Asianet Suvarna News

ಇನ್‌ಸ್ಟಾಗ್ರಾಮ್‌ನಲ್ಲಿ ಶ್ರೀಮಂತಿಕೆಯ ನಾಟಕ: 20 ಮಹಿಳಾ ಪೊಲೀಸ್ ಪೇದೆಗಳಿಗೆ ಮದುವೆ ಆಸೆ ತೋರಿಸಿ ₹24 ಲಕ್ಷ ವಂಚನೆ!

Chandrashekar GS — Mon, 26 Oct 2026 08:42:52 +0530

ನವದೆಹಲಿ: ಸಾಮಾಜಿಕ ಜಾಲತಾಣಗಳಲ್ಲಿ ಶ್ರೀಮಂತ ಉದ್ಯಮಿಯಂತೆ ಕಾಣಿಸಿಕೊಂಡು, ಮದುವೆಯ ಭರವಸೆ ಹಾಗೂ ಹೆಚ್ಚಿನ ಲಾಭದ ಆಮಿಷವೊಡ್ಡಿ ಮಹಿಳೆಯೊಬ್ಬರಿಗೆ ಸುಮಾರು ₹24 ಲಕ್ಷ ವಂಚಿಸಿದ ಆರೋಪದ ಮೇಲೆ ದೆಹಲಿ ಪೊಲೀಸರು ವಿಕ್ರಾಂತ್ ಕುಮಾರ್ ಅಲಿಯಾಸ್ ವಿಕ್ಕಿ ತೋಮರ್ ಎಂಬಾತನನ್ನು ಬಂಧಿಸಿದ್ದಾರೆ. ಈತ ಸುಮಾರು 20 ಮಹಿಳಾ ಪೊಲೀಸ್ ಕಾನ್‌ಸ್ಟೆಬಲ್‌ಗಳನ್ನು ಗುರಿಯಾಗಿಸಿಕೊಂಡಿರಬಹುದು ಎಂದು ತನಿಖಾಧಿಕಾರಿಗಳು ಶಂಕಿಸಿದ್ದಾರೆ. ಈ ಪ್ರಕರಣದ ಕುರಿತು ಹೆಚ್ಚಿನ ಮಾಹಿತಿ ಹೊರಬರುತ್ತಿದ್ದು, ಆರೋಪಿಯನ್ನು ಸಾಮಾಜಿಕ ಜಾಲತಾಣಗಳಲ್ಲಿ ‘ಜನ್-ಝಡ್ ರಿಕ್ಕಿ ಬಹ್ಲ್’ ಎಂದು ಕರೆಯಲಾಗುತ್ತಿದೆ.

ಇನ್‌ಸ್ಟಾಗ್ರಾಮ್ ಮೂಲಕ ಪರಿಚಯ, ಬಳಿಕ ಹಣದ ಬೇಡಿಕೆ

ಪೊಲೀಸರ ಮಾಹಿತಿಯ ಪ್ರಕಾರ, ಆರೋಪಿ ಇನ್‌ಸ್ಟಾಗ್ರಾಮ್ ಮೂಲಕ ಮಹಿಳಾ ಕಾನ್‌ಸ್ಟೆಬಲ್‌ರೊಬ್ಬರನ್ನು ಸಂಪರ್ಕಿಸಿದ್ದ. ದೆಹಲಿ ಪೊಲೀಸ್ ಇಲಾಖೆಯ ಕ್ರೀಡಾ ಕೋಟಾದ ನೇಮಕಾತಿಗೆ ಸಂಬಂಧಿಸಿದಂತೆ ಮಾರ್ಗದರ್ಶನ ಬೇಕೆಂದು ಹೇಳಿ ಪರಿಚಯ ಬೆಳೆಸಿಕೊಂಡಿದ್ದ ಎನ್ನಲಾಗಿದೆ. ನಂತರ ವಾಟ್ಸ್‌ಆ್ಯಪ್‌ನಲ್ಲಿ ಮಾತುಕತೆ ಮುಂದುವರಿಸಿ, ತಾನು ಶ್ರೀಮಂತ ಉದ್ಯಮಿ ಹಾಗೂ ಕ್ರಿಕೆಟ್ ಕ್ಷೇತ್ರದಲ್ಲಿ ಪರಿಚಿತ ವ್ಯಕ್ತಿ ಎಂಬಂತೆ ಬಿಂಬಿಸಿಕೊಂಡಿದ್ದ ಎಂದು ಆರೋಪಿಸಲಾಗಿದೆ.

ಐಷಾರಾಮಿ ಕಾರುಗಳು, ದುಬಾರಿ ರೆಸ್ಟೋರೆಂಟ್‌ಗಳು ಮತ್ತು ವೈಭವದ ಜೀವನಶೈಲಿಯನ್ನು ತೋರಿಸುವ ಫೋಟೋ ಹಾಗೂ ವಿಡಿಯೊಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಿದ್ದ ಎನ್ನಲಾಗಿದೆ. ಮಹಿಳೆಯ ವಿಶ್ವಾಸ ಗಳಿಸಿದ ಬಳಿಕ ಹೆಚ್ಚಿನ ಲಾಭ ನೀಡುವ ಹೂಡಿಕೆಯ ಆಮಿಷವೊಡ್ಡಿ ಹಣ ಪಡೆದಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

₹24 ಲಕ್ಷ ಹೇಗೆ ವಂಚಿಸಿದ?

ದೂರುದಾರ ಮಹಿಳಾ ಪೊಲೀಸ್ ಸಿಬ್ಬಂದಿ ತನ್ನ ಉಳಿತಾಯದ ಹಣವನ್ನು ಆರೋಪಿಯ ಸೂಚನೆಯಂತೆ ವರ್ಗಾಯಿಸಿದ್ದರು ಎನ್ನಲಾಗಿದೆ. ಅಲ್ಲದೆ, ಸುಮಾರು ₹12 ಲಕ್ಷ ವೈಯಕ್ತಿಕ ಸಾಲ ಪಡೆದು, ಪರಿಚಯಸ್ಥರಿಂದಲೂ ಹಣ ಸಾಲವಾಗಿ ಪಡೆದಿದ್ದರು ಎಂದು ವರದಿಯಾಗಿದೆ. ಒಟ್ಟಾರೆಯಾಗಿ ಸುಮಾರು ₹24 ಲಕ್ಷ ನಷ್ಟವಾಗಿದೆ ಎಂಬ ಆರೋಪವಿದೆ.

ಈ ಹಣದಲ್ಲಿ ಸುಮಾರು ₹8 ಲಕ್ಷವನ್ನು 1x.com ಬೆಟ್ಟಿಂಗ್ ವೇದಿಕೆಗೆ ಸಂಬಂಧಿಸಿದ ಖಾತೆಗಳಿಗೆ ವರ್ಗಾಯಿಸಲಾಗಿದೆ ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ. ಉಳಿದ ಹಣದ ವಹಿವಾಟುಗಳ ಬಗ್ಗೆಯೂ ಪೊಲೀಸರು ಪರಿಶೀಲನೆ ನಡೆಸುತ್ತಿದ್ದಾರೆ.

ಬಾಡಿಗೆ ಐಷಾರಾಮಿ ಕಾರುಗಳಲ್ಲಿ ಸುತ್ತಾಟ

ಆರೋಪಿಯು ದುಬಾರಿ ಕಾರುಗಳನ್ನು ಖರೀದಿಸದೆ, ಕೆಲವು ಗಂಟೆಗಳ ಅವಧಿಗೆ ಬಾಡಿಗೆಗೆ ಪಡೆದು ಮಹಿಳೆಯರ ಮುಂದೆ ತನ್ನ ಶ್ರೀಮಂತಿಕೆಯ ಪ್ರದರ್ಶನ ಮಾಡುತ್ತಿದ್ದ ಎನ್ನಲಾಗಿದೆ. ಈ ಮೂಲಕ ತನ್ನ ಬಳಿ ಸಾಕಷ್ಟು ಹಣವಿದೆ ಎಂಬ ಭಾವನೆ ಮೂಡಿಸಿ ವಿಶ್ವಾಸ ಗಳಿಸಲು ಪ್ರಯತ್ನಿಸಿದ್ದಾನೆ ಎಂದು ಪೊಲೀಸರು ಶಂಕಿಸಿದ್ದಾರೆ.

ತನಿಖೆಯ ವೇಳೆ, ಈತನ ಪರಿಚಯದಲ್ಲಿದ್ದ ಮಹಿಳಾ ಪೊಲೀಸ್ ಸಿಬ್ಬಂದಿಯ ಬ್ಯಾಚ್‌ನ ಇತರ ಮಹಿಳೆಯರೂ ಗುರಿಯಾಗಿರಬಹುದು ಎಂಬ ಮಾಹಿತಿ ಲಭ್ಯವಾಗಿದೆ. ಸುಮಾರು 20 ಮಹಿಳೆಯರು ವಂಚನೆಗೆ ಒಳಗಾಗಿರುವ ಸಾಧ್ಯತೆಯನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ. ಆದರೆ, ಎಲ್ಲರೂ ಅಧಿಕೃತವಾಗಿ ದೂರು ನೀಡಿದ್ದಾರೆಯೇ ಎಂಬುದು ಸ್ಪಷ್ಟವಾಗಿಲ್ಲ.

ಈಗ ಪೊಲೀಸರಿಂದ ತನಿಖೆ ಚುರುಕು

ವಿಕ್ರಾಂತ್ ವಿರುದ್ಧ ದೆಹಲಿಯ ವಿವಿಧ ಪೊಲೀಸ್ ಠಾಣೆಗಳಲ್ಲಿ ಈ ಹಿಂದೆಯೂ ವಂಚನೆಗೆ ಸಂಬಂಧಿಸಿದ ಪ್ರಕರಣಗಳು ದಾಖಲಾಗಿವೆ ಎಂದು ವರದಿಯಾಗಿದೆ. ಸದ್ಯ ಪೊಲೀಸರು ಆತನ ಬ್ಯಾಂಕ್ ಖಾತೆಗಳು, ಮೊಬೈಲ್ ಫೋನ್‌ಗಳು ಮತ್ತು ಸಾಮಾಜಿಕ ಜಾಲತಾಣದ ಚಟುವಟಿಕೆಗಳನ್ನು ಪರಿಶೀಲಿಸುತ್ತಿದ್ದಾರೆ. ಇತರ ಮಹಿಳೆಯರು ವಂಚನೆಗೆ ಒಳಗಾಗಿದ್ದಾರೆಯೇ ಮತ್ತು ಹಣದ ವಹಿವಾಟಿನಲ್ಲಿ ಬೇರೆ ಯಾರಾದರೂ ಭಾಗಿಯಾಗಿದ್ದಾರೆಯೇ ಎಂಬುದರ ಕುರಿತು ತನಿಖೆ ಮುಂದುವರಿದಿದೆ.

ಈ ಪ್ರಕರಣವು ಸಾಮಾಜಿಕ ಜಾಲತಾಣಗಳಲ್ಲಿ ಕಾಣಿಸುವ ಐಷಾರಾಮಿ ಜೀವನಶೈಲಿಯನ್ನು ಮಾತ್ರ ನಂಬಿ ಹಣಕಾಸಿನ ನಿರ್ಧಾರಗಳನ್ನು ತೆಗೆದುಕೊಳ್ಳಬಾರದು ಎಂಬ ಎಚ್ಚರಿಕೆಯನ್ನೂ ನೀಡುತ್ತದೆ. ಮದುವೆಯ ಭರವಸೆ ಇರಲಿ ಅಥವಾ ಹೆಚ್ಚಿನ ಲಾಭದ ಹೂಡಿಕೆಯ ಆಮಿಷವಿರಲಿ, ಹಣ ವರ್ಗಾಯಿಸುವ ಮೊದಲು ವ್ಯಕ್ತಿಯ ಹಿನ್ನೆಲೆ ಮತ್ತು ಹೂಡಿಕೆಯ ಸತ್ಯಾಸತ್ಯತೆಯನ್ನು ಪರಿಶೀಲಿಸುವುದು ಅಗತ್ಯ.

Delhi scam: 23-yr-old Vikrant Tomar posed as rich businessman on Instagram, defrauded 20 women police constables of ₹24 lakh by promising marriage.

Arrested from Burari; faces 5 FIRs, earlier out on bail. Live-in partner is also a constable from same batch. https://t.co/ZzY5ZLFHnd

— Ghar Ke Kalesh (@gharkekalesh) October 24, 2026

Narendr Modi: ಪ್ರಧಾನಿ ವಿರುದ್ಧ ಅವಹೇಳನಕಾರಿ ಹೇಳಿಕೆ: ಎಐಸಿಸಿ ಅಧ್ಯಕ್ಷ ಖರ್ಗೆ ವಿರುದ್ಧ ದೂರು ದಾಖಲು

Bhimasi M Koleppanavar — Mon, 26 Oct 2026 07:47:31 +0530

ಪಾಟ್ನಾದಲ್ಲಿ ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಹೇಳಿಕೆ ರಾಜಕೀಯ ವಿವಾದಕ್ಕೆ ಕಾರಣವಾಗಿದೆ. ಪ್ರಧಾನಿ ನರೇಂದ್ರ ಮೋದಿ ಅವರ ತಂದೆಯ ಬಗ್ಗೆ ಮಾಡಿರುವ ಹೇಳಿಕೆಗಳ ಕುರಿತು ಬಿಜೆಪಿ ನಾಯಕ ಕೃಷ್ಣ ಸಿಂಗ್ ಕಲ್ಲು ಪಾಟ್ನಾದ ಕೊಟ್ವಾಲಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಪೊಲೀಸರು ಈ ಬಗ್ಗೆ ತನಿಖೆ ನಡೆಸಿ ಸಾಕ್ಷ್ಯಾಧಾರಗಳ ಆಧಾರದ ಮೇಲೆ ಕಾನೂನು ಕ್ರಮ ಕೈಗೊಳ್ಳಬೇಕೆಂದು ದೂರುದಾರರು ಒತ್ತಾಯಿಸಿದ್ದಾರೆ.

ಬಾಪು ಆಡಿಟೋರಿಯಂ ಕಾರ್ಯಕ್ರಮದಲ್ಲಿ ನೀಡಿದ ಹೇಳಿಕೆ!

ಈ ವಿಷಯವು ಬಿಹಾರದ ಮೊದಲ ಸಿಎಂ ಶ್ರೀ ಕೃಷ್ಣ ಸಿಂಗ್ ಅವರ ಜನ್ಮ ದಿನದ ಸ್ಮರಣಾರ್ಥ ಪಾಟ್ನಾದ ಬಾಪು ಸಭಾಂಗಣದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಈ ಘಟನೆ ಸಂಭವಿಸಿದೆ. ಭಾಷಣದ ವೇಳೆಯಲ್ಲಿ ಖರ್ಗೆ, ಪ್ರಧಾನಿ ಬಗ್ಗೆ ನೀಡಿದ ಹೇಳಿಕೆ ವಿವಾದಕ್ಕೆ ಕಾರಣವಾಯಿತು. ಈ ಹೇಳಿಕೆಯಿಂದ ಪ್ರಧಾನಿ ಕುಟುಂಬಕ್ಕೆ ಧಕ್ಕೆ ತಂದಿದೆ ಎಂದು ಬಿಜೆಪಿ ನಾಯಕರು ಪ್ರತಿಭಟಿಸಿದ್ದು, ಅವರ ವಿರುದ್ಧ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದ್ದಾರೆ.

ಪೊಲೀಸರಿಂದ ತನಿಖೆಗೆ ಬಿಜೆಪಿ ನಾಯಕ ಆಗ್ರಹ!

ಸುದ್ದಿ ಹಾಗೂ ಕೆಲ ವರದಿಗಳ ಮೂಲಕ ಹೇಳಿಕೆ ಬಗ್ಗೆ ತಿಳಿದುಕೊಂಡಿದ್ದೇನೆ ಎಂದು ದೂರುದಾರ ಕೃಷ್ಣ ಸಿಂಗ್ ಕಲ್ಲು ಹೇಳಿದ್ದಾರೆ. ಸಂಬಂಧಿತ ವೀಡಿಯೊಗಳು, ಸುದ್ದಿ ಪ್ರಸಾರಗಳು ಮತ್ತು ಲಭ್ಯವಿರುವ ಇತರ ಪುರಾವೆಗಳನ್ನು ತನಿಖೆ ಮಾಡಲು ಮತ್ತು ದೂರಿನಲ್ಲಿರುವ ಹೇಳಿಕೆಯ ನಿಖರವಾದ ಪದಗಳು ಮತ್ತು ಸಂದರ್ಭವನ್ನು ಪರಿಶೀಲಿಸಲು ಅವರು ಪೊಲೀಸರನ್ನು ವಿನಂತಿಸಿದ್ದಾರೆ.

ಈ ಹೇಳಿಕೆಗೆ ಬಿಜೆಪಿ ಅಸಮಾಧಾನ!

ಘಟನೆಯ ಬಗ್ಗೆ ಬಿಹಾರ ಮುಖ್ಯಮಂತ್ರಿ ಸಾಮ್ರಾಟ್ ಚೌಧರಿ ಅಸಮಾಧಾನ ವ್ಯಕ್ತಪಡಿಸಿದ್ದು, ಖರ್ಗೆ ಮತ್ತು ರಾಹುಲ್ ಗಾಂಧಿ ಕ್ಷಮೆಯಾಚಿಸಬೇಕು ಎಂದು ಒತ್ತಾಯಿಸಿದ್ದಾರೆ. ಅಲ್ಲದೇ ಬಿಜೆಪಿ ನಾಯಕರು ಈ ಹೇಳಿಕೆಗಳನ್ನು ಗಂಭೀರವಾಗಿ ಟೀಕಿಸಿದ್ದಾರೆ. ಕಾಂಗ್ರೆಸ್ ಪಕ್ಷದಿಂದ ವಿವರಣೆಯನ್ನು ಕೋರಿದ್ದಾರೆ. ಈ ಹೇಳಿಕೆಯ ಸಂದರ್ಭದ ಬಗ್ಗೆ ಕಾಂಗ್ರೆಸ್ ಪಕ್ಷವು ವಿಭಿನ್ನ ದೃಷ್ಟಿಕೋನವನ್ನು ನೀಡಿದೆ. ಪ್ರಧಾನ ಮಂತ್ರಿಯವರ ಸೈದ್ಧಾಂತಿಕ ಮಾರ್ಗದರ್ಶಕ ರಾಷ್ಟ್ರೀಯ ಸ್ವಯಂಸೇವಕ ಸಂಘ (ಆರ್‌ಎಸ್‌ಎಸ್) ಬಗ್ಗೆ ಖರ್ಗೆ ಉಲ್ಲೇಖಿಸುತ್ತಿದ್ದಾರೆ ಎಂದು ಕಾಂಗ್ರೆಸ್ ಸಂಸದ ಪವನ್ ಖೇರಾ ಹೇಳಿದ್ದಾರೆ.

ತನಿಖೆಯ ನಂತರವೇ ಮುಂದಿನ ಕ್ರಮ!

ಪ್ರಸ್ತುತ, ಈ ಪ್ರಕರಣದಲ್ಲಿ ದೂರು ಮತ್ತು ಆರೋಪಿತ ಹೇಳಿಕೆಗೆ ಸಂಬಂಧಿಸಿದಂತೆ ವಿವಾದ ಉದ್ಭವಿಸಿದೆ. ದೂರು ದಾಖಲಿಸುವುದು ಎಂದರೆ ಆರೋಪಗಳು ಸಾಬೀತಾಗಿವೆ ಎಂದು ಅರ್ಥವಲ್ಲ. ಪೊಲೀಸ್ ತನಿಖೆಯು ಹೇಳಿಕೆಯ ನಿಖರವಾದ ಪದಗಳು, ಅದರ ಸಂದರ್ಭ ಮತ್ತು ಲಭ್ಯವಿರುವ ಪುರಾವೆಗಳನ್ನು ಪರಿಶೀಲಿಸುತ್ತದೆ. ತನಿಖೆಯ ನಂತರವೇ ಕ್ರಮ ಕೈಗೊಳ್ಳಬಹುದು.

ಬಂಗಾಳಕೊಲ್ಲಿಯಲ್ಲಿ ಭೀಕರ ವಾಯುಭಾರ ಕುಸಿತ; ಅ. 28ರಂದು ಕರಾವಳಿಗೆ ಚಂಡಮಾರುತ ಎಂಟ್ರಿ

Kannadaprabha News — Mon, 26 Oct 2026 05:59:46 +0530

ಕೋಲ್ಕತಾ/ತಿರುವನಂತಪುರಂ: ಬಂಗಾಳಕೊಲ್ಲಿಯಲ್ಲಿ ಉಂಟಾಗಿರುವ ತೀವ್ರ ವಾಯುಭಾರ ಕುಸಿತವು ಶೀಘ್ರದಲ್ಲೇ ಚಂಡಮಾರುತವಾಗಿ ರೂಪಾಂತರಗೊಳ್ಳಲಿದ್ದು, ಅ.28ರಂದು ಆಂಧ್ರಪ್ರದೇಶದ ಕರಾವಳಿಗೆ ಅಪ್ಪಳಿಸುವ ಸಾಧ್ಯತೆಯಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ಭಾನುವಾರ ಎಚ್ಚರಿಸಿದೆ. ಇದರ ಪರಿಣಾಮವಾಗಿ ಆಂಧ್ರಪ್ರದೇಶ, ಒಡಿಶಾ, ಪಶ್ಚಿಮ ಬಂಗಾಳ, ತಮಿಳುನಾಡು, ಕೇರಳ ಸೇರಿದಂತೆ ದಕ್ಷಿಣ ಮತ್ತು ಪೂರ್ವ ಭಾರತದ ಹಲವು ಭಾಗಗಳಲ್ಲಿ ಬಿರುಗಾಳಿ ಸಹಿತ ಭಾರಿ ಮಳೆಯಾಗಲಿದೆ.

ಪ್ರಸ್ತುತ ಪೂರ್ವ-ಮಧ್ಯ ಬಂಗಾಳಕೊಲ್ಲಿಯಲ್ಲಿ ವಾಯುಭಾರ ಕುಸಿತ ಉಂಟಾಗಿದ್ದು, ಇದು ಸೋಮವಾರ ಬೆಳಿಗ್ಗೆ ಹೊತ್ತಿಗೆ ತೀವ್ರಗೊಂಡು ಚಂಡಮಾರುತವಾಗಿ ಬದಲಾಗಲಿದೆ. ಅ.27ಕ್ಕೆ ಮತ್ತಷ್ಟು ತೀವ್ರಗೊಂಡು, ಅ.28ಕ್ಕೆ ಭೀಕರ ಚಂಡಮಾರುತವಾಗಿ ಮಾರ್ಪಟ್ಟು ಆಂಧ್ರದ ವಿಶಾಖಪಟ್ಟಣ ಹಾಗೂ ಬಾಪಟ್ಲ ನಡುವಿನ ಕರಾವಳಿಗೆ ಅಪ್ಪಳಿಸಲಿದೆ.

ಆಂಧ್ರ, ಒಡಿಶಾ, ಬಂಗಾಳಕ್ಕೆ ಎಚ್ಚರಿಕೆ

ಈ ಚಂಡಮಾರುತವು ಅ.28ರ ಮಧ್ಯಾಹ್ನದ ಹೊತ್ತಿಗೆ ಆಂಧ್ರಪ್ರದೇಶದ ಬಾಪಟ್ಲಾ ಮತ್ತು ವಿಶಾಖಪಟ್ಟಣಂ ಮಧ್ಯೆ ಹಾಗೂ ಯಾನಂ ಕರಾವಳಿಯ ಭಾಗದಲ್ಲಿ ಅಪ್ಪಳಿಸಲಿದೆ. ಆಂಧ್ರ ಹಾಗೂ ದಕ್ಷಿಣ ಒಡಿಶಾ ಕರಾವಳಿ ಪ್ರದೇಶಗಳಿಗೆ ಈಗಾಗಲೇ ಎಚ್ಚರಿಕೆಯನ್ನು ನೀಡಲಾಗಿದೆ. ಚಂಡಮಾರುತವು ವಾಯುವ್ಯ ದಿಕ್ಕಿನಲ್ಲಿ ಚಲಿಸುವುದರಿಂದ ಪಶ್ಚಿಮ ಬಂಗಾಳದ ಮೇಲೂ ತೀವ್ರ ಪರಿಣಾಮ ಬೀರಲಿದೆ. ಅ.27ರಿಂದಲೇ ಬಂಗಾಳ ಕರಾವಳಿಯಲ್ಲಿ ಬಿರುಗಾಳಿ ಬೀಸಲಿದ್ದು, ಅ.28-30ರವರೆಗೆ ಭಾರಿ ಮಳೆಯಾಗಲಿದೆ.

ಕೇರಳದಲ್ಲಿ ಪ್ರವಾಹ ಸ್ಥಿತಿ

ಭಿಕರವಾಗಿ ಸುರಿಯುತ್ತಿರುವ ಮಳೆಯಿಂದಾಗಿ ಕೇರಳದಲ್ಲಿ ಪ್ರವಾಹ ಪರಿಸ್ಥಿತಿ ನಿರ್ಮಾಣವಾಗಿದೆ. ತಗ್ಗು ಪ್ರದೇಶಗಳು ಜಲಾವೃತಗೊಂಡಿದ್ದು, ಸಾರ್ವಜನಿಕ ಜೀವನ ಅಸ್ತವ್ಯಸ್ತಗೊಂಡಿದೆ. ಹವಾಮಾನ ಇಲಾಖೆಯು ಮಲಪ್ಪುರಂ, ಕೋಝಿಕ್ಕೋಡ್ ಮತ್ತು ವಯನಾಡ್ ಜಿಲ್ಲೆಗಳಿಗೆ ರೆಡ್ ಅಲರ್ಟ್ ಘೋಷಿಸಿದೆ. ತಿರುವನಂತಪುರಂ, ಕೊಲ್ಲಂ, ಪತ್ತನಂತಿಟ್ಟ, ಪಾಲಕ್ಕಾಡ್, ಕಣ್ಣೂರು ಸೇರಿದಂತೆ 10 ಜಿಲ್ಲೆಗಳಿಗೆ ಆರೆಂಜ್ ಅಲರ್ಟ್ ಹಾಗೂ ಕಾಸರಗೋಡು ಜಿಲ್ಲೆಗೆ ಯೆಲ್ಲೋ ಅಲರ್ಟ್ ಘೋಷಿಸಲಾಗಿದೆ.

ತ.ನಾಡಿನಲ್ಲಿ ದಾಖಲೆ ಮಳೆ

ಈಶಾನ್ಯ ಮಾನ್ಸೂನ್ ಚುರುಕಾಗಿರುವುದರಿಂದ ತಮಿಳುನಾಡಿನ ವಿವಿಧ ಭಾಗಗಳಲ್ಲಿ ದಾಖಲೆ ಪ್ರಮಾಣದ ಮಳೆಯಾಗಿದೆ. ವಿಶೇಷವಾಗಿ ನೀಲಗಿರಿ ಜಿಲ್ಲೆಯ ಬುರ್ಲಿಯಾರ್‌ನಲ್ಲಿ ಗರಿಷ್ಠ 25 ಸೆಂ.ಮೀ. ಮಳೆ ದಾಖಲಾಗಿದೆ. ದೇವಿಕಾಪುರಂನಲ್ಲಿ 20 ಸೆಂ.ಮೀ., ಕೆಲ್ ಕೋಟಗಿರಿ ಎಸ್ಟೇಟ್‌ನಲ್ಲಿ 20 ಸೆಂ.ಮೀ., ನೆಡುಂಗುಣಂನಲ್ಲಿ 18 ಸೆಂ.ಮೀ., ಕೂನೂರ್ ಪಿಟಿಒನಲ್ಲಿ 17 ಸೆಂ.ಮೀ., ಅಲಕರೈ ಎಸ್ಟೇಟ್‌ನಲ್ಲಿ 16 ಸೆಂ.ಮೀ. ಮಳೆ ಸುರಿದಿದೆ. ಪೂರ್ವ ಮತ್ತು ದಕ್ಷಿಣ ಭಾರತದ ಕರಾವಳಿ ರಾಜ್ಯಗಳಲ್ಲಿ ಪರಿಸ್ಥಿತಿ ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿದ್ದು, ದುರಂತ ನಿರ್ವಹಣಾ ಪಡೆಗಳು ಹಾಗೂ ರಕ್ಷಣಾ ತಂಡಗಳನ್ನು ಮುನ್ನೆಚ್ಚರಿಕಾ ಕ್ರಮವಾಗಿ ಸಜ್ಜುಗೊಳಿಸಲಾಗಿದೆ.

ಫೋನ್ ಇಲ್ಲ, ಒಂದೇ ಊರಲ್ಲಿ ವಾಸವಿಲ್ಲ.. 26 ವರ್ಷ ಪೊಲೀಸರಿಂದ ತಪ್ಪಿಸಿಕೊಂಡಿದ್ದ ಹಂತಕ ಸಿಕ್ಕಿಬಿದ್ದಿದ್ದೇ ರೋಚಕ!

Ganesh Mabla Gowda — Sun, 25 Oct 2026 21:41:40 +0530

ಗುಜರಾತ್: ಸೂರತ್‌ನ ಪೊಲೀಸ್ ಅಧಿಕಾರಿಗಳು 62 ವರ್ಷದ ಕೊಲೆ ಆರೋಪಿಯನ್ನ ಬಂಧಿಸಿದ್ದಾರೆ. ಈತನ ಬಂಧನವು ತುಂಬಾ ರೋಚಕವಾಗಿದ್ದು, ಬರೋಬ್ಬರಿ 26 ವರ್ಷಗಳಿಂದ ತಪ್ಪಿಸಿಕೊಂಡು ಓಡಾಡುತ್ತಿದ್ದ. ಈತ ಪೊಲೀಸರಿಗೆ ಹೇಗೆ ಚಳ್ಳೆ ಹಣ್ಣು ತಿನ್ನಿಸುತ್ತಿದ್ದ ಅನ್ನೋದೇ ತುಂಬಾ ಇಂಟರೆಸ್ಟಿಂಗ್ ಆಗಿದೆ.

ಏನಿದು ಪ್ರಕರಣ?

ಅದು 2000 ಇಸವಿ. ಗುಜರಾತ್‌ನ ಸೂರತ್‌ನಲ್ಲಿ ಕೊಲೆಯೊಂದು ನಡೆದಿತ್ತು. ಆ ಕೊಲೆಯ ಆರೋಪಿಯೇ ಈಗ ಬಂಧಿತ 62 ವರ್ಷದ ವೃದ್ಧ. ಈತನ ಹೆಸರು, ಗೋಪಾಲ್ ಮಾನ್ಕರ್. ಸೂರತ್‌ನ ಪಾಂಡೇಸಾರದಲ್ಲಿ ಕಾರ್ಮಿಕನಾಗಿ ಕೆಲಸ ಮಾಡುತ್ತಿದ್ದಾಗ ಮತ್ತೊಬ್ಬ ಕಾರ್ಮಿಕನ ಜೊತೆ ವಾಗ್ವಾದಕ್ಕೆ ಇಳಿದು ಕೋಲಿನಿಂದ ಹಲ್ಲೆ ನಡೆಸಿ ಸಾಯಿಸಿದ್ದ. ಬಳಿಕ ಅಲ್ಲಿಂದ ಎಸ್ಕೇಪ್ ಆಗಿದ್ದ. ಪೊಲೀಸರು ಪ್ರಕರಣ ದಾಖಿಸಿಕೊಂಡು ತನಿಖೆ ಆರಂಭಿಸಿದ್ದರು. ಆದರೆ ಅಸಾಮಿ 26 ವರ್ಷಗಳಿಂದ ಪೊಲೀಸರಿಗೆ ಸಿಕ್ಕಿ ಬಿದ್ದಿರಲಿಲ್ಲ.

ಮಧ್ಯಪ್ರದೇಶದ ಖಾರ್ಗೋನ್ ಜಿಲ್ಲೆಯ ಬಲ್ಹಾವಾಡಾ ಠಾಣೆಯ ನಿಮ್ರಾಣಿ ಗ್ರಾಮದ ನಿವಾಸಿ ಆಗಿದ್ದ ಮಾನ್ಕರ್, ಪೊಲೀಸರಿಂದ ತಪ್ಪಿಸಿಕೊಳ್ಳಲು ಒಂದು ರಾಜ್ಯದಿಂದ ಇನ್ನೊಂದು ರಾಜ್ಯದಿಂದ ರಾಜ್ಯಕ್ಕೆ, ಒಂದು ನಗರದಿಂದ ಇನ್ನೊಂದು ನಗರಕ್ಕೆ ಪಲಾಯನ ಮಾಡುತ್ತಲೇ ಇದ್ದ. ಮಧ್ಯಪ್ರದೇಶದ ಬರ್ವಾನಿ, ಉಜ್ಜಯಿನಿ ಮತ್ತು ಇಂದೋರ್, ಮಹಾರಾಷ್ಟ್ರದ ನಾಸಿಕ್ ಸೇರಿದಂತೆ ಅನೇಕ ಕಡೆಗಳಲ್ಲಿ ಓಡಾಡುತ್ತಿದ್ದ. ಅಂತಿಮವಾಗಿ ಮಹಾರಾಷ್ಟ್ರದ ನಾಸಿಕ್‌ನಲ್ಲಿ ನೆಲೆಸಿದ್ದ.

ಇನ್ನು, ಪೊಲೀಸರಿಗೆ ತನ್ನ ಗುರುತು ಸಿಗಬಾರದೆಂಬ ಕಾರಣಕ್ಕೆ ಕಾರ್ಮಿಕನಾಗಿ ಕೆಲಸಕ್ಕೆ ಹೋಗುತ್ತಿದ್ದ. ಎಲ್ಲರ ಜೊತೆಗೂ ಸಹಜವಾಗಿಯೇ ಇರುತ್ತಿದ್ದ. ಉದ್ದೇಶಪೂರ್ವಕವಾಗಿಯೇ ಆತ ಮೊಬೈಲ್ ಫೋನ್‌ಗಳನ್ನ ಬಳಸುತ್ತಿರಲಿಲ್ಲ. ಯಾರಿಗೂ ಫೋನ್ ಕೂಡ ಮಾಡುತ್ತಿರಲಿಲ್ಲ. ತನ್ನ ಸ್ವಂತ ಹಳ್ಳಿಗೆ ಕೂಡ ಹಿಂತಿರುಗಲಿಲ್ಲ. ಹೀಗಾಗಿ ಆತ ಎಲ್ಲಿದ್ದಾನೆ ಅನ್ನೋದನ್ನ ತಿಳಿಯಲು ಪೊಲೀಸರಿಗೆ ತುಂಬಾ ಕಷ್ಟಾಗಿತ್ತು.

ಇದೊಂದು ಗಂಭೀರ ಪ್ರಕರಣ ಆಗಿರೋದ್ರಿಂದ ಪೊಲೀಸರು, ಆರೋಪಿಯನ್ನ ಬಂಧಿಸಲು ತೀವ್ರ ಪರಿಶೀಲನೆ ನಡೆಸಿದ್ದರು. ಇದರ ಮಧ್ಯೆ ಹಿರಿಯ ಪೊಲೀಸ್ ಅಧಿಕಾರಿಗಳಿಂದ ಖಡಕ್ ಆದೇಶವೊಂದು ಬಂದಿತ್ತು. ಕೊಲೆ, ದರೋಡೆ, ಡಕಾಯಿತಿ, ಮತ್ತು ವಂಚನೆಯಂತಹ ಅಪರಾಧಗಳಲ್ಲಿ ಭಾಗಿಯಾಗಿರುವ ವಾಂಟೆಡ್ ಆರೋಪಿಗಳ ಬಗ್ಗೆ ಮಾಹಿತಿ ಸಂಗ್ರಹಿಸಲು ಸೂಚಿಸಿದ್ದರು. ಜೊತೆಗೆ ಅದಕ್ಕಾಗಿ ಸ್ಥಳೀಯವಾಗಿ ತಂಡ ರಚಿಸಲು ಸೂಚನೆ ನೀಡಲಾಗಿತ್ತು. ಅಂದರೆ ದೀರ್ಘಕಾಲದಿಂದ ತಲೆಮರೆಸಿಕೊಂಡಿರುವ ಶಂಕಿತರ ಸ್ಥಳೀಯ ವಿಳಾಸಗಳು, ಸಂಬಂಧಿಕರು ಮತ್ತು ಸಂಭಾವ್ಯ ಸ್ಥಳಗಳನ್ನು ಪರಿಶೀಲಿಸುವ ಕಾರ್ಯ ನಡೆದಿತ್ತು.

ಹೀಗೆ ಪೊಲೀಸರು ಪ್ರಕರಣದ ಜಾಡು ಹಿಡಿದು ಆರೋಪಿಗಳ ಸುಳಿವಿಗಾಗಿ ಬಲೆ ಬೀಸಿದಾಗ ಪಿಸಿಬಿ ಹೆಡ್ ಕಾನ್ಸ್‌ಟೇಬಲ್ ಅಶೋಕ್‌ಭಾಯ್ ಲುನಿಗೆ ಮಾನ್ಕರ್ ನಾಸಿಕ್ ಜಿಲ್ಲೆಯ ಸೈಖೇಡಾದ ಗಂಗ್‌ನಗರದಲ್ಲಿ ವಾಸಿಸುವ ಬಗ್ಗೆ ಸುಳಿವು ಸಿಗುತ್ತದೆ. ಕೊನೆಗೆ ಪೊಲೀಸರು ತಾಂತ್ರಿಕ ಕಣ್ಗಾವಲು ಮತ್ತು ಮ್ಯಾನ್ ಪವರ್ ಬಳಸಿಕೊಂಡರು. ಆತನ ಸೋದರಿಯರು ಹಾಗೂ ಸೋದರಳಿಯಂದಿರ ಪತ್ತೆ ಹಚ್ಚಿ ಮಾಹಿತಿ ಸಂಗ್ರಹಿಸಲು ಬರೋಬ್ಬರಿ ಮೂರು ವರ್ಷಗಳು ಬೇಕಾಯಿತು ಎನ್ನಲಾಗಿದೆ.

ಮಾನ್ಕರ್ ಇರುವಿಕೆಯ ಬಗ್ಗೆ ಖಚಿತ ಮಾಹಿತಿ ಪಡೆದ ಪೊಲೀಸರು, ಹಿರಿಯ ಪೊಲೀಸ್ ಅಧಿಕಾರಿಗಳ ಅನುಮತಿಯೊಂದಿಗೆ ಲಾಲಾಭಾಯ್‌ನ ಇಟ್ಟಿಗೆ ಗೂಡಿನ ಬಳಿ ಆತನನ್ನು ಬಂಧಿಸಲಾಗಿದೆ. ಹೆಚ್ಚಿನ ತನಿಖೆಗಾಗಿ ಪಾಂಡೇಸಾರ ಪೊಲೀಸ್ ಠಾಣೆಗೆ ಕರೆದುಕೊಂಡು ಬರುವ ಪ್ರಕ್ರಿಯೆಗಳು ನಡೆಯುತ್ತಿವೆ.

ಸಿಂಹಕ್ಕಿಂತ ಜೋರಾಗಿ ಕಚ್ಚಿದ ಅತ್ತಿಗೆ; ಮೈದುನನ ಜನನಾಂಗದ ಸುತ್ತಲೂ 55 ಹೊಲಿಗೆ ಹಾಕಿದ ಡಾಕ್ಟರ್!

Ganesh Mabla Gowda — Sun, 25 Oct 2026 20:55:34 +0530

ಉತ್ತರ ಪ್ರದೇಶ: ಕಾನ್ಪುರದಿಂದ ಆಘಾತಕಾರಿ ಸುದ್ದಿಯೊಂದು ಬಂದಿದೆ. ಕೌಟುಂಬಿಕ ಕಲಹಕ್ಕೆ ಒಳಗಾದ ವ್ಯಕ್ತಿಯೊಬ್ಬ ತನ್ನ ಅಣ್ಣನ ಹೆಂಡತಿ ಅತ್ತಿಗೆಯಿಂದ ಕಚ್ಚಿಸಿಕೊಂಡು ಈಗ ಆಸ್ಪತ್ರೆ ಸೇರಿದ್ದಾನೆ. ಅಷ್ಟೇ ಅಲ್ಲ, ಕಚ್ಚಿದ ಜಾಗಕ್ಕೆ ವೈದ್ಯರು ಬರೋಬ್ಬರಿ 55 ಹೊಲಿಗೆಯ್ನ ಹಾಕಿದ್ದಾರೆ!

ಆಗಿದ್ದೇನು?

ರಜನೀಶ್ ಪ್ರಕರಣದ ಸಂತ್ರಸ್ತ. ಗಾಯತ್ರಿ, ರಜನೀಶ್ ಅವರ ಅತ್ತಿಗೆ. ಪುಷ್ಪರಾಜ್ ರಜನೀಶ ಅವರ ಅಣ್ಣ. ಸುಮನಾ, ರಜನೀಶ್ ಪತ್ನಿ. ಕಳೆದ ಶುಕ್ರವಾರ ಗಾಯತ್ರಿ ಮತ್ತು ಪುಷ್ಪರಾಜ್ ಮಗ ತನ್ನ ಚಿಕ್ಕಮ್ಮ ಸುಮನಾ ಮನೆಗೆ ಹೋಗಿದ್ದ. ಈ ವೇಳೆ ಮನೆಯ ವಿಚಾರಕ್ಕೆ ಗಾಯತ್ರಿ ಮಗನ ಜೊತೆಗೆ ಜಗಳ ಆಗಿದೆ. ಆಗ ರಜನೀಶ್, ಆತನಿಗೆ ಎರಡು ಪೆಟ್ಟು ಕೊಟ್ಟಿದ್ದಾನೆ ಎನ್ನಲಾಗಿದೆ.

ಚಿಕ್ಕಪ್ಪನಿಂದ ಹೊಡೆತ ತಿಂದ ಬಳಿಕ ಆತ, ಅಮ್ಮನ ಬಳಿ ಬಂದು ದೂರು ನೀಡಿದ್ದಾನೆ. ಅಮ್ಮಾ ನನಗೆ ಚಿಕ್ಕಪ್ಪ ಹೊಡೆದ ಎಂದು. ಅದಕ್ಕೆ ಗಾಯತ್ರಿ ರೊಚ್ಚಿಗೆದ್ದಿದ್ದಾಳೆ. ರಜನೀಶ್ ಮನೆಯ ಎದುರು ಹೋಗಿ ಗಲಾಟೆ ಮಾಡಿದ್ದಾಳೆ. ಮಾತಿಗೆ ಮಾತು ಬೆಳೆದು ಗಲಾಟೆ ಜೋರಾಗಿದೆ. ವಾಗ್ಯುದ್ಧ ಜೋರಾಗುತ್ತಿದ್ದಂತೆಯೇ ರಜನೀಶ್ ತನ್ನ ಬಟ್ಟೆಯನ್ನ ಬಿಚ್ಚಿ ಒಗೆದು ಆರ್ಭಟಿಸಿದ್ದಾನೆ ಎನ್ನಲಾಗಿದೆ.

ಆಗ ಗಾಯತ್ರಿ ತನ್ನ ಮೈದುನ ರಜನೀಶ್‌ನನ್ನು ಕೈಯಿಂದ ದೂಡಿ ಕೆಳಗೆ ಬೀಳಿಸಿದ್ದಾಳೆ. ಆಯ ತಪ್ಪಿಬಿದ್ದ ರಜನೀಶ್‌ನ ಮೇಲೆರಗಿ ಆತನ ಖಾಸಗಿ ಭಾಗದ ಸುತ್ತ ಕಚ್ಚಿದ್ದಾಳೆ ಎಂಬ ಆರೋಪವನ್ನು ರಜನೀಶ್ ಮಾಡಿದ್ದಾನೆ. ಯಾವಾಗ ಅತ್ತಿಗೆ ಗಾಯತ್ರಿ ಮಾರಕವಾಗಿ ಕಚ್ಚಿದಳೋ, ಆಗ ರಜನೀಶ್ ಜೋರಾಗಿ ಕಿರುಚಾಡಿಕೊಂಡಿದ್ದಾನೆ. ಆಗ ರಜನೀಶ್ ಅಪ್ಪ ಹಾಗೂ ಸ್ಥಳೀಯರು ಓಡೋಡಿ ಬಂದು ರಜನೀಶ್‌ನನ್ನು ಕಾಪಾಡಿದ್ದಾರೆ ಎನ್ನಲಾಗಿದೆ.

ಕೂಡಲೇ ರಜನೀಶ್ ಅವರನ್ನು ಸ್ಥಳೀಯ ಹ್ಯಾಲೆಟ್ ಆಸ್ಪತ್ರೆಗೆ ಕರೆದುಕೊಂಡು ಬರಲಾಗಿದೆ. ವೈದ್ಯರು ಗಾಯವನ್ನು ಪರಿಶೀಲಿಸಿ ಚಿಕಿತ್ಸೆ ನೀಡಿದ್ದಾರೆ. ವರದಿಗಳ ಪ್ರಕಾರ, ರಜನೀಶ್ ಅವರ ಜನನಾಂಗದ ಸುತ್ತ 55 ಹೊಲಿಗೆಗಳನ್ನ ಹಾಕಿದ್ದಾರಂತೆ. ಸದ್ಯ ರಜನೀಶ್ ಅವರು ಆಸ್ಪತ್ರೆಯ ಬೆಡ್‌ನಲ್ಲಿ ಚೇತರಿಸಿಕೊಳ್ಳುತ್ತಿದ್ದು, ಚಿಕಿತ್ಸೆಗೆ ಸ್ಪಂದಿಸುತ್ತಿದ್ದಾರೆ. ಇತ್ತ ವೈದ್ಯರು ರಜನೀಶ್ ಅವರ ಪ್ರಾಣಕ್ಕೆ ಯಾವುದೇ ತೊಂದರೆ ಇಲ್ಲ ಎಂಬ ಭರವಸೆ ನೀಡಿದ್ದಾರೆ.

ಇತ್ತ ರಜನೀಶ್ ಅವರ ಪತ್ನಿ ಸುಮನಾ ಹಾಗೂ ರಜನೀಶ್ ತಂದೆ ಪೊಲೀಸ್ ಠಾಣೆಗೆ ಓಡೋಡಿ ಬಂದಿದ್ದಾರೆ. ತನ್ನ ಪತಿಯನ್ನು ಕಚ್ಚಿ ಗಾಯಗೊಳಿಸಿರುವ ಬಗ್ಗೆ ಪೊಲೀಸರಿಗೆ ದೂರು ನೀಡಿದ್ದಾಳೆ. ದೂರು ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ಕೇವಲ ಗಾಯತ್ರಿ ಮಾತ್ರವಲ್ಲದೇ, ಗಾಯತ್ರಿಯ ಪತಿ ಪುಷ್ಪರಾಜ್ ವಿರುದ್ಧವೂ ದೂರು ನೀಡಿದ್ದಾರೆ. ಪುಷ್ಪರಾಜ್ ಅವರು, ಘಟನೆ ನಡೆದ ದಿನ ಮನೆಯಲ್ಲಿ ಇರಲಿಲಿಲ್ಲ. ಅವರು ಅಹ್ಮದಾಬಾದ್‌ನಲ್ಲಿ ಕೆಲಸ ಮಾಡೋದು. ಸದ್ಯ ಅಲ್ಲಿಂದ ಮನೆಗೆ ವಾಪಸ್ ಆಗಿದ್ದಾರೆ.

ಇನ್ನು ದೂರು ದಾಖಲಾಗುತ್ತಿದ್ದಂತೆಯೇ ಹಿರಿಯ ಪೊಲೀಸ್ ಅಧಿಕಾರಿ ಕೃಷ್ಣಕಾಂತ್ ಯಾದವ್ ಪ್ರಕರಣವನ್ನು ದೃಢಪಡಿಸಿದ್ದಾರೆ. ಪೊಲೀಸರು ಮುಂದಿನ ಕ್ರಮ ತೆಗೆದುಕೊಂಡು ಯಾರದ್ದು ಸರಿ, ಯಾರದ್ದು ತಪ್ಪು? ಘಟನೆಗೂ ಮೊದಲು ಏನಾಯಿತು ಅನ್ನೋದ್ರ ಬಗ್ಗೆ ತನಿಖೆ ನಡೆಸಿ ಸೂಕ್ತ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ತಿಳಿಸಿದ್ದಾರೆ.

3ನೇ ಮಹಡಿಯಿಂದ ಗುಟ್ಕಾ ಉಗಿದ, 11ಕೆವಿ ವೈರ್‌ಮೇಲೆ ಬಿತ್ತು; ಕರೆಂಟ್ ಶಾಕ್ ಹೊಡೆದು ವೃದ್ಧನ ಪ್ರಾಣ ಹೋಯ್ತು!

Sathish Kumar KH — Sun, 25 Oct 2026 19:39:38 +0530

ಅತಿಯಾದ ಗುಟ್ಕಾ ಅಥವಾ ತಂಬಾಕು ಜಗಿಯುವ ಅಭ್ಯಾಸ ಆರೋಗ್ಯಕ್ಕೆ ಮಾತ್ರವಲ್ಲ, ಕೆಲವೊಮ್ಮೆ ಜೀವಕ್ಕೇ ಕುತ್ತು ತರುತ್ತದೆ ಎಂಬುದಕ್ಕೆ ಮಧ್ಯಪ್ರದೇಶದಲ್ಲಿ ನಡೆದಿರುವ ಈ ಬೆಚ್ಚಿಬೀಳಿಸುವ ದುರಂತವೇ ಸಾಕ್ಷಿ.

ಮೂರನೇ ಮಹಡಿಯ ಬಾಲ್ಕನಿಯಲ್ಲಿ ನಿಂತು ಗುಟ್ಕಾ ಉಗಿಯಲು ಹೋದ 65 ವರ್ಷದ ವೃದ್ಧರೊಬ್ಬರು 11 ಸಾವಿರ ವೋಲ್ಟ್ (11kV) ಸಾಮರ್ಥ್ಯದ ಹೈಟೆನ್ಷನ್ ವಿದ್ಯುತ್ ತಂತಿಯ ಶಾಕ್‌ಗೆ ಸಿಲುಕಿ ಸ್ಥಳದಲ್ಲೇ ದಾರುಣವಾಗಿ ಸಾವನ್ನಪ್ಪಿರುವ ಘಟನೆ ಮಧ್ಯಪ್ರದೇಶದ ವಿದಿಶಾ ಜಿಲ್ಲೆಯ ಗಂಜ್‌ಬಸೋದಾದಲ್ಲಿ ನಡೆದಿದೆ. ಮೃತರನ್ನು ಮೂಲತಃ ಛತ್ತರ್‌ಪುರದವರಾದ, ಗಾರೆ ಮೇಸ್ತ್ರಿ ಕೆಲಸ ಮಾಡುತ್ತಿದ್ದ ಪ್ರಭುಲಾಲ್ ಗುಪ್ತಾ (65) ಎಂದು ಗುರುತಿಸಲಾಗಿದೆ. ಇವರು ಕಳೆದ 10 ವರ್ಷಗಳಿಂದ ಗಂಜ್‌ಬಸೋದಾದ ಗಾಯತ್ರಿ ನಗರದಲ್ಲಿರುವ ಬಾಡಿಗೆ ಮನೆಯೊಂದರಲ್ಲಿ ವಾಸವಾಗಿದ್ದರು.

ಘಟನೆ ನಡೆದಿದ್ದು ಹೇಗೆ?

ಶುಕ್ರವಾರ ಮಧ್ಯಾಹ್ನ ಸುಮಾರು 1 ಗಂಟೆಯ ಸುಮಾರಿಗೆ ಪ್ರಭುಲಾಲ್ ಗುಪ್ತಾ ಅವರು ತಮ್ಮ ಮೂರನೇ ಮಹಡಿಯ ಬಾಲ್ಕನಿಯಲ್ಲಿ ನಿಂತಿದ್ದರು. ಬಾಯಿಯಲ್ಲಿದ್ದ ಗುಟ್ಕಾವನ್ನು ಹೊರಗೆ ಉಗಿಯಲು ಮುಂದಾಗಿದ್ದಾರೆ. ಪ್ರತ್ಯಕ್ಷದರ್ಶಿಗಳ ಪ್ರಕಾರ, ಬಾಲ್ಕನಿಯ ತೀರಾ ಸನಿಹದಲ್ಲೇ ಹಾದುಹೋಗಿದ್ದ 11kV ಹೈಟೆನ್ಷನ್ ವಿದ್ಯುತ್ ತಂತಿಯ ಮೇಲೆ ಅವರು ಉಗುಳಿದ ಲಾಲಾರಸ (Saliva stream) ಬಿದ್ದಿದೆ. ತಕ್ಷಣವೇ ವಿದ್ಯುತ್ ಪ್ರವಾಹವು ಲಾಲಾರಸದ ಮೂಲಕ ಅವರ ದೇಹಕ್ಕೆ ತಗುಲಿದ್ದು, ಕ್ಷಣಾರ್ಧದಲ್ಲೇ ಪ್ರಭುಲಾಲ್ ಅವರ ದೇಹ ಬೆಂಕಿಗಾಹುತಿಯಾಗಿ ಸ್ಥಳದಲ್ಲೇ ಕೊನೆಯುಸಿರೆಳೆದಿದ್ದಾರೆ.

ಲಾಲಾರಸದಿಂದ ವಿದ್ಯುತ್ ಪ್ರವಹಿಸಿದ್ದು ಹೇಗೆ? ತಜ್ಞರ ವಿಶ್ಲೇಷಣೆ

ಗುಟ್ಕಾ ಉಗಿದಾಗ ಕರೆಂಟ್ ಶಾಕ್ ಹೊಡೆದು ಸಾಯಲು ಸಾಧ್ಯವೇ ಎಂಬ ಪ್ರಶ್ನೆಗೆ ವಿದ್ಯುತ್ ತಜ್ಞರು ವೈಜ್ಞಾನಿಕ ವಿವರಣೆ ನೀಡಿದ್ದಾರೆ. ಮಾನವನ ಎಂಜಲು ಅಥವಾ ಲಾಲಾರಸದಲ್ಲಿ ತೇವಾಂಶದ ಜೊತೆಗೆ ಲವಣಾಂಶಗಳು (Salts/Electrolytes) ಇರುತ್ತವೆ. ಇದು ಅತ್ಯುತ್ತಮ ವಿದ್ಯುತ್ ವಾಹಕವಾಗಿ (Good conductor) ಕೆಲಸ ಮಾಡುತ್ತದೆ. ಬಾಯಿಯಿಂದ ಹೊರಬಂದ ಎಂಜಲಿನ ಧಾರೆ ನಿರಂತರವಾಗಿ ವಿದ್ಯುತ್ ತಂತಿಯನ್ನು ಸ್ಪರ್ಶಿಸಿದರೆ, ಅದು ಕರೆಂಟ್ ಪ್ರವಹಿಸಲು ನೇರ ಸಂಪರ್ಕ ಮಾರ್ಗವನ್ನು ಕಲ್ಪಿಸುತ್ತದೆ.

ವಿದ್ಯುತ್ ಆರ್ಕ್ (Electrical Arc): 11kV ಯಂತಹ ಅತ್ಯಂತ ಪ್ರಬಲ ಹೈಟೆನ್ಷನ್ ತಂತಿಗಳ ಸಮೀಪಕ್ಕೆ ಯಾವುದೇ ವಾಹಕ ವಸ್ತು ಅಥವಾ ತೇವಾಂಶ ಬಂದರೆ, ವಿದ್ಯುತ್ ಗಾಳಿಯಲ್ಲೇ ಜಿಗಿಯುವ (Arcing) ಗುಣ ಹೊಂದಿರುತ್ತದೆ. ಬಾಲ್ಕನಿಯು ತಂತಿಗೆ ತೀರಾ ಹತ್ತಿರದಲ್ಲಿದ್ದ ಕಾರಣ, ಈ ಆರ್ಕಿಂಗ್ ನೇರವಾಗಿ ವ್ಯಕ್ತಿಯ ದೇಹದ ಮೂಲಕ ಹಾದುಹೋಗಿ ಈ ಭೀಕರ ದುರಂತ ಸಂಭವಿಸಿದೆ ಎಂದು ತಜ್ಞರು ತಿಳಿಸಿದ್ದಾರೆ.

ವಿದ್ಯುತ್ ಇಲಾಖೆಯ ವಿರುದ್ಧ ಸಾರ್ವಜನಿಕರ ಆಕ್ರೋಶ

ಈ ದುರಂತದ ಬೆನ್ನಲ್ಲೇ ಸ್ಥಳೀಯ ನಿವಾಸಿಗಳು ತೀವ್ರ ಆಕ್ರೋಶ ಹೊರಹಾಕಿದ್ದಾರೆ. ಮನೆಗಳ ತೀರಾ ಸಮೀಪದಲ್ಲೇ ಹಾದುಹೋಗಿರುವ 11kV ವಿದ್ಯುತ್ ತಂತಿಗಳನ್ನು ಸ್ಥಳಾಂತರಿಸುವಂತೆ ವಿದ್ಯುತ್ ಇಲಾಖೆಗೆ ಹತ್ತಾರು ಬಾರಿ ದೂರು ನೀಡಿದ್ದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಸ್ಥಳೀಯರು ಆರೋಪಿಸಿದ್ದಾರೆ.

ಮನೆಯ ಮಾಲೀಕರಾದ ಪದ್ಮಾ ಚಿದಾರ್ ಮಾತನಾಡಿ, 'ನಮ್ಮ ಬಡಾವಣೆಯಲ್ಲಿ ವಿದ್ಯುತ್ ಕಂಬಗಳು ಮತ್ತು ತಂತಿಗಳು ಅಪಾಯಕಾರಿ ಸ್ಥಿತಿಯಲ್ಲಿವೆ. ಮನೆಗಳ ಹತ್ತಿರದಲ್ಲೇ ಇರುವ ಹೈಟೆನ್ಷನ್ ಲೈನ್ ತೆಗೆಯುವಂತೆ ಅಧಿಕಾರಿಗಳಿಗೆ ಹಲವು ಬಾರಿ ಮನವಿ ಮಾಡಿದ್ದೆವು. ಸ್ಥಳಾಂತರಿಸುವುದಾಗಿ ಭರವಸೆ ನೀಡಿದ್ದ ಅಧಿಕಾರಿಗಳು ಬಳಿಕ ನಿರ್ಲಕ್ಷ್ಯ ವಹಿಸಿದರು. ಇಲಾಖೆಯ ಬೇಜವಾಬ್ದಾರಿಯೇ ಈ ಸಾವಿಗೆ ಕಾರಣ' ಎಂದು ಕಣ್ಣೀರಿಟ್ಟಿದ್ದಾರೆ.

ಮೋದಿ ಅಷ್ಟೇ ಅಲ್ಲ ಅವರಪ್ಪನೂ ಹೋಗ್ತಾನೆ, ಭಾರಿ ವಿವಾದ ಸೃಷ್ಟಿಸಿದ ಮಲ್ಲಿಕಾರ್ಜುನ್ ಖರ್ಗೆ ಮಾತು

Chethan Kumar — Sun, 25 Oct 2026 18:58:01 +0530

ಪಾಟ್ನಾ (ಅ.25) ಪ್ರಧಾನಿ ನರೇಂದ್ರ ಮೋದಿ, ಬಿಜೆಪಿ ಹಾಗೂ ಆರ್‌ಎಸ್ಎಸ್ ವಿರುದ್ದ ಕಾಂಗ್ರೆಸ್ ನಾಯಕರು ವಾಗ್ದಾಳಿ ನಡೆಸುವುದು ಹೊಸದೇನಲ್ಲ. ಪ್ರತಿ ಭಾಷಣ, ಪ್ರತಿ ಪ್ರತಿಕ್ರಿಯೆಯಲ್ಲಿ ಪ್ರಖರ ಮಾತುಗಳು ಇದ್ದೇ ಇರುತ್ತೆ. ಆದರೆ ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಮೋದಿ, ಬಿಜೆಪಿ ಹಾಗೂ ಆರ್‌ಎಸ್ಎಸ್ ಜೊತೆಗೆ ಮೋದಿ ತಂದೆಯನ್ನು ಎಳೆದು ತಂದು ವಿವಾದ ಸೃಷ್ಟಿಸಿದ್ದಾರೆ. ಬಿಹಾರದ ಪಾಟ್ನಾದಲ್ಲಿ ಆಯೋಜಿಸಿದ ಕಾರ್ಯಕ್ರಮದಲ್ಲಿ ಮಲ್ಲಿಕಾರ್ಜುನ ಖರ್ಗೆ ತಾಳ್ಮೆ ಕಳೆದುಕೊಂಡು ಮೋದಿ ಮಾತ್ರವಲ್ಲ ಅವರಪ್ಪನು ಹೋಗ್ತಾನೆ ಎಂದಿದ್ದಾರೆ. ಈ ಮಾತು ಕೋಲಾಹಲ ಸೃಷ್ಟಿಸಿದೆ.

ಮೋದಿಯನ್ನು ಜೈಲಿಗೆ ಕಳುಹಿಸಿತ್ತೇವೆ

ಬಿಹಾರ ಮಾಜಿ ಮುಖ್ಯಮಂತ್ರಿ ಕೃಷ್ಣ ಸಿಂಗ್ 139ನೇ ಜಯಂತಿ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡಿದ ಖರ್ಗೆ ಕೆರಳಿದ್ದಾರೆ. ಮೋದಿ ಚುನಾವಣೆ ಅಕ್ರಮ ಮಾಡುತ್ತಿದ್ದಾರೆ. ಇದರ ಹಿಂದಿರುವ ವ್ಯಕ್ತಿಗಳನ್ನು ಜೈಲಿಗೆ ಕಳುಹಿಸುವ ಕೆಲಸವನ್ನು ಕಾಂಗ್ರೆಸ್ ಮಾಡಲಿದೆ ಎಂದು ಖರ್ಗೆ ತಮ್ಮ ಭಾಷಣದಲ್ಲಿ ಹೇಳಿದ್ದಾರೆ. ಇದೇ ವೇಳೆ ಕಾರ್ಯಕ್ರಮದಲ್ಲಿ ಸಾಮಾನ್ಯ ವ್ಯಕ್ತಿ, ಮೋದಿ ಎಲ್ಲಿಗೂ ಹೋಗುವುದಿಲ್ಲ ಎಂದು ಕೂಗಿ ಹೇಳಿದ್ದಾರೆ. ಈ ಮಾತಿನಿಂದ ಮಲ್ಲಿಕಾರ್ಜುನ ಖರ್ಗೆ ಕೆರಳಿದ್ದಾರೆ. ವ್ಯಕ್ತಿ ಒಂದೆರೆಡು ಬಾರಿ ಮೋದಿ ಎಲ್ಲಿಗೂ ಹೋಗುವುದಿಲ್ಲ ಎಂದು ಕೂಗಿ ಹೇಳುತ್ತಿದ್ದಂತೆ ಖರ್ಗೆ ತಾಳ್ಮೆ ಕಳೆದುಕೊಂಡಿದ್ದಾರೆ

ಮೋದಿ, ಅಪರಪ್ಪನೂ ಹೋಗ್ತಾನೆ

ವ್ಯಕ್ತಿಯ ಮಾತುಗಳನ್ನು ಕೇಳಿಸಿಕೊಂಡ ಮಲ್ಲಿಕಾರ್ಜುನ ಖರ್ಗೆ, ಮೋದಿ ಕಾ ಬಾಪ್ ಬಿ ಜಾಯೇಗಾ (ಮೋದಿಯ ತಂದೆ ಕೂಡ ಹೋಗ್ತಾನೆ) ಎಂದಿದ್ದಾರೆ. ಇದೇ ಮಾತನ್ನು ಮಲ್ಲಿಖಾರ್ಜುನ ಖರ್ಗೆ ಪುನರುಚ್ಚರಿಸಿದ್ದಾರೆ. ಇಷ್ಟೇ ಅಲ್ಲ ನಡಿ ಇಲ್ಲಿಂದ ಎಂದಿದ್ದಾರೆ. ಖರ್ಗೆ ಮಾತು ಕೇಳಿಸಿಕೊಂಡ ಕಾಂಗ್ರೆಸ್ ಸಿಬ್ಬಂದಿಗಳು ನೇರವಾಗಿ ಕೂಗಿ ಹೇಳಿದ ವ್ಯಕ್ತಿಯನ್ನು ಹೊರಕ್ಕೆ ಕಳುಹಿಸುವ ಪ್ರಯತ್ನ ಮಾಡಿದ್ದಾರೆ. ಈ ವೇಳೆ ರಂಪಾಟ ನಡೆದಿದೆ. ಕಾಂಗ್ರೆಸ್ ವಿರುದ್ಧ ಘೋಷಣೆಗಳು ಮೊಳಗಿದೆ. ಇತ್ತ ಮೋದಿ ಚೋರ್, ಗದ್ದಿ ಚೋರ್ ಘೋಷಣೆಯನ್ನು ಕಾಂಗ್ರೆಸ್ ಕಾರ್ಯಕರ್ತರು ಮೊಳಗಿಸಿದ್ದಾರೆ. ಹೀಗಾಗಿ ಕೆಲ ಹೊತ್ತು ಸಭೆಯಲ್ಲಿ ಗೊಂದಲ, ಆತಂಕದ ವಾತಾವರಣ ನಿರ್ಮಾಣವಾಗಿತ್ತು.

