Asianet Suvarna News

ಐಟಿ ಉದ್ಯೋಗಿಗಳ ಪ್ರೈವೆಸಿಗೆ ಬಿತ್ತು ಕನ್ನ: ಲ್ಯಾಪ್‌ಟಾಪ್‌ಗಳಲ್ಲಿ ಮಾನಿಟರಿಂಗ್ ಸಾಫ್ಟ್‌ವೇರ್ ಹಾಕಿ ಟ್ರ್ಯಾಕ್‌ ಮಾಡಲು ಆರಂಭಿಸಿದ ಟಿಸಿಎಸ್!

Santosh Naik — Thu, 20 Aug 2026 20:24:01 +0530

ಬೆಂಗಳೂರು (ಆ.20): ಭಾರತದ ಪ್ರಮುಖ ಐಟಿ ದೈತ್ಯ ಸಂಸ್ಥೆಯಾದ ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ (TCS) ತನ್ನ ಉದ್ಯೋಗಿಗಳಿಗೆ ನೀಡಲಾಗಿರುವ ಲ್ಯಾಪ್‌ಟಾಪ್‌ಗಳಲ್ಲಿ 'ಡಿಜಿಟಲ್ ಯೂಸರ್ ಎಕ್ಸ್‌ಪೀರಿಯನ್ಸ್ ಮಾನಿಟರಿಂಗ್' (Digital User Experience Monitoring) ಎಂಬ ವಿಶೇಷ ಟೂಲ್ ಒಂದನ್ನು ಅಳವಡಿಸಿದೆ. ಈ ನಡೆ ಇದೀಗ ಉದ್ಯೋಗಿಗಳ ವಲಯದಲ್ಲಿ ತೀವ್ರ ಕಳವಳಕ್ಕೆ ಕಾರಣವಾಗಿದ್ದು, ಇದನ್ನು ಡೇಟಾ ಭದ್ರತೆಗಾಗಿ ಬಳಸಲಾಗುತ್ತಿದೆಯೇ ಅಥವಾ ಸಿಬ್ಬಂದಿಗಳ ದಿನನಿತ್ಯದ ಚಟುವಟಿಕೆಗಳ ಮೇಲೆ ಹದ್ದಿನ ಕಣ್ಣಿಡಲು ತರಲಾಗಿದೆಯೇ ಎನ್ನುವ ಪ್ರಶ್ನೆಗಳು ಎದ್ದಿವೆ.

ಕಂಪನಿ ನೀಡಿದ ಲ್ಯಾಪ್‌ಟಾಪ್‌ಗಳಲ್ಲಿ ಅಳವಡಿಸಲಾಗಿರುವ ಈ ತಂತ್ರಜ್ಞಾನವು, ಉದ್ಯೋಗಿಗಳು ಯಾವೆಲ್ಲಾ ಆ್ಯಪ್‌ಗಳನ್ನು ಬಳಸುತ್ತಿದ್ದಾರೆ ಮತ್ತು ಪ್ರತಿಯೊಂದು ಆ್ಯಪ್‌ನಲ್ಲಿ ಎಷ್ಟು ಸಮಯ ಕಳೆಯುತ್ತಿದ್ದಾರೆ ಎನ್ನುವುದನ್ನು ಒಳಗೊಂಡಂತೆ ಹಲವು ಪ್ರಮುಖ ಮಾಹಿತಿಗಳನ್ನು ಟ್ರ್ಯಾಕ್ ಮಾಡಲು ಟಿಸಿಎಸ್‌ಗೆ ಅವಕಾಶ ನೀಡುತ್ತದೆ.

ಸುರಕ್ಷತೆಯೋ ಅಥವಾ ಅತಿಯಾದ ನಿಯಂತ್ರಣವೋ?

ಟಿಸಿಎಸ್ ಸಂಸ್ಥೆಯ ಈ ನಡೆಯನ್ನು ಆಂತರಿಕವಾಗಿ ಎರಡು ಕೋನಗಳಲ್ಲಿ ನೋಡಲಾಗುತ್ತಿದೆ. ಮೊದಲನೆಯದಾಗಿ ಕಂಪನಿಯ ಪ್ರಮುಖ ಡೇಟಾ ಸೋರಿಕೆಯಾಗುವುದನ್ನು (Data Leak) ತಡೆಯುವುದು. ಎರಡನೆಯದಾಗಿ, ಉದ್ಯೋಗಿಗಳ ಸಾಧನಗಳಲ್ಲಿ (Devices) ಅವರ ಚಟುವಟಿಕೆಗಳ ಮೇಲೆ ಹೆಚ್ಚಿನ ನಿಯಂತ್ರಣ ಮತ್ತು ನಿಗಾ ಹೊಂದುವುದು.

ಆದರೆ, ಈ ಕುರಿತು ಮಾಧ್ಯಮಗಳು ಕೇಳಿದ ಯಾವುದೇ ಪ್ರಶ್ನೆಗಳಿಗೆ ಟಿಸಿಎಸ್ ಕಂಪನಿ ಅಧಿಕೃತವಾಗಿ ಉತ್ತರಿಸಿಲ್ಲ. ಅಳವಡಿಸಲಾದ ಸಾಫ್ಟ್‌ವೇರ್‌ನ ಹೆಸರೇನು? ಅದನ್ನು ಪೂರೈಸಿದ ವೆಂಡರ್ ಯಾರು? ಸಾಫ್ಟ್‌ವೇರ್‌ನ ಸಾಮರ್ಥ್ಯವೇನು? ಉದ್ಯೋಗಿಗಳ ಯಾವ ಪ್ರಕಾರದ ಡೇಟಾವನ್ನು ಸಂಗ್ರಹಿಸಲಾಗುತ್ತಿದೆ? ಮತ್ತು ಕಂಪನಿಯ ಯಾರಿಗೆ ಈ ಮಾಹಿತಿಯನ್ನು ವೀಕ್ಷಿಸುವ ಅಧಿಕಾರವಿದೆ? ಎಂಬ ಯಾವುದೇ ಪ್ರಶ್ನೆಗೂ ಟಿಸಿಎಸ್ ಸ್ಪಷ್ಟನೆ ನೀಡಿಲ್ಲ.

ಉದ್ಯೋಗಿಗಳಲ್ಲಿ ಹೆಚ್ಚಿದ ಅನುಮಾನ

ಐಟಿ ಹಾಗೂ ಬಿಸಿನೆಸ್ ಪ್ರೊಸೆಸ್ ಮ್ಯಾನೇಜ್‌ಮೆಂಟ್ (BPM) ಕಂಪನಿಗಳು ಉದ್ಯೋಗಿ ಮಾನಿಟರಿಂಗ್ ಟೂಲ್‌ಗಳನ್ನು ವರ್ಷಗಳಿಂದ ಬಳಸುತ್ತಾ ಬಂದಿವೆಯಾದರೂ, ಟಿಸಿಎಸ್ ಈ ಹಠಾತ್ ಬದಲಾವಣೆಯ ಕುರಿತು ತನ್ನ ಸಿಬ್ಬಂದಿಗೆ ಯಾವುದೇ ಅಧಿಕೃತ ಮಾಹಿತಿ ನೀಡಿಲ್ಲ. ಈ ಕಮ್ಯುನಿಕೇಶನ್ ಕೊರತೆಯೇ ಇದೀಗ ಸಾಲು ಸಾಲು ಅನುಮಾನಗಳಿಗೆ ದಾರಿ ಮಾಡಿಕೊಟ್ಟಿದೆ.

ಈ ಕುರಿತು ಮಾತನಾಡಿರುವ ಇಐಐಆರ್‌ಟ್ರೆಂಡ್ (EIIRTrend) ಸಿಇಒ ಪರೀಕ್ಷ್ ಜೈನ್, "ಯೂಸರ್‌ ಡಿಜಿಟಲ್ ಅನುಭವ ಸರಿಯಾಗಿದೆಯೇ? ಅಪ್ಲಿಕೇಶನ್ ಸರಿಯಾಗಿ ಕೆಲಸ ಮಾಡುತ್ತಿದೆಯೇ ಅಥವಾ ಹ್ಯಾಂಗ್ ಆಗುತ್ತಿದೆಯೇ? ಮತ್ತು ಪ್ರತಿಯೊಂದು ಆ್ಯಪ್‌ನಲ್ಲಿ ಎಷ್ಟು ಸಮಯ ವಿನಿಯೋಗಿಸಲಾಗುತ್ತಿದೆ? ಎಂಬುದನ್ನು ಅರ್ಥಮಾಡಿಕೊಳ್ಳುವುದು ಈ ಸಾಫ್ಟ್‌ವೇರ್‌ನ ಉದ್ದೇಶವಾಗಿರಬಹುದು. ಕ್ಲೈಂಟ್ ನೆಟ್‌ವರ್ಕ್ ನಿರ್ವಹಿಸುವಾಗ ಇದೊಂದು ಪ್ರಮುಖ ನಿಯತಾಂಕವಾಗಿರುತ್ತದೆ. ಆದರೆ, ಹೌದು, ಕಂಪನಿಯು ಬಯಸಿದರೆ ಇದನ್ನು ಉದ್ಯೋಗಿಗಳ ಮೇಲೆ ಕಣ್ಣಿಡುವ ಸ್ಪೈವೇರ್ ಅಥವಾ ಸರ್ವೇಲೆನ್ಸ್ ಟೂಲ್ ಆಗಿಯೂ ಬಳಸಬಹುದು" ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಮಾಹಿತಿ ಸುರಕ್ಷತೆಯ ಸವಾಲು ಹಾಗೂ ಪ್ರೈವೆಸಿ ಆತಂಕ

ಜಾಗತಿಕವಾಗಿ ಐಟಿ ಕಂಪನಿಗಳ ಮೇಲೆ ಗ್ರಾಹಕರ ಸೂಕ್ಷ್ಮ ಡೇಟಾವನ್ನು ರಕ್ಷಿಸುವ ಭಾರಿ ಒತ್ತಡವಿದೆ. ಆದರೆ ಈ ರೀತಿಯ ಟೂಲ್‌ಗಳ ಮೂಲಕ ಪ್ರತಿಯೊಬ್ಬ ಉದ್ಯೋಗಿಯ ಕೆಲಸದ ಸಮಯ ಮತ್ತು ಆ್ಯಪ್ ಬಳಕೆಯನ್ನು ವ್ಯಕ್ತಿಗತ ಮಟ್ಟದಲ್ಲಿ ಸಂಗ್ರಹಿಸಿದರೆ ಅದು ಅವರ ಖಾಸಗಿತನಕ್ಕೆ ಧಕ್ಕೆ ತರುತ್ತದೆ ಎನ್ನಲಾಗಿದೆ.

ಟಿಸಿಎಸ್‌ನಲ್ಲಿ ಸುಮಾರು 6 ಲಕ್ಷಕ್ಕೂ ಹೆಚ್ಚು ಉದ್ಯೋಗಿಗಳಿದ್ದಾರೆ. ಇಷ್ಟೊಂದು ಭಾರಿ ಪ್ರಮಾಣದ ಸಿಬ್ಬಂದಿಯ ಕಾರ್ಯಚಟುವಟಿಕೆಯ ಡೇಟಾವನ್ನು ಟ್ರ್ಯಾಕ್ ಮಾಡುವುದು ಮತ್ತು ವಿಶ್ಲೇಷಿಸುವುದೇ ಕಂಪನಿಗೆ ಮತ್ತೊಂದು ಕಾರ್ಯಾಚರಣೆಯ ಹಾಗೂ ಡೇಟಾ ನಿರ್ವಹಣೆಯ ಸವಾಲಾಗಲಿದೆ. ಈ ಸಾಫ್ಟ್‌ವೇರ್ ಮೂಲಕ ಲಭ್ಯವಾಗುವ ಡೇಟಾವನ್ನು ವ್ಯಕ್ತಿಗತವಾಗಿ ಲಿಂಕ್ ಮಾಡಲಾಗುತ್ತಿದೆಯೇ ಅಥವಾ ಐಟಿ ಭದ್ರತಾ ತಂಡಕ್ಕೆ ಕ್ರೋಢೀಕರಿಸಿ ನೀಡಲಾಗುತ್ತಿದೆಯೇ ಅಥವಾ ಮ್ಯಾನೇಜರ್‌ಗಳಿಗೆ ಪ್ರವೇಶ ನೀಡಲಾಗಿದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.

ಕಾಫ್ನಿಝೆಂಟ್ ಹಾದಿಯಲ್ಲಿ ಟಿಸಿಎಸ್?

ಕಳೆದ ವರ್ಷ ಪ್ರಸಿದ್ಧ ಕಾಫ್ನಿಝೆಂಟ್ ಕಂಪನಿಯು 'ಪ್ರೋಹ್ಯಾನ್ಸ್' (ProHance) ಎಂಬ ವರ್ಕ್‌ಫೋರ್ಸ್ ಮಾನಿಟರಿಂಗ್ ಟೂಲ್ ಬಳಸಿ ಸುದ್ದಿಯಾಗಿತ್ತು. ಈ ಸಾಫ್ಟ್‌ವೇರ್ ಉದ್ಯೋಗಿಗಳು ಲ್ಯಾಪ್‌ಟಾಪ್ ಲಾಗಿನ್ ಆದ ಸಮಯ, ಬಳಸಿದ ಆ್ಯಪ್/ವೆಬ್‌ಸೈಟ್ ಹಾಗೂ ಕೆಲಸ ಮಾಡದೆ ಸುಮ್ಮನೆ ಕುಳಿತ (Inactivity) ಸಮಯವನ್ನು ಟ್ರ್ಯಾಕ್ ಮಾಡುತ್ತಿತ್ತು. ಆದರೆ ಕಾಫ್ನಿಝೆಂಟ್ ಇದನ್ನು ಉದ್ಯೋಗಿಗಳ ಕಾರ್ಯಕ್ಷಮತೆ ಅಳೆಯಲು ಬಳಸುತ್ತಿಲ್ಲ, ಕೇವಲ ಕ್ಲೈಂಟ್‌ಗಳ ವಿನಂತಿಯ ಮೇರೆಗೆ ಪ್ರಕ್ರಿಯೆಯ ದಕ್ಷತೆ ತಿಳಿಯಲು ಬಳಸಲಾಗುತ್ತಿದೆ ಎಂದು ಸ್ಪಷ್ಟನೆ ನೀಡಿತ್ತು.

ಝಡ್‌ಸ್ಕೇಲರ್ (Zscaler) ಜೊತೆಗಿನ ಪಾಲುದಾರಿಕೆ

ಕೆಲವು ತಿಂಗಳ ಹಿಂದೆಯಷ್ಟೇ ಟಿಸಿಎಸ್ ತನ್ನ ಸೈಬರ್ ಸೆಕ್ಯುರಿಟಿ ಪಾಲುದಾರ ಸಂಸ್ಥೆಯಾದ 'ಝಡ್‌ಸ್ಕೇಲರ್' ಜೊತೆಗಿನ ಒಪ್ಪಂದವನ್ನು ವಿಸ್ತರಿಸಿ 'ಟಿಸಿಎಸ್ ವರ್ಕ್‌ಸ್ಪೇಸ್ ಎಕ್ಸ್‌ಪೀರಿಯನ್ಸ್ ಸ್ಟುಡಿಯೋ' ಅನ್ನು ಬಿಡುಗಡೆ ಮಾಡಿತ್ತು. ಇದು 'ಝೀರೋ-ಟ್ರಸ್ಟ್ ಸೆಕ್ಯುರಿಟಿ' ಮತ್ತು 'ಡಿಜಿಟಲ್ ಎಕ್ಸ್‌ಪೀರಿಯನ್ಸ್ ಮಾನಿಟರಿಂಗ್' ಸೌಲಭ್ಯ ಹೊಂದಿದೆ ಎಂದು ತಿಳಿಸಲಾಗಿತ್ತು. ಪ್ರಸ್ತುತ ಉದ್ಯೋಗಿಗಳ ಲ್ಯಾಪ್‌ಟಾಪ್‌ಗೆ ಹಾಕಲಾಗಿರುವ ಟೂಲ್ ಇದೇ ಝಡ್‌ಸ್ಕೇಲರ್ ತಂತ್ರಜ್ಞಾನವೇ ಎಂಬುದು ಅಧಿಕೃತವಾಗಿ ದೃಢಪಟ್ಟಿಲ್ಲ.

Jobs: ವರ್ಷಕ್ಕೆ ₹1 ಕೋಟಿ ಸಂಬಳ! AI ಯುಗದಲ್ಲಿ ಎಂಜಿನಿಯರ್‌ಗಳಿಗೆ ಬಂಪರ್‌ ಬೇಡಿಕೆ, ಯಾವುದು ಈ ಹೈ-ಪೇಯಿಂಗ್‌ ಕೆಲಸ?

Sumanth SN — Mon, 26 Oct 2026 17:47:59 +0530

ತಂತ್ರಜ್ಞಾನ ಕ್ಷೇತ್ರದಲ್ಲಿ ಉದ್ಯೋಗ ಮಾಡಬೇಕು ಎಂದು ಭಾವಿಸುವವರಿಗೆ ಕೃತಕ ಬುದ್ದಿಮತ್ತೆ ಹೊಸ ಅವಕಾಶಗಳನ್ನು ಮುಂದಿಟ್ಟಿದೆ. ಪ್ರಮುಖವಾಗಿ ಸ್ಟಾಫ್ಟ್‌ವೇರ್ ಎಂಜಿನಿಯರ್‌ಗಳಿಗೆ ಉತ್ತಮ ಸಂಬಳ ನೀಡುವ ವಿಶೇಷ ವೃತ್ತಿಜೀವನವನ್ನು ಆರಂಭಿಸುವ ಅವಕಾಶವನ್ನು ನೀಡುತ್ತಿದೆ. ಅದುವೇ ಫಾವರ್ಡ್ ಡಿಪ್ಲಾಯ್ಡ್ ಎಂಜಿನಿಯರಿಂಗ್. ಈ ಕ್ಷೇತ್ರದಲ್ಲಿ ಅಗತ್ಯ ನೈಪುಣ್ಯತೆಯನ್ನು ಪಡೆದರೆ, ವರ್ಷಕ್ಕೆ 40 ಲಕ್ಷ ರೂಪಾಯಿಯಿಂದ ಒಂದು ಕೋಟಿ ರೂಪಾಯಿವರೆಗೂ ಸಂಬಳ ಪಡೆದುಕೊಳ್ಳಬಹುದು. ಅಸಲಿಗೆ ಈ ಉದ್ಯೋಗ ಏನು? ಇದರಲ್ಲಿ ಯಾವ ರೀತಿಯ ನೈಪುಣ್ಯತೆ ಪಡೆದುಕೊಳ್ಳಬೇಕು? ಉದ್ಯೋಗಿಗಳಿಗೆ ಡಿಮ್ಯಾಂಡ್ ಹೇಗಿರುತ್ತದೆ ಎಂದು ತಿಳಿದುಕೊಳ್ಳೋಣ.

