Asianet Suvarna News

ಈ ನಟನ ಸೀಕ್ರೆಟ್ ಶಾಕಿಂಗ್ ಸ್ಟೋರಿ: 8 ಸಾವಿರ ಕೋಟಿ ಆಸ್ತಿ, 3 ಕೋಟಿ ಮನೆ; ದಿನಕ್ಕೆ ಕೈಗೆ ಸಿಗೋ ಬಾಡಿಗೆ ಹಣ ಇಷ್ಟೊಂದು!?

Shriram Bhat — Fri, 23 Oct 2026 15:33:36 +0530

ಭಾರತೀಯ ಚಿತ್ರರಂಗದ ಶ್ರೀಮಂತ ನಟ, ಸಾವಿರಾರು ಕೋಟಿ ಆಸ್ತಿಯ ಒಡೆಯ. ಸಿನಿಮಾಗಳ ಜೊತೆಗೆ ದಿನಕ್ಕೆ ಕೋಟ್ಯಂತರ ರೂಪಾಯಿ ಬ್ಯುಸಿನೆಸ್ ಮಾಡುವ ಈ ಸ್ಟಾರ್ ನಟ ಯಾರು? ತಮ್ಮ ಮನೆಯನ್ನೇ ದಿನಕ್ಕೆ 2 ಲಕ್ಷ ರೂಪಾಯಿಗೆ ಬಾಡಿಗೆಗೆ ಕೊಟ್ಟಿರುವ ಆ ಸೂಪರ್ ಸ್ಟಾರ್ ಬಗ್ಗೆ ಇಲ್ಲಿದೆ ಮಾಹಿತಿ ನೋಡಿ..

ಇವರು ಭಾರತೀಯ ಚಿತ್ರರಂಗದ ಅತಿ ಶ್ರೀಮಂತ ನಟ. ಇವರಷ್ಟು ಸಂಪತ್ತು ಬೇರೆ ಯಾವ ನಟನಿಗೂ ಇಲ್ಲ. ಸಾವಿರಾರು ಕೋಟಿ ಆಸ್ತಿಗೆ ಇವರು ಒಡೆಯ. ತಮ್ಮ ಮನೆಯ ಮುಂದಿರುವ ನೇಮ್ ಬೋರ್ಡ್‌ಗೇ 20 ಲಕ್ಷ ರೂ. ಖರ್ಚು ಮಾಡಿದ್ದಾರೆ ಅಂದರೆ ಇವರ ರೇಂಜ್ ಎಂಥದ್ದು ಅಂತ ನೀವೇ ಊಹಿಸಿ. ಸಿನಿಮಾಗಳು ಮಾತ್ರವಲ್ಲದೆ, ಬೇರೆ ಬೇರೆ ಬ್ಯುಸಿನೆಸ್ ಮೂಲಕವೂ ಇವರು ಕೋಟಿ ಕೋಟಿ ಸಂಪಾದಿಸುತ್ತಾರೆ.

ಈ ನಟನಿಗೆ 300 ಕೋಟಿ ರೂ. ಬೆಲೆಬಾಳುವ ಒಂದು ಐಷಾರಾಮಿ ಮನೆ ಇದೆ. ಆ ಮನೆಯನ್ನು ಬಾಡಿಗೆಗೆ ಬಿಟ್ಟು, ಪ್ರತಿ ತಿಂಗಳು ಲಕ್ಷ ಲಕ್ಷ ಹಣ ಗಳಿಸುತ್ತಿದ್ದಾರೆ. ದಿನದ ಬಾಡಿಗೆಯೇ ಬರೋಬ್ಬರಿ 2 ಲಕ್ಷ ರೂಪಾಯಿಗೂ ಹೆಚ್ಚು! ಆ ನಟ ಬೇರಾರೂ ಅಲ್ಲ, ಬಾಲಿವುಡ್ ಬಾದ್‌ಶಾ ಶಾರುಖ್ ಖಾನ್. ಈ ಮನೆ ಇರುವುದು ಭಾರತದಲ್ಲಿ ಅಲ್ಲ, ಅಮೆರಿಕದ ಲಾಸ್ ಏಂಜಲೀಸ್‌ನಲ್ಲಿ. ಈ ಮನೆಯ ವಿಶೇಷತೆ ಏನು ಗೊತ್ತಾ?

ಶಾರುಖ್ ಖಾನ್ ಭಾರತೀಯ ಚಿತ್ರರಂಗದ ಅತಿ ಶ್ರೀಮಂತ ಸ್ಟಾರ್ ಹೀರೋ. ಪ್ರಪಂಚದಾದ್ಯಂತ ಇವರಿಗೆ ಕೋಟ್ಯಂತರ ಅಭಿಮಾನಿಗಳಿದ್ದಾರೆ. ಸಿನಿಮಾಗಳ ಜೊತೆಗೆ ಐಪಿಎಲ್ ಕ್ರಿಕೆಟ್ ತಂಡದ ಮಾಲೀಕತ್ವ ಹಾಗೂ ಹಲವು ಬ್ಯುಸಿನೆಸ್ ಮೂಲಕ ಸಾವಿರಾರು ಕೋಟಿ ಸಾಮ್ರಾಜ್ಯವನ್ನು ಇವರು ಕಟ್ಟಿದ್ದಾರೆ. ಇವರ ಲೈಫ್‌ಸ್ಟೈಲ್ ಯಾವಾಗಲೂ ಸುದ್ದಿಯಲ್ಲಿರುತ್ತದೆ. ಮುಂಬೈನಲ್ಲಿರುವ ಇವರ 'ಮನ್ನತ್' ಬಂಗಲೆ ಬಗ್ಗೆ ಎಲ್ಲರಿಗೂ ಗೊತ್ತೇ ಇದೆ. ಆದರೆ, ವಿದೇಶಗಳಲ್ಲೂ ಶಾರುಖ್ ಖಾನ್‌ಗೆ ಐಷಾರಾಮಿ ಆಸ್ತಿಗಳಿವೆ. ಮುಖ್ಯವಾಗಿ ಅಮೆರಿಕದ ಲಾಸ್ ಏಂಜಲೀಸ್‌ನಲ್ಲಿ ಇವರದ್ದೊಂದು ಕೋಟ್ಯಂತರ ರೂಪಾಯಿ ಬೆಲೆಬಾಳುವ ಅದ್ಭುತ ಬಂಗಲೆ ಇದೆ.

ಅಮೆರಿಕದಲ್ಲಿ 300 ಕೋಟಿಯ ಬಂಗಲೆ

ಅಮೆರಿಕದ ಅತಿ ದುಬಾರಿ ಪ್ರದೇಶವಾದ 'ಬೆವರ್ಲಿ ಹಿಲ್ಸ್' (Beverly Hills) ನಲ್ಲಿ ಶಾರುಖ್ ಖಾನ್ ಈ ಲಕ್ಸುರಿ ಮನೆಯನ್ನು ಹೊಂದಿದ್ದಾರೆ. ಸುಮಾರು 300 ಕೋಟಿ ರೂ.ಗೂ ಹೆಚ್ಚು ಬೆಲೆಬಾಳುವ ಈ ಬಂಗಲೆಯಲ್ಲಿ ಅತ್ಯಾಧುನಿಕ ಸೌಲಭ್ಯಗಳಿವೆ. ವಿಶಾಲವಾದ 6 ಬೆಡ್‌ರೂಮ್‌ಗಳು, ಸುಂದರವಾದ ಸ್ವಿಮ್ಮಿಂಗ್ ಪೂಲ್, ಪ್ರೈವೇಟ್ ಕಬಾನಾ ಹಾಗೂ ಆಟವಾಡಲು ಪ್ರತ್ಯೇಕ ಟೆನಿಸ್ ಕೋರ್ಟ್ ಕೂಡ ಇಲ್ಲಿದೆ.

ಈ ಬಂಗಲೆಯ ಇಂಟೀರಿಯರ್ ಡಿಸೈನ್ ನೋಡಿದರೆ ರಾಜಮಹಲ್ ನೆನಪಾಗುತ್ತದೆ. ಹಾಲಿನಲ್ಲಿರುವ ದೊಡ್ಡ ಸಿಟ್ಟಿಂಗ್ ಏರಿಯಾದಿಂದ ಹೊರಗಿನ ಸುಂದರ ಪ್ರಕೃತಿಯನ್ನು ನೋಡಲು ಸುತ್ತಲೂ ಗ್ಲಾಸ್ ಫಿಟ್ಟಿಂಗ್ಸ್ ಅಳವಡಿಸಿದ್ದಾರೆ. ಸ್ಟೈಲಿಶ್ ಸೋಫಾ ಸೆಟ್‌ಗಳು, ರಾಜವಂಶವನ್ನು ನೆನಪಿಸುವ ವಾಲ್ ಪೇಂಟಿಂಗ್‌ಗಳು, ದುಬಾರಿ ಶೋಪೀಸ್‌ಗಳು ಹಾಗೂ ಪ್ರತಿಯೊಂದು ಮೂಲೆಯಲ್ಲೂ ಇರುವ ವಿಶೇಷ ಲೈಟಿಂಗ್ ಈ ಮನೆಯ ಅಂದವನ್ನು ಮತ್ತಷ್ಟು ಹೆಚ್ಚಿಸಿವೆ. ಅಷ್ಟೇ ಅಲ್ಲ, ಇಲ್ಲಿನ ಬಾತ್‌ರೂಮ್‌ಗಳು ಕೂಡ ಒಂದು ದೊಡ್ಡ ಬೆಡ್‌ರೂಮ್‌ನಷ್ಟೇ ವಿಶಾಲವಾಗಿವೆ. ಜಕುಝಿ (Jacuzzi) ಯಂತಹ ಅತ್ಯಾಧುನಿಕ ಸೌಲಭ್ಯಗಳು ಇಲ್ಲಿವೆ.

ಶಾರುಖ್ ಖಾನ್ ಈ ಐಷಾರಾಮಿ ಮನೆಯನ್ನು ಕೇವಲ ತಮ್ಮ ರಜೆ ಕಳೆಯಲು ಮಾತ್ರ ಬಳಸುವುದಿಲ್ಲ, ಬದಲಾಗಿ ಬಾಡಿಗೆಗೂ ಕೊಡುತ್ತಾರೆ. ಪ್ರಪಂಚದಾದ್ಯಂತ ಇರುವ ಗಣ್ಯರು ಅಥವಾ ಪ್ರವಾಸಿಗರು ಈ ಬಂಗಲೆಯಲ್ಲಿ ಉಳಿದುಕೊಳ್ಳಬೇಕಾದರೆ ಭಾರಿ ಮೊತ್ತ ಪಾವತಿಸಬೇಕು. ಈ ಮನೆಯಲ್ಲಿ ಒಂದು ದಿನ ಉಳಿದುಕೊಳ್ಳಲು ಬರೋಬ್ಬರಿ 2 ಲಕ್ಷ ರೂಪಾಯಿಗೂ ಹೆಚ್ಚು ಬಾಡಿಗೆ ಕಟ್ಟಬೇಕು. ಸಾವಿರಾರು ಕೋಟಿ ಆಸ್ತಿ ಇದ್ದರೂ, ವಿದೇಶಿ ಪ್ರಾಪರ್ಟಿಗಳನ್ನು ಬಾಡಿಗೆಗೆ ಕೊಟ್ಟು ಹಣ ಗಳಿಸುವ ಶಾರುಖ್ ಖಾನ್ ಅವರ ಬ್ಯುಸಿನೆಸ್ ಮೈಂಡ್ ಎಲ್ಲರಿಗೂ ಅಚ್ಚರಿ ಮೂಡಿಸುತ್ತದೆ.

17ನೇ ವಯಸ್ಸಿನಲ್ಲೇ ಬಿಸಿನೆಸ್ ಮೈಂಡ್! ದಾಂಡಿಯಾ ನೈಟ್ ನಲ್ಲಿ ನೀರಿನ ಬಾಟಲ್ ಮಾರಿ ಈತ ಗಳಿಸಿದ್ದೆಷ್ಟು ಗೊತ್ತಾ?

Roopa Hegde — Tue, 27 Oct 2026 12:31:11 +0530

ನವರಾತ್ರಿ ಸಂದರ್ಭದಲ್ಲಿ ದಾಂಡಿಯಾ ಸಂಭ್ರಮ ಮನೆ ಮಾಡಿರುತ್ತೆ. ಒಂಭತ್ತು ದಿನಗಳ ಕಾಲ ಸುಂದರವಾಗಿ ರೆಡಿಯಾಗಿ ಬರುವ ಜನರು, ಹಾಡಿಗೆ ಹೆಜ್ಜೆ ಹಾಕ್ತಾ ಸಂಭ್ರಮಿಸ್ತಾರೆ. ಎಲ್ಲರೂ ದಾಂಡಿಯಾ ನೈಟ್‌ ಹೇಗೆ ಎಂಜಾಯ್‌ ಮಾಡೋದು ಅಂತ ಯೋಚನೆ ಮಾಡ್ತಿದ್ರೆ ಈಗ ಹುಡುಗ ಹಣ ಮಾಡೋದು ಹೇಗೆ ಅಂತ ಪ್ಲಾನ್‌ ಮಾಡಿದ್ದಾನೆ. ಕೊನೆಯಲ್ಲಿ ಅವನ ಐಡಿಯಾ ವರ್ಕ್‌ ಆಗಿದೆ. ದಿನಕ್ಕೆ 50 ಸಾವಿರ ಸಂಪಾದನೆ ಕೂಡ ಮಾಡಿದ್ದಾನೆ.

ಸಣ್ಣ ಐಡಿಯಾ ನೀಡ್ತು ದೊಡ್ಡ ಆದಾಯ

ಗುಜರಾತ್ನ ಜನಪ್ರಿಯ ಗರ್ಬಾ ಕಾರ್ಯಕ್ರಮದಲ್ಲಿ ಜನಸಂದಣಿ ಹೆಚ್ಚಾಗಿರುತ್ತದೆ. ಸಾವಿರಾರು ಜನ ಸೇರುವ ಇಂತಹ ಜಾಗದಲ್ಲಿ ಕುಡಿಯುವ ನೀರಿಗೆ ಬೇಡಿಕೆಯೂ ಹೆಚ್ಚಿರುತ್ತೆ. ಇದೇ ಅವಕಾಶವನ್ನು ಗುರುತಿಸಿದ ಈ ಹುಡುಗ, ವಾಟರ್ ಬಾಟಲ್ ಮಾರಾಟ ಮಾಡುವ ಬಿಸಿನೆಸ್ ಶುರು ಮಾಡಿದ್ದಾನೆ.

ಈತ ದಿನಕ್ಕೆ ಸುಮಾರು 100 ಕಾರ್ಟನ್ ನೀರಿನ ಬಾಟಲ್ಗಳನ್ನು ಮಾರಾಟ ಮಾಡಿದ್ದಾನೆ. ಒಂದು ಕಾರ್ಟನ್ನಲ್ಲಿ 24 ಬಾಟಲ್ಗಳಿರುತ್ತವೆ. ಪ್ರತಿ ಬಾಟಲ್ನ ಬೆಲೆ 20 ರೂಪಾಯಿ. ಅಂದರೆ, 100 ಕಾರ್ಟನ್ಗಳಲ್ಲಿ ಒಟ್ಟು 2,400 ಬಾಟಲ್ಗಳಾಗುತ್ತವೆ. ಪ್ರತಿ ಬಾಟಲ್ಗೆ 20 ರೂಪಾಯಿಯಂತೆ ಲೆಕ್ಕ ಹಾಕಿದರೆ, ದಿನದ ಒಟ್ಟು ಮಾರಾಟದ ಮೊತ್ತ ಬರೋಬ್ಬರಿ 48 ಸಾವಿರ ರೂಪಾಯಿ.

ಬಂದ 48 ಸಾವಿರವೂ ಆತನಿಗೆ ಲಾಭವಲ್ಲ. ಈ ಸ್ಟಾಲ್ ಹಾಕಲು ಆತ ದಿನಕ್ಕೆ ಸುಮಾರು 20 ಸಾವಿರ ರೂಪಾಯಿ ಬಾಡಿಗೆ ನೀಡಿದ್ದಾನೆ ಎನ್ನಲಾಗಿದೆ. ಇದರ ಜೊತೆಗೆ ನೀರಿನ ಬಾಟಲ್ಗಳನ್ನು ಖರೀದಿಸುವ ವೆಚ್ಚ ಮತ್ತು ಇತರ ಖರ್ಚುಗಳು ಸೇರುತ್ವೆ. ಆದ್ರೆ ಒಂಭತ್ತು ದಿನಗಳಲ್ಲಿ ಆತ 50 ರಿಂದ 60 ಸಾವಿರ ಲಾಭ ಮಾಡಿರುವ ಸಾಧ್ಯತೆ ಇದೆ.

ಆದಾಯ ಎಷ್ಟೇ ಬಂದಿರಲಿ, ಈ ಹುಡುಗನ ಬಿಸಿನೆಸ್ ಐಡಿಯಾದಲ್ಲಿ ಕಲಿಯಬೇಕಾದ ಒಂದು ಮುಖ್ಯವಾದ ಪಾಠವಿದೆ. ಜನರು ಎಲ್ಲಿ ಹೆಚ್ಚು ಸೇರುತ್ತಾರೆ, ಅವರಿಗೆ ಯಾವ ವಸ್ತುವಿನ ಅಗತ್ಯವಿದೆ, ಆ ಅಗತ್ಯವನ್ನು ಹೇಗೆ ಬಿಸಿನೆಸ್ ಆಗಿ ಪರಿವರ್ತಿಸಬಹುದು ಅನ್ನೋದನ್ನು ಅರ್ಥಮಾಡಿಕೊಳ್ಳುವ ಬುದ್ಧಿವಂತಿಕೆ ಇರಬೇಕು. ಬಿಸಿನೆಸ್ ಮಾಡಬೇಕು ಅಂದ್ರೆ ದೊಡ್ಡ ಅಂಗಡಿ ಬೇಕು, ಲಕ್ಷಾಂತರ ರೂಪಾಯಿ ಬಂಡವಾಳ ಬೇಕು ಅಂತೇನಿಲ್ಲ. ಕೆಲವೊಮ್ಮೆ ಸಣ್ಣ ಐಡಿಯಾ ಕೂಡ ದೊಡ್ಡ ಅವಕಾಶವಾಗಿ ಬದಲಾಗಬಹುದು.

Chanakya Niti: ಶ್ರೀಮಂತರಾಗುತ್ತಿದ್ದಂತೆ ಈ 4 ವಿಷಯಗಳನ್ನು ಗುಟ್ಟಾಗಿಡಿ! ಚಾಣಕ್ಯ ನೀಡಿದ ಎಚ್ಚರಿಕೆಯ ಪಾಠ

Pavna Das — Sat, 17 Oct 2026 20:30:58 +0530

Chanakya Niti: ಹಣ ಸಂಪಾದಿಸುವುದು ಎಷ್ಟು ಮುಖ್ಯವೋ, ಅದನ್ನು ಸರಿಯಾಗಿ ನಿರ್ವಹಿಸುವುದೂ ಅಷ್ಟೇ ಮುಖ್ಯ. ಆಚಾರ್ಯ ಚಾಣಕ್ಯರ ನೀತಿಗಳು ಹಣಕಾಸಿನ ನಿರ್ವಹಣೆ, ಜೀವನಶೈಲಿ ಮತ್ತು ವೈಯಕ್ತಿಕ ನಡವಳಿಕೆಯ ಕುರಿತು ಹಲವು ಪಾಠಗಳನ್ನು ನೀಡುತ್ತವೆ. ಹಣ ಸಂಪಾದಿಸಿದ ನಂತರ ಏನು ಮಾಡಬೇಕು? ಇಲ್ಲಿದೆ ಮಾಹಿತಿ.

ಹಣ ಸಂಪಾದಿಸುವುದು ಎಷ್ಟು ಕಷ್ಟವೋ, ಸಂಪಾದಿಸಿದ ಹಣವನ್ನು ಜೋಪಾನವಾಗಿ ಉಳಿಸಿಕೊಳ್ಳುವುದು ಅದಕ್ಕಿಂತಲೂ ದೊಡ್ಡ ಸವಾಲು. ಇದಕ್ಕಾಗಿ ಪರಿಶ್ರಮ, ವಿವೇಕ, ತಾಳ್ಮೆ ಮತ್ತು ಸರಿಯಾದ ನಿರ್ಧಾರಗಳನ್ನು ತೆಗೆದುಕೊಳ್ಳುವುದು ಅಗತ್ಯ. ಚಾಣಕ್ಯ ನೀತಿಯ ಪ್ರಕಾರ, ಕೈಯಲ್ಲಿ ಹಣ ಬರಲು ಆರಂಭವಾದಾಗ ಅಹಂಕಾರ, ಆಡಂಬರ ಮತ್ತು ಕೆಟ್ಟ ಅಭ್ಯಾಸಗಳಿಂದ ದೂರವಿರಬೇಕು. ಯಾವ ನಾಲ್ಕು ವಿಷಯಗಳನ್ನು ವ್ಯಕ್ತಿ ಮಾಡಬಾರದು ಅನ್ನೋದನ್ನು ನೋಡೋಣ.

ಚಾಣಕ್ಯ ನೀತಿಯ ಪ್ರಕಾರ, ವ್ಯಕ್ತಿಯ ಕೈಗೆ ಹಣ ಬರಲು ಆರಂಭವಾದಾಗ ಕೆಲವರು ತಮ್ಮ ಸಂಪತ್ತನ್ನು ಪ್ರದರ್ಶಿಸಲು ಶುರುಮಾಡುತ್ತಾರೆ. ದುಬಾರಿ ವಸ್ತುಗಳನ್ನು ಖರೀದಿಸುವುದು, ಪ್ರತಿದಿನ ಹೊಸ ಹೊಸ ವಸ್ತುಗಳನ್ನು ಕೊಳ್ಳುವುದು, ಕೈಯಲ್ಲಿರುವ ನಗದನ್ನು ಇತರರಿಗೆ ತೋರಿಸುವುದು ಅಥವಾ ಸ್ನೇಹಿತರ ಮುಂದೆ ತಮ್ಮ ಆದಾಯದ ಬಗ್ಗೆ ಪದೇಪದೇ ಹೇಳಿಕೊಳ್ಳುವುದು ಮುಂತಾದವುಗಳ ಮೂಲಕ ಇತರರನ್ನು ಆಕರ್ಷಿಸಲು ಪ್ರಯತ್ನಿಸುತ್ತಾರೆ. ಆದರೆ ಇಂತಹ ನಡವಳಿಕೆಯು ಇತರರಲ್ಲಿ ಅಸೂಯೆ, ಅನಗತ್ಯ ಸ್ಪರ್ಧೆ ಮತ್ತು ಆರ್ಥಿಕ ಒತ್ತಡವನ್ನು ಹೆಚ್ಚಿಸಬಹುದು. ಆದ್ದರಿಂದ ನಿಮ್ಮ ಆರ್ಥಿಕ ಪರಿಸ್ಥಿತಿಯನ್ನು ಖಾಸಗಿಯಾಗಿ ಇಟ್ಟುಕೊಳ್ಳುವುದು ಮತ್ತು ಅಗತ್ಯಕ್ಕೆ ತಕ್ಕಂತೆ ಹಣ ಖರ್ಚು ಮಾಡುವುದು ಬುದ್ಧಿವಂತಿಕೆಯ ಲಕ್ಷಣ.

