Asianet Suvarna News

Jobs: ವರ್ಷಕ್ಕೆ ₹1 ಕೋಟಿ ಸಂಬಳ! AI ಯುಗದಲ್ಲಿ ಎಂಜಿನಿಯರ್‌ಗಳಿಗೆ ಬಂಪರ್‌ ಬೇಡಿಕೆ, ಯಾವುದು ಈ ಹೈ-ಪೇಯಿಂಗ್‌ ಕೆಲಸ?

Sumanth SN — Mon, 26 Oct 2026 17:47:59 +0530

ತಂತ್ರಜ್ಞಾನ ಕ್ಷೇತ್ರದಲ್ಲಿ ಉದ್ಯೋಗ ಮಾಡಬೇಕು ಎಂದು ಭಾವಿಸುವವರಿಗೆ ಕೃತಕ ಬುದ್ದಿಮತ್ತೆ ಹೊಸ ಅವಕಾಶಗಳನ್ನು ಮುಂದಿಟ್ಟಿದೆ. ಪ್ರಮುಖವಾಗಿ ಸ್ಟಾಫ್ಟ್‌ವೇರ್ ಎಂಜಿನಿಯರ್‌ಗಳಿಗೆ ಉತ್ತಮ ಸಂಬಳ ನೀಡುವ ವಿಶೇಷ ವೃತ್ತಿಜೀವನವನ್ನು ಆರಂಭಿಸುವ ಅವಕಾಶವನ್ನು ನೀಡುತ್ತಿದೆ. ಅದುವೇ ಫಾವರ್ಡ್ ಡಿಪ್ಲಾಯ್ಡ್ ಎಂಜಿನಿಯರಿಂಗ್. ಈ ಕ್ಷೇತ್ರದಲ್ಲಿ ಅಗತ್ಯ ನೈಪುಣ್ಯತೆಯನ್ನು ಪಡೆದರೆ, ವರ್ಷಕ್ಕೆ 40 ಲಕ್ಷ ರೂಪಾಯಿಯಿಂದ ಒಂದು ಕೋಟಿ ರೂಪಾಯಿವರೆಗೂ ಸಂಬಳ ಪಡೆದುಕೊಳ್ಳಬಹುದು. ಅಸಲಿಗೆ ಈ ಉದ್ಯೋಗ ಏನು? ಇದರಲ್ಲಿ ಯಾವ ರೀತಿಯ ನೈಪುಣ್ಯತೆ ಪಡೆದುಕೊಳ್ಳಬೇಕು? ಉದ್ಯೋಗಿಗಳಿಗೆ ಡಿಮ್ಯಾಂಡ್ ಹೇಗಿರುತ್ತದೆ ಎಂದು ತಿಳಿದುಕೊಳ್ಳೋಣ.

ಫಾವರ್ಡ್ ರಿಪ್ಲಾಯ್ಡ್ ಎಂಜಿನಿಯರಿಂಗ್ ಎಂದರೆ ಏನು?

ಫಾವರ್ಡ್ ರಿಪ್ಲಾಯ್ಡ್ ಎಂಜಿನಿಯರ್‌ಗಳು ಸಾಫ್ಟ್‌ವೇರ್, ಎಐ ಟೆಕ್ನಾಲಜಿಯನ್ನು ವ್ಯಾಪಾರದ ಅಗತ್ಯಕ್ಕೆ ಅನುಗುಣವಾಗಿ ಉಪಯೋಗಿಸುವುದರಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ. ಕಂಪನಿಗಳ ಸಮಸ್ಯೆಗಳನ್ನು ಅರ್ಥ ಮಾಡಿಕೊಂಡು, ಅವುಗಳಿಗೆ ಸೂಕ್ತ ಪರಿಹಾರಗಳನ್ನು ರೂಪಿಸಬೇಕಾಗುತ್ತದೆ.

ಸಾಮಾನ್ಯವಾಗಿ ಕೋಡಿಂಗ್ ಮಾಡುವುದು ಮಾತ್ರವಲ್ಲದೇ, ಸಮಸ್ಯೆಗೆ ಪರಿಹಾರ ಕಂಡುಕೊಂಡು ಪರೀಕ್ಷಿಸುವುದು, ಅವುಗಳನ್ನು ಜಾರಿ ಮಾಡುವುದು, ವಾಸ್ತವ ಪರಿಸ್ಥಿತಿಗಳನ್ನು ಸರಿಯಾಗಿ ಅರ್ಥಮಾಡಿಕೊಂಡು ಸರಿಯಾಗಿ ಕೆಲಸ ಮಾಡುತ್ತಿದೆಯೋ ಇಲ್ಲವೋ ಎಂದು ತಿಳಿದುಕೊಳ್ಳುವುದು ಈ ಕೆಲಸದ ಪ್ರಮುಖ ಭಾಗವಾಗಿದೆ. ಕಂಪನಿಯ ಗ್ರಾಹಕರೊಂದಿಗೆ ನೇರವಾಗಿ ಮಾತನಾಡಿ, ಅವರ ಅಗತ್ಯಗಳನ್ನು ತಿಳಿದುಕೊಂಡು ಪರಿಹಾರ ನೀಡುವುದನ್ನು ತಿಳಿದುಕೊಳ್ಳಬೇಕಿದೆ.

2030ರ ವೇಳೆಗೆ ಭಾರೀ ಬೇಡಿಕೆ ಇರುವ ಜಾಬ್

ಸ್ಕೆಲರ್, ಸೈಬರ್ ಮೀಡಿಯಾ ರಿಸರ್ಚ್ ಒಟ್ಟಿಗೆ ಸೇರಿ ಇಂಡಿಯಾಸ್ ಎಫ್‌ಡಿಇ ಆಪರ್ಚುನಿಟಿ ಹೆಸರಿನಲ್ಲಿ ಒಂದು ವರದಿಯನ್ನು ಬಿಡುಗಡೆ ಮಾಡಲಾಗಿದೆ. ಈ ವರದಿಯಲ್ಲಿ ಉದ್ಯೋಗ ಅವಕಾಶ, ಸಂಬಳ, ನೈಪುಣ್ಯಗಳನ್ನು ವಿಶ್ಲೇಷಣೆ ಮಾಡಿದೆ. ಈ ಅಧ್ಯಯನಕ್ಕಾಗಿ ಒಂದು ಸಾವಿರ ಸ್ಟಾಫ್ಟ್ ವೇರ್ ಎಂಜಿನಿಯರ್ ಗಳು, 200 ಸಂಸ್ಥೆಗಳ ಟೆಕ್ನಾಲಜಿ ನಿರ್ಣಯಿಸುವವರಿಂದ ಮಾಹಿತಿಯನ್ನು ಸಂಗ್ರಹಿಸಲಾಗಿದೆ. ಎಂಟು ಪ್ರಮುಖ ನಗರಗಳೊಂದಿಗೆ ಕೆಲವು ಟೈರ್ ಟು ಸಿಟಿಗಳಲ್ಲಿಯೂ ಮಾಹಿತಿ ಸಂಗ್ರಹಿ ಪರಿಶೀಲನೆ ನಡೆಸಲಾಗಿದೆ.

ಈ ವರದಿಯ ಅನ್ವಯ, 2030ರ ವೇಳೆಗೆ ಫಾವರ್ಡ್ ಡಿಪ್ಲಾಯ್ಡ್ ಎಂಜಿನಿಯರಿಂಗ್ ಸ್ಕಿಲ್ಸ್ ಹೊಂದಿರುವ ಉದ್ಯೋಗಿಗಳಿಗೆ ಭಾರೀ ಬೇಡಿಕೆ ಹೆಚ್ಚಾಗಲಿದೆ. ಆದರೆ ಸದ್ಯ ಈ ಅಧಿಕೃತವಾಗಿ ಕೇವಲ ಒಂದು ರಷ್ಟು ಎಂಜಿನಿಯರ್‌ಗಳು ಮಾತ್ರ ಈ ಕೆಲಸವನ್ನು ಮಾಡುತ್ತಿದ್ದಾರೆ.

ಈ ಕ್ಷೇತ್ರದಲ್ಲಿ ಉದ್ಯೋಗ ಪಡೆದುಕೊಳ್ಳಲು ಕೇವಲ ಕೋಡಿಂಗ್ ಬಂದರೆ ಸಾಕಾಗುವುದಿಲ್ಲ. ಸ್ಟಾಫ್ಟ್ ವೇರ್‌ಅನ್ನು ಕಾರ್ಯಗತಗೊಳಿಸಿ, ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳುವ ಕೌಶಲ್ಯಗಳನ್ನು ಉದ್ಯೋಗಿಗಳು ಹೊಂದಿರಬೇಕು. ಎಐ ತಂತ್ರಜ್ಞಾನದ ಬಳಕೆ ಹೆಚ್ಚಾದಂತೆ, ರಿಯಲ್ ಟೈಮ್‌ನಲ್ಲಿ ತಾಂತ್ರಿಕ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳುವುದು ವೃತ್ತಿಪರರಿಗೆ ಹೆಚ್ಚಿನ ಅವಕಾಶಗಳನ್ನು ಒದಗಿಸುತ್ತವೆ.

60,000 ಸಿಬ್ಬಂದಿಗೆ VRS: ಮೈಕ್ರೋಸಾಫ್ಟ್‌ ಬಿಗ್ ಆಫರ್‌! 4 ದೇಶದ ಟೆಕ್ಕಿಗಳಿಗೆ ಮಾಹಿತಿ

Kannadaprabha News — Tue, 27 Oct 2026 07:01:54 +0530

ನವದೆಹಲಿ: ಕೃತಕ ಬುದ್ಧಿಮತ್ತೆಯ ಮೇಲಿನ ಹೂಡಿಕೆಯನ್ನು ಹೆಚ್ಚಿಸಲು ಮುಂದಾಗಿರುವ ಟೆಕ್‌ ದಿಗ್ಗಜ ಮೈಕ್ರೋಸಾಫ್ಟ್‌, ಸ್ವಯಂಪ್ರೇರಿತವಾಗಿ ಕೆಲಸ ಬಿಟ್ಟರೆ ಉತ್ತಮ ಪ್ಯಾಕೇಜ್‌ ನೀಡುವ ಕುರಿತು ಭಾರತ ಸೇರಿದಂತೆ 4 ದೇಶಗಳ ಒಟ್ಟು 60 ಸಾವಿರ ಉದ್ಯೋಗಿಗಳಿಗೆ ಆಫರ್‌ ನೀಡಿದೆ. ಇದನ್ನು ಟೆಕ್‌ ಲೋಕದ ಬೃಹತ್‌ ಲೇಆಫ್‌ ಎನ್ನಲಾಗಿದೆ.

ಡಿ.1ರ ವರೆಗೆ ಕಾಲಾವಕಾಶ

ಮೈಕ್ರೊಸಾಫ್ಟ್‌ನಲ್ಲಿ ವಿಶ್ವಾದ್ಯಂತ 2,23,000 ಉದ್ಯೋಗಿಗಳಿದ್ದು, ಅವರಲ್ಲಿ ಸುಮಾರು ಶೇ.25ರಷ್ಟು ಮಂದಿಗೆ ಕೆಲಸ ಬಿಡುವ ಆಫರ್‌ ನೀಡಲಾಗಿದೆ. ಭಾರತದ 23 ಸಾವಿರ ಮಂದಿ ಮೈಕ್ರೊಸಾಫ್ಟ್‌ನಲ್ಲಿ ಕೆಲಸ ಮಾಡುತ್ತಿದ್ದು, ಅವರಲ್ಲಿ ಎಷ್ಟು ಮಂದಿ ನಿರುದ್ಯೋಗಿಗಳಾಗಲಿದ್ದಾರೆ ಎಂಬ ನಿಖರ ಮಾಹಿತಿ ಇಲ್ಲ. ಕೆಲಸ ಬಿಡುವ ಬಗ್ಗೆ ನಿರ್ಧರಿಸಲು ಡಿ.1ರ ವರೆಗೆ ಕಾಲಾವಕಾಶ ನೀಡಲಾಗಿದೆ.

1 ತಿಂಗಳ ಮೂಲ ವೇತನ

ಭಾರತ, ಅಮೆರಿಕ, ಬ್ರಿಟನ್‌ ಮತ್ತು ಕೆನಡಾ ಮೂಲದ, 70 ಹಾಗೂ ಅದಕ್ಕಿಂತ ಕೆಳಗಿನ ಹಂತದಲ್ಲಿ ಸೇವೆ ಸಲ್ಲಿಸುತ್ತಿರುವವರಿಗೆ ಕೆಲಸ ತೊರೆಯಲು ಸೂಚಿಸಲಾಗಿದೆ. ತಾವಾಗಿಯೇ ಕೆಲಸ ಬಿಡಲು ಮುಂದಾಗುವವರಿಗೆ, ಅವರು ಸೇವೆ ಸಲ್ಲಿಸಿದ ಪ್ರತಿ ವರ್ಷಕ್ಕೆ 1 ತಿಂಗಳ ಮೂಲ ವೇತನ ನೀಡಲಾಗುವುದು. ಜತೆಗೆ ಆರೋಗ್ಯ ವಿಮೆ ಮತ್ತು ವೃತ್ತಿ ಬದಲಾವಣೆಗೆ ಸಹಕಾರಿಯಾಗುವ ಸೇವೆಗಳು ಲಭಿಸಲಿವೆ ಎನ್ನಲಾಗಿದೆ.

ಜುಲೈನಲ್ಲಿ ಕಂಪನಿ 4,800 ಉದ್ಯೋಗಿಗಳನ್ನು ವಜಾ ಮಾಡಿತ್ತು.

ಕಣ್ಣೊರೆಸುವ ಯತ್ನ

ಟೆಕಿಗಳಿಗೆ ಕೆಲಸ ಬಿಡಲು ಸೂಚಿಸಿರುವ ಮೈಕ್ರೋಸಾಫ್ಟ್‌, ಭಾರತದಲ್ಲಿ ಹೂಡಿಕೆ ಮಾಡುವುದನ್ನು ಮುಂದುವರಿಸಲಿದ್ದೇವೆ. 2030ರ ವೇಳೆಗೆ ಭಾರತದಾದ್ಯಂತ 2 ಕೋಟಿ ಜನರಿಗೆ ಎಐ ಕೌಶಲಗಳನ್ನು ಕಲಿಸುತ್ತೇವೆ ಎಂಬ ಭರವಸೆ ನೀಡುವ ಮೂಲಕ, ಉದ್ಯೋಗನಷ್ಟದ ಗಾಯಕ್ಕೆ ಮುಲಾಮು ಸವರುವ ಯತ್ನ ಮಾಡಿದೆ.

ತಲೆ ಬೋಳಿಸಿದ್ರೂ, ಕಣ್ಣೀರಿಟ್ಟರೂ ಪ್ರಯೋಜನವೇ ಇಲ್ಲ: ಸಾಯೋವರೆಗೂ ಮುಷ್ಕರ- ಕೇರಳಂನಲ್ಲಿ ಪ್ರತಿಭಾನ್ವಿತರ ಪ್ರತಿಭಟನೆ

Suchethana D — Tue, 27 Oct 2026 17:05:24 +0530

ತಿರುವನಂತಪುರಂ: ಸರ್ಕಾರಿ ಉದ್ಯೋಗಗಳನ್ನು ಪಡೆಯಲು ಹತಾಶ ಪ್ರಯತ್ನದಲ್ಲಿ, ಕೇರಳಂನಲ್ಲಿ ಕಿರಿಯ ಪ್ರಾಥಮಿಕ ಶಿಕ್ಷಕಿ ಶ್ರೇಯಾಂಕದಾರರು ತಮ್ಮ ಪ್ರತಿಭಟನೆಯನ್ನು ತೀವ್ರಗೊಳಿಸಿದ್ದಾರೆ, Rank ಪಡೆದರೂ, ಉನ್ನತ ಅಂಕ ಪಡೆದರೂ, ಇದುವರೆಗೆ ಸರ್ಕಾರ ತಮ್ಮ ಬೇಡಿಕೆಯನ್ನು ಈಡೇರಿಸಲಿಲ್ಲ. ಪದೇ ಪದೇ ಆಶ್ವಾಸನೆ ನೀಡುತ್ತಿದೆಯೇ ವಿನಾ, ಯಾವುದೇ ಕ್ರಮ ತೆಗೆದುಕೊಂಡಿಲ್ಲ ಎಂದು ಸಂಘದ ಕಾರ್ಯದರ್ಶಿ ಎಸ್. ವಲರಮತಿ ತಮ್ಮ ತಲೆ ಬೋಳಿಸಿಕೊಂಡು ಅನಿರ್ದಿಷ್ಟಾವಧಿ ಉಪವಾಸ ಸತ್ಯಾಗ್ರಹವನ್ನು ಘೋಷಿಸಿದ್ದಾರೆ. ರಾಜ್ಯ ಸಚಿವಾಲಯದ ಹೊರಗೆ ನಡೆಯುತ್ತಿರುವ ಆಂದೋಲನವು 113 ನೇ ದಿನಕ್ಕೆ ಕಾಲಿಟ್ಟಿದ್ದು, ನೇಮಕಾತಿಗಳ ಕುರಿತು ಸರ್ಕಾರ ತನ್ನ ಭರವಸೆಗಳನ್ನು ಈಡೇರಿಸುವಲ್ಲಿ ವಿಫಲವಾಗಿದೆ ಎಂದು ಅಭ್ಯರ್ಥಿಗಳು ಆರೋಪಿಸಿದ್ದಾರೆ.

ತಲೆ ಬೋಳಿಸಿಕೊಂಡು ಪ್ರತಿಭಟನೆ

ಕೇರಳಂ ಸಾರ್ವಜನಿಕ ಸೇವಾ ಆಯೋಗದ (ಪಿಎಸ್‌ಸಿ) ಶ್ರೇಯಾಂಕ ಪಟ್ಟಿಯಿಂದ ನೇಮಕಾತಿ ವಿಳಂಬವನ್ನು ವಿರೋಧಿಸಿ ಅಖಿಲ ಕೇರಳ ಕಿರಿಯ ಪ್ರಾಥಮಿಕ ಶಾಲಾ ಶಿಕ್ಷಕರ (ಎಲ್‌ಪಿಎಸ್‌ಟಿ) ಶ್ರೇಯಾಂಕದಾರರ ಸಂಘದ ಕಾರ್ಯದರ್ಶಿ ವಲರಮತಿ ತಮ್ಮ ತಲೆ ಬೋಳಿಸಿಕೊಂಡಿದ್ದಾರೆ. ಮೇ 2025 ರಲ್ಲಿ ಪ್ರಕಟವಾದ ಎಲ್‌ಪಿಎಸ್‌ಟಿ ಶ್ರೇಯಾಂಕ ಪಟ್ಟಿಯಿಂದ ನೇಮಕಾತಿಗಳ ಮೇಲೆ ಆಂದೋಲನ ಕೇಂದ್ರೀಕೃತವಾಗಿದೆ. ಹೊಸ ನೇಮಕಾತಿ ಪ್ರಕ್ರಿಯೆ ಪ್ರಾರಂಭವಾಗುವ ಮೊದಲು ಲಭ್ಯವಿರುವ ಖಾಲಿ ಹುದ್ದೆಗಳನ್ನು ವರದಿ ಮಾಡಿ ಭರ್ತಿ ಮಾಡಬೇಕೆಂದು ಅಭ್ಯರ್ಥಿಗಳು ಒತ್ತಾಯಿಸುತ್ತಿದ್ದಾರೆ.

ಈ ವಿಷಯವು ರಾಜಕೀಯ ಟೀಕೆಗೆ ಗುರಿಯಾಗಿದೆ. ಕೇರಳದ ಹಿರಿಯ ಪ್ರಾಥಮಿಕ ಶಿಕ್ಷಕರ ಆಂದೋಲನದ ಬಗ್ಗೆ ಮೌನವಾಗಿರುವ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ದೆಹಲಿಯಲ್ಲಿ ವಿದ್ಯಾರ್ಥಿ ಪ್ರತಿಭಟನಾಕಾರರೊಂದಿಗೆ ಆಯ್ದ ಒಗ್ಗಟ್ಟನ್ನು ತೋರಿಸುತ್ತಿದ್ದಾರೆ ಎಂದು ಕೇರಳಂ ಜನರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ದೆಹಲಿಯಲ್ಲಿ ಕೂತು ವಿದ್ಯಾರ್ಥಿಗಳ ಪರವಾಗಿ ಮಾತನಾಡಿದ್ದಂತೆ ನಾಟಕ ಮಾಡಿದ್ದು ಸಾಕು, ನಿಮ್ಮದೇ ಕ್ಷೇತ್ರದ ವಿದ್ಯಾರ್ಥಿಗಳ ನೋವನ್ನು ಆಲಿಸಿ ಎಂದು ಹೇಳುತ್ತಿದ್ದಾರೆ.

113ನೇ ದಿನಕ್ಕೆ ಮುಷ್ಕರ

ತಮ್ಮ ಬೇಡಿಕೆಗಳು ಈಡೇರುವವರೆಗೂ ಪ್ರತಿಭಟನೆ ಮುಂದುವರಿಸುವುದಾಗಿ ರ್ಯಾಂಕ್‌ ಹೋಲ್ಡರ್‌ಗಳು ತಿಳಿಸಿದ್ದಾರೆ. ಪೊಲೀಸರು ಪ್ರತಿಭಟನಾಕಾರರು ಟೆಂಟ್‌ಗಳನ್ನು ಹಾಕಲು ಅವಕಾಶ ನೀಡಲಿಲ್ಲ, ಹಸಿವಿನಿಂದ ಬಳಲುತ್ತಿರುವವರನ್ನು ಮಳೆಯಲ್ಲಿ ಕುಳಿತುಕೊಳ್ಳುವಂತೆ ಒತ್ತಾಯಿಸಿದ್ದಾರೆ ಎಂದು ಆರೋಪಿಸಿ ಅವರು ವೀಡಿಯೊವನ್ನು ಸಹ ಹಂಚಿಕೊಂಡಿದ್ದಾರೆ.

ಕರ್ನಾಟಕ 15000 ಶಿಕ್ಷಕರ ನೇಮಕಾತಿ 2026: ಅರ್ಜಿ ದಿನಾಂಕ ವಿಸ್ತರಣೆ, ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಿ

Gowthami K — Tue, 27 Oct 2026 15:21:19 +0530

ಕರ್ನಾಟಕ ಶಿಕ್ಷಣ ಇಲಾಖೆಯು 15000 ಶಿಕ್ಷಕರ ಹುದ್ದೆಗಳಿಗೆ ನೇಮಕಾತಿ ಅಧಿಸೂಚನೆಯನ್ನು ಬಿಡುಗಡೆ ಮಾಡಿದೆ. GSTR-2026- PST/GPT/CST/HST/PE-Grade-I/PE-Grade-II ಶಿಕ್ಷಕರ ನೇಮಕಾತಿಗೆ ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕವನ್ನು ವಿಸ್ತರಿಸಲಾಗಿದೆ. ಅರ್ಹ ಅಭ್ಯರ್ಥಿಗಳು ಆನ್‌ಲೈನ್ ಮೂಲಕ ಅರ್ಜಿ ಸಲ್ಲಿಸಬಹುದು.

ಹುದ್ದೆಗಳ ಸಂಪೂರ್ಣ ವಿವರ:

ಸಂಸ್ಥೆಯ ಹೆಸರು : ಕರ್ನಾಟಕ ಶಿಕ್ಷಣ ಇಲಾಖೆ

ಹುದ್ದೆಗಳ ಸಂಖ್ಯೆ: 15000

ಉದ್ಯೋಗ ಸ್ಥಳ: ಕರ್ನಾಟಕ

ಹುದ್ದೆಯ ಹೆಸರು: ಶಿಕ್ಷಕರ

ವೇತನ: ತಿಂಗಳಿಗೆ ₹44425- ₹99400

ಶೈಕ್ಷಣಿಕ ಅರ್ಹತೆ:

ಅಭ್ಯರ್ಥಿಯು 12ನೇ ತರಗತಿ/ಪಿಯುಸಿ, ಪದವಿ, ಡಿಪ್ಲೊಮಾ, ಪದವಿಯನ್ನು ಮಾನ್ಯತೆ ಪಡೆದ ಯಾವುದೇ ಮಂಡಳಿಗಳು ಅಥವಾ ವಿಶ್ವವಿದ್ಯಾಲಯಗಳಿಂದ ಪೂರ್ಣಗೊಳಿಸಿರಬೇಕು.