ಫಾವರ್ಡ್ ರಿಪ್ಲಾಯ್ಡ್ ಎಂಜಿನಿಯರಿಂಗ್ ಎಂದರೆ ಏನು?

ಫಾವರ್ಡ್ ರಿಪ್ಲಾಯ್ಡ್ ಎಂಜಿನಿಯರ್‌ಗಳು ಸಾಫ್ಟ್‌ವೇರ್, ಎಐ ಟೆಕ್ನಾಲಜಿಯನ್ನು ವ್ಯಾಪಾರದ ಅಗತ್ಯಕ್ಕೆ ಅನುಗುಣವಾಗಿ ಉಪಯೋಗಿಸುವುದರಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ. ಕಂಪನಿಗಳ ಸಮಸ್ಯೆಗಳನ್ನು ಅರ್ಥ ಮಾಡಿಕೊಂಡು, ಅವುಗಳಿಗೆ ಸೂಕ್ತ ಪರಿಹಾರಗಳನ್ನು ರೂಪಿಸಬೇಕಾಗುತ್ತದೆ.

ಸಾಮಾನ್ಯವಾಗಿ ಕೋಡಿಂಗ್ ಮಾಡುವುದು ಮಾತ್ರವಲ್ಲದೇ, ಸಮಸ್ಯೆಗೆ ಪರಿಹಾರ ಕಂಡುಕೊಂಡು ಪರೀಕ್ಷಿಸುವುದು, ಅವುಗಳನ್ನು ಜಾರಿ ಮಾಡುವುದು, ವಾಸ್ತವ ಪರಿಸ್ಥಿತಿಗಳನ್ನು ಸರಿಯಾಗಿ ಅರ್ಥಮಾಡಿಕೊಂಡು ಸರಿಯಾಗಿ ಕೆಲಸ ಮಾಡುತ್ತಿದೆಯೋ ಇಲ್ಲವೋ ಎಂದು ತಿಳಿದುಕೊಳ್ಳುವುದು ಈ ಕೆಲಸದ ಪ್ರಮುಖ ಭಾಗವಾಗಿದೆ. ಕಂಪನಿಯ ಗ್ರಾಹಕರೊಂದಿಗೆ ನೇರವಾಗಿ ಮಾತನಾಡಿ, ಅವರ ಅಗತ್ಯಗಳನ್ನು ತಿಳಿದುಕೊಂಡು ಪರಿಹಾರ ನೀಡುವುದನ್ನು ತಿಳಿದುಕೊಳ್ಳಬೇಕಿದೆ.

2030ರ ವೇಳೆಗೆ ಭಾರೀ ಬೇಡಿಕೆ ಇರುವ ಜಾಬ್

ಸ್ಕೆಲರ್, ಸೈಬರ್ ಮೀಡಿಯಾ ರಿಸರ್ಚ್ ಒಟ್ಟಿಗೆ ಸೇರಿ ಇಂಡಿಯಾಸ್ ಎಫ್‌ಡಿಇ ಆಪರ್ಚುನಿಟಿ ಹೆಸರಿನಲ್ಲಿ ಒಂದು ವರದಿಯನ್ನು ಬಿಡುಗಡೆ ಮಾಡಲಾಗಿದೆ. ಈ ವರದಿಯಲ್ಲಿ ಉದ್ಯೋಗ ಅವಕಾಶ, ಸಂಬಳ, ನೈಪುಣ್ಯಗಳನ್ನು ವಿಶ್ಲೇಷಣೆ ಮಾಡಿದೆ. ಈ ಅಧ್ಯಯನಕ್ಕಾಗಿ ಒಂದು ಸಾವಿರ ಸ್ಟಾಫ್ಟ್ ವೇರ್ ಎಂಜಿನಿಯರ್ ಗಳು, 200 ಸಂಸ್ಥೆಗಳ ಟೆಕ್ನಾಲಜಿ ನಿರ್ಣಯಿಸುವವರಿಂದ ಮಾಹಿತಿಯನ್ನು ಸಂಗ್ರಹಿಸಲಾಗಿದೆ. ಎಂಟು ಪ್ರಮುಖ ನಗರಗಳೊಂದಿಗೆ ಕೆಲವು ಟೈರ್ ಟು ಸಿಟಿಗಳಲ್ಲಿಯೂ ಮಾಹಿತಿ ಸಂಗ್ರಹಿ ಪರಿಶೀಲನೆ ನಡೆಸಲಾಗಿದೆ.

ಈ ವರದಿಯ ಅನ್ವಯ, 2030ರ ವೇಳೆಗೆ ಫಾವರ್ಡ್ ಡಿಪ್ಲಾಯ್ಡ್ ಎಂಜಿನಿಯರಿಂಗ್ ಸ್ಕಿಲ್ಸ್ ಹೊಂದಿರುವ ಉದ್ಯೋಗಿಗಳಿಗೆ ಭಾರೀ ಬೇಡಿಕೆ ಹೆಚ್ಚಾಗಲಿದೆ. ಆದರೆ ಸದ್ಯ ಈ ಅಧಿಕೃತವಾಗಿ ಕೇವಲ ಒಂದು ರಷ್ಟು ಎಂಜಿನಿಯರ್‌ಗಳು ಮಾತ್ರ ಈ ಕೆಲಸವನ್ನು ಮಾಡುತ್ತಿದ್ದಾರೆ.

ಈ ಕ್ಷೇತ್ರದಲ್ಲಿ ಉದ್ಯೋಗ ಪಡೆದುಕೊಳ್ಳಲು ಕೇವಲ ಕೋಡಿಂಗ್ ಬಂದರೆ ಸಾಕಾಗುವುದಿಲ್ಲ. ಸ್ಟಾಫ್ಟ್ ವೇರ್‌ಅನ್ನು ಕಾರ್ಯಗತಗೊಳಿಸಿ, ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳುವ ಕೌಶಲ್ಯಗಳನ್ನು ಉದ್ಯೋಗಿಗಳು ಹೊಂದಿರಬೇಕು. ಎಐ ತಂತ್ರಜ್ಞಾನದ ಬಳಕೆ ಹೆಚ್ಚಾದಂತೆ, ರಿಯಲ್ ಟೈಮ್‌ನಲ್ಲಿ ತಾಂತ್ರಿಕ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳುವುದು ವೃತ್ತಿಪರರಿಗೆ ಹೆಚ್ಚಿನ ಅವಕಾಶಗಳನ್ನು ಒದಗಿಸುತ್ತವೆ.

WFH ಮಾಡುವಿರಾ? ಹುಷಾರ್!: ದಿನಕ್ಕೆ 8 ಗಂಟೆ ವಿಡಿಯೋ ಕಾಲ್‌ನಲ್ಲೇ ಕೂರಿಸುವ ಬಾಸ್ ವಿರುದ್ಧ ಉದ್ಯೋಗಿ ಮಾಡಿದ್ದೇನು?

Chandrashekar GS — Sun, 16 Aug 2026 07:11:09 +0530

ವರ್ಕ್ ಫ್ರಮ್ ಹೋಮ್ ಕೆಲಸ ಮಾಡುತ್ತಿರುವ ಉದ್ಯೋಗಿಯೊಬ್ಬರು ತಮ್ಮ ಮ್ಯಾನೇಜರ್‌ನ ಅತಿಯಾದ ಕರೆಗಳ ಕುರಿತು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ದಿನದ ಬಹುಪಾಲು ಸಮಯವನ್ನು ಮ್ಯಾನೇಜರ್ ಜೊತೆ ವೀಡಿಯೊ ಮತ್ತು ಫೋನ್ ಕರೆಗಳಲ್ಲಿ ಕಳೆಯಬೇಕಾಗುತ್ತಿದ್ದು, ಇದರಿಂದ ಕೆಲಸದ ಮೇಲೆ ಗಮನ ಕೇಂದ್ರೀಕರಿಸಲು ಸಾಧ್ಯವಾಗುತ್ತಿಲ್ಲ ಎಂದು ಅವರು ಹೇಳಿಕೊಂಡಿದ್ದಾರೆ.

ಎರಡು ದಿನಗಳಲ್ಲಿ ಬರೋಬ್ಬರಿ 15 ಗಂಟೆ ಕರೆ!

ರೆಡ್ಡಿಟ್‌ನಲ್ಲಿ ತಮ್ಮ ಅನುಭವ ಹಂಚಿಕೊಂಡಿರುವ ಉದ್ಯೋಗಿಯ ಪ್ರಕಾರ, ಕೇವಲ ಎರಡು ದಿನಗಳಲ್ಲಿ ಮ್ಯಾನೇಜರ್ ಜೊತೆ ಸುಮಾರು 15 ಗಂಟೆ ಮಾತನಾಡಿದ್ದಾರೆ. ಒಂದು ದಿನ ಮೈಕ್ರೋಸಾಫ್ಟ್ ಟೀಮ್ಸ್‌ನಲ್ಲಿ 7 ಗಂಟೆ 21 ನಿಮಿಷ, ಮತ್ತೊಂದು ದಿನ 5 ಗಂಟೆ 43 ನಿಮಿಷ ಟೀಮ್ಸ್ ಕರೆ ಹಾಗೂ 1 ಗಂಟೆ 53 ನಿಮಿಷ ಫೋನ್ ಕರೆ ನಡೆದಿತ್ತು.

ಕೆಲಸದ ಅಗತ್ಯಕ್ಕಾಗಿ ಕೆಲವು ಕರೆಗಳು ನಡೆಯುವುದು ಸಹಜ. ಆದರೆ ಇಲ್ಲಿ ಸಮಸ್ಯೆ ಎಂದರೆ, ಬಹುತೇಕ ಸಂಭಾಷಣೆಗಳು ಕೆಲಸಕ್ಕೆ ಸಂಬಂಧಿಸಿದ್ದೇ ಅಲ್ಲ ಎಂಬುದು ಉದ್ಯೋಗಿಯ ಆರೋಪ.

‘ಕೆಲಸದ ಮಾತಿಗಿಂತ ವೈಯಕ್ತಿಕ ಚರ್ಚೆಯೇ ಹೆಚ್ಚು’!

ಉದ್ಯೋಗಿ ಹೇಳುವಂತೆ, ಮ್ಯಾನೇಜರ್ ಕೆಲಸದ ಮಧ್ಯೆಯೇ ವೈಯಕ್ತಿಕ ವಿಚಾರಗಳನ್ನು ಚರ್ಚಿಸುತ್ತಾರೆ. ತಾವು ಖರೀದಿಸಲು ಬಯಸುವ ವಸ್ತುಗಳ ಚಿತ್ರಗಳನ್ನು ಕಳುಹಿಸುವುದು, ವೈಯಕ್ತಿಕ ವಿಷಯಗಳ ಕುರಿತು ಮಾತನಾಡುವುದು ಸೇರಿದಂತೆ ಹಲವು ವಿಚಾರಗಳು ಕರೆಗಳಲ್ಲಿ ನಡೆಯುತ್ತವೆ.

“ನನ್ನ ಪಕ್ಕದಲ್ಲಿ ಯಾರೋ ಕುಳಿತು ದಿನವಿಡೀ ಮಾತನಾಡುತ್ತಿರುವಂತೆ ಭಾಸವಾಗುತ್ತದೆ” ಎಂಬ ರೀತಿಯಲ್ಲಿ ಅವರು ತಮ್ಮ ಅನುಭವವನ್ನು ವಿವರಿಸಿದ್ದಾರೆ.

ಪ್ರತಿಯೊಂದು ನಿರ್ಧಾರಕ್ಕೂ ನನ್ನ ಅಭಿಪ್ರಾಯ ಬೇಕಂತೆ!

ಇಷ್ಟೇ ಅಲ್ಲದೆ, ಮ್ಯಾನೇಜರ್ ಬಹುತೇಕ ಪ್ರತಿಯೊಂದು ವಿಚಾರದಲ್ಲೂ ತಮ್ಮ ಅಭಿಪ್ರಾಯ ಕೇಳುತ್ತಾರೆ ಎಂದು ಉದ್ಯೋಗಿ ಹೇಳಿದ್ದಾರೆ. ಇದರಿಂದ ತಾವು ಮ್ಯಾನೇಜರ್‌ನ ಕೆಲಸದಲ್ಲೇ ಒಂದು ರೀತಿಯಲ್ಲಿ ತೊಡಗಿಸಿಕೊಂಡಿರುವ ಭಾವನೆ ಮೂಡುತ್ತಿದೆ ಎಂದಿದ್ದಾರೆ.

ಮ್ಯಾನೇಜರ್ ಭಾವನಾತ್ಮಕವಾಗಿ ಪ್ರತಿಕ್ರಿಯಿಸುವ ವ್ಯಕ್ತಿಯಾಗಿರುವುದರಿಂದ ನೇರವಾಗಿ ಮಿತಿಗಳನ್ನು ನಿಗದಿಪಡಿಸಿದರೆ ಪರಿಸ್ಥಿತಿ ಇನ್ನಷ್ಟು ಹದಗೆಡಬಹುದು ಎಂಬ ಆತಂಕವೂ ಉದ್ಯೋಗಿಗಿದೆ.

ಕೆಲಸ ಬಿಡಲು ಇಷ್ಟವಿಲ್ಲ; HRಗೆ ದೂರು ನೀಡಬೇಕೇ?

ಉದ್ಯೋಗಿಗೆ ಕೆಲಸ ಮತ್ತು ಕಂಪನಿ ಇಷ್ಟವಾಗಿರುವುದರಿಂದ ರಾಜೀನಾಮೆ ನೀಡುವ ಯೋಚನೆ ಇಲ್ಲ. ಆದರೆ ದಿನಕ್ಕೆ 6–8 ಗಂಟೆಗಳ ಕರೆಗಳು ಮಾನಸಿಕವಾಗಿ ದಣಿಸುತ್ತಿದ್ದು, ತಮ್ಮ ಉತ್ಪಾದಕತೆಯ ಮೇಲೂ ಪರಿಣಾಮ ಬೀರುತ್ತಿವೆ ಎಂದು ಅವರು ಹೇಳಿದ್ದಾರೆ.

ಹೀಗಾಗಿ, ಮೊದಲು ಮ್ಯಾನೇಜರ್ ಜೊತೆ ಸ್ಪಷ್ಟವಾಗಿ ಕೆಲಸದ ಸಮಯ ಮತ್ತು ಕರೆಗಳ ಕುರಿತು ಮಿತಿಗಳನ್ನು ನಿಗದಿಪಡಿಸಬೇಕೇ ಅಥವಾ HRಗೆ ವಿಷಯ ತಿಳಿಸಬೇಕೇ ಎಂಬ ಗೊಂದಲದಲ್ಲಿದ್ದಾರೆ. ಕೆಲಸದ ಸ್ಥಳದಲ್ಲಿ ಆರೋಗ್ಯಕರ ಸಂವಹನ ಮತ್ತು ವೈಯಕ್ತಿಕ ಗಡಿಗಳ ಅಗತ್ಯವನ್ನು ಈ ಘಟನೆ ಮತ್ತೊಮ್ಮೆ ಎತ್ತಿ ತೋರಿಸಿದೆ.

Manager keeps me on video calls 6-8 hours per dayby u/ in r/AskHR

ಟಿಸಿಎಸ್, ವಿಪ್ರೋ, ಇನ್ಫೋಸಿಸ್‌ ಫ್ರೆಶರ್‌ಗಳ ವಾರ್ಷಿಕ ಸ್ಯಾಲರಿ ಪ್ಯಾಕೇಜ್‌ಗಿಂತ ದುಬಾರಿ iPhone Duo, ಭಾರೀ ವೈರಲ್‌ ಆದ ಪೋಸ್ಟ್‌

Santosh Naik — Fri, 11 Sep 2026 19:14:17 +0530

ಬೆಂಗಳೂರು (ಸೆ.11): ಜಾಗತಿಕ ತಂತ್ರಜ್ಞಾನ ದೈತ್ಯ 'ಆಪಲ್' (Apple) ಸಂಸ್ಥೆಯು ತನ್ನ ಚೊಚ್ಚಲ ಫೋಲ್ಡಬಲ್ ಸ್ಮಾರ್ಟ್‌ಫೋನ್ 'ಐಫೋನ್ ಡ್ಯುಯೋ' (iPhone Duo) ಅನ್ನು ಮಾರುಕಟ್ಟೆಗೆ ಪರಿಚಯಿಸುತ್ತಿದ್ದಂತೆ, ಅದರ ಭಾರತದ ಪ್ರೀಮಿಯಂ ಬೆಲೆಗಳನ್ನು ಕಂಡ ತಂತ್ರಜ್ಞಾನ ಪ್ರಿಯರು ತಲೆಬಿಸಿ ಮಾಡಿಕೊಂಡಿದ್ದಾರೆ. ಪ್ರೀಮಿಯಂ ಸ್ಮಾರ್ಟ್‌ಫೋನ್‌ಗಳ ಬೆಲೆಗಳು ಎಷ್ಟು ಗಗನಕ್ಕೇರಿವೆ ಎಂದರೆ, ಪ್ರಮುಖ ಐಟಿ ಕಂಪನಿಗಳು ಪದವೀಧರ ಫ್ರೆಷರ್‌ಗಳಿಗೆ ನೀಡುವ ವಾರ್ಷಿಕ ಸ್ಯಾಲರಿ ಪ್ಯಾಕೇಜ್‌ಗೆ (Annual CTC) ಈ ಫೋನ್‌ನ ಬೆಲೆಗಳು ನೇರವಾಗಿ ಪೈಪೋಟಿ ನೀಡುತ್ತಿವೆ!

