Asianet Suvarna News

ಎಲ್ಲಿ ಏನೇನಾಯ್ತು ನನಗೆ ಗೊತ್ತಿದೆ, ದಸರಾ ವಜ್ರಮುಷ್ಠಿ ಕಾಳಗ ರದ್ದು ಬಗ್ಗೆ ಪ್ರಮೋದಾದೇವಿ ಸ್ಪಷ್ಟನೆ

Gowthami K — Sat, 24 Oct 2026 14:33:20 +0530

ಮೈಸೂರು: ವಿಜಯದಶಮಿ ಜಂಬೂಸವಾರಿ ಯಶಸ್ವಿಯಾಗಿ ನೆರವೇರಿದ ಬೆನ್ನಲ್ಲೇ, ದಸರಾದಲ್ಲಿ ಎದುರಾದ ಅಪಸ್ವರಗಳು, ವಜ್ರಮುಷ್ಠಿ ಕಾಳಗ ರದ್ದು ಹಾಗೂ ಕಾರ್ಯಕ್ರಮದ ಶಿಷ್ಟಾಚಾರಗಳ ಕುರಿತು ಮೈಸೂರು ರಾಜವಂಶಸ್ಥೆ ಪ್ರಮೋದಾದೇವಿ ಒಡೆಯರ್ ಹಾಗೂ ಸಂಸದ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ಚಾಮುಂಡಿ ಬೆಟ್ಟದಲ್ಲಿ ಪ್ರತಿಕ್ರಿಯಿಸಿದ್ದಾರೆ. ಇದೇ ವೇಳೆ ಚಾಮುಂಡಿ ಬೆಟ್ಟದಲ್ಲಿ ಕಂಠೀರವ ನರಸರಾಜ ಒಡೆಯರ್ ರಥೋತ್ಸವವು ಭಕ್ತಿ-ಸಂಭ್ರಮಗಳಿಂದ ಜರುಗಿತು.

ಜಟ್ಟಿ ಕಾಳಗ ರದ್ದಿನಿಂದ ಯಾವುದೇ ಕೇಡು ಸಂಭವಿಸುವುದಿಲ್ಲ: ರಾಜಮಾತೆ

ಅರಮನೆಯಲ್ಲಿ ವಜ್ರಮುಷ್ಠಿ (ಜಟ್ಟಿ) ಕಾಳಗ ರದ್ದಾಗಿರುವ ಕುರಿತು ಉಂಟಾಗಿರುವ ಗೊಂದಲಗಳಿಗೆ ತೆರೆ ಎಳೆದ ಪ್ರಮೋದಾದೇವಿ ಒಡೆಯರ್, ಇದರಿಂದ ನಾಡಿಗ ಕೆಡಕು ಆಗುವುದಿಲ್ಲ. ಯಾರು ಈ ವಿಚಾರದಲ್ಲಿ ಆತಂಕ ಪಡಬೇಡಿ. ನಾವು ದೇವರನ್ನ ನಂಬಿದ್ದೇವೆ. ನಾವು ಜ್ಯೋತಿಷ್ಯವನ್ನ ನಂಬಿಲ್ಲ. ನಾವು ಜ್ಯೋತಿಷ್ಯ ನಂಬಿ ಪೂಜೆ ಮಾಡುವುದಿಲ್ಲ. ದೇವರನ್ನ ಮಾತ್ರ ನಂಬುತ್ತೇವೆ. ಏನೇನೊ ಅರ್ಥಗಳನ್ನ ಇದಕ್ಕೆ ಕಲ್ಪಿಸಬೇಡಿ. ಎಲ್ಲಿ ಏನೇನಾಯ್ತು ಎಂಬುದು ನನಗೆ ಗೊತ್ತಾಗಿದೆ. ಎಲ್ಲದರ ವರದಿಯನ್ನ ನಾನು ತರಿಸಿಕೊಳ್ಳುತ್ತಿದ್ದೇನೆ. ಈ ವಿಚಾರದ ಬಗ್ಗೆ ಒಂದರೆಡು ದಿನದಲ್ಲಿ ನಾನೇ ವಿವರಣೆ ಕೊಡುತ್ತೇನೆ ಎಂದರು.

ಕಾಳಗ ರದ್ದಾದ ಬಗ್ಗೆ ಮಾತನಾಡಿ, ಅರಮನೆಯ ಪ್ರತಿಯೊಂದು ಧಾರ್ಮಿಕ ವಿಧಿವಿಧಾನಗಳು ಆಯಾ ಪವಿತ್ರ ಮುಹೂರ್ತದಲ್ಲೇ ನಡೆಯಬೇಕು. ಮುಹೂರ್ತವನ್ನು ಮೀರಿ ನಾವು ಯಾವುದೇ ಆಚರಣೆ ಮಾಡುವುದಿಲ್ಲ. ನಮ್ಮ ಮನೆಯ ವಿಧಿವಿಧಾನಗಳು ಆಯಾ ಮೂಹರ್ತಕ್ಕೆ ನಡೆಯಬೇಕು. ಮೂಹರ್ತ ಮೀರಿ ನಾವು ನಡೆಸುವುದಿಲ್ಲ. ಹೀಗಾಗಿ ಜೆಟ್ಟಿ ಕಾಳಗಕ್ಕೂ ಮುನ್ನ ವಿಜಯಯಾತ್ರೆ ನಡೆಸಿದ್ದೇವೆ. ನಾನು ಈ ವಿಚಾರದಲ್ಲಿ ಯಾವ ಜ್ಯೋತಿಷ್ಯವನ್ನ ಕೇಳಿಲ್ಲ. ಎಲ್ಲ ದೇವರ ಮೇಲೆ ಭಾರ ಹಾಕಿದ್ದೇವೆ. ಹೀಗಾಗಿ ನಾನು ಆತಂಕಕ್ಕೆ ಒಳಗಾಗಿಲ್ಲ. ಹೀಗಾಗಿ ಸಮಯ ಮೀರಿದ ಕಾರಣಕ್ಕಾಗಿ ಕಾಳಗ ನಡೆಸದೆ ವಿಜಯಯಾತ್ರೆ ನಡೆಸಲಾಯಿತು. ಎಲ್ಲಿ ಏನೇನು ಲೋಪವಾಗಿದೆ ಎಂಬ ಮಾಹಿತಿ ಬಂದಿದೆಯಾದರೂ, ಒಂದೆರಡು ದಿನಗಳಲ್ಲಿ ಸಂಪೂರ್ಣ ವರದಿ ತರಿಸಿಕೊಂಡು ನಾನೇ ಅಧಿಕೃತವಾಗಿ ವಿವರಣೆ ನೀಡಲಿದ್ದೇನೆ ಎಂದರು.

ಇನ್ನು ಅಂಬಾರಿ ಆನೆ ಪ್ರಶಾಂತನ ಕುರಿತು ಹರ್ಷ ವ್ಯಕ್ತಪಡಿಸಿದ ಅವರು, ಈ ಬಾರಿ ಪ್ರಶಾಂತ ಅಂಬಾರಿ ಹೊರಬಲ್ಲನೇ, ಹೇಗೆ ಸಾಗುತ್ತಾನೋ ಎಂಬ ಸಣ್ಣ ಆತಂಕ ನನ್ನಲ್ಲಿತ್ತು. ಹಿಂದೆ ನನಗೆ ಈ ರೀತಿ ಯಾವ ಆತಂಕ ಇರಲಿಲ್ಲ. ಈ ಬಾರಿಯೇ ನನಗೆ ಅಷ್ಟು ಆತಂಕ ಇತ್ತು. ಆದರೆ ಎಲ್ಲ ಆತಂಕಗಳನ್ನು ಮೀರಿ ಪ್ರಶಾಂತ ಅತ್ಯಂತ ಗಂಭೀರವಾಗಿ, ಯಶಸ್ವಿಯಾಗಿ ಅಂಬಾರಿಯನ್ನು ಹೊತ್ತು ಸಾಗಿದ್ದಾನೆ. ಚಾಮುಂಡೇಶ್ವರಿ ತಾಯಿ ಎಲ್ಲರಿಗೂ ಶುಭ ಹಾರೈಸಿದ್ದಾಳೆ ಎಂದು ಸಂತಸ ಹಂಚಿಕೊಂಡರು.

ದಸರಾ ನಂದಿಧ್ವಜ ಹಾಗೂ ಪುಷ್ಪಾರ್ಚನೆಗೆ ಶಿಷ್ಟಾಚಾರ ಅಗತ್ಯ: ಯದುವೀರ್

ಇದೇ ವೇಳೆ ದಸರಾ ವೇದಿಕೆಗಳಲ್ಲಿ ಕಂಡುಬರುತ್ತಿರುವ ಅನಗತ್ಯ ಜನಸಂದಣಿಯ ಕುರಿತು ಮಾತನಾಡಿದ ಸಂಸದ ಹಾಗೂ ರಾಜವಂಶಸ್ಥ ಯದುವೀರ್ ಒಡೆಯರ್, ಮೊದಲು ಸರ್ಕಾರ ದಸರಾದಲ್ಲಿ ಶಿಷ್ಟಾಚಾರ ಎಂದರೆ ಏನು ಎಂಬುದನ್ನು ಸ್ಪಷ್ಟಪಡಿಸಲಿ. ನಂದಿಧ್ವಜ ಪೂಜೆ ಹಾಗೂ ಅಂಬಾರಿಗೆ ಪುಷ್ಪಾರ್ಚನೆ ಮಾಡುವ ಸ್ಥಳದಲ್ಲಿ ಎಷ್ಟು ಕಡಿಮೆ ಜನರಿದ್ದರೆ ಅಷ್ಟು ಒಳ್ಳೆಯದು. ಮುಖ್ಯಮಂತ್ರಿಗಳ ಜೊತೆಗೆ ಒಂದಿಬ್ಬರು ಪ್ರಮುಖರಿದ್ದರೆ ಸಾಕು. ಎಲ್ಲರೂ ಆ ಸೂಕ್ಷ್ಮ ಸ್ಥಳಕ್ಕೆ ಹೋಗುವ ಅಗತ್ಯವೇನಿದೆ? ಈ ಕುರಿತು ಸರ್ಕಾರ ನಿಯಮಗಳನ್ನು ರೂಪಿಸಬೇಕು ಎಂದು ಆಗ್ರಹಿಸಿದರು.

ಇದೇ ವೇಳೆ ನೆರೆ ರಾಜ್ಯಗಳ ಮುಖ್ಯಮಂತ್ರಿಗಳಿಗೆ ಆಹ್ವಾನ ನೀಡಿರುವುದನ್ನು ಸಮರ್ಥಿಸಿಕೊಂಡ ಅವರು, ಪಕ್ಕದ ರಾಜ್ಯದ ಸಿಎಂಗಳನ್ನು ಅತಿಥಿಗಳಾಗಿ ಕರೆದ ಮೇಲೆ ಪುಷ್ಪಾರ್ಚನೆಗೆ ಆಹ್ವಾನಿಸುವುದು ಸೌಜನ್ಯ. ಆದರೆ ಅವರೊಂದಿಗೆ ಇತರ ಅನಗತ್ಯ ವ್ಯಕ್ತಿಗಳು ಬಂದಿರುವುದಕ್ಕೆ ಸರ್ಕಾರ ಸ್ಪಷ್ಟೀಕರಣ ನೀಡಬೇಕು. ನಾವೇನೇ ಮಾತನಾಡಿದರೂ ಅದನ್ನು ರಾಜಕೀಯವಾಗಿ ಬಿಂಬಿಸಲಾಗುತ್ತದೆ ಎಂದು ಬೇಸರ ವ್ಯಕ್ತಪಡಿಸಿದರು.

ಚಾಮುಂಡಿ ಬೆಟ್ಟದಲ್ಲಿ ವೈಭವದ ಚಾಮುಂಡೇಶ್ವರಿ ರಥೋತ್ಸವ

ಮೈಸೂರು ದಸರಾ ಜಂಬೂಸವಾರಿ ವೈಭವದಿಂದ ಮುಕ್ತಾಯಗೊಂಡ ಮರುದಿನ, ಚಾಮುಂಡಿ ಬೆಟ್ಟದಲ್ಲಿ ಶ್ರೀ ಚಾಮುಂಡೇಶ್ವರಿ ಅಮ್ಮನವರ ರಥೋತ್ಸವವು ಶ್ರದ್ಧಾಭಕ್ತಿಯಿಂದ ನೆರವೇರಿತು. ವಿಶೇಷ ಪೂಜೆ ಹಾಗೂ ಧಾರ್ಮಿಕ ವಿಧಿವಿಧಾನಗಳ ನಂತರ ದೇವಿಯ ಉತ್ಸವ ಮೂರ್ತಿಯನ್ನು ಪುಷ್ಪಾಲಂಕೃತ ರಥದಲ್ಲಿ ಪ್ರತಿಷ್ಠಾಪಿಸಲಾಯಿತು.

ರಾಜವಂಶಸ್ಥ ಯದುವೀರ್ ಒಡೆಯರ್ ಅವರು ರಥದ ಹಗ್ಗವನ್ನು ಎಳೆಯುವ ಮೂಲಕ ರಥೋತ್ಸವಕ್ಕೆ ಚಾಲನೆ ನೀಡಿದರು. ಪೊಲೀಸ್ ವಾದ್ಯವೃಂದದ ಮಂಗಳವಾದ್ಯಗಳ ನಾದ ಹಾಗೂ ಕುಶಾಲತೋಪುಗಳ ಗೌರವ ವಂದನೆಯೊಂದಿಗೆ ರಥವು ಬೆಟ್ಟದ ಬೀದಿಗಳಲ್ಲಿ ಸಾಗಿತು. ಸಾವಿರಾರು ಸಂಖ್ಯೆಯಲ್ಲಿ ನೆರೆದಿದ್ದ ಭಕ್ತಾದಿಗಳು ರಥಕ್ಕೆ ಹಣ್ಣು, ಜವನ ಅರ್ಪಿಸಿ, ಜಯಘೋಷ ಕೂಗಿ ದೇವಿಯ ಕೃಪೆಗೆ ಪಾತ್ರರಾದರು.

ಮೈಸೂರು ದಸರಾ: ಅಂಬಾರಿಯನ್ನು ಆನೆಯ ಮೇಲೆಯೇ ಹೊರಿಸುವುದೇಕೆ? ಕುದುರೆ ಗಾಡಿ, ಎತ್ತಿನ ಬಂಡಿ ಯಾಕೆ ಬಳಸಲಿಲ್ಲ?

Sathish Kumar KH — Tue, 20 Oct 2026 19:09:39 +0530

ಮೈಸೂರು ದಸರಾದಲ್ಲಿ 750 ಕೆಜಿ ತೂಕದ ಚಿನ್ನದ ಅಂಬಾರಿಯನ್ನು ಆನೆಯ ಮೇಲೆ ಹೊರಿಸಲಾಗುತ್ತದೆ. ಆದರೆ, ಆನೆಯೇ ಏಕೆ ಚಿನ್ನದ ಅಂಬಾರಿಯನ್ನು ಹೊರಬೇಕು? ಇದರ ಹಿಂದಿನ ಪೌರಾಣಿಕ, ಐತಿಹಾಸಿನ ಹಿನ್ನೆಲೆ ಮತ್ತು ಅಚ್ಚರಿಯ ಕಾರಣಗಳನ್ನು ತಿಳಿಯಿರಿ.

ವಿಶ್ವವಿಖ್ಯಾತ ಮೈಸೂರು ದಸರಾದ ಪ್ರಮುಖ ಆಕರ್ಷಣೆಯೇ ‘ಜಂಬೂ ಸವಾರಿ’. 750 ಕೆಜಿ ತೂಕದ ಚಿನ್ನದ ಅಂಬಾರಿಯಲ್ಲಿ ವಿರಾಜಮಾನಳಾದ ನಾಡದೇವತೆ ತಾಯಿ ಚಾಮುಂಡೇಶ್ವರಿಯನ್ನು ಗಜಪಡೆ ಹೊತ್ತು ಸಾಗುವ ಆ ಭವ್ಯ ಕ್ಷಣವನ್ನು ಕಣ್ತುಂಬಿಕೊಳ್ಳಲು ಲಕ್ಷಾಂತರ ಜನ ಜಮಾಯಿಸುತ್ತಾರೆ. ಆದರೆ, ಎಂದಾದರೂ ಯೋಚಿಸಿದ್ದೀರಾ? ಅಂಬಾರಿಯ ಮೆರವಣಿಗೆಗೆ ಕುದುರೆ ಗಾಡಿ ಅಥವಾ ಅಲಂಕೃತ ಎತ್ತಿನ ಬಂಡಿಯನ್ನು ಬಳಸದೆ, ಕೇವಲ ಆನೆಯ ಬೆನ್ನಿನ ಮೇಲೆಯೇ ಏಕೆ ಹೊರಿಸಲಾಗುತ್ತದೆ? ಇದರ ಹಿಂದೆ ಅದ್ಭುತ ಧಾರ್ಮಿಕ ಮತ್ತು ಪ್ರಾಯೋಗಿಕ ಇತಿಹಾಸವಿದೆ.

ಸನಾತನ ಪರಂಪರೆಯಲ್ಲಿ ಆನೆಯು ಕೇವಲ ಪ್ರಾಣಿಯಲ್ಲ, ಅದು ಮಂಗಳದಾಯಕ ಶಕ್ತಿಯಾದ ಶ್ರೀ ಗಣೇಶ ಮತ್ತು ಇಂದ್ರನ ವಾಹನ ಐರಾವತದ ಸಂಕೇತ. ಪುರಾಣಗಳ ಪ್ರಕಾರ, ದುಷ್ಟ ಮಹಿಷಾಸುರನನ್ನು ಸಂಹರಿಸಿದ ಬಳಿಕ ದೇವತೆಗಳು ತಾಯಿ ದುರ್ಗೆಯನ್ನು ಆನೆಗಳ ಮೂಲಕ ಗಜಪೂಜೆ ಸಲ್ಲಿಸಿ ಗೌರವಿಸಿದರು. ರಾಜಧರ್ಮದಲ್ಲೂ ತಾಯಿಯ ಪಟ್ಟಾಭಿಷೇಕವನ್ನು 'ಗಜಲಕ್ಷ್ಮಿ' ಸ್ವರೂಪದಲ್ಲಿ ಆಚರಿಸುವುದು ಪರಮ ಮಂಗಳಕರ ಎಂಬ ನಂಬಿಕೆಯಿದೆ.

ಮೈಸೂರು ಅರಮನೆಯ ಇತಿಹಾಸದ ಪ್ರಕಾರ, ಚಿನ್ನದ ಅಂಬಾರಿಯ ತೂಕವೇ ಬರೋಬ್ಬರಿ 750 ಕೆಜಿ. ಅದರೊಳಗೆ ಪ್ರತಿಷ್ಠಾಪಿಸುವ ಉತ್ಸವ ಮೂರ್ತಿ, ಪೂಜಾ ಪರಿಕರಗಳು ಎಲ್ಲವನ್ನೂ ಸೇರಿಸಿದರೆ ತೂಕ ಮತ್ತಷ್ಟು ಹೆಚ್ಚಾಗುತ್ತದೆ. ಕುದುರೆ ಅಥವಾ ಎತ್ತುಗಳು ಭಾರವನ್ನು ಎಳೆಯಬಲ್ಲವೇ ಹೊರತು, ಇಷ್ಟು ಅಪಾರ ತೂಕವನ್ನು ತಮ್ಮ ಬೆನ್ನಿನ ಮೇಲೆ ಲೀಲಾಜಾಲವಾಗಿ ಹೊತ್ತು ನಿಲ್ಲುವ ಶಕ್ತಿ ಕೇವಲ ಆನೆಗಳಿಗೆ ಮಾತ್ರವಿದೆ.

ದಸರಾ ಮೆರವಣಿಗೆಯಲ್ಲಿ 8 ರಿಂದ 10 ಲಕ್ಷಕ್ಕೂ ಹೆಚ್ಚು ಭಕ್ತರು ರಸ್ತೆಯ ಎರಡೂ ಬದಿ ನೆರೆದಿರುತ್ತಾರೆ. ಒಂದು ವೇಳೆ ಕುದುರೆ ಗಾಡಿ ಅಥವಾ ಎತ್ತಿನ ಬಂಡಿಯಲ್ಲಿ ಅಂಬಾರಿ ಇಟ್ಟಿದ್ದರೆ, ನೆಲಮಟ್ಟದಿಂದ ಕೇವಲ ಮುಂಭಾಗದಲ್ಲಿರುವ ಕೆಲವರಿಗೆ ಮಾತ್ರ ದೇವಿಯ ದರ್ಶನವಾಗುತ್ತಿತ್ತು. ಆದರೆ, 10 ರಿಂದ 11 ಅಡಿ ಎತ್ತರದ ಬೃಹತ್ ಆನೆಯ ಮೇಲೆ ಅಂಬಾರಿ ಇರಿಸಿದಾಗ, ನೂರಾರು ಮೀಟರ್ ದೂರದಲ್ಲಿ ನಿಂತ ಭಕ್ತರಿಗೂ ನಾಡದೇವತೆಯ ಸ್ಪಷ್ಟ ದರ್ಶನ ಲಭ್ಯವಾಗುತ್ತದೆ.

ವಿಜಯನಗರ ಸಾಮ್ರಾಜ್ಯದಿಂದ ಆರಂಭವಾಗಿ ಒಡೆಯರ್ ಕಾಲದವರೆಗೆ ಸೈನ್ಯದಲ್ಲಿದ್ದ ‘ಚತುರಂಗ ಬಲ’ದಲ್ಲಿ ಆನೆಗೆ ಅತ್ಯುನ್ನತ ಸ್ಥಾನವಿತ್ತು. ಪಟಾಕಿ, ವಾದ್ಯ-ಮೇಳ, ಅಪಾರ ಜನಸಂದಣಿಯ ನಡುವೆಯೂ ವಿಚಲಿತವಾಗದೆ ಗಾಂಭೀರ್ಯದಿಂದ ಹೆಜ್ಜೆ ಹಾಕುವ ಗುಣ ಆನೆಗೆ ಮಾತ್ರ ಸಾಧ್ಯ. ಕುದುರೆಗಳು ಗದ್ದಲಕ್ಕೆ ಸುಲಭವಾಗಿ ಬೆದರುತ್ತವೆ, ಎತ್ತಿನ ಬಂಡಿಗೆ ರಾಜವೈಭವ ತರುವ ಗಾಂಭೀರ್ಯವಿರುವುದಿಲ್ಲ. ಆದ್ದರಿಂದಲೇ ಆನೆಯ ‘ಗಜಗಮನ’ವೇ ಅಂಬಾರಿಯ ಮೆರವಣಿಗೆಗೆ ಇಂದಿಗೂ ಶಾಶ್ವತ ಶೋಭೆ.

10 ದಿನಗಳ ದಸರಾ ಮುಕ್ತಾಯಕ್ಕೆ ಇನ್ನೊಂದೇ ದಿನ ಬಾಕಿ! ಮೈಸೂರಿನಲ್ಲಿ ನಾಳೆ ಹಲವು ಪ್ರಥಮಗಳ ಜಂಬೂ ಸವಾರಿ, ವಿಶೇಷತೆ ಏನು ಗೊತ್ತಾ?

Kannadaprabha News — Tue, 20 Oct 2026 06:55:02 +0530

ಅಂಶಿ ಪ್ರಸನ್ನಕುಮಾರ್‌

ಮೈಸೂರು (ಅ.20): ವಿಶ್ವವಿಖ್ಯಾತ ನಾಡಹಬ್ಬ ಮೈಸೂರು ದಸರಾ ಮಹೋತ್ಸವದ ಪ್ರಮುಖ ಆಕರ್ಷಣೆಯಾದ ‘ಜಂಬೂಸವಾರಿ’ಯು ಬುಧವಾರ (ಅ.21) ನಡೆಯಲಿದ್ದು, ಇದರೊಂದಿಗೆ ಕಳೆದ ಹತ್ತು ದಿನಗಳಿಂದ ನಡೆಯುತ್ತಿರುವ ‘ನಾಡಹಬ್ಬ’ಕ್ಕೆ ತೆರೆ ಬೀಳಲಿದೆ.