ವಯೋಮಿತಿ:

ಕನಿಷ್ಠ ವಯಸ್ಸು 21 ವರ್ಷಗಳು ಮತ್ತು ಗರಿಷ್ಠ ವಯಸ್ಸು 40 ವರ್ಷಗಳು.

ವಯೋಮಿತಿ ಸಡಿಲಿಕೆ:

2ಎ, 2ಬಿ, 3ಎ, 3ಬಿ ಅಭ್ಯರ್ಥಿಗಳಿಗೆ: 03 ವರ್ಷ

ಎಸ್‌ಸಿ/ಎಸ್‌ಟಿ ಅಭ್ಯರ್ಥಿಗಳಿಗೆ: 5 ವರ್ಷ

ಅರ್ಜಿ ಶುಲ್ಕ:

ಸಾಮಾನ್ಯ, 2ಎ, 2ಬಿ, 3ಎ, 3ಬಿ ಅಭ್ಯರ್ಥಿಗಳಿಗೆ: ಒಂದು ಹುದ್ದೆಗೆ ₹750, ಎರಡು ಹುದ್ದೆಗಳಿಗೆ 1125

ಎಸ್‌ಸಿ, ಎಸ್‌ಟಿ, ಅಂಗವಿಕಲ ಅಭ್ಯರ್ಥಿಗಳು: ಒಂದು ಹುದ್ದೆಗೆ ₹500, ಎರಡು ಹುದ್ದೆಗಳಿಗೆ 750

ಆಯ್ಕೆ ಪ್ರಕ್ರಿಯೆ:

ಸ್ಪರ್ಧಾತ್ಮಕ ಪರೀಕ್ಷೆ (ಸಿಬಿಟಿ)

ದೈಹಿಕ ಪರೀಕ್ಷೆ - ಪಿಇಟಿ, ಪಿಎಸ್‌ಟಿ

ದಾಖಲೆ ಪರಿಶೀಲನೆ.

ಪರೀಕ್ಷಾ ಮಾದರಿ:

ಪರೀಕ್ಷಾ ಮಾದರಿ ಮತ್ತು ಪಠ್ಯಕ್ರಮವು ಅಧಿಕೃತ ಅಧಿಸೂಚನೆಯ ಪ್ರಕಾರವೇ ಇರುತ್ತದೆ, ಹಿಂದಿನ ಪರೀಕ್ಷೆಗಳಂತೆ ಈ ಕೆಳಗಿನ ಮಾದರಿಯೂ ಇದೆ.

ಸಾಮಾನ್ಯ ಜ್ಞಾನ

ಪ್ರಚಲಿತ ವಿದ್ಯಮಾನ

ಇತಿಹಾಸ - ಸಂವಿಧಾನ

ವಿಜ್ಞಾನ

ಒಟ್ಟು 100 ಅಂಕಗಳು

ಅರ್ಹತೆಯನ್ನು ನಿರ್ಧರಿಸುವ ವಿಧಾನ

ಸ್ಪರ್ಧಾತ್ಮಿಕ ಪರೀಕ್ಷೆಯಲ್ಲಿ ಪಡೆಯುವ ಅಂಕಗಳು: 85% ತೂಕ

ಪದವಿ ಪರೀಕ್ಷೆಯಲ್ಲಿ ಗಳಿಸಿದ ಅಂಕಗಳು: 13% ತೂಕ

BEd ಪಡೆದ ಅಂಕಗಳು: 2% ತೂಕ

ಪ್ರಮುಖ ದಿನಾಂಕಗಳು:

ಅರ್ಜಿ ಸಲ್ಲಿಕೆ ಪ್ರಾರಂಭವಾದ ದಿನಾಂಕ: ಆಗಸ್ಟ್ 18-2026

ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ: ನವೆಂಬರ್ 16- 2026

ಅರ್ಜಿ ಶುಲ್ಕ ಪಾವತಿಸಲು ಕೊನೆಯ ದಿನಾಂಕ: ಸೆಪ್ಟೆಂಬರ್ 10- 2026

ವಿವಿಧ ಇಲಾಖಾ ನೇಮಕಾತಿ ಲಿಖಿತ ಪರೀಕ್ಷೆ ಸುಸೂತ್ರ: ಕೆಇಎ

ಉಳಿಕೆ ಮೂಲ ವೃಂದದ ಇಎಸ್ಐ-ನರ್ಸಿಂಗ್ ಅಧಿಕಾರಿ, ಫಾರ್ಮಸಿ ಅಧಿಕಾರಿ, ವಸತಿ ಶಾಲೆಗಳ ಶಿಕ್ಷಕರ ಹುದ್ದೆಗಳಿಗೆ ಇಂದು ಸುಸೂತ್ರವಾಗಿ ಲಿಖಿತ ಪರೀಕ್ಷೆ ನಡೆಯಿತು.

ಬೆಳಗಿನ ಸಾಮಾನ್ಯ ಜ್ಞಾನ ಪತ್ರಿಕೆಯ ಪರೀಕ್ಷೆಯನ್ನು 48,767 ಅಭ್ಯರ್ಥಿಗಳ ಪೈಕಿ 33,603 (ಶೇ.69) ಮಂದಿ ಬರೆದರು. ಮಧ್ಯಾಹ್ನದ ನಿರ್ದಿಷ್ಟ ಪತ್ರಿಕೆಯನ್ನು 19,987 ಮಂದಿ ಪೈಕಿ 15,777 (ಶೇ‌.79) ಮಂದಿ ಬರೆದಿದ್ದಾರೆ ಎಂದು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರದ ಕಾರ್ಯನಿರ್ವಾಹಕ ನಿರ್ದೇಶಕ ಎಚ್.ಪ್ರಸನ್ನ ತಿಳಿಸಿದ್ದಾರೆ.

ಬೆಂಗಳೂರು ಸೇರಿದಂತೆ ಬಳ್ಳಾರಿ, ಬೀದರ್, ಕಲಬುರಗಿ, ಕೊಪ್ಪಳ, ರಾಯಚೂರು, ವಿಜಯನಗರ, ಯಾದಗಿರಿ, ಧಾರವಾಡ ಮತ್ತು ದಾವಣಗೆರೆ ಜಿಲ್ಲೆಗಳ ಒಟ್ಟು 119 ಕೇಂದ್ರಗಳಲ್ಲಿ ಪರೀಕ್ಷೆ ನಡೆಯಿತು. ಪರೀಕ್ಷೆ ಮುಗಿದ ಕೂಡಲೇ ಓಎಂಆರ್ ಪ್ರತಿಗಳನ್ನು ಸ್ಕ್ಯಾನ್ ಮಾಡಿ ಕೆಇಎ ವೆಬ್ ಸೈಟ್ ನಲ್ಲಿ ಅಪ್ ಲೋಡ್ ಮಾಡಲಾಯಿತು ಎಂದು ಅವರು ತಿಳಿಸಿದ್ದಾರೆ.

AI ನಿಂದ ಉದ್ಯೋಗ ಕಳೆದುಕೊಳ್ಳುವ ಆತಂಕವೇ? ಡೋಂಟ್‌ವರಿ ಈ 4 ಸ್ಕಿಲ್ ಕಲಿತರೆ 100% ನಿಮ್ಮ ಜಾಬ್ ಸೇಫ್!

Ravi Janekal — Sat, 24 Oct 2026 15:46:02 +0530

ಇತ್ತೀಚೆಗೆ ಎಐ ಬಳಕೆ ಹೆಚ್ಚಾದ ಬಳಿಕ ಈಗ ಪ್ರತಿಯೊಂದು ಕ್ಷೇತ್ರದಲ್ಲೂ ಉದ್ಯೋಗ ಕಳೆದುಕೊಳ್ಳುವ ಆತಂಕ ಎದುರಾಗಿದೆ. ಬಹುರಾಷ್ಟ್ರೀಯ ಕಾರ್ಪೊರೇಟ್ ಕಂಪನಿಗಳಿಂದ ಹಿಡಿದು ಸಣ್ಣಪುಟ್ಟ ಬ್ಯುಸಿನೆಸ್‌ ನಲ್ಲಿ ಎಐ ಆಕ್ರಮಿಸಿದೆ. ಹೀಗಾಗಿ ಒಂದು ಕಾಲದಲ್ಲಿ ತಂಬಾ ಡಿಮ್ಯಾಂಡ್ ಇದ್ದ ಡೇಟಾ ಎಂಟ್ರಿ, ಎಕ್ಸೆಲ್, ಕೋಡಿಂಗ್, ಕಾಂಟೆಂಟ್ ರೈಟಿಂಗ್, ಕಸ್ಟಮರ್ ಸಪೋರ್ಟ್‌ನಂತಹ ಹಲವು ಕೆಲಸಗಳಲ್ಲಿ ಎಐ ಅಕ್ರಮಿಸಿ ಆಗಿದೆ. ಅಂದರೆ ಅಲ್ಲಿ ಕೆಲಸ ಮಾಡುತ್ತಿರುವವರೆಲ್ಲ ಈಗ ಅವರಿಗೆ ಕೆಲಸವೇ ಇಲ್ಲದಂತಾಗಿದೆ. ನೀವು ಭವಿಷ್ಯದಲ್ಲಿ ನಿಮ್ಮ ಉದ್ಯೋಗ ಕಳೆದುಕೊಳ್ಳಬಾರದು ಎಂದರೆ ಈ ಕೆಳಗಿನ ಸ್ಕಿಲ್ ಕಲಿತುಕೊಳ್ಳುವುದು ಅವಶ್ಯವಾಗಿದೆ.

AI ನಿಂದ ನಿಮ್ಮ ಜಾಬ್ ಉಳಿಸಿಕೊಳ್ಳುವುದು ಹೇಗೆ?

ಖಾಸಗಿ ಕಂಪನಿಗಳಲ್ಲಿ ಕೆಲಸ ಮಾಡುತ್ತಿರುವ ಪ್ರತಿ ಉದ್ಯೋಗಿಗೂ ಈ ಒಂದು ಭಯ ಇದೆ. ಭವಿಷ್ಯದಲ್ಲಿ ನಮ್ಮ ಉದ್ಯೋಗವನ್ನೂ ಎಐ ಕಸಿದುಕೂಳ್ಳಲಿದೆಯೇ? ಎಂಬ ಆತಂಕದಲ್ಲೇ ಉದ್ಯೋಗಿಗಳು ಕೆಲಸ ಮಾಡುವಂತಾಗಿದೆ ಏಕೆಂದರೆ ಇಂದು ಎಐ ಯಾವ ವೇಗದಲ್ಲಿ ಎಲ್ಲ ಕ್ಷೇತ್ರಗಳನ್ನು ಆವರಿಸಿಕೊಳ್ಳುತ್ತಿದೆ ಎಂದರೆ ದಿನ ಬೆಳಗ್ಗೆ ಎದ್ದರೂ ಯಾವುದಾದರೂ ಎಐ ಸುದ್ದಿ ನಮಗೆ ಬಿದ್ದೇಬಿಳುತ್ತಿದೆ. ಸಣ್ಣಪುಟ್ಟ ಕಂಪನಿಗಳಲ್ಲಿ ಕೆಲಸ ಮಾಡುತ್ತಿದ್ದವರು, ಆಸ್ಪತ್ರೆಗಳಲ್ಲಿ ಡಾಟಾ ಎಂಟ್ರಿ, ಟೈಪಿಂಗ್, ಬರೆವಣಿಗೆ, ಫೋಟೋಗ್ರಫಿ, ಸಾಫ್ಟ್‌ವೇರ್ ಇಂಜಿನಿಯರಿಂಗ್, ಕೋಡಿಂಗ್.. ಈಗ ಎಲ್ಲದರಲ್ಲೂ ಎಐ ಬಂದು ಕುಳಿತಿದೆ. ನೀವು ಮಾಡಬೇಕಾದ ಕೆಲಸ ಎಐ ಕಬಳಿಸಿದೆ.

ಬುದ್ಧಿವಂತಿಕೆಯಿಂದ ಯೋಚಿಸಿ, ಎಐ ಶತ್ರುವಲ್ಲ!

ಈಗ ಇದನ್ನೇ ನಂಬಿ ಬದುಕುತ್ತಿದ್ದ ಉದ್ಯೋಗಿಗಳ ಪಾಡೇನು? ಭವಿಷ್ಯದಲ್ಲಿ ಯಾವ ಕೆಲಸ ಮಾಡಿ ಬದುಕಬೇಕು? ಹೀಗೆಲ್ಲ ಯೋಚನೆಗಳು ಉದ್ಯೋಗಿಗಳನ್ನು ಕಾಡುತ್ತಿದೆ. ಆದರೆ ಮನುಷ್ಯನಿಗೆ ಸ್ಕಿಲ್, ಕಲಿಯುವ ಹಂಬಲವೊಂದಿದ್ದರೆ ಯಾವ ಎಐ ಬಂದರೂ ಉದ್ಯೋಗ ಕಸಿಯಲಾಗದು. ಎಐ ನಮ್ಮ ಉದ್ಯೋಗ ಕಸಿಯಲಿದೆಯೇ ಎಂದು ಭಯ, ಆತಂಕ ಪಡುವ ಬದಲು ನಾವು ಸ್ವಲ್ಪ ಬುದ್ಧಿವಂತಿಕೆಯಿಂದ ಯೋಚಿಸಿದರೆ ಎಐ ನಮ್ಮ ಶತ್ರುವಲ್ಲ ಬದಲಾಗಿ ಅತ್ಯುತ್ತಮ ಸಹಾಯಕನನ್ನಾಗಿಸಿಕೊಳ್ಳಬಹುದು. ಅಂದರೆ ನಿಮ್ಮ ಉದ್ಯೋಗ, ಭವಿಷ್ಯ ಶಾಶ್ವತವಾಗಿ ಸುರಕ್ಷಿತವಾಗಿರಬೇಕೆಂದರೆ ಯಂತ್ರಗಳು ಎಂದಿಗೂ ಸ್ವಂತವಾಗಿ ಕಲಿಯಲಾಗದ ಅಥವಾ ಮಾಡಲು ಸಾಧ್ಯವಾಗದ ಸ್ಕಿಲ್‌ಗಳನ್ನ ನಾವು ಕಲಿತುಕೊಳ್ಳಬೇಕಾಗುತ್ತದೆ. ಅಂತಹ ಕೆಲಸಗಳು ಯಾವವು? ಹೇಗೆ ಕಲಿಯಬಹುದು ಎಂಬ ಬಗ್ಗೆ ಇಲ್ಲಿ ತಿಳಿದುಕೊಳ್ಳಿ.

ಎಐ ನಿಂದ ನಿಮ್ಮ ಜಾಬ್ ಉಳಿಸಲು ಈ ಸ್ಕಿಲ್ ಕಲಿಯಿರಿ

ಎಐನಿಂದಾಗಿ ನಿಮ್ಮ ಉದ್ಯೋಗ ಕಳೆದುಹೋಗುತ್ತದೆ ಎಂಬ ಭಯ ಬೇಡ. ಅದರ ಬದಲಾಗಿ ನಿಮ್ಮ ಕೌಶಲ್ಯ ಅಥವಾ ಹೊಸ ಸ್ಕಿಲ್ ಕಲಿಯುವ ಮೂಲಕ ಅಪ್‌ಗ್ರೇಡ್ ಆಗಿ. ಈ ಸ್ಕಿಲ್ ಕಲಿಯುವುದರಿಂದ ಎಐ ನಿಮ್ಮ ಮುಟ್ಟಲು ಸಾಧ್ಯವಿಲ್ಲ.

ಪ್ರಾಂಪ್ಟ್ ಎಂಜಿನಿಯರಿಂಗ್ ಕಲಿಯಿರಿ

ಪ್ರಾಂಪ್ಟ್‌ ಎಂಜಿನಿಯರಿಂಗ್, ಎಐ ಅನ್ನು ಸರಿಯಾದ ರೀತಿ ಬಳಸುವ ಕಲೆಯನ್ನ ಕಲಿಯಿರಿ. ಕಂಪ್ಯೂಟರ್‌ ಸೈನ್ಸ್‌ನಲ್ಲಿ ಒಂದು ಜನಪ್ರಿಯ ಮಾತಿದೆ. ಅದೇನೆಂದರೆ 'ಎಐ ನಿಮ್ಮ ಕೆಲಸವನ್ನು ಕಸಿದುಕೊಳ್ಳುವುದಿಲ್ಲ, ಎಐ ಚಲಾಯಿಸಬಲ್ಲ ವ್ಯಕ್ತಿಯನ್ನು ಅದು ತೆಗೆದುಕೊಳ್ಳುತ್ತದೆ! ಅಂದರೆ ನಿಮಗೆ ಎಐ ಸರಿಯದ ಬಳಕೆ ಗೊತ್ತಿದ್ದರೆ ಎಐ ನಿಮ್ಮನ್ನ ಇನ್ನಷ್ಟು ದೊಡ್ಡ ಉದ್ಯೋಗ, ಜವಾಬ್ದಾರಿ, ಗಳಿಕೆಗೆ ಕಾರಣವಾಗುತ್ತದೆ. ನೀವು ಕಾಂಟೆಂಟ್ ರೈಟರ್ ಆಗಿದ್ದರೆ, ಡಿಸೈನರ್, ಡೇಟಾ ಅನಾಲಿಸ್ಟ್ ಆಗಿದ್ದರೆ ಎಐ ಗೆ ಹೆದರುವ ಬದಲು ಅವುಗಳ ಸಾಮೀಪ್ಯ ಬೆಳೆಸಿಕೊಳ್ಳಿ. ಅಂದರೆ ChatGPT, Gemini ಇತರೆ ಎಐ ಟೂಲ್‌ಗಳನ್ನೇ ಬಳಸಿಕೊಂಡು ಸರಿಯಾದ ಔಟ್‌ಪುಟ್ ಹೊರತೆಗೆಯುವ ಕಲೆ ಕರಗತ ಮಾಡಿಕೊಳ್ಳಿ. ಎಐ ಸಹಾಯದಿಂದ ಹತ್ತೇ ನಿಮಿಷದಲ್ಲಿ ಒಂದು ಗಂಟೆಯ ಮಾಡಬೇಕಿದ್ದ ಕೆಲಸ ಮುಗಿಸಿದಾಗ ಕಂಪನಿಯು ನಿಮ್ಮನ್ನು ಎಂದಿಗೂ ಕೈಬಿಡುವುದಿಲ್ಲ.

ಸಮಸ್ಯೆಗಳಿಗೆ ತಕ್ಷಣ ಪರಿಹಾರ ಹುಡುಕುವ ಕಲೆ

ಯಂತ್ರಗಳು ನಾವು ಕೊಡುವ ದತ್ತಾಂಶದ ಮೂಲಕ ಕೆಲಸ ಮಾಡುತ್ತವೆ. ಆದರೆ ಕೆಲವು ಸಂದರ್ಭಗಳಲ್ಲಿ ತಕ್ಷಣ ಏನು ಮಾಡಬೇಕು ಎಂಬುದು ಅವುಗಳಿಗೆ ಸ್ವಂತವವಾಗಿ ನಿರ್ಧರಿಸಲು ಸಾಧ್ಯವಿಲ್ಲ.

ಯಂತ್ರಗಳು ದತ್ತಾಂಶದ ಮೂಲಕ ಕಲಿಸಿದಂತೆ ಮಾಡುತ್ತವೆ. ವಿಚಿತ್ರ ಅಥವಾ ಹೊಸ ಬಿಕ್ಕಟ್ಟಿನ ಸಂದರ್ಭದಲ್ಲಿ ತಕ್ಷಣ ಏನು ಮಾಡಬೇಕೆಂದು ಅವುಗಳಿಗೆ ಸ್ವಂತವಾಗಿ ನಿರ್ಧರಿಸಲು ಸಾಧ್ಯವಿಲ್ಲ. ಇದನ್ನೇ 'Critical Thinking' ಅನ್ನೋದು ಅಂದ್ರೆ ಯಾವುದೇ ತುರ್ತು ಸಮಸ್ಯೆಗೆ ತಕ್ಷಣ ಪರಿಹಾರ ಹುಡುಕುವುದು ಒಂದು ಕಲೆ. ಈ ಕಲೆ ಕರಗತವಾಗಿದ್ದೇ ಆದರೆ ಎಐ ಎಷ್ಟೇ ಮುಂದುವರಿದರೂ ನಿಮ್ಮ ಕೆಲಸ ಕಸಿದುಕೊಳ್ಳಲಾಗದು. ಯಾವುದೇ ಒಂದು ಕಂಪನಿಯು ದೊಡ್ಡ ವ್ಯವಹಾರ ಬಿಕ್ಕಟ್ಟು ಎದುರಾದಾಗ ಅಂತಹ ವೇಳೆ ಯುವದೇ ಎಐ ಬಳಸಿ ಸಲಹೆ ಪಡೆಯುವುದಿಲ್ಲ ಎಂಬುದು ಗಮನಿಸಬೇಕು. ಏಕೆಂದರೆ ಅಂತಹ ವೇಳೆ ಎಐನಿಂದ ಹೊರಗೆ ಯೋಚಿಸುವ, ಹೊಸ ಮಾರ್ಗ, ಪರಿಹಾರ ಹುಡುಕುವ ಸಮರ್ಥ ವ್ಯಕ್ತಿ ಬೇಕು.

ಎಮೋಷನಲ್ ಇಂಟಲಿಜೆಂಟ್ ನಿಮಗಿದು ದೊಡ್ಡ ಅಸ್ತ್ರ!

ನೀವು ಒಬ್ಬ ಗ್ರಾಹಕನ್ನು ನೋಡಿಕೊಳ್ಳುತ್ತಿರಲಿ ಅಥವಾ ಒಂದು ಟೀಂ ಮುನ್ನಡೆಸುತ್ತಿರಲಿ ಇಂಥ ವೇಳೆ ಭಾವನೆಗಳು ಮತ್ತು ಪರಸ್ಪರ ತಿಳಿವಳಿಕೆ ಬಹಳ ಮುಖ್ಯ. ಇದು ಯಾಂತ್ರಿಕ ಅಥಾವ ಎಐ ಸಲಹೆಗಿಂತ ಬಹಳ ಮುಖ್ಯವಾದುದ್ದು. ಎದುರಿಗಿರುವ ಒಬ್ಬ ವ್ಯಕ್ತಿಯ ಅಥವಾ ಗ್ರಾಹಕನ ಮನಸ್ಥಿತಿ ಗುರುತಿಸುವುದು, ಆ ವ್ಯಕ್ತಿ ಹೇಳಲಾಗದ ಸಮಸ್ಯೆ, ತೊಂದರೆಗಳನ್ನ ಅರ್ಥ ಮಾಡಿಕೊಂಡು ಮಾತುಕತೆ ನಡೆಸುವುದು ಒಂದು ಕಲೆಯಾಗಿದೆ. ಇದನ್ನ ಯಾವುದೇ ರೊಬೊಟ್ ಅಥವಾ ಅಲ್ಗರಿದಮ್ ಕೂಡ ಮಾನವ ಭಾವನೆಗಳನ್ನ ಅರ್ಥಮಾಡಿಕೊಳ್ಳಲು ಸಾಧ್ಯವಿಲ್ಲ. ಆಫೀಸ್‌ನಲ್ಲಿ ಉತ್ತಮ ಸಂವಹನಕಾರ, ಸಹಾನುಭೂತಿಯುಳ್ಳ ಸಹೋದ್ಯೋಗಿಯಾಗಿರುವುದು ಯಾವಾಗಲೂ ನಿಮ್ಮನ್ನು ಇತರರಿಗಿಂತ ವಿಭಿನ್ನ, ವಿಶೇಷ ವ್ಯಕ್ತಿಯಾಗಿಸುತ್ತದೆ. ಇದರಿಂದ ನೀವು ಕೆಲಸ ಕಳೆದುಕೊಳ್ಳುವ ಸಾಧ್ಯತೆ ತೀರಾ ಕಡಿಮೆ.