ಸರಿ, ಸರಿ ಎಂದು ಮಲ್ಲಿಕಾರ್ಜುನ್ ಖರ್ಗೆ ಭಾಷಣ ಮುಂದುವರಿಸಿದ್ದಾರೆ. ಅಷ್ಟರಲ್ಲೇ ಖರ್ಗೆ ಮಾತುಗಳು ವಿವಾದವಾಗಿದೆ. ಮೋದಿ ತಂದೆ ಯಾವುದೇ ರಾಜಕೀಯದಲ್ಲಿ ಇರಲಿಲ್ಲ. ವಿನಾಕಾರಣ ಮೋದಿ ತಂದೆಯನ್ನು ಎಳೆದು ತಂದಿದ್ದೇಕೆ, ಮೋದಿ ತಾಯಿಯನ್ನು ನಿಂದಿಸುವ ಪದ್ಧತಿಯನ್ನು ಕಾಂಗ್ರೆಸ್ ಸೇರಿದಂತೆ ವಿಪಕ್ಷಗಳ ಹಲವರು ಮಾಡಿದ್ದಾರೆ. ಇದೀಗ ಮೋದಿ ತಂದೆಯನ್ನು ರಾಜಕೀಯ ಹೇಳಿಕೆಯಲ್ಲಿ ಪ್ರತಿಕ್ರಿಯೆಯಲ್ಲಿ ಎಳೆದು ತಂದಿದ್ದು ಯಾಕೆ ಎಂದು ಪ್ರಶ್ನಿಸಲಾಗುತ್ತಿದೆ. ಮೋದಿ ತಪ್ಪು ಮಾಡಿದ್ದರೆ, ಜೈಲಿಗೆ ಹಾಕಿ, ಆದರೆ ಮೋದಿ ತಂದೆ ಏನು ಮಾಡಿದ್ದಾರೆ, ಕಾಂಗ್ರೆಸ್ ಪದ ಪ್ರಯೋಗ ಎಲ್ಲೇ ಮೀರುತ್ತಿರುವುದು ಯಾಕೆ ಎಂಬ ಪ್ರಶ್ನೆಗಳು ಹುಟ್ಟಿಕೊಂಡಿದೆ.

ಮೋದಿ ತಂದೆ ಕುರಿತು ಆಡಿದ ಕೀಳು ಮಾತುಗಳಿಂದ ಇದೀಗ ಮಲ್ಲಿಕಾರ್ಜುನ ಖರ್ಗೆ ಮಾಡಿದ ಇಡೀ ಭಾಷಣ ಇದೀಗ ಟೀಕೆಗೆ ಗುರಿಯಾಗುತ್ತಿದೆ. ಇದಕ್ಕೂ ಮೊದಲು ಖರ್ಗೆ, ಆರ್‌ಎಸ್ಎಸ್ ಹಾಗೂ ಆರ್‌ಎಸ್ಎಸ್ ಸಿದ್ಧಾಂತ ಇರುವವರೆಗೆ ದೇಶದಲ್ಲಿ ಶಾಂತಿ ನೆಲಸಲು ಸಾಧ್ಯವಿಲ್ಲ ಎಂಬ ಖರ್ಗೆ ಹೇಳಿಕೆಗೂ ಭಾರಿ ಟೀಕೆ ವ್ಯಕ್ತವಾಗುತ್ತಿದೆ .

ಬಾಡಿಗೆಗೆ ದುಡ್ಡಿಲ್ಲ ಎಂದು ಎಸ್ಕೇಪ್ ಆದವನ ಮನೆಯಲ್ಲಿ 48 ಲಕ್ಷ ನೋಟಿನ ಕಂತೆ! ಬೇಸ್ತು ಬಿದ್ದ ಮಾಲೀಕ

Suchethana D — Sun, 25 Oct 2026 16:55:36 +0530

ನಾಗ್ಪುರ: ಬಾಡಿಗೆ ಸರಿಯಾಗಿ ಕೊಡದ ಕಾರಣ, ಮನೆ ಮಾಲೀಕ ಬಾಡಿಗೆದಾರರನ್ನು ಓಡಿಸಿದ್ದರೆ, ಆ ಮನೆಯಲ್ಲಿ 48 ಲಕ್ಷದಷ್ಟು ನೋಟಿನ ಕಂತೆ ಸಿಕ್ಕಿರುವ ಶಾಕಿಂಗ್ ಘಟನೆಯೊಂದು ಘಟನೆ ಮಹಾರಾಷ್ಟ್ರದ ನಾಗ್ಪುರದಲ್ಲಿ ನಡೆದಿದೆ. ಆರೋಪಿ ಪುಷ್ಪಕ್ ಕೃಷ್ಣ ಭಂಡಾರ್ಕರ್ ಸುಮಾರು ಒಂದೂವರೆ ವರ್ಷಗಳ ಹಿಂದೆ ಕೊಠಡಿಯನ್ನು ಬಾಡಿಗೆಗೆ ಪಡೆದಿದ್ದ. ಬಾಡಿಗೆ ಒಪ್ಪಂದ ಕಳೆದ ಜನವರಿಯಲ್ಲಿಯೇ ಕೊನೆಗೊಂಡಿತ್ತು. ಆ ಬಳಿಕ ಬಾಡಿಗೆಯನ್ನೇ ಕೊಟ್ಟಿರಲಿಲ್ಲ. ಕೇಳಿದರೆ ತನ್ನ ಬಳಿ ಹಣ ಇಲ್ಲ ಎಂದು ಹೇಳುತ್ತಿದ್ದ. ಮನೆ ಮಾಲೀಕ ರಮೇಶ್ ಬೇಸತ್ತು ಮನೆಯನ್ನು ಖಾಲಿ ಮಾಡುವಂತೆ ಕೇಳಿದಾಗ, ಆತ ಚಾಕುವಿನಿಂದ ಬೆದರಿಕೆ ಹಾಕಿದ್ದ.

ಬಳಿಕ ಮಾಲೀಕ ವಾಥೋಡಾ ಪೊಲೀಸರಿಗೆ ದೂರು ನೀಡಿದ್ದರು. ಇಷ್ಟಾಗುತ್ತಿದ್ದಂತೆಯೇ, ಬಾಡಿಗೆದಾರ ಇದ್ದಕ್ಕಿದ್ದಂತೆಯೇ ಕಣ್ಮರೆಯಾದ. ಮನೆ ಮಾಲೀಕ ರಮೇಶ್, ಈ ಕೋಣೆಯ ಬೀಗವನ್ನು ಒಡೆದು ನೋಡಿದಾಗ ನಗದು, ಪೆನ್ನುಗಳು ಮತ್ತು ಕಾಗದದ ರಾಶಿಗಳಂತೆ ಕಾಣುವ ನೋಟುಗಳ ಬಂಡಲ್‌ಗಳು ಕಂಡುಬಂದಿದ್ದು, ಅವರು ಬೆಚ್ಚಿ ಬಿದ್ದರು. ಮನೆ ಮಾಲೀಕ ತಕ್ಷಣ ಪೊಲಿಸರಿಗೆ ಮಾಹಿತಿ ನೀಡಿದರು. ಸ್ಥಳಕ್ಕೆ ಆಗಮಿಸಿದ ವಾಥೋಡಾ ಪೊಲೀಸರು, ನೋಟುಗಳನ್ನು ಪರಿಶೀಲಿಸಿದಾಗ, ಅವೆಲ್ಲವೂ ಖೋಟಾ ನೋಟು ಅರ್ಥಾತ್ ನಕಲಿ ನೋಟು ಎನ್ನುವುದು ತಿಳಿದಿದೆ.

48 ಲಕ್ಷ ನಕಲಿ ನೋಟುಗಳು

ಕೋಣೆಯಲ್ಲಿದ್ದ ನಕಲಿ ನೋಟುಗಳ ಕಟ್ಟುಗಳು, ಪ್ರಿಂಟರ್ ಮತ್ತು ಮುದ್ರಣ ಸಾಮಗ್ರಿಗಳನ್ನು ಕಂಡು ಪೊಲೀಸರು ಬೆಚ್ಚಿಬಿದ್ದರು. ಅಲ್ಲದೆ, ಭಾಗಶಃ ಮುದ್ರಿತವಾದ ನೋಟುಗಳು ಸೇರಿದಂತೆ ಸುಮಾರು 48 ಲಕ್ಷ ರೂಪಾಯಿ ಮೌಲ್ಯದ ಇತರ ಸಾಮಗ್ರಿಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಆರೋಪಿ ನಾಗ್ಪುರದ ತ್ರಿಮೂರ್ತಿ ನಗರದ ನಿವಾಸಿ ಪುಷ್ಪಕ್ ಕೃಷ್ಣ ಭಂಡಾರ್ಕರ್ (ಅಲಿಯಾಸ್ ಬೆಂದಾನೆ) ಎಂದು ತಿಳಿದುಬಂದಿದ್ದು, ಆತನಿಗಾಗಿ ಕಾರ್ಯಾಚರಣೆ ನಡೆಸಲಾಗುತ್ತಿದೆ.

ತನಿಖೆ ಮಾಡ್ತಿರೋ ಪೊಲೀಸರು

ತನಿಖಾಧಿಕಾರಿಗಳು ವಶಪಡಿಸಿಕೊಂಡ ದಾಖಲೆಗಳನ್ನು ವಿಶ್ಲೇಷಿಸುತ್ತಿದ್ದಾರೆ ಮತ್ತು ಶಂಕಿತ ನಕಲಿ ನೋಟುಗಳ ಚಲಾವಣೆಯನ್ನು ಪರಿಶೀಲಿಸುತ್ತಿದ್ದಾರೆ ಅಥವಾ ಉತ್ಪಾದನೆಯಲ್ಲಿ ಇತರ ಸಹ-ಸಂಚುಕೋರರು ಭಾಗಿಯಾಗಿದ್ದಾರೆಯೇ ಎಂದು ಪರಿಶೀಲಿಸುತ್ತಿದ್ದಾರೆ. ಲಭ್ಯವಿರುವ ಮಾಹಿತಿಯ ಪ್ರಕಾರ, ಪುಷ್ಪಕ್ ಸುಮಾರು ಒಂದೂವರೆ ವರ್ಷದ ಹಿಂದೆ ಖಾರ್ಬಿ ಪ್ರದೇಶದಲ್ಲಿ ಕೋಣೆಯೊಂದನ್ನು ಬಾಡಿಗೆಗೆ ಪಡೆದಿದ್ದ. ಕೊನೆಗೆ ಬಾಡಿಗೆ ಕೊಡದೇ ಪರಾರಿಯಾಗಿದ್ದ. ಸ್ಥಳಕ್ಕೆ ಆಗಮಿಸಿದ ಪೊಲೀಸ್ ತಂಡಗಳು, 500 ರೂಪಾಯಿಯ ನಕಲಿ ನೋಟುಗಳ ಕಟ್ಟುಗಳನ್ನು ಪತ್ತೆಹಚ್ಚಿದವು. ವಶಪಡಿಸಿಕೊಂಡ ನೋಟುಗಳ ಮೊತ್ತವನ್ನು ಅಂದಾಜಿಸಲು ಹಣ ಎಣಿಸುವ ಯಂತ್ರವನ್ನು ತರಿಸಲಾಯಿತು. ಪ್ರಾಥಮಿಕ ತನಿಖೆಯ ಪ್ರಕಾರ, ಆರೋಪಿಯು ಸುಮಾರು 37 ಲಕ್ಷ ರೂಪಾಯಿ ಮೌಲ್ಯದ ನಕಲಿ ನೋಟುಗಳನ್ನು ಮುದ್ರಿಸಿದ್ದಾನೆ ಎಂದು ತಿಳಿದುಬಂದಿದೆ.

ಅಕ್ಟೋಬರ್ 31ರಿಂದ ವಾರಣಸಿಗೆ ವಂದೇ ಭಾರತ್ ಸ್ಲೀಪರ್ ರೈಲು ಸಂಪರ್ಕ, ಇಲ್ಲಿದೆ ವೇಳಾಪಟ್ಟಿ

Chethan Kumar — Sun, 25 Oct 2026 16:43:57 +0530

ದೇಶದ ಎರಡನೇ ವಂದೇ ಭಾರತ್ ಸ್ಲೀಪರ್ ರೈಲು ನೇರವಾಗಿ ವಾರಣಸಿಗೆ ಸಂಪರ್ಕ ಕಲ್ಪಿಸುತ್ತಿದೆ. ಅಕ್ಟೋಬರ್ 31 ರಿಂದ ಈ ರೈಲು ಸೇವೆ ಆರಂಭಗೊಳ್ಳುತ್ತಿದೆ. ರೈಲು ಸಮಯ ಸೇರಿದಂತೆ ಸಂಪೂರ್ಣ ವೇಳಾಪಟ್ಟಿ ಇಲ್ಲಿದೆ.

ಧಾರ್ಮಿಕ ಟೂರಿಸಂಗೆ ಹೆಚ್ಚಿನ ಮಹತ್ವದ ನೀಡಲಾಗುತ್ತಿದೆ. ಪರಿಣಾಮ ಹಲವು ಕ್ಷೇತ್ರಗಳಿಗೆ ನೇರ ರೈಲು ಸಂಪರ್ಕ ಕಲ್ಪಿಸಲಾಗಿದೆ. ಇದೀಗ ವಾರಣಸಿಗೆ ವಂದೇ ಭಾರತ್ ಸ್ಲೀಪರ್ ರೈಲು ಸೇವೆ ಆರಂಭಗೊಳ್ಳುತ್ತಿದೆ. ಅಕ್ಟೋಬರ್ 31ರಿಂದ ಈ ಸೇವೆ ಲಭ್ಯವಿದೆ. ದೆಹಲಿಯಿಂದ ನೇರ ವಾರಣಸಿಗೆ ವಂದೇ ಭಾರತ್ ಸ್ಲೀಪರ್ ರೈಲು ಸೇವೆ ನೀಡಲಾಗುತ್ತಿದೆ. ಈ ಮೂಲಕ ದೇಶದ ಯಾವುದೇ ರಾಜ್ಯದಿಂದ ಸುಲಭವಾಗಿ ವಾರಣಸಿ ದರ್ಶನ ಮಾಡಲು ಸಾಧ್ಯವಿದೆ.

ದೆಹಲಿಯಿಂದ ವಾರಣಸಿ 8 ಗಂಟೆಗಳ ಪ್ರಯಾಣ. ವಂದೇ ಭಾರತ್ ರೈಲಿನ ಮೂಲಕ ಸುಲಭವಾಗಿ ಹಾಗೂ ಆರಾಮದಾಯಕವಾಗಿ ಪ್ರಯಾಣ ಸಾಧ್ಯವಿದೆ. ದೆಹೆಲಿಯಿಂದ ರಾತ್ರಿ ತೆರಳಿದರೆ ಬೆಳಗಿನ ಜಾವ ವಾರಣಸಿ ತಲುಪಲಿದೆ. ಇದರಿಂದ ವಾರಣಸಿ ದರ್ಶನ ಮತ್ತಷ್ಟು ಸುಲಭವಾಗಲಿದೆ. ಅಕ್ಟೋಬರ್ 31ಕ್ಕೆ ರೈಲ್ವೇ ಸಚಿವ ಅಶ್ವಿನಿ ವೈಷ್ಣವ್ ಈ ರೈಲಿಗೆ ಚಾಲನೆ ನೀಡುವ ಸಾಧ್ಯತೆ ಇದೆ.

ದೆಹಲಿ ವಾರಣಸಿ ಹಾಗೂ ವಾರಣಸಿ ದೆಹಲಿ ನಡುವೆ ವಂದೇ ಭಾರತ್ ಸ್ಲೀಪರ್ ರೈಲು ಸಂಖ್ಯೆ 27421 ಹಾಗೂ 27422 ಕಾರ್ಯನಿರ್ವಹಿಸಲಿದೆ. ವಾರಣಸಿಯಿಂದ ರಾತ್ರಿ 8.55ಕ್ಕೆ ಹೊರಟು ಬೆಳಗಿನ 5.55ಕ್ಕೆ ದೆಹಲಿ ತಲುಪಲಿದೆ. ಇನ್ನು ದೆಹಲಿಯಿಂದ ರಾತ್ರಿ 9.40ಕ್ಕೆ ಹೊರಟು ಬೆಳಗಿನ ದಾವ 6.45ಕ್ಕೆ ವಾರಣಸಿ ತಲುಪಲಿದೆ.

ವಾರದಲ್ಲಿ 6 ದಿನ ರೈಲು ಕಾರ್ಯನಿರ್ವಹಿಸಲಿದೆ. ಅಂದರೆ ದೆಹಲಿಯಿಂದ ಶುಕ್ರವಾರ ಹಾಗೂ ವಾರಣಸಿಯಿಂದ ಶನಿವಾರ ವಂದೇ ಭಾರತ್ ಸ್ಲೀಪರ್ ರೈಲು ಸೇವೆ ಲಭ್ಯವಿರುವುದಿಲ್ಲ. ಇನ್ನುಳಿದ ಎಲ್ಲಾ ದಿನ ಈ ಸೇವೆ ಲಭ್ಯವಿದೆ. ಧಾರ್ಮಿಕ ಕ್ಷೇತ್ರಗಳ ಸಂದರ್ಶನಕ್ಕೆ ಹೊಸ ರೈಲು ಸಂಪರ್ಕ ಮತ್ತಷ್ಟು ಉತ್ತೇಜನ ನೀಡಲಿದೆ.

ವಾರಣಸಿ ವಂದೇ ಭಾರತ್ ಸ್ಲೀಪರ್ ರೈಲು 16 ಕೋಚ್ ಹೊಂದಿದೆ. ಪ್ರತಿ ಕೋಚ್ ಕೂಡ ಏರ್ ಕಂಡೀಷನ್ ಸೌಲಭ್ಯವಿದೆ. ಒಂದು ಫಸ್ಟ್ ಎಸಿ ಕೋಚ್, ನಾಲ್ಕು ಸೆಕೆಂಡ್ ಎಸಿ ಕೋಚ್, ಹಾಗೂ 11 ಥರ್ಡ್ ಎಸಿ ಕೋಚ್ ಹೊಂದಿದೆ. ಒಟ್ಟು 823 ಪ್ರಯಾಣಿಕರ ಸಾಮರ್ಥ್ಯ ಹೊಂದಿದೆ.

ನೆಲದಿಂದ 100 ಅಡಿ ಆಳದಲ್ಲಿ ನಿಲ್ದಾಣ, ಸಮುದ್ರದ ಕೆಳಗೆ 7KM ಸುರಂಗ! ದೇಶದ ಮೊದಲ ಬುಲೆಟ್ ರೈಲು ಬಗ್ಗೆ ಕೇಂದ್ರದಿಂದ ಬಿಗ್‌ ಅಪ್‌ಡೇಟ್ಸ್

Ganesh Mabla Gowda — Sun, 25 Oct 2026 16:40:50 +0530

ನವದೆಹಲಿ: ದೇಶದ ಮೊದಲ ಬುಲೆಟ್ ಟ್ರೈನ್ ಬಗ್ಗೆ ಕೇಂದ್ರ ಸರ್ಕಾರ ಬಿಗ್ ಅಪ್‌ಡೇಟ್ಸ್ ನೀಡಿದೆ. ಬುಲೆಟ್ ಟ್ರೈನ್ ಉದ್ಘಾಟನೆಗೆ ಸಮರೋಪಾದಿಯಲ್ಲಿ ಕೆಲಸಗಳು ನಡೆಯುತ್ತಿದ್ದು, 2027ರ ವೇಳೆಗೆ ಅತೀ ವೇಗದ ರೈಲು ಸಂಚಾರ ನಡೆಸುವ ನಿರೀಕ್ಷೆಗಳಿವೆ. ಈ ಬಗ್ಗೆ ಕೇಂದ್ರ ರೈಲ್ವೇ ಸಚಿವ ಅಶ್ವಿನಿ ವೈಷ್ಣವ್ ಅವರು ದೇಶದ ಮೊದಲ ಬುಲೆಟ ಟ್ರೈನ್ ಈಗ ಆಕಾರ ಪಡೆಯುತ್ತಿದೆ ಎಂದು ಮಾಹಿತಿ ನೀಡಿದ್ದಾರೆ.

ಈ ಬಗ್ಗೆ ಸುದೀರ್ಘವಾಗಿ ಕೇಂದ್ರ ಸಚಿವರು ಮಾಹಿತಿ ನೀಡಿದ್ದಾರೆ. ಭಾರತದ ಬುಲೆಟ್ ರೈಲು ಉದ್ಘಾಟನೆ ಬಗ್ಗೆ ಇನ್ನೂ ಘೋಷಣೆ ಆಗಿಲ್ಲ.ಇದು ಒಟ್ಟು 508 ಕಿಲೋ ಮೀಟರ್ ದೂರದ ನಿರ್ಮಾಣ ಕಾರ್ಯ. ತಂಬಾ ವೇಗವಾಗಿ ಇದರ ಕಾರ್ಯಗಳು ನಡೆಯುತ್ತಿವೆ. ಇದರ ಮೊದಲ ಸೇವೆ 2027ರ ಕೊನೆಯ ತ್ರೈಮಾಸಿಕದಲ್ಲಿ ಶುರುವಾಗಲಿದೆ ಎಂದು ತಿಳಿಸಿದ್ದಾರೆ. ಮೊದಲ ಬುಲೆಟ್‌ ಟ್ರೈನ್ ಅಹಮದಾಬಾದ್‌ ಟು ಮುಂಬೈಗೆ ಹೈಸ್ಪೀಡ್ ಮಾರ್ಗದಲ್ಲಿ ಸಂಚಾರ ಮಾಡಲಿದೆ.

ವಿಶೇಷತೆ ಏನು?

ಬುಲೆಟ್ ಟ್ರೈನ್‌ ಯೋಜನೆಯ ಮುಂದುರಿದ ಭಾಗವಾಗಿ ಮುಂಬೈನಲ್ಲಿ ಬೃಹತ್ ರೈಲ್ವೇ ನಿರ್ಮಾಣ ಮಾಡಲಾಗುತ್ತಿದೆ.ಬಾಂದ್ರಾ-ಕುರ್ಲಾ ಸಂಕಿರಣದಲ್ಲಿ 100 ಅಡಿ ಕೆಳಗೆ ಅಂದರೆ 10 ಅಂತಸ್ತಿನ ಕಟ್ಟಡಕ್ಕಿಂತ ಆಳವಾಗಿದೆ. ಮುಂಬೈನ ಹೃದಯಭಾಗವಾಗಿರುವ ಬಿಕೆಸಿಯಲ್ಲಿ ನಾವು ಹೈ-ಸ್ಪೀಡ್ ರೈಲು ಕಾರಿಡಾರ್ ನಡೆಯುತ್ತಿದೆ. ಈ ಕಾರಿಡಾರ್‍‌ನಲ್ಲಿ ನಾವು ಏಕೈಕ ಭೂಗತ ನಿಲ್ದಾಣ ನಿರ್ಮಾಣ ಮಾಡುತ್ತಿದ್ದೇವೆ. ರೈಲ್ವೇ ನಿಲ್ದಾಣದ ಎಂಜಿನಿಯರಿಂಗ್ ಅದ್ಭುತವಾಗಿದೆ ಎಂದು ತಿಳಿಸಿದ್ದಾರೆ.

ಕೇಂದ್ರ ಸಚಿವರು ನೀಡಿರುವ ಮಾಹಿತಿ ಪ್ರಕಾರ.. ಭೂಮಿಯ ಆಳದಲ್ಲಿ ರೈಲ್ವೇ ನಿಲ್ದಾಣ ಮಾಡುವ ಉದ್ದೇಶದಿಂದ 32 ಮೀಟರ್ ಆಳದಲ್ಲಿ ಉತ್ಖನ ನಡೆಯುತ್ತಿದೆ. ಪ್ಲಾಟ್‌ಫಾರ್ಮ್‌ಗಳು, ಕಾನ್ಕೋರ್ಸ್‌ಗಳು ಮತ್ತು ಸೇವಾ ಪ್ರದೇಶಗಳನ್ನು ಒಳಗೊಳ್ಳಲಿದೆ. ಈ ಆಳದಲ್ಲಿ ಒಟ್ಟು ಮೂರು ಹಂತಗಳನ್ನ ನಿರ್ಮಿಸಲಾಗುತ್ತದೆ. 400 ಮೀಟರ್‌ಗಿಂತ ಹೆಚ್ಚು ಉದ್ದದ ಒಟ್ಟು ಆರು ಪ್ಲಾಟ್ ಫಾರ್ಮ್‌ ನಿರ್ಮಾಣ ಮಾಡಲಾಗುತ್ತಿದೆ ಎಂಬ ವಿಚಾರವನ್ನು ತಿಳಿಸಿದ್ದಾರೆ.

ಜೊತೆಗೆ ನೀರಿನೊಳಗೆ ರೈಲು ಸುರಂಗ ನಿರ್ಮಿಸಲು 3200 ಟನ್ ತೂಕದ ಯಂತ್ರವು ಥಾಣೆ ಕ್ರೀಕ್‌ನ ಕೆಳಗೆ ಬಂಡೆಗಳನ್ನ ಸೆವೆಸುತ್ತಿದೆ. ಬುಲೆಟ್ ಟ್ರೈನ್ ಅದರ ಮೂಲಕ ಹೆಚ್ಚಿನ ವೇಗದಲ್ಲಿ ಚಲಿಸಲಿದೆ. ಈ ಬುಲೆಟ್ ಟ್ರೈನ್ ಕಾರಿಡಾರ್‍‌ ಒಟ್ಟು 21 ಕಿಲೋ ಮೀಟರ್ ಉದ್ದದ ಸುರಂಗದ ಮೂಲಕ ಚಲಿಸಲಿದೆ. ಅದರಲ್ಲಿ 7 ಕಿಲೋ ಮೀಟರ್ ಥಾಣೆ ಕ್ರಿಕ್‌ನಡಿ ಹಾದು ಹೋಗುತ್ತದೆ. ಇದು ದೇಶದ ಮೊದಲ ಸಾಗರದೊಳಗಿನ ಸುರಂಗ ಆಗಲಿದೆ ಎಂದು ಅವರು ತಿಳಿಸಿದ್ದಾರೆ.

ರೈಲ್ವೇ ಸಚಿವರು ನೀಡಿದ ಹೆಚ್ಚಿನ ಮಾಹಿತಿ

ಕಳೆದ ಜುಲೈನಲ್ಲಿ ವಿಖ್ರೋಲಿ ಮತ್ತು ಸಾವ್ಲಿಯಿಂದ 2 ಸುರಂಗ ಕೊರೆಯುವ ಯಂತ್ರಗಳ ಉಡಾವಣೆ
ಭಾರತದಲ್ಲಿ ಇದುವರೆಗೆ ಸ್ಥಾಪಿಸಲಾದ ಅತಿದೊಡ್ಡ ಸುರಂಗ ಕೊರೆಯವ ಯಂತ್ರಗಳಲ್ಲಿ ಒಂದಾಗಿದೆ
ಪ್ರತಿ ಯಂತ್ರವು 13.6 ಮೀಟರ್ ವ್ಯಾಸದ ಕಟ್ಟರ್‌ಹೆಡ್ ಅನ್ನು ಹೊಂದಿದೆ ಎಂದು ತಿಳಿದುಬಂದಿದೆ
ಅಂದರೆ ನಾಲ್ಕು ಅಂತಸ್ತಿನ ಕಟ್ಟಡದಷ್ಟು ಎತ್ತರ, ಪ್ರತಿ ಯಂತ್ರವು 3,000 ಟನ್‌ಗಳಿಗಿಂತ ಹೆಚ್ಚು ತೂಕ
ಅಂದರೆ ಸುಮಾರು 500 ಏಷ್ಯನ್ ಆನೆಗಳಿಗೆ ಸಮಾನ, ಯಂತ್ರವು 96 ಮೀಟರ್ ಉದ್ದವಾಗಿದೆ.
ಬುಲೆಟ್ ರೈಲು ಪೂರ್ಣ ವೇಗದಲ್ಲಿ ಚಲಿಸಿದಾಗ ಗಂಟೆಗೆ 320 ಕಿ.ಮೀ ವೇಗದಲ್ಲಿ ಇರುತ್ತದೆ

“ಈಗಾಗಲೇ ನಷ್ಟದಲ್ಲಿದ್ದೇನೆ, ದಯವಿಟ್ಟು ರಿಟರ್ನ್ ಮಾಡಬೇಡಿ”; Flipkart Parcelನಲ್ಲಿ ಸಿಕ್ಕಿತು ಮನಕಲಕುವ ಮನವಿ!

Chandrashekar GS — Sun, 25 Oct 2026 16:22:23 +0530

ಫ್ಲಿಪ್‌ಕಾರ್ಟ್ ಪಾರ್ಸಲ್‌ನಲ್ಲಿ ಅಚ್ಚರಿಯ ಚೀಟಿ!

ಆನ್‌ಲೈನ್‌ನಲ್ಲಿ ವಸ್ತುಗಳನ್ನು ಆರ್ಡರ್ ಮಾಡಿದಾಗ ಪಾರ್ಸಲ್‌ನಲ್ಲಿ ಖರೀದಿಸಿದ ಪ್ರೊಡಕ್ಟ್ ಸಿಗುವುದು ಸಾಮಾನ್ಯ. ಆದರೆ, ಟಿ-ಶರ್ಟ್ ಪಾರ್ಸಲ್‌ನೊಳಗೆ ಮಾರಾಟಗಾರನ ಮನವಿಯಿರುವ ಚೀಟಿಯೊಂದು ಸಿಕ್ಕಿದ್ದು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿದೆ. “ದಯವಿಟ್ಟು ಈ ಉತ್ಪನ್ನವನ್ನು ಹಿಂದಿರುಗಿಸಬೇಡಿ. ನಾನು ಈಗಾಗಲೇ ನಷ್ಟದಲ್ಲಿದ್ದೇನೆ” ಎಂಬ ಅರ್ಥದ ಮನವಿಯನ್ನು ಓದಿದ ಗ್ರಾಹಕ ಈ ಅನುಭವವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಈ ಪೋಸ್ಟ್ ಅನೇಕ ಮಂದಿಯ ಗಮನ ಸೆಳೆದಿದೆ.

“ದಯವಿಟ್ಟು ರಿಟರ್ನ್ ಮಾಡಬೇಡಿ” ಎಂದ ಮಾರಾಟಗಾರ

ವರದಿಯ ಪ್ರಕಾರ, ಕಲ್ಪೇಶ್ ಕೋಲಿ ಎಂಬ ಬಳಕೆದಾರರು ಫ್ಲಿಪ್‌ಕಾರ್ಟ್‌ನಲ್ಲಿ ಎಲ್‌ (L) ಗಾತ್ರದ ಟಿ-ಶರ್ಟ್ ಖರೀದಿಸಿದ್ದರು. ಪಾರ್ಸಲ್ ತೆರೆದಾಗ ಅದರೊಳಗೆ ಉತ್ಪನ್ನದ ಜೊತೆಗೆ ಸಣ್ಣ ಬಿಳಿ ಕಾಗದವೂ ಇತ್ತು. ಅದರಲ್ಲಿ, ಉತ್ಪನ್ನವನ್ನು ಹಿಂದಿರುಗಿಸದಂತೆ ಮಾರಾಟಗಾರ ಮನವಿ ಮಾಡಿಕೊಂಡಿದ್ದಾನೆ.

ತಾನು ಈಗಾಗಲೇ ವ್ಯಾಪಾರದಲ್ಲಿ ನಷ್ಟ ಅನುಭವಿಸುತ್ತಿರುವುದಾಗಿ ಮಾರಾಟಗಾರ ಬರೆದಿದ್ದಾನೆ ಎನ್ನಲಾಗಿದೆ. ಸಾಮಾನ್ಯವಾಗಿ ಗ್ರಾಹಕರು ಉತ್ಪನ್ನ ಇಷ್ಟವಾಗದಿದ್ದರೆ ಅಥವಾ ಸರಿಯಾದ ಗಾತ್ರ ಸಿಗದಿದ್ದರೆ ಅದನ್ನು ಹಿಂದಿರುಗಿಸುವ ಅವಕಾಶ ಬಳಸಿಕೊಳ್ಳುತ್ತಾರೆ. ಆದರೆ, ಈ ಚೀಟಿ ಗ್ರಾಹಕರಿಗೆ ಆನ್‌ಲೈನ್ ಮಾರಾಟದ ಇನ್ನೊಂದು ಮುಖವನ್ನು ಪರಿಚಯಿಸಿದೆ.

ಸಣ್ಣ ವ್ಯಾಪಾರಿಗಳ ಸಂಕಷ್ಟದ ಬಗ್ಗೆ ಚರ್ಚೆ

ಈ ಪೋಸ್ಟ್ ವೈರಲ್ ಆದ ಬಳಿಕ ಅನೇಕರು ಮಾರಾಟಗಾರನ ಪರಿಸ್ಥಿತಿಯ ಬಗ್ಗೆ ಸಹಾನುಭೂತಿ ವ್ಯಕ್ತಪಡಿಸಿದ್ದಾರೆ. ಆನ್‌ಲೈನ್ ಮಾರುಕಟ್ಟೆಯಲ್ಲಿ ದೊಡ್ಡ ಕಂಪನಿಗಳ ಜೊತೆಗೆ ಸಣ್ಣ ವ್ಯಾಪಾರಿಗಳೂ ಸ್ಪರ್ಧಿಸಬೇಕಾಗುತ್ತದೆ. ಉತ್ಪನ್ನ ತಯಾರಿಕೆ ಅಥವಾ ಖರೀದಿ ವೆಚ್ಚ, ಪ್ಯಾಕಿಂಗ್, ಸಾಗಣೆ ಮತ್ತು ವಾಪಸಾತಿಗೆ ಸಂಬಂಧಿಸಿದ ವೆಚ್ಚಗಳು ಅವರ ಲಾಭದ ಮೇಲೆ ಪರಿಣಾಮ ಬೀರಬಹುದು.

ವಿಶೇಷವಾಗಿ, ಹಬ್ಬದ ಸಮಯದಲ್ಲಿ ಹೆಚ್ಚು ಸರಕು ಸಂಗ್ರಹಿಸುವ ಸಣ್ಣ ವ್ಯಾಪಾರಿಗಳಿಗೆ ಮಾರಾಟವಾಗದ ಉತ್ಪನ್ನಗಳು ಮತ್ತು ವಾಪಸಾದ ಆರ್ಡರ್‌ಗಳು ಹೆಚ್ಚುವರಿ ಹೊರೆ ಉಂಟುಮಾಡಬಹುದು ಎಂಬ ಅಭಿಪ್ರಾಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಕ್ತವಾಗಿವೆ.

ಗ್ರಾಹಕರ ಹಕ್ಕುಗಳೂ ಅಷ್ಟೇ ಮುಖ್ಯ

ಕೆಲವರು ಉತ್ಪನ್ನವನ್ನು ಬಳಸಿದ ನಂತರ ಹಿಂದಿರುಗಿಸುವುದು ಸಣ್ಣ ವ್ಯಾಪಾರಿಗಳಿಗೆ ನಷ್ಟ ಉಂಟುಮಾಡಬಹುದು ಎಂದು ಅಭಿಪ್ರಾಯಪಟ್ಟಿದ್ದಾರೆ. ಇನ್ನೂ ಕೆಲವರು, ಗ್ರಾಹಕರಿಗೆ ಸರಿಯಾದ ಉತ್ಪನ್ನ ಸಿಗದಿದ್ದರೆ ಅಥವಾ ಗುಣಮಟ್ಟದಲ್ಲಿ ಸಮಸ್ಯೆಯಿದ್ದರೆ ವಾಪಸಾತಿ ಅವರ ಹಕ್ಕು ಎಂದು ಹೇಳಿದ್ದಾರೆ.

ವಾಸ್ತವವಾಗಿ, ಗ್ರಾಹಕರಿಗೆ ಗುಣಮಟ್ಟದ ಉತ್ಪನ್ನ ನೀಡುವುದು ಮಾರಾಟಗಾರರ ಜವಾಬ್ದಾರಿ. ಅದೇ ರೀತಿ, ಉತ್ಪನ್ನ ಸರಿಯಾಗಿದ್ದರೆ ಕೇವಲ ಅನಗತ್ಯ ಕಾರಣಗಳಿಗಾಗಿ ಅದನ್ನು ಹಿಂದಿರುಗಿಸುವ ಮೊದಲು ಸಣ್ಣ ವ್ಯಾಪಾರಿಗಳ ಮೇಲಿನ ಪರಿಣಾಮವನ್ನೂ ಪರಿಗಣಿಸಬಹುದು.

ಒಂದು ಚಿಕ್ಕ ಚೀಟಿಯ ಮೂಲಕ ಮಾರಾಟಗಾರನ ಮನವಿ ಹೊರಬಂದಿರುವ ಈ ಘಟನೆ, ಆನ್‌ಲೈನ್ ಶಾಪಿಂಗ್‌ನಲ್ಲಿ ಗ್ರಾಹಕರು ಮತ್ತು ಮಾರಾಟಗಾರರ ನಡುವಿನ ಸಂಬಂಧದ ಬಗ್ಗೆ ಹೊಸ ಚರ್ಚೆಗೆ ದಾರಿ ಮಾಡಿಕೊಟ್ಟಿದೆ. ವ್ಯಾಪಾರದಲ್ಲಿ ಲಾಭದ ಜೊತೆಗೆ ನಷ್ಟದ ಅಪಾಯವೂ ಇರುತ್ತದೆ ಎಂಬುದನ್ನು ಈ ಘಟನೆ ನೆನಪಿಸುತ್ತದೆ. ಅದೇ ಸಮಯದಲ್ಲಿ, ಗ್ರಾಹಕರ ಹಕ್ಕುಗಳನ್ನು ಗೌರವಿಸುವುದೂ ಅತ್ಯಗತ್ಯ.

I ordered from Flipkart What I got in the box Honest seller https://t.co/ZllrzSVM5W

— kalpesh koli (@dev_kalpeshkk) October 24, 2026

Marriage ಪ್ರಾಮಿಸ್ ಮಾಡೋ ಮುನ್ನ ಯೋಚಿಸಿ; ರಾಜ್ಯಪಾಲರಾದ ಆನಂದಿಬೆನ್‌ರಿಂದ ಯೂತ್ಸ್‌ಗೆ ಮಾರ್ಮಿಕ ಸಂದೇಶ! ಅಸಲಿ ಕಥೆ ಏನು?

Bhimasi M Koleppanavar — Sun, 25 Oct 2026 16:19:49 +0530

ಇಂದಿನ ಆಧುನಿಕ ಯುಗದಲ್ಲಿ ಪ್ರೀತಿ, ಡೇಟಿಂಗ್ ಮತ್ತು ಸಂಬಂಧಗಳು ತುಂಬಾ ಸುಲಭವಾಗಿಬಿಟ್ಟಿವೆ. ಆದರೆ ಅದೇ ವೇಗದಲ್ಲಿ ಸಂಬಂಧಗಳಲ್ಲಿನ ಗಾಢತೆ ಮತ್ತು ಪ್ರಾಮಾಣಿಕತೆ ಕರಗುತ್ತಿದೆ. ಸಂಬಂಧ ಎಂದರೆ ಕೇವಲ ಒಟ್ಟಿಗೆ ಸುತ್ತುವುದು ಅಥವಾ ಮಾತುಗಳಲ್ಲ, ಅದೊಂದು ದೊಡ್ಡ ಬದ್ಧತೆ ಎಂಬುದನ್ನು ಉತ್ತರ ಪ್ರದೇಶದ ರಾಜ್ಯಪಾಲರಾದ ಆನಂದಿಬೇನ್ ಪಟೇಲ್ ಅವರು ಯುವಜನತೆಗೆ ನೆನಪಿಸಿದ್ದಾರೆ. ವಿಶ್ವವಿದ್ಯಾಲಯವೊಂದರ ಸಮಾರಂಭದಲ್ಲಿ ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ಅವರು ಆಡಿದ ಮಾತುಗಳು ಕೇವಲ ರಾಜಕೀಯ ಭಾಷಣವಾಗಿರದೆ, ಸಮಾಜದ ಕಣ್ಣು ತೆರೆಸುವ ತಾಯಿಯೊಬ್ಬಳ ಕಳಕಳಿಯಂತೆ ಮೂಡಿಬಂದಿದೆ.

ಗರ್ಲ್‌ಫ್ರೆಂಡ್ ಇದ್ದರೆ ಅವರನ್ನೇ ಮದುವೆ ಆಗಿ!

ನೀವು ಯಾರನ್ನಾದರೂ ಪ್ರೀತಿಸಿದರೆ ಅಥವಾ ಗರ್ಲ್‌ಫ್ರೆಂಡ್ ಮಾಡಿಕೊಂಡರೆ, ಜವಾಬ್ದಾರಿಯಿಂದ ಅವರನ್ನೇ ಮದುವೆಯಾಗಬೇಕು" ಎಂದು ಆನಂದಿಬೇನ್ ಪಟೇಲ್ ಹೇಳಿದ್ದಾರೆ. ಪ್ರೀತಿಯ ಹೆಸರಿನಲ್ಲಿ ವರ್ಷಗಟ್ಟಲೆ ಜೊತೆಗಿದ್ದು, ಮದುವೆಯ ಮಾತು ಬಂದಾಗ ಪೋಷಕರ ನೆಪವೊಡ್ಡಿ ಅಥವಾ ಬೇರೆ ಕಾರಣ ನೀಡಿ ಕೈಬಿಟ್ಟು ಹೋಗುವ ಯುವಕರ ಧೋರಣೆಯನ್ನು ಅವರು ತೀವ್ರವಾಗಿ ಖಂಡಿಸಿದ್ದಾರೆ. ಸಂಬಂಧವನ್ನು ಕೇವಲ ಮೋಜಿನ ವಿಷಯವಾಗಿ ನೋಡಬಾರದು. ಯಾರದೇ ಭಾವನೆಗಳೊಂದಿಗೆ ಆಟವಾಡುವುದು ಅಪರಾಧ ಎಂಬ ಗಂಭೀರ ಸಂದೇಶವನ್ನು ಅವರು ಯುವ ಪೀಳಿಗೆಯ ಮನಸ್ಸಿಗೆ ತಲುಪಿಸಿದ್ದಾರೆ.

ಸಂಬಂಧದ ನಿಜವಾದ ಅರ್ಥ; ಪ್ರೀತಿ, ಗೌರವ ಮತ್ತು ಬದ್ಧತೆ!

ಸಂಬಂಧಗಳು ಕೇವಲ ಪ್ರೀತಿಯಿಂದ ಮಾತ್ರ ಉಳಿಯುವುದಿಲ್ಲ. ಅಲ್ಲಿ ಪರಸ್ಪರ ಗೌರವ, ನಂಬಿಕೆ ಮತ್ತು ಭವಿಷ್ಯದ ಬಗೆಗಿನ ಜವಾಬ್ದಾರಿ ಇರಬೇಕಾಗುತ್ತದೆ. ಬದುಕು ಎಂದರೆ ಕೇವಲ ಸಂತೋಷದ ದಿನಗಳಲ್ಲ. ಕಷ್ಟದ ಸಮಯದಲ್ಲಿ ಪರಸ್ಪರ ಬೆಂಬಲವಾಗಿ ನಿಲ್ಲುವುದು ಮತ್ತು ಕಠಿಣ ಸನ್ನಿವೇಶಗಳಲ್ಲೂ ಕೈಬಿಡದೆ ಜೊತೆಯಾಗಿ ಸಾಗುವುದೇ ನಿಜವಾದ ಬದ್ಧತೆ. ಯುವಜನತೆ ಸಂಬಂಧಗಳನ್ನು ಬೆಳೆಸುವ ಮುನ್ನವೇ ಮಾನಸಿಕವಾಗಿ ಪಕ್ವತೆಯನ್ನು ಹೊಂದಿರಬೇಕು. ತಾವು ತೆಗೆದುಕೊಳ್ಳುವ ನಿರ್ಧಾರ ಇನ್ನೊಂದು ಜೀವದ ಇಡೀ ಬದುಕನ್ನು ನಿರ್ಧರಿಸುತ್ತದೆ ಎಂಬ ಪ್ರಜ್ಞೆ ಇರಬೇಕು.

ಮಹಿಳೆಯರ ಘನತೆ ಮತ್ತು ಸಾಮಾಜಿಕ ಪರಿಣಾಮ!

ಪ್ರೀತಿಯ ಹೆಸರಿನಲ್ಲಿ ವಂಚನೆಗೊಳಗಾಗಿ ಅರ್ಧ ಹಾದಿಯಲ್ಲೇ ಒಂಟಿಯಾಗುವ ಹೆಣ್ಣುಮಕ್ಕಳು ಸಮಾಜದಲ್ಲಿ ಅನುಭವಿಸುವ ಮಾನಸಿಕ ಯಾತನೆ ಅಪಾರ. ಮದುವೆಯಾಗದೆ ಜೊತೆಯಲ್ಲಿದ್ದು ಕೊನೆಗೆ ಕೈಬಿಟ್ಟಾಗ, ಅದರಿಂದ ಹುಟ್ಟುವ ಮಕ್ಕಳು ಮತ್ತು ಆ ಹೆಣ್ಣುಮಗಳು ಅನಾಥರಾಗುವ ಸ್ಥಿತಿ ನಿರ್ಮಾಣವಾಗುತ್ತಿದೆ. ಇಂತಹ ಸಾಮಾಜಿಕ ಪಿಡುಗುಗಳ ವಿರುದ್ಧ ರಾಜ್ಯಪಾಲರು ಧ್ವನಿ ಎತ್ತಿದ್ದಾರೆ.

ಇಂದಿನ ಪೀಳಿಗೆ ಕಲಿಯಬೇಕಾದ ಪಾಠ!

ಕೇವಲ ಭಾವನೆಗಳಿಗೆ ಮಾರುಹೋಗದೆ, ಯುವಕ ಮತ್ತು ಯುವತಿಯರಿಬ್ಬರೂ ಮೊದಲು ತಮ್ಮ ಕಾಲಿನ ಮೇಲೆ ನಿಂತು ಆರ್ಥಿಕ ಭದ್ರತೆ ಮಾಡಿಕೊಳ್ಳಬೇಕು, ನಂತರವೇ ಸಂಸಾರದ ಜವಾಬ್ದಾರಿ ಹೊರಬೇಕು. ಕಾನೂನು ಅಥವಾ ಕಟ್ಟುಪಾಡುಗಳಿಗಿಂತ ಹೆಚ್ಚಾಗಿ, ಪ್ರತಿಯೊಬ್ಬ ವ್ಯಕ್ತಿಯಲ್ಲೂ ನೈತಿಕತೆ ಮತ್ತು ಮಾನವೀಯ ಮೌಲ್ಯಗಳು ಜಾಗೃತವಾಗಬೇಕು. ಆನಂದಿಬೇನ್ ಪಟೇಲ್ ಅವರ ಈ ಮಾತುಗಳು ಕೇವಲ ಯುವಕರಿಗಷ್ಟೇ ಅಲ್ಲ, ಇಡೀ ಸಮಾಜಕ್ಕೆ ಬದುಕಿನ ಪಾಠವಾಗಿದೆ. ಪ್ರೀತಿಸಿದ ಜೀವಕ್ಕೆ ಕೊನೆಯವರೆಗೂ ನ್ಯಾಯ ಒದಗಿಸುವುದೇ ಅತ್ಯುನ್ನತ ಮನುಷ್ಯ ಧರ್ಮ ಎಂಬುದನ್ನು ಲೇಖನದ ಕೊನೆಯಲ್ಲಿ ಮನಮುಟ್ಟುವಂತೆ ಬರೆಯಿರಿ.

ಗಿನ್ನೆಸ್ ದಾಖಲೆ ಪಡೆದಿದ್ದ ಖ್ಯಾತ ಬಾಣಸಿಗ ಚೆಫ್ ದಾಮುಗೆ ಏನಾಗಿತ್ತು? ಅವರ ಸಾಧನೆಗಳೇನು?

Govindaraj S — Sun, 25 Oct 2026 16:12:32 +0530

'ಕುಕ್ ವಿತ್ ಕೋಮಾಲಿ' ಶೋ ಮೂಲಕ ಮನೆಮಾತಾಗಿದ್ದ ಖ್ಯಾತ ಬಾಣಸಿಗ ಕೆ. ದಾಮೋದರನ್ (ಚೆಫ್ ದಾಮು) ತಮ್ಮ 72ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ಗಿನ್ನೆಸ್ ದಾಖಲೆ ಹಾಗೂ ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತರಾಗಿದ್ದ ಇವರು, ಕಿರುತೆರೆ ವೀಕ್ಷಕರ ಅಚ್ಚುಮೆಚ್ಚಿನ ತೀರ್ಪುಗಾರರಾಗಿದ್ದರು.

ಪಾಕಶಾಲೆಯ ದಿಗ್ಗಜ ಚೆಫ್ ದಾಮು ನೆನಪು

'ಚೆಫ್ ದಾಮು' ಎಂದೇ ಜನಪ್ರಿಯರಾಗಿದ್ದ ಖ್ಯಾತ ಬಾಣಸಿಗ ಕೆ. ದಾಮೋದರನ್ ತಮ್ಮ 72ನೇ ವಯಸ್ಸಿನಲ್ಲಿ ಇಹಲೋಕ ತ್ಯಜಿಸಿದ್ದಾರೆ. ಪಾಕಶಾಸ್ತ್ರ ಮತ್ತು ಟಿವಿ ರಂಗಕ್ಕೆ ಅವರು ನೀಡಿದ ಕೊಡುಗೆ ಅಪಾರ. 'ಕುಕ್ ವಿತ್ ಕೋಮಾಲಿ'ಯಂತಹ ಜನಪ್ರಿಯ ಶೋಗಳ ಮೂಲಕ ಅಡುಗೆಯನ್ನು ಟಿವಿ ವೀಕ್ಷಕರಿಗೆ ಹತ್ತಿರ ಮಾಡಿದ ಅವರು, ತಮಿಳು ಕಿರುತೆರೆಯ ಚಿರಪರಿಚಿತ ಮುಖವಾಗಿದ್ದರು. ತಮಿಳುನಾಡು ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ಅವರು ಎಕ್ಸ್ (X) ಖಾತೆಯಲ್ಲಿ ಪೋಸ್ಟ್ ಮಾಡುವ ಮೂಲಕ ದಾಮು ನಿಧನಕ್ಕೆ ಸಂತಾಪ ಸೂಚಿಸಿದ್ದಾರೆ.

ಟಿವಿ ಕಾರ್ಯಕ್ರಮಗಳ ಮೂಲಕ ಅಡುಗೆಯನ್ನು ಜನಸಾಮಾನ್ಯರಿಗೆ ತಲುಪಿಸಿದ ಅವರ ಶ್ರಮವನ್ನು ಸಿಎಂ ಸ್ಮರಿಸಿದ್ದಾರೆ. ತಮಿಳುನಾಡು ಮುಖ್ಯಮಂತ್ರಿ ಕಚೇರಿ ಹಂಚಿಕೊಂಡಿರುವ ಪೋಸ್ಟ್‌ನಲ್ಲಿ, "ತಮ್ಮ ಪಾಕಶಾಸ್ತ್ರದ ಪರಿಣತಿ ಮತ್ತು ವಿಶಿಷ್ಟ ಶೈಲಿಯ ಮೂಲಕ ಅವರು ಅಡುಗೆ ಕಲೆಯನ್ನು ಟಿವಿ ಕಾರ್ಯಕ್ರಮಗಳ ಮೂಲಕ ಜನರಿಗೆ ತಲುಪಿಸಿದರು. 2010ರಲ್ಲಿ ಅತಿ ಉದ್ದದ ವೈಯಕ್ತಿಕ ಅಡುಗೆ ಮ್ಯಾರಥಾನ್‌ಗಾಗಿ ಅವರು ಗಿನ್ನೆಸ್ ವಿಶ್ವ ದಾಖಲೆ ನಿರ್ಮಿಸಿದ್ದರು. ಅಲ್ಲದೆ, ಪದ್ಮಶ್ರೀ ಪ್ರಶಸ್ತಿಗೂ ಭಾಜನರಾಗಿದ್ದರು. ಅವರ ನಿಧನ ಪಾಕಶಾಸ್ತ್ರ ಕ್ಷೇತ್ರಕ್ಕೆ ತುಂಬಲಾರದ ನಷ್ಟ" ಎಂದು ಬರೆಯಲಾಗಿದೆ.

ವೃತ್ತಿಜೀವನದ ಸಾಧನೆಗಳು ಮತ್ತು ಟಿವಿ ಲೋಕದ ಸ್ಟಾರ್‌ಡಮ್

1954ರಲ್ಲಿ ಜನಿಸಿದ ಚೆಫ್ ದಾಮು, ಚೆನ್ನೈನ ಇನ್‌ಸ್ಟಿಟ್ಯೂಟ್ ಆಫ್ ಹೋಟೆಲ್ ಮ್ಯಾನೇಜ್‌ಮೆಂಟ್‌ನಲ್ಲಿ ಶಿಕ್ಷಣ ಪಡೆದರು. ತಮಿಳುನಾಡು ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮದಲ್ಲಿ ಮ್ಯಾನೇಜ್‌ಮೆಂಟ್ ಟ್ರೈನಿಯಾಗಿ ತಮ್ಮ ವೃತ್ತಿಜೀವನ ಆರಂಭಿಸಿದ ಅವರು, ಬಳಿಕ ಪಾಕಶಾಲೆಯ ಜಗತ್ತಿನಲ್ಲಿ ಪ್ರಮುಖ ವ್ಯಕ್ತಿಯಾಗಿ ಬೆಳೆದರು. ಡಿಸೆಂಬರ್ 2010ರಲ್ಲಿ, ಕೇವಲ 24 ಗಂಟೆ, 30 ನಿಮಿಷ ಮತ್ತು 12 ಸೆಕೆಂಡುಗಳಲ್ಲಿ ಒಟ್ಟು 190 ಕೆಜಿ ತೂಕದ 617 ಭಕ್ಷ್ಯಗಳನ್ನು ತಯಾರಿಸುವ ಮೂಲಕ ಅವರು ಗಿನ್ನೆಸ್ ವಿಶ್ವ ದಾಖಲೆಗೆ ಸೇರಿದರು. ಆ ನಂತರ ಮಧುರೈನಲ್ಲಿ 14.7 ಮೀಟರ್ ಉದ್ದದ ದೋಸೆ ಮಾಡಿದ್ದು ಮತ್ತು ಸಿಂಗಾಪುರದಲ್ಲಿ ವಿಶ್ವದ ಅತಿದೊಡ್ಡ ಕರಿ (curry) ತಯಾರಿಸಿದ್ದು ಸೇರಿದಂತೆ ಹಲವು ಅಡುಗೆ ಸವಾಲುಗಳನ್ನು ಅವರು ಯಶಸ್ವಿಯಾಗಿ ಪೂರೈಸಿದ್ದರು.

ತಮಿಳು ಮಾಧ್ಯಮದ ಮೇಲಿನ ಪ್ರಭಾವ

ಇನ್ನು ವಿಜಯ್ ಟಿವಿಯ 'ಕುಕ್ ವಿತ್ ಕೋಮಾಲಿ' ಶೋದ ತೀರ್ಪುಗಾರರಾಗಿ ಚೆಫ್ ದಾಮು ಟಿವಿ ವೀಕ್ಷಕರಿಗೆ ಬಹಳ ಹತ್ತಿರವಾಗಿದ್ದರು. ಅಡುಗೆ ಸವಾಲುಗಳು ಮತ್ತು ಕಾಮಿಡಿ ಎರಡನ್ನೂ ಒಟ್ಟಿಗೆ ತಂದ ಈ ಶೋನಲ್ಲಿ, ತಮ್ಮ ಮೃದು ಹಾಸ್ಯ ಮತ್ತು ಸ್ಪರ್ಧಿಗಳಿಗೆ ನೀಡುತ್ತಿದ್ದ ಸಲಹೆಗಳ ಮೂಲಕ ದಾಮು ಎಲ್ಲರ ಗಮನ ಸೆಳೆದರು. ಶೋದ ಆರಂಭಿಕ ಸೀಸನ್‌ಗಳಿಂದಲೂ ಕಾಣಿಸಿಕೊಂಡಿದ್ದರು.

ಅಡುಗೆಯ ತಂತ್ರಗಳನ್ನು ಸರಳವಾಗಿ ವಿವರಿಸುವುದರಲ್ಲಿ ಎತ್ತಿದ ಕೈ. ಟಿವಿ ಮಾತ್ರವಲ್ಲದೆ, ತಮಿಳು ಸಿನಿಮಾಗಳಲ್ಲೂ ಬಣ್ಣ ಹಚ್ಚಿದ್ದ ಚೆಫ್ ದಾಮು, ಪಾಕಶಾಸ್ತ್ರ ಕ್ಷೇತ್ರಕ್ಕೆ ತಮ್ಮ ಕೊಡುಗೆಯನ್ನು ಮುಂದುವರಿಸಿದ್ದರು. ಪಾಕಶಾಸ್ತ್ರ ಕ್ಷೇತ್ರಕ್ಕೆ ನೀಡಿದ ಅಪಾರ ಕೊಡುಗೆಯನ್ನು ಗುರುತಿಸಿ, ಜನವರಿ 2025ರಲ್ಲಿ ಅವರು ಪದ್ಮಶ್ರೀ ಪ್ರಶಸ್ತಿಗೆ ಭಾಜನರಾದರು. ವೃತ್ತಿಪರ ಅಡುಗೆಯನ್ನು ಜನಸಾಮಾನ್ಯರಿಗೆ ತಲುಪಿಸಿದ ಮತ್ತು ಆಹಾರ ಉದ್ಯಮದಲ್ಲಿ ಕೆಲಸ ಮಾಡುವವರಿಗೆ ಸ್ಫೂರ್ತಿಯಾದ ಅವರ ಕಾರ್ಯಕ್ಕೆ ಈ ಗೌರವ ಒಲಿದುಬಂದಿತ್ತು.

ಗಾಂಧೀಜಿಯ '5ನೇ ಮಗ' ಕಟ್ಟಿದ 14 ಲಕ್ಷ ಕೋಟಿಯ ಸಾಮ್ರಾಜ್ಯ! ಅಪ್ಪನ ಮಾತಿಗೆ ಸಿಟ್ಟಾಗಿ ಆಸ್ತಿ ತ್ಯಜಿಸಲು ಮುಂದಾಗಿದ್ರು

Naveen Kodase — Sun, 25 Oct 2026 14:38:34 +0530

The Untold Story of Jamnalal Bajaj: Business, Freedom Struggle and Social Reform | ಭಾರತದ ಸ್ವಾತಂತ್ರ್ಯ ಹೋರಾಟದ ಇತಿಹಾಸದಲ್ಲಿ ಮಹಾತ್ಮ ಗಾಂಧೀಜಿಯವರ ಹೆಸರು ಕೇಳದೇ ಇರಲು ಸಾಧ್ಯವೇ ಇಲ್ಲ. ಆದರೆ ಗಾಂಧೀಜಿಯವರ ಆಪ್ತ ಸಹಚರರಾಗಿದ್ದ, ಅವರನ್ನು ತಮ್ಮ ತಂದೆಯಂತೆ ಗೌರವಿಸುತ್ತಿದ್ದ ಮತ್ತು ದೇಶದ ಸ್ವಾತಂತ್ರ್ಯ ಚಳವಳಿಗೆ ಆರ್ಥಿಕ ನೆರವು ನೀಡುತ್ತಿದ್ದ ಉದ್ಯಮಿಯೊಬ್ಬರ ಕಥೆ ಅನೇಕರಿಗೆ ತಿಳಿದಿಲ್ಲ. ಅವರೇ ಜಮ್ನಾಲಾಲ್ ಬಜಾಜ್. ಗಾಂಧೀಜಿಯವರು ಇವರನ್ನು ಪ್ರೀತಿಯಿಂದ ತಮ್ಮ ‘ಐದನೇ ಮಗ’ ಎಂದು ಕರೆಯುತ್ತಿದ್ದರು. ಇಂದು ಬಜಾಜ್ ಸಮೂಹವು ಸುಮಾರು ₹14 ಲಕ್ಷ ಕೋಟಿ ಒಟ್ಟು ಮಾರುಕಟ್ಟೆ ಮೌಲ್ಯ ಹೊಂದಿರುವ ಗ್ರೂಪ್ ಆಫ್ ಇಂಡಸ್ಟ್ರಿಯಾಗಿ ಬೆಳೆದಿದೆ.

ಜಮ್ನಾಲಾಲ್ ಬಜಾಜ್ ಗಾಂಧಿಯ ಐದನೇ ಮಗನೆಂಬ ಗೌರವ ಪಡೆದಿದ್ದು ಹೇಗೆ?

