Asianet Suvarna News

ಬೆಂಗಳೂರು HRಗೆ ಅಶ್ಲೀಲ ಸಂದೇಶ ಕಳಿಸಿ ಕೊಲೆ ಬೆದರಿಕೆ ಹಾಕಿದ 24 ವರ್ಷದ ಉದ್ಯೋಗಕಾಂಕ್ಷಿ

Mahmad Rafik — Sun, 02 Aug 2026 11:55:13 +0530

ಬೆಂಗಳೂರು: 24 ವರ್ಷದ ಉದ್ಯೋಗಕಾಂಕ್ಷಿಯೋರ್ವ ಹೆಚ್‌ಆರ್ ಸಿಬ್ಬಂದಿಗೆ ಅಶ್ಲೀಲ ಮೆಸೇಜ್ ಕಳುಹಿಸಿದ ಆರೋಪದಡಿಯಲ್ಲಿ ಪ್ರಕರಣ ದಾಖಲಾಗಿದೆ. ಈ ಯುವಕ ಹೆಚ್‌ಆರ್ ಸಿಬ್ಬಂದಿಗೆ ವಾಟ್ಸಪ್ ಮತ್ತು ಇ-ಮೇಲ್ ಮೂಲಕ ಕೊಲೆ ಬೆದರಿಕೆ ಹಾಕಿದ್ದಾನೆ ಎಂದು ಹೆಚ್‌ ಆರ್ ಸಿಬ್ಬಂದಿ ಆರೋಪಿಸಿದ್ದಾರೆ. ಬೆಂಗಳೂರಿನ ದೊಮ್ಮಲೂರಿನಲ್ಲಿರುವ (Domlur Bengaluru) ಬೇಕರ್ ಟಿಲ್ಲಿ ಒನ್ ಇಂಡಿಯಾ ಎಲ್‌ಎಲ್‌ಪಿಯ (Baker Tilly One India LLP) ಎಂಪ್ಲಾಯ್ ರಿಲೇಶನ್ಸ್ ಮ್ಯಾನೇಜರ್ ಈ ಸಂಬಂಧ ದೂರು ದಾಖಲಿಸಿದ್ದಾರೆ.

ಏನಿದು ಪ್ರಕರಣ?

2026ರ ಏಪ್ರಿಲ್‌ನಲ್ಲಿ ಪ್ರಾಜೆಕ್ಟ್ ಸೀನಿಯರ್ ಮ್ಯಾನೇಜರ್-ಕನ್ಸಲ್ಟಿಂಗ್ ಹುದ್ದೆಗೆ ಅರ್ಜಿ ಅಹ್ವಾನಿಸಿತ್ತು. ಜಾನ್ ಕಿಂಗ್ಸಿಲಿ ನಾಡರ್ ಎಂಬಾತ ಈ ಹುದ್ದೆಗೆ ಅರ್ಜಿ ಸಲ್ಲಿಕೆ ಮಾಡಿದ್ದನು. ಜೂನ್‌ನಲ್ಲಿ ನಡೆದ ವರ್ಚುವಲ್ ಸಂದರ್ಶನಕ್ಕೆ ನಾಡರ್ ಹಾಜರಾಗಿದ್ದನು. ಹಲವು ಸುತ್ತುಗಳಲ್ಲಿ ನಡೆದ ಸಂದರ್ಶನದಲ್ಲಿ ನಾಡರ್ ಭಾಗಿಯಾಗಿದ್ದನು.

ಜುಲೈ 2ರಂದು ತನ್ನ ಸಂದರ್ಶನದ ಫಲಿತಾಂಶಕ್ಕಾಗಿ ಹೆಚ್‌ಆರ್ ಸಿಬ್ಬಂದಿಯನ್ನು ಸಂಪರ್ಕಿಸಲು ನಾಡರ್ ಪ್ರಯತ್ನಿಸಿದ್ದಾನೆ. ಆದ್ರೆ ಕಂಪನಿಯ ನೇಮಕಾತಿ ತಂಡ ನಾಡರ್ ಕರೆಯನ್ನು ಸ್ವೀಕರಿಸಿಲ್ಲ. ತನ್ನ ಕಾಲ್‌ಗೆ ಸ್ಪಂದನೆ ಸಿಗದಿದ್ದಾಗ ಹೆಚ್‌ಆರ್ ಸಿಬ್ಬಂದಿಗೆ ವಾಟ್ಸಪ್ ಮೂಲಕ ಅಶ್ಲೀಲ ಸಂದೇಶ ಮತ್ತು ವಾಯ್ಸ್ ನೋಟ್ ಕಳುಹಿಸಲು ಆರಂಭಿಸಿದ್ದಾನೆ. ಇದರಿಂದ ಸಿಬ್ಬಂದಿ ನಾಡರ್ ಮೊಬೈಲ್ ಸಂಖ್ಯೆಯನ್ನು ಬ್ಲಾಕ್ ಮಾಡಿದ್ದಾರೆ.

ಇದನ್ನೂ ಓದಿ: ಇಂದು ಅವರು ನಾಳೆ ನಾನು? ಕಂಪನಿಯ ಲೇಆಫ್ ಕರಾಳ ಸತ್ಯ ಬಿಚ್ಚಿಟ್ಟ ಐಟಿ ಉದ್ಯೋಗಿ!

ಸಾಲು ಸಾಲು ಮೇಲ್ ಕಳುಹಿಸಿರುವ ಯುವಕ

ಇಷ್ಟಕ್ಕೆ ಸುಮ್ಮನಾಗದ ನಾಡರ್, ಸಿಬ್ಬಂದಿಯ ಮೇಲ್ ಐಡಿಗೆ ನಿಂದನೆಯ ಮೇಲ್‌ಗಳನ್ನು ಕಳುಹಿಸಲು ಆರಂಭಿಸಿದ್ದಾನೆ ಎಂದು ಹಿರಿಯ ಪೊಲೀಸ್ ಅಧಿಕಾರಿ ಹೇಳಿದ್ದಾರೆ. ಇದೀಗ ಅರ್ಜಿದಾರನ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ ಎಂದು ವರದಿಯಾಗಿದೆ.

ಇದನ್ನೂ ಓದಿ: "ನಿಮ್ಮ ಸಂಬಳವನ್ನು ಸದ್ದಿಲ್ಲದೆ ಖಾಲಿ ಮಾಡುತ್ತಿವೆ ಈ 5 ವೆಚ್ಚಗಳು" ಬೆಂಗಳೂರು ವ್ಯಕ್ತಿಯ ವೈರಲ್ ಪೋಸ್ಟ್

ವಿಜಯಪುರದಲ್ಲಿ ನಡೆದ ಪೊಲೀಸ್ ನೇಮಕಾತಿ ಪರೀಕ್ಷೆಯಲ್ಲೂ ಅಕ್ರಮ?; ಲಾಠಿ ಚಾರ್ಜ್ ಖಂಡಿಸಿದ ಬಿಜೆಪಿ ಮುಖಂಡ ವಿಜುಗೌಡ

Sathish Kumar KH — Sun, 02 Aug 2026 20:21:24 +0530

ವಿಜಯಪುರ (ಆ.02): ವಿಜಯಪುರ ಜಿಲ್ಲೆಯ ತಿಕೋಟಾ (Tikota) ಪರೀಕ್ಷಾ ಕೇಂದ್ರದಲ್ಲಿ (Exam Centre) ನಡೆದಿದ್ದ ಎನ್ನಲಾದ ಪರೀಕ್ಷಾ (Exam) ಗೊಂದಲ ಇದೀಗ ರಾಜಕೀಯ ತಿರುವು ಪಡೆದುಕೊಂಡಿದೆ. ಜಿಲ್ಲಾ ಬಿಜೆಪಿ (BJP) ಕಚೇರಿಯಲ್ಲಿ ಸುದ್ದಿಗೋಷ್ಠಿ (Press Conference) ನಡೆಸಿದ ಬಿಜೆಪಿ ಮುಖಂಡ ವಿಜುಗೌಡ ಪಾಟೀಲ್ (Vijugouda Patil), ಕಾಂಗ್ರೆಸ್ ಸರ್ಕಾರದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದರು.

ಸುದ್ದಿಗೋಷ್ಠಿಯಲ್ಲಿ ಪರೀಕ್ಷಾರ್ಥಿಗಳನ್ನು (Candidates) ಪೊಲೀಸರು ಬಲವಂತವಾಗಿ ಕರೆದೊಯ್ಯುತ್ತಿರುವ ವಿಡಿಯೋ (Video) ಪ್ರದರ್ಶಿಸಿದ ಅವರು, ಪರೀಕ್ಷೆ (Exam) ನಡೆಸುವಲ್ಲಿ ಸರ್ಕಾರ ಸಂಪೂರ್ಣ ವಿಫಲವಾಗಿದೆ ಎಂದು ಆರೋಪಿಸಿದರು. ದೂರದ ಧಾರವಾಡ (Dharwad) ಸೇರಿದಂತೆ ವಿವಿಧ ಜಿಲ್ಲೆಗಳಿಂದ ಪರೀಕ್ಷೆ ಬರೆಯಲು ಬಂದ ಅಭ್ಯರ್ಥಿಗಳಿಗೆ (Candidates) ಸರಿಯಾದ ವ್ಯವಸ್ಥೆ (Arrangements) ಕಲ್ಪಿಸದೇ ನಿರ್ಲಕ್ಷ್ಯ ವಹಿಸಲಾಗಿದೆ ಎಂದು ದೂರಿದರು.

11.15ರವರೆಗೆ ಪ್ರಶ್ನೆಪತ್ರಿಕೆ ಕೊಟ್ಟಿಲ್ಲ:

ವಿಜುಗೌಡ ಪಾಟೀಲ್ ಅವರ ಆರೋಪದ ಪ್ರಕಾರ, ಬೆಳಿಗ್ಗೆ ಸುಮಾರು 11.15 ಗಂಟೆಯವರೆಗೂ ಅನೇಕ ವಿದ್ಯಾರ್ಥಿಗಳಿಗೆ ಪ್ರಶ್ನೆಪತ್ರಿಕೆ (Question Paper) ಹಾಗೂ ಒಎಂಆರ್ ಶೀಟ್ (OMR Sheet) ವಿತರಣೆ ಮಾಡಲಾಗಿಲ್ಲ. ಕೆಲವು ಕಡೆ OMR ಶೀಟ್ ಸಂಖ್ಯೆ (OMR Number) ಮತ್ತು ಪ್ರಶ್ನೆಪತ್ರಿಕೆ ಸಂಖ್ಯೆ (Question Paper Number) ಹೊಂದಿಕೆಯಾಗದ ಕಾರಣ ಪರೀಕ್ಷಾರ್ಥಿಗಳು ಗೊಂದಲಕ್ಕೆ ಸಿಲುಕಿದರು ಎಂದು ಹೇಳಿದರು.

ಈ ಸಮಸ್ಯೆಯನ್ನು ಅಧಿಕಾರಿಗಳ (Officials) ಗಮನಕ್ಕೆ ತಂದರೂ ಯಾವುದೇ ಸ್ಪಂದನೆ ಸಿಗಲಿಲ್ಲ. ಸುಮಾರು 300ಕ್ಕೂ ಹೆಚ್ಚು ವಿದ್ಯಾರ್ಥಿಗಳು (Students) ಪರೀಕ್ಷಾ ಕೇಂದ್ರದ (Exam Centre) ಹೊರಗಡೆಯೇ ಉಳಿಯುವಂತಾಯಿತು ಎಂದು ಅವರು ಆರೋಪಿಸಿದರು.

ಪರಿಸ್ಥಿತಿಯನ್ನು ಸಮಾಧಾನದಿಂದ ನಿಭಾಯಿಸುವ ಬದಲು ಪೊಲೀಸರು (Police) ಲಾಠಿಚಾರ್ಜ್ (Lathi Charge) ನಡೆಸಿ ವಿದ್ಯಾರ್ಥಿಗಳನ್ನು ಬಲವಂತವಾಗಿ ಕರೆದೊಯ್ದಿದ್ದಾರೆ ಎಂದು ವಿಜುಗೌಡ ಪಾಟೀಲ್ ಗಂಭೀರ ಆರೋಪ ಮಾಡಿದರು. ಪರೀಕ್ಷೆಗೆ (Exam) ಬಂದ ಯುವಕರ ಮೇಲೆ ದೌರ್ಜನ್ಯ (Police Excess) ನಡೆದಿದೆ ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದರು.

ಈ ಘಟನೆಗೆ ನೈತಿಕ ಹೊಣೆ ಹೊತ್ತು ಶಿಕ್ಷಣ ಸಚಿವರು (Education Minister), ಉಸ್ತುವಾರಿ ಸಚಿವರು (District In-charge Minister) ಹಾಗೂ ಮುಖ್ಯಮಂತ್ರಿ ರಾಜೀನಾಮೆ ನೀಡಬೇಕು ಎಂದು ಅವರು ಆಗ್ರಹಿಸಿದರು. 'ಇತರ ರಾಜ್ಯಗಳಲ್ಲಿ ಇಂತಹ ವೈಫಲ್ಯಗಳಿಗೆ ಸಚಿವರು ರಾಜೀನಾಮೆ ನೀಡಿದ ಉದಾಹರಣೆಗಳಿವೆ. ಹಾಗಿದ್ದರೆ ಕರ್ನಾಟಕದಲ್ಲಿ (Karnataka) ಹೊಣೆಗಾರಿಕೆ ಯಾರು ಹೊರುತ್ತಾರೆ?' ಎಂದು ಪ್ರಶ್ನಿಸಿದರು.

ಅಧಿಕಾರಿಗಳ ನಿರ್ಲಕ್ಷ್ಯ (Negligence) ಹಾಗೂ ಪರೀಕ್ಷಾ ವ್ಯವಸ್ಥೆಯ (Examination System) ವೈಫಲ್ಯದಿಂದ ವಿದ್ಯಾರ್ಥಿಗಳ ಭವಿಷ್ಯಕ್ಕೆ (Students Future) ಧಕ್ಕೆಯಾಗಿದೆ ಎಂದು ಆರೋಪಿಸಿದ ಅವರು, ಸರ್ಕಾರ ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿ ತಪ್ಪಿತಸ್ಥರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದರು.

View this post on Instagram

A post shared by (@kirik_nanmaklu_official)

ಕೆಲಸ ಬಿಟ್ಟು ರಿಸ್ಕ್ ತೆಗೆದುಕೊಂಡ ಬೆಂಗಳೂರು ಯುವಕನಿಗೆ ಜಾಕ್‌ಪಾಟ್; ಈಗ ತಿಂಗಳಿಗೆ 2 ಕೋಟಿ ಆದಾಯ

Sushma Hegde — Thu, 06 Aug 2026 12:48:40 +0530

ಭಾರತದಲ್ಲಿ ಪ್ಲಾಸ್ಟಿಕ್ ಮಾಲಿನ್ಯ ದಿನದಿಂದ ದಿನಕ್ಕೆ ದೊಡ್ಡ ಪರಿಸರ ಸಮಸ್ಯೆಯಾಗಿ ಪರಿಣಮಿಸುತ್ತಿದೆ. ಏಕ-ಬಳಕೆಯ ಪ್ಲಾಸ್ಟಿಕ್ ತ್ಯಾಜ್ಯವು ಭೂಕುಸಿತ ಪ್ರದೇಶಗಳು, ಒಳಚರಂಡಿ ವ್ಯವಸ್ಥೆಗಳು ಹಾಗೂ ಸಮುದ್ರ ಪರಿಸರದ ಮೇಲೆ ಗಂಭೀರ ಪರಿಣಾಮ ಬೀರುತ್ತಿದೆ. ಇದೇ ಸಮಸ್ಯೆಗೆ ಶಾಶ್ವತ ಪರಿಹಾರ ಕಂಡುಕೊಳ್ಳುವ ಉದ್ದೇಶದಿಂದ NIFT ಬೆಂಗಳೂರು ಪದವೀಧರ ವೈಭವ್ ಅನಂತ್ ತಮ್ಮ ಉದ್ಯೋಗವನ್ನೇ ತೊರೆದು ಪರಿಸರ ಸ್ನೇಹಿ ಪ್ಯಾಕೇಜಿಂಗ್ ಸ್ಟಾರ್ಟ್‌ಅಪ್ Bambrew ಆರಂಭಿಸಿದರು. ಇಂದು ಈ ಕಂಪನಿ ಪ್ರತಿ ತಿಂಗಳು ಸುಮಾರು 2 ಕೋಟಿ ಆದಾಯ ಗಳಿಸುತ್ತಿದ್ದು, ಭಾರತದ ಪ್ರಮುಖ ಗ್ರೀನ್‌ಟೆಕ್ ಸ್ಟಾರ್ಟ್‌ಅಪ್‌ಗಳಲ್ಲಿ ಒಂದಾಗಿದೆ.

ಮಧ್ಯಮ ವರ್ಗದ ಕುಟುಂಬದಿಂದ ಸ್ಟಾರ್ಟ್‌ಅಪ್ ಲೋಕಕ್ಕೆ

ಜಾರ್ಖಂಡ್‌ನ ಹಜಾರಿಬಾಗ್ ಮೂಲದ ವೈಭವ್ ಅನಂತ್ ಮಧ್ಯಮ ವರ್ಗದ ಕುಟುಂಬದಲ್ಲಿ ಬೆಳೆದವರು. ಬೆಂಗಳೂರಿನ ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಫ್ಯಾಷನ್ ಟೆಕ್ನಾಲಜಿ (NIFT) ಯಲ್ಲಿ B.FTech (Fashion Technology) ಪದವಿ ಪಡೆದ ಬಳಿಕ ದೆಹಲಿಯ ಎಡ್‌ಟೆಕ್ ಸ್ಟಾರ್ಟ್‌ಅಪ್‌ನಲ್ಲಿ ಉದ್ಯೋಗ ಆರಂಭಿಸಿದರು. ಆದರೆ 2018ರಲ್ಲಿ ಭಾರತ ಸರ್ಕಾರ ಏಕ-ಬಳಕೆಯ ಪ್ಲಾಸ್ಟಿಕ್‌ಗಳನ್ನು ಹಂತಹಂತವಾಗಿ ನಿಷೇಧಿಸುವ ಯೋಜನೆ ಘೋಷಿಸಿದ ಬಳಿಕ, ಪ್ಲಾಸ್ಟಿಕ್‌ನಿಂದ ಪರಿಸರಕ್ಕೆ ಆಗುತ್ತಿರುವ ಹಾನಿ ಅವರ ಗಮನ ಸೆಳೆಯಿತು. ಇದರಿಂದ ಉತ್ತಮ ಉದ್ಯೋಗವನ್ನು ತೊರೆದು ಪರಿಸರ ಸ್ನೇಹಿ ಪರ್ಯಾಯಗಳನ್ನು ಅಭಿವೃದ್ಧಿಪಡಿಸುವ ನಿರ್ಧಾರ ಕೈಗೊಂಡರು.

2018ರಲ್ಲಿ ಹುಟ್ಟಿದ Bambrew

2018ರ ಆಗಸ್ಟ್‌ನಲ್ಲಿ ವೈಭವ್ Bambrew ಎಂಬ ಗ್ರೀನ್‌ಟೆಕ್ ಸ್ಟಾರ್ಟ್‌ಅಪ್ ಆರಂಭಿಸಿದರು. ಆರಂಭದಲ್ಲಿ ಪ್ಲಾಸ್ಟಿಕ್ ಸ್ಟ್ರಾಗಳಿಗೆ ಪರ್ಯಾಯ ಉತ್ಪನ್ನಗಳನ್ನು ತಯಾರಿಸಿದ ಕಂಪನಿ, ನಂತರ ಸಂಪೂರ್ಣ ಪ್ಯಾಕೇಜಿಂಗ್ ಕ್ಷೇತ್ರಕ್ಕೆ ವಿಸ್ತರಿಸಿತು.

ಬಿದಿರು, ಮರದ ತಿರುಳು, ಕಬ್ಬು, ಕಡಲಕಳೆ

Bambrew ಪ್ಲಾಸ್ಟಿಕ್‌ಗೆ ಬದಲಾಗಿ ಬಿದಿರು (Bamboo), ಮರದ ತಿರುಳು (Wood Pulp), ಕಬ್ಬಿನ ತೊಗಟೆ (Sugarcane Bagasse) ಮತ್ತು ಕಡಲಕಳೆ (Seaweed) ಸೇರಿದಂತೆ ನವೀಕರಿಸಬಹುದಾದ ನೈಸರ್ಗಿಕ ಕಚ್ಚಾ ವಸ್ತುಗಳಿಂದ ಪ್ಯಾಕೇಜಿಂಗ್ ಉತ್ಪನ್ನಗಳನ್ನು ತಯಾರಿಸುತ್ತದೆ. ಕಂಪನಿಯ ಪ್ರಕಾರ, ಈ ಉತ್ಪನ್ನಗಳು ಜೈವಿಕವಾಗಿ ವಿಘಟನೀಯ (Biodegradable), ಕಾಂಪೋಸ್ಟ್ ಆಗುವ (Compostable) ಹಾಗೂ ಸಂಪೂರ್ಣ ಪ್ಲಾಸ್ಟಿಕ್-ಮುಕ್ತವಾಗಿವೆ. ಬಳಸುವ ಬಿದಿರು ಮತ್ತು ಮರದ ತಿರುಳು Forest Stewardship Council (FSC) ಪ್ರಮಾಣೀಕೃತವಾಗಿವೆ.

ಭಾರತದ ಬಿದಿರೇ ಯಶಸ್ಸಿನ ಬಲ

ವೈಭವ್ ಅನಂತ್ ಅವರ ಪ್ರಕಾರ, ಭಾರತವು ವಿಶ್ವದ ಎರಡನೇ ಅತಿದೊಡ್ಡ ಬಿದಿರು ಉತ್ಪಾದಕ ರಾಷ್ಟ್ರವಾಗಿದೆ. ಸುಲಭವಾಗಿ ದೊರೆಯುವ ಹಾಗೂ ಹಲವು ವರ್ಷಗಳ ಕಾಲ ಕೊಯ್ಲು ಮಾಡಬಹುದಾದ ಬಿದಿರು ಪರಿಸರ ಸ್ನೇಹಿ ಪ್ಯಾಕೇಜಿಂಗ್‌ಗೆ ಅತ್ಯುತ್ತಮ ಕಚ್ಚಾ ವಸ್ತುವಾಗಿದೆ.

10,000 ಟನ್ ಪ್ಲಾಸ್ಟಿಕ್ ತ್ಯಾಜ್ಯ ಕಡಿತ

Bambrew ಉತ್ಪನ್ನಗಳು ಇದುವರೆಗೆ 10,000 ಟನ್‌ಗಿಂತ ಹೆಚ್ಚು ಪ್ಲಾಸ್ಟಿಕ್ ತ್ಯಾಜ್ಯವನ್ನು ಕಡಿಮೆ ಮಾಡಲು ಸಹಾಯ ಮಾಡಿವೆ. ಕಂಪನಿಯ ಪರಿಸರ ಸ್ನೇಹಿ ಪ್ಯಾಕೇಜಿಂಗ್ ಪರಿಹಾರಗಳು ಈಗ 10ಕ್ಕೂ ಹೆಚ್ಚು ದೇಶಗಳಲ್ಲಿ ಮಾರಾಟವಾಗುತ್ತಿವೆ.