ಚಾಣಕ್ಯ ನೀತಿಯ ಪ್ರಕಾರ, ದಾನ ಮಾಡುವುದು ಒಳ್ಳೆಯ ಕಾರ್ಯ. ಆದರೆ ಸಮಾಜದಲ್ಲಿ ಹೆಸರು ಗಳಿಸಲು ಅಥವಾ ಇತರರ ಮುಂದೆ ಒಳ್ಳೆಯ ವ್ಯಕ್ತಿಯಂತೆ ಕಾಣಿಸಿಕೊಳ್ಳಲು ಸಾಮರ್ಥ್ಯಕ್ಕಿಂತ ಹೆಚ್ಚು ಹಣ ದಾನ ಮಾಡಬಾರದು. ಇತರರಿಗೆ ಸಹಾಯ ಮಾಡುವ ಮೊದಲು ನಿಮ್ಮ ಆರ್ಥಿಕ ಪರಿಸ್ಥಿತಿಯನ್ನು ಪರಿಶೀಲಿಸಬೇಕು. ಕುಟುಂಬದ ಜವಾಬ್ದಾರಿಗಳು, ದೈನಂದಿನ ಖರ್ಚುಗಳು ಮತ್ತು ಭವಿಷ್ಯದ ಉಳಿತಾಯದ ಬಗ್ಗೆಯೂ ಗಮನ ಹರಿಸಬೇಕು. ಕೇವಲ ಆಡಂಬರಕ್ಕಾಗಿ ದಾನ ಮಾಡಿದರೆ, ನಿಮ್ಮ ಸಂಪತ್ತಿನ ಪರಿಣಾಮ ಬೀರಬಹುದು.

ದುಬಾರಿ ಕಾರುಗಳು, ಬ್ರ್ಯಾಂಡೆಡ್ ಬಟ್ಟೆಗಳು ಮತ್ತು ಬೆಲೆಬಾಳುವ ಆಭರಣಗಳನ್ನು ಖರೀದಿಸುವುದು ಪ್ರತಿಯೊಬ್ಬರ ವೈಯಕ್ತಿಕ ಆಯ್ಕೆ. ಆದರೆ ಇತರರನ್ನು ಮೆಚ್ಚಿಸುವ ಉದ್ದೇಶದಿಂದ ಮಾತ್ರ ಇಂತಹ ವಸ್ತುಗಳನ್ನು ಖರೀದಿಸಲು ತಮ್ಮ ಆದಾಯಕ್ಕಿಂತ ಹೆಚ್ಚು ಖರ್ಚು ಮಾಡುವುದು ಸಾಲದ ಹೊರೆ ಮತ್ತು ಆರ್ಥಿಕ ಸಂಕಷ್ಟಕ್ಕೆ ಕಾರಣವಾಗಬಹುದು.

ಆಚಾರ್ಯ ಚಾಣಕ್ಯರ ನೀತಿಯ ಪ್ರಕಾರ, ವ್ಯಸನಗಳು ವ್ಯಕ್ತಿಯ ಆರೋಗ್ಯ, ಸಂಬಂಧಗಳು ಮತ್ತು ಆರ್ಥಿಕ ಪರಿಸ್ಥಿತಿಯ ಮೇಲೆ ಕೆಟ್ಟ ಪರಿಣಾಮ ಬೀರಬಹುದು. ವ್ಯಸನಗಳಿಂದ ಅನೇಕ ಕುಟುಂಬಗಳು ಸಂಕಷ್ಟಕ್ಕೆ ಸಿಲುಕಿದ್ದು, ಹಲವರು ತಮ್ಮ ಸಂಪತ್ತನ್ನು ಕಳೆದುಕೊಂಡಿದ್ದಾರೆ ಮತ್ತು ಆರೋಗ್ಯ ಸಮಸ್ಯೆಗಳನ್ನು ಎದುರಿಸಿದ್ದಾರೆ.ಮದ್ಯಪಾನ ಅಥವಾ ಇತರ ಮಾದಕ ವಸ್ತುಗಳ ಬಳಕೆಯಿಂದ ವ್ಯಕ್ತಿಯ ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯವೂ ಕುಂಠಿತವಾಗಬಹುದು. ಇದರಿಂದ ಅನಗತ್ಯ ಖರ್ಚು ಹೆಚ್ಚಾಗಿ, ಆರ್ಥಿಕ ಪರಿಸ್ಥಿತಿ ಹದಗೆಡಬಹುದು.

Jio IPO: ಖುಲಾಯಿಸಿದ jio ಅದೃಷ್ಟ: ಆರಂಭವಾದ 35 ನಿಮಿಷದಲ್ಲೇ ಐಪಿಒ ಹೌಸ್‌ಫುಲ್, ಹೂಡಿಕೆದಾರರಿಂದ ಮುಗಿಬಿದ್ದ ಅರ್ಜಿ!

Bhimasi M Koleppanavar — Wed, 21 Oct 2026 11:28:23 +0530

ಜಿಯೋ ಪ್ಲಾಟ್ಫಾರ್ಮ್ಸ್ನ ಐಪಿಒ ಮಾರುಕಟ್ಟೆಯಲ್ಲಿ ಘೋಷಣೆಯಾದ ತಕ್ಷಣ ಹೂಡಿಕೆದಾರರು ಭರ್ಜರಿ ಖರೀದಿ ಆರಂಭಿಸಿದ್ದಾರೆ. ಷೇರು ಮಾರುಕಟ್ಟೆ ಆರಂಭವಾದ ಕೇವಲ 35 ನಿಮಿಷಗಳಲ್ಲಿ (ಬೆಳಿಗ್ಗೆ 10:35 ರ ಹೊತ್ತಿಗೆ) ಸಂಪೂರ್ಣ ಐಪಿಒಗೆ ಚಂದಾದಾರಿಕೆ ದೊರೆತಿದೆ. ಎನ್ಎಸ್ಇ ದತ್ತಾಂಶದ ಪ್ರಕಾರ, ಕಂಪನಿಯು ನೀಡಿದ 197.5 ಮಿಲಿಯನ್ ಷೇರುಗಳಿಗೆ ಪ್ರತಿಯಾಗಿ 200.3 ಮಿಲಿಯನ್ ಷೇರುಗಳಿಗೆ ಅರ್ಜಿ ಸಲ್ಲಿಕೆಯಾಗಿದ್ದು, ಒಟ್ಟಾರೆಯಾಗಿ 1.01 ಪಟ್ಟು ಚಂದಾದಾರಿಕೆ ಪಡೆದುಕೊಂಡಿದೆ ಎನ್ನಲಾಗಿದೆ. ಈ ಕುರಿತು ಸಂಪೂರ್ಣ ವಿವರ ಇಲ್ಲಿದೆ.

ಕ್ಯೂಐಬಿ (QIB) ಭಾಗಕ್ಕೆ ಅಭೂತಪೂರ್ವ ಬೆಂಬಲ!

ಜಿಯೋ ಪ್ಲಾಟ್ಫಾರ್ಮ್ಸ್ ತನ್ನ ಐಪಿಒದ 50% ಭಾಗವನ್ನು ಅರ್ಹ ಸಾಂಸ್ಥಿಕ ಖರೀದಿದಾರರಿಗೆ (QIB) ಕಾಯ್ದಿರಿಸಿದೆ. ಈ ವಿಭಾಗಕ್ಕೆ ನಿರೀಕ್ಷೆಗಿಂತ ಎರಡರಷ್ಟು ಅರ್ಜಿಗಳು ಸ್ವೀಕೃತವಾಗಿದ್ದು, 3.25 ಪಟ್ಟು ಚಂದಾದಾರಿಕೆ ಪಡೆಯುವ ಮೂಲಕ ಸಂಪೂರ್ಣವಾಗಿ ಭರ್ತಿಯಾಗಿದೆ.

ಹೂಡಿಕೆದಾರರಿಂದ ₹8,109.84 ಕೋಟಿ ಸಂಗ್ರಹ!

ಐಪಿಒ ಚಂದಾದಾರಿಕೆ ಆರಂಭಕ್ಕೂ ಮುನ್ನ, ಅಕ್ಟೋಬರ್ 19 ರಂದು ಜಿಯೋ ಪ್ಲಾಟ್ಫಾರ್ಮ್ಸ್ 212 ಹೂಡಿಕೆದಾರರಿಂದ ₹8,109.84 ಕೋಟಿ ಸಂಗ್ರಹಿಸಿದೆ. ಆಂಕರ್ ಹೂಡಿಕೆದಾರರ ಒಟ್ಟು ಬೇಡಿಕೆಯು ಸುಮಾರು ₹2.5 ಲಕ್ಷ ಕೋಟಿ ತಲುಪಿದ್ದು, ಇಷ್ಟು ದೊಡ್ಡ ಮಟ್ಟದ ಬಿಡ್ ಪಡೆದ ಮೊದಲ ಭಾರತೀಯ ಐಪಿಒ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ಜಾಗತಿಕ ದೈತ್ಯ ಸಂಸ್ಥೆಗಳು ಹಾಗೂ ಪಿಂಚಣಿ ನಿಧಿಗಳ ಹೂಡಿಕೆ!

ಈ ಹೂಡಿಕೆದಾರರಲ್ಲಿ ಬ್ಲ್ಯಾಕ್ರಾಕ್, ಕ್ಯಾಪಿಟಲ್ ಗ್ರೂಪ್, ಫಿಡೆಲಿಟಿ ಇನ್ವೆಸ್ಟ್ಮೆಂಟ್ಸ್ , ಟಿ. ರೋವ್ ಪ್ರೈಸ್ , ಶ್ರೋಡರ್ಸ್ , ಜೆಪಿ ಮಾರ್ಗನ್ ಅಸೆಟ್ ಮ್ಯಾನೇಜ್ಮೆಂಟ್, ಫ್ರಾಂಕ್ಲಿನ್ ಟೆಂಪಲ್ಟನ್, ಇನ್ವೆಸ್ಕೊ (Invesco) ಮತ್ತು ಪ್ರುಡೆನ್ಶಿಯಲ್ ನಂತಹ ವಿಶ್ವಪ್ರಸಿದ್ಧ ಸಂಸ್ಥೆಗಳು ಸೇರಿವೆ. ಇದರ ಜೊತೆಗೆ ಸಿಂಗಾಪುರ, ಅಬುಧಾಬಿ, ಕತಾರ್, ಕ್ಯಾಲಿಫೋರ್ನಿಯಾ ಮತ್ತು ಫ್ಲೋರಿಡಾದಂತಹ ದೇಶ/ನಗರಗಳ ಸರ್ಕಾರಿ ಪಿಂಚಣಿ ನಿಧಿಗಳು ಸಹ ಇದರಲ್ಲಿ ಭಾರಿ ಪ್ರಮಾಣದ ಹಣ ಹೂಡಿಕೆ ಮಾಡಿವೆ.

ಜಿಎಂಪಿ ಏರಿಕೆ!

ಜಿಯೋ ಐಪಿಒ ಮಾರುಕಟ್ಟೆಯಲ್ಲಿ ಭಾರಿ ಸಂಚಲನ ಮೂಡಿಸಿದ್ದು, ಬೂದು ಮಾರುಕಟ್ಟೆಯಲ್ಲೂ ಇದರ ಜನಪ್ರಿಯತೆ ಹೆಚ್ಚುತ್ತಿದೆ. ಇಂದು ಬೆಳಿಗ್ಗೆ ಐಪಿಒದ ಗ್ರೇ ಮಾರ್ಕೆಟ್ ಪ್ರೀಮಿಯಂ ಸುಮಾರು 24% ರಷ್ಟು ಹೆಚ್ಚಾಗಿ, ₹273 ಪ್ರೀಮಿಯಂ ತಲುಪಿದೆ. ಇದರರ್ಥ ಷೇರುಗಳು ಪಟ್ಟಿಯಾಗುವ ಸಮಯದಲ್ಲಿ ಹೂಡಿಕೆದಾರರಿಗೆ ಪ್ರತಿ ಷೇರಿಗೆ ₹273 ಲಾಭ (ಶೇ. 24.4% ಗಳಿಕೆ) ತಂದುಕೊಡುವ ಸಾಧ್ಯತೆಯಿದೆ.

33 ವರ್ಷಗಳ ಯುಎಇ ವಾಸದ ಬಳಿಕ ಭಾರತೀಯನಿಗೆ ಒಲಿದ ₹12.9 ಕೋಟಿ ಲಾಟರಿ! ಹಣ ಬಂದ್ಮೇಲೆ ಅವರ ಮುಂದಿನ ಪ್ಲ್ಯಾನ್ ಏನು?

Chandrashekar GS — Tue, 27 Oct 2026 08:30:24 +0530

33 ವರ್ಷಗಳಿಂದ ಯುಎಇಯಲ್ಲಿ ನೆಲೆಸಿದ್ದ ಭಾರತೀಯನಿಗೆ ₹12.9 ಕೋಟಿ ಲಾಟರಿ! ಗೋಲ್ಡನ್ ವೀಸಾ, ಪತ್ನಿಯೊಂದಿಗೆ ವಿಶ್ವ ಪ್ರವಾಸದ ಕನಸು

ಯುನೈಟೆಡ್ ಅರಬ್ ಎಮಿರೇಟ್ಸ್‌ (ಯುಎಇ)ನಲ್ಲಿ ಮೂರು ದಶಕಗಳಿಗೂ ಹೆಚ್ಚು ಕಾಲ ಬದುಕು ಕಟ್ಟಿಕೊಂಡಿರುವ ಭಾರತೀಯ ಮೂಲದ ಕಿಶೋರ್ ಪಾಂಡುರಂಗ ರಾವ್ ಅವರಿಗೆ ಅದೃಷ್ಟ ಒಲಿದಿದೆ. ಯುಎಇ ಲಾಟರಿಯಲ್ಲಿ ಬರೋಬ್ಬರಿ 50 ಲಕ್ಷ ದಿರ್ಹಮ್‌ (ಸುಮಾರು ₹12.9 ಕೋಟಿ) ಬಹುಮಾನ ಗೆದ್ದಿರುವ ಅವರು, ಈಗ ಕುಟುಂಬದೊಂದಿಗೆ ಹೆಚ್ಚು ಸಮಯ ಕಳೆಯುವುದು, ಪತ್ನಿಯೊಂದಿಗೆ ವಿಶ್ವ ಪ್ರವಾಸ ಕೈಗೊಳ್ಳುವುದು ಮತ್ತು ಗೋಲ್ಡನ್ ವೀಸಾ ಪಡೆಯುವ ಕನಸನ್ನು ನನಸಾಗಿಸಿಕೊಳ್ಳುವ ಬಗ್ಗೆ ಯೋಚಿಸುತ್ತಿದ್ದಾರೆ.

₹1,300 ಹೂಡಿಕೆಗೆ ₹12.9 ಕೋಟಿ ಬಹುಮಾನ!

ಶಾರ್ಜಾದಲ್ಲಿ ನೆಲೆಸಿರುವ ಕಿಶೋರ್ ರಾವ್ ಅವರು ಅಕ್ಟೋಬರ್ 3ರಂದು ನಡೆದ ‘ಲಕ್ಕಿ ಡೇ’ ಲಾಟರಿ ಡ್ರಾದಲ್ಲಿ ಎರಡನೇ ಬಹುಮಾನ ಗೆದ್ದಿದ್ದಾರೆ. ಅವರು ಕೇವಲ 50 ದಿರ್ಹಮ್‌ (ಸುಮಾರು ₹1,300) ನೀಡಿ ಲಾಟರಿ ಟಿಕೆಟ್ ಖರೀದಿಸಿದ್ದರು. ಸಂಖ್ಯೆಗಳ ಆಯ್ಕೆಗಾಗಿ ‘ಈಸಿ ಪಿಕ್’ ಆಯ್ಕೆಯನ್ನು ಬಳಸಿದ್ದರು. ಡ್ರಾದಲ್ಲಿ ‘ಡೇಸ್’ ವಿಭಾಗದ ಆರು ಸಂಖ್ಯೆಗಳೂ ಹೊಂದಿಕೆಯಾಗಿದ್ದರಿಂದ ಅವರಿಗೆ 50 ಲಕ್ಷ ದಿರ್ಹಮ್‌ ಬಹುಮಾನ ದೊರೆತಿದೆ. ಅಕ್ಟೋಬರ್ 8ರಂದು ತಮ್ಮ 60ನೇ ಹುಟ್ಟುಹಬ್ಬ ಆಚರಿಸಿಕೊಳ್ಳುವ ಕೆಲವೇ ದಿನಗಳ ಮೊದಲು ಈ ಸುದ್ದಿ ಅವರಿಗೆ ಸಿಕ್ಕಿದೆ.

ಹಣಕ್ಕಿಂತ ಕುಟುಂಬವೇ ಮೊದಲ ಆದ್ಯತೆ

ಕಿಶೋರ್ ರಾವ್ ಅವರಿಗೆ ಈ ಹಣವನ್ನು ಖರ್ಚು ಮಾಡುವುದಕ್ಕಿಂತ ಕುಟುಂಬದ ಭವಿಷ್ಯಕ್ಕೆ ಬಳಸುವುದು ಮುಖ್ಯವಾಗಿದೆ. ತಮ್ಮ ಹಿರಿಯ ಮಗ ಸ್ವಂತ ಉದ್ಯಮ ಆರಂಭಿಸಲು ನೆರವಾಗಬೇಕು ಮತ್ತು ಕಿರಿಯ ಮಗನ ಉನ್ನತ ಶಿಕ್ಷಣಕ್ಕೆ ಸಹಾಯ ಮಾಡಬೇಕು ಎಂಬುದು ಅವರ ಆಶಯ. ಕೆಲಸದ ಕಾರಣದಿಂದ ಕುಟುಂಬದವರಿಂದ ದೂರವಿದ್ದ ಸಂದರ್ಭಗಳೂ ಇದ್ದುದರಿಂದ, ಎಲ್ಲರೂ ಯುಎಇಯಲ್ಲಿ ಒಟ್ಟಿಗೆ ಹೆಚ್ಚು ಸಮಯ ಕಳೆಯುವಂತಾಗಬೇಕು ಎಂದು ಬಯಸಿದ್ದಾರೆ.

ಗೋಲ್ಡನ್ ವೀಸಾ ಮತ್ತು ಪತ್ನಿಯೊಂದಿಗೆ ವಿಶ್ವ ಪ್ರವಾಸ

1993ರಲ್ಲಿ ಯುಎಇಗೆ ಬಂದಿದ್ದ ಕಿಶೋರ್ ರಾವ್ ಅವರು ದುಬೈ, ಅಜ್ಮಾನ್, ಶಾರ್ಜಾ ಮತ್ತು ಅಬುಧಾಬಿಯಲ್ಲಿ ವಾಸಿಸಿದ್ದಾರೆ. ದೀರ್ಘಕಾಲದಿಂದ ಯುಎಇ ಗೋಲ್ಡನ್ ವೀಸಾ ಪಡೆಯುವ ಆಸೆ ಹೊಂದಿದ್ದ ಅವರಿಗೆ, ಈಗ ಅದಕ್ಕಾಗಿ ಅರ್ಜಿ ಸಲ್ಲಿಸುವ ಅವಕಾಶದ ಬಗ್ಗೆ ಯೋಚಿಸಲು ಸಾಧ್ಯವಾಗಿದೆ. ಜೊತೆಗೆ, ಪ್ರವಾಸ ಇಷ್ಟಪಡುವ ತಮ್ಮ ಪತ್ನಿಯೊಂದಿಗೆ ಜಗತ್ತಿನ ವಿವಿಧ ದೇಶಗಳನ್ನು ಸುತ್ತಬೇಕು ಎಂಬುದು ಅವರ ಕನಸು. ಆದರೆ ಹಣವನ್ನು ಹೇಗೆ ಬಳಸಬೇಕು ಎಂಬುದರ ಬಗ್ಗೆ ಆತುರದ ನಿರ್ಧಾರ ತೆಗೆದುಕೊಳ್ಳುವುದಿಲ್ಲ ಎಂದು ಅವರು ಹೇಳಿದ್ದಾರೆ. ಲಾಟರಿಯಲ್ಲಿ ಭಾಗವಹಿಸುವವರು ತಮ್ಮ ಖರ್ಚಿಗೆ ಮಿತಿ ನಿಗದಿಪಡಿಸಿಕೊಳ್ಳಬೇಕು ಎಂಬ ಸಲಹೆಯನ್ನೂ ನೀಡಿದ್ದಾರೆ.

Say hello to Kishore, our latest AED 5 MILLION Second Prize winner!

Kishore has a lot to celebrate, especially with his 60th birthday making this winning moment even more memorable!

A big congratulations to Kishore!