1889ರ ನವೆಂಬರ್ 4ರಂದು ರಾಜಸ್ಥಾನದ ಸಿಕರ್ ಸಮೀಪದ ಕಾಶಿ ಕಾ ಬಾಸ್ ಗ್ರಾಮದಲ್ಲಿ ಜಮ್ನಾಲಾಲ್ ಬಜಾಜ್ ಜನಿಸಿದರು. ಅವರ ಕುಟುಂಬ ಆರ್ಥಿಕವಾಗಿ ಸಾಮಾನ್ಯ ಸ್ಥಿತಿಯಲ್ಲಿತ್ತು. ಅವರು ಐದು ವರ್ಷದವರಾಗಿದ್ದಾಗ ವಾರ್ಧಾದ ಶ್ರೀಮಂತ ವ್ಯಾಪಾರಿ ಸೇಠ್ ಬಚ್ಛರಾಜ್ ಬಜಾಜ್ ಮತ್ತು ಅವರ ಪತ್ನಿ ಸದ್ದಿಬಾಯಿ ದತ್ತು ಪಡೆದರು. ಬಾಲ್ಯದಿಂದಲೇ ವ್ಯಾಪಾರ ವಹಿವಾಟುಗಳ ನಡುವೆ ಬೆಳೆದ ಜಮ್ನಾಲಾಲ್, ಹೆಚ್ಚಿನ ಔಪಚಾರಿಕ ಶಿಕ್ಷಣ ಪಡೆಯದಿದ್ದರೂ ವ್ಯವಹಾರದ ಲೆಕ್ಕಾಚಾರ, ಮಾರುಕಟ್ಟೆ ಮತ್ತು ವ್ಯಾಪಾರದ ಸೂಕ್ಷ್ಮತೆಗಳನ್ನು ಪ್ರಾಯೋಗಿಕವಾಗಿ ಕಲಿತರು.

ಆದರೆ ಅವರ ಬದುಕು ಕೇವಲ ಹಣ ಸಂಪಾದಿಸುವುದಕ್ಕೆ ಸೀಮಿತವಾಗಿರಲಿಲ್ಲ. ಮಹಾತ್ಮ ಗಾಂಧೀಜಿಯವರ ಸರಳ ಜೀವನ, ಅಹಿಂಸೆ ಮತ್ತು ಸ್ವದೇಶಿ ಚಿಂತನೆಗಳಿಂದ ಅವರು ಬಹಳ ಪ್ರಭಾವಿತರಾಗಿದ್ದರು. ಗಾಂಧೀಜಿಯವರ ಸ್ವಾತಂತ್ರ್ಯ ಹೋರಾಟಕ್ಕೆ ಕೈಜೋಡಿಸಿದ ಅವರು, ತಮ್ಮ ಸಂಪತ್ತು ಮತ್ತು ಸಮಯವನ್ನು ದೇಶದ ಸೇವೆಗೆ ಬಳಸಿದರು. ಈ ನಿಕಟ ಸಂಬಂಧದ ಕಾರಣದಿಂದಲೇ ಗಾಂಧೀಜಿಯವರು ಅವರನ್ನು ತಮ್ಮ ‘ಐದನೇ ಮಗ’ ಎಂದು ಪ್ರೀತಿಯಿಂದ ಕರೆಯುತ್ತಿದ್ದರು.

ಆಸ್ತಿ ತ್ಯಜಿಸಲು ಮುಂದಾಗಿದ್ದ ಯುವ ಉದ್ಯಮಿ!

ಜಮ್ನಾಲಾಲ್ ಬಜಾಜ್ ಅವರ ಬದುಕಿನಲ್ಲಿ ಕುತೂಹಲಕಾರಿ ಘಟನೆಯೊಂದು ನಡೆಯಿತು. 1906ರಲ್ಲಿ, ತಮಗೆ ಸಿಕ್ಕಿದ್ದ ಆಸ್ತಿ ಮತ್ತು ಸಂಪತ್ತಿನ ಹಕ್ಕನ್ನು ತ್ಯಜಿಸುವುದಾಗಿ ಅವರು ಪತ್ರ ಬರೆದಿದ್ದರು. ದತ್ತು ತಂದೆ ಬಚ್ಛರಾಜ್ ಅವರಿಂದ ಬಂದ ಕಟುವಾದ ಮಾತುಗಳಿಂದ ಬೇಸರಗೊಂಡಿದ್ದ ಅವರು, ವಾರ್ಧಾವನ್ನು ಬಿಟ್ಟು ಹರಿದ್ವಾರ ಮತ್ತು ಋಷಿಕೇಶದ ಕಡೆಗೆ ತೆರಳಲು ನಿರ್ಧರಿಸಿದ್ದರು. ಆದರೆ ರೈಲು ನಿಲ್ದಾಣಕ್ಕೆ ತೆರಳಿದ್ದ ಜಮ್ನಾಲಾಲ್ ಅವರನ್ನು ಬಚ್ಛರಾಜ್ ತಡೆದು ಮನೆಗೆ ಮರಳುವಂತೆ ಮನವೊಲಿಸಿದರು. ಬಳಿಕ ಕುಟುಂಬದ ವ್ಯವಹಾರಗಳ ಜವಾಬ್ದಾರಿ ಅವರ ಹೆಗಲೇರಿತು. ತಾವು ತ್ಯಜಿಸಲು ಬಯಸಿದ್ದ ಉದ್ಯಮವೇ ಮುಂದೆ ಅವರ ಜೀವನದ ಪ್ರಮುಖ ಕೆಲಸವಾಗಿ ಬದಲಾಯಿತು.

ಹತ್ತಿಯಿಂದ ಸಕ್ಕರೆ, ಉಕ್ಕಿನ ಉದ್ಯಮದವರೆಗೆ ಬೆಳವಣಿಗೆ:

ಜಮ್ನಾಲಾಲ್ ಬಜಾಜ್ ಕುಟುಂಬದ ಉದ್ಯಮ ಆರಂಭದಲ್ಲಿ ಹತ್ತಿ ವ್ಯಾಪಾರ ಮತ್ತು ಹತ್ತಿ ಸಂಸ್ಕರಣೆಗೆ ಸಂಬಂಧಿಸಿದ್ದಾಗಿತ್ತು. ಇದಾದ ಬಳಿಕ ಕಾಲಕ್ರಮೇಣ ಈ ವ್ಯವಹಾರವನ್ನು ವಿಸ್ತರಿಸಿ, ಹೊಸ ಉದ್ಯಮಗಳಿಗೆ ಕಾಲಿಟ್ಟರು.

- 1926: ಬಜಾಜ್ ಸಮೂಹದ ಇತಿಹಾಸದಲ್ಲಿ ಪ್ರಮುಖ ಘಟ್ಟ. ಆ ವರ್ಷ ಬಚ್ಛರಾಜ್ ಫ್ಯಾಕ್ಟರೀಸ್ ಪ್ರೈವೇಟ್ ಲಿಮಿಟೆಡ್ ಸ್ಥಾಪನೆಯಾಯಿತು.

- 1931: ಸಕ್ಕರೆ ಉತ್ಪಾದನಾ ಕ್ಷೇತ್ರಕ್ಕೆ ಪ್ರವೇಶಿಸಿದರು.

- 1939: ಉಕ್ಕು ಮತ್ತು ಭಾರೀ ಕೈಗಾರಿಕಾ ಕ್ಷೇತ್ರದಲ್ಲೂ ಉದ್ಯಮ ವಿಸ್ತರಿಸಿದರು.

ಈ ಬೆಳವಣಿಗೆ ಒಂದೇ ದಿನದಲ್ಲಿ ಸಂಭವಿಸಿದ್ದಲ್ಲ. ಮಾರುಕಟ್ಟೆಯ ಅಗತ್ಯಗಳನ್ನು ಅರ್ಥಮಾಡಿಕೊಂಡು, ಹಂತ ಹಂತವಾಗಿ ಹೊಸ ಕ್ಷೇತ್ರಗಳಿಗೆ ಪ್ರವೇಶಿಸುವ ಮೂಲಕ ಉದ್ಯಮದ ನೆಲೆಯನ್ನು ಬಲಪಡಿಸಿದರು.

ಇಂದು ಬಜಾಜ್ ಹೆಸರನ್ನು ಕೇಳಿದಾಗ ಬೈಕ್‌ಗಳು, ಸ್ಕೂಟರ್‌ಗಳು, ಹಣಕಾಸು ಸೇವೆಗಳು ಮತ್ತು ವಿವಿಧ ಕೈಗಾರಿಕೆಗಳು ನೆನಪಾಗುತ್ತವೆ. ಹಲವು ದಶಕಗಳಲ್ಲಿ ಕುಟುಂಬದ ಮುಂದಿನ ಪೀಳಿಗೆಗಳು ಈ ಉದ್ಯಮಗಳನ್ನು ವಿಸ್ತರಿಸಿವೆ. ಹೀಗೆ ಒಂದು ಕುಟುಂಬದ ವ್ಯಾಪಾರವು ಭಾರತದ ಪ್ರಮುಖ ಉದ್ಯಮ ಸಮೂಹಗಳಲ್ಲಿ ಒಂದಾಗಿ ಬೆಳೆದು ನಿಂತಿದೆ.

ಸ್ವಾತಂತ್ರ್ಯ ಹೋರಾಟಕ್ಕೂ ಆರ್ಥಿಕ ನೆರವು

ಜಮ್ನಾಲಾಲ್ ಬಜಾಜ್ ಅವರು ಉದ್ಯಮದ ಬೆಳವಣಿಗೆಯ ಜೊತೆಗೆ ದೇಶದ ಸ್ವಾತಂತ್ರ್ಯ ಹೋರಾಟದಲ್ಲೂ ಸಕ್ರಿಯವಾಗಿ ಭಾಗವಹಿಸಿದ್ದರು. 1921ರಲ್ಲಿ ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್‌ನ ಖಜಾಂಚಿಯಾಗಿ ಜವಾಬ್ದಾರಿ ವಹಿಸಿಕೊಂಡ ಅವರು, ಸುಮಾರು ಎರಡು ದಶಕಗಳ ಕಾಲ ಕಾಂಗ್ರೆಸ್‌ಗೆ ಆರ್ಥಿಕ ನೆರವು ನೀಡಿದರು. 1923ರ ನಾಗಪುರ ಧ್ವಜ ಸತ್ಯಾಗ್ರಹದಲ್ಲಿ ಭಾಗವಹಿಸಿದ್ದಕ್ಕಾಗಿ ಅವರನ್ನು ಬಂಧಿಸಲಾಗಿತ್ತು. ಉಪ್ಪಿನ ಸತ್ಯಾಗ್ರಹ ಸೇರಿದಂತೆ ಹಲವು ಚಳವಳಿಗಳಲ್ಲಿಯೂ ಅವರು ಪಾಲ್ಗೊಂಡಿದ್ದರು. ಬ್ರಿಟಿಷ್ ಸರ್ಕಾರ ನೀಡಿದ್ದ ‘ರಾಯ್ ಬಹದ್ದೂರ್’ ಬಿರುದನ್ನೂ ಜಮ್ನಾಲಾಲ್ ಬಜಾಜ್ ತ್ಯಜಿಸಿದ್ದರು. ಗಾಂಧೀಜಿಯವರ ಸ್ವದೇಶಿ ಚಿಂತನೆಯಂತೆ ಖಾದಿ, ಗ್ರಾಮೀಣ ಕೈಗಾರಿಕೆಗಳು ಮತ್ತು ಸ್ಥಳೀಯ ಉತ್ಪಾದನೆಗೆ ಅವರು ಬೆಂಬಲ ನೀಡಿದರು. ಅವರ ಪಾಲಿಗೆ ಸಂಪತ್ತು ಎಂದರೆ ವೈಯಕ್ತಿಕ ಐಷಾರಾಮಕ್ಕಾಗಿ ಮಾತ್ರವಲ್ಲ, ಸಮಾಜದ ಒಳಿತಿಗೂ ಬಳಕೆಯಾಗಬೇಕಾದ ಸಾಧನವಾಗಿತ್ತು.

ಸಮಾಜ ಸುಧಾರಣೆಯಲ್ಲೂ ಮುಂಚೂಣಿಯಲ್ಲಿದ್ದರು

ಜಮ್ನಾಲಾಲ್ ಬಜಾಜ್ ಅವರು ಸಾಮಾಜಿಕ ಅಸಮಾನತೆಗಳ ವಿರುದ್ಧವೂ ಧ್ವನಿ ಎತ್ತಿದ್ದರು. 1928ರಲ್ಲಿ ವಾರ್ಧಾದಲ್ಲಿದ್ದ ಕುಟುಂಬದ ಲಕ್ಷ್ಮೀ ನಾರಾಯಣ ದೇವಸ್ಥಾನವನ್ನು ದಲಿತರಿಗೆ ಮುಕ್ತಗೊಳಿಸಿದರು. ತಮ್ಮ ಜಮೀನಿನಲ್ಲಿದ್ದ ಬಾವಿಗಳನ್ನೂ ಅವರು ಎಲ್ಲರ ಬಳಕೆಗೆ ತೆರೆಯುವ ಮೂಲಕ ಸಾಮಾಜಿಕ ಸಮಾನತೆಯ ಸಂದೇಶ ಸಾರಿದರು. ಮಹಿಳಾ ಶಿಕ್ಷಣ, ಖಾದಿ ಪ್ರಚಾರ ಮತ್ತು ಗ್ರಾಮೀಣ ಕೈಗಾರಿಕೆಗಳ ಬೆಳವಣಿಗೆಗೂ ಅವರು ಕೊಡುಗೆ ನೀಡಿದರು. ಅವರ ಪತ್ನಿ ಜಾನಕಿದೇವಿ ಬಜಾಜ್ ಕೂಡ ಸಮಾಜ ಸೇವೆ ಮತ್ತು ಮಹಿಳೆಯರ ಸಬಲೀಕರಣದ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದರು.

ಅವರ ನಿಧನದ ಬಳಿಕವೂ ಮುಂದುವರಿದ ಉದ್ಯಮದ ಪಯಣ

1942ರ ಫೆಬ್ರವರಿ 11ರಂದು, ತಮ್ಮ 52ನೇ ವಯಸ್ಸಿನಲ್ಲಿ ಜಮ್ನಾಲಾಲ್ ಬಜಾಜ್ ನಿಧನರಾದರು. ಅವರ ನಂತರ ಪುತ್ರ ಕಮಲನಯನ್ ಬಜಾಜ್ ಉದ್ಯಮದ ಜವಾಬ್ದಾರಿ ವಹಿಸಿಕೊಂಡು ಅದನ್ನು ಮುಂದುವರಿಸಿದರು. ಬಳಿಕದ ಪೀಳಿಗೆಗಳು ವಾಹನ, ಹಣಕಾಸು ಮತ್ತು ಇತರ ಕೈಗಾರಿಕಾ ಕ್ಷೇತ್ರಗಳಲ್ಲಿ ಬಜಾಜ್ ಸಮೂಹವನ್ನು ಮತ್ತಷ್ಟು ವಿಸ್ತರಿಸಿದವು.

ಇಂದು ಬಜಾಜ್ ಸಮೂಹದ ಒಟ್ಟು ಮಾರುಕಟ್ಟೆ ಮೌಲ್ಯ ಸುಮಾರು ₹14 ಲಕ್ಷ ಕೋಟಿ ಎಂದು ವರದಿಯಾಗಿದೆ. ಈ ಅಂಕಿ ಸಮೂಹದ ವಿವಿಧ ಕಂಪನಿಗಳ ಮಾರುಕಟ್ಟೆ ಮೌಲ್ಯವನ್ನು ಆಧರಿಸಿದ್ದು, ಒಬ್ಬ ವ್ಯಕ್ತಿಯ ವೈಯಕ್ತಿಕ ಆಸ್ತಿಯಲ್ಲ. ಒಟ್ಟಿನಲ್ಲಿ, ಜಮ್ನಾಲಾಲ್ ಬಜಾಜ್ ಅವರ ಜೀವನವು ಉದ್ಯಮ ಯಶಸ್ಸು ಮತ್ತು ಸಮಾಜ ಸೇವೆ ಎರಡನ್ನೂ ಒಟ್ಟಿಗೆ ಸಾಧಿಸಬಹುದು ಎಂಬುದಕ್ಕೆ ಉದಾಹರಣೆಯಾಗಿದೆ. ಗಾಂಧೀಜಿಯವರ ‘ಐದನೇ ಮಗ’ ಎಂಬ ಗೌರವದಿಂದ ಗುರುತಿಸಿಕೊಂಡ ಅವರು, ತಮ್ಮ ಸಂಪತ್ತನ್ನು ದೇಶದ ಸ್ವಾತಂತ್ರ್ಯ ಹೋರಾಟಕ್ಕೂ ಸಮಾಜದ ಸುಧಾರಣೆಗೂ ಬಳಸಿದರು. ಅವರ ಕಥೆ ಇಂದಿನ ಉದ್ಯಮಿಗಳಿಗೆ ಮಾತ್ರವಲ್ಲ, ಸಮಾಜಕ್ಕೆ ಕೊಡುಗೆ ನೀಡಲು ಬಯಸುವ ಪ್ರತಿಯೊಬ್ಬರಿಗೂ ಸ್ಫೂರ್ತಿದಾಯಕವಾಗಿದೆ.

ಜನಪ್ರಿಯ ಶೆಫ್, ಪದ್ಮಶ್ರಿ ಪ್ರಶಸ್ತಿ ಪುರಸ್ಕೃತ ದಾಮು ಅಲಿಯಾಸ್ ದಾಮೋದರನ್ ನಿಧನ, ಗಣ್ಯರಿಂದ ಸಂತಾಪ

Chethan Kumar — Sun, 25 Oct 2026 14:25:00 +0530

ಚೆನ್ನೈ (ಅ.25) ಅಸಾಧ್ಯ ಕುಕಿಂಗ್ ಸ್ಕಿಲ್, ಟಿವಿ ಕಾರ್ಯಕ್ರಮಗಳ ಮೂಲಕ ಅತ್ಯಂತ ಜನಪ್ರಿಯರಾಗಿರುವ ಖ್ಯಾತ ಶೆಪ್ ದಾಮು ಅಲಿಯಾಸ್ ದಾಮೋದರ್ ಕೋದಂಡರಾಮನ್ ನಿಧನರಾಗಿದ್ದಾರೆ. ಪದ್ಮಶ್ರಿ ಪ್ರಶಸ್ತಿ ಪುರಸ್ಕೃತ ಶೆಫ್ ದಾಮು ಅನಾರೋಗ್ಯದಿಂದ ನಿಧನರಾಗಿದ್ದಾರೆ. ಕಳೆದ ಕೆಲ ದಿನಗಳಿಂದ ದಾಮು ಆರೋಗ್ಯ ಬಿಗಡಾಯಿಸಿತ್ತು. ಇಂದು ಚೆನ್ನೈನಲ್ಲಿ ನಿಧನರಾಗಿದ್ದಾರೆ. ದಾಮು ನಿಧನ ಸುದ್ದಿ ಹೊರಬೀಳುತ್ತಿದ್ದಂತೆ ಕುಕಿಂಗ್ ಕ್ಷೇತ್ರದ ದಿಗ್ಗಜರು, ಹಲವು ಗಣ್ಯರು ಸಂತಾಪ ಸೂಚಿಸಿದ್ದಾರೆ.

25ಕ್ಕೂ ಹೆಚ್ಚು ಪುಸ್ತಕ ಪ್ರಕಟಿಸಿದ್ದ ದಾಮು ಅಪ್ಪ

ಕುಕ್ ವಿತ್ ಕೋಮಾಲಿ ರಿಯಾಲಿಟಿ ಶೋ ಮೂಲಕ ದಾಮು ಅತ್ಯಂತ ಜನಪ್ರಿಯರಾಗಿದ್ದರು. ದೇಶದಲ್ಲೇ ಶೆಫ್ ದಾಮು ಜನಪ್ರಿಯರಾಗಿದ್ದರು. 25ಕ್ಕೂ ಹೆಚ್ಚು ಪುಸ್ತಕ ಬರೆದಿರುವ ದಾಮು ಅಗಲಿಕೆಗೆ ನೋವನ್ನು ಮತ್ತೊರ್ವ ಖ್ಯಾತ ಶೆಫ್ ವೆಂಕಟೇಶ್ ಭಟ್ ಹಂಚಿಕೊಂಡಿದ್ದಾರೆ. ಸಾಂಪ್ರಾದಾಯಿಕ ತಮಿಳು ಅಡುಗೆಯನ್ನು ವಿಶ್ವ ಮಟ್ಟಕ್ಕೆ ಕೊಂಡೊಯ್ದು ಪ್ರಚಾರ ಮಾಡಿದ ಹಾಗೂ ತಮಿಳು ನಾಡಿನ ವಿಶೇಷ ಖಾದ್ಯ, ಭಾರತದ ಪಾಕ ಪರಂಪರೆಯನ್ನು ಜಗತ್ತಿಗೆ ಸಾರಿದ ಕೆಲವೇ ಕೆಲವು ಶೆಫ್ ಪೈಕಿ ದಾಮು ಕೂಜ ಒಬ್ಬರಾಗಿದ್ದಾರೆ ಎಂದು ವಂಕಟೇಶ್ ಭಟ್ ಹೇಳಿದ್ದಾರೆ.

ಭಾರತೀಯ ಅಡುಗೆಯನ್ನು ಸರಳವಾಗಿ, ಸುಲಭವಾಗಿ, ಸಂಪ್ರದಾಯಬದ್ಧವಾಗಿ ಹಾಗೂ ಶುಚಿಯಾಗಿ ಜನರಿಗೆ ತಲುಪಿಗೆ ಮೇರು ವ್ಯಕ್ತಿತ್ವ ಎಂದು ಹಲವರು ದಾಮು ಅವರ ಕೊಡುಗೆಯನ್ನು ಸ್ಮರಿಸಿದ್ದಾರೆ. ದಾಮು ಪಾಕ ಕ್ಷೇತ್ರದಲ್ಲಿ ನೀಡಿದ ಕೊಡುಗೆ ಅಪಾರ. ಅವರ ಸಲಹೆಗಳು, ಪಾಕ ವಿಧಾನ ಅಡುಗಮನೆಯಲ್ಲಿ ನಿರಂತವಾಗಲಿ ಸಾಗಲಿದೆ ಎಂದು ಹಲವರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಹೊಟೆಲ್ ಮ್ಯಾನೇಜ್‌ಮೆಂಟ್ ಪದವಿ ಬಳಿಕ ಪ್ರವಾಸೋದ್ಯ ಇಲಾಖೆಯಲ್ಲಿ ಸೇವೆ ಆರಂಭಿಸಿದ ದಾಮು, ತಮ್ಮ ಆಸಕ್ತಿಯ ಕುಕಿಂಗ್ ಕ್ಷೇತ್ರಕ್ಕೆ ಮರಳಲು ಕಾತರಗೊಂಡಿದ್ದರು. ಹೀಗಾಗಿ 2004ರಲ್ಲಿ ಮದ್ರಾಸ್ ವಿಶ್ವವಿದ್ಯಾಲಯದಿಂದ ಹೊಟೆಲ್ ಮ್ಯಾನೇಜ್‌ಮೆಂಟ್ ಹಾಗೂ ಕ್ಯಾಟರಿಂಗ್ ಕ್ಷೇತ್ರದಲ್ಲಿ ಪಿಹೆಚ್‌ಡಿ ಪದವಿ ಪೂರೈಸಿದರು. ಈ ಸಾಧನೆ ಮಾಡಿದ ಭಾರತದ ಮೊದಲ ಶೆಫ್ ಅನ್ನೋ ಹೆಗ್ಗಳಿಕೆಗೂ ದಾಮು ಪಾತ್ರರಾಗಿದ್ದಾರೆ. ತಮಿಳುನಾಡಿನ ಶಾಲೆಗಳಲ್ಲಿ ಮಕ್ಕಳ ಮಧ್ಯಾಹ್ನದ ಊಟದ ವ್ಯವಸ್ಥೆಯಲ್ಲಿ ಸುಧಾರಣೆಗೆ ಸಲಹೆ, 1.4 ಲಕ್ಷ ಕಾರ್ಮಿಕರಿಗೆ ತರಬೇತಿ ಸೇರಿದಂತೆ ಹಲವು ಸಾಮಾಜಿಕ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದರು.

ದಾಮು ಅಪ್ಪ ಎಂದೇ ಗುರುತಿಸಿಕೊಂಡಿದ್ದ ದಾಮೋದರನ್ ದೇಶಾದ್ಯಂತ ಅಭಿಮಾನಿ ಬಳಗ ಹೊಂದಿದ್ದರು. ಒಬ್ಬ ಶೆಫ್ ಈ ಮಟ್ಟಿಗೆ ಜನಪ್ರಿಯರಾಗಬಹುದು ಅನ್ನೋದು ತೋರಿಸಿಕೊಟ್ಟಿದ್ದೆ ದಾಮು ಅನ್ನೋ ಮಾತಿದೆ.

ತಂದೆ ಹೆಸರಿನ ಗೊಂದಲದಲ್ಲಿ ಜಿರಳೆ ಲೀಡರ್ ಸೌರವ್ ದಾಸ್: SIR ವಿರೋಧದ ಕಾರಣ ಹೆಕ್ಕಿ ತೆಗೆದರು- ಅಪ್ಪ ಯಾರು

Suchethana D — Sun, 25 Oct 2026 14:14:57 +0530

ಮುಂಬೈ: ಕಾಕ್ರೋಚ್ ಜನತಾ ಪಕ್ಷ (CJP)ಯ ಸಂಸ್ಥಾಪಕ ಅಭಿಜೀತ್ ದೀಪ್ಕೆ ಇದಾಗಲೇ ಪ್ರತಿಭಟನೆಯ ಮುಂದಾಳತ್ವ ವಹಿಸಿದೋನು ನಾನಲ್ಲ, ಅದೇನಿದ್ದರೂ ಸೌರವ್ ದಾಸ್ ಮತ್ತು ಅಶುತೋಷ್ ರಾಂಕಾ ಎಂದು ವಿಡಿಯೋ ಮಾಡುವ ಮೂಲಕ ನುಣುಚಿಕೊಳ್ಳುವ ಯತ್ನ ಮಾಡಿರುವುದು ಇದಾಗಲೇ ಸಾಕಷ್ಟು ಟ್ರೋಲ್ ಆಗಿದೆ. ದೆಹಲಿಯಲ್ಲಿ ನಡೆದ ಘಟನೆಯ ತನಿಖೆಯನ್ನು ಕ್ರೈಂಬ್ರ್ಯಾಂಚ್ನವರು ವಹಿಸಿಕೊಂಡ ಬೆನ್ನಲ್ಲೇ ದೀಪ್ಕೆ ವಿಡಿಯೋ ಮಾಡಿ, ಉಳಿದಿಬ್ಬರ ಹೆಸರು ಹೇಳಿ ನಾನು ಅವರು ಹೇಳಿದಂತೆ ಕೇಳುವವ ಅಷ್ಟೇ ಅಂದಿದ್ದಾರೆ! ಇದೇ ಘಟನೆಗೆ ಸಂಬಂಧಿಸಿದಂತೆ ದೀಪ್ಕೆ ಹೊರಕ್ಕೆ ಇದ್ದರೆ, ಸೌರವ್ ದಾಸ್ ಮತ್ತು ಅಶುತೋಷ್ ರಾಂಕಾ ಅವರು ಏಳು ದಿನ ನ್ಯಾಯಾಂಗ ಬಂಧನದಲ್ಲಿ ಇದ್ದರು.

ಈ ಮಧ್ಯೆ, ಸೌರವ್ ದಾಸ್ ಅವರಿಗೆ ಜಾಮೀನು ನೀಡಲು ನಿರಾಕರಿಸಿದ್ದರ ಹಿಂದಿರುವ ಕೋರ್ಟ್ ಆದೇಶದ ಪ್ರತಿ ಇದೀಗ ವೈರಲ್ ಆಗಿದೆ. ಇದಕ್ಕೆ ಕಾರಣ, ಅರ್ಜಿಯಲ್ಲಿ ಕೆಲವೊಂದು ಲೋಪ ಇರುವುದು ಒಂದೆಡೆಯಾದರೆ, ಅವರು ತಮ್ಮ ತಂದೆಯ ಹೆಸರನ್ನು ಸರಿಯಾಗಿ ನೀಡಲು ಸೌರವ್ ದಾಸ್ ವಿಫಲವಾಗಿರುವುದು ಎಂದು ಬರೆಯಲಾಗಿದೆ. ಎಸ್‌ಇಎಂ ನ್ಯಾಯಾಲಯದ ದಾಖಲೆಗಳಿಗಾಗಿ ಸೌರವ್ ಅವರು ತಂದೆಯ ಹೆಸರು ಮತ್ತು ವಿಳಾಸವನ್ನು ನೀಡಲು ಸಾಧ್ಯವಾಗದಿದ್ದಾಗ ಬಹಳಷ್ಟು ತೊಂದರೆಗೆ ಸಿಲುಕಿದರು. ಕೊನೆಗೂ ಅವರು ದೆಹಲಿಯ ಒಂದು ಅಡ್ರೆಸ್ ಕೊಟ್ಟು ತಂದೆಯ ಹೆಸರನ್ನು ಸುಬೀರ್ ದಾಸ್ ಎಂದು ಬರೆದರು.

ಆದರೆ ಸಮಸ್ಯೆ ಶುರುವಾಗಿದ್ದು, ಅಲ್ಲಿಂದಲೇ, 2023 ರ ಮದ್ರಾಸ್ ಹೈಕೋರ್ಟ್ ಆದೇಶದ ಪ್ರತಿಯೊಂದರಲ್ಲಿ ಸೌರವ್ ಅವರು ಸೀಮಾ ಛೆಟ್ರಿ ಅವರ ಪುತ್ರ ಎಂದು ಉಲ್ಲೇಖಿಸುತ್ತದೆ. ಅಲ್ಲಿ ಪಾಂಡಿಚೇರಿ ವಿಳಾಸ ನೀಡಲಾಗಿದೆ. ಇದೀಗ ಸಾಕಷ್ಟು ಚರ್ಚೆಗೆ ಗ್ರಾಸವಾಗಿದೆ.

ಹಾಗಾದರೆ ಸತ್ಯವೇನು?

ಸದ್ಯ ಎಲ್ಲೆಡೆ ಹರಿದಾಡುತ್ತಿರುವ ಮಾಹಿತಿಯ ಪ್ರಕಾರ, ಸೌರವ್ ದಾಸ್ ಅವರು "ಪ್ರಮುಖ ರಾಜಕಾರಣಿ"ಯ ಮಗ ಎಂದು ಹೇಳಲಾಗುತ್ತದೆ. ಅವರ ಹೆತ್ತ ತಂದೆಯ ಹೆಸರು ಸದ್ಯ ಬೆಳಕಿಗೆ ಬಂದಿಲ್ಲ. ವಾಸ್ತವವೆಂದರೆ ಅವರ ತಂದೆ ನೇಪಾಳಿಯಾಗಿದ್ದು, ಸೌರವ್ 3 ವರ್ಷದವನಿದ್ದಾಗ ಅವರನ್ನು ತ್ಯಜಿಸಿದ್ದರು. ಕೆಲವು ವರ್ಷಗಳ ನಂತರ, ಅವರ ತಾಯಿ ಸುಬೀರ್ ದಾಸ್ ಅವರನ್ನು ಭೇಟಿಯಾಗಿ ಅವರ ಜೊತೆ ನೆಲೆಸಿದ್ದಾರೆ. ಸುಬೀರ್ ಸೌರವ್ ಅವರು ಸೌರವ್ ಅವರನ್ನು ಕಾನೂನುಬದ್ಧವಾಗಿ ದತ್ತು ಪಡೆದಿಲ್ಲ. ಆದರೆ ಸೌರವ್ ಅವರು ದಾಸ್ ಎನ್ನುವ ಸರ್ನೇಮ್ನಿಂದ ಗುರುತಿಸಿಕೊಳ್ಳುತ್ತಿದ್ದಾರೆ. ಇದೇ ಕಾರಣಕ್ಕೆ ಕೆಲವು ಕಡೆಗಳಲ್ಲಿ ತಾಯಿಯ ಹೆಸರು ಸೂಚಿಸುತ್ತಿದ್ದಾರೆ. ಆಗಿದ್ದು ಇಷ್ಟೇ. ಆದರೆ ಇದೇ ಈಗ ಬಹುದೊಡ್ಡ ಪ್ರಮಾಣದಲ್ಲಿ ಚರ್ಚೆಯಾಗುತ್ತಿದೆ ಅಷ್ಟೇ.

ನೇಪಾಳದಿಂದ ಭಾರತಕ್ಕೆ ದಿಢೀರ್ ಬಂದ ಅಮ್ಮ

2019 ರಲ್ಲಿ CAA/NRC ಜಾರಿಗೆ ಬರುವವರೆಗೂ, ಸೀಮಾ ಛೆಟ್ರಿ ತಮ್ಮನ್ನು ನೇಪಾಳಿ ಎಂದು ಹೆಮ್ಮೆಯಿಂದ ಗುರುತಿಸಿಕೊಳ್ಳುತ್ತಿದ್ದರು. CAA/NRC ನಂತರ, ಅವರ ಮೂಲ ಸ್ಥಳವು ನಿಗೂಢವಾಗಿ ಪಶ್ಚಿಮ ಬಂಗಾಳದ ಸಿಲಿಗುರಿಗೆ ಬದಲಾಯಿತು. ಇದು ಸೌರವ್ ಅವರನ್ನು ಸ್ವಲ್ಪ ಮಟ್ಟಿಗೆ ಗೊಂದಲಕ್ಕೀಡು ಮಾಡುತ್ತಿದೆ ಎಂದೂ ಹೇಳಲಾಗುತ್ತಿದೆ. ಅವರ ಜೈವಿಕ ಪೋಷಕರು ಇಬ್ಬರೂ ನೇಪಾಳಿ ಮೂಲದವರು ಎಂದು ಕಂಡುಬಂದರೆ, ಅವರು ಭಾರತದಲ್ಲಿ ಜನಿಸಿದರೂ ಸಹ, ಅವರು ಭಾರತೀಯ ಪ್ರಜೆಯಾಗುವುದಿಲ್ಲ. ಭಾರತೀಯ ಕಾನೂನಿನ ಪ್ರಕಾರ, 1987 ಮತ್ತು 2004 ರ ನಡುವೆ ಭಾರತದಲ್ಲಿ ಜನಿಸಿದ ವ್ಯಕ್ತಿಯು ಸ್ವಯಂ ಆಗಿ ಭಾರತೀಯ ಪ್ರಜೆಯಾಗುತ್ತಾನೆ, ಅವರ ಜೈವಿಕ ಪೋಷಕರಲ್ಲಿ ಕನಿಷ್ಠ ಒಬ್ಬರು ಭಾರತೀಯ ಪ್ರಜೆಯಾಗಿದ್ದರೆ ಮಾತ್ರ.

ಸೌರವ್ ದಾಸ್ 2000 ರಲ್ಲಿ ಜನಿಸಿದ ಕಾರಣ, ಈ ಸಂಗತಿ (ನಿಜವಾಗಿದ್ದರೆ) ಅವರು ಭಾರತೀಯ ಪ್ರಜೆ ಆಗುವುದಿಲ್ಲ. ಮತ್ತು ಇದು ಅವರ ಜೀವನವನ್ನು ಕಷ್ಟಕರವಾಗಿಸಬಹುದು. ಅವರು ಆರಂಭದಲ್ಲಿ RTI ಕಾರ್ಯಕರ್ತನಾಗಿ ಖ್ಯಾತಿಯನ್ನು ಗಳಿಸಿದ್ದರಿಂದ ಮತ್ತು ಈಗ ರಾಜಕೀಯ ಸವಾಲುಗಳನ್ನು ಎದುರಿಸುತ್ತಿರುವುದರಿಂದ ಅವರಿಗೆ ಇನ್ನೂ ಹೆಚ್ಚಿನ ಕಷ್ಟವಾಗಬಹುದು. ಆದರೆ ಈ ಬಗ್ಗೆ ಎಲ್ಲಿಯೂ ಅಧಿಕೃತಪಟ್ಟಿಲ್ಲ ಎನ್ನುವುದು ಕೂಡ ಗಮನಿಸಬೇಕಾದ ಅಂಶ.

ಪುರುಷರನ್ನು ಮೆಚ್ಚಿಸಲು ಇತರ ಮಹಿಳೆಯ ಬೆನ್ನಿಗೆ ಇರಿಯೋದು ನಿಲ್ಲಿಸಿ- ಉದ್ಯಮಿ ಉಪಾಸನಾ ಖಡಕ್ ವಾರ್ನಿಂಗ್

Suchethana D — Sun, 25 Oct 2026 12:57:30 +0530

ಮುಂಬೈ: ಮಹಿಳೆಗೆ ಮಹಿಳೆಯೇ ಶತ್ರು ಎನ್ನುವುದು ತಲೆತಲಾಂತರಗಳಿಂದ ಬಂದಿರುವ ಮಾತು. ಹಾಗೆಂದು ಇದನ್ನು ಹಿರಿಯರೇನೂ ಸುಖಾಸುಮ್ಮನೇ ಮಾಡಿದ್ದಲ್ಲ. ಹತ್ತು ಹಲವು ಉದಾಹರಣೆಗಳನ್ನು ನೋಡಿಯೇ ಈ ಮಾತು ಚಾಲ್ತಿಯಲ್ಲಿ ಬಂದಿರುವುದು. ಮಹಿಳಾವಾದಿಗಳಿಗೆ ಈ ಮಾತು ಹಿಡಿಸದೇ ಹೋದರೂ, ಮನೆಯಿಂದ ಹಿಡಿದು ಕಚೇರಿಯವರೆಗೆ, ಚಿಕ್ಕ ಪುಟ್ಟ ಉದ್ಯೋಗ ಸ್ಥಳದಿಂದ ಹಿಡಿದು, ದೊಡ್ಡ ದೊಡ್ಡ ವಲಯಗಳಲ್ಲಿ, ಹಲವಾರು ಮಹಿಳೆಯರು ಇನ್ನೋರ್ವ ಮಹಿಳೆಯಿಂದಲೇ ಯಾತನೆ ಅನುಭವಿಸಿರುವುದು ಇದ್ದೇ ಇದೆ. ವಿಧಾನಗಳು ಬೇರೆಬೇರೆಯಾಗಿದ್ದರೂ, ಎಲ್ಲಾ ಕ್ಷೇತ್ರಗಳಲ್ಲಿಯೂ ಹಲವು ಮಹಿಳೆಯರು ಈ ಕೆಟ್ಟ ಅನುಭವವನ್ನು ಅನುಭವಿಸಿಯೇ ಇರುತ್ತಾರೆ. ಅದರಲ್ಲಿಯೂ ಕೆಲವು ಕ್ಷೇತ್ರಗಳಲ್ಲಿ ತಾವು ಉನ್ನತ ಮಟ್ಟಕ್ಕೆ ಏರಲು ಯಾವೆಲ್ಲಾ ಮಟ್ಟಿಗೆ ಮಹಿಳೆಯರು ಹೋಗುತ್ತಾರೆ ಎನ್ನುವ ಅನುಭವವೂ ಹಲವರಿಗೆ ಆಗಿದ್ದಿದೆ.

ಇದೀಗ ಅದರ ಬಗ್ಗೆಯೇ ಮಾತನಾಡಿದ್ದಾರೆ ಉದ್ಯಮಿ ಹಾಗೂ ನಟ ರಾಮ್ಚರಣ್ ಅವರ ಪತ್ನಿ ಉಪಾಸನಾ ಕಾಮಿನೇನಿ ಕೊನಿಡೇಲಾ (Upasana Kamineni Konidela). ಉಪಾಸನಾ ಅವರು ಸಾಕಷ್ಟು ಬಾರಿ ಮಹಿಳಾ ಸಬಲೀಕರಣದ ಬಗ್ಗೆ ಧ್ವನಿ ಎತ್ತುತ್ತಾರೆ, ಮಹಿಳೆಯರ ಸಬಲೀಕರಣದ ಬಗ್ಗೆ ಸಾಕಷ್ಟು ಕೆಲಸವನ್ನೂ ಮಾಡಿದ್ದಾರೆ. ಆದರೆ ಇದೀಗ ಅವರು ಕೆಲವು ಮಹಿಳೆಯರ ಬಗ್ಗೆ ಮಾತನಾಡಿದ್ದಾರೆ. ತಮ್ಮ ವೈಯಕ್ತಿಕ ಲಾಭಕ್ಕಾಗಿ ಅಥವಾ ಪುರುಷರನ್ನು ಮೆಚ್ಚಿಸಲು ಇತರ ಮಹಿಳೆಯರನ್ನು ಕೆಳಗಿಳಿಸುವ ಮಹಿಳೆಯರಿಗೆ ಅವರು ಬಲವಾದ ಸಂದೇಶವನ್ನು ಕಳುಹಿಸಿದ್ದಾರೆ. 'ಒಬ್ಬ ಮಹಿಳೆಯ ನೋವು ಎಂದಿಗೂ ಇನ್ನೊಬ್ಬ ಮಹಿಳೆಯ ಗೆಲುವಾಗಬಾರದು' ಎಂದಿರುವ ಉಪಸನಾ ಅವರು, ದುರ್ಬಲ ಪುರುಷರನ್ನು ಮೆಚ್ಚಿಸಲು ಇತರ ಮಹಿಳೆಯ ಬೆನ್ನಿಗೆ ಇರಿಯುವುದನ್ನು ನಿಲ್ಲಿಸಿ ಎಂದು ಹೆಂಗಳೆಯರಿಗೆ ಖಡಕ್ ವಾರ್ನಿಂಗ್ ನೀಡಿದ್ದಾರೆ.

ಒಬ್ಬ ಮಹಿಳೆಯ ನೋವು ಎಂದಿಗೂ ಇನ್ನೊಬ್ಬ ಮಹಿಳೆಯ ಗೆಲುವಾಗಬಾರದು

ಇತ್ತೀಚೆಗೆ ನಡೆದ ಕಾರ್ಯಕ್ರಮವೊಂದರಲ್ಲಿ, ಒಬ್ಬರನ್ನೊಬ್ಬರು ನಿಜವಾಗಿಯೂ ಬೆಂಬಲಿಸುವ, ಆಚರಿಸುವ ಮತ್ತು ಪ್ರೇರೇಪಿಸುವ ಮಹಿಳೆಯರಿಗಿಂತ ಹೆಚ್ಚಿನ ಸಬಲೀಕರಣ ಇನ್ನೊಂದಿಲ್ಲ ಎಂದು ಉಪಾಸನಾ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಉಪಾಸನಾ ಸ್ಪಷ್ಟವಾಗಿ "ಒಬ್ಬ ಮಹಿಳೆಯ ನೋವು ಎಂದಿಗೂ ಇನ್ನೊಬ್ಬ ಮಹಿಳೆಯ ಗೆಲುವಾಗಬಾರದು. ಪರಸ್ಪರರ ಸೋಲುಗಳಲ್ಲಿ ಸಂತೋಷವನ್ನು ಕಂಡುಕೊಳ್ಳುವ ಮನಸ್ಥಿತಿಯನ್ನು ಮಹಿಳೆಯರು ಬದಲಾಯಿಸಬೇಕು. ದುರ್ಬಲ ಪುರುಷರನ್ನು ಮೆಚ್ಚಿಸಲು ಬೆನ್ನಿಗೆ ಇರಿಯುವುದನ್ನು ನಿಲ್ಲಿಸಿ ಎನ್ನುವ ಮೂಲಕ ವೈಯಕ್ತಿಕ ಲಾಭಕ್ಕಾಗಿ ಅಥವಾ "ದುರ್ಬಲ ಪುರುಷ"ನನ್ನು ಸಮಾಧಾನಪಡಿಸಲು ಇತರ ಮಹಿಳೆಯರನ್ನು ಬಳಸುವ ಅಥವಾ ತಡೆಯುವ ಮಹಿಳೆಯರಿಗೆ ಅವರು ಕಠಿಣ ಎಚ್ಚರಿಕೆ ನೀಡಿದ್ದಾರೆ.

ನಿಜವಾದ ಸಬಲೀಕರಣ ಎಂದರೆ...

ನಿಜವಾದ ಸಬಲೀಕರಣವು ಪರಸ್ಪರ ಸ್ಪರ್ಧಿಸುವುದರಲ್ಲಿ ಅಥವಾ ಕೆಳಕ್ಕೆ ಎಳೆಯುವುದರಲ್ಲಿ ಅಲ್ಲ, ಆದರೆ ಒಟ್ಟಿಗೆ ಎದ್ದು ಪರಸ್ಪರ ಬೆಂಬಲಿಸುವುದರಲ್ಲಿ ಅಡಗಿದೆ ಎಂದು ಉಪಾಸನಾ ಒತ್ತಿ ಹೇಳಿದ್ದಾರೆ. ಸಾಮಾಜಿಕ ಕಾರ್ಯಕರ್ತೆ ಸುನೀತಾ ಕೃಷ್ಣನ್ ಅವರ ಕೆಲಸವನ್ನು ಉಲ್ಲೇಖಿಸಿ, ಸಮಾಜದಲ್ಲಿ ಮಹಿಳೆಯರು ಎದುರಿಸುತ್ತಿರುವ ಅನ್ಯಾಯ ಅಥವಾ ಶೋಷಣೆಯು ಇತರ ಮಹಿಳೆಯರ ಪಾತ್ರ ಅಥವಾ ಸ್ವಾರ್ಥದಿಂದಾಗಿ ಸಂಭವಿಸುತ್ತದೆ ಎಂದು ಅವರು ಕಳವಳ ವ್ಯಕ್ತಪಡಿಸಿದರು, ಇದನ್ನು ತುರ್ತಾಗಿ ನಿಲ್ಲಿಸಬೇಕಾಗಿದೆ ಎಂದರು. ನಮ್ಮ ಸಹಾಯದ ಅಗತ್ಯವಿರುವ ಅನೇಕ ಮಹಿಳೆಯರು ಇದ್ದಾರೆ. ಆದರೆ ನನ್ನ ಸಂಶೋಧನೆಯು, ಇತರ ಮಹಿಳೆಯರನ್ನು ತುಳಿಯುವ ಮಹಿಳೆಯರ ಬಗ್ಗೆ ತೋರಿಸುತ್ತದೆ ಎಂದಿರುವ ಉಪಾಸನಾ, ನಿಮಗೆ ನನ್ನ ಎಚ್ಚರಿಕೆ ಇದು: ನಿಮ್ಮ ಯಶಸ್ಸಿಗಾಗಿ ಅಥವಾ ದುರ್ಬಲ ಪುರುಷನನ್ನು ಮೆಚ್ಚಿಸಲು ನೀವು ಮಹಿಳೆಯ ಮೇಲೆ ಕಾಲಿಡಬಹುದು ಎಂದು ಭಾವಿಸಬೇಡಿ. ನಮ್ಮ ಹೆಚ್ಚಿನ ಮಕ್ಕಳು ಆ ಪರಿಸ್ಥಿತಿಯಲ್ಲಿದ್ದಾರೆ. ಏಕೆಂದರೆ ಇತರ ಮಹಿಳೆಯರು ತಮ್ಮ ಸ್ವಂತ ಸಂತೋಷವನ್ನು ಪಡೆಯಲು ಮಹಿಳೆಯರಿಗೆ ಅನ್ಯಾಯ ಮಾಡಿದ್ದಾರೆ ಎಂದಿದ್ದಾರೆ.

Second marriage: ಬಯಲಾಯ್ತು ಗಂಡನ ಅಸಲಿ ರೂಪ; ಎರಡನೇ ಮದುವೆಯಲ್ಲೂ ಟ್ವಿಂಕಲ್‌ಗೆ ಬಿಗ್‌ ಶಾಕ್‌!

Bhimasi M Koleppanavar — Sun, 25 Oct 2026 12:39:16 +0530

ಪ್ರೀತಿ ಯಾರ ಮೇಲೆ, ಹೇಗಾಗುತ್ತೆ, ಎಲ್ಲಿ ಹುಟ್ಟುತ್ತದೆ ಎನ್ನುವುದನ್ನು ಭಾವಿಸುವುದಕ್ಕೆ ಸಾಧ್ಯವಿಲ್ಲ, ಒಟ್ಟಿನಲ್ಲಿ ಪ್ರೀತಿ ಎನ್ನುವುದು ದೈವಿ ಸ್ವರೂಪ. ಅದು ದಾನವ ರೂಪದಲ್ಲೂ ಪುನಾರ್ತನೆಯಾಗಬಹುದು. ಅದು, ಪುನಾವರ್ತನೆಯಾಗಬೇಕಾದರೆ, ಅದನ್ನು ನೋಡುವ ಹಾಗೂ ಕಾಣುವ ಕಣ್ಣು, ಅದರೊಂದಿಗೆ ಹಾಕುವ ಹೆಜ್ಜೆ ಮೇಲೆ ನಿಂತಿರುತ್ತದೆ. ಹೀಗೆ ಪಂಜಾಬ್‌ನ ಒಂದು ಸಿಟಿಯಲ್ಲಿ ಇಬ್ಬರ ನಡುವೆ ಪ್ರೀತಿಯಾಗುತ್ತದೆ, ನಂತರ ಅದು ಮದುವೆ ಹಂತಕ್ಕೆ ಬಂದು, ಇಬ್ಬರ ಮದುವೆಯೂ ಆಗುತ್ತದೆ. ಆಮೇಲೆ ಆದ ಕಥೆಯೇ ಬೇರೆ. ಮೊದಲು ಥಾಋ, ನಂತರ ಬೈಕ್‌ಗೆ ಬೇಡಿಕೆ, ಇದಾದ ಮೇಲೆ ಪತ್ನಿಯನ್ನು ರಸ್ತೆಗೆ ತಂದ ಭೂಪ ಮಾಡಿದ್ದೇನು? ಎಳೆ-ಎಳೆಯಾಗಿ ನೋಡೋಣ ಬನ್ನಿ.

ಪತ್ನಿಯನ್ನು ಕ್ರೂರವಾಗಿ ಥಳಿಸಿದ ಪತಿ!

ಪಂಜಾಬ್‌ನ ಲುಧಿಯಾನದ ಜಸ್ಸಿಯಾ ಗ್ರೀನ್ ಎನ್‌ಕ್ಲೇವ್‌ನಲ್ಲಿ ಪತಿಯೊಬ್ಬ ತನ್ನ ಪತ್ನಿಯನ್ನು ಸಾರ್ವಜನಿಕವಾಗಿ ಕ್ರೂರವಾಗಿ ಥಳಿಸುತ್ತಿರುವ ಪ್ರಕರಣ ಬೆಳಕಿಗೆ ಬಂದಿದೆ. ಘಟನೆಯ ಸಿಸಿಟಿವಿ ದೃಶ್ಯಗಳು ಸಹ ಹೊರಬಂದಿವೆ. ಪತಿ ಮೊದಲು ತನ್ನ ಪತ್ನಿಗೆ ಕಪಾಳಮೋಕ್ಷ ಮಾಡಿ, ನಂತರ ಆಕೆಯ ಕೂದಲನ್ನು ಹಿಡಿದು, ಬೀದಿಗೆ ಎಸೆದು, ತೀವ್ರವಾಗಿ ಒದೆಯುತ್ತಿರುವುದನ್ನು ವೀಡಿಯೊ ವೈರಲ್‌ ಆಗಿದೆ. ಮಹಿಳೆಯ ಕಿರುಚಾಟ ಕೇಳಿದ ನೆರೆಹೊರೆಯವರು ತಕ್ಷಣ ತಮ್ಮ ಮನೆಗಳಿಂದ ಹೊರಗೆ ಓಡಿಬಂದರು. ಅವರು ಧೈರ್ಯದಿಂದ ಮಧ್ಯಪ್ರವೇಶಿಸಿ ಮಹಿಳೆಯ ಜೀವವನ್ನು ಉಳಿಸಿದ್ದಾರೆ.

ದೂರು ನೀಡಿದ ಮಹಿಳೆ!

ನಂತರ ಅವರು ತಕ್ಷಣ ಮಹಿಳೆಯ ಕುಟುಂಬಕ್ಕೆ ಕರೆ ಮಾಡಿ ದಾಳಿಯ ಬಗ್ಗೆ ಮಾಹಿತಿ ನೀಡಿದರು. ಸಂತ್ರಸ್ತೆ ಜಗತ್‌ಪುರಿ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಸಿಸಿಟಿವಿ ದೃಶ್ಯಗಳನ್ನು ಸಲ್ಲಿಸಿದ್ದಾರೆ. ಪೊಲೀಸರು ಈ ಬಗ್ಗೆ ತನಿಖೆ ಆರಂಭಿಸಿದ್ದಾರೆ. ಥಾರ್ ಕಾರನ್ನು ಬೇಡಿಕೆ ಇಟ್ಟ ನಂತರ, ಆರೋಪಿ ಈಗ ಮೋಟಾರ್ ಸೈಕಲ್‌ಗೆ ಬೇಡಿಕೆ ಇಡುತ್ತಿದ್ದಾನೆ ಎಂದು ವರದಿಯಾಗಿದೆ.

ಸಲೂನ್‌ ನಡೆಸುತ್ತಿರುವ ಟ್ವಿಂಕಲ್!

ಸಂತ್ರಸ್ತೆ ಟ್ವಿಂಕಲ್ ತನ್ನದೇ ಆದ ಸಲೂನ್ ನಡೆಸುತ್ತಾಳೆ. ಆಕೆಯ ಆರೋಪಿ ಪತಿ ರಿತೀಶ್ ಶರ್ಮಾ ವೈದ್ಯಕೀಯ ಕ್ಷೇತ್ರದಲ್ಲಿ ಕೆಲಸ ಮಾಡುತ್ತಾರೆ. ರಿತೀಶ್ ಒಂಟಿ ಪೋಷಕರಾಗಿದ್ದು, ಒಬ್ಬಂಟಿಯಾಗಿ ವಾಸಿಸುತ್ತಿದ್ದಾರೆ. ಇದು ರಿತೀಶ್ ಅವರ ಮೊದಲ ಮದುವೆಯಾಗಿದ್ದರೆ, ಟ್ವಿಂಕಲ್ ಅವರದು ಎರಡನೇ ಮದುವೆ. ಟ್ವಿಂಕಲ್ ಸುಮಾರು ಎರಡು ವರ್ಷಗಳ ಹಿಂದೆ ತನ್ನ ಮೊದಲ ಪತಿಗೆ ವಿಚ್ಛೇದನ ನೀಡಿದರು, ಅವರೊಂದಿಗೆ ಅವರಿಗೆ ಏಳು ವರ್ಷದ ಮಗನಿದ್ದಾನೆ. ವಿಚ್ಛೇದನ ಪ್ರಕ್ರಿಯೆಯ ಸಮಯದಲ್ಲಿ ಅವರು ರಿತೀಶ್ ಅವರನ್ನು ಭೇಟಿಯಾಗಿದ್ದಾರೆ, ನಂತರ ಸ್ನೇಹ ಹುಟ್ಟತ್ತೆ,ಕಳೆದ ವರ್ಷ ನವೆಂಬರ್‌ನಲ್ಲಿ ವಿವಾಹವಾಗಿದ್ದಾರೆ. ಅವರ ಮದುವೆಯ ನಂತರ, ಅವರು ತಮ್ಮ ಹೊಸ ಜೀವನ ಪ್ರಾರಂಭಿಸಲು ಜಸ್ಸಿಯಾ ಗ್ರೀನ್ ಎನ್‌ಕ್ಲೇವ್‌ನಲ್ಲಿ ವಾಸಿಸುತ್ತಿದ್ದರು.

ಮದುವೆಯಾದ ಕೇವಲ 3 ತಿಂಗಳ ನಂತರ ಥಾರ್‌ಗೆ ಬೇಡಿಕೆ ಪ್ರಾರಂಭ!.

ಮದುವೆಯಾದ ಕೇವಲ ಮೂರು ತಿಂಗಳ ನಂತರ, ರಿತೀಶ್ ತನ್ನ ಆಸೆಗಳನ್ನು ಪೂರೈಸಲು ತನ್ನ ಹೆಂಡತಿಯಿಂದ ಥಾರ್ ಕೇಳಲು ಪ್ರಾರಂಭಿಸಿದನು ಎಂದು ಆರೋಪಿಸಲಾಗಿದೆ. ಆ ಹುಡುಗ ಪೋಷಕರಿಲ್ಲದ ವ್ಯಕ್ತಿಯಾಗಿದ್ದರಿಂದ, ಇದು ಸಾಂಪ್ರದಾಯಿಕ ವರದಕ್ಷಿಣೆ ಸಮಸ್ಯೆಯಾಗಿರಲಿಲ್ಲ, ಬದಲಾಗಿ ರಿತೀಶ್‌ನ ಸ್ವಂತ ದುರಾಸೆಯಾಗಿತ್ತು. ಥಾರ್ ಕುಟುಂಬದಲ್ಲಿ ದೈನಂದಿನ ಸಂಘರ್ಷದ ಮೂಲವಾಯಿತು. ವಿವಾದ ಉಲ್ಬಣಗೊಂಡಾಗ, ಮಧ್ಯವರ್ತಿಯ ಮೂಲಕ ರಾಜಿ ಮಾಡಿಕೊಳ್ಳಲಾಯಿತು, ಇದು ಸ್ವಲ್ಪ ಸಮಯದವರೆಗೆ ಪರಿಸ್ಥಿತಿಯನ್ನು ಶಾಂತಗೊಳಿಸಿತು.

ರಕ್ಷಣೆಗೆ ನೆರೆಯವರ ಬಳಿಗೆ ಹೋದರೂ ಬಿಡದ ಗಂಡ!

ಥಾರ್ ಬೇಡಿಕೆ ನಿಂತ ಕೆಲವೇ ತಿಂಗಳುಗಳ ನಂತರ, ರಿತೀಶ್ ಬೈಕ್‌ಗೆ ಬೇಡಿಕೆ ಇಡಲು ಪ್ರಾರಂಭಿಸಿದಳು. ಘಟನೆ ನಡೆದ ದಿನ, ಬೈಕ್‌ನ ವಿವಾದ ಎಷ್ಟರ ಮಟ್ಟಿಗೆ ಬೆಳೆದುತ್ತೆಂದರೆ, ಟ್ವಿಂಕಲ್ ತನ್ನನ್ನು ತಾನು ರಕ್ಷಿಸಿಕೊಳ್ಳಲು ತನ್ನ ನೆರೆಹೊರೆಯವರ ಬಳಿಗೆ ಹೋದಳು. ಆದರೆ ರಿತೀಶ್ ಅಲ್ಲಿಗೆ ಬಂದು ಸಾರ್ವಜನಿಕವಾಗಿ ಅವಳನ್ನು ಹೊಡೆಯಲು ಪ್ರಾರಂಭಿಸಿದಳು. ಅವಳನ್ನು ರಸ್ತೆಯ ಮೇಲೆ ಎಳೆದುಕೊಂಡು ಹೋಗಿ ಹೊಡೆಯುವ ಸಂಪೂರ್ಣ ಘಟನೆ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಪ್ರಸ್ತುತ, ದೂರಿನ ಆಧಾರದ ಮೇಲೆ ಆರೋಪಿ ಪತಿಯ ವಿರುದ್ಧ ಪೊಲೀಸರು ಮುಂದಿನ ಕ್ರಮ ಕೈಗೊಳ್ಳುತ್ತಿದ್ದಾರೆ.

ಡೆಲಿವರಿ ಬಾಯ್ಗೆ ಅನಂತ್ ಅಂಬಾನಿ ಸರ್ಪ್ರೈಸ್ ಗಿಫ್ಟ್: ಹೃದಯ ಶ್ರೀಮಂತಿಕೆಯ ಭಾವುಕ ವಿಡಿಯೋ ವೈರಲ್

Suchethana D — Sun, 25 Oct 2026 12:23:34 +0530

ಜಗತ್ತಿನ ಶ್ರೀಮಂತರಲ್ಲಿ ಒಬ್ಬರಾಗಿರುವ ರಿಲಯನ್ಸ್ ಇಂಡಸ್ಟ್ರೀಸ್ ನಿರ್ದೇಶಕ ಅನಂತ್ ಅಂಬಾನಿ ಅವರು ಇದಾಗಲೇ ಹಲವರು ಬಾರಿ ಹೃದಯ ಶ್ರೀಮಂತಿಕೆಯನ್ನೂ ಮೆರೆದಿದ್ದಾರೆ. ವಿಕೃತ ಮನಸ್ಸಿನವರು ಅವರ ಬಾಡಿ ಶೇಮಿಂಗ್ ಮಾಡುತ್ತಿದ್ದರೂ, ಅದ್ಯಾವುದನ್ನೂ ಪರಿಗಣನೆಗೆ ತೆಗೆದುಕೊಳ್ಳದೇ, ಪ್ರಚಾರವನ್ನೂ ಬಯಸದೇ ಸದ್ದಿಲ್ಲದೇ ತಮ್ಮ ಸಮಾಜ ಸೇವೆಯನ್ನು ಮುಂದುವರೆಸುತ್ತಿದ್ದಾರೆ ಅನಂತ್ ಅಂಬಾನಿ. ಅವರು ಸಮಾಜ ಸೇವೆ ಹಾಗೂ ಮುಖ್ಯವಾಗಿ ಪ್ರಾಣಿ ಕಲ್ಯಾಣ ಮತ್ತು ವನ್ಯಜೀವಿ ಸಂರಕ್ಷಣಾ ಕ್ಷೇತ್ರಗಳಲ್ಲಿ ಬೃಹತ್ ಕೊಡುಗೆಗಳನ್ನು ನೀಡುತ್ತಿದ್ದಾರೆ. ತಮ್ಮ ಸನಾತನ ಸಿದ್ಧಾಂತವಾದ 'ಜೀವ ಸೇವೆ'ಯನ್ನು (ಎಲ್ಲಾ ಜೀವಿಗಳ ಸೇವೆ) ಜೀವನದ ಮುಖ್ಯ ಉದ್ದೇಶವಾಗಿಸಿಕೊಂಡು ಅವರು ಹಲವು ಜನಪರ ಹಾಗೂ ಪ್ರಾಣಿ ಕಲ್ಯಾಣ ಕಾರ್ಯಕ್ರಮಗಳನ್ನು ನಡೆಸುತ್ತಿದ್ದಾರೆ.

ತಮ್ಮ ಹುಟ್ಟುಹಬ್ಬ ಹಾಗೂ ವಿಶೇಷ ಸಂದರ್ಭಗಳಲ್ಲಿ ಜಾಮ್‌ನಗರ ಮತ್ತು ಸುತ್ತಮುತ್ತಲಿನ ಹಳ್ಳಿಗಳಲ್ಲಿ ಬೃಹತ್ ಜನಸೇವೆಯನ್ನು ಕೈಗೊಳ್ಳುತ್ತಾರೆ. ಬಡ ರೋಗಿಗಳಿಗೆ ಮಲ್ಟಿ-ಸ್ಪೆಷಾಲಿಟಿ ಆರೋಗ್ಯ ಶಿಬಿರಗಳು ಮತ್ತು ಉಚಿತ ಕಣ್ಣಿನ ತಪಾಸಣೆಗಳನ್ನು ಆಯೋಜಿಸುತ್ತಾರೆ. ಗುರು ಗೋವಿಂದ್ ಸಿಂಗ್ ಆಸ್ಪತ್ರೆಯ ಲಕ್ಷಾಂತರ ರೋಗಿಗಳಿಗೆ ಹಾಗೂ ಸ್ಥಳೀಯ ಜನರಿಗೆ ಉಚಿತ ಊಟದ ವ್ಯವಸ್ಥೆ ಮಾಡಲಾಗುತ್ತದೆ. ಗ್ರಾಮೀಣ ಭಾಗದ ಸರ್ಕಾರಿ ಶಾಲಾ ಮಕ್ಕಳಿಗೆ ಉಚಿತ ಸ್ಕೂಲ್ ಕಿಟ್, ಶಾಲಾ ಕಟ್ಟಡಗಳ ನವೀಕರಣ ಹಾಗೂ ಕ್ರೀಡಾ ಸಾಮಗ್ರಿಗಳನ್ನು ವಿತರಿಸುತ್ತಾರೆ. ಅನಂತ್ ಅಂಬಾನಿ ಅವರು ರಿಲಯನ್ಸ್ ಫೌಂಡೇಶನ್ ಮೂಲಕ ದೇಶದ ಶಿಕ್ಷಣ, ಗ್ರಾಮೀಣಾಭಿವೃದ್ಧಿ ಹಾಗೂ ವಿಪತ್ತು ನಿರ್ವಹಣಾ ಕಾರ್ಯಗಳಿಗೂ ಬೆಂಬಲ ನೀಡುತ್ತಿದ್ದಾರೆ.

