Asianet Suvarna News

ಬಂಜೆತನದಿಂದ ಬಳಲುತ್ತಿರುವ ಮಹಿಳೆಯರಿಗೆ ಗುಡ್‌ನ್ಯೂಸ್! 4 ಸರ್ಕಾರಿ ಆಸ್ಪತ್ರೆಗಳಲ್ಲಿ ಐವಿಎಫ್‌ ಕೇಂದ್ರ, ಯಾವಾಗ ಆರಂಭ? ಎಲ್ಲೆಲ್ಲಿ?

Kannadaprabha News — Sun, 08 Nov 2026 07:46:41 +0530

ಮಂಗಳೂರು (ನ.8): ರಾಜ್ಯದ 4 ಜಿಲ್ಲೆಯ ಸರ್ಕಾರಿ ಆಸ್ಪತ್ರೆಗಳಲ್ಲಿ ಐವಿಎಫ್‌ ಸೆಂಟರ್‌ (ಬಂಜೆತನ ಚಿಕಿತ್ಸಾ ಕೇಂದ್ರ) ಮಾಡಬೇಕೆಂದು ತೀರ್ಮಾನಿಸಲಾಗಿದ್ದು, ಮಂಗಳೂರಿನ ಲೇಡಿಗೋಶನ್‌ ಆಸ್ಪತ್ರೆಯಲ್ಲಿ ಮೊದಲು ಆರಂಭಿಸಿ, ಬಳಿಕ ಬೆಂಗಳೂರು, ಮೈಸೂರು, ಹುಬ್ಬಳ್ಳಿ ಅಥವಾ ಬೆಳಗಾವಿ ಭಾಗದಲ್ಲಿ ಮಾಡಲು ನಿರ್ಧರಿಸಲಾಗಿದೆ ಎಂದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಯು.ಟಿ. ಖಾದರ್‌ ತಿಳಿಸಿದರು.

ಬಡವರ ಅನುಕೂಲಕ್ಕೆ ಸರ್ಕಾರಿ ಆಸ್ಪತ್ರೆಯಲ್ಲೇ ಐವಿಎಫ್ ಕೇಂದ್ರ

ಶನಿವಾರ ಪತ್ರಕರ್ತರೊಂದಿಗೆ ಮಾತನಾಡಿ, ಬಹಳಷ್ಟು ಮಂದಿ ಬಡವರು ಇಂತಹ ಚಿಕಿತ್ಸೆಗಾಗಿ ಕಾಯುತ್ತಿದ್ದಾರೆ. ಅವಮಾನಕ್ಕೊಳಗಾಗಿದ್ದಾರೆ. ಖಾಸಗಿಯಲ್ಲಿ ಲಕ್ಷಾಂತರ ವೆಚ್ಚ ಮಾಡಬೇಕಾಗುತ್ತದೆ. ಅದಕ್ಕಾಗಿ ಜನಸಾಮಾನ್ಯರಿಗಾಗಿ ಕಡಿಮೆ ದರದಲ್ಲಿ, ಉತ್ತಮ ಸೇವೆ ನೀಡಲಾಗುವುದು. ಇದರ ಅಂತಿಮ ಪಕ್ರಿಯೆ ಹಂತದಲ್ಲಿದೆ. ಒಂದು ಕೇಂದ್ರಕ್ಕೆ 5 ಕೋಟಿ ರು. ವೆಚ್ಚಬೇಕಾಗುತ್ತದೆ. ತಜ್ಞರ ಸಮಿತಿ ಮಾಡಲಾಗಿದೆ. ಎಬಿಎಆರ್‌ಕೆಯಲ್ಲೂ ಇದಕ್ಕೆ ಅವಕಾಶ ನೀಡಲಾಗಿತ್ತು. ಆದರೆ ಖಾಸಗಿಯವರು ಮುಂದೆ ಬರಲಿಲ್ಲ. ಈ ಕಾರಣದಿಂದ ಸರ್ಕಾರಿ ಆಸ್ಪತ್ರೆಯಲ್ಲಿ ಐವಿಎಫ್‌ ಕೇಂದ್ರ ಮಾಡಲಾಗುತ್ತದೆ. ಇನ್ನು 2-3 ತಿಂಗಳಲ್ಲಿ ಯೋಜನೆ ಆರಂಭಿಸಲಾಗುತ್ತದೆ ಎಂದರು.

ಔಷಧ ಬೆಲೆ ನಿಗದಿ ಮಾಡೋದು ಕೇಂದ್ರ ಸರ್ಕಾರ

ಅಗತ್ಯ ಔಷಧಗಳ ಬೆಲೆ ಕುರಿತ ಪ್ರಶ್ನೆಗೆ ಉತ್ತರಿಸಿದ ಸಚಿವರು, ಯಾವುದೆಲ್ಲ ಕ್ಯಾನ್ಸರ್‌ಗೆ ಸಂಬಂಧಿಸಿದ ಔಷಧಗಳು ಎಂದು ನಿಗದಿಪಡಿಸುವುದು ಕೇಂದ್ರ ಆರೋಗ್ಯ ಸಚಿವಾಲಯ. ಕೇಂದ್ರ ಆರೋಗ್ಯ ಇಲಾಖೆ ಸುಮಾರು 137 ಔಷಧಗಳನ್ನು ಆಯ್ಕೆ ಮಾಡಿತ್ತು. ಇದಕ್ಕೆ ಶೇ.30ರಷ್ಟು ಕ್ಯಾಪಿಂಗ್‌ ಮಾಡಿದೆ. ನವೆಂಬರ್‌ನಲ್ಲಿ ದರ ನಿಗದಿ ಮಾಡಲು ತಿಳಿಸಲಾಗಿದೆ. ಅದರಂತೆ ಪ್ರಕ್ರಿಗಳು ನಡೆಯುತ್ತಿದೆ ಎಂದರು.

ಮೇಖ್ರಿ ಸರ್ಕಲ್ -ಹೆಬ್ಬಾಳ ಕಾಮಗಾರಿ: BDA ಸ್ಪಷ್ಟನೆಯಿಂದ ನಿಟ್ಟುಸಿರು ಬಿಟ್ಟ ಜನರು

Kannadaprabha News — Sun, 08 Nov 2026 07:46:11 +0530

ಬೆಂಗಳೂರು: ಮೇಖ್ರಿ ವೃತ್ತ ಎಲಿವೇಟೆಡ್ ಕಾರಿಡಾರ್ ನಿರ್ಮಾಣ ಕಾಮಗಾರಿ ನಡೆಯುವ 18 ತಿಂಗಳ ಅವಧಿಯಲ್ಲೂ ಹೆಬ್ಬಾಳ ಮೇಲ್ಸೇತುವೆ ಮತ್ತು ಬಳ್ಳಾರಿ ರಸ್ತೆಯಲ್ಲಿ ವಾಹನ ಸಂಚಾರ ಸಂಪೂರ್ಣ ಬಂದ್ ಮಾಡುವುದಿಲ್ಲ. ಕೇವಲ ಒಂದು ಲೇನ್‌ ನಿರ್ಬಂಧದಲ್ಲಿ ವಾಹನ ಸಂಚಾರ ಎಂದಿನಂತೆ ಮುಂದುವರಿಯಲಿದೆ ಎಂದು ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ ಸ್ಪಷ್ಟಪಡಿಸಿದೆ.

ಶನಿವಾರ ಬಿಡಿಎ ಅಧ್ಯಕ್ಷ ಎನ್.ಎ.ಹ್ಯಾರಿಸ್, ಆಯುಕ್ತ ಮೇಜರ್ ಪಿ.ಮಣಿವಣ್ಣನ್ ಹಾಗೂ ಹೆಚ್ಚುವರಿ ಪೊಲೀಸ್ ಆಯುಕ್ತ (ಸಂಚಾರ) ಕಾರ್ತಿಕ್ ರೆಡ್ಡಿ ಅವರು ಜಂಟಿಯಾಗಿ ಹೆಬ್ಬಾಳ, ಬ್ಯಾಪ್ಟಿಸ್ಟ್ ಆಸ್ಪತ್ರೆ ಮತ್ತು ಮೇಖ್ರಿ ವೃತ್ತದ ಮಾರ್ಗಗಳಲ್ಲಿ ನಡೆಯಲಿರುವ ಎಲಿವೇಟೆಡ್ ಕಾರಿಡಾರ್ ಕಾಮಗಾರಿ ಹಿನ್ನೆಲೆಯಲ್ಲಿ ಸ್ಥಳ ಪರಿಶೀಲನೆ ನಡೆಸಿದರು.

ರಸ್ತೆ ಮುಚ್ಚುವುದಕ್ಕಲ್ಲ

ಈ ವೇಳೆ ಮಾತನಾಡಿದ ಬಿಡಿಎ ಅಧ್ಯಕ್ಷ ಎನ್.ಎ. ಹ್ಯಾರಿಸ್, ಪ್ರಸ್ತುತ ರಸ್ತೆಯಲ್ಲಿ ಎರಡೂ ಬದಿ ತಲಾ 3 ಲೇನ್‌ಗಳಿವೆ. ಕಾಮಗಾರಿಗಾಗಿ ಸುಮಾರು 4.5 ಮೀಟರ್ ಅಗಲದ ಜಾಗವನ್ನು (ಕೇವಲ ಒಂದು ಲೇನ್) ಮಾತ್ರ ಬ್ಯಾರಿಕೇಡ್ ಹಾಕಿ ಬಳಸಿಕೊಳ್ಳಲಾಗುವುದು. ಉಳಿದ 2 ಲೇನ್‌ಗಳು ಹಾಗೂ ಸರ್ವಿಸ್ ರಸ್ತೆಗಳಲ್ಲಿ ವಾಹನಗಳ ಸಂಚಾರ ಎಂದಿನಂತೆ ಇರಲಿದೆ. 18 ತಿಂಗಳ ಕಾಲಮಿತಿ ನಿಗದಿ ಆಗಿರುವುದು ಕಾರಿಡಾರ್ ನಿರ್ಮಾಣಕ್ಕೆ ಮಾತ್ರವೇ ಹೊರತು, ರಸ್ತೆ ಮುಚ್ಚುವುದಕ್ಕಲ್ಲ. ಇದರ ಬಗ್ಗೆ ಊಹಾಪೋಹವನ್ನು ನಂಬಬೇಕಿಲ್ಲ ಎಂದು ಹೇಳಿದರು.

ಸಂಚಾರ ನಿರ್ವಹಣೆಯ ಭಾಗವಾಗಿ ಕಾರುಗಳು, ದ್ವಿಚಕ್ರ ವಾಹನಗಳು, ಶಾಲಾ ವಾಹನಗಳು ಹಾಗೂ ಬಿಎಂಟಿಸಿ ಮತ್ತು ಕೆಎಸ್‌ಆರ್‌ಟಿಸಿ ಬಸ್‌ಗಳ ಸಂಚಾರಕ್ಕೆ ಎಂದಿನಂತೆ ಅವಕಾಶ ನೀಡಲಾಗಿದೆ. ಆದರೆ, ಸಂಚಾರ ದಟ್ಟಣೆ ನಿಯಂತ್ರಿಸುವ ಸಲುವಾಗಿ ಸರಕು ಸಾಗಣೆ (ಭಾರಿ) ವಾಹನಗಳ ಪ್ರವೇಶಕ್ಕೆ ಸಂಚಾರ ಪೊಲೀಸರ ಮಾರ್ಗಸೂಚಿಯನ್ವಯ ನಿರ್ಬಂಧ ವಿಧಿಸಲಾಗುತ್ತದೆ.

445.7 ಕೋಟಿ ರು.ಮೊತ್ತದ ಯೋಜನೆ

ಹೆಬ್ಬಾಳ ಮತ್ತು ಮೇಖ್ರಿ ವೃತ್ತ ನಡುವಿನ ದಟ್ಟಣೆಗೆ ಶಾಶ್ವತ ಮುಕ್ತಿ ನೀಡಲು ಈ ಎಲಿವೇಟೆಡ್ ಕಾರಿಡಾರ್ ರೂಪಿಸಲಾಗಿದೆ. ಯುಎಎಸ್ (ಕೃಷಿ ವಿವಿ) ಸಿಬ್ಬಂದಿ ವಸತಿ ಗೃಹದಿಂದ ಮೇಖ್ರಿ ವೃತ್ತದವರೆಗೆ 4 ಪಥಗಳ ಎಲಿವೇಟೆಡ್ ಕಾರಿಡಾರ್ (1.74 ಕಿ.ಮೀ) ನಿರ್ಮಾಣ ಯೋಜನೆ ಇದಾಗಿದೆ. ಅಂದಾಜು 445.7 ಕೋಟಿ ವೆಚ್ಚದ ಕಾಮಗಾರಿಗೆ 18 ತಿಂಗಳುಗಳ ಗುರಿ ನೀಡಲಾಗಿದೆ. 49 ಪಿಲ್ಲರ್‌ಗಳು, ಮೇಖ್ರಿ ವೃತ್ತದಲ್ಲಿ ಎಲಿವೇಟೆಡ್ ರೋಟರಿ ಜಂಕ್ಷನ್ ಹಾಗೂ ಸಿ.ವಿ. ರಾಮನ್ ರಸ್ತೆ (ಯಶವಂತಪುರ ಕಡೆಗೆ) ಮತ್ತು ಜಯಮಹಲ್ ರಸ್ತೆಗೆ ಸಂಪರ್ಕಿಸುವ ಪ್ರತ್ಯೇಕ ಡೌನ್-ರ್‍ಯಾಂಪ್‌ಗಳು ಇರಲಿವೆ.

ವಾಹನ ಸವಾರರಿಗೆ ಪರ್ಯಾಯ ಮಾರ್ಗಗಳು

ವಿಮಾನ ನಿಲ್ದಾಣದ ಕಡೆಗೆ ತೆರಳುವವರಿಗೆ

ಹೆಬ್ಬಾಳ ಕಡೆಯಿಂದ: ಹಳೇ ಹೈಗ್ರೌಂಡ್ಸ್–ಕಲ್ಪನಾ ಜಂಕ್ಷನ್ –ಹಳೇ ಉದಯ ಟಿವಿ ಜಂಕ್ಷನ–ಕಂಟೋನ್ಮೆಂಟ್ ರೈಲ್ವೆ ನಿಲ್ದಾಣ –ಟ್ಯಾನರಿ ರಸ್ತೆ–ನಾಗವಾರ ಮಾರ್ಗ.\Bಯಶವಂತಪುರ ಕಡೆಯಿಂದ: \Bಮತ್ತಿಕೆರೆ ರಸ್ತೆ–ಬಿಇಎಲ್ ವೃತ್ತದಿಂದ ಬಲಕ್ಕೆ ತಿರುಗಿ ಹೊರವರ್ತುಲ ರಸ್ತೆ ಸಂಪರ್ಕಿಸಬಹುದು.

ನಗರದ ಕೇಂದ್ರ ಭಾಗಕ್ಕೆ ತೆರಳುವವರಿಗೆ

ವಿಮಾನ ನಿಲ್ದಾಣ ಮಾರ್ಗ (ಆಯ್ಕೆ 1): ಹೆಬ್ಬಾಳ ಬಳಿ ಎಡಕ್ಕೆ ತಿರುಗಿ, ನಾಗವಾರ ಜಂಕ್ಷನ್–ಬ್ಯಾಂಬೂ ಬಜಾರ್–ಕ್ವೀನ್ಸ್ ರಸ್ತೆ ಮಾರ್ಗ. ವಿಮಾನ ನಿಲ್ದಾಣ ಮಾರ್ಗ (ಆಯ್ಕೆ 2): ಹೆಬ್ಬಾಳ ಬಳಿ ಬಲಕ್ಕೆ ತಿರುಗಿ, ಹೊರವರ್ತುಲ ರಸ್ತೆ –ಕುವೆಂಪು ವೃತ್ತ –ಗೊರಗುಂಟೆಪಾಳ್ಯ–ಡಾ. ರಾಜ್‌ಕುಮಾರ್ ರಸ್ತೆ.

ಯಶವಂತಪುರ ಕಡೆಯಿಂದ: ಬಿಎಚ್‌ಇಎಲ್ ಜಂಕ್ಷನ್ –ಮಾರಮ್ಮ ವೃತ್ತ – ಮಾರ್ಗೋಸಾ ರಸ್ತೆ.

ಹೆಬ್ಬಾಳದಿಂದ ಸ್ಥಳೀಯ ಬಡಾವಣೆಗಳಿಗೆ

ಸಿಟಿ ಕಡೆಗೆ: ಮೇಲ್ಸೇತುವೆಯಿಂದ ಇಳಿದು ಬ್ಯಾಪ್ಟಿಸ್ಟ್ ಆಸ್ಪತ್ರೆ ಮುಂಭಾಗದ ಸರ್ವಿಸ್ ರಸ್ತೆ ಮೂಲಕ ಸಿಬಿಐ ಜಂಕ್ಷನ್ ತಲುಪಿ ಬಳ್ಳಾರಿ ಮುಖ್ಯ ರಸ್ತೆ ಸೇರುವುದು.

ಆರ್.ಟಿ. ನಗರ, ಗಂಗಾನಗರ, ಜಯಮಹಲ್: ಬ್ಯಾಪ್ಟಿಸ್ಟ್ ಸರ್ವಿಸ್ ರಸ್ತೆ–ಆನಂದ ನಗರ ಕ್ರಾಸ್ –ಸಿಬಿಐ ಜಂಕ್ಷನ್ ಮಾರ್ಗ. ಪರ್ಯಾಯ ಮಾರ್ಗಗಳಾದ ನ್ಯೂ ಬಿಇಎಲ್ ರಸ್ತೆ ಮತ್ತು ಆರ್.ಟಿ. ನಗರ ಠಾಣೆ ರಸ್ತೆಗಳ ದುರಸ್ತಿ ಕಾರ್ಯವನ್ನು ಆದ್ಯತೆ ಮೇರೆಗೆ ಪೂರ್ಣಗೊಳಿಸುವಂತೆ ಬಿಡಿಎ ಮತ್ತು ಜಿಬಿಎ ಅಧಿಕಾರಿಗಳಿಗೆ ಸೂಚಿಸಲಾಗಿದೆ.

ಕೆಪಿಸಿಸಿ ಅಧ್ಯಕ್ಷ, ಗೃಹಮಂತ್ರಿ ಕುಮ್ಮಕ್ಕಿನಿಂದಲೇ ವಿಪಕ್ಷ ನಾಯಕನ ಮನೆಗೆ ಕೈ ಚೂರಿ ಪಾರ್ಸೆಲ್‌; ಬಿಜೆಪಿ ನಿಯೋಗದಿಂದ ಪೊಲೀಸ್ ಆಯುಕ್ತರಿಗೆ ದೂರು

Kannadaprabha News — Sun, 08 Nov 2026 07:23:12 +0530

ವಿಧಾನ ಪರಿಷತ್‌ ವಿಪಕ್ಷ ನಾಯಕ ಛಲವಾದಿ ನಾರಾಯಣಸ್ವಾಮಿ ಮನೆಗೆ 20 ಮೊಬೈಲ್‌ ಸಂಖ್ಯೆಗಳಿಂದ ಚಾಕು, ಚೂರಿ ಬುಕ್‌ ಮಾಡಿ ಕಳುಹಿಸಿದ್ದ ಎನ್‌ಎಸ್‌ಯುಐ ಕಾರ್ಯಕರ್ತರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವಂತೆ ಕೋರಿ ಬಿಜೆಪಿ ನಾಯಕರ ನಿಯೋಗ ಬೆಂಗಳೂರು ಪೊಲೀಸ್‌ ಆಯುಕ್ತ ಸೀಮಂತ್‌ ಕುಮಾರ್‌ ಸಿಂಗ್‌ ಅವರನ್ನು ಭೇಟಿಯಾಗಿ ದೂರು ನೀಡಿದೆ.

ಬೆಂಗಳೂರು (ನ.8): ಮಾತಿನ ಭರದಲ್ಲಿ ಕಾಂಗ್ರೆಸ್‌ ನಾಯಕರನ್ನು ತುಂಡು ತುಂಡಾಗಿ ಕತ್ತರಿಸಿ ಅರಬ್ಬಿ ಸಮುದ್ರಕ್ಕೆ ಎಸೆಯುತ್ತಾರೆ ಎಂಬ ವಿವಾದಾತ್ಮಕ ಹೇಳಿಕೆ ನೀಡಿದ್ದ ವಿಧಾನ ಪರಿಷತ್ತಿನ ಪ್ರತಿಪಕ್ಷ ನಾಯಕ ಛಲವಾದಿ ನಾರಾಣಸ್ವಾಮಿ(Chalavadi Narayanaswamy) ಅವರ ಸರ್ಕಾರಿ ನಿವಾಸದ ವಿಳಾಸಕ್ಕೆ ನ್ಯಾಷನಲ್‌ ಸ್ಟೂಡೆಂಟ್ಸ್‌ ಯೂನಿಯನ್‌ ಆಫ್‌ ಇಂಡಿಯಾ (NSUI) ಕಾರ್ಯಕರ್ತರು ಬ್ಲಿಂಕಿಟ್‌ನಲ್ಲಿ ಚಾಕುಗಳ ಪಾರ್ಸೆಲ್‌ ಕಳುಹಿಸಿರುವ ಘಟನೆ ಶನಿವಾರ ನಡೆದಿದೆ.

ಪೊಲೀಸ್ ಆಯುಕ್ತರಿಗೆ ದೂರು, ಚಾಕು ಚೂರಿ ಕಳಿಸಿದ್ಯಾರು?

ಈ ಸಂಬಂಧ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ.ವಿಜಯೇಂದ್ರ, ವಿಧಾನಸಭೆ ವಿರೋಧ ಪಕ್ಷದ ನಾಯಕ ಆರ್.ಅಶೋಕ್‌, ಪರಿಷತ್ತಿನ ವಿರೋಧ ಪಕ್ಷದ ನಾಯಕ ಛಲವಾದಿ ನಾರಾಯಣಸ್ವಾಮಿ ಸೇರಿ ಪ್ರಮುಖ ನಾಯಕರ ನಿಯೋಗ ಶನಿವಾರ ನಗರ ಪೊಲೀಸ್‌ ಆಯುಕ್ತ ಸೀಮಂತ್‌ ಕುಮಾರ್‌ ಸಿಂಗ್‌ ಅವರನ್ನು ಭೇಟಿಯಾಗಿ ಒಂಬತ್ತು ವ್ಯಕ್ತಿಗಳ ಹೆಸರು ಮತ್ತು ಮೊಬೈಲ್ ಸಂಖ್ಯೆಗಳ ಸಹಿತ ದೂರು ನೀಡಿದೆ.

ಸುಮಾರು 20 ಮೊಬೈಲ್‌ ಸಂಖ್ಯೆಗಳಿಂದ ಛಲವಾದಿ ನಾರಾಯಣಸ್ವಾಮಿ ನಿವಾಸಕ್ಕೆ ಚಾಕು, ಚೂರಿ ವಸ್ತುಗಳನ್ನು ಬುಕ್‌ ಮಾಡಿದ್ದ ಎನ್‌ಎಸ್‌ಯುಐನ ಗೂಂಡಾಗಳ ವಿರುದ್ಧ ಗಡಿಪಾರು ಕ್ರಮ ಕೈಗೊಳ್ಳುವಂತೆ ಬಿಜೆಪಿ ನಿಯೋಗ ಆಗ್ರಹಿಸಿದೆ.

ಕೆಪಿಸಿಸಿ ಅಧ್ಯಕ್ಷ, ಗೃಹಮಂತ್ರಿಯೇ ನೇರ ಕಾರಣ

ಎನ್‌ಎಸ್‌ಯುಐ ಹುಡುಗರು ಸುಮಾರು 20 ಮೊಬೈಲ್‌ ನಂಬರ್‌ಗಳಿಂದ ಚಾಕು, ಚೂರಿ ಮಾರಕವಸ್ತುಗಳನ್ನು ಛಲವಾದಿ ನಾರಾಯಣಸ್ವಾಮಿ ಅವರ ವಿಳಾಸಕ್ಕೆ ಬುಕ್‌ ಮಾಡಿದ್ದರು. ಸುಮಾರು 10 ಮಂದಿ ಕಾಂಗ್ರೆಸ್‌ ಪಕ್ಷದ ನಾಯಕರು ಛಲವಾದಿ ಅವರ ಮನೆ ಬಳಿ ಬಂದು ಗೇಟ್ ಸುತ್ತುವರಿದು ಭಯ ಹುಟ್ಟಿಸಿದ್ದಾರೆ. ಗೂಂಡಾ ಸಂಸ್ಕೃತಿಯ ಎನ್‍ಎಸ್‍ಯುಐ ಕಾರ್ಯಕರ್ತರು ಇಂಥ ಕೆಲಸಗಳಲ್ಲಿ ತೊಡಗಲು ಕುಮ್ಮಕ್ಕು ನೀಡಿರುವ ಕಾಂಗ್ರೆಸ್ ಪಕ್ಷದ ಅಧ್ಯಕ್ಷರು, ಮುಖ್ಯಮಂತ್ರಿಗಳು, ಗೃಹ ಮಂತ್ರಿಗಳೇ ನೇರ ಕಾರಣ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.

ಕೆಪಿಸಿಸಿ ಕಾರ್ಯದರ್ಶಿ ಮನೋಹರ್ ಮತ್ತು ಸಹಚರರು ಸಾಕಷ್ಟು ಬಾರಿ ಮನೆ ಎದುರು ಪ್ರತಿಭಟನೆ ಮಾಡಿದ್ದಾರೆ. ಛಲವಾದಿ ನಾರಾಯಣಸ್ವಾಮಿ ಅವರ ಮನೆ ಅಕ್ಕ-ಪಕ್ಕದಲ್ಲಿ ಅನೇಕ ಮಂತ್ರಿಗಳ ಹಾಗೂ ಹೈಕೋರ್ಟ್‌ ನ್ಯಾಯಾಧೀಶರ ಮನೆಗಳಿವೆ. ಆನ್‍ಲೈನ್ ವ್ಯವಹಾರಿಕ ಸಂಸ್ಥೆ ಬ್ಲಿಂಕಿಟ್ ಯಾವುದೇ ವಸ್ತುಗಳನ್ನು ಪಾರ್ಸಲ್ ಮಾಡುವ ಮುಂಚೆ ಪರಿಶೀಲಿಸಬೇಕು. ಆದರೆ, ಅದ್ಯಾವುದನ್ನೂ ಪರಿಶೀಲಿಸದೆ ಮಾರಕ ವಸ್ತುಗಳನ್ನು ಪಾರ್ಸೆಲ್‌ ಕೊಟ್ಟಿರುವುದು ಸಂಸ್ಥೆ ಬಗ್ಗೆ ಸಂಶಯ ಮೂಡಿಸಿದೆ. ಹೀಗಾಗಿ ಈ ಸಂಸ್ಥೆಯ ಪರವಾನಗಿ ರದ್ದುಪಡಿಸಬೇಕು. ಮಾರಕಾಸ್ತ್ರ ಬುಕ್‌ ಮಾಡಿ ಭಯದ ವಾತಾವರಣ ಸೃಷ್ಟಿಸಿದವರನ್ನು ಪತ್ತೆ ಹಚ್ಚಿ ಪ್ರಕರಣ ದಾಖಲಿಸಬೇಕು. ಇವರನ್ನು ಗೂಂಡಾ ಕಾಯ್ದೆಯಡಿ ಗಡಿಪಾರು ಮಾಡಬೇಕು ಎಂದು ಆಗ್ರಹಿಸಲಾಗಿದೆ.

ಛಲವಾದಿ ಮನೆಗೆ ಬಿವೈವಿ ಭೇಟಿ:

ಇದಕ್ಕೂ ಮುನ್ನ ಚಾಕು ಪಾರ್ಸೆಲ್‌ ವಿಚಾರ ತಿಳಿದು ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ.ವಿಜಯೇಂದ್ರ ಅವರು ಛಲವಾದಿ ನಾರಾಯಣಸ್ವಾಮಿ ಅವರ ಸರ್ಕಾರಿ ನಿವಾಸಕ್ಕೆ ಭೇಟಿ ನೀಡಿದರು. ಈ ವೇಳೆ ಸುದ್ದಿಗಾರರೊಂದಿಗೆ ಮಾತನಾಡಿ, ಕಾಂಗ್ರೆಸ್ಸಿಗರ ಪಾಪದ ಕೊಡ ತುಂಬಿದೆ. ನಿಮ್ಮ ಈ ಅಹಂಕಾರ, ದುರಹಂಕಾರ, ಅಧಿಕಾರದ ಮದವನ್ನು ರಾಜ್ಯದ ಜನ ಶೀಘ್ರದಲ್ಲೇ ಇಳಿಸಲಿದ್ದಾರೆ ಎಂದು ಕಿಡಿಕಾರಿದರು.

ಕಾಂಗ್ರೆಸ್‌ ಪಕ್ಷದಲ್ಲಿ ಕೊತ್ವಾಲ್ ಶಿಷ್ಯರು ಇದ್ದಾರೆ

ಛಲವಾದಿ ನಾರಾಯಣಸ್ವಾಮಿ ಅವರ ಮನೆಗೆ ಚಾಕು-ಚೂರಿಗಳನ್ನು ಕಳಿಸುವ ಮುಖಾಂತರ ಕಾಂಗ್ರೆಸ್ ಪಕ್ಷ, ಕಾಂಗ್ರೆಸ್ ಸರ್ಕಾರ, ಕಾಂಗ್ರೆಸ್ ಕಾರ್ಯಕರ್ತರ ಸಂಸ್ಕೃತಿ ಮತ್ತೊಮ್ಮೆ ಅನಾವರಣಗೊಂಡಿದೆ. ಕಾಂಗ್ರೆಸ್ ಸರ್ಕಾರ ಗೂಂಡಾ ಸರ್ಕಾರ ಎಂಬುದನ್ನು ದೇಶದ ಜನತೆಗೆ ತೋರಿಸಿಕೊಟ್ಟಿದ್ದಾರೆ. ಕೊತ್ವಾಲ್‌ ರಾಮಚಂದ್ರನ ಜತೆಯಲ್ಲಿ ಗೂಂಡಾಗಿರಿ ಮಾಡಿಕೊಂಡು ಬಂದವರು ಕಾಂಗ್ರೆಸ್‌ ಪಕ್ಷದ ವ್ಯವಸ್ಥೆ ಹಾಗೂ ಸರ್ಕಾರದಲ್ಲೂ ಇದ್ದಾರೆ. ಹುಟ್ಟುಗುಣ ಸುಟ್ಟರೂ ಹೋಗಲ್ಲ ಎನ್ನುವಂತೆ ಇವರ ವರ್ತನೆ ಇದೆ. ಡಿ.ಕೆ.ಶಿವಕುಮಾರ್‌, ಬಿ.ಕೆ.ಹರಿಪ್ರಸಾದ್‌, ಪ್ರಿಯಾಂಕ್‌ ಖರ್ಗೆ ಅವರ ಗೂಂಡಾವರ್ತನೆ ಕ್ಷಮಿಸಲು ಸಾಧ್ಯವಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಪೊಲೀಸ್ ಇಲಾಖೆ ವೈಫಲ್ಯ

ವಿರೋಧ ಪಕ್ಷದ ನಾಯಕ ಆರ್‌.ಅಶೋಕ್ ಮಾತನಾಡಿ, ಕಳೆದ ಮೂರೂವರೆ ವರ್ಷಗಳಲ್ಲಿ ಕಾಂಗ್ರೆಸ್‌ ಆಡಳಿತದಲ್ಲಿ ಕಾನೂನು ಸುವ್ಯವಸ್ಥೆಯನ್ನು ಕೇಳುವವರೇ ಇಲ್ಲದಂತಾಗಿದೆ. ರೌಡಿಗಳು ಮಚ್ಚು, ಲಾಂಗ್‌ಗಳನ್ನು ಹಿಡಿಯುತ್ತಿದ್ದಾರೆ. ಛಲವಾದಿ ನಾರಾಯಣಸ್ವಾಮಿ ಅವರ ಮನೆಗೆ ಈ ಕಾಂಗ್ರೆಸ್‌ನವರು ಚಾಕು-ಚೂರಿ, ಮುಚ್ಚುಗಳನ್ನು ಪಾರ್ಸೆಲ್‌ ಕಳುಹಿಸುತ್ತಾರೆ ಎಂದರೆ, ಪೊಲೀಸ್‌ ವೈಫಲ್ಯವಾಗಿದೆ. ಪೊಲೀಸರು ಆ ಕಾಂಗ್ರೆಸ್ಸಿಗರ ವಿರುದ್ಧ ಕೊಲೆ ಯತ್ನ ಪ್ರಕರಣ ದಾಖಲಿಸಬೇಕು ಎಂದು ಆಗ್ರಹಿಸಿದರು.

ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‌ ಇಂತಹವರ ವಿರುದ್ಧ ಕ್ರಮ ವಹಿಸಬೇಕು. ಇಲ್ಲವಾದರೆ, ಇದು ಗೂಂಡಾಗಳ ಸರ್ಕಾರ ಎಂದು ಎಲ್ಲ ಕಡೆ ಪೋಸ್ಟರ್‌ ಅಂಟಿಸುವ ಅಭಿಯಾನ ಮಾಡುತ್ತೇವೆ. ಕಾನೂನು ಸುವ್ಯವಸ್ಥೆ ಹದಗೆಡಬಾರದೆಂದು ನಾವು ಸುಮ್ಮನಿದ್ದೇವೆ. ಆದರೆ ಕಾಂಗ್ರೆಸ್‌ನವರು ಜಿರಳೆ ಪಾರ್ಟಿ ಜೊತೆ ಸೇರಿಕೊಂಡು ಜಿರಳೆಗಳಂತೆ ವರ್ತಿಸಿದರೆ ಅದಕ್ಕೆ ತಕ್ಕಂತೆ ಹಿಟ್‌ ಹೊಡೆಯುವುದು ನಮಗೂ ತಿಳಿದಿದೆ ಎಂದು ಎಚ್ಚರಿಸಿದರು.

ಕೊತ್ವಾಲ್‌ ಸಂಸ್ಕೃತಿ ಮೊದಲು ಬಿಡಿ: ಛಲವಾದಿ

ಬೆಂಗಳೂರು: ಕೊತ್ವಾಲ್ ಸಂಸ್ಕೃತಿ ಮೊದಲು ಬಿಡಬೇಕು. ಎಷ್ಟು ಓದಿದರೇನು? ಎಷ್ಟು ಬುದ್ಧಿ ಇದ್ದರೇನು? ಮೊದಲು ಸಂಸ್ಕೃತಿ ಕಲಿತುಕೊಳ್ಳಿ ಎಂದು ವಿಧಾನ ಪರಿಷತ್ತಿನ ವಿಪಕ್ಷ ನಾಯಕ ಛಲವಾದಿ ನಾರಾಯಣಸ್ವಾಮಿ ತೀಕ್ಷ್ಮವಾಗಿ ಪ್ರತಿಕ್ರಿಯಿಸಿದ್ದಾರೆ.

ಶನಿವಾರ ಸುದ್ದಿಗಾರರೊಂದಿಗೆ ಮಾತನಾಡಿ, ಕೊತ್ವಾಲ್ ಅವರು ಈಗಿಲ್ಲ. ವಿಪರ್ಯಾಸ ಎಂದರೆ, ಕೊತ್ವಾಲ್ ಸಂಸ್ಕೃತಿ ಇನ್ನೂ ಬದುಕಿದೆ ಎಂಬುದಕ್ಕೆ ಈಗ ಜೀವಂತ ಉದಾಹರಣೆ ಅಥವಾ ಸಾಕ್ಷಿ ಸಿಗುತ್ತಿದೆ. ಮೊನ್ನೆ ಕೋಲಾರದಲ್ಲಿ ಮಾತನಾಡುವಾಗ ಕಾಂಗ್ರೆಸ್‌ ದೇಶದಲ್ಲಿ ಅರಾಜಕತೆ ಸೃಷ್ಟಿಸುತ್ತಿದೆ. ಇದೇ ರೀತಿ ಅರಾಜಕತೆ ಸೃಷ್ಟಿ ಮಾಡಿದರೆ, ಪಕ್ಷವನ್ನು ತುಂಡು ತುಂಡಾಗಿ ಕತ್ತರಿಸಿ ಸಮುದ್ರಕ್ಕೆ ಹಾಕುತ್ತಾರೆ ಎಂದು ಹೇಳಿದ್ದೆ ಎಂದರು.

ಕಾಂಗ್ರೆಸ್ ಪಕ್ಷವನ್ನು ಶರದ್ ಪವಾರ್, ಮಮತಾ ಬ್ಯಾನರ್ಜಿ ತುಂಡು ಮಾಡಿದ್ದರು. ನಿಜಲಿಂಗಪ್ಪ, ಬಂಗಾರಪ್ಪ ಗುಂಡೂರಾಯರ ಕಾಲದಲ್ಲೂ ತುಂಡಾಗಿದೆ. ದೇವರಾಜ ಅರಸರ ಕಾಲದಲ್ಲೂ ತುಂಡಾಗಿದೆ. ತುಂಡು ತುಂಡಾಗುವುದು ಕಾಂಗ್ರೆಸ್ಸಿಗೆ ಹೊಸದೇನೂ ಅಲ್ಲ. ನಾನೇ ತುಂಡು ಮಾಡುತ್ತೇನೆ ಎಂದು ಹೇಳಿಲ್ಲ. ದೇಶದ ಜನ ಮಾಡಲಿದ್ದಾರೆ ಎಂದು ಹೇಳಿದ್ದೆ ಎಂದು ಸ್ಪಷ್ಟನೆ ನೀಡಿದರು.

ಹಣ ಪಾವತಿ ಕಳಿಸಬಹುದಿತ್ತು:

ಚಾಕು-ಚೂರಿ ಸಂಸ್ಕೃತಿ ಯಾರದು ಎಂಬುದು ದೇಶಕ್ಕೆ ಗೊತ್ತಿತ್ತು, ಈಗ ಮತ್ತೊಮ್ಮೆ ಸಾಬೀತಾಗಿದೆ. ಕೊತ್ವಾಲ್ ಸಂಸ್ಕೃತಿ ಕಾಂಗ್ರೆಸ್ ನಲ್ಲಿ ಬದುಕಿದೆ, ಚಾಕು-ಚೂರಿಯನ್ನು ಹಣ ಪಾವತಿಸಿ ಕಳಿಸಬಹುದಿತ್ತು. ನಮಗೆ ತರಕಾರಿ ಕತ್ತರಿಸಲು ಆಗುತ್ತಿತ್ತು. ಅದಕ್ಕೆ ಹಣನೂ ಕೊಟ್ಟಿಲ್ಲ. ಪುಕ್ಕಟೆ ಫೋನ್‌ ಮಾಡಿ ಸೆವೆನ್ ಮಿನಿಸ್ಟರ್ಸ್ ಕ್ವಾರ್ಟರ್ಸ್, ನಂಬರ್ ಸಿಕ್ಸ್, ಛಲವಾದಿ ನಾರಾಯಣಸ್ವಾಮಿ ಎಂದು ವಿಳಾಸಕ್ಕೆ ಹಾಕಿ ಕಳಿಸಿದ್ದಾರೆ. ಎನ್‍ಎಸ್‍ಯುಐನ ಇಬ್ಬರು ಹುಡುಗರು ಅಲ್ಲಿ ನಿಂತು ‘ಹೋಗಿ ಹೋಗಿ ಒಳಗಡೆ, ಕೊಟ್ಟು ಹೋಗಿ’ ಅಂತ ಕಳಿಸುತ್ತಿದ್ದಾರೆ. ಏನು ಸಾಧಿಸಲು ಹೊರಟ್ಟಿದ್ದೀರಿ? ಗೂಂಡಾ ಸಂಸ್ಕೃತಿ, ಕೊಲೆಗಡುಕರ ಸಂಸ್ಕೃತಿ ಈ ಕಾಂಗ್ರೆಸ್‌ ಮರೆತೇ ಇಲ್ಲ ಎಂದು ಛಲವಾದಿ ವಾಗ್ದಾಳಿ ನಡೆಸಿದರು.

ಇದರಿಂದ ನೀವು ನಮ್ಮ ಬಾಯಿ ಮುಚ್ಚಿಸಲು ಸಾಧ್ಯವೇ? ನಿಮ್ಮ ಚಾಕು-ಚೂರಿಗೆ ನಾವು ಹೆದರಲ್ಲ. ಯಾರೋ ಕೆಲ ನಕಲಿ ದಲಿತರು ‘ನಂದು ಅಂಬೇಡ್ಕರ್ ರಕ್ತ'' ಅಂತಾರಲ್ಲ, ನಿಜವಾದ ಅಂಬೇಡ್ಕರ್ ರಕ್ತ ಇಲ್ಲಿದೆ. ನಮಗೇನು ಅದರ ಭಯ ಇಲ್ಲ. ನಾವು ಸತ್ಯ ಹೇಳಲು ಎಂದಿಗೂ ಹಿಂಜರಿಯಲ್ಲ ಎಂದು ಛಲವಾದಿ ಗುಡುಗಿದರು.===

ನೀವು ಎಷ್ಟು ಚಾಕು-ಚೂರಿ ಕಳಸುತ್ತಿರೋ ಕಳಿಸಿ. ಆದರೆ ದುಡ್ಡು ಕೊಟ್ಟು ಕಳುಹಿಸಿ. ನಾನು ಅವುಗಳಿಗೆ ಫ್ರೇಮ್‌ ಹಾಕಿಸಿ ಮನೆ ಬಾಗಿಲಲ್ಲಿ ‘ಕಾಂಗ್ರೆಸ್‌ ಕೊಡುಗೆ’ ಎಂದು ಇರಿಸುವೆ.

- ಛಲವಾದಿ ನಾರಾಯಣಸ್ವಾಮಿ, ವಿಧಾನ ಪರಿಷತ್ತಿನ ವಿಪಕ್ಷ ನಾಯಕ

ಚಿಕ್ಕಮಗಳೂರು: 275 ಕಾರ್ಯಾಚರಣೇಲಿ ಭಾಗಿ, 61 ಪ್ರಕರಣಗಳನ್ನು ಭೇದಿಸಿದ್ದ ಪೊಲೀಸ್‌ ಶ್ವಾನ ದತ್ತ ನಿಧನ

Kannadaprabha News — Sun, 08 Nov 2026 06:46:23 +0530

ಚಿಕ್ಕಮಗಳೂರು (ನ.8): ಪೊಲೀಸ್‌ ಇಲಾಖೆಯಲ್ಲಿ 275 ಪ್ರಕರಣಗಳ ಕಾರ್ಯಾಚರಣೆಯಲ್ಲಿ ಭಾಗಿಯಾಗಿದ್ದ ಹೆಮ್ಮೆಯ ಶ್ವಾನ ‘ದತ್ತ’ ಅನಾರೋಗ್ಯದಿಂದ ಶನಿವಾರ ಮೃತಪಟ್ಟಿದೆ.

ಬೆಂಗಳೂರಲ್ಲಿ ಕಠಿಣ ತರಬೇತಿ ಪಡೆದಿದ್ದ ದತ್ತ

2019ರ ಮೇ ತಿಂಗಳಲ್ಲಿ ಜನಿಸಿದ್ದ ದತ್ತ, ಅದೇ ವರ್ಷ ಅಪರಾಧ ಪತ್ತೆ ಶ್ವಾನವಾಗಿ ಪೊಲೀಸ್ ಇಲಾಖೆಗೆ ಸೇರ್ಪಡೆ ಗೊಂಡಿತ್ತು. ಬೆಂಗಳೂರಿನಲ್ಲಿ ಕಠಿಣ ತರಬೇತಿ ಪಡೆದಿದ್ದ ದತ್ತ, ಹ್ಯಾಂಡ್ಲರ್‌ಗಳಾದ ರಾಜಪ್ಪ ಎಲ್.ಜಿ. ಹಾಗೂ ಮಂಜುನಾಥ್ ಎ.ಎಂ. ಅವರ ಮಾರ್ಗದರ್ಶನದಲ್ಲಿ ಕರ್ತವ್ಯ ನಿರ್ವಹಿಸಿತ್ತು.

61 ಪ್ರಕರಣಗಳಲ್ಲಿ ಪೊಲೀಸರಿಗೆ ಮಹತ್ವದ ಸುಳಿವು

ಕಳ್ಳತನ, ದರೋಡೆ, ಕೊಲೆ ಸೇರಿದಂತೆ ವಿವಿಧ ಅಪರಾಧ ಪ್ರಕರಣಗಳ ಪತ್ತೆ ಕಾರ್ಯದಲ್ಲಿ ಭಾಗವಹಿಸಿ 61 ಪ್ರಕರಣಗಳಲ್ಲಿ ಪೊಲೀಸರಿಗೆ ಮಹತ್ವದ ಸುಳಿವು ನೀಡಿತ್ತು. ಅಲ್ಲದೆ, 9 ಪ್ರಕರಣಗಳಲ್ಲಿ ಆರೋಪಿಗಳನ್ನು ನಿಖರವಾಗಿ ಪತ್ತೆಹಚ್ಚುವಲ್ಲಿ ಯಶಸ್ವಿಯಾಗಿತ್ತು.

70 ವರ್ಷದ ವೃದ್ಧನನ್ನ ಜೀವಂತ ರಕ್ಷಿಸಿದ್ದ ಶ್ವಾನ

2025ರಲ್ಲಿ ಕೊಪ್ಪ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಾಪತ್ತೆಯಾಗಿದ್ದ 70 ವರ್ಷದ ವೃದ್ಧರೊಬ್ಬರನ್ನು ಸತತ 3 ದಿನಗಳ ಕಾರ್ಯಾಚರಣೆ ಬಳಿಕ ದಟ್ಟ ಅರಣ್ಯದಲ್ಲಿ ಜೀವಂತವಾಗಿ ಪತ್ತೆಹಚ್ಚುವ ಮೂಲಕ ವಿಶೇಷ ಸಾಧನೆ ಮಾಡಿತ್ತು. 2 ಬಾರಿ ವಲಯ ಮಟ್ಟದ ಬೆಳ್ಳಿ ಪದಕ ಗಳಿಸಿದ್ದ ದತ್ತ, ರಾಜ್ಯಮಟ್ಟದ ಸ್ಪರ್ಧೆಯಲ್ಲಿಯೂ ಪ್ರತಿನಿಧಿಸಿತ್ತು.

ದತ್ತನ ನಿಧನಕ್ಕೆ ಅಧಿಕಾರಿಗಳು, ಸಿಬ್ಬಂದಿ ಕಂಬನಿ ಮಿಡಿದಿದ್ದಾರೆ.

5 ದಿನದಲ್ಲಿ 7000 ಕ್ಯುಸೆಕ್ ನೀರು ತಮಿಳುನಾಡಿಗೆ, 104 ಅಡಿ ತುಂಬಿದ್ದ ಕೆಆರ್‌ಎಸ್ ಡ್ಯಾಂ 98ಕ್ಕೆ ಕುಸಿತ! ಬೆಂಗಳೂರಿಗೆ ಆತಂಕ

Kannadaprabha News — Sun, 08 Nov 2026 06:26:01 +0530

ಶ್ರೀರಂಗಪಟ್ಟಣ (ನ.8): ಕಾವೇರಿ ಜಲಾನಯನ ಪ್ರದೇಶದಲ್ಲಿ ಮಳೆಯ ಕೊರತೆ, ತಮಿಳುನಾಡಿಗೆ ನಿರಂತರವಾಗಿ ನೀರು ಬಿಡುತ್ತಿರುವ ಪರಿಣಾಮ ಕೆಆರ್‌ಎಸ್‌ ಜಲಾಶಯದ ನೀರಿನ ಮಟ್ಟ 98 ಅಡಿಗೆ ಕುಸಿದಿದೆ.

5 ದಿನಗಳಿಂದ 7000 ಕ್ಯುಸೆಕ್ ನೀರು ತಮಿಳುನಾಡಿಗೆ

ಕಳೆದ ಏಳೆಂಟು ದಿನಗಳ ಹಿಂದೆ ಮೂರ್ನಾಲ್ಕು ದಿನಗಳ ಕಾಲ ಸುರಿದ ಮಳೆಯಿಂದ ಜಲಾಶಯಕ್ಕೆ ಹೆಚ್ಚಿನ ನೀರು ಹರಿದು ಬಂದು 104 ಅಡಿ ನೀರು ತುಂಬಿತ್ತು. ಆದರೆ, ಕಾವೇರಿ ಪ್ರಾಧಿಕಾರದ ಆದೇಶದಂತೆ ಸರ್ಕಾರ ಕಳೆದ ಐದು ದಿನಗಳಿಂದ 7 ಸಾವಿರಕ್ಕೂ ಹೆಚ್ಚಿನ ಕ್ಯುಸೆಕ್ ನೀರನ್ನು ತಮಿಳುನಾಡಿಗೆ ಹಾಗೂ ನಾಲೆಗಳಿಗೆ ಬಿಡುತ್ತಿರುವ ಪರಿಣಾಮ ನೀರಿನ ಮಟ್ಟ 98 ಅಡಿಗೆ ಕುಸಿದಿದೆ. ಹೀಗಾಗಿ ಬೇಸಿಗೆಯಲ್ಲಿ ಬೆಂಗಳೂರು ಸೇರಿದಂತೆ‌ ಕಾವೇರಿ ನೀರು ಅವಲಂಬಿತ ಜಿಲ್ಲೆಗಳಿಗೆ ಕುಡಿಯುವ‌ ನೀರಿನ ಸಮಸ್ಯೆ ಎದುರಾಗುವ ಸಂಭವವಿದೆ.

ಸದ್ಯ ಡ್ಯಾಂನಲ್ಲಿ 21 ಟಿಎಂಸಿ ನೀರು ಮಾತ್ರ ಶೇಖರಣೆಯಾಗಿದೆ. ಇದರಲ್ಲಿ 6 ಟಿಎಂಸಿ ಡೆಡ್ ಸ್ಟೋರೇಜ್ ಇದ್ದು, ಬಳಕೆಗೆ ಇರೋದು ಕೇವಲ‌ 16 ಟಿಎಂಸಿ ನೀರು ಮಾತ್ರ. ಕಳೆದ ವರ್ಷ ಇದೇ ದಿನ ಅಣೆಕಟ್ಟೆಯಲ್ಲಿ 124.80 ಅಡಿ ನೀರು ಪೂರ್ಣ ಪ್ರಮಾಣದಲ್ಲಿ ಸಂಗ್ರಹವಾಗಿತ್ತು.

ಪ್ರಮುಖ ಜಲಾಶಯಗಳ ಇಂದಿನ ನೀರಿನ ಮಟ್ಟ (7-11-2026):

ಜಲಾಶಯ ಶೇಕಡ ಗರಿಷ್ಠ ಮಟ್ಟ ಇಂದಿನ ಮಟ್ಟ

ಕಬಿನಿ 66% 2284 2272.22
ಹೇಮಾವತಿ 49% 2922 2897.66
ತುಂಗಭದ್ರಾ 34% 1633 1609.34
ಸೂಪಾ(ಮೀ.) 49% 564 543.59
ಕೆಆರ್‌ಎಸ್ 44% 124.80 98.54
ಘಟಪ್ರಭಾ 93% 2175 2170.75
ಲಿಂಗನಮಕ್ಕಿ 50% 1819.12 1791.05
ಭದ್ರಾ 78% 2158 2144.58
ಹಾರಂಗಿ 64% 2859 2847.71
ಆಲಮಟ್ಟಿ(ಮೀ.) 50% 519.60 514.77
ನಾರಾಯಣಪುರ(ಮೀ.) 66% 492.25 489.44
ಮಲಪ್ರಭಾ 54% 2079.50 2064.40

ಎಲ್ಲ ಸರ್ಕಾರಿ ಶಾಲೇಲಿ ಇಂಗ್ಲಿಷ್‌ ಮೀಡಿಯಂ! ಮುಂದಿನ ಶೈಕ್ಷಣಿಕ ವರ್ಷದಿಂದಲೇ ಆರಂಭ, ಶಿಕ್ಷಣ ಸಚಿವ ಮಹತ್ವದ ನಿರ್ಧಾರ!

Kannadaprabha News — Sun, 08 Nov 2026 06:12:48 +0530

ಚಿಕ್ಕಮಗಳೂರು (ನ.8) ಮುಂಬರುವ ಶೈಕ್ಷಣಿಕ ವರ್ಷದಿಂದ ರಾಜ್ಯದ ಎಲ್ಲ ಸರ್ಕಾರಿ ಶಾಲೆಗಳಲ್ಲೂ ಕನ್ನಡದ ಜೊತೆ ಇಂಗ್ಲಿಷ್‌ ಮಾಧ್ಯಮದಲ್ಲೂ ಪಠ್ಯ ಬೋಧನೆಗೆ ನಿರ್ಧರಿಸಲಾಗಿದೆ ಎಂದು ಶಿಕ್ಷಣ ಸಚಿವ ಮಧು ಬಂಗಾರಪ್ಪ ತಿಳಿಸಿದ್ದಾರೆ.

ಎಲ್ಲ ಸರ್ಕಾರಿ ಶಾಲೆಗಳಲ್ಲೂ ಇಂಗ್ಲಿಷ್ ಮಾಧ್ಯಮ ಬೋಧನೆ

ಚಿಕ್ಕಮಗಳೂರಿನ ಜಿಲ್ಲಾ ಪಂಚಾಯತ್‌ ಸಭಾಂಗಣದಲ್ಲಿ ಶನಿವಾರ ನಡೆದ ಜಿಲ್ಲಾಮಟ್ಟದ ಶಿಕ್ಷಣ ಇಲಾಖೆಯ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ಮಾತನಾಡಿ, ರಾಜ್ಯದ ಸುಮಾರು 15 ಜಿಲ್ಲೆಗಳಲ್ಲಿ ಸರ್ಕಾರಿ ಶಾಲೆಗಳಲ್ಲಿ ಈಗಾಗಲೇ ಕನ್ನಡದ ಜೊತೆ ಇಂಗ್ಲಿಷ್‌ ಮಾಧ್ಯಮದ ಬೋಧನೆ ಆರಂಭಿಸಲಾಗಿದೆ. ಉಳಿದ ಜಿಲ್ಲೆಗಳಲ್ಲೂ ಸರ್ಕಾರಿ ಶಾಲೆಗಳಲ್ಲಿ ಇಂಗ್ಲಿಷ್‌ ಮಾಧ್ಯಮದ ಬೋಧನೆಗೆ ಅನುಮೋದನೆ ನೀಡಲಾಗುವುದು. ಮುಂಬರುವ ಶೈಕ್ಷಣಿಕ ವರ್ಷದಿಂದ ರಾಜ್ಯದ ಎಲ್ಲಾ ಸರ್ಕಾರಿ ಶಾಲೆಗಳಲ್ಲೂ ದ್ವಿಭಾಷಾ ಮಾಧ್ಯಮದ ಮೂಲಕ ಬೋಧನೆ ಜಾರಿ ಮಾಡಲಾಗುವುದು ಎಂದರು.

ವಿದ್ಯಾರ್ಥಿಗಳ ದಾಖಲಾತಿ ಪ್ರಮಾಣ ಹೆಚ್ಚಳ

ಮೂಲಭೂತ ಸೌಕರ್ಯಗಳ ಕೊರತೆಯಿಂದ ರಾಜ್ಯದ ಕೆಲವು ಜಿಲ್ಲೆಗಳಲ್ಲಿ ಕೆಲವು ಶಾಲೆಗಳಿಗೆ ಇನ್ನೂ ಇಂಗ್ಲಿಷ್‌ ಬೋಧನೆಗೆ ಅನುಮತಿ ದೊರೆತಿಲ್ಲ. ಇದರಿಂದ ಸಮಸ್ಯೆಗಳು ಉಂಟಾಗುತ್ತಿವೆ. ದ್ವಿಭಾಷಾ ಬೋಧನೆ ಇರುವ ಸರ್ಕಾರಿ ಶಾಲೆಗಳಲ್ಲಿ ವಿದ್ಯಾರ್ಥಿಗಳ ದಾಖಲಾತಿ ಹೆಚ್ಚಳವಾಗಿದೆ. ಹೀಗಾಗಿ, ರಾಜ್ಯದ ಎಲ್ಲಾ ಸರ್ಕಾರಿ ಶಾಲೆಗಳಲ್ಲೂ ದ್ವಿಭಾಷಾ ಮಾಧ್ಯಮದ ಬೋಧನೆ ಆರಂಭಿಸಬೇಕೆಂಬ ಬೇಡಿಕೆ ಕೇಳಿ ಬರುತ್ತಿದೆ. ಈ ಹಿನ್ನೆಲೆಯಲ್ಲಿ ರಾಜ್ಯದ ಎಲ್ಲ ಸರ್ಕಾರಿ ಶಾಲೆಗಳಲ್ಲೂ ದ್ವಿಭಾಷಾ ಬೋಧನೆಗೆ ನಿರ್ಧರಿಸಲಾಗಿದೆ ಎಂದು ತಿಳಿಸಿದರು.

ಕೆಲವು ಸರ್ಕಾರಿ ಶಾಲೆಗಳಲ್ಲಿ ಇಂಗ್ಲಿಷ್ ಬೋಧನೆಗೆ ಅಧಿಕೃತ ಅನುಮತಿ ಇಲ್ಲದಿದ್ದರೂ ದ್ವಿಭಾಷಾ ಮಾಧ್ಯಮದ ಬೋಧನೆ ನಡೆಸಲಾಗುತ್ತಿದೆ. ಅಂತಹ ಶಾಲೆಗಳ ಶಿಕ್ಷಕರು ಆತಂಕಪಡುವ ಅಗತ್ಯವಿಲ್ಲ. ಅನುಮತಿ ಇಲ್ಲದೆ ಬೋಧನೆ ನಡೆಸುತ್ತಿರುವ ಶಾಲೆಗಳ ಬಗ್ಗೆ ಮಾಹಿತಿ ನೀಡಿದರೆ ಕೂಡಲೇ ಅನುಮತಿ ಕೊಡಿಸಲು ಕ್ರಮ ಕೈಗೊಳ್ಳಲಾಗುವುದು ಎಂದು ಸಚಿವ ಮಧು ಬಂಗಾರಪ್ಪ ಭರವಸೆ ನೀಡಿದರು.

ಶಾಲೆಗಳಲ್ಲಿ ಶಿಕ್ಷಕರು ಸ್ವಯಂ ಆಸಕ್ತಿಯಿಂದ ವಿದ್ಯಾರ್ಥಿಗಳಿಗೆ ವಿಶೇಷ ತರಗತಿಗಳನ್ನು ನಡೆಸಬೇಕು. ಇದರಿಂದ ಮಕ್ಕಳ ಕಲಿಕಾ ಸಾಮರ್ಥ್ಯ ಮತ್ತು ಶೈಕ್ಷಣಿಕ ಪ್ರಗತಿಗೆ ಸಹಕಾರಿಯಾಗಲಿದೆ ಎಂದು ಅವರು ಸಲಹೆ ನೀಡಿದರು.

ಸರ್ಕಾರಿ ಶಾಲೆಗಳಲ್ಲೂ ಪೋಷಕರ ಸಭೆ ಕಡ್ಡಾಯ

ಸರ್ಕಾರಿ ಶಾಲೆಗಳಿಗೆ ಮಕ್ಕಳನ್ನು ಕಳುಹಿಸಿದರೆ ತಮ್ಮ ಜವಾಬ್ದಾರಿ ಮುಗಿಯಿತು ಎಂಬ ಭಾವನೆ ಬಹುತೇಕ ಪೋಷಕರಲ್ಲಿದೆ. ಆದರೆ, ಮಕ್ಕಳ ಶೈಕ್ಷಣಿಕ ಪ್ರಗತಿಯಲ್ಲಿ ಶಿಕ್ಷಕರ ಶ್ರಮದ ಜತೆಗೆ ಪೋಷಕರ ಪ್ರಯತ್ನವೂ ಅಗತ್ಯ. ಈ ನಿಟ್ಟಿನಲ್ಲಿ ಪ್ರತಿ ಶಾಲೆಯಲ್ಲೂ ಕಡ್ಡಾಯವಾಗಿ ಪೋಷಕರ ಸಭೆ ನಡೆಸಬೇಕು. ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸಿ, ನಿರಂತರವಾಗಿ ಸಭೆಗಳನ್ನು ಆಯೋಜಿಸುವಂತೆ ಶಿಕ್ಷಣ ಸಚಿವರು ಸೂಚಿಸಿದರು.

ಗದಗ ಶಾಕಿಂಗ್: ಮನೆ ಮನೆಗೆ ತಲುಪಬೇಕಿದ್ದ ಆಧಾರ್ ಕಾರ್ಡ್‌ಗಳು ಕಸದ ರಾಶಿಯಲ್ಲಿ ಪತ್ತೆ!

Kannadaprabha News — Sun, 08 Nov 2026 05:56:06 +0530

ಗದಗ (ನ.8): ಸಾರ್ವಜನಿಕರ ಮನೆ ಬಾಗಿಲಿಗೆ ಸುರಕ್ಷಿತವಾಗಿ ತಲುಪಬೇಕಿದ್ದ ಆಧಾರ್ ಕಾರ್ಡ್‌ಗಳು(Adhar Card) ಕಸದ ರಾಶಿಯಲ್ಲಿ ಹಾಗೂ ಗಟಾರದ ಪಕ್ಕದಲ್ಲಿ ಪತ್ತೆಯಾಗಿರುವ ಆಶ್ಚರ್ಯಕರ ಘಟನೆ ಗದಗ(Gadag) ನಗರದಲ್ಲಿ ಬೆಳಕಿಗೆ ಬಂದಿದೆ. ಅಂಚೆ ಇಲಾಖೆ(Gadag post office) ಸಿಬ್ಬಂದಿಯ ಬೇಜವಾಬ್ದಾರಿತನದಿಂದಾಗಿ ಪ್ರಮುಖ ದಾಖಲೆಗಳು ರಸ್ತೆ ಪಾಲಾಗಿರುವುದು ಸ್ಥಳೀಯರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.

ಗದಗ ಕಸದ ರಾಶಿಯಲ್ಲಿ ಆಧಾರ್ ಕಾರ್ಡ್‌ಗಳು!

ಇಲ್ಲಿನ ಪಂಚಾಕ್ಷರಿ ನಗರದ (ಬಡಾವಣೆ) ಕಸದ ರಾಶಿ ಹಾಗೂ ಗಟಾರದ ಬಳಿ ಸುಮಾರು 20ಕ್ಕೂ ಅಧಿಕ ಆಧಾರ್ ಕಾರ್ಡ್‌ಗಳು ಬಿದ್ದಿರುವುದು ಪತ್ತೆಯಾಗಿದೆ. ಗಟಾರವನ್ನು ಸ್ವಚ್ಛಗೊಳಿಸುವ ಸಂದರ್ಭದಲ್ಲಿ ಸ್ಥಳೀಯ ನಿವಾಸಿಗಳ ಕಣ್ಣಿಗೆ ಈ ಕಾರ್ಡ್‌ಗಳು ಬಿದ್ದಿವೆ. ಪರಿಶೀಲಿಸಿದಾಗ, ಇವೆಲ್ಲವೂ ಸಮೀಪದ ಕಾಶಿ ವಿಶ್ವನಾಥ್ ನಗರದ ನಿವಾಸಿಗಳಿಗೆ ಸೇರಿದ ಆಧಾರ್ ಕಾರ್ಡ್‌ಗಳೆಂದು ಪ್ರಾಥಮಿಕ ತನಿಖೆಯಿಂದ ತಿಳಿದು ಬಂದಿದೆ.

ವಿಳಾಸ ಬದಲಾವಣೆಗೆ ಅರ್ಜಿ

ಕಾಶಿ ವಿಶ್ವನಾಥ್ ನಗರದ ನಿವಾಸಿಗಳು ತಮ್ಮ ಆಧಾರ್ ಕಾರ್ಡ್‌ಗಳಲ್ಲಿ ವಿಳಾಸ ಸೇರಿದಂತೆ ವಿವಿಧ ತಿದ್ದುಪಡಿಗಳಿಗಾಗಿ ಅರ್ಜಿ ಸಲ್ಲಿಸಿದ್ದರು. ನಿಯಮದ ಪ್ರಕಾರ, ತಿದ್ದುಪಡಿಯಾದ ಹೊಸ ಕಾರ್ಡ್‌ಗಳು ಅಂಚೆ (ಪೋಸ್ಟ್) ಮೂಲಕ ಸಂಬಂಧಪಟ್ಟವರ ಮನೆ ವಿಳಾಸಕ್ಕೆ ನೇರವಾಗಿ ತಲುಪಬೇಕಿತ್ತು. ಆದರೆ, ಅರ್ಜಿ ಸಲ್ಲಿಸಿ ತಿಂಗಳುಗಳು ಕಳೆದರೂ ಕಾರ್ಡ್ ಕೈಸೇರದೆ ಜನರು ಕಾಯುತ್ತಿದ್ದರು. ಈಗ ಈ ಕಾರ್ಡ್‌ಗಳು ಗಟಾರ ಸೇರಿರುವುದು ಜನರ ಆತಂಕ ಮತ್ತು ಆಕ್ರೋಶವನ್ನು ಹೆಚ್ಚಿಸಿದೆ.

ಸಿಬ್ಬಂದಿ ಮೇಲೆಯೇ ಶಂಕೆ:

ಮನೆ ಮನೆಗೆ ತೆರಳಿ ವಿತರಿಸಬೇಕಾದ ಜವಾಬ್ದಾರಿ ಹೊಂದಿದ್ದ ಅಂಚೆ ಇಲಾಖೆಯ ಸಿಬ್ಬಂದಿಯೇ ಕೆಲಸದ ಆಲಸ್ಯದಿಂದ ಅಥವಾ ನಿರ್ಲಕ್ಷ್ಯದಿಂದ ಈ ಕಾರ್ಡ್‌ಗಳನ್ನು ಕಸದ ರಾಶಿಗೆ ಎಸೆದಿರಬಹುದು ಎಂದು ಅಲ್ಲಿನ ನಿವಾಸಿಗಳು ಆರೋಪಿಸುತ್ತಿದ್ದಾರೆ. ಪ್ರಮುಖ ವೈಯಕ್ತಿಕ ದಾಖಲೆಗಳನ್ನು ಈ ರೀತಿ ರಸ್ತೆ ಪಾಲಾಗುವಂತೆ ಮಾಡಿ, ದುರುಪಯೋಗಕ್ಕೆ ಅವಕಾಶ ಮಾಡಿಕೊಟ್ಟಿರುವ ಸಂಬಂಧಪಟ್ಟ ಸಿಬ್ಬಂದಿಯ ವಿರುದ್ಧ ಇಲಾಖಾ ಮೇಲಧಿಕಾರಿಗಳಿಗೆ ದೂರು ನೀಡುವುದಾಗಿ ಅಲ್ಲಿನ ನಿವಾಸಿಗಳು ತಿಳಿಸಿದ್ದಾರೆ.

ಈ ಗಂಭೀರ ನಿರ್ಲಕ್ಷ್ಯದ ಕುರಿತು ಅಂಚೆ ಇಲಾಖೆಯ ಅಧಿಕಾರಿಗಳನ್ನು ಸಂಪರ್ಕಿಸಲು ಪ್ರಯತ್ನಿಸಲಾಯಿತಾದರೂ, ಯಾವುದೇ ಅಧಿಕೃತ ಪ್ರತಿಕ್ರಿಯೆ ಲಭ್ಯವಾಗಿಲ್ಲ. ಹೀಗಾಗಿ ಈ ಕಾರ್ಡ್‌ಗಳು ಅಂಚೆ ಕಚೇರಿಯಿಂದಲೇ ರವಾನೆಯಾಗಿ ಮಾರ್ಗ ಮಧ್ಯೆ ಎಸೆಯಲ್ಪಟ್ಟಿವೆಯೇ ಅಥವಾ ವಿತರಣಾ ಹಂತದಲ್ಲಿ ಬೇರೆ ಲೋಪವಾಗಿದೆಯೇ ಎಂಬ ಬಗ್ಗೆ ಅಧಿಕೃತ ಸ್ಪಷ್ಟತೆ ಸಿಕ್ಕಿಲ್ಲ.

Kolar: ಕಾಂಗ್ರೆಸ್ ಶಾಸಕರಿಗೆ ಬಿಗ್ ರಿಲೀಫ್ ಕೊಟ್ಟ ಹೈಕೋರ್ಟ್, ED ದಾಖಲಿಸಿದ್ದ ಪ್ರಕರಣ ರದ್ದು

Kannadaprabha News — Sat, 07 Nov 2026 23:02:52 +0530

ಕೋಲಾರ: ಕೋಮುಲ್ ನೇಮಕಾತಿ ಪ್ರಕರಣದಲ್ಲಿ ಜಾರಿ ನಿರ್ದೇಶನಾಲಯ ದಾಖಲಿಸಿದ್ದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಾಲೂರು ಕಾಂಗ್ರೆಸ್ ಶಾಸಕ ನಂಜೇಗೌಡರಿಗೆ ಧಾರವಾಡ ಹೈಕೋರ್ಟ್‌ನಿಂದ ದೊಡ್ಡ ರಿಲೀಫ್‌ ದೊರೆತಿದೆ.

ನ್ಯಾಯಮೂರ್ತಿ ಎಂ.ಐ.ಅರುಣ್ ಅವರು ಶಾಸಕ ನಂಜೇಗೌಡ ಸಲ್ಲಿಸಿದ್ದ ಅರ್ಜಿಯನ್ನು ಪುರಸ್ಕರಿಸಿ ಆದೇಶ ಹೊರಡಿಸಿದ್ದಾರೆ. ಜಾರಿ ನಿರ್ದೇಶನಾಲಯ ದಾಖಲಿಸಿದ್ದ ಅರ್ಜಿ ವಿರುದ್ಧ ಶಾಸಕರು ಸಲ್ಲಿಸಿದ್ದ ಅರ್ಜಿಗೆ ಈ ಆದೇಶ ಪ್ರಕಟವಾಗಿದೆ.

ಜಾರಿ ನಿರ್ದೇಶನಾಲಯವು ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡಿತ್ತು. ಕೋಮುಲ್ ನೇಮಕಾತಿ ವಿಚಾರದಲ್ಲಿ ಈ ಪ್ರಕರಣ ದಾಖಲಾಗಿತ್ತು.

ಜನವರಿ 20, 2024ರಂದು ಶಾಸಕ ನಂಜೇಗೌಡರ ಮೇಲೆ ಜಾರಿ ನಿರ್ದೇಶನಾಲಯ ದಾಳಿ ನಡೆಸಿತ್ತು. ಮಾಲೂರು ತಾಲೂಕಿನ ಕೊಮ್ಮನಹಳ್ಳಿ ನಿವಾಸ ಹಾಗೂ ಇತರೆಡೆ ದಾಳಿ ನಡೆಸಿದ್ದ ಅಧಿಕಾರಿಗಳು, ಸೆಪ್ಟೆಂಬರ್ 12, 2024ರಂದು ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡಿದ್ದರು.

ಜನಪ್ರತಿನಿಧಿಗಳ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಿಸಿದ್ದರು. ದಾಳಿ ವೇಳೆ ನಂಜೇಗೌಡ ಕುಟುಂಬಕ್ಕೆ ಸೇರಿದ್ದ ಜಮೀನು, ಆಸ್ತಿ, ನಗದು ಹಾಗೂ ಮೊಬೈಲ್‌ಗಳನ್ನು ಜಾರಿ ನಿರ್ದೇಶನಾಲಯ ಜಪ್ತಿ ಮಾಡಿತ್ತು. ನೇಮಕಾತಿ ವಿಚಾರದಲ್ಲಿ ಜಾರಿ ನಿರ್ದೇಶನಾಲಯ ವಿಚಾರಣೆ ನಡೆಸಲು ಅವಕಾಶವಿಲ್ಲ ಎಂದು ಶಾಸಕ ನಂಜೇಗೌಡ ನ್ಯಾಯಾಲಯದ ಮೆಟ್ಟಿಲೇರಿದ್ದರು. ಸತತ ವಿಚಾರಣೆ ನಡೆಸಿದ ಹೈಕೋರ್ಟ್ ಆದೇಶ ಹೊರಡಿಸಿದೆ.

ಶಾಸಕ ನಂಜೇಗೌಡರ ಪರ ವಕೀಲ ಮಹೇಂದ್ರ ಗೌಡ ವಾದ ಮಂಡಿಸಿದ್ದರು. ಜಾರಿ ನಿರ್ದೇಶನಾಲಯದ ಅಧಿಕಾರಿಗಳು ಸರ್ವೋಚ್ಚ ನ್ಯಾಯಾಲಯದ ಮೆಟ್ಟಿಲೇರುವ ಸಾಧ್ಯತೆ ಇದೆ ಎಂದು ತಿಳಿದುಬಂದಿದೆ.

ನಂಜೇಗೌಡ ವಿರುದ್ಧ ಪ್ರಕರಣ ರದ್ದು, ಕಾಂಗ್ರೇಸಿಗರ ಹರ್ಷ

ಶಾಸಕ ಕೆ.ವೈ. ನಂಜೇಗೌಡ ಅವರ ವಿರುದ್ಧ ಜಾರಿ ನಿರ್ದೇಶನಾಲಯ (ಇ.ಡಿ.) ದಾಖಲಿಸಿದ್ದ ಪ್ರಕರಣವನ್ನು ಜನಪ್ರತಿನಿಧಿಗಳ ವಿಶೇಷ ನ್ಯಾಯಾಲಯ ರದ್ದುಪಡಿಸಿರುವುದು ನ್ಯಾಯಕ್ಕೆ ಸಂದ ಜಯವಾಗಿದೆ ಎಂದು ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ಎಚ್.ಎಂ. ವಿಜಯ ನರಸಿಂಹ ಹೇಳಿದ್ದಾರೆ.

ನಗರದ ಮಾರುತಿ ಬಡಾವಣೆಯಲ್ಲಿರುವ ಕಾಂಗ್ರೆಸ್ ಕಚೇರಿಯಲ್ಲಿ ಮಾಲೂರು ಹಾಗೂ ಮಾಸ್ತಿ ಬ್ಲಾಕ್ ಕಾಂಗ್ರೆಸ್ ಸಮಿತಿಗಳ ವತಿಯಿಂದ ಆಯೋಜಿಸಿದ್ದ ಪತ್ರಿಕಾಗೋಷ್ಠಿಯಲ್ಲಿ ಅವರು ಮಾತನಾಡಿದ ಅವರು, 2024ರಲ್ಲಿ ಬಿಜೆಪಿ ಸರ್ಕಾರವು ಇ.ಡಿ.ಯನ್ನು ದುರುಪಯೋಗಪಡಿಸಿಕೊಂಡು ಶಾಸಕ ಕೆ.ವೈ. ನಂಜೇಗೌಡ ಅವರ ನಿವಾಸದ ಮೇಲೆ ದಾಳಿ ನಡೆಸಿ ಮಾನಸಿಕ ಕಿರುಕುಳ ನೀಡಿತ್ತು. ನಂತರ ಜನಪ್ರತಿನಿಧಿಗಳ ವಿಶೇಷ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಿಸಲಾಗಿತ್ತು. ಆದರೆ ಸಂವಿಧಾನಾತ್ಮಕವಾಗಿ ಈ ಪ್ರಕರಣದ ತನಿಖೆ ನಡೆಸುವ ಅಧಿಕಾರ ಇ.ಡಿ.ಗೆ ಇಲ್ಲವೆಂದು ಪ್ರಶ್ನಿಸಿ ಶಾಸಕರು ಹೈಕೋರ್ಟ್ ಮೊರೆ ಹೋಗಿದ್ದರು ಎಂದು ತಿಳಿಸಿದರು.

ಮಾಲೂರು ಬ್ಲಾಕ್ ಕಾಂಗ್ರೆಸ್ ಸಮಿತಿ ಅಧ್ಯಕ್ಷ ಎಂ. ಕೃಷ್ಣಪ್ಪ ಮಾತನಾಡಿ, ಶಾಸಕರ ವಿರುದ್ಧ ದಾಖಲಿಸಲಾಗಿದ್ದ ಇ.ಡಿ. ಪ್ರಕರಣವನ್ನು ರದ್ದುಪಡಿಸಿರುವುದು ಪ್ರತಿಪಕ್ಷಗಳಿಗೆ ನಡುಕ ಉಂಟುಮಾಡಿದೆ ಎಂದರು. ಪತ್ರಿಕಾಗೋಷ್ಠಿಯಲ್ಲಿ ಕೆಪಿಸಿಸಿ ಸದಸ್ಯ ಸೋಮಶೇಖರ್, ಗ್ಯಾರಂಟಿ ಯೋಜನೆಗಳ ಅನುಷ್ಠಾನ ಸಮಿತಿ ಅಧ್ಯಕ್ಷ ಅಂಜಿನಪ್ಪ, ಉಪಾಧ್ಯಕ್ಷ ಅಶ್ವತ್ ರೆಡ್ಡಿ ಇದ್ದರು.

Bengaluru ನಿಂದ ಹೊರಡಬೇಕಿದ್ದ ಇಂಡಿಗೋ ವಿಮಾನಕ್ಕೆ ಹೈಜಾಕ್ ಬೆದರಿಕೆ; ತೀವ್ರ ಆತಂಕ, ಭದ್ರತಾ ತಪಾಸಣೆ!

Bhimasi M Koleppanavar — Sat, 07 Nov 2026 21:03:42 +0530

ಬೆಂಗಳೂರಿನ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಲಖನೌಗೆ ಹೊರಟಿದ್ದ ಇಂಡಿಗೋ ವಿಮಾನದಲ್ಲಿ ಹೈಜಾಕ್ ಬೆದರಿಕೆ ಚೀಟಿ ಪತ್ತೆಯಾಗಿದ್ದು, ವಿಮಾನ ನಿಲ್ದಾಣದಲ್ಲಿ ಕೆಲಕಾಲ ತೀವ್ರ ಆತಂಕ ಸೃಷ್ಟಿಸಿದೆ. ಇಂಡಿಗೋ ಸಂಸ್ಥೆಗೆ ಸೇರಿದ 6E-451 ವಿಮಾನ. ಬೆಂಗಳೂರು ವಿಮಾನ ನಿಲ್ದಾಣದ ಟರ್ಮಿನಲ್-1 ನಿಂದ ಬೆಂಗಳೂರಿನಿಂದ ಉತ್ತರ ಪ್ರದೇಶದ ಲಖನೌಗೆ ಹೊರಟಿತ್ತು. ಆದರೆ ಆ ಒಂದು ಬೆದರಿಕೆ ಮಾತ್ರ ಎಲ್ಲರನಗನು

ಚೀಟಿಯಲ್ಲಿದ್ದ ಆತಂಕಕಾರಿ ಸಂದೇಶವೇನು?

ವಿಮಾನದೊಳಗೆ ಅನುಮಾನಾಸ್ಪದ ಕೈಬರಹದ ಚೀಟಿಯೊಂದು ಪತ್ತೆಯಾಗಿದೆ. ಚೀಟಿಯಲ್ಲಿ Going to get hijacked exacta at 6:30 ಎಂದು ಬರೆಯಲಾಗಿತ್ತು. ಸಮಯದ ಉಲ್ಲೇಖ: ಸಂಜೆ 6:30 ರ ಸುಮಾರಿಗೆ ಈ ವಿಮಾನವನ್ನು ಹೈಜಾಕ್ ಮಾಡಲಾಗುತ್ತದೆ ಎಂದು ಉಲ್ಲೇಖಿಸಿ ಭೀತಿ ಹುಟ್ಟಿಸಲಾಗಿತ್ತು. ಆದರೆ ಸಿಬ್ಬಂದಿ ಚಾನಾಕ್ಷತದಿಂದ ದೊಡ್ಡ ಅವಘಡವೊಂದು ಸಂಭವಿಸುವುದು ತಪ್ಪಿದಂತಾಗಿದೆ.

ತಕ್ಷಣದ ರಕ್ಷಣಾ ಕ್ರಮಗಳು!

ವಿಷಯ ತಿಳಿಯುತ್ತಿದ್ದಂತೆ ವಿಮಾನ ನಿಲ್ದಾಣದ ಭದ್ರತಾ ಪಡೆಗಳು ಅಲರ್ಟ್ ಆದವು. ಕೂಡಲೇ ಕಾರ್ಯಪ್ರವೃತ್ತರಾದ ಸಿಬ್ಬಂದಿ, ಇಡೀ ವಿಮಾನವನ್ನು ಸಂಪೂರ್ಣವಾಗಿ ಪರಿಶೀಲನೆಗೆ ಒಳಪಡಿಸಿದರು. ತಪಾಸಣೆಯ ವೇಳೆ ಯಾವುದೇ ಸ್ಫೋಟಕ ಅಥವಾ ಶಂಕಾಸ್ಪದ ವಸ್ತುಗಳು ಪತ್ತೆಯಾಗಿಲ್ಲ. ಆದರೂ ಭದ್ರತಾ ಸಿಬ್ಬಂದಿಯ ತೀವ್ರ ತಪಾಸಣೆಯ ನಂತರ ವಿಮಾನ ಸುರಕ್ಷಿತವಾಗಿದೆ ಎಂದು ಧೃಡಪಟ್ಟಿದೆ. ಪರಿಶೀಲನೆ ಮುಗಿದ ಬೆನ್ನಲ್ಲೇ ವಿಮಾನ ಲಖನೌಗೆ ಹೊರಡಲು ಕ್ಲಿಯರೆನ್ಸ್ ನೀಡಲಾಗಿದೆ. ಸದ್ಯ ಇಂಡಿಗೋ ಏರ್‌ಲೈನ್ಸ್ ಸಿಬ್ಬಂದಿ ಪ್ರಯಾಣಿಕರನ್ನು ಮರು-ಬೋರ್ಡಿಂಗ್ ಮಾಡಿಸುತ್ತಿದ್ದು, ವಿಮಾನ ಪ್ರಯಾಣಕ್ಕೆ ಸಿದ್ಧವಾಗಿದೆ.

ಪೂರ್ಣ ತುರ್ತು ಪರಿಸ್ಥಿತಿ ಘೋಷಣೆ!

ಬೆಂಗಳೂರಿನ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್-1 ರಲ್ಲಿ ಲಖನೌಗೆ ಹೊರಟಿದ್ದ ಇಂಡಿಗೋ ವಿಮಾನದಲ್ಲಿ ಹೈಜಾಕ್ ಬೆದರಿಕೆ ಹಿನ್ನೆಲೆ 'ಪೂರ್ಣ ತುರ್ತು ಪರಿಸ್ಥಿತಿ' ಘೋಷಿಸಲಾಗಿದೆ. ವಿಮಾನ ನಿಲ್ದಾಣದ ಇತಿಹಾಸ ಮತ್ತು ನಿಯಮಾವಳಿಗಳ ಪ್ರಕಾರ, ತೀವ್ರ ಸ್ವರೂಪದ ಹೈಜಾಕ್ ಬೆದರಿಕೆ ಸಂದೇಶ ಪತ್ತೆಯಾದ ತಕ್ಷಣವೇ 'ಫುಲ್ ಎಮರ್ಜೆನ್ಸಿ' ಎಂದು ಘೋಷಿಸಿ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಯಿತು. ಈ ಆತಂಕಕಾರಿ ಕೈಬರಹದ ಚೀಟಿಯು ವಿಮಾನದ ಒಳಗಿನ ಶೌಚಾಲಯದಲ್ಲಿ ಪತ್ತೆಯಾಗಿದೆ. ಬೆಂಗಳೂರು ಏರ್‌ಪೋರ್ಟ್‌ನ ಟರ್ಮಿನಲ್-1 ರನ್‌ವೇ ಹಾಗೂ ಸುತ್ತಮುತ್ತಲಿನ ಭದ್ರತೆಯನ್ನು ತಕ್ಷಣವೇ ದುಪ್ಪಟ್ಟುಗೊಳಿಸಲಾಯಿತು. ಪ್ರಯಾಣಕ್ಕೆ ರೆಡಿ ಭದ್ರತಾ ತಪಾಸಣೆ ಮುಗಿದ ಬಳಿಕ ವಿಮಾನ ಲಖನೌಗೆ ಹೊರಡಲು ಗ್ರೀನ್ ಸಿಗ್ನಲ್ ಸಿಕ್ಕಿದ್ದು, ಸದ್ಯ ಇಂಡಿಗೋ ಏರ್‌ಲೈನ್ಸ್ ಸಿಬ್ಬಂದಿ ಪ್ರಯಾಣಿಕರನ್ನು ಮರು-ಬೋರ್ಡಿಂಗ್ ಮಾಡಿಸುತ್ತಿದ್ದಾರೆ.

ಕರುನಾಡ ಸಾಧಕರಿಗೆ 'ಪುನೀತ್ ರಾಜ್‌ಕುಮಾರ್ ಪ್ರಶಸ್ತಿ' ಗರಿ: ಕನ್ನಡ ನವೆಂಬರ್ ಆಚರಣೆಯಾಗದೆ ನಿತ್ಯೋತ್ಸವವಾಗಲಿ-ನಾಗಾಭರಣ!

Santosh Naik — Sat, 07 Nov 2026 20:02:17 +0530

ಬೆಂಗಳೂರು (ನ.07): 'ಕರ್ನಾಟಕದಲ್ಲಿ ವಾಸಿಸುವ ಪ್ರತಿಯೊಬ್ಬರೂ ಕನ್ನಡ ಭಾಷೆಯನ್ನು ಬಳಸಬೇಕು. ಪಾಲಿಕೆ ಆಡಳಿತದಲ್ಲಿ ಕನ್ನಡಕ್ಕೆ ಎಂದಿಗೂ ಪ್ರಥಮ ಆದ್ಯತೆ' ಎಂದು ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ (GBA) ಮುಖ್ಯ ಆಯುಕ್ತರಾದ ಎಂ. ಮಹೇಶ್ವರರಾವ್ ಸ್ಪಷ್ಟವಾಗಿ ಕರೆ ನೀಡಿದ್ದಾರೆ.

ಜಿಬಿಎ ಕೇಂದ್ರ ಕಚೇರಿಯಲ್ಲಿ ಗ್ರೇಟರ್ ಬೆಂಗಳೂರು ಪ್ರಾಧಿಕಾರ ಮತ್ತು ಪಾಲಿಕೆಗಳ ನೌಕರರ ಕನ್ನಡ ಸಂಘದ ವತಿಯಿಂದ ಆಯೋಜಿಸಲಾಗಿದ್ದ 71ನೇ ಕನ್ನಡ ರಾಜ್ಯೋತ್ಸವ ಹಾಗೂ ಕರುನಾಡ ಸಾಧಕರಿಗೆ ‘ಕರ್ನಾಟಕ ರತ್ನ ಡಾ. ಪುನೀತ್ ರಾಜ್‌ಕುಮಾರ್ ಪ್ರಶಸ್ತಿ’ ಪ್ರದಾನ ಸಮಾರಂಭವನ್ನು ಗಣ್ಯರು ಜ್ಯೋತಿ ಬೆಳಗಿಸುವ ಮೂಲಕ ಅದ್ಧೂರಿಯಾಗಿ ಉದ್ಘಾಟಿಸಿದರು.

ಬೆಂಗಳೂರು ವಿಶ್ವಮಾನ್ಯವಾಗಲು ನೌಕರರ ಶ್ರಮ ಕಾರಣ:

ಕಾರ್ಯಕ್ರಮದಲ್ಲಿ ಮಾತನಾಡಿದ ಮುಖ್ಯ ಆಯುಕ್ತ ಮಹೇಶ್ವರರಾವ್, 'ಕನ್ನಡ ಕೇವಲ ಭಾಷೆಯಲ್ಲ, ನಮ್ಮ ಬದುಕು. ಪಾಲಿಕೆಯ ಆಡಳಿತ ಕಚೇರಿಗಳಲ್ಲಿ ಕನ್ನಡವೇ ಸಾರ್ವಭೌಮ. ಕಲೆ, ಸಾಹಿತ್ಯ ಹಾಗೂ ಪಾಲಿಕೆಯಲ್ಲಿ ಪ್ರಾಮಾಣಿಕವಾಗಿ ಸೇವೆ ಸಲ್ಲಿಸಿದ ನೌಕರರನ್ನು ಗುರುತಿಸಿ ‘ಅಪ್ಪು’ ಅವರ ಹೆಸರಿನಲ್ಲಿ ಪುರಸ್ಕರಿಸುತ್ತಿರುವುದು ಹೆಮ್ಮೆಯ ಸಂಗತಿ. ಇಂದು ಬೆಂಗಳೂರು ಜಾಗತಿಕ ಮಟ್ಟದಲ್ಲಿ ಗುರುತಿಸಿಕೊಂಡಿದೆ ಎಂದರೆ ಅದಕ್ಕೆ ಪಾಲಿಕೆ ಅಧಿಕಾರಿಗಳು ಮತ್ತು ಪೌರಕಾರ್ಮಿಕರ ನಿಸ್ವಾರ್ಥ ಶ್ರಮವೇ ಕಾರಣ' ಎಂದರು.

ಅನ್ಯಭಾಷಿಕರಿಗೆ ಪ್ರೀತಿಯಿಂದ ಕನ್ನಡ ಕಲಿಸಿ:

ಹಿರಿಯ ನಿರ್ದೇಶಕ ಟಿ.ಎಸ್. ನಾಗಾಭರಣ ಮಾತನಾಡಿ, "ಕನ್ನಡ ಕೇವಲ ನವೆಂಬರ್ ತಿಂಗಳ ಆಚರಣೆಯಾಗದೆ ‘ನಿತ್ಯೋತ್ಸವ’ವಾಗಬೇಕು. ಇಂದಿನ ದಿನಗಳಲ್ಲಿ ಆಂಗ್ಲ ಮಾಧ್ಯಮ ಶಾಲೆಗಳ ವ್ಯಾಮೋಹ ಹೆಚ್ಚಾಗಿದೆ. ಆದರೆ, ಪಾಲಿಕೆ ಶಾಲೆಗಳಲ್ಲಿ ಕನ್ನಡದ ಬೇರುಗಳನ್ನು ಗಟ್ಟಿಗೊಳಿಸುವ ಅದ್ಭುತ ಶಕ್ತಿಯಿದೆ. ಅನ್ಯಭಾಷಿಕರ ಮೇಲೆ ದ್ವೇಷ ಬೇಡ, ಬದಲಿಗೆ ಅವರಿಗೆ ಪ್ರೀತಿಯಿಂದ ಕನ್ನಡ ಕಲಿಸಿ, ಶಿಕ್ಷಣ, ಉದ್ಯೋಗ ಹಾಗೂ ನಿತ್ಯ ವ್ಯವಹಾರದಲ್ಲಿ ಕನ್ನಡವನ್ನು ಕಡ್ಡಾಯವಾಗಿ ಬಳಸುವಂತೆ ಮಾಡಬೇಕು" ಎಂದು ಕಿವಿಮಾತು ಹೇಳಿದರು.

ಅಪ್ಪು ಅವರಲ್ಲಿ ದೈವಿಕ ಶಕ್ತಿಯಿತ್ತು: ನಿರ್ದೇಶಕ ಎಸ್. ನಾರಾಯಣ್

ಖ್ಯಾತ ನಟ-ನಿರ್ದೇಶಕ ಎಸ್. ನಾರಾಯಣ್ ಮಾತನಾಡಿ, 'ಬೆಂಗಳೂರು ಸ್ವಚ್ಛವಾಗಿರಲು ಹಗಲಿರುಳು ದುಡಿಯುವ ಪೌರಕಾರ್ಮಿಕರೇ ನಿಜವಾದ ಸ್ವಚ್ಛತಾ ವಾರಿಯರ್ಸ್. ಕನ್ನಡಿಗರು ಮನೆಯಲ್ಲಿ ಮೊದಲು ಕನ್ನಡ ಬಳಸುವ ಅಭ್ಯಾಸ ಮಾಡಿಕೊಳ್ಳಬೇಕು. ಅಪ್ಪು ಅವರು ಕೇವಲ ನಟನಾಗಿರಲಿಲ್ಲ, ಅವರಲ್ಲಿ ದೈವಿಕ ಅಂಶವಿತ್ತು. ಅದಕ್ಕಾಗಿಯೇ ಇಡೀ ಕರುನಾಡು ಅವರನ್ನು ಇಂದಿಗೂ ಆರಾಧಿಸುತ್ತದೆ. ರಾಜ್‌ಕುಮಾರ್ ಕುಟುಂಬದ ಸರಳತೆ ಎಲ್ಲರಿಗೂ ಮಾದರಿ' ಎಂದು ಭಾವುಕರಾಗಿ ಸ್ಮರಿಸಿದರು.

ಕಲಾವಿದರು, ಸಾಧಕರಿಗೆ ‘ಅಪ್ಪು ಪ್ರಶಸ್ತಿ’ ಪ್ರದಾನ:

ವಿವಿಧ ಕ್ಷೇತ್ರಗಳಲ್ಲಿ ನಿಸ್ವಾರ್ಥ ಸೇವೆ ಸಲ್ಲಿಸಿದ ಗಣ್ಯರಿಗೆ ಪ್ರತಿಷ್ಠಿತ ‘ಕರ್ನಾಟಕ ರತ್ನ ಡಾ. ಪುನೀತ್ ರಾಜ್‌ಕುಮಾರ್ ಪ್ರಶಸ್ತಿ’ ನೀಡಿ ಗೌರವಿಸಲಾಯಿತು. ನಟ ಶರತ್ ಲೋಹಿತಾಶ್ವ, ಖ್ಯಾತ ಜಾನಪದ ಗಾಯಕ ಗುರುರಾಜ್ ಹೊಸಕೋಟೆ, ಹಿರಿಯ ನಟ ಬಾಲರಾಜ್, ನಟಿ ಭವಾನಿ ಪ್ರಕಾಶ್, ಕನ್ನಡ ಪರ ಹೋರಾಟಗಾರರು, ಸಾಹಿತಿಗಳು, ಪತ್ರಕರ್ತರು ಹಾಗೂ ಪಾಲಿಕೆಯ ಉತ್ತಮ ಅಧಿಕಾರಿಗಳು ಮತ್ತು ನೌಕರರಿಗೆ ಪ್ರಶಸ್ತಿ ನೀಡಿ ಸನ್ಮಾನಿಸಲಾಯಿತು.

ಕಾರ್ಯಕ್ರಮದಲ್ಲಿ ಮಾಜಿ ಮಹಾಪೌರರಾದ ಜೆ. ಹುಚ್ಚಪ್ಪ, ನಿವೃತ್ತ ಐಎಎಸ್ ಅಧಿಕಾರಿ ಡಾ. ಸಿ. ಸೋಮಶೇಖರ್, ಜಿಬಿಎ ನೌಕರರ ಕ್ಷೇಮಾಭಿವೃದ್ಧಿ ಸಂಘದ ಅಧ್ಯಕ್ಷ ಎ. ಅಮೃತ್ ರಾಜ್, ಕನ್ನಡ ಸಂಘದ ಅಧ್ಯಕ್ಷ ಹೆಚ್. ನಂಜಪ್ಪ, ಗೌರವ ಕಾರ್ಯದರ್ಶಿ ಪಿ. ದಯಾನಂದ್ ಹಾಗೂ ಹಾಸ್ಯನಟ ಮೂ.ಗು. ಸುರೇಶ್ ಉಪಸ್ಥಿತರಿದ್ದರು.

ಬೆಂಗಳೂರಿನ 4 ಕ್ಷೇತ್ರಗಳಿಗೆ ‘ಹೊಸ ಕಸ ವಿಲೇವಾರಿ ಸೂತ್ರ’: ವಾಹನಗಳಿಗೆ GPS ಕಡ್ಡಾಯ, ಗಾಡಿ ಓಡದಿದ್ದರೆ ಬಿಲ್ ಕಟ್!

Santosh Naik — Sat, 07 Nov 2026 19:43:41 +0530

ಬೆಂಗಳೂರು (ನ.07): ಬೆಂಗಳೂರಿನ ಬಹುದಿನಗಳ ತಲೆನೋವಾದ ಕಸದ ಸಮಸ್ಯೆಗೆ ಮುಕ್ತಿ ಹಾಡಲು ಸರ್ಕಾರ ಹೊಸ ಡಿಜಿಟಲ್ ಹೆಜ್ಜೆ ಇಟ್ಟಿದೆ. ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ವ್ಯಾಪ್ತಿಯಲ್ಲಿ ನೂತನ ಟೆಂಡರ್ ಪ್ರಕಾರ ಕಸ ವಿಲೇವಾರಿ ವ್ಯವಸ್ಥೆ ಜಾರಿಗೆ ಬರಲಿದ್ದು, ಮೊದಲ ಹಂತದಲ್ಲಿ ನಗರದ ಪ್ರಮುಖ 4 ವಿಧಾನಸಭಾ ಕ್ಷೇತ್ರಗಳಲ್ಲಿ ನವೆಂಬರ್ ಅಂತ್ಯದೊಳಗೆ ಈ ಹೊಸ ನಿಯಮಗಳು ಕಾರ್ಯಾರಂಭ ಮಾಡಲಿವೆ.

ವಿಕಾಸಸೌಧದಲ್ಲಿ ನಡೆದ ಉನ್ನತ ಮಟ್ಟದ ಪರಿಶೀಲನಾ ಸಭೆಯಲ್ಲಿ ಗ್ರೇಟರ್ ಬೆಂಗಳೂರು ಅಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ಅವರು ಈ ಮಹತ್ವದ ಆದೇಶ ನೀಡಿದ್ದಾರೆ. 'ಕಸ ಸಂಗ್ರಹಣಾ ವಾಹನಗಳಿಗೆ ಜಿಪಿಎಸ್ (GPS) ಇರಲೇಬೇಕು, ಇಲ್ಲದಿದ್ದರೆ ಗುತ್ತಿಗೆದಾರರಿಗೆ ಬಿಲ್ ಪಾವತಿಸುವುದಿಲ್ಲ' ಎಂದು ಖಡಕ್ ಎಚ್ಚರಿಕೆ ನೀಡಿದ್ದಾರೆ.

ಯಾವೆಲ್ಲಾ ಕ್ಷೇತ್ರಗಳಲ್ಲಿ ಮೊದಲು ಜಾರಿ?

ಹೊಸ ಟೆಂಡರ್ ಅಡಿಯಲ್ಲಿ ಸಿದ್ಧತೆಗಳು ಬಹುತೇಕ ಪೂರ್ಣಗೊಂಡಿದ್ದು, ಮೊದಲ ಹಂತದಲ್ಲಿ ಈ ಕೆಳಗಿನ ಕ್ಷೇತ್ರಗಳಲ್ಲಿ ನವೆಂಬರ್ ಅಂತ್ಯದಿಂದಲೇ ಹೊಸ ಮಾದರಿಯ ಕಸ ವಿಲೇವಾರಿ ಆರಂಭವಾಗಲಿದೆ:

ಗೋವಿಂದರಾಜನಗರ
ಮಹಾಲಕ್ಷ್ಮಿ ಲೇಔಟ್
ವಿಜಯನಗರ
ಚಾಮರಾಜಪೇಟೆ

ಇದಲ್ಲದೆ, ಚಿಕ್ಕಪೇಟೆ ವಿಧಾನಸಭಾ ಕ್ಷೇತ್ರದಲ್ಲಿ ಡಿಸೆಂಬರ್ ತಿಂಗಳಿನಿಂದ ಈ ನೂತನ ವ್ಯವಸ್ಥೆ ಅನುಷ್ಠಾನಗೊಳ್ಳಲಿದೆ.

ಹೊಸ ನಿಯಮದಲ್ಲೇನಿದೆ? ಕಸದ ಗಾಡಿಗಳಿಗೆ ಬಿಗ್ ಶಾಕ್!

ಜಿಪಿಎಸ್ ದತ್ತಾಂಶ ಇದ್ದರೆ ಮಾತ್ರ ಹಣ: ಇನ್ಮುಂದೆ ಕಸದ ಗಾಡಿಗಳು ರಸ್ತೆಗಿಳಿಯದೆ ಸುಳ್ಳು ಬಿಲ್ ಮಾಡಲು ಸಾಧ್ಯವೇ ಇಲ್ಲ. ವಾಹನಗಳು ನಿಗದಿತ ಮಾರ್ಗದಲ್ಲಿ ಸಂಚರಿಸಿವೆಯೇ ಎಂಬುದನ್ನು ಜಿಪಿಎಸ್ ಮೂಲಕ ಟ್ರ್ಯಾಕ್ ಮಾಡಲಾಗುತ್ತದೆ. ಜಿಪಿಎಸ್ ಡೇಟಾ ಆಧರಿಸಿ ಸಾಫ್ಟ್‌ವೇರ್ ಮೂಲಕ ಜನರೇಟ್ ಆಗುವ (System Generated) ಬಿಲ್‌ಗಳಿಗೆ ಮಾತ್ರ ಹಣ ಸಂದಾಯವಾಗಲಿದೆ.

ಜಿಪಿಎಸ್ ಇಲ್ಲದಿದ್ದರೆ ದಂಡ: ಯಾವುದೇ ವಾಹನದಲ್ಲಿ ಜಿಪಿಎಸ್ ಆಫ್ ಆಗಿದ್ದರೆ ಅಥವಾ ಕಾರ್ಯನಿರ್ವಹಿಸದಿದ್ದರೆ, ಆ ದಿನದ ಪೂರ್ತಿ ಬಿಲ್ ರದ್ದು ಮಾಡುವುದರ ಜೊತೆಗೆ ಗುತ್ತಿಗೆದಾರರಿಗೆ ದಂಡ (Penalty) ವಿಧಿಸಲಾಗುತ್ತದೆ.

ವಾಹನ, ಸಿಬ್ಬಂದಿಗೆ ಹೊಸ ಲುಕ್: ಕಸ ಸಂಗ್ರಹಣೆ ವಾಹನಗಳು ಏಕರೂಪದ ಬ್ರ್ಯಾಂಡಿಂಗ್, ಸೂಕ್ತ ಸ್ಟಿಕ್ಕರಿಂಗ್ ಹೊಂದಿರಬೇಕು. ಜೊತೆಗೆ ಕಸ ಸಂಗ್ರಹಿಸುವ ಪೌರಕಾರ್ಮಿಕರು ಹಾಗೂ ಸಿಬ್ಬಂದಿಗೆ ನೂತನ ಸಮವಸ್ತ್ರ ಕಡ್ಡಾಯಗೊಳಿಸಲಾಗಿದೆ.

‘ಬ್ಲ್ಯಾಕ್ ಸ್ಪಾಟ್‌’ಗಳಿಗೆ ಕಠಿಣ ಬ್ರೇಕ್: ರಸ್ತೆ ಬದಿಗಳಲ್ಲಿ ಕಸ ಸುರಿದು ‘ಬ್ಲ್ಯಾಕ್ ಸ್ಪಾಟ್’ ಮಾಡುವ ಕಿಡಿಗೇಡಿಗಳ ವಿರುದ್ಧ ನಿರ್ದಾಕ್ಷಿಣ್ಯ ಕ್ರಮ ಕೈಗೊಳ್ಳಲಾಗುವುದು. ಈ ಜಾಗಗಳನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಿ ನಿರ್ಮೂಲನೆ ಮಾಡಲು ಸಚಿವರು ಸೂಚಿಸಿದ್ದಾರೆ.

33 ಪ್ಯಾಕೇಜ್‌ಗಳ ಮೆಗಾ ಪ್ಲಾನ್!

ಬೆಂಗಳೂರಿನಲ್ಲಿ ಕಸ ವಿಲೇವಾರಿಗೆ ಸಂಬಂಧಿಸಿದಂತೆ ಒಟ್ಟು 33 ಪ್ಯಾಕೇಜ್‌ಗಳನ್ನು ರೂಪಿಸಲಾಗಿದೆ.

5 ಪ್ಯಾಕೇಜ್‌ಗಳಿಗೆ ಈಗಾಗಲೇ ವರ್ಕ್ ಆರ್ಡರ್ ನೀಡಲಾಗಿದೆ.

13 ಪ್ಯಾಕೇಜ್‌ಗಳಿಗೆ ಗುತ್ತಿಗೆ ಒಪ್ಪಿಗೆ ಪತ್ರ (LoA) ನೀಡಲಾಗಿದೆ.

10 ಪ್ಯಾಕೇಜ್‌ಗಳು ಸರ್ಕಾರದ ಅನುಮೋದನೆಗೆ ಕಾಯುತ್ತಿವೆ.

ಇನ್ನುಳಿದ 5 ಪ್ಯಾಕೇಜ್‌ಗಳು ಕೋರ್ಟ್ ಹಾಗೂ ತಾಂತ್ರಿಕ ಪ್ರಕ್ರಿಯೆಗಳ ಬಳಿಕ ಚಾಲನೆ ಪಡೆಯಲಿವೆ.

ಮನೆ-ಮನೆ ಸಮೀಕ್ಷೆಯ (Door-to-door survey) ಚೆಕ್‌ಲಿಸ್ಟ್ ವರದಿಯ ಆಧಾರದ ಮೇಲೆಯೇ ಈ ಇಡೀ ಯೋಜನೆಯನ್ನು ವೈಜ್ಞಾನಿಕವಾಗಿ ಜಾರಿಗೆ ತರಲಾಗುತ್ತಿದೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

Chikkamagaluru: ಕಾಲಲ್ಲಿ ಚಪ್ಪಲಿ ಇಲ್ಲ, ನಡೆಯೋಕೆ ದಾರಿ ಇಲ್ಲ; 6500 ಅಡಿ ಎತ್ತರದ ಬೆಟ್ಟವೇರಿದ 50 ಸಾವಿರಕ್ಕೂ ಅಧಿಕ ಭಕ್ತರು!

Sumanth SN — Sat, 07 Nov 2026 18:14:21 +0530

ಚಿಕ್ಕಮಗಳೂರು: 15 ಸಾವಿರಕ್ಕೂ ಅಧಿಕ ವಾಹನಗಳು. 50 ಸಾವಿರಕ್ಕೂ ಹೆಚ್ಚು ಭಕ್ತರು. ಕಾಲಲ್ಲಿ ಚಪ್ಪಲಿ ಇಲ್ಲ. ನಡೆಯೋಕೆ ದಾರಿ ಇಲ್ಲ. ಆದ್ರು ಬೆಟ್ಟದ ತಾಯಿಯನ್ನ ನೋಡೋ ತವಕ. ಇದು ಚಿಕ್ಕಮಗಳೂರಿನ ಮಲ್ಲೇನಹಳ್ಳಿ ದೇವಿರಮ್ಮನ ದರ್ಶನ ಪಡೆಯೋಕೆ ಇಂದು ಬಂದ ಭಕ್ತಸಾಗರ. ಸಮುದ್ರ ಮಟ್ಟದಿಂದ ಸುಮಾರು 6500 ಅಡಿ ಎತ್ತರದ ಬೆಟ್ಟದಲ್ಲಿ ನೆಲೆಸಿರೋ ಈ ಶಕ್ತಿ ದೇವಿಯನ್ನ ನೋಡಲು ಭಕ್ತ ಸಾಗರವೇ ಹರಿದು ಬಂದಿದೆ. ಭಕ್ತರು ಬರಿಗಾಲಲ್ಲಿ ಕಾಡು-ಮೇಡು ಅಲೆದು ದೇವಿಯ ದರ್ಶನ ಪಡೆದು ಪುನೀತರಾದ್ರು. ಭಕ್ತರ ಅನುಕೂಲಕ್ಕೆ ಈ ಬಾರಿ 2 ದಿನ ಬೆಟ್ಟ ಹತ್ತಲು ಜಿಲ್ಲಾಡಳಿತ ಅವಕಾಶ ನೀಡಿತ್ತು. ಇಂದು ಒಂದೇ ದಿನ ಸುಮಾರು 50 ಸಾವಿರದಷ್ಟು ಭಕ್ತರು ಬೆಟ್ಟ ಹತ್ತಿ ಬೆಟ್ಟದ ತಾಯಿಯನ್ನ ಕಂಡು ಪುಳಕಿತರಾಗಿದ್ದಾರೆ.

ನಾಳೆಯೂ ಬೆಟ್ಟ ಹತ್ತಲು ಅವಕಾಶ

ಹೀಗೆ ಬೆಟ್ಟಗಳ ಸಾಲಲ್ಲಿ ಇರುವೆಯಂತೆ ತಳುಕುತ್ತಾ-ಬಳುಕುತ್ತಾ-ತೆವಳುತ್ತಾ ಅಕ್ಕಪಕ್ಕದವರ ನೆರವಿನಿಂದ ಸಾಗ್ತಿರೋ ಇವರೆಲ್ಲಾ ಬಿಂಡಿಗ ದೇವಿರಮ್ಮನ ಭಕ್ತರು. ವರ್ಷಕ್ಕೊಮ್ಮೆ ದರ್ಶನ ಕೊಡೋ ಬೆಟ್ಟದ ತಾಯಿಯನ್ನ ನೋಡೋಕೆ ಈ ವರ್ಷ ನಿರೀಕ್ಷೆಗೂ ಮೀರಿದ ಭಕ್ತವೃಂದ ಆಗಮಿಸಿತ್ತು. ಪ್ರತಿ ವರ್ಷ 50 ಸಾವಿರಕ್ಕೂ ಅಧಿಕ ಭಕ್ತರು ಬೆಟ್ಟ ಹತ್ತುತ್ತಿದ್ರು. ಆದರೆ, ಕಳೆದ ಎರಡ್ಮೂರು ವರ್ಷಗಳಿಂದ ಮಳೆಯಿಂದ ಕೊಂಚ ಜನಸಂಖ್ಯೆ ಕ್ಷೀಣಿಸಿತ್ತು. ಆದರೆ, ಈ ವರ್ಷ ಬೆಟ್ಟ ಹತ್ತಿದ ಭಕ್ತರ ಸಂಖ್ಯೆ ಅಂದಾಜು 50 ಸಾವಿರ ದಾಟಿದೆ. ನಾಳೆಯೂ ಬೆಟ್ಟ ಹತ್ತಲು ಅವಕಾಶವಿದ್ದು, ಲಕ್ಷದ ಗಡಿಯೂ ದಾಟಬಹುದು.

ಕೊಂಚ ಎಡವಿದ್ರು ಪಾತಾಳ ಸೇರೋದು ಗ್ಯಾರಂಟಿ!

ದೀಪಾವಳಿ ಅಮವಾಸೆಯ ಹಿಂದಿನ ದಿನ ಬೆಟ್ಟದಲ್ಲಿರೋ ಶಿವನ ಅಸ್ತ್ರಗಳುಳ್ಳ ದುರ್ಗೆಗೆ ವಿಶೇಷ ಪೂಜೆ ನಡೆಯಲಿದೆ. ಆ ಪೂಜೆಯನ್ನ ನೋಡಿ ಕಣ್ತುಂಬಿಕೊಳ್ಳಲು ಭಕ್ತರು ಚಿಕ್ಕಮಗಳೂರು ತಾಲೂಕಿನ ಚಂದ್ರದ್ರೋಣ ಪರ್ವತದ ಸಾಲಿನಲ್ಲಿರುವ ಬಿಂಡಿಗ ಗ್ರಾಮಕ್ಕೆ ಬಂದೇ ಬರ್ತಾರೆ. ಇಲ್ಲಿ ಹರಕೆ ಕಟ್ಟಿದ್ರೆ ಆ ಹರಕೆ ಈಡೇರೋದ್ರಲ್ಲಿ ಅನುಮಾನವಿಲ್ಲ. ಅದಕ್ಕಾಗಿ ಹರಕೆ ಕಟ್ಟಿದ-ಕಟ್ಟದ ಭಕ್ತರು ಪ್ರತಿವರ್ಷ ಇಲ್ಲಿಗೆ ಬಂದೇ ಬರ್ತಾರೆ. ಕಿರಿದಾದ ಕಲ್ಲು-ಬಂಡೆ, ಮುಳ್ಳುಗಳ ಬೆಟ್ಟದಲ್ಲಿ ಭಕ್ತರು ಮುಂಜಾನೆಯಿಂದಲೇ ಬೆಟ್ಟ ಹತ್ತೋಕೆ ಶುರು ಮಾಡುತ್ತಾರೆ. ಬೆಟ್ಟವನ್ನೇರುವಾಗಿ ಕೊಂಚ ಎಡವಿದ್ರು ಪಾತಾಳ ಸೇರೋದು ಗ್ಯಾರಂಟಿ. ಈ ವರ್ಷದಿಂದ ಬೆಟ್ಟ ಏರಿ ದೇವಿ ದರ್ಶನ ಪಡೆಯಲು ಎರಡು ದಿನ ಅವಕಾಶ ನೀಡಲಾಗಿದ್ದು ಇಂದು ಮೊದಲ ದಿನವೇ 50 ಸಾವಿರಕ್ಕೂ ಅಧಿಕ ಭಕ್ತರು ದೇವಿ ದರ್ಶನ ಪಡೆದಿದ್ದಾರೆ. ‌ನಾಳೆ ನರಕ ಚತುರ್ದಶಿ ಹಿನ್ನೆಲೆ ಇನ್ನಷ್ಟು ಹೆಚ್ಚುವ ನಿರೀಕ್ಷೆ ಮಾಡಲಾಗಿದೆ. ಇಂದು ಚಿತ್ರನಟಿ ಅಮೂಲ್ಯ ಸೇರಿದಂತೆ ಬೇಲೂರು ಮೂಲದ ಅಂಗವಿಕಲ ಕುಮಾರ್ ಬೆಟ್ಟ ಏರಿದ್ದು ವಿಶೇಷವಾಗಿತ್ತು.

ಸಮುದ್ರಮಟ್ಟದಿಂದ ಸುಮಾರು 6500 ಅಡಿ ಎತ್ತದಲ್ಲಿರೋ ದೇವಿರಮ್ಮನ ಬೆಟ್ಟ

ಇಲ್ಲಿ ಹರಕೆ ಕಟ್ಟಿಕೊಂಡೋರು ಬೆಟ್ಟ ಹತ್ತುವಾಗ ಎಷ್ಟೇ ಕಷ್ಟವಾದ್ರು ಅವರ ಶಕ್ತಿಗನುಸಾರವಾಗಿ ಸೌದೆಯನ್ನ ಹೊತ್ತೊಯ್ಯುತ್ತಾರೆ. ಇದರ ಜೊತೆಗೆ, ಸೀರೆ, ತುಪ್ಪ, ಬೆಣ್ಣೆ, ಕಾಯಿ, ಬಾಳೆಹಣ್ಣನ್ನ ದೇವಿಗೆ ಸಮರ್ಪಿಸ್ತಾರೆ. ಸಮುದ್ರಮಟ್ಟದಿಂದ ಸುಮಾರು 6500 ಅಡಿ ಎತ್ತದಲ್ಲಿರೋ ದೇವಿರಮ್ಮನ ಬೆಟ್ಟದಲ್ಲಿ ವರ್ಷಕ್ಕೊಮ್ಮೆ ಮಾತ್ರ ಪೂಜೆ ನಡೆಯೋದು. ವ್ರತದ ಮೂಲಕ ಹರಕೆ ಕಟ್ಟಿ ಉಪವಾಸವಿದ್ದೋರು ದೇವರಿಗೆ ಪೂಜೆ ಸಲ್ಲಿಸಿದ ಬಳಿಕ ಬೆಟ್ಟದಲ್ಲಿ ಸಂಜೆ ದೀಪ ಬೆಳಗಿದ ನಂತರವೇ ಊಟ ಮಾಡೋದು. ಆದರೆ, ಈ‌ ವರ್ಷ ಭಕ್ತರ ಸಂಖ್ಯೆ ಹೆಚ್ಚುವ ಸಾಧ್ಯತೆ ಇದ್ದ ಕಾರಣ ಜಿಲ್ಲಾಡಳಿತ ದೇವಾಲಯ ಆಡಳಿತ ಮಂಡಳಿಯ ‌ಜೊತೆ ಚರ್ಚೆ ನಡೆಸಿ ಎರಡು ದಿನಗಳ ಕಾಲ ಬೆಟ್ಟ ಏರಲು ಅವಕಾಶ ನೀಡಿತ್ತು.

ಒಂದೇ ದಿನ ಸುಮಾರು 50 ಸಾವಿರಕ್ಕೂ ಅಧಿಕ ಭಕ್ತರಿಂದ ದೇವಿ ದರ್ಶನ

ಇಂದು ಮುಂಜಾನೆ ಇಂದ ಬೆಟ್ಟ ಏರಿದ ಭಕ್ತರಿಗೆ 10 ಗಂಟೆಯಿಂದ ದೇವಿರಮ್ಮ ದರ್ಶನ ಭಾಗ್ಯ ಸಿಕ್ಕಿದೆ. ಇಂದು‌ ಒಂದೇ ದಿನ ಸುಮಾರು 50 ಸಾವಿರಕ್ಕೂ ಅಧಿಕ ಭಕ್ತರು ದೇವಿ ದರ್ಶನ ಪಡೆದಿದ್ದಾರೆ. ನಾಳೆ ಬೆಳಗ್ಗೆ 6 ಗಂಟೆಯಿಂದ ಮಧ್ಯಾಹ್ನ 3 ಗಂಟೆಯ ವರೆಗೆ ದರ್ಶನಕ್ಕೆ ಅವಕಾಶ ನೀಡಲಾಗಿದೆ. ಎರಡು ದಿನ ಭಕ್ತರು ತಂದ ಸೌದೆ, ಎಣ್ಣೆ, ಬೆಣ್ಣೆ, ಸೀರೆ, ರವಕೆಗಳಿಗೆ ನಾಳೆ ಸಂಜೆ ಬೆಟ್ಟದ ಮೇಲೆ ಅಗ್ನಿ ಸ್ಪರ್ಶ ಮಾಡಿದ ಮೇಲೆ ಚಿಕ್ಕಮಗಳೂರಿನ ಸುತ್ತಮುತ್ತಲಿನ ಜನ ಆ ಜ್ಯೋತಿಯನ್ನೇ ನೋಡಿದ ಬಳಿಕ ಅದಕ್ಕೆ ಆರತಿ ಮಾಡಿ ದೀಪಾವಳಿ ಆಚರಿಸೋದು. ಈ ಬೆಟ್ಟದ ತಾಯಿಗೂ ಮೈಸೂರು ಅರಸರಿಗೂ ತೀರಾ ಅವಿನಾಭಾವ ಸಂಬಂಧ. ಪ್ರತಿವರ್ಷ ಮೈಸೂರಿನ ಅರಮನೆಯಿಂದ ಈ ದೇವಾಲಯಕ್ಕೆ ಇಂದಿಗೂ ಎಣ್ಣೆ, ಸೀರೆ, ಅರಿಶಿನ-ಕುಂಕುಮ ಸೇರಿದಂತೆ ಪೂಜೆ ವಸ್ತುಗಳು ಬರುತ್ತದೆ. ಭದ್ರತೆಗಾಗಿ ಕೆಳಭಾಗದಿಂದ ಬೆಟ್ಟದ ಮೇಲ್ಬಾಗದ ವರೆಗೂ ಹಗ್ಗದ ವ್ಯವಸ್ಥೆ ಮಾಡಲಾಗಿತ್ತು. 500ಕ್ಕೂ ಅಧಿಕ ಪೊಲೀಸರು ಸೇರಿದಂತೆ ಅಗ್ನಿಶಾಮಕದಳ ಸಿಬ್ಬಂದಿಗಳು, ಆರೋಗ್ಯ ಇಲಾಖೆಯ ಸಿಬ್ಬಂದಿಗಳನ್ನ ನಿಯೋಜನೆ ಮಾಡಲಾಗಿತ್ತು.