#TheUAELottery #WinnerSpotlight #DareToImagine https://t.co/PI2kHiN4wn

— The UAE Lottery (@theuaelottery) October 26, 2026

Jio Platforms IPO ಧಮಾಕಾ : ಹೂಡಿಕೆದಾರರಿಂದ ಸಿಕ್ಕಿದೆ ಉತ್ತಮ ರೆಸ್ಪಾನ್ಸ್, ನಾಳೆ ಒಂದೇ ದಿನ ಅವಕಾಶ

Roopa Hegde — Thu, 22 Oct 2026 19:49:27 +0530

ರಿಲಯನ್ಸ್ ಗ್ರೂಪ್ನ ಜಿಯೋ ಪ್ಲಾಟ್ಫಾರ್ಮ್ಸ್ ಐಪಿಒ (IPO), ಹೂಡಿಕೆದಾರರ ಗಮನ ಸೆಳೆದಿದೆ. ಸುಮಾರು 30,213 ಕೋಟಿ ರೂಪಾಯಿ ಮೌಲ್ಯದ ಈ ಐಪಿಒಗೆ ಮೊದಲ ಎರಡು ದಿನಗಳಲ್ಲಿ ಭಾರಿ ಬೇಡಿಕೆ ವ್ಯಕ್ತವಾಗಿದೆ. ಅಕ್ಟೋಬರ್ 22ರ ವರದಿಗಳ ಪ್ರಕಾರ, ಆಂಕರ್ ಹೂಡಿಕೆದಾರರ ಬೇಡಿಕೆಯನ್ನು ಸೇರಿಸಿ ಒಟ್ಟು ಬಿಡ್ಗಳ ಮೌಲ್ಯ ಸುಮಾರು 3.58 ಲಕ್ಷ ಕೋಟಿ ರೂಪಾಯಿ ತಲುಪಿದೆ. ಆದರೂ, ಭಾರತದ ಐಪಿಒ ಇತಿಹಾಸದಲ್ಲಿ ಅತಿ ಹೆಚ್ಚು ಬಿಡ್ ಮೌಲ್ಯದ ದಾಖಲೆ ಜಿಯೋ ಹೆಸರಿನಲ್ಲಿಲ್ಲ.

ಜಿಯೋ ಐಪಿಒಗೆ ಎರಡನೇ ದಿನವೂ ಭಾರಿ ಬೇಡಿಕೆ

ಜಿಯೋ ಪ್ಲಾಟ್ಫಾರ್ಮ್ಸ್ ಐಪಿಒ ಅಕ್ಟೋಬರ್ 21ರಂದು ಸಾರ್ವಜನಿಕ ಚಂದಾದಾರಿಕೆಗೆ ತೆರೆಯಿತು. ಅಕ್ಟೋಬರ್ 22ರಂದು ಮಧ್ಯಾಹ್ನ 1.15ರ ವೇಳೆಗೆ ಐಪಿಒ 3.93 ಪಟ್ಟು ಸಬ್ಸ್ಕ್ರೈಬ್‌ ಪಡೆದಿತ್ತು. ಸಾರ್ವಜನಿಕರಿಗೆ ಮೀಸಲಿಟ್ಟಿದ್ದ ಸುಮಾರು 19.75 ಕೋಟಿ ಷೇರುಗಳಿಗೆ 77.64 ಕೋಟಿ ಷೇರುಗಳಿಗೆ ಬಿಡ್ ಸಲ್ಲಿಸಲಾಗಿತ್ತು. ಪ್ರತಿ ಷೇರಿಗೆ 1,119ರ ಗರಿಷ್ಠ ಬೆಲೆಯ ಆಧಾರದಲ್ಲಿ ಈ ಬಿಡ್ಗಳ ಮೌಲ್ಯ ಸುಮಾರು 86,880 ಕೋಟಿ ಆಗಿತ್ತು.

ಅಂದರೆ, ಐಪಿಒ ಗಾತ್ರಕ್ಕಿಂತ ಹಲವು ಪಟ್ಟು ಹೆಚ್ಚಿನ ಬೇಡಿಕೆ ವ್ಯಕ್ತವಾಗಿದೆ. ನಂತರದ ವರದಿಗಳ ಪ್ರಕಾರ, ಅಕ್ಟೋಬರ್ 22ರ ಸಂಜೆ ವೇಳೆಗೆ ಸಾರ್ವಜನಿಕ ಚಂದಾದಾರಿಕೆ ಸುಮಾರು 5 ಪಟ್ಟು ತಲುಪಿದ್ದು, ಆಂಕರ್ ಹೂಡಿಕೆದಾರರ ಬೇಡಿಕೆಯನ್ನೂ ಸೇರಿಸಿ ಒಟ್ಟು ಬೇಡಿಕೆ ಸುಮಾರು 3.58 ಲಕ್ಷ ಕೋಟಿ ಆಗಿದೆ.

ಆಂಕರ್ ಹೂಡಿಕೆದಾರರಿಗೆ 8,109 ಕೋಟಿ ಮೌಲ್ಯದ ಷೇರು ಹಂಚಿಕೆ

ಜಿಯೋ ಪ್ಲಾಟ್ಫಾರ್ಮ್ಸ್ ಒಟ್ಟು 212 ಆಂಕರ್ ಹೂಡಿಕೆದಾರರಿಗೆ 8,109.85 ಕೋಟಿ ಮೌಲ್ಯದ ಷೇರುಗಳನ್ನು ಹಂಚಿಕೆ ಮಾಡಿದೆ. ಪ್ರತಿ ಷೇರಿಗೆ 1,119ರ ಗರಿಷ್ಠ ಬೆಲೆಯಲ್ಲಿ ಈ ಹಂಚಿಕೆ ನಡೆದಿದೆ. ಸಾಂಸ್ಥಿಕ ಹೂಡಿಕೆದಾರರಿಂದ ಸುಮಾರು 2.5 ಲಕ್ಷ ಕೋಟಿ ಮೌಲ್ಯದ ಬೇಡಿಕೆ ವ್ಯಕ್ತವಾಗಿದೆ ಎಂದು ವರದಿಯಾಗಿದೆ. ಆಂಕರ್ ಹೂಡಿಕೆದಾರರಿಗೆ ಮೀಸಲಿಟ್ಟಿದ್ದ ಷೇರುಗಳ ಪ್ರಮಾಣಕ್ಕೆ ಹೋಲಿಸಿದರೆ ಇದು 30 ಪಟ್ಟು ಹೆಚ್ಚು ಬೇಡಿಕೆಯಾಗಿದೆ. ಆಂಕರ್ ಹೂಡಿಕೆದಾರರು ಎಂದರೆ ಐಪಿಒ ಸಾರ್ವಜನಿಕರಿಗೆ ತೆರೆಯುವ ಮೊದಲು ಷೇರುಗಳನ್ನು ಹಂಚಿಕೆ ಪಡೆಯುವ ಅರ್ಹ ದೊಡ್ಡ ಹೂಡಿಕೆದಾರರು. ಇವರಲ್ಲಿ ಮ್ಯೂಚುವಲ್ ಫಂಡ್ಗಳು, ವಿಮಾ ಕಂಪನಿಗಳು ಮತ್ತು ಇತರ ಹಣಕಾಸು ಸಂಸ್ಥೆಗಳು ಸೇರಿರುತ್ತವೆ.

ಭಾರತದ ಅತಿದೊಡ್ಡ ಐಪಿಒ ಬಿಡ್ ದಾಖಲೆ ಯಾರ ಹೆಸರಿನಲ್ಲಿದೆ?

ಜಿಯೋ ಐಪಿಒಗೆ ಭಾರಿ ಬೇಡಿಕೆ ಬಂದಿದ್ದರೂ, ಭಾರತದ ಐಪಿಒ ಇತಿಹಾಸದಲ್ಲಿ ಅತಿ ಹೆಚ್ಚು ಬಿಡ್ ಮೌಲ್ಯದ ದಾಖಲೆ ಇನ್ನೂ ರಿಲಯನ್ಸ್ ಪವರ್ ಹೆಸರಿನಲ್ಲಿದೆ. 2008ರಲ್ಲಿ ಬಿಡುಗಡೆಯಾದ ರಿಲಯನ್ಸ್ ಪವರ್ ಐಪಿಒಗೆ ಸುಮಾರು ₹7.52 ಲಕ್ಷ ಕೋಟಿ ಮೌಲ್ಯದ ಬಿಡ್ಗಳು ಬಂದಿದ್ದವು.

ಪ್ರಮುಖ ಐಪಿಒಗಳ ಬಿಡ್ ಮೌಲ್ಯಗಳ ಹೋಲಿಕೆ ಇಲ್ಲಿದೆ:

ರಿಲಯನ್ಸ್ ಪವರ್ (2008): ಸುಮಾರು ₹7.52 ಲಕ್ಷ ಕೋಟಿ

ಎಲ್‌ ಜಿ ಎಲೆಕ್ಟ್ರಾನಿಕ್ಸ್ ಇಂಡಿಯಾ (2025): ಸುಮಾರು ₹4.4 ಲಕ್ಷ ಕೋಟಿ

ಬಜಾಜ್ ಹೌಸಿಂಗ್ ಫೈನಾನ್ಸ್ (2024): ಸುಮಾರು ₹3.28 ಲಕ್ಷ ಕೋಟಿ

ಜಿಯೋ ಪ್ಲಾಟ್ಫಾರ್ಮ್ಸ್ (2026): ಅಕ್ಟೋಬರ್ 22ರ ವರದಿಯ ಪ್ರಕಾರ ಆಂಕರ್ ಬೇಡಿಕೆ ಸೇರಿಸಿ ಸುಮಾರು ₹3.58 ಲಕ್ಷ ಕೋಟಿ

ಜಿಯೋ ಐಪಿಒಗೆ ಅರ್ಜಿ ಸಲ್ಲಿಸಲು ಯಾವಾಗ ಕೊನೆಯ ದಿನ?

ಜಿಯೋ ಪ್ಲಾಟ್ಫಾರ್ಮ್ಸ್ ಐಪಿಒಗೆ ಅರ್ಜಿ ಸಲ್ಲಿಸಲು ಅಕ್ಟೋಬರ್ 23, 2026 ಕೊನೆಯ ದಿನವಾಗಿದೆ. ಷೇರಿನ ಬೆಲೆ ಪಟ್ಟಿಯನ್ನು 1,065ರಿಂದ 1,119ರವರೆಗೆ ನಿಗದಿಪಡಿಸಲಾಗಿದೆ. ಒಂದು ಲಾಟ್ನಲ್ಲಿ 12 ಷೇರುಗಳಿದ್ದು, ಗರಿಷ್ಠ ಬೆಲೆಯ ಆಧಾರದಲ್ಲಿ ಒಂದು ಲಾಟ್ಗೆ 13,428 ಹೂಡಿಕೆ ಮಾಡಬೇಕಾಗುತ್ತದೆ. ವರದಿಗಳ ಪ್ರಕಾರ, ಷೇರು ಹಂಚಿಕೆ ಅಕ್ಟೋಬರ್ 26ರಂದು ಅಂತಿಮಗೊಳ್ಳುವ ನಿರೀಕ್ಷೆಯಿದ್ದು, ಅಕ್ಟೋಬರ್ 28ರಂದು ಷೇರು ಮಾರುಕಟ್ಟೆಯಲ್ಲಿ ಲಿಸ್ಟಿಂಗ್ ಆಗುವ ಸಾಧ್ಯತೆಯಿದೆ.

ಲಿಸ್ಟಿಂಗ್ ದಿನ ಲಾಭ ಸಿಗುತ್ತದೆಯೇ?

IPOಗೆ ಹೆಚ್ಚಿನ ಬೇಡಿಕೆ ಬಂದಿದೆ ಎಂಬ ಕಾರಣಕ್ಕೆ ಲಿಸ್ಟಿಂಗ್ ದಿನ ಷೇರಿನ ಬೆಲೆ ಏರಲಿದೆ ಅಥವಾ ಹೂಡಿಕೆದಾರರಿಗೆ ಲಾಭ ಖಚಿತ ಎಂದು ಹೇಳಲು ಸಾಧ್ಯವಿಲ್ಲ. ಲಿಸ್ಟಿಂಗ್ ಬೆಲೆ ಮಾರುಕಟ್ಟೆಯ ಪರಿಸ್ಥಿತಿ, ಕಂಪನಿಯ ಮೌಲ್ಯಮಾಪನ ಮತ್ತು ಹೂಡಿಕೆದಾರರ ಬೇಡಿಕೆಯನ್ನು ಅವಲಂಬಿಸಿರುತ್ತದೆ. ಆದ್ದರಿಂದ, ಕೇವಲ ಚಂದಾದಾರಿಕೆ ಪ್ರಮಾಣ ಅಥವಾ ಗ್ರೇ ಮಾರ್ಕೆಟ್ ಪ್ರೀಮಿಯಂ ಆಧರಿಸಿ ಹೂಡಿಕೆ ನಿರ್ಧಾರ ತೆಗೆದುಕೊಳ್ಳುವುದಕ್ಕಿಂತ, ಕಂಪನಿಯ ಹಣಕಾಸಿನ ಸ್ಥಿತಿ ಮತ್ತು ಐಪಿಒಗೆ ಸಂಬಂಧಿಸಿದ ಅಧಿಕೃತ ದಾಖಲೆಗಳನ್ನು ಪರಿಶೀಲಿಸುವುದು ಮುಖ್ಯ.

Bank Loan: ಸಾಲ ಪಡೆಯುವಾಗ ಆತುರ, ಎಲ್ಲರೂ ಮಾಡುವ ಐದು ದೊಡ್ಡ ತಪ್ಪುಗಳು

Ganesh Mabla Gowda — Sat, 24 Oct 2026 23:10:19 +0530

ಬದುಕಿಗೆ ಒಂದಷ್ಟು ಕನಸುಗಳು. ಇನ್ನೂ ಬೇಕು, ಏನೋ ಬೇಕು ಎಂಬ ಆಸೆ. ಅದನ್ನ ಈಡೇರಿಸಿಕೊಳ್ಳೋಣ ಅಂದ್ರೆ ಕೈಯಲ್ಲಿ ಕಾಸು ಇರಲ್ಲ. ಹೇಗಾದರೂ ಮಾಡಿ ಪಡೆಯಲೇಬೇಕು ಅಂತಾ ಹೊರಟಾಗ.. ಮುಖದ ಮುಂದೆ ಚಿನ್ನದಂಥ ಬಣ್ಣಗಳನ್ನ ಇಟ್ಟು ಬುಡದಿಂದ ತಲೆಯವರೆಗೆ ಹೆರೆಯುವ ಬ್ಯಾಂಕಿಂಗ್‌ ಸ್ಕೀಮ್‌ಗಳು ಕಣ್ಮುಂದೆ ಬರುತ್ತವೆ. ಆಗಿದ್ದು ಆಗಿಯೇ ಹೋಗಲಿ. ಸಾಲ ಮಾಡಿಯಾದರೂ ಸರಿ ತೆಗೆದುಕೊಳ್ಳೋಣ ಅಂತಾ ಲೋನ್‌ ಮಾಡಲು ಹೋಗುತ್ತೇವೆ. ಈ ಲೋನ್‌ ಮಾಡುವ ಆತುರದಲ್ಲಿ ನಾವು ಒಂದಷ್ಟು ತಪ್ಪುಗಳನ್ನ ಮಾಡಿಬಿಡುತ್ತೇವೆ. ಲೋನ್‌ ಮಾಡುವ ಐದು ತಪ್ಪುಗಳು ಇಲ್ಲಿವೆ..

ಅಗತ್ಯಕ್ಕಿಂತ ಹೆಚ್ಚು ಸಾಲ

ಈ ಬ್ಯಾಂಕ್‌ಗಳು, ಕ್ರೆಡಿಟ್‌ ಕಾರ್ಟ್‌ಗಳು ಹಾಗೂ ಇತರೆ ಹಣಕಾಸು ಸಂಸ್ಥೆಗಳು.. ಜನರಿಗೆ ಅವರ ಅಗತ್ಯಕ್ಕಿಂತ ಹೆಚ್ಚಿನ ಸಾಲ ನೀಡಿ ಅವರಿಂದ ಮತ್ತಷ್ಟು ಹಣವನ್ನು ಪೀಕಿಸುವ ಪ್ಲಾನ್‌ ಮಾಡಿರುತ್ತವೆ. ಸಾಲ ಪಡೆಯುವಾಗ ಇದನ್ನೆಲ್ಲ ಮರೆತು ಸಿಗುತ್ತದೆ ಎಂದಾಗ ಇರಲಿ, ಆಮೇಲೆ ನೋಡಿಕೊಳ್ಳೋಣ ಎಂದು ಲೋನ್‌ ಮಾಡಿ ಬಿಡ್ತೇವೆ. ಇದು ತಪ್ಪು. ಯಾವತ್ತೂ ಹಾಗೆ ಮಾಡಬಾರದು. ಇದು ಮರುಪಾವತಿಗೆ, ಇಎಂಐಗೆ ಭಾರೀ ತೊಂದರೆ ಆಗುತ್ತದೆ. ಮಾಸಿಕ ಆದಾಯದ ಮಿತಿಯೊಳಗೆ ನಮ್ಮ ಸಾಲ ಇರಬೇಕು.

ಯೋಚಿಸದೇ ಇರೋದು

ಹಣ ಅಗತ್ಯ ಇದ್ದಾಗ ಜನರು ಬಹುತೇಕ ಕಡೆಗಳಲ್ಲಿ ಕುರುಡಾಗಿ ಸಾಲ ಮಾಡಿ ಬಿಡುತ್ತೇವೆ. ಜನರು ಸಂಬಳ ಖಾತೆ ಮತ್ತು ತಮಗೆ ತಿಳಿದಿರುವ ಕಂಪನಿಗಳನ್ನ ನಂಬಿರುತ್ತಾರೆ. NBFCಗಳು ಹೆಚ್ಚಿನ ಬಡ್ಡಿಯನ್ನು ವಿಧಿಸುತ್ತವೆ ಎಂಬ ತಪ್ಪು ಕಲ್ಪನೆ ಇರುತ್ತದೆ. ಸಾಲ ತೆಗೆದುಕೊಳ್ಳುವ ಮೊದಲು ಕನಿಷ್ಠ 3 ರಿಂದ 4 ವಿಭಿನ್ನ ಬ್ಯಾಂಕುಗಳು ಮತ್ತು NBFCಗಳ ಬಡ್ಡಿದರಗಳನ್ನು ಹೋಲಿಸಬೇಕು. ಬಡ್ಡಿದರ ಸೇರಿದಂತೆ ಇತರೆ ಫೀಸ್‌ಗಳ ಬಗ್ಗೆಯೂ ತಿಳಿದುಕೊಂಡು ಮುಂದುವರಿಯಬೇಕು.

ದಾಖಲೆಗಳನ್ನ ಓದಬೇಕು

ಯಾವುದೇ ಕಾರಣಕ್ಕೂ ಸಾಲ ಪಡೆಯುವಾಗ ದಾಖಲೆಗಳನ್ನ ಓದೋದನ್ನು ಮರೆಯಬಾರದು. ಬ್ಯಾಂಕು ವಿಧಿಸುವ ನಿಯಮಗಳು, ಷರತ್ತುಗಳನ್ನ ಓದಿಯೇ ಒಪ್ಪಂದಗಳಿಗೆ ಸಹಿ ಮಾಡಬೇಕು.

ಬಡ್ಡಿದರ ಸ್ಥಿರವಾಗಿದೆಯೇ? ಇಲ್ಲ ಬದಲಾಗುತ್ತಾ?
ನಿಗದಿತ ದಿನಾಂಕದ ಮೊದಲು ಮರುಪಾವತಿ ಮಾಡಿದ್ರೆ ಏನು?
ಇಎಂಐ ವಿಳಂಬವಾದರೆ ದಂಡಗಳು ಯಾವುವು?
ಈ ಎಲ್ಲಾ ವಿಚಾರಗಳನ್ನು ಸ್ಪಷ್ಟವಾಗಿ ತಿಳಿದುಕೊಳ್ಳಬೇಕು
ಇಲ್ಲದಿದ್ದರೆ ಜೇಬು ಖಾಲಿ ಆಗೋದ್ರಲ್ಲಿ ಯಾವುದೇ ಅನುಮಾನ ಇಲ್ಲ

EMI ಮತ್ತು ಮರುಪಾವತಿ ದಿನಾಂಕದಲ್ಲಿ ಆತುರ

ಸಾಲದ ಮೊತ್ತದ ಹೊರತಾಗಿ EMI ಮೊತ್ತವು ಸಹ ನಿರ್ಣಾಯಕ
ಮಾಸಿಕ ವೆಚ್ಚಗಳು, ಭವಿಷ್ಯದ ಅಗತ್ಯಗಳು ಗಮನದಲ್ಲಿ ಇರಬೇಕು
ಆರಾಮವಾಗಿ ನಿಭಾಯಿಸಬಹುದಾದ EMI ಮೊತ್ತವನ್ನು ನಿರ್ಧರಿಸಿ
ಮಾಸಿಕ ಸಂಬಳದ 40 ಪ್ರತಿಶತ ಇಎಂಐ ಮೀರದಂತೆ ನೋಡಿಕೊಳ್ಳಬೇಕು
EMI ದಿನಾಂಕವನ್ನು ಆಯ್ಕೆಮಾಡುವಾಗ ಜಾಗರೂಕರಾಗಿರಿ
5 ಅಥವಾ 7 ನೇ ತಾರೀಖಿನಂದು EMI ದಿನಾಂಕ ನಿಗದಿಪಡಿಸುವುದು ಉತ್ತಮ
ಇದರಿಂದ ನೀವು EMI ಬೌನ್ಸ್ ಮತ್ತು ದಂಡಗಳನ್ನು ತಪ್ಪಿಸಿಕೊಳ್ಳಬಹುದು

ಒಂದು ಕಾಲದಲ್ಲಿ ಆಟವಾಡಲು ಖರೀದಿಸಿದ ಕಾರ್ಡ್‌ಗಳೇ ಈಗ ₹19.8 ಕೋಟಿ ಮೌಲ್ಯ! ಅಸಲಿ ಕಥೆ ಇಲ್ಲಿದೆ

Chandrashekar GS — Sat, 24 Oct 2026 13:30:11 +0530

1990ರ ದಶಕದಲ್ಲಿ ಖರೀದಿಸಿದ Pokemon ಕಾರ್ಡ್‌ಗಳಿಂದ ₹19.8 ಕೋಟಿ ಗಳಿಕೆ! 15 ವರ್ಷ ಅಟ್ಟದಲ್ಲಿ ಮರೆತಿದ್ದ ಸಂಗ್ರಹ

ಇಂಗ್ಲೆಂಡ್‌ನ ನಿವೃತ್ತ ಅಲಂಕಾರ ಕೆಲಸಗಾರರೊಬ್ಬರು ಹಲವು ವರ್ಷಗಳ ಹಿಂದೆ ಸಂಗ್ರಹಿಸಿದ್ದ Pokemon ಕಾರ್ಡ್‌ಗಳನ್ನು ಹರಾಜಿನಲ್ಲಿ ಮಾರಾಟ ಮಾಡಿ ಬರೋಬ್ಬರಿ £1.56 ಮಿಲಿಯನ್, ಅಂದರೆ ಸುಮಾರು ₹19.8 ಕೋಟಿ ಗಳಿಸಿದ್ದಾರೆ. 1990ರ ದಶಕದ ಕೊನೆಯಲ್ಲಿ ಹೂಡಿಕೆಯಾಗಬಹುದು ಎಂಬ ನಿರೀಕ್ಷೆಯಿಂದ ಖರೀದಿಸಿದ್ದ ಈ ಕಾರ್ಡ್‌ಗಳು, ಸುಮಾರು 15 ವರ್ಷಗಳ ಕಾಲ ಮನೆಯ ಅಟ್ಟದಲ್ಲಿ ಯಾರ ಗಮನಕ್ಕೂ ಬಾರದೆ ಉಳಿದಿದ್ದವು. ಇತ್ತೀಚೆಗೆ ಅವುಗಳ ಮೌಲ್ಯ ತಿಳಿದಾಗ ಅವರಿಗೆ ಅಚ್ಚರಿ ಕಾದಿತ್ತು.