ಡೆಲಿವರಿ ಬಾಯ್ಗೆ ಸ್ಕೂಟರ್ ಗಿಫ್ಟ್

ಇಂಥ ಹತ್ತು ಹಲವು ಕಾರ್ಯಗಳನ್ನು ಸೈಲೆಂಟ್ ಆಗಿಮಾಡುವ ಕಾರಣ, ಅವರ ಈ ಮಹತ್ಕಾರ್ಯಗಳು ಉಳಿದವರಿಗೆ ತಿಳಿಯುವುದೇ ಇಲ್ಲ. ಇದೀಗ ಅವರು, ಸೈಕಲ್‌ನಲ್ಲಿ ಡೆಲಿವರಿ ಮಾಡುತ್ತಿದ್ದ ಬ್ಲಿಂಕಿಟ್ ಡೆಲಿವರಿ ಕೆಲಸಗಾರನಿಗೆ ಎಲೆಕ್ಟ್ರಿಕ್ ಸ್ಕೂಟರ್ ಉಡುಗೊರೆಯಾಗಿ ನೀಡುವ ಮೂಲಕ ಜನರ ಹೃದಯ ಗೆದ್ದಿದ್ದಾರೆ. ಸೈಕಲ್ ಮೇಲೆ ಡೆಲವರಿ ಮಾಡುತ್ತಿದ್ದ ಸಿಬ್ಬಂದಿಯೊಬ್ಬರಿಗೆ, ಇದಾಗಲೇ ಜನಸೇವೆ ಮೂಲಕ ಸೋಷಿಯಲ್ ಮೀಡಿಯಾದಲ್ಲಿ ಜನರ ಮನಸ್ಸನ್ನು ಗೆದ್ದಿರುವ ಹುಸೇನ್ ಮನ್ಸೂರಿ ಅವರ ಮೂಲಕ, ಈ ಉಡುಗೊರೆಯನ್ನು ನೀಡಿದ್ದಾರೆ ಅನಂತ್ ಅಂಬಾನಿ.

ಹುಸೇನ್ ಮನ್ಸೂರಿ ಅವರು ಈ ವಿಡಿಯೋ ಅನ್ನು ತಮ್ಮ ಸೋಷಿಯಲ್ ಮೀಡಿಯಾ ಖಾತೆಯಲ್ಲಿ ಶೇರ್ ಮಾಡಿಕೊಂಡಿದ್ದಾರೆ. ಸೈಕಲ್ ಮೇಲೆ ಹೋಗುವ ಡೆಲವರಿ ಬಾಯ್ ಅನ್ನು ಮಾತನಾಡಿಸಿ, ಕೊನೆಗೆ, ಅವರ ಕಣ್ಣಿಗೆ ಬಟ್ಟೆ ಕಟ್ಟಿ, ಅನಂತ್ ಅಂಬಾನಿ ಅವರು ನೀಡಿರುವ ಎಲೆಕ್ಟ್ರಿಕ್ ಸ್ಕೂಟರ್ ಉಡುಗೊರೆಯನ್ನು ತೋರಿಸಿದಾಗ, ಆ ವ್ಯಕ್ತಿಗೆ ಕಣ್ಣೀರು ತಡೆಯಲು ಆಗಲಿಲ್ಲ. ಅನಂತ್ ಅಂಬಾನಿ ಅವರಿಗೆ ಹೃದಯಪೂರ್ವಕವಾಗಿ ಆಶೀರ್ವದಿಸಿದ್ದಾರೆ ಅವರು. ಇದರ ವಿಡಿಯೋ ವೈರಲ್ ಆಗಿದ್ದು, ಅಂಬಾನಿ ಕುಟುಂಬಕ್ಕೆ ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.

ಯುವಕನ ಕಣ್ಣೀರು

ಇನ್ನು ಅನಂತ್ ಅಂಬಾನಿ ಅವರ ಕುರಿತು ಹೇಳುವುದಾದರೆ, ಇವರಿಗೆ 'ಗ್ಲೋಬಲ್ ಹ್ಯುಮಾನಿಟೇರಿಯನ್ ಅವಾರ್ಡ್' (Global Humanitarian Award) ನೀಡಿ ಗೌರವಿಸಲಾಗಿದೆ. ಈ ಪ್ರಶಸ್ತಿಯನ್ನು ಪಡೆದ ಅತ್ಯಂತ ಕಿರಿಯ ಹಾಗೂ ಮೊದಲ ಏಷ್ಯಾದ ವ್ಯಕ್ತಿ ಇವರಾಗಿದ್ದಾರೆ. ಗುಜರಾತ್‌ನ ಜಾಮ್‌ನಗರದಲ್ಲಿ ಸುಮಾರು 3,500 ಎಕರೆ ಪ್ರದೇಶದಲ್ಲಿ ಈ ಅತ್ಯಾಧುನಿಕ ವನ್ಯಜೀವಿ ರಕ್ಷಣೆ, ಪುನರ್ವಸತಿ ಮತ್ತು ಆರೈಕೆ ಕೇಂದ್ರವನ್ನು ಸ್ಥಾಪಿಸಲಾಗಿದೆ. ಜಗತ್ತಿನಾದ್ಯಂತ ಹಿಂಸೆ, ಅನಾರೋಗ್ಯ ಹಾಗೂ ಅಪಾಯಕ್ಕೆ ಸಿಲುಕಿದ್ದ ಸುಮಾರು 1.5 ಲಕ್ಷಕ್ಕೂ ಹೆಚ್ಚು ಪ್ರಾಣಿಗಳನ್ನು ರಕ್ಷಿಸಿ ಇಲ್ಲಿ ಪೋಷಿಸಲಾಗುತ್ತಿದೆ. ಇದರಲ್ಲಿ ಆನೆಗಳು, ಚಿರತೆಗಳು, ಹುಲಿಗಳು ಮತ್ತು ವಿವಿಧ ಪಕ್ಷಿ ಪ್ರಭೇದಗಳು ಸೇರಿವೆ. ಇಲ್ಲಿ ಆನೆಗಳಿಗಾಗಿಯೇ ಜಗತ್ತಿನ ಅತ್ಯಂತ ದೊಡ್ಡ ಹೈಟೆಕ್ ಆಸ್ಪತ್ರೆಯನ್ನು ನಿರ್ಮಿಸಲಾಗಿದ್ದು, ಗಾಯಗೊಂಡ ಆನೆಗಳಿಗೆ ಹೈಡ್ರೋಥೆರಪಿ ಹಾಗೂ ಸುಧಾರಿತ ಶಸ್ತ್ರಚಿಕಿತ್ಸೆಗಳನ್ನು ನೀಡಲಾಗುತ್ತದೆ.• ಇತ್ತೀಚಿನ ವರದಿಗಳ ಪ್ರಕಾರ, ಅವರ ನೇತೃತ್ವದ ತಂಡವು ಸುಮಾರು ೯ ಲಕ್ಷ ಗೋವುಗಳ ರಕ್ಷಣೆ ಮತ್ತು ಆರೈಕೆಯ ಜವಾಬ್ದಾರಿಯನ್ನು ಹೊತ್ತುಕೊಂಡಿದೆ.

ಇದರಲ್ಲಿ ಹಾಲು ನೀಡದ ಸುಮಾರು 7 ಲಕ್ಷಕ್ಕೂ ಅಧಿಕ ವೃದ್ಧ ಹಾಗೂ ಅಶಕ್ತ ಗೋವುಗಳನ್ನು ವಿಶೇಷ ಕಾಳಜಿಯಿಂದ ಸಾಕಿ ಸಲಹಲಾಗುತ್ತಿದೆ. ಸಮುದಾಯದಲ್ಲಿರುವ ಪ್ರಾಣಿಗಳ ಕಲ್ಯಾಣಕ್ಕಾಗಿ ಅವರು 'Champions of Care' ಎಂಬ ರಾಷ್ಟ್ರೀಯ ಯೋಜನೆಯನ್ನು ಘೋಷಿಸಿದ್ದಾರೆ. ಈ ಮೂಲಕ ಭಾರತದಾದ್ಯಂತ ಇರುವ 50ಕ್ಕೂ ಹೆಚ್ಚು ಪ್ರಾಣಿ ಕಲ್ಯಾಣ ಸಂಸ್ಥೆಗಳನ್ನು ಒಟ್ಟುಗೂಡಿಸಿ, ಬೀದಿ ನಾಯಿಗಳು, ಬೆಕ್ಕುಗಳು ಮತ್ತು ಇತರೆ ಪ್ರಾಣಿಗಳಿಗೆ ಉಚಿತ ಅಂಬುಲೆನ್ಸ್, ವೈದ್ಯಕೀಯ ಚಿಕಿತ್ಸೆ ಹಾಗೂ ಪುನರ್ವಸತಿ ಸೌಲಭ್ಯಗಳನ್ನು ಒದಗಿಸಲು ನೆರವು ನೀಡುತ್ತಿದ್ದಾರೆ

ಕೇರಳದ ಈ ಕೆಫೆಯಲ್ಲಿ ಗಾಂಧಿ ಪಕ್ಕ ಜಿನ್ನಾ ಪ್ರತಿಮೆ, ಗೋಮಾಂಸವೂ ಸರ್ವ್‌? ಯೂಟ್ಯೂಬರ್‌ಗೆ ಆರೋಪಕ್ಕೆ ಭಾರೀ ಆಕ್ರೋಶ!

Ravi Janekal — Sun, 25 Oct 2026 11:58:33 +0530

ಕೇರಳದ ಕೊಚ್ಚಿಯಲ್ಲಿರುವ, ಪೋರ್ಟ್ ಕೊಚ್ಚಿ ಎಂದೇ ಪ್ರಸಿದ್ಧವಾಗಿರುವ ಈ ಪ್ರದೇಶ ಅತ್ಯುತ್ತಮ ಕೆಫೆಗಳಿಗೆ ಹೆಸರುವಾಸಿ. ಪ್ರವಾಸಿಗರು ಹೆಚ್ಚು ಭೇಟಿ ನೀಡುವುದು ಇಲ್ಲಿನ ಕೆಫೆಗಳಿಗೆ ಆದರೆ ಇದೀಗ ಅಲ್ಲಿ ನಡೆದಿರುವ ಒಂದು ಆಘಾತಕಾರಿ ಕೃತ್ಯದಿಂದಾಗಿ ದೇಶಾದ್ಯಂತ ಚರ್ಚೆಗೆ ಗ್ರಾಸವಾಗಿದೆ. ಪ್ರಕರಣ ಸಂಬಂಧ ಎಫ್‌ಐಆರ್ ದಾಖಲಾಗಿದೆ. ಈ ಘಟನೆಗೆ ಕೇರಳ ಸಿಎಂ ತೀವ್ರವಾಗಿ ಖಂಡಿಸಿದ್ದಾರೆ. ಪೋರ್ಟ್ ಕೊಚ್ಚಿ ಕೆಫೆಯಲ್ಲಿ ನಡೆದಿದ್ದೇನು? ಅಷ್ಟಕ್ಕೂ ಯುಟ್ಯೂಬರ್ ಮಾಡಿರುವ ಗಂಭೀರ ಆರೋಪವೇನು?

ಯುಟ್ಯೂಬರ್ ಮಾಡಿರುವ ವಿಡಿಯೋದಲ್ಲಿ ಏನಿದೆ?

ಕೇರಳದೆ ಈ ಕೆಫೆ ಭೇಟಿ ನೀಡಿದ್ದ ಯುಟ್ಯೂಬರ್ ಅಮೃತ್ ಸಿಂಗ್ ಡ್ಯಾರೆನ್ ಎಂಬಾತ ಇನ್‌ಸ್ಟಾಗ್ರಾಮ್‌ನಲ್ಲಿ ಒಂದು ವಿಡಿಯೋ ಹಂಚಿಕೊಂಡಿದ್ದಾನೆ. ಕೇರಳದ ಪೋರ್ಟ್ ಕೊಚ್ಚಿ ಕೆಫೆಯಲ್ಲಿ ಮಹಾತ್ಮ ಗಾಂಧೀಜಿಯ ಪ್ರತಿಮೆ ಜೊತೆಗೆ ಪಾಕಿಸ್ತಾನದ ಸಂಸ್ಥಾಪಕ ಮೊಹಮ್ಮದ್ ಅಲಿ ಜಿನ್ನಾ ಪ್ರತಿಮೆಯನ್ನ ಇರಿಸಲಾಗಿದೆ. ಮಹಾತ್ಮನ ಪ್ರತಿಮೆ ಇಂಥ ಕೆಫೆಯಲ್ಲಿ ಗೋಮಾಂಸ ನೀಡಲಾಗುತ್ತಿದೆ ಎಂದು ತಿಳಿಸಿರುವ ವಿಡಿಯೋ ಹಂಚಿಕೊಂಡಿದ್ದಾರೆ. ಈ ವಿಡಿಯೋ ದೇಶಾದ್ಯಂತ ವೈರಲ್ ಆಗಿದ್ದು ಕೋಮು ಗಲಭೆಗೆ ಪ್ರಚೋದನೆ ನೀಡಿದಂತಾಗಿದೆ. ಈ ವಿಡಿಯೋ ನೋಡಿದ ಬಳಿಕ ಹಿಂದೂ-ಮುಸ್ಲಿಂ ಆರೋಪ ಪ್ರತ್ಯಾರೋಪಗಳು ಮತ್ತೆ ಜೋರಾಗಿವೆ.

ಕೋಮು ಪ್ರಚೋದನಕಾರಿ ಹೇಳಿಕೆ ಯುಟ್ಯೂಬರ್ ವಿರುದ್ಧ ಎಫ್‌ಐಆರ್

ಯುಟ್ಯೂಬರ್ ಹಂಚಿಕೊಂಡಿರುವ ವಿಡಿಯೋದಿಂದಾಗ ಸಾಮಾಜಿಕ ಜಾಲತಾಣದಲ್ಲಿ ಕೆಫೆ ವಿರುದ್ಧ ಭಾರೀ ಆಕ್ರೋಶ ವ್ಯಕ್ತವಾಗಿದೆ. ಅಕ್ಟೋಬರ್ 22ರಂದು ಬೆಳಿಗ್ಗೆ ಸುಮಾರು 6 ಗಂಟೆಗೆ ಈ ವಿಡಿಯೋವನ್ನು ಪೋಸ್ಟ್ ಮಾಡಲಾಗಿದ್ದು. ಈ ವಿಡಿಯೋ ಕಾಡ್ಗಿಚ್ಚಿನಂತೆ ದೇಶಾದ್ಯಂತ ಹಬ್ಬಿ ಇದೀಗ ವಿವಾದ ಸೃಷ್ಟಿಸಿದೆ ಅಲ್ಲ, ಹಿಂದೂ ಮುಸ್ಲಿಂ ನಡುವಿನ ಸೌಹಾರ್ದತೆಗೆ ಕೊಳ್ಳಿ ಇಟ್ಟಂತಾಗಿದೆ. ಈ ಘಟನೆಯನ್ನು ಕೇರಳ ಮುಖ್ಯಮಂತ್ರಿ ವಿ.ಡಿ. ಸತೀಶನ್ ಮತ್ತು ಸಿಪಿಐ(ಎಂ) ಹಿರಿಯ ನಾಯಕ ಪಿಣರಾಯಿ ವಿಜಯನ್ ಅವರು ಕೂಡ ತೀವ್ರವಾಗಿ ಖಂಡಿಸಿದ್ದಾರೆ. ಫೋರ್ಟ್ ಕೊಚ್ಚಿ ಪೊಲೀಸರು ಭಾರತೀಯ ನ್ಯಾಯ ಸಂಹಿತೆ (ಬಿಎನ್‌ಎಸ್) ಸೆಕ್ಷನ್ 353(2) ಮತ್ತು 192ರ ಅಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಕಾಶಿ ಆರ್ಟ್‌ ಕೆಫೆಯಲ್ಲಿ ಜಿನ್ನಾ ಪ್ರತಿಮೆ ಇದೆಯೇ?

ಯುಟ್ಯೂಬರ್ ಆರೋಪಿಸಿದಂತೆ ಕಾಶಿ ಆರ್ಟ್ ಕೆಫೆಯಲ್ಲಿ ಮಹಾತ್ಮ ಗಾಂಧೀಜಿ ಜೊತೆಗೆ ಪಕ್ಕದಲ್ಲಿ ಬೆಳ್ಳಿಯಿಂದ ತಯಾರಿಸಲಾದ ಮೊಹಮ್ಮದ್ ಅಲಿ ಜಿನ್ನಾ ಪ್ರತಿಮೆ ಇಡಲಾಗಿದೆಯೇ? ಈ ಕೆಫೆಯಲ್ಲಿ ನಿಜಕ್ಕೂ ಗೋಮಾಂಸ ನೀಡಲಾಗುತ್ತದೆಯೇ? ಈ ಆರೋಪಗಳಿಗೆ ಸೋಷಿಯಲ್ ಮೀಡಿಯಾದಲ್ಲಿ ಮಿಶ್ರ ಪ್ರತಿಕ್ರಿಯೆ ಬಂದಿವೆ. ಕೆಲವರು ಯುಟ್ಯೂಬರ್ ಹೇಳುವುದು ನಿಜ ಎಂದರೆ, ಇನ್ನು ಕೆಲವರು ವಿರೋಧಿಸಿದ್ದಾರೆ.

ಆದರೆ ಎಫ್‌ಐಆರ್ ವರದಿ ಪ್ರಕಾರ ಆರೋಪಿ ತನ್ನ ಕೃತ್ಯದಿಂದ ಸಾರ್ವಜನಿಕ ಶಾಂತಿಗೆ ಭಂಗ ತರಬಹುದು ಎಂದು ಗೊತ್ತಿದ್ದರೂ ಸೋಷಿಯಲ್ ಮೀಡಿಯಾದಲ್ಲಿ ವಿಡಿಯೋ ಹಂಚಿಕೊಂಡಿದ್ದಾರೆ. ಅಂದರೆ ಹಿಂದೂ ಮುಸ್ಲಿಂ ನಡುವೆ ಸಂಘರ್ಷ ತಂದಿಡಲೆಂದೇ, ಉದ್ದೇಶಪೂರ್ವಕವಾಗಿ ಶೇರ್ ಮಾಡಿಕೊಂಡಿರುವುದು ಮೇಲ್ನೋಟಕ್ಕೆ ಕಂಡುಬಂದಿದೆ. ಹಿಂದೂಗಳಿಗೆ ಧಾರ್ಮಿಕ ಮಹತ್ವ ಹೊಂದಿರುವ ಕಾಶಿ ಕೆಫೆ ಎಂದು ಹೆಸರಿಡಲಾಗಿದ್ದರು. ಈ ಕೆಫೆಯ ಸುತ್ತಮುತ್ತಲು ಮುಸ್ಲಿಂರ ಸಂಖ್ಯೆ ಹೆಚ್ಚಿರುವ ಕಾರಣ ಅಲ್ಲಿ ಗೋಮಾಂಸ ನೀಡಲಾಗುತ್ತಿದೆ ಎಂಬ ಅರ್ಥ ಬರುವಂತೆ ವಿಡಿಯೋದಲ್ಲಿ ಹೇಳಲಾಗಿದೆ ಎಂದು ಎಫ್‌ಐಆರ್‌ನಲ್ಲಿ ಉಲ್ಲೇಖಿಸಲಾಗಿದೆ. ಇದು ಕೋಮು ವೈಷಮ್ಯಕ್ಕೆ ಕಾರಣವಾಗುತ್ತದೆ ಎಂದು ಎಫ್‌ಐಆರ್‌ನಲ್ಲಿ ತಿಳಿಸಿದೆ.

ಯುಟ್ಯೂಬರ್ ವಿರುದ್ಧ ಕೇಸ್ ದಾಖಲು

ಸಮಾಜದಲ್ಲಿ ಗೊಂದಲ ಸೃಷ್ಟಿಸುವ ಉದ್ದೇಶ, ಹಿಂದೂ ಮುಸ್ಲಿಂ ಕೋಮು ಸಂಘರ್ಷಕ್ಕೆ ಪ್ರಚೋದಿಸುವ ಉದ್ದೇಶದಿಂದ ವಿಡಿಯೋ ಹಂಚಿಕೊಳ್ಳಲಾಗಿದೆ ಎಂಬ ಆರೋಪ ಹಿನ್ನೆಲೆ ಯುಟ್ಯೂಬರ್ ವಿರುದ್ಧ ಬಿಎನ್‌ಎಸ್ ಸೆಕ್ಷನ್ 353(2) ಸಾರ್ವಜನಿಕರಲ್ಲಿ ಗೊಂದಲ ಉದ್ವಿಗ್ನತೆ, ಪ್ರಚೋದನೆ ಮಾಡುವ ಕೃತ್ಯಕ್ಕೆ ಸಂಬಂಧಿಸಿದ ಸೆಕ್ಷನ್ 192 ರ ಅಡಿ ಕೇಸ್ ದಾಖಲಾಗಿದೆ.

ಯುಟ್ಯೂಬರ್ ವಿಡಿಯೋ ಖಂಡಿಸಿದ ಕೇರಳ ಸಿಎಂ

ಈ ವಿಡಿಯೋವನ್ನು ಕೇರಳ ಮುಖ್ಯಮಂತ್ರಿ ವಿ.ಡಿ. ಸತೀಶನ್ ತೀವ್ರವಾಗಿ ಖಂಡಿಸಿದ್ದಾರೆ. ಕೇರಳದ ಜನರು ಒಗ್ಗಟ್ಟಿನಿಂದ ಇದ್ದಾರೆ. ಇಲ್ಲಿ ಕೋಮು ದ್ವೇಷ ಹರಡುವ ಪ್ರಯತ್ನಗಳನ್ನು ಸಹಿಸುವುದಿಲ್ಲ ಎಂದು ಎಚ್ಚರಿಸಿದ್ದಾರೆ. ರಾಜ್ಯದ ಹೊರಗಿನ ವ್ಲಾಗರ್ ಒಬ್ಬರು ಫೋರ್ಟ್ ಕೊಚ್ಚಿ ಕುರಿತು ತಪ್ಪು ಮಾಹಿತಿಯನ್ನು ಹರಡಿ, ನಮ್ಮ ರಾಜ್ಯವನ್ನು ಕೆಟ್ಟದಾಗಿ ಬಿಂಬಿಸಿ, ಸಮುದಾಯಗಳ ನಡುವೆ ವಿಭಜನೆ ಮೂಡಿಸಲು ಪ್ರಯತ್ನಿಸಿರುವ ಇತ್ತೀಚಿನ ಇನ್‌ಸ್ಟಾಗ್ರಾಂ ವಿಡಿಯೋ ಸ್ವೀಕಾರಾರ್ಹವಲ್ಲ. ದೇವರ ಸ್ವಂತ ನಾಡಿನಲ್ಲಿ ಹೊಸ ಯುಗ ಆರಂಭವಾಗಿದೆ. ದ್ವೇಷಕ್ಕೆ ಇಲ್ಲಿ ಅವಕಾಶವಿಲ್ಲ. ನಮ್ಮ ಕೋಮು ಸೌಹಾರ್ದಕ್ಕೆ ಯಾರೂ ಧಕ್ಕೆ ತರಲು ನಾವು ಬಿಡುವುದಿಲ್ಲ ಎಂದು ಸತೀಶನ್ ಅವರು ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.

ಮಾಜಿ ಸಿಎಂ ಪಿಣರಾಯಿ ಕಿಡಿ

ಕೇರಳದಲ್ಲಿ ದ್ವೇಷ ಹರಡಲು ಯತ್ನಿಸಿದ್ದಾರೆ ಎಂದು ಪಿಣರಾಯಿ ವಿಜಯನ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿದ್ದ ವಿಜಯನ್, ಫೋರ್ಟ್ ಕೊಚ್ಚಿ ಮತ್ತು ವರ್ಕಲಾ ಪ್ರದೇಶಗಳು ವಿವಿಧ ಸಂಸ್ಕೃತಿಗಳು ಒಂದಾಗುವ, ಇತಿಹಾಸಗಳು ಬೆಸೆದುಕೊಳ್ಳುವ ಮತ್ತು ವೈವಿಧ್ಯತೆ ಬೆಳೆಯುವ ಸ್ಥಳಗಳಾಗಿವೆ ಎಂದು ಹೇಳಿದ್ದಾರೆ. ಅಲ್ಲದೆ ಸುಳ್ಳು ಸುದ್ದಿ ಶೇರ್ ಮಾಡಿಕೊಂಡಿರುವ ಯುಟ್ಯೂಬರ್ ವಿರುದ್ಧ ಕಠಿಣ ಕ್ರಮಕ್ಕೆ ಆಗ್ರಹಿಸಿದ್ದಾರೆ

ಯುಟ್ಯೂಬ್ ವೀಕ್ಷಣೆ, ಸಬ್‌ಸ್ಕ್ರೈಬ್ ಪಡೆಯಲು ಈ ರೀತಿ ದ್ವೇಷ ಹರಡುವ ವ್ಲಾಗರ್‌ ಒಬ್ಬರು ಪೋರ್ಟ್ ಕೊಚ್ಚಿ ಕೆಫೆ ಬಗ್ಗೆ ಕೋಮು ವಿಭಜನೆ ದೃಷ್ಟಿಯಿಂದ ವ್ಲಾಗರ್ ಯತ್ನಿಸುತ್ತಿದ್ದಾರೆ ಎಂಬುದು ಮೇಲ್ನೋಟಕ್ಕೆ ಕಂಡುಬರುತ್ತಿದೆ. ಸೂಕ್ತ ಹಾಗೂ ಕಠಿಣ ಕ್ರಮಕ್ಕೆ ಪಿಣರಾಯಿ ವಿಜಯನ್ ಆಗ್ರಹಿಸಿದ್ದಾರೆ.

ಪ್ರತಿಭಟನಕಾರರಿಂದ NHPC ಕಚೇರಿ, ಪೊಲೀಸ್ ಠಾಣೆಗೆ ಬೆಂಕಿ, ಬಿಜೆಪಿ ರಾಜ್ಯಾಧ್ಯಕ್ಷನ ಮನೆ ಪುಡಿ ಪುಡಿ

Chethan Kumar — Sun, 25 Oct 2026 11:35:18 +0530

ಇಟಾನಗರ (ಅ.25) ಪ್ರತಿಭಟನೆ ಆರಂಭಗೊಳ್ಳುತ್ತಿದ್ದಂತೆ ಹಿಂಸೆಗೆ ತಿರುಗಿದೆ. ಪರಿಣಾಮ ರಾಷ್ಟ್ರೀಯ ಹೈಡ್ರೋಎಲೆಕ್ಟ್ರಿಕ್ ಪವರ್ ಕಾರ್ಪೋರೇಶನ್(NHPC) ಕಚೇರಿ, ಪೊಲೀಸ್ ಠಾಣೆಗೆ ಪ್ರತಿಭಟನಾಕಾರರು ಬೆಂಕಿ ಹಚ್ಚಿದ್ದಾರೆ. ಇದೇ ವೇಳೆ ಬಿಜೆಪಿ ರಾಜ್ಯಾಧ್ಯಕ್ಷನ ಮನೆಯನ್ನು ಪುಡಿ ಮಾಡಿದ್ದಾರೆ. ಇತ್ತ ಬಿಜೆಪಿ ಮಾಜಿ ಶಾಸಕನ ಮನೆಯನ್ನು ದೋಚಲಾಗಿದೆ. ದಂಗೆಯ ಸ್ವರೂಪ ಪಡೆದುಕೊಂಡ ಪ್ರತಿಭಟನೆಯಿಂದ ಹಲವರು ಪೊಲೀಸರು ಗಂಭೀರವಾಗಿ ಗಾಯಗೊಂಡ ಘಟನೆ ಅರುಣಾಚಲ ಪ್ರದೇಶದಲ್ಲಿ ನಡೆದಿದೆ. ಅರುಣಾಚಲ ಪ್ರದೇಶ ಪವರ್ ಪ್ರಾಜೆಕ್ಟ್ ವಿರುದ್ಧ ಆರಂಭಗೊಂಡ ಪ್ರತಿಭಟನೆ ಇದೀಗ ಹಿಂಸೆಗೆ ತಿರುಗಿದ್ದು, ಕೋಲಾಹಲ ಸೃಷ್ಟಿಯಾಗಿದೆ.

ಉದ್ರಿಕ್ತರ ಗುಂಪಿನಿಂದ ಕೃತ್ಯ

11,200 MW ಸಿಯಾಂಗ್ ಅಪ್ಪರ್ ಮಲ್ಟಿಪರ್ಪಸ್ ಪವರ್ ಪ್ರಾಜೆಕ್ಟ್ ಯೋಜನೆಗೆ ಪೂರ್ವ ಸಿಯಾಂಗ್ ಜಿಲ್ಲೆಯಲ್ಲಿ ಭಾರಿ ವಿರೋಧ ವ್ಯಕ್ತವಾಗಿದೆ. ಪಸಿಘಾಟ್‌ನಲ್ಲಿ ಆರಂಭಗೊಂಡ ಪ್ರತಿಭಟನೆ ಇಡೀ ಸಿಯಾಂಗ್ ಜಿಲ್ಲೆಗೆ ಆವರಿಸಿದೆ. ಹೈಡ್ರೋ ಪವರ್ ಪ್ರಾಜೆಕ್ಟ್ ವಿರುದ್ಧ 12 ಗಂಟೆ ಬಂದ್ ಆಚರಿಸಿ ಪ್ರತಿಭಟನೆ ಹಮ್ಮಿಕೊಂಡಿತ್ತು. ಶುಕ್ರವಾರ ಈ ಪ್ರತಿಭಟನೆಗೆ ಪೊಲೀಸರು ಸಕಲ ತಯಾರಿ ನಡೆಸಿದ್ದರು, ಪ್ರತಿಭಟನೆ ವೇಳೆ ನೂಕಾಟ, ತಳ್ಳಾಟಗಳು ನಡೆದಿತ್ತು. ಪ್ರತಿಭಟನೆ ಬಳಿಕ ಪೊಲೀಸ್ ನಿಯೋಜನೆ ಸಡಿಲಗೊಂಡಿತ್ತು. ಇದೇ ವೇಳೆ ಉದ್ರಿಕ್ತರ ಗುಂಪು ಏಕಾಏಕಿ ರಸ್ತೆಗಳಲ್ಲಿ ನುಗ್ಗಿದೆ. ಪವರ್ ಪ್ರಾಜೆಕ್ಟ್ ಕಚೇರಿಗಳು, ಪೊಲೀಸ್ ಠಾಣೆಗೆ ನುಗ್ಗಿ ದಾಂಧಲೆ ನಡೆಸಿದೆ ಎಂದು ಪಸಿಘಾಟ್ ಸುಪರಿಡೆಂಟ್ ಆಫ್ ಪೊಲೀಸಿ ಟೋನಿ ತಾಟಕ್ ಹೇಳಿದ್ದಾರೆ.

ಬಿಜೆಪಿ ರಾಜ್ಯಾಧ್ಯಕ್ಷನ ಮನೆ ಧ್ವಂಸ

ಪ್ರತಿಭಟನೆ ಬಳಿಕ ಉದ್ರಿಕ್ತರ ಗುಂಪು ನೇರವಾಗಿ ಅರುಣಾಚಲ ಬಿಜೆಪಿ ರಾಜಾಧ್ಯಕ್ಷ ಹಾಗೂ ಮಾಜಿ ಶಾಸಕ ಕಲಿಂಗ್ ಮಯೋಂಗ್ ಅವರ ಮನೆಯತ್ತ ನುಗ್ಗಿದೆ. ಪಸಿಘಾಟ್‌ನಲ್ಲಿರುವ ಮಯೋಂಗ್ ಮನೆಗೆ ನುಗ್ಗಿದ್ದ ಉದ್ರಿಕ್ತರ ಗುಂಪು ಮನೆಯನ್ನು ಪುಡಿ ಮಾಡಿದೆ. ಆರಂಭದಲ್ಲಿ ಕಲ್ಲು ತೂರಾಟ ನಡೆಸಿದರೆ ಬಲಿಕ ನೇರವಾಗಿ ಮನೆಗೆ ನುಗ್ಗಿ ಪಿಠೋಪಕರಣ ಸೇರಿದಂತಂ ವಸ್ತುಗಳನ್ನು ಪುಡಿ ಮಾಡಿ ಹೊರಗೆಸೆದಿದ್ದಾರೆ. ಕೌಂಪೌಂಡ್ ಧ್ವಂಸಗೊಳಿಸಲಾಗಿದೆ. ಬಾಗಿಲು ಮುರಿಯಲಾಗಿದೆ.

ಪವರ್ ಕಾರ್ಪೋರೇಶನ್ ಕಚೇರಿಗೆ ಬೆಂಕಿ

ಪಸಿಘಾಟ್‌ನಲ್ಲಿರುವ NHPC ಕಚೇರಿಯತ್ತ ನುಗ್ಗಿದ ಉದ್ರಿಕ್ತರು ಕಚೇರಿಗೆ ಬೆಂಕಿ ಹಚ್ಚಿದ್ದಾರೆ. ದಾಖಲೆಗಳು, ಕಂಪ್ಯೂಟರ್ ಸೇರಿದಂತೆ ಇಡೀ ಕಚೇರಿ ಹೊತ್ತಿ ಉರಿದಿದೆ. ಪೆಟ್ರೋಲ್ ಸೇರಿದಂತೆ ಎಲ್ಲಾ ತಯಾರಿಯೊಂದಿಗೆ ಉದ್ರಿಕ್ತರು ಆಗಮಿಸಿದ್ದರು. ಕೆಲವೇ ಕ್ಷಣದಲ್ಲಿ NHPC ಕಚೇರಿ ಹೊತ್ತಿ ಉರಿದಿದೆ. ಅಗ್ನಿಶಾಮಕ ದಳ ಸ್ಥಳಕ್ಕೆ ಆಗಮಿಸುವ ವೇಳೆ ಕಚೇರಿ ಸಂಪೂರ್ಣ ಹೊತ್ತಿ ಉರಿದಿತ್ತು.

ಪೊಲೀಸ್ ಠಾಣೆಗೆ ಬೆಂಕಿ

ಇದೇ ವೇಳೆ ಉದ್ರಿಕ್ತರ ಗುಂಪು ನೇರವಾಗಿ ಪೊಲೀಸ್ ಠಾಣೆಗೆ ನುಗ್ಗಿದೆ. 1500ಕ್ಕೂ ಹೆಚ್ಚು ಉದ್ರಿಕ್ತರು ಕೈಯಲ್ಲಿ ಆಯುಧ, ಪೆಟ್ರೋಲ್ ಹಿಡಿದುಕೊಂಡೆ ಪೊಲೀಸ್ ಠಾಣೆಗೆ ನುಗ್ಗಿದ್ದರು. ಪೊಲೀಸ್ ವಾಹನ, ಪೊಲೀಸ್ ಠಾಣೆಗೆ ಬೇಕಿ ಹಚ್ಚಿದ್ದಾರೆ. ಪ್ರತಿಭಟನಕಾರರನ್ನು ಹತ್ತಿಕ್ಕಲು ಆಗಮಿಸಿದ ಪೊಲೀಸರ ಮೇಲೆ ಕಲ್ಲು ತೂರಾಟ ನಡೆಸಲಾಗಿದೆ. ಹಲವು ಪೊಲೀಸರು ಗಂಭೀರವಾಗಿ ಗಾಯಗೊಂಡಿದ್ದಾರೆ.

ಉದ್ರಿಕ್ತ ಗುಂಪು ಹಲವು ಬೇಡಿಕೆ ಮುಂದಿಟ್ಟಿದೆ. ಬಂಧಿತ 10 ಹೋರಾಟಗಾರರನ್ನು ಬಿಡುಗಡೆ ಮಾಡುವಂತೆ ಮೊದಲ ಬೇಡಿಕೆ ಮುಂದಿಟ್ಟಿದೆ. ಪ್ರಸ್ತಾವಿತ ಪವರ್ ಪ್ರಾಜೆಕ್ಟ್ ಯೋಜನೆ ಕೈಬಿಡುವಂತೆ ಸೂಚಿಸಿದೆ. ಪ್ಯಾರಾಮಿಲಿಟರಿ ತುಕಡಿಯನ್ನು ಹಿಂಪಡೆಯುವಂತೆ ಉದ್ರಿಕ್ತರು ಹಾಗೂ ಪ್ರತಿಭಟನಾಕಾರರು ಬೇಡಿಕೆ ಮುಂದಿಟ್ಟಿದ್ದಾರೆ.

Lion of Naushera story: ಧರ್ಮದ ಕಾರ್ಡ್ ಪ್ಲೇ ಮಾಡಿದ ಜಿನ್ನಾಗೆ ಬ್ರಿಗೇಡಿಯರ್ ಉಸ್ಮಾನ್ ಕೊಟ್ಟ ಖಡಕ್ ಮಾತು ಈಗ ವೈರಲ್‌

Bhimasi M Koleppanavar — Sun, 25 Oct 2026 11:16:32 +0530

1947 ರ ದೇಶ ವಿಭಜನೆಯ ಸುಡುವ ಸನ್ನಿವೇಶದಲ್ಲಿ ಧರ್ಮದ ಆಧಾರದ ಮೇಲೆ ಭಾರತ-ಪಾಕಿಸ್ತಾನ ಪ್ರತ್ಯೇಕಗೊಂಡಾಗ, ಮುಸ್ಲಿಂ ಲೀಗ್ ಹಾಗೂ ಪಾಕಿಸ್ತಾನ ಸರ್ಕಾರ ಆಡಿದ ಕೋಮು ಕಾರ್ಡ್‌ಗೆ ಭಾರತದ ಹೆಮ್ಮೆಯ ಸೇನಾಧಿಕಾರಿ ಬ್ರಿಗೇಡಿಯರ್ ಮೊಹಮ್ಮದ್ ಉಸ್ಮಾನ್ ನೀಡಿದ ಖಡಕ್ ಉತ್ತರ ಇಂದಿಗೂ ಇತಿಹಾಸದ ಪುಟಗಳಲ್ಲಿ ಸ್ವರ್ಣಾಕ್ಷರಗಳಲ್ಲಿ ಉಳಿದಿದೆ.

ಪಾಕ್ ಸೇನಾ ಮುಖ್ಯಸ್ಥ ಹುದ್ದೆಯ ಆಮಿಷ ತಿರಸ್ಕಾರ!

ವಿಭಜನೆಯ ಸಮಯದಲ್ಲಿ ಪಾಕಿಸ್ತಾನ ಸರ್ಕಾರವು ಬ್ರಿಗೇಡಿಯರ್ ಉಸ್ಮಾನ್ ಅವರಿಗೆ ತಮ್ಮ ದೇಶದ ಸೇನಾ ಮುಖ್ಯಸ್ಥ (ಆರ್ಮಿ ಚೀಫ್) ಹುದ್ದೆ ವಹಿಸಿಕೊಳ್ಳುವಂತೆ ಬೃಹತ್ ಆಫರ್ ನೀಡಿತ್ತು. ಧರ್ಮದ ಹೆಸರಿನಲ್ಲಿ ನೀಡಲಾದ ಈ ಮಹೋನ್ನತ ಅಧಿಕಾರದ ಆಸೆ ಕಸದಂತೆ ತಳ್ಳಿಹಾಕಿದ ಉಸ್ಮಾನ್, "ನಾನು ಭಾರತೀಯನಾಗಿ ಹುಟ್ಟಿದ್ದೇನೆ, ಭಾರತೀಯನಾಗಿಯೇ ಸಾಯುತ್ತೇನೆ" ಎಂಬ ಐತಿಹಾಸಿಕ ಮಾತಿನ ಮೂಲಕ ಜಿನ್ನಾ ಪಡೆಗೆ ತಕ್ಕ ಚಾಟಿ ಬೀಸಿದ್ದರು.

ನೌಶೇರಾ ಕದನ ಮತ್ತು 'ಲಯನ್ ಆಫ್ ನೌಶೇರಾ' ಅಭಿದಾನ!

ವಿಭಜನೆಯ ಬೆನ್ನಲ್ಲೇ ಪಾಕಿಸ್ತಾನ ಬೆಂಬಲಿತ ಆಕ್ರಮಣಕಾರರು ಕಾಶ್ಮೀರದ ಮೇಲೆ ದಾಳಿ ನಡೆಸಿದಾಗ, ಬ್ರಿಗೇಡಿಯರ್ ಉಸ್ಮಾನ್ ಅವರು ಭಾರತೀಯ ಸೇನಾ ಪಡೆಗಳ ಮುಂಚೂಣಿ ನಾಯಕತ್ವ ವಹಿಸಿಕೊಂಡರು. ಶತ್ರುಗಳ ಸಂಖ್ಯೆ ಭಾರತೀಯ ಸೈನಿಕರಿಗಿಂತ ಎಷ್ಟೋ ಪಟ್ಟು ಹೆಚ್ಚಿದ್ದರೂ, ಯುದ್ಧಭೂಮಿಯಲ್ಲಿ ಅಪ್ರತಿಮ ಧೈರ್ಯ ಮತ್ತು ತಂತ್ರಗಾರಿಕೆ ಪ್ರದರ್ಶಿಸಿದ ಅವರು ನೌಶೇರಾ ವಲಯವನ್ನು ಯಶಸ್ವಿಯಾಗಿ ರಕ್ಷಿಸಿದರು. ಶತ್ರುಪಡೆಗಳನ್ನು ಬೆಚ್ಚಿಬೀಳಿಸಿದ ಅವರ ನಾಯಕತ್ವಕ್ಕೆ ‘ದಿ ಲಯನ್ ಆಫ್ ನೌಶೇರಾ’ (ನೌಶೇರಾದ ಸಿಂಹ) ಎಂಬ ಹೆಮ್ಮೆಯ ಬಿರುದು ಒಲಿದುಬಂತು.

35ನೇ ವಯಸ್ಸಿನಲ್ಲಿ ಮಾತೃಭೂಮಿಗಾಗಿ ವೀರಮರಣ!

ಜುಲೈ 1948 ರಲ್ಲಿ ನೌಶೇರಾ ವಲಯವನ್ನು ಶತ್ರುಗಳ ಆಕ್ರಮಣದಿಂದ ರಕ್ಷಿಸುವ ಕಾರ್ಯಾಚರಣೆಯಲ್ಲಿದ್ದಾಗ, ನಡೆದ ಭೀಕರ ಫಿರಂಗಿ ದಾಳಿಯಲ್ಲಿ ಬ್ರಿಗೇಡಿಯರ್ ಉಸ್ಮಾನ್ ತಮ್ಮ 35ನೇ ವಯಸ್ಸಿನಲ್ಲಿಯೇ ಪ್ರಾಣಾರ್ಪಣೆ ಮಾಡಿ ವೀರಮರಣ ಅಪ್ಪಿದರು. ಕಣ್ಣಮುಂದಿದ್ದ ಉನ್ನತ ಹುದ್ದೆ, ಅಧಿಕಾರ ಹಾಗೂ ಧರ್ಮದ ಆಮಿಷಗಳನ್ನು ಬದಿಗೊತ್ತಿ ತಾಯ್ನಾಡಿನ ರಕ್ಷಣೆಗಾಗಿ ಪ್ರಾಣ ಮುಡುಪಾಗಿಟ್ಟ ಬ್ರಿಗೇಡಿಯರ್ ಉಸ್ಮಾನ್ ಅವರ ಈ ನಿಸ್ವಾರ್ಥ ಬಲಿದಾನವು ಭಾರತೀಯ ಸೇನಾ ಇತಿಹಾಸದಲ್ಲಿ ದೇಶಭಕ್ತಿ ಮತ್ತು ಶೌರ್ಯದ ಅತ್ಯುನ್ನತ ಸಂಕೇತವಾಗಿ ಶಾಶ್ವತವಾಗಿ ನೆಲೆನಿಂತಿದೆ.

ವೈರಲ್‌ ಆದ ಖಡಕ್‌ ಮಾತು!

ನಾನು ಭಾರತೀಯನಾಗಿ ಹುಟ್ಟಿದ್ದೇನೆ, ಭಾರತೀಯನಾಗಿಯೇ ಸಾಯುತ್ತೇನೆ) ಎಂಬ ಸಾಲೇ ಈ ಇಡೀ ಕಥೆಯ ಅತ್ಯಂತ ಭಾವನಾತ್ಮಕ ಹಾಗೂ ಶಕ್ತಿಶಾಲಿ ಭಾಗವಾಗಿದೆ. ಈ ಮಾತು ಜನರ ಮನಸ್ಸಿನಲ್ಲಿ ಶಾಶ್ವತವಾಗಿ ಉಳಿಯಲು ಮತ್ತು ವೈರಲ್ ಆಗಲು ಪ್ರಮುಖ ಕಾರಣಗಳನ್ನು ಸಹ ನೋಡಬಹುದು. ಉನ್ನತ ಹುದ್ದೆಯ ಆಮಿಷವನ್ನು ಮೆಟ್ಟಿನಿಂತದ್ದು: ಪಾಕಿಸ್ತಾನದ ಸೇನಾ ಮುಖ್ಯಸ್ಥ (Army Chief) ಆಗುವ ಬೃಹತ್ ಅವಕಾಶ ಕಣ್ಣಮುಂದಿದ್ದರೂ, ಅಧಿಕಾರದ ಆಸೆಗೆ ಬಲಿಬೀಳದೆ ತಾಯ್ನಾಡಿನ ಪರವಾಗಿ ನಿಂತ ಅವರ ನಿಸ್ವಾರ್ಥ ದೇಶಭಕ್ತಿಗೆ ಈ ಸಾಲು ಸಾಕ್ಷಿಯಾಗಿದೆ.ದೇಶ ವಿಭಜನೆಯ ಸಂದರ್ಭದಲ್ಲಿ ಧರ್ಮದ ಹೆಸರಿನಲ್ಲಿ ಬಂದ ಆಫರ್‌ಗೆ ಅವರು ನೀಡಿದ ಈ ಉತ್ತರ, "ದೇಶಭಕ್ತಿಗೆ ಧರ್ಮಕ್ಕಿಂತ ದೇಶವೇ ಮೊದಲು" ಎಂಬುದನ್ನು ಗಟ್ಟಿಯಾಗಿ ಸಾರಿತು.

Adulterated Ghee: ತಿರುಪತಿ ಬಳಿಕ ಶಬರಿಮಲೇಲೂ ಕಳಪೆ ತುಪ್ಪ ಪೂರೈಕೆ ಗೋಲ್ಮಾಲ್, ಗುತ್ತಿಗೆದಾರ ಅರೆಸ್ಟ್

Kannadaprabha News — Sun, 25 Oct 2026 09:36:31 +0530

ತಿರುವನಂತಪುರಂ: ಶಬರಿಮಲೆ ದೇವಸ್ಥಾನಕ್ಕೆ ಅರವಣ ಪ್ರಸಾದ ತಯಾರಿಸಲು ಸಾಗಿಸಬೇಕಿದ್ದ 11 ಸಾವಿರ ಲೀಟರ್‌ ಮಿಲ್ಮಾ ತುಪ್ಪದ ಬದಲು ಕಡಿಮೆ ಗುಣಮಟ್ಟದ ತುಪ್ಪ ಪೂರೈಸುವ ಮೂಲಕ ತಿರುವಾಂಕೂರು ದೇವಸ್ವಂ ಮಂಡಳಿ (ಟಿಡಿಬಿ)ಗೆ 2.5 ಕೋಟಿ ರು. ನಷ್ಟ ಉಂಟು ಮಾಡಿದ ಆರೋಪಕ್ಕೆ ಸಂಬಂಧಿಸಿ ಲಾರಿ ಕಾಂಟ್ರ್ಯಾಕ್ಟರ್‌ ಒಬ್ಬರನ್ನು ಬಂಧಿಸಲಾಗಿದೆ.

11,000 ಲೀ. ಮಿಲ್ಮಾ ತುಪ್ಪ ಬದಲು ಕಡಿಮೆ ಗುಣಮಟ್ಟದ ತುಪ್ಪ ಪೂರೈಕೆ

ಬಂಧಿತನನ್ನು ಎಸ್‌.ಎಸ್‌.ಬಿನು ಎಂದು ಗುರುತಿಸಲಾಗಿದ್ದು, ಈತ 2025ರಿಂದ ಶಬರಿಮಲೆ ದೇಗುಲಕ್ಕೆ ಮಿಲ್ಮಾ ಡೈರಿಯಿಂದ ತುಪ್ಪ ಸಾಗಿಸುವ ಕಾಂಟ್ರ್ಯಾಕ್ಟ್‌ ಪಡೆದಿದ್ದ. ತುಪ್ಪ ಪೂರೈಕೆಯಲ್ಲಿ ಭಾರೀ ಅಕ್ರಮದ ಆರೋಪ ಕೇಳಿಬಂದ ಹಿನ್ನೆಲೆಯಲ್ಲಿ ಕೇರಳ ಹೈಕೋರ್ಟ್‌ ಉಸ್ತುವಾರಿಯಲ್ಲಿ ತನಿಖೆ ನಡೆಸುತ್ತಿರುವ ವಿಚಕ್ಷಣ ಹಾಗೂ ಭ್ರಷ್ಟಾಚಾರ ನಿಗ್ರಹ ದಳದ ಅಧಿಕಾರಿಗಳು ಶುಕ್ರವಾರ ಬಿನುನನ್ನು ಬಂಧಿಸಿದ್ದಾರೆ.

ಸಾರಿಗೆ ಕಾಂಟ್ರ್ಯಾಕ್ಟರ್‌ ಬಂಧಿಸಿದ ವಿಚಕ್ಷಣ ದಳ

ಕರ್ನಾಟಕದ ಕೆಎಂಎಫ್‌ನ ನಂದಿನಿ ಬ್ರ್ಯಾಂಡ್‌ನಂತೆ ಕೇರಳದ ಸಹಕಾರಿ ಹಾಲು ಒಕ್ಕೂಟವು ಮಿಲ್ಮಾ ಬ್ರ್ಯಾಂಡ್‌ನಡಿ ಹಾಲು ಮತ್ತು ಹಾಲಿನ ಉತ್ಪನ್ನಗಳನ್ನು ಮಾರಾಟ ಮಾಡುತ್ತದೆ. ಶಬರಿಮಲೆಯ ಅರವಣ (ಸಿಹಿ) ಪ್ರಸಾದಕ್ಕಾಗಿ ಟಿಡಿಬಿಯು ಪಟ್ಟಣಂತಿಟ್ಟ ಮಿಲ್ಮಾ ಡೈರಿ ಜತೆ ನೇರ ಒಪ್ಪಂದ ಮಾಡಿಕೊಂಡಿತ್ತು.

ತುಪ್ಪ ಸಾಗಣೆ ವೇಳೆ ಅಕ್ರಮ, 2.5 ಕೋಟಿ ನಷ್ಟ ಉಂಟುಮಾಡಿದ ಆರೋಪ

ಡೈರಿಯಿಂದ ತುಪ್ಪವನ್ನು ಸಾಗಿಸುವ ಗುತ್ತಿಗೆಯನ್ನು ಆರೋಪಿ ಬಿನುಗೆ ನೀಡಲಾಗಿತ್ತು. ಆದರೆ ಆರೋಪಿ ಬಿನು ಮಿಲ್ಮಾ ಡೈರಿಯಿಂದ ಲಾರಿಗೆ ತುಂಬುತ್ತಿದ್ದ ನೈಜ ತುಪ್ಪ ಬೇರೆಡೆ ವರ್ಗಾಯಿಸಿ, ಶಬರಿಮಲೆಗೆ ಕಡಿಮೆ ಗುಣಮಟ್ಟದ ತುಪ್ಪ ಪೂರೈಸಿದ್ದ. ತಮಿಳುನಾಡಿನ ಶ್ರೀ ವೆಂಕಟೇಶ್ವರ ಟ್ರೇಡರ್ಸ್‌ ಮತ್ತು ಲಿಯೋ ಟ್ರೇಡರ್ಸ್‌ಗೆ ನೈಜ ಮಿಲ್ಮಾ ತುಪ್ಪವನ್ನು ನಕಲಿ ದಾಖಲೆಗಳನ್ನು ಬಳಸಿ ಸಾಗಿಸಲಾಗಿದೆ ಎಂಬ ಆರೋಪವಿದೆ.

100 ಕೋಟಿ ರೂ. ಆರೋಪ 500 ಕೋಟಿಯಾಗಿದ್ದು ಹೇಗೆ? ಕಾನೂನು ಸಮರಕ್ಕೆ ಸಿದ್ಧವಾದ ಬಿಜೆಪಿ

Kannadaprabha News — Sun, 25 Oct 2026 09:23:49 +0530

ಮುಂಬೈ: ಮರಾಠಾ ಮೀಸಲು ಹೋರಾಟಗಾರ ಮನೋಜ್‌ ಜಾರಂಗೆ ಅವರನ್ನು ಸುಮ್ಮನಾಗಿಸಲು 500 ಕೋಟಿ ರು. ನೀಡಿದ ಆರೋಪಕ್ಕೆ ಸಂಬಂಧಿಸಿದ ವಿವಾದಾತ್ಮಕ ಆಡಿಯೋ ನಕಲಿ, ಇದರ ಹಿಂದೆ ಶಿವಸೇನೆ (ಉದ್ದವ್‌ ಬಣ) ಮುಖಂಡ ಸಂಜಯ್‌ ರಾವುತ್‌ ಇದ್ದಾರೆ ಎಂದು ಬಿಜೆಪಿ ಆರೋಪಿಸಿದೆ.

ಭಿನ್ನಮತ ಸೃಷ್ಟಿಸಲು ಪ್ರಯತ್ನ

ಸಂಜಯ್‌ ರಾವುತ್‌ ಅವರು ನಕಲಿ ಎಐ ಆಡಿಯೋ ಸೃಷ್ಟಿಸಿ ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಅವರ ಅಜೆಂಡಾ ಜಾರಿಗೊಳಿಸಲು ಹಾಗೂ ಆಡಳಿತಾರೂಢ ಮೈತ್ರಿಕೂಟ ನಡುವೆ ಭಿನ್ನಮತ ಸೃಷ್ಟಿಸಲು ಹೊರಟಿದ್ದಾರೆ ಎಂದು ಕಿಡಿಕಾರಿದೆ. ಜತೆಗೆ ಅಗತ್ಯಬಿದ್ದರೆ ರಾವುತ್‌ ವಿರುದ್ಧ ದೂರು ನೀಡಲಾಗುವುದು ಎಂದು ಹೇಳಿದೆ.

ರಾಹುಲ್‌ ಗಾಂಧಿಯಿಂದ ಹಣ ನೀಡಿದ್ದಾರೆಯೇ?

ರಾವುತ್‌ ಅವರು ಮಹಾರಾಷ್ಟ್ರ ರಾಜಕಾರಣದಲ್ಲಿ ಭಾರೀ ಸಂಚಲನಕ್ಕೆ ಕಾರಣವಾದ ಆಡಿಯೋ ಕ್ಲಿಪ್‌ ಅನ್ನು ಬಿಜೆಪಿ ಎಂಎಎಲ್ಸಿಯೊಬ್ಬರು ಲೀಕ್‌ ಮಾಡಿದ್ದಾರೆ ಎಂದು ಆರೋಪಿಸಿದ್ದರು. ಈ ಕುರಿತು ಪ್ರತಿಕ್ರಿಯಿಸಿರುವ ಬಿಜೆಪಿ ವಕ್ತಾರ ನವನಾಥ್‌ ಬನ್‌ ಅವರು, ಆ ಆಡಿಯೋ ಸಂಬಂಧ ಅಗತ್ಯಬಿದ್ದರೆ ಸಂಜಯ್‌ ರಾವುತ್‌ ವಿರುದ್ಧ ಪ್ರಕರಣ ದಾಖಲಿಸಲಾಗುವುದು ಮತ್ತು ಈ ರೀತಿಯ ಷಡ್ಯಂತ್ರ ರೂಪಿಸಲು ರಾಹುಲ್‌ ಗಾಂಧಿಯಿಂದ ಹಣ ನೀಡಿದ್ದಾರೆಯೇ ಎಂಬ ಬಗ್ಗೆ ತನಿಖೆಯನ್ನೂ ನಡೆಸಲಾಗುವುದು ಎಂದು ಹೇಳಿದ್ದಾರೆ.

ಮಾಧ್ಯಮದ ಗಮನ ಸೆಳೆಯಲು 500 ಕೋಟಿಗೆ ಹೆಚ್ಚಳ

ರಾವುತ್‌ ಅವರು ಈ ಆಡಿಯೋ ಕ್ಲಿಪ್‌ ವಿಚಾರವಾಗಿ 2 ತಿಂಗಳಿಂದ ಕೆಲಸ ಮಾಡುತ್ತಿದ್ದಾರೆ, ಯೂಟ್ಯೂಬ್‌ನಲ್ಲಿ ಲಭ್ಯವಿರುವ ಧ್ವನಿ ಮಾದರಿಯನ್ನು ಆಧಾರವಾಗಿಟ್ಟುಕೊಂಡು ಎಐ ಬಳಸಿ ಈ ಆಡಿಯೋ ಸಿದ್ಧಪಡಿಸಲಾಗಿದೆ. ಈ ಕುರಿತ ಸ್ಕ್ರಿಪ್ಟ್‌ ಅನ್ನು ಸಾಮ್ನಾದಲ್ಲಿ ಸಿದ್ಧವಾಗಿದ್ದು, ಆರಂಭದಲ್ಲಿ 100 ಕೋಟಿ ರು. ನೀಡಿದ ಆರೋಪ ಮಾಡಲಾಗಿತ್ತು. ಆ ಬಳಿಕ ಮಾಧ್ಯಮದ ಗಮನ ಸೆಳೆಯಲು ಅದನ್ನು 500 ಕೋಟಿ ರು.ಗೆ ಹೆಚ್ಚಿಸಲಾಗಿದೆ ಎಂದು ದೂರಿದ್ದಾರೆ.

ಬಿಜೆಪಿ ನಾಯಕರು, ಶಿಂದೆ ಹಾಗೂ ಜಾರಂಗೆ ಅವರ ಗೌರವ ಹಾಳುಗೆಡವಲು ಮತ್ತು ಮಿತ್ರಪಕ್ಷಗಳ ನಡುವೆ ಭಿನ್ನಮತ ಸೃಷ್ಟಿಸಲು ಈ ಆಡಿಯೋ ಸಿದ್ಧಪಡಿಸಲಾಗಿದೆ. ಈಗಾಗಲೇ ಈ ಆಡಿಯೋ ಕುರಿತು ಮುಖ್ಯಮಂತ್ರಿ ಫಡ್ನವೀಸ್‌ ಅ‍ವರು ಫಾರೆನ್ಸಿಕ್‌ ತನಿಖೆಗೆ ಆದೇಶಿಸಿದ್ದಾರೆ ಎಂದರು.

ಇದನ್ನೂ ಓದಿ: Farooq Abdullah: 'ಪಾಕಿಸ್ತಾನ ನಮ್ಮನ್ನು ರಕ್ಷಿಸುತ್ತಿದೆ..' ಫಾರೂಕ್ ಅಬ್ದುಲ್ಲಾ ವಿವಾದಾತ್ಮಕ ಹೇಳಿಕೆ!

Farooq Abdullah: 'ಪಾಕಿಸ್ತಾನ ನಮ್ಮನ್ನು ರಕ್ಷಿಸುತ್ತಿದೆ..' ಫಾರೂಕ್ ಅಬ್ದುಲ್ಲಾ ವಿವಾದಾತ್ಮಕ ಹೇಳಿಕೆ!

Ravi Janekal — Sun, 25 Oct 2026 08:59:41 +0530

ಶ್ರೀನಗರ (ಅ.25):‘ನಮ್ಮ ಕುರಿತು ಭಾರತ ಸರ್ಕಾರದ ಉದ್ದೇಶ ಒಳ್ಳೆಯದಾಗಿಲ್ಲ. ಆದರೆ ಪಾಕ್ ಪ್ರಧಾನಿ ಶೆಹಬಾಜ್ ಷರೀಫ್ ಅವರು ಕಾಶ್ಮೀರ ಸಮಸ್ಯೆ ಬಗೆಹರಿದಿಲ್ಲ ಎಂದು ಎಲ್ಲೆಡೆ ಹೇಳುತ್ತಿದ್ದಾರೆ. ಪಾಕ್‌ನ ಈ ನಿಲುವು ನಮ್ಮನ್ನು ರಕ್ಷಿಸುತ್ತಿದೆ. ಭಾರತವು ಪಾಕ್‌ ಹೇಳಿಕೆಗಳಿಂದ ಒತ್ತಡಕ್ಕೆ ಒಳಗಾಗಿ ನಮ್ಮ ಪರ ಕೆಲಸ ಮಾಡುತ್ತಿದೆ’ ಎಂದು ಜಮ್ಮು-ಕಾಶ್ಮೀರದ ಮಾಜಿ ಮುಖ್ಯಮಂತ್ರಿ ಹಾಗೂ ನ್ಯಾಷನಲ್‌ ಕಾನ್ಫರೆನ್ಸ್‌ ಪಕ್ಷದ ಅಧ್ಯಕ್ಷ ಫಾರೂಕ್‌ ಅಬ್ದುಲ್ಲಾ(National Conference Party President Farooq Abdullah) ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ.

ಪಾಕಿಸ್ತಾನವೇ ನಮ್ಮನ್ನು ರಕ್ಷಿಸುತ್ತಿದೆ ಎಂದ ಫಾರೂಕ್ ಅಬ್ದುಲ್ಲ!