ಪ್ರಶಾಂತ’ಗೆ ಇದೇ ಮೊದಲ ಜಂಬೂಸವಾರಿ

ರಾಜ್ಯಪಾಲರಾದ ಡಾ.ಸುಧಾ ಯಾದವ್‌, ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‌ ಹಾಗೂ ಅಂಬಾರಿ ಆನೆ ‘ಪ್ರಶಾಂತ’ಗೆ ಇದೇ ಮೊದಲ ಜಂಬೂಸವಾರಿ ಆಗಿರುವುದು ವಿಶೇಷ. ಅಲ್ಲದೆ, ಇದೇ ಮೊದಲ ಬಾರಿಗೆ ಜಂಬೂಸವಾರಿಯಲ್ಲಿ ಭಾರತೀಯ ಸೇನೆಯ ಮೂರು ತುಕಡಿಗಳು ಭಾಗವಹಿಸುತ್ತಿವೆ. ಜೊತೆಗೆ, ದಸರಾ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ನೆರೆರಾಜ್ಯಗಳ ಮುಖ್ಯಮಂತ್ರಿಗಳನ್ನು ಆಹ್ವಾನಿಸಲಾಗಿದ್ದು, ಕೇರಳ ಮತ್ತು ತೆಲಂಗಾಣದ ಮುಖ್ಯಮಂತ್ರಿಗಳು ಭಾಗವಹಿಸುತ್ತಿದ್ದಾರೆ.

ನೂತನ ರಾಜ್ಯಪಾಲರಿಗೆ ಆಹ್ವಾನ

ದಸರೆ ಆರಂಭವಾದಾಗ ಥಾವರ್‌ಚಂದ್‌ ಗೆಹಲೋತ್‌ ರಾಜ್ಯಪಾಲರಾಗಿದ್ದರು. ಆಹ್ವಾನ ಪತ್ರಿಕೆಯಲ್ಲಿ ಹೆಸರು ಮುದ್ರಿಸಿ, ಜಿಲ್ಲಾಡಳಿತದಿಂದ ಅಧಿಕೃತ ಆಹ್ವಾನ ನೀಡಲಾಗಿತ್ತು. ಆದರೆ, ಗೆಹಲೋತ್‌ ಅವರ ಅಧಿಕಾರಾವಧಿ ಮುಕ್ತಾಯವಾಗಿ, ಅವರ ಸ್ಥಾನಕ್ಕೆ ಡಾ.ಸುಧಾ ಯಾದವ್‌ ಅವರು ನೇಮಕವಾಗಿ ಅ.16 ರಂದು ಅಧಿಕಾರ ಸ್ವೀಕರಿಸಿರುವುದರಿಂದ ರಾಜ್ಯ ಸರ್ಕಾರ ಹಾಗೂ ಜಿಲ್ಲಾಡಳಿತ ನೂತನ ರಾಜ್ಯಪಾಲರಿಗೆ ಆಹ್ವಾನ ನೀಡಿದೆ. ಹೀಗಾಗಿ, ಡಾ.ಸುಧಾ ಯಾದವ್‌ ಅವರಿಗೆ ಇದೇ ಮೊದಲ ಜಂಬೂಸವಾರಿ.

ಸಿಎಂ ಆಗಿ ಡಿಕೆ ಶಿವಕುಮಾರ್‌ಗೆ ಇದು ಮೊದಲ ದಸರಾ

ಈವರೆಗೆ ಮೈಸೂರು ಜಿಲ್ಲೆಯವರೇ ಆದ ಸಿದ್ದರಾಮಯ್ಯ ಸಿಎಂ ಆಗಿದ್ದರು. ಮುಖ್ಯಮಂತ್ರಿಯಾಗಿ ಮೊದಲ ಅವಧಿಯಲ್ಲಿ ಐದು, ಎರಡನೇ ಅವಧಿಯಲ್ಲಿ ಮೂರು ಸೇರಿ ಒಟ್ಟಾರೆ ಎಂಟು ಬಾರಿ ಜಂಬೂಸವಾರಿಯನ್ನು ಉದ್ಘಾಟಿಸಿದ್ದರು. ಆ ಮೂಲಕ ಅತಿ ಹೆಚ್ಚು ಬಾರಿ ಜಂಬೂಸವಾರಿ ಉದ್ಘಾಟಿಸಿದ ಸಿಎಂ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದರು. ಸಿದ್ದರಾಮಯ್ಯ ಅವರ ಪದತ್ಯಾಗದ ನಂತರ ಡಿ.ಕೆ. ಶಿವಕುಮಾರ್‌ ಮುಖ್ಯಮಂತ್ರಿಯಾಗಿದ್ದು, ಅವರಿಗೆ ಇದೇ ಮೊದಲ ಜಂಬೂಸವಾರಿ.

ಕಳೆದ 18 ವರ್ಷಗಳಿಂದಲೂ ದಸರೆಯಲ್ಲಿ ಭಾಗವಹಿಸುತ್ತಿರುವ ಪ್ರಶಾಂತ ಆನೆ ಇದೇ ಮೊದಲ ಬಾರಿಗೆ ಅಂಬಾರಿ ಹೊರುವ ಕಾಯಕಕ್ಕೆ ನಿಯೋಜನೆಯಾಗಿದೆ. ಈ ಬಾರಿ ಮುಖ್ಯಮಂತ್ರಿಗಳಾದ ಕೇರಳದ ವಿ.ಡಿ.ಸತೀಶನ್‌, ತೆಲಂಗಾಣದ ರೇವಂತ್‌ ರೆಡ್ಡಿ ಭಾಗವಹಿಸುತ್ತಿದ್ದಾರೆ. ತಮಿಳುನಾಡಿನ ಸಿ. ಜೋಸೆಫ್‌ ವಿಜಯ್‌ ಹಾಗೂ ಆಂಧ್ರಪ್ರದೇಶದ ಚಂದ್ರಬಾಬು ನಾಯ್ಡು ಅವರನ್ನು ಕೂಡ ಆಹ್ವಾನಿಸಲಾಗಿತ್ತು. ಆದರೆ, ಅವರು ಬರುತ್ತಿಲ್ಲ.

ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‌ ಅವರ ಮನವಿ ಮೇರೆಗೆ ರಕ್ಷಣಾ ಖಾತೆ ಸಚಿವ ರಾಜನಾಥ್‌ಸಿಂಗ್‌ ಅವರು, ಸೇನೆಯ ಮೂರು ತುಕಡಿಗಳನ್ನು ಮೆರವಣಿಗೆಗೆ ಕಳುಹಿಸುತ್ತಿದ್ದಾರೆ. ಇದಲ್ಲದೇ ಕನ್ನಡ ಚಲನಚಿತ್ರ ರಂಗದ ನಟಿ-ನಟಿಯರು ಕೂಡ ಮೆರವಣಿಗೆಯಲ್ಲಿ ಸಾಗಲಿದ್ದಾರೆ.

ಅಂತಿಮ ಹಂತದ ಸಿದ್ಧತೆ:

ಅರಮನೆಯಿಂದ ಬನ್ನಿಮಂಟಪದವರೆಗೆ ಜಂಬೂಸವಾರಿ ಸಾಗುವ ಮಾರ್ಗವನ್ನು ಸುಂದರಗೊಳಿಸಲಾಗಿದೆ. ಮೆರವಣಿಗೆ ಸುಗಮವಾಗಿ ಸಾಗಲು ಅನುವಾಗುವಂತೆ ರಸ್ತೆಯ ಇಕ್ಕೆಲಗಳಲ್ಲಿ ಕಟಕಟೆಗಳನ್ನು ನಿರ್ಮಿಸಲಾಗಿದೆ. ಪ್ರವಾಸಿಗರ ಅನುಕೂಲಕ್ಕಾಗಿ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮ ಹಾಗೂ ರೈಲ್ವೆ ಇಲಾಖೆ ವಿಶೇಷ ಸಂಚಾರದ ವ್ಯವಸ್ಥೆ ಮಾಡಿವೆ. ಕಾನೂನು ಸುವ್ಯವಸ್ಥೆ ಕಾಪಾಡಲು ಪೊಲೀಸ್‌ ಇಲಾಖೆ ಬಿಗಿ ಬಂದೋಬಸ್ತ್‌ ಮಾಡಿದೆ.

ಮುಖ್ಯಮಂತ್ರಿ ಚಾಲನೆ:

ಬುಧವಾರ ಮಧ್ಯಾಹ್ನ 1.36 ರಿಂದ 1.56 ರವರೆಗೆ ಸಲ್ಲುವ ಶುಭ ಮಕರ ಲಗ್ನದಲ್ಲಿ ಅರಮನೆಯ ಬಲರಾಮ ದ್ವಾರದಲ್ಲಿ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‌ ಅವರು ನಂದಿಧ್ವಜ ಪೂಜೆ ನೆರವೇರಿಸುವ ಮೂಲಕ ಜಂಬೂಸವಾರಿಗೆ ಚಾಲನೆ ನೀಡಲಿದ್ದಾರೆ. ನಂತರ, ಸಂಜೆ 4.10 ರಿಂದ 4.35 ರವರೆಗೆ ಸಲ್ಲುವ ಶುಭ ಮೀನ ಲಗ್ನದಲ್ಲಿ ಅರಮನೆಯ ಒಳಾವರಣದ ವಿಶೇಷ ವೇದಿಕೆಯಲ್ಲಿ ಗಜರಾಜ ಪ್ರಶಾಂತ ಹೊರಲಿರುವ 750 ಕೆ.ಜಿ. ತೂಕದ ಚಿನ್ನದ ಅಂಬಾರಿಯಲ್ಲಿರುವ ಚಾಮುಂಡೇಶ್ವರಿ ವಿಗ್ರಹಕ್ಕೆ ಪುಷ್ಪಾರ್ಚನೆ ಮಾಡಲಿದ್ದಾರೆ. ಈ ಸಂದರ್ಭದಲ್ಲಿ ರಾಜವಂಶಸ್ಥ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್‌, ಉಪ ಮುಖ್ಯಮಂತ್ರಿ ಡಾ.ಜಿ.ಪರಮೇಶ್ವರ, ಜಿಲ್ಲಾ ಉಸ್ತುವಾರಿ ಸಚಿವ ಡಾ.ಯತೀಂದ್ರ ಸಿದ್ದರಾಮಯ್ಯ, ಕನ್ನಡ ಮತ್ತು ಸಂಸ್ಕೃತಿ ಸಚಿವ ಶಿವರಾಜ್‌ ಎಸ್‌. ತಂಗಡಗಿ ಮತ್ತಿತರರು ಉಪಸ್ಥಿತರಿರುವರು.

ಅರಮನೆ ಆವರಣದಲ್ಲಿ ಅತಿ ಗಣ್ಯರು, ಆಹ್ವಾನಿತರು, ಗೋಲ್ಡ್‌ ಕಾರ್ಡ್‌ ಹಾಗೂ ಟಿಕೆಟ್‌ ಹೊಂದಿರುವವರಿಗೆ ಆಸನದ ವ್ಯವಸ್ಥೆ ಮಾಡಲಾಗಿದೆ. ಪುರಭವನ, ನಗರದ ಬಸ್‌ ನಿಲ್ದಾಣದ ಎದುರು ಪಾದಚಾರಿ ಮಾರ್ಗದಲ್ಲಿ ನಗರಪಾಲಿಕೆಯಿಂದ ಆಸನದ ವ್ಯವಸ್ಥೆ ಮಾಡಲಾಗಿದೆ.

ನಂದಿಧ್ವಜ, ವೀರಗಾಸೆ, ನಾದಸ್ವರ, ನಿಶಾನೆ ಅಭಿಮನ್ಯು, ನೌಫತ್‌ ಆನೆ ಗೋಪಿ, ಎನ್‌ಸಿಸಿ, ಸ್ಕೌಟ್ಸ್‌ ಮತ್ತು ಗೈಡ್ಸ್‌, ವಿವಿಧ ಪೊಲೀಸ್‌ ತುಕಡಿಗಳು, ನಾಡಿನ ಕಲೆ, ಸಂಸ್ಕೃತಿ ಬಿಂಬಿಸುವ ಸ್ತಬ್ಧಚಿತ್ರಗಳು, ಜಾನಪದ ಕಲಾ ತಂಡಗಳು ಮೆರವಣಿಗೆಯಲ್ಲಿ ಸಾಗಲಿವೆ. ಕೊನೆಯಲ್ಲಿ ಪ್ರಶಾಂತ ಆನೆ ಇದೇ ಮೊದಲ ಬಾರಿಗೆ ಅಂಬಾರಿ ಹೊತ್ತು ಸಂಗಾತಿಗಳಾದ ಕಾವೇರಿ ಹಾಗೂ ರೂಪಾ ಜೊತೆ ಹೆಜ್ಜೆ ಹಾಕಲಿದ್ದಾನೆ.

ಈ ಮೆರವಣಿಗೆ 5 ಕಿ.ಮೀ.ದೂರ ಸಾಗಿ ಬನ್ನಿಮಂಟಪ ತಲುಪಲಿದೆ. ಅಲ್ಲಿ ಸಂಜೆ 7ಕ್ಕೆ ಪಂಜಿನ ಕವಾಯತು ನಡೆಯಲಿದ್ದು, ರಾಜ್ಯಪಾಲರಾದ ಡಾ.ಸುಧಾ ಯಾದವ್‌ ಗೌರವ ವಂದನೆ ಸ್ವೀಕರಿಸುವರು. ಸಿಎಂ ಸೇರಿದಂತೆ ಸಂಪುಟದ ಹಲವು ಸದಸ್ಯರು ಪಾಲ್ಗೊಳ್ಳುವರು. ಇದರೊಂದಿಗೆ ಈ ಬಾರಿಯ ನಾಡಹಬ್ಬ ಮೈಸೂರು ದಸರೆಗೆ ತೆರೆ ಬೀಳಲಿದೆ.

Men will be Men: ಮೈಸೂರು ಪ್ಯಾಲೇಸ್‌ಗೆ ದಾರಿ ಹೇಳಿ ಪುರುಷರ ಕಿಕ್ ಏರಿಸಿದ ಯುವಕ!

Mahmad Rafik — Sun, 25 Oct 2026 12:31:25 +0530

ಮೈಸೂರು: ಹೊಸ ಸ್ಥಳಗಳಿಗೆ ಭೇಟಿ ನೀಡಿದಾಗ ದಾರಿ ತಿಳಿಯದೇ ಸ್ಥಳೀಯರ ಸಹಾಯವನ್ನು ಪಡೆದುಕೊಳ್ಳಲಾಗುತ್ತದೆ. ಸ್ಥಳೀಯರು ಸಹ ತಮ್ಮೂರಿಗೆ ಬಂದ ದಾರಿ ಕೇಳಿದವರಿಗೆ ಮಾರ್ಗ ತೋರಿಸುತ್ತಾರೆ. ಆದ್ರೆ ಈ ಮಾರ್ಗ ತೋರಿಸುವ ವಿಧಾನ ಸ್ಥಳದಿಂದ ಸ್ಥಳಕ್ಕೆ ಅಥವಾ ವ್ಯಕ್ತಿಯಿಂದ ವ್ಯಕ್ತಿಗೆ ಬದಲಾಗುತ್ತದೆ. ಮಾತನಾಡುವ ಶೈಲಿ, ಆತನ್ನಾಡುವ ಪದಗಳು ಆ ವ್ಯಕ್ತಿ ಬಗೆಗಿನ ಕೊಂಚ ಮಾಹಿತಿಯನ್ನು ಹೇಳುತ್ತದೆ. ಇಂತಹ ಸೂಕ್ಷ್ಮ ವಿಷಯಗಳು ಆ ವ್ಯಕ್ತಿಯ ಗುರುತನ್ನು ಹೇಳುತ್ತವೆ. ಇದೀಗ ಮಾರ್ಗ ತೋರಿಸಿದ ಯುವಕನ ವಿಡಿಯೋವೊಂದು (Viral Video) ಸಾಮಾಜಿಕ ಜಾಲತಾಣದಲ್ಲಿ (Social Media) ವೈರಲ್ ಆಗುತ್ತಿದೆ.

ಇತ್ತೀಚೆಗಷ್ಟೇ ಇಡೀ ವಿಶ್ವದ ನಾಡಿನ ದಸರಾ ಹಬ್ಬವನ್ನು (Dasara Festival) ಕಣ್ತುಂಬಿಕೊಂಡಿದೆ. ಮೈಸೂರಿಗೆ ಆಗಮಿಸಲು ಸಾಧ್ಯವಾಗದ ಜನರು ಮನೆಯಿಂದಲೇ ತಾಯಿ ಚಾಮುಂಡೇಶ್ವರಿ ದರ್ಶನ ಪಡೆದುಕೊಂಡ ಪುನೀತರಾಗಿದ್ದಾರೆ. ಮೈಸೂರು ದಸರಾ (Mysuru Dasara) ಅಂದ್ರೆ ಅಲ್ಲಿಗೆ ಅನೇಕ ಸೋಶಿಯಲ್ ಮೀಡಿಯಾ ಇನ್‌ಫ್ಲುಯೆನ್ಸರ್‌ಗಳು ಆಗಮಿಸಿ, ತಮ್ಮದೇ ವಿನೂತನ ಶೈಲಿಯಲ್ಲಿ ವಿಡಿಯೋಗಳನ್ನು ಮಾಡುತ್ತಾರೆ. ಇಂತಹ ವ್ಲಾಗರ್ ಪೈಕಿ ಯುವತಿಯೊಬ್ಬರು, ಓರ್ವ ಯುವಕನಿಗೆ ಮೈಸೂರು ಅರಮನೆಗೆ (Mysuru Palace) ದಾರಿ ಕೇಳಿದ್ರೆ ನೀವು ಹೇಗೆ ವಿವರಿಸುತ್ತೀರಿ ಎಂದು ಪ್ರಶ್ನೆ ಮಾಡುತ್ತಾರೆ. ಇದಕ್ಕೆ ಯುವಕ ನೀಡಿದ ಉತ್ತರ ಸೋಶಿಯಲ್ ಮೀಡಿಯಾದಲ್ಲಿ ಪುರುಷರ (Men) ಖುಷಿಗೆ ಕಾರಣವಾಗಿದೆ.

ಅರಮನೆಗೆ ಯುವಕ ಹೇಳಿದ ದಾರಿ ಹೇಗಿತ್ತು?

ಯುವತಿ ಪ್ರಶ್ನೆ: ಅಪರಿಚಿತರು ಮೈಸೂರು ಪ್ಯಾಲೇಸ್ ಕೇಳಿದ್ರೆ ದಾರಿಯನ್ನು ಹೇಗೆ ಹೇಳ್ತೀರಿ?

ಯುವಕನ ಉತ್ತರ: ಬಸ್ ನಿಲ್ದಾಣದಿಂದ ದಾರಿ ಆರಂಭಿಸೋಣ. ಬಸ್‌ ನಿಲ್ದಾಣದಿಂದ ನೇರವಾಗಿ ಬಂದ್ರೆ ನಿಮಗೆ ಶ್ರೀನಿವಾಸ್ ಬಾರ್ ಸಿಗುತ್ತದೆ. ಅಲ್ಲಿಂದ ರೈಟ್ ತೆಗೆದುಕೊಂಡು ಸ್ವಲ್ಪ ಮುಂದೆ ಬಂದ್ರೆ ಕರಾವಳಿ ಬಾರ್ ಸಿಗುತ್ತೆ. ಅಲ್ಲಿಂದ ನೇರವಾಗಿ ಬಂದ್ರೆ ವೆಂಕಟೇಶ್ವರ ಬಾರ್ ಸಿಗುತ್ತೆ. ಇಲ್ಲಿಂದ ಕೇವಲ 300 ಮೀಟರ್ ಹೋದ್ರೆ ಪ್ಯಾಲೇಸ್ ಸಿಗುತ್ತೆ!

ಯುವತಿ: ಬ್ರೋ ಎಲ್ಲಾನೂ ಬಾರ್ ಹೆಸರೇ ಹೇಳ್ತಿದ್ದೀರಿ ಅಲ್ಲವಾ? ಆ 300 ಮೀಟರ್‌ನಲ್ಲಿ ಯಾವುದೇ ಬಾರ್‌ ಇಲ್ಲವಾ?

ಯುವಕ: ಜನರಿಗೆ ಸರಳವಾಗಿ ಅರ್ಥ ಆಗ್ಲಿ ಅಂತ ಹೇಳಿದಷ್ಟೇ!

ಯುವತಿ: ಈ ಮೂರು ಬಾರ್‌ಗಳಲ್ಲಿ ನಿಮ್ಮ ನೆಚ್ಚಿನ ಬಾರ್ ಯಾವುದು?

ಯುವಕ: ನಾನು ತಮಾಷೆಯಾಗಿ ಹೇಳೋಕೆ ಹೋದ್ರೆ ನನ್ನ ಬುಡಕ್ಕೆ ಬಂತು ಅಲ್ಲವಾ ಎಂದು ಹೇಳಿ ನಗುತ್ತಾರೆ.

ವಿಡಿಯೋ ನೋಡಿದ ಜನರು ಹೇಳಿದ್ದೇನು?

ದಾರಿಯಲ್ಲಿ ಇಷ್ಟೊಂದು ಬಾರ್ ಬಂದ್ರೆ, ಪ್ಯಾಲೇಸ್‌ಗೆ ಯಾಕೆ ಹೋಗ್ತಾರೆ? ಮೂರು ಬಾರ್‌ಗಳಲ್ಲಿ ಕುಡಿದ್ರೆ ಅಲ್ಲೇ ಅರಮನೆಯ ದರ್ಶನವಾಗುತ್ತೆ. ಯುವಕ ಚೆನ್ನಾಗಿ ದಾರಿ ತೋರಿಸಿದ್ದಾನೆ. ಹೊಸಬರು ತಿಳಿದುಕೊಳ್ಳಬೇಕಾದ ಪ್ರಮುಖ ವಿಷಯ ಇದಾಗಿದೆ ಎಂದು ತಮಾಷೆ ಮಾಡಿದ್ದಾರೆ. ಕೆಲವರು ನಿಜಕ್ಕೂ ಮೈಸೂರಿನಲ್ಲಿ 100 ಮೀಟರ್ ಅಂತರದಲ್ಲೊಂದು ಬಾರ್ ಸಿಗುತ್ತೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ಸದ್ಯ ಈ ವಿಡಿಯೋ ಸಿಕ್ಕಾಪಟ್ಟೆ ವೈರಲ್ ಆಗಿದ್ದು, ಸೋಶಿಯಲ್ ಮೀಡಿಯಾ ಬಳಕೆದಾರರು ತಮ್ಮ ಆಪ್ತವಲಯದಲ್ಲಿರುವ ಮದ್ಯಪ್ರಿಯರಿಗರ ವಿಡಿಯೋ ಟ್ಯಾಗ್ ಮಾಡುತ್ತಿದ್ದಾರೆ. ಇನ್ನು ಕೆಲವರು ಬಸ್‌ ನಿಲ್ದಾಣದಿಂದ ಅರಮನೆಗೆ ಹೋಗುವ ಮಾರ್ಗದಲ್ಲಿ ಹಲವು ಲ್ಯಾಂಡ್‌ಮಾರ್ಕ್‌ಗಳಿವೆ. ಆದ್ರೆ ಈ ಯುವಕನಿಗೆ ಬಾರ್‌ ಗಳ ದರ್ಶನ ಮಾತ್ರ ಆಗಿದೆ ಎಂದಿದ್ದಾರೆ. ವೈರಲ್ ವಿಡಿಯೋದಲ್ಲಿ ಯುವಕ ಹೇಳಿದ ದಾರಿ ಸರಿಯಾಗಿದೆಯಾ ಅಥವಾ ಇಲ್ಲವಾ ಎಂಬುದನ್ನು ನೀವು ಕಮೆಂಟ್ ಮಾಡಿ.

ಇದನ್ನೂ ಓದಿ: ಊಟದ ಬಿಲ್‌ನಲ್ಲಿ ಅರ್ಧ ಕೊಡು ಎಂದಿದ್ದೇ ತಪ್ಪಾಯ್ತಾ? ಮಹಿಳೆಗೆ ‘ಕೆಟ್ಟ ಸ್ನೇಹಿತೆ’ ಪಟ್ಟ ಕೊಟ್ಟ ಗೆಳತಿ!

ಕೆನಡಾ ಬಿಟ್ಟು ಮೈಸೂರಿಗೆ ಬರಲು ಸಿದ್ಧವಾದ ಕುಟುಂಬ; ₹1.5 ಲಕ್ಷದಲ್ಲಿ ಐಷಾರಾಮಿ ಜೀವನ ಸಾಧ್ಯವೇ?