'ಎಕ್ಸ್'ನಲ್ಲಿ (X) ಗಗನ್ ಎಂಬುವವರು 'ಐಫೋನ್ ಡ್ಯುಯೋ' ಮಾದರಿಗಳ ಬೆಲೆಯನ್ನು ಪ್ರಮುಖ ಐಟಿ ಕಂಪನಿಗಳಾದ ಟಿಸಿಎಸ್, ವಿಪ್ರೋ, ಅಕ್ಸೆಂಚರ್ ಹಾಗೂ ಇನ್ಫೋಸಿಸ್ ನೀಡುವ ಫ್ರೆಷರ್ಸ್‌ ಸ್ಯಾಲರಿಗೆ ಹೋಲಿಸಿ ಮಾಡಿರುವ ಪೋಸ್ಟ್ ಈಗ ಇಂಟರ್ನೆಟ್‌ನಲ್ಲಿ ತೀವ್ರ ವೈರಲ್ ಆಗಿದೆ.

ವೈರಲ್ ಪೋಸ್ಟ್‌ನಲ್ಲಿರುವ ಬೆಲೆ ಹಾಗೂ ಸಂಬಳದ ಹೋಲಿಕೆ ಇಲ್ಲಿದೆ

256GB ಆವೃತ್ತಿ – ₹2,99,900. ಇದು ಟಿಸಿಎಸ್ (TCS) ಕಂಪನಿಯ ಫ್ರೆಷರ್ಸ್‌ ವಾರ್ಷಿಕ ಸ್ಯಾಲರಿ ಪ್ಯಾಕೇಜ್.

512GB ಆವೃತ್ತಿ – ₹3,24,900 ಇದು ವಿಪ್ರೋ (Wipro) ಸಂಸ್ಥೆಗೆ ಸೇರುವ ಫ್ರೆಶರ್‌ ಉದ್ಯೋಗಿಯ ವಾರ್ಷಿಕ ವೇತನ.

1TB ಆವೃತ್ತಿ – ₹3,74,900. ಇದು ಅಕ್ಸೆಂಚರ್ (Accenture) ಕಂಪನಿಯ ವೇರಿಯೇಬಲ್ ಪೇ ಸೇರಿದಂತೆ ಸಿಗುವ ವಾರ್ಷಿಕ ವೇತನ.

2TB ಆವೃತ್ತಿ – ₹4,49,900. ಇದು ಇನ್ಫೋಸಿಸ್ (Infosys) ಸಂಸ್ಥೆಯ ಆರಂಭಿಕ ಹಂತದ ಫ್ರೆಷರ್ಸ್‌ ವಾರ್ಷಿಕ ಸಿಟಿಸಿ.

ಫೋನ್ ಸ್ಪೆಸಿಫಿಕೇಶನ್ ವರ್ಸಸ್ ವಾಸ್ತವ ಬಜೆಟ್

ನಿಮ್ಮ ಸ್ಮಾರ್ಟ್‌ಫೋನ್‌ನ ಆರಂಭಿಕ ಬೆಲೆಯೇ ಒಬ್ಬ ಐಟಿ ಫ್ರೆಷರ್‌ನ ವಾರ್ಷಿಕ ಸಿಟಿಸಿಯಂತೆ (CTC) ಕಾಣಲು ಪ್ರಾರಂಭಿಸಿದಾಗ, ವಿಷಯಗಳು ನಿಜಕ್ಕೂ ಗಂಭೀರ ಹಂತಕ್ಕೆ ತಲುಪಿವೆ ಎಂಬುದು ಅರಿವಾಗುತ್ತದೆ ಎಂದು ವೈರಲ್ ಪೋಸ್ಟ್ ತಮಾಷೆಯಾಗಿ ಚಾಟಿ ಬೀಸಿದೆ.

ಒಂದು ಕಾಲದಲ್ಲಿ ಸ್ಮಾರ್ಟ್‌ಫೋನ್ ಖರೀದಿಸುವಾಗ ಇದರ ಸ್ಪೆಸಿಫಿಕೇಶನ್‌ಗಳು ಮತ್ತು ಫೀಚರ್‌ಗಳು ಏನೇನಿವೆ? ಎಂದು ರಿಸರ್ಚ್ ಮಾಡುತ್ತಿದ್ದ ಜನ, ಇಂದು ಪ್ರೀಮಿಯಂ ಫೋನ್‌ಗಳ ಬೆಲೆ ನೋಡಿ "ಇದನ್ನು ಕೊಳ್ಳಲು ನನ್ನಿಂದ ನಿಜಕ್ಕೂ ಸಾಧ್ಯವೇ?" ಎಂದು ಯೋಚಿಸುವ ಸ್ಥಿತಿಗೆ ತಲುಪಿದ್ದಾರೆ. "ಒಂದು ಇಡೀ ವರ್ಷ ಕಷ್ಟಪಟ್ಟು ದುಡಿದ ಸಂಪೂರ್ಣ ಸಂಬಳವನ್ನು ಕೇವಲ ಒಂದೇ ಒಂದು ಸ್ಮಾರ್ಟ್‌ಫೋನ್ ಖರೀದಿಸಲು ನೀವು ಖರ್ಚು ಮಾಡುತ್ತೀರಾ?" ಎಂಬ ಪ್ರಶ್ನೆ ಈಗ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಐಟಿ ವಲಯದಲ್ಲಿ ಇಂದಿಗೂ ಆರಂಭಿಕ ಹಂತದ ವೇತನಗಳು ಹತ್ತಾರು ವರ್ಷಗಳಿಂದ ಗಣನೀಯವಾಗಿ ಏರಿಕೆಯಾಗದಿರುವುದು ಮತ್ತು ಇನ್ನೊಂದೆಡೆ ಪ್ರೀಮಿಯಂ ತಂತ್ರಜ್ಞಾನದ ಬೆಲೆ ಕಲ್ಪನೆಗೂ ಮೀರಿದ ವೇಗದಲ್ಲಿ ಗಗನಕ್ಕೇರುತ್ತಿರುವುದನ್ನು ಈ ವೈರಲ್ ಪೋಸ್ಟ್ ಅತ್ಯಂತ ರೋಚಕವಾಗಿ ಹಾಗೂ ಹಾಸ್ಯಾಸ್ಪದವಾಗಿ ಪ್ರತಿಬಿಂಬಿಸಿದೆ.

"ನನ್ನ ಕಷ್ಟ ಆ ದೇವರಿಗೇ ಗೊತ್ತು..." - ತಂದೆಯ ಅನಾರೋಗ್ಯದ ಮಧ್ಯೆಯೂ ಕೆಲಸ ಕಳೆದುಕೊಳ್ಳುವ ಭಯದಲ್ಲಿ ಟೆಕ್ಕಿ

Chandrashekar GS — Mon, 20 Jul 2026 13:35:59 +0530

ಕಾರ್ಪೊರೇಟ್ ಜಗತ್ತಿನಲ್ಲಿ ಕ್ಷೀಣಿಸುತ್ತಿರುವ ಮಾನವೀಯತೆ

ಕುಟುಂಬದ ತುರ್ತು ಪರಿಸ್ಥಿತಿ ಮತ್ತು ಕಚೇರಿಯ ಜವಾಬ್ದಾರಿಗಳನ್ನು ಒಟ್ಟಿಗೆ ಸರಿದೂಗಿಸುವುದು ಪ್ರತಿಯೊಬ್ಬ ಉದ್ಯೋಗಿಗೂ ಸವಾಲಿನ ಕೆಲಸ. ಆದರೆ, ತಂದೆಯ ಗಂಭೀರ ಅನಾರೋಗ್ಯದ ಹಿನ್ನೆಲೆಯಲ್ಲಿ ಕೇವಲ 'ಹೈಬ್ರಿಡ್ ವರ್ಕ್' (Hybrid Work) ವ್ಯವಸ್ಥೆಗೆ ವಿನಂತಿಸಿದ ಉದ್ಯೋಗಿಯೊಬ್ಬರಿಗೆ, ಕಂಪನಿಯು 'ಪಿಐಪಿ' (PIP - Performance Improvement Plan) ಅಥವಾ BOTP ಬೆದರಿಕೆ ಒಡ್ಡಿರುವ ಘಟನೆ ರೆಡ್ಡಿಟ್‌ನಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

100% ಬದ್ಧತೆ ಇದ್ದರೂ ಸಿಕ್ಕಿತು ಪಿಐಪಿ:

ಉದ್ಯೋಗಿ ಹಂಚಿಕೊಂಡ ಪೋಸ್ಟ್ ಪ್ರಕಾರ, ಅವರು ಕಂಪನಿಯ ಯೋಜನೆಗಳನ್ನು 100% ನಿಯಮಬದ್ಧವಾಗಿ ಪೂರೈಸಿದ್ದು, ಯಾವುದೇ ಕಾರ್ಯಕ್ಷಮತೆ ಅಥವಾ ಶಿಸ್ತಿನ ಲೋಪ ಎಸಗಿರಲಿಲ್ಲ. ಪ್ರಸ್ತುತ ವಾರದ 5 ದಿನಗಳ ಕಾಲ ಆಫೀಸ್‌ನಿಂದಲೇ (ODC) ಕೆಲಸ ಮಾಡುವ ವ್ಯವಸ್ಥೆಯ ಬದಲಿಗೆ, ಸಂಸ್ಥೆಯ ಸಾಮಾನ್ಯ ಹೈಬ್ರಿಡ್ ಮಾದರಿಗೆ ಸ್ಥಳಾಂತರಿಸಲು ಕೇಳಿಕೊಂಡಿದ್ದರು. ಅವರು ಸಂಪೂರ್ಣ ವರ್ಕ್ ಫ್ರಮ್ ಹೋಮ್ (WFH) ಅಥವಾ ಪ್ರಾಜೆಕ್ಟ್‌ನಿಂದ ಹೊರಹೋಗಲು ಬಯಸಿರಲಿಲ್ಲ. ಮುನ್ನೆಚ್ಚರಿಕೆಯಾಗಿ ಕಿರಿಯ ಉದ್ಯೋಗಿಗಳಿಗೆ ಕೆಲಸದ ಜ್ಞಾನ ಹಸ್ತಾಂತರಿಸಿ, ತುರ್ತು ಸಮಯದಲ್ಲಿ ಲಭ್ಯವಿರುವುದಾಗಿಯೂ ಭರವಸೆ ನೀಡಿದ್ದರು.

ಮ್ಯಾನೇಜರ್ ಕಿರುಕುಳ ಮತ್ತು BU ಮುಖ್ಯಸ್ಥರಿಗೆ ದೂರು

ಉದ್ಯೋಗಿಯ ಈ ವಿನಂತಿಯನ್ನು ಪುರಸ್ಕರಿಸುವ ಬದಲು, ಮ್ಯಾನೇಜರ್ ಅದನ್ನು ತೀರಾ ನೆಗೆಟಿವ್ ಆಗಿ ಸ್ವೀಕರಿಸಿದರು. "ಈ ಉದ್ಯೋಗಿಯೂ ಯಾವಾಗಲೂ ODCಯಿಂದ ಹೊರಹೋಗಲು ನೆಪ ಹುಡುಕುತ್ತಾರೆ" ಎಂದು ಬಿಸಿನೆಸ್ ಯುನಿಟ್ (BU) ಮುಖ್ಯಸ್ಥರಿಗೆ ದೂರು ನೀಡಿದರು. ಪೂರ್ವ ಮಾಹಿತಿ ನೀಡದೆ ಇಮೇಲ್ ಕಳುಹಿಸಿದ್ದಕ್ಕೆ ಕೋಪಗೊಂಡ ಮ್ಯಾನೇಜರ್, ಉದ್ಯೋಗಿಯನ್ನು BOTPಗೆ ತಳ್ಳಲು ನಿರ್ಧರಿಸಿದ್ದಾರೆ. "ನಿಜವಾದ ವೈದ್ಯಕೀಯ ಸಮಸ್ಯೆಗೆ ಸೌಲಭ್ಯ ಕೇಳಿದ್ದಕ್ಕೆ ಇಂತಹ ಆಘಾತಕಾರಿ ಪ್ರತಿಕ್ರಿಯೆ ಸಿಗುತ್ತಿದೆ" ಎಂದು ಉದ್ಯೋಗಿ ಅಳಲು ತೋಡಿಕೊಂಡಿದ್ದಾರೆ.

ಉದ್ಯೋಗಿಗೆ ನೆಟ್ಟಿಗರ ಉಪಯುಕ್ತ ಸಲಹೆಗಳು:

ಈ ಘಟನೆಗೆ ಜಾಲತಾಣಗಳಲ್ಲಿ ವ್ಯಾಪಕ ಆಕ್ರೋಶ ವ್ಯಕ್ತವಾಗಿದೆ.

ದಾಖಲೆಗಳನ್ನು ಕಾಯ್ದುಕೊಳ್ಳಿ: ಮ್ಯಾನೇಜರ್‌ಗಳ ಜೊತೆಗಿನ ಪ್ರತಿಯೊಂದು ಸಂಭಾಷಣೆ ಹಾಗೂ ಇಮೇಲ್‌ಗಳನ್ನು ಪ್ರತಿಯಾಗಿ ದಾಖಲಿಸಿ (Documentation) ಇಟ್ಟುಕೊಳ್ಳಿ.
ಆತುರಪಟ್ಟು ನಿರ್ಧಾರ ಬೇಡ: ತಕ್ಷಣವೇ ರಾಜೀನಾಮೆ ನೀಡದೆ, ಇಮೇಲ್ ಸಾಕ್ಷ್ಯಗಳೊಂದಿಗೆ HR ಅನ್ನು ಸಂಪರ್ಕಿಸಿ.
ಹೊಸ ಆಯ್ಕೆ ಹುಡುಕಿ: ಕಾರ್ಪೊರೇಟ್ ವಲಯದಲ್ಲಿ ಮಾನವೀಯತೆ ನಿರೀಕ್ಷಿಸುವುದು ಕಷ್ಟ. ಆದ್ದರಿಂದ ತಕ್ಷಣವೇ ಬೇರೆ ಕೆಲಸಕ್ಕೆ ಅರ್ಜಿ ಸಲ್ಲಿಸಲು ನೆಟ್ಟಿಗರು ಸಲಹೆ ನೀಡಿದ್ದಾರೆ.

Manager escalated my request for hybrid work and... by u/USERNAME in r/developersIndia

IT ಕೆಲಸಕ್ಕೆ 'ಗುಡ್ ಬೈ', ರೈಸ್ ಬಿಸಿನೆಸ್‌ಗೆ 'ಹೈ': ಈಗ ಕೋಟಿ ಕೋಟಿ ವಹಿವಾಟು, ವರ್ಷಕ್ಕೆ 25 ಲಕ್ಷ ಗಳಿಸುತ್ತಿರುವ ಯುವಕ!

Chandrashekar GS — Sun, 26 Jul 2026 19:00:44 +0530

TCS ಉದ್ಯೋಗ ತಿರಸ್ಕರಿಸಿ ಅಕ್ಕಿ ವ್ಯವಹಾರಕ್ಕೆ ಎಂಟ್ರಿ! ವರ್ಷಕ್ಕೆ ₹25 ಲಕ್ಷ ಆದಾಯ ಗಳಿಸುತ್ತಿರುವ ಯುವಕನ ಕಥೆ ವೈರಲ್!

ಕಾರ್ಪೊರೇಟ್ ಉದ್ಯೋಗವೇ ಯಶಸ್ಸಿನ ಏಕೈಕ ದಾರಿ ಎಂಬ ನಂಬಿಕೆಗೆ ಸವಾಲೊಡ್ಡುವ ಮತ್ತೊಂದು ಕಥೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ. ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್ (TCS) ನೀಡಿದ್ದ ಕ್ಯಾಂಪಸ್ ಪ್ಲೇಸ್‌ಮೆಂಟ್ ಅವಕಾಶವನ್ನು ತಿರಸ್ಕರಿಸಿದ ಯುವಕನೊಬ್ಬ, ಇಂದು ಅಕ್ಕಿ ವಿತರಣಾ ಉದ್ಯಮದ ಮೂಲಕ ವರ್ಷಕ್ಕೆ ಸುಮಾರು ₹25 ಲಕ್ಷ ಆದಾಯ ಗಳಿಸುತ್ತಿದ್ದಾನೆ ಎಂಬ ಪೋಸ್ಟ್ X (ಹಿಂದಿನ ಟ್ವಿಟರ್)ನಲ್ಲಿ ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ.

