಕ ಮತ್ತು ವೃತ್ತಿಪರ ಜವಾಬ್ದಾರಿಗಳಿವೆ. ಹಣಕಾಸಿನ ವಿಚಾರವಾಗಿ ಯಾವುದೇ ತನಿಖೆ ಎದುರಿಸಲು ಧನ್ವೀರ್ ಸಿದ್ಧರಿದ್ದಾರೆ. ಅಗತ್ಯ ಬಿದ್ದರೆ ಜಾರಿ ನಿರ್ದೇಶನಾಲಯ (ED) ಅಥವಾ ಸಿಬಿಐ (CBI) ತನಿಖೆಗೂ ಹಾಜರಾಗಲು ನಾವು ಸಿದ್ಧ,' ಎಂದು ಸ್ಪಷ್ಟಪಡಿಸಿದರು.

ಪೊಲೀಸ್ ನೋಟಿಸ್ ಕುರಿತು ಮಾತನಾಡುತ್ತಾ, 'ಪೊಲೀಸರು ನೋಟಿಸ್ ನೀಡಿದ್ದಾರೆ, ಅದಕ್ಕೆ ನಾವು ಕಾನೂನುಬದ್ಧವಾಗಿಯೇ ಅಧಿಕೃತ ದಾಖಲೆಗಳೊಂದಿಗೆ ಸೂಕ್ತ ಉತ್ತರ ನೀಡಲಿದ್ದೇವೆ. ನ್ಯಾಯಾಲಯವು ಕೇವಲ ಮಾತುಗಳು ಅಥವಾ ಅಂತೆ-ಕಂತೆಗಳನ್ನು ನಂಬುವುದಿಲ್ಲ, ಅಧಿಕೃತ ದಾಖಲೆಗಳನ್ನು ಮಾತ್ರ ಒಪ್ಪುತ್ತದೆ,' ಎಂದರು.

ದರ್ಶನ್‌ಗೆ ಶ್ಯೂರಿಟಿ ಕೊಟ್ಟಿದ್ದೇ ಧನ್ವೀರ್:

ದರ್ಶನ್ ಹಾಗೂ ಧನ್ವೀರ್ ನಡುವಿನ ಸ್ನೇಹ ಮತ್ತು ಬೆಂಬಲದ ಬಗ್ಗೆ ಮಾತನಾಡಿದ ಅವರು, ದರ್ಶನ್ ಅವರು ಕಷ್ಟದಲ್ಲಿದ್ದ ಮೊದಲ ದಿನದಿಂದಲೂ ಧನ್ವೀರ್ ಅವರ ಜೊತೆಯಲ್ಲೇ ನಿಂತಿದ್ದಾರೆ. ದರ್ಶನ್ ಅವರಿಗೆ ನ್ಯಾಯಾಲಯದಲ್ಲಿ ಶ್ಯೂರಿಟಿ (Surety) ನೀಡಿದ್ದೇ ಧನ್ವೀರ್. ದರ್ಶನ್ ಅವರು ಕಾನೂನುಬದ್ಧವಾಗಿ ಆದಷ್ಟು ಬೇಗ ಜೈಲಿನಿಂದ ಹೊರಗೆ ಬರಬೇಕು ಎಂಬುದೇ ನಮ್ಮ ಮುಖ್ಯ ಉದ್ದೇಶ. ಆ ಕಾನೂನು ಹೋರಾಟದಲ್ಲಿ ನಾವು ಪ್ರಾಮಾಣಿಕವಾಗಿ ಭಾಗಿಯಾಗಿದ್ದೇವೆ. ದರ್ಶನ್ ಅವರ ಪತ್ನಿ ವಿಜಯಲಕ್ಷ್ಮಿ ಅವರ ಜೊತೆಗಿನ ಧನ್ವೀರ್ ಅವರ ಸಂಬಂಧ ಈಗಲೂ ಮೊದಲಿನಂತೆಯೇ ಚೆನ್ನಾಗಿದೆ. ಅದರಲ್ಲಿ ಯಾವುದೇ ಭಿನ್ನಾಭಿಪ್ರಾಯಗಳಿಲ್ಲ ಎಂದು ತಿಳಿಸಿದರು.

ಇದು ಥ್ರಿಲ್ಲರ್ ಸಿನಿಮಾ ತರಹ ಇದೆ

'ಜೈಲಿನಿಂದ ದರ್ಶನ್ ಹೀಗೆ ಹೇಳಿದ್ದಾರೆ, ಹಾಗೆ ಹೇಳಿದ್ದಾರೆ ಎಂಬ ಗಾಳಿ ಮಾತುಗಳು ಹಾಗೂ ಊಹಾಪೋಹಗಳಿಗೆ ನಾವು ತಲೆಕೆಡಿಸಿಕೊಳ್ಳುವುದಿಲ್ಲ. ಇದು ನೋಡಲು ಒಂದು ಥ್ರಿಲ್ಲರ್ ಮೂವಿಯಂತೆ ಕಾಣುತ್ತಿದೆ. ಈ ಹೋರಾಟದಲ್ಲಿ ಆರಂಭದಲ್ಲಿ ಯಾರಿದ್ದರು, ಈಗ ಕೊನೆಯವರೆಗೂ ಯಾರು ನಿಂತಿದ್ದಾರೆ ಎಂಬ ಅಸಲಿ ಸತ್ಯವೆಲ್ಲವೂ ಮುಂದಿನ ದಿನಗಳಲ್ಲಿ ತಾನಾಗಿಯೇ ಹೊರಬರಲಿದೆ. ನಾವು ಕೊನೆವರೆಗೂ ದರ್ಶನ್ ಅವರ ಪರವಾಗಿಯೇ ನಿಲ್ಲುತ್ತೇವೆ' ಎಂದು ವಕೀಲ ಪ್ರಜ್ವಲ್ ಪುನರುಚ್ಚರಿಸಿದ್ದಾರೆ.

ಕೇವಲ 1 ಡಾಲರ್‌ನಲ್ಲಿ ಬೆಂಗಳೂರಿನಿಂದ ವಿಯೆಟ್ನಾಂ ಪ್ರವಾಸ! ಆಫರ್ ಪಡೆಯುವುದು ಹೇಗೆ?

Kannadaprabha News — Thu, 29 Oct 2026 07:08:18 +0530

ಬೆಂಗಳೂರು: ಭಾರತ-ವಿಯೆಟ್ನಾಂ ನಡುವೆ ವಿಮಾನದಲ್ಲಿ ಪ್ರಯಾಣಿಸುವ ಪ್ರಯಾಣಿಕರಿಗೆ ವಿಯಟ್ ಜೆಟ್ ವಿಮಾನ ಸಂಸ್ಥೆ ನವೆಂಬರ್ 1, 2026 ಅಕ್ಟೋಬರ್ 31, 2027ರ ನಡುವೆ ಪ್ರಯಾಣಿಸುವ ಪ್ರಯಾಣಿಕರಿಗಾಗಿ ಕೇವಲ 1 ಡಾಲರ್ (ತೆರಿಗೆಗಳು ಮತ್ತು ಶುಲ್ಕಗಳನ್ನು ಹೊರತುಪಡಿಸಿ) ಬೆಲೆಯಲ್ಲಿ ಮುಂಗಡ ಟೆಕೆಟ್ ಕಾಯ್ದಿರಿಸುವ ಅವಕಾಶ ನೀಡಿದೆ.

ಭಾರತದ 10 ವಿಮಾನ ನಿಲ್ದಾಣಗಳಿಗೆ ತನ್ನ ವಿಮಾನಗಳನ್ನು ಆರಂಭಿಸಿದ್ದು, ಪ್ರಯಾಣಿಕರನ್ನು ಆಕರ್ಷಿಸಲು ಪ್ರೊಮೋಷನಲ್ ಪ್ರೈಸ್ ಆಗಿ ಈ ದರ ನೀಡುತ್ತಿದೆ.

ಹೋ ಚಿ ಮಿನ್ಹ್ ನಗರಕ್ಕೆ ನೇರ ವಿಮಾನಯಾನ

ಸೀಮಿತ ಅವಧಿಗೆ ಕೊಡುಗೆ ನೀಡುತ್ತಿರುವ ವಿಯೆಟ್ ಜೆಟ್ ಸಂಸ್ಥೆ ಹನೋಯ್-ತೈನಾನ್ ಮಾರ್ಗವನ್ನು ಹೊಸದಾಗಿ ಪ್ರಾರಂಭಿಸಿದೆ. ಅಲ್ಲದೆ ಹೋ ಚಿ ಮಿನ್ಹ್ ಸಿಟಿ ಮತ್ತು ಚಿಯಾಂಗ್ ಮಾಯ್ ನಡುವೆ ತನ್ನ ನೇರ ವಿಮಾನಗಳನ್ನು ಪುನರಾರಂಭಿಸಿದೆ. ಅಲ್ಲದೆ, ಏಷ್ಯಾದಲ್ಲಿ ತನ್ನ ಜಾಲವನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶ ಹೊಂದಿದೆ.

ನವೆಂಬರ್ 1, 2026 ಮತ್ತು ಅಕ್ಟೋಬರ್ 31, 2027

ಭಾರತೀಯ ಪ್ರಯಾಣಿಕರು ಅ.26ರಿಂದ ನವೆಂಬರ್ 1, 2026 (IST) ರಂದು 21:30 ರವರೆಗೆ www.vietjetair.com ಅಥವಾ ವಿಯೆಟ್ ಜೆಟ್ ಏರ್ ಮೊಬೈಲ್ ಅಪ್ಲಿಕೇಶನ್ ಮೂಲಕ ದರಗಳನ್ನು ಬುಕ್ ಮಾಡಬಹುದು. ಈ ಕೊಡುಗೆ ದೆಹಲಿ, ಮುಂಬೈ, ಅಹಮದಾಬಾದ್, ಹೈದರಾಬಾದ್ ಮತ್ತು ಬೆಂಗಳೂರಿನಿಂದ ವಿಯೆಟ್ನಾಂನ ಅತಿದೊಡ್ಡ ನಗರಗಳಾದ ಹನೋಯ್ ಮತ್ತು ಹೋ ಚಿ ಮಿನ್ಹ್ ನಗರಕ್ಕೆ ಸಂಪರ್ಕಿಸುವ ವಿಮಾನಗಳಿಗೆ ನವೆಂಬರ್ 1, 2026 ಮತ್ತು ಅಕ್ಟೋಬರ್ 31, 2027 ರ ನಡುವೆ ಪ್ರಯಾಣಿಸಲು ಮಾತ್ರ ಅನ್ವಯಿಸುತ್ತದೆ (ಬ್ಲಾಕ್‌ಔಟ್ ದಿನಾಂಕಗಳು ಅನ್ವಯಿಸುತ್ತವೆ).

ವಿಯೆಟ್ನಾಂನ ದೇಶೀಯ ಮತ್ತು ವಿಯೆಟ್ ಜೆಟ್ ನೆಟ್‌ವರ್ಕ್‌ನಾದ್ಯಂತ ಇತರ ಅಂತರರಾಷ್ಟ್ರೀಯ ಮಾರ್ಗಗಳಲ್ಲಿಯೂ ಲಭ್ಯವಿದೆ ಎಂದು ಸಂಸ್ಥೆ ತಿಳಿಸಿದೆ.

ನನ್ನ ವೈಯಕ್ತಿಕ ಜೀವನದಲ್ಲಿ ಆದ ಘಟನೆಗಳಿಗೆ ಮೈಮಾಟ ಹಾಡು ಉತ್ತರವಲ್ಲ, ಸ್ಪಷ್ಟನೆ ನೀಡಿದ ರ‍್ಯಾಪರ್ ಚಂದನ್‌ ಶೆಟ್ಟಿ

Santosh Naik — Wed, 28 Oct 2026 21:56:01 +0530

ಬೆಂಗಳೂರು (ಅ.28): ಕನ್ನಡದ ಪ್ರಸಿದ್ಧ ರ‍್ಯಾಪರ್ ಹಾಗೂ ಸಂಗೀತ ನಿರ್ದೇಶಕ ಚಂದನ್ ಶೆಟ್ಟಿ (Chandan Shetty) ಅಭಿನಯಿಸಿ, ಹಾಡಿರುವ ನೂತನ ಮೈಮಾಟ (Maimata) ಆಲ್ಬಮ್ ಸಾಂಗ್ ಇತ್ತೀಚೆಗೆ ಬಿಡುಗಡೆಯಾಗಿ ಯೂಟ್ಯೂಬ್‌ನಲ್ಲಿ ಧೂಳೆಬ್ಬಿಸುತ್ತಿದೆ. ಆದರೆ, ಈ ಹಾಡಿನ ಸಾಲುಗಳು ಚಂದನ್ ಶೆಟ್ಟಿ ಅವರ ವೈಯಕ್ತಿಕ ಜೀವನ ಹಾಗೂ ಅವರ ಮಾಜಿ ಪತ್ನಿ ನಿವೇದಿತಾ ಗೌಡ (Niveditha Gowda) ಅವರನ್ನು ಗುರಿಯಾಗಿಸಿಕೊಂಡು ಬರೆಯಲಾಗಿದೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ, ಯೂಟ್ಯೂಬ್ ಚಾನೆಲ್‌ಗಳಲ್ಲಿ ಹಾಗೂ ಮಾಧ್ಯಮಗಳಲ್ಲಿ ಭಾರಿ ಚರ್ಚೆ ಮತ್ತು ಊಹಾಪೋಹಗಳು ಎದ್ದಿದ್ದವು. ಇದೀಗ ಈ ಎಲ್ಲಾ ಚರ್ಚೆಗಳಿಗೆ ಸ್ವತಃ ಚಂದನ್ ಶೆಟ್ಟಿ ಅವರೇ ಸುದೀರ್ಘ ಪೋಸ್ಟ್ ಮೂಲಕ ಮುಕ್ತಾಯ ಹಾಡಿದ್ದು, ಅಧಿಕೃತ ಸ್ಪಷ್ಟೀಕರಣ ನೀಡಿದ್ದಾರೆ.

ನನ್ನ ವೈಯಕ್ತಿಕ ಜೀವನದಲ್ಲಿ ಆದ ಘಟನೆಗಳಿಗೆ ಮೈಮಾಟ ಹಾಡು ಉತ್ತರವಲ್ಲ ಎಂದು ಸ್ಪಷ್ಟಪಡಿಸಿರುವ ಚಂದನ್ ಶೆಟ್ಟಿ, ಈ ಹಾಡನ್ನು ಕೇವಲ ಮನರಂಜನೆಯ ಉದ್ದೇಶದಿಂದಷ್ಟೇ ರಚಿಸಲಾಗಿದೆ ಎಂದು ವಿನಂತಿಸಿಕೊಂಡಿದ್ದಾರೆ.

ಚಂದನ್ ಶೆಟ್ಟಿ ಹೇಳಿದ್ದೇನು?

ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಅಭಿಮಾನಿಗಳು ಹಾಗೂ ಮಾಧ್ಯಮಗಳಿಗಾಗಿ ಸಂದೇಶ ಹಂಚಿಕೊಂಡಿರುವ ಚಂದನ್ ಶೆಟ್ಟಿ, 'ನನ್ನ ಇತ್ತೀಚಿನ MAIMATA ಹಾಡಿನ ಆರಂಭದಲ್ಲೇ ತಿಳಿಸಿರುವಂತೆ, ಈ ಹಾಡನ್ನು ಕೇವಲ ಮನರಂಜನೆಗಾಗಿ ರಚಿಸಲಾಗಿದ್ದು, ಯಾರನ್ನೂ ನೋಯಿಸುವ ಅಥವಾ ಗುರಿಯಾಗಿಸುವ ಉದ್ದೇಶವನ್ನು ಹೊಂದಿಲ್ಲ. ಈ ರೀತಿಯ ಹೊಸ ಸಂಗೀತ ಶೈಲಿಯನ್ನು ಪ್ರಯತ್ನಿಸಬೇಕೆಂಬ ಆಸೆ ನನಗೆ ಬಹಳ ಹಿಂದಿನಿಂದಲೂ ಇತ್ತು. ನನ್ನ ವೈಯಕ್ತಿಕ ಜೀವನದಲ್ಲಿ ನಡೆದ ಕೆಲವು ಘಟನೆಗಳಿಗೂ ಮೊದಲೇ ಈ ಹಾಡನ್ನು ಸಿದ್ಧಪಡಿಸಲಾಗಿತ್ತು. ಆದರೆ ಇತ್ತೀಚೆಗೆ ಕೆಲವು ಸುದ್ದಿ ಮಾಧ್ಯಮಗಳಲ್ಲಿ, ಯೂಟ್ಯೂಬ್ ಚಾನೆಲ್‌ಗಳಲ್ಲಿ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಈ ಹಾಡನ್ನು ನನ್ನ ವೈಯಕ್ತಿಕ ಜೀವನಕ್ಕೆ ಸಂಬಂಧಿಸಿದಂತೆ ಬಿಂಬಿಸಲಾಗುತ್ತಿದೆ. ಈ ಬಗ್ಗೆ ಅನೇಕ ಪ್ರಶ್ನೆಗಳು ಹಾಗೂ ಊಹಾಪೋಹಗಳು ಕೇಳಿಬರುತ್ತಿರುವುದರಿಂದ ಈ ಸ್ಪಷ್ಟನೆ ನೀಡುತ್ತಿದ್ದೇನೆ' ಎಂದು ಬರೆದಿದ್ದಾರೆ.

ಅನಗತ್ಯ ನಕಾರಾತ್ಮಕತೆಯನ್ನು ಹರಡಬೇಡಿ

ತಮ್ಮ ಹಾಡಿನ ಬಗ್ಗೆ ಹರಿದಾಡುತ್ತಿರುವ ನೆಗೆಟಿವ್ ಕಮೆಂಟ್‌ಗಳು ಹಾಗೂ ಊಹಾಪೋಹಗಳಿಗೆ ಬೇಸರ ವ್ಯಕ್ತಪಡಿಸಿದ ಅವರು, 'ದಯವಿಟ್ಟು ಈ ಹಾಡನ್ನು ನನ್ನ ವೈಯಕ್ತಿಕ ಜೀವನದೊಂದಿಗೆ ಹೋಲಿಸಿ ಅನಗತ್ಯ ಊಹಾಪೋಹಗಳು ಹಾಗೂ ನಕಾರಾತ್ಮಕತೆಯನ್ನು ಹರಡಬೇಡಿ ಎಂದು ಎಲ್ಲರಲ್ಲೂ ವಿನಂತಿಸಿಕೊಳ್ಳುತ್ತೇನೆ. ಸಂಗೀತ ಎನ್ನುವುದು ಸೃಜನಶೀಲತೆಯ ಅಭಿವ್ಯಕ್ತಿ. ಪ್ರತಿಯೊಂದು ಹಾಡೂ ಕಲಾವಿದನ ವೈಯಕ್ತಿಕ ಜೀವನದ ಕಥೆಯಾಗಿರಬೇಕೆಂದಿಲ್ಲ. ಈ ಹಾಡಿಗೆ ನೀವು ತೋರಿಸುತ್ತಿರುವ ಅಪಾರ ಪ್ರೀತಿ, ಪ್ರೋತ್ಸಾಹ ಮತ್ತು ಬೆಂಬಲಕ್ಕೆ ಹೃದಯಪೂರ್ವಕ ಧನ್ಯವಾದಗಳು. ನಿಮ್ಮ ಪ್ರೀತಿಯೇ ನನಗೆ ಇನ್ನಷ್ಟು ಹೊಸ ಪ್ರಯೋಗಗಳನ್ನು ಮಾಡಲು ಸ್ಫೂರ್ತಿ' ಎಂದು ಬರೆದುಕೊಂಡಿದ್ದಾರೆ.

ನೆಟ್ಟಿಗರ ಚರ್ಚೆಗೆ ಬಿತ್ತು ಪೂರ್ಣವಿರಾಮ

ಬಿಗ್ ಬಾಸ್ ಮೂಲಕ ಪರಿಚಯವಾಗಿ ಬಳಿಕ ಪ್ರೀತಿಸಿ ಮದುವೆಯಾಗಿ, ವರ್ಷಗಳ ಹಿಂದೆಯಷ್ಟೇ ವಿಚ್ಛೇದನ ಪಡೆದಿದ್ದ ಚಂದನ್ ಶೆಟ್ಟಿ ಮತ್ತು ನಿವೇದಿತಾ ಗೌಡ ಜೋಡಿಯ ವಿಷಯ 'ಮೈಮಾಟ' ಸಾಂಗ್ ರಿಲೀಸ್ ಆದಾಗಿನಿಂದಲೂ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿತ್ತು. ಹಾಡಿನಲ್ಲಿ ಬ್ರೇಕಪ್ ಹಾಗೂ ಪ್ರೀತಿಯಲ್ಲಿನ ವಂಚನೆಯ ಸಾಲುಗಳಿದ್ದ ಕಾರಣ, ನೆಟ್ಟಿಗರು ಇದನ್ನು ನಿವೇದಿತಾ ಗೌಡ ಅವರಿಗೆ ನೀಡಿದ ಟಾಂಗ್ ಎಂದೇ ಭಾವಿಸಿದ್ದರು. ಆದರೆ, ಇದೀಗ ಚಂದನ್ ಶೆಟ್ಟಿ, ಈ ಹಾಡು ತಮ್ಮ ಡಿವೋರ್ಸ್‌ಗೂ ಮುನ್ನವೇ ತಯಾರಾಗಿತ್ತು ಹಾಗೂ ಇದು ಬರಿ ಸೃಜನಶೀಲ ರ‍್ಯಾಪ್ ಸಾಂಗ್ ಅಷ್ಟೇ ಎಂದು ಹೇಳಿದ್ದಾರೆ. ಪ್ರಸ್ತುತ ಯೂಟ್ಯೂಬ್‌ನಲ್ಲಿ ಭಾರಿ ವ್ಯೂವ್ಸ್ ಪಡೆಯುತ್ತಿರುವ 'ಮೈಮಾಟ' ಸಾಂಗ್ ತನ್ನ ಹೊಸ ಶೈಲಿಯಿಂದ ಕನ್ನಡಿಗರ ಗಮನ ಸೆಳೆಯುತ್ತಿದೆ.

View this post on Instagram

A post shared by Chandan Shetty (@chandanshettyofficial)

‘ಬನ’ ಸಿನಿಮಾ ನೋಡಿದ ಬಳಿಕ ಜಯಪ್ರಕಾಶ್ ಶೆಟ್ಟಿ ಜೊತೆ ಫೋಟೋಗೆ ಮುಗಿಬಿದ್ದ ವಿದ್ಯಾರ್ಥಿಗಳು: ಕಾರಣವೇನು?

Govindaraj S — Wed, 28 Oct 2026 21:35:47 +0530

ಪತ್ರಕರ್ತ ಜಯಪ್ರಕಾಶ್‌ ಶೆಟ್ಟಿ ಅವರು ಪ್ರಮುಖ ಪಾತ್ರದಲ್ಲಿ ನಟಿಸಿರುವ ತುಳು ಭಾಷೆಯ ‘ಬನ’ ಚಿತ್ರವು ಹೌಸ್‌ಫುಲ್‌ ಪ್ರದರ್ಶನ ಕಾಣುತ್ತಿದೆ. ವಾರ ಮಧ್ಯಮದಲ್ಲೂ ಮಂಗಳೂರಿನ ಭಾರತ್‌ ಸಿನಿಮಾಸ್‌ನಲ್ಲಿ ಹೌಸ್‌ಫುಲ್‌ ಆಗುತ್ತಿರುವುದಕ್ಕೆ ಚಿತ್ರತಂಡ ಸಂಭ್ರಮ ವ್ಯಕ್ತಪಡಿಸಿದೆ. ಚಿತ್ರವನ್ನು ನೋಡಿ ಎಲ್ಲಾ ಧರ್ಮದ ಪ್ರೇಕ್ಷಕ ವರ್ಗದ ಜನರು ಮೆಚ್ಚಿಕೊಳ್ಳುತ್ತಿದ್ದಾರೆ. ಚಿತ್ರದಲ್ಲಿ ನಟಿಸಿರುವ ಜಯಪ್ರಕಾಶ್‌ ಶೆಟ್ಟಿ ಅವರ ಜೊತೆಗೆ ಫೋಟೋ ತೆಗೆಸಿಕೊಳ್ಳುತ್ತಿರುವುದು ಚಿತ್ರದ ಯಶಸ್ಸಿಗೆ ಸಾಕ್ಷಿ.