Sushma Hegde — Thu, 22 Oct 2026 10:03:31 +0530

ಕೆನಡಾದ ಒಂಟಾರಿಯೊದಲ್ಲಿ ನೆಲೆಸಿದ್ದ ಮೂವರ ಕುಟುಂಬವೊಂದು ಭಾರತಕ್ಕೆ ಮರಳಲು ನಿರ್ಧರಿಸಿದ್ದು, ಕರ್ನಾಟಕದ ಮೈಸೂರಿನಲ್ಲಿ ವಾಸಿಸಲು ಯೋಜಿಸಿದೆ. ಆದರೆ, ತಿಂಗಳಿಗೆ ₹1.5 ಲಕ್ಷ ಬಜೆಟ್‌ನಲ್ಲಿ ಕುಟುಂಬದ ಜೀವನ ನಿರ್ವಹಣೆ ಸಾಧ್ಯವೇ ಎಂಬ ಪ್ರಶ್ನೆಯನ್ನು ಸಾಮಾಜಿಕ ಜಾಲತಾಣದಲ್ಲಿ ಮುಂದಿಟ್ಟಿದ್ದು, ಈ ಚರ್ಚೆ ಈಗ ಗಮನ ಸೆಳೆಯುತ್ತಿದೆ.

ಗಂಡ, ಹೆಂಡತಿ ಹಾಗೂ ಎಂಟು ವರ್ಷದ ಮಗುವನ್ನು ಒಳಗೊಂಡಿರುವ ಈ ಕುಟುಂಬ, ಮೈಸೂರಿನಲ್ಲಿ ಮನೆ ಖರ್ಚಿನ ಬಗ್ಗೆ ಚಿಂತಿಸುವ ಅಗತ್ಯವಿಲ್ಲ ಎಂದು ಹೇಳಿದೆ. ಈಗಾಗಲೇ ವಸತಿ ವ್ಯವಸ್ಥೆಯನ್ನು ಮಾಡಿಕೊಳ್ಳಲಾಗಿದ್ದು, ಬಾಡಿಗೆ ಅಥವಾ ಗೃಹಸಾಲದ ಕಂತು ಪಾವತಿಸುವ ಹೊರೆ ಇರುವುದಿಲ್ಲ. ಹೀಗಾಗಿ, ಉಳಿದ ಅಗತ್ಯ ವೆಚ್ಚಗಳನ್ನು ₹1.5 ಲಕ್ಷದೊಳಗೆ ನಿರ್ವಹಿಸಬಹುದೇ ಎಂಬುದನ್ನು ತಿಳಿದುಕೊಳ್ಳಲು ಅವರು ಸ್ಥಳೀಯರು ಹಾಗೂ ವಿದೇಶದಿಂದ ಭಾರತಕ್ಕೆ ಮರಳಿರುವವರ ಸಲಹೆ ಕೇಳಿದ್ದಾರೆ.

ಹಸಿರು ಪರಿಸರದ ನಡುವೆ ವಾಸಿಸುವ ಆಸೆ

ಕುಟುಂಬದ ವ್ಯಕ್ತಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ಮಾಹಿತಿಯ ಪ್ರಕಾರ, ಅವರಿಗೆ ಹಸಿರು ಪರಿಸರ, ತೆಂಗಿನ ತೋಟಗಳು ಅಥವಾ ನೀರಿನ ಮೂಲಗಳ ಸಮೀಪ ವಾಸಿಸುವ ಆಸೆಯಿದೆ. ಕುಟುಂಬದ ತಿಂಗಳ ಬಜೆಟ್ ಸುಮಾರು ₹1.5 ಲಕ್ಷವಾಗಿದ್ದು, ಇದು ಕೆನಡಾದ ಕರೆನ್ಸಿಯಲ್ಲಿ ಅಂದಾಜು 2,200 ಡಾಲರ್‌ಗೆ ಸಮಾನ ಎಂದು ತಿಳಿಸಿದ್ದಾರೆ.

ಈ ಬಜೆಟ್‌ನಲ್ಲಿ ವಿದ್ಯುತ್, ನೀರು, ಅಡುಗೆ ಅನಿಲ, ದಿನಸಿ ಸಾಮಗ್ರಿಗಳು, ಮನೆಗೆಲಸದವರ ಸಂಬಳ, ವಾಹನದ ಇಂಧನ ಮತ್ತು ನಿರ್ವಹಣೆ ಹಾಗೂ ಮಗುವಿನ ಶಾಲಾ ಶುಲ್ಕ ಸೇರಿದಂತೆ ದಿನನಿತ್ಯದ ಅಗತ್ಯ ವೆಚ್ಚಗಳನ್ನು ಭರಿಸುವ ಯೋಜನೆಯಿದೆ. ಮನೆ ಬಾಡಿಗೆ ಇಲ್ಲದಿರುವುದರಿಂದ ಈ ಮೊತ್ತದಲ್ಲಿ ನೆಮ್ಮದಿಯ ಜೀವನ ನಡೆಸಲು ಸಾಧ್ಯವೇ ಎಂಬುದೇ ಅವರ ಪ್ರಮುಖ ಪ್ರಶ್ನೆಯಾಗಿದೆ.

ಮೈಸೂರಿನಲ್ಲಿ ಯಾವ ಶಾಲೆ ಉತ್ತಮ?

ಕುಟುಂಬಕ್ಕೆ ಎದುರಾಗಿರುವ ಮತ್ತೊಂದು ಪ್ರಮುಖ ಪ್ರಶ್ನೆ ಮಗುವಿನ ಶಿಕ್ಷಣಕ್ಕೆ ಸಂಬಂಧಿಸಿದೆ. ಮೈಸೂರಿನ ಎಕ್ಸೆಲ್ ಪಬ್ಲಿಕ್ ಸ್ಕೂಲ್‌ನಂತಹ ಶಾಲೆಗಳಲ್ಲಿ ಪ್ರವೇಶ ಪಡೆಯುವುದು ಎಷ್ಟು ಕಷ್ಟ ಎಂಬುದನ್ನು ಅವರು ಕೇಳಿದ್ದಾರೆ.

ಅಷ್ಟೇ ಅಲ್ಲದೆ, ಮಕ್ಕಳು ಕೇವಲ ಕಪ್ಪು ಹಲಗೆಯ ಮುಂದೆ ಕುಳಿತು ಪಾಠ ಕೇಳುವುದಕ್ಕಿಂತ, ಪ್ರಾಯೋಗಿಕ ಚಟುವಟಿಕೆಗಳ ಮೂಲಕ ಕಲಿಯುವಂತಹ ಪರ್ಯಾಯ ಶಿಕ್ಷಣ ಸಂಸ್ಥೆಗಳು ಮೈಸೂರಿನಲ್ಲಿ ಇವೆಯೇ ಎಂಬ ಬಗ್ಗೆಯೂ ಮಾಹಿತಿ ಬಯಸಿದ್ದಾರೆ. ವಿದೇಶದಿಂದ ಭಾರತಕ್ಕೆ ಮರಳುವ ಕುಟುಂಬಗಳಿಗೆ ಮಕ್ಕಳ ಶಿಕ್ಷಣ, ಕಲಿಕೆಯ ವಿಧಾನ ಮತ್ತು ಶಾಲೆಯ ವಾತಾವರಣ ಪ್ರಮುಖ ಆದ್ಯತೆಗಳಾಗಿರುವುದರಿಂದ ಈ ಪ್ರಶ್ನೆ ಸಹಜವಾಗಿಯೇ ಗಮನ ಸೆಳೆದಿದೆ.

ಕೆಆರ್‌ಎಸ್ ರಸ್ತೆ ಉತ್ತಮವೇ? ಬೋಗಾದಿ ಅಥವಾ ವಿಜಯನಗರ ಹೇಗಿದೆ?

ಮೈಸೂರಿನಲ್ಲಿ ವಾಸಿಸಲು ಸೂಕ್ತವಾದ ಪ್ರದೇಶವನ್ನು ಆಯ್ಕೆ ಮಾಡುವ ಬಗ್ಗೆಯೂ ಕುಟುಂಬ ಸಲಹೆ ಕೇಳಿದೆ. ಕಾವೇರಿ ನದಿ ಹಾಗೂ ಕೆಆರ್‌ಎಸ್ ರಸ್ತೆ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ವಾಸಿಸುವುದು ಉತ್ತಮವೇ? ಅಥವಾ ಬೋಗಾದಿ ಹಾಗೂ ವಿಜಯನಗರ 4ನೇ ಹಂತದಂತಹ ಬಡಾವಣೆಗಳನ್ನು ಆಯ್ಕೆ ಮಾಡಬೇಕೇ ಎಂದು ಪ್ರಶ್ನಿಸಿದೆ.

ಶುದ್ಧ ಗಾಳಿ, ನೀರು ಮತ್ತು ಹಸಿರು ಪರಿಸರಕ್ಕೆ ಆದ್ಯತೆ ನೀಡುವ ಕುಟುಂಬಕ್ಕೆ ಬೇಸಿಗೆಯಲ್ಲಿ ನೀರಿನ ಪೂರೈಕೆ ಹೇಗಿರುತ್ತದೆ ಎಂಬುದೂ ಮುಖ್ಯವಾಗಿದೆ. ಹೀಗಾಗಿ, ಈ ಪ್ರದೇಶಗಳಲ್ಲಿ ನೀರಿನ ಲಭ್ಯತೆ ಮತ್ತು ಪೂರೈಕೆಯ ಸ್ಥಿರತೆಯ ಬಗ್ಗೆ ಸ್ಥಳೀಯರ ಅಭಿಪ್ರಾಯವನ್ನು ಕೋರಿದ್ದಾರೆ.

₹1.5 ಲಕ್ಷದಲ್ಲಿ ಜೀವನ ಸಾಧ್ಯವೇ? ನೆಟ್ಟಿಗರು ಹೇಳಿದ್ದೇನು?

ಈ ಪ್ರಶ್ನೆಗೆ ಪ್ರತಿಕ್ರಿಯಿಸಿರುವ ಸಾಮಾಜಿಕ ಜಾಲತಾಣ ಬಳಕೆದಾರರು, ಕುಟುಂಬದ ಜೀವನಶೈಲಿ ಮತ್ತು ಖರ್ಚು ಮಾಡುವ ರೀತಿಯನ್ನು ಅವಲಂಬಿಸಿ ಉತ್ತರ ಬದಲಾಗುತ್ತದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಒಬ್ಬ ಬಳಕೆದಾರರು ಎಲೆಕ್ಟ್ರಿಕ್ ವಾಹನ (EV) ಖರೀದಿಸುವುದು ಮತ್ತು ಮನೆಯ ಮೇಲೆ ಸೌರ ವಿದ್ಯುತ್ ವ್ಯವಸ್ಥೆ ಅಳವಡಿಸಿಕೊಳ್ಳುವುದು ದೀರ್ಘಾವಧಿಯಲ್ಲಿ ವೆಚ್ಚವನ್ನು ಕಡಿಮೆ ಮಾಡಲು ಸಹಾಯ ಮಾಡಬಹುದು ಎಂದು ಸಲಹೆ ನೀಡಿದ್ದಾರೆ.

ಮತ್ತೊಬ್ಬರು, ಕುಟುಂಬಕ್ಕೆ ತಿಂಗಳಿಗೆ ₹1.5 ಲಕ್ಷ ಆದಾಯ ಎಲ್ಲಿಂದ ಬರಲಿದೆ ಎಂಬುದನ್ನು ತಿಳಿದುಕೊಳ್ಳುವ ಕುತೂಹಲ ವ್ಯಕ್ತಪಡಿಸಿದ್ದಾರೆ. ಅದು ಸ್ಥಿರ ಠೇವಣಿಯಿಂದ ಬರುವ ಬಡ್ಡಿಯೇ ಅಥವಾ ಬೇರೆ ಆದಾಯದ ಮೂಲವಿದೆಯೇ ಎಂದು ಪ್ರಶ್ನಿಸಿದ್ದಾರೆ.

ಇನ್ನೊಬ್ಬ ಬಳಕೆದಾರರು, ಕಾರಿನ ಆಯ್ಕೆ, ಆಹಾರ ಮತ್ತು ದಿನಸಿ ಖರ್ಚು, ಬಟ್ಟೆ ಹಾಗೂ ಇತರ ವೈಯಕ್ತಿಕ ಅಗತ್ಯಗಳ ಮೇಲೆ ಒಟ್ಟು ವೆಚ್ಚ ನಿರ್ಧಾರವಾಗುತ್ತದೆ ಎಂದು ಹೇಳಿದ್ದಾರೆ.

"ಭಾರತದಲ್ಲಿ ತಿಂಗಳಿಗೆ ₹1 ಲಕ್ಷದಲ್ಲೂ ಜೀವನ ನಡೆಸಬಹುದು. ಅದೇ ರೀತಿ, ₹1 ಕೋಟಿ ಇದ್ದರೂ ಕೆಲವರು ಬಡವರಂತೆ ಬದುಕಬಹುದು. ಎಲ್ಲವೂ ಜೀವನಶೈಲಿಯನ್ನು ಅವಲಂಬಿಸಿರುತ್ತದೆ. ಮನೆ ಖರ್ಚು ಇಲ್ಲದೆ ಮಿತವ್ಯಯದ ಜೀವನ ನಡೆಸಿದರೆ ₹1.5 ಲಕ್ಷದಲ್ಲಿ ಬದುಕುವುದು ಸಾಧ್ಯ" ಎಂಬುದು ಅವರ ಅಭಿಪ್ರಾಯದ ಸಾರವಾಗಿದೆ.

ಇನ್ಫೋಸಿಸ್ ಉದ್ಯೋಗಿಗಳಿಂದ ಸಲಹೆ ಪಡೆಯಲು ಸೂಚನೆ

ಮೈಸೂರಿನ ಇನ್ಫೋಸಿಸ್ ಕಚೇರಿಯಲ್ಲಿ ಕೆಲಸ ಮಾಡುವ ಕೆಲವು ಹಿರಿಯ ಉದ್ಯೋಗಿಗಳು ತಮ್ಮ ಕುಟುಂಬಗಳೊಂದಿಗೆ ನಗರದಲ್ಲಿ ನೆಲೆಸಿದ್ದಾರೆ ಎಂದು ಮತ್ತೊಬ್ಬರು ಗಮನ ಸೆಳೆದಿದ್ದಾರೆ.

ಕುಟುಂಬದ ಆರ್ಥಿಕ ಪರಿಸ್ಥಿತಿ ಮತ್ತು ಜೀವನಶೈಲಿಗೆ ಹೋಲಿಕೆಯಾಗುವಂತಹ ಅನುಭವ ಹೊಂದಿರುವವರನ್ನು ನೇರವಾಗಿ ಸಂಪರ್ಕಿಸಿ ಮಾಹಿತಿ ಪಡೆಯುವುದು ಉತ್ತಮ ಎಂದು ಅವರು ಸಲಹೆ ನೀಡಿದ್ದಾರೆ. ಒಟ್ಟಿನಲ್ಲಿ, ಮನೆ ಬಾಡಿಗೆಯ ಹೊರೆ ಇಲ್ಲದಿದ್ದರೆ ಮೈಸೂರಿನಲ್ಲಿ ತಿಂಗಳಿಗೆ ₹1.5 ಲಕ್ಷದಲ್ಲಿ ಆರಾಮದಾಯಕ ಜೀವನ ನಡೆಸಲು ಸಾಧ್ಯವೇ ಎಂಬ ಚರ್ಚೆ ಮುನ್ನೆಲೆಗೆ ಬಂದಿದೆ. ಆದರೆ, ಶಾಲೆಯ ಶುಲ್ಕ, ವಾಹನದ ನಿರ್ವಹಣೆ, ದಿನಸಿ ಖರ್ಚು, ಆರೋಗ್ಯದ ಅಗತ್ಯಗಳು ಮತ್ತು ಕುಟುಂಬದ ಜೀವನಶೈಲಿಯನ್ನು ಪರಿಗಣಿಸಿದ ಬಳಿಕವೇ ನಿಖರವಾದ ಮಾಸಿಕ ಬಜೆಟ್ ರೂಪಿಸಲು ಸಾಧ್ಯ. ನೆಟ್ಟಿಗರ ಅಭಿಪ್ರಾಯಗಳ ಪ್ರಕಾರ, ಸರಿಯಾದ ಯೋಜನೆ ಮತ್ತು ವೆಚ್ಚಗಳ ನಿಯಂತ್ರಣ ಈ ಕುಟುಂಬದ ಪಾಲಿಗೆ ಪ್ರಮುಖವಾಗಲಿದೆ.

ನೀರಿಲ್ಲದ KRS ಅಣೆಕಟ್ಟೆಯಿಂದ 15 ದಿನ ತಮಿಳುನಾಡಿಗೆ 3 ಸಾವಿರ ಕ್ಯೂಸೆಕ್‌ ನೀರು ಹರಿಸಲು CWMA ಆದೇಶ, ತಲೆ ಮೇಲೆ ಕೈಹೊತ್ತು ಕುಳಿತ ಕರ್ನಾಟಕ

Santosh Naik — Fri, 23 Oct 2026 16:26:13 +0530

ನವದೆಹಲಿ (ಅ.23): ತೀವ್ರ ಬರಗಾಲ ಹಾಗೂ ಕುಡಿಯುವ ನೀರಿನ ಅಭಾವದಿಂದ ಕಂಗೆಟ್ಟಿರುವ ಕರ್ನಾಟಕಕ್ಕೆ ಮತ್ತೊಂದು ಭಾರಿ ಆಘಾತ ಎದುರಾಗಿದೆ. ಕಾವೇರಿ ನೀರು ನಿಯಂತ್ರಣ ಸಮಿತಿಯು (CWRC) ತಮಿಳುನಾಡಿಗೆ ನೀರು ಬಿಡುವಂತೆ ಮಾಡಿದ್ದ ಶಿಫಾರಸನ್ನು ಕಾವೇರಿ ನೀರು ನಿರ್ವಹಣಾ ಪ್ರಾಧಿಕಾರವು (CWMA) ಎತ್ತಿಹಿಡಿದಿದೆ. ಇದರೊಂದಿಗೆ ಮುಂದಿನ 15 ದಿನಗಳ ಕಾಲ ತಮಿಳುನಾಡಿಗೆ ನಿತ್ಯ 3,000 ಕ್ಯೂಸೆಕ್ ನೀರನ್ನು ಹರಿಸುವಂತೆ ಪ್ರಾಧಿಕಾರವು ಕರ್ನಾಟಕಕ್ಕೆ ಕಟ್ಟುನಿಟ್ಟಿನ ಆದೇಶ ನೀಡಿದೆ. ಈ ಕುರಿತು ಮುಂದಿನ ಕಾವೇರಿ ನೀರು ನಿರ್ವಹಣಾ ಪ್ರಾಧಿಕಾರದ (CWMA) ಸಭೆಯನ್ನು ಬರುವ ನವೆಂಬರ್ 6 ರಂದು ನಡೆಸಲು ತೀರ್ಮಾನಿಸಲಾಗಿದೆ.

ಸಿಡಬ್ಲ್ಯೂಆರ್‌ಸಿ ಶಿಫಾರಸಿಗೆ ಕರ್ನಾಟಕದ ತೀವ್ರ ಆಕ್ಷೇಪ

ಇದಕ್ಕೂ ಮುನ್ನ, ತಮಿಳುನಾಡಿಗೆ 15 ದಿನಗಳ ಕಾಲ ದಿನವೂ 3,000 ಕ್ಯೂಸೆಕ್ ನೀರು ಹರಿಸುವಂತೆ ಸಿಡಬ್ಲ್ಯೂಆರ್‌ಸಿ (CWRC) ಶಿಫಾರಸು ಮಾಡಿತ್ತು. ಆದರೆ, ಈ ಶಿಫಾರಸಿಗೆ ಕರ್ನಾಟಕ ಸರ್ಕಾರವು ತೀವ್ರ ವಿರೋಧ ವ್ಯಕ್ತಪಡಿಸಿತ್ತು. ಇಡೀ ಕರ್ನಾಟಕದಲ್ಲಿ, ಅದರಲ್ಲೂ ಪ್ರಮುಖವಾಗಿ ಕಾವೇರಿ ಜಲಾನಯನ ಪ್ರದೇಶದ ಬಹುತೇಕ ತಾಲ್ಲೂಕುಗಳಲ್ಲಿ ಬರಗಾಲ ಘೋಷಣೆಯಾಗಿದೆ. ನಮ್ಮಲ್ಲೇ ಕುಡಿಯಲು ಹಾಗೂ ಕೃಷಿಗೆ ತೀವ್ರ ನೀರಿನ ಅಭಾವವಿರುವಾಗ ತಮಿಳುನಾಡಿಗೆ ಯಾವುದೇ ಕಾರಣಕ್ಕೂ 3,000 ಕ್ಯೂಸೆಕ್ ನೀರನ್ನು ಹರಿಸಲು ಸಾಧ್ಯವೇ ಇಲ್ಲ ಎಂದು ಕರ್ನಾಟಕ ಸರ್ಕಾರ ಹೇಳಿತ್ತು.

ದೆಹಲಿಯ ಸಿಡಬ್ಲ್ಯೂಎಮ್‌ಎ ಸಭೆಯಲ್ಲಿ ನಡೆದಿದ್ದೇನು?

ಸಿಡಬ್ಲ್ಯೂಆರ್‌ಸಿ ಮಾಡಿದ್ದ ನೀರು ಹಂಚಿಕೆಯ ಶಿಫಾರಸನ್ನು ಪ್ರಶ್ನಿಸಿ ಕರ್ನಾಟಕ ಸಲ್ಲಿಕೆ ಮಾಡಿದ್ದ ಆಕ್ಷೇಪಣೆಯ ಹಿನ್ನೆಲೆಯಲ್ಲಿ, ನವದೆಹಲಿಯಲ್ಲಿರುವ ಸಿಡಬ್ಲ್ಯೂಎಮ್‌ಎ ಕಚೇರಿಯಲ್ಲಿ ಇಂದು ಮಧ್ಯಾಹ್ನ 3 ಗಂಟೆಗೆ ಮಹತ್ವದ ಸಭೆ ನಡೆಯಿತು.

ಈ ಸಭೆಯಲ್ಲಿ ಕರ್ನಾಟಕ ಸರ್ಕಾರದ ಪರವಾಗಿ ಸರ್ಕಾರದ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ (ACS) ಗೌರವ್ ಗುಪ್ತಾ ಅವರು ಭಾಗವಹಿಸಿದ್ದರು. ಸಭೆ ಆರಂಭವಾಗುತ್ತಿದ್ದಂತೆ, ಸಿಡಬ್ಲ್ಯೂಆರ್‌ಸಿ ನೀಡಿದ್ದ ನೀರು ಹರಿಸುವ ಶಿಫಾರಸಿಗೆ ಗೌರವ್ ಗುಪ್ತಾ ಅವರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು. ರಾಜ್ಯದಲ್ಲಿ ಎದುರಾಗಿರುವ ಭೀಕರ ಬರಗಾಲದ ಪರಿಸ್ಥಿತಿ, ಜಲಾಶಯಗಳಲ್ಲಿರುವ ನೀರಿನ ಸಂಗ್ರಹದ ಕೊರತೆ ಹಾಗೂ ಸಾರ್ವಜನಿಕರ ಕುಡಿಯುವ ನೀರಿನ ಅಗತ್ಯತೆಯನ್ನು ಆಧಾರಸಹಿತವಾಗಿ ವಿವರಿಸಿದರು.

ಅಂತಿಮವಾಗಿ ಸಿಡಬ್ಲ್ಯೂಆರ್‌ಸಿ ನಿರ್ಧಾರವೇ ಎತ್ತಿಹಿಡಿದ ಪ್ರಾಧಿಕಾರ

ಕರ್ನಾಟಕದ ಅಧಿಕಾರಿಗಳು ರಾಜ್ಯದ ವಾಸ್ತವ ಬರಗಾಲದ ಪರಿಸ್ಥಿತಿಯನ್ನು ಪ್ರಾಧಿಕಾರದ ಮುಂದೆ ಮನವರಿಕೆ ಮಾಡಿಕೊಡಲು ಸತತ ಯತ್ನ ನಡೆಸಿದರೂ, ಅಂತಿಮವಾಗಿ ಕಾವೇರಿ ನೀರು ನಿರ್ವಹಣಾ ಪ್ರಾಧಿಕಾರವು (CWMA) ಸಿಡಬ್ಲ್ಯೂಆರ್‌ಸಿ (CWRC) ನೀಡಿದ್ದ ಶಿಫಾರಸನ್ನೇ ಎತ್ತಿಹಿಡಿದಿದೆ. ತಮಿಳುನಾಡಿನ ಸುಳ್ಳು ವಾದಗಳಿಗೆ ಮಣಿದಂತೆ ಕಾಣುತ್ತಿರುವ ಪ್ರಾಧಿಕಾರ, ತಕ್ಷಣವೇ ಜಾರಿಗೆ ಬರುವಂತೆ ಮುಂದಿನ 15 ದಿನಗಳ ಕಾಲ ದಿನಕ್ಕೆ 3,000 ಕ್ಯೂಸೆಕ್ ನೀರನ್ನು ಹರಿಸಲೇಬೇಕು ಎಂದು ಆದೇಶಿಸಿದೆ. ರಾಜ್ಯದಲ್ಲಿ ಮಳೆಯಿಲ್ಲದೆ ಕಾವೇರಿ ಜಲಾನಯನ ಪ್ರದೇಶದ ಜಲಾಶಯಗಳು ಬರಿದಾಗುತ್ತಿರುವ ಬೆನ್ನಲ್ಲೇ, ಪ್ರಾಧಿಕಾರದ ಈ ಆದೇಶವು ಕಾವೇರಿ ಪಾತ್ರದ ರೈತರು ಹಾಗೂ ಸಾರ್ವಜನಿಕರಲ್ಲಿ ತೀವ್ರ ಕಳವಳ ಮತ್ತು ಆಕ್ರೋಶವನ್ನುಂಟುಮಾಡಿದೆ.