ಮಗನ ಹವ್ಯಾಸದಿಂದ ಆರಂಭವಾದ ಕಾರ್ಡ್ ಸಂಗ್ರಹ

ಇಂಗ್ಲೆಂಡ್‌ನ ವೋಕಿಂಗ್ ಪ್ರದೇಶದ ಈ ವ್ಯಕ್ತಿಯ ಮಗ ಬಾಲ್ಯದಲ್ಲಿ Pokemon ಕಾರ್ಡ್‌ಗಳನ್ನು ಸಂಗ್ರಹಿಸುತ್ತಿದ್ದ. ಶಾಲೆಯಲ್ಲಿ ಸ್ನೇಹಿತರೊಂದಿಗೆ ಕಾರ್ಡ್‌ಗಳನ್ನು ವಿನಿಮಯ ಮಾಡಿಕೊಳ್ಳುತ್ತಿದ್ದ ಮಗನ ಆಸಕ್ತಿಯನ್ನು ಕಂಡ ತಂದೆಯೂ ಈ ಕಾರ್ಡ್‌ಗಳತ್ತ ಆಕರ್ಷಿತರಾದರು.

ಆದರೆ ಮಗನಿಗೆ ಅದು ಆಟ ಮತ್ತು ಮನರಂಜನೆಯಾಗಿದ್ದರೆ, ತಂದೆಗೆ ಅವು ಭವಿಷ್ಯದಲ್ಲಿ ಬೆಲೆ ಹೆಚ್ಚಿಸಿಕೊಳ್ಳಬಹುದಾದ ಸಂಗ್ರಹ ವಸ್ತುಗಳಂತೆ ಕಂಡವು. ಹೀಗಾಗಿ ಅವರು 1990ರ ದಶಕದ ಕೊನೆಯಲ್ಲಿ ಕಾರ್ಡ್‌ಗಳನ್ನು ಖರೀದಿಸಲು ಆರಂಭಿಸಿದರು. ಮಲೇಷ್ಯಾದ ಮಾರಾಟಗಾರರಿಂದ ಇಬೇ ಮೂಲಕ ಸಂಪೂರ್ಣ ಕಾರ್ಡ್ ಸೆಟ್‌ಗಳನ್ನು ಖರೀದಿಸಿದ್ದರು.

ಅಟ್ಟದಲ್ಲಿ 15 ವರ್ಷಗಳ ಕಾಲ ಉಳಿದಿದ್ದ ಸಂಗ್ರಹ

42 ಸಂಪೂರ್ಣ ಸೆಟ್‌ಗಳ ಸಂಗ್ರಹ

ಕಾಲಕ್ರಮೇಣ ಅವರ ಬಳಿ 42 ಸಂಪೂರ್ಣ Pokémon ಕಾರ್ಡ್ ಸೆಟ್‌ಗಳು ಸಂಗ್ರಹವಾದವು. ಕಾರ್ಡ್‌ಗಳನ್ನು ವಿಶೇಷವಾಗಿ ತಯಾರಿಸಿದ ಫೋಲ್ಡರ್‌ಗಳಲ್ಲಿ ಜೋಡಿಸಿ ಸುರಕ್ಷಿತವಾಗಿ ಇಟ್ಟಿದ್ದರು. ಮಗ ಬೆಳೆದಂತೆ Pokemon ಮೇಲಿನ ಆಸಕ್ತಿ ಕಡಿಮೆಯಾಯಿತು. ನಂತರ ಈ ಸಂಗ್ರಹವನ್ನು ಮನೆಯ ಅಟ್ಟದಲ್ಲಿ ಇರಿಸಲಾಯಿತು. ಹೀಗೆ ಸುಮಾರು 15 ವರ್ಷಗಳ ಕಾಲ ಅವು ಅಲ್ಲಿಯೇ ಉಳಿದವು.

ಒಂದು ದಿನ ಸ್ಥಳೀಯ ಪತ್ರಿಕೆಯಲ್ಲಿ ಒಂದೇ Pokémon ಕಾರ್ಡ್‌ ಸುಮಾರು £6,000, ಅಂದರೆ ಆ ಕಾಲದ ವರದಿಯ ಪ್ರಕಾರ ಸುಮಾರು ₹7.6 ಲಕ್ಷಕ್ಕೆ ಮಾರಾಟವಾದ ಸುದ್ದಿ ಓದಿದರು. ಇದರಿಂದ ತಮ್ಮ ಸಂಗ್ರಹದ ಮೌಲ್ಯವನ್ನೂ ಪರಿಶೀಲಿಸಬೇಕೆಂಬ ಆಲೋಚನೆ ಬಂತು. ಅದೇ ಅವರ ಜೀವನದಲ್ಲಿ ದೊಡ್ಡ ತಿರುವಾಯಿತು.

ಹರಾಜಿನಲ್ಲಿ ನಿರೀಕ್ಷೆಗೂ ಮೀರಿದ ಬೆಲೆ

£300ಕ್ಕೆ ಖರೀದಿಸಿದ ಸೆಟ್ £75,000ಕ್ಕೆ ಮಾರಾಟ

ಈ ಸಂಗ್ರಹದ ಒಟ್ಟು 42 ಸೆಟ್‌ಗಳಲ್ಲಿ 41 ಸೆಟ್‌ಗಳನ್ನು ಅಕ್ಟೋಬರ್ 21ರಂದು ಇಂಗ್ಲೆಂಡ್‌ನ ಸರೆ ಪ್ರದೇಶದಲ್ಲಿರುವ Ewbank’s ಹರಾಜು ಸಂಸ್ಥೆಯಲ್ಲಿ ಮಾರಾಟ ಮಾಡಲಾಯಿತು. ಒಂದು ಸೆಟ್ ಅನ್ನು ಮಾಲೀಕರು ತಮ್ಮ ಬಳಿಯೇ ಉಳಿಸಿಕೊಂಡರು. ಒಟ್ಟು ಮಾರಾಟದ ಮೊತ್ತ £1.56 ಮಿಲಿಯನ್ ತಲುಪಿತು.

ಅಚ್ಚರಿಯ ಸಂಗತಿಯೆಂದರೆ, ಹಿಂದೆ ಸುಮಾರು £300ಕ್ಕೆ ಖರೀದಿಸಿದ್ದ ಒಂದು ಸೆಟ್ ಹರಾಜಿನಲ್ಲಿ £75,000ಕ್ಕೆ ಮಾರಾಟವಾಯಿತು. ಅಪರೂಪದ Charizard ಕಾರ್ಡ್‌ಗಳನ್ನು ಒಳಗೊಂಡ ಮತ್ತೊಂದು ಸೆಟ್ £100,000 ಬೆಲೆ ಪಡೆಯಿತು. ಈ ಹರಾಜು ಬ್ರಿಟನ್‌ನಲ್ಲಿ ಟ್ರೇಡಿಂಗ್ ಕಾರ್ಡ್‌ಗಳ ಅತ್ಯಂತ ಮೌಲ್ಯಯುತ ಹರಾಜುಗಳಲ್ಲಿ ಒಂದಾಗಿದೆ ಎಂದು ವರದಿಯಾಗಿದೆ.

ಹಳೆಯ ಸಂಗ್ರಹಗಳಿಗೂ ಇರಬಹುದು ದೊಡ್ಡ ಮೌಲ್ಯ

ಈ ಘಟನೆ ಹಳೆಯ ಆಟಿಕೆಗಳು, ಕಾರ್ಡ್‌ಗಳು ಮತ್ತು ಇತರ ಸಂಗ್ರಹ ವಸ್ತುಗಳ ಮೌಲ್ಯದ ಬಗ್ಗೆ ಜನರಲ್ಲಿ ಕುತೂಹಲ ಮೂಡಿಸಿದೆ. ಆದರೆ ಎಲ್ಲ ಹಳೆಯ ಕಾರ್ಡ್‌ಗಳೂ ಕೋಟ್ಯಂತರ ರೂಪಾಯಿ ಬೆಲೆ ಪಡೆಯುವುದಿಲ್ಲ. ಅವುಗಳ ಅಪರೂಪದ ಸ್ವರೂಪ, ಸ್ಥಿತಿ, ಬೇಡಿಕೆ ಮತ್ತು ಸಂಗ್ರಹದ ಸಂಪೂರ್ಣತೆಯಂತಹ ಅಂಶಗಳು ಬೆಲೆಯನ್ನು ನಿರ್ಧರಿಸುತ್ತವೆ.

ಹೀಗಾಗಿ, ಈ ವ್ಯಕ್ತಿಯ ಯಶಸ್ಸು ಅಪರೂಪದ ಸಂದರ್ಭವಾಗಿದೆ; Pokemon ಕಾರ್ಡ್‌ಗಳನ್ನು ಖರೀದಿಸಿದರೆ ಖಚಿತವಾಗಿ ಲಾಭ ಸಿಗುತ್ತದೆ ಎಂಬುದಕ್ಕೆ ಇದು ಸಾಕ್ಷಿಯಲ್ಲ. ಆದರೂ, ವರ್ಷಗಳ ಹಿಂದೆ ಹವ್ಯಾಸಕ್ಕಾಗಿ ಸಂಗ್ರಹಿಸಿದ ವಸ್ತುಗಳು ಕೆಲವೊಮ್ಮೆ ಅನಿರೀಕ್ಷಿತ ಸಂಪತ್ತಾಗಿ ಬದಲಾಗಬಹುದು ಎಂಬುದಕ್ಕೆ ಈ ಕಥೆ ಉತ್ತಮ ಉದಾಹರಣೆ.

Gold Loan: ಚಿನ್ನದ ಬಿಸ್ಕತ್ ಎಷ್ಟೇ ಶುದ್ಧವಾಗಿದ್ರೂ ಬ್ಯಾಂಕ್‌ಗಳು ಲೋನ್ ಕೊಡಲು ಹಿಂದೇಟು ಹಾಕುವುದೇಕೆ? ಈ ಬ್ಯಾಂಕ್ ರೂಲ್ಸ್ ಗೊತ್ತಾ?

Naveen Kodase — Tue, 20 Oct 2026 18:54:00 +0530

Gold Loan: ಮನೆಯಲ್ಲಿ ಚಿನ್ನ ಇದ್ದರೆ ಸುಲಭವಾಗಿ ಲೋನ್ ಸಿಗುತ್ತೆ ಅಂತ ನಾವು ಅಂದುಕೊಳ್ತೀವಿ. ಆದರೆ ಒಡವೆಗಳ ಮೇಲೆ ಸಾಲ ಕೊಡುವ ಬ್ಯಾಂಕ್ ಮತ್ತು ಫೈನಾನ್ಸ್ ಕಂಪನಿಗಳು ಚಿನ್ನದ ಬಿಸ್ಕತ್ ಅಥವಾ ಗಟ್ಟಿಗಳ ಮೇಲೆ ಲೋನ್ ಕೊಡಲು ಹಿಂದೇಟು ಹಾಕುತ್ತವೆ. ಇದಕ್ಕೆ ಅಸಲಿ ಕಾರಣ ಏನು ಅಂತ ಬಹುತೇಕ ಮಂದಿಗೆ ಗೊತ್ತಿಲ್ಲ.

ಗೋಲ್ಡ್ ಲೋನ್‌ಗೆ ಎಂಥಾ ಚಿನ್ನ ಇಡ್ತಾರೆ?

ಭಾರತದಲ್ಲಿ ಬ್ಯಾಂಕ್‌ಗಳು ಮತ್ತು ನಾನ್-ಬ್ಯಾಂಕಿಂಗ್ ಫೈನಾನ್ಸ್ ಕಂಪನಿಗಳು (NBFC) ಸಾಮಾನ್ಯವಾಗಿ ಚಿನ್ನದ ಒಡವೆಗಳನ್ನು ಅಡಮಾನ ಇಟ್ಟುಕೊಂಡು ಸಾಲ ನೀಡುತ್ತವೆ. ಉಂಗುರ, ಚೈನ್, ಬಳೆಗಳಂತಹ ಆಭರಣಗಳ ಮೇಲೆ ಸುಲಭವಾಗಿ ಲೋನ್ ಸಿಗುತ್ತದೆ. ಬ್ಯಾಂಕ್ ಸಿಬ್ಬಂದಿ ಇವುಗಳ ತೂಕ ಮತ್ತು ಶುದ್ಧತೆಯನ್ನು ಪರೀಕ್ಷಿಸಿ ಸಾಲದ ಮೊತ್ತವನ್ನು ನಿರ್ಧರಿಸುತ್ತಾರೆ. ಆದರೆ ಚಿನ್ನದ ಬಿಸ್ಕತ್ ಮತ್ತು ಗಟ್ಟಿಗಳ ಕಥೆ ಬೇರೆ. ಇವು ನೂರಕ್ಕೆ ನೂರು ಶುದ್ಧವಾಗಿದ್ದರೂ, ಎಲ್ಲಾ ಬ್ಯಾಂಕ್‌ಗಳು ಇವುಗಳನ್ನು ಅಡಮಾನವಾಗಿ ಸ್ವೀಕರಿಸುವುದಿಲ್ಲ. ಹಾಗಾಗಿ ಬಿಸ್ಕತ್ ಇದ್ದ ತಕ್ಷಣ ಲೋನ್ ಸಿಗುತ್ತೆ ಅಂತ ಅಂದುಕೊಳ್ಳಬಾರದು.

ಚಿನ್ನದ ಬಿಸ್ಕತ್ ಮೇಲೆ ಲೋನ್ ಯಾಕೆ ಕೊಡಲ್ಲ?

ಚಿನ್ನದ ಬಿಸ್ಕತ್ ಮೇಲೆ ಸಾಲ ಕೊಡಲು ಬ್ಯಾಂಕ್‌ಗಳು ಹಿಂದೇಟು ಹಾಕಲು ಕೆಲವು ಮುಖ್ಯ ಕಾರಣಗಳಿವೆ.

ಮಾಲೀಕತ್ವದ ಅನುಮಾನ: ಒಡವೆಗಳನ್ನು ಸಾಮಾನ್ಯವಾಗಿ ಮನೆ ಬಳಕೆಗಾಗಿ ಖರೀದಿಸುತ್ತಾರೆ. ಆದರೆ ಚಿನ್ನದ ಬಿಸ್ಕತ್ ಎಲ್ಲಿಂದ ಬಂತು? ಯಾರು ಮಾರಿದ್ದು? ಬಿಲ್ ಇದೆಯಾ? ಅಂತ ಬ್ಯಾಂಕ್‌ಗಳು ಪ್ರಶ್ನಿಸುತ್ತವೆ. ಸರಿಯಾದ ದಾಖಲೆ ಇಲ್ಲದಿದ್ದರೆ ಸಾಲ ಸಿಗುವುದಿಲ್ಲ.

ಮೋಸ ತಡೆಯಲು: ಚಿನ್ನದ ಬಿಸ್ಕತ್ ಮತ್ತು ಗಟ್ಟಿಗಳನ್ನು ಸುಲಭವಾಗಿ ಸಾಗಿಸಬಹುದು. ಇವುಗಳ ಅಸಲಿಯತ್ತು ಮತ್ತು ಮೂಲವನ್ನು ಪತ್ತೆ ಮಾಡದೆ ಲೋನ್ ಕೊಟ್ಟರೆ ಬ್ಯಾಂಕ್‌ಗಳು ಮೋಸ ಹೋಗುವ ಅಪಾಯ ಇರುತ್ತದೆ.

ಶುದ್ಧತೆ ಪರೀಕ್ಷೆ: ಬರೀ ಬಣ್ಣ ನೋಡಿ ಚಿನ್ನದ ಶುದ್ಧತೆ ಅಳೆಯಲು ಸಾಧ್ಯವಿಲ್ಲ. ಬಿಸ್ಕತ್ ಮೇಲಿರುವ ಹಾಲ್‌ಮಾರ್ಕ್ ಮುದ್ರೆ ಮಾತ್ರ ಸಾಲದು. ಕೆಲವೊಮ್ಮೆ ಹೆಚ್ಚಿನ ಪರೀಕ್ಷೆಗಳು ಬೇಕಾಗುತ್ತವೆ.

ಬ್ಯಾಂಕ್ ನಿಯಮಗಳು: ಪ್ರತಿಯೊಂದು ಬ್ಯಾಂಕ್ ಮತ್ತು ಫೈನಾನ್ಸ್ ಕಂಪನಿಗೆ ತನ್ನದೇ ಆದ ನಿಯಮಗಳಿರುತ್ತವೆ. ಈ ನಿಯಮಗಳಿಗೆ ಹೊಂದಿಕೆಯಾಗದ ಚಿನ್ನದ ಬಿಸ್ಕತ್‌ಗಳನ್ನು ಅವರು ತಿರಸ್ಕರಿಸುತ್ತಾರೆ.

ಒಡವೆ ಅಥವಾ ಬಿಸ್ಕತ್; ಅಡಮಾನಕ್ಕೆ ಯಾವುದು ಬೆಸ್ಟ್?

ಚಿನ್ನದ ಒಡವೆ ಮತ್ತು ಬಿಸ್ಕತ್ ಎರಡರಲ್ಲೂ ಚಿನ್ನವೇ ಇದ್ದರೂ, ಸಾಲ ಕೊಡುವಾಗ ಬ್ಯಾಂಕ್‌ಗಳು ತಾರತಮ್ಯ ಮಾಡುತ್ತವೆ. ಒಡವೆಗಳ ತೂಕ ಮತ್ತು ಶುದ್ಧತೆ ಪರೀಕ್ಷಿಸಲು ಬ್ಯಾಂಕ್‌ಗಳ ಬಳಿ ಸ್ಪಷ್ಟವಾದ ವಿಧಾನಗಳಿವೆ. ಹಾಗಾಗಿ ಒಡವೆಗಳ ಮೇಲೆ ಜನರಿಗೆ ಸುಲಭವಾಗಿ ಲೋನ್ ಸಿಗುತ್ತದೆ.

ಆದರೆ ಚಿನ್ನದ ಬಿಸ್ಕತ್ ಎಷ್ಟೇ ಶುದ್ಧವಾಗಿದ್ದರೂ, ಅದನ್ನು ಸ್ವೀಕರಿಸುವುದು ಬ್ಯಾಂಕ್ ನಿಯಮಗಳಿಗೆ ಬಿಟ್ಟ ವಿಚಾರ. ನಿಮ್ಮ ಬಳಿ ಪಕ್ಕಾ ಬಿಲ್ ಇದ್ದರೂ ಲೋನ್ ಸಿಕ್ಕೇ ಸಿಗುತ್ತದೆ ಎಂಬ ಗ್ಯಾರಂಟಿ ಇಲ್ಲ. ಇನ್ನೊಂದು ಮುಖ್ಯ ವಿಚಾರ ಅಂದರೆ, ಒಡವೆಗಳ ಮೇಲೆ ಲೋನ್ ಕೊಡುವಾಗ ಬ್ಯಾಂಕ್‌ಗಳು ಮೇಕಿಂಗ್ ಚಾರ್ಜ್ ಅಥವಾ ಡಿಸೈನ್ ಬೆಲೆಯನ್ನು ಲೆಕ್ಕಕ್ಕೆ ತೆಗೆದುಕೊಳ್ಳುವುದಿಲ್ಲ. ಕೇವಲ ಚಿನ್ನದ ನಿವ್ವಳ ತೂಕ ಮತ್ತು ಶುದ್ಧತೆ ಆಧಾರದ ಮೇಲೆ ಮಾತ್ರ ಸಾಲದ ಮೊತ್ತವನ್ನು ನಿರ್ಧರಿಸುತ್ತವೆ.

ಆರ್‌ಬಿಐ ನಿಯಮಗಳು ಏನು ಹೇಳುತ್ತವೆ?

ಗೋಲ್ಡ್ ಲೋನ್ ವಿಚಾರದಲ್ಲಿ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ನಿಯಮಗಳು ಬಹಳ ಮುಖ್ಯ ಪಾತ್ರ ವಹಿಸುತ್ತವೆ. ಅಡಮಾನ ಇಡುವ ಚಿನ್ನದ ಮೌಲ್ಯ, ಶುದ್ಧತೆ, ಸಾಲದ ಮಿತಿ ಮತ್ತು ಗ್ರಾಹಕರ ಹಿನ್ನೆಲೆಯನ್ನು ಬ್ಯಾಂಕ್‌ಗಳು ಕಡ್ಡಾಯವಾಗಿ ಪರಿಶೀಲಿಸಬೇಕು.

ಆದರೆ ಚಿನ್ನದ ಬಿಸ್ಕತ್ ಮೇಲೆ ಸಾಲ ಕೊಡಬಾರದು ಅಂತ ಆರ್‌ಬಿಐ ಯಾವುದೇ ಸಂಪೂರ್ಣ ನಿಷೇಧ ಹೇರಿಲ್ಲ. ಚಿನ್ನದ ಒಡವೆ, ನಾಣ್ಯ ಮತ್ತು ಬಿಸ್ಕತ್‌ಗಳಿಗೆ ಸಂಬಂಧಿಸಿದಂತೆ ಆಯಾ ಬ್ಯಾಂಕ್‌ಗಳು ತಮ್ಮದೇ ಆದ ಪಾಲಿಸಿಗಳನ್ನು ರೂಪಿಸಿಕೊಳ್ಳುತ್ತವೆ.