ಇತ್ತೀಚೆಗೆ ಮಂಗಳೂರಿನ ಭಾರತ್‌ ಮಾಲ್‌ನಲ್ಲಿ ಎಂಐಟಿಇ ಕಾಲೇಜಿನ ವಿದ್ಯಾರ್ಥಿಗಳು ಒಟ್ಟಿಗೆ ‘ಬನ’ ಚಿತ್ರವನ್ನು ನೋಡಿ ಮೆಚ್ಚಿಕೊಂಡಿದ್ದಾರೆ. ಈ ಕುರಿತು ಮಾತನಾಡಿದ ಜಯಪ್ರಕಾಶ್‌ ಶೆಟ್ಟಿ, ‘ನಮ್ಮ ಬನ ಚಿತ್ರವನ್ನು ಎಂಐಟಿಇ ಕಾಲೇಜಿನ ವಿದ್ಯಾರ್ಥಿಗಳು ಸಿನಿಮಾ ನೋಡಿ ಮೆಚ್ಚುಗೆ ಮಾತುಗ‍ಳನ್ನು ಆಡಿದರು. ನನ್ನ ಜೊತೆಗೆ ಫೋಟೋ ತೆಗೆಸಿಕೊಂಡು ಸಂಭ್ರಮಿಸಿದರು. ಇದು ನನಗೆ ವಿಶೇಷ ಅನುಭವ ಮತ್ತು ನಮ್ಮ ಚಿತ್ರದ ಯಶಸ್ಸಿಗೆ ಸಾಕ್ಷಿ.

ಭಾವನೆಗಳ ಸಂಗಮ

ಅದರಲ್ಲೂ ಮುಸ್ಲಿಂ ವಿದ್ಯಾರ್ಥಿಗಳು ಕೂಡ ಸಿನಿಮಾ ನೋಡಿ ನನ್ನ ಜೊತೆಗೆ ಫೋಟೋ ತೆಗೆಸಿಕೊಂಡಿದ್ದು ಮೊದಲು. ಬುಕ್‌ ಮೈ ಶೋನಂತಹ ಪ್ರತಿಷ್ಠಿತ ಆನ್‌ಲೈನ್‌ ಪ್ಲಾಟ್‌ಫಾರಂನಲ್ಲಿ ನಮ್ಮ ಚಿತ್ರಕ್ಕೆ 10ಕ್ಕೆ 10 ರೇಟಿಂಗ್‌ ಕೊಟ್ಟಿದ್ದಾರೆ. ಆ ಮೂಲಕ ಸಿನಿಮಾ ಎಲ್ಲಾ ವರ್ಗದ ಜನರಿಗೆ ಕನೆಕ್ಟ್‌ ಆಗುತ್ತಿದೆ. ತುಳು ಚಿತ್ರರಂಗದಲ್ಲಿ ಹೊಸ ನಿರೀಕ್ಷೆ ಮೂಡಿಸಿರುವ ‘ಬನ’ ತುಳು ಸಿನಿಮಾ ಅಕ್ಟೋಬರ್‌ 23ರಂದು ತೆರೆಕಂಡಿತ್ತು. ‘ಬನ’ ಕೇವಲ ಸಿನಿಮಾವಲ್ಲ, ಭಾವನೆಗಳ ಸಂಗಮ.

ಆಡಂಬರವಿಲ್ಲದ ಸರಳ ನಿರೂಪಣೆ, ಮನಮುಟ್ಟುವ ಕಥೆ, ಸಹಜ ಅಭಿನಯ, ಸುಂದರ ಸಂಗೀತ ಹಾಗೂ ಹಿನ್ನೆಲೆ ಸಂಗೀತ ಚಿತ್ರದ ಪ್ರಮುಖ ಆಕರ್ಷಣೆಗಳಾಗಿವೆ. ಕಥೆಯೇ ನಿಜವಾದ ನಾಯಕನಾಗಿ ಪ್ರೇಕ್ಷಕರನ್ನು ಹಿಡಿದಿಟ್ಟುಕೊಳ್ಳುತ್ತದೆ. ಸಿನಿಮಾದ ಪ್ರತಿಯೊಂದು ಸನ್ನಿವೇಶವೂ ಪ್ರೇಕ್ಷಕರ ಮನಸ್ಸಿನಲ್ಲಿ ಭಾವನೆಗಳನ್ನು ಮೂಡಿಸುವಂತೆ ರೂಪುಗೊಂಡಿದೆ. ವಿಶೇಷವಾಗಿ ಚಿತ್ರದ ಅಂತ್ಯ ಪ್ರೇಕ್ಷಕರ ಮನಸ್ಸಿನಲ್ಲಿ ದೀರ್ಘಕಾಲ ಉಳಿಯುವ ಅನುಭವ ನೀಡುತ್ತದೆ’ ಎನ್ನುತ್ತಾರೆ.

ಉತ್ತಮ ಉದಾಹರಣೆ

‘ನಮ್ಮ ಚಿತ್ರಕ್ಕೆ ಎಲ್ಲ ಧರ್ಮಗಳ ಬಂಧುಗಳಿಂದಲೂ ಪ್ರೀತಿ, ಪ್ರೋತ್ಸಾಹ ಮತ್ತು ಮೆಚ್ಚುಗೆ ವ್ಯಕ್ತವಾಗುತ್ತಿರುವುದು ವಿಶೇಷ. ಭಾಷೆ ಮತ್ತು ಧರ್ಮದ ಗಡಿಗಳನ್ನು ಮೀರಿ ಒಂದು ಒಳ್ಳೆಯ ಕತೆ ಜನರನ್ನು ಹೇಗೆ ಒಗ್ಗೂಡಿಸಬಲ್ಲದು ಎಂಬುದಕ್ಕೆ ಈ ಚಿತ್ರ ಉತ್ತಮ ಉದಾಹರಣೆಯಾಗಿದೆ. ತುಳು ಸಂಸ್ಕೃತಿ, ಮಾನವೀಯ ಭಾವನೆಗಳು ಹಾಗೂ ಕುಟುಂಬದ ಸಂಬಂಧಗಳನ್ನು ಒಳಗೊಂಡಿರುವ ‘ಬನ’ ಚಿತ್ರತಂಡದ ಪ್ರಯತ್ನಕ್ಕೆ ಪ್ರೇಕ್ಷಕರಿಂದ ದೊರೆಯುತ್ತಿರುವ ಬೆಂಬಲ ಹೊಸ ಹುರುಪು ನೀಡಿದೆ.

ಒಳ್ಳೆಯ ಕಥೆಗಳನ್ನು ಪ್ರೀತಿಸುವ ಪ್ರತಿಯೊಬ್ಬರೂ ಚಿತ್ರಮಂದಿರಕ್ಕೆ ಭೇಟಿ ನೀಡಿ ‘ಬನ’ ಚಿತ್ರವನ್ನು ವೀಕ್ಷಿಸಿ, ಚಿತ್ರತಂಡವನ್ನು ಪ್ರೋತ್ಸಾಹಿಸಿ’ ಎಂಬುದು ಜಯಪ್ರಕಾಶ್‌ ಶೆಟ್ಟಿ ಅವರ ಮನವಿ. ಮನೋರ್‌ ರೈ ವೈಪಾಲ ನಿರ್ಮಾಣದ, ನಿತಿನ್‌ ರೈ ಕುಕ್ಕುವಳ್ಳಿ ನುಳಿಯಾಲು ನಿರ್ದೇಶನದ ಈ ಚಿತ್ರದಲ್ಲಿ ರೂಪಿಕಾ ವರ್ಕಾಡಿ, ನಿಹಾಲ್‌ ರೈ, ಕೃತಿ ಶ್ರೀನಿವಾಸನ್‌ ಪೂಜಾರಿ, ಶರತ್‌ ಆಳ್ವ, ಪ್ರಿಯಾ ಶೆಟ್ಟಿ, ವಿಜಯಹರಿ ರೈ ಮುಂತಾದವರು ನಟಿಸಿದ್ದಾರೆ.

'ನನ್ನ ಆ 2 ಸಿನಿಮಾಗಳನ್ನು ನೋಡು ಸಾಕು'.. ಸಹನಟಿಗೆ ಹೀಗ್ಯಾಕೆ ಹೇಳಿದ್ದು ಕೀರ್ತಿ ಸುರೇಶ್? ಹಿಂದಿರೋ ಅಸಲಿಯತ್ತೇನು?

Shriram Bhat — Wed, 28 Oct 2026 21:13:35 +0530

Keerthy Suresh movie recommendation herself only for 2 movies: ರಾಧಿಕಾ ಆಪ್ಟೆಗೆ ಕೀರ್ತಿ ಸುರೇಶ್ ಕೊಟ್ಟ ಸಿನಿಮಾ ಸಲಹೆ ಏನು? ಈ ಎರಡು ಚಿತ್ರಗಳನ್ನು ನೋಡಲು ನಟಿ ಹೇಳಿದ್ದೇಕೆ?

ದಕ್ಷಿಣ ಭಾರತದ ಚಿತ್ರರಂಗದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿರುವ ನಟಿ ಕೀರ್ತಿ ಸುರೇಶ್, ನಟನೆ ಮೂಲಕ ಅಭಿಮಾನಿಗಳ ಮನ ಗೆದ್ದಿದ್ದಾರೆ. ತಮಿಳು, ತೆಲುಗು, ಮಲಯಾಳಂ ಸೇರಿದಂತೆ ವಿವಿಧ ಭಾಷೆಗಳ ಸಿನಿಮಾಗಳಲ್ಲಿ ಅಭಿನಯಿಸಿರುವ ಅವರು, ತಮ್ಮ ಪ್ರತಿಭೆಗೆ ರಾಷ್ಟ್ರ ಪ್ರಶಸ್ತಿಯನ್ನೂ ಮುಡಿಗೇರಿಸಿಕೊಂಡಿದ್ದಾರೆ. ಆದರೆ ಈಗ ಕೀರ್ತಿ ಸುರೇಶ್ ಅವರ ಸಿನಿಮಾಗಳ ಕುರಿತಾದ ಒಂದು ಕುತೂಹಲಕಾರಿ ಸಂಗತಿ ಸುದ್ದಿಯಾಗಿದೆ. ತಮ್ಮ ಸಿನಿಮಾಗಳನ್ನೇ ನೋಡಿರದ ನಟಿ ರಾಧಿಕಾ ಆಪ್ಟೆಗೆ, ಕೀರ್ತಿ ತಮ್ಮ ಅಭಿನಯದ ಎರಡು ಚಿತ್ರಗಳನ್ನು ಮಾತ್ರ ನೋಡುವಂತೆ ಸಲಹೆ ನೀಡಿದ್ದಾರೆ!

ಸದ್ಯ ಕೀರ್ತಿ ಸುರೇಶ್ ಮತ್ತು ರಾಧಿಕಾ ಆಪ್ಟೆ ‘ಅಕ್ಕ’ ಎಂಬ ಕ್ರೈಂ ಥ್ರಿಲ್ಲರ್ ವೆಬ್ ಸರಣಿಯಲ್ಲಿ ಒಟ್ಟಿಗೆ ಕಾಣಿಸಿಕೊಂಡಿದ್ದಾರೆ. ಈ ಸರಣಿಯ ಪ್ರಚಾರದ ಭಾಗವಾಗಿ ಇಬ್ಬರೂ ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಭಾಗವಹಿಸಿದ್ದರು. ಮಾತುಕತೆಯ ವೇಳೆ ರಾಧಿಕಾ ಆಪ್ಟೆ ಅಭಿನಯದ ಚಿತ್ರಗಳ ಬಗ್ಗೆ ಕೀರ್ತಿ ತಮ್ಮ ಅಭಿಪ್ರಾಯ ಹಂಚಿಕೊಂಡರು. ‘ಅಂಧಾಧುನ್’, ‘ಕಬಾಲಿ’, ‘ಸೇಕ್ರೆಡ್ ಗೇಮ್ಸ್’, ‘ಬದ್ಲಾಪುರ್’ ಸೇರಿದಂತೆ ರಾಧಿಕಾ ನಟಿಸಿರುವ ಹಲವು ಸಿನಿಮಾಗಳು ತಮಗೆ ಇಷ್ಟವೆಂದು ತಿಳಿಸಿದರು.

ಆದರೆ ಮಾತಿನ ನಡುವೆ ರಾಧಿಕಾ ಆಪ್ಟೆ, ಕೀರ್ತಿ ಸುರೇಶ್ ಅಭಿನಯದ ಯಾವುದೇ ಸಿನಿಮಾವನ್ನೂ ತಾವು ಇನ್ನೂ ನೋಡಿಲ್ಲ ಎಂಬ ವಿಚಾರವನ್ನು ಬಹಿರಂಗಪಡಿಸಿದರು. ಇದನ್ನು ಕೇಳಿದ ಕೀರ್ತಿ ಅಚ್ಚರಿಪಡುವುದರ ಜೊತೆಗೆ ತಮಾಷೆಯಾಗಿ ಪ್ರತಿಕ್ರಿಯಿಸಿದರು. ನಿಮಗೆ ಸಾಕಷ್ಟು ಸಮಯವಿದೆ, ಲಂಡನ್‌ಗೆ ಹೋದ ಬಳಿಕ ಆರಾಮವಾಗಿ ಸಿನಿಮಾಗಳನ್ನು ನೋಡಬಹುದು ಎಂದು ಹೇಳಿದರು.

“ನಿಮ್ಮ ಯಾವ ಸಿನಿಮಾ ನೋಡಬೇಕು?”

ನಂತರ ರಾಧಿಕಾ, “ನಿಮ್ಮ ಯಾವ ಸಿನಿಮಾ ನೋಡಬೇಕು?” ಎಂದು ಕೇಳಿದಾಗ ಕೀರ್ತಿ ಎರಡು ಚಿತ್ರಗಳ ಹೆಸರನ್ನು ಸೂಚಿಸಿದರು. ಮೊದಲನೆಯದು ಕೀರ್ತಿಗೆ ರಾಷ್ಟ್ರ ಪ್ರಶಸ್ತಿ ತಂದುಕೊಟ್ಟ ‘ಮಹಾನಟಿ’. ಎರಡನೆಯದು ಇತ್ತೀಚೆಗೆ ಬಿಡುಗಡೆಯಾದ ‘ಡೋರ್ತಿ’. ಈ ಎರಡೂ ಸಿನಿಮಾಗಳನ್ನು ನೋಡಿದರೆ ಸಾಕು ಎಂದು ಕೀರ್ತಿ ಹೇಳಿದ್ದು, ವಿಶೇಷವಾಗಿ ‘ಡೋರ್ತಿ’ ಸಿನಿಮಾ ರಾಧಿಕಾಗೆ ಇಷ್ಟವಾಗಬಹುದು ಎಂಬ ವಿಶ್ವಾಸವನ್ನೂ ವ್ಯಕ್ತಪಡಿಸಿದ್ದಾರೆ.

ರಾಧಿಕಾ ಆಪ್ಟೆ ಕೂಡ ಈ ಸಲಹೆಯನ್ನು ಸ್ವೀಕರಿಸಿದ್ದು, ಸಿನಿಮಾಗಳ ಹೆಸರುಗಳನ್ನು ಸಂದೇಶದ ಮೂಲಕ ಕಳುಹಿಸುವಂತೆ ಕೇಳಿಕೊಂಡಿದ್ದಾರೆ. ಇಲ್ಲದಿದ್ದರೆ ಹೆಸರುಗಳನ್ನು ಮರೆತುಬಿಡುವ ಸಾಧ್ಯತೆ ಇದೆ ಎಂದು ನಗುತ್ತಲೇ ಹೇಳಿದ ಅವರು, ಖಂಡಿತವಾಗಿಯೂ ಚಿತ್ರಗಳನ್ನು ವೀಕ್ಷಿಸುವುದಾಗಿ ಭರವಸೆ ನೀಡಿದ್ದಾರೆ. ‘ಮಹಾನಟಿ’ಯಿಂದ ‘ಡೋರ್ತಿ’ವರೆಗೆ: ಕೀರ್ತಿಯ ವಿಭಿನ್ನ ಆಯ್ಕೆ ಕೀರ್ತಿ ಸುರೇಶ್ ಅವರ ವೃತ್ತಿಜೀವನದಲ್ಲಿ ‘ಮಹಾನಟಿ’ ಮಹತ್ವದ ಸ್ಥಾನ ಹೊಂದಿದೆ. ಖ್ಯಾತ ನಟಿ ಸಾವಿತ್ರಿ ಅವರ ಜೀವನವನ್ನು ಆಧರಿಸಿದ ಈ ಚಿತ್ರದಲ್ಲಿ ಕೀರ್ತಿ, ಸಾವಿತ್ರಿ ಪಾತ್ರಕ್ಕೆ ಜೀವ ತುಂಬಿದ್ದರು. ಅವರ ಅಭಿನಯಕ್ಕೆ ವ್ಯಾಪಕ ಮೆಚ್ಚುಗೆ ದೊರೆತಿದ್ದು, ಇದೇ ಚಿತ್ರದ ಮೂಲಕ ಅವರಿಗೆ ರಾಷ್ಟ್ರ ಪ್ರಶಸ್ತಿ ಲಭಿಸಿತ್ತು.

ಈ ಚಿತ್ರದ ವಿಚಾರಗಳು ಕೆಲವೆಡೆ ಚರ್ಚೆ ಮತ್ತು ವಿರೋಧಕ್ಕೂ ಕಾರಣವಾಗಿದೆ!

ಇನ್ನೊಂದೆಡೆ, ‘ಡೋರ್ತಿ’ ವಿಭಿನ್ನ ಕಥಾವಸ್ತುವಿನ ಮೂಲಕ ಗಮನ ಸೆಳೆದಿದೆ. ಈ ಸಿನಿಮಾದಲ್ಲಿ LGBTQ+ ಸಮುದಾಯಕ್ಕೆ ಸಂಬಂಧಿಸಿದ ವಿಷಯಗಳನ್ನು ಚರ್ಚಿಸಲಾಗಿದೆ. ಚಿತ್ರದ ವಿಚಾರಗಳು ಕೆಲವೆಡೆ ಚರ್ಚೆ ಮತ್ತು ವಿರೋಧಕ್ಕೂ ಕಾರಣವಾಗಿದ್ದರೂ, ಹಲವು ಚಿತ್ರರಂಗದ ಗಣ್ಯರು ಸಿನಿಮಾವನ್ನು ವೀಕ್ಷಿಸಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ ಎಂದು ವರದಿಯಾಗಿದೆ. ರಜನಿಕಾಂತ್, ಉಪೇಂದ್ರ, ಸೂರ್ಯ ಮತ್ತು ರಾಣಾ ದಗ್ಗುಬಾಟಿ ಸೇರಿದಂತೆ ಹಲವು ಕಲಾವಿದರು ಚಿತ್ರದ ಬಗ್ಗೆ ಮೆಚ್ಚುಗೆ ಸೂಚಿಸಿರುವುದಾಗಿ ವರದಿಗಳು ತಿಳಿಸಿವೆ.

ಒಟ್ಟಿನಲ್ಲಿ, ರಾಧಿಕಾ ಆಪ್ಟೆಗೆ ಕೀರ್ತಿ ಸುರೇಶ್ ನೀಡಿದ ಈ ಸಿನಿಮಾ ಸಲಹೆ ಈಗ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ. ಒಂದೆಡೆ ರಾಷ್ಟ್ರ ಪ್ರಶಸ್ತಿ ತಂದುಕೊಟ್ಟ ಅಭಿನಯ ಪ್ರಧಾನ ಸಿನಿಮಾ, ಮತ್ತೊಂದೆಡೆ ವಿಭಿನ್ನ ವಿಷಯವನ್ನು ಆಯ್ದುಕೊಂಡ ಚಿತ್ರ—ಈ ಎರಡು ಸಿನಿಮಾಗಳ ಮೂಲಕ ತಮ್ಮ ನಟನೆಯ ವಿಭಿನ್ನ ಮುಖಗಳನ್ನು ರಾಧಿಕಾಗೆ ಪರಿಚಯಿಸಲು ಕೀರ್ತಿ ಬಯಸಿದಂತಿದೆ. ಈಗ ರಾಧಿಕಾ ಈ ಚಿತ್ರಗಳನ್ನು ವೀಕ್ಷಿಸಿದ ಬಳಿಕ ತಮ್ಮ ಅಭಿಪ್ರಾಯವನ್ನು ಹಂಚಿಕೊಳ್ಳುತ್ತಾರೆಯೇ ಎಂಬುದನ್ನು ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ.

Ramayana Release: ಭಾರತ ಮಾತ್ರವಲ್ಲ, ಭಾರತೀಯ ಮಹಾಕಾವ್ಯ 'ರಾಮಾಯಣ' ಸಿನಿಮಾ ನೋಡಲಿವೆ 100ಕ್ಕೂ ಹೆಚ್ಚು ದೇಶಗಳು!

Shriram Bhat — Wed, 28 Oct 2026 19:10:20 +0530

Ramayana movie to release in 50,000 screens in more than 100 countries-100ಕ್ಕೂ ಹೆಚ್ಚು ದೇಶಗಳಲ್ಲಿ ‘ರಾಮಾಯಣ’ ಬಿಡುಗಡೆ: ಭಾರತೀಯ ಮಹಾಕಾವ್ಯವನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ಯಲು ಸಜ್ಜಾದ ಚಿತ್ರತಂಡ!

ಭಾರತೀಯ ಸಂಸ್ಕೃತಿ, ಪರಂಪರೆ ಮತ್ತು ಪುರಾಣಗಳ ಬಗ್ಗೆ ಜಗತ್ತಿನಾದ್ಯಂತ ಆಸಕ್ತಿ ಹೆಚ್ಚುತ್ತಿರುವ ಈ ಸಮಯದಲ್ಲಿ, ನಿತೇಶ್ ತಿವಾರಿ ನಿರ್ದೇಶನದ ಬಹುನಿರೀಕ್ಷಿತ ‘ರಾಮಾಯಣ’ ಸಿನಿಮಾ ದೊಡ್ಡ ಮಟ್ಟದಲ್ಲಿ ಪ್ರೇಕ್ಷಕರನ್ನು ತಲುಪಲು ಸಜ್ಜಾಗಿದೆ. ರಣಬೀರ್ ಕಪೂರ್ ಮತ್ತು ಸಾಯಿ ಪಲ್ಲವಿ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿರುವ ಈ ಚಿತ್ರವು 100ಕ್ಕೂ ಹೆಚ್ಚು ದೇಶಗಳಲ್ಲಿ ಸುಮಾರು 50,000 ಪರದೆಗಳಲ್ಲಿ ಬಿಡುಗಡೆಯಾಗಲಿದೆ ಎಂದು ತಿಳಿಸಲಾಗಿದೆ. ಚಿತ್ರದ ಮೊದಲ ಭಾಗವು 2026ರ ನವೆಂಬರ್ 5ರಂದು ವಿಶ್ವದಾದ್ಯಂತ ತೆರೆಕಾಣುವ ನಿರೀಕ್ಷೆಯಿದೆ.

‘ರಾಮಾಯಣ’ ಭಾರತೀಯರಿಗೆ ಕೇವಲ ಪುರಾಣದ ಕಥೆಯಲ್ಲ, ಇದೊಂದು ಇತಿಹಾಸ, ಮಹಾಕಾವ್ಯ!

‘ರಾಮಾಯಣ’ ಭಾರತೀಯರಿಗೆ ಕೇವಲ ಪುರಾಣದ ಕಥೆಯಲ್ಲ. ಇದು ಹಲವು ತಲೆಮಾರುಗಳಿಂದ ಜನರ ಜೀವನ, ಸಂಸ್ಕೃತಿ ಮತ್ತು ಮೌಲ್ಯಗಳ ಮೇಲೆ ಪ್ರಭಾವ ಬೀರಿರುವ ಮಹಾಕಾವ್ಯ. ರಾಮನ ಜೀವನದ ಮೂಲಕ ಧೈರ್ಯ, ಕರ್ತವ್ಯನಿಷ್ಠೆ, ತ್ಯಾಗ, ಧರ್ಮ ಮತ್ತು ಕೆಟ್ಟದ್ದರ ವಿರುದ್ಧ ಒಳ್ಳೆಯದರ ವಿಜಯದಂತಹ ಸಂದೇಶಗಳು ಜನರಿಗೆ ತಲುಪಿವೆ. ಇಂತಹ ಕಥೆಯನ್ನು ಆಧುನಿಕ ತಂತ್ರಜ್ಞಾನ ಮತ್ತು ಅದ್ಧೂರಿ ದೃಶ್ಯಗಳ ಮೂಲಕ ಜಾಗತಿಕ ಪ್ರೇಕ್ಷಕರ ಮುಂದೆ ಪ್ರಸ್ತುತಪಡಿಸುವ ಪ್ರಯತ್ನ ಈ ಸಿನಿಮಾದಲ್ಲಿದೆ.