ಒಟ್ಟಾರೆ, ಶಕ್ತಿ ದೇವತೆ ನೆಲಿಸಿರುವ ಬೆಟ್ಟದ ತಾಯಿಯನ್ನ ನೋಡೋಕೆ ಪ್ರತಿವರ್ಷ ರಾಜ್ಯ-ಹೊರರಾಜ್ಯದಿಂದಲೂ ಸಾವಿರಾರು ಭಕ್ತರು ಬರ್ತಾರೆ. ಇಲ್ಲಿನ ಆಹ್ಲಾದಕರ ವಾತಾವರಣವನ್ನ ಸವಿಯೋಕೆ ಬರೋರು ಉಂಟು, ಪ್ರೇಮಿಗಳು ಉಂಟು, ಕಷ್ಟವನ್ನ ಪರಿಹರಿಸೆ ತಾಯಿ ಅಂತ ಬೇಡೋರು ಉಂಟು. ಬೆಟ್ಟ ಹತ್ತಿ ಎಂಜಾಯ್ ಮಾಡೋರು ಇದ್ದಾರೆ. ಆದರೆ, ಆ ಬೆಟ್ಟದ ತಾಯಿ ಮಾತ್ರ ತನ್ನ ಮಡಿಲಿಗೆ ಬರೋ ಯಾರೊಬ್ಬರಿಗೂ ಎಳ್ಳಷ್ಟು ಅನಾಹುತವಾಗದಂತೆ ಕಾಯ್ತಿದ್ದಾಳೆ. ಎರಡು ದಿನದ ಹಗಲಲ್ಲಿ ಬರುವ ಸುಮಾರು ಲಕ್ಷದಷ್ಟು ಭಕ್ತರನ್ನ ನಿಭಾಯಿಸಿ-ಸಂಭಾಳಿಸುವಷ್ಟರಲ್ಲಿ ಪೊಲೀಸರು ಮಾತ್ರ ಹೈರಾಣಾಗಿರ್ತಾರೆ. (ವರದಿ: ಆಲ್ದೂರು ಕಿರಣ್, ಏಷ್ಯಾನೆಟ್ ಸುವರ್ಣ ನ್ಯೂಸ್, ಚಿಕ್ಕಮಗಳೂರು)

ದೀಪಾವಳಿ ಶಾಪಿಂಗ್‌ಗೆ ಬೆಂಗಳೂರಿನ ಈ 8 ಮಾರ್ಕೆಟ್‌ಗಳು ಬೆಸ್ಟ್: ಕಡಿಮೆ ಬೆಲೆಗೆ ಸಿಗುತ್ತೆ ಎಲ್ಲವೂ!

Govindaraj S — Sat, 07 Nov 2026 18:07:54 +0530

ಬೆಂಗಳೂರಿನಲ್ಲಿ ದೀಪಾವಳಿ ಶಾಪಿಂಗ್ ಮಾಡಲು 8 ಮಾರ್ಕೆಟ್‌ಗಳ ಮಾಹಿತಿ ಇಲ್ಲಿದೆ. ಕಮರ್ಷಿಯಲ್ ಸ್ಟ್ರೀಟ್, ಚಿಕ್ಕಪೇಟೆ, ಜಯನಗರ 4ನೇ ಬ್ಲಾಕ್, ಗಾಂಧಿ ಬಜಾರ್ ಸೇರಿದಂತೆ ಈ ಮಾರುಕಟ್ಟೆಗಳಲ್ಲಿ ಹಬ್ಬದ ಬಟ್ಟೆಗಳು, ಆಭರಣಗಳು, ಗಿಫ್ಟ್‌ಗಳು, ಹೂವುಗಳು, ದೀಪಗಳು ಮತ್ತು ಮನೆ ಅಲಂಕಾರಿಕ ವಸ್ತುಗಳನ್ನು ಖರೀದಿಸಬಹುದು.

ಬೆಂಗಳೂರಿನಲ್ಲಿ ದೀಪಾವಳಿ ಶಾಪಿಂಗ್ ಮಾಡಲು ಸಾಕಷ್ಟು ಆಯ್ಕೆಗಳಿವೆ. ಹೂವುಗಳು, ಮಣ್ಣಿನ ದೀಪಗಳು ಮತ್ತು ಪೂಜಾ ವಸ್ತುಗಳನ್ನು ಮಾರುವ ಸಾಂಪ್ರದಾಯಿಕ ಮಾರುಕಟ್ಟೆಗಳಿಂದ ಹಿಡಿದು ಬಟ್ಟೆ, ಆಭರಣಗಳು ಹಾಗೂ ಗಿಫ್ಟ್ ಅಂಗಡಿಗಳಿರುವ ಜನಜಂಗುಳಿಯ ಬೀದಿಗಳವರೆಗೆ ಎಲ್ಲವೂ ಇಲ್ಲಿವೆ. ಹಬ್ಬದ ಬಟ್ಟೆಗಳು, ಮನೆ ಅಲಂಕಾರಿಕ ವಸ್ತುಗಳು, ಸಾಂಪ್ರದಾಯಿಕ ದೀಪಗಳು ಅಥವಾ ಲಕ್ಷ್ಮಿ ಪೂಜೆಗೆ ಬೇಕಾದ ವಸ್ತುಗಳನ್ನು ಹುಡುಕುತ್ತಿರುವವರಿಗೆ ನಗರದಾದ್ಯಂತ ಹಲವು ಮಾರುಕಟ್ಟೆಗಳು ಸೂಕ್ತ ಆಯ್ಕೆಗಳನ್ನು ನೀಡುತ್ತವೆ. ಕಮರ್ಷಿಯಲ್ ಸ್ಟ್ರೀಟ್, ಚಿಕ್ಕಪೇಟೆಯಿಂದ ಹಿಡಿದು ಜಯನಗರ 4ನೇ ಬ್ಲಾಕ್ ಮತ್ತು ಮಲ್ಲೇಶ್ವರಂ 8ನೇ ಕ್ರಾಸ್ ವರೆಗೆ, ದೀಪಾವಳಿ ಶಾಪಿಂಗ್‌ಗಾಗಿ ಭೇಟಿ ನೀಡಬಹುದಾದ ಬೆಂಗಳೂರಿನ 8 ಜನಪ್ರಿಯ ಮಾರುಕಟ್ಟೆಗಳ ಮಾಹಿತಿ ಇಲ್ಲಿದೆ.

ದಕ್ಷಿಣ ಬೆಂಗಳೂರಿನ ಜನಪ್ರಿಯ ಶಾಪಿಂಗ್ ತಾಣಗಳಲ್ಲಿ ಜಯನಗರ 4ನೇ ಬ್ಲಾಕ್ ಕೂಡ ಒಂದು. ಬಟ್ಟೆಗಳು, ಆಕ್ಸೆಸರೀಸ್, ಫುಟ್‌ವೇರ್ ಮತ್ತು ಗೃಹಬಳಕೆಯ ವಸ್ತುಗಳನ್ನು ಖರೀದಿಸುವ ಗ್ರಾಹಕರನ್ನು ಇದು ಆಕರ್ಷಿಸುತ್ತದೆ. ಶಾಪಿಂಗ್ ಕಾಂಪ್ಲೆಕ್ಸ್ ಮತ್ತು ಅದರ ಸುತ್ತಮುತ್ತಲಿನ ರಸ್ತೆಗಳಲ್ಲಿ ವಿವಿಧ ಬಜೆಟ್‌ಗಳಿಗೆ ಹೊಂದುವಂತಹ ಹಲವು ಅಂಗಡಿಗಳಿವೆ. ಹಬ್ಬದ ಸಮಯದಲ್ಲಿ ಗ್ರಾಹಕರು ಇಲ್ಲಿ ಸಾಂಪ್ರದಾಯಿಕ ಬಟ್ಟೆಗಳು, ಇಮಿಟೇಶನ್ ಜ್ಯುವೆಲರಿ, ಅಲಂಕಾರಿಕ ವಸ್ತುಗಳು, ದೀಪಗಳು, ಲೈಟ್ಸ್ ಮತ್ತು ಪೂಜಾ ಸಾಮಗ್ರಿಗಳನ್ನು ಹುಡುಕಬಹುದು. ಒಂದೇ ಭೇಟಿಯಲ್ಲಿ ಎಲ್ಲಾ ಶಾಪಿಂಗ್ ಮುಗಿಸಲು ಬಯಸುವ ಕುಟುಂಬಗಳಿಗೆ ಇದು ಹೇಳಿಮಾಡಿಸಿದ ಜಾಗ.

ಮಲ್ಲೇಶ್ವರಂ 8ನೇ ಕ್ರಾಸ್ ಬೆಂಗಳೂರಿನ ಪ್ರಸಿದ್ಧ ಸಾಂಪ್ರದಾಯಿಕ ಶಾಪಿಂಗ್ ತಾಣವಾಗಿದೆ. ಹಬ್ಬಗಳ ಸಮಯದಲ್ಲಿ ಈ ಮಾರುಕಟ್ಟೆ ವಿಶೇಷವಾಗಿ ಜನಪ್ರಿಯವಾಗುತ್ತದೆ. ಇಲ್ಲಿನ ಅಂಗಡಿಗಳು ಮತ್ತು ರಸ್ತೆಬದಿಯ ವ್ಯಾಪಾರಿಗಳು ಹೂವುಗಳು, ಹಾರಗಳು, ಮಣ್ಣಿನ ದೀಪಗಳು, ರಂಗೋಲಿ ಬಣ್ಣಗಳು ಮತ್ತು ಇತರ ಅಲಂಕಾರಿಕ ವಸ್ತುಗಳನ್ನು ಮಾರಾಟ ಮಾಡುತ್ತಾರೆ. ಗ್ರಾಹಕರು ಸೀರೆಗಳು, ಸಾಂಪ್ರದಾಯಿಕ ಬಟ್ಟೆಗಳು, ಗೃಹಬಳಕೆಯ ಉತ್ಪನ್ನಗಳು ಮತ್ತು ಹಬ್ಬದ ಆಕ್ಸೆಸರೀಸ್‌ಗಳನ್ನು ಮಾರುವ ಅಂಗಡಿಗಳನ್ನೂ ಇಲ್ಲಿ ಅನ್ವೇಷಿಸಬಹುದು. ಬಟ್ಟೆ ಶಾಪಿಂಗ್ ಜೊತೆಗೆ ಹೂವುಗಳು ಮತ್ತು ಇತರ ದೀಪಾವಳಿ ವಸ್ತುಗಳನ್ನು ಒಂದೇ ಕಡೆ ಖರೀದಿಸಲು ಬಯಸುವವರಿಗೆ ಈ ಪ್ರದೇಶ ಉತ್ತಮ ಆಯ್ಕೆಯಾಗಿದೆ.

ಬೆಂಗಳೂರಿನ ಅತ್ಯುತ್ತಮ ಶಾಪಿಂಗ್ ತಾಣಗಳಲ್ಲಿ ಕಮರ್ಷಿಯಲ್ ಸ್ಟ್ರೀಟ್ ಮುಂಚೂಣಿಯಲ್ಲಿದೆ, ವಿಶೇಷವಾಗಿ ಬಟ್ಟೆ, ಫುಟ್‌ವೇರ್, ಆಭರಣಗಳು ಮತ್ತು ಫ್ಯಾಶನ್ ಆಕ್ಸೆಸರೀಸ್‌ಗಳಿಗೆ ಇದು ಹೆಸರುವಾಸಿ. ಸದಾ ಜನಜಂಗುಳಿಯಿಂದ ಕೂಡಿರುವ ಈ ಬೀದಿಯಲ್ಲಿ ಬ್ರಾಂಡೆಡ್ ಔಟ್‌ಲೆಟ್‌ಗಳು, ಸ್ವತಂತ್ರ ಸ್ಟೋರ್‌ಗಳು ಮತ್ತು ರಸ್ತೆಬದಿಯ ಅಂಗಡಿಗಳು ಒಟ್ಟಿಗೇ ಕಾಣಸಿಗುತ್ತವೆ. ದೀಪಾವಳಿಗಾಗಿ ಗ್ರಾಹಕರು ಇಲ್ಲಿ ಎಥ್ನಿಕ್ ವೇರ್, ಕುರ್ತಾ ಸೆಟ್‌ಗಳು, ಡ್ರೆಸ್‌ಗಳು, ಹ್ಯಾಂಡ್‌ಬ್ಯಾಗ್‌ಗಳು, ಫುಟ್‌ವೇರ್, ಇಮಿಟೇಶನ್ ಜ್ಯುವೆಲರಿ ಮತ್ತು ಗಿಫ್ಟ್ ಐಟಂಗಳನ್ನು ಹುಡುಕಬಹುದು. ಒಂದೇ ಸ್ಥಳದಲ್ಲಿ ಹಬ್ಬದ ಬಟ್ಟೆಗಳು ಮತ್ತು ಆಕ್ಸೆಸರೀಸ್‌ಗಳನ್ನು ಖರೀದಿಸಲು ಬಯಸುವವರಿಗೆ ಇದು ಅಚ್ಚುಮೆಚ್ಚಿನ ತಾಣ.

ಬೆಂಗಳೂರಿನ ಸಾಂಪ್ರದಾಯಿಕ ಸಗಟು ಮತ್ತು ಚಿಲ್ಲರೆ ಶಾಪಿಂಗ್ ಹಬ್‌ಗಳಲ್ಲಿ ಚಿಕ್ಕಪೇಟೆ ಪ್ರಮುಖವಾದದ್ದು. ವಿಶೇಷವಾಗಿ ಟೆಕ್ಸ್‌ಟೈಲ್ಸ್ ಮತ್ತು ಸೀರೆಗಳಿಗೆ ಇದು ಹೆಸರುವಾಸಿಯಾಗಿದೆ. ಈ ಮಾರುಕಟ್ಟೆಯಲ್ಲಿ ರೇಷ್ಮೆ ಸೀರೆಗಳು, ಡ್ರೆಸ್ ಮೆಟೀರಿಯಲ್ಸ್, ಬಟ್ಟೆಗಳು, ಸಾಂಪ್ರದಾಯಿಕ ಉಡುಪುಗಳು ಮತ್ತು ಕ್ಲೋಥಿಂಗ್ ಆಕ್ಸೆಸರೀಸ್‌ಗಳನ್ನು ಮಾರುವ ಅಸಂಖ್ಯಾತ ಅಂಗಡಿಗಳಿವೆ. ಹಬ್ಬ ಮತ್ತು ವಿಶೇಷ ಸಂದರ್ಭಗಳಿಗೆ ಬೇಕಾದ ಬಟ್ಟೆಗಳನ್ನು ಖರೀದಿಸುವವರಿಗೆ ಇದು ಜನಪ್ರಿಯ ತಾಣವಾಗಿದ್ದು, ವಿವಿಧ ಬೆಲೆಗಳಲ್ಲಿ ಆಯ್ಕೆಗಳಿವೆ. ದೀಪಾವಳಿಗೆ ಸೀರೆಗಳು ಅಥವಾ ಬಟ್ಟೆಗಳನ್ನು ಖರೀದಿಸಲು ಯೋಜಿಸುವವರು ಇಲ್ಲಿನ ಹಲವು ಅಂಗಡಿಗಳಿಗೆ ಭೇಟಿ ನೀಡಿ ಕಲೆಕ್ಷನ್‌ಗಳನ್ನು ಹೋಲಿಸಿ ನೋಡಬಹುದು.

ಸಿಟಿ ಮಾರ್ಕೆಟ್ ಎಂದೂ ಕರೆಯಲ್ಪಡುವ ಕೆ.ಆರ್. ಮಾರ್ಕೆಟ್, ಬೆಂಗಳೂರಿನ ಪ್ರಮುಖ ಸಾಂಪ್ರದಾಯಿಕ ಮಾರುಕಟ್ಟೆಗಳಲ್ಲಿ ಒಂದಾಗಿದೆ. ವಿಶೇಷವಾಗಿ ದೊಡ್ಡ ಮಟ್ಟದ ಹೂವಿನ ವ್ಯಾಪಾರಕ್ಕೆ ಇದು ಹೆಸರುವಾಸಿಯಾಗಿದ್ದು, ದೀಪಾವಳಿ ಆಚರಣೆಗೆ ಸಿದ್ಧತೆ ನಡೆಸುವವರಿಗೆ ಜನಪ್ರಿಯ ತಾಣವಾಗಿದೆ. ಮನೆ ಅಲಂಕಾರ ಮತ್ತು ಪೂಜಾ ವಿಧಿಗಳಿಗೆ ಬಳಸುವ ಚೆಂಡು ಹೂವು, ಮಲ್ಲಿಗೆ, ಗುಲಾಬಿ, ಹಾರಗಳು ಮತ್ತು ಇತರ ಹೂವುಗಳನ್ನು ಗ್ರಾಹಕರು ಇಲ್ಲಿ ಖರೀದಿಸಬಹುದು. ಹಣ್ಣುಗಳು, ಬಾಳೆ ಎಲೆಗಳು ಮತ್ತು ಇತರ ಹಬ್ಬದ ವಸ್ತುಗಳನ್ನು ಮಾರುವ ವ್ಯಾಪಾರಿಗಳೂ ಈ ಮಾರುಕಟ್ಟೆಯಲ್ಲಿದ್ದಾರೆ. ಹೆಚ್ಚಿನ ಪ್ರಮಾಣದಲ್ಲಿ ಹೂವುಗಳನ್ನು ಖರೀದಿಸಲು ಯೋಜಿಸುವವರು ಮುಂಜಾನೆ ಭೇಟಿ ನೀಡುವುದು ಸೂಕ್ತ.

ದಕ್ಷಿಣ ಬೆಂಗಳೂರಿನ ಮತ್ತೊಂದು ಶಾಪಿಂಗ್ ತಾಣವೆಂದರೆ ಬನಶಂಕರಿ ಬಿಡಿಎ ಕಾಂಪ್ಲೆಕ್ಸ್, ಇಲ್ಲಿ ಬಟ್ಟೆಗಳು, ಆಕ್ಸೆಸರೀಸ್, ಗೃಹಬಳಕೆಯ ಉತ್ಪನ್ನಗಳು ಮತ್ತು ದಿನನಿತ್ಯದ ಅಗತ್ಯ ವಸ್ತುಗಳನ್ನು ಮಾರುವ ಅಂಗಡಿಗಳಿವೆ. ಹಬ್ಬದ ಸೀಸನ್‌ನಲ್ಲಿ ಗ್ರಾಹಕರು ಸಾಂಪ್ರದಾಯಿಕ ಬಟ್ಟೆಗಳು, ಫುಟ್‌ವೇರ್, ಗಿಫ್ಟ್ ಐಟಂಗಳು ಮತ್ತು ಗೃಹಬಳಕೆಯ ವಸ್ತುಗಳನ್ನು ಖರೀದಿಸಲು ಸುತ್ತಮುತ್ತಲಿನ ವಾಣಿಜ್ಯ ಪ್ರದೇಶಕ್ಕೆ ಭೇಟಿ ನೀಡಬಹುದು. ಸ್ಥಳೀಯ ಅಂಗಡಿಗಳಿರುವ ಈ ಮಾರುಕಟ್ಟೆ, ಬನಶಂಕರಿ ಮತ್ತು ಸುತ್ತಮುತ್ತಲಿನ ನಿವಾಸಿಗಳಿಗೆ ಅನುಕೂಲಕರ ಆಯ್ಕೆಯಾಗಿದೆ.

ಬಸವನಗುಡಿಯ ಗಾಂಧಿ ಬಜಾರ್ ಸಾಂಪ್ರದಾಯಿಕ ಶಾಪಿಂಗ್ ವಾತಾವರಣ ಮತ್ತು ಹಬ್ಬದ ವಸ್ತುಗಳಿಗೆ ಹೆಸರುವಾಸಿಯಾಗಿದೆ. ಹೂವುಗಳು, ಪೂಜಾ ಸಾಮಗ್ರಿಗಳು, ಹಣ್ಣುಗಳು, ಸಿಹಿತಿಂಡಿಗಳು ಮತ್ತು ಗೃಹಬಳಕೆಯ ವಸ್ತುಗಳನ್ನು ಹುಡುಕುವ ಗ್ರಾಹಕರನ್ನು ಈ ಮಾರುಕಟ್ಟೆ ಆಕರ್ಷಿಸುತ್ತದೆ. ದೀಪಾವಳಿ ಸಮಯದಲ್ಲಿ, ವ್ಯಾಪಾರಿಗಳು ಮಣ್ಣಿನ ದೀಪಗಳು, ಅಲಂಕಾರಿಕ ದೀಪಗಳು, ಆಕಾಶಬುಟ್ಟಿಗಳು, ಲೈಟಿಂಗ್ ಆಕ್ಸೆಸರೀಸ್ ಮತ್ತು ಇತರ ಹಬ್ಬದ ಅಲಂಕಾರಿಕ ವಸ್ತುಗಳನ್ನು ಮಾರಾಟ ಮಾಡುತ್ತಾರೆ. ಮನೆ ಅಲಂಕಾರ ಮತ್ತು ಲಕ್ಷ್ಮಿ ಪೂಜೆಗೆ ಸಾಂಪ್ರದಾಯಿಕ ವಸ್ತುಗಳನ್ನು ಖರೀದಿಸಲು ಬಯಸುವ ಗ್ರಾಹಕರಿಗೆ ಈ ಪ್ರದೇಶ ವಿಶೇಷವಾಗಿ ಸೂಕ್ತವಾಗಿದೆ.

ಬೆನ್ಸನ್ ಟೌನ್ ಪ್ರದೇಶದಲ್ಲಿರುವ ಪಾಟರಿ ಟೌನ್, ಸಾಂಪ್ರದಾಯಿಕ ಮಣ್ಣಿನ ಪಾತ್ರೆಗಳು ಮತ್ತು ಮಣ್ಣಿನ ಉತ್ಪನ್ನಗಳನ್ನು ಹುಡುಕುವವರಿಗೆ ಜನಪ್ರಿಯ ತಾಣವಾಗಿದೆ. ದೀಪಾವಳಿಗೂ ಮುನ್ನ, ತಮ್ಮ ಮನೆಗಳನ್ನು ಅಲಂಕರಿಸಲು ಮಣ್ಣಿನ ದೀಪಗಳನ್ನು ಖರೀದಿಸಲು ಆಸಕ್ತಿ ಹೊಂದಿರುವ ಗ್ರಾಹಕರು ಈ ಪ್ರದೇಶಕ್ಕೆ ಆಗಮಿಸುತ್ತಾರೆ. ಮಣ್ಣಿನ ದೀಪಗಳು, ಮಡಿಕೆಗಳು, ಅಲಂಕಾರಿಕ ವಸ್ತುಗಳು ಮತ್ತು ಇತರ ಮಣ್ಣಿನ ಉತ್ಪನ್ನಗಳನ್ನು ಮಾರಾಟ ಮಾಡುವ ಅಂಗಡಿಗಳು ಮತ್ತು ಕುಂಬಾರಿಕೆ ಘಟಕಗಳನ್ನು ಸಂದರ್ಶಕರು ಅನ್ವೇಷಿಸಬಹುದು. ಸಾಮೂಹಿಕವಾಗಿ ಉತ್ಪಾದಿಸುವ ಅಲಂಕಾರಿಕ ವಸ್ತುಗಳ ಬದಲಾಗಿ ಸಾಂಪ್ರದಾಯಿಕ ವಸ್ತುಗಳನ್ನು ಹುಡುಕುತ್ತಿರುವವರು ತಮ್ಮ ಹಬ್ಬದ ಖರೀದಿಗಾಗಿ ಪಾಟರಿ ಟೌನ್‌ಗೆ ಭೇಟಿ ನೀಡಲು ಪರಿಗಣಿಸಬಹುದು.

ಬೇಗನೆ ಭೇಟಿ ನೀಡಿ: ದೀಪಾವಳಿಗೆ ಮುನ್ನ ಜನಪ್ರಿಯ ಮಾರುಕಟ್ಟೆಗಳಲ್ಲಿ ಜನದಟ್ಟಣೆ ಹೆಚ್ಚಿರುತ್ತದೆ. ಬೆಳಿಗ್ಗೆ ಭೇಟಿ ನೀಡುವುದರಿಂದ ಶಾಪಿಂಗ್ ಹೆಚ್ಚು ಅನುಕೂಲಕರವಾಗಿರುತ್ತದೆ.

ಬೆಲೆಗಳನ್ನು ಹೋಲಿಸಿ: ವಿಶೇಷವಾಗಿ ಚಿಕ್ಕಪೇಟೆ ಮತ್ತು ಕಮರ್ಷಿಯಲ್ ಸ್ಟ್ರೀಟ್‌ನಂತಹ ಮಾರುಕಟ್ಟೆಗಳಲ್ಲಿ ವಿವಿಧ ಅಂಗಡಿಗಳಲ್ಲಿ ಬೆಲೆಗಳನ್ನು ಪರಿಶೀಲಿಸಿ.

ಕ್ಯಾಶ್ ಇಟ್ಟುಕೊಳ್ಳಿ ಹಾಗೂ ಯುಪಿಐ ಬಳಸಿ: ಹಲವು ಅಂಗಡಿಗಳು ಡಿಜಿಟಲ್ ಪೇಮೆಂಟ್‌ಗಳನ್ನು ಸ್ವೀಕರಿಸುತ್ತವೆಯಾದರೂ, ಸಣ್ಣ ಸ್ಟಾಲ್‌ಗಳಲ್ಲಿ ಶಾಪಿಂಗ್ ಮಾಡುವಾಗ ಸ್ವಲ್ಪ ಕ್ಯಾಶ್ ಇಟ್ಟುಕೊಳ್ಳುವುದು ಉಪಯುಕ್ತವಾಗಿರುತ್ತದೆ.

ನಿಮ್ಮ ಶಾಪಿಂಗ್ ಪ್ಲಾನ್ ಮಾಡಿ: ಪ್ರಯಾಣದ ಸಮಯ ಉಳಿಸಲು ಹತ್ತಿರದ ಮಾರುಕಟ್ಟೆಗಳನ್ನು ಒಟ್ಟಿಗೆ ಭೇಟಿ ಮಾಡಲು ಪರಿಗಣಿಸಿ.

ನಿಮ್ಮ ಖರೀದಿಗಳನ್ನು ಪರಿಶೀಲಿಸಿ: ಪೇಮೆಂಟ್ ಮಾಡುವ ಮೊದಲು ಬಟ್ಟೆ, ಅಲಂಕಾರಿಕ ದೀಪಗಳು ಮತ್ತು ಇತರ ಉತ್ಪನ್ನಗಳನ್ನು ಪರೀಕ್ಷಿಸಿ. ಹಬ್ಬದ ಬಟ್ಟೆಗಳು ಮತ್ತು ಆಕ್ಸೆಸರೀಸ್‌ಗಳಿಂದ ಹಿಡಿದು ಹೂವುಗಳು, ಮಣ್ಣಿನ ದೀಪಗಳು ಮತ್ತು ಸಾಂಪ್ರದಾಯಿಕ ಅಲಂಕಾರಗಳವರೆಗೆ, ದೀಪಾವಳಿಗೆ ಸಿದ್ಧತೆ ನಡೆಸುವ ಗ್ರಾಹಕರಿಗೆ ಬೆಂಗಳೂರಿನ ಮಾರುಕಟ್ಟೆಗಳು ಹಲವು ಆಯ್ಕೆಗಳನ್ನು ನೀಡುತ್ತವೆ. ಈ ಶಾಪಿಂಗ್ ತಾಣಗಳನ್ನು ಅನ್ವೇಷಿಸುವುದರಿಂದ ದಿನನಿತ್ಯದ ಅಗತ್ಯಗಳಿಂದ ಹಿಡಿದು ಸಾಂಪ್ರದಾಯಿಕ ಹಬ್ಬದ ವಸ್ತುಗಳವರೆಗೆ ಎಲ್ಲವನ್ನೂ ಹುಡುಕಲು ಸಂದರ್ಶಕರಿಗೆ ಸಹಾಯವಾಗುತ್ತದೆ.

ರೈಲಿನಲ್ಲಿ ನೋ ಟಿಕೆಟ್, ಆಟೋನೇ ನಮ್ಮ ಫ್ಲೈಟ್; ಬೆಂಗಳೂರು ಟು ಬಿಹಾರ: ಹಬ್ಬದ ಹೊತ್ತಲ್ಲಿ 2,200 ಕಿ.ಮೀ ಆಟೋ ಜರ್ನಿ

Bhimasi M Koleppanavar — Sat, 07 Nov 2026 18:01:39 +0530

ಛಠ್ ಪೂಜೆಗೂ ಮುನ್ನ ದೃಢೀಕೃತ ರೈಲು ಟಿಕೆಟ್‌ ಪಡೆಯುವುದು ಕಷ್ಟ. ವಿಮಾನ ದರಗಳು ಗಗನಕ್ಕೇರಿದ್ದರಿಂದ, ಬೆಂಗಳೂರಿನಲ್ಲಿ ವಾಸಿಸುವ ಬಿಹಾರದ ನಾಲ್ವರು ಯುವಕರು ಹಬ್ಬಕ್ಕೆ ಮನೆಗೆ ತಲುಪಲು ಅನ್ಯ ಮಾರ್ಗವನ್ನು ತೆಳೆದಿದ್ದಾರೆ. ರೈಲಿಗಾಗಿ ಕಾಯುವ ಬದಲು, ಅದರಂತೆ ವಿಮಾನ ಪ್ರಯಾಣಕ್ಕಾಗಿ ಭಾರಿ ಮೊತ್ತವನ್ನು ಖರ್ಚು ಮಾಡುವ ಬದಲು, ಅವರು ಬೆಂಗಳೂರಿನಿಂದ ಬಿಹಾರದ ಮೋತಿಹಾರಿಗೆ ಮೂರು ಚಕ್ರಗಳ ಆಟೋರಿಕ್ಷಾದಲ್ಲಿ ಸುಮಾರು 2,200 ಕಿ.ಮೀ ಪ್ರಯಾಣವನ್ನು ಪ್ರಾರಂಭಿಸಿದ್ದಾರೆ. ಈ ಕುರಿತು ಕಂಪ್ಲೀಟ್‌ ಸ್ಟೋರಿ ಇಲ್ಲಿದೆ.

ಇಲ್ಲಿ ಗಮನ ಸೆಳೆದ್ದಿದ್ದೇನು?

ಪ್ರಯಾಣದ ಸೌಕರ್ಯಕ್ಕಿಂತ, ಛಠ್ ಪೂಜೆಗೆ ಸಮಯಕ್ಕೆ ಸರಿಯಾಗಿ ಮನೆಗೆ ತಲುಪುವುದು ಮತ್ತು ಅವರ ಕುಟುಂಬಗಳೊಂದಿಗೆ ಹಬ್ಬವನ್ನು ಆಚರಿಸುವುದು ಈ ನಾಲ್ವರು ಪುರುಷರಿಗೆ ಹೆಚ್ಚು ಮುಖ್ಯವಾಗಿತ್ತು. ಸಾಮಾನ್ಯವಾಗಿ ಸಣ್ಣ ಪ್ರಯಾಣಕ್ಕೆ ಬಳಸುವ ವಾಹನದಲ್ಲಿ ಇಷ್ಟು ದೂರ ಕ್ರಮಿಸುವ ಅವರ ನಿರ್ಧಾರವು ಗಮನ ಸೆಳೆದಿದೆ. ಆದ್ದರಿಂದ ಅವನ ಪಯಣ ಹೇಗೆ ಸಾಗಿದೆ ಎನ್ನುವುದನ್ನು ನೋಡೋಣ ಬನ್ನಿ.

ಬೆಂಗಳೂರಿನಿಂದ ಬಿಹಾರಕ್ಕೆ; ಆಟೋರಿಕ್ಷಾದಲ್ಲಿ 2,200 ಕಿ.ಮೀ ಪ್ರಯಾಣ!

ಬೆಂಗಳೂರು ಮತ್ತು ಬಿಹಾರದ ಮೋತಿಹರಿಯ ಅರೆರಾಜ್ ಪ್ರದೇಶದ ನಡುವಿನ ಅಂತರ ಸುಮಾರು 2,100-2,200 ಕಿ.ಮೀ. ಈ ನಾಲ್ವರು ಹುಡುಗರು ತಮ್ಮ ಆಟೋರಿಕ್ಷಾದಲ್ಲಿ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಪ್ರಯಾಣಿಸಿದ್ದಾರೆ. ಇಷ್ಟು ದೀರ್ಘ ರಸ್ತೆ ಪ್ರಯಾಣದಿಂದ ಉಂಟಾದ ದೈಹಿಕ ಆಯಾಸ ಮತ್ತು ಅಸ್ವಸ್ಥತೆ ಹೊರತಾಗಿ್ಲದೇಯೂ ತಮ್ಮ ಪ್ರಯಾಣ ಮುಂದುವರೆಸಿದರು. ಈ ಪ್ರಯಾಣವು ವಿಭಿನ್ನ ಹವಾಮಾನ ಪರಿಸ್ಥಿತಿಗಳಲ್ಲಿ ಪ್ರಯಾಣಿಸುವುದು ಮತ್ತು ರಸ್ತೆಯಲ್ಲಿ ದೀರ್ಘ ಗಂಟೆಗಳ ಕಾಲ ಕಳೆಯುವ ಸವಾಲುಗಳನ್ನು ಎದುರಿಸುವುದನ್ನು ಒಳಗೊಂಡಿತ್ತು. ಆದರೆ ಈ ಛಠ್ ಆಚರಣೆಗಳಿಗೆ ಮುಂಚಿತವಾಗಿ ತಮ್ಮ ಗ್ರಾಮ ತಲುಪುವ ಅವರ ದೃಢಸಂಕಲ್ಪ ಇತ್ತಲ್ಲಾ, ಅವರನ್ನು ಮುಂದುವರಿಸಿದೆ.

ಸೋಮೇಶ್ವರನಾಥ ದೇವಾಲಯ ತಲುಪಿದ ಆಟೋ!

ನಾಲ್ಕು ಹುಡುಗರು ಮೋತಿಹಾರಿಯಲ್ಲಿರುವ ಸೋಮೇಶ್ವರನಾಥ ದೇವಾಲಯ ತಲುಪುತ್ತಾರೆ. ದೀರ್ಘ ದೂರ ಕ್ರಮಿಸಿದ ನಂತರ, ಆಟೋರಿಕ್ಷಾ ಕೊನೆಗೂ ಮೋತಿಹಾರಿಯಲ್ಲಿರುವ ಐತಿಹಾಸಿಕ ಸೋಮೇಶ್ವರನಾಥ ದೇವಾಲಯ ತಲುಪಿದೆ. ಈ ಆಗಮನ ಅವರ ಕಠಿಣ ಪ್ರಯಾಣದ ಅಂತ್ಯ ಸೂಚಿಸಿತು. ಈಗ ಅವರ ಊರು ಮತ್ತು ಕುಟುಂಬಗಳಿಗೆ ಹತ್ತಿರವಾಗಿದ್ದ ನಾಲ್ವರಿಗೆ ಸಮಾಧಾನ ತಂದಿದೆ. ಅವರ ಪ್ರಯಾಣವು ತಮ್ಮ ಪ್ರೀತಿಪಾತ್ರರೊಂದಿಗೆ ಛಠ್ ಪೂಜೆ ಆಚರಣೆಗಳಲ್ಲಿ ಭಾಗವಹಿಸುವ ಬಯಕೆಯಿಂದ ಜನ್ಮತಾಳಿತ್ತು. ಅದು ಇನ್ನೇನು ಪೂರ್ಣಗೊಳ್ಳುವ ಹಂತದಲ್ಲಿದೆ.

ಛಠ್ ಪೂಜೆ; ಬಿಹಾರದ ಜನರು ಹಬ್ಬಕ್ಕೆ ಮನೆಗೆ ಏಕೆ ಪ್ರಯಾಣಿಸುತ್ತಾರೆ!

ಛಠ್ ಪೂಜೆಯು ಬಿಹಾರದ ಜನರಿಗೆ ಅಪಾರ ಧಾರ್ಮಿಕ ಮತ್ತು ಸಾಂಸ್ಕೃತಿಕ ಮಹತ್ವವನ್ನು ಹೊಂದಿದೆ. ಸೂರ್ಯ ದೇವರು ಮತ್ತು ಛಠಿ ಮೈಯಾಗೆ ಸಮರ್ಪಿತವಾದ ಈ ನಾಲ್ಕು ದಿನಗಳ ಉತ್ಸವದಲ್ಲಿ ಭಕ್ತರು ಕಠಿಣ ಉಪವಾಸಗಳನ್ನು ಆಚರಿಸುತ್ತಾರೆ ಮತ್ತು ಸೂರ್ಯಾಸ್ತ ಮತ್ತು ಉದಯಿಸುತ್ತಿರುವ ಸೂರ್ಯನಿಗೆ ಅರ್ಘ್ಯ ಅರ್ಪಿಸುತ್ತಾರೆ.

ಛಠ್‌ ಮೇಲೆ ಕಡಿಮೆಯಾಗದ ಬಿಹಾರಿಗಳ ಪ್ರೀತಿ!

ದೇಶದ ಇತರ ಭಾಗಗಳಲ್ಲಿ ವಾಸಿಸುವ ಮತ್ತು ಕೆಲಸ ಮಾಡುವ ಬಿಹಾರದ ಜನರಿಗೆ, ಛಠ್ ತಮ್ಮ ಊರುಗಳಿಗೆ ಮರಳಲು ಮತ್ತು ತಮ್ಮ ಕುಟುಂಬಗಳೊಂದಿಗೆ ಆಚರಿಸಲು ಸೇರುವ ಒಂದು ಸಂದರ್ಭವಾಗಿದೆ. ಆಚರಣೆಗಳಲ್ಲಿ ಭಾಗವಹಿಸಲು ಅನೇಕರು ದೀರ್ಘ ಪ್ರಯಾಣ ಕೈಗೊಳ್ಳುತ್ತಾರೆ, ಇದು ಹಬ್ಬದ ಅವಧಿ ಪ್ರಮುಖ ನಗರಗಳನ್ನು ಬಿಹಾರಕ್ಕೆ ಸಂಪರ್ಕಿಸುವ ಮಾರ್ಗಗಳಲ್ಲಿ ಅತ್ಯಂತ ಜನನಿಬಿಡ ಪ್ರಯಾಣದ ಋತುಗಳಲ್ಲಿ ಒಂದನ್ನಾಗಿ ಮಾಡುತ್ತದೆ. ಛಠ್ ಪೂಜೆ ಸಮಯದಲ್ಲಿ ಜನರು ತಮ್ಮ ಕುಟುಂಬಗಳೊಂದಿಗೆ ಇರಲು ಎಷ್ಟೊಂದು ದೂರ ಹೋಗುತ್ತಾರೆ ಎಂಬುದಕ್ಕೆ ಬೆಂಗಳೂರಿನ ಈ ನಾಲ್ವರು ಯುವಕರ ಪ್ರಯಾಣ ಮತ್ತೊಂದು ಉದಾಹರಣೆಯಾಗಿದೆ.

ಬ್ಲೂ ಲೈನ್ ಮೆಟ್ರೋ ಓಪನ್ ಯಾವಾಗ? 2028ರ ಮಾರ್ಚ್‌ಗೆ ವಿಮಾನ ನಿಲ್ದಾಣಕ್ಕೆ ಸಂಪರ್ಕ, ಬಳ್ಳಾರಿ ರಸ್ತೆಯಲ್ಲಿ 18 ತಿಂಗಳು ಟ್ರಾಫಿಕ್ ಸಂಕಷ್ಟ!

Gowthami K — Sat, 07 Nov 2026 17:51:51 +0530

ಬೆಂಗಳೂರು: ರಾಜಧಾನಿ ಬೆಂಗಳೂರಿನ ವಿಮಾನ ನಿಲ್ದಾಣ ಪ್ರಯಾಣಿಕರು ಹಾಗೂ ಹೊರ ವರ್ತುಲ ರಸ್ತೆ ಸವಾರರಿಗೆ ಮಹತ್ವದ ಸುದ್ದಿಯೊಂದು ಲಭ್ಯವಾಗಿದೆ. ಸೆಂಟ್ರಲ್ ಸಿಲ್ಕ್ ಬೋರ್ಡ್‌ನಿಂದ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುವ 58 ಕಿಲೋಮೀಟರ್ ಉದ್ದದ ನಮ್ಮ ಮೆಟ್ರೋ 'ನೀಲಿ ಮಾರ್ಗ' ಸಂಪೂರ್ಣವಾಗಿ ಕಾರ್ಯಾರಂಭಗೊಳ್ಳಲು ಮಾರ್ಚ್ 2028 ರವರೆಗೆ ಕಾಯಬೇಕಾಗಿದೆ. ಅದರಲ್ಲೂ ಬಳ್ಳಾರಿ ರಸ್ತೆಯನ್ನು ಒಂದೂವರೆ ವರ್ಷ ಬಂದ್ ಮಾಡಲಾಗಿದ್ದು, ಇದು ಕೂಡ ದೊಡ್ಡ ಹೊಡೆತ. ಜೊತೆಗೆ ಕಾಮಗಾರಿ ಮೂಲಸೌಕರ್ಯಕ್ಕೆ ಬೇಕಾದ ಅಗತ್ಯ ವಸ್ತುಗಳ ಕೊರತೆ ಕೂಡ ದಟ್ಟವಾಗಿದೆ. ಭವಿಷ್ಯದಲ್ಲಿ ಇನ್ನೇನೇನು ಸಮಸ್ಯೆಗಳು ಕಾಡಲಿದೆ ಅನ್ನುವುದು ಕಾದು ನೋಡಬೇಕಿದೆ.

ಬೆಂಗಳೂರು ಮೆಟ್ರೋ ರೈಲು ನಿಗಮ ಲಿಮಿಟೆಡ್ ಎಂಜಿನಿಯರಿಂಗ್ ಅಡಚಣೆಗಳು ಹಾಗೂ ಸವಾಲುಗಳ ಹಿನ್ನೆಲೆಯಲ್ಲಿ ಈ ಹಿಂದೆ ನಿಗದಿಪಡಿಸಿದ್ದ ಡಿಸೆಂಬರ್ 2027ರ ಗಡುವನ್ನು ಮೂರು ತಿಂಗಳು ವಿಸ್ತರಿಸಿದೆ. ಮತ್ತೊಂದೆಡೆ, ಬಿಡಿಎ ವತಿಯಿಂದ ಹೆಬ್ಬಾಳದ ಆನಂದನಗರ ಮತ್ತು ಮೆಖ್ರಿ ವೃತ್ತದ ನಡುವೆ ಎತ್ತರಿಸಿದ ಕಾರಿಡಾರ್ ಕಾಮಗಾರಿ ಆರಂಭವಾಗಿರುವುದರಿಂದ ಬಳ್ಳಾರಿ ರಸ್ತೆಯಲ್ಲಿ ಮುಂದಿನ 18 ತಿಂಗಳ ಕಾಲ ಭಾರಿ ಸಂಚಾರ ನಿರ್ಬಂಧ ಜಾರಿಯಲ್ಲಿರಲಿದೆ.

ಹಂತ ಹಂತವಾಗಿ ಮುಕ್ತಾಯಗೊಳ್ಳಲಿರುವ ಮೆಟ್ರೋ ನೀಲಿ ಮಾರ್ಗ

58 ಕಿ.ಮೀ. ಉದ್ದದ ಈ ಬೃಹತ್ ಕಾರಿಡಾರ್‌ ಅನ್ನು ಬಿಎಮ್‌ಆರ್‌ಸಿಎಲ್ ಮೂರು ಪ್ರಮುಖ ಹಂತಗಳಲ್ಲಿ ಸಾರ್ವಜನಿಕ ಸಂಚಾರಕ್ಕೆ ಮುಕ್ತಗೊಳಿಸಲು ಯೋಜನೆ ರೂಪಿಸಿದೆ.

ಹಂತ 2ಎ: ಸೆಂಟ್ರಲ್ ಸಿಲ್ಕ್ ಬೋರ್ಡ್ ನಿಂದ ಕೆ.ಆರ್.ಪುರಂ

ಈ ಭಾಗದಲ್ಲಿ 2027ರ ಆರಂಭದಲ್ಲಿ ಪ್ರಾಯೋಗಿಕ ಸಂಚಾರ ಆರಂಭವಾಗಲಿದ್ದು, 2027ರ ಮಧ್ಯಭಾಗದ ವೇಳೆಗೆ ವಾಣಿಜ್ಯ ಕಾರ್ಯಾಚರಣೆ ಶುರುವಾಗಲಿದೆ. ಅಕ್ಟೋಬರ್ ವೇಳೆಗೆ ಕೆಆರ್ ಪುರಂ-ಇಬ್ಲೂರು ಹಾಗೂ ಡಿಸೆಂಬರ್ ವೇಳೆಗೆ ಇಬ್ಲೂರು-ಸಿಲ್ಕ್ ಬೋರ್ಡ್ ನಡುವೆ ಪ್ರಾಯೋಗಿಕ ಓಟ ನಡೆಯಲಿದೆ ಎಂದು ಸಚಿವ ಕೃಷ್ಣ ಬೈರೇಗೌಡ ತಿಳಿಸಿದ್ದಾರೆ.

ಹಂತ 2ಬಿ: ಹೆಬ್ಬಾಳ ದಿಂದ ವಿಮಾನ ನಿಲ್ದಾಣ

ನೇರವಾಗಿ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ಸಂಪರ್ಕಿಸುವ ಈ ಮಾರ್ಗವನ್ನು ಸೆಪ್ಟೆಂಬರ್ 2027ರ ವೇಳೆಗೆ ಪೂರ್ಣಗೊಳಿಸಿ ಉದ್ಘಾಟಿಸುವ ಗುರಿ ಹೊಂದಲಾಗಿದೆ.

ಸಂಕೀರ್ಣ ವಿಭಾಗ : ಕೆ.ಆರ್. ಪುರಂ to ನಾಗವಾರ to ಹೆಬ್ಬಾಳ

ಅತ್ಯಂತ ಸಂಕೀರ್ಣವಾದ ಇಂಟರ್ಚೇಂಜ್ ರಚನೆಗಳನ್ನು ಒಳಗೊಂಡಿರುವ ಈ ಮಾರ್ಗವು ಡಿಸೆಂಬರ್ 2027 ರಿಂದ ಮಾರ್ಚ್ 2028 ರ ನಡುವೆ ಪೂರ್ಣಗೊಳ್ಳಲಿದೆ.

ನೀಲಿ ಮಾರ್ಗ ಕಾಮಗಾರಿ ವಿಳಂಬಕ್ಕೆ ಪ್ರಮುಖ ಕಾರಣಗಳು

ನಾಲ್ಕು ಹಳಿಗಳ ಬೃಹತ್ ಮೆಟ್ರೋ ಕಾರಿಡಾರ್: ಹೆಬ್ಬಾಳ ಮತ್ತು ಕೆಂಪಾಪುರ ನಡುವೆ 4 ಹಳಿಗಳನ್ನು (4-tracks) ಒಳಗೊಂಡ ವಿಶಿಷ್ಟ ಎತ್ತರಿಸಿದ ಮೆಟ್ರೋ ಮಾರ್ಗವನ್ನು ನಿರ್ಮಿಸಲಾಗುತ್ತಿದೆ. ಇದು ಭವಿಷ್ಯದಲ್ಲಿ ಜೆಪಿ ನಗರ-ಕೆಂಪಾಪುರ 'ಕಿತ್ತಳೆ ಮಾರ್ಗ'ದ (Orange Line) ಜೊತೆ ವಿಲೀನಗೊಳ್ಳಲಿದೆ. ಬಿಎಮ್‌ಆರ್‌ಸಿಎಲ್ ಇತಿಹಾಸದಲ್ಲೇ ಮೊದಲ ಬಾರಿಗೆ 1 ಕಿ.ಮೀ. ವ್ಯಾಪ್ತಿಯಲ್ಲಿ 3-ಪಿಯರ್ ಪೋರ್ಟಲ್ ರಚನೆಯನ್ನು ನಿರ್ಮಿಸಲಾಗುತ್ತಿದೆ. ಭಾರಿ ವಾಹನ ದಟ್ಟಣೆ, ಭೂಸ್ವಾಧೀನ ಪ್ರಕ್ರಿಯೆಯ ವಿಳಂಬ, ಭೂಗತ ಯುಟಿಲಿಟಿ (ಕೇಬಲ್/ಪೈಪ್‌ಲೈನ್) ಸ್ಥಳಾಂತರ ಹಾಗೂ ಹೊರ ವರ್ತುಲ ರಸ್ತೆಯುದ್ದಕ್ಕೂ ನಿಲ್ದಾಣಗಳ ನಿರ್ಮಾಣದ ತೊಡಕುಗಳು ಯೋಜನೆಯನ್ನು ತಡಗೊಳಿಸಿವೆ.

ಬಳ್ಳಾರಿ ರಸ್ತೆಯಲ್ಲಿ ನಿರ್ಬಂಧ ನಿಯಮಗಳು

ಹೆಬ್ಬಾಳದ ಆನಂದನಗರ ಮತ್ತು ಮೆಖ್ರಿ ವೃತ್ತದ ನಡುವೆ 1.7 ಕಿ.ಮೀ. ಉದ್ದದ ನಾಲ್ಕು ಪಥಗಳ ಎತ್ತರಿಸಿದ ಕಾರಿಡಾರ್ ನಿರ್ಮಾಣ ಕಾಮಗಾರಿ ನಡೆಯುತ್ತಿರುವುದರಿಂದ ಕೆಳಗಿನ ಸಂಚಾರ ನಿಯಮಗಳು ಜಾರಿಯಲ್ಲಿರುತ್ತವೆ.

ಲಘು, ಮಧ್ಯಮ ಮತ್ತು ಭಾರಿ ಸರಕು ಸಾಗಣೆ ವಾಹನಗಳು ಹಾಗೂ ಕೆಎಸ್‌ಆರ್‌ಟಿಸಿ, ಬಿಎಂಟಿಸಿ ಮತ್ತು ಖಾಸಗಿ ಬಸ್‌ಗಳ ಸಂಚಾರವನ್ನು ಈ ಮಾರ್ಗದಲ್ಲಿ ನಿಷೇಧಿಸಲಾಗಿದೆ.

ಸ್ವಂತ ಕಾರುಗಳು, ಟ್ಯಾಕ್ಸಿ/ಕ್ಯಾಬ್‌ಗಳು, ದ್ವಿಚಕ್ರ ವಾಹನಗಳು, ಶಾಲಾ ಬಸ್‌ಗಳು ಮತ್ತು ಆಂಬ್ಯುಲೆನ್ಸ್ ನಂತಹ ತುರ್ತು ವಾಹನಗಳು ಮಾತ್ರ ಸಂಚರಿಸಬಹುದು.

ವಿಮಾನ ನಿಲ್ದಾಣ ಹಾಗೂ ಹೆಬ್ಬಾಳ ಪ್ರಯಾಣಿಕರಿಗೆ ಪರ್ಯಾಯ ಮಾರ್ಗಗಳು

ಸಂಚಾರ ದಟ್ಟಣೆ ನಿವಾರಿಸಲು ಬೆಂಗಳೂರು ಸಂಚಾರ ಪೊಲೀಸರು ಪ್ರಮುಖ ಪರ್ಯಾಯ ಮಾರ್ಗಗಳನ್ನು ಸೂಚಿಸಿದ್ದಾರೆ:

ನಗರದಿಂದ ವಿಮಾನ ನಿಲ್ದಾಣದ ಕಡೆಗೆ ತೆರಳುವ ವಾಹನಗಳಿಗೆ, ಓಲ್ಡ್ ಹೈ ಗ್ರೌಂಡ್ಸ್ ಜಂಕ್ಷನ್ - ಕಲ್ಪನಾ ಜಂಕ್ಷನ್ - ಓಲ್ಡ್ ಉದಯ ಟಿವಿ ಜಂಕ್ಷನ್ -ಕಂಟೋನ್ಮೆಂಟ್ ರೈಲ್ವೆ ನಿಲ್ದಾಣ - ಟ್ಯಾನರಿ ರಸ್ತೆ - ನಾಗವಾರ ರಸ್ತೆ ಮೂಲಕ ವಿಮಾನ ನಿಲ್ದಾಣ ತಲುಪುವುದು.

ವಿಮಾನ ನಿಲ್ದಾಣದಿಂದ ನಗರದ ಕೇಂದ್ರ ಭಾಗಕ್ಕೆ ಬರುವ ವಾಹನಗಳಿಗೆ, ನಾಗವಾರ ಜಂಕ್ಷನ್ - ಬಿದಿರು ಬಜಾರ್ - ಕ್ವೀನ್ಸ್ ರಸ್ತೆ ಮಾರ್ಗ.

ಹೆಬ್ಬಾಳ ಹೊರ ವರ್ತುಲ ರಸ್ತೆ - ಕುವೆಂಪು ವೃತ್ತ - ಗೊರಗುಂಟೆಪಾಳ್ಯ ಜಂಕ್ಷನ್ ಮಾರ್ಗ.

ಇತರ ಪ್ರಮುಖ ಮಾರ್ಗ ಬದಲಾವಣೆಗಳು:

ಹೆಬ್ಬಾಳದಿಂದ ನಗರಕ್ಕೆ ಬರುವವರು, ಫ್ಲೈಓವರ್ ಇಳಿದ ನಂತರ ಬ್ಯಾಪ್ಟಿಸ್ಟ್ ಆಸ್ಪತ್ರೆ ಮುಂಭಾಗದ ಸರ್ವಿಸ್ ರಸ್ತೆ ಬಳಸಿ ಸಿಬಿಐ ಜಂಕ್ಷನ್ ಕಡೆಗೆ ಸಾಗಬೇಕು.

ಯಶವಂತಪುರದಿಂದ ವಿಮಾನ ನಿಲ್ದಾಣಕ್ಕೆ ಹೋಗುವವರು, ಮತ್ತಿಕೆರೆ ರಸ್ತೆ - ಬಿಇಎಲ್ ವೃತ್ತ - ಹೊರ ವರ್ತುಲ ರಸ್ತೆ ಮಾರ್ಗವನ್ನು ಬಳಸಬಹುದು.

Deepavali ಹಬ್ಬಕ್ಕೆ ಊರಿಗೆ ಓಡುವವರ ವ್ಯಥೆ; ಜನ್ಮಭೂಮಿ-ಕರ್ಮಭೂಮಿ ನಡುವೆ ಸಿಲುಕಿದ ಬೆಂಗಳೂರಿಗರ ರಿಯಲ್ ಸ್ಟೋರಿ!

Bhimasi M Koleppanavar — Sat, 07 Nov 2026 17:13:32 +0530

ಬೆಂಗಳೂರು ಎಂದರೆ ಹೊಗಳುವವರು ಎಷ್ಟೋ, ತೆಗಳುವವರು ಅಷ್ಟೇ. ಆದರೂ ಗೊತ್ತಿದ್ದೋ ಅಥವಾ ಗೊತ್ತಿಲ್ಲದೆಯೋ ಈ ನಗರ ನಮಗೆ ಏನೋ ಒಂದು ಹೊಸತನವನ್ನು ನೀಡುತ್ತದೆ, ಬದುಕನ್ನು ಕಲಿಸುತ್ತದೆ. ಇನ್ನೊಂದೆಡೆ, ಇಲ್ಲಿನ ಟ್ರಾಫಿಕ್ ಹಾಗೂ ದುಬಾರಿ ಜೀವನ ಶೈಲಿಗಳು ನಮ್ಮ ಬದುಕನ್ನು ಅರಿಯದಂತೆ ಹಿಸುಕಿ ಹಾಕುತ್ತವೆ. ಹಾಗಾಗಿಯೇ, ಬೆಂಗಳೂರನ್ನು ಬಿಟ್ಟು ಹೋಗಲೂ ಆಗದೆ, ಇಲ್ಲೇ ಉಳಿದುಕೊಳ್ಳಲೂ ಕಷ್ಟಪಡುವ ಅಸಂಖ್ಯಾತ ಜನರ ಸ್ಟೋರಿ ಇದು. ಕಥೆ ಮಾತ್ರವಲ್ಲ, ಕಹಿ ವ್ಯತೆಯೂ ಇಲ್ಲಿದೆ.

ಬದುಕು ಕೊಟ್ಟ ಜನ್ಮಭೂಮಿ ಬೆಂಗಳೂರು!

ಲಕ್ಷಾಂತರ ಯುವಜನಯ ಕನಸುಗಳಿಗೆ ರೆಕ್ಕೆ ನೀಡಿದ ಕರ್ಮಭೂಮಿ. ಉದ್ಯೋಗ, ವೃತ್ತಿಜೀವನ, ಉತ್ತಮ ಸಂಬಳ ಮತ್ತು ಆಧುನಿಕ ಜೀವನಶೈಲಿ ನೀಡಿದ ಈ ಮಹಾನಗರದಲ್ಲಿ ದಿನನಿತ್ಯ ಬಾಳುವುದು ಒಂದು ಸವಾಲಾದರೆ, ಹಬ್ಬ-ಹರಿದಿನಗಳು ಬಂದಾಗ ಈ ನಗರವನ್ನು ತೊರೆದು ಸ್ವಂತ ಊರಿನತ್ತ ಪಯಣಿಸುವುದು ಮತ್ತೊಂದು ದೊಡ್ಡ ಸಾಹಸ. ಬೆಂಗಳೂರಿನಲ್ಲಿ ಇರುವುದೂ ಕಷ್ಟ, ಬೆಂಗಳೂರನ್ನು ಬಿಟ್ಟು ಹೊರಡುವುದೂ ಕಷ್ಟ ಎಂಬ ಮಾತು ದೀಪಾವಳಿ ಹಬ್ಬದ ಸಮಯದಲ್ಲಿ ನೂರಕ್ಕೆ ನೂರರಷ್ಟು ಸತ್ಯವಾಗಿ ಕಣ್ಣಮುಂದೆ ನಿಲ್ಲುತ್ತದೆ.

ಹಬ್ಬದ ಸೀಸನ್‌ನಲ್ಲಿ ಎಕ್ಸಿಟ್ ಟ್ರಾಫಿಕ್ ನರಕ!

ದೀಪಾವಳಿ ಸಾಲು ಸಾಲು ರಜೆಗಳು ಘೋಷಣೆಯಾಗುತ್ತಿದ್ದಂತೆಯೇ ನಗರದ ಪ್ರಮುಖ ನಿರ್ಗಮನ ರಸ್ತೆಗಳಾದ ಮೆಜೆಸ್ಟಿಕ್, ಸ್ಯಾಟಲೈಟ್ ಬಸ್ ನಿಲ್ದಾಣ, ಗೊರಗುಂಟೆಪಾಳ್ಯ, ಕೆ.ಆರ್. ಪುರಂ ಹಾಗೂ ನೈಸ್ ರಸ್ತೆಗಳಲ್ಲಿ ವಾಹನಗಳ ಸಾಲೇ ಸಾಲು ಕಂಡುಬರುತ್ತದೆ. ಗಂಟೆಗಟ್ಟಲೆ ಟ್ರಾಫಿಕ್‌ನಲ್ಲಿ ಸಿಲುಕಿಕೊಳ್ಳುವುದು, ಖಾಸಗಿ ಬಸ್‌ಗಳಲ್ಲಿ ದುಪ್ಪಟ್ಟು ಭಾಡಿಗೆ ನೀಡಬೇಕಾದ ಪರಿಸ್ಥಿತಿ ಮತ್ತು ಬಸ್‌ಗಳಿಗಾಗಿ ನಡುರಸ್ತೆಯಲ್ಲಿ ಗಂಟೆಗಟ್ಟಲೆ ಕಾಯುವ ಕಷ್ಟ ಪ್ರತಿಯೊಬ್ಬ ಪ್ರಯಾಣಿಕನಿಗೂ ನರಕಯಾತನೆ ತರುತ್ತದೆ.

ಟ್ರಾಫಿಕ್ ಕಷ್ಟವನ್ನು ಮೆಟ್ಟಿ ನಿಲ್ಲುವ ಊರಿನ ಮಣ್ಣಿನ ವಾಸನೆ!

ಎಷ್ಟೇ ತೀವ್ರವಾದ ಟ್ರಾಫಿಕ್ ಇರಲಿ, ಬಸ್‌ ಸಿಗದೇ ಕಾಯುವ ಕಿರಿಕಿರಿ ಇರಲಿ, ಈ ಯಾವುದೇ ಕಷ್ಟಗಳೂ ಊರಿಗೆ ತಲುಪಬೇಕೆನ್ನುವ ತುಡಿತವನ್ನು ತಡೆಯಲು ಸಾಧ್ಯವಿಲ್ಲ. ವಾರ ಪೂರ್ತಿ ಲ್ಯಾಪ್ಟಾಪ್, ಡೆಡ್‌ಲೈನ್ ಮತ್ತು ಯಾಂತ್ರಿಕ ಬದುಕಲ್ಲಿ ಮುಳುಗಿದ್ದ ಟೆಕ್ಕಿಗಳು ಹಾಗೂ ಉದ್ಯೋಗಿಗಳಿಗೆ, ಕಣ್ಣಮುಂದೆ ತೇಲುವ ಒಂದೇ ಒಂದು ದೃಶ್ಯವೆಂದರೆ ಅದು ಹುಟ್ಟೂರಿನ ಮನೆ. ಅಂಗಳದಲ್ಲಿ ಅಮ್ಮ ಹಚ್ಚಿಡುವ ಸಾಲು ಸಾಲು ಹಣತೆ ದೀಪಗಳು, ಮನೆ ತುಂಬಾ ಹರಡುವ ಸಾಂಪ್ರದಾಯಿಕ ಅಡುಗೆಯ ಕಂಪು ಹಾಗೂ ಬಾಲ್ಯದ ಗೆಳೆಯರೊಂದಿಗೆ ಹಂಚಿಕೊಳ್ಳುವ ಆ ನಗು ಪ್ರತಿಯೊಂದು ಕಷ್ಟವನ್ನೂ ಮರೆಸಿಬಿಡುತ್ತದೆ.

ಜನ್ಮಭೂಮಿ, ಕರ್ಮಭೂಮಿಯ ನಡುವಿನ ಅನನ್ಯ ಬಂಧ!

ಬೆಂಗಳೂರು ಪ್ರತಿಯೊಬ್ಬರಿಗೂ ಆಶ್ರಯ ನೀಡಿದ ನಗರ. ಇಲ್ಲಿನ ಹವಾಮಾನ ಮತ್ತು ಉದ್ಯೋಗ ಅವಕಾಶಗಳು ನಮ್ಮನ್ನು ಈ ನಗರದ ಪ್ರೇಮಕ್ಕೆ ಬೀಳಿಸುವುದರಲ್ಲಿ ಎರಡೂ ಮಾತಿಲ್ಲ. ಆದರೆ, ಹಬ್ಬ ಬಂದಾಗ ಮಾತ್ರ ಹುಟ್ಟೂರಿನ ಮಣ್ಣಿನ ವಾಸನೆ ಹಾಗೂ ತಾಯಿಯ ಮಡಿಲ ಸೆಳೆತ ಗೆದ್ದು ನಿಲ್ಲುತ್ತದೆ. ನಗರದ ಗದ್ದಲದಿಂದ ದೂರವಾಗಿ ಊರಿನ ಶಾಂತ ವಾತಾವರಣದಲ್ಲಿ ಕಳೆಯುವ ಆ ಕೆಲವು ದಿನಗಳು ಮನಸ್ಸಿಗೆ ಮತ್ತು ಜೀವಕ್ಕೆ ಮರುಜೀವ ನೀಡುತ್ತವೆ.

ಎಲ್ಲರಿಗೂ ದೀಪಾವಳಿ ಶುಭಾಷಯ!

ದೀಪಾವಳಿಯ ಪಯಣ ಕೇವಲ ಒಂದು ಪ್ರಯಾಣವಲ್ಲ, ಅದು ಪ್ರತಿಯೊಬ್ಬ ಕನ್ನಡಿಗನ ಭಾವನಾತ್ಮಕ ಮರುಸಂಪರ್ಕ. ಎಷ್ಟೇ ಸರ್ಕಸ್ ಮಾಡಿ, ಟ್ರಾಫಿಕ್ ದಾಟಿ ಊರಿನ ಹೊಸ್ತಿಲು ಮೆಟ್ಟಿದಾಗ ಸಿಗುವ ಆಂತರಿಕ ನೆಮ್ಮದಿಗೆ ಪ್ರಪಂಚದ ಯಾವ ಐಷಾರಾಮಿ ಸೌಲಭ್ಯವೂ ಸಾಟಿಯಾಗಲಾರದು.

ವರ್ಷದಲ್ಲಿ ಒಮ್ಮೆ ಮಾತ್ರ ದರ್ಶನ ನೀಡುವ ದೇವಿರಮ್ಮ ಜಾತ್ರೆ, ಎಷ್ಟು ಗಂಟೆಯಿಂದ ಬೆಟ್ಟಕ್ಕೆ ಭಕ್ತರಿಗೆ ಅವಕಾಶ?

Chethan Kumar — Sat, 07 Nov 2026 17:04:55 +0530

ಚಿಕ್ಕಮಗಳೂರು (ನ.07) ಪ್ರಸಿದ್ಧ ದೇವಿರಮ್ಮ ಜಾತ್ರೆ ಆರಂಭಗೊಂಡಿದೆ. ವರ್ಷದಲ್ಲಿ ಒಮ್ಮೆ ಮಾತ್ರ ದರ್ಶನ ನೀಡುವ ಚಿಕ್ಕಮಗಳೂರಿನ ದೇವಿರಮ್ಮ ದರ್ಶನ ಪಡೆಯಲು ಭಕ್ತರು ಆಗಮಿಸುತ್ತಿದ್ದಾರೆ. ಕಡಿದಾದ ಬೆಟ್ಟ ಹತ್ತಿ ದೇವಿರಮ್ಮ ದರ್ಶನ ಮಾಡಲು ಸ್ಥಳೀಯ ಜಿಲ್ಲಾಡಳಿತ ಎಲ್ಲಾ ವ್ಯವಸ್ಥೆ ಮಾಡಿದೆ. ಭಕ್ತರ ಸಂಖ್ಯೆ ಹೆಚ್ಚಾಗುತ್ತಿದೆ. ಸಂಜೆ 4 ಗಂಟೆವರೆಗೆ ಮಾತ್ರ ದೇವಿರಮ್ಮ ದರ್ಶನಕ್ಕೆ ಅವಕಾಶ ನೀಡಲಾಗಿದೆ. ನಾಳೆ (ನ.08) ದೇವಿರಮ್ಮ ದರ್ಶನಕ್ಕೆ ಸಮಯ ನಿಗದಿ ಮಾಡಲಾಗಿದೆ.

ಯಾವ ಸಮಯದಲ್ಲಿ ದೇವಿರಮ್ಮ ದರ್ಶನ

ದೀಪಾವಳಿ ಹಬ್ಬದ ಸಂಭ್ರಮ ಒಂದೆಡೆಯಾದರೆ ನಾಳೆ ಭಾನುವಾರ. ಹೀಗಾಗಿ ದೇವಿರಮ್ಮ ದರ್ಶನ ಪಡೆಯಲು ನಾಳೆ ಭಕ್ತರ ಸಂಖ್ಯೆ ಹೆಚ್ಚಾಗುವ ಸಾಧ್ಯತೆ ಇದೆ. ಹೀಗಾಗಿ ನಾಳೆ ಬೆಳಗ್ಗೆ 7 ಗಂಟೆಯಿಂದ 3 ಗಂಟೆಯವರೆಗೆ ಬೆಟ್ಟ ಹತ್ತಲು ಅವಕಾಶ ನೀಡಲಾಗಿದೆ. ದೇವಿರಮ್ಮ ವರ್ಷದಲ್ಲಿ ಒಮ್ಮೆ ಮಾತ್ರ ದರ್ಶನ ನೀಡುವ ಶಕ್ತಿ ದೇವತೆ. ರಾಜ್ಯದ ಮೂಲೆ ಮೂಲೆಗಳಿಂದ ಭಕ್ತರು ಆಗಮಿಸಿ ದರ್ಶನ ಪಡೆಯುತ್ತಿದ್ದಾರೆ.

ಮಲ್ಲೇನಹಳ್ಳಿ ,ಮಾಣಿಕ್ಯಾಧಾರ, ಅರಿಶಿಣಗುಪ್ಪೆ ಮಾರ್ಗವಾಗಿ ಭಕ್ತರು ದೇವಿರಮ್ಮ ದರ್ಶನಕ್ಕೆ ಬೆಟ್ಟ ಹತ್ತುತ್ತಿದ್ದಾರೆ. ಇಲ್ಲಿಯವರೆಗೆ 50 ಸಾವಿರಕ್ಕೂ ‌ಅಧಿಕ ಭಕ್ತರಿನಿಂದ ಬೆಟ್ಟದ ತಾಯಿ ದರ್ಶನ ಮಾಡಿದ್ದಾರೆ. ನಾಳೆ ಭಕ್ತರ ಸಂಖ್ಯೆ ಏರಿಕೆಯಾಗಲಿದೆ. ಚಿಕ್ಕಮಗಳೂರು ತಾಲೂಕಿನ ಚಂದ್ರದ್ರೋಣ ಪರ್ವತದ ಸಾಲಿನಲ್ಲಿರುವ ಬಿಂಡಿಗ ದೇವಿರಮ್ಮ ದೇವಾಲಯ ಅತ್ಯಂತ ಪುರಾಣ ಪ್ರಸಿದ್ಧ ದೇವಸ್ಥಾನವಾಗಿದೆ. ಬಿಂಡಿಗ ದೇವಿರಮ್ಮ ದೇವಸ್ಥಾನದ ಬಾಗಿಲು ವರ್ಷಕ್ಕೊಮ್ಮೆ ಮಾತ್ರ ತೆರೆಯಲಾಗುತ್ತದೆ.

ಬೆಟ್ಟ ಹತ್ತಲು ಕೆಲವರಿಗೆ ನಿರ್ಬಂಧ

ಕಡಿದಾದ ಬೆಟ್ಟ ಹತ್ತಿ ದೇವಿರಮ್ಮ ದರ್ಶನ ಪಡೆಯಬೇಕಿರುವ ಕಾರಣ ಕೆಲ ನಿರ್ಬಂಧಗಳನ್ನು ವಿಧಿಸಲಾಗಿದೆ. 15 ವರ್ಷಕ್ಕಿಂತ ಕೆಳಗಿನವರಿಗೆ ಬೆಟ್ಟ ಹತ್ತಲು ಅವಕಾಶವಿಲ್ಲ. 15 ವರ್ಷಕ್ಕಿಂತ ಮೇಲ್ಪಟ್ಟು ಹಾಗೂ 60 ವರ್ಷಕ್ಕಿಂತ ಒಳಗಿನವರಿಗೆ ಮಾತ್ರ ಬೆಟ್ಟ ಹತ್ತಲು ಅವಕಾಶ ನೀಡಲಾಗಿದೆ. ಸಮುದ್ರ ಮಟ್ಟದಿಂದ ಸುಮಾರು 3800 ಅಡಿ ಎತ್ತರದಲ್ಲಿರುವ ಈ ಬೆಟ್ಟ ಕಾಲುದಾರಿಯಲ್ಲಿ ಹತ್ತಬೇಕು. ಕಡಿದಾದ ದಾರಿಯಲ್ಲಿ ಅಪಾಯದ ಸಾಧ್ಯತೆಗಳು ಹೆಚ್ಚು. ಜೊತೆಗೆ ಆರೋಗ್ಯದ ದೃಷ್ಟಿಯಿಂದ ಈ ನಿಯಮ ರೂಪಿಸಲಾಗಿದೆ.

ಭಕ್ತರ ಸುರಕ್ಷತೆಗೆ ಜಿಲ್ಲಾಡಳಿತ ಅಗತ್ಯ ಕ್ರಮ ಕೈಗೊಂಡಿದೆ. ಪೊಲೀಸ್ ಸೇರಿದಂತೆ ಭದ್ರತಾ ಪಡೆಗಳು ಸ್ಥಳದಲ್ಲಿದೆ. ಪ್ರತಿ ವರ್ಷ ಲಕ್ಷಾಂತರ ಭಕ್ತರು ಬೆಟ್ಟ ಹತ್ತಿ ದೇವಿರಮ್ಮ ದರ್ಶನ ಪಡೆಯುತ್ತಾರೆ.

ದೀಪಾವಳಿಗೂ ಮುನ್ನ ಘೋರ ದುರಂತ, ಬೀದರ್‍‌ನಲ್ಲಿ ಪ್ರಾಣಬಿಟ್ಟ ನಾಲ್ವರು ಯುವಕರು

Ganesh Mabla Gowda — Sat, 07 Nov 2026 16:38:45 +0530

ಯಾದಗಿರಿ (ನವೆಂಬರ್ 7): ನಿರ್ಮಾಣ ಹಂತದ ಎಕ್ಸ್‌ಪ್ರೆಸ್‌ ಹೈವೇಯಲ್ಲಿ ಭೀಕರ ಅಪಘಾತ ಸಂಭವಿಸಿದೆ. ದುರ್ಘಟನೆಯಲ್ಲಿ ನಾಲ್ವರು ಯುವಕರು ಸ್ಥಳದಲ್ಲೇ ಪ್ರಾಣ ಕಳೆದುಕೊಂಡಿದ್ದಾರೆ. ಚೆನ್ನೈ-ಸೂರತ್ ಎಕ್ಸ್‌ಪ್ರೆಸ್‌ ಹೈವೇ ಮೇಲೆ ಈ ಡೆಡ್ಲಿ ಆಕ್ಸಿಡೆಂಟ್ ನಡೆದಿದೆ.

ಯಾದಗಿರಿ ಜಿಲ್ಲೆಯ ಶಹಾಪುರ ತಾ. ಇಬ್ರಾಹಿಂಪುರ ಡಿಬಿಎಲ್ ಕ್ಯಾಂಪ್ ಬಳಿ ಅಪಘಾತ ಸಂಭವಿಸಿದೆ. ನಿನ್ನೆ ರಾತ್ರಿ ಭೀಕರ ಅಪಘಾತ ನಡೆದಿದೆ. ಕಾರಿನಲ್ಲಿ ಜೇವರ್ಗಿಯಿಂದ ಯಾದಗಿರಿ ಕಡೆಗೆ ನಾಲ್ವರು ಯುವಕರು ಬರುತ್ತಿದ್ದರು. ವೇಗವಾಗಿ ಬರುತ್ತಿದ್ದ ವೇಳೆ ರಸ್ತೆ ಪಕ್ಕದ ಗೋಡೆಗೆ ಡಿಕ್ಕಿ ಹೊಡೆದು ದುರಂತ ಸಂಭವಿಸಿದೆ. ಡಿಕ್ಕಿಯ ರಭಸಕ್ಕೆ ನಾಲ್ವರು ಸ್ಥಳದಲ್ಲೇ ಪ್ರಾಣಬಿಟ್ಟಿದ್ದಾರೆ. ಇನ್ನು ವಾಹನ ನುಜ್ಜುಗುಜ್ಜಾಗಿದೆ.

ಗುರುರಾಜ್ ಚವ್ಹಾಣ್ (35), ಗೋವಿಂದ ಚವ್ಹಾಣ್ (28), ಕುಮಾರ್ ರಾಠೋಡ್ (26) ಸೇರಿ ನಾಲ್ವರು ಮೃತಪಟ್ಟಿದ್ದಾರೆ. ಮೃತ ನಾಲ್ವರಲ್ಲಿ ಮೂವರು ಮಲ್ಹಾರ್ ತಾಂಡಾದ ನಿವಾಸಿಗಳು, ಓರ್ವ ಲಿಂಗೇರಿ ತಾಂಡಾದ ಯುವಕ ಎಂದು ತಿಳಿದುಬಂದಿದೆ. ಅಪಘಾತ ಹಿನ್ನೆಲೆಯಲ್ಲಿ ರಸ್ತೆಯಲ್ಲಿ ಕೆಲಸ ಕಾಲ ಸಂಚಾರಕ್ಕೆ ಅಡಚಣೆ ಆಗಿದೆ. ವಿಷಯ ತಿಳಿಯುತ್ತಿದ್ದಂತೆಯೇ ಸ್ಥಳೀಯರು ರಕ್ಷಣೆಗೆ ಧಾವಿಸಿದ್ದರು. ಆದರೆ ಯಾವುದೇ ಪ್ರಯೋಜನ ಆಗಿಲ್ಲ. ಬಳಿಕ ಮೃತದೇಹಗಳನ್ನ ಸ್ಥಳೀಯ ಸರ್ಕಾರಿ ಆಸ್ಪತ್ರೆಗೆ ಸಾಗಿಸಲಾಗಿತ್ತು. ಅಲ್ಲಿ ಮರಣೋತ್ತರ ಪರೀಕ್ಷೆ ಮುಗಿದು ಮೃತದೇಹಗಳನ್ನು ಕುಟುಂಬಕ್ಕೆ ಹಸ್ತಾಂತರ ಮಾಡಲಾಗಿದೆ.

ನಿರ್ಮಾಣ ಹಂತದಲ್ಲಿರುವ ಎಕ್ಸ್‌ಪ್ರೆಸ್‌ ಹೈವೇಯಲ್ಲಿ ಅಪಘಾತ ಸಂಭವಿಸಿದೆ. ರಸ್ತೆ ದುರ್ಘಮ ಆಗಿರೋದ್ರಿಂದಲೇ ಅಪಘಾತಕ್ಕೆ ಕಾರಣ ಎನ್ನಲಾಗಿದೆ. ಅಪಘಾತದ ವಿಚಾರ ತಿಳಿಯುತ್ತಿದ್ದಂತೆಯೇ ಎಸ್‌ಪಿ ಪೃಥ್ವಿಕ್ ಶಂಕರ್ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಶಹಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ತನಿಖೆಯನ್ನು ಮುಂದುವರಿಸಿದ್ದಾರೆ.

ಕುಟುಂಬಸ್ಥರಿಂದ ಮುಗಿಲು ಮುಟ್ಟಿದ ಆಕ್ರಂದನ

ವಿಷಯ ತಿಳಿಯುತ್ತಿದ್ದಂತೆಯೇ ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದೆ. ದೀಪಾವಳಿಗೂ ಮುನ್ನವೇ ಘೋರ ದುರಂತ ಸಂಭವಿಸಿರೋದು ಶೋಕದ ವಾತಾವರಣ ನಿರ್ಮಾಣವಾಗಿದೆ. ಮನೆಗೆ ಆಧಾರವಾಗಿದ್ದ ಕುಟುಂಬಸ್ಥರನ್ನು ಕಳೆದುಕೊಂಡು ದುಃಖದಲ್ಲಿ ಮುಳುಗಿದ್ದಾರೆ.

ಬೀದರ್‌ನಲ್ಲಿ ಲಾರಿ ಹರಿದು 30 ಕುರಿಗಳ ಮಾರಣ ಹೋಮ

ಬೀದರ್‌ ಜಿಲ್ಲೆಯ ಭಾಲ್ಕಿ ತಾಲೂಕಿನ ಬಾಳೂರ ಬಳಿ ಲಾರಿ ಹರಿದು 30 ಕುರಿಗಳು ಸಾವನ್ನಪ್ಪಿವೆ. ಕೆಂಪುಕಲ್ಲು ತುಂಬಿಕೊಂಡು ಹೋಗುತ್ತಿದ್ದ ಲಾರಿ ಹರಿದು ದುರಂತ ಸಂಭವಿಸಿದೆ. ಬಸವರಾಜ್ ಮುಗತಾ ಎಂಬ ರೈತನಿಗೆ ಕುರಿಗಳು ಸಾವನ್ನಪ್ಪಿವೆ. ದುರ್ಘಟನೆ ಬೆನ್ನಲ್ಲೇ ಭಯದಲ್ಲಿ ಲಾರಿ ಚಾಲಕ ವಾಹನ ಬಿಟ್ಟು ಪರಾರಿ ಆಗಿದ್ದಾನೆ. ಇನ್ನು ಕುರಿಗಳು ಕಳೆದುಕೊಂಡ ರೈತ ಬಸವರಾಜ್ ಕಣ್ಣೀರು ಇಟ್ಟಿದ್ದಾನೆ. ಧನ್ನೂರ್ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಘಟನೆ ನಡೆದಿದೆ. ರೈತನಿಗೆ ಪರಿಹಾರ ನೀಡಬೇಕು ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ. ಅಲ್ಲದೇ ಅಪಘಾತಕ್ಕೆ ಕಾರಣವಾಗಿರುವ ಡ್ರೈವರ್‍‌ನನ್ನು ಬಂಧಿಸಿ ತನಿಖೆ ನಡೆಸಬೇಕು ಎಂಬ ಆಗ್ರಹ ಕೇಳಿಬಂದಿದೆ.

ಕ್ರಿ.ಪೂ 2000ಕ್ಕೂ ಹಳೆಯದಾದ ಸಂಗೀತ ಕಲ್ಗುಳಿ, ವೀರಗಲ್ಲಿನ ಮೇಲೆ 9 ಕಲ್ಗುಳಿಗಳು ಪತ್ತೆ

Kannadaprabha News — Sat, 07 Nov 2026 15:32:52 +0530

ಚಿತ್ರದುರ್ಗ: ಮೊಳಕಾಲ್ಮೂರು ತಾಲೂಕಿನ ಕೋನಾಪುರ ಗ್ರಾಮದ ಸುತ್ತಲಿನಲ್ಲಿ ಇತಿಹಾಸ ಸಂಶೋಧಕರ ತಂಡವು ಶಿಲಾಯುಗದ ಕಾಲಘಟ್ಟದ್ದ ಹಲವು ಕುರುಹುಗಳನ್ನು ಪತ್ತೆ ಮಾಡಿದೆ.

ಕಲ್ಲಿನ ಆಯುಧಗಳಿಂದ ಕುಟ್ಟಿ ರೇಖಾಚಿತ್ರ

ದೇವಸಮುದ್ರ ಹೋಬಳಿಯ ಗಡಿ ಗ್ರಾಮವಾಗಿರುವ ಕೋನಾಪುರ ಗ್ರಾಮವು ಗುಡ್ಡಗಳ ತಪ್ಪಲಿನಲ್ಲಿದ್ದು ಕೂಡ್ಲಿಗಿ ಮತ್ತು ಸಂಡೂರು ತಾಲೂಕುಗಳನ್ನು ಅಂಟಿಕೊಂಡಿದೆ. ಗ್ರಾಮದ ದಕ್ಷಿಣ ದಿಕ್ಕಿನಲ್ಲಿ ಕಿ.ಮೀ ದೂರದಲ್ಲಿರುವ ಕೊರ್ಲು (ಸೊಪ್ಪು) ಬೆಟ್ಟದ ಅಕ್ಷರ ಗುಂಡಿನಲ್ಲಿ ಗೂಳಿ ಚಿತ್ರ, ನೃತ್ಯ ಮಾಡುತ್ತಿರುವ ನವಿಲುಗಳ ಚಿತ್ರ, ಮುಖಾಮುಖಿಯಾಗಿ ಕಾದಾಡುತ್ತಿರುವ ಗೂಳಿಗಳು, ಎರಡು ಆನೆಗಳು ಮತ್ತು ಪಕ್ಷಿಗಳ ಚಿತ್ರಗಳನ್ನು ಕೆತ್ತಿರುವ ರೇಖಾ ಚಿತ್ರಗಳು ಪತ್ತೆಯಾಗಿದ್ದು ರೇಖಾ ಚಿತ್ರಗಳು ಬಳಕೆಯಲ್ಲಿದ್ದ ಕಾಲ ಘಟ್ಟದಲ್ಲಿ ಕಲ್ಲಿನ ಆಯುಧಗಳಿಂದ ಕುಟ್ಟಿ ಕೆತ್ತಲಾಗಿದೆ.

ಇವು ಕ್ರಿ.ಪೂ 2,000ಕ್ಕೂ ಹಳೆಯದ್ದಾಗಿವೆ ಎಂದು ಸಂಶೋಧನೆ ನೇತೃತ್ವ ವಹಿಸಿರುವ ಬಳ್ಳಾರಿ ಸರ್ಕಾರಿ ವಾಣಿಜ್ಯ ಕಾಲೇಜಿನ ಇತಿಹಾಸ ಉಪನ್ಯಾಸಕ ಓಬಯ್ಯ ಹಾಲಸಾಗರ ಅವರ ಹೇಳಿದ್ದಾರೆ.

ಗೋಲಾಕಾರದ ಗುಣಿ

ಇದರೊಟ್ಟಿಗೆ ಗುಂಡುಗಳ ಮೇಲ್ಬಾಗದಲ್ಲಿ ಗೋಲಾಕಾರದ ಗುಣಿಗಳನ್ನು ಹೊಂದಿರುವ ಕಲ್ಲುಳನ್ನು ಪತ್ತೆ ಹಚ್ಚಲಾಗಿದೆ. ಒಂದು ಬಂಡೆ ಮೇಲೆ ದೊಡ್ಡ ರುಬ್ಬುವ ಆಕೃತಿ ಕಲ್ಲು ಮತ್ತು 15 ಸಂಗೀತ ಕಲ್ಗುಳಿಗಳು ಬಂಡ್ಲು ಬೆಟ್ಟ ಸಮೀಪದ ಬೃಹತ್ ಸಮಾಧಿಯ ಮೇಲೆ 10 ಚಿಕ್ಕ ಕಲ್ಗುಳಿಗಳು, ಸಮೀಪದ ವೀರಗಲ್ಲಿನ ಮೇಲೆ 9 ಕಲ್ಗುಳಿಗಳು ಕಂಡುಬಂದಿವೆ.

ಇವು ಶಿಲಾಯುಗ ಕಾಲದಲ್ಲಿ ಅಂದರೆ ಕ್ರಿ.ಪೂ. 30000 1200ನೇ ಸಾಲಿನಷ್ಟು ಹಳೆಯದಾಗಿರಬಹುದು ಎಂದು ಅಂದಾಜಿಸಲಾಗಿದೆ. ಇದೇ ಗ್ರಾಮಕ್ಕೆ ಹೆದ್ದಾರಿಗೆ ಹೊಂದಿಕೊಂಡಿರುವ ಸಮಿಪದ ಬಂಡ್ಲು ಬೆಟ್ಟ ಬಳಿ ಬೃಹತ್ ಶಿಲಾಯುಗ ಕಾಲದ ಸಮಾಧಿ ಇದ್ದು, ಇದು 6 ಮೀಟರ್ ಉದ್ದ. 5 ಮೀಟರ್ ಅಗಲ ಮತ್ತು 18.1 ಮೀಟರ್ ಸುತ್ತಳತೆ ಹೊಂದಿದೆ. ಇದು ಅವನತಿಯ ಹಂತದಲ್ಲಿದೆ. ಇದೇ ರೀತಿಯ ಹಲವು ಶಿಲಾಯುಗ ಕಾಲಘಟ್ಟದ ಸಣ್ಣ ಸಮಾಧಿಗಳು ಗ್ರಾಮದ ಬಳಿ ಇದ್ದು, ಅವೂ ಅವನತಿಯತ್ತ ಸಾಗಿವೆ. ಸಂರಕ್ಷಣೆ ಮತ್ತು ಸಂಶೋಧನೆ ಕಾರ್ಯವಾಗಬೇಕಿದೆ ಎಂದು ಅಭಿಪ್ರಾಯಪಟ್ಟರು.

ಮೂಲೆ ಭಾಗದಲ್ಲಿರುವ ಕಾರಣ ಈ ಗ್ರಾಮಕ್ಕೆ ಕೋನಾಪುರ ಎಂದು ಅಥವಾ ಹಿಂದೆ ಬಹಳ ಹಿಂದೆ ಅಂಧ್ರಪ್ರದೇಶದಿಂದ ಕೋಣಗಳ ಸಹಾಯದಿಂದ ಆಂಜನೇಯ ಸ್ವಾಮಿಯ ಮೂರ್ತಿಯನ್ನು ಎಳೆತಂದು ಇಲ್ಲಿ ಪ್ರತಿಷ್ಠಾಪನೆ ಮಾಡಿರುವ ಕಾರಣಕ್ಕಾಗಿಯೋ ಗ್ರಾಮಕ್ಕೆ ಕೋನಾಪುರ ಎಂಬ ಹೆಸರು ಬಂದಿರಬಹುದು ಎಂದು ಉಪನ್ಯಾಸಕ ಬೊಮ್ಮಣ್ಣ ತಿಳಿಸಿದ್ದಾರೆ.

ಇಲ್ಲಿ ಸಿಕ್ಕಿರುವ ವಸ್ತುಗಳ ಬಗ್ಗೆ ಇತಿಹಾಸ ತಜ್ಞ ಗಂಗಾವತಿಯ ಶರಣಬಸಪ್ಪ ಕೋಲಾಕಾರ್ ಮತ್ತು ಧಾರವಾಡದ ರು.ಮಾ. ಷಡಕ್ಷರಯ್ಯ ಅವರ ಗಮನಕ್ಕೆ ತರಲಾಗಿದೆ. ಇವು ನೂತನ ಶಿಲಾಯುಗ ಅಥವಾ ಆದಿ ಚಾರಿತ್ರಿಕ ಕಾಲಘಟ್ಟದ್ದಾಗಿರುವ ಸಾಧ್ಯತೆಯಿದೆ ಎಂದು ಶರಣಬಸಪ್ಪ ಅವರು ಹೇಳಿದ್ದರೆ ಆಗಿನ ಕಾಲದ ಪರಿಸರ, ಮಾನವನ ಜೀವನ ಶೈಲಿ, ವನ್ಯಜೀವಿಗಳ ಜತೆಗಿನ ಬಾಂಧವ್ಯ ಮತ್ತು ಅವುಗಳ ಪರಿಚಯವನ್ನು ಕಲಾಕೃತಿಗಳ ಮೂಲಕ ಮುಂದಿನ ತಲೆ ಮಾತಿಗೆ ಪರಿಚಯ ಮಾಡುವಂತೆ ಮಾಡಲಾಗಿದೆ ಎಂದು ಅಭಿಪ್ರಾಯಪಟ್ಟಿದ್ದಾಗಿ ಅವರು ಹೇಳಿದರು.---

ಕೋನಾಪುರ ಸುತ್ತಮುತ್ತ ಸಾಕಷ್ಟು ಪ್ರಾಗೈತಿಹಾಸಿಕ ಕುರುಹುಗಳು ಇದ್ದು ಸರ್ಕಾರ ಇವುಗಳ ಸಂರಕ್ಷಣೆಗೆ ಮುಂದಾಗಬೇಕು.ಮುಂದಿನ ಪೀಳಿಗೆಗೆ ಪರಿಚಯಿಸುವ ಕಾರ್ಯ ವಾಗಬೇಕು.

-ಬೊಮ್ಮಣ್ಣ, ಉಪನ್ಯಾಸಕ, ಕೋನಾಪುರ.

ಕೋನಾಪುರ ಬಳಿ ಸಿಕ್ಕಿರುವ ಅಂಶಗಳನ್ನು ಈಚೆಗೆ ಬೀದರ್‌ನ ಭಾಲ್ಕಿಯಲ್ಲಿ ನಡೆದ ಕರ್ನಾಟಕ ಇತಿಹಾಸ ಸಂಶೋಧಕರ 40ನೇ ವಾರ್ಷಿಕ ರಾಷ್ಟ್ರೀಯ ಸಮ್ಮೇಳದಲ್ಲಿ ಪ್ರಸ್ತಾವ ಮಾಡಿ ವಿವರಿಸಲಾಗಿದೆ.

-ಓಬಯ್ಯ ಹಾಲಸಾಗರ, ಉಪನ್ಯಾಸಕ, ಬಳ್ಳಾರಿ

ಕಾಂಗ್ರೆಸ್ ಮುಖಂಡರ ಆತಂಕ ಹೆಚ್ಚಿಸಿದ ರಾಹುಲ್ ಗಾಂಧಿ ರ‍್ಯಾಲಿ, ಸಚಿವ ಲಮಾಣಿ ಪುತ್ರ ಸೇರಿ ನಾಲ್ವರು ಸಸ್ಪೆಂಡ್

Chethan Kumar — Sat, 07 Nov 2026 15:26:58 +0530

ಬೆಂಗಳೂರು (ನ.07) ಕಾಂಗ್ರೆಸ್ ಯುವ ಮುಖಂಡರಿಗೆ ಯುವ ರಾಜ ರಾಹುಲ್ ಗಾಂಧಿ ಆರ್ಡರ್ ಭಯ ಶುರುವಾಗಿದೆ. ಕಳೆದೆರಡು ದಿನದಿಂದ ಒಬ್ಬರ ಹಿಂದೆ ಒಬ್ಬರು ಮುಖಂಡರು ಕಾಂಗ್ರೆಸ್ ಪಕ್ಷದಿಂದ ಅಮಾನತುಗೊಳ್ಳುತ್ತಿದ್ದಾರೆ. ವಿವರಣೆ, ಸ್ಪಷ್ಟನೆ, ಕಾರಣ ಯಾವುದು ಕೇಳದೆ ಕಾಂಗ್ರೆಸ್ ಪದಾಧಿಕಾರಿಗಳನ್ನು ಸಸ್ಪೆಂಡ್ ಮಾಡಲಾಗುತ್ತಿದೆ. ನವೆಂಬರ್ 1 ರಂದು ದೆಹಲಿಯಲ್ಲಿ ರಾಹುಲ್ ಗಾಂಧಿ ಆಯೋಜಿಸಿದ ವೋಟ್ ಚೋರಿ ಪ್ರತಿಭಟನಾ ರ್ಯಾಲಿ ಈ ಅಮಾನತ್ತಿಗೆ ಕಾರಣವಾಗಿದೆ.

ಕರ್ನಾಟಕದ ನಾಲ್ವರು ಪದಾಧಿಕಾರಿಗಳು ಸಸ್ಪೆಂಡ್

ನವೆಂಬರ್ 1ರಂದು ದೆಹಲಿಯಲ್ಲಿ ಬೃಹತ್ ರ್ಯಾಲಿ ಆಯೋಜಿಸಲಾಗಿತ್ತು. ರಾಹುಲ್ ಗಾಂಧಿ ನೇತೃತ್ವದಲ್ಲಿ ವಿಪಕ್ಷಗಳು ಈ ರ್ಯಾಲಿ ಆಯೋಜಿಸಿತ್ತು. ದೇಶದ ಮೂಲೆ ಮೂಲೆಗಳಿಂದ ಕಾಂಗ್ರೆಸ್ ನಾಯಕರು, ಕಾರ್ಯಕರ್ತರು ಈ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು. ಆದರೆ ಕೆಲ ಮುಖಂಡರು, ಪದಾಧಿಕಾರಿಗಳು ಈ ಪ್ರತಿಭಟನೆಗೆ ಗೈರಾಗಿದ್ದರು. ಗೈರಾದ ಪದಾಧಿಕಾರಿಗಳು, ಮುಖಂಡರನ್ನು ಹುಡುಕಿ ಹುಡುಕಿ ಅಮಾನತು ಮಾಡಲಾಗುತ್ತಿದೆ. ಈ ಪೈಕಿ ಕರ್ನಾಟಕದ ನಾಲ್ವರು ಪದಾಧಿಕಾರಿಗಳು ಅಮಾನತ್ತಾಗಿದ್ದಾರೆ.

ರುದ್ರಪ್ಪ ಲಮಾಣಿ ಪುತ್ರ ದರ್ಶನ್ ಕುಮಾರ್ ಸೇರಿ ನಾಲ್ವರು ಅಮಾನತು

ರಾಷ್ಟ್ರೀಯ ಯುವ ಕಾಂಗ್ರೆಸ್ ಅಧ್ಯಕ್ಷರ ಸೂಚನೆ ಮೇರೆಗೆ ಪ್ರತಿಭಟನೆಗೆ ಗೈರಾದ ಕಾಂಗ್ರೆಸ್ ಮುಖಂಡರನ್ನು ಸಸ್ಪೆಂಡ್ ಮಾಡಿ ಆದೇಶ ಹೊರಡಿಸಲಾಗದೆ. ಇದರ ಭಾಗವಾಗಿ ಸಚಿವ ರುದ್ರಪ್ಪ ಲಮಾಣಿ ಪುತ್ರ, ಹಾವೇರಿ ಜಿಲ್ಲಾ ಯೂತ್ ಕಾಂಗ್ರೆಸ್ ಅಧ್ಯಕ್ಷ ದರ್ಶನ್ ಕುಮಾರ್ ಸಸ್ಪೆಂಡ್ ಆಗಿದ್ದಾರೆ. ಇನ್ನು ಯೂತ್ ಕಾಂಗ್ರೆಸ್ ಕಾರ್ಯದರ್ಶಿಗಳಾದ ಅಬ್ದುಲ್ ಅಜೀಜ್, ಸೂರಜ್, ಪವನ್ ಸಾಲಿಯಾನ್ ಸೇರಿ ಅಭಿಷೇಕ್ ನಾಲ್ವರು ಸಸ್ಪೆಂಡ್ ಆಗಿದ್ದಾರೆ.

ದೇಶಾದ್ಯಂತ 200ಕ್ಕೂ ಹೆಚ್ಚು ಮುಖಂಡರು ಸಸ್ಪೆಂಡ್

ರಾಹುಲ್ ಗಾಂಧಿ ಪ್ರತಿಭಟನಾ ರ್ಯಾಲಿಯಲ್ಲಿ ಪಾಲ್ಗೊಳ್ಳದ ಯೂತ್ ಕಾಂಗ್ರೆಸ್ ಮುಖಂಡರು, ಪದಾಧಿಕಾರಿಗಳಿಗೆ ಸಸ್ಪೆಂಡ್ ಬಿಸಿ ತಟ್ಟುತ್ತಿದೆ. ದೇಶಾದ್ಯಂತ ಈಗಾಗಲೇ 200ಕ್ಕೂ ಹೆಚ್ಚು ಪದಾಧಿಕಾರಿಗಳನ್ನು ಸಸ್ಪೆಂಡ್ ಮಾಡಲಾಗಿದೆ. ಈ ಪೈಕಿ ಮಧ್ಯಪ್ರದೇಶದಲ್ಲಿ ಅತೀ ಹೆಚ್ಚು ಕಾಂಗ್ರೆಸ್ ಮುಖಂಡರು ಅಮಾನತ್ತಾಗಿದ್ದಾರೆ.

ನವೆಂಬರ್ 26ಕ್ಕೆ ಮತ್ತೊಂದು ಪ್ರತಿಭಟನೆ

ನವೆಂಬರ್ 1ರಂದು ಆಯೋಜಿಸಿದ ರ್ಯಾಲಿ ಅತ್ಯಂತ ಯಶಸ್ವಿಯಾಗಿದೆ ಎಂದು ಕಾಂಗ್ರೆಸ್ ಹೇಳಿಕೊಂಡಿದೆ. ಈ ಯಶಸ್ವಿ ಪ್ರತಿಭಟನೆ ಬೆನ್ನಲ್ಲೇ ಇದೀಗ ಮತ್ತೊಂದು ಸುತ್ತಿನ ಶಕ್ತಿ ಪ್ರದರ್ಶನಕ್ಕೆ ಕಾಂಗ್ರೆಸ್ ಮುಂದಾಗಿದೆ. ರಾಹುಲ್ ಗಾಂಧಿ ನೇತೃತ್ವದಲ್ಲಿ ದೆಹಲಿಯಲ್ಲಿ ಮತ್ತೊದು ಹೋರಾಟ ನಡೆಯಲಿದೆ. ನವೆಂಬರ್ 26ರಂದು ಸಂವಿಧಾನ್ ಬಚಾವೋ ಪ್ರತಿಭಟನೆ ನಡೆಯಲಿದೆ. ಸತತವಾಗಿ ಬಿಜೆಪಿ ವಿರುದ್ದ ಬೀದಿ ಹೋರಾಟಕ್ಕೆ ಕಾಂಗ್ರೆಸ್ ಪ್ಲಾನ್ ಮಾಡಿಕೊಂಡಿದೆ. ಈ ಮೂಲಕ ಮೋದಿ ಸರ್ಕಾರಕ್ಕೆ ಪ್ರತಿಭಟನೆ ಬಿಸಿ ಮುಟ್ಟಿಸಲು ರಾಹುಲ್ ಗಾಂಧಿ ತಯಾರಿ ನಡೆಸಿದ್ದಾರೆ. ಇಷ್ಟೇ ಅಲ್ಲ ಮೋದಿ ಸರ್ಕಾರಕ್ಕೆ ಹೆಜ್ಜೆ ಹೆಜ್ಜೆಗೂ ಸಿಂಹ ಸ್ವಪ್ನವಾಗಿ ಕಾಡಲು ಸಜ್ಜಾಗಿದ್ದಾರೆ.

'ಈ ವರ್ಷ ಅಮ್ಮ ಇಲ್ಲ, ಅಪ್ಪನೂ ಬರಲಿಲ್ಲ..'' ಹಾಸನಾಂಬೆ ದರ್ಶನ ಪಡೆದ ಚನ್ನಮ್ಮ ಪುತ್ರಿ ಶೈಲಜಾ ಭಾವುಕ!

Ravi Janekal — Sat, 07 Nov 2026 15:16:16 +0530

ಹಾಸನ(ನ.7): ಇಂದಿಗೆ ಒಂಭತ್ತದಿನ ಹಾಸನಾಂಬ ದೇವಿಯ ದರ್ಶನಕ್ಕೆ ಭಕ್ತಸಾಗರ ಹರಿದುಬರುತ್ತಲೇ ಇದೆ. ಈ ನಡುವೆ ಮಾಜಿ ಪ್ರಧಾನಿ ಹೆಚ್‌ಡಿ ದೇವೇಗೌಡ ದಿ.ಚನಮ್ಮ ಅವರ ಪುತ್ರಿ ಶೈಲಜಾ ಈ ಬಾರಿ ಹಾಸನಂಬ ದರ್ಶನಕ್ಕೆ ತಾಯಿಯಿಲ್ಲದೆ ಒಂಟಿಯಾಗಿ ದರ್ಶನ ಪಡೆದರು. ಈ ವೇಳೆ ತಾಯಿಯ ನೆನಪಾಗಿ ಭಾವುಕರಾದ ಘಟನೆ ನಡೆಯಿತು.

ಪ್ರತಿ ವರ್ಷ ನಮ್ಮ ತಾಯಿ ಜೊತೆಗೆ ಬರುತ್ತಿದ್ದೆ..

ಹಾಸನಾಂಬ ದರ್ಶನಕ್ಕೆ ಪ್ರತಿ ವರ್ಷ ನನ್ನ ತಾಯಿಯ ಜೊತೆಯಲ್ಲೇ ಹಸನಾಂಬ ದೇವಿ ದರ್ಶನಕ್ಕೆ ಬರುತ್ತಿದ್ದೆ. ಈ ವರ್ಷ ನನ್ನ ತಾಯಿ ನೆನಪಲ್ಲಿ ಬಂದು ದರ್ಶನ ಮಾಡುತ್ತಿದ್ದೇನೆ. ಈ ಬಾರಿ ನನ್ನ ತಂದೆಯವರು ಕೂಡ ಆರೋಗ್ಯ ಸಮಸ್ಯೆಯಿಂದಾಗಿ ದರ್ಶನಕ್ಕೆ ಬರಲು ಸಾಧ್ಯವಾಗಿಲ್ಲ ಎಂದು ಭಾವುಕರಾದರು.

ಕನ್ನಡಿಗರೆಲ್ಲರಿಗೂ ಒಳ್ಳೆಯದಾಗಲಿ ಎಂದ ಚೆನ್ನಮ್ಮ ಪುತ್ರಿ

ಆ ತಾಯಿ ಹಾಸನಾಂಬ ದೇವಿ ನಾಡಿನ ಸಮಸ್ತ ಜನತೆ ಒಳ್ಳೆಯದು ಮಾಡಲಿ, ಆಯುರಾರೋಗ್ಯ, ನೆಮ್ಮದಿಯ ಬದುಕು ಕೊಟ್ಟು ಕಾಪಾಡಲಿ ಎಂದು ಬೇಡಿದ್ದೇನೆ ನಮ್ಮೆಲ್ಲ ಕನ್ನಡಿರಿಗೂ ಒಳ್ಳೆಯದಾಗಲಿ ಎಂದು ಪ್ರಾರ್ಥಿಸಿದ್ದೇನೆ ಎಂದರು.

30 ವರ್ಷಗಳಿಂದ ಹಾಸನಂಬಾ ದರ್ಶನ ಮಾಡುತ್ತಿದ್ದೇನೆ...

ಹಾಸನಾಂಬ ದೇವಿಯ ದರ್ಶನದ ವೇಳೆ ಬಾಲ್ಯದ ಬಗ್ಗೆ ನೆನಪಿಸಿಕೊಂಡ ಶೈಲಜಾ ಅವರು, 'ನಾನು ಚಿಕ್ಕವಳಿದ್ದಾಗ ಹಾಸನದಿಂದ ದೂರ ಇದ್ದೆ. ಬೆಂಗಳೂರಿನಲ್ಲಿ ನಾನು ಬೆಳೆದಿದ್ದು, ನನಗೆ ಹಾಸನದ ಒಡನಾಟ ಕಡಿಮೆ. ಆದರೂ ನನ್ನ ತಾಯಿ ಚನ್ನಮ್ಮ ನನ್ನನ್ನು ಪ್ರತಿವರ್ಷ ಹಾಸನಾಂಬ ದರ್ಶನಕ್ಕೆ ಕರೆದುಕೊಂಡು ಬರುತ್ತಿದ್ದರು. ಅಪಾರ ದೈವಭಕ್ತೆಯಾದ ನನ್ನ ತಾಯಿ ಕರೆದುಕೊಂಡು ಬಂದು ನನಗೆ ಹಾಸನಾಂಬೆಯ ದರ್ಶನ ಮಾಡಿಸುತ್ತಿದ್ದರು. ಅಂದಿನಿಂದ ಇಂದಿನವರೆಗೂ ಸುಮಾರು 30 ವರ್ಷಗಳಿಂದ ಹಾಸನಾಂಬ ದರ್ಶನ ಮಾಡುತ್ತಿದ್ದೇನೆ ಎಂದು ನೆನಪಿಸಿಕೊಂಡರು.

ಇಂದು ನನ್ನ ತಾಯಿಯನ್ನೇ ಕಂಡಷ್ಟು ನೆಮ್ಮದಿ

ಇವತ್ತು ನಾನು ದೇವಸ್ಥಾನಕ್ಕೆ ಬಂದ ತಕ್ಷಣವೇ ನನ್ನ ಅಮ್ಮನ ನೆನಪು ತುಂಬಾ ಕಾಡಿತು. ನಮ್ಮಮ್ಮನಿಗೆ ದೈವದ ಮೇಲೆ ಅಪಾರವಾದ ನಂಬಿಕೆ ಇತ್ತು. ಈಗಲೂ ನಮ್ಮ ತಾಯಿ ಹಾಸನಂಬೆಯ ತಾಯಿಯ ಸನ್ನಿಧಿಯಲ್ಲಿ ಇದ್ದಾರೆ ಎಂದು ನಾನು ನಂಬಿದ್ದೇನೆ. ಹೀಗಾಗಿ ನಾನು ಇಲ್ಲಿಗೆ ಬಂದಾಗ ತಕ್ಷಣ ನನ್ನ ತಾಯಿಯ ನೋಡಿದಷ್ಟು ನೆಮ್ಮದಿಯಾಗಿದೆ. ನನ್ನ ತಾಯಿಯ ಆತ್ಮ ಆ ಹಾಸನಾಂಬ ದೇವಿಯಲ್ಲಿ ಸೇರಿಕೊಂಡಿದೆ ಎಂದು ನಂಬಿದ್ದೇನೆ

ಇವತ್ತು ನಾನು ದೇವಸ್ಥಾನಕ್ಕೆ ಬಂದ ತಕ್ಷಣವೇ ನನ್ನ ಅಮ್ಮನ ನೆನಪು ಕಾಡಿತು

ಹಾಸನಾಂಬ ದರ್ಶನಕ್ಕೆ ಬಂದು ತಾಯಿಯ ದರ್ಶನ ಮಾಡಿದ್ದೇನೆ, ಅಶೀರ್ವಾದ ಪಡೆದಿದ್ದೇನೆ. ನಮ್ಮ ತಂದೆಯವರು ಕೂಡ ಮಂಗಳವಾರ ಹಾಸನಾಂಬ ದರ್ಶನಕ್ಕೆ ಬರಬೇಕು ಎಂದುಕೊಂಡಿದ್ದರು. ಆದರೆ ಸಾರ್ವಜನಿಕರಿಗೆ ನನ್ನಿಂದ ತೊಂದರೆಯಾಗುತ್ತದೆ ನಾನು ಬರುವುದಿಲ್ಲ, ನೀನು ಹೋಗಿ ದರ್ಶನ ಮಾಡಿಕೊಂಡು ಬಾ ಎಂದರು. ಹೀಗಾಗಿ ನಾನು ಬಂದಿದ್ದೇನೆ. ನಮ್ಮ ತಂದೆ ಪ್ರತಿವರ್ಷನೂ ಬರ್ತಿದ್ರು. ಈ ಬಾರಿ ಅವರ ಆರೋಗ್ಯವೂ ಸರಿಯಿಲ್ಲದ ಕಾರಣ, ಹಾಸನಾಂಬ ದರ್ಶನಕ್ಕೆ ಬರುವ ಭಕ್ತರಿಗೂ ತೊಂದರೆ ಆಗುವ ಕಾರಣ ಈ ಬಾರಿ ಬರಲಾಗಲಿಲ್ಲ ಎಂದರು.

ಅಪ್ಪನಿಗೆ ಪ್ರಸಾದ ತೆಗೆದುಕೊಂಡು ಹೋಗುತ್ತೇನೆ..

ನಾನು ಇಂದು ಹಾಸನಾಂಬ ದರ್ಶನ ಮಾಡಿಕೊಂಡು ಅಪ್ಪನಿಗೆ ತಾಯಿಯ ಪ್ರಸಾದ ತೆಗೆದುಕೊಂಡು ಹೋಗುತ್ತಿದ್ದೇನೆ. ನಮ್ಮ ತಾಯಿಯ ತವರೂರು ಮುತ್ತಿಗೆ ಹಿರೇಹಳ್ಳಿಯಲ್ಲಿ ಮುತ್ತಿಗೆ ಅಮ್ಮ ದೇವಸ್ಥಾನ ಇದೆ. ಅಲ್ಲಿಯೂ ವರ್ಷಕ್ಕೆ ಎರಡು ದಿನ ಮಾತ್ರ ಬಾಗಿಲು ತೆರೆಯುತ್ತದೆ. ಅಲ್ಲಿ ಪ್ರಥಮ ಪೂಜೆ ಸಲ್ಲಿಸುತ್ತಿದ್ದುದ್ದು ನಮ್ಮ ತಾಯಿಯವರೇ. ಆದರೆ ಈ ವರ್ಷದಿಂದ ನಮ್ಮ ಅಮ್ಮನನ್ನು ಕಳೆದುಕೊಂಡಿದ್ದೇವೆ. ಆದರಿಂದ ನಮ್ಮ ಕುಟುಂಬವೇ ಆ ಸಂಪ್ರದಾಯ ಮುಂದುವರಿಸಿಕೊಂಡು ಹೋಗುತ್ತದೆ ಎಂದು ಶೈಲಜಾ ತಿಳಿಸಿದರು.

ವೈದ್ಯರ ಯಡವಟ್ಟಿಗೆ ಕೋಮಾಗೆ ಜಾರಿದ ಮಗು, 103 ದಿನಗಳಿಂದ ಚಿಕಿತ್ಸೆ; ಈ ಸ್ಥಿತಿಗೆ ಆಸ್ಪತ್ರೆ ಮುಖ್ಯಸ್ಥರೇ ಹೊಣೆ ಎಂದ ಖಾದರ್

Ganesh Mabla Gowda — Sat, 07 Nov 2026 14:36:18 +0530

ಬೆಂಗಳೂರು: ನಾಗರಬಾವಿ ಕ್ಲೌಡ್‌ನೈನ್‌ ಆಸ್ಪತ್ರೆಯಲ್ಲಿ 103 ದಿನಗಳಿಂದ ಮಗುವೊಂದು ಕೋಮಾದಲ್ಲಿ ಚಿಕಿತ್ಸೆ ಪಡೆಯುತ್ತಿದೆ. ಮಗು ಕೋಮಾಗೆ ಜಾರಲು ಆಸ್ಪತ್ರೆಯ ಮುಖ್ಯಸ್ಥರೇ ಕಾರಣ ಎಂದು ಆರೋಗ್ಯ ಸಚಿವ ಯುಟಿ ಖಾದರ್ ಹೇಳಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿ ಸಂಪೂರ್ಣ ವರದಿ ನೀಡುವಂತೆ ಆದೇಶ ನೀಡಿದ್ದಾರೆ. ಒಂದು ವರ್ಷದ ಮಗು ಶಯಾನ್ ಕೋಮಾಗೆ ಜಾರಿರುವ ಕಂದಮ್ಮ.

ಆಗಿದ್ದೇನು?

ಕಿವಿ ಗಾಯದಿಂದಾಗಿ ನಾಗರಬಾವಿ ಕ್ಲೌಡ್‌ನೈನ್‌ ಆಸ್ಪತ್ರೆಗೆ ದಾಖಲಾಗಿದ್ದ ಒಂದು ವರ್ಷದ ಮಗು ವೈದ್ಯರ ನಿರ್ಲಕ್ಷ್ಯದಿಂದ ಕಳೆದ ಮೂರು ತಿಂಗಳಿಂದ ಕೋಮಾದಲ್ಲಿರುವಂತಾಗಿದೆ ಅನ್ನೋದು ಪೋಷಕರ ಆರೋಪ. ಇದೇ ವಿಚಾರವಾಗಿ ಮಗುವಿನ ಪೋಷಕರು ಆಸ್ಪತ್ರೆ ಮುಂದೆ ಇತ್ತೀಚೆಗೆ ಪ್ರತಿಭಟನೆ ನಡೆಸಿದ್ದರು. ಬಳಿಕ ವೈದ್ಯರ ವಿರುದ್ಧ ಸೂಕ್ತ ಕ್ರಮ ತೆಗೆದುಕೊಳ್ಳುವಂತೆ ಕೆಎಂಸಿ ಹಾಗೂ ಜಿಲ್ಲಾ ಆರೋಗ್ಯಾಧಿಕಾರಿಗೆ ದೂರು ನೀಡಿದ್ದರು. ದೂರಿನ ಬೆನ್ನಲ್ಲೇ ಸಿವಿ ರಾಮನ್ ಜನರಲ್ ಆಸ್ಪತ್ರೆಯ ಡಾ.ರಘುನಾಥ್ ನೇತೃತ್ವದ ವೈದ್ಯರ ತಂಡ ಆಸ್ಪತ್ರೆಗೆ ಭೇಟಿ ನೀಡಿತ್ತು. ಭೇಟಿ ವೇಳೆ ಮೇಲ್ನೋಟಕ್ಕೆ ವೈದ್ಯರ ಲೋಪ ಪತ್ತೆಯಾಗಿದೆ ಎನ್ನಲಾಗಿತ್ತು. ಇವತ್ತು ಖುದ್ದು ಸಚಿವ ಯುಟಿ ಖಾದರ್ ಅವರು ವರದಿ ಪರಿಶೀಲಿಸಿ ಖಡಕ್ ಆದೇಶ ನೀಡಿದ್ದಾರೆ.

ಖಾದರ್ ಏನಂದ್ರು?

ಯುಟಿ ಖಾದರ್ ಅವರು ಇವತ್ತು, ಮಗುವಿನ ಆರೋಗ್ಯವನ್ನು ವಿಚಾರಿಸಿದರು. ಬಳಿಕ ವರದಿ ಪರಿಶೀಲಿಸಿ ಮಗುವಿನ ಸ್ಥಿತಿಗೆ ಆಸ್ಪತ್ರೆ ಮುಖ್ಯಸ್ಥರೇ ಕಾರಣ. ಈ ಸ್ಥಿತಿಗೆ ಆಸ್ಪತ್ರೆಯ ಮುಖ್ಯಸ್ಥರೇ ಜವಾಬ್ದಾರಿ ತೆಗೆದುಕೊಳ್ಳಬೇಕು. ಅನಸ್ತೇಶಿಯಾ ಕೊಟ್ಟ ವೈದ್ಯರ ವಿರುದ್ಧವೂ ಕ್ರಮ ಆಗಬೇಕು ಎಂದಿದ್ದಾರೆ. ಅಲ್ಲದೇ ಹೆಚ್ಚಿನ ತನಿಖೆ ನಡೆಸಿ ವರದಿ ನೀಡುವಂತೆ ತಜ್ಞ ವೈದ್ಯರ ಸಮಿತಿಯನ್ನ ರಚನೆ ಮಾಡಿದ್ದಾರೆ. ಇಂದಿರಾಗಾಂಧಿ ಹಾಗೂ ನಿಮಾನ್ಸ್ ತಜ್ಞ ವೈದ್ಯರ ನೇತೃತ್ವದಲ್ಲಿ ಸಮಿತಿ ರಚನೆ ಮಾಡಿದ್ದಾರೆ. ಇನ್ನು ಸೂಕ್ತ ವೈದ್ಯರ ತಂಡ ಮತ್ತು ಮಹಿಳಾ‌ ಮತ್ತು ಮಕ್ಕಳ ಹಕ್ಕುಗಳ ಅಭಿವೃದ್ಧಿ ಇಲಾಖೆಯ ಅಧಿಕಾರಿಗಳು ಆಸ್ಪತ್ರೆಗೆ ಭೇಟಿ ನೀಡಿ ಮಗುವಿನ ಆರೋಗ್ಯವನ್ನು ವಿಚಾರಿಸಿದ್ದಾರೆ.