ಬಾರಾಮುಲ್ಲಾದಲ್ಲಿ ನಡೆದ ಪಕ್ಷದ ಕಾರ್ಯಕರ್ತರ ಸಭೆಯಲ್ಲಿ ಮಾತನಾಡಿದ ಅವರು, ‘ನಮ್ಮ ನೆರೆಯವರು ಸದಾ ಅವರ ಬೆನ್ನ ಹಿಂದೆಯೇ ಇರುತ್ತಾರೆ. ಕಾಶ್ಮೀರ ಸಮಸ್ಯೆಯು ಇನ್ನೂ ಬಗೆಹರಿದಿಲ್ಲ ಎಂದು ಅವರು (ಪಾಕ್‌ ಪ್ರಧಾನಿ ಷರೀಫ್) ಎಲ್ಲೆಡೆ ಹೇಳುತ್ತಾ ಹೋಗುತ್ತಾರೆ. ಹೀಗಾಗಿ ಅವರು ನಮ್ಮನ್ನು ರಕ್ಷಿಸುತ್ತಿದ್ದಾರೆ. ಇಲ್ಲದಿದ್ದರೆ, ಭಾರತದ ಉದ್ದೇಶಗಳು ಒಳ್ಳೆಯದಾಗಿಲ್ಲ. ಜಾಗತಿಕ ಒತ್ತಡದ ಕಾರಣಕ್ಕೆ ಕೇಂದ್ರ ಸರ್ಕಾರ ಮೌನ ವಹಿಸಿದೆ’ ಎಂದರು.

ದೇಶದ ವಿರುದ್ಧ ಜಮ್ಮು ಕಾಶ್ಮೀರ ಯುವಕರನ್ನ ಎತ್ತಿಕಟ್ಟುತ್ತಿದ್ದರಾ ಅಬ್ದುಲ್ಲಾ?

‘ಜಮ್ಮು ಮತ್ತು ಕಾಶ್ಮೀರದ ಜನರು ಸರ್ಕಾರದಿಂದ ನ್ಯಾಯವನ್ನು ನಿರೀಕ್ಷಿಸಬಹುದೇ? ಅವರು ನಿಮಗೆ ನ್ಯಾಯ ಒದಗಿಸಿಕೊಡುತ್ತಾರೆ ಎಂದು ಭಾವಿಸುತ್ತೀರಾ? ಹೋರಾಡುವ ಧೈರ್ಯವನ್ನು ಬೆಳೆಸಿಕೊಳ್ಳಿ. ಇಲ್ಲದಿದ್ದರೆ ನೀವು ನಿರ್ನಾಮವಾಗುತ್ತೀರಿ ಮತ್ತು ನಿಮ್ಮ ಅಸ್ತಿತ್ವವೇ ಕಣ್ಮರೆಯಾಗುತ್ತದೆ’ ಎಂದು ಎಚ್ಚರಿಸಿದರು.

ಫಾರೂಕ್ ಅಬ್ದುಲ್ಲಾ ಹೇಳಿಕೆಗೆ ಬಿಜೆಪಿ ಆಕ್ರೋಶ

ಫಾರೂಕ್‌ ಹೇಳಿಕೆಗೆ ಬಿಜೆಪಿ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ. ಜಮ್ಮು ಮತ್ತು ಕಾಶ್ಮೀರದ ಬಿಜೆಪಿ ಘಟಕದ ಅಧ್ಯಕ್ಷ ಸತ್‌ ಶರ್ಮಾ ಮಾತನಾಡಿ, ‘ಈ ದೇಶದಲ್ಲಿ ತಮಗೆ ಇಷ್ಟವಾದುದನ್ನು ಹೇಳುವ ಸ್ವಾತಂತ್ರ್ಯ ತಮಗಿದೆ ಎಂಬುದನ್ನು ಫಾರೂಕ್ ಅಬ್ದುಲ್ಲಾ ಅರ್ಥಮಾಡಿಕೊಳ್ಳಬೇಕು. ಈ ಸ್ವಾತಂತ್ರ್ಯವಿರುವುದರಿಂದಲೇ ಅವರು ಇಂತಹ ಹೇಳಿಕೆಗಳನ್ನು ನೀಡಲು ಸಾಧ್ಯವಾಗುತ್ತಿದೆ. ಇದೇ ಮಾತುಗಳನ್ನು ನೀವು ಪಾಕಿಸ್ತಾನದಲ್ಲಿ ಆಡಿದ್ದರೆ, ಬಹುಶಃ ನೀವು ಸುರಕ್ಷಿತವಾಗಿರುತ್ತಿರಲಿಲ್ಲ’ ಎಂದಿದ್ದಾರೆ. ಜತೆಗೆ, ಫಾರೂಕ್‌ ಸಾರ್ವಜನಿಕವಾಗಿ ಕ್ಷಮೆಯಾಚಿಸಬೇಕು ಎಂದು ಆಗ್ರಹಿಸಿದ್ದಾರೆ.

Baramulla, Jammu and Kashmir: National Conference President Farooq Abdullah says, "They are completely independent. When I saw those documents, what can you expect from Delhi? Do you expect them to deliver justice for you? Have the courage to fight, or you will be wiped out, and your identity will disappear. They are silent today because of the pressure from the world. Our neighbour is constantly after them. He goes everywhere saying that the Kashmir issue has not been resolved. He is protecting us; otherwise, their intentions are not good."

— IANS (@ians_india) October 24, 2026

‘ಪ್ರತಿ ಪೈಸೆಗೂ ಬೆಲೆ ಸಿಕ್ಕಿದೆ!’ ವಂದೇ ಭಾರತ್ ಪ್ರಯಾಣದ ಬಗ್ಗೆ ವಿದೇಶಿ ಯುವತಿ ಹೇಳಿದ ಮಾತು ವೈರಲ್

Sushma Hegde — Sun, 25 Oct 2026 08:28:13 +0530

ಭಾರತೀಯ ರೈಲಿನಲ್ಲಿ ಪ್ರಯಾಣಿಸುವುದು ಅನೇಕರಿಗೆ ದಿನನಿತ್ಯದ ಅನುಭವ. ಜನಸಂದಣಿ, ಲಗೇಜ್ ಇಡಲು ಜಾಗ ಹುಡುಕುವುದು, ಟಿಕೆಟ್ ಬುಕ್ ಮಾಡುವ ತೊಂದರೆ ಹೀಗೆ ಹಲವು ಸವಾಲುಗಳನ್ನು ಭಾರತೀಯರು ಎದುರಿಸುತ್ತಾರೆ. ಆದರೆ ವಿದೇಶಿ ಪ್ರವಾಸಿಗರು ಇದೇ ಅನುಭವವನ್ನು ತಮ್ಮ ದೃಷ್ಟಿಕೋನದಿಂದ ಹಂಚಿಕೊಂಡಾಗ ಅದು ವಿಶೇಷವಾಗಿ ಗಮನ ಸೆಳೆಯುತ್ತದೆ. ಇದೀಗ ಲಿಥುವೇನಿಯಾದ ಇಬ್ಬರು ಮಹಿಳಾ ಪ್ರವಾಸಿಗರು ವಂದೇ ಭಾರತ್ ಎಕ್ಸ್‌ಪ್ರೆಸ್‌ನಲ್ಲಿ ಪ್ರಯಾಣಿಸಿದ ಅನುಭವವನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿದ್ದು, ಅವರ ವಿಡಿಯೋಗಳು ವೈರಲ್ ಆಗಿವೆ.

ವಂದೇ ಭಾರತ್ ಪ್ರಯಾಣಕ್ಕೆ ಫುಲ್ ಮಾರ್ಕ್ಸ್!

ಲಿಥುವೇನಿಯಾದ ಕರಿಷಾ ಮತ್ತು ಅವರ ಸ್ನೇಹಿತೆ ಕ್ರಿಸ್ಟಿನಾ ಭಾರತ ಪ್ರವಾಸದಲ್ಲಿದ್ದಾರೆ. ಇಬ್ಬರೂ ತಮ್ಮ ಉದ್ಯೋಗಗಳನ್ನು ತೊರೆದು ದೇಶದ ವಿವಿಧ ಸ್ಥಳಗಳನ್ನು ಅನ್ವೇಷಿಸಲು ಹೊರಟಿದ್ದಾರೆ ಎನ್ನಲಾಗಿದೆ. ಈ ಪ್ರವಾಸದ ವೇಳೆ ಅವರು ವಂದೇ ಭಾರತ್ ಎಕ್ಸ್‌ಪ್ರೆಸ್‌ನಲ್ಲಿ ಪ್ರಯಾಣಿಸಿದ್ದು, ಅದರ ಅನುಭವವನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದಾರೆ.

ವಂದೇ ಭಾರತ್‌ನ ಎಸಿ ಕೋಚ್‌ನಲ್ಲಿ ಸುಮಾರು 10 ಗಂಟೆಗಳ ಕಾಲ ಪ್ರಯಾಣಿಸಿದ ಬಳಿಕ ಕರಿಷಾ ರೈಲಿನ ಸೌಕರ್ಯವನ್ನು ಮೆಚ್ಚಿಕೊಂಡಿದ್ದಾರೆ. ಈ ಪ್ರಯಾಣಕ್ಕೆ ಖರ್ಚು ಮಾಡಿದ ಹಣಕ್ಕೆ ತಕ್ಕ ಅನುಭವ ಸಿಕ್ಕಿದೆ ಎಂಬ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ.

ಲಗೇಜ್ ಇಡಲು ಜಾಗ ಹುಡುಕುವುದೇ ‘ಹಂಗರ್ ಗೇಮ್ಸ್‌’!

ಕರಿಷಾ ಹಂಚಿಕೊಂಡ ಮೊದಲ ವಿಡಿಯೋದಲ್ಲಿ ರೈಲು ನಿಲ್ದಾಣದ ಜನಸಂದಣಿ ಮತ್ತು ಲಗೇಜ್ ಇಡಲು ಜಾಗ ಹುಡುಕುವ ಪ್ರಯಾಣಿಕರ ದೃಶ್ಯಗಳು ಗಮನ ಸೆಳೆಯುತ್ತವೆ. ರೈಲು ಹತ್ತುವಾಗ ಮತ್ತು ತಮ್ಮ ಸಾಮಾನುಗಳನ್ನು ವ್ಯವಸ್ಥಿತವಾಗಿ ಇಡಲು ಪ್ರಯತ್ನಿಸುವಾಗ ಎದುರಾದ ಗೊಂದಲವನ್ನು ಅವರು ‘ದಿ ಹಂಗರ್ ಗೇಮ್ಸ್‌’ ಸಿನಿಮಾದ ಸನ್ನಿವೇಶಕ್ಕೆ ಹೋಲಿಸಿದ್ದಾರೆ.

ಜನರು ತಮ್ಮ ಲಗೇಜ್‌ಗಳಿಗೆ ಜಾಗ ಹುಡುಕುವುದನ್ನು ನೋಡುವಾಗ ‘ಹಂಗರ್ ಗೇಮ್ಸ್‌’ ನೆನಪಾಗುತ್ತದೆ. ನಾವೂ ಈ ಪ್ರಕ್ರಿಯೆಯಲ್ಲಿ ಸಾಕಷ್ಟು ಕಷ್ಟಪಟ್ಟೆವು ಎಂಬ ಅರ್ಥದಲ್ಲಿ ಅವರು ತಮ್ಮ ಅನುಭವವನ್ನು ವಿವರಿಸಿದ್ದಾರೆ.

ಆದರೆ ಈ ಗೊಂದಲದ ನಡುವೆಯೂ ವಂದೇ ಭಾರತ್ ರೈಲಿನ ಪ್ರಯಾಣವನ್ನು ಅವರು ಮೆಚ್ಚಿಕೊಂಡಿದ್ದಾರೆ. ರೈಲಿನ ಎಸಿ ಕೋಚ್‌ನ ಸೌಕರ್ಯ ಮತ್ತು ಪ್ರಯಾಣದ ಅನುಭವ ತಮಗೆ ಇಷ್ಟವಾಯಿತು ಎಂದು ಹೇಳಿದ್ದಾರೆ.

ಎಸಿ ಕೋಚ್‌ನಲ್ಲಿ ಪ್ರಯಾಣಿಸುವುದೇ ಉತ್ತಮ ಎಂದ ವಿದೇಶಿ ಮಹಿಳೆ!

ಮತ್ತೊಂದು ವಿಡಿಯೋದಲ್ಲಿ ಕರಿಷಾ ಎಸಿ ಮತ್ತು ನಾನ್‌ ಎಸಿ ರೈಲು ಪ್ರಯಾಣದ ನಡುವಿನ ವ್ಯತ್ಯಾಸದ ಬಗ್ಗೆ ಮಾತನಾಡಿದ್ದಾರೆ. ತಮ್ಮ ಪ್ರಕಾರ, ಎಸಿ ಕೋಚ್ ಮತ್ತು ಎಸಿ ಇಲ್ಲದ ಕೋಚ್‌ನ ಟಿಕೆಟ್ ದರದ ವ್ಯತ್ಯಾಸ ಕಡಿಮೆ ಇದ್ದರೆ, ಎಸಿ ಕೋಚ್ ಆಯ್ಕೆ ಮಾಡಿಕೊಳ್ಳುವುದೇ ಉತ್ತಮ.

ವಂದೇ ಭಾರತ್‌ನಲ್ಲಿ ಪ್ರಯಾಣಿಸುವಾಗ ಹೆಚ್ಚು ಸುರಕ್ಷಿತ ಭಾವನೆ ಮೂಡಿತು ಎಂದು ಅವರು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ಈ ಹೇಳಿಕೆ ಸಾಮಾಜಿಕ ಮಾಧ್ಯಮ ಬಳಕೆದಾರರ ಗಮನ ಸೆಳೆದಿದೆ.

ರೈಲಿನ ಬಾತ್‌ರೂಮ್ ಬಗ್ಗೆ ಏನಂದ್ರು?

ಕರಿಷಾ ಅವರ ಮತ್ತೊಂದು ವಿಡಿಯೋ ರೈಲಿನ ಶೌಚಾಲಯದ ಒಳಭಾಗವನ್ನು ತೋರಿಸುತ್ತದೆ. ಶೌಚಾಲಯ ಸ್ವಚ್ಛವಾಗಿರುವುದು ಅವರಿಗೆ ಇಷ್ಟವಾದರೂ, ಅಲ್ಲಿನ ವಾಸನೆ ಅಷ್ಟಾಗಿ ಇಷ್ಟವಾಗಲಿಲ್ಲ ಎಂದು ಹೇಳಿದ್ದಾರೆ.

ಅಷ್ಟೇ ಅಲ್ಲ, ಶೌಚಾಲಯದಲ್ಲಿನ ವಾಶ್‌ಬೇಸಿನ್‌ ಗಾತ್ರದ ಬಗ್ಗೆಯೂ ತಮಾಷೆಯಾಗಿ ಪ್ರತಿಕ್ರಿಯಿಸಿದ್ದಾರೆ. ಅವರ ಈ ನೇರವಾದ ಅಭಿಪ್ರಾಯಗಳು ಪ್ರವಾಸದ ಅನುಭವವನ್ನು ಮತ್ತಷ್ಟು ಆಸಕ್ತಿದಾಯಕವಾಗಿಸಿವೆ.

ಭಾರತ ಪ್ರವಾಸಕ್ಕೆ ಉದ್ಯೋಗವನ್ನೇ ಬಿಟ್ಟ ಸ್ನೇಹಿತೆಯರು!

ಕ್ರಿಸ್ಟಿನಾ ಅವರ ಇನ್‌ಸ್ಟಾಗ್ರಾಮ್ ಪ್ರೊಫೈಲ್‌ನಲ್ಲಿನ ಮಾಹಿತಿಯ ಪ್ರಕಾರ, ಇಬ್ಬರೂ ಅಕ್ಟೋಬರ್ 16ರಂದು ಭಾರತಕ್ಕೆ ಬಂದಿದ್ದು, ನವದೆಹಲಿಯಿಂದ ತಮ್ಮ ಪ್ರವಾಸ ಆರಂಭಿಸಿದ್ದಾರೆ. ಬಳಿಕ ಆಟೋರಿಕ್ಷಾ ಮತ್ತು ಮೆಟ್ರೋದಲ್ಲಿ ಸಂಚರಿಸಿ, ಆಗ್ರಾ ಸೇರಿದಂತೆ ಹಲವು ಸ್ಥಳಗಳನ್ನು ಸುತ್ತಾಡಿದ್ದಾರೆ. ನಂತರ ಜಮ್ಮು ಮತ್ತು ಕಾಶ್ಮೀರದತ್ತ ಪ್ರಯಾಣ ಬೆಳೆಸಿದ್ದಾರೆ.

ದೆಹಲಿ, ಆಗ್ರಾ, ಜೈಪುರ ಮತ್ತು ಕಾಶ್ಮೀರ ಸೇರಿದಂತೆ ಭಾರತದ ವಿವಿಧ ಭಾಗಗಳನ್ನು ಅನ್ವೇಷಿಸುವುದು ಅವರ ಪ್ರವಾಸದ ಯೋಜನೆಯಾಗಿದೆ. ಕೇರಳಕ್ಕೂ ಭೇಟಿ ನೀಡುವ ಸಾಧ್ಯತೆಯಿದೆ ಎಂದು ಅವರ ಪ್ರೊಫೈಲ್ ಸೂಚಿಸುತ್ತದೆ.

ವೈರಲ್ ವಿಡಿಯೋಗೆ ನೆಟ್ಟಿಗರ ಪ್ರತಿಕ್ರಿಯೆ ಹೇಗಿದೆ?

ಈ ವಿಡಿಯೋಗಳು ವೈರಲ್ ಆಗುತ್ತಿದ್ದಂತೆ ಸಾಮಾಜಿಕ ಮಾಧ್ಯಮದಲ್ಲಿ ಹಲವು ರೀತಿಯ ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. ವಂದೇ ಭಾರತ್ ರೈಲಿನಲ್ಲೂ ಜನದಟ್ಟಣೆ ಹೆಚ್ಚುತ್ತಿದೆ ಎಂದು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ. ಇನ್ನು ಕೆಲವರು ಭಾರತೀಯ ರೈಲ್ವೆಯಲ್ಲಿ ಟಿಕೆಟ್ ಬುಕ್ ಮಾಡುವ ಪ್ರಕ್ರಿಯೆಯೇ ದೊಡ್ಡ ಸವಾಲು ಎಂದು ಹೇಳಿದ್ದಾರೆ.

ಭಾರತದಲ್ಲಿ ರೈಲು ಪ್ರಯಾಣಕ್ಕೆ ಹೆಚ್ಚಿನ ಬೇಡಿಕೆ ಇರುವುದರಿಂದ ಜನಸಂದಣಿ ಸಾಮಾನ್ಯವಾಗಿದೆ ಎಂದು ಕೆಲವರು ವಿವರಿಸಿದ್ದಾರೆ. ಒಟ್ಟಿನಲ್ಲಿ, ವಿದೇಶಿ ಪ್ರವಾಸಿಗರ ಈ ಅನುಭವವು ಭಾರತೀಯ ರೈಲ್ವೆಯ ಸೌಲಭ್ಯಗಳ ಜೊತೆಗೆ ಪ್ರಯಾಣಿಕರು ಎದುರಿಸುವ ಸವಾಲುಗಳ ಬಗ್ಗೆಯೂ ಚರ್ಚೆ ಹುಟ್ಟುಹಾಕಿದೆ.

ಆಂಧ್ರದಲ್ಲಿ ‘ಯಲಹಂಕ ಪ್ಯಾಲೇಸ್‌’ ಫೈಟ್‌! ಬೆಂಗಳೂರಿನ ಆಸ್ತಿಗಾಗಿ ಅಣ್ಣ-ತಂಗಿ ಫೈಟ್

Kannadaprabha News — Sun, 25 Oct 2026 07:24:58 +0530

ಅಮರಾವತಿ: ಆಂಧ್ರಪ್ರದೇಶದ ಮಾಜಿ ಮುಖ್ಯಮಂತ್ರಿ ಹಾಗೂ ವೈಎಸ್‌ಆರ್‌ ಕಾಂಗ್ರೆಸ್‌ ಮುಖ್ಯಸ್ಥ ವೈ.ಎಸ್. ಜಗನ್ ಮೋಹನ್ ರೆಡ್ಡಿ ಮತ್ತು ಅವರ ತಂಗಿ, ಆಂಧ್ರಪ್ರದೇಶ ಕಾಂಗ್ರೆಸ್‌ ಅಧ್ಯಕ್ಷೆ ವೈ.ಎಸ್. ಶರ್ಮಿಳಾ ನಡುವಿನ ಕೌಟುಂಬಿಕ ಕಲಹ ಮತ್ತೊಮ್ಮೆ ಬಹಿರಂಗವಾಗಿದೆ. ಶರ್ಮಿಳಾ ಅವರ ಮಗಳ ಮದುವೆ ವೇದಿಕೆಯ ವಿಚಾರವಾಗಿ ಅಣ್ಣ-ತಂಗಿಯ ನಡುವೆ ವಿವಾದ ಭುಗಿಲೆದ್ದಿದೆ.

ಶರ್ಮಿಳಾ ಅವರ ಪುತ್ರಿ ಅಂಜಿಲಿ ಅವರ ವಿವಾಹವು ನ.25ರಂದು ನಿಗದಿಯಾಗಿದ್ದು, ಈ ಮದುವೆ ಕಾರ್ಯಕ್ರಮವನ್ನು ಬೆಂಗಳೂರಿನಲ್ಲಿರುವ ಜಗನ್ ಮೋಹನ್ ರೆಡ್ಡಿ ಹಾಗೂ ತಮ್ಮ ಜಂಟಿ ಒಡೆತನದಲ್ಲಿರುವ ‘ಯಲಹಂಕ ಪ್ಯಾಲೇಸ್‌’ನಲ್ಲಿ ನಡೆಸಲು ಶರ್ಮಿಳಾ ತೀರ್ಮಾನಿಸಿದ್ದರು. ಆದರೆ, ಭದ್ರತಾ ಕಾರಣಗಳನ್ನು ಮುಂದಿಟ್ಟು ಜಗನ್ ತಮ್ಮ ಮನೆಯನ್ನು ಮದುವೆಗೆ ನೀಡಲು ನಿರಾಕರಿಸಿದ್ದಾರೆ. ಅಣ್ಣನ ವಿರೋಧದ ನಡುವೆಯೂ ಶರ್ಮಿಳಾ ಅದೇ ಸ್ಥಳದಲ್ಲಿ ಮದುವೆ ಮಾಡುವ ಸಿದ್ಧತೆ ನಡೆಸಿದ್ದಾರೆ ಹಾಗೂ ಅದೇ ವಿಳಾಸವನ್ನೇ ಆಮಂತ್ರಣ ಪತ್ರಿಕೆಯಲ್ಲಿ ಮುದ್ರಿಸಿ ಗಣ್ಯರಿಗೆ ನೀಡಿದ್ದಾರೆ. ಇದು ವಿವಾದ ಉಂಟುಮಾಡಿದೆ.

ಯಲಹಂಕದಲ್ಲಿದೆ ರೆಡ್ಡಿಗಳ ಆಸ್ತಿ

ಜಗನ್‌ ಹಾಗೂ ಶರ್ಮಿಳಾ ಅವರ ತಂದೆ, ಆಂಧ್ರದ ಮಾಜಿ ಸಿಎಂ ವೈ.ಎಸ್. ರಾಜಶೇಖರ ರೆಡ್ಡಿ ಅವರು ಬೆಂಗಳೂರಿನ ಯಲಹಂಕದಲ್ಲಿ 20 ಎಕರೆ ಆಸ್ತಿ ಹೊಂದಿದ್ದರು. ಅದಕ್ಕೆ ಯಲಹಂಕ ಪ್ಯಾಲೇಸ್‌ ಎಂಬ ಹೆಸರು ಇರಿಸಿದ್ದರು. ಕುಟುಂಬದ ಅನೇಕ ಮದುವೆಗಳನ್ನು ಇಲ್ಲಿ ಮಾಡಿಸಿದ್ದರು. ನಿಧನಕ್ಕೂ ಮುನ್ನ ಈ ಜಾಗವನ್ನು ಶರ್ಮಿಳಾ ಮತ್ತು ಜಗನ್‌ಗೆ ಸಮಾನ ಭಾಗ ಮಾಡಿದ್ದರು. ಅದರ ಪ್ರಕಾರ ಯಲಹಂಕದಲ್ಲಿ ಶರ್ಮಿಳಾ ಹಾಗೂ ಜಗನ್‌ರ ಇಬ್ಬರ ಮನೆಗಳೂ ಯಲಹಂಕ ಪ್ಯಾಲೇಸ್‌ನ ಒಂದೇ ಕಾಂಪೌಂಡಲ್ಲಿವೆ. ಇಲ್ಲಿ ಏನೇ ಸಮಾರಂಭ ನಡೆದರೂ ಇಬ್ಬರಿಂದಲೂ ಪರಸ್ಪರ ಒಪ್ಪಿಗೆ ಅಗತ್ಯ. ಆ ಪ್ರಕಾರ ನ.25ರಂದು ಶರ್ಮಿಳಾ ಅವರ ಮಗಳು ಅಂಜಿಲಿ ಮದುವೆ ನಿಗದಿ ಮಾಡಿದ್ದರು.

ಮನೆ ನೀಡಲು ಜಗನ್‌ ನಕಾರ

ಆದರೆ ಅ.9ರಂದೇ ತಂಗಿ ಶರ್ಮಿಳಾಗೆ ಬರೆದ ಪತ್ರದಲ್ಲಿ ಜಗನ್, ‘ಮದುವೆಯಂತಹ ಸಮಾರಂಭಕ್ಕೆ ಅಡುಗೆ ಸಿಬ್ಬಂದಿ, ಈವೆಂಟ್ ಮ್ಯಾನೇಜ್‌ಮೆಂಟ್ ತಂಡ, ಫೋಟೋಗ್ರಾಫರ್‌ಗಳು ಸೇರಿದಂತೆ ಅನೇಕ ಅಪರಿಚಿತ ವ್ಯಕ್ತಿಗಳು ಹಾಗೂ ಅತಿಥಿಗಳು ಮನೆಗೆ ಬಂದು ಹೋಗುತ್ತಾರೆ. ಈ ಸಂದರ್ಭದಲ್ಲಿ ತಾವು ವಾಸ್ತವ್ಯವಿರುವ ನಿವಾಸದ ವಿಡಿಯೋಗಳು ಮತ್ತು ಫೋಟೋಗಳು ಹೊರಬರುವುದರಿಂದ ನನ್ನ ಕುಟುಂಬದ ಭದ್ರತೆಗೆ ಹಾಗೂ ಗೌಪ್ಯತೆಗೆ ಗಂಭೀರ ಧಕ್ಕೆಯಾಗುತ್ತದೆ’ ಎಂದು ತಿಳಿಸಿದ್ದಾರೆ. ಜಗನ್ ಝಡ್+ ಕೆಟಗರಿ ಭದ್ರತೆ ಹೊಂದಿದ್ದಾರೆ.

‘ನನಗೆ ಈ ನಿರ್ಧಾರ ತೆಗೆದುಕೊಳ್ಳುವುದು ಸುಲಭವಾಗಿರಲಿಲ್ಲವಾದರೂ, ನನ್ನ ಸ್ವಂತ ಮಕ್ಕಳಾದ ಹರ್ಷ ಅಥವಾ ವರ್ಷ ಅವರ ಮದುವೆಯಾಗಿದ್ದರೂ ನಾನು ಇದೇ ನಿರ್ಧಾರ ತೆಗೆದುಕೊಳ್ಳುತ್ತಿದ್ದೆ’ ಎಂದು ಜಗನ್ ಸ್ಪಷ್ಟಪಡಿಸಿದ್ದಾರೆ.\B\B

‘ಬೆಂಗಳೂರಿನ ಮನೆಯಲ್ಲಿ ಮದುವೆ ಬೇಡ ಎಂದು 2 ತಿಂಗಳ ಹಿಂದೆಯೇ ಮೌಖಿಕವಾಗಿ ತಿಳಿಸಿದ್ದೆ. ಅದರ ಬದಲು ‘ನಿಮಗೆ ಕನ್ವೆನ್ಷನ್ ಸೆಂಟರ್ ಅಥವಾ ಡೆಸ್ಟಿನೇಷನ್ ವೆಡ್ಡಿಂಗ್ ಬೇಡವೆಂದಾದಲ್ಲಿ, ಹೈದರಾಬಾದ್‌ನ ನನ್ನ ಲೋಟಸ್ ಪಾಂಡ್ ಆಸ್ತಿಯನ್ನು ಮದುವೆಗೆ ಬಳಸಿಕೊಳ್ಳಬಹುದು’ ಎಂದಿದ್ದೆ. ಆದಾಗ್ಯೂ ಶರ್ಮಿಳಾ ಬೆಂಗಳೂರಲ್ಲೇ ಮದುವೆ ಎಂದು ಆಮಂತ್ರಣ ಮುದ್ರಿಸಿದ್ದಾರೆ’ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

‘ಆದರೆ ಕಳೆದ 7 ವರ್ಷಗಳಲ್ಲಿ ಏನೇ ಭಿನ್ನಾಭಿಪ್ರಾಯಗಳು ನಡೆದಿದ್ದರೂ, ತಮ್ಮ ಸೋದರಸೊಸೆ ಅಂಜಿಲಿ ಅವರ ಮುಂಬರುವ ವೈವಾಹಿಕ ಜೀವನಕ್ಕೆ ಶುಭ ಹಾರೈಸಿರುವೆ’ ಎಂದು ಅವರು ತಿಳಿಸಿದ್ದಾರೆ.

ಶರ್ಮಿಳಾ ನಿಲುವು

ಅಣ್ಣನ ಕಡೆಯಿಂದ ಸ್ಪಷ್ಟ ವಿರೋಧವಿದ್ದರೂ, ಶರ್ಮಿಳಾ ಈಗಾಗಲೇ ಹಲವು ಗಣ್ಯ ವ್ಯಕ್ತಿಗಳಿಗೆ ಆಹ್ವಾನ ಪತ್ರಿಕೆ ನೀಡಿರುವುದು ಗಮನ ಸೆಳೆದಿದೆ. ಕಳೆದ 7 ವರ್ಷಗಳಿಂದ ಅಣ್ಣ-ತಂಗಿಯರ ಸಂಬಂಧ ಹಳಸಿ ಹೋಗಿದ್ದರೂ, ಮಗಳ ಮದುವೆಗೆ ಜಗನ್ ತಮ್ಮ ಬೆಂಗಳೂರು ನಿವಾಸವನ್ನು ನೀಡುತ್ತಾರೆ ಎಂದು ಶರ್ಮಿಳಾ ನಂಬಿದ್ದರು ಎನ್ನಲಾಗಿದೆ. ಇದೀಗ ಜಗನ್‌ ನಿಲುವಿಗೆ ಶರ್ಮಿಳಾ ಆಪ್ತರು ಕಿಡಿಕಾರಿದ್ದಾರೆ. ಜಗನ್‌ ಭದ್ರತಾ ಕಾರಣ ನೀಡಿ ಮದುವೆಗೆ ನಿರಾಕರಿಸುತ್ತಿದ್ದಾರೆ. ಭದ್ರತೆ ಸಮಸ್ಯೆಯಾದರೆ ಅವರೇ ಮದುವೆ ದಿನ ಮನೆ ಬಿಟ್ಟು ಬೇರೆಡೆ ನೆಲೆಸಲಿ ಎಂದು ಕುಟುಕಿದ್ದಾರೆ.

ಜಗನ್‌ ಕಂಸಮಾಮ- ನಾಯ್ಡು ವ್ಯಂಗ್ಯ

ಈ ಬೆಳವಣಿಗೆಯ ಬೆನ್ನಲ್ಲೇ ಆಂಧ್ರಪ್ರದೇಶದ ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು ಅವರು ಜಗನ್ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ‘ಸ್ವಂತ ತಂಗಿಯ ಮಗಳ ಮದುವೆಗೆ ಮನೆ ಕೊಡಲು ನಿರಾಕರಿಸಿದ ಜಗನ್ ಕಂಸ ಮಾವ ಇದ್ದಂತೆ’ ಎಂದು ವ್ಯಂಗ್ಯವಾಡಿದ್ದಾರೆ.

ಏನಿದು ಜಟಾಪಟಿ?

ಬೆಂಗಳೂರಿನ ಯಲಹಂಕದಲ್ಲಿ ಮಾಜಿ ಸಿಎಂ ವೈಎಸ್ಸಾರ್‌ 20 ಎಕರೆ ಖರೀದಿಸಿ ಬಂಗಲೆ ಕಟ್ಟಿಸಿದ್ದಾರೆ
ಅದಕ್ಕೆ ಯಲಹಂಕ ಪ್ಯಾಲೇಸ್‌ ಅಂತ ಹೆಸರಿಟ್ಟಿದ್ದಾರೆ. ಅದನ್ನು ಮಕ್ಕಳಾದ ಜಗನ್‌- ಶರ್ಮಿಳಾಗೆ ಹಂಚಿದ್ದಾರೆ
ಈ ಬಂಗಲೆಯಲ್ಲಿ ನ.25ರಂದು ವಿವಾಹ ನೆರವೇರಿಸಲು ಆಹ್ವಾನ ಪತ್ರಿಕೆ ಪ್ರಿಂಟ್‌ ಮಾಡಿಸಿರುವ ಶರ್ಮಿಳಾ
ಆದರೆ ಅ.9ರಂದೇ ಪತ್ರ ಬರೆದು ಆ ಬಂಗಲೆಯಲ್ಲಿ ವಿವಾಹ ಮಾಡಬೇಡಿ ಎಂದಿರುವ ಜಗನ್ಮೋಹನ್‌
ಸಿದ್ಧತೆ ಮುಗಿದ ಬಳಿಕ ಅನುಮತಿ ನಿರಾಕರಿಸಿದ್ದರಿಂದ ವಿವಾದ. ಆಂಧ್ರ ಸಿಎಂ ನಾಯ್ಡುರಿಂದಲೂ ತರಾಟೆ

ಸ್ಮಶಾನದ ಬಳಿ ಪ್ರಧಾನಿ ಮೋದಿ ಫೋಟೋ ಇಟ್ಟು ವಾಮಾಚಾರ! ಶಾಕಿಂಗ್ ವಿಡಿಯೋ ವೈರಲ್

Ravi Janekal — Sun, 25 Oct 2026 07:05:36 +0530

ಪ್ರತಿ ಬಾರಿ ಚುನಾವಣೆ ಸಮೀಪಿಸಿದಾಗಲೆಲ್ಲ ಪ್ರಧಾನಿ ಮೋದಿಯವರ ವಿರುದ್ಧ ಹಲವು ಸಂಚುಗಳು ನಡೆಯುತ್ತಲೇ ಇವೆ. ಈ ಹಿಂದಿನ ಚುನಾವಣೆಗಳಲ್ಲೂ ಹ ತ್ಯೆಯ ಸಂಚು ರೂಪಿಸಲಾಗಿತ್ತು. ಇತ್ತೀಚಿಗೆ ಮುಂಬೈನಲ್ಲೂ ಇಂದಿರಾ ಗಾಂಧಿ ಹ ತ್ಯೆ ಮಾದರಿಯಲ್ಲಿ ಸಂಚು ರೂಪಿಸಿದ್ದ ಉಗ್ರನೊಬ್ಬನ ಬಂಧಿಸಿದ್ದಾಯ್ತು, ಇದೀಗ ಉತ್ತರ ಪ್ರದೇಶದಲ್ಲಿ ಮತ್ತೊಂದು ಶಾಕಿಂಗ್ ಘಟನೆ ನಡೆದಿದೆ. ಪ್ರಧಾನಿ ಮೋದಿಯವರ ವಿರುದ್ಧದ ಸಂಚಿಗೆ ಈ ಬಾರಿ ವಾಮಾಚಾರ ಕೃತ್ಯ ನಡೆಸಲಾಗಿದೆ.

ಹೌದು ಪ್ರಧಾನಿ ಮೋದಿ ಅವರ ಫೋಟೋವನ್ನಿಟ್ಟು ಸ್ಮಶಾನದಲ್ಲಿ ವಾಮಾಚಾರ ನಡೆಸಿರುವ ಕೃತ್ಯವೊಂದರ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು. ಈ ಘಟನೆ ಸಂಬಂಧ ಉತ್ತರ ಪ್ರದೇಶ ಪೊಲೀಸರು ಅಪರಿಚಿತ ವ್ಯಕ್ತಿಯ ವಿರುದ್ಧ ಎಫ್‌ಐಆರ್ ದಾಖಲಿಸಿಕೊಂಡು ತನಿಖೆಗೆ ಇಳಿದಿದ್ದಾರೆ.

ಸ್ಮಶಾನದಲ್ಲಿ ಪ್ರಧಾನಿ ಮೋದಿ ಫೋಟೋ ಇಟ್ಟು ವಾಮಾಚಾರ

ಈ ಘಟನೆ ಉತ್ತರ ಪ್ರದೇಶದ ಮೌ ಜಿಲ್ಲೆಯ ದೋಹ್ರಿಘಾಟ್ ಪೊಲೀಸ್ ಠಾಣೆ ವ್ಯಾಪ್ತಿಯ ಸರಯೂ ನದಿ ದಂಡೆಯ ಮೇಲೆ ಈ ಕೃತ್ಯ ನಡೆದಿದ್ದು, ಪ್ರಧಾನಿ ಮೋದಿಯವರ ಭಾವಚಿತ್ರದ ಮುಂದೆ ತೆಂಗಿನಕಾಯಿ, ನಿಂಬೆಹಣ್ಣು, ಕಿತ್ತಳೆ ಬಣ್ಣದ ಪುಡಿ ಹಾಕಿರುವುದು ವಿಡಿಯೋದಲ್ಲಿ ಕಂಡುಬಂದಿದೆ. ವಾಮಾಚಾರಕ್ಕೆ ಬಳಸುವ ಎಲ್ಲ ವಸ್ತುಗಳು ಇಲ್ಲಿವೆ.

ಪೊಲೀಸರಿಂದ ತನಿಖೆ ಚುರುಕು

ಸಾಮಾಜಿಕ ಜಾಲತಾಣದ ಮೂಲಕ ವಿಡಿಯೋ ವೈರಲ್ ಆಗಿರುವ ಬಗ್ಗೆ ಗಮನಕ್ಕೆ ಬರುತ್ತಿದ್ದಂತೆ ಅಲರ್ಟ್ ಆಗಿರುವ ಪೊಲೀಸರು, ಮೊದಲಿಗೆ ಸೋಷಿಯಲ್ ಮೀಡಿಯಾದಲ್ಲಿ ಹರಿಬಿಟ್ಟವರು ಯಾರು? ವಿಡಿಯೋ ಎಲ್ಲಿಂದ ಬಂದಿದೆ ಎಂಬ ಬಗ್ಗೆ ಸೈಬರ್ ಕ್ರೈಂ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಘಟನೆ ಸ್ಥಳದಿಂದಲೂ ಸಾಕ್ಷ್ಯ ಸಂಗ್ರಹಿಸುತ್ತಿದ್ದಾರೆ.

ಪ್ರಧಾನಿ ಮೋದಿ ಭಾವಚಿತ್ರಕ್ಕೆ ದುಷ್ಕರ್ಮಿಗಳು ವಾಮಾಚಾರ ನಡೆಸಿರುವ ಘಟನೆಯನ್ನ ಗಂಭೀರವಾಗಿ ಪರಿಗಣಿಸಿರುವ ಉತ್ತರ ಪ್ರದೇಶ ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ. ಘಟನೆ ನಡೆದ ಸುತ್ತಮುತ್ತಲಿನ ಸ್ಥಳದಲ್ಲಿ ಅಳವಡಿಸಲಾಗಿರುವ ಸಿಸಿಟಿವಿಗಳನ್ನ ಪರಿಶೀಲನೆ ನಡೆಸುತ್ತಿದ್ದಾರೆ. ಈ ಬಗ್ಗೆ ಘೋಸಿ ಸರ್ಕಲ್ ನ ಪೊಲೀಸ್ ಅಧಿಕಾರಿ ಸತ್ಯೇಂದ್ರ ಭೂಷಣ್ ತಿವಾರಿ ಅವರು ಮಾಹಿತಿ ನೀಡಿದ್ದಾರೆ.

ಕೃತ್ಯ ನಡೆಸಿರುವ ಅಪರಿಚಿತ ಆರೋಪಿಗಳ ವಿರುದ್ಧ ಬಿಎನ್‌ಎಸ್ ಆಕ್ಟ್ ಅಡಿ ಕೇಸ್ ದಾಖಲಿಸಿಕೊಳ್ಳಲಾಗಿದೆ. ಕೃತ್ಯವೆಸಗಿದ್ದು ಯಾರು? ಏನಿವರ ಉದ್ದೇಶ? ಪ್ರಧಾನಿ ಮೋದಿ ಫೋಟೋ, ವಾಮಾಚಾರದ ವಸ್ತುಗಳನ್ನ ದಡಕ್ಕೆ ತಂದಿಟ್ಟವರು ಯಾರು? ವಿಡಿಯೋವನ್ನು ಮೊದಲಿಗೆ ಸೋಷಿಯಲ್ ಮೀಡಿಯಾದಲ್ಲಿ ಶೇರ್ ಮಾಡಿರುವವರು ಯಾರು? ಈ ಕೃತ್ಯದ ಹಿಂದಿನ ಉದ್ದೇಶವೇನು? ಈ ಎಲ್ಲ ಆಯಾಮಗಳಲ್ಲಿ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ ಎಂದು ಪೊಲೀಸ್ ಅಧಿಕಾರಿ ತಿಳಿಸಿದ್ದಾರೆ.

Alleged Black Magic with PM Modi's Photo in Mau, Police Engaged in Investigation https://t.co/Ombe6LbHya

— Khoje Patrakaar (@khojepatrakaar) October 24, 2026

Bank Loan: ಸಾಲ ಪಡೆಯುವಾಗ ಆತುರ, ಎಲ್ಲರೂ ಮಾಡುವ ಐದು ದೊಡ್ಡ ತಪ್ಪುಗಳು

Ganesh Mabla Gowda — Sat, 24 Oct 2026 23:10:19 +0530

ಬದುಕಿಗೆ ಒಂದಷ್ಟು ಕನಸುಗಳು. ಇನ್ನೂ ಬೇಕು, ಏನೋ ಬೇಕು ಎಂಬ ಆಸೆ. ಅದನ್ನ ಈಡೇರಿಸಿಕೊಳ್ಳೋಣ ಅಂದ್ರೆ ಕೈಯಲ್ಲಿ ಕಾಸು ಇರಲ್ಲ. ಹೇಗಾದರೂ ಮಾಡಿ ಪಡೆಯಲೇಬೇಕು ಅಂತಾ ಹೊರಟಾಗ.. ಮುಖದ ಮುಂದೆ ಚಿನ್ನದಂಥ ಬಣ್ಣಗಳನ್ನ ಇಟ್ಟು ಬುಡದಿಂದ ತಲೆಯವರೆಗೆ ಹೆರೆಯುವ ಬ್ಯಾಂಕಿಂಗ್‌ ಸ್ಕೀಮ್‌ಗಳು ಕಣ್ಮುಂದೆ ಬರುತ್ತವೆ. ಆಗಿದ್ದು ಆಗಿಯೇ ಹೋಗಲಿ. ಸಾಲ ಮಾಡಿಯಾದರೂ ಸರಿ ತೆಗೆದುಕೊಳ್ಳೋಣ ಅಂತಾ ಲೋನ್‌ ಮಾಡಲು ಹೋಗುತ್ತೇವೆ. ಈ ಲೋನ್‌ ಮಾಡುವ ಆತುರದಲ್ಲಿ ನಾವು ಒಂದಷ್ಟು ತಪ್ಪುಗಳನ್ನ ಮಾಡಿಬಿಡುತ್ತೇವೆ. ಲೋನ್‌ ಮಾಡುವ ಐದು ತಪ್ಪುಗಳು ಇಲ್ಲಿವೆ..

ಅಗತ್ಯಕ್ಕಿಂತ ಹೆಚ್ಚು ಸಾಲ

ಈ ಬ್ಯಾಂಕ್‌ಗಳು, ಕ್ರೆಡಿಟ್‌ ಕಾರ್ಟ್‌ಗಳು ಹಾಗೂ ಇತರೆ ಹಣಕಾಸು ಸಂಸ್ಥೆಗಳು.. ಜನರಿಗೆ ಅವರ ಅಗತ್ಯಕ್ಕಿಂತ ಹೆಚ್ಚಿನ ಸಾಲ ನೀಡಿ ಅವರಿಂದ ಮತ್ತಷ್ಟು ಹಣವನ್ನು ಪೀಕಿಸುವ ಪ್ಲಾನ್‌ ಮಾಡಿರುತ್ತವೆ. ಸಾಲ ಪಡೆಯುವಾಗ ಇದನ್ನೆಲ್ಲ ಮರೆತು ಸಿಗುತ್ತದೆ ಎಂದಾಗ ಇರಲಿ, ಆಮೇಲೆ ನೋಡಿಕೊಳ್ಳೋಣ ಎಂದು ಲೋನ್‌ ಮಾಡಿ ಬಿಡ್ತೇವೆ. ಇದು ತಪ್ಪು. ಯಾವತ್ತೂ ಹಾಗೆ ಮಾಡಬಾರದು. ಇದು ಮರುಪಾವತಿಗೆ, ಇಎಂಐಗೆ ಭಾರೀ ತೊಂದರೆ ಆಗುತ್ತದೆ. ಮಾಸಿಕ ಆದಾಯದ ಮಿತಿಯೊಳಗೆ ನಮ್ಮ ಸಾಲ ಇರಬೇಕು.

ಯೋಚಿಸದೇ ಇರೋದು

ಹಣ ಅಗತ್ಯ ಇದ್ದಾಗ ಜನರು ಬಹುತೇಕ ಕಡೆಗಳಲ್ಲಿ ಕುರುಡಾಗಿ ಸಾಲ ಮಾಡಿ ಬಿಡುತ್ತೇವೆ. ಜನರು ಸಂಬಳ ಖಾತೆ ಮತ್ತು ತಮಗೆ ತಿಳಿದಿರುವ ಕಂಪನಿಗಳನ್ನ ನಂಬಿರುತ್ತಾರೆ. NBFCಗಳು ಹೆಚ್ಚಿನ ಬಡ್ಡಿಯನ್ನು ವಿಧಿಸುತ್ತವೆ ಎಂಬ ತಪ್ಪು ಕಲ್ಪನೆ ಇರುತ್ತದೆ. ಸಾಲ ತೆಗೆದುಕೊಳ್ಳುವ ಮೊದಲು ಕನಿಷ್ಠ 3 ರಿಂದ 4 ವಿಭಿನ್ನ ಬ್ಯಾಂಕುಗಳು ಮತ್ತು NBFCಗಳ ಬಡ್ಡಿದರಗಳನ್ನು ಹೋಲಿಸಬೇಕು. ಬಡ್ಡಿದರ ಸೇರಿದಂತೆ ಇತರೆ ಫೀಸ್‌ಗಳ ಬಗ್ಗೆಯೂ ತಿಳಿದುಕೊಂಡು ಮುಂದುವರಿಯಬೇಕು.

ದಾಖಲೆಗಳನ್ನ ಓದಬೇಕು

ಯಾವುದೇ ಕಾರಣಕ್ಕೂ ಸಾಲ ಪಡೆಯುವಾಗ ದಾಖಲೆಗಳನ್ನ ಓದೋದನ್ನು ಮರೆಯಬಾರದು. ಬ್ಯಾಂಕು ವಿಧಿಸುವ ನಿಯಮಗಳು, ಷರತ್ತುಗಳನ್ನ ಓದಿಯೇ ಒಪ್ಪಂದಗಳಿಗೆ ಸಹಿ ಮಾಡಬೇಕು.

ಬಡ್ಡಿದರ ಸ್ಥಿರವಾಗಿದೆಯೇ? ಇಲ್ಲ ಬದಲಾಗುತ್ತಾ?
ನಿಗದಿತ ದಿನಾಂಕದ ಮೊದಲು ಮರುಪಾವತಿ ಮಾಡಿದ್ರೆ ಏನು?
ಇಎಂಐ ವಿಳಂಬವಾದರೆ ದಂಡಗಳು ಯಾವುವು?
ಈ ಎಲ್ಲಾ ವಿಚಾರಗಳನ್ನು ಸ್ಪಷ್ಟವಾಗಿ ತಿಳಿದುಕೊಳ್ಳಬೇಕು
ಇಲ್ಲದಿದ್ದರೆ ಜೇಬು ಖಾಲಿ ಆಗೋದ್ರಲ್ಲಿ ಯಾವುದೇ ಅನುಮಾನ ಇಲ್ಲ

EMI ಮತ್ತು ಮರುಪಾವತಿ ದಿನಾಂಕದಲ್ಲಿ ಆತುರ

ಸಾಲದ ಮೊತ್ತದ ಹೊರತಾಗಿ EMI ಮೊತ್ತವು ಸಹ ನಿರ್ಣಾಯಕ
ಮಾಸಿಕ ವೆಚ್ಚಗಳು, ಭವಿಷ್ಯದ ಅಗತ್ಯಗಳು ಗಮನದಲ್ಲಿ ಇರಬೇಕು
ಆರಾಮವಾಗಿ ನಿಭಾಯಿಸಬಹುದಾದ EMI ಮೊತ್ತವನ್ನು ನಿರ್ಧರಿಸಿ
ಮಾಸಿಕ ಸಂಬಳದ 40 ಪ್ರತಿಶತ ಇಎಂಐ ಮೀರದಂತೆ ನೋಡಿಕೊಳ್ಳಬೇಕು
EMI ದಿನಾಂಕವನ್ನು ಆಯ್ಕೆಮಾಡುವಾಗ ಜಾಗರೂಕರಾಗಿರಿ
5 ಅಥವಾ 7 ನೇ ತಾರೀಖಿನಂದು EMI ದಿನಾಂಕ ನಿಗದಿಪಡಿಸುವುದು ಉತ್ತಮ
ಇದರಿಂದ ನೀವು EMI ಬೌನ್ಸ್ ಮತ್ತು ದಂಡಗಳನ್ನು ತಪ್ಪಿಸಿಕೊಳ್ಳಬಹುದು

6 ತಿಂಗಳ ಪ್ರಯಾಣದ ಬಳಿಕ ಕೊನೆಗೂ ಗುರಿ ತಲುಪಿದ 200 ಟನ್‌ ತೂಕ ಹೊತ್ತಿದ್ದ 308 ಚಕ್ರದ ಬಾಹುಬಲಿ ಟ್ರಕ್‌

Santosh Naik — Sat, 24 Oct 2026 22:11:59 +0530

ಲಕ್ನೋ (ಅ.24): ಬರೋಬ್ಬರಿ 200 ಟನ್ ತೂಕದ ಭಾರಿ ಯಂತ್ರವನ್ನು ಹೊತ್ತ 308 ಚಕ್ರಗಳ 'ಬಾಹುಬಲಿ ಟ್ರಕ್' (Bahubali Truck) ಸುದೀರ್ಘ 6 ತಿಂಗಳ ಪ್ರಯಾಣದ ನಂತರ ಕೊನೆಗೂ ತನ್ನ ಗುರಿಯಾದ ಉತ್ತರ ಪ್ರದೇಶದ ಲಖಿಂಪುರ್-ಖೇರಿ (Lakhimpur-Kheri) ಜಿಲ್ಲೆಯನ್ನು ತಲುಪಿದೆ. ಜಗತ್ತಿನ ಗಮನ ಸೆಳೆದ ಈ 'ಮಹಾಟ್ರಕ್' ಯುರೋಪ್ ಖಂಡದ ಬೆಲ್ಜಿಯಂ ದೇಶದಿಂದ ಹೊರಟು ಒಡಿಶಾ, ಜಾರ್ಖಂಡ್ ಮತ್ತು ಬಿಹಾರ ರಾಜ್ಯಗಳ ಮೂಲಕ ಸಾಗಿ ಯುಪಿಗೆ ಬಂದಿಳಿದಿದೆ. ದಿನಕ್ಕೆ ಕೇವಲ 10 ರಿಂದ 20 ಕಿಲೋಮೀಟರ್‌ಗಳಷ್ಟು ದೂರವನ್ನು ಮಾತ್ರ ಕ್ರಮಿಸುತ್ತಿದ್ದ ಈ ವಾಹನವು, ಗಂಟೆಗೆ ಸರಾಸರಿ 4 ರಿಂದ 5 ಕಿಲೋಮೀಟರ್ ವೇಗದಲ್ಲಿ ಸಾಗುತ್ತಿತ್ತು. ಹೋದಲ್ಲೆಲ್ಲಾ ಈ ರಾಕ್ಷಸ ವಾಹನವನ್ನು ನೋಡಲು ರಸ್ತೆಗಳ ಇಕ್ಕೆಲಗಳಲ್ಲಿ ಜನಸಾಗರವೇ ಹರಿದುಬರುತ್ತಿತ್ತು.

ಏನಿದು ಯಂತ್ರ? ಎಲ್ಲೆಲ್ಲಿಂದ ಸಾಗಿಬಂತು?

ಉತ್ತರ ಪ್ರದೇಶದ ಲಖಿಂಪುರ್-ಖೇರಿ ಜಿಲ್ಲೆಯ ಕುಂಭಿ ಎನ್ನುವಲ್ಲಿ ಸ್ಥಾಪನೆಯಾಗುತ್ತಿರುವ ಭಾರತದ ಮೊದಲ 'ಪಾಲಿಲ್ಯಾಕ್ಟಿಕ್ ಆಸಿಡ್' (Polylactic Acid) ಆಧಾರಿತ ಬಯೋಪ್ಲಾಸ್ಟಿಕ್ ತಯಾರಿಕಾ ಘಟಕಕ್ಕಾಗಿ ಬೆಲ್ಜಿಯಂನಿಂದ ಈ 200 ಟನ್ ತೂಕದ ಬೃಹತ್ 'ವ್ಯಾಕ್ಯೂಮ್ ಬಾಯ್ಲರ್' (Vacuum Boiler) ಅನ್ನು ತರಿಸಲಾಗಿದೆ. ಈ ಯಂತ್ರವು ಕಳೆದ ಮೇ ತಿಂಗಳಿನಲ್ಲಿ ಬೆಲ್ಜಿಯಂನಿಂದ ಸಮುದ್ರ ಮಾರ್ಗವಾಗಿ ಒಡಿಶಾದ 'ಪ್ಯಾರಾದೀಪ್' ಬಂದರಿಗೆ (Paradip Port) ತಲುಪಿತ್ತು. ಅಲ್ಲಿಂದ ಇದನ್ನು ರಸ್ತೆ ಮಾರ್ಗವಾಗಿ ಸಾಗಿಸಲು ಅತ್ಯಾಧುನಿಕ ಹೈಡ್ರಾಲಿಕ್ ಮಲ್ಟಿ-ಆಕ್ಸಲ್ ಟ್ರೇಲರ್‌ಗೆ (Hydraulic Multi-axle Trailer) ಲೋಡ್ ಮಾಡಲಾಗಿತ್ತು.

ದಾರಿಯುದ್ದಕ್ಕೂ ಹತ್ತಾರು ತಡೆಗಳು, ಸೇತುವೆ-ಸೈನ್ ಬೋರ್ಡ್ ತೆರವು!

ಜಾರ್ಖಂಡ್ ಮತ್ತು ಬಿಹಾರ ರಾಜ್ಯಗಳ ಮೂಲಕ ಸಾಗುವಾಗ ಅತ್ಯಂತ ಕಿರಿದಾದ ರಸ್ತೆ ತಿರುವುಗಳು, ಸೇತುವೆಗಳು, ವಿದ್ಯುತ್ ಕಂಬಗಳು ಹಾಗೂ ಮರಗಳ ಕಾರಣದಿಂದ ವಾಹನದ ಚಲನೆಗೆ ಭಾರಿ ಅಡಚಣೆಗಳು ಎದುರಾಗಿದ್ದವು. ಇದನ್ನು ನಿವಾರಿಸಲು ವಿವಿದ ಇಲಾಖೆಗಳ ತಜ್ಞರ ತಂಡವೇ ವಾಹನದ ಜೊತೆಗೆ ಸಾಗಿತ್ತು.

ವಾರಣಾಸಿ ಜಿಲ್ಲೆಯ ಒಂದು ಭಾಗದಲ್ಲಿ ಈ ಬೃಹತ್ ಟ್ರಕ್ ಸಾಗಲು ಜಾಗವಿಲ್ಲದೆ, ರಸ್ತೆಗೆ ಅಡ್ಡವಾಗಿದ್ದ ಪಾದಚಾರಿ ಮೇಲ್ಸೇತುವೆಯನ್ನೇ (Footbridge) ತೆರವುಗೊಳಿಸಲಾಯಿತು. ಇನ್ನು ಚಲನೆಯ ಸುಲಭಕ್ಕಾಗಿ ಆರಂಭದಲ್ಲಿದ್ದ 308 ಚಕ್ರಗಳ ಸಂಖ್ಯೆಯನ್ನು ನಂತರ 240 ಕ್ಕೆ ಇಳಿಸಲಾಯಿತು. ಮಾರ್ಗದಲ್ಲಿದ್ದ ನೂರಾರು ಸೈನ್ ಬೋರ್ಡ್‌ಗಳು ಹಾಗೂ ಸ್ವಾಗತ ಕಮಾನುಗಳನ್ನು ತೆರವುಗೊಳಿಸಿ ದಾರಿ ಮಾಡಿಕೊಡಲಾಯಿತು.

ಅಕ್ಟೋಬರ್ 20 ರಂದು ಈ ಟ್ರಕ್ ಲಖಿಂಪುರ್-ಖೇರಿ ಜಿಲ್ಲೆಯ ಗಡಿಯನ್ನು ಪ್ರವೇಶಿಸಿತು. ಹಾದಿಯುದ್ದಕ್ಕೂ ಈ ಅಪರೂಪದ ದೃಶ್ಯವನ್ನು ಕಣ್ಣುಂಬಿಕೊಳ್ಳಲು ಮತ್ತು ಮೊಬೈಲ್‌ಗಳಲ್ಲಿ ಫೋಟೋ, ವಿಡಿಯೋ ಸೆರೆಹಿಡಿಯಲು ನೂರಾರು ಜನರು ಮುಗಿಬಿದ್ದ ಕಾರಣ, ಜನರನ್ನು ಚದುರಿಸಲು ಹಲವೆಡೆ ಪೊಲೀಸರು ಮಧ್ಯಪ್ರವೇಶಿಸಬೇಕಾಯಿತು. ಸದ್ಯ ಈ 'ಬಾಹುಬಲಿ ಟ್ರಕ್'ನ ವಿಡಿಯೋಗಳು ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ವೈರಲ್ ಆಗಿವೆ.

₹3,000 ಕೋಟಿ ವೆಚ್ಚದ ಬಯೋಪ್ಲಾಸ್ಟಿಕ್ ಯೋಜನೆ

ಕುಂಭಿಯಲ್ಲಿ ನಿರ್ಮಾಣವಾಗುತ್ತಿರುವ ಈ ಬಯೋಪ್ಲಾಸ್ಟಿಕ್ ಪ್ಲಾಂಟ್‌ಗೆ ಈ ಬಾಯ್ಲರ್ ಅತ್ಯಂತ ಪ್ರಮುಖ ಭಾಗವಾಗಿದೆ. ಸುಮಾರು ₹3,000 ಕೋಟಿಗೂ ಅಧಿಕ ವೆಚ್ಚದ ಈ ಯೋಜನೆಯು ಕಬ್ಬಿನಿಂದ ಪಡೆಯುವ ಸಕ್ಕರೆಯನ್ನು ಬಳಸಿ 'ಪಾಲಿಲ್ಯಾಕ್ಟಿಕ್ ಆಸಿಡ್' (PLA) ಉತ್ಪಾದಿಸುವ ಗುರಿಯನ್ನು ಹೊಂದಿದೆ. ಈ ಪರಿಸರ ಸ್ನೇಹಿ ವಸ್ತುವಿನಿಂದ ಮರುಬಳಕೆ ಮಾಡಬಹುದಾದ ಪ್ಲಾಸ್ಟಿಕ್ ಕಪ್‌ಗಳು, ಟ್ರೇಗಳು, ಪ್ಯಾಕೇಜಿಂಗ್ ಸಾಮಗ್ರಿಗಳು ಹಾಗೂ ಇತರ ದೈನಂದಿನ ವಸ್ತುಗಳನ್ನು ತಯಾರಿಸಬಹುದಾಗಿದೆ.

ಡಾರ್ಕ್‌ ಚಾಕೊಲೇಟ್‌ ಸಿಕ್ತು ಅಂತಾ ಕಣ್ಮುಚ್ಚಿ ಬಾಯಿಗೆ ಹಾಕಿದ್ರೆ ಅಷ್ಟೇ ಕತೆ, ಚೂರು ಯಾಮಾರಿದ್ರೂ ಜೀವಕ್ಕೆ ಕಾದಿದೆ ಅಪಾಯ

Ganesh Mabla Gowda — Sat, 24 Oct 2026 20:20:27 +0530

ನವದೆಹಲಿ: ಡಾರ್ಕ್‌ ಚಾಕೊಲೇಟ್‌ ಪ್ರಿಯರಿಗೆ ಆಘಾತಕಾರಿ ಸುದ್ದಿಯೊಂದು ಬಂದಿದೆ. ಡಾರ್ಕ್‌ ಚಾಕೊಲೇಟ್‌ ಅಂದಕೂಡಲೇ ಕೆಲವರ ಬಾಯಲ್ಲಿ ನೀರು ಬರುತ್ತೆ. ಹೀಗೇ ಬಾಯಲ್ಲಿ ನೀರು ತರಿಸುವ ಚಾಕೊಲೇಟ್‌ ನಿಮ್ಮ ಆರೋಗ್ಯಕ್ಕೆ ಸುರಕ್ಷಿತವಾಗಿದೆಯಾ ಎಂಬ ಪ್ರಶ್ನೆ ಮತ್ತೊಮ್ಮೆ ಶುರುವಾಗಿದೆ. ಅಸಲಿಗೆ ಆಗಿದ್ದೇನು?

ಅಮೂಲ್.‌ ದೇಶದ ಪ್ರಸಿದ್ಧ ಡೈರಿ ಬ್ರಾಂಡ್‌ ಅಮೂಲ್!‌ ಈ ಅಮೂಲ್‌ಗೆ ಸರಿಸಾಟಿ ಆಗಿರುವ ಮತ್ತೊಂದು ಬ್ರಾಂಡ್‌ ಇನ್ನೂ ಇಲ್ಲ. ಹೀಗಿರುವಾಗ ಅಮೂಲನ್‌ನ ಶುದ್ಧತೆ ಮತ್ತು ಗುಣಮಟ್ಟದ ಬಗ್ಗೆ ಮತ್ತೊಮ್ಮೆ ಪ್ರಶ್ನೆ ಉದ್ಭವಿಸಿದೆ. ಹಿಮಾಚಲ ಪ್ರದೇಶದ ಶಿಮ್ಲಾದ ಗ್ರಾಹಕರೊಬ್ಬರು ಡಾರ್ಕ್‌ ಚಾಕೊಲೇಟ್‌ ಖರೀದಿಸಿ ಆಘಾತಕ್ಕೆ ಒಳಗಾಗಿದ್ದಾರೆ. ಪ್ರಸಿದ್ಧ ಬ್ರ್ಯಾಂಡ್‌ನ ಚಾಕೊಲೇಟ್‌ ಒಳಗೆ ಹುಳುಗಳು ಓಡಾಡುತ್ತಿರೋದನ್ನ ನೋಡಿರೋದಾಗಿ ದೂರಿದ್ದಾರೆ. ಬೆನ್ನಲ್ಲೇ.. ಮಕ್ಕಳ ಆರೋಗ್ಯ ಮತ್ತು ಆಹಾರ ಉತ್ಪನ್ನಗಳ ಸುರಕ್ಷತೆಯ ಬಗ್ಗೆ ಪೋಷಕರು ಮತ್ತು ಸಾರ್ವಜನಿಕರಲ್ಲಿ ಕಳವಳ ಶುರುವಾಗಿದೆ. ಜೊತೆಗೆ ಪ್ರಸಿದ್ಧ ಬ್ರಾಂಡ್‌ ವಿರುದ್ಧ ಆಕ್ರೋಶವನ್ನು ಹೊರಹಾಕಿದೆ. ಮಕ್ಕಳಿಗೆ ಅದು ಹೇಗಿದೆ ನೋಡದೇ ನೇರವಾಗಿ ನೀಡಿದರೆ ಏನು ಕತೆ ಎಂಬ ಪ್ರಶ್ನೆಯೂ ಎದ್ದಿದೆ. ಜೊತೆಗೆ ಜನಪ್ರಿಯ ಬ್ರಾಂಡ್‌ ಒಂದು ಇಷ್ಟು ಕಳಪೆಗೆ ಇಳಿಯಾ ಎಂದು ಗ್ರಾಹಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಏನಿದು ಪ್ರಕರಣ?