Mysuru: ಸರ್ಕಾರ-ಅರಮನೆ ನಡುವೆ ಸಮನ್ವಯದ ಕೊರತೆ, ನೂರಾರು ವರ್ಷಗಳಿಂದ ನಡೆದುಕೊಂಡು ಬಂದಿದ್ದ ವಜ್ರಮುಷ್ಠಿ ಕಾಳಗ ಕ್ಯಾನ್ಸಲ್‌!

Santosh Naik — Wed, 21 Oct 2026 16:16:18 +0530

ಮೈಸೂರು (ಅ.21): ವಿಶ್ವಪ್ರಸಿದ್ಧ ಮೈಸೂರು ದಸರಾ ಮಹೋತ್ಸವದ ವಿಜಯದಶಮಿಯ ಶುಭ ದಿನದಂದು ಮೈಸೂರು ಅರಮನೆ ಆವರಣದಲ್ಲಿ ಪೊಲೀಸರ ಅತಿಯಾದ ನಿರ್ಬಂಧ ಹಾಗೂ ಗೊಂದಲಕಾರಿ ನಡವಳಿಕೆಯಿಂದಾಗಿ ನೂರಾರು ವರ್ಷಗಳಿಂದ ಶ್ರದ್ಧಾಭಕ್ತಿಯಿಂದ ನಡೆದುಕೊಂಡು ಬಂದಿದ್ದ ಸಾಂಪ್ರದಾಯಿಕ ಆಚರಣೆಗಳೇ ಸಂಪೂರ್ಣ ಉಲ್ಟಾಪಲ್ಟಿಯಾದ ಘಟನೆ ನಡೆದಿದೆ. ಅರಮನೆಯಲ್ಲಿ ರಾಜಪರಂಪರೆಯಂತೆ ನಡೆಯಬೇಕಿದ್ದ ಐತಿಹಾಸಿಕ 'ವಜ್ರಮುಷ್ಟಿ ಕಾಳಗ'ದ ಪ್ರಕ್ರಿಯೆಗೆ ಪೊಲೀಸರು ಅಡ್ಡಿಪಡಿಸಿದ್ದು, ಪಾಸ್ ಹೊಂದಿದ್ದರೂ ಜೆಟ್ಟಿ ಪೈಲ್ವಾನರನ್ನು ಒಳಗೆ ಬಿಡದೆ ತಡೆದ ಪರಿಣಾಮ ಅರಮನೆ ಆವರಣದಲ್ಲಿ ಭಾರಿ ಅವ್ಯವಸ್ಥೆ ಹಾಗೂ ವಾಗ್ವಾದ ಸೃಷ್ಟಿಯಾಗಿದೆ.

ವಿಜಯದಶಮಿಯಂದು ಬೆಳಿಗ್ಗೆ 9 ಗಂಟೆಗೆ ಸರಿಯಾಗಿ ಸಾಂಪ್ರದಾಯಿಕ ವಜ್ರಮುಷ್ಟಿ ಕಾಳಗ ನಡೆಯಬೇಕಿತ್ತು. ಇದಕ್ಕಾಗಿ ಪ್ರಮುಖ ಜೆಟ್ಟಿಗಳು ಅರಮನೆಯ ಶ್ವೇತ ವರಾಹ ಸ್ವಾಮಿ ದೇವಾಲಯದ ಬಳಿ ಜಾತಿಗಳ ಪೂಜೆ ಕಾರ್ಯ ನೆರವೇರಿಸಿ, ಸುಮಾರು ಒಂದೂವರೆ ಗಂಟೆಗೂ ಹೆಚ್ಚು ಕಾಲ ಪೂರ್ವಾಭಾವಿ ಸಿದ್ಧತೆಗಳನ್ನು ಕೈಗೊಳ್ಳಬೇಕಿತ್ತು.

ರಾಜವಂಶಸ್ಥರು ನೀಡಿರುವ ಅಧಿಕೃತ ಪಾಸ್‌ಗಳನ್ನು ಕೈಯಲ್ಲಿ ಹಿಡಿದುಕೊಂಡು ಬಂದಿದ್ದರೂ ಪೊಲೀಸರು ಜೆಟ್ಟಿಗಳನ್ನು ಹಾಗೂ ಅವರ ಕಡೆಯವರನ್ನು ಅರಮನೆ ಆವರಣಕ್ಕೆ ಬಿಡದೆ ತಡೆದು ವಿಳಂಬ ಮಾಡಿದರು. ಕೆಲವರನ್ನು ಮಾತ್ರ ಒಳಗೆ ಬಿಟ್ಟು, ಇನ್ನು ಕೆಲವರನ್ನು ಹೊರಗೆ ತಡೆದು ನಿಲ್ಲಿಸಲಾಯಿತು. ಅಷ್ಟೇ ಅಲ್ಲದೆ, ಪ್ರಮುಖ ಪೂಜೆ ನಡೆಯಬೇಕಿದ್ದ ಶ್ವೇತ ವರಾಹ ಸ್ವಾಮಿ ದೇವಾಲಯವೂ ಸಮಯಕ್ಕೆ ಸರಿಯಾಗಿ ಓಪನ್ ಆಗಿರಲಿಲ್ಲ.

ಈ ಕುರಿತು ತೀವ್ರ ಅಸಮಾಧಾನ ವ್ಯಕ್ತಪಡಿಸಿರುವ ಬೆಂಗಳೂರು ಗರಡಿ ಜೆಟ್ಟಿ ಸಂಘದ ಅಧ್ಯಕ್ಷ ಜಗನ್ನಾಥ್ ಎ. ಜೆಟ್ಟಿ, "ಎಲ್ಲಾ ಜೆಟ್ಟಿಗಳು ಒಂದೆಡೆ ಸೇರಿದರಷ್ಟೇ ಕಾಳಗದ ಸಿದ್ಧತೆ ಸಾಧ್ಯ. ಕಾಳಗ ಆರಂಭಕ್ಕೂ ಮುನ್ನ ಒಂದೂವರೆ ಗಂಟೆ ಸಿದ್ಧತೆ ಮಾಡಿಕೊಳ್ಳಬೇಕಿತ್ತು. ಆದರೆ ಪೊಲೀಸರು ಪಾಸ್ ಇದ್ದರೂ ಒಳಗೆ ಬಿಡದೆ ಅನಗತ್ಯ ಕಿರಿಕಿರಿ ಉಂಟುಮಾಡಿದ್ದಾರೆ" ಎಂದು ಕಿಡಿಕಾರಿದ್ದಾರೆ.

ಸರ್ಕಾರ-ಅರಮನೆ ನಡುವೆ ಸಮನ್ವಯದ ಕೊರತೆ

ಅರಮನೆ ಆಡಳಿತ ಹಾಗೂ ಸರ್ಕಾರದ ಪೊಲೀಸ್ ಇಲಾಖೆ ನಡುವೆ ಸೂಕ್ತ ಸಮನ್ವಯದ ಕೊರತೆ ಎದ್ದು ಕಾಣುತ್ತಿದ್ದು, ರಾಜವಂಶಸ್ಥರಿಗೆ ಪೊಲೀಸ್ ಅಧಿಕಾರಿಗಳು ಸರಿಯಾಗಿ ಸ್ಪಂದಿಸುತ್ತಿಲ್ಲ ಎಂಬ ಆರೋಪ ಕೇಳಿಬಂದಿದೆ. ರಾಜವಂಶಸ್ಥರು ನೀಡಿರುವ ಗೌರವಾನ್ವಿತ ಪಾಸ್‌ಗಳಿಗೂ ಬೆಲೆ ನೀಡದೆ ಪೊಲೀಸರು ಅತಿಯಾಗಿ ವರ್ತಿಸಿದ್ದರಿಂದ, ಮುಹೂರ್ತದ ಒಳಗಾಗಿ ಅರಮನೆಯೊಳಗೆ ಬಂದು ಸಿದ್ಧತೆ ನಡೆಸಲು ಸಾಧ್ಯವಾಗದೆ ಜೆಟ್ಟಿ ಪೈಲ್ವಾನರು ಹಾಗೂ ಉಸ್ತಾದ್‌ಗಳು ಕಂಗಾಲಾದರು. ಅಂತಿಮವಾಗಿ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ಅವರು ಖಾಸಗಿ ದರ್ಬಾರ್ ಮುಗಿಸಿ ವಿಜಯಯಾತ್ರೆ ಹೊರಟ ನಂತರವಷ್ಟೇ ಜಟ್ಟಿಗಳಿಗೆ ಅರಮನೆಯೊಳಗೆ ಪ್ರವೇಶಿಸಲು ಸಾಧ್ಯವಾಯಿತು.

ವಿಜಯಯಾತ್ರೆಯ ಮುಹೂರ್ತ ಮೀರುವ ಆತಂಕ - ಆಚರಣೆ ಉಲ್ಟಾಪಲ್ಟ!:

ಸಾಮಾನ್ಯವಾಗಿ ಅರಮನೆಯಲ್ಲಿ ಮೊದಲು ವಜ್ರಮುಷ್ಟಿ ಕಾಳಗ ನಡೆದು, ಆ ನಂತರ ರಾಜವಂಶಸ್ಥರ ವಿಜಯಯಾತ್ರೆ ನಡೆಯುವುದು ನೂರಾರು ವರ್ಷಗಳ ಸಂಪ್ರದಾಯ. ಆದರೆ ಪೊಲೀಸರ ಕಿರಿಕಿನಿಂದಾಗಿ ಜಟ್ಟಿಗಳು ಕಾಳಗದ ಅಂಕಣ ತಲುಪಲು ತಡವಾಯಿತು. ಈ ನಡುವೆ ವಿಜಯಯಾತ್ರೆಯ ಶುಭ ಮುಹೂರ್ತವೇ ಮೀರಿ ಹೋಗುವ ಆತಂಕ ಸೃಷ್ಟಿಯಾಯಿತು. ಸ್ಥಿತಿಗತಿಯನ್ನು ಅರಿತ ಅರಮನೆ ಮಂಡಳಿ ಹಾಗೂ ರಾಜವಂಶಸ್ಥರು, ಸಾಂಪ್ರದಾಯಿಕ ಕ್ರಮವನ್ನು ಬದಲಿಸಿ ಮೊದಲು ಯದುವೀರ್ ಅವರ 'ವಿಜಯಯಾತ್ರೆ'ಯನ್ನು ಆರಂಭಿಸಿದರು. ವಿಜಯಯಾತ್ರೆ ಹಾಗೂ ಬನ್ನಿ ಪೂಜೆ ಪೂರ್ಣಗೊಂಡ ನಂತರವಷ್ಟೇ ವಜ್ರಮುಷ್ಟಿ ಕಾಳಗ ನಡೆಸಲು ತೀರ್ಮಾನಿಸಲಾಯಿತು.

ಪೊಲೀಸರೊಂದಿಗೆ ಸುದೀರ್ಘ ವಾಗ್ವಾದ ನಡೆಸಿದ ಬಳಿಕ ಕೊನೆಗೂ ಜಟ್ಟಿಗಳು ಕಾಳಗದ ಅಂಕಣಕ್ಕೆ ತೆರಳಿದ್ದಾರಾದರೂ, ಯೋಜಿತ ಸಮಯಕ್ಕೆ ಕಾಳಗ ನಡೆಯದ ಕಾರಣ ಸದ್ಯ ವಜ್ರಮುಷ್ಟಿ ಕಾಳಗ ರದ್ದುಪಡಿಸಲು ತೀರ್ಮಾನಿಸಲಾಗಿದೆ. ಖಾಕಿ ಪಡೆಯ ಈ ಭಾರಿ ಎಡವಟ್ಟಿನ ವಿರುದ್ಧ ಮೈಸೂರಿನ ಸಾಂಪ್ರದಾಯಿಕ ಪ್ರಜಾವರ್ಗ ಹಾಗೂ ರಾಜಮನೆತನದ ಅಭಿಮಾನಿಗಳಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿದೆ.

ಕೊಪ್ಪಳ ಗವಿಮಠದಿಂದ ಮೈಸೂರಿಗೆ, ಬರೊಬ್ಬರಿ 460 ಕಿ.ಮೀ. ಕೈಬಿಟ್ಟು ಬೈಕ್ ರೈಡ್! ಸಾಹಸದ ಹಿಂದಿದೆ ದೊಡ್ಡ ಸಂದೇಶ

Kannadaprabha News — Tue, 20 Oct 2026 07:35:14 +0530

ಕೊಪ್ಪಳ (ಅ.20) ಯುವಶಕ್ತಿ ಜಾಗೃತಿ, ವ್ಯಸನಮುಕ್ತ ಸಮಾಜ ಹಾಗೂ ಕನ್ನಡ ನಾಡು-ನುಡಿಯ ಸಂರಕ್ಷಣೆಯ ಸಂದೇಶ ಸಾರುವ ಉದ್ದೇಶದಿಂದ ಬಾಗಲಕೋಟೆ ಜಿಲ್ಲೆಯ ಇಳಕಲ್ಲಿನ ಬೈಕ್ ಸಾಹಸಿ ಈರಣ್ಣ ಜಿ. ಕುಂದರಗಿಮಠ ಅವರು ಕೊಪ್ಪಳದ ಗವಿಮಠದಿಂದ ಮೈಸೂರಿನ ಚಾಮುಂಡೇಶ್ವರಿ ದೇವಸ್ಥಾನದವರೆಗೆ ಕೈಬಿಟ್ಟು ಬೈಕ್ ಸಾಹಸ ಯಾನ ಕೈಗೊಂಡಿದ್ದಾರೆ.

ಗವಿಮಠದಿಂದ ಸಾಹಸ ಯಾನಕ್ಕೆ ಚಾಲನೆ

ಸೋಮವಾರ ಬೆಳಗ್ಗೆ ಗವಿಮಠದ ಅಭಿನವ ಶ್ರೀ ಗವಿಸಿದ್ದೇಶ್ವರ ಮಹಾಸ್ವಾಮೀಜಿಗಳು ಸಾಹಸ ಯಾನಕ್ಕೆ ಚಾಲನೆ ನೀಡಿದರು. ಸುಮಾರು 460 ಕಿ.ಮೀ. ದೂರದ ಈ ಯಾನ ಹೊಸಪೇಟೆ, ಕೂಡ್ಲಿಗಿ, ಚಿತ್ರದುರ್ಗ, ಹಿರಿಯೂರು, ಶಿರಾ, ತುಮಕೂರು, ಕುಣಿಗಲ್, ಮದ್ದೂರು ಹಾಗೂ ಮಂಡ್ಯ ಮಾರ್ಗವಾಗಿ ಸಾಗಲಿದೆ.

ಯಾರೂ ಈ ಸಾಹಸಿ?

ಈರಣ್ಣ ಅವರು ಈ ಹಿಂದೆ ಬಾಗಲಕೋಟೆಯಿಂದ ಬೆಂಗಳೂರಿಗೆ 510 ಕಿ.ಮೀ. ಹಾಗೂ ಕಲಬುರಗಿಯಿಂದ ಬೆಂಗಳೂರಿಗೆ 860 ಕಿ.ಮೀ. ದೂರವನ್ನು ಕೈಬಿಟ್ಟು ಬೈಕ್ ಚಲಾಯಿಸಿ ಗಮನ ಸೆಳೆದಿದ್ದರು.

ಕನ್ನಡ ಧ್ವಜ ಹಾಗೂ ನಾಡದೇವತೆ ಚಾಮುಂಡೇಶ್ವರಿಯ ಲಾಂಛನದೊಂದಿಗೆ ಸಾಗುವ ಈ ಯಾನವು ಯುವಜನರಲ್ಲಿ ಕನ್ನಡ ಭಾಷೆ, ಸಂಸ್ಕೃತಿ ಮತ್ತು ಪರಂಪರೆಯ ಬಗ್ಗೆ ಅಭಿಮಾನ ಮೂಡಿಸುವ ಆಶಯ ಹೊಂದಿದೆ. ಯುವಕರು ವ್ಯಸನಗಳಿಂದ ದೂರವಿದ್ದು, ಸಕಾರಾತ್ಮಕ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳಬೇಕು ಎಂಬ ಸಂದೇಶವನ್ನೂ ಸಾರಲಿದೆ.

Mysuru ಅರಮನೆಯಲ್ಲಿ ಮಮತೆಯ ದರ್ಬಾರ್: ರಾಜಮಾತೆ-ಮೊಮ್ಮಗನ ತುಂಟಾಟಕ್ಕೆ ದಸರಾ ಜನತೆ ಫಿದಾ!

Bhimasi M Koleppanavar — Wed, 21 Oct 2026 13:55:05 +0530

ಮೈಸೂರು ದಸರಾ ಎಂದರೆ ನೆನಪಾಗುವುದು ರಾಜ ಗಾಂಭೀರ್ಯದ ಹೆಜ್ಜೆ ಇಡುವ ಆನೆ, ಅಂಬಾರಿ, ಮತ್ತು ತಾಯಿ ಚಾಮುಂಡೇಶ್ವರ ಜಂಬೂ ಸವಾರಿ. ಅಲ್ಲದೇ ಸಾಂಪ್ರದಾಯಿಕ ಪೂಜ, ಶಿಸ್ತಿನ ವಿಧಿವಿಧಾನಗಳು. ಆದರೆ, ಈ ಭವ್ಯತೆಯ ನಡುವೆ ಜನರ ಹೃದಯವನ್ನು ಅತಿ ಹೆಚ್ಚು ಸ್ಪರ್ಶಿಸುತ್ತಿರುವುದು ಅರಮನೆಯ ಒಳಗೆ ಕಂಡುಬರುತ್ತಿರುವ ಮಮತೆಯ ಮತ್ತು ಕೌಟುಂಬಿಕ ಕ್ಷಣಗಳು. ಈ ಬಾರಿ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿರುವ ವಿಡಿಯೋಗಳು ರಾಜಮನೆತನದ ಆಚೆಗಿನ ಒಂದು ಸುಂದರ ಅಜ್ಜಿ-ಮೊಮ್ಮಗನ ಭಾವನಾತ್ಮಕ ಬಾಂಧವ್ಯವನ್ನು ಜಗತ್ತಿಗೆ ಪರಿಚಯಿಸುತ್ತಿವೆ. ಈ ಕುರಿತು ಕಂಪ್ಲೀಟ್‌ ಸ್ಟೋರಿ ಇಲ್ಲಿದೆ.

ರಾಜ ಗಾಂಭೀರ್ಯದ ನಡುವೆ ಅರಳಿದ ಕೌಟುಂಬಿಕ ಪ್ರೀತಿ!

ಅರಮನೆಯ ಖಾಸಗಿ ದರ್ಬಾರ್ ಮತ್ತು ಆಯುಧ ಪೂಜೆಯ ಸಂದರ್ಭಗಳು ಅತ್ಯಂತ ಕಟ್ಟುನಿಟ್ಟಿನ ನಿಯಮಗಳಿಂದ ಕೂಡಿರುತ್ತವೆ. ಇಂತಹ ಗಂಭೀರ ವಾತಾವರಣದ ನಡುವೆಯೂ, ಪ್ರಮೋದಾದೇವಿ ಒಡೆಯರ್ ಮತ್ತು ಅವರ ಮುದ್ದಿನ ಮೊಮ್ಮಗ ಆದ್ಯವೀರ್ ಒಡೆಯರ್ ನಡುವಿನ ಮುದ್ದಾದ ತುಂಟಾಟ ಇಡೀ ಹಬ್ಬಕ್ಕೆ ಒಂದು ಕೌಟುಂಬಿಕ ಕಳೆ ತಂದುಕೊಟ್ಟಿದೆ. ಸಿಂಹಾಸನದ ಮೇಲಿರುವ ರಾಜಪ್ರಭುತ್ವದ ಗಾಂಭೀರ್ಯಕ್ಕಿಂತ, ಅಲ್ಲಿ ಹರಿಯುತ್ತಿರುವ ಅಜ್ಜಿ-ಮೊಮ್ಮಗನ ಪ್ರೀತಿ ದೊಡ್ಡದು ಎಂಬುದನ್ನು ಈ ಕ್ಷಣಗಳು ನಿರೂಪಿಸುತ್ತವೆ.

ಪ್ರಮೋದಾ ದೇವಿ ಒಡೆಯರ್ ಕಣ್ಣುಗಳಲ್ಲಿ ಮೂಡಿದ ಮಿನುಗು!

ಪತಿ ಶ್ರೀಕಂಠದತ್ತ ನರಸಿಂಹರಾಜ ಒಡೆಯರ್ ಅವರ ಅಗಲಿಕೆಯ ನಂತರ, ಇಡೀ ರಾಜಮನೆತನವನ್ನು ಮತ್ತು ದಸರಾ ಪರಂಪರೆಯನ್ನು ಮುನ್ನಡೆಸಿಕೊಂಡು ಬಂದವರು ಪ್ರಮೋದಾದೇವಿ ಒಡೆಯರ್‍‌. ಇಂದು ಅವರದ್ದೇ ಮಡಿಲಲ್ಲಿ ಬೆಳೆಯುತ್ತಿರುವ ಪುಟ್ಟ ಯುವರಾಜ ಆದ್ಯವೀರ್, ತಂದೆ ಯದುವೀರ್ ಒಡೆಯರ್ ಅವರ ಪಕ್ಕದಲ್ಲಿ ರಾಜ ಪೋಷಾಕು ಧರಿಸಿ ಶಿಸ್ತಿನಿಂದ ಕುಳಿತುಕೊಳ್ಳುವುದನ್ನು ನೋಡುವಾಗ, ರಾಜಮಾತೆಯ ಕಣ್ಣುಗಳಲ್ಲಿ ಮೂಡುವ ತೃಪ್ತಿ ಮತ್ತು ಹೆಮ್ಮೆಯ ಮಿನುಗು ಕೋಟಿ ರೂಪಾಯಿ ಕೊಟ್ಟರೂ ಸಿಗದ ಅದ್ಭುತ ಭಾವನೆ.

ಪರಂಪರೆಯ ಹಸ್ತಾಂತರಕ್ಕೆ ಸಾಕ್ಷಿಯಾದ ಮುಗ್ಧತೆ!

ಪುಟ್ಟ ವಯಸ್ಸಿನ ಆದ್ಯವೀರ್ ತನ್ನ ತಂದೆಯನ್ನು ನೋಡಿ ಅದೇ ರೀತಿ ಸಾರ್ವಜನಿಕರಿಗೆ ಕೈಮುಗಿಯುವುದು, ರಾಜರ ಶೈಲಿಯಲ್ಲಿ ಸೆಲ್ಯೂಟ್ ಹೊಡೆಯುವುದನ್ನು ಕಣ್ಣುಂಬಿಕೊಳ್ಳುವುದು ಭಾವುಕ ಕ್ಷಣ. ಶತಮಾನಗಳ ಇತಿಹಾಸವಿರುವ ರಾಜಪರಂಪರೆ ಹೇಗೆ ಮುಂದಿನ ಪೀಳಿಗೆಗೆ ಅತ್ಯಂತ ಸಹಜವಾಗಿ ಮತ್ತು ಮುಗ್ಧವಾಗಿ ಹಸ್ತಾಂತರವಾಗುತ್ತಿದೆ ಎಂಬುದಕ್ಕೆ ಈ ಪುಟ್ಟ ಯುವರಾಜನ ನಡವಳಿಕೆಯೇ ಸಾಕ್ಷಿ. ಇದನ್ನು ಅರಮನೆಯ ಗ್ಯಾಲರಿಯಲ್ಲಿ ಕುಳಿತು ಹೆಮ್ಮೆಯಿಂದ ನೋಡುವ ತಾಯಿ ತ್ರಿಷಿಕಾ ಕುಮಾರಿ ಅವರ ಮುಖದ ಭಾವನೆಗಳು ಪ್ರತಿಯೊಬ್ಬ ತಾಯಿಗೂ ಕನೆಕ್ಟ್ ಆಗುವಂತಿವೆ.