TCS ಉದ್ಯೋಗಕ್ಕೆ ಗುಡ್‌ಬೈ ಹೇಳಿದ ಯುವಕ

X ಬಳಕೆದಾರ ಅಂಕಿತ್ ಪಾಂಡೆ ಹಂಚಿಕೊಂಡಿರುವ ಪೋಸ್ಟ್ ಪ್ರಕಾರ, ಉತ್ತಮ ಸಂಬಳದ ಕಾರ್ಪೊರೇಟ್ ಉದ್ಯೋಗವನ್ನು ಆಯ್ಕೆ ಮಾಡಿಕೊಳ್ಳುವ ಬದಲು, ಯುವಕ ಉದ್ಯಮಶೀಲತೆಯ ಹಾದಿ ಹಿಡಿದಿದ್ದಾನೆ. ಆರಂಭದಲ್ಲಿ ಈ ನಿರ್ಧಾರವನ್ನು ಹಲವರು ಟೀಕಿಸಿ, ಭದ್ರ ಉದ್ಯೋಗ ಬಿಟ್ಟು ದೊಡ್ಡ ಅಪಾಯ ತೆಗೆದುಕೊಳ್ಳುತ್ತಿದ್ದಾನೆ ಎಂದು ಅಭಿಪ್ರಾಯಪಟ್ಟಿದ್ದರು. ಆದರೆ ಇಂದು ಅದೇ ನಿರ್ಧಾರ ಅವನಿಗೆ ಯಶಸ್ಸಿನ ದಾರಿ ತೋರಿಸಿದೆ ಎನ್ನಲಾಗಿದೆ.

ರೈತರಿಂದ ನೇರ ಖರೀದಿ, ಸ್ವಂತ ಬ್ರ್ಯಾಂಡ್ ನಿರ್ಮಾಣ

ಯುವಕ ವಿವಿಧ ಹಳ್ಳಿಗಳು ಹಾಗೂ ರಾಜ್ಯಗಳ ರೈತರಿಂದ ನೇರವಾಗಿ ಅಕ್ಕಿಯನ್ನು ಖರೀದಿಸುತ್ತಾನೆ. ಬಳಿಕ ಅಕ್ಕಿಯನ್ನು ಸ್ವಚ್ಛಗೊಳಿಸಿ, ತನ್ನದೇ ಬ್ರ್ಯಾಂಡ್ ಹೆಸರಿನಲ್ಲಿ ಪ್ಯಾಕ್ ಮಾಡಿ ಸುಮಾರು 200 ಚಿಲ್ಲರೆ ಅಂಗಡಿಗಳಿಗೆ ಪೂರೈಕೆ ಮಾಡುತ್ತಾನೆ. ಮಧ್ಯವರ್ತಿಗಳನ್ನು ಕಡಿಮೆ ಮಾಡುವ ಈ ಮಾದರಿಯಿಂದ ರೈತರು ಹಾಗೂ ವ್ಯಾಪಾರಿಗಳಿಗೆ ಅನುಕೂಲವಾಗುವ ವ್ಯವಸ್ಥೆಯನ್ನು ರೂಪಿಸಿರುವುದಾಗಿ ಪೋಸ್ಟ್‌ನಲ್ಲಿ ಉಲ್ಲೇಖಿಸಲಾಗಿದೆ.

ಅಕ್ಕಿ ವ್ಯವಹಾರದಿಂದ ಹೇಗೆ ಬರುತ್ತಿದೆ ಲಾಭ?

ಪೋಸ್ಟ್‌ನಲ್ಲಿ ವಿವರಿಸಿರುವ ವ್ಯವಹಾರ ಮಾದರಿಯ ಪ್ರಕಾರ, ರೈತರಿಂದ ಪ್ರತಿ ಕೆಜಿ ಅಕ್ಕಿಯನ್ನು ಸುಮಾರು ₹35ಕ್ಕೆ ಖರೀದಿಸಲಾಗುತ್ತದೆ. ಪ್ಯಾಕಿಂಗ್‌ಗೆ ₹3 ಮತ್ತು ಸಾಗಣೆಗೆ ₹2 ವೆಚ್ಚವಾಗುವುದರಿಂದ ಒಟ್ಟು ವೆಚ್ಚ ₹40 ಆಗುತ್ತದೆ.

ಈ ಅಕ್ಕಿಯನ್ನು ಚಿಲ್ಲರೆ ವ್ಯಾಪಾರಿಗಳಿಗೆ ಪ್ರತಿ ಕೆಜಿಗೆ ₹50ಕ್ಕೆ ಮಾರಾಟ ಮಾಡಲಾಗುತ್ತದೆ. ನಂತರ ಚಿಲ್ಲರೆ ಅಂಗಡಿಗಳು ಅದನ್ನು ಗ್ರಾಹಕರಿಗೆ ₹55ರಿಂದ ₹57ರ ದರದಲ್ಲಿ ಮಾರಾಟ ಮಾಡುತ್ತವೆ. ಈ ಲೆಕ್ಕಾಚಾರದ ಪ್ರಕಾರ, ಪ್ರತಿ ಕೆಜಿಗೆ ಸುಮಾರು ₹10 ಲಾಭ ಸಿಗುತ್ತದೆ.

My friend got a placement at TCS.He rejected it.Everyone said he was making the biggest mistake of his life.Today, he earns around ₹25 lakh a year selling rice.He buys rice directly from farmers across multiple villages and states, cleans it, packs it under his own… pic.twitter.com/93Ih45YckG

— Ankit Pandey (@iamankitpande) July 24, 2026

ತಿಂಗಳಿಗೆ 20,000 ಕೆಜಿ ಅಕ್ಕಿ ಪೂರೈಕೆ

ಈ ಉದ್ಯಮವು ಪ್ರತಿ ತಿಂಗಳು ಸುಮಾರು 20,000 ಕೆಜಿ ಅಕ್ಕಿಯನ್ನು ವಿವಿಧ ಚಿಲ್ಲರೆ ಅಂಗಡಿಗಳಿಗೆ ಪೂರೈಸುತ್ತಿದೆ ಎಂದು ಪೋಸ್ಟ್‌ನಲ್ಲಿ ಹೇಳಲಾಗಿದೆ. ಈ ಪ್ರಮಾಣದ ವ್ಯವಹಾರದಿಂದ ವರ್ಷಕ್ಕೆ ಸುಮಾರು ₹25 ಲಕ್ಷ ಆದಾಯ ಗಳಿಸಲಾಗುತ್ತಿದೆ ಎಂಬ ಅಂದಾಜು ವ್ಯಕ್ತಪಡಿಸಲಾಗಿದೆ. ಆದರೆ, ಈ ಅಂಕಿಅಂಶಗಳನ್ನು ಸ್ವತಂತ್ರವಾಗಿ ದೃಢೀಕರಿಸಲಾಗಿಲ್ಲ ಎಂಬುದನ್ನು ಗಮನಿಸಬೇಕು.

ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆ

ಈ ವೈರಲ್ ಪೋಸ್ಟ್ ಉದ್ಯಮಶೀಲತೆ, ಅಪಾಯ ಸ್ವೀಕಾರ ಮತ್ತು ವೃತ್ತಿ ಆಯ್ಕೆ ಕುರಿತು ಹೊಸ ಚರ್ಚೆಗೆ ಕಾರಣವಾಗಿದೆ. ಕೆಲವರು, "ಉದ್ಯೋಗಕ್ಕಿಂತ ಸ್ವಂತ ವ್ಯವಹಾರದಲ್ಲಿ ಬೆಳವಣಿಗೆಯ ಅವಕಾಶ ಹೆಚ್ಚು" ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇನ್ನೂ ಕೆಲವರು, "ವ್ಯವಹಾರ ಆರಂಭಿಸುವುದು ಸುಲಭದ ಕೆಲಸವಲ್ಲ. ಅದಕ್ಕೆ ನಿರಂತರ ಪರಿಶ್ರಮ, ಹಣಕಾಸಿನ ಶಿಸ್ತು, ಜವಾಬ್ದಾರಿ ಹಾಗೂ ತಾಳ್ಮೆ ಅಗತ್ಯ" ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಉದ್ಯೋಗವೇ ಅಥವಾ ಉದ್ಯಮವೇ?

ಈ ಕಥೆಯಲ್ಲಿರುವ ಆದಾಯ ಮತ್ತು ವ್ಯವಹಾರದ ವಿವರಗಳನ್ನು ಸ್ವತಂತ್ರವಾಗಿ ಪರಿಶೀಲಿಸಲಾಗಿಲ್ಲ. ಆದರೂ, ಉತ್ತಮ ಉದ್ಯೋಗದ ಅವಕಾಶವಿದ್ದರೂ ಉದ್ಯಮಶೀಲತೆಯ ಮೂಲಕ ಯಶಸ್ಸು ಸಾಧಿಸಲು ಸಾಧ್ಯವೇ ಎಂಬ ಪ್ರಶ್ನೆಯನ್ನು ಈ ಘಟನೆ ಮತ್ತೆ ಮುನ್ನೆಲೆಗೆ ತಂದಿದೆ. ಸರಿಯಾದ ಯೋಜನೆ, ಮಾರುಕಟ್ಟೆಯ ಅರಿವು ಮತ್ತು ನಿರಂತರ ಪರಿಶ್ರಮ ಇದ್ದರೆ, ಉದ್ಯಮವೂ ಉತ್ತಮ ವೃತ್ತಿ ಆಯ್ಕೆಯಾಗಬಹುದು ಎಂಬ ಚರ್ಚೆಗೆ ಈ ವೈರಲ್ ಪೋಸ್ಟ್ ಹೊಸ ಆಯಾಮ ನೀಡಿದೆ.

14 ಲಕ್ಷ ಸಂಬಳವಿದ್ದರೂ ಇನ್ಫೋಸಿಸ್ ನೀಡಿದ್ದು ಎಷ್ಟು ಗೊತ್ತಾ? ಟೆಕ್ಕಿ ಕೊಟ್ಟ ರಿಲ್ಯಾಕ್ಸ್ಡ್ 'ರಿವೇಂಜ್' ಈಗ ವೈರಲ್!

Chandrashekar GS — Tue, 11 Aug 2026 08:03:35 +0530

₹8.7 ಲಕ್ಷ ಸಂಬಳ, ₹14 ಲಕ್ಷದ ಆಫರ್; ಆದರೂ ಕಡಿಮೆ ಸಂಬಳದ ಆಫರ್!

ಇನ್ಫೋಸಿಸ್‌ನಲ್ಲಿ ಉದ್ಯೋಗ ಪಡೆಯಲು ಮುಂದಾದ ಟೆಕ್ಕಿಯೊಬ್ಬರ ಹಳೆಯ ಉದ್ಯೋಗ ಹುಡುಕಾಟದ ಅನುಭವ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಮತ್ತೆ ಚರ್ಚೆಗೆ ಬಂದಿದೆ. ಈಗಾಗಲೇ ವರ್ಷಕ್ಕೆ ₹8.7 ಲಕ್ಷ ಸಂಬಳ ಪಡೆಯುತ್ತಿದ್ದ ಅವರಿಗೆ ಮತ್ತೊಂದು ಕಂಪನಿಯಿಂದ ಸುಮಾರು ₹14 ಲಕ್ಷದ ಆಫರ್ ಇದ್ದರೂ, ಇನ್ಫೋಸಿಸ್ ನೇಮಕಾತಿ ಪ್ರಕ್ರಿಯೆಯಲ್ಲಿ ಭಾಗವಹಿಸಿದ್ದರು.

ನೇಮಕಾತಿದಾರರು ಆರಂಭದಲ್ಲೇ ಅವರ ಪ್ರಸ್ತುತ ಸಂಬಳ, ನಿರೀಕ್ಷಿತ ವೇತನ ಹಾಗೂ ಕೈಯಲ್ಲಿರುವ ಆಫರ್‌ಗಳ ಬಗ್ಗೆ ಮಾಹಿತಿ ಪಡೆದಿದ್ದರು ಎನ್ನಲಾಗಿದೆ.

ಎರಡು ರೌಂಡ್ ಇಂಟರ್ವ್ಯೂ ಪಾಸ್, ಆದರೂ ಆಫರ್ ಮಾತ್ರ ₹7.5 ಲಕ್ಷ!

ಅಭ್ಯರ್ಥಿ ಇನ್ಫೋಸಿಸ್‌ನ ಎರಡು ಹಂತದ ಸಂದರ್ಶನಗಳನ್ನು ಪೂರ್ಣಗೊಳಿಸಿ ಆಯ್ಕೆಯಾದರು. ಆದರೆ ನಂತರ ಅವರಿಗೆ ನೀಡಲಾಗಿದ್ದ ವೇತನ ಪ್ರಸ್ತಾವನೆ ₹7.5 ಲಕ್ಷ ವಾರ್ಷಿಕ ಎಂಬುದು ತಿಳಿದುಬಂದಿತು.

ಇದು ಅವರ ಪ್ರಸ್ತುತ ₹8.7 ಲಕ್ಷ ಸಂಬಳಕ್ಕಿಂತಲೂ ಕಡಿಮೆ. ಜೊತೆಗೆ ₹14 ಲಕ್ಷದ ಮತ್ತೊಂದು ಆಫರ್ ಕೈಯಲ್ಲಿದ್ದ ಸಂದರ್ಭದಲ್ಲಿ ಇಂತಹ ಪ್ರಸ್ತಾಪ ಬಂದಿದ್ದರಿಂದ ಅಭ್ಯರ್ಥಿ ಅಚ್ಚರಿಗೊಂಡರು. ಈ ಕುರಿತು ಪ್ರಶ್ನಿಸಿದಾಗ ನೇಮಕಾತಿ ತಂಡದಿಂದ ನಿರೀಕ್ಷಿತ ರೀತಿಯ ಸಮಾಧಾನಕರ ಉತ್ತರ ಸಿಗಲಿಲ್ಲ ಎಂದು ಅವರು ಹೇಳಿಕೊಂಡಿದ್ದಾರೆ.

ಮೊದಲು ನಿರಾಕರಣೆ, ನಂತರ ಮತ್ತೆ ಆಫರ್ ಕೇಳಿದ ಟೆಕ್ಕಿ!

ಆರಂಭದಲ್ಲಿ ಅಭ್ಯರ್ಥಿ ₹7.5 ಲಕ್ಷದ ಆಫರ್‌ ಅನ್ನು ತಿರಸ್ಕರಿಸಿದರು. ಆದರೆ ಕೆಲವೇ ನಿಮಿಷಗಳ ಬಳಿಕ ನೇಮಕಾತಿದಾರರನ್ನು ಮತ್ತೆ ಸಂಪರ್ಕಿಸಿ ಆಫರ್ ಲೆಟರ್ ನೀಡುವಂತೆ ಕೇಳಿದರು. ಉತ್ತಮ ವರ್ಕ್-ಲೈಫ್ ಬ್ಯಾಲೆನ್ಸ್ ಮತ್ತು ಭವಿಷ್ಯದಲ್ಲಿ ಆನ್‌ಸೈಟ್ ಅವಕಾಶಗಳ ನಿರೀಕ್ಷೆಯಿಂದ ಇನ್ಫೋಸಿಸ್‌ನಲ್ಲಿ ಆಸಕ್ತಿ ಹೊಂದಿದ್ದಾಗಿ ಅವರು ವಿವರಿಸಿದ್ದರು.

ಸುಮಾರು ಎರಡು ವಾರಗಳ ಬಳಿಕ ಆಫರ್ ಲೆಟರ್ ಬಂದರೂ, ಅಂತಿಮವಾಗಿ ಅವರು ಅದನ್ನು ಸ್ವೀಕರಿಸದೆ ತಿರಸ್ಕರಿಸಿದರು.

ಟೆಕ್ಕಿಯ ನಿರ್ಧಾರಕ್ಕೆ ಸೋಶಿಯಲ್ ಮೀಡಿಯಾದಲ್ಲಿ ಬಾರಿ ಚರ್ಚೆ!

ಆಫರ್ ತಿರಸ್ಕರಿಸಿದ ಬಳಿಕ ನೇಮಕಾತಿದಾರರಿಂದ ಹಲವು ಸಂದೇಶಗಳು ಹಾಗೂ ಮೇಲಧಿಕಾರಿಯಿಂದ ಇಮೇಲ್ ಬಂದಿದ್ದರೂ ತಾನು ಪ್ರತಿಕ್ರಿಯಿಸಲಿಲ್ಲ ಎಂದು ಟೆಕ್ಕಿ ಹೇಳಿಕೊಂಡಿದ್ದಾರೆ.

ಈ ಘಟನೆ ಆನ್‌ಲೈನ್‌ನಲ್ಲಿ ಬಲವಾದ ಚರ್ಚೆಗೆ ಕಾರಣವಾಗಿದೆ. ಕೆಲವರು ಕಂಪನಿಯು ಅಭ್ಯರ್ಥಿಯ ಸಂಬಳ ಮತ್ತು ಇತರ ಆಫರ್‌ಗಳ ಮಾಹಿತಿ ತಿಳಿದಿದ್ದರೂ ಕಡಿಮೆ ವೇತನ ಪ್ರಸ್ತಾಪಿಸಿರುವುದನ್ನು ಟೀಕಿಸಿದ್ದಾರೆ. ಮತ್ತೊಂದೆಡೆ, ಕೆಲವರು ಇಂತಹ ನಡೆ ಮುಂದಿನ ದಿನಗಳಲ್ಲಿ ಅಭ್ಯರ್ಥಿಯ ವೃತ್ತಿಜೀವನಕ್ಕೆ ವಿರುದ್ಧ ಪರಿಣಾಮ ಬೀರಬಹುದು ಎಂದು ಎಚ್ಚರಿಸಿದ್ದಾರೆ.

‘ಸರ್’ ಅನ್ನಲಿಲ್ಲ, 5 ನಿಮಿಷ ಲೇಟ್ - ಟೆಕ್ಕಿ ಕೆಲಸವೇ ಹೋಯ್ತು!