Amazon, Flipkart, Nykaa ಸೇರಿ ದಿಗ್ಗಜ ಕಂಪನಿಗಳ ಜೊತೆ ಒಪ್ಪಂದ

ಇಂದು Bambrew ಭಾರತದ ಹಲವು ದೊಡ್ಡ ಕಂಪನಿಗಳಿಗೆ ಪರಿಸರ ಸ್ನೇಹಿ ಪ್ಯಾಕೇಜಿಂಗ್ ಒದಗಿಸುತ್ತಿದೆ. ಕಂಪನಿಯ ಗ್ರಾಹಕರ ಪಟ್ಟಿಯಲ್ಲಿ:

Amazon

Flipkart

Nykaa

Myntra

BigBasket

1mg

Puma

Chumbak

Aditya Birla Group

Accessorize London

ಗ್ರಾಹಕರಿಗೂ ಹೊಸ ಉತ್ಪನ್ನಗಳು

ಕೇವಲ ಕಂಪನಿಗಳಿಗೆ ಪ್ಯಾಕೇಜಿಂಗ್ ಪೂರೈಸುವುದಲ್ಲದೆ, Bambrew ಕಳೆದ ವರ್ಷದಿಂದ ನೇರವಾಗಿ ಗ್ರಾಹಕರಿಗಾಗಿ ಜೈವಿಕವಾಗಿ ಕರಗುವ ಕಸದ ಚೀಲಗಳು, ಬಿದಿರಿನ ಪೇಪರ್ ಟವೆಲ್‌, ಟಾಯ್ಲೆಟ್ ರೋಲ್‌, ಸ್ಯಾನಿಟರಿ ಡಿಸ್ಪೋಸಲ್ ಬ್ಯಾಗ್ ಹಾಗೂ ಪೆಟ್ ವೇಸ್ಟ್ ಬ್ಯಾಗ್‌ಗಳನ್ನು ಮಾರುಕಟ್ಟೆಗೆ ಪರಿಚಯಿಸಿದೆ.

9ನೇ ತರಗತಿ ಫೇಲಾಗಿದ್ದ ಟ್ಯಾಕ್ಸಿ ಡ್ರೈವರ್‌ಗೆ ಕೆಲಸ ಕೊಟ್ಟ ಸ್ಟಾರ್ಟ್‌ಅಪ್ ಮಾಲೀಕ: ಈಗ ಕಂಪನಿಯ ಇಂಡಿಯಾ ಹೆಡ್!

Sathish Kumar KH — Sat, 08 Aug 2026 22:05:49 +0530

ಸಾಮಾನ್ಯವಾಗಿ ಕಾರ್ಪೊರೇಟ್ ಕಂಪನಿಗಳು (Corporate Companies) ಕೆಲಸಕ್ಕೆ ಆಳುಗಳನ್ನು ನೇಮಿಸಿಕೊಳ್ಳುವಾಗ (Recruitment) ಅಭ್ಯರ್ಥಿಯ ಶೈಕ್ಷಣಿಕ ಅರ್ಹತೆ (Educational Qualification), ಇಂಗ್ಲಿಷ್ ಸಂವಹನ ಕೌಶಲ್ಯ (English Communication) ಮತ್ತು ಅನುಭವವನ್ನು ನೋಡುತ್ತವೆ. ಆದರೆ, ಹೈದರಾಬಾದ್ ಮೂಲದ ಪ್ರಸಿದ್ಧ ಸ್ಟಾರ್ಟ್‌ಅಪ್ (Startup) 'ಅಡೋನ್‌ಮೋ' (Adonmo) ಸಹ-ಸಂಸ್ಥಾಪಕ ಹಾಗೂ ಮೈಕ್ರೋಸಾಫ್ಟ್‌ನ (Microsoft) ಮಾಜಿ ಉದ್ಯೋಗಿ ಶ್ರಾವಂತ್ ಗಜುಲಾ (Sravanth Gajula) ಅವರು ಮಾಡಿದ್ದು ಸಂಪೂರ್ಣ ಭಿನ್ನವಾದ ಕಾರ್ಯ!

ಹತ್ತು ವರ್ಷಗಳ ಹಿಂದೆ ಅವರು ತಮ್ಮ ಕಂಪನಿಯನ್ನು ಪ್ರಾರಂಭಿಸಿದಾಗ, ಮೊದಲ ಉದ್ಯೋಗಿಯಾಗಿ (First Employee) ಒಬ್ಬ ಟ್ಯಾಕ್ಸಿ ಡ್ರೈವರ್‌ ಅನ್ನು ನೇಮಿಸಿಕೊಂಡಿದ್ದರು. ಇಂದು ಆ ನಿರ್ಧಾರದ ಫಲವಾಗಿ, ಆ ವ್ಯಕ್ತಿ ಕಂಪನಿಯ ಅತ್ಯುನ್ನತ ಹುದ್ದೆಗೆ ಬೆಳೆದು ನಿಂತಿದ್ದಾರೆ! ಶ್ರಾವಂತ್ ಗಜುಲಾ ಅವರು ಸೋಶಿಯಲ್ ಮೀಡಿಯಾ ಪ್ಲಾಟ್‌ಫಾರ್ಮ್ ಲಿಂಕ್ಡ್‌ಇನ್‌ನಲ್ಲಿ (LinkedIn) ಹಂಚಿಕೊಂಡಿರುವ ಈ ಸ್ಪೂರ್ತಿದಾಯಕ ಕಥೆ (Inspirational Story) ಈಗ ಇಂಟರ್‌ನೆಟ್‌ನಲ್ಲಿ ವೈರಲ್ ಆಗಿದೆ.

ಕೇವಲ 9ನೇ ತರಗತಿ ಓದಿದ್ದ ಟ್ಯಾಕ್ಸಿ ಡ್ರೈವರ್!

ಹತ್ತು ವರ್ಷಗಳ ಹಿಂದೆ ಶ್ರಾವಂತ್ ಅವರು ನೇಮಿಸಿಕೊಂಡ ವ್ಯಕ್ತಿ ಕೇವಲ 9ನೇ ತರಗತಿಯವರೆಗೆ ಮಾತ್ರ ವಿದ್ಯಾಭ್ಯಾಸ ಮಾಡಿದ್ದರು. ಅವರಿಗೆ ಯಾವುದೇ ಕಾರ್ಪೊರೇಟ್ ಅನುಭವವಿರಲಿಲ್ಲ ಮತ್ತು ಇಂಗ್ಲಿಷ್ ಮಾತನಾಡಲು ಬರುತ್ತಿರಲಿಲ್ಲ. ಯಾವುದೇ ಕಂಪನಿಯೂ ಇಂತಹ ವ್ಯಕ್ತಿಯನ್ನು ಕೆಲಸಕ್ಕೆ ತಗೆದುಕೊಳ್ಳಲು ಸಿದ್ಧವಿರಲಿಲ್ಲ. ಆದರೆ, ಶ್ರಾವಂತ್ ಅವರು ಆ ಟ್ಯಾಕ್ಸಿ ಡ್ರೈವರ್‌ನಲ್ಲಿದ್ದ ಕಲಿಯುವ ಅದಮ್ಯ ಆಸೆ ಮತ್ತು ಪ್ರಾಮಾಣಿಕತೆಯನ್ನು (Honesty & Dedication) ಕಂಡು ಅವರಿಗೆ ಕೆಲಸ ನೀಡಿದ್ದರು.

ಕಂಪನಿಯಿಂದ ತರಬೇತಿ ಮತ್ತು ಸಂಪೂರ್ಣ ನಂಬಿಕೆ:

ಕೆಲಸಕ್ಕೆ ಸೇರಿಸಿಕೊಂಡ ನಂತರ ಕಂಪನಿಯೇ ಅವರಿಗೆ ಸ್ಪೋಕನ್ ಇಂಗ್ಲಿಷ್ (Spoken English) ತರಬೇತಿ ಕೊಡಿಸಿತು. ಮೆಲ್ಲನೆ ಕಂಪನಿಯ ಪ್ರಮುಖ ಕಾರ್ಯಾಚರಣೆಗಳ ಜವಾಬ್ದಾರಿಯನ್ನು ಅವರ ಹೆಗಲಿಗೆ ನೀಡಲಾಯಿತು. ಶ್ರಾವಂತ್ ಅವರು ತಮ್ಮ ಉದ್ಯೋಗಿಯ ಮೇಲೆ ಇಟ್ಟಿದ್ದ ಸಂಪೂರ್ಣ ನಂಬಿಕೆಗೆ ತಕ್ಕಂತೆ, ಆ ವ್ಯಕ್ತಿಯೂ ಹಗಲಿರುಳು ಶ್ರಮಿಸಿ ಕಂಪನಿಯ ಬೆಳವಣಿಗೆಗೆ ಶ್ರಮಿಸಿದರು.

10 ವರ್ಷಗಳ ನಂತರ ಸಿಕ್ಕ ಬಂಪರ್ ಬಡ್ತಿ!

ಶ್ರಾವಂತ್ ಅವರ ನಂಬಿಕೆ ಮತ್ತು ಉದ್ಯೋಗಿಯ ಕಠಿಣ ಪರಿಶ್ರಮದ ಫಲವಾಗಿ, ಹತ್ತು ವರ್ಷಗಳ ನಂತರ ಇಂದು ಅವರು 'ಅಡೋನ್‌ಮೋ' ಕಂಪನಿಯ ಭಾರತದಾದ್ಯಂತದ ವಿಭಾಗದ 'ಪ್ರೊಕ್ಯೂರ್‌ಮೆಂಟ್ ಹೆಡ್' (Head of Procurement - India) ಆಗಿ ಬಡ್ತಿ (Promotion) ಪಡೆದಿದ್ದಾರೆ! ಇಂದು ಅವರು ದೇಶಾದ್ಯಂತ ಕಂಪನಿಯ ಸರಬರಾಜು ಮತ್ತು ನಿರ್ವಹಣೆಯ ದೊಡ್ಡ ಹೊಣೆಗಾರಿಕೆಯನ್ನು ನಿರ್ವಹಿಸುತ್ತಿದ್ದಾರೆ.

ಜನರ ಮೆಚ್ಚುಗೆ ಹಾಗೂ ನಾಯಕತ್ವದ ಪಾಠ:

‘ಬೇರೆಯವರು ತಿರಸ್ಕರಿಸಿದವರನ್ನು ಕೆಲಸಕ್ಕೆ ನೇಮಿಸಿಕೊಂಡು, ಅವರ ಮೇಲಿನ ನಂಬಿಕೆಯಿಂದ ಕೌಶಲ್ಯಗಳನ್ನು ಬೆಳೆಸುವುದೇ ನಿಜವಾದ ಕಂಪನಿ ಸಂಸ್ಕೃತಿ (Company Culture). ಉದ್ಯೋಗಿಗಳ ಮೇಲೆ ನಂಬಿಕೆ ಇಟ್ಟರೆ, ಅವರು ನಮ್ಮ ನಿರೀಕ್ಷೆಗೂ ಮೀರಿ ಬೆಳೆಯುತ್ತಾರೆ,’ ಎಂದು ಶ್ರಾವಂತ್ ಬರೆದುಕೊಂಡಿದ್ದಾರೆ.

ಈ ಪೋಸ್ಟ್‌ಗೆ ಸಾವಿರಾರು ಜನರು ಕಾಮೆಂಟ್ ಮಾಡಿದ್ದು, ‘ಕೌಶಲ್ಯಗಳನ್ನು ತರಬೇತಿ ಮೂಲಕ ಕಲಿಸಬಹುದು, ಆದರೆ ಪ್ರಾಮಾಣಿಕತೆ ಮತ್ತು ನಿಷ್ಠೆಯನ್ನು ಕಲಿಸಲು ಸಾಧ್ಯವಿಲ್ಲ. ನಿಜವಾದ ನಾಯಕತ್ವ (Leadership) ಎಂದರೆ ಕಂಪನಿಯನ್ನು ಮಾತ್ರವಲ್ಲ, ಜನರ ಬದುಕನ್ನೂ ಬೆಳೆಸುವುದು’ ಎಂದು ನೆಟ್ಟಿಗರು ಶ್ಲಾಘಿಸಿದ್ದಾರೆ.

ಕಾನ್ಸ್‌ಟೇಬಲ್ ಪರೀಕ್ಷೆ ವೇಳೆ ಹಲವು ಅನುಮಾನ - ವಿಜಯಪುರದಲ್ಲಿ ಭುಗಿಲೆದ್ದ ಪರೀಕ್ಷಾರ್ಥಿಗಳ ಆಕ್ರೋಶ

Ganesh Mabla Gowda — Sun, 02 Aug 2026 13:07:14 +0530

ವಿಜಯಪುರ: ಇಂದು ನಡೆಯುತ್ತಿದ್ದ ಪೊಲೀಸ್ ಕಾನ್ಸ್‌ಟೇಬಲ್ ನೇಮಕಾತಿ ಪ್ರವೇಶ ಪರೀಕ್ಷೆಯಲ್ಲಿ ಭಾರೀ ಗೊಂದಲ ಹಾಗೂ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿದೆ. ಪರೀಕ್ಷಾ ಕೇಂದ್ರದಲ್ಲಿ ಪ್ರಶ್ನೆ ಪತ್ರಿಕೆ ವಿತರಿಸಲು ವಿಳಂಬ ಮಾಡಿದ್ದರಿಂದ ಆಕ್ರೋಶಗೊಂಡ ಅಭ್ಯರ್ಥಿಗಳು ಭಾರಿ ಪ್ರತಿಭಟನೆ ನಡೆಸಿದ್ದು, ಕಾಲೇಜಿನ ಗೇಟ್ ಮುರಿದು ಆಕ್ರೋಶ ಹೊರಹಾಕಿದ್ದಾರೆ.

ನಡೆದಿದ್ದೇನು?

ವಿಜಯಪುರ ಜಿಲ್ಲೆಯ ತಿಕೋಟಾದ ಕೋಟ್ಯಾಳ್ ರಸ್ತೆಯಲ್ಲಿರುವ ಶಾರದಾಂಬಾ ಪಿಯು ಕಾಲೇಜಿನಲ್ಲಿ ಈ ಘಟನೆ ನಡೆದಿದೆ. ನಿಯಮದ ಪ್ರಕಾರ ಬೆಳಗ್ಗೆ 10:30ಕ್ಕೆ ಅಭ್ಯರ್ಥಿಗಳಿಗೆ ಪ್ರಶ್ನೆ ಪತ್ರಿಕೆ ನೀಡಬೇಕಾಗಿತ್ತು. ಸುಮಾರು ಅರ್ಧ ಗಂಟೆ ತಡವಾಗಿ ಅಂದರೆ 11 ಗಂಟೆಗೆ ಪ್ರಶ್ನೆ ಪತ್ರಿಕೆ ನೀಡಲಾಗಿದೆ ಎಂದು ಪರೀಕ್ಷಾರ್ಥಿಗಳು ಗಂಭೀರವಾಗಿ ಆರೋಪಿಸಿದ್ದಾರೆ.

ಗೇಟ್ ಮುರಿದು ಪರೀಕ್ಷಾರ್ಥಿಗಳ ಆಕ್ರೋಶ

ಪ್ರಶ್ನೆ ಪತ್ರಿಕೆ ನೀಡಲು ವಿಳಂಬವಾಗುತ್ತಿದ್ದಂತೆ ಆತಂಕಕ್ಕೊಳಗಾದ ಅಭ್ಯರ್ಥಿಗಳು ಪರೀಕ್ಷಾ ಕೇಂದ್ರದ ಒಳಗೆ ಮತ್ತು ಹೊರಗೆ ಗದ್ದಲ ಆರಂಭಿಸಿದರು. ಸಮಯದ ಅಭಾವವಾಗುತ್ತದೆ ಮತ್ತು ಪರೀಕ್ಷಾ ವ್ಯವಸ್ಥೆಯಲ್ಲಿ ಪಾರದರ್ಶಕತೆ ಇಲ್ಲ ಎಂದು ಆರೋಪಿಸಿ ಪ್ರತಿಭಟನೆ ನಡೆಸಿದರು. ಈ ವೇಳೆ ಆಕ್ರೋಶ ಎಷ್ಟಿತ್ತೆಂದರೆ, ಪರೀಕ್ಷಾರ್ಥಿಗಳು ಕಾಲೇಜಿನ ಮುಖ್ಯ ಗೇಟ್ ಅನ್ನು ಮುರಿದು ಹಾಕಿ ಆಕ್ರೋಶ ವ್ಯಕ್ತಪಡಿಸಿದರು.

ಸ್ಥಳಕ್ಕೆ ಜಿಲ್ಲಾಧಿಕಾರಿ ಭೇಟಿ

ಪರೀಕ್ಷಾ ಕೇಂದ್ರದಲ್ಲಿ ಗಲಾಟೆ ನಡೆಯುತ್ತಿರುವ ಮಾಹಿತಿ ತಿಳಿಯುತ್ತಿದ್ದಂತೆಯೇ ವಿಜಯಪುರ ಜಿಲ್ಲಾಧಿಕಾರಿ ಆನಂದ ಕೆ. ಅವರು ಸ್ಥಳಕ್ಕೆ ಧಾವಿಸಿದರು. ಪರೀಕ್ಷಾರ್ಥಿಗಳನ್ನು ಭೇಟಿ ಮಾಡಿ ಮಾಹಿತಿ ಪಡೆದ ಜಿಲ್ಲಾಧಿಕಾರಿಗಳು, ಪರೀಕ್ಷಾ ಕೇಂದ್ರದ ಅಧಿಕಾರಿಗಳಿಂದ ವಿಳಂಬಕ್ಕೆ ಕಾರಣವೇನು ಎಂಬ ಬಗ್ಗೆ ವಿವರಣೆ ಕೇಳಿದರು. ಘಟನೆಯ ಕುರಿತು ಸಂಪೂರ್ಣ ಮಾಹಿತಿ ಪಡೆದ ಡಿಸಿ ಅವರು, ಅಭ್ಯರ್ಥಿಗಳನ್ನು ಸಮಾಧಾನಪಡಿಸುವ ಪ್ರಯತ್ನ ಮಾಡಿದರು.

ಅಭ್ಯರ್ಥಿಗಳ ಆತಂಕ

ನಾವು ತಿಂಗಳುಗಟ್ಟಲೆ ಕಷ್ಟಪಟ್ಟು ಪರೀಕ್ಷೆಗೆ ತಯಾರಿ ನಡೆಸಿದ್ದೇವೆ. ಅರ್ಧ ಗಂಟೆ ತಡವಾಗಿ ಪ್ರಶ್ನೆ ಪತ್ರಿಕೆ ನೀಡಿದರೆ ನಮಗೆ ಉತ್ತರಿಸಲು ಸಮಯ ಸಾಕಾಗುವುದಿಲ್ಲ. ಇಂತಹ ಬೇಜವಾಬ್ದಾರಿತನದಿಂದ ಅಭ್ಯರ್ಥಿಗಳ ಭವಿಷ್ಯಕ್ಕೆ ತೊಂದರೆಯಾಗುತ್ತದೆ ಎಂದು ಪರೀಕ್ಷಾರ್ಥಿಗಳು ಕಿಡಿಕಾರಿದ್ದಾರೆ. ಸದ್ಯ ಪರೀಕ್ಷಾ ಕೇಂದ್ರದಲ್ಲಿ ಪೊಲೀಸ್ ಬಂದೋಬಸ್ತ್ ಏರ್ಪಡಿಸಲಾಗಿದ್ದು, ಅಧಿಕಾರಿಗಳು ಪರಿಸ್ಥಿತಿಯನ್ನು ತಿಳಿಗೊಳಿಸಲು ಮುಂದಾಗಿದ್ದಾರೆ.

ಆಟೋ ಹತ್ತಿದ್ರೆ 60 ರೂಪಾಯಿ ಖರ್ಚು; ಬೆಂಗಳೂರಿನ CA ಮಾಡಿದ್ರು ಈ ಕೆಲಸ, ತಿಂಗಳಿಗೆ 1,560 ಉಳಿತಾಯ

Sushma Hegde — Fri, 07 Aug 2026 14:22:05 +0530

22ನೇ ವಯಸ್ಸಿನಲ್ಲಿ ಮೊದಲ ಉದ್ಯೋಗ ಆರಂಭಿಸಿದ ಮೀನಲ್ ಗೋಯೆಲ್‌ಗೆ ತಿಂಗಳಿಗೆ 20,000 ಸಂಬಳ ಬರುತ್ತಿತ್ತು. ಬಾಡಿಗೆ, ಊಟ ಮತ್ತು ಇತರ ಬಿಲ್‌ಗಳನ್ನು ಪಾವತಿಸಿದ ಬಳಿಕ ಕೈಯಲ್ಲಿ ಉಳಿಯುತ್ತಿದ್ದದ್ದು ಕೇವಲ 3,000. ಇಂತಹ ಸಂದರ್ಭದಲ್ಲಿ ಪ್ರತಿದಿನ ಆಟೋಗೆ 60 ರೂಪಾಯಿ ಖರ್ಚು ಮಾಡುವ ಬದಲು, ಅವರು ಮೂರು ತಿಂಗಳ ಕಾಲ ಪ್ರತಿದಿನ 4 ಕಿ.ಮೀ ನಡೆದು ಕಚೇರಿಗೆ ತೆರಳಿದ್ದರು. ಹಣ ಉಳಿಸಲು ಆರಂಭಿಸಿದ ಈ ಸಣ್ಣ ನಿರ್ಧಾರವೇ ಮುಂದೆ ಅವರಿಗೆ ಸ್ವಾವಲಂಬನೆ, ತಾಳ್ಮೆ ಮತ್ತು ಕಠಿಣ ಪರಿಸ್ಥಿತಿಗಳನ್ನು ಎದುರಿಸುವ ಸಾಮರ್ಥ್ಯ ಕಲಿಸಿದ ದೊಡ್ಡ ಜೀವನಪಾಠವಾಯಿತು.

ದಿನಕ್ಕೆ 60 ತಿಂಗಳಿಗೆ 1,560

ಮೀನಲ್ ಅವರ ಸುತ್ತಮುತ್ತಲಿನವರು ಪ್ರತಿದಿನ 60 ರೂಪಾಯಿ ಆಟೋಗೆ ಖರ್ಚು ಮಾಡುವುದು ದೊಡ್ಡ ವಿಷಯವಲ್ಲ, ಆಟೋದಲ್ಲೇ ಹೋಗಿ ಎಂದು ಹೇಳುತ್ತಿದ್ದರು. ಆದರೆ ಅವರು ಲೆಕ್ಕ ಹಾಕಿದಾಗ ಪರಿಸ್ಥಿತಿ ಬೇರೆಯೇ ಕಾಣಿಸಿತು.

26 ಕೆಲಸದ ದಿನ × 60 = ತಿಂಗಳಿಗೆ 1,560.