ಪೋಷಕರಿಂದ ಮುಂದುವರಿದ ಪ್ರತಿಭಟನೆ

ಇತ್ತ ಪೋಷಕರು ತಮ್ಮ ಮಗುವನ್ನು ಜೀವಂತವಾಗಿ ಕೊಡುವಂತೆ ತಮ್ಮ ಪ್ರತಿಭಟನೆಯನ್ನು ಮುಂದುವರಿಸಿದ್ದಾರೆ. ರಾತ್ರಿ ಹಗಲೆನ್ನದೆ ನಾಗರಬಾವಿ ಕ್ಲೌಡ್ ನೈನ್ ಆಸ್ಪತ್ರೆಯಲ್ಲಿ ಸಂಬಂಧಿಕರು ಧರಣಿ ನಡೆಸುತ್ತಿದ್ದಾರೆ. ಜೊತೆಗೆ ಮಗುವಿಗೆ ಅನಸ್ತೇಶಿಯಾ ಕೊಟ್ಟಿರುವ ಡಿಪ್ಲೋಮಾ ಪದವಿ ಅನಸ್ತ್ಯಾಲಜಿಸ್ಟ್ ಡಾ.ಚರಣ್ ವಿರುದ್ಧ ಶಿಸ್ತುಕ್ರಮ ಆಗಬೇಕು ಎಂದು ಆಗ್ರಹಿಸುತ್ತಿದ್ದಾರೆ. ಪ್ರಸ್ತುತ ಮಗು ಕೋಮಾದಲ್ಲಿದೆ. ಮಗು ಕೋಮಾಗೆ ಜಾರುತ್ತಿದ್ದಂತೆಯೇ ವೈದ್ಯರ ಯಟವಟ್ಟು ಬಹಿರಂಗ ಆಗಿದೆ. ಈ ಹಿನ್ನೆಲೆಯಲ್ಲಿ ಮಗುವಿಗೆ ಉಚಿತವಾಗಿ ಚಿಕಿತ್ಸೆ ನೀಡಲಾಗುತ್ತಿದೆ.

ಸಭೆ ನಡೆಸಾಕ್ ಧಮ್ ಇಲ್ಲೇನು?.. ಕಬ್ಬಿನ ದರ ನಿಗದಿ ವಿಚಾರ, ಪ್ರಿಯಾಂಕ್ ಖರ್ಗೆ ವಿರುದ್ಧ ಮಾಶ್ಯಾಳ ಮಠದ ಸ್ವಾಮೀಜಿ ವಾಗ್ದಾಳಿ!

Ravi Janekal — Sat, 07 Nov 2026 14:28:37 +0530

ಕಲಬುರಗಿ (ನ.7): ಕಬ್ಬಿನ ಬೆಲೆ ನಿಗದಿಗೆ ಆಗ್ರಹಿಸಿ ರಾಜ್ಯಾದ್ಯಂತ ರೈತರು ಪ್ರತಿಭಟನೆ ಮಾಡ್ತಿದ್ದಾರೆ, ಬೆಳಗಾವೀಲಿ ಕಳೆದ ಹತ್ತು ದಿನಗಳಿಂದ ಊಟ ನಿದ್ದೆ ಬಿಟ್ಟು ರೈತರು ಪ್ರತಿಭಟನೆ ಮಾಡಿದ್ರು. ಇಷ್ಟಾದ್ರೂ ಕಲಬುರಗೀಲಿ ಕಬ್ಬಿನ ಬೆಲೆ ನಿಗದಿ ಮಾಡುವ ವಿಚಾರಕ್ಕೆ ಇಲ್ಲಿವರೆಗೆ ಒಂದೇ ಒಂದು ಸಭೆ ಮಾಡಿಲ್ಲಂದ್ರ ಏನರ್ಥ? ಎಂದು ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ವಿರುದ್ಧ ಮಾಶ್ಯಾಳ ಮಠದ ಮರುಳಾರಾಧ್ಯ ಸ್ವಾಮೀಜಿ ಏಕವಚನದಲ್ಲಿ ವಾಗ್ದಾಳಿ ನಡೆಸಿದರು.

ಸಭೆ ಮಾಡೋಕ ಕು.. ಡ್ಯಾಗ್ ಧಮ್ ಇಲ್ಲೇನು?

ಅಫಜಲಪೂರ ತಾಲೂಕಿ‌ನ ಚೌಡಾಪುರದಲ್ಲಿ ನಡೆದ ಕಬ್ಬು ಬೆಳೆಗಾರರ ಪ್ರತಿಭಟನೆಯಲ್ಲಿ ಭಾಗಿಯಾಗಿ ಮಾತನಾಡಿದ ಸ್ವಾಮಿಜಿ ಸ್ವಾಮೀಜಿ ಈ ವೇಳೆ ಪ್ರಿಯಾಂಕ್ ಖರ್ಗೆ ಈವರೆಗೆ ಒಂದೇ ಒಂದು ಸಭೆ ಮಾಡದ್ದಕ್ಕೆ ಆಕ್ರೋಶ ವ್ಯಕ್ತಪಡಿಸಿದ ಸ್ವಾಮೀಜಿ, ಕಬ್ಬು ಬೆಳೆಗಾರರ ಸಮಸ್ಯೆ ಬಗೆಹರಿಸಲು ಎಲ್ಲರೂ ಡಿಸಿ, ಶಾಸಕರ ಹೆಸರು ಹೇಳ್ತಿದ್ದಾರೆ. ಜಿಲ್ಲಾ ಉಸ್ತುವಾರಿ ಸಚಿವರೇನು ಉಂಡು ಮಲಗೋಕೆ ಇದ್ದಾರಾ? ಕಲಬುರಗಿಗೆ ಜಿಲ್ಲಾ ಉಸ್ತುವಾರಿ ಸಚಿವರು ನೀವಾ ಅದೀರಿ.. ಅದರಲ್ಲೂ ರಾಜ್ಯದ ಹೋಂ ಮಿನಿಸ್ಟರ್ ಬೇರೆ ಅದೀರಿ. ಆದರೆ ಕಬ್ಬು ಬೆಲೆ ನಿಗದಿ ಸಂಬಂಧ ಇಲ್ಲಿವರೆಗೆ ಜಿಲ್ಲೆಯಲ್ಲಿ ಒಂದೇ ಒಂದು ಮೀಟಿಂಗ್ ನಡೆಸಿಲ್ಲ ನಿಮ್ಮ ಕು.. ಡ್ಯಾಗ ಧಮ್ ಇಲ್ಲೇನು ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಅವರಿವರಿಗೆ ಬೈಕೋಂತ ಕುಡೋದು ಬಿಟ್ಟು ರೈತರಿಗೆ ಒಳ್ಳೆ ಕೆಲಸ ಮಾಡಿ

ದೊಡ್ಡ ಸ್ಥಾನದಲ್ಲಿ ರೈತರಿಗೆ ಜನಕ ಉಪಯೋಗ ಆಗುವಂತಹ ಕೆಲಸ ಮಾಡೋದುಬಿಟ್ಟು ದಿನ ಬೆಳಗಾದರೆ ಅವರಿಗೆ ಬೈಯೋದು, ಇವರಿಗೆ ಬೈಯೋದು ಮಾಡ್ಕೊಂತ ಕುಂತೀರಿ. ಆದ್ರೆ ರೈತರ ವಿಚಾರಕ್ಕೆ ಬಂದಾಗ ಧಮ್ ತೋರಿಸಬೇಕು, ಬೆಲೆ ನಿಗದಿಗೆ ಮೀಟಿಂಗ್ ಮಾಡಬೇಕು ಅದುಬಿಟ್ಟು ಕೆಲಸಕ್ಕೆ ಬಾರದ ಮಾತುಗಳು ಆಡ್ಕೋಂತ ಕುಂತೀರಿ ಎಂದು ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ವಿರುದ್ಧ ಏಕವಚನದಲ್ಲಿ ವಾಗ್ದಾಳಿ ನಡೆಸಿರು.

Bengaluru ಆಟೋ ಹಿಂಬದಿ ಬರಹ; ಚಾಲಕನ ಹೃದಯವಂತಿಕೆ, ಪ್ರೀತಿಗೆ ನೆಟ್ಟಿಗರ ಸೆಲ್ಯೂಟ್

Mahmad Rafik — Sat, 07 Nov 2026 14:24:15 +0530

ಬೆಂಗಳೂರು: ನೀವು ಬೆಂಗಳೂರಿನ ರಸ್ತೆಗಿಳಿದ್ರೆ ವಿಭಿನ್ನ ಪ್ರಪಂಚದ ದರ್ಶನವಾಗುತ್ತದೆ. ಅದರಲ್ಲಿಯೂ ಟ್ರಾಫಿಕ್‌ನಲ್ಲಿ ಸಿಲುಕಿದ ಸಂದರ್ಭದಲ್ಲಿ ತಮ್ಮ ಸುತ್ತಮುತ್ತ ನಿಂತಿರುವ ವಾಹನಗಳತ್ತ ಕಣ್ಣು ಹೋಗುತ್ತದೆ. ಒಂದು ವೇಳೆ ನೀವು ಸಾರಿಗೆ ಬಸ್‌ನಲ್ಲಿ ಪ್ರಯಾಣಿಸುತ್ತಿದ್ರೆ, ನಿಮಗೆ ವಿವಿಧ ಭಾಗದ ಜನರೊಂದಿಗೆ ಮಾತನಾಡುವ ಅವಕಾಶವೂ ಲಭ್ಯವಾಗುತ್ತದೆ. ಹಾಗೆಯೇ ಆಟೋಗಳ ಹಿಂಬದಿ ಬರಹ ನಿಮ್ಮನ್ನು ಆಕರ್ಷಿಸುತ್ತವೆ. ಚಾಲಕರು ತಮ್ಮ ಆಟೋಗಳ ಮೇಲೆ ವಿಶೇಷ ಮತ್ತು ವಿಭಿನ್ನ ಸಾಲುಗಳನ್ನು ಬರೆಸುತ್ತಿರುತ್ತಾರೆ. ಕೆಲವರು ತಮಾಷೆಯಾಗಿ ಈ ಸಾಲುಗಳ ಫೋಟೋಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಶೇರ್ ಮಾಡಿಕೊಳ್ಳುತ್ತಿರುತ್ತಾರೆ. ಆದ್ರೆ ಆ ಸಾಲುಗಳ ಹಿಂದಿರುವ ಕಥೆ ಕೇಳಿದ್ರೆ ಕಣ್ಣಾಲಿಗಳು ತೇವಗೊಳ್ಳುತ್ತವೆ.

ಇಂತಹ ವಿಶೇಷ ಮತ್ತು ಭಾವನಾತ್ಮಕ ಸಾಲುಗಳನ್ನು ಬರೆಸಿರೋ ಆಟೋ ಚಾಲಕನ ಕಥೆ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿವೆ. ಈ ವಿಡಿಯೋ ನೋಡಿದ ಸೋಶಿಯಲ್ ಮೀಡಿಯಾ ಬಳಕೆದಾರರು, ಸಮಾಜಕ್ಕೆ ನಿಜವಾದ ಹೀರೋ ಬಾಸ್ ನೀನೇ ಅಣ್ಣ. ನಿಮ್ಮ ಮಗಳ ಭವಿಷ್ಯ ನಿಮ್ಮ ಜೀವನ ಉಜ್ವಲವಾಗಲಿ ಅಂತ ದೇವರಲ್ಲಿ ಪ್ರಾರ್ಥಿಸುತ್ತೇನೆ. ಪ್ರಾಣಕ್ಕಿಂತ ಹೆಚ್ಚಾಗಿ ಪ್ರೀತಿ ಮಾಡಿದವರು ಇಲ್ಲ ಅಂದ್ರೂ ಇದಾರೆ ಅನ್ಕೊಂಡೆ ಜೀವಿಸುದೆ ನಿಜವಾದ ಪ್ರೀತಿ ಎಂದು ಕಮೆಂಟ್ ಮಾಡಿದ್ದಾರೆ.

ಆಟೋ ಮೇಲಿನ ಸಾಲುಗಳು ಹೀಗಿವೆ

ಕೊನೆಯವರೆಗೂ ಇರುತ್ತೇನೆ ಎಂದಳು!

ಮಾತು ತಪ್ಪಲಿಲ್ಲ

ಈಗಲೂ ಜೊತೆಗೇ ಇದ್ದಾಳೆ,

ಒಮ್ಮೆ ನೆನಪಾಗಿ, ಮತ್ತೊಮ್ಮೆ ನೋವಾಗಿ!

ಆಟೋ ಚಾಲಕನ ಕಣ್ಣೀರಿನ ಕಥೆ

ಈ ವಿಡಿಯೋವನ್ನು Babugvibes ಹೆಸರಿನ ಇನ್‌ಸ್ಟಾಗ್ರಾಂನಲ್ಲಿ ಈ ವಿಡಿಯೋ ಶೇರ್ ಮಾಡಿಕೊಳ್ಳಲಾಗಿದೆ. ಆಟೋದ ಮೇಲಿನ ಸಾಲುಗಳನ್ನು ಗಮನಿಸಿದ ವ್ಲಾಗರ್ ಚಾಲಕನೊಂದಿಗೆ ಮಾತನಾಡಿದ್ದಾರೆ. ಈ ಸಾಲುಗಳ ಅರ್ಥ ಏನು ಎಂದು ಕೇಳಿದಾಗ, ನನ್ನ ಪತ್ನಿ ಗರ್ಭಿಣಿಯಾಗಿದ್ದಾಗ ಸಾವನ್ನಪ್ಪಿದರು. ಸಾವನ್ನಪ್ಪಿದ್ರೂ ಪತ್ನಿ ನನ್ನ ಜೊತೆಯಲ್ಲಿಯೇ ಇದ್ದಾಳೆ ಎಂದು ಈ ಸಾಲುಗಳನ್ನು ಬರೆಸಿದ್ದೇನೆ. ಈಗ ಇರೋ ಮಗಳಿಗಾಗಿ ಜೀವನ ನಡೆಸುತ್ತಿದ್ದೇನೆ. ನನ್ನೊಂದಿಗೆ ಮುಂದಿನ ಜೀವನ ನಡೆಸಲು ಮಗಳನ್ನು ಬಿಟ್ಟು ಹೋಗಿದ್ದಾನೆ. ಮುಂದಿನ ಜೀವನವೆಲ್ಲಾ ಮಗಳಿಗೆ ಮೀಸಲು. ಪತ್ನಿ ನೆನಪುಗಳ ಜೊತೆಯಲ್ಲಿದ್ದೇನೆ ಎಂದು ಚಾಲಕ ತಮ್ಮ ಕಥೆಯನ್ನು ಹೇಳಿಕೊಂಡಿದ್ದಾರೆ.

ಇದನ್ನೂ ಓದಿ: ನೀವೇನು ತರಕಾರಿ ಮಂಗಳ ಗ್ರಹದಿಂದ ತರ್ತೀರಾ? ರಾಮೇಶ್ವರಂ ಕೆಫೆ ಮಾಲೀಕ ಫುಲ್ ಟ್ರೋಲ್

ಈ ಆಟೋ ಚಾಲಕ ಯಾರು ಮತ್ತು ಎಲ್ಲಯವರು ಎಂಬುದರ ಬಗ್ಗೆ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ. ಇಲ್ಲಿವರೆಗೆ ಈ ವಿಡಿಯೋಗೆ 61 ಲಕ್ಷಕ್ಕೂ ಅಧಿಕ ವ್ಯೂವ್, 5 ಸಾವಿರಕ್ಕೂ ಹೆಚ್ಚು ಕಮೆಂಟ್‌ಗಳು ಬಂದಿವೆ. 50 ಸಾವಿರಕ್ಕೂ ಅಧಿಕ ಲೈಕ್ಸ್‌ಗಳನ್ನು ಈ ವಿಡಿಯೋ ಪಡೆದುಕೊಂಡಿದೆ.

ಇದನ್ನೂ ಓದಿ: ಗ್ರಾಮದ ಮಧ್ಯೆ ಪಾಳುಬಿದ್ದ 300 ವರ್ಷದ ಶಾಪಗ್ರಸ್ಥ ಮನೆ; ನಿಧಿ ಇದ್ರೂ ಮುಟ್ಟಂಗಿಲ್ಲ!

View this post on Instagram

A post shared by Babugvibes (@babugvibes)

‘ಆರಂಭದಲ್ಲಿ ಟೀಕೆ, ಅಪಹಾಸ್ಯ ಮಾಡಿದವರ ಮುಂದೆ ಸಾಧನೆ ಮೆರೆದ ನಾರಿಯರು!’: ಧಾರಾವಾಡದ ತೀರ್ಥಾ ಗ್ರಾಮದ ಮಹಿಳೆಯರ ಬೀಜ ಬ್ಯಾಂಕ್‌ಗೆ ಕೇಂದ್ರದ ಪ್ರಶಸ್ತಿ!

Sushma Hegde — Sat, 07 Nov 2026 14:20:13 +0530

ಕರ್ನಾಟಕದ ಮಹಿಳೆಯರ ಸಾಧನೆ ಮತ್ತೊಮ್ಮೆ ದೇಶದ ಗಮನ ಸೆಳೆದಿದೆ. ಕಣ್ಮರೆಯಾಗುತ್ತಿದ್ದ ಸಾಂಪ್ರದಾಯಿಕ ಬೆಳೆಗಳ ಬೀಜಗಳನ್ನು ಉಳಿಸಬೇಕು ಎಂಬ ಉದ್ದೇಶದಿಂದ 2018ರಲ್ಲಿ ಕೇವಲ 14 ಮಹಿಳೆಯರು ಆರಂಭಿಸಿದ ಪುಟ್ಟ ಪ್ರಯತ್ನ ಇಂದು ದೊಡ್ಡ ಕೃಷಿ ಆಂದೋಲನವಾಗಿ ಬೆಳೆದಿದೆ. ಎಂಟು ವರ್ಷಗಳಲ್ಲಿ 30 ಹಳ್ಳಿಗಳಿಗೆ ವಿಸ್ತರಿಸಿರುವ ಈ ಮಹಿಳಾ ಸಂಘಕ್ಕೆ ಇದೀಗ ₹10 ಲಕ್ಷ ನಗದು ಬಹುಮಾನ ಹೊಂದಿರುವ ಪ್ರತಿಷ್ಠಿತ ರಾಷ್ಟ್ರೀಯ ಪ್ರಶಸ್ತಿ ಒಲಿದು ಬಂದಿದೆ.

ಧಾರವಾಡ ಜಿಲ್ಲೆಯ ಕುಂದಗೋಳ ತಾಲೂಕಿನ ತೀರ್ಥಾ ಗ್ರಾಮದ ಬಿಬಿಜಾನ್ ಮೌಲಾಸಾಬ್ ಹಳೇಮನಿ ಅವರ ನೇತೃತ್ವದಲ್ಲಿ ಆರಂಭವಾದ ಈ ಅಭಿಯಾನ ಇಂದು ನೂರಾರು ಸಾಂಪ್ರದಾಯಿಕ ಬೀಜಗಳ ಸಂರಕ್ಷಣೆಗೆ ನೆರವಾಗುತ್ತಿದೆ. ಬಿಬಿ ಫಾತಿಮಾ ಮಹಿಳಾ ಸ್ವಸಹಾಯ ಸಂಘ (SHG) ಹೆಸರಿನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಈ ತಂಡ, ರೈತರಲ್ಲಿ ಸಿರಿಧಾನ್ಯ ಕೃಷಿಯನ್ನು ಮತ್ತೆ ಜನಪ್ರಿಯಗೊಳಿಸುವುದರ ಜೊತೆಗೆ ಸ್ಥಳೀಯ ತಳಿಗಳ ಬೀಜಗಳನ್ನು ಮುಂದಿನ ಪೀಳಿಗೆಗೆ ಉಳಿಸುವ ಕೆಲಸ ಮಾಡುತ್ತಿದೆ.

ಈ ಸಾಧನೆಯನ್ನು ಗುರುತಿಸಿರುವ ಕೇಂದ್ರ ಕೃಷಿ ಮತ್ತು ರೈತ ಕಲ್ಯಾಣ ಸಚಿವಾಲಯದ ಅಡಿಯಲ್ಲಿ ಕಾರ್ಯನಿರ್ವಹಿಸುವ ಸಸ್ಯ ತಳಿಗಳ ಸಂರಕ್ಷಣೆ ಮತ್ತು ರೈತರ ಹಕ್ಕುಗಳ ಪ್ರಾಧಿಕಾರ (PPVFRA), ಸಂಘಕ್ಕೆ 'ಪ್ಲಾಂಟ್ ಜೀನೋಮ್ ಸೇವಿಯರ್ ಕಮ್ಯುನಿಟಿ ಅವಾರ್ಡ್' ಪ್ರಶಸ್ತಿಯನ್ನು ಘೋಷಿಸಿದೆ. ಈ ಪ್ರಶಸ್ತಿಯು ₹10 ಲಕ್ಷ ನಗದು ಬಹುಮಾನ, ಪ್ರಮಾಣಪತ್ರ ಹಾಗೂ ಸ್ಮರಣಿಕೆಯನ್ನು ಒಳಗೊಂಡಿದೆ. ನವೆಂಬರ್ 12, 2026ರಂದು ನವದೆಹಲಿಯಲ್ಲಿ ಪ್ರಶಸ್ತಿ ಪ್ರದಾನ ಸಮಾರಂಭ ನಡೆಯಲಿದೆ.

ತಂದೆಯ ಅಭ್ಯಾಸವೇ ಬೀಜ ಉಳಿಸುವ ಆಸಕ್ತಿಗೆ ಪ್ರೇರಣೆ

ಬಿಬಿಜಾನ್ ಹಳೇಮನಿ ಅವರಿಗೆ ಸಾಂಪ್ರದಾಯಿಕ ಬೀಜಗಳನ್ನು ಸಂರಕ್ಷಿಸುವ ಆಸಕ್ತಿ ಚಿಕ್ಕಂದಿನಿಂದಲೇ ಇತ್ತು. ಇದಕ್ಕೆ ಅವರ ತಂದೆಯೇ ಮುಖ್ಯ ಪ್ರೇರಣೆ. ತಂದೆ ವಿವಿಧ ಬೆಳೆಗಳ ಬೀಜಗಳನ್ನು ಜೋಪಾನವಾಗಿ ಸಂಗ್ರಹಿಸಿ ಮುಂದಿನ ಕೃಷಿಗೆ ಬಳಸುವುದನ್ನು ಅವರು ಬಾಲ್ಯದಿಂದ ನೋಡಿಕೊಂಡು ಬೆಳೆದಿದ್ದರು. ಕಾಲಕ್ರಮೇಣ ಹಳೆಯ ತಳಿಯ ಬೆಳೆಗಳು ಹೊಲಗಳಿಂದ ಕಣ್ಮರೆಯಾಗುತ್ತಿರುವುದನ್ನು ಗಮನಿಸಿದ ಅವರು, ಅವುಗಳನ್ನು ಉಳಿಸಬೇಕೆಂದು ನಿರ್ಧರಿಸಿದರು. 2018ರಲ್ಲಿ ತಮ್ಮ ಗ್ರಾಮದ ಇತರ 14 ಮಹಿಳೆಯರನ್ನು ಒಗ್ಗೂಡಿಸಿ ಬೀಜ ಸಂರಕ್ಷಣೆಯ ಕಾರ್ಯಕ್ಕೆ ಕೈಹಾಕಿದರು. ಈ ಪ್ರಯತ್ನಕ್ಕೆ ಸಾವಯವ ಕೃಷಿ ಮತ್ತು ಸುಸ್ಥಿರ ಕೃಷಿಯನ್ನು ಉತ್ತೇಜಿಸುವ ಸಹಜ ಸಮೃದ್ಧ ಸಂಸ್ಥೆಯ ಮಾರ್ಗದರ್ಶನ ಹಾಗೂ ಬೆಂಬಲವೂ ದೊರೆಯಿತು.

ಆ ಸಮಯದಲ್ಲಿ ಈ ಭಾಗದಲ್ಲಿ ಸಿರಿಧಾನ್ಯ ಕೃಷಿ ಕಡಿಮೆಯಾಗುತ್ತಿತ್ತು. ರೈತರು ರಾಗಿ, ನವಣೆ ಸೇರಿದಂತೆ ಸಾಂಪ್ರದಾಯಿಕ ಬೆಳೆಗಳನ್ನು ಬಿಟ್ಟು ಮೆಕ್ಕೆಜೋಳ, ಹತ್ತಿ ಮತ್ತು ಭತ್ತದಂತಹ ಬೆಳೆಗಳತ್ತ ಹೆಚ್ಚು ಒಲವು ತೋರಿಸುತ್ತಿದ್ದರು. ಸಿರಿಧಾನ್ಯ ಬೆಳೆದರೂ ಕಟಾವಿನ ನಂತರ ಸ್ವಚ್ಛಗೊಳಿಸುವುದು ಕಷ್ಟವಾಗುತ್ತಿತ್ತು. ಇದರಿಂದ ಕೃಷಿ ಲಾಭದಾಯಕವಲ್ಲ ಎಂಬ ಭಾವನೆ ರೈತರಲ್ಲಿ ಮೂಡಿತ್ತು.

ಮನೆಯ ಪಕ್ಕದಲ್ಲೇ ಆರಂಭವಾದ ಬೀಜ ಬ್ಯಾಂಕ್‌ನಲ್ಲಿ 250ಕ್ಕೂ ಹೆಚ್ಚು ತಳಿಗಳು!

2018ರಲ್ಲಿ ಬಿಬಿಜಾನ್ ಅವರ ಮನೆಯ ಪಕ್ಕದಲ್ಲೇ ಸಮುದಾಯ ಬೀಜ ಬ್ಯಾಂಕ್ ಸ್ಥಾಪಿಸಲಾಯಿತು. ಆರಂಭದಲ್ಲಿ ಸಿರಿಧಾನ್ಯಗಳ ಬೀಜ ಸಂಗ್ರಹ ಮತ್ತು ವಿತರಣೆಗೆ ಒತ್ತು ನೀಡಿದ್ದ ಮಹಿಳೆಯರು, ನಂತರ ಬೇಳೆಕಾಳು, ಎಣ್ಣೆಕಾಳು, ಭತ್ತ ಹಾಗೂ ತರಕಾರಿ ಬೀಜಗಳನ್ನೂ ಸಂಗ್ರಹಿಸಲು ಆರಂಭಿಸಿದರು.

ಇಂದು ಈ ಬೀಜ ಬ್ಯಾಂಕ್‌ನಲ್ಲಿ 250ಕ್ಕೂ ಹೆಚ್ಚು ಸಾಂಪ್ರದಾಯಿಕ ಬೀಜದ ತಳಿಗಳನ್ನು ಸಂರಕ್ಷಿಸಲಾಗುತ್ತಿದೆ. ಅವುಗಳಲ್ಲಿ ಪ್ರಮುಖವಾದವು:

- 70 ಬಗೆಯ ರಾಗಿ ತಳಿಗಳು

- 25 ಬಗೆಯ ಸಾಮೆ ತಳಿಗಳು

- 2 ಬಗೆಯ ಬರ್ನ್‌ಯಾರ್ಡ್ ಮಿಲೆಟ್ ತಳಿಗಳು

- 25 ಬಗೆಯ ಹುರಳಿಕಾಳು ತಳಿಗಳು

- 10 ಬಗೆಯ ಕಡಲೆ ತಳಿಗಳು

- 25 ಬಗೆಯ ಭತ್ತದ ತಳಿಗಳು

- ನವಣೆ, ಹೆಸರುಕಾಳು, ಎಣ್ಣೆಕಾಳು ಮತ್ತು ಸ್ಥಳೀಯ ತರಕಾರಿ ತಳಿಗಳು.

ಈ ಬೀಜ ಬ್ಯಾಂಕ್‌ನ ಮತ್ತೊಂದು ವಿಶೇಷವೆಂದರೆ, ರೈತರು ಇಲ್ಲಿಂದ ಬೀಜಗಳನ್ನು ಸಾಲವಾಗಿ ಪಡೆಯಬಹುದು. ಬೆಳೆ ಕಟಾವಿನ ನಂತರ ಪಡೆದ ಬೀಜಕ್ಕಿಂತ ಹೆಚ್ಚಿನ ಪ್ರಮಾಣದ ಬೀಜವನ್ನು ಮರಳಿ ನೀಡಬೇಕು. ಹೀಗೆ ಬೀಜಗಳ ಸಂಗ್ರಹ ನಿರಂತರವಾಗಿ ಹೆಚ್ಚಾಗುವ ವ್ಯವಸ್ಥೆಯನ್ನು ಮಹಿಳೆಯರು ರೂಪಿಸಿದ್ದಾರೆ. ಹವಾಮಾನ ಬದಲಾವಣೆ, ಮಳೆಯ ಏರಿಳಿತಗಳ ನಡುವೆಯೂ ಸ್ಥಳೀಯ ಪರಿಸರಕ್ಕೆ ಹೊಂದಿಕೊಳ್ಳುವ ಸಾಮರ್ಥ್ಯ ಹೊಂದಿರುವ ಸಾಂಪ್ರದಾಯಿಕ ತಳಿಗಳನ್ನು ರೈತರಿಗೆ ತಲುಪಿಸುವುದು ಈ ಸಂಘದ ಪ್ರಮುಖ ಉದ್ದೇಶವಾಗಿದೆ.

30 ಹಳ್ಳಿಗಳಲ್ಲಿ ಮತ್ತೆ ಸಿರಿಧಾನ್ಯ ಕೃಷಿಗೆ ಉತ್ತೇಜನ

ಬೀಜಗಳನ್ನು ಸಂಗ್ರಹಿಸುವುದಷ್ಟೇ ಈ ಮಹಿಳೆಯರ ಗುರಿಯಾಗಿರಲಿಲ್ಲ. ರೈತರು ಮತ್ತೆ ಸಿರಿಧಾನ್ಯ ಕೃಷಿ ಆರಂಭಿಸುವಂತೆ ಪ್ರೇರೇಪಿಸುವ ಸವಾಲನ್ನೂ ಅವರು ಎದುರಿಸಬೇಕಾಯಿತು. ಆರಂಭದಲ್ಲಿ ವಿವಿಧ ತಾಲೂಕುಗಳ ಹಳ್ಳಿಗಳಿಗೆ ತೆರಳಿ ರೈತರನ್ನು ಭೇಟಿಯಾಗಿ ಸಿರಿಧಾನ್ಯ ಕೃಷಿಯ ಪ್ರಯೋಜನಗಳನ್ನು ವಿವರಿಸುತ್ತಿದ್ದರು. ಆದರೆ ರೈತರಿಂದ ಅಷ್ಟಾಗಿ ಸ್ಪಂದನೆ ಸಿಗುತ್ತಿರಲಿಲ್ಲ. ಸಭೆಗಳಿಗೆ ಬರಲು ಕೂಡ ಹಲವರು ಹಿಂದೇಟು ಹಾಕುತ್ತಿದ್ದರು.

ಆಗ ಸಹಜ ಸಮೃದ್ಧ ಸಂಸ್ಥೆಯ ನೆರವಿನಿಂದ 'ನವಧಾನ್ಯ ಕಿಟ್‌'ಗಳನ್ನು ವಿತರಿಸಲು ಆರಂಭಿಸಿದರು. ಪ್ರತಿ ಕಿಟ್‌ನಲ್ಲಿ ಒಂದು ಎಕರೆ ಜಮೀನಿನಲ್ಲಿ ಬೆಳೆಯಬಹುದಾದ ಒಂಬತ್ತು ಬಗೆಯ ಸಿರಿಧಾನ್ಯಗಳ ಬೀಜಗಳಿದ್ದವು. ಇದರಿಂದ ರೈತರು ವಿವಿಧ ತಳಿಗಳನ್ನು ಪ್ರಯೋಗಿಸಲು ಅವಕಾಶ ದೊರೆಯಿತು. ಕ್ರಮೇಣ ರೈತರ ಆಸಕ್ತಿ ಹೆಚ್ಚಾಯಿತು. ಇಂದು ಮಳೆಯಾಶ್ರಿತ ಕೃಷಿ ಪ್ರದೇಶಗಳ 30 ಹಳ್ಳಿಗಳಲ್ಲಿ ಮಿಶ್ರ ಬೆಳೆ ಪದ್ಧತಿಯೊಂದಿಗೆ ಸಿರಿಧಾನ್ಯ ಕೃಷಿ ಪುನರುಜ್ಜೀವನಗೊಳ್ಳಲು ಈ ಮಹಿಳೆಯರ ಪ್ರಯತ್ನ ಪ್ರಮುಖ ಪಾತ್ರ ವಹಿಸಿದೆ.

ಬೀಜ ಸಂರಕ್ಷಣೆಯ ಜೊತೆಗೆ ಸಂಸ್ಕರಣಾ ಘಟಕವನ್ನೂ ಸ್ಥಾಪನೆ

ಸಿರಿಧಾನ್ಯ ಕೃಷಿ ಹೆಚ್ಚಾದರೂ ಕಟಾವಿನ ನಂತರ ಧಾನ್ಯಗಳನ್ನು ಸ್ವಚ್ಛಗೊಳಿಸಿ ಸಂಸ್ಕರಿಸುವುದು ರೈತರಿಗೆ ದೊಡ್ಡ ಸಮಸ್ಯೆಯಾಗಿತ್ತು. ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಮಹಿಳೆಯರು 2022ರಲ್ಲಿ ತೀರ್ಥಾ ಗ್ರಾಮದಲ್ಲಿ ಸಿರಿಧಾನ್ಯ ಸಂಸ್ಕರಣಾ ಘಟಕವನ್ನು ಆರಂಭಿಸಿದರು. ಸಹಜ ಸಮೃದ್ಧ, ಹೈದರಾಬಾದ್‌ನ ಭಾರತೀಯ ಸಿರಿಧಾನ್ಯ ಸಂಶೋಧನಾ ಸಂಸ್ಥೆ (IIMR) ಮತ್ತು CROPS4HD ಯೋಜನೆಯ ಸಹಕಾರದಿಂದ ಈ ಘಟಕ ಸ್ಥಾಪನೆಯಾಯಿತು.

ಈ ಘಟಕವನ್ನು ಮಹಿಳೆಯರೇ ನಿರ್ವಹಿಸುತ್ತಿದ್ದಾರೆ. ಸೆಲ್ಕೊ ಫೌಂಡೇಶನ್ ಸೌರ ವಿದ್ಯುತ್ ವ್ಯವಸ್ಥೆ ಒದಗಿಸಿದ್ದು, ಇದರಿಂದ ವಿದ್ಯುತ್ ವೆಚ್ಚ ಕಡಿಮೆ ಮಾಡಲು ಸಹಾಯವಾಗಿದೆ. ಬೆಂಗಳೂರಿನ ಮಿಲೆಟ್ ಫೌಂಡೇಶನ್ ಘಟಕದ ಯಂತ್ರೋಪಕರಣಗಳನ್ನು ನಿರ್ವಹಿಸುವ ಕುರಿತು ಮಹಿಳೆಯರಿಗೆ ತರಬೇತಿ ನೀಡಿದೆ.ಇದರ ಮೂಲಕ ರೈತರು ತಮ್ಮ ಬೆಳೆಗಳನ್ನು ಸಂಸ್ಕರಿಸಿ ಮಾರುಕಟ್ಟೆಗೆ ತಲುಪಿಸಲು ನೆರವಾಗುತ್ತಿದ್ದಾರೆ. ಮಧ್ಯವರ್ತಿಗಳ ಮೇಲಿನ ಅವಲಂಬನೆಯನ್ನೂ ಕಡಿಮೆ ಮಾಡುವ ಪ್ರಯತ್ನ ನಡೆಯುತ್ತಿದೆ.

ಆರಂಭದಲ್ಲಿ ಟೀಕೆ, ಅಪಹಾಸ್ಯ; ಈಗ ದೇಶವೇ ಗುರುತಿಸಿದ ಸಾಧನೆ!

ಈ ಮಹಿಳೆಯರ ಪಯಣ ಅಷ್ಟು ಸುಲಭವಾಗಿರಲಿಲ್ಲ. ಆರಂಭದಲ್ಲಿ ಗ್ರಾಮದ ಕೆಲವರು ಅವರ ಕೆಲಸವನ್ನು ಗಂಭೀರವಾಗಿ ಪರಿಗಣಿಸದೆ ಅಪಹಾಸ್ಯ ಮಾಡುತ್ತಿದ್ದರು. ಕೆಲಸದ ನಿಮಿತ್ತ ಹೆಗಲಿಗೆ ಚೀಲ ಹಾಕಿಕೊಂಡು ಹೋಗುತ್ತಿದ್ದರೂ ಕೆಲವರು ಟೀಕೆ ಮಾಡುತ್ತಿದ್ದರು ಎಂದು ಬಿಬಿಜಾನ್ ನೆನಪಿಸಿಕೊಂಡಿದ್ದಾರೆ. ಸಂಘದ ಕೆಲಸಕ್ಕಾಗಿ ಬ್ಯಾಂಕ್ ಖಾತೆ ತೆರೆಯುವ ಸಂದರ್ಭದಲ್ಲೂ ಮಹಿಳೆಯರು ಸಮಸ್ಯೆ ಎದುರಿಸಿದ್ದರು. ಈ ಪ್ರಕ್ರಿಯೆ ವೇಳೆ ಫೋನ್ ಕರೆ ಸ್ವೀಕರಿಸಿದ್ದಕ್ಕೆ ಬ್ಯಾಂಕ್ ಮ್ಯಾನೇಜರ್ ಅಗೌರವದಿಂದ ವರ್ತಿಸಿದ್ದ ಘಟನೆಯನ್ನೂ ಅವರು ಸ್ಮರಿಸಿದ್ದಾರೆ.

ಆದರೆ ಟೀಕೆಗಳಿಗೆ ತಲೆಕೆಡಿಸಿಕೊಳ್ಳದೆ ಮಹಿಳೆಯರು ತಮ್ಮ ಕೆಲಸ ಮುಂದುವರಿಸಿದರು. ಒಂದು ಮನೆಯ ಪಕ್ಕದಲ್ಲಿ ಆರಂಭವಾದ ಪುಟ್ಟ ಬೀಜ ಬ್ಯಾಂಕ್ ಇಂದು 30 ಹಳ್ಳಿಗಳ ರೈತರಿಗೆ ನೆರವಾಗುತ್ತಿದೆ. ನೂರಾರು ಸಾಂಪ್ರದಾಯಿಕ ಬೀಜದ ತಳಿಗಳನ್ನು ಉಳಿಸುವುದರ ಜೊತೆಗೆ ಮಹಿಳೆಯರೇ ಕೃಷಿ ಉದ್ಯಮವನ್ನೂ ಮುನ್ನಡೆಸುತ್ತಿದ್ದಾರೆ. ಈಗ ₹10 ಲಕ್ಷದ ರಾಷ್ಟ್ರೀಯ ಪ್ರಶಸ್ತಿಗೆ ಆಯ್ಕೆಯಾಗಿರುವುದು ಅವರ ಎಂಟು ವರ್ಷಗಳ ಶ್ರಮಕ್ಕೆ ಸಂದ ಗೌರವವಾಗಿದೆ. ಕಣ್ಮರೆಯಾಗುತ್ತಿದ್ದ ಬೀಜಗಳನ್ನು ಉಳಿಸುವ ಸಂಕಲ್ಪದೊಂದಿಗೆ ಆರಂಭವಾದ 14 ಮಹಿಳೆಯರ ಪ್ರಯತ್ನ ಇಂದು ಇಡೀ ಸಮುದಾಯಕ್ಕೆ ಮಾದರಿಯಾಗಿದೆ.

Mysuru: ಅರಮನೆ, ಸಿಂಹಾಸನ, ಅಂಬಾರಿ ಎಲ್ಲವೂ ಜನರಿಗೆ ಸೇರಬೇಕು; ಸಚಿವ ಯತೀಂದ್ರ ಸಿದ್ದರಾಮಯ್ಯ

Sumanth SN — Sat, 07 Nov 2026 13:20:06 +0530

ಮೈಸೂರು: ಸಾಂಸ್ಕೃತಕ ನಗರ ಮೈಸೂರಿನ ಅರಮನೆ ಆಸ್ತಿ ಹಕ್ಕು, ದಸರಾ ಆಚರಣೆ ಹಾಗೂ ಅಂಬಾರಿ ವಿವಾದಕ್ಕೆ ಸಂಬಂಧಿಸಿದಂತೆ ರಾಜಮಾತೆ ಪ್ರಮೋದಾದೇವಿ ಒಡೆಯರ್ ಸುದ್ದಿಗೋಷ್ಠಿ ನಡೆಸಿ ದಾಖಲೆಗಳ ಸಮೇತ ಮಾಹಿತಿ ನೀಡಿದ್ದರು. ಇದರ ಬೆನ್ನಲ್ಲೇ ಸಚಿವ ಯತೀಂದ್ರ ಸಿದ್ದರಾಮಯ್ಯ ಅವರು ಮಾತನಾಡಿ, ಮತ್ತೊಮ್ಮೆ ತಮ್ಮ ಹೇಳಿಕೆಗೆ ಸ್ಪಷ್ಟನೆ ನೀಡಿದ್ದಾರೆ. ಅಲ್ಲದೇ, ಸರ್ಕಾರ ಆಗಲಿ, ರಾಜಾಡಳಿತವಾಗಲಿ ಜನರ ತರಿಗೆಯಿಂದಲೇ ನಡೆಯುವುದು. ಹೀಗಾಗಿ ಎಲ್ಲವೂ ಜನರಿಗೆ ಸೇರಿದ್ದು ಎಂದು ತಿಳಿಸಿದ್ದಾರೆ.

ಸಿಂಹಾಸನ, ಅಂಬಾರಿ ಸರ್ಕಾರದ್ದು ಎಂದು ಹೇಳಿಲ್ಲ!

ಮೈಸೂರಿನಲ್ಲಿ ಮಾಧ್ಯಮಳೊಂದಿಗೆ ಮಾತನಾಡಿ ಪ್ರಮೋದಾದೇವಿ ಒಡೆಯರ್ ಅವರು ಹೇಳಿಕೆ ಕುರಿತಂತೆ ಪ್ರತಿಕ್ರಿಯೆ ನೀಡಿದ ಸಚಿವ ಯತೀಂದ್ರ ಅವರು, ಸಿಂಹಾಸನ, ಅಂಬಾರಿ ಸರ್ಕಾರದ್ದು ಎಂದು ನಾನು ಎಲ್ಲಿಯೂ ಹೇಳಿಲ್ಲ. ನಾವು ಬಾಡಿಗೆ ಕೊಡುತ್ತೇವೆ ಎಂದು ಹೇಳಿದ್ದೆ. ಅವರು ಅದನ್ನ ಗೌರವಧನ ಎಂದು ಹೇಳಿದ್ದಾರೆ. ಇದರಲ್ಲಿ ಅಂತಹ ವ್ಯತ್ಯಾಸವೇನು ಇಲ್ಲ‌ ಎಂದಿದ್ದಾರೆ.

ಆದರೆ, ಅರಮನೆ ಕಟ್ಟಿದ್ದು ಮಹರಾಜರೇ. ನಾನು ಅರಮನೆ ಮಹಾರಾಜರು ಕಟ್ಟಿಲ್ಲ ಎಂದು ಹೇಳಿಲ್ಲ‌. ಅರಮನೆ ಕೂಡ ಜನರ ತೆರಿಗೆ ಹಣದಿಂದಲೇ ಕಟ್ಟಿದ್ದು. ಹೀಗಾಗಿ ಎಲ್ಲವೂ ಜನರಿಗೇ ಸೇರಬೇಕು. ಸರ್ಕಾರ ಆಗಲಿ, ರಾಜಾಡಳಿತವಾಗಲಿ ಜನರ ತರಿಗೆಯಿಂದಲೇ ನಡೆಯುವುದು. ಹೀಗಾಗಿ ಎಲ್ಲವೂ ಜನರಿಗೆ ಸೇರಿದ್ದು. ಪ್ರತಿ ವರ್ಷವೂ ರಾಜಮನೆತನದವರು ಸಹಕಾರ ಕೊಟ್ಟಿದ್ದಾರೆ. ಈ ವರ್ಷ ಒಂದಿಷ್ಟು ಗೊಂದಲ ಆಗಿದೆ. ಮುಂದಿನ ದಿನಗಳಲ್ಲಿ ಅವರು ಸಿಎಂ ಜೊತೆ ಮಾತನಾಡಿ ಎಲ್ಲಾ ಗೊಂದಲ ಬಗೆ ಹರಿಸಿಕೊಳ್ಳುತ್ತಾರೆ ಎಂದು ಸಚಿವ ಯತೀಂದ್ರ ಸಿದ್ದರಾಮಯ್ಯ ಹೇಳಿದ್ದಾರೆ.

ಯಾರೇ ತಪ್ಪು ಮಾಡಿದ್ದರು ಕ್ರಮ ಆಗುತ್ತೆ!

ಇದೇ ವೇಳೆ ಅರಮನೆಯಲ್ಲಿ ಜೆಟ್ಟಿಕಾಳಗ ರದ್ದು ವಿಚಾರವಾಗಿಯೂ ಪ್ರಕ್ರಿಯೆ ನೀಡಿದ ಸಚಿವರು, ಈ ಬಗ್ಗೆ ಅಧಿಕಾರಿಗಳಿಂದ ವರದಿ ಕೇಳಿದ್ದೇನೆ. ಈಗಾಗಲೇ ಕೆಲವರ ಮೇಲೆ ಕರ್ತವ್ಯ ಲೋಪದ ದೂರುಗಳು ಬಂದಿವೆ. ಅಧಿಕಾರಿಗಳ ವರದಿ ಸಂಪೂರ್ಣವಾಗಿ ಬರಲಿ. ವರದಿ ಬಂದ ಮೇಲೆ‌ ಯಾರೇ ತಪ್ಪು ಮಾಡಿದ್ರು ಕ್ರಮ ಕೈಗೊಳ್ಳುತ್ತೇನೆ ಎಂದು ಭರವಸೆ ನೀಡಿದರು.

ಸಿದ್ದರಾಮಯ್ಯ ಮತ್ತು ಮಹಾದೇವಪ್ಪ ನಡುವೆ ಸಣ್ಣ ಪುಟ್ಟ ವ್ಯತ್ಯಾಸ

ಮಾಜಿ ಸಚಿವ ಮಹದೇವಪ್ಪ‌ ಭೇಟಿ ವಿಚಾರ ಮಾತನಾಡಿ, ನಮ್ಮ ತಂದೆ ಹಾಗೂ ಮಹದೇವಪ್ಪ ನಡುವೆ ಸಂಬಂಧ ಏನು ಕೆಟ್ಟಿಲ್ಲ. ಅವರಿಬ್ಬರದ್ದು 40 ವರ್ಷದ ಸ್ನೇಹ. 40 ವರ್ಷ ಸ್ನೇಹ ಅಷ್ಟು ಸುಲಭವಾಗಿ ಮುರಿದು ಹೋಗುವುದಿಲ್ಲ. ಏನೋ ಸಣ್ಣ ಪುಟ್ಟ ವ್ಯತ್ಯಾಸಗಳು ಆಗಿದೆ. ಅದನ್ನ ಅವರೇ ಬಗ್ಗೆ ಹರಿಸಿಕೊಳ್ಳುತ್ತಾರೆ. ಮಹದೇವಪ್ಪ‌ ಪ್ರತ್ಯೇಕವಾಗಿ ಸಂವಿಧಾನ ದಿನಾಚರಣೆ ಮಾಡುತ್ತಿಲ್ಲ. ಸರ್ಕಾರ ಮಾಡುವ ಸಂವಿಧಾನ ದಿನಾಚರಣೆಗೆ ಅವರನ್ನ ಆಹ್ವಾನಿಸಿದ್ದೇನೆ. ಬೇರೆ ಬೇರೆ ಸಂಘಟನೆಗಳು ಪ್ರತ್ಯೇಕವಾಗಿ ಮಾಡಬಹದು ಅದನ್ನ ತಪ್ಪು ಎಂದು ಹೇಳಲು ಆಗುವುದಿಲ್ಲ ಎಂದಿದ್ದಾರೆ.

ಬಾಲಕಿಯಿಂದ ಮುಖಂಡನ ಮೇಲೆ ಹನಿಟ್ರ್ಯಾಪೋ, ಅತ್ಯಾ*ಚಾರವೊ? 62 ವರ್ಷದ ವೃದ್ಧನ ಬೆವರಿಳಿಸಿದ ಹೈಕೋರ್ಟ್

Suchethana D — Sat, 07 Nov 2026 12:36:46 +0530

ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ಹನಿಟ್ರ್ಯಾಪ್ ಎನ್ನೋದು ಮಾಮೂಲಾಗಿಬಿಟ್ಟಿದೆ. ಕೆಲವು ಪ್ರಕರಣಗಳಲ್ಲಿ ಇದು ನಿಜವೇ ಆಗಿದ್ದರೆ, ಮತ್ತೆ ಕೆಲವು ಪ್ರಕರಣಗಳಲ್ಲಿ ಮಾಡಬಾರದ್ದನ್ನು ಮಾಡಿದ ಆರೋಪಿ ಸಿಕ್ಕಿಬಿದ್ದರೆ ಅದಕ್ಕೆ ಹನಿಟ್ರ್ಯಾಪ್ ಹೆಸರು ಕೊಟ್ಟು ತಪ್ಪಿಸಿಕೊಳ್ಳಲು ನೋಡುವುದು ಇದೆ. ಇದಾಗಲೇ ಸಾಕಷ್ಟು ಧುರೀಣರು ಈ ಹನಿಟ್ರ್ಯಾಪ್, ಸ್ಟಿಂಗ್ ಆಪರೇಷನ್ ಕೇಸ್ನಲ್ಲಿ ಸಿಲುಕಿರುವುದು ಇದೆ. ಮನೆಯಲ್ಲಿ ಪತ್ನಿ ಇದ್ದರೂ, ಬೇರೆಯವರ ಸಹವಾಸ ಬಯಸುವ ಗಂಡಸರ ಬುದ್ಧಿಯನ್ನು ಉಪಯೋಗಪಡಿಸಿಕೊಂಡು ಹನಿಟ್ರ್ಯಾಪ್ ಮಾಡುವ ದೊಡ್ಡ ಜಾಲವೇ ಹುಟ್ಟಿಕೊಂಡಿದೆ. "ಕಾಮಾತುರಾಣಾಂ ನ ಭಯಂ ನ ಲಜ್ಜಾ" ಎಂದರೆ ಕಾಮಕ್ಕೆ ಆತುರನಾಗಿದ್ದವನಿಗೆ ಭಯವೂ ಇರುವುದಿಲ್ಲ, ನಾಚಿಕೆಯೂ ಇರುವುದಿಲ್ಲ ಎನ್ನುವಂತೆ ದೊಡ್ಡ ದೊಡ್ಡ ಮುಖಂಡರೂ ತಮ್ಮ ಸ್ಥಾನದ ಘನತೆಯನ್ನೂ ಲೆಕ್ಕಿಸದೇ ಇದಕ್ಕೆ ಬಿದ್ದು ಕೊನೆಗೆ ಒದ್ದಾಡುವುದು ಇದಾಗಲೇ ಸಾಕಷ್ಟು ಪ್ರಕರಣಗಳಲ್ಲಿ ನೋಡಲಾಗುತ್ತಿದೆ.

**62 ವರ್ಷದವನಿಂದ ಬಾಲಕಿಯ ಮೇಲೆ ರೇ*ಪ್?**

ಈಗ ಅಂಥದ್ದೇ ಒಂದು ಪ್ರಕರಣ ಹೈಕೋರ್ಟ್ಗೆ ಬಂದಿದೆ. ಇಲ್ಲಿ 62 ವರ್ಷದ ಮುಖಂಡರೊಬ್ಬರ ಮೇಲೆ ಅ*ತ್ಯಾಚಾರ ಕೇಸ್ ದಾಖಲಾಗಿದೆ. ಅದು ಕೂಡ ಅಪ್ರಾಪ್ತೆಯ ಮೇಲೆ ಆಗಿರುವ ಕಾರಣದಿಂದ ಪೋಕ್ಸೋ ಕಾಯ್ದೆ ಮೇಲೆ ದೂರು ದಾಖಲಾಗಿದೆ. ಇದರ ರದ್ದತಿಗೆ ಆತ ಹೈಕೋರ್ಟ್ ಮೊರೆಹೋಗಿದ್ದ. ಇದು ಹೈಕೋರ್ಟ್ ನ್ಯಾಯಮೂರ್ತಿ ನಾಗಪ್ರಸನ್ನ ಅವರ ಪೀಠದ ಮುಂದೆ ವಿಚಾರಣೆಗೆ ಬಂದಿತ್ತು.

ಆರೋಪಿ ಪರ ವಕೀಲರು ತಮ್ಮ ಕಕ್ಷಿದಾರರನ್ನು ಸಮರ್ಥಿಸಿಕೊಳ್ಳುತ್ತಾ, ಇದು ಅ*ತ್ಯಾಚಾರ ಅಲ್ಲ, ಹನಿಟ್ರ್ಯಾಪ್. ಅವರಿಗೆ ವಯಸ್ಸಾಗಿದೆ, ಏನು ಮಾಡುವುದಕ್ಕೂ ಕೆಪ್ಯಾಸಿಟಿ ಇಲ್ಲ. ಅವರು ಹೇಗೆ ಅ*ತ್ಯಾಚಾರ ಮಾಡಲು ಸಾಧ್ಯ. 17 ವರ್ಷದ ಬಾಲಕಿ ಹನಿಟ್ರ್ಯಾಪ್ ಮಾಡಿ ಸಿಕ್ಕಿಸಿಹಾಕಿದ್ದಾಳೆ. ಆದ್ದರಿಂದ ಪೊಕ್ಸೋ ಕಾಯ್ದೆ ಅಡಿ ದಾಖಲಾಗಿರುವ ಪ್ರಕರಣವನ್ನು ರದ್ದು ಮಾಡಬೇಕು ಎಂದು ಕೋರಿದರು.

ಜಡ್ಜ್ ಕಿಡಿ

ಇದರಿಂದ ನ್ಯಾಯಮೂರ್ತಿ ನಾಗಪ್ರಸನ್ನ ಗರಂ ಆದರು. ನಂಬರ್ ಎನ್ನೋದು ಲೆಕ್ಕಕ್ಕೇ ಇಲ್ಲ ಎನ್ನುವ ಹಾಗೆ ಮಾಡುವುದನ್ನು ಮಾಡಿ ಈಗ ಹನಿಟ್ರ್ಯಾಪ್ ಅನ್ನುತ್ತೀದ್ದೀರಾ ಎಂದು ಪ್ರಶ್ನಿಸಿದರು. ಅವರಿಗೆ 62 ವರ್ಷ. ಆಕೆ ಇನ್ನೂ ಅಪ್ರಾಪ್ತಳು. ಅವಳು ಹೋದಲೆಲ್ಲಾ, ಕೊನೆಗೆ ಬಾತ್ರೂಮ್ಗೆ ಹೋದಾಗಲೂ ಹಿಂಬಾಲಿಸಿರುವ ಸಾಕ್ಷಿ ಇದೆ. ಏನಂತ ಮಾತನಾಡುತ್ತೀರಿ, ಮಾಡುವುದನ್ನು ಮಾಡಿ ಈಗ ಹನಿಟ್ರ್ಯಾಪ್ ಎನ್ನುತ್ತೀರಾ ಎಂದು ಆರೋಪಿಯನ್ನು ನ್ಯಾಯಮೂರ್ತಿಗಳು ತರಾಟೆಗೆ ತೆಗೆದುಕೊಂಡರು. ಹೈಕೋರ್ಟ್ ಕಲಾಪ ಲೈವ್ಸ್ಟ್ರೀಮ್ ಆಗುವ ಹಿನ್ನೆಲೆಯಲ್ಲಿ ಇದು ಕೂಡ ಸೋಷಿಯಲ್ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ. ಕೊನೆಗೆ ಕೋರ್ಟ್ ಏನು ತೀರ್ಪು ಕೊಟ್ಟಿದೆ ಎನ್ನುವುದು ಇದರಲ್ಲಿ ದಾಖಲಾಗಿಲ್ಲ.

Mandya: ಪರಸ್ಪರ ತಬ್ಬಿಕೊಂಡು ರೈಲಿಗೆ ತಲೆ ಕೊಟ್ಟ ರ್ಯಾಪಿಡೋ ಚಾಲಕ-ಗೃಹಣಿ

Kannadaprabha News — Sat, 07 Nov 2026 11:53:52 +0530

ಮಂಡ್ಯ: ಅನೈತಿಕ ಸಂಬಂಧದ ಹಿನ್ನೆಲೆ ಪ್ರಿಯಕರನೊಂದಿಗೆ ಗೃಹಿಣಿ ರೈಲಿಗೆ ತಲೆಯೊಡ್ಡಿ ಆತ್ಮಹತ್ಯೆ ಮಾಡಿಕೊಂಡಿರುವ ಧಾರುಣ ಘಟನೆ ತಾಲೂಕಿನ ಇಂಡುವಾಳು ಗ್ರಾಮ ಸಮೀಪವಿರುವ ರೈಲುಹಳಿ ಬಳಿ ನಡೆದಿದೆ.

ಪ್ರೀತಿಸಿ ಮದುವೆ, ಬೆಂಗಳೂರಿನಲ್ಲೇ ವಾಸ

ಬೆಂಗಳೂರಿನ ನಿವಾಸಿ ವೀರೇಶ್ ಅವರ ಪತ್ನಿ ಸಹನಾ (27) ಹಾಗೂ ಈಕೆಯ ಪ್ರಿಯಕರ ಮಡಿಕೇರಿ ಮೂಲದ ಸುರೇಶ ಅವರ ಪುತ್ರ ರಾಹುಲ್ (30) ಆತ್ಮಹತ್ಯೆ ಮಾಡಿಕೊಂಡವರು.

ಮಂಡ್ಯ ತಾಲೂಕು ಗುನ್ನಾಯ್ಕನಹಳ್ಳಿ ಮೂಲದ ಸಹನಾ ಬೆಂಗಳೂರಿನಲ್ಲಿ ಖಾಸಗಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದಳು. ಈ ವೇಳೆ ಪಾವಗಡದ ಸಮೀಪವಿರುವ ಅರಸೀಕೆರೆ ನಿವಾಸಿ ಬೆಂಗಳೂರಿನಲ್ಲಿ ಆಟೋ ಚಾಲಕನಾಗಿ ಕೆಲಸ ಮಾಡುತ್ತಿದ್ದ ವೀರೇಶ್‌ನೊಂದಿಗೆ ಪರಿಚಯವಾಗಿ ಪ್ರೀತಿಸಿ ಆತನನ್ನು ಮದುವೆ ಮಾಡಿಕೊಂಡು ಬೆಂಗಳೂರಿನಲ್ಲೇ ವಾಸಿಸುತ್ತಿದ್ದರು.

ಇಬ್ಬರ ನಡುವೆ ಪ್ರೀತಿ ಆರಂಭವಾಗಿ ನಂತರ ಅನೈತಿಕ ಸಂಬಂಧ

ಈ ದಂಪತಿಗೆ 5 ವರ್ಷದ ಹೆಣ್ಣು ಹಾಗೂ 2 ವರ್ಷದ ಗಂಡು ಮಗುವಿದೆ. ಈ ಮಧ್ಯೆ ರ್‍ಯಾಪಿಡ್ ಬೈಕ್ ಚಾಲನೆ ಮಾಡಿಕೊಂಡು ಜೀವನ ನಡೆಸುತ್ತಿದ್ದ ರಾಹುಲ್‌ನನ್ನು ಸಹನಾ ಪರಿಚಯ ಮಾಡಿಕೊಂಡಿದ್ದಾಳೆ. ನಂತರ ಇಬ್ಬರ ನಡುವೆ ಪ್ರೀತಿ ಆರಂಭವಾಗಿ ನಂತರ ಅನೈತಿಕ ಸಂಬಂಧ ಬೆಳೆದಿದೆ. ಈ ವಿಚಾರ ಗಂಡ ವೀರೇಶನಿಗೆ ತಿಳಿದು ಪತ್ನಿ ಸಹನಾಳೊಂದಿಗೆ ಜಗಳವಾಡಿದ್ದಾನೆ. ಜೊತೆಗೆ ಬುದ್ದಿ ಹೇಳಿ ನಡತೆ ಬದಲಿಸಿಕೊಳ್ಳುವಂತೆ ಎಚ್ಚರಿಕೆ ನೀಡಿದ್ದಾನೆ. ಆದರೂ ಸಹನಾ ತನ್ನ ಹಳೇ ಚಾಳಿಯನ್ನು ಮುಂದುವರಿದ್ದಾಳೆ.

ರಾತ್ರಿ ಸುಮಾರು 1.50ರ ಸಮಯದಲ್ಲಿ ದುರಂತ

ಈ ವಿಚಾರವಾಗಿ ಗಂಡ- ಹೆಂಡತಿ ನಡುವೆ ಜೋರು ಜಗಳವಾಗಿದೆ. ಇದರಿಂದ ಬೇಸತ್ತ ಸಹನಾ ತನ್ನ ಮಕ್ಕಳೊಂದಿಗೆ ಅಜ್ಜಿ ಮನೆ ಮಂಡ್ಯದ ಗುನ್ನನಾಹಕನಹಳ್ಳಿಗೆ ಆಗಮಿಸಿದ್ದರು. ನಂತರ ಸಹನಾ ರಾಹುಲ್ ನನ್ನು ಬೆಂಗಳೂರಿನಿಂದ ಮಂಡ್ಯಕ್ಕೆ ಕರೆಸಿಕೊಂಡಿದ್ದರು. ನಂತರ ಇಬ್ಬರು ತಾಲೂಕಿನ ಇಂಡುವಾಳು ಬಳಿಯ ಹೆದ್ದಾರಿ ಸರ್ವೀಸ್ ರಸ್ತೆ ಕಾಮಗಾರಿ ನಡೆಯುತ್ತಿರುವ ಸ್ಥಳದ ಸಮೀಪ ಆಗಮಿಸಿ ರಾತ್ರಿ ಸುಮಾರು 1.50ರ ಸಮಯದಲ್ಲಿ ಒಬ್ಬರನೊಬ್ಬರು ತಬ್ಬಿಕೊಂಡು ಬೆಂಗಳೂರಿನಿಂದ ಮೈಸೂರಿಗೆ ತೆರಳುತ್ತಿದ್ದ ಪ್ಯಾಸೆಂಜರ್ ರೈಲಿಗೆ ತಲೆಯೊಡ್ಡಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಇಬ್ಬರ ದೇಹ ಛಿದ್ರವಾಗಿದೆ.

ಸುದ್ದಿ ತಿಳಿದ ರೈಲ್ವೆ ಪೊಲೀಸ್ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ನಂತರ ಶವಗಳನ್ನು ಮಿಮ್ಸ್‌ನ ಶವಾಗಾರಕ್ಕೆ ಸಾಗಿಸಿದರು. ಈ ಸಂಬಂಧ ರೈಲ್ವೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ಮುಂದಿನ ಕ್ರಮ ಕೈಗೊಂಡಿದ್ದಾರೆ.

ರಿಕವರಿಗಾಗಿ ದೌರ್ಜನ್ಯ: ಫೈನಾನ್ಸ್ ಏಜೆಂಟ್ಸ್ ಸೆರೆ

ಬೈಕ್ ಸಾಲದ ಕಂತು ಪಾವತಿಸಿಲ್ಲ ಎಂದು ಎಲ್ ಅಂಡ್ ಟಿ ಮೈಕ್ರೋ ಫೈನಾನ್ಸ್ ಕಂಪನಿ ಏಜೆಂಟರು ವ್ಯಕ್ತಿ ಮೇಲೆ ಹಲ್ಲೆ ಮಾಡಿ, ಆತನ ಸಾವಿಗೆ ಕಾರಣರಾಗಿದ್ದ ಇಬ್ಬರು ಮೈಕ್ರೋ ಫೈನಾನ್ಸ್ ಕಂಪನಿಯ ರಿಕವರಿ ಏಜೆಂಟರನ್ನು ನೆಲಮಂಗಲ ಗ್ರಾಮಾಂತರ ಪೊಲೀಸರು ಬಂಧಿಸಿದ್ದಾರೆ. ರೇವಂತ್ (21) ದಿಲೀಪ್ (22) ಬಂಧಿತ ಏಜೆಂಟರುಗಳು. ಇವರು ಆ.28ರಂದು ನೆಲಮಂಗಲ ತಾಲೂಕಿನ ಬೂದಿಹಾಳ್ ಗ್ರಾಮದ ಬಳಿ ಟಿ.ಬೇಗೂರಿನ ಮುರಳಿ(39) ಬೈಕ್ ಸಾಲದ ಕಂತು ಪಾವತಿಸಿಲ್ಲ ಎಂದು ಆತನನ್ನು ಹಿಂಬಾಲಿಸಿ ಬೆನ್ನಟ್ಟಿದ್ದ ಏಜೆಂಟರು, ಚಲಿಸುತ್ತಿದ್ದ ಬೈಕ್ ಗೆ ಕಾಲಿನಿಂದ ಒದ್ದು ರಸ್ತೆಗೆ ಬೀಳಿಸಿ ದ್ದರು. ಮುರಳಿ ಬೀಳುತ್ತಿದ್ದಂತೆ ರಿಕವರಿ ಏಜೆಂಟರ್ ಸ್ಥಳದಿಂದ ಪರಾರಿಯಾಗಿದ್ದರು.

ಘಟನೆಯಲ್ಲಿ ತೀವ್ರ ಗಾಯ ಗೊಂಡಿದ್ದ ಮುರಳಿ ಅವರನ್ನು ಸ್ಥಳೀಯರು ಬೆಂಗಳೂರಿನ ವಿಕ್ಟೋರಿಯಾ ಆಸ್ಪತ್ರೆಗೆ ದಾಖಲಿಸಿದ್ದರು ಚಿಕಿತ್ಸೆ ಫಲಕಾರಿಯಾಗದೆ ಸಾವನ್ನಪ್ಪಿದ್ದರು. ಈ ಘಟನೆಗೆ ಸಂಬಂಧಿಸಿದಂತೆ ನೆಲಮಂಗಲ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಪ್ರಕರಣ ದಾಖಲಿಸಿಕೊಂಡು ಕೃತ್ಯ ಎಸಗಿ ತಲೆಮರೆಸಿಕೊಂಡಿದ್ದ ಇಬ್ಬರು ಮೈಕ್ರೋ ಫೈನಾನ್ಸ್ ಏಜೆಂಟರನ್ನು ನೆಲಮಂಗಲ ಗ್ರಾಮಾಂತರ ಪೊಲೀಸರು ಬಂಧಿಸಿದ್ದಾರೆ.

ಕೇವಲ 1.6 ಕಿಮೀ ಕಾಮಗಾರಿಗೆ 18 ತಿಂಗಳು ಕೆಐಎ ರಸ್ತೆ ಬಂದ್, ಪರ್ಯಾಯ ರೋಡ್‌ ಕಥೆ ಒಂದೆರಡಲ್ಲ, ಯಾವ ಮಾರ್ಗದಲ್ಲಿ ಏನೇನು ಸಮಸ್ಯೆ?

Gowthami K — Sat, 07 Nov 2026 11:39:11 +0530

ಬೆಂಗಳೂರು: ನಗರದ ಪ್ರಮುಖ ಸಂಚಾರ ಮಾರ್ಗಗಳಲ್ಲಿ ಒಂದಾದ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ ರಸ್ತೆಯಲ್ಲಿ ಎಲಿವೇಟೆಡ್ ಕಾರಿಡಾರ್ ನಿರ್ಮಾಣಕ್ಕೆ ಸಿದ್ಧತೆ ನಡೆಯುತ್ತಿದೆ. ಯುಎಎಸ್‌ ಸ್ಟಾಫ್ ಕ್ವಾರ್ಟರ್ಸ್‌ನಿಂದ ಮೆಖ್ರಿ ಸರ್ಕಲ್ ವರೆಗೆ ಸುಮಾರು 1.6 ಕಿಲೋಮೀಟರ್ ಉದ್ದದ ನಾಲ್ಕು ಪಥಗಳ ಎತ್ತರಿಸಿದ ಕಾರಿಡಾರ್ ನಿರ್ಮಿಸಲಾಗುತ್ತಿದ್ದು, ಕಾಮಗಾರಿ ಪೂರ್ಣಗೊಳಿಸಲು 18 ತಿಂಗಳ ಕಾಲಾವಕಾಶ ನಿಗದಿಪಡಿಸಲಾಗಿದೆ. ಈ ಅವಧಿಯಲ್ಲಿ ಕೆಲವು ವಾಹನಗಳ ಸಂಚಾರಕ್ಕೆ ನಿರ್ಬಂಧ ವಿಧಿಸುವ ಪ್ರಸ್ತಾವನೆಯಿಂದಾಗಿ ಬೆಂಗಳೂರಿನ ಸಂಚಾರ ವ್ಯವಸ್ಥೆಯ ಮೇಲೆ ಮತ್ತಷ್ಟು ಒತ್ತಡ ಉಂಟಾಗುವ ಸಾಧ್ಯತೆ ಇದೆ.

ಈ ಯೋಜನೆಯಿಂದಾಗಿ ಕೆಐಎ ರಸ್ತೆ, ಬಳ್ಳಾರಿ ರೋಡ್‌ ನಲ್ಲಿ ಸಂಚಾರ ನಿರ್ಬಂಧ ಜಾರಿಯಾದರೆ, ವಿಮಾನ ನಿಲ್ದಾಣ ಮತ್ತು ನಗರದ ವಿವಿಧ ಭಾಗಗಳ ನಡುವೆ ಸಂಚರಿಸುವ ವಾಹನಗಳು ಪರ್ಯಾಯ ಮಾರ್ಗಗಳನ್ನು ಅವಲಂಬಿಸಬೇಕಾಗುತ್ತದೆ. ಆದರೆ, ಸಂಚಾರ ಪೊಲೀಸರು ಸೂಚಿಸಿರುವ ಪರ್ಯಾಯ ರಸ್ತೆಗಳಲ್ಲಿ ಈಗಾಗಲೇ ಮೆಟ್ರೋ ಕಾಮಗಾರಿ, ರಸ್ತೆ ದುರಸ್ತಿ, ಪೈಪ್‌ಲೈನ್ ಮತ್ತು ಭೂಗತ ವಿದ್ಯುತ್ ಕೇಬಲ್ ಅಳವಡಿಕೆ ಸೇರಿದಂತೆ ಹಲವು ಕೆಲಸಗಳು ನಡೆಯುತ್ತಿವೆ. ಕೆಲವು ರಸ್ತೆಗಳಲ್ಲಿ ಗುಂಡಿ ಮುಚ್ಚುವ ಮತ್ತು ಮರು ಡಾಂಬರೀಕರಣದ ಕೆಲಸಗಳು ಪೂರ್ಣಗೊಂಡಿಲ್ಲ. ಹೀಗಾಗಿ, ಹೆಚ್ಚುವರಿ ವಾಹನಗಳ ಸಂಚಾರವನ್ನು ಈ ರಸ್ತೆಗಳು ಹೇಗೆ ನಿಭಾಯಿಸಲಿವೆ ಎಂಬುದೇ ಈಗಿರುವ ದೊಡ್ಡ ಪ್ರಶ್ನೆಯಾಗಿದೆ.

ಪರ್ಯಾಯ ಮಾರ್ಗಗಳ ಮೂಲಕ ವಾಹನಗಳನ್ನು ಕಳುಹಿಸುವುದರಿಂದ ಸಮಸ್ಯೆ ಪರಿಹಾರವಾಗುವ ಬದಲು, ಆ ರಸ್ತೆಗಳೇ ಹೊಸ ಸಂಚಾರ ದಟ್ಟಣೆಯ ಕೇಂದ್ರಗಳಾಗಿ ಬದಲಾಗುವ ಆತಂಕ ಪ್ರಯಾಣಿಕರಲ್ಲಿ ವ್ಯಕ್ತವಾಗಿದೆ. ಹೆಚ್ಚುವರಿ ಸಂಚಾರಕ್ಕೆ ಅವಕಾಶ ಕಲ್ಪಿಸುವ ಮೊದಲು ರಸ್ತೆಗಳನ್ನು ದುರಸ್ತಿಗೊಳಿಸಿ, ಅವುಗಳ ವಾಹನ ಸಾಮರ್ಥ್ಯವನ್ನು ಪರಿಶೀಲಿಸಬೇಕು ಎಂಬುದು ಸಾರ್ವಜನಿಕರ ಒತ್ತಾಯವಾಗಿದೆ.

ನಾಗವಾರ–ಹೆಬ್ಬಾಳ ಮಾರ್ಗದಲ್ಲಿ ಮೆಟ್ರೋ ಕಾಮಗಾರಿಯ ಸವಾಲು

ನಗರದಿಂದ ವಿಮಾನ ನಿಲ್ದಾಣದ ಕಡೆಗೆ ತೆರಳುವ ವಾಹನಗಳಿಗೆ ಕಂಟೋನ್ಮೆಂಟ್ ರಸ್ತೆ, ಟ್ಯಾನರಿ ರಸ್ತೆ ಮತ್ತು ನಾಗವಾರ ಮುಖ್ಯ ರಸ್ತೆಯ ಮೂಲಕ ಹೆಬ್ಬಾಳ ತಲುಪುವ ಪರ್ಯಾಯ ಮಾರ್ಗವನ್ನು ಸೂಚಿಸಲಾಗಿದೆ. ಆದರೆ, ನಾಗವಾರ ಮುಖ್ಯ ರಸ್ತೆಯಲ್ಲಿ ಈಗಾಗಲೇ ವಾಹನ ದಟ್ಟಣೆ ಹೆಚ್ಚಾಗಿದೆ. ಇದಕ್ಕೆ ಪ್ರಮುಖ ಕಾರಣ ನಮ್ಮ ಮೆಟ್ರೋದ ನೀಲಿ ಮಾರ್ಗದ ಕಾಮಗಾರಿ.

ನಾಗವಾರದಿಂದ ಹೆಬ್ಬಾಳದವರೆಗೆ ಸುಮಾರು ನಾಲ್ಕು ಕಿಲೋಮೀಟರ್ ವ್ಯಾಪ್ತಿಯಲ್ಲಿ ಬೆಂಗಳೂರು ಮೆಟ್ರೋ ರೈಲು ನಿಗಮ (ಬಿಎಂಆರ್‌ಸಿಎಲ್) ಎತ್ತರಿಸಿದ ಮೆಟ್ರೋ ಮಾರ್ಗದ ಕಾಮಗಾರಿ ಕೈಗೊಂಡಿದೆ. ಕಾಮಗಾರಿ ನಡೆಯುತ್ತಿರುವುದರಿಂದ ರಸ್ತೆಯ ಲಭ್ಯವಿರುವ ಜಾಗ ಕಡಿಮೆಯಾಗಿದ್ದು, ವಾಹನಗಳ ಸಂಚಾರ ನಿಧಾನಗತಿಯಲ್ಲಿ ಸಾಗುತ್ತಿದೆ.

ಇದೇ ಮಾರ್ಗದಲ್ಲಿ ಖಾಸಗಿ ಬಸ್‌ಗಳು ಹಾಗೂ ಕೆಎಸ್‌ಆರ್‌ಟಿಸಿ ಬಸ್‌ಗಳ ಸಂಚಾರವೂ ಗಮನಾರ್ಹವಾಗಿದೆ. ಕೆಐಎ ರಸ್ತೆಯ ನಿರ್ಬಂಧದಿಂದಾಗಿ ಹೆಚ್ಚುವರಿ ಬಸ್‌ಗಳು ಮತ್ತು ಇತರ ವಾಹನಗಳು ಈ ಮಾರ್ಗವನ್ನು ಬಳಸಿದರೆ ಈಗಿರುವ ದಟ್ಟಣೆ ಮತ್ತಷ್ಟು ಹೆಚ್ಚಬಹುದು. ಕಾಮಗಾರಿ ನಡೆಯುತ್ತಿರುವ ರಸ್ತೆಯಲ್ಲಿ ವಾಹನಗಳ ಸಂಖ್ಯೆ ಹೆಚ್ಚಾದರೆ ಪ್ರಯಾಣದ ಸಮಯವೂ ವಿಸ್ತರಣೆಯಾಗುವ ಸಾಧ್ಯತೆ ಇದೆ.

ಗೋರಗುಂಟೆಪಾಳ್ಯ ಜಂಕ್ಷನ್‌ನಲ್ಲಿ ಮತ್ತಷ್ಟು ಒತ್ತಡ?

ವಿಮಾನ ನಿಲ್ದಾಣದಿಂದ ಕೇಂದ್ರ ಬೆಂಗಳೂರಿನ ಕಡೆಗೆ ಬರುವ ವಾಹನಗಳಿಗೆ ಹೆಬ್ಬಾಳದಿಂದ ಯಶವಂತಪುರದ ಕಡೆಗೆ ತೆರಳಿ, ಗೋರಗುಂಟೆಪಾಳ್ಯ ಜಂಕ್ಷನ್ ಮೂಲಕ ಡಾ. ರಾಜ್‌ಕುಮಾರ್ ರಸ್ತೆಯನ್ನು ತಲುಪುವ ಮಾರ್ಗವನ್ನು ಪರ್ಯಾಯವಾಗಿ ಸೂಚಿಸಲಾಗಿದೆ. ಆದರೆ, ಗೋರಗುಂಟೆಪಾಳ್ಯ ಜಂಕ್ಷನ್ ಈಗಾಗಲೇ ನಗರದ ಅತ್ಯಂತ ವಾಹನ ದಟ್ಟಣೆಯ ಪ್ರದೇಶಗಳಲ್ಲಿ ಒಂದಾಗಿದೆ.

ಹೊರ ವರ್ತುಲ ರಸ್ತೆ (ಔಟರ್ ರಿಂಗ್ ರೋಡ್) ಮತ್ತು ತುಮಕೂರು ರಸ್ತೆ ಸಂಪರ್ಕಿಸುವ ಪ್ರಮುಖ ಜಂಕ್ಷನ್ ಆಗಿರುವುದರಿಂದ, ಇಲ್ಲಿ ದಿನವಿಡೀ ವಾಹನಗಳ ಸಂಚಾರ ಹೆಚ್ಚಾಗಿರುತ್ತದೆ. ಅದರಲ್ಲೂ ಬಿಇಎಲ್ ವೃತ್ತದಿಂದ ಗೋರಗುಂಟೆಪಾಳ್ಯದವರೆಗಿನ ಹೊರ ವರ್ತುಲ ರಸ್ತೆಯ ಕೆಲವು ಭಾಗಗಳು ಕಿರಿದಾಗಿದ್ದು, ಭಾರೀ ವಾಹನಗಳ ಸಂಚಾರವೂ ಅಧಿಕವಾಗಿದೆ.

ಇದಲ್ಲದೆ, ಮುತ್ಯಾಲ ನಗರದ ಸಮೀಪವಿರುವ ಕಿರಿದಾದ ರೈಲ್ವೆ ಮೇಲ್ಸೇತುವೆ ಈ ಮಾರ್ಗದಲ್ಲಿ ಮತ್ತೊಂದು ಸಂಚಾರ ಅಡಚಣೆಯಾಗಿದೆ. ಈಗಾಗಲೇ ವಾಹನಗಳ ಒತ್ತಡವಿರುವ ಈ ಮಾರ್ಗಕ್ಕೆ ವಿಮಾನ ನಿಲ್ದಾಣದ ಕಡೆಗೆ ಅಥವಾ ಅಲ್ಲಿಂದ ಬರುವ ಹೆಚ್ಚುವರಿ ವಾಹನಗಳನ್ನು ಸೇರಿಸಿದರೆ ಸಂಚಾರ ನಿರ್ವಹಣೆ ಕಷ್ಟವಾಗಬಹುದು ಎಂಬ ಆತಂಕವಿದೆ.

ಡಾ. ರಾಜ್‌ಕುಮಾರ್ ರಸ್ತೆಯಲ್ಲೂ ಕಾಮಗಾರಿ ಮತ್ತು ಬಸ್‌ಗಳ ಸಂಚಾರ

ಗೋರಗುಂಟೆಪಾಳ್ಯದಿಂದ ಕೇಂದ್ರ ಬೆಂಗಳೂರಿನ ಕಡೆಗೆ ಸಂಪರ್ಕ ಕಲ್ಪಿಸುವ ಡಾ. ರಾಜ್‌ಕುಮಾರ್ ರಸ್ತೆಯಲ್ಲಿಯೂ ಹಲವು ಸಮಸ್ಯೆಗಳಿವೆ. ಈ ರಸ್ತೆಯ ಕೆಲವು ಭಾಗಗಳಲ್ಲಿ ವೈಟ್‌ಟಾಪಿಂಗ್ ಕಾಮಗಾರಿ ಇನ್ನೂ ಪೂರ್ಣಗೊಂಡಿಲ್ಲ. ಪರಿಣಾಮವಾಗಿ, ಕೆಲವು ವಿಭಾಗಗಳಲ್ಲಿ ಏಕಮುಖ ಸಂಚಾರ ವ್ಯವಸ್ಥೆ ಜಾರಿಯಲ್ಲಿದೆ.

ಮೆಜೆಸ್ಟಿಕ್‌ನಿಂದ ತುಮಕೂರು ರಸ್ತೆಯ ಕಡೆಗೆ ತೆರಳುವ ಹಲವು ಕೆಎಸ್‌ಆರ್‌ಟಿಸಿ ಬಸ್‌ಗಳು ಈಗಾಗಲೇ ಇದೇ ರಸ್ತೆಯನ್ನು ಬಳಸುತ್ತಿವೆ. ಕಾಮಗಾರಿ ಪೂರ್ಣಗೊಳ್ಳದಿರುವ ಸಂದರ್ಭದಲ್ಲಿ ಹೆಚ್ಚುವರಿ ಬಸ್‌ಗಳು ಹಾಗೂ ಸರಕು ಸಾಗಣೆ ವಾಹನಗಳ ಸಂಚಾರವೂ ಇದೇ ಮಾರ್ಗಕ್ಕೆ ವರ್ಗಾವಣೆಯಾದರೆ ವಾಹನ ದಟ್ಟಣೆ ಹೆಚ್ಚುವ ಸಾಧ್ಯತೆ ಇದೆ.

ರಸ್ತೆಯ ಕಾಮಗಾರಿ, ಬಸ್‌ಗಳ ಸಂಚಾರ ಮತ್ತು ಹೆಚ್ಚುವರಿ ವಾಹನಗಳ ಒತ್ತಡ ಒಂದೇ ಸಮಯದಲ್ಲಿ ಎದುರಾದರೆ ಪ್ರಯಾಣಿಕರು ಹೆಚ್ಚು ಸಮಯ ರಸ್ತೆಯಲ್ಲೇ ಕಳೆಯಬೇಕಾದ ಪರಿಸ್ಥಿತಿ ನಿರ್ಮಾಣವಾಗಬಹುದು.

ಮತ್ತಿಕೆರೆ ರಸ್ತೆಯ ದುಸ್ಥಿತಿ: ಕೇಬಲ್ ಮತ್ತು ಪೈಪ್‌ಲೈನ್ ಕಾಮಗಾರಿ

ಭಾರತೀಯ ವಿಜ್ಞಾನ ಸಂಸ್ಥೆ (ಐಐಎಸ್‌ಸಿ) ಮತ್ತು ಬಿಇಎಲ್ ವೃತ್ತದ ನಡುವಿನ ಮತ್ತಿಕೆರೆ ರಸ್ತೆಯ ಸ್ಥಿತಿಯೂ ಉತ್ತಮವಾಗಿಲ್ಲ. ಕರ್ನಾಟಕ ವಿದ್ಯುತ್ ಪ್ರಸರಣ ನಿಗಮ ನಿಯಮಿತ (ಕೆಪಿಟಿಸಿಎಲ್) ಭೂಗತ ವಿದ್ಯುತ್ ಕೇಬಲ್ ಅಳವಡಿಕೆ ಕಾಮಗಾರಿ ನಡೆಸಿದ ಬಳಿಕ, ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ (ಬಿಡಬ್ಲ್ಯೂಎಸ್‌ಎಸ್‌ಬಿ) ಪೈಪ್‌ಲೈನ್ ಕಾಮಗಾರಿಯನ್ನೂ ಕೈಗೊಂಡಿತ್ತು.

ಈ ಕಾಮಗಾರಿಗಳಿಗಾಗಿ ರಸ್ತೆಯ ಹಲವು ಭಾಗಗಳನ್ನು ಅಗೆಯಲಾಗಿತ್ತು. ಬಳಿಕ ಕೆಲವು ಕಡೆ ತಾತ್ಕಾಲಿಕವಾಗಿ ಗುಂಡಿಗಳನ್ನು ಮುಚ್ಚಿ ಪ್ಯಾಚ್‌ವರ್ಕ್ ಮಾಡಲಾಗಿದೆ. ಆದರೂ ರಸ್ತೆ ಮೇಲ್ಮೈ ಸಮತಟ್ಟಾಗಿಲ್ಲ. ಅಲ್ಲಲ್ಲಿ ತೇಪೆ ಹಾಕಿದ ಗುರುತುಗಳು ಕಾಣುತ್ತಿದ್ದು, ವಾಹನ ಸವಾರರಿಗೆ ಸಂಚಾರ ಅಸೌಕರ್ಯ ಉಂಟಾಗುತ್ತಿದೆ.

ವಾಹನ ದಟ್ಟಣೆಯ ಜೊತೆಗೆ ಜಂಕ್ಷನ್‌ಗಳಲ್ಲಿ ಸಮರ್ಪಕ ಸಂಚಾರ ನಿಯಂತ್ರಣದ ಕೊರತೆಯೂ ಸಮಸ್ಯೆಯನ್ನು ಹೆಚ್ಚಿಸಬಹುದು. ಈ ರಸ್ತೆಯ ಮೂಲಕ ಹೆಚ್ಚುವರಿ ವಾಹನಗಳನ್ನು ಕಳುಹಿಸುವ ಮೊದಲು ರಸ್ತೆ ದುರಸ್ತಿ ಹಾಗೂ ಸಂಚಾರ ನಿರ್ವಹಣೆಗೆ ಆದ್ಯತೆ ನೀಡಬೇಕಿದೆ.

ಹೊಸ ಬಿಇಎಲ್ ರಸ್ತೆಗೆ ಸಮಗ್ರ ಮರು ಡಾಂಬರೀಕರಣದ ಅಗತ್ಯ

ಹೊಸ ಬಿಇಎಲ್ ರಸ್ತೆಯ ಮೇಲೂ ಬಿಡಬ್ಲ್ಯೂಎಸ್‌ಎಸ್‌ಬಿ ಕೈಗೊಂಡಿದ್ದ ಉಪಯುಕ್ತತಾ ಕಾಮಗಾರಿಗಳ ಪರಿಣಾಮ ಬೀರಿದೆ. ಪೈಪ್‌ಲೈನ್ ಸೇರಿದಂತೆ ವಿವಿಧ ಕೆಲಸಗಳಿಗಾಗಿ ರಸ್ತೆಯ ಉದ್ದಕ್ಕೂ ಹಲವು ಭಾಗಗಳನ್ನು ಅಗೆಯಲಾಗಿತ್ತು. ಕಾಮಗಾರಿ ಬಳಿಕ ತಾತ್ಕಾಲಿಕ ಪ್ಯಾಚ್‌ವರ್ಕ್ ಮಾಡಲಾಗಿದ್ದರೂ, ಸಂಪೂರ್ಣ ರಸ್ತೆಗೆ ಸಮಗ್ರ ಮರು ಡಾಂಬರೀಕರಣ ಮಾಡಬೇಕಾದ ಅಗತ್ಯವಿದೆ.

ಕೆಲವು ತಿಂಗಳ ಹಿಂದೆ ರಸ್ತೆ ಮೇಲ್ಮೈಯನ್ನು ಮಿಲ್ಲಿಂಗ್ ಮಾಡಿದ್ದರೂ, ಆ ಭಾಗಗಳಿಗೆ ಇನ್ನೂ ಸಮರ್ಪಕ ದುರಸ್ತಿ ಮಾಡಲಾಗಿಲ್ಲ ಎಂಬುದು ವಾಹನ ಸವಾರರ ಅಸಮಾಧಾನ. ಅಸಮತಟ್ಟಾದ ರಸ್ತೆ ಮತ್ತು ತಾತ್ಕಾಲಿಕ ದುರಸ್ತಿ ದ್ವಿಚಕ್ರ ವಾಹನ ಸವಾರರಿಗೆ ವಿಶೇಷವಾಗಿ ಅಪಾಯಕಾರಿಯಾಗಬಹುದು.

ಹೀಗಾಗಿ, ಹೊಸ ಬಿಇಎಲ್ ರಸ್ತೆಯನ್ನು ಪರ್ಯಾಯ ಮಾರ್ಗವಾಗಿ ಬಳಸುವ ಮೊದಲು ಅದರ ಸ್ಥಿತಿಯನ್ನು ಪರಿಶೀಲಿಸಿ ಅಗತ್ಯ ದುರಸ್ತಿ ಕೈಗೊಳ್ಳಬೇಕಿದೆ.

ವಾಹನ ಸಂಚಾರ ನಿರ್ಬಂಧದ ವಿವರ

ಯುಎಎಸ್‌ ಸ್ಟಾಫ್ ಕ್ವಾರ್ಟರ್ಸ್‌ನಿಂದ ಮೆಖ್ರಿ ವೃತ್ತದವರೆಗೆ ನಿರ್ಮಾಣವಾಗಲಿರುವ ನಾಲ್ಕು ಪಥಗಳ ಎತ್ತರದ ಕಾರಿಡಾರ್ ಸುಮಾರು 1.6 ಕಿಲೋಮೀಟರ್ ಉದ್ದವಿರಲಿದೆ. ಯೋಜನೆ ಪೂರ್ಣಗೊಳಿಸಲು 18 ತಿಂಗಳ ಕಾಲಾವಕಾಶ ನಿಗದಿಪಡಿಸಲಾಗಿದ್ದು, ಪ್ರಸ್ತುತ ವೇಳಾಪಟ್ಟಿಯ ಪ್ರಕಾರ 2028ರ ಮೇ ತಿಂಗಳೊಳಗೆ ಕಾಮಗಾರಿ ಪೂರ್ಣಗೊಳ್ಳುವ ಗುರಿ ಹೊಂದಲಾಗಿದೆ.

ಯೋಜನೆಯ ನಿರ್ಮಾಣ ಅವಧಿಯಲ್ಲಿ ಕೆಐಎ ರಸ್ತೆಯ ಈ ಭಾಗದಲ್ಲಿ ಕೆಎಸ್‌ಆರ್‌ಟಿಸಿ ಬಸ್‌ಗಳು, ಖಾಸಗಿ ಬಸ್‌ಗಳು ಮತ್ತು ಸರಕು ಸಾಗಣೆ ವಾಹನಗಳ ಸಂಚಾರಕ್ಕೆ ನಿರ್ಬಂಧ ವಿಧಿಸುವ ಪ್ರಸ್ತಾವನೆ ಇದೆ. ಆದರೆ, ಕಾರುಗಳು, ಕ್ಯಾಬ್‌ಗಳು, ದ್ವಿಚಕ್ರ ವಾಹನಗಳು, ಶಾಲಾ ಬಸ್‌ಗಳು ಹಾಗೂ ತುರ್ತು ಸೇವೆಯ ವಾಹನಗಳಿಗೆ ಸಂಚಾರಕ್ಕೆ ಅವಕಾಶ ಕಲ್ಪಿಸುವುದಾಗಿ ತಿಳಿಸಲಾಗಿದೆ.

ಈ ನಿರ್ಬಂಧಗಳು ಜಾರಿಗೆ ಬಂದ ಬಳಿಕ ಪರ್ಯಾಯ ರಸ್ತೆಗಳಲ್ಲಿ ವಾಹನಗಳ ಸಂಖ್ಯೆ ಎಷ್ಟು ಹೆಚ್ಚಾಗಲಿದೆ ಮತ್ತು ಸಂಚಾರ ವ್ಯವಸ್ಥೆಯ ಮೇಲೆ ಯಾವ ರೀತಿಯ ಪರಿಣಾಮ ಉಂಟಾಗಲಿದೆ ಎಂಬುದು ಸ್ಪಷ್ಟವಾಗಲಿದೆ.

ಕೆಐಎ ರಸ್ತೆಯ ಸಂಚಾರ ಬದಲಾವಣೆಗಳ ಪರಿಣಾಮ ಅಧ್ಯಯನಕ್ಕೆ ಕೆಎಸ್‌ಆರ್‌ಟಿಸಿ ಸಿದ್ಧತೆ

ಬಳ್ಳಾರಿ ರಸ್ತೆಯ ಮೂಲಕ ಪ್ರತಿದಿನ ನೂರಾರು ಕೆಎಸ್‌ಆರ್‌ಟಿಸಿ ಬಸ್ ಸೇವೆಗಳು ಸಂಚರಿಸುತ್ತವೆ. ಎತ್ತರದ ಕಾರಿಡಾರ್ ಕಾಮಗಾರಿಯಿಂದಾಗಿ ಈ ಬಸ್‌ಗಳ ಸಂಚಾರ ಮಾರ್ಗದಲ್ಲಿ ಬದಲಾವಣೆ ಮಾಡಬೇಕಾದ ಅನಿವಾರ್ಯತೆ ಎದುರಾಗಬಹುದು. ಈ ಹಿನ್ನೆಲೆಯಲ್ಲಿ ನಿರ್ಬಂಧಗಳು ಜಾರಿಗೆ ಬಂದ ನಂತರ ಉಂಟಾಗುವ ಪರಿಣಾಮವನ್ನು ಪರಿಶೀಲಿಸುವುದಾಗಿ ಕೆಎಸ್‌ಆರ್‌ಟಿಸಿಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಒಟ್ಟಾರೆ, ಎತ್ತರದ ಕಾರಿಡಾರ್ ನಿರ್ಮಾಣದಿಂದ ಭವಿಷ್ಯದಲ್ಲಿ ಕೆಐಎ ರಸ್ತೆಯ ಸಂಚಾರ ಸುಗಮವಾಗುವ ನಿರೀಕ್ಷೆಯಿದ್ದರೂ, ಕಾಮಗಾರಿ ಅವಧಿಯಲ್ಲಿ ವಾಹನ ಸವಾರರಿಗೆ ತೊಂದರೆ ಎದುರಾಗುವ ಸಾಧ್ಯತೆ ಇದೆ. ವಿಶೇಷವಾಗಿ ಈಗಾಗಲೇ ಸಂಚಾರ ದಟ್ಟಣೆ ಮತ್ತು ರಸ್ತೆ ಕಾಮಗಾರಿಗಳಿಂದ ಬಳಲುತ್ತಿರುವ ಪರ್ಯಾಯ ಮಾರ್ಗಗಳಿಗೆ ಹೆಚ್ಚುವರಿ ವಾಹನಗಳನ್ನು ವರ್ಗಾಯಿಸುವ ಮೊದಲು ಸಮಗ್ರ ಸಿದ್ಧತೆ ಅಗತ್ಯವಾಗಿದೆ. ರಸ್ತೆ ದುರಸ್ತಿ, ಜಂಕ್ಷನ್‌ಗಳ ಸಂಚಾರ ನಿರ್ವಹಣೆ, ಬಸ್ ಮಾರ್ಗಗಳ ಮರುಯೋಜನೆ ಮತ್ತು ವಾಹನ ಸಾಮರ್ಥ್ಯದ ಅಧ್ಯಯನ ಕೈಗೊಂಡರೆ ಮಾತ್ರ ಸಂಚಾರ ಸಮಸ್ಯೆಯನ್ನು ನಿಯಂತ್ರಿಸಲು ಸಾಧ್ಯವಾಗಲಿದೆ.

Chamarajanagar: ಮಾದಪ್ಪನ ಭಕ್ತರಿಗೆ ವಿಶೇಷ ಭದ್ರತೆ; ಥರ್ಮಲ್ ಡ್ರೋನ್ ಮೂಲಕ ವಿಶೇಷ ನಿಗಾ!

Sumanth SN — Sat, 07 Nov 2026 11:17:12 +0530

ಮಲೆ ಮಹದೇಶ್ವರ ಬೆಟ್ಟದಲ್ಲಿ ದೀಪಾವಳಿ ಜಾತ್ರೆಯ ಹಿನ್ನೆಲೆಯಲ್ಲಿ ಭಕ್ತರ ಸುರಕ್ಷತೆಗಾಗಿ ಅರಣ್ಯ ಇಲಾಖೆ ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದೆ. ಪಾದಯಾತ್ರೆಗೆ ಬೆಳಗ್ಗೆ 7ರಿಂದ ಸಂಜೆ 4ರವರೆಗೆ ಮಾತ್ರ ಅವಕಾಶ ನೀಡಲಾಗಿದ್ದು, ವನ್ಯಜೀವಿಗಳ ಮೇಲೆ ನಿಗಾ ಇಡಲು ವಿಶೇಷ ತಂಡಗಳನ್ನು ರಚಿಸಲಾಗಿದೆ.

ಚಾಮರಾಜನಗರ: ಮಲೆ ಮಹದೇಶ್ವರ ಬೆಟ್ಟದಲ್ಲಿ ದೀಪಾವಳಿ ಜಾತ್ರೆ ಹಿನ್ನಲೆ ಭಕ್ತರ ಸುರಕ್ಷತೆ ಮತ್ತು ವನ್ಯಜೀವಿ ಸಂರಕ್ಷಣೆ ಅರಣ್ಯ ಇಲಾಖೆಯಿಂದ ಮುನ್ನೆಚ್ಚರಿಕೆ ವಹಿಸಲಾಗಿದೆ. ಚಿರತೆ ದಾಳಿಯಂತಹ ಘಟನೆಗಳು ಮತ್ತೆ ಸಂಭವಿಸದಂತೆ ಮುನ್ನೆಚ್ಚರಿಕೆ ವಹಿಸಲಾಗಿದೆ.

ಪಾದಯಾತ್ರಿಗಳಿಗೆ ಸಮಯ ನಿರ್ಬಂಧಿಸಿ ಅರಣ್ಯ ಇಲಾಖೆ ಆದೇಶ ಹೊರಡಿಸಿದೆ. ಭಕ್ತಾಧಿಗಳಿಗೆ ಬೆಳಗ್ಗೆ 7 ಗಂಟೆಯಿಂದ ಸಂಜೆ 4 ರವರೆಗೂ ಅರಣ್ಯಾಧಿಕಾರಿಗಳು ಅವಕಾಶ ಕೊಟ್ಟಿದ್ದಾರೆ. ಸಂಜೆ 5 ರಿಂದ ಬೆಳಗ್ಗೆ 7 ರವರೆಗೂ ಪಾದಯಾತ್ರೆ ಹೋಗಲೂ ನಿರ್ಬಂಧಿಸಲಾಗಿದೆ.

ಹೆಚ್ಚು ಭಕ್ತರು ಪಾದಯಾತ್ರೆ ಮೂಲಕ‌ ತಾಳುಬೆಟ್ಟಕ್ಕೆ ಆಗಮಿಸಿರುವ ಹಿನ್ನಲೆ ಗುಂಪು ಗುಂಪಾಗಿ ಭಕ್ತರು ಪಾದಯಾತ್ರೆ ಹೋಗಲೂ ಅವಕಾಶ ಕಲ್ಪಿಸಲಾಗಿದೆ. ಅರಣ್ಯ ಇಲಾಖೆಯಿಂದ ಏಳು ವಿಶೇಷ ತಂಡಗಳನ್ನು ಗಸ್ತು ನಿಯೋಜನೆ ಮಾಡಲಾಗಿದೆ.

ತಾಳುಬೆಟ್ಟ, ಪೊನ್ನಾಚ್ಚಿ ಕ್ರಾಸ್, ರಂಗಸ್ವಾಮಿ ಒಡ್ಡು, ಆನೆ ತಲೆದಿಂಬ ಸೇರಿ ಪಾದಯಾತ್ರೆ ಹೋಗುವ ಮಾರ್ಗದಲ್ಲಿ ಗಸ್ತು ಹಾಗೂ ಸಿಬ್ಬಂದಿ ನಿಯೋಜಿಸಲಾಗಿದೆ. ಪ್ರತಿಯೊಂದು ತಂಡಕ್ಕೂ ಕೂಡ ವಾಕಿಟಾಕಿ, ಪಟಾಕಿ, ಡ್ರೋನ್ ಸೇರಿದಂತೆ ಅಗತ್ಯ ಸುರಕ್ಷತಾ ಹಾಗೂ ಸಂವಹನಾ ಸಾಧನ ಕೊಡಲಾಗಿದೆ.

ಅರಣ್ಯ ಪ್ರದೇಶದಲ್ಲಿ ಆಹಾರ ಹಾಗೂ ಪಾನೀಯ ವಿತರಣೆಗೆ ನಿಷೇಧಿಸಲಾಗಿದೆ. ಪ್ಲಾಸ್ಟಿಕ್ ಬಳಕೆ, ತ್ಯಾಜ್ಯ ವಿಲೇವಾರಿಗೆ ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದ್ದಾರೆ. ಥರ್ಮಲ್ ಡ್ರೋನ್ ಗಳ ಮೂಲಕ ವನ್ಯಜೀವಿಗಳ ಮೇಲೆ ನಿಗಾ ಇಟ್ಟಿದ್ದಾರೆ. ಪಾದಯಾತ್ರೆ ಹೋಗುವ ಭಕ್ತರ ಸುರಕ್ಷತೆಗೆ ಆದ್ಯತೆ ಕೊಟ್ಟಿದ್ದಾರೆ. ಮಲೆ ಮಹದೇಶ್ವರ ವನ್ಯಧಾಮದ ಡಿಸಿಎಫ್ ಭಾಸ್ಕರ್ ಆದೇಶ ಹೊರಡಿಸಿದ್ದಾರೆ.

ಬೇಲಿಯೇ ಎದ್ದು ಹೊಲ ಮೇಯ್ದ ಕತೆ, ಇಬ್ಬರು ಪೊಲೀಸ್ ಸಿಬ್ಬಂದಿಯನ್ನ ಒದ್ದು ಒಳಗೆ ಹಾಕಿದ‌ ಮಂಗಳೂರು ಕಮಿಷನರ್

Ganesh Mabla Gowda — Sat, 07 Nov 2026 10:40:01 +0530

ಮಂಗಳೂರು: ಬೇಲಿಯೇ ಎದ್ದು ಹೊಲ ಮೇಯ್ದ ಕಥೆ ಇದು. ಹೊಯ್ಸಳ ವಾಹನದಲ್ಲಿ ಲೂಟಿಗಿಳಿದಿದ್ದ ಇಬ್ಬರು ಪೊಲೀಸರು ಅರೆಸ್ಟ್‌ ಮಾಡಲಾಗಿದೆ. ಮಂಗಳೂರಿನ ದಕ್ಷಿಣ ಪೊಲೀಸ್ ಠಾಣೆಯ ಇಬ್ಬರು ಪೊಲೀಸ್‌ ಅಧಿಕಾರಿಗಳನ್ನ ಸ್ವತಃ ಪೊಲೀಸ್‌ ಕಮಿಷನರ್‌ ಅವರೇ ಬಂಧಿಸಿದ್ದಾರೆ. ಶಿವರಾಜ್, ಹಿರಣ್ಣ ಬೆನ್ನಿ ಬಂಧನಕ್ಕೆ ಒಳಗಾದ ಅಧಿಕಾರಿಗಳು.

ಏನಿದು ಪ್ರಕರಣ?

ವಿಟ್ಲ ನಿವಾಸಿ ರವಿರಾಜ್‌ ಅನ್ನೋರು ಮಂಗಳೂರಿನಲ್ಲಿ ಎಲೆಕ್ಟ್ರಿಷಿಯನ್ ಆಗಿದ್ದಾರೆ. ಶಿವರಾಜ್, ಹಿರಣ್ಣ ಬೆನ್ನಿ ಅವರು ಹೊಯ್ಸಳ ವಾಹನದಲ್ಲಿ ಓಡಾಡುತ್ತ ವಸೂಲಿ ಮಾಡುತ್ತಿರುವ ಬಗ್ಗೆ ರವಿರಾಜ್‌ ದೂರು ನೀಡಿದ್ದರು. ಈ ಸಂಬಂಧ ಎಫ್‌ಐಆರ್‌ ದಾಖಲಿಸಿ ಅರೆಸ್ಟ್‌ ಮಾಡಲಾಗಿದೆ. ಒಂದು ದಿನ ರವಿರಾಜ್ ನೆಹರು ಮೈದಾನಲ್ಲಿ ವಾಕಿಂಗ್ ಮುಗಿಸಿ ಮನೆಯ ಕಡೆಗೆ ನಡೆದುಕೊಂಡು ಹೋಗುತ್ತಿದ್ದರು. ಆಗ ಹೊಯ್ಸಳ ವಾಹನದಲ್ಲಿ ಬಂದ ಹಿರಣ್ಣ ಬೆನ್ನಿ ಮತ್ತು ಶಿವರಾಜ್ ತಡೆದಿದ್ದಾರೆ. ನಂತರ ಮನಸೋ ಇಚ್ಛೆ ಹಲ್ಲೆ ನಡೆಸಿ ರವಿರಾಜ್ ಕಿಸೆಯಿಂದ ಮೊಬೈಲ್‌ನ್ನು ತೆಗೆದು, ಮೊಬೈಲ್ ಕವರ್‌ನಲ್ಲಿಇದ್ದ 300 ರೂಪಾಯಿ ಹಣ ಲೂಟಿ ಮಾಡಿದ್ದರು.

ಮತ್ತೊಬ್ಬ ಸಿಬ್ಬಂದಿ ವಿರುದ್ಧವೂ ದೂರು

ಅಷ್ಟೇ ಅಲ್ಲದೇ ಬಳಿಕ ಅವಾಚ್ಯ ಶಬ್ದಗಳಿಂದ ಬೈದು ಬೆದರಿಕೆ ಹಾಕಿದ್ದರಂತೆ. ಅಲ್ಲಿಗೂ ನಿಲ್ಲಿಸದ ಇವರ ದೌರ್ಜನ್ಯ ಮಾರನೇಯ ದಿನವೂ ಮುಂದುವರಿದಿತ್ತು. ಮತ್ತೆ ಹೊಯ್ಸಳ ವಾಹನದಲ್ಲಿ ಬಂದು ಗಲಾಟೆ ಮಾಡಿದ್ದರಂತೆ. ಮೊಬೈಲ್ ಕವರ್‌ನಲ್ಲಿದ್ದ ಕರ್ನಾಟಕ ಬ್ಯಾಂಕ್ ಮತ್ತು ಯೂನಿಯನ್ ಬ್ಯಾಂಕ್‌ನ 2 ಎ.ಟಿ.ಎಮ್ ಕಾರ್ಡ್ ಹಾಗೂ 1000 ನಗದು ಮತ್ತು ಮೋಟಾರು ಸೈಕಲ್‌ನ ಕೀ ತೆಗೆದುಕೊಂಡು ಹೋಗಿದ್ದರಂತೆ. ಅದಾದ ಬಳಿಕ ಮೊಬೈಲ್‌ನ ಪಾಸ್‌ವರ್ಡ್ ಪಡೆದು ಮೊಬೈಲ್‌ನಲ್ಲಿ ಬ್ಯಾಂಕ್ ಬ್ಯಾಲೆನ್ಸ್‌ ಚೆಕ್ ಮಾಡಿ ಲೂಟಿ ಮಾಡಿದ್ದಾರೆ. ಈ ಕೂಡಲೇ 2000 ಹಣ ನೀಡು. ಇಲ್ಲದಿದ್ದರೆ ಕೇಸ್ ಮಾಡಿ ಜೈಲಿಗೆ ಹಾಕುವುದಾಗಿ ಬೆದರಿಕೆ ಹಾಕಿದ್ದರು ಎಂದು ಆರೋಪಿಸಿದ್ದರು. ಹಾಗೆಯೇ ರವಿರಾಜ್‌ ಅನ್ನೋರು ಮತ್ತೊಬ್ಬ ಪೊಲೀಸ್‌ ಸಿಬ್ಬಂದಿ ಉಮಾನಾಥ್‌ ಅನ್ನೋರು ಅವರ ಬೈಕ್‌ ಅಡ್ಡಗಟ್ಟಿ ಸೀಜ್‌ ಮಾಡಿದ್ದಾರೆ. ಈ ವೇಳೆ ಬೈಕ್‌ ಕೀ ಕಸಿದುಕೊಂಡು ಹೋಗಿದ್ದು ಹಣ ಕೊಟ್ಟರೆ ಮಾತ್ರ ನೀಡೋದಾಗಿ ಬೆದರಿಸಿದ್ದಾರೆ ಎಂದು ದೂರು ನೀಡಿದ್ದಾರೆ.

ಈ ಸಂಬಂಧ ಪಾಂಡೇಶ್ವರ ಪೊಲೀಸ್ ಠಾಣೆಯಲ್ಲಿ ರವಿರಾಜ್‌ ದೂರು ನೀಡಿದ್ದರು. ದೂರಿನ ಅನ್ವಯ ಎಫ್ಐಆರ್ ದಾಖಲಾಗಿತ್ತು. ಕಮಿಷನರ್ ಸುಧೀರ್ ರೆಡ್ಡಿ ಸೂಚನೆ ಬೆನ್ನಲ್ಲೇ ಇಬ್ಬರು ಪೊಲೀಸ್‌ ಅಧಿಕಾರಿಗಳನ್ನ ಬಂಧಿಸಲಾಗಿದೆ. ಬಂಧಿಸಿದ ಪೊಲೀಸರು ಕೋರ್ಟ್‌ಗೆ ಹಾಜರು ಪಡಿಸಿದರು. ಕೋರ್ಟ್‌ ಇಬ್ಬರು ಆರೋಪಿಗಳಿಗೂ ನ್ಯಾಯಾಂಗ ಬಂಧನ ವಿಧಿಸಿದೆ. ಮತ್ತೊಬ್ಬ ಪೊಲೀಸ್ ಸಿಬ್ಬಂದಿ ಉಮಾನಾಥ್ ವಿರುದ್ದ ತನಿಖೆ ಮುಂದುವರಿದೆ ಎಂದು ತಿಳಿದು ಬಂದಿದೆ.

2 ಹೆಕ್ಟೇರ್‌ನಲ್ಲಿ ನಿಂಬೆ ತೋಟ ನಿರ್ಮಿಸಿದ ರೈತ ರಾಮನಗೌಡ; ಕಡಿಮೆ ಖರ್ಚು, ಉತ್ತಮ ಆದಾಯ

Kannadaprabha News — Sat, 07 Nov 2026 10:10:03 +0530

ಪರಶಿವಮೂರ್ತಿ ಮಾಟಲದಿನ್ನಿ

ಕನ್ನಡಪ್ರಭ ವಾರ್ತೆ ಕುಷ್ಟಗಿ

ಒಂದೆಡೆ ಕೃಷಿ ವೆಚ್ಚದ ಏರಿಕೆ, ಮತ್ತೊಂದೆಡೆ ಬೆಳೆಗಳಿಗೆ ಸೂಕ್ತ ಬೆಲೆ ಸಿಗದೆ ಕಂಗಾಲಾಗಿರುವ ರೈತರು... ಇಂತಹ ಸಂದರ್ಭದಲ್ಲಿ ಕಡಿಮೆ ನಿರ್ವಹಣಾ ವೆಚ್ಚ, ಮಾರುಕಟ್ಟೆಯಲ್ಲಿ ನಿರಂತರ ಬೇಡಿಕೆ ಹಾಗೂ ಉತ್ತಮ ಆದಾಯದ ನಿರೀಕ್ಷೆ ಹೊಂದಿರುವ ನಿಂಬೆ ಕೃಷಿ ರೈತರ ಪಾಲಿಗೆ ಆಶಾಕಿರಣವಾಗಿ ಮೂಡುತ್ತಿದೆ.

ತಾಲೂಕಿನ ಮಡಿಕೇರಿ ಗ್ರಾಮದ ರೈತ ರಾಮನಗೌಡ ಪಾಟೀಲ ಅವರು ತಮ್ಮ ಜಮೀನಿನಲ್ಲಿ 2 ಹೆಕ್ಟೇರ್ ಪ್ರದೇಶದಲ್ಲಿ ನಿಂಬೆ ಬೆಳೆ ಬೆಳೆದು ಗಮನ ಸೆಳೆದಿದ್ದಾರೆ. ಸಾಂಪ್ರದಾಯಿಕ ಬೆಳೆಗಳ ಜತೆಗೆ ಪರ್ಯಾಯ ಕೃಷಿಯತ್ತ ಮುಖ ಮಾಡಿರುವ ಅವರು, ನಿಂಬೆ ಕೃಷಿಯ ಮೂಲಕ ಉತ್ತಮ ಆದಾಯ ಗಳಿಸುವ ಆಶಯ ಹೊಂದಿದ್ದಾರೆ.

ಕಡಿಮೆ ಖರ್ಚು, ನಿರಂತರ ಬೇಡಿಕೆ:

ನಿಂಬೆ ಬೆಳೆಗೆ ಕೊಟ್ಟಿಗೆ ಗೊಬ್ಬರ ಹಾಗೂ ಸಾವಯವ ಗೊಬ್ಬರ ಬಳಕೆ ಮಾಡಬಹುದು. ಹನಿ ನೀರಾವರಿ ಮೂಲಕ ನೀರಿನ ಸಮರ್ಪಕ ಬಳಕೆ ಸಾಧ್ಯವಾಗುತ್ತದೆ. ಒಂದು ಎಕರೆಗೆ ಸುಮಾರು 100 ಗಿಡಗಳನ್ನು ನಾಟಿ ಮಾಡಬಹುದಾಗಿದೆ. ನಿಂಬೆ ಬೆಳೆಯ ವಿಸ್ತೀರ್ಣ ಕಡಿಮೆಯಾಗುತ್ತಿದ್ದರೂ ಮಾರುಕಟ್ಟೆಯಲ್ಲಿ ಬೇಡಿಕೆ ಹೆಚ್ಚುತ್ತಿರುವುದು ರೈತರಿಗೆ ಹೊಸ ಅವಕಾಶ ಕಲ್ಪಿಸಿದೆ.

ಕೃಷಿಯಲ್ಲಿ ಒಂದೇ ಬೆಳೆಯನ್ನು ಅವಲಂಬಿಸದೆ ಮಾರುಕಟ್ಟೆ ಬೇಡಿಕೆ, ನೀರಿನ ಲಭ್ಯತೆ ಹಾಗೂ ಮಣ್ಣಿನ ಗುಣಧರ್ಮಕ್ಕೆ ಅನುಗುಣವಾಗಿ ಪರ್ಯಾಯ ಬೆಳೆಗಳನ್ನು ಆಯ್ಕೆ ಮಾಡಿಕೊಳ್ಳಬೇಕಿದೆ. ಈ ನಿಟ್ಟಿನಲ್ಲಿ ರಾಮನಗೌಡ ಪಾಟೀಲ ಅವರ ನಿಂಬೆ ಕೃಷಿ ಪ್ರಯತ್ನ ಇತರ ರೈತರಿಗೂ ಪ್ರೇರಣೆಯಾಗಬಹುದು.

ತೋಟಕ್ಕೆ ಅಧಿಕಾರಿಗಳ ಭೇಟಿ, ಮಾರ್ಗದರ್ಶನ:

ರೈತ ರಾಮನಗೌಡ ಪಾಟೀಲ ನಿಂಬೆ ತೋಟಕ್ಕೆ ತೋಟಗಾರಿಕೆ ಇಲಾಖೆಯ ಹಿರಿಯ ಸಹಾಯಕ ನಿರ್ದೇಶಕ ಶಿವಯೋಗಪ್ಪ ಅವರು ಭೇಟಿ ನೀಡಿ ಬೆಳೆ ಪರಿಶೀಲಿಸಿದರು. ಗಿಡಗಳ ಬೆಳವಣಿಗೆ, ತೋಟದ ನಿರ್ವಹಣೆ ಹಾಗೂ ಉತ್ತಮ ಇಳುವರಿ ಪಡೆಯುವ ಕೃಷಿ ಪದ್ಧತಿಗಳ ಕುರಿತು ಸಲಹೆ ನೀಡಿದರು.

ಕುಷ್ಟಗಿ ತಾಲೂಕಿನಲ್ಲಿ ನಿಂಬೆ ಬೆಳೆ ಬೆಳೆಯಲು ಉತ್ತಮ ಅವಕಾಶಗಳಿವೆ. ವೈಜ್ಞಾನಿಕ ಪದ್ಧತಿಯಲ್ಲಿ ತೋಟ ನಿರ್ವಹಣೆ, ಹನಿ ನೀರಾವರಿ ಹಾಗೂ ಸಾವಯವ ಗೊಬ್ಬರ ಬಳಕೆಗೆ ಆದ್ಯತೆ ನೀಡಬೇಕು. ತೋಟಗಾರಿಕೆ ಇಲಾಖೆಯಿಂದ ನಿಂಬೆ ಬೆಳೆ ಮತ್ತು ಹನಿ ನೀರಾವರಿಗೆ ದೊರೆಯುವ ಸಹಾಯಧನವನ್ನು ರೈತರು ಸದುಪಯೋಗಪಡಿಸಿಕೊಳ್ಳಬೇಕು.

ಶಿವಯೋಗಪ್ಪ, ಹಿರಿಯ ಸಹಾಯಕ ನಿರ್ದೇಶಕ ತೋಟಗಾರಿಕೆ ಕುಷ್ಟಗಿ

ದ್ರಾಕ್ಷಿ ಮತ್ತು ದಾಳಿಂಬೆ ಬೆಳೆಗಳಿಗೆ ಹೋಲಿಸಿದರೆ ನಿಂಬೆ ಕೃಷಿಯಲ್ಲಿ ನಿರ್ವಹಣಾ ವೆಚ್ಚ ಕಡಿಮೆ. ಒಂದು ಗಿಡದಿಂದ ವರ್ಷಕ್ಕೆ ₹5 ಸಾವಿರದಿಂದ ₹6 ಸಾವಿರದ ವರೆಗೆ ಆದಾಯ ಗಳಿಸುವ ಅವಕಾಶವಿದೆ. ಪ್ರಸ್ತುತ ಮಾರುಕಟ್ಟೆಯಲ್ಲಿ ಒಂದು ನಿಂಬೆಗೆ ₹8ರಿಂದ ₹10ರ ವರೆಗೆ ಬೆಲೆ ದೊರೆಯುತ್ತಿದೆ. ಬೇಸಿಗೆಯಲ್ಲಿ ಬೇಡಿಕೆ ಹೆಚ್ಚಾದಾಗ ಉತ್ತಮ ಬೆಲೆ ಸಿಗುತ್ತದೆ. ಒಂದು ಎಕರೆಗೆ ವಾರ್ಷಿಕ ₹2ರಿಂದ ₹3 ಲಕ್ಷದ ವರೆಗೆ ಲಾಭ ಗಳಿಸುವ ಅವಕಾಶವಿದೆ. ರೈತರು ನಿಂಬೆ ಕೃಷಿಯತ್ತ ಆಸಕ್ತಿ ತೋರಬೇಕು.