Ganesh Mabla Gowda — Sat, 25 Jul 2026 21:08:54 +0530

ಐಟಿ ಕಂಪನಿಗಳಲ್ಲಿನ Work Culture ಮತ್ತು ಉದ್ಯೋಗಿಗಳ ಮೇಲಿನ ಅತಿಯಾದ ನಿಗಾ ಬಗ್ಗೆ ಆಗಾಗ ಚರ್ಚೆಗಳು ನಡೆಯುತ್ತಲೇ ಇರುತ್ತವೆ. ಇದೀಗ ಟೆಕ್ಕಿಯೊಬ್ಬರು ತಮಗೆ ಎದುರಾದ ಕಹಿ ಅನುಭವವನ್ನು ರೆಡ್ಡಿಟ್‌ನಲ್ಲಿ ಹಂಚಿಕೊಂಡಿದ್ದು, ಅದು ಸೋಷಿಯಲ್ ಮೀಡಿಯಾದಲ್ಲಿ ಭಾರೀ ಸಂಚಲನ ಮೂಡಿಸಿದೆ. ಆರು ತಿಂಗಳ ಕಾಲ ಉತ್ತಮವಾಗಿ ಕೆಲಸ ಮಾಡಿದರೂ ಸಹ ಕಂಪನಿಯು ತನ್ನ ಆಂತರಿಕ ರಾಜಕೀಯ ಮತ್ತು ಕ್ಷುಲ್ಲಕ ಕಾರಣಗಳಿಗಾಗಿ ಅವರನ್ನು ಕೆಲಸದಿಂದ ವಜಾ ಮಾಡಿದೆ ಎಂದು ಅವರು ಆರೋಪಿಸಿದ್ದಾರೆ.

ಘಟನೆಯ ವಿವರ

ಈ ಟೆಕ್ಕಿ ಭಾರತೀಯ ಮೂಲದ ಐಟಿ ಕಂಪನಿಯೊಂದರಲ್ಲಿ 'ಕಾಂಟ್ರಾಕ್ಟ್' ಉದ್ಯೋಗಿಯಾಗಿ ಸೇರಿದ್ದರು. ಅಮೆರಿಕ ಮೂಲದ ಕ್ಲೈಂಟ್ ತಂಡದೊಂದಿಗೆ ಮನೆಯಿಂದಲೇ (Remote Work) ಕೆಲಸ ಮಾಡುತ್ತಿದ್ದರು. ಏಳು ಜನರಿದ್ದ ತಂಡದಲ್ಲಿ ಇವರು ಒಬ್ಬರೇ ಒಟ್ಟು 90 ಕೆಲಸಗಳ (Stories) ಪೈಕಿ 40 ಕೆಲಸಗಳನ್ನು ಪೂರ್ಣಗೊಳಿಸಿದ್ದರು. ಇಷ್ಟೊಂದು ಕೆಲಸ ಮಾಡಿದ್ದರೂ ಸಹ ಕಂಪನಿಯು ಅವರಿಗೆ ಯಾವುದೇ ಮುನ್ಸೂಚನೆ ನೀಡದೆ ಕೆಲಸದಿಂದ ತೆಗೆದುಹಾಕಿದೆ.

ವಜಾ ಮಾಡಲು ನೀಡಿದ ವಿಚಿತ್ರ ಕಾರಣಗಳು

ಕಂಪನಿಯು ಇವರನ್ನು ವಜಾ ಮಾಡಲು ನೀಡಿದ ಕಾರಣಗಳು ನಿಜಕ್ಕೂ ಆಶ್ಚರ್ಯಕರವಾಗಿವೆ. ಈ ಹಿಂದೆ ಅಮೆರಿಕದ ಕಂಪನಿಯಲ್ಲಿ ಕೆಲಸ ಮಾಡಿದ್ದ ಈ ಟೆಕ್ಕಿ, ಮ್ಯಾನೇಜರ್‌ಗಳನ್ನು ಹೆಸರಿಡಿದು ಕರೆಯುತ್ತಿದ್ದರು. ಆದರೆ ಈ ಭಾರತೀಯ ಕಂಪನಿಯಲ್ಲಿ "ಸರ್" ಅಥವಾ "ಮೇಡಂ" ಎಂದು ಕರೆಯದಿದ್ದಕ್ಕೆ ಮ್ಯಾನೇಜರ್‌ಗಳು ಅಸಮಾಧಾನಗೊಂಡಿದ್ದರು ಎನ್ನಲಾಗಿದೆ. ವೈದ್ಯಕೀಯ ಕಾರಣಗಳಿಗಾಗಿ ಇವರು ಕಳೆದ ಎರಡು-ಮೂರು ತಿಂಗಳಿನಿಂದ ಬೆಳಗಿನ ಸಭೆಗೆ (Standup meeting) ಕೇವಲ 5 ನಿಮಿಷ ತಡವಾಗಿ ಸೇರುತ್ತಿದ್ದರು. ಇದಕ್ಕೆ ಕ್ಲೈಂಟ್ ತಂಡದ ಮ್ಯಾನೇಜರ್ ಒಪ್ಪಿಗೆ ನೀಡಿದ್ದರೂ, ಭಾರತೀಯ ಐಟಿ ಕಂಪನಿ ಇದನ್ನು ಕಾರ್ಯಕ್ಷಮತೆಯ ಸಮಸ್ಯೆ ಎಂದು ಪರಿಗಣಿಸಿದೆ.

ಮನೆಯಿಂದ ಕೆಲಸ ಮಾಡುವಾಗ ಸ್ಲಾಕ್ (Slack) ಅಥವಾ ಟೀಮ್ಸ್ (Teams) ಆ್ಯಪ್‌ಗಳಲ್ಲಿ ಉದ್ಯೋಗಿಗಳು ಸದಾ 'ಆಕ್ಟಿವ್' ಆಗಿರಬೇಕು ಮತ್ತು ತಕ್ಷಣ ಪ್ರತಿಕ್ರಿಯಿಸಬೇಕು ಎಂದು ಕಂಪನಿ ಒತ್ತಾಯಿಸುತ್ತಿತ್ತು. ಉದ್ಯೋಗಿಗಳು ಒಬ್ಬರ ಮೇಲೊಬ್ಬರು ನಿಗಾ ಇಡುವಂತೆ ಪ್ರೇರೇಪಿಸುತ್ತಿತ್ತು ಎಂದು ಟೆಕ್ಕಿ ಆರೋಪಿಸಿದ್ದಾರೆ. ಕಂಪನಿಯು 10% ಬಗ್ ರೇಟ್ ನಿರೀಕ್ಷಿಸಿತ್ತು, ಆದರೆ ಇವರ ಕೆಲಸದಲ್ಲಿ 14% ಇತ್ತು ಎಂಬ ಕಾರಣ ನೀಡಲಾಗಿದೆ. ಆದರೆ ಪ್ರೊಡಕ್ಷನ್ ಸಮಸ್ಯೆಗಳನ್ನು ಬಗೆಹರಿಸುವಾಗ ಬಗ್ ರೇಟ್ ಸ್ವಲ್ಪ ಹೆಚ್ಚಾಗುವುದು ಸಹಜ ಎಂದು ಟೆಕ್ಕಿ ವಾದಿಸಿದ್ದಾರೆ.

ಪಾರದರ್ಶಕತೆಯ ಕೊರತೆ

ತಮ್ಮನ್ನು ಕೆಲಸದಿಂದ ತೆಗೆಯುವ ಮೊದಲು ಯಾವುದೇ ಕಾರ್ಯಕ್ಷಮತೆಯ ವಿಮರ್ಶೆ (Performance Review) ಅಥವಾ ಫೀಡ್‌ಬ್ಯಾಕ್ ನೀಡಿರಲಿಲ್ಲ. ಅಷ್ಟೇ ಅಲ್ಲದೆ, ಇವರ ಜೊತೆ ಪ್ರತಿದಿನ ಕೆಲಸ ಮಾಡುತ್ತಿದ್ದ ಕ್ಲೈಂಟ್ ತಂಡದ ಅಭಿಪ್ರಾಯವನ್ನೂ ಕಂಪನಿ ಪಡೆದುಕೊಂಡಿಲ್ಲ ಎಂದು ಇವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ರೆಡ್ಡಿಟ್‌ನಲ್ಲಿ ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ ಅನೇಕರು ಭಾರತೀಯ ಐಟಿ ಕಂಪನಿಗಳ ಹಳೆಯ ಶೈಲಿಯ ಮ್ಯಾನೇಜ್‌ಮೆಂಟ್ ಬಗ್ಗೆ ಕಿಡಿಕಾರಿದ್ದಾರೆ. ಕೆಲಸಕ್ಕಿಂತಲೂ ಬೂಟಾಟಿಕೆಗೆ ಇಲ್ಲಿ ಹೆಚ್ಚು ಆದ್ಯತೆ ನೀಡಲಾಗುತ್ತದೆ ಎಂದು ಹಲವರು ಕಮೆಂಟ್ ಮಾಡಿದ್ದಾರೆ.

ಇಂದು ಅವರು.... ನಾಳೆ ನಾನು? ಕಂಪನಿಯ ಲೇಆಫ್ ಕರಾಳ ಸತ್ಯ ಬಿಚ್ಚಿಟ್ಟ ಐಟಿ ಉದ್ಯೋಗಿ!

Chandrashekar GS — Sun, 02 Aug 2026 10:44:50 +0530

ಕಾರ್ಪೊರೇಟ್ ಕ್ಷೇತ್ರದಲ್ಲಿ ಉದ್ಯೋಗ ಕಡಿತ (Layoff) ಈಗ ಹೊಸ ವಿಷಯವಲ್ಲ. ಆದರೆ, ಅದರ ನಿಜವಾದ ಪರಿಣಾಮ ಕೇವಲ ಕೆಲಸ ಕಳೆದುಕೊಂಡವರಿಗಷ್ಟೇ ಸೀಮಿತವಾಗುವುದಿಲ್ಲ. ಕೆಲಸ ಉಳಿಸಿಕೊಂಡವರ ಮನಸ್ಸಿನಲ್ಲೂ ಭಯ, ಆತಂಕ ಮತ್ತು ಅನಿಶ್ಚಿತತೆಯ ಭಾವನೆ ಮನೆ ಮಾಡುತ್ತದೆ. ಇಂತಹ ಅನುಭವವನ್ನೇ ಉದ್ಯೋಗಿಯೊಬ್ಬರು ಸಾಮಾಜಿಕ ಜಾಲತಾಣ ರೆಡ್ಡಿಟ್‌ನಲ್ಲಿ ಹಂಚಿಕೊಂಡಿದ್ದು, ಸಾವಿರಾರು ಮಂದಿಯ ಗಮನ ಸೆಳೆದಿದೆ.

ಕೆಲಸ ಉಳಿದರೂ ಮನಸ್ಸಿನಲ್ಲಿ ಆತಂಕ..!

ತಮ್ಮ ಸಂಸ್ಥೆಯಲ್ಲಿ ನಡೆದ ಇತ್ತೀಚಿನ ಲೇಆಫ್ ವೇಳೆ ಇಬ್ಬರು ತಂಡದ ಸದಸ್ಯರು ಉದ್ಯೋಗ ಕಳೆದುಕೊಂಡಿದ್ದಾರೆ ಎಂದು ಉದ್ಯೋಗಿ ತಿಳಿಸಿದ್ದಾರೆ. ತಾವು ಕೆಲಸ ಉಳಿಸಿಕೊಂಡಿದ್ದರೂ, ಸಹೋದ್ಯೋಗಿಗಳು ಸಂಸ್ಥೆ ತೊರೆಯಬೇಕಾದ ದೃಶ್ಯ ಮನಸ್ಸಿಗೆ ಆಘಾತ ನೀಡಿದೆ ಎಂದು ಅವರು ಹೇಳಿದ್ದಾರೆ.

"ಅವರು ಹೊರಟಾಗ ನಾನು ಉಳಿದಿದ್ದೇನೆ ಎಂಬ ಕಾರಣಕ್ಕೆ ವಿಚಿತ್ರ ಭಾವನೆ, ದುಃಖ, ಭಯ ಮತ್ತು ಅಪರಾಧಿ ಮನೋಭಾವ ನನ್ನನ್ನು ಕಾಡುತ್ತಿದೆ. ಒಂದು ವೇಳೆ ಮುಂದಿನ ಬಾರಿ ನನ್ನ ಸರದಿ ಬಂದರೆ ಏನು ಮಾಡಬೇಕು ಎಂಬ ಪ್ರಶ್ನೆ ನಿರಂತರವಾಗಿ ಕಾಡುತ್ತಿದೆ" ಎಂದು ಅವರು ಬರೆದಿದ್ದಾರೆ.

ಉದ್ಯೋಗ ಭದ್ರತೆಗೆ ಸವಾಲಾದ ಲೇಆಫ್..!

ಈ ಘಟನೆ ಬಳಿಕ ಯಾವುದೇ ಉದ್ಯೋಗವೂ ಶಾಶ್ವತವಲ್ಲ ಎಂಬ ಅರಿವು ಮೂಡಿದೆ ಎಂದು ಉದ್ಯೋಗಿ ಹೇಳಿದ್ದಾರೆ. ಇಂದಿನ ಸ್ಪರ್ಧಾತ್ಮಕ ಉದ್ಯೋಗ ಮಾರುಕಟ್ಟೆಯಲ್ಲಿ ಕ್ಷಣಾರ್ಧದಲ್ಲೇ ಪರಿಸ್ಥಿತಿ ಬದಲಾಗಬಹುದು. ಕೃತಕ ಬುದ್ಧಿಮತ್ತೆ (AI), ಆರ್ಥಿಕ ಒತ್ತಡ, ವೆಚ್ಚ ಕಡಿತದ ನೀತಿಗಳು ಮತ್ತು ಸಂಸ್ಥೆಗಳ ಪುನರ್‌ರಚನೆ ಉದ್ಯೋಗ ಭದ್ರತೆಯ ಮೇಲೆ ದೊಡ್ಡ ಪರಿಣಾಮ ಬೀರುತ್ತಿವೆ ಎಂಬ ಆತಂಕವನ್ನೂ ಅವರು ವ್ಯಕ್ತಪಡಿಸಿದ್ದಾರೆ.

ಉದ್ಯೋಗ ಭದ್ರತೆ ಕುರಿತು ನೆಟ್ಟಿಗರ ಅಭಿಪ್ರಾಯ..!

ಈ ಪೋಸ್ಟ್‌ಗೆ ಸಾವಿರಾರು ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. ಹಲವರು ತಾವು ಸಹ ಇದೇ ಪರಿಸ್ಥಿತಿಯನ್ನು ಎದುರಿಸಿದ್ದಾಗಿ ತಿಳಿಸಿದ್ದಾರೆ. ಕೆಲವರು ಲೇಆಫ್ ಬಳಿಕ ಹಲವು ತಿಂಗಳು ಉದ್ಯೋಗಕ್ಕಾಗಿ ಅಲೆದ ಅನುಭವವನ್ನು ಹಂಚಿಕೊಂಡರೆ, ಇನ್ನೂ ಕೆಲವರು ಕಚೇರಿ ರಾಜಕೀಯ, ವೆಚ್ಚ ಕಡಿತ ಮತ್ತು ಕಾರ್ಯಕ್ಷಮತೆ ಹೊರತಾದ ಕಾರಣಗಳಿಂದಲೂ ಉದ್ಯೋಗ ಕಳೆದುಕೊಳ್ಳಬೇಕಾಗುತ್ತದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಕಾರ್ಪೊರೇಟ್ ಕ್ಷೇತ್ರದ ಕಹಿ ವಾಸ್ತವ..!

ಇತ್ತೀಚಿನ ವರ್ಷಗಳಲ್ಲಿ ಉದ್ಯೋಗ ಕಡಿತವು ಉದ್ಯೋಗ ಕಳೆದುಕೊಂಡವರಷ್ಟೇ ಅಲ್ಲ, ಉಳಿದ ಸಿಬ್ಬಂದಿಯ ಮಾನಸಿಕ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತಿದೆ ಎಂದು ತಜ್ಞರು ಹೇಳುತ್ತಾರೆ. ಇಂತಹ ಸಂದರ್ಭಗಳಲ್ಲಿ ಹೊಸ ಕೌಶಲ್ಯಗಳನ್ನು ಕಲಿಯುವುದು, ವೃತ್ತಿಪರ ಸಂಪರ್ಕ ವಿಸ್ತರಿಸುವುದು ಹಾಗೂ ಆರ್ಥಿಕ ಯೋಜನೆ ರೂಪಿಸಿಕೊಳ್ಳುವುದು ಅಗತ್ಯ ಎಂದು ವೃತ್ತಿ ತಜ್ಞರು ಸಲಹೆ ನೀಡುತ್ತಿದ್ದಾರೆ. ಈ ವೈರಲ್ ಪೋಸ್ಟ್ ಕೂಡ ಉದ್ಯೋಗ ಭದ್ರತೆಗಿಂತ ನಿರಂತರ ಕೌಶಲ್ಯ ವೃದ್ಧಿಯೇ ಇಂದಿನ ಕಾಲದ ದೊಡ್ಡ ಭದ್ರತೆ ಎಂಬ ಸಂದೇಶವನ್ನು ಮತ್ತೊಮ್ಮೆ ನೆನಪಿಸಿದೆ.

Today completely changed how I look at job security by u/OPusername in r/IndianWorkplace

"ಸರ್, ಕೆಲಸಕ್ಕೆ ಬರೋದೇ ಕಷ್ಟವಾಗಿದೆ!" ಸಿಇಒ ಬಳಿ ಯುವ ಉದ್ಯೋಗಿ ಹೇಳಿದ ಆ ಒಂದು ಮಾತು ಕೇಳಿ ನೆಟ್ಟಿಗರು ಶಾಕ್!

Chandrashekar GS — Tue, 18 Aug 2026 19:00:45 +0530

ಬೆಂಗಳೂರಿನಲ್ಲಿ ಕೆಲಸ ಮಾಡುತ್ತಿರುವ ಯುವ ಉದ್ಯೋಗಿಯೊಬ್ಬರು ಪ್ರತಿದಿನ ಕಚೇರಿಗೆ ತೆರಳಲು ಸುಮಾರು ₹350 ಖರ್ಚಾಗುತ್ತಿದೆ ಎಂದು ಹೇಳಿರುವುದು ಇದೀಗ ಚರ್ಚೆಗೆ ಕಾರಣವಾಗಿದೆ. ಈ ವಿಚಾರವನ್ನು CEO ಸಂಕೇತ್ ಶೇಠ್ ತಮ್ಮ LinkedIn ಪೋಸ್ಟ್‌ನಲ್ಲಿ ಹಂಚಿಕೊಂಡಿದ್ದಾರೆ. 