ಮುಖ್ಯವಾಗಿ ಚಿನ್ನದ ನಾಣ್ಯ ಮತ್ತು ಬಿಸ್ಕತ್ ಎರಡನ್ನೂ ಒಂದೇ ತಕ್ಕಡಿಯಲ್ಲಿ ಅಳೆಯುವಂತಿಲ್ಲ. ಕೆಲವು ಬ್ಯಾಂಕ್‌ಗಳು ನಿಯಮಗಳ ಪ್ರಕಾರ ಚಿನ್ನದ ನಾಣ್ಯಗಳ ಮೇಲೆ ಸಾಲ ನೀಡುತ್ತವೆ. ಆದರೆ ಬಿಸ್ಕತ್ ಅಥವಾ ಗಟ್ಟಿಗಳ ವಿಚಾರಕ್ಕೆ ಬಂದರೆ, ಬ್ಯಾಂಕ್‌ಗಳು ಅದನ್ನು ಒಪ್ಪುತ್ತವೆಯೋ ಇಲ್ಲವೋ ಎಂಬುದನ್ನು ಮೊದಲೇ ವಿಚಾರಿಸುವುದು ಒಳಿತು.

ಚಿನ್ನದ ಬಿಸ್ಕತ್ ಮೇಲೆ ಲೋನ್ ಪಡೆಯುವ ಚಾನ್ಸ್ ಇದೆಯಾ?

ನೀವು ಚಿನ್ನದ ಬಿಸ್ಕತ್ ಮೇಲೆ ಲೋನ್ ಪಡೆಯಲೇಬೇಕು ಅಂದುಕೊಂಡಿದ್ದರೆ, ಮೊದಲು ನಿಮ್ಮ ಬ್ಯಾಂಕ್ ಅಥವಾ ಫೈನಾನ್ಸ್ ಕಂಪನಿಯನ್ನು ಸಂಪರ್ಕಿಸಿ. ಅವರು ಬಿಸ್ಕತ್ ಅಡಮಾನ ಇಟ್ಟುಕೊಳ್ಳುತ್ತಾರಾ? ಯಾವೆಲ್ಲಾ ದಾಖಲೆಗಳು ಬೇಕು? ಶುದ್ಧತೆಯನ್ನು ಹೇಗೆ ಪರೀಕ್ಷಿಸುತ್ತಾರೆ? ಎಂಬೆಲ್ಲಾ ಮಾಹಿತಿ ಕಲೆಹಾಕಿ. ಚಿನ್ನ ಖರೀದಿಸಿದ ಬಿಲ್, ಮಾರಾಟಗಾರರ ವಿವರಗಳನ್ನು ಸಿದ್ಧವಾಗಿಟ್ಟುಕೊಳ್ಳಿ. ಇಷ್ಟೆಲ್ಲಾ ಇದ್ದರೂ ಬ್ಯಾಂಕ್ ನಿಯಮಗಳ ಪ್ರಕಾರ ನಿಮ್ಮ ಸಾಲದ ಅರ್ಜಿ ತಿರಸ್ಕೃತವಾಗುವ ಸಾಧ್ಯತೆಯೂ ಇರುತ್ತದೆ.

ಒಂದು ವೇಳೆ ಬಿಸ್ಕತ್ ಮೇಲೆ ಲೋನ್ ಸಿಗದಿದ್ದರೆ, ಮನೆಯಲ್ಲಿರುವ ಒಡವೆಗಳನ್ನು ಇಟ್ಟು ಸಾಲ ಪಡೆಯಬಹುದು. ಲೋನ್ ತೆಗೆದುಕೊಳ್ಳುವ ಮುನ್ನ ಬಡ್ಡಿ ದರ, ಪ್ರೊಸೆಸಿಂಗ್ ಶುಲ್ಕ ಮತ್ತು ಮರುಪಾವತಿ ಅವಧಿಯನ್ನು ಹೋಲಿಕೆ ಮಾಡಿ ನೋಡಿ.

ಒಟ್ಟಾರೆಯಾಗಿ ಹೇಳಬೇಕೆಂದರೆ, ಚಿನ್ನದ ಬಿಸ್ಕತ್‌ಗಳಲ್ಲಿ ಶುದ್ಧತೆ ಕಡಿಮೆ ಇರುತ್ತದೆ ಎಂಬ ಕಾರಣಕ್ಕೆ ಬ್ಯಾಂಕ್‌ಗಳು ಸಾಲ ನಿರಾಕರಿಸುವುದಿಲ್ಲ. ಬದಲಾಗಿ ಅದರ ಮೂಲ ಪತ್ತೆ ಹಚ್ಚುವುದು, ಮೋಸದ ಅಪಾಯ ತಪ್ಪಿಸುವುದು ಮತ್ತು ಬ್ಯಾಂಕ್‌ನ ಆಂತರಿಕ ನಿಯಮಗಳೇ ಇಲ್ಲಿ ನಿರ್ಣಾಯಕ ಪಾತ್ರ ವಹಿಸುತ್ತವೆ.

ಈ ದೀಪಾವಳಿಗೆ ನಿಮ್ಮ ಮಕ್ಕಳಿಗಾಗಿ ಸ್ವೀಟ್, ದುಬಾರಿ ಬಟ್ಟೆ ಬೇಡ, ಈ ಷೇರುಗಳನ್ನೇ ಗಿಫ್ಟ್ ಕೊಡಿ! ಮಕ್ಕಳ ಭವಿಷ್ಯಕ್ಕೆ ಸಂಪತ್ತು ಸೃಷ್ಟಿಸುತ್ತೆ!

Ravi Janekal — Tue, 20 Oct 2026 14:04:33 +0530

ದೀಪಾವಳಿ ಹಬ್ಬಕ್ಕಾಗಿ ಮಕ್ಕಳಿಗಾಗಿ ಸಾವಿರಾರು ರೂಪಾಯಿ ಖರ್ಚು ಮಾಡಿ ದುಬಾರಿ ಬಟ್ಟೆ, ಸುಟ್ಟು ಬೂದಿಯಾಗುವ ಪಟಾಕಿ ಕೊಡಿಸಲು ಬದಲು ಮ್ಯೂಚುವಲ್ ಫಂಡ್ ಯುನಿಟ್, ಷೇರುಗಳನ್ನ ಗಿಫ್ಟ್ ಆಗಿ ನೀಡಿದ್ರೆ ಹೇಗೆ? ಇದರಿಂದ ಮಕ್ಕಳ ಭವಿಷ್ಯಕ್ಕೆ ಸಂಪತ್ತು ಸೃಷ್ಟಿಯಾಗುತ್ತದೆ.. ಈ ಬಗ್ಗೆ ಐಡಿಯಾಗಳು ಇಲ್ಲಿವೆ.

ಭಾರತೀಯ ಪೋಷಕರು ತಮ್ಮ ಮಕ್ಕಳು ಸುಖವಾಗಿರಲು ಸಾಕಷ್ಟು ಖರ್ಚು ಮಾಡುತ್ತಾರೆ. ಮಕ್ಕಳ ಪ್ರತಿ ಬೇಡಿಕೆಯನ್ನ ನಿರಾಕರಿಸುವುದಿಲ್ಲ, ಹಬ್ಬಗಳಿಗೆ ದುಬಾರಿ ಬಟ್ಟೆ, ಸೈಕಲ್, ಬೈಕ್, ದೀಪಾವಳಿಗೆ ಸಾವಿರಾರು ರೂಪಾಯಿಯ ಪಟಾಕಿ, ಸ್ವೀಟ್ ಖರೀದಿಸಿ ತರುತ್ತಾರೆ. ಇದರಿಂದ ಮಕ್ಕಳು ಸಂತೋಷವಾಗಿರುತ್ತಾರೆ ಎಂಬ ಭಾವನೆ ಪೋಷಕರದ್ದು. ಆದರೆ ಮಕ್ಕಳ ಭವಿಷ್ಯಕ್ಕಾಗಿ ಉಳಿತಾಯ, ಅವರಿಗೆ ಭವಿಷ್ಯಕ್ಕೆ ಉಪಯೋಗವಾಗುವ ಸಂಪತ್ತು ಸೃಷ್ಟಿಸುವ ಬಗ್ಗೆ ಯೋಚಿಸುವುದೇ ಇಲ್ಲ. ಆಗಿಂದಾಗ್ಗೆ ಖರ್ಚು ಮಾಡುವುದೇ ಮಕ್ಕಳನ್ನು ಸುಖವಾಗಿಡುವುದು ಎಂದು ಕೊಂಡಿದ್ದಾರೆ. ಮಕ್ಕಳಿಗೆ ಸಾಕಷ್ಟು ಹಣ ಖರ್ಚು ಮಾಡುವ ಬದಲು ಮಕ್ಕಳ ಭವಿಷ್ಯಕ್ಕಾಗಿ ಅಷ್ಟೇ ಹಣ ಉಳಿತಾಯ ಮಾಡಿದ್ರೆ ಅದೆಷ್ಟು ಉಪಯೋಗಕ್ಕೆ ಬರುತ್ತದಲ್ಲವೇ?

ಹೌದು, ಈ ಬಾರಿ ದೀಪಾವಳಿ ಹಬ್ಬ ಸಮೀಪಿಸುತ್ತಿದೆ. ಈ ಬಾರಿ ದೀಪಾವಳಿಗಾಗಿ ಹಣ ಖರ್ಚು ಮಾಡುವ ಬದಲು ನಿಮ್ಮ ಮಕ್ಕಳಿಗೆ ಪ್ರೀತಿ ಪಾತ್ರರಿಗೆ ಚಿನ್ನ, ಬೆಳ್ಳಿ, ಸಾವಿರಾರು ಬೆಲೆಯ ಬಟ್ಟೆ, ಸ್ವೀಟ್ ಬಾಕ್ಸ್, ದುಬಾರಿ ವಸ್ತುಗಳನ್ನ ನೀಡುವ ಬದಲು ಷೇರುಗಳು ಅಥವಾ ಮ್ಯೂಚುವಲ್ ಫಂಡ್ ಯುನಿಟ್‌ಗಳ ಗಿಫ್ಟ್ ನೀಡಿ. ಏಕೆಂದರೆ ಸ್ವೀಟ್ ಖಾಲಿಯಾಗಬಹುದು, ಬಟ್ಟೇ ಹರಿದುಹೋಗಬಹುದು, ಪಟಾಕಿ ಸಿಡಿದು ಕ್ಷಣಾರ್ಥದಲ್ಲಿ ಬೂದಿಯಾಗಬಹುದು.ಆದರೆ ನೀವು ನೀಡುವ ಇಂತಹ ಈ ಗಿಫ್ಟ್ ಮಕ್ಕಳ, ಪ್ರೀತಿಪಾತ್ರರ ಭವಿಷ್ಯಕ್ಕಾಗಿ ಸಂಪತ್ತನ್ನ ಸೃಷ್ಟಿಸಲು ಮೊದಲ ಹೆಜ್ಜೆಯಾಗುತ್ತದೆ!

ಷೇರುಗಳು ಅಥವಾ ಮ್ಯೂಚುವಲ್ ಫಂಡ್‌ಗಳನ್ನು ಇತರರಿಗೆ ಉಡುಗೊರೆಯಾಗಿ ನೀಡುವ ಮೊದಲು ಅವುಗಳನ್ನು ಹೇಗೆ ಟ್ರಾನ್ಸ್‌ಫರ್ ಮಾಡಲಾಗುತ್ತೆ, ಅದರಿಂದ ಉಂಟಾಗುವ ತೆರಿಗೆ ಪರಿಣಾಮಗಳೇನು ಎಂಬುದನ್ನು ತಿಳಿದುಕೊಳ್ಳುವುದು ಬಹಳ ಮುಖ್ಯ. ಆ ಬಗ್ಗೆ ಇಲ್ಲಿ ವಿವರವಾಗಿ ತಿಳಿಸಲಾಗಿದೆ.

ಭಾರತದಲ್ಲಿ ಷೇರುಗಳು, ಮ್ಯೂಚುವಲ್ ಫಂಡ್‌ಗಳನ್ನುಉಡುಗೊರೆಯಾಗಿ ನೀಡಲು ಅದರದ್ದೇ ಆದ ನಿಯಮಗಳಿವೆ. ಮುಖ್ಯವಾಗಿ ಈ ಇಂತಹ ಉಡುಗೊರೆ ನೀಡುವಾಗ ಕುಟುಂಬದ ಸದಸ್ಯರಿಗೆ ನೀಡಲಾಗಿದೆಯೇ ಅಥವಾ ಸ್ನೇಹಿತರು ಅಥವಾ ಸಂಬಂಧಿಕರಲ್ಲದ ವ್ಯಕ್ತಿಗಳಿಗೆ ನೀಡಲಾಗಿದೆಯೇ ಎಂಬುದರ ಆಧಾರದ ಮೇಲೆ ತೆರಿಗೆಯ ನಿಯಮಗಳು ಬದಲಾಗಬಹುದು.

ನಿಮ್ಮ ಪೋರ್ಟ್‌ಫೋಲಿಯೊದಲ್ಲಿರುವ ಷೇರುಗಳನ್ನು ನಿಮ್ಮ ಪೋಷಕರು, ಒಡಹುಟ್ಟಿದವರು ಅಥವಾ ಸಂಗಾತಿಗೆ ಅಥವಾ ಬೇರೆ ಯಾವುದೇ ವ್ಯಕ್ತಿಗೆ ಗಿಫ್ಟ್ ನೀಡಬೇಕು ಅನಿಸಿದರೆ ಸಾಮಾನ್ಯವಾಗಿ ನೀವು ಅವುಗಳನ್ನು ಮಾರಾಟ ಮಾಡುವ ಬದಲು ನೇರವಾಗಿ ಟ್ರಾನ್ಸ್‌ಫರ್ ಮಾಡಬಹುದು. ಇದಕ್ಕಾಗಿನ ಷೇರುಗಳನ್ನು ನೀಡುವವರು ಮತ್ತು ಪಡೆಯುವವರು ಇಬ್ಬರೂ ಡಿಮ್ಯಾಟ್ (Demat) ಖಾತೆಯನ್ನು ಹೊಂದಿರಬೇಕು. ಷೇರುದಾರರು ತಮ್ಮ ಬ್ರೋಕರ್ ಅಥವಾ ಡಿಪಾಸಿಟರಿ ಪಾರ್ಟಿಸಿಪೆಂಟ್ (Depository Participant) ಮೂಲಕ 'ಆಫ್-ಮಾರುಕಟ್ಟೆ ಟ್ರಾನ್ಸ್‌ಫರ್(off-market transfer) ಮಾಡಬಹುದು. ಇದಕ್ಕೆ, ಷೇರುಗಳನ್ನು ಪಡೆಯುವವರ ಡಿಮ್ಯಾಟ್ ಅಕೌಂಟ್‌ ಸರಿಯಾದ ವಿವರ ಹಾಗೂ ಅಗತ್ಯ ಟ್ರಾನ್ಸ್‌ಫರ್ ಸೂಚನೆಗಳನ್ನ ನೀಡಬೇಕಾಗುತ್ತೆ.

ಯೆಸ್, ಮ್ಯೂಚುವಲ್ ಫಂಡ್ ಯುನಿಟ್‌ಗಳನ್ನು ಬೇರೆಯವರಿಗೆ ಉಡುಗೊರೆಯಾಗಿ ನೀಡಬಹುದು. ಆದರೆ ಟ್ರಾನ್ಸ್‌ಫರ್ ಪ್ರೊಸೆಸ್ ಆ ಯುನಿಟ್‌ಗಳು ಡಿಮ್ಯಾಟ್ ಖಾತೆಯಲ್ಲಿವೆಯೇ ಅಥವಾ 'ಸ್ಟೇಟ್‌ಮೆಂಟ್ ಆಫ್ ಅಕೌಂಟ್' (SoA) ರೂಪದಲ್ಲಿವೆಯೇ ಎಂಬುದರ ಮೇಲೆ ಅವಲಂಬಿತವಾಗಿರುತ್ತದೆ. ಒಂದು ವೇಳೆ ಡಿಮ್ಯಾಟ್ ಖಾತೆಯಲ್ಲಿದ್ದರೆ ಯುನಿಟ್‌ಗಳನ್ನು ಡೆಪಾಸಿಟರಿ (Depository) ಮೂಲಕ ವರ್ಗಾಯಿಸಬಹುದು. SoA ರೂಪದಲ್ಲಿರುವ ಯುನಿಟ್‌ಗಳ ವಿಷಯಕ್ಕೆ ಬಂದರೆ ಮ್ಯೂಚುವಲ್ ಫಂಡ್ ಸಂಸ್ಥೆ, ರಿಜಿಸ್ಟ್ರಾರ್ ಮತ್ತು ಟ್ರಾನ್ಸ್‌ಫರ್ ಏಜೆಂಟ್ (RTA) ಹಾಗೂ 'MF ಸೆಂಟ್ರಲ್' (MF Central) ನಿಗದಿಪಡಿಸಿದ ನಿಯಮಗಳು ಮತ್ತು ಅರ್ಹತಾ ಮಾನದಂಡಗಳನ್ನು ಪರಿಶೀಲಿಸಬೇಕಾಗುತ್ತದೆ. ಎಲ್ಲಾ ಮ್ಯೂಚುವಲ್ ಫಂಡ್ ಯೋಜನೆಗಳಿಗೂ ಎಲ್ಲ ರೀತಿಯ ವರ್ಗಾವಣೆ ಸೌಲಭ್ಯಗಳು ಲಭ್ಯವಿರುವುದಿಲ್ಲ ಎಂಬುದನ್ನು ಗಮನಿಸುವುದು ಮುಖ್ಯ.

₹50,000 ಮೀರಿದ ಗಿಫ್ಟ್ ಯಾವಾಗ ತೆರಿಗೆಗೆ ಒಳಪಡುತ್ತವೆ?

ಆದಾಯ ತೆರಿಗೆ ಕಾಯಿದೆ, 2025ರ ಸೆಕ್ಷನ್ 92ರ ಅಡಿಯಲ್ಲಿ, ನೀವು ಸಂಬಂಧಿಕರಲ್ಲದ ವ್ಯಕ್ತಿಯೊಬ್ಬರಿಂದ ಷೇರುಗಳು ಮತ್ತು ಸೆಕ್ಯೂರಿಟಿಗಳಂತಹ ನಿರ್ದಿಷ್ಟ ಆಸ್ತಿಗಳನ್ನು ಯಾವುದೇ ಹಣ ಪಾವತಿಸದೆ ಉಡುಗೊರೆಯಾಗಿ ಪಡೆದರೆ ಮತ್ತು ಒಂದು ಆರ್ಥಿಕ ವರ್ಷದಲ್ಲಿ ಅಂತಹ ಆಸ್ತಿಗಳ ಒಟ್ಟು fair market value ₹50,000 ಮೀರಿದರೆ, ಆಗ ಆ ಸಂಪೂರ್ಣ ಮೊತ್ತವು ತೆರಿಗೆಗೆ ಒಳಪಡಬಹುದು (ಕೇವಲ ₹50,000 ಮೀರಿದ ಭಾಗ ಮಾತ್ರವಲ್ಲದೆ, ಇಡೀ ಮೊತ್ತವೇ ತೆರಿಗೆಗೆ ಒಳಪಡಬಹುದು. ಆದರೆ ನಿರ್ದಿಷ್ಟ ಸಂಬಂಧಿಕರಿಂದ ಪಡೆಯುವ ಉಡುಗೊರೆಗಳಿಗೆ ಈ ನಿಯಮದಿಂದ ವಿನಾಯಿತಿ ಇದೆ. ಈ ವರ್ಗದಲ್ಲಿ ಸಂಗಾತಿ, ಸಹೋದರ-ಸಹೋದರಿಯರು, ಪೋಷಕರು, ಮಕ್ಕಳು ಮತ್ತು ಕಾನೂನಿನ ಪ್ರಕಾರ ವ್ಯಾಖ್ಯಾನಿಸಲಾದ ಇತರ ಕೆಲವು ಸಂಬಂಧಿಕರು ಸೇರುತ್ತಾರೆ.

ಷೇರುಗಳ ಮಾರಾಟದ ಮೇಲೆ ತೆರಿಗೆ ಪಾವತಿಸಲು ಯಾರು ಹೊಣೆಗಾರರು?

ಸಾಮಾನ್ಯವಾಗಿ ಒಬ್ಬ ವ್ಯಕ್ತಿ ಅಥವಾ HUF ನಿಂದ ಬಂಡವಾಳ ಆಸ್ತಿಯನ್ನು ಉಡುಗೊರೆಯಾಗಿ ನೀಡುವುದನ್ನು ಕೆಲವು ಷರತ್ತುಗಳನ್ನು ಪೂರೈಸಿದರೆ, ಬಂಡವಾಳ ಲಾಭ ತೆರಿಗೆಯ ಉದ್ದೇಶಕ್ಕಾಗಿ 'ಮಾರಾಟ' ಎಂದು ಪರಿಗಣಿಸಲಾಗುವುದಿಲ್ಲ. ಆದಾಗ್ಯೂ, ಸ್ವೀಕರಿಸುವವರು ತರುವಾಯ ಈ ಷೇರುಗಳನ್ನು ಅಥವಾ ಮ್ಯೂಚುಯಲ್ ಫಂಡ್ ಯುನಿಟ್‌ಗಳನ್ನು ಮಾರಾಟ ಮಾಡಿದಾಗ ತೆರಿಗೆ ಹೊಣೆಗಾರಿಕೆ ಉಂಟಾಗಬಹುದು. ಅಂತಹ ಸಂದರ್ಭಗಳಲ್ಲಿ ಮೂಲ ಮಾಲೀಕರ ಸ್ವಾಧೀನ ವೆಚ್ಚವನ್ನು ಸಾಮಾನ್ಯವಾಗಿ ಗಣನೆಗೆ ತೆಗೆದುಕೊಳ್ಳಲಾಗುತ್ತದೆ. ಇದಲ್ಲದೆ, ಆಸ್ತಿಯನ್ನು ಸಂಗಾತಿಗೆ ಅಥವಾ ಅಪ್ರಾಪ್ತ ಮಗುವಿಗೆ ಉಡುಗೊರೆಯಾಗಿ ನೀಡಿದರೆ 'ಆದಾಯವನ್ನು ಒಟ್ಟುಗೂಡಿಸುವ' ನಿಬಂಧನೆಗಳು ಅನ್ವಯಿಸಬಹುದು.

ಗಮನಿಸಿ: ಏಷ್ಯಾನೆಟ್ ಸುವರ್ಣ ನ್ಯೂಸ್ ಷೇರುಗಳು, ಮ್ಯೂಚುವಲ್ ಫಂಡ್‌ಗಳು, ಐಪಿಒಗಳು (IPOs) ಅಥವಾ ಸರಕುಗಳ (commodities) ಕುರಿತು ಯಾವುದೇ ಹೂಡಿಕೆ ಸಲಹೆಯನ್ನು ನೀಡುವುದಿಲ್ಲ. ಇಲ್ಲಿ ಒದಗಿಸಲಾದ ಮಾಹಿತಿಯು ಕೇವಲ ತಿಳುವಳಿಕೆಗಾಗಿ ಮಾತ್ರ. ಯಾವುದೇ ಹೂಡಿಕೆ ಮಾಡುವ ಮೊದಲು ದಯವಿಟ್ಟು ನಿಮ್ಮ ಆರ್ಥಿಕ ಸಲಹೆಗಾರರನ್ನು ಸಂಪರ್ಕಿಸಿ.