ಹೊಸದನ್ನು ಕಲಿಯಿರಿ, ಯಾವಾಗಲೂ ಸಂತೋಷವಾಗಿರಿ

ಕಾಲ ಸಾಕಷ್ಟು ಬದಲಾಗಿದೆ, ಮುಂದೆ ಹೋಗಿದೆ. ಹಿಂದಿನಂತ ಒಮ್ಮೆ ಕಲಿತು ಮರೆತುಬಿಡುವ ಕಾಲ ಇದಲ್ಲ. ಪ್ರತಿದಿನವೂ ಹೊಸ ಹೊಸ ಟೆಕ್ನಾಲಜಿ, ಆವಿಷ್ಕಾರಗಳು ಆಗುತ್ತಲೇ ಇರುತ್ತವೆ. ಯಾವಾಗಲೂ ನಮ್ಮನ್ನು ನಾವು ಅಪ್ಡೇಟ್ ಮಾಡುತ್ತಲೇ ಇರಬೇಕು, ಪ್ರತಿಯೊಂದನ್ನು ಕಲಿಯುವ ಹಂಬಲವಿರಬೇಕು. ಪದವಿ ಡಿಗ್ರಿ ಒಂದನ್ನೇ ಹಿಡ್ಕೊಂಡು ಬದುಕುವ ಕಾಲ ಇದಲ್ಲ. ಅದರ ಜೊತೆ ಜೊತೆಗೆ ಭವಿಷ್ಯದ ದೃಷ್ಟಿಯಿಂದ ಸ್ಕಿಲ್‌ಗಳನ್ನ ವೃದ್ಧಿಸಿಕೊಳ್ಳುತ್ತ ಅಪ್ಡೇಟ್ ಆಗುತ್ತಲೇ ಇರಬೇಕು. ಇದರಿಂದ ಮುಂದಿನ ಎಲ್ಲ ಹೊಸ ಸವಾಲುಗಳಿಗೆ ನಿಮ್ಮ ಸಿದ್ಧಗೊಳಿಸಲು ಸಾಧ್ಯವಾಗುತ್ತದೆ. ಅಯ್ಯೋ ಅದರಲ್ಲಿ ನನಗೆ ಆಸಕ್ತಿ ಇಲ್ಲ, ಅದು ನನ್ನಿಂದಾಗಲ್ಲ, ನನ್ನ ಆಸಕ್ತಿಯ ವಿಷಯ ಅದಲ್ಲ.. ಹೀಗೆ ಹೇಳುತ್ತಾ ಹೋದರೆ ಹಿಂದೆ ಬಿಳುತ್ತೀರಿ. ಕೆಲಸವೂ ಕಳೆದುಹೋಗುತ್ತದೆ. ಹೀಗಾಗಿ ಸದಾ ಹೊಸದನ್ನು ಕಲಿಯುತ್ತಲೇ ಇರಿ. ನಿಮ್ಮಲ್ಲಿ ಸ್ಕಿಲ್ ಇದ್ದರೆ ಎಐ ನಿಮ್ಮ ಕೆಲಸ ಕಳೆದುಕೊಳ್ಳುವ ಬದಲು ನಿಮ್ಮ ಅಸಿಸ್ಟೆಂಟ್ ಆಗಿ ಸಾಥ್ ಕೊಡುತ್ತದೆ.

ಕನ್ನಡಿಗರಿಗೆ ಉದ್ಯೋಗ ನೀಡದಿದ್ದರೆ ಕಠಿಣ ಕ್ರಮ: ಮುಖ್ಯಮಂತ್ರಿ ಡಿಕೆಶಿ ಐಟಿ ಕಂಪೆನಿಗಳಿಗೆ ಖಡಕ್ ವಾರ್ನಿಂಗ್

Suchethana D — Mon, 26 Oct 2026 13:34:27 +0530

ಬೆಂಗಳೂರು: ಬೆಂಗಳೂರಿನ ಕೆಲವು ಮಾಹಿತಿ ತಂತ್ರಜ್ಞಾನ (IT) ಕಂಪನಿಗಳಲ್ಲಿ ಕನ್ನಡಿಗ ಉದ್ಯೋಗಾಕಾಂಕ್ಷಿಗಳ ವಿರುದ್ಧ ತಾರತಮ್ಯ ಎಸಗಲಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದೆ. ಈ ಕುರಿತು ಸೋಷಿಯಲ್ ಮೀಡಿಯಾದಲ್ಲಿ ಯುವತಿಯೊಬ್ಬರು ಮಾಡಿದ್ದ ವಿಡಿಯೋ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ. ಇದಕ್ಕೀಗ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅವರು ಪ್ರತಿಕ್ರಿಯೆ ನೀಡಿದ್ದಾರೆ. ಎಕ್ಸ್ ಖಾತೆಯಲ್ಲಿ ಅವರು, ಬೆಂಗಳೂರಿನ ಐಟಿ ಕಂಪನಿಗಳಲ್ಲಿ ಕನ್ನಡಿಗರು ಉದ್ಯೋಗಾವಕಾಶಗಳಲ್ಲಿ ಅನ್ಯಾಯ ಎದುರಿಸುತ್ತಿದ್ದಾರೆ ಎಂಬ ದೂರುಗಳು ಕೇಳಿ ಬರುತ್ತಿರುವುದು ಬೇಸರದ ಸಂಗತಿ. ಕರ್ನಾಟಕದಲ್ಲಿ, ಕನ್ನಡಿಗರು ಸಾರ್ವಭೌಮರು. ಯಾವುದೇ ಕಾರಣಕ್ಕೂ ಕನ್ನಡಿಗರ ಹಕ್ಕುಗಳು, ಘನತೆ ಮತ್ತು ಅವಕಾಶಗಳನ್ನು ಕಡೆಗಣಿಸಲು ಸರ್ಕಾರ ಬಿಡುವುದಿಲ್ಲ. ಜಗತ್ತು ಬೆಂಗಳೂರನ್ನು ಭಾರತದ ತಂತ್ರಜ್ಞಾನ ರಾಜಧಾನಿಯಾಗಿ ನೋಡುತ್ತದೆ ಮತ್ತು ನಮ್ಮ ಕನ್ನಡಿಗರ ಪ್ರತಿಭೆ, ಕೌಶಲ್ಯ ಮತ್ತು ಸಾಮರ್ಥ್ಯಗಳ ಬಗ್ಗೆ ನಮಗೆ ಅಪಾರ ಹೆಮ್ಮೆ ಇದೆ ಎಂದಿದ್ದಾರೆ.

ಕಠಿಣ ಕ್ರಮದ ಎಚ್ಚರಿಕೆ

ಯಾವುದೇ ಖಾಸಗಿ ಸಂಸ್ಥೆಯು ಉದ್ದೇಶಪೂರ್ವಕವಾಗಿ ಕನ್ನಡಿಗರನ್ನು ಕಡೆಗಣಿಸುತ್ತಿದೆ ಎಂದು ಕಂಡುಬಂದರೆ, ಸರ್ಕಾರ ಸೂಕ್ತ ಕ್ರಮ ಕೈಗೊಳ್ಳುತ್ತದೆ. ಕನ್ನಡಿಗರ ಹಿತಾಸಕ್ತಿಗಳ ಧ್ವನಿಯಾಗಿ, ಸರ್ಕಾರವು ಅವರ ಸಮಸ್ಯೆಗಳಿಗೆ ಸ್ಪಂದಿಸಲು ಯಾವಾಗಲೂ ಬದ್ಧವಾಗಿರುತ್ತದೆ ಎಂದು ಮುಖ್ಯಮಂತ್ರಿ ಹೇಳಿದ್ದಾರೆ.

ಯುವತಿ ಹೇಳಿದ್ದೇನು?

ಹೊರ ರಾಜ್ಯಗಳ ಅಭ್ಯರ್ಥಿಗಳಿಗೆ ಉದ್ಯೋಗ ನೀಡುತ್ತಿರುವ ಕೆಲವು ಕಂಪೆನಿಗಳು, ಕನ್ನಡಿಗ ಅಭ್ಯರ್ಥಿಗಳನ್ನು ಮಾತ್ರ ತಿರಸ್ಕರಿಸುತ್ತಿವೆ ಎಂದು ಯುವತಿ ದೂರಿದ್ದಾರೆ. ಬೆಂಗಳೂರಿನ ಕೆಲವು ಕಂಪನಿಗಳು ಬೆರಳೆಣಿಕೆಯಷ್ಟು ಕನ್ನಡಿಗರಿಗೆ ಮಾತ್ರ ಉದ್ಯೋಗ ನೀಡುತ್ತಿವೆ. ಬದಲಾಗಿ ಹೊರರಾಜ್ಯಗಳಲ್ಲಿ ಕ್ಯಾಂಪಸ್ ಸಂದರ್ಶನಗಳನ್ನು ನಡೆಸಿ ಕಡಿಮೆ ವೇತನಕ್ಕೆ ಅಭ್ಯರ್ಥಿಗಳನ್ನು ನೇಮಕ ಮಾಡಿಕೊಳ್ಳುತ್ತಿವೆ ಎಂದು ಅವರು ದೂರಿದ್ದಾರೆ. ಇದರಿಂದ ಸ್ಥಳೀಯ ಕನ್ನಡಿಗರಿಗೆ ಉದ್ಯೋಗಾವಕಾಶಗಳು ಸಿಗುತ್ತಿಲ್ಲ ಎಂದು ಯುವತಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಯುವತಿಯು ತಮ್ಮ ವಿಡಿಯೊದಲ್ಲಿ ಅಸ್ಥೆನೋಸ್ ಟೆಕ್ನಾಲಜೀಸ್ ಪ್ರೈವೇಟ್ ಲಿಮಿಟೆಡ್ (Asthenos Technologies Private Limited) ಕಂಪನಿಯ ಹೆಸರನ್ನು ಉಲ್ಲೇಖಿಸಿದ್ದಾರೆ. ಈ ಕಂಪನಿಯಲ್ಲಿ ತಮಿಳು ಮತ್ತು ತೆಲುಗು ಭಾಷೆಗಳಿಗೆ ಮಾನ್ಯತೆ ನೀಡುತ್ತಿದೆ. ಆದರೆ, ಕನ್ನಡ ಮಾತನಾಡುವ ಅಭ್ಯರ್ಥಿಗಳಿಗೆ ಅದೇ ರೀತಿಯ ಆದ್ಯತೆ ನೀಡುತ್ತಿಲ್ಲ ಎಂದು ಅವರು ಆರೋಪಿಸಿದ್ದಾರೆ. ಅಭ್ಯರ್ಥಿಗಳು ತಮ್ಮ ಬಯೋಡೇಟಾದಲ್ಲಿ ಮಾತೃಭಾಷೆ ಕನ್ನಡ ಎಂದು ನಮೂದಿಸಿದರೆ, ಸಂದರ್ಶನದ ಹಂತದಲ್ಲಿಯೇ ಅವರನ್ನು ತಿರಸ್ಕರಿಸುವ ಸಾಧ್ಯತೆಯಿದೆ ಎಂದು ಯುವತಿ ದೂರಿದ್ದಾರೆ. ಇದಲ್ಲದೆ, ಬೆಂಗಳೂರಿನ ಕಾಲೇಜುಗಳಲ್ಲಿ ಕ್ಯಾಂಪಸ್ ನೇಮಕಾತಿ ಅಭಿಯಾನಗಳನ್ನು ನಡೆಸುತ್ತಿಲ್ಲ. ಇದರಿಂದ ಸ್ಥಳೀಯ ಪದವೀಧರರಿಗೆ ಉದ್ಯೋಗಾವಕಾಶಗಳು ಸೀಮಿತವಾಗಿವೆ ಎಂದು ಅವರು ಆರೋಪಿಸಿದ್ದಾರೆ.

ಈ ವಿಚಾರದಲ್ಲಿ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಮಧ್ಯಪ್ರವೇಶಿಸಿ ಕನ್ನಡಿಗ ಉದ್ಯೋಗಾಕಾಂಕ್ಷಿಗಳು ಎದುರಿಸುತ್ತಿರುವ ಸಮಸ್ಯೆಗಳಿಗೆ ಪರಿಹಾರ ಒದಗಿಸಬೇಕು ಎಂದು ಯುವತಿ ವಿಡಿಯೊ ಮೂಲಕ ಮನವಿ ಮಾಡಿದ್ದರಿಂದ, ಈ ವಿಡಿಯೋ ಕುರಿತು ಮುಖ್ಯಮಂತ್ರಿಗಳು ಪ್ರತಿಕ್ರಿಯೆ ನೀಡಿದ್ದಾರೆ.

ಸ್ವಯಂ ನಿವೃತ್ತಿ ಪಡೆದು ಮನೆಗೆ ಹೋಗಿ: ಇ-ಮೇಲ್ ನೋಡಿ ಬಿಕ್ಕಿಬಿಕ್ಕಿ ಅಳ್ತಿರೋ ಟೆಕ್ಕಿ- ಭಾವುಕ ಪೋಸ್ಟ್

Suchethana D — Tue, 27 Oct 2026 13:06:38 +0530

ಮೈಕ್ರೋಸಾಫ್ಟ್ ಕಂಪೆನಿ ಅಮೆರಿಕ, ಕೆನಡಾ, ಭಾರತ ಮತ್ತು ಯುಕೆಯಲ್ಲಿನ ತನ್ನ ಹೆಚ್ಚಿನ ಉದ್ಯೋಗಿಗಳಿಗೆ ಸ್ವಯಂಪ್ರೇರಿತ ನಿವೃತ್ತಿ ಯೋಜನೆಯನ್ನು ಪ್ರಾರಂಭಿಸಿದೆ. ಕೃತಕ ಬುದ್ಧಿಮತ್ತೆ (AI) ಮೂಲಸೌಕರ್ಯದ ಮೇಲಿನ ಹೆಚ್ಚುತ್ತಿರುವ ವೆಚ್ಚವನ್ನು ಆರ್ಥಿಕ ದಕ್ಷತೆಯೊಂದಿಗೆ ಸಮತೋಲನಗೊಳಿಸಲು ಕಂಪೆನಿಯು ಈ ಕ್ರಮವನ್ನು ತೆಗೆದುಕೊಂಡಿದೆ. ಸ್ವಯಂಪ್ರೇರಿತ ನಿವೃತ್ತಿ (Voluntary Retirement) ಕೊಡುಗೆ ಎಂದು ಕರೆಯಲ್ಪಡುವ ಕಂಪೆನಿಯ ಹೊಸ ಯೋಜನೆಯು 70 ಅಥವಾ ಅದಕ್ಕಿಂತ ಕಡಿಮೆ ಮಟ್ಟದ ಅರ್ಹ ಉದ್ಯೋಗಿಗಳಿಗೆ ಕಂಪೆನಿಯನ್ನು ತೊರೆಯುವ ಆಯ್ಕೆಯನ್ನು ನೀಡುತ್ತಿದೆ. ಇದರ ಅರ್ಥ ಉದ್ಯೋಗಿಗಳ ಗುಣಮಟ್ಟ, ಅವರು ಕೆಲಸ ಮಾಡುವ ರೀತಿ ಎಲ್ಲವನ್ನೂ ಪರಿಗಣಿಸಿ ಅರ್ಹತೆ ನೀಡಲಾಗುತ್ತದೆ. ಅದರ ಆಧಾರದ ಮೇಲೆ ಯಾರಿಗೆ ನಿವೃತ್ತಿ ಕೊಟ್ಟು ಮನೆಗೆ ಕಳುಹಿಸಬೇಕು ಎಂದು ಯೋಜನೆ ರೂಪಿಸಿದೆ ಕಂಪೆನಿ. ಈ ಹಿನ್ನೆಲೆಯಲ್ಲಿ ಸರಿಸುಮಾರು 60,000 ಉದ್ಯೋಗಿಗಳು ಈ ಯೋಜನೆಯ ವ್ಯಾಪ್ತಿಗೆ ಬರುತ್ತಾರೆ, ಇದು ಮೈಕ್ರೋಸಾಫ್ಟ್‌ನ ಒಟ್ಟು 2,23,000 ಉದ್ಯೋಗಿಗಳ ಪೈಕಿ ಸುಮಾರು 22 ಪ್ರತಿಶತವನ್ನು ಪ್ರತಿನಿಧಿಸುತ್ತದೆ.

AI ಯ ಬೆಳೆಯುತ್ತಿರುವ ಕಂಪ್ಯೂಟಿಂಗ್ ಅಗತ್ಯಗಳನ್ನು ಪೂರೈಸಲು ಮೈಕ್ರೋಸಾಫ್ಟ್ ಡೇಟಾ ಕೇಂದ್ರಗಳಲ್ಲಿ ತನ್ನ ಹೂಡಿಕೆಯನ್ನು ಹೆಚ್ಚಿಸುತ್ತಿದೆ. ಕಂಪೆನಿಯು ಆಂಥ್ರೊಪಿಕ್, ಓಪನ್‌ಎಐ ಮತ್ತು ಇತರ ಹಲವಾರು ಕಂಪೆನಿಗಳಿಗೆ ಕ್ಲೌಡ್ ಸೇವೆಗಳನ್ನು ಸಹ ಒದಗಿಸುತ್ತದೆ. ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ಅದರ ಬಂಡವಾಳ ವೆಚ್ಚಗಳು $50 ಬಿಲಿಯನ್ ಮೀರುವ ನಿರೀಕ್ಷೆಯಿದೆ ಎಂದು ಮೈಕ್ರೋಸಾಫ್ಟ್ ಜುಲೈನಲ್ಲಿ ಹೇಳಿದೆ. ಕಳೆದ ವರ್ಷ ಇದೇ ತ್ರೈಮಾಸಿಕದಲ್ಲಿ ಬಂಡವಾಳ ವೆಚ್ಚಗಳು ಮತ್ತು ಹಣಕಾಸು ಗುತ್ತಿಗೆಗಳು ಒಟ್ಟು $34.9 ಬಿಲಿಯನ್ ಆಗಿದ್ದವು. ಈ ಹೆಚ್ಚಿದ ಖರ್ಚು ಕಂಪೆನಿಯ ಆರ್ಥಿಕ ಸ್ಥಿತಿಯ ಮೇಲೂ ಪರಿಣಾಮ ಬೀರುತ್ತಿದೆ. ಏಪ್ರಿಲ್‌ನಲ್ಲಿ, ಮೈಕ್ರೋಸಾಫ್ಟ್ ಯುಎಸ್‌ನಲ್ಲಿ ತನ್ನ ಮೊದಲ ಉದ್ಯೋಗಿಗಳಿಗೆ ಸ್ವಯಂಪ್ರೇರಿತ ನಿವೃತ್ತಿ ಕಾರ್ಯಕ್ರಮವನ್ನು ಘೋಷಿಸಿತು. ಸರಿಸುಮಾರು 7% ಅಮೆರಿಕದ ಉದ್ಯೋಗಿಗಳು ಒಳಗೊಂಡಿದ್ದರು. ತರುವಾಯ, ಜುಲೈನಲ್ಲಿ, ಕಂಪೆನಿಯು 4,800 ಉದ್ಯೋಗಿಗಳನ್ನು ವಜಾಗೊಳಿಸುವ ಯೋಜನೆಯನ್ನು ಪ್ರಕಟಿಸಿತು.

ಟೆಕ್ಕಿಯ ಕಣ್ಣೀರು

ಇದರ ಬೆನ್ನಲ್ಲೇ ಈಚೆಗೆ, ಉದ್ಯೋಗ ಸೇರಿದ ಯುವಕನೊಬ್ಬ ರೆಡ್ಡಿಟ್ನಲ್ಲಿ ಈ ವಿಷಯವನ್ನು ಪ್ರಸ್ತಾಪಿಸಿದ್ದು, ಯಾವ ರೀತಿ ತಮ್ಮ ಜೀವನ ಅನಿಶ್ಚಿತತೆಯಿಂದ ಕೂಡಿದೆ ಎನ್ನುವುದನ್ನು ಹೇಳಿದ್ದಾರೆ. ತಮಗೆ ನಿವೃತ್ತಿ ಯೋಜನೆಯ ಇ-ಮೇಲ್ ಬಂದಾಗ ಆದ ಆತಂಕವನ್ನು ಅವರು ವಿವರಿಸಿದ್ದಾರೆ. 60 ಸಾವಿರ ಉದ್ಯೋಗಿಗಳಿಗೆ ಸ್ವಯಪ್ರೇರಿತ ನಿವೃತ್ತಿಗೆ ಅವಕಾಶ ಕಲ್ಪಿಸಲಾಗಿದೆ. ಈ ಆಫರ್ ಅನ್ನು ಸ್ವೀಕರಿಸುವವರು ಡಿಸೆಂಬರ್ 31 ರೊಳಗೆ ಹಣವನ್ನು ಸ್ವೀಕರಿಸಿ ಕಂಪೆನಿಯಲ್ಲಿ ತಮ್ಮ ವೃತ್ತಿಜೀವನವನ್ನು ಕೊನೆಗೊಳಿಸಬಹುದು. ಅರ್ಜಿ ಸಲ್ಲಿಸಲು ಡಿಸೆಂಬರ್ 1 ಅನ್ನು ಕೊನೆಯ ದಿನಾಂಕವೆಂದು ಪೋಸ್ಟ್‌ನಲ್ಲಿ ಉಲ್ಲೇಖಿಸಲಾಗಿದೆ. ಇದನ್ನು ನೋಡಿ ಶಾಕ್ ಆಗಿರುವ ಬಗ್ಗೆ ವಿವರಿಸಿದ್ದಾರೆ.

ತಮ್ಮ ಹತಾಶೆಯನ್ನು ವ್ಯಕ್ತಪಡಿಸಿದ ಉದ್ಯೋಗಿ, ಉದ್ಯೋಗ ಮಾರುಕಟ್ಟೆಯ ಪ್ರಸ್ತುತ ಸ್ಥಿತಿಯನ್ನು ಗಮನಿಸಿದರೆ ತಮ್ಮ ಕಠಿಣ ಪರಿಶ್ರಮದ ಮೌಲ್ಯವನ್ನು ಪ್ರಶ್ನಿಸಿದರು. "ನಾನು ಏಕೆ ಹೆಚ್ಚು ಕಷ್ಟಪಟ್ಟು ಕೆಲಸ ಮಾಡಲಿಲ್ಲ ಎಂದು ನನಗೆ ಅನಿಸುತ್ತದೆ. ಚೆನ್ನಾಗಿ ಕೆಲಸ ಮಾಡಿದ್ದರೆ ಈ ಪರಿಸ್ಥಿತಿ ಬರುತ್ತಿರಲಿಲ್ಲ ಎಂದು ನೊಂದುಕೊಂಡಿದ್ದಾರೆ. ಮುಂದಿನ ಪರಿಸ್ಥಿತಿ ನೆನಪಿಸಿಕೊಂಡರೆ ಭಯವಾಗುತ್ತದೆ ಎಂದಿದ್ದಾರೆ. ಕೇವಲ ಮೂರು ತಿಂಗಳ ಹಿಂದೆ ಉದ್ಯೋಗಗಕ್ಕೆ ಸೇರಿಕೊಂಡೆ. ಕಂಪೆನಿಯ ಕೋಡ್‌ಬೇಸ್ ಬಗ್ಗೆ ತಮಗೆ ಸೀಮಿತ ಜ್ಞಾನವಿತ್ತು ಮತ್ತು ತಮ್ಮ ಮುಂದಿನ ವೃತ್ತಿಜೀವನದ ಬದಲಾವಣೆಯ ಬಗ್ಗೆ ಅನಿಶ್ಚಿತತೆ ಹೊಂದಿರುವುದಾಗಿ ಹೇಳಿದ್ದಾರೆ. ನನಗೆ ಕೇವಲ ಮೂರು ವರ್ಷಗಳ ಅನುಭವ ಇರೋದು. ಆದರೆ ಈಗಲೇ ಈ ಸ್ಥಿತಿಗೆ ಬಂದಿದ್ದೇನೆ ಎಂದು ನೊಂದು ನುಡಿದಿದ್ದಾರೆ.

