Asianet Suvarna News

ಬೆಂಗಳೂರು ಜನತೆಗೆ KSRTC ಬಂಪರ್ ಆಫರ್; ₹2000ಕ್ಕೆ ಹಾಸನಾಂಬೆ ದರ್ಶನದ ಜೊತೆಗೆ ಒಂದು ದಿನದ ಪ್ರವಾಸ!

Sathish Kumar KH — Mon, 26 Oct 2026 23:04:22 +0530

ಬೆಂಗಳೂರು (ಅ.26): ವರ್ಷಕ್ಕೊಮ್ಮೆ ಮಾತ್ರ ಭಕ್ತರಿಗೆ ದರ್ಶನ ನೀಡುವ ಹಾಸನದ ಇತಿಹಾಸ ಪ್ರಸಿದ್ಧ ಶ್ರೀ ಹಾಸನಾಂಬೆಯ ಜಾತ್ರಾ ಮಹೋತ್ಸವಕ್ಕೆ ಕ್ಷಣಗಣನೆ ಆರಂಭವಾಗಿದೆ. ಈ ಪವಿತ್ರ ಸಂದರ್ಭದಲ್ಲಿ ಬೆಂಗಳೂರು ಹಾಗೂ ಸಾಂಸ್ಕೃತಿಕ ನಗರಿ ಮೈಸೂರಿನ ಭಕ್ತಾದಿಗಳು ಸುಲಭವಾಗಿ ಮತ್ತು ಯಾವುದೇ ಆಯಾಸವಿಲ್ಲದೆ ದೇವಿಯ ದರ್ಶನ ಪಡೆಯಲು ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು (KSRTC) ಭರ್ಜರಿ ಸಿಹಿಸುದ್ದಿ ನೀಡಿದೆ.

'ಭಕ್ತಿಯ ಹೆಜ್ಜೆಗಳಿಗೆ ಕೆಎಸ್‌ಆರ್‌ಟಿಸಿ ಜೊತೆಯಾಗಲಿದೆ' ಎಂಬ ಪರಿಕಲ್ಪನೆಯೊಂದಿಗೆ ನಿಗಮವು ನೂತನ 'ಅಶ್ವಮೇಧ' (Ashwamedha Point-to-Point Express) ಬಸ್‌ಗಳ ಮೂಲಕ ವಿಶೇಷ ‘ಶ್ರೀ ಹಾಸನಾಂಬ ಪ್ಯಾಕೇಜ್ ಟೂರ್’ ಘೋಷಿಸಿದೆ. ಈ ಪ್ಯಾಕೇಜ್‌ನ ಪ್ರಮುಖ ಆಕರ್ಷಣೆಯೆಂದರೆ, ಇದರಲ್ಲಿ ಹಾಸನಾಂಬೆಯ ₹1,000 ಮೌಲ್ಯದ ವಿಶೇಷ (VIP) ದರ್ಶನ ಟಿಕೆಟ್ ಕೂಡ ಒಳಗೊಂಡಿರುತ್ತದೆ!

ಅಕ್ಟೋಬರ್ 30 ರಿಂದ ನವೆಂಬರ್ 10 ರವರೆಗೆ ಈ ವಿಶೇಷ ಪ್ಯಾಕೇಜ್

1. ಬೆಂಗಳೂರು - ಹಾಸನಾಂಬೆ ದರ್ಶನ ಪ್ಯಾಕೇಜ್ (ಅಶ್ವಮೇಧ ವಾಹನ)

ರಾಜಧಾನಿ ಬೆಂಗಳೂರಿನಿಂದ ನೇರವಾಗಿ ಹಾಸನಾಂಬೆಯ ಸನ್ನಿಧಿಗೆ ತೆರಳುವ ಭಕ್ತರಿಗೆ ಈ ಪ್ರವಾಸ ಅತ್ಯಂತ ಅನುಕೂಲಕರವಾಗಿದೆ.
ಪ್ರೇಕ್ಷಣೀಯ/ಯಾತ್ರಾ ಸ್ಥಳಗಳು: ಬೆಂಗಳೂರು ➔ ಶ್ರೀ ಹಾಸನಾಂಬ ಹಾಗೂ ಸಿದ್ದೇಶ್ವರ ದೇವಾಲಯ ದರ್ಶನ ➔ ದೇವಿಗೆರೆ ಕಲ್ಯಾಣಿ ➔ ಬೆಂಗಳೂರು.
ಹೊರಡುವ ಸಮಯ & ಸ್ಥಳ: ಬೆಳಗ್ಗೆ 06:00 ಗಂಟೆಗೆ, ಕೆಂಪೇಗೌಡ ಬಸ್ ನಿಲ್ದಾಣ (ಮೆಜೆಸ್ಟಿಕ್), ಬೆಂಗಳೂರು.
ಒಟ್ಟು ಪ್ರಯಾಣ: 380 ಕಿ.ಮೀ.
ಟಿಕೆಟ್ ದರ: ₹2000/- ಮಾತ್ರ.
(ಇದರಲ್ಲಿ ₹1000 ಮೌಲ್ಯದ ಹಾಸನಾಂಬೆ ದೇವಿಯ ವಿಶೇಷ ದರ್ಶನ ಟಿಕೆಟ್ ಹಾಗೂ ₹1000 ಬಸ್ ಪ್ರಯಾಣ ದರ ಒಳಗೊಂಡಿದೆ).

2. ಮೈಸೂರು - ಹಾಸನಾಂಬೆ & ಹೊಳೆನರಸೀಪುರ ಪ್ಯಾಕೇಜ್ (ಅಶ್ವಮೇಧ ವಾಹನ)

ಮೈಸೂರಿನ ಜನತೆಗಾಗಿ ಹಾಸನಾಂಬೆ ಜೊತೆಗೆ ಹೊಳೆನರಸೀಪುರದ ಪ್ರಸಿದ್ಧ ನರಸಿಂಹಸ್ವಾಮಿ ದೇವಾಲಯ ದರ್ಶನದ ಅವಕಾಶವನ್ನೂ ಕಲ್ಪಿಸಲಾಗಿದೆ.
ಪ್ರೇಕ್ಷಣೀಯ/ಯಾತ್ರಾ ಸ್ಥಳಗಳು: ಮೈಸೂರು ➔ ಶ್ರೀ ಹಾಸನಾಂಬ ಹಾಗೂ ಸಿದ್ದೇಶ್ವರ ದೇವಾಲಯ ದರ್ಶನ ➔ ದೇವಿಗೆರೆ ಕಲ್ಯಾಣಿ ➔ ಶ್ರೀ ಲಕ್ಷ್ಮೀ ನರಸಿಂಹಸ್ವಾಮಿ ದೇವಾಲಯ (ಹೊಳೆನರಸೀಪುರ) ➔ ಮೈಸೂರು.
ಹೊರಡುವ ಸಮಯ & ಸ್ಥಳ: ಬೆಳಗ್ಗೆ 06:00 ಗಂಟೆಗೆ, ಮೈಸೂರು ಕೇಂದ್ರೀಯ ಬಸ್ ನಿಲ್ದಾಣ.
ಒಟ್ಟು ಪ್ರಯಾಣ: 250 ಕಿ.ಮೀ.
ಟಿಕೆಟ್ ದರ: ₹1600/- ಮಾತ್ರ.
(ಇದರಲ್ಲಿ ₹1000 ಮೌಲ್ಯದ ಹಾಸನಾಂಬೆ ದೇವಿಯ ವಿಶೇಷ ದರ್ಶನ ಟಿಕೆಟ್ ಹಾಗೂ ₹600 ಬಸ್ ಪ್ರಯಾಣ ದರ ಒಳಗೊಂಡಿದೆ).

ಪ್ರವಾಸದ ಮುಖ್ಯ ನಿಯಮಗಳು ಹಾಗೂ ಸೌಲಭ್ಯಗಳು:

ವಿಐಪಿ ದರ್ಶನ ಸೌಲಭ್ಯ: ಪ್ಯಾಕೇಜ್ ಟಿಕೆಟ್‌ನಲ್ಲೇ ₹1000 ಮೌಲ್ಯದ ದರ್ಶನ ಪಾಸ್ ಇರುವುದರಿಂದ ಗಂಟೆಗಟ್ಟಲೆ ಸರತಿ ಸಾಲಿನಲ್ಲಿ ನಿಲ್ಲುವ ಕಿರಿಕಿರಿ ಇರುವುದಿಲ್ಲ.

ಆಗಮನದ ಸಮಯ: ಬೆಳಗ್ಗೆ 6 ಗಂಟೆಗೆ ಹೊರಡುವ ಬಸ್‌ಗಳು ಸಂಜೆ ವೇಳೆಗೆ ದರ್ಶನ ಮುಗಿಸಿ, ರಾತ್ರಿ ಸುಮಾರು 8:00 ಗಂಟೆಗೆ ಮರಳಿ ಆರಂಭಿಕ ಸ್ಥಳಕ್ಕೆ ತಲುಪಿಸಲಿವೆ.

ಪ್ರತ್ಯೇಕ ದರ: ಮಕ್ಕಳಿಗೆ ಪ್ರತ್ಯೇಕ ಪ್ರಯಾಣ ದರ ನಿಗದಿಪಡಿಸಲಾಗಿದೆ.

ಊಟ/ಪ್ರವೇಶ ಶುಲ್ಕ: ಊಟೋಪಚಾರ ಹಾಗೂ ಇತರೆ ಪ್ರವೇಶ ಶುಲ್ಕಗಳನ್ನು ಪ್ರಯಾಣಿಕರೇ ಪ್ರತ್ಯೇಕವಾಗಿ ಭರಿಸಬೇಕಾಗುತ್ತದೆ.