ಕಚೇರಿಗೆ ಹೋಗುವುದಕ್ಕೇ ದಿನಕ್ಕೆ ₹350 ಬೇಕು!

2024ರಲ್ಲಿ ಕಂಪನಿಯಲ್ಲಿ ಮತ್ತೆ ಆಫೀಸ್‌ನಿಂದ ಕೆಲಸ ಮಾಡುವ ವ್ಯವಸ್ಥೆ ಆರಂಭವಾದಾಗ ಫ್ರೆಶರ್ ಒಬ್ಬರು ತಮ್ಮ ಪ್ರಯಾಣದ ಸಮಸ್ಯೆಯನ್ನು CEO ಬಳಿ ಹೇಳಿಕೊಂಡಿದ್ದರು. ಆ ಯುವಕ ಲಾಲ್‌ಬಾಗ್ ಸಮೀಪ ವಾಸವಾಗಿದ್ದು, ಕಚೇರಿ HSR ಪ್ರದೇಶದಲ್ಲಿತ್ತು.

ಪೋಷಕರಿಗೆ ಬೆಂಗಳೂರಿನ ರಸ್ತೆ ಹಾಗೂ ಟ್ರಾಫಿಕ್ ಪರಿಸ್ಥಿತಿಯ ಕಾರಣದಿಂದ ಸ್ಕೂಟರ್‌ನಲ್ಲಿ ಓಡಾಡುವುದು ಇಷ್ಟವಿರಲಿಲ್ಲ. ಹೀಗಾಗಿ ಸಾರ್ವಜನಿಕ ಸಾರಿಗೆ ಬಳಸಿದರೆ ಸುಮಾರು ಎರಡು ಗಂಟೆ ಒಂದು ಮಾರ್ಗಕ್ಕೆ ಬೇಕಾಗುತ್ತಿತ್ತು. ಹಲವು ಬದಲಾವಣೆಗಳು ಮತ್ತು ಕೊನೆಯ ಹಂತದ ಪ್ರಯಾಣದಿಂದ ಸಮಯವೂ ಹೆಚ್ಚಾಗುತ್ತಿತ್ತು.

₹7,000-₹8,000 ಮಾಸಿಕ ಪ್ರಯಾಣ ವೆಚ್ಚ!

ಸಾರ್ವಜನಿಕ ಸಾರಿಗೆಯ ಜೊತೆಗೆ ಆಟೋ ಬಳಸಿದಾಗ ದಿನಕ್ಕೆ ಸುಮಾರು ₹350 ಖರ್ಚಾಗುತ್ತಿತ್ತು. ತಿಂಗಳಿಗೆ ಕೆಲಸದ ದಿನಗಳನ್ನು ಲೆಕ್ಕ ಹಾಕಿದರೆ ಕೇವಲ ಕಚೇರಿಗೆ ಹೋಗಿ ಬರಲು ₹7,000ರಿಂದ ₹8,000ವರೆಗೆ ಖರ್ಚಾಗುವ ಪರಿಸ್ಥಿತಿ.

ಮೊದಲ ಸಂಬಳ ಪಡೆಯುತ್ತಿರುವ ಫ್ರೆಶರ್‌ಗೆ ಇದು ದೊಡ್ಡ ಹೊರೆಯಾಗಬಹುದು ಎಂಬುದು CEO ಸಂಕೇತ್ ಶೇಠ್ ಅವರ ವಾದ.

‘ಬೆಂಗಳೂರು ಯುವಕರಿಗೆ ಕೈಗೆಟುಕದ ನಗರವಾಗುತ್ತಿದೆಯೇ?’

ಈ ಘಟನೆಯನ್ನು ಆಧರಿಸಿ ಸಂಕೇತ್ ಶೇಠ್ ಬೆಂಗಳೂರಿನ ಹೆಚ್ಚುತ್ತಿರುವ ಜೀವನ ವೆಚ್ಚದ ಬಗ್ಗೆ ಪ್ರಶ್ನೆ ಎತ್ತಿದ್ದಾರೆ. ಪ್ರತಿವರ್ಷ 21, 22 ಮತ್ತು 23 ವರ್ಷದ ಸಾವಿರಾರು ಯುವಕರು ಉದ್ಯೋಗ, ಕನಸು ಮತ್ತು ಹೊಸ ಅವಕಾಶಗಳಿಗಾಗಿ ಬೆಂಗಳೂರಿಗೆ ಬರುತ್ತಾರೆ. ಆದರೆ ಪ್ರಯಾಣ, ಬಾಡಿಗೆ, ಆಹಾರ ಸೇರಿದಂತೆ ಹೆಚ್ಚುತ್ತಿರುವ ಖರ್ಚು ಅವರ ಮೊದಲ ಸಂಬಳದ ದೊಡ್ಡ ಭಾಗವನ್ನು ನುಂಗಬಹುದು ಎಂಬ ಚರ್ಚೆ ಶುರುವಾಗಿದೆ.

ಅವರ ಪ್ರಕಾರ, 22 ವರ್ಷದ ಯುವಕ ಕೆಲಸಕ್ಕೆ ಹೋಗಲು ಸಾಧ್ಯವೇ ಎಂಬುದನ್ನೇ ಯೋಚಿಸುವ ಪರಿಸ್ಥಿತಿ ಬರಬಾರದು. ಮೊದಲ ಸಂಬಳವು ಸ್ವಾತಂತ್ರ್ಯದ ಅನುಭವ ನೀಡಬೇಕು ಎಂಬುದು ಅವರ ಅಭಿಪ್ರಾಯ.

ರಿಮೋಟ್ ವರ್ಕ್‌ಗೇ ಯುವಕರ ಒಲವು?

ಪ್ರಯಾಣ ಮತ್ತು ಜೀವನ ವೆಚ್ಚ ಇದೇ ರೀತಿ ಹೆಚ್ಚಾದರೆ, ಯುವ ಉದ್ಯೋಗಿಗಳು ವರ್ಕ್ ಫ್ರಮ್ ಹೋಮ್ ಅಥವಾ ರಿಮೋಟ್ ಉದ್ಯೋಗಗಳಿಗೆ ಆದ್ಯತೆ ನೀಡಬಹುದು, ಕಚೇರಿಗೆ ಹಾಜರಾಗಬೇಕಾದ ಅವಕಾಶಗಳನ್ನು ತಿರಸ್ಕರಿಸಬಹುದು ಅಥವಾ ಕಡಿಮೆ ಸಂಬಳವಾದರೂ ಕಡಿಮೆ ಖರ್ಚಿನ ನಗರಗಳಿಗೆ ತೆರಳಬಹುದು ಎಂಬ ಆತಂಕವನ್ನೂ ಶೇಠ್ ವ್ಯಕ್ತಪಡಿಸಿದ್ದಾರೆ.

ಸೋಶಿಯಲ್ ಮೀಡಿಯಾದಲ್ಲಿ ಬಿಸಿಬಿಸಿ ಚರ್ಚೆ!

ಈ LinkedIn ಪೋಸ್ಟ್‌ಗೆ ಮಿಶ್ರ ಪ್ರತಿಕ್ರಿಯೆಗಳು ಬಂದಿವೆ. ಕೆಲವರು ಬೆಂಗಳೂರಿನ ಜೀವನ ವೆಚ್ಚ ಹೆಚ್ಚುತ್ತಿರುವುದನ್ನು ಒಪ್ಪಿಕೊಂಡರೆ, ಇನ್ನೂ ಕೆಲವರು ಇದು ಬೆಂಗಳೂರಿಗೆ ಮಾತ್ರ ಸೀಮಿತವಾದ ಸಮಸ್ಯೆಯಲ್ಲ ಎಂದು ಹೇಳಿದ್ದಾರೆ. ಸಾರ್ವಜನಿಕ ಸಾರಿಗೆ, ವಿಶೇಷವಾಗಿ BMTC ಬಳಸುವುದು ಸೇರಿದಂತೆ ವಿವಿಧ ಪರಿಹಾರಗಳನ್ನೂ ಕೆಲವರು ಸೂಚಿಸಿದ್ದಾರೆ.

ಇನ್ನೊಬ್ಬ ಬಳಕೆದಾರರು ₹25,000-₹30,000 ಆರಂಭಿಕ ಸಂಬಳ ಪಡೆಯುವ ಫ್ರೆಶರ್‌ಗಳು ಬಾಡಿಗೆ, ಆಹಾರ ಮತ್ತು ಇತರ ಖರ್ಚುಗಳ ಬಳಿಕ ಉಳಿತಾಯ ಮಾಡಲು ಬಹಳ ಕಡಿಮೆ ಹಣ ಉಳಿಸಿಕೊಳ್ಳುತ್ತಾರೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಅಮೆರಿಕದಲ್ಲಿ ಭಾರತೀಯ ಐಟಿ ಕಂಪನಿಗಳಿಗೆ ಬಿಗ್ ಶಾಕ್: ಗ್ರೀನ್ ಕಾರ್ಡ್ ಪ್ರೋಗ್ರಾಂನಿಂದ ಇನ್ಫೋಸಿಸ್, ಟಿಸಿಎಸ್, ವಿಪ್ರೋ, ಎಚ್‌ಸಿಎಲ್ ಸಸ್ಪೆಂಡ್‌

Santosh Naik — Thu, 08 Oct 2026 21:04:18 +0530

ನ್ಯೂಯಾರ್ಕ್‌ (ಅ.8): ಅಮೆರಿಕದಲ್ಲಿ ಉದ್ಯೋಗದಲ್ಲಿರುವ ಲಕ್ಷಾಂತರ ವಿದೇಶಿ ನೌಕರರಿಗೆ ಹಾಗೂ ಜಾಗತಿಕ ಐಟಿ ಸೇವಾ ಸಂಸ್ಥೆಗಳಿಗೆ ಭಾರಿ ಆಘಾತ ಎದುರಾಗಿದೆ. ವಿದೇಶಿ ಉದ್ಯೋಗಿಗಳಿಗೆ ಅಮೆರಿಕದಲ್ಲಿ ಖಾಯಂ ನಿವಾಸದ ಹಕ್ಕು (ಗ್ರೀನ್ ಕಾರ್ಡ್) ಕಲ್ಪಿಸುವ ಪ್ರಮುಖ ನಿಯಮಾವಳಿಯಾದ 'ಪರ್ಮನೆಂಟ್ ಲೇಬರ್ ಸರ್ಟಿಫಿಕೇಶನ್ ಪ್ರೋಗ್ರಾಂ'ನಿಂದ (PERM) ಭಾರತದ ಪ್ರಮುಖ ಐಟಿ ದೈತ್ಯ ಸಂಸ್ಥೆಗಳಾದ ಇನ್ಫೋಸಿಸ್, ಟಿಸಿಎಸ್ (TCS), ವಿಪ್ರೋ ಮತ್ತು ಎಚ್‌ಸಿಎಲ್ ಸೇರಿದಂತೆ ಹಲವು ದೈತ್ಯ ಕಂಪನಿಗಳನ್ನು ಅಮೆರಿಕದ ಕಾರ್ಮಿಕ ಇಲಾಖೆಯು ಅಮಾನತುಗೊಳಿಸಿದೆ.

ವಿದೇಶಿ ನೌಕರರಿಗೆ ಗ್ರೀನ್ ಕಾರ್ಡ್ ಮತ್ತು ಖಾಯಂ ನಿವಾಸ ಕಲ್ಪಿಸುವ ನಿಟ್ಟಿನಲ್ಲಿ ಜಾರಿಯಲ್ಲಿರುವ ಈ ಸರ್ಕಾರಿ ವ್ಯವಸ್ಥೆಯನ್ನು ದುರ್ಬಳಕೆ ಮಾಡಿಕೊಳ್ಳಲಾಗುತ್ತಿದೆ ಎಂದು ಆರೋಪಿಸಿರುವ ಅಮೆರಿಕ ಸರ್ಕಾರವು ಈ ಕಠಿಣ ಕ್ರಮ ಕೈಗೊಂಡಿದೆ. ಭಾರತೀಯ ಮೂಲದ ಸಂಸ್ಥೆಗಳ ಜೊತೆಗೆ 'ಮೈಕ್ರೋಸಾಫ್ಟ್' ಮತ್ತು 'ಅಡೋಬ್'ನಂತಹ ಜಾಗತಿಕ ಟೆಕ್ ದೈತ್ಯ ಸಂಸ್ಥೆಗಳನ್ನೂ ಈ ಯೋಜನೆಯಿಂದ ಅಮಾನತುಗೊಳಿಸಲಾಗಿದೆ. ಇದರ ಜೊತೆಗೆ ಅಮೆರಿಕದ 9 ಪ್ರಮುಖ ವಿಶ್ವವಿದ್ಯಾಲಯಗಳ ವಿರುದ್ಧವೂ ತನಿಖೆ ಆರಂಭಿಸಲಾಗಿದೆ.

ವ್ಯಾಪಕ ತನಿಖೆ ಮತ್ತು ಕಠಿಣ ಕ್ರಮ

ಈ ಕುರಿತು ಅಧಿಕೃತವಾಗಿ ಮಾಹಿತಿ ನೀಡಿರುವ ಅಮೆರಿಕದ ಕಾರ್ಮಿಕ ಕಾರ್ಯದರ್ಶಿ ಕೀತ್ ಸೋಂಡರ್ಲಿಂಗ್, "ಕಾಪಾಡ್ ಗ್ರೂಪ್‌ನ ಅಡಿಯಲ್ಲಿ ಬರುವ ಕಾಗ್ನಿಜೆಂಟ್, ಇನ್ಫೋಸಿಸ್, ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್ (TCS), ವಿಪ್ರೋ, ಎಚ್‌ಸಿಎಲ್ ಹಾಗೂ ಕ್ಯಾಪ್‌ಜೆಮಿನಿ ಸಂಸ್ಥೆಗಳನ್ನು ಈ ಪ್ರೋಗ್ರಾಂನಿಂದ ಅಮಾನತುಗೊಳಿಸಲಾಗಿದೆ. ಪ್ರಸ್ತುತ ಹಲವು ಫೆಡರಲ್ ತನಿಖೆಗಳು ನಡೆಯುತ್ತಿರುವುದರಿಂದ ಮೈಕ್ರೋಸಾಫ್ಟ್ ಮತ್ತು ಅಡೋಬ್ ಸಂಸ್ಥೆಗಳ ವಿರುದ್ಧವೂ ಈ ಕ್ರಮ ಜರುಗಿಸಲಾಗಿದೆ" ಎಂದು ಸ್ಪಷ್ಟಪಡಿಸಿದ್ದಾರೆ. ಇದೇ ವೇಳೆ ಮೈಕ್ರೋಸಾಫ್ಟ್ ಸಂಸ್ಥೆಯ ನಡೆಯನ್ನು ತೀವ್ರವಾಗಿ ಖಂಡಿಸಿದ ಸೋಂಡರ್ಲಿಂಗ್, "ದುರದೃಷ್ಟವಶಾತ್ ಅಮೆರಿಕದಲ್ಲಿದ್ದುಕೊಂಡು ಈ ವ್ಯವಸ್ಥೆಯನ್ನು ಮೈಕ್ರೋಸಾಫ್ಟ್‌ಗಿಂತ ಹೆಚ್ಚು ದುರ್ಬಳಕೆ ಮಾಡಿಕೊಂಡ ಮತ್ತೊಂದು ಕಂಪನಿಯೇ ಇಲ್ಲ" ಎಂದು ವಾಗ್ದಾಳಿ ನಡೆಸಿದ್ದಾರೆ.

ಅಮೆರಿಕನ್ ಉದ್ಯೋಗಿಗಳನ್ನು ತೆಗೆದು ವಿದೇಶಿಗರಿಗೆ ಅವಕಾಶ: ಜೆ.ಡಿ. ವ್ಯಾನ್ಸ್ ಆಕ್ರೋಶ

ಈ ವಿಚಾರವಾಗಿ ಮಾತನಾಡಿರುವ ಅಮೆರಿಕದ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್, "ಅರ್ಹ ಅಮೆರಿಕನ್ ಉದ್ಯೋಗಿಗಳು ಸಿಗುತ್ತಿಲ್ಲ ಎಂದು ಅಮೆರಿಕ ಸರ್ಕಾರಕ್ಕೆ ಲಿಖಿತ ಪ್ರಮಾಣಪತ್ರ ಸಲ್ಲಿಸಿದ್ದ ಮೈಕ್ರೋಸಾಫ್ಟ್ ಸಂಸ್ಥೆಯು, 2025ರ ಒಂದೇ ವರ್ಷದಲ್ಲಿ ಬರೋಬ್ಬರಿ 6,000 ಅಮೆರಿಕನ್ ಉದ್ಯೋಗಿಗಳನ್ನು ಕೆಲಸದಿಂದ ವಜಾಗೊಳಿಸಿತ್ತು (Layoff). ಆದರೆ, ಅದೇ ಸಮಯದಲ್ಲಿ ಸಂಸ್ಥೆಯು 6,000ಕ್ಕೂ ಹೆಚ್ಚು ಎಚ್-1ಬಿ (H-1B) ವೀಸಾಗಳಿಗೆ ಅನುಮೋದನೆ ಪಡೆದುಕೊಂಡಿತ್ತಲ್ಲದೆ, 3,682 'PERM' ಅರ್ಜಿಗಳನ್ನು ಸಲ್ಲಿಸಿತ್ತು" ಎಂದು ಅಂಕಿ-ಅಂಶಗಳ ಸಮೇತ ವಿವರಿಸಿದ್ದಾರೆ.