ಗಾಂಭೀರ್ಯ ಸರಿಸಿ ನಿಲ್ಲುವ ಮೊಮ್ಮಗನ ತುಂಟಾಟ!

ಎಷ್ಟೇ ರಾಜಮನೆತನವಾದರೂ ಮಗುವಿನ ಮುಗ್ಧತೆ ಮತ್ತು ತುಂಟಾಟಕ್ಕೆ ಯಾವುದೇ ಬೌಂಡರಿ ಇರುವುದಿಲ್ಲ. ಪೂಜೆಯ ಮಧ್ಯೆ ಮುದ್ದಾಗಿ ಆಕಳಿಸುವುದು, ಸುತ್ತಲೂ ಕುತೂಹಲದಿಂದ ನೋಡುವುದು ಮತ್ತು ಅಜ್ಜಿಯ ಹತ್ತಿರ ಬಂದಾಗ ಅವರ ಸೆರಗು ಹಿಡಿದು ಎಳೆಯುವ ಮುದ್ದಾದ ತುಂಟಾಟಗಳು ಜನರ ಮನಸ್ಸು ಕದಿಯುತ್ತಿವೆ. ಸದಾ ಗಂಭೀರ ಮುಖಭಾವದಿಂದ ಧಾರ್ಮಿಕ ವಿಧಿವಿಧಾನಗಳಲ್ಲಿ ನಿರತರಾಗಿರುವ ಪ್ರಮೋದಾದೇವಿ ಒಡೆಯರ್‍‌, ಮೊಮ್ಮಗನ ತುಂಟಾಟಕ್ಕೆ ಕೊಡುವ ಮುಗುಳ್ನಗು ಮತ್ತು ಅವನ ತಲೆ ಸವರುವ ರೀತಿ ಅರಮನೆಯಲ್ಲೂ ಸಾಮಾನ್ಯರಂತೆಯೇ ಇರುವ ಅಜ್ಜಿ-ಮೊಮ್ಮಗನ ಮಮತೆಯ ಲೋಕವನ್ನು ಎತ್ತಿ ತೋರಿಸುತ್ತದೆ.

ನೆಟ್ಟಿಗರ ಮನಗೆದ್ದ 'ರಿಯಲ್' ಕೌಟುಂಬಿಕ ಮೌಲ್ಯಗಳು!

ಇಂದಿನ ಡಿಜಿಟಲ್ ಯುಗದಲ್ಲಿ ಜಂಟಿ ಕುಟುಂಬಗಳು ಮತ್ತು ಹಿರಿಯರೊಂದಿಗಿನ ಬಾಂಧವ್ಯ ಕಡಿಮೆ ಆಗುತ್ತಿರುವಾಗ, ಮೈಸೂರು ಅರಮನೆಯ ಈ ದೃಶ್ಯಗಳು ಸಮಾಜಕ್ಕೆ ಒಂದು ಸಂದೇಶ ನೀಡುತ್ತಿವೆ. ಇದೇ ಕಾರಣಕ್ಕೆ ಇನ್ಸ್ಟಾಗ್ರಾಮ್ ಮತ್ತು ಯೂಟ್ಯೂಬ್‌ನಲ್ಲಿ ಜನರು ಇವುಗಳನ್ನು ಕೇವಲ 'ರಾಜಮನೆತನದ ವಿಡಿಯೋ' ಎಂದು ನೋಡುತ್ತಿಲ್ಲ, ಬದಲಿಗೆ ತಮ್ಮದೇ ಮನೆಯ ಹಬ್ಬದ ಸಂಭ್ರಮದಂತೆ ಭಾವನಾತ್ಮಕವಾಗಿ ಸ್ವೀಕರಿಸಿ, ಲಕ್ಷಾಂತರ ಲೈಕ್ಸ್ ಮತ್ತು ಕಮೆಂಟ್‌ಗಳ ಮೂಲಕ ಪ್ರೀತಿ ಹರಿಸುತ್ತಿದ್ದಾರೆ.

ದಸರಾ ಎಂದರೇನೇ ಪ್ರಿತಿಯ ಪರಂಪರೆ!

ಕೊನೆಯದಾಗಿ, ಮೈಸೂರು ದಸರಾ ಎಂದರೆ ಕೇವಲ ಅಂಬಾರಿ, ಆನೆಗಳು ಮತ್ತು ದೀಪಾಲಂಕಾರದ ವೈಭವವಷ್ಟೇ ಅಲ್ಲ; ಅದು ತಲೆಮಾರುಗಳನ್ನು ಬೆಸೆಯುವ ಪ್ರೀತಿ, ಪರಂಪರೆ ಮತ್ತು ಕೌಟುಂಬಿಕ ಮೌಲ್ಯಗಳ ಮಹಾಸಂಗಮ ಎಂಬುದನ್ನು ಅರಮನೆಯ ಈ 'ಮಮತೆಯ ದರ್ಬಾರ್' ಸಾಬೀತುಪಡಿಸಿದೆ.

ಅರಮನೆ ಬೋರ್ಡ್, ಅರಮನೆ ಜಾಗ ಸರ್ಕಾರದ್ದು, ಅವರಿಗೆ ಉಳಿದುಕೊಳ್ಳಲು ಒಂದಿಷ್ಟು ಜಾಗ ಕೊಟ್ಟಿದ್ದೇವಷ್ಟೇ: ಯತೀಂದ್ರ ಸಿದ್ದರಾಮಯ್ಯ

Suchethana D — Mon, 26 Oct 2026 12:16:16 +0530

ಮೈಸೂರು: ತಲೆತಲಾಂತರಗಳಿಂದ ಮೈಸೂರು ರಾಜರ ಒಡೆತನದಲ್ಲಿರುವ ಚಿನ್ನದ ಅಂಬಾರಿಯ ವಿಷಯವಾಗಿ ಇದೀಗ ರಾಜಮನೆತನ ಮತ್ತು ಸರ್ಕಾರ ನಡುವೆ ಜಟಾಪಟಿ ಶುರುವಾಗಿದೆ. ದಸರಾ ಆಚರಣೆಯ ಸಂದರ್ಭದಲ್ಲಿ ಸರ್ಕಾರದ ಹಾಗೂ ಪೊಲೀಸರ ನಡೆ ಮತ್ತು ಸಮನ್ವಯದ ಕೊರತೆಯ ಬಗ್ಗೆ ರಾಣಿ ಪ್ರಮೋದಾದೇವಿ ಅವರು ಆಕ್ಷೇಪ ವ್ಯಕ್ತಪಡಿಸಿ, ಸುದೀರ್ಘ ಪತ್ರ ಬರೆದಿದ್ದಾರೆ. ಕಳೆದ 45 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ, ಜಂಬೂಸವಾರಿಯಲ್ಲಿ ಚಿನ್ನದ ಅಂಬಾರಿಯನ್ನು ಯಾವ ಆನೆ ಹೊರಲಿದೆ ಎಂಬ ಮಾಹಿತಿಯನ್ನು ಅರಣ್ಯ ಇಲಾಖೆಯು ಕೊನೆಯ ಕ್ಷಣದವರೆಗೂ ಅರಮನೆಗೆ ನೀಡದೆ ಗೋಪ್ಯವಾಗಿಟ್ಟಿತ್ತು ಎನ್ನುವ ಕಾರಣಕ್ಕೆ ರಾಜಮನೆತನಕ್ಕೆ ತುಂಬಾ ಅಸಮಾಧಾನ ಉಂಟಾಗಿದೆ. ದಸರಾ ಆಚರಣೆಯ ಧಾರ್ಮಿಕ ವಿಧಿವಿಧಾನಗಳ ಸಮಯದಲ್ಲಿ ಪೊಲೀಸರು ಅನುಚಿತವಾಗಿ ವರ್ತಿಸಿದ್ದು, ಧಾರ್ಮಿಕ ಕಾರ್ಯಗಳಿಗೆ ಅಡ್ಡಿಪಡಿಸಿದ್ದಾರೆ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.

ಮಾಧ್ಯಮದವರ ಜೊತೆಮಾತನಾಡಿದ್ದ ರಾಣಿ ಪ್ರಮೋದಾ ದೇವಿ ಅವರು, ರಾಜ ಕುಟುಂಬದ ಖಾಸಗಿ ಪಾರ್ಕಿಂಗ್‌ ಸ್ಥಳದ ಅತಿಕ್ರಮಣ, ವಿವೇಚನೆಯಿಲ್ಲದೆ ಬ್ಯಾರಿಕೇಡ್‌ ಅಳವಡಿಸಿರುವುದರಿಂದ ಅರಮನೆ ಆಚರಣೆಗಳಿಗೆ ಅಡ್ಡಿಯಾಗುತ್ತಿದೆ. ಇಂತಹ ಘಟನೆಗಳಿಂದಲೇ ವಿಜಯದಶಮಿಯಂದು ಚಾಮುಂಡೇಶ್ವರಿ ಅಮ್ಮನವರ ಮೆರವಣಿಗೆ ನಡೆಸುವ ನಿರ್ಧಾರವನ್ನೇ ಮರುಪರಿಶೀಲಿಸಬೇಕಾದ ಪರಿಸ್ಥಿತಿ ಎದುರಾಗಿದೆ ಎಂದು ಬೇಸರ ವ್ಯಕ್ತಪಡಿಸಿದ್ದರು. ಕಾರ್ಯಕ್ರಮಕ್ಕೆ ಕೇವಲ ಐದು ದಿನಗಳಿರುವಾಗ ಯಾವ ಆನೆಗೆ ಅಂಬಾರಿ ಹೊರುವ ಜವಾಬ್ದಾರಿ ನೀಡಲಾಗಿದೆ ಎಂದು ತಿಳಿದುಕೊಳ್ಳಬೇಕಾಯಿತು. ಇದರಿಂದ ಅನಗತ್ಯ ಒತ್ತಡ ಉಂಟಾಯಿತು ಎಂದಿದ್ದರು.

ಚಿನ್ನದ ಅಂಬಾರಿ ಬಳಿ ಭದ್ರತಾ ನಿಯಮಗಳನ್ನು ಉಲ್ಲಂಘಿಸಿ ಪೊಲೀಸ್‌ ಸಿಬ್ಬಂದಿ ಮತ್ತು ಅವರ ಕುಟುಂಬದವರು ಸೆಲ್ಫಿ ಹಾಗೂ ಛಾಯಾಚಿತ್ರಗಳನ್ನು ತೆಗೆದುಕೊಳ್ಳಲು ಮುಗಿಬಿದ್ದಿದ್ದರು. ಅಂಬಾರಿ ಬಳಿ ಇರಲು ನಿರ್ದಿಷ್ಟ ವ್ಯಕ್ತಿಗಳಿಗೆ ಮಾತ್ರ ಅಧಿಕೃತ ಪಾಸ್‌ ನೀಡಲಾಗಿದ್ದರೂ, ನಾನಾ ಸರಕಾರಿ ಇಲಾಖೆಗಳ ಅನಧಿಕೃತ ವ್ಯಕ್ತಿಗಳು ಅಲ್ಲಿ ಕಾಣಿಸಿಕೊಳ್ಳುತ್ತಿರುವುದು ಭರವಸೆಯ ಉಲ್ಲಂಘನೆಯಾಗಿದೆ ಎಂದು ಅವರು ನೊಂದು ನುಡಿದಿದ್ದರು.

ಸರ್ಕಾರದ ತಿರುಗೇಟು

ಮಾಧ್ಯಮಗಳ ಮುಂದೆ ಈ ಮಾತುಗಳನ್ನಾಡಿರುವುದಕ್ಕೆ ಹಾಗೂ ಅವರ ಪತ್ರದ ವಿಚಾರವಾಗಿ ಸಚಿವ ಯತೀಂದ್ರ ಸಿದ್ದರಾಮಯ್ಯ ಪ್ರತಿಕ್ರಿಯೆ ನೀಡಿದ್ದಾರೆ. ಮೈಸೂರಿನಲ್ಲಿ ಮಾತನಾಡಿರುವ ಅವರು, ಅರಮನೆ ಬೋರ್ಡ್ ಸರ್ಕಾರದ್ದು, ಅರಮನೆ ಜಾಗ ಸರ್ಕಾರದ್ದು. ಅರಮನೆ ಕೂಡ ಸರ್ಕಾರದ್ದು. ಅವರಿಗೆ ಉಳಿದುಕೊಳ್ಳಲು ಒಂದಿಷ್ಟು ಜಾಗ ಕೊಟ್ಟಿದ್ದೇವೆ, ಅಷ್ಟೇ. ಅಂಬಾರಿಯನ್ನು ನಾವು ಉಚಿತವಾಗಿ ಪಡೆಯುತ್ತಿಲ್ಲ. ಅಂಬಾರಿಗೂ ಸರ್ಕಾರ ದುಡ್ಡು ಕೊಡುತ್ತದೆ. ಏನಾದರೂ ಸಮಸ್ಯೆ ಇದಿದ್ರೆ ಸರ್ಕಾರಕ್ಕೆ ನೇರವಾಗಿ ಹೇಳಬಹುದಿತ್ತು. ನಾವು ನಿರಂತರವಾಗಿ ಅವರ ಜೊತೆಯಲ್ಲಿ ಸಂಪರ್ಕದಲ್ಲಿದ್ದೆವು. ನಮ್ಮ ಗಮನಕ್ಕೆ ಏನೂ ತಂದಿಲ್ಲ. ಏಕಾಏಕಿ ಮಾಧ್ಯಮಗಳಿಗೆ ಪತ್ರ ಬರೆದರೆ ಹೇಗೆ ಎಂದು ಪ್ರಶ್ನಿಸಿದ್ದಾರೆ.

ಅವರೇನು ಸರ್ಕಾರಕ್ಕೆ ಪತ್ರ ಬರೆದಿಲ್ಲ. ಅಗತ್ಯವಿದರೆ ನಾವು ಕೆಲವರನ್ನು ಸರ್ಕಾರದಿಂದ ಅವರ ಬಳಿಗೆ ಕಳುಹಿಸುತ್ತೇವೆ. ಏನು ಸಮಸ್ಯೆಯಾಗಿದೆ ಎಂಬುದರ ಬಗ್ಗೆ ಬೇಕಿದ್ದರೆ ಚರ್ಚೆ ಮಾಡುತ್ತೇವೆ ಎಂದಿದ್ದಾರೆ. ಪ್ರಮೋದಾದೇವಿ ಒಡೆಯರ್ ಹೇಳಿರುವ ಸಮಸ್ಯೆ ಬಗೆಹರಿಸುತ್ತೇವೆ. ಆದರೆ ಅವರು ಹೇಳಿರುವುದನ್ನಲ್ಲ ಒಪ್ಪಲು ಆಗುವುದಿಲ್ಲ. ಅವರು ಹೇಳಿದ ರೀತಿ 7 ದಿನ ದಸರಾ ಮಾಡಲು ಸಾಧ್ಯವಿಲ್ಲ. ಸರ್ಕಾರದ್ದು ದಸರಾ ಅಲ್ಲ ಎಂಬ ಪದ ಬಳಕೆಯೂ ಸರಿಯಲ್ಲ. ಸರ್ಕಾರದ ದಸರಾಗೂ ಇತಿಹಾಸ ಇದೆ ಎಂದು ಹೇಳಿದ್ದಾರೆ.

ಅವರಲ್ಲಿಯೇ ಗೊಂದಲ

1972ರಿಂದಲೂ ಸರ್ಕಾರ ದಸರಾ ನಡೆಸುತ್ತಿದೆ. ಅದನ್ನು ದಸರಾ ಅಲ್ಲ ಎಂಬುದು ನಾವು ಒಪ್ಪುವುದಿಲ್ಲ. ಅಂಬಾರಿ ಆನೆ ಯಾವುದು ಎಂದು ಕಾನೂನು ಪ್ರಕಾರ ಅವರಿಗೆ ಹೇಳುವ ಅವಶ್ಯಕತೆ ಇಲ್ಲ. ಅಂಬಾರಿ ಆನೆ ತೀರ್ಮಾನ ಆಗಿದ್ದೆ ಕೊನೆ ಘಳಿಗೆಯಲ್ಲಿ. ಮೊದಲು ಮಹೇಂದ್ರ, ಆಮೇಲೆ ಧನಂಜಯ ಎಂದರು, ಆಮೇಲೆ ಪ್ರಶಾಂತ ಎಂದರು. ಇಲ್ಲೇ ಸ್ವಲ್ಪ ಗೊಂದಲ ಇತ್ತು. ಹೀಗಾಗಿ ಆಯ್ಕೆ ತಡವಾಗಿದೆ. ಅವರಿಗೆ ಅಂಬಾರಿ ಆನೆ ಯಾವುದು ಎಂಬುದನ್ನು ಹೇಳುವ ಅಗತ್ಯ ಇಲ್ಲ ಎಂದಿದ್ದಾರೆ.

ದಸರಾ ಸಂಭ್ರಮದಲ್ಲಿ ಮೈಸೂರು ಮೃಗಾಲಯಕ್ಕೆ ಬಂಪರ್ ಆದಾಯ: 1.57 ಲಕ್ಷ ಪ್ರವಾಸಿಗರಿಂದ ಬಂತು ಕೋಟಿ ಕೋಟಿ ಆದಾಯ!

Santosh Naik — Fri, 23 Oct 2026 22:20:30 +0530

ಮೈಸೂರು (ಅ.23): ನಾಡಹಬ್ಬ ಮೈಸೂರು ದಸರಾ ಮಹೋತ್ಸವದ ಸಂಭ್ರಮದ ವೇಳೆಯಲ್ಲಿ ಪ್ರಸಿದ್ಧ ಶ್ರೀ ಚಾಮರಾಜೇಂದ್ರ ಮೃಗಾಲಯಕ್ಕೆ (ಮೈಸೂರು ಝೂ) ಒಟ್ಟು 1.57 ಲಕ್ಷ ಪ್ರವಾಸಿಗರು ಭೇಟಿ ನೀಡಿದ್ದು, ಪ್ರವೇಶ ದರ ಒಂದರಿಂದಲೇ ಬರೋಬ್ಬರಿ ₹1.93 ಕೋಟಿ ಆದಾಯ ಸಂಗ್ರಹವಾಗಿದೆ. ವಿಜಯದಶಮಿಯಂದು (ಅಕ್ಟೋಬರ್ 21) ಮೃಗಾಲಯಕ್ಕೆ 19,745 ಪ್ರವಾಸಿಗರು ಭೇಟಿ ನೀಡಿದ್ದು, ₹25.15 ಲಕ್ಷ ಪ್ರವೇಶ ದರ ಸಂಗ್ರಹವಾಗಿದೆ. ಇದರ ಹಿಂದಿನ ದಿನವಾದ ಆಯುಧ ಪೂಜೆಯಂದು 20,264 ಪ್ರವಾಸಿಗರು ಆಗಮಿಸಿದ್ದು, ₹25.67 ಲಕ್ಷ ಆದಾಯ ಬಂದಿತ್ತು.

2025 ರ ದಸರಾ ಸಮಯದಲ್ಲಿ ಸಂಗ್ರಹವಾಗಿದ್ದ ₹1.91 ಕೋಟಿಗೆ ಹೋಲಿಸಿದರೆ ಈ ಬಾರಿ ಒಟ್ಟು ಆದಾಯದಲ್ಲಿ ಸಣ್ಣ ಪ್ರಮಾಣದ ಏರಿಕೆ ಕಂಡುಬಂದಿದೆಯಾದರೂ, ಹಬ್ಬದ ಪ್ರಮುಖ ಎರಡು ದಿನಗಳಂದು (ಆಯುಧ ಪೂಜೆ ಮತ್ತು ವಿಜಯದಶಮಿ) ಪ್ರವಾಸಿಗರ ಸಂಖ್ಯೆ ಕಳೆದ ವರ್ಷಕ್ಕಿಂತ ತುಸು ಕಡಿಮೆಯಾಗಿದೆ. 2025 ರ ಆಯುಧ ಪೂಜೆ ಮತ್ತು ವಿಜಯದಶಮಿಯಂದು ಕ್ರಮವಾಗಿ 27,033 ಮತ್ತು 27,272 ಪ್ರವಾಸಿಗರು ಮೃಗಾಲಯಕ್ಕೆ ಭೇಟಿ ನೀಡಿದ್ದು, ಕ್ರಮವಾಗಿ ₹33.21 ಲಕ್ಷ ಹಾಗೂ ₹34.07 ಲಕ್ಷ ಆದಾಯ ಬಂದಿತ್ತು.

ಕಳೆದ 5 ವರ್ಷಗಳ ಅಂಕಿ-ಅಂಶಗಳ ಮೇಲೊಂದು ಕಣ್ಣು

ಮೈಸೂರು ಮೃಗಾಲಯಕ್ಕೆ ದಸರಾ ಅವಧಿಯಲ್ಲಿ ಕಳೆದ ಐದು ವರ್ಷಗಳಲ್ಲಿ ಹರಿದುಬಂದಿರುವ ಪ್ರವಾಸಿಗರು ಹಾಗೂ ಸಂಗ್ರಹವಾದ ಆದಾಯದ ವಿವರ ಹೀಗಿದೆ.

2022: ಒಟ್ಟು 1.55 ಲಕ್ಷ ಪ್ರವಾಸಿಗರು ಭೇಟಿ ನೀಡಿದ್ದು, ₹1.53 ಕೋಟಿ ಆದಾಯ ಬಂದಿತ್ತು. ಇದರಲ್ಲಿ ವಿಜಯದಶಮಿಯಂದೇ ಬರೋಬ್ಬರಿ 36,013 ಪ್ರವಾಸಿಗರು ಆಗಮಿಸಿ, ₹35.83 ಲಕ್ಷ ಆದಾಯ ಹರಿದುಬಂದಿತ್ತು.
2023: ಒಟ್ಟು ಪ್ರವಾಸಿಗರ ಸಂಖ್ಯೆ 1.65 ಲಕ್ಷಕ್ಕೆ ಏರಿಕೆಯಾಗಿದ್ದು, ₹1.67 ಕೋಟಿ ಆದಾಯ ಸಂಗ್ರಹವಾಗಿತ್ತು.
2024: 1.65 ಲಕ್ಷ ಪ್ರವಾಸಿಗರು ಭೇಟಿ ನೀಡಿದ್ದು, ₹1.71 ಕೋಟಿ ಆದಾಯ ತಂದುಕೊಟ್ಟಿದ್ದರು. ವಿಜಯದಶಮಿಯಂದು 34,659 ಪ್ರವಾಸಿಗರಿಂದ ₹35.54 ಲಕ್ಷ ಹರಿದುಬಂದಿತ್ತು.
2025: ಮೃಗಾಲಯಕ್ಕೆ 1.56 ಲಕ್ಷ ಪ್ರವಾಸಿಗರು ಆಗಮಿಸಿದ್ದು, ₹1.91 ಕೋಟಿ ಆದಾಯ ಸಂಗ್ರಹವಾಗಿತ್ತು.
2026: ಪ್ರಸ್ತುತ ಸಾಲಿನಲ್ಲಿ (2026) ಆಯುಧ ಪೂಜೆ ಮತ್ತು ವಿಜಯದಶಮಿಯ ದಿನಗಳಲ್ಲಿ ಪ್ರವಾಸಿಗರ ಹರಿವು ಕಳೆದ ವರ್ಷಗಳಿಗಿಂತ ಕಡಿಮೆಯಾಗಿದ್ದರೂ, ಒಟ್ಟು ಸಂಗ್ರಹವಾದ ಆದಾಯದಲ್ಲಿ ಸಣ್ಣ ಪ್ರಮಾಣದ ಹೆಚ್ಚಳ ದಾಖಲಾಗಿದೆ.