ಅಂದರೆ 3,000 ಮಾಸಿಕ ಉಳಿತಾಯದಲ್ಲಿ ಬರೋಬ್ಬರಿ 52% ಹಣ ಆಟೋ ಪ್ರಯಾಣಕ್ಕೇ ಖರ್ಚಾಗುತ್ತಿತ್ತು. ಹೀಗಾಗಿ ಆಟೋ ಬಿಟ್ಟು ನಡೆಯಲು ನಿರ್ಧರಿಸಿದರು.

ಮೂರು ತಿಂಗಳು ಪ್ರತಿದಿನ 4 ಕಿ.ಮೀ ನಡಿಗೆ

ಆಟೋ ದರ ಉಳಿಸಲು ಮೀನಲ್ ಸತತ ಮೂರು ತಿಂಗಳು ಪ್ರತಿದಿನ 4 ಕಿ.ಮೀ ನಡೆದು ಕೆಲಸಕ್ಕೆ ಹೋಗುತ್ತಿದ್ದರು. ಈ ವಿಚಾರವನ್ನು ತಮ್ಮ ಪೋಷಕರಿಗೂ ಅವರು ತಿಳಿಸಿರಲಿಲ್ಲ. ತಮ್ಮ ಪೋಷಕರಿಗೆ ವಿಷಯ ಗೊತ್ತಾಗಿದ್ದರೆ, ಅವರು ತಕ್ಷಣ ಹಣ ಕಳುಹಿಸಿ ಸಹಾಯ ಮಾಡುತ್ತಿದ್ದರು ಎಂದು ಮೀನಲ್ ಹೇಳಿದ್ದಾರೆ. ಆದರೆ ಅವರಿಗೆ ಅದು ಬೇಕಿರಲಿಲ್ಲ.

ಇನ್ನು ಮುಂದೆ ಪೋಷಕರನ್ನು ಅವಲಂಬಿಸುವುದಿಲ್ಲ

20ನೇ ವಯಸ್ಸಿನಲ್ಲೇ ಮೀನಲ್ ತಮ್ಮೊಳಗೆ ಒಂದು ನಿರ್ಧಾರ ಮಾಡಿಕೊಂಡಿದ್ದರಂತೆ—ಇನ್ನು ಮುಂದೆ ತಮ್ಮ ಖರ್ಚುಗಳಿಗೆ ಪೋಷಕರನ್ನು ಅವಲಂಬಿಸಬಾರದು. ಹೀಗಾಗಿ ದಿನಕ್ಕೆ 60 ರೂಪಾಯಿ ಉಳಿಸುವುದಕ್ಕಿಂತ, ತಮ್ಮ ಕಾಲ ಮೇಲೆ ತಾವು ನಿಲ್ಲಬೇಕು ಎಂಬ ಉದ್ದೇಶ ಅವರಿಗೆ ಮುಖ್ಯವಾಗಿತ್ತು.

ನಾನು ಉಳಿತಾಯಕ್ಕಿಂತ ದೊಡ್ಡದನ್ನು ನಿರ್ಮಿಸುತ್ತಿದ್ದೆ

ತಾವು ಪ್ರತಿದಿನ 4 ಕಿ.ಮೀ ನಡೆದುಕೊಂಡು ಹೋಗುತ್ತಿದ್ದುದನ್ನು ನೋಡಿದ ಕೆಲವರು ಮೀನಲ್ ಅವರನ್ನು ಅಸಮಂಜಸವಾಗಿ ನಡೆದುಕೊಳ್ಳುತ್ತಿದ್ದಾರೆ ಎಂದು ಭಾವಿಸಿದ್ದರು. ಪೋಷಕರು ಸಹಾಯ ಮಾಡಲು ಸಿದ್ಧರಾಗಿದ್ದರೂ, ಇಷ್ಟೊಂದು ಕಷ್ಟಪಟ್ಟು ನಡೆಯುವ ಅಗತ್ಯವೇನು ಎಂದು ಕೆಲವರು ಪ್ರಶ್ನಿಸುತ್ತಿದ್ದರು.

ಆದರೆ ಮೀನಲ್‌ಗೆ ಆ ನಡಿಗೆ ಕೇವಲ ಹಣ ಉಳಿಸುವ ಮಾರ್ಗವಾಗಿರಲಿಲ್ಲ

ಪ್ರತಿದಿನ ಆ 4 ಕಿ.ಮೀ ನಡೆಯುವಾಗ ನಾನು ಉಳಿತಾಯಕ್ಕಿಂತ ದೊಡ್ಡದನ್ನು ನಿರ್ಮಿಸುತ್ತಿದ್ದೆ ಎಂಬುದು ಅವರ ನಿಲುವು. ಅದು ಅವರ ಪಾಲಿಗೆ ಸ್ವಾವಲಂಬನೆಯ ನಿರ್ಮಾಣವಾಗಿತ್ತು.

ಸಣ್ಣ ನಿರ್ಧಾರ, ದೊಡ್ಡ ಜೀವನಪಾಠ

ರೂಪಾಯಿ 60 ಉಳಿಸುವುದರಿಂದ ಆರಂಭವಾದ ಈ ಪ್ರಯಾಣ, ಮೀನಲ್‌ಗೆ ಹಣದ ಮೌಲ್ಯ ಮಾತ್ರವಲ್ಲದೆ ಸ್ವಾತಂತ್ರ್ಯ, ಸ್ಥಿತಿಸ್ಥಾಪಕತೆ ಮತ್ತು ಕಷ್ಟಕರ ಕೆಲಸಗಳನ್ನು ಎದುರಿಸುವ ಧೈರ್ಯ ಕಲಿಸಿತು. ಕಡಿಮೆ ಸಂಬಳವಿದ್ದಾಗಲೂ ಪ್ರತಿಯೊಂದು ಸಣ್ಣ ಖರ್ಚಿನ ಲೆಕ್ಕ ಇಟ್ಟುಕೊಂಡು, ಸ್ವಂತ ಕಾಲ ಮೇಲೆ ನಿಲ್ಲಲು ಪ್ರಯತ್ನಿಸಿದ ಮೀನಲ್ ಅವರ ಕಥೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆಯುತ್ತಿದೆ.

ರೈಡ್‌ ಮುಗಿದ್ಮೇಲೆ 'ಜಾಬ್' ರಿಕ್ವೆಸ್ಟ್! 'ರ‍್ಯಾಪಿಡೋ' ಚಾಲಕನ ವಾಟ್ಸಾಪ್ ಮೆಸೇಜ್ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್

Chandrashekar GS — Tue, 04 Aug 2026 18:00:32 +0530

Rapido ಸವಾರನಿಂದ ಅನಿರೀಕ್ಷಿತ WhatsApp ಸಂದೇಶ!

ಸಾಮಾನ್ಯವಾಗಿ ಕ್ಯಾಬ್ ಅಥವಾ ಬೈಕ್ ಟ್ಯಾಕ್ಸಿ ಪ್ರಯಾಣದ ಬಳಿಕ ಪ್ರಯಾಣಿಕರು ರೇಟಿಂಗ್ ನೀಡುವುದು ಅಥವಾ ಚಾಲಕರಿಂದ ಪ್ರತಿಕ್ರಿಯೆ ಕೇಳುವುದು ಸಾಮಾನ್ಯ. ಆದರೆ ಇಲ್ಲಿ ನಡೆದ ಘಟನೆ ಸಂಪೂರ್ಣ ವಿಭಿನ್ನ. Rapido ಮೂಲಕ ಕಚೇರಿಗೆ ತೆರಳಿದ್ದ ಮಹಿಳೆಗೆ, ಪ್ರಯಾಣ ಮುಗಿದ ಕೆಲವೇ ಕ್ಷಣಗಳಲ್ಲಿ ಚಾಲಕರಿಂದ ಬಂದ WhatsApp ಸಂದೇಶ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

'ನಾನು BTech ಪದವೀಧರ, ಕೆಲಸ ಬೇಕಿದೆ':

X (Twitter) ನಲ್ಲಿ ನಂದಿನಿ ಗುಪ್ತಾ ಎಂಬ ಬಳಕೆದಾರರು ಈ ಘಟನೆಯನ್ನು ಹಂಚಿಕೊಂಡಿದ್ದಾರೆ. ಅವರು ಹಂಚಿಕೊಂಡಿರುವ ಸ್ಕ್ರೀನ್‌ಶಾಟ್‌ನಲ್ಲಿ Rapido ಚಾಲಕ ತನ್ನ ಹೆಸರು ಇಬ್ರಾಹಿಂ ಎಂದು ಪರಿಚಯಿಸಿಕೊಂಡು, 2024ರಲ್ಲಿ BTech ಪೂರ್ಣಗೊಳಿಸಿರುವುದಾಗಿ ತಿಳಿಸಿದ್ದಾರೆ.

ಅವರು, "ನಾನು ಉದ್ಯೋಗ ಹುಡುಕುತ್ತಿದ್ದೇನೆ. ಯಾವುದೇ ಫ್ರೆಶರ್ ಅವಕಾಶ ಇದ್ದರೆ ದಯವಿಟ್ಟು ತಿಳಿಸಿ" ಎಂದು ವಿನಂತಿಸಿಕೊಂಡಿದ್ದು, ಜೊತೆಗೆ ತಮ್ಮ ರೆಸ್ಯೂಮ್‌ನ್ನೂ ಕಳುಹಿಸಿದ್ದಾರೆ. ಈ ಸಂದೇಶ ಅನೇಕರ ಗಮನ ಸೆಳೆದಿದೆ.

ಉದ್ಯೋಗ ಮಾರುಕಟ್ಟೆಯ ವಾಸ್ತವತೆ ಮತ್ತೆ ಚರ್ಚೆಗೆ!

ಈ ಘಟನೆ ಭಾರತದ ಉದ್ಯೋಗ ಪರಿಸ್ಥಿತಿಯ ಬಗ್ಗೆ ಮತ್ತೊಮ್ಮೆ ಚರ್ಚೆಗೆ ಕಾರಣವಾಗಿದೆ. ಪದವಿ ಪಡೆದ ನಂತರವೂ ಸೂಕ್ತ ಉದ್ಯೋಗ ಸಿಗದೆ ಅನೇಕ ಯುವಕರು ಜೀವನೋಪಾಯಕ್ಕಾಗಿ ವಿವಿಧ ಕೆಲಸಗಳನ್ನು ಮಾಡಬೇಕಾದ ಪರಿಸ್ಥಿತಿ ಎದುರಿಸುತ್ತಿದ್ದಾರೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.

ಅನೇಕ ನೆಟ್ಟಿಗರು, "ಕುಟುಂಬದ ಹೊಣೆ ಹೊತ್ತು ಕೆಲಸ ಮಾಡುತ್ತಲೇ ಉದ್ಯೋಗಕ್ಕಾಗಿ ಪ್ರಯತ್ನಿಸುತ್ತಿರುವ ಈ ಯುವಕನ ಶ್ರಮ ಶ್ಲಾಘನೀಯ" ಎಂದು ಪ್ರಶಂಸಿಸಿದ್ದಾರೆ. ಕೆಲವರು ಅವನಿಗೆ ಉದ್ಯೋಗ ಸಿಗಲೆಂದು ಶುಭ ಹಾರೈಸಿದ್ದಾರೆ.

ಗೌಪ್ಯತೆ ಬಗ್ಗೆ ಎದ್ದ ಪ್ರಶ್ನೆಗಳು!

ಮತ್ತೊಂದೆಡೆ, ಕೆಲವು ಬಳಕೆದಾರರು ಪ್ರಯಾಣಿಕರ ಮೊಬೈಲ್ ಸಂಖ್ಯೆಯನ್ನು ಬಳಸಿಕೊಂಡು ವೈಯಕ್ತಿಕವಾಗಿ ಸಂಪರ್ಕಿಸಿರುವುದು ಸರಿಯೇ ಎಂಬ ಪ್ರಶ್ನೆಯನ್ನೂ ಎತ್ತಿದ್ದಾರೆ. ಈ ರೀತಿಯ ಸಂಪರ್ಕ ಗೌಪ್ಯತೆಗೆ ಧಕ್ಕೆಯಾಗಬಹುದು ಎಂದು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ.

ಇನ್ನೂ ಕೆಲವರು, "ಸಹಾಯ ಮಾಡುವ ಮನಸ್ಸು ಇರಲಿ, ಆದರೆ ವೈಯಕ್ತಿಕ ಮಾಹಿತಿಯ ಬಳಕೆಯಲ್ಲಿ ಎಚ್ಚರಿಕೆ ಅಗತ್ಯ" ಎಂದು ಸಲಹೆ ನೀಡಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಚರ್ಚೆ!

ಈ ಘಟನೆ ಒಂದೆಡೆ ನಿರುದ್ಯೋಗದ ಕಠಿಣ ವಾಸ್ತವವನ್ನು ಬಿಚ್ಚಿಟ್ಟರೆ, ಮತ್ತೊಂದೆಡೆ ಡಿಜಿಟಲ್ ಸೇವೆಗಳಲ್ಲಿ ಬಳಕೆದಾರರ ಗೌಪ್ಯತೆ ಎಷ್ಟು ಮಹತ್ವದ್ದು ಎಂಬ ಚರ್ಚೆಯನ್ನೂ ಹುಟ್ಟುಹಾಕಿದೆ. ಇಬ್ರಾಹಿಂನ ಪ್ರಯತ್ನವನ್ನು ಹಲವರು ಮೆಚ್ಚಿಕೊಂಡಿದ್ದರೂ, ಪ್ರಯಾಣಿಕರನ್ನು ನಂತರ ವೈಯಕ್ತಿಕವಾಗಿ ಸಂಪರ್ಕಿಸುವುದು ಸರಿಯೇ ಎಂಬ ಪ್ರಶ್ನೆ ಇನ್ನೂ ಚರ್ಚೆಯಲ್ಲಿದೆ.

Got a dm from a guy who dropped me at my office pic.twitter.com/UHyGDdXiYH

— Nandini Gupta (@yoursnandieni) August 3, 2026

ಇಂದು ಅವರು.... ನಾಳೆ ನಾನು? ಕಂಪನಿಯ ಲೇಆಫ್ ಕರಾಳ ಸತ್ಯ ಬಿಚ್ಚಿಟ್ಟ ಐಟಿ ಉದ್ಯೋಗಿ!

Chandrashekar GS — Sun, 02 Aug 2026 10:44:50 +0530

ಕಾರ್ಪೊರೇಟ್ ಕ್ಷೇತ್ರದಲ್ಲಿ ಉದ್ಯೋಗ ಕಡಿತ (Layoff) ಈಗ ಹೊಸ ವಿಷಯವಲ್ಲ. ಆದರೆ, ಅದರ ನಿಜವಾದ ಪರಿಣಾಮ ಕೇವಲ ಕೆಲಸ ಕಳೆದುಕೊಂಡವರಿಗಷ್ಟೇ ಸೀಮಿತವಾಗುವುದಿಲ್ಲ. ಕೆಲಸ ಉಳಿಸಿಕೊಂಡವರ ಮನಸ್ಸಿನಲ್ಲೂ ಭಯ, ಆತಂಕ ಮತ್ತು ಅನಿಶ್ಚಿತತೆಯ ಭಾವನೆ ಮನೆ ಮಾಡುತ್ತದೆ. ಇಂತಹ ಅನುಭವವನ್ನೇ ಉದ್ಯೋಗಿಯೊಬ್ಬರು ಸಾಮಾಜಿಕ ಜಾಲತಾಣ ರೆಡ್ಡಿಟ್‌ನಲ್ಲಿ ಹಂಚಿಕೊಂಡಿದ್ದು, ಸಾವಿರಾರು ಮಂದಿಯ ಗಮನ ಸೆಳೆದಿದೆ.

ಕೆಲಸ ಉಳಿದರೂ ಮನಸ್ಸಿನಲ್ಲಿ ಆತಂಕ..!

ತಮ್ಮ ಸಂಸ್ಥೆಯಲ್ಲಿ ನಡೆದ ಇತ್ತೀಚಿನ ಲೇಆಫ್ ವೇಳೆ ಇಬ್ಬರು ತಂಡದ ಸದಸ್ಯರು ಉದ್ಯೋಗ ಕಳೆದುಕೊಂಡಿದ್ದಾರೆ ಎಂದು ಉದ್ಯೋಗಿ ತಿಳಿಸಿದ್ದಾರೆ. ತಾವು ಕೆಲಸ ಉಳಿಸಿಕೊಂಡಿದ್ದರೂ, ಸಹೋದ್ಯೋಗಿಗಳು ಸಂಸ್ಥೆ ತೊರೆಯಬೇಕಾದ ದೃಶ್ಯ ಮನಸ್ಸಿಗೆ ಆಘಾತ ನೀಡಿದೆ ಎಂದು ಅವರು ಹೇಳಿದ್ದಾರೆ.

"ಅವರು ಹೊರಟಾಗ ನಾನು ಉಳಿದಿದ್ದೇನೆ ಎಂಬ ಕಾರಣಕ್ಕೆ ವಿಚಿತ್ರ ಭಾವನೆ, ದುಃಖ, ಭಯ ಮತ್ತು ಅಪರಾಧಿ ಮನೋಭಾವ ನನ್ನನ್ನು ಕಾಡುತ್ತಿದೆ. ಒಂದು ವೇಳೆ ಮುಂದಿನ ಬಾರಿ ನನ್ನ ಸರದಿ ಬಂದರೆ ಏನು ಮಾಡಬೇಕು ಎಂಬ ಪ್ರಶ್ನೆ ನಿರಂತರವಾಗಿ ಕಾಡುತ್ತಿದೆ" ಎಂದು ಅವರು ಬರೆದಿದ್ದಾರೆ.

ಉದ್ಯೋಗ ಭದ್ರತೆಗೆ ಸವಾಲಾದ ಲೇಆಫ್..!

ಈ ಘಟನೆ ಬಳಿಕ ಯಾವುದೇ ಉದ್ಯೋಗವೂ ಶಾಶ್ವತವಲ್ಲ ಎಂಬ ಅರಿವು ಮೂಡಿದೆ ಎಂದು ಉದ್ಯೋಗಿ ಹೇಳಿದ್ದಾರೆ. ಇಂದಿನ ಸ್ಪರ್ಧಾತ್ಮಕ ಉದ್ಯೋಗ ಮಾರುಕಟ್ಟೆಯಲ್ಲಿ ಕ್ಷಣಾರ್ಧದಲ್ಲೇ ಪರಿಸ್ಥಿತಿ ಬದಲಾಗಬಹುದು. ಕೃತಕ ಬುದ್ಧಿಮತ್ತೆ (AI), ಆರ್ಥಿಕ ಒತ್ತಡ, ವೆಚ್ಚ ಕಡಿತದ ನೀತಿಗಳು ಮತ್ತು ಸಂಸ್ಥೆಗಳ ಪುನರ್‌ರಚನೆ ಉದ್ಯೋಗ ಭದ್ರತೆಯ ಮೇಲೆ ದೊಡ್ಡ ಪರಿಣಾಮ ಬೀರುತ್ತಿವೆ ಎಂಬ ಆತಂಕವನ್ನೂ ಅವರು ವ್ಯಕ್ತಪಡಿಸಿದ್ದಾರೆ.

ಉದ್ಯೋಗ ಭದ್ರತೆ ಕುರಿತು ನೆಟ್ಟಿಗರ ಅಭಿಪ್ರಾಯ..!

ಈ ಪೋಸ್ಟ್‌ಗೆ ಸಾವಿರಾರು ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. ಹಲವರು ತಾವು ಸಹ ಇದೇ ಪರಿಸ್ಥಿತಿಯನ್ನು ಎದುರಿಸಿದ್ದಾಗಿ ತಿಳಿಸಿದ್ದಾರೆ. ಕೆಲವರು ಲೇಆಫ್ ಬಳಿಕ ಹಲವು ತಿಂಗಳು ಉದ್ಯೋಗಕ್ಕಾಗಿ ಅಲೆದ ಅನುಭವವನ್ನು ಹಂಚಿಕೊಂಡರೆ, ಇನ್ನೂ ಕೆಲವರು ಕಚೇರಿ ರಾಜಕೀಯ, ವೆಚ್ಚ ಕಡಿತ ಮತ್ತು ಕಾರ್ಯಕ್ಷಮತೆ ಹೊರತಾದ ಕಾರಣಗಳಿಂದಲೂ ಉದ್ಯೋಗ ಕಳೆದುಕೊಳ್ಳಬೇಕಾಗುತ್ತದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಕಾರ್ಪೊರೇಟ್ ಕ್ಷೇತ್ರದ ಕಹಿ ವಾಸ್ತವ..!

ಇತ್ತೀಚಿನ ವರ್ಷಗಳಲ್ಲಿ ಉದ್ಯೋಗ ಕಡಿತವು ಉದ್ಯೋಗ ಕಳೆದುಕೊಂಡವರಷ್ಟೇ ಅಲ್ಲ, ಉಳಿದ ಸಿಬ್ಬಂದಿಯ ಮಾನಸಿಕ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತಿದೆ ಎಂದು ತಜ್ಞರು ಹೇಳುತ್ತಾರೆ. ಇಂತಹ ಸಂದರ್ಭಗಳಲ್ಲಿ ಹೊಸ ಕೌಶಲ್ಯಗಳನ್ನು ಕಲಿಯುವುದು, ವೃತ್ತಿಪರ ಸಂಪರ್ಕ ವಿಸ್ತರಿಸುವುದು ಹಾಗೂ ಆರ್ಥಿಕ ಯೋಜನೆ ರೂಪಿಸಿಕೊಳ್ಳುವುದು ಅಗತ್ಯ ಎಂದು ವೃತ್ತಿ ತಜ್ಞರು ಸಲಹೆ ನೀಡುತ್ತಿದ್ದಾರೆ. ಈ ವೈರಲ್ ಪೋಸ್ಟ್ ಕೂಡ ಉದ್ಯೋಗ ಭದ್ರತೆಗಿಂತ ನಿರಂತರ ಕೌಶಲ್ಯ ವೃದ್ಧಿಯೇ ಇಂದಿನ ಕಾಲದ ದೊಡ್ಡ ಭದ್ರತೆ ಎಂಬ ಸಂದೇಶವನ್ನು ಮತ್ತೊಮ್ಮೆ ನೆನಪಿಸಿದೆ.