ಸಂದೀಪ್ ಶರ್ಮಾ, ನ್ಯೂ ಶಿಮ್ಲಾ ನಿವಾಸಿ. ಇವರು ಅಕ್ಟೋಬರ್ 17, 2026 ರಂದು ಹಿಮಾಚಲ ಪ್ರದೇಶದ ಉನಾ ಜಿಲ್ಲೆಯ ಅಂಗಡಿಯಿಂದ 40 ಗ್ರಾಂ ತೂಕದ ಅಮುಲ್ ಡಾರ್ಕ್ ಫ್ರೂಟ್ ಅಂಡ್ ನಟ್ ಚಾಕೊಲೇಟ್ ಖರೀದಿಸಿದ್ದರಂತೆ.. ಖರೀದಿ ಬಳಿಕ ಶಿಮ್ಲಾಗೆ ಹಿಂತಿರುಗಿದ್ದರು. ಮನೆಗೆ ಬಂದು ಚಾಕೊಲೇಟ್ ಪ್ಯಾಕೆಟ್ ತೆರೆದಾಗ.. ಒಳಗೆ ಜೀವಂತ ಕೀಟಗಳು ತೆವಳುತ್ತಿರುವುದು ಕಂಡುಬಂದಿದೆ.. ಈ ದೃಶ್ಯ ನೋಡಿ ನನ್ನ ಇಡೀ ಕುಟುಂಬ ಆಘಾತಕ್ಕೆ ಒಳಗಾಗಿದೆ ಎಂದು ದೂರಿದ್ದಾರೆ..

ಇನ್ನು ಆ ಚಾಕೊಲೇಟ್‌ಗೆ ಎಕ್ಸ್‌ಪೈರಿ ಕೂಡ ಆಗಿರಲಿಲ್ಲ. ಅದರ ಎಕ್ಸ್‌ಪೈರಿ ಡೇಟ್‌ 2027 ಆಗಿತ್ತು. ಹೀಗಿದ್ದೂ ಚಾಕೊಲೇಟ್‌ ಒಳಗೆ ಹುಳುಗಳು ಹೇಗೆ ಆದವು. ಅದರ ಗುಣಮಟ್ಟ ಮತ್ತು ಪ್ಯಾಕಿಂಗ್‌ ಮೇಲೆ ಅನುಮಾನ ವ್ಯಕ್ತವಾಗಿದೆ. ಅಲ್ಲದೇ ಪ್ರಸಿದ್ಧ ಅಮೂಲ್‌ ಬ್ರಾಂಡ್‌ ತನ್ನ ಗುಣಮಟ್ಟವನ್ನು ಕಳೆದುಕೊಳ್ಳುತ್ತಿದೆಯಾ ಎಂಬ ಅನುಮಾನ ಮೂಡಿದೆ. ಹುಳು ಪತ್ತೆ ಆಗಿರೋದನ್ನು ಗಂಭೀರವಾಗಿ ಪರಿಗಣಿಸಿರುವ ಸಂದೀಪ್‌ ಶರ್ಮಾ, ಪ್ರಕರಣವನ್ನು ಅಲ್ಲಿಗೆ ನಿಲ್ಲಿಸಲಿಲ್ಲ.

ಗ್ರಾಹಕರ ಸುರಕ್ಷತೆಯನ್ನು ಇಟ್ಟುಕೊಂಡು ಅಮೂಲ್‌ ಗ್ರಾಹಕರ ಸೇವೆಗೆ ದೂರು ನೀಡಿದ್ದಾರೆ. ಕಂಪನಿಯು ಚಾಕೊಲೇಟ್‌ ವಿಚಾರದಲ್ಲಿ ನಿರ್ಲಕ್ಷ್ಯ ಮಾಡಿದಂತೆ. ಈ ಬಗ್ಗೆ ಸೂಕ್ತ ತನಿಖೆ ನಡೆಸಿ ಕ್ರಮ ತೆಗೆದುಕೊಳ್ಳಿ ಎಂದು ದೂರಿನಲ್ಲಿ ಉಲ್ಲೇಖಿಸಿದ್ದಾರೆ. ಅಷ್ಟೇ ಅಲ್ಲದೇ.. ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ ಮತ್ತು ಆಡಳಿತಕ್ಕೆ ಮನವಿ ಮಾಡಿದ್ದಾರೆ. FSSAI ಪ್ರಸಿದ್ಧ ಡೈರಿ ಬ್ರಾಂಡ್‌ ವಿರುದ್ಧ ಯಾವ ರೀತಿ ಕ್ರಮ ತೆಗೆದುಕೊಳ್ಳುತ್ತದೆ ಅನ್ನೋದು ತೀವ್ರ ಕುತೂಹಲ ಮೂಡಿಸಿದೆ.

Rahul protest: ನ.01ರ ರಾಹುಲ್ ಪ್ರತಿಭಟನೆಗೆ ಬಿಗ್ ಟ್ವಿಸ್ಟ್; ಬಿಜೆಪಿ ಹೂಡಿದ ಬ್ರಹ್ಮಾಸ್ತ್ರಕ್ಕೆ 'ಕೈ' ಪಡೆ ವಿಲವಿಲ

Bhimasi M Koleppanavar — Sat, 24 Oct 2026 19:00:46 +0530

ಬೆಂಗಳೂರು: ನವೆಂಬರ್ 1 ರಂದು ದೆಹಲಿಯ ರಾಮಲೀಲಾ ಮೈದಾನದಲ್ಲಿ ಕಾಂಗ್ರೆಸ್ ಬೃಹತ್ ರ್ಯಾಲಿ ನಡೆಸಲು ನಿರ್ಧರಿಸಿರುವ ಬೆನ್ನಲ್ಲೇ, ಈ ಪ್ರತಿಭಟನೆಗೆ ತೀವ್ರ ರಾಜಕೀಯ ತಿರುವು ಸಿಕ್ಕಿದೆ. 'ಚುನಾವಣಾ ಅಕ್ರಮ' ಹಾಗೂ 'ಮತ ಕಳ್ಳತನ' ಆರೋಪಿಸಿ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ಅವರ ರಾಜೀನಾಮೆಗೆ ಆಗ್ರಹಿಸಿ ಇಂಡಿಯಾ ಮೈತ್ರಿಕೂಟದ ಪರವಾಗಿ ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಈ ರ್ಯಾಲಿಗೆ ಕರೆ ನೀಡಿದ್ದರು. ಆದರೆ, ಈ ಪ್ರತಿಭಟನೆಯ ದಿನಾಂಕವನ್ನೇ ಅಸ್ತ್ರವಾಗಿಸಿಕೊಂಡಿರುವ ಬಿಜೆಪಿ, ಕಾಂಗ್ರೆಸ್ ವಿರುದ್ಧ '1984ರ ಸಿಖ್ ಹ*ಕಾಂಡ'ದ ಬ್ರಹ್ಮಾಸ್ತ್ರ ಪ್ರಯೋಗಿಸಿದ್ದು, ಕೈ ಪಡೆ ತೀವ್ರ ಇರಸುಮುರುಸಿಗೆ ಈಡಾಗಿದೆ.

ಸಿಖ್ಖರ ಗಾಯಕ್ಕೆ ಉಪ್ಪು ಸವರುವ ಯತ್ನ; ಬಿಜೆಪಿ ವಾಗ್ದಾಳಿ!

ನವೆಂಬರ್ 1 ರ ದಿನಾಂಕವನ್ನು ಕಾಂಗ್ರೆಸ್ ಉದ್ದೇಶಪೂರ್ವಕವಾಗಿ ಆಯ್ಕೆ ಮಾಡಿಕೊಂಡಿದೆ ಎಂದು ಬಿಜೆಪಿ ನಾಯಕ ಹಾಗೂ ವಕ್ತಾರ ರವಿಶಂಕರ್ ಪ್ರಸಾದ್ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ನವೆಂಬರ್ 1 ಸಿಖ್ ಸಮುದಾಯದ ಆಳವಾದ ಗಾಯಗಳಿಗೆ ಕಾರಣವಾದ ಭೀಕರ ದಿನ. ಅಂದು ದೆಹಲಿಯಲ್ಲಿ ಗಲಭೆ ಎಬ್ಬಿಸುವ ಮೂಲಕ ರಾಹುಲ್ ಗಾಂಧಿ ಸಿಖ್ಖರ ಗಾಯಗಳಿಗೆ ಉಪ್ಪು ಸವರಲು ಹೊರಟಿದ್ದೀರಾ? ಈ ದಿನದಂದೇ ರ್ಯಾಲಿ ನಡೆಸಲು ಏಕಿಷ್ಟು ಒತ್ತಾಯ ಮಾಡುತ್ತಿದ್ದೀರಿ? ಇದರ ಮೂಲಕ ಯಾವ ಅವ್ಯವಸ್ಥೆ ಹಾಗೂ ಅರಾಜಕತೆಯನ್ನು ಸೃಷ್ಟಿಸಲು ಹೊರಟಿದ್ದೀರಿ? ಎಂದು ಅವರು ಕಟುವಾಗಿ ಪ್ರಶ್ನಿಸಿದ್ದಾರೆ.

ದೀಪಾವಳಿ ಸೀಸನ್‌; ವ್ಯಾಪಾರಿಗಳ ವಿರೋಧ!

ಒಂದೆಡೆ ದೀಪಾವಳಿ ಹಾಗೂ ಧಂತೇರಸ್‌ ಹಬ್ಬದ ಸನ್ನಿಹಿತದಲ್ಲೇ ಈ ಬೃಹತ್ ರ್‍ಯಾಲಿ ನಡೆಸುತ್ತಿರುವುದರಿಂದ ತಮ್ಮ ವ್ಯಾಪಾರ-ವಹಿವಾಟಿಗೆ ತೀವ್ರ ತೋಂದರೆಯಾಗಲಿದೆ ಎಂದು ದೆಹಲಿ ವ್ಯಾಪಾರಿಗಳು ಪ್ರತಿಭಟನೆಯನ್ನು ಮುಂದೂಡುವಂತೆ ಮನವಿ ಮಾಡಿದ್ದಾರೆ. ಇದರ ಬೆನ್ನಲ್ಲೇ ಬಿಜೆಪಿ ಬಿಜೆಪಿ 1984ರ ಸಿಖ್ ವಿರೋಧಿ ಹಿಂಸಾಚಾರದ ಆಂಗಲ್ ತಂದಿರುವುದು ಕಾಂಗ್ರೆಸ್‌ಗೆ ನುಂಗಲಾರದ ಬಿಸಿ ತುಪ್ಪವಾಗಿ ಪರಿಣಮಿಸಿದೆ.

ಏನಿದು ನವೆಂಬರ್ 1 ರ ಭೀಕರ ಇತಿಹಾಸ?

ಅಕ್ಟೋಬರ್ 31, 1984 ರಂದು ಆಗಿನ ಪ್ರಧಾನಿ ಇಂದಿರಾ ಗಾಂಧಿ ಅವರ ಹ*ಯ ನಂತರ, ನವೆಂಬರ್ 1 ರಿಂದ ದೆಹಲಿ ಸೇರಿ ದೇಶಾದ್ಯಂತ ಸಿಖ್ಖರ ವಿರುದ್ಧ ಭೀಕರ ಹಿಂಸಾಚಾರ ಭುಗಿಲೆದ್ದಿತ್ತು. ನ.01 ಮತ್ತು 2 ರಂದು ನಡೆದ ಅಮಾನವೀಯ ದಾಳಿಗಳಲ್ಲಿ ಸಿಖ್ಖರ ಮನೆ, ಅಂಗಡಿಗಳನ್ನು ದೋಚಿ, ಜನರನ್ನು ಮನೆಗಳಿಂದ ಹೊರಗೆಳೆದು ಅಮಾನವೀಯವಾಗಿ ನಡೆಸಿಕೊಳ್ಳಲಾಯಿತು. ಕೇಂದ್ರ ಗೃಹ ಸಚಿವಾಲಯದ ಅಧಿಕೃತ ಅಂಕಿಅಂಶಗಳ ಪ್ರಕಾರ ಈ ಹಿಂಸಾಚಾರದಲ್ಲಿ ದೇಶಾದ್ಯಂತ 3,325 ಜನರು ದಾರುಣವಾಗಿ ಹತ್ಯೆಗೊಳಗಾಗಿದ್ದರು.

ನಾನಾವತಿ ಆಯೋಗದ ವರದಿ ಮತ್ತು ರಾಜಕೀಯ ತಾಪತ್ರಯ!

ಈ ಹಿಂಸಾಚಾರದ ತನಿಖೆಗೆ ರಚನೆಯಾಗಿದ್ದ ನ್ಯಾಯಮೂರ್ತಿ ಜಿ.ಟಿ. ನಾನಾವತಿ ಆಯೋಗವು 2005 ರಲ್ಲಿ ಸಲ್ಲಿಸಿದ ವರದಿಯಲ್ಲಿ, ಸಿಖ್ ವಿರೋಧಿ ದಂಗೆಯಲ್ಲಿ ಸ್ಥಳೀಯ ನಾಯಕರು ಹಾಗೂ ಕೆಲವು ಕಾಂಗ್ರೆಸ್ ಕಾರ್ಯಕರ್ತರ ಪಾತ್ರವಿತ್ತು ಎಂದು ಗಂಭೀರ ಆರೋಪ ಮಾಡಿತ್ತು. ಹೀಗಿರುವಾಗ, ಅದೇ ನವೆಂಬರ್ 1 ರಂದು ಕಾಂಗ್ರೆಸ್ ರ್ಯಾಲಿ ಹಮ್ಮಿಕೊಂಡಿರುವುದು ಸಿಖ್ ಸಮುದಾಯದ ಭಾವನೆಗಳನ್ನು ಬಗೆಯುವ ಯತ್ನ ಎಂದು ಬಿಜೆಪಿ ಆರೋಪಿಸಿದೆ.

ಬಿಜೆಪಿಯ ಮಹಾ ತಿರಗೇಟು!

ಚುನಾವಣಾ ಆಯೋಗದ ವಿರುದ್ಧ ದಾಳಿ ನಡೆಸಿ ಕೇಂದ್ರ ಸರ್ಕಾರವನ್ನು ಇಕ್ಕಟ್ಟಿಗೆ ಸಿಲುಕಿಸಲು ಪ್ಲಾನ್ ಮಾಡಿದ್ದ ರಾಹುಲ್ ಗಾಂಧಿಗೆ, ಬಿಜೆಪಿ ಈಗ 1984ರ ಇತಿಹಾಸದ ಕನ್ನಡಿ ಹಿಡಿದು ತಿರುಗೇಟು ನೀಡಿದೆ. ವ್ಯಾಪಾರಿಗಳ ಅಸಮಾಧಾನ ಮತ್ತು ಸಿಖ್ ಸಮುದಾಯದ ಭಾವನಾತ್ಮಕ ವಿಚಾರ ಮುನ್ನೆಲೆಗೆ ಬಂದಿರುವುದರಿಂದ ನವೆಂಬರ್ 1 ರ ರ್ಯಾಲಿಯ ಸುತ್ತ ರಾಜಕೀಯ ಕಾವು ತೀವ್ರಗೊಂಡಿದೆ.

ನೂತನ ರಾಜ್ಯಪಾಲರಾಗಿ ಅಧಿಕಾರ ಸ್ವೀಕರಿಸುತ್ತಲೇ ಮಾಂಸಾಹಾರ ಬ್ಯಾನ್? ಭಾರಿ ವಿವಾದ- ರಾಜಭವನ ಹೇಳಿದ್ದೇನು

Suchethana D — Sat, 24 Oct 2026 17:17:51 +0530

ತ್ರಿವೇಂದ್ರಂ: ಕೇರಳಂನ ಹೊಸ ರಾಜ್ಯಪಾಲರು ಅಧಿಕಾರ ವಹಿಸಿಕೊಂಡ ಮೊದಲ ದಿನವೇ ವಿವಾದವನ್ನು ಹುಟ್ಟುಹಾಕಿದ್ದಾರೆ. ಓಂ ಪ್ರಕಾಶ್ ಮಾಥುರ್ ಅವರು ಕೇರಳದ 29 ನೇ ರಾಜ್ಯಪಾಲರಾಗಿ ಪ್ರಮಾಣವಚನ ಸ್ವೀಕರಿಸಿದ್ದಾರೆ. ಕಳೆದ ಶುಕ್ರವಾರ ಬೆಳಿಗ್ಗೆ ಮಾಥುರ್ ಅವರಿಗೆ ಕೇರಳಂ ಹೈಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿ ಸೌಮೆನ್ ಸೇನ್ ಪ್ರಮಾಣ ವಚನ ಬೋಧಿಸಿದರು. ಹೊಸ ರಾಜ್ಯಪಾಲರು ಅಧಿಕಾರ ಸ್ವೀಕರಿಸುತ್ತಿದ್ದಂತೆಯೇ ರಾಜಭವನದ ಅಡುಗೆಮನೆಯಲ್ಲಿ ಸಸ್ಯಾಹಾರಿ ಆಹಾರವನ್ನು ಮಾತ್ರ ತಯಾರಿಸಲು ಆದೇಶಿಸಿದ್ದಾರೆ ಎನ್ನುವ ಗಂಭೀರ ಆರೋಪ ಕೇಳಿಬಂದಿದೆ. ಈ ನಿರ್ಧಾರ ಆಡಳಿತಾರೂಢ ಕಾಂಗ್ರೆಸ್ ಮತ್ತು ವಿರೋಧ ಪಕ್ಷ ಸಿಪಿಎಂ ಎರಡೂ ವಿರೋಧಿಸಿದ್ದು, ಎರಡೂ ಪಕ್ಷಗಳು ರಾಜ್ಯಪಾಲರು ಸಂಘ ಪರಿವಾರದ ಕಾರ್ಯಸೂಚಿಯನ್ನು ಹೇರುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.

ಕೇರಳಂ ವೈವಿಧ್ಯಮಯ ಆಹಾರ ಸಂಸ್ಕೃತಿಯನ್ನು ಹೊಂದಿದೆ ಎಂದು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಕೆ.ಸಿ. ವೇಣುಗೋಪಾಲ್ ಹೇಳಿದರು. ಇದು ಕರಾವಳಿ ರಾಜ್ಯವಾಗಿದ್ದು, ಮೀನು ಇಲ್ಲಿ ಪ್ರಮುಖ ಆಹಾರವಾಗಿದೆ. ಈ ರಾಜ್ಯದ ಜನರು ತಾವು ಏನು ತಿನ್ನುತ್ತಾರೆ ಎಂಬುದನ್ನು ಆಯ್ಕೆ ಮಾಡಲು ಸ್ವತಂತ್ರರು ಎಂದು ಅವರು ಹೇಳಿದರು. ಕೇರಳದ ಜನರ ಆಹಾರ ಮತ್ತು ಪಾನೀಯಗಳ ಮೇಲೆ ಯಾವುದೇ ನಿರ್ಬಂಧಗಳನ್ನು ವಿಧಿಸಿದರೆ, ಕಾಂಗ್ರೆಸ್ ಅದನ್ನು ಸ್ವೀಕರಿಸುವುದಿಲ್ಲ ಎಂದು ಅವರು ಹೇಳಿದರು. ಇದು ಕೇರಳದ ಜನರ ಸಂಸ್ಕೃತಿಯ ಮೇಲಿನ ದಾಳಿ ಎಂದು ವೇಣುಗೋಪಾಲ್ ಹೇಳಿದರು. ವಿರೋಧ ಪಕ್ಷ ಸಿಪಿಐ(ಎಂ) ಕೂಡ ಈ ನಿರ್ಧಾರವನ್ನು ಟೀಕಿಸಿದೆ. ರಾಜ್ಯಪಾಲರು ಈಗ ಏನು ತಿನ್ನಬೇಕೆಂದು ನಿರ್ಧರಿಸುತ್ತಾರೆಯೇ ಎಂದು ಪ್ರಶ್ನಿಸಿದ್ದಾರೆ.

ಆರ್‌ಎಸ್‌ಎಸ್ ಕಾರ್ಯಸೂಚಿಯನ್ನು ಅನುಸರಿಸುವ ಆರೋಪಗಳು

ಇದು ಕೇಸರಿಕರಣದ ಆರಂಭ ಎಂದು ವೇಣುಗೋಪಾಲ್ ಹೇಳಿದರು. ಸಂಘ ಪರಿವಾರದ ಕಾರ್ಯಸೂಚಿಯನ್ನು ಈ ರೀತಿ ಅನುಸರಿಸಲಾಗುವುದು ಮತ್ತು ಕೇರಳದ ಜನರ ಸಂಸ್ಕೃತಿಯ ಮೇಲೆ ದಾಳಿ ಮಾಡಲಾಗುತ್ತದೆ ಎಂದು ಅವರು ಹೇಳಿದರು. ಸಂಸ್ಕೃತಿಯನ್ನು ರಕ್ಷಿಸುವುದು ರಾಜ್ಯಪಾಲರ ಜವಾಬ್ದಾರಿಯಾಗಿದೆ. ಅದನ್ನು ಬಿಟ್ಟು ಆಹಾರದ ಮೇಲೆ ನಿರ್ಬಂಧ ಹೇರುವುದಲ್ಲ ಎಂದು ಹೇಳಿದ್ದಾರೆ.

ಏತನ್ಮಧ್ಯೆ, ಯಾರೊಬ್ಬರ ಆಹಾರವನ್ನು ನಿರ್ಣಯಿಸುವುದು ಸಂವಿಧಾನಕ್ಕೆ ವಿರುದ್ಧವಾಗಿದೆ ಮತ್ತು ಪ್ರತಿಯೊಬ್ಬ ವ್ಯಕ್ತಿಗೂ ತಮ್ಮದೇ ಆದ ಆಹಾರವನ್ನು ಆಯ್ಕೆ ಮಾಡುವ ಸ್ವಾತಂತ್ರ್ಯವಿದೆ ಎಂದು ರಾಜ್ಯ ಗೃಹ ಸಚಿವ ರಮೇಶ್ ಚೆನ್ನಿತ್ತಲ ಹೇಳಿದ್ದಾರೆ. ಭಾರತವು ಜನರಿಗೆ ಪ್ರಜಾಪ್ರಭುತ್ವ ಹಕ್ಕುಗಳನ್ನು ಹೊಂದಿರುವ ದೇಶ ಎಂದು ಸಿಪಿಐ(ಎಂ) ರಾಜ್ಯ ಕಾರ್ಯದರ್ಶಿ ಎಂ.ವಿ. ಗೋವಿಂದನ್ ಹೇಳಿದರು. ಈಗ ಆಹಾರವನ್ನು ಸಹ ಕೋಮು ಅಸ್ತ್ರವಾಗಿ ಬಳಸಲಾಗುತ್ತಿದೆ ಎಂದು ಅವರು ಹೇಳಿದರು.

ಲೋಕಭವನದ ಸ್ಪಷ್ಟನೆ

ರಾಜ್ಯಪಾಲ ಮಾಥುರ್ ಕಟ್ಟುನಿಟ್ಟಿನ ಸಸ್ಯಾಹಾರಿ ಮತ್ತು ಅವರ ಊಟ ತಯಾರಿಸುವ ಅಡುಗೆಮನೆಯಲ್ಲಿ ಮಾಂಸಾಹಾರಿ ಆಹಾರವನ್ನು ತಯಾರಿಸಬಾರದು ಎಂದು ಆದೇಶಿಸಿದ್ದಾರೆಯೇ ವಿನಾ ಬೇರೆ ಕಡೆ ಅಲ್ಲ ಎಂದು ಲೋಕಭವನ ಸ್ಪಷ್ಟೀಕರಣ ನೀಡಿದೆ. ಇತರ ಉದ್ಯೋಗಿಗಳು ಬಯಸಿದರೆ ಮನೆಯಿಂದ ಆಹಾರವನ್ನು ತಂದು ಹೊರಗೆ ತಿನ್ನಬಹುದು. ಅವರ ಆಹಾರ ಸೇವನೆಯ ಮೇಲೆ ಯಾವುದೇ ನಿರ್ಬಂಧಗಳಿಲ್ಲ ಎಂದು ಮೂಲ ತಿಳಿಸಿದೆ.

ಇನ್‌ಸ್ಟಾದಲ್ಲಿ ಲೇಡಿ ಪೊಲೀಸ್‌ನ ಪಟಾಯಿಸಿ 24 ಲಕ್ಷ ದೋಚಿದ ಖದೀಮ.. ಮೋಸಕ್ಕಾಗಿ ಬೀಸಿದ ಆ ಬಲೆ ಹೇಗಿತ್ತು?

Ganesh Mabla Gowda — Sat, 24 Oct 2026 16:15:07 +0530

ನವದೆಹಲಿ: ದೆಹಲಿ ಕೇಂದ್ರಾ ಜಿಲ್ಲಾ ಸೈಬರ್ ಪೊಲೀಸರು ವಿಕ್ರಾಂತ್‌ ಕುಮಾರ್‌ ಅಲಿಯಾಸ್‌ ವಿಕ್ಕಿ ಎಂಬಾತನ ಬಂಧಿಸಿದ್ದಾರೆ. ಈತನ ವಿರುದ್ಧ ಲೇಡಿ ಪೊಲೀಸ್‌ ಒಬ್ಬರಿಂದ ಬರೋಬ್ಬರಿ 24 ಲಕ್ಷ ರೂಪಾಯಿ ಲಪಾಟಿಯಿಸಿದ ಆರೋಪ ಇದೆ.

ವಂಚನೆಯ ಬಲೆ ಬೀಸಿದ್ದು ಹೇಗೆ..?

ಇನ್‌ಸ್ಟಾಗ್ರಾಮ್‌ನಲ್ಲಿ ಫ್ರೆಂಡ್‌ ರಿಕ್ವೆಸ್ಟ್‌ ಕಳುಹಿಸಿದ್ದ. ಆತನ ಪ್ರೊಫೈಲ್‌ ನೋಡಿದ ಲೇಡಿ ಪೊಲೀಸ್‌ ಕಳೆದು ಹೋಗಿದ್ದಾರೆ. ಫ್ರೆಂಡ್‌ ರಿಕ್ವೆಸ್ಟ್‌ ಸ್ವೀಕರಿಸಿದ್ದಾರೆ. ನಂತರ ಸ್ನೇಹದ ಹೆಸರಲ್ಲಿ ಹಂತಹಂತವಾಗಿ ಮೆಸೇಜ್‌ಗಳನ್ನ ಮಾಡಲು ಶುರುಮಾಡಿದ್ದ. ನಾನೊಬ್ಬ ದೊಡ್ಡ ಬ್ಯುಸಿನೆಸ್‌ಮ್ಯಾನ್‌, ತನ್ನ ಬಳಿ ಐಷಾರಾಮಿ ಕಾರುಗಳಿವೆ ಎಂದೆಲ್ಲ ಬಿಲ್ಡಪ್‌ ಕೊಟ್ಟಿದ್ದ. ತನ್ನ ಬಿಲ್ಡಪ್‌ಗೆ ತಕ್ಕಂತೆ ಐಷಾರಾಮಿ ಕಾರುಗಳ ಮುಂದೆ ನಿಂತು ರೀಲ್ಸ್‌ಗಳನ್ನ ಮಾಡಿ ಸೋಶಿಯಲ್‌ ಮೀಡಿಯಾದಲ್ಲಿ ಶೇರ್‌ ಮಾಡುತ್ತಿದ್ದ. ಇದೆಲ್ಲ ಹೌದು ಅಂದ್ಕೊಂಡಿದ್ದ ಲೇಡಿ ಪೊಲೀಸ್‌, ಆತನ ಜೊತೆ ಮುಕ್ತವಾಗಿ ಮಾತನ್ನಾಡಲು ಶುರುಮಾಡಿದ್ದಾರೆ. ಅಷ್ಟೇ ಅಲ್ಲ.. ತನ್ನ ಹೆಸರು ಕ್ರಿಕೆಟ್‌ ಜಗತ್ತಿನಲ್ಲಿ ದೊಡ್ದದಾಗಿ ಇರೋದಾಗಿ ಹೇಳಿಕೊಂಡಿದ್ದಾನೆ ಎನ್ನಲಾಗಿದೆ.

ನಂತರ ಆ ಮಹಿಳಾ ಪೊಲೀಸ್‌ಗೆ ಹೂಡಿಕೆಯಿಂದ ಬರುವ ಲಾಭದ ಬಗ್ಗೆ ಕತೆ ಕಟ್ಟಿದ್ದಾನೆ. ಆತನನ್ನು ಸಂಪೂರ್ಣವಾಗಿ ನಂಬಿದ ಲೇಡಿ ಪೊಲೀಸ್‌ ಮೊದಲಿಗೆ ತನ್ನ ಉಳಿತಾಯದ ಹಣವನ್ನು ನೀಡಿದ್ದಾಳೆ. ನಂತರ ತನಗೆ ಪರಿಚಯಸ್ಥರಿಂದ ಸಾಲವಾಗಿ 12 ಲಕ್ಷ ರೂಪಾಯಿ ಸಾಲ ಪಡೆದುಕೊಂಡಿದ್ದಳು. ಕೊನೆಗೆ ಹಣ ವಾಪಸ್‌ ಕೇಳಿದಾಗ ಈತನ ಅಸಲಿ ಬಂಡವಾಳ ಗೊತ್ತಾಗಿದೆ. ಮೋಸ ಹೋದ ಲೇಡಿ ಪೊಲೀಸ್‌ ಪೊಲೀಸರಿಗೆ ದೂರು ನೀಡಿದ್ದಾರೆ..

ಪೊಲೀಸರ ತನಿಖೆಯಲ್ಲಿ 1x.com ಬೆಟ್ಟಿಂಗ್ ಪ್ಲಾಟ್‌ಫಾರ್ಮ್‌ಗೆ ಲಿಂಕ್ ಮಾಡಲಾದ ಅಕೌಂಟ್‌ಗೆ 8 ಲಕ್ಷ ಹಣ ವರ್ಗಾಯಿಸಿರೋದು ಗೊತ್ತಾಗಿದೆ. ವಹಿವಾಟುಗಳಿಗೆ ಒನ್‌ಎಕ್ಸ್ ಬೆಟ್ಟಿಂಗ್ ಅಪ್ಲಿಕೇಶನ್ ಖಾತೆ ಬಳಸಲಾಗಿದೆ. ಇನ್ನುಳಿದ ಹಣವನ್ನು ಏನು ಮಾಡಿದ್ದಾನೆ ಎನ್ನುವುದರ ಬಗ್ಗೆ ಯಾವುದೇ ಮಾಹಿತಿ ಇಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ. 2011ರಲ್ಲಿ ರಣ್‌ವೀರ್‌ ಸಿಂಗ್‌ ಅವರ ಲೇಡೀಸ್ ವರ್ಸಸ್ ರಿಕಿ ಬಹ್ಲ್ ಚಿತ್ರದ ಮಾದರಿಯಲ್ಲೇ ವಂಚನೆ ಮಾಡಲಾಗಿದೆ. ಆ ಸಿನಿಮಾದಲ್ಲಿ ರಣ್‌ವೀರ್‌ ಸಿಂಗ್‌ ಮಹಿಳೆಯರನ್ನ ಮೋಸಗೊಳಿಸುವ ವಂಚಕ ಪಾತ್ರವನ್ನ ನಿಭಾಯಿಸಿದ್ದರು. ಅದೇ ರೀತಿ ಈತ ಲೇಡಿ ಪೊಲೀಸ್‌ಗೆ ಮೋಸ ಮಾಡಿದ್ದಾನೆ ಎನ್ನಲಾಗುತ್ತಿದೆ.

ತನಿಖೆಯಲ್ಲಿ ಗೊತ್ತಾಗಿದ್ದೇನು?

ಪೊಲೀಸ್‌ ಅಧಿಕಾರಿಗಳು ಬುರಾರಿಯಲ್ಲಿ ಆರೋಪಿ ವಿಕ್ರಾಂತ್‌ ಕುಮಾರ್‌ನನ್ನು ಬಂಧಿಸಿದ್ದಾರೆ. ತನ್ನನ್ನು ಉದ್ಯಮಿ ಎಂದು ಬಿಂಬಿಸಿಕೊಂಡಿದ್ದಾನೆ. ಆತನ ವಯಸ್ಸು ಕೇವಲ 23. ಮಹಿಳಾ ಪೊಲೀಸ್‌ ಕಾನ್‌ಸ್ಟೇಬಲ್‌ ಬುಟ್ಟಿಯಲ್ಲಿ ಹಾಕಿಕೊಳ್ಳಲು ಮತ್ತೊ ಹೊರಗಡೆ ಕರೆದುಕೊಂಡು ಹೋಗಲು ಆತ 8 ಗಂಟೆಗಳ ಕಾಲ ಆತನ ಐಷಾರಾಮಿ ಕಾರನ್ನು ಬುಕ್‌ ಮಾಡಿದ್ದ. ಅವರಿಂದ ಹಣ ಕೇಳುವ ಮೊದಲು ಮದುವೆಯ ಭರವಸೆ ನೀಡಿದ್ದ. ಆತ ಮಹಿಳಾ ಪೊಲೀಸ್‌ ಅಧಿಕಾರಿಗಳನ್ನ ಯಾಮಾರಿಸಿರೋದು ಇದೇ ಮೊದಲಲ್ಲ. ಈತ, ಇದೇ ಲೇಡಿ ಪೊಲೀಸ್‌ನ ಬ್ಯಾಚ್‌ ಸುಮಾರು 20 ಮಹಿಳೆಯರನ್ನ ಗುರಿಯಾಗಿಸಿಕೊಂಡು ಕೃತ್ಯದಲ್ಲಿ ತೊಡಗಿದ್ದ. ಅನೇಕರು ಹೆದರಿ ದೂರು ನೀಡಿಲ್ಲ. ದೆಹಲಿಯ ವಿವಿಧ ಭಾಗಗಳಲ್ಲಿ ಸುಮಾರು ಐದು ಕೇಸ್‌ಗಳು ದಾಖಲಾಗಿವೆ ಎನ್ನಲಾಗಿದೆ.

SIR Protest Controversy: ಸಿಜೆಪಿ ಯಡವಟ್ಟು, ಬಿಜೆಪಿಗೆ ಲಾಟರಿ; ಹೊಸ ಗೇಮ್ ಪ್ಲ್ಯಾನ್‌ಲ್ಲಿ ರಾಹುಲ್!

Bhimasi M Koleppanavar — Sat, 24 Oct 2026 15:09:44 +0530

ನೀಟ್ ಹಗರಣದ ಹೋರಾಟದಲ್ಲಿ ಕಣ್ಣಮುಂದೆ ಸಮಸ್ಯೆ ಹಾಗೂ ಅದಕ್ಕೆ ಪೂರಕವಾದ ಬಲವಾದ ದಾಖಲೆಗಳಿದ್ದವು. ಹಾಗಾಗಿಯೇ ಆ ಹೋರಾಟ ತೀವ್ರ ಸ್ವರೂಪ ಪಡೆದುಕೊಂಡು ಆಡಳಿತಾರೂಢ ಬಿಜೆಪಿಯನ್ನು ತೀವ್ರ ಇರಸಮುರುಸಿಗೆ ಈಡುಮಾಡಿತ್ತು. ಆದರೆ, ಪ್ರಸ್ತುತ ನಡೆಯುತ್ತಿರುವ ಎಸ್‌ಐಆರ್ ವಿರೋಧಿ ಹೋರಾಟದಲ್ಲಿ ಯಾವುದೇ ನಿಖರ ದಾಖಲೆಗಳಿಲ್ಲದೇ ಕೇವಲ ಆರೋಪಗಳಷ್ಟೇ ಕೇಳಿಬರುತ್ತಿವೆ. ಇದರ ನಡುವೆ, ಹೋರಾಟಗಾರರ 'ಬಾಂಗ್ಲಾ ಮಾದರಿ' ಹಾಗೂ 'ರೆಜಿಮ್ ಚೇಂಜ್' (ಸರ್ಕಾರ ಬದಲಾವಣೆ) ಹೇಳಿಕೆಗಳು ಇಡೀ ಚಳವಳಿಯ ದಿಕ್ಕನ್ನೇ ಬದಲಿಸಿದ್ದು, ಇಷ್ಟು ದಿನ ಬ್ಯಾಕ್‌ಫುಟ್‌ನಲ್ಲಿದ್ದ ಬಿಜೆಪಿಗೆ ವರದಾನವಾಗಿ ಪರಿಣಮಿಸಿದೆ.

ಆಧಾರರಹಿತ ಆರೋಪ ಮತ್ತು ಎಡವಿದ ಸಿಜೆಪಿ!

ಎಸ್‌ಐಆರ್ ಹೋರಾಟದ ಮುಂಚೂಣಿಯಲ್ಲಿದ್ದ ನೇಹಾ ಬೋರಾ ಹಾಗೂ ಪ್ರಶಾಂತ್ ಭೂಷಣ್ ಅವರ ಹೇಳಿಕೆಗಳು ರಾಜಕೀಯ ವಲಯದಲ್ಲಿ ಭಾರೀ ಚರ್ಚೆ ಸೃಷ್ಟಿಸಿವೆ. 'ಭಾರತದಲ್ಲೂ ಬಾಂಗ್ಲಾದೇಶ ಮಾದರಿಯ ರಕ್ತಪಾತದ ಹೋರಾಟ ನಡೆಯಬೇಕು' ಹಾಗೂ 'ಸರ್ಕಾರವನ್ನು ಕಿತ್ತೊಗೆಯಬೇಕು' ಎಂಬ ರೀತಿಯ ಹೇಳಿಕೆಗಳು ಸಾರ್ವಜನಿಕರಲ್ಲಿ ಆತಂಕ ಮೂಡಿಸಿವೆ. ನೀಟ್ ವಿಷಯದಲ್ಲಿ ಬಿಜೆಪಿಯನ್ನು ಪ್ರತಿಪಕ್ಷಗಳು ಹಾಗೂ ಸಂಘಟನೆಗಳು ಕಟುವಾಗಿ ಪ್ರಶ್ನಿಸಿದ್ದವು. ಆದರೆ, ಎಸ್‌ಐಆರ್ ಹೋರಾಟದಲ್ಲಿ ಕೇವಲ ಆರೋಪಗಳಷ್ಟೇ ಇರುವುದು ಮತ್ತು ಹಿಂಸಾತ್ಮಕ ಹೋರಾಟದ ಸುಳಿವು ನೀಡಿರುವುದು ಸಿಜೆಪಿ ಸಂಘಟನೆಯನ್ನೇ ಇಕ್ಕಟ್ಟಿಗೆ ಸಿಲುಕಿಸಿದೆ. ಇದರಿಂದಾಗಿ ಆರಂಭದಲ್ಲಿ ಬೆಂಬಲ ನೀಡಿದ್ದ ಸಾಮಾನ್ಯ ಜನತೆ ಹಾಗೂ ಪ್ರಬುದ್ಧ ನಾಗರಿಕರು ಈಗ ಹೋರಾಟದಿಂದ ಹಿಂದೆ ಸರಿಯುತ್ತಿರುವುದು ಸ್ಪಷ್ಟವಾಗಿ ಕಂಡುಬರುತ್ತಿದೆ.

ಜಗತ್ತಿನ ದೊಡ್ಡ ಪ್ರಜಾಪ್ರಭುತ್ವಕ್ಕೆ ಬಾಂಗ್ಲಾ ಮಾದರಿ ಅಪ್ರಸ್ತುತ!

ಭಾರತವು ಬಲವಾದ ಸಂವಿಧಾನ ಹಾಗೂ ಸಮರ್ಪಣಾ ಮನೋಭಾವದ ನಾಯಕತ್ವವನ್ನು ಹೊಂದಿರುವ ಜಗತ್ತಿನ ಅತಿ ದೊಡ್ಡ ಪ್ರಜಾಪ್ರಭುತ್ವ ರಾಷ್ಟ್ರ. ಇಲ್ಲಿ ಜನಾದೇಶದ ಮೂಲಕ ಆಯ್ಕೆಯಾದ ಸರ್ಕಾರವನ್ನು ಬದಲಾಯಿಸಲು ಚುನಾವಣೆಗಳು ಹಾಗೂ ಸಂಸದೀಯ ವ್ಯವಸ್ಥೆಯಲ್ಲಿ 'ಅವಿಶ್ವಾಸ ನಿರ್ಣಯ' ದಂತಹ ಹಲವಾರು ಸಾಂವಿಧಾನಿಕ ಮಾರ್ಗಗಳಿವೆ. ಹೀಗಿರುವಾಗ, ಬಾಂಗ್ಲಾದೇಶದಲ್ಲಿ ನಡೆದಂತಹ ರಕ್ತಪಾತ ಹಾಗೂ ರಾಜಕೀಯ ಅಸ್ಥಿರತೆಯನ್ನು ಭಾರತದಲ್ಲೂ ಮರುಸೃಷ್ಟಿಸಲು ಯತ್ನಿಸಲಾಗುತ್ತಿದೆಯೇ ಎಂಬ ಅನುಮಾನ ಸಾರ್ವಜನಿಕರಲ್ಲಿ ಮೂಡಿದೆ.

ಪ್ರಶಾಂತ ಭೂಷಣ ಹೇಳಿಕೆಯ ಉದ್ದೇಶ!

ವಿದೇಶಿ ಧನಸಹಾಯ (ಫಂಡಿಂಗ್) ಹಾಗೂ ದೇಶವಿರೋಧಿ ಹೇಳಿಕೆಗಳ ಆರೋಪಗಳು ಕೇಳಿಬರುತ್ತಿದ್ದಂತೆಯೇ, ಪ್ರಶಾಂತ್ ಭೂಷಣ್ ಅವರು ತಮ್ಮ ಹೇಳಿಕೆಗೆ ಸ್ಪಷ್ಟನೆ ನೀಡಲು ಮುಂದಾದರಾದರೂ, ಅವರ ಮೂಲ ಉದ್ದೇಶ ಈಗಾಗಲೇ ಸ್ಪಷ್ಟವಾಗಿತ್ತು. ಬಾಂಗ್ಲಾ ವಿದ್ಯಾರ್ಥಿಗಳ ಹಿಂಸಾತ್ಮಕ ಹೋರಾಟಕ್ಕೂ, ಭಾರತದ ಪ್ರಜಾಸತ್ತಾತ್ಮಕ ಹೋರಾಟಕ್ಕೂ ಅಂತರಂಗದಲ್ಲೇ ಭಾರೀ ವ್ಯತ್ಯಾಸವಿದೆ. ಈ ಎಲ್ಲ ಬೆಳವಣಿಗೆಗಳು ಬಿಜೆಪಿಗೆ ಬಲವಾದ ರಾಜಕೀಯ ಅಸ್ತ್ರ ಒದಗಿಸಿಕೊಟ್ಟಿದ್ದು, ಸಿಜೆಪಿ ತಾನೇ ಮುಂಚೂಣಿಯಲ್ಲಿದ್ದ ಫ್ರಂಟ್ ಫುಟ್‌ನಿಂದ ಬ್ಯಾಕ್‌ಫುಟ್‌ಗೆ ಜಾರುವಂತೆ ಮಾಡಿದೆ.

ನ.01ರಂದು ರಾಹುಲ್ ಹೋರಾಟ!

ಈ ಹೋರಾಟದ ಸಂಪೂರ್ಣ ಕ್ರೆಡಿಟ್ ಹಾಗೂ ನಾಯಕತ್ವವನ್ನು ಸಿಜೆಪಿ ಪಡೆದುಕೊಂಡು, ಮುಖ್ಯವಾಹಿನಿಯ ರಾಜಕೀಯದಲ್ಲಿ ನೆಲೆ ಕಂಡುಕೊಳ್ಳಬಹುದು ಎಂಬ ಭೀತಿಯಲ್ಲಿದ್ದ ಕಾಂಗ್ರೆಸ್ ಪಕ್ಷಕ್ಕೆ ಈಗ ದಿಢೀರ್ ಸುವರ್ಣಾವಕಾಶ ಲಭಿಸಿದಂತಾಗಿದೆ. ಸಿಜೆಪಿ ಹಿನ್ನಡೆ ಅನುಭವಿಸಿ ಖಾಲಿ ಬಿದ್ದಿರುವ ಈ ರಾಜಕೀಯ ಹಾಗೂ ಚಳವಳಿಯ ಜಾಗವನ್ನು ತುಂಬಲು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಮಾಸ್ಟರ್ ಪ್ಲಾನ್ ರೂಪಿಸಿದ್ದಾರೆ. ನವೆಂಬರ್ 1 ರಂದು ರಾಹುಲ್ ಗಾಂಧಿ ಈ ಹೋರಾಟವನ್ನು ಕೊಂಡೊಯ್ಯಲು ನಿರ್ಧರಿಸಿದ್ದಾರೆ. ಉತ್ತರ ಭಾರತದಿಂದ ಹಿಡಿದು ಕೋಲ್ಕತಾ ಹಾಗೂ ಬೆಂಗಳೂರಿನವರೆಗೆ ಈ ಬೃಹತ್ ಹೋರಾಟವನ್ನು ವಿಸ್ತರಿಸಲು ಯೋಜನೆ ರೂಪಿಸಲಾಗಿದೆ. ಸಿಜೆಪಿಯ ಎಡವಟ್ಟಿನಿಂದ ಸೃಷ್ಟಿಯಾದ ಖಾಲಿತನವನ್ನು ಕಾಂಗ್ರೆಸ್ ಹೇಗೆ ತನ್ನ ರಾಜಕೀಯ ಲಾಭಕ್ಕಾಗಿ ಬಳಸಿಕೊಳ್ಳಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

ಬಿಜೆಪಿಗೆ ಎದುರಾಗಲಿದೆ ಹೊಸ ಸವಾಲು!

ಇತ್ತ, ಬಾಂಗ್ಲಾ ಮಾದರಿ ಹೇಳಿಕೆ ಹಾಗೂ ರೆಜಿಮ್ ಚೇಂಜ್ ಅಸ್ತ್ರಗಳನ್ನು ಬಳಸಿಕೊಂಡು ಸಿಜೆಪಿಯನ್ನು ರಕ್ಷಣಾತ್ಮಕ ಸ್ಥಿತಿಗೆ ತಳ್ಳಿದ ಬಿಜೆಪಿ, ತಾನು ಆಕ್ರಮಣಕಾರಿ ಫ್ರಂಟ್ ಫುಟ್‌ಗೆ ಬಂದಿದೆ. ಆದರೆ, ಕಾಂಗ್ರೆಸ್ ಹಾಗೂ ರಾಹುಲ್ ಗಾಂಧಿ ನವೆಂಬರ್ 1 ರಿಂದ ಪ್ರಾರಂಭಿಸಲಿರುವ ಈ ದೇಶವ್ಯಾಪಿ ಹೋರಾಟಕ್ಕೆ ಬಿಜೆಪಿ ಯಾವ ರೀತಿ ಪ್ರತಿತಂತ್ರ (ಟಕ್ಕರ್) ಹೂಡಲಿದೆ ಎಂಬುದು ಕುತೂಹಲ ಮೂಡಿಸಿದೆ. ಪ್ರಜಾಸತ್ತಾತ್ಮಕ ಹೋರಾಟದ ಹೊಸ ರೂಪ ಪಡೆದುಕೊಳ್ಳುತ್ತಿರುವ ಈ ವಿದ್ಯಮಾನದಲ್ಲಿ ಯಾರು ಮೇಲುಗೈ ಸಾಧಿಸಲಿದ್ದಾರೆ ಎಂಬುದು ಮುಂಬರುವ ದಿನಗಳಲ್ಲಿ ತೀರ್ಮಾನವಾಗಲಿದೆ.

ರೆಸ್ಟೋರೆಂಟ್ನಲ್ಲಿ ಮೊದಲ ಭೇಟಿ: Love At First Sight; ರಾಜೀವ್ ಗಾಂಧಿ-ಸೋನಿಯಾ ಲವ್ ಸ್ಟೋರಿ ಇದು

Suchethana D — Sat, 24 Oct 2026 14:00:23 +0530

ದೆಹಲಿ: ಜೀವನದಲ್ಲಿ ಕೆಲವು ಘಟನೆಗಳು ನಡೆಯುತ್ತವೆ, ಅವು ಕಾಲಕ್ರಮೇಣ ಮಸುಕಾಗುವ ಬದಲು, ಇನ್ನಷ್ಟು ಗಾಢವಾಗುತ್ತವೆ. ವರ್ಷಗಳ ನಂತರವೂ, ಅವರ ನೆನಪುಗಳು ಮುಖದಲ್ಲಿ ನಗುವನ್ನು ತರುತ್ತವೆ ಮತ್ತು ಹೃದಯವನ್ನು ಕಲಕುತ್ತವೆ. ಹಿರಿಯ ಕಾಂಗ್ರೆಸ್ ನಾಯಕಿ ಸೋನಿಯಾ ಗಾಂಧಿ ಅವರು ಪತಿ, ಮಾಜಿ ಪ್ರಧಾನಿ ರಾಜೀವ್ ಗಾಂಧಿಯವರೊಂದಿಗಿನ ತಮ್ಮ ಪ್ರೇಮಕಥೆಯಿಂದ ಅಂತಹ ಒಂದು ನೆನಪನ್ನು ಹಂಚಿಕೊಂಡಿದ್ದಾರೆ. ನವೆಂಬರ್ 10, 2026 ರಂದು ಬಿಡುಗಡೆಯಾಗಲಿರುವ ಅವರ ಮುಂಬರುವ ಆತ್ಮಚರಿತ್ರೆ 'ಬಿಲಾಂಗಿಂಗ್: ಎ ಜರ್ನಿ ಆಫ್ ಲವ್' ನ ಸ್ನೀಕ್-ಪೀಕ್‌ನಲ್ಲಿ ಅವರ ನೆನಪುಗಳು ಕಾಣಿಸಿಕೊಳ್ಳುತ್ತವೆ. ಅದಕ್ಕೂ ಮುನ್ನ ವಿಡಿಯೋ ಒಂದರಲ್ಲಿ ಸೋನಿಯಾ ಗಾಂಧಿ (Sonia Gandhi) ತಮ್ಮ ಮತ್ತು ರಾಜೀವ್ ಅವರ ಮೊದಲ ನೋಟದಲ್ಲಿಯೇ ನಡೆದ ಪ್ರೇಮ (Love At First Sight) ವಿಷಯವನ್ನು ಹಂಚಿಕೊಂಡಿದ್ದಾರೆ. ಇಂಗ್ಲೆಂಡ್‌ನ ಕೇಂಬ್ರಿಡ್ಜ್‌ನಲ್ಲಿರುವ ಒಂದು ಸಣ್ಣ ಗ್ರೀಕ್ ರೆಸ್ಟೋರೆಂಟ್‌ನಲ್ಲಿ ರಾಜೀವ್ ಗಾಂಧಿಯವರೊಂದಿಗಿನ ತಮ್ಮ ಮೊದಲ ಭೇಟಿಯನ್ನು ವಿವರಿಸಿದ್ದಾರೆ. ಇದು ಅವರ ಪ್ರೇಮಕಥೆ ಪ್ರಾರಂಭವಾದ ಸ್ಥಳ.

ಸೋನಿಯಾ ಗಾಂಧಿ ತಮ್ಮ ಪುಸ್ತಕ ಬಿಡುಗಡೆಗೆ ಮುಂಚಿತವಾಗಿ ಶೇರ್ ಮಾಡಿರುವ ಈ ವಿಡಿಯೋದಲ್ಲಿ, ಒಂದು ಸುಂದರವಾದ ಸಂದೇಶವನ್ನು ಸಹ ಹೇಳಿದ್ದಾರೆ. ಅದರಲ್ಲಿ ಅವರು, "ನನ್ನ ಪ್ರೇಮ ಪ್ರಯಾಣವು ಕೇಂಬ್ರಿಡ್ಜ್‌ನಲ್ಲಿರುವ ಒಂದು ಸಣ್ಣ ಗ್ರೀಕ್ ರೆಸ್ಟೋರೆಂಟ್‌ನಲ್ಲಿ ಪ್ರಾರಂಭವಾಯಿತು. ರಾಜೀವ್ ಮತ್ತು ನಾನು ಪ್ರೀತಿ, ನಗು ಮತ್ತು ನೆನಪುಗಳಿಂದ ತುಂಬಿದ ಜಗತ್ತನ್ನು ಸೃಷ್ಟಿಸಿದೆವು. ನವೆಂಬರ್ 10 ರಂದು, ನಾನು ಆ ಜಗತ್ತನ್ನು ನಿಮ್ಮೊಂದಿಗೆ ಹಂಚಿಕೊಳ್ಳುತ್ತೇನೆ" ಎಂದಿದ್ದಾರೆ. ವಿಡಿಯೋದಲ್ಲಿ, ಸೋನಿಯಾ ಗಾಂಧಿ ಅವರು ಇಂಗ್ಲೆಂಡ್‌ನಲ್ಲಿದ್ದ ಸಮಯವನ್ನು ನೆನಪಿಸಿಕೊಳ್ಳುತ್ತಾರೆ. ಅವರ ಪ್ರಕಾರ, ಇಂದಿನಷ್ಟು ರೆಸ್ಟೋರೆಂಟ್‌ಗಳು ಅಲ್ಲಿ ಇರಲಿಲ್ಲ. ಅವರು ಆಗಾಗ್ಗೆ ತಮ್ಮ ನೆಚ್ಚಿನ ಆಹಾರವನ್ನು ತಿನ್ನಲು ಸ್ಥಳವನ್ನು ಹುಡುಕುತ್ತಿದ್ದರು. ಇಟಾಲಿಯನ್ ಆಹಾರವನ್ನು ಇಷ್ಟಪಡುತ್ತಿದ್ದ ಸೋನಿಯಾ, ಕೊನೆಗೂ ಗ್ರೀಕ್ ರೆಸ್ಟೋರೆಂಟ್ ಅನ್ನು ಕಂಡುಕೊಂಡಿದ್ದರು. ಅಲ್ಲಿ ಯುರೋಪ್ ಮತ್ತು ಇಂಗ್ಲೆಂಡ್‌ನ ವಿದ್ಯಾರ್ಥಿಗಳು ಸೇರಿದಂತೆ ಅನೇಕ ವಿದ್ಯಾರ್ಥಿಗಳು ಆಗಾಗ್ಗೆ ರೆಸ್ಟೋರೆಂಟ್‌ಗೆ ಭೇಟಿ ನೀಡುತ್ತಿದ್ದರು.

ಮೊದಲ ಭೇಟಿ

ಈ ರೆಸ್ಟೋರೆಂಟ್‌ನಲ್ಲಿ ಅವರು ರಾಜೀವ್ ಗಾಂಧಿಯನ್ನು ಭೇಟಿಯಾದರು. ಪರಸ್ಪರ ಸ್ನೇಹಿತನೊಬ್ಬ ಅವರನ್ನು ಪರಿಚಯಿಸಿದನೆಂದು ಸೋನಿಯಾ ಹೇಳುತ್ತಾರೆ. ಅವರ ಮೊದಲ ಭೇಟಿಯ ನಂತರ ಸ್ನೇಹಕ್ಕೆ ತಿರುಗಿತು. ನಂತರ, ಪಾರ್ಟಿಗಳಿಗೆ ಹಾಜರಾಗುವುದು ಮತ್ತು ಸ್ನೇಹಿತರೊಂದಿಗೆ ಸಮಯ ಕಳೆಯುವಂತಹ ಚಟುವಟಿಕೆಗಳು ಅವರ ಸಂಬಂಧದ ಭಾಗವಾದವು. ತಮ್ಮ ನೆನಪುಗಳನ್ನು ಹಂಚಿಕೊಳ್ಳುತ್ತಾ, ಸೋನಿಯಾ ಗಾಂಧಿ ಅವರು, ರಾಜೀವ್ ಗಾಂಧಿಯವರ ವ್ಯಕ್ತಿತ್ವವು ಮೊದಲ ಭೇಟಿಯಿಂದಲೇ ತನ್ನನ್ನು ಪ್ರಭಾವಿಸಿತು ಎಂದಿದ್ದಾರೆ. ರಾಜೀವ್ ಅವರು ತಮ್ಮೊಂದಿಗೆ ಇರಲು ಬಯಸುವ ವ್ಯಕ್ತಿ ಎಂದು ಅವರು ತಕ್ಷಣವೇ ಅರಿತುಕೊಂಡೆ. ನಂತರ, ರಾಜೀವ್ ಅವರಿಗೂ ಅದೇ ರೀತಿ ಅನಿಸಿತು ಎಂದಿದ್ದಾರೆ. ರಾಜೀವ್ ಅವರ ಸೌಂದರ್ಯಕ್ಕಿಂತ ಹೆಚ್ಚಾಗಿ, ಅವರ ಸೌಮ್ಯ ಸ್ವಭಾವವು ನನ್ನ ಹೃದಯವನ್ನು ಗೆದ್ದಿತು ಎಂದು ಸೋನಿಯಾ ಹೇಳಿದ್ದಾರೆ.

ಸೌಂದರ್ಯವಂತರಷ್ಟೇ ಅಲ್ಲದೇ ಸ್ವಭಾವವೂ ಅಷ್ಟೇ ಮೃದು

ವಿಡಿಯೋದಲ್ಲಿ, ರಾಜೀವ್ ಗಾಂಧಿಯವರ ವ್ಯಕ್ತಿತ್ವವನ್ನು ಉಲ್ಲೇಖಿಸುತ್ತಾ, ಸೋನಿಯಾ ಗಾಂಧಿ ಅವರು, ರಾಜೀವ್ ಅತ್ಯಂತ ಸುಂದರರಾಗಿದ್ದರು, ಆದರೆ ನನ್ನನ್ನು ವಿಶೇಷವಾಗಿ ಪ್ರಭಾವಿಸಿದ ಮತ್ತೊಂದು ಗುಣವಿತ್ತು: ಅದು ಅವರ ಸೌಮ್ಯ ಮತ್ತು ನಿರಾಳ ಸ್ವಭಾವ ಎಂದು ಹೇಳಿದ್ದಾರೆ. ರಾಜೀವ್, ತಮ್ಮ ಮೊದಲ ಭೇಟಿಯಲ್ಲಿ ತುಂಬಾ ಸೌಮ್ಯವಾಗಿ ಕಾಣಿಸಿಕೊಂಡಿದ್ದರು. ಅವರ ಸೌಂದರ್ಯ, ಅವರ ಸೌಮ್ಯತೆಯೊಂದಿಗೆ, ಅವರ ವ್ಯಕ್ತಿತ್ವದಲ್ಲಿ ಸ್ಪಷ್ಟವಾಗಿತ್ತು. ರಾಜೀವ್ ಅವರ ಈ ಸ್ವಭಾವವು ನನ್ನ ಹೃದಯವನ್ನು ಮುಟ್ಟಿತು ಮತ್ತು ಆ ಮೊದಲ ಭೇಟಿಯನ್ನು ನಾನು ಎಂದಿಗೂ ಮರೆಯುವುದಿಲ್ಲ ಎಂದು ವಿಡಿಯೋದಲ್ಲಿ ಸೋನಿಯಾ ಗಾಂಧಿ ನೆನಪಿಸಿಕೊಂಡಿದ್ದಾರೆ. ಅನೇಕ ಸಂಖ್ಯೆಯ ವಿದ್ಯಾರ್ಥಿಗಳು ಭಾಗವಹಿಸಿದ್ದ ಹ್ಯಾಲೋವೀನ್ ಪಾರ್ಟಿಯನ್ನು ಸಹ ಅವರು ನೆನಪಿಸಿಕೊಂಡಿದ್ದಾರೆ. ಆ ಹೊತ್ತಿಗೆ, ಅವರ ಸ್ನೇಹ ಅರಳಲು ಪ್ರಾರಂಭಿಸಿತ್ತು. ಸ್ನೇಹಿತರೊಂದಿಗಿನ ಸಭೆಗಳು ಮತ್ತು ಒಟ್ಟಿಗೆ ಕಳೆದ ಕ್ಷಣಗಳು ನಂತರ ಜೀವಮಾನದ ಒಡನಾಟವಾಗಿ ಅರಳುವ ಬಂಧವನ್ನು ರೂಪಿಸುತ್ತಿದ್ದವು.

ಕೇಂಬ್ರಿಡ್ಜ್‌ನಲ್ಲಿ ಬೇರೂರಿದೆ

ಸೋನಿಯಾ ಗಾಂಧಿ ಮತ್ತು ರಾಜೀವ್ ಗಾಂಧಿಯವರ ಪ್ರೇಮಕಥೆಯ ಒಂದು ಪ್ರಮುಖ ಭಾಗವು ಕೇಂಬ್ರಿಡ್ಜ್‌ನಲ್ಲಿ ಬೇರೂರಿದೆ. ಆ ಸಮಯದಲ್ಲಿ ರಾಜೀವ್ ಗಾಂಧಿ ಇಂಗ್ಲೆಂಡ್‌ನಲ್ಲಿ ಓದುತ್ತಿದ್ದರು, ಆದರೆ ಸೋನಿಯಾ ಗಾಂಧಿ ಕೂಡ ತಮ್ಮ ಅಧ್ಯಯನಕ್ಕಾಗಿ ಅಲ್ಲಿಗೆ ಬಂದರು. ಈ ಸಮಯದಲ್ಲಿ ಅವರು ಭೇಟಿಯಾದರು ಮತ್ತು ಅವರ ಸಂಬಂಧ ಕ್ರಮೇಣ ಗಾಢವಾಯಿತು. ಅವರು 1968 ರಲ್ಲಿ ವಿವಾಹವಾದರು. ಇದರ ನಂತರ, ಸೋನಿಯಾ ಗಾಂಧಿ ಭಾರತೀಯ ಜೀವನ ಮತ್ತು ಸಂಸ್ಕೃತಿಯ ಭಾಗವಾದರು. ನಂತರ ರಾಜೀವ್ ಗಾಂಧಿ ರಾಜಕೀಯ ಪ್ರವೇಶಿಸಿ 1984 ರಲ್ಲಿ ಭಾರತದ ಪ್ರಧಾನಿಯಾದರು. ಅವರ ರಾಜಕೀಯ ವೃತ್ತಿಜೀವನ ಎಷ್ಟೇ ಮಹತ್ವದ್ದಾಗಿದ್ದರೂ, ಅವರ ವೈಯಕ್ತಿಕ ಜೀವನ ಮತ್ತು ಕುಟುಂಬವೂ ಚರ್ಚೆಯ ವಿಷಯವಾಗಿತ್ತು.