ಮಾಹಿತಿ ಹಾಗೂ ಮುಂಗಡ ಬುಕಿಂಗ್‌ಗಾಗಿ ಸಂಪರ್ಕಿಸಿ:

ಈ ವಿಶೇಷ ಪ್ಯಾಕೇಜ್ ಟೂರ್‌ನ ಸೀಟುಗಳನ್ನು ಕಾಯ್ದಿರಿಸಲು ಮತ್ತು ಹೆಚ್ಚಿನ ವಿವರಗಳಿಗಾಗಿ ಕೆಳಗಿನ ಸಹಾಯವಾಣಿ ಸಂಖ್ಯೆಗಳನ್ನು ಸಂಪರ್ಕಿಸಬಹುದು:

ಮೊಬೈಲ್ ಸಂಖ್ಯೆಗಳು: 7760990518, 7760990519, 7760990520, 7760990523

ಟೋಲ್ ಫ್ರೀ / ವಿಚಾರಣೆ: 080 2625 2625

ಅಧಿಕೃತ ವೆಬ್‌ಸೈಟ್: www.ksrtc.in

ಪ್ರೇಮದ ಊರಲಿ ಶೂಟಿಂಗ್ ವೇಳೆ ಇದ್ದ 'ತ್ರಿಶೂಲ' ಈಗಿಲ್ಲ; ಮಳೆ ಮಲ್ಲೇಶ್ವರನ ಕೈ ಮುರಿದು ಹಾಕಿದ ಜನ!

Sathish Kumar KH — Fri, 23 Oct 2026 14:09:12 +0530

ಪ್ರೇಮದ ಊರಲಿ ಹೊಸಬರ ಸಿನಿಮಾ ಭರ್ಜರಿ ಪ್ರದರ್ಶನವಾಗುತ್ತಿದೆ. ರಾಜ್ಯಾದ್ಯಂತ 30 ದಿನಗಳ ನಂತರವೂ ಹೌಸ್‌ಫುಲ್ ಪ್ರದರ್ಶನವಾಗುತ್ತಿದ್ದು, ಈಗಾಗಲೇ 100 ಕೋಟಿ ರೂ. ಆದಾಯ ಗಳಿಸುವ ಮೂಲಕ ಬಾಕ್ಸ್ ಆಫೀಸ್ ದಾಖಲೆ ಮಾಡಿದೆ. ಆದರೆ, ಸಿನಿಮಾ ಶೂಟಿಂಗ್ ವೇಳೆ ಇದ್ದ ಸೀಗೆಗುಡ್ಡದ ಮಳೆ ಮಲ್ಲೇಶ್ವರ ದೇವರ ತ್ರಿಶೂಲವನ್ನು ಹಿಡಿದಿದ್ದ ಕೈ ಮುರಿದು ಬಿದ್ದಿದೆ. ಇನ್ನು ಸೀಗೆಗುಡ್ಡಕ್ಕೆ ಪ್ರವಾಸಿಗರ ಸಂಖ್ಯೆಯೂ ಹೆಚ್ಚಾಗಿದ್ದು, ಹಳ್ಳಿಯ ವಾತಾವರಣದಲ್ಲಿ ಟ್ರಾಫಿಕ್ ಜಾಮ್ ಉಂಟಾಗುತ್ತಿದೆ.

ಟ್ರಾಫಿಕ್ ಜಾಮ್

ಪ್ರೇಮದ ಊರಲಿ ಸಿನಿಮಾವನ್ನು ಹಾಸನ ಜಿಲ್ಲೆಯ ಸೀಗೆಗುಡ್ಡದ ಬಳಿ ಶೂಟಿಂಗ್ ಮಾಡಲಾಗಿದೆ. ಇದೇ ಸೀಗೆಗುಡ್ಡದಲ್ಲಿ ಒಂದು ಮಳೆ ಮಲ್ಲೇಶ್ವರ ದೇವಸ್ಥಾನವೂ ಇತ್ತು. ಈ ದೇವಸ್ಥಾನದ ಬಳಿ ನಿಂತು ನೋಡಿದತೆ ಹಚ್ಚ ಹಸಿರಿನ ತಾಣ, ನೈಸರ್ಗಿಕ ರಮಣೀಯ ನೋಟ ಕಾಣಿಸುತ್ತಿತ್ತು. ಇನ್ನು ಪ್ರೇಮದ ಊರಲಿ ಸಿನಿಮಾ ರಿಲೀಸ್ ಆಗುತ್ತಿದ್ದಂತೆ ಈ ಸಿನಿಮಾ ಶೂಟಿಂಗ್ ಸ್ಥಳ ಭಾರೀ ಪ್ರಸಿದ್ಧಿ ಪಡೆಯಿತು. ಈ ಹಳ್ಳಿಗಾಡಿನ ಗುಡ್ಡದ ಪ್ರದೇಶ ಹಾಗೂ ಮಳೆ ಮಲ್ಲೇಶ್ವರ ದೇವಸ್ಥಾನಕ್ಕೆ ಪ್ರವಾಸಕ್ಕೆ ಬರುವವರ ಸಂಖ್ಯೆ ದಿನೇ ದಿನೇ ತೀವ್ರ ಹೆಚ್ಚಾಯಿತು. ಇದೀಗ ಅಲ್ಲಿ ಭಾರೀ ಟ್ರಾಫಿಕ್ ಜಾಮ್ ಉಂಟಾಗುತ್ತಿದೆ.

ಶಿವನ ಕೈ ಮುರಿದು ಬಿದ್ದಿದೆ

ಬೆಂಗಳೂರಿನಿಂದ 3-4 ಗಂಟೆ ದೂರದಲ್ಲಿರುವ ಈ ಪ್ರದೇಶಕ್ಕೆ ಬೆಂಗಳೂರು ಸೇರಿದಂತೆ ವಿವಿಧೆಡೆಯಿಂದ ಪ್ರವಾಸಿಗರು ಆಗಮಿಸುತ್ತಿದ್ದಾರೆ. ಇಲ್ಲಿದೆ ಸಾರ್ವಜನಿಕ ಸಾರಿಗೆ ವ್ಯವಸ್ಥೆ ಸರಿಯಾಗಿ ಇಲ್ಲದ್ದರಿಂದ ಎಲ್ಲರೂ ತಮ್ಮ ಖಾಸಗಿ ವಾಹನಗಳಲ್ಲಿಯೇ ಅಲ್ಲಿಗೆ ಹೋಗುತ್ತಿದ್ದಾರೆ. ಇದೀಗ ಸೀಗೆ ಗುಡ್ಡದಲ್ಲಿ ಎಲ್ಲಿ ನೋಡಿದರೂ ಕಾರು, ಬೈಕ್, ಟ್ರ್ಯಾಕ್ಟರ್ ಸೇರಿದಂತೆ ವಾಹನಗಳು ಗಿಜಿಗುಡುತ್ತಿವೆ. ಎಲ್ಲಿ ನೋಡಿದರೂ ಜನರು ಕಿಕ್ಕಿರಿದು ತುಂಬಿ ಹೋಗಿದ್ದಾರೆ. ಆದರೆ, ಅತಿಯಾದ ಜನರು ಹಾಗೂ ಪ್ರವಾಸಿಗರ ಭೇಟಿಯಿಂದಾಗಿ ಅಲ್ಲಿನ ಪ್ರಸಿದ್ಧ ಮಳೆ ಮಲ್ಲೇಶ್ವರ ದೇವರ ತ್ರಿಶೂಲವನ್ನು ಹಿಡಿದ ಒಂದು ಕೈ ಮುರಿದು ಬಿದ್ದಿದೆ. ಹಲವು ಯೂಟ್ಯೂಬರ್‌ಗಳು ಈ ಬಗ್ಗೆ ವಿಡಿಯೋ ಮಾಡಿ ಶೇರ್ ಮಾಡಿಕೊಂಡಿದ್ದಾರೆ. ಪ್ರೇಮದ ಊರಲಿ ಸಿನಿಮಾದಲ್ಲಿದ್ದ ಮಳೆ ಮಲ್ಲೇಶ್ವರ ದೇವರ ಕೈಲಿದ್ದ ತ್ರಿಶೂಲ ಮುರಿದು ಬಿದ್ದಿದ್ದು, ಅದು ದೇವರ ಹಿಂಭಾಗದಲ್ಲಿ ಬಿದ್ದಿದೆ ಎಂಬುದನ್ನು ತೋರಿಸಿದ್ದಾರೆ.

ಎತ್ತಿನಗಾಡಿ, ಟ್ರ್ಯಾಕ್ಟರ್‌ಗಳಲ್ಲಿ ಬಂದು ಸಿನಿಮಾ ವೀಕ್ಷಣೆ

ಹೌದು, ಪ್ರೇಮದ ಊರಲಿ ಸಿನಿಮಾ ಇದೀದ ಕನ್ನಡ ಚಿತ್ರರಂಗದಲ್ಲಿ ಭಾರೀ ಸದ್ದು ಮಾಡುತ್ತಿದೆ. ಕನ್ನಡ ಚಿತ್ರರಂಗದಲ್ಲಿ ಪ್ಯಾನ್ ಇಂಡಿಯಾ ಸ್ಟಾರ್ ಯಶ್ ಸೇರಿದಂತೆ ಹಲವು ಬಿಗ್ ಬಜೆಟ್ ಸಿನಿಮಾಗಳೇ ಮಕಾಡೆ ಮಲಗುತ್ತಿದ್ದವು. ಇದರಿಂದ ಕನ್ನಡ ಚಿತ್ರಗಳನ್ನು ಜನರು ನೋಡುತ್ತಿಲ್ಲ. ಜನರು ಚಿತ್ರಮಂದಿರಕ್ಕೆ ಬರುತ್ತಿಲ್ಲ ಎಂದು ಸಿನಿಮಾದವರು ಆರೋಪ ಮಾಡುತ್ತಿದ್ದರು. ಆದರೆ, ಸಿನಿಮಾ ಪ್ರೇಕ್ಷಕರ ಮೇಲೆ ಬಂದಿದ್ದ ಎಲ್ಲ ಆರೋಪವನ್ನು ಪ್ರೇಮದ ಊರಲಿ ಸಿನಿಮಾ ದೂರ ಮಾಡಿದೆ. ಕಾರಣ, ಈ ಸಿನಿಮಾವನ್ನು ನೋಡುವುದಕ್ಕೆ ಈಗಲೂ ಜನರು ಹೌಸ್‌ಫುಲ್ ಆಗಿ ಬರುತ್ತಿದ್ದಾರೆ. ಹಳ್ಳಿಗಳಲ್ಲಿ ಟ್ರ್ಯಾಕ್ಟರ್‌ಗಳಲ್ಲಿ ಬಂದು ಸಿನಿಮಾ ನೋಡುವವರ ಸಂಖ್ಯೆಯೂ ಹೆಚ್ಚಾಗಿದೆ.