ಇಂದಿನ ₹50 ಲಕ್ಷವೇ ಮೇಲೊ, 10 ವರ್ಷದ ನಂತರದ ₹1 ಕೋಟಿ ಮೇಲೊ? ನಿಮಗೆ ಗೊತ್ತಿಲ್ಲದೆ ನಿಮ್ಮ ಹಣ ಕರಗಿಸಲಿದೆ ಹಣದುಬ್ಬರ!

Santosh Naik — Sat, 24 Oct 2026 20:29:01 +0530

ಹೂಡಿಕೆ, ಅಭಿವೃದ್ಧಿ, ಉಳಿತಾಯ ಅಥವಾ ನಿವೃತ್ತಿಯ (Retirement) ಯೋಜನೆಗಳನ್ನು ರೂಪಿಸುವಾಗ ಬಹುತೇಕರು ಮಾಡುವ ದೊಡ್ಡ ತಪ್ಪೆಂದರೆ ಕೇವಲ ಬಡ್ಡಿದರ ಮತ್ತು ತೆರಿಗೆಯನ್ನು (Taxes) ಮಾತ್ರ ಲೆಕ್ಕ ಹಾಕುವುದು. ಆದರೆ, ನಮಗೆ ಅರಿವಿಲ್ಲದಂತೆಯೇ ನಾವು ಕಷ್ಟಪಟ್ಟುಗಳಿಸಿದ ಹಣದ ನೈಜ ಮೌಲ್ಯವನ್ನು ಸದ್ದಿಲ್ಲದೆ ಕರಗಿಸುವ 'ಹಣದುಬ್ಬರ'ವನ್ನು (Inflation) ನಾವು ಪರಿಗಣಿಸುವುದೇ ಇಲ್ಲ. ಮಕ್ಕಳ ಶಿಕ್ಷಣದಿಂದ ಹಿಡಿದು ದಿನಸಿ ಪದಾರ್ಥಗಳವರೆಗೆ, ವೈದ್ಯಕೀಯ ವೆಚ್ಚದಿಂದ ಹಿಡಿದು ಮನೆ ನಿರ್ಮಾಣದವರೆಗೆ ಪ್ರತಿಯೊಂದು ನಿತ್ಯಜೀವನದ ವೆಚ್ಚಗಳು ಕಾಲಕ್ರಮೇಣ ಏರಿಕೆಯಾಗುತ್ತಲೇ ಸಾಗುತ್ತವೆ. ಈ ಹಣದುಬ್ಬರವು ವೆಚ್ಚಗಳನ್ನು ಹೆಚ್ಚಿಸಿದಂತೆ, ನಿಮ್ಮ ಹಣದ 'ಖರೀದಿ ಸಾಮರ್ಥ್ಯ' (Purchasing Power) ಸತತವಾಗಿ ಕುಸಿಯುತ್ತಾ ಸಾಗುತ್ತದೆ.

ಹೀಗಾಗಿ, ನಿವೃತ್ತಿ ಅಥವಾ ಭವಿಷ್ಯದ ಹೂಡಿಕೆ ಯೋಜನೆಗಳನ್ನು ಮಾಡುವಾಗ ಕೇವಲ ತೆರಿಗೆಯಷ್ಟೇ ಅಲ್ಲದೆ, ಹಣದುಬ್ಬರವನ್ನೂ ಕಡ್ಡಾಯವಾಗಿ ಲೆಕ್ಕಚಾರದಲ್ಲಿ ಸೇರಿಸಿಕೊಳ್ಳಬೇಕು. ಇಲ್ಲವಾದರೆ, ಕಾಗದದ ಮೇಲಷ್ಟೇ ನಿಮ್ಮ ಹಣ ಕೋಟಿಗಳಲ್ಲಿ ದೊಡ್ಡದಾಗಿ ಕಾಣಿಸುತ್ತದೆ, ಆದರೆ ಮಾರುಕಟ್ಟೆಯಲ್ಲಿ ಅದರ ನೈಜ ಖರೀದಿ ಸಾಮರ್ಥ್ಯ ನಿಮ್ಮನ್ನು ತೀವ್ರ ನಿರಾಶೆಗೆ ದೂಡಬಹುದು!

ಇಂದಿನ ₹50 ಲಕ್ಷ vs 10 ವರ್ಷಗಳ ನಂತರದ ₹1 ಕೋಟಿ

ಇಂದಿನ ಕಾಲಘಟ್ಟದಲ್ಲಿ ₹50 ಲಕ್ಷ ಎಂಬುದು ಅತ್ಯಂತ ದೊಡ್ಡ ಮೊತ್ತ. ಬಹುತೇಕ ಮಧ್ಯಮ ವರ್ಗದ ಜನರಿಗೆ ₹50 ಲಕ್ಷದಿಂದ ₹1 ಕೋಟಿಯಷ್ಟು ಹಣ ಉಳಿಸುವುದು ಜೀವನದ ಪ್ರಮುಖ ಆರ್ಥಿಕ ಗುರಿಯಾಗಿರುತ್ತದೆ. ಆದರೆ, ಈ ಆರ್ಥಿಕ ಗುರಿಗಳು ಕಾಲಾನಂತರದಲ್ಲಿ ಹಣದುಬ್ಬರದ ಹೊಡೆತಕ್ಕೆ ಸಿಲುಕಿ ತಮ್ಮ ಮೌಲ್ಯವನ್ನು ಕಳೆದುಕೊಳ್ಳುತ್ತವೆ.

ಉದಾಹರಣೆಗೆ, ಇಂದು ₹1 ಕೋಟಿ ನೀಡಿ ನೀವು ಏನೆಲ್ಲಾ ವಸ್ತುಗಳನ್ನು ಅಥವಾ ಆಸ್ತಿಯನ್ನು ಖರೀದಿಸಬಹುದೋ, ಇನ್ನು 10 ವರ್ಷಗಳ ನಂತರ ಅದೇ ₹1 ಕೋಟಿಯಿಂದ ಅಷ್ಟೇ ಮೌಲ್ಯದ ವಸ್ತುಗಳನ್ನು ಕೊಳ್ಳಲು ಖಂಡಿತ ಸಾಧ್ಯವಾಗುವುದಿಲ್ಲ.

ಆನ್‌ಲೈನ್ ಇನ್ಫ್ಲೇಷನ್ ಕ್ಯಾಲ್ಕುಲೇಟರ್‌ಗಳ (Inflation Calculators) ಆಧಾರದ ಮೇಲಿನ ಲೆಕ್ಕಾಚಾರ ಇಲ್ಲಿದೆ:

ಇಂದಿನ ಮೌಲ್ಯ: ₹1 ಕೋಟಿ
ಸಮಯ: 10 ವರ್ಷಗಳು
ಸರಾಸರಿ ಹಣದುಬ್ಬರ ದರ: ಶೇಕಡಾ 6%
10 ವರ್ಷದ ನಂತರ ಅದೇ ವಸ್ತುಗಳ ಭವಿಷ್ಯದ ಬೆಲೆ: ₹1.79 ಕೋಟಿ
10 ವರ್ಷದ ನಂತರ ಸಿಗುವ ₹1 ಕೋಟಿಯ ಇಂದಿನ ನೈಜ ಮೌಲ್ಯ: ₹55.84 ಲಕ್ಷ

ಇದರರ್ಥವೇನೆಂದರೆ, ಇಂದಿನ ಮಾರುಕಟ್ಟೆಯಲ್ಲಿ ₹55.84 ಲಕ್ಷ ಕೊಟ್ಟು ನೀವು ಏನೆಲ್ಲಾ ವಸ್ತುಗಳನ್ನು ಖರೀದಿಸಬಹುದೋ, ಇನ್ನು 10 ವರ್ಷಗಳ ನಂತರ ಬರೋಬ್ಬರಿ ₹1 ಕೋಟಿ ನೀಡಿದರೆ ಮಾತ್ರ ಅಷ್ಟೇ ವಸ್ತುಗಳು ಸಿಗುತ್ತವೆ! ಈ ಮೌಲ್ಯವು ₹50 ಲಕ್ಷಕ್ಕಿಂತ ತುಸು ಹೆಚ್ಚಾಗಿದ್ದರೂ ಸಹ, ಹಣದುಬ್ಬರವು ಹೇಗೆ ನಿಧಾನವಾಗಿ ನಿಮ್ಮ ಹಣದ ಶಕ್ತಿಯನ್ನು ಕಸಿದುಕೊಳ್ಳುತ್ತದೆ ಎಂಬುದಕ್ಕೆ ಇದು ಸ್ಪಷ್ಟ ಉದಾಹರಣೆಯಾಗಿದೆ.

15 ವರ್ಷಗಳ ನಂತರ ₹1 ಕೋಟಿಯ ಸ್ಥಿತಿ ಏನು?

ಇದೇ ಲೆಕ್ಕಾಚಾರವನ್ನು 15 ವರ್ಷಗಳಿಗೆ ವಿಸ್ತರಿಸಿದರೆ, 15 ವರ್ಷಗಳ ನಂತರ ನಿಮ್ಮ ಕೈಗೆ ಸಿಗುವ ₹1 ಕೋಟಿ ಹಣದ ನೈಜ ಮೌಲ್ಯ ಇಂದಿನ ಕೇವಲ ₹42 ಲಕ್ಷಕ್ಕೆ ಸಮನಾಗಿರುತ್ತದೆ!

ನೀವೇನಾದರೂ ನಿವೃತ್ತಿ ಜೀವನಕ್ಕಾಗಿ (Retirement Planning) ಯೋಜಿಸುತ್ತಿದ್ದರೆ, ನಿವೇಷ್ಟೇ ಹಣ ಉಳಿಸಬೇಕು ಎಂಬುದನ್ನು ಅಂದಾಜಿಸಲು ಹಣದುಬ್ಬರ, ನಿಮ್ಮ ಜೀವನಶೈಲಿಯ ವೆಚ್ಚಗಳು, ವೈದ್ಯಕೀಯ ಚಿಕಿತ್ಸಾ ವೆಚ್ಚಗಳು ಹಾಗೂ ನಿಮ್ಮ ಹೂಡಿಕೆಯಿಂದ ಸಿಗುವ ನಿರೀಕ್ಷಿತ ಆದಾಯವನ್ನು (Investment Returns) ಕಡ್ಡಾಯವಾಗಿ ಲೆಕ್ಕ ಹಾಕಬೇಕು.\

ಒಂದು ವೇಳೆ ಇಂದು ₹1 ಕೋಟಿ ವೆಚ್ಚದಲ್ಲಿ ಸಿಗುವ ಜೀವನಶೈಲಿಯನ್ನು ಇನ್ನು 15 ವರ್ಷಗಳ ನಂತರದ ನಿವೃತ್ತಿ ಜೀವನದಲ್ಲೂ ಪಡೆಯಲು ನೀವು ಬಯಸುವುದಾದರೆ ನಿಮಗೆ ವಾಸ್ತವವಾಗಿ ಬೇಕಾಗುವ ಹಣ ಎಷ್ಟು ಗೊತ್ತಾ?

ಇಂದಿನ ಮೌಲ್ಯ: ₹1 ಕೋಟಿ
ಸರಾಸರಿ ಹಣದುಬ್ಬರ: ಶೇಕಡಾ 6%
ಸಮಯ: 15 ವರ್ಷಗಳು
ಅಷ್ಟೇ ವಸ್ತುಗಳನ್ನು ಕೊಳ್ಳಲು 15 ವರ್ಷಗಳ ನಂತರ ಬೇಕಾಗುವ ಮೊತ್ತ: ₹2.40 ಕೋಟಿ

ಅಂದರೆ, ಇಂದಿನ ₹1 ಕೋಟಿಯ ಜೀವನಶೈಲಿಯನ್ನು 15 ವರ್ಷಗಳ ನಂತರ ಕಾಪಾಡಿಕೊಳ್ಳಲು ನಿಮಗೆ ಬರೋಬ್ಬರಿ ₹2.40 ಕೋಟಿ ನಿಧಿ (Corpus) ಅಗತ್ಯವಿರುತ್ತದೆ. ಹೀಗಾಗಿ, ಕೇವಲ ಬ್ಯಾಂಕ್ ಡೆಪಾಸಿಟ್ ಅಥವಾ ಸಾಂಪ್ರದಾಯಿಕ ಉಳಿತಾಯ ಯೋಜನೆಗಳಲ್ಲಿ ಹಣವಿಡುವ ಬದಲು, ಹಣದುಬ್ಬರವನ್ನು ಮೀರಿಸಿ (Beat Inflation) ಉತ್ತಮ ರಿಟರ್ನ್ಸ್ ನೀಡುವ ಈಕ್ವಿಟಿ, ಮ್ಯೂಚುಯಲ್ ಫಂಡ್ ಹಾಗೂ ಇತರ ಆಸ್ತಿಗಳಲ್ಲಿ ಬುದ್ಧಿವಂತಿಕೆಯಿಂದ ಹೂಡಿಕೆ ಮಾಡುವುದು ಇಂದಿನ ತುರ್ತು ಅಗತ್ಯವಾಗಿದೆ.

ಕೇವಲ 15 ಸೆಕೆಂಡ್ ಒಂದು ರೀಲ್ಸ್‌ ಗೆ 7 ಲಕ್ಷ ! gen z ಇನ್‌ಫ್ಲುಯೆನ್ಸರ್ ಗಳಿಕೆ ಕೇಳಿದ್ರೆ ಶಾಕ್‌ ಆಗ್ತೀರಿ

Roopa Hegde — Tue, 27 Oct 2026 11:16:58 +0530

ಸ್ಮಾರ್ಟ್ಫೋನ್ ಮತ್ತು ಫಾಸ್ಟ್ ಇಂಟರ್ನೆಟ್ ಯುಗದಲ್ಲಿ ಫ್ಯಾಷನ್ ಅಂದರೆ ಕೇವಲ ರ್ಯಾಂಪ್ ವಾಕ್ ಅಥವಾ ಬಾಲಿವುಡ್ಗೆ ಮಾತ್ರ ಸೀಮಿತವಾಗಿಲ್ಲ. ಇನ್ಸ್ಟಾಗ್ರಾಮ್ ಮತ್ತು ಯೂಟ್ಯೂಬ್ನಲ್ಲಿ 15ರಿಂದ 30 ಸೆಕೆಂಡ್ಗಳ ವಿಡಿಯೋ ಮಾಡುವ ಮೂಲಕ ಭಾರತದ Gen Z ಫ್ಯಾಷನ್ ಮತ್ತು ಬ್ಯೂಟಿ ಇನ್ಫ್ಲುಯೆನ್ಸರ್ಗಳು ಪ್ರತಿ ತಿಂಗಳು ಲಕ್ಷಾಂತರ ರೂಪಾಯಿ ಸಂಪಾದಿಸುತ್ತಿದ್ದಾರೆ.

ಒಂದು ಕಾಲದಲ್ಲಿ ಇದನ್ನು ಕೇವಲ ಹವ್ಯಾಸ ಎಂದು ಪರಿಗಣಿಸಲಾಗುತ್ತಿತ್ತು. ಆದರೆ ಈಗ ಇದು ವೇಗವಾಗಿ ಬೆಳೆಯುತ್ತಿರುವ ಉದ್ಯಮಗಳಲ್ಲಿ ಒಂದಾಗಿದೆ. ವರದಿಯ ಪ್ರಕಾರ, ಭಾರತದ ಟಾಪ್ 5 Gen Z ಫ್ಯಾಷನ್ ಮತ್ತು ಬ್ಯೂಟಿ ಇನ್ಫ್ಲುಯೆನ್ಸರ್ಗಳು ಕೇವಲ 15 ಸೆಕೆಂಡ್ನ ಒಂದು ಬ್ರಾಂಡೆಡ್ ರೀಲ್ಗೆ 2 ಲಕ್ಷದಿಂದ 7 ಲಕ್ಷ ರೂಪಾಯಿವರೆಗೆ ಚಾರ್ಜ್ ಮಾಡ್ತಿದ್ದಾರೆ. ಅಷ್ಟೇ ಅಲ್ಲ, ಇವರ ಆದಾಯ ಕೇವಲ ರೀಲ್ಗಳಿಗೆ ಸೀಮಿತವಾಗಿಲ್ಲ.

ಕೋಮಲ್ ಪಾಂಡೆ – ಎಕ್ಸ್ಪೆರಿಮೆಂಟಲ್ ಫ್ಯಾಷನ್ನ ಕ್ವೀನ್

Gen Z ಫ್ಯಾಷನ್ ಬಗ್ಗೆ ಮಾತನಾಡುವಾಗ ಕೋಮಲ್ ಪಾಂಡೆ ಹೆಸರು ಪ್ರಮುಖವಾಗಿ ಕೇಳಿಬರುತ್ತದೆ. ವಿಭಿನ್ನ ಸ್ಟೈಲಿಂಗ್, ಬೋಲ್ಡ್ ಲುಕ್ ಮತ್ತು ಹೈ ಫ್ಯಾಷನ್ ವಿಡಿಯೋಗಳ ಮೂಲಕ ಅವರು ಜನಪ್ರಿಯರಾಗಿದ್ದಾರೆ. ಲಕ್ಸುರಿ ಮತ್ತು ಪ್ರೀಮಿಯಂ ಫ್ಯಾಷನ್ ಬ್ರ್ಯಾಂಡ್ಗಳ ಜೊತೆ ಕೆಲಸ ಮಾಡುವ ಕೋಮಲ್ ಪಾಂಡೆ, ಒಂದು ರೀಲ್ಗೆ ಸುಮಾರು 4ರಿಂದ 6 ಲಕ್ಷ ರೂಪಾಯಿವರೆಗೆ ಚಾರ್ಜ್ ಮಾಡ್ತಾರೆ. ಇದರ ಜೊತೆಗೆ ಯೂಟ್ಯೂಬ್ ಆ್ಯಡ್ಸೆನ್ಸ್ ಮತ್ತು ಫ್ಯಾಷನ್ ಬ್ರ್ಯಾಂಡ್ಗಳ ಜೊತೆಗಿನ ಪಾರ್ಟನರ್ಶಿಪ್ ಕೂಡ ಅವರ ಆದಾಯದ ಪ್ರಮುಖ ಮೂಲಗಳಾಗಿವೆ.

ಕೃತಿಕಾ ಖುರಾನಾ – ಬೋಹೋ ಚಿಕ್ ಮತ್ತು ಡೈಲಿ ವೇರ್ ಸ್ಟೈಲ್

ಇಂಡೋ-ವೆಸ್ಟರ್ನ್ ಮತ್ತು ಬೋಹೋ ಸ್ಟೈಲ್ಗಳನ್ನು ಜನಪ್ರಿಯಗೊಳಿಸಿರುವ ಕೃತಿಕಾ ಖುರಾನಾ, Gen Z ಜೊತೆಗೆ ಮಿಲೇನಿಯಲ್ಸ್ನಲ್ಲೂ ಸಾಕಷ್ಟು ಫೇಮಸ್ ಆಗಿದ್ದಾರೆ. ಫ್ಯಾಷನ್ ಮಾತ್ರವಲ್ಲದೆ, ತಮ್ಮ ಲೈಫ್ಸ್ಟೈಲ್ ಮತ್ತು ಬ್ಯೂಟಿ ಪ್ರಾಡಕ್ಟ್ಗಳ ಬಗ್ಗೆಯೂ ಅವರು ವಿಡಿಯೋಗಳನ್ನು ಮಾಡುತ್ತಾರೆ. ಬ್ಯೂಟಿ ಬ್ರ್ಯಾಂಡ್ಗಳ ಜೊತೆಗಿನ ದೀರ್ಘಾವಧಿಯ ಒಪ್ಪಂದಗಳು ಮತ್ತು ಇನ್ಸ್ಟಾಗ್ರಾಮ್ ರೀಲ್ಗಳ ಮೂಲಕ ಕೃತಿಕಾ ಒಂದು ರೀಲ್ಗೆ ಸುಮಾರು 3ರಿಂದ 5 ಲಕ್ಷ ರೂಪಾಯಿವರೆಗೆ ಸಂಪಾದಿಸುತ್ತಾರೆ.

ರೋಶ್ನಿ ಭಾಟಿಯಾ – ಎಲಿಗಂಟ್ ಮತ್ತು ಸ್ಟ್ರೀಟ್ ಸ್ಟೈಲ್

ಕ್ಲಾಸಿಕ್ ಫ್ಯಾಷನ್ ಮತ್ತು ಮಾಡರ್ನ್ ಸ್ಟ್ರೀಟ್ವೇರ್ ಲುಕ್ಗಳ ಮೂಲಕ ರೋಶ್ನಿ ಭಾಟಿಯಾ ತಮ್ಮದೇ ಆದ ಗುರುತು ಹೊಂದಿದ್ದಾರೆ. ಟೈರ್-1 ಮತ್ತು ಟೈರ್-2 ನಗರಗಳ ಪ್ರೇಕ್ಷಕರಲ್ಲೂ ಅವರಿಗೆ ಉತ್ತಮ ಜನಪ್ರಿಯತೆ ಇದೆ. ಇದೇ ಕಾರಣಕ್ಕೆ ಮಿಂತ್ರಾ, ಅಜಿಯೋ ಮತ್ತು ನೈಕಾ ರೀತಿಯ ಆನ್ಲೈನ್ ಶಾಪಿಂಗ್ ಹಾಗೂ ಬ್ಯೂಟಿ ಪ್ಲಾಟ್ಫಾರ್ಮ್ಗಳ ಬ್ರ್ಯಾಂಡ್ ಕ್ಯಾಂಪೇನ್ಗಳಲ್ಲಿ ಅವರು ಕಾಣಿಸಿಕೊಳ್ಳುತ್ತಾರೆ. ಒಂದು ಬ್ರಾಂಡೆಡ್ ಕ್ಯಾಂಪೇನ್ ಅಥವಾ ರೀಲ್ಗೆ ರೋಶ್ನಿ ಸುಮಾರು 2.5 ಲಕ್ಷದಿಂದ 4.5 ಲಕ್ಷ ರೂಪಾಯಿವರೆಗೆ ಚಾರ್ಜ್ ಮಾಡ್ತಾರೆ.