ರಾಮನಗೌಡ ಪಾಟೀಲ್‌, ಮಡಿಕೇರಿ ಗ್ರಾಮದ ನಿಂಬೆ ಬೆಳೆದ ರೈತ

ಕರ್ನಾಟಕದಲ್ಲಿ ಮುಂದಿನ ಎರಡು ದಿನ ಮಳೆ ಪಕ್ಕಾ! ಬೆಂಗಳೂರು, ಕರಾವಳಿ ಸೇರಿ ಹಲವು ಜಿಲ್ಲೆಗಳ ಮಳೆ ಮುನ್ಸೂಚನೆ ಹೀಗಿದೆ

Gowthami K — Sat, 07 Nov 2026 09:48:01 +0530

ಬೆಂಗಳೂರು: ರಾಜ್ಯದ ಹವಾಮಾನದಲ್ಲಿ ಪ್ರಮುಖ ಬದಲಾವಣೆಗಳು ಕಂಡುಬರುತ್ತಿದ್ದು, ಭಾರತೀಯ ಹವಾಮಾನ ಇಲಾಖೆ (IMD) ನೀಡಿರುವ ಮುನ್ಸೂಚನೆಯಂತೆ ದಕ್ಷಿಣ ಒಳನಾಡು ಹಾಗೂ ಕರಾವಳಿ ಜಿಲ್ಲೆಗಳಲ್ಲಿ ಮಳೆಯ ಚಟುವಟಿಕೆ ಹೆಚ್ಚಾಗಲಿದೆ. ರಾಜಧಾನಿ ಬೆಂಗಳೂರು ನಗರ ಮತ್ತು ಗ್ರಾಮಾಂತರ ಪ್ರದೇಶಗಳು ಸೇರಿದಂತೆ ಹಲವು ಭಾಗಗಳಲ್ಲಿ ಗುಡುಗು-ಮಿಂಚು ಸಹಿತ ಹಗುರದಿಂದ ಸಾಧಾರಣ ಮಳೆಯಾಗುವ ನಿರೀಕ್ಷೆಯಿದೆ.

ಆದರೆ, ಉತ್ತರ ಒಳನಾಡಿನಲ್ಲಿ ಮಳೆಯ ಪ್ರಮಾಣ ಕ್ಷೀಣಿಸಲಿದ್ದು, ಮುಂಬರುವ ದಿನಗಳಲ್ಲಿ ಒಣಹವೆ ಹಾಗೂ ಬಿಸಿಲಿನ ವಾತಾವರಣವೇ ಪ್ರಾಬಲ್ಯ ಸಾಧಿಸಲಿದೆ.

ದಕ್ಷಿಣ ಒಳನಾಡು ಮತ್ತು ಮಲೆನಾಡಿನಲ್ಲಿ ಮಳೆಯ ಮುನ್ಸೂಚನೆ

ದಕ್ಷಿಣ ಒಳನಾಡಿನ ಕಾವೇರಿ ಕೊಳ್ಳದ ಜಿಲ್ಲೆಗಳು ಹಾಗೂ ಮಲೆನಾಡು ಭಾಗದಲ್ಲಿ ಮೋಡ ಕವಿದ ವಾತಾವರಣದೊಂದಿಗೆ ಮಳೆಯಾಗುವ ಸಾಧ್ಯತೆಯಿದೆ.

ಸಾಧಾರಣ ಮಳೆಯಾಗುವ ಜಿಲ್ಲೆಗಳು: ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ, ಕೊಡಗು, ಮೈಸೂರು, ಮಂಡ್ಯ, ಚಾಮರಾಜನಗರ, ರಾಮನಗರ, ಕೋಲಾರ, ಬೆಂಗಳೂರು ನಗರ ಹಾಗೂ ಬೆಂಗಳೂರು ಗ್ರಾಮಾಂತರ ಜಿಲ್ಲೆಗಳ ಒಂದೆರಡು ಕಡೆಗಳಲ್ಲಿ ಅಲ್ಲಲ್ಲಿ ಸಾಧಾರಣ ಮಳೆಯಾಗಬಹುದು.

ಒಣಹವೆ ಮುಂದುವರಿಯುವ ಪ್ರದೇಶಗಳು: ದಕ್ಷಿಣ ಒಳನಾಡಿನ ಭಾಗವಾಗಿದ್ದರೂ ಬಳ್ಳಾರಿ, ಚಿಕ್ಕಬಳ್ಳಾಪುರ, ಚಿತ್ರದುರ್ಗ, ದಾವಣಗೆರೆ, ತುಮಕೂರು ಮತ್ತು ವಿಜಯನಗರ ಜಿಲ್ಲೆಗಳಲ್ಲಿ ಮುಖ್ಯವಾಗಿ ಬಿಸಿಲು ಹಾಗೂ ಒಣಹವೆ ಮುಂದುವರಿಯಲಿದೆ.

ಕರಾವಳಿಯಲ್ಲಿ ಮಳೆ, ಉತ್ತರ ಒಳನಾಡಿನಲ್ಲಿ ಸೆಕೆ

ದಕ್ಷಿಣ ಕನ್ನಡ ಜಿಲ್ಲೆಯ ಹಲವೆಡೆ ಶುಕ್ರವಾರ ಭಾರೀ ಮಳೆಯಾಗಿದೆ. ಮಂಗಳೂರು ನಗರ ಸೇರಿದಂತೆ ಸುಳ್ಯ, ಪುತ್ತೂರು, ಕಡಬ, ಬೆಳ್ತಂಗಡಿ, ಬಂಟ್ವಾಳ, ಉಳ್ಳಾಲ, ಮೂಲ್ಕಿ, ಮೂಡುಬಿದಿರೆ ತಾಲೂಕಿನ ಹಲವೆಡೆ ಅಪರಾಹ್ನ ಬಳಿಕ ಮಳೆಯಾಗಿದೆ. ಶುಕ್ರವಾರ ದಿನವಿಡೀ ಜಿಲ್ಲೆಯಲ್ಲಿ ಮೋಡ ಕವಿದ ವಾತಾವರಣ ಮುಂದುವರಿದಿತ್ತು. ಮಂಗಳೂರು ಸಿಟಿ ಬಿಟ್ಟು ಉಳಿದ ತಾಲೂಕುಗಳಲ್ಲಿ ಗುಡುಗು ಸಹಿತ ಭಾರೀ ಮಳೆಯಾಗಿದೆ. ಮಳೆಯ ರಭಸಕ್ಕೆ ಅಲ್ಲಲ್ಲಿ ವಿದ್ಯುತ್ ಸಂಪರ್ಕ ಕಡಿತಗೊಂಡಿದೆ. ಮಳೆಗಾಲ ಮತ್ತೆ ಪ್ರಾರಂಭವಾಯಿತೇ ಎಂಬಂತೆ ಅನಿಸಿದೆ.

ಇನ್ನು ಮುಂದಿನ ಎರಡು ದಿನಗಳ ಕಾಲ ಉಡುಪಿ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಗಳ ಕೆಲವು ಪ್ರದೇಶಗಳಲ್ಲಿ ಗುಡುಗು ಸಹಿತ ಸಾಧಾರಣ ಮಳೆಯಾಗುವ ಸಾಧ್ಯತೆಯಿದೆ. ಆದರೆ, ಉತ್ತರ ಕನ್ನಡ ಜಿಲ್ಲೆಯಲ್ಲಿ ಹೆಚ್ಚಿನ ಮಳೆಯ ನಿರೀಕ್ಷೆಯಿಲ್ಲದೆ ಮುಖ್ಯವಾಗಿ ಒಣಹವೆ ಇರಲಿದೆ.

ಬೆಳಗಾವಿ, ಬೀದರ್, ಧಾರವಾಡ, ಗದಗ, ಹಾವೇರಿ, ಕಲಬುರಗಿ, ಕೊಪ್ಪಳ, ರಾಯಚೂರು, ವಿಜಯಪುರ, ಬಾಗಲಕೋಟೆ ಮತ್ತು ಯಾದಗಿರಿ ಜಿಲ್ಲೆಗಳಲ್ಲಿ ಮುಂದಿನ ಮೂರು ದಿನಗಳ ಕಾಲ ಸಂಪೂರ್ಣ ಒಣಹವೆ ಇರಲಿದ್ದು, ಹಗಲಿನಲ್ಲಿ ಬಿಸಿಲು ಮತ್ತು ಸೆಕೆಯ ವಾತಾವರಣ ಮುಂದುವರಿಯಲಿದೆ.

ಶನಿವಾರ ಉಡುಪಿ, ದಕ್ಷಿಣ ಕನ್ನಡ, ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ, ಕೊಡಗು, ಮೈಸೂರು, ಮಂಡ್ಯ, ಚಾಮರಾಜನಗರ, ಬೆಂಗಳೂರು ನಗರ, ಬೆಂಗಳೂರು ಗ್ರಾಮಾಂತರ, ಕೋಲಾರ ಜಿಲ್ಲೆಯಲ್ಲಿ ಮಳೆಯಾಗುವ ಸಾಧ್ಯತೆ ಇದೆ. ಮತ್ತು ಚಿತ್ರದುರ್ಗ, ದಾವಣಗೆರೆ, ತುಮಕೂರು, ಬಳ್ಳಾರಿ, ವಿಜಯನಗರ, ಚಿಕ್ಕಬಳ್ಳಾಪುರ ಹಾಗೂ ಇಡೀ ಉತ್ತರ ಒಳನಾಡು ಒಣಹವೆ ಮುಂದುವರೆಯಲಿದೆ.

ಭಾನುವಾರ ಕೊಡಗು, ಮೈಸೂರು, ಮಂಡ್ಯ, ಚಾಮರಾಜನಗರ, ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ, ಉಡುಪಿ, ದಕ್ಷಿಣ ಕನ್ನಡ ಮಳೆಯಾಗುವ ಸಾಧ್ಯತೆ ಇದೆ. ಬೆಂಗಳೂರು ನಗರ, ಬೆಂಗಳೂರು ಗ್ರಾಮಾಂತರ, ರಾಮನಗರ, ಕೋಲಾರ, ತುಮಕೂರು, ದಾವಣಗೆರೆ ಹಾಗೂ ಉತ್ತರ ಒಳನಾಡಿನ ಜಿಲ್ಲೆಗಳಲ್ಲಿ ಒಣಹವೆ ಮುಂದುವರೆಯಲಿದೆ. ಮುಂದಿನ ಎರಡೂ ದಿನ ಕೂಡ ಸಂಜೆ ಅಥವಾ ರಾತ್ರಿಯ ವೇಳೆಗೆ ಗುಡುಗು ಸಹಿತ ಮಳೆಯಾಗುವ ಸಾಧ್ಯತೆಯಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ಒಟ್ಟಾರೆಯಾಗಿ, ನವೆಂಬರ್ 7 ಮತ್ತು 8ರಂದು ಕರ್ನಾಟಕದ ದಕ್ಷಿಣ ಒಳನಾಡು ಹಾಗೂ ಕರಾವಳಿಯ ಕೆಲವು ಜಿಲ್ಲೆಗಳಲ್ಲಿ ಮಳೆಯ ವಾತಾವರಣ ಮುಂದುವರಿಯುವ ಸಾಧ್ಯತೆಯಿದೆ. ಉತ್ತರ ಒಳನಾಡಿನ ಜಿಲ್ಲೆಗಳಲ್ಲಿ ಬಿಸಿಲು ಮತ್ತು ಒಣಹವೆ ಇರಲಿದೆ. ಬೆಂಗಳೂರು ಸೇರಿದಂತೆ ದಕ್ಷಿಣ ಭಾಗದ ಜನರು ಸ್ಥಳೀಯ ಹವಾಮಾನ ಬದಲಾವಣೆಗಳ ಬಗ್ಗೆ ಗಮನಹರಿಸುವುದು ಉತ್ತಮ.

'ತಂದೆ-ತಾಯಿಯ ಕಣ್ಣೀರೊರೆಸಲು ಊರು ಬಿಟ್ಟ ಮಗ'; ಹುಬ್ಬಳ್ಳಿಯಿಂದ ಯುರೋಪ್‌ಗೆ ಹಾರಿ ಲಕ್ಷ ಲಕ್ಷ ಗಳಿಸ್ತಿರೋ ಕನ್ನಡಿಗ!

Sushma Hegde — Sat, 07 Nov 2026 09:33:40 +0530

ವಿದೇಶದಲ್ಲಿ ಉದ್ಯೋಗ ಪಡೆಯಬೇಕು, ಕೈತುಂಬ ಸಂಬಳ ಸಂಪಾದಿಸಬೇಕು ಎಂಬುದು ಹಲವರ ಕನಸು. ಆದರೆ ಆ ಕನಸನ್ನು ನನಸು ಮಾಡಿಕೊಳ್ಳಲು ಕೆಲವರು ಸಾಕಷ್ಟು ಕಷ್ಟಪಡುತ್ತಾರೆ. ಅಂತಹವರ ಸಾಲಿಗೆ ಹುಬ್ಬಳ್ಳಿಯ 25 ವರ್ಷದ ಯುವಕ ಭರತ್ ಕೂಡ ಸೇರುತ್ತಾರೆ. ಭಾರತದಲ್ಲಿ ಸಣ್ಣಪುಟ್ಟ ಕೆಲಸಗಳನ್ನು ಮಾಡಿಕೊಂಡು ಕುಟುಂಬ ನಿರ್ವಹಣೆಗೆ ಪರದಾಡುತ್ತಿದ್ದ ಭರತ್, ಇದೀಗ ಯುರೋಪ್‌ನ ಲಿಥುವೇನಿಯಾದಲ್ಲಿ ಟ್ರಕ್ ಚಾಲಕರಾಗಿ ಕೆಲಸ ಮಾಡುತ್ತಿದ್ದಾರೆ. ವಿಶೇಷವೆಂದರೆ, ಇವರಿಗೆ ತಿಂಗಳಿಗೆ ಬರೋಬ್ಬರಿ 2,500 ಯುರೋ ಅಂದರೆ ಭಾರತೀಯ ರೂಪಾಯಿ ಲೆಕ್ಕದಲ್ಲಿ ಸುಮಾರು ₹3 ಲಕ್ಷ ಸಂಬಳ ಸಿಗುತ್ತಿದೆ.

ಯೂಟ್ಯೂಬ್ ಚಾನೆಲ್‌ ಒಂದರಲ್ಲಿ ಹಂಚಿಕೊಂಡಿರುವ ಸಂದರ್ಶನದಲ್ಲಿ ಭರತ್ ತಮ್ಮ ವಿದೇಶಿ ಉದ್ಯೋಗ, ಸಂಬಳ, ಕೆಲಸದ ಸಮಯ, ಲಾರಿ ಸೌಲಭ್ಯಗಳು ಹಾಗೂ ಅಲ್ಲಿಗೆ ತಲುಪಲು ಪಟ್ಟ ಕಷ್ಟಗಳ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದಾರೆ.

ಬಿಎ ಜರ್ನಲಿಸಂ ಓದಿದ ಯುವಕ ಈಗ ಯುರೋಪ್‌ನಲ್ಲಿ ಟ್ರಕ್ ಡ್ರೈವರ್!

ಭರತ್ ಮೂಲತಃ ಧಾರವಾಡ ಜಿಲ್ಲೆಯ ಹುಬ್ಬಳ್ಳಿಯವರು. ಇವರು ಬಿಎ ಜರ್ನಲಿಸಂ ಪದವಿ ಪೂರ್ಣಗೊಳಿಸಿದ್ದಾರೆ. ಆದರೆ ಓದಿಗೆ ತಕ್ಕ ಉದ್ಯೋಗ ಸಿಗದ ಕಾರಣ ಹಲವು ಕೆಲಸಗಳನ್ನು ಮಾಡಿದ್ದಾರೆ. ಹುಬ್ಬಳ್ಳಿಯಲ್ಲಿ ಜೊಮ್ಯಾಟೊ ಕೆಲಸ ಮಾಡಿದ್ದಲ್ಲದೆ, ಇತರರ ಕಾರುಗಳನ್ನು ಬಾಡಿಗೆಗೆ ಓಡಿಸುವ ಕೆಲಸವನ್ನೂ ಮಾಡಿದ್ದಾರೆ. ಭರತ್ ಅವರ ತಂದೆಗೆ ಸ್ಟ್ರೋಕ್ ಆಗಿದ್ದರಿಂದ ಕುಟುಂಬದ ಜವಾಬ್ದಾರಿ ಚಿಕ್ಕ ವಯಸ್ಸಿನಲ್ಲೇ ಇವರ ಹೆಗಲೇರಿತ್ತು. ತಂದೆ-ತಾಯಿ ಇಬ್ಬರೂ ಆರೋಗ್ಯ ಸಮಸ್ಯೆಯಿಂದ ಬಳಲುತ್ತಿದ್ದು, ಔಷಧಿಗಳಿಗೂ ಪ್ರತಿ ತಿಂಗಳು ಹಣ ಖರ್ಚು ಮಾಡಬೇಕಿತ್ತು. ಈ ನಡುವೆ ಕೆಲಸ ಹುಡುಕಿಕೊಂಡು ಬೆಂಗಳೂರಿಗೆ ಬಂದ ಭರತ್, ಓಲಾ ಮತ್ತು ಉಬರ್‌ನಲ್ಲಿ ಕಾರು ಚಾಲಕರಾಗಿ ಕೆಲಸ ಮಾಡಿದರು. ತಿಂಗಳಿಗೆ ಸುಮಾರು ₹40 ಸಾವಿರ ಉಳಿಸುವಷ್ಟು ಆದಾಯವೂ ಬರುತ್ತಿತ್ತು.

ಆದರೆ ತಾವು ಚಾಲಕ ವೃತ್ತಿಗೆ ಬರಬಾರದು ಎಂದುಕೊಂಡಿದ್ದರೂ, ಪರಿಸ್ಥಿತಿ ಅವರನ್ನು ಅದೇ ವೃತ್ತಿಯತ್ತ ಕರೆದೊಯ್ದಿತು. ಭಾರತದಲ್ಲಿ ಚಾಲಕರಿಗೆ ಸಿಗುವ ಗೌರವಕ್ಕಿಂತ ಯುರೋಪ್‌ನಲ್ಲಿ ಈ ವೃತ್ತಿಗೆ ಹೆಚ್ಚಿನ ಗೌರವವಿದೆ ಎಂಬ ಕಾರಣವೂ ವಿದೇಶಕ್ಕೆ ತೆರಳುವ ನಿರ್ಧಾರಕ್ಕೆ ಪ್ರೇರಣೆಯಾಯಿತು.

ಯುರೋಪ್‌ಗೆ ಬರಲು ₹8 ಲಕ್ಷ ಖರ್ಚು!

ಲಿಥುವೇನಿಯಾಗೆ ಬಂದು ಕೆಲಸ ಆರಂಭಿಸಲು ಭರತ್ ಸುಮಾರು ₹8 ಲಕ್ಷ ಖರ್ಚು ಮಾಡಿದ್ದಾರೆ. ವಿಮಾನ ಟಿಕೆಟ್, ಪ್ರಯಾಣ ಮತ್ತು ಅಲ್ಲಿಗೆ ಹೋದ ಬಳಿಕ ಎರಡು-ಮೂರು ತಿಂಗಳು ಉಳಿದುಕೊಳ್ಳುವ ವೆಚ್ಚ ಸೇರಿದಂತೆ ಈ ಮೊತ್ತ ಖರ್ಚಾಗಿದೆ ಎಂದು ಅವರು ತಿಳಿಸಿದ್ದಾರೆ. ಅಲ್ಲಿಗೆ ಹೋದ ಬಳಿಕವೂ ಕೆಲವು ಅಗತ್ಯ ದಾಖಲೆಗಳನ್ನು ತಮ್ಮ ಖರ್ಚಿನಲ್ಲೇ ಮಾಡಿಸಿಕೊಳ್ಳಬೇಕಾಗುತ್ತದೆ. ವಿಶೇಷವಾಗಿ ಕೋಡ್ 95, ಟ್ಯಾಕೋಗ್ರಾಫ್ ಕಾರ್ಡ್ ಮತ್ತು ತಾತ್ಕಾಲಿಕ ನಿವಾಸದ ಅನುಮತಿ (TRC) ಪ್ರಮುಖವಾಗಿವೆ ಎಂದು ಭರತ್ ವಿವರಿಸಿದ್ದಾರೆ.

ಕೋಡ್ 95 ಅಡಿಯಲ್ಲಿ ಯುರೋಪ್‌ನ ರಸ್ತೆ ನಿಯಮಗಳು, ಚಾಲಕರಿಗೆ ಸಂಬಂಧಿಸಿದ ನಿಯಮಾವಳಿಗಳು, ಟ್ಯಾಕೋಗ್ರಾಫ್ ಬಳಕೆ ಹಾಗೂ ವಿವಿಧ ದೇಶಗಳ ಸಂಚಾರ ನಿಯಮಗಳ ಬಗ್ಗೆ ತಿಳಿದುಕೊಳ್ಳಬೇಕು. ಇದಕ್ಕೆ ಪರೀಕ್ಷೆಯನ್ನೂ ಎದುರಿಸಬೇಕಾಗುತ್ತದೆ.

ತಿಂಗಳಿಗೆ ₹3 ಲಕ್ಷ ಸಂಬಳ, ಊಟ-ವಸತಿಗೆ ಕಡಿಮೆ ಖರ್ಚು!

ಭರತ್ ಅವರಿಗೆ ಆರಂಭದಲ್ಲಿ ದಿನಕ್ಕೆ 87 ಯುರೋ ಸಂಬಳ ನೀಡಲಾಗುತ್ತಿದೆ. ಇದರಿಂದ ತಿಂಗಳಿಗೆ ಸುಮಾರು 2,500 ಯುರೋ ಆದಾಯ ಬರುತ್ತದೆ. ಭಾರತೀಯ ರೂಪಾಯಿ ಲೆಕ್ಕದಲ್ಲಿ ಇದು ಸುಮಾರು ₹3 ಲಕ್ಷದಷ್ಟಾಗುತ್ತದೆ. ಇಲ್ಲಿನ ಮತ್ತೊಂದು ವಿಶೇಷವೆಂದರೆ, ಅವರು ವಾಸಿಸಲು ಪ್ರತ್ಯೇಕ ಮನೆ ಬಾಡಿಗೆ ಪಡೆಯುವ ಅಗತ್ಯವಿಲ್ಲ. ಟ್ರಕ್‌ನಲ್ಲೇ ಮಲಗಲು ಬೆಡ್ ವ್ಯವಸ್ಥೆ ಇದೆ. ಊಟವನ್ನೂ ಅವರೇ ಅಡುಗೆ ಮಾಡಿಕೊಂಡು ತಿನ್ನುತ್ತಾರೆ. ಇದರಿಂದ ತಿಂಗಳಿಗೆ ಸುಮಾರು ₹30 ಸಾವಿರದಿಂದ ₹40 ಸಾವಿರದವರೆಗೆ ಖರ್ಚಾಗುತ್ತದೆ ಎಂದು ಭರತ್ ಹೇಳಿದ್ದಾರೆ.

ಯುರೋಪ್‌ನಲ್ಲಿ ಹೋಟೆಲ್‌ಗಳಲ್ಲಿ ಊಟ ಮಾಡುವುದು ದುಬಾರಿ. ಒಂದು ಸಾಮಾನ್ಯ ಬ್ರೆಡ್ ಖರೀದಿಸಲು ಕೂಡ ಸುಮಾರು ₹100 ಖರ್ಚಾಗಬಹುದು. ಹೀಗಾಗಿ ಭಾರತೀಯ ದಿನಸಿ ಅಂಗಡಿಗಳಿಂದ ಅಗತ್ಯ ಸಾಮಗ್ರಿಗಳನ್ನು ಖರೀದಿಸಿ, ಟ್ರಕ್‌ನಲ್ಲೇ ಅಡುಗೆ ಮಾಡಿಕೊಳ್ಳುತ್ತಾರೆ.

ಅರಮನೆಯಂತಿದೆ 40 ಅಡಿ ಉದ್ದದ ಲಾರಿ!

ಭರತ್ ಓಡಿಸುವ ಟ್ರಕ್‌ನ ಒಳಭಾಗ ನೋಡಿದರೆ ಅಚ್ಚರಿಯಾಗುತ್ತದೆ. ಸುಮಾರು 40 ಅಡಿ ಉದ್ದದ ಟ್ರೈಲರ್ ಹೊಂದಿರುವ ಈ ವಾಹನದಲ್ಲಿ ಆಧುನಿಕ ಸೌಲಭ್ಯಗಳಿವೆ. ಆಟೋಮ್ಯಾಟಿಕ್ ಗೇರ್, ಕ್ರೂಸ್ ಕಂಟ್ರೋಲ್, ಜಿಪಿಎಸ್, ಟೋಲ್ ಪಾವತಿಗೆ ವಿಶೇಷ ಸಾಧನ, ಆಟೋಮ್ಯಾಟಿಕ್ ಬ್ರೇಕಿಂಗ್ ವ್ಯವಸ್ಥೆ ಸೇರಿದಂತೆ ಹಲವು ತಂತ್ರಜ್ಞಾನಗಳಿವೆ. ಚಾಲಕನ ಆಸನಕ್ಕೂ ವಿಶೇಷ ವ್ಯವಸ್ಥೆ ಮಾಡಲಾಗಿದೆ. ಸೀಟನ್ನು ಬೇಕಾದಂತೆ ಮೇಲೆ, ಕೆಳಗೆ ಮತ್ತು ಹಿಂದಕ್ಕೆ ಸರಿಸಬಹುದು. ಏರ್ ಸಸ್ಪೆನ್ಷನ್ ವ್ಯವಸ್ಥೆಯಿಂದ ದೀರ್ಘಕಾಲ ಚಾಲನೆ ಮಾಡುವಾಗ ಬೆನ್ನು ನೋವಿನ ಸಮಸ್ಯೆ ಕಡಿಮೆಯಾಗಲು ಸಹಾಯವಾಗುತ್ತದೆ ಎಂದು ಭರತ್ ವಿವರಿಸಿದ್ದಾರೆ.

ಇನ್ನು ಟ್ರಕ್‌ನೊಳಗೆ ಎರಡು ಬೆಡ್‌ಗಳಿವೆ. ಒಬ್ಬರು ವಾಹನ ಚಲಾಯಿಸುವಾಗ ಮತ್ತೊಬ್ಬ ಚಾಲಕ ವಿಶ್ರಾಂತಿ ಪಡೆಯಬಹುದು. ಆಹಾರ ಪದಾರ್ಥಗಳನ್ನು ಇಡಲು ಫ್ರಿಡ್ಜ್, ಎಸಿ, ಚಳಿಗಾಲದಲ್ಲಿ ಬಳಸಲು ಹೀಟರ್ ಸೇರಿದಂತೆ ಹಲವು ಸೌಲಭ್ಯಗಳಿವೆ. ಕೆಲವು ಟ್ರಕ್‌ಗಳಲ್ಲಿ ವೈಫೈ ಮತ್ತು ಇತರ ಮನರಂಜನಾ ವ್ಯವಸ್ಥೆಗಳೂ ಇವೆ.

ದಿನಕ್ಕೆ ಗರಿಷ್ಠ 9 ಗಂಟೆ ಮಾತ್ರ ಡ್ರೈವಿಂಗ್!

ಭಾರತ ಮತ್ತು ಯುರೋಪ್‌ನ ಟ್ರಕ್ ಚಾಲಕರ ಕೆಲಸದ ಪರಿಸ್ಥಿತಿಯಲ್ಲಿ ಸಾಕಷ್ಟು ವ್ಯತ್ಯಾಸವಿದೆ ಎಂದು ಭರತ್ ಹೇಳಿದ್ದಾರೆ. ಯುರೋಪ್‌ನಲ್ಲಿ ಸಾಮಾನ್ಯವಾಗಿ ದಿನಕ್ಕೆ 8ರಿಂದ 9 ಗಂಟೆಗಳವರೆಗೆ ಮಾತ್ರ ವಾಹನ ಚಾಲನೆ ಮಾಡುತ್ತಾರೆ. ತುರ್ತು ಪರಿಸ್ಥಿತಿಯಲ್ಲಿ ಕೆಲವು ಸಂದರ್ಭಗಳಲ್ಲಿ ಹೆಚ್ಚುವರಿ ಒಂದು ಗಂಟೆ ಚಾಲನೆ ಮಾಡಬಹುದು. ಒಟ್ಟಾರೆ ಕೆಲಸದ ಅವಧಿ ಸುಮಾರು 12 ಗಂಟೆಗಳಿರಬಹುದು. ಆದರೆ ಲೋಡಿಂಗ್ ಮತ್ತು ಅನ್‌ಲೋಡಿಂಗ್ ಕೆಲಸಗಳನ್ನು ಸಾಮಾನ್ಯವಾಗಿ ಇತರ ಸಿಬ್ಬಂದಿ ನಿರ್ವಹಿಸುತ್ತಾರೆ. ಚಾಲಕರಿಗೆ ವಾರದಲ್ಲಿ ಐದು ದಿನ ಕೆಲಸವಿದ್ದು, ಶನಿವಾರ ಮತ್ತು ಭಾನುವಾರ ರಜೆ ಇರುತ್ತದೆ ಎಂದು ಅವರು ತಿಳಿಸಿದ್ದಾರೆ.

ಇವರ ಕೆಲಸ ಕೇವಲ ಒಂದು ದೇಶಕ್ಕೆ ಸೀಮಿತವಾಗಿಲ್ಲ. ಜರ್ಮನಿ, ಸ್ವೀಡನ್ ಸೇರಿದಂತೆ ವಿವಿಧ ಯುರೋಪಿಯನ್ ದೇಶಗಳಿಗೆ ಸರಕು ಸಾಗಣೆ ಮಾಡುತ್ತಾರೆ. ಕೆಲವೊಮ್ಮೆ 1,000ರಿಂದ 1,500 ಕಿಲೋಮೀಟರ್ ಪ್ರಯಾಣದ ನಡುವೆ ದೇಶಗಳ ಗಡಿಗಳನ್ನು ದಾಟಬೇಕಾಗುತ್ತದೆ.

ಕುಟುಂಬವನ್ನು ಬಿಟ್ಟು ವಿದೇಶಕ್ಕೆ ಬಂದ ನೋವು!

ತಿಂಗಳಿಗೆ ಲಕ್ಷಾಂತರ ರೂಪಾಯಿ ಸಂಪಾದಿಸುತ್ತಿದ್ದರೂ ಭರತ್ ಅವರ ಜೀವನದಲ್ಲಿ ನೋವಿನ ಸಂಗತಿಯೂ ಇದೆ. ಅನಾರೋಗ್ಯದಿಂದ ಬಳಲುತ್ತಿರುವ ತಂದೆ-ತಾಯಿಯನ್ನು ಹುಬ್ಬಳ್ಳಿಯಲ್ಲೇ ಬಿಟ್ಟು ಅವರು ವಿದೇಶಕ್ಕೆ ಬಂದಿದ್ದಾರೆ.

ಕುಟುಂಬದ ಆರ್ಥಿಕ ಪರಿಸ್ಥಿತಿಯನ್ನು ಸುಧಾರಿಸಬೇಕು, ತಂದೆ-ತಾಯಿಗೆ ಉತ್ತಮ ಜೀವನ ಕಲ್ಪಿಸಬೇಕು ಎಂಬ ಉದ್ದೇಶದಿಂದ ಈ ನಿರ್ಧಾರ ತೆಗೆದುಕೊಂಡಿದ್ದಾರೆ. ಕನಿಷ್ಠ 10 ವರ್ಷಗಳಾದರೂ ಯುರೋಪ್‌ನಲ್ಲಿ ದುಡಿದು ಜೀವನದಲ್ಲಿ ನೆಲೆ ಕಂಡುಕೊಳ್ಳಬೇಕು ಎಂಬ ಆಸೆ ಅವರದು.

ತಂದೆ-ತಾಯಿಯನ್ನು ನೋಡಿಕೊಳ್ಳಲು ವರ್ಷಕ್ಕೊಮ್ಮೆ ಅಥವಾ ಸಾಧ್ಯವಾದರೆ ಆರು ತಿಂಗಳಿಗೊಮ್ಮೆ ಭಾರತಕ್ಕೆ ಬಂದು ಹೋಗುವ ಯೋಜನೆಯನ್ನೂ ಹೊಂದಿದ್ದಾರೆ.

ಒಟ್ಟಿನಲ್ಲಿ, ಬಿಎ ಜರ್ನಲಿಸಂ ಪದವಿ ಪಡೆದಿದ್ದರೂ ಪರಿಸ್ಥಿತಿಯ ಕಾರಣಕ್ಕೆ ವಿವಿಧ ಕೆಲಸಗಳನ್ನು ಮಾಡಿದ್ದ ಹುಬ್ಬಳ್ಳಿಯ ಭರತ್, ಇಂದು ಯುರೋಪ್‌ನಲ್ಲಿ ಟ್ರಕ್ ಚಾಲಕರಾಗಿ ಹೊಸ ಬದುಕು ಕಟ್ಟಿಕೊಳ್ಳುತ್ತಿದ್ದಾರೆ. ಅವರ ಈ ಪಯಣ ಕೇವಲ ₹3 ಲಕ್ಷ ಸಂಬಳದ ಕಥೆಯಲ್ಲ; ಕುಟುಂಬದ ಜವಾಬ್ದಾರಿ, ಪರಿಶ್ರಮ ಮತ್ತು ಬದುಕಿನಲ್ಲಿ ಏನಾದರೂ ಸಾಧಿಸಬೇಕೆಂಬ ಹಠದ ಕಥೆಯೂ ಹೌದು.

ಪಾಠವಷ್ಟೇ ಅಲ್ಲ, ಕನಸುಗಳಿಗೂ ಜೀವ ನೀಡಿದ ಗುರು: ಸರ್ಕಾರಿ ಶಾಲಾ ಮಕ್ಕಳ ವಿಮಾನ ಪ್ರವಾಸ

Kannadaprabha News — Sat, 07 Nov 2026 09:28:49 +0530

ಶಶಿಕಾಂತ ಮೆಂಡೆಗಾರ -ಕನ್ನಡಪ್ರಭ ವಾರ್ತೆ

ವಿಜಯಪುರ: ಗುರುಬ್ರಹ್ಮ ಗುರುವಿಷ್ಣುಃ ಗುರುರ್ದೇವೋ ಮಹೇಶ್ವರಃ! ಗುರುಸಾಕ್ಷಾತ್ ಪರಬ್ರಹ್ಮ ತಸ್ಮೈಶ್ರೂ ಗುರುವೇ ನಮಃ ಎಂದು ನಾವೆಲ್ಲ ಪಾಠ ಹೇಳುವ ಶಿಕ್ಷಕರನ್ನು ಗೌರವಿಸುತ್ತೇವೆ. ಅಳೆದು ತೂಗಿ ನೋಡಿದರೂ ಈ ಪದಗಳಿಗೆ ಒಂದು ಕೈ ಮೇಲೆ ಎಂಬಂತೆ ಇಲ್ಲಿನ ಮುಖ್ಯ ಶಿಕ್ಷಕರೊಬ್ಬರು ತಮ್ಮ 3 ತಿಂಗಳ ಸಂಬಳದ ಹಣದಲ್ಲೇ ಸರ್ಕಾರಿ ಶಾಲೆಯ 20 ಮಕ್ಕಳಿಗೆ ವಿಮಾನದಲ್ಲಿ ಶೈಕ್ಷಣಿಕ ಪ್ರವಾಸ ಮಾಡಿಸುತ್ತಿದ್ದಾರೆ.

ಮಕ್ಕಳಿಗೆ ವಿಮಾನ ಭಾಗ್ಯ ಕಲ್ಪಿಸಿದ ಶಿಕ್ಷಕ

ಕಳೆದ 30 ವರ್ಷಗಳಿಂದ ಸರ್ಕಾರಿ ಶಾಲೆಯ ಶಿಕ್ಷಕರಾಗಿ ಪಾಠ ಮಾಡುತ್ತಿರುವ ವಿಠ್ಠಲ ಭೈರಗೊಂಡ ರವರು ಪ್ರಸ್ತುತವಾಗಿ ಚಡಚಣ ತಾಲೂಕಿನ ಹಳೆ ದೂಳಖೇಡ ಶಾಲೆಯ ಮುಖ್ಯ ಶಿಕ್ಷಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ತಮ್ಮ ಶಾಲೆಯ 6 ಹಾಗೂ 7ನೇ ತರಗತಿಯ 12ಹೆಣ್ಣು ಹಾಗೂ 8 ಗಂಡು ಸೇರಿ ಒಟ್ಟು 20 ಬಡ ಮಕ್ಕಳಿಗೆ ಉಚಿತವಾಗಿ ನವ್ಹೆಂಬರ್‌ 13ರಿಂದ 18ರ ವರೆಗೆ ಶಾಲಾ ಶೈಕ್ಷಣಿಕ ಪ್ರವಾಸ ಮಾಡಿಸುತ್ತಿದ್ದಾರೆ. ಸೋಲಾಪುರದಿಂದ ಪುನಾ ವರೆಗೆ ರೈಲಿನಲ್ಲಿ ಹಾಗೂ ಇಂದೋರ್‌ನಿಂದ ದೆಹಲಿಗೆ ವಿಮಾನದಲ್ಲಿ ಪ್ರವಾಸ ಕೈಗೊಂಡಿದ್ದಾರೆ. ಅದಕ್ಕಾಗಿಯೇ ಸೆಪ್ಟೆಂಬರ್‌ ತಿಂಗಳಿನಲ್ಲಿಯೇ ಇಂಡಿಗೋ ಏರಲೈನ್ಸ್ ನಲ್ಲಿ ಟಿಕೆಟ್ ಬುಕ್ ಮಾಡಿಸಿದ್ದು, ಟಿಕೆಟ್‌ಗಾಗಿಯೇ 2ಲಕ್ಷ ರೂಪಾಯಿ ಖರ್ಚಾಗಿದ್ದು, ಪ್ರವಾಸ ಮುಗಿಯುವುದರಲ್ಲಿ ಇನ್ನೂ 2 ಲಕ್ಷ ರೂ ಖರ್ಚಾಗಬಹುದು ಎನ್ನುತ್ತಾರೆ ಶಿಕ್ಷಕ.

ಯಾರು ಈ ಮಾದರಿ ಶಿಕ್ಷಕ?

ಜಿಲ್ಲೆಯ ಚಡಚಣ ತಾಲೂಕಿನ ಹಳೆ ದೂಳಖೇಡ ಗ್ರಾಮದ ಸರ್ಕಾರಿ ಕನ್ನಡ ಹಿರಿಯ ಪ್ರಾಥಮಿಕ ಶಾಲೆಯ ಮುಖ್ಯೋಪಾಧ್ಯಾಯ ವಿಠ್ಠಲ ಭೈರಗೊಂಡ ರವರು ಸುಮಾರು ₹2-3 ಲಕ್ಷ ಖರ್ಚು ಮಾಡಿ ತಮ್ಮ ಸರ್ಕಾರಿ ಶಾಲೆಯ ಮಕ್ಕಳಿಗೆ ವಿಮಾನದಲ್ಲಿ ದೆಹಲಿಗೆ ಶೈಕ್ಷಣಿಕ ಪ್ರವಾಸಕ್ಕೆ ಕರೆದುಕೊಂಡು ಹೋಗುತ್ತಿದ್ದಾರೆ. ಇಬ್ಬರು ಸಹಶಿಕ್ಷಕರೊಂದಿಗೆ ಪ್ರವಾಸಕ್ಕೆ ತೆರಳುತ್ತಿರುವ ವಿಠ್ಠಲ ಭೈರಗೊಂಡ, ಸರ್ಕಾರಿ ಶಾಲಾ ಮಕ್ಕಳಿಗೆ ವಿಮಾನಯಾನ ಭಾಗ್ಯ ಕಲ್ಪಿಸಿದ್ದಾರೆ.

ಯಾವಾಗ ಪ್ರವಾಸ ಆರಂಭ?

ನ.13ರಂದು ಸೋಲಾಪೂರ ಪುಣೆ ಮಾರ್ಗವಾಗಿ ದೆಹಲಿಗೆ ತೆರಳುವ ಪ್ರವಾಸ ತಂಡ ಸುಮಾರು 4 ದಿನಗಳ ವರೆಗೆ ಶೈಕ್ಷಣಿಕ ಪ್ರವಾಸದಲ್ಲಿರುತ್ತಾರೆ. ಸರ್ಕಾರಿ ಶಾಲಾ ಮಕ್ಕಳಿಗೆ ವಿಮಾನ ಪ್ರಯಾಣದ ಮೂಲಕ ಶೈಕ್ಷಣಿಕ ಪ್ರವಾಸ ಮಾಡಿಸುತ್ತಿರುವ ಮಾದರಿ ಶಿಕ್ಷಕ ವಿಠ್ಠಲ ಭೈರಗೊಂಡ ಅವರ ಕಾರ್ಯ ಶ್ಲಾಘನೀಯವಾಗಿದೆ ಎಂದು ಶಾಲಾ ಸುಧಾರಣಾ ಸಮಿತಿ ಅಧ್ಯಕ್ಷರು, ಪದಾಧಿಕಾರಿಗಳು ಪಾಲಕರು, ಸಾರ್ವಜನಿಕರು ಹರ್ಷ ವ್ಯಕ್ತ ಪಡಿಸಿದ್ದಾರೆ.

ಎಲ್ಲೆಲ್ಲಿ ಟೂರ್‌?

ನ.13ರಿಂದ ಪ್ರಾರಂಭವಾಗುವ ಶೈಕ್ಷಣಿಕ ಪ್ರವಾಸವೂ ದೆಹಲಿಯ ಪ್ರೇಕ್ಷಣೀಯ ಸ್ಥಳಗಳಾದ ಕುತೂಬಮಿನಾರ್‌, ರಾಜಘಾಟ, ಕೆಂಪುಕೋಟೆ, ಇಂದಿರಾ ಪ್ಯಾಲೇಸ್, ಇಂಡಿಯಾ ಗೇಟ್ ಸೇರಿದಂತೆ ಇತರೆ ಪ್ರೇಕ್ಷಣೀಯ ಸ್ಥಳಗಳಿಗೆ ಭೇಟಿ ನೀಡಿ ಮಕ್ಕಳ ಕಲಿಕೆ ಇಮ್ಮಡಿಗೊಳಿಸಲಿದ್ದಾರೆ. ನಂತರ ದೆಹಲಿ ಸುತ್ತಮುತ್ತಲಿನ ಆಗ್ರಾದ ತಾಜಮಹಲ್, ಯಮುನಾ ನದಿ, ಪತೇಪೂರ ಸಿಕ್ರಿ, ಮಥೂರಾ ಬೃಂದಾವನ ಸೇರಿದಂತೆ ಪ್ರಸಿದ್ಧ ಪ್ರವಾಸಿ ತಾಣಗಳಿಗೆ ಭೇಟಿ ನೀಡಲಿದ್ದಾರೆ.

ಎಲ್ಲರಂತೆ ನಮ್ಮ ಮಕ್ಕಳಿಗೂ ವಿಮಾನದಲ್ಲಿ ಕುಳಿತುಕೊಳ್ಳುವ ಆಸೆಯಿರುತ್ತದೆ. ಹಾಗಾಗಿ ಸರ್ಕಾರಿ ಶಾಲಾ ಮಕ್ಕಳಿಗೆ ವಿಮಾನದಲ್ಲಿ ಶೈಕ್ಷಣಿಕ ಪ್ರವಾಸ ಮಾಡಬೇಕೆಂಬ ಸದುದ್ದೇಶದಿಂದ ಈ ಕಾರ್ಯ ಕೈಕೊಂಡಿರುವೆ. ಇದಕ್ಕೆ ಸಹಶಿಕ್ಷಕರು, ಅಧಿಕಾರಿಗಳು, ಪಾಲಕರ ಅನುಮತಿ ಪಡೆಯಲಾಗಿದೆ.

-ವಿಠ್ಠಲ ಭೈರಗೊಂಡ, ಮುಖ್ಯಗುರುಗಳು, ಸರ್ಕಾರಿ ಪ್ರಾಥಮಿಕ ಶಾಲೆ ಧೂಳಖೇಡ.

ಶಾಲಾ ಶಿಕ್ಷಕರು, ಪಾಲಕರು ಹಾಗೂ ಎಸ್‌ಡಿಎಂಸಿಯವರು ಬಿಇಓ ಕಚೇರಿಗೆ ಮನವಿ ಮಾಡಿಕೊಂಡ ಹಿನ್ನೆಲೆ ವಿಮಾನ ಪ್ರವಾಸಕ್ಕೆ ಅನುಮತಿಸಲಾಗಿದೆ. ಚಡಚಣ ತಾಲೂಕಿನ ಹಳೆ ದೂಳಖೇಡ ಶಾಲೆಯ ಮುಖ್ಯಗುರು ವಿಠ್ಠಲ ಭೈರಗೊಂಡ ತಮ್ಮ ಸ್ವಂತ ಖರ್ಚಿನಲ್ಲಿ ಸರ್ಕಾರಿ ಶಾಲಾ ಮಕ್ಕಳನ್ನು ವಿಮಾನದ ಮೂಲಕ ಶೈಕ್ಷಣಿಕ ಪ್ರವಾಸ ಮಾಡಿಸುತ್ತಿರುವುದು ಶ್ಲಾಘನೀಯಗಿದೆ. ಜಿಲ್ಲೆಯ ಶಿಕ್ಷಕರು ಇವರ ಕಾರ್ಯವನ್ನು ಮೆಚ್ಚಿಕೊಂಡಿದ್ದು, ಇಂತಹ ಕಾರ್ಯ ಸಮಾಜದಲ್ಲಿ ಹೆಚ್ಚಾಗಬೇಕು. ಸರ್ಕಾರಿ ಶಾಲೆಗಳ ಸಬಲೀಕರಣಕ್ಕೆ ಎಲ್ಲರೂ ಕೈಜೋಡಿಸಬೇಕು.

-ಎಚ್.ನಾಗೇಂದ್ರಪ್ಪ, ಕ್ಷೇತ್ರ ಶಿಕ್ಷಣಾಧಿಕಾರಿಗಳು, ಚಡಚಣ.

3 ಲಕ್ಷ ಬಹುಮಾನವುಳ್ಳ 'ರೈತಪೀಠ' ಪ್ರಶಸ್ತಿಗೆ ಅರ್ಜಿ ಆಹ್ವಾನ; ಕೊನೆ ದಿನಾಂಕ ಯಾವಾಗ?

Kannadaprabha News — Sat, 07 Nov 2026 08:40:35 +0530

ದಕ್ಷಿಣ ಕನ್ನಡ: ಕೃಷಿ ವಲಯದ ಶ್ರಮಜೀವಿ ರೈತರನ್ನು ಗುರುತಿಸಿ ಸಮಾಜದಲ್ಲಿ ಅವರಿಗೆ ಸೂಕ್ತ ಗೌರವ ಹಾಗೂ ಮನ್ನಣೆ ಕಲ್ಪಿಸುವ ಮಹತ್ವಾಕಾಂಕ್ಷೆಯೊಂದಿಗೆ ಎಸ್‌ಕೆಎಫ್ ಎಲಿಕ್ಸಿರ್ ಸಂಸ್ಥೆಯ ಮುಖ್ಯಸ್ಥ ಹಾಗೂ ಖ್ಯಾತ ಕೃಷಿ ಉದ್ಯಮಿ ಡಾ. ಜಿ. ರಾಮಕೃಷ್ಣ ಆಚಾರ್ ಸ್ಥಾಪಿಸಿರುವ ರೈತಪೀಠ 2027 ಪ್ರಶಸ್ತಿಗೆ ಅರ್ಹ ಹಾಗೂ ಸಾಧಕ ರೈತರಿಂದ ಅರ್ಜಿಗಳನ್ನು ಆಹ್ವಾನಿಸಲಾಗಿದೆ. ಈ ಸಂದರ್ಭ ರೈತಪೀಠ ಪ್ರಶಸ್ತಿಯ ಅಧಿಕೃತ ಲೋಗೋ ಅನಾವರಣ ಮಾಡಲಾಯಿತು.

ಕಾರ್ಯಕ್ರಮದ ಉದ್ದೇಶ ಏನು?

ಪ್ರಶಸ್ತಿಯ ಆಶಯದ ಕುರಿತು ಮಾತನಾಡಿದ ಸಂಸ್ಥಾಪಕ ಡಾ. ಜಿ. ರಾಮಕೃಷ್ಣ ಆಚಾರ್, ಕೃಷಿ ಕ್ಷೇತ್ರದಲ್ಲೂ ಕಾರ್ಪೊರೇಟ್ ಮಟ್ಟದ ಸಾಧನೆ ಸಾಧ್ಯವಿದೆ. ಸಣ್ಣ ಹಿಡುವಳಿಯಲ್ಲೂ ಮೀನುಗಾರಿಕೆ, ನಾಟಿ ಕೋಳಿ ಸಾಕಣೆ, ಜೇನು ಕೃಷಿ ಅಥವಾ ನೂತನ ಯಂತ್ರೋಪಕರಣ-ತಂತ್ರಜ್ಞಾನವನ್ನು ಬಳಸಿ ಲಕ್ಷಾಂತರ ರೂಪಾಯಿ ದುಡಿಯುವ ಮಾದರಿ ಕೃಷಿಕರಿದ್ದಾರೆ. ಅಂತಹ ರೈತರನ್ನು ಮುಂಚೂಣಿಗೆ ತಂದು ಗೌರವಿಸುವುದು ನಮ್ಮ ಉದ್ದೇಶ ಎಂದರು.

ಮೂವರು ಪ್ರಗತಿಪರ ಕೃಷಿಕರಿಗೆ ತಲಾ 1 ಲಕ್ಷ ರೂಪಾಯಿ ಬಹುಮಾನ

ವಿವಿಧ ರಾಜ್ಯದ ರೈತರು: ಒಟ್ಟು ₹ 3 ಲಕ್ಷ ಮೊತ್ತದ ಈ ಪ್ರಶಸ್ತಿಗೆ ದಕ್ಷಿಣ ಭಾರತದ ಆರು ರಾಜ್ಯಗಳಾದ ಕರ್ನಾಟಕ, ಮಹಾರಾಷ್ಟ್ರ, ಕೇರಳ, ಆಂಧ್ರಪ್ರದೇಶ, ತೆಲಂಗಾಣ ಹಾಗೂ ತಮಿಳುನಾಡಿನ ಮೂವರು ಪ್ರಗತಿಪರ ಕೃಷಿಕರನ್ನು ಆಯ್ಕೆ ಮಾಡಿ, ತಲಾ ಒಂದು ಲಕ್ಷ ರು. ನಗದು ಪುರಸ್ಕಾರ ನೀಡಿ ಗೌರವಿಸಲಾಗುವುದು. ಸಣ್ಣ ಮತ್ತು ಮಧ್ಯಮ ಜಮೀನಿನಲ್ಲಿ ಸುಸ್ಥಿರ, ಸಾವಯವ, ಗೋ-ಆಧಾರಿತ ಹಾಗೂ ತಂತ್ರಜ್ಞಾನಾಧಾರಿತ ಮಾದರಿ ಕೃಷಿ ಮಾಡುವ ರೈತರಿಗೆ ಮೊದಲ ಆದ್ಯತೆ ನೀಡಲಾಗುತ್ತದೆ. ಅರ್ಜಿ ಸಲ್ಲಿಕೆಗೆ ಕೊನೆಯ ದಿನಾಂಕ 15 ಡಿಸೆಂಬರ್ 2026.

ಅರ್ಜಿ ಸಲ್ಲಿಕೆ ಹೇಗೆ?

https://gaudhama.comನಲ್ಲಿ ಅರ್ಜಿ ನಮೂನೆ ಲಭ್ಯವಿದ್ದು, ಅರ್ಹ ರೈತರು ತಾವೇ ಆ ಅರ್ಜಿ ತುಂಬಿಸಿ ಕಳುಹಿಸಬಹುದು. ಅಥವಾ ಇತರರು ಅರ್ಹ ರೈತರನ್ನು ಗುರುತಿಸಿ ನಾಮ ನಿರ್ದೇಶನ ಮಾಡಬಹುದು. ಹೆಚ್ಚಿನ ಮಾಹಿತಿ 9164561789 ಅಥವಾ 9606429200 ಸಂಖ್ಯೆಯನ್ನು ಸಂಪರ್ಕಿಸಬಹುದು.

ಇದನ್ನೂ ಓದಿ: Bantwal: ಸೈಕಲ್ ಏರಿ ಹಳ್ಳಿಹಳ್ಳಿಗೆ ಸಂಚರಿಸುವ ಜನಪರ ವೈದ್ಯ 68ರ ಅಬ್ಬು ಪಂಡಿತರು!

ಲೋಗೋ ಅನಾವರಣ ಕಾರ್ಯಕ್ರಮದಲ್ಲಿ ಕೃಷಿ ತಜ್ಞ, ಸಾಹಿತಿ ಡಾ. ನರೇಂದ್ರ ರೈ ದೇರ್ಲ, ಶಿಕ್ಷಣ ತಜ್ಞ ಮತ್ತು ಉದ್ಯಮಿ ದೇವಿಪ್ರಸಾದ್ ಶೆಟ್ಟಿ, ಎಸ್‌ಕೆಎಫ್ ಎಲಿಕ್ಸಿರ್ ಇಂಡಿಯಾ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಪ್ರಜ್ವಲ್ ಆಚಾರ್, ಸಂಸ್ಥೆಯ ಸೇಲ್ಸ್ ಮತ್ತು ಮಾರ್ಕೆಟಿಂಗ್ ವಿಭಾಗದ ಹಿರಿಯ ನಿರ್ದೇಶಕ ದೇವ್‌ರಾಜ್ ಎಸ್. ಉಪಸ್ಥಿತರಿದ್ದರು.

ಇದನ್ನೂ ಓದಿ: ಕರುಳಿನ ಬಳ್ಳಿಯಂತೆ ಹಾಲಿನ ಧಾರೆ: ನಿತ್ಯ 19.760 ಲೀಟರ್‌ ಹಾಲು ನೀಡುವ ಕರುಣಾಮಯಿ ರಾಧೆ, ಯಾವ ತಳಿಯ ಹಸು?

Bantwal: ಸೈಕಲ್ ಏರಿ ಹಳ್ಳಿಹಳ್ಳಿಗೆ ಸಂಚರಿಸುವ ಜನಪರ ವೈದ್ಯ 68ರ ಅಬ್ಬು ಪಂಡಿತರು!

Kannadaprabha News — Sat, 07 Nov 2026 08:26:35 +0530

ಮೌನೇಶ ವಿಶ್ವಕರ್ಮ

ಬಂಟ್ವಾಳ: ಆಸ್ಪತ್ರೆಗಳ ಸಂಖ್ಯೆ ಹೆಚ್ಚಾಗುತ್ತಿರುವ ಕಾಲದಲ್ಲೂ, ಹಳ್ಳಿಯ ದಾರಿಗಳಲ್ಲಿ ಸೈಕಲ್ ತುಳಿಯುತ್ತಾ ಸಾಗಿ ಗಿಡಮೂಲಿಕೆಗಳ ಔಷಧದೊಂದಿಗೆ ಜನರ ಆರೋಗ್ಯ ವಿಚಾರಿಸುತ್ತಾ, ಅಗತ್ಯದವರಿಗೆ ಔಷಧಿ ನೀಡುವ ವ್ಯಕ್ತಿಯೊಬ್ಬರಿದ್ದಾರೆ. ಅವರೇ ಬಂಟ್ವಾಳ ತಾಲೂಕಿನ ನಾವೂರು ಗ್ರಾಮದ ಪೂಪಾಡಿಕಟ್ಟೆಯ ಅಬುಬಕ್ಕರ್ (ಅಬ್ಬು) ಪಂಡಿತರು. ಅಜ್ಜ ಮತ್ತು ತಂದೆಯಿಂದ ಕಲಿತ ಪಾರಂಪರಿಕ ಚಿಕಿತ್ಸಾ ಪದ್ಧತಿಯನ್ನು ಕಳೆದ 50 ವರ್ಷಗಳಿಂದ ಮುಂದುವರಿಸಿಕೊಂಡು ಬಂದಿರುವ ಇವರು, ತಮ್ಮ ಸರಳ ಬದುಕು ಮತ್ತು ನಿರಂತರ ಸೇವೆಯಿಂದ ವಿಶಿಷ್ಟವಾಗಿ ಗುರುತಿಸಿಕೊಂಡಿದ್ದಾರೆ.

ಗಮನ ಸೆಳೆಯುವ ಅಬ್ಬು ಪಂಡಿತರ ಜೀವನಶೈಲಿ

ಹೌದು... ಇವರ ಬದುಕಿನಲ್ಲಿ ಆಡಂಬರವಿಲ್ಲ, ದೊಡ್ಡ ಆಸೆ-ಆಕಾಂಕ್ಷೆಗಳ ಬೆನ್ನಟ್ಟುವ ಹಂಬಲವಿಲ್ಲ. ತಮಗೆ ತಿಳಿದಿರುವ ವಿದ್ಯೆಯನ್ನು ಸಾಧ್ಯವಾದಷ್ಟು ಜನರಿಗೆ ತಲುಪಿಸಬೇಕು ಎಂಬ ಸರಳ ಆಶಯವಷ್ಟೇ ಇದೆ. ಐಷಾರಾಮಿ ಬದುಕಿನ ಹಿಂದೆ ಓಡುವ ಈ ಕಾಲದಲ್ಲಿ, ಅಲ್ಪ ಸೌಲಭ್ಯಗಳ ನಡುವೆಯೂ ತೃಪ್ತಿಯಿಂದ ಬದುಕುತ್ತಾ ಜನರೊಂದಿಗೆ ಬೆರೆತು ಸೇವೆ ಸಲ್ಲಿಸುವ ಅಬ್ಬು ಪಂಡಿತರ ಜೀವನಶೈಲಿ ಗಮನ ಸೆಳೆಯುತ್ತದೆ. ಅವರ ಸುದೀರ್ಘ ಸೇವೆಯ ಹಿಂದೆ ಅಡಗಿರುವ ಪರಿಶ್ರಮ, ತಾಳ್ಮೆ ಮತ್ತು ಜನರೊಂದಿಗಿನ ಆತ್ಮೀಯ ಸಂಬಂಧವೇ ಅವರ ಬದುಕಿನ ವಿಶೇಷತೆ.

ಚಿಕಿತ್ಸಾ ಪದ್ಧತಿ

68 ವರ್ಷ ವಯಸ್ಸಿನ ಅಬ್ಬು ಪಂಡಿತರು ತಮ್ಮ 18ನೇ ವಯಸ್ಸಿನಲ್ಲಿಯೇ ತಂದೆಯ ಜೊತೆ ಸೇರಿ ಔಷಧಿ ನೀಡಲು ಆರಂಭಿಸಿದವರು. ಅಬ್ಬು ಪಂಡಿತರ ಬದುಕಿನ ವಿಶೇಷತೆ ಅವರು ನೀಡುವ ಚಿಕಿತ್ಸೆಯಲ್ಲಿ ಮಾತ್ರವಿಲ್ಲ; ಅದನ್ನು ಜನರಿಗೆ ತಲುಪಿಸುವ ರೀತಿಯಲ್ಲಿಯೂ ಇದೆ. ಔಷಧಕ್ಕಾಗಿ ತಮ್ಮ ಬಳಿ ಬರುವವರಿಂದ ದೊಡ್ಡ ಮೊತ್ತದ ಹಣವನ್ನು ನಿರೀಕ್ಷಿಸುವುದಿಲ್ಲ. 10 ಅಥವಾ 20 ರೂಪಾಯಿಗಳನ್ನು ನೀಡಿದರೂ ಸ್ವೀಕರಿಸುತ್ತಾರೆ. ಯಾರಾದರೂ ಮನೆಗೆ ಕರೆದರೆ ಅಲ್ಲಿಗೇ ತೆರಳಿ ಔಷಧ ನೀಡುತ್ತಾರೆ. ಕೆಲವೊಮ್ಮೆ ಸೈಕಲ್‌ನಲ್ಲಿ ಸಂಚರಿಸುವಾಗ ಪರಿಚಯದವರು ಎದುರಾದರೂ ಸೈಕಲ್ ನಿಲ್ಲಿಸಿ ಅವರ ಆರೋಗ್ಯ ವಿಚಾರಿಸಿ, ಅಗತ್ಯಕ್ಕೆ ತಕ್ಕಂತೆ ಔಷಧ ನೀಡುತ್ತಾರೆ. ಗಿಡಮೂಲಿಕೆಗಳನ್ನು ತಾವೇ ಸಂಗ್ರಹಿಸಿ, ಮನೆಯಲ್ಲಿಯೇ ಅರೆದು ಔಷಧ ಸಿದ್ಧಪಡಿಸುವುದು ಇವರ ಚಿಕಿತ್ಸಾ ಪದ್ಧತಿಯ ಮತ್ತೊಂದು ವಿಶೇಷತೆ.

ಸಂಸ್ಕೃತ ಪಠಣ ಮತ್ತು ಬಸವಣ್ಣನ ವಚನ

ಬೆಳಗಿನ ಜಾವ 4 ಗಂಟೆಗೆ ಆರಂಭವಾಗುವ ಇವರ ದಿನಚರಿ ಸಂಜೆ 5 ಗಂಟೆಯವರೆಗೂ ಸಾಗುತ್ತದೆ. ಸೈಕಲ್ ಸವಾರಿಯೇ ಇವರ ನಿತ್ಯದ ಸಂಚಾರದ ಸಾಧನ ಹಾಗೂ ವ್ಯಾಯಾಮದ ಮಾರ್ಗ. ನಾವೂರು ಗ್ರಾಮದ ಪೂಪಾಡಿಕಟ್ಟೆಯ ಪುಟ್ಟ ಮನೆಯಲ್ಲಿ ವಾಸಿಸುವ ಅಬ್ಬು ಪಂಡಿತರು ಸುತ್ತಮುತ್ತಲಿನ ಜನರೊಂದಿಗೆ ಆತ್ಮೀಯ ಒಡನಾಟ ಹೊಂದಿದ್ದಾರೆ. ಸಂಸ್ಕೃತ ಪಠಣ ಮತ್ತು ಬಸವಣ್ಣನ ವಚನಗಳ ಬಗ್ಗೆಯೂ ಆಸಕ್ತಿ ಹೊಂದಿರುವ ಇವರು, ಸರಳತೆ ಮತ್ತು ವಿನಯವನ್ನು ಬದುಕಿನ ಭಾಗವಾಗಿಸಿಕೊಂಡಿದ್ದಾರೆ.

Vijayapura: ವಿಶಿಷ್ಟ ರುಚಿಯುಳ್ಳ ಮಾಲ್ದಂಡಿಯ ಬಿಳಿ ಜೋಳಕ್ಕೆ ಬೇಕಿದೆ GI ಟ್ಯಾಗ್!

Kannadaprabha News — Sat, 07 Nov 2026 07:46:16 +0530

ಮಲ್ಲಿಕಾರ್ಜುನ ಪಟ್ಟಣಶೆಟ್ಟಿ

ವಿಜಯಪುರ: ದೇವರಹಿಪ್ಪರಗಿ ಉತ್ತರ ಕರ್ನಾಟಕದ ಆಹಾರ ಸಂಸ್ಕೃತಿಯಲ್ಲಿ ಜೋಳದ ರೊಟ್ಟಿಗೆ ತನ್ನದೇ ಆದ ವಿಶಿಷ್ಟ ಸ್ಥಾನವಿದೆ. ಅದರಲ್ಲೂ ವಿಜಯಪುರ ಜಿಲ್ಲೆಯ ಡೋಣಿ ನದಿ ತೀರದ ಪ್ರದೇಶದಲ್ಲಿ ಬೆಳೆಯುವ ಮಾಲ್ದಂಡಿ ಬಿಳಿ ಜೋಳ ತನ್ನ ಗುಣಮಟ್ಟ, ರುಚಿ ಹಾಗೂ ಪೌಷ್ಟಿಕ ಗುಣಗಳಿಂದ ವಿಶೇಷ ಹೆಗ್ಗಳಿಕೆ ಪಡೆದಿದೆ. ಇಂತಹ ವಿಶಿಷ್ಟ ಜೋಳಕ್ಕೆ ರಾಜ್ಯ ಹಾಗೂ ರಾಷ್ಟ್ರಮಟ್ಟದಲ್ಲಿ ಪ್ರತ್ಯೇಕ ಗುರುತಿನೊಂದಿಗೆ ಭೌಗೋಳಿಕ ಸ್ಥಾನಮಾನ (ಜಿಐ-ಜಿಯೋಗ್ರಾಫಿಕಲ್‌ ಇಂಡಿಕೇಷನ್‌) ಕಲ್ಪಿಸಬೇಕು ಎಂಬ ಬೇಡಿಕೆ ಮತ್ತೆ ಮುನ್ನೆಲೆಗೆ ಬಂದಿದೆ.

ಡೋಣಿ ನದಿ ತೀರದ ಮಣ್ಣಿನ ಗುಣಲಕ್ಷಣ, ಹವಾಮಾನ ಹಾಗೂ ಕೃಷಿ ಪದ್ಧತಿ ಕಾರಣದಿಂದ ಈ ಭಾಗದಲ್ಲಿ ಬೆಳೆಯುವ ಮಾಲ್ದಂಡಿ ಬಿಳಿ ಜೋಳಕ್ಕೆ ವಿಶಿಷ್ಟ ಗುಣಮಟ್ಟವಿದೆ. ಈ ಜೋಳದಿಂದ ತಯಾರಿಸುವ ರೊಟ್ಟಿ ಉತ್ತರ ಕರ್ನಾಟಕದ ಜನರ ಪ್ರಮುಖ ಆಹಾರವಾಗಿದ್ದು, ಸ್ಥಳೀಯ ಆಹಾರ ಸಂಸ್ಕೃತಿಯ ಅವಿಭಾಜ್ಯ ಅಂಗವಾಗಿದೆ. ಹೀಗಾಗಿ ಇಂಡಿ ಲಿಂಬೆ, ಬ್ಯಾಡಗಿ ಮೆಣಸಿನಕಾಯಿಯ ಮಾದರಿಯಲ್ಲಿ ಡೋಣಿ ತೀರದ ಮಾಲ್ದಂಡಿ ಜೋಳಕ್ಕೂ ಭೌಗೋಳಿಕ ಸ್ಥಾನ ದೊರೆಯಬೇಕೆಂಬುದು ರೈತರ ಹಾಗೂ ಈ ಭಾಗದ ಜನರ ಆಶಯ.

57 ಗ್ರಾಮಗಳ ಮಣ್ಣಿನ ಪರೀಕ್ಷೆ

ಡೋಣಿ ನದಿ ತೀರದ ಜೋಳದ ಭೌಗೋಳಿಕ ಸ್ಥಾನಮಾನ ನೀಡುವ ನಿಟ್ಟಿನಲ್ಲಿ ಜಿಲ್ಲಾ ಕೃಷಿ ಇಲಾಖೆ ಹಾಗೂ ಕೃಷಿ ವಿಜ್ಞಾನಿಗಳ ತಂಡ ಮಹತ್ವದ ಅಧ್ಯಯನ ನಡೆಸಿದೆ. ಡೋಣಿ ನದಿ ತೀರದ ವ್ಯಾಪ್ತಿಯ ಸುಮಾರು 57 ಗ್ರಾಮಗಳ ಮಣ್ಣಿನ ಮಾದರಿ ಸಂಗ್ರಹಿಸಿ ಪರಿಶೀಲಿಸಲಾಗಿದೆ. ಈ ಭಾಗದ ಮಣ್ಣಿನ ಗುಣಧರ್ಮ, ಜೋಳದ ಉತ್ಪಾದನೆ ಹಾಗೂ ಗುಣಮಟ್ಟದ ಕುರಿತು ವೈಜ್ಞಾನಿಕ ಅಧ್ಯಯನಕ್ಕೆ ಒತ್ತು ನೀಡಲಾಗಿದೆ. ಜೋಳದ ವಿಶೇಷ ಆಹಾರ ಗುಣಮಟ್ಟ ಹಾಗೂ ಬೀಜದ ಗುಣಲಕ್ಷಣಗಳ ಕುರಿತು ಹೆಚ್ಚಿನ ಪರೀಕ್ಷೆ ನಡೆಸುವ ಉದ್ದೇಶದಿಂದ ಮಾದರಿಗಳನ್ನು ಧಾರವಾಡದ ಕೃಷಿ ವಿಶ್ವವಿದ್ಯಾಲಯಕ್ಕೆ ಕಳುಹಿಸಲಾಗಿದೆ. ಆದರೆ ಸಿಬ್ಬಂದಿ ಹಾಗೂ ಅನುದಾನದ ಕೊರತೆಯಿಂದ ಪರೀಕ್ಷಾ ಕಾರ್ಯಕ್ಕೆ ತಾತ್ಕಾಲಿಕ ಹಿನ್ನಡೆಯಾಗಿದೆ.

ವಿಶ್ವವಿದ್ಯಾಲಯದಿಂದ ಸಹಕಾರದ ಭರವಸೆ

ಮಾಲ್ದಂಡಿ ಜೋಳಕ್ಕೆ ಭೌಗೋಳಿಕ ಸ್ಥಾನಮಾನ ಕಲ್ಪಿಸುವ ನಿಟ್ಟಿನಲ್ಲಿ ಕೃಷಿ ವಿಶ್ವವಿದ್ಯಾಲಯದ ಕುಲಪತಿಗಳು ಅಗತ್ಯವಿರುವ ಎಲ್ಲ ರೀತಿಯ ತಾಂತ್ರಿಕ ಹಾಗೂ ವೈಜ್ಞಾನಿಕ ಸಹಕಾರ ನೀಡಲು ಸಿದ್ಧರಿದ್ದಾರೆ. ಆದರೆ ಸಂಬಂಧಿಸಿದ ಏಜೆನ್ಸಿ ಮಟ್ಟದಲ್ಲಿ ವಿಳಂಬವಾಗುತ್ತಿರುವುದರಿಂದ ಮುಂದಿನ ಪ್ರಕ್ರಿಯೆ ನಿರೀಕ್ಷಿತ ವೇಗದಲ್ಲಿ ಸಾಗುತ್ತಿಲ್ಲ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ. ಸಂಬಂಧಿಸಿದ ಏಜೆನ್ಸಿ ಮುಂದಿನ ಪರೀಕ್ಷೆ ಹಾಗೂ ವರದಿ ಪ್ರಕ್ರಿಯೆಗೆ ಆಸಕ್ತಿ ತೋರಿದರೆ ಈಗಾಗಲೇ ಸಂಗ್ರಹಿಸಿರುವ ಮಣ್ಣಿನ ಮಾದರಿಗಳ ಪರಿಶೀಲನೆ ಮತ್ತು ಲಭ್ಯವಿರುವ ವರದಿಗಳ ಆಧಾರದಲ್ಲಿ ಮಾಲ್ದಂಡಿ ಜೋಳಕ್ಕೆ ಭೌಗೋಳಿಕ ಸ್ಥಾನಮಾನದ ಮಾನ್ಯತೆ ಹಾಗೂ ಪ್ರತ್ಯೇಕ ಪ್ರಾಧಿಕಾರ ಸ್ಥಾಪನೆಗೆ ಸಂಬಂಧಿಸಿದ ಪ್ರಸ್ತಾವ ಸಲ್ಲಿಸಲು ಅವಕಾಶವಿದೆ ಎಂಬುದು ಕೃಷಿ ತಜ್ಞರ ಅಭಿಮತ.

ಪ್ರಾಧಿಕಾರ ಸ್ಥಾಪನೆಯಾದರೆ ರೈತರಿಗೆ ಅನುಕೂಲ

ಡೋಣಿ ತೀರದ ಮಾಲ್ದಂಡಿ ಬಿಳಿ ಜೋಳಕ್ಕೆ ಪ್ರತ್ಯೇಕ ಪ್ರಾಧಿಕಾರ ಸ್ಥಾಪನೆಯಾದರೆ ಈ ಭಾಗದ ರೈತರಿಗೆ ಹಲವು ರೀತಿಯಲ್ಲಿ ಅನುಕೂಲವಾಗಬಹುದು. ಜೋಳದ ಗುಣಮಟ್ಟದ ಸಂರಕ್ಷಣೆ, ಉತ್ತಮ ಬೀಜಗಳ ಅಭಿವೃದ್ಧಿ, ವೈಜ್ಞಾನಿಕ ಕೃಷಿ ಪದ್ಧತಿ, ಸಂಶೋಧನೆ, ಮೌಲ್ಯವರ್ಧನೆ, ಮಾರುಕಟ್ಟೆ ವ್ಯವಸ್ಥೆ ಹಾಗೂ ರೈತರಿಗೆ ಸೂಕ್ತ ಬೆಲೆ ದೊರಕಿಸಲು ನೆರವಾಗಬಹುದು.

ವಿಜಯಪುರ ಡೋಣಿ ನದಿ ತೀರದ ಪ್ರದೇಶದಲ್ಲಿ ಬೆಳೆಯುವ ಮಾಲ್ದಂಡಿ ಬಿಳಿ ಜೋಳವು ಅಂತಾರಾಷ್ಟ್ರೀಯ ಮಟ್ಟದ ಗುಣಮಟ್ಟ ಮತ್ತು ವಿಶೇಷತೆಗೆ ಹೆಸರುವಾಸಿಯಾಗಿದೆ. ಇಂಡಿ ಲಿಂಬೆ, ಬ್ಯಾಡಗಿ ಮೆಣಸಿನಕಾಯಿಯ ಮಾದರಿಯಲ್ಲಿ. ಮಾಲ್ದಂಡಿ ಬಿಳಿ ಜೋಳದ ಹೆಸರಿನಲ್ಲಿ ಪ್ರತ್ಯೇಕ ನಿಗಮ ಸ್ಥಾಪನೆಯಾದರೇ ಈ ಭಾಗದ ರೈತರಿಗೆ ಅನುಕೂಲವಾಗಲಿದೆ. ಈ ನಿಟ್ಟಿನಲ್ಲಿ ಸಂಬಂಧಪಟ್ಟ ಅಧಿಕಾರಿಗಳು ಸಮಗ್ರ ವರದಿ ಸಿದ್ಧಪಡಿಸಿ ಸರ್ಕಾರಕ್ಕೆ ಸಲ್ಲಿಸಬೇಕು. ಆದಷ್ಟು ಶೀಘ್ರದಲ್ಲಿ ನಿಗಮ ಸ್ಥಾಪನೆ ಮಾಡುವಂತೆ ಮುಖ್ಯಮಂತ್ರಿಗಳು, ಕೃಷಿ ಸಚಿವರು, ಉಸ್ತುವಾರಿ ಸಚಿವರ ಮೇಲೆ ಒತ್ತಡ ತರಲಾಗುವುದು.

-ರಾಜುಗೌಡ ಪಾಟೀಲ ಕುದರಿಸಾಲವಾಡಗಿ, ಶಾಸಕರು, ದೇವರಹಿಪ್ಪರಗಿ.

ವಿಜಯಪುರ ದೋಣಿ ತೀರದ ಮಾಲ್ದಂಡಿ ಜೋಳದಿಂದ ತಯಾರಿಸಿದ ಬಿಸಿರೊಟ್ಟಿ ಅತ್ಯಂತ ಮೃದು, ಬಲು ರುಚಿ. ಖಡಕ್‌ ರೊಟ್ಟಿಯೂ ಹೆಚ್ಚು ದಿನ ಹಾಳಾಗಲ್ಲ. ದಿನ ಕಳೆದಂತೆಲ್ಲ ರುಚಿ ಗುಣಮಟ್ಟ ಹೆಚ್ಚಾಗುತ್ತದೆ. ಈ ವಿಶೇಷ ಗುಣದಿಂದಲೇ ಮಾಲ್ದಂಡಿ ಜೋಳಕ್ಕೆ ಬೇಡಿಕೆ ಇದೆ. ಜೋಳದ ಬೀಜಕ್ಕೆ ಹಾಗೂ ಜಾನುವಾರುಗಳಿಗೆ ಈ ಜೋಳದ ಮೇವಿಗೂ ರಾಜ್ಯ, ಹೊರ ರಾಜ್ಯಗಳಲ್ಲಿ ಬೇಡಿಕೆ ಹೆಚ್ಚು. ಸಾರ್ವಜನಿಕರಲ್ಲಿ ಜೋಳದ ವಿಶೇಷತೆ ಕುರಿತು ಮನೆಯಿಂದಲೇ ಬದಲಾವಣೆ ಬರಬೇಕಾಗಿದೆ. ಈ ಭಾಗದ ಜೋಳಕ್ಕೆ ವಿಶೇಷ ಸ್ಥಾನಮಾನ ಕಲ್ಪಿಸಬೇಕು.

-ಡಾ.ಎಸ್.ಎಸ್.ಕರಭಂಟನಾಳ, ಕೃಷಿ ಸಂಶೋಧನಾ ಕೇಂದ್ರ, ಜೋಳ ಅಭಿವೃದ್ಧಿ ಯೋಜನೆಯ ಪ್ರಧಾನ ವಿಜ್ಞಾನಿ.

ಡೋಣಿ ತೀರದ ಮಾಲ್ದಂಡಿ ಬಿಳಿ ಜೋಳದ ವಿಶೇಷತೆಯನ್ನು ವೈಜ್ಞಾನಿಕವಾಗಿ ಗುರುತಿಸಿ ಅದಕ್ಕೆ ಪ್ರತ್ಯೇಕ ಮಾನ್ಯತೆ ಕಲ್ಪಿಸುವ ಪ್ರಯತ್ನಕ್ಕೆ ವಿಶ್ವವಿದ್ಯಾಲಯದಿಂದ ಅಗತ್ಯವಿರುವ ಎಲ್ಲ ರೀತಿಯ ತಾಂತ್ರಿಕ ಹಾಗೂ ವೈಜ್ಞಾನಿಕ ಸಹಕಾರ ನೀಡಲು ಸಿದ್ಧರಿದ್ದೇವೆ. ಆಹಾರ ಗುಣಮಟ್ಟ ಮತ್ತು ಬೀಜದ ಗುಣಲಕ್ಷಣಗಳ ಪರೀಕ್ಷೆ ಸೇರಿದಂತೆ ಅಗತ್ಯ ಅಧ್ಯಯನಗಳನ್ನು ಕೈಗೊಳ್ಳಬೇಕಿದೆ. ಸದ್ಯ ಸಿಬ್ಬಂದಿ ಹಾಗೂ ಅನುದಾನದ ಕೊರತೆಯಿಂದ ಕೆಲವು ಪರೀಕ್ಷಾ ಕಾರ್ಯಗಳು ತಾತ್ಕಾಲಿಕವಾಗಿ ವಿಳಂಬವಾಗಿವೆ. ಸಂಬಂಧಿಸಿದ ಏಜೆನ್ಸಿ ಮುಂದಿನ ಪ್ರಕ್ರಿಯೆಗೆ ಮುಂದಾದರೆ ಲಭ್ಯವಿರುವ ಅಧ್ಯಯನ ವರದಿಗಳ ಆಧಾರದಲ್ಲಿ ವಿಶೇಷ ಸ್ಥಾನಮಾನ ಹಾಗೂ ನಿಗಮ ಸ್ಥಾಪನೆಯ ಪ್ರಸ್ತಾವನೆಗೆ ಸಹಕಾರ ನೀಡಬಹುದು.

- ಸಜ್ಜನವರ.ಜಿ, ಉಪಕುಲಪತಿಗಳು ಕೃಷಿ ವಿಶ್ವವಿದ್ಯಾಲಯ ವಿಜಯಪುರ.

ಡೋಣಿ ನದಿ ತೀರದ ಸುಮಾರು 57 ಗ್ರಾಮಗಳ ಮಣ್ಣಿನ ಗುಣ ಧರ್ಮ, ರೊಟ್ಟಿಯ ರುಚಿ, ಉತ್ತಮ ಆರೋಗ್ಯಕ್ಕೆ ಬೇಕಾದ ವಿವಿಧ ಪೋಷಕಾಂಶ ಜೋಳದಲ್ಲಿದೆ. ಈ ಕುರಿತು ಕೃಷಿ ಇಲಾಖೆ ಹಾಗೂ ವಿಜ್ಞಾನಿಗಳು ಜಂಟಿಯಾಗಿ ಅಗತ್ಯ ಇರುವ ವೈಜ್ಞಾನಿಕ ವರದಿ ಮತ್ತು ಮಣ್ಣಿನ ಮಾದರಿಗಳನ್ನು ಕೃಷಿ ವಿಶ್ವವಿದ್ಯಾಲಯದಲ್ಲಿ ಪರಿಶೀಲನೆ ಮಾಡಲಾಗಿದ್ದು. ಸರ್ಕಾರಕ್ಕೆ ಮಾಲ್ದಂಡಿ ಬಿಳಿ ಜೋಳಕ್ಕೆ ವಿಶೇಷ ಸ್ಥಾನ ನೀಡಲು ಉಸ್ತುವಾರಿ ಸಚಿವರ ನಿರ್ದೇಶನದಂತೆ ಜಿಲ್ಲಾಧಿಕಾರಿಗಳ ಮಾರ್ಗದರ್ಶನದಲ್ಲಿ ಹಲವು ಸಭೆ ನಡೆದಿದೆ ಶೀಘ್ರದಲ್ಲಿ ಸರ್ಕಾರಕ್ಕೆ ವರದಿ ಸಲ್ಲಿಸಲಾಗುವುದು.

-ಶಿವನಗೌಡ ಪಾಟೀಲ, ಜಿಲ್ಲಾ ಜಂಟಿ ಕೃಷಿ ನಿರ್ದೇಶಕರು ವಿಜಯಪುರ.

KMF vs Amul: ನಂದಿನಿ ಮೊಸರಿನ ದರ ಏರಿಕೆ ಬೆನ್ನಲ್ಲೇ, ಅಮುಲ್ ಮೊಸರು ₹10 ರ ಇಳಿಕೆ!

Kannadaprabha News — Sat, 07 Nov 2026 07:42:02 +0530

1 ಲೀಟರ್‌ ನಂದಿನಿ ಮೊಸರಿನ ದರ 68 ರು.
950 ಗ್ರಾಂ. ಅಮೂಲ್‌ ಮೊಸರಿಗೆ 58 ರು.
ರಾಜ್ಯದಲ್ಲಿ ಮಾರುಕಟ್ಟೆ ವಿಸ್ತರಣೆಗೆ ಈ ಕ್ರಮ

ಬೆಂಗಳೂರು (ನ.7): ರಾಜ್ಯದ ಹೆಮ್ಮೆಯ ಕೆಎಂಎಫ್‌ ಒಡೆತನದ ನಂದಿನಿಗೆ ನೇರ ಸ್ಪರ್ಧೆ ನೀಡಲು ಗುಜರಾತ್‌ ಮೂಲದ ಅಮೂಲ್‌ ಮುಂದಾಗಿದ್ದು, ಮೊಸರಿನ ದರ ಇಳಿಸುವ ಮೂಲಕ ಮಾರುಕಟ್ಟೆಯಲ್ಲಿ ಭರ್ಜರಿ ಬೆಲೆ ಸಮರಕ್ಕೆ ಮುಂದಾಗಿದೆ. ನಂದಿನಿಗಿಂತ ಅಮೂಲ್‌ ತನ್ನ ಮೊಸರಿನ ದರವನ್ನು 10 ರು.ನಷ್ಟು ಇಳಿಸಿದೆ.

ರಾಜ್ಯದಲ್ಲಿ ಮಾರುಕಟ್ಟೆ ವಿಸ್ತರಣೆಗೆ ಈ ಕ್ರಮ

ನ.1ರಿಂದ ಕೆಎಂಎಫ್‌ ಹಾಲಿನ ದರವನ್ನು 8ರಿಂದ 12 ರು.ನಷ್ಟು ಮತ್ತು ಮೊಸರಿನ ದರವನ್ನು ಬರೋಬ್ಬರಿ 14 ರು. ಏರಿಕೆ ಮಾಡಿತ್ತು. ಕೆಎಂಎಫ್‌ ಹಾಲಿನ ಗುಣಮಟ್ಟದ ಮೇಲೆ (ಜಿಡ್ಡಿನಾಂಶ) ದರ ಏರಿಕೆ ಮಾಡಿರುವುದಾಗಿ ಹೇಳಲಾಗಿದ್ದು, ಇದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.

ಇದರ ಬೆನ್ನಲ್ಲೇ ಕರ್ನಾಟಕದ ಡೈರಿ ಮಾರುಕಟ್ಟೆಯಲ್ಲಿ ತನ್ನ ಹೆಜ್ಜೆ ಗುರುತು ವಿಸ್ತರಿಸಲು ಕಾಯುತ್ತಿದ್ದ ಅಮೂಲ್‌ ಸಂಸ್ಥೆ, ನಂದಿನಿ ಗ್ರಾಹಕರನ್ನು ಸೆಳೆಯಲು ಮೊಸರಿನ ಬೆಲೆ ಕಡಿತ ಮಾಡುವ ತಂತ್ರಗಾರಿಕೆ ರೂಪಿಸಿ, 900 ಗ್ರಾಂ. ಪ್ಯಾಕೇಟ್‌ ಮೊಸರಿಗೆ ಕೇವಲ 58 ರು.ನಿಗದಿ ಮಾಡಿದೆ. ಈ ಕುರಿತು ಜಾಹೀರಾತು ನೀಡುವ ಮೂಲಕ ನೇರ ಬೆಲೆ ಸಮರಕ್ಕೂ ಮುಂದಾಗಿದೆ. ನಗರ ಪ್ರದೇಶಗಳಲ್ಲಿ ಹಾಗೂ ಆನ್‌ಲೈನ್‌ ಕ್ವಿಕ್‌ ಕಾಮರ್ಸ್‌ ಪ್ಲಾಟ್‌ಫಾರ್ಮ್‌ಗಳಲ್ಲಿ ಅಮೂಲ್‌ ಮೊಸರಿನ ಲಭ್ಯತೆ ಹೆಚ್ಚುತ್ತಿದ್ದು, ಕಡಿಮೆ ದರದ ಆಫರ್‌ಗಳ ಮೂಲಕ ನಂದಿನಿಗೆ ಪೈಪೋಟಿ ನೀಡಲು ಸಜ್ಜಾಗುತ್ತಿದೆ. ಕೆಎಂಎಫ್‌ ಮೊಸರಿನ ದರ ಲೀಟರ್‌ಗೆ 68 ರು.ವರೆಗೆ ಏರಿಕೆ ಆಗಿದೆ.

--------------------

ಇದರಿಂದ ಸಹಜವಾಗಿಯೇ ಗ್ರಾಹಕರಿಂದ ಭಾರೀ ಅಸಮಾಧಾನ ವ್ಯಕ್ತವಾಗಿದೆ. ಇದರ ಪರಿಣಾಮ ರಾಜ್ಯ ಸರ್ಕಾರ ಮತ್ತು ಕೆಎಂಎಫ್‌ ಆಡಳಿತ ಮಂಡಳಿ ಮಧ್ಯಪ್ರವೇಶಿಸಿ, ಮೊಸರಿನ ದರದಲ್ಲಿ ಪ್ರತಿ ಲೀಟರ್‌ಗೆ 2 ರು.ಇಳಿಕೆ ಮಾಡಲು ತೀರ್ಮಾನ ಕೈಗೊಂಡಿತ್ತು. ಹೀಗಿದ್ದರೂ ಖಾಸಗಿ ಹಾಗೂ ಹೊರ ರಾಜ್ಯದ ಬ್ರಾಂಡ್‌ಗಳು ಅಮೂಲ್‌, ಹಟ್ಸನ್‌, ಸಿದ್ಸ್‌ ಫಾರ್ಮಾ, ಕಂಟ್ರಿ ಡಿಲೈಟ್ಸ್‌, ಮಿಲ್ಕಿಮಿಸ್ಟ್‌ ನಂತಹ ಸಂಸ್ಥೆಗಳು ನಂದಿನಿಯ ದರ ಏರಿಕೆಯನ್ನೇ ಅಸ್ತ್ರವನ್ನಾಗಿ ಮಾಡಿಕೊಂಡು ತಮ್ಮ ಮಾರುಕಟ್ಟೆ ಪಾಲನ್ನು ಹೆಚ್ಚಿಸಿಕೊಳ್ಳಲು ಬೆಲೆ ಕಡಿತಕ್ಕೆ ಮುಂದಾಗಿವೆ.

ಹೋಟೆಲ್‌ಗಳು ಹಾಗೂ ಕ್ಯಾಟರಿಂಗ್‌ ಉದ್ಯಮಗಳಲ್ಲಿ ಬೃಹತ್‌ ಪ್ರಮಾಣದಲ್ಲಿ ಮೊಸರು ಬಳಕೆಯಾಗುವುದರಿಂದ ಈ ದರ ವ್ಯತ್ಯಾಸ ಅವರ ಖರೀದಿ ನಿರ್ಧಾರದ ಮೇಲೆ ಪ್ರಭಾವ ಬೀರಲಿದೆ. ನಿತ್ಯ ಮೊಸರು ಬಳಸುವ ಮಧ್ಯಮ ವರ್ಗದ ಗ್ರಾಹಕರಿಗೆ ಕಡಿಮೆ ದರದಲ್ಲಿ ಗುಣಮಟ್ಟದ ಮೊಸರಿನ ಆಯ್ಕೆಗಳು ಸಿಗುವುದರಿಂದ ಸಹಜವಾಗಿ ಕಡಿಮೆ ದರ ಇರುವ ಬ್ರಾಂಡ್‌ನತ್ತ ಆಕರ್ಷಿತರಾಗುವ ಸಾಧ್ಯತೆ ಹೆಚ್ಚಿದ್ದು, ನಂದಿನಿ ಬ್ರಾಂಡ್‌ಗೆ ಮುಂದಿನ ದಿನಗಳಲ್ಲಿ ದೊಡ್ಡ ಸವಾಲು ಎದುರಾಗುವ ಸಾಧ್ಯತೆ ಇದೆ ಎನ್ನುತ್ತಾರೆ ತಜ್ಞರು.

ಮೊಸರಿನ ಬ್ರಾಂಡ್‌ಗಳು ತೂಕದ ಪ್ರಮಾಣ ದರ ಪಟ್ಟಿ

ನಂದಿನಿ 500ಗ್ರಾಂ 34ರು.
ನಂದಿನಿ 1000ಗ್ರಾಂ 68
ಅಮೂಲ್‌ 450 ಗ್ರಾಂ 29 ರು.
ಅಮೂಲ್‌ 900ಗ್ರಾಂ 58 ರು.
ಸಿದ್ಸ್‌ ಫಾರ್ಮಾ ಬಫೆಲ್ಲೋ ಕರ್ಡ್‌ 500 ಗ್ರಾಂ 36 ರು.
ಸಿದ್ಸ್‌ ಫಾರ್ಮಾ ಎಮ್ಮೆ ಮೊಸರು 1 ಲೀಟರ್‌ 62ರು.
ಮಿಲ್ಕಿಮಿಸ್ಟ್‌ 400 ಗ್ರಾಂ 39 ರು.
ಮಸ್ತಿ 450 ಗ್ರಾಂ 40 ರು.
ಹಟ್ಸನ್‌ 500 ಗ್ರಾಂ 38 ರು.

Bengaluru: PVR ಮಾಲ್‌ನಲ್ಲಿ ಬಳಸಿದ ಕಪ್‌ನಲ್ಲೇ ಪೆಪ್ಸಿ ಸರ್ವ್‌ ಮಾಡಿದ್ದ ಅಂಗಡಿಗೆ ಬೀಗ

Kannadaprabha News — Sat, 07 Nov 2026 07:37:02 +0530

ಬೆಂಗಳೂರು: ಬಳಸಿದ ಪ್ಲಾಸ್ಟಿಕ್ ಕಪ್‌ನಲ್ಲಿ ಗ್ರಾಹಕರಿಗೆ ತಂಪು ಪಾನೀಯ ಪೆಪ್ಸಿ ಮಾರಾಟ ಮಾಡಿದ್ದ ಕನಕಪುರ ರಸ್ತೆಯ ಫೋರಂ ಸೌತ್ ಬೆಂಗಳೂರು ಮಾಲ್‌ನಲ್ಲಿರುವ ಪಿವಿಆರ್ ಸಿನಿಮಾಸ್‌ ಆವರಣದಲ್ಲಿನ ತಿನಿಸು ಮಳಿಗೆಗೆ ಆರೋಗ್ಯ ಇಲಾಖೆಯ ಅಧಿಕಾರಿಗಳು ಶುಕ್ರವಾರ ಬೀಗ ಹಾಕಿದರು.

ನೋಟಿಸ್ ನೀಡಿ ಜ್ಯೂಸ್ ಕೌಂಟರ್ ಕ್ಲೋಸ್

ಸಾರ್ವಜನಿಕರ ದೂರು ಹಿನ್ನೆಲೆಯಲ್ಲಿ ಸ್ಥಳಕ್ಕೆ ಭೇಟಿ ನೀಡಿದ ಅಧಿಕಾರಿಗಳಿಂದ ಪರಿಶೀಲನೆ ವೇಳೆ ಆಹಾರ ಸುರಕ್ಷತಾ ನಿಯಮಗಳ ಉಲ್ಲಂಘನೆ ಕಂಡು ಬಂದಿದೆ. ಈ ಹಿನ್ನೆಲೆಯಲ್ಲಿ ಮಳಿಗೆಗೆ ನೋಟಿಸ್ ಜಾರಿ ಮಾಡಿ ಜ್ಯೂಸ್ ಕೌಂಟರ್ ಅನ್ನು ಬಂದ್ ಮಾಡಲಾಗಿದೆ ಎಂದು ಆರೋಗ್ಯ ಸಚಿವ ಯು.ಟಿ. ಖಾದರ್ ಹೇಳಿದ್ದಾರೆ.

ವ್ಯಾಪಾರದಷ್ಟೇ ಜನರ ಆರೋಗ್ಯವೂ ಮುಖ್ಯ

ಆಹಾರ ಸುರಕ್ಷತೆಯ ವಿಷಯ ಬಂದಾಗ ದೊಡ್ಡ ಬ್ರ್ಯಾಂಡ್‌ಗಳಾಗಲಿ, ಸಣ್ಣ ವ್ಯಾಪಾರಿಗಳಾಗಿರಲಿ ಎಲ್ಲರಿಗೂ ಒಂದೇ ನಿಯಮ ಅನ್ವಯಿಸುತ್ತವೆ. ಪ್ರತಿಯೊಬ್ಬ ವ್ಯಾಪಾರಿಯು ಗ್ರಾಹಕರ ಆರೋಗ್ಯವನ್ನು ಗಮನದಲ್ಲಿಟ್ಟುಕೊಂಡು ವ್ಯಾಪಾರ ಮಾಡಬೇಕು. ನಿಮ್ಮ ವ್ಯಾಪಾರದಷ್ಟೇ ಜನರ ಆರೋಗ್ಯವೂ ಮುಖ್ಯ.

ಆಹಾರದ ಪ್ಯಾಕೇಜಿಂಗ್, ಬಡಿಸುವುದು ಸೇರಿದಂತೆ ಆಹಾರಕ್ಕೆ ಸಂಬಂಧಿಸಿದ ಶುಚಿತ್ವ ಇಲ್ಲದಿರುವುದು ಕಂಡು ಬಂದರೆ ಆಹಾರ ಇಲಾಖೆ ದೂರು ನೀಡಬಹುದು ಎಂದು ಸಚಿವ ಯು.ಟಿ. ಖಾದರ್ ಹೇಳಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆದ ವಿಡಿಯೋ

ಪಿವಿಆರ್ ಸಿನೆಮಾಸ್‌ ಆವರಣದಲ್ಲಿನ ತಿನಿಸು ಮಳಿಗೆಯಲ್ಲಿ ಬಳಸಿದ ಕಪ್‌ಗಳಲ್ಲಿ ಗ್ರಾಹಕರಿಗೆ ಪೆಸ್ಸಿ ಮಾರಾಟ ಮಾಡುತ್ತಿರುವುದನ್ನು ಗ್ರಾಹಕರೊಬ್ಬರು ಪತ್ತೆ ಹಚ್ಚಿ ವಿಡಿಯೋ ಮಾಡಿ ಜಾಲತಾಣದಲ್ಲಿ ಹಂಚಿಕೊಂಡಿದ್ದರು.

Agrilief Utsav: ದೀಪಾವಳಿ ಹಬ್ಬಕ್ಕೆ ಸಿಬ್ಬಂದಿಗೆ 5 ಟಾಟಾ ನೆಕ್ಸಾನ್ ಇವಿ ಕಾರು ಗಿಫ್ಟ್ ಕೊಟ್ಟ ಬೆಳ್ತಂಗಡಿ ಕಂಪನಿ!

Kannadaprabha News — Sat, 07 Nov 2026 07:16:35 +0530

ಬೆಳ್ತಂಗಡಿ(ನ.7): ಬೆಳ್ತಂಗಡಿ(Belthangady) ನಿಡ್ಲೆಯ ಅಗ್ರಿಲೀಫ್ ಎಕ್ಸ್‌ಪೋರ್ಟ್ಸ್ ಪ್ರೈವೇಟ್ ಲಿಮಿಟೆಡ್(Agrilief Exports Private Limited) ಸಂಸ್ಥೆಯು ದೀಪಾವಳಿ ಹಬ್ಬ(Deepavali festival)ದ ಆಚರಣೆ, ಅಗ್ರಿಲೀಫ್ ಉತ್ಸವ(Agrilief Utsav) ಅಂಗವಾಗಿ ತನ್ನ ಉದ್ಯೋಗಿಗಳಿಗೆ ₹ 1 ಕೋಟಿ ರು. ಮೌಲ್ಯದ ವಿವಿಧ ಕೊಡುಗೆಗಳನ್ನು ನೀಡಿದೆ.

ನಿಡ್ಲೆಯ ಕಾರ್ಖಾನೆಯಲ್ಲಿ ಅಗ್ರಿಲೀಫ್ ಉತ್ಸವ

ನಿಡ್ಲೆಯ ಕಾರ್ಖಾನೆಯಲ್ಲಿ ಗುರುವಾರ ದೀಪಾವಳಿ ಸಂಭ್ರಮ, ಅಗ್ರಿಲೀಫ್ ಉತ್ಸವ ನಡೆಯಿತು. ಈ ವೇಳೆ ಸಾಧನೆ ಮಾಡಿದ ಐವರು ಉದ್ಯೋಗಿಗಳಿಗೆ 5 ಟಾಟಾ ನೆಕ್ಸಾನ್ ಇವಿ ಕಾರುಗಳನ್ನು ನೀಡಲಾಯಿತು. ಇಬ್ಬರಿಗೆ 2 ಲಕ್ಷ ಮೌಲ್ಯದ ಎರಡು ದ್ವಿಚಕ್ರವಾಹನಗಳನ್ನು ನೀಡಲಾಯಿತು. ಹಲವಾರು ಅತ್ಯುತ್ತಮ ಉದ್ಯೋಗಿಗಳನ್ನು ಗುರುತಿಸಿ ಅಮೂಲ್ಯ ಉಡುಗೊರೆಗಳೊಂದಿಗೆ ಸನ್ಮಾನಿಸಲಾಯಿತು.

ಅಗ್ರಿಲೀಫ್‌: ಅಡಿಕೆ ಹಾಳೆ ತಟ್ಟೆ ತಯಾರಕ ಕಂಪನಿ

ಅಗ್ರಿಲೀಫ್‌ ಭಾರತದ ಪ್ರಮುಖ ಅಡಿಕೆ ಹಾಳೆ ತಟ್ಟೆಗಳ ತಯಾರಕರಲ್ಲಿ ಒಂದಾಗಿದೆ. ಕಂಪನಿಯು ತನ್ನ ರೈತ ಜಾಲದ ಮೂಲಕ, ಸುಮಾರು 10,000 ರೈತ ಕುಟುಂಬಗಳಿಗೆ ಪರ್ಯಾಯ ಆದಾಯದ ಅವಕಾಶಗಳನ್ನು ಒದಗಿಸಿದೆ. ಅಲ್ಲದೆ 20 ಕ್ಕೂ ಹೆಚ್ಚು ದೇಶಗಳಿಗೆ ಉತ್ಪನ್ನಗಳನ್ನು ರಫ್ತು ಮಾಡುತ್ತಿದೆ.

ಅಗ್ರಿಲೀಫ್‌ ಉತ್ಸವದಲ್ಲಿ ನಿರೂಪಕಿ ತನುಶ್ರೀ ಭಾಗಿ

ಕಾರ್ಯಕ್ರಮದಲ್ಲಿ ಖ್ಯಾತ ಕನ್ನಡ ಕಿರುತೆರೆ ನಿರೂಪಕಿ ಅನುಶ್ರೀ, ನಿರ್ದೇಶಕ ಮತ್ತು ನಟ ಜೆ.ಪಿ. ತುಮಿನಾಡ್, ಉದ್ಯಮಿ ಶಶಿಧರ ಶೆಟ್ಟಿ ಬರೋಡ ಮತ್ತು ಭಟ್ ’ಎನ್’ ಭಟ್ ಸಂಸ್ಥೆಯ ಸುದರ್ಶನ್ ಭಟ್ ಬೆದ್ರಾಡಿ ಉಪಸ್ಥಿತರಿದ್ದು ಸಂವಾದ ನಡೆಸಿಕೊಟ್ಟರು.

NDA Exam 2026: ಎನ್‌ಡಿಎ ಪರೀಕ್ಷೆಯಲ್ಲಿ ಭದ್ರಾವತಿಯ ಶ್ರೇಯಾಗೌಡ ದೇಶಕ್ಕೆ ಪ್ರಥಮ!

Kannadaprabha News — Sat, 07 Nov 2026 05:31:56 +0530

ಭದ್ರಾವತಿ (ನ.7): ನಗರದ ವಿಶ್ವೇಶ್ವರಯ್ಯ ಕಬ್ಬಿಣ ಮತ್ತು ಉಕ್ಕಿನ ಕಾರ್ಖಾನೆ ನಿವೃತ್ತ ನೌಕರ ಜೆ.ನಾಗೇಂದ್ರರವರ ಪುತ್ರಿ, ಶ್ರೇಯಾ ಎನ್. ಗೌಡ ಕೇಂದ್ರ ಲೋಕ ಸೇವಾ ಆಯೋಗ (ಯುಪಿಎಸ್‌ಸಿ) ನಡೆಸುವ ನ್ಯಾಷನಲ್ ಡಿಫೆನ್ಸ್ ಅಕಾಡೆಮಿ (ಎನ್‌ಡಿಎ) ಪರೀಕ್ಷೆಯ ಮಹಿಳಾ ವಿಭಾಗದಲ್ಲಿ ದೇಶಕ್ಕೆ ಪ್ರಥಮ ರ್‍ಯಾಂಕ್ ಪಡೆಯುವ ಮೂಲಕ ಉಕ್ಕಿನ ನಗರದ ಕೀರ್ತಿಪತಾಕೆಯನ್ನು ರಾಷ್ಟ್ರಮಟ್ಟದಲ್ಲಿ ಹೆಚ್ಚಿಸಿದ್ದಾರೆ.

ಶ್ರೇಯಾ ಓದಿನಲ್ಲೂ ಚುರುಕು

ಶ್ರೇಯಾ ಅವರ ತಾಯಿ ಡಾ. ಬಿ.ಎಂ. ಆಶಾ ಅತಿಥಿ ಉಪನ್ಯಾಸಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಶ್ರೇಯಾ ಅವರು ೧ರಿಂದ ೧೦ನೇ ತರಗತಿವರೆಗೆ ಭದ್ರಾವತಿ ತಾಲೂಕಿನ ಕಾರೇಹಳ್ಳಿ ಶ್ರೀ ಬಾಲಗಂಗಾಧರನಾಥ ಸ್ವಾಮೀಜಿ ಕೇಂದ್ರೀಯ ವಿದ್ಯಾಲಯ (ಬಿಜಿಎಸ್) ಶಾಲೆಯಲ್ಲಿ ವ್ಯಾಸಾಂಗ ಮಾಡಿದ್ದು, ನಂತರ ಬೆಂಗಳೂರಿನ ರಾಜಾಜಿನಗರದ ಬೇಸ್ ಕಾಲೇಜಿನಲ್ಲಿ ಪಿಯುಸಿ ಶಿಕ್ಷಣ ಮುಗಿಸಿ, ಪ್ರಸ್ತುತ ಮಂಗಳೂರಿನ ಸುರತ್ಕಲ್ ಕಾಲೇಜಿನಲ್ಲಿ ಇಂಜಿನಿಯರಿಂಗ್ ವ್ಯಾಸಂಗ ಮಾಡುತ್ತಿದ್ದಾರೆ.

ಸೈನ್ಯ ಸೇರುವ ಕನಸು ನನಸು

ಬಾಲ್ಯದಿಂದಲೂ ಸೈನ್ಯಕ್ಕೆ ಸೇರಿ ದೇಶಸೇವೆ ಮಾಡಬೇಕೆಂಬ ಕನಸು ಹೊಂದಿದ್ದ ಶ್ರೇಯಾ ಅವರಿಗೆ ೮ನೇ ತರಗತಿಯಲ್ಲಿ ಓದುತ್ತಿದ್ದಾಗ ಎನ್‌ಡಿಎಯಲ್ಲಿ ಮಹಿಳೆಯರಿಗೂ ಅವಕಾಶ ಕಲ್ಪಿಸಿರುವ ವಿಷಯ ತಿಳಿದಿತ್ತು. ಅಂದಿನಿಂದಲೇ ಎನ್‌ಡಿಎ ಸೇರುವ ಗುರಿಯೊಂದಿಗೆ ತಯಾರಿ ನಡೆಸಿದ್ದ ಅವರು, ಮೊದಲ ಪ್ರಯತ್ನದಲ್ಲೇ ದೇಶಕ್ಕೆ ಪ್ರಥಮ ರ್‍ಯಾಂಕ್ ಪಡೆಯುವ ಮೂಲಕ ದೇಶದ ಗಮನ ಸೆಳೆದಿದ್ದಾರೆ.

ದೆಹಲಿ ಹೋರಾಟಕ್ಕೆ ಹೋಗದ್ದಕ್ಕೆ ಸಚಿವ ಲಮಾಣಿ ಪುತ್ರ, ಹಾವೇರಿ ಯುವ ಕಾಂಗ್ರೆಸ್ ಅಧ್ಯಕ್ಷ ಸೇರಿ 6 ಮಂದಿ ಅಮಾನತು

Kannadaprabha News — Sat, 07 Nov 2026 06:46:55 +0530

ಹಾವೇರಿ (ನ.7): ದೆಹಲಿ(Delhi)ಯಲ್ಲಿ ರಾಹುಲ್‌ ಗಾಂಧಿ(Rahul Gandhi) ನೇತೃತ್ವದಲ್ಲಿ ಈಚೆಗೆ ನಡೆದ ಹೋರಾಟಕ್ಕೆ ಗೈರು ಹಾಜರಾದ ಹಿನ್ನೆಲೆಯಲ್ಲಿ ಹಾವೇರಿ ಜಿಲ್ಲಾ ಯುವ ಕಾಂಗ್ರೆಸ್ ಅಧ್ಯಕ್ಷ(Haveri youth congress president) ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ರುದ್ರಪ್ಪ ಲಮಾಣಿ(Minister Rudrappa lamani) ಪುತ್ರ ದರ್ಶನಕುಮಾರ ಲಮಾಣಿ(Darshan kumar lamani) ಅವರನ್ನು ಹುದ್ದೆಯಿಂದ ಅಮಾನತುಗೊಳಿಸಲಾಗಿದೆ.

ಹಾವೇರಿ, ಉತ್ತರ ಕನ್ನಡ ಜಿಲ್ಲಾ ಯುವ ಕಾಂಗ್ರೆಸ್ ಅಧ್ಯಕ್ಷ ಸೇರಿ 6 ಮಂದಿ ಅಮಾನತು

ಭಾರತೀಯ ಯುವ ಕಾಂಗ್ರೆಸ್‌ನ ರಾಷ್ಟ್ರೀಯ ನಾಯಕತ್ವ ಈ ಅಮಾನತು ಆದೇಶ ಹೊರಡಿಸಿದೆ. ದೆಹಲಿಯಲ್ಲಿ ಕಾಂಗ್ರೆಸ್ ಹಮ್ಮಿಕೊಂಡ ಎಸ್ಐಆರ್ ವಿರೋಧಿಸಿ ಹೋರಾಟ(Anti-SIR protest), ಸಂಸತ್ ಚಲೋ ಸೇರಿ ವಿವಿಧ ಕಾರ್ಯಕ್ರಮಗಳಿಗೆ ಗೈರು ಹಾಜರಾಗಿರುವುದನ್ನು ಗಂಭೀರವಾಗಿ ಪರಿಗಣಿಸಿರುವ ನಾಯಕತ್ವ, ಮುಂದಿನ ಆದೇಶದವರೆಗೆ ದರ್ಶನಕುಮಾರ ಲಮಾಣಿ ಸೇರಿದಂತೆ ಆರು ಪದಾಧಿಕಾರಿಗಳನ್ನು ಅಮಾನತಿನಲ್ಲಿಡಲು ನಿರ್ಧರಿಸಿದೆ.

ಅಮಾನತುಗೊಂಡವರಲ್ಲಿ ರಾಜ್ಯ ಕಾರ್ಯದರ್ಶಿಗಳಾದ ಅಬ್ದುಲ್ ಅಜೀಜ್, ಸೂರಜ್ ಆವಟಿ, ಪವನ ಸಾಲಿಯಾನ್, ಅಭಿಷೇಕ ಸಿ.ಹಾಗೂ ಹಾವೇರಿ ಜಿಲ್ಲಾ ಯುವ ಕಾಂಗ್ರೆಸ್ ಅಧ್ಯಕ್ಷ ದರ್ಶನಕುಮಾರ ಲಮಾಣಿ ಮತ್ತು ಉತ್ತರ ಕನ್ನಡ ಜಿಲ್ಲಾ ಯುವ ಕಾಂಗ್ರೆಸ್ ಅಧ್ಯಕ್ಷ ಸುಬ್ರಹ್ಮಣ್ಯ ಸಿರ್ಸಿಕರ ಸೇರಿದ್ದಾರೆ.

ಕೆಪಿವೈಸಿಸಿ ಅಧ್ಯಕ್ಷ ಮಂಜುನಾಥ ಎಚ್.ಎಸ್., ರಾಷ್ಟ್ರೀಯ ಕಾರ್ಯದರ್ಶಿ ಹಾಗೂ ಕೆಪಿವೈಸಿಸಿ ಸಹ ಉಸ್ತುವಾರಿ ತಾರಿಕ ಬಾಗ್ವಾನ ಮತ್ತು ಶ್ರೀನಿವಾಸ ರಾಠೋಡ ಅವರು ಅಮಾನತು ಆದೇಶ ಹೊರಡಿಸಿದ್ದಾರೆ.

ಟೂರಿಸ್ಟ್ ಬಸ್ಸಿನ ಮೇಲೆ ಓಪನ್ನಾಗಿ ದಾವೂದ್ ವೈಭವೀಕರಣ, ಕೇರಳ ಪೊಲೀಸರು ಸೈಲೆಂಟ್, ಕರ್ನಾಟಕ ಪೊಲೀಸರಿಂದ ಕ್ರಮ, ಚಿಕ್ಕಮಗಳೂರಲ್ಲಿ ಬಸ್ ವಶಕ್ಕೆ

Kannadaprabha News — Sat, 07 Nov 2026 06:18:13 +0530

ಚಿಕ್ಕಮಗಳೂರು (ನ.7)- ಭೂಗತ ಪಾತಕಿ ದಾವೂದ್ ಇಬ್ರಾಹಿಂನನ್ನು ವೈಭವೀಕರಿಸುವ ರೀತಿಯ ಬರಹ ಹೊಂದಿದ್ದ ಕೇರಳ ಮೂಲದ ಪ್ರವಾಸಿ ಬಸ್ ವಿವಾದಕ್ಕೆ ಕಾರಣವಾಗಿದೆ. ಚಿಕ್ಕಮಗಳೂರಿನಲ್ಲಿ ಬಸ್ಸಿನ ಮೇಲೆ ‘Dawood Rise of Day’ ಹಾಗೂ ‘Emperor Strikes Again’ ಎಂಬ ಬರಹಗಳನ್ನು ಬರೆಯಲಾಗಿದ್ದು, ಇದು ದಾವೂದ್ ಇಬ್ರಾಹಿಂನನ್ನು ವೈಭವೀಕರಿಸುವ ಪ್ರಯತ್ನ ಎಂದು ಆಕ್ರೋಶ ವ್ಯಕ್ತಪಡಿಸಿದ ಹಿಂದೂಪರ ಸಂಘಟನೆಗಳ ಕಾರ್ಯಕರ್ತರು ಬಸ್ಸನ್ನು ಅಡ್ಡಗಟ್ಟಿದ್ದಾರೆ. ಚಿಕ್ಕಮಗಳೂರಿನಲ್ಲಿ ಬಸ್ಸನ್ನು ತಡೆದು ನಿಲ್ಲಿಸಿದ ಕಾರ್ಯಕರ್ತರು, ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಬಳಿಕ ಪೊಲೀಸರು ಬಸ್ಸನ್ನು ವಶಕ್ಕೆ ಪಡೆದು ಮುಂದಿನ ಕ್ರಮ ಕೈಗೊಂಡಿದ್ದಾರೆ.

ಇದನ್ನೂ ಓದಿ: ಭಾರತದ 'ಚಹಾ ರಾಜಧಾನಿ' ಯಾವುದು ಗೊತ್ತಾ? ಊಟಿ ಅಲ್ಲವೇ ಅಲ್ಲ, ಕರ್ನಾಟಕದಲ್ಲಿ ಬೆಳೆಯುತ್ತೆ ಈ ಸ್ಪೆಷಲ್ ಟೀ!

ತಮಿಳನಾಡಲ್ಲೂ ಈ ಹಿಂದೆ ಬರೆಯಲಾಗಿತ್ತು

ಆರು ತಿಂಗಳ ಹಿಂದೆಯೂ ತಮಿಳುನಾಡು ಮೂಲದ ಬಸ್ಸಿನಲ್ಲಿ ಇದೇ ರೀತಿ ವಿವಾದಾತ್ಮಕ ಬರಹ ಪತ್ತೆಯಾಗಿತ್ತು. ಇದೀಗ ಕೇರಳ ಮೂಲದ ಮತ್ತೊಂದು ಪ್ರವಾಸಿ ಬಸ್ಸಿನಲ್ಲೂ ದಾವೂದ್ ಇಬ್ರಾಹಿಂ ಹೆಸರನ್ನು ವೈಭವೀಕರಿಸುವ ಬರಹ ಕಂಡು ಬಂದಿರುವುದು ಸಾರ್ವಜನಿಕ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.

ಇದನ್ನೂ ಓದಿ: ಹುಬ್ಬಳ್ಳಿ-ಚಿಕ್ಕಮಗಳೂರು ವಿಶೇಷ ಎಕ್ಸ್‌ಪ್ರೆಸ್ ರೈಲು ಸೇವೆ ವಿಸ್ತರಣೆ; ಯಾರಾರಿಗೆ ಅನುಕೂಲ ಒಮ್ಮೆ ಚೆಕ್ ಮಾಡಿ

ಘಟನೆ ಕುರಿತು ಆಕ್ರೋಶ ವ್ಯಕ್ತಪಡಿಸಿದ ಬಿಜೆಪಿ ಯುವ ಮೋರ್ಚಾ ಅಧ್ಯಕ್ಷ ಸಂತೋಷ್ ಕೋಟ್ಯಾನ್, ಪೊಲೀಸ್ ಇಲಾಖೆ ಭದ್ರತಾ ವೈಫಲ್ಯ ಪ್ರಶ್ನಿಸಿದ್ದಾರೆ. ಹತ್ತಾರು ಚೆಕ್‌ಪೋಸ್ಟ್‌ಗಳನ್ನು ದಾಟಿ ಇಂತಹ ಬರಹ ಹೊಂದಿರುವ ಬಸ್ ಚಿಕ್ಕಮ ಗಳೂರಿಗೆ ಹೇಗೆ ಪ್ರವೇಶಿಸಿತು ಎಂದು ಪ್ರಶ್ನಿಸಿದ್ದಾರೆ.

ಹಾಸನಾಂಬೆ ದರ್ಶನದಲ್ಲಿ ಸಿದ್ದರಾಮಯ್ಯಗೆ ರಾಜಮರ್ಯಾದೆ, ಸಚಿವರ ಕಾರಿಗೆ ತಡೆ! ಜಿಲ್ಲಾಡಳಿತದ ನಡೆಗೆ ಪ್ರಶ್ನೆಗಳ ಸುರಿಮಳೆ

Kannadaprabha News — Sat, 07 Nov 2026 05:55:54 +0530

ಹಾಸನ (ನ.7): ಗಣ್ಯರಿಗೆ ಹಾಸನಾಂಬೆ ದರ್ಶನಕ್ಕೆ ಶಿಷ್ಟಾಚಾರದ ಸಮಯ ನಿಗದಿ ಮಾಡಿದ್ದರೂ, ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ವಿಚಾರದಲ್ಲಿ ಜಿಲ್ಲಾಡಳಿತ ವಿಫಲವಾಗಿದೆ. ಶಿಷ್ಟಾಚಾರದ ಹೆಸರಿನಲ್ಲಿ ಗಣ್ಯರ ದರ್ಶನಕ್ಕೆ ನಿರ್ದಿಷ್ಟ ಸಮಯ ನಿಗದಿಪಡಿಸಿರುವ ಜಿಲ್ಲಾಡಳಿತವೇ, ಅದೇ ನಿಯಮವನ್ನು ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ವಿಚಾರದಲ್ಲಿ ಪಾಲಿಸದೆ ವಿಶೇಷ ಅವಕಾಶ ಕಲ್ಪಿಸಿರುವುದು ಹಲವು ಪ್ರಶ್ನೆಗಳಿಗೆ ಎಡೆಮಾಡಿಕೊಟ್ಟಿದೆ.