ನಮಿತ್ ಮಲ್ಹೋತ್ರಾ ನಿರ್ಮಾಣದಲ್ಲಿ ಮೂಡಿಬರುತ್ತಿರುವ ಈ ಚಿತ್ರದಲ್ಲಿ ರಣಬೀರ್ ಕಪೂರ್ ರಾಮನಾಗಿ, ಸಾಯಿ ಪಲ್ಲವಿ ಸೀತೆಯಾಗಿ, ರಾಕಿಂಗ್ ಸ್ಟಾರ್ ಯಶ್ ರಾವಣನಾಗಿ, ಸನ್ನಿ ಡಿಯೋಲ್ ಹನುಮಂತನಾಗಿ ಮತ್ತು ರವಿ ದುಬೆ ಲಕ್ಷ್ಮಣನಾಗಿ ಕಾಣಿಸಿಕೊಳ್ಳಲಿದ್ದಾರೆ. ಈ ತಾರಾಗಣದ ಜೊತೆಗೆ ಚಿತ್ರದ ದೃಶ್ಯ ವೈಭವ, ತಾಂತ್ರಿಕ ಗುಣಮಟ್ಟ ಮತ್ತು ಕಥೆಯ ನಿರೂಪಣೆ ಕುರಿತು ಈಗಾಗಲೇ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿದೆ.

ವಿಶ್ವದಾದ್ಯಂತ 50,000 ಪರದೆಗಳಲ್ಲಿ ಸಿನಿಮಾ ಬಿಡುಗಡೆ

ವಿಶ್ವದಾದ್ಯಂತ 50,000 ಪರದೆಗಳಲ್ಲಿ ಸಿನಿಮಾ ಬಿಡುಗಡೆಯಾಗುವ ಯೋಜನೆ ಭಾರತೀಯ ಚಿತ್ರರಂಗದ ಜಾಗತಿಕ ವ್ಯಾಪ್ತಿಯ ದೃಷ್ಟಿಯಿಂದ ಗಮನಾರ್ಹವಾಗಿದೆ. ಭಾರತೀಯ ಪುರಾಣಗಳು ಮತ್ತು ಕಥೆಗಳನ್ನು ಬೇರೆ ದೇಶಗಳ ಪ್ರೇಕ್ಷಕರಿಗೂ ಪರಿಚಯಿಸಲು ಇದು ನೆರವಾಗಬಹುದು. ವಿಶೇಷವಾಗಿ, ರಾಮಾಯಣದ ಕಥೆಯನ್ನು ಹೊಸ ತಲೆಮಾರಿನ ಪ್ರೇಕ್ಷಕರು ದೊಡ್ಡ ಪರದೆಯಲ್ಲಿ ಅನುಭವಿಸಲು ಈ ಸಿನಿಮಾ ಅವಕಾಶ ಕಲ್ಪಿಸಲಿದೆ.

ಈ ಚಿತ್ರವನ್ನು ಎರಡು ಭಾಗಗಳಲ್ಲಿ ನಿರ್ಮಿಸಲಾಗುತ್ತಿದೆ. ಮೊದಲ ಭಾಗವು 2026ರ ನವೆಂಬರ್ 5ರಂದು ಬಿಡುಗಡೆಯಾಗಲಿದ್ದು, ಎರಡನೇ ಭಾಗವು 2027ರ ದೀಪಾವಳಿಯ ಸಂದರ್ಭದಲ್ಲಿ ತೆರೆಕಾಣುವ ನಿರೀಕ್ಷೆಯಿದೆ. ಭಾರತದಲ್ಲಿ ಹಿಂದಿ, ಕನ್ನಡ, ತಮಿಳು, ತೆಲುಗು ಮತ್ತು ಮಲಯಾಳಂ ಭಾಷೆಗಳಲ್ಲಿ ಚಿತ್ರವನ್ನು ಬಿಡುಗಡೆ ಮಾಡಲು ಯೋಜಿಸಲಾಗಿದೆ. ಅಲ್ಲದೆ, IMAX ಸೇರಿದಂತೆ ದೊಡ್ಡ ಪರದೆಯ ಅನುಭವವನ್ನು ಒದಗಿಸುವ ಸ್ವರೂಪಗಳಲ್ಲಿಯೂ ಸಿನಿಮಾ ಬಿಡುಗಡೆಯಾಗಲಿದೆ.

ಎಂಟು ಆಸ್ಕರ್ ಪ್ರಶಸ್ತಿಗಳನ್ನು ಗೆದ್ದಿರುವ DNEG ಸಂಸ್ಥೆ ಮತ್ತು ಯಶ್ ಅವರ ಮಾನ್ಸ್ಟರ್ ಮೈಂಡ್ ಕ್ರಿಯೇಷನ್ಸ್ ಸಹಯೋಗದೊಂದಿಗೆ ಚಿತ್ರ ನಿರ್ಮಾಣವಾಗುತ್ತಿದೆ. ಭಾರತದ ಹೊರಗಿನ ವಿತರಣೆಯನ್ನು ಸೋನಿ ಪಿಕ್ಚರ್ಸ್ ನಿರ್ವಹಿಸಲಿದ್ದು, ಹಿಂದಿ ಭಾಷೆಯ ಮಾರುಕಟ್ಟೆಯಲ್ಲಿ ಧರ್ಮ ಪ್ರೊಡಕ್ಷನ್ಸ್ ವಿತರಣೆಯ ಜವಾಬ್ದಾರಿ ವಹಿಸಿಕೊಳ್ಳಲಿದೆ ಎಂದು ತಿಳಿಸಲಾಗಿದೆ.

ಒಟ್ಟಿನಲ್ಲಿ, ‘ರಾಮಾಯಣ’ ಸಿನಿಮಾ ಕೇವಲ ದೊಡ್ಡ ಬಜೆಟ್‌ನ ಚಿತ್ರವಾಗಿ ಮಾತ್ರವಲ್ಲದೆ, ಭಾರತೀಯ ಪರಂಪರೆಯನ್ನು ವಿಶ್ವದ ಮುಂದೆ ಪರಿಚಯಿಸುವ ಪ್ರಯತ್ನವಾಗಿಯೂ ಗಮನ ಸೆಳೆಯುತ್ತಿದೆ. ಪ್ರೇಕ್ಷಕರ ನಿರೀಕ್ಷೆಗಳು ಹೆಚ್ಚಿರುವ ಹಿನ್ನೆಲೆಯಲ್ಲಿ, ಕಥೆಯ ಭಾವನಾತ್ಮಕ ಆಳ, ಪಾತ್ರಗಳ ಚಿತ್ರಣ ಮತ್ತು ದೃಶ್ಯ ವೈಭವವನ್ನು ಚಿತ್ರತಂಡ ಹೇಗೆ ಸಮತೋಲನಗೊಳಿಸುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ.

ಅಮ್ಮ ಶ್ರೀದೇವಿ ನಿಧನರಾದಾಗ ನನಗಾಗಿ ಲಂಡನ್ ಓದು ಬಿಟ್ಟು ಬಂದಿದ್ದ: ಜಾನ್ವಿ ಕಪೂರ್ ಭಾವುಕ

Govindaraj S — Wed, 28 Oct 2026 19:09:44 +0530

ಬಾಲಿವುಡ್ ನಟಿ ಜಾನ್ವಿ ಕಪೂರ್ ತಮ್ಮ ವೈಯಕ್ತಿಕ ಜೀವನದ ಬಗ್ಗೆ ಮಾಡಿದ ಹೇಳಿಕೆಗಳು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ತಾಯಿ ಶ್ರೀದೇವಿ ನಿಧನರಾದ ಸಂದರ್ಭದಲ್ಲಿ ತಮಗೆ ಬೆಂಬಲವಾಗಿ ನಿಂತಿದ್ದ ಗೆಳೆಯ ಶಿಖರ್ ಪಹಾರಿಯಾ ಬಗ್ಗೆ ಜಾನ್ವಿ ಮನಬಿಚ್ಚಿ ಮಾತನಾಡಿದ್ದಾರೆ. ಅಂದು ತಮಗೆ ಸಾಂತ್ವನ ಹೇಳಲು ಶಿಖರ್ ಲಂಡನ್‌ನಲ್ಲಿ ತಮ್ಮ ಓದಿಗೆ ವಿರಾಮ ನೀಡಿ ಬಂದಿದ್ದರು ಎಂಬ ವಿಚಾರವನ್ನು ಅವರು ಹಂಚಿಕೊಂಡಿದ್ದಾರೆ.

ಬಾಲಿವುಡ್ ಸಿನಿಮಾಗಳ ಮೂಲಕ ಗುರುತಿಸಿಕೊಂಡಿರುವ ಜಾನ್ವಿ ಕಪೂರ್, ‘ದೇವರ’ ಚಿತ್ರದ ಮೂಲಕ ತೆಲುಗು ಪ್ರೇಕ್ಷಕರಿಗೂ ಹತ್ತಿರವಾಗಿದ್ದಾರೆ. ಸದ್ಯ ‘ಪೆದ್ದಿ’ ಸೇರಿದಂತೆ ಹಲವು ಸಿನಿಮಾಗಳ ವಿಚಾರವಾಗಿ ಸುದ್ದಿಯಲ್ಲಿರುವ ಈ ನಟಿ, ಸಿನಿಮಾ ಮಾತ್ರವಲ್ಲದೆ ತಮ್ಮ ವೈಯಕ್ತಿಕ ಬದುಕಿನ ವಿಚಾರಗಳಿಂದಲೂ ಆಗಾಗ ಸುದ್ದಿಯಾಗುತ್ತಾರೆ. ಇದೀಗ ಶಿಖರ್ ಪಹಾರಿಯಾ ಜೊತೆಗಿನ ತಮ್ಮ ಆತ್ಮೀಯ ಸಂಬಂಧದ ಬಗ್ಗೆ ಅವರು ಹೇಳಿರುವ ಮಾತುಗಳು ಅಭಿಮಾನಿಗಳ ಗಮನ ಸೆಳೆಯುತ್ತಿವೆ.

ಅಮ್ಮ ಶ್ರೀದೇವಿ ನಿಧನರಾದಾಗ ನನಗಾಗಿ ಬಂದಿದ್ದ ಶಿಖರ್!

2018ರಲ್ಲಿ ತಾಯಿ ಶ್ರೀದೇವಿ ನಿಧನರಾದ ನಂತರ ತಾವು ಎದುರಿಸಿದ ಕಠಿಣ ಸಮಯವನ್ನು ಜಾನ್ವಿ ಕಪೂರ್ ನೆನಪಿಸಿಕೊಂಡಿದ್ದಾರೆ. ಆ ಸಂದರ್ಭದಲ್ಲಿ ಶಿಖರ್ ಪಹಾರಿಯಾ ತಮಗೆ ನೀಡಿದ ಬೆಂಬಲದ ಬಗ್ಗೆ ಮಾತನಾಡಿದ್ದಾರೆ. ಆಗ ಇಬ್ಬರೂ ಪ್ರೀತಿಯ ಸಂಬಂಧದಲ್ಲಿರಲಿಲ್ಲವಾದರೂ, ಶಿಖರ್ ತಮ್ಮ ಕಷ್ಟದ ಸಮಯದಲ್ಲಿ ಜೊತೆಗಿದ್ದರು ಎಂದು ಜಾನ್ವಿ ತಿಳಿಸಿದ್ದಾರೆ. ‘ಕಾಫಿ ವಿತ್ ಕರಣ್’ ಕಾರ್ಯಕ್ರಮದಲ್ಲಿ ಮಾತನಾಡುವಾಗ ಈ ಘಟನೆಯನ್ನು ನೆನಪಿಸಿಕೊಂಡ ಜಾನ್ವಿ, ಶಿಖರ್ ಆಗ ಲಂಡನ್‌ನಲ್ಲಿ ಓದುತ್ತಿದ್ದರು ಎಂದು ಹೇಳಿದ್ದಾರೆ.

ತಾಯಿ ನಿಧನರಾದ ಸುದ್ದಿ ತಿಳಿದ ತಕ್ಷಣ ಅವರು ತಮ್ಮ ಓದಿಗೆ ವಿರಾಮ ನೀಡಿ ಭಾರತಕ್ಕೆ ಬಂದಿದ್ದರು. ಅಷ್ಟೇ ಅಲ್ಲದೆ, ಮುಂಬೈನ ಜುಹುವಿನಲ್ಲಿರುವ ತಮ್ಮ ಸ್ನೇಹಿತನ ಮನೆಯಲ್ಲಿ ಸುಮಾರು ಒಂದು ತಿಂಗಳ ಕಾಲ ಉಳಿದುಕೊಂಡಿದ್ದರು ಎಂಬ ವಿಚಾರವೂ ಜಾನ್ವಿಗೆ ಬಹಳ ದಿನಗಳ ನಂತರ ತಿಳಿದಿತ್ತಂತೆ. ತಮ್ಮ ಕಷ್ಟದ ಸಮಯದಲ್ಲಿ ಶಿಖರ್ ತೋರಿದ ಕಾಳಜಿ ಹಾಗೂ ಬೆಂಬಲವನ್ನು ನೆನಪಿಸಿಕೊಂಡ ಜಾನ್ವಿ, ಆ ಸಂದರ್ಭವನ್ನು ಭಾವುಕವಾಗಿ ವಿವರಿಸಿದ್ದಾರೆ. ಈ ಹೇಳಿಕೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿದೆ.

ಶಿಖರ್ ಪ್ರೀತಿಯೇ ನನಗೆ ಧೈರ್ಯ ನೀಡಿತು!

ಜಾನ್ವಿ ಕಪೂರ್ ಹಾಗೂ ಶಿಖರ್ ಪಹಾರಿಯಾ ಹಲವು ವರ್ಷಗಳಿಂದ ಆತ್ಮೀಯವಾಗಿದ್ದಾರೆ. ಇವರಿಬ್ಬರೂ ಪ್ರೀತಿಯಲ್ಲಿದ್ದಾರೆ ಎಂಬ ಸುದ್ದಿ ಆಗಾಗ ಕೇಳಿಬರುತ್ತಿದ್ದರೂ, ತಮ್ಮ ಸಂಬಂಧದ ಬಗ್ಗೆ ಇಬ್ಬರೂ ಅಧಿಕೃತವಾಗಿ ಎಲ್ಲವನ್ನೂ ಬಹಿರಂಗಪಡಿಸಿಲ್ಲ. ಆದರೂ, ಜಾನ್ವಿ ತಮ್ಮ ಸಂದರ್ಶನಗಳಲ್ಲಿ ಶಿಖರ್ ಬಗ್ಗೆ ಮಾತನಾಡುವ ರೀತಿ ಅಭಿಮಾನಿಗಳ ಕುತೂಹಲ ಹೆಚ್ಚಿಸಿದೆ.

ಇತ್ತೀಚೆಗೆ ರಾಜ್ ಶಮಾನಿ ಅವರ ಪಾಡ್‌ಕಾಸ್ಟ್‌ನಲ್ಲಿ ಮಾತನಾಡಿದ್ದ ಜಾನ್ವಿ, ಪ್ರೀತಿಯ ಬಗ್ಗೆ ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡಿದ್ದರು. ಪ್ರೀತಿ ಎನ್ನುವುದು ಸುರಕ್ಷಿತ ಭಾವನೆ ನೀಡುವ ಸಂಬಂಧ ಎಂದು ವಿವರಿಸಿದ್ದ ಅವರು, ಶಿಖರ್ ಜೊತೆಗಿರುವಾಗ ತಾವು ಯಾವುದೇ ಮುಜುಗರವಿಲ್ಲದೆ ತಮ್ಮಂತೆಯೇ ಇರಬಹುದು ಎಂಬ ಅರ್ಥದಲ್ಲಿ ಮಾತನಾಡಿದ್ದರು.

ಶಿಖರ್ ಜೊತೆಗಿರುವಾಗ ತಮ್ಮ ಭಾವನೆಗಳನ್ನು ಮುಕ್ತವಾಗಿ ವ್ಯಕ್ತಪಡಿಸಬಹುದು ಮತ್ತು ತಮ್ಮನ್ನು ಯಾರೂ ತಪ್ಪಾಗಿ ಅರ್ಥಮಾಡಿಕೊಳ್ಳುವುದಿಲ್ಲ ಎಂಬ ನೆಮ್ಮದಿ ಸಿಗುತ್ತದೆ ಎಂದು ಜಾನ್ವಿ ಹೇಳಿಕೊಂಡಿದ್ದರು. ಇದೀಗ ತಾಯಿ ನಿಧನರಾದ ಸಮಯದಲ್ಲಿ ಶಿಖರ್ ನೀಡಿದ್ದ ಬೆಂಬಲದ ವಿಚಾರವೂ ಮುನ್ನೆಲೆಗೆ ಬಂದಿರುವುದರಿಂದ, ಇವರಿಬ್ಬರ ಸಂಬಂಧದ ಬಗ್ಗೆ ಮತ್ತೆ ಚರ್ಚೆ ಶುರುವಾಗಿದೆ.

ಶ್ರೀದೇವಿ ನಿಧನದ ನೋವು ಇಂದಿಗೂ ಮರೆಯಲಾಗದು

2018ರ ಫೆಬ್ರವರಿಯಲ್ಲಿ ದುಬೈನಲ್ಲಿ ಶ್ರೀದೇವಿ ನಿಧನರಾದ ಸುದ್ದಿ ಭಾರತೀಯ ಚಿತ್ರರಂಗಕ್ಕೆ ದೊಡ್ಡ ಆಘಾತ ನೀಡಿತ್ತು. ಅವರ ಅಕಾಲಿಕ ಸಾವು ಅಭಿಮಾನಿಗಳು ಹಾಗೂ ಚಿತ್ರರಂಗದ ಗಣ್ಯರನ್ನು ದುಃಖದಲ್ಲಿ ಮುಳುಗಿಸಿತ್ತು. ತಾಯಿಯನ್ನು ಕಳೆದುಕೊಂಡ ನಂತರ ಜಾನ್ವಿ ಕಪೂರ್ ಎದುರಿಸಿದ ನೋವು ಮತ್ತು ಆ ಸಂದರ್ಭದಲ್ಲಿ ಅವರಿಗೆ ಸಿಕ್ಕಿದ್ದ ಕುಟುಂಬದವರ ಹಾಗೂ ಸ್ನೇಹಿತರ ಬೆಂಬಲ ಬಹಳ ಮಹತ್ವದ್ದಾಗಿತ್ತು.

ಇದೀಗ ಹಲವು ವರ್ಷಗಳ ನಂತರ ಆ ಕಠಿಣ ದಿನಗಳನ್ನು ನೆನಪಿಸಿಕೊಂಡಿರುವ ಜಾನ್ವಿ, ಶಿಖರ್ ಪಹಾರಿಯಾ ತಮ್ಮ ಜೀವನದಲ್ಲಿ ಯಾವ ರೀತಿಯ ಸ್ಥಾನ ಹೊಂದಿದ್ದಾರೆ ಎಂಬುದನ್ನು ತಮ್ಮ ಮಾತುಗಳ ಮೂಲಕ ಪರೋಕ್ಷವಾಗಿ ವ್ಯಕ್ತಪಡಿಸಿದ್ದಾರೆ. ಈ ಹೇಳಿಕೆಗಳು ಅಭಿಮಾನಿಗಳಲ್ಲಿ ಭಾವನಾತ್ಮಕ ಪ್ರತಿಕ್ರಿಯೆ ಮೂಡಿಸಿದ್ದು, ಜಾನ್ವಿ ಮತ್ತು ಶಿಖರ್ ನಡುವಿನ ಆತ್ಮೀಯತೆಯ ಬಗ್ಗೆ ಮತ್ತೊಮ್ಮೆ ಚರ್ಚೆ ನಡೆಯುತ್ತಿದೆ.

ಅನಿರುದ್ಧ್-ಕಾವ್ಯಾ ಮಾರನ್ ಮದುವೆ ಸುದ್ದಿ ಮತ್ತೆ ವೈರಲ್: ಹಾಟ್ ಟಾಪಿಕ್ ವೆಡ್ಡಿಂಗ್ ಕಾರ್ಡ್‌ನಲ್ಲಿ ಏನಿದೆ?

Govindaraj S — Wed, 28 Oct 2026 18:12:34 +0530

ಮ್ಯೂಸಿಕ್ ಡೈರೆಕ್ಟರ್ ಅನಿರುದ್ಧ್ ರವಿಚಂದರ್ ಹಾಗೂ ಕಾವ್ಯಾ ಮಾರನ್ ಮದುವೆ ಕಾರ್ಡ್ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ. ನವೆಂಬರ್ 21ರಂದು ಚೆನ್ನೈನಲ್ಲಿ ಇವರ ಆರತಕ್ಷತೆ ನಡೆಯಲಿದೆ ಎನ್ನಲಾಗಿದ್ದು, ಈ ಕ್ಯೂಟ್ ವೆಡ್ಡಿಂಗ್ ಕಾರ್ಡ್ ನೋಡಿ ಫ್ಯಾನ್ಸ್ ಥ್ರಿಲ್ ಆಗಿದ್ದಾರೆ.

ಮ್ಯೂಸಿಕ್ ಡೈರೆಕ್ಟರ್ ಅನಿರುದ್ಧ್ ರವಿಚಂದರ್ ಹಾಗೂ ಸನ್‌ರೈಸರ್ಸ್ ಹೈದರಾಬಾದ್ ಸಿಇಒ ಕಾವ್ಯಾ ಮಾರನ್ ಮದುವೆ ಕಾರ್ಡ್ ಎನ್ನಲಾದ ವಿಡಿಯೋವೊಂದು ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ಸದ್ದು ಮಾಡುತ್ತಿದೆ. ನವೆಂಬರ್‌ನಲ್ಲಿ ಇವರ ಮದುವೆ ನಡೆಯಲಿದೆ ಎಂಬ ಸುದ್ದಿಯ ಬೆನ್ನಲ್ಲೇ, ಈ ಸುಂದರವಾದ ವೆಡ್ಡಿಂಗ್ ಕಾರ್ಡ್ ಫ್ಯಾನ್ಸ್ ಗಮನ ಸೆಳೆದಿದೆ.

ಗಮನ ಸೆಳೆಯುತ್ತಿರುವ ಅನಿರುದ್ಧ್-ಕಾವ್ಯಾ ಮದುವೆ ಕಾರ್ಡ್

ಬಿಳಿ ಬಣ್ಣದ ಬಾಕ್ಸ್ ಮೇಲೆ ತಿಳಿ ನೀಲಿ ಬಣ್ಣದ ಡಿಸೈನ್ ಇರುವ ಈ ಕಾರ್ಡ್ ನೋಡಲು ತುಂಬಾ ರಿಚ್ ಆಗಿದೆ. ವೈರಲ್ ಆಗಿರುವ ವಿಡಿಯೋದಲ್ಲಿ, ಡಿಸೈನರ್ ಆ ಬಾಕ್ಸ್ ಓಪನ್ ಮಾಡಿದಾಗ ಒಳಗಡೆ ಮದುವೆ ದಿನಾಂಕ ಸೇರಿದಂತೆ ಹಲವು ಡೀಟೇಲ್ಸ್ ಇರುವುದನ್ನು ಕಾಣಬಹುದು. ಈ ವಿಡಿಯೋ ನೋಡಿದ ಫ್ಯಾನ್ಸ್ ಮದುವೆ ಬಗ್ಗೆ ಇನ್ನಷ್ಟು ತಿಳಿದುಕೊಳ್ಳಲು ಕ್ಯೂರಿಯಸ್ ಆಗಿದ್ದಾರೆ. ಆದರೆ, ಕೇವಲ ಈ ವಿಡಿಯೋದಿಂದಲೇ ಮದುವೆ ಬಗ್ಗೆ ಅಧಿಕೃತವಾಗಿ ಖಚಿತಪಡಿಸಲು ಸಾಧ್ಯವಿಲ್ಲ.

ತೆಲಂಗಾಣ ಸಿಎಂಗೆ ಆಹ್ವಾನ ನೀಡಿದ ಕಾವ್ಯಾ ಮಾರನ್ ಪೋಷಕರು

ಈ ಮದುವೆ ಸುದ್ದಿಗಳ ನಡುವೆಯೇ, ಕಾವ್ಯಾ ಪೋಷಕರಾದ ಸನ್ ಗ್ರೂಪ್ ಚೇರ್ಮನ್ ಕಲಾನಿಧಿ ಮಾರನ್ ಹಾಗೂ ಕಾವೇರಿ ಮಾರನ್ ಇತ್ತೀಚೆಗೆ ತೆಲಂಗಾಣ ಮುಖ್ಯಮಂತ್ರಿ ಎ. ರೇವಂತ್ ರೆಡ್ಡಿ ಅವರನ್ನು ಜುಬಿಲಿ ಹಿಲ್ಸ್‌ನಲ್ಲಿರುವ ಅವರ ನಿವಾಸದಲ್ಲಿ ಭೇಟಿಯಾಗಿದ್ದಾರೆ. ತಮ್ಮ ಮಗಳ ಮದುವೆ ಆರತಕ್ಷತೆಗೆ ಸಿಎಂಗೆ ಅವರು ಆಹ್ವಾನ ನೀಡಿದ್ದಾರೆ ಎಂದು ತೆಲಂಗಾಣ ಸಿಎಂ ಕಚೇರಿ (CMO) ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿದೆ. ನವೆಂಬರ್ 21ರಂದು ಚೆನ್ನೈನಲ್ಲಿ ಕಾವ್ಯಾ ಮಾರನ್ ಹಾಗೂ ಅನಿರುದ್ಧ್ ರವಿಚಂದರ್ ಅವರ ಆರತಕ್ಷತೆ ನಡೆಯಲಿದೆ ಎಂದು ಸಿಎಂ ಕಚೇರಿ ಸ್ಪಷ್ಟಪಡಿಸಿದೆ.