ಬೇಲೂರಿನಲ್ಲಿ ಎರಡು ದೈತ್ಯ ಮದಗಜಗಳ ಭೀಕರ ಕಾಳಗ! ವಿಡಿಯೋ ವೈರಲ್ ಬಳಿಕ ಸ್ಥಳೀಯರಲ್ಲಿ ನಡುಕ

Sathish Kumar KH — Mon, 26 Oct 2026 19:08:42 +0530

ಹಾಸನ ಜಿಲ್ಲೆಯ ಬೇಲೂರು ತಾಲೂಕಿನ ಜಗಬೋರನಹಳ್ಳಿ ಬಳಿ ಎರಡು ದೈತ್ಯ ಕಾಡಾನೆಗಳು ಮುಖಾಮುಖಿಯಾಗಿ ಭೀಕರ ಕಾಳಗ ನಡೆಸಿವೆ. ಆನೆಗಳ ರೌದ್ರಾವತಾರ ಕಂಡು ಗ್ರಾಮಸ್ಥರು ಆತಂಕಗೊಂಡಿದ್ದು, ಅರಣ್ಯ ಇಲಾಖೆಯ ಇಟಿಎಫ್ ಸಿಬ್ಬಂದಿ ಕಾರ್ಯಾಚರಣೆ ನಡೆಸುತ್ತಿದ್ದಾರೆ.

ಹಾಸನ (ಅ.26): ಕಾಫಿನಾಡು ಹಾಸನ ಜಿಲ್ಲೆಯಲ್ಲಿ ಮತ್ತೊಮ್ಮೆ ಕಾಡಾನೆಗಳ ಆರ್ಭಟ ಮುಗಿಲುಮುಟ್ಟಿದೆ. ಬೇಲೂರು ತಾಲೂಕಿನ ಜಗಬೋರನಹಳ್ಳಿ ಗ್ರಾಮದ ಬಳಿ ಎರಡು ದೈತ್ಯ ಮದಗಜಗಳು ಪರಸ್ಪರ ಮುಖಾಮುಖಿಯಾಗಿ ಭೀಕರ ಕಾಳಗಕ್ಕಿಳಿದಿದ್ದು, ಇಡೀ ಗ್ರಾಮಸ್ಥರಲ್ಲಿ ತೀವ್ರ ಆತಂಕ ಮತ್ತು ಭೀತಿಯ ವಾತಾವರಣ ಸೃಷ್ಟಿಯಾಗಿದೆ.

ತಮ್ಮ ಹಿಂಡಿನಿಂದ ಬೇರ್ಪಟ್ಟಿದ್ದ ಪ್ರಾಯದ ಎರಡು ಬೃಹತ್ ಗಂಡಾನೆಗಳು ಮುಖಾಮುಖಿಯಾಗುತ್ತಿದ್ದಂತೆ ಒಂದನ್ನೊಂದು ಸದೆಬಡಿಯಲು ಮುಂದಾಗಿವೆ. ದಂತಗಳಿಂದ ಪರಸ್ಪರ ತಿವಿಯುತ್ತಾ, ಸೊಂಡಿಲುಗಳಿಂದ ಬಲವಾಗಿ ನೂಕಾಡುತ್ತಾ ನಡೆಸಿದ ಈ ಕಾಳಗವು ನೋಡುವವರ ಮೈ ನವಿರೇಳಿಸುವಂತಿತ್ತು.

ಭೀಕರವಾಗಿ ಘರ್ಜಿಸುತ್ತಾ ಕಾದಾಟಕ್ಕಿಳಿದಿದ್ದ ಆನೆಗಳ ಶಬ್ದ ಕೇಳಿ ತೋಟದ ನಾಯಿ ಬಂದು ಜೋರಾಗಿ ಬೊಗಳಲು ಆರಂಭಿಸಿದೆ. ಮದೋನ್ಮತ್ತ ಸ್ಥಿತಿಯಲ್ಲಿದ್ದ ಕಾಡಾನೆಗಳು ನಾಯಿ ಬೊಗಳುವಿಕೆಯಿಂದ ಮತ್ತಷ್ಟು ರೊಚ್ಚಿಗೆದ್ದು, ಅದರ ಮೇಲೂ ಎರಗಿ ದಾಳಿ ಮಾಡಲು ಮುಂದಾಗಿದ್ದವು. ಆನೆಗಳ ಈ ರೌದ್ರಾವತಾರ ಕಂಡು ಗ್ರಾಮಸ್ಥರು ಬೆಚ್ಚಿಬಿದ್ದಿದ್ದಾರೆ. ಸದ್ಯ ಈ ಎರಡು ದೈತ್ಯ ಕಾಡಾನೆಗಳು ಜಗಬೋರನಹಳ್ಳಿ ಗ್ರಾಮದ ಸಮೀಪದ ಜಮೀನುಗಳ ಬಳಿಯೇ ಬೀಡುಬಿಟ್ಟಿದ್ದು, ಯಾವ ಕ್ಷಣದಲ್ಲಿ ಗ್ರಾಮದೊಳಗೆ ನುಗ್ಗುತ್ತವೆಯೋ ಎಂಬ ಭಯದಲ್ಲಿ ಸ್ಥಳೀಯರು ಕಾಲ ಕಳೆಯುವಂತಾಗಿದೆ.

ವಿಷಯ ತಿಳಿಯುತ್ತಿದ್ದಂತೆ ಸ್ಥಳಕ್ಕೆ ದೌಡಾಯಿಸಿದ ಅರಣ್ಯ ಇಲಾಖೆಯ ಆನೆ ಕಾರ್ಯಪಡೆ (ETF - Elephant Task Force) ಸಿಬ್ಬಂದಿ, ಕಾದಾಟದಲ್ಲಿ ನಿರತವಾಗಿದ್ದ ಆನೆಗಳನ್ನು ಬೇರ್ಪಡಿಸಲು ಹಾಗೂ ಅವುಗಳನ್ನು ಜನವಸತಿ ಪ್ರದೇಶದಿಂದ ಕಾಡಿನತ್ತ ಓಡಿಸಲು ಹರಸಾಹಸ ಪಡುತ್ತಿದ್ದಾರೆ. ಯಾವುದೇ ಅಹಿತಕರ ಘಟನೆಗಳು ಅಥವಾ ಪ್ರಾಣಹಾನಿ ಸಂಭವಿಸದಂತೆ ಮುಂಜಾಗ್ರತಾ ಕ್ರಮವಾಗಿ ಸಿಬ್ಬಂದಿ ಹದ್ದಿನ ಕಣ್ಣಿಟ್ಟು ಕಾರ್ಯಾಚರಣೆ ನಡೆಸುತ್ತಿದ್ದಾರೆ.

ಆನೆಗಳು ಮದದ ಗುಂಗಿನಲ್ಲಿರುವುದರಿಂದ ಅರಣ್ಯ ಇಲಾಖೆ ಹಾಗೂ ಇಟಿಎಫ್ ಅಧಿಕಾರಿಗಳು ಸಾರ್ವಜನಿಕರಿಗೆ ಕಟ್ಟುನಿಟ್ಟಿನ ಸೂಚನೆಗಳನ್ನು ನೀಡಿದ್ದಾರೆ.

ಕಾಡಾನೆಗಳು ಪ್ರಚೋದಿತ ಸ್ಥಿತಿಯಲ್ಲಿದ್ದು, ಯಾವುದೇ ಕಾರಣಕ್ಕೂ ಗ್ರಾಮಸ್ಥರು ಅಥವಾ ರೈತರು ಆನೆಗಳ ಸಮೀಪಕ್ಕೆ ಹೋಗಬಾರದು.
ಕಾಡಾನೆಗಳ ಕಾಳಗ ಅಥವಾ ಓಡಾಟವನ್ನು ನೋಡಲು ಸಾರ್ವಜನಿಕರು ಗುಂಪು ಗುಂಪಾಗಿ ಜಮಾಯಿಸುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ.
ಆನೆಗಳ ಫೋಟೋ ತೆಗೆಯುವುದು, ಮೊಬೈಲ್‌ನಲ್ಲಿ ಸೆಲ್ಫಿ ಕ್ಲಿಕ್ಕಿಸುವುದು, ವಿಡಿಯೋ/ರೀಲ್ಸ್ ಮಾಡುವುದು ಅಥವಾ ಅವುಗಳ ಮೇಲೆ ಕಲ್ಲು ತೂರಿ ಕೆರಳಿಸುವುದನ್ನು ಸಂಪೂರ್ಣವಾಗಿ ನಿರ್ಬಂಧಿಸಲಾಗಿದೆ. ನಿಯಮ ಮೀರಿದರೆ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಸಲಾಗಿದೆ.

ಸದ್ಯ ಇಟಿಎಫ್ ಸಿಬ್ಬಂದಿ ಸ್ಥಳದಲ್ಲೇ ಮೊಕ್ಕಾಂ ಹೂಡಿದ್ದು, ಕಾಡಾನೆಗಳ ಚಲನವಲನಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದಾರೆ. ಗ್ರಾಮಸ್ಥರು ಎಚ್ಚರಿಕೆಯಿಂದ ಇರುವಂತೆ ಡಂಗೂರ ಸಾರಲಾಗಿದೆ.