ಶುಕ್ರವಾರ ಸಂಜೆ ಸುಮಾರು 6.30ರ ವೇಳೆಗೆ ಸಿದ್ದರಾಮಯ್ಯ ಅವರು ವಿಶೇಷ ವಾಹನದಲ್ಲಿ ಹಾಸನಾಂಬೆ ದೇವಸ್ಥಾನದ ಮುಖ್ಯ ದ್ವಾರದ ಮೂಲಕವೇ ಒಳಪ್ರವೇಶಿಸಿದರು. ₹1000 ವಿಶೇಷ ಟಿಕೆಟ್ ಪಡೆದು ದೇವಿಯ ದರ್ಶನಕ್ಕೆ ಆಗಮಿಸಿದ ಅವರಿಗೆ ಜಿಲ್ಲಾ ಉಸ್ತುವಾರಿ ಸಚಿವ ಕೆ.ಎಂ.ಶಿವಲಿಂಗೇಗೌಡ ಹಾಗೂ ಸಂಸದ ಶ್ರೇಯಸ್ ಎಂ. ಪಟೇಲ್ ಸಾಥ್ ನೀಡಿದರು. ಜಿಲ್ಲಾಡಳಿತದ ಅಧಿಕಾರಿಗಳು ಕೂಡ ಮಾಜಿ ಸಿಎಂರನ್ನು ಸ್ವಾಗತಿಸಿ ದರ್ಶನಕ್ಕೆ ವ್ಯವಸ್ಥೆ ಮಾಡಿದರು.

ಹಾಸನಾಂಬೆ ದರ್ಶನಕ್ಕೆ ಬಂದ ಸಚಿವರ ಕಾರು ತಡೆದ ಸಿಬ್ಬಂದಿ

ಇನ್ನೊಂದೆಡೆ ಹಾಸನಾಂಬ ದರ್ಶನಕ್ಕೆ ಬಂದ ಸಚಿವರ ಕಾರನ್ನೇ ಸಿಬ್ಬಂದಿ ತಡೆದಿದ್ದರಿಂದ ದರ್ಶನಕ್ಕೆ ನಡೆದುಕೊಂಡೇ ಹೋದ ಘಟನೆ ನಡೆಯಿತು.

ಹಾಸನಾಂಬೆ ದೇವಿಯ ದರ್ಶನಕ್ಕೆ ಗಣ್ಯರಿಗಾಗಿ ಮಾಡಲಾಗಿರುವ ಪ್ರೋಟೋಕಾಲ್‌ ವ್ಯವಸ್ಥೆಯನ್ನು ಬಿಟ್ಟು ತಮ್ಮದೇ ಸರ್ಕಾರಿ ಕಾರಿನಲ್ಲಿ ಹಾಸನಾಂಬೆ ದರ್ಶನಕ್ಕೆ ಆಗಮಿಸಿದ ಸಚಿವ ಪುಟ್ಟರಂಗಶೆಟ್ಟಿ ಅವರ ಕಾರನ್ನು ಭದ್ರತಾ ಸಿಬ್ಬಂದಿ ಒಳಗೆ ಬಿಡಲಿಲ್ಲ. ಕಾರಣ ಸಚಿವರು ಕಾರಿನಿಂದ ಇಳಿದು ನಡೆದುಕೊಂಡೇ ಹೋಗಿ ಹಾಸನಾಂಬೆ ದರ್ಶನ ಮಾಡಿದರು.

ಗಣ್ಯರಿಗೆ ಹಾಸನಾಂಬೆ ದರ್ಶನಕ್ಕೆಂದೇ ಜಿಲ್ಲಾಡಳಿತ ನಗರದಲ್ಲಿರುವ ಪ್ರವಾಸಿ ಮಂದಿರದಿಂದ ಪ್ರತ್ಯೇಕ ಪ್ರೋಟೋಕಾಲ್‌ ವ್ಯವಸ್ಥೆ ಮಾಡಿದೆ. ಆದರೆ, ಸಚಿವ ಪುಟ್ಟರಂಗಶೆಟ್ಟಿ ಅವರು ಪ್ರೋಟೋಕಾಲ್ ವ್ಯವಸ್ಥೆಯ ಮೂಲಕ ಆಗಮಿಸದೆ ನೇರವಾಗಿ ಸರ್ಕಾರಿ ವಾಹನದಲ್ಲಿ ದೇವಾಲಯದ ಮುಖ್ಯದ್ವಾರದ ಬಳಿಗೆ ಬಂದಿದ್ದರು. ಈ ವೇಳೆ ಭದ್ರತಾ ಸಿಬ್ಬಂದಿ ವಾಹನವನ್ನು ಒಳಗೆ ಬಿಡಲು ನಿರಾಕರಿಸಿದರು. ನಂತರ ಸಚಿವರು ಕಾರಿನಿಂದ ಇಳಿದು ನಡೆದುಕೊಂಡು ದೇಗುಲಕ್ಕೆ ತೆರಳಿದರು.

ವಾಹನದಲ್ಲಿರೋರು ಸಚಿವರೆಂದು ತಿಳಿಸಿದರೂ ಡೋಂಟ್ ಕೇರ್!

ಸಚಿವರ ವೈಯಕ್ತಿಕ ಸಹಾಯಕರು (ಪಿಎ) ವಾಹನದಲ್ಲಿರುವವರು ಸಚಿವರು ಎಂದು ಸಿಬ್ಬಂದಿಗೆ ತಿಳಿಸಿದರೂ, ಕರ್ತವ್ಯದಲ್ಲಿದ್ದ ಸಿಬ್ಬಂದಿ ತಮ್ಮ ನಿಯಮಗಳಿಂದ ಹಿಂದೆ ಸರಿಯದೆ ವಾಹನ ಪ್ರವೇಶಕ್ಕೆ ಅವಕಾಶ ನೀಡಲಿಲ್ಲ. ಇದರಿಂದಾಗಿ ಸಚಿವರು ವಾಹನದಿಂದ ಇಳಿದು ನಡೆದುಕೊಂಡೇ ದೇವಸ್ಥಾನದತ್ತ ತೆರಳಿದರು. ಬಳಿಕ ಹಾಸನಾಂಬೆ ದೇವಿಯ ದರ್ಶನ ಪಡೆದು ವಿಶೇಷ ಪೂಜೆ ಸಲ್ಲಿಸಿದರು.

ಹಾಸನಾಂಬೆ ಜಾತ್ರೆಯ ಸಂದರ್ಭದಲ್ಲಿ ಗಣ್ಯರು, ಜನಪ್ರತಿನಿಧಿಗಳು ಹಾಗೂ ಭಕ್ತರ ಸಂಚಾರಕ್ಕೆ ಕಟ್ಟುನಿಟ್ಟಿನ ಭದ್ರತಾ ವ್ಯವಸ್ಥೆ ಕಲ್ಪಿಸಲಾಗಿದ್ದು, ಸಿಬ್ಬಂದಿಯ ನಿಯಮ ಪಾಲನೆಗೆ ಇದು ಸ್ಪಷ್ಟ ಉದಾಹರಣೆಯಾಗಿದೆ.

ಜ.6 ರಿಂದ ಮತ್ಸಗಂಧ ಎಕ್ಸ್‌ಪ್ರೆಸ್‌ ಡೌನ್‌ಗ್ರೇಡ್‌: ಸೂಪರ್‌ಫಾಸ್ಟ್‌ ವರ್ಗದಿಂದ ಎಕ್ಸ್‌ಪ್ರೆಸ್‌ ವರ್ಗಕ್ಕೆ ಇಳಿಕೆ, ಟಿಕೆಟ್‌ ಬೆಲೆಯಲ್ಲೂ ಕಡಿತ

Santosh Naik — Sat, 07 Nov 2026 02:00:26 +0530

ಮಂಗಳೂರು (ನ.7): ಕರಾವಳಿ ಭಾಗದ ಪ್ರಮುಖ ರೈಲು ಸೇವೆಯಾದ ಮಂಗಳೂರು ಸೆಂಟ್ರಲ್ - ಮುಂಬೈ ಎಲ್‌ಟಿಟಿ (ಮಂಗಳೂರು ಸೆಂಟ್ರಲ್-ಮುಂಬೈ ಲೋಕಮಾನ್ಯ ತಿಲಕ್ ಟರ್ಮಿನಸ್) ನಡುವೆ ಸಂಚರಿಸುವ 'ಮತ್ಸ್ಯಗಂಧ ಎಕ್ಸ್‌ಪ್ರೆಸ್' ರೈಲನ್ನು ಸೂಪರ್‌ಫಾಸ್ಟ್ ವಿಭಾಗದಿಂದ ಸಾಮಾನ್ಯ ಮೇಲ್/ಎಕ್ಸ್‌ಪ್ರೆಸ್ ವಿಭಾಗಕ್ಕೆ ಶ್ರೇಣಿ ಕಡಿತಗೊಳಿಸಿ (Downgrade) ಭಾರತೀಯ ರೈಲ್ವೆ ಆದೇಶಿಸಿದೆ: ಈ ನೂತನ ಆದೇಶವು ಮುಂಬರುವ ಜನವರಿ 6 ರಿಂದ ಜಾರಿಗೆ ಬರಲಿದ್ದು, ಇದರಿಂದಾಗಿ ಪ್ರಯಾಣಿಕರು ಪ್ರತಿ ಟಿಕೆಟ್ ಮೇಲೆ ₹15 ರಿಂದ ₹45 ರವರೆಗೆ ಕಡಿಮೆ ದರ ಪಾವತಿಸಲಿದ್ದಾರೆ.

ಮಂಗಳೂರು ಸೆಂಟ್ರಲ್ ಹಾಗೂ ಮುಂಬೈ ನಡುವೆ ಸಂಚರಿಸುವ ಮತ್ಸ್ಯಗಂಧ ಎಕ್ಸ್‌ಪ್ರೆಸ್ ರೈಲು ನಿಗದಿತ ಗಂಟೆಗೆ 55 ಕಿಲೋಮೀಟರ್‌ಗಳ ಸರಾಸರಿ ವೇಗವನ್ನು ಕಾಯ್ದುಕೊಳ್ಳಲು ವಿಫಲವಾಗಿದ್ದರೂ, ರೈಲ್ವೆ ಇಲಾಖೆಯು ಸೂಪರ್‌ಫಾಸ್ಟ್ ಹೆಸರಿನಲ್ಲಿ ಪ್ರಯಾಣಿಕರಿಂದ ಹೆಚ್ಚುವರಿ ಶುಲ್ಕ ವಸೂಲಿ ಮಾಡುತ್ತಿದೆ ಎಂದು ಪ್ರಯಾಣಿಕರು ಹಾಗೂ ರೈಲು ಹಿತರಕ್ಷಣಾ ಸಂಘಟನೆಗಳು ನಿರಂತರವಾಗಿ ಪ್ರಶ್ನಿಸುತ್ತಿದ್ದವು. ಈ ಹೋರಾಟಕ್ಕೆ ಇದೀಗ ಫಲ ಸಿಕ್ಕಿದೆ.

ಶ್ರೇಣಿ ಕಡಿತಕ್ಕೆ ಕಾರಣವೇನು? ವೇಗದ ಲೆಕ್ಕಾಚಾರ

ರೈಲ್ವೆ ನಿಯಮಾವಳಿಗಳ ಪ್ರಕಾರ, ರೈಲೊಂದನ್ನು 'ಸೂಪರ್‌ಫಾಸ್ಟ್ ಎಕ್ಸ್‌ಪ್ರೆಸ್' ಎಂದು ಪರಿಗಣಿಸಲು ಅದು ಗಂಟೆಗೆ ಕನಿಷ್ಠ 55 ಕಿ.ಮೀ ಸರಾಸರಿ ವೇಗವನ್ನು ಹೊಂದಿರಬೇಕು. ಆದರೆ ಮತ್ಸ್ಯಗಂಧ ಎಕ್ಸ್‌ಪ್ರೆಸ್‌ನ ಲೆಕ್ಕಾಚಾರ ಹೀಗಿದೆ: ರೈಲು ಸಂಖ್ಯೆ 12619 (ಮುಂಬೈ LTT - ಮಂಗಳೂರು ಸೆಂಟ್ರಲ್) ಮುಂಗಾರು ರಹಿತ (Non-monsoon) ವೇಳಾಪಟ್ಟಿಯಲ್ಲಿ ಗಂಟೆಗೆ 53 ಕಿ.ಮೀ ಸರಾಸರಿ ವೇಗ ಹೊಂದಿದೆ. ರೈಲು ಸಂಖ್ಯೆ 12620 (ಮಂಗಳೂರು ಸೆಂಟ್ರಲ್ - ಮುಂಬೈ LTT) ಮುಂಗಾರು ರಹಿತ ವೇಳಾಪಟ್ಟಿಯಲ್ಲಿ ಗಂಟೆಗೆ 54 ಕಿ.ಮೀ ಸರಾಸರಿ ವೇಗ ಹೊಂದಿದೆ. ಮಳೆಗಾಲದ ವೇಳಾಪಟ್ಟಿಯಲ್ಲಿ (Monsoon Timetable) ಇವೆರಡೂ ರೈಲುಗಳ ಸರಾಸರಿ ವೇಗ ಅನುಕ್ರಮವಾಗಿ ಗಂಟೆಗೆ 50 ಕಿ.ಮೀ ಮತ್ತು 52 ಕಿ.ಮೀ ಗೆ ಕುಸಿಯುತ್ತದೆ. ಹೀಗಾಗಿ ಸರಾಸರಿ ವೇಗದ ಮಾನದಂಡ ತಲುಪದಿದ್ದರೂ ಸೂಪರ್‌ಫಾಸ್ಟ್ ಹೆಚ್ಚುವರಿ ಶುಲ್ಕವನ್ನು ಮೂಲ ದರದ ಜೊತೆ ವಿಧಿಸಲಾಗುತ್ತಿತ್ತು. ಇದನ್ನು ತೆರವುಗೊಳಿಸುವಂತೆ ಪ್ರಯಾಣಿಕರ ಸಂಘಟನೆಗಳು ತೀವ್ರವಾಗಿ ಒತ್ತಾಯಿಸಿದ್ದವು.

ಪ್ರಯಾಣಿಕರಿಗೆ ಸಿಗಲಿದೆ ದರ ವಿನಾಯಿತಿ (Superfast Charges Saved)

ಸಾಮಾನ್ಯವಾಗಿ ಭಾರತೀಯ ರೈಲ್ವೆಯು ಸೂಪರ್‌ಫಾಸ್ಟ್ ರೈಲುಗಳಿಗೆ ಮೂಲ ದರದ ಜೊತೆಗೆ ಹೆಚ್ಚುವರಿಯಾಗಿ ಜನರಲ್ ಸೆಕೆಂಡ್ ಕ್ಲಾಸ್‌ಗೆ ₹15, ಸ್ಲೀಪರ್ ಕ್ಲಾಸ್‌ಗೆ (Sleeper) ₹30, 3 ಟೈರ್ ಎಸಿ/ಎಕಾನಮಿ ಮತ್ತು 2-ಟೈರ್ ಎಸಿ ಕ್ಲಾದ್‌ಗೆ ₹45 ಮತ್ತು ಫಸ್ಟ್ ಎಸಿ (1st AC) ಕ್ಲಾಸ್‌ಗೆ ₹75 ಹೆಚ್ಚುವರಿ ಶುಲ್ಕ ವಿಧಿಸುತ್ತದೆ. ಜನವರಿ 6 ರಿಂದ ಮತ್ಸ್ಯಗಂಧ ರೈಲಿನ ಸೂಪರ್‌ಫಾಸ್ಟ್ ಟ್ಯಾಗ್ ರದ್ದಾಗುತ್ತಿರುವುದರಿಂದ ಪ್ರಯಾಣಿಕರು ಈ ಹೆಚ್ಚುವರಿ ಶುಲ್ಕದಿಂದ ವಿನಾಯಿತಿ ಪಡೆಯಲಿದ್ದಾರೆ.

ರೈಲು ಸಂಖ್ಯೆ ಬದಲಾವಣೆ ಮತ್ತು ನೆಟ್‌ವರ್ಕ್ ವಿವರ

ನೈಋತ್ಯ ರೈಲ್ವೆ (SWR) ಹೊರಡಿಸಿರುವ ಪ್ರಕಟಣೆಯ ಪ್ರಕಾರ, ಜನವರಿ 6 ರಿಂದ ಜಾರಿಗೆ ಬರುವಂತೆ ರೈಲು ಸಂಖ್ಯೆ 12619/12620 ಅನ್ನು ರದ್ದುಗೊಳಿಸಿ, ನೂತನ ರೈಲು ಸಂಖ್ಯೆ 16369/16370 ಎಂದು ಮರುನಾಮಕರಣ ಮಾಡಲಾಗುತ್ತದೆ. ಈ ರೈಲು ದಕ್ಷಿಣ ರೈಲ್ವೆಯ ತಿರುವನಂತಪುರಂ ವಿಭಾಗದ ಒಡೆತನದಲ್ಲೇ ಮುಂದುವರಿಯಲಿದೆ. ಏಕೆಂದರೆ ಈ ರೈಲು, ತಿರುವನಂತಪುರಂ ಸೆಂಟ್ರಲ್ - ಮಂಗಳೂರು ಸೆಂಟ್ರಲ್ - ತಿರುವನಂತಪುರಂ ಎಕ್ಸ್‌ಪ್ರೆಸ್ (ರೈಲು ಸಂಖ್ಯೆ 16347/16348) ಜೊತೆಗೆ ರೇಕ್ ಶೇರಿಂಗ್ (Rake Sharing) ವ್ಯವಸ್ಥೆಯನ್ನು ಹೊಂದಿದೆ.

ಗರೀಬ್ ರಥ್ ಎಕ್ಸ್‌ಪ್ರೆಸ್ ಸಂಖ್ಯೆ ಬದಲಾವಣೆ ದಿನಾಂಕ ಮಾರ್ಪಾಡು

ಇದೇ ಪ್ರಕಟಣೆಯಲ್ಲಿ ರೈಲ್ವೆ ಇಲಾಖೆಯು ಮತ್ತೊಂದು ಪ್ರಮುಖ ಮಾಹಿತಿಯನ್ನು ಹಂಚಿಕೊಂಡಿದೆ. ಮುಂಬೈ LTT - ತಿರುವನಂತಪುರಂ ನಾರ್ತ್ - ಮುಂಬೈ LTT ನಡುವೆ ಸಂಚರಿಸುವ ವಾರಕ್ಕೊಮ್ಮೆಯ ಗರೀಬ್ ರಥ್ ಎಕ್ಸ್‌ಪ್ರೆಸ್ (ರೈಲು ಸಂಖ್ಯೆ 12201) ಅನ್ನು ನೂತನ ರೈಲು ಸಂಖ್ಯೆ 16371 ಎಂದು ಬದಲಾಯಿಸಲಾಗುತ್ತಿದ್ದು, ಈ ಹಿಂದೆ ಜನವರಿ 1 ರಿಂದ ಜಾರಿಗೆ ಬರಲಿದೆ ಎಂದು ಪ್ರಕಟಿಸಲಾಗಿತ್ತು. ಆದರೆ, ಈ ಬದಲಾವಣೆಯು ಇದೀಗ ಜನವರಿ 4 ರಿಂದ ಜಾರಿಗೆ ಬರಲಿದೆ ಎಂದು ನೈಋತ್ಯ ರೈಲ್ವೆ ಪತ್ರಿಕಾ ಪ್ರಕಟಣೆಯಲ್ಲಿ ಸ್ಪಷ್ಟಪಡಿಸಿದೆ.

ಗೋವಾ ಚೀಪ್ ರೇಟ್ ಎಣ್ಣೆ ಸಾಗಿಸಲು ಲಾರಿಯಲ್ಲಿತ್ತು ರಹಸ್ಯ ಕೋಣೆ; 267 ಲೀ. ಮದ್ಯ ಜಪ್ತಿ ಮಾಡಿದ ಅಬಕಾರಿ ಇಲಾಖೆ!

Sathish Kumar KH — Fri, 06 Nov 2026 22:54:45 +0530

ಉತ್ತರಕನ್ನಡ (ನ.06): ಗೋವಾದಿಂದ ರಾಜ್ಯಕ್ಕೆ ಅಕ್ರಮವಾಗಿ ಮದ್ಯ ಸಾಗಿಸುತ್ತಿದ್ದ ಭಾರಿ ಜಾಲವೊಂದನ್ನು ಅಬಕಾರಿ ಇಲಾಖೆ ಅಧಿಕಾರಿಗಳು ಭೇದಿಸಿದ್ದಾರೆ. ಉತ್ತರಕನ್ನಡ ಜಿಲ್ಲೆಯ ಜೊಯಿಡಾ ತಾಲೂಕಿನ ಗಡಿ ಭಾಗದಲ್ಲಿರುವ ಅನಮೋಡ್ ಪರಿಶೀಲನಾ ಠಾಣೆ (Anamod Checkpost) ಬಳಿ ನಡೆಸಿದ ಕಾರ್ಯಾಚರಣೆಯಲ್ಲಿ ಲಾರಿಯಲ್ಲಿ ಬೀರಲಾಗಿದ್ದ ಬೃಹತ್ ಪ್ರಮಾಣದ ಗೋವಾ ಮದ್ಯವನ್ನು ಜಪ್ತಿ ಮಾಡಲಾಗಿದೆ.

ಖಚಿತ ಮಾಹಿತಿ ಆಧರಿಸಿ ದಾಳಿ ನಡೆಸಿದ ಅಬಕಾರಿ ಇಲಾಖೆ ಸಿಬ್ಬಂದಿ, ₹1.20 ಲಕ್ಷ ಮೌಲ್ಯದ 267 ಲೀಟರ್ ಗೋವಾ ಮದ್ಯವನ್ನು ವಶಪಡಿಸಿಕೊಂಡಿದ್ದು, ಕೃತ್ಯಕ್ಕೆ ಬಳಸಿದ್ದ ತಮಿಳುನಾಡು ನೋಂದಾಯಿತ ಲಾರಿಯನ್ನು ಜಪ್ತಿ ಮಾಡಿ ಓರ್ವ ಆರೋಪಿಯನ್ನು ಬಂಧಿಸಿದ್ದಾರೆ.

ಲಾರಿಯಲ್ಲಿ ರಹಸ್ಯ ಕಂಪಾರ್ಟ್‌ಮೆಂಟ್!

ಆರೋಪಿಯು ಅಬಕಾರಿ ಅಧಿಕಾರಿಗಳ ಕಣ್ಣಿಗೆ ಮಣ್ಣೆರಚಿ ಗೋವಾದಿಂದ ಮದ್ಯವನ್ನು ಸಾಗಿಸಲು ಲಾರಿಯೊಳಗೆ ವಿಶೇಷವಾದ ರಹಸ್ಯ ಕಂಪಾರ್ಟ್‌ಮೆಂಟ್ (Special Hidden Compartment) ಒಂದನ್ನು ನಿರ್ಮಿಸಿಕೊಂಡಿದ್ದ. ಸಾಮಾನ್ಯ ತಪಾಸಣೆ ವೇಳೆ ಮದ್ಯದ ಬಾಟಲಿಗಳು ಕಣ್ಣಿಗೆ ಬೀಳದಂತೆ ಅತ್ಯಂತ ಚಾಲಾಕಿತನದಿಂದ ವಿನ್ಯಾಸಗೊಳಿಸಲಾಗಿತ್ತು. ಆದರೆ, ಅಬಕಾರಿ ಸಿಬ್ಬಂದಿಗೆ ಮದ್ಯ ಸಾಗಾಣಿಕೆಯ ಕುರಿತು ಮುಂಚಿತವಾಗಿಯೇ ಖಚಿತ ಮಾಹಿತಿ ದೊರೆತಿದ್ದರಿಂದ ಅನಮೋಡ್ ಚೆಕ್‌ಪೋಸ್ಟ್‌ನಲ್ಲಿ ಲಾರಿ ಬಿದ್ದ ತಕ್ಷಣವೇ ಕೂಲಂಕಷವಾಗಿ ತಪಾಸಣೆ ನಡೆಸಲಾಯಿತು. ಈ ವೇಳೆ ರಹಸ್ಯ ಜಾಗದಲ್ಲಿ ಬಾಂಕ್ಸ್ ಹಾಗೂ ಬಾಟಲಿಗಳಲ್ಲಿ ಬೀರಲಾಗಿದ್ದ 267 ಲೀಟರ್ ಅಕ್ರಮ ಗೋವಾ ಮದ್ಯ ಪತ್ತೆಯಾಗಿದೆ.

ಲಾರಿ ಜಪ್ತಿ, ಆರೋಪಿ ಬಂಧನ

ಘಟನೆಗೆ ಸಂಬಂಧಿಸಿದಂತೆ ಅಬಕಾರಿ ಸಿಬ್ಬಂದಿ ತಮಿಳುನಾಡು ಮೂಲದ ಲಾರಿಯನ್ನು ವಶಕ್ಕೆ ಪಡೆದಿದ್ದು, ಚಾಲಕ/ಆರೋಪಿಯನ್ನು ಬಂಧಿಸಿ ವಿಚಾರಣೆಗೆ ಒಳಪಡಿಸಿದ್ದಾರೆ. ವಶಪಡಿಸಿಕೊಂಡ ಮದ್ಯದ ಒಟ್ಟು ಮೌಲ್ಯ ಅಂದಾಜು ₹1.20 ಲಕ್ಷ ಎಂದು ತಿಳಿದುಬಂದಿದೆ. ಗಡಿ ಭಾಗಗಳಲ್ಲಿ ಅಕ್ರಮ ಮದ್ಯ ಹಾಗೂ ಮಾದಕ ವಸ್ತುಗಳ ಸಾಗಾಣಿಕೆ ತಡೆಯಲು ಅಬಕಾರಿ ಇಲಾಖೆ ಮತ್ತು ಪೊಲೀಸರು ಕಟ್ಟುನಿಟ್ಟಿನ ನಿಗಾ ವಹಿಸಿದ್ದು, ಚೆಕ್‌ಪೋಸ್ಟ್‌ನಲ್ಲಿ ತಪಾಸಣೆಯನ್ನು ಮತ್ತಷ್ಟು ಬಿಗಿಗೊಳಿಸಲಾಗಿದೆ. ಈ ಕುರಿತು ಅಬಕಾರಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.

ಕಾಂಗ್ರೆಸ್ ಕಾರ್ಯಕರ್ತರೇ ಮತ್ತೆ ದೆಹಲಿಗೆ ತೆರಳಲು ಸಜ್ಜಾಗಿ, ನ.26ಕ್ಕೆ ರಾಜಧಾನಿಯಲ್ಲಿ ರಣಕಹಳೆ

Chethan Kumar — Fri, 06 Nov 2026 22:46:38 +0530

ನವದೆಹಲಿ (ನ.06) ಚುನಾವಣಾ ಆಯುಕ್ತ ಗ್ಯಾನೇಶ್ ಕುಮಾರ್, ಪ್ರಧಾನಿ ನರೇಂದ್ರ ಮೋದಿ ಹಾಗೂ ಅಮಿತ್ ಶಾ ವಿರುದ್ಧ ಕಾಂಗ್ರೆಸ್ ಹಾಗೂ ವಿಪಕ್ಷಗಳು ವೋಟ್ ಚೋರಿ ಹೋರಾಟ ನಡೆಸಿದೆ. ನವೆಂಬರ್ 1ರಂದು ರಾಮಲೀಲಾ ಮೈದಾನದಲ್ಲಿ ಬೃಹತ್ ಪ್ರತಿಭಟನಾ ಹೋರಾಟ ನಡೆಸಿತ್ತು. ಇದೀಗ ದೆಹಲಿಯಲ್ಲಿ ಮತ್ತೊಂದು ಬೃಹತ್ ಹೋರಾಟಕ್ಕೆ ಕಾಂಗ್ರೆಸ್ ಸಜ್ಜಾಗಿದೆ. ಇಂದು ರಾಹುಲ್ ಗಾಂಧಿ ಆಯೋಜಿಸಿದ್ದ ದೀಪಾವಳಿ ಮಿಲನ್ ಚಹಾ ಕೂಟ ಕಾರ್ಯಕ್ರಮದಲ್ಲಿ ಪ್ರಮುಖ ನಿರ್ಧಾರವೊಂದು ಹೊರಬಿದ್ದಿದೆ.

ನವೆಂಬರ್ 26ಕ್ಕೆ ಬೃಹತ್ ಹೋರಾಟ

ಬಿಜೆಪಿ ಪ್ರಜಾಪ್ರಭುತ್ವ ಉಳಿಸಿ ಅರಾಜಕತೆ ಅಳಿಸಿ ಹೋರಾಟಕ್ಕೆ ಪ್ರತಿಯಾಗಿ ಕಾಂಗ್ರೆಸ್ ಭಾರಿ ಹೋರಾಟ ರೂಪಿಸುತ್ತಿದೆ. ರಾಷ್ಟ್ರ ರಾಜಧಾನಿಯಲ್ಲಿ ಬೃಹತ್ ರಣ ಕಹಳೆ ಮೊಳಗಿಸಲು ವಿಪಕ್ಷಗಳು ಸಜ್ಜಾಗುತ್ತಿದೆ. ಸಂವಿಧಾನ ಬಚಾವೋ ಹೋರಾಟಕ್ಕೆ ನೇತೃತ್ವ ವಹಿಸಲು ಕಾಂಗ್ರೆಸ್ ಸಜ್ಜಾಗಿದೆ. ನವೆಂಬರ್ 26ಕ್ಕೆ ದೆಹಲಿಯಲ್ಲಿ ಸಂವಿಧಾನ ಬಚಾವೋ ಹೋರಾಟದ ಕುರಿತು ಇಂದಿನ ಚಹಾ ಕೂಟದಲ್ಲಿ ನಾಯಕರು ಚರ್ಚಿಸಿದ್ದಾರೆ. ಕಾಂಗ್ರೆಸ್ ಕಾರ್ಯಕರ್ತರು ದೆಹಲಿಗೆ ಬರಲು ಸಜ್ಜು ಮಾಡುವಂತೆ ಉಸ್ತುವಾರಿ ಗಳಿಗೆ, ಪಿಸಿಸಿ ಗಳಿಗೆ ಸೂಚನೆ ನೀಡಲಾಗಿದೆ. ದೆಹಲಿಗೆ ಬರುವ ಕಾರ್ಯಕರ್ತರಿಗೆ ಅಗತ್ಯ ಸೌಕರ್ಯಗಳನ್ನು ಒದಗಿಸಲು ಸೂಚಿಸಲಾಗಿದೆ.

ಮೋದಿ ಸರ್ಕಾರದ ವಿರುದ್ದ ಸಮರ

ಮೋದಿ ಸರ್ಕಾರ ಸಂವಿಧಾನ ಬದ್ಧವಾಗಿ ನಡೆದುಕೊಳ್ಳುತ್ತಿಲ್ಲ. ಸಾಂವಿಧಾನಿಕ ಸಂಸ್ಥೆಗಳನ್ನು ತಮ್ಮ ಕಪಿಮುಷ್ಠಿಯಲ್ಲಿಟ್ಟಿದ್ದಾರೆ. ಚುನಾವಣಾ ಆಯೋಗ ಮುಖ್ಯ ಆಯುಕ್ತ ಗ್ಯಾನೇಶ್ ಕುಮಾರ್ ಮೂಲಕ ಬಿಜಿಪಿ ಮತ ಕಳ್ಳತನ ಮಾಡುತ್ತಿದೆ. ಸಾಂವಿಧಾನಿಕ ಸಂಸ್ಥೆಯನ್ನು ತನ್ನ ಕೈಗೊಂಬೆಯಂತೆ ಆಡಿಸುತ್ತಿದ್ದಾರೆ. ಹೀಗಾಗಿ ಬಿಜೆಪಿಯಿಂದ, ನರೇಂದ್ರ ಮೋದಿ, ಅಮಿತ್ ಶಾರಿಂದ ಈ ದೇಶವನ್ನು ಸಂವಿಧಾನವನ್ನು ರಕ್ಷಿಸಬೇಕಿದೆ. ಹೀಗಾಗಿ ಸಂವಿದಾನ ಬಚಾವೋ ಹೋರಾಟ ಅತ್ಯಗತ್ಯ ಅನ್ನೋ ಅಭಿಪ್ರಾಯಗಳು ಇಂದಿನ ದೀಪಾವಳಿ ಮಲಿನ್ ಚಹಾ ಕೂಟದಲ್ಲಿ ವ್ಯಕ್ತವಾಗಿದೆ.

ಸ್ವಾತಂತ್ರ್ಯಾ ನಂತರ ಕಾಂಗ್ರೆಸ್ ದೇಶದಲ್ಲಿ ಸಂವಿಧಾನ ಉಳಿಸಿಕೊಂಡು ಬರುತ್ತಿದೆ. ಆದರೆ ಕಳೆದ 10 -12 ವರ್ಷದಲ್ಲಿ ಮೋದಿ ಸರ್ಕಾರ ಸಂವಿಧಾನ ಆಶಯಗಳಿಗೆ ವಿರುದ್ಧವಾಗಿ ಆಡಳಿತ ನಡೆಸುತ್ತಿದೆ. ಜನರ ಆಕ್ರೋಶಕ್ಕೆ ಧನಿಯಾಗುವ ಮೂಲಕ ಮೋದಿ ವಿರುದ್ಧ ಪ್ರಬಲ ಅಸ್ತ್ರ ಪ್ರಯೋಗಿಸಬೇಕು ಅನ್ನೋ ಮಾತುಗಳು ಇಂದಿನ ಚಹಾಕೂಟದಲ್ಲಿ ವ್ಯಕ್ತವಾಗಿದೆ.

ನವೆಂಬರ್ 1ರಂದು ಕಾಂಗ್ರೆಸ್ ಸೇರಿದಂತೆ ಪ್ರತಿಪಕ್ಷಗಳು ನಡೆಸಿದ ಪ್ರತಿಭಟನೆ ಯಶಸ್ವಿಯಾಗಿದೆ ಎಂದು ಕಾಂಗ್ರೆಸ್ ಹೇಳಿಕೊಂಡಿದೆ. ಇದರ ಬೆನ್ನಲ್ಲೇ ಮತ್ತೊಮ್ಮೆ ಮೋದಿ ಸರ್ಕಾರದ ವಿರುದ್ಧ ಹೋರಾಟಕ್ಕೆ ಕಾಂಗ್ರೆಸ್ ಸಜ್ಜಾಗಿದೆ. ಈ ಬಾರಿ ಹೆಚ್ಚಿನ ಸಂಖ್ಯೆಯಲ್ಲಿ ಕಾರ್ಯಕರ್ತರು ದೆಹಲಿಯಲ್ಲಿ ಸೇರುವ ಸಾಧ್ಯತೆ ಇದೆ.

ಬೆಂಗಳೂರು ಕಲ್ಟ್ ಫಿಟ್ ಜಿಮ್‌ಗೆ ₹30,000 ಫೈನ್ ಹಾಕಿದ ಪಾಲಿಕೆ! ಮಾರ್ಷಲ್‌ಗಳಿಂದ ದಂಡ ವಸೂಲಿ

Sathish Kumar KH — Fri, 06 Nov 2026 22:34:04 +0530

ಬೆಂಗಳೂರು (ನ.06): ನಗರದಲ್ಲಿ ಸ್ವಚ್ಛತೆ ಹಾಗೂ ನೈರ್ಮಲ್ಯ ಕಾಪಾಡುವ ಉದ್ದೇಶದಿಂದ ಬೆಂಗಳೂರು ದಕ್ಷಿಣ ನಗರ ಪಾಲಿಕೆ ವ್ಯಾಪ್ತಿಯಲ್ಲಿ ‘ತ್ಯಾಜ್ಯದಿಂದ ಸ್ವಾತಂತ್ರ್ಯ’ ಅಭಿಯಾನವನ್ನು ನಿರಂತರವಾಗಿ ನಡೆಸಲಾಗುತ್ತಿದೆ. ಈ ಕಾರ್ಯಾಚರಣೆಯ ಭಾಗವಾಗಿ ಘನತ್ಯಾಜ್ಯ ನಿರ್ವಹಣೆ ನಿಯಮ ಉಲ್ಲಂಘಿಸಿದ ಪ್ರಸಿದ್ಧ ಫಿಟ್‌ನೆಸ್ ಸಂಸ್ಥೆ ‘ಕಲ್ಟ್ ಫಿಟ್’ (CULT.FIT LTD) ಸೇರಿದಂತೆ ವಾಣಿಜ್ಯ ಮಳಿಗೆಗಳಿಗೆ ಪಾಲಿಕೆ ಮಾರ್ಷಲ್‌ಗಳು ಒಟ್ಟು ₹35,000 ದಂಡ ವಿಧಿಸಿದ್ದಾರೆ.

ಬೃಹತ್ ತ್ಯಾಜ್ಯ ಉತ್ಪಾದಕರು ಹಾಗೂ ವಾಣಿಜ್ಯ ಸಂಸ್ಥೆಗಳು ತ್ಯಾಜ್ಯವನ್ನು ಮೂಲದಲ್ಲೇ ವೈಜ್ಞಾನಿಕವಾಗಿ ವಿಂಗಡಿಸಬೇಕು ಮತ್ತು ಏಕಬಳಕೆಯ ಪ್ಲಾಸ್ಟಿಕ್ ಸಂಪೂರ್ಣವಾಗಿ ನಿಷೇಧಿಸಬೇಕು ಎಂಬ ಕಟ್ಟುನಿಟ್ಟಿನ ಮಾರ್ಗಸೂಚಿಯಿದ್ದರೂ, ನಿಯಮ ಪಾಲಿಸದ ಸಂಸ್ಥೆಗಳ ವಿರುದ್ಧ ಈ ಕಠಿಣ ಕ್ರಮ ಕೈಗೊಳ್ಳಲಾಗಿದೆ.

ಎಚ್‌ಎಸ್‌ಆರ್ ಲೇಔಟ್‌ ಕಲ್ಟ್ ಫಿಟ್‌ಗೆ ₹30,000 ದಂಡ!

ಪಾಲಿಕೆ ಅಧಿಕಾರಿಗಳು ಮತ್ತು ಮಾರ್ಷಲ್‌ಗಳ ತಂಡವು ಎಚ್‌ಎಸ್‌ಆರ್ ಲೇಔಟ್ (HSR Layout) ಸೆಕ್ಟರ್ 3ರಲ್ಲಿರುವ ‘ಕಲ್ಟ್ ಫಿಟ್’ ಸಂಸ್ಥೆಯಲ್ಲಿ ತಪಾಸಣೆ ನಡೆಸಿದಾಗ ಅಸಮರ್ಪಕ ತ್ಯಾಜ್ಯ ನಿರ್ವಹಣೆ ಬೆಳಕಿಗೆ ಬಂದಿದೆ. ಸಂಸ್ಥೆಯು ಉತ್ಪತ್ತಿಯಾಗುವ ಕಸವನ್ನು ಹಸಿ ಮತ್ತು ಒಣ ಕಸವಾಗಿ ಪ್ರತ್ಯೇಕಿಸದೆ, ಅವೈಜ್ಞಾನಿಕವಾಗಿ ಮಿಶ್ರ ತ್ಯಾಜ್ಯ ವಿಲೇವಾರಿ ಮಾಡುತ್ತಿರುವುದು ಪತ್ತೆಯಾಗಿದೆ. ಬೃಹತ್ ತ್ಯಾಜ್ಯ ಉತ್ಪಾದಕರ ನಿಯಮಾವಳಿಗಳನ್ನು ಗಾಳಿಗೆ ತೂರಿದ್ದಕ್ಕಾಗಿ ಪಾಲಿಕೆ ಮಾರ್ಷಲ್‌ಗಳು ಕಲ್ಟ್ ಫಿಟ್ ಸಂಸ್ಥೆಗೆ ₹30,000 ಭಾರಿ ದಂಡ ವಿಧಿಸಿ ತಕ್ಷಣವೇ ವಸೂಲಿ ಮಾಡಿದ್ದಾರೆ.

'ಈ ಕಾವೀ ರೆಸ್ಟೋರೆಂಟ್‌'ಗೂ ಬಿತ್ತು ದಂಡದ ಬಿಸಿ

ಮತ್ತೊಂದೆಡೆ, ಜೆ.ಪಿ. ನಗರ 5ನೇ ಫೇಸ್ ವ್ಯಾಪ್ತಿಯ ಹೊರವರ್ತುಲ ರಸ್ತೆಯಲ್ಲಿರುವ ‘ಈ ಕಾವೀ ರೆಸ್ಟೋರೆಂಟ್’ (EE KAVII RESTAURANT) ಮೇಲೆಯೂ ತಪಾಸಣೆ ನಡೆಸಲಾಯಿತು. ಅಲ್ಲಿ ನಿಯಮಬಾಹಿರವಾಗಿ ಏಕಬಳಕೆಯ ನಿಷೇಧಿತ ಪ್ಲಾಸ್ಟಿಕ್ (SUPs) ಬಳಸುತ್ತಿರುವುದು ಕಂಡುಬಂದಿದ್ದರಿಂದ ಜಯನಗರ ವಿಭಾಗದ ಕಿರಿಯ ಆರೋಗ್ಯ ಪರಿವೀಕ್ಷಕರು ರೆಸ್ಟೋರೆಂಟ್‌ಗೆ ₹5,000 ದಂಡ ವಿಧಿಸಿದರು. ಈ ಎರಡು ಪ್ರತ್ಯೇಕ ತಪಾಸಣೆಗಳ ಮೂಲಕ ಪಾಲಿಕೆ ಅಧಿಕಾರಿಗಳು ಒಟ್ಟಾರೆಯಾಗಿ ₹35,000 ದಂಡ ವಸೂಲಿ ಮಾಡಿ ಉಲ್ಲಂಘನೆ ಎಸಗಿದ ಸಂಸ್ಥೆಗಳಿಗೆ ಎಚ್ಚರಿಕೆ ನೀಡಿದ್ದಾರೆ.

ವೈಜ್ಞಾನಿಕ ತ್ಯಾಜ್ಯ ವಿಲೇವಾರಿಗೆ ಎಚ್ಚರಿಕೆ

ದಂಡ ವಿಧಿಸಿದ ಬಳಿಕ ಸಂಬಂಧಪಟ್ಟ ಸಂಸ್ಥೆಗಳ ಪ್ರತಿನಿಧಿಗಳಿಗೆ ತ್ಯಾಜ್ಯ ವಿಂಗಡಣೆಯ ಮಹತ್ವದ ಕುರಿತು ಅಧಿಕಾರಿಗಳು ಅರಿವು ಮೂಡಿಸಿದರು. ಪ್ರತಿಯೊಂದು ವಾಣಿಜ್ಯ ಸಂಸ್ಥೆಯು ಕಸವನ್ನು ಮೂಲದಲ್ಲೇ ಹಸಿ, ಒಣ ಹಾಗೂ ನೈರ್ಮಲ್ಯ ತ್ಯಾಜ್ಯವೆಂದು ಪ್ರತ್ಯೇಕಿಸಬೇಕು ಮತ್ತು ಪ್ಲಾಸ್ಟಿಕ್ ಬಳಕೆಯನ್ನು ಸಂಪೂರ್ಣವಾಗಿ ತ್ಯಜಿಸಬೇಕು ಎಂದು ಸೂಚಿಸಲಾಯಿತು.

ಈ ಕುರಿತು ಎಚ್ಚರಿಕೆ ನೀಡಿದ ಪಾಲಿಕೆ ಆಯುಕ್ತರಾದ ಶ್ರೀ ಕೆ.ಎನ್. ರಮೇಶ್ ಅವರು, ‘ಜಿಮ್‌ಗಳು, ಹೋಟೆಲ್‌ಗಳು, ರೆಸ್ಟೋರೆಂಟ್‌ಗಳು ಹಾಗೂ ಇತರೆ ವಾಣಿಜ್ಯ ಸಂಸ್ಥೆಗಳು ಕಡ್ಡಾಯವಾಗಿ ಘನತ್ಯಾಜ್ಯ ನಿರ್ವಹಣೆ ಮತ್ತು ಪ್ಲಾಸ್ಟಿಕ್ ನಿಷೇಧದ ನಿಯಮ ಪಾಲಿಸಬೇಕು. ನಗರದ ನೈರ್ಮಲ್ಯಕ್ಕೆ ಧಕ್ಕೆ ತರುವ ಸಂಸ್ಥೆಗಳ ವಿರುದ್ಧ ಯಾವುದೇ ಮುಲಾಜಿಲ್ಲದೆ ಕಠಿಣ ಕಾನೂನು ಕ್ರಮ ಹಾಗೂ ದಂಡ ವಿಧಿಸುವ ಪ್ರಕ್ರಿಯೆ ಮುಂದುವರಿಯಲಿದೆ’ ಎಂದು ಸ್ಪಷ್ಟಪಡಿಸಿದ್ದಾರೆ.

ಈ ಕಾರ್ಯಾಚರಣೆಯಲ್ಲಿ ಎಚ್‌ಎಸ್‌ಆರ್ ಲೇಔಟ್ ಹಾಗೂ ಜಯನಗರ ವಿಭಾಗದ ಮಾರ್ಷಲ್ ಸೂಪರ್‌ವೈಸರ್‌ಗಳು, ಕಿರಿಯ ಆರೋಗ್ಯ ಪರಿವೀಕ್ಷಕರು ಮತ್ತು ವಾರ್ಡ್ ಮಾರ್ಷಲ್‌ಗಳು ಉಪಸ್ಥಿತರಿದ್ದರು.

ದೇವಸ್ಥಾನಕ್ಕೆ ಹೋಗುತ್ತೇನೆ, ಹಾಸನಾಂಬ ದರ್ಶನ ಪಡೆದು ನಾನು ನಾಸ್ತಿಕನಲ್ಲ ಎಂದ ಸಿದ್ದರಾಮಯ್ಯ

Chethan Kumar — Fri, 06 Nov 2026 21:57:47 +0530

ಹಾಸನ (ನ.06) ಪವಿತ್ರ ಹಾಸನಾಂಬ ದರ್ಶನಕ್ಕೆ ರಾಜ್ಯದ ಮೂಲೆ ಮೂಲೆಗಳಿಂದ ಭಕ್ತರು ಆಗಮಿಸುತ್ತಿದ್ದಾರೆ. ಪ್ರತಿ ದಿನ ಸಾವಿರು ಭಕ್ತರು ಆಗಮಿಸಿ ದರ್ಶನ ಪಡೆಯುತ್ತಿದ್ದಾರೆ. ಇಂದು ಹಾಸನಾಂಬ ದರ್ಶನಕ್ಕೆ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಆಗಮಿಸಿದ್ದರು. ಹಾಸನಾಂಬ ದರ್ಶನ ಪಡೆದು ವಿಶೇಷ ಪೂಜೆ ಸಲ್ಲಿಸಿದ್ದಾರೆ. ಇದೇ ವೇಳೆ ಮಾತನಾಡಿದ ಸಿದ್ದರಾಮಯ್ಯ ನಾನು ದೇವಸ್ಥಾನಕ್ಕೆ ಹೋಗುತ್ತೇನೆ. ನಾಸ್ತಿನಕಲ್ಲ ಎಂದಿದ್ದಾರೆ.

ನಾನು ನಾಸ್ತಿಕನಲ್ಲ, ದೇವಸ್ಥಾನಕ್ಕೆ ಹೋಗುತ್ತೇನೆ

ಹಾಸನಾಂಬ ದರ್ಶನ ಪಡೆದ ಬಳಿಕ ಕ್ರೀಡೋತ್ಸವದಲ್ಲಿ ಪಾಲ್ಗೊಂಡ ಸಿದ್ದರಾಮಯ್ಯ ಭಾಷಣ ಮಾಡಿದ್ದಾರೆ. ನಾನು ನಾಲ್ಕು ಬಾರಿ ಹಾಸನಾಂಬೆ ದರ್ಶನ ಪಡೆದಿದ್ದೇನೆ. ಮುಖ್ಯಮಂತ್ರಿ ಆಗಿ ಮೂರು ಬಾರಿ ಈಗ ಒಂದು ಬಾರಿ ದರ್ಶನ ಪಡೆದಿದ್ದೇನೆ. ನನ್ನನ್ನ ನಾಸ್ತಿಕ ಯಾಕೆ ದೇವಸ್ಥಾನಕ್ಕೆ ಹೋಗುತ್ತಾನೆ ಎಂದು ಪ್ರಶ್ನಿಸಿದ್ದರು. ನಾನು ನಾಸ್ತಿಕ ಅಲ್ಲ, ದೇವಸ್ಥಾನಕ್ಕೆ ಹೋಗುತ್ತೇನೆ. ಆದರೆ ಹೆಚ್ಚಿಲ್ಲ, ಆದರೆ ದೇವಸ್ಥಾನಕ್ಕೆ ಹೋಗುವುದು ಕಡಿಮೆ. ದೇವನೊಬ್ಬ ನಾಮ ಹಲವು ಎಂದು ಸಿದ್ದರಾಮಯ್ಯ ಹೇಳಿದ್ದಾರೆ.

ಹಾಸನಾಂಬ ದರ್ಶನ ಪಡೆದು ದೇವರಲ್ಲಿ ಪ್ರಾರ್ಥಿಸಿದ್ದೇನೆ. ರಾಜ್ಯಕ್ಕೆ, ಜನರಿಗೆ, ನನಗೂ ಒಳ್ಳೆಯದಾಗಲಿ ಅಂತ ಪ್ರಾರ್ಥಿಸಿದ್ದೇನೆ. ಮೈಸೂರು ದಸರಾ ಮಾದರಿಯಲ್ಲಿ ಉತ್ಸವ ಮಾಡುತ್ತಿದ್ದಾರೆ. ಹಾಸನಾಂಬೆ ಭಕ್ತರ ಸಂಖ್ಯೆ ಹೆಚ್ಚಾಗುತ್ತಿದೆ. ಮುಂದಿನ ವರ್ಷ ಇನ್ನೂ ಚೆನ್ನಾಗಿ ನಡೆಯಲಿ ಎಂದು ಸಿದ್ದರಾಮಯ್ಯ ಹಾರೈಸಿದ್ದಾರೆ. ಪ್ರತಿ ವರ್ಷವೂ ಭಕ್ತರ ಸಂಖ್ಯೆ ಹೆಚ್ಚಾಗುತ್ತಿವೆ.

ಅಹಿತಕರ ಘಟನೆ ನಡೆಯದಂತೆ ನೋಡಿಕೊಳ್ಳುತ್ತಿದ್ದಾರೆ. ಅದಕ್ಕಾಗಿ ಭಕ್ತರ ಸಂಖ್ಯೆ ಹೆಚ್ಚಾಗುತ್ತಿದೆ. ಜಿಲ್ಲಾಡಳಿತ ಉತ್ತಮ‌ ರೀತಿ ವ್ಯವಸ್ಥೆ ಮಾಡಿಕೊಂಡಿದೆ. ಎಲ್ಲರಿಗೂ ಧನ್ಯವಾದ ಹೇಳಲು ಬಯಸುತ್ತೇನೆ. ಮುಂದೆಯೂ ಶಿವಲಿಂಗೇಗೌಡರ ಉಸ್ತುವಾರಿಯಲ್ಲಿ ಹಾಸನಾಂಬ ಉತ್ಸವ ಯಶಸ್ವಿಯಾಗಿ ನಡೆಯಲಿದೆ. ಎಲ್ಲರಿಗೂ ಶುಭವಾಗಲಿ, ಕ್ರೀಡಾಪಟುಗಳಿಗೆ, ಅಭಿಮಾನಿಗಳಿಗೆ ಶುಭವಾಗಲಿ . ಸ್ಕೌಟ್ ಅಂಡ್ ಗೈಡ್ ನ ಎಲ್ಲಾ ಮಕ್ಕಳಿಗೂ ದೇವರು ಆರೋಗ್ಯ ಕೊಡಲಿ ಎಂದು ಸಿದ್ದರಾಮಯ್ಯ ಹೇಳಿದ್ದಾರೆ.

ಅಕ್ಕಿ, ಭತ್ತ ವ್ಯಾಪಾರಿಗಳಿಗೆ ಕೇಂದ್ರದ ಹೊಸ ಆದೇಶ: ಇನ್ಮುಂದೆ ಇದು ಕಡ್ಡಾಯ- ತಪ್ಪಿದ್ರೆ ಕಠಿಣ ಕ್ರಮ

Suchethana D — Fri, 06 Nov 2026 20:06:07 +0530

ದೆಹಲಿ: ದೇಶದ ಎಲ್ಲಾ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿರುವ ವ್ಯಾಪಾರಿಗಳು, ಸಗಟು ವ್ಯಾಪಾರಿಗಳು, ದೊಡ್ಡ ಚಿಲ್ಲರೆ ವ್ಯಾಪಾರ ಸರಪಳಿಗಳು (Big Chain Retailers) ಮತ್ತು ಸಂಸ್ಕರಣಾ ಘಟಕಗಳು ತಮ್ಮ ಬಳಿ ಇರುವ ಅಕ್ಕಿ ಮತ್ತು ಭತ್ತದ ದಾಸ್ತಾನಿನ ವಿವರವನ್ನು ಘೋಷಿಸಬೇಕೆಂದು ಕೇಂದ್ರ ಸರ್ಕಾರ ನಿರ್ದೇಶನ ನೀಡಿದೆ. ಅಕ್ಕಿ ಮತ್ತು ಭತ್ತವನ್ನು ದಾಸ್ತಾನು ಮಾಡಿಕೊಂಡಿರುವ ಎಲ್ಲಾ ಸಂಸ್ಥೆಗಳು, ಪ್ರತಿ ಶುಕ್ರವಾರ 'ಫುಡ್ ಸ್ಟಾಕ್ ಪೋರ್ಟಲ್' (Food Stock Portal) ನಲ್ಲಿ ತಮ್ಮ ದಾಸ್ತಾನಿನ ವಿವರವನ್ನು ಬಹಿರಂಗಪಡಿಸಬೇಕು. ಅಲ್ಲದೆ, ಒದಗಿಸಲಾದ ಮಾಹಿತಿಯು ನಿಖರವಾಗಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು ಮತ್ತು ಅದನ್ನು ನಿಯಮಿತವಾಗಿ ನವೀಕರಿಸಬೇಕು ಎಂದು ಗ್ರಾಹಕ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣಾ ಸಚಿವಾಲಯ ತಿಳಿಸಿದೆ.

ವಿಶೇಷವಾಗಿ ದಕ್ಷಿಣ ಭಾರತದ ರಾಜ್ಯಗಳಲ್ಲಿ ಗ್ರಾಹಕರಿಗೆ ಸಮಂಜಸವಾದ ಬೆಲೆಯಲ್ಲಿ ಅಕ್ಕಿ ಲಭ್ಯವಾಗುವಂತೆ ಮಾಡುವ ಉದ್ದೇಶದಿಂದ, ಆಂಧ್ರಪ್ರದೇಶ, ಕರ್ನಾಟಕ, ಕೇರಳ, ತಮಿಳುನಾಡು ಮತ್ತು ತೆಲಂಗಾಣ ರಾಜ್ಯ ಸರ್ಕಾರಗಳು ಭತ್ತ ಮತ್ತು ಅಕ್ಕಿಯ ಮೇಲೆ ದಾಸ್ತಾನು ಮಿತಿಗಳನ್ನು ವಿಧಿಸಲು ಕೇಂದ್ರ ಸರ್ಕಾರವು ಅನುಮತಿ ನೀಡಿದೆ. ಈ ದಾಸ್ತಾನು ಮಿತಿಗಳು ಮುಂದಿನ ವರ್ಷದ ಜನವರಿ 31ರವರೆಗೆ ಜಾರಿಯಲ್ಲಿರುತ್ತವೆ.

ಸಚಿವಾಲಯದ ಎಚ್ಚರಿಕೆ

ಈ ಪೋರ್ಟಲ್‌ನಲ್ಲಿ ನೋಂದಾಯಿಸಿಕೊಳ್ಳದ ಸಂಸ್ಥೆಗಳು ಅಥವಾ ನಿಗದಿತ ದಾಸ್ತಾನು ಮಿತಿಗಳನ್ನು ಉಲ್ಲಂಘಿಸುವ ಸಂಸ್ಥೆಗಳ ವಿರುದ್ಧ 'ಅಗತ್ಯ ಸರಕುಗಳ ಕಾಯ್ದೆ'ಯ (Essential Commodities Act) ಅಡಿಯಲ್ಲಿ ಸೂಕ್ತ ದಂಡನಾತ್ಮಕ ಕ್ರಮ ಕೈಗೊಳ್ಳಲಾಗುವುದು ಎಂದು ಸಚಿವಾಲಯ ಎಚ್ಚರಿಸಿದೆ. ಸರ್ಕಾರವು ಆಹಾರ ಧಾನ್ಯಗಳ, ವಿಶೇಷವಾಗಿ ಅಕ್ಕಿಯ ಬೆಲೆಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದೆ. ದೇಶೀಯವಾಗಿ ಸಾಕಷ್ಟು ಪೂರೈಕೆ ಲಭ್ಯವಿರುವಂತೆ ನೋಡಿಕೊಳ್ಳಲು, ಬೆಲೆ ಸ್ಥಿರತೆಯನ್ನು ಕಾಯ್ದುಕೊಳ್ಳಲು, ಅಕ್ರಮ ದಾಸ್ತಾನು (hoarding) ತಡೆಯಲು ಮತ್ತು ಗ್ರಾಹಕರ ಹಿತಾಸಕ್ತಿಗಳನ್ನು ರಕ್ಷಿಸಲು ಸರ್ಕಾರವು ಹಲವಾರು ನೀತಿ ಕ್ರಮಗಳನ್ನು ಕೈಗೊಳ್ಳುತ್ತಿದೆ ಎಂದು ಸಚಿವಾಲಯ ಹೇಳಿದೆ.

ಮುಕ್ತ ಮಾರುಕಟ್ಟೆ ಮಾರಾಟ ಯೋಜನೆ

ಇದರ ಜೊತೆಗೆ, 2026-27ನೇ ಸಾಲಿಗೆ 'ಮುಕ್ತ ಮಾರುಕಟ್ಟೆ ಮಾರಾಟ ಯೋಜನೆ'ಯ (Open Market Sale Scheme) ಅಡಿಯಲ್ಲಿ ಇ-ಹರಾಜಿನ ಮೂಲಕ ಮಾರಾಟ ಮಾಡಬೇಕಾದ ಅಕ್ಕಿಯ ಗುರಿಯ ಪ್ರಮಾಣವನ್ನು ಕೇಂದ್ರ ಸರ್ಕಾರವು ದ್ವಿಗುಣಗೊಳಿಸಿದೆ. ಈ ಪ್ರಮಾಣವನ್ನು 25 ಲಕ್ಷ ಮೆಟ್ರಿಕ್ ಟನ್‌ಗಳಿಂದ 50 ಲಕ್ಷ ಮೆಟ್ರಿಕ್ ಟನ್‌ಗಳಿಗೆ ಹೆಚ್ಚಿಸಲಾಗಿದೆ.

ಹಾಸನಾಂಬೆ ದರ್ಶನಕ್ಕೆ ಬಂದ ಮಾಜಿ ಸಿಎಂ ಸಿದ್ದರಾಮಯ್ಯ: ಶಿಷ್ಟಾಚಾರ ಗಾಳಿಗೆ ತೂರಿ ವಿಶೇಷ ಅವಕಾಶ ಕಲ್ಪಿಸಿದ ಜಿಲ್ಲಾಡಳಿತ!

Sathish Kumar KH — Fri, 06 Nov 2026 19:23:51 +0530

ಹಾಸನ (ನ.06): ವರ್ಷಕ್ಕೊಮ್ಮೆ ಮಾತ್ರ ಬಾಗಿಲು ತೆರೆಯುವ ಪ್ರಸಿದ್ಧ ಹಾಸನಾಂಬೆ ದೇವಿಯ (Hasanamba Temple) ದರ್ಶನಕ್ಕಾಗಿ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಶುಕ್ರವಾರ ಹಾಸನಕ್ಕೆ ಆಗಮಿಸಿ ದೇವಿಯ ದರ್ಶನ ಪಡೆದರು. ₹1,000 ಮುಖಬೆಲೆಯ ವಿಶೇಷ ಟಿಕೆಟ್‌ನೊಂದಿಗೆ ಆಗಮಿಸಿದ ಸಿದ್ದರಾಮಯ್ಯ ಅವರಿಗೆ ಜಿಲ್ಲಾಡಳಿತ ಹಾಗೂ ಸ್ಥಳೀಯ ಜನಪ್ರತಿನಿಧಿಗಳು ಅದ್ಧೂರಿ ಸ್ವಾಗತ ಕೋರಿದರು.

ಸಿದ್ದರಾಮಯ್ಯ ಅವರೊಂದಿಗೆ ಹಾಸನ ಜಿಲ್ಲಾ ಉಸ್ತುವಾರಿ ಸಚಿವ ಕೆ.ಎಂ. ಶಿವಲಿಂಗೇಗೌಡ ಹಾಗೂ ಸಂಸದ ಶ್ರೇಯಸ್ ಪಟೇಲ್ ಸಾಥ್ ನೀಡಿದರು. ಆದರೆ, ಈ ದರ್ಶನದ ವೇಳೆ ನಿಗದಿತ ಶಿಷ್ಟಾಚಾರದ (Protocol) ಸಮಯವನ್ನು ಮರೆತು ಜಿಲ್ಲಾಡಳಿತ ಮಾಜಿ ಸಿಎಂ ಅವರಿಗೆ ವಿಶೇಷ ಸೌಲಭ್ಯ ಒದಗಿಸಿರುವುದು ಇದೀಗ ಸಾರ್ವಜನಿಕ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ.

1 ಸಾವಿರ ರೂ. ಟಿಕೆಟ್ ಪಡೆದು ಬಗ್ಗೀಸ್ ವಾಹನದಲ್ಲಿ ಪ್ರವೇಶ

ಹಾಸನಾಂಬ ದೇವಾಲಯದ ಮುಖ್ಯ ದ್ವಾರಕ್ಕೆ ಆಗಮಿಸಿದ ಮಾಜಿ ಸಿಎಂ ಸಿದ್ದರಾಮಯ್ಯ ಅವರನ್ನು ಜಿಲ್ಲಾಡಳಿತದ ಹಿರಿಯ ಅಧಿಕಾರಿಗಳು ಆತ್ಮೀಯವಾಗಿ ಸ್ವಾಗತಿಸಿದರು. ಬಳಿಕ ಸಿದ್ದರಾಮಯ್ಯ ಅವರು ದೇವಾಲಯದ ಆವರಣದೊಳಗೆ ಸಂಚರಿಸಲು ಸಿದ್ಧಪಡಿಸಲಾಗಿದ್ದ ವಿಶೇಷ ಬಗ್ಗೀಸ್ (Buggies) ವಾಹನದಲ್ಲಿ ಪ್ರವೇಶಿಸಿ ದೇವಿಯ ದರ್ಶನ ಪಡೆದುಕೊಂಡರು. ಸಿದ್ದರಾಮಯ್ಯ ಅವರು ಸ್ವತಃ ₹1,000 ಟಿಕೆಟ್ ಪಡೆದು ಸಾಲಿನಲ್ಲಿ ತೆರಳಿ ದರ್ಶನ ಪಡೆದರು.

ಶಿಷ್ಟಾಚಾರ ಸಮಯ ಮೀರಿದರೂ ವಿಶೇಷ ಅವಕಾಶ:

ಹಾಸನಾಂಬೆ ದರ್ಶನದ ವೇಳೆ ವಿಐಪಿ ಹಾಗೂ ಗಣ್ಯರಿಗಾಗಿ ಬೆಳಿಗ್ಗೆ 10.30 ರಿಂದ ಮಧ್ಯಾಹ್ನ 12.30 ರವರೆಗೆ ಮಾತ್ರ ಶಿಷ್ಟಾಚಾರದ (Protocol) ಅಡಿಯಲ್ಲಿ ವಿಶೇಷ ದರ್ಶನಕ್ಕೆ ಅವಕಾಶ ಕಲ್ಪಿಸಲಾಗಿತ್ತು. ಆದರೆ, ಮಾಜಿ ಸಿಎಂ ಸಿದ್ದರಾಮಯ್ಯ ಅವರು ಈ ನಿಗದಿತ ಅವಧಿ ಹೊರತುಪಡಿಸಿ ಸಂಜೆ 6.30 ಕ್ಕೆ ದರ್ಶನಕ್ಕೆ ಆಗಮಿಸಿದ್ದರು.

ಜನಸಾಮಾನ್ಯರು ಘಂಟೆಗಟ್ಟಲೆ ಸಾಲಿನಲ್ಲಿ ನಿಂತು ದರ್ಶನ ಪಡೆಯುತ್ತಿರುವಾಗ, ಶಿಷ್ಟಾಚಾರದ ಸಮಯ ಮೀರಿದ್ದರೂ ಸಹ ಸಿದ್ದರಾಮಯ್ಯ ಅವರಿಗೆ ನೇರ ದರ್ಶನಕ್ಕೆ ವ್ಯವಸ್ಥೆ ಮಾಡಲಾಗಿತ್ತು. ಜಿಲ್ಲಾ ಉಸ್ತುವಾರಿ ಸಚಿವ ಕೆ.ಎಂ. ಶಿವಲಿಂಗೇಗೌಡ ಅವರ ನೇರ ಸೂಚನೆಯ ಮೇರೆಗೆ ಅಧಿಕಾರಿಗಳು ಎಲ್ಲಾ ನಿಯಮಗಳನ್ನು ಬದಿಗೊತ್ತಿ ಮಾಜಿ ಸಿಎಂಗಾಗಿ ಶಿಷ್ಟಾಚಾರವನ್ನೇ ಗಾಳಿಗೆ ತೂರಿದ್ದಾರೆ ಎಂಬ ಆರೋಪಗಳು ಕೇಳಿಬಂದಿವೆ.

'ಪ್ರಿಯಾಂಕ್ ಖರ್ಗೆ ನೀನು ಬಲಿತ ದಲಿತ, ನಿನಗೆ ಮೇಲ್ಜಾತಿಯವರ ಹುಡುಗಿ ಬೇಕಾ?: ಡಾ. ಚಿ.ನಾ. ರಾಮು ತೀವ್ರ ವಾಗ್ದಾಳಿ!

Sathish Kumar KH — Fri, 06 Nov 2026 19:12:43 +0530

ಬೆಂಗಳೂರು (ನ.06): ರಾಜ್ಯ ರಾಜಕಾರಣದಲ್ಲಿ ದಲಿತ ಸಬಲೀಕರಣ ಹಾಗೂ ಮೀಸಲಾತಿ ಕುರಿತಾದ ಸಂವಾದಗಳು ಕಾವು ಪಡೆದುಕೊಳ್ಳುತ್ತಿರುವ ನಡುವೆಯೇ, ಪ್ರಮುಖ ದಲಿತ ಮುಖಂಡ ಡಾ. ಚಿ.ನಾ. ರಾಮು ಅವರು ಸಚಿವ ಪ್ರಿಯಾಂಕ್ ಖರ್ಗೆ ಹಾಗೂ ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಕುಟುಂಬದ ವಿರುದ್ಧ ಸಂಚಲನ ಮೂಡಿಸುವಂತಹ ಏಕವಚನ ವಾಗ್ದಾಳಿ ನಡೆಸಿದ್ದಾರೆ.

ಬೆಂಗಳೂರಿನ ಭಾರತೀಯ ವಿದ್ಯಾಭವನದಲ್ಲಿ ಶುಕ್ರವಾರ ನಡೆದ ಡಾ. ಚಿ.ನಾ. ರಾಮು ಅವರು ರಚಿಸಿರುವ 'ನನ್ನ ಜನ ಅನಾಥ' ಪುಸ್ತಕದ ಎರಡನೇ ಆವೃತ್ತಿ ಬಿಡುಗಡೆ ಸಮಾರಂಭದಲ್ಲಿ ಈ ಘಟನೆ ನಡೆದಿದೆ. ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಅವರ ಸಮ್ಮುಖದಲ್ಲೇ ನಡೆದ ಕಾರ್ಯಕ್ರಮದಲ್ಲಿ ಚಿ.ನಾ. ರಾಮು ಅವರು ಸಚಿವ ಪ್ರಿಯಾಂಕ್ ಖರ್ಗೆ ವಿರುದ್ಧ ವೈಯಕ್ತಿಕ ಹಾಗೂ ರಾಜಕೀಯ ದಾಳಿ ನಡೆಸಿದರು.

9 ಬಾರಿ ಶಾಸಕರಾದ ಮೇಲೂ ನಿಮಗೇಕೆ ಮೀಸಲಾತಿ ಬೇಕು?

ಕಾರ್ಯಕ್ರಮದಲ್ಲಿ ನೆರೆದಿದ್ದ ಸಭಿಕರನ್ನು ಉದ್ದೇಶಿಸಿ ಮಾತನಾಡಿದ ಡಾ. ಚಿ.ನಾ. ರಾಮು, ಮಲ್ಲಿಕಾರ್ಜುನ ಖರ್ಗೆ ಅವರ ದೀರ್ಘ ರಾಜಕೀಯ ಜೀವನವನ್ನು ಪ್ರಸ್ತಾಪಿಸಿ ಪ್ರಶ್ನೆ ಎತ್ತಿದರು. 'ಮಲ್ಲಿಕಾರ್ಜುನ ಖರ್ಗೆ ಅವರು ಒಂಬತ್ತು ಬಾರಿ ಗೆದ್ದು ಶಾಸಕ, ಮಂತ್ರಿ, ಸಂಸದರಾಗಿದ್ದಾರೆ. ಇಷ್ಟೆಲ್ಲ ಅಧಿಕಾರ ಅನುಭವಿಸಿದ ಮೇಲೆಯೂ ಇನ್ನೂ ನಿಮಗೆ ಮೀಸಲಾತಿ ಏತಕ್ಕೆ ಬೇಕು?' ಎಂದು ಪ್ರಶ್ನಿಸಿದರು. ಇನ್ನು ಅವರ ಮಗ ಸಚಿವ ಪ್ರಿಯಾಂಕ್ ಖರ್ಗೆ ಕುರಿತು ಮಾತನಾಡುತ್ತಾ, 'ಪ್ರಿಯಾಂಕ್ ಖರ್ಗೆ ನೀನು ನಿಜವಾದ ಎಳಸು, ಗುಗ್ಗು! ನೀನು ನಿಜಕ್ಕೂ ಬಲಿತ ದಲಿತ. ದಲಿತ ಸಮುದಾಯದಿಂದ ಮೀಸಲಾತಿ ಸೌಲಭ್ಯಗಳನ್ನು ಪಡೆದುಕೊಂಡು ಮೇಲ್ಜಾತಿಯವರ ಸಂಬಂಧ ಬೆಳೆಸಲು ಹೊರಟಿದ್ದೀರಿ' ಎಂದು ಕಿಡಿಕಾರಿದರು.

ನಮ್ಮ ಸಮುದಾಯದ ಹುಡುಗಿಯರು ಸುಂದರವಾಗಿರಲಿಲ್ಲವೇ?

ತಮ್ಮ ಭಾಷಣವನ್ನು ಮುಂದುವರಿಸಿದ ಚಿ.ನಾ. ರಾಮು, ಪ್ರಿಯಾಂಕ್ ಖರ್ಗೆ ಅವರ ವೈಯಕ್ತಿಕ ಮದುವೆ ವಿಚಾರ ಹಾಗೂ ಕುಟುಂಬದ ಸಂಬಂಧಗಳ ಕುರಿತು ನೇರ ವಾಗ್ದಾಳಿ ನಡೆಸಿದರು. 'ಪ್ರಿಯಾಂಕ್ ಖರ್ಗೆ, ನಿನಗೆ ಮೇಲ್ಜಾತಿಯವರ ಹುಡುಗಿ ಬೇಕು. ನಮ್ಮ ಜಾತಿಯ ದಲಿತ ಹುಡುಗಿಯರು ಎಷ್ಟು ಸುಂದರವಾಗಿದ್ದರು ಗೊತ್ತಾ? ಆದರೆ ನೀನು ಮದುವೆಯಾಗಿರುವುದು ಮೇಲ್ಜಾತಿಯವರನ್ನು. ಅಷ್ಟೇ ಅಲ್ಲದೆ ರಾಧಾಕೃಷ್ಣ ಅವರ ಮಗಳನ್ನೂ ಮೇಲ್ಜಾತಿಯ ಹುಡುಗನಿಗೆ ಮದುವೆ ಮಾಡಿಕೊಟ್ಟಿದ್ದೀರಿ. ನಿನ್ನಂತೆ ಈಗಾಗಲೇ ಸಕಲ ಸೌಲಭ್ಯ ಪಡೆದು 'ಬಲಿತ'ವರೇ ಉದ್ಧಾರವಾದರೆ, ನಿಜವಾದ ಶೋಷಿತ ಹಾಗೂ ಬಡ ದಲಿತರು ಏನು ಮಾಡಬೇಕು?' ಎಂದು ಕಿಡಿಕಾರಿದರು.

ವೇದಿಕೆಯಲ್ಲಿದ್ದ ಕುಮಾರಸ್ವಾಮಿ ಸಮ್ಮುಖದಲ್ಲೇ ಬಿಸಿಬಿಸಿ ಚರ್ಚೆ

ಇತ್ತೀಚೆಗಷ್ಟೇ ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಹಾಗೂ ಸಚಿವ ಪ್ರಿಯಾಂಕ್ ಖರ್ಗೆ ನಡುವೆ 'ಬಲಿತ ದಲಿತ' ಎಂಬ ವಿಚಾರವಾಗಿ ಜಾಲತಾಣಗಳಲ್ಲಿ ಭಾರಿ ವಾಕ್ಸಮರ ನಡೆದಿತ್ತು. ಇದೀಗ ಕುಮಾರಸ್ವಾಮಿ ಅವರಿದ್ದ ವೇದಿಕೆಯಲ್ಲೇ ಚಿ.ನಾ. ರಾಮು ಅವರು ಖರ್ಗೆ ಕುಟುಂಬವನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿರುವುದು ರಾಜ್ಯ ರಾಜಕೀಯ ವಲಯದಲ್ಲಿ ಹೊಸ ಸಂಚಲನಕ್ಕೆ ಕಾರಣವಾಗಿದೆ.

ನಿಜವಾದ ದಲಿತರಿಗೆ ಪ್ರಾತಿನಿಧ್ಯ ಹಾಗೂ ಸೌಲಭ್ಯ ಸಿಗುತ್ತಿಲ್ಲ, ಬದಲಿಗೆ ದಶಕಗಳಿಂದ ಅಧಿಕಾರದಲ್ಲಿರುವ ನಾಯಕರ ಕುಟುಂಬಗಳೇ ಮೀಸಲಾತಿ ಫಲ ಉಣ್ಣುತ್ತಿವೆ ಎಂಬ ಆರೋಪಕ್ಕೆ ಈ ಭಾಷಣ ಮತ್ತಷ್ಟು ಕಾವು ನೀಡಿದೆ.

ಅಪ್ಪ-ಮಗಳ ಸ್ಕೆಚ್‌ಗೆ ಬಲಿಯಾಯ್ತು ಕೂಡು ಕುಟುಂಬ; ಆಸ್ತಿ ದ್ವೇಷವೋ, ಸೌಂದರ್ಯದ ಕೀಳರಿಮೆಯೋ? ರಹಸ್ಯ ಬಿಚ್ಚಿಟ್ಟ ಸಂಬಂಧಿ!

Bhimasi M Koleppanavar — Fri, 06 Nov 2026 17:46:30 +0530

ಬೆಂಗಳೂರಿನ ರಾಜಾಜಿನಗರದ ಆ ಘಟನೆ ಇದೆಯಲ್ಲ, ಎಂಥವರ ಎದೆಯನ್ನೂ ಒಂದು ಕ್ಷಣ ನಡುಗಿಸುವುದರಲ್ಲಿ ಯಾವುದೇ ಸಂಶಯವಿಲ್ಲ. ಈ ಭೀಕರ ಕೃತ್ಯದ ಕುರಿತು ಯೋಚಿಸುತ್ತಿದ್ದರೆ, ಮನುಕುಲದಲ್ಲಿ ಮನುಷ್ಯತ್ವವೇ ಸತ್ತುಹೋಗಿದೆಯೇ ಎನಿಸಿಬಿಡುತ್ತದೆ. ಒಬ್ಬ ವ್ಯಕ್ತಿ ಒಂದೇ ಕುಟುಂಬದ 7 ಜನರನ್ನು ಕ್ರೂರವಾಗಿ ಮುಗಿಸಿ, ಶವಗಳನ್ನು ತುಂಡರಿಸಿ ಪುಣ್ಯಕ್ಷೇತ್ರಗಳ ಸುತ್ತಮುತ್ತ ಎಸೆದು ಬರುತ್ತಾನೆ ಎಂದರೆ, ಆತನಲ್ಲಿ ಇಂತಹ ಪೈಶಾಚಿಕ ಮನಸ್ಥಿತಿ ಬೆಳೆದದ್ದಾದರೂ ಹೇಗೆ? ಮೊದಲಿಗೆ ಈ ಹ*ಕಾಂಡಕ್ಕೆ ಕೌಟಂಬಿಕ ಕಲಹವೇ ಕಾರಣ ಎಂದು ತಳುಕು ಹಾಕಲಾಗಿತ್ತಾದರೂ, ತನಿಖೆ ಮುಂದುವರಿದಂತೆ ಇದರ ಹಿಂದೆ ಕೋಟ್ಯಂತರ ರೂಪಾಯಿ ಆಸ್ತಿಯ ಹಪಾಹಪಿತನ ಇರುವುದು ಬೆಳಕಿಗೆ ಬಂದಿದೆ. ಇದರ ನಡುವೆ, ಈಗ ಈ ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಮತ್ತೊಬ್ಬ ಹತ್ತಿರದ ಸಂಬಂಧಿ ನೀಡಿರುವ ಆಘಾತಕಾರಿ ಹೇಳಿಕೆ ಹತ್ತಾರು ನಿಗೂಢ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ! ಹಾಗಾದರೆ ಆ ಸಂಬಂಧಿ ಬಿಚ್ಚಿಟ್ಟ ರಹಸ್ಯವೇನು? ಇಂಟರನೆಟ್‌ ಬ್ರಹ್ಮಾಸ್ತ್ರವಾಗಿದ್ದು ಹೇಗೆ? ಈ ರಕ್ತಸಿಕ್ತ ಕರಾಳ ಕಥೆಯ ಕಂಪ್ಲೀಟ್‌ ಸ್ಟೋರಿ ಇಲ್ಲಿದೆ.

ಅದು ಸಾಧಾರಣ ಜಗಳವಾಗಿರಲಿಲ್ಲ!

ಬೆಂಗಳೂರಿನ ರಾಜಾಜಿನಗರದ ಆ ಮನೆಯೊಳಗೆ ಕಳೆದ ಎರಡು ತಿಂಗಳುಗಳಿಂದ ನಡೆಯುತ್ತಿದ್ದದ್ದು ಸಾಧಾರಣ ಜಗಳಗಳಲ್ಲ, ಬದಲಿಗೆ ಇಡೀ ಕರುನಾಡೇ ಬೆಚ್ಚಿಬೀಳುವಂತಹ ಸರಣಿ ಕೊಲೆಗಳ ಕರಾಳ ಸಂಚು. ಕ್ಯಾಬ್ ಚಾಲಕ ಇಂದುಶೇಖರ್ ಹೆಣೆದ ಆ ಪೈಶಾಚಿಕ ಜಾಲದ ಒಂದೊಂದೇ ಎಳೆಗಳು ಈಗ ಮೃತರ ಹತ್ತಿರದ ಸಂಬಂಧಿ ವೆಂಕಟೇಶ್ ಅವರ ಆಘಾತಕಾರಿ ಹೇಳಿಕೆಯಿಂದ ಹೊರಬರುತ್ತಿವೆ.

ಹೆಂಡತಿಯ ಸೌಂದರ್ಯ ಮತ್ತು ಆ ಕೀಳರಿಮೆಯ ವಿಷಬೀಜ!

ನನ್ನ ಹೆಂಡತಿ ತುಂಬಾ ಸುಂದರಿ, ಆದರೆ ಅವಳಿಗೆ ಈಗ ವಯಸ್ಸಾಗುತ್ತಿದೆ, ಆರೋಪಿ ಇಂದುಶೇಖರ್ ಆಗಾಗ ಸಂಬಂಧಿಕರ ಮುಂದೆ ಆಡುತ್ತಿದ್ದ ಮಾತುಗಳಿವು. ತನ್ನ ಪತ್ನಿ ಸುನೀತಾಳ ಸೌಂದರ್ಯವನ್ನು ನೋಡಿ ಆತನಿಗೆ ಮನಸ್ಸಿನಲ್ಲೇ ಎಲ್ಲೋ ಒಂದು ಕಡೆ ತೀವ್ರವಾದ ಕೀಳರಿಮೆ ಶುರುವಾಗಿತ್ತು. ದಂಪತಿಗಳ ನಡುವಿನ ವಯಸ್ಸಿನ ವ್ಯತ್ಯಾಸವೇ ಅವರ ಸಂಸಾರದಲ್ಲಿ ಪ್ರತಿದಿನವೂ ಕಿಡಿ ಹೊತ್ತಿಸುತ್ತಿತ್ತು ಎಂದು ವೆಂಕಟೇಶ ಹೇಳಿದ್ದಾರೆ. ಸಣ್ಣ ಪುಟ್ಟ ವಾದಗಳು ದೊಡ್ಡ ಜಗಳಗಳಾಗಿ ಮಾರ್ಪಡುತ್ತಿದ್ದವು. ಆದರೆ, ಇದು ಗಂಡ-ಹೆಂಡತಿಯ ವೈಯಕ್ತಿಕ ವಿಚಾರ ಎಂದು ಭಾವಿಸಿದ ಕುಟುಂಬಸ್ಥರು ಯಾರೂ ಇದರ ಆಳದಲ್ಲಿದ್ದ ಕ್ರೌರ್ಯವನ್ನು ಊಹಿಸಿರಲಿಲ್ಲ.

ಕುಟುಂಬದ ದೀಪವಾಗಿದ್ದ ಅತ್ತೆ ರೂಪಾವತಿ!

ಇಡೀ ಕುಟುಂಬಕ್ಕೆ ತಾಯಿಯಂತೆ, ಕಣ್ಣಿನಂತೆ ಇದ್ದವರು ಅತ್ತೆ ರೂಪಾವತಿ. ಸಂಬಂಧಿಕರ ಮದುವೆಗಳನ್ನು ಹತ್ತಿರ ನಿಂತು ಮಾಡಿಸುವುದು, ಕಷ್ಟದಲ್ಲಿದ್ದವರಿಗೆ ಜೀವನ ಕಟ್ಟಿಕೊಳ್ಳಲು ಆರ್ಥಿಕ ಸಹಾಯ ಮಾಡುವುದು ಅವರ ದಿನಚರಿಯಾಗಿತ್ತು. ಬೆಂಗಳೂರಿನಲ್ಲಿ ಸ್ವಂತ ಮನೆ ಹೊಂದಿದ್ದ ಆ ಕುಟುಂಬ ಆರ್ಥಿಕವಾಗಿ ತುಂಬಾ ಸೌಮ್ಯವಾಗಿ, ಚೆನ್ನಾಗಿಯೇ ಇತ್ತು. ಆದರೆ, ಆ ನಗುವಿನ ಹಿಂದೆಯೇ ಯಮನೊಬ್ಬ ಹೊಂಚು ಹಾಕುತ್ತಿರುವುದು ಆ ರೂಪಾವತಿಗೆ ತಿಳಿದಿರಲಿಲ್ಲ.

ಬ್ರಹ್ಮಾಸ್ತ್ರವಾದ ಇಂಟರ್ನೆಟ್ ಮತ್ತು ಎರಡು ತಿಂಗಳ ಸ್ಕೆಚ್!

ಇಂದುಶೇಖರ್ ಈ ಭೀಕರ ಕೃತ್ಯವನ್ನು ದಿಢೀರನೆ ಮಾಡಿದ್ದಲ್ಲ. ಈ ಇಡೀ ಕೊಲೆ ಯೋಜನೆಯನ್ನು ಆತ ಯಾವುದೋ ಕ್ರೈಮ್ ಥ್ರಿಲ್ಲರ್ ಸಿನಿಮಾ ಅಥವಾ ಯೂಟ್ಯೂಬ್, ಗೂಗಲ್ ನೋಡಿ ಕಲಿತಿದ್ದನೇ? ಎಂಬ ದಟ್ಟವಾದ ಅನುಮಾನ ಈಗ ಮೂಡಿದೆ. ಪೊಲೀಸರು ಆತನ ಮೊಬೈಲ್ ವಶಪಡಿಸಿಕೊಂಡು ಡಿಜಿಟಲ್ ಹಿಸ್ಟರಿಯನ್ನು ಜಾಲಾಡುತ್ತಿದ್ದಾರೆ. ಯಾರೂ ಊಹಿಸದ ಕರಾಳ ಯೋಜನೆಯೊಂದನ್ನು ಆತ ಎರಡು ತಿಂಗಳ ಮೊದಲೇ ರೂಪಿಸಿದ್ದ. ಎಲ್ಲರನ್ನೂ ಒಟ್ಟಿಗೆ ಕೊಂದರೆ ಸಿಕ್ಕಿಬೀಳುತ್ತೇನೆ ಎಂಬ ಭಯದಿಂದ, ಒಬ್ಬೊಬ್ಬರನ್ನೇ ಆಮಿಷವೊಡ್ಡಿ ಮನೆಗೆ ಕರೆಯಿಸಿಕೊಳ್ಳಲು ಪ್ಲಾನ್ ಮಾಡಿದ್ದಾನೆ. ಕನ್ಯಾಕುಮಾರಿಗೆ ಪ್ರವಾಸ ಹೋಗೋಣ ಬನ್ನಿ ಎಂದು ಆಸೆಯ ಆಮಿಷವೊಡ್ಡಿ ಮೊದಲು ಅತ್ತೆ ರೂಪಾವತಿಯನ್ನು ಮನೆಗೆ ಬರಮಾಡಿಕೊಂಡ. ಆ ನಂತರ ಒಂದೇ ಕುಟುಂಬದ 7 ಜನರನ್ನು ಬೇರೆ ಬೇರೆ ದಿನಗಳಲ್ಲಿ ನಂಬಿಸಿ ಮನೆಗೆ ಕರೆಸಿಕೊಂಡ. ಎಲ್ಲರ ಮೇಲೂ ಒಳ ಕಲ್ಲಿನಿಂದ ಹಲ್ಲೆ ನಡೆಸಿ ಕ್ರೂರವಾಗಿ ಮುಗಿಸಿದ್ದಾನೆ ಎನ್ನಲಾಗಿದೆ. ಸಂಬಂಧಿಕರ ಈ ಆಘಾತಕಾರಿ ಹೇಳಿಕೆ ಮತ್ತು ಪೊಲೀಸರ ತನಿಖೆ ಈಗ ಇಡೀ ಸಮಾಜ ತಲೆತಗ್ಗಿಸುವಂತೆ ಮಾಡಿದೆ. ಈ ರಕ್ತಸಿಕ್ತ ಕರಾಳ ಕಥೆಯ ಹಿಂದಿನ ಸಂಪೂರ್ಣ ಸತ್ಯ ಮತ್ತು ಇಂಟರ್ನೆಟ್‌ನ ಆ 'ಬ್ರಹ್ಮಾಸ್ತ್ರ'ದ ಬಳಕೆ ಹೇಗೆ ನಡೆಯಿತು ಎಂಬುದು ಸದ್ಯದಲ್ಲೇ ಕಂಪ್ಲೀಟ್ ಆಗಿ ಹೊರಬರಬೇಕಿದೆ.

ಕನ್ನಡಿಗರ ವಿಚಾರದಲ್ಲಿ ನುಡಿದಂತೆ ನಡೆಯಿರಿ: ಶೇ.80 ಉದ್ಯೋಗ ಮೀಸಲಾತಿ ಪ್ರಣಾಳಿಕೆ ನೆನಪಿಸಿದ ಕರವೇ ನಾರಾಯಣಗೌಡ!

Sathish Kumar KH — Fri, 06 Nov 2026 17:19:51 +0530

ಬೆಂಗಳೂರು (ನ.06): ರಾಜ್ಯದಲ್ಲಿ ಖಾಸಗಿ ಹಾಗೂ ಸಾರ್ವಜನಿಕ ವಲಯದ ಎಲ್ಲಾ ಹಂತದ ಉದ್ಯೋಗಾವಕಾಶಗಳಲ್ಲಿ ಕನ್ನಡಿಗರಿಗೆ ಶೇ.80ರಷ್ಟು ಹುದ್ದೆಗಳನ್ನು ಕಾಯ್ದಿರಿಸುವ ಪ್ರಣಾಳಿಕೆಯ ಭರವಸೆಯನ್ನು ತಕ್ಷಣವೇ ಈಡೇರಿಸಬೇಕೆಂದು ಆಗ್ರಹಿಸಿ ಕರ್ನಾಟಕ ರಕ್ಷಣಾ ವೇದಿಕೆ (ಕರವೇ) ರಾಜ್ಯಾಧ್ಯಕ್ಷ ಟಿ.ಎ. ನಾರಾಯಣಗೌಡ ಅವರು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರಿಗೆ ಬಹಿರಂಗ ಪತ್ರ ಬರೆದಿದ್ದಾರೆ.

ಚುನಾವಣೆಗೆ ಮುನ್ನ ಕಾಂಗ್ರೆಸ್ ಪಕ್ಷ ನೀಡಿದ್ದ ಈ ಪ್ರಮುಖ ಭರವಸೆಯನ್ನು ಈಡೇರಿಸುವುದು ಸರ್ಕಾರದ ಸಾಂವಿಧಾನಿಕ ಹಾಗೂ ನೈತಿಕ ಕರ್ತವ್ಯವಾಗಿದೆ. ಈ ಬಾರಿಯ ದೀಪಾವಳಿ ಹಬ್ಬದ ಕೊಡುಗೆಯಾಗಿ ಸಚಿವ ಸಂಪುಟ ಸಭೆಯಲ್ಲಿ ನಿರ್ಣಯ ಕೈಗೊಂಡು ಕನ್ನಡಿಗರ ಕಾಯ್ದೆಯನ್ನು ಜಾರಿಗೆ ತರಬೇಕು ಎಂದು ಮನವಿ ಮಾಡಿದ್ದಾರೆ.

ಇದು ಕನ್ನಡದ ಮಕ್ಕಳ ಭವಿಷ್ಯದ ಪ್ರಶ್ನೆ

ತಮ್ಮ ಸೋಶಿಯಲ್ ಮೀಡಿಯಾ ಖಾತೆಯಲ್ಲಿ ಬಹಿರಂಗ ಪತ್ರ ಹಂಚಿಕೊಂಡಿರುವ ನಾರಾಯಣಗೌಡರು, 'ನೀವು ಕಾಂಗ್ರೆಸ್ ರಾಜ್ಯ ಘಟಕದ ಅಧ್ಯಕ್ಷರಾಗಿದ್ದಾಗಲೇ ಈ ಪ್ರಣಾಳಿಕೆ ರೂಪುಗೊಂಡಿದೆ. ನೀವು ಅಪಾರ ಕನ್ನಡ ಪ್ರೇಮ ಹೊಂದಿರುವವರು. ಸಾರ್ವಜನಿಕ ಹಾಗೂ ಖಾಸಗಿ ವಲಯದಲ್ಲಿ ಶೇ. 80ರಷ್ಟು ಹುದ್ದೆಗಳನ್ನು ಸ್ಥಳೀಯರಿಗೆ ನೀಡುತ್ತೇವೆ ಎಂಬ ಭರವಸೆ ನೀಡಿ ನಾಲ್ಕು ವರ್ಷಗಳಾಗುತ್ತ ಬಂದರೂ ಅದು ಈಡೇರಿಲ್ಲ. ಇದಕ್ಕಿಂತ ದೊಡ್ಡ ಆದ್ಯತೆಯ ವಿಷಯ ಇನ್ನೊಂದಿರಲು ಸಾಧ್ಯವಿಲ್ಲ. ಏಕೆಂದರೆ ಇದು ಕನ್ನಡದ ಮಕ್ಕಳ ಭವಿಷ್ಯದ ಪ್ರಶ್ನೆ' ಎಂದು ಉಲ್ಲೇಖಿಸಿದ್ದಾರೆ. ಸರ್ಕಾರ ಈ ಬೇಡಿಕೆಯನ್ನು ಈಡೇರಿಸಿದರೆ ಕರವೇ ವತಿಯಿಂದ ಯಾವುದೇ ಅಭಿಯಾನ ನಡೆಸುವ ಅಗತ್ಯವಿರುವುದಿಲ್ಲ. ಲಕ್ಷಾಂತರ ಕನ್ನಡದ ಮಕ್ಕಳನ್ನು ಸೇರಿಸಿ ಇಡೀ ಸರ್ಕಾರಕ್ಕೆ ಬೃಹತ್ ಅಭಿನಂದನಾ ಸಭೆ ನಡೆಸಲಾಗುವುದು ಎಂದು ತಿಳಿಸಿದ್ದಾರೆ.

ಪಕ್ಷಾತೀತ ಬೆಂಬಲವಿದೆ, ಬ್ಲಾಕ್ ಮೇಲ್‌ಗೆ ಮಣಿಯಬೇಡಿ!

ಖಾಸಗಿ ವಲಯದಲ್ಲಿ ಕನ್ನಡಿಗರಿಗೆ ಉದ್ಯೋಗ ಮೀಸಲಾತಿ ನೀಡುವ ವಿಚಾರದಲ್ಲಿ ರಾಜ್ಯದ ಎಲ್ಲಾ ಪ್ರಮುಖ ರಾಜಕೀಯ ಪಕ್ಷಗಳ ಬೆಂಬಲವೂ ಇದೆ ಎಂಬುದನ್ನು ನಾರಾಯಣಗೌಡರು ಪತ್ರದಲ್ಲಿ ನೆನಪಿಸಿದ್ದಾರೆ. ಕಾರ್ಮಿಕ ಸಚಿವ ಸಂತೋಷ್ ಲಾಡ್ ಹಾಗೂ ಐಟಿ-ಬಿಟಿ ಸಚಿವ ಪ್ರಿಯಾಂಕ್ ಖರ್ಗೆ ಅವರು ಇತ್ತೀಚೆಗೆ ಈ ಕಾಯ್ದೆ ತರಲು ಸರ್ಕಾರ ಬದ್ಧವಾಗಿದೆ ಎಂದು ಹೇಳಿದ್ದಾರೆ. ಬಿಜೆಪಿ ರಾಜ್ಯ ಅಧ್ಯಕ್ಷ ಬಿ.ವೈ. ವಿಜಯೇಂದ್ರ ಅವರು ಕರವೇ ಆಗ್ರಹ ಅಭಿಯಾನವನ್ನು ಬೆಂಬಲಿಸಿದ್ದಾರೆ. ಮಾಜಿ ಸಿಎಂ ಬಸವರಾಜ ಬೊಮ್ಮಾಯಿ ಅವರು ಸಹ ಈ ಹಿಂದೆ ಶೇ.80ರಷ್ಟು ಹುದ್ದೆ ಕಾಯ್ದಿರಿಸುವ ಬಗ್ಗೆ ಬೆಂಬಲ ವ್ಯಕ್ತಪಡಿಸಿದ್ದರು.

ಎಲ್ಲಾ ರಾಜಕೀಯ ನಾಯಕರ ಬೆಂಬಲವಿರುವಾಗ ಕೆಲವೇ ಕೆಲವು ಬೆರಳೆಣಿಕೆಯ, ಬ್ಲಾಕ್ ಮೇಲ್ ಕೂಗುಮಾರಿ ಉದ್ಯಮಿಗಳ ಒತ್ತಡಕ್ಕೆ ನೀವು ಮಣಿಯಕೂಡದು. ನಿಮ್ಮ ಹಠ ಹಾಗೂ ಛಲವನ್ನು ನಾನು ಬಲ್ಲೆ. ಇಂತಹ ಬ್ಲಾಕ್ ಮೇಲ್‌ಗಳನ್ನು ಮೆಟ್ಟಿನಿಲ್ಲುವ ಸ್ಥೈರ್ಯ ನಿಮಗಿದೆ. ನಿಮ್ಮ ಅವಧಿಯಲ್ಲಿ ಈ ಕಾಯ್ದೆ ಬಂದಲ್ಲಿ ಕನ್ನಡಿಗರು ನಿಮ್ಮನ್ನು ಹೃದಯದಲ್ಲಿಟ್ಟುಕೊಂಡು ಆರಾಧಿಸುತ್ತಾರೆ' ಎಂದು ಪತ್ರದಲ್ಲಿ ಪ್ರಸ್ತಾಪಿಸಲಾಗಿದೆ.

ಅಹಿಂಸಾತ್ಮಕ 'ಆಗ್ರಹ ಅಭಿಯಾನ': ಸರ್ಕಾರಕ್ಕೆ ವರದಿ ಸಲ್ಲಿಕೆ

ನವೆಂಬರ್ 1ರಿಂದ ಕರ್ನಾಟಕ ರಕ್ಷಣಾ ವೇದಿಕೆ ಆರಂಭಿಸಿರುವ 'ಆಗ್ರಹ ಅಭಿಯಾನ'ದ ಭಾಗವಾಗಿ ಇದುವರೆಗೆ ಸುಮಾರು 350ಕ್ಕೂ ಹೆಚ್ಚು ಸಣ್ಣ ಹಾಗೂ ಬೃಹತ್ ಸಂಸ್ಥೆಗಳನ್ನು ತಲುಪಲಾಗಿದೆ. ಎಲ್ಲೂ ಕೂಡ ಯಾವುದೇ ಕಹಿ ಘಟನೆ ನಡೆಯದೆ ಶಾಂತಿಯುತವಾಗಿ ಹಾಗೂ ಗೌರವಯುತವಾಗಿ ಸಂವಾದ ನಡೆಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಖಾಸಗಿ ಸಂಸ್ಥೆಗಳ ಮುಖ್ಯಸ್ಥರು ಈ ಅಭಿಯಾನಕ್ಕೆ ಆಶಾದಾಯಕವಾಗಿ ಸ್ಪಂದಿಸುತ್ತಿದ್ದು, ಈ ಸಮೀಕ್ಷೆಯಲ್ಲಿ ದೊರೆಯುವ ನೈಜ ಅಂಕಿ-ಅಂಶಗಳನ್ನು ಸರ್ಕಾರದ ಗಮನಕ್ಕೆ ತರಲು ವರದಿ ರೂಪದಲ್ಲಿ ಸಲ್ಲಿಸಲಾಗುವುದು ಎಂದು ಪತ್ರದಲ್ಲಿ ಸ್ಪಷ್ಟಪಡಿಸಲಾಗಿದೆ. ಕನ್ನಡಿಗರ ಹಕ್ಕುಗಳನ್ನು ರಕ್ಷಿಸುವ ಉದ್ಯೋಗ ಮಸೂದೆಯನ್ನು ಈ ಕೂಡಲೇ ಜಾರಿಗೆ ತರಲು ಸರ್ಕಾರ ತಕ್ಷಣವೇ ಹೆಜ್ಜೆ ಇಡಬೇಕೆಂಬುದು ಕರವೇಯ ಮುಖ್ಯ ಆಗ್ರಹವಾಗಿದೆ.

Network: ಟವರ್ ಇಲ್ಲದ ಹಳ್ಳಿಗಳಿಗೂ 4G ನೆಟ್‌ವರ್ಕ್; ಶಿರಸಿಯ ಯುವಕರ ಸಾಧನೆಗೆ ಮೆಚ್ಚುಗೆ!

Sushma Hegde — Fri, 06 Nov 2026 16:53:08 +0530

ಮೊಬೈಲ್‌ನಲ್ಲಿ ನೆಟ್‌ವರ್ಕ್ ಸಿಗದೆ ಪರದಾಡುವುದು ಇಂದಿಗೂ ಗ್ರಾಮೀಣ ಪ್ರದೇಶಗಳು ಮತ್ತು ದಟ್ಟ ಅರಣ್ಯ ಪ್ರದೇಶಗಳಲ್ಲಿ ಸಾಮಾನ್ಯ ಸಮಸ್ಯೆಯಾಗಿದೆ. ಅದರಲ್ಲೂ ಗುಡ್ಡಗಾಡು ಪ್ರದೇಶಗಳು, ಕಾಡಿನ ನಡುವಿನ ಹಳ್ಳಿಗಳು ಹಾಗೂ ಸಂಪರ್ಕ ವ್ಯವಸ್ಥೆ ತಲುಪಲು ಕಷ್ಟವಾಗಿರುವ ಸ್ಥಳಗಳಲ್ಲಿ ಮೊಬೈಲ್ ನೆಟ್‌ವರ್ಕ್ ಪಡೆಯುವುದು ದೊಡ್ಡ ಸವಾಲು. ಇಂತಹ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಕರ್ನಾಟಕದ ಮೂವರು ಯುವಕರು ಸ್ವದೇಶಿ ತಂತ್ರಜ್ಞಾನದ ಮೊರೆ ಹೋಗಿದ್ದಾರೆ. ಉತ್ತರ ಕನ್ನಡ ಜಿಲ್ಲೆಯ ಶಿರಸಿ ಮೂಲದ ಅಭಯ್, ಸುದರ್ಶನ್ ಮತ್ತು ಸಮರ್ಥ್ ಎಂಬ ಯುವಕರು ಮೊಬೈಲ್ ನೆಟ್‌ವರ್ಕ್ ಸಮಸ್ಯೆಗೆ ಹೊಸ ಪರಿಹಾರವೊಂದನ್ನು ಅಭಿವೃದ್ಧಿಪಡಿಸಿದ್ದಾರೆ.

ಸಾಂಪ್ರದಾಯಿಕ ಮೊಬೈಲ್ ಟವರ್‌ಗಳನ್ನು ನಿರ್ಮಿಸಲು ಸಾಧ್ಯವಾಗದ ದೂರದ ಪ್ರದೇಶಗಳಿಗೂ 4G ಸಂಪರ್ಕ ಕಲ್ಪಿಸುವ ಉದ್ದೇಶದಿಂದ 'ಮೈಕ್ರೋ ಸೆಲ್' (Micro Cell) ಎಂಬ ಸಾಧನವನ್ನು ಬಳಸಿಕೊಂಡು. ಗ್ರಾಮೀಣ ಭಾಗದ ಜನರಿಗೆ ಎದುರಾಗುವ ನೆಟ್‌ವರ್ಕ್ ಸಮಸ್ಯೆಯನ್ನು ಪರಿಹರಿಸುವ ಪ್ರಯತ್ನ ಇದೀಗ ಗಮನ ಸೆಳೆಯುತ್ತಿದೆ.

ಕೊರೊನಾ ಲಾಕ್‌ಡೌನ್‌ನಲ್ಲಿ ಎದುರಾದ ಸಮಸ್ಯೆಯೇ ಆವಿಷ್ಕಾರಕ್ಕೆ ಪ್ರೇರಣೆ

ಈ ಮೂವರು ಯುವಕರಿಗೆ ನೆಟ್‌ವರ್ಕ್ ಸಮಸ್ಯೆ ಹೊಸತೇನಲ್ಲ. ಕೊರೊನಾ ಸಾಂಕ್ರಾಮಿಕದ ಸಂದರ್ಭದಲ್ಲಿ ವಿಧಿಸಲಾಗಿದ್ದ ಲಾಕ್‌ಡೌನ್ ಸಮಯದಲ್ಲಿ ಮೊಬೈಲ್ ಸಂಪರ್ಕದ ಕೊರತೆಯಿಂದ ಎದುರಾದ ತೊಂದರೆಗಳನ್ನು ಅವರು ಸ್ವತಃ ಅನುಭವಿಸಿದ್ದರು. ಆನ್‌ಲೈನ್ ಸಂವಹನ, ಮಾಹಿತಿ ವಿನಿಮಯ ಸೇರಿದಂತೆ ಹಲವು ಕೆಲಸಗಳಿಗೆ ಇಂಟರ್ನೆಟ್ ಅನಿವಾರ್ಯವಾಗಿದ್ದ ಸಂದರ್ಭದಲ್ಲಿ ಗ್ರಾಮೀಣ ಭಾಗಗಳಲ್ಲಿ ನೆಟ್‌ವರ್ಕ್ ಸಿಗದಿರುವುದು ದೊಡ್ಡ ಅಡಚಣೆಯಾಗಿತ್ತು. ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಬೇಕು ಎಂಬ ಉದ್ದೇಶದಿಂದ ಅಭಯ್, ಸುದರ್ಶನ್ ಮತ್ತು ಸಮರ್ಥ್ ಒಟ್ಟಾಗಿ ಕೆಲಸ ಆರಂಭಿಸಿದರು. ತಂತ್ರಜ್ಞಾನದ ಮೂಲಕ ನೆಟ್‌ವರ್ಕ್ ಸಮಸ್ಯೆ ನಿವಾರಿಸುವ ಗುರಿ ಹೊಂದಿದರು.

ವರ್ಷಗಳಿಂದ ಮೊಬೈಲ್ ನೆಟ್‌ವರ್ಕ್ ಸಮಸ್ಯೆ ಎದುರಿಸುತ್ತಿದ್ದ ಉತ್ತರ ಕನ್ನಡ ಜಿಲ್ಲೆಯ ಪಶ್ಚಿಮ ಘಟ್ಟಗಳ ಭಾಗದ ಜನರಿಗೆ ಇದೀಗ ಸಿಹಿಸುದ್ದಿ ಸಿಕ್ಕಿದೆ. ಸರಿಯಾಗಿ ಮೊಬೈಲ್ ಸಿಗ್ನಲ್ ಸಿಗದೆ ಫೋನ್ ಕರೆ ಮಾಡಲೂ ಗುಡ್ಡ ಹತ್ತಬೇಕಾದ ಪರಿಸ್ಥಿತಿ ಈಗ ಬದಲಾಗುವ ನಿರೀಕ್ಷೆಯಿದೆ. BSNL ಮತ್ತು Nexus Spherical Technologies ಸಂಸ್ಥೆಗಳು Lekha Wireless Solutions Pvt. Ltd. ಸಹಯೋಗದೊಂದಿಗೆ ಉತ್ತರ ಕನ್ನಡ ಜಿಲ್ಲೆಯ ಗ್ರಾಮೀಣ ಹಾಗೂ ನೆಟ್‌ವರ್ಕ್ ಸೌಲಭ್ಯವಿಲ್ಲದ ಪ್ರದೇಶಗಳಲ್ಲಿ ಹೈ ಸ್ಪೀಡ್ 4G ಸಂಪರ್ಕ ಕಲ್ಪಿಸಿವೆ. ಯಲ್ಲಾಪುರದ ಅನಗೋಡದಲ್ಲಿ 4G ಸೇವೆ ಆರಂಭ Lekha Wireless ಸಂಸ್ಥೆ ಸ್ವದೇಶಿ ತಂತ್ರಜ್ಞಾನ ಬಳಸಿ ಅಭಿವೃದ್ಧಿಪಡಿಸಿರುವ 4G Radio Access Network (RAN) ತಂತ್ರಜ್ಞಾನದ ನೆರವಿನಿಂದ ಯಲ್ಲಾಪುರ ತಾಲೂಕಿನ ಅನಗೋಡ ಪ್ರದೇಶದಲ್ಲಿ 4G ಸಂಪರ್ಕ ಕಲ್ಪಿಸಲಾಗಿದೆ.

ಇದುವರೆಗೆ ಪಶ್ಚಿಮ ಘಟ್ಟಗಳ ಹಲವು ಪ್ರದೇಶಗಳಲ್ಲಿ ಮೊಬೈಲ್ ನೆಟ್‌ವರ್ಕ್ ಸಮಸ್ಯೆ ದೊಡ್ಡ ಸವಾಲಾಗಿತ್ತು. ಕೆಲವೆಡೆ ಫೋನ್ ಕರೆ ಮಾಡಲು ಅಥವಾ ಇಂಟರ್ನೆಟ್ ಬಳಸಲು ಜನರು ಎತ್ತರದ ಗುಡ್ಡ ಪ್ರದೇಶಗಳಿಗೆ ತೆರಳಬೇಕಾಗಿತ್ತು. ಇದೀಗ ಈ ಸಮಸ್ಯೆಗೆ ಪರಿಹಾರ ಕಲ್ಪಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆ ಇಡಲಾಗಿದೆ. ಕೇಂದ್ರ ಸಂವಹನ ಸಚಿವಾಲಯದಿಂದ ಮೆಚ್ಚುಗೆ ಈ ಯೋಜನೆಯ ಯಶಸ್ವಿ ಅನುಷ್ಠಾನಕ್ಕೆ ಕೇಂದ್ರ ಸಂವಹನ ಸಚಿವಾಲಯ ಮೆಚ್ಚುಗೆ ವ್ಯಕ್ತಪಡಿಸಿದೆ ಎಂದು ಸಂಸ್ಥೆಗಳು ತಿಳಿಸಿವೆ. ದೇಶೀಯವಾಗಿ ಅಭಿವೃದ್ಧಿಪಡಿಸಿದ ತಂತ್ರಜ್ಞಾನವನ್ನು ಬಳಸಿಕೊಂಡು ಗ್ರಾಮೀಣ ಪ್ರದೇಶಗಳಲ್ಲಿಯೂ ಉತ್ತಮ ನೆಟ್‌ವರ್ಕ್ ಸೌಲಭ್ಯ ಒದಗಿಸಬಹುದು ಎಂಬುದಕ್ಕೆ ಈ ಯೋಜನೆ ಉದಾಹರಣೆಯಾಗಿದೆ.

ಲೇಖಾ ವಯರ್‌ಲೆಸ್ ಸಂಸ್ಥಾಪಕ ಮತ್ತು ಸಿಇಒ ರಾಮು ಅವರ ಪ್ರಕಾರ, ನೀತಿ ಬದಲಾವಣೆಯು ಟೆಲಿಕಾಂ ವಲಯದಲ್ಲಿ ಆತ್ಮನಿರ್ಭರತೆಯನ್ನು ಸಾಧಿಸುವ ನಿಟ್ಟಿನಲ್ಲಿ ಭಾರತೀಯ ಉತ್ಪನ್ನಗಳಿಗೆ ಮಾರುಕಟ್ಟೆ ಪ್ರವೇಶವನ್ನು ಒದಗಿಸುತ್ತದೆ. ನೆಕ್ಸಸ್‌ಸ್ಫೆರಿಕಲ್ ಟೆಕ್ನಾಲಜೀಸ್ ಸಂಸ್ಥೆಯ ಸಹ-ಸಂಸ್ಥಾಪಕ ಸುದರ್ಶನ್ ಎಚ್.ಎನ್. ಅವರ ಪ್ರಕಾರ, ಗ್ರಾಮೀಣ ಪ್ರದೇಶಗಳಲ್ಲಿ ಮೊಬೈಲ್ ನೆಟ್‌ವರ್ಕ್ ವ್ಯಾಪ್ತಿಯನ್ನು ವಿಸ್ತರಿಸುವುದರಿಂದ ಸಾಕಷ್ಟು ಉದ್ಯೋಗಾವಕಾಶಗಳು ಸೃಷ್ಟಿಯಾಗುತ್ತವೆ ಮತ್ತು ಸ್ಥಳೀಯ ಜನರ ಏಳಿಗೆಗೆ ಸಹಾಯವಾಗುತ್ತದೆ ಎಂದು ತಿಳಿಸಿದ್ದಾರೆ.

ಗ್ರಾಮೀಣ ಭಾರತದ ನೆಟ್‌ವರ್ಕ್ ಸಮಸ್ಯೆಗೆ ಸಿಗುತ್ತಾ ಪರಿಹಾರ?

ಇಂದಿನ ಡಿಜಿಟಲ್ ಯುಗದಲ್ಲಿ ಶಿಕ್ಷಣ, ಉದ್ಯೋಗ, ಬ್ಯಾಂಕಿಂಗ್, ಆರೋಗ್ಯ ಸೇವೆ ಸೇರಿದಂತೆ ಬಹುತೇಕ ಕ್ಷೇತ್ರಗಳಿಗೆ ಇಂಟರ್ನೆಟ್ ಅತ್ಯಗತ್ಯವಾಗಿದೆ. ಆದರೆ ನಗರಗಳಿಗೆ ಹೋಲಿಸಿದರೆ ಗ್ರಾಮೀಣ ಮತ್ತು ಅರಣ್ಯ ಪ್ರದೇಶಗಳಲ್ಲಿ ಸಂಪರ್ಕ ವ್ಯವಸ್ಥೆ ಇನ್ನೂ ಸವಾಲಾಗಿದೆ. ಇಂತಹ ಸಂದರ್ಭದಲ್ಲಿ ಸಿರ್ಸಿಯ ಅಭಯ್, ಸುದರ್ಶನ್ ಮತ್ತು ಸಮರ್ಥ್ ಅವರ ಮೈಕ್ರೋ ಸೆಲ್ ಆವಿಷ್ಕಾರ ಗ್ರಾಮೀಣ ಪ್ರದೇಶಗಳ ಸಂಪರ್ಕ ವ್ಯವಸ್ಥೆಯನ್ನು ಸುಧಾರಿಸುವ ಪ್ರಯತ್ನದಲ್ಲಿ ಹೊಸ ಭರವಸೆ ಮೂಡಿಸಿದೆ.

ಬೆಂಗಳೂರು ಪೂರ್ವ ಕೆ.ಆರ್. ಪುರದಲ್ಲೂ ಹೊಸ ಸ್ಯಾಟಲೈಟ್ ಬಸ್ ನಿಲ್ದಾಣ! 5 ಎಕರೆ ಜಾಗ ಪರಿಶೀಲನೆ

Sathish Kumar KH — Fri, 06 Nov 2026 17:03:16 +0530

ಬೆಂಗಳೂರು (ನ.06): ಬೆಂಗಳೂರು ನಗರ ತೀವ್ರವಾಗಿ ಬೆಳೆಯುತ್ತಿರುವ ಹಿನ್ನೆಲೆಯಲ್ಲಿ ಸಂಚಾರ ದಟ್ಟಣೆ ನಿಯಂತ್ರಿಸಲು ಹಾಗೂ ಸಾರ್ವಜನಿಕ ಪ್ರಯಾಣಿಕರಿಗೆ ಸುಸಜ್ಜಿತ ಸಾರಿಗೆ ಸೌಲಭ್ಯ ಕಲ್ಪಿಸಲು ಪೂರ್ವ ನಗರ ಪಾಲಿಕೆ ವ್ಯಾಪ್ತಿಯ ಕೆ.ಆರ್. ಪುರದಲ್ಲಿ (KR Puram) ನೂತನ ಸ್ಯಾಟಲೈಟ್ ಬಸ್ ನಿಲ್ದಾಣ ನಿರ್ಮಿಸಲು ಬೃಹತ್ ಯೋಜನೆ ರೂಪಿಸಲಾಗಿದೆ.

ಯೋಜನೆಯ ತಾಂತ್ರಿಕ ಹಾಗೂ ಆಡಳಿತಾತ್ಮಕ ಸಾಧ್ಯತೆಗಳು, ಭೂಸ್ವಾಧೀನ, ಪರಿಹಾರ ವಿತರಣೆ ಮತ್ತು ಅಗತ್ಯ ಮೂಲಸೌಕರ್ಯಗಳ ಕುರಿತು ಅಪರ ಆಯುಕ್ತರಾದ (ಅಭಿವೃದ್ಧಿ) ಲೋಖಂಡೆ ಸ್ನೇಹಲ್ ಸುಧಾಕರ್ ಅವರ ಅಧ್ಯಕ್ಷತೆಯಲ್ಲಿ ವಿವಿಧ ಇಲಾಖೆಗಳ ಉನ್ನತಾಧಿಕಾರಿಗಳ ಸಮನ್ವಯ ಸಭೆ ಶುಕ್ರವಾರ ನಡೆಯಿತು.

ಮುಖ್ಯರಸ್ತೆ ಸಮೀಪ 5 ಎಕರೆ ಜಾಗ ಗುರುತು

ಕೆ.ಆರ್. ಪುರ ಭಾಗದಲ್ಲಿ ಸುಸಜ್ಜಿತ ಬಸ್ ನಿಲ್ದಾಣದ ಅಗತ್ಯತೆ ಕುರಿತು ಈಗಾಗಲೇ ಮುಖ್ಯಮಂತ್ರಿಗಳ ಹಂತದಲ್ಲೂ ಚರ್ಚೆಯಾಗಿದೆ. ಈ ಹಿನ್ನೆಲೆಯಲ್ಲಿ ಕೆ.ಆರ್. ಪುರದಿಂದ ಭಟ್ಟರಹಳ್ಳಿ ನಡುವಿನ ಮುಖ್ಯರಸ್ತೆ ಸಮೀಪ ಸ್ಯಾಟಲೈಟ್ ಬಸ್ ನಿಲ್ದಾಣ ನಿರ್ಮಿಸಲು ಸೂಕ್ತವಾದ ಸುಮಾರು 5 ಎಕರೆ ಜಮೀನನ್ನು ಗುರುತಿಸಿ ಅಗತ್ಯ ಕ್ರಮ ಕೈಗೊಳ್ಳುವಂತೆ ಅಪರ ಆಯುಕ್ತರು ಅಧಿಕಾರಿಗಳಿಗೆ ಸೂಚಿಸಿದರು. ಮುಖ್ಯರಸ್ತೆಗೆ ಸಮೀಪವೇ ಬಸ್ ನಿಲ್ದಾಣ ನಿರ್ಮಾಣವಾದರೆ ಸಾರ್ವಜನಿಕರಿಗೆ ಹೆಚ್ಚಿನ ಅನುಕೂಲವಾಗಲಿದ್ದು, ಬಸ್ ಸಂಚಾರ ವ್ಯವಸ್ಥೆಯನ್ನು ಸುಧಾರಿಸಲು ಮತ್ತು ಟ್ರಾಫಿಕ್ ಜಾಮ್ ನಿಯಂತ್ರಿಸಲು ಸಾಧ್ಯವಾಗಲಿದೆ ಎಂದು ಅವರು ಸ್ಪಷ್ಟಪಡಿಸಿದರು.