ಮದುವೆ ವದಂತಿ ಶುರುವಾಗಿದ್ದು ಹೇಗೆ?

ಅನಿರುದ್ಧ್ ಹಾಗೂ ಕಾವ್ಯಾ ರಿಲೇಷನ್‌ಶಿಪ್ ಹಾಗೂ ಮದುವೆ ಬಗ್ಗೆ ಕಳೆದ ಕೆಲವು ತಿಂಗಳುಗಳಿಂದಲೇ ಸುದ್ದಿಗಳು ಹರಿದಾಡುತ್ತಿದ್ದವು. ಜೂನ್ ತಿಂಗಳಲ್ಲಿ ಕೆಪಿಟಿವಿ (KPTV)ಗೆ ನೀಡಿದ ಸಂದರ್ಶನವೊಂದರಲ್ಲಿ ಅನಿರುದ್ಧ್ ಅವರ ಚಿಕ್ಕಪ್ಪ, ನಟ ವೈ. ಜಿ. ಮಹೇಂದ್ರ ಈ ಮದುವೆ ಬಗ್ಗೆ ಮಾತನಾಡಿದ್ದರು. ತಮಗೆ ತಿಳಿದಿರುವ ಮಾಹಿತಿಯ ಪ್ರಕಾರ ಈ ಮದುವೆ ನಡೆಯಲಿದೆ ಎಂದು ಹೇಳಿ, ಅನಿರುದ್ಧ್‌ಗೆ ಅವರು ಶುಭಕೋರಿದ್ದರು. ಜೊತೆಗೆ, ಕಾವ್ಯಾ ಒಬ್ಬ ಸಾಧಕಿ, ದೊಡ್ಡ ಕ್ರಿಕೆಟ್ ಫ್ರಾಂಚೈಸಿಯನ್ನು ಅವರು ಅದ್ಭುತವಾಗಿ ನಿಭಾಯಿಸುತ್ತಿದ್ದಾರೆ ಎಂದು ಹೊಗಳಿದ್ದರು. ಇವರಿಬ್ಬರ ಜೋಡಿ ಸೂಪರ್ ಆಗಿರುತ್ತದೆ ಎಂದೂ ಅವರು ಹೇಳಿದ್ದರು.

ಯಾರಿದು ಕಾವ್ಯಾ ಮಾರನ್?

ಸನ್ ಗ್ರೂಪ್ ಸಂಸ್ಥಾಪಕ ಕಲಾನಿಧಿ ಮಾರನ್ ಅವರ ಪುತ್ರಿಯೇ ಈ ಕಾವ್ಯಾ ಮಾರನ್. ಸನ್ ಟಿವಿ ನೆಟ್‌ವರ್ಕ್‌ನ ಎಕ್ಸಿಕ್ಯೂಟಿವ್ ಡೈರೆಕ್ಟರ್ ಆಗಿರುವ ಇವರು, ತಮ್ಮ ಸಂಸ್ಥೆಯ ಸ್ಪೋರ್ಟ್ಸ್ ಬ್ಯುಸಿನೆಸ್ ಅನ್ನು ಕೂಡ ನೋಡಿಕೊಳ್ಳುತ್ತಿದ್ದಾರೆ. ಐಪಿಎಲ್‌ನಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ತಂಡದ ಮೂಲಕ ಇವರು ಫೇಮಸ್ ಆಗಿದ್ದಾರೆ. ದಕ್ಷಿಣ ಆಫ್ರಿಕಾದ ಎಸ್‌ಎ20 (SA20) ಟೂರ್ನಿಯ ಸನ್‌ರೈಸರ್ಸ್ ಈಸ್ಟರ್ನ್ ಕೇಪ್ ಹಾಗೂ ಇಂಗ್ಲೆಂಡ್‌ನ 'ದಿ ಹಂಡ್ರೆಡ್' ಟೂರ್ನಿಯ ಸನ್‌ರೈಸರ್ಸ್ ಲೀಡ್ಸ್ ತಂಡಗಳ ಜೊತೆಯೂ ಇವರು ಗುರುತಿಸಿಕೊಂಡಿದ್ದಾರೆ. ಐಪಿಎಲ್ ಮ್ಯಾಚ್‌ಗಳ ವೇಳೆ ಸ್ಟೇಡಿಯಂನಲ್ಲಿ ಕಾಣಿಸಿಕೊಳ್ಳುವ ಕಾವ್ಯಾ, ಕ್ರಿಕೆಟ್ ಫ್ಯಾನ್ಸ್‌ಗೆ ಚಿರಪರಿಚಿತ.

ಅನಿರುದ್ಧ್ ರವಿಚಂದರ್ ಮುಂದಿನ ಪ್ರಾಜೆಕ್ಟ್‌ಗಳು

ಸೌತ್ ಇಂಡಿಯನ್ ಸಿನಿಮಾ ಇಂಡಸ್ಟ್ರಿಯಲ್ಲಿ ಅನಿರುದ್ಧ್ ಟಾಪ್ ಮ್ಯೂಸಿಕ್ ಡೈರೆಕ್ಟರ್‌ಗಳಲ್ಲಿ ಒಬ್ಬರು. 2012ರಲ್ಲಿ ಬಂದ ಧನುಷ್ ಅವರ '3' ಸಿನಿಮಾದ 'ವೈ ದಿಸ್ ಕೊಲವೆರಿ ಡಿ' ಹಾಡಿನ ಮೂಲಕ ಇವರು ರಾತ್ರೋರಾತ್ರಿ ಸೆನ್ಸೇಷನ್ ಕ್ರಿಯೇಟ್ ಮಾಡಿದ್ದರು. ಸದ್ಯ ಯಶ್ ಅವರ 'ಟಾಕ್ಸಿಕ್', ನಾನಿ ನಟನೆಯ 'ದಿ ಪ್ಯಾರಡೈಸ್' ಹಾಗೂ ರಜನಿಕಾಂತ್ ಅವರ 'ಜೈಲರ್ 2' ಸಿನಿಮಾಗಳಿಗೆ ಇವರು ಮ್ಯೂಸಿಕ್ ಮಾಡುತ್ತಿದ್ದಾರೆ. ಶಾರುಖ್ ಖಾನ್ ಅವರ 'ಕಿಂಗ್', 'ಕೆಹೆಚ್ x ಆರ್‌ಕೆ' (KH x RK), 'ಧರ್ಮನ್' ಹಾಗೂ 'ಇಂಡಿಯನ್ 3' ಸಿನಿಮಾಗಳು ಕೂಡ ಇವರ ಕೈಯಲ್ಲಿವೆ.

ಇನ್ನು ಸೂಪರ್‌ಸ್ಟಾರ್ ರಜನಿಕಾಂತ್ ಪತ್ನಿ ಲತಾ ರಜನಿಕಾಂತ್ ಅವರು ಅನಿರುದ್ಧ್ ಅವರ ಸೋದರತ್ತೆ. ಹೀಗಾಗಿ ರಜನಿ ಫ್ಯಾಮಿಲಿ ಜೊತೆಗೂ ಇವರಿಗೆ ನಂಟಿದೆ. ಇದೀಗ ಮದುವೆ ಕಾರ್ಡ್ ವಿಡಿಯೋ ವೈರಲ್ ಆಗಿದ್ದು, ನವೆಂಬರ್ 21ರಂದು ಆರತಕ್ಷತೆ ನಡೆಯಲಿದೆ ಎಂಬ ಸುದ್ದಿ ಕೇಳಿ ಫ್ಯಾನ್ಸ್ ಈ ಕ್ಯೂಟ್ ಜೋಡಿಯ ಮುಂದಿನ ಅಪ್‌ಡೇಟ್ಸ್‌ಗಾಗಿ ಕಾಯುತ್ತಿದ್ದಾರೆ.

ಕೆಜಿಎಫ್ ಬೆಡಗಿಯ ಕಾಲಿಗೆ ಬೀಳಲು ಹೋದ ತೆಲುಗಿನ ಖ್ಯಾತ ನಿರ್ದೇಶಕ: ಶಾಕ್ ಆಗಿದ್ದೇಕೆ ಶ್ರೀನಿಧಿ ಶೆಟ್ಟಿ!

Govindaraj S — Wed, 28 Oct 2026 17:42:35 +0530

ತೆಲುಗು ಚಿತ್ರರಂಗದ ಖ್ಯಾತ ನಿರ್ದೇಶಕ ತ್ರಿವಿಕ್ರಮ್ ಶ್ರೀನಿವಾಸ್ ಹಾಗೂ ಕನ್ನಡದ ನಟಿ ಶ್ರೀನಿಧಿ ಶೆಟ್ಟಿ ನಡುವಿನ ಅಪರೂಪದ ಕ್ಷಣವೊಂದು ಇದೀಗ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಸದ್ದು ಮಾಡುತ್ತಿದೆ. ವೆಂಕಟೇಶ್ ಅಭಿನಯದ ‘ಆದರ್ಶ ಕುಟುಂಬಂ’ ಚಿತ್ರದ ಪ್ರೀ-ರಿಲೀಸ್ ಕಾರ್ಯಕ್ರಮದಲ್ಲಿ ನಡೆದ ಈ ಘಟನೆ ನೆರೆದಿದ್ದವರನ್ನು ಅಚ್ಚರಿಗೀಡು ಮಾಡಿದೆ. ಶ್ರೀನಿಧಿ ಶೆಟ್ಟಿ ನಿರ್ದೇಶಕ ತ್ರಿವಿಕ್ರಮ್ ಅವರಿಗೆ ನಮಸ್ಕರಿಸಲು ಮುಂದಾದಾಗ, ಅವರು ತಮಾಷೆಯಾಗಿ ಆಕೆಯ ಕಾಲಿಗೆ ನಮಸ್ಕರಿಸಲು ಬಾಗಿದ್ದಾರೆ. ಇದರಿಂದ ಒಂದು ಕ್ಷಣ ಶಾಕ್ ಆದ ಶ್ರೀನಿಧಿ, ತಕ್ಷಣವೇ ಅವರನ್ನು ತಡೆದು ತಾವೇ ತ್ರಿವಿಕ್ರಮ್ ಅವರ ಕಾಲಿಗೆ ನಮಸ್ಕರಿಸಿದ್ದಾರೆ. ಈ ದೃಶ್ಯದ ವಿಡಿಯೋ ಈಗ ವೈರಲ್ ಆಗಿದೆ.

ಶ್ರೀನಿಧಿ ಶೆಟ್ಟಿಗೆ ನಮಸ್ಕರಿಸಲು ಮುಂದಾದ ತ್ರಿವಿಕ್ರಮ್!

ವೆಂಕಟೇಶ್ ನಾಯಕನಾಗಿ ನಟಿಸಿರುವ ‘ಆದರ್ಶ ಕುಟುಂಬಂ’ ಸಿನಿಮಾ ಬಿಡುಗಡೆಗೆ ಸಜ್ಜಾಗಿದೆ. ತ್ರಿವಿಕ್ರಮ್ ಶ್ರೀನಿವಾಸ್ ನಿರ್ದೇಶನದ ಈ ಚಿತ್ರದಲ್ಲಿ ಶ್ರೀನಿಧಿ ಶೆಟ್ಟಿ ಹಾಗೂ ನಿವೇತಾ ಪೇತುರಾಜ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಚಿತ್ರದ ಪ್ರಚಾರದ ಭಾಗವಾಗಿ ಮಂಗಳವಾರ ಸಂಜೆ ಹೈದರಾಬಾದ್‌ನ ಶಿಲ್ಪಕಲಾ ವೇದಿಕೆಯಲ್ಲಿ ಅದ್ಧೂರಿ ಪ್ರೀ-ರಿಲೀಸ್ ಕಾರ್ಯಕ್ರಮ ಆಯೋಜಿಸಲಾಗಿತ್ತು.

ಈ ಕಾರ್ಯಕ್ರಮಕ್ಕೆ ನಾಯಕ ವೆಂಕಟೇಶ್, ನಿರ್ದೇಶಕ ತ್ರಿವಿಕ್ರಮ್ ಸೇರಿದಂತೆ ಚಿತ್ರದ ಪ್ರಮುಖ ಕಲಾವಿದರು ಹಾಗೂ ತಾಂತ್ರಿಕ ತಂಡದ ಸದಸ್ಯರು ಹಾಜರಾಗಿದ್ದರು. ಕಾರ್ಯಕ್ರಮ ನಡೆಯುತ್ತಿದ್ದ ಸಂದರ್ಭದಲ್ಲಿ ಸ್ವಲ್ಪ ತಡವಾಗಿ ಆಗಮಿಸಿದ ಶ್ರೀನಿಧಿ ಶೆಟ್ಟಿ, ನೇರವಾಗಿ ತ್ರಿವಿಕ್ರಮ್ ಅವರ ಬಳಿ ತೆರಳಿ ನಮಸ್ಕರಿಸಿದ್ದಾರೆ. ಆಗ ಕುರ್ಚಿಯಿಂದ ಎದ್ದು ನಿಂತ ತ್ರಿವಿಕ್ರಮ್, ಮೊದಲು ಶ್ರೀನಿಧಿ ಅವರಿಗೆ ಹಸ್ತಲಾಘವ ನೀಡಿದ್ದಾರೆ. ಬಳಿಕ ಇದ್ದಕ್ಕಿದ್ದಂತೆ ಬಾಗಿ ಅವರ ಕಾಲಿಗೆ ನಮಸ್ಕರಿಸಲು ಮುಂದಾಗಿದ್ದಾರೆ. ನಿರ್ದೇಶಕರ ಈ ಅನಿರೀಕ್ಷಿತ ನಡೆ ಕಂಡು ಶ್ರೀನಿಧಿ ಒಂದು ಕ್ಷಣ ಗಾಬರಿಯಾಗಿದ್ದಾರೆ.

ತ್ರಿವಿಕ್ರಮ್ ನಡೆಗೆ ಶಾಕ್; ಬಳಿಕ ನಡೆದಿದ್ದೇನು?

ತ್ರಿವಿಕ್ರಮ್ ತಮಾಷೆಯಾಗಿ ಕಾಲಿಗೆ ನಮಸ್ಕರಿಸಲು ಮುಂದಾಗುತ್ತಿದ್ದಂತೆ ಶ್ರೀನಿಧಿ ಶೆಟ್ಟಿ ಅವರನ್ನು ತಡೆದಿದ್ದಾರೆ. ಬಳಿಕ ಅವರೇ ತ್ರಿವಿಕ್ರಮ್ ಅವರ ಕಾಲಿಗೆ ನಮಸ್ಕರಿಸಿದ್ದಾರೆ. ನಂತರ ಇಬ್ಬರೂ ಪರಸ್ಪರ ಕೈಮುಗಿದು ನಮಸ್ಕರಿಸುತ್ತಾ ನಗುತ್ತಿರುವುದು ಕಾರ್ಯಕ್ರಮದಲ್ಲಿ ನೆರೆದಿದ್ದವರ ಗಮನ ಸೆಳೆದಿದೆ. ವೇದಿಕೆಯ ಮೇಲಿದ್ದ ನಿರೂಪಕಿ ಸುಮಾ ಕೂಡ ಈ ಘಟನೆಯನ್ನು ಗಮನಿಸಿ, 'ಏನಿದು, ಅಲ್ಲಿ ಏನು ನಡೆಯುತ್ತಿದೆ?' ಎಂಬರ್ಥದಲ್ಲಿ ಪ್ರಶ್ನಿಸಿದ್ದಾರೆ.

ಈ ಸಂದರ್ಭದಲ್ಲಿ ನಡೆದ ತಮಾಷೆಯ ಕ್ಷಣದ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ನಿರ್ದೇಶಕ ಹಾಗೂ ನಾಯಕಿಯ ನಡುವಿನ ಈ ಆತ್ಮೀಯ ಕ್ಷಣವನ್ನು ಕಂಡ ನೆಟ್ಟಿಗರು ವಿವಿಧ ರೀತಿಯ ಪ್ರತಿಕ್ರಿಯೆಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ. ತ್ರಿವಿಕ್ರಮ್ ಅವರು ಶ್ರೀನಿಧಿ ಅವರ ಕಾಲಿಗೆ ನಮಸ್ಕರಿಸಲು ಮುಂದಾಗಿದ್ದೇಕೆ? ಇಬ್ಬರ ನಡುವೆ ಇಷ್ಟೊಂದು ಆತ್ಮೀಯತೆ ಇದೆಯೇ? ಎಂಬ ಕುತೂಹಲವೂ ಅಭಿಮಾನಿಗಳಲ್ಲಿ ಮೂಡಿದೆ.

ಶ್ರೀನಿಧಿ ಶೆಟ್ಟಿಗೆ ತ್ರಿವಿಕ್ರಮ್ ನಿರ್ದೇಶನದಲ್ಲಿ ನಟಿಸುವ ಆಸೆ!

‘ಕೆಜಿಎಫ್’ ಸಿನಿಮಾದ ಮೂಲಕ ದೇಶಾದ್ಯಂತ ಗುರುತಿಸಿಕೊಂಡಿರುವ ಶ್ರೀನಿಧಿ ಶೆಟ್ಟಿ, ತ್ರಿವಿಕ್ರಮ್ ಶ್ರೀನಿವಾಸ್ ಅವರ ನಿರ್ದೇಶನದಲ್ಲಿ ಕೆಲಸ ಮಾಡುವ ಆಸೆಯನ್ನು ಬಹಳ ದಿನಗಳಿಂದ ಹೊಂದಿದ್ದರಂತೆ. ‘ಆದರ್ಶ ಕುಟುಂಬಂ’ ಚಿತ್ರದ ಕಥೆ ಕೇಳಿದ ಕೂಡಲೇ ಅವರು ನಟಿಸಲು ಒಪ್ಪಿಕೊಂಡಿದ್ದರು ಎಂದು ತ್ರಿವಿಕ್ರಮ್ ಕಾರ್ಯಕ್ರಮದಲ್ಲಿ ಹೇಳಿಕೊಂಡಿದ್ದಾರೆ.

'ನನಗೆ ಓಕೆ, ನಿಮಗೆ ನಾನು ಓಕೆಯಾ?' ಎಂದು ಶ್ರೀನಿಧಿ ತಮ್ಮನ್ನು ಕೇಳಿದ್ದರು ಎಂಬುದನ್ನೂ ತ್ರಿವಿಕ್ರಮ್ ಹಂಚಿಕೊಂಡಿದ್ದಾರೆ. ಈ ಮಾತು ಶ್ರೀನಿಧಿ ಅವರಿಗೆ ನಿರ್ದೇಶಕರ ಮೇಲಿರುವ ನಂಬಿಕೆ ಹಾಗೂ ಸಿನಿಮಾದ ಬಗ್ಗೆ ಇದ್ದ ಆಸಕ್ತಿಯನ್ನು ತೋರಿಸುತ್ತದೆ. ಇದೇ ವೇಳೆ ಮತ್ತೊಬ್ಬ ನಾಯಕಿ ನಿವೇತಾ ಪೇತುರಾಜ್ ಅವರನ್ನು ತಮ್ಮ ಕುಟುಂಬದ ಸದಸ್ಯರಂತೆ ಪರಿಗಣಿಸುವುದಾಗಿ ತ್ರಿವಿಕ್ರಮ್ ಹೇಳಿದ್ದಾರೆ. ಕಥೆ ಕೇಳದೆಯೇ ಈ ಸಿನಿಮಾದಲ್ಲಿ ನಟಿಸಲು ಅವರು ಒಪ್ಪಿಕೊಂಡಿದ್ದರು ಎಂದು ನಿರ್ದೇಶಕರು ತಿಳಿಸಿದ್ದಾರೆ.

ಬಿಡುಗಡೆಗೆ ಸಜ್ಜಾದ ‘ಆದರ್ಶ ಕುಟುಂಬಂ’

ಇನ್ನು ವೆಂಕಟೇಶ್ ಹಾಗೂ ಶ್ರೀನಿಧಿ ಶೆಟ್ಟಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ‘ಆದರ್ಶ ಕುಟುಂಬಂ’ ಸಿನಿಮಾ ಈಗಾಗಲೇ ಚಿತ್ರೀಕರಣ ಸೇರಿದಂತೆ ಬಹುತೇಕ ಕೆಲಸಗಳನ್ನು ಪೂರ್ಣಗೊಳಿಸಿದೆ. ಚಿತ್ರದ ಬಿಡುಗಡೆಗೂ ಮುನ್ನ ನಡೆಯುತ್ತಿರುವ ಪ್ರಚಾರ ಕಾರ್ಯಕ್ರಮಗಳು ಅಭಿಮಾನಿಗಳ ಗಮನ ಸೆಳೆಯುತ್ತಿವೆ. ಒಂದೆಡೆ ಚಿತ್ರದ ಬಿಡುಗಡೆಗಾಗಿ ಪ್ರೇಕ್ಷಕರು ಕಾಯುತ್ತಿದ್ದರೆ, ಮತ್ತೊಂದೆಡೆ ಪ್ರೀ-ರಿಲೀಸ್ ಕಾರ್ಯಕ್ರಮದಲ್ಲಿ ತ್ರಿವಿಕ್ರಮ್ ಹಾಗೂ ಶ್ರೀನಿಧಿ ಶೆಟ್ಟಿ ನಡುವೆ ನಡೆದ ಈ ತಮಾಷೆಯ ಪ್ರಸಂಗ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿದೆ. ಸದ್ಯ ಈ ವಿಡಿಯೋ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದ್ದು, ‘ಆದರ್ಶ ಕುಟುಂಬಂ’ ಚಿತ್ರದ ಮೇಲಿನ ಗಮನವನ್ನೂ ಹೆಚ್ಚಿಸಿದೆ.

'ದಕ್ಷಿಣದ ಸಿನಿಮಾಗಳಲ್ಲಿ ಬಾಲಿವುಡ್ ನಟಿಯರಿಗೆ ಹೆಚ್ಚಿನ ಅವಕಾಶ ಏಕೆ?' ಸಂಚಲನ ಸೃಷ್ಟಿಸಿದ ನಟಿ ರಾಧಿಕಾ ಆಪ್ಟೆ ಹೇಳಿಕೆ!

Shriram Bhat — Wed, 28 Oct 2026 17:18:34 +0530

ರಾಧಿಕಾ ಆಪ್ಟೆ ಅವರ ಈ ಅಭಿಪ್ರಾಯಗಳು ಚಿತ್ರರಂಗದಲ್ಲಿ ಪ್ರತಿಭೆಗೆ ಆದ್ಯತೆ ನೀಡುವುದು, ಮೈಬಣ್ಣದ ಆಧಾರದ ಮೇಲಿನ ತಾರತಮ್ಯವನ್ನು ಪ್ರಶ್ನಿಸುವುದು ಮತ್ತು ಸ್ಥಳೀಯ ಕಲಾವಿದರಿಗೆ ಸೂಕ್ತ ಅವಕಾಶ ಕಲ್ಪಿಸುವುದರ ಅಗತ್ಯವನ್ನು ಮತ್ತೆ ಮುನ್ನೆಲೆಗೆ ತಂದಿವೆ. ಇದೆಂಥಾ ಚರ್ಚೆ ಹುಟ್ಟುಹಾಕಿದೆ ನೋಡಿ..

ಬಾಲಿವುಡ್‌ನ ಪ್ರತಿಭಾವಂತ ನಟಿ ರಾಧಿಕಾ ಆಪ್ಟೆ ಅವರು ದಕ್ಷಿಣ ಭಾರತದ ಚಿತ್ರರಂಗದ ಬಗ್ಗೆ ಹಂಚಿಕೊಂಡಿರುವ ಅಭಿಪ್ರಾಯಗಳು ಇದೀಗ ಚರ್ಚೆಗೆ ಕಾರಣವಾಗಿವೆ. ದಕ್ಷಿಣದ ಸಿನಿಮಾಗಳಲ್ಲಿ ಉತ್ತರ ಭಾರತದ ನಟಿಯರಿಗೆ ಹೆಚ್ಚಿನ ಅವಕಾಶ ನೀಡುವ ಪ್ರವೃತ್ತಿಯ ಹಿಂದೆ ಮೈಬಣ್ಣದ ಕುರಿತಾದ ಒಲವು ಇರಬಹುದು ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಇದೇ ಕಾರಣಗಳಲ್ಲಿ ಒಂದರಿಂದ ತಾವು ದಕ್ಷಿಣದ ಚಿತ್ರರಂಗದಿಂದ ದೂರ ಉಳಿಯಲು ನಿರ್ಧರಿಸಿದ್ದಾಗಿ ಸಂದರ್ಶನವೊಂದರಲ್ಲಿ ತಿಳಿಸಿದ್ದಾರೆ.