ದಿಢೀರ್ ಕುಸಿದ ಅಡಕೆ ಧಾರಣೆ: ಬರಗಾಲದಲ್ಲಿಯೂ ಕಷ್ಟಪಟ್ಟು ಬೆಳೆದ ಅಡಿಕೆ ಬೆಲೆ ₹12 ಸಾವಿರ ಕುಸಿತ

Sathish Kumar KH — Sun, 04 Oct 2026 09:07:30 +0530

ವರದಿ-ಯಡಗೆರೆ ಮಂಜುನಾಥ್

ಚಿಕ್ಕಮಗಳೂರು (ಅ.04): ಮಲೆನಾಡು ರೈತರ ಆರ್ಥಿಕ ಬೆಳೆ ಹಾಗೂ ಜೀವನಾಡಿಯಾಗಿರುವ ಅಡಕೆಗೆ ಸದಾ ಸಂಕಷ್ಟ ಎದುರಾಗುತ್ತಲೇ ಇದೆ. ಈ ಬಾರಿ ಅಡಕೆ ರಾಶಿ ಇಡಿಗೆ ಕಳೆದ ವರ್ಷಕ್ಕಿಂತ ₹12 ಸಾವಿರ ಕುಸಿತ ಕಂಡು ಬೆಳೆಗಾರರು ಕಂಗಾಲಾಗಿದ್ದಾರೆ.

ಕಳೆದ ವರ್ಷ ಸೆಪ್ಟೆಂಬರ್, ಅಕ್ಟೋಬರ್ ನಲ್ಲಿ ರಾಶಿ ಇಡಿಗೆ ₹63 ರಿಂದ 65 ಸಾವಿರದವರೆಗೆ ಮಾರಾಟವಾಗಿದ್ದ ಅಡಕೆ ನಂತರದ ತಿಂಗಳಲ್ಲಿ ಧಾರಣೆ ನಿಧಾನವಾಗಿ ಇಳಿಯುತ್ತಾ ₹50- ₹55 ಸಾವಿರಕ್ಕೆ ಮಾರಾಟವಾಗುತ್ತಿತ್ತು. ಆದರೆ, ಕಳೆದ 2 ತಿಂಗಳಿಂದ ಅಡಕೆ ಮತ್ತಷ್ಟು ಕುಸಿದಿದ್ದು ಪ್ರಸ್ತುತ ರಾಶಿ ಇಡಿ ₹40-₹45 ಸಾವಿರಕ್ಕೆ ಮಾತ್ರ ಮಾರಾಟವಾಗುತ್ತಿದೆ. ಕಳೆದ ವರ್ಷ ರಾಶಿ ಇಡಿ ₹50ರಿಂದ ₹55 ಸಾವಿರಕ್ಕೆ ಬಂದಾಗ ₹60 ಸಾವಿರ ಬರಲಿದೆ ಎಂದು ಹಲವಾರು ಬೆಳೆಗಾರರು ಅಡಕೆ ಮಾರಾಟ ಮಾಡದೆ ಕಾಯುತ್ತಾ ಕುಳಿತಿದ್ದರು. ಈಗ ಮಾರಿದರೆ ಲಕ್ಷಾಂತರ ನಷ್ಟವಾಗಲಿದೆ.

ಮಲೆನಾಡು ಭಾಗದ ಕೊಪ್ಪ, ಶೃಂಗೇರಿ ತಾಲೂಕುಗಳಲ್ಲಿ ಅಡಕೆಗೆ ಹಳದಿ ಎಲೆ ರೋಗ ಬಂದು ಸಂಪೂರ್ಣ ನಾಶವಾಗಿದೆ. ಇದರ ಜೊತೆಗೆ ಕಳೆದ 5 ವರ್ಷದಿಂದ ಎಲೆ ಚುಕ್ಕಿ ರೋಗ ಕಾಣಿಸಿಕೊಂಡು ಗಾಯದ ಮೇಲೆ ಬರೆ ಹಾಕಿದಂತಾಗಿತ್ತು. 2011 ರಲ್ಲಿ ಅಡಕೆ ಕ್ವಿಂಟಲ್ ಗೆ ₹12 ರಿಂದ ₹18 ಸಾವಿರ ಮಾತ್ರ ಇತ್ತು. 2012 ರ ನಂತರ ಅಡಕೆಗೆ ಚಿನ್ನದ ಬೆಲೆ ಬಂದು ಬೆಳೆಗಾರರು ಸಂಭ್ರಮದಲ್ಲಿದ್ದರು. ರೈತರು ಸದ್ಯಕ್ಕೆ ಎಲ್ಲಾ ಬೆಳೆಗಳನ್ನು ಬಿಟ್ಟು ಅಡಕೆ ಬೆಳೆ ಮಾತ್ರ ನೆಚ್ಚಿಕೊಂಡಿದ್ದಾರೆ. ಬಹುತೇಕ ಉತ್ತರ ಭಾರತದ ರಾಜ್ಯಗಳಲ್ಲಿರುವ ಪಾನ್ ಮಸಾಲ ಕಂಪನಿಗಳೇ ಅಡಕೆಗೆ ಉತ್ತಮ ಧಾರಣೆ ಬರಲು ಕಾರಣವಾಗಿವೆ.

ಅಡಕೆ ದರ ಕುಸಿತಕ್ಕೆ ಕಾರಣಗಳೇನೇನು?

1. ಕಳೆದ ಅಕ್ಟೋಬರ್ ವೇಳೆಗೆ ಇಡೀ ಮಾರುಕಟ್ಟೆಯಲ್ಲಿ ಅಡಕೆ ದಾಸ್ತಾನೇ ಇರಲಿಲ್ಲ. ಹಾಗಾಗಿ ಪಾನ್ ಮಸಾಲ ಕಂಪನಿಗಳು ಡಿಮ್ಯಾಂಡ್ ಮಾಡಿ ಉತ್ತಮ ಧಾರಣೆ ನೀಡಿ ಅಡಕೆ ಖರೀದಿಸಿವೆ.

2. ಈ ವರ್ಷ ಅಡಕೆ ಗುಣಮಟ್ಟ ಕಡಿಮೆಯಾಗಿದೆ ಎಂದು ಪಾನ್ ಮಸಾಲ ಕಂಪನಿಗಳು ಧಾರಣೆ ಇಳಿಸುತ್ತಿವೆ. ರಾಶಿ ಇಡಿ ಅಡಕೆಯನ್ನು ಸರಿಯಾಗಿ ಬೇಯಿಸಿ ಒಣಗಿಸದೆ ಇರುವುದು, ರಾಶಿ ಇಡಿಗೆ ಗೊರಬಲು ಅಡಕೆ ಸಿಪ್ಪೆ ತೆಗೆದು ಬೇಯಿಸಿ ರಾಶಿ ಇಡಿಗೆ ಮಿಕ್ಸ್ ಮಾಡುವುದು, ಶಿರಸಿ, ಸಿದ್ದಾಪುರ, ಹಳೇ ಮೈಸೂರು ಭಾಗದ ಚಾಲಿ ಅಡಕೆಗೆ ಕಲರ್ ಹಾಕಿ ರಾಶಿ ಇಡಿಗೆ ಮಿಕ್ಸ್ ಮಾಡುತ್ತಿದ್ದು ಅಡಕೆ ಗುಣಮಟ್ಟ ಕಡಿಮೆಯಾಗುತ್ತಿದೆ ಎಂದು ಕಂಪನಿಗಳು ದೂರುತ್ತಿವೆ.

3. ಈ ಹಿಂದೆ ಪಾನ್ ಮಸಾಲಕ್ಕೆ ಎಕ್ಸೈಸ್‌ ಸುಂಕ ₹28 ಇತ್ತು. ಈಗ ₹40 ಕ್ಕೆ ಏರಿಸಲಾಗಿದೆ.

4. ರೈತರು, ಮಾಮ್ ಕೋಸ್, ಕ್ಯಾಂಪ್ಕೋ, ಅಡಕೆ ಮಂಡಿಗಳು, ವ್ಯಾಪಾರಿಗಳು ಸೇರಿ ಅಡಕೆ ಮಾರುಕಟ್ಟೆಯಲ್ಲಿ ಬರುವ ವಾರ್ಷಿಕ ಅಡಕೆಯಲ್ಲಿ ಶೇ. 30 ರಿಂದ 40 ರಷ್ಟು ಅಡಕೆ ದಾಸ್ತಾನು ಇದೆ. ಅಂದಾಜು 30 ಸಾವಿರ ಅಡಕೆ ಮೂಟೆ ಉಳಿದಿವೆ.

5. 50 ವರ್ಷಗಳ ಹಿಂದೆ ಮಲೆನಾಡು ಭಾಗವಾದ ಶಿವಮೊಗ್ಗ, ಚಿಕ್ಕಮಗಳೂರು, ಉತ್ತರ ಕನ್ನಡ ಜಿಲ್ಲೆಗೆ ಅಡಕೆ ಸೀಮಿತವಾಗಿತ್ತು.ಈಗ ಬಯಲು ಸೀಮೆ ಜಿಲ್ಲೆಗಳಿಗೆ ಅಡಕೆ ವಿಸ್ತರಣೆಯಾಗುತ್ತಾ ರಾಜ್ಯದ 10 ಜಿಲ್ಲೆಗಳಲ್ಲಿ ಅಡಕೆ ಬೆಳೆಯ ಲಾಗುತ್ತದೆ. ಬೇಡಿಕೆಗಿಂತ ಜಾಸ್ತಿ ಅಡಕೆ ಮಾರುಕಟ್ಟೆಗೆ ಬರುತ್ತಿರುವುದು ಸಹ ಅಡಕೆ ಬೆಲೆ ಕುಸಿಯಲು ಕಾರಣ.

6. ಅಡಕೆಗೆ ಕೃತಕ ಬಣ್ಣ ಹಾಕದೆ ನೈಸರ್ಗಿಕವಾಗಿ ಸಂಸ್ಕರಣೆ ಮಾಡಬೇಕು ಎಂಬುದು ಈ ಕಂಪನಿಗಳ ಬೇಡಿಕೆ.