ಆಯುಧ ಪೂಜೆಯಂದು ಯದುವೀರ ದತ್ತ ಒಡೆಯರ್ ಪತ್ನಿ, ಪುತ್ರರ ಸುಂದರ ಝಲಕ್ ವೈರಲ್

Suchethana D — Tue, 20 Oct 2026 17:06:49 +0530

ಮೈಸೂರು ಅರಮನೆಯಲ್ಲಿ ರಾಜವಂಶಸ್ಥ ಹಾಗೂ ಸಂಸದ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ಅವರು ಪರಂಪರೆಯಂತೆ ವಿಜಯದಶಮಿ ಹಬ್ಬದ ಹಿಂದಿನ ದಿನ ಆಯುಧ ಪೂಜೆಯನ್ನು ನೆರವೇರಿಸುತ್ತಾರೆ. ಈ ಬಾರಿಯೂ ಅವರು ಇದೇ ಸಂಪ್ರದಾಯವನ್ನು ಮುಂದುವರೆಸಿದ್ದಾರೆ. ಈ ಸಂದರ್ಭದಲ್ಲಿ, ಅರಮನೆಯ ಕಲ್ಯಾಣ ಮಂಟಪದಲ್ಲಿ ಚಂಡಿಕಾ ಹೋಮದ ನಂತರ, ಸವಾರಿ ತೊಟ್ಟಿಯಲ್ಲಿ ರಾಜವಂಶಸ್ಥರ ಪಟ್ಟದ ಕತ್ತಿ, ಹಳೆಯ ಶಸ್ತ್ರಾಸ್ತ್ರಗಳು, ಫಿರಂಗಿ, ರಾಜಮನೆತನದ ವಾಹನಗಳು ಹಾಗೂ ಕಾರುಗಳಿಗೆ ಪೂಜೆ ಸಲ್ಲಿಸಲಾಗುತ್ತದೆ. ಪರಂಪರೆಯಂತೆ ಪಟ್ಟದ ಆನೆ, ಕುದುರೆ, ಹಸು ಸೇರಿದಂತೆ ಅರಮನೆಯ ಸಾಕುಪ್ರಾಣಿಗಳಿಗೂ ಸಹ ಯದುವೀರ್ ಒಡೆಯರ್ ವಿಶೇಷ ಪೂಜೆ ನೆರವೇರಿಸುತ್ತಾರೆ.

ಮಕ್ಕಳ ಜೊತೆ ವೀಕ್ಷಣೆ

ಈ ಧಾರ್ಮಿಕ ಆಚರಣೆಯ ವೇಳೆ ರಾಜಮಾತೆ ಪ್ರಮೋದಾ ದೇವಿ ಒಡೆಯರ್ ಹಾಗೂ ಯದುವೀರ್ ಅವರ ಪತ್ನಿ ತ್ರಿಷಿಕಾ ಕುಮಾರಿ ಒಡೆಯರ್ ಸೇರಿದಂತೆ ಕುಟುಂಬದವರು ಅರಮನೆಯಿಂದ ವೀಕ್ಷಿಸುತ್ತಾರೆ. ಇದೀಗ ತ್ರಿಷಿಕಾ ಕುಮಾರಿ ಅವರು ತಮ್ಮ ಇಬ್ಬರು ಪುತ್ರರೊಂದಿಗೆ ಆಯುಧ ಪೂಜೆಯನ್ನು ವೀಕ್ಷಿಸುತ್ತಿರುವ ದೃಶ್ಯ ವೈರಲ್ ಆಗಿದೆ. ಅಂದಹಾಗೆ, ಮೈಸೂರಿನ ರಾಜ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ಮತ್ತು ತ್ರಿಷಿಕಾ ಕುಮಾರಿ ದಂಪತಿಗೆ ಇಬ್ಬರು ಗಂಡು ಮಕ್ಕಳಿದ್ದಾರೆ. 6 ಡಿಸೆಂಬರ್ 2017ರಲ್ಲಿ ಮೊದಲ ಮಗ ಆದ್ಯಾವೀರ್ ನರಸಿಂಹರಾಜ ಒಡೆಯರ್ ಹುಟ್ಟಿದ್ದರೆ, 11 ಅಕ್ಟೋಬರ್ 2024ರಂದು ಯುಗಾಧ್ಯಕ್ಷ ಕೃಷ್ಣರಾಜ ಒಡೆಯರ್ ಹುಟ್ಟಿರುವುದು.

ಹೇಗಿರುತ್ತೆ ಮೈಸೂರು ದಸರಾ

ಇನ್ನು ಮೈಸೂರು ದಸರಾ ಕುರಿತು ಹೇಳುವುದೇ ಬೇಡ. ಇಡೀ ಮೈಸೂರು ನಗರ ಮತ್ತು ಮೈಸೂರು ಅರಮನೆಯು ಲಕ್ಷಾಂತರ ವಿದ್ಯುತ್ ದೀಪಗಳಿಂದ ಕಂಗೊಳಿಸುತ್ತದೆ.ವಿಜಯದಶಮಿಯ ದಿನದಂದು 750 ಕೆಜಿ ತೂಕದ ಚಿನ್ನದ ಅಂಬಾರಿಯಲ್ಲಿ ಚಾಮುಂಡೇಶ್ವರಿ ದೇವಿಯ ಉತ್ಸವ ಮೂರ್ತಿಯನ್ನು ಆನೆಗಳ ಮೆರವಣಿಗೆಯೊಂದಿಗೆ ಅರಮನೆಯಿಂದ ಬನ್ನಿಮಂಟಪದವರೆಗೆ ಕೊಂಡೊಯ್ಯಲಾಗುತ್ತದೆ. ಬನ್ನಿಮಂಟಪ ಮೈದಾನದಲ್ಲಿ ವಿಜಯದಶಮಿ ರಾತ್ರಿ ನಡೆಯುವ ಭವ್ಯವಾದ ಪಂಜಿನ ಕವಾಯತು ನಡೆಯುತ್ತದೆ.

ಮೈಸೂರು ಅರಮನೆ ಆವರಣ ಸೇರಿದಂತೆ ವಿವಿಧ ವೇದಿಕೆಗಳಲ್ಲಿ ಶಾಸ್ತ್ರೀಯ ಸಂಗೀತ, ನೃತ್ಯ ಮತ್ತು ನಾಟಕ ಪ್ರದರ್ಶನಗಳು ನಡೆಯುತ್ತವೆ. ಭಾರತೀಯ ವಾಯುಪಡೆಯ 'ಸೂರ್ಯಕಿರಣ್' ಏರೋಬ್ಯಾಟಿಕ್ ತಂಡದಿಂದ ಆಕಾಶದಲ್ಲಿ ಸಾಹಸ ಪ್ರದರ್ಶನ ಕೂಡ ನಡೆದಿದೆ. ಅರಮನೆಯಲ್ಲಿ ಪರಂಪರೆಯಂತೆ ರಾಜವಂಶಸ್ಥರಿಂದ ವಿಶೇಷ ಪೂಜೆಗಳು ಮತ್ತು ದರ್ಬಾರ್ ನಡೆಯುವುದು ವಿಶೇಷವಾಗಿದೆ. ಇದನ್ನು ಕಣ್ತುಂಬಿಸಿಕೊಳ್ಳಲು ವಿದೇಶಗಳಿಂದಲೂ ಪ್ರವಾಸಿಗಳ ದಂಡ ಬರುವುದು ವಿಶೇಷ.

Mysuru Dasara: ಮುಖ್ಯಮಂತ್ರಿ ಡಿಕೆ ಶಿವಕುಮಾರ್‌ಗೆ ಸಿಗಲಿದೆ ವಿಶೇಷ ಉಡುಗೊರೆ; ಏನಿದು ಗಿಫ್ಟ್?

Mahmad Rafik — Wed, 21 Oct 2026 07:16:14 +0530

ಮೈಸೂರು: ವಿಶ್ವಪ್ರಸಿದ್ಧ ಮೈಸೂರು ದಸರಾದ ಪ್ರಮುಖ ಆಕರ್ಷಣೆಯಾದ ಜಂಬೂಸವಾರಿಗೆ ಸಾಂಸ್ಕೃತಿಕ ನಗರಿ ಸಂಪೂರ್ಣವಾಗಿ ಸಜ್ಜಾಗಿದೆ. ಜಂಬೂಸವಾರಿಗೂ ಮುನ್ನ ನಡೆಯುವ ನಂದಿ ಧ್ವಜ ಪೂಜೆಯ ನಂತರ, ನಂದಿಕಂಬಕ್ಕೆ ಪೂಜೆ ಸಲ್ಲಿಸಿ ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿ ಹಾಗೂ ಸಚಿವರಿಗೆ ವಿಶೇಷ ಉಡುಗೊರೆಗಳನ್ನು ನೀಡಲು ಮೈಸೂರಿನ ಖ್ಯಾತ ಶಿಲ್ಪಿ ರಾಜೇಶ್ ಮತ್ತು ಅವರ ಕುಟುಂಬದವರು ಸಿದ್ಧತೆ ಮಾಡಿಕೊಂಡಿದ್ದಾರೆ. ಪ್ರತಿ ವರ್ಷವೂ ನಂದಿಪೂಜೆಯ ಬಳಿಕ ಮುಖ್ಯಮಂತ್ರಿಗಳಿಗೆ ವಿಶೇಷ ಉಡುಗೊರೆ ನೀಡುವ ಪರಂಪರೆಯನ್ನು ಈ ಕುಟುಂಬವು ಮುಂದುವರಿಸಿಕೊಂಡು ಬಂದಿದೆ.

ಮುಖ್ಯಮಂತ್ರಿಗಳಿಗೆ ವಿಶೇಷ ಉಡುಗೊರೆ

ಈ ಬಾರಿ ಪಂಚಲೋಹದಲ್ಲಿ ಸಿದ್ಧವಾಗಿರುವ ಸಿಎಂ ಡಿ.ಕೆ. ಶಿವಕುಮಾರ್ ಅವರ ಆರಾಧ್ಯ ದೈವ 'ಗಂಗಾಧರ ಅಜ್ಜಯ್ಯ'ನ ವಿಗ್ರಹವನ್ನು ಅವರಿಗೆ ಕಾಣಿಕೆಯಾಗಿ ನೀಡಲಾಗುತ್ತದೆ. ಹಾಗೆಯೇ ಶಾಂತಿಧೂತನಾದ ಬುದ್ಧನ ವಿಗ್ರಹವನ್ನು ಡಿಸಿಎಂ ಜಿ. ಪರಮೇಶ್ವರ್ ಅವರಿಗಾಗಿ ಅತ್ಯಂತ ಕಲಾತ್ಮಕವಾಗಿ ಕೆತ್ತನೆ ಮಾಡಲಾಗಿದೆ. ಇದರೊಂದಿಗೆ, ಕೊಪ್ಪಳ ಜಿಲ್ಲೆಯ ಕನಕಗಿರಿಯಲ್ಲಿರುವ ಕನಕಾಚಲಪತಿ ದೇವಸ್ಥಾನದ ಕನಕಾಚಲಪತಿ ದೇವರ ಮೂರ್ತಿಯನ್ನು ಸಚಿವ ಶಿವರಾಜ್ ತಂಗಡಗಿ ಅವರಿಗೆ ನೀಡಲಾಗುತ್ತಿದ್ದು, ಇದು ಅವರ ಮನೆ ದೇವರಾಗಿದೆ. ನಂದಿ ಪೂಜೆ ನೆರವೇರಿದ ಬಳಿಕ ಶಿಲ್ಪಿ ರಾಜೇಶ್ ಅವರು ಈ ಕಲಾತ್ಮಕ ವಿಗ್ರಹಗಳನ್ನು ಜನಪ್ರತಿನಿಧಿಗಳಿಗೆ ಹಸ್ತಾಂತರಿಸಲಿದ್ದಾರೆ.

'ಪ್ರಶಾಂತ' ನೇತೃತ್ವದ ಗಜಪಡೆ

ಜಂಬೂಸವಾರಿಯನ್ನು ಯಶಸ್ವಿಗೊಳಿಸಲು ಕ್ಯಾಪ್ಟನ್ 'ಪ್ರಶಾಂತ' ನೇತೃತ್ವದ ಗಜಪಡೆ ಸಂಪೂರ್ಣವಾಗಿ ಸಜ್ಜಾಗಿದೆ. ಈ ಬಾರಿ ಒಟ್ಟು 12 ಆನೆಗಳು ಜಂಬೂಸವಾರಿಯಲ್ಲಿ ಪಾಲ್ಗೊಳ್ಳುತ್ತಿದ್ದು, 18 ವರ್ಷಗಳ ದಸರಾ ಅನುಭವ ಹೊಂದಿರುವ ಮತ್ತು ಅತ್ಯಂತ ಶಾಂತ ಸ್ವಭಾವದ ಪ್ರಶಾಂತ ಆನೆ ಇದೇ ಮೊದಲ ಬಾರಿಗೆ ಚಿನ್ನದ ಅಂಬಾರಿಯನ್ನು ಹೊರಲಿದ್ದಾನೆ. ಈತನಿಗೆ ಕಾವೇರಿ ಮತ್ತು ರೂಪ ಆನೆಗಳು ಕುಂಕಿ ಆನೆಗಳಾಗಿ ಸಾಥ್ ನೀಡಲಿವೆ.

ಜಂಬೂಸವಾರಿಯನ್ನು ಯಾವುದೇ ಆತಂಕವಿಲ್ಲದೆ ಯಶಸ್ವಿಯಾಗಿ ನೆರವೇರಿಸುವ ವಿಶ್ವಾಸವನ್ನು ಡಿಸಿಎಫ್ ಪ್ರಭುಗೌಡ ವ್ಯಕ್ತಪಡಿಸಿದ್ದು, 5.5 ಕಿಲೋಮೀಟರ್ ರಾಜಮಾರ್ಗವನ್ನು ಪ್ರಶಾಂತ ನಿರಾಯಾಸವಾಗಿ ತಲುಪಲಿದ್ದಾನೆ ಹಾಗೂ ಮೆರವಣಿಗೆಯ ವೇಳೆ ಆನೆಗಳಿಗೆ ನೀಡಲು ವಿಶೇಷ ಆಹಾರವನ್ನೂ ಸಿದ್ಧಪಡಿಸಲಾಗಿದೆ ಎಂದು ತಿಳಿಸಿದ್ದಾರೆ.

ಜಂಬೂಸವಾರಿಯ ಸಾಲಿನಲ್ಲಿ, ಮಾಜಿ ಕ್ಯಾಪ್ಟನ್ ಅಭಿಮನ್ಯು 'ನಿಶಾನೆ ಆನೆ'ಯಾಗಿ ಗಜಪಡೆಯನ್ನು ಮುನ್ನಡೆಸಲಿದ್ದು, ಪುಷ್ಪಾರ್ಚನೆ ನಡೆಯುವ ಸ್ಥಳದಲ್ಲೇ ಆತನಿಗೆ ವಿಶೇಷ ಬೀಳ್ಕೊಡುಗೆ ಗೌರವ ಸಲ್ಲಿಸಲಾಗುತ್ತದೆ. ಅಭಿಮನ್ಯುವಿನ ಹಿಂದೆ 'ನೌಪತ್ ಆನೆ'ಯಾಗಿ ಗೋಪಿ ಸಾಗಲಿದ್ದು, ಮೊದಲ ಸಾಲಾನೆಗಳಾಗಿ ಮಹೇಂದ್ರ, ಶ್ರೀರಾಮ ಹಾಗೂ ಶ್ರೀಕಂಠ ಹೆಜ್ಜೆ ಹಾಕಲಿವೆ. ಎರಡನೇ ಸಾಲಿನಲ್ಲಿ ಚೈತ್ರ ಮತ್ತು ಲಕ್ಷ್ಮಿ ಆನೆಗಳು, ಮೂರನೇ ಸಾಲಿನಲ್ಲಿ ಸುಗ್ರೀವ ಹಾಗೂ ಏಕಲವ್ಯ ಆನೆಗಳು ಸಾಗಲಿವೆ.

ಕೊನೆಯಲ್ಲಿ ಚಿನ್ನದ ಅಂಬಾರಿ ಹೊತ್ತ ಪ್ರಶಾಂತ ಆನೆಗೆ ಕುಂಕಿ ಆನೆಗಳಾದ ಕಾವೇರಿ ಮತ್ತು ರೂಪ ಬೆಂಗಾವಲಾಗಿ ಸಾಗುವ ಮೂಲಕ ಅದ್ದೂರಿ ಜಂಬೂಸವಾರಿಗೆ ಚಾಲನೆ ಸಿಗಲಿದೆ.

ಸಂಜೆ 4:10 ರಿಂದ 4:35 ರವರೆಗೆ ಸಲ್ಲುವ ಮೀನಾ ಲಗ್ನದಲ್ಲಿ ಮೆರವಣಿಗೆಗೆ ಚಾಲನೆ

ಜಂಬೂಸವಾರಿಗೂ ಮುನ್ನ ಮಧ್ಯಾಹ್ನ 1:36 ರಿಂದ 1:56 ರವರೆಗೆ ಸಲ್ಲುವ ಶುಭ ಮಕರ ಲಗ್ನದಲ್ಲಿ ಮುಖ್ಯಮಂತ್ರಿ ಡಿಕೆ ಶಿವಕುಮಾರ್ ಅವರು ನಂದಿಧ್ವಜಕ್ಕೆ ಪೂಜೆ ನೆರವೇರಿಸಲಿದ್ದಾರೆ. ತದನಂತರ ಸಂಜೆ 4:10 ರಿಂದ 4:35 ರವರೆಗೆ ಸಲ್ಲುವ ಮೀನಾ ಲಗ್ನದಲ್ಲಿ, 750 ಕೆಜಿ ಚಿನ್ನದ ಅಂಬಾರಿಯಲ್ಲಿ ವಿರಾಜಮಾನಳಾದ ತಾಯಿ ಚಾಮುಂಡೇಶ್ವರಿ ವಿಗ್ರಹಕ್ಕೆ ಪುಷ್ಪಾರ್ಚನೆ ಮಾಡುವ ಮೂಲಕ ವಿಜಯದಶಮಿ ಮೆರವಣಿಗೆಗೆ ಅಧಿಕೃತ ಚಾಲನೆ ಸಿಗಲಿದೆ.

ಈ ಶುಭ ಕಾರ್ಯಕ್ರಮದಲ್ಲಿ ಮುಖ್ಯಮಂತ್ರಿ ಡಿಕೆ ಶಿವಕುಮಾರ್, ಉಪ ಮುಖ್ಯಮಂತ್ರಿ ಡಾ. ಜಿ. ಪರಮೇಶ್ವರ್, ಜಿಲ್ಲಾ ಉಸ್ತುವಾರಿ ಸಚಿವ ಡಾ. ಯತೀಂದ್ರ ಸಿದ್ದರಾಮಯ್ಯ, ಜಿಲ್ಲಾಧಿಕಾರಿ ಲಕ್ಷ್ಮಿಕಾಂತ್ ರೆಡ್ಡಿ, ಪೊಲೀಸ್ ಕಮಿಷನರ್ ಸೀಮಾ ಲಾಟ್ಕರ್ ಹಾಗೂ ಇತರ ಗಣ್ಯಾತಿಗಣ್ಯರು ಭಾಗವಹಿಸಿ ಪುಷ್ಪಾರ್ಚನೆ ಮಾಡಲಿದ್ದಾರೆ.

Mysuru: ದಸರಾದಲ್ಲಿ ದಲಿತ ಸಚಿವರಿಗೆ ಅವಮಾನ, BJP ಆರೋಪದ ಬೆನ್ನಲ್ಲೇ ವಿಚಾರಣೆಗೆ ಸಿಎಂ ಆದೇಶ

Sumanth SN — Thu, 22 Oct 2026 12:42:22 +0530

ಬೆಂಗಳೂರು: ಮೈಸೂರು ಅರಮನೆ ಆವರಣದಲ್ಲಿ ನಿನ್ನೆ ನಡೆದ ನಂದಿಧ್ವಜ ಪೂಜೆ ಸಂದರ್ಭದಲ್ಲಿ ಸಚಿವರಾದ ಬಾಲಕೃಷ್ಣ, ನರೇಂದ್ರ ಸ್ವಾಮಿ, ಬಸವಂತಪ್ಪ ಅವರನ್ನು ಪೂಜೆ ಆವರಣ ಪ್ರವೇಶಿಸಲು ಪೊಲೀಸ್ ಅಧಿಕಾರಿಗಳು ನಿರ್ಬಂಧಿಸಿದ ಪ್ರಕರಣದ ಬಗ್ಗೆ ವಿಚಾರಣೆ ನಡೆಸಿ ವರದಿ ನೀಡುವಂತೆ ಸಿಎಂ ಡಿ ಕೆ ಶಿವಕುಮಾರ್ ಅವರು ಸರಕಾರದ ಮುಖ್ಯ ಕಾರ್ಯದರ್ಶಿ ಶಾಲಿನಿ ರಜನೀಶ್ ಅವರಿಗೆ ಸೂಚನೆ ನೀಡಿದ್ದಾರೆ.

ಮೈಸೂರು ನಂದಿಧ್ವಜ ಪೂಜೆ ಸಂದರ್ಭ ಮಂತ್ರಿಗಳಿಗೆ ಅವಕಾಶ ನಿರಾಕರಣೆ ಪ್ರಕರಣ

ಮಂತ್ರಿಗಳನ್ನೇ ನಿರ್ಬಂಧಿಸುವ ಮೂಲಕ ಅಧಿಕಾರಿಗಳು ಉದ್ಧಟತನದಿಂದ ವರ್ತಿಸಿರುವುದು ಕಂಡು ಬಂದಿದೆ. ತಕ್ಷಣ ಖುದ್ದು ನಾನೇ ಮಧ್ಯಪ್ರವೇಶಿಸಿ ಮಂತ್ರಿಗಳ ಪ್ರವೇಶಕ್ಕೆ ಅನುವು ಮಾಡಿಕೊಟ್ಟಿದ್ದೇನೆ. ಆದರೂ ಅಧಿಕಾರಿಗಳ ಉಡಾಫೆ ಸಹಿಸಲು ಆಗುವುದಿಲ್ಲ. ಹೀಗಾಗಿ ಇದಕ್ಕೆ ಹೊಣೆಗಾರರು ಯಾರು ಎಂಬ ಬಗ್ಗೆ ವಿಚಾರಣೆ ನಡೆಸಿ ವರದಿ ನೀಡುವಂತೆ ಮುಖ್ಯ ಕಾರ್ಯದರ್ಶಿ ಅವರಿಗೆ ಅದೇಶಿಸಿದ್ದೇನೆ ಎಂದು ಸಿಎಂ ಅವರು ಮಾಧ್ಯಮ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ. ವರದಿ ಬಂದ ನಂತರ ತಪ್ಪಿತಸ್ಥ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗುವುದು ಎಂದು ಸಿಎಂ ಅವರು ಹೇಳಿದ್ದಾರೆ.

ಏನಿದು ಘಟನೆ?

ಮೈಸೂರು ಜಂಬೂ ಸವಾರಿಗೂ ಮುನ್ನ ನಂದಿಧ್ವಜಕ್ಕೆ ಪೂಜೆ ಸಲ್ಲಿಕೆ ಮಾಡಲು ಸಿಎಂ ಡಿಕೆ ಶಿವಕುಮಾರ್ ಅವರೊಂದಿಗೆ ಸಚಿವರು ತೆರಳುತ್ತಿದ್ದರು. ಈ ಸಂದರ್ಭದಲ್ಲಿ ಸಚಿವರಾದ ಬಸವಂತಪ್ಪ, ಶಿವರಾಜ್ ತಂಗಡಗಿ, ನರೇಂದ್ರ ಸ್ವಾಮಿ ಅವರನ್ನು ಹಿರಿಯ ಐಪಿಎಸ್ ಅಧಿಕಾರಿ ತಡೆದಿದ್ದರು. ಇದರೊಂದಿಗೆ ಸಚಿವರಿಗೆ ಮುಜುಗರ ಎದುರಾಗಿತ್ತು. ಕೂಡಲೇ ಮಧ್ಯ ಪ್ರವೇಶ ಮಾಡಿದ್ದ ಸಿಎಂ, ಸಚಿವರನ್ನು ಬಿಡಲು ಹೇಳಿದ್ದರು. ಆ ಬಳಿಕ ಸಚಿವರು ಸಿಎಂ ಅವರೊಂದಿಗೆ ತೆರಳಿದ್ದರು.