ಚಿತ್ರರಂಗದಲ್ಲಿ ಪ್ರತಿಭೆ ಮತ್ತು ಭಾಷಾ ಜ್ಞಾನಕ್ಕೆ ಹೆಚ್ಚಿನ ಮಹತ್ವ ನೀಡಬೇಕು ಎಂಬುದು ರಾಧಿಕಾ ಅವರ ಅಭಿಪ್ರಾಯ. ದಕ್ಷಿಣ ಭಾರತದಲ್ಲಿ ಸಾಕಷ್ಟು ಪ್ರತಿಭಾವಂತ ನಟಿಯರಿದ್ದು, ಅವರಿಗೆ ಸ್ಥಳೀಯ ಭಾಷೆಯ ಮೇಲೆ ಉತ್ತಮ ಹಿಡಿತವಿದೆ. ಇಂತಹ ಕಲಾವಿದರಿಗೆ ಅವಕಾಶ ನೀಡುವ ಬದಲು, ಮುಂಬೈನಿಂದ ಭಾಷೆ ತಿಳಿಯದ ನಟಿಯರನ್ನು ಕರೆತಂದು ಅವರ ಪಾತ್ರಗಳಿಗೆ ಡಬ್ಬಿಂಗ್ ಮಾಡಿಸುವ ಪದ್ಧತಿಯನ್ನು ತಾವು ಒಪ್ಪುವುದಿಲ್ಲ ಎಂದು ಅವರು ಹೇಳಿದ್ದಾರೆ.

ರಾಧಿಕಾ ಅವರ ಪ್ರಕಾರ, ನಟನೆ ಎಂದರೆ ಕೇವಲ ಸಂಭಾಷಣೆಗಳನ್ನು ಬಾಯಿಪಾಠ ಮಾಡಿ ಹೇಳುವುದಲ್ಲ. ಪಾತ್ರದ ಭಾವನೆಗಳನ್ನು ಅರ್ಥಮಾಡಿಕೊಂಡು, ಸಂದರ್ಭಕ್ಕೆ ತಕ್ಕಂತೆ ಅವುಗಳನ್ನು ಅಭಿವ್ಯಕ್ತಿಸುವ ಸಾಮರ್ಥ್ಯವೂ ಮುಖ್ಯ. ಇದಕ್ಕಾಗಿ ಆ ಚಿತ್ರದ ಭಾಷೆಯ ಬಗ್ಗೆ ತಿಳುವಳಿಕೆ ಹೊಂದಿರುವುದು ಅಗತ್ಯ. ಭಾಷೆ ಗೊತ್ತಿಲ್ಲದಿದ್ದರೆ ಪಾತ್ರಕ್ಕೆ ಸಂಪೂರ್ಣ ನ್ಯಾಯ ಒದಗಿಸಲು ಕಷ್ಟವಾಗಬಹುದು ಎಂಬ ಕಾರಣಕ್ಕೆ ತಾವು ಕೆಲವು ಅವಕಾಶಗಳಿಂದ ದೂರ ಉಳಿದಿದ್ದಾಗಿ ಅವರು ವಿವರಿಸಿದ್ದಾರೆ.

ಈ ಹಿಂದೆ ತೆಲುಗು ಚಿತ್ರರಂಗದಲ್ಲಿನ ಪುರುಷ ಪ್ರಧಾನ ಮನೋಭಾವ ಮತ್ತು ಮಹಿಳಾ ಪಾತ್ರಗಳ ಚಿತ್ರಣದ ಬಗ್ಗೆಯೂ ರಾಧಿಕಾ ಟೀಕೆ ಮಾಡಿದ್ದರು. ಆದರೆ ತಮ್ಮ ಹಿಂದಿನ ಅನುಭವಗಳನ್ನು ನೆನಪಿಸಿಕೊಳ್ಳುವಾಗ, ದಕ್ಷಿಣದ ಸಿನಿಮಾ ಸೆಟ್‌ಗಳಲ್ಲಿ ಕಂಡ ಸ್ನೇಹಪರ ವಾತಾವರಣವನ್ನು ಅವರು ಮೆಚ್ಚಿಕೊಂಡಿದ್ದಾರೆ. ಅಲ್ಲಿನ ಜನರು ತಮ್ಮನ್ನು ಕುಟುಂಬದ ಸದಸ್ಯರಂತೆ ಆತ್ಮೀಯವಾಗಿ ನೋಡಿಕೊಳ್ಳುತ್ತಿದ್ದರು ಎಂದು ಹೇಳಿದ್ದಾರೆ.

ರಾಧಿಕಾ ಆಪ್ಟೆ ಅವರ ಈ ಅಭಿಪ್ರಾಯಗಳು ಚಿತ್ರರಂಗದಲ್ಲಿ ಪ್ರತಿಭೆಗೆ ಆದ್ಯತೆ ನೀಡುವುದು, ಮೈಬಣ್ಣದ ಆಧಾರದ ಮೇಲಿನ ತಾರತಮ್ಯವನ್ನು ಪ್ರಶ್ನಿಸುವುದು ಮತ್ತು ಸ್ಥಳೀಯ ಕಲಾವಿದರಿಗೆ ಸೂಕ್ತ ಅವಕಾಶ ಕಲ್ಪಿಸುವುದರ ಅಗತ್ಯವನ್ನು ಮತ್ತೆ ಮುನ್ನೆಲೆಗೆ ತಂದಿವೆ. ಸಿನಿಮಾ ಕ್ಷೇತ್ರದಲ್ಲಿ ಭಾಷೆ, ಸಂಸ್ಕೃತಿ ಮತ್ತು ಕಲಾವಿದರ ಸಾಮರ್ಥ್ಯಕ್ಕೆ ಗೌರವ ಸಿಗಬೇಕು ಎಂಬ ಚರ್ಚೆಗೂ ಈ ಹೇಳಿಕೆ ಹೊಸ ಆಯಾಮ ನೀಡಿದೆ.

ಜೈಲಲ್ಲಿ ದರ್ಶನ್‌ಗೆ ಮತ್ತೆ ಅನಾರೋಗ್ಯ, ನ್ಯಾಯಾಲಯಕ್ಕೆ ತುರ್ತು ಬೇಡಿಕೆ, ಅಕ್ಟೋಬರ್‌ನಲ್ಲೇ ನಟನಿಗೆ ಆರೋಗ್ಯ ಕೆಡೋದೇಕೆ?

Gowthami K — Wed, 28 Oct 2026 16:10:10 +0530

ಬೆಂಗಳೂರು: ಚಿತ್ರದುರ್ಗ ರೇಣುಕಾಸ್ವಾಮಿ ಪ್ರಕರಣದ ಪ್ರಮುಖ ಆರೋಪಿಯಾಗಿ ಜೈಲುವಾಸ ಅನುಭವಿಸುತ್ತಿರುವ ನಟ ದರ್ಶನ್ ತೂಗುದೀಪ ಗೆ ಮತ್ತೆ ಬೆನ್ನು ನೋವಿನ ಸಮಸ್ಯೆ ತೀವ್ರವಾಗಿ ಕಾಣಿಸಿಕೊಂಡಿದೆ. ಜೈಲಿನಲ್ಲಿನ ವಿಪರೀತ ಚಳಿ ಹಾಗೂ ಹವಾಮಾನ ವೈಪರೀತ್ಯದಿಂದಾಗಿ ಆರೋಗ್ಯದಲ್ಲಿ ಏರುಪೇರಾಗಿದ್ದು, ತಮಗೆ ತಕ್ಷಣ ಫಿಸಿಯೋಥೆರಪಿ ಚಿಕಿತ್ಸೆ ಪಡೆಯಲು ಅವಕಾಶ ನೀಡಬೇಕೆಂದು ಅವರು ಪ್ರಕರಣದ ವಿಚಾರಣೆ ವೇಳೆ ನ್ಯಾಯಾಧೀಶರ ಮುಂದೆ ಖುದ್ದಾಗಿ ಮನವಿ ಮಾಡಿಕೊಂಡಿದ್ದಾರೆ.

ದರ್ಶನ್ ಮನವಿಗೆ ನ್ಯಾಯಾಲಯ ಹೇಳಿದ್ದೇನು?

ಇಂದು ಪ್ರಕರಣದ ವಿಚಾರಣೆ ವೇಳೆ ನ್ಯಾಯಾಧೀಶರ ಎದುರು ತಮ್ಮ ಅಳಲು ತೋಡಿಕೊಂಡ ನಟ ದರ್ಶನ್, "ನನಗೆ ಈ ಹಿಂದೆ ತೀವ್ರವಾದ ಬೆನ್ನು ನೋವಿನ ಸಮಸ್ಯೆಯಿತ್ತು. ಆ ವೇಳೆ ಜೈಲಿನಲ್ಲಿ ಕೆಲವು ದಿನಗಳ ಕಾಲ ಫಿಸಿಯೋಥೆರಪಿ ಚಿಕಿತ್ಸೆ ನೀಡಲಾಗಿತ್ತು. ಆದರೆ ಈಗ ಜೈಲಿನ ವಾತಾವರಣ ಮತ್ತು ಚಳಿಯಿಂದಾಗಿ ಬೆನ್ನು ನೋವು ಮತ್ತೆ ಹೆಚ್ಚಾಗಿದೆ. ಹೀಗಾಗಿ ತಕ್ಷಣವೇ ಫಿಸಿಯೋಥೆರಪಿ ಚಿಕಿತ್ಸೆ ಪಡೆಯಲು ಅವಕಾಶ ಕಲ್ಪಿಸಬೇಕು ಎಂದು ತೋಡಿಕೊಂಡರು.

ಈ ವೇಳೆ ದರ್ಶನ್ ಪರ ಹಿರಿಯ ವಕೀಲ ಹಷ್ಮತ್ ಪಾಷಾ, ಚಿಕಿತ್ಸೆಗೆ ಅವಕಾಶ ಕೋರಿ ನಾಳೆ ನ್ಯಾಯಾಲಯಕ್ಕೆ ಅಧಿಕೃತ ಅರ್ಜಿ ಸಲ್ಲಿಸುವುದಾಗಿ ತಿಳಿಸಿದರು. ಅದಕ್ಕೆ ಪ್ರತಿಕ್ರಿಯಿಸಿದ ನ್ಯಾಯಾಧೀಶರು, ನಾಳೆಯವರೆಗೆ ಕಾಯುವುದು ಬೇಡ, ಇಂದೇ ಅರ್ಜಿ ಸಲ್ಲಿಸುವುದಾದರೆ ತಕ್ಷಣವೇ ಸಲ್ಲಿಸಿ. ಅದನ್ನು ಪರಿಶೀಲಿಸಿ ಸೂಕ್ತ ಆದೇಶ ಹೊರಡಿಸಲಾಗುವುದು ಎಂದು ಸೂಚನೆ ನೀಡಿದರು.

ಹಿಂದೆಯೂ ಬಾಧಿಸಿದ್ದ ಬೆನ್ನು ನೋವಿನ ಸಮಸ್ಯೆ:

ನಟ ದರ್ಶನ್‌ಗೆ ಬೆನ್ನು ನೋವು ಬಾಧಿಸುತ್ತಿರುವುದು ಇದೇ ಮೊದಲೇನಲ್ಲ. ಈ ಹಿಂದೆ 2024ರ ಅಕ್ಟೋಬರ್ ತಿಂಗಳಿನಲ್ಲಿ ಬಳ್ಳಾರಿ ಜೈಲಿನಲ್ಲಿದ್ದಾಗಲೂ ನಟನಿಗೆ ತೀವ್ರ ಬೆನ್ನು ನೋವು ಕಾಣಿಸಿಕೊಂಡಿತ್ತು. ಆಗ ಬಿಮ್ಸ್ ಆಸ್ಪತ್ರೆಯ ವೈದ್ಯರಾದ ಡಾ. ಸುಬ್ಬಾರೆಡ್ಡಿ ಅವರು ಜೈಲಿನ ಹೈ-ಸೆಕ್ಯುರಿಟಿ ಸೆಲ್‌ಗೆ ತೆರಳಿ ಫಿಸಿಯೋಥೆರಪಿ ಮಾಡಿದ್ದರು.

ಆ ಬಳಿಕ ಬೆನ್ನು ನೋವಿಗೆ ತುರ್ತು ಶಸ್ತ್ರಚಿಕಿತ್ಸೆ ಮಾಡಿಸಿಕೊಳ್ಳಬೇಕೆಂಬ ಕಾರಣ ನೀಡಿ ದರ್ಶನ್ ನ್ಯಾಯಾಲಯದಿಂದ ಷರತ್ತುಬದ್ಧ ಮಧ್ಯಂತರ ಜಾಮೀನು ಪಡೆದು ಹೊರಬಂದಿದ್ದರು. ಆದರೆ ಜಾಮೀನಿನ ಅವಧಿಯಲ್ಲಿ ಶಸ್ತ್ರಚಿಕಿತ್ಸೆ ಮಾಡಿಸಿಕೊಳ್ಳದೆ ಆರಾಮವಾಗಿದ್ದ ದರ್ಶನ್ 'ಡೆವಿಲ್' ಸಿನಿಮಾದ ಚಿತ್ರೀಕರಣದಲ್ಲಿ ಭಾಗವಹಿಸಿ ಸಿನೆಮಾವನ್ನು ಪೂರ್ತಿ ಮಾಡಿದ್ದರು. ಇದಾದ ನಂತರ ಸುಪ್ರೀಂ ಕೋರ್ಟ್ ಆರೋಪಿಗಳ ಜಾಮೀನನ್ನು ರದ್ದುಗೊಳಿಸಿದ್ದರಿಂದ ದರ್ಶನ್ ಮತ್ತೆ ಜೈಲು ಸೇರಬೇಕಾಯಿತು.

ಅಕ್ಟೋಬರ್ ತಿಂಗಳಲ್ಲೇ ನೋವು ಉಲ್ಬಣ ಯಾಕೆ?

ಕಳೆದ ವರ್ಷ ಅಂದರೆ 2025ರಲ್ಲಿ ಕೂಡ ಅಕ್ಟೋಬರ್‌ ತಿಂಗಳಿನಲ್ಲೇ ಬೆನ್ನು ನೋವು ಕಾಣಿಸಿಕೊಂಡಿತ್ತು. ಜೈಲಿನಲ್ಲಿ ಕುಂಟುತ್ತಾ ನಡೆಯುವಂತಾಗಿದೆ ಬೆನ್ನು ನೋವು ಹೆಚ್ಚಾಗಿದೆ ಎಂದು ದರ್ಶನ್ ಜೈಲಾಧಿಕಾರಿಗಳಿಗೆ ಪತ್ರ ಬರೆದು ಚಿಕಿತ್ಸೆಗೆ ಮನವಿ ಮಾಡಿದ್ದರು. ಈ ಪತ್ರಕ್ಕೆ ಸ್ಪಂದಿಸಿ ಖಾಸಗಿ ಆಸ್ಪತ್ರೆಯ ವೈದ್ಯರ ತಪಾಸಣೆ ಬಳಿಕ ವೈದ್ಯರ ಸಲಹೆಯಂತೆ ಜೈಲಿನಲ್ಲೇ ವಾರಕ್ಕೆ ಎರಡು ಬಾರಿ ದರ್ಶನ್‌ಗೆ ಫಿಸಿಯೋಥೆರಪಿ ಮಾಡಿಸಲಾಗುತ್ತಿತ್ತು. ಇದೀಗ ಮತ್ತೆ ಇದೇ ಅಕ್ಟೋಬರ್ ತಿಂಗಳಲ್ಲೇ ನೋವು ತೀವ್ರಗೊಂಡಿದ್ದು, ಈ ಹಿನ್ನೆಲೆಯಲ್ಲಿ ಕೋರ್ಟ್ ಮುಂದೆ ಚಿಕಿತ್ಸೆಗೆ ಮನವಿ ಮಾಡಲಾಗಿದೆ. ಈ ಸಂಬಂಧ ವಕೀಲರು ಕೋರ್ಟ್ ಗೆ ಮನವಿ ಮಾಡಲಿದ್ದು, ಅರ್ಜಿ ವಿಚಾರಣೆ ನಡೆಸಿ ನ್ಯಾಯಾಲಯ ಯಾವ ತೀರ್ಮಾನ ತೆಗೆದುಕೊಳ್ಳಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

YASH in US: ಅಮೆರಿಕಾದಲ್ಲಿ ಕನ್ನಡ ನಟ ಯಶ್ ಬಗ್ಗೆ ಬಾಲಿವುಡ್ ನಿರ್ಮಾಪಕ ಹೇಳಿದ್ದು ಕೇಳಿ ಇಡೀ ಜಗತ್ತೇ ಬೆರಗಾಯ್ತು!

Shriram Bhat — Wed, 28 Oct 2026 15:45:11 +0530

Yash viral Statement in Ramayana Premier: ‘ರಾಮಾಯಣ’ ವಿಶ್ವ ಪ್ರೀಮಿಯರ್‌ನಲ್ಲಿ ಕನ್ನಡ ಚಿತ್ರರಂಗದ ಬಗ್ಗೆ ಹೆಮ್ಮೆ ವ್ಯಕ್ತಪಡಿಸಿದ ಯಶ್; ‘ನಾವು ಎಲ್ಲಿಂದ ಶುರು ಮಾಡುತ್ತೇವೆ ಎನ್ನುವುದು ನಮ್ಮ ಸಾಧನೆಯ ಗಡಿ ನಿರ್ಧರಿಸಲ್ಲ’

ರಾಕಿಂಗ್ ಸ್ಟಾರ್ ಯಶ್ ಇದೀಗ ಕನ್ನಡ ಚಿತ್ರರಂಗದ ಹೆಮ್ಮೆಯನ್ನು ಜಾಗತಿಕ ವೇದಿಕೆಯಲ್ಲಿ ಮತ್ತೊಮ್ಮೆ ಸಾರಿದ್ದಾರೆ. ಬಹುನಿರೀಕ್ಷಿತ ‘ರಾಮಾಯಣ: ರೈಸ್ ಆಫ್ ಎ ಲೆಜೆಂಡ್’ ಚಿತ್ರದ ಲಾಸ್ ಏಂಜಲೀಸ್‌ನಲ್ಲಿ ನಡೆದ ವಿಶ್ವ ಪ್ರೀಮಿಯರ್ ಕಾರ್ಯಕ್ರಮದಲ್ಲಿ ಭಾಗವಹಿಸಿದ ಯಶ್, ಕನ್ನಡ ಚಿತ್ರರಂಗದಿಂದ ಜಾಗತಿಕ ಮಟ್ಟದವರೆಗೆ ತಾವು ಬೆಳೆದು ಬಂದ ಹಾದಿಯ ಬಗ್ಗೆ ಹೆಮ್ಮೆಯಿಂದ ಮಾತನಾಡಿದ್ದಾರೆ.

ಚಿತ್ರದ ಪ್ರದರ್ಶನಕ್ಕೂ ಮುನ್ನ ಪ್ರೇಕ್ಷಕರನ್ನು ಉದ್ದೇಶಿಸಿ ಮಾತನಾಡಿದ ಯಶ್, “ನಾವು ಎಲ್ಲಿಂದ ಆರಂಭಿಸುತ್ತೇವೆ ಎಂಬುದು ನಾವು ಎಷ್ಟು ದೂರ ಸಾಗಬಹುದು ಎನ್ನುವುದನ್ನು ಎಂದಿಗೂ ನಿರ್ಧರಿಸುವುದಿಲ್ಲ” ಎಂದು ಹೇಳಿದ್ದಾರೆ. ಅವರ ಈ ಮಾತುಗಳು ಅಭಿಮಾನಿಗಳ ಗಮನ ಸೆಳೆದಿವೆ. ಕನ್ನಡ ಚಿತ್ರರಂಗದ ಭಾಗವಾಗಿರುವುದಕ್ಕೆ ಹೆಮ್ಮೆ ಇದೆ ಎಂದು ಹೇಳುವ ಮೂಲಕ ತಮ್ಮ ನೆಲದ ಮೇಲಿನ ಅಭಿಮಾನವನ್ನು ವ್ಯಕ್ತಪಡಿಸಿದ್ದಾರೆ.

ಲಾಸ್ ಏಂಜಲೀಸ್‌ನಲ್ಲಿ ‘ರಾಮಾಯಣ’ ತಂಡದ ಭರ್ಜರಿ ಸಂಭ್ರಮ

‘ರಾಮಾಯಣ’ ಚಿತ್ರದ ವಿಶ್ವ ಪ್ರೀಮಿಯರ್ ಕಾರ್ಯಕ್ರಮದಲ್ಲಿ ನಟರಾದ ರಣಬೀರ್ ಕಪೂರ್, ಸಾಯಿ ಪಲ್ಲವಿ, ಯಶ್, ನಿರ್ದೇಶಕ ನಿತೇಶ್ ತಿವಾರಿ ಹಾಗೂ ನಿರ್ಮಾಪಕ ನಮಿತ್ ಮಲ್ಹೋತ್ರಾ ಭಾಗವಹಿಸಿದ್ದರು. ರೆಡ್ ಕಾರ್ಪೆಟ್‌ನಲ್ಲಿ ಮಿಂಚಿದ ತಾರೆಯರು, ಅಂತಾರಾಷ್ಟ್ರೀಯ ಮಾಧ್ಯಮಗಳೊಂದಿಗೆ ಮಾತನಾಡಿ ಚಿತ್ರದ ವಿಶೇಷತೆಗಳನ್ನು ಹಂಚಿಕೊಂಡರು. ಬಳಿಕ ಗಣ್ಯರು, ಅತಿಥಿಗಳು ಮತ್ತು ಪತ್ರಕರ್ತರಿಗಾಗಿ ಆಯೋಜಿಸಿದ್ದ ವಿಶೇಷ ಪ್ರದರ್ಶನದಲ್ಲಿ ಪಾಲ್ಗೊಂಡರು.

ಈ ಸಂದರ್ಭದಲ್ಲಿ ನಿರ್ಮಾಪಕ ನಮಿತ್ ಮಲ್ಹೋತ್ರಾ ಅವರು ಯಶ್ ಅವರ ಕೊಡುಗೆಯನ್ನು ಶ್ಲಾಘಿಸಿದರು. ಚಿತ್ರದ ನಾಯಕನಷ್ಟೇ ಅಲ್ಲದೆ ನಿರ್ಮಾಣ ಪಾಲುದಾರರಾಗಿಯೂ ಯಶ್ ಮಹತ್ವದ ಪಾತ್ರ ವಹಿಸಿದ್ದಾರೆ ಎಂದು ತಿಳಿಸಿದರು. ಲಾಸ್ ಏಂಜಲೀಸ್‌ನಲ್ಲಿ ಮೊದಲ ಬಾರಿಗೆ ಭೇಟಿಯಾದಾಗ ಯಶ್ ಅವರ ದೃಢನಂಬಿಕೆ ಮತ್ತು ತಮ್ಮ ದೃಷ್ಟಿಕೋನ ಒಟ್ಟಾಗಿ ಈ ದೊಡ್ಡ ಯೋಜನೆಯನ್ನು ಸಾಕಾರಗೊಳಿಸಲು ನೆರವಾದವು ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

‘ರಾಮಾಯಣ’ ಕೇವಲ ಕಥೆಯಲ್ಲ, ನಮ್ಮ ಪರಂಪರೆ ಎಂದ ಯಶ್

ತಮ್ಮ ಮಾತನ್ನು ‘ನಮಸ್ಕಾರ’ ಎಂದು ಆರಂಭಿಸಿದ ಯಶ್, ‘ರಾಮಾಯಣ’ದ ಸಾಂಸ್ಕೃತಿಕ ಮಹತ್ವವನ್ನೂ ವಿವರಿಸಿದರು. ಈ ಮಹಾಕಾವ್ಯ ಕೇವಲ ಒಂದು ಕಥೆಯಲ್ಲ; ಸಾವಿರಾರು ವರ್ಷಗಳಿಂದ ತಲೆಮಾರಿನಿಂದ ತಲೆಮಾರಿಗೆ ಸಾಗಿಬಂದಿರುವ ಭಾರತದ ಸಾಂಸ್ಕೃತಿಕ ಪರಂಪರೆ ಎಂದು ಹೇಳಿದರು.

ಈ ಕಥೆಯನ್ನು ಜಗತ್ತಿನಾದ್ಯಂತ ಇರುವ ಪ್ರೇಕ್ಷಕರಿಗೆ ಪರಿಚಯಿಸುವ ಅವಕಾಶ ಸಿಕ್ಕಿರುವುದು ಹೆಮ್ಮೆಯ ಸಂಗತಿ. ಭಾರತದ ಸಂಸ್ಕೃತಿ, ಪರಂಪರೆ ಮತ್ತು ಜಗತ್ತಿಗೆ ನೀಡಬಹುದಾದ ಸಂದೇಶವನ್ನು ಈ ಸಿನಿಮಾ ತಲುಪಿಸಲಿ ಎಂಬ ಆಶಯವನ್ನೂ ವ್ಯಕ್ತಪಡಿಸಿದರು.