AI ಯುಗದಲ್ಲಿ ಬದಲಾಗುತ್ತಿರುವ ವ್ಯವಹಾರ ಮಾದರಿ

ಮೈಕ್ರೋಸಾಫ್ಟ್ ತನ್ನ ವ್ಯವಹಾರ ಮಾದರಿಯನ್ನು ಸಹ ಬದಲಾಯಿಸುತ್ತಿದೆ. AI ಸೇವೆಗಳ ನಿಜವಾದ ಬಳಕೆಯ ಆಧಾರದ ಮೇಲೆ ಗ್ರಾಹಕರಿಂದ ಶುಲ್ಕ ವಿಧಿಸುವತ್ತ ಕಂಪೆನಿಯು ಸಾಗುತ್ತಿದೆ. ಇದು ಪ್ರೋಗ್ರಾಮರ್‌ಗಳು, ಮಾರಾಟ ಸಿಬ್ಬಂದಿ ಮತ್ತು ಪೂರೈಕೆ ಸರಪಳಿ ಉದ್ಯೋಗಿಗಳಿಗೆ AI ಪರಿಕರಗಳನ್ನು ಒದಗಿಸಿದೆ ಮತ್ತು ಅವುಗಳ ಬಳಕೆಯಿಂದ ಸಕಾರಾತ್ಮಕ ಫಲಿತಾಂಶಗಳನ್ನು ಕಂಡಿದೆ. ಹೊಸ AI-ಸಂಬಂಧಿತ ಬೆಳವಣಿಗೆಯ ಅವಕಾಶಗಳನ್ನು ಬಂಡವಾಳ ಮಾಡಿಕೊಳ್ಳಲು ಮತ್ತು ಅದರ ವೆಚ್ಚಗಳನ್ನು ನಿಯಂತ್ರಿಸಲು ಅಗತ್ಯವಿರುವ ಪ್ರತಿಭೆಯನ್ನು ಉಳಿಸಿಕೊಳ್ಳುವ ಗುರಿಯನ್ನು ಕಂಪೆನಿ ಹೊಂದಿದೆ. ಜೂನ್ ತ್ರೈಮಾಸಿಕದಲ್ಲಿ ಮೈಕ್ರೋಸಾಫ್ಟ್ $19.64 ಬಿಲಿಯನ್‌ನಷ್ಟು ಸಕಾರಾತ್ಮಕ ಉಚಿತ ನಗದು ಹರಿವನ್ನು ವರದಿ ಮಾಡಿದೆ, ಆದಾಗ್ಯೂ ಇದು ಹಿಂದಿನ ವರ್ಷಕ್ಕಿಂತ 23 ಪ್ರತಿಶತದಷ್ಟು ಇಳಿಕೆಯಾಗಿದೆ. ಅದರ ಕ್ಲೌಡ್ ಪ್ರತಿಸ್ಪರ್ಧಿಗಳಾದ ಆಲ್ಫಾಬೆಟ್ ಮತ್ತು ಅಮೆಜಾನ್ ಇದೇ ಅವಧಿಯಲ್ಲಿ ನಕಾರಾತ್ಮಕ ಉಚಿತ ನಗದು ಹರಿವನ್ನು ವರದಿ ಮಾಡಿವೆ.

ಡಿಸೆಂಬರ್‌ನಲ್ಲಿ ಉದ್ಯೋಗಿ ಭಾಗವಹಿಸುವಿಕೆ ನಿರ್ಧಾರ

ಕಂಪೆನಿಯ ಕೆಲವು ಮಾರ್ಕೆಟಿಂಗ್, ಮಾರಾಟ ಮತ್ತು ಎಂಜಿನಿಯರಿಂಗ್ ತಂಡಗಳು ಹೊಸ ಯೋಜನೆಯಲ್ಲಿ ಭಾಗವಹಿಸದಿರಲು ನಿರ್ಧರಿಸಿವೆ. ಅರ್ಹ ಉದ್ಯೋಗಿಗಳು ಡಿಸೆಂಬರ್ ಆರಂಭದೊಳಗೆ ಈ ಕೊಡುಗೆಯನ್ನು ಸ್ವೀಕರಿಸಬೇಕೆ ಎಂದು ನಿರ್ಧರಿಸಬೇಕಾಗುತ್ತದೆ. ಯೋಜನೆಯನ್ನು ಆಯ್ಕೆ ಮಾಡುವ ಉದ್ಯೋಗಿಗಳನ್ನು ಡಿಸೆಂಬರ್ 31 ರಂದು ವಜಾಗೊಳಿಸಲಾಗುತ್ತದೆ. ಜುಲೈನಲ್ಲಿ, ಸ್ವಯಂಪ್ರೇರಿತ ನಿವೃತ್ತಿ ಕಾರ್ಯಕ್ರಮಕ್ಕೆ ಅರ್ಹರಾಗಿರುವ ಶೇಕಡಾ 30 ಕ್ಕಿಂತ ಹೆಚ್ಚು ಉದ್ಯೋಗಿಗಳು ಅದನ್ನು ತೆಗೆದುಕೊಂಡಿದ್ದಾರೆ ಎಂದು ಮೈಕ್ರೋಸಾಫ್ಟ್ ವರದಿ ಮಾಡಿದೆ. ಆದಾಗ್ಯೂ, ಆ ಯೋಜನೆಯು 67 ಅಥವಾ ಅದಕ್ಕಿಂತ ಕಡಿಮೆ ವಯಸ್ಸಿನ ಹಿರಿಯ ನಿರ್ದೇಶಕರಿಗೆ ಸೀಮಿತವಾಗಿತ್ತು, ಆದರೆ ಹೊಸ ಯೋಜನೆಯು ವೈಸ್ ಪ್ರೆಸಿಡೆಂಡ್ ಹಂತದವರೆಗೆ ವಿಸ್ತರಿಸುತ್ತದೆ. ಮೂಲದ ಪ್ರಕಾರ, ಈ ಬಾರಿ ಎಷ್ಟು ಉದ್ಯೋಗಿಗಳು ಈ ಕೊಡುಗೆಯನ್ನು ಸ್ವೀಕರಿಸುತ್ತಾರೆ ಎಂಬುದಕ್ಕೆ ಮೈಕ್ರೋಸಾಫ್ಟ್ ಯಾವುದೇ ಗುರಿಯನ್ನು ನಿಗದಿಪಡಿಸಿಲ್ಲ.

ಉದ್ಯೋಗಾಕಾಂಕ್ಷಿಗಳಿಗೆ ಸುವರ್ಣಾವಕಾಶ, ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ನಲ್ಲಿ ಬೃಹತ್ ನೇಮಕಾತಿ

Gowthami K — Sat, 24 Oct 2026 15:57:29 +0530

ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಲಿಮಿಟೆಡ್ ಅಧಿಕೃತ ಅಧಿಸೂಚನೆಯ ಮೂಲಕ ಅಪ್ರೆಂಟಿಸ್ ಹುದ್ದೆಗಳನ್ನು ಭರ್ತಿ ಮಾಡಲು ಅರ್ಹ ಮತ್ತು ಆಸಕ್ತ ಅಭ್ಯರ್ಥಿಗಳಿಂದ ಅರ್ಜಿಗಳನ್ನು ಆಹ್ವಾನಿಸಿದೆ. ಹೆಚ್ಚಿನ ಮಾಹಿತಿಗೆ https://iocl.com/ ಸಂಪರ್ಕಿಸಿ

ಅರ್ಹ ಹಾಗೂ ಆಸಕ್ತ ಅಭ್ಯರ್ಥಿಗಳು ನವೆಂಬರ್-4-2026 ರಂದು ಅಥವಾ ಮೊದಲು ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಬಹುದು.

ಹುದ್ದೆಗಳ ಸಂಪೂರ್ಣ ವಿವರ:

ಸಂಸ್ಥೆಯ ಹೆಸರು: ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಲಿಮಿಟೆಡ್ (IOCL)

ಹುದ್ದೆಗಳ ಸಂಖ್ಯೆ: 335

ಹುದ್ದೆಯ ಹೆಸರು: ಅಪ್ರೆಂಟಿಸ್

ಶೈಕ್ಷಣಿಕ ಅರ್ಹತೆ:

ಅಭ್ಯರ್ಥಿಯು ಮಾನ್ಯತೆ ಪಡೆದ ಮಂಡಳಿಗಳು ಅಥವಾ ವಿಶ್ವವಿದ್ಯಾಲಯಗಳಿಂದ 10ನೇ, 12ನೇ, BA, B.Com, B.Sc, BBA, ITI ಅನ್ನು ಪೂರ್ಣಗೊಳಿಸಿರಬೇಕು.

ವಯೋಮಿತಿ:

ಅಭ್ಯರ್ಥಿಯು ಕನಿಷ್ಠ 18 ವರ್ಷ ಮತ್ತು ಗರಿಷ್ಠ 24 ವರ್ಷ ವಯಸ್ಸಿನವರಾಗಿರಬೇಕು.

ವಯೋಮಿತಿ ಸಡಿಲಿಕೆ:

ಒಬಿಸಿ ಅಭ್ಯರ್ಥಿಗಳಿಗೆ: 3 ವರ್ಷ

ಎಸ್‌ಸಿ, ಎಸ್‌ಟಿ ಅಭ್ಯರ್ಥಿಗಳಿಗೆ: 5 ವರ್ಷ

ಪಿಡಬ್ಲ್ಯೂಡಿ ಅಭ್ಯರ್ಥಿಗಳಿಗೆ: 10 ವರ್ಷ

ಅರ್ಜಿ ಶುಲ್ಕ: ಅರ್ಜಿ ಶುಲ್ಕವಿಲ್ಲ.

ಆಯ್ಕೆ ಪ್ರಕ್ರಿಯೆ:

ಲಿಖಿತ ಪರೀಕ್ಷೆ/ ಸಂದರ್ಶನ

ಪ್ರಮುಖ ದಿನಾಂಕಗಳು:

ಅರ್ಜಿ ಸಲ್ಲಿಕೆ ಪ್ರಾರಂಭವಾದ ದಿನಾಂಕ: ಅಕ್ಟೋಬರ್‌ 05-2026

ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ: ನವೆಂಬರ್-4-2026

ಅರ್ಜಿ ಸಲ್ಲಿಸುವುದು ಹೇಗೆ?

ಮೊದಲನೆಯದಾಗಿ IOCL ನೇಮಕಾತಿ ಅಧಿಸೂಚನೆ 2026 ಅನ್ನು ಸಂಪೂರ್ಣವಾಗಿ ಓದಿ ಮತ್ತು ಅಭ್ಯರ್ಥಿಯು ಅರ್ಹತಾ ಮಾನದಂಡಗಳನ್ನು ಪೂರೈಸುತ್ತಾರೆಯೇ ಎಂದು ಖಚಿತಪಡಿಸಿಕೊಳ್ಳಿ (ನೇಮಕಾತಿ ಲಿಂಕ್ ಅನ್ನು ಕೆಳಗೆ ನೀಡಲಾಗಿದೆ).

ಆನ್‌ಲೈನ್ ಮೂಲಕ ಅರ್ಜಿಯನ್ನು ಭರ್ತಿ ಮಾಡುವ ಮೊದಲು, ದಯವಿಟ್ಟು ಸಂವಹನ ಉದ್ದೇಶಕ್ಕಾಗಿ ಸರಿಯಾದ ಇಮೇಲ್ ಐಡಿ ಮತ್ತು ಮೊಬೈಲ್ ಸಂಖ್ಯೆಯನ್ನು ಹೊಂದಿರಿ ಮತ್ತು ಐಡಿ ಪ್ರೂಫ್, ವಯಸ್ಸು, ಶೈಕ್ಷಣಿಕ ಅರ್ಹತೆ, ರೆಸ್ಯೂಮ್, ಯಾವುದೇ ಅನುಭವವಿದ್ದರೆ ಇತ್ಯಾದಿ ದಾಖಲೆಗಳನ್ನು ಸಿದ್ಧವಾಗಿಡಿ.

ಐಒಸಿಎಲ್ ಆನ್‌ಲೈನ್ ಅರ್ಜಿ ನಮೂನೆಯಲ್ಲಿ ಅಗತ್ಯವಿರುವ ಎಲ್ಲಾ ವಿವರಗಳನ್ನು ನವೀಕರಿಸಿ. ಅಗತ್ಯ ಪ್ರಮಾಣಪತ್ರಗಳು/ದಾಖಲೆಗಳ ಸ್ಕ್ಯಾನ್ ಮಾಡಿದ ಪ್ರತಿಗಳನ್ನು ನಿಮ್ಮ ಇತ್ತೀಚಿನ ಛಾಯಾಚಿತ್ರದೊಂದಿಗೆ (ಅನ್ವಯಿಸಿದರೆ) ಅಪ್‌ಲೋಡ್ ಮಾಡಿ. ನಿಮ್ಮ ವರ್ಗದ ಪ್ರಕಾರ ಅರ್ಜಿ ಶುಲ್ಕವನ್ನು ಪಾವತಿಸಿ.

₹40 ಸಾವಿರ ಸಂಬಳದ ಎಂಜಿನಿಯರಿಂಗ್ ಕೆಲಸ ಬಿಟ್ಟ ಯುವಕ; ಈಗ Rapido ಓಡಿಸಿ ತಿಂಗಳಿಗೆ ₹1.2 ಲಕ್ಷ ಆದಾಯ!

Chandrashekar GS — Wed, 21 Oct 2026 09:56:19 +0530

ಎಂಜಿನಿಯರ್ ಕೆಲಸ ಬಿಟ್ಟು ರ‍್ಯಾಪಿಡೋ ಚಾಲಕನಾದ ಯುವಕ; ತಿಂಗಳಿಗೆ ₹1.2 ಲಕ್ಷದವರೆಗೆ ಗಳಿಕೆ!

ಎಂಜಿನಿಯರಿಂಗ್ ಪದವಿ, ಖಾಸಗಿ ಕಂಪನಿಯಲ್ಲಿ ಉದ್ಯೋಗ ಮತ್ತು ತಿಂಗಳಿಗೆ ₹40,000 ಸಂಬಳ. ಹೊರನೋಟಕ್ಕೆ ಇದು ಉತ್ತಮ ಜೀವನದಂತೆ ಕಾಣಬಹುದು. ಆದರೆ ಕುಟುಂಬದ ಖರ್ಚುಗಳನ್ನು ನಿಭಾಯಿಸಲು ಈ ಸಂಬಳ ಸಾಕಾಗದಿದ್ದರೆ ಏನು ಮಾಡಬೇಕು? ಜಾರ್ಖಂಡ್‌ನ ಯುವಕನೊಬ್ಬ ತನ್ನ ವೃತ್ತಿಯನ್ನೇ ಬದಲಿಸಿಕೊಂಡು ಈ ಪ್ರಶ್ನೆಗೆ ವಿಭಿನ್ನ ಉತ್ತರ ನೀಡಿದ್ದಾನೆ. ಎಂಜಿನಿಯರ್ ಕೆಲಸ ಬಿಟ್ಟು ರ‍್ಯಾಪಿಡೋ ಬೈಕ್ ಟ್ಯಾಕ್ಸಿ ಚಾಲಕನಾದ ಆತನ ಕಥೆಯನ್ನು ಮಹಿಳೆಯೊಬ್ಬರು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು, ಈಗ ಚರ್ಚೆಗೆ ಕಾರಣವಾಗಿದೆ.

₹198 ಪ್ರಯಾಣದಲ್ಲಿ ಹೊರಬಂದ ಯುವಕನ ಕಥೆ

ಮಹಿಳೆಯೊಬ್ಬರು ರ‍್ಯಾಪಿಡೋ ಬೈಕ್ ಟ್ಯಾಕ್ಸಿಯಲ್ಲಿ ಪ್ರಯಾಣಿಸುತ್ತಿದ್ದಾಗ ಚಾಲಕನೊಂದಿಗೆ ಮಾತುಕತೆ ನಡೆಸಿದ್ದಾರೆ. ಸುಮಾರು ₹198 ವೆಚ್ಚದ ಈ ಪ್ರಯಾಣದ ವೇಳೆ, ಚಾಲಕ ಹಿಂದೆ ಎಂಜಿನಿಯರ್ ಆಗಿ ಕೆಲಸ ಮಾಡುತ್ತಿದ್ದ ಸಂಗತಿ ತಿಳಿದುಬಂದಿದೆ.

ಆತ ಹಿಂದಿನ ಉದ್ಯೋಗದಲ್ಲಿ ತಿಂಗಳಿಗೆ ₹40,000 ಸಂಬಳ ಪಡೆಯುತ್ತಿದ್ದನು. ಆದರೆ ಕುಟುಂಬದ ಖರ್ಚುಗಳನ್ನು ನಿಭಾಯಿಸಲು ಆ ಮೊತ್ತ ಸಾಕಾಗುತ್ತಿರಲಿಲ್ಲ. ಹೀಗಾಗಿ, ಹೆಚ್ಚು ಆದಾಯ ಗಳಿಸುವ ಉದ್ದೇಶದಿಂದ ಕೆಲಸ ಬಿಟ್ಟು ಬೈಕ್ ಟ್ಯಾಕ್ಸಿ ಚಾಲಕನಾಗಲು ನಿರ್ಧರಿಸಿದ್ದನು.

ದಿನಕ್ಕೆ ₹4,000 ಗಳಿಕೆ; ತಿಂಗಳಿಗೆ ₹1.2 ಲಕ್ಷದವರೆಗೆ ಆದಾಯ!

ಸ್ವಂತ ಊರಿನಲ್ಲೇ ಕೆಲಸ ಮಾಡುವ ಅವಕಾಶ

ಮಹಿಳೆ ದಿನದ ಸಂಪಾದನೆಯ ಬಗ್ಗೆ ಕೇಳಿದಾಗ, ಚಾಲಕ ದಿನಕ್ಕೆ ₹4,000 ವರೆಗೆ ಗಳಿಸುವುದಾಗಿ ತಿಳಿಸಿದ್ದಾನೆ. ಇದರಿಂದ ಆಶ್ಚರ್ಯಗೊಂಡ ಅವರು, ತಿಂಗಳಿಗೆ ಎಷ್ಟು ಆದಾಯ ಬರುತ್ತದೆ ಎಂದು ಪ್ರಶ್ನಿಸಿದ್ದಾರೆ. ಅದಕ್ಕೆ ಆತ ₹1 ಲಕ್ಷದಿಂದ ₹1.2 ಲಕ್ಷದವರೆಗೆ ಗಳಿಸುವುದಾಗಿ ಹೇಳಿದ್ದಾನೆ ಎಂದು ಮಹಿಳೆ ತಮ್ಮ ಪೋಸ್ಟ್‌ನಲ್ಲಿ ವಿವರಿಸಿದ್ದಾರೆ.

ಈ ಬದಲಾವಣೆಯಿಂದ ಹೆಚ್ಚು ಹಣ ಗಳಿಸುವುದರ ಜೊತೆಗೆ, ಸ್ವಂತ ಊರಿನಲ್ಲೇ ಉಳಿದು ಕೆಲಸ ಮಾಡುವ ಅವಕಾಶವೂ ದೊರೆತಿದೆ ಎಂದು ಚಾಲಕ ತಿಳಿಸಿದ್ದಾನೆ. ಈ ಹೊಸ ಜೀವನಶೈಲಿಯಿಂದ ತಾನು ಸಂತೋಷವಾಗಿರುವುದಾಗಿಯೂ ಹೇಳಿದ್ದಾನೆ.

ಯಶಸ್ಸು ಎಂದರೆ ಕೇವಲ ದೊಡ್ಡ ಹುದ್ದೆಯೇ?

ಎಂಜಿನಿಯರಿಂಗ್ ಪದವಿ ಮತ್ತು ಉತ್ತಮ ಉದ್ಯೋಗವಿದ್ದರೂ, ಆರ್ಥಿಕ ನೆಮ್ಮದಿ ಇಲ್ಲದಿದ್ದರೆ ಜೀವನ ಕಷ್ಟವಾಗಬಹುದು. ಈ ಯುವಕನ ನಿರ್ಧಾರವು ಉದ್ಯೋಗದ ಹುದ್ದೆಗಿಂತ ಆದಾಯ, ಕುಟುಂಬದ ಅಗತ್ಯಗಳು ಮತ್ತು ವೈಯಕ್ತಿಕ ಸಂತೋಷವೂ ಮುಖ್ಯ ಎಂಬುದನ್ನು ತೋರಿಸುತ್ತದೆ.

ಆದರೆ ಈ ಕಥೆಯಲ್ಲಿನ ಆದಾಯವು ಚಾಲಕನ ಹೇಳಿಕೆಯ ಆಧಾರದಲ್ಲಿದೆ. ಇದು ಎಲ್ಲ ರ‍್ಯಾಪಿಡೋ ಚಾಲಕರಿಗೂ ಅನ್ವಯಿಸುವುದಿಲ್ಲ. ಇಂಧನ, ವಾಹನ ನಿರ್ವಹಣೆ ಮತ್ತು ಇತರ ಖರ್ಚುಗಳನ್ನು ಕಳೆಯುವ ಮೊದಲು ಹಾಗೂ ನಂತರದ ಆದಾಯದಲ್ಲಿ ವ್ಯತ್ಯಾಸವಿರಬಹುದು.

ಒಟ್ಟಿನಲ್ಲಿ, ಪ್ರತಿಯೊಬ್ಬರ ಯಶಸ್ಸಿನ ವ್ಯಾಖ್ಯಾನವೂ ವಿಭಿನ್ನ. ಕೆಲವರಿಗೆ ಉನ್ನತ ಹುದ್ದೆ ಮುಖ್ಯವಾದರೆ, ಇನ್ನು ಕೆಲವರಿಗೆ ಉತ್ತಮ ಆದಾಯ, ಕುಟುಂಬದ ನೆಮ್ಮದಿ ಮತ್ತು ಸ್ವಂತ ಊರಿನಲ್ಲಿ ಬದುಕುವ ಸ್ವಾತಂತ್ರ್ಯ ಮುಖ್ಯ. ತಮ್ಮ ಪರಿಸ್ಥಿತಿಗೆ ತಕ್ಕ ನಿರ್ಧಾರ ತೆಗೆದುಕೊಂಡು ಸಂತೋಷದಿಂದ ಬದುಕುವುದೂ ಯಶಸ್ಸಿನ ಒಂದು ರೂಪವೇ ಎಂಬ ಸಂದೇಶವನ್ನು ಈ ಕಥೆ ನೀಡುತ್ತದೆ.

Today, I booked a Rapido bike ride for ₹198. The Rapido rider arrived, I told him the OTP, and as he started the bike, our conversation began along the way.

During the conversation, I asked him a few questions, and his answers left me surprised.

Me: Brother, how much do you earn in a day?

Rapido Rider: Sister, I earn up to ₹4,000 a day.

Me: What, brother! Do you earn only ₹4,000 in a month?

Rapido Rider: Oh no, sister! I’m telling you my daily earnings.

And then, what I heard next...1/2

— Neend Ki Rani (@Neend_Ki_Rani) October 17, 2026

ಬೆಂಗಳೂರಿನ ಉದ್ಯೋಗಿಗೆ ಸಂಬಳವೇ ಮುಳುವಾಯ್ತಾ? ರಾಜೀನಾಮೆ ನೀಡುವಂತೆ ಹೊಸ ಮ್ಯಾನೇಜರ್ ಒತ್ತಡ!

Chandrashekar GS — Wed, 28 Oct 2026 08:22:37 +0530

ಒಳ್ಳೆಯ ಸಂಬಳ ಪಡೆಯುತ್ತಿದ್ದ ಉದ್ಯೋಗಿಗೆ ಹೊಸ ಸಂಕಷ್ಟ

ಬೆಂಗಳೂರಿನಲ್ಲಿ ಕೆಲಸ ಮಾಡುವ ಉದ್ಯೋಗಿಯೊಬ್ಬರು ತಮ್ಮ ಸಂಬಳವೇ ಕೆಲಸಕ್ಕೆ ಕುತ್ತಾಗಿದೆಯೇ ಎಂಬ ಆತಂಕ ವ್ಯಕ್ತಪಡಿಸಿದ್ದಾರೆ. ಉತ್ತಮ ಸಂಬಳ ಪಡೆಯುತ್ತಿದ್ದರೂ, ಕೆಲಸದಲ್ಲಿ ಯಾವುದೇ ತಪ್ಪು ಮಾಡಿಲ್ಲ ಎಂದು ಹೇಳಿಕೊಂಡಿರುವ ಅವರಿಗೆ ಹೊಸ ಮ್ಯಾನೇಜರ್ ರಾಜೀನಾಮೆ ನೀಡುವಂತೆ ಕೇಳುತ್ತಿದ್ದಾರೆ ಎನ್ನಲಾಗಿದೆ. ಈ ವಿಚಾರವನ್ನು ಉದ್ಯೋಗಿ ಸಾಮಾಜಿಕ ಜಾಲತಾಣದ ರೆಡ್ಡಿಟ್‌ನಲ್ಲಿ ಹಂಚಿಕೊಂಡಿದ್ದು, ಇದೀಗ ಉದ್ಯೋಗಿಗಳಲ್ಲಿ ಚರ್ಚೆಗೆ ಕಾರಣವಾಗಿದೆ.

ಎರಡು ತಿಂಗಳ ಹಿಂದಷ್ಟೇ ಬದಲಾಗಿದ್ದ ಮ್ಯಾನೇಜರ್!

ಉದ್ಯೋಗಿಯ ಪೋಸ್ಟ್ ಪ್ರಕಾರ, ಸುಮಾರು ಎರಡು ತಿಂಗಳ ಹಿಂದೆ ಅವರ ಮ್ಯಾನೇಜರ್ ಬದಲಾಗಿದ್ದರು. ಹೊಸ ಮ್ಯಾನೇಜರ್ ಬಂದ ನಂತರ ಮುಂಬರುವ ಅಪ್ರೈಸಲ್‌ಗೂ ಮುನ್ನವೇ ರಾಜೀನಾಮೆ ನೀಡುವಂತೆ ಕೇಳುತ್ತಿದ್ದಾರೆ ಎಂದು ಅವರು ಆರೋಪಿಸಿದ್ದಾರೆ.