ಈ ಕುರಿತಂತೆ ಮಾಧ್ಯಮಗಳೊಂದಿಗೆ ಮಾತನಾಡಿದ್ದ ಸಿಎಂ ಡಿಕೆ ಶಿವಕುಮಾರ್ ಅವರು, ಯಾರೋ ಅಧಿಕಾರಿಗಳು ಹೀಗೆ ಮಾಡಿದ್ದಾರೆ, ಆಗ ನಾನೇ ಅವರನ್ನು ಬಿಡಿಸಿದೆ. ಧ್ವಜ ಕಂಬದ ಪೂಜೆಗೆ ನಾನೇ ಬಂದು ಬಿಡಿಸಬೇಕಾಗಿಯಿತು. ಅದಕ್ಕೆಲ್ಲ ನಾನು ಏನು ಮಾಡೋಕೆ ಆಗಲ್ಲ. ನಮ್ಮ ಚಿಫ್ ಸೆಕ್ರೆಟರಿ ಅವರ ಮೇಲೆ ತನಿಖೆ ಮಾಡಿ ವಿಡಿಯೋ ಶಾಟ್ಸ್ ತೆಗೆದು ಏನು ಎತ್ತ ಎಂದು ನೋಡುತ್ತಿದ್ದಾರೆ. ದಸರಾ ಬಹಳ ವ್ಯವಸ್ಥಿತವಾಗಿ ನಡೆದಿದೆ. ಯತೀಂದ್ರ ಒಬ್ಬರ ಕೈಯಲ್ಲಿ ಆಗಲ್ಲ, ಆದ್ದರಿಂದಲೇ ನಾನು ಒಬ್ಬೊಬ್ಬರು ಒಂದೊಂದು ಜವಾಬ್ದಾರಿ ತಗೋಬೇಕು ಎಂದು ಹೇಳಿದ್ದೆ. ಫಾರೇನ್ ಡೆಲಿಗೆಟ್ಸ್ ನ ರಾಯರೆಡ್ಡಿ ನೋಡಿಕೊಂಡರು, ಸಂತೋಷ ಎಲೆಕ್ಷನ್ ಇರುವ ಕಾರಣಕ್ಕೆ ಬರಲಿಲ್ಲ. ಸಚಿವ ಜಾರ್ಜ್ ಬಹಳ ಚೆನ್ನಾಗಿ ಅಚ್ಚುಕಟ್ಟಾಗಿ ಲೈಟಿಂಗ್ ಮಾಡಿದ್ದಾರೆ. ಎಲ್ಲಾ ಜವಾಬ್ದಾರಿ ವಹಿಸಿಕೊಂಡವರು ಬಹಳ ಚೆನ್ನಾಗಿ ಮಾಡಿದ್ದಾರೆ. ಕೆಲವರಿಗೆ ಎಲೆಕ್ಷನ್ ಇತ್ತು ನಾನು ಪೋರ್ಸ್ ಮಾಡಲು ಹೋಗಿಲ್ಲ ಎಂದಷ್ಟೇ ಸಿಎಂ ಹೇಳಿದರು.

"ಜಂಬೂಸವಾರಿಯಲ್ಲಿ ಆನೆಗಳಿಗೆ ಭಾರ ಹೊರಿಸುವುದನ್ನು ನಿಲ್ಲಿಸಿ, ವಾಹನ ಬಳಸಿ" ಅಭಿಪ್ರಾಯ

Kannadaprabha News — Mon, 26 Oct 2026 14:00:23 +0530

ಮೈಸೂರು: ಹಿಂದಿನ ರಾಜರ ಕಾಲದಲ್ಲಿ ಇಂದಿನಂತೆ ವಾಹನಗಳ ಸೌಲಭ್ಯಗಳಿರಲಿಲ್ಲ. ಆದ್ದರಿಂದ ಸಾರಿಗೆಗಾಗಿ ಕುದುರೆ ಮತ್ತು ಆನೆಗಳನ್ನು ಬಳಸುವುದು ವಾಡಿಕೆಯಾಗಿತ್ತು. ರಾಜರು ಆನೆಯ ಮೇಲಿನ ಅಂಬಾರಿಯಲ್ಲಿ ಕುಳಿತು ಮೆರವಣಿಗೆಯಲ್ಲಿ ಸಾಗುತ್ತಿದ್ದರು. ಕಾಲಕ್ರಮೇಣ ರಾಜರ ಕಾಲ ಮುಗಿದ ನಂತರ, ಅದೇ ಅಂಬಾರಿಯಲ್ಲಿ ಚಾಮುಂಡೇಶ್ವರಿ ಅಮ್ಮನವರ ಮೂರ್ತಿಯನ್ನು ಪ್ರತಿಷ್ಠಾಪಿಸಿ ಉತ್ಸವ ನಡೆಸುವ ಪದ್ಧತಿ ರೂಢಿಗೆ ಬಂದಿತು ಎಂದು ನೃತ್ಯ ಕಲಾವಿದೆ, ಜಮುನಾರಾಣಿ ವಿ. ಮಿರ್ಲೆ ಅಭಿಪ್ರಾಯ ಪಟ್ಟಿದ್ದಾರೆ.

ಆದರೆ ಇಂದಿನ ಸಮಾಜ ಸಾಕಷ್ಟು ಮುಂದುವರಿದಿದೆ. ವಿಜ್ಞಾನ ಮತ್ತು ತಂತ್ರಜ್ಞಾನದಲ್ಲಿ ನಾವು ಬಹಳಷ್ಟು ಪ್ರಗತಿ ಸಾಧಿಸಿದ್ದೇವೆ. ಇಂತಹ ಸಂದರ್ಭದಲ್ಲಿ, ಅಲಂಕೃತವಾದ ಭವ್ಯ ರಥವನ್ನು ನಿರ್ಮಿಸಿ, ಅದನ್ನು ವಾಹನದ ಮೇಲೆ ಇರಿಸಿ ಮೆರವಣಿಗೆ ನಡೆಸುವ ಪರ್ಯಾಯ ವ್ಯವಸ್ಥೆಯನ್ನು ಏಕೆ ಮಾಡಬಾರದು?

ಪ್ರಾಣಿಗಳ ಕಷ್ಟ ತಪ್ಪಿಸೋದು ನಮ್ಮ ಕರ್ತವ್ಯ

ಆನೆಗಳು ಮೆರವಣಿಗೆಯಲ್ಲಿ ಭಾಗವಹಿಸುವುದಕ್ಕೆ ನನ್ನ ವಿರೋಧವಿಲ್ಲ. ಅವು ತಮ್ಮ ಸಹಜ ನಡಿಗೆಯಲ್ಲಿ, ಯಾವುದೇ ಭಾರವಿಲ್ಲದೆ ಮೆರವಣಿಗೆಯಲ್ಲಿ ಸಾಗಲಿ. ಆದರೆ ಅವುಗಳ ಮೇಲೆ ಅಂಬಾರಿಯನ್ನು ಹೊರಿಸಿ, ಅದರ ಭಾರವನ್ನು ಹೊರುವಂತೆ ಮಾಡುವುದರಿಂದ ಅವುಗಳಿಗೆ ಎಷ್ಟರಮಟ್ಟಿಗೆ ದೈಹಿಕ ಕಷ್ಟವಾಗುತ್ತದೆ, ನೋವಾಗುತ್ತದೆ ಎಂಬುದು ನಮಗೆ ನಿಖರವಾಗಿ ತಿಳಿದಿಲ್ಲ. ಆ ಮೂಕ ಪ್ರಾಣಿಗಳಿಗೆ ಆಗಬಹುದಾದ ಕಷ್ಟವನ್ನು ತಪ್ಪಿಸುವುದು ನಮ್ಮ ಕರ್ತವ್ಯವಲ್ಲವೇ?

ದೇವರು ಎಂದಿಗೂ ಪ್ರಾಣಿಗಳಿಗೆ ಹಿಂಸೆ ನೀಡಿ ನನಗೆ ಉತ್ಸವ ಮಾಡು ಎಂದು ಬಯಸುವುದಿಲ್ಲ. ಎಲ್ಲ ಜೀವಿಗಳೂ ಸುಖವಾಗಿರಬೇಕು, ಸಂತೋಷವಾಗಿರಬೇಕು ಎಂಬುದೇ ಭಗವಂತನ ಆಶಯವಲ್ಲವೇ?

ಹಾಗಿರುವಾಗ, ನಮ್ಮ ಸಂಪ್ರದಾಯದ ಮೂಲ ಆಶಯವನ್ನು ಉಳಿಸಿಕೊಂಡೇ, ಕಾಲಕ್ಕೆ ತಕ್ಕಂತೆ ಪ್ರಾಣಿಗಳಿಗೂ ಹಿತವಾಗುವ ರೀತಿಯಲ್ಲಿ ಈ ಪದ್ಧತಿಯನ್ನು ಬದಲಾಯಿಸಿಕೊಳ್ಳಬಹುದಲ್ಲವೇ?

ಇದು ನಮ್ಮ ಸಂಪ್ರದಾಯದ ವಿರುದ್ಧದ ಚಿಂತನೆಯಲ್ಲ; ಬದಲಾಗಿ, ಸಂಪ್ರದಾಯದೊಂದಿಗೆ ಕರುಣೆ, ಮಾನವೀಯತೆ ಮತ್ತು ಪ್ರಾಣಿ ಕಲ್ಯಾಣವನ್ನೂ ಬೆಸೆಯುವ ಒಂದು ಸಕಾರಾತ್ಮಕ ಚಿಂತನೆ. ದೇವರ ಮೇಲಿನ ಭಕ್ತಿ ಮತ್ತು ಪ್ರಾಣಿಗಳ ಮೇಲಿನ ಕರುಣೆ ಎರಡೂ ಜೊತೆಜೊತೆಯಾಗಿ ಸಾಗಲಿ ಎಂಬುದೇ ನನ್ನ ಆಶಯ.

- ಜಮುನಾರಾಣಿ ವಿ. ಮಿರ್ಲೆ, ನೃತ್ಯ ಕಲಾವಿದೆ, ಮೈಸೂರು

ಅಬ್ಬಬ್ಬಾ! ಈ ಬಾರಿ ಮೈಸೂರು ದಸರಾ ನೋಡಲು ಬಂದವರೆಷ್ಟು ಗೊತ್ತಾ? ಅರಮನೆ, ಮೃಗಾಲಯ ಯಾವುದಕ್ಕೆ ಹೆಚ್ಚು ಭೇಟಿ?

Kannadaprabha News — Fri, 23 Oct 2026 08:47:35 +0530

ಮೈಸೂರು (ಅ.23): ನಾಡಹಬ್ಬ ದಸರಾ ನಿಮಿತ್ತ ಸಾಂಸ್ಕೃತಿಕ ನಗರಿ ಮೈಸೂರಿಗೆ ಪ್ರವಾಸಿಗರ ದಂಡೇ ಹರಿದುಬಂದಿತ್ತು. ಅರಮನೆ ಮತ್ತು ಶ್ರೀ ಚಾಮರಾಜೇಂದ್ರ ಮೃಗಾಲಯಕ್ಕೆ ಭೇಟಿ ನೀಡಿದ ಪ್ರವಾಸಿಗರ ಸಂಖ್ಯೆಯಲ್ಲಿ ಕಳೆದ ವರ್ಷಕ್ಕಿಂತ ಈ ವರ್ಷ ಹೆಚ್ಚಳವಾಗಿದೆ.

9 ದಿನಗಳಲ್ಲಿ ಅರಮನೆ ನೋಡಲು 1.10 ಲಕ್ಷ ಮಂದಿ ಭೇಟಿ

ಕಳೆದ 9 ದಿನಗಳಲ್ಲಿ (ಆಯುಧಪೂಜೆ - ವಿಜಯದಶಮಿಗೆ ರಜೆ) ಅರಮನೆಗೆ 1.10 ಲಕ್ಷ ಮಂದಿ ಭೇಟಿ ನೀಡಿದ್ದರೆ, ಮೃಗಾಲಯಕ್ಕೆ ಒಟ್ಟು 11 ದಿನಗಳಲ್ಲಿ 1.57 ಲಕ್ಷ ಮಂದಿ ಭೇಟಿ ನೀಡಿದ್ದಾರೆ. ಇದೇ ಅವಧಿಯಲ್ಲಿ ಕಳೆದ ವರ್ಷ ಮೃಗಾಲಯಕ್ಕೆ 1.56 ಲಕ್ಷ ಮಂದಿ ಭೇಟಿ ನೀಡಿದ್ದರು.

ದಸರಾಕ್ಕೆ ಮೈಸೂರಿಗೆ ಭೇಟಿ ನೀಡಿದ ಪ್ರವಾಸಿಗರೆಷ್ಟು?

ಕಳೆದ ಮೂರ್ನಾಲ್ಕು ವರ್ಷಗಳಲ್ಲಿ ವರ್ಷದಿಂದ ವರ್ಷಕ್ಕೆ ಪ್ರವಾಸಿಗರ ಸಂಖ್ಯೆ ಹೆಚ್ಚಾಗಿತ್ತು. ಸಾಮಾನ್ಯವಾಗಿ ಅರಮನೆ ಮತ್ತು ಮೈಸೂರು ಮೃಗಾಲಯಕ್ಕೆ ಭೇಟಿ ನೀಡುವ ಪ್ರವಾಸಿಗರ ಸಂಖ್ಯೆಯನ್ನು ಆಧರಿಸಿ ಎಷ್ಟು ಮಂದಿ ಪ್ರವಾಸಿಗರು ಮೈಸೂರಿಗೆ ಭೇಟಿ ನೀಡಿರಬಹುದು ಎಂದು ನಿರ್ಧರಿಸಲಾಗುತ್ತದೆ. ಅದರಂತೆ ಈ ಬಾರಿಯು ಮೈಸೂರಿಗೆ ಸುಮಾರು ನಾಲ್ಕೈದು ಲಕ್ಷ ಮಂದಿ ಭೇಟಿ ನೀಡಿದ್ದಾರೆ.

ಯುವದಸರಾ ಮೈಸೂರು ನಗರದ ಹೊರಗೆ ಆಯೋಜಿಸಿದ್ದರಿಂದ ನಗರದ ಒಳ ಭಾಗ ಉಂಟಾಗುವ ಒತ್ತಡ ನಿವಾರಣೆ ಆಯಿತು. ಇನ್ನು ಸಾರ್ವಜನಿಕರು ಹೆಚ್ಚಾಗಿ ಮುಗಿ ಬೀಳುವಂತೆ ಮಾಡಿದ್ದು ಕಣ್ಮನ ತಣಿಸುವ ವಿದ್ಯುತ್‌ ದೀಪಾಲಂಕಾರ, ಆಹಾರ ಮೇಳ ಮತ್ತು ಅರಮನೆ ಮುಂದಿನ ಸಾಂಸ್ಕೃತಿಕ ಕಾರ್ಯಕ್ರಮಕ್ಕೆ ಮಾತ್ರ.

ಅರಮನೆಗೆ ವಾರಾಂತ್ಯದ ಅ.17ರಂದು 15,075 ಮಂದಿ, 18 ರಂದು 17,969 ಮತ್ತು 19 ರಂದು 16,378 ಮಂದಿ ಭೇಟಿ ನೀಡಿದ್ದರು. ಮೃಗಾಲಯಕ್ಕೆ ಆಯುಧಪೂಜೆಯಂದು 20,264 ವಿಜಯದಶಮಿಯಂದು 19,745 ಮಂದಿ ಭೇಟಿ ನೀಡಿದ್ದು, ಇದರಿಂದಾಗಿ 1.93 ಕೋಟಿ ರು. ಆದಾಯ ಸಂಗ್ರಹವಾಗಿದೆ ಎಂದು ಮೃಗಾಲಯ ಕಾರ್ಯನಿರ್ವಾಹಕ ನಿರ್ದೇಶಕಿ ಪಿ. ಅನುಷಾ ಮಾಹಿತಿ ನೀಡಿದ್ದಾರೆ. ಕಳೆದ ವರ್ಷ ₹1.91 ಕೋಟಿ ಸಂಗ್ರಹವಾಗಿತ್ತು.

ಮೈಸೂರಿನಿಂದ ದಿಢೀರ್ ವಿಶೇಷ ರೈಲು ಘೋಷಣೆ; ದಸರಾ ಮುಗಿಸಿ ಊರಿಗೆ ಹೊರಟವರಿಗೆ ಭಾರಿ ಅನುಕೂಲ!

Sathish Kumar KH — Fri, 23 Oct 2026 07:54:33 +0530

ಮೈಸೂರು: ಪ್ರಯಾಣಿಕರ ಹೆಚ್ಚುವರಿ ದಟ್ಟಣೆಯನ್ನು ಗಮನದಲ್ಲಿಟ್ಟುಕೊಂಡು, ನೈರುತ್ಯ ರೈಲ್ವೆಯು (SWR) ಮೈಸೂರಿನಿಂದ ಉತ್ತರ ಪ್ರದೇಶದ ವೀರಾಂಗಣ ಲಕ್ಷ್ಮೀಬಾಯಿ ಜಾನ್ಸಿ ರೈಲ್ವೆ ನಿಲ್ದಾಣಕ್ಕೆ ಏಕಮುಖ (ಒನ್-ವೇ) ವಿಶೇಷ ಎಕ್ಸ್‌ಪ್ರೆಸ್‌ ರೈಲು ಓಡಿಸಲು ನಿರ್ಧರಿಸಿದೆ. ಈ ವಿಶೇಷ ರೈಲು ಬೆಂಗಳೂರು ಸೇರಿದಂತೆ ರಾಜ್ಯದ ಪ್ರಮುಖ ನಿಲ್ದಾಣಗಳ ಮೂಲಕ ಸಾಗಲಿದ್ದು, ಉತ್ತರ ಭಾರತದತ್ತ ಪ್ರಯಾಣಿಸುವ ಜನರಿಗೆ ಭಾರಿ ಅನುಕೂಲವಾಗಲಿದೆ.

ರೈಲು ಸಂಚಾರದ ವೇಳಾಪಟ್ಟಿ:

ರೈಲು ಸಂಖ್ಯೆ: 06276 (ಮೈಸೂರು–ವೀರಾಂಗಣ ಲಕ್ಷ್ಮೀಬಾಯಿ ಜಾನ್ಸಿ ಒನ್-ವೇ ಸ್ಪೆಷಲ್ ಎಕ್ಸ್‌ಪ್ರೆಸ್)

ಹೊರಡುವ ದಿನ ಮತ್ತು ಸಮಯ: ಅಕ್ಟೋಬರ್ 23 ರಂದು ಮಧ್ಯಾಹ್ನ 2:00 ಗಂಟೆಗೆ ಮೈಸೂರು ನಿಲ್ದಾಣದಿಂದ ಪ್ರಯಾಣ ಆರಂಭಿಸಲಿದೆ.

ತಲುಪುವ ದಿನ ಮತ್ತು ಸಮಯ: ಅಕ್ಟೋಬರ್ 25 ರಂದು ಬೆಳಿಗ್ಗೆ 10:00 ಗಂಟೆಗೆ ವೀರಾಂಗಣ ಲಕ್ಷ್ಮೀಬಾಯಿ ಜಾನ್ಸಿ ನಿಲ್ದಾಣವನ್ನು ತಲುಪಲಿದೆ.

ಮಾರ್ಗ ಮಧ್ಯೆ ಎಲ್ಲೆಲ್ಲಿ ನಿಲುಗಡೆ? (Major Halts)

ಈ ವಿಶೇಷ ರೈಲು ಕರ್ನಾಟಕ, ಆಂಧ್ರಪ್ರದೇಶ, ತೆಲಂಗಾಣ, ಮಹಾರಾಷ್ಟ್ರ ಮತ್ತು ಮಧ್ಯಪ್ರದೇಶ ರಾಜ್ಯಗಳ ಪ್ರಮುಖ ನಗರಗಳನ್ನು ಸಂಪರ್ಕಿಸಲಿದೆ.

ಕೆಎಸ್‌ಆರ್ ಬೆಂಗಳೂರು (KSR Bengaluru)
ಧರ್ಮಾವರಂ
ರಾಯಚೂರು
ಸಿಕಂದರಾಬಾದ್
ಕಾಜಿಪೇಟೆ
ಬಲ್ಹಾರ್ಷಾ
ನಾಗ್ಪುರ
ಇಟಾರ್ಸಿ
ಭೋಪಾಲ್

ಬೋಗಿಗಳ ವಿವರ (Coach Composition):

ಈ ರೈಲು ಒಟ್ಟು 20 ಬೋಗಿಗಳನ್ನು ಒಳಗೊಂಡಿರಲಿದೆ:
12 ಸ್ಲೀಪರ್ ಕ್ಲಾಸ್ (Sleeper Class) ಬೋಗಿಗಳು
6 ಸಾಮಾನ್ಯ ದರ್ಜೆಯ (General Second Class) ಬೋಗಿಗಳು
2 ಲಗೇಜ್-ಕಮ್-ಬ್ರೇಕ್ ವ್ಯಾನ್ (ದಿವ್ಯಾಂಗ ಸ್ನೇಹಿ ಕಂಪಾರ್ಟ್‌ಮೆಂಟ್ ಒಳಗೊಂಡಂತೆ)

ಹಬ್ಬದ ಋತುವಿನಲ್ಲಿ ರೈಲುಗಳಲ್ಲಿ ಟಿಕೆಟ್ ಸಿಗದೆ ಪರದಾಡುತ್ತಿದ್ದ ಪ್ರಯಾಣಿಕರಿಗೆ, ವಿಶೇಷವಾಗಿ ಉತ್ತರ ಭಾರತದ ವಿವಿಧ ರಾಜ್ಯಗಳಿಗೆ ತೆರಳುವ ಕಾರ್ಮಿಕರು, ವಿದ್ಯಾರ್ಥಿಗಳು ಹಾಗೂ ಪ್ರವಾಸಿಗರಿಗೆ ಈ ವಿಶೇಷ ರೈಲು ಸಂಚಾರದಿಂದ ದೊಡ್ಡ ಮಟ್ಟದ ನೆರವಾಗಲಿದೆ ಎಂದು ನೈರುತ್ಯ ರೈಲ್ವೆ ಪ್ರಕಟಣೆಯಲ್ಲಿ ತಿಳಿಸಿದೆ.

ಇದು ನನ್ನ ಸರ್ಕಾರ ಅಲ್ಲ, ಏನು ಮಾಡ್ಲಿ, ಮೊದಲ ಬಾರಿ ಡಿಕೆಶಿ ಸರ್ಕಾರ ವಿರುದ್ಧ ಸಿದ್ದರಾಮಯ್ಯ ಅಸಮಧಾನ

Chethan Kumar — Fri, 23 Oct 2026 16:27:34 +0530

ಮೈಸೂರು (ಅ.23) ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಸ್ಟಿಂಗ್ ವಿಚಾರ ರಾಜ್ಯದಲ್ಲಿ ಹಾಗೂ ರಾಜಕೀಯದಲ್ಲಿ ಕೋಲಾಹಲ ಸೃಷ್ಟಿಸಿದೆ. ಕಳೆದ ಹಲವು ದಿನಗಳಿಂದ ಕೇಂದ್ರ ಸಚಿವ ಹೆಚ್‌ಡಿ ಕುಮಾರಸ್ವಾಮಿ , ರಾಜ್ಯ ಸರ್ಕಾರ ಹಾಗೂ ಮುಖ್ಯಮಂತ್ರಿ ಡಿಕೆ ಶಿವಕುಮಾರ್ ವಿರುದ್ದ ಸತತ ಹೋರಾಟ ನಡೆಸುತ್ತಿದ್ದಾರೆ. ಈ ಬೆಳವಣಿಗೆ ಬೆನ್ನಲ್ಲೇ ಇದೀಗ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೊದಲ ಬಾರಿಗೆ ಡಿಕೆ ಶಿವಕುಮಾರ್ ಸರ್ಕಾರದ ವಿರುದ್ದ ಅಸಮಾಧಾನ ಹೊರಹಾಕಿದ್ದಾರೆ. ದಸಾರ ಉಸ್ತುವಾರಿ ವಿವಾದ ಕುರಿತು ಪ್ರತಿಕ್ರಿಯಿಸಿದ ಸಿದ್ದರಾಮಯ್ಯ, ತೀವ್ರ ಬೇಸರ ವ್ಯಕ್ತಪಡಿಸಿದ್ದಾರೆ.

ಇದು ನನ್ನ ಸರ್ಕಾರ ಅಲ್ಲ,ನಾನೇನು ಮಾಡಲಿ

ದಸಾರಾ ಉಸ್ತುವಾರಿಗೆ ಒಂದೇ ದಿನ ಮೂವರು ಮೇಲುಸ್ತುವಾರಿ ನೇಮಿಸುವ ಅಗತ್ಯ ಇರಲಿಲ್ಲ. ಮೇಲುಸ್ತುವಾರಿ ವಹಿಸಿದ ಯಾರೂ ಕೂಡ ಮೈಸೂರು ದಸಾರಗೆ ಬರಲಿಲ್ಲ. ಆದರೂ ಸರ್ಕಾರದ ಮೇಲುಸ್ತುವಾರಿಯನ್ನು ನೇಮಿಸಿತು. ಯಾಕೆ ನೇಮಿಸದುರ ಅನ್ನೋದು ಗೊತ್ತಿಲ್ಲ. ಇದು ನನ್ನ ಸರ್ಕಾರ ಅಲ್ಲ, ಬೇರೆ ಸರ್ಕಾರ. ಇವೆಲ್ಲಾ ಮುಖ್ಯಮಂತ್ರಿಗಳ ನಿರ್ಧಾರ ನಾನೇನು ಮಾಡಲಿ ಎಂದು ಸಿದ್ದರಾಮಯ್ಯ ಅಸಮಾಧಾನ ತೋಡಿಕೊಂಡಿದ್ದಾರೆ.