7. ರಾಶಿ ಇಡಿಯಲ್ಲಿ ಶೇ.30 ರಷ್ಟು ಚಿಕಣಿ ( ಕಪ್ಪು ಉಂಡೆ) ಇರಬೇಕು. ಆದರೆ, ಈಗ ತಯಾರಿಸುತ್ತಿರುವ ಅಡಕೆಯಲ್ಲಿ ಚಿಕಣಿ ಇರುವುದಿಲ್ಲ. ಇದೂ ಅಡಕೆ ಧಾರಣೆ ಇಳಿಕೆಗೆ ಕಾರಣ.

----

ಬೆಳೆಗಾರರು ಉತ್ತಮ ಗುಣ ಮಟ್ಟದ ಅಡಕೆ ತಯಾರಿಸಬೇಕು. ಈ ವರ್ಷ ಮಾರುಕಟ್ಟೆಯಲ್ಲಿ ಶೇ. 40 ರಷ್ಟು ಅಡಕೆ ದಾಸ್ತಾನು ಇರುವುದು ಧಾರಣೆ ಕುಸಿತಕ್ಕೆ ಮುಖ್ಯ ಕಾರಣ. ರೈತರು, ಎಪಿಎಂಸಿ, ವ್ಯಾಪಾರಿಗಳು, ಸಹಕಾರ ಸಂಸ್ಥೆಗಳಲ್ಲಿ ಅಡಕೆ ದಾಸ್ತಾನು ಇದೆ.

-ಯಡಗೆರೆ ಸುಬ್ರಮಣ್ಯ, ವೃತ್ತಿ ಪರ ನಿರ್ದೇಶಕ, ರಾಜ್ಯ ಅಡಕೆ ಮಾರಾಟ ಸಹಕಾರ ಸಂಘಗಳ ಮಹಾ ಮಂಡಳ

----

ಅಡಕೆ ರಾಶಿ ಇಡಿಗೆ ಕನಿಷ್ಠ ₹50 ಸಾವಿರ ಬರಬೇಕು. ಈಗಾಗಲೇ ಕೃಷಿ ಕೂಲಿ ಕಾರ್ಮಿಕರ ಧಾರಣೆ, ಅಡಕೆಗೆ ಕೊಳೆ ಬಾರದಂತೆ ಸಿಂಪಡಿಸುವ ಬೋರ್ಡೋ ಮಿಶ್ರಣದ ಖರ್ಚು ಗಗನಕ್ಕೇರಿದೆ. ಇನ್ನಷ್ಟು ಉತ್ತಮ ಧಾರಣೆ ಬರಬಹುದು ಎಂದು ಬಹುತೇಕ ಅಡಕೆ ಬೆಳೆಗಾರರು ದಾಸ್ತಾನು ಮಾಡಿದ್ದಾರೆ. ರೈತರು ಅಡಕೆ ಮಾರಾಟ ಮಾಡದೆ ಇಟ್ಟುಕೊಂಡಿದ್ದಾರೆ. ಸರ್ಕಾರ ಪಾನ್ ಮಸಾಲಕ್ಕೆ ತೆರಿಗೆ ಏರಿಸಿದೆ. ಶಿವಮೊಗ್ಗ ಮಾಮ್ ಕೋಸ್ ಸಂಸ್ಥೆಯಲ್ಲೇ ಕಳೆದ ವರ್ಷಕ್ಕಿಂತ 3 ಪಟ್ಟುಹೆಚ್ಚು ಅಡಕೆ ದಾಸ್ತಾನು ಇದೆ. ಸದ್ಯಕ್ಕೆ ಅಡಕೆ ಧಾರಣೆ ಏರುವ ಲಕ್ಷಣ ಇಲ್ಲ.

-ಕೃಪಾಲ್ ಗೌಡ, ಅಡಕೆ ಬೆಳೆಗಾರ, ಮುತ್ತಿನಕೊಪ್ಪ

ಹಾಸನಾಂಬೆ ದರ್ಶನಕ್ಕೆ KSRTC ಭರ್ಜರಿ ಕೊಡುಗೆ: ಕೇವಲ ₹375 ರಿಂದ ಸ್ಪೆಷಲ್ ಪ್ಯಾಕೇಜ್ ಟೂರ್‌ ಆರಂಭ

Sathish Kumar KH — Mon, 26 Oct 2026 16:30:14 +0530

ಹಾಸನ (ಅ.26): ವರ್ಷಕ್ಕೊಮ್ಮೆ ಮಾತ್ರ ಬಾಗಿಲು ತೆರೆಯುವ ಹಾಸನದ ಅಧಿದೇವತೆ ಹಾಸನಾಂಬೆಯ ಭಕ್ತಾದಿಗಳಿಗೆ ಮತ್ತು ಪ್ರವಾಸಿಗರಿಗೆ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು (KSRTC) ಭರ್ಜರಿ ಸಿಹಿಸುದ್ದಿ ನೀಡಿದೆ. ಹಾಸನಾಂಬೆ ಜಾತ್ರಾ ಮಹೋತ್ಸವದ ಅಂಗವಾಗಿ ಸಾರ್ವಜನಿಕರ ಅನುಕೂಲಕ್ಕಾಗಿ "ಯಾತ್ರೆ ನಮ್ಮದು - ದಿವ್ಯಾನುಭವ ನಿಮ್ಮದು" ಎಂಬ ಧ್ಯೇಯವಾಕ್ಯದೊಂದಿಗೆ ‘ಶ್ರೀ ಹಾಸನಾಂಬ ಪ್ಯಾಕೇಜ್ ಟೂರ್’ ಅನ್ನು ಘೋಷಿಸಿದೆ.

ಅಕ್ಟೋಬರ್ 30 ರಿಂದ ನವೆಂಬರ್ 10 ರವರೆಗೆ ಈ ವಿಶೇಷ ಪ್ರವಾಸ ಪ್ಯಾಕೇಜ್ ಲಭ್ಯವಿರಲಿದ್ದು, ಹಾಸನ ಜಿಲ್ಲೆ ಹಾಗೂ ಸುತ್ತಮುತ್ತಲಿನ ಧಾರ್ಮಿಕ ಮತ್ತು ಪ್ರೇಕ್ಷಣೀಯ ಸ್ಥಳಗಳನ್ನು ಕಣ್ತುಂಬಿಕೊಳ್ಳಲು ಕೆಎಸ್‌ಆರ್‌ಟಿಸಿ ಒಟ್ಟು 8 ಪ್ರತ್ಯೇಕ ಮಾರ್ಗಗಳ ಟೂರ್ ಪ್ಯಾಕೇಜ್‌ಗಳನ್ನು ರೂಪಿಸಿದೆ.

ಪ್ರವಾಸದ ಪ್ರಮುಖ ಅಂಶಗಳು:

ಆರಂಭದ ಸ್ಥಳ: ನಗರ ಬಸ್ ನಿಲ್ದಾಣ, ಹಾಸನ.
ಹೊರಡುವ ಸಮಯ: ಪ್ರತಿದಿನ ಬೆಳಗ್ಗೆ 07:30 ರಿಂದ 08:00 ಗಂಟೆಗೆ.
ವಾಪಸ್ ಆಗಮನ: ಸಂಜೆ ಸುಮಾರು 7:00 ಗಂಟೆಗೆ.
ಟಿಕೆಟ್ ದರ: ಕನಿಷ್ಠ ₹375/- ರಿಂದ ಆರಂಭ.

8 ಪ್ಯಾಕೇಜ್ ಟೂರ್‌ಗಳ ಸಂಪೂರ್ಣ ವಿವರ ಮತ್ತು ದರ ಪಟ್ಟಿ:

ಪ್ಯಾಕೇಜ್ 1: ಹಾಸನಾಂಬೆ ವಿಶೇಷ ದರ್ಶನ ಪ್ಯಾಕೇಜ್

ಸ್ಥಳಗಳು: ಶ್ರೀ ಹಾಸನಾಂಬ ಹಾಗೂ ಸಿದ್ದೇಶ್ವರ ದೇವಾಲಯ ದರ್ಶನ, ದೇವಿಗೆರೆ ಕಲ್ಯಾಣಿ, ಕೆಂಚಮ್ಮನ ಹೊಸಕೋಟೆ ದೇವಾಲಯ.
ಸಮಯ & ದಿನ: ಬೆಳಗ್ಗೆ 08:00 (ಬುಧವಾರ, ಶುಕ್ರವಾರ ಮತ್ತು ಭಾನುವಾರ ಮಾತ್ರ).
ಒಟ್ಟು ಕಿ.ಮೀ: 90 ಕಿ.ಮೀ.
ಟಿಕೆಟ್ ದರ: ₹1400/- (ಇದರಲ್ಲಿ ₹1000 ಮೌಲ್ಯದ ಹಾಸನಾಂಬೆ ವಿಶೇಷ ದರ್ಶನ ಟಿಕೆಟ್ ಹಾಗೂ ₹400 ಬಸ್ ಪ್ರಯಾಣ ದರ ಒಳಗೊಂಡಿದೆ).