Today completely changed how I look at job security by u/OPusername in r/IndianWorkplace

4 ಲಕ್ಷ ಸಂಬಳದ ಉದ್ಯೋಗಕ್ಕೆ 'ನೋ'; ಇಂದು 30 ಲಕ್ಷ ಪ್ಯಾಕೇಜ್ ಪಡೆದ ಬೇಬಿ ಬಾಯ್‌

Sushma Hegde — Thu, 06 Aug 2026 16:18:16 +0530

ಎಂಜಿನಿಯರಿಂಗ್ ಪದವಿ ಮುಗಿದ ತಕ್ಷಣ ಸಿಕ್ಕ ಮೊದಲ ಉದ್ಯೋಗವನ್ನು ಒಪ್ಪಿಕೊಳ್ಳುವುದು ಬಹುತೇಕರ ಕನಸಾಗಿರುತ್ತದೆ. ಆದರೆ ಹೈದರಾಬಾದ್‌ನ ಎಲೆಕ್ಟ್ರಾನಿಕ್ಸ್ ಮತ್ತು ಕಮ್ಯುನಿಕೇಷನ್ ಎಂಜಿನಿಯರಿಂಗ್ (ECE) ಪದವೀಧರರೊಬ್ಬರು ಸುರಕ್ಷಿತ ಉದ್ಯೋಗವನ್ನು ತಿರಸ್ಕರಿಸಿ, ತಮ್ಮ ಕನಸಿನ ಹಿಂದೆ ಹೋಗುವ ನಿರ್ಧಾರ ಕೈಗೊಂಡರು. ಕುಟುಂಬದ ಒತ್ತಡ, ಅನಿಶ್ಚಿತ ಭವಿಷ್ಯ ಎಲ್ಲವನ್ನೂ ಮೀರಿ ಒಂದು ವರ್ಷ ಗ್ಯಾಪ್ ಇಯರ್ ತೆಗೆದುಕೊಂಡ ಈ ಯುವಕ, ಇಂದು IIT ಹೈದರಾಬಾದ್ನಲ್ಲಿ ಎಂ.ಟೆಕ್ ಪೂರ್ಣಗೊಳಿಸಿ Qualcommನಲ್ಲಿ 30 ಲಕ್ಷ ವಾರ್ಷಿಕ CTC ಪ್ಯಾಕೇಜ್‌ನ ಉದ್ಯೋಗ ಪಡೆದಿದ್ದಾರೆ.

4 ಲಕ್ಷದ ಉದ್ಯೋಗಕ್ಕೆ 'ನೋ'

2023ರಲ್ಲಿ ಹೈದರಾಬಾದ್‌ನ CVR College of Engineeringನಲ್ಲಿ ಎಲೆಕ್ಟ್ರಾನಿಕ್ಸ್ ಮತ್ತು ಕಮ್ಯುನಿಕೇಷನ್ ಎಂಜಿನಿಯರಿಂಗ್ (ECE)ನಲ್ಲಿ B.Tech ಪೂರ್ಣಗೊಳಿಸಿದ ಈ ವಿದ್ಯಾರ್ಥಿಗೆ, Sutherland ಕಂಪನಿಯಿಂದ 4 ಲಕ್ಷ ವಾರ್ಷಿಕ (LPA) ತಾಂತ್ರಿಕೇತರ ಉದ್ಯೋಗದ ಆಫರ್ ಬಂದಿತ್ತು. ಬಹುತೇಕರು ಇದನ್ನು ಉತ್ತಮ ಆರಂಭವೆಂದು ಪರಿಗಣಿಸುತ್ತಿದ್ದರೂ, ಇದು ತಮ್ಮ ವೃತ್ತಿಜೀವನದ ಗುರಿಗೆ ಹೊಂದಿಕೆಯಾಗುವುದಿಲ್ಲ ಎಂದು ಅವರು ಭಾವಿಸಿದರು. ಹೀಗಾಗಿ ಉದ್ಯೋಗವನ್ನು ತಿರಸ್ಕರಿಸಿ GATE ಪರೀಕ್ಷೆಗೆ ತಯಾರಿ ನಡೆಸಲು ನಿರ್ಧರಿಸಿದರು.

ಕುಟುಂಬದ ವಿರೋಧ, ಆದರೆ ಕನಸಿನ ಮೇಲೆ ನಂಬಿಕೆ

ಒಂದು ವರ್ಷದ ಗ್ಯಾಪ್ ತೆಗೆದುಕೊಳ್ಳುವ ನಿರ್ಧಾರವನ್ನು ಅವರ ತಂದೆ ಆರಂಭದಲ್ಲಿ ಒಪ್ಪಲಿಲ್ಲ. ಮೊದಲು ಉದ್ಯೋಗ ಸೇರಬೇಕು ಎಂಬುದು ಕುಟುಂಬದ ಅಭಿಪ್ರಾಯವಾಗಿತ್ತು. ಆದರೆ ತಮ್ಮ ಸಾಮರ್ಥ್ಯವನ್ನು ಸಾಬೀತುಪಡಿಸಲು ಅವರು PGCET (Post Graduate Engineering Common Entrance Test) ಪರೀಕ್ಷೆ ಬರೆದರು. ಫಲಿತಾಂಶದಲ್ಲಿ ರಾಜ್ಯ ಮಟ್ಟದಲ್ಲಿ 13ನೇ ರ್ಯಾಂಕ್ ಗಳಿಸಿದರು. ಈ ಸಾಧನೆಯ ನಂತರ ಅವರ ತಂದೆ ಸೇರಿದಂತೆ ಕುಟುಂಬದವರು ಅವರ ನಿರ್ಧಾರವನ್ನು ಬೆಂಬಲಿಸಿದರು.

GATE ತಯಾರಿ, IIT ಹೈದರಾಬಾದ್‌ಗೆ ಎಂಟ್ರಿ

ಕುಟುಂಬದ ಬೆಂಬಲ ಸಿಕ್ಕ ನಂತರ ಅವರು ಹೈದರಾಬಾದ್‌ನ OHM Instituteನಲ್ಲಿ ಪೂರ್ಣಾವಧಿ GATE ತರಬೇತಿ ಪಡೆದರು. GATE 2024 ಪರೀಕ್ಷೆಯಲ್ಲಿ AIR 1200 ಗಳಿಸಿ, ಭಾರತದ ಪ್ರಮುಖ ಸೆಮಿಕಂಡಕ್ಟರ್ ಸಂಶೋಧನಾ ಸಂಸ್ಥೆಗಳಲ್ಲಿ ಒಂದಾದ IIT Hyderabadನಲ್ಲಿ VLSI ವಿಭಾಗದಲ್ಲಿ M.Techಗೆ ಪ್ರವೇಶ ಪಡೆದರು. ಖಾಸಗಿ ಎಂಜಿನಿಯರಿಂಗ್ ಕಾಲೇಜಿನಿಂದ IITಗೆ ಸೇರಿದ ಬಳಿಕ, ಸುಧಾರಿತ ಸೆಮಿಕಂಡಕ್ಟರ್ ತಂತ್ರಜ್ಞಾನ ಮತ್ತು VLSI ವಿನ್ಯಾಸದಲ್ಲಿ ಪರಿಣತಿ ಪಡೆದು ತಮ್ಮ ಕೌಶಲ್ಯವನ್ನು ಮತ್ತಷ್ಟು ವೃದ್ಧಿಸಿಕೊಂಡರು.

Qualcommನಲ್ಲಿ 30 ಲಕ್ಷ ಪ್ಯಾಕೇಜ್

M.Tech ಪೂರ್ಣಗೊಳಿಸಿದ ಬಳಿಕ ಅವರು ವಿಶ್ವದ ಪ್ರಮುಖ ಸೆಮಿಕಂಡಕ್ಟರ್ ಕಂಪನಿಗಳಲ್ಲೊಂದಾದ Qualcommನಲ್ಲಿ ಉದ್ಯೋಗ ಪಡೆದರು. ಅವರಿಗೆ 30 ಲಕ್ಷ ವಾರ್ಷಿಕ CTC ಪ್ಯಾಕೇಜ್ ದೊರೆತಿದ್ದು, ಅದರಲ್ಲಿ ಸುಮಾರು 18 ಲಕ್ಷ ಮೂಲ ವಾರ್ಷಿಕ ವೇತನ (Base Salary) ಸೇರಿದೆ. ಪದವಿ ಮುಗಿದ ತಕ್ಷಣ ಸಿಕ್ಕಿದ್ದ 4 ಲಕ್ಷದ ತಾಂತ್ರಿಕೇತರ ಉದ್ಯೋಗದೊಂದಿಗೆ ಹೋಲಿಸಿದರೆ ಇದು ಹಲವು ಪಟ್ಟು ದೊಡ್ಡ ಸಾಧನೆಯಾಗಿದೆ.

GATE ಆಕಾಂಕ್ಷಿಗಳಿಗೆ ಸ್ಪೂರ್ತಿ

ಈ ಯುವಕನ ಕಥೆ ಸಾವಿರಾರು GATE ಆಕಾಂಕ್ಷಿಗಳಿಗೆ ದೊಡ್ಡ ಪ್ರೇರಣೆಯಾಗಿದೆ. ಸುರಕ್ಷಿತ ಆಯ್ಕೆಯನ್ನು ಆರಿಸುವುದಕ್ಕಿಂತ ಸರಿಯಾದ ಗುರಿಯೊಂದಿಗೆ ಶ್ರಮಿಸಿದರೆ ಜೀವನವೇ ಬದಲಾಗಬಹುದು ಎಂಬುದನ್ನು ಈ ಯಶೋಗಾಥೆ ತೋರಿಸುತ್ತದೆ. ಕುಟುಂಬದ ನಿರೀಕ್ಷೆಗಳು ಮತ್ತು ವೈಯಕ್ತಿಕ ಕನಸುಗಳು ಕೆಲವೊಮ್ಮೆ ಮುಖಾಮುಖಿಯಾಗಬಹುದು. ಆದರೆ ತನ್ನ ಸಾಮರ್ಥ್ಯದ ಮೇಲೆ ನಂಬಿಕೆ, ನಿರಂತರ ತಯಾರಿ ಮತ್ತು ತಾಳ್ಮೆಯಿಂದ ಕೆಲಸ ಮಾಡಿದರೆ ದೊಡ್ಡ ಅವಕಾಶಗಳು ಸಿಗಬಹುದು ಎಂಬುದಕ್ಕೆ ಈ ಕಥೆಯೇ ಸಾಕ್ಷಿ.

ಭಾರತ ವಿಶ್ವದ AI ಬಳಕೆಯ ರಾಜಧಾನಿಯಾಗಲಿದೆ, ದೊಡ್ಡ ಕಂಪನಿಗಳಲ್ಲಿ ಲೇ ಆಫ್, ಸಣ್ಣ ಉದ್ಯಮಗಳಿಗೆ ವರ: ನಂದನ್ ನಿಲೇಕಣಿ

Gowthami K — Fri, 07 Aug 2026 14:56:22 +0530

ನವದೆಹಲಿ: ಭಾರತವು ವಿಶ್ವದ ಅತ್ಯಂತ ಶಕ್ತಿಶಾಲಿ ಕೃತಕ ಬುದ್ಧಿಮತ್ತೆ (AI) ಮಾದರಿಗಳು ಅಥವಾ ಮೂಲಸೌಕರ್ಯಗಳನ್ನು ನಿರ್ಮಿಸುವುದಕ್ಕಿಂತ ಹೆಚ್ಚಾಗಿ, ದೈನಂದಿನ ಸಾರ್ವಜನಿಕ ಸೇವೆಗಳಲ್ಲಿ ಈ ತಂತ್ರಜ್ಞಾನವನ್ನು ವ್ಯಾಪಕವಾಗಿ ಅಳವಡಿಸಿಕೊಳ್ಳುವುದರ ಮೇಲೆ ಗಮನಹರಿಸಬೇಕು ಎಂದು ಇನ್ಫೋಸಿಸ್ ಸಹ-ಸಂಸ್ಥಾಪಕ ಹಾಗೂ ಪ್ರಸಿದ್ಧ ಉದ್ಯಮಿ ನಂದನ್ ನಿಲೇಕಣಿ ಹೇಳಿದ್ದಾರೆ.

ನವದೆಹಲಿಯಲ್ಲಿ ನಡೆದ 'ಇಂಡಿಯಾ ಪಾಲಿಸಿ ಫೋರಂ' (India Policy Forum) ಕಾರ್ಯಕ್ರಮದಲ್ಲಿ ಮಾತನಾಡಿದ ರಾಷ್ಟ್ರೀಯ ಅನ್ವಯಿಕ ಆರ್ಥಿಕ ಸಂಶೋಧನಾ ಮಂಡಳಿಯ (NCAER) ಅಧ್ಯಕ್ಷರೂ ಆಗಿರುವ ನಿಲೇಕಣಿ, ಅಂತರರಾಷ್ಟ್ರೀಯ ಮಟ್ಟದಲ್ಲಿ ದೇಶಗಳಿಗೆ ದೊಡ್ಡ ಮಟ್ಟದ AI ಮೂಲಸೌಕರ್ಯಕ್ಕಿಂತಲೂ, ಅದನ್ನು ಜನಸಾಮಾನ್ಯರ ಹಂತದಲ್ಲಿ ಬೃಹತ್ ಪ್ರಮಾಣದಲ್ಲಿ ನಿಯೋಜಿಸುವುದರಿಂದಲೇ ಹೆಚ್ಚು ಆರ್ಥಿಕ ಹಾಗೂ ಸಾಮಾಜಿಕ ಪ್ರಯೋಜನ ಸಿಗಲಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

"ಅನ್ವಯಿಕ AI ಕ್ಷೇತ್ರದಲ್ಲಿ ಭಾರತವೇ ವಿಶ್ವಕ್ಕೆ ನಾಯಕ": ನಂದನ್ ನಿಲೇಕಣಿ

ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯ (DPI) ನಿರ್ಮಾಣದಲ್ಲಿ ಭಾರತ ಸಾಧಿಸಿರುವ ಅಭೂತಪೂರ್ವ ಯಶಸ್ಸು, AI ತಂತ್ರಜ್ಞಾನದ ಮುಂದಿನ ಹಂತದ ನಿಯೋಜನೆಗೂ ಒಂದು ಮಾದರಿಯಾಗಲಿದೆ ಎಂದರು.

ಜಗತ್ತಿನ ದೊಡ್ಡ ದೇಶಗಳು ಅರೆವಾಹಕಗಳು (Semiconductors), ಸೂಪರ್ ಕಂಪ್ಯೂಟಿಂಗ್ ಸಾಮರ್ಥ್ಯ ಹಾಗೂ ಬೃಹತ್ ಭಾಷಾ ಮಾದರಿಗಳ (LLM) ಅಭಿವೃದ್ಧಿಯಲ್ಲಿ ಪೈಪೋಟಿ ನಡೆಸುತ್ತಿರಬಹುದು. ಆದರೆ, ಅನ್ವಯಿಕ AI (Applied AI) ಕ್ಷೇತ್ರದಲ್ಲಿ ಭಾರತವೇ ವಿಶ್ವಕ್ಕೆ ನಾಯಕನಾಗಲಿದೆ. ಭಾರತವು ವಿಶ್ವದ 'AI ಬಳಕೆಯ ರಾಜಧಾನಿ'ಯಾಗಿ ಹೊರಹೊಮ್ಮಲಿದೆ. ನಾವು DPI ಮೂಲಕ ಕೋಟಿಗಟ್ಟಲೆ ಜನರ ಜೀವನದಲ್ಲಿ ಬದಲಾವಣೆ ತಂದಂತೆ, AI ಅನ್ನು ಕೇವಲ ಕೆಲವು ಉದ್ಯಮಗಳಿಗೆ ಸೀಮಿತಗೊಳಿಸದೆ, 140 ಕೋಟಿ ಭಾರತೀಯರಿಗೆ ಉಪಯುಕ್ತವಾಗುವಂತೆ ಸಾರ್ವಜನಿಕ ಸೇವೆಗಳಲ್ಲಿ ನಿಯೋಜಿಸಲಿದ್ದೇವೆ ಎಂದರು.

ದೊಡ್ಡ ಕಂಪನಿಗಳಲ್ಲಿ ಉದ್ಯೋಗ ಕಡಿತದ ಭೀತಿ: ಸಣ್ಣ ಉದ್ಯಮಗಳಿಗೆ ವರ!

ತಂತ್ರಜ್ಞಾನದ ವ್ಯಾಪಕ ಅಳವಡಿಕೆಯು ಉದ್ಯೋಗ ಮಾರುಕಟ್ಟೆಯ ಮೇಲೆ ತರುವ ಪರಿಣಾಮಗಳ ಕುರಿತು ನಿಲೇಕಣಿ ಎಚ್ಚರಿಕೆ ನೀಡಿದ್ದಾರೆ. ಮುಂಬರುವ ವರ್ಷಗಳಲ್ಲಿ AI ಯಾಂತ್ರೀಕರಣದ (Automation) ಪರಿಣಾಮವಾಗಿ ಬೃಹತ್ ಕಾರ್ಪೊರೇಟ್ ಸಂಸ್ಥೆಗಳಲ್ಲಿ ನಿವ್ವಳ ಉದ್ಯೋಗ ನಷ್ಟ ಸಂಭವಿಸುವ ಸಾಧ್ಯತೆಯಿದೆ ಎಂದಿದ್ದಾರೆ. ದೊಡ್ಡ ಕಂಪನಿಗಳಲ್ಲಿ ಪ್ರತಿಯೊಂದು ಕೆಲಸವೂ ನಿರ್ದಿಷ್ಟ ರಚನೆಯನ್ನು ಹೊಂದಿರುವುದರಿಂದ (Structured tasks), ಅಂತಹ ಕಾರ್ಯಗಳನ್ನು AI ಮೂಲಕ ಸ್ವಯಂಚಾಲಿತಗೊಳಿಸುವುದು ಮತ್ತು ಉದ್ಯೋಗಗಳನ್ನು ಕಡಿತಗೊಳಿಸುವುದು ಸುಲಭ. ಸಣ್ಣ ಉದ್ಯಮಗಳು (Small Businesses) ತಮ್ಮ ನಮ್ಯತೆ (Flexibility) ಮತ್ತು ಸರಳ ಕಾರ್ಯವೈಖರಿಯಿಂದಾಗಿ ಸ್ಥಿತಿಸ್ಥಾಪಕತ್ವವನ್ನು ಪ್ರದರ್ಶಿಸಲಿವೆ. ಒಂದು ದೊಡ್ಡ ಕಂಪನಿ 10 ಲಕ್ಷ ಜನರನ್ನು ನೇಮಿಸಿಕೊಳ್ಳುವ ದಿನಗಳು ಮುಗಿಯುತ್ತಿದ್ದು, ಭವಿಷ್ಯದಲ್ಲಿ ತಲಾ ಒಬ್ಬರೇ ನಡೆಸುವ 10 ಲಕ್ಷ ಸಣ್ಣ ಉದ್ಯಮಗಳು (One-person companies) ರೂಪುಗೊಳ್ಳುವ ಮೂಲಕ ದೇಶದ ಆರ್ಥಿಕತೆ ಬೆಳೆಯಲಿದೆ, ಎಂದು ಅವರು ಭವಿಷ್ಯ ನುಡಿದರು.

ಐಟಿ ಮತ್ತು ಕಾರ್ಪೊರೇಟ್ ವಲಯದಲ್ಲಿ ಜಾಗತಿಕ 'ಮೌನ ವಜಾ' (Silent Layoffs)

ನಿಲೇಕಣಿ ಅವರ ಈ ಹೇಳಿಕೆಗಳು ಪ್ರಸ್ತುತ ಜಾಗತಿಕ ಮತ್ತು ಭಾರತೀಯ ಉದ್ಯೋಗ ಮಾರುಕಟ್ಟೆಯಲ್ಲಿ ಎದುರಾಗಿರುವ ವಾಸ್ತವವನ್ನು ಪ್ರತಿಬಿಂಬಿಸುತ್ತವೆ. AI ಅಳವಡಿಕೆ ಹೆಚ್ಚುತ್ತಿದ್ದಂತೆ ಪ್ರಮುಖ ತಂತ್ರಜ್ಞಾನ ಮತ್ತು ಹಣಕಾಸು ಕಂಪನಿಗಳು ತಮ್ಮ ಕಾರ್ಯಪಡೆಯನ್ನು ಮರುಸಂಘಟಿಸುತ್ತಿವೆ.

ವೀಸಾ (Visa) ನಿದರ್ಶನ: ಇತ್ತೀಚೆಗೆ ಪ್ರಸಿದ್ಧ ಪಾವತಿ ಸಂಸ್ಥೆ 'ವೀಸಾ'ದ ಭಾರತ ಮೂಲದ ಉದ್ಯೋಗಿಗಳು, ಮುಂದಿನ ಹಂತದ AI ಅಳವಡಿಕೆಯ ಭಾಗವಾಗಿ ಕಂಪನಿ ಪುನಾರಚನೆಗೊಳ್ಳುತ್ತಿದ್ದು, ತಮ್ಮ ಹುದ್ದೆಗಳನ್ನು ರದ್ದುಗೊಳಿಸಲಾಗಿದೆ ಎಂಬ ಇಮೇಲ್‌ಗಳನ್ನು ಸ್ವೀಕರಿಸಿದ್ದರು.

ಹೆಚ್ಚುತ್ತಿರುವ ಲೇ ಆಫ್: ನೇಮಕಾತಿ ಸಂಸ್ಥೆಗಳಾದ 'ಟೀಮ್‌ಲೀಸ್' (TeamLease) ಮತ್ತು 'CIEL HR Services' ವರದಿಗಳ ಪ್ರಕಾರ, 'ಮೌನ ವಜಾ' (ಸಾರ್ವಜನಿಕವಾಗಿ ಪ್ರಕಟಿಸದೆ ನಿಧಾನವಾಗಿ ಉದ್ಯೋಗ ಕಡಿತಗೊಳಿಸುವುದು, ಒಪ್ಪಂದ ನವೀಕರಿಸದಿರುವುದು ಇತ್ಯಾದಿ) ಪ್ರವೃತ್ತಿ ತೀವ್ರಗೊಂಡಿದೆ.

ಉದ್ಯೋಗ ನಷ್ಟದ ಅಂದಾಜು: ಪ್ರಸಕ್ತ ಅವಧಿಯಲ್ಲಿ ಭಾರತದ ಪ್ರಮುಖ ವಲಯಗಳಲ್ಲಿ ಸಾವಿರಾರು ಉದ್ಯೋಗಿಗಳು ಉದ್ಯೋಗ ಕಳೆದುಕೊಂಡಿದ್ದು, ಶಿಕ್ಷಣ, ಹಣಕಾಸು ಮತ್ತು ಗ್ರಾಹಕ ಸೇವಾ ವಲಯಗಳಲ್ಲಿ AI ಪ್ರಭಾವದಿಂದಾಗಿ ಕಾರ್ಯಪಡೆಯ ಬದಲಾವಣೆಗಳು ವೇಗವಾಗಿ ನಡೆಯುತ್ತಿವೆ.

ಆರ್ಥಿಕತೆಯ ಉತ್ಪಾದಕತೆಯನ್ನು ಹೆಚ್ಚಿಸಲು AI ಒಂದು ಪ್ರಮುಖ ಅಸ್ತ್ರವಾಗಿದ್ದರೂ, ಅದು ಉದ್ಯೋಗ ಸೃಷ್ಟಿ ಮತ್ತು ಕಾರ್ಪೊರೇಟ್ ಸಂ ರಚನೆಗಳ ಮೇಲೆಯೂ ಗಂಭೀರ ಪ್ರಭಾವ ಬೀರಲಿದೆ. ಈ ಸವಾಲನ್ನು ಎದುರಿಸಿ ಸಣ್ಣ ಹಾಗೂ AI-ಸಕ್ರಿಯಗೊಳಿಸಿದ ಉದ್ಯಮಗಳನ್ನು ಬೆಳೆಸುವುದರ ಮೇಲೆಯೇ ಭಾರತದ ಮುಂದಿನ ಡಿಜಿಟಲ್ ಬೆಳವಣಿಗೆ ಆಧಾರಿತವಾಗಿದೆ.