ಅಕ್ಟೋಬರ್ 31, 1984 ರಂದು ಇಂದಿರಾ ಗಾಂಧಿಯವರ ಹತ್ಯೆಯ ನಂತರ, ರಾಜೀವ್ ಗಾಂಧಿ ಭಾರತದ ಅತ್ಯಂತ ಕಿರಿಯ ಪ್ರಧಾನಿಯಾದರು. 1991 ರ ಮೇ 21 ರಂದು ತಮಿಳುನಾಡಿನ ಶ್ರೀಪೆರಂಬದೂರಿನಲ್ಲಿ ನಡೆದ ಚುನಾವಣಾ ರ್ಯಾಲಿಯಲ್ಲಿ ಅವರನ್ನು ಹತ್ಯೆ ಮಾಡಲಾಯಿತು. ರಾಜೀವ್ ಗಾಂಧಿಯವರ ಸಾವು ಸೋನಿಯಾ ಗಾಂಧಿಯವರ ಜೀವನವನ್ನು ಶಾಶ್ವತವಾಗಿ ಬದಲಾಯಿಸಿತು. ಇದರ ಹೊರತಾಗಿಯೂ, ರಾಜೀವ್ ಗಾಂಧಿಯವರ ನೆನಪುಗಳು ಅವರ ಜೀವನದ ಪ್ರಮುಖ ಭಾಗವಾಗಿ ಉಳಿದಿವೆ.

ಬಂಗಾಳ ಕೊಲ್ಲಿಯಲ್ಲಿ ಬಲಗೊಂಡ ಚಂಡಮಾರುತ, ಭಾರಿ ಮಳೆ ಜೊತೆ ಅ.28ಕ್ಕೆ ಭೂಕುಸಿತದ ಎಚ್ಚರಿಕೆ

Chethan Kumar — Sat, 24 Oct 2026 13:30:02 +0530

ನವದೆಹಲಿ (ಅ.24) ವಾಯುಭಾರ ಕುಸಿತದ ಪರಿಣಾಣ ಇದೀಗ ದೇಶದ ಹಲವು ಭಾಗದಲ್ಲಿ ಮಳೆಯಾಗುತ್ತಿದೆ. ತಮಿಳುನಾಡಿನಲ್ಲಿ ಭಾರಿ ಪ್ರಮಾಣದ ಮಳೆಯಿಂದ ಪ್ರವಾಹ ಪರಿಸ್ಥಿತಿಗಳು ನಿರ್ಮಾಣವಾಗಿದೆ. ಇತ್ತ ಬೆಂಗಳೂರು ಸೇರಿದಂತೆ ಕರ್ನಾಟಕದ ಹಲವು ಜಿಲ್ಲೆಗಳಲ್ಲಿ ನಿರಂತರ ಮಳೆಯಾಗುತ್ತಿದೆ. ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸುವ ಎಚ್ಚರಿಕೆಯನ್ನು ಹವಾಮಾನ ಇಲಾಖೆ ನೀಡಿದೆ. ಕಾರಣ ಬಂಗಾಳ ಕೊಲ್ಲಿಯಲ್ಲಿ ಚಂಡಮಾರುತ ಬಲಗೊಳ್ಳುತ್ತಿದೆ. ಅಕ್ಟೋಬರ್ 28 ರಂದು ಕರಾವಳಿ ತೀರ ಪ್ರದೇಶಕ್ಕೆ ಅಪ್ಪಳಿಸಲಿದೆ. ಪರಿಣಾಮ ಮಳೆ ಪ್ರಮಾಣ ಹೆಚ್ಚಾಗಲಿದೆ. ಹಲೆವೆಡೆ ಭೂಕುಸಿತ ಸಂಭವಿಸಲಿದೆ ಎಂದು ಹವಾಮಾನ ಇಲಾಖೆ ಎಚ್ಚರಿಸಿದೆ.

ಕರ್ನಾಟಕ, ತಮಿಳುನಾಡು ಸೇರಿ ದಕ್ಷಿಣ ಭಾರತದಲ್ಲಿ ಭಾರಿ ಮಳೆ

ಈಶಾನ್ಯ ಮಾನ್ಸನ್ ಆರಂಭಗೊಂಡಿರುವ ಪರಿಣಾಮ ಕರ್ನಾಟಕ, ತಮಿಳುನಾಡು, ಪುದುಚೇರಿ, ಆಂಧ್ರ ಪ್ರದೇಶ, ಮಾಹೆ ಸೇರಿದಂತೆ ಹಲವು ಭಾಗದಲ್ಲಿ ಭಾರಿ ಮಳೆಯಾಗುತ್ತಿದೆ. ಈ ಪೈಕಿ ಕರ್ನಾಟಕ ಹಾಗೂ ತಮಿಳುನಾಡಿನ ಹಲವು ಜಿಲ್ಲೆಗಳಲ್ಲಿ ಭಾರಿ ಮಳೆ ಮುಂದುವರಿಯಲಿದೆ. ಇದು ಕಲೆವೆಡೆ ಭೂಕುಸಿತಕ್ಕೂ ಕಾರಣವಾಗಲಿದೆ ಎಂದು ಹವಾಮಾನ ಇಲಾಖೆ ಎಚ್ಚರಿಸಿದೆ. ತಮಿಳುನಾಡಿನ ಮೆಟ್ಟುಪಾಳಯಂ ಬಳಿಯ ಕಲ್ಲಾರ್‌ನಲ್ಲಿ ಭೂಕುಸಿತ ಸಂಭವಿಸಿದೆ. ಇತ್ತ ಬೆಂಗಳೂರಿನಲ್ಲಿ ಬೆಳಗ್ಗೆಯಿಂದಲೇ ಮಳೆ ಹಲವರಿಗೆ ಅಡ್ಡಿಯಾಗಿದೆ. ಇನ್ನು ಕರ್ನಾಟಕ ಹಲವು ಜಿಲ್ಲೆಗಳಲ್ಲಿ ಮಳೆಯಾಗುತ್ತಿದೆ. ಈ ಮಳೆ ಪ್ರಮಾಣ ಅಕ್ಟೋಬರ್ 28ರ ವೇಳೆಗೆ ಮತ್ತಷ್ಟು ಹೆಚ್ಚಾಗಲಿದೆ ಎಂದು ಎಚ್ಚರಿಸಲಾಗಿದೆ.

ಬಂಗಾಳ ಕೊಲ್ಲಿಯಲ್ಲಿ ಚಂಡಮಾರುಕತ ಬಲಗೊಳ್ಳುತ್ತಿರುವ ಹಿನ್ನಲೆಯಲ್ಲಿ ಹವಮಾನ ಇಲಾಖೆ ಮಹತ್ವದ ಎಚ್ಚರಿಕೆ ನೀಡಿದೆ.ಅಕ್ಟೋಬರಿ 26ರ ಬೆಳಗ್ಗೆ ಪಶ್ಚಿಮ ಮಧ್ಯ ಬಂಗಾಳ ಕೊಲ್ಲಿಯಲ್ಲಿ ಚಂಡಮಾರುತ ಬಲಗೊಳ್ಳಲಿದೆ. ಅಕ್ಟೋಬರಿ 28ಕ್ಕೆ ಆಂಧ್ರ ಪ್ರದೇಶ, ಒಡಿಶಾ ಕರಾವಳಿ ತೀರ ಪ್ರದೇಶಕ್ಕೆ ಅಪ್ಪಳಸಲಿದೆ. ಹೀಗಾಗಿ ಒಡಿಶಾ ಹಾಗೂ ಆಂಧ್ರ ಪ್ರದೇಶ ಕರಾವಳಿ ಭಾಗದಲ್ಲಿ ಭೂಕುಸಿತ ಸಂಭವಿಸುವ ಸಾಧ್ಯತೆ ಇದೆ ಎಂದು ಎಚ್ಚರಿಸಲಾಗಿದೆ.

ಈ ಚಂಡಮಾರುತ ಪರಿಣಾಮ ಬೆಂಗಳೂರು ಸೇರಿದಂತೆ ಕರ್ನಾಟಕದ ಮೇಲೂ ಬೀಳಲಿದೆ. ಇದರಿಂದ ಕರ್ನಾಟಕದಲ್ಲಿ ಮಳೆ ಪ್ರಮಾಣ ಹೆಚ್ಚಾಗಲಿದೆ. ಮಳೆ ಪ್ರಮಾಣ ತೀವ್ರಗೊಳ್ಳುವ ಕಾರಣ ಅಪಾಯದ ಸಾಧ್ಯತೆಗಳು ಹೆಚ್ಚು ಎಂದು ಎಚ್ಚರಿಕೆ ನೀಡಲಾಗಿದೆ.

ಹವಾಮಾನ ಇಲಾಖೆ ಬೆನ್ನಲ್ಲೇ ಒಡಿಶಾ ಸರ್ಕಾರ ವಿಪತ್ತು ನಿರ್ವಹಣಾ ತಂಡಗಳಿಗೆ ಮಹತ್ವದ ಸೂಚನೆ ನೀಡಿದೆ. ಕರಾವಳಿ ತೀರ ಪ್ರದೇಶದಲ್ಲಿರುವ ಶಾಲಾ ಕಾಲೇಜುಗಳಿಗೆ ಅಗತ್ಯ ಬಿದ್ದರೆ ರಜೆ ನೀಡಲು ಸೂಚನೆ ನೀಡಲಾಗಿದೆ. ಇತ್ತ ಭಾರಿ ಮಳೆ ಹಾಗೂ ಚಂಡಮಾರುತದಿಂದ ಅಪಾಯ ಪ್ರಮಾಣ ತಗ್ಗಿಸಲು ಜನರನ್ನು ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಲು ಸೂಚನೆ ನೀಡಲಾಗಿದೆ. ಈಗಾಗಲೇ 30 ಜಿಲ್ಲೆಗಳಲ್ಲಿ ಎಚ್ಚರಿಕೆ ನೀಡಲಾಗಿದೆ.

ಮೀನುಗಾರರಿಗೆ ಎಚ್ಚರಿಕೆ

ಈಗಾಗಲೇ ಆಳ ಸಮುದ್ರ ಮೀನುಗಾರಿಗೆ ತೆರಳಿರು ಮೀನುಗಾರರಿಗೆ ಎಚ್ಚರಿಕೆ ನೀಡಲಾಗಿದೆ. ಆದಷ್ಟು ಬೇಗ ದಡ ಸೇರಿಕೊಳ್ಳಲು ಸೂಚಿಸಲಾಗಿದೆ. ಇನ್ನು ತೀರ ಸಮುದ್ರ ಮೀನುಗಾರಿಕೆ ಮಾಡುವ ಮೀನುಗಾರರಿಗೆ ಸಮುದ್ರಕ್ಕೆ ಇಳಿಯದಂತೆ ಎಚ್ಚರಿಕೆ ನೀಡಲಾಗಿದೆ.

ಭಾರತದ 'ಬೆಲ್ಲದ ರಾಜಧಾನಿ' ಯಾವುದು ಗೊತ್ತಾ? ಏಷ್ಯಾದ ಅತಿ ದೊಡ್ಡ ಬೆಲ್ಲದ ಮಾರುಕಟ್ಟೆ ಇರೋದು ಇಲ್ಲೇ!

Sathish Kumar KH — Sat, 24 Oct 2026 13:08:02 +0530

ಭಾರತೀಯರ ಮನೆಗಳಲ್ಲಿ ಸಕ್ಕರೆಗಿಂತ ಬೆಲ್ಲದ ಬಳಕೆ ಹೆಚ್ಚು. ಆದರೆ, ನಮ್ಮ ದೇಶದಲ್ಲಿ ಅತಿ ಹೆಚ್ಚು ಬೆಲ್ಲ ಎಲ್ಲಿ ಉತ್ಪಾದನೆಯಾಗುತ್ತದೆ ಗೊತ್ತಾ? ವಿಶ್ವದ ಅತಿದೊಡ್ಡ ಬೆಲ್ಲದ ಮಾರುಕಟ್ಟೆ ನಮ್ಮ ಭಾರತದಲ್ಲೇ ಇದೆ. ಮಂಡ್ಯಕ್ಕೆ ಯಾವ ಸ್ಥಾನವಿದೆ? ಆ ನಗರದ ಬಗ್ಗೆ ಮಾಹಿತಿ ತಿಳಿಯಿರಿ.

ಭಾರತೀಯ ಅಡುಗೆಯಲ್ಲಿ ಮತ್ತು ಸಂಪ್ರದಾಯದಲ್ಲಿ 'ಬೆಲ್ಲ'ಕ್ಕೆ (Jaggery) ಅತ್ಯಂತ ಪವಿತ್ರ ಹಾಗೂ ಮಹತ್ವದ ಸ್ಥಾನವಿದೆ. ಹಬ್ಬ-ಹರಿದಿನಗಳಿಂದ ಹಿಡಿದು ದಿನನಿತ್ಯದ ಚಹಾ, ಸಿಹಿ ತಿನಿಸುಗಳವರೆಗೆ ಬೆಲ್ಲದ ಬಳಕೆ ಅಗಾಧ. ಆದರೆ, ಇಡೀ ಭಾರತದ 'ಬೆಲ್ಲದ ರಾಜಧಾನಿ' (Jaggery Capital of India) ಎಂದು ಯಾವ ನಗರವನ್ನು ಕರೆಯುತ್ತಾರೆ ಎಂಬುದು ನಿಮಗೆ ತಿಳಿದಿದೆಯೇ?

ಹೌದು, ಭಾರತದ ಮಾತ್ರವಲ್ಲದೆ, ಇಡೀ ಏಷ್ಯಾದಲ್ಲೇ ಅತಿ ದೊಡ್ಡ ಬೆಲ್ಲದ ಮಾರುಕಟ್ಟೆಯನ್ನು ಹೊಂದಿರುವ ಆ ಹೆಗ್ಗಳಿಕೆಯ ನಗರ ಉತ್ತರ ಪ್ರದೇಶದ ‘ಮುಜಫರ್‌ನಗರ’ (Muzaffarnagar).

ಉತ್ತರ ಪ್ರದೇಶದ ಪಶ್ಚಿಮ ಭಾಗದಲ್ಲಿರುವ ಮುಜಫರ್‌ನಗರವನ್ನು ಅಧಿಕೃತವಾಗಿ ಭಾರತದ ಬೆಲ್ಲದ ನಗರ ಅಥವಾ ಬೆಲ್ಲದ ರಾಜಧಾನಿ (ಭಾರತದ ಸಕ್ಕರೆ ಬಟ್ಟಲು) ಎಂದು ಗುರುತಿಸಲಾಗುತ್ತದೆ. ಇಲ್ಲಿ ಬೆಳೆಯುವ ಕಬ್ಬು ಮತ್ತು ಉತ್ಪಾದನೆಯಾಗುವ ಸಾವಯವ, ಸಾಂಪ್ರದಾಯಿಕ ಬೆಲ್ಲಕ್ಕೆ ದೇಶ-ವಿದೇಶಗಳಲ್ಲಿ ಭಾರಿ ಬೇಡಿಕೆಯಿದೆ.

ಏಷ್ಯಾದ ಬೃಹತ್ ಮಂಡಿ: ಮುಜಫರ್‌ನಗರದಲ್ಲಿರುವ ಬೆಲ್ಲದ ಮಂಡಿ (Jaggery Market) ಏಷ್ಯಾದಲ್ಲೇ ಅತಿ ದೊಡ್ಡ ಸಗಟು ಮಾರುಕಟ್ಟೆ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ದೈನಂದಿನ ವಹಿವಾಟು: ಕಬ್ಬು ಕಟಾವಿನ ಸೀಸನ್‌ನಲ್ಲಿ ಇಲ್ಲಿ ಪ್ರತಿದಿನ ನೂರಾರು ಟನ್ ಬೆಲ್ಲ ತಯಾರಾಗುತ್ತದೆ ಮತ್ತು ಕೋಟ್ಯಂತರ ರೂಪಾಯಿಗಳ ವಹಿವಾಟು ನಡೆಯುತ್ತದೆ.

ಗುಣಮಟ್ಟ: ಇಲ್ಲಿ ವಿವಿಧ ವಿನ್ಯಾಸ, ರುಚಿ ಮತ್ತು ಆಯುರ್ವೇದ ಗುಣಗಳುಳ್ಳ ಕೆಮಿಕಲ್-ಮುಕ್ತ ನೈಸರ್ಗಿಕ ಬೆಲ್ಲವನ್ನು ಉತ್ಪಾದಿಸಿ ಜಗತ್ತಿನ ನಾನಾ ಮೂಲೆಗಳಿಗೆ ರಫ್ತು ಮಾಡಲಾಗುತ್ತದೆ.

2023ರಲ್ಲಿ ಮುಜಾಫರ್‌ನಗರದ ಬೆಲ್ಲಕ್ಕೆ ಪ್ರತಿಷ್ಠಿತ ಜಿಐ (GI) ಟ್ಯಾಗ್ ಸಿಕ್ಕಿದೆ. ಉತ್ತರ ಪ್ರದೇಶ ಸರ್ಕಾರದ 'ಒಂದು ಜಿಲ್ಲೆ ಒಂದು ಉತ್ಪನ್ನ' ಯೋಜನೆಯಲ್ಲೂ ಇದು ಸ್ಥಾನ ಪಡೆದಿದೆ. 2025ರ ಮಾರ್ಚ್‌ನಲ್ಲಿ ಬರೋಬ್ಬರಿ 30 ಮೆಟ್ರಿಕ್ ಟನ್ ಜಿಐ-ಟ್ಯಾಗ್ ಇರುವ ಮುಜಾಫರ್‌ನಗರದ ಬೆಲ್ಲ ಬಾಂಗ್ಲಾದೇಶಕ್ಕೆ ರಫ್ತಾಗಲಿದೆ.

ಉತ್ತರ ಭಾರತದಲ್ಲಿ ಮುಜಫರ್‌ನಗರ ಮುಂಚೂಣಿಯಲ್ಲಿದ್ದರೆ, ದಕ್ಷಿಣ ಭಾರತದಲ್ಲೂ ಪ್ರಮುಖ ಬೆಲ್ಲದ ಮಾರುಕಟ್ಟೆಗಳಿವೆ:

ಮಂಡ್ಯ (ಕರ್ನಾಟಕ): ನಮ್ಮ ಕರ್ನಾಟಕದ ಹೆಮ್ಮೆಯ ಸಕ್ಕರೆ ನಗರಿ ಮಂಡ್ಯ ಕೂಡ ಗುಣಮಟ್ಟದ ಕಬ್ಬು ಮತ್ತು ಆಲೆಮನೆಗಳಲ್ಲಿ ತಯಾರಾಗುವ ರುಚಿಕರ ಸಾವಯವ ಬೆಲ್ಲಕ್ಕೆ ದಕ್ಷಿಣ ಭಾರತದಲ್ಲೇ ಹೆಸರುವಾಸಿಯಾಗಿದೆ. ಇನ್ನು ಮಂಡ್ಯವನ್ನು ಕರ್ನಾಟಕದ ಸಕ್ಕರೆ ನಾಡು ಎಂದು ಕರೆದರೂ, ಅತಿಹೆಚ್ಚು ಸಕ್ಕರೆಯನ್ನು ಬೆಳಗಾವಿ ಜಿಲ್ಲೆಯಲ್ಲಿ ಉತ್ಪಾದನೆ ಮಾಡಲಾಗುತ್ತದೆ.

ಅನಕಾಪಲ್ಲಿ (ಆಂಧ್ರಪ್ರದೇಶ): ಮುಜಫರ್‌ನಗರದ ನಂತರ ಭಾರತದ ಎರಡನೇ ಅತಿ ದೊಡ್ಡ ಬೆಲ್ಲದ ಮಾರುಕಟ್ಟೆ ಎಂಬ ಕೀರ್ತಿ ಆಂಧ್ರಪ್ರದೇಶದ ವಿಶಾಖಪಟ್ಟಣಂ ಸಮೀಪದ ‘ಅನಕಾಪಲ್ಲಿ’ಗೆ (Anakapalle) ಸಲ್ಲುತ್ತದೆ.

ಸಕ್ಕರೆಗಿಂತ ಬೆಲ್ಲ ಆರೋಗ್ಯಕ್ಕೆ ಅತ್ಯಂತ ಹಿತಕಾರಿ. ಇದರಲ್ಲಿ ಕಬ್ಬಿಣದ ಅಂಶ (Iron), ಮೆಗ್ನೀಸಿಯಮ್, ಪೊಟ್ಯಾಶಿಯಮ್ ಹೇರಳವಾಗಿದ್ದು, ರಕ್ತಹೀನತೆ ತಡೆಯಲು ಮತ್ತು ಜೀರ್ಣಕ್ರಿಯೆಯನ್ನು ಸುಧಾರಿಸಲು ಸಹಕಾರಿಯಾಗಿದೆ. ಚಳಿಗಾಲದಲ್ಲಂತೂ ಬೆಲ್ಲ ಸೇವನೆ ದೇಹಕ್ಕೆ ನೈಸರ್ಗಿಕ ಉಷ್ಣತೆ ಹಾಗೂ ರೋಗನಿರೋಧಕ ಶಕ್ತಿಯನ್ನು ನೀಡುತ್ತದೆ.

5 ವರ್ಷದ ಬಾಲಕನ ಐಕ್ಯೂ 141! ಈಗಾಗಲೇ 3,000 ಪುಸ್ತಕ ಓದಿ ಮೆನ್ಸಾ, ಇಂಟರ್‌ಟೆಲ್ ಸೇರಿದ ಈ ಪುಟ್ಟ ಜೀನಿಯಸ್ ಯಾರು?

Chandrashekar GS — Sat, 24 Oct 2026 12:29:26 +0530

ಸಾಮಾನ್ಯವಾಗಿ ಐದು ವರ್ಷದ ಮಕ್ಕಳು ಆಟ, ಚಿತ್ರಕಲೆ ಮತ್ತು ಕಥೆಗಳಲ್ಲಿ ಆಸಕ್ತಿ ತೋರಿಸುತ್ತಾರೆ. ಆದರೆ ಕೆನಡಾದಲ್ಲಿ ವಾಸಿಸುತ್ತಿರುವ ಭಾರತೀಯ ಮೂಲದ ಅರ್ಜುನ್ ಪ್ರಜಾಪತಿ ಗಣಿತ, ಬಾಹ್ಯಾಕಾಶ, ಮಾನವ ದೇಹ ಮತ್ತು ತಳಿವಿಜ್ಞಾನದಂತಹ ಸಂಕೀರ್ಣ ವಿಷಯಗಳ ಬಗ್ಗೆ ಕುತೂಹಲ ಹೊಂದಿದ್ದಾನೆ. ಈಗಾಗಲೇ 3,000ಕ್ಕೂ ಹೆಚ್ಚು ಪುಸ್ತಕಗಳನ್ನು ಓದಿರುವ ಈ ಬಾಲಕನ ಬುದ್ಧಿಮತ್ತೆ ಮತ್ತು ಕಲಿಯುವ ಆಸಕ್ತಿ ಎಲ್ಲರ ಗಮನ ಸೆಳೆದಿದೆ.

ಗುಜರಾತ್‌ನ ವಡೋದರ ಮೂಲದ ವೈದ್ಯಕೀಯ ಸಂಶೋಧಕ ಡಾ. ವಿಶಾಲ್ ಪ್ರಜಾಪತಿ ಮತ್ತು ವಕೀಲೆಯಾಗಿರುವ ಮಹಿತಾ ಅವರ ಪುತ್ರ ಅರ್ಜುನ್, ಸುಮಾರು 18 ತಿಂಗಳ ವಯಸ್ಸಿನಲ್ಲೇ ಓದಲು ಆರಂಭಿಸಿದ್ದನು. ನಾಲ್ಕು ವರ್ಷದವನಾಗಿದ್ದಾಗಲೇ ಆತನ ಐಕ್ಯೂ ಪರೀಕ್ಷೆಯ ಫಲಿತಾಂಶ 141 ದಾಖಲಾಗಿತ್ತು. ಈ ಸಾಧನೆಯ ಆಧಾರದಲ್ಲಿ ಜಗತ್ತಿನ ಎರಡು ಪ್ರತಿಷ್ಠಿತ ಉನ್ನತ ಬುದ್ಧಿಮತ್ತೆ ಸಂಘಟನೆಗಳಾದ ಮೆನ್ಸಾ (Mensa) ಮತ್ತು ಇಂಟರ್‌ಟೆಲ್ (Intertel) ಸದಸ್ಯತ್ವಕ್ಕೂ ಅರ್ಹತೆ ಪಡೆದಿದ್ದಾನೆ.

ಐಕ್ಯೂ 141 ಎಂದರೇನು?

ಅರ್ಜುನ್‌ಗೆ ನಾಲ್ಕು ವರ್ಷ ಮತ್ತು ಹತ್ತು ತಿಂಗಳಾಗಿದ್ದಾಗ ಸ್ಟ್ಯಾನ್‌ಫೋರ್ಡ್–ಬಿನೆಟ್ (Stanford–Binet) ಬುದ್ಧಿಮತ್ತೆ ಪರೀಕ್ಷೆ ನಡೆಸಲಾಗಿತ್ತು. ಅದರಲ್ಲಿ ಆತನ ಒಟ್ಟು ಐಕ್ಯೂ 141 ದಾಖಲಾಗಿದ್ದು, ಇದು ಜನಸಂಖ್ಯೆಯ ಸುಮಾರು ಶೇ. 99.7ರಷ್ಟು ಜನರಿಗಿಂತ ಹೆಚ್ಚಿನ ಫಲಿತಾಂಶವಾಗಿದೆ ಎಂದು ವರದಿಯಾಗಿದೆ.

ಮೆನ್ಸಾ ಸಂಘಟನೆಯು ಮಾನ್ಯತೆ ಪಡೆದ ಬುದ್ಧಿಮತ್ತೆ ಪರೀಕ್ಷೆಗಳಲ್ಲಿ ಅಗ್ರ ಶೇ. 2ರೊಳಗೆ ಸ್ಥಾನ ಪಡೆದವರಿಗೆ ಸದಸ್ಯತ್ವ ನೀಡುತ್ತದೆ. ಇಂಟರ್‌ಟೆಲ್ ಸಾಮಾನ್ಯವಾಗಿ ಅಗ್ರ ಶೇ. 1ರೊಳಗಿನ ಫಲಿತಾಂಶವನ್ನು ನಿರೀಕ್ಷಿಸುತ್ತದೆ. ಇಷ್ಟು ಚಿಕ್ಕ ವಯಸ್ಸಿನಲ್ಲಿ ಎರಡೂ ಸಂಘಟನೆಗಳಿಗೆ ಅರ್ಹತೆ ಪಡೆದಿರುವುದು ಅರ್ಜುನ್‌ನ ಸಾಧನೆಯ ವಿಶೇಷತೆಯಾಗಿದೆ.

ಪುಸ್ತಕಗಳೇ ಅರ್ಜುನ್‌ನ ಅಚ್ಚುಮೆಚ್ಚಿನ ಸ್ನೇಹಿತರು

ಅರ್ಜುನ್‌ಗೆ ಪುಸ್ತಕಗಳ ಮೇಲಿರುವ ಪ್ರೀತಿ ಅಪಾರ. ಗಣಿತ, ಖಗೋಳಶಾಸ್ತ್ರ, ಇತಿಹಾಸ, ಮಾನವ ದೇಹ, ಜೀವಶಾಸ್ತ್ರ ಮತ್ತು ರೋಗನಿರೋಧಕ ವ್ಯವಸ್ಥೆಯಂತಹ ವಿಷಯಗಳನ್ನು ಓದಲು ಇಷ್ಟಪಡುತ್ತಾನೆ. ಕಾರಿನಲ್ಲಿಯೂ ಎಂಟರಿಂದ ಹತ್ತು ಪುಸ್ತಕಗಳನ್ನು ಇಟ್ಟುಕೊಳ್ಳುವ ಅಭ್ಯಾಸ ಆತನಿಗಿದೆ. ಪ್ರಯಾಣದ ವೇಳೆ ಬೇಸರವಾದರೆ ಓದಲು ಪುಸ್ತಕಗಳು ಇರಬೇಕು ಎಂಬುದು ಆತನ ಆಸೆ.

ಅರ್ಜುನ್‌ಗೆ ಕೇವಲ ಉತ್ತರಗಳನ್ನು ತಿಳಿದುಕೊಳ್ಳುವುದಕ್ಕಿಂತ, ಒಂದು ವಿಷಯ ಏಕೆ ಸಂಭವಿಸುತ್ತದೆ ಮತ್ತು ಅದು ಹೇಗೆ ಕೆಲಸ ಮಾಡುತ್ತದೆ ಎಂಬುದನ್ನು ಅರ್ಥಮಾಡಿಕೊಳ್ಳುವ ಆಸಕ್ತಿ ಹೆಚ್ಚಾಗಿದೆ. ಅನಂತ ಸಂಖ್ಯೆಗಳು, ಕಪ್ಪು ಕುಳಿಗಳು ಮತ್ತು ಮಾನವ ದೇಹದ ಕಾರ್ಯವಿಧಾನಗಳ ಬಗ್ಗೆ ಆತ ಪ್ರಶ್ನೆಗಳನ್ನು ಕೇಳುತ್ತಾನೆ.

ಪ್ರತಿಭೆಯ ಜೊತೆಗೆ ಸಂತೋಷದ ಬಾಲ್ಯಕ್ಕೂ ಆದ್ಯತೆ

ಅರ್ಜುನ್‌ನ ಪೋಷಕರು ಆತನ ಕಲಿಕೆಗೆ ಪ್ರೋತ್ಸಾಹ ನೀಡುತ್ತಿದ್ದರೂ, ಓದು ಮತ್ತು ಸಾಧನೆಗಳಿಗಾಗಿ ಒತ್ತಡ ಹೇರುವುದಿಲ್ಲ. ಮಗನಿಗೆ ತನ್ನ ಆಸಕ್ತಿಗಳಿಗೆ ಅನುಗುಣವಾಗಿ ಕಲಿಯಲು ಅವಕಾಶ ನೀಡುವುದರ ಜೊತೆಗೆ ಆಟವಾಡಲು, ಚಿತ್ರ ಬಿಡಿಸಲು, ಸಂಗೀತ ಆಸ್ವಾದಿಸಲು ಮತ್ತು ಸ್ನೇಹಿತರೊಂದಿಗೆ ಸಮಯ ಕಳೆಯಲು ಅವಕಾಶ ಕಲ್ಪಿಸಿದ್ದಾರೆ.

ಅರ್ಜುನ್‌ನ ಕಥೆ ಮಕ್ಕಳಲ್ಲಿ ಕುತೂಹಲ ಬೆಳೆಸಲು ಪುಸ್ತಕಗಳು, ಸೂಕ್ತ ಮಾರ್ಗದರ್ಶನ ಮತ್ತು ಪ್ರೋತ್ಸಾಹ ಎಷ್ಟು ಮುಖ್ಯ ಎಂಬುದನ್ನು ತೋರಿಸುತ್ತದೆ. ಹೆಚ್ಚಿನ ಐಕ್ಯೂ ಒಂದೇ ಮಗುವಿನ ಭವಿಷ್ಯವನ್ನು ನಿರ್ಧರಿಸುವುದಿಲ್ಲ. ಕಲಿಯುವ ಆಸಕ್ತಿ, ಪರಿಶ್ರಮ, ಸಹಾನುಭೂತಿ ಮತ್ತು ಸಂತೋಷದಿಂದ ಬೆಳೆಯುವ ಅವಕಾಶವೂ ಅಷ್ಟೇ ಮುಖ್ಯ.

‘ನಮ್ಮೆಲ್ಲರ ಕಣ್ಣಲ್ಲೂ ನೀರು ತುಂಬಿತ್ತು’.. 16 ವರ್ಷಗಳ ಹಿಂದಿನ ಬೆಂಗಳೂರಿನ ನೆನಪನ್ನು ಬಿಚ್ಚಿಟ್ಟ ಪೋಲೆಂಡ್ ಪ್ರಧಾನಿ!

Ravi Janekal — Sat, 24 Oct 2026 12:21:25 +0530

ಇತ್ತೀಚೆಗೆ ವ್ಯಾಪಾರ ಮತ್ತು ರಕ್ಷಣಾ ವಿಚಾರಗಳ ಸಂಬಂಧ ಚರ್ಚೆಗಳಿಗೆ ಭಾರತಕ್ಕೆ ಆಗಮಿಸಿದ್ದ ಪೊಲೆಂಡ್ ಪ್ರಧಾನಿ ಡೊನಾಲ್ಡ್ ಟಸ್ಕ್ ಬೆಂಗಳೂರಿಗೂ ಬಂದಿದ್ದರು. ಹದಿನಾರು ವರ್ಷಗಳ ಹಿಂದೆ ಭೇಟಿ ನೀಡಿದ್ದ ಸ್ಥಳಕ್ಕೆ ಮತ್ತೆ ಭೇಟಿ ನೀಡಿದರು. ಈ ವೇಳೆ ಭಾವುಕರಾದ ಹೃದಯಸ್ಪರ್ಶಿ ಘಟನೆ ನಡೆಯಿತು.

ಭಾರತಕ್ಕೆ ಭೇಟಿ ನೀಡಿದ್ದ ವೇಳೆ ತಮಗಾದ ಸಂತೋಷದ ಹೃದಯಸ್ಪರ್ಶಿ ಅನುಭವವನ್ನು ಪೋಲೆಂಡ್ ಪ್ರಧಾನಿ ಎಕ್ಸ್‌(X) ಪೋಸ್ಟ್‌ನಲ್ಲಿ ಒಂದು ವಿಡಿಯೋ ಹಂಚಿಕೊಂಡಿದ್ದು, ಅವರು ಮೊದಲ ಅವಧಿಯಲ್ಲಿ ಪ್ರಧಾನ ಮಂತ್ರಿಯಾಗಿದ್ದಾಗ, ಅಂದರೆ ಸುಮಾರು 16 ವರ್ಷಗಳ ಹಿಂದೆ ಭಾರತಕ್ಕೆ ಭೇಟಿ ನೀಡಿದ್ದ ವೇಳೆ ಬೆಂಗಳೂರಿಗೂ ಬಂದಿದ್ದರು. ಬೆಂಗಳೂರಿನಲ್ಲಿ ದೃಷ್ಟಿಹೀನ ಮಕ್ಕಳ ಕೇಂದ್ರವೊಂದಕ್ಕೆ ಭೇಟಿ ನೀಡಿದ್ದ ವೇಳೆ ಅಲ್ಲಿನ ಮಕ್ಕಳನ್ನು ಕಂಡು ಕಣ್ಣೀರು ಹಾಕಿ ದುಃಖಿಸಿದ ಬಗ್ಗೆಯೂ ನೆನಪಿಸಿಕೊಂಡಿದ್ದಾರೆ.

16 ವರ್ಷಗಳ ಹಿಂದಿನ ಘಟನೆ ನೆನಪಿಸಿಕೊಂಡ ಪೋಲೆಂಡ್ ಪ್ರಧಾನಿ

ಎಕ್ಸ್‌ ಖಾತೆಯಲ್ಲಿ ವಿಡಿಯೋ ಹಂಚಿಕೊಂಡಿರುವ ಪೋಲೆಂಡ್ ಪ್ರಧಾನಿ ಅವರು, '16 ವರ್ಷಗಳ ಹಿಂದೆ ಬೆಂಗಳೂರಿನಲ್ಲಿ ಪೋಲಿಷ್ ನಿಯೋಗದೊಂದಿಗೆ ನಾನು ಫ್ರಾನ್ಸಿಸ್ಕನ್ ಸಿಸ್ಟರ್ಸ್(ಕ್ರೈಸ್ತ್ ಸನ್ಯಾಸಿನಿಯರು) ನಡೆಸುತ್ತಿದ್ದ ದೃಷ್ಟಿಹೀನ ಮಕ್ಕಳ ಕೇಂದ್ರಕ್ಕೆ ಭೇಟಿ ನೀಡಿದ್ದೆ. ಈ ಸನ್ಯಾಸಿನಿಯರಲ್ಲಿ ಪೋಲೆಂಡ್‌ನವರು ಕೂಡ ಇದ್ದರು. ಅಂದು ಅವರು ದೃಷ್ಟಿಹೀನ ಮಕ್ಕಳು ಪೋಲೆಂಡ್‌ನ ರಾಷ್ಟ್ರಗೀತೆ ಹಾಡಿದಾಗ ನನಗೆ ಭಾವನೆಗಳನ್ನ ಮರೆಮಾಚಲು ಆಗಲಿಲ್ಲ, ಅಳು ಬಂದುಬಿಡ್ತು ಎಂದು ಎಂದು ಹಳೆಯ ಘಟನೆ ನೆನಪಾಗಿ ಭಾವುಕರಾಗಿ ಬರೆದುಕೊಂಡಿದ್ದಾರೆ.

ಹದಿನಾರು ವರ್ಷಗಳ ಬಳಿಕ ನಾನು ಮತ್ತೆ ಬೆಂಗಳೂರಿಗೆ ಭೇಟಿ ನೀಡಿದ್ದೇನೆ. ಆದರೆ ಆ ನೆನಪು ಇನ್ನು ನನ್ನ ಮನಸಲ್ಲಿ ಹಾಗೆ ಉಳಿದಿದೆ. ಅಂದು ಆ ಮಕ್ಕಳು ಹಾಡಿದ್ದ ಮುಜರೆಕ್ ಡಾಬ್ರೊವ್ಸ್ಕಿಯೊ.. (Mazurek Dąbrowskiego) ಗೀತೆಯ ಸಾಲುಗಳು ಇನ್ನೂ ನೆನಪಿವೆ. ಇಂದು ಕೂಡ ಹಾಡುವಾಗ ನಮ್ಮಿಬ್ಬರ ಕಣ್ಣುಗಳು ತೇವಗೊಂಡವು ಎಂದು ಬರೆದುಕೊಂಡಿದ್ದಾರೆ. ಅಂದಹಾಗೆ Mazurek Dąbrowskiego ಈ ಹಾಡು ಪೋಲೆಂಡ್‌ನ ರಾಷ್ಟ್ರಗೀತೆಯಾಗಿದೆ.

ಗುಲಾಬಿ ಬಣ್ಣದ ಡ್ರೆಸ್ ತೊಟ್ಟಿದ್ದ ಮಕ್ಕಳು:

ನಾನು ಹದಿನಾರು ವರ್ಷಗಳ ಬಳಿಕ ಮತ್ತೆ ಬೆಂಗಳೂರಿನ ಅದೇ ಸ್ಥಳಕ್ಕೆ ಬಂದಾಗ ಪೋಲೆಂಡ್ ಪ್ರಧಾನಿ ಅಚ್ಚರಿಪಟ್ಟರು. ಮಕ್ಕಳು ಗುಲಾಬಿ ಬಣ್ಣದ ಡ್ರೆಸ್ ತೊಟ್ಟು ರಾಷ್ಟ್ರಗೀತೆ ಹಾಡಿದರು. ನಂತರ ಟಸ್ಕ್ ಅವರು ಮಕ್ಕಳಿಗೆ ವಿಶೇಷ ಉಡುಗೊರೆ ನೀಡುತ್ತಾ 'ಈ ಭೇಟಿ ನನ್ನ ರಾಜಕೀಯ ವಿಚಾರಗಳಿಗಿಂತ ಹೆಚ್ಚು ಮಹತ್ವದ್ದಾಗಿದೆ' ಎಂದು ತಮಾಷೆಯಾಗಿ ಹೇಳಿರುವುದು ವಿಡಿಯೋದಲ್ಲಿ ನೋಡಬಹುದು.

2010 ರಲ್ಲಿ ಪತ್ನಿಯೊಂದಿಗೆ ಭೇಟಿ ನೀಡಿದ್ದ ಡೊನಾಲ್ಡ್ ಟಸ್ಕ್

ಪೋಲೆಂಡ್ ಪ್ರಧಾನಿ ಡೊನಾಲ್ಡ್ ಟಸ್ಕ್ 2010ರಲ್ಲಿ ಮೊದಲ ಬಾರಿಗೆ ಪತ್ನಿಯೊಂದಿಗೆ ಭಾರತಕ್ಕೆ ಆಗಮಿಸಿದ್ದರು ಆ ವೇಳೆ ಬೆಂಗಳೂರಿನಲ್ಲಿ ದೃಷ್ಟಿಹೀನರಿಗಾಗಿಯೇ ಇರುವ ಜ್ಯೋತಿ ಸೇವಾ ವಸತಿ ಶಾಲೆ' ಗೆ ಭೇಟಿ ನೀಡಿದ್ದರು. ಆ ಸಂದರ್ಭದಲ್ಲಿ ಇಲ್ಲಿನ ದೃಷ್ಟಿಹೀನ ಮಕ್ಕಳು ಆರರಿಂದ ಹದಿಮೂರು ವರ್ಷದ ಮಕ್ಕಳಾಗಿದ್ದರು.

16 lat temu w Bengaluru odwiedziłem wraz z polską delegacją ośrodek dla dzieci niewidomych prowadzony przez siostry franciszkanki, w tym siostry z Polski. Nie kryliśmy wzruszenia, gdy dzieci zaśpiewały polski hymn.

Dziś są już dorosłe, ale wciąż pamiętają słowa Mazurka Dąbrowskiego.

I one, i ja, wszyscy mieliśmy dziś łzy w oczach.

— Donald Tusk (@donaldtusk) October 23, 2026

16 ವರ್ಷದ ಬಳಿಕ ಡೊನಾಲ್ಡ್ ಟಸ್ಕ್ ಇತ್ತೀಚೆಗೆ ಭೇಟಿ

ಪೋಲೆಂಡ್ ಪ್ರಧಾನಿ ಡೊನಾಲ್ಡ್ ಟಸ್ಕ್ ಅವರು ಅಕ್ಟೋಬರ್ 21 ರಿಂದ 23 ರವರೆಗೆ ಮೂರು ದಿನಗಳ ಕಾಲ ಭಾರತಕ್ಕೆ ಭೇಟಿ ನೀಡಿದ್ದರು. ಅಕ್ಟೋಬರ್ 21 ರಂದು ಭಾರತಕ್ಕೆ ಆಗಮಿಸಿದರು. ಮರುದಿನ ಅಂದರೆ ಅಕ್ಟೋಬರ್ 22 ರಂದು ಪ್ರಧಾನಿ ನರೇಂದ್ರ ಮೋದಿ ಹಾಗೂ ವಿದೇಶಾಂಗ ವ್ಯವಹಾರಗಳ ಸಚಿವ ಡಾ ಎಸ್ ಜೈಶಂಕರ್ ಅವರನ್ನು ಭೇಟಿ ಮಾಡಿ ಹಲವು ವಿಚಾರಗಳ ಕುರಿತು ಚರ್ಚಿಸಿದ್ದರು. ಅನಂತರ ಅಕ್ಟೋಬರ್ 23ರಂದ ಪೋಲೆಂಡ್‌ಗೆ ವಾಪಸ್ ಆಗುವ ಮುನ್ನ ಬೆಂಗಳೂರಿಗೆ ಭೇಟಿ ನೀಡಿ ಮುಖ್ಯಮಂತ್ರಿ ಡಿಕೆ ಶಿವಕುಮಾರ್ ಅವರನ್ನು ಭೇಟಿಯಾಗಿ ಅದೇ ದಿನ ಪೋಲೆಂಡ್‌ಗೆ ವಾಪಸ್ ಆದರು.

ವಿಶ್ವದ ಟಾಪ್ 10 ಅತೀ ಮಾಲಿನ್ಯ ನಗರದ ಪಟ್ಟಿ ಪ್ರಕಟ, ದೆಹಲಿ ಅಲ್ಲ, ಈ ನಗರಕ್ಕೆ ನಂ.1 ಪಟ್ಟ

Chethan Kumar — Sat, 24 Oct 2026 12:17:16 +0530

ನವದೆಹಲಿ (ಅ.24) ದಸರಾ ಹಬ್ಬದ ಬೆನ್ನಲ್ಲೇ ದೆಹಲಿಯಲ್ಲಿ ವಾಯು ಮಾಲಿನ್ಯ ತೀವ್ರಗೊಳ್ಳುತ್ತಿದೆ. ಈಗಾಗಲೇ ಹಲವು ನಿರ್ಬಂಧಗಳು ಜಾರಿಯಾಗಿದೆ. ಇದೀಗ ಅಕ್ಟೋಬರ್ 24ರಂದು ವಿಶ್ವದಲ್ಲಿ ಅತೀ ಹೆಚ್ಚು ಮಾಲಿನ್ಯಕ್ಕೊಳಗಾಗಿರುವ ನಗರಳ ಪಟ್ಟಿ ಪ್ರಕಟಗೊಂಡಿದೆ. ಇಂದು ಅತೀ ಮಾಲಿನ್ಯ ನಗರ ಪಟ್ಟಿಯಲ್ಲಿ ನಂಬರ್ 1 ಸ್ಥಾನ ಇಂಡೋನೇಷಿಯಾದ ಸಂಪಿತ್ ನಗರವಿದೆ. ಅತೀ ಹೆಚ್ಚು ಮಾಲಿನ್ಯ ನಗರ ಎಂದೇ ಗುರುತಿಸಿಕೊಂಡಿರುವ ದೆಹಲಿ ಟಾಪ್ 10 ಪಟ್ಟಿಯಲ್ಲಿ ಸ್ಥಾನ ಪಡೆದಿಲ್ಲ. ಆದರೆ ಭಾರತದ 7 ನಗರಗಳು ಪಟ್ಟಿಯಲ್ಲಿದೆ.

ವಿಶೇಷ ಅಂದರೆ ಟಾಪ್ 25ರ ಪಟ್ಟಿಯಲ್ಲಿ ದೆಹಲಿ ಸ್ಥಾನ ಪಡೆದಿಲ್ಲ. ದೆಹಲಿಯಲ್ಲಿ ಹಲವು ಕಟ್ಟು ನಿಟ್ಟಿನ ಕ್ರಮಗಳು ಇದಕ್ಕೆ ಕಾರಣವಾಗಿದೆ. ಇನ್ನು ಮಂಬೈ 17 ಸ್ಥಾನದಲ್ಲಿದ್ದರೆ, ನವಿ ಮುಂಬೈ 22ನೇ ಸ್ಥಾನದಲ್ಲಿದೆ. ಅದೃಷ್ಠ ಎಂದರೆ ಟಾಪ್ 25 ಪಟ್ಟಿಯಲ್ಲಿ ಕರ್ನಾಟಕದ ಯಾವುದೇ ನಗರ ಸ್ಥಾನ ಪಡೆದಿಲ್ಲ.

ಅತೀ ಹೆಚ್ಚು ಮಾಲಿನ್ಯ ನಗರ ಪಟ್ಟಿಯಲ್ಲಿ ಆರಂಭಿಕ ಮೂರು ಸ್ಥಾನಗಳು ಇಂಡೋನೇಷಿಯಾದ ನಗರದ ಪಾಲಾಗಿದೆ. ಸಂಪಿತ್, ಪೊಂತಿಯಾಂಕ್, ಪಲಂಗಕರಾಯ ನಗರ ಟಾಪ್ 3 ವಿಶ್ವದ ಮಾಲಿನ್ಯ ನಗರ ಪಟ್ಟಿಯಲ್ಲಿದೆ. ಟಾಪ್ 10 ಪಟ್ಟಿಯ ಆರಂಭಿಕ 3 ಸ್ಥಾನ ಇಂಡೋನೇಷಿಯಾ ನಗರವಿದ್ದರೆ, ಇನ್ನುಳಿದ 7 ನಗರ ಭಾರತದ್ದಾಗಿದೆ. ದುರಂತ ಅಂದರೆ ಟಾಪ್ 25 ಪಟ್ಟಿಯಲ್ಲೂ ಆರಂಭಿಕ 3 ಸ್ಥಾನ ಹೊರತುಪಡಿಸಿದರೆ ಇನ್ನುಳಿದ ಎಲ್ಲಾ ನಗರ ಭಾರತದ್ದಾಗಿದೆ.

ಅತೀ ಹೆಚ್ಚು ಮಾಲಿನ್ಯದ ಟಾಪ್ 10 ಪಟ್ಟಿ

ಸಂಪಿತ್, ಇಂಡೋನೇಷಿಯಾ
ಪೊಂತಿಯಾಂಕ, ಇಂಡೋನೇಷಿಯಾ
ಪಲಂಗಕರಾಯ, ಇಂಡೋನೇಷಿಯಾ
ಗಾಝಿಯಾಬಾದ್, ಉತ್ತರ ಪ್ರದೇಶ, ಭಾರತ
ಪಾನಿಪತ್, ಹರ್ಯಾಣ, ಭಾರತ
ಮೀರತ್, ಉತ್ತರ ಪ್ರದೇಶ, ಭಾರತ
ಫರೀದ್‌ಕೋಟ್, ಪಂಜಾಬ್, ಭಾರತ
ಬತಿಂದಾ, ಪಂಜಾಬ್, ಭಾರತ
ಹಾಪುರ್, ಉತ್ತರ ಪ್ರದೇಶ, ಭಾರತ
ಭೀವಂಡಿ, ಮಹಾರಾಷ್ಟ್ರ, ಭಾರತ

ವಿಶ್ವದಲ್ಲೇ ಹಲವು ನಗರಗಳು ಮಾಲಿನ್ಯ ನಗರಗಳಾಗಿ ಗುರುತಿಸಿಕೊಂಡಿದೆ. ಆದರೆ ಅತೀ ಹೆಚ್ಚು ಮಾಲಿನ್ಯ ನಗರದಲ್ಲಿ ಭಾರತದ ಪ್ರಮುಖ ನಗರಗಳೇ ಸ್ಥಾನ ಪಡೆದಿದೆ. ದೆಹಲಿಯಲ್ಲಿ ಕಠಿಣ ನಿರ್ಬಂಧಗಳು ಜಾರಿಯಾಗಿರುವ ಕಾರಣ ದೆಹಲಿಯಲ್ಲಿ ನಿಧನಾವಾಗಿ ಮಾಲಿನ್ಯ ತಗ್ಗುತ್ತಿದೆ. ಆದರೆ ಇದೀಗ ಆತಂಕ ಹೆಚ್ಚಾಗಲು ಮತ್ತೊಂದು ಕಾರಣವಿದೆ. ದೀಪಾವಳಿ ಹಬ್ಬ ಸಮೀಪಿಸುತ್ತಿದೆ, ಇತ್ತ ಪಂಜಾಬ್ ಹಾಗೂ ಹರಿಯಾಣದಲ್ಲಿ ಬೆಳೆ ಕಟಾವು ಸಮಯವೂ ಹತ್ತಿರಬರುತ್ತಿದೆ. ಹೀಗಾಗಿ ಸಮೀಪದಲ್ಲಿರುವ ದೆಹಲಿಯಲ್ಲಿ ಮತ್ತೆ ಮಾಲಿನ್ಯ ವಿಪರೀತ ಪ್ರಮಾಣದಲ್ಲಿ ಹೆಚ್ಚಾಗುವ ಸಾಧ್ಯತೆ ಇದೆ.

'ಭಾರತ ಅಭಿವೃದ್ಧಿಯಾಗುವವರೆಗೂ ಜಗತ್ತಿನಲ್ಲಿ ನಿಜವಾದ ಗೌರವ ಸಿಗಲ್ಲ' — ಶ್ರೀಧರ್ ವೆಂಬು ಹೇಳಿಕೆಯ ಹಿಂದಿನ ಸಂದೇಶವೇನು?

Naveen Kodase — Sat, 24 Oct 2026 11:50:22 +0530

ಭಾರತೀಯರ ವಿರುದ್ಧದ ದ್ವೇಷದ ಕುರಿತು ಹೊಸ ಚರ್ಚೆ

ಭಾರತೀಯರು, ಹಿಂದೂಗಳು ಮತ್ತು ವಿದೇಶಗಳಲ್ಲಿ ನೆಲೆಸಿರುವ ಭಾರತೀಯ ಮೂಲದ ಜನರ ವಿರುದ್ಧ ಹೆಚ್ಚುತ್ತಿರುವ ದ್ವೇಷದ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ ನಡೆಯುತ್ತಿದೆ. ಈ ಹಿನ್ನೆಲೆಯಲ್ಲಿ ಜೊಹೊ (Zoho) ಸಂಸ್ಥೆಯ ಸಹ-ಸಂಸ್ಥಾಪಕ ಶ್ರೀಧರ್ ವೆಂಬು ಹಂಚಿಕೊಂಡಿರುವ ಅಭಿಪ್ರಾಯ ಇದೀಗ ಗಮನ ಸೆಳೆದಿದೆ. ಜನಾಂಗೀಯ ದ್ವೇಷ ಮಾಡುವವರನ್ನು ದ್ವೇಷಿಸುವ ಬದಲು, ಭಾರತವನ್ನು ಬಲಿಷ್ಠ ರಾಷ್ಟ್ರವನ್ನಾಗಿ ನಿರ್ಮಿಸುವ ಮೂಲಕ ಉತ್ತರ ನೀಡಬೇಕು ಎಂಬುದು ಅವರ ಸಂದೇಶವಾಗಿದೆ.

ಅಮೆರಿಕದ ಎರಿಕ್ ವೈನ್‌ಸ್ಟೈನ್ ಪೋಸ್ಟ್‌ಗೆ ವೆಂಬು ಪ್ರತಿಕ್ರಿಯೆ

ಅಮೆರಿಕದ ಗಣಿತಜ್ಞ ಹಾಗೂ ಪಾಡ್‌ಕಾಸ್ಟರ್ ಎರಿಕ್ ವೈನ್‌ಸ್ಟೈನ್ ಅವರು ಎಕ್ಸ್‌ನಲ್ಲಿ (ಹಿಂದಿನ ಟ್ವಿಟರ್) ಭಾರತೀಯರು, ಹಿಂದೂಗಳು ಮತ್ತು ಭಾರತೀಯ ಮೂಲದ ಅಮೆರಿಕನ್ನರ ವಿರುದ್ಧ ಅನಗತ್ಯ ದ್ವೇಷ ಹೆಚ್ಚುತ್ತಿರುವುದಾಗಿ ಬರೆದಿದ್ದರು. ಇಂತಹ ಮನೋಭಾವ ಹೊಂದಿರುವವರು ತಮ್ಮನ್ನು ಅನುಸರಿಸುವುದನ್ನು ನಿಲ್ಲಿಸಬಹುದು ಎಂದೂ ಅವರು ತಿಳಿಸಿದ್ದರು.

ಈ ಪೋಸ್ಟ್‌ಗೆ ಪ್ರತಿಕ್ರಿಯಿಸಿದ ಶ್ರೀಧರ್ ವೆಂಬು, ಭಾರತವು ತನ್ನದೇ ಜನರ ಪ್ರತಿಭೆ ಮತ್ತು ಸಾಮರ್ಥ್ಯವನ್ನು ಆಧರಿಸಿ ಅಭಿವೃದ್ಧಿ ಹೊಂದುವವರೆಗೆ ಜಗತ್ತಿನಲ್ಲಿ ನಿಜವಾದ ಗೌರವ ಗಳಿಸುವುದು ಕಷ್ಟ ಎಂದು ಅಭಿಪ್ರಾಯಪಟ್ಟರು. ಬೇರೆ ದೇಶಗಳಲ್ಲಿ ಯಾವ ರಾಜಕೀಯ ಪಕ್ಷ ಅಧಿಕಾರದಲ್ಲಿದೆ ಎಂಬುದಕ್ಕಿಂತ, ಭಾರತ ತನ್ನ ಸಾಮರ್ಥ್ಯವನ್ನು ಹೇಗೆ ಬೆಳೆಸಿಕೊಳ್ಳುತ್ತದೆ ಎಂಬುದು ಮುಖ್ಯ ಎಂದು ಅವರು ಒತ್ತಿಹೇಳಿದರು.

“ನಾನು ಅವರನ್ನು ದ್ವೇಷಿಸುವುದಿಲ್ಲ, ನಿರ್ಮಾಣದ ಮೂಲಕ ಉತ್ತರಿಸುತ್ತೇನೆ”

ಜನಾಂಗೀಯ ದ್ವೇಷ ವ್ಯಕ್ತಪಡಿಸುವವರು ಭಾರತದ ಸಾಮರ್ಥ್ಯವನ್ನು ಪ್ರಶ್ನಿಸಿದಾಗ, ಅವರಿಗೆ ಕೋಪದಿಂದ ಪ್ರತಿಕ್ರಿಯಿಸುವ ಬದಲು ಕೆಲಸದ ಮೂಲಕ ಉತ್ತರಿಸಲು ಬಯಸುವುದಾಗಿ ವೆಂಬು ಹೇಳಿದ್ದಾರೆ. ಭಾರತ ಎಂದಿಗೂ ಅಭಿವೃದ್ಧಿಯಾಗುವುದಿಲ್ಲ ಎಂದು ನಂಬುವ ಭಾರತೀಯರ ಬಗ್ಗೆಯೂ ದ್ವೇಷ ಬೆಳೆಸಿಕೊಳ್ಳಲು ಬಯಸುವುದಿಲ್ಲ ಎಂದು ಅವರು ತಿಳಿಸಿದ್ದಾರೆ.

ಕಂಪನಿಗಳಾಗಲಿ, ರಾಷ್ಟ್ರಗಳಾಗಲಿ, ಅವುಗಳನ್ನು ಕಟ್ಟಲು ಸಾಧ್ಯ ಎಂಬ ನಂಬಿಕೆಯಿರುವ ಜನರಿಂದಲೇ ಅಭಿವೃದ್ಧಿ ಸಾಧ್ಯವಾಗುತ್ತದೆ ಎಂಬುದು ಅವರ ಅಭಿಪ್ರಾಯ. ದೇಶದ ಪ್ರತಿಭಾವಂತ ಜನರಿಗೆ ಅವಕಾಶ ಕಲ್ಪಿಸುವುದು, ಹೊಸ ತಂತ್ರಜ್ಞಾನಗಳನ್ನು ಅಭಿವೃದ್ಧಿಪಡಿಸುವುದು ಮತ್ತು ಸ್ವಂತ ಉದ್ಯಮಗಳನ್ನು ಬೆಳೆಸುವುದು ಇಂತಹ ಪ್ರಗತಿಗೆ ಮುಖ್ಯವಾಗಿವೆ.

“ನಿರ್ಮಿಸಿ, ನಿರ್ಮಿಸಿ, ಮತ್ತೆ ನಿರ್ಮಿಸಿ”

ತಮ್ಮ ಸಂದೇಶದ ಕೊನೆಯಲ್ಲಿ ವೆಂಬು, ಭಾರತದ ತುರ್ತು ರಾಷ್ಟ್ರೀಯ ಆದ್ಯತೆ ನಿರ್ಮಾಣ ಮತ್ತು ಅಭಿವೃದ್ಧಿಯಾಗಿರಬೇಕು ಎಂದು ಕರೆ ನೀಡಿದ್ದಾರೆ. ಅವರ ಅಭಿಪ್ರಾಯ ಸಾಮಾಜಿಕ ಜಾಲತಾಣಗಳಲ್ಲಿ ಬೆಂಬಲವನ್ನೂ ಚರ್ಚೆಯನ್ನೂ ಹುಟ್ಟುಹಾಕಿದೆ. ಕೆಲವರು ದ್ವೇಷಕ್ಕೆ ಸಕಾರಾತ್ಮಕ ಸಾಧನೆಗಳ ಮೂಲಕ ಉತ್ತರಿಸುವುದನ್ನು ಬೆಂಬಲಿಸಿದರೆ, ಇನ್ನು ಕೆಲವರು ಜನಾಂಗೀಯ ತಾರತಮ್ಯವನ್ನು ನೇರವಾಗಿ ಪ್ರಶ್ನಿಸುವುದೂ ಅಗತ್ಯ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಒಟ್ಟಿನಲ್ಲಿ, ವೆಂಬು ಅವರ ಸಂದೇಶವು ದೇಶದ ಪ್ರಗತಿಗಾಗಿ ಪ್ರತಿಭೆ, ಉದ್ಯಮಶೀಲತೆ ಮತ್ತು ತಂತ್ರಜ್ಞಾನಕ್ಕೆ ಆದ್ಯತೆ ನೀಡಬೇಕೆಂಬುದನ್ನು ನೆನಪಿಸುತ್ತದೆ. ಆದರೆ ಜನಾಂಗೀಯ ತಾರತಮ್ಯವನ್ನು ತಡೆಯುವ ಪ್ರಯತ್ನಗಳೂ ಅಷ್ಟೇ ಮುಖ್ಯ. ಅಭಿವೃದ್ಧಿಯ ಜೊತೆಗೆ ಸಮಾನತೆ ಮತ್ತು ಪರಸ್ಪರ ಗೌರವಕ್ಕೂ ಮಹತ್ವ ನೀಡಿದಾಗ ಮಾತ್ರ ಬಲಿಷ್ಠ ಸಮಾಜವನ್ನು ನಿರ್ಮಿಸಲು ಸಾಧ್ಯ.

Until India develops, based on the talents of our own people, we will not find true respect in the world, no matter whether right, left or center is in charge anywhere.

The racist shows us a mirror and asks: "if your nation is smart, why do you want to come here". I do not hate him, I want to respond by building.

Some Indians agree with the racist and think India will never develop. I do not hate them either, I want to respond by building.

Companies and nations are built by people who believe it can be done.

The urgent national priority is to build, build and build.

— Sridhar Vembu (@svembu) October 23, 2026

Border ಅಲ್ಲಿ ಭಾರತದ ಭಾರ್ಗವಾಸ್ತ್ರ; ಚೀನಾದ ಗರ್ವಭಂಗ ಮಾಡಲು ಶೌರ್ಯ ಪಡೆ ಸಜ್ಜು, ಇದರ ತಾಕತ್ತೇ ಬೇರೆ!

Bhimasi M Koleppanavar — Sat, 24 Oct 2026 11:46:20 +0530

ನವದೆಹಲಿ: ಭಾರತ-ಚೀನಾ ಗಡಿಯ ವಾಸ್ತವ ನಿಯಂತ್ರಣ ರೇಖೆಯಲ್ಲಿ ಚೀನಾದ ಅತಿಕ್ರಮಣ ಮತ್ತು ಕುತಂತ್ರಗಳಿಗೆ ತಕ್ಕ ಉತ್ತರ ನೀಡಲು ಭಾರತೀಯ ಪಡೆಗಳು ಬಲಿಷ್ಠ ತಡೆಗೋಡೆಯನ್ನು ನಿರ್ಮಿಸಿವೆ. ಲಡಾಖ್‌ನಿಂದ ಅರುಣಾಚಲ ಪ್ರದೇಶದವರೆಗಿನ ದುರ್ಗಮ ಪರ್ವತ ಪ್ರದೇಶಗಳಲ್ಲಿ ಚೀನಾದ ಗರ್ವಭಂಗ ಮಾಡಲು ಇಂಡೋ-ಟಿಬೆಟಿಯನ್ ಗಡಿ ಪೊಲೀಸ್ ಪಡೆಯ ಅತ್ಯಂತ ಗಣ್ಯ ಹಾಗೂ ಸಾಹಸಿ ವಿಭಾಗವಾದ 'ಶೌರ್ಯ ಕಮಾಂಡೋಗಳ' ಪಡೆ ಗಡಿಯಲ್ಲಿ ನಿಯೋಜಿಸಲಾಗಿದೆ.