ಪ್ಯಾಕೇಜ್ 2: ವಾಟೇಹೊಳೆ - ಬೈರವೇಶ್ವರ ಪ್ರವಾಸ

ಸ್ಥಳಗಳು: ವಾಟೇಹೊಳೆ ಡ್ಯಾಂ, ಜನಾರ್ದನಸ್ವಾಮಿ ದೇವಸ್ಥಾನ, ಪಾಳ್ಯ, ಮುರಗಡಿ ಜಲಪಾತ, ಬೆಟ್ಟದ ಭೈರವೇಶ್ವರ ದೇವಸ್ಥಾನ.
ಸಮಯ: ಬೆಳಗ್ಗೆ 07:30 (184 ಕಿ.ಮೀ).
ಟಿಕೆಟ್ ದರ: ₹500/-.
ಪ್ಯಾಕೇಜ್ 3: ಮಂಜರಾಬಾದ್ ಕೋಟೆ - ಬಿಸಿಲೆ ಘಾಟ್ ವೀಕ್ಷಣೆ
ಸ್ಥಳಗಳು: ಮಂಜರಾಬಾದ್ ಕೋಟೆ, ಮೂಕನಮನೆ ಜಲಪಾತ, ಬಿಸಿಲೆ ಘಾಟ್ ವೀಕ್ಷಣಾ ಕೇಂದ್ರ.
ಸಮಯ: ಬೆಳಗ್ಗೆ 07:30 (192 ಕಿ.ಮೀ).
ಟಿಕೆಟ್ ದರ: ₹525/-.

ಪ್ಯಾಕೇಜ್ 4: ಬೇಲೂರು - ಹಳೇಬೀಡು ಐತಿಹಾಸಿಕ ತಾಣಗಳ ಯಾತ್ರೆ

ಸ್ಥಳಗಳು: ಬೇಲೂರು ಶ್ರೀ ಚನ್ನಕೇಶವ ದೇವಾಲಯ, ಯಾಗಚಿ ಜಲಸಾಹಸ ಕ್ರೀಡಾ ಕೇಂದ್ರ, ಶ್ರೀ ಪುಷ್ಪಗಿರಿ ಮಲ್ಲಿಕಾರ್ಜುನ ಸ್ವಾಮಿ ಬೆಟ್ಟ, ಹಳೇಬೀಡು ಹೊಯ್ಸಳೇಶ್ವರ ದೇವಾಲಯ, ಕೊಂಡಜ್ಜಿ ವರದರಾಜ ಸ್ವಾಮಿ ದೇವಾಲಯ.
ವಿಶೇಷತೆ: ಶ್ರೀ ಪುಷ್ಪಗಿರಿ ಮಲ್ಲಿಕಾರ್ಜುನ ಸ್ವಾಮಿ ದೇವಸ್ಥಾನದಲ್ಲಿ ದಾಸೋಹ (ಊಟ) ಲಭ್ಯ.
ಸಮಯ: ಬೆಳಗ್ಗೆ 07:30 (117 ಕಿ.ಮೀ).
ಟಿಕೆಟ್ ದರ: ₹375/-.

ಪ್ಯಾಕೇಜ್ 5: ಶ್ರವಣಬೆಳಗೊಳ - ನುಗ್ಗೇಹಳ್ಳಿ ಟೂರ್

ಸ್ಥಳಗಳು: ನುಗ್ಗೇಹಳ್ಳಿ ಶ್ರೀ ಲಕ್ಷ್ಮೀ ನರಸಿಂಹ ಸ್ವಾಮಿ ದೇವಾಲಯ, ಶ್ರವಣಬೆಳಗೊಳ, ವಿಂಧ್ಯಗಿರಿ ಬೆಟ್ಟ, ಚಂದ್ರಗಿರಿ ಬೆಟ್ಟ, ಬಿಸಿಲಿಸಿದ್ಧ ಪಾರ್ಕ್.
ವಿಶೇಷತೆ: ಶ್ರವಣಬೆಳಗೊಳ ಜೈನ ಮಠದಲ್ಲಿ ದಾಸೋಹ ವ್ಯವಸ್ಥೆ.
ಸಮಯ: ಬೆಳಗ್ಗೆ 07:30 (132 ಕಿ.ಮೀ).
ಟಿಕೆಟ್ ದರ: ₹400/-.

ಪ್ಯಾಕೇಜ್ 6: ಅರಸೀಕೆರೆ - ಜೇನುಕಲ್ಲು ಸಿದ್ಧೇಶ್ವರ ಬೆಟ್ಟ ಯಾತ್ರೆ

ಸ್ಥಳಗಳು: ಕೋರವಂಗಲ ಭೂವನೇಶ್ವರ ದೇವಾಲಯ, ಹಾರನಹಳ್ಳಿ ಕೇಶವ ಮತ್ತು ಸೋಮೇಶ್ವರ ದೇವಾಲಯ, ಮಾಲೇಕಲ್ಲು ತಿರುಪತಿ ದೇವಾಲಯ, ಜೇನುಕಲ್ಲು ಸಿದ್ದೇಶ್ವರ ಬೆಟ್ಟ, ಅರಸೀಕೆರೆ ಮಹಾತ್ಮ ಗಾಂಧಿ ಚಿತಾಭಸ್ಮ-ನರಸಿಂಹಸ್ವಾಮಿ ದೇವಾಲಯ, ಶಾಂತಿಗ್ರಾಮ, ಗೆಂಡೆಕಟ್ಟೆ ಫಾರೆಸ್ಟ್, ಹಾಸನ ವಸ್ತು ಸಂಗ್ರಹಾಲಯ.
ವಿಶೇಷತೆ: ಜೇನುಕಲ್ಲು ಸಿದ್ಧೇಶ್ವರ ಬೆಟ್ಟದಲ್ಲಿ ದಾಸೋಹ ಲಭ್ಯ.
ಸಮಯ: ಬೆಳಗ್ಗೆ 07:30 (134 ಕಿ.ಮೀ).
ಟಿಕೆಟ್ ದರ: ₹400/-.

ಪ್ಯಾಕೇಜ್ 7: ಗೋರೂರು ಡ್ಯಾಂ - ಶೆಟ್ಟಿಹಳ್ಳಿ ಚರ್ಚ್ ಪ್ರವಾಸ

ಸ್ಥಳಗಳು: ಹಾಲುವಾಗಿಲು ಕಟ್ಟೆ, ಮುಳುಗಡೆ ಖ್ಯಾತಿಯ ಶೆಟ್ಟಿಹಳ್ಳಿ ಚರ್ಚ್, ಶ್ರೀ ರಂಗನಾಥಸ್ವಾಮಿ ದೇವಸ್ಥಾನ, ಕೋಣಾಪುರ-ಹೇಮಾವತಿ ಜಲಾಶಯ (ಗೋರೂರು), ಗೋರೂರು ಶ್ರೀ ಸುಬ್ರಹ್ಮಣ್ಯ ಸ್ವಾಮಿ ದೇವಾಲಯ, ರಾಮನಾಥಪುರ ರಾಮೇಶ್ವರ ದೇವಸ್ಥಾನ.
ಸಮಯ: ಬೆಳಗ್ಗೆ 07:30 (143 ಕಿ.ಮೀ).
ಟಿಕೆಟ್ ದರ: ₹400/-.

ಪ್ಯಾಕೇಜ್ 8: ಜಾವಗಲ್ - ಬಾಣಾವರ ಕೋಟೆ ಪರಂಪರೆ ಯಾತ್ರೆ

ಸ್ಥಳಗಳು: ಜಾವಗಲ್ ಶ್ರೀ ಲಕ್ಷ್ಮೀನರಸಿಂಹಸ್ವಾಮಿ ದೇವಾಲಯ, ಅರಕೆರೆ ಶ್ರೀ ಚನ್ನಕೇಶವ ದೇವಸ್ಥಾನ, ಬೆಟ್ಟದಪುರ ಶ್ರೀ ರಂಗನಾಥಸ್ವಾಮಿ ದೇವಸ್ಥಾನ, ಬಾಣಾವರ ಕೋಟೆ, ಬೆಳಕಲ್ಲು ಶ್ರೀ ರಂಗನಾಥಸ್ವಾಮಿ ದೇವಸ್ಥಾನ.
ಸಮಯ: ಬೆಳಗ್ಗೆ 07:30 (181 ಕಿ.ಮೀ).
ಟಿಕೆಟ್ ದರ: ₹500/-.

ಗಮನಿಸಬೇಕಾದ ಮುಖ್ಯ ನಿಯಮಗಳು:

ಮಕ್ಕಳಿಗೆ ಪ್ರತ್ಯೇಕ ಪ್ರಯಾಣ ದರ ನಿಗದಿಪಡಿಸಲಾಗಿದೆ. ಊಟ ಮತ್ತು ಪ್ರವಾಸಿ ತಾಣಗಳ ಪ್ರವೇಶ ಶುಲ್ಕ (Entry Fee) ಪ್ರಯಾಣಿಕರೇ ಪ್ರತ್ಯೇಕವಾಗಿ ಭರಿಸಬೇಕು (ದಾಸೋಹ ಇರುವ ಸ್ಥಳಗಳನ್ನು ಹೊರತುಪಡಿಸಿ).

ಎಲ್ಲಾ ಬಸ್‌ಗಳು ಹಾಸನ ನಗರ ಬಸ್ ನಿಲ್ದಾಣದಿಂದಲೇ ಹೊರಟು ಸಂಜೆ ಅಲ್ಲೇ ಪ್ರವಾಸ ಮುಕ್ತಾಯಗೊಳಿಸಲಿವೆ.

ಮಾಹಿತಿ ಮತ್ತು ಮುಂಗಡ ಬುಕಿಂಗ್‌ಗಾಗಿ ಸಂಪರ್ಕಿಸಿ:

ಪ್ಯಾಕೇಜ್ ಪ್ರವಾಸದ ಹೆಚ್ಚಿನ ಮಾಹಿತಿ ಹಾಗೂ ಆಸನಗಳ ಕಾಯ್ದಿರಿಸುವಿಕೆಗಾಗಿ ಕೆಳಗಿನ ಸಹಾಯವಾಣಿ ಸಂಖ್ಯೆಗಳನ್ನು ಸಂಪರ್ಕಿಸಬಹುದು:
ಮೊಬೈಲ್ ಸಂಖ್ಯೆಗಳು: 7760990518, 7760990519, 7760990520, 7760990523
ಗ್ರಾಹಕ ಸೇವಾ ಸಂಖ್ಯೆ: 080 2625 2625
ಅಧಿಕೃತ ವೆಬ್‌ಸೈಟ್: www.ksrtc.in

ಬೇಲೂರು-ಆಲೂರು ರೈಲ್ವೆ ಕಾಮಗಾರಿ; ಭೂಸ್ವಾಧೀನ ಬೆಲೆ ನಿಗದಿಯಲ್ಲಿ ತಾರತಮ್ಯದ ಆರೋಪ!