ಇದಕ್ಕೆ ನೀಡಿರುವ ಕಾರಣ, ಉದ್ಯೋಗಿಯ ಪ್ರಸ್ತುತ ಸಂಬಳ ತಂಡದ ಬಜೆಟ್‌ಗೆ ಹೋಲಿಸಿದರೆ ಹೆಚ್ಚಾಗಿದೆ ಎಂಬುದಾಗಿದೆ. ಮುಂದಿನ ವೇತನ ಪರಿಷ್ಕರಣೆಯ ಸಮಯ ಸಮೀಪಿಸುತ್ತಿರುವುದರಿಂದ, ಈ ಒತ್ತಡಕ್ಕೆ ಬಜೆಟ್ ಸಮಸ್ಯೆಯೇ ಕಾರಣವಾಗಿರಬಹುದು ಎಂದು ಉದ್ಯೋಗಿ ಅನುಮಾನ ವ್ಯಕ್ತಪಡಿಸಿದ್ದಾರೆ.

'ನಾನು ಯಾವುದೇ ತಪ್ಪು ಮಾಡಿಲ್ಲ, ಆತುರದ ನಿರ್ಧಾರ ಬೇಡ'

ತಮ್ಮ ಕೆಲಸದಲ್ಲಿ ಯಾವುದೇ ತಪ್ಪು ಮಾಡಿರುವುದು ತನಗೆ ತಿಳಿದಿಲ್ಲ ಎಂದು ಉದ್ಯೋಗಿ ಹೇಳಿದ್ದಾರೆ. ಕೆಲಸದ ಕಾರ್ಯಕ್ಷಮತೆ ಅಥವಾ ವೃತ್ತಿಪರ ನಡವಳಿಕೆಯ ಬಗ್ಗೆ ಸ್ಪಷ್ಟವಾದ ದೂರು ಇಲ್ಲದಿದ್ದರೂ, ಸಂಬಳದ ಕಾರಣಕ್ಕೆ ಕೆಲಸ ಬಿಡುವಂತೆ ಕೇಳುತ್ತಿರುವುದು ಅವರಿಗೆ ಗೊಂದಲ ಉಂಟುಮಾಡಿದೆ.

ಅಲ್ಲದೆ, ಉದ್ಯೋಗಿಗೆ ಎರಡು ತಿಂಗಳ ನೋಟಿಸ್ ಅವಧಿಯೂ ಇದೆ. ತಾವೇ ಸ್ವಯಂಪ್ರೇರಿತವಾಗಿ ರಾಜೀನಾಮೆ ನೀಡದಿದ್ದರೆ ಕಂಪನಿಯೇ ಕೆಲಸದಿಂದ ತೆಗೆದುಹಾಕುವ ಸಾಧ್ಯತೆ ಏನು, ಅಂತಹ ಸಂದರ್ಭದಲ್ಲಿ ಯಾವ ಪರಿಣಾಮಗಳನ್ನು ಎದುರಿಸಬೇಕಾಗಬಹುದು ಎಂಬ ಪ್ರಶ್ನೆಗಳನ್ನು ಅವರು ಮುಂದಿಟ್ಟಿದ್ದಾರೆ. ಆದರೆ, ಕಂಪನಿಯು ಅಧಿಕೃತವಾಗಿ ಕೆಲಸದಿಂದ ತೆಗೆದುಹಾಕುವ ಪ್ರಕ್ರಿಯೆ ಆರಂಭಿಸಿದೆಯೇ ಎಂಬುದು ಸ್ಪಷ್ಟವಾಗಿಲ್ಲ.

ಉದ್ಯೋಗಿಗೆ ನೆಟ್ಟಿಗರ ಸಲಹೆಗಳೇನು?

ಈ ಪೋಸ್ಟ್‌ಗೆ ಪ್ರತಿಕ್ರಿಯಿಸಿರುವ ಹಲವರು, ಮ್ಯಾನೇಜರ್ ಒತ್ತಡಕ್ಕೆ ಮಣಿದು ತಕ್ಷಣ ರಾಜೀನಾಮೆ ನೀಡಬಾರದು ಎಂದು ಸಲಹೆ ನೀಡಿದ್ದಾರೆ.

ಎಲ್ಲವನ್ನೂ ದಾಖಲಿಸಿಕೊಳ್ಳಿ: ಮ್ಯಾನೇಜರ್ ಜೊತೆಗಿನ ಮಾತುಕತೆ ಮತ್ತು ಇಮೇಲ್‌ಗಳ ದಾಖಲೆಗಳನ್ನು ಸುರಕ್ಷಿತವಾಗಿ ಇಟ್ಟುಕೊಳ್ಳಿ.
ಎಚ್‌ಆರ್‌ಗೆ ಮಾಹಿತಿ ನೀಡಿ: ರಾಜೀನಾಮೆ ನೀಡುವಂತೆ ಒತ್ತಡ ಹೇರುತ್ತಿರುವ ವಿಚಾರವನ್ನು ಕಂಪನಿಯ ಮಾನವ ಸಂಪನ್ಮೂಲ ವಿಭಾಗದ ಗಮನಕ್ಕೆ ಲಿಖಿತವಾಗಿ ತನ್ನಿ.
ಬೇರೆ ಉದ್ಯೋಗ ಹುಡುಕಿ: ಪ್ರಸ್ತುತ ಕೆಲಸದ ಪರಿಸ್ಥಿತಿಯನ್ನು ಪರಿಶೀಲಿಸುತ್ತಲೇ ಹೊಸ ಉದ್ಯೋಗಾವಕಾಶಗಳನ್ನು ಹುಡುಕುವುದು ಉತ್ತಮ ಎಂದು ಕೆಲವರು ಹೇಳಿದ್ದಾರೆ.

ಈ ಘಟನೆ ಉದ್ಯೋಗಿಗಳ ಸಂಬಳ, ಕಂಪನಿಯ ಬಜೆಟ್ ಮತ್ತು ಕೆಲಸದ ಭದ್ರತೆಯ ನಡುವಿನ ಸಂಬಂಧದ ಕುರಿತು ಚರ್ಚೆ ಹುಟ್ಟುಹಾಕಿದೆ. ಆದರೆ ಉದ್ಯೋಗಿಯ ಹೇಳಿಕೆ ಸಾಮಾಜಿಕ ಜಾಲತಾಣದ ಪೋಸ್ಟ್ ಆಧಾರಿತವಾಗಿದ್ದು, ಕಂಪನಿಯ ಪ್ರತಿಕ್ರಿಯೆ ಲಭ್ಯವಿಲ್ಲ.

Manager is asking me to resign cause my salary is highby u/Desperate_Price_6691 in IndianWorkplace

‘ನನ್ನ ಸಿಬ್ಬಂದಿಯ ಗೌರವವೇ ಮೊದಲು’… ಮಾಣಿಗೆ ಹೊಡೆದ ಗ್ರಾಹಕನನ್ನು ಶಾಶ್ವತವಾಗಿ ಬ್ಯಾನ್ ಮಾಡಿದ ಹೋಟೆಲ್

Naveen Kodase — Mon, 26 Oct 2026 16:20:09 +0530

ಆಗ್ರಾದ ತಾಜ್ ಹೋಟೆಲ್‌ನಲ್ಲಿ ವೇಟರ್‌ಗೆ ಕಪಾಳಮೋಕ್ಷ: ಅತಿಥಿಗೆ ಶಾಶ್ವತ ನಿಷೇಧ ಹೇರಿದ ಆಡಳಿತ ಮಂಡಳಿ

ಆತಿಥ್ಯ ಕ್ಷೇತ್ರದಲ್ಲಿ ಗ್ರಾಹಕರಿಗೆ ಗೌರವ ನೀಡುವುದು ಎಷ್ಟು ಮುಖ್ಯವೋ, ಅಲ್ಲಿನ ಸಿಬ್ಬಂದಿಯ ಗೌರವ ಮತ್ತು ಸುರಕ್ಷತೆಯನ್ನು ಕಾಪಾಡುವುದೂ ಅಷ್ಟೇ ಮುಖ್ಯ. ಆಗ್ರಾದ ತಾಜ್ ಹೋಟೆಲ್‌ನಲ್ಲಿ ಅತಿಥಿಯೊಬ್ಬರು ವೇಟರ್‌ಗೆ ಕಪಾಳಮೋಕ್ಷ ಮಾಡಿದ್ದಾರೆ ಎಂಬ ಆರೋಪದ ಬೆನ್ನಲ್ಲೇ, ಹೋಟೆಲ್ ಆಡಳಿತವು ಆ ಅತಿಥಿಯನ್ನು ತನ್ನ ಆವರಣಕ್ಕೆ ಪ್ರವೇಶಿಸದಂತೆ ಶಾಶ್ವತವಾಗಿ ನಿಷೇಧಿಸಿದೆ. ಈ ಘಟನೆ ಉದ್ಯೋಗಿಗಳ ಗೌರವ ಮತ್ತು ಕೆಲಸದ ಸ್ಥಳದಲ್ಲಿನ ಘನತೆಯ ಕುರಿತು ಚರ್ಚೆಗೆ ಕಾರಣವಾಗಿದೆ.

ಭಾಷೆಯ ಸಮಸ್ಯೆಯಿಂದ ಆರಂಭವಾದ ವಿವಾದ

ಆಗ್ರಾದ ತಾಜ್ ಹೋಟೆಲ್‌ ಆ್ಯಂಡ್ ಕನ್ವೆನ್ಷನ್ ಸೆಂಟರ್‌ನ ರೆಸ್ಟೋರೆಂಟ್‌ನಲ್ಲಿ ಕಾಂತಿ ಎಂಬ ವೇಟರ್ ಅತಿಥಿಯೊಬ್ಬರಿಗೆ ಸೇವೆ ಸಲ್ಲಿಸುತ್ತಿದ್ದರು. ಈ ಸಂದರ್ಭದಲ್ಲಿ ಇಂಗ್ಲಿಷ್‌ ಸಂವಹನದಲ್ಲಿ ತೊಂದರೆ ಉಂಟಾಗಿ, ಇಬ್ಬರ ನಡುವೆ ತಪ್ಪು ತಿಳಿವಳಿಕೆ ಉಂಟಾಗಿದೆ ಎಂದು ಹೋಟೆಲ್ ನಿರ್ವಹಣೆಯೊಂದಿಗೆ ಸಂಬಂಧ ಹೊಂದಿರುವ ಪರಿತೋಷ್ ಲಧಾನಿ ತಿಳಿಸಿದ್ದಾರೆ.

ಈ ತಪ್ಪು ತಿಳಿವಳಿಕೆಯ ಬಳಿಕ ಅತಿಥಿಯು ವೇಟರ್‌ಗೆ ಕಪಾಳಮೋಕ್ಷ ಮಾಡಿದ್ದಾರೆ ಎಂಬುದಾಗಿ ಲಧಾನಿ ತಮ್ಮ ಲಿಂಕ್ಡ್‌ಇನ್‌ ಪೋಸ್ಟ್‌ನಲ್ಲಿ ಆರೋಪಿಸಿದ್ದಾರೆ. ಗ್ರಾಹಕರೊಂದಿಗೆ ಮಾತನಾಡುವಾಗ ಭಾಷಾ ಸಮಸ್ಯೆ ಎದುರಾಗಬಹುದು. ಆದರೆ ಅದಕ್ಕಾಗಿ ಸಿಬ್ಬಂದಿಯ ಮೇಲೆ ದೈಹಿಕ ಹಲ್ಲೆ ನಡೆಸುವುದು ಯಾವುದೇ ಕಾರಣಕ್ಕೂ ಸಮರ್ಥನೀಯವಲ್ಲ ಎಂಬ ಸಂದೇಶ ಈ ಘಟನೆಯಿಂದ ಮುನ್ನೆಲೆಗೆ ಬಂದಿದೆ.

ಕೆಲಸ ಕಳೆದುಕೊಳ್ಳುವ ಭಯದಿಂದ ದೂರು ನೀಡದ ವೇಟರ್!

“ಈ ಹೋಟೆಲ್‌ನಲ್ಲಿ ಕೆಲಸ ಮಾಡುವುದು ನನ್ನ ಕನಸು”

ಈ ಘಟನೆಯಲ್ಲಿನ ಅತ್ಯಂತ ಗಮನಾರ್ಹ ಅಂಶವೆಂದರೆ, ಹಲ್ಲೆಗೊಳಗಾದ ವೇಟರ್ ಕಾಂತಿ ತಕ್ಷಣವೇ ಆಡಳಿತ ಮಂಡಳಿಗೆ ದೂರು ನೀಡಿರಲಿಲ್ಲ ಎನ್ನುವುದು. ಲಧಾನಿ ಅವರು ಈ ಬಗ್ಗೆ ವಿಚಾರಿಸಿದಾಗ, ಕಾಂತಿ ಹತ್ತಿರದ ಗ್ರಾಮದ ಕೃಷಿಕ ಕುಟುಂಬದಿಂದ ಬಂದಿದ್ದು, ಹೋಟೆಲ್‌ನಲ್ಲಿ ಕೆಲಸ ಮಾಡುವುದು ತಮ್ಮ ಕನಸು ಎಂದು ಹೇಳಿಕೊಂಡಿದ್ದಾರೆ.

ಕೆಲಸಕ್ಕೆ ತೊಂದರೆಯಾಗಬಹುದು ಅಥವಾ ಕೆಲಸ ಕಳೆದುಕೊಳ್ಳಬಹುದು ಎಂಬ ಆತಂಕದಿಂದಲೇ ತಾವು ದೂರು ನೀಡಲು ಹಿಂಜರಿದಿದ್ದಾಗಿ ಕಾಂತಿ ತಿಳಿಸಿದ್ದಾರೆ ಎಂದು ವರದಿ ವಿವರಿಸುತ್ತದೆ. ಉದ್ಯೋಗಿಯೊಬ್ಬರು ತಮ್ಮ ಘನತೆಗೆ ಧಕ್ಕೆಯಾದರೂ ಕೆಲಸ ಉಳಿಸಿಕೊಳ್ಳಲು ಮೌನವಾಗಿರುವ ಪರಿಸ್ಥಿತಿ ಎಷ್ಟು ಕಳವಳಕಾರಿ ಎಂಬುದನ್ನು ಈ ಘಟನೆ ತೋರಿಸುತ್ತದೆ.

ಅತಿಥಿಗೆ ಶಾಶ್ವತ ನಿಷೇಧ

ಕಾಂತಿ ಅವರಿಂದ ಘಟನೆ ತಿಳಿದ ಬಳಿಕ, ಹೋಟೆಲ್ ಆಡಳಿತವು ಅತಿಥಿಯ ವಿರುದ್ಧ ಕಠಿಣ ಕ್ರಮ ಕೈಗೊಂಡಿದೆ. ಮರುದಿನವೇ ಆ ವ್ಯಕ್ತಿಯನ್ನು ಹೋಟೆಲ್‌ನಿಂದ ಶಾಶ್ವತವಾಗಿ ನಿಷೇಧಿಸಿರುವುದಾಗಿ ಪರಿತೋಷ್ ಲಧಾನಿ ತಿಳಿಸಿದ್ದಾರೆ.

“ಅತಿಥಿ ಎಷ್ಟೇ ಶ್ರೀಮಂತರಾಗಿರಲಿ, ಪ್ರಭಾವಶಾಲಿಯಾಗಿರಲಿ ಅಥವಾ ಹೋಟೆಲ್‌ನಲ್ಲಿ ಎಷ್ಟೇ ಹಣ ಖರ್ಚು ಮಾಡಲಿ, ನಮ್ಮ ಸಿಬ್ಬಂದಿಯನ್ನು ಅಗೌರವಿಸುವ ಹಕ್ಕು ಯಾರಿಗೂ ಇಲ್ಲ” ಎಂಬುದು ಲಧಾನಿ ಅವರ ಸ್ಪಷ್ಟ ಸಂದೇಶವಾಗಿದೆ.

ಸಾಮಾಜಿಕ ಜಾಲತಾಣದಲ್ಲಿ ನಿರ್ಧಾರಕ್ಕೆ ಮೆಚ್ಚುಗೆ

ಲಧಾನಿ ಅವರ ಲಿಂಕ್ಡ್‌ಇನ್‌ ಪೋಸ್ಟ್‌ಗೆ ಸಾಮಾಜಿಕ ಜಾಲತಾಣದಲ್ಲಿ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಗ್ರಾಹಕರನ್ನು ಸಂತೋಷಪಡಿಸುವುದರ ಜೊತೆಗೆ ಉದ್ಯೋಗಿಗಳ ಗೌರವವನ್ನು ಕಾಪಾಡುವುದು ಕೂಡ ಉತ್ತಮ ನಿರ್ವಹಣೆಯ ಲಕ್ಷಣ ಎಂದು ಹಲವರು ಅಭಿಪ್ರಾಯಪಟ್ಟಿದ್ದಾರೆ.

ಈ ಘಟನೆ ಒಂದು ಮುಖ್ಯ ಪಾಠವನ್ನು ನೆನಪಿಸುತ್ತದೆ: ಸೇವಾ ಕ್ಷೇತ್ರದಲ್ಲಿ ಕೆಲಸ ಮಾಡುವವರೂ ಗೌರವಕ್ಕೆ ಅರ್ಹರು. ಗ್ರಾಹಕರ ಅಸಮಾಧಾನವನ್ನು ಮಾತುಕತೆಯ ಮೂಲಕ ಪರಿಹರಿಸಬಹುದು. ಆದರೆ ದೈಹಿಕ ಹಲ್ಲೆ ಅಥವಾ ಅವಮಾನವನ್ನು ಸಹಿಸಿಕೊಳ್ಳಬೇಕೆಂಬ ನಿರೀಕ್ಷೆ ಯಾರ ಮೇಲೂ ಇರಬಾರದು.

KSRPಯಲ್ಲಿ 25 ಅಂಕ ಪಡೆದಿದ್ದ ಅಭ್ಯರ್ಥಿ, VAO ಪರೀಕ್ಷೆಯಲ್ಲಿ 151 ಅಂಕ ಗಳಿಸಿದ್ದೇಗೆ? ತನಿಖೆಗೆ ಆದೇಶಿಸಿದ KEA!

Sathish Kumar KH — Wed, 28 Oct 2026 17:21:34 +0530

ಬೆಂಗಳೂರು (ಅ.28): ರಾಜ್ಯದಲ್ಲಿ ಇತ್ತೀಚೆಗೆ ನಡೆದ ಗ್ರಾಮ ಆಡಳಿತಾಧಿಕಾರಿ (VAO) ನೇಮಕಾತಿ ಪರೀಕ್ಷೆಯಲ್ಲಿ ಭಾರೀ ಅಕ್ರಮ ನಡೆದಿದೆಯೇ ಎಂಬ ಅನುಮಾನ ಇದೀಗ ಸಾರ್ವಜನಿಕ ವಲಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಕೆಎಸ್ಆರ್‌ಪಿ (KSRP) ಕಾನ್ಸ್‌ಟೇಬಲ್ ಪರೀಕ್ಷೆಯಲ್ಲಿ ಕೇವಲ 25 ಅಂಕ ಪಡೆದಿದ್ದ ಸಾಧಾರಣ ಅಭ್ಯರ್ಥಿಯೊಬ್ಬ, ವಿಎಒ ಪರೀಕ್ಷೆಯಲ್ಲಿ ಬರೋಬ್ಬರಿ 151 ಅಂಕಗಳನ್ನು ಪಡೆದಿರುವುದು ಬೆಳಕಿಗೆ ಬಂದಿದೆ. ಈ ಅನುಮಾನಾಸ್ಪದ ಬೆಳವಣಿಗೆಯ ವಿರುದ್ಧ ಅಭ್ಯರ್ಥಿಗಳು ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಆಕ್ರೋಶ ಭುಗಿಲೆದ್ದ ಬೆನ್ನಲ್ಲೇ, ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (KEA) ಸಮಗ್ರ ತನಿಖೆಗೆ ಆದೇಶಿಸಿದೆ.

ಸಾಮಾಜಿಕ ಮಾಧ್ಯಮಗಳಲ್ಲಿ ಭುಗಿಲೆದ್ದ ಆಕ್ರೋಶ:

ಹಾವೇರಿ ಜಿಲ್ಲೆಯ ಶಿಗ್ಗಾವಿ ಪರೀಕ್ಷಾ ಕೇಂದ್ರದಲ್ಲಿ ಅಕ್ಟೋಬರ್ 4ರಂದು ನಡೆದ ವಿಎಒ ಪರೀಕ್ಷೆಯನ್ನು ಅದೇ ಜಿಲ್ಲೆಯ ಶಂಕರ ಬನ್ನೂರು ಎಂಬ ಅಭ್ಯರ್ಥಿ ಬರೆದಿದ್ದರು. ಈ ಅಭ್ಯರ್ಥಿಯ ಶೈಕ್ಷಣಿಕ ಹಿನ್ನೆಲೆ ಅಷ್ಟೇನೂ ಹೇಳಿಕೊಳ್ಳುವಂತಿಲ್ಲ. ಅಲ್ಲದೆ, ಇತ್ತೀಚೆಗೆ ನಡೆದ ಕೆಎಸ್‌ಆರ್‌ಪಿ ಪರೀಕ್ಷೆಯಲ್ಲಿ ಕೇವಲ 25 ಅಂಕಗಳನ್ನಷ್ಟೇ ಪಡೆಯಲು ಶಕ್ತರಾಗಿದ್ದರು. ಆದರೆ, ಕಠಿಣ ಸ್ಪರ್ಧೆ ಇರುವ ವಿಎಒ ಪರೀಕ್ಷೆಯಲ್ಲಿ ದಿಢೀರನೆ 151 ಅಂಕಗಳನ್ನು ಗಳಿಸಿದ್ದು ಹೇಗೆ? ಇಲ್ಲಿ ಪರೀಕ್ಷಾ ಅಕ್ರಮ ಅಥವಾ ಭ್ರಷ್ಟಾಚಾರ ನಡೆದಿದೆಯೇ? ಎಂಬ ಗಂಭೀರ ಅನುಮಾನಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದವು. ಹಗಲಿರುಳು ಕಷ್ಟಪಟ್ಟು ಓದಿದ ಪ್ರಾಮಾಣಿಕ ಅಭ್ಯರ್ಥಿಗಳಿಗೆ ಅನ್ಯಾಯವಾಗುತ್ತಿದೆ ಎಂದು ಆಕ್ರೋಶ ವ್ಯಕ್ತವಾಗಿತ್ತು.

ಶಿಗ್ಗಾವಿ ಕೇಂದ್ರದ ಸಿಸಿಟಿವಿ ಪರಿಶೀಲನೆಗೆ ಹಾವೇರಿ ಡಿಸಿಗೆ ಪತ್ರ:

ಈ ಎಲ್ಲಾ ಗೊಂದಲ ಮತ್ತು ಶಂಕೆಗಳಿಗೆ ತೆರೆ ಎಳೆಯಲು ಮುಂದಾಗಿರುವ ಕೆಇಎ, ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದೆ. ಜಿಲ್ಲಾ ಪರೀಕ್ಷಾ ಮುಖ್ಯ ಅಧೀಕ್ಷಕರೂ ಆಗಿರುವ ಹಾವೇರಿ ಜಿಲ್ಲಾಧಿಕಾರಿಯವರಿಗೆ ಪತ್ರ ಬರೆದಿರುವ ಕೆಇಎ, "ಶಿಗ್ಗಾವಿ ಪರೀಕ್ಷಾ ಕೇಂದ್ರದಲ್ಲಿ ಪರೀಕ್ಷಾ ನಿಯಮಗಳ ಉಲ್ಲಂಘನೆ ಅಥವಾ ಲೋಪಗಳು ಆಗಿವೆಯೇ ಎಂಬುದನ್ನು ಸಿಸಿಟಿವಿ (CCTV) ವಿಡಿಯೋ ತುಣುಕುಗಳ ಮೂಲಕ ಕೂಲಂಕಷವಾಗಿ ಪರಿಶೀಲಿಸಿ ವರದಿ ನೀಡಬೇಕು. ಒಂದು ವೇಳೆ ಯಾವುದೇ ಅಕ್ರಮ ಸಾಬೀತಾದರೆ ತಕ್ಷಣವೇ ಪೊಲೀಸರಿಗೆ ದೂರು ನೀಡಿ ಎಫ್‌ಐಆರ್ ದಾಖಲಿಸಬೇಕು" ಎಂದು ಕಟ್ಟುನಿಟ್ಟಿನ ಸೂಚನೆ ನೀಡಿದೆ.