ನವೆಂಬರ್ 5ರಂದು ‘ರಾಮಾಯಣ: ರೈಸ್ ಆಫ್ ಎ ಲೆಜೆಂಡ್’ ವಿಶ್ವದಾದ್ಯಂತ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ಒಟ್ಟಿನಲ್ಲಿ, ಕನ್ನಡ ಚಿತ್ರರಂಗದಿಂದ ಜಾಗತಿಕ ವೇದಿಕೆಯವರೆಗೆ ಯಶ್ ಅವರ ಪಯಣ ಮತ್ತು ಕನ್ನಡದ ಮೇಲಿನ ಅವರ ಅಭಿಮಾನ ಇದೀಗ ಮತ್ತೊಮ್ಮೆ ಅಭಿಮಾನಿಗಳಲ್ಲಿ ಹೆಮ್ಮೆಯ ಭಾವನೆ ಮೂಡಿಸಿದೆ.

ರೇಣುಕಾಸ್ವಾಮಿ ಕೇಸ್‌ನಲ್ಲಿ ಮಹತ್ವದ ತಿರುವು: ನ್ಯಾಯಪೀಠದ ಮುಂದೆ ನಿಂತು ದರ್ಶನ್ ಗುರುತಿಸದ ಪ್ರಮುಖ ಸಾಕ್ಷಿ!

Gowthami K — Wed, 28 Oct 2026 13:33:57 +0530

ಬೆಂಗಳೂರು: ನಟ ದರ್ಶನ್ ತೂಗುದೀಪ ಹಾಗೂ ಆತನ ಸಹಚರರು ಭಾಗಿಯಾಗಿದ್ದಾರೆನ್ನಲಾದ ಚಿತ್ರದುರ್ಗದ ರೇಣುಕಾಸ್ವಾಮಿ ಪ್ರಕರಣದ ವಿಚಾರಣೆಯಲ್ಲಿ ಪ್ರಮುಖ ಬೆಳವಣಿಗೆಯೊಂದು ನಡೆದಿದೆ. ಪ್ರಕರಣದ ಪ್ರಮುಖ ಸಾಕ್ಷಿ ಎನಿಸಿಕೊಂಡಿದ್ದ ಘಟನೆ ನಡೆದ ಸ್ಥಳ ಪಟ್ಟಣಗೆರೆ ಶೆಡ್‌ನ ಉದ್ಯೋಗಿ ಎಂ.ಜಿ. ಪುನೀತ್, ಇಂದು ಸೆಷನ್ಸ್ ನ್ಯಾಯಾಲಯದ ಕಟಕಟೆಯಲ್ಲಿ ನಿಂತು ಉಲ್ಟಾ ಹೊಡೆದಿದ್ದು, ಹಾಸ್ಟೈಲ್ ಸಾಕ್ಷಿಯಾಗಿದ್ದಾರೆ.

ಪಟ್ಟಣಗೆರೆ ಶೆಡ್‌ನಲ್ಲಿನ 'ಇನ್‌ಟ್ಯಾಕ್ಟ್ ಆಟೋ ಪಾರ್ಟ್ಸ್' ಕಂಪನಿಯಲ್ಲಿ ಜಪ್ತಿ ಮಾಡಲಾದ ವಾಹನಗಳನ್ನು ಪಾರ್ಕ್ ಮಾಡುವ ಕೆಲಸ ಮಾಡುತ್ತಿದ್ದ ಪುನೀತ್, ಘಟನೆ ನಡೆದ ದಿನದಂದು ಸ್ಥಳದಲ್ಲೇ ಇದ್ದ ಪ್ರತ್ಯಕ್ಷದರ್ಶಿ ಎಂದು ಪೊಲೀಸರ ಮುಂದೆ ಹೇಳಿಕೆ ನೀಡಿದ್ದ. ಆದರೆ, ಅಕ್ಟೋಬರ್ 28ರಂದು ನ್ಯಾಯಾಧೀಶರ ಎದುರು ಸಾಕ್ಷ್ಯ ದಾಖಲಿಸುವ ವೇಳೆ, ಕೋರ್ಟ್‌ನಲ್ಲಿ ನೇರವಾಗಿ ಹಾಜರಿದ್ದ ಹಾಗೂ ವಿಡಿಯೋ ಕಾನ್ಫರೆನ್ಸ್ ಮೂಲಕ ಹಾಜರಿದ್ದ ನಟ ದರ್ಶನ್ ಸೇರಿದಂತೆ ಯಾವುದೇ ಆರೋಪಿಗಳನ್ನು ಗುರುತಿಸಿಲ್ಲ . "ನಾನ್ ಯಾರನ್ನೂ ನೋಡೇ ಇಲ್ಲ, ಇವರ್ಯಾರೂ ಆ ಸ್ಥಳಕ್ಕೆ ಬಂದಿರಲಿಲ್ಲ" ಎಂದು ಹೇಳಿಕೆ ನೀಡುವ ಮೂಲಕ ಉಲ್ಟಾ ಹೊಡೆದಿದ್ದಾನೆ ಈ ಮೂಲಕ ತನಿಖಾ ತಂಡಕ್ಕೆ ಶಾಕ್ ಕೊಟ್ಟಿದ್ದಾನೆ.

ನಾನು ಯಾರನ್ನೂ ನೋಡಿಲ್ಲ: ಪುನೀತ್

ಘಟನೆ ನಡೆದ ದಿನ ಕೆಲವು ವಾಹನಗಳನ್ನು ರಿಲೀಸ್ ಮಾಡುವ ಕೆಲಸವಿದ್ದಿದ್ದರಿಂದ ನಾನು ಶೆಡ್‌ನ ಗೇಟ್ ಬಳಿಯೇ ಇದ್ದೆ. ಕೆಲವರು ಕಾರಿನಲ್ಲಿ ಬಂದು ಮರದ ಬಳಿಗೆ ಹೋದರು, ಆದರೆ ನಾನು ಅಲ್ಲಿಗೆ ಹೋಗಲಿಲ್ಲ. ಸಾಯಂಕಾಲ 6.30 ರವರೆಗೆ ಶೆಡ್‌ನಲ್ಲಿದ್ದು, ನಂತರ ಅಲ್ಲಿಂದ ಮಲೆ ಮಹದೇಶ್ವರ ಬೆಟ್ಟಕ್ಕೆ ತೆರಳಿದೆ. ಆ ಸಮಯದಲ್ಲಿ ಶೆಡ್‌ನಲ್ಲಿ ಕಿರಣ್, ಮಲ್ಲಿಕಾರ್ಜುನ್, ಬಸವರಾಜ್ ಮತ್ತು ಸೆಕ್ಯುರಿಟಿ ಗಾರ್ಡ್ ನರೇಂದರ್ ಮಾತ್ರ ಇದ್ದರು. ನಾನು ಈ ಕೇಸಿನ ಯಾವುದೇ ಆರೋಪಿಗಳನ್ನೂ ಎಲ್ಲೂ ನೋಡಿಯೇ ಇಲ್ಲ ಎಂದು ಪುನೀತ್ ನ್ಯಾಯಾಲಯಕ್ಕೆ ತಿಳಿಸಿದ್ದಾನೆ ಎಂದು ವರದಿ ತಿಳಿಸಿದೆ.

SPP ಪ್ರಶ್ನೆಗೆ ದರ್ಶನ್ ವಕೀಲರ ಆಕ್ಷೇಪ

ವಿಚಾರಣೆ ವೇಳೆ ವಿಶೇಷ ಸಾರ್ವಜನಿಕ ಅಭಿಯೋಜಕ (SPP) ಪ್ರಸನ್ನ ಕುಮಾರ್ ಅವರು ಸಾಕ್ಷಿಗೆ ಪ್ರಶ್ನೆಗಳನ್ನು ಕೇಳಲು ಮುಂದಾದಾಗ, ನಟ ದರ್ಶನ್ ಪರ ವಕೀಲ ಹಷ್ಮತ್ ಪಾಷಾ ಅದಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು. ಕಣ್ಣಾರೆ ಕಂಡಿದ್ದೇನೆ ಎಂದು ತನಿಖಾ ತಂಡದ ಮುಂದೆ ಹೇಳಿಕೆ ನೀಡಿ ಸಾಕ್ಷಿ ಎಂದೇ ಪರಿಗಣಿಸಲಾಗಿದ್ದ ಪ್ರಮುಖ ವ್ಯಕ್ತಿಯೇ ನ್ಯಾಯಾಲಯದಲ್ಲಿ ಈಗ ನೀಡಿರುವ ಹೇಳಿಕೆಯಿಂದ ಪ್ರಕರಣದ ಚಾರಣೆ ಹಂತದಲ್ಲಿ ಪ್ರಮುಖ ತಿರುವು ಪಡೆದುಕೊಂಡಿದೆ.

Navika Kotia Breakup: ನಿಶ್ಚಿತಾರ್ಥ ಮುರಿದುಕೊಂಡ ನವಿಕಾ, ಈ ಖ್ಯಾತ ನಟಿಯ ಬ್ರೇಕ್‌ಅಪ್‌ಗೆ 'ಅದೊಂದೇ' ಕಾರಣವಾಯ್ತಾ?

Shriram Bhat — Wed, 28 Oct 2026 12:28:52 +0530

Navika Kotia called off her engagement to businessman Mazen Modi: ನವಿಕಾ ಕೊಟಿಯಾ ಎಂಗೇಜ್‌ಮೆಂಟ್ ಬ್ರೇಕಪ್! ಮೋದಿ ಜೊತೆಗಿನ ನಿಶ್ಚಿತಾರ್ಥ ಮುರಿದುಬೀಳಲು ಇದೇ ಕಾರಣ?

‘ಇಂಗ್ಲಿಷ್ ವಿಂಗ್ಲಿಷ್’ ಸಿನಿಮಾದಲ್ಲಿ ದಿವಂಗತ ನಟಿ ಶ್ರೀದೇವಿ ಅವರ ಮಗಳ ಪಾತ್ರದಲ್ಲಿ ಅಭಿನಯಿಸಿ ಗಮನ ಸೆಳೆದಿದ್ದ ನಟಿ ನವಿಕಾ ಕೊಟಿಯಾ ಈಗ ವೈಯಕ್ತಿಕ ಜೀವನದ ವಿಚಾರವಾಗಿ ಸುದ್ದಿಯಲ್ಲಿದ್ದಾರೆ. ಕಿರುತೆರೆಯ ಜನಪ್ರಿಯ ಧಾರಾವಾಹಿ ‘ಯೇ ರಿಶ್ತಾ ಕ್ಯಾ ಕೆಹ್ಲಾತಾ ಹೈ’ ಮೂಲಕವೂ ಪ್ರೇಕ್ಷಕರಿಗೆ ಪರಿಚಿತರಾಗಿರುವ ನವಿಕಾ, ಉದ್ಯಮಿ ಮಝೆನ್ ಮೋದಿ ಅವರೊಂದಿಗಿನ ನಿಶ್ಚಿತಾರ್ಥವನ್ನು ಮುರಿದುಕೊಂಡಿದ್ದಾರೆ ಎಂಬ ವರದಿಗಳು ಹೊರಬಿದ್ದಿವೆ. ಮದುವೆಯ ಸಂಭ್ರಮದಲ್ಲಿದ್ದ ಈ ಜೋಡಿ ಇದೀಗ ತಮ್ಮ ಸಂಬಂಧಕ್ಕೆ ಅಂತ್ಯ ಹಾಡಿರುವುದು ಅಭಿಮಾನಿಗಳ ಗಮನ ಸೆಳೆದಿದೆ.

ವರದಿಗಳ ಪ್ರಕಾರ, ನವಿಕಾ ಮತ್ತು ಪುಣೆಯ ಉದ್ಯಮಿ ಮಝೆನ್ ಮೋದಿ 2026ರ ಜನವರಿಯಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. ಮುಂದಿನ ವರ್ಷ ಅದ್ಧೂರಿಯಾಗಿ ಮದುವೆಯಾಗುವ ಯೋಜನೆಯನ್ನೂ ಹಾಕಿಕೊಂಡಿದ್ದರು ಎನ್ನಲಾಗಿದೆ. ಎರಡೂ ಕುಟುಂಬಗಳ ಒಪ್ಪಿಗೆಯೊಂದಿಗೆ ಮದುವೆಯ ಮಾತುಕತೆ ನಡೆದಿತ್ತು. ಅಲ್ಲದೆ, ಈ ಸಂಬಂಧದ ಭಾಗವಾಗಿ ಗೋಲ್ ಧನಾ ಸಮಾರಂಭವನ್ನೂ ಆಯೋಜಿಸಲಾಗಿತ್ತು. ಎಲ್ಲವೂ ಸುಸೂತ್ರವಾಗಿ ಸಾಗುತ್ತಿದೆ ಎಂದು ಭಾವಿಸಿದ್ದ ಸಂದರ್ಭದಲ್ಲಿ ಇಬ್ಬರ ನಡುವಿನ ಆಲೋಚನೆಗಳು ಮತ್ತು ಜೀವನದ ಆದ್ಯತೆಗಳಲ್ಲಿ ವ್ಯತ್ಯಾಸವಿರುವುದು ಅರಿವಿಗೆ ಬಂದಿದೆ ಎಂದು ವರದಿಗಳು ತಿಳಿಸಿವೆ.

ಹೊಂದಾಣಿಕೆಯ ಕೊರತೆಯೇ ಬ್ರೇಕಪ್‌ಗೆ ಕಾರಣ?

‘ಟೈಮ್ಸ್ ಆಫ್ ಇಂಡಿಯಾ’ ವರದಿಯ ಪ್ರಕಾರ, ಪರಸ್ಪರರ ಸ್ವಭಾವ ಮತ್ತು ಆಲೋಚನೆಗಳಲ್ಲಿ ಹೊಂದಾಣಿಕೆ ಇಲ್ಲದಿರುವುದನ್ನು ಅರಿತ ಬಳಿಕ ಇಬ್ಬರೂ ನಿಶ್ಚಿತಾರ್ಥ ಮುರಿದುಕೊಳ್ಳಲು ನಿರ್ಧರಿಸಿದ್ದಾರೆ ಎನ್ನಲಾಗಿದೆ. ಜುಲೈ ತಿಂಗಳ ಆರಂಭದಲ್ಲೇ ಈ ನಿರ್ಧಾರ ಕೈಗೊಂಡಿದ್ದಾರೆ ಎಂಬ ಮಾಹಿತಿಯೂ ವರದಿಯಾಗಿದೆ. ಇನ್ನು ‘ಟೆಲ್ಲಿಚಕ್ಕರ್’ ವರದಿಯ ಪ್ರಕಾರ, ಜೀವನದ ಆದ್ಯತೆಗಳು ಮತ್ತು ಭವಿಷ್ಯದ ನಿರೀಕ್ಷೆಗಳಲ್ಲಿನ ಭಿನ್ನಾಭಿಪ್ರಾಯಗಳಿಂದಾಗಿ ಈ ಸಂಬಂಧಕ್ಕೆ ಅಂತ್ಯ ಹಾಡಲಾಗಿದೆ.

ಆದರೆ, ಈ ನಿರ್ಧಾರ ಯಾವುದೇ ದೊಡ್ಡ ಮನಸ್ತಾಪ ಅಥವಾ ವಿವಾದದಿಂದ ಆಗಿಲ್ಲ ಎನ್ನಲಾಗಿದೆ. ಇಬ್ಬರೂ ಪರಸ್ಪರ ಗೌರವದಿಂದ ದೂರವಾಗಿದ್ದು, ತಮ್ಮ ತಮ್ಮ ಜೀವನದಲ್ಲಿ ಮುಂದೆ ಸಾಗುತ್ತಿದ್ದಾರೆ ಎಂದು ವರದಿಗಳು ಹೇಳಿವೆ. ನವಿಕಾ ಕೂಡ ತಮ್ಮ ಸಾಮಾಜಿಕ ಜಾಲತಾಣ ಖಾತೆಯಿಂದ ನಿಶ್ಚಿತಾರ್ಥದ ಫೋಟೋಗಳನ್ನು ತೆಗೆದುಹಾಕಿದ್ದಾರೆ ಎನ್ನಲಾಗಿದೆ.

ನವಿಕಾ ಮತ್ತು ಮಝೆನ್ ಪರಿಚಯವಾಗಿದ್ದು ಹೇಗೆ?

ನವಿಕಾ ಈ ಹಿಂದೆ ನೀಡಿದ್ದ ಸಂದರ್ಶನವೊಂದರಲ್ಲಿ ಮಝೆನ್ ಅವರ ಪರಿಚಯದ ಬಗ್ಗೆ ಮಾತನಾಡಿದ್ದರು. ಸಾಮಾನ್ಯ ಸ್ನೇಹಿತರ ಮೂಲಕ ಇಬ್ಬರಿಗೂ ಪರಿಚಯವಾಗಿತ್ತು. ಬಳಿಕ ಮಝೆನ್ ಅವರ ಪೋಷಕರನ್ನು ಎರಡು ಬಾರಿ ಭೇಟಿಯಾಗಿದ್ದಾಗಿ ಅವರು ತಿಳಿಸಿದ್ದರು. ನಂತರ ಮಝೆನ್ ಅವರ ಕುಟುಂಬದವರು ನವಿಕಾ ಅವರ ತಾಯಿಯನ್ನು ಸಂಪರ್ಕಿಸಿ ಮದುವೆಯ ಪ್ರಸ್ತಾಪ ಮುಂದಿಟ್ಟಿದ್ದರು.

ಆರಂಭದಲ್ಲಿ ಈ ಬೆಳವಣಿಗೆ ತಮಗೆ ಅಚ್ಚರಿ ಮೂಡಿಸಿತ್ತು ಎಂದು ನವಿಕಾ ಹೇಳಿಕೊಂಡಿದ್ದರು. ಆದರೆ, ತಮ್ಮ ಮದುವೆಯ ನಿರ್ಧಾರದಲ್ಲಿ ಪೋಷಕರ ಅಭಿಪ್ರಾಯಕ್ಕೆ ಮಹತ್ವ ನೀಡಲು ಬಯಸಿದ್ದರಿಂದ ಈ ಪ್ರಸ್ತಾಪವನ್ನು ಗಂಭೀರವಾಗಿ ಪರಿಗಣಿಸಿದ್ದರು. ಮಝೆನ್ ಅವರನ್ನು ಅರ್ಥಮಾಡಿಕೊಳ್ಳಲು ಸಮಯ ತೆಗೆದುಕೊಂಡ ನಂತರ ಮದುವೆಗೆ ಒಪ್ಪಿಗೆ ಸೂಚಿಸಿದ್ದಾಗಿ ಅವರು ವಿವರಿಸಿದ್ದರು. ನವೆಂಬರ್‌ನಲ್ಲಿ ಸಣ್ಣ ಪ್ರಮಾಣದ ರೋಕಾ ಸಮಾರಂಭವೂ ನಡೆದಿತ್ತು ಎಂದು ಸಂದರ್ಶನದಲ್ಲಿ ತಿಳಿಸಿದ್ದರು.

ಮಝೆನ್ ಮೋದಿ ಜೊತೆ ನಟಿ ರಿತಿಕಾ ಬದಿಯಾನಿ ಹೆಸರು!

ನವಿಕಾ ಜೊತೆಗಿನ ನಿಶ್ಚಿತಾರ್ಥ ಮುರಿದುಬಿದ್ದಿರುವ ಸುದ್ದಿ ಹರಿದಾಡುತ್ತಿರುವ ಬೆನ್ನಲ್ಲೇ, ಮಝೆನ್ ಮೋದಿ ಅವರ ಹೆಸರು ನಟಿ ರಿತಿಕಾ ಬದಿಯಾನಿ ಜೊತೆ ಕೇಳಿಬರುತ್ತಿದೆ. ಸಾಮಾಜಿಕ ಜಾಲತಾಣಗಳಲ್ಲಿನ ಕೆಲವು ಅಪ್‌ಡೇಟ್‌ಗಳ ಆಧಾರದಲ್ಲಿ ಇವರಿಬ್ಬರ ನಡುವೆ ಸಂಬಂಧವಿದೆ ಎಂಬ ಊಹಾಪೋಹಗಳು ಹರಿದಾಡುತ್ತಿವೆ. ಆದರೆ, ಈ ಕುರಿತು ಅಧಿಕೃತ ದೃಢೀಕರಣ ಲಭ್ಯವಿದೆ ಎಂದು ಹೇಳಲಾಗದು.

2001ರ ಅಕ್ಟೋಬರ್ 17ರಂದು ಗುಜರಾತ್‌ನ ಪೋರಬಂದರ್‌ನಲ್ಲಿ ಜನಿಸಿದ ರಿತಿಕಾ ಬದಿಯಾನಿ, ‘ಏರ್‌ಲಿಫ್ಟ್’, ‘10 ಕಲ್ಪನಕಲ್’ ಮತ್ತು ‘ಚಮನ್ ಬಹಾರ್’ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ.

ಬಾಲನಟಿಯಿಂದ ಕಿರುತೆರೆಯ ಜನಪ್ರಿಯ ನಟಿಯವರೆಗೆ!

ನವಿಕಾ ಕೊಟಿಯಾ ಬಾಲನಟಿಯಾಗಿ ಮನರಂಜನಾ ಕ್ಷೇತ್ರಕ್ಕೆ ಕಾಲಿಟ್ಟವರು. ‘ಕಸಮ್ ಸೇ’, ‘ಬಾ ಬಹೂ ಔರ್ ಬೇಬಿ’ ಮತ್ತು ‘ಬಾಲಿಕಾ ವಧು’ ಸೇರಿದಂತೆ ಹಲವು ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ. 2012ರಲ್ಲಿ ಬಿಡುಗಡೆಯಾದ ಶ್ರೀದೇವಿ ಅಭಿನಯದ ‘ಇಂಗ್ಲಿಷ್ ವಿಂಗ್ಲಿಷ್’ ಸಿನಿಮಾದಲ್ಲಿ ಅವರ ಮಗಳ ಪಾತ್ರ ನಿರ್ವಹಿಸುವ ಮೂಲಕ ಹೆಚ್ಚಿನ ಜನಪ್ರಿಯತೆ ಗಳಿಸಿದರು.

ನಂತರ ವಿದ್ಯಾಭ್ಯಾಸದ ಕಡೆ ಗಮನಹರಿಸಲು ಸುಮಾರು ಎಂಟು ವರ್ಷಗಳ ಕಾಲ ನಟನೆಯಿಂದ ದೂರ ಉಳಿದಿದ್ದರು. 2022ರಲ್ಲಿ ‘ಯೇ ರಿಶ್ತಾ ಕ್ಯಾ ಕೆಹ್ಲಾತಾ ಹೈ’ ಧಾರಾವಾಹಿಯ ಮೂಲಕ ಕಿರುತೆರೆಗೆ ಮರಳಿದ ಅವರು, ಮಾಯಾ ಅಲಿಯಾಸ್ ಮೌ ಖೇರಾ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಬಳಿಕ ‘ಕ್ಯೋಂಕಿ ಸಾಸ್ ಮಾ ಬಹೂ ಬೇಟಿ ಹೋತಿ ಹೈ’ ಧಾರಾವಾಹಿಯಲ್ಲಿ ನಾಯಕಿಯಾಗಿ ನಟಿಸಿದರು. ಅಮೆಜಾನ್ ಮಿನಿಟಿವಿಯ ‘ಸ್ಕೂಲ್ ಫ್ರೆಂಡ್ಸ್’ ವೆಬ್ ಸರಣಿಯ ಮೂರು ಸೀಸನ್‌ಗಳಲ್ಲಿಯೂ ಅಭಿನಯಿಸಿದ್ದಾರೆ.

ಒಟ್ಟಿನಲ್ಲಿ, ನವಿಕಾ ಕೊಟಿಯಾ ಅವರ ನಿಶ್ಚಿತಾರ್ಥ ಮುರಿದುಬಿದ್ದಿರುವ ಸುದ್ದಿ ಈಗ ಮನರಂಜನಾ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ. ಆದರೆ, ಈ ನಿರ್ಧಾರದ ಕುರಿತು ನಟಿಯ ಕಡೆಯಿಂದ ಅಧಿಕೃತ ಹೇಳಿಕೆ ಹೊರಬರುವವರೆಗೆ ವರದಿಗಳಲ್ಲಿನ ಮಾಹಿತಿಯನ್ನು ದೃಢಪಟ್ಟ ಸಂಗತಿಗಳೆಂದು ಪರಿಗಣಿಸುವುದು ಸೂಕ್ತವಲ್ಲ.