Kannadaprabha News — Sat, 17 Oct 2026 10:04:31 +0530

ಹಾಸನ: ಬೇಲೂರು-ಆಲೂರು ರೈಲ್ವೆ ಸಂಪರ್ಕ ಕಾಮಗಾರಿಗಾಗಿ ನಡೆಯುತ್ತಿರುವ ಭೂಸ್ವಾಧೀನ ಪ್ರಕ್ರಿಯೆಯಲ್ಲಿ ಬೆಲೆ ನಿಗದಿಪಡಿಸುವಾಗ ತಾರತಮ್ಯ ನೀತಿ ಅನುಸರಿಸಲಾಗಿದೆ ಎಂದು ಆರೋಪಿಸಿ, ತಾಲೂಕು ರೈತ ಸಂಘದ ನೇತೃತ್ವದಲ್ಲಿ ಆಲೂರು ತಾಲೂಕಿನ ತಾಳೂರು ಗ್ರಾಮ ಪಂಚಾಯತಿ ವ್ಯಾಪ್ತಿಯ ರೈತರು ತೋಟಗಾರಿಕಾ ಇಲಾಖೆಗೆ ಬೀಗ ಜಡಿದು ತೀವ್ರ ಪ್ರತಿಭಟನೆ ನಡೆಸಿದರು.

ಬೆಲೆ ನಿಗದಿಪಡಿಸುವಲ್ಲಿ ತೀವ್ರ ಅನ್ಯಾಯ

ಪ್ರತಿಭಟನೆಯನ್ನು ಉದ್ದೇಶಿಸಿ ರೈತ ಸಂಘದ ಜಿಲ್ಲಾಧ್ಯಕ್ಷ ಧರ್ಮರಾಜ್ ಮಾತನಾಡಿ, ರೈಲ್ವೆ ಯೋಜನೆಗಾಗಿ ತಮ್ಮ ಜಮೀನುಗಳನ್ನು ಕಳೆದುಕೊಳ್ಳುತ್ತಿರುವ ರೈತರಿಗೆ ಬೆಲೆ ನಿಗದಿಪಡಿಸುವಲ್ಲಿ ತೀವ್ರ ಅನ್ಯಾಯ ಎಸಗಲಾಗಿದೆ. ಕೆಲವು ಗ್ರಾಮಗಳಿಗೆ ಹೆಚ್ಚಿನ ಪರಿಹಾರ ನೀಡಿ, ಇನ್ನು ಕೆಲವು ಗ್ರಾಮಗಳಿಗೆ ಕಡಿಮೆ ಹಣ ನಿಗಧಿ ನೀಡುವ ಮೂಲಕ ತಾರತಮ್ಯ ಮಾಡಲಾಗುತ್ತಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಅಧಿಕಾರಿಯ ದಬ್ಬಾಳಿಕೆ

ಇದೇ ವೇಳೆ, ರೈತರು ತಾವು ಬೆಳೆದಿರುವ ತೋಟಗಾರಿಕಾ ಬೆಳೆಗಳಿಗೆ ಸೂಕ್ತ ಬೆಲೆ ನಿಗದಿಪಡಿಸುವಂತೆ ಕೋರಿದ್ದಕ್ಕೆ, ತೋಟಗಾರಿಕಾ ಇಲಾಖೆಯ ಅಧಿಕಾರಿಯೊಬ್ಬರು "ನೀವು ವಿಷ ಕುಡಿದು ಸಾಯಿರಿ" ಎಂದು ಅತ್ಯಂತ ಬೇಜವಾಬ್ದಾರಿಯಿಂದ ಮತ್ತು ಉಡಾಫೆಯಿಂದ ಮಾತನಾಡಿದ್ದಾರೆ. ರೈತರ ಕಷ್ಟಕ್ಕೆ ಸ್ಪಂದಿಸಬೇಕಾದ ಅಧಿಕಾರಿಯೇ ದಬ್ಬಾಳಿಕೆ ನಡೆಸಿ ಈ ರೀತಿ ಮಾತನಾಡಿರುವುದು ಖಂಡನೀಯ. ಕೂಡಲೇ ಅಂತಹ ಅಧಿಕಾರಿಯ ವಿರುದ್ಧ ಕಠಿಣ ಶಿಸ್ತು ಕ್ರಮ ಕೈಗೊಳ್ಳಬೇಕು ಹಾಗೂ ರೈತರ ಭೂಮಿಗೆ ಸೂಕ್ತ ಮತ್ತು ನ್ಯಾಯಯುತ ಬೆಲೆ ನಿಗದಿಪಡಿಸಬೇಕು ಎಂದು ಅವರು ಒತ್ತಾಯಿಸಿದರು.

ರೈತರ ಮನವಿಯನ್ನು ಸ್ವೀಕರಿಸಿದ ಜಂಟಿ ನಿರ್ದೇಶಕ ಯೋಗೇಶ್

ಪ್ರತಿಭಟನಾ ಸ್ಥಳಕ್ಕೆ ತೋಟಗಾರಿಕಾ ಇಲಾಖೆಯ ಜಂಟಿ ನಿರ್ದೇಶಕ ಯೋಗೇಶ್ ಆಗಮಿಸಿ, ರೈತರ ಮನವಿಯನ್ನು ಸ್ವೀಕರಿಸಿ, ನಿಮ್ಮ ಬೇಡಿಕೆಗಳನ್ನು ಈಡೇರಿಸಲು ಪ್ರಾಮಾಣಿಕ ಪ್ರಯತ್ನ ಮಾಡುವುದಾಗಿ ಭರವಸೆ ನೀಡಿದ ಬಳಿಕ ಪ್ರತಿಭಟನೆಯನ್ನು ಶಾಂತಗೊಳಿಸಲಾಯಿತು.

ಪ್ರತಿಭಟನೆಯಲ್ಲಿ ತಾಳೂರು ಗ್ರಾಮ ಪಂಚಾಯತಿ ಮಾಜಿ ಸದಸ್ಯ ಷಡಕ್ಷರಿ, ಹರೀಶ್ ಜಿ.ಜಿ. ಕೊಪ್ಪಲು, ಯೋಗೇಶ್ ಕುಪ್ಪೆಹೊಸಹಳ್ಳಿ, ನಂದೀಶ್ ತಾಳೂರು, ಜಿ.ಕೆ. ವೆಂಕಟೇಶ್, ಸೋಮಶೇಖರ್‌ ಗುಡ್ಡನಹಳ್ಳಿ, ತಾಳೂರು ಭೀಮಯ್ಯ, ದ್ಯಾವಯ್ಯ ಸೇರಿದಂತೆ ಹಲವು ರೈತರು ಹಾಜರಿದ್ದರು.

Hassan: ಅ.29ರಿಂದ ನ.11ರ ವರೆಗೆ ಹಾಸನಾಂಬೆ ಜಾತ್ರೋತ್ಸವ, ಪೂರ್ವಸಿದ್ಧತೆ ನಡುವೆ ಅಚ್ಚರಿಯ ಬೆಳವಣಿಗೆ!

Kannadaprabha News — Sat, 17 Oct 2026 11:58:35 +0530

ಹಾಸನ: ಹಾಸನಾಂಬೆ ದೇವಿ ದರ್ಶನೋತ್ಸವಕ್ಕೆ ಜಿಲ್ಲಾಡಳಿತ ಸಿದ್ಧತೆಗಳನ್ನು ಚುರುಕುಗೊಳಿಸಿದ್ದು, ಈ ಬಾರಿ ಕಳೆದ ವರ್ಷಕ್ಕಿಂತ ಹೆಚ್ಚಿನ ಸಂಖ್ಯೆಯಲ್ಲಿ ಭಕ್ತರು ಆಗಮಿಸುವ ನಿರೀಕ್ಷೆಯಿದೆ. ಲಕ್ಷಾಂತರ ಭಕ್ತರಿಗೆ ಸುಗಮ ಮತ್ತು ಸುರಕ್ಷಿತ ದರ್ಶನ ಕಲ್ಪಿಸುವುದರ ಜತೆಗೆ, ಸರತಿ ಸಾಲಿನಲ್ಲಿ ಗಂಟೆಗಟ್ಟಲೆ ಕಾಯುವ ಸಮಯವನ್ನು ಕಡಿಮೆ ಮಾಡಲು ವಿಶೇಷ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ ಎಂದು ಜಿಲ್ಲಾಧಿಕಾರಿ ಕೆ.ಎಸ್. ಲತಾಕುಮಾರಿ ತಿಳಿಸಿದರು.

ಹಾಸನಾಂಬೆ ಜಾತ್ರೆಯ ಪೂರ್ವಸಿದ್ಧತೆ ಪರಿಶೀಲಿಸಿದ ಡಿಸಿ

ಶುಕ್ರವಾರ ಹಾಸನಾಂಬೆ ದರ್ಶನೋತ್ಸವದ ಪೂರ್ವಸಿದ್ಧತೆಗಳ ಪರಿಶೀಲನೆಗೆ ಆಗಮಿಸಿದ್ದ ಜಿಲ್ಲಾಧಿಕಾರಿ ಕೆ.ಎಸ್. ಲತಾಕುಮಾರಿ ಮಾತನಾಡಿ, ಭಕ್ತರ ದರ್ಶನದ ವ್ಯವಸ್ಥೆ, ಪೂಜಾ ಕೈಂಕರ್ಯ ನಿರ್ವಹಣೆ ಹಾಗೂ ಜನದಟ್ಟಣೆ ನಿಯಂತ್ರಣಕ್ಕೆ ಸಂಬಂಧಿಸಿದಂತೆ ಅರ್ಚಕರೊಂದಿಗೆ ಚರ್ಚೆ ನಡೆಸಲಾಗಿದೆ. ಭಕ್ತರಿಗೆ ಉತ್ತಮ ದರ್ಶನದ ವ್ಯವಸ್ಥೆ ಕಲ್ಪಿಸಲು ಅರ್ಚಕರು ಸಹಕಾರ ನೀಡುವ ಭರವಸೆ ನೀಡಿದ್ದಾರೆ ಎಂದರು.