ಕೆಇಎ ತಪಾಸಣೆಯಲ್ಲಿ ಕಂಡುಬಂದ ಪ್ರಮುಖ ಅಂಶಗಳು:

ಪ್ರಾಧಿಕಾರವು ಪ್ರಾಥಮಿಕವಾಗಿ ತನ್ನ ಸರ್ವರ್ ಹಾಗೂ ದಾಖಲೆಗಳನ್ನು ಪರಿಶೀಲಿಸಿದ್ದು, ಕೆಳಗಿನ ಅಂಶಗಳನ್ನು ಸ್ಪಷ್ಟಪಡಿಸಿದೆ:

ಅಭ್ಯರ್ಥಿಯೇ ಪರೀಕ್ಷೆ ಬರೆದಿದ್ದಾನೆ: ಅರ್ಜಿ ಸಲ್ಲಿಸಿದ ಮೂಲ ಅಭ್ಯರ್ಥಿಯೇ ಪರೀಕ್ಷಾ ಕೇಂದ್ರಕ್ಕೆ ಹಾಜರಾಗಿದ್ದು, ಮುಖ ಚಹರೆ (Face Recognition) ತಂತ್ರಜ್ಞಾನದ ಮೂಲಕ ಇದು ದೃಢಪಟ್ಟಿದೆ.

ಒಎಂಆರ್ (OMR) ಶೀಟ್ ನೈಜತೆ: ಅಭ್ಯರ್ಥಿಗೆ ನೀಡಲಾದ ಒಎಂಆರ್ ಶೀಟ್ ಸರಿಯಾಗಿದ್ದು, ಅಕ್ಟೋಬರ್ 5ರಂದೇ ಅದನ್ನು ಸ್ಕ್ಯಾನ್ ಮಾಡಿ ಕೆಇಎ ಅಧಿಕೃತ ವೆಬ್‌ಸೈಟ್‌ನಲ್ಲಿ ಅಪ್‌ಲೋಡ್ ಮಾಡಲಾಗಿದೆ.

ದಾಖಲೆಗಳಲ್ಲಿ ವ್ಯತ್ಯಾಸ: ಅಭ್ಯರ್ಥಿಯು 2013ರಲ್ಲೇ ದ್ವಿತೀಯ ಪಿಯುಸಿ ಉತ್ತೀರ್ಣರಾಗಿದ್ದು, ಇದು ಪದವಿ ಪೂರ್ವ ಶಿಕ್ಷಣ ಇಲಾಖೆಯ ಡೇಟಾದೊಂದಿಗೆ ಮ್ಯಾಚ್ ಆಗಿದೆ. ಆದರೆ, ಇದೇ ಅಭ್ಯರ್ಥಿ ಕೆಎಸ್‌ಆರ್‌ಪಿ ಅರ್ಜಿಯಲ್ಲಿ ತಾನು 2026ರಲ್ಲಿ ಪಾಸಾಗಿದ್ದೇನೆ ಎಂದು ತಿದ್ದುಪಡಿ ಮಾಡಿಕೊಂಡಿರುವುದು ಸರ್ವರ್‌ನಲ್ಲಿ ದಾಖಲಾಗಿದೆ.

#VaoRecruitmentExam:

#KSRP ಕಾನ್ಸ್‌ಟೇಬಲ್ ಪರೀಕ್ಷೆಯಲ್ಲಿ ಕೇವಲ‌ 25 ಅಂಕ ಪಡೆದಿದ್ದ ಹಾವೇರಿ ಜಿಲ್ಲೆಯ ಅಭ್ಯರ್ಥಿಯೊಬ್ಬ ಗ್ರಾಮ ಆಡಳಿತಾಧಿಕಾರಿ (#VAO) ನೇಮಕಾತಿ ಪರೀಕ್ಷೆಯಲ್ಲಿ ‌151 ಅಂಕಗಳನ್ನು ಹೇಗೆ ಪಡೆದ ಎಂದು ಸಾಮಾಜಿಕ ಮಾಧ್ಯಮದಲ್ಲಿ ವ್ಯಕ್ತವಾದ ಅನುಮಾನಗಳ ಬಗ್ಗೆ #KEA ತನಿಖೆಗೆ ಆದೇಶಿಸಿದೆ.

ಈ ಸಂಬಂಧ ಜಿಲ್ಲಾ ಪರೀಕ್ಷಾ ಮುಖ್ಯ ಅಧೀಕ್ಷಕರೂ ಆದ ಹಾವೇರಿ ಜಿಲ್ಲಾಧಿಕಾರಿಯವರಿಗೆ ಪತ್ರ ವರೆದು ಶಿಗ್ಗಾವಿ ಪರೀಕ್ಷಾ ಕೇಂದ್ರದಲ್ಲಿ ಏನಾದರು ಲೋಪಗಳು ಆಗಿವೆಯೇ‌ ಎಂಬುದರ ಬಗ್ಗೆ ಸಿಸಿಟಿವಿ ವಿಡಿಯೊ ತುಣುಕುಗಳನ್ನು ನೋಡಿ, ಸಮಗ್ರವಾಗಿ ವಿಚಾರಣೆ ನಡೆಸಿ ವರದಿ‌ ನೀಡಲು ಕೋರಲಾಗಿದೆ. ಅಗತ್ಯ ಬಿದ್ದರೆ‌ ಪೊಲೀಸರಿಗೆ ದೂರು ಕೊಡುವುದಕ್ಕೂ ಸೂಚಿಸಲಾಗಿದೆ.

ಹಾವೇರಿ ಜಿಲ್ಲೆಯ ಶಿಗ್ಗಾವಿ ಪರೀಕ್ಷಾ ಕೇಂದ್ರದಲ್ಲಿ ‌ಅ.4ರಂದು ನಡೆದ VAO ಪರೀಕ್ಷೆಯನ್ನು ಅದೇ ಜಿಲ್ಲೆಯ ಶಂಕರ ಬನ್ನೂರು ಎಂಬುವರು ಬರೆದಿದ್ದಾರೆ. ಇವರ ಶೈಕ್ಷಣಿಕ ಹಿನ್ನೆಲೆ ಕೂಡ ಹೇಳಿಕೊಳ್ಳುವಂತಿಲ್ಲ.‌ ಅಂತಹ ಮಾಮೂಲಿ ಅಭ್ಯರ್ಥಿ ಇಷ್ಟೊಂದು ಅಂಕ ಹೇಗೆ ಪಡೆದ? ಇದರಲ್ಲಿ ಭ್ರಷ್ಟಾಚಾರ ನಡೆದಿರುವ ಬಗ್ಗೆ ಶಂಕೆ ವ್ಯಕ್ತಪಡಿಸಿ, ಅನೇಕರು ಸಾಮಾಜಿಕ ಮಾಧ್ಯಮದಲ್ಲಿ ಚರ್ಚೆ ನಡೆಸಿದ್ದಾರೆ. ಈ ಅನುಮಾನಗಳಿಗೆ‌ ಇತಿಶ್ರೀ ಹಾಡಲು ತನಿಖೆಯ ತೀರ್ಮಾನ ಮಾಡಲಾಗಿದೆ.

ಪ್ರಾಧಿಕಾರದಲ್ಲಿ ಲಭ್ಯವಾಗಿರುವ ಮಾಹಿತಿ ಪ್ರಕಾರ, ಅರ್ಜಿ ಹಾಕಿದ್ದ ಅಭ್ಯರ್ಥಿಯೇ‌ ಕೇಂದ್ರಕ್ಕೆ ಹೋಗಿ ಪರೀಕ್ಷೆ‌ ಬರೆದಿದ್ದಾರೆ. ಇದು ಮುಖ ಚಹರೆ ತಂತ್ರಜ್ಞಾನದ ಮೂಲಕ ದೃಢೀಕರಣ ಕೂಡ ಆಗಿದೆ. ಅಭ್ಯರ್ಥಿಗೆ ಕೊಟ್ಟಿರುವ ಒಎಂಅರ್ ಕೂಡ ಸರಿ ಇದೆ. ಅಲ್ಲದೆ ಅದೇ ಒಎಂಆರ್‌ ಅನ್ನು ಅ.5ರಂದು ಸ್ಕ್ಯಾನ್ ಮಾಡಿ ಕೆಇಎ ವೆಬ್ ಸೈಟ್ ನಲ್ಲಿ ಅಪ್ ಲೋಡ್ ಮಾಡಲಾಗಿದೆ. ಇದಾರಚೆಗೆ ಶಿಗ್ಗಾವಿ ಪರೀಕ್ಷಾ ಕೇಂದ್ರದಲ್ಲಿ ಏನಾದರು ಲೋಪಗಳು ಆಗಿವೆಯೇ ಎಂಬುದನ್ನು ಅಲ್ಲಿನ ಜಿಲ್ಲಾಧಿಕಾರಿಯೇ‌ ಪರಿಶೀಲಿಸಿ ವರದಿ ನೀಡಬೇಕಾಗಿದೆ.

ಸದರಿ ಅಭ್ಯರ್ಥಿ‌ ದ್ವಿತೀಯ ಪಿಯುಸಿ ಉತ್ತೀರ್ಣರಾಗಿರುವುದು‌ 2013ರಲ್ಲಿ. ಇದು ವಿಎಒ ಹುದ್ದೆಗೆ ಅರ್ಜಿ‌ ಹಾಕಿದ ಸಂದರ್ಭದಲ್ಲಿ ಪದವಿ ಪೂರ್ವ ಶಿಕ್ಷಣ ಇಲಾಖೆಯ‌ ದತ್ತಾಂಶದ ಜತೆ‌ ಆನ್ ಲೈನ್ ನಲ್ಲಿ ಹೊಂದಾಣಿಕೆ ಆಗಿದೆ. ಅದರೆ ಕೆಎಸ್ಆರ್ ಪಿ ಅರ್ಜಿಯಲ್ಲಿ ಇದೇ ಅಭ್ಯರ್ಥಿ ತಾನು ಉತ್ತೀರ್ಣನಾಗಿದ್ದು 2026ರಲ್ಲಿ ಎಂದು ತಿದ್ದುಪಡಿ‌ ಮಾಡಿಕೊಂಡಿರುವುದೂ ಪ್ರಾಧಿಕಾರದ ಸರ್ವರ್ ನಲ್ಲಿ ದಾಖಲಾಗಿದೆ.

ಕಷ್ಟಪಟ್ಟು ಓದುವ ಅಭ್ಯರ್ಥಿಗಳಿಗೆ ಯಾವುದೇ ರೀತಿಯಲ್ಲೂ ಅನ್ಯಾಯ ಆಗಬಾರದೆಂದು ನೂರಕ್ಕೆ ನೂರು ಪಾರದರ್ಶಕವಾಗಿ ಪರೀಕ್ಷೆ‌ ನಡೆಸುವ ಉದ್ದೇಶದಿಂದ ಪ್ರಾಧಿಕಾರವು ಕಳೆದೆರಡು ವರ್ಷಗಳಿಂದ ಒಎಂಆರ್ ಪ್ರತಿ ಸ್ಕ್ಯಾನ್ ಮಾಡಿ ವೆಬ್ ಸೈಟ್ ಗೆ ಹಾಕುವುದು ಸೇರಿದಂತೆ ಅನೇಕ ಸುಧಾರಣಾ ಕ್ರಮಗಳನ್ನು ಕೈಗೊಂಡಿದೆ. ಇದರ‌ ನಡುವೆಯೂ ಏನಾದರು ಲೋಪಗಳಿದ್ದರೆ ಅವುಗಳನ್ನು‌ ಬಯಲಿಗೆಳೆದು ಕಠಿಣ ಕಾನೂನು ಕ್ರಮ ತೆಗೆದುಕೊಳ್ಳಲು ಈ ತನಿಖೆ‌‌ ಸಹಕಾರಿಯಾಗಲಿದೆ. ಈ ಕಾರಣಕ್ಕೇ ತನಿಖೆಗೆ ಆದೇಶ ನೀಡಲಾಗಿದೆ.

- ಹೆಚ್.ಪ್ರಸನ್ನ ಐಎಎಸ್

ಕಾರ್ಯನಿರ್ವಾಹಕ ನಿರ್ದೇಶಕ

ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ

ಈ ಪ್ರಕರಣ ಕುರಿತು #KEA ಕಾರ್ಯನಿರ್ವಾಹಕ ನಿರ್ದೇಶಕ ಹೆಚ್ ಪ್ರಸನ್ನ ಅವರು KEA ವಿಕಸನ ಯೂಟ್ಯೂಬ್ ಚಾನೆಲ್ ಜತೆ‌ ಮಾತನಾಡಿದ್ದಾರೆ. ಅದರ ಲಿಂಕ್ ಇಲ್ಲಿದೆ ನೋಡಿ.

https://t.co/OdVSW1YHqe

@CMofKarnataka

@brayareddi

@S_PrakashPatil

— ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ KEA (@KEA_karnataka) October 28, 2026

ಪ್ರಾಮಾಣಿಕ ಅಭ್ಯರ್ಥಿಗಳಿಗೆ ಅನ್ಯಾಯವಾಗಲು ಬಿಡೆವು:

ಈ ಕುರಿತು ಅಧಿಕೃತ ಪ್ರಕಟಣೆ ಹೊರಡಿಸಿರುವ ಕರ್ನಾಟಕ ಪರೀಕ್ಷಾ ಪ್ರಾಧಿಕಾರದ ಕಾರ್ಯನಿರ್ವಾಹಕ ನಿರ್ದೇಶಕ ಹೆಚ್. ಪ್ರಸನ್ನ ಐಎಎಸ್, 'ಕಷ್ಟಪಟ್ಟು ಓದುವ ಅರ್ಹ ಅಭ್ಯರ್ಥಿಗಳಿಗೆ ಯಾವುದೇ ಕಾರಣಕ್ಕೂ ಅನ್ಯಾಯವಾಗಬಾರದು. ಪರೀಕ್ಷೆಗಳನ್ನು ಶೇ. 100ರಷ್ಟು ಪಾರದರ್ಶಕವಾಗಿ ನಡೆಸಲು ಕಳೆದ 2 ವರ್ಷಗಳಿಂದ ಒಎಂಆರ್ ಪ್ರತಿಗಳನ್ನು ಸ್ಕ್ಯಾನ್ ಮಾಡಿ ವೆಬ್‌ಸೈಟ್‌ಗೆ ಹಾಕುವುದು ಸೇರಿದಂತೆ ಹತ್ತು ಹಲವು ಕ್ರಾಂತಿಕಾರಿ ಕ್ರಮಗಳನ್ನು ಜಾರಿಗೆ ತರಲಾಗಿದೆ. ಈ ವ್ಯವಸ್ಥೆಯ ನಡುವೆಯೂ ಪರೀಕ್ಷಾ ಕೇಂದ್ರದಲ್ಲಿ ಏನಾದರೂ ಸ್ಥಳೀಯ ಲೋಪಗಳಾಗಿದ್ದರೆ, ಅದನ್ನು ಬಯಲಿಗೆಳೆದು ತಪ್ಪಿತಸ್ಥರ ವಿರುದ್ಧ ನಿರ್ದಾಕ್ಷಿಣ್ಯವಾಗಿ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು. ಅದಕ್ಕಾಗಿಯೇ ಈ ತನಿಖೆಗೆ ಆದೇಶಿಸಲಾಗಿದೆ' ಎಂದು ಸ್ಪಷ್ಟಪಡಿಸಿದ್ದಾರೆ.

Office politics: ಕಷ್ಟಪಟ್ಟು ದುಡಿದು ಒಳ್ಳೆಯ ಸಂಬಳ ಪಡೆದಿದ್ದೇ ತಪ್ಪಾಯ್ತಾ? ಬೆಂಗಳೂರಿನ ಉದ್ಯೋಗಿಗೆ ಮ್ಯಾನೇಜರ್‌ ಕಿರುಕುಳ

Sushma Hegde — Thu, 22 Oct 2026 10:29:54 +0530

ಬೆಂಗಳೂರಿನಲ್ಲಿ ಕೆಲಸ ಮಾಡುವ ಉದ್ಯೋಗಿಯೊಬ್ಬರಿಗೆ ತಮ್ಮ ಸಂಬಳವೇ ಸಮಸ್ಯೆಯಾಗಿ ಪರಿಣಮಿಸಿದೆಯೇ? ಮುಂಬರುವ ವೇತನ ಹೆಚ್ಚಳದ (Appraisal) ಮುನ್ನವೇ ರಾಜೀನಾಮೆ ನೀಡುವಂತೆ ಮ್ಯಾನೇಜರ್‌ ಒತ್ತಡ ಹೇರುತ್ತಿದ್ದಾರೆ ಎಂಬ ಉದ್ಯೋಗಿಯ ಆರೋಪ ಈಗ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಕಾರಣವಾಗಿದೆ. ತಂಡದ ಬಜೆಟ್‌ಗೆ ಹೋಲಿಸಿದರೆ ಉದ್ಯೋಗಿಯ ಸಂಬಳ ಹೆಚ್ಚಾಗಿದೆ ಎಂಬ ಕಾರಣ ನೀಡಿ ರಾಜೀನಾಮೆ ಕೇಳಲಾಗುತ್ತಿದೆ ಎನ್ನಲಾಗಿದೆ.

ಎರಡು ತಿಂಗಳ ಹಿಂದಷ್ಟೇ ಬದಲಾಗಿದ್ದ ಮ್ಯಾನೇಜರ್‌!

ಉದ್ಯೋಗಿಯೊಬ್ಬರು, 'ನನ್ನ ಸಂಬಳ ಹೆಚ್ಚಿದೆ ಎಂಬ ಕಾರಣಕ್ಕೆ ಮ್ಯಾನೇಜರ್‌ ರಾಜೀನಾಮೆ ಕೇಳುತ್ತಿದ್ದಾರೆ, ನಾನೇನು ಮಾಡಲಿ?' ಎಂಬ ಅರ್ಥದ ಶೀರ್ಷಿಕೆಯೊಂದಿಗೆ ತಮ್ಮ ಸಮಸ್ಯೆಯನ್ನು ಹಂಚಿಕೊಂಡಿದ್ದಾರೆ. ಉದ್ಯೋಗಿಯ ಹೇಳಿಕೆಯ ಪ್ರಕಾರ, ಸುಮಾರು ಎರಡು ತಿಂಗಳ ಹಿಂದೆ ಅವರ ಮ್ಯಾನೇಜರ್‌ ಬದಲಾಗಿದ್ದರು. ಹೊಸ ಮ್ಯಾನೇಜರ್‌ ಬಂದ ಬಳಿಕ ತಮ್ಮ ಮೇಲೆ ಒತ್ತಡ ಹೆಚ್ಚಾಗಿದೆ ಎಂದು ಅವರು ಆರೋಪಿಸಿದ್ದಾರೆ. ಮುಂಬರುವ ಅಪ್ರೈಸಲ್‌ಗೂ ಮುನ್ನವೇ ರಾಜೀನಾಮೆ ನೀಡುವಂತೆ ಮ್ಯಾನೇಜರ್‌ ಕೇಳುತ್ತಿದ್ದಾರೆ ಎಂದು ತಿಳಿಸಿದ್ದಾರೆ.

ಇದಕ್ಕೆ ನೀಡಿರುವ ಕಾರಣವೆಂದರೆ, ಉದ್ಯೋಗಿಗೆ ಈಗಾಗಲೇ ಉತ್ತಮ ಸಂಬಳವಿದ್ದು, ತಂಡದ ಬಜೆಟ್‌ನಲ್ಲಿ ಅದಕ್ಕಿಂತ ಹೆಚ್ಚಿನ ಮೊತ್ತವನ್ನು ನಿರ್ವಹಿಸಲು ಸಾಧ್ಯವಿಲ್ಲ ಎಂಬುದಾಗಿದೆ. ಹೀಗಾಗಿ, ಮುಂಬರುವ ಅಪ್ರೈಸಲ್‌ನಲ್ಲಿ ವೇತನ ಹೆಚ್ಚಳ ನೀಡುವ ಪರಿಸ್ಥಿತಿಯನ್ನು ತಪ್ಪಿಸಲು ಈ ಕ್ರಮ ಕೈಗೊಳ್ಳಲಾಗುತ್ತಿದೆಯೇ ಎಂಬ ಅನುಮಾನ ಉದ್ಯೋಗಿಯಲ್ಲಿ ಮೂಡಿದೆ.

ಅಕ್ಟೋಬರ್‌ 24ರ ವೇತನದ ದಿನಕ್ಕೂ ಮುನ್ನವೇ ಒತ್ತಡ?

ಉದ್ಯೋಗಿಯ ಪ್ರಕಾರ, ಮುಂದಿನ ವೇತನ ಚಕ್ರ ಅಕ್ಟೋಬರ್‌ 24ರ ಸುಮಾರಿಗೆ ಬರಲಿದ್ದು, ಅದಕ್ಕೂ ಮುನ್ನ ರಾಜೀನಾಮೆ ನೀಡುವಂತೆ ಒತ್ತಡ ಹೇರಲಾಗುತ್ತಿದೆ. ತನ್ನ ಕೆಲಸದಲ್ಲಿ ಯಾವುದೇ ತಪ್ಪು ಮಾಡಿರುವುದು ತನಗೆ ತಿಳಿದಿಲ್ಲ ಎಂದು ಹೇಳಿರುವ ಉದ್ಯೋಗಿ, ಕೇವಲ ಬಜೆಟ್‌ ಸಮಸ್ಯೆಯ ಕಾರಣಕ್ಕೆ ತಮ್ಮನ್ನು ಕೆಲಸ ಬಿಡುವಂತೆ ಕೇಳುತ್ತಿರುವುದು ಸರಿಯೇ ಎಂಬ ಪ್ರಶ್ನೆ ಎತ್ತಿದ್ದಾರೆ.

"ನಾನು ಆತುರದಲ್ಲಿ ಯಾವುದೇ ನಿರ್ಧಾರ ತೆಗೆದುಕೊಳ್ಳಲು ಬಯಸುವುದಿಲ್ಲ. ಈ ಪರಿಸ್ಥಿತಿಗೆ ನನ್ನ ಕೆಲಸದ ಕಾರ್ಯಕ್ಷಮತೆಗಿಂತ ಬಜೆಟ್‌ ಸಮಸ್ಯೆಯೇ ಕಾರಣವಾಗಿರುವಂತೆ ಕಾಣುತ್ತಿದೆ" ಎಂದು ಅವರು ತಮ್ಮ ಪೋಸ್ಟ್‌ನಲ್ಲಿ ತಿಳಿಸಿದ್ದಾರೆ. ಎರಡು ತಿಂಗಳ ನೋಟಿಸ್‌ ಅವಧಿಯೂ ಇರುವುದಾಗಿ ವಿವರಿಸಿರುವ ಅವರು, ಸ್ವಯಂಪ್ರೇರಿತವಾಗಿ ರಾಜೀನಾಮೆ ನೀಡದಿದ್ದರೆ ಕಂಪನಿಯೇ ಕೆಲಸದಿಂದ ತೆಗೆದುಹಾಕುವ ಸಂದರ್ಭದಲ್ಲಿ ಯಾವ ಪರಿಣಾಮಗಳು ಎದುರಾಗಬಹುದು ಎಂದು ಇತರರ ಸಲಹೆ ಕೇಳಿದ್ದಾರೆ.

'ರಾಜೀನಾಮೆ ಕೊಡಬೇಡಿ' ಎಂದ ನೆಟ್ಟಿಗರು!

ಈ ಪೋಸ್ಟ್‌ ವೈರಲ್‌ ಆಗುತ್ತಿದ್ದಂತೆ ಹಲವರು ಉದ್ಯೋಗಿಗೆ ಧೈರ್ಯ ತುಂಬಿದ್ದಾರೆ. ಯಾವುದೇ ಒತ್ತಡಕ್ಕೆ ಮಣಿದು ತಕ್ಷಣ ರಾಜೀನಾಮೆ ನೀಡಬಾರದು ಎಂದು ಸಲಹೆ ನೀಡಿದ್ದಾರೆ.