ಮೊದಲ ಮಗುವಿನ ನಿರೀಕ್ಷೆಯಲ್ಲಿ ಬಿಗ್ ಬಾಸ್ ಖ್ಯಾತಿಯ ನಟ ರಂಜಿತ್ -ಮಾನಸಾ ಗೌಡ ದಂಪತಿ

Gowthami K — Wed, 28 Oct 2026 10:58:49 +0530

ಬೆಂಗಳೂರು: ಕನ್ನಡ ಕಿರುತೆರೆಯ ಜನಪ್ರಿಯ ನಟ, ಬೆಳ್ಳಪರದೆಯಲ್ಲೂ ಮಿಂಚಿರುವ 'ಬಿಗ್ ಬಾಸ್ ಕನ್ನಡ ಸೀಸನ್ 11' ಖ್ಯಾತಿಯ ರಂಜಿತ್ ಕುಮಾರ್ ಹಾಗೂ ಪತ್ನಿ, ಫ್ಯಾಷನ್ ಡಿಸೈನರ್ ಮಾನಸಾ ಗೌಡ ಅವರ ಮನೆಯಲ್ಲಿ ಈಗ ಸಂಭ್ರಮದ ವಾತಾವರಣ ನಿರ್ಮಾಣವಾಗಿದೆ. ತಮ್ಮ ಪ್ರೀತಿಯ ಸಂಕೇತವಾಗಿ ಈ ದಂಪತಿ ಇದೀಗ ತಮ್ಮ ಮೊದಲ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ, ಈ ಸಂಭ್ರಮವನ್ನು ತಮ್ಮ ಅಭಿಮಾನಿಗಳೊಂದಿಗೆ ಹಂಚಿಕೊಂಡಿದ್ದಾರೆ.

2025ರಲ್ಲಿ ಪ್ರೀತಿಸಿ ಮದುವೆಯಾಗಿದ್ದ ಜೋಡಿ

ಕಿರುತೆರೆ ರಂಗದಲ್ಲಿ ಸಕ್ರಿಯರಾಗಿದ್ದ ರಂಜಿತ್ ಕುಮಾರ್ ಹಾಗೂ ಮಾನಸಾ ಗೌಡ ಅವರು ಕೆಲಕಾಲ ಪರಸ್ಪರ ಪ್ರೀತಿಸುತ್ತಿದ್ದರು. ಇಬ್ಬರ ಕುಟುಂಬಗಳ ಒಪ್ಪಿಗೆಯೊಂದಿಗೆ 2025ರ ಮಾರ್ಚ್ ತಿಂಗಳಲ್ಲಿ ಈ ಜೋಡಿಯ ಅದ್ದೂರಿ ನಿಶ್ಚಿತಾರ್ಥ ಕಾರ್ಯಕ್ರಮ ನಡೆದಿತ್ತು. ತದನಂತರ ಮೇ 11, 2025 ರಂದು ಬಂಧು-ಮಿತ್ರರ ಸಮ್ಮುಖದಲ್ಲಿ ಇಬ್ಬರೂ ಹಸೆಮಣೆ ಏರಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು.

ಇದೀಗ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಪ್ರೆಗ್ನೆನ್ಸಿ ಅನೌನ್ಸ್‌ಮೆಂಟ್ ನ ಸುಂದರ ವಿಡಿಯೋ ಹಂಚಿಕೊಂಡಿರುವ ದಂಪತಿ, "ನಮ್ಮ ಕುಟುಂಬ ಬೆಳೆಯುತ್ತಿದ್ದು, ನಿಮ್ಮೆಲ್ಲರ ಆಶೀರ್ವಾದ ಹಾಗೂ ಪ್ರೀತಿ ನಮ್ಮ ಮೇಲಿರಲಿ" ಎಂದು ಭಾವನಾತ್ಮಕವಾಗಿ ಬರೆದುಕೊಂಡಿದ್ದಾರೆ. ಅಭಿಮಾನಿಗಳು ದಂಪತಿಗೆ ಅಭಿನಂದನೆ ಸಲ್ಲಿಸಿ ಕಾಮೆಂಟ್ ಮಾಡಿದ್ದಾರೆ.

ಹೆಣ್ಣಿಗೆ ಹೊಸ ಜೀವನ ತಪ್ಪೇ? ಧೈರ್ಯವಾಗಿ ಉತ್ತರಿಸಿ ಮನ ಗೆದ್ದಿದ್ದ ರಂಜಿತ್

ಈ ಹಿಂದೆ ಮಾನಸಾ ಅವರೊಂದಿಗಿನ ಮದುವೆಯ ನಂತರ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಕ್ತವಾಗಿದ್ದ ಕೆಲವು ಟೀಕೆಗಳು ಹಾಗೂ ಪ್ರಶ್ನೆಗಳಿಗೆ ನಟ ರಂಜಿತ್ ಕುಮಾರ್ ಅತ್ಯಂತ ದಿಟ್ಟವಾಗಿ ಉತ್ತರ ನೀಡಿ ಮನಸ್ಸು ಗೆದ್ದಿದ್ದರು. ಪತ್ನಿಯ ಮೊದಲ ಮದುವೆಯ 13 ವರ್ಷದ ಮಗಳನ್ನು ತಮ್ಮ ಸ್ವಂತ ಮಗಳಂತೆ ನೋಡಿಕೊಳ್ಳುತ್ತಿರುವ ಬಗ್ಗೆ ಮಾತನಾಡಿ ಟ್ರೋಲಿಗರಿಗೆ ತಕ್ಕ ಉತ್ತರ ನೀಡಿದ್ದರು, ಮಾತ್ರವಲ್ಲ ಹೆಣ್ಣಿನ ಬಗ್ಗೆ ಅವರಿಗಿರುವ ಗೌರವ ಎದ್ದು ಕಾಣುತ್ತಿತ್ತು. ಟೀಕೆಗಳಿಗೆ ದಿಟ್ಟವಾಗಿ ಉತ್ತರಿಸಿ ಅವರ ಬಾಯಿ ಮುಚ್ಚಿಸಿ ಅದೆಷ್ಟೋ ಮಂದಿಯ ಮನ ಗೆದ್ದಿದ್ದರು.

ರಂಜಿತ್ ನುಡಿದ ಮಾತುಗಳು:

"ಪತ್ನಿಯ 13 ವರ್ಷದ ಮಗಳನ್ನು ಪ್ರೀತಿಯಿಂದ ನೋಡಿಕೊಳ್ಳುವುದು ಯಾವುದೇ ತಪ್ಪು ಅಥವಾ ಅಪರಾಧವಲ್ಲ. ಪ್ರತಿಯೊಬ್ಬ ಹೆಣ್ಣಿಗೂ ಹಾಗೂ ಮಗುವಿಗೂ ಗೌರವಯುತವಾದ ಮತ್ತೊಂದು ಜೀವನ ಪಡೆಯುವ ಹಕ್ಕಿದೆ. ಇದನ್ನು ಪ್ರಶ್ನೆ ಮಾಡುವವರಿಗೆ ಇದು ಅಪರಾಧ ಅನಿಸುತ್ತಾ? ಪ್ರತಿಯೊಬ್ಬರ ಜೀವನದಲ್ಲೂ ಒಂದಲ್ಲಾ ಒಂದು ಕಷ್ಟ , ಸವಾಲುಗಳು ಇದ್ದೇ ಇರುತ್ತವೆ. ನಾವು ಪರಸ್ಪರ ಅರ್ಥ ಮಾಡಿಕೊಂಡು, ಗೌರವ ನೀಡಿ ನೆಮ್ಮದಿಯ ಜೀವನ ನಡೆಸುತ್ತಿದ್ದೇವೆ.

ಒಬ್ಬ ಹುಡುಗಿ ಹಾಗೂ ಮಗುವಿನ ಜೀವನ ಉತ್ತಮವಾಗುತ್ತಿದೆ ಎಂದಾಗ ಸಮಾಜ ಖುಷಿಪಡಬೇಕು. ನನ್ನ ಪತ್ನಿಯನ್ನು ನಾನು ಪೂರ್ಣಮನಸ್ಸಿನಿಂದ ಸ್ವೀಕರಿಸಿದ ಮೇಲೆ ಆಕೆಯ ಹಿಂದಿನ ಜೀವನ ಮತ್ತು ಮಗಳನ್ನು ಸ್ವೀಕರಿಸುವುದು ನನ್ನ ಜವಾಬ್ದಾರಿ. ಆ ಮಗುವಿಗೆ ಉತ್ತಮ ಭವಿಷ್ಯ ಕೊಡುವುದು ತಪ್ಪೇ? ನನ್ನ ಜೀವನವನ್ನು ನಾನು ಹೇಗೆ ನಡೆಸಬೇಕು ಎಂಬುದನ್ನು ನಿರ್ಧಾರ ಮಾಡುವುದು ನಾನು." ಎಂದು ಖಡಕ್ ಆಗಿಯೇ ಪ್ರತಿಕ್ರಯಿಸಿದ್ದರು.

ರಂಜಿತ್ ಕಿರುತೆರೆ ಹಾಗೂ ಬೆಳ್ಳಿಪರದೆ ಪಯಣ

ರಂಜಿತ್ ಕುಮಾರ್ ಅವರು ಕನ್ನಡ ಕಿರುತೆರೆಯಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದ ನಟ. ಪ್ರಸಿದ್ಧ ಧಾರಾವಾಹಿ 'ಶನಿ'ಯಲ್ಲಿ ಸೂರ್ಯ ದೇವನ ಪಾತ್ರದ ಮೂಲಕ ಅಪಾರ ಅಭಿಮಾನಿಗಳನ್ನು ಗಳಿಸಿದ್ದರು. ಇದರ ಜೊತೆಗೆ 'ಅಮೃತವರ್ಷಿಣಿ', 'ಮೀರಾ ಮಾಧವ', 'ಅವನು ಮತ್ತೆ ಶ್ರಾವಣಿ' ಹೀಗೆ ಹಲವು ಸೂಪರ್ ಹಿಟ್ ಧಾರಾವಾಹಿಗಳಲ್ಲಿ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಧಾರಾವಾಹಿಗಳಷ್ಟೇ ಅಲ್ಲದೆ ಬೆಳ್ಳಿಪರದೆ ಮೇಲೆಯೂ ಮಿಂಚಿರುವ ರಂಜಿತ್, ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಅಭಿನಯದ 'ಜೇಮ್ಸ್' ಹಾಗೂ ಆ್ಯಕ್ಷನ್ ಪ್ರಿನ್ಸ್ ಧ್ರುವ ಸರ್ಜಾ ಅಭಿನಯದ 'ಭರ್ಜರಿ' ಸಿನಿಮಾಗಳಲ್ಲೂ ಗಮನಾರ್ಹ ಪಾತ್ರಗಳಲ್ಲಿ ನಟಿಸಿದ್ದಾರೆ. ಜನಪ್ರಿಯ ರಿಯಾಲಿಟಿ ಶೋ 'ಬಿಗ್ ಬಾಸ್ ಕನ್ನಡ ಸೀಸನ್ 11'ರಲ್ಲಿ ಸ್ಪರ್ಧಿಯಾಗಿ ಭಾಗವಹಿಸಿ ತಮ್ಮ ವ್ಯಕ್ತಿತ್ವದಿಂದ ವೀಕ್ಷಕರ ಮನಗೆದ್ದಿದ್ದರು.

ತಮ್ಮ ಜೀವನದ ಹೊಸ ಅಧ್ಯಾಯಕ್ಕೆ ಕಾಲಿಡುತ್ತಿರುವ ರಂಜಿತ್ ಹಾಗೂ ಮಾನಸಾ ಗೌಡ ದಂಪತಿಗೆ ನಮ್ಮ ಕಡೆಯಿಂದಲೂ ಸುಂದರ ಶುಭಾಶಯಗಳು. ತುಂಬು ಕುಟುಂಬ ನಿಮ್ಮದಾಗಲಿ.

ಕನ್ನಡಿಗ ಯಶ್ ದಾರಿಯಲ್ಲೇ ತಮಿಳು ಸೂರ್ಯ; 20 ವರ್ಷಗಳ ಬಳಿಕ ಕೊನೆಗೂ 'ಸೀತೆ' ಜೊತೆಗಿನ ಗುಟ್ಟು ಬಿಚ್ಚಿಟ್ಟ ನಟ!

Shriram Bhat — Wed, 28 Oct 2026 10:53:34 +0530

ಸೂರ್ಯ–ಜ್ಯೋತಿಕಾ ದಾಂಪತ್ಯದ ಗುಟ್ಟು ರಟ್ಟು! ಸಣ್ಣ ಕೆಲಸಕ್ಕೂ ಈ ನಟಿ ಏನ್ ಮಾಡ್ತಾರಂತೆ?

ತಮಿಳು ಚಿತ್ರರಂಗದ ಜನಪ್ರಿಯ ನಟ ಸೂರ್ಯ ಮತ್ತು ನಟಿ ಜ್ಯೋತಿಕಾ ಅವರ ಪ್ರೇಮಕಥೆ ಹಾಗೂ ದಾಂಪತ್ಯ ಜೀವನಕ್ಕೆ ಅಪಾರ ಅಭಿಮಾನಿಗಳಿದ್ದಾರೆ. ತೆರೆಯ ಮೇಲೆ ತಮ್ಮ ಅದ್ಭುತ ಅಭಿನಯದ ಮೂಲಕ ಪ್ರೇಕ್ಷಕರ ಮನಗೆದ್ದಿರುವ ಈ ಜೋಡಿ, ನಿಜ ಜೀವನದಲ್ಲೂ ಪರಸ್ಪರ ಪ್ರೀತಿ, ಗೌರವ ಮತ್ತು ಬೆಂಬಲಕ್ಕೆ ಹೆಸರಾಗಿದೆ. ಇದೀಗ ನಟ ಸೂರ್ಯ ತಮ್ಮ ದಾಂಪತ್ಯದ ಸುಂದರ ಕ್ಷಣಗಳ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದು, ಪತ್ನಿ ಜ್ಯೋತಿಕಾ ತೋರುವ ಪ್ರೀತಿಯ ಕುರಿತು ಹೇಳಿರುವ ಮಾತುಗಳು ಅಭಿಮಾನಿಗಳ ಗಮನ ಸೆಳೆದಿವೆ.

ದುಬೈನಲ್ಲಿ ನಡೆದ ತಮ್ಮ ಹೊಸ ಸಿನಿಮಾದ ವಿಶೇಷ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಸೂರ್ಯ, ಅಭಿಮಾನಿಗಳ ಪ್ರೀತಿ ಮತ್ತು ವೈಯಕ್ತಿಕ ಜೀವನದಲ್ಲಿ ಜ್ಯೋತಿಕಾ ನೀಡುವ ಪ್ರೋತ್ಸಾಹದ ಬಗ್ಗೆ ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡಿದ್ದಾರೆ. ಸಿನಿಮಾ ಕ್ಷೇತ್ರದಲ್ಲಿ ತಾವು ಮಾಡುವ ಪ್ರತಿಯೊಂದು ಪ್ರಯತ್ನಕ್ಕೂ ಅಭಿಮಾನಿಗಳು ಅಪಾರ ಪ್ರೀತಿ ನೀಡುತ್ತಾರೆ. ಆದರೆ, ತಮ್ಮ ಸಂಸಾರದಲ್ಲಿ ತಾವು ಮಾಡುವ ಸಣ್ಣಪುಟ್ಟ ಕೆಲಸಗಳಿಗೂ ಜ್ಯೋತಿಕಾ ತೋರುವ ಪ್ರೀತಿಯನ್ನು ತಾನು ಎಂದಿಗೂ ಸರಿಗಟ್ಟಲು ಸಾಧ್ಯವಿಲ್ಲ ಎಂಬ ಅರ್ಥದಲ್ಲಿ ಸೂರ್ಯ ಮಾತನಾಡಿದ್ದಾರೆ. ಪತ್ನಿಯ ಮೇಲಿನ ಅವರ ಗೌರವ ಮತ್ತು ಪ್ರೀತಿ ಈ ಮಾತುಗಳಲ್ಲಿ ಸ್ಪಷ್ಟವಾಗಿ ವ್ಯಕ್ತವಾಗಿದೆ.

20ನೇ ವಿವಾಹ ವಾರ್ಷಿಕೋತ್ಸವಕ್ಕೆ ವಿಶೇಷ ಸಂಭ್ರಮ!

ಸೂರ್ಯ ಮತ್ತು ಜ್ಯೋತಿಕಾ ಇತ್ತೀಚೆಗೆ ತಮ್ಮ 20ನೇ ವಿವಾಹ ವಾರ್ಷಿಕೋತ್ಸವವನ್ನು ಅತ್ಯಂತ ವಿಶೇಷವಾಗಿ ಆಚರಿಸಿಕೊಂಡಿದ್ದಾರೆ. ಸ್ಕಾಟ್‌ಲ್ಯಾಂಡ್‌ನ ಸುಂದರ ಪರಿಸರದಲ್ಲಿ ನಡೆದ ಈ ಖಾಸಗಿ ಸಮಾರಂಭದಲ್ಲಿ ಇಬ್ಬರೂ ಮತ್ತೊಮ್ಮೆ ಮದುವೆಯ ಪ್ರತಿಜ್ಞೆಗಳನ್ನು ಸ್ವೀಕರಿಸಿ ತಮ್ಮ ಪ್ರೀತಿಗೆ ಹೊಸ ಮೆರುಗು ನೀಡಿದ್ದಾರೆ. ಮಕ್ಕಳಾದ ದಿಯಾ ಮತ್ತು ದೇವ್ ಹಾಗೂ ಆಪ್ತ ಬಂಧುಗಳ ಸಮ್ಮುಖದಲ್ಲಿ ನಡೆದ ಈ ಕಾರ್ಯಕ್ರಮದ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದವು.

ಹಿಮದಿಂದ ಆವೃತವಾದ ಸ್ಕಾಟ್‌ಲ್ಯಾಂಡ್‌ನ ರಮಣೀಯ ವಾತಾವರಣವು ತಮ್ಮ ಪ್ರೇಮಕಥೆಯ ಸುಂದರ ನೆನಪುಗಳನ್ನು ಮರುಕಳಿಸುವಂತೆ ಮಾಡಿತು ಎಂದು ಸೂರ್ಯ ತಿಳಿಸಿದ್ದಾರೆ. ಎರಡು ದಶಕಗಳ ದಾಂಪತ್ಯ ಜೀವನದ ಬಳಿಕವೂ ಪರಸ್ಪರ ಪ್ರೀತಿಯನ್ನು ಅದೇ ಉತ್ಸಾಹದಿಂದ ಸಂಭ್ರಮಿಸುತ್ತಿರುವ ಈ ಜೋಡಿಯನ್ನು ಕಂಡು ಅಭಿಮಾನಿಗಳು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಸಿನಿಮಾ ಸೆಟ್‌ನಲ್ಲಿ ಶುರುವಾದ ಪ್ರೀತಿ!

ಸೂರ್ಯ ಮತ್ತು ಜ್ಯೋತಿಕಾ ಅವರ ಪ್ರೇಮಕಥೆ ಆರಂಭವಾಗಿದ್ದು 1999ರಲ್ಲಿ. ‘ಪೂವೆಲ್ಲಾಂ ಕೇಟ್ಟುಪ್ಪಾರ್’ ಚಿತ್ರದ ಚಿತ್ರೀಕರಣದ ಸಂದರ್ಭದಲ್ಲಿ ಮೊದಲ ಬಾರಿಗೆ ಭೇಟಿಯಾದ ಈ ಜೋಡಿ, ಕಾಲಕ್ರಮೇಣ ಪರಸ್ಪರ ಹತ್ತಿರವಾಯಿತು. ಹಲವು ವರ್ಷಗಳ ಪ್ರೀತಿಯ ಬಳಿಕ 2006ರಲ್ಲಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟರು. ನಂತರವೂ ಇಬ್ಬರೂ ತಮ್ಮ ವೃತ್ತಿಜೀವನದ ಜೊತೆಗೆ ಕುಟುಂಬಕ್ಕೂ ಸಮಾನ ಮಹತ್ವ ನೀಡುತ್ತಾ ಬಂದಿದ್ದಾರೆ.

ಒಟ್ಟಿಗೆ ಹಲವು ಸಿನಿಮಾಗಳಲ್ಲಿ ನಟಿಸಿರುವ ಈ ಜೋಡಿ, ತೆರೆಮೇಲಿನ ಕೆಮಿಸ್ಟ್ರಿಯ ಜೊತೆಗೆ ನಿಜ ಜೀವನದ ಹೊಂದಾಣಿಕೆಯಿಂದಲೂ ಪ್ರೇಕ್ಷಕರ ಮನ ಗೆದ್ದಿದೆ. ಮದುವೆಯ ಬಳಿಕ ನಟನೆಯಿಂದ ವಿರಾಮ ಪಡೆದಿದ್ದ ಜ್ಯೋತಿಕಾ, 2015ರಲ್ಲಿ ಮತ್ತೆ ಚಿತ್ರರಂಗಕ್ಕೆ ಮರಳಿದರು. ಆ ನಂತರವೂ ತಮ್ಮ ವೃತ್ತಿಜೀವನವನ್ನು ಮುಂದುವರಿಸುವುದರ ಜೊತೆಗೆ ಸೂರ್ಯ ಅವರಿಗೂ ಬೆಂಬಲವಾಗಿ ನಿಂತಿದ್ದಾರೆ.

ನಟನೆಯಷ್ಟೇ ಅಲ್ಲ, ನಿರ್ಮಾಣದಲ್ಲೂ ಜೊತೆಯಾದ ಜೋಡಿ!

ಸೂರ್ಯ ಮತ್ತು ಜ್ಯೋತಿಕಾ ಈಗ ನಟನೆಯ ಜೊತೆಗೆ ನಿರ್ಮಾಣ ಕ್ಷೇತ್ರದಲ್ಲೂ ಸಕ್ರಿಯರಾಗಿದ್ದಾರೆ. ತಮ್ಮದೇ ಆದ ‘2D ಎಂಟರ್‌ಟೈನ್‌ಮೆಂಟ್’ ನಿರ್ಮಾಣ ಸಂಸ್ಥೆಯ ಮೂಲಕ ವಿಭಿನ್ನ ಕಥಾಹಂದರದ ಸಿನಿಮಾಗಳನ್ನು ನಿರ್ಮಿಸುತ್ತಾ ಚಿತ್ರರಂಗಕ್ಕೆ ಕೊಡುಗೆ ನೀಡುತ್ತಿದ್ದಾರೆ.

ಅಂದಹಾಗೆ, ಪ್ರೀತಿ ಎಂದರೆ ದೊಡ್ಡ ದೊಡ್ಡ ಉಡುಗೊರೆಗಳಲ್ಲ; ಪರಸ್ಪರರ ಸಣ್ಣ ಪ್ರಯತ್ನಗಳನ್ನು ಗುರುತಿಸಿ ಗೌರವಿಸುವುದೂ ಹೌದು ಎಂಬ ಸಂದೇಶವನ್ನು ಸೂರ್ಯ ಅವರ ಮಾತುಗಳು ಸಾರುತ್ತವೆ. ಎರಡು ದಶಕಗಳ ದಾಂಪತ್ಯದ ಬಳಿಕವೂ ಒಬ್ಬರ ಮೇಲೊಬ್ಬರು ಇಟ್ಟುಕೊಂಡಿರುವ ಪ್ರೀತಿ ಮತ್ತು ನಂಬಿಕೆಯೇ ಈ ಜೋಡಿಯ ವಿಶೇಷತೆ. ಅದಕ್ಕಾಗಿಯೇ ಸೂರ್ಯ–ಜ್ಯೋತಿಕಾ ಜೋಡಿ ಇಂದಿಗೂ ಅಭಿಮಾನಿಗಳಿಗೆ ನೆಚ್ಚಿನ ತಾರಾ ದಂಪತಿಯಾಗಿ ಉಳಿದಿದೆ.

ಇಲ್ಲೊಂದು ಮಾತು.. ಇತ್ತೀಚೆಗಷ್ಟೇ ತಮ್ಮ 'ರಾಮಾಯಣ' ಚಿತ್ರದ ಪ್ರಚಾರದ ವೇಳೆ, ಎಲ್ಲರೆದುರು ನಟ ಯಶ್ ಅವರು ತಮ್ಮ ಪತ್ನಿ ರಾಧಿಕಾ ಬಗ್ಗೆ 'ಇವರು ನನ್ನ ಸೀತೆ' ಎಂದಿದ್ದರು. ಅದೇ ರೀತಿಯಲ್ಲಿ ತಮಿಳು ಸ್ಟಾರ್ ನಟ ಸೂರ್ಯ ಸಹ ತಮ್ಮ ಪತ್ನಿ ಜ್ಯೋತಿಕಾರನ್ನು ತಮ್ಮ ಜೀವನದಲ್ಲಿ ಬಂದ 'ಸೀತೆ' ಎಂಬ ಅರ್ಥದಲ್ಲೇ ಮಾತನ್ನಾಡಿದ್ದಾರೆ. ಹೀಗಾಗಿ, ನಟ ಸೂರ್ಯ ಅವರನ್ನು ಕನ್ನಡಿಗ ನಟ ಯಶ್ ಅವರಿಗೆ ಈ ಸಂಗತಿಯಲ್ಲಿ ಹೋಲಿಸಬಹುದು.

ವಾರದ ಮಧ್ಯದಲ್ಲೂ ಜಯಪ್ರಕಾಶ್ ಶೆಟ್ಟಿ ಉಪ್ಪಳ ನಟನೆಯ ‘ಬನ’ ತುಳು ಚಿತ್ರ ಹೌಸ್‌ಫುಲ್!