ಮಾಜಿ ಮುಖ್ಯಮಂತ್ರಿ ಸಿದ್ದಾರಾಮಯ್ಯ ದಸರಾ ಉಸ್ತುವಾರಿ ವಿವಾದ ಕುರಿತು ಪ್ರಶ್ನೆಗೆ ಉತ್ತರಿಸುತ್ತಾ ಬೇಸರ ಹೊರಹಾಕಿದ್ದಾರೆ. ಗೊಂದಲ ನಿರ್ಧಾರಗಳನ್ನು ಪ್ರಶ್ನಿಸಿದ್ದಾರೆ. ಇದೀಗ ಸಿದ್ದರಾಮಯ್ಯ ಅಸಮಾಧಾನ ರಾಜಕೀಯವಾಗಿ ಕಾವು ಪಡೆದುಕೊಂಡಿದೆ. ಸ್ಟಿಂಗ್ ವಿವಾದಲ್ಲಿ ಸಿಲುಕಿರುವ ಸರ್ಕಾರಕ್ಕೆ ಇದೀಗ ಸಿದ್ದರಾಮಯ್ಯ ಅಸಮಾಧಾನ ಹಿನ್ನಡೆಯಾಗುತ್ತಾ ಅನ್ನೋ ಚರ್ಚೆಗಳು ಶುರುವಾಗಿದೆ.

ಶಿಷ್ಟಾಚಾರ ಉಲ್ಲಂಘನೆ ಕುರಿತು ಯತೀಂದ್ರ ಸಿದ್ದರಾಮಯ್ಯ ಬೆಂಬಲಿಗರ ಪ್ರತಿಭಟನೆ

ಸದ್ಯ ಸಿದ್ದರಾಮಯ್ಯ ದಸರಾ ಉಸ್ತುವಾರಿ ಕುರಿತು ಅಸಧಾನ ಹೊರಹಾಕಿದ್ದರೆ, ಇದಕ್ಕೂ ಮೊದಲು ಮೈಸೂರು ದಸರಾ ವಿಚಾರದಲ್ಲಿ ಯತೀಂದ್ರ ಸಿದ್ದರಾಮಯ್ಯ ಬೆಂಬಲಿಗರು ತೀವ್ರ ಪ್ರತಿಭಟನೆ ನಡೆಸಿದ್ದಾರೆ. ದಸರಾ ಸರ್ಕಾರಿ ಜಾಹೀರಾತಿನಲ್ಲಿ ಯತೀಂದ್ರ ಸಿದ್ದರಾಮಯ್ಯ ಫೋಟೋ ಹಾಕದ ವಿಚಾರವಾಗಿ ಬೆಂಬಲಿಗರು ಪ್ರತಿಭಟನೆ ನಡೆಸಿದ್ದರು. ಯತೀಂದ್ರ ಸಿದ್ದರಾಮಯ್ಯನವರ ಫೋಟೋವನ್ನು ಸರ್ಕಾರಿ ಜಾಹೀರಾತಿನಲ್ಲಿ ಹಾಕಿಲ್ಲ. ಇದು ಯತೀಂದ್ರ ಸಿದ್ದರಾಮಯ್ಯ ವರ್ಚಿಸ್ಸಿಗೆ ಧಕ್ಕೆ ತರುವ ಹುನ್ನಾರ ಎಂದು ಪ್ರತಿಭಟನೆ ನಡೆಸಿದ್ದರು. ನಗರದ ರಾಮಸ್ವಾಮಿ ವೃತ್ತದಲ್ಲಿ ಪ್ರತಿಭಟನೆ ನಡೆಸಿದ್ದರು. ಸಚಿವರಾದ ಬಸಂತಪ್ಪ, ನರೇಂದ್ರಸ್ವಾಮಿಗೆ ತಡೆ ಹಾಕಲಾಗಿದೆ. ದಸರಾ ಜಾಹೀರಾತಿನಲ್ಲಿ ಯತೀಂದ್ರ ಸಿದ್ದರಾಮಯ್ಯ ಫೋಟೋ ಹಾಕಿಲ್ಲ.

ಜಿಲ್ಲಾ ಉಸ್ತುವಾರಿ ಫೋಟೋ ಇಲ್ಲದೆ ಜಾಹೀರಾತು ಕೊಟ್ಟಿದ್ದಾರೆ ಎಂದು ಆಕ್ರೋಶ ಹೊರಹಾಕಿದ್ದರು. ಒಂದೆಡೆ ಸಿದ್ದರಾಮಯ್ಯನವರ ಅಸಮಾಧಾನ , ಇತ್ತ ಯತೀಂದ್ರ ಸಿದ್ದರಾಮಯ್ಯ ಬೆಂಬಲಿಗರು ಪ್ರತಿಭಟನೆ ಸರ್ಕಾರದ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂಬ ಮಾತುಗಳು ಕೇಳಿಬರುತ್ತಿದೆ.

ಮೈಸೂರು ದಸರಾ ಡ್ರೋನ್ ಶೋಗೆ ಗಿನ್ನೆಸ್ ದಾಖಲೆ! 3,473 ಡ್ರೋನ್‌ಗಳಿಂದ ಮೂಡಿಬಂತು ಭವ್ಯ ನವಿಲು

Chandrashekar GS — Fri, 23 Oct 2026 20:55:13 +0530

ಮೈಸೂರು ದಸರಾ ಡ್ರೋನ್‌ ಶೋ: 3,473 ಡ್ರೋನ್‌ಗಳಿಂದ ಗಿನ್ನೆಸ್ ವಿಶ್ವ ದಾಖಲೆ

ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವಕ್ಕೆ ಮತ್ತೊಂದು ಹೆಮ್ಮೆಯ ಗರಿ ಸಿಕ್ಕಿದೆ. ಸಾವಿರಾರು ಬಣ್ಣಬಣ್ಣದ ದೀಪಗಳಿಂದ ಕಂಗೊಳಿಸಿದ ಆಕಾಶದಲ್ಲಿ ಭಾರತದ ರಾಷ್ಟ್ರೀಯ ಪಕ್ಷಿ ನವಿಲಿನ ಬೃಹತ್ ಚಿತ್ರ ಮೂಡಿಸುವ ಮೂಲಕ ಮೈಸೂರು ದಸರಾ ಡ್ರೋನ್‌ ಪ್ರದರ್ಶನ ಹೊಸ ಗಿನ್ನೆಸ್ ವಿಶ್ವ ದಾಖಲೆಯನ್ನು ನಿರ್ಮಿಸಿದೆ. ಅಕ್ಟೋಬರ್ 18, 2026ರಂದು ಮೈಸೂರಿನ ಬನ್ನಿಮಂಟಪದ ಪಂಜಿನ ಕವಾಯತು ಮೈದಾನದಲ್ಲಿ ನಡೆದ ಈ ಅದ್ಭುತ ಪ್ರದರ್ಶನ ಜನರ ಗಮನ ಸೆಳೆಯಿತು.

ಒಂದೆರಡು ಡ್ರೋನ್‌ಗಳಲ್ಲ, ಬರೋಬ್ಬರಿ 3,473 ಡ್ರೋನ್‌ಗಳನ್ನು ಏಕಕಾಲದಲ್ಲಿ ಬಳಸಿಕೊಂಡು ನವಿಲಿನ ಆಕೃತಿಯನ್ನು ಆಕಾಶದಲ್ಲಿ ರೂಪಿಸಲಾಯಿತು. ಬಣ್ಣಬಣ್ಣದ ಬೆಳಕು, ನಿಖರ ಚಲನೆ ಮತ್ತು ಅದ್ಭುತ ಸಂಯೋಜನೆಯಿಂದ ಮೂಡಿಬಂದ ನವಿಲಿನ ದೃಶ್ಯ ನೋಡುಗರಿಗೆ ಮರೆಯಲಾಗದ ಅನುಭವ ನೀಡಿತು. ಈ ಸಾಧನೆಗೆ ಅತಿ ಹೆಚ್ಚು ಡ್ರೋನ್‌ಗಳನ್ನು ಬಳಸಿ ಆಕಾಶದಲ್ಲಿ ಪಕ್ಷಿಯ ಚಿತ್ರವನ್ನು ರೂಪಿಸಿದ ಪ್ರದರ್ಶನ ಎಂಬ ಗಿನ್ನೆಸ್ ವಿಶ್ವ ದಾಖಲೆಯ ಮಾನ್ಯತೆ ದೊರೆಯಿತು.

ಗಿನ್ನೆಸ್ ದಾಖಲೆ ನಿರ್ಮಿಸಿದ ತಂಡ ಯಾವುದು?

ಮೈಸೂರು ದಸರಾ ಸಂದರ್ಭದಲ್ಲಿ ಈ ವಿಶೇಷ ಕಾರ್ಯಕ್ರಮವನ್ನು ಚಾಮುಂಡೇಶ್ವರಿ ವಿದ್ಯುತ್ ಸರಬರಾಜು ನಿಗಮ ನಿಯಮಿತ (CESC) ಕರ್ನಾಟಕ ಸರ್ಕಾರದ ಇಂಧನ ಇಲಾಖೆಯ ಸಹಕಾರದೊಂದಿಗೆ ಆಯೋಜಿಸಿತ್ತು. ದೆಹಲಿಯ ಐಐಟಿ ದೆಹಲಿ ಇನ್‌ಕ್ಯುಬೇಟೆಡ್ ಸಂಸ್ಥೆಯಾದ ಬಾಟ್‌ಲ್ಯಾಬ್ ಡೈನಾಮಿಕ್ಸ್ (BotLab Dynamics) ಡ್ರೋನ್‌ ಪ್ರದರ್ಶನವನ್ನು ನಡೆಸಿತು.

ಗಿನ್ನೆಸ್ ವಿಶ್ವ ದಾಖಲೆ ತಂಡದ ಪ್ರತಿನಿಧಿಗಳು ಲಂಡನ್‌ನಿಂದ ಆಗಮಿಸಿ ಸಾಧನೆಯನ್ನು ಪರಿಶೀಲಿಸಿದರು. ಬಳಿಕ ದಾಖಲೆಯನ್ನು ಅಧಿಕೃತವಾಗಿ ಗುರುತಿಸಿ, ಸಿಇಎಸ್‌ಸಿ ತಾಂತ್ರಿಕ ನಿರ್ದೇಶಕ ಎಲ್. ಲೋಕೇಶ್ ಸೇರಿದಂತೆ ಅಧಿಕಾರಿಗಳಿಗೆ ಪ್ರಮಾಣಪತ್ರವನ್ನು ನೀಡಿದರು.

ನವಿಲಷ್ಟೇ ಅಲ್ಲ, ಆಕಾಶದಲ್ಲಿ ಇನ್ನೂ ಹಲವು ಚಮತ್ಕಾರ!

ಈ ಡ್ರೋನ್‌ ಪ್ರದರ್ಶನದಲ್ಲಿ ನವಿಲಿನ ಆಕೃತಿಯೇ ಪ್ರಮುಖ ಆಕರ್ಷಣೆಯಾಗಿದ್ದರೂ, ಪ್ರೇಕ್ಷಕರನ್ನು ರಂಜಿಸಲು ಒಟ್ಟು 12 ವಿಭಿನ್ನ ವಿನ್ಯಾಸಗಳನ್ನು ರೂಪಿಸಲಾಗಿತ್ತು. ಚಿಟ್ಟೆ, ಸಿಂಹ, ಸೈನಿಕನ ಕೈಯಲ್ಲಿರುವ ರಾಷ್ಟ್ರಧ್ವಜ, ಸುದರ್ಶನ ಚಕ್ರ, ಶಿವನ ರೂಪ, ನಂದಿ, ಅಂಬಾರಿ ಆನೆ ಮತ್ತು ತಾಯಿ ಚಾಮುಂಡೇಶ್ವರಿಯ ಚಿತ್ರಗಳೂ ಆಕಾಶದಲ್ಲಿ ಮೂಡಿಬಂದವು. ಪ್ರತಿಯೊಂದು ವಿನ್ಯಾಸವೂ ಬೆಳಕು ಮತ್ತು ತಂತ್ರಜ್ಞಾನದ ಸುಂದರ ಸಂಯೋಜನೆಗೆ ಸಾಕ್ಷಿಯಾಯಿತು.

ಕಳೆದ ವರ್ಷದಲ್ಲಿ ಹುಲಿ, ಈ ವರ್ಷದಲ್ಲಿ ನವಿಲು!

ಮೈಸೂರು ದಸರಾ ಡ್ರೋನ್‌ ಪ್ರದರ್ಶನಕ್ಕೆ ವಿಶ್ವ ದಾಖಲೆ ಹೊಸದಲ್ಲ. 2025ರಲ್ಲಿ 2,983 ಡ್ರೋನ್‌ಗಳನ್ನು ಬಳಸಿ ಜಿಗಿಯುವ ಹುಲಿಯ ಆಕೃತಿಯನ್ನು ರೂಪಿಸಲಾಗಿತ್ತು. ಆ ಮೂಲಕ ಸಸ್ತನಿಯೊಂದರ ಅತಿ ದೊಡ್ಡ ಆಕಾಶಚಿತ್ರದ ವಿಭಾಗದಲ್ಲಿ ಗಿನ್ನೆಸ್ ದಾಖಲೆ ನಿರ್ಮಿಸಲಾಗಿತ್ತು. ಇದೀಗ 2026ರಲ್ಲಿ ನವಿಲಿನ ವಿನ್ಯಾಸದ ಮೂಲಕ ಮತ್ತೊಂದು ಸಾಧನೆ ಮಾಡಲಾಗಿದೆ.

ಸಂಸ್ಕೃತಿ ಮತ್ತು ತಂತ್ರಜ್ಞಾನದ ಅದ್ಭುತ ಸಂಗಮ

ಮೈಸೂರು ದಸರಾ ಎಂದರೆ ಅರಮನೆಯ ದೀಪಾಲಂಕಾರ, ಜಂಬೂಸವಾರಿ, ಸಾಂಸ್ಕೃತಿಕ ಕಾರ್ಯಕ್ರಮಗಳು ಮತ್ತು ಪಂಜಿನ ಕವಾಯತು ನೆನಪಾಗುತ್ತವೆ. ಈಗ ಈ ಸಂಭ್ರಮಕ್ಕೆ ಆಧುನಿಕ ಡ್ರೋನ್‌ ತಂತ್ರಜ್ಞಾನವೂ ಹೊಸ ಮೆರುಗು ನೀಡುತ್ತಿದೆ. ನಾಡಿನ ಪರಂಪರೆಯನ್ನು ಆಧುನಿಕತೆಯೊಂದಿಗೆ ಬೆಸೆಯುವ ಇಂತಹ ಪ್ರಯತ್ನಗಳು ಕರ್ನಾಟಕದ ಸೃಜನಶೀಲತೆ ಮತ್ತು ತಾಂತ್ರಿಕ ಸಾಮರ್ಥ್ಯವನ್ನು ಜಗತ್ತಿಗೆ ಪರಿಚಯಿಸುತ್ತವೆ.

3,473 ಡ್ರೋನ್‌ಗಳ ಬೆಳಕಿನಲ್ಲಿ ಮೂಡಿಬಂದ ನವಿಲು ಕೇವಲ ಒಂದು ಪ್ರದರ್ಶನವಲ್ಲ; ಅದು ಮೈಸೂರು ದಸರಾ ವೈಭವ, ತಂತ್ರಜ್ಞಾನದ ಶಕ್ತಿ ಮತ್ತು ಕನ್ನಡ ನಾಡಿನ ಹೆಮ್ಮೆಯನ್ನು ಸಾರಿದ ಐತಿಹಾಸಿಕ ಕ್ಷಣವಾಗಿದೆ.

View this post on Instagram

A post shared by BotLab Dynamics | Drone Light Shows (@botlab.dynamics)

417 ವರ್ಷಗಳ ಐತಿಹಾಸಿಕ ವಜ್ರಮುಷ್ಠಿ ಕಾಳಗಕ್ಕೆ ತಡೆಯೊಡ್ಡಿದ್ದು ಪೊಲೀಸ್, ಪತ್ರಿಕಾಗೋಷ್ಠಿಯಲ್ಲಿ ಜಟ್ಟಿಗಳ ಆರೋಪ

Gowthami K — Sat, 24 Oct 2026 12:02:48 +0530

ಮೈಸೂರು: ಈ ಬಾರಿ ಅರಮನೆಯಲ್ಲಿ ಜಟ್ಟಿ ಕಾಳಗ ನಡೆಯದೇ ಹೋದುದರ ಹಿಂದೆ ಜಟ್ಟಿಗಳ ತಪ್ಪೇನಿಲ್ಲ, ಬದಲಾಗಿ ಅರಮನೆ ಎಸಿಪಿ ಸಹಕರಿಸದೇ ವಿಳಂಬವಾಗಿ ಅರಮನೆ ಪ್ರವೇಶಿಸುವಂತೆ ಮಾಡಿದುದೇ ಕಾರಣ ಎಂದು ಜಟ್ಟಿಗಳು ಅಳಲು ತೋಡಿಕೊಂಡಿದ್ದಾರೆ.

ಕಾಳಗದಲ್ಲಿ ಪಾಲ್ಗೊಳ್ಳುವ ಜಟ್ಟಿಗಳೆಲ್ಲ ಬೆಳಗ್ಗೆ 8ರ ಮುನ್ನವೇ ಅರಮನೆ ಪ್ರವೇಶಿಸಿ, ಸ್ಥಳಕ್ಕೆ ಆಗಮಿಸಬೇಕೆಂದು ಸೂಚಿಸಿ ತಮಗೆಲ್ಲ ಪಾಸ್ ನೀಡಲಾಗಿತ್ತು. ಅದರಂತೆ ಬೆಳಗ್ಗೆ 8ಕ್ಕೆ ಅರಮನೆಯ ಕರಿಕಲ್ ತೊಟ್ಟಿ ಬಳಿ ಹಾಜರಾದಾಗ ಪೊಲೀಸರು ತಕರಾರು ಮಾಡಿದರು. ಸ್ಕ್ಯಾನ್ ಮಾಡುವ ಯಂತ್ರ ಬಂದಿಲ್ಲ, ಅದರಲ್ಲಿ 9.30ಕ್ಕೆ ಸ್ಕ್ಯಾನ್ ಮಾಡಿ ಎಂದಿದೆ ಎಂದು ಕಾರಣ ನೀಡಿದರು. ಆಗ ನಾವು ಕಾಳಗದಲ್ಲಿ ಪಾಲ್ಗೊಳ್ಳುವ ಜಟ್ಟಿಗಳಾಗಿದ್ದೇವೆ, ಮುಹೂರ್ತದ ಸಮಯಕ್ಕೆ ಸರಿಯಾಗಿ ಅಲ್ಲಿರಬೇಕೆಂದು ಪರಿಪರಿಯಾಗಿ ಕೇಳಿಕೊಂಡರೂ ಬಿಡಲಿಲ್ಲ ಎಂದು ಬಾಲಾಜಿ ಜಟ್ಟಿ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಆರೋಪಿಸಿದರು.

ಈ ವೇಳೆ ಅರಮನೆ ಎಸಿಪಿ ಚಂದ್ರಶೇಖರ್ ಗೆ ದೂರವಾಣಿ ಕರೆ ಮಾಡಿ ಸಮಸ್ಯೆ ವಿವರಿಸಿದೆವು. ಆದರೆ, ಅವರು ನೆರವಿಗೆ ಬರಲಿಲ್ಲ. ಕಳೆದ ಬಾರಿ ಸಹ ಇದೇ ಪರಿಸ್ಥಿತಿ ಎದುರಾಗಬೇಕಾಗಿದ್ದಾಗ ರಾಜವಂಶಸ್ಥರೊಬ್ಬರು ನೆರವಿಗೆ ಬಂದರು. ಆದರೆ, ಈ ಎಸಿಪಿ ಯಾವಾಗಲೂ ಸಹಕರಿಸುವುದಿಲ್ಲ, ಅರಮನೆ ಎಸಿಪಿ ಚಂದ್ರಶೇಖರ್ ನಾಲಾಯಕ್ ಸಾಕಷ್ಟು ವರ್ಷದಿಂದ ಬಕೆಟ್ ಹಿಡಿದುಕೊಂಡು ನಿಂತಿದ್ದಾನೆ‌ ಎಂದು ದೂರಿದರು.

ಈ ಬಾರಿ ಜಟ್ಟಿ ಕಾಳಗ ಮೈಸೂರು ದಸರಾ ಇತಿಹಾಸದಲ್ಲಿ ಇದೇ ಮೊದಲ ಬಾರಿ ಎಂಬಂತೆ ರದ್ದಾಗಿದೆ. ಈ ಕಪ್ಪು ಚುಕ್ಕೆ ಉಂಟಾಗಲು ಈ ಅಧಿಕಾರಿಗಳೇ ಕಾರಣರಾಗಿದ್ದಾರೆ. ಬೇಕಿದ್ದರೆ ಆ ವೇಳೆಯ ಸಿಸಿಟಿವಿ ದೃಶ್ಯಾವಳಿ ಯಾರಾದರೂ ಪರಿಶೀಲಿಸಲಿ. ಈ ಬಗ್ಗೆ ತಾವೆಲ್ಲ ನಗರ ಪೊಲೀಸ್ ಆಯುಕ್ತರಿಗೆ ದೂರು ನೀಡುತ್ತಿದ್ದೇವೆ ಎಂದರು. ಜಟ್ಟಿಗಳಾದ ಮಾಧವ ಜಟ್ಟಿ, ಕೃಷ್ಣ ಜಟ್ಟಿ, ಬಲರಾಂ ಜಟ್ಟಿ ಇದ್ದರು.

417 ವರ್ಷಗಳ ಐತಿಹಾಸಿಕ ಕಾಳಗ

ಮೈಸೂರು ರಾಜವಂಶಸ್ಥರು 417 ವರ್ಷಗಳಿಂದಲೂ ದಸರಾ ಆಚರಿಸಿಕೊಂಡು ಬಂದ ಸಂಪ್ರದಾಯದ ವಿಜಯದಶಮಿ ಮೆರವಣಿಗೆಗೂ ಮುನ್ನಾ ಜಟ್ಟಿ ಕಾಳಗ ನಡೆಯಬೇಕು. ಆದರ ವಜ್ರಮುಷ್ಠಿ ಕಾಳಗದಲ್ಲಿ ಪಾಲ್ಗೊಳ್ಳಬೇಕಾದ ಜಟ್ಟಿಗಳಿಗೇ ಅರಮನೆ ಪ್ರವೇಶಕ್ಕೆ ಅವಕಾಶ ನೀಡದ ಹಿನ್ನೆಲೆಯಲ್ಲಿ ವಜ್ರಮುಷ್ಠಿ ಕಾಳಗ ರದ್ದಾಯಿತು.

ಜಟ್ಟಿ ಕಾಳಗ ನಡೆಸುವ ಬದಲು ಜಟ್ಟಿಗಳು ಪೊಲೀಸರೊಂದಿಗೆ ಅರಮನೆ ಪ್ರವೇಶಕ್ಕಾಗಿ ಕಾಳಗ ನಡೆಸಬೇಕಾದ ಪ್ರಸಂಗ ಎದುರಾಯಿತು. ಐದು ವರ್ಷಗಳ ಹಿಂದೆ ಕೋವಿಡ್‌ ಸಂದರ್ಭದಲ್ಲಿ ರಾಜವಂಶಸ್ಥೆ ಪ್ರಮೋದಾದೇವಿ ಒಡೆಯರ್‌ ಅವರ ತಾಯಿ ನಿಧನರಾದ ಹಿನ್ನೆಲೆಯಲ್ಲಿ ವಜ್ರಮುಷ್ಠಿ ಕಾಳಗ ರದ್ದುಪಡಿಸಿ, ಐದು ದಿನಗಳ ಬಳಿಕ ವಜ್ರಮುಷ್ಠಿ ಕಾಳಗ ನಡೆಸಿದ್ದರು.