ಗೃಹಿಣಿಯರು ಮನೆ ಕೆಲಸ ಮಾಡುತ್ತಲೇ ಗಂಟೆಗೆ 250 ರೂ. ಗಳಿಸಿ: ಚೆನ್ನೈನಲ್ಲಿ ಟ್ರೆಂಡ್ ಸೃಷ್ಟಿಸಿದ AI ಟ್ರೇನಿಂಗ್!

Sathish Kumar KH — Sat, 01 Aug 2026 21:57:29 +0530

ಮನೆಯಲ್ಲಿ ಮಾವಿನಕಾಯಿ ಹೆಚ್ಚುತ್ತೀರಾ? ಅಥವಾ ಮಡಿಚಿಟ್ಟ ಬಟ್ಟೆಗಳನ್ನು ಜೋಡಿಸುತ್ತೀರಾ? ಇನ್ನು ಮುಂದೆ ಈ ಕೆಲಸಗಳಿಗೂ ನಿಮಗೆ ಹಣ ಸಿಗಬಹುದು. ಹೌದು, ನೀವು ಓದಿದ್ದು ನಿಜ. ಇದು ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಅಂದರೆ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನದಿಂದ ಸಾಧ್ಯವಾಗಿದ್ದು, ದಕ್ಷಿಣ ಭಾರತದಲ್ಲಿ ಇದೊಂದು ಹೊಸ ಆದಾಯದ ಮೂಲವಾಗಿ ಸದ್ದು ಮಾಡುತ್ತಿದೆ. ಚೆನ್ನೈನಂತಹ ಮಹಾನಗರಗಳಲ್ಲಿ ಹಲವಾರು ಗೃಹಿಣಿಯರು ತಮ್ಮ ಮನೆಯ ದೈನಂದಿನ ಕೆಲಸಗಳನ್ನು ಮಾಡುತ್ತಲೇ ಗಂಟೆಗೆ 250 ರೂಪಾಯಿವರೆಗೆ ಸಂಪಾದಿಸುತ್ತಿದ್ದಾರೆ. ಇದು ಯಾವುದೇ ಕಷ್ಟದ ಕೆಲಸವಲ್ಲ, ಬದಲಿಗೆ ತಮ್ಮ ಮನೆಯಲ್ಲಿ ಮಾಡುವ ಸಾಮಾನ್ಯ ಕೆಲಸಗಳೇ ಇಲ್ಲಿ ಆದಾಯ ತಂದುಕೊಡುತ್ತಿರುವುದು ವಿಶೇಷ.

ಏನಿದು ಎಐ ತರಬೇತಿ? ಹಣ ಸಿಗೋದು ಹೇಗೆ?

ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನವು ಮನುಷ್ಯರಂತೆ ಯೋಚಿಸಲು ಮತ್ತು ಕೆಲಸ ಮಾಡಲು ಕಲಿಯಬೇಕಾಗುತ್ತದೆ. ಇದಕ್ಕಾಗಿ, ಅದಕ್ಕೆ ಅಪಾರ ಪ್ರಮಾಣದ ಡೇಟಾ ಬೇಕು. ಮನುಷ್ಯರು ಮಾಡುವ ಸಾಮಾನ್ಯ ಕೆಲಸಗಳನ್ನು, ಉದಾಹರಣೆಗೆ ತರಕಾರಿ ಕತ್ತರಿಸುವುದು, ಬಟ್ಟೆ ಮಡಚುವುದು, ಮನೆ ಸ್ವಚ್ಛಗೊಳಿಸುವುದು ಇತ್ಯಾದಿಗಳನ್ನು ಗುರುತಿಸಲು ಎಐ ಮಾಡೆಲ್‌ಗಳಿಗೆ ತರಬೇತಿ ನೀಡಲಾಗುತ್ತದೆ. ಈ ತರಬೇತಿಗಾಗಿಯೇ ಟೆಕ್ ಕಂಪನಿಗಳು ಜನರಿಂದ ಅವರ ದೈನಂದಿನ ಚಟುವಟಿಕೆಗಳ ವಿಡಿಯೋಗಳನ್ನು ಸಂಗ್ರಹಿಸುತ್ತವೆ. ಇದಕ್ಕಾಗಿಯೇ ಜನರಿಗೆ ಹಣ ಪಾವತಿಸಲಾಗುತ್ತಿದೆ. ನೀವು ನಿಮ್ಮ ಮನೆಯಲ್ಲಿ ಮಾಡುವ ಕೆಲಸವನ್ನು ವಿಡಿಯೋ ಮಾಡಿ ಕಳುಹಿಸಿದರೆ, ಅದಕ್ಕೆ ಪ್ರತಿಯಾಗಿ ನಿಮಗೆ ಹಣ ಸಿಗುತ್ತದೆ. ಹೀಗೆ, ನಿಮ್ಮ ಸಾಮಾನ್ಯ ಕೆಲಸವೇ ಎಐ ತಂತ್ರಜ್ಞಾನಕ್ಕೆ ಪಾಠವಾಗುತ್ತದೆ.

ದಕ್ಷಿಣ ಭಾರತದಲ್ಲಿ ಹೊಸ ಟ್ರೆಂಡ್

ಸದ್ಯ ಈ ಮಾದರಿಯ ಕೆಲಸ ದಕ್ಷಿಣ ಭಾರತದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿದೆ. ಯಾವುದೇ ವಿಶೇಷ ಕೌಶಲ್ಯ ಅಥವಾ ಹೆಚ್ಚುವರಿ ಸಮಯ ನೀಡದೆ, ತಮ್ಮ ದೈನಂದಿನ ಕೆಲಸಗಳ ಮೂಲಕವೇ ಹಣ ಸಂಪಾದಿಸುವ ಅವಕಾಶ ಇದಾಗಿರುವುದರಿಂದ, ವಿಶೇಷವಾಗಿ ಗೃಹಿಣಿಯರು ಇದರ ಪ್ರಯೋಜನ ಪಡೆದುಕೊಳ್ಳುತ್ತಿದ್ದಾರೆ. ಚೆನ್ನೈ ನಗರದಲ್ಲಿ ಈ ಪ್ರವೃತ್ತಿ ಹೆಚ್ಚಾಗಿ ಕಂಡುಬರುತ್ತಿದೆ. ಮನೆಯ ಜವಾಬ್ದಾರಿಗಳ ಜೊತೆಗೆ ಆರ್ಥಿಕವಾಗಿಯೂ ಕೊಡುಗೆ ನೀಡಲು ಇದೊಂದು ಸುಲಭ ದಾರಿಯಾಗಿದೆ. ಕಾಲ ಬದಲಾದಂತೆಲ್ಲಾ ಹಣ ಸಂಪಾದಿಸುವ ದಾರಿಗಳೂ ಹೇಗೆ ಬದಲಾಗುತ್ತವೆ ಅನ್ನೋದಕ್ಕೆ ಇದಕ್ಕಿಂತ ಉತ್ತಮ ಉದಾಹರಣೆ ಬೇಕಿಲ್ಲವೇನೋ!

₹2 ಲಕ್ಷದಿಂದ ₹40,000ಕ್ಕೆ ಕುಸಿದ ತಿಂಗಳ ಆದಾಯ! 'ಎಐ' ತಂದಿಟ್ಟ ಸಂಕಷ್ಟ ಬಿಚ್ಚಿಟ್ಟ ಕಾಪಿರೈಟರ್!

Chandrashekar GS — Mon, 03 Aug 2026 17:00:32 +0530

AI ಅಲೆಗೆ ತತ್ತರಿಸಿದ ಕಾಪಿರೈಟರ್ ಬದುಕು! ಆದಾಯ ಕುಸಿತದ ಹಿಂದೆ ಏನಿದೆ?

ಕೃತಕ ಬುದ್ಧಿಮತ್ತೆ (AI) ಅನೇಕ ಉದ್ಯೋಗ ಕ್ಷೇತ್ರಗಳಲ್ಲಿ ವೇಗವಾಗಿ ಬದಲಾವಣೆ ತರುತ್ತಿದೆ. ಕೆಲವರಿಗೆ ಇದು ಹೊಸ ಅವಕಾಶಗಳನ್ನು ಸೃಷ್ಟಿಸುತ್ತಿದ್ದರೆ, ಮತ್ತೊಂದೆಡೆ ಕೆಲ ವೃತ್ತಿಪರರಿಗೆ ಉದ್ಯೋಗ ಮತ್ತು ಆದಾಯದ ಮೇಲೆ ಗಂಭೀರ ಪರಿಣಾಮ ಬೀರುತ್ತಿದೆ. ಇಂತಹದ್ದೇ ಅನುಭವವನ್ನು ಹೈದರಾಬಾದ್ ಮೂಲದ ಕಾಪಿರೈಟರ್ ಒಬ್ಬರು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು, ಅದು ವ್ಯಾಪಕ ಚರ್ಚೆಗೆ ಕಾರಣವಾಗಿದೆ.

₹2 ಲಕ್ಷ ಸಂಬಳದಿಂದ ₹40 ಸಾವಿರಕ್ಕೆ ಕುಸಿತ!

ರೆಡ್ಡಿಟ್‌ನಲ್ಲಿ ಪೋಸ್ಟ್ ಹಂಚಿಕೊಂಡಿರುವ ವ್ಯಕ್ತಿ, ಎಂಟು ವರ್ಷಗಳ ಹಿಂದೆ ಫ್ರೀಲಾನ್ಸ್ ಕಾಪಿರೈಟಿಂಗ್ ಆರಂಭಿಸಿದ್ದಾಗಿ ತಿಳಿಸಿದ್ದಾರೆ. ಕಾಲೇಜು ಶಿಕ್ಷಣ ಪೂರ್ಣಗೊಳಿಸದಿದ್ದರೂ ಕೌಶಲ್ಯದ ಆಧಾರದಲ್ಲಿ ವೃತ್ತಿ ಕಟ್ಟಿಕೊಂಡು, 22ನೇ ವಯಸ್ಸಿನಲ್ಲೇ ತಿಂಗಳಿಗೆ ₹2 ಲಕ್ಷ ಆದಾಯ ಗಳಿಸುತ್ತಿದ್ದರಂತೆ. ಆದರೆ 2026ರಲ್ಲಿ AI ತಂತ್ರಜ್ಞಾನ ವ್ಯಾಪಕ ಬಳಕೆಗೆ ಬಂದ ನಂತರ ಪರಿಸ್ಥಿತಿ ಸಂಪೂರ್ಣ ಬದಲಾಗಿದೆ ಎಂದು ಅವರು ಹೇಳಿದ್ದಾರೆ.

Went from 2L a month to 40K a month salary, the... by u/username in r/IndianWorkplace

AI ಕಾರಣದಿಂದ ಕೆಲಸ ಕಳೆದುಕೊಂಡೆ ಎಂದ ಉದ್ಯೋಗಿ..!

ತಮ್ಮ ವಿದೇಶಿ ಕ್ಲೈಂಟ್‌ಗಳು AI ಆಧಾರಿತ ಕಂಟೆಂಟ್ ಉತ್ಪಾದನೆಗೆ ಆದ್ಯತೆ ನೀಡಿದ್ದು, ಸ್ಥಳೀಯ ಸಿಬ್ಬಂದಿಯನ್ನು ನೇಮಿಸಿಕೊಂಡ ಕಾರಣ ಎಲ್ಲಾ ಪ್ರಾಜೆಕ್ಟ್‌ಗಳನ್ನು ಕಳೆದುಕೊಂಡೆ ಎಂದು ಅವರು ಆರೋಪಿಸಿದ್ದಾರೆ. ಕೆಲವೇ ವಾರಗಳಲ್ಲಿ ಆದಾಯ ಶೂನ್ಯಕ್ಕೆ ಇಳಿದಿದ್ದು, ನಂತರ ಹೈದರಾಬಾದ್‌ನ ಮಾರ್ಕೆಟಿಂಗ್ ಏಜೆನ್ಸಿಯಲ್ಲಿ ತಿಂಗಳಿಗೆ ₹40 ಸಾವಿರ ಸಂಬಳಕ್ಕೆ ಕೆಲಸ ಸೇರಬೇಕಾಯಿತು ಎಂದು ಹೇಳಿದ್ದಾರೆ.

ಹೆಚ್ಚು ಜವಾಬ್ದಾರಿ... ಕಡಿಮೆ ವೇತನ!

ಪ್ರಸ್ತುತ ತೆಲಂಗಾಣ ಪ್ರವಾಸೋದ್ಯಮದ ಮಾರ್ಕೆಟಿಂಗ್ ತಂತ್ರ ರೂಪಿಸುವ ಪ್ರಮುಖ ತಂಡದಲ್ಲಿದ್ದರೂ, ಹಿಂದಿನ ಆದಾಯಕ್ಕೆ ಹೋಲಿಸಿದರೆ ವೇತನ ಬಹಳ ಕಡಿಮೆ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ. ಕೆಲಸದ ಒತ್ತಡ ಹೆಚ್ಚಿದ್ದರೂ ಸೃಜನಶೀಲ ವಾತಾವರಣದ ಕೊರತೆ ಹಾಗೂ ಉತ್ಸಾಹವಿಲ್ಲದ ಕೆಲಸದ ಸಂಸ್ಕೃತಿ ತಮ್ಮ ಪ್ರೇರಣೆಯನ್ನೇ ಕುಗ್ಗಿಸಿದೆ ಎಂದು ಹೇಳಿದ್ದಾರೆ.

'ಧೈರ್ಯ ಕಳೆದುಕೊಳ್ಳಬೇಡಿ' ಎಂದ ನೆಟ್ಟಿಗರು..!

ಈ ಪೋಸ್ಟ್‌ಗೆ ಪ್ರತಿಕ್ರಿಯಿಸಿದ ಅನೇಕರು, AI ಯುಗದಲ್ಲಿ ಕೌಶಲ್ಯಗಳನ್ನು ನಿರಂತರವಾಗಿ ನವೀಕರಿಸಿಕೊಳ್ಳುವುದು ಅಗತ್ಯ ಎಂದು ಸಲಹೆ ನೀಡಿದ್ದಾರೆ. ಕೆಲವರು ಇದು ತಾತ್ಕಾಲಿಕ ಹಿನ್ನಡೆಯಷ್ಟೇ ಎಂದು ಹೇಳಿದರೆ, ಇನ್ನೂ ಕೆಲವರು ಮತ್ತೆ ಫ್ರೀಲಾನ್ಸಿಂಗ್ ಆರಂಭಿಸಿ ನೆಟ್‌ವರ್ಕ್ ವಿಸ್ತರಿಸಿಕೊಳ್ಳುವಂತೆ ಪ್ರೋತ್ಸಾಹಿಸಿದ್ದಾರೆ. ಬದಲಾವಣೆಗೆ ಹೊಂದಿಕೊಳ್ಳುವವರು ಮಾತ್ರ ಮುಂದಿನ ದಿನಗಳಲ್ಲಿ ಯಶಸ್ಸು ಸಾಧಿಸಬಲ್ಲರು ಎಂಬ ಅಭಿಪ್ರಾಯವೂ ವ್ಯಕ್ತವಾಗಿದೆ.

ದಶಕಗಳಿಂದ ಪೈಲಟ್ ಆಗೋ ಕನಸು ಕಂಡ 'ನಾ ನಿನ್ನ ಬಿಡಲಾರೆ' ದುರ್ಗಾ ಲೈಫ್ನಲ್ಲಿ ಅಂದು ಆಗಿದ್ದೇನು

Suchethana D — Wed, 05 Aug 2026 17:36:33 +0530

'ನಾ ನಿನ್ನ ಬಿಡಲಾರೆ' ಖ್ಯಾತಿಯ ನಟಿ ರಿಷಿಕಾ, ಎಂಜಿನಿಯರಿಂಗ್ ಪದವೀಧರೆಯಾಗಿದ್ದು, ಬಾಲ್ಯದಲ್ಲಿ ಪೈಲಟ್ ಆಗುವ ಕನಸು ಕಂಡಿದ್ದರು. ಆದರೆ, ವಂಡರ್ಲಾದಲ್ಲಿ ನಡೆದ ಒಂದು ಘಟನೆಯಿಂದಾಗಿ ತಮ್ಮ ಎತ್ತರದ ಭಯವನ್ನು ಅರಿತುಕೊಂಡು, ಆ ಕನಸನ್ನು ಕೈಬಿಟ್ಟು ನಟನಾ ಕ್ಷೇತ್ರಕ್ಕೆ ಬಂದರು.

ನಟಿ ರಿಷಿಕಾ ಎನ್ನುವುದಕ್ಕಿಂತ ನಾ ನಿನ್ನ ಬಿಡಲಾರೆಯ ದುರ್ಗಾ ಎಂದರೆ ಎಲ್ಲರಿಗೂ ತಿಳಿದುಬಿಡುತ್ತದೆ. ಈ ಸೀರಿಯಲ್ನಲ್ಲಿ ಪೆದ್ದು ಪೆದ್ದಾಗಿ ನಟಿಸಿ ಈಗ ಪ್ರಬುದ್ಧ ಪತ್ನಿಯಾಗಿರುವ ದುರ್ಗಾಳ ರಿಯಲ್ ಹೆಸರು ರಿಷಿಕಾ.

ಮೂಲತಃ ಮಲೆನಾಡು ಶಿವಮೊಗ್ಗದವರಾದ ಇವರು, ಹುಟ್ಟಿ ಬೆಳೆದೆಲ್ಲಾ ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ. ರಿಷಿಕಾ ಇಂಜಿನಿಯರಿಂಗ್ ಪದವೀಧರೆ. ಇಂಜಿನಿಯರಿಂಗ್ ಕೆಲಸಕ್ಕೆ ಸೇರುವ ಬದಲು ನಟನೆಯತ್ತ ಮುಖ ಮಾಡಿದರು. 2012 ರಿಂದ ಬಣ್ಣದ ಲೋಕದಲ್ಲಿ ಸಕ್ರಿಯವಾಗಿರೋ ನಟಿ, ಇದಾಗಲೇ ಹಲವು ಸೀರಿಯಲ್ಗಳಲ್ಲಿ ನಟಿಸಿದ್ದಾರೆ.

ನಾನಿ ನ್ನ ಬಿಡಲಾರೆ ಸೀರಿಯಲ್ ರಿಷಿಕಾಗೆ ನಾಲ್ಕನೇ ಧಾರಾವಾಹಿ. ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ 'ಕನ್ಯಾಕುಮಾರಿ' ಧಾರಾವಾಹಿಯಲ್ಲಿ ನಾಯಕನ ತಂಗಿ ಐಶ್ವರ್ಯಾ ಆಗಿ ಕಿರುತೆರೆಗೆ ಎಂಟ್ರಿ ಕೊಟ್ಟರು. ಮೊದಲ ಸೀರಿಯಲ್ನಲ್ಲಿ ಸೈಡ್ ರೋಲ್ನಲ್ಲಿ ಕಾಣಿಸಿಕೊಂಡಿದ್ದರೂ, ನಟನೆಯ ಮೂಲಕ ಕಿರುತೆರೆ ವೀಕ್ಷಕರ ಮನ ಸೆಳೆದರು. ಬಳಿಕ ಉದಯ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ 'ಕನ್ಯಾದಾನ' ಧಾರಾವಾಹಿಯಲ್ಲಿ ಚಿತ್ರಾ ಆಗಿ ನಟಿಸಿದ ಈಕೆ ಅಲ್ಲೂ ತಮ್ಮ ನಟನೆಯ ಮೂಲಕ ಗುರುತಿಸಿಕೊಂಡ ಪ್ರತಿಭೆ.

ಅಂದಹಾಗೆ, ಚಿಕ್ಕಂದಿನಿಂದಲೂ ಪೈಲಟ್ ಆಗೋ ಕನಸು ಕಂಡ ರಿಷಿಕಾ ಕೊನೆಗೆ ತಮ್ಮ ಆಸೆಯನ್ನು ಅದೊಂದು ಘಟನೆಯಿಂದ ಅಲ್ಲಿಯೇ ಬಿಟ್ಟ ಬಗ್ಗೆ kannada.mojo360 ಚಾನೆಲ್ಗೆ ನೀಡಿರುವ ಸಂದರ್ಶನದಲ್ಲಿ ತಿಳಿಸಿದ್ದಾರೆ. ' ನನ್ನ ಅಪ್ಪ ಎಚ್ಎಎಲ್ನಲ್ಲಿ ಉದ್ಯೋಗದಲ್ಲಿ ಇದ್ದರು. ನಾನು ಅಪ್ಪನ ಜೊತೆ ಆಫೀಸ್ಗೆ ಹೋದಾಗಲೆಲ್ಲಾ ನನ್ನ ತಲೆಯಲ್ಲಿ ಓಡ್ತಿದ್ದಿದ್ದು ಒಂದೇ. ಪೈಲಟ್ ಆಗುವ ಕನಸು. ಅಲ್ಲಿ ಅಪ್ಪನ ಸೀರಿಯಲ್ ಏರೋನಾಟಿಕಲ್ ಎಂಜಿನಿಯರ್ ಇದ್ದರು. ಅವರ ಬಳಿ ಎಲ್ಲಾ ವಿವರ ಕೇಳಿ ಪಡೆದಿದ್ದೆ' ಎಂದು ಅಂದಿನ ಘಟನೆಗಳನ್ನು ರಿಷಿಕಾ ಹೇಳಿದ್ದಾರೆ.

'ಪಿಯುಸಿ ಆದ ಬಳಿಕ ಅಪ್ಪನ ಸೀನಿಯರ್ ಬಳಿ ಮಾತನಾಡಿದಾಗ, ನೀನು ತುಂಬಾ ಸಣ್ಣಗೆ ಇದ್ಯಾ, ಪೈಲಟ್ ಆಗಲು ಸ್ಟ್ರೆಂಗ್ಥ್ ಬೇಕು. ನೀನು ಆಯ್ಕೆ ಆಗೋದು ಕಷ್ಟ ಎಂದಾಗ ತುಂಬಾ ನೋವು ಪಟ್ಟುಕೊಂಡೆ. ಸ್ಟ್ರಾಂಗ್ ಆಗೋದು ಹೇಗೆ ಎನ್ನುವ ಚಿಂತೆನೂ ಕಾಡಿತ್ತು. ಹೇಗಾದರೂ ಮಾಡಿ ಪೈಲಟ್ ಆಗಲೇಬೇಕು ಎಂದು ಕನಸು ಕಂಡಿದ್ದೆ' ಎಂದಿದ್ದಾರೆ.