ಸಾಕ್ಷಿ ಶಿವದಾಸಾನಿ

ತಮ್ಮ ವಿಭಿನ್ನ ಶೈಲಿ ಮತ್ತು ಮನರಂಜನೆಯ ಬ್ಯೂಟಿ ವಿಡಿಯೋಗಳಿಂದ ಸಾಕ್ಷಿ ಶಿವದಾಸಾನಿ ಯುವಜನರಲ್ಲಿ ಜನಪ್ರಿಯರಾಗಿದ್ದಾರೆ. ಮೇಕಪ್ ಟಿಪ್ಸ್, ಸ್ಕಿನ್ಕೇರ್ ಮತ್ತು ಕಡಿಮೆ ಬಜೆಟ್ನಲ್ಲಿ ಫ್ಯಾಷನಬಲ್ ಆಗಿ ಕಾಣಿಸಿಕೊಳ್ಳುವ ವಿಧಾನಗಳನ್ನು ಅವರು ತಮ್ಮ ವಿಡಿಯೋಗಳ ಮೂಲಕ ಹಂಚಿಕೊಳ್ಳುತ್ತಾರೆ. ಹೀಗಾಗಿ ಸ್ಕಿನ್ಕೇರ್ ಮತ್ತು ಪರ್ಸನಲ್ ಕೇರ್ ಬ್ರ್ಯಾಂಡ್ಗಳು ಅವರ ಜೊತೆ ಕೆಲಸ ಮಾಡಲು ಆಸಕ್ತಿ ತೋರುತ್ತವೆ. ಸಾಕ್ಷಿ ಒಂದು ರೀಲ್ಗೆ ಸುಮಾರು 2 ಲಕ್ಷದಿಂದ 3.5 ಲಕ್ಷ ರೂಪಾಯಿವರೆಗೆ ಚಾರ್ಜ್ ಮಾಡುತ್ತಾರೆ.

ಅನಮ್ ದರ್ಬಾರ್

ಟ್ರೆಂಡಿ ಬಟ್ಟೆಗಳು, ಡ್ಯಾನ್ಸ್ ಮತ್ತು ಎನರ್ಜಿಟಿಕ್ ವಿಡಿಯೋಗಳ ಮೂಲಕ ಅನಮ್ ದರ್ಬಾರ್ ಯುವಜನರಲ್ಲಿ ಜನಪ್ರಿಯತೆ ಗಳಿಸಿದ್ದಾರೆ. ಫ್ಯಾಷನ್ ಮತ್ತು ಬ್ಯೂಟಿ ಜೊತೆಗೆ ಯುವಜನರನ್ನು ಆಕರ್ಷಿಸುವ ಕಂಟೆಂಟ್ ಮಾಡೋದ್ರಲ್ಲಿ ಫೇಮಸ್. ಒಂದು ಸ್ಪಾನ್ಸರ್ಡ್ ಪೋಸ್ಟ್ ಅಥವಾ ರೀಲ್ಗೆ ಅನಮ್ ಸುಮಾರು 1.5 ಲಕ್ಷದಿಂದ 3 ಲಕ್ಷ ರೂಪಾಯಿವರೆಗೆ ಚಾರ್ಜ್ ಮಾಡುತ್ತಾರೆ.

ಇನ್ಫ್ಲುಯೆನ್ಸರ್ ಸಂಪಾದನೆಯ 3 ಪ್ರಮುಖ ಮೂಲಗಳು

ಈ ಇನ್ಫ್ಲುಯೆನ್ಸರ್ಗಳು ರೀಲ್ಗಳಿಂದ ಮಾತ್ರ ಹಣ ಸಂಪಾದಿಸ್ತಿಲ್ಲ. ಇವರಿಗೆ ಆದಾಯ ತರುವ ಮೂರು ಪ್ರಮುಖ ಮೂಲಗಳಿವೆ. ಬ್ರ್ಯಾಂಡ್ ಎಂಡೋರ್ಸ್ಮೆಂಟ್ ಮತ್ತು ಸ್ಪಾನ್ಸರ್ಡ್ ರೀಲ್ಸ್ ಒಂದಾದ್ರೆ. ಅಫಿಲಿಯೇಟ್ ಮಾರ್ಕೆಟಿಂಗ್ ಎರಡನೇಯದು. ಸ್ವಂತ ಬ್ರ್ಯಾಂಡ್ ಮತ್ತು ಮಾಸ್ಟರ್ಕ್ಲಾಸ್ ಮೂಲಕ ಕೂಡ ಅವರು ಸಂಪಾದನೆ ಮಾಡ್ತಿದ್ದಾರೆ.

ಸಂಬಂಧಿಕರಿಗೆ ₹2 ಲಕ್ಷ ಸಾಲ ಕೊಟ್ಟು ಸಂಕಷ್ಟಕ್ಕೆ ಸಿಲುಕಿದ ವ್ಯಕ್ತಿ: ಪತ್ನಿಗೆ ಹೇಳದೆ ಮಾಡಿದ ನಿರ್ಧಾರದಿಂದ ದಾಂಪತ್ಯದಲ್ಲಿ ಬಿರುಕು!

Chandrashekar GS — Fri, 23 Oct 2026 09:14:33 +0530

ಸಂಬಂಧಿಕರಿಗೆ ₹2 ಲಕ್ಷ ಸಾಲ ಕೊಟ್ಟು ಸಂಕಷ್ಟಕ್ಕೆ ಸಿಲುಕಿದ ವ್ಯಕ್ತಿ: ಪತ್ನಿಗೆ ಹೇಳದೆ ಮಾಡಿದ ನಿರ್ಧಾರದಿಂದ ದಾಂಪತ್ಯದಲ್ಲಿ ಬಿರುಕು!

ಸಂಬಂಧಿಕರಿಗೆ ಕಷ್ಟದ ಸಮಯದಲ್ಲಿ ಹಣಕಾಸಿನ ನೆರವು ನೀಡುವುದು ಮಾನವೀಯ ಗುಣ. ಆದರೆ ಸಾಲವಾಗಿ ಕೊಟ್ಟ ಹಣ ವಾಪಸ್ ಬರದಿದ್ದರೆ, ಅದರಿಂದ ಕುಟುಂಬದ ನೆಮ್ಮದಿಯೇ ಹಾಳಾದರೆ ಏನು ಮಾಡಬೇಕು? ಇಂತಹ ಪ್ರಶ್ನೆ ಹುಟ್ಟುಹಾಕುವ ಘಟನೆ ಕುರಿತು ಮನಿಕಂಟ್ರೋಲ್ ವರದಿ ಮಾಡಿದೆ. ಸಂಬಂಧಿಕರೊಬ್ಬರ ವೈದ್ಯಕೀಯ ತುರ್ತು ಪರಿಸ್ಥಿತಿಗಾಗಿ ₹2 ಲಕ್ಷ ನೀಡಿದ ವ್ಯಕ್ತಿಯೊಬ್ಬರು, ಆ ನಿರ್ಧಾರದಿಂದ ಪತ್ನಿಯೊಂದಿಗೆ ಭಿನ್ನಾಭಿಪ್ರಾಯ ಎದುರಿಸಿರುವುದಾಗಿ ರೆಡಿಟ್‌ನಲ್ಲಿ ತಮ್ಮ ಅನುಭವ ಹಂಚಿಕೊಂಡಿದ್ದಾರೆ.

ಪತ್ನಿಯೊಂದಿಗೆ ಚರ್ಚಿಸದೆ ₹2 ಲಕ್ಷ ವರ್ಗಾವಣೆ

ವರದಿಯ ಪ್ರಕಾರ, ಆ ವ್ಯಕ್ತಿ ಮತ್ತು ಅವರ ಪತ್ನಿ ಇಬ್ಬರೂ 20ರ ಹರೆಯದಲ್ಲಿದ್ದು, ದೊಡ್ಡ ನಗರವೊಂದರಲ್ಲಿ ವಾಸಿಸುತ್ತಿದ್ದಾರೆ. ದಂಪತಿಯ ಒಟ್ಟು ಮಾಸಿಕ ಆದಾಯ ತೆರಿಗೆ ಕಡಿತದ ನಂತರ ಸುಮಾರು ₹3.5 ಲಕ್ಷ ಎಂದು ಅವರು ತಿಳಿಸಿದ್ದಾರೆ.

ಒಂದು ತಿಂಗಳ ಹಿಂದೆ ಆಪ್ತ ಸಂಬಂಧಿಕರೊಬ್ಬರು ವೈದ್ಯಕೀಯ ಸಮಸ್ಯೆಯ ಕಾರಣ ತುರ್ತಾಗಿ ₹2 ಲಕ್ಷ ಬೇಕೆಂದು ಕೇಳಿದ್ದಾರೆ. 30 ದಿನಗಳಲ್ಲಿ ಹಣ ಹಿಂತಿರುಗಿಸುವುದಾಗಿ ಭರವಸೆ ನೀಡಿದ್ದರಿಂದ, ಸಂಬಂಧಿಕರಿಗೆ ನೆರವಾಗಬೇಕೆಂಬ ಉದ್ದೇಶದಿಂದ ವ್ಯಕ್ತಿ ತಮ್ಮ ಉಳಿತಾಯದ ಹಣವನ್ನು ವರ್ಗಾಯಿಸಿದ್ದಾರೆ. ಆದರೆ ಈ ನಿರ್ಧಾರ ತೆಗೆದುಕೊಳ್ಳುವ ಮೊದಲು ಪತ್ನಿಯೊಂದಿಗೆ ಚರ್ಚಿಸಿರಲಿಲ್ಲ.

ನಂತರ ಪತ್ನಿಗೆ ವಿಷಯ ತಿಳಿಸಿದಾಗ ದಂಪತಿಯ ನಡುವೆ ವಾಗ್ವಾದ ನಡೆದಿದೆ. ಹಣದ ಮೊತ್ತಕ್ಕಿಂತಲೂ, ಕುಟುಂಬದ ಆರ್ಥಿಕ ನಿರ್ಧಾರಗಳನ್ನು ಪರಸ್ಪರ ಚರ್ಚಿಸದೆ ತೆಗೆದುಕೊಂಡಿರುವುದೇ ಭಿನ್ನಾಭಿಪ್ರಾಯಕ್ಕೆ ಪ್ರಮುಖ ಕಾರಣವಾಗಿತ್ತು ಎಂದು ಅವರು ವಿವರಿಸಿದ್ದಾರೆ.

30 ದಿನ ಕಳೆದರೂ ಹಣ ವಾಪಸ್ ಬರಲಿಲ್ಲ

ಸಾಲ ನೀಡಿದ ಒಂದು ತಿಂಗಳು ಕಳೆದರೂ ಸಂಬಂಧಿಕರಿಂದ ಹಣ ವಾಪಸ್ ಬಂದಿರಲಿಲ್ಲ. ಹಣದ ಬಗ್ಗೆ ವಿಚಾರಿಸಿದಾಗ, ತಾನು ಹಣ ಕೇಳಿದ್ದಕ್ಕೆ ಸಂಬಂಧಿಕರು ಅಹಂಕಾರದ ಆರೋಪ ಮಾಡಿದರು ಮತ್ತು ತಪ್ಪಿತಸ್ಥ ಭಾವನೆ ಮೂಡಿಸುವ ರೀತಿಯಲ್ಲಿ ಮಾತನಾಡಿದರು ಎಂದು ಆ ವ್ಯಕ್ತಿ ರೆಡಿಟ್ ಪೋಸ್ಟ್‌ನಲ್ಲಿ ತಿಳಿಸಿದ್ದಾರೆ.

ಹಣಕಾಸಿನ ನೆರವು ನೀಡಿದರೂ ಅದನ್ನು ಮರಳಿ ಕೇಳುವುದು ತಪ್ಪೇ ಎಂಬ ಪ್ರಶ್ನೆ ಅವರಲ್ಲಿ ಮೂಡಿದೆ. ಹಣ ವಾಪಸ್ ಬರದಿರುವುದು ಮಾತ್ರವಲ್ಲದೆ, ಕುಟುಂಬದೊಳಗಿನ ಸಂಬಂಧಗಳ ಮೇಲೂ ಈ ಘಟನೆ ಪರಿಣಾಮ ಬೀರಿದೆ ಎಂದು ಅವರು ಅಳಲು ತೋಡಿಕೊಂಡಿದ್ದಾರೆ. ಆದರೆ ಸಂಬಂಧಿಕರು ಕೊನೆಗೆ ಹಣ ಹಿಂದಿರುಗಿಸಿದ್ದಾರೆಯೇ ಎಂಬುದು ವರದಿಯಲ್ಲಿ ಸ್ಪಷ್ಟವಾಗಿಲ್ಲ. ಈ ವಿವರಗಳು ಸಾಮಾಜಿಕ ಜಾಲತಾಣದಲ್ಲಿ ವ್ಯಕ್ತಿಯೊಬ್ಬರು ಹಂಚಿಕೊಂಡ ಅನುಭವವನ್ನು ಆಧರಿಸಿವೆ; ಅವುಗಳನ್ನು ಸ್ವತಂತ್ರವಾಗಿ ಪರಿಶೀಲಿಸಲಾಗಿಲ್ಲ.

ಸಂಬಂಧಿಕರಿಗೆ ಹಣ ಕೊಡುವ ಮುನ್ನ ಗಮನಿಸಬೇಕಾದ ಅಂಶಗಳು

ಈ ಘಟನೆ ಕುಟುಂಬದವರಿಗೆ ಹಣಕಾಸಿನ ನೆರವು ನೀಡುವಾಗ ಕೆಲವು ಮಿತಿಗಳನ್ನು ನಿಗದಿಪಡಿಸುವ ಅಗತ್ಯವನ್ನು ನೆನಪಿಸುತ್ತದೆ.

ಮೊದಲು ಸಂಗಾತಿಯೊಂದಿಗೆ ಚರ್ಚಿಸಿ: ಕುಟುಂಬದ ಉಳಿತಾಯಕ್ಕೆ ಸಂಬಂಧಿಸಿದ ದೊಡ್ಡ ನಿರ್ಧಾರಗಳನ್ನು ಪತಿ-ಪತ್ನಿ ಒಟ್ಟಿಗೆ ತೆಗೆದುಕೊಳ್ಳುವುದು ಉತ್ತಮ.
ಮರಳಿ ಪಾವತಿಸುವ ಅವಧಿ ಸ್ಪಷ್ಟವಾಗಿರಲಿ: ಎಷ್ಟು ಹಣ, ಯಾವ ದಿನದೊಳಗೆ ವಾಪಸ್ ಕೊಡಬೇಕು ಎಂಬುದನ್ನು ಲಿಖಿತವಾಗಿ ದಾಖಲಿಸಿಕೊಳ್ಳಿ.
ನಿಮ್ಮ ಸಾಮರ್ಥ್ಯಕ್ಕೆ ತಕ್ಕಂತೆ ನೆರವು ನೀಡಿ: ಹಣ ಮರಳಿ ಬರಲು ತಡವಾದರೂ ನಿಮ್ಮ ಅಗತ್ಯಗಳಿಗೆ ತೊಂದರೆಯಾಗದ ಮೊತ್ತವನ್ನೇ ಸಾಲವಾಗಿ ನೀಡಿ.
ಸಾಲ ಮತ್ತು ಉಡುಗೊರೆಯ ನಡುವಿನ ವ್ಯತ್ಯಾಸ ತಿಳಿದಿರಲಿ: ಹಣವನ್ನು ಮರಳಿ ಪಡೆಯುವ ನಿರೀಕ್ಷೆಯಿದ್ದರೆ, ಅದನ್ನು ಆರಂಭದಲ್ಲೇ ಸ್ಪಷ್ಟಪಡಿಸಿ.

ಸಂಬಂಧಿಕರಿಗೆ ನೆರವಾಗುವುದು ತಪ್ಪಲ್ಲ. ಆದರೆ ಸಹಾಯ ಮಾಡುವ ಉದ್ದೇಶದಿಂದ ತೆಗೆದುಕೊಳ್ಳುವ ನಿರ್ಧಾರವು ಕುಟುಂಬದ ಆರ್ಥಿಕ ಭದ್ರತೆ ಮತ್ತು ದಾಂಪತ್ಯದ ನಂಬಿಕೆಗೆ ಧಕ್ಕೆ ತರಬಾರದು. ಹಣಕಾಸಿನ ವಿಷಯದಲ್ಲಿ ಸ್ಪಷ್ಟತೆ, ಪರಸ್ಪರ ಚರ್ಚೆ ಮತ್ತು ಸೂಕ್ತ ಮಿತಿಗಳು ಇದ್ದರೆ ಅನಗತ್ಯ ಮನಸ್ತಾಪವನ್ನು ಕಡಿಮೆ ಮಾಡಬಹುದು.

We earn 3.5L/month combined but loaning 2L to a by One_Magician_4873 in IndiaFinance

V Harish: ಸೋಷಿಯಲ್ ಮೀಡಿಯಾದಲ್ಲಿ 13 ಲಕ್ಷ ಫಾಲೋವರ್ಸ್ ಹೊಂದಿದ್ದ ಇನ್‌ಫ್ಲುಯೆನ್ಸರ್ ಸಾವು

Bhimasi M Koleppanavar — Wed, 21 Oct 2026 12:00:38 +0530

ಚೆನ್ನೈ; ಸೈಬರ್ ಬೆದರಿಕೆ, ಸಾಮಾಜಿಕ ಮಾಧ್ಯಮದಲ್ಲಿ ನಿಂದನಾತ್ಮಕ ಪೋಸ್ಟ್‌ಗಳು ಹಾಗೂ ತಮ್ಮ ಆನ್‌ಲೈನ್ ಚಾನೆಲ್‌ಗಳನ್ನು ಪದೇ ಪದೇ ಬ್ಲಾಕ್ (ನಿರ್ಬಂಧ) ಮಾಡಿಸಿದ್ದರಿಂದ ತೀವ್ರ ಮನನೊಂದು 27 ವರ್ಷದ ಸೋಷಿಯಲ್ ಮೀಡಿಯಾ ಇನ್ಫ್ಲುಯೆನ್ಸರ್ ವಿ. ಹರೀಶ್ ಆ*ಹತ್ಯೆ ಮಾಡಿಕೊಂಡಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಬರೋಬ್ಬರಿ 1.3 ಮಿಲಿಯನ್ (13 ಲಕ್ಷ) ಅನುಯಾಯಿಗಳನ್ನು ಹೊಂದಿದ್ದ ಹರೀಶ್, ಚೆನ್ನೈನ ಮಟ್ಟುಕಾಡು ಪ್ರದೇಶದಲ್ಲಿರುವ ತಮ್ಮ ಬಾಡಿಗೆ ವಿಲ್ಲಾದಲ್ಲಿ ಮಂಗಳವಾರ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. ಇವರು ಕಳೆದ ಐದು ವರ್ಷಗಳಿಂದ ಹಣಕಾಸು ಮತ್ತು ಹೂಡಿಕೆಗೆ ಸಂಬಂಧಿಸಿದ ವಿಷಯಗಳ ಬಗ್ಗೆ ವಿಡಿಯೋಗಳನ್ನು ಪೋಸ್ಟ್ ಮಾಡುತ್ತಿದ್ದರು.

ಪ್ರಕರಣದ ಪ್ರಮುಖ ಮಾಹಿತಿ!

ಸಾಕಷ್ಟು ವರದಿಗಳ (ರಿಪೋರ್ಟ್) ನಂತರ, ಕಳೆದ ಸೆಪ್ಟೆಂಬರ್‌ನಲ್ಲಿ ಹರೀಶ್ ಅವರ ಮುಖ್ಯ ಆನ್‌ಲೈನ್ ಚಾನೆಲ್ ಮತ್ತು ಮತ್ತೊಂದು ಖಾತೆಯನ್ನು ನಿರ್ಬಂಧಿಸಲಾಗಿತ್ತು. ತರುವಾಯ ಅವರು ಹೊಸ ಚಾನೆಲ್ ಪ್ರಾರಂಭಿಸಿದರೂ, ಅದನ್ನು ಸಹ ವರದಿ ಮಾಡಿ ಬ್ಲಾಕ್ ಮಾಡಿಸಲಾಗಿತ್ತು. ಇದರಿಂದ ಬಹಳ ಮನ ನೊಂದಿದ್ದರು ಎಂದು ಮೂಲಗಳು ತಿಳಿಸಿವೆ.

ತಂದೆಯಿಂದ ದೂರು ಹಾಗೂ ಆರೋಪ!

ಹರೀಶ್ ಅವರ ತಂದೆ ಜೆ. ವಿನಯಾಗಂ ಪೊಲೀಸರಿಗೆ ದೂರು ನೀಡಿದ್ದಾರೆ. ಮತ್ತೊಬ್ಬ ಇನ್ಫ್ಲುಯೆನ್ಸರ್ ಜೇಸನ್ ಸ್ಯಾಮ್ಯುಯೆಲ್ ಎಂಬುವವರು ತಮ್ಮ ಮಗನ ವಿರುದ್ಧ ಪದೇ ಪದೇ ಸೈಬರ್ ನಿಂದನೆ, ಮಾನಹಾನಿಕರ ಪೋಸ್ಟ್‌ಗಳು ಹಾಗೂ ಬೆದರಿಕೆಗಳನ್ನು ಹಾಕುತ್ತಿದ್ದರೆಂದು ಅವರು ಆರೋಪಿಸಿದ್ದಾರೆ. ಅಕ್ಟೋಬರ್ 18 ರಂದು ಸ್ಯಾಮ್ಯುಯೆಲ್, ಹರೀಶ್ ಜನರನ್ನು ದಾರಿ ತಪ್ಪಿಸುತ್ತಿದ್ದಾರೆ ಹಾಗೂ ವಂಚಿಸುತ್ತಿದ್ದಾರೆ ಎಂದು ಆರೋಪಿಸಿ ವಿಡಿಯೋಗಳನ್ನು ಪ್ರಕಟಿಸಿದ್ದರು.

ಆತ್ಮಹತ್ಯೆಗೂ ಮುನ್ನ ರೆಕಾರ್ಡ್ ಮಾಡಿದ ವಿಡಿಯೋ!