ವಿಶೇಷವೆಂದರೆ, ಮೈಕ್ರೋಸಾಫ್ಟ್ ಸಲ್ಲಿಸಿದ್ದ ಈ 'PERM' ಅರ್ಜಿಗಳ ಪೈಕಿ ಸುಮಾರು 1,000 ಅರ್ಜಿಗಳು, ಕಂಪನಿಯು ಯಾವ ಹುದ್ದೆಗಳಿಂದ ಅಮೆರಿಕನ್ ಉದ್ಯೋಗಿಗಳನ್ನು ವಜಾಗೊಳಿಸಿತ್ತೋ ಅದೇ ಹುದ್ದೆಗಳಿಗೆ ಸಂಬಂಧಿಸಿದ್ದಾಗಿದ್ದವು ಎಂದು ವ್ಯಾನ್ಸ್ ಆರೋಪಿಸಿದ್ದಾರೆ. "ಸ್ಥಳೀಯ ಅಮೆರಿಕನ್ ನೌಕರರಿಂದ ಭರ್ತಿ ಮಾಡಲು ಸಾಧ್ಯವಾಗದ ಹುದ್ದೆಗಳಿಗೆ ಮಾತ್ರ ಜಗತ್ತಿನ 'ಅತ್ಯುತ್ತಮ ನೌಕರರನ್ನು' ಅಮೆರಿಕಕ್ಕೆ ಕರೆತರಲು ಎಚ್-1ಬಿ ವೀಸಾ ವ್ಯವಸ್ಥೆಯನ್ನು ತರಲಾಗಿತ್ತು. ಆದರೆ ಪ್ರಸ್ತುತ ಈ ಯೋಜನೆ ಸಂಪೂರ್ಣ ಅಕ್ರಮ ಮತ್ತು ವಂಚನೆಯಿಂದ ಕೂಡಿದೆ" ಎಂದು ವ್ಯಾನ್ಸ್ ಕಿಡಿಕಾರಿದ್ದಾರೆ.

ವಿಶ್ವವಿದ್ಯಾಲಯಗಳ ಮೇಲೆಯೂ ತನಿಖಾ ಅಸ್ತ್ರ

ಕಾರ್ಮಿಕ ಇಲಾಖೆಯ ಈ ಕ್ರಮವು ಕೇವಲ ಐಟಿ ಕಂಪನಿಗಳಿಗೆ ಮಾತ್ರ ಸೀಮಿತವಾಗಿಲ್ಲ. ಪ್ರಸಿದ್ಧ ಹಾರ್ವರ್ಡ್‌, ಯೇಲ್ ಹಾಗೂ ಸ್ಟ್ಯಾನ್‌ಫೋರ್ಡ್ ವಿಶ್ವವಿದ್ಯಾಲಯಗಳು ಸೇರಿದಂತೆ ಒಟ್ಟು 9 ಪ್ರಮುಖ ಅಮೆರಿಕನ್ ವಿಶ್ವವಿದ್ಯಾಲಯಗಳ ವಿರುದ್ಧವೂ ತನಿಖೆಗೆ ಆದೇಶಿಸಲಾಗಿದೆ. ಅಂತಾರಾಷ್ಟ್ರೀಯ ವಿದ್ಯಾರ್ಥಿಗಳನ್ನು ಅಮೆರಿಕಕ್ಕೆ ಕರೆತಂದು, ಸ್ಥಳೀಯ ಅಮೆರಿಕನ್ನರ ವೇತನ ಪ್ರಮಾಣವನ್ನು ಕುಗ್ಗಿಸುವ (Wage Undercutting) ಕೆಲಸದಲ್ಲಿ ಈ ಶಿಕ್ಷಣ ಸಂಸ್ಥೆಗಳು ಭಾಗಿಯಾಗಿವೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ.

ಈಗಾಗಲೇ ಈ ವಿಚಾರವಾಗಿ ಸಂಬಂಧಪಟ್ಟ ಸಂಸ್ಥೆಗಳಿಗೆ ಸಮನ್ಸ್ ಮತ್ತು ಸಬ್‌ಪೀನಾ (Subpoena) ಜಾರಿಗೊಳಿಸಲಾಗಿದೆ ಎಂದು ಕಾರ್ಮಿಕ ಇಲಾಖೆಯ ಇನ್ಸ್ಪೆಕ್ಟರ್ ಜನರಲ್ ಆಂಥೋನಿ ಡಿ'ಎಸ್ಪೊಸಿಟೊ ಸ್ಪಷ್ಟಪಡಿಸಿದ್ದಾರೆ. ಆದರೆ, ಅಮೆರಿಕ ಸರ್ಕಾರದ ಈ ದಿಢೀರ್ ನಡೆ ಮತ್ತು ಅಮಾನತು ಕ್ರಮದ ಕುರಿತು ಮೈಕ್ರೋಸಾಫ್ಟ್ ಅಥವಾ ಭಾರತೀಯ ಐಟಿ ಸಂಸ್ಥೆಗಳು ತಕ್ಷಣಕ್ಕೆ ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ. ಅಮೆರಿಕದಲ್ಲಿ ಉದ್ಯೋಗದಲ್ಲಿರುವ ಮತ್ತು ಗ್ರೀನ್ ಕಾರ್ಡ್ ನಿರೀಕ್ಷೆಯಲ್ಲಿದ್ದ ಲಕ್ಷಾಂತರ ಭಾರತೀಯ ಐಟಿ ಉದ್ಯೋಗಿಗಳಿಗೆ ಈ ಬೆಳವಣಿಗೆ ಭಾರಿ ಆತಂಕ ತಂದೊಡ್ಡಿದೆ.

.@Sonderling47: "I am hereby suspending from the Permanent Labor Certification Program some of the largest IT outsourcing firms in the world — Cognizant, Infosys, Tata, Wipro, HCL, and Capgemini — and also, due to multiple active federal investigations, @USDOL is suspending Microsoft and Adobe from the program."

— Rapid Response 47 (@RapidResponse47) October 8, 2026

ಕೆಲಸ ಬಿಟ್ಟಿದ್ದೇ ತಪ್ಪಾಯ್ತಾ?: ಮಾನಸಿಕ ಒತ್ತಡಕ್ಕೆ ರಿಸೈನ್ ಮಾಡಿದ ಯುವತಿಗೆ ₹30 ಸಾವಿರ ಹಣ ಕಟ್ಟುವಂತೆ ವಿಪ್ರೋದಿಂದ ಲೀಗಲ್ ನೋಟಿಸ್!

Santosh Naik — Tue, 13 Oct 2026 13:24:08 +0530

ಬೆಂಗಳೂರು (ಅ.13): ಕಾರ್ಪೊರೇಟ್ ಪ್ರಪಂಚದಲ್ಲಿ ಉದ್ಯೋಗಿಗಳಿಗೆ ಎಚ್‌ಆರ್ (HR) ನೀಡುವ ಬಾಯ ಮಾತಿನ ಭರವಸೆಗಳು ಕೇವಲ ಗಾಳಿಯಲ್ಲಿ ತೂರಿಹೋಗುತ್ತವೆ ಹಾಗೂ ಕೊನೆಗೆ ಉಳಿಯುವುದು ಕಂಪನಿಯ ಕಟು 'ಕಾಗದದ ನೋಟಿಸ್‌ಗಳು' ಮಾತ್ರ ಎಂಬುದಕ್ಕೆ ಪ್ರಮುಖ ಐಟಿ ದೈತ್ಯ ಸಂಸ್ಥೆ 'ವಿಪ್ರೋ' (Wipro Limited) ಎಸಗಿದೆ ಎನ್ನಲಾದ ಘಟನೆಯೊಂದು ಜೀವಂತ ಸಾಕ್ಷಿಯಾಗಿದೆ. ಕೇವಲ 4 ತಿಂಗಳು ಕೆಲಸ ಮಾಡಿ, ತೀವ್ರ ಮಾನಸಿಕ ಒತ್ತಡದ ಕಾರಣಕ್ಕೆ ಉದ್ಯೋಗಕ್ಕೆ ರಾಜೀನಾಮೆ ನೀಡಿದ ಯುವತಿಯೊಬ್ಬಳಿಗೆ ವಿಪ್ರೋ ಸಂಸ್ಥೆಯು ಬರೋಬ್ಬರಿ ₹30,130 ಹಣ ಪಾವತಿ ಮಾಡುವಂತೆ ಲೀಗಲ್ ನೋಟಿಸ್ ಕಳುಹಿಸಿದ್ದು, 10 ದಿನಗಳ ಒಳಗೆ ಬಡ್ಡಿ ಸಮೇತ ಹಣ ಪಾವತಿಸದಿದ್ದರೆ 'ಸಿವಿಲ್ ಹಾಗೂ ಕ್ರಿಮಿನಲ್' (Civil and Criminal Case) ಮೊಕದ್ದಮೆ ಹೂಡುವುದಾಗಿ ಬೆದರಿಕೆ ಹಾಕಿರುವ ಪತ್ರ ಸೋಶಿಯಲ್‌ ಮೀಡಿಯಾದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಏನಿದು ಪ್ರಕರಣ?

ಘಟನೆಯ ಹಿನ್ನೆಲೆ: ಸಂತ್ರಸ್ತ ಯುವತಿ (ತನ್ನು) 2025 ರ ಅಕ್ಟೋಬರ್‌ನಲ್ಲಿ ಗುರುಗ್ರಾಮ್ (Gurugram) ಶಾಖೆಯಲ್ಲಿ ಕಸ್ಟಮರ್ ಸರ್ವಿಸ್ ರೆಪ್ರೆಸೆಂಟೇಟಿವ್ ಆಗಿ ವಿಪ್ರೋ ಸಂಸ್ಥೆಯನ್ನು ಸೇರಿಕೊಂಡಿದ್ದರು. ಕಂಪನಿಯೊಂದಿಗೆ 12 ತಿಂಗಳ (1 ವರ್ಷ) ಉದ್ಯೋಗ ಒಪ್ಪಂದವಿತ್ತು. ಆದರೆ, ಕೆಲಸದ ವಿಪರೀತ ಮಾನಸಿಕ ಒತ್ತಡವನ್ನು (Stress) ತಾಳಲಾರದೆ ಆಕೆ ಉದ್ಯೋಗಕ್ಕೆ ಸೇರಿದ ಕೇವಲ 4 ತಿಂಗಳಿನಲ್ಲೇ ಅಂದರೆ 2026ರ ಫೆಬ್ರವರಿ 25 ರಂದು ರಾಜೀನಾಮೆ ಸಲ್ಲಿಸಿದ್ದರು.

ಯುವತಿ ರಿಸೈನ್ ಮಾಡುತ್ತಿದ್ದಂತೆಯೇ ಆಕೆಗೆ ಶಾಕ್ ನೀಡಿದ್ದ ಕಂಪನಿ, ನೋಟಿಸ್ ಪೀರಿಯಡ್ ಭರಿಸಲು ₹30,000 ಪಾವತಿಸುವಂತೆ, ಇಲ್ಲದಿದ್ದರೆ ಕೆಲಸ ಮಾಡಿದ 'ಅನುಭವದ ಪ್ರಮಾಣಪತ್ರ' (Experience Letter) ನೀಡುವುದಿಲ್ಲ ಎಂದು ಕಟ್ಟುನಿಟ್ಟಾಗಿ ತಿಳಿಸಿತ್ತು. ಈ ವೇಳೆ ಎಚ್‌ಆರ್ (HR) ಅಧಿಕಾರಿಯೊಬ್ಬರು ಫೋನ್‌ನಲ್ಲಿ ಮಾತನಾಡಿ, "ನಿಮಗೆ ಎಕ್ಸ್‌ಪೀರಿಯನ್ಸ್ ಲೆಟರ್ ಬೇಡವೆಂದಾದರೆ ಯಾವುದೇ ಹಣ ಪಾವತಿಸುವ ಅಗತ್ಯವಿಲ್ಲ" ಎಂದು ಅಭಯ ನೀಡಿದ್ದರು. ಇದನ್ನು ನಂಬಿದ ಯುವತಿ ಸುಮ್ಮನಾಗಿದ್ದರು.

FNF ಶೀಟ್‌ನಲ್ಲಿ ₹27 ಸಾವಿರಕ್ಕೂ ಹೆಚ್ಚು ಹಣ ಕಡಿತ

ಆದರೆ, 2026 ರ ಏಪ್ರಿಲ್‌ನಲ್ಲಿ ವಿಪ್ರೋ ಬಿಡುಗಡೆ ಮಾಡಿದ ತಾತ್ಕಾಲಿಕ ಅಂತಿಮ ಸೆಟಲ್‌ಮೆಂಟ್ ಪತ್ರದಲ್ಲಿ (Provisional Final Settlement Statement) ಕಂಪನಿಯು ಉದ್ಯೋಗಿಗೆ ನೀಡಬೇಕಿದ್ದ ಮೂಲ ವೇತನ, ಬೋನಸ್ ಹಾಗೂ ಹೆಚ್‌ಆರ್‌ಎ ಸೇರಿದಂತೆ ಒಟ್ಟು ₹23,372 ಗಿಫ್ಟ್ ಮೊತ್ತವನ್ನು ಶೂನ್ಯಗೊಳಿಸಿತ್ತು.

ಅಷ್ಟೇ ಅಲ್ಲದೆ, ನೋಟಿಸ್ ಪೀರಿಯಡ್ ರಿಕವರಿ (Notice Period Recovery) ಹೆಸರಿನಲ್ಲಿ ಬರೋಬ್ಬರಿ ₹27,549.79 ಗಳ ಬೃಹತ್ ಮೊತ್ತವನ್ನು ಕಡಿತಗೊಳಿಸಿತ್ತು. ಅಂತಿಮವಾಗಿ ಯುವತಿಯಿಂದ ಉದ್ಯೋಗ ಸಂಸ್ಥೆಗೆ ₹30,129.78 ಬಾಕಿ ಉಳಿದಿದೆ ಎಂದು ಮಾಹಿತಿ ನೀಡಲಾಗಿತ್ತು.

ಲೀಗಲ್ ನೋಟಿಸ್, ಕ್ರಿಮಿನಲ್ ಕೇಸ್‌ನ ಬೆದರಿಕೆ

ಎಫ್‌ಎನ್‌ಎಫ್ ಬಂದ ಹಲವು ತಿಂಗಳ ನಂತರ, ಅಂದರೆ 2026 ರ ಸೆಪ್ಟೆಂಬರ್ 30 ರ ದಿನಾಂಕ ನಮೂದಾಗಿರುವ ಅಧಿಕೃತ 'ಲೀಗಲ್ ನೋಟಿಸ್' ಅನ್ನು ಬೆಂಗಳೂರಿನ ಸರ್ಜಾಪುರ ರಸ್ತೆಯಲ್ಲಿರುವ ವಿಪ್ರೋ ಪ್ರಧಾನ ಕಚೇರಿಯ ವಕೀಲರ ಮೂಲದಿಂದ ಯುವತಿಗೆ ಕಳುಹಿಸಲಾಗಿದೆ.

ನೋಟಿಸ್‌ನಲ್ಲಿರುವ ಪ್ರಮುಖ ಬೆದರಿಕೆ ಅಂಶಗಳು

ಸಂಸ್ಥೆಗೆ ಉದ್ಯೋಗಿಯಿಂದ ಒಟ್ಟು ₹30,130 ಗಳ ಬಾಕಿ ಬರಬೇಕಿದೆ. ಈ ಹಣಕ್ಕೆ ಆಕೆಯು ನಿಗದಿತ ದಿನದಿಂದ ವಾರ್ಷಿಕ ಶೇಕಡಾ 12% ರಷ್ಟು ಬಡ್ಡಿಯನ್ನು ಸೇರಿಸಿ ಪಾವತಿಸಬೇಕು. ಅದಲ್ಲದೆ, ನೋಟಿಸ್ ತಲುಪಿದ 10 ದಿನಗಳ ಒಳಗೆ\ಹಣವನ್ನು ಎಚ್‌ಡಿಎಫ್‌ಸಿ ಬ್ಯಾಂಕ್‌ನ ವಿಪ್ರೋ ಖಾತೆಗೆ ಜಮಾ ಮಾಡಬೇಕು. ಒಂದು ವೇಳೆ ನಿಗದಿತ ಅವಧಿಯಲ್ಲಿ ಹಣ ಪಾವತಿಸಲು ವಿಫಲವಾದರೆ ಉದ್ಯೋಗಿಯ ವಿರುದ್ಧ 'ಸಿವಿಲ್ ಹಾಗೂ ಕ್ರಿಮಿನಲ್' (Civil and Criminal Legal Action) ಕಾನೂನು ಕ್ರಮ ಕೈಗೊಳ್ಳಲಾಗುವುದು ಹಾಗೂ ಅದಕ್ಕಾಗುವ ವೆಚ್ಚವನ್ನು ಉದ್ಯೋಗಿಯೇ ಭರಿಸಬೇಕಾಗುತ್ತದೆ ಎಂದು ಎಚ್ಚರಿಸಲಾಗಿದೆ.

ಫೋನ್‌ನಲ್ಲಿ ಎಚ್‌ಆರ್ ಕೊಟ್ಟ ಮಾತನ್ನು ಸಂಪೂರ್ಣವಾಗಿ ಗಾಳಿಯಲ್ಲಿ ತೂರಿ, ಕಾಗದದ ನೋಟಿಸ್ ಮೂಲಕ ₹30 ಸಾವಿರಕ್ಕೂ ಹೆಚ್ಚು ಹಣ ಹಾಗೂ 12% ಬಡ್ಡಿ ಕೇಳಿ, ಕ್ರಿಮಿನಲ್ ಕೇಸ್ ಹಾಕುವುದಾಗಿ ಎಚ್ಚರಿಸಿರುವ ವಿಪ್ರೋದ ಈ ನಡವಳಿಕೆ ಕಾರ್ಪೊರೇಟ್ ವಲಯದಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. 'ಐಟಿ ಕಂಪನಿಗಳು ತಮ್ಮ ನೌಕರರನ್ನು ಹೇಗೆ ಶೋಷಿಸುತ್ತವೆ' ಎಂಬುದಕ್ಕೆ ಈ ಪ್ರಕರಣ ಉದಾಹರಣೆಯಾಗಿದೆ.