ಐಟಿಐ ಜಮೀನು ಲಭ್ಯತೆ ಮತ್ತು ಕೆಎಸ್‌ಆರ್‌ಟಿಸಿ ಆಸಕ್ತಿ

ಸಭೆಯಲ್ಲಿ ಐಟಿಐ ಲಿಮಿಟೆಡ್‌ಗೆ (ITI Limited) ಸೇರಿದ ಜಮೀನಿನ ಲಭ್ಯತೆ ಹಾಗೂ ಕೆಎಸ್‌ಆರ್‌ಟಿಸಿ (KSRTC) ವತಿಯಿಂದ ಸುಮಾರು 5 ಎಕರೆ ಜಮೀನು ಪಡೆದು ಬಸ್ ನಿಲ್ದಾಣ ನಿರ್ಮಿಸುವ ಆಸಕ್ತಿಯ ಕುರಿತು ಗಂಭೀರ ಚರ್ಚೆ ನಡೆಯಿತು. ಜಮೀನಿನ ಮಾರುಕಟ್ಟೆ ಮೌಲ್ಯದ ಆಧಾರದ ಮೇಲೆ ಪರಿಹಾರ ನಿಗದಿಪಡಿಸುವುದು, ಭೂ ವಿನಿಮಯ ಸಾಧ್ಯತೆಗಳು ಹಾಗೂ ಭೂಸ್ವಾಧೀನ ಕಾಯ್ದೆಯಡಿ ಜಮೀನು ಪಡೆಯುವ ಪ್ರಕ್ರಿಯೆಗಳನ್ನು ನಿಯಮಾನುಸಾರ ಪರಿಶೀಲಿಸಲು ನಿರ್ದೇಶಿಸಲಾಯಿತು. ಇದಲ್ಲದೆ, ಐಟಿಐ ಲಿಮಿಟೆಡ್ ಸಮೀಪ ನಕ್ಷೆಯಲ್ಲಿದ್ದರೂ ಸ್ಥಳದಲ್ಲಿ ಒತ್ತುವರಿಯಾಗಿದ್ದ 80 ಮೀಟರ್ ಉದ್ದದ ರಸ್ತೆಯ ಒತ್ತುವರಿಯನ್ನು ತಕ್ಷಣವೇ ತೆರವುಗೊಳಿಸಿ, ಸಾರ್ವಜನಿಕ ಬಳಕೆಗೆ ಮುಕ್ತಗೊಳಿಸಲು ಅಧಿಕಾರಿಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಲಾಯಿತು.

ನವೆಂಬರ್ 16ರಂದು ಜಂಟಿ ಸರ್ವೆಗೆ ಸೂಚನೆ

ಯೋಜನೆಯ ವೇಗದ ಅನುಷ್ಠಾನಕ್ಕಾಗಿ ನವೆಂಬರ್ 16ರಂದು ಜಂಟಿ ಸರ್ವೆ ನಡೆಸಲು ನಿರ್ಧರಿಸಲಾಗಿದೆ. ಐಟಿಐ ಲಿಮಿಟೆಡ್ ಸಂಸ್ಥೆಯ ಪ್ರತಿನಿಧಿಗಳು, ಎಡಿಎಲ್‌ಆರ್ (ADLR), ಕರ್ನಾಟಕ ಗೃಹ ಮಂಡಳಿ (KHB) ಹಾಗೂ ಅರಣ್ಯ/ಸಂಬಂಧಿತ ಇಲಾಖೆ ಅಧಿಕಾರಿಗಳು ಈ ಜಂಟಿ ಸರ್ವೆಯಲ್ಲಿ ಭಾಗವಹಿಸಲಿದ್ದಾರೆ. ಸರ್ವೆಗೂ ಮುನ್ನ ಸಿಡಿಪಿ (CDP) ರಸ್ತೆ ನಕ್ಷೆಯ ಪ್ರಕಾರ ಅಲೈನ್‌ಮೆಂಟ್ ಸಿದ್ಧಪಡಿಸಿ, ರಸ್ತೆ ಮಾರ್ಗದಲ್ಲಿರುವ ಒತ್ತುವರಿ ಹಾಗೂ ಗಿಡಗಳನ್ನು ತೆರವುಗೊಳಿಸಿ ವರದಿ ಸಲ್ಲಿಸುವಂತೆ ತಿಳಿಸಲಾಗಿದೆ.

ಲಿಖಿತ ವರದಿ ನೀಡಿ ತಕ್ಷಣ ಕೆಲಸ ಆರಂಭಿಸಿ!

ಅಧಿಕಾರಿಗಳು ಕೇವಲ ಮೌಖಿಕವಾಗಿ ಮಾಹಿತಿ ನೀಡುವುದನ್ನು ನಿರಾಕರಿಸಿದ ಅಪರ ಆಯುಕ್ತ ಲೋಖಂಡೆ ಸ್ನೇಹಲ್ ಸುಧಾಕರ್, 'ಸ್ಥಳದ ಲಭ್ಯತೆ, ಭೂಸ್ವಾಧೀನದ ತಾಂತ್ರಿಕ ವಿವರಗಳನ್ನು ಲಿಖಿತ ರೂಪದಲ್ಲಿ ಸಲ್ಲಿಸಬೇಕು. ಯಾವುದೇ ವಿಳಂಬವಿಲ್ಲದೆ ತಕ್ಷಣದಿಂದಲೇ (ನವೆಂಬರ್ 7) ಅಗತ್ಯ ಪ್ರಕ್ರಿಯೆಗಳನ್ನು ಪ್ರಾರಂಭಿಸಿ' ಎಂದು ಆದೇಶಿಸಿದರು.

ಸಭೆಯ ಬಳಿಕ ಅಪರ ಆಯುಕ್ತರ ನಿರ್ದೇಶನದಂತೆ ಕಾರ್ಯಪಾಲಕ ಅಭಿಯಂತರರು ಹಾಗೂ ಸಹಾಯಕ ಕಾರ್ಯಪಾಲಕ ಅಭಿಯಂತರರ ತಂಡವು ಐಟಿಐ ಪ್ರದೇಶಕ್ಕೆ ಭೇಟಿ ನೀಡಿ ಸ್ಥಳ ಪರಿಶೀಲನೆ ನಡೆಸಿತು. ಸಭೆಯಲ್ಲಿ ಮುಖ್ಯ ಅಭಿಯಂತರರಾದ ವಿಶ್ವನಾಥ್ ಜೆ., KHB, PWD, DDLR, ಐಟಿಐ ಲಿಮಿಟೆಡ್ ಹಾಗೂ ಪಾಲಿಕೆಯ ಪ್ರಮುಖ ಅಧಿಕಾರಿಗಳು ಉಪಸ್ಥಿತರಿದ್ದರು.

ಕಾಡು-ಮೇಡು ಬಿಟ್ಟು ಮನೆಯೊಳಗೆ ಮಲಗಲು ಬಂದ ಕಾಳಿಂಗ ಸರ್ಪ; 10 ಅಡಿ ಹಾವು ನೋಡಿ ಬೆಚ್ಚಿಬಿದ್ದ ಮನೆಮಂದಿ!

Sathish Kumar KH — Fri, 06 Nov 2026 16:47:55 +0530

ಕೊಡಗು (ನ.06): ಮಲೆನಾಡಿನ ದಟ್ಟ ಕಾಡುಗಳಲ್ಲಿ ಸಾಮಾನ್ಯವಾಗಿ ಕಂಡುಬರುವ ಕಾಳಿಂಗ ಸರ್ಪವೊಂದು (King Cobra) ಆಹಾರ ಅಥವಾ ಬೆಚ್ಚಿನ ಸ್ಥಳವನ್ನು ಹುಡುಕಿಕೊಂಡು ಹೋಗಿ ನೇರವಾಗಿ ಮನೆಯೊಳಗೆ ನುಗ್ಗಿದ ಘಟನೆ ಕೊಡಗಿನಲ್ಲಿ ನಡೆದಿದೆ. ಮನೆಯ ಕೋಣೆಯಲ್ಲಿ ಬೃಹತ್ ಗಾತ್ರದ ಹಾವನ್ನು ಕಂಡು ಮನೆಯವರು ಬೆಚ್ಚಿಬಿದ್ದಿದ್ದು, ಬಳಿಕ ಅರಣ್ಯ ಇಲಾಖೆ ಸಿಬ್ಬಂದಿ ಹಾವನ್ನು ಸುರಕ್ಷಿತವಾಗಿ ಸೆರೆಹಿಡಿದು ಕಾಡಿಗೆ ಬಿಟ್ಟಿದ್ದಾರೆ.

ಮದೆನಾಡಿನ ಭಾರತಿ ಅವರ ಮನೆಯಲ್ಲಿ ಪತ್ತೆಯಾದ ಬೃಹತ್ ಹಾವು

ಕೊಡಗು ಜಿಲ್ಲೆಯ ಮದೆನಾಡು ಗ್ರಾಮದ ನಿವಾಸಿ ಭಾರತಿ ಎಂಬುವವರ ಮನೆಯೊಳಗೆ ಈ ಘಟನೆ ನಡೆದಿದೆ. ನಿನ್ನೆ ರಾತ್ರಿ ವೇಳೆ ಮನೆಯಲ್ಲಿ ಎಲ್ಲರೂ ಇದ್ದರೂ, ಸದ್ದಿಲ್ಲದೇ 10 ಅಡಿ ಉದ್ದ ಹಾಗೂ 14 ಕೆಜಿ ತೂಕದ ಬೃಹತ್ ಕಾಳಿಂಗ ಸರ್ಪ ನೇರವಾಗಿ ಮನೆಯ ಕೋಣೆಯೊಳಗೆ ಸೇರಿಕೊಂಡಿದೆ. ರೂಮಿನೊಳಗೆ ಹೋದ ಭಾರತಿ ಅವರಿಗೆ ದೊಡ್ಡ ಗಾತ್ರದ ಹಾವಿನ ಹೆಡೆ ಕಾಣಿಸಿಕೊಂಡಿದ್ದು, ತಕ್ಷಣವೇ ಆತಂಕಗೊಂಡು ಬೆಚ್ಚಿಬಿದ್ದಿದ್ದಾರೆ. ಕೂಡಲೇ ಮನೆಯವರ ಸಹಾಯದಿಂದ ಅಕ್ಕಪಾಸಿನವರಿಗೆ ವಿಷಯ ಮುಟ್ಟಿಸಿದ್ದು, ಗ್ರಾಮಸ್ಥರಲ್ಲಿ ಭೀತಿಯ ವಾತಾವರಣ ನಿರ್ಮಾಣವಾಗಿತ್ತು.

ಉರಗಪ್ರೇಮಿ ಪಿಯೂಷ್ ಅವರಿಂದ ಧೈರ್ಯದ ಕಾರ್ಯಾಚರಣೆ

ವಿಷಯ ತಿಳಿದ ಕೂಡಲೇ ಸ್ಥಳಕ್ಕೆ ಧಾವಿಸಿದ ಯುವ ಉರಗಪ್ರೇಮಿ ಪಿಯೂಷ್, ಯಾವುದೇ ಪ್ರಾಣಾಪಾಯವಾಗದಂತೆ ಎಚ್ಚರಿಕೆ ವಹಿಸಿ ಕಾರ್ಯಾಚರಣೆ ನಡೆಸಿದರು. ಮನೆಯ ಕೋಣೆಯಲ್ಲಿ ಅಡಗಿಕೊಂಡಿದ್ದ ಸುಮಾರು 10 ಅಡಿ ಉದ್ದದ ಅತೀ ವಿಷಪೂರಿತ ಕಾಳಿಂಗ ಸರ್ಪವನ್ನು ಸೆರೆಹಿಡಿಯುವಲ್ಲಿ ಪಿಯೂಷ್ ಯಶಸ್ವಿಯಾದರು. ಹಾವನ್ನು ಸುರಕ್ಷಿತವಾಗಿ ಚೀಲಕ್ಕೆ ಬಂಧಿಸುತ್ತಿದ್ದಂತೆ ಮನೆಯವರು ಹಾಗೂ ಸ್ಥಳೀಯರು ನಿಟ್ಟುಸಿರು ಬಿಟ್ಟರು.

ಅರಣ್ಯ ಇಲಾಖೆ ವತಿಯಿಂದ ಸಂಪಾಜೆ ಅರಣ್ಯಕ್ಕೆ ಬಿಡುಗಡೆ

ಮನೆಯಲ್ಲಿದ್ದ ಕಾಳಿಂಗ ಸರ್ಪವನ್ನು ಯಶಸ್ವಿಯಾಗಿ ಸೆರೆಹಿಡಿದ ಬಳಿಕ, ಉರಗಪ್ರೇಮಿ ಪಿಯೂಷ್ ಅವರು ಅದನ್ನು ತಕ್ಷಣವೇ ಅರಣ್ಯ ಇಲಾಖೆ ಸಿಬ್ಬಂದಿಗೆ ಅಧಿಕೃತವಾಗಿ ಹಸ್ತಾಂತರಿಸಿದರು.

ಅರಣ್ಯ ಇಲಾಖೆಯ ಸಿಬ್ಬಂದಿ ಹಾಗೂ ಉರಗಪ್ರೇಮಿ ಪಿಯೂಷ್ ಅವರ ಸಮ್ಮುಖದಲ್ಲಿ, ಆ ಬೃಹತ್ ಕಾಳಿಂಗ ಸರ್ಪಕ್ಕೆ ಯಾವುದೇ ಹಾನಿಯಾಗದಂತೆ ಸುರಕ್ಷಿತವಾಗಿ ಸಂಪಾಜೆ ಅರಣ್ಯ ಪ್ರದೇಶದ ಆಳಕ್ಕೆ ಒಯ್ದು ಬಿಡಲಾಯಿತು. ಮಲೆನಾಡಿನಲ್ಲಿ ಹೆಚ್ಚುತ್ತಿರುವ ಕಾಡು-ನಾಡು ವಿಸ್ತರಣೆಯ ನಡುವೆಯೂ ವನ್ಯಜೀವಿಗಳ ರಕ್ಷಣೆಗಾಗಿ ಸ್ಥಳೀಯರು ಮತ್ತು ಅರಣ್ಯ ಇಲಾಖೆ ನಡೆಸುತ್ತಿರುವ ಇಂತಹ ಕಾರ್ಯಗಳಿಗೆ ಸಾರ್ವಜನಿಕ ವಲಯದಲ್ಲಿ ಮೆಚ್ಚುಗೆ ವ್ಯಕ್ತವಾಗಿದೆ.

ಕರಾವಳಿ ರೈಲು ಪ್ರಯಾಣಿಕರಿಗೆ ಕಾದಿದೆ ಒಂದು ಅಚ್ಚರಿಯ ಸುದ್ದಿ, ಯಶವಂತಪುರ-ಕಾರವಾರ ಎಕ್ಸ್‌ಪ್ರೆಸ್ ಅಪ್‌ಗ್ರೇಡ್!

Gowthami K — Fri, 06 Nov 2026 16:24:12 +0530

ಮಂಗಳೂರು: ಯಶವಂತಪುರ–ಕಾರವಾರ (16515) ಎಕ್ಸ್‌ಪ್ರೆಸ್ ರೈಲು ಗುರುವಾರ ಮೊದಲ ಬಾರಿಗೆ ವಿದ್ಯುತ್ ಎಂಜಿನ್‌ನೊಂದಿಗೆ ಸಂಚರಿಸಿದೆ. ರೈಲಿಗೆ ಯಶವಂತಪುರದಿಂದ ಸುಬ್ರಹ್ಮಣ್ಯ ರೋಡ್ (ಎಸ್‌ಬಿಎಚ್‌ಆರ್) ನಿಲ್ದಾಣದವರೆಗೆ ವಿದ್ಯುತ್ ಎಂಜಿನ್ ಅಳವಡಿಸಲಾಗಿತ್ತು. ಕೆಜೆಎಂ ಮೂಲದ ಡಬ್ಲ್ಯುಎಜಿ-9 ಎಚ್‌ಸಿ ಮಾದರಿಯ 34110 ಮತ್ತು 44258 ಸಂಖ್ಯೆಯ ಎರಡು ವಿದ್ಯುತ್ ಎಂಜಿನ್‌ಗಳನ್ನು ಜೋಡಿಸಲಾಗಿತ್ತು. ಇದರೊಂದಿಗೆ ಡಬ್ಲ್ಯುಎಪಿ-7 ಮಾದರಿಯ 39418 ಸಂಖ್ಯೆಯ ಎಂಜಿನ್ ನ್ನು ಎಸ್‌ಬಿಎಚ್‌ಆರ್ ನಿಲ್ದಾಣದವರೆಗೆ ಕಾರ್ಯನಿರ್ವಹಿಸದ ಸ್ಥಿತಿಯಲ್ಲಿ (ಡೆಡ್ ಎಂಜಿನ್) ಜೋಡಿಸಲಾಗಿತ್ತು.

ಯಶವಂತಪುರದಿಂದ ಸುಬ್ರಹ್ಮಣ್ಯ ರೋಡ್‌ವರೆಗೆ ವಿದ್ಯುತ್ ಎಂಜಿನ್ ಬಳಕೆಯೊಂದಿಗೆ ರೈಲಿನ ಮೊದಲ ವಿದ್ಯುತ್ ರೈಲು ಸಂಚಾರ ನಡೆದಿದ್ದು, ರೈಲ್ವೆ ಕಾರ್ಯಾಚರಣೆಯಲ್ಲಿ ಮಹತ್ವದ ಬದಲಾವಣೆಯಾಗಿದೆ. ಘಾಟ್ ವಿಭಾಗದಲ್ಲಿ ಇನ್ನು ಮುಂದೆ ವಿದ್ಯುತ್ ಎಂಜಿನ್ ಬಳಕೆಯ ಕಾರ್ಯವೈಖರಿ ಹೇಗಿರಲಿದೆ ಎಂಬುದು ಗಮನಾರ್ಹವಾಗಿದೆ.

ದೀಪಾವಳಿಗೆ ವಯಾ ಮಂಗಳೂರು ಜಂಕ್ಷನ್‌ ಮೂಲಕ ಬೆಂಗಳೂರು-ಮಡ್ಗಾಂವ್‌ ವಿಶೇಷ ರೈಲು

ದೀಪಾವಳಿ ಹಬ್ಬದ ಹಿನ್ನೆಲೆಯಲ್ಲಿ ಪ್ರಯಾಣಿಕರ ಹೆಚ್ಚುವರಿ ದಟ್ಟಣೆಯನ್ನು ನಿಯಂತ್ರಿಸುವ ಉದ್ದೇಶದಿಂದ ನೈಋತ್ಯ ರೈಲ್ವೆಯು ಯಶವಂತಪುರ-ಮಡಗಾಂವ್ ಹಾಗೂ ಮಡಗಾಂವ್-ಬೆಂಗಳೂರು ಕಂಟೋನ್ಮೆಂಟ್ ನಡುವೆ ವಿಶೇಷ ಎಕ್ಸ್‌ಪ್ರೆಸ್ ರೈಲುಗಳನ್ನು ಓಡಿಸಲು ನಿರ್ಧರಿಸಿದೆ. ಎರಡೂ ಮಾರ್ಗಗಳಲ್ಲಿ ತಲಾ ಒಂದು ಟ್ರಿಪ್ ಸಂಚರಿಸಲಿದ್ದು, ಕರಾವಳಿ ಭಾಗದ ಪ್ರಯಾಣಿಕರಿಗೆ ಅನುಕೂಲವಾಗಲಿದೆ. ಈ ರೈಲು ವಯಾ ಮಂಗಳೂರು ಜಂಕ್ಷನ್‌ ಮೂಲಕ ಸಂಚರಿಸಲಿದೆ. ರೈಲು ಸಂಖ್ಯೆ 06591 ಯಶವಂತಪುರ-ಮಡಗಾಂವ್ ವಿಶೇಷ ಎಕ್ಸ್‌ಪ್ರೆಸ್ ನವೆಂಬರ್ 6 ರಂದು ರಾತ್ರಿ 11.55ಕ್ಕೆ ಯಶವಂತಪುರದಿಂದ ಹೊರಟು, ನವೆಂಬರ್ 7 ರಂದು ಸಂಜೆ 6.10ಕ್ಕೆ ಮಡಗಾಂವ್ ತಲುಪಲಿದೆ.

ಹಿಂತಿರುಗುವ ಪ್ರಯಾಣದಲ್ಲಿ ರೈಲು ಸಂಖ್ಯೆ 06592 ಮಡಗಾಂವ್-ಬೆಂಗಳೂರು ಕಂಟೋನ್ಮೆಂಟ್ ವಿಶೇಷ ಎಕ್ಸ್‌ಪ್ರೆಸ್ ನವೆಂಬರ್ 8 ರಂದು ಬೆಳಗ್ಗೆ 11 ಗಂಟೆಗೆ ಮಡಗಾಂವ್‌ನಿಂದ ಹೊರಟು, ಮರುದಿನ ಬೆಳಗ್ಗೆ 5.20ಕ್ಕೆ ಬೆಂಗಳೂರು ಕಂಟೋನ್ಮೆಂಟ್ ತಲುಪಲಿದೆ.

ಈ ರೈಲುಗಳು ಎರಡೂ ಮಾರ್ಗಗಳಲ್ಲಿ ಕುಣಿಗಲ್, ಚನ್ನರಾಯಪಟ್ಟಣ, ಹಾಸನ, ಸಕಲೇಶಪುರ, ಸುಬ್ರಹ್ಮಣ್ಯ ರೋಡ್, ಕಬಕ-ಪುತ್ತೂರು, ಬಂಟ್ವಾಳ, ಮಂಗಳೂರು ಜಂಕ್ಷನ್, ಸುರತ್ಕಲ್, ಮೂಲ್ಕಿ, ಉಡುಪಿ, ಬಾರ್ಕೂರು, ಕುಂದಾಪುರ, ಬೈಂದೂರು, ಭಟ್ಕಳ, ಮುರ್ಡೇಶ್ವರ, ಹೊನ್ನಾವರ, ಕುಮಟಾ, ಗೋಕರ್ಣ ರೋಡ್, ಅಂಕೋಲಾ, ಕಾರವಾರ ಹಾಗೂ ಕಾಣಕೋಣ ನಿಲ್ದಾಣಗಳಲ್ಲಿ ನಿಲುಗಡೆ ಹೊಂದಲಿವೆ.

ಆದರೆ ಮಡಗಾಂವ್‌ನಿಂದ ಬೆಂಗಳೂರಿಗೆ ಮರಳುವ ರೈಲು ಸಂಖ್ಯೆ 06592 ಯಶವಂತಪುರದಲ್ಲಿ ನಿಲುಗಡೆ ಹೊಂದಿರುವುದಿಲ್ಲ. ಬದಲಾಗಿ ಎಸ್‌ಎಂವಿಟಿ ಬೆಂಗಳೂರು ನಿಲ್ದಾಣದಲ್ಲಿ ನಿಲುಗಡೆ ನೀಡಲಾಗಿದೆ.

ಒಟ್ಟು 19 ಬೋಗಿಗಳನ್ನು ಹೊಂದಿರುವ ಈ ವಿಶೇಷ ರೈಲಿನಲ್ಲಿ ಎಸಿ, ಸ್ಲೀಪರ್ ಹಾಗೂ ಸಾಮಾನ್ಯ ದರ್ಜೆಯ ಬೋಗಿಗಳಿರಲಿವೆ. ಇದರೊಂದಿಗೆ ಲಗೇಜ್ ಕಮ್ ಬ್ರೇಕ್ ವ್ಯಾನ್ ಮತ್ತು ದಿವ್ಯಾಂಗಚೇತನ ಪ್ರಯಾಣಿಕರಿಗಾಗಿ ಮೀಸಲಾದ ಬೋಗಿಯೂ ಇರಲಿದೆ.

ಸಂಸದರ ಮನವಿಗೆ ಸ್ಪಂದನೆ:

ದೀಪಾವಳಿಗೆ ಬೆಂಗಳೂರು-ಮಂಗಳೂರು ನಡುವೆ ವಿಶೇಷ ರೈಲು ಓಡಾಟ ನಡೆಸುವಂತೆ ಕೋರಿ ದ.ಕ. ಸಂಸದ ಕ್ಯಾ.ಬ್ರಿಜೇಶ್‌ ಚೌಟ ಅವರು ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್‌ಗೆ ಮನವಿ ಸಲ್ಲಿಸಿದ್ದರು. ಈ ಮನವಿಗೆ ಸ್ಪಂದಿಸಿ ಮಂಗಳೂರು ಜಂಕ್ಷನ್‌ ಮೂಲಕ ವಿಶೇಷ ರೈಲು ಸಂಚಾರ ಏರ್ಪಡಿಸಲಾಗಿದೆ.

Karnataka Weather: ರಾಜ್ಯದ ಈ 11 ಜಿಲ್ಲೆಗಳಲ್ಲಿ ಮಳೆ ಅಲರ್ಟ್; ಬೆಂಗಳೂರಲ್ಲೂ ಗುಡುಗು ಸಹಿತ ಮಳೆ ಮುನ್ಸೂಚನೆ ಕೊಟ್ಟ ಹವಾಮಾನ ಇಲಾಖೆ

Naveen Kodase — Fri, 06 Nov 2026 16:00:28 +0530

ಬೆಂಗಳೂರು(ನ.06): ಕರ್ನಾಟಕದ ಹಲವು ಜಿಲ್ಲೆಗಳಲ್ಲಿ ಮುಂದಿನ ಎರಡು ದಿನಗಳ ಕಾಲ ಮಳೆಯಾಗುವ ಸಾಧ್ಯತೆಯಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (IMD) ಮುನ್ಸೂಚನೆ ನೀಡಿದೆ. ಕರಾವಳಿ ಕರ್ನಾಟಕ ಹಾಗೂ ದಕ್ಷಿಣ ಒಳನಾಡಿನ ಕೆಲವು ಜಿಲ್ಲೆಗಳಲ್ಲಿ ನವೆಂಬರ್ 6 ಮತ್ತು 7ರಂದು ಹಗುರದಿಂದ ಸಾಧಾರಣ ಮಳೆಯಾಗುವ ನಿರೀಕ್ಷೆಯಿದೆ. ಉತ್ತರ ಒಳನಾಡಿನಲ್ಲಿ ಒಣ ಹವಾಮಾನ ಮುಂದುವರಿಯಲಿದೆ.

ಹವಾಮಾನ ಇಲಾಖೆಯ ನವೆಂಬರ್ 6ರ ವರದಿ ಪ್ರಕಾರ, ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ, ಕೊಡಗು, ಮೈಸೂರು, ಮಂಡ್ಯ, ಚಾಮರಾಜನಗರ, ರಾಮನಗರ, ಬೆಂಗಳೂರು ಗ್ರಾಮಾಂತರ, ಬೆಂಗಳೂರು ನಗರ ಹಾಗೂ ಕೋಲಾರ ಜಿಲ್ಲೆಗಳ ಒಂದೆರಡು ಕಡೆಗಳಲ್ಲಿ ಮಳೆ ಅಥವಾ ಗುಡುಗು ಸಹಿತ ಮಳೆಯಾಗುವ ಸಾಧ್ಯತೆಯಿದೆ.

ಬೆಂಗಳೂರಿನಲ್ಲಿ ಮುಂದಿನ 48 ಗಂಟೆ ಮೋಡ ಕವಿದ ವಾತಾವರಣ

ಬೆಂಗಳೂರು ನಗರ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಮುಂದಿನ 24ರಿಂದ 48 ಗಂಟೆಗಳವರೆಗೆ ಸಾಮಾನ್ಯವಾಗಿ ಮೋಡ ಕವಿದ ವಾತಾವರಣ ಇರಲಿದೆ. ಹಗುರದಿಂದ ಸಾಧಾರಣ ಮಳೆ ಅಥವಾ ಗುಡುಗು ಸಹಿತ ಮಳೆಯಾಗುವ ಸಾಧ್ಯತೆಯಿದೆ. ಗರಿಷ್ಠ ತಾಪಮಾನ 28 ಡಿಗ್ರಿ ಸೆಲ್ಸಿಯಸ್ ಹಾಗೂ ಕನಿಷ್ಠ ತಾಪಮಾನ 20 ಡಿಗ್ರಿ ಸೆಲ್ಸಿಯಸ್ ಇರುವ ನಿರೀಕ್ಷೆಯಿದೆ.

ಮಂಡ್ಯದಲ್ಲಿ 7 ಸೆಂ.ಮೀ. ಮಳೆ ದಾಖಲು

ನವೆಂಬರ್ 6ರ ಬೆಳಗ್ಗೆ 8.30ರವರೆಗಿನ ಮಳೆ ದಾಖಲೆ ಪ್ರಕಾರ, ಮಂಡ್ಯ ಜಿಲ್ಲೆಯ ಬೆಳ್ಳೂರಿನಲ್ಲಿ 7 ಸೆಂ.ಮೀ. ಭಾರಿ ಮಳೆಯಾಗಿದೆ. ಹಾಸನ ಜಿಲ್ಲೆಯ ಅರಕಲಗೂಡಿನಲ್ಲಿ 4 ಸೆಂ.ಮೀ., ಕೊಣನೂರಿನಲ್ಲಿ 3 ಸೆಂ.ಮೀ. ಹಾಗೂ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಹೊಸಕೋಟೆಯಲ್ಲಿ 3 ಸೆಂ.ಮೀ. ಮಳೆ ದಾಖಲಾಗಿದೆ.

ಮುಖ್ಯ ಎಚ್ಚರಿಕೆ:

ನವೆಂಬರ್ 6ರಂದು ಕರಾವಳಿ ಕರ್ನಾಟಕ ಮತ್ತು ದಕ್ಷಿಣ ಒಳನಾಡಿನ ಒಂದೆರಡು ಕಡೆಗಳಲ್ಲಿ ಸಿಡಿಲು ಸಹಿತ ಗುಡುಗು ಸಂಭವಿಸುವ ಸಾಧ್ಯತೆಯಿದೆ. ಆದರೆ, ಹವಾಮಾನ ಇಲಾಖೆ ಭಾರಿ ಮಳೆ ಅಥವಾ ಬಿರುಗಾಳಿ ಎಚ್ಚರಿಕೆ ನೀಡಿಲ್ಲ. ನವೆಂಬರ್ 9ರಿಂದ ರಾಜ್ಯದ ಬಹುತೇಕ ಜಿಲ್ಲೆಗಳಲ್ಲಿ ಒಣ ಹವಾಮಾನ ಮುಂದುವರಿಯುವ ಮುನ್ಸೂಚನೆ ಇದೆ. ನವೆಂಬರ್ 11 ಮತ್ತು 12ರಂದು ರಾಜ್ಯದ ಕರಾವಳಿ, ಉತ್ತರ ಒಳನಾಡು ಹಾಗೂ ದಕ್ಷಿಣ ಒಳನಾಡಿನ ಎಲ್ಲಾ ಜಿಲ್ಲೆಗಳಲ್ಲಿ ಒಣ ಹವಾಮಾನ ಇರಲಿದೆ ಎಂದು ಇಲಾಖೆ ತಿಳಿಸಿದೆ.

ಗೃಹಲಕ್ಷ್ಮಿಯರಿಗೆ ₹500 ಕೊಟ್ಟು ಮೊಮ್ಮಗಳಿಗೆ ತೊಟ್ಟಿಲು ಖರೀದಿಸಿದ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್!

Sathish Kumar KH — Fri, 06 Nov 2026 15:57:03 +0530

ಬೆಂಗಳೂರು (ನ.06): ರಾಜ್ಯ ಸರ್ಕಾರದ ಮಹತ್ವಾಕಾಂಕ್ಷೆಯ ಗೃಹಲಕ್ಷ್ಮಿ ಯೋಜನೆ (Gruha Lakshmi Scheme) ಮಹಿಳೆಯರ ಆರ್ಥಿಕ ಸ್ವಾತಂತ್ರ್ಯ ಮತ್ತು ಸಬಲೀಕರಣಕ್ಕೆ ಹೇಗೆ ಆಸರೆಯಾಗುತ್ತಿದೆ ಎಂಬುದಕ್ಕೆ ಸಿಎಂ ಗೃಹಕಚೇರಿ 'ಕೃಷ್ಣಾ'ದಲ್ಲಿ ನಡೆದ ಸಂವಾದ ಕಾರ್ಯಕ್ರಮವೊಂದು ಸಾಕ್ಷಿಯಾಯಿತು.

ಗೃಹಲಕ್ಷ್ಮಿ ಯೋಜನೆಯ ಫಲಾನುಭವಿಗಳೊಂದಿಗೆ ಶುಕ್ರವಾರ ಸಂವಾದ ನಡೆಸುತ್ತಿದ್ದಾಗ, ಕಲಬುರಗಿ ಮೂಲದ ಮಹಿಳೆಯೊಬ್ಬರ ಕರಕುಶಲ ಉದ್ಯಮ ಮತ್ತು ಅವರ ಶ್ರಮವನ್ನು ಕಂಡು ಉಪಮುಖ್ಯಮಂತ್ರಿ ಹಾಗೂ ಸಿಎಂ ಡಿ.ಕೆ. ಶಿವಕುಮಾರ್ (DK Shivakumar) ಅವರು ಅತ್ಯಂತ ಪ್ರಸನ್ನರಾದರು. ಅಷ್ಟೇ ಅಲ್ಲದೆ, ಅವರ ಬಳಿಯಿದ್ದ ಮಣಿಗಳಿಂದ ಮಾಡಿದ ಆಟಿಕೆ ತೊಟ್ಟಿಲನ್ನು ನೋಡಿ ಇಷ್ಟಪಟ್ಟು, ತಮ್ಮ ಮೊಮ್ಮಗಳಿಗೆಂದು ₹500 ನೀಡಿ ಖರೀದಿಸಿದರು.

ಗೃಹಲಕ್ಷ್ಮಿ ಹಣದಿಂದ ಉದ್ಯಮ ಕಟ್ಟಿಕೊಂಡ ಸುವರ್ಣಮ್ಮ!

ಕಲಬುರಗಿಯ ಶಿವನಗರದ ನಿವಾಸಿ ಎಂ. ಎಸ್. ಸುವರ್ಣ ಅವರು ಗೃಹಲಕ್ಷ್ಮಿ ಯೋಜನೆಯಡಿ ಪ್ರತಿ ತಿಂಗಳು ಸರ್ಕಾರದಿಂದ ಸಿಗುತ್ತಿದ್ದ ಹಣವನ್ನು ಪೋಲು ಮಾಡದೆ, ಅದನ್ನೇ ಬಂಡವಾಳವನ್ನಾಗಿ ಮಾಡಿಕೊಂಡು ಕರಕುಶಲ ವಸ್ತುಗಳ ಸಣ್ಣ ವ್ಯಾಪಾರ ಆರಂಭಿಸಿದ್ದರು. ಮಣಿಗಳಿಂದ ತೊಟ್ಟಿಲು, ಮುತ್ತಿನ ತೇನೆ, ದಂಡಿ ಹಾಗೂ ವಿವಿಧ ಅಲಂಕಾರಿಕ ವಸ್ತುಗಳನ್ನು ತಯಾರಿಸಿ ಮಾರಾಟ ಮಾಡಲು ತೊಡಗಿದರು. ಸಂವಾದದಲ್ಲಿ ತಮ್ಮ ಅನುಭವ ಹಂಚಿಕೊಂಡ ಸುವರ್ಣಮ್ಮ, 'ಈ ಯೋಜನೆಯ ಹಣದಿಂದ ಆರಂಭವಾದ ನನ್ನ ಸಣ್ಣ ಉದ್ಯಮ ಇಂದು ಮುಂಬೈ, ಪುಣೆ, ಹೈದರಾಬಾದ್ ಮುಂತಾದ ದೊಡ್ಡ ನಗರಗಳಿಗೂ ವಿಸ್ತರಿಸಿದೆ. ಇದರಿಂದ ನನ್ನ ಕುಟುಂಬದ ಬದುಕು ಸುಧಾರಿಸಿದೆ' ಎಂದು ಹೆಮ್ಮೆಯಿಂದ ಸಿಎಂ ಗಮನಕ್ಕೆ ತಂದರು.

ಎಷ್ಟಮ್ಮ ಇದರ ಬೆಲೆ? ನನ್ನ ಮೊಮ್ಮಗಳಿಗೆ ಕೊಡ್ತೀನಿ": ಡಿ.ಕೆ. ಶಿವಕುಮಾರ್

ಸಂವಾದದ ವೇಳೆ ಸುವರ್ಣಮ್ಮ ಅವರು ತಾವು ತಯಾರಿಸಿದ್ದ ಗುಲಾಬಿ ಬಣ್ಣದ ಮಣಿಗಳ ಆಟಿಕೆ ತೊಟ್ಟಿಲನ್ನು ಪ್ರದರ್ಶಿಸಿದರು. ಅದನ್ನು ನೋಡಿದ ತಕ್ಷಣವೇ ಆಕರ್ಷಿತರಾದ ಡಿ.ಕೆ. ಶಿವಕುಮಾರ್, 'ಚನ್ನಾಗಿದೆ ಕಣಮ್ಮಾ ಆ ತೊಟ್ಟಿಲು, ನನ್ನ ಮೊಮ್ಮಗಳಿಗೆ ಕೊಡ್ತೀನಿ, ಕೊಡು ಅದನ್ನ, ಎಷ್ಟು ಅದರ ಬೆಲೆ..?' ಎಂದು ಪ್ರೀತಿಯಿಂದ ವಿಚಾರಿಸಿದರು. ಅದಕ್ಕೆ ಉತ್ತರಿಸಿದ ಸುವರ್ಣಮ್ಮ, 'ಸರ್‌, ಇದನ್ನು ಮಾಡಲು ನಮಗೆ ₹125 ಖರ್ಚಾಗುತ್ತದೆ. ನಾವು ಮಾರುಕಟ್ಟೆಯಲ್ಲಿ ₹250 ರಿಂದ ₹300 ಕ್ಕೆ ಮಾರಾಟ ಮಾಡುತ್ತೇವೆ. ಇದರಿಂದ ಸಾಕಷ್ಟು' ಲಾಭ ಸಿಗುತ್ತಿದೆ ಎಂದರು.

ಬೇಡ ಎಂದರೂ ₹500 ನೀಡಿದ ಸಿಎಂ!

ಸುವರ್ಣಮ್ಮ ಅವರು ಗೌರವ ಪೂರ್ವಕವಾಗಿ ತೊಟ್ಟಿಲನ್ನು ಉಚಿತವಾಗಿ ನೀಡಲು ಮುಂದಾದಾಗ, ಸಿಎಂ ಡಿ.ಕೆ. ಶಿವಕುಮಾರ್ ಅವರು 'ಬೇಡ ಬೇಡ' ಎಂದು ಉಚಿತವಾಗಿ ನೀಡುವುದನ್ನು ಪ್ರೀತಿಯಿಂದ ನಿರಾಕರಿಸಿ, ತಮ್ಮ ಜೇಬಿನಿಂದ ₹500 ತೆಗೆದು ಅವರ ಕೈಗಿಟ್ಟರು. ನಂತರ ಆ ಮಣಿ ತೊಟ್ಟಿಲನ್ನು ಮೇಲೆ-ಕೆಳಗೆ ತಿರುಗಿಸಿ ನೋಡಿ, ಅದರ ಸೊಬಗನ್ನು ಕಣ್ತುಂಬಿಕೊಂಡು ಮನೆಗೆ ತೆಗೆದುಕೊಂಡು ಹೋಗಲು ತಮ್ಮ ಸಹಾಯಕ ಸಿಬ್ಬಂದಿ ಕೈಯಲ್ಲಿ ಕಳುಹಿಸಿಕೊಟ್ಟರು. ರಾಜ್ಯದ ಮುಖ್ಯಮಂತ್ರಿಯೊಬ್ಬರು ತಾವೇ ಸ್ವತಃ ತಯಾರಿಸಿದ ವಸ್ತುವನ್ನು ಕೊಂಡುಕೊಂಡು ಪ್ರೋತ್ಸಾಹಿಸಿದ್ದನ್ನು ಕಂಡು ಸುವರ್ಣಮ್ಮನವರ ಸಂತಸಕ್ಕೆ ಎಲ್ಲೆಯಿರಲಿಲ್ಲ.

65 ಕನ್ನಡ ಹಾಡುಗಳ ಹಾಡಿ ಇಂಡಿಯಾ ಬುಕ್ ಆಫ್ ರೆಕಾರ್ಡ್ ಸಾಧನೆ ಮಾಡಿದ ಹಾವೇರಿ ಬಾಲಕಿ

Chethan Kumar — Fri, 06 Nov 2026 15:47:21 +0530

ಹಾವೇರಿ (ನ.06) ಬಾಲ್ಯದಿಂದಲೇ ಹಾಡು ಗುನುಗುತ್ತಾ, ಹಾಡುತ್ತಾ ಬೆಳೆದ ಹಾವೇರಿಯ 9 ವರ್ಷದ ಭೂಮಿಕ ಮಾಲ್ತೇಶ್ ಇದೀಗ ಇಂಡಿಯಾ ಬುಕ್ ರೆಕಾರ್ಡ್ ಸಾಧನೆ ಮಾಡಿದ್ದಾರೆ. ಬರೋಬ್ಬರಿ 65 ಕನ್ನಡ ಹಾಡುಗಳನ್ನು ಹಾಡಿ ಈ ಸಾಧನೆ ಮಾಡಿದ್ದಾರೆ. ಇದೇ ಮೊದಲ ಬಾರಿಗೆ 9 ವರ್ಷದ ಬಾಲಕಿ 65 ಕನ್ನಡ ಹಾಡುಗಳನ್ನು ಹಾಡುವ ಮೂಲಕ ಇಂಡಿಯಾ ಬುಕ್ ಆಫ್ ರೆಕಾರ್ಡ್‌ನಲ್ಲಿ ಸ್ಥಾನ ಪಡೆದಿದ್ದಾರೆ. ಭೂಮಿಕಾ ಮಾಲ್ತೇಶ್ ಹಾಡಿದ ವಿಡಿಯೋವನ್ನು ತನ್ನ ಯೂಟ್ಯೂಬ್ ಚಾನೆಲ್‌ನಲ್ಲಿ ಅಪ್ಲೋಡ್ ಮಾಡಿದ್ದಾರೆ. ಕೆಲವೇ ದಿನಗಳಲ್ಲಿ ಇಂಡಿಯಾ ಬುಕ್ ಆಫ್ ರೆಕಾರ್ಡ್ ಗೌರವಕ್ಕೆ ಪಾತ್ರರಾಗಿದ್ದಾರೆ.

ಗರಿಷ್ಠ ಹಾಡು ಹಾಡಿದ ಬಾಲಕಿ

ಆಗಸ್ಟ್ 19ರಂದು 65 ಕನ್ನಡ ಹಾಡುಗಳನ್ನು ಹಾಡಿದ ರೆಕಾರ್ಡ್ ವಿಡಿಯೋವನ್ನು ಯೂಟ್ಯೂಬ್ ಚಾನೆಲ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ. ಈ ವಿಡಿಯೋಗಳು ಹಲವರ ಗಮನಸೆಳೆದಿದೆ. ಇದೇ ವೇಳೆ ಇಂಡಿಯಾ ಬುಕ್ ಆಫ್ ರೆಕಾರ್ಡ್ ಕಮಿಟಿಯ ಗಮನಕ್ಕೂ ಬಂದಿದೆ. 9 ವರ್ಷದ ಬಾಲಕಿ ಸಾಧನೆ ಪರಿಗಣಿಸಿ ಗೌರವಿಸಲಾಗಿದೆ. ಭಾರತದಲ್ಲಿ ಬಾಲಕಿ ಹಾಡಿದ ಗರಿಷ್ಠ ಹಾಡು ಇದಾಗಿದೆ. ಈ ಕೆಟಗರಿಯಲ್ಲಿ ಭೂಮಿಕಾ ಮಾಲ್ತೇಶ್‌ಗೆ ಗೌರವ ದೊರಕಿದೆ.

2016ರ ಅಕ್ಟೋಬರ್ 8 ರಂದು ಜನಿಸಿದ ಭೂಮಿಕಾ, ತಮ್ಮ 9 ವರ್ಷ, 10 ತಿಂಗಳು ಹಾಗೂ 11 ದಿನಗಳ ಪ್ರಾಯದಲ್ಲಿ ಈ ಅಪರೂಪದ ಸಾಧನೆ ಮಾಡಿದ್ದಾರೆ. ಸಣ್ಣ ವಯಸ್ಸಿನ ಮಗುವೊಂದು ಅತಿ ಹೆಚ್ಚು ಕನ್ನಡ ಹಾಡುಗಳನ್ನು ಹಾಡಿ ಆನ್‌ಲೈನ್‌ನಲ್ಲಿ ಹಂಚಿಕೊಂಡಿರುವ ಸಾಧನೆಯನ್ನು ಗುರುತಿಸಿ 'ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್' ಈ ಆಫಿಶಿಯಲ್ ಮನ್ನಣೆ ನೀಡಿದೆ. 2026ರ ಆಗಸ್ಟ್ 19 ರಂದು ಈ ದಾಖಲೆಯನ್ನು ಅಧಿಕೃತವಾಗಿ ದೃಢಪಡಿಸಲಾಗಿದೆ.

ಡಿಜಿಟಲ್ ಮಾಧ್ಯಮ ಮೂಲಕ ಸಾಧನೆ

ಪುಟಾಣಿ ಮಕ್ಕಳು ಮನೆಯಲ್ಲಿ ಸುಶ್ರಾವ್ಯವಾಗಿ ಹಾಡುತ್ತಾರೆ, ಮನೆ ಕಾರ್ಯಕ್ರಮಗಳು ಸೇರಿದಂತೆ ಸಣ್ಣ ವೇದಿಕೆಯಲ್ಲಿ ಹಾಡುತ್ತಾರೆ. ಆದರೆ ಭೂಮಿಕಾ ಮಾಲ್ತೇಶ್ ಹಾಡುಗಳನ್ನು ರೆಕಾರ್ಡ್ ಮಾಡಿ ಯೂಟ್ಯೂಬ್ ಚಾನೆಲ್ ಮೂಲಕ ಪೋಸ್ಟ್ ಮಾಡಿದ್ದಾರೆ. ಒಂದೇ ಶೈಲಿಯ ಹಾಡಿಗೆ ಭೂಮಿಕಾ ಸೀಮಿತವಾಗಿಲ್ಲ, ಸಿನಿಮಾ ಹಾಡು, ಭಜನೆ, ಜಾನಪದ, ಭಾವಗೀತೆ ಸೇರಿದಂತೆ ಎಲ್ಲಾ ರೀತಿಯ ಹಾಡುಗಳ ಮೂಲಕ ಭೂಮಿಕಾ ಎಲ್ಲರ ಮನಗೆದ್ದಿದಾಳೆ.

ಭೂಮಿಕಾ ಡಿಜಿಟಲ್ ಮಾಧ್ಯಮವನ್ನು ಸಮರ್ಥವಾಗಿ ಬಳಸಿಕೊಂಡು ಇದೀಗ ಇಂಡಿಯಾ ಬುಕ್ ರೆಕಾರ್ಡ್ ಗರಿ ಗಿಟ್ಟಿಸಿಕೊಂಡಿದ್ದಾರೆ. 9ನೇ ವಯಸ್ಸಿನಲ್ಲಿ ಕನ್ನಡ ಸಾಹಿತ್ಯ, ಸಂಗೀತ ಪರಂಪರೆಯನ್ನು ಜಗತ್ತಿಗೆ ಸಾರಿದ್ದಾರೆ. ಕನ್ನಡ ಹಾಡುಗಳು ಇದೀಗ ಜಗತ್ತಿಗೆ ಪಸರಿಸುವಂತೆ ಮಾಡಿದ್ದಾಳೆ. ಭೂಮಿಕಾ ಸಾಧನೆಗೆ ಹಲವರು ಅಭಿನಂದನೆ ತಿಳಿಸಿದ್ದಾರೆ. ಭೂಮಿಕಾ ಮಧುರ ಕಂಠಕ್ಕೆ ಹಲವರು ಮಾರು ಹೋಗಿದ್ದಾರೆ.

ಗೃಹಲಕ್ಷ್ಮೀ ಹಣ ಪಡೆದವರು ಡಿಕೆಶಿ ಅಣ್ಣನ ಋಣ ತೀರಿಸ್ಬೇಕು, 2028ರಲ್ಲಿ ಪಕ್ಷವನ್ನ ಮತ್ತೆ ಅಧಿಕಾರಕ್ಕೆ ತರಬೇಕು: ಮಹಿಳೆಯರಿಗೆ ಸಿಎಂ ಮನವಿ

Santosh Naik — Fri, 06 Nov 2026 15:13:01 +0530

ಬೆಂಗಳೂರು (ನ.6): ರಾಜ್ಯ ಸರ್ಕಾರದ ಮಹತ್ವಾಕಾಂಕ್ಷೆಯ 'ಗೃಹಲಕ್ಷ್ಮಿ' ಯೋಜನೆಯ ಸೌಲಭ್ಯ ಪಡೆಯುತ್ತಿರುವ ಫಲಾನುಭವಿ ಮಹಿಳೆಯರೊಂದಿಗೆ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ನಗರದ ಸಿಎಂ ಗೃಹ ಕಚೇರಿ 'ಕೃಷ್ಣಾ'ದಲ್ಲಿ ನೇರ ಸಂವಾದ ನಡೆಸಿದರು: ಈ ವೇಳೆ ಯೋಜನೆಯ ಸಾಧಕ-ಬಾಧಕಗಳನ್ನು ಚರ್ಚಿಸಿದ ಸಿಎಂ, ಗೃಹಲಕ್ಷ್ಮಿಯರ ಹಣ ದುರುಪಯೋಗವಾಗದಂತೆ ಹಾಗೂ ಅಕ್ರಮಗಳಿಗೆ ಬಲಿಯಾಗದಂತೆ ಮಹಿಳೆಯರಿಗೆ ಮನವಿ ಮಾಡಿದರು.

ರಾಜ್ಯದ ಪ್ರತಿ ಜಿಲ್ಲೆಯಿಂದ ತಲಾ 3 ಜನ ಆಯ್ಕೆಯಾದ ಗೃಹಲಕ್ಷ್ಮಿ ಫಲಾನುಭವಿಗಳನ್ನು ಸಿಎಂ ಗೃಹ ಕಚೇರಿಗೆ ಆಹ್ವಾನಿಸಲಾಗಿತ್ತು. ಫಲಾನುಭವಿಗಳ ನೇರ ಅನುಭವ, ಎದುರಿಸುತ್ತಿರುವ ಸಮಸ್ಯೆಗಳು ಹಾಗೂ ಯೋಜನೆಯ ಯಶಸ್ಸಿನ ಕುರಿತು ಮುಖ್ಯಮಂತ್ರಿಗಳು ಪ್ರತ್ಯಕ್ಷವಾಗಿ ಮಾಹಿತಿ ಪಡೆದರು.

ಯೋಜನೆಯ ಹುಟ್ಟಿನ ಕಥೆ ಹಂಚಿಕೊಂಡ ಸಿಎಂ

ಈ ಹಂತದಲ್ಲಿ ಯೋಜನೆ ಹುಟ್ಟಿದ ಕ್ಷಣವನ್ನು ಸಿಎಂ ನೆನಪಿಸಿಕೊಂಡರು. 'ರಾಜ್ಯದ ಜನ ನಮಗೆ 136 ಸೀಟುಗಳನ್ನು ಕೊಟ್ಟರು. ನಾವು 5 ಗ್ಯಾರಂಟಿಗಳನ್ನು ಘೋಷಿಸಿದಾಗ ವಿರೋಧ ಪಕ್ಷದವರು ನಮ್ಮನ್ನು ನೋಡಿ ನಕ್ಕರು, ಅತ್ತೆ-ಸೊಸೆ ನಡುವೆ ಜಗಳ ತಂದಿಡುತ್ತಿದ್ದೀರಾ ಎಂದರು. ಆದರೆ ನಾವು 1 ಕೋಟಿ 24 ಲಕ್ಷ ಮನೆ ಯಜಮಾನಿಯರಿಗೆ ಹಣ ತಲುಪಿಸಿದ್ದೇವೆ. ಚಾಮುಂಡೇಶ್ವರಿಯ ಬಳಿ ಹೋಗಿ ರಾಜ್ಯದ ಮಹಿಳೆಯರಿಗೆ ಶಕ್ತಿ ನೀಡುವಂತೆ ಬೇಡಿಕೊಂಡಿದ್ದೆ. ನನ್ನ ಸಂಬಂಧಿ ಹುಡುಗ ಪರಮೇಶ್ ಹಾಡಿದ 'ತಾಯಿ ಸತ್ತ ಮೇಲೆ ತವರಿಗೆ ಎಂದು ಹೋಗಬಾರದಮ್ಮ' ಎಂಬ ಹಾಡನ್ನು ಕೇಳಿ, ಮಹಿಳೆಯರಿಗೆ ಸ್ವಾವಲಂಬನೆ ಮತ್ತು ಶಕ್ತಿ ನೀಡಲೇಬೇಕು ಎಂದು ತೀರ್ಮಾನಿಸಿ ಗೃಹಲಕ್ಷ್ಮಿ ಹಾಗೂ ಶಕ್ತಿ ಯೋಜನೆಗಳನ್ನು ರೂಪಿಸಿದೆವು. ಸಿದ್ದರಾಮಯ್ಯನವರು ತಮ್ಮ ಬಾಲ್ಯದಲ್ಲಿ ಮನೆಯಲ್ಲಿ ಅಕ್ಕಿಯೇ ಇರಲಿಲ್ಲ ಎಂಬ ಸ್ಥಿತಿಯನ್ನು ನೆನಪಿಸಿಕೊಳ್ಳುತ್ತಿದ್ದರು. ಈ ಯೋಜನೆಗಳನ್ನು ಯಾರಿಂದಲೂ ನಿಲ್ಲಿಸಲು ಸಾಧ್ಯವಿಲ್ಲ. ಪ್ರಧಾನಿ ಮೋದಿಯವರೇ ಇದನ್ನು ಟೀಕಿಸಿ, ಬಳಿಕ ಅವರೂ ಇಂತಹ ಯೋಜನೆಗಳನ್ನು ಅನುಕರಿಸಿದರು' ಎಂದರು.

ಆರ್ಥಿಕ ಲೆಕ್ಕಾಚಾರ ಹಾಗೂ ತಾಂತ್ರಿಕ ಲೋಪ ಸರಿಪಡಿಸಲು ಕ್ರಮ

ಯೋಜನೆಯ ಹಣಕಾಸು ವಿವರ ಹಂಚಿಕೊಂಡ ಸಿಎಂ, ಇಲ್ಲಿಯವರೆಗೆ ಯೋಜನೆಯಡಿ 120 ಕೋಟಿ ವಹಿವಾಟು ಕ್ರಾಸ್ ಆಗಿದ್ದು, ಒಟ್ಟು ₹86,000 ಕೋಟಿ ರೂಪಾಯಿ ಬಜೆಟ್ ವೆಚ್ಚ ತಲುಪಿದೆ ಎಂದರು.ಕೆಲವು ಕಡೆ ಫೋನ್ ನಂಬರ್ ಒಬ್ಬರದ್ದಾಗಿದ್ದು, ಹಣ ಬೇರೆಯವರ ಖಾತೆಗೆ ಜಮೆಯಾಗುತ್ತಿರುವುದು ಹಾಗೂ ಸತ್ತವರ ಖಾತೆಗಳಿಗೂ ಹಣ ತಲುಪುತ್ತಿರುವ ತಾಂತ್ರಿಕ ಲೋಪಗಳು ಗಮನಕ್ಕೆ ಬಂದಿವೆ. ಕೆಲವರು ಬ್ಯಾಂಕ್ ಸಾಲ ಪಡೆದು, ಈ ಗೃಹಲಕ್ಷ್ಮಿ ಹಣ ನೇರವಾಗಿ ಆ ಸಾಲದ ಕಂತಿಗೆ ಜಮೆಯಾಗುವಂತೆ ಮಾಡಿಕೊಂಡಿದ್ದಾರೆ. ಇವೆಲ್ಲವನ್ನೂ ಸರಿಪಡಿಸಿ, ಯೋಜನೆಗೆ ಸಂಬಂಧಿಸಿದಂತೆ ನೂತನ ಅಪ್ಲಿಕೇಶನ್ ರೆಡಿ ಮಾಡಿಟ್ಟುಕೊಳ್ಳಲಾಗಿದ್ದು, ಮಹಿಳೆಯರ ಅಭಿಪ್ರಾಯ ಪಡೆದು ಶೀಘ್ರವೇ ಜಾರಿಗೆ ತರಲಾಗುವುದು ಎಂದು ಸ್ಪಷ್ಟಪಡಿಸಿದರು.

ಲಕ್ಷ್ಮಿ ಹೆಬ್ಬಾಳ್ಕರ್ ಕರೆಸಿ: ಮಹಿಳೆಯರ ಆಗ್ರಹಕ್ಕೆ ಸಿಎಂ ನಗೆ

ಸಂವಾದದ ವೇಳೆ ಮಹಿಳೆಯೊಬ್ಬರು, ಮೊದಲು ಲಕ್ಷ್ಮಿ ಹೆಬ್ಬಾಳ್ಕರ್ ಮೇಡಂ ನಮ್ಮ ಜೊತೆ ಮಾತನಾಡಲು ಬರುತ್ತಿದ್ದರು, ಅವರಿಂದ ನಮಗೆ ಬಹಳ ನೆರವಾಗಿದೆ, ಅವರನ್ನು ಮತ್ತೆ ಕರೆಸಿ" ಎಂದು ಮನವಿ ಮಾಡಿದರು. ಈ ವೇಳೆ ಸದ್ಯಕ್ಕೆ ನಾನೇ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯ ಉಸ್ತುವಾರಿ ವಹಿಸಿಕೊಂಡಿದ್ದೇನೆ ಎಂದ ಸಿಎಂ, ನಿಮ್ಮನ್ನು ನಾನು ಹೆಬ್ಬಾಳ್ಕರ್ ಅವರನ್ನು ಶಿಫಾರಸು ಮಾಡಿ ಎಂದು ಕರೆಸಿಲ್ಲ ಎಂದು ತಮಾಷೆಯಾಗಿ ನಕ್ಕರು. ಮುಂದುವರಿದು ಮಾತನಾಡಿದ ಅವರು, ಮುಂದಿನ ವಿಧಾನಸಭಾ ಅಧಿವೇಶನ ಪ್ರಾರಂಭವಾಗುವುದರೊಳಗೆ ಹೈಕಮಾಂಡ್ ಸೂಚನೆಯಂತೆ ಒಬ್ಬ ಮಹಿಳಾ ಶಾಸಕಿಯನ್ನು ಈ ಇಲಾಖೆಯ ನೂತನ ಸಚಿವೆಯನ್ನಾಗಿ ನೇಮಕ ಮಾಡಲಾಗುವುದು ಎಂದರು.

ಉಡುಪಿ-ಮಂಗಳೂರು ಬದಲಾವಣೆ & ಹಾರೂಡಿ ಮಹಿಳೆಯ ಪ್ರೀತಿಯ ಕೊಡುಗೆ:

ಉಡುಪಿ ಮತ್ತು ಮಂಗಳೂರು ಭಾಗದಲ್ಲಿ ಕಾಂಗ್ರೆಸ್ ಪಕ್ಷ ಗೆಲ್ಲದಿದ್ದರೂ ಅಲ್ಲಿನ ಮಹಿಳೆಯರು ಗೃಹಲಕ್ಷ್ಮಿ ಯೋಜನೆ ಪಡೆಯುತ್ತಿದ್ದಾರೆ. ಅಲ್ಲಿನ ವಾತಾವರಣ ಬದಲಾಗಿದೆಯೇ ಎಂದು ಸಿಎಂ ಉಡುಪಿಯ ಮಹಿಳೆಯನ್ನು ಪ್ರಶ್ನಿಸಿದರು. ಅದಕ್ಕೆ ಉತ್ತರಿಸಿದ ಮಹಿಳೆ, ಎಲ್ಲಾ ಮಹಿಳೆಯರಿಗೂ ಯೋಜನೆ ನೆರವಾಗಿದೆ, ಜನರು ಬದಲಾಗುತ್ತಿದ್ದಾರೆ. ನಮ್ಮ ಜಿಲ್ಲೆಯಲ್ಲೂ ಇಂತಹ ಬೃಹತ್ ಕಾರ್ಯಕ್ರಮ ಮಾಡಿದರೆ ಇನ್ನಷ್ಟು ಬದಲಾವಣೆ ಸಾಧ್ಯ ಎಂದರು.

ದೊಡ್ಡಬಳ್ಳಾಪುರದ ಹಾರೂಡಿಯಿಂದ ಬಂದಿದ್ದ ಪ್ರಭಾವತಿ ಎಂಬ ಫಲಾನುಭವಿ ಮಹಿಳೆ, ಪ್ರೀತಿಯಿಂದ ತಂದಿದ್ದ 'ಹುರುಳಿ ಕಾಳಿನ ಹಪ್ಪಳ'ವನ್ನು ಸಿಎಂಗೆ ಉಡುಗೊರೆಯಾಗಿ ನೀಡಿದರು. ಅದನ್ನು ಸ್ವೀಕರಿಸಿದ ಸಿಎಂ, ಅದನ್ನು ತಮ್ಮ ಮನೆಗೆ ತಲುಪಿಸುವಂತೆ ಸಿಬ್ಬಂದಿಗೆ ಸೂಚಿಸಿದರು. ಮತ್ತೊಬ್ಬ ಮಹಿಳೆ, ಗೃಹಲಕ್ಷ್ಮಿ ಹಣದಿಂದ ತಮ್ಮ ಮಗನನ್ನು ಖಾಸಗಿ ಇಂಗ್ಲಿಷ್ ಮಾಧ್ಯಮ ಶಾಲೆಗೆ ಸೇರಿಸಿ ಓದಿಸುತ್ತಿರುವುದಾಗಿ ಸಂತಸ ಹಂಚಿಕೊಂಡರು.

ಮೀಟರ್ ಬಡ್ಡಿ, ಚಿಟ್ ಫಂಡ್ ಧಂದೆಗೆ ಬಲಿಬೀಳಬೇಡಿ

ಸಂವಾದದಲ್ಲಿ ಮಹಿಳೆಯರಿಗೆ ಕಟ್ಟುನಿಟ್ಟಿನ ಸಲಹೆ ನೀಡಿದ ಸಿಎಂ ಡಿಕೆ ಶಿವಕುಮಾರ್, ಕೆಲವು ಮಹಿಳೆಯರು ಗೃಹಲಕ್ಷ್ಮಿ ಹಣವನ್ನು ಹೆಚ್ಚಿನ ಆಸೆಗೆ ಬಿದ್ದು ಮೀಟರ್ ಬಡ್ಡಿಗೆ ಕೊಟ್ಟು ಹಾಗೂ ಖಾಸಗಿ ಚಿಟ್ ಫಂಡ್‌ಗಳಿಗೆ ಹಾಕಿ ಹಣ ಕಳೆದುಕೊಂಡು ಮೋಸ ಹೋಗುತ್ತಿದ್ದಾರೆ. ಯಾವುದೇ ಕಾರಣಕ್ಕೂ ಇಂತಹ ಬಡ್ಡಿ ವ್ಯವಹಾರ ಅಥವಾ ಚಿಟ್ ಫಂಡ್ ಆಸೆಗೆ ಬಿದ್ದು ಹಣ ಕಳೆದುಕೊಳ್ಳಬೇಡಿ. ಗೃಹಲಕ್ಷ್ಮಿ ಮೆಸೇಜ್ ಬರುವ ನಿಮ್ಮ ಮೊಬೈಲ್ ಫೋನ್ ಅನ್ನು ನಿಮ್ಮ ಬಳಿಯೇ ಇಟ್ಟುಕೊಳ್ಳಿ. ಗಂಡ ಅಥವಾ ಮಕ್ಕಳಿಗೆ ಕೊಡಬೇಡಿ. ಹೊರಗಿನವರೆಲ್ಲಾ ಬಂದು ಉಚಿತ ಬಸ್ ಪ್ರಯಾಣದ ದುರುಪಯೋಗ ಪಡೆಯುತ್ತಿರುವುದರಿಂದ, ಶೀಘ್ರದಲ್ಲೇ ಶಕ್ತಿ ಯೋಜನೆ ಅಡಿ ಅರ್ಹರಿಗೆ ಸ್ಮಾರ್ಟ್ ಕಾರ್ಡ್ (Smart Card) ವಿತರಿಸಲು ಯೋಜಿಸಲಾಗಿದೆ. ಎಲ್ಲರೂ ಕಾರ್ಡ್ ಪಡೆಯಬೇಕು ಎಂದರು

ಕೊನೆಯಲ್ಲಿ ಈ ಯೋಜನೆಯ ಸೌಲಭ್ಯ ಪಡೆದ ನೀವು 2028 ರಲ್ಲಿ ಮತ್ತೆ ನಮ್ಮ ಸರ್ಕಾರವನ್ನು ಅಧಿಕಾರಕ್ಕೆ ತರುವ ಮೂಲಕ ಶಿವಕುಮಾರ್ ಅಣ್ಣನ ಋಣ ತೀರಿಸಬೇಕು ಎಂದು ಮಹಿಳೆಯರಲ್ಲಿ ಮನವಿ ಮಾಡಿದರು.

ಚಲಿಸುವ ರೈಲಿಗೆ ಹಾರಿ ಪ್ರಾಣ ಕಳೆದುಕೊಂಡ ಬೆಂಗಳೂರಿನ ವಿವಾಹಿತೆ ಸಹನಾ, ಯುವಕ ರಾಹುಲ್‌

Santosh Naik — Fri, 06 Nov 2026 15:01:39 +0530

ಮಂಡ್ಯದ ವಿಸಿ ಫಾರಂ ರೈಲ್ವೆ ಗೇಟ್ ಬಳಿ ಬೆಂಗಳೂರು ಮೂಲದ ವಿವಾಹಿತ ಮಹಿಳೆ ಮತ್ತು ಯುವಕ ರೈಲಿಗೆ ಸಿಲುಕಿ ಸಾವನ್ನಪ್ಪಿದ್ದಾರೆ. ರೈಲ್ವೆ ಪೊಲೀಸರು ಮೃತದೇಹಗಳನ್ನು ಮಿಮ್ಸ್ ಆಸ್ಪತ್ರೆಗೆ ರವಾನಿಸಿದ್ದು, ಸಾವಿಗೆ ನಿಖರ ಕಾರಣ ತಿಳಿಯಲು ತನಿಖೆ ಮುಂದುವರಿಸಿದ್ದಾರೆ.

ಮಂಡ್ಯ ನಗರದ ಹೊರವಲಯದಲ್ಲಿರುವ ವಿಸಿ ಫಾರಂ ರೈಲ್ವೆ ಗೇಟ್ ಬಳಿ ಇಂದು ಬೆಳಿಗ್ಗೆ ವಿವಾಹಿತ ಮಹಿಳೆ ಹಾಗೂ ಯುವಕ ರೈಲಿಗೆ ಸಿಲುಕಿ ಭೀಕರವಾಗಿ ಸಾವಿಗೆ ಶರಣಾಗಿದ್ದಾರೆ.

ಮೃತರನ್ನು ಬೆಂಗಳೂರು ಮೂಲದ ಸಹನ ಹಾಗೂ ರಾಹುಲ್ ಎಂದು ಗುರುತಿಸಲಾಗಿದೆ. 8 ವರ್ಷಗಳ ಹಿಂದೆ ವಿರೇಶ್ ಎಂಬ ಆಟೋ ಚಾಲಕನನ್ನು ಪ್ರೀತಿಸಿ ಮದುವೆಯಾಗಿದ್ದ ಸಹನಾ (25) ಅವರಿಗೆ ಇಬ್ಬರು ಮುದ್ದಾದ ಮಕ್ಕಳಿದ್ದು (6 ವರ್ಷದ ಹೆಣ್ಣು, 2 ವರ್ಷದ ಗಂಡು), ವಾಸವಿದ್ದ ಬಿಲ್ಡಿಂಗ್‌ನಲ್ಲೇ ಇದ್ದ ಯುವಕ ರಾಹುಲ್ (23) ಜೊತೆ ಸೃಷ್ಟಿಯಾದ ಅಕ್ರಮ ಸಂಬಂಧವೇ ಈ ದುರಂತಕ್ಕೆ ಕಾರಣವಾಗಿದೆ.

ಬೆಂಗಳೂರಿನ ಮಾದನಾಯಕನಹಳ್ಳಿಯಲ್ಲಿದ್ದ ದಂಪತಿ ನಡುವೆ ಅಕ್ರಮ ಸಂಬಂಧದ ವಿಚಾರ ತಿಳಿದು ಜಗಳವಾಗುತ್ತಿತ್ತು. ಹಲವು ಬಾರಿ ಹಿರಿಯರ ಸಮ್ಮುಖದಲ್ಲಿ ಪಂಚಾಯಿತಿ ನಡೆಸಿ ಬುದ್ಧಿ ಹೇಳಿದ್ದರೂ ಸಹನಾ, ರಾಹುಲ್ ಸಾಹಸ ಬಿಟ್ಟಿರಲಿಲ್ಲ.

ಕಳೆದ ಸೋಮವಾರವೂ ಇದೇ ವಿಚಾರಕ್ಕೆ ಗಂಡ-ಹೆಂಡತಿ ನಡುವೆ ತೀವ್ರ ಜಗಳವಾಗಿದ್ದು, "ನಾನು ರಾಹುಲ್ ಜೊತೆಯೇ ಬಾಳುತ್ತೇನೆ" ಎಂದಿದ್ದ ಸಹನಾಗೆ, "ನಿಮ್ಮಿಬ್ಬರನ್ನು ಬಾಳಲು ಬಿಡಲ್ಲ" ಎಂದು ಗಂಡ ವಿರೇಶ್ ಗದರಿದ್ದರು. ಗಂಡನ ಗದರಿಕೆಯ ಬಳಿಕ ಮಂಗಳವಾರ ಬೆಂಗಳೂರಿನ ಮನೆಯಿಂದ ಹೊರಟಿದ್ದ ಸಹನಾ, ಮಂಡ್ಯದ ಗುನ್ನಾಯಕನಹಳ್ಳಿಯಲ್ಲಿರುವ ತನ್ನ ಅಜ್ಜಿ ಮನೆಗೆ ಬಂದು ತಂಗಿದ್ದಳು.

ಗುರುವಾರ ಮಂಡ್ಯದ ಗುನ್ನಾಯಕನಹಳ್ಳಿಗೆ ಬಂದಿದ್ದ ರಾಹುಲ್, ಸಹನಾಳನ್ನು ಪಿಕ್ ಮಾಡಿಕೊಂಡು ಗಂಡ ವಿರೇಶ್ ವಿರುದ್ಧ ದೂರು ನೀಡಲು ಇಬ್ಬರೂ ತೀರ್ಮಾನಿಸಿದ್ದರು. ಆದರೆ "ಗಂಡ ವಿರೇಶ್ ನಮ್ಮನ್ನು ನೆಮ್ಮದಿಯಿಂದ ಬಾಳಲು ಬಿಡುವುದಿಲ್ಲ" ಎಂದು ತೀವ್ರ ಮನನೊಂದ ಭಗ್ನಪ್ರೇಮಿಗಳು ಅಂತಿಮವಾಗಿ ಪ್ರಾಣ ತ್ಯಾಗ ಮಾಡಲು ನಿರ್ಧರಿಸಿದ್ದರು.

ಇಂದು ಬೆಳಿಗ್ಗೆ ಮಂಡ್ಯದ ವಿಸಿ ಫಾರಂ ರಸ್ತೆಯ ರೈಲ್ವೆ ಟ್ರ್ಯಾಕ್ ಬಳಿ ಚಲಿಸುವ ರೈಲಿಗೆ ಇಬ್ಬರೂ ತಲೆಕೊಟ್ಟು ಭೀಕರವಾಗಿ ಸಾವಿಗೆ ಶರಣಾಗಿದ್ದಾರೆ. ಘಟನೆ ನಡೆದ ವಿಷಯ ತಿಳಿಯುತ್ತಿದ್ದಂತೆಯೇ ಮಂಡ್ಯ ರೈಲ್ವೆ ಪೊಲೀಸರು ಸ್ಥಳಕ್ಕೆ ದೌಡಾಯಿಸಿ ಪರಿಶೀಲನೆ ನಡೆಸಿದ್ದಾರೆ.

ರೈಲ್ವೆ ಪೊಲೀಸರು ಸ್ಥಳದಲ್ಲಿದ್ದ ಮೃತದೇಹಗಳನ್ನು ವಶಕ್ಕೆ ಪಡೆದು, ಮರಣೋತ್ತರ ಪರೀಕ್ಷೆಗಾಗಿ ಮಂಡ್ಯದ ಮಿಮ್ಸ್ (MIMS) ಆಸ್ಪತ್ರೆಯ ಶವಗಾರಕ್ಕೆ ರವಾನಿಸಿದ್ದಾರೆ. ಮೃತರ ಕಡೆಯವರಿಗೆ ಘಟನೆಯ ಕುರಿತು ಮಂಡ್ಯ ರೈಲ್ವೆ ಪೊಲೀಸರು ಈಗಾಗಲೇ ಮಾಹಿತಿ ರವಾನಿಸಿದ್ದಾರೆ.

ಸಾಯಲು ಹೋದ ಮಹಿಳೆಯನ್ನು ಬದುಕಿಸಿದ ಮೊಸಳೆ, ಕುಕ್ಕೆ ಸುಬ್ರಹ್ಮಣ್ಯದಲ್ಲಿ ನಡೆಯಿತು ವಿಚಿತ್ರ ಘಟನೆ

Chethan Kumar — Fri, 06 Nov 2026 14:57:21 +0530

ಸುಬ್ರಹ್ಮಣ್ಯ (ನ.06) ಕುಕ್ಕೆ ಸುಬ್ರಹ್ಮಣ್ಯದಲ್ಲಿ ವಿಚಿತ್ರ ಘಟನೆಯೊಂದು ನಡೆದಿದೆ. ಮನೆಯಲ್ಲಿ ಮನಸ್ತಾಪಗಳು, ಬದಕಿನಲ್ಲಿ ನಡೆದ ಹಲವು ಘಟನೆಗಳಿಂದ ತೀವ್ರವಾಗಿ ಬೇಸರಗೊಂಡಿದ್ದ ಮಹಿಳೆ ಸಾಯಲು ನಿರ್ಧರಿಸಿದ್ದಳು. ಬದುಕು ಸಾಕಾಹಿ ಹೋಗಿದೆ ಎಂದು ಗಟ್ಟಿ ನಿರ್ಧಾರ ಮಾಡಿದ್ದಳು. ಎಲ್ಲಾ ಪ್ಲಾನ್ ಮಾಡಿಕೊಂಡ ಮಹಿಳೆ ರಾತ್ರಿ ವೇಳೆ ದುಡುಕಿನ ನಿರ್ಧಾರಕ್ಕೆ ಮುಂದಾಗಿದ್ದಳು. ಆದರೆ ಮಹಿಳೆಯನ್ನು ಮೊಸಳೆ ಬದುಕಿಸಿದ ಘಟನೆ ನಡೆದಿದೆ. ಸದ್ಯ ಮನೆಯಲ್ಲಿ ವಿಶ್ರಾಂತಿ ಪಡೆಯುತ್ತಿರುವ ಮಹಿಳೆಗೆ ಮರು ಜೀವಕೊಟ್ಟ ಮೊಸಳೆ ಇದೀಗ ಭಾರಿ ಸದ್ದು ಮಾಡುತ್ತಿದೆ.

ಏನಿದು ಘಟನೆ?

ನವೆಂಬರ್ ನಾಲ್ಕರಂದು ಮಹಿಳೆ ಬದುಕಿನ ಕೊನೆಯ ದಿನಕ್ಕೆ ಸಜ್ಜಾಗಿದ್ದಳು. ಹಲವು ಕಾರಣಗಳಿಂದ ಮಹಿಳೆ ಈ ನಿರ್ಧಾರಕ್ಕೆ ಬಂದಿದ್ದಳು. ಬುಧವಾರ ರಾತ್ರಿಯಾಗುತ್ತಿದ್ದಂತೆ ಕುಕ್ಕೆ ಸುಬ್ರಹ್ಮಣ್ಯದ ಬಳಿ ಇರುವ ಕುಮಾರಧಾರ ಸೇತುವೆ ಬಳಿ ಆಗಮಿಸಿದ್ದಾಳೆ. ಪಕ್ಕದಲ್ಲೇ ಇರುವ ಸುಬ್ರಹ್ಮಣ್ಯ ದೇವರ ಧ್ಯಾನಿಸಿ ನದಿಗೆ ಹಾರಿದ್ದಾಳೆ. ತುಂಬಿ ಹರಿಯುತ್ತಿರುವ ಕುಮಾರಧಾರ ನದಿಗೆ ಹಾರಿದ ಬೆನ್ನಲ್ಲೇ ಅಲ್ಲೆ ಇದ್ದ ಮೊಸಳೆ ಮಹಿಳೆಯ ಮೇಲೆ ದಾಳಿಗೆ ಮುಂದಾಗಿದೆ.

ನದಿಯಲ್ಲಿತ್ತು ದೈತ್ಯ ಮೊಸಳೆ

ಮಹಿಳೆ ನೀರಿನಲ್ಲಿ ಮುಳುಗುತ್ತಿದ್ದಂತೆ ಮೊಸಳೆ ದಾಳಿ ಮಾಡಿದೆ. ಒಂದೆ ಮಹಿಳೆ ನದಿ ನೀರಿನಲ್ಲಿ ಕೊಚ್ಚಿ ಕೆಲ ದೂರ ಹೊಗುತ್ತಿದ್ದಂತೆ ಮತ್ತೊಂದೆಡೆ ಮೊಸಳೆ ದಾಳಿ ಮಾಡಿದೆ. ಮೊಸಳೆ ದಾಳಿಯಿಂದ ಭಯಗೊಂಡ ಮಹಿಳೆ ಕಿರುಚಾಡಿದ್ದಾಳೆ. ಕಾಪಾಡಲು ಮೊರೆ ಇಟ್ಟಿದ್ದಾಳೆ. ಮಹಿಳೆಯ ಕೂಗು ಕೇಳಿದ ಸ್ಥಳೀಯರು ಸೇತುವೆ ಬಳಿ ಆಗಮಿಸಿದ್ದಾರೆ. ಈ ವೇಳೆ ಮಹಿಳೆ ಕಾಪಾಡಿ ಕಾಪಾಡಿ ಎಂದು ಕೂಗಿಕೊಳ್ಳುತ್ತಿರುವುದು ಗಮನಿಸಿದ್ದಾರೆ. ತಕ್ಷಣವೇ ಕಾರ್ಯಪ್ರವೃತ್ತರಾದ ಸ್ಥಳೀಯರು ಮಹಿಳೆಯನ್ನು ನೀರಿನಿಂದ ಮೇಲಕ್ಕೆತ್ತಿದ್ದಾರೆ.

ಮಹಿಳೆಯನ್ನು ಕುಟಂಬದ ವಶಕ್ಕೆ ನೀಡಿದ ಪೊಲೀಸ್

ಮೊಸಳೆ ದಾಳಿ, ಇತ್ತ ನೀರಿನಲ್ಲಿ ಮುಳುಗು ಅಸ್ವಸ್ಥರಾಗಿದ್ದ ಮಹಿಳೆಯನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ವೈದ್ಯರು ಮೊಸಳೆ ಕಡಿತ ಹಾಗೂ ಇತರ ಗಾಯಗಳಿಗೆ ಚಿಕಿತ್ಸೆ ನೀಡಿದ್ದಾರೆ. ರಾತ್ರಿ ಆಸ್ಪತ್ರೆಯಲ್ಲೇ ಕಳೆದ ಮಹಿಳೆ ಬೆಳಗ್ಗೆ ಬಿಡುಗಡೆಯಾಗಿದ್ದಾರೆ. ಬಳಿಕ ಮಹಿಳೆ ಕುಟುಂಬಸ್ಥರಿಗೆ ಪೊಲೀಸರು ಮಾಹಿತಿ ನೀಡಿದ್ದಾರೆ. ಮಹಿಳೆಗೆ ಕೌನ್ಸಿಲಿಂಗ್ ಮಾಡಿದ ಪೊಲೀಸರು ಕುಟುಂಬಸ್ಥರ ವಶಕ್ಕೆನೀಡಿದ್ದಾರೆ. ಸದ್ಯ ಮಹಿಳೆ ಮನೆಯಲ್ಲಿ ವಿಶ್ರಾಂತಿ ಪಡೆಯುತ್ತಿದ್ದಾರೆ. ಘಟನೆ ಸಂಬಂಧ ಯಾವುದೇ ಪ್ರಕರಣ ದಾಖಲಾಗಿಲ್ಲ. ಮಹಿಳೆ ಕುಟುಂಬಸ್ಥರ ಮನವಿ ಮೇರೆ ಪೊಲೀಸರು ಮಹಿಳೆಯ ಯಾವುದೇ ಮಾಹಿತಿಯನ್ನು ಬಹಿರಂಗಪಡಿಸಿಲ್ಲ.

ಸಾಯಲು ಹೋದ ಮಹಿಳೆ ಮೊಸಳೆ ಕಂಡು ಭಯಭೀತಗೊಂಡು ಕಿರುಚಾಡಿದ ಕಾರಣ ಮಹಿಳೆಯ ಜೀವ ಉಳಿದಿದೆ. ಇದೀಗ ಮೊಸಳೆ ಮಹಿಳೆಯನ್ನು ಕಾಪಾಡಿದೆ ಎಂಬ ಮಾತುಗಳು ಕೇಳಿಬರುತ್ತಿದೆ. ದೇವರೇ ಬಂದು ಮಹಿಳೆಯನ್ನು ಕಾಪಾಡಿದ್ದಾರೆ. ಸ್ಥಳೀಯರು ತುರ್ತು ಸಹಾಯಕ್ಕೆ ಬಂದ ಕಾರಣ ಮಹಿಳೆ ಜೀವ ಉಳಿದಿದೆ. ಈ ಕುರಿತು ಸ್ಥಳೀಯ ಮಟ್ಟದಲ್ಲಿ ಭಾರಿ ಚರ್ಚೆಯಾಗುತ್ತಿದೆ. ಇದೇ ವೇಳೆ ಸ್ಥಳೀಯರಲ್ಲಿ ಆತಂಕವೂ ಮನೆ ಮಾಡಿದೆ. ಕುಮಾರಧಾರ ನದಿಯಲ್ಲಿ ಮೊಸಳೆ ಇರುವಿಕೆ ಕುರಿತು ಯಾವುದೇ ಸುಳಿವು ಇರಲಿಲ್ಲ. ಸ್ಥಳೀಯರು ಇದೇ ನದಿಗೆ ಹಲವು ಬಾರಿ ಇಳಿದಿದ್ದಾರೆ. ಇದೀಗ ಮೊಸಳೆ ದಾಳಿಯಿಂದ ಆತಂಕ ಹೆಚ್ಚಾಗಿದೆ. ದೇವಸ್ಥಾನದ ಸುತ್ತ ಮುತ್ತ ಹೊರತುಪಡಿಸಿ ಇತರ ಕಾಡು ಪ್ರದೇಶಗಳಲ್ಲಿ ಯಾರು ನದಿಗೆ ಇಳಿಯದಂತೆ ಸೂಚನೆ ನೀಡಲಾಗಿದೆ.

ಹಾಸನಾಂಬ ಮುಖ್ಯದ್ವಾರದಲ್ಲಿ ಹೈಡ್ರಾಮಾ: ದೇವಿಗೆ ಬರೆದ ವಿಶೇಷ ಪತ್ರ, ಬೆಳೆದ ಬೆಳೆ ಹೊತ್ತು ತಂದ ನೂರಾರು ರೈತರು!

Ravi Janekal — Fri, 06 Nov 2026 14:44:24 +0530

ಹಾಸನಾಂಬೆ(Hasanamba Devi) ದರ್ಶನಕ್ಕೆ ಎಂಟನೆಯ ದಿನವಾದ ಇಂದು ಮಳೆಯ ನಡುವೆಯೂ ದೇವಿಯ ದರ್ಶನಕ್ಕೆ ಭಕ್ತ ಮಹಾಸಾಗರವೇ ಹರಿದುಬಂದಿದೆ. ನಿನ್ನೆ(ನ.5, ಬುಧವಾರ) ಗುಡುಗು ಮಿಂಚು ಸಹಿತ ರಾತ್ರಿ ಸುರಿದ ಮಳೆಗೆ ತೊಂದರೆಯಾದರೂ ಮಳೆಯ ನಡುವೆಯೂ ದೇವಿಯ ದರ್ಶನ ಪಡೆದರು.

ಇಂದು ಹಾಸನಾಂಬೆ ಮುಖ್ಯದ್ವಾರದಲ್ಲಿ ನೂರಾರು ರೈತರು ವಿನೂತ ಪ್ರತಿಭಟನೆ ನಡೆಸಿದ ಘಟನೆಯೂ ನಡೆದಿದೆ. ಬೆಳೆದ ಬೆಳೆಯನ್ನೇ ತಲೆಮೇಲೆ ಬುಟ್ಟಿಯಲ್ಲಿಟ್ಟುಕೊಂಡು ಹಾಸನಾಂಬ ದೇವಿಗೆ ನೈವೇದ್ಯ ತಂದ ರೈತರು ವಿಶೇಷ ಪತ್ರ ದೇವಿಯ ಮುಂದೆ ಇಟ್ಟು ಬೇಡಿದರು.

ಬೆಳೆಹಾನಿಗೆ ಪರಿಹಾರ ಕೊಡುವಂತಹ ಬುದ್ಧಿ ಕೊಡಮ್ಮ..!

ಕಳಸ, ಬುಟ್ಟಿಯಲ್ಲಿ ಬೆಳೆದ ಬೆಳೆ ಹೊತ್ತು ಬಂದ ನೂರಾರು ರೈತರು ದೇವಿಗೆ ವಿಶೇಷವಾಗಿ ಬರೆದು ತಂದಿದ್ದ ಪತ್ರ ಸಮರ್ಪಿಸಿದರು. ಕಾಲ ಕಾಲಕ್ಕೆ ಮಳೆ ಬೀಳುವಂತೆ ಮಾಡಮ್ಮ, ಉತ್ತಮ ಬೀಜ, ಗೊಬ್ಬರ ಸಿಗುವಂತೆ ಮಾಡಮ್ಮ, ಬಳಿಕ ಈ ಸರ್ಕಾರಕ್ಕೆ ಬೆಳೆಹಾನಿಗೆ ಸೂಕ್ತ ಪರಿಹಾರ ಕೊಡುವಂತಹ ಬುದ್ಧಿ ಕೊಡಮ್ಮ ಹಾಸನಾಂಬೆಯಲ್ಲಿ ಸಂಗ್ರಹವಾದ ಹಣವನ್ನು ರೈತರಿಗೆ ಪರಿಹಾರವಾಗಿ ಕೊಡುವಂತೆ ಮಾಡಮ್ಮ, ಹಾಸನ ಅಧಿಕಾರಿಗಳು ಪಡೆಯುವುದು ನಿಲ್ಲಿಸುವಂತೆ ಮಾಡಮ್ಮ ಎಂದು ಬೇಡಿದರು. ಈ ವೇಳೆ ಜಿಲ್ಲಾಡಳಿತದ ವಿರುದ್ಧ ರೈತರು ಆಕ್ರೋಶ ವ್ಯಕ್ತಪಡಿಸಿದರು.

ಹಾಸನಾಂಬೆಗೆ ನೈವೇದ್ಯ ಸಲ್ಲಿಸಲು ಬಿಡದ್ದಕ್ಕೆ ಆಕ್ರೋಶ

ಹಾಸನಾಂಬ ದೇವಿಗೆ ನೈವೇದ್ಯ ಸಲ್ಲಿಸಲು ತಲೆಮೇಲೆ ಹೊತ್ತುತಂದಿದ್ದ ಬೆಳೆಯನ್ನು ದೇವಿಗೆ ಸಲ್ಲಿಸಲು ನೂರಾರು ರೈತರಿಗೆ ಅವಕಾಶ ಕೊಡಲಿಲ್ಲ. ಈ ವೇಳೆ ಅವಕಾಶ ಕಲ್ಪಿಸುವಂತೆ ಪ್ರತಿಭಟನಕಾರರು ಆಕ್ರೋಶ ವ್ಯಕ್ತಪಡಿಸಿದರು. ಆಗ ಪೊಲೀಸರು ಮಧ್ಯಪ್ರವೇಶಿಸಿ ರೈತರ ಮನವೊಲಿಸಲು ಪ್ರಯತ್ನಿಸಿದರು ಅಷ್ಟಕ್ಕೂ ಸುಮ್ಮನಾಗದಾದಾಗ ಸಚಿವ ಶಿವಲಿಂಗೇಗೌಡ ಆಗಮಿಸಿ ಉತ್ತಮ ರೀತಿ ದರ್ಶನ ನಡೆಯುತ್ತಿದೆ ಎಂದು ರೈತರಿಗೆ ತಿಳಿಸಿದರು. ಅದರಂತೆಯೇ ಮೊದಲಿಗೆ ಹತ್ತು ಜನ ಮಾತ್ರ ದರ್ಶನ ನೈವೇದ್ಯ ನೀಡಲು ಅವಕಾಶ ಕಲ್ಪಿಸುತ್ತೇನೆ, ಉಳಿದವರು ಪ್ರತ್ಯೇಕ ಸಾಲಿನಲ್ಲಿ ದರ್ಶನದ ವ್ಯವಸ್ಥೆ ಕಲ್ಪಿಸಲಾಗುವುದು ಎಂದು ಭರವಸೆ ನೀಡಿದ ಬಳಿಕ ರೈತರು ಪ್ರತಿಭಟನೆ ಕೈಬಿಟ್ಟರು.

ಉತ್ತರ ಕನ್ನಡ: ಕಡ್ಡಿ ಗೀರಿ ಬಾವಿಗೆ ಎಸೆದರೆ ಹೊತ್ತಿಕೊಳ್ಳುತ್ತೆ ಬೆಂಕಿ, ಸ್ಥಳೀಯರು ಕಂಗಾಲು!

Santosh Naik — Fri, 06 Nov 2026 14:40:29 +0530

ಶಿರಸಿ (ನ.6): ಉತ್ತರಕನ್ನಡ ಜಿಲ್ಲೆಯ ಶಿರಸಿ ತಾಲೂಕಿನ ನಿವಾಸಿಗಳಲ್ಲಿ ತೀವ್ರ ಆತಂಕ ಮೂಡಿಸುವ ಘಟನೆ ನಡೆದಿದೆ. ಇಲ್ಲಿನ ಓಂಕಾರ ಕಾಲೋನಿಯಲ್ಲಿರುವ ಬಾವಿಗಳಲ್ಲಿ ಅಪಾರ ಪ್ರಮಾಣದ ಆಯಿಲ್ ಪತ್ತೆಯಾಗಿದ್ದು, ಬಾವಿ ನೀರಿಗೆ ಬೆಂಕಿ ಕಡ್ಡಿ ಗೀರಿದರೆ ಸಾಕು ಇಡೀ ನೀರು ಹೊತ್ತಿ ಉರಿಯುತ್ತಿದೆ. ಶಿರಸಿ ತಾಲೂಕಿನ ದೊಡ್ನಳ್ಳಿ ಗ್ರಾಮ ಪಂಚಾಯತಿ ವ್ಯಾಪ್ತಿಗೆ ಒಳಪಡುವ ಓಂಕಾರ ಕಾಲೋನಿಯಲ್ಲಿ ಈ ಘಟನೆ ಸಂಭವಿಸಿದೆ. ಕಾಲೋನಿಯಲ್ಲಿರುವ ಸುಮಾರು ಆರು ಬಾವಿಗಳಲ್ಲಿ ದಿಢೀರನೇ ಬಾವಿ ನೀರಿನ ಜೊತೆ ತೈಲ/ಆಯಿಲ್ ಮಿಶ್ರಣಗೊಂಡಿರುವುದು ಪತ್ತೆಯಾಗಿದೆ. ಬಾವಿಯಿಂದ ನೀರು ಎತ್ತಿ ಪರಿಶೀಲಿಸಿದಾಗ ಆಯಿಲ್ ಮಿಶ್ರಿತವಾಗಿರುವುದು ಕಂಡುಬಂದಿದ್ದು, ಬೆಂಕಿ ಕಡ್ಡಿ ಗೀರಿದಾಗ ಉರಿಯಲು ಆರಂಭಿಸಿದೆ. ಇದನ್ನು ಕಂಡು ಅಚ್ಚರಿಗೊಂಡ ಸ್ಥಳೀಯ ನಿವಾಸಿಗಳು ತಕ್ಷಣವೇ ದೊಡ್ನಳ್ಳಿ ಗ್ರಾಮ ಪಂಚಾಯತಿ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾರೆ.

ಸ್ಥಳಕ್ಕೆ ದೌಡಾಯಿಸಿದ ಅಧಿಕಾರಿಗಳು

ಸ್ಥಳೀಯರಿಂದ ದೂರು ಸ್ವೀಕರಿಸುತ್ತಿದ್ದಂತೆಯೇ ದೊಡ್ನಳ್ಳಿ ಗ್ರಾಮ ಪಂಚಾಯತಿ ಅಧಿಕಾರಿಗಳು ತಜ್ಞರ ತಂಡದೊಂದಿಗೆ ಸ್ಥಳಕ್ಕೆ ದೌಡಾಯಿಸಿದ್ದಾರೆ. ಬಾವಿಗಳನ್ನು ಪ್ರತ್ಯಕ್ಷವಾಗಿ ವೀಕ್ಷಿಸಿದ ಅಧಿಕಾರಿಗಳು ಹಾಗೂ ತಜ್ಞರು, ನೀರಿನಲ್ಲಿ ಆಯಿಲ್ ತೇಲುತ್ತಿರುವುದನ್ನು ಮತ್ತು ಹೊತ್ತಿ ಉರಿಯುತ್ತಿರುವುದನ್ನು ಕಂಡು ದಂಗಾಗಿದ್ದಾರೆ. ಬಾವಿ ನೀರಿಗೆ ಈ ಪ್ರಮಾಣದಲ್ಲಿ ಆಯಿಲ್ ಎಲ್ಲಿಂದ ಸೇರುತ್ತಿದೆ ಎಂಬ ಖಚಿತ ಮೂಲವನ್ನು ಪತ್ತೆಹಚ್ಚಲು ತಜ್ಞರ ತಂಡ ತೀವ್ರ ಹರಸಾಹಸ ಪಡುತ್ತಿದೆ.

ಪವರ್ ಗ್ರಿಡ್‌ನಿಂದ ಆಯಿಲ್ ಲೀಕೇಜ್ ಶಂಕೆ?

ಓಂಕಾರ ಕಾಲೋನಿಯ ಪಕ್ಕದಲ್ಲೇ ವಿದ್ಯುತ್ ಪ್ರಸರಣ ಸಂಸ್ಥೆಯ ಬೃಹತ್ 'ಪವರ್ ಗ್ರಿಡ್' (Power Grid) ಇದೆ. ಈ ಪವರ್ ಗ್ರಿಡ್‌ನ ಟ್ರಾನ್ಸ್‌ಫಾರ್ಮರ್‌ಗಳಿಂದ ಅಥವಾ ಸಂಗ್ರಹಾಗಾರದಿಂದ ಆಯಿಲ್ ಸೋರಿಕೆಯಾಗಿ (Oil Seepage) ಭೂಮಿಯ ಅಂತರ್ಜಲ ಮಟ್ಟಕ್ಕೆ ಸೇರಿರಬಹುದು ಎಂದು ಸಂಶಯ ವ್ಯಕ್ತವಾಗಿದೆ. ಈ ಶಂಕೆಯ ಹಿನ್ನೆಲೆಯಲ್ಲಿ ಅಧಿಕಾರಿಗಳು ಹಾಗೂ ತಜ್ಞರ ತಂಡ ಪವರ್ ಗ್ರಿಡ್ ಆವರಣಕ್ಕೂ ಭೇಟಿ ನೀಡಿ ಕೂಲಂಕಷ ತಪಾಸಣೆ ನಡೆಸಿದ್ದಾರೆ. ಆದರೆ, ಭೂಮಿಗೆ ಆಯಿಲ್ ಸೇರ್ಪಡೆಯಾದ ಮೂಲ ಸ್ಥಳ ಯಾವುದು ಎಂಬುದು ಸದ್ಯಕ್ಕೆ ಖಚಿತವಾಗಿ ಪತ್ತೆಯಾಗಿಲ್ಲ.

ಟ್ಯಾಂಕರ್ ಮೂಲಕ ತಾತ್ಕಾಲಿಕ ನೀರು ಪೂರೈಕೆ

ಕಾಲೋನಿಯ ಆರು ಬಾವಿಗಳ ನೀರು ಸಂಪೂರ್ಣವಾಗಿ ಆಯಿಲ್ ಮಿಶ್ರಿತವಾಗಿ ಕಲುಷಿತಗೊಂಡಿರುವುದರಿಂದ, ಈ ನೀರನ್ನು ಕುಡಿಯಲು ಅಥವಾ ಗೃಹಬಳಕೆಗೆ ಬಳಸದಂತೆ ನಿವಾಸಿಗಳಿಗೆ ಸೂಚನೆ ನೀಡಲಾಗಿದೆ. ಬಾವಿ ನೀರು ಬಂದ್ ಆಗಿರುವುದರಿoದ ಕಾಲೋನಿಯಲ್ಲಿ ಕುಡಿಯುವ ನೀರಿನ ಅಭಾವ ಸೃಷ್ಟಿಯಾಗಿದ್ದು, ಗ್ರಾಮ ಪಂಚಾಯತಿ ವತಿಯಿಂದ ತಾತ್ಕಾಲಿಕವಾಗಿ ಓಂಕಾರ ಕಾಲೋನಿಯ ನಿವಾಸಿಗಳಿಗೆ ಟ್ಯಾಂಕರ್ ಮೂಲಕ ಕುಡಿಯುವ ನೀರನ್ನು ಸರಬರಾಜು ಮಾಡಲಾಗುತ್ತಿದೆ. ಭೂಮಿಗೆ ಆಯಿಲ್ ಸೇರುತ್ತಿರುವ ಮೂಲವನ್ನು ಪತ್ತೆಹಚ್ಚಲು ಹಾಗೂ ನೀರನ್ನು ಶುದ್ಧೀಕರಿಸಲು ತಜ್ಞರು ತನಿಖೆಯನ್ನು ಮುಂದುವರಿಸಿದ್ದಾರೆ.

ಹಾಸನ: ಉತ್ತರಾಖಂಡ್‌ ಹೆಲಿಕಾಪ್ಟರ್‌ ದುರಂತದಲ್ಲಿ ಎದೆಯೆತ್ತರ ಬೆಳೆದ ಮಗ ಪ್ರತಾಪ್ ಗೌಡ ಸಾವಿನ 6 ದಿನಕ್ಕೆ ತಂದೆ ಕೂಡ ಸಾವು

Santosh Naik — Fri, 06 Nov 2026 14:11:05 +0530

ಹಾಸನ (ನ.6): ಜಿಲ್ಲೆಯ ಸಕಲೇಶಪುರ ತಾಲೂಕಿನ ಬಾಚಿಹಳ್ಳಿ ಗ್ರಾಮದಲ್ಲಿ ಮನಕಲುಕುವ ದುರಂತ ಸಂಭವಿಸಿದೆ. ಅಕ್ಟೋಬರ್‌ 30 ರಂದು ಉತ್ತರಾಖಂಡದಲ್ಲಿ ಸಂಭವಿಸಿದ ಹೆಲಿಕಾಪ್ಟರ್ ದುರಂತದಲ್ಲಿ ಅಕಾಲಿಕ ಮರಣ ಹೊಂದಿದ್ದ ಖ್ಯಾತ ಉದ್ಯಮಿ ಹಾಗೂ ಸಮಾಜ ಸೇವಕ ಪ್ರತಾಪಗೌಡ (ಪ್ರತಾಪ್ ಬಾಚಿಹಳ್ಳಿ) ಅವರ ತಂದೆ ನಿಂಗರಾಜು ಗುರುವಾರ ನಿಧನರಾಗಿದ್ದಾರೆ. 6 ದಿನಗಳ ಹಿಂದೆಯಷ್ಟೇ ಎದೆಯೆತ್ತರ ಬೆಳೆದ ಮಗನನ್ನು ಕಳೆದುಕೊಂಡು ತೀವ್ರ ದುಃಖದಲ್ಲಿದ್ದ ನಿಂಗರಾಜು ಅವರು, ಮಗನ ಅಗಲಿಕೆಯ ನೋವನ್ನು ಭರಿಸಲಾಗದೆ ತೀವ್ರ ಹೃದಯಾಘಾತದಿಂದ ಕೊನೆಯುಸಿರೆಳೆದಿದ್ದಾರೆ.

ಒಂದೇ ಕುಟುಂಬದಲ್ಲಿ 6 ದಿನದ ಅವಧಿಯಲ್ಲಿ ಸಂಭವಿಸಿದ ದುರಂತಗಳು ಸಕಲೇಶಪುರ ತಾಲೂಕಿನ ಬಾಚಿಹಳ್ಳಿ ಗ್ರಾಮ ಹಾಗೂ ಸುತ್ತಮುತ್ತಲ ಪ್ರದೇಶಗಳಲ್ಲಿ ಕದ ಛಾಯೆಯನ್ನು ಮೂಡಿಸಿದೆ. ಬೆನ್ನುಬೆನ್ನಿಗೆ ಇಬ್ಬರು ಪ್ರಮುಖ ಸದಸ್ಯರನ್ನು ಕಳೆದುಕೊಂಡ ಆ ಕುಟುಂಬದ ಸ್ಥಿತಿ ಅತ್ಯಂತ ಶೋಚನೀಯವಾಗಿದ್ದು, ಇಡೀ ಗ್ರಾಮಸ್ಥರು ಹಾಗೂ ಬಂಧು-ಮಿತ್ರರು ಕಣ್ಣೀರಿನಲ್ಲಿ ಮುಳುಗಿದ್ದಾರೆ.

ಹಾಸನ ಜಿಲ್ಲೆಯ ಹೆತ್ತೂರು ಹೋಬಳಿಯ ಬಾಚಿಹಳ್ಳಿ ಗ್ರಾಮದವರಾದ ಪ್ರತಾಪಗೌಡ ಅವರು ಐಟಿಐ (ITI) ಶಿಕ್ಷಣ ಪಡೆದಿದ್ದರು. ತಮ್ಮ ಕಠಿಣ ಪರಿಶ್ರಮದಿಂದ ಬೆಂಗಳೂರಿನಲ್ಲಿ ರಿಯಲ್ ಎಸ್ಟೇಟ್ ಹಾಗೂ ಕಟ್ಟಡ ನಿರ್ಮಾಣ (Construction) ಸಂಸ್ಥೆಯನ್ನು ಸ್ಥಾಪಿಸಿ, ಯಶಸ್ವಿ ಉದ್ಯಮಿಯಾಗಿ ಗುರುತಿಸಿಕೊಂಡಿದ್ದರು.

ಕೋಟಿ ಕೋಟಿ ಗಳಿಸಿದರೂ ಹುಟ್ಟೂರನ್ನು ಮರೆಯದ ದಾನಿ

ತಮ್ಮ ಉದ್ಯಮದಲ್ಲಿ ಸಂಪಾದಿಸಿದ ಹಣದಲ್ಲಿ ಸಕಲೇಶಪುರ ಹಾಗೂ ನೆರೆಯ ಕೊಡಗು ಜಿಲ್ಲೆಯ ಸೋಮವಾರಪೇಟೆ ತಾಲೂಕಿನ ಭಾಗಗಳಲ್ಲಿ ಅಪಾರ ಪ್ರಮಾಣದ ಧನಸಹಾಯ ಮತ್ತು ಸಮಾಜಮುಖಿ ಕಾರ್ಯಗಳನ್ನು ನಡೆಸಿ ಪ್ರತಾಪ್ ಜನಪ್ರಿಯರಾಗಿದ್ದರು: ತಮ್ಮ ಹುಟ್ಟೂರಾದ ಬಾಚಿಹಳ್ಳಿಯಲ್ಲಿ ತಮ್ಮ ಸ್ವಂತ ವೆಚ್ಚದ ₹26 ಲಕ್ಷ ರೂಪಾಯಿಗಳನ್ನು ವ್ಯಯಿಸಿ ಭವ್ಯ ದೇವಸ್ಥಾನ ನಿರ್ಮಾಣ ಮಾಡಿಸಿಕೊಟ್ಟಿದ್ದರು.

ಹೆತ್ತೂರು ಸಮೀಪದ ಹಳ್ಳಿಯೂರಿನಲ್ಲಿ ಬೆಂಕಿ ಅವಘಡಕ್ಕೀಡಾಗಿ ಸಂಪೂರ್ಣ ಮನೆ ಕಳೆದುಕೊಂಡು ಬೀದಿಗೆ ಬಿದ್ದಿದ್ದ ಬಡ ಮಹಿಳೆಗೆ ತಮ್ಮದೇ ಸ್ವಂತ ಖರ್ಚಿನಲ್ಲಿ ₹4.2 ಲಕ್ಷ ವೆಚ್ಚದಲ್ಲಿ ನೂತನ ಮನೆ ಕಟ್ಟಿಸಿಕೊಡುವ ಮೂಲಕ ಸಮಾಜ ಸೇವಕರಾಗಿ ಹೆಸರುವಾಸಿಯಾಗಿದ್ದರು. ಉದಾರ ಮನಸ್ಸಿನ ಮಗ ಉತ್ತರಾಖಂಡದ ಹೆಲಿಕಾಪ್ಟರ್ ದುರಂತದಲ್ಲಿ ಮೃತಪಟ್ಟಿದ್ದು ಇಡೀ ತಾಲೂಕಿಗೆ ಪೆಟ್ಟು ನೀಡಿದ್ದರೆ, ಇದೀಗ ಆ ದುಃಖದಲ್ಲೇ ತಂದೆ ನಿಂಗರಾಜು ಅವರು ನಿಧನರಾಗಿರುವುದು ದೈವದ ಕ್ರೂರ ಆಟಕ್ಕೆ ಸಾಕ್ಷಿಯಾಗಿದೆ.

ಮೈಸೂರಲ್ಲಿ ಸಿಕ್ಕಿತು 9ನೇ ಶತಮಾನದ ಆದಿ ಶಂಕರಾಚಾರ್ಯರ ಪ್ರಾಚೀನ ಶಿಲ್ಪ! ಮದ್ರಾಸ್ ಎಎಸ್‌ಐ ತಜ್ಞರ ಅಧ್ಯಯನ

Gowthami K — Fri, 06 Nov 2026 13:36:05 +0530

ಮೈಸೂರು/ಚೆನ್ನೈ: ಕರ್ನಾಟಕದ ಮೈಸೂರು ಜಿಲ್ಲೆಯ ಕೆ.ಆರ್. ನಗರ ತಾಲೂಕಿನ ಹಂಪಾಪುರ ಗ್ರಾಮದಲ್ಲಿ ಪತ್ತೆಯಾಗಿರುವ ಪ್ರಾಚೀನ ಶಿಲ್ಪವೊಂದು ಆದಿ ಶಂಕರಾಚಾರ್ಯರ ಇತಿಹಾಸದ ಕುರಿತು ಹೊಸ ಬೆಳಕು ಚೆಲ್ಲುವ ನಿರೀಕ್ಷೆ ಮೂಡಿಸಿದೆ. ಗ್ರಾಮದ ಪ್ರಾಚೀನ ಇಟ್ಟಿಗೆ ರಚನೆಯೊಂದರಲ್ಲಿ ದೊರೆತಿರುವ ಈ ಶಿಲ್ಪವು ಆದಿ ಶಂಕರಾಚಾರ್ಯರನ್ನು ಪ್ರತಿನಿಧಿಸುತ್ತದೆ ಎಂದು ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆಯ (ASI) ಪ್ರತಿಮಾಶಾಸ್ತ್ರ ತಜ್ಞರ ತಂಡ ದೃಢಪಡಿಸಿದೆ. ಇದು 9ನೇ ಶತಮಾನದ ಆದಿ ಶಂಕರಾಚಾರ್ಯರ ವಿಗ್ರಹವೆಂದು ಎಎಸ್‌ಐ ಪ್ರತಿಮಾಶಾಸ್ತ್ರಜ್ಞರ ತಂಡ ದೃಢಪಡಿಸಿದೆ.

ಕೇಂದ್ರ ಶಿಕ್ಷಣ ಸಚಿವಾಲಯದ ಬೃಹತ್ 'ಶಂಕರ ಶಾಸನ ಯೋಜನೆ'

ಆದಿ ಶಂಕರಾಚಾರ್ಯರ ಜೀವನ, ಧಾರ್ಮಿಕ ಪ್ರವಾಸಗಳು, ತಾತ್ವಿಕ ಚಿಂತನೆಗಳು ಹಾಗೂ ಅವರ ಬೋಧನೆಗಳ ಪ್ರಸರಣಕ್ಕೆ ಸಂಬಂಧಿಸಿದ ಐತಿಹಾಸಿಕ ದಾಖಲೆಗಳನ್ನು ಪತ್ತೆಹಚ್ಚುವ ಕಾರ್ಯದಲ್ಲಿ ತೊಡಗಿರುವ ಎಎಸ್‌ಐಗೆ ಈ ಶಿಲ್ಪದ ಪತ್ತೆ ಹೊಸ ಸುಳಿವು ನೀಡಿದೆ. ದೇಶದ ವಿವಿಧ ಭಾಗಗಳಲ್ಲಿ ಲಭ್ಯವಿರುವ ಸಾವಿರಾರು ಶಾಸನಗಳನ್ನು ಪರಿಶೀಲಿಸಿ, ಶಂಕರಾಚಾರ್ಯರಿಗೆ ಸಂಬಂಧಿಸಿದ ಉಲ್ಲೇಖಗಳನ್ನು ಸಂಗ್ರಹಿಸುವುದು ಈ ಯೋಜನೆಯ ಮುಖ್ಯ ಉದ್ದೇಶವಾಗಿದೆ.

ಈ ಕುರಿತು ಮಾಹಿತಿ ನೀಡಿರುವ ಎಎಸ್‌ಐ ಶಿಲಾಶಾಸನ ವಿಭಾಗದ ನಿರ್ದೇಶಕ ಕೆ. ಮುನಿರತ್ನಂ ರೆಡ್ಡಿ, "ಈ ಆವಿಷ್ಕಾರವು ಶಂಕರಾಚಾರ್ಯರ ಐತಿಹಾಸಿಕತೆಯನ್ನು ಪುಷ್ಟೀಕರಿಸುವ ಸಂಶೋಧನೆಗೆ ನೂತನ ಭರವಸೆ ನೀಡಿದೆ," ಎಂದು ತಿಳಿಸಿದ್ದಾರೆ.

ಶಂಕರಾಚಾರ್ಯರಿಗೆ ನೇರವಾಗಿ ಸಂಬಂಧಿಸಿದ ಆರಂಭಿಕ ಶಾಸನಗಳು ಭಾರತದಲ್ಲಿ ಬಹಳ ವಿರಳವಾಗಿವೆ. ಕ್ರಿ.ಶ. 500-515ರ ಕಾಲಕ್ಕೆ ಸೇರಿದ ಗುಜರಾತ್‌ನ ತಾಮ್ರಫಲಕ ಶಾಸನವು ಶಂಕರಾಚಾರ್ಯರ ಅತ್ಯಂತ ಆರಂಭಿಕ ಉಲ್ಲೇಖಗಳಲ್ಲಿ ಒಂದಾಗಿದೆ. ತಮಿಳುನಾಡಿನ ತಿರುಚಿರಾಪಳ್ಳಿ ಜಿಲ್ಲೆಯ ಚೋಳಮದೇವಿಯಲ್ಲಿರುವ 11 ನೇ ಶತಮಾನದ ಶಾಸನವು ಅವರ ದಾರ್ಶನಿಕ ಕೊಡುಗೆಗಳನ್ನು ಹೆಸರಿಸುತ್ತದೆ.

"ಈ ಯೋಜನೆಯು ಯಶಸ್ವಿಯಾಗಿ ಪೂರ್ಣಗೊಂಡರೆ, ಆದಿ ಶಂಕರಾಚಾರ್ಯರ ದೇಶಾದ್ಯಂತದ ಪಯಣ, ಅವರ ತತ್ವಚಿಂತನೆ ಹಾಗೂ ಬೋಧನೆಗಳ ಪ್ರಸಾರದ ಬಗ್ಗೆ ನಿಖರ ಐತಿಹಾಸಿಕ ಆಧಾರಗಳು ಜಗತ್ತಿಗೆ ದೊರೆಯಲಿವೆ," ಎಂದು ತಿರುಪತಿಯ ರಾಷ್ಟ್ರೀಯ ಸಂಸ್ಕೃತ ವಿಶ್ವವಿದ್ಯಾಲಯದ ಸಾಹಿತ್ಯ ಪ್ರಾಧ್ಯಾಪಕ ಜಿ. ಶಂಕರನಾರಾಯಣನ್ ಅಭಿಪ್ರಾಯಪಟ್ಟಿದ್ದಾರೆ.

ಈ ಪ್ರತಿಮೆ ಕರ್ನಾಟಕದಲ್ಲಿ ಸಿಕ್ಕಿದ್ದೆಲ್ಲಿ?

ಮೈಸೂರು ಜಿಲ್ಲೆಯ ಕೆ.ಆರ್. ನಗರ ತಾಲೂಕಿನ ಹಂಪಾಪುರ ಗ್ರಾಮದಲ್ಲಿ ಪ್ರಾಚೀನ ಇಟ್ಟಿಗೆ ರಚನೆಯೊಳಗೆ ಈ ಶಿಲ್ಪ ಪತ್ತೆಯಾಗಿದೆ. ಪ್ರಾಥಮಿಕ ಮಾಹಿತಿಯ ಪ್ರಕಾರ, ಈ ನಿರ್ಮಾಣವು ಸುಮಾರು 9ನೇ ಶತಮಾನಕ್ಕೆ ಸೇರಿದ್ದಾಗಿದೆ. ಶಿಲ್ಪದ ಗುರುತಿಸುವಿಕೆಯನ್ನು ಎಎಸ್‌ಐನ ಪ್ರತಿಮಾಶಾಸ್ತ್ರ ತಜ್ಞರ ತಂಡ ದೃಢಪಡಿಸಿರುವುದು ವಿಶೇಷವಾಗಿದೆ.

ಆದಿ ಶಂಕರಾಚಾರ್ಯರು ಭಾರತೀಯ ತತ್ವಶಾಸ್ತ್ರ, ವಿಶೇಷವಾಗಿ ಅದ್ವೈತ ವೇದಾಂತ ಪರಂಪರೆಯ ಬೆಳವಣಿಗೆಯಲ್ಲಿ ಮಹತ್ವದ ಪಾತ್ರ ವಹಿಸಿದ ದಾರ್ಶನಿಕರು. ಅವರ ಜೀವನ ಮತ್ತು ಪ್ರವಾಸಗಳಿಗೆ ಸಂಬಂಧಿಸಿದ ನೇರ ಐತಿಹಾಸಿಕ ದಾಖಲೆಗಳು ಸೀಮಿತವಾಗಿರುವ ಹಿನ್ನೆಲೆಯಲ್ಲಿ, ದೇಶದ ವಿವಿಧ ಪ್ರದೇಶಗಳಲ್ಲಿ ದೊರೆಯುವ ಶಾಸನಗಳು, ಶಿಲ್ಪಗಳು ಮತ್ತು ಪ್ರಾಚೀನ ದಾಖಲೆಗಳ ಅಧ್ಯಯನಕ್ಕೆ ಹೆಚ್ಚಿನ ಮಹತ್ವ ದೊರೆತಿದೆ. ಹಂಪಾಪುರದಲ್ಲಿ ದೊರೆತಿರುವ ಈ ಶಿಲ್ಪವು ಶಂಕರಾಚಾರ್ಯರ ಕುರಿತು ನಡೆಯುತ್ತಿರುವ ಸಂಶೋಧನೆಗೆ ಹೊಸ ಆಯಾಮ ನೀಡುವ ಸಾಧ್ಯತೆಯಿದೆ.

84,000ಕ್ಕೂ ಹೆಚ್ಚು ಶಾಸನಗಳ ಕೂಲಂಕಷ ಪರಿಶೀಲನೆ

ಎಎಸ್‌ಐ ಬಳಿ ಪ್ರಸ್ತುತ 84,000ಕ್ಕೂ ಹೆಚ್ಚು ಪ್ರಾಚೀನ ಶಾಸನಗಳ ಬೃಹತ್ ದತ್ತಸಂಚಯವಿದೆ. ಶಂಕರಾಚಾರ್ಯರು ಭೇಟಿ ನೀಡಿದ್ದಾರೆನ್ನಲಾದ 86 ಪ್ರಮುಖ ಪುಣ್ಯಕ್ಷೇತ್ರಗಳ ಪಟ್ಟಿಯನ್ನು ಸಿದ್ಧಪಡಿಸಲಾಗಿದ್ದು, ಅಲ್ಲಿ ದೊರೆತಿರುವ ಶಾಸನಗಳನ್ನು ತಜ್ಞರ ತಂಡ ಪರಿಶೀಲಿಸುತ್ತಿದೆ. ಶ್ರೀಶೈಲಂ, ಕಾಂಚೀಪುರಂ, ಚಿದಂಬರಂ ಶಾಸನಗಳ ಮೇಲೆ ವಿಶೇಷ ಗಮನ

ಶಾಸನಗಳ ಪರಿಶೀಲನೆಗೆ ಆಯ್ಕೆ ಮಾಡಿರುವ ಸ್ಥಳಗಳಲ್ಲಿ ಕೆಲವು ಪ್ರದೇಶಗಳು ಹೆಚ್ಚಿನ ಐತಿಹಾಸಿಕ ದಾಖಲೆಗಳನ್ನು ಹೊಂದಿವೆ. ಎಎಸ್‌ಐನ ಲಭ್ಯ ದಾಖಲೆಗಳ ಪ್ರಕಾರ, ಶ್ರೀಶೈಲಂನಲ್ಲಿ 645, ಕಾಂಚೀಪುರಂನಲ್ಲಿ 625, ಚಿದಂಬರಂನಲ್ಲಿ 352 ಹಾಗೂ ತಿರುಪತಿಯಲ್ಲಿ 159 ಶಾಸನಗಳು ದಾಖಲಾಗಿವೆ.