ಆದರೆ, ಅವರ ಲೈಫ್ನಲ್ಲಿ ನಡೆದ ಆ ಒಂದು ಘಟನೆಯಿಂದ, ಪೈಲಟ್ ಕನಸು ನುಚ್ಚು ನೂರಾಯ್ತಂತೆ. ಅದೇನೆಂದರೆ, ಬೆಂಗಳೂರಿನ ವಂಡರ್ಲಾಗೆ ಹೋಗಿದಾಗ, ಅಲ್ಲಿ ಥಹರೇವಾರಿ ಆಟದ ವಸ್ತುಗಳಿವೆ. ಹಿಂದೆ- ಮುಂದೆ, ಮೇಲೆ- ಕೆಳಗೆ ಮಾಡುವ ಜೋಕಾಲಿ ಎಲ್ಲವೂ ಇದೆ. ಅದನ್ನು ಹತ್ತಿ ಕೆಳಗೆ ನೋಡಿದಾಗ ತಲೆ ಸುತ್ತಿ ಬಂತು. ಆಗಲೇ ನನಗೆ ಹೈಟ್ ಫೋಬಿಯಾ ಇರೋದು ತಿಳಿಯಿತು. ಇನ್ನು ನಾನು ಪೈಲಟ್ ಆದ್ರೆ ನನ್ನ ಕಥೆ ಮಾತ್ರವಲ್ಲ, ಜನರ ಕಥೆನೂ ಗೋವಿಂದ ಎಂದು ಅಷ್ಟೂ ವರ್ಷಗಳ ಆಸೆಗೆ ತಿಲಾಂಜಲಿ ಇಟ್ಟೆ ಎಂದಿದ್ದಾರೆ ರಿಷಿಕಾ.

ಒಬ್ಬ ಮಾಡಿದ ಎಡವಟ್ಟಿಗೆ ಇಡೀ ಟೀಮ್‌ಗೆ ಪನಿಶ್‌ಮೆಂಟ್: ಕೆಲವೇ ಗಂಟೆಗಳಲ್ಲಿ ವರ್ಕ್ ಫ್ರಮ್ ಆಫೀಸ್ ಕಡ್ಡಾಯ

Sushma Hegde — Fri, 07 Aug 2026 16:08:37 +0530

ವರ್ಕ್ ಫ್ರಮ್ ಹೋಮ್ (WFH) ಮಾಡುತ್ತಿದ್ದ ಉದ್ಯೋಗಿಯೊಬ್ಬರ ಕ್ಲೈಂಟ್ ಕಾಲ್‌ನಿಂದಾಗಿ ಕಂಪನಿಯೇ ರಿಟರ್ನ್ ಟು ಆಫೀಸ್ (RTO) ನೀತಿ ಜಾರಿಗೆ ತಂದಿದೆ ಎನ್ನಲಾದ ರೆಡ್ಡಿಟ್ ಪೋಸ್ಟ್ ಇದೀಗ ಭಾರೀ ಚರ್ಚೆಗೆ ಕಾರಣವಾಗಿದೆ. ಆದರೆ WFH ರದ್ದುಪಡಿಸಲು ಕಾರಣವಾಯಿತೇ? ಅಥವಾ ಕಂಪನಿ ಮೊದಲೇ ಆಫೀಸ್‌ಗೆ ಕರೆಸಿಕೊಳ್ಳಲು ನಿರ್ಧರಿಸಿತ್ತೇ? ಎಂಬ ಪ್ರಶ್ನೆಯೂ ಎದ್ದಿದೆ.

ಒಂದು ವರ್ಷಕ್ಕೂ ಹೆಚ್ಚು ಕಾಲ WFH

ವೈರಲ್ ರೆಡ್ಡಿಟ್ ಪೋಸ್ಟ್ ಪ್ರಕಾರ, ಈ ತಂಡವು ಒಂದು ವರ್ಷಕ್ಕೂ ಹೆಚ್ಚು ಕಾಲ ಯಾವುದೇ ಸಮಸ್ಯೆಗಳಿಲ್ಲದೆ ರಿಮೋಟ್ ಆಗಿ ಕೆಲಸ ಮಾಡುತ್ತಿತ್ತು. ಎಲ್ಲಾ ಕೆಲಸವು ಅವಧಿಯಲ್ಲಿ ಮುಗಿಯುತ್ತಿತ್ತು, ಲಾಭವು ಉತ್ತಮವಾಗಿತ್ತು. ಜೊತೆಗೆ ಉದ್ಯೋಗಿಗಳು ಮನೆಯಿಂದ ಕೆಲಸ ಮಾಡುವುದನ್ನು ಆನಂದಿಸುತ್ತಿದ್ದರು. ಆದರೆ, ತಂಡದ ಒಬ್ಬ ಉದ್ಯೋಗಿಯ ಕ್ಲೈಂಟ್ ಕಾಲ್‌ ಬಳಿಕ ಪರಿಸ್ಥಿತಿ ಬದಲಾಗಿದೆ ಎನ್ನಲಾಗಿದೆ.

ಡ್ರೈವಿಂಗ್ ಮಾಡುತ್ತಲೇ ಕ್ಲೈಂಟ್ ಕಾಲ್‌ಗೆ ಎಂಟ್ರಿ

ರೆಡ್ಡಿಟ್ ಬಳಕೆದಾರರ ಹೇಳಿಕೆಯ ಪ್ರಕಾರ, ಸಹೋದ್ಯೋಗಿಯೊಬ್ಬರು ಕಾರ್ ಚಾಲನೆ ಮಾಡುತ್ತಲೇ ಕ್ಲೈಂಟ್ ಮೀಟಿಂಗ್‌ಗೆ ಸೇರಿದ್ದರು. ಕಾಲ್ ನಡೆಯುತ್ತಿದ್ದ ವೇಳೆ ಅವರ ಕ್ಯಾಮೆರಾ ಆಕಸ್ಮಿಕವಾಗಿ ಆನ್ ಆಗಿದೆ. ಜೋರಾಗಿ ಮ್ಯೂಸಿಕ್ ಕೂಡ ಕೇಳಿಸುತ್ತಿತ್ತು. ಸಹೋದ್ಯೋಗಿಗಳು ಕ್ಯಾಮೆರಾ ಆಫ್ ಮಾಡಿ, ಮೈಕ್ ಮ್ಯೂಟ್ ಮಾಡುವಂತೆ ಸೂಚಿಸಿದ್ದಾರೆ. ಆದರೆ ಗಾಬರಿಗೊಂಡ ಉದ್ಯೋಗಿ ತಪ್ಪಾಗಿ ಹಲವು ಆಯ್ಕೆಗಳನ್ನು ಕ್ಲಿಕ್ ಮಾಡಿದ್ದು, ಕೊನೆಗೆ ಸ್ಕ್ರೀನ್ ಶೇರ್ ಆಗಿದೆ. ಆಗ ಅವರ ಕಂಪ್ಯೂಟರ್‌ನಲ್ಲಿ ವಿಡಿಯೋ ಗೇಮ್ ಓಪನ್ ಆಗಿರುವುದು ಕ್ಲೈಂಟ್ ಮತ್ತು ತಂಡದವರಿಗೆ ಕಾಣಿಸಿಕೊಂಡಿದೆ ಎನ್ನಲಾಗಿದೆ.

ಕೆಲವೇ ಗಂಟೆಗಳಲ್ಲಿ HRನಿಂದ ಶಾಕಿಂಗ್ ಘೋಷಣೆ

ಈ ಘಟನೆ ನಡೆದ ಕೆಲವೇ ಗಂಟೆಗಳ ಬಳಿಕ ಕಂಪನಿಯ HR ಮಹತ್ವದ ನೀತಿ ಬದಲಾವಣೆಯನ್ನು ಘೋಷಿಸಿದೆ ಎಂದು ಪೋಸ್ಟ್‌ನಲ್ಲಿ ಹೇಳಲಾಗಿದೆ. ಮುಂದಿನ ತಿಂಗಳಿಂದ ಉದ್ಯೋಗಿಗಳು ಕಡ್ಡಾಯವಾಗಿ ಆಫೀಸ್‌ನಿಂದ ಕೆಲಸ ಮಾಡಬೇಕು, ನಿಗದಿತ ಕೆಲಸದ ಸಮಯ ಪಾಲಿಸಬೇಕು, ಬ್ಯಾಡ್ಜ್ ಟ್ರ್ಯಾಕಿಂಗ್ ವ್ಯವಸ್ಥೆ ಅನುಸರಿಸಬೇಕು ಎಂಬ ನಿಯಮ ಜಾರಿಗೆ ಬರಲಿದೆ ಎಂದು ತಿಳಿಸಲಾಗಿದೆ. ರಿಮೋಟ್ ಕೆಲಸದ ವೇಳೆ ಉದ್ಯೋಗಿಗಳ ವೃತ್ತಿಪರತೆ ಮತ್ತು ಎಂಗೇಜ್‌ಮೆಂಟ್ ಬಗ್ಗೆ ಕಳವಳವಿದೆ ಎಂಬ ಕಾರಣವನ್ನು ಆಡಳಿತ ಮಂಡಳಿ ನೀಡಿದೆ ಎನ್ನಲಾಗಿದೆ.

ಒಬ್ಬನ ತಪ್ಪಿಗೆ ಎಲ್ಲರೂ ಯಾಕೆ ಶಿಕ್ಷೆ?

ಈ ಘಟನೆಗೆ ಸಂಬಂಧಿಸಿದಂತೆ ತಂಡದ ಇತರ ಸದಸ್ಯರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ ಎನ್ನಲಾಗಿದೆ. ಒಬ್ಬ ಉದ್ಯೋಗಿಯ ತಪ್ಪಿನಿಂದ WFH ಸೌಲಭ್ಯವನ್ನು ಸರಿಯಾಗಿ ಬಳಸುತ್ತಿದ್ದ ಉಳಿದ ಉದ್ಯೋಗಿಗಳಿಗೂ ತೊಂದರೆಯಾಗಿದೆ ಎಂಬ ಅಭಿಪ್ರಾಯಗಳು ವ್ಯಕ್ತವಾಗಿವೆ.

ಆದರೆ ರೆಡ್ಡಿಟ್‌ನಲ್ಲಿ ಮತ್ತೊಂದು ವಾದವೂ ಜೋರಾಗಿದೆ.

ಕಂಪನಿ ಮೊದಲೇ WFH ನಿಲ್ಲಿಸಲು ನಿರ್ಧರಿಸಿತ್ತು?

ಅನೇಕ ನೆಟ್ಟಿಗರು ಕಂಪನಿಯ ನಿರ್ಧಾರವನ್ನು ಪ್ರಶ್ನಿಸಿದ್ದಾರೆ. ಆಡಳಿತ ಮಂಡಳಿಗೆ ಈಗಾಗಲೇ ಉದ್ಯೋಗಿಗಳನ್ನು ಕಚೇರಿಗೆ ಮರಳಿ ಕರೆಸಿಕೊಳ್ಳುವ ಉದ್ದೇಶವಿತ್ತು, ಈ ಘಟನೆ ಕೇವಲ ಅದಕ್ಕೆ ನೆಪವಾಯಿತೇ? ಎಂದು ಹಲವರು ಪ್ರಶ್ನಿಸಿದ್ದಾರೆ. ಒಬ್ಬ ಬಳಕೆದಾರರ ಪ್ರಕಾರ, ಇಷ್ಟು ದೊಡ್ಡ ನೀತಿ ಬದಲಾವಣೆಯನ್ನು ಕೇವಲ ಒಬ್ಬ ಉದ್ಯೋಗಿಯ ತಪ್ಪಿನ ಆಧಾರದ ಮೇಲೆ ತೆಗೆದುಕೊಳ್ಳಲಾಗಿದೆ ಎಂದು ನಂಬುವುದು ಕಷ್ಟ. ಇನ್ನೊಬ್ಬರು, ಜನರನ್ನು ಕಚೇರಿಗೆ ಮರಳಿ ಕರೆತರಲು ಮೊದಲೇ ನಿರ್ಧರಿಸಿದ್ದರು; ಅದಕ್ಕೆ ಒಂದು ನೆಪ ಬೇಕಿತ್ತು ಎಂಬ ರೀತಿಯಲ್ಲಿ ಪ್ರತಿಕ್ರಿಯಿಸಿದ್ದಾರೆ.

ಕ್ಯಾಮೆರಾ ಆನ್ ಎಂದರೆ ಯಾಕೆ ಟೆನ್ಷನ್?

ಕೆಲವರು ಈ ಘಟನೆಯನ್ನು ರಿಮೋಟ್ ಮೀಟಿಂಗ್‌ಗಳಲ್ಲಿನ ಸಾಮಾನ್ಯ ಸಮಸ್ಯೆಗಳಿಗೂ ಹೋಲಿಸಿದ್ದಾರೆ. ವರ್ಚುವಲ್ ಮೀಟಿಂಗ್‌ಗಳಲ್ಲಿ ಮ್ಯಾನೇಜರ್‌ಗಳು ಎಲ್ಲರೂ ಕ್ಯಾಮೆರಾ ಆನ್ ಮಾಡುವಂತೆ ಹೇಳಿದಾಗ ಉದ್ಯೋಗಿಗಳು ಯಾಕೆ ಗಾಬರಿಯಾಗುತ್ತಾರೆ ಎಂಬುದಕ್ಕೆ ಇಂತಹ ಘಟನೆಗಳೇ ಉದಾಹರಣೆ ಎಂದು ಕೆಲವರು ತಮಾಷೆ ಮಾಡಿದ್ದಾರೆ. ಒಟ್ಟಿನಲ್ಲಿ, ಒಬ್ಬ ಉದ್ಯೋಗಿಯ ನಿರ್ಲಕ್ಷ್ಯದಿಂದ ಇಡೀ ತಂಡದ WFH ಅವಕಾಶ ಕಳೆದುಹೋಯಿತೇ, ಅಥವಾ ಕಂಪನಿಗೆ RTO ಜಾರಿಗೆ ತರಲು ಇದು ಕೇವಲ ಒಂದು ನೆಪವೇ? ಎಂಬ ಚರ್ಚೆ ಸಾಮಾಜಿಕ ಜಾಲತಾಣಗಳಲ್ಲಿ ಮುಂದುವರಿದಿದೆ.

ಕಾನ್‌ಸ್ಟೇಬಲ್‌ ನೇಮಕಾತಿಗೆ ಮರುಪರೀಕ್ಷೆ..? ನಿನ್ನೆ ಪರೀಕ್ಷೆ ಬರೆದವರಿಗೆ ಶುರುವಾಯ್ತು ಗೊಂದಲ

Ganesh Mabla Gowda — Mon, 03 Aug 2026 12:53:59 +0530

ವಿಜಯಪುರ/ಬೆಂಗಳೂರು: ನಿನ್ನೆಯಷ್ಟೇ ನಡೆದ ಸಿವಿಲ್ ಪೊಲೀಸ್ ಕಾನ್‌ಸ್ಟೇಬಲ್ (CPC) ನೇಮಕಾತಿ ಪರೀಕ್ಷೆಯ ಸುತ್ತ ಗೊಂದಲದ ಮೋಡಗಳು ಕವಿದಿವೆ. ಪರೀಕ್ಷೆಯಲ್ಲಿ ಅಕ್ರಮ ನಡೆದಿದೆ ಎಂದು ಆರೋಪಿಸಿ ವಿಜಯಪುರದಲ್ಲಿ ಬೃಹತ್ ಪ್ರತಿಭಟನೆ ವ್ಯಕ್ತವಾಗಿದ್ದರೆ, ಅತ್ತ ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (KEA) ಈ ಬಗ್ಗೆ ಮಹತ್ವದ ಸ್ಪಷ್ಟನೆ ನೀಡಿದೆ. ಈ ನಡುವೆ ಅಭ್ಯರ್ಥಿಗಳಲ್ಲಿ ಮರುಪರೀಕ್ಷೆ ನಡೆಯುತ್ತಾ? ಎಂಬ ಆತಂಕ ಮನೆಮಾಡಿದೆ.

ವಿಜಯಪುರದಲ್ಲಿ ಎಬಿವಿಪಿ ಕಿಚ್ಚು

ಪರೀಕ್ಷೆ ವೇಳೆ ವಿಜಯಪುರ ಜಿಲ್ಲೆಯ ತಿಕೋಟಾದಲ್ಲಿ ನಡೆದ ಗಲಾಟೆ ವಿಚಾರಕ್ಕೆ ಸಂಬಂಧಿಸಿದಂತೆ ಇಂದು ನಗರದಲ್ಲಿ ಎಬಿವಿಪಿ (ABVP) ಕಾರ್ಯಕರ್ತರು ಮತ್ತು ವಿದ್ಯಾರ್ಥಿಗಳು ಬೃಹತ್ ಪ್ರತಿಭಟನೆ ನಡೆಸಿದರು. ನಗರದ ಗಾಂಧಿ ಚೌಕ್‌ನಲ್ಲಿ ರಸ್ತೆ ತಡೆ ನಡೆಸಿದ ಪ್ರತಿಭಟನಾಕಾರರು ಸರ್ಕಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು. ಗಾಂಧಿ ವೃತ್ತದಿಂದ ಅಂಬೇಡ್ಕರ್ ವೃತ್ತದವರೆಗೆ ಮೆರವಣಿಗೆ ನಡೆಸಿದ ವಿದ್ಯಾರ್ಥಿಗಳು, ಪರೀಕ್ಷೆಯಲ್ಲಿ ಅಕ್ರಮ ನಡೆದಿದ್ದು ಕೂಡಲೇ ಮರುಪರೀಕ್ಷೆ ನಡೆಸಬೇಕು ಎಂದು ಪಟ್ಟು ಹಿಡಿದರು.

ಈ ವೇಳೆ ಪ್ರತಿಭಟನಾಕಾರರು ಮತ್ತು ಪೊಲೀಸರ ನಡುವೆ ಭಾರೀ ವಾಗ್ವಾದ ಹಾಗೂ ಜಟಾಪಟಿ ನಡೆಯಿತು. ಸರ್ಕಾರದ ವಿರುದ್ಧ ಪೋಸ್ಟರ್ ಪ್ರದರ್ಶಿಸಲು ಮುಂದಾದ ಯುವಕರ ಕೈಯಲ್ಲಿದ್ದ ಪೋಸ್ಟರ್‌ಗಳನ್ನು ಪೊಲೀಸರು ಕಸಿದುಕೊಂಡರು. ಪರಿಸ್ಥಿತಿ ಕೈಮೀರುತ್ತಿದ್ದಂತೆ ಪೊಲೀಸರು 10ಕ್ಕೂ ಅಧಿಕ ಪ್ರತಿಭಟನಾಕಾರರನ್ನು ವಶಕ್ಕೆ ಪಡೆದರು. ಈ ವೇಳೆ ಪೊಲೀಸರು ವಿದ್ಯಾರ್ಥಿಗಳನ್ನು ವ್ಯಾನ್‌ಗೆ ಹತ್ತಿಸಲು ಹರಸಾಹಸ ಪಡಬೇಕಾಯಿತು.

ಪ್ರಶ್ನೆ ಪತ್ರಿಕೆ ಲೀಕ್ ವದಂತಿಗೆ ಕೆಇಎ ಬ್ರೇಕ್

ಇತ್ತ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಪ್ರಶ್ನೆ ಪತ್ರಿಕೆ ಸೋರಿಕೆ ಮತ್ತು ಒಎಂಆರ್ (OMR) ಶೀಟ್ ಗೊಂದಲಕ್ಕೆ ಕೆಇಎ ಕಾರ್ಯನಿರ್ವಾಹಕ ನಿರ್ದೇಶಕ ಪ್ರಸನ್ನ ಅವರು ಸ್ಪಷ್ಟನೆ ನೀಡಿದ್ದಾರೆ. ಪರೀಕ್ಷೆಯಲ್ಲಿ ಒಎಂಆರ್ ಶೀಟ್ ಸಂಖ್ಯೆ ಮತ್ತು ಪ್ರಶ್ನೆ ಪತ್ರಿಕೆ ಸಂಖ್ಯೆ ಒಂದೇ ಇರಬೇಕು ಎಂಬ ನಿಯಮವಿಲ್ಲ. ಸೀರಿಯಲ್ ನಂಬರ್ ಬೇರೆ ಬೇರೆಯಾಗಿರಬಹುದು. ಆ ಬಗ್ಗೆ ಆತಂಕ ಪಡುವ ಅಗತ್ಯವಿಲ್ಲ ಎಂದು ಅವರು ತಿಳಿಸಿದ್ದಾರೆ. ವರ್ಷನ್ ಕೋಡ್ ಮತ್ತು ಪ್ರಶ್ನೆ ಪತ್ರಿಕೆ ಸಂಖ್ಯೆಯನ್ನು ಒಎಂಆರ್‌ನಲ್ಲಿ ಪ್ರತ್ಯೇಕವಾಗಿ ನಮೂದಿಸಲು ಅವಕಾಶವಿರುತ್ತದೆ. ಸಾಮಾಜಿಕ ಜಾಲತಾಣಗಳಲ್ಲಿ ಹರಡುತ್ತಿರುವ ಸುಳ್ಳು ಸುದ್ದಿಗಳನ್ನು ನಂಬಬೇಡಿ ಎಂದು ಅಭ್ಯರ್ಥಿಗಳಲ್ಲಿ ಮನವಿ ಮಾಡಿದ್ದಾರೆ.

ಮರುಪರೀಕ್ಷೆ ನಡೆಯುತ್ತಾ?

ಸದ್ಯದ ಪರಿಸ್ಥಿತಿಯಲ್ಲಿ ಕೆಇಎ ಪರೀಕ್ಷೆಯು ಪಾರದರ್ಶಕವಾಗಿ ನಡೆದಿದೆ ಎಂದು ಸಮರ್ಥಿಸಿಕೊಳ್ಳುತ್ತಿದೆ. ವಿಜಯಪುರ ಸೇರಿದಂತೆ ಕೆಲವು ಕೇಂದ್ರಗಳಲ್ಲಿ ನಡೆದಿದೆ ಎನ್ನಲಾದ ತಾಂತ್ರಿಕ ಗೊಂದಲ ಮತ್ತು ಗಲಾಟೆಗಳು ಅಭ್ಯರ್ಥಿಗಳಲ್ಲಿ ಸಂಶಯ ಹುಟ್ಟಿಸಿವೆ. ಪ್ರತಿಭಟನಾಕಾರರು ಮರುಪರೀಕ್ಷೆಗೆ ಪಟ್ಟು ಹಿಡಿದಿದ್ದರೂ, ಸರ್ಕಾರದ ಮಟ್ಟದಲ್ಲಿ ಅಥವಾ ಕೆಇಎ ವತಿಯಿಂದ ಮರುಪರೀಕ್ಷೆಯ ಬಗ್ಗೆ ಯಾವುದೇ ಅಧಿಕೃತ ಸೂಚನೆ ಬಂದಿಲ್ಲ. ಪರೀಕ್ಷಾ ಪ್ರಾಧಿಕಾರದ ಸ್ಪಷ್ಟನೆಯ ನಂತರವೂ ಅಭ್ಯರ್ಥಿಗಳ ಆಕ್ರೋಶ ತಣ್ಣಗಾಗದಿದ್ದರೆ ಮುಂದಿನ ದಿನಗಳಲ್ಲಿ ಈ ಹೋರಾಟ ತೀವ್ರ ಸ್ವರೂಪ ಪಡೆದುಕೊಳ್ಳುವ ಸಾಧ್ಯತೆಯಿದೆ.