- ಮೊದಲು ಹೊಸ ಉದ್ಯೋಗ ಹುಡುಕಿ: ಪ್ರಸ್ತುತ ಕೆಲಸ ಬಿಡುವ ಮೊದಲು ಬೇರೆ ಕಂಪನಿಯಲ್ಲಿ ಉದ್ಯೋಗಾವಕಾಶ ಹುಡುಕಿ, ಸಾಧ್ಯವಾದರೆ ಹೊಸ ಆಫರ್‌ ಪಡೆದ ಬಳಿಕ ಮುಂದಿನ ನಿರ್ಧಾರ ತೆಗೆದುಕೊಳ್ಳಿ ಎಂದು ಒಬ್ಬರು ಸಲಹೆ ನೀಡಿದ್ದಾರೆ.

- ಎಲ್ಲ ಸಂವಹನಗಳ ದಾಖಲೆ ಇಟ್ಟುಕೊಳ್ಳಿ: ಮ್ಯಾನೇಜರ್‌ ಜೊತೆಗಿನ ಮಾತುಕತೆ, ಇಮೇಲ್‌ಗಳು ಮತ್ತು ರಾಜೀನಾಮೆ ನೀಡುವಂತೆ ಒತ್ತಡ ಹೇರಿರುವುದಕ್ಕೆ ಸಂಬಂಧಿಸಿದ ದಾಖಲೆಗಳನ್ನು ಸುರಕ್ಷಿತವಾಗಿ ಇಟ್ಟುಕೊಳ್ಳುವಂತೆ ಮತ್ತೊಬ್ಬರು ಹೇಳಿದ್ದಾರೆ.

- ಎಚ್‌ಆರ್‌ ಗಮನಕ್ಕೆ ತನ್ನಿ: ಈ ಸಮಸ್ಯೆಯನ್ನು ಕಂಪನಿಯ ಮಾನವ ಸಂಪನ್ಮೂಲ ವಿಭಾಗದ (HR) ಗಮನಕ್ಕೆ ತಂದು, ತಮ್ಮ ಕಡೆಯಿಂದ ನಡೆದಿರುವ ಘಟನೆಗಳನ್ನು ಲಿಖಿತವಾಗಿ ದಾಖಲಿಸುವುದು ಉತ್ತಮ ಎಂದು ಇನ್ನೊಬ್ಬ ಬಳಕೆದಾರರು ಅಭಿಪ್ರಾಯಪಟ್ಟಿದ್ದಾರೆ.

- ಕಂಪನಿಯ ನಿರ್ಧಾರಕ್ಕಾಗಿ ಕಾಯಿರಿ: ಉದ್ಯೋಗಿಯೇ ರಾಜೀನಾಮೆ ನೀಡುವ ಬದಲು, ಕಂಪನಿಯೇ ಕೆಲಸದಿಂದ ತೆಗೆದುಹಾಕುವ ನಿರ್ಧಾರ ಕೈಗೊಂಡರೆ ಅದರ ಹಿಂದಿನ ಕಾರಣಗಳನ್ನು ಅಧಿಕೃತವಾಗಿ ದಾಖಲಿಸುವ ಅಗತ್ಯ ಎದುರಾಗಬಹುದು ಎಂದು ಕೆಲವರು ಹೇಳಿದ್ದಾರೆ.

₹22,000ಕ್ಕೆ ಬೆಂಗಳೂರಿನಲ್ಲಿ ಬಿಎಂಟಿಸಿ ಬಸ್ ಓಡಿಸುತ್ತಿರುವ ಬಿ.ಕಾಂ ಪದವೀಧರ; ಯಾರಿಗೆ ಸಾಲುತ್ತೆ ಸಂಬಳ?

Sathish Kumar KH — Tue, 27 Oct 2026 16:34:15 +0530

ಬೆಂಗಳೂರು (ಅ.27): ರಾಜ್ಯ ಸರ್ಕಾರ ಪ್ರತಿವರ್ಷ ಹಣದುಬ್ಬರದ ಲೆಕ್ಕಾಚಾರ ಹಾಕಿ ಬಜೆಟ್ ಗಾತ್ರವನ್ನು ಹಿಗ್ಗಿಸುತ್ತಲೇ ಇರುತ್ತದೆ. ಅಭಿವೃದ್ಧಿ ಯೋಜನೆಗಳು, ಟೆಂಡರ್ ಮೊತ್ತ ಹಾಗೂ ಜನಪ್ರತಿನಿಧಿಗಳಾದ ಶಾಸಕರು ಮತ್ತು ಮಂತ್ರಿಗಳ ವೇತನ, ಭತ್ಯೆಗಳನ್ನು ಕಾಲಕಾಲಕ್ಕೆ ಏರಿಕೆ ಮಾಡಿಕೊಳ್ಳಲಾಗುತ್ತದೆ. ಆದರೆ, ಹಗಲಿರುಳು ದುಡಿಯುವ ಗುತ್ತಿಗೆ ಆಧಾರಿತ ಕಾರ್ಮಿಕರ ಕನಿಷ್ಠ ವೇತನ ಹೆಚ್ಚಳ ಮಾಡಲು ಮಾತ್ರ ಸರ್ಕಾರಕ್ಕೆ ಕಿಂಚಿತ್ತೂ ಆಸಕ್ತಿಯಿಲ್ಲ ಎಂಬುದಕ್ಕೆ ಬೆಂಗಳೂರಿನ ಈ ಬಿಎಂಟಿಸಿ (BMTC) ಎಲೆಕ್ಟ್ರಿಕ್ ಬಸ್ ಚಾಲಕನ ಜೀವನವೇ ಸಾಕ್ಷಿ.

ಹೌದು, ಉನ್ನತ ಶಿಕ್ಷಣ ಪಡೆದರೂ ಸರ್ಕಾರಿ ನೇಮಕಾತಿಗಳು ನಡೆಯದ ಕಾರಣ, ಎಷ್ಟೋ ಪದವೀಧರ ಯುವಕರು ಇಂದು ಸರ್ಕಾರ ನೀಡುವ ಬಿಡಿಗಾಸಿಗೆ ದಿನಗೂಲಿ ಹಾಗೂ ಗುತ್ತಿಗೆ ನೌಕರರಾಗಿ ದುಡಿಯುತ್ತಿದ್ದಾರೆ. ಇಂತಹದ್ದೇ ಮನಕಲಕುವ ಕಥೆಯೊಂದನ್ನು ಬಿಎಂಟಿಸಿ ಎಲೆಕ್ಟ್ರಿಕ್ ಬಸ್ ಚಾಲಕರೊಬ್ಬರು ಬಿಚ್ಚಿಟ್ಟಿದ್ದಾರೆ.

ಬಿ.ಕಾಂ ಪದವೀಧರನಿಗೆ ದಕ್ಕಿದ್ದು ₹22,000 ಸಂಬಳದ ಡ್ರೈವರ್ ಕೆಲಸ!

ಇತ್ತೀಚೆಗೆ ‘ವಿನೋದ್’ ಎಂಬ ಯೂಟ್ಯೂಬರ್ ನಡೆಸಿದ ಸಂದರ್ಶನದಲ್ಲಿ ಬಿಎಂಟಿಸಿ ಎಲೆಕ್ಟ್ರಿಕ್ ಬಸ್ ಚಾಲಕರೊಬ್ಬರು ತಮ್ಮ ಜೀವನದ ಸಂಕಷ್ಟಗಳನ್ನು ತೋಡಿಕೊಂಡಿದ್ದಾರೆ. ಮೂಲತಃ ಬಿ.ಕಾಂ (B.Com) ಪದವೀಧರರಾಗಿರುವ ಇವರು, ಸರ್ಕಾರದ ಯಾವುದೇ ನೇರ ನೇಮಕಾತಿಗಳು ನಡೆಯದ ಕಾರಣ ಅನಿವಾರ್ಯವಾಗಿ ಗುತ್ತಿಗೆ ಆಧಾರದ ಮೇಲೆ ಬಿಎಂಟಿಸಿ ಬಸ್ ಡ್ರೈವರ್ ಆಗಿ ಸೇರಿಕೊಂಡಿದ್ದಾರೆ. 'ಕಳೆದ 5 ವರ್ಷಗಳಿಂದ ನಾನು ಇಲ್ಲಿ ಕೆಲಸ ಮಾಡುತ್ತಿದ್ದೇನೆ. ಆರಂಭದಲ್ಲಿ ₹18,000 ಇದ್ದ ಸಂಬಳ ಈಗ ₹24,000 ತಲುಪಿದೆ. ಆದರೆ, ಪಿಎಫ್ (PF) ಸೇರಿದಂತೆ ಇತರೆ ಕಡಿತಗಳೆಲ್ಲಾ ಹೋಗಿ ತಿಂಗಳಿಗೆ ಕೈಗೆ ಸಿಗುವುದು ಕೇವಲ ₹22,000 ಮಾತ್ರ' ಎಂದು ಅವರು ಅಳಲು ತೋಡಿಕೊಂಡಿದ್ದಾರೆ.

ಬೆಂಗಳೂರಿನಲ್ಲಿ ₹22 ಸಾವಿರದಲ್ಲಿ ಜೀವನ ನಡೆಸುವುದು ಹೇಗೆ?

ಬೆಂಗಳೂರಿನಂತಹ ದುಬಾರಿ ನಗರದಲ್ಲಿ ₹22,000 ಸಂಬಳದಲ್ಲಿ ಕನಿಷ್ಠ 'ಲೋಯರ್ ಮಿಡಲ್ ಕ್ಲಾಸ್' ಜೀವನ ನಡೆಸುವುದೂ ಅಸಾಧ್ಯ. ದುಡಿದ ಹಣವೆಲ್ಲವೂ ಮನೆ ಬಾಡಿಗೆ, ಊಟ ಹಾಗೂ ದಿನನಿತ್ಯದ ಓಡಾಟಕ್ಕೆ ಸರಿಹೋಗುತ್ತದೆ. ಇನ್ನು ಹಳ್ಳಿಗಳಿಂದ ಬೆಂಗಳೂರಿಗೆ ಬಂದು ದುಡಿಯುವ ಯುವಕರು, ತಮ್ಮ ಪೋಷಕರಿಗೆ ತಿಂಗಳಿಗೆ ₹5,000 ಕಳುಹಿಸಿದರೆ ಉಳಿಯುವುದು ಬರಿಗೈ ಮಾತ್ರ! ಒಂದುವೇಳೆ ಈ ಸಂಬಳದಲ್ಲಿ ಮದುವೆಯಾಗಿ, ಮಕ್ಕಳಾದರೆ ಆ ಕುಟುಂಬ ಕಡುಬಡತನದಲ್ಲಿಯೇ ಜೀವನ ಸಾಗಿಸಬೇಕಾಗುತ್ತದೆ.

ನೇರ ನೇಮಕಾತಿ ಮಾಡಿದರೆ ₹50 ಸಾವಿರ ಸಂಬಳ ನೀಡಬೇಕು!

ಒಂದುವೇಳೆ ಸರ್ಕಾರವೇ ನೇರ ನೇಮಕಾತಿ (Direct Recruitment) ಮೂಲಕ ಚಾಲಕರನ್ನು ನೇಮಿಸಿಕೊಂಡರೆ, ಕನಿಷ್ಠ ₹40,000 ದಿಂದ ₹50,000 ವರೆಗೆ ವೇತನ ಹಾಗೂ ಸರ್ಕಾರಿ ಸೌಲಭ್ಯಗಳನ್ನು ನೀಡಬೇಕಾಗುತ್ತದೆ. ಇದರಿಂದ ತಪ್ಪಿಸಿಕೊಳ್ಳಲು ಸರ್ಕಾರ ಗುತ್ತಿಗೆ ಆಧಾರದ (Contract Basis) ಮೊರೆ ಹೋಗಿದೆ. ಲಕ್ಷಾಂತರ ರೂಪಾಯಿ ಗೌರವಧನ, ಭತ್ಯೆ ಪಡೆಯುವ ಜನಪ್ರತಿನಿಧಿಗಳಿರುವ ಸರ್ಕಾರ, ಗುತ್ತಿಗೆ ನೌಕರರ ಬದುಕನ್ನು ಮಾತ್ರ ಅತಂತ್ರ ಸ್ಥಿತಿಗೆ ತಳ್ಳಿದೆ ಎಂಬ ಆಕ್ರೋಶ ಸಾರ್ವಜನಿಕ ವಲಯದಲ್ಲಿ ವ್ಯಕ್ತವಾಗುತ್ತಿದೆ.

BMTC ಎಲೆಕ್ಟ್ರಿಕ್ ಬಸ್ ಡ್ರೈವರ್ ಕೆಲಸದ ಕುರಿತ ಪ್ರಮುಖ ಮಾಹಿತಿ:

ನೀವೂ ಕೂಡ ಬಿಎಂಟಿಸಿ ಇವಿ ಬಸ್ ಚಾಲಕರಾಗಲು ಬಯಸಿದರೆ ಅಥವಾ ಅವರ ವೃತ್ತಿ ಜೀವನದ ಸವಾಲುಗಳ ಬಗ್ಗೆ ತಿಳಿಯಲು ಬಯಸಿದರೆ ಈ ಕೆಳಗಿನ ಅಂಶಗಳನ್ನು ಗಮನಿಸಿ:

ವೇತನ: ಗುತ್ತಿಗೆ ಆಧಾರದ ಮೇಲೆ ಪ್ರಸ್ತುತ ಗರಿಷ್ಠ ₹24,000 ವರೆಗೆ ಸಂಬಳ ನಿಗದಿಯಾಗಿದ್ದು, ಕಡಿತಗಳ ನಂತರ ₹22,000 ಕೈ ಸೇರಲಿದೆ.

ಅರ್ಹತೆ ಮತ್ತು ಸವಾಲುಗಳು: ಭಾರೀ ವಾಹನ ಚಾಲನಾ ಪರವಾನಗಿ (HTV License) ಕಡ್ಡಾಯ. ಬೆಂಗಳೂರಿನ ಟ್ರಾಫಿಕ್ ಒತ್ತಡದ ನಡುವೆ ಅತ್ಯಂತ ಜವಾಬ್ದಾರಿಯುತವಾಗಿ ಬಸ್ ಓಡಿಸುವ ಸವಾಲು ಚಾಲಕರ ಮೇಲಿರುತ್ತದೆ.

ಉದ್ಯೋಗದ ಸ್ಥಿತಿಗತಿ: ಉದ್ಯೋಗ ಭದ್ರತೆ ಇರುವುದಿಲ್ಲ ಮತ್ತು ಸರ್ಕಾರಿ ನೌಕರರಿಗೆ ಸಿಗುವ ಯಾವುದೇ ಹೆಚ್ಚುವರಿ ಸೌಲಭ್ಯಗಳು ಗುತ್ತಿಗೆ ಚಾಲಕರಿಗೆ ಲಭ್ಯವಿರುವುದಿಲ್ಲ.

ಒಟ್ಟಾರೆಯಾಗಿ, ಸಾರ್ವಜನಿಕರನ್ನು ಸುರಕ್ಷಿತವಾಗಿ ಗುರಿ ತಲುಪಿಸುವ ಸಾರಿಗೆ ಚಾಲಕರ ಬದುಕು ಮಾತ್ರ ಇಂದಿಗೂ ಅಭದ್ರತೆಯಲ್ಲೇ ಸಾಗುತ್ತಿದೆ. ಸರ್ಕಾರ ಇನ್ನಾದರೂ ಎಚ್ಚೆತ್ತುಕೊಂಡು ಗುತ್ತಿಗೆ ನೌಕರರ ವೇತನ ಪರಿಷ್ಕರಣೆ ಮಾಡುತ್ತದೆಯೇ ಕಾದು ನೋಡಬೇಕಿದೆ.

9 to 6 ಕೆಲಸಕ್ಕೆ ಗುಡ್‌ಬೈ ಹೇಳಿದ ಯುವಕ! ಈಗ ಸೋಷಿಯಲ್ ಮೀಡಿಯಾದಿಂದ ತಿಂಗಳಿಗೆ ₹2.5 ಲಕ್ಷ ಆದಾಯ! 'EMI ಚಿಂತೆ ಇನ್ನಿಲ್ಲ'

Naveen Kodase — Sat, 24 Oct 2026 14:21:33 +0530

ಇಂದಿನ ದಿನಗಳಲ್ಲಿ ಒಳ್ಳೆಯ ಸಂಬಳದ ಕೆಲಸ ಸಿಗಬೇಕು, ಪ್ರತಿ ತಿಂಗಳು ಕೈತುಂಬಾ ಹಣ ಬರಬೇಕು, ಜೀವನದಲ್ಲಿ ಆರ್ಥಿಕ ಭದ್ರತೆ ಇರಬೇಕು ಎಂಬುದು ಬಹುತೇಕರ ಕನಸು. ಆದರೆ, ಕೆಲವರಿಗೆ ಕಚೇರಿಯ ಕೆಲಸದ ಜೊತೆಗೆ ತಮ್ಮದೇ ಆದ ಆಸಕ್ತಿಯ ಕ್ಷೇತ್ರದಲ್ಲಿ ಏನಾದರೂ ಸಾಧಿಸಬೇಕು ಎಂಬ ಹಂಬಲವೂ ಇರುತ್ತದೆ. ಅಂಥವರಲ್ಲಿ ಕೆಲವರು ತಮ್ಮ ಆಸಕ್ತಿಯನ್ನೇ ವೃತ್ತಿಯನ್ನಾಗಿ ಮಾಡಿಕೊಂಡು ಯಶಸ್ಸು ಗಳಿಸುತ್ತಿದ್ದಾರೆ. ಇದಕ್ಕೆ ಮುಂಬೈ ಮೂಲದ ಕಂಟೆಂಟ್ ಕ್ರಿಯೇಟರ್ ಶುಭ್ ಸಾರಂಗ್ ಅವರ ಕಥೆಯೂ ಒಂದು ಉತ್ತಮ ಉದಾಹರಣೆ.

ಪ್ರತಿದಿನ ಬೆಳಗ್ಗೆ 9ರಿಂದ ಸಂಜೆ 6ರವರೆಗೆ ಕಾರ್ಪೊರೇಟ್ ಉದ್ಯೋಗ ಮಾಡುತ್ತಿದ್ದ ಶುಭ್ ಸಾರಂಗ್, ಇದೀಗ ತಮ್ಮ ಕೆಲಸಕ್ಕೆ ರಾಜೀನಾಮೆ ನೀಡಿ ಪೂರ್ಣಾವಧಿ ಕಂಟೆಂಟ್ ಕ್ರಿಯೇಟರ್ ಆಗಿದ್ದಾರೆ. ವರದಿಗಳ ಪ್ರಕಾರ, ಅವರು ಸೋಷಿಯಲ್ ಮೀಡಿಯಾ ಮೂಲಕ ಪ್ರತಿ ತಿಂಗಳು ಸುಮಾರು ₹2.2 ಲಕ್ಷದಿಂದ ₹2.5 ಲಕ್ಷದವರೆಗೆ ಆದಾಯ ಗಳಿಸುತ್ತಿದ್ದಾರೆ. ಈ ಬದಲಾವಣೆಯಿಂದಾಗಿ ಪ್ರತಿ ತಿಂಗಳ ಇಎಂಐ ಕಟ್ಟುವುದು ಹಾಗೂ ಕಚೇರಿಯ ಕೆಲಸದ ಒತ್ತಡದ ಬಗ್ಗೆ ಇದ್ದ ಆತಂಕವೂ ಕಡಿಮೆಯಾಗಿದೆ ಎಂದು ಅವರು ತಮ್ಮ ಅನುಭವ ಹಂಚಿಕೊಂಡಿದ್ದಾರೆ.

10 ಸಾವಿರ ಫಾಲೋವರ್ಸ್‌ನಿಂದ ಶುರುವಾದ ಪ್ರಯಾಣ!

ಶುಭ್ ಸಾರಂಗ್ ಅವರ ಕಂಟೆಂಟ್ ಕ್ರಿಯೇಷನ್ ಪ್ರಯಾಣ ಆರಂಭವಾದಾಗ ಇನ್‌ಸ್ಟಾಗ್ರಾಮ್‌ನಲ್ಲಿ ಸುಮಾರು 10 ಸಾವಿರ ಫಾಲೋವರ್ಸ್ ಇದ್ದರು. ಆರಂಭದಲ್ಲಿ ಸೋಷಿಯಲ್ ಮೀಡಿಯಾದಿಂದಲೇ ಜೀವನ ನಡೆಸುವಷ್ಟು ಆದಾಯ ಗಳಿಸಲು ಸಾಧ್ಯವೇ ಎಂಬ ಅನುಮಾನ ಅವರಿಗೂ ಇತ್ತು. ನಿಗದಿತ ಸಂಬಳ ನೀಡುವ ಉದ್ಯೋಗವನ್ನು ಬಿಡುವುದು ಸುಲಭದ ನಿರ್ಧಾರವಾಗಿರಲಿಲ್ಲ. ಆದರೆ, ಅವರ ವಿಡಿಯೋಗಳಿಗೆ ಜನರಿಂದ ಉತ್ತಮ ಪ್ರತಿಕ್ರಿಯೆ ಸಿಗಲಾರಂಭಿಸಿತು. ಒಂದೆರಡು ತಿಂಗಳ ಅವಧಿಯಲ್ಲಿ ಅವರ ಫಾಲೋವರ್ಸ್ ಸಂಖ್ಯೆ ಸುಮಾರು ಒಂದು ಲಕ್ಷಕ್ಕೆ ಏರಿಕೆಯಾಯಿತು. ಬಳಿಕ ಮತ್ತಷ್ಟು ಜನಪ್ರಿಯತೆ ದೊರೆತು, ಅವರ ಖಾತೆಯ ಫಾಲೋವರ್ಸ್ ಸಂಖ್ಯೆ ಎರಡು ಲಕ್ಷದ ಗಡಿ ದಾಟಿತು. ಈ ಬೆಳವಣಿಗೆಯ ನಡುವೆ ಅವರಿಗೆ ಬ್ರ್ಯಾಂಡ್‌ಗಳ ಜೊತೆ ಕೆಲಸ ಮಾಡುವ ಅವಕಾಶವೂ ಸಿಕ್ಕಿತು. ಒಂದು ಬ್ರ್ಯಾಂಡ್ ಸಹಯೋಗದಿಂದ ₹1 ಲಕ್ಷದ ಪಾವತಿ ದೊರೆತದ್ದು, ಕಂಟೆಂಟ್ ಕ್ರಿಯೇಷನ್ ಅನ್ನು ಪೂರ್ಣಾವಧಿ ವೃತ್ತಿಯನ್ನಾಗಿ ಪರಿಗಣಿಸಲು ಶುಭ್ ಸಾರಂಗ್ ಆತ್ಮವಿಶ್ವಾಸ ನೀಡಿತು.

ಒಂದೇ ವಿಡಿಯೋಗೆ ₹1.5 ಲಕ್ಷದವರೆಗೆ ಆಫರ್!

ಸೋಷಿಯಲ್ ಮೀಡಿಯಾದಲ್ಲಿ ಫಾಲೋವರ್ಸ್ ಹೆಚ್ಚಾದಂತೆ ಬ್ರ್ಯಾಂಡ್‌ಗಳಿಂದ ಬರುವ ಸಹಯೋಗದ ಅವಕಾಶಗಳೂ ಹೆಚ್ಚಾದವು. ಶುಭ್ ಸಾರಂಗ್ ಅವರ ಹೇಳಿಕೆಯ ಪ್ರಕಾರ, ಕೆಲವು ಬ್ರ್ಯಾಂಡ್‌ಗಳು ಒಂದೇ ವಿಡಿಯೋಗೆ ₹1.3 ಲಕ್ಷದಿಂದ ₹1.5 ಲಕ್ಷದವರೆಗೆ ಪಾವತಿಸಲು ಸಿದ್ಧವಾಗಿದ್ದವು.

ಇದರಿಂದ ಅವರ ಕಂಟೆಂಟ್ ಕ್ರಿಯೇಷನ್ ಆದಾಯ ತಿಂಗಳಿಗೆ ₹2.2 ಲಕ್ಷದಿಂದ ₹2.5 ಲಕ್ಷದವರೆಗೆ ತಲುಪಿತು. ತಮ್ಮ ಕಾರ್ಪೊರೇಟ್ ಉದ್ಯೋಗದಿಂದ ಸಿಗುತ್ತಿದ್ದ ಸಂಬಳಕ್ಕಿಂತ ಸೋಷಿಯಲ್ ಮೀಡಿಯಾದಿಂದ ಮೂರರಿಂದ ನಾಲ್ಕು ಪಟ್ಟು ಹೆಚ್ಚು ಆದಾಯ ಬರಲಾರಂಭಿಸಿದ ಬಳಿಕ ಅವರು ಉದ್ಯೋಗ ತೊರೆಯುವ ನಿರ್ಧಾರ ಕೈಗೊಂಡರು.