ಈ ಶಾಸನಗಳಲ್ಲಿ ಆದಿ ಶಂಕರಾಚಾರ್ಯರು, ಅವರ ಕೃತಿಗಳು ಅಥವಾ ಅವರ ತಾತ್ವಿಕ ಪರಂಪರೆಗೆ ಸಂಬಂಧಿಸಿದ ಮಾಹಿತಿಗಳಿವೆಯೇ ಎಂಬುದನ್ನು ತಜ್ಞರು ಪರಿಶೀಲಿಸಲಿದ್ದಾರೆ. ಈ ಪ್ರಕ್ರಿಯೆಯಿಂದ ಈಗಾಗಲೇ ತಿಳಿದಿರುವ ಇತಿಹಾಸದ ಜತೆಗೆ ಹೊಸ ದಾಖಲೆಗಳೂ ಸಂಶೋಧಕರ ಗಮನಕ್ಕೆ ಬರುವ ನಿರೀಕ್ಷೆಯಿದೆ. ಇವುಗಳ ಹೊರತಾಗಿ ಶೃಂಗೇರಿ, ಗೋಕರ್ಣ, ತಿರುವನಂತಪುರಂ, ವಾರಣಾಸಿ, ಬದರಿನಾಥ, ದ್ವಾರಕಾ ಮತ್ತು ಪುರಿ ಕ್ಷೇತ್ರಗಳಲ್ಲಿ ದೊರೆತ ದಾಖಲೆಗಳನ್ನು ಶೋಧಿಸಲಾಗುತ್ತಿದೆ.

ಚೋಳರ ಕಾಲದ 'ಪ್ರದೀಪಕ' ಶಾಸನದ ಮಹತ್ವ

ಈ ಪರಿಶೀಲನೆಯ ವೇಳೆ ತಿರುಚಿಯ ಚೋಳಮದೇವಿಯಲ್ಲಿರುವ ಕೈಲಾಸನಾಥ ದೇವಾಲಯದ ದ್ವಿಭಾಷಾ (ಸಂಸ್ಕೃತ-ತಮಿಳು) ಶಾಸನವು ಮರು-ಗುರುತಿಸಲ್ಪಟ್ಟಿದೆ. 11ನೇ ಶತಮಾನದ ಚೋಳ ರಾಜ ವೀರರಾಜೇಂದ್ರನ (ಕ್ರಿ.ಶ. 1065) ಆಳ್ವಿಕೆಯ ಕಾಲದ ಈ ಶಾಸನದಲ್ಲಿ, ಆದಿ ಶಂಕರಾಚಾರ್ಯರ (ಭಗವತ್ಪಾದರ) 'ಶಾರೀರಕ ಭಾಷ್ಯ' ಕುರಿತು ಚಿದಾನಂದ ಪಿದಾರಾರ್ ಬರೆದ 'ಪ್ರದೀಪಕ' ಎಂಬ ವ್ಯಾಖ್ಯಾನವನ್ನು ಬೋಧಿಸುತ್ತಿದ್ದ ಶಿಕ್ಷಕನ ನಿರ್ವಹಣೆಗೆ ಭೂಮಿ ನೀಡಿದ ಉಲ್ಲೇಖವಿದೆ. ಚೋಳಮದೇವಿಯ ಶಾಸನದ ಐತಿಹಾಸಿಕ ಮಹತ್ವವನ್ನು ಖ್ಯಾತ ಪುರಾತತ್ವಶಾಸ್ತ್ರಜ್ಞ ಆರ್. ನಾಗಸ್ವಾಮಿ ಅವರು ಹಿಂದೆಯೇ ಗುರುತಿಸಿದ್ದರು. 1991ರಲ್ಲಿಯೇ ಈ ಬಗ್ಗೆ ವರದಿ ಆಗಿತ್ತು. ಚೋಳರ ಕಾಲದಲ್ಲಿ ಬ್ರಹ್ಮಸೂತ್ರಗಳ ಮೇಲಿನ ಶಂಕರಾಚಾರ್ಯರ ಭಾಷ್ಯವನ್ನು 'ಭಗವದ್ ಪಾದೀಯಂ' ಎಂದು ಕರೆಯಲಾಗುತ್ತಿತ್ತು ಎಂಬ ಅಂಶವೂ ಈ ವರದಿಯಲ್ಲಿತ್ತು. 11ನೇ ಶತಮಾನದಲ್ಲೇ ಚೋಳ ಮಂಡಲದಲ್ಲಿ ಶಂಕರಾಚಾರ್ಯರ ತತ್ವಶಾಸ್ತ್ರವನ್ನು ಅಧಿಕೃತವಾಗಿ ಅಧ್ಯಯನ ಮಾಡಲಾಗುತ್ತಿತ್ತು ಎಂಬುದಕ್ಕೆ ಇದು ಪ್ರಬಲ ಸಾಕ್ಷಿಯಾಗಿದೆ. ಬ್ರಹ್ಮಸೂತ್ರಗಳ ಮೇಲಿನ ಶಂಕರ ಭಾಷ್ಯವನ್ನು ಆ ಕಾಲದಲ್ಲಿ 'ಭಗವದ್‌ಪಾದೀಯಂ' ಎಂದು ಕರೆಯಲಾಗುತ್ತಿತ್ತು ಎಂದು ಈ ಶಾಸನವು ದೃಢಪಡಿಸುತ್ತದೆ.

ಶಾಸನಗಳ ಡಿಜಿಟಲೀಕರಣ

ಅಮರಾವತಿಯ ಕೆಲವು ಕ್ಷೇತ್ರಗಳಿಗೂ ಶಂಕರಾಚಾರ್ಯರು ಭೇಟಿ ನೀಡಿದ್ದರೆಂಬ ಹೊಸ ಕುರುಹುಗಳು ಲಭ್ಯವಾಗಿದ್ದು, ಆ ಸ್ಥಳಗಳಿಗೆ ಎಎಸ್‌ಐ ಕ್ಷೇತ್ರ ಸಂಶೋಧನಾ ತಂಡಗಳನ್ನು ಕಳುಹಿಸುತ್ತಿದೆ. ಈ ಬೃಹತ್ ಯೋಜನೆಯ ಪ್ರಗತಿಯ ಪರಿಶೀಲನೆ ಹಾಗೂ ಮುಂದಿನ ಕ್ರಿಯಾ ಯೋಜನೆಯ ಕುರಿತು ಚರ್ಚಿಸಲು ಎಎಸ್‌ಐ ಉನ್ನತಾಧಿಕಾರಿಗಳು ಕೇಂದ್ರ ಶಿಕ್ಷಣ ಸಚಿವಾಲಯದ ಅಧಿಕಾರಿಗಳೊಂದಿಗೆ ಮಹತ್ವದ ಸಭೆ ನಡೆಸಿದ್ದಾರೆ. ಇತ್ತೀಚೆಗೆ ಆಂಧ್ರಪ್ರದೇಶದ ಅಮರಾವತಿಯ ಕೆಲವು ಪ್ರದೇಶಗಳಿಗೆ ಶಂಕರಾಚಾರ್ಯರು ಭೇಟಿ ನೀಡಿದ್ದರೆಂಬ ಮಾಹಿತಿ ದೊರೆತಿದೆ ಎಂದು ಮುನಿರತ್ನಂ ರೆಡ್ಡಿ ತಿಳಿಸಿದ್ದಾರೆ.

ನವೆಂಬರ್ 6ರಂದು ಕೇಂದ್ರ ಶಿಕ್ಷಣ ಸಚಿವಾಲಯದ ಅಧಿಕಾರಿಗಳೊಂದಿಗೆ ಸಭೆ

ಯೋಜನೆಯ ಪ್ರಗತಿ, ಮುಂದಿನ ಸಂಶೋಧನಾ ಚಟುವಟಿಕೆಗಳು ಮತ್ತು ಅನುಷ್ಠಾನದ ರೂಪುರೇಷೆಗಳ ಕುರಿತು ಚರ್ಚಿಸಲು ಎಎಸ್‌ಐನ ಶಿಲಾಶಾಸನ ವಿಭಾಗದ ನಿರ್ದೇಶಕ ಕೆ. ಮುನಿರತ್ನಂ ರೆಡ್ಡಿ ಅವರು ನವೆಂಬರ್ 6ರಂದು ಕೇಂದ್ರ ಶಿಕ್ಷಣ ಸಚಿವಾಲಯದ ಅಧಿಕಾರಿಗಳನ್ನು ಭೇಟಿ ಮಾಡಲಿದ್ದಾರೆ.

ಯೋಜನೆಯಡಿ ಗುರುತಿಸಿ, ಪರಿಶೀಲಿಸಿ ದೃಢೀಕರಿಸಲಾದ ಶಾಸನಗಳನ್ನು ಡಿಜಿಟಲೀಕರಣಗೊಳಿಸಲಾಗುತ್ತದೆ. ಬಳಿಕ ಅವುಗಳನ್ನು 'ಭಾರತ್‌ಶ್ರೀ' ವೇದಿಕೆಯಲ್ಲಿ ಅಪ್‌ಲೋಡ್ ಮಾಡುವ ಉದ್ದೇಶ ಹೊಂದಲಾಗಿದೆ.

ಒಟ್ಟಾರೆಯಾಗಿ, ಹಂಪಾಪುರದಲ್ಲಿ ಪತ್ತೆಯಾದ ಆದಿ ಶಂಕರಾಚಾರ್ಯರ ಶಿಲ್ಪ ಮತ್ತು ದೇಶಾದ್ಯಂತ ನಡೆಯಲಿರುವ ಶಾಸನಗಳ ಪರಿಶೀಲನೆ ಭಾರತೀಯ ತತ್ವಶಾಸ್ತ್ರದ ಇತಿಹಾಸದ ಅಧ್ಯಯನಕ್ಕೆ ಹೊಸ ಅವಕಾಶಗಳನ್ನು ತೆರೆದಿಡುವ ನಿರೀಕ್ಷೆಯಿದೆ.

ಮೊಬೈಲ್ ಗೀಳಿನ ಮಕ್ಕಳ ನಡುವೆ ಈ ಬಾಲಕನ ಸಾಧನೆ ನೋಡಿ! 11ನೇ ವಯಸ್ಸಿಗೆ 3 ಪುಸ್ತಕಗಳ ಲೇಖಕ, ಏಷ್ಯಾದಲ್ಲೇ 8ನೇ ರ‍್ಯಾಂಕ್!

Kannadaprabha News — Fri, 06 Nov 2026 13:06:44 +0530

ಶಿವರಾಜ ವಿಶ್ವನಾಥ್

ಇತ್ತೀಚಿನ ಮಕ್ಕಳು ವಿಡಿಯೋ ಗೇಮ್ಸ್‌, ರೀಲ್ಸ್, ಸೋಷಿಯಲ್ ಮೀಡಿಯಾ ಇನ್ನಿತರ ಮೊಬೈಲ್, ಲ್ಯಾಪ್‌ಟಾಪ್‌ಗಳಂತಹ ಸಾಧನಗಳಲ್ಲಿ ತೊಡಗಿಸಿಕೊಂಡಿರುವಾಗ 11 ವರ್ಷದ ಬಾಲಕನೊಬ್ಬ ಇಂಗ್ಲಿಷ್‌ನಲ್ಲಿ 3 ಪುಸ್ತಕಗಳನ್ನು ರಚಿಸಿ ಎಲ್ಲರ ಹುಬ್ಬೇರಿಸುವಂತೆ ಮಾಡಿದ್ದಾನೆ.

11ನೇ ವಯಸ್ಸಿಗೆ ಮೂರು ಪುಸ್ತಕಗಳ ಲೇಖಕ!

ಬಾಗಲಕೋಟೆ ಜಿಲ್ಲೆಯ ಇಳಕಲ್ಲಿನ ನಿವಾಸಿಯಾದ ಪ್ರಣವ್‌ ಅಮರೇಶ ಹಿರೇಮಠ(Pranav Amaresh Hiremath) ಸದ್ಯ ವಿಜಯಪುರದಲ್ಲಿ ದೆಹಲಿ ಪಬ್ಲಿಕ್ ಸ್ಕೂಲ್(Delhi Public school vijayapur) ವಿದ್ಯಾರ್ಥಿಯಾಗಿದ್ದು ತನ್ನ 11ನೇ ವಯಸ್ಸಿನಲ್ಲಿ ಓದಿನ ಜತೆಗೆ ಬರವಣಿಗೆಯನ್ನು ರೂಢಿಸಿಕೊಂಡಿದ್ದಾನೆ. ಅಂತಾರಾಷ್ಟ್ರೀಯ ಮಟ್ಟದ ಮಕ್ಕಳ ವೇದಿಕೆಯಾದ ‘ಬ್ರಿ ಬುಕ್ಸ್‌’ ಪ್ರಕಾಶನದ ‘ಪರ್ಫಾರ್ಮಡ್ ನ್ಯಾಷನಲ್ ಯಂಗ್ ಆಥರ್ಸ್ ಫೇರ್’ ಸ್ಪರ್ಧೆಯಲ್ಲಿ ಭಾಗವಹಿಸಿ ಪ್ರಥಮ ಪ್ರಯತ್ನದಲ್ಲೇ ‘ವೆನ್ ಮೂಮೆಂಟ್ ಸ್ಪೀಕ್’ ಎಂಬ ವಿಷಯ ಕುರಿತು ಸುಮಾರು 147 ಪುಟಗಳ ಪುಸ್ತಕ ಬರೆದಿದ್ದಾನೆ. ಈ ಮೂಲಕ ಜ್ಯೂರಿ ಚಾಯಿಸ್‌ ಪ್ರಶಸ್ತಿಯಲ್ಲಿ ಏಷ್ಯಾದಲ್ಲೇ 8ನೇ ರ್‍ಯಾಂಕ್‌ ಗಳಿಸಿದ್ದಾನೆ. ಪ್ರಣವ್‌ ಈ ಪ್ರಶಸ್ತಿ ಪಡೆದ ಅತಿ ಕಿರಿಯ ವಯಸ್ಸಿನ ಸಾಧಕನಾಗಿದ್ದಾನೆ. ಜೊತೆಗೆ ಬೆಸ್ಟ್‌ ಸೆಲ್ಲರ್ ಪ್ರಶಸ್ತಿಯೂ ಲಭಿಸಿದೆ.

ಬಾಲಕ ಪ್ರಣವ್‌ ಅಮರೇಶ ಹಿರೇಮಠ ಬರೆದ ಮೂರು ಕೃತಿಗಳು

ಅನಂತರ 2ನೇ ಪುಸ್ತಕ ‘ಇನ್‌ಕ್ರೆಡಿಬಲ್ ಇಂಡಿಯಾ’ ಎಲ್ಲೂ ಇಲ್ಲದ್ದು ಭಾರತ ದೇಶದಲ್ಲಿದೆ ಎಂಬ ವಿಷಯ ಕುರಿತು ಸುಮಾರು 55 ಪುಟಗಳಲ್ಲಿ ಪುಸ್ತಕ ರಚಿಸಿ ಸಕಲ ಸೌಲಭ್ಯವೂ ನಮ್ಮ ದೇಶದಲ್ಲೇ ಇದ್ದರೂ ಬೇರೆ ದೇಶಕ್ಕೆ ಸುತ್ತಾಡುವುದೇಕೆ ಎಂಬ ಕುರಿತ ಪುಸ್ತಕಕ್ಕೆ ಭಾರೀ ಮೆಚ್ಚುಗೆ ವ್ಯಕ್ತವಾಗಿದೆ.

ಇನ್ನು 3ನೇ ಪುಸ್ತಕ ‘ದಿ ರಿಯಾಲಿಟಿ ಆಫ್ ಮಾಡರ್ನ್ ಅರ್ಥ್’ ಎಂಬ ಪುಸ್ತಕದಲ್ಲಿ ಇಂದಿನ ಪರಿಸರ ಮಾಲಿನ್ಯ ಹಾಗೂ ಮನುಷ್ಯನ ಆರೋಗ್ಯಕ್ಕೆ ಅಗತ್ಯವಾದ ಆಹಾರದಲ್ಲೂ ಸರಿಯಾದ ಪೌಷ್ಟಿಕತೆ ಇಲ್ಲದಿರಿರುವುದು ಅತ್ಯಂತ ನೋವಿನ ಸಂಗತಿ, ಇಂದಿನ ಯುವಕರ ಜೀವನ 50ರ ಗಡಿ ವಯಸ್ಸು ದಾಟದಿರುವ ಕುರಿತು ಹಾಗೂ ಅದನ್ನು ಸರಿಪಡಿಸುವ ಕುರಿತ ಚಿಂತನೆ ಮಾಡಬೇಕಾದ ಅಗತ್ಯವಿದೆ ಎಂಬ ಸಮಗ್ರ ವಿಷಯ ಕುರಿತು ರಚಿಸಿದ ಪುಸ್ತಕವೂ ‘ಬೆಸ್ಟ್‌ ಸೆಲ್ಲರ್’ ಆಗಿ ಮೆಚ್ಚುಗೆ ಪಡೆದಿದೆ. ಪ್ರತಿಷ್ಠಿತ ಖಾಸಗಿ ವಾಹಿನಿಯಾದ ಡಿಸ್ಕವರಿಯಲ್ಲಿ ಸಹ ಪ್ರಣವ್‌ ಸಾಧನೆ ಕುರಿತು ಪ್ರಸಾರವಾಗಿದ್ದು ಗಮನಾರ್ಹ.

ಸಾಂಸ್ಕೃತಿಕ ವಿಭಾಗದಲ್ಲೂ ಆಸಕ್ತಿ:

ಓದು ಬರಹದ ಜೊತೆಗೆ ಸಾಂಸ್ಕೃತಿಕ ವಿಭಾಗದಲ್ಲಿ (ಗಿಟಾರ್) ಕ್ರೀಡೆಯಲ್ಲಿ (ಚೆಸ್) ಸಹ ಈ ಬಾಲಕ ಒಳ್ಳೆಯ ಸಾಧನೆ ಮಾಡಿ ಸ್ಪರ್ಧಾತ್ಮಕ ಪರೀಕ್ಷೆ ಎದುರಿಸುವ ಹವ್ಯಾಸ ಬೆಳೆಸಿಕೊಂಡಿದ್ದಾನೆ. ಭವಿಷ್ಯತ್ತಿನಲ್ಲಿ ಐ.ಎ.ಎಸ್. ಪಾಸಾಗಿ ಜಿಲ್ಲಾಧಿಕಾರಿಯಾಗಬೇಕೆಂಬ ಹೆಬ್ಬಯಕೆ ಹೊಂದಿದ್ದು, ಜೊತೆಗೆ ಜಗತ್ತಿನ ಹೆಮ್ಮೆಯ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿ ಮಾಡಿ ಮಾತನಾಡಬೇಕೆಂಬುದು ಈತನ ಮಹತ್ವಾಕಾಂಕ್ಷೆಯಾಗಿದೆ.

ನನ್ನ ಪತ್ನಿ ರಾಜೇಶ್ವರಿ ಅವರ ತಂಗಿಯ ಪುತ್ರನಾದ ಪ್ರಣವ್ ಈತ ಜನಿಸಿದ್ದು ಇಳಕಲ್ಲ ನಗರದಲ್ಲಿ ಬೆಳೆದದ್ದೂ ನಮ್ಮ ಮಡಿಲಲ್ಲಿ, ಸದ್ಯ ಈತನ ಓದು ಮಾತ್ರ ವಿಜಯಪುರದಲ್ಲಿ, ಈತನ ಸರ್ವಾಂಗೀಣ ಬೆಳವಣಿಗೆ ನಮ್ಮೊಂದಿಗೆ ಇದೆ. ಈತನ ಪ್ರತಿಯೊಂದು ಸಾಧನೆಯ ಹೆಜ್ಜೆ ಹೆಜ್ಜೆಯ ಭವಿಷ್ಯಕ್ಕೂ ನಮ್ಮೆಲ್ಲರ ಸಹಾಯ, ಸಹಕಾರವಿದೆ.

ಬಸವರಾಜ ತೆಗ್ಗಿನಮಠ, ನಿವೃತ್ತ ಕ್ರೀಡಾ ನಿರ್ದೇಶಕರು, ಇಳಕಲ್ಲ

ಮಲಯಾಳಂ ಸಿನಿಮಾ ಸೂಕ್ಷ್ಮದರ್ಶಿನಿ ಸ್ಟೈಲ್‌ನಲ್ಲಿ ಕೊ*, ಮೃತರ ಮೊಬೈಲ್‌ ತನ್ನಲ್ಲೇ ಇರಿಸಿಕೊಂಡು ಅವರ ಕುಟುಂಬಕ್ಕೆ ಮೆಸೇಜ್‌ ಕಳಿಸ್ತಿದ್ದ ಇಂದುಶೇಖರ್‌!

Santosh Naik — Fri, 06 Nov 2026 12:53:55 +0530

ಬೆಂಗಳೂರು (ನ.6): ಮಲಯಾಳಂನ ಲೇಡಿ ಸೂಪರ್‌ಸ್ಟಾರ್‌ ನಜರಿಯಾ ನಜೀಂ ಅಭಿನಯದ ಸೂಕ್ಷ್ಮದರ್ಶಿನಿ ಸಿನಿಮಾ ಸ್ಟೈಲ್‌ನಲ್ಲೇ ಬೆಂಗಳೂರಿನಲ್ಲಿ ಭೀಕರ ಕೊ* ಆಗಿದೆ. 2024ರಲ್ಲಿ ರಿಲೀಸ್‌ ಆಗಿ ಬಾಕ್ಸಾಫೀಸ್‌ನಲ್ಲಿ ಭರ್ಜರಿ ಕಲೆಕ್ಷನ್‌ ಮಾಡಿದ್ದ ಈ ಸಿನಿಮಾದಲ್ಲಿ ಸ್ವಂತ ಅಕ್ಕನನ್ನೇ ಕೊ* ಮಾಡಿ ಸಾಕ್ಷ್ಯನಾಶಕ್ಕೆ ಮಾಡುವ ಥ್ರಿಲ್ಲರ್‌ ಕಥಾಹಂದರ ಹೊಂದಿತ್ತು. ಸೂಕ್ಷ್ಮದರ್ಶಿನಿ ಸಿನಿಮಾದಲ್ಲಿ ಅಕ್ಕನನ್ನೇ ಕೊಲೆ ಮಾಡುವ ತಮ್ಮ ಆಕೆಯ ಮೊಬೈಲ್‌ ತನ್ನಲ್ಲೇ ಇರಿಸಿಕೊಂಡು, ಅದರಿಂದ ಮೆಸೇಜ್‌ ಕಳಿಸಿ ಸಾಕ್ಷ್ಯನಾಶ ಮಾಡುವ ಕಥೆ ಇತ್ತು.ಅದೇ ರೀತಿಯಲ್ಲಿ ಬೆಂಗಳೂರಿನ ರಾಜಾಜಿನಗರದಲ್ಲಿ ನಡೆದ ಒಂದೇ ಕುಟುಂಬದ 7 ಮಂದಿಯ ಕೊ**ಯಲ್ಲೂ ನಡೆದಿದೆ. ಇಲ್ಲೂ ಕೂಡ ಸಂಚಿನಿಂದ ಈ ವ್ಯಕ್ತಿಗಳ ಬರ್ಬರ ಹ* ಮಾಡಿದ್ದಲ್ಲದೆ, ಸಾಕ್ಷಿಗಳನ್ನು ಮುಚ್ಚಿಹಾಕುವ ಸಲುವಾಗಿ ನಡೆದ ಪ್ರಯತ್ನ ಸೂಕ್ಷ್ಮದರ್ಶಿನಿ ಸಿನಿಮಾದ ಕ್ಲೈಮ್ಯಾಕ್ಸ್‌ನಂತೆಯೇ ಇದೆ.

ರಾಜಾಜಿನಗರದ ಬಾಷ್ಯಂ ಸರ್ಕಲ್‌ನಲ್ಲಿ ಒಂದೇ ಕುಟುಂಬದ 7 ಮಂದಿಯನ್ನು ಹ** ಮಾಡಿದ ಪ್ರಕರಣ ಇಡೀ ರಾಜ್ಯವನ್ನು ಬೆಚ್ಚಿಬೀಳಿಸಿದೆ. ಘಟನೆಯ ಬಗ್ಗೆ ಒಂದೊಂದೇ ವಿವರಗಳು ಈಗ ಹೊರಬರುತ್ತಿದ್ದು, ಕೇಸ್‌ನಲ್ಲಿ ಇಂದುಶೇಖರ್‌ ಮಾತ್ರಲ್ಲದೆ ಆತನ ಅಪ್ರಾಪ್ತ ಮಗಳು ಕೂಡ ಈ ಕೇಸ್‌ನಲ್ಲಿ ಭಾಗಿಯಾಗಿರುವುದು ಖಚಿತವಾಗಿದೆ. ಇನ್ನು ಪೊಲೀಸರ ನಿರ್ಲಕ್ಯದ ಬಗ್ಗೆಯೂ ದೂರುಗಳು ಬಂದಿವೆ. 15 ದಿನಗಳ ಅಂತರದಲ್ಲಿ ಈ ಘಟನೆ ನಡೆದಿದ್ದು, ಮೊದಲ ಕೊ** ನಡೆದ ಬಳಿಕ ಒಂದಿಬ್ಬರ ನಾಪತ್ತೆಯಾಗಿದ್ದರು. ಈ ವೇಳೆ ಮಿಸ್ಸಿಂಗ್‌ ದೂರು ದಾಖಲು ಮಾಡಲಾಗಿತ್ತು. ಈ ವೇಳೆ ಸರಿಯಾಗಿ ತನಿಖೆ ಮಾಡಿದ್ದರೆ, ಕೆಲವರಾದರೂ ಉಳಿಯುತ್ತಿದ್ದರು ಎಂದು ಕುಟುಂಬದವರ ಆರೋಪವಾಗಿದೆ.

ಸೂಕ್ಷ್ಮದರ್ಶಿನಿ ಫಿಲ್ಮ್‌ ಸ್ಟೈಲ್‌ನಲ್ಲಿ ಸಾಕ್ಷ್ಯನಾಶ

ಅಕ್ಟೋಬರ್‌16 ರಿಂದಲೇ ಇಂದುಶೇಖರ್‌ ಕೊ** ಮಾಡಲು ಆರಂಭಿಸಿದ್ದ. ನಂದಿಬೆಟ್ಟ ಚಾರ್ಮಾಡಿ ಘಾಟ್‌, ತಮಿಳುನಾಡಿನ ವಿವಿಧ ಕಡೆ ಬಾಡಿ ಎಸೆದಿದ್ದಾಗಿ ಮಾಹಿತಿ ನೀಡಿದ್ದಾರೆ. ಕೊ* ಮಾಡಿದ ಬಳಿಕ ಮೃತರಾದವರ ಎಲ್ಲರ ಮೊಬೈಲ್‌ಗಳನ್ನು ತನ್ನಲ್ಲಿಯೇ ಇರಿಸಿಕೊಂಡಿದ್ದ. ಆ ಬಳಿಕ ಅವರ ಮೊಬೈಲ್‌ಗಳಿಂದಲೇ ಅವರ ಕುಟುಂಬಕ್ಕೆ ನಾವೆಲ್ಲಾ ಟ್ರಿಪ್‌ಗೆ ಹೋಗಿರುವುದಾಗಿ ವಿಚಾರ ತಿಳಿಸಿದ್ದ. ಟ್ರಿಪ್‌ಗೆ ಹೋಗಿದ್ದೇವೆ. ಇಲ್ಲಿ ನೆಟ್‌ವರ್ಕ್‌ ಸಿಕ್ತಾ ಇಲ್ಲ ಎಂದು ಮೆಸೇಜ್‌ ಹಾಕಿದ್ದ. ಪೊಲೀಸರಿಗೆ ಎಲ್ಲಾರೂ ಕಾಣೆ ಆದ ಬಗ್ಗೆ ಮಾಹಿತಿ ಸಿಕ್ಕಿದಾಗ ಲೊಕೇಷನ್ ಟ್ರೇಸ್ ಮಾಡಿದ್ದಾರೆ. ಈ ವೇಳೆ ಅಷ್ಟೂ ಮೊಬೈಲ್‌ಗಳು ಒಂದೇ ಲೊಕೇಷನ್‌ನಲ್ಲಿ ಪತ್ತೆಯಾಗಿದೆ. ಈ ವೇಳೆ ಇಂದುಶೇಖರ್ ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಏಳು ಜನರ ಹ** ಆಗಿರುವುದು ಬೆಳಕಿಗೆ ಬಂದಿದೆ. ಎಲ್ಲರನ್ನೂ ಬೆಂಗಳೂರಿನಲ್ಲೇ ಹ** ಮಾಡಿದ್ದಾನೆಯೇ ಅಥವಾ ಬೇರೆ ಕಡೆ ಈ ಕೃತ್ಯ ಎಸಗಿದ್ದಾನೆಯೇ ಎನ್ನುವ ಅನುಮಾನ ವ್ಯಕ್ತವಾಗಿದೆ.

ದಿವ್ಯಾ ತಾಯಿಗೆ ಕಳಿಸಿದ್ದ ಮೆಸೇಜ್‌

ಮೃತಳಾಗಿರುವ ದಿವ್ಯಾ ಅವರ ತಾಯಿಗೆ ದಿವ್ಯಾ ಅವರ ಮೊಬೈಲ್‌ನಿಂದಲೇ ಇಂದುಶೇಖರ್‌ ಕಳಿಸಿರುವ ಮೆಸೇಜ್‌ ಕೂಡ ಪೊಲೀಸರಿಗೆ ಸಿಕ್ಕಿದೆ. ಆರೋಪಿ ಮೃತ ಕುಟುಂಸ್ಥರಿಗೆ ಈತ ಮೆಸೇಜ್‌ ಕಳಿಸಿದ್ದ. ಮೃತ ದಿವ್ಯಾ ಕೊನೆಯದಾಗಿ ತನ್ನ ಅಕ್ಕ ಉಷಾಗೆ ಈ ಮೆಸೇಜ್‌ ಕಳಿಸಿದ್ದಳು. ಈ ಮಸೇಜ್ ಆರೋಪಿ ಇಂದುಶೇಖರ್ ಕಳುಹಿಸಿರುವ ಅನುಮಾನ ವ್ಯಕ್ತವಾಗಿದೆ. ಟ್ರಿಪ್ ಗೆ ಬಂದಿದ್ದೇವೆ, ಎಲ್ಲಾ ಅರಾಮಾಗಿದ್ದೇವೆ ಅಂತ ಕೊನೆಯ ಮೆಸೇಜ್ ದಿವ್ಯಾಳ ಮೊಬೈಲ್‌ನಿಂದ ಬಂದಿತ್ತು.

ಅಕ್ಟೋಬರ್‌ 26 ರಂದು ದಿವ್ಯಾಳ ಮೊಬೈಲ್‌ನಿಂದ ಸಂಜೆ 7.09 ನಿಮಿಷಕ್ಕೆ 'ಹೊಗೆನಕಲ್‌ ಟ್ರಿಪ್‌ಗೆ ಬಂದಿದ್ದೀವಿ. ಗುರುವಾರ ಬರ್ತೀನಿ. ಯಾರೂ ಟೆಂಕ್ಷನ್‌ ಮಾಡ್ಕೋಬೇಡಿ' ಎನ್ನುವ ಸಂದೇಶ ಬಂದಿತ್ತು. ಗುರುವಾರವೂ ಬರದೇ ಇದ್ದಾಗ ದಿವ್ಯಾ ಅವರ ಅಕ್ಕ ಮೆಸೇಜ್‌ ಮಾಡಿದ್ದು, 'ದಿವ್ಯಾ ಸಂಘಕ್ಕೆ ದುಡ್ಡು ಕೊಡಬೇಕಂತೆ ಕೊಡ್ತಾಳಾ ಇಲ್ವಾ ಕೇಳೇ' ಅನ್ನೋ ಮೆಸೇಜ್‌ ಹೋಗಿದೆ. ಇದೇ ಮೆಸೇಜ್‌ 'ಇವತ್ತು 6 ಗಂಟೆ ಒಳಗೆ ಕಳಿಸ್ತೀನಿ ಅಂತಾ ಹೇಳಿದೀನಿ. ಸಂಜೆಯೊಳಗೆ ಹಣವನ್ನು ಕಳಿಸಿಕೊಡುತ್ತೇನೆ' ಎಂದು ಮೆಸೇಜ್‌ ಹೋಗಿದೆ.

ರಾಜಧಾನಿಯಲ್ಲಿ ಎದೆನಡೆಗಿಸುವ ಕೃತ್ಯ; 7 ಜನರನ್ನು ಮುಗಿಸಿ, ಕಸದಂತೆ ಪುಣ್ಯಕ್ಷೇತ್ರದಲ್ಲಿ ಎಸೆದ ಪಾಪಿ ಇಂದುಶೇಖರ!

Bhimasi M Koleppanavar — Fri, 06 Nov 2026 12:43:18 +0530

ಬದುಕು ಕೆಲವೊಮ್ಮೆ ಎಷ್ಟು ಕ್ರೂರ ಮತ್ತು ನಿಗೂಢ ಅನಿಸಿಬಿಡುತ್ತದೆ. ಒಂದೆಡೆ ಬಾಳಿ ಬದುಕಬೇಕಾದ ಜೀವಗಳು, ಇನ್ನೊಂದೆಡೆ ಜಗತ್ತನ್ನೇ ಸರಿಯಾಗಿ ಕಾಣದ ಕಂದಮ್ಮಗಳು... ಮತ್ತೊಂದೆಡೆ ಕಿಂಚಿತ್ತೂ ಕರುಣೆ ಇಲ್ಲದೆ ಜೀವ ತೆಗೆದ ಆ ಪಾಪಿ ಮನಸ್ಸಿಗೆ ತೋಚಿದ್ದಾದರೂ ಏನು? ಬೆಂಗಳೂರನ್ನು ನಡುಗಿಸಿದ ಈ 7 ಜನರ ಭೀಕರ ಸಾಮೂಹಿಕ ಹ*ಕಾಂಡಕ್ಕೆ ಸ್ವಂತ ಮಗಳೇ ತಂದೆಗೆ ಸಹಕರಿಸಿರುವುದು ಇಡೀ ಪ್ರಕರಣಕ್ಕೆ ಅತ್ಯಂತ ರೋಚಕ ಹಾಗೂ ದಿಗ್ಭ್ರಮೆ ಮೂಡಿಸುವ ತಿರುವು ನೀಡಿದೆ. ಹಾಗಾದರೆ, ಇಷ್ಟೂ ಜನರನ್ನು ಕೊಂದಿದ್ದು ಹೇಗೆ? ಅವರು ಯಾರ್‍ಯಾರು? ಕಸದಂತೆ ಶವಗಳನ್ನು ಎಸೆದಿದ್ದು ಎಲ್ಲಿ? ಈ ರ*ಸಿಕ್ತ ಕರಾಳ ಕಥೆಯ ಸಂಪೂರ್ಣ ವಿವರ ಇಲ್ಲಿದೆ.

ಅಲ್ಲಿದ್ದವರು ಯಾರ್‍ಯಾರು?

ಈ ಸಂಪೂರ್ಣ ಸ್ಟೋರಿ ಕೇಂದ್ರಬಿಂದು ವಾರ ಪತ್ರಿಕೆ ಸಂಪಾದಕ ಕಂ ಕ್ಯಾಬ್ ಚಾಲಕ ಇಂದುಶೇಖರ. ಇವನು ತನ್ನ ಪತ್ನಿ ಸುನೀತಾಳನ್ನು ಮಾತ್ರವಲ್ಲದೆ, ತನ್ನ ಅತ್ತೆ ರೂಪಾವತಿ, ಸೋದರ ಮಾವ ಶಿವಕುಮಾರ್ ಮತ್ತು ಶಂಕರ್, ರೂಪಾವತಿಯ ಇಬ್ಬರು ಸೊಸೆಯಂದಿರಾದ ದಿವ್ಯಾ ಮತ್ತು ನಳಿನಿ ಮತ್ತು ಸೋದರ ಮಾವನ ಏಳು ವರ್ಷದ ಮಗ ಪುನೀತ್ ನನ್ನು ಸಹ ಮುಗಿಸಿದ್ದಾನೆ. ಇಲ್ಲೇ ನೋಡಬಹುದು, ವಿಕೃತಿ ಎಷ್ಟರ ಮಟ್ಟಿಗೆ ಎಸೆಗಿದೆ ಎನ್ನುವುದನ್ನು ಸಾರಿ, ಸಾರಿ ಹೇಳುತ್ತದೆ.

ಅದು ಪ್ರವಾಸವಲ್ಲ, ಕರಾಳ ಪಯಣ!

ಅದೊಂದು ಕೇವಲ ಪ್ರವಾಸವಾಗಿರಲಿಲ್ಲ, ಅದೊಂದು ರಕ್ತಸಿಕ್ತ ರಹಸ್ಯವನ್ನು ಹೊತ್ತು ಸಾಗಿದ ಕರಾಳ ಪಯಣವಾಗಿತ್ತು. ತನಿಖೆಯ ತೀವ್ರತೆ ಹೆಚ್ಚುತ್ತಿದ್ದಂತೆ ಪೊಲೀಸರ ಮುಂದೆ ಬಂದ ನಿಗೂಢ ಸಾಕ್ಷಿ ಶಂಕರ್ ಪುತ್ರ‌ ಯತಿನ್ ಬಿಚ್ಚಿಟ್ಟ ಆ ಒಂದು ಹೇಳಿಕೆ, ಇಡೀ ಪ್ರಕರಣದ ದಿಕ್ಕನ್ನೇ ಬದಲಿಸಿಬಿಟ್ಟಿತು. ಆತ ಹೇಳಿದ ಆ ಮಾತುಗಳು ಯಾವುದೇ ಕ್ರೈಮ್ ಥ್ರಿಲ್ಲರ್ ಸಿನಿಮಾದ ಕಥೆಗಿಂತ ಕಮ್ಮಿಯಿರಲಿಲ್ಲ. ಎಲ್ಲವೂ ಎಂದಿನಂತೆಯೇ ಇತ್ತು. ಮಾಮ ಇಂದುಶೇಖರ್ ಮತ್ತು ಆತನ ಅಪ್ರಾಪ್ತ ಮಗಳು (ನನ್ನ ಅಕ್ಕ) ನನ್ನನ್ನು ಟ್ರಿಪ್‌ಗೆ ಕರೆದುಕೊಂಡು ಹೋಗಿದ್ದರು. ಹಾಸನ, ಕುಕ್ಕೆ ಸುಬ್ರಹ್ಮಣ್ಯ, ಧರ್ಮಸ್ಥಳ ಹೀಗೆ ಹಲವು ಪುಣ್ಯಕ್ಷೇತ್ರಗಳಿಗೆಲ್ಲಾ ನಾವು ಜೊತೆಯಾಗಿಯೇ ಸುತ್ತಾಡಿದ್ದೆವು. ಆದರೆ ಆ ಇಡೀ ಪ್ರವಾಸದಲ್ಲಿ ನನ್ನ ಮನಸ್ಸನ್ನು ಒಂದೇ ಪ್ರಶ್ನೆ ಪದೇ ಪದೇ ಕೊರೆಯುತ್ತಿತ್ತು. ಅಪ್ಪ ಅಮ್ಮ ನನ್ನನ್ನು ಬಿಟ್ಟು ಎಲ್ಲಿ ಹೋದರು? A

ಆಲ್‌ ಇಂಡಿಯಾ ಟ್ರಿಪ್‌ ಒಂದೇ ಉತ್ತರ!

ನಾನು ಮಾಮನ ಬಳಿ ಕೇಳಿದಾಗಲೆಲ್ಲಾ, ಅವರೆಲ್ಲಾ ಆಲ್ ಇಂಡಿಯಾ ಟ್ರಿಪ್ ಹೋಗಿದ್ದಾರೆ ಎಂದು ತುಂಬಾ ಕ್ಯಾಶುಯಲ್ ಆಗಿ ಸುಳ್ಳು ಹೇಳಿ ನನ್ನನ್ನು ನಂಬಿಸಿದ್ದರು. ಆದರೆ ಆ ಇಡೀ ಪ್ರಯಾಣದಲ್ಲಿ ಮಾಮನ ನಡವಳಿಕೆ ತುಂಬಾ ವಿಚಿತ್ರವಾಗಿತ್ತು. ಗಾಡಿ ನಿಲ್ಲಿಸಿ ಅಲ್ಲಲ್ಲಿ ಕಸದ ಚೀಲಗಳನ್ನು ಎಸೆಯುತ್ತಿದ್ದರು. ಕುತೂಹಲ ತಡೆಯಲಾಗದೆ ನಾನೇನಾದರೂ ಆ ಚೀಲಗಳನ್ನು ಇಣುಕಿ ನೋಡಲು ಹೋದರೆ, ಮಾಮ ನನ್ನನ್ನು ಗದರಿಸಿ ಬಯ್ಯುತ್ತಿದ್ದರು ಎಂದಿದ್ದಾನೆ.

ಪೊಲೀಸರ ಬೆನ್ನುಹುರಿ ನಡುಗಿಸಿದ ಯತಿನ್‌ ಹೇಳಿಕೆ!

ಯತಿನ್ ನೀಡಿದ ಈ ಒಂದೇ ಒಂದು ಹೇಳಿಕೆ ಪೊಲೀಸರ ಬೆನ್ನುಹುರಿಯಲ್ಲಿ ನಡುಕ ಹುಟ್ಟಿಸಿತ್ತು. ಯಾಕೆಂದರೆ, ಯತಿನ್ ಕಸ ಎಂದು ಭಾವಿಸಿ ನೋಡಲು ಹೋದ ಆ ಚೀಲಗಳಲ್ಲಿ ಇದ್ದದ್ದು ಸಾಮಾನ್ಯ ಕಸವಾಗಿರಲಿಲ್ಲ; ಬದಲಿಗೆ ತನ್ನದೇ ಹೆತ್ತವರ, ಒಡಹುಟ್ಟಿದವರ ರಕ್ತಸಿಕ್ತ ಶವದ ತುಂಡುಗಳು! ಇಡೀ ಕುಟುಂಬವನ್ನೇ ಮುಗಿಸಿ, ಮೃತದೇಹಗಳನ್ನು ಕಸದಂತೆ ಘಾಟ್‌ಗಳಲ್ಲಿ ಎಸೆಯುತ್ತಾ, ಏನೂ ತಿಳಿಯದ ಮಗುವನ್ನೂ ಅದೇ ಕಾರಿನಲ್ಲಿ ಕೂರಿಸಿಕೊಂಡು ಹಂತಕರು ತೀರ್ಥಯಾತ್ರೆ ಮಾಡಿದ್ದರು ಎಂಬ ಕಟು ಸತ್ಯ ಈಗ ಜಗತ್ತಿನ ಮುಂದೆ ಅನಾವರಣಗೊಂಡಿದೆ.

Bengaluru Mass murder case: ರುಬ್ಬುಗುಂಡಲ್ಲಿ ಹೊಡೆದು ಏಳು ಜನರ ಕತೆ ಮುಗಿಸಿದ ಪಾತಕಿ!

Kannadaprabha News — Fri, 06 Nov 2026 10:39:37 +0530

ಬೆಂಗಳೂರು (ನ.6): ಕೌಟುಂಬಿಕ ಕಲಹ ಹಿನ್ನೆಲೆಯಲ್ಲಿ ಕ್ಯಾಬ್‌ ಚಾಲಕ(Cab driver)ನೊಬ್ಬ ತನ್ನ ಪತ್ನಿ ಹಾಗೂ ಆಕೆಯ ಪರಿವಾರದ 7 ಮಂದಿಯನ್ನು ರುಬ್ಬುಗುಂಡಿನಿಂದ ಮನಬಂದಂತೆ ಹಲ್ಲೆ ನಡೆಸಿ ಬೀಭತ್ಸವಾಗಿ ಹ ತ್ಯೆ ಗೈದಿರುವ ಘಟನೆ ಬೆಂಗಳೂರಿನಲ್ಲಿ ನಡೆದಿದೆ.

ಶ್ರೀರಾಮಪುರದ ರೂಪವತಿ, ಆಕೆಯ ಮಗಳು ಸುನೀತಾ, ಪುತ್ರರಾದ ಶಿವಕುಮಾರ್‌, ಶಂಕರ್‌, ಸೊಸೆಯಂದಿರಾದ ದಿವ್ಯಾ, ನಳಿನಿ ಹಾಗೂ ಮೊಮ್ಮಗ ಪುನೀತ್‌ (7) ಮೃತ ದುರ್ದೈವಿಗಳು. ಈ ಹ ತ್ಯಾಕಾಂಡ ಸಂಬಂಧ ಮೃತರ ಅಳಿಯ ರಾಜಾಜಿನಗರ ಸಮೀಪದ ನಿವಾಸಿ ಇಂದುಶೇಖರ್‌ನನ್ನು ಪೊಲೀಸರು ಬಂಧಿಸಿದ್ದಾರೆ. ತನ್ನ ಮನೆಯಲ್ಲಿ ಒಬ್ಬೊಬ್ಬರನ್ನೇ ಕೊಂದ ಬಳಿಕ ಮೃತದೇಹವನ್ನು ಚಿಕ್ಕಬಳ್ಳಾಪುರ ಜಿಲ್ಲೆ ನಂದಿಬೆಟ್ಟ ಸೇರಿದಂತೆ ಇತರೆಡೆ ಆತ ಎಸೆದಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ.

ತನ್ನ ಮಗಳು ನಳಿನಿ ನಿಗೂಢವಾಗಿ ಕಣ್ಮರೆಯಾದ ಬಗ್ಗೆ ಶಂಕಿಸಿ ಶ್ರೀರಾಮಪುರ ಠಾಣೆ ಪೊಲೀಸರಿಗೆ ಮೃತ ನಳಿನಿ ತಾಯಿ ದೂರು ನೀಡಿದ್ದರು. ಅದರನ್ವಯ ತನಿಖೆಗಿಳಿದ ಪೊಲೀಸರು, 2 ದಿನಗಳ ಹಿಂದೆ ಆರೋಪಿಯನ್ನು ವಶಕ್ಕೆ ಪಡೆದು ವಿಚಾರಣೆಗೆ ಒಳಪಡಿಸಿದಾಗ ಭೀಕರ ಹ ತ್ಯಾ ಕಾಂಡ ಬಯಲಾಗಿದೆ. ನಂದಿನಿ ಬೆಟ್ಟದ ತಪ್ಪಲಿಗೆ ಗುರುವಾರ ಆರೋಪಿಯನ್ನು ಕರೆದೊಯ್ದು ಮೃತದೇಹಗಳನ್ನು ಶೋಧಿಸಲು ಪೊಲೀಸರು ಕಾರ್ಯಾಚರಣೆ ನಡೆಸಿದ್ದಾರೆ ಎಂದು ಉನ್ನತ ಮೂಲಗಳು ‘ಕನ್ನಡಪ್ರಭ’ಕ್ಕೆ ಮಾಹಿತಿ ನೀಡಿವೆ.

ಪತ್ನಿ ಮೇಲೆ ಸಿಟ್ಟಿಗೆ ಕೃತ್ಯ :

ಶೇಖರ್‌ಗೆ 2 ದಶಕಗಳ ಹಿಂದೆ ಸುನಿತಾ ಜತೆ ವಿವಾಹವಾಗಿತ್ತು. ರಾಜಾಜಿನಗರದ ಭಾಷ್ಯಂ ವೃತ್ತದ ಸಮೀಪ ದಂಪತಿ ವಾಸವಾಗಿದ್ದರು. ಆದರೆ ಇತ್ತೀಚೆಗೆ ವೈವಾಹಿಕ ಜೀವನದಲ್ಲಿ ಬಿರುಗಾಳಿ ಎದ್ದಿತ್ತು. ಕೌಟುಂಬಿಕ ವಿಷಯಗಳಿಗೆ ಸತಿ-ಪತಿ ಮಧ್ಯೆ ಮನಸ್ತಾಪವಾಗಿತ್ತು. ಹಲವು ಬಾರಿ ರಾಜಿ ಪಂಚಾಯ್ತಿ ನಡೆದರೂ ಕೂಡ ಸಂಸಾರಿಕ ಕಲಹ ಮುಂದುವರಿದಿತ್ತು. ತನ್ನ ಪತ್ನಿ ನೆರವಿಗೆ ಆಕೆಯ ತಾಯಿ ಹಾಗೂ ಸೋದರರು ನಿಲ್ಲುತ್ತಾರೆ ಎಂದು ಆರೋಪಿಗೆ ಅಸಮಾಧಾನ ಹುಟ್ಟಿತು. ಈ ವಿಚಾರಕ್ಕೆ ತನ್ನ ಬಾಮೈದರಾದ ಶಿವಕುಮಾರ್ ಹಾಗೂ ಶಂಕರ್ ವಿರುದ್ಧ ಆತ ಬಹಿರಂಗವಾಗಿ ಕೋಪ ಸಹ ತೋರಿಸಿದ್ದ.

ಶ್ರೀರಾಮಪುರದಲ್ಲಿದ್ದ ತವರು ಮನೆಗೆ ಇಂದುಶೇಖರ್‌ ಪತ್ನಿ ಭೇಟಿ ನೀಡುತ್ತಿದ್ದಳು. ಆದರೆ ತವರು ಮನೆಗೆ ಹೋಗದಂತೆ ಇಂದುಶೇಖರ್‌ ನಿರ್ಬಂಧಿಸಿದ್ದರೂ, ಆಕೆ ತವರಿನ ಬಾಂಧವ್ಯ ಕಡಿದುಕೊಂಡಿರಲಿಲ್ಲ. ತನ್ನ ಬದುಕಿಗೆ ಕಂಟಕವಾಗಿದ್ದಾರೆ ಎಂದು ಭಾವಿಸಿ ಸುನೀತಾ ಪರಿವಾರ ಹ ತ್ಯೆಗೆ ಆತ ನಿರ್ಧರಿಸಿದ್ದಾನೆ. ಪೂರ್ವಯೋಜಿತ ಸಂಚಿನಂತೆ ಮೊದಲು ಪತ್ನಿ ತಲೆಗೆ ಮನೆಯಲ್ಲಿ ಮಸಾಲೆ ಅರೆಯಲು ಇಟ್ಟಿದ್ದ ರುಬ್ಬುಗುಂಡಿನಿಂದ ಹೊಡೆದು ಹ ತ್ಯೆ ಮಾಡಿದ್ದಾನೆ. ಬಳಿಕ ಮೃತದೇಹವನ್ನು ತೆಗೆದು ಕೊಂಡು ಹೋಗಿ ನಂದಿ ಬೆಟ್ಟಕ್ಕೆ ಎಸೆದು ಬಂದಿದ್ದಾನೆ. ಮರುದಿನ ತನ್ನ ಸ್ನೇಹಿತೆಯರ ಜತೆ ಸುನೀತಾ ಪ್ರವಾಸಕ್ಕೆ ಹೋಗಿದ್ದಾಳೆ ಎಂದು ಸುಳ್ಳು ಹೇಳಿ ನೆರೆಹೊರೆಯಲ್ಲಿ ಆರೋಪಿ ನಂಬಿಸಿದ್ದಾನೆ. ಆಕೆಯ ಕುಟುಂಬದವರಿಗೆ ಅನುಮಾನಬಾರದಂತೆ ಮೊಬೈಲ್ ಅನ್ನು ಸಹ ಸ್ವಿಚ್ಡ್ ಆಫ್ ಮಾಡಿದ್ದಾನೆ.

ಬಳಿಕ ಮನೆಯಲ್ಲಿ ಮದ್ಯದ ಪಾರ್ಟಿ ಮಾಡುವ ಸಲುವಾಗಿ ಭಾಮೈದರಾದ ಶಿವಕುಮಾರ್ ಹಾಗೂ ಶಂಕರ್ ಅವರನ್ನು ಮನೆಗೆ ಕರೆಸಿ ಹ ತ್ಯೆ ಮಾಡಿದ್ದಾನೆ. ನಂತರ ಶಂಕರ್ ಪತ್ನಿ ನಳಿನಿ ಹಾಗೂ ಶಿವಕುಮಾರ್ ಪತ್ನಿ ದಿವ್ಯಾಳನ್ನು ಕೊಂದಿದ್ದಾನೆ. ಬಳಿಕ ಅತ್ತೆ ರೂಪಾವತಿ ಹಾಗೂ ಶಂಕರ್ ಪುತ್ರ ಪುನೀತ್‌ನನ್ನು ಹ ತ್ಯೆ ಮಾಡಿದ್ದಾನೆ. ಒಬ್ಬೊಬ್ಬರಾಗಿ ಮನೆಯಲ್ಲಿಯೇ ಕೊಂದು ಮೃತದೇಹಗಳನ್ನು ಬೇರೆ ತೆಗೆದುಕೊಂಡು ಬಿಸಾಡಿದ್ದಾನೆ ಎಂದು ಮೂಲಗಳು ವಿವರಿಸಿವೆ.

ನಂದಿ ಬೆಟ್ಟದಲ್ಲಿ ಮೃತದೇಹ

ನಂದಿಬೆಟ್ಟದಲ್ಲಿ ಶಿವಕುಮಾರ್‌ ಪುತ್ರ ಪುನೀತ್‌ನ ಮೃತದೇಹ ಪತ್ತೆಯಾಗಿದೆ. ಬೆಟ್ಟಕ್ಕೆ ಆರೋಪಿಯನ್ನು ಕರೆದೊಯ್ದು ಪೊಲೀಸರು ಹುಡುಕಾಟ ನಡೆಸಿದರು. ಕೊನೆಗೆ ಸತತ 4 ತಾಸುಗಳ ಶೋಧನೆ ಬಳಿಕ ಮೃತದೇಹ ಪತ್ತೆಯಾಗಿದೆ. ಇನ್ನುಳಿದ ಶವಗಳು ಪತ್ತೆಯಾಗಿಲ್ಲ.

ಗೊಂದಲಕಾರಿ ಹೇಳಿಕೆ ಸುಳಿವು

ಮೃತ ಸುನೀತಾ ಕುಟುಂಬದ ನಿಗೂಢ ನಾಪತ್ತೆ ಬಗ್ಗೆ ಶ್ರೀರಾಮಪುರ ಠಾಣೆಯಲ್ಲಿ ಕಣ್ಮರೆ ಪ್ರಕರಣ ದಾಖಲಾಯಿತು. ಈ ಬಗ್ಗೆ ತನಿಖೆಗಿಳಿದ ಪೊಲೀಸರು, ಶಂಕೆ ಮೇರೆಗೆ ಇಂದು ಶೇಖರ್‌ನನ್ನು ವಶಕ್ಕೆ ಪಡೆದು ವಿಚಾರಿಸಿದರು. ಆದರೆ ಆತ ಗೊಂದಲಕಾರಿ ಹೇಳಿಕೆ ನೀಡಿ ತಪ್ಪಿಸಿಕೊಳ್ಳಲು ಯತ್ನಿಸಿದ್ದಾನೆ. ಅಷ್ಟರಲ್ಲಿ ಆರೋಪಿ ಮನೆಗೆ ಶೋಧಿಸಿದಾಗ ಕೊಲೆ ಬಗ್ಗೆ ಸುಳಿವು ಸಿಕ್ಕಿತು. ಈ ಮಾಹಿತಿ ಆಧರಿಸಿ ಆತನನ್ನು ತೀವ್ರವಾಗಿ ಪ್ರಶ್ನಿಸಿದಾಗ ಕೊನೆಗೆ ಸತ್ಯ ಬಾಯ್ಬಿಟ್ಟಿದ್ದಾನೆ ಎಂದು ತಿಳಿದು ಬಂದಿದೆ.

ಠಾಣೆಯಲ್ಲೇ ಜಂಟಿ ಆಯುಕ್ತ, ಡಿಸಿಪಿ ಮೊಕ್ಕಾಂ

ಈ ಸಾಮೂಹಿಕ ಹ ತ್ಯಾ ಕಾಂಡದ ಬಗ್ಗೆ ತಿಳಿದ ಕೂಡಲೇ ರಾಜಾಜಿನಗರ ಠಾಣೆಗೆ ಪಶ್ಚಿಮ ವಿಭಾಗದ ಜಂಟಿ ಆಯುಕ್ತ ವಂಶಿಕೃಷ್ಣ ಹಾಗೂ ಉತ್ತರ ವಿಭಾಗದ ಡಿಸಿಪಿ ನೇಮಗೌಡ ಧಾವಿಸಿದ್ದಾರೆ. ಠಾಣೆಯಲ್ಲೇ ಗುರುವಾರ ಬೀಡು ಬಿಟ್ಟ ಜಂಟಿ ಆಯುಕ್ತರು, ತನಿಖೆಗೆ ಡಿಸಿಪಿ ಸಾರಥ್ಯದಲ್ಲಿ ಮೂವರು ಎಸಿಪಿಗಳ ತಂಡವನ್ನು ರಚಿಸಿ ಕಾರ್ಯಾಚರಣೆಗಿಳಿಸಿದರು.

ರುಬ್ಬುಗುಂಡು ತೊಳೆದಿಟ್ಟ ಆರೋಪಿ

ಈ ಹ ತ್ಯಾ ಕಾಂಡ ಬಳಿಕ ಮನೆಯಲ್ಲಿ ತೊಳೆದು ಒಪ್ಪವಾಗಿಸಿದ್ದ ಆತ, ರಕ್ತದ ಕಲೆಗಳ ಅಂಟಿದ್ದ ರುಬ್ಬುಗುಂಡನ್ನು ಕೂಡ ರಾಸಾಯನಿಕ ಬಳಸಿ ಸ್ವಚ್ಛಗೊಳಿಸಿದ್ದ. ಮೃತ ದೇಹಗಳನ್ನು ಸಾಗಿಸಿದ ಕಾರು ಮತ್ತು ರುಬ್ಬುಗುಂಡನ್ನು ಜಪ್ತಿ ಮಾಡಿದ್ದಾರೆ ಎಂದು ಮೂಲಗಳು ಹೇಳಿವೆ.

ಸಿನಿಮಾ ಸ್ಟಾರ್ ಅಲ್ಲ, ಸೋಷಿಯಲ್ ಮೀಡಿಯಾ ಇನ್‌ಫ್ಲುಯೆನ್ಸರ್ ಕೂಡ ಅಲ್ಲ… ಆದರೂ ಗೌರಿಗೆ 6 ಸಾವಿರ ಫಾಲೋವರ್ಸ್!

Chandrashekar GS — Fri, 06 Nov 2026 07:54:48 +0530

ಬೆಂಗಳೂರಿನ ಬೀದಿ ನಾಯಿ ಗೌರಿಗೆ 6 ಸಾವಿರಕ್ಕೂ ಹೆಚ್ಚು ಫಾಲೋವರ್ಸ್! ಆಟೋ, ಸ್ಕೂಟರ್‌ನಲ್ಲಿ ಓಡಾಡುವ ಈ ಶ್ವಾನವೇ ಸೋಷಿಯಲ್ ಮೀಡಿಯಾ ಸೆಲೆಬ್ರಿಟಿ

ಬೆಂಗಳೂರಿನ ಬೀದಿಗಳಲ್ಲಿ ಓಡಾಡುವ ನಾಯಿಗಳಲ್ಲಿ ಕೆಲವು ಜನರ ಮನಸ್ಸಿನಲ್ಲಿ ವಿಶೇಷ ಸ್ಥಾನ ಪಡೆದುಕೊಳ್ಳುತ್ತವೆ. ಪ್ರೀತಿ, ಸ್ನೇಹ ಮತ್ತು ಮನುಷ್ಯರೊಂದಿಗಿನ ಆತ್ಮೀಯತೆಯಿಂದ ಇಂತಹ ಮೂಕ ಪ್ರಾಣಿಗಳೂ ಎಲ್ಲರ ಗಮನ ಸೆಳೆಯುತ್ತವೆ. ಇದಕ್ಕೆ ಬೆಂಗಳೂರಿನ ಜಯನಗರದ ಗೌರಿ ಎಂಬ ಬೀದಿ ನಾಯಿಯೇ ಉದಾಹರಣೆ. ಸಾಮಾನ್ಯ ಬೀದಿ ನಾಯಿಯಾಗಿದ್ದ ಗೌರಿ ಈಗ ಸೋಷಿಯಲ್ ಮೀಡಿಯಾದಲ್ಲಿ ಸೆಲೆಬ್ರಿಟಿಯಾಗಿದೆ. ಇನ್‌ಸ್ಟಾಗ್ರಾಂನಲ್ಲಿ ಬರೋಬ್ಬರಿ 6 ಸಾವಿರಕ್ಕೂ ಹೆಚ್ಚು ಫಾಲೋವರ್ಸ್ ಹೊಂದಿರುವ ಈ ಶ್ವಾನದ ಕಥೆ ನೆಟ್ಟಿಗರ ಗಮನ ಸೆಳೆಯುತ್ತಿದೆ.

ಜಯನಗರದ ಬೀದಿ ನಾಯಿಗೆ ಸಿಕ್ಕ ಸೆಲೆಬ್ರಿಟಿ ಪಟ್ಟ!

ಗೌರಿ ಬೆಂಗಳೂರಿನ ಜಯನಗರದ ನಿವಾಸಿ. ಆದರೆ ಆಕೆಗೆ ಒಂದೇ ಮನೆಯಿಲ್ಲ. ನೆರೆಹೊರೆಯ ನಾಲ್ಕೈದು ರಸ್ತೆಗಳಲ್ಲಿ ವಾಸಿಸುವ ಹಲವು ಕುಟುಂಬಗಳು ಗೌರಿಯನ್ನು ಪ್ರೀತಿಯಿಂದ ನೋಡಿಕೊಳ್ಳುತ್ತವೆ. ಒಂದು ರಸ್ತೆಯಲ್ಲಿ ಗೌರಿ ಎಂದು ಕರೆಯಿಸಿಕೊಂಡರೆ, ಮತ್ತೊಂದು ಕಡೆ ಜಾರಾ, ಇನ್ನೊಂದು ಕಡೆ ಜಿಮ್ಮಿ ಎಂಬ ಹೆಸರಿನಿಂದಲೂ ಪರಿಚಿತಳು.

ಆಟೋದಲ್ಲಿ ಓಡಾಡುವುದು, ಸ್ಕೂಟರ್‌ನಲ್ಲಿ ಪ್ರಯಾಣಿಸುವುದು, ಕಬ್ಬನ್ ಪಾರ್ಕ್‌ಗೆ ಭೇಟಿ ನೀಡುವುದು ಮತ್ತು ಕೆಫೆಗಳಿಗೆ ಹೋಗುವುದು ಗೌರಿಗೆ ಇಷ್ಟ. ಬಿಸಿಲಿನಲ್ಲಿ ಮಲಗುವುದು, ಮಕ್ಕಳೊಂದಿಗೆ ಆಟವಾಡುವುದು ಹಾಗೂ ಇತರ ಸಾಕುಪ್ರಾಣಿಗಳೊಂದಿಗೆ ಬೆರೆಯುವುದು ಆಕೆಯ ದಿನಚರಿಯ ಭಾಗವಾಗಿದೆ.

ಆರು ವರ್ಷಗಳ ಹಿಂದೆಯೇ ಶುರುವಾದ ಸ್ನೇಹ

ವರ್ಷಿತಾ ಪಾಳ್ಯಂ (24) ಮತ್ತು ಅಕ್ಷತಾ ಪಾಳ್ಯಂ (28) ಎಂಬ ಸಹೋದರಿಯರಿಗೆ ಗೌರಿ ಕಳೆದ ಆರು ವರ್ಷಗಳಿಂದ ಪರಿಚಿತಳು. ನೆರೆಮನೆಯ ಜರ್ಮನ್ ಶೆಫರ್ಡ್ ನಾಯಿ ಜೀಯಸ್‌ನ ಹಿಂದೆ ಬರುತ್ತಿದ್ದ ಗೌರಿಯೊಂದಿಗೆ ಇವರ ಪರಿಚಯ ಆರಂಭವಾಗಿತ್ತು. ನಂತರ ಈ ಪರಿಚಯ ಆತ್ಮೀಯ ಸ್ನೇಹವಾಗಿ ಬದಲಾಯಿತು.

ಕ್ರಮೇಣ ಈ ಕುಟುಂಬವೂ ಗೌರಿಗೆ ಆಹಾರ ನೀಡುವ ಮತ್ತು ಆರೈಕೆ ಮಾಡುವ ಸ್ಥಳೀಯ ನಿವಾಸಿಗಳ ಗುಂಪಿನ ಭಾಗವಾಯಿತು. ಹೀಗೆ ಗೌರಿ ಒಬ್ಬರ ಮನೆಯ ನಾಯಿಯಾಗದೆ, ಇಡೀ ನೆರೆಹೊರೆಯವರ ಮುದ್ದಿನ ನಾಯಿಯಾಗಿ ಬೆಳೆದಳು.

ಇನ್‌ಸ್ಟಾಗ್ರಾಂನಲ್ಲಿ 6,393 ಫಾಲೋವರ್ಸ್!

ಅಕ್ಷತಾ ಉದ್ಯೋಗ ಹುಡುಕುವ ಸಲುವಾಗಿ ಅಮೆರಿಕಕ್ಕೆ ತೆರಳಿದ ಬಳಿಕ ಗೌರಿಯನ್ನು ಮಿಸ್ ಮಾಡಿಕೊಳ್ಳತೊಡಗಿದರು. ಆಗ ಆಕೆಯ ನೆನಪುಗಳನ್ನು ಉಳಿಸಿಕೊಳ್ಳಲು ಸುಮಾರು ಒಂದು ವರ್ಷದ ಹಿಂದೆ @happygowri ಹೆಸರಿನ ಇನ್‌ಸ್ಟಾಗ್ರಾಂ ಖಾತೆ ಆರಂಭಿಸಿದರು. ಗೌರಿಯ ಫೋಟೋಗಳನ್ನು ನೋಡುವುದು ಅವರ ಒತ್ತಡದ ದಿನಗಳಲ್ಲಿ ಸಂತೋಷ ನೀಡುತ್ತಿತ್ತು.

ಕಳೆದ ಸೆಪ್ಟೆಂಬರ್‌ನಲ್ಲಿ ಕಲಾವಿದೆ ವರ್ಷಿತಾ ಬಿಡಿಸಿದ ಮ್ಯೂರಲ್‌ನೊಂದಿಗೆ ಗೌರಿಯನ್ನು ತೋರಿಸುವ ರೀಲ್ ಭಾರಿ ವೈರಲ್ ಆಯಿತು. ಕೆಲವೇ ದಿನಗಳಲ್ಲಿ ಸುಮಾರು 30 ಲಕ್ಷ ವೀಕ್ಷಣೆಗಳನ್ನು ಪಡೆದುಕೊಂಡಿತು. ಇದಾದ ಬಳಿಕ ಗೌರಿಯನ್ನು ನೋಡಲು ಜನರು ನಿಲ್ಲಿಸುವುದು, ಫೋಟೋ ತೆಗೆಯುವುದು ಮತ್ತು ತಿಂಡಿ ನೀಡುವುದು ಹೆಚ್ಚಾಯಿತು.

ಗೌರಿಯ ಖ್ಯಾತಿಯಿಂದ ಇತರ ನಾಯಿಗಳಿಗೂ ಸಹಾಯ!

ಗೌರಿಯ ಖ್ಯಾತಿ ಕೇವಲ ಫಾಲೋವರ್ಸ್‌ಗಳಿಗೆ ಸೀಮಿತವಾಗಿಲ್ಲ. ಆಕೆಯ ಇನ್‌ಸ್ಟಾಗ್ರಾಂ ಖಾತೆಯ ಮೂಲಕ ಬರುವ ದೇಣಿಗೆಗಳನ್ನು ಸಹೋದರಿಯರು ನೆರೆಹೊರೆಯ ಇತರ ಬೀದಿ ನಾಯಿಗಳಿಗೆ ಆಹಾರ ನೀಡಲು ಬಳಸುತ್ತಿದ್ದಾರೆ.

ಒಂದು ಬೀದಿ ನಾಯಿಗೆ ಪ್ರೀತಿ ತೋರಿಸುವುದರಿಂದ ಎಷ್ಟೋ ಜನರು ಒಟ್ಟಾಗಿ ಬರಬಹುದು ಎಂಬುದಕ್ಕೆ ಗೌರಿಯ ಕಥೆ ಉತ್ತಮ ಉದಾಹರಣೆ. ಪ್ರಾಣಿಗಳ ಮೇಲಿನ ಕಾಳಜಿ ಮತ್ತು ಮಾನವೀಯತೆ ಇದ್ದರೆ ಸಾಮಾನ್ಯ ಬೀದಿ ನಾಯಿಯೂ ಎಲ್ಲರ ಪ್ರೀತಿಯ ಸೆಲೆಬ್ರಿಟಿಯಾಗಬಹುದು ಎಂಬುದನ್ನು ಗೌರಿ ಸಾಬೀತುಪಡಿಸಿದ್ದಾಳೆ.

View this post on Instagram

A post shared by gowri (@happygowri)

NWKRTC ಇನ್ಮುಂದೆ ಕಿತ್ತೂರು ರಾಣಿ ಚೆನ್ನಮ್ಮ ರಸ್ತೆ ಸಾರಿಗೆ ಸಂಸ್ಥೆ, ಅಧಿಕೃತ ಆದೇಶ ಪ್ರಕಟಿಸಿದ ರಾಜ್ಯ ಸರ್ಕಾರ

Santosh Naik — Fri, 06 Nov 2026 12:03:57 +0530

ಬೆಂಗಳೂರು (ನ.6): ರಾಜ್ಯ ಸರ್ಕಾರವು ಉತ್ತರ ಕರ್ನಾಟಕದ ಪ್ರಮುಖ ರಸ್ತೆ ಸಾರಿಗೆ ಸಂಸ್ಥೆಯಾದ 'ವಾಯುವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆ'ಯ (NWKRTC) ಹೆಸರನ್ನು 'ಕಿತ್ತೂರು ರಾಣಿ ಚೆನ್ನಮ್ಮ ರಸ್ತೆ ಸಾರಿಗೆ ಸಂಸ್ಥೆ' ಎಂದು ಮರುನಾಮಕರಣ ಮಾಡಿ ಅಧಿಕೃತ ಆದೇಶ ಹೊರಡಿಸಿದೆ. ರಾಜ್ಯ ಸಚಿವ ಸಂಪುಟದ (Cabinet) ಅನುಮೋದನೆಯಂತೆ, ಸಾರಿಗೆ ಇಲಾಖೆಯ ಅಧೀನ ಕಾರ್ಯದರ್ಶಿ ಪುಷ್ಪ ವಿ.ಎಸ್. ಅವರು ನ.5 ರಂದು ಈ ಕುರಿತು ಅಧಿಕೃತ ಆದೇಶ ಹೊರಡಿಸಿದ್ದಾರೆ. ಜನಪ್ರತಿನಿಧಿಗಳು ಹಾಗೂ ಸಾರ್ವಜನಿಕರ ಸುದೀರ್ಘ ಕಾಲದ ಕೋರಿಕೆಯನ್ನು ಪರಿಶೀಲಿಸಿ ಸರ್ಕಾರ ಈ ಐತಿಹಾಸಿಕ ನಿರ್ಣಯ ಕೈಗೊಂಡಿದೆ.

ಬೆಳಗಾವಿ, ಧಾರವಾಡ, ಉತ್ತರ ಕನ್ನಡ, ಬಾಗಲಕೋಟೆ, ಗದಗ ಹಾಗೂ ಹಾವೇರಿ ಸೇರಿದಂತೆ ಪ್ರಮುಖ ಜಿಲ್ಲೆಗಳಲ್ಲಿ ಕಾರ್ಯಾಚರಣೆ ನಡೆಸುತ್ತಿರುವ ಈ ಸಾರಿಗೆ ಸಂಸ್ಥೆಗೆ ಕಿತ್ತೂರಿನ ವೀರವನಿತೆ ರಾಣಿ ಚೆನ್ನಮ್ಮನ ಹೆಸರು ಇಟ್ಟಿರುವುದು ಸಾರ್ವಜನಿಕರ ಹರ್ಷಕ್ಕೆ ಕಾರಣವಾಗಿದೆ. 2019 ರ ಸೆಪ್ಟೆಂಬರ್ 17 ರಂದು ಹೈದರಾಬಾದ್ ಕರ್ನಾಟಕವನ್ನು 'ಕಲ್ಯಾಣ ಕರ್ನಾಟಕ' ಎಂದು ಮರುನಾಮಕರಣ ಮಾಡಿ, ಅಲ್ಲಿನ ಸಾರಿಗೆ ಸಂಸ್ಥೆಗೂ ಕಲ್ಯಾಣ ಕರ್ನಾಟಕ ಎಂದು ಹೆಸರಿಡಲಾಗಿತ್ತು. ಇದೇ ಮಾದರಿಯಲ್ಲಿ 'ಮುಂಬೈ ಕರ್ನಾಟಕ'ವನ್ನು 'ಕಿತ್ತೂರು ಕರ್ನಾಟಕ' ಎಂದು ಮರುನಾಮಕರಣ ಮಾಡಬೇಕೆಂದು ಬೆಳಗಾವಿ ಜಿಲ್ಲಾ ಕನ್ನಡ ಸಂಘಟನೆಗಳ ಕ್ರಿಯಾ ಸಮಿತಿಯು 2021 ರ ಆಗಸ್ಟ್ 8 ರಂದು ಅಂದಿನ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರಿಗೆ ಮನವಿ ಸಲ್ಲಿಸಿತ್ತು.

ತದನಂತರ 2021 ರ ಅಕ್ಟೋಬರ್ 23 ರಂದು ನಡೆದ ಕಿತ್ತೂರು ವಿಜಯೋತ್ಸವ ಕಾರ್ಯಕ್ರಮದಲ್ಲಿ ಅಂದಿನ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ಮುಂಬೈ ಕರ್ನಾಟಕಕ್ಕೆ 'ಕಿತ್ತೂರು ಕರ್ನಾಟಕ' ಎಂದು ಮರುನಾಮಕರಣ ಮಾಡುವುದಾಗಿ ಘೋಷಿಸಿ, ಸಂಪುಟದಲ್ಲೂ ಅನುಮೋದನೆ ಪಡೆದಿದ್ದರು. ಆದರೆ ವಾಯುವ್ಯ ಸಾರಿಗೆ ಸಂಸ್ಥೆಯ ಹೆಸರು ಮಾತ್ರ ಬದಲಾಗದೆ ಉಳಿದುಕೊಂಡಿತ್ತು.

ನಾಯಕರ ಯತ್ನ ಹಾಗೂ ಬೋರ್ಡ್ ನಿರ್ಣಯ

2024 ರ ಆರಂಭದಲ್ಲಿ ಕಾಗವಾಡ ಶಾಸಕ ರಾಜು ಕಾಗೆ ಅವರು ಸಂಸ್ಥೆಯ ಅಧ್ಯಕ್ಷರಾದಾಗ ಕ್ರಿಯಾ ಸಮಿತಿಯು ಅವರಿಗೆ ಮನವಿ ಸಲ್ಲಿಸಿತ್ತು. ಬಳಿಕ 2024 ರ ಫೆಬ್ರವರಿಯಲ್ಲಿ ಹುಬ್ಬಳ್ಳಿಯಲ್ಲಿ ನಡೆದ ಸಂಸ್ಥೆಯ ಆಡಳಿತ ಮಂಡಳಿ ಸಭೆಯಲ್ಲಿ 'ಕಿತ್ತೂರು ರಾಣಿ ಚೆನ್ನಮ್ಮ ಸಾರಿಗೆ ಸಂಸ್ಥೆ' ಎಂದು ಹೆಸರಿಡಲು ನಿರ್ಧರಿಸಿ ಸರ್ಕಾರಕ್ಕೆ ಅಧಿಕೃತ ಪ್ರಸ್ತಾವನೆ ಸಲ್ಲಿಸಲಾಯಿತು. ನಂತರ ಸಂಸ್ಥೆಯ ಉಪಾಧ್ಯಕ್ಷರಾಗಿ ಸುನಿಲ್ ಹನುಮನ್ನವರ ಅಧಿಕಾರ ವಹಿಸಿಕೊಂಡ ಬಳಿಕವೂ ಮರುನಾಮಕರಣದ ಪ್ರಯತ್ನ ತೀವ್ರಗೊಂಡಿತು. ಸುನಿಲ್ ಹನುಮನ್ನವರ ಹಾಗೂ ಕಿತ್ತೂರು ಶಾಸಕ ಬಾಬಾಸಾಹೇಬ ಪಾಟೀಲ ಅವರು ಮುಖ್ಯಮಂತ್ರಿಗಳ ಮೇಲೆ ತೀವ್ರ ಒತ್ತಡ ತಂದು ಈ ಬೇಡಿಕೆಗೆ ಮರುಜೀವ ನೀಡಿದರು. ಇದರ ಫಲವಾಗಿ ಇತ್ತೀಚೆಗೆ ನಡೆದ ಅಕ್ಟೋಬರ್ 23 ರ ಕಿತ್ತೂರು ಉತ್ಸವದಲ್ಲಿ ಮುಖ್ಯಮಂತ್ರಿಯವರು ಈ ನಿರ್ಧಾರವನ್ನು ಪ್ರಕಟಿಸಿದ್ದರು.

₹10 ಕೋಟಿಗೂ ಅಧಿಕ ವೆಚ್ಚ ಹಾಗೂ ಬೆಳಗಾವಿಯಲ್ಲಿ ಸಮಾರಂಭ

ಸಂಸ್ಥೆಯ ವ್ಯಾಪ್ತಿಗೆ ಬರುವ ಏಳು ಜಿಲ್ಲೆಗಳ ಸುಮಾರು 5,500 ಬಸ್‌ಗಳು, ಬಸ್ ನಿಲ್ದಾಣಗಳು ಹಾಗೂ ಅಧಿಕೃತ ದಾಖಲೆಗಳು, ಲಾಂಛನಗಳಲ್ಲಿ ಹೆಸರು ಬದಲಾಯಿಸಲು ಬರೋಬ್ಬರಿ ₹10 ಕೋಟಿಗೂ ಅಧಿಕ ವೆಚ್ಚವಾಗಲಿದೆ ಎಂದು ಅಂದಾಜಿಸಲಾಗಿದೆ. ಆದೇಶ ಜಾರಿಯಾಗಿರುವ ಹಿನ್ನೆಲೆಯಲ್ಲಿ ನವೆಂಬರ್ ಅಂತ್ಯದೊಳಗೆ ಬೆಳಗಾವಿಯಲ್ಲಿಯೇ ವೈಭವದ ಮರುನಾಮಕರಣ ಸಮಾರಂಭವನ್ನು ಆಯೋಜಿಸುವಂತೆ ಸುನಿಲ್ ಹನುಮನ್ನವರ ಅವರಿಗೆ ಕನ್ನಡ ಹೋರಾಟಗಾರರು ಮನವಿ ಮಾಡಿದ್ದಾರೆ. ಕನ್ನಡ ಸಂಘಟನೆಗಳ ನಿರಂತರ ಶ್ರಮಕ್ಕೆ ಇದೀಗ ಸಂಪೂರ್ಣ ಯಶಸ್ಸು ಸಿಕ್ಕಂತಾಗಿದೆ.

ಶಿವಮೊಗ್ಗಕ್ಕೆ ವಿಮಾನ ಸಂಪರ್ಕವೇ ಕಟ್: ನ.21 ರಿಂದ ಸಂಪೂರ್ಣ ಕಾರ್ಯಾಚರಣೆ ಸ್ಥಗಿತಗೊಳಿಸಲಿದೆ ಸ್ಟಾರ್ ಏರ್!

Santosh Naik — Fri, 06 Nov 2026 11:29:25 +0530

ಶಿವಮೊಗ್ಗ (ನ.6): ಮಲೆನಾಡಿನ ಕೇಂದ್ರ ಬಿಂದುವಾಗಿರುವ ಶಿವಮೊಗ್ಗ ನಗರವು ಶೀಘ್ರದಲ್ಲೇ ತನ್ನ ಸಂಪೂರ್ಣ ವಿಮಾನ ಸಂಪರ್ಕವನ್ನು (Air Connectivity) ಕಳೆದುಕೊಳ್ಳುವ ಸಾಧ್ಯತೆ ಇದೆ. ಪ್ರಾದೇಶಿಕ ವಿಮಾನಯಾನ ಸಂಸ್ಥೆಯಾದ 'ಸ್ಟಾರ್ ಏರ್' (Star Air) ನವೆಂಬರ್ 21 ರಿಂದ ಶಿವಮೊಗ್ಗ ವಿಮಾನ ನಿಲ್ದಾಣದಿಂದ ತನ್ನ ಎಲ್ಲಾ ಪ್ರಯಾಣಿಕ ವಿಮಾನ ಸೇವೆಗಳು ಹಾಗೂ ಬುಕಿಂಗ್‌ಗಳನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲು ನಿರ್ಧರಿಸಿದೆ!

ಶಿವಮೊಗ್ಗ ವಿಮಾನ ನಿಲ್ದಾಣದಿಂದ ಈಗಾಗಲೇ ಕಮರ್ಷಿಯಲ್ ಸೇವೆ ನೀಡುತ್ತಿದ್ದ ಇಂಡಿಗೋ ಮೇ 1 ರಿಂದ ತನ್ನ ಬೆಂಗಳೂರು ಮಾರ್ಗದ ಸೇವೆಯನ್ನು ಜೂನ್ 9 ರಂದು ಸ್ಪೈಸ್‌ಜೆಟ್ (SpiceJet) ತನ್ನ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸಿದ್ದವು. ಇಷ್ಟಾದ ನಂತರ ಕೊನೆಯ ಸಕ್ರಿಯ ಪ್ರಾದೇಶಿಕ ವಿಮಾನಯಾನ ಸಂಸ್ಥೆಯಾಗಿ ಸೇವೆ ನೀಡುತ್ತಿದ್ದ 'ಸ್ಟಾರ್ ಏರ್' ಕೂಡ ಇದೀಗ ತನ್ನ ಸೇವೆಯನ್ನು ಹಿಂಪಡೆಯುತ್ತಿದ್ದು, ಶಿವಮೊಗ್ಗ ವಿಮಾನ ನಿಲ್ದಾಣವು ಸಂಪೂರ್ಣವಾಗಿ ವಿಮಾನಗಳಿಲ್ಲದೆ ಇರಲಿದೆ.

'ಉಡಾನ್' ಆರ್ಥಿಕ ನೆರವು ನಿಂತಿದ್ದೇ ಕಾರಣ

ವಿಮಾನ ನಿಲ್ದಾಣದ ಅಧಿಕೃತ ಮೂಲಗಳ ಪ್ರಕಾರ, ಪ್ರಾದೇಶಿಕ ಸಂಪರ್ಕ ಯೋಜನೆ 'ಆರ್‌ಸಿಎಸ್-ಉಡಾನ್' (RCS-UDAN Scheme) ಅಡಿಯಲ್ಲಿ ಇದುವರೆಗೆ ಶಿವಮೊಗ್ಗಕ್ಕೆ ವಿಮಾನಗಳನ್ನು ಓಡಿಸಲಾಗುತ್ತಿತ್ತು. ಆದರೆ ಈ ಯೋಜನೆಗೆ ಕೇಂದ್ರ ಸರ್ಕಾರ ನೀಡುತ್ತಿದ್ದ ಆರ್ಥಿಕ ಸಬ್ಸಿಡಿ ಬೆಂಬಲವು ನವೆಂಬರ್ 2026 ಕ್ಕೆ ಮುಕ್ತಾಯಗೊಳ್ಳಲಿದೆ. ಸರ್ಕಾರಿ ಅನುದಾನ ಹಾಗೂ ನೆರವಿಲ್ಲದೆ ಪ್ರಾದೇಶಿಕ ವಿಮಾನ ನಿಲ್ದಾಣಗಳನ್ನು ನಡೆಸುವುದು ಅತ್ಯಂತ ಕಷ್ಟಕರವಾಗಿದ್ದು, ಪ್ರಯಾಣಿಕರ ಬೇಡಿಕೆಯೂ ನಿರೀಕ್ಷಿತ ಮಟ್ಟದಲ್ಲಿಲ್ಲದಿರುವುದು ಈ ಸೇವಾ ಕಡಿತಕ್ಕೆ ಪ್ರಮುಖ ಕಾರಣವಾಗಿದೆ. ಸ್ಟಾರ್ ಏರ್ ಸಂಸ್ಥೆಯು ಶಿವಮೊಗ್ಗದಿಂದ ಗೋವಾ, ಹೈದರಾಬಾದ್ ಮತ್ತು ತಿರುಪತಿಗೆ ನೇರ ವಿಮಾನ ಸೇವೆಯನ್ನು ಒದಗಿಸುತ್ತಿತ್ತು.

ಇದು ತಾತ್ಕಾಲಿಕ ಅಷ್ಟೇ: ಶಿವಮೊಗ್ಗ ಸಂಸದ ಬಿ.ವೈ. ರಾಘವೇಂದ್ರ ಭರವಸೆ

ಈ ಕುರಿತು ಪ್ರತಿಕ್ರಿಯಿಸಿರುವ ಶಿವಮೊಗ್ಗ ಲೋಕಸಭಾ ಕ್ಷೇತ್ರದ ಸಂಸದ ಬಿ.ವೈ. ರಾಘವೇಂದ್ರ, ವಿಮಾನ ಸಂಚಾರ ಸ್ಥಗಿತಗೊಳ್ಳುತ್ತಿರುವುದು ತಾತ್ಕಾಲಿಕ ಎಂದಿದ್ದಾರೆ.'ಶಿವಮೊಗ್ಗ ವಿಮಾನ ನಿಲ್ದಾಣದಲ್ಲಿ ವಾಣಿಜ್ಯ ವಿಮಾನ ಕಾರ್ಯಾಚರಣೆ ನಿಂತಿರುವುದು ಕೇವಲ ತಾತ್ಕಾಲಿಕ ವಿದ್ಯಮಾನ. ಕೇಂದ್ರ ಸರ್ಕಾರವು 'ಉಡಾನ್-6' (UDAN-6) ಯೋಜನೆಯ ಅಡಿಯಲ್ಲಿ ನೂತನ ಟೆಂಡರ್ ಕರೆಯಲು ಭರದಿಂದ ಸಿದ್ಧತೆ ನಡೆಸುತ್ತಿದೆ. ಅಷ್ಟೇ ಅಲ್ಲದೆ, ರಾಜ್ಯ ಸರ್ಕಾರವೂ ಸಹ ಶಿವಮೊಗ್ಗದಿಂದ 10 ಹೊಸ ವಿಮಾನ ಮಾರ್ಗಗಳನ್ನು ಆರಂಭಿಸುವಂತೆ ಕೇಂದ್ರಕ್ಕೆ ಪ್ರಸ್ತಾವನೆ ಸಲ್ಲಿಸಿದೆ. ಮುಂದಿನ ಎರಡು ತಿಂಗಳ ಸುದೀರ್ಘ ವಿರಾಮದ ಬಳಿಕ ಶಿವಮೊಗ್ಗದಲ್ಲಿ ಪುನಃ ವಿಮಾನ ಸೇವೆಗಳು ಯಶಸ್ವಿಯಾಗಿ ಆರಂಭಗೊಳ್ಳಲಿವೆ ಎಂಬ ಭರವಸೆ ನನಗಿದೆ' ಎಂದಿದ್ದಾರೆ.

ಪ್ರಾದೇಶಿಕ ವಿಮಾನ ನಿಲ್ದಾಣಗಳ ಭವಿಷ್ಯ ಮಬ್ಬು: ಕೆಎಸ್‌ಐಐಡಿಸಿ ಅಧ್ಯಕ್ಷರ ಕಳವಳ

ಕರ್ನಾಟಕ ರಾಜ್ಯ ಕೈಗಾರಿಕಾ ಮತ್ತು ಮೂಲಸೌಕರ್ಯ ಅಭಿವೃದ್ಧಿ ನಿಗಮದ (KSIIDC) ಅಧ್ಯಕ್ಷ ಎಸ್.ಜಿ. ನಂಜಯ್ಯನಮಠ ಅವರು ಪ್ರಾದೇಶಿಕ ವಿಮಾನ ನಿಲ್ದಾಣಗಳ ಅಸ್ತಿತ್ವದ ಬಗ್ಗೆ ತೀವ್ರ ಆತಂಕ ವ್ಯಕ್ತಪಡಿಸಿದ್ದಾರೆ: 'ಪ್ರಾದೇಶಿಕ ವಿಮಾನ ನಿಲ್ದಾಣಗಳ ಭವಿಷ್ಯ ತೀವ್ರ ಮಬ್ಬಾಗಿದೆ. ಈ ವಿಮಾನ ನಿಲ್ದಾಣಗಳು ಭವಿಷ್ಯದಲ್ಲಿ ಹೇಗೆ ಬದುಕಿ ಉಳಿಯುತ್ತವೆ ಮತ್ತು ಪ್ರತಿದಿನ ಯಾರು ಪ್ರಯಾಣಿಸುತ್ತಾರೆ ಎಂಬುದೇ ನನಗಿರುವ ದೊಡ್ದ ಪ್ರಶ್ನೆ. ಸರ್ಕಾರವು ಶಿವಮೊಗ್ಗ ವಿಮಾನ ನಿಲ್ದಾಣಕ್ಕಾಗಿ ₹450 ಕೋಟಿಗೂ ಹೆಚ್ಚು ತೆರಿಗೆದಾರರ ಹಣವನ್ನು ವೆಚ್ಚ ಮಾಡಿದೆ. ನೈಟ್ ಲ್ಯಾಂಡಿಂಗ್ (Night Landing) ವ್ಯವಸ್ಥೆಯ ಕಾಮಗಾರಿ ಮುಕ್ತಾಯದ ಹಂತದಲ್ಲಿದೆ. ಇಷ್ಟಾದರೂ ವಿಮಾನ ಏರುವ ಶ್ರಿಮಂತ ಪ್ರಯಾಣಿಕರಿಗೆ ಇಂದಿಗೂ ಸಾರ್ವಜನಿಕರ ತೆರಿಗೆ ಹಣದಿಂದ ಸಬ್ಸಿಡಿ ನೀಡಬೇಕಾಗಿರುವುದು ಅರ್ಥಹೀನ. ಹೀಗೆಯೇ ಮುಂದುವರಿದರೆ ಮುಂಬರುವ ವರ್ಷಗಳಲ್ಲಿ ಪ್ರಾದೇಶಿಕ ವಿಮಾನ ನಿಲ್ದಾಣಗಳು ಸಂಪೂರ್ಣವಾಗಿ ಮುಚ್ಚಲ್ಪಡಬಹುದು' ಎಂದಿದ್ದಾರೆ.

ಅವರ ಮಾಹಿತಿಯಂತೆ, ಶಿವಮೊಗ್ಗ ವಿಮಾನ ನಿಲ್ದಾಣದಲ್ಲಿ 200 ಕ್ಕೂ ಹೆಚ್ಚು ಸಿಬ್ಬಂದಿ ಕೆಲಸ ಮಾಡುತ್ತಿದ್ದಾರೆ. ಸುಮಾರು 100 ಸಿಬ್ಬಂದಿಯ ವೇತನ ಹಾಗೂ ಉಪಕರಣಗಳ ನಿರ್ವಹಣೆಗಾಗಿ ನಿಗಮವು ಪ್ರತಿ ತಿಂಗಳು ಸುಮಾರು ₹95 ಲಕ್ಷ ವೆಚ್ಚ ಮಾಡುತ್ತಿದೆ. ಇನ್ನುಳಿದ ನೌಕರರ ವೇತನವನ್ನು ರಾಜ್ಯ ಸರ್ಕಾರವೇ ಪಾವತಿಸುತ್ತಿದೆ.

ಬೀದರ್ - ಬೆಂಗಳೂರು ವಿಮಾನ ಸೇವೆಯೂ ಸಸ್ಪೆಂಡ್!

ಇನ್ನೊಂದೆಡೆ, ಸ್ಟಾರ್ ಏರ್ ಸಂಸ್ಥೆಯು ನವೆಂಬರ್ 1 ರಿಂದ ಜಾರಿಗೆ ಬರುವಂತೆ ತನ್ನ ಬೀದರ್ - ಬೆಂಗಳೂರು ನಿತ್ಯ ವಿಮಾನ ಸೇವೆಯನ್ನು ಸಹ ಸಂಪೂರ್ಣವಾಗಿ ರದ್ದುಗೊಳಿಸಿದೆ. ಈ ರದ್ದತಿಗೆ ಯಾವುದೇ ನಿರ್ದಿಷ್ಟ ಅಧಿಕೃತ ಕಾರಣವನ್ನು ಸಂಸ್ಥೆ ನೀಡಿಲ್ಲ. ಕಳೆದ ವರ್ಷ ರಾಜ್ಯ ಸರ್ಕಾರವು ಸ್ಟಾರ್ ಏರ್ ಸಂಸ್ಥೆಗೆ 1 ವರ್ಷದ ಅವಧಿಗೆ ₹13.48 ಕೋಟಿ ಪ್ರೋತ್ಸಾಹಧನ (Incentive) ನೀಡಲು ಒಪ್ಪಿಕೊಂಡಿದ್ದರಿಂದ ಸೇವೆ ಪುನರಾರಂಭವಾಗಿತ್ತು. ಆದರೆ ಪ್ರಸ್ತುತ ವಿಮಾನ ಇಂಧನ ಹಾಗೂ ತೈಲ ಬೆಲೆ ಭಾರಿ ಏರಿಕೆಯಾಗಿರುವುದರಿಂದ ಸಂಸ್ಥೆಯು ಹೆಚ್ಚಿನ ಪ್ರೋತ್ಸಾಹಧನ ನೀಡುವಂತೆ ಸರ್ಕಾರಕ್ಕೆ ಮನವಿ ಮಾಡಿತ್ತು. ಆದರೆ ಸರ್ಕಾರದ ಕಡೆಯಿಂದ ಸೂಕ್ತ ಸ್ಪಂದನೆ ಸಿಗದ ಹಿನ್ನೆಲೆಯಲ್ಲಿ ವಿಮಾನ ಸೇವೆಯನ್ನು ರದ್ದುಗೊಳಿಸಲಾಗಿದೆ ಎಂದು ತಿಳಿದುಬಂದಿದೆ.

ದೀಪಾವಳಿ ಹಬ್ಬದ ಪ್ರಯುಕ್ತ ಬೆಂಗಳೂರು-ಬೆಳಗಾವಿ ನಡುವೆ ವಿಶೇಷ ರೈಲು, ದಿನ, ಸಮಯ ಎಲ್ಲೆಲ್ಲಿ ನಿಲುಗಡೆ? ಮಾಹಿತಿ ಇಲ್ಲಿದೆ

Gowthami K — Fri, 06 Nov 2026 11:23:24 +0530

ಹುಬ್ಬಳ್ಳಿ: ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ಪ್ರಯಾಣಿಕರ ಹೆಚ್ಚುವರಿ ದಟ್ಟಣೆ ನಿಯಂತ್ರಿಸಲು ನೈಋತ್ಯ ರೈಲ್ವೆಯು ಬೆಂಗಳೂರಿನ ಸರ್ ಎಂ. ವಿಶ್ವೇಶ್ವರಯ್ಯ ಟರ್ಮಿನಲ್ ಮತ್ತು ಬೆಳಗಾವಿ ನಡುವೆ ವಿಶೇಷ ರೈಲು ಸಂಚಾರ ನಡೆಸಲಿದೆ. ಈ ರೈಲುಗಳು ಎರಡೂ ಮಾರ್ಗಗಳಲ್ಲಿ ತಲಾ ಎರಡು ಟ್ರಿಪ್ (ಪ್ರಯಾಣ) ಸಂಚರಿಸಲಿವೆ.

ರೈಲು ಸಂಖ್ಯೆ 06551 ಎಸ್ಎಂವಿಟಿ ಬೆಂಗಳೂರು- ಬೆಳಗಾವಿ ವಿಶೇಷ ಎಕ್ಸ್‌ಪ್ರೆಸ್: ನ. 7 ಮತ್ತು ನ 9 ರಂದು ಸಂಜೆ 7ಕ್ಕೆ ಎಸ್ಎಂವಿಟಿ ಬೆಂಗಳೂರಿನಿಂದ ಹೊರಟು, ಮರುದಿನ ಬೆಳಗ್ಗೆ 8:25 ಗಂಟೆಗೆ ಬೆಳಗಾವಿ ತಲುಪಲಿದೆ.

ರೈಲು ಸಂಖ್ಯೆ 06552 ಬೆಳಗಾವಿ- ಎಸ್ಎಂವಿಟಿ ಬೆಂಗಳೂರು ವಿಶೇಷ ಎಕ್ಸ್‌ಪ್ರೆಸ್ ರೈಲು ನ. 8 ಮತ್ತು ನ. 10 ರಂದು ಸಂಜೆ 5:30ಕ್ಕೆ ಬೆಳಗಾವಿಯಿಂದ ಹೊರಟು, ಮರುದಿನ ಬೆಳಗ್ಗೆ 5ಕ್ಕೆ ಎಸ್ಎಂವಿಟಿ ಬೆಂಗಳೂರು ತಲುಪಲಿದೆ.

ನಿಲುಗಡೆಗಳು:

ಈ ವಿಶೇಷ ರೈಲುಗಳು ಎರಡೂ ಮಾರ್ಗಗಳಲ್ಲಿ ಚಿಕ್ಕಬಾಣಾವರ, ತುಮಕೂರು, ಅರಸೀಕೆರೆ, ಬೀರೂರು, ದಾವಣಗೆರೆ, ಹರಿಹರ, ಎಸ್‌ಎಂಎಂ ಹಾವೇರಿ, ಎಸ್‌ಎಸ್‌ಎಸ್ ಹುಬ್ಬಳ್ಳಿ, ಧಾರವಾಡ, ಅಳ್ನಾವರ, ಲೊಂಡಾ ಮತ್ತು ಖಾನಾಪುರ ನಿಲ್ದಾಣಗಳಲ್ಲಿ ನಿಲುಗಡೆಯಾಗಲಿದೆ.

ಈ ರೈಲು ಎಸಿ 2-ಟೈರ್, ಎಸಿ 3-ಟೈರ್, ಸ್ಲೀಪರ್ ಕ್ಲಾಸ್ ಮತ್ತು ಜನರಲ್ ಕ್ಲಾಸ್ ಬೋಗಿಗಳು, ದಿವ್ಯಾಂಗಚೇತನ ಸ್ನೇಹಿ ಜತೆಗೆ ಲಗೇಜ್-ಕಮ್-ಬ್ರೇಕ್ ವ್ಯಾನ್ ಹಾಗೂ ಜನರೇಟರ್-ಕಮ್-ಬ್ರೇಕ್ ವ್ಯಾನ್ ಸೇರಿ ಒಟ್ಟು 20 ಬೋಗಿಗಳನ್ನು ಒಳಗೊಂಡಿರಲಿದೆ ಎಂದು ನೈಋತ್ಯ ರೈಲ್ವೆ ಪ್ರಕಟಣೆ ತಿಳಿಸಿದೆ.

ಹುಬ್ಬಳ್ಳಿಯಿಂದ ವಟ್ವಾಗೆ ಏಕಮುಖ ವಿಶೇಷ ರೈಲು

ಹುಬ್ಬಳ್ಳಿ: ಪ್ರಯಾಣಿಕರ ಹೆಚ್ಚುವರಿ ದಟ್ಟಣೆ ನಿಭಾಯಿಸಲು ನೈಋತ್ಯ ರೈಲ್ವೆಯು ಎಸ್‌ಎಸ್‌ಎಸ್ ಹುಬ್ಬಳ್ಳಿಯಿಂದ ವಟ್ವಾಗೆ 07311 ಸಂಖ್ಯೆಯ ಏಕಮುಖ ವಿಶೇಷ ಎಕ್ಸ್‌ಪ್ರೆಸ್ ರೈಲು ಓಡಿಸಲು ನಿರ್ಧರಿಸಿದೆ. ಈ ವಿಶೇಷ ರೈಲು ನ. 5ರಂದು ರಾತ್ರಿ 10.15 ಗಂಟೆಗೆ ಎಸ್‌ಎಸ್‌ಎಸ್ ಹುಬ್ಬಳ್ಳಿಯಿಂದ ಹೊರಟು ನ. 6ರಂದು ರಾತ್ರಿ 9.50ಕ್ಕೆ ವಟ್ವಾವನ್ನು ತಲುಪಲಿದೆ. ಈ ರೈಲು ಮಾರ್ಗಮಧ್ಯ ಧಾರವಾಡ, ಅಳ್ನಾವರ, ಲೋಂಡಾ, ಬೆಳಗಾವಿ, ಗೋಕಾಕ್ ರೋಡ್, ಘಟಪ್ರಭಾ, ರಾಯಭಾಗ, ಕುಡಚಿ, ಮಿರಾಜ್, ಸಾಂಗ್ಲಿ, ಕರಾಡ್, ಸತಾರಾ, ಪುಣೆ, ಲೋನಾವಾಲಾ, ಕಲ್ಯಾಣ್, ವಸಾಯಿ ರೋಡ್, ಪಾಲ್ಘರ್, ವಾಪಿ, ವಲ್ಸಾಡ್, ಸೂರತ್, ಭರೂಚ್, ವಡೋದರಾ ಮತ್ತು ಆನಂದ್ ನಿಲ್ದಾಣಗಳಲ್ಲಿ ನಿಲ್ಲಲಿದೆ. ಈ ರೈಲಿನಲ್ಲಿ ಸ್ಲೀಪರ್ ಕ್ಲಾಸ್, ಜನರಲ್ ಕ್ಲಾಸ್, ಲಗೇಜ್-ಕಮ್-ಬ್ರೇಕ್ ವ್ಯಾನ್ ಹಾಗೂ ಅಂಗವಿಕಲರಿಗಾಗಿ ಮೀಸಲಾದ ಬೋಗಿಗಳು ಸೇರಿದಂತೆ ಒಟ್ಟು 20 ಬೋಗಿಗಳು ಇರಲಿವೆ ಎಂದು ನೈಋತ್ಯ ರೈಲ್ವೆ ಪ್ರಕಟಣೆ ತಿಳಿಸಿದೆ.

ಖಾಸಗಿ ವಾಹನಗಳಿಗೆ ಕೋಟಿಗಟ್ಟಲೆ ಮೇಲ್ಸೇತುವೆ, ಬಡವರ ಬಸ್‌ಗೆ ಭಾರಿ ದರ: ಸರ್ಕಾರದ ಸಾರಿಗೆ ನೀತಿಗೆ ಪ್ರಯಾಣಿಕರ ವೇದಿಕೆ ತೀವ್ರ ಖಂಡನೆ

Santosh Naik — Fri, 06 Nov 2026 10:53:09 +0530

ಬೆಂಗಳೂರು (ನ.6): ರಾಜಧಾನಿ ಬೆಂಗಳೂರಿನಲ್ಲಿ ಬಿಎಂಟಿಸಿ (BMTC) ಬಸ್ ಪ್ರಯಾಣ ದರಗಳನ್ನು ಏರಿಕೆ ಮಾಡಿರುವ ರಾಜ್ಯ ಸರ್ಕಾರದ ಕ್ರಮವನ್ನು 'ಬಸ್ ಪ್ರಯಾಣಿಕರ ವೇದಿಕೆ' (Bus Prayanikara Vedike) ತೀವ್ರವಾಗಿ ಖಂಡಿಸಿದೆ. ಈ ದರ ಏರಿಕೆಯು ದುಡಿಯುವ ವರ್ಗದ ಸಾರ್ವಜನಿಕರ ಮೇಲೆ ತೀವ್ರ ಆರ್ಥಿಕ ಹೊರೆಯನ್ನು ಹೇರಲಿದ್ದು, ಜನರನ್ನು ಸಾರ್ವಜನಿಕ ಸಾರಿಗೆಯಿಂದ ದೂರ ತಳ್ಳಲಿದೆ. ಹೀಗಾಗಿ ಹೆಚ್ಚಿಸಲಾಗಿರುವ ಬಸ್ ದರಗಳನ್ನು ತಕ್ಷಣವೇ ಹಿಂಪಡೆಯಬೇಕು (Rollback) ಎಂದು ವೇದಿಕೆ ಒತ್ತಾಯಿಸಿದೆ.

ಸಾರ್ವಜನಿಕ ಸಾರಿಗೆ ಹಕ್ಕುಗಳಿಗಾಗಿ ಹೋರಾಡುವ 'ಬಸ್ ಪ್ರಯಾಣಿಕರ ವೇದಿಕೆ' ಸಂಸ್ಥೆಯು ಈ ಕುರಿತು ಅಧಿಕೃತ ಪ್ರಕಟಣೆ ಹೊರಡಿಸಿದ್ದು, ಬಸ್ ದರಗಳ ಪರಿಷ್ಕರಣೆ ಮಾಡುವ ಮೊದಲು ಪ್ರಯಾಣಿಕರು, ಕಾರ್ಮಿಕ ಸಂಘಟನೆಗಳು ಹಾಗೂ ಪ್ರಯಾಣಿಕರ ಹಿತರಕ್ಷಣಾ ಗುಂಪುಗಳೊಂದಿಗೆ ಸರ್ಕಾರ ಸಮಾಲೋಚನೆ ನಡೆಸಬೇಕಿತ್ತು ಎಂದು ಹೇಳಿದೆ. ಇದರ ಜೊತೆಗೆ ಬಸ್‌ಗಳ ಸಂಖ್ಯೆ, ಮಾರ್ಗಗಳ ಲಭ್ಯತೆ, ಸಮಯ ಪಾಲನೆ, ತಲುಪುವಿಕೆ, ಸುರಕ್ಷತೆ ಹಾಗೂ ಮೂಲಸೌಕರ್ಯಗಳನ್ನು ಸುಧಾರಿಸುವ ಬಗ್ಗೆ ಸಾರ್ವಜನಿಕ ಚರ್ಚೆ ನಡೆಸಬೇಕು ಎಂದು ಆಗ್ರಹಿಸಿದೆ.

ಶ್ರಮಿಕ ವರ್ಗ ಹಾಗೂ ವಿದ್ಯಾರ್ಥಿಗಳಿಗೆ ಆಘಾತ

ದಿನನಿತ್ಯದ ಪ್ರಯಾಣಕ್ಕೆ ಸಂಪೂರ್ಣವಾಗಿ ಬಿಎಂಟಿಸಿ ಬಸ್‌ಗಳನ್ನೇ ನೆಚ್ಚಿಕೊಂಡಿರುವ ಬೀದಿ ಬದಿ ವ್ಯಾಪಾರಿಗಳು, ಗಾರ್ಮೆಂಟ್ಸ್ ಕಾರ್ಮಿಕರು, ಗೃಹ ಕಾರ್ಮಿಕರು, ಕಟ್ಟಡ ಕಾರ್ಮಿಕರು, ಪೌರಕಾರ್ಮಿಕರು ಹಾಗೂ ವಿದ್ಯಾರ್ಥಿ ಸಮೂಹಕ್ಕೆ ಈ ದರ ಏರಿಕೆಯು ಭಾರಿ ಹೊರೆಯಾಗಿ ಪರಿಣಮಿಸಲಿದೆ.

ಟಿಕೆಟ್ ದರದಲ್ಲಿನ ಸಣ್ಣ ಪ್ರಮಾಣದ ಏರಿಕೆಯೂ ಸಹ ಈ ಬಡ ಹಾಗೂ ಕೆಳ ಮಧ್ಯಮ ವರ್ಗದ ಕುಟುಂಬಗಳ ಮಾಸಿಕ ಬಜೆಟ್ ಮೇಲೆ ತೀವ್ರ ಪರಿಣಾಮ ಬೀರಲಿದೆ. ದರ ಏರಿಕೆಯ ಭೀತಿಯಿಂದಾಗಿ ಅನೇಕ ಪ್ರಯಾಣಿಕರು ಅನಿವಾರ್ಯವಾಗಿ ದ್ವಿಚಕ್ರ ವಾಹನಗಳು ಅಥವಾ ಮೆಟ್ರೋದತ್ತ ಮುಖ ಮಾಡುತ್ತಿದ್ದಾರೆ. ಇನ್ನು ಹಣ ಉಳಿಸುವ ಸಲುವಾಗಿ ಹಲವು ಸಾರ್ವಜನಿಕರು ಸುದೀರ್ಘ ದೂರವನ್ನು ಕಾಲ್ನಡಿಗೆಯಲ್ಲೇ ಕ್ರಮಿಸುವಂತಾಗಿದೆ ಎಂದು ವೇದಿಕೆ ಕಳವಳ ವ್ಯಕ್ತಪಡಿಸಿದೆ.

ಬಿಎಂಟಿಸಿಗೆ ಮತ್ತೆ ಭಾರಿ ನಷ್ಟದ ಭೀತಿ!

ಈ ದರ ಏರಿಕೆಯು ಸಾರ್ವಜನಿಕರಷ್ಟೇ ಅಲ್ಲದೆ, ಸ್ವತಃ ಬಿಎಂಟಿಸಿಯ ಆರ್ಥಿಕ ಸ್ಥಿತಿಗೂ ಭಾರಿ ಪೆಟ್ಟು ನೀಡಲಿದೆ ಎಂದು ವೇದಿಕೆ ಎಚ್ಚರಿಸಿದೆ. ವರದಿಯೊಂದರ ಪ್ರಕಾರ, ಜನವರಿ 2025 ರಲ್ಲಿ ಕೈಗೊಳ್ಳಲಾಗಿದ್ದ ಹಿಂದಿನ ದರ ಪರಿಷ್ಕರಣೆಯ ಬಳಿಕ ಬಿಎಂಟಿಸಿಯ ದೈನಂದಿನ ಪ್ರಯಾಣಿಕರ ಸಂಖ್ಯೆಯು ಬರೋಬ್ಬರಿ 38.03 ಲಕ್ಷದಿಂದ 35.85 ಲಕ್ಷಕ್ಕೆ ಕುಸಿತ ಕಂಡಿತ್ತು. ಇದೀಗ ಮತ್ತೆ ದರ ಹೆಚ್ಚಿಸಿರುವುದರಿಂದ ಪ್ರಯಾಣಿಕರ ಸಂಖ್ಯೆ ಮತ್ತಷ್ಟು ಇಳಿಮುಖವಾಗಿ ನಿಗಮದ ಆದಾಯವೇ ಕುಸಿಯುವ ಭೀತಿಯಿದೆ.

ತಲೆಕೆಳಗಾದ ಸಾರಿಗೆ ನೀತಿ: ಸರ್ಕಾರದ ವಿರುದ್ಧ ವಾಗ್ದಾಳಿ

ರಾಜ್ಯ ಸರ್ಕಾರದ ಸಾರಿಗೆ ನೀತಿಯನ್ನು ತಲೆಕೆಳಗಾದ ನೀತಿ ಎಂದು ಕಟುವಾಗಿ ವಿಮರ್ಶಿಸಿರುವ ವೇದಿಕೆ, 'ಖಾಸಗಿ ವಾಹನಗಳ ಸುಗಮ ಸಂಚಾರಕ್ಕಾಗಿ ಸರ್ಕಾರವು ಫ್ಲೈಓವರ್‌ಗಳು, ಎಲಿವೇಟೆಡ್ ಕಾರಿಡಾರ್‌ಗಳು ಹಾಗೂ ರಸ್ತೆಗಳ ನಿರ್ಮಾಣಕ್ಕಾಗಿ ಸಾವಿರಾರು ಕೋಟಿ ರೂಪಾಯಿಗಳನ್ನು ವೆಚ್ಚ ಮಾಡುತ್ತಿದೆ. ಆದರೆ ಸಾಮಾನ್ಯ ಬಡಜನರು ಸಂಚರಿಸುವ ಬಸ್ ಪ್ರಯಾಣವನ್ನು ಮಾತ್ರ ದಿನದಿಂದ ದಿನಕ್ಕೆ ಭಾರಿ ದುಬಾರಿ ಮಾಡುತ್ತಿದೆ' ಎಂದು ಆಕ್ರೋಶ ಹೊರಹಾಕಿದೆ.ಸಾರಿಗೆ ನಿಗಮಗಳಿಗೆ ರಾಜ್ಯ ಸರ್ಕಾರವು ತನ್ನ ಆಯವ್ಯಯದಲ್ಲಿ (Budget) ನೀಡುವ ಹಣಕಾಸಿನ ನೆರವನ್ನು ಗಮನಾರ್ಹವಾಗಿ ಹೆಚ್ಚಿಸಬೇಕು ಎಂದು ಆಗ್ರಹಿಸಲಾಗಿದೆ.

ಡಿಕೆ ಶಿವಕುಮಾರ್‌ಗೆ ನೇರ ಸವಾಲು

"ಕೇಂದ್ರ ಸರ್ಕಾರವು ಇಂಧನ ದರಗಳನ್ನು ಇಳಿಕೆ ಮಾಡಿದರೆ ರಾಜ್ಯದಲ್ಲೂ ಬಸ್ ದರ ಹಿಂಪಡೆಯಲಾಗುವುದು" ಎಂಬ ಮುಖ್ಯಮಂತ್ರಿ ಡಿಕೆ ಶಿವಕುಮಾರ್ (DK Shivakumar) ಅವರ ಹೇಳಿಕೆಯನ್ನು ಉಲ್ಲೇಖಿಸಿರುವ ವೇದಿಕೆ, ಡೀಸೆಲ್ ಮೇಲಿನ ತೆರಿಗೆ ಕಡಿತ ಹಾಗೂ ಬೆಲೆ ಇಳಿಕೆಗೆ ಕೇಂದ್ರ ಸರ್ಕಾರದ ಮೇಲೆ ರಾಜ್ಯ ಸರ್ಕಾರ ಒತ್ತಡ ಹೇರಬೇಕು ಎಂದು ಆಗ್ರಹಿಸಿದೆ. ಕೇಂದ್ರ ಸರ್ಕಾರದಿಂದ ಸಬ್ಸಿಡಿ ದರದಲ್ಲಿ ಡೀಸೆಲ್ ಪೂರೈಕೆ ಹಾಗೂ ನೇರ ಆರ್ಥಿಕ ನೆರವು ಪಡೆಯಲು ಪ್ರಯತ್ನಿಸಬೇಕು. ಜೊತೆಗೆ, ಸಾರಿಗೆ ನಿಗಮಗಳಿಗೆ ದೀರ್ಘಾವಧಿಯಲ್ಲಿ ಭಾರಿ ಆರ್ಥಿಕ ಹೊರೆಯಾಗಿ ಪರಿಣಮಿಸಲಿರುವ ಲೀಸ್ ಆಧಾರಿತ ವಿದ್ಯುತ್ ಬಸ್ (Electric Bus) ಖರೀದಿ ಮಾದರಿಯನ್ನು ಮರುಪರಿಶೀಲಿಸುವಂತೆ ಬಸ್ ಪ್ರಯಾಣಿಕರ ವೇದಿಕೆ ಸರ್ಕಾರವನ್ನು ಕೋರಿದೆ.

ಕಿದ್ವಾಯಿ, ಕಿಮ್ಸ್‌ಗೆ ರೋಬೋಟಿಕ್‌ ಸರ್ಜರಿ ಉಪಕರಣ ಖರೀದಿ, ರಾಜ್ಯ ಸಚಿವ ಸಂಪುಟ ಸಭೆಯಲ್ಲಿ ತೀರ್ಮಾನ

Gowthami K — Fri, 06 Nov 2026 10:40:00 +0530

ಬೆಂಗಳೂರು: ಕ್ಯಾನ್ಸರ್‌ ರೋಗಿಗಳ ಚಿಕಿತ್ಸಾ ವ್ಯವಸ್ಥೆ ಸುಧಾರಿಸಲು ಬೆಂಗಳೂರಿನ ಕಿದ್ವಾಯಿ ಸ್ಮಾರಕ ಗಂಥಿ ಸಂಸ್ಥೆ ಹಾಗೂ ಹುಬ್ಬಳ್ಳಿಯ ಕಿಮ್ಸ್‌ಗೆ ಒಟ್ಟು 40 ಕೋಟಿ ವೆಚ್ಚದಲ್ಲಿ ತಲಾ ಒಂದೊಂದು ರೋಬೊಟಿಕ್‌ ಸರ್ಜರಿ ಉಪಕರಣ ಖರೀದಿಸಲು ಗುರುವಾರ ನಡೆದ ರಾಜ್ಯ ಸಚಿವ ಸಂಪುಟ ಸಭೆ ನಿರ್ಧರಿಸಿದೆ.

ಸಂಪುಟ ಸಭೆ ಬಳಿಕ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಸಚಿವ ಈಶ್ವರ್ ಖಂಡ್ರೆ, ಪ್ರತಿ ಸಂಸ್ಥೆಗೆ 20 ಕೋಟಿ ರು. ವೆಚ್ಚದಲ್ಲಿ ಈ ಉಪಕರಣ ಖರೀದಿ ಮಾಡಲಾಗುತ್ತಿದ್ದು, ಈ ಪೈಕಿ ತಲಾ 5 ಕೋಟಿ ರು.ಗಳನ್ನು ಆಯಾ ಸಂಸ್ಥೆಗಳು ಸ್ವಂತ ಸಂಪನ್ಮೂಲದಿಂದ ಭರಿಸಲಿವೆ. ಉಳಿದ ಮೊತ್ತವನ್ನು ಸರಕಾರ ಭರಿಸಲಿದೆ. ಈ ಪ್ರಸ್ತಾವನೆಗೆ ಸಂಪುಟ ಆಡಳಿತಾತ್ಮಕ ಅನುಮೋದನೆ ನೀಡಿದೆ. ಇದರಿಂದ ಕ್ಯಾನ್ಸರ್‌ ಚಿಕಿತ್ಸೆಗೆ ಬರುವ ರೋಗಿಗಳ ಸೇವೆಗೆ ಮತ್ತಷ್ಟು ಬಲ ಸಿಗಲಿದೆ ಎಂದು ತಿಳಿಸಿದರು.

ಮಲ್ಪೆ ಬಂದರಿನಲ್ಲಿ ಬಹುಮಹಡಿ ಪಾರ್ಕಿಂಗ್‌ ವ್ಯವಸ್ಥೆ:

ಉಡುಪಿ ಜಿಲ್ಲೆಯ ಮಲ್ಪೆ ಮೀನುಗಾರಿಕಾ ಬಂದರಿನಲ್ಲಿ ಒಟ್ಟು 1,800 ಚದರ ಮೀಟರ್‌ ವಿಸ್ತೀರ್ಣದ ಜಾಗದಲ್ಲಿ ಸಾರ್ವಜನಿಕ ಮತ್ತು ಖಾಸಗಿ ಸಹಭಾಗಿತ್ವ ಮಾದರಿಯಲ್ಲಿ ಬಹುಮಹಡಿ ವಾಹನ ನಿಲುಗಡೆ ಸೌಲಭ್ಯ ಅಭಿವೃದ್ಧಿಪಡಿಸುವ ಪ್ರಸ್ತಾವನೆಗೆ ಸಂಪುಟ ಅನುಮೋದನೆ ನೀಡಿತು.