ಹಗಲಲ್ಲಿ ಪುಸ್ತಕ, ಇರುಳಲ್ಲಿ ಪೆಟ್ರೋಲ್ ಬಂಕ್ನಲ್ಲಿ ಕಾಯಕ: ಜೆನ್ Z ಯುವತಿಯ ಮನಮಿಡಿಯುವ ಜೀವನಗಾಥೆ

Chandrashekar GS — Sun, 02 Aug 2026 19:00:37 +0530

ಶಿಕ್ಷಣಕ್ಕಾಗಿ ಕಠಿಣ ಹಾದಿ ಹಿಡಿದ ಯುವತಿ!

ಮಹಾರಾಷ್ಟ್ರ: ಉನ್ನತ ಶಿಕ್ಷಣ ಪಡೆಯುವುದು ಪ್ರತಿಯೊಬ್ಬ ವಿದ್ಯಾರ್ಥಿಯ ಕನಸು. ಆದರೆ ಆ ಕನಸನ್ನು ನನಸಾಗಿಸಲು ಕೆಲವರು ಎದುರಿಸುವ ಸವಾಲುಗಳು ಸಾಮಾನ್ಯರಿಗೆ ಊಹಿಸಲಾಗದಷ್ಟು ಕಠಿಣವಾಗಿರುತ್ತವೆ. ಅಂತಹ ಪ್ರೇರಣಾದಾಯಕ ಕಥೆಯೊಂದು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಕಾಲೇಜು ವಿದ್ಯಾರ್ಥಿನಿಯೊಬ್ಬಳು ಹಗಲು ತರಗತಿಗಳಿಗೆ ಹಾಜರಾಗುವುದರ ಜೊತೆಗೆ ರಾತ್ರಿ 10 ಗಂಟೆಯವರೆಗೆ ಪೆಟ್ರೋಲ್ ಬಂಕ್‌ನಲ್ಲಿ ಕೆಲಸ ಮಾಡಿ ತನ್ನ ಶಿಕ್ಷಣದ ವೆಚ್ಚವನ್ನು ತಾನೇ ಭರಿಸುತ್ತಿದ್ದಾಳೆ.

ಒಂದು ಸಾಮಾನ್ಯ ಭೇಟಿ ಬಿಚ್ಚಿಟ್ಟ ಅಸಾಮಾನ್ಯ ಕಥೆ..!

ರಾತ್ರಿ ವೇಳೆ ಶೆಲ್ ಪೆಟ್ರೋಲ್ ಬಂಕ್‌ಗೆ ಕಾರಿಗೆ ಇಂಧನ ತುಂಬಿಸಿಕೊಳ್ಳಲು ಬಂದ ವ್ಯಕ್ತಿಯೊಬ್ಬರು ವಿದ್ಯಾರ್ಥಿನಿಯೊಂದಿಗೆ ಮಾತುಕತೆ ನಡೆಸಿದಾಗ ಆಕೆಯ ಬದುಕಿನ ನಿಜವಾದ ಹೋರಾಟ ಬೆಳಕಿಗೆ ಬಂದಿದೆ. ಮಹಾರಾಷ್ಟ್ರದ ರಾಯಗಡ್ ಜಿಲ್ಲೆಯ ಮೂಲದ ಈ ಯುವತಿ ಕಾಲೇಜು ಓದಿಗಾಗಿ ನಗರಕ್ಕೆ ಬಂದಿದ್ದು, ಕುಟುಂಬದ ಮೇಲಿನ ಆರ್ಥಿಕ ಹೊರೆ ಕಡಿಮೆ ಮಾಡಲು ಉದ್ಯೋಗವನ್ನು ಆಯ್ಕೆ ಮಾಡಿಕೊಂಡಿದ್ದಾಳೆ.

ಹಗಲು ಓದು... ರಾತ್ರಿ ದುಡಿಮೆ!

ವಿದ್ಯಾರ್ಥಿನಿ ಬೆಳಗ್ಗೆ ಕಾಲೇಜು ತರಗತಿಗಳಿಗೆ ಹಾಜರಾಗುತ್ತಾಳೆ. ಸಂಜೆ ಪೆಟ್ರೋಲ್ ಬಂಕ್‌ನಲ್ಲಿ ಕೆಲಸ ಆರಂಭಿಸಿ ರಾತ್ರಿ 10 ಗಂಟೆಯವರೆಗೆ ಸೇವೆ ಸಲ್ಲಿಸುತ್ತಾಳೆ. ವಾರಾಂತ್ಯದಲ್ಲಿ ಬೆಳಗ್ಗೆ ಹಾಗೂ ಸಂಜೆ ಎರಡೂ ಪಾಳಿಗಳಲ್ಲಿ ಕೆಲಸ ಮಾಡಿ ಕಾಲೇಜು ಶುಲ್ಕ, ವಸತಿ ಮತ್ತು ದಿನನಿತ್ಯದ ಖರ್ಚುಗಳನ್ನು ನಿರ್ವಹಿಸುತ್ತಾಳೆ. ತನ್ನ ಗುರಿಯತ್ತ ಅಚಲವಾಗಿ ಸಾಗುತ್ತಿರುವ ಆಕೆಯ ದೃಢಸಂಕಲ್ಪ ಅನೇಕರಿಗೆ ಸ್ಫೂರ್ತಿಯಾಗಿದೆ.

ಸಾಮಾಜಿಕ ಜಾಲತಾಣದಲ್ಲಿ ಮೆಚ್ಚುಗೆಯ ಮಹಾಪೂರ..

ಈ ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ಸಾವಿರಾರು ಮಂದಿಯ ಮನ ಗೆದ್ದಿದೆ. ಅನೇಕರು ವಿದ್ಯಾರ್ಥಿನಿಯ ಪರಿಶ್ರಮ, ಆತ್ಮವಿಶ್ವಾಸ ಮತ್ತು ಆತ್ಮನಿರ್ಭರತೆಯನ್ನು ಕೊಂಡಾಡಿದ್ದಾರೆ. ಕೆಲವರು ಆಕೆಯ ಶಿಕ್ಷಣಕ್ಕೆ ನೆರವು ನೀಡಲು ಮುಂದಾಗಿದ್ದರೆ, ಇನ್ನೂ ಹಲವರು ಇಂತಹ ವಿದ್ಯಾರ್ಥಿಗಳಿಗೆ ಸಮಾಜ ಮತ್ತು ಸಂಸ್ಥೆಗಳು ಹೆಚ್ಚಿನ ಬೆಂಬಲ ನೀಡಬೇಕು ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಭಾರತದಲ್ಲಿ ಅರೆಕಾಲಿಕ ಉದ್ಯೋಗದ ಅಗತ್ಯತೆ..!

ಈ ಘಟನೆ ಮತ್ತೊಮ್ಮೆ ವಿದ್ಯಾರ್ಥಿಗಳಿಗಾಗಿ ಅರೆಕಾಲಿಕ ಉದ್ಯೋಗಗಳ ಅಗತ್ಯವನ್ನು ಚರ್ಚೆಗೆ ತಂದಿದೆ. ವಿದೇಶಗಳಲ್ಲಿ ವಿದ್ಯಾರ್ಥಿಗಳು ಓದಿನ ಜೊತೆಗೆ ಉದ್ಯೋಗ ಮಾಡುವುದು ಸಾಮಾನ್ಯ. ಭಾರತದಲ್ಲೂ ವಿಶ್ವವಿದ್ಯಾಲಯಗಳು ಮತ್ತು ಖಾಸಗಿ ಸಂಸ್ಥೆಗಳು ಇಂತಹ ಅವಕಾಶಗಳನ್ನು ಹೆಚ್ಚಿಸಿದರೆ, ಆರ್ಥಿಕ ಸಂಕಷ್ಟದಲ್ಲಿರುವ ವಿದ್ಯಾರ್ಥಿಗಳು ಆತ್ಮವಿಶ್ವಾಸದಿಂದ ತಮ್ಮ ಶಿಕ್ಷಣವನ್ನು ಮುಂದುವರಿಸಬಹುದು ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.

ಪರಿಶ್ರಮಕ್ಕೆ ಪರ್ಯಾಯವಿಲ್ಲ!

ಈ ವಿದ್ಯಾರ್ಥಿನಿಯ ಕಥೆ ಕೇವಲ ವೈರಲ್ ಪೋಸ್ಟ್ ಅಲ್ಲ. ಗುರಿ ಸ್ಪಷ್ಟವಾಗಿದ್ದರೆ ಯಾವುದೇ ಪರಿಸ್ಥಿತಿಯಲ್ಲೂ ಕನಸನ್ನು ಸಾಕಾರಗೊಳಿಸಬಹುದು ಎಂಬುದಕ್ಕೆ ಇದು ಜೀವಂತ ಉದಾಹರಣೆ. ಆಕೆಯ ಹೋರಾಟ ಸಾವಿರಾರು ಯುವಕರಿಗೆ ಧೈರ್ಯ, ಪರಿಶ್ರಮ ಮತ್ತು ಆತ್ಮವಿಶ್ವಾಸದ ಮಹತ್ವವನ್ನು ನೆನಪಿಸುತ್ತದೆ.

ಜಾಬ್‌ ಸಿಗೋದೆ ಕಷ್ಟ.. ಅಂತದ್ರಲ್ಲಿ 20ಕ್ಕೂ ಹೆಚ್ಚು ಕಂಪನಿಗಳಲ್ಲಿ ಕೆಲಸ ಗಿಟ್ಟಿಸಿಕೊಂಡ ಯುವಕನ Success Story Viral

Ashwini HR — Sun, 02 Aug 2026 10:54:07 +0530

ಇಂದಿನ ಸ್ಪರ್ಧಾತ್ಮಕ ಜಗತ್ತಿನಲ್ಲಿ ಒಂದು ಉದ್ಯೋಗ ಗಿಟ್ಟಿಸಿಕೊಳ್ಳುವುದೇ ದೊಡ್ಡ ಸವಾಲು. ಇಂತಹ ಪರಿಸ್ಥಿತಿಯಲ್ಲಿ ಸಾಫ್ಟ್‌ವೇರ್ ಇಂಜಿನಿಯರ್ ಒಬ್ಬರಿಗೆ ವಿಶ್ವದ ದಿಗ್ಗಜ ಕಂಪನಿಗಳಿಂದ 20ಕ್ಕೂ ಹೆಚ್ಚು ಆಫರ್ ಬಂದಿದೆ ಎಂದರೆ ನಂಬಲೇಬೇಕು. ನಿಶ್ಚಯ್ ಅಗರ್ವಾಲ್ ಎಂಬುವವರ ಈ ಸ್ಪೂರ್ತಿದಾಯಕ ಕಥೆ ಈಗ ಇಂಟರ್ನೆಟ್‌ನಲ್ಲಿ ವೈರಲ್ ಆಗುತ್ತಿದೆ.

ಸತತ ಪರಿಶ್ರಮಕ್ಕೆ ಸಿಕ್ಕ ಪ್ರತಿಫಲ

ಲಿಂಕ್ಡ್‌ಇನ್ (LinkedIn) ಬಳಕೆದಾರರಾದ ನಿಶ್ಚಯ್ ಅಗರ್ವಾಲ್ ಅವರು ಇತ್ತೀಚೆಗೆ ತಮ್ಮ ವೃತ್ತಿಜೀವನದ ಮೈಲಿಗಲ್ಲನ್ನು ಹಂಚಿಕೊಂಡಿದ್ದಾರೆ. ಉದ್ಯೋಗ ಹುಡುಕಾಟದ ಸಮಯದಲ್ಲಿ ಅವರಿಗೆ Adobe, Amazon, Tesla, Salesforce, JioHotstar, eBay, CRED, Twilio ಮತ್ತು Autodesk ನಂತಹ ಪ್ರತಿಷ್ಠಿತ ಕಂಪನಿಗಳಿಂದ 20ಕ್ಕೂ ಹೆಚ್ಚು ಆಫರ್ ಲೆಟರ್‌ಗಳು ಬಂದಿವೆ. ಅಷ್ಟೇ ಅಲ್ಲದೆ, ಅವರಿಗೆ ವಿದೇಶಿ ಕಂಪನಿಯೊಂದರಿಂದ ಅಂತರಾಷ್ಟ್ರೀಯ ಆಫರ್ ಕೂಡ ಲಭಿಸಿದೆ.

ಯಶಸ್ಸಿನ ಹಾದಿ ಸುಲಭವಾಗಿರಲಿಲ್ಲ

ಈ ಯಶಸ್ಸಿನ ಬಗ್ಗೆ ಮಾತನಾಡಿರುವ ನಿಶ್ಚಯ್, "ಇದು ಕೇವಲ ಕಂಪನಿಗಳ ಲೋಗೋ ಅಥವಾ ಹೆಸರಿನ ಕಥೆಯಲ್ಲ, ಇದರ ಹಿಂದೆ ದೊಡ್ಡ ಹೋರಾಟವಿದೆ" ಎಂದಿದ್ದಾರೆ. ಈ ಹಂತಕ್ಕೆ ತಲುಪಲು ಅವರು ಅನೇಕ ರಾತ್ರಿಗಳನ್ನು ಕಲಿಕೆಯಲ್ಲಿ ಕಳೆದಿದ್ದಾರೆ. ವೀಕೆಂಡ್‌ಗಳಲ್ಲೂ ವಿಶ್ರಾಂತಿ ಪಡೆಯದೆ ಸಿದ್ಧತೆ ನಡೆಸಿದ್ದಾರೆ. ಹಲವು ಸಂದರ್ಶನಗಳಲ್ಲಿ ತಿರಸ್ಕಾರವನ್ನು ಎದುರಿಸಿದ್ದಾರೆ. ದೀರ್ಘಕಾಲದ ಕೋಡಿಂಗ್ ಮತ್ತು ಡಿಬಗ್ಗಿಂಗ್ ಅವರ ತಾಳ್ಮೆಯನ್ನು ಪರೀಕ್ಷಿಸಿತ್ತು. ಆತ್ಮವಿಶ್ವಾಸ ಕುಗ್ಗಿದಾಗಲೂ ಸತತ ಕಲಿಕೆಯ ಹಂಬಲ ಅವರನ್ನು ಮುನ್ನಡೆಸಿದೆ.

ಉದ್ಯೋಗಾಕಾಂಕ್ಷಿಗಳಿಗೆ ಸಲಹೆ

ನೌಕರಿಗಾಗಿ ಹುಡುಕುತ್ತಿರುವ ಯುವಕರಿಗೆ ನಿಶ್ಚಯ್ ಒಂದು ಮಹತ್ವದ ಸಲಹೆ ನೀಡಿದ್ದಾರೆ. "ನಿಮ್ಮ ಆರಂಭದ ಹಂತವನ್ನು ಬೇರೆಯವರ ಯಶಸ್ಸಿನ ಮುಂದಿನ ಹಂತದೊಂದಿಗೆ ಹೋಲಿಸಿಕೊಳ್ಳಬೇಡಿ. ಪ್ರತಿಯೊಬ್ಬರ ಜೀವನದ ಪ್ರಯಾಣವೂ ಭಿನ್ನವಾಗಿರುತ್ತದೆ. ನಿರಂತರವಾಗಿ ಹೊಸದನ್ನು ಕಲಿಯಿರಿ, ಹೊಸ ಪ್ರಾಜೆಕ್ಟ್ ಮಾಡಿ ಮತ್ತು ನಿಮ್ಮ ಮೇಲೆ ನಂಬಿಕೆ ಇಡಿ" ಎಂದಿದ್ದಾರೆ. ತಮ್ಮ ಯಶಸ್ಸಿನ ಶ್ರೇಯಸ್ಸನ್ನು ಅವರು ಕುಟುಂಬ, ಮ್ಯಾನೇಜರ್‌ಗಳು ಮತ್ತು ತಮ್ಮ ತಂಡಕ್ಕೆ ನೀಡಿದ್ದಾರೆ.

ಆಶ್ಚರ್ಯ ವ್ಯಕ್ತಪಡಿಸಿದ ನೆಟ್ಟಿಗರು

ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ತರಹೇವಾರಿ ಕಾಮೆಂಟ್ ಮಾಡುತ್ತಿದ್ದಾರೆ. ಒಬ್ಬ ಬಳಕೆದಾರರು "ನೀವು ಪೋಕಿಮನ್ ಕಾರ್ಡ್ ಕಲೆಕ್ಟ್ ಮಾಡಿದ ಹಾಗೆ ಆಫರ್ ಲೆಟರ್‌ಗಳನ್ನು ಕಲೆಕ್ಟ್ ಮಾಡಿದ್ದೀರಾ!" ಎಂದು ತಮಾಷೆ ಮಾಡಿದ್ದಾರೆ. ಇನ್ನು ಕೆಲವರು ಇದು ಪ್ರತಿಯೊಬ್ಬ ಟೆಕ್ ಇಂಜಿನಿಯರ್‌ನ ಕನಸು ಎಂದು ಬಣ್ಣಿಸಿದ್ದಾರೆ.

ಯಶಸ್ಸು ಎಂಬುದು ರಾತ್ರೋರಾತ್ರಿ ಬರುವುದಿಲ್ಲ; ಇದು ಸತತ ಪ್ರಯತ್ನ ಮತ್ತು ನೂರಾರು ಸೋಲುಗಳ ನಂತರ ಸಿಗುವ ಪ್ರತಿಫಲ. ನಿಶ್ಚಯ್ ಅವರ ಸಾಧನೆಯು ಉದ್ಯೋಗಾಕಾಂಕ್ಷಿಗಳಿಗೆ "ಮಾರುಕಟ್ಟೆ ಎಷ್ಟೇ ಕಠಿಣವಾಗಿದ್ದರೂ, ಪ್ರತಿಭೆ ಮತ್ತು ಕೌಶಲವಿದ್ದರೆ ಅವಕಾಶಗಳು ನಮ್ಮನ್ನು ಹುಡುಕಿಕೊಂಡು ಬರುತ್ತವೆ" ಎಂಬ ಭರವಸೆ ನೀಡುತ್ತದೆ.

Bro is suffering from success16+ offers at this time pic.twitter.com/BQgw9v5NfH

— Ajay (@ajay_2512x) July 31, 2026

ಹತ್ತಾರು ವರ್ಷ ಕೆಲ್ಸ ಮಾಡಿದ್ರೂ ಹೊರ ದಬ್ಬುತ್ತಿದೆ ಅಮೆರಿಕ: ಬರಿಗೈನಲ್ಲಿ ಭಾರತಕ್ಕೆ ವಾಪಸಾಗ್ತಿರೋರ ಕಣ್ಣೀರ ಕಥೆ

Suchethana D — Fri, 07 Aug 2026 13:22:24 +0530

ಭಾರತದಲ್ಲಿಯೇ ಹುಟ್ಟಿ, ಇಲ್ಲಿಯೇ ಕಲಿತು, ಇಲ್ಲಿಯೇ ಹಲವಾರು ರೀತಿಯ ಉದ್ಯೋಗಕಕ್ಕೆ ಅವಕಾಶ ಇದ್ದರೂ, ವಿದೇಶದ ಕನಸು ಕಾಣುವವರು ಹಲವರು. ತಮಗೆ ಇಷ್ಟವಿಲ್ಲದಿದ್ದರೂ ಎಷ್ಟೋ ಮಕ್ಕಳು, ಅಪ್ಪ-ಅಮ್ಮನ ಆಸೆ ಪೂರೈಸುವುದಕ್ಕಾಗಿಯಾದರೂ, ಅವರ ಪ್ರೆಸ್ಟೀಜ್ಗಾದರೂ ವಿದೇಶಕ್ಕೆ ಅದರಲ್ಲಿಯೂ ಅಮೆರಿಕಕ್ಕೆ ಹೋಗಲೇಬೇಕಾದ ಅನಿವಾರ್ಯತೆ ಕಂಡವರು. ಮಗನೋ, ಮಗಳೋ ಫಾರಿನ್ ರಿಟರ್ನ್ ಎಂದು ಕರೆಸಿಕೊಳ್ಳುವ ಆಸೆ ಕೆಲವು ಅಪ್ಪ-ಅಮ್ಮಂದಿರಿಗೆ. ಇದೇ ಕಾರಣಕ್ಕೆ, ತಮ್ಮಿಂದ ಮಕ್ಕಳನ್ನು ದೂರ ಮಾಡಿ, ಕೊನೆಗೆ ವೃದ್ಧಾಪ್ಯದಲ್ಲಿ ಗೋಳೋ ಎನ್ನುವ ಅಪ್ಪ-ಅಮ್ಮಂದಿರೂ ಸಾಕಷ್ಟು ಇದ್ದಾರೆ. ಎಷ್ಟೋ ಸಂದರ್ಭಗಳಲ್ಲಿ ದಿಢೀರ್ ಎಂದು ಅಪ್ಪ-ಅಮ್ಮಂದಿರಿಗೆ ಏನಾದರೂ ಅನಾಹುತ ಸಂಭವಿಸಿದರೂ ಆ ಮಕ್ಕಳು ಬರಲಾರದ ಸ್ಥಿತಿಯೂ ಇದೆ. ಇನ್ನು ಕೆಲವರಿಗೆ ಕಂಪೆನಿಯಿಂದ ಹೋಗುವ ಅವಕಾಶ ಸಿಕ್ಕರೆ, ಮತ್ತೆ ಕೆಲವರು ಸ್ಕಾಲರ್ಷಿಪ್ ಪಡೆದು ಹೋದವರು ಇದ್ದಾರೆ. ಹೀಗೆ ಹೀಗೆ ಭಾರತದ ಬಿಟ್ಟು ಫಾರಿನ್ ಆಸೆಗೆ ಕಟ್ಟುಬಿದ್ದು ಜೀವನ ಕಟ್ಟಿಕೊಳ್ಳುತ್ತಿರುವ ಲಕ್ಷಾಂತರ ಮಂದಿ ಅಮೆರಿಕದಲ್ಲಿದ್ದಾರೆ.