ಆದರೆ, ಈ ಯಶಸ್ಸು ರಾತ್ರೋರಾತ್ರಿ ಸಿಕ್ಕಿದ್ದಲ್ಲ. ಅವರ ಆಸಕ್ತಿಯ ಕ್ಷೇತ್ರದಲ್ಲಿ ನಿರಂತರವಾಗಿ ಕೆಲಸ ಮಾಡುವುದು, ವಿಡಿಯೋಗಳನ್ನು ಸಿದ್ಧಪಡಿಸುವುದು ಮತ್ತು ಪ್ರೇಕ್ಷಕರ ಗಮನ ಸೆಳೆಯುವ ಕಂಟೆಂಟ್ ರೂಪಿಸುವುದು ಈ ಪ್ರಯಾಣದ ಪ್ರಮುಖ ಭಾಗವಾಗಿತ್ತು.

ರಾತ್ರಿ 4 ಗಂಟೆಯವರೆಗೂ ವಿಡಿಯೋ ಎಡಿಟಿಂಗ್!

ಉದ್ಯೋಗದಲ್ಲಿದ್ದಾಗ ಶುಭ್ ಅವರ ದಿನಚರಿ ಸಾಕಷ್ಟು ಒತ್ತಡದಿಂದ ಕೂಡಿತ್ತು. ಬೆಳಗ್ಗೆ 9ರಿಂದ ಸಂಜೆ 6ರವರೆಗೆ ಕಚೇರಿಯಲ್ಲಿ ಕೆಲಸ ಮುಗಿಸಿದ ಬಳಿಕ ಮನೆಗೆ ಬರುತ್ತಿದ್ದರು. ಸ್ವಲ್ಪ ವಿಶ್ರಾಂತಿ ಪಡೆದ ನಂತರ ವಿಡಿಯೋ ಚಿತ್ರೀಕರಣಕ್ಕೆ ತೆರಳುತ್ತಿದ್ದರು. ಶೂಟಿಂಗ್ ಮುಗಿದ ಬಳಿಕ ಎಡಿಟಿಂಗ್ ಕೆಲಸದಲ್ಲಿ ತೊಡಗಿಕೊಳ್ಳುತ್ತಿದ್ದರು.

ಕೆಲವೊಮ್ಮೆ ವಿಡಿಯೋ ಎಡಿಟಿಂಗ್ ಮುಗಿಸುವಷ್ಟರಲ್ಲಿ ಬೆಳಗಿನ ಜಾವ 4 ಗಂಟೆಯಾಗುತ್ತಿತ್ತು. ಕೆಲವೇ ಗಂಟೆಗಳ ಕಾಲ ನಿದ್ರೆ ಮಾಡಿ ಮತ್ತೆ ಕಚೇರಿಗೆ ತೆರಳಬೇಕಾಗುತ್ತಿತ್ತು. ಉದ್ಯೋಗದ ಜವಾಬ್ದಾರಿಗಳ ಜೊತೆಗೆ ಕಂಟೆಂಟ್ ಕ್ರಿಯೇಷನ್ ಮುಂದುವರಿಸುವುದು ಅವರಿಗೆ ದೈಹಿಕವಾಗಿಯೂ ಮಾನಸಿಕವಾಗಿಯೂ ಸವಾಲಾಗಿತ್ತು ಎಂದು ಹೇಳಿದ್ದಾರೆ. ಈಗ ಪೂರ್ಣಾವಧಿ ಕಂಟೆಂಟ್ ಕ್ರಿಯೇಟರ್ ಆಗಿರುವ ಅವರು, ಕಚೇರಿಯ ಟಾರ್ಗೆಟ್‌ಗಳು ಮತ್ತು ಬಾಸ್‌ನ ಒತ್ತಡದಿಂದ ದೂರವಾಗಿ ತಮ್ಮ ಆಸಕ್ತಿಯ ಕೆಲಸಕ್ಕೆ ಹೆಚ್ಚಿನ ಸಮಯ ನೀಡಲು ಸಾಧ್ಯವಾಗುತ್ತಿದೆ ಎಂದು ಸಂತಸ ಹಂಚಿಕೊಂಡಿದ್ದಾರೆ.

ಉದ್ಯೋಗ ಬಿಡುವ ಮುನ್ನ ಈ ಎಚ್ಚರಿಕೆ ಅಗತ್ಯ!

ಶುಭ್ ಸಾರಂಗ್ ಅವರ ಕಥೆ ಹಲವರಿಗೆ ಸ್ಫೂರ್ತಿ ನೀಡಬಹುದು. ಆದರೆ, ಅವರ ಯಶಸ್ಸನ್ನು ನೋಡಿ ತಕ್ಷಣವೇ ಉದ್ಯೋಗಕ್ಕೆ ರಾಜೀನಾಮೆ ನೀಡುವುದು ಸರಿಯಾದ ನಿರ್ಧಾರವಲ್ಲ. ಸ್ವತಃ ಶುಭ್ ಕೂಡ ತಮ್ಮ ಅನುಭವದ ಆಧಾರದಲ್ಲಿ ಎಲ್ಲರೂ ಉದ್ಯೋಗ ಬಿಟ್ಟು ಕಂಟೆಂಟ್ ಕ್ರಿಯೇಷನ್ ಆರಂಭಿಸಬೇಕು ಎಂದು ಹೇಳುತ್ತಿಲ್ಲ. ಇದರಲ್ಲಿ ಆರ್ಥಿಕ ಅಪಾಯಗಳಿವೆ ಎಂದು ಎಚ್ಚರಿಸಿದ್ದಾರೆ.

ಸೋಷಿಯಲ್ ಮೀಡಿಯಾದ ಆದಾಯವು ಫಾಲೋವರ್ಸ್ ಸಂಖ್ಯೆ, ವಿಡಿಯೋಗಳ ವೀಕ್ಷಣೆ, ಪ್ರೇಕ್ಷಕರ ಪ್ರತಿಕ್ರಿಯೆ ಮತ್ತು ಬ್ರ್ಯಾಂಡ್‌ಗಳಿಂದ ಸಿಗುವ ಸಹಯೋಗಗಳ ಮೇಲೆ ಅವಲಂಬಿತವಾಗಿರುತ್ತದೆ. ಒಂದು ತಿಂಗಳು ಉತ್ತಮ ಆದಾಯ ಬಂದರೂ ಮುಂದಿನ ತಿಂಗಳು ಅದೇ ಪ್ರಮಾಣದ ಆದಾಯ ಬರುತ್ತದೆ ಎಂಬ ಖಾತರಿ ಇರುವುದಿಲ್ಲ.

ಹೀಗಾಗಿ, ಕಂಟೆಂಟ್ ಕ್ರಿಯೇಷನ್ ಅನ್ನು ವೃತ್ತಿಯನ್ನಾಗಿ ಮಾಡಿಕೊಳ್ಳಲು ಬಯಸುವವರು ಮೊದಲು ಉದ್ಯೋಗದ ಜೊತೆಗೆ ಅದನ್ನು ಪ್ರಯತ್ನಿಸಬಹುದು. ಆದಾಯ ನಿರಂತರವಾಗಿದೆಯೇ ಎಂಬುದನ್ನು ಪರಿಶೀಲಿಸಬೇಕು. ಕನಿಷ್ಠ ಕೆಲವು ತಿಂಗಳ ಅಗತ್ಯ ವೆಚ್ಚಗಳಿಗೆ ಸಾಕಾಗುವಷ್ಟು ಉಳಿತಾಯ ಮಾಡಿಕೊಳ್ಳುವುದು, ಇಎಂಐ ಮತ್ತು ಇತರ ಹಣಕಾಸಿನ ಜವಾಬ್ದಾರಿಗಳನ್ನು ಲೆಕ್ಕ ಹಾಕುವುದು ಮುಖ್ಯ.

ಒಟ್ಟಿನಲ್ಲಿ, ಶುಭ್ ಸಾರಂಗ್ ಅವರ ಕಥೆ ಹೇಳುವ ಸಂದೇಶ ಇಷ್ಟೇ: ಆಸಕ್ತಿಯ ಕ್ಷೇತ್ರದಲ್ಲಿ ನಿರಂತರವಾಗಿ ಪ್ರಯತ್ನಿಸಿದರೆ ಹೊಸ ಅವಕಾಶಗಳು ಸಿಗಬಹುದು. ಆದರೆ, ಉದ್ಯೋಗ ತೊರೆಯುವಂತಹ ದೊಡ್ಡ ನಿರ್ಧಾರ ಕೈಗೊಳ್ಳುವ ಮೊದಲು ಆದಾಯದ ಸ್ಥಿರತೆ ಮತ್ತು ಆರ್ಥಿಕ ಭದ್ರತೆಗೆ ಆದ್ಯತೆ ನೀಡಬೇಕು.

View this post on Instagram

A post shared by Shubh Sarang (@shubbhhhhh)

Asianet Suvarna News

Jobs: ವರ್ಷಕ್ಕೆ ₹1 ಕೋಟಿ ಸಂಬಳ! AI ಯುಗದಲ್ಲಿ ಎಂಜಿನಿಯರ್‌ಗಳಿಗೆ ಬಂಪರ್‌ ಬೇಡಿಕೆ, ಯಾವುದು ಈ ಹೈ-ಪೇಯಿಂಗ್‌ ಕೆಲಸ?

ಫಾವರ್ಡ್ ರಿಪ್ಲಾಯ್ಡ್ ಎಂಜಿನಿಯರಿಂಗ್ ಎಂದರೆ ಏನು?

2030ರ ವೇಳೆಗೆ ಭಾರೀ ಬೇಡಿಕೆ ಇರುವ ಜಾಬ್

60,000 ಸಿಬ್ಬಂದಿಗೆ VRS: ಮೈಕ್ರೋಸಾಫ್ಟ್‌ ಬಿಗ್ ಆಫರ್‌! 4 ದೇಶದ ಟೆಕ್ಕಿಗಳಿಗೆ ಮಾಹಿತಿ

ಡಿ.1ರ ವರೆಗೆ ಕಾಲಾವಕಾಶ

1 ತಿಂಗಳ ಮೂಲ ವೇತನ

ಕಣ್ಣೊರೆಸುವ ಯತ್ನ

ತಲೆ ಬೋಳಿಸಿದ್ರೂ, ಕಣ್ಣೀರಿಟ್ಟರೂ ಪ್ರಯೋಜನವೇ ಇಲ್ಲ: ಸಾಯೋವರೆಗೂ ಮುಷ್ಕರ- ಕೇರಳಂನಲ್ಲಿ ಪ್ರತಿಭಾನ್ವಿತರ ಪ್ರತಿಭಟನೆ

ತಲೆ ಬೋಳಿಸಿಕೊಂಡು ಪ್ರತಿಭಟನೆ

113ನೇ ದಿನಕ್ಕೆ ಮುಷ್ಕರ

ಕರ್ನಾಟಕ 15000 ಶಿಕ್ಷಕರ ನೇಮಕಾತಿ 2026: ಅರ್ಜಿ ದಿನಾಂಕ ವಿಸ್ತರಣೆ, ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಿ

ಹುದ್ದೆಗಳ ಸಂಪೂರ್ಣ ವಿವರ:

ಶೈಕ್ಷಣಿಕ ಅರ್ಹತೆ:

ವಯೋಮಿತಿ:

ವಯೋಮಿತಿ ಸಡಿಲಿಕೆ:

ಅರ್ಜಿ ಶುಲ್ಕ:

ಆಯ್ಕೆ ಪ್ರಕ್ರಿಯೆ:

ಪರೀಕ್ಷಾ ಮಾದರಿ:

ಪ್ರಮುಖ ದಿನಾಂಕಗಳು:

ವಿವಿಧ ಇಲಾಖಾ ನೇಮಕಾತಿ ಲಿಖಿತ ಪರೀಕ್ಷೆ ಸುಸೂತ್ರ: ಕೆಇಎ

AI ನಿಂದ ಉದ್ಯೋಗ ಕಳೆದುಕೊಳ್ಳುವ ಆತಂಕವೇ? ಡೋಂಟ್‌ವರಿ ಈ 4 ಸ್ಕಿಲ್ ಕಲಿತರೆ 100% ನಿಮ್ಮ ಜಾಬ್ ಸೇಫ್!

AI ನಿಂದ ನಿಮ್ಮ ಜಾಬ್ ಉಳಿಸಿಕೊಳ್ಳುವುದು ಹೇಗೆ?

ಬುದ್ಧಿವಂತಿಕೆಯಿಂದ ಯೋಚಿಸಿ, ಎಐ ಶತ್ರುವಲ್ಲ!

ಎಐ ನಿಂದ ನಿಮ್ಮ ಜಾಬ್ ಉಳಿಸಲು ಈ ಸ್ಕಿಲ್ ಕಲಿಯಿರಿ

ಪ್ರಾಂಪ್ಟ್ ಎಂಜಿನಿಯರಿಂಗ್ ಕಲಿಯಿರಿ

ಸಮಸ್ಯೆಗಳಿಗೆ ತಕ್ಷಣ ಪರಿಹಾರ ಹುಡುಕುವ ಕಲೆ

ಎಮೋಷನಲ್ ಇಂಟಲಿಜೆಂಟ್ ನಿಮಗಿದು ದೊಡ್ಡ ಅಸ್ತ್ರ!

ಹೊಸದನ್ನು ಕಲಿಯಿರಿ, ಯಾವಾಗಲೂ ಸಂತೋಷವಾಗಿರಿ

ಕನ್ನಡಿಗರಿಗೆ ಉದ್ಯೋಗ ನೀಡದಿದ್ದರೆ ಕಠಿಣ ಕ್ರಮ: ಮುಖ್ಯಮಂತ್ರಿ ಡಿಕೆಶಿ ಐಟಿ ಕಂಪೆನಿಗಳಿಗೆ ಖಡಕ್​ ವಾರ್ನಿಂಗ್​

ಕಠಿಣ ಕ್ರಮದ ಎಚ್ಚರಿಕೆ

ಯುವತಿ ಹೇಳಿದ್ದೇನು?

ಸ್ವಯಂ ನಿವೃತ್ತಿ ಪಡೆದು ಮನೆಗೆ ಹೋಗಿ: ಇ-ಮೇಲ್​ ನೋಡಿ ಬಿಕ್ಕಿಬಿಕ್ಕಿ ಅಳ್ತಿರೋ ಟೆಕ್ಕಿ- ಭಾವುಕ ಪೋಸ್ಟ್​

ಟೆಕ್ಕಿಯ ಕಣ್ಣೀರು

AI ಯುಗದಲ್ಲಿ ಬದಲಾಗುತ್ತಿರುವ ವ್ಯವಹಾರ ಮಾದರಿ

ಡಿಸೆಂಬರ್‌ನಲ್ಲಿ ಉದ್ಯೋಗಿ ಭಾಗವಹಿಸುವಿಕೆ ನಿರ್ಧಾರ

ಉದ್ಯೋಗಾಕಾಂಕ್ಷಿಗಳಿಗೆ ಸುವರ್ಣಾವಕಾಶ, ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ನಲ್ಲಿ ಬೃಹತ್ ನೇಮಕಾತಿ

ಹುದ್ದೆಗಳ ಸಂಪೂರ್ಣ ವಿವರ:

ಶೈಕ್ಷಣಿಕ ಅರ್ಹತೆ:

ವಯೋಮಿತಿ ಸಡಿಲಿಕೆ:

ಆಯ್ಕೆ ಪ್ರಕ್ರಿಯೆ:

ಪ್ರಮುಖ ದಿನಾಂಕಗಳು:

ಅರ್ಜಿ ಸಲ್ಲಿಸುವುದು ಹೇಗೆ?

₹40 ಸಾವಿರ ಸಂಬಳದ ಎಂಜಿನಿಯರಿಂಗ್ ಕೆಲಸ ಬಿಟ್ಟ ಯುವಕ; ಈಗ Rapido ಓಡಿಸಿ ತಿಂಗಳಿಗೆ ₹1.2 ಲಕ್ಷ ಆದಾಯ!

ಎಂಜಿನಿಯರ್ ಕೆಲಸ ಬಿಟ್ಟು ರ‍್ಯಾಪಿಡೋ ಚಾಲಕನಾದ ಯುವಕ; ತಿಂಗಳಿಗೆ ₹1.2 ಲಕ್ಷದವರೆಗೆ ಗಳಿಕೆ!

₹198 ಪ್ರಯಾಣದಲ್ಲಿ ಹೊರಬಂದ ಯುವಕನ ಕಥೆ

ದಿನಕ್ಕೆ ₹4,000 ಗಳಿಕೆ; ತಿಂಗಳಿಗೆ ₹1.2 ಲಕ್ಷದವರೆಗೆ ಆದಾಯ!

ಯಶಸ್ಸು ಎಂದರೆ ಕೇವಲ ದೊಡ್ಡ ಹುದ್ದೆಯೇ?

ಬೆಂಗಳೂರಿನ ಉದ್ಯೋಗಿಗೆ ಸಂಬಳವೇ ಮುಳುವಾಯ್ತಾ? ರಾಜೀನಾಮೆ ನೀಡುವಂತೆ ಹೊಸ ಮ್ಯಾನೇಜರ್ ಒತ್ತಡ!

ಒಳ್ಳೆಯ ಸಂಬಳ ಪಡೆಯುತ್ತಿದ್ದ ಉದ್ಯೋಗಿಗೆ ಹೊಸ ಸಂಕಷ್ಟ

ಎರಡು ತಿಂಗಳ ಹಿಂದಷ್ಟೇ ಬದಲಾಗಿದ್ದ ಮ್ಯಾನೇಜರ್!

'ನಾನು ಯಾವುದೇ ತಪ್ಪು ಮಾಡಿಲ್ಲ, ಆತುರದ ನಿರ್ಧಾರ ಬೇಡ'

ಉದ್ಯೋಗಿಗೆ ನೆಟ್ಟಿಗರ ಸಲಹೆಗಳೇನು?

‘ನನ್ನ ಸಿಬ್ಬಂದಿಯ ಗೌರವವೇ ಮೊದಲು’… ಮಾಣಿಗೆ ಹೊಡೆದ ಗ್ರಾಹಕನನ್ನು ಶಾಶ್ವತವಾಗಿ ಬ್ಯಾನ್ ಮಾಡಿದ ಹೋಟೆಲ್

ಆಗ್ರಾದ ತಾಜ್ ಹೋಟೆಲ್‌ನಲ್ಲಿ ವೇಟರ್‌ಗೆ ಕಪಾಳಮೋಕ್ಷ: ಅತಿಥಿಗೆ ಶಾಶ್ವತ ನಿಷೇಧ ಹೇರಿದ ಆಡಳಿತ ಮಂಡಳಿ

ಭಾಷೆಯ ಸಮಸ್ಯೆಯಿಂದ ಆರಂಭವಾದ ವಿವಾದ

ಕೆಲಸ ಕಳೆದುಕೊಳ್ಳುವ ಭಯದಿಂದ ದೂರು ನೀಡದ ವೇಟರ್!

ಅತಿಥಿಗೆ ಶಾಶ್ವತ ನಿಷೇಧ

ಸಾಮಾಜಿಕ ಜಾಲತಾಣದಲ್ಲಿ ನಿರ್ಧಾರಕ್ಕೆ ಮೆಚ್ಚುಗೆ

KSRPಯಲ್ಲಿ 25 ಅಂಕ ಪಡೆದಿದ್ದ ಅಭ್ಯರ್ಥಿ, VAO ಪರೀಕ್ಷೆಯಲ್ಲಿ 151 ಅಂಕ ಗಳಿಸಿದ್ದೇಗೆ? ತನಿಖೆಗೆ ಆದೇಶಿಸಿದ KEA!

ಸಾಮಾಜಿಕ ಮಾಧ್ಯಮಗಳಲ್ಲಿ ಭುಗಿಲೆದ್ದ ಆಕ್ರೋಶ:

ಶಿಗ್ಗಾವಿ ಕೇಂದ್ರದ ಸಿಸಿಟಿವಿ ಪರಿಶೀಲನೆಗೆ ಹಾವೇರಿ ಡಿಸಿಗೆ ಪತ್ರ:

ಕೆಇಎ ತಪಾಸಣೆಯಲ್ಲಿ ಕಂಡುಬಂದ ಪ್ರಮುಖ ಅಂಶಗಳು:

ಪ್ರಾಮಾಣಿಕ ಅಭ್ಯರ್ಥಿಗಳಿಗೆ ಅನ್ಯಾಯವಾಗಲು ಬಿಡೆವು:

Office politics: ಕಷ್ಟಪಟ್ಟು ದುಡಿದು ಒಳ್ಳೆಯ ಸಂಬಳ ಪಡೆದಿದ್ದೇ ತಪ್ಪಾಯ್ತಾ? ಬೆಂಗಳೂರಿನ ಉದ್ಯೋಗಿಗೆ ಮ್ಯಾನೇಜರ್‌ ಕಿರುಕುಳ

ಎರಡು ತಿಂಗಳ ಹಿಂದಷ್ಟೇ ಬದಲಾಗಿದ್ದ ಮ್ಯಾನೇಜರ್‌!

ಅಕ್ಟೋಬರ್‌ 24ರ ವೇತನದ ದಿನಕ್ಕೂ ಮುನ್ನವೇ ಒತ್ತಡ?

'ರಾಜೀನಾಮೆ ಕೊಡಬೇಡಿ' ಎಂದ ನೆಟ್ಟಿಗರು!

₹22,000ಕ್ಕೆ ಬೆಂಗಳೂರಿನಲ್ಲಿ ಬಿಎಂಟಿಸಿ ಬಸ್ ಓಡಿಸುತ್ತಿರುವ ಬಿ.ಕಾಂ ಪದವೀಧರ; ಯಾರಿಗೆ ಸಾಲುತ್ತೆ ಸಂಬಳ?

ಬಿ.ಕಾಂ ಪದವೀಧರನಿಗೆ ದಕ್ಕಿದ್ದು ₹22,000 ಸಂಬಳದ ಡ್ರೈವರ್ ಕೆಲಸ!

ಬೆಂಗಳೂರಿನಲ್ಲಿ ₹22 ಸಾವಿರದಲ್ಲಿ ಜೀವನ ನಡೆಸುವುದು ಹೇಗೆ?

ನೇರ ನೇಮಕಾತಿ ಮಾಡಿದರೆ ₹50 ಸಾವಿರ ಸಂಬಳ ನೀಡಬೇಕು!

BMTC ಎಲೆಕ್ಟ್ರಿಕ್ ಬಸ್ ಡ್ರೈವರ್ ಕೆಲಸದ ಕುರಿತ ಪ್ರಮುಖ ಮಾಹಿತಿ:

9 to 6 ಕೆಲಸಕ್ಕೆ ಗುಡ್‌ಬೈ ಹೇಳಿದ ಯುವಕ! ಈಗ ಸೋಷಿಯಲ್ ಮೀಡಿಯಾದಿಂದ ತಿಂಗಳಿಗೆ ₹2.5 ಲಕ್ಷ ಆದಾಯ! 'EMI ಚಿಂತೆ ಇನ್ನಿಲ್ಲ'

10 ಸಾವಿರ ಫಾಲೋವರ್ಸ್‌ನಿಂದ ಶುರುವಾದ ಪ್ರಯಾಣ!

ಒಂದೇ ವಿಡಿಯೋಗೆ ₹1.5 ಲಕ್ಷದವರೆಗೆ ಆಫರ್!

ರಾತ್ರಿ 4 ಗಂಟೆಯವರೆಗೂ ವಿಡಿಯೋ ಎಡಿಟಿಂಗ್!

ಉದ್ಯೋಗ ಬಿಡುವ ಮುನ್ನ ಈ ಎಚ್ಚರಿಕೆ ಅಗತ್ಯ!

ಕನ್ನಡಿಗರಿಗೆ ಉದ್ಯೋಗ ನೀಡದಿದ್ದರೆ ಕಠಿಣ ಕ್ರಮ: ಮುಖ್ಯಮಂತ್ರಿ ಡಿಕೆಶಿ ಐಟಿ ಕಂಪೆನಿಗಳಿಗೆ ಖಡಕ್ ವಾರ್ನಿಂಗ್

ಸ್ವಯಂ ನಿವೃತ್ತಿ ಪಡೆದು ಮನೆಗೆ ಹೋಗಿ: ಇ-ಮೇಲ್ ನೋಡಿ ಬಿಕ್ಕಿಬಿಕ್ಕಿ ಅಳ್ತಿರೋ ಟೆಕ್ಕಿ- ಭಾವುಕ ಪೋಸ್ಟ್