Santosh Naik — Tue, 27 Oct 2026 20:36:20 +0530

ಮಂಗಳೂರು (ಅ.27): ತುಳು ಚಿತ್ರರಂಗದಲ್ಲಿ ಹೊಸ ನಿರೀಕ್ಷೆ ಮೂಡಿಸಿರುವ ಜಯಪ್ರಕಾಶ್ ಅಭಿನಯದ ‘ಬನ’ ತುಳು ಸಿನಿಮಾ ಅಕ್ಟೋಬರ್ 23ರಂದು ತೆರೆಕಂಡಿದ್ದು, ಪ್ರೇಕ್ಷಕರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿದೆ. ವಾರದ ಮಧ್ಯದಲ್ಲೂ ಚಿತ್ರಮಂದಿರಗಳಲ್ಲಿ ಹೌಸ್‌ಫುಲ್ ಪ್ರದರ್ಶನ ಕಾಣುತ್ತಿರುವುದು ಚಿತ್ರದ ಜನಪ್ರಿಯತೆಗೆ ಸಾಕ್ಷಿಯಾಗಿದೆ.

‘ಬನ’ ಕೇವಲ ಸಿನಿಮಾವಲ್ಲ, ಭಾವನೆಗಳ ಸಂಗಮ. ಆಡಂಬರವಿಲ್ಲದ ಸರಳ ನಿರೂಪಣೆ, ಮನಮುಟ್ಟುವ ಕಥೆ, ಸಹಜ ಅಭಿನಯ, ಸುಂದರ ಸಂಗೀತ ಹಾಗೂ ಹಿನ್ನೆಲೆ ಸಂಗೀತ ಚಿತ್ರದ ಪ್ರಮುಖ ಆಕರ್ಷಣೆಗಳಾಗಿವೆ. ಇಲ್ಲಿ ಕಥೆಯೇ ನಿಜವಾದ ನಾಯಕನಾಗಿ ಪ್ರೇಕ್ಷಕರನ್ನು ಹಿಡಿದಿಟ್ಟುಕೊಳ್ಳುತ್ತದೆ. ಸಿನಿಮಾದ ಪ್ರತಿಯೊಂದು ಸನ್ನಿವೇಶವೂ ಪ್ರೇಕ್ಷಕರ ಮನಸ್ಸಿನಲ್ಲಿ ಭಾವನೆಗಳನ್ನು ಮೂಡಿಸುವಂತೆ ರೂಪುಗೊಂಡಿದೆ.

ಚಿತ್ರದ ಕಥೆ ಮತ್ತು ನಿರೂಪಣೆ ಪ್ರೇಕ್ಷಕರನ್ನು ಆಪ್ತವಾಗಿ ಸೆಳೆಯುತ್ತಿದ್ದು, ಹಾಸ್ಯ, ಕುತೂಹಲ ಹಾಗೂ ಭಾವನಾತ್ಮಕ ಸನ್ನಿವೇಶಗಳು ಚಿತ್ರದ ಮೆರುಗನ್ನು ಹೆಚ್ಚಿಸಿವೆ. ವಿಶೇಷವಾಗಿ ಚಿತ್ರದ ಅಂತ್ಯ ಪ್ರೇಕ್ಷಕರ ಮನಸ್ಸಿನಲ್ಲಿ ದೀರ್ಘಕಾಲ ಉಳಿಯುವ ಅನುಭವ ನೀಡುತ್ತದೆ.

‘ಬನ’ ಚಿತ್ರಕ್ಕೆ ಎಲ್ಲ ಧರ್ಮಗಳ ಬಂಧುಗಳಿಂದಲೂ ಪ್ರೀತಿ, ಪ್ರೋತ್ಸಾಹ ಮತ್ತು ಮೆಚ್ಚುಗೆ ವ್ಯಕ್ತವಾಗುತ್ತಿರುವುದು ವಿಶೇಷ. ಭಾಷೆ ಮತ್ತು ಧರ್ಮದ ಗಡಿಗಳನ್ನು ಮೀರಿ ಒಂದು ಒಳ್ಳೆಯ ಕಥೆ ಜನರನ್ನು ಹೇಗೆ ಒಗ್ಗೂಡಿಸಬಲ್ಲದು ಎಂಬುದಕ್ಕೆ ಈ ಚಿತ್ರ ಉತ್ತಮ ಉದಾಹರಣೆಯಾಗಿದೆ.

ತುಳು ಸಂಸ್ಕೃತಿ, ಮಾನವೀಯ ಭಾವನೆಗಳು ಮತ್ತು ಕುಟುಂಬದ ಸಂಬಂಧಗಳನ್ನು ಒಳಗೊಂಡಿರುವ ‘ಬನ’ ಚಿತ್ರತಂಡದ ಪ್ರಯತ್ನಕ್ಕೆ ಪ್ರೇಕ್ಷಕರಿಂದ ದೊರೆಯುತ್ತಿರುವ ಬೆಂಬಲ ಹೊಸ ಹುರುಪು ನೀಡಿದೆ. ಚಿತ್ರದಲ್ಲಿ ನಟಿಸಿರುವ ಕಲಾವಿದರ ಸಹಜ ಅಭಿನಯವೂ ಕಥೆಗೆ ಜೀವ ತುಂಬಿದೆ.

ಒಟ್ಟಿನಲ್ಲಿ, ‘ಕಥೆಯೇ ನಾಯಕ’ ಎಂಬ ಮಾತಿಗೆ ತಕ್ಕಂತೆ ಮೂಡಿಬಂದಿರುವ ‘ಬನ’ ತುಳು ಚಿತ್ರರಂಗದಲ್ಲಿ ಪ್ರೇಕ್ಷಕರ ಪ್ರೀತಿಯನ್ನು ಗಳಿಸುತ್ತಿದೆ. ಒಳ್ಳೆಯ ಕಥೆಗಳನ್ನು ಪ್ರೀತಿಸುವ ಪ್ರತಿಯೊಬ್ಬರೂ ಚಿತ್ರಮಂದಿರಕ್ಕೆ ಭೇಟಿ ನೀಡಿ ‘ಬನ’ ಚಿತ್ರವನ್ನು ವೀಕ್ಷಿಸಿ, ಚಿತ್ರತಂಡವನ್ನು ಪ್ರೋತ್ಸಾಹಿಸಬೇಕೆಂಬುದು ಅಭಿಮಾನಿಗಳ ಆಶಯವಾಗಿದೆ.

ಚಂದನ್‌ ಶೆಟ್ಟಿ ಮೈಮಾಟ ಸಾಂಗ್‌ಗೆ ಟಾಂಗ್‌ ಕೊಟ್ರಾ ನಿವೇದಿತಾ ಗೌಡ, ಹಳೆ ದೆವ್ವ ನನ್ನ ಬಿಡ್ತಿಲ್ಲ ಅಂದಿದ್ದು ಯಾರಿಗೆ?

Santosh Naik — Tue, 27 Oct 2026 20:22:13 +0530

ಬೆಂಗಳೂರು (ಅ.27): ಕನ್ನಡದ ಪ್ರಸಿದ್ಧ ರ‍್ಯಾಪರ್ ಹಾಗೂ ಸಂಗೀತ ನಿರ್ದೇಶಕ ಚಂದನ್ ಶೆಟ್ಟಿ (Chandan Shetty) ತಮ್ಮ ಅಧಿಕೃತ ಯೂಟ್ಯೂಬ್ ಚಾನೆಲ್‌ನಲ್ಲಿ ಬಿಡುಗಡೆ ಮಾಡಿರುವ ಹೊಸ ಆಲ್ಬಮ್ ಸಾಂಗ್ "ಮೈಮಾಟ" (Maimata) ಸೋಷಿಯಲ್ ಮೀಡಿಯಾದಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿದೆ. ಬಿಗ್ ಬಾಸ್ ವೇದಿಕೆಯಲ್ಲಿ ಪ್ರೀತಿಸಿ, ಅದ್ಧೂರಿಯಾಗಿ ಮದುವೆಯಾಗಿ ವರ್ಷಗಳ ಿಂದೆ ಪರಸ್ಪರ ಸಮ್ಮತಿಯಿಂದ ವಿಚ್ಛೇದನ (Divorce) ಪಡೆದಿದ್ದ ಚಂದನ್ ಶೆಟ್ಟಿ ಮತ್ತು ನಿವೇದಿತಾ ಗೌಡ (Niveditha Gowda) ದಂಪತಿಯ ಹಳೆಯ ನೆನಪುಗಳು ಈ ಹಾಡಿನ ಮೂಲಕ ಮತ್ತೆ ಮುನ್ನೆಲೆಗೆ ಬಂದಿವೆ.

ಹಾಡು ಬಿಡುಗಡೆಯಾದ ಎರಡೇ ದಿನಗಳಲ್ಲಿ ಚಂದನ್ ಶೆಟ್ಟಿ ಅವರ ಮಾಜಿ ಪತ್ನಿ, ನಟಿ ನಿವೇದಿತಾ ಗೌಡ ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ಶೇರ್ ಮಾಡಿಕೊಂಡಿರುವ ವೀಡಿಯೊ ಹಾಗೂ ಅದರ ಸಾಲುಗಳು ಈಗ ನೆಟ್ಟಿಗರ ಗಮನ ಸೆಳೆದಿದ್ದು, ಇದು ಚಂದನ್‌ ಶೆಟ್ಟಿಯವರ ಹಾಡಿಗೆ ನಿವೇದಿತಾ ನೀಡಿದ ಪ್ರತಿಕ್ರಿಯೆ ಎಂದೇ ವ್ಯಾಖ್ಯಾನಿಸಲಾಗುತ್ತಿದೆ.

ಹಾಡಿನಲ್ಲಿ ಚಂದನ್ ಶೆಟ್ಟಿ ಬ್ರೇಕಪ್ ನೋವಿನ ರ‍್ಯಾಪ್

ಚಂದನ್ ಶೆಟ್ಟಿ ಬರೆದು, ಸಂಗೀತ ಸಂಯೋಜಿಸಿ ಹಾಡಿರುವ "ಮೈಮಾಟ" ರ‍್ಯಾಪ್ ಸಾಂಗ್ ಸಂಪೂರ್ಣವಾಗಿ ಪ್ರೀತಿಯಲ್ಲಾದ ವಂಚನೆ, ಬ್ರೇಕಪ್ ನಂತರದ ನೋವು ಹಾಗೂ ಅದರಿಂದ ಹೊರಬಂದು ಸ್ವತಂತ್ರವಾಗಿ ಬೆಳೆಯುವ ಆತ್ಮವಿಶ್ವಾಸದ ಕಥೆಯನ್ನು ಹೊಂದಿದೆ.

ಹಾಡಿನಲ್ಲಿ ಬರುವ ಪ್ರಮುಖ ಸಾಲುಗಳು ಹೀಗಿವೆ

"ಏನೇ ನಿನ್ನ ಮೈಮಾಟದಾಟ, ಇನ್ ಏಳು ಜನುಮಕ್ಕೂ ಕಲಿಸಿಯ ಪಾಠ...

ನೀ ಹೋದಮೇಲೆ ನಾ ಸೋತಿಲ್ಲ, ಬದಲಾದೆ! ನನ್ನ ಪ್ರೀತಿ ಸೋತಿರಬಹುದು ಆದರೆ ನಾ ಸೋತಿಲ್ಲ..."

ಈ ಹಾಡು ಯೂಟ್ಯೂಬ್‌ನಲ್ಲಿ ಸೆನ್ಸೇಷನ್‌ ಸೃಷ್ಟಿಸುತ್ತಿದ್ದಂತೆ, ಹಾಡಿನ ಸಾಲುಗಳು ಸಂಪೂರ್ಣವಾಗಿ ನಿವೇದಿತಾ ಗೌಡ ಅವರನ್ನು ಗುರಿಯಾಗಿಸಿಕೊಂಡೇ ಬರೆಯಲಾಗಿದೆ ಎಂದು ನೆಟ್ಟಿಗರು ಕಾಮೆಂಟ್ ಮಾಡಲು ಪ್ರಾರಂಭಿಸಿದರು. ಹಾಡಿಗೆ ಬಂದಿರುವ ಬಹುತೇಕ ಕಮೆಂಟ್ಸ್‌ಗಳಲ್ಲಿ ನಿವೇದಿತಾ ಅವರನ್ನೇ ಟಾರ್ಗೆಟ್ ಮಾಡಲಾಗಿತ್ತು.

"ಹಳೆಯ ದೆವ್ವ ನನ್ನನ್ನು ಬಿಡುತ್ತಿಲ್ಲ!" - ನಿವೇದಿತಾ ಗೌಡ ಇನ್‌ಸ್ಟಾಗ್ರಾಮ್ ಟಾಂಗ್

ತಮ್ಮ ಮೇಲೆ ಸೋಶಿಯಲ್‌ ಮೀಡಿಯಾದಲ್ಲಿ ನಿರಂತರ ಟ್ರೋಲ್ ಹಾಗೂ ಚರ್ಚೆಗಳು ಆರಂಭವಾಗುತ್ತಿದ್ದಂತೆಯೇ, ನಿವೇದಿತಾ ಗೌಡ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಇಂಗ್ಲಿಷ್‌ನಲ್ಲಿ ಕೋಟ್ ಒಂದನ್ನು ಹಂಚಿಕೊಳ್ಳುವ ಮೂಲಕ ಪರೋಕ್ಷವಾಗಿ ತಿರುಗೇಟು ನೀಡಿದ್ದಾರೆ.

ನಿವೇದಿತಾ ತಮ್ಮ ಪೋಸ್ಟ್‌ನಲ್ಲಿ

'ನನ್ನ ಗತಕಾಲ ಎನ್ನುವ ದೆವ್ವ... ಅದ್ಭುತ ಸ್ನೇಹಿತರನ್ನು ಹೊಂದಿರುವ, ಮಹತ್ವಾಕಾಂಕ್ಷೆಯುಳ್ಳ ಹಾಗೂ ಪ್ರೀತಿಯಲ್ಲಿ ದುರದೃಷ್ಟವಂತೆಯಾಗಿರುವ ಹುಡುಗಿಯ ಜೀವನವು ರೊಮ್ಯಾಂಟಿಕ್ ಕಾಮಿಡಿಯಂತೆ ಇರುತ್ತದೆ ಎಂದು ಎಲ್ಲೋ ಓದಿದ್ದೆ. ಆದರೆ ನನ್ನ ಜೀವನ ಮಾತ್ರ ಸಂಪೂರ್ಣ ಹಾರರ್ ಸ್ಟೋರಿಯಾಗಿದೆ (Horror Story)! ಸ್ಪಷ್ಟವಾಗಿ ಹೇಳುವುದಾದರೆ, ನನ್ನ ಗತಕಾಲದ ನೆನಪುಗಳು (The Past) ನನ್ನನ್ನು ಒಂಟಿಯಾಗಿ ಬಿಡುತ್ತಲೇ ಇಲ್ಲ...' ಎಂದು ಬರೆದುಕೊಂಡಿದ್ದಾರೆ.

ನಿವೇದಿತಾ ಗೌಡ ಅವರ ಈ ಪೋಸ್ಟ್ ಬಹಿರಂಗವಾಗುತ್ತಿದ್ದಂತೆಯೇ, "ಮೈಮಾಟ ಸಾಂಗ್‌ಗೆ ನಿವೇದಿತಾ ನೀಡಿದ ಉತ್ತರವೇ ಇದು" ಎಂದು ಫ್ಯಾನ್ಸ್ ಚರ್ಚಿಸುತ್ತಿದ್ದಾರೆ. ಚಂದನ್ ಶೆಟ್ಟಿ ತಮ್ಮ ಸಾಂಗ್‌ನಲ್ಲಿ "ನನ್ನ ಪ್ರೀತಿ ಸೋತಿರಬಹುದು ಆದರೆ ನಾ ಸೋತಿಲ್ಲ, ಅಸಲಿ ಆಟ ಇನ್ನೇ ಶುರು" ಎಂದು ಸವಾಲು ಹಾಕಿದ್ದರೆ, ಇತ್ತ ನಿವೇದಿತಾ "ನನ್ನ ಹಳೆಯ ಗತಕಾಲ ಎನ್ನುವ ದೆವ್ವ ನನ್ನನ್ನು ಇಂದಿಗೂ ಬಿಡುತ್ತಿಲ್ಲ" ಎಂದು ಬೇಸರ ಹಾಗೂ ಟಾಂಗ್ ಬೆರೆಸಿದ ಧಾಟಿಯಲ್ಲಿ ಪ್ರತಿಕ್ರಿಯಿಸಿದ್ದಾರೆ. ವಿಚ್ಛೇದನದ ಬಳಿಕ ಇಬ್ಬರೂ ತಮ್ಮ ತಮ್ಮ ವೃತ್ತಿಜೀವನದಲ್ಲಿ ಬ್ಯಸಿಯಾಗಿದ್ದರೂ, ಚಂದನ್ ಅವರ ಈ ಹೊಸ ಆಲ್ಬಮ್ ಸಾಂಗ್ ಹಾಗೂ ನಿವೇದಿತಾ ಅವರ ರಿಯಾಕ್ಷನ್ ಪೋಸ್ಟ್ ಸೋಶಿಯಲ್ ಮೀಡಿಯಾದಲ್ಲಿ ದೊಡ್ಡ ಮಟ್ಟದ ವಿವಾದ ಮತ್ತು ರಾಜಕೀಯ-ಮನರಂಜನಾ ಚರ್ಚೆಗೆ ಹಾದಿಮಾಡಿಕೊಟ್ಟಿದೆ.

View this post on Instagram

A post shared by Niveditha Gowda (@niveditha__gowda)

ಮೈಮಾಟ ಸಾಂಗ್‌ನ ಪೂರ್ತಿ ಲಿರಿಕ್ಸ್‌

ಏನೇ ನಿನ್ನ

ಮೈಮಾಟ ಮೈಮಾಟ ಮೈಮಾಟದಾಟ

ಏನೇ ನಿನ್ನ ಮೈಮಟಾದ ಆಟ

ಇನ್ ಏಳ ಜನುಮಕ ಕಲಿಸಿಯ ಪಾಠ

ನೂರೆಂಟ ಹುಡುಗೀರ ಕೊಡತಿದ್ರು ಕಾಟ

ನೀ ಬಂದ ಕಿತ್ವಾಗೆದಿ ಇದ್ದೊಂದ ಹಾರ್ಟ ..

ಏನೇ ನಿನ್ನ ಮೈಮಾಟದಾಟ

ಇನ್ ಏಳ ಜನುಮಕ ಕಲಿಸಿಯ ಪಾಠ

ನೂರೆಂಟ ಹುಡುಗೀರ ಕೊಡತಿದ್ರ ಕಾಟ

ನೀ ಬಂದ ಕಿತ್ವಾಗೆದಿ ಇದ್ದೊಂದ ಹಾರ್ಟ ..

ಕಣ್ಣಲ್ಲೇ ಬಾ ಅಂತ ಕರೀತಾ ಇದ್ದೆ

ನಾ ಬಂದಾಗ ವಲ್ಲೆ ಅಂತ ಸರಿತಾ ಇದ್ದೆ

ನೀ ನನ್ನೊಳು ಅಂತ ನಾ ಮೆರಿತಾ ಇದ್ದೆ

ನನ್ನ ಮುಗಿಸೋಕೆ ನೀ ಪ್ಲಾನ ಬರಿತಾ ಇದ್ದೆ

ನಿನ್ನ ಮ್ಯಾಗ ನಾ ದುಡ್ಡ ಸುರಿತಾ ಇದ್ದೆ

ನೀ ನಗನಗತ ಎದೆ ಮ್ಯಾಗ ಒದೆಯಾತಿದ್ದೆ

ನಾ ಬ್ಯಾಡಂದ್ರ ನೀನಾಗ ಸಿಗಿತಾ ಇದ್ದೆ

ಬೆನ್‌ ಹಿಂದೆ ನನ್‌ ಗೇಲಿ ಮಾಡಿ ನಗತಾ ಇದ್ದೆ

ಏನ ನ ನಿನ್ನ ಮೈಮಾಟದಾಟ

ಇನ್ ಏಳ ಜನುಮಕ ಕಲಿಸಿಯ ಪಾಠ

ನೂರೆಂಟ ಹುಡುಗೀರ ಕೊಡತಿದ್ರು ಕಾಟ

ನೀ ಬಂದ ಕಿತ್ವಾಗೆದಿ ಇದ್ದೊಂದ ಹಾರ್ಟ..

ಏನೇ ನಿನ್ನ ಮೈಮಟಾದ ಆಟ

ಇನ್ ಏಳ ಜನುಮಕ ಕಲಿಸಿಯ ಪಾಠ

ನೂರೆಂಟ ಹುಡುಗೀರ ಕೊಡತಿದ್ರು ಕಾಟ

ನೀ ಬಂದ ಕಿತ್ವಾಗೆದಿ ಇದ್ದೊಂದ ಹಾರ್ಟ

ಮೊದ ಮೊದಲ ನಾ ಹೇಳಿದ ಕೇಳ್ತಾ ಇದ್ದೆ

ಕೊನಗೆ ನೀ ಹೇಳಿದ್ದೆಲ್ಲ ನಾನ ಮಾಡ್ತಾ ಇದ್ದೆ

ಕೆಲಸ ಆಗಬೇಕಂದಾಗ ನುಲಿಯಾತಿದ್ದೆ

ಉದ್ದುದ್ದ ಉದರಾಗ ಎದೆ ಮ್ಯಾಗ ಕೆರಿಯದಿದ್ದೆ

ಕಂಡವರ ಮಾತನ್ನ ಕೇಳ್ತಾ ಇದ್ದೆ

ನೀ ನನ್ನನ್ನ ನಾಯಿಯಂಗ ನೋಡ್ತಾ ಇದ್ದೆ

ನಾ ಲಾಯಕ್ಕಾ ಇಲ್ಲ ಅಂತ ಹೇಳ್ತಾ ಇದ್ದೆ

ಆದ ಗಾಯಕ ನೀ ಉಪ್ಪ ಸುರಿತಾಗಿದ್ದೆ

ಏನೇ ನಿನ್ನ ಮೈಮಾಟದಾಟ

ಇನ್ ಏಳ ಜನುಮಕ ಕಲಸಿಯ ಪಾಠ

ನೂರೆಂಟ ಹುಡಗಿರ ಕೊಡತಿದ್ರ ಕಾಟ

ನೀ ಬಂದಕಿತ್ವಗದಿ ಇದ್ದೊಂದ ಹಾರ್ಟ .

ಏನೇ ನಿನ್ನ ಮೈಮಾಟದಾಟ

ಇನ್ ಏಳ ಜನುಮಕ ಕಲಿಸಿಯ ಪಾಠ

ನೂರೆಂಟ ಹುಡುಗೀರ ಕೊಡತಿದ್ರು ಕಾಟ

ನೀ ಬಂದ ಕಿತ್ವಾಗೆದಿ ಇದ್ದೊಂದ ಹಾರ್ಟ ..

ನೀ ಹೊದ್ಮೇಲೆ ನಾ ಸೋತಿಲ್ಲ ಬದಲಾದೆ!

ನನ್ನ ಪ್ರೀತಿ ಸೋತಿರಬಹುದು ಆದರೆ ನಾ ಸೋತಿಲ್ಲ..

ನೀ ಬಿಟ್ಟು ಹೋದ ಜಾಗ ಈಗ ಖಾಲಿ ಇಲ್ಲ..

ಅಲ್ಲಿ ಬರಿ ನನ್ನ ಕನಸುಗಳ ತುಂಬಿವೆ

ನನ್ನ ಕಥೆ ಮುಗಿತು ಅಂದುಕೊಂಡೆ

ಆದ್ರೆ ಅಸಲಿ ಆಟ ..ಇನ್ನ ಶುರುನೇ ಆಗಿಲ್ಲ

ಏನೇ ನಿನ್ನ ಮೈಮಾಟದಾಟ

ಇನ್ನೆಳ ಜನಮಕ ಕಲಸಿಯ ಪಾಠ

ನೂರೆಂಟ ಹುಡಗಿರ ಕೊಡತಿದ್ರ ಕಾಟ

ನೀ ಬಂದ ಕಿತ್ವಗದಿ ಇದ್ದೊಂದ ಹಾರ್ಟ

ಏನೇ ನಿನ್ನ ಮೈಮಾಟದಾಟ

ಇನ್ನೆಳ ಜನಮಕ ಕಲಸಿಯ ಪಾಠ

ನೂರೆಂಟ ಹುಡಗಿರ ಕೊಡತಿದ್ರು ಕಾಟ

ನೀ ಬಂದ ಕಿತ್ವಗದಿ ಇದ್ದೊಂದ ಹಾರ್ಟ

ದಿಸ್ ಇಸ್ ಕನ್ನಡ ರಾಪರ್ ಚಂದನ್ ಶೆಟ್ಟಿ SHABAASH!