ಆದರೆ ಈಗ ಅಲ್ಲಿಯ ಸ್ಥಿತಿ ಡೋಲಾಯಮಾನವಾಗಿದೆ. ಡಾಲರ್ ಕನಸು ಕಂಡು ತಾಯ್ನಾಡು ಬಿಟ್ಟು ಹೋದವರು, H-1B ವೀಸಾದ ಮೇಲೆ ಅಮೆರಿಕದಲ್ಲಿ ಕೆಲಸ ಮಾಡುತ್ತಿರುವ ಭಾರತೀಯರು ಪುನಃ ಬರಿಗೈಯಲ್ಲಿ ಭಾರತಕ್ಕೆ ಬರುವಂತಾಗಿದೆ. ಈ ಕುರಿತು, ಮಹಿಳೆಯೊಬ್ಬರು 12 ವರ್ಷಗಳನ್ನು ಕಳೆದ ನಂತರ ಭಾರತಕ್ಕೆ ಹೇಗೆ ಹಿಂತಿರುಗಬೇಕಾಯಿತು ಎಂಬುದರ ಕುರಿತು NRI ಗುಂಪಿನಲ್ಲಿ ತಮ್ಮ ಕಥೆಯನ್ನು ಹಂಚಿಕೊಂಡಿದ್ದು, ಇದೀಗ ಭಾರಿ ವೈರಲ್ ಆಗಿದೆ. ಇದರಲ್ಲಿ ಮಹಿಳೆ ತಾವು ಸಲಹಾ ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿರುವುದಾಗಿ ಹೇಳಿದ್ದಾರೆ. ನನಗೆ ಕಳೆದ ಆರು ತಿಂಗಳಿನಿಂದ ವೇತನ ಕೊಟ್ಟಿಲ್ಲ. ಅನೇಕ H-1B ವೀಸಾ ಹೊಂದಿರುವವರನ್ನು ಐಟಿ ಸಿಬ್ಬಂದಿ ಏಜೆನ್ಸಿಗಳು ಮತ್ತು ಸಲಹಾ ಸಂಸ್ಥೆಗಳು ನೇಮಿಸಿಕೊಂಡು ನಂತರ ಗ್ರಾಹಕರಿಗೆ ಪೂರೈಸುವುದರಿಂದ ಇದು ಒಂದು ದೊಡ್ಡ ಸಮಸ್ಯೆಯಾಗಿ ಹೊರಹೊಮ್ಮಿದೆ. ಅಂತಹ ಸಂದರ್ಭಗಳಲ್ಲಿ, ಅವರು ಕೆಲಸ ಮಾಡುತ್ತಿರುವ ಕ್ಲೈಂಟ್‌ಗಳು ತಮ್ಮ ವೇತನ ಮತ್ತು ಸಂಬಳವನ್ನು ಕೊಡುತ್ತಿಲ್ಲ ಎಂದಿದ್ದಾರೆ ಮಹಿಳೆ. "ನಾನು 12 ವರ್ಷಗಳ ಹಿಂದೆ ಉತ್ತಮ ಜೀವನವನ್ನು ನಿರ್ಮಿಸುವ ಕನಸಿನೊಂದಿಗೆ ಅಮೆರಿಕಕ್ಕೆ ಬಂದಿದ್ದೇನೆ. ದುರದೃಷ್ಟವಶಾತ್, ನನ್ನ ಉದ್ಯೋಗದಾತರು ಕಳೆದ ಆರು ತಿಂಗಳಿನಿಂದ ನನಗೆ ಸಂಬಳ ನೀಡುವುದನ್ನು ನಿಲ್ಲಿಸಿದ್ದಾರೆ. ನಾನು ಈಗಾಗಲೇ ಕಾರ್ಮಿಕ ಇಲಾಖೆಗೆ ದೂರು ನೀಡಿದ್ದೇನೆ ಎಂದಿದ್ದಾರೆ.

ಅಮೆರಿಕದಲ್ಲಿ 50 ಲಕ್ಷಕ್ಕಿಂತಲೂ ಹೆಚ್ಚು ಭಾರತೀಯರು ಇದ್ದಾರೆ. ಇವರಲ್ಲಿ ಬಹುತೇಕ ಮಂದಿ ಉದ್ಯೋಗಕ್ಕೆ ಹೋದವರು. ಅರ್ಥಾತ್ H-1B ವೀಸಾ ಹೊಂದಿರುವವರು. ಆದರೆ ಇವರಿಗೆಲ್ಲಾ ಇದೀಗ ಭಾರಿ ಶಾಕ್ ಆಗುವ ಎಚ್ಚರಿಕೆಯನ್ನು ಅಮೆರಿಕ ನೀಡಿದೆ. ಅಮೆರಿಕದ ಟೆಕ್ ವಲಯದಲ್ಲಿ ನಡೆಯುತ್ತಿರುವ ವಜಾಗಳು ಅಲ್ಲಿ ವಾಸಿಸುವ ಸಾವಿರಾರು ಭಾರತೀಯ ಎಂಜಿನಿಯರ್‌ಗಳು ಮತ್ತು ಸಾಫ್ಟ್‌ವೇರ್ ಡೆವಲಪರ್‌ಗಳ ಜೀವನವನ್ನು ತಲೆಕೆಳಗಾಗಿಸಿದೆ. ಅದೆಷ್ಟೋ ವರ್ಷಗಳಿಂದ ಕೆಲಸ ಮಾಡುತ್ತಿದ್ದ, ಮನೆಗಳನ್ನು ಖರೀದಿಸಿ, ತಮ್ಮ ಕುಟುಂಬಗಳೊಂದಿಗೆ ನೆಲೆಸಿದವರಿಗೆ, ಅವರ ಕಂಪನಿಯಿಂದ ಬಂದ ಒಂದೇ ಒಂದು ಇಮೇಲ್ ಎಲ್ಲವನ್ನೂ ಬದಲಾಯಿಸುತ್ತಿದೆ.

ಆರು ತಿಂಗಳು ವೇತನವಿಲ್ಲ

"ನನ್ನ ಉದ್ಯೋಗದಾತರು ವೇತನವನ್ನು ನೀಡದ ಕಾರಣ ಮತ್ತು ನಾನು ಬೇರೆ ಉದ್ಯೋಗದಾತರಿಗೆ ವರ್ಗಾಯಿಸಲು ಸಾಧ್ಯವಾಗದ ಕಾರಣ ನನ್ನ H-1B ಸ್ಥಿತಿಯನ್ನು ಅಂತಿಮವಾಗಿ ರದ್ದುಗೊಳಿಸಲಾಯಿತು. ನನ್ನ ಪತಿ H-4 ಸ್ಥಿತಿಗೆ ಹೋಗಬೇಕಾಯಿತು, ಮತ್ತು ನಾನು H-4 ಗೆ ಸಮಯಕ್ಕೆ ಸರಿಯಾಗಿ ಅರ್ಜಿ ಸಲ್ಲಿಸಲು ಸಾಧ್ಯವಾಗಲಿಲ್ಲ. ನಮಗೆ ಒಂದು ಶಿಶು ಸೇರಿದಂತೆ ಮೂವರು ಮಕ್ಕಳಿದ್ದಾರೆ. ನಾವು ಕಷ್ಟಪಟ್ಟು ನಿರ್ಮಿಸಿದ ಎಲ್ಲವನ್ನೂ ಕಳೆದುಕೊಂಡ ನಂತರ, ನಮಗೆ ಭಾರತಕ್ಕೆ ಮರಳುವುದನ್ನು ಬಿಟ್ಟು ಬೇರೆ ದಾರಿಯಿಲ್ಲ" ಎಂದಿದ್ದಾರೆ. "ಇಂದು ನಾನು ಯುಎಸ್ ಅನ್ನು ಖಾಲಿ ಕೈಗಳಿಂದ ಬಿಡುತ್ತಿದ್ದೇನೆ. ನನ್ನ ಉದ್ಯೋಗದಾತ ನಾವು 12 ವರ್ಷಗಳ ಕಾಲ ನಿರ್ಮಿಸಿದ ಎಲ್ಲವನ್ನೂ ನಾಶಪಡಿಸಿದರು. ನಾನು ಒಬ್ಬಂಟಿಯಲ್ಲ ಎಂದು ನನಗೆ ತಿಳಿದಿದೆ. ಇನ್ನೂ ಅನೇಕರು ಮೌನವಾಗಿ ಅದೇ ಪರಿಸ್ಥಿತಿಯನ್ನು ಎದುರಿಸುತ್ತಿದ್ದಾರೆ. ನಮ್ಮ ಕಥೆಗಳು ಕೇಳಿಬರುತ್ತವೆ ಮತ್ತು ಬೇರೆ ಯಾರೂ ಇದನ್ನು ಹೇಳಿಕೊಳ್ಳುವುದಿಲ್ಲ ಎಂದಿದ್ದಾರೆ.

H-1B ವೀಸಾ ಹೊಂದಿರುವರ ಬಿಕ್ಕಟ್ಟು

ಅಮೆರಿಕದಲ್ಲಿ ಕೆಲಸ ಮಾಡುವ ಹೆಚ್ಚಿನ ಭಾರತೀಯ ಟೆಕ್ ವೃತ್ತಿಪರರು H-1B ವೀಸಾಗಳಲ್ಲಿದ್ದಾರೆ, ಅದು ಅವರ ಕಂಪೆನಿಗೆ ನೇರವಾಗಿ ಸಂಬಂಧಿಸಿದೆ. ಕೆಲಸ ಕಳೆದುಕೊಂಡ ನಂತರ ಅವರು ಎದುರಿಸುತ್ತಿರುವ ದೊಡ್ಡ ಸವಾಲು ಸಮಯ. ಯುಎಸ್ ವಲಸೆ ನಿಯಮಗಳ ಅಡಿಯಲ್ಲಿ, ಅವರ ವೀಸಾವನ್ನು ವರ್ಗಾಯಿಸಲು ಮತ್ತೊಂದು ಕಂಪೆನಿಯನ್ನು ಹುಡುಕಲು ಅವರಿಗೆ ಬಹಳ ಕಡಿಮೆ ಸಮಯವಿರುತ್ತದೆ. ಈ ಸಮಯದೊಳಗೆ ಅವರು ಹೊಸ ಪ್ರಾಯೋಜಕರನ್ನು ಹುಡುಕಲು ವಿಫಲವಾದರೆ, ಅವರು ಕಾನೂನುಬದ್ಧವಾಗಿ ಅಮೆರಿಕ ತೊರೆಯಬೇಕಾಗುತ್ತದೆ. ಇದು ಅವರ ಇಡೀ ಜೀವನದ ಮೇಲೆ ಪರಿಣಾಮ ಬೀರುತ್ತದೆ, ಏಕೆಂದರೆ ಇದು ಉದ್ಯೋಗವನ್ನು ಹುಡುಕುವುದು ಮಾತ್ರವಲ್ಲದೆ, ಮಕ್ಕಳ ಶಾಲಾ ಶಿಕ್ಷಣ, ಗೃಹ ಸಾಲಗಳು, ಆರೋಗ್ಯ ರಕ್ಷಣೆ ಮತ್ತು ಕುಟುಂಬದ ಭವಿಷ್ಯದ ಬಗ್ಗೆಯೂ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತದೆ.

60 ದಿನಗಳ H-1B ನಿಯಮ ಏನು?

US ಪೌರತ್ವ ಮತ್ತು ವಲಸೆ ಸೇವೆಗಳ ನಿಯಮಗಳ ಪ್ರಕಾರ, ವಜಾಗೊಳಿಸಿದ H-1B ಉದ್ಯೋಗಿಗಳು ಸಾಮಾನ್ಯವಾಗಿ 60 ದಿನಗಳ ಗ್ರೇಸ್ ಅವಧಿಯನ್ನು ಪಡೆಯುತ್ತಾರೆ, ಅಥವಾ ಅವರ I-94 ಸ್ಥಿತಿ ಮಾನ್ಯವಾಗಿರುವವರೆಗೆ, ಯಾವುದು ಮೊದಲು ಬರುತ್ತದೆಯೋ ಅದು. ಈ 60 ದಿನಗಳ ಗ್ರೇಸ್ ಅವಧಿಯು ಉದ್ಯೋಗಿಯ ಕೊನೆಯ ಕೆಲಸದ ದಿನದಂದು ಪ್ರಾರಂಭವಾಗುತ್ತದೆ, ಅವರು ತಮ್ಮ ಕೊನೆಯ ಸಂಬಳವನ್ನು ಪಡೆದ ದಿನವಲ್ಲ. ಈ ಅವಧಿಯಲ್ಲಿ, ಅವರು ಹೊಸ ಉದ್ಯೋಗವನ್ನು ಹುಡುಕಬಹುದು, ಮತ್ತೊಂದು ವೀಸಾ ವರ್ಗಕ್ಕೆ ಅರ್ಜಿ ಸಲ್ಲಿಸಬಹುದು ಅಥವಾ ದೇಶವನ್ನು ತೊರೆಯಲು ತಯಾರಿ ಮಾಡಬಹುದು. ಇವಿಷ್ಟೇ ಅವರಿಗೆ ಇರುವ ದಾರಿಗಳು.

ಬೆಂಗಳೂರು ಪೊಲೀಸ್‌ ವ್ಯವಸ್ಥೆಯಲ್ಲಿ ಭಾರೀ ಬದಲಾವಣೆ: 5 ಹೊಸ ಕಮಿಷನರೇಟ್‌, 6,633 ಹೊಸ ಹುದ್ದೆ ಸೃಷ್ಟಿಗೆ ಪ್ರಸ್ತಾವನೆ!

Sathish Kumar KH — Mon, 03 Aug 2026 18:52:22 +0530

ಬೆಂಗಳೂರು (ಆ.03): ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲಿ ಹೆಚ್ಚುತ್ತಿರುವ ಜನಸಂಖ್ಯೆ, ವಾಹನ ದಟ್ಟಣೆ (Traffic Congestion), ಸೈಬರ್ ಅಪರಾಧಗಳು (Cyber Crimes) ಹಾಗೂ ಭೌಗೋಳಿಕ ವಿಸ್ತರಣೆಗೆ ತಕ್ಕಂತೆ ನಗರದ ಕಾನೂನು ಮತ್ತು ಸುವ್ಯವಸ್ಥೆಯನ್ನು (Law and Order) ಮತ್ತಷ್ಟು ಬಲಪಡಿಸಲು ಕರ್ನಾಟಕ ರಾಜ್ಯ ಪೊಲೀಸ್ ಇಲಾಖೆ ಬೃಹತ್ ಯೋಜನೆಯೊಂದನ್ನು ರೂಪಿಸಿದೆ.

ಬೆಂಗಳೂರು ಮಹಾನಗರ ಪ್ರಾಧಿಕಾರ (GBA) ವಲಯಗಳ ಮಾದರಿಯಲ್ಲೇ ಬೆಂಗಳೂರು ನಗರ ಪೊಲೀಸ್ ಕಮಿಷನರೇಟ್ ಅನ್ನು ಐದು (5) ಪ್ರತ್ಯೇಕ ಪೊಲೀಸ್ ಕಮಿಷನರೇಟ್‌ಗಳಾಗಿ (Police Commissionerates) ವಿಂಗಡಿಸಿ, ಇಡೀ ನಗರಕ್ಕೆ ಒಬ್ಬರು 'ಮುಖ್ಯ ಪೊಲೀಸ್ ಆಯುಕ್ತರನ್ನು' (Chief Commissioner of Police) ನೇಮಿಸಲು ಸರ್ಕಾರಕ್ಕೆ ಅಧಿಕೃತ ಪ್ರಸ್ತಾವನೆ ಸಲ್ಲಿಸಲಾಗಿದೆ.

ಐದು ಹೊಸ ಕಮಿಷನರೇಟ್‌ಗಳು ಯಾವುವು?

ಪ್ರಸ್ತುತ ಇರುವ ಬೆಂಗಳೂರು ನಗರ ಪೊಲೀಸ್ ಘಟಕವನ್ನು ಮರುಸಂಘಟಿಸಿ (Re-organisation) ಕೆಳಗಿನಂತೆ 5 ಪ್ರತ್ಯೇಕ ಕಮಿಷನರೇಟ್‌ಗಳನ್ನಾಗಿ ಮಾಡಲು ಉದ್ದೇಶಿಸಲಾಗಿದೆ:

ಸೆಂಟ್ರಲ್ ಕಮಿಷನರೇಟ್ (Central COP): CBD ವಲಯ, ವಿಧಾನಸೌಧ, ಉಚ್ಚ ನ್ಯಾಯಾಲಯ ಹಾಗೂ ಪ್ರಮುಖ ವಾಣಿಜ್ಯ ಪ್ರದೇಶಗಳು.
ನಾರ್ತ್ ಕಮಿಷನರೇಟ್ (North COP): ಯಲಹಂಕ, ದೇವನಹಳ್ಳಿ, ವಿಮಾನ ನಿಲ್ದಾಣ (KIAB) ಹಾಗೂ ಸುತ್ತಮುತ್ತಲ ಪ್ರದೇಶಗಳು.
ಸೌತ್ ಕಮಿಷನರೇಟ್ (South COP): ಜಯನಗರ, ಎಲೆಕ್ಟ್ರಾನಿಕ್ ಸಿಟಿ, ಬನ್ನೇರುಘಟ್ಟ ಹಾಗೂ ದಕ್ಷಿಣ ಭಾಗಗಳು.
ವೆಸ್ಟ್ ಕಮಿಷನರೇಟ್ (West COP): ವಿಜಯನಗರ, ಪೀಣ್ಯ, ಕೆಂಗೇರಿ ಹಾಗೂ ಪಶ್ಚಿಮ ವಲಯದ ಕೈಗಾರಿಕಾ ಪ್ರದೇಶಗಳು.
ಈಸ್ಟ್ ಕಮಿಷನರೇಟ್ (East COP): ವೈಟ್‌ಫೀಲ್ಡ್, ಕೆ.ಆರ್. ಪುರಂ, ಮಹದೇವಪುರ ಮತ್ತು ಕೃಷ್ಣರಾಜಪುರ ಭಾಗಗಳು.

ಈ ಐದೂ ವಲಯಗಳ ಮೇಲ್ವಿಚಾರಣೆಯನ್ನು ಐಜಿಪಿ/ಡಿಐಜಿಪಿ (IGP/DIGP) ದರ್ಜೆಯ ಅಧಿಕಾರಿಗಳು ವಹಿಸಿಕೊಳ್ಳಲಿದ್ದು, ಇವರೆಲ್ಲರೂ ‘ಚೀಫ್ ಕಮಿಷನರ್ ಆಫ್ ಪೊಲೀಸ್’ (Chief Commissioner of Police) ಅವರ ಅಧೀನದಲ್ಲಿ ಕಾರ್ಯನಿರ್ವಹಿಸಲಿದ್ದಾರೆ.

6,633 ಹೊಸ ಹುದ್ದೆಗಳ ಸೃಷ್ಟಿಗೆ ಸಿಫಾರಸು!

ಈ ಬೃಹತ್ ಬದಲಾವಣೆಯನ್ನು ಪರಿಣಾಮಕಾರಿಯಾಗಿ ಜಾರಿಗೆ ತರಲು ಒಟ್ಟು 6,633 ಹೊಸ ಹುದ್ದೆಗಳನ್ನು (New Posts Creation) ಸೃಷ್ಟಿಸಲು ಪ್ರಸ್ತಾವನೆಯಲ್ಲಿ ಕೋರಲಾಗಿದೆ.

ವಲಯವಾರು ಅಗತ್ಯವಿರುವ ಹೊಸ ಹುದ್ದೆಗಳು:

ಈಸ್ಟ್ ಕಮಿಷನರೇಟ್ (East COP): 2,734 ಹುದ್ದೆಗಳು
ವೆಸ್ಟ್ ಕಮಿಷನರೇಟ್ (West COP): 1,235 ಹುದ್ದೆಗಳು
ಸೌತ್ ಕಮಿಷನರೇಟ್ (South COP): 1,043 ಹುದ್ದೆಗಳು
ನಾರ್ತ್ ಕಮಿಷನರೇಟ್ (North COP): 944 ಹುದ್ದೆಗಳು
ಸೆಂಟ್ರಲ್ ಕಮಿಷನರೇಟ್ (Central COP): 677 ಹುದ್ದೆಗಳು

ಬದಲಾವಣೆಗೆ ಪ್ರಮುಖ ಕಾರಣಗಳೇನು?

ಬೃಹತ್ ಜನಸಂಖ್ಯೆ: ಬೆಂಗಳೂರಿನ ಹಾಲಿ ಜನಸಂಖ್ಯೆ ಸುಮಾರು 1.56 ಕೋಟಿಗೂ ಮೀರಿದ್ದು, ನಗರದ ವಿಸ್ತೀರ್ಣ 712 ಚದರ ಕಿಲೋಮೀಟರ್‌ಗೆ ತಲುಪಿದೆ.

ಐಟಿ-ಬಿಟಿ ವಲಯ ಮತ್ತು ಕೈಗಾರಿಕೆಗಳು: ವೈಟ್‌ಫೀಲ್ಡ್, ಪೀಣ್ಯ ಹಾಗೂ ಎಲೆಕ್ಟ್ರಾನಿಕ್ ಸಿಟಿಯಂತಹ ವಲಯಗಳಲ್ಲಿ ಭದ್ರತೆ (Security) ಮತ್ತು ಸಂಚಾರ ನಿರ್ವಹಣೆ ಅತ್ಯಂತ ಸವಾಲಿನದ್ದಾಗಿದೆ.

ತನಿಖೆಯ ವೇಗ (Fast Investigation): ಪ್ರತ್ಯೇಕ ಕಮಿಷನರೇಟ್‌ಗಳಿಂದಾಗಿ ಅಪರಾಧ ಪ್ರಕರಣಗಳ ತನಿಖೆ (Crime Investigation) ಹಾಗೂ ವಿಲೇವಾರಿ ವೇಗವಾಗಿ ನಡೆಯಲಿದೆ.

ಸಂಚಾರ ನಿಯಂತ್ರಣ (Traffic Management): ಪ್ರತಿ ಕಮಿಷನರೇಟ್‌ನಲ್ಲಿಯೂ ಪ್ರತ್ಯೇಕ ಸಂಚಾರ ವಿಭಾಗ (Traffic Division) ಇರುವುದರಿಂದ ಟ್ರಾಫಿಕ್ ಸಮಸ್ಯೆ ನಿವಾರಣೆಗೆ ಹೆಚ್ಚಿನ ಗಮನ ಹರಿಸಬಹುದು.

ಅಂದಾಜು ವೆಚ್ಚ ಎಷ್ಟು?

ಈ ಯೋಜನೆಗಾಗಿ ಒಟ್ಟು ₹7,648.72 ಕೋಟಿ (₹764.87 Crore / 7648.72 Million) ವೆಚ್ಚವಾಗಲಿದ್ದು, ಇದರಲ್ಲಿ ಸಿಬ್ಬಂದಿ ವೇತನ ಒಳಗೊಂಡಂತೆ ಆವರ್ತಕ ವೆಚ್ಚ (Recurring Cost) ₹3,687.12 ಕೋಟಿ ಹಾಗೂ ಸಿಸಿಟಿವಿ (CCTV), ವಾಹನಗಳು, ತಂತ್ರಜ್ಞಾನ ಮತ್ತು ಮೂಲಸೌಕರ್ಯಕ್ಕಾಗಿ (Non-Recurring Cost) ₹3,961.60 ಕೋಟಿ ಅನುದಾನದ ಅಗತ್ಯವಿದೆ ಎಂದು ಅಂದಾಜಿಸಲಾಗಿದೆ.

ರಾಜ್ಯ ಸಚಿವ ಸಂಪುಟವು (Karnataka Cabinet) ಈ ಪ್ರಸ್ತಾವನೆಗೆ ಅನುಮೋದನೆ ನೀಡಿದರೆ, ರಾಜಧಾನಿ ಬೆಂಗಳೂರಿನ ಭದ್ರತಾ ವ್ಯವಸ್ಥೆಯಲ್ಲಿ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ನವೀಕರಣ (Upgrade) ಆಗಲಿದೆ.