ಬಂದರಿಗೆ ನಿತ್ಯ 7 ಸಾವಿರ ಪ್ರವಾಸಿಗರ ಭೇಟಿ ಜತೆಗೆ, ಮೀನುಗಾರಿಕೆ ಅವಧಿಯಲ್ಲಿವಾಹನ ಸಂಚಾರ ಹೆಚ್ಚಿರುತ್ತದೆ. 3 ಸಾವಿರ ನೋಂದಾಯಿತ ಮೀನುಗಾರಿಕೆ ದೋಣಿಗಳು ಇಲ್ಲಿಕಾರ್ಯನಿರ್ವಹಿಸುತ್ತವೆ. ಹಾಗಾಗಿ, ಬಂದರಿನಲ್ಲಿ ಸುಗಮ ಕಾರ್ಯಾಚರಣೆ, ವಾಹನ ದಟ್ಟಣೆ ಕಡಿಮೆ ಮಾಡುವುದು, ಮೀನುಗಾರರು, ಪ್ರವಾಸಿಗರು ಮತ್ತು ಸಾರ್ವಜನಿಕರ ಅನುಕೂಲದ ದೃಷ್ಟಿಯಿಂದ ಈ ತೀರ್ಮಾನ ಮಾಡಲಾಗಿದೆ ಎಂದು ಸಚಿವ ಈಶ್ವರ್ ಖಂಡ್ರೆ ತಿಳಿಸಿದರು.

ಕೈಗಾರಿಕಾ ಟೌನ್‌ಶಿಪ್‌:

ವಿಜಯಪುರ ಜಿಲ್ಲೆಯ ಮುದ್ದೇಬಿಹಾಳ ಹಾಗೂ ಬಳ್ಳಾರಿ ಜಿಲ್ಲೆ ಕಂಪ್ಲಿಹೋಬಳಿಯ ಹರಳಹಳ್ಳಿಯಲ್ಲಿಒಟ್ಟು 26.10 ಕೋಟಿ ರು. ವೆಚ್ಚದಲ್ಲಿಹೊಸದಾಗಿ ಕೈಗಾರಿಕಾ ವಸಾಹತುಗಳನ್ನುನಿರ್ಮಿಸುವ ಪ್ರಸ್ತಾವನೆಗೆ ಕ್ಯಾಬಿನೆಟ್‌ ಆಡಳಿತಾತ್ಮಕ ಅನುಮೋದನೆ ನೀಡಲಾಗಿದೆ.

ಆಯವ್ಯಯದಲ್ಲಿ ಘೋಷಣೆ ಮಾಡಿದ್ದಂತೆ ರಾಜ್ಯ ಸಣ್ಣ ಕೈಗಾರಿಕೆಗಳ ಅಭಿವೃದ್ಧಿ ನಿಗಮದ ಸಂಪನ್ಮೂಲದಿಂದ ಈ ವಸಾಹತುಗಳ ನಿರ್ಮಾಣವಾಗಲಿದ್ದು, ಸ್ಥಳೀಯ ಕೈಗಾರಿಕೋದ್ಯಮಿಗಳು ಸಣ್ಣ ಕೈಗಾರಿಕೆಗಳನ್ನು ಪ್ರಾರಂಭಿಸಲು ಹಾಗೂ ಸ್ಟಾರ್ಟಪ್‌ಗಳಿಗೆ ಉತ್ತೇಜನ ನೀಡುವುದು ಈ ತೀರ್ಮಾನದ ಉದ್ದೇಶವಾಗಿದೆ.

ರೈಲ್ವೆ ಬ್ಯಾರಿಕೇಡ್‌ ನಿರ್ಮಾಣ:

ಮಲೆ ಮಹದೇಶ್ವರ ವನ್ಯಜೀವಿ ವಲಯದಲ್ಲಿಪಿ.ಜಿ.ಪಾಳ್ಯದಿಂದ ಕುಡುವಲೆ ಕ್ರಾಸ್‌ವರೆಗೆ ಒಟ್ಟು 10.60 ಕಿ.ಮೀ ಉದ್ದದ ರೈಲ್ವೆ ಬ್ಯಾರಿಕೇಡ್‌ ನಿರ್ಮಾಣ ಮಾಡುವ 16.83 ಕೋಟಿ ರು. ವೆಚ್ಚದ ಪ್ರಸ್ತಾವನೆಗೆ ಸಂಪುಟ ಅನುಮೋದನೆ ನೀಡಿತು.

ಈ ವನ್ಯಜೀವಿಧಾಮ ವಲಯದಲ್ಲಿಹೆಚ್ಚುತ್ತಿರುವ ಮಾನವ-ವನ್ಯಜೀವಿ ಸಂಘರ್ಷವನ್ನು ನಿಯಂತ್ರಿಸುವ ಉದ್ದೇಶದ 81.75 ಕೋಟಿ ರೂ ವೆಚ್ಚದ ಯೋಜನೆಯ ಭಾಗವಾಗಿ ಈ ರೈಲ್ವೆ ಬ್ಯಾರಿಕೇಡ್‌ ಅಳವಡಿಸುವ ಕಾಮಗಾರಿಯನ್ನು ಕೈಗೆತ್ತಿಕೊಳ್ಳಲಾಗುತ್ತಿದೆ ಎಂದು ಸಚಿವ ಈಶ್ವರ್ ಖಂಡ್ರೆ ತಿಳಿಸಿದರು.

ಸುದ್ದಿಗೋಷ್ಠಿ ನಡೆಸಲು ಮರೆತ ಸರ್ಕಾರ

ಸಚಿವ ಸಂಪುಟ ಸಭೆ ಬಳಿಕ ಸಂಪುಟ ತೀರ್ಮಾನಗಳ ಕುರಿತು ಮಾಹಿತಿ ನೀಡಬೇಕಿದ್ದ ಸರ್ಕಾರ ಸುದ್ದಿಗೋಷ್ಠಿ ನಡೆಸುವುದನ್ನೇ ಮರೆತ ಘಟನೆ ಗುರುವಾರ ನಡೆದಿದೆ. ಸಂಪುಟ ಸಭೆ ಬಳಿಕ ಸುದ್ದಿಗೋಷ್ಠಿ ನಡೆಸಬೇಕಾದ ಉಪಮುಖ್ಯಮಂತ್ರಿ ಹಾಗೂ ಸಂಸದೀಯ ವ್ಯವಹಾರಗಳ ಸಚಿವರಾದ ಡಾ.ಜಿ.ಪರಮೇಶ್ವರ್‌ ಅವರು ಅನಾರೋಗ್ಯದಿಂದಾಗಿ ಬೇಗನೆ ಹೊರಟು ಹೋದರು.

ಇನ್ನು ಪರಮೇಶ್ವರ್‌ ಅವರ ಅನುಪಸ್ಥಿತಿಯಲ್ಲಿ ಕಳೆದ ಸಚಿವ ಸಂಪುಟದಲ್ಲಿ ಸುದ್ದಿಗೋಷ್ಠಿ ನಡೆಸಿದ್ದ ಕೃಷ್ಣಬೈರೇಗೌಡ ಅವರು ತಮ್ಮ ಜವಾಬ್ದಾರಿಯಲ್ಲ ಎಂದು ಹೊರಟುಬಿಟ್ಟರು. ಈ ಬಗ್ಗೆ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‌ ಅವರಿಗೆ ಮಾಹಿತಿಯನ್ನೇ ನೀಡಿರಲಿಲ್ಲ. ಸಂಪುಟ ಸಭೆ ಮುಗಿದು ಒಂದು ತಾಸಿಗೂ ಹೆಚ್ಚು ಸಮಯ ಕಳೆದರೂ ಸುದ್ದಿಗೋಷ್ಠಿ ನಡೆಸಬೇಕಾಗಿದ್ದ ಸಮಿತಿ ಕೊಠಡಿಗೆ ಯಾವೊಬ್ಬ ಸಚಿವರೂ ಆಗಮಿಸಲಿಲ್ಲ. ಬಳಿಕ ಮುಖ್ಯಮಂತ್ರಿ ಅವರಿಗೆ ವಿಷಯ ತಲುಪಿಸಿದ್ದರಿಂದ ತರಾತುರಿಯಲ್ಲಿ ಸಚಿವ ಈಶ್ವರ್‌ ಖಂಡ್ರೆ ಅವರನ್ನು ಸುದ್ದಿಗೋಷ್ಠಿ ನಡೆಸಲು ಕಳುಹಿಸಿದರು ಎಂದು ತಿಳಿದುಬಂದಿದೆ.

ಸರ್ಕಾರದ ಖಜಾನೆಯಲ್ಲಿ ದುಡ್ಡಿಲ್ಲ ಅಂದ್ರೆ, ಶಾಸಕರು-ಸಚಿವರು ಸಂಬಳ ತೆಗೆದುಕೊಳ್ಳೋದು ಬಿಡಲಿ: ದರ ಏರಿಕೆಗೆ ಜನಾಕ್ರೋಶ

Santosh Naik — Fri, 06 Nov 2026 10:30:33 +0530

ಬೆಂಗಳೂರು (ನ.6): ರಾಜಧಾನಿ ಬೆಂಗಳೂರಿನಲ್ಲಿ ಬಿಎಂಟಿಸಿ (BMTC) ಬಸ್ ದರಗಳನ್ನು ಏರಿಕೆ ಮಾಡಿದ ಬೆನ್ನಲ್ಲೇ, ಸಾರ್ವಜನಿಕ ಸಾರಿಗೆಯ ದರ ವ್ಯವಸ್ಥೆಯಲ್ಲಿಆತಂಕಕಾರಿ ವ್ಯತ್ಯಾಸ ಬೆಳಕಿಗೆ ಬಂದಿದೆ. ದೇಶದಲ್ಲೇ ಅತ್ಯಂತ ದುಬಾರಿ ರೈಲು ಆಧಾರಿತ ಸಾರಿಗೆ ವ್ಯವಸ್ಥೆ ಎಂದು ಹೆಸರು ಪಡೆದಿರುವ 'ನಮ್ಮ ಮೆಟ್ರೋ' (Namma Metro) ಪ್ರಯಾಣಕ್ಕಿಂತಲೂ, ರಸ್ತೆಯಲ್ಲಿ ನಿಧಾನವಾಗಿ ಸಾಗುವ ಸಾಮಾನ್ಯ ಬಿಎಂಟಿಸಿ ಬಸ್‌ಗಳ ಪ್ರಯಾಣವೇ ಇದೀಗ ದುಬಾರಿಯಾಗಿದೆ. ಬಿಎಂಟಿಸಿ ಇತ್ತೀಚೆಗೆ ಕೈಗೊಂಡಿರುವ ದರ ಏರಿಕೆಯಿಂದಾಗಿ ನಗರದ ನಿತ್ಯ ಪ್ರಯಾಣಿಕರು ತೀವ್ರ ಅಸಮಾಧಾನಗೊಂಡಿದ್ದಾರೆ. ವೇಗವಾಗಿ ಗುರಿ ತಲುಪಿಸುವ ನಮ್ಮ ಮೆಟ್ರೋಗಿಂತ ಬಿಎಂಟಿಸಿ ಬಸ್‌ಗಳಲ್ಲಿ ಪ್ರಯಾಣಿಸಲು ಹೆಚ್ಚಿನ ದರ ತೆರಬೇಕಾಗಿರುವುದು ಸಾರಿಗೆ ತಜ್ಞರು ಹಾಗೂ ಪ್ರಯಾಣಿಕರ ಅಚ್ಚರಿಗೆ ಕಾರಣವಾಗಿದೆ.

ಮೆಟ್ರೋ ವರ್ಸಸ್ ಬಿಎಂಟಿಸಿ ದರಗಳ ಭಾರಿ ವ್ಯತ್ಯಾಸ

ದಿನನಿತ್ಯದ ಪ್ರಯಾಣದ ಮಾರ್ಗಗಳನ್ನು ಹೋಲಿಸಿ ನೋಡಿದರೆ ದರ ವ್ಯತ್ಯಾಸ ಸ್ಪಷ್ಟವಾಗಿ ಗೋಚರಿಸುತ್ತದೆ. ಬೆನ್ನಿಗಾನಹಳ್ಳಿ (ಟಿನ್ ಫ್ಯಾಕ್ಟರಿ) ಸ್ಥಳದಿಂದ ಇಂದಿರಾನಗರಕ್ಕೆ ನಮ್ಮ ಮೆಟ್ರೋದಲ್ಲಿ ಪ್ರಯಾಣಕ್ಕೆ ತಗುಲುವ ವೆಚ್ಚ ಕೇವಲ ₹20 ಹಾಗೂ ಪ್ರಯಾಣದ ಅವಧಿ ಕೇವಲ 8 ನಿಮಿಷ. ಆದರೆ, ಇದೇ ಮಾರ್ಗದಲ್ಲಿ ಬಿಎಂಟಿಸಿ ನಾನ್-ಎಸಿ ಬಸ್‌ನಲ್ಲಿ ಪ್ರಯಾಣಿಸಿದರೆ ₹25 ಟಿಕೆಟ್ ದರ ನೀಡಬೇಕು ಮತ್ತು ಸಮಯ ಮೆಟ್ರೋಗಿಂತ ಮೂರು ಪಟ್ಟು ಹೆಚ್ಚು ತಗುಲುತ್ತದೆ. ಇದೇ ರೀತಿ ಜೆಪಿ ನಗರದಿಂದ ಲಾಲ್‌ಬಾಗ್‌ಗೆ ಬಿಎಂಟಿಸಿ ಬಸ್‌ನಲ್ಲಿ ಪ್ರಯಾಣಕ್ಕೆ ₹35 ವೆಚ್ಚವಾಗುತ್ತಿದ್ದರೆ, ನಮ್ಮ ಮೆಟ್ರೋದಲ್ಲಿ ಪ್ರಯಾಣದ ದರ ಕೇವಲ ₹25 ಆಗಿದೆ.

ಸಾರ್ವಜನಿಕ ಸಾರಿಗೆಯ ಉದ್ದೇಶಕ್ಕೇ ಧಕ್ಕೆ: ಪ್ರಯಾಣಿಕರ ಆಕ್ರೋಶ

ದರ ಏರಿಕೆಯ ಪರಿಣಾಮದ ಕುರಿತು ಪ್ರಯಾಣಿಕ ಕೃಷ್ಣ ಪ್ರಸಾದ್ ಎಂಬುವರು ಮಾತನಾಡಿ, "ಬಿಎಂಟಿಸಿ ಎಂಬುದು ಸಾಮಾನ್ಯ ಜನರ ಸಾರಿಗೆಯಾಗಬೇಕಿತ್ತು. ಆದರೆ ದೇಶದಲ್ಲೇ ಅತ್ಯಂತ ದುಬಾರಿ ಎನ್ನಲಾದ ಸಾರಿಗೆ ವ್ಯವಸ್ಥೆಗೆ (ಮೆಟ್ರೋ) ಸಮಾನವಾಗಿ ಬಿಎಂಟಿಸಿ ದರಗಳು ಬಂದು ನಿಂತಿವೆ. ಬೆಂಗಳೂರಿನಲ್ಲಿ ಟ್ರಾಫಿಕ್ ಕಡಿಮೆ ಮಾಡಲು ಜನರನ್ನು ಸಾರ್ವಜನಿಕ ಸಾರಿಗೆಯತ್ತ ಸೆಳೆಯುವುದು ಸರ್ಕಾರದ ಉದ್ದೇಶವಾಗಿತ್ತು. ಆದರೆ ಇಂತಹ ಭಾರಿ ದರ ಏರಿಕೆಯಿಂದ ಜನರು ಮರಳಿ ತಮ್ಮ ಸ್ವಂತ ದ್ವಿಚಕ್ರ ವಾಹನಗಳ ಬಳಕೆಗೆ ಮುಂದಾಗಲಿದ್ದಾರೆ" ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.

ಮೆಜೆಸ್ಟಿಕ್‌ನಲ್ಲಿ ಪ್ರಯಾಣಿಕ ರಾಘವೇಂದ್ರ ಹೆಚ್. ಮಾತನಾಡಿ, ಈಗಿನ ಸ್ಥಿತಿಯಲ್ಲಿ ಬಿಎಂಟಿಸಿಗಿಂತ ಮೆಟ್ರೋ ಎಲ್ಲ ರೀತಿಯಲ್ಲೂ ಮೇಲು. ರಸ್ತೆಗಳು ಕೆಟ್ಟಿವೆ, ಬಸ್‌ಗಳ ಸ್ಥಿತಿ ಹಿಂದಿನಂತಿಲ್ಲ, ಮಾಲಿನ್ಯವೂ ಹೆಚ್ಚಿದೆ. ಮುಂದಿನ ದಿನಗಳಲ್ಲಿ ಎಲ್ಲಾ ಮೆಟ್ರೋ ಲೈನ್‌ಗಳು ಪೂರ್ಣಗೊಂಡು ಕೊನೆಯ ಹಂತದ ಸಂಪರ್ಕ (Last-mile connectivity) ಸರಿಹೋದರೆ, ರಸ್ತೆ ಸಾರಿಗೆ ನಿಗಮಗಳು ಮತ್ತಷ್ಟು ಭಾರಿ ನಷ್ಟಕ್ಕೆ ಸಿಲುಕುವುದು ಖಚಿತ ಎಂದಿದ್ದಾರೆ.

ಬಸ್ ಕಂಡಕ್ಟರ್‌ಗಳ ಜೊತೆ ಪ್ರಯಾಣಿಕರ ಜಗಳ

ಮೆಜೆಸ್ಟಿಕ್‌ನಲ್ಲಿ ಕೆಎಸ್‌ಆರ್‌ಟಿಸಿ (KSRTC) ಬಸ್ ಏರುವ ಪ್ರಯಾಣಿಕರು, ತಾವು ಗೆಲ್ಲಿಸಿದ ಸರ್ಕಾರವೇ ಬಡವರ ಮೇಲೆ ಈ ರೀತಿ ದರ ಹೇರಿಕೆ ಮಾಡಿ ದೌರ್ಜನ್ಯ ಎಸಗುತ್ತಿದೆ ಎಂದು ಆಕ್ರೋಶ ಹೊರಹಾಕಿದ್ದಾರೆ. ಕೆಎಸ್‌ಆರ್‌ಟಿಸಿ ಬಸ್ ಕಂಡಕ್ಟರ್ ಪಿ.ಎಸ್. ಬೀರೇಂದ್ರ ಕುಮಾರ್ ತಮ್ಮ ಅನುಭವ ಹಂಚಿಕೊಂಡು, ಪ್ರಯಾಣಿಕರು ಟಿಕೆಟ್ ದರ ವ್ಯತ್ಯಾಸವನ್ನು ನೋಡಿ ತೀವ್ರ ಆಘಾತಗೊಂಡಿದ್ದಾರೆ. ಬಸ್ ಏರುತ್ತಿದ್ದಂತೆ ನಮ್ಮ ಜೊತೆ ಜಗಳಕ್ಕೆ ಇಳಿಯುತ್ತಿದ್ದಾರೆ, ದರದಲ್ಲಿ ಇಷ್ಟೊಂದು ವ್ಯತ್ಯಾಸವೇಕೆ ಎಂದು ಪ್ರಶ್ನಿಸುತ್ತಿದ್ದಾರೆ. ಮುಂಬರುವ ಕೆಲ ದಿನಗಳ ಕಾಲ ನಾವು ಪ್ರಯಾಣಿಕರ ಆಕ್ರೋಶವನ್ನು ಎದುರಿಸಬೇಕಾಗಿದೆ ಎಂದು ಅಳಲು ತೋಡಿಕೊಂಡಿದ್ದಾರೆ.

ಶಕ್ತಿ ಯೋಜನೆಯ ನಷ್ಟವನ್ನು ಮಧ್ಯಮ ವರ್ಗದ ಮೇಲೆ ಹೊರಿಸಲಾಗುತ್ತಿದೆ

ಸರ್ಕಾರಕ್ಕೆ ದರ ಹೆಚ್ಚಳ ಮಾಡುವುದು ಅನಿವಾರ್ಯವೇ ಆಗಿದ್ದರೂ, ಸಾರ್ವಜನಿಕರ ಹಿತದೃಷ್ಟಿಯಿಂದ ಸಣ್ಣ ಮಟ್ಟದ ಏರಿಕೆ ಮಾಡಬೇಕಿತ್ತು ಎಂಬುದು ಬಹುತೇಕರ ಅಭಿಪ್ರಾಯವಾಗಿದೆ. ಮಧುಗಿರಿಯಿಂದ ಬೆಂಗಳೂರಿಗೆ ನಿತ್ಯ ಪ್ರಯಾಣಿಸುವ ಗಿರೀಶ್ ಎಂಬ ಪ್ರಯಾಣಿಕರು ಸರ್ಕಾರದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿ, 'ಇದು ಯಾವುದೇ ಸರ್ಕಾರ ಮಾಡಿದ ಅತ್ಯಂತ ಕೆಟ್ಟ ದರ ಏರಿಕೆ. ರಾಜ್ಯದ ಯಾವೊಬ್ಬ ಮಹಿಳೆಯೂ 'ಶಕ್ತಿ ಯೋಜನೆ' (Shakti Scheme) ಬೇಕು ಎಂದು ಕೇಳಿರಲಿಲ್ಲ. ಸರ್ಕಾರದ ಬಳಿ ಹಣವಿಲ್ಲದಿದ್ದರೆ ಸಚಿವರು ತಮ್ಮ ವೇತನದಲ್ಲಿ ಕಡಿತ ಮಾಡಿಕೊಳ್ಳುತ್ತಿದ್ದಾರೆಯೇ ಅಥವಾ ಪ್ರಯಾಣಕ್ಕೆ ಹಣ ನೀಡುತ್ತಿದ್ದಾರೆಯೇ? ಸರ್ಕಾರದ ಈ ಎಲ್ಲಾ ಉಚಿತ ಯೋಜನೆಗಳ ನಷ್ಟದ ಹೊರೆಯನ್ನು ಕೇವಲ ಮಧ್ಯಮ ವರ್ಗದ ಜನರ ಮೇಲೆ ಹೊರಿಸಲಾಗುತ್ತಿದೆ' ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಬಿಎಂಟಿಸಿ ಹಾಗೂ ಕೆಎಸ್‌ಆರ್‌ಟಿಸಿ ದರ ಏರಿಕೆಯು ಸಾರ್ವಜನಿಕರಲ್ಲಿ ತೀವ್ರ ಅಸಮಾಧಾನ ಮೂಡಿಸಿದ್ದು, ಜನರು ಆಟೋ ಹಾಗೂ ಸ್ವಂತ ವಾಹನಗಳತ್ತ ಮುಖ ಮಾಡುತ್ತಿರುವುದರಿಂದ ಸಾರಿಗೆ ನಿಗಮಗಳಿಗೆ ಪ್ರಯಾಣಿಕರ ಸಂಖ್ಯೆ ಕುಸಿಯುವ ಭೀತಿ ಎದುರಾಗಿದೆ.

ಕನ್ನಡದ ಖ್ಯಾತ ವಿಮರ್ಶಕ ಕೆವಿ ನಾರಾಯಣ ನಿಧನ

Santosh Naik — Fri, 06 Nov 2026 10:04:51 +0530

ಬೆಂಗಳೂರು (ನ.6): ಕನ್ನಡ ಸಾಹಿತ್ಯ, ಭಾಷಾವಿಜ್ಞಾನ ಹಾಗೂ ವಿಮರ್ಶಾ ಲೋಕಕ್ಕೆ ಭಾರಿ ಆಘಾತ ಎದುರಾಗಿದೆ. ಕನ್ನಡದ ಹಿರಿಯ ಭಾಷಾವಿಜ್ಞಾನಿ, ಪ್ರಖ್ಯಾತ ಸಾಹಿತ್ಯ ವಿಮರ್ಶಕ ಹಾಗೂ ಸಾಹಿತ್ಯ ಲೋಕದಲ್ಲಿ 'ಕೆವಿಎನ್' ಎಂದೇ ಚಿರಪರಿಚಿತರಾಗಿದ್ದ ಪ್ರೊಫೆಸರ್ ಕೆ.ವಿ. ನಾರಾಯಣ್ ಅವರು ಬೆಂಗಳೂರಿನಲ್ಲಿ ನಿಧನರಾಗಿದ್ದಾರೆ. ಬೆಂಗಳೂರಿನ ಯಲಹಂಕದಲ್ಲಿ ವಾಸವಿದ್ದ ಪ್ರೊ. ಕಂಪಲಾಪುರ ವೀರಣ್ಣ ನಾರಾಯಣ್ ಅವರ ಆರೋಗ್ಯದಲ್ಲಿ ಗುರುವಾರ ತಡರಾತ್ರಿ ದಿಢೀರ್ ಏರುಪೇರಾಗಿತ್ತು. ಕೂಡಲೇ ಅವರನ್ನು ಸಮೀಪದ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಅವರು ಕೊನೆಯುಸಿರೆಳೆದಿದ್ದಾರೆ. ಮೃತರು ಪತ್ನಿ ಎಚ್.ಎಸ್. ಶ್ರೀಮತಿ, ಓರ್ವ ಪುತ್ರ ಹಾಗೂ ಪುತ್ರಿಯನ್ನು ಅಗಲಿದ್ದಾರೆ.

ಪಿರಿಯಾಪಟ್ಟಣದಿಂದ ಹಂಪಿ ವಿವಿವರೆಗೆ

ಮೈಸೂರು ಜಿಲ್ಲೆಯ ಪಿರಿಯಾಪಟ್ಟಣ ತಾಲೂಕಿನ ಕಂಪಲಾಪುರದಲ್ಲಿ 1948 ರಲ್ಲಿ ಜನಿಸಿದ ನಾರಾಯಣ ಅವರು, ಆರಂಭಿಕ ಶಿಕ್ಷಣದ ಬಳಿಕ ಬೆಂಗಳೂರು ವಿಶ್ವವಿದ್ಯಾಲಯದಲ್ಲಿ ಕನ್ನಡ ವಿಷಯದಲ್ಲಿ ಸ್ನಾತಕೋತ್ತರ (MA) ಪದವಿ ಪಡೆದರು. ರಾಷ್ಟ್ರಕವಿ ಜಿ.ಎಸ್. ಶಿವರುದ್ರಪ್ಪ ಅವರ ಮಾರ್ಗದರ್ಶನದಲ್ಲಿ ಪಿಎಚ್.ಡಿ ಪದವಿ ಪಡೆದ ಅವರು ಕನ್ನಡ ಭಾಷೆಯ ಬೇರು ಮಟ್ಟದ ಸಂಶೋಧನೆಯಲ್ಲಿ ತೊಡಗಿಸಿಕೊಂಡರು. ಬೆಂಗಳೂರಿನ ಪ್ರಸಿದ್ಧ ನ್ಯಾಷನಲ್ ಕಾಲೇಜಿನಲ್ಲಿ ಉಪನ್ಯಾಸಕರಾಗಿ ತಮ್ಮ ಶೈಕ್ಷಣಿಕ ವೃತ್ತಿಜೀವನವನ್ನು ಆರಂಭಿಸಿದರು.

ತದನಂತರ ಬೆಂಗಳೂರು ವಿಶ್ವವಿದ್ಯಾಲಯದ ಕನ್ನಡ ಅಧ್ಯಯನ ಕೇಂದ್ರದಲ್ಲಿ ಭಾಷಾ ವಿಜ್ಞಾನ (Linguistics) ಮತ್ತು ಸಾಹಿತ್ಯ ಮೀಮಾಂಸೆಯನ್ನು ಬೋಧಿಸುವ ಮೂಲಕ ನೂರಾರು ವಿದ್ಯಾರ್ಥಿಗಳಿಗೆ ಮಾರ್ಗದರ್ಶಕರಾದರು. ಹಂಪಿಯ ಕನ್ನಡ ವಿಶ್ವವಿದ್ಯಾಲಯದಲ್ಲಿ ಭಾಷಾ ನಿಕಾಯದ ಡೀನ್, ಕುಲಸಚಿವ (Registrar) ಹಾಗೂ ಪ್ರಭಾರ ಕುಲಪತಿಯಾಗಿ ಯಶಸ್ವಿಯಾಗಿ ಆಡಳಿತಾತ್ಮಕ ಮತ್ತು ಶೈಕ್ಷಣಿಕ ಸೇವೆ ಸಲ್ಲಿಸಿದರು.

ಭಾಷಾ ಸೇವೆ ಹಾಗೂ 'ಕರ್ನಾಟಕ ಓದು' ಯೋಜನೆ

ಕರ್ನಾಟಕ ಸರ್ಕಾರದ 'ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರ'ದ ಅಧ್ಯಕ್ಷರಾಗಿ ಕಾರ್ಯನಿರ್ವಹಿಸಿದ್ದ ಪ್ರೊ. ಕೆ.ವಿ. ನಾರಾಯಣ್ ಅವರು, ಕನ್ನಡ ಭಾಷಾ ಚಿಂತನೆಯನ್ನು ಹೊಸ ದೃಷ್ಟಿಕೋನದಿಂದ ನೋಡಿದವರು. ಭಾಷೆ, ಸಾಹಿತ್ಯ, ಬೋಧನೆ ಮತ್ತು ವಿಜ್ಞಾನ ವಲಯಗಳಲ್ಲಿ ಆಳವಾದ ಆಸಕ್ತಿ ಹೊಂದಿದ್ದ ಅವರು, ಕನ್ನಡವನ್ನು ಜ್ಞಾನ ಭಾಷೆಯನ್ನಾಗಿ ಬೆಳೆಸಲು 'ಕರ್ನಾಟಕ ಓದು' (Karnataka Odu) ಎಂಬ ಕಾರ್ಯಾಗಾರ ಸರಣಿಯನ್ನು ಆರಂಭಿಸಿ, ಭಾಷಾ ಸಂಶೋಧನೆಗೆ ಹೊಸ ಚೈತನ್ಯ ನೀಡಿದ್ದರು.

ಪ್ರಶಸ್ತಿ ಮತ್ತು ಗೌರವಗಳು

ಕನ್ನಡ ಭಾಷೆ ಮತ್ತು ಸಾಹಿತ್ಯಕ್ಕೆ ನೀಡಿದ ಜೀವಮಾನದ ಕೊಡುಗೆಗಾಗಿ ಅವರಿಗೆ ಹಲವಾರು ಗೌರವಗಳು ಒಲಿದುಬಂದಿದ್ದವು. ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, ಕರ್ನಾಟಕ ಸಾಹಿತ್ಯ ಅಕಾಡೆಮಿ ಗೌರವ ಪ್ರಶಸ್ತಿ, ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿಗೆ ಇವರು ಭಾಜನರಾಗಿದ್ದರು. ಕೆ.ವಿ. ನಾರಾಯಣ್ ಅವರ ಅಗಲಿಕೆಗೆ ರಾಜ್ಯದ ಸಾಹಿತಿಗಳು, ಸಂಶೋಧಕರು, ಭಾಷಾತಜ್ಞರು ಹಾಗೂ ಅಪಾರ ಭಕ್ತ-ವಿದ್ಯಾರ್ಥಿ ವೃಂದ ತೀವ್ರ ಶೋಕ ವ್ಯಕ್ತಪಡಿಸಿದೆ.

ಬಳಸಿದ ಕಪ್‌ನಲ್ಲೇ ಪೆಪ್ಸಿ ಸರ್ವ್‌ ಮಾಡಿದ ಬೆಂಗಳೂರಿನ ಪಿವಿಆರ್ ತಿನಿಸು ಮಳಿಗೆ, ವೈರಲ್ ಬಳಿಕ ಫೋರಂ ಮಾಲ್ ಕ್ಷಮೆ

Gowthami K — Fri, 06 Nov 2026 09:54:01 +0530

ಬೆಂಗಳೂರು: ಏಕ ಬಳಕೆಯ ಬಳಸಿದ ಪ್ಲಾಸ್ಟಿಕ್ ಕಪ್‌ನಲ್ಲಿ ಗ್ರಾಹಕರಿಗೆ ತಂಪು ಪಾನೀಯ ಪೆಪ್ಸಿ ಮಾರಾಟ ಮಾಡಿದ ಆರೋಪ ನಗರದ ಕನಕಪುರ ರಸ್ತೆಯಲ್ಲಿರುವ ಫೋರಂ ಸೌತ್ ಬೆಂಗಳೂರು ಮಾಲ್‌ನಲ್ಲಿರುವ ಪಿವಿಆರ್ ವಿರುದ್ಧ ಕೇಳಿ ಬಂದಿದೆ.

ಈ ಸಂಬಂಧ ಗ್ರಾಹಕರೊಬ್ಬರು ಇನ್‌ಸ್ಟಾಗ್ರಾಂನಲ್ಲಿ ವಿಡಿಯೋ ಪೋಸ್ಟ್ ಮಾಡಿದ್ದು, ವೈರಲ್ ಆಗಿದೆ. ಈ ಕುರಿತು ವ್ಯಾಪಕ ಚರ್ಚೆಗಳು ನಡೆದಿದ್ದು ಪ್ರತಿಷ್ಠಿತ ವ್ಯಾಪಾರ ಸ್ಥಳಗಳಲ್ಲೇ ಗ್ರಾಹಕರನ್ನು ಈ ರೀತಿ ವಂಚಿಸಿದರೆ ಯಾರನ್ನು ನಂಬಬೇಕು? ಎಂದು ಅನೇಕರು ಪ್ರಶ್ನಿಸಿದ್ದಾರೆ. ಮಿಥಿಲ್ ಕುಮಾರ್ ಎಂಬುವರು ವಿಡಿಯೋ ಪೋಸ್ಟ್ ಮಾಡಿದ್ದು, ಈ ಬಗ್ಗೆ ಜನರು ಸಾರ್ವಜನಿಕರು ಎಚ್ಚೆತ್ತುಕೊಳ್ಳಬೇಕು ಎಂದು ಹೇಳಿದ್ದಾರೆ.

ಕ್ಷಮೆ ಕೇಳಿರ ಫೋರಂ: ನಿಮಗೆ ಆಗಿರುವ ತೊಂದರೆಗೆ ನಾವು ಕ್ಷಮೆಯಾಚಿಸುತ್ತೇವೆ. ಘಟನೆಯನ್ನು ಗಂಭೀರವಾಗಿ ಪರಿಗಣಿಸಲಾಗಿದ್ದು, ಈ ಕುರಿತು ಪಿವಿಆರ್ ತಂಡ ವಿಚಾರಣೆ ನಡೆಸುತ್ತಿದೆ. ಮುಂದೆ ಈ ರೀತಿ ಆಗದಂತೆ ಸೂಕ್ತ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಫೋರಂ ಸೌತ್ ಬೆಂಗಳೂರು ಹೇಳಿದೆ.

ಪಿವಿಆರ್ ಸಿನಿಮಾಸ್‌ಗೆ 75,000 ರು.ದಂಡ!

ಕಳೆದ ಸೆಪ್ಟೆಂಬರ್‌ ನಲ್ಲಿ ಹೊಸೂರು ಮುಖ್ಯ ರಸ್ತೆಯ ಪ್ರತಿಷ್ಠಿತ ‘ಪಿವಿಆರ್ ಸಿನಿಮಾಸ್’ ವಾಣಿಜ್ಯ ಸಂಸ್ಥೆಯಲ್ಲಿ ಅಸಮರ್ಪಕ ತ್ಯಾಜ್ಯ ನಿರ್ವಹಣೆ ಮಾಡಿ ನಿಯಮ ಉಲ್ಲಂಘಿಸಿದ ಪಿವಿಆರ್ ಸಿನಿಮಾಸ್‌ಗೆ ಪಾಲಿಕೆ ಅಧಿಕಾರಿಗಳು 75,000 ರು.ದಂಡ ವಿಧಿಸಿದ್ದರು.

ಕಸವನ್ನು ಮೂಲದಲ್ಲೇ ಸಮರ್ಪಕವಾಗಿ ವಿಂಗಡಿಸದೆ ಮಿಶ್ರಣ ಮಾಡಿದ್ದಕ್ಕಾಗಿ 50 ಸಾವಿರ ಹಾಗೂ ನಿಷೇಧಿತ ಏಕಬಳಕೆಯ ಪ್ಲಾಸ್ಟಿಕ್ ಬಳಕೆಗೆ 25 ಸಾವಿರ ರೂ. ದಂಡ ವಿಧಿಸಿದ್ದರು.

ಪೋರಂ ಮಾಲ್ ಸಿಬ್ಬಂದಿಗೆ 50,839 ರೂ. ದಂಡ

ಉತ್ತರಹಳ್ಳಿ ಕನಕಪುರ ಮುಖ್ಯ ರಸ್ತೆ ಜಯನಗರ ಹೌಸಿಂಗ್ ಸೊಸೈಟಿ ಬಡಾವಣೆ ಶಾಪ್ ವೆಲ್ ಸೂಪರ್ ಮಾರ್ಕೆಟ್ ಹತ್ತಿರ ಒಳಚರಂಡಿ ಸಂಸ್ಕರಣ ತ್ಯಾಜ್ಯ ಸುರಿದಿರುವುದು ಕಂಡು ಬಂತು. ಸ್ಥಳೀಯರು ನೀಡಿದ ಮಾಹಿತಿ ಮೇರೆಗೆ ಹಾಗೂ ಈ ತ್ಯಾಜ್ಯವು ಪೋರಂ ಮಾಲ್‌ಗೆ ಸೇರಿದ್ದಾಗಿದೆ ಎಂದು ಮಾಲ್ ನ ಸಿಬ್ಬಂದಿ ಒಪ್ಪಿದ ಮೇರೆಗೆ 50,839 ರು. ಗಳ ದಂಡ ವಿಧಿಸಿ ವಸೂಲಿ ಮಾಡಲಾಗಿತ್ತು.

ವೈಜ್ಞಾನಿಕ ತ್ಯಾಜ್ಯ ವಿಲೇಗೆ ಅಧಿಕಾರಿಗಳ ಕಟ್ಟುನಿಟ್ಟಿನ ಸೂಚನೆ:

ದಂಡ ವಸೂಲಿ ಮಾಡಿದ ಅಧಿಕಾರಿಗಳು, ಮುಂದಿನ ದಿನಗಳಲ್ಲಿ ಕಡ್ಡಾಯವಾಗಿ ಹಸಿ ಮತ್ತು ಒಣ ಕಸವನ್ನು ಪ್ರತ್ಯೇಕವಾಗಿ ಸಂಗ್ರಹಿಸಿ ವೈಜ್ಞಾನಿಕವಾಗಿ ವಿಲೇವಾರಿ ಮಾಡಬೇಕು ಎಂದು ಚಿತ್ರಮಂದಿರದ ಆಡಳಿತ ಮಂಡಳಿಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಲಾಗಿತ್ತು.

ತುಂಗಭದ್ರಾ ನೀರು ಬಿಡದಿರುವುದೇ ಅಕ್ಕಿ ಬೆಲೆ ಹೆಚ್ಚಲು ಕಾರಣ, ಸೋನಾ ಮಸೂರಿ ಬೆಲೆ ಕೆಜಿಗೆ 150 ಆಗುವ ಆತಂಕ!

Kannadaprabha News — Fri, 06 Nov 2026 09:49:14 +0530

ಕನ್ನಡಪ್ರಭ ವಾರ್ತೆ ಬೆಂಗಳೂರು (ನ.6): ರಾಜ್ಯದಲ್ಲಿ ಒಂದೆಡೆ ಹಾಲು, ಮೊಸರು, ಬಸ್ ಪ್ರಯಾಣ ದರ ಹೆಚ್ಚುತ್ತಿದ್ದರೆ, ಮತ್ತೊಂದೆಡೆ ಅಕ್ಕಿಯ ಬೆಲೆ ದಿನದಿಂದ ದಿನಕ್ಕೆ ಗಗನಕ್ಕೆ ಏರುತ್ತಿದೆ. ಇದಕ್ಕೆ ಪ್ರಮುಖ ಕಾರಣ ತುಂಗಭದ್ರಾ ಅಣೆಕಟ್ಟೆಯಿಂದ ಭತ್ತದ ಬೆಳೆಗೆ ನೀರು ಬಿಡದೆ ಸರ್ಕಾರ ಕಳ್ಳಾಟ ನಡೆಸುತ್ತಿರುವುದೇ ಪರೋಕ್ಷ ಕಾರಣ ಎಂದು ವ್ಯಾಪಾರಿಗಳು ಆರೋಪಿಸಿದ್ದಾರೆ. ತುಂಗಭದ್ರಾ ನಾಲೆಯಲ್ಲಿ ಸದ್ಯದ ಸ್ಥಿತಿಯಲ್ಲಿ ನೀರು ತುಂಬಿದ್ದರೂ ಸರ್ಕಾರ ಭತ್ತದ ಬೆಳೆಗೆ ನೀರು ಬಿಡದೆ ಸ್ಥಗಿತಗೊಳಿಸಿದೆ. ಈ ಕಾರಣದಿಂದ ಕಳೆದ ವರ್ಷ ಬೆಳೆದ ಭತ್ತವನ್ನು ಶೇಖರಿಸಿರುವ ಅಕ್ಕಿ ಗಿರಣಿಗಳು ಹಾಗೂ ರೈತರು ಇರುವ ಭತ್ತವನ್ನೇ ಹೆಚ್ಚಿನ ಬೆಲೆಗೆ ಮಾರಾಟ ಮಾಡುತ್ತಿದ್ದಾರೆ. ಆದ್ದರಿಂದಲೇ ಅಕ್ಕಿ ಬೆಲೆ ಏರಿಕೆಗೆ ಮತ್ತೊಂದು ಕಾರಣವಾಗಿದೆ ಎಂದು ವ್ಯಾಪಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.

ಮೂರು ತಿಂಗಳ ಹಿಂದೆ 1 ಕೆಜಿಗೆ 40 ರುಪಾಯಿ ಇದ್ದ ಸೋನಾ ಮಸೂರಿ ಅಕ್ಕಿಗೆ ಪ್ರಸ್ತುತ 75 ರುಪಾಯಿ, ಆರ್ ಎನ್ ಆರ್ 80 ರುಪಾಯಿ, ಎಚ್ ಎಂಟಿ 85 ರುಪಾಯಿ, ಜೀರಾ 96 ರುಪಾಯಿಗೆ ಏರಿಕೆಯಾಗಿವೆ.

10 ತಿಂಗಳು ಅಕ್ಕಿ ಗಿರಣಿಗೆ ಬರಲ್ಲ

ಇದು ಶೇ.35ರಷ್ಟು ಏರಿಕೆಯಾಗಿದ್ದು, ಇನ್ನೂ 10 ತಿಂಗಳವರೆಗೆ ಈಗ ಇರುವ ಭತ್ತವನ್ನೇ ಮಾರಾಟ ಮಾಡುವುದರಿಂದ ಬೆಲೆ ಏರಿಕೆಗೆ ಕಾರಣವಾಗಿದೆ. ಇದೇ ಪರಿಸ್ಥಿತಿ ಮುಂದುವರಿದರೆ ಸೋನಾ ಮಸೂರಿ ಸೇರಿ ಇತರೆ ಅಕ್ಕಿಗಳ ಬೆಲೆ ಕೆಜಿಗೆ 150 ರುಪಾಯಿ ತಲುಪುವ ಆತಂಕ ಎದುರಾಗಿದೆ. ಬೆಂಗಳೂರಿನ ಯಶವಂತಪುರ ಹಾಗೂ ಹುಬ್ಬಳ್ಳಿ ಆರ್ ಎಂಸಿಗಳು ಪ್ರಮುಖ ಅಕ್ಕಿ ಸರಬರಾಜು ಮಾರುಕಟ್ಟೆಗಳಾಗಿವೆ. ಇಲ್ಲಿಗೆ ರಾಜ್ಯದ ಸಿಂಧನೂರು, ಕಾರಟಗಿ, ಗಂಗಾವತಿ, ದಾವಣಗೆರೆ, ಮಲೆಬೆನ್ನೂರು, ಸಿಂಧನೂರು, ಕೊಪ್ಪಳ ಸೇರಿದಂತೆ ವಿವಿಧ ಕಡೆಗಳಿಂದ ಬರುವ ಅಕ್ಕಿಯನ್ನು ಮಾರಾಟ ಮಾಡಲಾಗುತ್ತದೆ.

ಈ ಪ್ರದೇಶಗಳಲ್ಲಿ ಬೆಳೆಯುತ್ತಿದ್ದ ಭತ್ತದ ಬೆಳೆ ತುಂಗಭದ್ರಾ ಅಣೆಕಟ್ಟೆಯ ನೀರನ್ನು ಅವಲಂಬಿಸಿವೆ. ಕಳೆದ ಜೂನ್ ತಿಂಗಳಲ್ಲಿ ಈ ಭಾಗಗಳಲ್ಲಿ ಮಳೆ ಆಶ್ರಿತ ಭತ್ತದ ಬೆಳೆ ಬೆಳೆದಿದ್ದು, ಈಗಾಗಲೇ ಕಟಾವಿಗೆ ಬಂದಿದೆ. ಈಗ ಬಂದಿರುವ ಭತ್ತ ಮಾರುಕಟ್ಟೆಗೆ ಬಂದರೂ ಅದು ಪ್ರಸ್ತುತ ಬೇಡಿಕೆ ಈಡೇರಿಸಲು ಸಾಧ್ಯವಾಗುವುದಿಲ್ಲ.

ಮುಂದಿನ ಆರು ತಿಂಗಳು ಹಾಗೂ ಅದಾದ ನಂತರ ನಾಲ್ಕು ತಿಂಗಳು ಒಟ್ಟು 10 ತಿಂಗಳು ಭತ್ತ ಅಕ್ಕಿ ಗಿರಣಿಗಳಿಗೆ ಬರುವುದಿಲ್ಲ. ಆದ್ದರಿಂದ ಈಗ ಗೋದಾಮಿನಲ್ಲಿ ಇರುವ ಭತ್ತವನ್ನೇ ಅಕ್ಕಿ ಮಾಡಿ ಮಾರಾಟ ಮಾಡಬೇಕಾಗಿದೆ. ಆದ್ದರಿಂದಲೇ, ಅಕ್ಕಿಗಿರಣಿಗಳು ಬೆಲೆ ಏರಿಕೆ ಮಾಡಿವೆ ಎಂದು ಹುಬ್ಬಳ್ಳಿ ಎಪಿಎಂಸಿ ಆಹಾರ ಧಾನ್ಯ ವರ್ತಕರ ಸಂಘದ ಅಧ್ಯಕ್ಷ ಚನ್ನು ಹೊಸಮನಿ ಅಭಿಪ್ರಾಯಪಟ್ಟಿದ್ದಾರೆ.

ರಾಜ್ಯಕ್ಕೆ ಆಂಧ್ರಪ್ರದೇಶದಿಂದಲೂ ಅಕ್ಕಿ ಸರಬರಾಜು ಮಾಡಲಾಗುತ್ತಿದ್ದರೂ ಇಲ್ಲಿನ ಮಳೆ ಕೊರತೆ, ಭತ್ತದ ಬೆಳೆ ಬೆಳೆಯದೇ ಇರುವುದನ್ನು ಬಂಡವಾಳ ಮಾಡಿಕೊಂಡಿರುವ ಅಲ್ಲಿನ ಅಕ್ಕಿ ಸರಬರಾಜುದಾರರು ಬೆಲೆ ಏರಿಕೆ ಮಾಡುತ್ತಿದ್ದಾರೆ. ಖರೀದಿಸಬೇಕಾಗಿರುವುದು ರಾಜ್ಯದ ಜನರಿಗೆ ಅನಿವಾರ್ಯವಾಗಿದೆ ಎಂದು ಅವರು ವಿವರಿಸಿದರು.

ಅನ್ನಭಾಗ್ಯ ಅಕ್ಕಿ ಆಫ್ರಿಕಾಗೆ ರಫ್ತು ದೃಢ! ಮುಂಬೈ, ಗುಜರಾತ್‌ ಬಂದರು ಮೂಲಕ ರವಾನೆ, ಸಿಐಡಿ 4000 ಪುಟಗಳ ಚಾರ್ಜ್‌ಶೀಟ್‌

Gowthami K — Fri, 06 Nov 2026 09:18:01 +0530

ವರದಿ: ಆನಂದ್‌ ಎಂ. ಸೌದಿ

ಯಾದಗಿರಿ: ಬಡವರಿಗೆಂದು ಸರ್ಕಾರಗಳು ನೀಡುವ ಅನ್ನಭಾಗ್ಯ (ಪಡಿತರ) ಪೌಷ್ಟಿಕಾಂಶಯುಕ್ತ ಅಕ್ಕಿಯನ್ನು ಕಾಳಸಂತೆಯಲ್ಲಿ ಖರೀದಿಸಿ, ನಂತರ ಪಾಲಿಶ್‌ ಮಾಡಿ, ವಿವಿಧ ಬ್ರಾಂಡ್‌ಗಳ ಹೆಸರಲ್ಲಿ ಪ್ಯಾಕ್‌ ಮಾಡಿ ಮುಂಬೈ ಮೂಲದ ಕಂಪನಿಯ ಮೂಲಕ ಆಫ್ರಿಕಾ ಖಂಡಕ್ಕೆ ಸಾಗಿಸಲಾಗುತ್ತಿತ್ತು ಅನ್ನೋದು ಸಿಐಡಿ ತನಿಖೆಯಲ್ಲಿ ದೃಢಪಟ್ಟಿದೆ.

ಕಳೆದ ವರ್ಷ ಸೆ.6 ರಂದು ಯಾದಗಿರಿ ಜಿಲ್ಲೆಯ ಗುರುಮಠಕಲ್‌ನ ಶ್ರೀಲಕ್ಷ್ಮಿ ವೆಂಕಟೇಶ್ವರ ಹಾಗೂ ಶ್ರೀ ಲಕ್ಷ್ಮಿ ಬಾಲಾಜಿ ಇಂಡಸ್ಟ್ರೀಸ್‌ ರೈಸ್‌ಮಿಲ್‌ಗಳಲ್ಲಿ ಪತ್ತೆಯಾದ, 1.21 ಕೋಟಿ ರು. ಮೌಲ್ಯದ, 3,985 ಕ್ವಿಂಟಲ್‌ ಪಡಿತರ ಅಕ್ಕಿ ಅಕ್ರಮ ಸಂಗ್ರಹ ಪ್ರಕರಣದ ತನಿಖೆ ನಡೆಸಿದ ಸಿಐಡಿ, ಇದೀಗ ನ್ಯಾಯಾಲಯಕ್ಕೆ ಚಾರ್ಜ್‌ಶೀಟ್‌ ಸಲ್ಲಿಸಿದ್ದು, ಅದರಲ್ಲಿ ಪಡಿತರ ಅಕ್ಕಿ ವಿದೇಶಗಳಿಗೆ ಹೋಗುವ ಬಗ್ಗೆ ದೃಢಪಡಿಸಿದೆ.

2025ರ ಸೆ.4ರಂದು ಗುರುಮಠಕಲ್‌ನಲ್ಲಿ ಪತ್ತೆಯಾದ ಈ ಪ್ರಕರಣದ ತನಿಖೆಯನ್ನು ಅಂದಿನ ಸಿಎಂ ಸಿದ್ದರಾಮಯ್ಯ ಸಿಐಡಿಗೆ ವಹಿಸಿದ್ದರು. ತನಿಖಾಧಿಕಾರಿ ಅನಿಲ್‌ಕುಮಾರ್ ಈ ಪ್ರಕರಣದ ಪತ್ತೆ ನಡೆಸುತ್ತಿದ್ದಾಗ ಇದೇ ವ್ಯಾಪ್ತಿಯ ಮತ್ತೊಂದೆಡೆ ಮತ್ತೆ ಸುಮಾರು 43.79 ಲಕ್ಷ ರು.ಮೌಲ್ಯದ ಅಕ್ಕಿ, ಜೋಳ ಜೊತೆಗೆ ಶಾಲಾ ಮಕ್ಕಳ ಕ್ಷೀರಭಾಗ್ಯದ ಹಾಲಿನ ಪೌಡರ್‌ ದಾಸ್ತಾನು ಪತ್ತೆಯಾಗಿತ್ತು. ಮೊದಲ ಪ್ರಕರಣ ಸೇರಿ, ಈ ಬಗ್ಗೆ ದಾಖಲಾದ ಒಟ್ಟು 4 ದೂರು ದಾಖಲಾಗಿದ್ದವು.

ಈ 4 ಪ್ರಕರಣಗಳನ್ನು ತನಿಖೆ ನಡೆಸಿದ್ದ ಸಿಐಡಿ ಡಿಟೆಕ್ಟಿವ್‌ ಪೊಲೀಸ್‌ ಇನ್ಸ್‌ಪೆಕ್ಟರ್‌ ಹಾಗೂ ಪ್ರಕರಣದ ತನಿಖಾಧಿಕಾರಿ ಆಗಿರುವ ಜಿ. ಅನಿಲ್‌ ಕುಮಾರ್‌ ಹಾಗೂ ಸಹಾಯಕ ತನಿಖಾಧಿಕಾರಿ, ಎಎಸ್‌ಐ ಹರ್ಷ ಅವರ ತಂಡ, ಸತತ 1 ವರ್ಷ ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿ ಸೇರಿದಂತೆ ದೇಶದ ವಿವಿಧ ರಾಜ್ಯಗಳಿಗೆ ತೆರಳಿ, ತನಿಖೆ ನಡೆಸಿ ಯಾದಗಿರಿ ನ್ಯಾಯಾಲಯಕ್ಕೆ ಇದೇ ಅ.30 ರಂದು ಸುಮಾರು 4000 ಪುಟ ಚಾರ್ಜ್‌ಶೀಟ್‌ ಸಲ್ಲಿಸಿದ್ದಾರೆ.

ಎಲ್ಲರಿಗಿಂತ ಮೊದಲೇ ತಿಳಿಯುವುದು ಇಲ್ಲೇ!

ಅನ್ನಭಾಗ್ಯ ಅಕ್ಕಿ ಫಾರಿನ್‌ಗೆ ಕುರಿತು ಸೆ.8, 2025 ರಂದು ‘ಕನ್ನಡಪ್ರಭ’ ವರದಿ ಮಾಡಿತ್ತು.

ಸಿಐಡಿ ತನಿಖೆಯಲ್ಲಿ ದೃಢ

ಮುಂಬೈ ಮೂಲದ ಕಂಪನಿಯೊಂದು ಪಡಿತರ ಅಕ್ಕಿಯನ್ನು ಪಾಲಿಶ್ ಮಾಡಿದ ನಂತರ ಅಕ್ಕಿ ರಫ್ತು ವ್ಯವಹಾರದಲ್ಲಿ ನಿರತವಾಗಿರುವ ದೇಶದ ಕೆಲವು ಉತ್ತಮ ಸಂಸ್ಥೆಗಳಿಗೆ ಸರಬರಾಜು ಮಾಡಿದ್ದು, ಸದರಿ ಖರೀದಿ ಸಂಸ್ಥೆಗಳು ಪಾಲಿಶ್ ಮಾಡಲಾಗಿರುವ ಇದೇ ಅಕ್ಕಿಯನ್ನು (ಪಡಿತರ ಅಕ್ಕಿ ಎಂಬುದಾಗಿ ಅರಿವಿಲ್ಲದೆ) ತಮ್ಮದೇ ಆದ ಬ್ರಾಂಡ್‌ಗಳ ಹೆಸರಿನಲ್ಲಿ ಮುಂಬೈ ಮತ್ತು ಗುಜರಾತ್ ಬಂದರುಗಳ ಮೂಲಕ ಆಫ್ರಿಕಾ ಮೂಲದ ರವಾಂಡಾ, ಕಿಗಳ, ತಾಂಜೇನಿಯ ಮುಂತಾದ ವಿವಿಧ ದೇಶಗಳಿಗೆ ರಫ್ತು ಮಾಡಿರುವುದು ಸಿಐಡಿ ತನಿಖೆಯಲ್ಲಿ ತಿಳಿದುಬಂದಿದೆ. ಅಲ್ಲದೆ, ಪಡಿತರ ಅಕ್ಕಿಯನ್ನು ಕಾಳಸಂತೆಯಲ್ಲಿ ಖರೀದಿಸಿ ಅದನ್ನು ಪಾಲಿಶ್ ಮಾಡಿದ ನಂತರ, ರಾಜ್ಯದ ವಿವಿಧ ಜಿಲ್ಲೆಗಳು ಮಾತ್ರವಲ್ಲದೆ, ಮಹಾರಾಷ್ಟ್ರ, ಗುಜರಾತ್ ರಾಜ್ಯಗಳಿಗೆ ಸಹ ವಿವಿಧ ಬ್ರಾಂಡ್‌ಗಳ ಹೆಸರಿನಲ್ಲಿ ಮಾರಾಟ ಮಾಡಿರುವುದು ಸಿಐಡಿ ತನಿಖೆಯಲ್ಲಿ ದೃಢಪಟ್ಟಿರುತ್ತದೆ.

ಹೊಸನಗರದ ಹುಡುಗನ ಅಸಾಧಾರಣ ಸಾಧನೆ.. ಭಾರತದ ಯುವ EdTech ಉದ್ಯಮಿಯಾಗಿ ಬೆಳೆದ ಕನ್ನಡಿಗ ಸೂರಜ್ ಶೆಟ್ಟಿ!

Chandrashekar GS — Fri, 06 Nov 2026 09:12:36 +0530

ಹೊಸನಗರದಿಂದ ಬೆಂಗಳೂರಿನವರೆಗೆ: ಯುವ ಉದ್ಯಮಿ ಸೂರಜ್ ವಿಜಯ್ ಶೆಟ್ಟಿ ಅವರ ಯಶಸ್ಸಿನ ಪಯಣ

ಕರ್ನಾಟಕದ ಸಣ್ಣ ಪಟ್ಟಣವೊಂದರಿಂದ ಬೆಂಗಳೂರಿನ ಉದ್ಯಮ ಜಗತ್ತಿನತ್ತ ಹೆಜ್ಜೆಯಿಟ್ಟು, ತಂತ್ರಜ್ಞಾನ ಶಿಕ್ಷಣ ಕ್ಷೇತ್ರದಲ್ಲಿ ತಮ್ಮದೇ ಆದ ಗುರುತು ಮೂಡಿಸಲು ಪ್ರಯತ್ನಿಸುತ್ತಿರುವ ಯುವ ಉದ್ಯಮಿ ಸೂರಜ್ ವಿಜಯ್ ಶೆಟ್ಟಿ ಅವರ ಪಯಣ ಗಮನ ಸೆಳೆಯುತ್ತದೆ. ಎಂಜಿನಿಯರಿಂಗ್ ಶಿಕ್ಷಣ, ತಂತ್ರಜ್ಞಾನ ಕಂಪನಿಗಳಲ್ಲಿನ ಅನುಭವ, ಉದ್ಯಮಶೀಲತೆ ಹಾಗೂ ಎಜುಟೆಕ್ ಕ್ಷೇತ್ರದ ಹೊಸ ಪ್ರಯತ್ನಗಳ ಮೂಲಕ ಅವರು ತಮ್ಮ ವೃತ್ತಿಜೀವನವನ್ನು ರೂಪಿಸಿಕೊಂಡಿದ್ದಾರೆ.

ಹೊಸನಗರದಲ್ಲಿ ಆರಂಭವಾದ ಪಯಣ

1996ರ ಆಗಸ್ಟ್ 8ರಂದು ಜನಿಸಿದ ಸೂರಜ್ ವಿಜಯ್ ಶೆಟ್ಟಿ ಅವರು ಕರ್ನಾಟಕದ ಶಿವಮೊಗ್ಗ ಜಿಲ್ಲೆಯ ಹೊಸನಗರದವರು. ಶ್ರೀ ರಾಮಕೃಷ್ಣ ಶಾಲೆಯಲ್ಲಿ ಪ್ರಾಥಮಿಕ ಹಾಗೂ ಶಾಲಾ ಶಿಕ್ಷಣ ಪಡೆದ ಅವರು, ನಂತರ ಉಜಿರೆಯ ಎಸ್‌ಡಿಎಂ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯಲ್ಲಿ ಎಂಜಿನಿಯರಿಂಗ್ ಶಿಕ್ಷಣ ಮುಂದುವರಿಸಿದರು.

ಗ್ರಾಮೀಣ ಪರಿಸರದಿಂದ ಬಂದ ಯುವಕನಾಗಿ ಶಿಕ್ಷಣದ ಮೂಲಕ ವೃತ್ತಿಜೀವನ ರೂಪಿಸಿಕೊಳ್ಳುವ ಹಾದಿಯಲ್ಲಿ ಸಾಗಿದ ಸೂರಜ್, ತಂತ್ರಜ್ಞಾನ ಕ್ಷೇತ್ರದಲ್ಲಿ ಹೊಸ ಅವಕಾಶಗಳನ್ನು ಹುಡುಕಿಕೊಂಡರು.

ತಂತ್ರಜ್ಞಾನ ಕ್ಷೇತ್ರದಿಂದ ಉದ್ಯಮಶೀಲತೆಯತ್ತ

ಎಂಜಿನಿಯರಿಂಗ್ ಶಿಕ್ಷಣದ ನಂತರ Neutrinos ಸೇರಿದಂತೆ ತಂತ್ರಜ್ಞಾನ ಸಂಸ್ಥೆಗಳಲ್ಲಿ ಕೆಲಸ ಮಾಡಿದ ಅವರು, Test Yantra ಸಂಸ್ಥೆಯಲ್ಲಿಯೂ ವೃತ್ತಿಪರ ಅನುಭವ ಗಳಿಸಿದರು. ತಂತ್ರಜ್ಞಾನ ಮತ್ತು ಉದ್ಯಮ ನಿರ್ವಹಣೆಯ ಅನುಭವದೊಂದಿಗೆ ಮುಂದೆ ತಮ್ಮದೇ ಆದ ಉದ್ಯಮದತ್ತ ಗಮನ ಹರಿಸಿದರು.

2020ರಲ್ಲಿ Pentagon Space ಸ್ಥಾಪನೆಯಲ್ಲಿಯೂ ಅವರು ತೊಡಗಿಸಿಕೊಂಡಿದ್ದರು. ಈ ಅನುಭವಗಳು ತಂತ್ರಜ್ಞಾನ ಕ್ಷೇತ್ರದ ಜೊತೆಗೆ ವಿದ್ಯಾರ್ಥಿಗಳ ಕೌಶಲ್ಯ ಅಭಿವೃದ್ಧಿ ಮತ್ತು ಉದ್ಯೋಗಾವಕಾಶಗಳ ನಡುವಿನ ಅಂತರವನ್ನು ಅರ್ಥಮಾಡಿಕೊಳ್ಳಲು ನೆರವಾದವು.

Dhee Coding Lab ಮೂಲಕ ಹೊಸ ಪ್ರಯತ್ನ

2024ರಲ್ಲಿ ಸೂರಜ್ ವಿಜಯ್ ಶೆಟ್ಟಿ ಅವರು ಶಿಶಿರ ಭಟ್ ಅವರೊಂದಿಗೆ ಸೇರಿ Dhee Coding Lab ಆರಂಭಿಸಿದರು. ಎಂಜಿನಿಯರಿಂಗ್ ಪದವಿ ಪಡೆದ ಅನೇಕ ವಿದ್ಯಾರ್ಥಿಗಳಿಗೆ ತಾಂತ್ರಿಕ ಜ್ಞಾನವಿದ್ದರೂ, ಉದ್ಯೋಗ ಪಡೆಯಲು ಅಗತ್ಯವಿರುವ ಪ್ರಾಯೋಗಿಕ ಕೌಶಲ್ಯ ಮತ್ತು ಸಂದರ್ಶನದ ಸಿದ್ಧತೆಯಲ್ಲಿ ಕೊರತೆ ಎದುರಾಗುತ್ತದೆ. ಈ ಅಂತರವನ್ನು ಕಡಿಮೆ ಮಾಡುವ ಉದ್ದೇಶದಿಂದ ಸಂಸ್ಥೆ ಕಾರ್ಯನಿರ್ವಹಿಸುತ್ತಿದೆ.

ಪ್ರೋಗ್ರಾಮಿಂಗ್, ಡೇಟಾ ಸ್ಟ್ರಕ್ಚರ್ಸ್ ಮತ್ತು ಅಲ್ಗಾರಿದಮ್ಸ್, ಆಪ್ಟಿಟ್ಯೂಡ್, ಸಂವಹನ ಕೌಶಲ್ಯ ಹಾಗೂ ಸಂದರ್ಶನದ ಸಿದ್ಧತೆ ಸೇರಿದಂತೆ ಹಲವು ವಿಷಯಗಳಿಗೆ ತರಬೇತಿ ನೀಡಲಾಗುತ್ತದೆ.

ತಂತ್ರಜ್ಞಾನ ಶಿಕ್ಷಣಕ್ಕೆ ಡಿಜಿಟಲ್ ಸ್ಪರ್ಶ

Dhee Coding Labನ ಮತ್ತೊಂದು ಪ್ರಯತ್ನ Dhee App. ಇದರ ಮೂಲಕ ವಿದ್ಯಾರ್ಥಿಗಳಿಗೆ ರೆಕಾರ್ಡ್ ಮಾಡಿದ ಪಾಠಗಳು, ಕೋಡಿಂಗ್ ಅಭ್ಯಾಸ, ಪರೀಕ್ಷೆಗಳು, ಹಾಜರಾತಿ ಮತ್ತು ಕಲಿಕೆಯ ಪ್ರಗತಿಯನ್ನು ಗಮನಿಸುವ ಸೌಲಭ್ಯಗಳನ್ನು ಒದಗಿಸಲಾಗುತ್ತದೆ.

ಪ್ರತಿದಿನ ಬದಲಾಗುತ್ತಿರುವ ಐಟಿ ಉದ್ಯೋಗ ಮಾರುಕಟ್ಟೆಯಲ್ಲಿ ಕೇವಲ ಪದವಿ ಹೊಂದಿರುವುದಷ್ಟೇ ಸಾಕಾಗುವುದಿಲ್ಲ. ಪ್ರಾಯೋಗಿಕ ಜ್ಞಾನ, ನಿರಂತರ ಅಭ್ಯಾಸ ಮತ್ತು ಸರಿಯಾದ ಮಾರ್ಗದರ್ಶನವೂ ಮುಖ್ಯ. ಈ ಅಗತ್ಯವನ್ನು ಗಮನದಲ್ಲಿಟ್ಟುಕೊಂಡು ಸೂರಜ್ ಅವರು ತಂತ್ರಜ್ಞಾನ ಶಿಕ್ಷಣ ಕ್ಷೇತ್ರದಲ್ಲಿ ತಮ್ಮ ಪ್ರಯತ್ನ ಮುಂದುವರಿಸುತ್ತಿದ್ದಾರೆ.

ಹೊಸನಗರದಿಂದ ಬೆಂಗಳೂರಿನವರೆಗೆ ಬೆಳೆದು ಬಂದ ಅವರ ವೃತ್ತಿಪರ ಪಯಣ, ಶಿಕ್ಷಣ ಮತ್ತು ಉದ್ಯಮಶೀಲತೆಯ ಮೂಲಕ ಹೊಸ ಅವಕಾಶಗಳನ್ನು ಹುಡುಕುತ್ತಿರುವ ಯುವಜನರಿಗೆ ಪರಿಚಯವಾಗುವಂತಹ ಕಥೆಯಾಗಿದೆ.

ರೈತರಿಗೆ ಹಣ ನೀಡಲು ನಷ್ಟದ ಸಬೂಬು, ಹೊಸ ಉದ್ಯಮಕ್ಕೆ ಭಾರಿ ಕ್ಯೂ: 39 ಹೊಸ ಸಕ್ಕರೆ ಕಾರ್ಖಾನೆ ಸ್ಥಾಪನೆಗೆ ಮಾಲೀಕರಿಂದ ಅರ್ಜಿ!

Santosh Naik — Fri, 06 Nov 2026 08:58:07 +0530

ಕನ್ನಡಪ್ರಭ ವಾರ್ತೆ ಬೆಂಗಳೂರು (ನ.6): ರೈತರ ಬೇಡಿಕೆಯನುಸಾರ ದರ ನೀಡಲು ನಷ್ಟದ ಸಬೂಬು ಹೇಳುವ ಸಕ್ಕರೆ ಕಾರ್ಖಾನೆ ಮಾಲೀಕರು, ಹೊಸದಾಗಿ ಸಕ್ಕರೆ ಕಾರ್ಖಾನೆ ಸ್ಥಾಪನೆಗೆ ಅನುಮತಿ ಕೋರಿ ರಾಜ್ಯ ಮತ್ತು ಕೇಂದ್ರ ಸರ್ಕಾರಗಳಿಗೆ ಅರ್ಜಿ ಸಲ್ಲಿಸುವುದರಲ್ಲಿ ಮಾತ್ರ ಬಹಳ ಮುಂದಿದ್ದಾರೆ. ರಾಜ್ಯದಲ್ಲಿ ಹೊಸದಾಗಿ ಒಟ್ಟು 39 ಸಕ್ಕರೆ ಕಾರ್ಖಾನೆ ಮಾಲೀಕರು ಕಾರ್ಖಾನೆ ತೆರೆಯುವ ಸಂಬಂಧ ಅರ್ಜಿ ಸಲ್ಲಿಸಿರುವುದು ಬೆಳಕಿಗೆ ಬಂದಿದೆ.

ಪ್ರತಿಟನ್‌ ಕಬ್ಬಿಗೆ 5500 ರು. ಬೆಂಬಲ ಬೆಲೆ ನಿಗದಿಗೆ ಆಗ್ರಹಿಸಿ ರಾಜ್ಯಾದ್ಯಂತ ಕಬ್ಬು ಬೆಳೆಗಾರರು ಹೋರಾಟ ನಡೆಸುತ್ತಿದ್ದಾರೆ. 3600 ರೂಪಾಯಿಗೆ ರೈತರು ಒಪ್ಪಿರುವ ಮಾಹಿತಿಯೂ ಸಿಕ್ಕಿದೆ. ರಸ್ತೆ, ಜೈಲ್‌ ಭರೋ ಸೇರಿ ಹಲವು ರೀತಿಯ ಹೋರಾಟಕ್ಕೂ ಮುಂದಾಗಿದ್ದಾರೆ. ಈಗಾಗಲೇ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‌ ನೇತೃತ್ವದಲ್ಲೇ ಕಬ್ಬು ಬೆಳೆಗಾರರು ಮತ್ತು ಸಕ್ಕರೆ ಕಾರ್ಖಾನೆ ಮಾಲೀಕರ ಸಭೆಯೂ ನಡೆದಿದೆ. ಕೇಂದ್ರ ಸರ್ಕಾರದಿಂದ ಬೆಂಬಲ ನಿಗದಿ ಕುರಿತಂತೆ ಸ್ಪಷ್ಟ ಆದೇಶ ಬರಬೇಕಿದೆ.

ಕಬ್ಬು ಬೆಳೆಗಾರರು ಕೇಳುತ್ತಿರುವ ಬೇಡಿಕೆಗೆ ಸಕ್ಕರೆ ಕಾರ್ಖಾನೆ ಮಾಲೀಕರು ಒಪ್ಪದೇ, ರೈತರು ಕೇಳುತ್ತಿರುವಷ್ಟು ಬೆಂಬಲ ಬೆಲೆ ನಿಗದಿ ಮಾಡಿದರೆ ಸಕ್ಕರೆ ಕಾರ್ಖಾನೆಗಳು ನಷ್ಟಕ್ಕೆ ತಿರುಗುತ್ತವೆ. ಈಗಾಗಲೇ ನೂರಾರು ಕೋಟಿ ರು. ನಷ್ಟ ಅನುಭವಿಸುತ್ತಿರುವ ಸಕ್ಕರೆ ಕಾರ್ಖಾನೆಗಳು, ಪ್ರತಿ ಟನ್‌ ಕಬ್ಬಿಗೆ 5500 ರು. ನಿಗದಿ ಮಾಡಿದರೆ ನಷ್ಟ ಪ್ರಮಾಣ ಮತ್ತಷ್ಟು ಹೆಚ್ಚಲಿದೆ. ಹೀಗಾಗಿ 5500 ರು. ಬೆಂಬಲ ಬೆಲೆ ನಿಗದಿ ಮಾಡದಂತೆ ಒತ್ತಡವನ್ನೂ ಹೇರುತ್ತಿದ್ದಾರೆ.

ಹೊಸ ಕಾರ್ಖಾನೆಗೆ ಅರ್ಜಿ

ಹೀಗೆ ನಷ್ಟದ ನೆಪವೊಡ್ಡಿ ಕಬ್ಬು ಬೆಳೆಗಾರರಿಗೆ ಹಣ ನೀಡಲು ಹಿಂದೇಟು ಹಾಕುತ್ತಿರುವ 39 ಸಕ್ಕರೆ ಕಾರ್ಖಾನೆ ಮಾಲೀಕರು ಹೊಸ ಕಾರ್ಖಾನೆ ಸ್ಥಾಪನೆಗೆ ಅನುಮತಿ ಕೋರುತ್ತಿದ್ದಾರೆ. ಅಂಗಡಿ ಶುಗರ್ಸ್‌ ಆ್ಯಂಡ್‌ ಪವರ್‌, ಶ್ರೀ ದೇವಿ ಶುಗರ್ಸ್‌, ಯರಗಟ್ಟಿ ಶುಗರ್ಸ್‌, ಮೃಣಾಲ್‌ ಶುಗರ್ಸ್‌ ಹೀಗೆ 39 ಸಕ್ಕರೆ ಕಾರ್ಖಾನೆ ಮಾಲೀಕರು ಹೊಸದಾಗಿ ಕಾರ್ಖಾನೆ ತೆರೆಯಲು ಅನುಮತಿ ಕೋರುತ್ತಿದ್ದಾರೆ. ಈ ಕಾರ್ಖಾನೆಗಳಲ್ಲಿ ಬಹುತೇಕವು ರಾಜ್ಯದ ಪ್ರಭಾವಿ ರಾಜಕಾರಣಿಗಳು ನಿರ್ದೇಶಕರಾಗಿರುವ ಸಂಸ್ಥೆಗಳಾಗಿವೆ. ಅವರೇ ಇದೀಗ ನಷ್ಟ ಎನ್ನುತ್ತಲೇ ಹೊಸದಾಗಿ ಉದ್ಯಮ ಆರಂಭಿಸಲು ಮುಂದಾಗಿದ್ದಾರೆ.

ನಾನು ಅರಬ್‌ಗಿಂತ ಹೆಚ್ಚು ಭಾರತೀಯ: ಅಮೆರಿಕದ ಸೆನೆಟರ್‌ ಆದ ಭಟ್ಕಳದ ಅಳಿಯನ ಅಚ್ಚರಿಯ ಹೇಳಿಕೆ!

Gowthami K — Fri, 06 Nov 2026 08:40:12 +0530

ವಾಷಿಂಗ್ಟನ್: ಅಮೆರಿಕದ ಇತಿಹಾಸದಲ್ಲೇ ಮೊದಲ ಮುಸ್ಲಿಂ ಸೆನೆಟರ್ ಆಗಿ ಆಯ್ಕೆಯಾದ ಡೆಮಾಕ್ರಟಿಕ್ ಪಕ್ಷದ ಅಬ್ದುಲ್ ಎಲ್-ಸಯೀದ್ , ‘ನಾನು ಈಗ ಅರಬ್‌ಗಿಂತ ಹೆಚ್ಚು ಭಾರತೀಯನಾಗಿರಬಹುದು’ ಎಂದಿದ್ದಾರೆ.

ಈಜಿಪ್ಟ್‌ ಮೂಲದವರಾದ ಸಯ್ಯದ್‌ ಕರ್ನಾಟಕದ ಭಟ್ಕಳದ ಮುಸ್ಲಿಂ ಕುಟುಂಬವೊಂದರ ಯುವತಿ ಡಾ. ಸಾರಾ ಜುಕಾಕು ಅವರನ್ನು ವರಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಪಾಡ್‌ಕಾಸ್ಟ್‌ ಒಂದರಲ್ಲಿ ತಮ್ಮ ವೈವಾಹಿಕ ಜೀವನದ ಬಗ್ಗೆ ಮಾತನಾಡುತ್ತಾ ಎಲ್-ಸಯೀದ್, ‘ನಾನು ಕಳೆದ 20 ವರ್ಷಗಳಿಂದ ದಕ್ಷಿಣ ಭಾರತೀಯ ಕುಟುಂಬದೊಂದಿಗೆ ಸಂಬಂಧ ಹೊಂದಿದ್ದೇನೆ ಮತ್ತು ಅವರ ಸಂಸ್ಕೃತಿಗೆ ಹೊಂದಿಕೊಂಡಿದ್ದೇನೆ. ನಾನು ಈಗ ಅರಬ್‌ಗಿಂತ ಹೆಚ್ಚು ಭಾರತೀಯನಾಗಿರಬಹುದು’ ಎಂದು ತಮಾಷೆಯಾಗಿ ಹೇಳಿದರು.

ಐತಿಹಾಸಿಕ ಜಯ

ಈಜಿಪ್ಟ್ ಮೂಲದ ವಲಸಿಗರ ಮಗನಾದ 42 ವರ್ಷದ ವೈದ್ಯ ಮತ್ತು ಆರೋಗ್ಯ ತಜ್ಞರಾದ ಅಬ್ದುಲ್ ಎಲ್-ಸಯೀದ್ ಅವರು, ರಿಪಬ್ಲಿಕನ್ ಪಕ್ಷದ ಮೈಕ್ ರೇಂಜರ್ಸ್ ಅವರನ್ನು ಸೋಲಿಸಿ ಅಮೆರಿಕ ಸೆನೆಟ್‌ಗೆ ಆಯ್ಕೆಯಾದ ಮೊದಲ ಮುಸ್ಲಿಂ ಎಂಬ ಇತಿಹಾಸ ಸೃಷ್ಟಿಸಿದ್ದಾರೆ.

ಭಟ್ಕಳದ ಯುವತಿಯನ್ನು ಮದುವೆ ಆಗಿರುವ ಅಬ್ದುಲ್‌

ವಾಷಿಂಗ್ಟನ್: ಕರ್ನಾಟಕದ ಭಟ್ಕಳ ನಂಟು ಹೊಂದಿರುವ ಅಬ್ದುಲ್ ಅಲ್-ಸಯೀದ್‌ ಅವರು ಅಮೆರಿಕದ ಮಿಚಿಗನ್ ರಾಜ್ಯದಿಂದ ಸೆನೆಟ್‌ ಚುನಾವಣೆಯಲ್ಲಿ ವಿಜಯಿಯಾಗಿದ್ದಾರೆ. ಅಮೆರಿಕದ ಇತಿಹಾಸದಲ್ಲೇ ಸೆನೆಟ್ ಪ್ರವೇಶಿಸುತ್ತಿರುವ ಮೊದಲ ಮುಸ್ಲಿಂ ಎಂಬ ಇತಿಹಾಸ ಸೃಷ್ಟಿಸಿದ್ದಾರೆ. ರಿಪಬ್ಲಿಕನ್ ಪಕ್ಷದ ಅಭ್ಯರ್ಥಿ ಮೈಕ್ ರೋಜರ್ಸ್ ಅವರನ್ನುಅಬ್ದುಲ್ ಸೋಲಿಸಿದ್ದಾರೆ.

ಶಂಶುದ್ಧೀನ್ ಮೊಮ್ಮಗಳು ಸಾರಾ:

ಡಾ. ಸಾರಾ ಅವರು ದಿ. ಜೆ.ಎಚ್. ಶಂಶುದ್ಧೀನ್ ಜುಕಾಕೊ ಅವರ ಮೊಮ್ಮಗಳು. ಇವರು ಅಂದಿನ ಮುಖ್ಯಮಂತ್ರಿ ಬಿ.ಡಿ. ಜತ್ತಿ ಅವರ ನೇತೃತ್ವದ ಮೈಸೂರು ರಾಜ್ಯ ಸರ್ಕಾರದಲ್ಲಿ ಹಣಕಾಸು ಉಪ ಸಚಿವರಾಗಿ ಸೇವೆ ಸಲ್ಲಿಸಿದ್ದರು. ಪ್ರಖ್ಯಾತ ವಕೀಲರು ಮತ್ತು ಸಾರ್ವಜನಿಕ ವ್ಯಕ್ತಿಯಾಗಿದ್ದ ಶಂಶುದ್ಧೀನ್ ಜುಕಾಕೋ ಅವರು ಭಟ್ಕಳದ ಮೊದಲ ವಕೀಲರೆಂದು ಗುರುತಿಸಲ್ಪಟ್ಟಿದ್ದಲ್ಲದೇ ಇಲ್ಲಿನ ಅಭಿವೃದ್ಧಿಗೆ ಅಪಾರ ಕೊಡುಗೆ ನೀಡಿದವರೆನ್ನುವ ಹೆಗ್ಗಳಿಕೆ ಇದೆ.

ಅಮೆರಿಕ ಸೆನೆಟ್ ಗೆ ಆಯ್ಕೆಯಾದ ಅಬ್ದುಲ್ ರೆಹಮಾನ್ ಪತ್ನಿ ಡಾ. ಸಾರಾ ಅವರು ಡಾ. ತಯೇಬ್ ಜುಕಾಕೋ ಅವರ ಪುತ್ರಿ. ಡಾ. ತಯೇಬ್ ಅವರು ಮೂತ್ರಪಿಂಡ ರೋಗ ತಜ್ಞರಾಗಿದ್ದು(ನೆಫ್ರಾಲಜಿಸ್ಟ್). 1976ರಲ್ಲಿ ಬೆಂಗಳೂರು ವೈದ್ಯಕೀಯ ಕಾಲೇಜಿನಲ್ಲಿ ಎಂಬಿಬಿಎಸ್ ಪದವಿ ಪೂರೈಸಿದ್ದರು. ವಿದೇಶದಲ್ಲಿ ಕೆಲಸ ಮಾಡಿದ ನಂತರ ೧೯೮೦ರ ದಶಕದಲ್ಲಿ ಅವರು ಅಮೆರಿಕಕ್ಕೆ ತೆರಳಿ, ಅಲ್ಲಿ ತಮ್ಮ ವೈದ್ಯಕೀಯ ವೃತ್ತಿಯನ್ನು ರೂಪಿಸಿಕೊಂಡರು. ಸಾರಾ ಅಮೆರಿಕದಲ್ಲಿಯೇ ಬೆಳೆದಿದ್ದರೂ, ಅವರ ತಂದೆ ತಮ್ಮ ಮಕ್ಕಳಿಗೆ ತಮ್ಮ ಮೂಲ ನೆಲೆಯೊಂದಿಗೆ ಸಂಪರ್ಕವಿರಲಿ ಎಂಬ ಉದ್ದೇಶದಿಂದ, ಅವರು ಆಗಾಗ ಭಟ್ಕಳ ಮತ್ತು ಬೆಂಗಳೂರಿಗೆ ಭೇಟಿ ನೀಡುವಂತೆ ನೋಡಿಕೊಂಡಿದ್ದರು. ಜುಕಾಕು ಕುಟುಂಬದ ಹಲವು ಸದಸ್ಯರು ಈಗ ಬೆಂಗಳೂರಿನಲ್ಲಿ ನೆಲೆಸಿದ್ದಾರೆ. ಡಾ. ಸಾರಾ ಅವರ ಕುಟುಂಬವು ಅಮೆರಿಕ ಸಂಯುಕ್ತ ಸಂಸ್ಥಾನದಲ್ಲಿ ವಾಸಿಸುತ್ತಿದೆ.

2006ರಲ್ಲಿ ಸಾರಾರೊಂದಿಗೆ ವಿವಾಹ: ಡಾ. ಸಾರಾ ಮತ್ತು ಅಬ್ದುಲ್ ರೆಹಮಾನ್ ಮೊಹಮ್ಮದ್ ಎಲ್- ಸಯೀ ದ್ಅವರು ಮಿಚಿಗನ್ ವಿಶ್ವವಿದ್ಯಾಲಯದಲ್ಲಿ ಓದುತ್ತಿದ್ದಾಗ ಮೊದಲ ಬಾರಿಗೆ ಭೇಟಿಯಾದರು ಮತ್ತು 2006ರಲ್ಲಿ ವಿವಾಹವಾಗಿದ್ದರು. ದಂಪತಿಗೆ ಇಬ್ಬರು ಹೆಣ್ಣುಮಕ್ಕಳಿದ್ದಾರೆ. ಸಾರಾ ಅವರ ಸೋದರ ಸಂಬಂಧಿಯೊಬ್ಬರ ಪ್ರಕಾರ, ಈ ಕುಟುಂಬವು ಭಟ್ಕಳದೊಂದಿಗೆ ನಿಕಟ ಸಂಪರ್ಕವನ್ನು ಉಳಿಸಿಕೊಂಡಿದೆ. ಕುಟುಂಬದ ಸಮಾರಂಭಗಳಲ್ಲಿ ಭಾಗವಹಿಸಲು ಸಾರಾ ಹಲವು ಬಾರಿ ಭಟ್ಕಳ ಮತ್ತು ಬೆಂಗಳೂರಿಗೆ ಭೇಟಿ ನೀಡಿದ್ದಾರೆ.

ಭಟ್ಕಳದೊಂದಿಗೆ ಸಂಪರ್ಕ:

ಸುಮಾರು ಏಳು ವರ್ಷಗಳ ಹಿಂದೆ ಅವರು ಕುಟುಂಬದ ಇತರ ಸದಸ್ಯರೊಂದಿಗೆ ಕೊನೆಯ ಬಾರಿಗೆ ಭಟ್ಕಳಕ್ಕೆ ಭೇಟಿ ನೀಡಿದ್ದರು ಎನ್ನುವುದನ್ನು ಸ್ಮರಿಸುತ್ತಾರೆ.

ಕಬ್ಬಿನ ದರ ನಿಗದಿಗಾಗಿ ರೈತರ 12 ದಿನದ ಪ್ರತಿಭಟನೆ ಸುಖಾಂತ್ಯ: ಆದ್ರೆ ಈ ಒಂದು ಕಾರಣಕ್ಕೆ ಹೋರಾಟ ಮುಂದುವರಿಯುತ್ತೆ!

Kannadaprabha News — Fri, 06 Nov 2026 08:16:14 +0530

ಬೆಳಗಾವಿ (ನ.6) : ಕಬ್ಬಿಗೆ ನ್ಯಾಯಯುತ ಬೆಲೆ ನಿಗದಿಪಡಿಸುವಂತೆ ಆಗ್ರಹಿಸಿ ಕಳೆದ 12 ದಿನಗಳಿಂದ ಬೆಳಗಾವಿ ಜಿಲ್ಲೆಯ ಮೂಡಲಗಿ ತಾಲೂಕಿನ ಗುರ್ಲಾಪುರದಲ್ಲಿ ನಡೆಯುತ್ತಿದ್ದ ರೈತರ ಹೋರಾಟಕ್ಕೆ ಕೊನೆಗೂ ತಾತ್ಕಾಲಿಕ ತೆರೆ ಬಿದ್ದಿದೆ. ಜಿಲ್ಲಾ ಉಸ್ತುವಾರಿ ಸಚಿವ ಸತೀಶ ಜಾರಕಿಹೊಳಿ ನೀಡಿದ ಭರವಸೆ ಹಾಗೂ ಹುಕ್ಕೇರಿ ಹಿರೇಮಠದ ಚಂದ್ರಶೇಖರ ಶಿವಾಚಾರ್ಯ ಸ್ವಾಮೀಜಿ ಅವರ ಮಧ್ಯಸ್ಥಿಕೆಯಲ್ಲಿ ನಡೆದ ಸಂಧಾನ ಸಭೆಯ ಫಲವಾಗಿ ರೈತ ಮುಖಂಡರು ಪ್ರತಿಭಟನೆ ಹಿಂಪಡೆಯುವ ನಿರ್ಧಾರವನ್ನು ಅಧಿಕೃತವಾಗಿ ಗುರುವಾರ ಪ್ರಕಟಿಸಿದ್ದಾರೆ.

ಆದರೆ, ರಾಜ್ಯ ಸರ್ಕಾರ ಪ್ರೋತ್ಸಾಹಧನವನ್ನು ₹1000 ನೀಡುವವರೆಗೂ ಹೋರಾಟ ಮಾತ್ರ ಮುಂದುವರಿಯುತ್ತದೆ. ಮಾತ್ರವಲ್ಲ ನ.6ರಿಂದ ಕಬ್ಬು ಕಾರ್ಖಾನೆಗಳನ್ನು ಆರಂಭಿಸಲು ಯಾವ ರೈತರೂ ಅಡ್ಡಿಪಡಿಸದಂತೆ ರೈತ ಹೋರಾಟ ನಾಯಕತ್ವ ವಹಿಸಿದ್ದ ಚೂನಪ್ಪ ಪೂಜೇರಿ ಮನವಿ ಮಾಡಿದ್ದಾರೆ.

ನಗರದಲ್ಲಿ ಗುರುವಾರ ಹುಕ್ಕೇರಿ ಹಿರೇಮಠದ ಚಂದ್ರಶೇಖರ ಶಿವಾಚಾರ್ಯ ಸ್ವಾಮೀಜಿ ಅವರ ನೇತೃತ್ವದಲ್ಲಿ ನಡೆದ ಮಹತ್ವದ ಸಭೆಯಲ್ಲಿ ರೈತ ಮುಖಂಡರು ಚರ್ಚಿಸಿ ಅಂತಿಮ ತೀರ್ಮಾನಕ್ಕೆ ಬಂದರು. ಜಿಲ್ಲಾಡಳಿತದಿಂದ ಒಪ್ಪಂದದ ದಾಖಲೆ ಪಡೆದುಕೊಂಡ ಬಳಿಕ ಪ್ರತಿಭಟನೆ ಹಿಂಪಡೆಯುವುದಾಗಿ ರೈತ ಮುಖಂಡರು ಘೋಷಿಸಿದರು.

ಇಂದಿನಿಂದ ಕಾರ್ಖಾನೆ ಆರಂಭ:

ಸಕ್ಕರೆ ಕಾರ್ಖಾನೆಗಳು ಮೊದಲ ಹಂತದಲ್ಲಿ ಪ್ರತಿ ಟನ್ ಕಬ್ಬಿಗೆ ₹3,600 ದರ ನೀಡಲು ಒಪ್ಪಿಕೊಂಡಿವೆ. ಈ ಹಿನ್ನೆಲೆಯಲ್ಲಿ ರೈತರು ಪ್ರತಿಭಟನೆ ಹಿಂಪಡೆದು ಸಕ್ಕರೆ ಕಾರ್ಖಾನೆಗಳ ಕಾರ್ಯಾರಂಭಕ್ಕೆ ಅವಕಾಶ ಮಾಡಿಕೊಡಬೇಕು ಎಂದು ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆಯ ಅಧ್ಯಕ್ಷ ಚೂನಪ್ಪ ಪೂಜೇರಿ ಹೇಳಿದರು.

ಜಿಲ್ಲಾ ಉಸ್ತುವಾರಿ ಸಚಿವರು ಈ ವಿಷಯದಲ್ಲಿ ಜವಾಬ್ದಾರಿ ತೆಗೆದುಕೊಂಡಿದ್ದಾರೆ. ಹೀಗಾಗಿ ಶುಕ್ರವಾರದಿಂದ ಜಿಲ್ಲೆಯ ಎಲ್ಲ ಸಕ್ಕರೆ ಕಾರ್ಖಾನೆಗಳು ಕಾರ್ಯಾರಂಭ ಮಾಡಲಿವೆ. ಗುರ್ಲಾಪುರದಲ್ಲಿ ರೈತರೊಂದಿಗೆ ಸಮಗ್ರವಾಗಿ ಚರ್ಚಿಸಿ ನಿರ್ಧಾರವನ್ನು ಮನವರಿಕೆ ಮಾಡಿಕೊಡಲಾಗುವುದು. ಈಗಿನಿಂದಲೇ ಹೋರಾಟವನ್ನು ಹಿಂಪಡೆಯಲಾಗುತ್ತಿದೆ ಎಂದರು.

ಅಧಿವೇಶನಕ್ಕೂ ಮುನ್ನ ಜಾರಿಗೆ ಒತ್ತಾಯ:

ರೈತರ ಒಗ್ಗಟ್ಟಿನ ಹೋರಾಟದಿಂದ ಮೊದಲ ಹಂತದಲ್ಲಿ ₹300 ಹೆಚ್ಚುವರಿ ದರ ದೊರೆತಿದೆ. ಆದರೆ, ಇದರಿಂದ ಸಂಪೂರ್ಣ ತೃಪ್ತರಾಗಿಲ್ಲ. ರಾಜ್ಯ ಸರ್ಕಾರ ಘೋಷಿಸಬೇಕೆಂದು ಒತ್ತಾಯಿಸಿರುವ ಪ್ರತಿ ಟನ್ ಕಬ್ಬಿಗೆ ₹1,000 ಪ್ರೋತ್ಸಾಹಧನ ದೊರೆಯುವವರೆಗೂ ಹೋರಾಟ ಮುಂದುವರಿಯಲಿದೆ ಎಂದು ಸ್ಪಷ್ಟಪಡಿಸಿದರು.

ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ ಅವರು ಬೆಳಗಾವಿ ಅಧಿವೇಶನಕ್ಕೆ ಬರುವ ಮುನ್ನವೇ ₹1,000 ಪ್ರೋತ್ಸಾಹಧನ ಘೋಷಿಸಬೇಕು. ಈ ಬೇಡಿಕೆ ಈಡೇರದಿದ್ದರೆ ಅಧಿವೇಶನದ ಸಂದರ್ಭದಲ್ಲಿ ಹುಕ್ಕೇರಿ ಹಿರೇಮಠದ ಚಂದ್ರಶೇಖರ ಶಿವಾಚಾರ್ಯ ಸ್ವಾಮೀಜಿ ಹಾಗೂ ಶಶಿಕಾಂತ ಗುರೂಜಿ ನೇತೃತ್ವದಲ್ಲಿ ಲಕ್ಷಾಂತರ ರೈತರನ್ನು ಸಂಘಟಿಸಿ ಮತ್ತೊಂದು ಹಂತದ ಹೋರಾಟ ನಡೆಸಲಾಗುವುದು. ನ.26ರವರೆಗೆ ಎಂಎಸ್‌ಪಿ ವಿಚಾರವಾಗಿ ಸರ್ಕಾರಕ್ಕೆ ಗಡುವು ನೀಡಲಾಗಿದೆ. ಅಷ್ಟರೊಳಗೆ ಬೇಡಿಕೆ ಈಡೇರದಿದ್ದರೆ ಮುಂದಿನ ಹೋರಾಟದ ರೂಪುರೇಷೆ ನಿರ್ಧರಿಸಲಾಗುವುದು ಎಂದರು.

ಸಕ್ಕರೆ ಮಾರಾಟದ ದರ ಹೆಚ್ಚಳವಾದಂತೆ ರೈತರಿಗೆ ನೀಡುವ ಕಬ್ಬಿನ ದರದಲ್ಲಿಯೂ ಹೆಚ್ಚಳವಾಗಬೇಕು. ಸಕ್ಕರೆ ಬೆಲೆ ಕೆಜಿಗೆ ₹45ಕ್ಕೆ ನಿಗದಿಯಾದ ಹಿನ್ನೆಲೆಯಲ್ಲಿ ₹3,600 ಮೊದಲ ಕಂತಿನ ದರ ಒಪ್ಪಿಕೊಳ್ಳಲಾಗಿದೆ. ಮಾರುಕಟ್ಟೆಯಲ್ಲಿ ಸಕ್ಕರೆ ಬೆಲೆ ಏರಿಕೆಯಾದರೆ ರೈತರಿಗೆ ಹೆಚ್ಚುವರಿ ದರ ದೊರೆಯುವ ಸಾಧ್ಯತೆಯಿದೆ. ಕೆಲವು ಕಾರ್ಖಾನೆಗಳು ₹3,650 ನೀಡಲೂ ಮುಂದಾಗಿವೆ. ರೈತರಿಗೆ ಮತ್ತಷ್ಟು ತೊಂದರೆಯಾಗಬಾರದು ಎಂಬ ಕಾರಣಕ್ಕೆ ಮೊದಲ ಹಂತದ ಒಪ್ಪಂದಕ್ಕೆ ಒಪ್ಪಿಗೆ ಸೂಚಿಸಲಾಗಿದೆ ಎಂದು ವಿವರಿಸಿದರು.

ಕಳೆದ ಎರಡು ತಿಂಗಳಿಂದ ವಿವಿಧ ಹಂತಗಳಲ್ಲಿ ನಡೆದ ಹೋರಾಟ, ಗುರ್ಲಾಪುರದಲ್ಲಿ ಮತ್ತೆ ತೀವ್ರಗೊಂಡ ಹೋರಾಟದ ಪರಿಣಾಮವಾಗಿ ಈ ಒಪ್ಪಂದ ಸಾಧ್ಯವಾಗಿದೆ ಎಂದು ತಿಳಿಸಿದರು.

ರೈತರು ಯಾವುದೇ ರಾಜಕೀಯ ಪಕ್ಷದ ಪರವಾಗಿಲ್ಲ. ರೈತರ ಹಿತಾಸಕ್ತಿಯೇ ಮುಖ್ಯ. ಬರಗಾಲದ ಪರಿಸ್ಥಿತಿಯಲ್ಲಿ ರೈತರು ಮತ್ತಷ್ಟು ಸಂಕಷ್ಟಕ್ಕೆ ಸಿಲುಕಬಾರದು. ಹೀಗಾಗಿ ಸದ್ಯಕ್ಕೆ ಪ್ರತಿಭಟನೆ ಹಿಂಪಡೆಯುವ ನಿರ್ಧಾರ ಕೈಗೊಳ್ಳಲಾಗಿದೆ. ಆದರೆ, ಸರ್ಕಾರ ನೀಡಬೇಕಾದ ಪ್ರೋತ್ಸಾಹಧನದ ವಿಚಾರದಲ್ಲಿ ನಮ್ಮ ಹೋರಾಟ ನಿಲ್ಲುವುದಿಲ್ಲ ಎಂದು ಎಚ್ಚರಿಸಿದರು.

ಸಭೆಯಲ್ಲಿ ಹುಕ್ಕೇರಿ ಹಿರೇಮಠದ ಚಂದ್ರಶೇಖರ ಶಿವಾಚಾರ್ಯ ಸ್ವಾಮೀಜಿ, ರೈತ ನಾಯಕಿ ಚುಕ್ಕಿ ನಂಜುಂಡಸ್ವಾಮಿ ಸೇರಿದಂತೆ ರೈತ ಮುಖಂಡರು ಉಪಸ್ಥಿತರಿದ್ದರು.

ಹೋರಾಟ ಸ್ಥಗಿತ

- ಚೂನಪ್ಪ ಪೂಜೇರಿ, ರೈತ ಮುಖಂಡ

ಒಪ್ಪಂದದಲ್ಲಿ ಏನಿದೆ?

ಮೊದಲ ಕಂತಲ್ಲಿ ಪ್ರತಿ ಮೆಟ್ರಿಕ್ ಟನ್ ಕಬ್ಬಿಗೆ ₹3500 ಮುಂಗಡ ಪಾವತಿ
ಹಂಗಾಮು ಮುಕ್ತಾಯಗೊಂಡ ನಂತರ ಟನ್‌ಗೆ ₹100 ಹೆಚ್ಚುವರಿ ಪಾವತಿ
ಅಂತಿಮ ಕಂತಲ್ಲಿ ಸಕ್ಕರೆ ದರ ಹೆಚ್ಚಾದಲ್ಲಿ ಹೆಚ್ಚುವರಿ ಆದಾಯದ ಹಂಚಿಕೆ
ಹೆಚ್ಚುವರಿ ಆದಾಯದಲ್ಲಿ ಶೇ.75ರಷ್ಟು ರೈತರಿಗೆ, ಶೇ.25ರಷ್ಟು ಕಾರ್ಖಾನೆಗೆ
ಸರ್ಕಾರದಿಂದ 1000 ಪ್ರೋತ್ಸಾಹಧನದ ಹೋರಾಟ ತಾತ್ಕಾಲಿಕ ಸ್ಥಗಿತ
ಬೆಳಗಾವಿ ಅಧಿವೇಶನದೊಳಗೆ ನೆರವು ಘೋಷಿಸಿದ್ರೆ ಮತ್ತೆ ಹೋರಾಟ

ಜಿಪಂ, ತಾಪಂ ಚುನಾವಣೆಗೆ ಕ್ಷಣಗಣನೆ ನಡುವೆ ಬಂಪರ್‌ ಕೊಡುಗೆ, ರಸ್ತೆ-ಸೇತುವೆ ಅಭಿವೃದ್ಧಿಗೆ ₹20000 ಕೋಟಿ ಅನುದಾನ

Gowthami K — Fri, 06 Nov 2026 08:11:49 +0530

ಬೆಂಗಳೂರು: ರಾಜ್ಯಾದ್ಯಂತ ರಾಜ್ಯ ಹೆದ್ದಾರಿ, ಜಿಲ್ಲಾ ಪ್ರಮುಖ ರಸ್ತೆಗಳು, ಜಿಲ್ಲಾ ಕೇಂದ್ರ ಹಾಗೂ ತಾಲೂಕು ಕೇಂದ್ರಗಳ ನಡುವೆ ಸಂಪರ್ಕ ಕಲ್ಪಿಸುವ ರಸ್ತೆಗಳು ಸೇರಿ ಬರೋಬ್ಬರಿ 20,000 ಕೋಟಿ ರು. ವೆಚ್ಚದಲ್ಲಿ ವಿವಿಧ ರಸ್ತೆ ಹಾಗೂ ಸೇತುವೆ ನಿರ್ಮಾಣ ಹಾಗೂ ಅಭಿವೃದ್ಧಿಗೆ ಗುರುವಾರ ನಡೆದ ಸಚಿವ ಸಂಪುಟ ಸಭೆಯಲ್ಲಿ ತೀರ್ಮಾನ ಕೈಗೊಳ್ಳಲಾಗಿದೆ.

ಎರಡು ತಿಂಗಳಲ್ಲಿ ಜಿಲ್ಲಾ ಮತ್ತು ತಾಲೂಕು ಪಂಚಾಯತಿ ಚುನಾವಣೆ ನಡೆಸಲು ಸಿದ್ಧತೆ ನಡೆಯುತ್ತಿರುವ ಬೆನ್ನಲ್ಲೇ, ಜಿಪಂ ಹಾಗೂ ತಾಪಂ ಮಟ್ಟದ ರಸ್ತೆಗಳ ನಿರ್ಮಾಣಕ್ಕೆ ಸಚಿವ ಸಂಪುಟ ಸಭೆಯಲ್ಲಿ ಆದ್ಯತೆ ನೀಡಿರುವುದು ಕುತೂಹಲ ಮೂಡಿಸಿದೆ. 20,000 ಕೋಟಿ ರು. ವೆಚ್ಚದ ಅಭಿವೃದ್ಧಿ ಯೋಜನೆಯಲ್ಲಿ ಜಿಲ್ಲಾ ಕೇಂದ್ರದಿಂದ ಜಿಲ್ಲಾ ಕೇಂದ್ರ, ಜಿಲ್ಲಾ ಕೇಂದ್ರದಿಂದ ತಾಲೂಕು ಕೇಂದ್ರ ಮತ್ತು ತಾಲೂಕು ಕೇಂದ್ರದಿಂದ ತಾಲೂಕು ಕೇಂದ್ರಕ್ಕೆ ರಸ್ತೆ ಕಲ್ಪಿಸುವ 3,986 ಕಿ.ಮೀ. ಉದ್ದದ ರಸ್ತೆ ಅಭಿವೃದ್ಧಿಯನ್ನು 6,000 ಕೋಟಿ ರು. ವೆಚ್ಚದಲ್ಲಿ ಕೈಗೆತ್ತಿಕೊಳ್ಳಲು ತೀರ್ಮಾನಿಸಲಾಗಿದೆ.

ಈ ಬಗ್ಗೆ ಸಂಪುಟ ಸಭೆ ಬಳಿಕ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಗ್ರಾಮೀಣಾಭಿವೃದ್ಧಿ ಸಚಿವ ಈಶ್ವರ್‌ ಖಂಡ್ರೆ, ಜಿಲ್ಲಾ ಮತ್ತು ತಾಲೂಕು ಕೇಂದ್ರಗಳ ವ್ಯಾಪ್ತಿಯಲ್ಲಿ 6,000 ಕೋಟಿ ರು. ವೆಚ್ಚದಲ್ಲಿ ರಸ್ತೆ ಅಭಿವೃದ್ಧಿಗೆ ತೀರ್ಮಾನಿಸಲಾಗಿದೆ. ಇದೇ ವೇಳೆ 6,000 ಕೋಟಿ ರು. ವೆಚ್ಚದಲ್ಲಿ ವಿವಿಧ ವಿಧಾನಸಭಾ ಕ್ಷೇತ್ರಗಳ ವ್ಯಾಪ್ತಿಯಲ್ಲಿ ರಸ್ತೆ, ಸೇತುವೆ ಹಾಗೂ ಕಟ್ಟಡ ಕಾಮಗಾರಿ ಕೈಗೊಳ್ಳಲು ನಿರ್ಧರಿಸಲಾಗಿದೆ. ಜತೆಗೆ 3,000 ಕೋಟಿ ರು. ಹೆಚ್ಚುವರಿ ಅನುದಾನದಲ್ಲಿ ರಸ್ತೆ ಅಭಿವೃದ್ಧಿಗೆ ಅನುಮೋದನೆ ನೀಡಲಾಗಿದೆ ಎಂದು ಮಾಹಿತಿ ನೀಡಿದರು.

ಇನ್ನು ರಾಜ್ಯ ಹೆದ್ದಾರಿ ಅಭಿವೃದ್ಧಿ ಯೋಜನೆ 5ನೇ ಹಂತ 2ನೇ ಘಟ್ಟದಲ್ಲಿ 1,897 ಕಿ.ಮೀ. ಉದ್ದದ ರಸ್ತೆಗಳ ಅಭಿವೃದ್ಧಿಗೆ ಅನುಮೋದನೆ ನೀಡಲಾಗಿದೆ. ಇದು 2017ರಲ್ಲಿ ಅನುಮೋದನೆಯಾಗಿದ್ದ ಯೋಜನೆಯಾಗಿದ್ದು, 2018ರಲ್ಲಿ ಕಾಮಗಾರಿ ಶುರುವಾಗಿತ್ತು. 5ನೇ ಹಂತದ ರಸ್ತೆಗೆ ಗುರುವಾರ ಅನುಮೋದನೆ ನೀಡಲಾಗಿದೆ. ಇದಕ್ಕೆ ಈಗಾಗಲೇ ಆರ್ಥಿಕ ಇಲಾಖೆ ಅನುಮೋದನೆ ನೀಡಿದೆ ಎಂದು ಖಂಡ್ರೆ ಮಾಹಿತಿ ನೀಡಿದರು.

3,409 ಕೋಟಿ ಪರಿಷ್ಕೃತ ವೆಚ್ಚದಲ್ಲಿ ರಸ್ತೆ ಅಭಿವೃದ್ದಿ:

ಕರ್ನಾಟಕ ರಸ್ತೆ ಅಭಿವೃದ್ಧಿ ನಿಗಮದ ವತಿಯಿಂದ ಬೆಂಗಳೂರು ಸುತ್ತಮುತ್ತಲಿನ ರಸ್ತೆಗಳ ಅಭಿವೃದ್ಧಿ ಕಾಮಗಾರಿಗಳನ್ನು 10 ಪ್ಯಾಕೇಜ್‌ ಗಳಲ್ಲಿ ಕೈಗೊಳ್ಳಲು 3,409.02 ಕೋಟಿ ರು. ಪರಿಷ್ಕೃತ ಅಂದಾಜು ವೆಚ್ಚಕ್ಕೆ ಸಚಿವ ಸಂಪುಟ ಆಡಳಿತಾತ್ಮಕ ಅನುಮೋದನೆ ನೀಡಿದೆ.

ಬೆಂಗಳೂರು ನಗರ ಹಾಗೂ ಸುತ್ತಮುತ್ತಲಿನ ಪ್ರದೇಶದಲ್ಲಿ ಸಂಚಾರ ದಟ್ಟಣೆ ತಗ್ಗಿಸಲು ಮತ್ತು ಬೆಂಗಳೂರು ನಗರದ ರಸ್ತೆ ಜಾಲ ಬಲಪಡಿಸಲು ಈ ಯೋಜನೆ ಪೂರಕವಾಗಿದೆ ಎಂದು ಈಶ್ವರ ಖಂಡ್ರೆ ತಿಳಿಸಿದರು.

ಬೆಂಗಳೂರು ಸುತ್ತಮುತ್ತಲಿನ 155 ಕಿ.ಮೀ. ರಸ್ತೆಗಳ ಅಭಿವೃದ್ಧಿ ಕಾಮಗಾರಿಯನ್ನು ಇ.ಪಿ.ಸಿ. ಮಾದರಿಯಲ್ಲಿ 2,095 ಕೋಟಿ ರು. ಗಳಲ್ಲಿ ಕೈಗೆತ್ತಿಕೊಳ್ಳಲು 2017ರಲ್ಲೇ ಅನುಮೋದನೆ ನೀಡಲಾಗಿತ್ತು. ಈ ರಸ್ತೆ ಅಭಿವೃದ್ಧಿ ಕಾಮಗಾರಿಗಳನ್ನು 2019ರಲ್ಲಿ ಪ್ರಾರಂಭಿಸಲಾಗಿದ್ದು, ಪರಿಷ್ಕೃತ 142.27 ಕಿ.ಮೀ. ಉದ್ದದ ರಸ್ತೆ ಅಭಿವೃದ್ಧಿ ಕಾಮಗಾರಿಗಳ ಪೈಕಿ 121.78 ಕಿ.ಮೀ. ರಸ್ತೆ ಪೂರ್ಣಗೊಂಡಿದೆ ಎಂದೂ ವಿವರಿಸಿದರು.

ಇದಲ್ಲದೆ ಭದ್ರಾವತಿ ವಿಧಾನಸಭಾ ಕ್ಷೇತ್ರದ ನಗರಸಭೆ ವ್ಯಾಪ್ತಿಯಲ್ಲಿ 42 ಕೋಟಿ ರು. ವೆಚ್ಚದಲ್ಲಿ ಕೆಎಸ್‌ಆರ್ಟಿಸಿ ಬಸ್ಸು ನಿಲ್ದಾಣದಿಂದ ಸಿದ್ದಾರೂಢ ನಗರಕ್ಕೆ ಸಂಪರ್ಕ ಕಲ್ಪಿಸುವ ಸೇತುವೆಯ ಪುನರ್‌ ನಿರ್ಮಾಣಕ್ಕೆ ಅನುಮೋದನೆ ನೀಡಲಾಗಿದೆ.

ಕಲಬುರಗಿ ಜಿಲ್ಲೆ ಕಾಳಗಿ ತಾಲೂಕಿನ ರಾಜ್ಯ ಹೆದ್ದಾರಿ 125ರಲ್ಲಿ ಬೆಣ್ಣೆತೊರಾಗೆ ಅಡ್ಡಲಾಗಿ ಕನ್ಸೂರು ಬಳಿ 21 ಕೋಟಿ ರು. ವೆಚ್ಚದಲ್ಲಿ ಎತ್ತರಿಸಿದ ರಸ್ತೆ ಹಾಗೂ ಸೇತುವೆ ನಿರ್ಮಾಣ, ಶಿವಮೊಗ್ಗ ನಗರದಲ್ಲಿರುವ ಬಾಗಲಕೋಟೆ-ಬಿಳಿರಂಗನ ಬೆಟ್ಟ ರಾಜ್ಯ ಹೆದ್ದಾರಿ 57ರಲ್ಲಿ ಶಿಥಿಲಗೊಂಡಿರುವ ತುಂಗಾ ಸೇತುವೆಯನ್ನು 40 ಕೋಟಿ ರು. ವೆಚ್ಚದಲ್ಲಿ ಮರು ನಿರ್ಮಾಣಕ್ಕೆ ಸಚಿವ ಸಂಪುಟ ಸಭೆ ಅನುಮೋದನೆ ನೀಡಿದೆ.

ಅನುದಾನ ಕೊರತೆಯಿಲ್ಲ: ಖಂಡ್ರೆ

ರಾಜ್ಯದ ಹಣಕಾಸು ಪರಿಸ್ಥಿತಿ ಸುಭದ್ರವಾಗಿದೆ. ನಿರೀಕ್ಷೆಗೆ ತಕ್ಕಂತೆ ಜಿಎಸ್ಟಿ ಸೇರಿ ಲಭ್ಯ ಆದಾಯ ಮೂಲಗಳಿಂದ ಆದಾಯ ಬರುತ್ತಿದೆ. ಹೀಗಾಗಿ ಯಾವುದೇ ರೀತಿಯಲ್ಲೂ ಆರ್ಥಿಕ ಸಮಸ್ಯೆ ಇಲ್ಲ. 20,000 ಕೋಟಿ ರು. ವೆಚ್ಚದಲ್ಲಿ ರಸ್ತೆ ಅಭಿವೃದ್ಧಿಗೆ ಹಣಕಾಸು ಇಲಾಖೆಯೂ ಅನುಮೋದನೆ ನೀಡಿದೆ ಎಂದು ಸಚಿವ ಈಶ್ವರ್ ಖಂಡ್ರೆ ಸಮರ್ಥನೆ ನೀಡಿದರು.

ಎಲ್ಲಿ? ಏನೇನು? ಕಾಮಗಾರಿ

ಜಿಲ್ಲಾ ಕೇಂದ್ರಗಳ ನಡುವೆ, ಜಿಲ್ಲಾ ಕೇಂದ್ರದಿಂದ ತಾಲೂಕಿಗೆ, ತಾಲೂಕು- ತಾಲೂಕು ರಸ್ತೆ ಅಭಿವೃದ್ಧಿ

3986 ಕಿ.ಮೀ. ಉದ್ದದ ಈ ರಸ್ತೆಗಳನ್ನು 6,000 ಕೋಟಿ ರು. ವೆಚ್ಚದಲ್ಲಿ ಅಭಿವೃದ್ದಿಪಡಿಸಲು ನಿರ್ಧಾರ

ವಿವಿಧ ವಿಧಾನಸಭಾ ಕ್ಷೇತ್ರಗಳ ವ್ಯಾಪ್ತಿಯಲ್ಲಿ ರಸ್ತೆ, ಸೇತುವೆ, ಕಟ್ಟಡ ಕಾಮಗಾರಿಗೆ ₹6000 ಕೋಟಿ

ರಾಜ್ಯ ಹೆದ್ದಾರಿ ಅಭಿವೃದ್ಧಿ ಯೋಜನೆ 5ನೇ ಹಂತದಲ್ಲಿ 1897 ಕಿ.ಮೀ. ಉದ್ದದ ರಸ್ತೆ ಅಭಿವೃದ್ಧಿಗೆ ಓಕೆ

ಬೆಂಗಳೂರು ಸುತ್ತಮುತ್ತಲ ರಸ್ತೆ ಅಭಿವೃದ್ಧಿ ಕೆಲಸಕ್ಕೆ ₹3409 ಕೋಟಿ ರು. ಪರಿಷ್ಕೃತ ಅಂದಾಜಿಗೂ ಸಮ್ಮತಿ

ತಮಿಳನಾಡಿಗೆ ನಿರಂತರ ನೀರು ಹರಿಸುತ್ತಿರುವ ಹಿನ್ನೆಲೆ ಕೆಆರ್‌ಎಸ್ ಡ್ಯಾಂ ಅರ್ಧಕರ್ಧ ಖಾಲಿ!

Kannadaprabha News — Fri, 06 Nov 2026 07:52:02 +0530

ಶ್ರೀರಂಗಪಟ್ಟಣ (ನ.6): ಕಾವೇರಿ ಜಲಾನಯನ ಪ್ರದೇಶದಲ್ಲಿ ಮಳೆಯ ಕೊರತೆಯಿಂದಾಗಿ ಕೆ.ಆರ್.ಸಾಗರ ಅಣೆಕಟ್ಟೆ ಒಳ ಹರಿವಿನ ನೀರಿನ ಪ್ರಮಾಣ ಇಳಿಮುಖ ಕಂಡು ಗುರುವಾರ ಸಂಜೆ ವೇಳೆಗೆ 99 ಅಡಿಗೆ ತಲುಪಿದೆ. ಮಳೆ ಕೊರತೆ, ಕಾವೇರಿ ನಿರ್ವಹಣಾ ಸಮಿತಿ ಅದೇಶದಂತೆ ತಮಿಳುನಾಡಿಗೆ ನದಿ ಮೂಲಕ ನೀರು ಹರಿಸುತ್ತಿರುವ ಪರಿಣಾಮ ಅಣೆಕಟ್ಟೆಯಲ್ಲಿ ದಿನದಿಂದ ದಿನಕ್ಕೆ ಕುಸಿತ ಕಾಣುತ್ತಿದೆ.

ಇದರಿಂದ ಮುಂದಿನ ದಿನಗಳಲ್ಲಿ ನೀರಿನ ಕೊರತೆಯಿಂದಾಗಿ ಜನರಿಗೆ ಕುಡಿಯುವ ನೀರು ಮತ್ತು ರೈತರು ಬೆಳೆದಿರುವ ಬೆಳೆಗಳನ್ನು ಉಳಿಸಿಕೊಳ್ಳಲು ಸಮಸ್ಯೆ ಎದುರಾಗಲಿದೆ. ಕಳೆದ ವರ್ಷ ಇದೇ ದಿನ 2025ರ ನವೆಂಬರ್ ಮೊದಲ ವಾರ 124.80 ಅಡಿ ಸಂಗ್ರಹವಾಗಿ ಅಣೆಕಟ್ಟೆ ಪೂರ್ಣ ಪ್ರಮಾಣದಲ್ಲಿ ಭರ್ತಿಯಾಗಿತ್ತು.

ಮುಖ ಜಲಾಶಯಗಳ ನೀರಿನ ಮಟ್ಟ (4-11-2026)

ಜಲಾಶಯ ಶೇಕಡ ಗರಿಷ್ಠ ಮಟ್ಟ ಇಂದಿನ ಮಟ್ಟ

ಕಬಿನಿ 67% 2284 2272.90

ಹೇಮಾವತಿ 49% 2922 2897.07

ತುಂಗಭದ್ರಾ 37% 1633 1610.59

ಸೂಪಾ(ಮೀ.) 50% 564 543.85

ಕೆಆರ್‌ಎಸ್ 46% 124.80 100.12

ಘಟಪ್ರಭಾ 96% 2175 2172.55

ಲಿಂಗನಮಕ್ಕಿ 50% 1819.12 1791.30

ಭದ್ರಾ 78% 2158 2144.72

ಹಾರಂಗಿ 66% 2859 2848.74

ಆಲಮಟ್ಟಿ(ಮೀ.) 55% 519.60 515.42

ನಾರಾಯಣಪುರ(ಮೀ.) 64% 492.25 489.20

ಮಲಪ್ರಭಾ 55% 2079.50 2064.86