ಮೈನಸ್ 40 ಡಿಗ್ರಿ ಚಳಿಯಲ್ಲೂ ಸೈ ಎನ್ನುವ ಕಮಾಂಡೋಗಳು!

ಶೌರ್ಯ ಕಮಾಂಡೋಗಳು ಐಟಿಬಿಪಿಯ ಅತ್ಯಂತ ನುರಿತ, ದೈಹಿಕವಾಗಿ ಸಮರ್ಥ ಮತ್ತು ಮಾನಸಿಕವಾಗಿ ಗಟ್ಟಿಮುಟ್ಟಾದ ಸಿಬ್ಬಂದಿಯಿಂದ ಆಯ್ಕೆಯಾದ ವಿಶೇಷ ಪಡೆಯಾಗಿದೆ. 10,000 ದಿಂದ 18,000 ಅಡಿಗಳಷ್ಟು ಎತ್ತರದ ಪ್ರದೇಶಗಳಲ್ಲಿ, ಗಾಳಿಯಲ್ಲಿ ಆಮ್ಲಜನಕದ ಮಟ್ಟ ತೀವ್ರ ಕಡಿಮೆಯಿರುವ ವಾತಾವರಣದಲ್ಲೂ ದಣಿವರಿಯದೆ ಗಸ್ತು ತಿರುಗಲು ಇವರಿಗೆ ತರಬೇತಿ ನೀಡಲಾಗಿದೆ. ಮೈನಸ್ 40 ಡಿಗ್ರಿ ಸೆಲ್ಸಿಯಸ್‌ನಷ್ಟು ಮೂಳೆ ಕೊರೆವ ಚಳಿಯಲ್ಲೂ ಆಕ್ರಮಣಕಾರಿ ಕಾರ್ಯಾಚರಣೆ ನಡೆಸಬಲ್ಲ ಈ ಪಡೆ, 3,488 ಕಿ.ಮೀ ಉದ್ದದ ಭಾರತ-ಚೀನಾ ಗಡಿ ಭದ್ರತೆಯ ಹೊಸ ಸ್ತಂಭವಾಗಿ ಹೊರಹೊಮ್ಮಿದೆ.

ಗಾಲ್ವಾನ್ ಘಟನೆಯ ಬಳಿಕ ನಿರಾಯುಧ ಕಾಳಗದ ತರಬೇತಿ!

ಎಲ್‌ಎಸಿ ಉದ್ದಕ್ಕೂ ಎರಡೂ ದೇಶಗಳ ನಡುವೆ ಗುಂಡಿನ ದಾಳಿ ನಡೆಸದಿರುವ ಶಿಷ್ಟಾಚಾರವಿರುವುದರಿಂದ, ಚೀನಾದ ಸೈನಿಕರು ಆಗಾಗ್ಗೆ ಕುತಂತ್ರ ಮತ್ತು ಕೈಕೈ ಮಿಲಾಯಿಸುವ ತಂತ್ರಗಳನ್ನು ಆಶ್ರಯಿಸುತ್ತಾರೆ. ಇಂತಹ ಸಂದರ್ಭಗಳಲ್ಲಿ ಚೀನಾಕ್ಕೆ ತಕ್ಕ ಶಾಸ್ತಿ ಮಾಡಲು 2020ರ ಗಾಲ್ವಾನ್ ಕಣಿವೆ ಹಿಂಸಾತ್ಮಕ ಘರ್ಷಣೆ ನಂತರ ಈ ಕಮಾಂಡೋಗಳಿಗೆ ಶಸ್ತ್ರಾಸ್ತ್ರಗಳಿಲ್ಲದೆ ಮುಖಾಮುಖಿ ಯುದ್ಧ ಮಾಡುವ ತರಬೇತಿಯನ್ನು ಕಡ್ಡಾಯಗೊಳಿಸಲಾಗಿದೆ.

ಅತ್ಯಾಧುನಿಕ ಶಸ್ತ್ರಾಸ್ತ್ರ ಮತ್ತು ಸಾಮರ್ಥ್ಯ!

ಈ ಕಮಾಂಡೋಗಳು ಕೇವಲ ಮುಖಾಮುಖಿ ಕಾಳಗದಲ್ಲಷ್ಟೇ ಅಲ್ಲದೆ, ಅತ್ಯಾಧುನಿಕ ಆಕ್ರಮಣಕಾರಿ ರೈಫಲ್‌ಗಳು, ಸ್ನೈಪರ್ ಗನ್‌, ರಾತ್ರಿ-ದೃಷ್ಟಿ ಗೇರ್‌ ಕಾರ್ಯಾಚರಣೆಯಲ್ಲಿ ಬಳಸಲಿದ್ದಾರೆ. ಜತೆಗೆ ರಾಸಾಯನಿಕ, ಜೈವಿಕ, ವಿಕಿರಣಶೀಲ ಮತ್ತು ಪರಮಾಣು ತುರ್ತು ಸಂದರ್ಭ ನಿರ್ವಹಿಸುವ ವಿಶೇಷ ಪರಿಣತಿಯನ್ನೂ ಇವರು ಹೊಂದಿದ್ದಾರೆ. ಸಾಮಾನ್ಯ ಸೈನಿಕರಿಗಿಂತ ಹೆಚ್ಚು ಆಕ್ರಮಣಕಾರಿ ಮತ್ತು ಸುದೀರ್ಘ ಕಾಳಗಕ್ಕೆ ಸಾಮರ್ಥ್ಯ ಹೊಂದಿರುವ ಈ 'ಶೌರ್ಯ ಪಡೆ', ಗಡಿಯಲ್ಲಿ ಎದುರಾಗುವ ಯಾವುದೇ ತುರ್ತು ಪರಿಸ್ಥಿತಿಗೆ ತಕ್ಷಣ ಸ್ಪಂದಿಸುವ ಭಾರತದ ಅತ್ಯಂತ ಪ್ರಬಲ ಅಸ್ತ್ರವಾಗಿದೆ.

Gold and Silver price today: ಚಿನ್ನ ಮತ್ತು ಬೆಳ್ಳಿ ದರದಲ್ಲಿ ಭಾರೀ ಇಳಿಕೆ! ಬೆಂಗಳೂರಲ್ಲಿ ಇಂದಿನ ದರ ಎಷ್ಟು?

Ravi Janekal — Sat, 24 Oct 2026 10:54:57 +0530

ಇತ್ತೀಚೆಗೆ ಗಗನಕ್ಕೆ ಏರಿದ್ದ ಚಿನ್ನ ಬೆಳ್ಳಿ ದರಗಳು ಇಳಿಕೆಯಾಗಿ ಅಚ್ಚರಿ ಮೂಡಿಸಿವೆ. ಯಾವ್ಯಾವ ನಗರದಲ್ಲಿ ಚಿನ್ನ, ಬೆಳ್ಳಿ ದರಗಳಲ್ಲಿ ಪ್ರತಿ ಗ್ರಾಂಗೆ ಎಷ್ಟು ಇಳಿಕೆಯಾಗಿದೆ ಎಂಬ ದರಗಳ ಪಟ್ಟಿ ಸಹಿ ಸಂಪೂರ್ಣ ವಿವರ ಇಲ್ಲಿ ತಿಳಿಸಲಾಗಿದೆ.

ಮುಂಬೈ, ದೆಹಲಿ, ನಾಸಿಕ್, ಬೆಂಗಳೂರು ಸೇರಿದಂತೆ ದೇಶದ ಹಲವು ನಗರಗಳಲ್ಲಿ ಚಿನ್ನ ಬೆಳ್ಳಿ ದರದಲ್ಲಿ ಭಾರೀ ಇಳಿಕೆಯಾಗಿದೆ.

ಹಾಗಾದ್ರೆ ಬೆಂಗಳೂರಿನಲ್ಲಿ ಇಂದಿನ ಚಿನ್ನದ ದರ ಎಷ್ಟಿದೆ?

ಬೆಂಗಳೂರಿನಲ್ಲಿ 22 ಕ್ಯಾರೆಟ್ ಚಿನ್ನದ ಬೆಲೆ ಪ್ರತಿ 10 ಗ್ರಾಂಗೆ ₹1,30,590 ಆಗಿದೆ. ಭಾರತದಲ್ಲಿ ಅಕ್ಟೋಬರ್ 24 ರಂದು, ಪ್ರತಿ ಗ್ರಾಂಗೆ 24 ಕ್ಯಾರೆಟ್ ಚಿನ್ನದ ದರ ₹14,247 ಪ್ರತಿ ಗ್ರಾಂಗೆ 22 ಕ್ಯಾರೆಟ್ ಚಿನ್ನದ ದರ ₹13,059 ಮತ್ತು 18 ಕ್ಯಾರೆಟ್ ಚಿನ್ನದ ದರ ₹10,685 ಗೆ ಇಳಿದಿದೆ.

ಭಾರತದಲ್ಲಿ, ಅಕ್ಟೋಬರ್ 24 ರಂದು, ಪ್ರತಿ 10 ಗ್ರಾಂಗೆ 22 ಕ್ಯಾರೆಟ್ ಚಿನ್ನದ ದರ ₹1,30,590, ಪ್ರತಿ 10 ಗ್ರಾಂಗೆ 24 ಕ್ಯಾರೆಟ್ ಚಿನ್ನದ ದರ ₹1,42,470 ಮತ್ತು 10 ಗ್ರಾಂಗೆ 18 ಕ್ಯಾರೆಟ್ ಚಿನ್ನದ ದರ ₹1,06,850 ಇತ್ತು. ಭಾರತದಲ್ಲಿ, ಅಕ್ಟೋಬರ್ 24 ರಂದು ಪ್ರತಿ ಗ್ರಾಂಗೆ ಬೆಳ್ಳಿ ದರ 219.90 ರೂ ಮತ್ತು ಪ್ರತಿ ಕಿಲೋಗ್ರಾಂಗೆ ₹2,19,900 ಆಗಿದೆ.

ಹಿಂದಿನ ದರ ಎಷ್ಟಿತ್ತು?

ಭಾರತದಲ್ಲಿ, ಅಕ್ಟೋಬರ್ 23 ರಂದು, ಪ್ರತಿ ಗ್ರಾಂಗೆ 24 ಕ್ಯಾರೆಟ್ ಚಿನ್ನದ ದರ ₹14,437 ಪ್ರತಿ ಗ್ರಾಂಗೆ 22 ಕ್ಯಾರೆಟ್ ಚಿನ್ನದ ದರ ₹13,234, 18 ಕ್ಯಾರೆಟ್ ಚಿನ್ನದ ದರ ₹10,828. ಇತ್ತು. ಅಕ್ಟೋಬರ್ 23 ರಂದು, ಪ್ರತಿ 10 ಗ್ರಾಂಗೆ 22 ಕ್ಯಾರೆಟ್ ಚಿನ್ನದ ದರ ₹1,32,340 ಪ್ರತಿ 10 ಗ್ರಾಂಗೆ 24 ಕ್ಯಾರೆಟ್ ಚಿನ್ನದ ದರ ₹1,44,370 ಮತ್ತು 10 ಗ್ರಾಂಗೆ 18 ಕ್ಯಾರೆಟ್ ಚಿನ್ನದ ದರ ₹1,08,280, ಭಾರತದಲ್ಲಿ ಪ್ರತಿ ಗ್ರಾಂ ಮತ್ತು ಕೆಜಿಗೆ ಬೆಳ್ಳಿ ದರ 224.90 ರೂ. ಇತ್ತು

ಬೆಂಗಳೂರಿನಲ್ಲಿ 22 ಕ್ಯಾರೆಟ್ ಚಿನ್ನದ ದರ ಪ್ರತಿ 10 ಗ್ರಾಂಗೆ ₹1,30,590, 24 ಕ್ಯಾರೆಟ್ ಚಿನ್ನದ ದರ ಪ್ರತಿ 10 ಗ್ರಾಂಗೆ ₹1,42,470 ಮತ್ತು 18 ಕ್ಯಾರೆಟ್ ಚಿನ್ನದ ದರ ಪ್ರತಿ 10 ಗ್ರಾಂಗೆ ₹1,06,850, ನಾಸಿಕ್‌ನಲ್ಲಿ 22 ಕ್ಯಾರೆಟ್ ಚಿನ್ನದ ದರ ಪ್ರತಿ 10 ಗ್ರಾಂಗೆ ₹1,30,590, 24 ಕ್ಯಾರೆಟ್ ಚಿನ್ನದ ದರ ಪ್ರತಿ 10 ಗ್ರಾಂಗೆ ₹1,42,470 ಮತ್ತು 18 ಕ್ಯಾರೆಟ್ ಚಿನ್ನದ ದರ ಪ್ರತಿ 10 ಗ್ರಾಂಗೆ ₹1,06,850 ಆಗಿದೆ. ಇನ್ನು ದೆಹಲಿಯಲ್ಲಿ 10 ಗ್ರಾಂಗೆ 22 ಕ್ಯಾರೆಟ್ ಚಿನ್ನದ ದರ ₹1,30,740., 10 ಗ್ರಾಂಗೆ 24 ಕ್ಯಾರೆಟ್ ಚಿನ್ನದ ದರ ₹1,42,620. ಮತ್ತು 10 ಗ್ರಾಂಗೆ 18 ಕ್ಯಾರೆಟ್ ಚಿನ್ನದ ದರ 1,06,850 ಇದೆ.

ಗಮನಿಸಿ: ಮೇಲಿನ ಚಿನ್ನದ ದರಗಳು GST, TCS ಮತ್ತು ಇತರ ತೆರಿಗೆಗಳನ್ನು ಒಳಗೊಂಡಿಲ್ಲ. ನಿಖರವಾದ ದರಗಳಿಗಾಗಿ ದಯವಿಟ್ಟು ಸಮೀಪದ ಜ್ಯೂವೆಲ್ಲರಿಗಳಿಗೆ ಭೇಟಿ ನೀಡಿ

ಟ್ರಕ್‌ ಪಲ್ಟಿ, ರಸ್ತೆ ಮೇಲೆ 209 ಬಿಯರ್‌ ಬಾಕ್ಸ್‌ಗಳು ಚೆಲ್ಲಾಪಿಲ್ಲಿ; ಎದ್ನೋ ಬಿದ್ನೋ ಅಂತಾ ಎತ್ಕೊಂಡು ಹೋದ ಮದ್ಯಪ್ರಿಯರು

Ganesh Mabla Gowda — Sat, 24 Oct 2026 10:27:44 +0530

209 ಬಿಯರ್ ಬಾಕ್ಸ್ ಮತ್ತು ಮದ್ಯ ಸಾಗಿಸುತ್ತಿದ್ದ ಪಿಕಪ್‌ ವಾಹನ ಪಲ್ಟಿಯಾಗಿದೆ. ವಿಷಯ ತಿಳಿದ ಕೂಡಲೇ ಸ್ಥಳೀಯ ಮದ್ಯಪ್ರಿಯರು ಪೊಲೀಸರು ಬರುವ ಮುನ್ನವೇ ಸ್ಥಳಕ್ಕೆ ದೌಡಾಯಿಸಿ ಬಾಟಲಿಗಳನ್ನ ಕೈಗೆತ್ತಿಕೊಂಡು ಪರರಾರಿ ಆಗಿದ್ದಾರೆ. ಈ ಘಟನೆ ಜಾರ್ಖಂಡ್‌ನ ಪಶ್ಚಿಮ ಸಿಂಗ್‌ಭೂಮ್ ಜಿಲ್ಲೆಯ ಖುಂಟ್‌ಪಾನಿ ಗ್ರಾಮದ ಬಳಿ ನಡೆದಿದೆ.

ಆಗಿದ್ದೇನು?

ಶುಕ್ರವಾರ ಸಂಜೆ ಚೈಬಾಸಾ-ಚಕ್ರಧರಪುರ ರಸ್ತೆಯ ಖುಂಟ್‌ಪಾನಿ ಗ್ರಾಮದ ಬಳಿ ಪಿಕಪ್ ಪಲ್ಟಿಯಾಗಿದೆ. ಪರಿಣಾಮ ವಾಹನದಲ್ಲಿದ್ದ 209 ಬಾಕ್ಸ್‌ಗಳು ರಸ್ತೆ ಮಧ್ಯೆ ಚೆಲ್ಲಾಪಿಯಲ್ಲಿಯಾಗಿ ಬಿದ್ದಿವೆ. ನೂರಾರು ಬಾಟಲಿಗಳು ಒಡೆದು ಮದ್ಯ ಚೆಲ್ಲಿ ಹೋಗಿದೆ. ಇನ್ನು, ಕೆಲವು ಬಾಟಲ್‌ಗಳು ಏನೂ ಆಗದೇ ರಸ್ತೆಯಲ್ಲಿ ಬಿದ್ದಿದ್ದವು. ಇದು ಅಲ್ಲಿದ್ದ ಮದ್ಯಪ್ರಿಯರನ್ನ ಆಕರ್ಷಿಸಿದೆ. ಅವುಗಳನ್ನ ಸಂಗ್ರಹಿಸಿಕೊಳ್ಳಲು ಧಾವಿಸಿದ್ದಾರೆ. ಅಷ್ಟೇ ಅಲ್ಲ.. ಮದ್ಯದ ಬಾಟಲಿ ರಸ್ತೆಯಲ್ಲಿ ಬಿದ್ದಿರುವ ವಿಚಾರ ಗ್ರಾಮದ ತುಂಬೆಲ್ಲಾ ಗೊತ್ತಾಗುತ್ತಿದ್ದಂತೆಯೇ ಮತ್ತಷ್ಟು ಜನ ಓಡೋಡಿ ಬಂದಿದ್ದಾರೆ. ಇದರಿಂದಾಗಿ ಅಲ್ಲಿ ಉದ್ವಿಗ್ನದ ಪರಿಸ್ಥಿತಿ ನಿರ್ಮಾಣವಾಗಿತ್ತು.

ಅಪಘಾತ ಆಗಿದ್ದು ಹೇಗೆ?

ಅಂದ್ಹಾಗೆ ಅಪಘಾತ ಸಂಭವಿಸಿರೋದು ರಾಷ್ಟ್ರೀಯ ಹೆದ್ದಾರಿ 75E ನಲ್ಲಿ. ವರದಿಗಳ ಪ್ರಕಾರ.. ಪಿಕಪ್ ಟ್ರಕ್ ಚೈಬಾಸಾದ ತುಂಗ್ರಿಯಲ್ಲಿರುವ ಗೋದಾಮಿನಿಂದ ಮದ್ಯವನ್ನು ಸಾಗಿಸುತ್ತಿತ್ತು. ಚಕ್ರಧರಪುರ ಮತ್ತು ಮನೋಹರಪುರದ ಇಟ್ವಾರಿ ಬಜಾರ್ ಕಡೆಗೆ ಸರಕನ್ನು ಕೊಂಡೊಯ್ಯುತ್ತಿತ್ತು. ಖುಂಟ್ಪಾನಿ ಬಳಿ ಚಾಲಕನ ನಿಯಂತ್ರಣ ತಪ್ಪಿ ಪಲ್ಟಿಯಾಗಿದೆ. ಪರಿಣಾಮ ಮದ್ಯದ ಬಾಕ್ಸ್‌ ರಸ್ತೆಗೆ ಜಾರಿ ಬಿದ್ದಿವೆ. ಬೆನ್ನಲ್ಲೇ ಹಲವು ಸ್ಥಳೀಯ ಯುವಕರು ಪಲ್ಟಿಯಾದ ವಾಹನದ ಸುತ್ತ ದೌಡಾಯಿಸಿದ್ದಾರೆ.

ಕೆಲವು ಯುವಕರು ಮದ್ಯದ ಬಾಟಲಿಯನ್ನು ಎದ್ನೋ ಬಿದ್ನೋ ಎಂದು ಎತ್ತಿಕೊಂಡು ಓಡಿದ್ದಾರೆ. ನಂತರ ಯಾರೋ ಅದನ್ನು ಗಮನಿಸಿ ಸ್ಥಳೀಯ ಪೊಲೀಸರಿಗೆ ಕರೆ ಮಾಡಿ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಆಗಮಿಸಿದ ಮುಫಾಸಿಲ್ ಪೊಲೀಸ್ ಠಾಣೆಯ ಪೊಲೀಸರು ಅಲ್ಲಿನ ಪರಿಸ್ಥಿತಿಯನ್ನ ನಿಯಂತ್ರಣಕ್ಕೆ ತೆಗೆದುಕೊಂಡರು. ಪಲ್ಟಿಯಾದ ವಾಹವನವನ್ನು ರಸ್ತೆಯಿಂದ ತೆರವುಗೊಳಿಸಿ.. ರಸ್ತೆಯಲ್ಲಿ ಬಿದ್ದಿದ್ದ ಬಾಟಲಿಗಳನ್ನ ಸುರಕ್ಷಿತಗೊಳಿಸಿದರು. ನಂತರ ಒಡೆದು ಹೋಗಿದ್ದ ಬಾಟಲಿಗಳ ಪೀಸ್‌ಗಳಲ್ಲಿ ಕ್ಲೀನ್‌ ಮಾಡಿಸಿ ಸುಗಮ ರಸ್ತೆ ಸಂಚಾರಕ್ಕೆ ಅನುವು ಮಾಡಿಕೊಟ್ಟರು.

ಅಬಕಾರಿ ಇಲಾಖೆಯ ಅಧಿಕಾರಿಗಳು ನೀಡಿರುವ ಮಾಹಿತಿಗಳ ಪ್ರಕಾರ.. ಅದೊಂದು ದುರ್ಘಟನೆಯಿಂದ ಲಕ್ಷಾಂತರ ರೂಪಾಯಿ ನಷ್ಟವಾಗಿದೆ. ಅಪಘಾತದ ತೀವ್ರತೆಗೆ ನೂರಾರು ಬಾಟಲ್‌ಗಳು ಒಡೆದು ಹೋಗಿವೆ. ಪುಡಿಪುಡಿಯಾದ ಬಾಟಲ್‌ಗಳಲ್ಲಿ ಸುಮಾರು 8 ಲಕ್ಷ ಮೌಲ್ಯದ ಮದ್ಯ ಇತ್ತು ಎನ್ನಲಾಗುತ್ತಿದೆ. ವಾಹನದಲ್ಲಿದ್ದ ಎಲ್ಲ ಬಾಕ್ಸ್‌ಗಳಿಗೂ ಪರವಾನಗಿ ಇತ್ತು. ವಿಮಾ ಸೌಲಭ್ಯ ಇತ್ತೋ ಇಲ್ಲವೋ ಅನ್ನೋದನ್ನು ಪರಿಶೀಲಿಸಬೇಕಾಗಿದೆ. ಒಂದು ವೇಳೆ ವಿಮಾ ವ್ಯವಸ್ಥೆ ಇದ್ದರೆ.. ಆರ್ಥಿಕನಷ್ಟ ಮರುಪಡೆಯಲು ಸಹಾಯ ಮಾಡುತ್ತದೆ. ಇಲ್ಲದಿದ್ದರೆ ಯಾರು ಪರವಾನಗಿ ಹೊಂದಿರುತ್ತಾರೋ, ಅವರೇ ಆರ್ಥಿಕ ನಷ್ಟವನ್ನು ಭರಿಸಬೇಕಾಗುತ್ತದೆ ಎಂದು ತಿಳಿಸಿದ್ದಾರೆ. ಇನ್ನು, ಪೊಲೀಸರು ಹಾನಿಗೊಳಗಾದ ಪಿಕಪ್ ಟ್ರಕ್ ಅನ್ನು ವಶಪಡಿಸಿಕೊಂಡಿದ್ದಾರೆ. ಅಪಘಾತದ ಬಗ್ಗೆ ತನಿಖೆ ಪ್ರಾರಂಭಿಸಿದ್ದಾರೆ.

16,000 ಅಡಿ ಎತ್ತರದಲ್ಲಿ ಪರ್ವತಾರೋಹಣ, ಇದ್ದಕ್ಕಿದ್ದಂತೆ ಶುರುವಾಯ್ತು ಪೀರಿಯಡ್ಸ್‌! ಯುವತಿ ಮಾಡಿದ್ದೇನು?

Chandrashekar GS — Sat, 24 Oct 2026 10:05:03 +0530

16,000 ಅಡಿ ಎತ್ತರದಲ್ಲಿ ಪರ್ವತಾರೋಹಿಗೆ ಮುಟ್ಟಾದ ಪಿರಿಯಡ್ಸ್! ಸ್ಯಾನಿಟರಿ ಪ್ಯಾಡ್ ಇಲ್ಲದೆ ಟಿಶ್ಯೂ ಪೇಪರ್‌ನಿಂದ ಪರಿಹಾರ

ಪರ್ವತಾರೋಹಣವೆಂದರೆ ಕೇವಲ ಎತ್ತರದ ಶಿಖರಗಳನ್ನು ಏರುವ ಸಾಹಸವಲ್ಲ; ಕಠಿಣ ಪರಿಸ್ಥಿತಿಯಲ್ಲಿ ದೈನಂದಿನ ಅಗತ್ಯಗಳನ್ನು ನಿಭಾಯಿಸುವ ಸವಾಲೂ ಹೌದು. ಮಹಾರಾಷ್ಟ್ರದ ಪರ್ವತಾರೋಹಿ ಹಾಗೂ ಸಾಹಸ ಅನ್ವೇಷಕಿ ಯೋಗೇಶ್ವರಿ ಬೊಹ್ರೆ ಅವರಿಗೆ ಸುಮಾರು 16,000 ಅಡಿ ಎತ್ತರದಲ್ಲಿ ಪರ್ವತಾರೋಹಣದ ವೇಳೆ ಪಿರಿಯಡ್ಸ್ ಆರಂಭವಾಗಿದೆ. ಸ್ಯಾನಿಟರಿ ಪ್ಯಾಡ್ ಲಭ್ಯವಿರದ ಕಾರಣ, ತಮ್ಮ ಬಳಿಯಿದ್ದ ಟಿಶ್ಯೂ ಪೇಪರ್ ಮತ್ತು ಮೆಡಿಕಲ್ ಟೇಪ್ ಬಳಸಿ ತಾತ್ಕಾಲಿಕ ಪ್ಯಾಡ್ ತಯಾರಿಸಿಕೊಂಡಿದ್ದಾರೆ. ಈ ಅನುಭವವನ್ನು ಅವರು ವಿಡಿಯೋದಲ್ಲಿ ಹಂಚಿಕೊಂಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆದಿದೆ.

ಎತ್ತರದ ಪರ್ವತದಲ್ಲಿ ಎದುರಾದ ಅನಿರೀಕ್ಷಿತ ಸವಾಲು

ಸ್ಯಾನಿಟರಿ ಪ್ಯಾಡ್ ಇಲ್ಲ, ಸಹಾಯಕ್ಕೆ ಮಹಿಳೆಯರೂ ಇರಲಿಲ್ಲ

ಯೋಗೇಶ್ವರಿ ಪರ್ವತಾರೋಹಣದ ಅಭಿಯಾನದಲ್ಲಿದ್ದಾಗಲೇ ಅವರಿಗೆ ಪಿರಿಯಡ್ಸ್ ಆರಂಭವಾಯಿತು. ಸುತ್ತಮುತ್ತ ಸ್ಯಾನಿಟರಿ ಪ್ಯಾಡ್ ಲಭ್ಯವಿರಲಿಲ್ಲ. ಜೊತೆಗೆ, ಆ ಸ್ಥಳದಲ್ಲಿ ಅವರೊಂದಿಗೆ ಬೇರೆ ಮಹಿಳೆಯರೂ ಇರಲಿಲ್ಲ. ಇನ್ನೂ ನಾಲ್ಕರಿಂದ ಐದು ದಿನಗಳ ಕಾಲ ಅಲ್ಲಿಯೇ ಇರಬೇಕಿದ್ದ ಕಾರಣ, ಪರಿಸ್ಥಿತಿಯನ್ನು ಹೇಗೆ ನಿಭಾಯಿಸಬೇಕು ಎಂಬ ಪ್ರಶ್ನೆ ಎದುರಾಯಿತು.

ಸಾಮಾನ್ಯವಾಗಿ ನಗರಗಳಲ್ಲಿ ಸುಲಭವಾಗಿ ಸಿಗುವ ಮುಟ್ಟಿನ ಸ್ವಚ್ಛತಾ ಉತ್ಪನ್ನಗಳು, ದೂರದ ಪರ್ವತ ಪ್ರದೇಶಗಳಲ್ಲಿ ಲಭ್ಯವಾಗದೇ ಇರಬಹುದು. ಇಂತಹ ಸಂದರ್ಭಗಳಲ್ಲಿ ಮಹಿಳೆಯರು ಎದುರಿಸುವ ಸಮಸ್ಯೆಗಳು ಸಾಹಸ ಪ್ರವಾಸಗಳ ಬಗ್ಗೆ ನಡೆಯುವ ಚರ್ಚೆಗಳಲ್ಲಿ ಹೆಚ್ಚಾಗಿ ಗಮನಕ್ಕೆ ಬರುವುದಿಲ್ಲ.

ಟಿಶ್ಯೂ ಪೇಪರ್‌ನಿಂದ ತಾತ್ಕಾಲಿಕ ವ್ಯವಸ್ಥೆ

ಯೋಗೇಶ್ವರಿ ತಮ್ಮ ಬಳಿ ಇದ್ದ ಟಿಶ್ಯೂ ಪೇಪರ್‌ನ ಹಲವು ಪದರಗಳನ್ನು ಒಂದರ ಮೇಲೊಂದು ಇಟ್ಟು, ಅಗತ್ಯಕ್ಕೆ ತಕ್ಕಂತೆ ಮಡಚಿಕೊಂಡರು. ನಂತರ ಅದರ ಅಂಚುಗಳನ್ನು ಮೆಡಿಕಲ್ ಟೇಪ್ ಬಳಸಿ ಭದ್ರಪಡಿಸಿ ತಾತ್ಕಾಲಿಕ ಪ್ಯಾಡ್ ತಯಾರಿಸಿದರು. ಇದನ್ನು ಹೇಗೆ ಮಾಡಿದರು ಎಂಬುದನ್ನು ವಿಡಿಯೋದಲ್ಲಿ ತೋರಿಸಿದ್ದಾರೆ.

ತಮ್ಮ ಅನುಭವವನ್ನು ಹಂಚಿಕೊಂಡ ಅವರು, ಪರ್ವತಗಳು ಕೇವಲ ಏರುವುದನ್ನು ಮಾತ್ರವಲ್ಲ, ಕಷ್ಟದ ಸಂದರ್ಭಗಳಿಗೆ ಹೊಂದಿಕೊಳ್ಳುವುದನ್ನೂ ಕಲಿಸುತ್ತವೆ ಎಂಬ ಸಂದೇಶ ನೀಡಿದ್ದಾರೆ. ಪಿರಿಯಡ್ಸ್ ಪ್ರವಾಸದ ವೇಳಾಪಟ್ಟಿಯನ್ನು ನೋಡಿ ಬರುವುದಿಲ್ಲ; ಆದ್ದರಿಂದ ಅನಿರೀಕ್ಷಿತ ಸಂದರ್ಭಗಳಿಗೆ ಸಿದ್ಧರಾಗಿರುವುದು ಮುಖ್ಯ ಎಂದು ಅವರ ಅನುಭವ ನೆನಪಿಸುತ್ತದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಮೆಚ್ಚುಗೆ

ಯೋಗೇಶ್ವರಿ ಅವರ ವಿಡಿಯೋಗೆ ಹಲವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಪರ್ವತಾರೋಹಣದ ವೇಳೆ ಮುಟ್ಟಿನ ನಿರ್ವಹಣೆಯ ಬಗ್ಗೆ ಮುಂಚಿತವಾಗಿ ಯೋಜನೆ ಮಾಡುವುದು ಎಷ್ಟು ಮುಖ್ಯ ಎಂಬುದನ್ನೂ ಈ ಘಟನೆ ನೆನಪಿಸಿದೆ. ಮುಂದಿನ ಪ್ರವಾಸಗಳಲ್ಲಿ ಸ್ಯಾನಿಟರಿ ಪ್ಯಾಡ್ ಅಥವಾ ಮೆನ್ಸ್ಟ್ರುವಲ್ ಕಪ್‌ನಂತಹ ಅಗತ್ಯ ವಸ್ತುಗಳನ್ನು ಕೊಂಡೊಯ್ಯುವಂತೆ ಕೆಲವರು ಸಲಹೆ ನೀಡಿದ್ದಾರೆ.

ಪರ್ವತಾರೋಹಣಕ್ಕೆ ಹೋಗುವ ಮಹಿಳೆಯರು ಗಮನಿಸಬೇಕಾದ ಅಂಶಗಳು

ಪರ್ವತಾರೋಹಣ ಅಥವಾ ದೂರದ ಚಾರಣಕ್ಕೆ ಹೋಗುವಾಗ ಮುಟ್ಟಿನ ದಿನಾಂಕವನ್ನು ಗಮನದಲ್ಲಿಟ್ಟುಕೊಂಡು ಅಗತ್ಯ ವಸ್ತುಗಳನ್ನು ಮುಂಚಿತವಾಗಿ ಪ್ಯಾಕ್ ಮಾಡಿಕೊಳ್ಳುವುದು ಉತ್ತಮ. ಹೆಚ್ಚುವರಿ ಪ್ಯಾಡ್‌ಗಳು, ಸ್ವಚ್ಛವಾದ ಒಳಉಡುಪು, ಕೈ ಸ್ವಚ್ಛಗೊಳಿಸುವ ಸಾಮಗ್ರಿ ಮತ್ತು ಬಳಸಿದ ಉತ್ಪನ್ನಗಳನ್ನು ಸುರಕ್ಷಿತವಾಗಿ ವಾಪಸ್ ತರಲು ಚೀಲಗಳನ್ನು ಇಟ್ಟುಕೊಳ್ಳಬಹುದು.

ಯೋಗೇಶ್ವರಿ ಬಳಸಿದ ಟಿಶ್ಯೂ ಪೇಪರ್ ಮತ್ತು ಮೆಡಿಕಲ್ ಟೇಪ್ ತುರ್ತು ಪರಿಸ್ಥಿತಿಯಲ್ಲಿ ಮಾಡಿದ ತಾತ್ಕಾಲಿಕ ವ್ಯವಸ್ಥೆ ಮಾತ್ರ. ಇದು ಸಾಮಾನ್ಯ ಸ್ಯಾನಿಟರಿ ಪ್ಯಾಡ್‌ಗೆ ಸಮಾನವಾದ ಸುರಕ್ಷಿತ ಪರ್ಯಾಯವಲ್ಲ. ಆದ್ದರಿಂದ ಇಂತಹ ಪರಿಸ್ಥಿತಿ ಎದುರಾಗದಂತೆ ಮುಂಚಿತ ಸಿದ್ಧತೆ ಮಾಡಿಕೊಳ್ಳುವುದು ಮುಖ್ಯ.

ಯೋಗೇಶ್ವರಿ ಅವರ ಅನುಭವವು ಪರ್ವತಾರೋಹಣದಲ್ಲಿ ಮಹಿಳೆಯರ ಆರೋಗ್ಯ ಮತ್ತು ವೈಯಕ್ತಿಕ ಅಗತ್ಯಗಳ ಬಗ್ಗೆ ಮುಕ್ತವಾಗಿ ಮಾತನಾಡುವ ಅಗತ್ಯವನ್ನೂ ಎತ್ತಿ ತೋರಿಸಿದೆ.

View this post on Instagram

A post shared by Mountaineer Yogeshwari (@yogi_on_everest)

81ನೇ ವಯಸ್ಸಿನಲ್ಲಿ ತಂದೆಗೆ ಮಗನ ವಿಶೇಷ ಉಡುಗೊರೆ; ವಿಮಾನದಲ್ಲಿನ ಘೋಷಣೆ ಕೇಳಿ ಭಾವುಕರಾದ ಪ್ರಯಾಣಿಕರು!

Chandrashekar GS — Sat, 24 Oct 2026 08:58:17 +0530

“ಹ್ಯಾಪಿ 81ನೇ ಹುಟ್ಟುಹಬ್ಬ ಅಪ್ಪಾ!” ವಿಮಾನದಲ್ಲೇ ತಂದೆಗೆ ಗೌರವ ಸಲ್ಲಿಸಿದ ಪೈಲಟ್

ತಂದೆಯ ಹುಟ್ಟುಹಬ್ಬಕ್ಕೆ ಮಗನಿಂದ ಮರೆಯಲಾಗದ ಉಡುಗೊರೆ

ತಂದೆ ಎಂದರೆ ಮಕ್ಕಳ ಪಾಲಿಗೆ ಮೊದಲ ಹೀರೋ, ಜೀವನದ ಮೊದಲ ಗುರು ಮತ್ತು ಸದಾ ಪ್ರೇರಣೆ ನೀಡುವ ವ್ಯಕ್ತಿ. ಅಂತಹ ತಂದೆಯ 81ನೇ ಹುಟ್ಟುಹಬ್ಬವನ್ನು ವಿಶೇಷವಾಗಿ ಆಚರಿಸಲು ಇಂಡಿಗೋ ವಿಮಾನದ ಪೈಲಟ್ ಒಬ್ಬರು ಮಾಡಿದ ಕೆಲಸ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಎಲ್ಲರ ಮನ ಗೆದ್ದಿದೆ.

ಇಂಡಿಗೋ ವಿಮಾನದ ಕ್ಯಾಪ್ಟನ್ ಮಣಿಕ್ ಮೆಹ್ತಾ (Manik Mehta), ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದ ತಮ್ಮ ತಂದೆಗೆ ವಿಶೇಷ ಘೋಷಣೆಯ ಮೂಲಕ ಹುಟ್ಟುಹಬ್ಬದ ಶುಭಾಶಯ ಕೋರಿದ್ದಾರೆ. ಅವರ ತಂದೆ ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸಿದ ನಿವೃತ್ತ ಯೋಧರಾಗಿದ್ದು, ಪ್ಯಾರಾಟ್ರೂಪರ್ ಆಗಿಯೂ ಕಾರ್ಯನಿರ್ವಹಿಸಿದ್ದರು. ತಂದೆಯನ್ನು ತಮ್ಮ ಜೀವನದ ಹೀರೋ ಮತ್ತು ಮಾದರಿ ವ್ಯಕ್ತಿ ಎಂದು ಬಣ್ಣಿಸಿದ ಪೈಲಟ್, ಅವರು ಮಾಡಿದ ಎಲ್ಲ ತ್ಯಾಗ ಮತ್ತು ಕೊಡುಗೆಗಳಿಗೆ ಕೃತಜ್ಞತೆ ಸಲ್ಲಿಸಿದ್ದಾರೆ.

ವಿಮಾನದೊಳಗೆ ಮೊಳಗಿದ ಭಾವನಾತ್ಮಕ ಮಾತುಗಳು

ವಿಮಾನದಲ್ಲಿ ಪ್ರಯಾಣಿಕರನ್ನು ಉದ್ದೇಶಿಸಿ ಮಾತನಾಡಿದ ಕ್ಯಾಪ್ಟನ್ ಮಣಿಕ್ ಮೆಹ್ತಾ, ತಮ್ಮ ತಂದೆ-ತಾಯಿ ಮೂರನೇ ಸಾಲಿನ ಬಿ ಮತ್ತು ಸಿ ಆಸನಗಳಲ್ಲಿ ಕುಳಿತಿದ್ದಾರೆ ಎಂದು ತಿಳಿಸಿದರು. ಬಳಿಕ ತಂದೆಯ 81ನೇ ಹುಟ್ಟುಹಬ್ಬದ ವಿಶೇಷ ಸಂದರ್ಭವನ್ನು ಹಂಚಿಕೊಂಡರು.

ತಂದೆ ತಮ್ಮ ಜೀವನದಲ್ಲಿ ಎಷ್ಟು ಮಹತ್ವದ ಸ್ಥಾನ ಹೊಂದಿದ್ದಾರೆ ಎಂಬುದನ್ನು ವಿವರಿಸಿದ ಅವರು, ತಮ್ಮ ಪೋಷಕರನ್ನು ಮತ್ತೊಮ್ಮೆ ವಿಮಾನದಲ್ಲಿ ಕರೆದೊಯ್ಯುತ್ತಿರುವುದು ಹೆಮ್ಮೆಯ ಸಂಗತಿ ಎಂದು ಹೇಳಿದರು. ಪೈಲಟ್ ಆಗಿ ಕಾರ್ಯನಿರ್ವಹಿಸುತ್ತಿರುವ ಮಗನ ಮಾತುಗಳಲ್ಲಿ ತಂದೆಯ ಮೇಲಿನ ಪ್ರೀತಿ, ಗೌರವ ಮತ್ತು ಕೃತಜ್ಞತೆ ಸ್ಪಷ್ಟವಾಗಿ ವ್ಯಕ್ತವಾಯಿತು.

ಈ ಹಿಂದೆ ತಮ್ಮ ಪೋಷಕರನ್ನು ಆಗ್ರಾದಿಂದ ಬೆಂಗಳೂರಿಗೆ ಕರೆದೊಯ್ದಿದ್ದಾಗಿ ತಿಳಿಸಿದ ಅವರು, ಇದೀಗ ಹಿಂದಿರುಗುವ ಪ್ರಯಾಣದಲ್ಲಿಯೂ ಅವರೊಂದಿಗೆ ಇರುವ ಅವಕಾಶ ಸಿಕ್ಕಿರುವುದನ್ನು ವಿಶೇಷ ಕ್ಷಣವೆಂದು ಹಂಚಿಕೊಂಡರು. ಕೊನೆಯಲ್ಲಿ ಪೋಷಕರನ್ನು ಪ್ರಯಾಣಕ್ಕೆ ಸಿದ್ಧರಿದ್ದೀರಾ ಎಂದು ಕೇಳಿದಾಗ, ಅವರ ಉತ್ಸಾಹಭರಿತ ಪ್ರತಿಕ್ರಿಯೆ ಈ ಸಂದರ್ಭವನ್ನು ಇನ್ನಷ್ಟು ಮಧುರವಾಗಿಸಿತು.

ಸಾಮಾಜಿಕ ಜಾಲತಾಣಗಳಲ್ಲಿ ಮೆಚ್ಚುಗೆಯ ಮಹಾಪೂರ

ಈ ಭಾವನಾತ್ಮಕ ಘೋಷಣೆಯ ವಿಡಿಯೊವನ್ನು ಮಣಿಕ್ ಮೆಹ್ತಾ ತಮ್ಮ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ವಿಡಿಯೊ ವೈರಲ್ ಆಗುತ್ತಿದ್ದಂತೆ ಅನೇಕರು ಪೈಲಟ್‌ನ ನಡೆಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ತಂದೆಯನ್ನು ಗೌರವಿಸುವ ಮಗನ ಪ್ರೀತಿ, ಸೇನಾನಿಯ ದೇಶಸೇವೆ ಮತ್ತು ಪೋಷಕರೊಂದಿಗೆ ಇಂತಹ ನೆನಪುಗಳನ್ನು ಸೃಷ್ಟಿಸುವ ಅವಕಾಶದ ಮಹತ್ವವನ್ನು ಜನರು ಕೊಂಡಾಡಿದ್ದಾರೆ.

ತಂದೆ-ಮಗನ ಪ್ರೀತಿಗೆ ಸಾಕ್ಷಿಯಾದ ವಿಶೇಷ ಹಾರಾಟ

ಸಾವಿರಾರು ಅಡಿ ಎತ್ತರದಲ್ಲಿ ವಿಮಾನವನ್ನು ಮುನ್ನಡೆಸುವ ಪೈಲಟ್‌ಗೆ ಈ ಪ್ರಯಾಣ ಕೇವಲ ವೃತ್ತಿಪರ ಕರ್ತವ್ಯವಾಗಿರಲಿಲ್ಲ. ತನ್ನ ಜೀವನಕ್ಕೆ ದಾರಿ ತೋರಿದ ತಂದೆಯೊಂದಿಗೆ ಹಂಚಿಕೊಂಡ ಅಮೂಲ್ಯ ಕ್ಷಣವಾಗಿತ್ತು. ದೇಶಕ್ಕಾಗಿ ಸೇವೆ ಸಲ್ಲಿಸಿದ ತಂದೆಗೆ ಮಗ ಸಾರ್ವಜನಿಕವಾಗಿ ಗೌರವ ಸಲ್ಲಿಸಿದ್ದು, ಕುಟುಂಬದ ಪ್ರೀತಿ ಮತ್ತು ಕೃತಜ್ಞತೆಯ ಸುಂದರ ಉದಾಹರಣೆಯಾಗಿದೆ.

View this post on Instagram

A post shared by Manik Mehta (@maniakmehta)

Asianet Suvarna News

ಇನ್‌ಸ್ಟಾಗ್ರಾಮ್‌ನಲ್ಲಿ ಶ್ರೀಮಂತಿಕೆಯ ನಾಟಕ: 20 ಮಹಿಳಾ ಪೊಲೀಸ್ ಪೇದೆಗಳಿಗೆ ಮದುವೆ ಆಸೆ ತೋರಿಸಿ ₹24 ಲಕ್ಷ ವಂಚನೆ!

ಇನ್‌ಸ್ಟಾಗ್ರಾಮ್ ಮೂಲಕ ಪರಿಚಯ, ಬಳಿಕ ಹಣದ ಬೇಡಿಕೆ

₹24 ಲಕ್ಷ ಹೇಗೆ ವಂಚಿಸಿದ?

ಬಾಡಿಗೆ ಐಷಾರಾಮಿ ಕಾರುಗಳಲ್ಲಿ ಸುತ್ತಾಟ

ಈಗ ಪೊಲೀಸರಿಂದ ತನಿಖೆ ಚುರುಕು

Narendr Modi: ಪ್ರಧಾನಿ ವಿರುದ್ಧ ಅವಹೇಳನಕಾರಿ ಹೇಳಿಕೆ: ಎಐಸಿಸಿ ಅಧ್ಯಕ್ಷ ಖರ್ಗೆ ವಿರುದ್ಧ ದೂರು ದಾಖಲು

ಬಾಪು ಆಡಿಟೋರಿಯಂ ಕಾರ್ಯಕ್ರಮದಲ್ಲಿ ನೀಡಿದ ಹೇಳಿಕೆ!

ಪೊಲೀಸರಿಂದ ತನಿಖೆಗೆ ಬಿಜೆಪಿ ನಾಯಕ ಆಗ್ರಹ!

ಈ ಹೇಳಿಕೆಗೆ ಬಿಜೆಪಿ ಅಸಮಾಧಾನ!

ತನಿಖೆಯ ನಂತರವೇ ಮುಂದಿನ ಕ್ರಮ!

ಬಂಗಾಳಕೊಲ್ಲಿಯಲ್ಲಿ ಭೀಕರ ವಾಯುಭಾರ ಕುಸಿತ; ಅ. 28ರಂದು ಕರಾವಳಿಗೆ ಚಂಡಮಾರುತ ಎಂಟ್ರಿ

ಆಂಧ್ರ, ಒಡಿಶಾ, ಬಂಗಾಳಕ್ಕೆ ಎಚ್ಚರಿಕೆ

ಕೇರಳದಲ್ಲಿ ಪ್ರವಾಹ ಸ್ಥಿತಿ

ತ.ನಾಡಿನಲ್ಲಿ ದಾಖಲೆ ಮಳೆ

ಫೋನ್ ಇಲ್ಲ, ಒಂದೇ ಊರಲ್ಲಿ ವಾಸವಿಲ್ಲ.. 26 ವರ್ಷ ಪೊಲೀಸರಿಂದ ತಪ್ಪಿಸಿಕೊಂಡಿದ್ದ ಹಂತಕ ಸಿಕ್ಕಿಬಿದ್ದಿದ್ದೇ ರೋಚಕ!

ಏನಿದು ಪ್ರಕರಣ?

ಸಿಂಹಕ್ಕಿಂತ ಜೋರಾಗಿ ಕಚ್ಚಿದ ಅತ್ತಿಗೆ; ಮೈದುನನ ಜನನಾಂಗದ ಸುತ್ತಲೂ 55 ಹೊಲಿಗೆ ಹಾಕಿದ ಡಾಕ್ಟರ್!

ಆಗಿದ್ದೇನು?

3ನೇ ಮಹಡಿಯಿಂದ ಗುಟ್ಕಾ ಉಗಿದ, 11ಕೆವಿ ವೈರ್‌ಮೇಲೆ ಬಿತ್ತು; ಕರೆಂಟ್ ಶಾಕ್ ಹೊಡೆದು ವೃದ್ಧನ ಪ್ರಾಣ ಹೋಯ್ತು!

ಘಟನೆ ನಡೆದಿದ್ದು ಹೇಗೆ?

ಲಾಲಾರಸದಿಂದ ವಿದ್ಯುತ್ ಪ್ರವಹಿಸಿದ್ದು ಹೇಗೆ? ತಜ್ಞರ ವಿಶ್ಲೇಷಣೆ

ವಿದ್ಯುತ್ ಇಲಾಖೆಯ ವಿರುದ್ಧ ಸಾರ್ವಜನಿಕರ ಆಕ್ರೋಶ

ಮೋದಿ ಅಷ್ಟೇ ಅಲ್ಲ ಅವರಪ್ಪನೂ ಹೋಗ್ತಾನೆ, ಭಾರಿ ವಿವಾದ ಸೃಷ್ಟಿಸಿದ ಮಲ್ಲಿಕಾರ್ಜುನ್ ಖರ್ಗೆ ಮಾತು

ಮೋದಿಯನ್ನು ಜೈಲಿಗೆ ಕಳುಹಿಸಿತ್ತೇವೆ

ಮೋದಿ, ಅಪರಪ್ಪನೂ ಹೋಗ್ತಾನೆ

ಬಾಡಿಗೆಗೆ ದುಡ್ಡಿಲ್ಲ ಎಂದು ಎಸ್ಕೇಪ್​ ಆದವನ ಮನೆಯಲ್ಲಿ 48 ಲಕ್ಷ ನೋಟಿನ ಕಂತೆ! ಬೇಸ್ತು ಬಿದ್ದ ಮಾಲೀಕ

48 ಲಕ್ಷ ನಕಲಿ ನೋಟುಗಳು

ತನಿಖೆ ಮಾಡ್ತಿರೋ ಪೊಲೀಸರು

ಅಕ್ಟೋಬರ್ 31ರಿಂದ ವಾರಣಸಿಗೆ ವಂದೇ ಭಾರತ್ ಸ್ಲೀಪರ್ ರೈಲು ಸಂಪರ್ಕ, ಇಲ್ಲಿದೆ ವೇಳಾಪಟ್ಟಿ

ನೆಲದಿಂದ 100 ಅಡಿ ಆಳದಲ್ಲಿ ನಿಲ್ದಾಣ, ಸಮುದ್ರದ ಕೆಳಗೆ 7KM ಸುರಂಗ! ದೇಶದ ಮೊದಲ ಬುಲೆಟ್ ರೈಲು ಬಗ್ಗೆ ಕೇಂದ್ರದಿಂದ ಬಿಗ್‌ ಅಪ್‌ಡೇಟ್ಸ್

ವಿಶೇಷತೆ ಏನು?

ರೈಲ್ವೇ ಸಚಿವರು ನೀಡಿದ ಹೆಚ್ಚಿನ ಮಾಹಿತಿ

“ಈಗಾಗಲೇ ನಷ್ಟದಲ್ಲಿದ್ದೇನೆ, ದಯವಿಟ್ಟು ರಿಟರ್ನ್ ಮಾಡಬೇಡಿ”; Flipkart Parcelನಲ್ಲಿ ಸಿಕ್ಕಿತು ಮನಕಲಕುವ ಮನವಿ!

ಫ್ಲಿಪ್‌ಕಾರ್ಟ್ ಪಾರ್ಸಲ್‌ನಲ್ಲಿ ಅಚ್ಚರಿಯ ಚೀಟಿ!

“ದಯವಿಟ್ಟು ರಿಟರ್ನ್ ಮಾಡಬೇಡಿ” ಎಂದ ಮಾರಾಟಗಾರ

ಸಣ್ಣ ವ್ಯಾಪಾರಿಗಳ ಸಂಕಷ್ಟದ ಬಗ್ಗೆ ಚರ್ಚೆ

ಗ್ರಾಹಕರ ಹಕ್ಕುಗಳೂ ಅಷ್ಟೇ ಮುಖ್ಯ

Marriage ಪ್ರಾಮಿಸ್ ಮಾಡೋ ಮುನ್ನ ಯೋಚಿಸಿ; ರಾಜ್ಯಪಾಲರಾದ ಆನಂದಿಬೆನ್‌ರಿಂದ ಯೂತ್ಸ್‌ಗೆ ಮಾರ್ಮಿಕ ಸಂದೇಶ! ಅಸಲಿ ಕಥೆ ಏನು?

ಗರ್ಲ್‌ಫ್ರೆಂಡ್ ಇದ್ದರೆ ಅವರನ್ನೇ ಮದುವೆ ಆಗಿ!

ಸಂಬಂಧದ ನಿಜವಾದ ಅರ್ಥ; ಪ್ರೀತಿ, ಗೌರವ ಮತ್ತು ಬದ್ಧತೆ!

ಮಹಿಳೆಯರ ಘನತೆ ಮತ್ತು ಸಾಮಾಜಿಕ ಪರಿಣಾಮ!

ಇಂದಿನ ಪೀಳಿಗೆ ಕಲಿಯಬೇಕಾದ ಪಾಠ!

ಗಿನ್ನೆಸ್ ದಾಖಲೆ ಪಡೆದಿದ್ದ ಖ್ಯಾತ ಬಾಣಸಿಗ ಚೆಫ್ ದಾಮುಗೆ ಏನಾಗಿತ್ತು? ಅವರ ಸಾಧನೆಗಳೇನು?

ತಮಿಳು ಮಾಧ್ಯಮದ ಮೇಲಿನ ಪ್ರಭಾವ

ಗಾಂಧೀಜಿಯ '5ನೇ ಮಗ' ಕಟ್ಟಿದ 14 ಲಕ್ಷ ಕೋಟಿಯ ಸಾಮ್ರಾಜ್ಯ! ಅಪ್ಪನ ಮಾತಿಗೆ ಸಿಟ್ಟಾಗಿ ಆಸ್ತಿ ತ್ಯಜಿಸಲು ಮುಂದಾಗಿದ್ರು

ಜಮ್ನಾಲಾಲ್ ಬಜಾಜ್ ಗಾಂಧಿಯ ಐದನೇ ಮಗನೆಂಬ ಗೌರವ ಪಡೆದಿದ್ದು ಹೇಗೆ?

ಆಸ್ತಿ ತ್ಯಜಿಸಲು ಮುಂದಾಗಿದ್ದ ಯುವ ಉದ್ಯಮಿ!

ಹತ್ತಿಯಿಂದ ಸಕ್ಕರೆ, ಉಕ್ಕಿನ ಉದ್ಯಮದವರೆಗೆ ಬೆಳವಣಿಗೆ:

ಸ್ವಾತಂತ್ರ್ಯ ಹೋರಾಟಕ್ಕೂ ಆರ್ಥಿಕ ನೆರವು

ಸಮಾಜ ಸುಧಾರಣೆಯಲ್ಲೂ ಮುಂಚೂಣಿಯಲ್ಲಿದ್ದರು

ಅವರ ನಿಧನದ ಬಳಿಕವೂ ಮುಂದುವರಿದ ಉದ್ಯಮದ ಪಯಣ

ಜನಪ್ರಿಯ ಶೆಫ್, ಪದ್ಮಶ್ರಿ ಪ್ರಶಸ್ತಿ ಪುರಸ್ಕೃತ ದಾಮು ಅಲಿಯಾಸ್ ದಾಮೋದರನ್ ನಿಧನ, ಗಣ್ಯರಿಂದ ಸಂತಾಪ

25ಕ್ಕೂ ಹೆಚ್ಚು ಪುಸ್ತಕ ಪ್ರಕಟಿಸಿದ್ದ ದಾಮು ಅಪ್ಪ

ತಂದೆ ಹೆಸರಿನ ಗೊಂದಲದಲ್ಲಿ ಜಿರಳೆ ಲೀಡರ್​ ಸೌರವ್​ ದಾಸ್​: SIR ವಿರೋಧದ ಕಾರಣ ಹೆಕ್ಕಿ ತೆಗೆದರು- ಅಪ್ಪ ಯಾರು

ಹಾಗಾದರೆ ಸತ್ಯವೇನು?

ನೇಪಾಳದಿಂದ ಭಾರತಕ್ಕೆ ದಿಢೀರ್​ ಬಂದ ಅಮ್ಮ

ಪುರುಷರನ್ನು ಮೆಚ್ಚಿಸಲು ಇತರ ಮಹಿಳೆಯ ಬೆನ್ನಿಗೆ ಇರಿಯೋದು ನಿಲ್ಲಿಸಿ- ಉದ್ಯಮಿ ಉಪಾಸನಾ ಖಡಕ್​ ವಾರ್ನಿಂಗ್​

ಒಬ್ಬ ಮಹಿಳೆಯ ನೋವು ಎಂದಿಗೂ ಇನ್ನೊಬ್ಬ ಮಹಿಳೆಯ ಗೆಲುವಾಗಬಾರದು

ನಿಜವಾದ ಸಬಲೀಕರಣ ಎಂದರೆ...

Second marriage: ಬಯಲಾಯ್ತು ಗಂಡನ ಅಸಲಿ ರೂಪ; ಎರಡನೇ ಮದುವೆಯಲ್ಲೂ ಟ್ವಿಂಕಲ್‌ಗೆ ಬಿಗ್‌ ಶಾಕ್‌!

ಪತ್ನಿಯನ್ನು ಕ್ರೂರವಾಗಿ ಥಳಿಸಿದ ಪತಿ!

ದೂರು ನೀಡಿದ ಮಹಿಳೆ!

ಸಲೂನ್‌ ನಡೆಸುತ್ತಿರುವ ಟ್ವಿಂಕಲ್!

ಮದುವೆಯಾದ ಕೇವಲ 3 ತಿಂಗಳ ನಂತರ ಥಾರ್‌ಗೆ ಬೇಡಿಕೆ ಪ್ರಾರಂಭ!.

ರಕ್ಷಣೆಗೆ ನೆರೆಯವರ ಬಳಿಗೆ ಹೋದರೂ ಬಿಡದ ಗಂಡ!

ಡೆಲಿವರಿ ಬಾಯ್​ಗೆ ಅನಂತ್​ ಅಂಬಾನಿ ಸರ್​ಪ್ರೈಸ್​ ಗಿಫ್ಟ್​: ಹೃದಯ ಶ್ರೀಮಂತಿಕೆಯ ಭಾವುಕ ವಿಡಿಯೋ ವೈರಲ್​

ಡೆಲಿವರಿ ಬಾಯ್​ಗೆ ಸ್ಕೂಟರ್​ ಗಿಫ್ಟ್​

ಯುವಕನ ಕಣ್ಣೀರು

ಕೇರಳದ ಈ ಕೆಫೆಯಲ್ಲಿ ಗಾಂಧಿ ಪಕ್ಕ ಜಿನ್ನಾ ಪ್ರತಿಮೆ, ಗೋಮಾಂಸವೂ ಸರ್ವ್‌? ಯೂಟ್ಯೂಬರ್‌ಗೆ ಆರೋಪಕ್ಕೆ ಭಾರೀ ಆಕ್ರೋಶ!

ಯುಟ್ಯೂಬರ್ ಮಾಡಿರುವ ವಿಡಿಯೋದಲ್ಲಿ ಏನಿದೆ?

ಕೋಮು ಪ್ರಚೋದನಕಾರಿ ಹೇಳಿಕೆ ಯುಟ್ಯೂಬರ್ ವಿರುದ್ಧ ಎಫ್‌ಐಆರ್

ಕಾಶಿ ಆರ್ಟ್‌ ಕೆಫೆಯಲ್ಲಿ ಜಿನ್ನಾ ಪ್ರತಿಮೆ ಇದೆಯೇ?

ಯುಟ್ಯೂಬರ್ ವಿರುದ್ಧ ಕೇಸ್ ದಾಖಲು

ಯುಟ್ಯೂಬರ್ ವಿಡಿಯೋ ಖಂಡಿಸಿದ ಕೇರಳ ಸಿಎಂ

ಮಾಜಿ ಸಿಎಂ ಪಿಣರಾಯಿ ಕಿಡಿ

ಪ್ರತಿಭಟನಕಾರರಿಂದ NHPC ಕಚೇರಿ, ಪೊಲೀಸ್ ಠಾಣೆಗೆ ಬೆಂಕಿ, ಬಿಜೆಪಿ ರಾಜ್ಯಾಧ್ಯಕ್ಷನ ಮನೆ ಪುಡಿ ಪುಡಿ

ಉದ್ರಿಕ್ತರ ಗುಂಪಿನಿಂದ ಕೃತ್ಯ

ಬಿಜೆಪಿ ರಾಜ್ಯಾಧ್ಯಕ್ಷನ ಮನೆ ಧ್ವಂಸ

ಪವರ್ ಕಾರ್ಪೋರೇಶನ್ ಕಚೇರಿಗೆ ಬೆಂಕಿ

ಬಾಡಿಗೆಗೆ ದುಡ್ಡಿಲ್ಲ ಎಂದು ಎಸ್ಕೇಪ್ ಆದವನ ಮನೆಯಲ್ಲಿ 48 ಲಕ್ಷ ನೋಟಿನ ಕಂತೆ! ಬೇಸ್ತು ಬಿದ್ದ ಮಾಲೀಕ

ತಂದೆ ಹೆಸರಿನ ಗೊಂದಲದಲ್ಲಿ ಜಿರಳೆ ಲೀಡರ್ ಸೌರವ್ ದಾಸ್: SIR ವಿರೋಧದ ಕಾರಣ ಹೆಕ್ಕಿ ತೆಗೆದರು- ಅಪ್ಪ ಯಾರು

ನೇಪಾಳದಿಂದ ಭಾರತಕ್ಕೆ ದಿಢೀರ್ ಬಂದ ಅಮ್ಮ

ಪುರುಷರನ್ನು ಮೆಚ್ಚಿಸಲು ಇತರ ಮಹಿಳೆಯ ಬೆನ್ನಿಗೆ ಇರಿಯೋದು ನಿಲ್ಲಿಸಿ- ಉದ್ಯಮಿ ಉಪಾಸನಾ ಖಡಕ್ ವಾರ್ನಿಂಗ್

ಡೆಲಿವರಿ ಬಾಯ್ಗೆ ಅನಂತ್ ಅಂಬಾನಿ ಸರ್ಪ್ರೈಸ್ ಗಿಫ್ಟ್: ಹೃದಯ ಶ್ರೀಮಂತಿಕೆಯ ಭಾವುಕ ವಿಡಿಯೋ ವೈರಲ್

ಡೆಲಿವರಿ ಬಾಯ್ಗೆ ಸ್ಕೂಟರ್ ಗಿಫ್ಟ್

ರೆಸ್ಟೋರೆಂಟ್ನಲ್ಲಿ ಮೊದಲ ಭೇಟಿ: Love At First Sight; ರಾಜೀವ್ ಗಾಂಧಿ-ಸೋನಿಯಾ ಲವ್ ಸ್ಟೋರಿ ಇದು