ಸಾವು ಅಪ್ಪಿಕೊಳ್ಳುವ ಮೊದಲು ಹರೀಶ್ ವಿಡಿಯೋ ಒಂದನ್ನು ರೆಕಾರ್ಡ್ ಮಾಡಿಕೊಂಡಿದ್ದಾರೆ. ಅದರಲ್ಲಿ ತಮ್ಮ ಈ ನಿರ್ಧಾರಕ್ಕೆ ಜೇಸನ್ ಸ್ಯಾಮ್ಯುಯೆಲ್ ಕಾರಣ ಎಂದು ಹೇಳಿದ್ದಾರೆ. ಸ್ಯಾಮ್ಯುಯೆಲ್ ತಮ್ಮ ಎಲ್ಲಾ ಸಾಮಾಜಿಕ ಮಾಧ್ಯಮ ಖಾತೆಗಳನ್ನು ಬ್ಲಾಕ್ ಮಾಡಿಸುವುದಾಗಿ ಮತ್ತು ಹೊಸ ಖಾತೆಗಳನ್ನು ತೆರೆಯದಂತೆ ತಡೆಯುವುದಾಗಿ ಬೆದರಿಕೆ ಹಾಕಿದ್ದ ಎಂದು ಹರೀಶ್ ಆರೋಪಿಸಿದ್ದಾರೆ.

ಜೇಸನ್ ಸ್ಯಾಮ್ಯುಯೆಲ್ ನೀಡಿದ ಸ್ಪಷ್ಟನೆ!

ಸಾಮಾಜಿಕ ಮಾಧ್ಯಮ ಪೋಸ್ಟ್ ಮೂಲಕ ಈ ಆರೋಪ ನಿರಾಕರಿಸಿರುವ ಜೇಸನ್ ಸ್ಯಾಮ್ಯುಯೆಲ್, ತಾವು ಕೇವಲ ಹರೀಶ್ ಅವರ ಅರ್ಹತೆ ಮತ್ತು ಸಲಹೆ ನೀಡುವ ಅಧಿಕಾರವನ್ನು ಪ್ರಶ್ನಿಸಿದ್ದಾಗಿ ಹೇಳಿದ್ದಾರೆ. ಹರೀಶ್ ಬಳಿ ಭಾರತೀಯ ಭದ್ರತಾ ಮತ್ತು ವಿನಿಮಯ ಮಂಡಳಿಯ (SEBI) ನೋಂದಾಯಿತ ಹೂಡಿಕೆ ಸಲಹೆಗಾರ (RIA) ಪರವಾನಗಿ ಇರಲಿಲ್ಲ. ಅಲ್ಲದೇ ಭಾರತದ ಮ್ಯೂಚುವಲ್ ಫಂಡ್‌ಗಳ ಸಂಘದ (AMFI) ನೋಂದಣಿಯನ್ನೂ ಅವರು ತಪ್ಪಾಗಿ ಪ್ರತಿನಿಧಿಸಿದ್ದರು ಎಂದು ಸ್ಯಾಮ್ಯುಯೆಲ್ ಆರೋಪಿಸಿದ್ದಾರೆ. ಅಲ್ಲದೆ, ಹರೀಶ್ ಇಂತಹ ಕಠಿಣ ಹೆಜ್ಜೆ ಇಡುತ್ತಾರೆ ಎಂದು ತಾನು ನಿರೀಕ್ಷಿಸಿರಲಿಲ್ಲ ಎಂದಿದ್ದಾರೆ.

ಪೊಲೀಸ್ ತನಿಖೆ!

ಕಾನತ್ತೂರು ಪೊಲೀಸರು ಈ ಕುರಿತು ಅಸ್ವಾಭಾವಿಕ ಸಾವು ಪ್ರಕರಣವನ್ನು ದಾಖಲಿಸಿಕೊಂಡಿದ್ದಾರೆ. ಹರೀಶ್ ಅವರ ತಂದೆ, ಮಗ ಸಾವಿಗೂ ಮುನ್ನ ರೆಕಾರ್ಡ್ ಮಾಡಿದ ವಿಡಿಯೋವನ್ನು ಪರಿಶೀಲಿಸಬೇಕು, ಸಂಬಂಧಿತ ಡಿಜಿಟಲ್ ಪುರಾವೆಗಳನ್ನು ಸಂರಕ್ಷಿಸಬೇಕು ಹಾಗೂ ಖಾತೆಗಳನ್ನು ಬ್ಲಾಕ್ ಮಾಡಿದ ಹಿನ್ನೆಲೆಯನ್ನು ತನಿಖೆ ಮಾಡಬೇಕೆಂದು ಒತ್ತಾಯಿಸಿದ್ದಾರೆ. ಪೊಲೀಸರು ಸದ್ಯ ಎರಡೂ ಕಡೆಯವರ ಹೇಳಿಕೆಗಳನ್ನು ಪರಿಶೀಲಿಸುತ್ತಿದ್ದಾರೆ.

9 to 6 ಕೆಲಸಕ್ಕೆ ಗುಡ್‌ಬೈ ಹೇಳಿದ ಯುವಕ! ಈಗ ಸೋಷಿಯಲ್ ಮೀಡಿಯಾದಿಂದ ತಿಂಗಳಿಗೆ ₹2.5 ಲಕ್ಷ ಆದಾಯ! 'EMI ಚಿಂತೆ ಇನ್ನಿಲ್ಲ'

Naveen Kodase — Sat, 24 Oct 2026 14:21:33 +0530

ಇಂದಿನ ದಿನಗಳಲ್ಲಿ ಒಳ್ಳೆಯ ಸಂಬಳದ ಕೆಲಸ ಸಿಗಬೇಕು, ಪ್ರತಿ ತಿಂಗಳು ಕೈತುಂಬಾ ಹಣ ಬರಬೇಕು, ಜೀವನದಲ್ಲಿ ಆರ್ಥಿಕ ಭದ್ರತೆ ಇರಬೇಕು ಎಂಬುದು ಬಹುತೇಕರ ಕನಸು. ಆದರೆ, ಕೆಲವರಿಗೆ ಕಚೇರಿಯ ಕೆಲಸದ ಜೊತೆಗೆ ತಮ್ಮದೇ ಆದ ಆಸಕ್ತಿಯ ಕ್ಷೇತ್ರದಲ್ಲಿ ಏನಾದರೂ ಸಾಧಿಸಬೇಕು ಎಂಬ ಹಂಬಲವೂ ಇರುತ್ತದೆ. ಅಂಥವರಲ್ಲಿ ಕೆಲವರು ತಮ್ಮ ಆಸಕ್ತಿಯನ್ನೇ ವೃತ್ತಿಯನ್ನಾಗಿ ಮಾಡಿಕೊಂಡು ಯಶಸ್ಸು ಗಳಿಸುತ್ತಿದ್ದಾರೆ. ಇದಕ್ಕೆ ಮುಂಬೈ ಮೂಲದ ಕಂಟೆಂಟ್ ಕ್ರಿಯೇಟರ್ ಶುಭ್ ಸಾರಂಗ್ ಅವರ ಕಥೆಯೂ ಒಂದು ಉತ್ತಮ ಉದಾಹರಣೆ.

ಪ್ರತಿದಿನ ಬೆಳಗ್ಗೆ 9ರಿಂದ ಸಂಜೆ 6ರವರೆಗೆ ಕಾರ್ಪೊರೇಟ್ ಉದ್ಯೋಗ ಮಾಡುತ್ತಿದ್ದ ಶುಭ್ ಸಾರಂಗ್, ಇದೀಗ ತಮ್ಮ ಕೆಲಸಕ್ಕೆ ರಾಜೀನಾಮೆ ನೀಡಿ ಪೂರ್ಣಾವಧಿ ಕಂಟೆಂಟ್ ಕ್ರಿಯೇಟರ್ ಆಗಿದ್ದಾರೆ. ವರದಿಗಳ ಪ್ರಕಾರ, ಅವರು ಸೋಷಿಯಲ್ ಮೀಡಿಯಾ ಮೂಲಕ ಪ್ರತಿ ತಿಂಗಳು ಸುಮಾರು ₹2.2 ಲಕ್ಷದಿಂದ ₹2.5 ಲಕ್ಷದವರೆಗೆ ಆದಾಯ ಗಳಿಸುತ್ತಿದ್ದಾರೆ. ಈ ಬದಲಾವಣೆಯಿಂದಾಗಿ ಪ್ರತಿ ತಿಂಗಳ ಇಎಂಐ ಕಟ್ಟುವುದು ಹಾಗೂ ಕಚೇರಿಯ ಕೆಲಸದ ಒತ್ತಡದ ಬಗ್ಗೆ ಇದ್ದ ಆತಂಕವೂ ಕಡಿಮೆಯಾಗಿದೆ ಎಂದು ಅವರು ತಮ್ಮ ಅನುಭವ ಹಂಚಿಕೊಂಡಿದ್ದಾರೆ.

10 ಸಾವಿರ ಫಾಲೋವರ್ಸ್‌ನಿಂದ ಶುರುವಾದ ಪ್ರಯಾಣ!

ಶುಭ್ ಸಾರಂಗ್ ಅವರ ಕಂಟೆಂಟ್ ಕ್ರಿಯೇಷನ್ ಪ್ರಯಾಣ ಆರಂಭವಾದಾಗ ಇನ್‌ಸ್ಟಾಗ್ರಾಮ್‌ನಲ್ಲಿ ಸುಮಾರು 10 ಸಾವಿರ ಫಾಲೋವರ್ಸ್ ಇದ್ದರು. ಆರಂಭದಲ್ಲಿ ಸೋಷಿಯಲ್ ಮೀಡಿಯಾದಿಂದಲೇ ಜೀವನ ನಡೆಸುವಷ್ಟು ಆದಾಯ ಗಳಿಸಲು ಸಾಧ್ಯವೇ ಎಂಬ ಅನುಮಾನ ಅವರಿಗೂ ಇತ್ತು. ನಿಗದಿತ ಸಂಬಳ ನೀಡುವ ಉದ್ಯೋಗವನ್ನು ಬಿಡುವುದು ಸುಲಭದ ನಿರ್ಧಾರವಾಗಿರಲಿಲ್ಲ. ಆದರೆ, ಅವರ ವಿಡಿಯೋಗಳಿಗೆ ಜನರಿಂದ ಉತ್ತಮ ಪ್ರತಿಕ್ರಿಯೆ ಸಿಗಲಾರಂಭಿಸಿತು. ಒಂದೆರಡು ತಿಂಗಳ ಅವಧಿಯಲ್ಲಿ ಅವರ ಫಾಲೋವರ್ಸ್ ಸಂಖ್ಯೆ ಸುಮಾರು ಒಂದು ಲಕ್ಷಕ್ಕೆ ಏರಿಕೆಯಾಯಿತು. ಬಳಿಕ ಮತ್ತಷ್ಟು ಜನಪ್ರಿಯತೆ ದೊರೆತು, ಅವರ ಖಾತೆಯ ಫಾಲೋವರ್ಸ್ ಸಂಖ್ಯೆ ಎರಡು ಲಕ್ಷದ ಗಡಿ ದಾಟಿತು. ಈ ಬೆಳವಣಿಗೆಯ ನಡುವೆ ಅವರಿಗೆ ಬ್ರ್ಯಾಂಡ್‌ಗಳ ಜೊತೆ ಕೆಲಸ ಮಾಡುವ ಅವಕಾಶವೂ ಸಿಕ್ಕಿತು. ಒಂದು ಬ್ರ್ಯಾಂಡ್ ಸಹಯೋಗದಿಂದ ₹1 ಲಕ್ಷದ ಪಾವತಿ ದೊರೆತದ್ದು, ಕಂಟೆಂಟ್ ಕ್ರಿಯೇಷನ್ ಅನ್ನು ಪೂರ್ಣಾವಧಿ ವೃತ್ತಿಯನ್ನಾಗಿ ಪರಿಗಣಿಸಲು ಶುಭ್ ಸಾರಂಗ್ ಆತ್ಮವಿಶ್ವಾಸ ನೀಡಿತು.

ಒಂದೇ ವಿಡಿಯೋಗೆ ₹1.5 ಲಕ್ಷದವರೆಗೆ ಆಫರ್!

ಸೋಷಿಯಲ್ ಮೀಡಿಯಾದಲ್ಲಿ ಫಾಲೋವರ್ಸ್ ಹೆಚ್ಚಾದಂತೆ ಬ್ರ್ಯಾಂಡ್‌ಗಳಿಂದ ಬರುವ ಸಹಯೋಗದ ಅವಕಾಶಗಳೂ ಹೆಚ್ಚಾದವು. ಶುಭ್ ಸಾರಂಗ್ ಅವರ ಹೇಳಿಕೆಯ ಪ್ರಕಾರ, ಕೆಲವು ಬ್ರ್ಯಾಂಡ್‌ಗಳು ಒಂದೇ ವಿಡಿಯೋಗೆ ₹1.3 ಲಕ್ಷದಿಂದ ₹1.5 ಲಕ್ಷದವರೆಗೆ ಪಾವತಿಸಲು ಸಿದ್ಧವಾಗಿದ್ದವು.

ಇದರಿಂದ ಅವರ ಕಂಟೆಂಟ್ ಕ್ರಿಯೇಷನ್ ಆದಾಯ ತಿಂಗಳಿಗೆ ₹2.2 ಲಕ್ಷದಿಂದ ₹2.5 ಲಕ್ಷದವರೆಗೆ ತಲುಪಿತು. ತಮ್ಮ ಕಾರ್ಪೊರೇಟ್ ಉದ್ಯೋಗದಿಂದ ಸಿಗುತ್ತಿದ್ದ ಸಂಬಳಕ್ಕಿಂತ ಸೋಷಿಯಲ್ ಮೀಡಿಯಾದಿಂದ ಮೂರರಿಂದ ನಾಲ್ಕು ಪಟ್ಟು ಹೆಚ್ಚು ಆದಾಯ ಬರಲಾರಂಭಿಸಿದ ಬಳಿಕ ಅವರು ಉದ್ಯೋಗ ತೊರೆಯುವ ನಿರ್ಧಾರ ಕೈಗೊಂಡರು.

ಆದರೆ, ಈ ಯಶಸ್ಸು ರಾತ್ರೋರಾತ್ರಿ ಸಿಕ್ಕಿದ್ದಲ್ಲ. ಅವರ ಆಸಕ್ತಿಯ ಕ್ಷೇತ್ರದಲ್ಲಿ ನಿರಂತರವಾಗಿ ಕೆಲಸ ಮಾಡುವುದು, ವಿಡಿಯೋಗಳನ್ನು ಸಿದ್ಧಪಡಿಸುವುದು ಮತ್ತು ಪ್ರೇಕ್ಷಕರ ಗಮನ ಸೆಳೆಯುವ ಕಂಟೆಂಟ್ ರೂಪಿಸುವುದು ಈ ಪ್ರಯಾಣದ ಪ್ರಮುಖ ಭಾಗವಾಗಿತ್ತು.

ರಾತ್ರಿ 4 ಗಂಟೆಯವರೆಗೂ ವಿಡಿಯೋ ಎಡಿಟಿಂಗ್!

ಉದ್ಯೋಗದಲ್ಲಿದ್ದಾಗ ಶುಭ್ ಅವರ ದಿನಚರಿ ಸಾಕಷ್ಟು ಒತ್ತಡದಿಂದ ಕೂಡಿತ್ತು. ಬೆಳಗ್ಗೆ 9ರಿಂದ ಸಂಜೆ 6ರವರೆಗೆ ಕಚೇರಿಯಲ್ಲಿ ಕೆಲಸ ಮುಗಿಸಿದ ಬಳಿಕ ಮನೆಗೆ ಬರುತ್ತಿದ್ದರು. ಸ್ವಲ್ಪ ವಿಶ್ರಾಂತಿ ಪಡೆದ ನಂತರ ವಿಡಿಯೋ ಚಿತ್ರೀಕರಣಕ್ಕೆ ತೆರಳುತ್ತಿದ್ದರು. ಶೂಟಿಂಗ್ ಮುಗಿದ ಬಳಿಕ ಎಡಿಟಿಂಗ್ ಕೆಲಸದಲ್ಲಿ ತೊಡಗಿಕೊಳ್ಳುತ್ತಿದ್ದರು.

ಕೆಲವೊಮ್ಮೆ ವಿಡಿಯೋ ಎಡಿಟಿಂಗ್ ಮುಗಿಸುವಷ್ಟರಲ್ಲಿ ಬೆಳಗಿನ ಜಾವ 4 ಗಂಟೆಯಾಗುತ್ತಿತ್ತು. ಕೆಲವೇ ಗಂಟೆಗಳ ಕಾಲ ನಿದ್ರೆ ಮಾಡಿ ಮತ್ತೆ ಕಚೇರಿಗೆ ತೆರಳಬೇಕಾಗುತ್ತಿತ್ತು. ಉದ್ಯೋಗದ ಜವಾಬ್ದಾರಿಗಳ ಜೊತೆಗೆ ಕಂಟೆಂಟ್ ಕ್ರಿಯೇಷನ್ ಮುಂದುವರಿಸುವುದು ಅವರಿಗೆ ದೈಹಿಕವಾಗಿಯೂ ಮಾನಸಿಕವಾಗಿಯೂ ಸವಾಲಾಗಿತ್ತು ಎಂದು ಹೇಳಿದ್ದಾರೆ. ಈಗ ಪೂರ್ಣಾವಧಿ ಕಂಟೆಂಟ್ ಕ್ರಿಯೇಟರ್ ಆಗಿರುವ ಅವರು, ಕಚೇರಿಯ ಟಾರ್ಗೆಟ್‌ಗಳು ಮತ್ತು ಬಾಸ್‌ನ ಒತ್ತಡದಿಂದ ದೂರವಾಗಿ ತಮ್ಮ ಆಸಕ್ತಿಯ ಕೆಲಸಕ್ಕೆ ಹೆಚ್ಚಿನ ಸಮಯ ನೀಡಲು ಸಾಧ್ಯವಾಗುತ್ತಿದೆ ಎಂದು ಸಂತಸ ಹಂಚಿಕೊಂಡಿದ್ದಾರೆ.

ಉದ್ಯೋಗ ಬಿಡುವ ಮುನ್ನ ಈ ಎಚ್ಚರಿಕೆ ಅಗತ್ಯ!

ಶುಭ್ ಸಾರಂಗ್ ಅವರ ಕಥೆ ಹಲವರಿಗೆ ಸ್ಫೂರ್ತಿ ನೀಡಬಹುದು. ಆದರೆ, ಅವರ ಯಶಸ್ಸನ್ನು ನೋಡಿ ತಕ್ಷಣವೇ ಉದ್ಯೋಗಕ್ಕೆ ರಾಜೀನಾಮೆ ನೀಡುವುದು ಸರಿಯಾದ ನಿರ್ಧಾರವಲ್ಲ. ಸ್ವತಃ ಶುಭ್ ಕೂಡ ತಮ್ಮ ಅನುಭವದ ಆಧಾರದಲ್ಲಿ ಎಲ್ಲರೂ ಉದ್ಯೋಗ ಬಿಟ್ಟು ಕಂಟೆಂಟ್ ಕ್ರಿಯೇಷನ್ ಆರಂಭಿಸಬೇಕು ಎಂದು ಹೇಳುತ್ತಿಲ್ಲ. ಇದರಲ್ಲಿ ಆರ್ಥಿಕ ಅಪಾಯಗಳಿವೆ ಎಂದು ಎಚ್ಚರಿಸಿದ್ದಾರೆ.

ಸೋಷಿಯಲ್ ಮೀಡಿಯಾದ ಆದಾಯವು ಫಾಲೋವರ್ಸ್ ಸಂಖ್ಯೆ, ವಿಡಿಯೋಗಳ ವೀಕ್ಷಣೆ, ಪ್ರೇಕ್ಷಕರ ಪ್ರತಿಕ್ರಿಯೆ ಮತ್ತು ಬ್ರ್ಯಾಂಡ್‌ಗಳಿಂದ ಸಿಗುವ ಸಹಯೋಗಗಳ ಮೇಲೆ ಅವಲಂಬಿತವಾಗಿರುತ್ತದೆ. ಒಂದು ತಿಂಗಳು ಉತ್ತಮ ಆದಾಯ ಬಂದರೂ ಮುಂದಿನ ತಿಂಗಳು ಅದೇ ಪ್ರಮಾಣದ ಆದಾಯ ಬರುತ್ತದೆ ಎಂಬ ಖಾತರಿ ಇರುವುದಿಲ್ಲ.

ಹೀಗಾಗಿ, ಕಂಟೆಂಟ್ ಕ್ರಿಯೇಷನ್ ಅನ್ನು ವೃತ್ತಿಯನ್ನಾಗಿ ಮಾಡಿಕೊಳ್ಳಲು ಬಯಸುವವರು ಮೊದಲು ಉದ್ಯೋಗದ ಜೊತೆಗೆ ಅದನ್ನು ಪ್ರಯತ್ನಿಸಬಹುದು. ಆದಾಯ ನಿರಂತರವಾಗಿದೆಯೇ ಎಂಬುದನ್ನು ಪರಿಶೀಲಿಸಬೇಕು. ಕನಿಷ್ಠ ಕೆಲವು ತಿಂಗಳ ಅಗತ್ಯ ವೆಚ್ಚಗಳಿಗೆ ಸಾಕಾಗುವಷ್ಟು ಉಳಿತಾಯ ಮಾಡಿಕೊಳ್ಳುವುದು, ಇಎಂಐ ಮತ್ತು ಇತರ ಹಣಕಾಸಿನ ಜವಾಬ್ದಾರಿಗಳನ್ನು ಲೆಕ್ಕ ಹಾಕುವುದು ಮುಖ್ಯ.

ಒಟ್ಟಿನಲ್ಲಿ, ಶುಭ್ ಸಾರಂಗ್ ಅವರ ಕಥೆ ಹೇಳುವ ಸಂದೇಶ ಇಷ್ಟೇ: ಆಸಕ್ತಿಯ ಕ್ಷೇತ್ರದಲ್ಲಿ ನಿರಂತರವಾಗಿ ಪ್ರಯತ್ನಿಸಿದರೆ ಹೊಸ ಅವಕಾಶಗಳು ಸಿಗಬಹುದು. ಆದರೆ, ಉದ್ಯೋಗ ತೊರೆಯುವಂತಹ ದೊಡ್ಡ ನಿರ್ಧಾರ ಕೈಗೊಳ್ಳುವ ಮೊದಲು ಆದಾಯದ ಸ್ಥಿರತೆ ಮತ್ತು ಆರ್ಥಿಕ ಭದ್ರತೆಗೆ ಆದ್ಯತೆ ನೀಡಬೇಕು.

View this post on Instagram

A post shared by Shubh Sarang (@shubbhhhhh)