10 ನಿಮಿಷ ಬೇಗ ಹೊರಟಿದ್ದೆ ತಪ್ಪಾ? CEO ಕಳುಹಿಸಿದ ವಾಟ್ಸಾಪ್ ಮೆಸೇಜ್ ನೋಡಿ ಉದ್ಯೋಗಿ ಕಕ್ಕಾಬಿಕ್ಕಿ!

Chandrashekar GS — Sun, 26 Jul 2026 09:15:11 +0530

10 ನಿಮಿಷ ಮೊದಲೇ ಕಚೇರಿ ಬಿಟ್ಟಿದ್ದಕ್ಕೆ CEO ಪ್ರಶ್ನೆ

ಭಾರತದ ಕಾರ್ಪೊರೇಟ್ ವಲಯದಲ್ಲಿ ಕೆಲಸದ ಸಂಸ್ಕೃತಿ ಕುರಿತು ಮತ್ತೊಮ್ಮೆ ಚರ್ಚೆ ಶುರುವಾಗಿದೆ. ರೆಡ್ಡಿಟ್‌ನಲ್ಲಿ ಯುವ ಮಾನವ ಸಂಪನ್ಮೂಲ (HR) ಉದ್ಯೋಗಿಯೊಬ್ಬರು ಹಂಚಿಕೊಂಡ ಅನುಭವ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಉದ್ಯೋಗಿಯ ಹೇಳಿಕೆಯ ಪ್ರಕಾರ, ನಿಗದಿತ ಸಮಯಕ್ಕಿಂತ ಸುಮಾರು 10 ನಿಮಿಷ ಮೊದಲೇ ಕಚೇರಿಯಿಂದ ಹೊರಟಿದ್ದಕ್ಕೆ, ಕಂಪನಿಯ CEO ವಾಟ್ಸಾಪ್ ಮೂಲಕ "ಇಂದು ಎಷ್ಟು ಗಂಟೆಗೆ ಹೊರಟಿರಿ?" ಎಂದು ಪ್ರಶ್ನಿಸಿದ್ದಾರೆ. ಈ ಸಂದೇಶದ ಸ್ಕ್ರೀನ್‌ಶಾಟ್‌ನ್ನು ಅವರು ರೆಡ್ಡಿಟ್‌ನಲ್ಲಿ ಹಂಚಿಕೊಂಡಿದ್ದು, ನೆಟ್ಟಿಗರ ನಡುವೆ ಭಾರೀ ಚರ್ಚೆಗೆ ಕಾರಣವಾಗಿದೆ.

ರೆಡ್ಡಿಟ್‌ನಲ್ಲಿ ವೈರಲ್ ಆದ ಪೋಸ್ಟ್

ಈ ಘಟನೆ r/IndianWorkplace ಸಮುದಾಯದಲ್ಲಿ ಹಂಚಿಕೊಳ್ಳಲಾಗಿತ್ತು. ಉದ್ಯೋಗಿಯು ಇದು ತಮ್ಮ ಮೊದಲ ಪೂರ್ಣಾವಧಿಯ ಕಾರ್ಪೊರೇಟ್ ಉದ್ಯೋಗವಾಗಿದ್ದು, ಇಂತಹ ಮೇಲ್ವಿಚಾರಣೆ ಸಾಮಾನ್ಯವೇ ಎಂಬ ಪ್ರಶ್ನೆಯನ್ನು ಎತ್ತಿದ್ದಾರೆ.

ಅವರ ಪ್ರಕಾರ, ಕೆಲಸದ ಸಮಯ ಮುಗಿಯಲು ಕೆಲವೇ ನಿಮಿಷಗಳು ಬಾಕಿ ಇರುವಾಗ ಹೊರಟಿದ್ದರೂ, ಕೆಲವೇ ಕ್ಷಣಗಳಲ್ಲಿ CEO ಅವರಿಂದ ವಾಟ್ಸಾಪ್ ಸಂದೇಶ ಬಂದಿದ್ದು ಅಚ್ಚರಿ ಮೂಡಿಸಿತು.

My CEO texted me for leaving 10 minutes early byu/username inr/TwentiesIndia

ಕಂಪನಿಯ ಕಾರ್ಯವೈಖರಿಯ ಬಗ್ಗೆ ಉದ್ಯೋಗಿಯ ಆರೋಪ:

ಉದ್ಯೋಗಿಯು ಕೇವಲ ಈ ಘಟನೆಯನ್ನಷ್ಟೇ ಅಲ್ಲ, ಕಂಪನಿಯ ಕಾರ್ಯವೈಖರಿಯ ಬಗ್ಗೆಯೂ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಅವರ ಹೇಳಿಕೆಯಂತೆ,

ಕೆಲಸದ ವೆಚ್ಚದ ಮರುಪಾವತಿಗೆ ಹಲವು ದಿನಗಳು ಕಾಯಬೇಕಾಯಿತು.
ಹಲವು ಬಾರಿ ನೆನಪಿಸಿದ ಬಳಿಕವೂ ಹಣ ತಡವಾಗಿ ಸಿಕ್ಕಿತು.
ಕೆಲ ಹಿರಿಯ ಉದ್ಯೋಗಿಗಳು ದೀರ್ಘ ವಿರಾಮ ತೆಗೆದುಕೊಂಡರೂ ಪ್ರಶ್ನಿಸಲಾಗಲಿಲ್ಲ.
ಆದರೆ ತಾವು ಕೆಲವೇ ನಿಮಿಷ ಮೊದಲೇ ಹೊರಟಿದ್ದಕ್ಕೆ ಪ್ರಶ್ನೆ ಎದುರಿಸಬೇಕಾಯಿತು.

ಈ ಅನುಭವದಿಂದ ಕೆಲಸದ ಸ್ಥಳದಲ್ಲಿ ಎಲ್ಲರಿಗೂ ಒಂದೇ ರೀತಿಯ ನಿಯಮ ಅನ್ವಯವಾಗುತ್ತಿದೆಯೇ ಎಂಬ ಪ್ರಶ್ನೆ ಉದ್ಭವಿಸಿದೆ ಎಂದು ಅವರು ತಿಳಿಸಿದ್ದಾರೆ.

'ಕಾರ್ಪೊರೇಟ್ ಜೀವನ ಊಹಿಸಿದ್ದಕ್ಕಿಂತ ಭಿನ್ನ'

ತಮ್ಮನ್ನು Gen Z ಉದ್ಯೋಗಿ ಎಂದು ಪರಿಚಯಿಸಿಕೊಂಡಿರುವ ಅವರು, ಈ ಘಟನೆ ಬಳಿಕ ಕಾರ್ಪೊರೇಟ್ ಜೀವನದ ಬಗ್ಗೆ ತಮ್ಮ ದೃಷ್ಟಿಕೋನ ಬದಲಾಗಿದೆ ಎಂದು ಹೇಳಿದ್ದಾರೆ.

ಕಚೇರಿ ಸಂಸ್ಕೃತಿ, ಸಮಯ ಪಾಲನೆ ಮತ್ತು ಉದ್ಯೋಗಿಗಳ ಮೇಲಿನ ನಿರೀಕ್ಷೆಗಳ ಬಗ್ಗೆ ಹೊಸ ಪ್ರಶ್ನೆಗಳು ಮೂಡಿವೆ ಎಂದು ಅವರು ಪೋಸ್ಟ್‌ನಲ್ಲಿ ಉಲ್ಲೇಖಿಸಿದ್ದಾರೆ.

ನೆಟ್ಟಿಗರ ಪ್ರತಿಕ್ರಿಯೆ ಏನು?

ರೆಡ್ಡಿಟ್‌ನಲ್ಲಿ ಅನೇಕ ಬಳಕೆದಾರರು CEO ಅವರ ನಡೆ ಮೈಕ್ರೋ ಮ್ಯಾನೇಜ್‌ಮೆಂಟ್‌ನ ಉದಾಹರಣೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಇನ್ನೂ ಕೆಲವರು,

ಉದ್ಯೋಗಿಗಳ ಸಮಯಕ್ಕಿಂತ ಅವರ ಕಾರ್ಯಕ್ಷಮತೆಯನ್ನು ಮೌಲ್ಯಮಾಪನ ಮಾಡಬೇಕು.
ನಂಬಿಕೆ ಆಧಾರಿತ ಕೆಲಸದ ವಾತಾವರಣ ಉತ್ತಮ ಫಲಿತಾಂಶ ನೀಡುತ್ತದೆ.
ವೃತ್ತಿ ಜೀವನದ ಆರಂಭದಲ್ಲಿ ಅನುಭವ ಗಳಿಸಿ, ನಂತರ ಉತ್ತಮ ಕೆಲಸದ ಸಂಸ್ಕೃತಿಯ ಕಂಪನಿಗಳನ್ನು ಆಯ್ಕೆ ಮಾಡಬಹುದು ಎಂದು ಸಲಹೆ ನೀಡಿದ್ದಾರೆ.

ಕೆಲವರು ಮಾತ್ರ ಸಂಸ್ಥೆಯ ನಿಯಮಗಳನ್ನು ಪಾಲಿಸುವುದು ಉದ್ಯೋಗಿಯ ಜವಾಬ್ದಾರಿಯೂ ಹೌದು ಎಂದು ಅಭಿಪ್ರಾಯಪಟ್ಟಿದ್ದಾರೆ. ಹೀಗಾಗಿ ಈ ವಿಷಯದಲ್ಲಿ ಸಾಮಾಜಿಕ ಜಾಲತಾಣದಲ್ಲಿ ಪರ-ವಿರೋಧ ಚರ್ಚೆ ಮುಂದುವರಿದಿದೆ.

ಮೈಕ್ರೋ ಮ್ಯಾನೇಜ್‌ಮೆಂಟ್ ಎಂದರೇನು?

ಮೈಕ್ರೋ ಮ್ಯಾನೇಜ್‌ಮೆಂಟ್ ಎಂದರೆ, ಉದ್ಯೋಗಿಗಳ ಪ್ರತಿಯೊಂದು ಸಣ್ಣ ಕೆಲಸ ಅಥವಾ ಚಲನವಲನವನ್ನು ಅತಿಯಾಗಿ ಗಮನಿಸುವ ಮತ್ತು ನಿಯಂತ್ರಿಸುವ ನಿರ್ವಹಣಾ ಶೈಲಿ. ತಜ್ಞರ ಪ್ರಕಾರ, ಇದು ದೀರ್ಘಾವಧಿಯಲ್ಲಿ ಉದ್ಯೋಗಿಗಳ ಆತ್ಮವಿಶ್ವಾಸ, ಸೃಜನಶೀಲತೆ ಮತ್ತು ಕೆಲಸದ ತೃಪ್ತಿಯ ಮೇಲೆ ಪರಿಣಾಮ ಬೀರಬಹುದು. ಆದರೆ ಕೆಲವು ಸಂಸ್ಥೆಗಳು ಶಿಸ್ತು ಮತ್ತು ಸಮಯ ಪಾಲನೆಯನ್ನು ಕಟ್ಟುನಿಟ್ಟಾಗಿ ಅನುಸರಿಸುವುದನ್ನೂ ಸಮರ್ಥಿಸಿಕೊಳ್ಳುತ್ತವೆ.

20,000 ನೇಮಕಾತಿ..ಭರ್ಜರಿ ಗುಡ್‌ ನ್ಯೂಸ್ ಕೊಟ್ಟ ಇನ್ಫೋಸಿಸ್..!

Ganesh Mabla Gowda — Sun, 26 Jul 2026 21:08:50 +0530

ಬೆಂಗಳೂರು: ಇನ್ಫೋಸಿಸ್ ಕಂಪನಿಯು ತನ್ನ ಮೊದಲ ತ್ರೈಮಾಸಿಕ (Q1) ಫಲಿತಾಂಶಗಳನ್ನು ಪ್ರಕಟಿಸಿದ್ದು, ಇದರ ಬೆನ್ನಲ್ಲೇ ಉದ್ಯೋಗಿಗಳಿಗೆ ವೇತನ ಹೆಚ್ಚಳದ ಸಿಹಿಸುದ್ದಿ ನೀಡಿದೆ. ಕಂಪನಿಯ ಸಿಇಒ ಸಲಿಲ್ ಪರೇಖ್ ಅವರು ಗುರುವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಈ ಮಹತ್ವದ ನಿರ್ಧಾರಗಳನ್ನು ಪ್ರಕಟಿಸಿದ್ದಾರೆ.

ಮೂರು ಹಂತಗಳಲ್ಲಿ ಸ್ಯಾಲರಿ ಹೈಕ್

ಇನ್ಫೋಸಿಸ್ ಈ ವರ್ಷದ ವೇತನ ಹೆಚ್ಚಳವನ್ನು ಒಟ್ಟು ಮೂರು ಹಂತಗಳಲ್ಲಿ ಜಾರಿಗೆ ತರಲು ನಿರ್ಧರಿಸಿದೆ. ಅಕ್ಟೋಬರ್‌ನಿಂದ ಈ ಪ್ರಕ್ರಿಯೆ ಆರಂಭವಾಗಲಿದ್ದು, ಜನವರಿವರೆಗೆ ಮುಂದುವರಿಯಲಿದೆ. ಹೆಚ್ಚಿನ ಉದ್ಯೋಗಿಗಳಿಗೆ ಅಕ್ಟೋಬರ್‌ನಲ್ಲಿ ವೇತನ ಹೆಚ್ಚಳದ ಲಾಭ ಸಿಗಲಿದೆ.

ಹಿರಿಯ ಅಧಿಕಾರಿಗಳು ಮತ್ತು ಸೀನಿಯರ್ ಉದ್ಯೋಗಿಗಳಿಗೆ ಜನವರಿಯಲ್ಲಿ ವೇತನ ಪರಿಷ್ಕರಣೆಯಾಗಲಿದೆ. ಆದರೆ ಎಷ್ಟು ಶೇಕಡಾವಾರು ಹೆಚ್ಚಳವಾಗಲಿದೆ ಎಂಬ ಮಾಹಿತಿಯನ್ನು ಕಂಪನಿ ಸದ್ಯಕ್ಕೆ ಗೌಪ್ಯವಾಗಿಟ್ಟಿದೆ.

20,000 ಫ್ರೆಶರ್‌ಗಳ ನೇಮಕಾತಿ

ಐಟಿ ವಲಯದಲ್ಲಿ ಉದ್ಯೋಗದ ನಿರೀಕ್ಷೆಯಲ್ಲಿರುವವರಿಗೆ ಇನ್ಫೋಸಿಸ್ ದೊಡ್ಡ ಅವಕಾಶ ನೀಡಿದೆ. ಈ ಹಣಕಾಸು ವರ್ಷದಲ್ಲಿ ಒಟ್ಟು 20,000 ಫ್ರೆಶರ್‌ಗಳನ್ನು (Freshers) ನೇಮಕ ಮಾಡಿಕೊಳ್ಳುವುದಾಗಿ ಕಂಪನಿ ಘೋಷಿಸಿದೆ. ಈಗಾಗಲೇ ಏಪ್ರಿಲ್-ಜೂನ್ ಅವಧಿಯಲ್ಲಿ 4,000ಕ್ಕೂ ಹೆಚ್ಚು ಮಂದಿಯನ್ನು ನೇಮಿಸಿಕೊಳ್ಳಲಾಗಿದೆ ಎಂದು ಕಂಪನಿ ತಿಳಿಸಿದೆ.

ಅಶೀಶ್ ಕುಮಾರ್ ದಾಶ್ ಮುಂದಿನ ಸಿಇಒ

ಕಂಪನಿಯ ನಾಯಕತ್ವದಲ್ಲೂ ಮಹತ್ವದ ಬದಲಾವಣೆಯಾಗಿದೆ. ಪ್ರಸ್ತುತ ಸಿಇಒ ಸಲಿಲ್ ಪರೇಖ್ ಅವರ ಅವಧಿ 2027ರ ಮಾರ್ಚ್‌ಗೆ ಕೊನೆಗೊಳ್ಳಲಿದ್ದು, ಅವರ ನಂತರ ಕಂಪನಿಯನ್ನು ಮುನ್ನಡೆಸಲು ಅಶೀಶ್ ಕುಮಾರ್ ದಾಶ್ (Ashiss Kumar Dash) ಅವರನ್ನು 'ಸಿಇಒ-ಡಿಸಿನೇಟ್' ಆಗಿ ಮಂಡಳಿ ನೇಮಿಸಿದೆ. ಇವರು ಏಪ್ರಿಲ್ 2027 ರಿಂದ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ. ಕಂಪನಿಯ ಒಟ್ಟು ಆದಾಯದಲ್ಲಿ ಕೃತಕ ಬುದ್ಧಿಮತ್ತೆ (Artificial Intelligence) ಸೇವೆಗಳ ಪಾಲು ಹೆಚ್ಚುತ್ತಿದೆ. ಕಳೆದ ಡಿಸೆಂಬರ್ ತ್ರೈಮಾಸಿಕದಲ್ಲಿ ಶೇ. 5.5 ರಷ್ಟಿದ್ದ ಎಐ ಕೊಡುಗೆ, ಈ ತ್ರೈಮಾಸಿಕದಲ್ಲಿ ಶೇ. 8.2 ಕ್ಕೆ ಏರಿಕೆಯಾಗಿದೆ. ಇದಲ್ಲದೆ, 3.6 ಬಿಲಿಯನ್ ಡಾಲರ್ ಮೌಲ್ಯದ ಬೃಹತ್ ಡೀಲ್‌ಗಳನ್ನು ಕಂಪನಿ ತನ್ನದಾಗಿಸಿಕೊಂಡಿದೆ.