ಪೊಲೀಸ್ ಇಲಾಖೆಗೆ ಸವಾಲು

ಹಾಸನಾಂಬೆ ದೇವಾಲಯದಲ್ಲಿ ಅರ್ಚಕರು ಆಗಮ ಶಾಸ್ತ್ರದ ಪ್ರಕಾರ ಶಾಸ್ತ್ರೋಕ್ತವಾಗಿ ಪೂಜಾ ಕೈಂಕರ್ಯ ನೆರವೇರಿಸುವುದರಿಂದ ಕೆಲವೊಮ್ಮೆ ಹೆಚ್ಚಿನ ಸಮಯ ಬೇಕಾಗುತ್ತದೆ. ಮತ್ತೊಂದೆಡೆ, ದರ್ಶನೋತ್ಸವದ ಸಂದರ್ಭದಲ್ಲಿ ದಿನವಿಡೀ ಲಕ್ಷಾಂತರ ಭಕ್ತರು ಆಗಮಿಸುವ ನಿರೀಕ್ಷೆಯಿದ್ದು, ದರ್ಶನಕ್ಕಾಗಿ ಮೂರು, ನಾಲ್ಕು ಅಥವಾ ಐದು ಗಂಟೆಗಳ ಕಾಲ ಸರತಿ ಸಾಲಿನಲ್ಲಿ ಕಾಯುವ ಪರಿಸ್ಥಿತಿ ನಿರ್ಮಾಣವಾಗುವ ಸಾಧ್ಯತೆಯಿದೆ. ಈ ಹಿನ್ನೆಲೆಯಲ್ಲಿ ಪೂಜಾ ವಿಧಾನಗಳಿಗೆ ಅಗತ್ಯ ಗೌರವ ನೀಡುವುದರ ಜತೆಗೆ, ಭಕ್ತರಿಗೆ ಹೆಚ್ಚಿನ ಸಮಯ ದರ್ಶನದ ಅವಕಾಶ ಕಲ್ಪಿಸುವ ಕುರಿತು ಅರ್ಚಕರೊಂದಿಗೆ ಚರ್ಚಿಸಲಾಗಿದೆ. ಜನದಟ್ಟಣೆ ನಿಯಂತ್ರಿಸುವುದು ಮತ್ತು ಭಕ್ತರ ಕಾಯುವ ಸಮಯವನ್ನು ಕಡಿಮೆ ಮಾಡುವುದು ಪೊಲೀಸ್ ಇಲಾಖೆಗೆ ದೊಡ್ಡ ಸವಾಲಾಗಿದೆ. ಈ ನಿಟ್ಟಿನಲ್ಲಿ ಅರ್ಚಕರು ಸಹಕಾರ ನೀಡಲು ಒಪ್ಪಿಕೊಂಡಿದ್ದು, ದರ್ಶನ ವ್ಯವಸ್ಥೆಯನ್ನು ಮತ್ತಷ್ಟು ಸುಧಾರಿಸಲು ಪ್ರಯತ್ನಿಸಲಾಗುತ್ತಿದೆ ಎಂದು ತಿಳಿಸಿದರು.

ಭಾನುವಾರ ಜಿಲ್ಲಾ ಉಸ್ತುವಾರಿ ಸಚಿವರ ಅಧ್ಯಕ್ಷತೆಯಲ್ಲಿ ಅಧಿಕಾರಿಗಳ ಸಭೆ ನಡೆಯಲಿದ್ದು, ದರ್ಶನ ವ್ಯವಸ್ಥೆ, ಬ್ಯಾರಿಕೇಡ್‌ಗಳ ಅಳವಡಿಕೆ ಹಾಗೂ ಇತರ ಮೂಲಸೌಕರ್ಯ ಕಾಮಗಾರಿಗಳ ಕುರಿತು ಪರಿಶೀಲನೆ ನಡೆಸಲಾಗುತ್ತದೆ. ಅಗತ್ಯ ಕಾಮಗಾರಿಗಳಿಗೆ ಚಾಲನೆ ನೀಡುವ ಮೂಲಕ ಸಿದ್ಧತಾ ಕಾರ್ಯಗಳಿಗೆ ಮತ್ತಷ್ಟು ವೇಗ ನೀಡಲಾಗುವುದು ಎಂದರು.

ದೇವತೆಯ ಸುಗಮ ದರ್ಶನಕ್ಕೆ ಸಕಲ ಸಿದ್ಧತೆ

ಉಪವಿಭಾಗಾಧಿಕಾರಿ ಜಗದೀಶ್ ಗಂಗಣನವರ್ ಮಾತನಾಡಿ, ಈ ಬಾರಿಯ ಹಾಸನಾಂಬೆ ದೇವಿ ದರ್ಶನೋತ್ಸವವು ಅಕ್ಟೋಬರ್ ೨೯ರಿಂದ ನವೆಂಬರ್ ೧೧, ೨೦೨೬ರವರೆಗೆ ನಡೆಯಲಿದೆ. ಅಕ್ಟೋಬರ್ ೨೯ರಂದು ದೇವಾಲಯದ ಬಾಗಿಲು ತೆರೆಯಲಾಗುತ್ತಿದ್ದು, ನವೆಂಬರ್ ೧೧ ರಂದು ಮುಚ್ಚಲಾಗುತ್ತದೆ. ಅಕ್ಟೋಬರ್ ೩೦ ರಿಂದ ನವೆಂಬರ್ ೧೦ ರವರೆಗೆ ಭಕ್ತರಿಗೆ ದರ್ಶನದ ವ್ಯವಸ್ಥೆ ಕಲ್ಪಿಸಲಾಗಿದೆ. ಮೊದಲ ದಿನವಾದ ಅಕ್ಟೋಬರ್ ೨೯ ಹಾಗೂ ಕೊನೆಯ ದಿನವಾದ ನವೆಂಬರ್ ೧೧ ರಂದು ಸಾರ್ವಜನಿಕರಿಗೆ ದರ್ಶನ ಇರುವುದಿಲ್ಲ. ಜಿಲ್ಲಾ ಉಸ್ತುವಾರಿ ಸಚಿವರ ನಿರ್ದೇಶನ ಹಾಗೂ ಜಿಲ್ಲಾಧಿಕಾರಿಗಳ ಮಾರ್ಗದರ್ಶನದಲ್ಲಿ ದೇವಾಲಯದ ಆವರಣದ ದುರಸ್ತಿ, ಸುಣ್ಣ-ಬಣ್ಣ ಬಳಿಯುವುದು ಸೇರಿದಂತೆ ವಿವಿಧ ಕಾಮಗಾರಿಗಳು ನಡೆಯುತ್ತಿವೆ. ದೇವಾಲಯದ ಬಾಗಿಲು ತೆರೆಯುವ ಮುನ್ನ ಅರ್ಚಕರೊಂದಿಗೆ ಸೌಹಾರ್ದಯುತ ಸಭೆ ನಡೆಸಿ, ಕಳೆದ ವರ್ಷಗಳಂತೆ ಈ ಬಾರಿಯೂ ಪೂಜಾ ಕೈಂಕರ್ಯ ನಿರ್ವಹಣೆ ಮತ್ತು ಭಕ್ತರ ದರ್ಶನಕ್ಕೆ ಸಹಕರಿಸುವಂತೆ ಮನವಿ ಮಾಡಲಾಗಿದೆ. ಪ್ರಧಾನ ಅರ್ಚಕ ನಾಗರಾಜ್ ಸೇರಿದಂತೆ ಇತರ ಅರ್ಚಕರು ಜಿಲ್ಲಾಡಳಿತಕ್ಕೆ ಸಂಪೂರ್ಣ ಸಹಕಾರ ನೀಡುವ ಭರವಸೆ ನೀಡಿದ್ದಾರೆ ಎಂದು ಹೇಳಿದರು.

ದರ್ಶನೋತ್ಸವದ ಕರ್ತವ್ಯ ನಿರ್ವಹಣೆಗಾಗಿ ಕಂದಾಯ ಇಲಾಖೆಯ ಸುಮಾರು ೧,೨೦೦ ಸಿಬ್ಬಂದಿಯನ್ನು ನಿಯೋಜಿಸಲು ಸಿದ್ಧತೆ ಮಾಡಿಕೊಳ್ಳಲಾಗಿದೆ. ಗ್ರಾಮ ಸಹಾಯಕರು, ಗ್ರಾಮ ಆಡಳಿತಾಧಿಕಾರಿಗಳು, ಕಂದಾಯ ನಿರೀಕ್ಷಕರು, ಉಪತಹಸೀಲ್ದಾರರು ಹಾಗೂ ಸಹಾಯಕ ಆಯುಕ್ತರ ಕಚೇರಿಯ ಅಧಿಕಾರಿಗಳು ಸೇರಿದಂತೆ ವಿವಿಧ ಹಂತದ ಸಿಬ್ಬಂದಿಗೆ ಜಿಲ್ಲಾ ಪಂಚಾಯಿತಿ ಸಭಾಂಗಣದಲ್ಲಿ ಎರಡು ದಿನಗಳ ಮೊದಲ ಹಂತದ ತರಬೇತಿ ನೀಡಲಾಗಿದೆ. ಕರ್ತವ್ಯ ಹಂಚಿಕೆ, ಜವಾಬ್ದಾರಿಗಳು ಹಾಗೂ ಕಾರ್ಯನಿರ್ವಹಣೆಯ ಕುರಿತು ಸಿಬ್ಬಂದಿಗೆ ಮಾಹಿತಿ ನೀಡಲಾಗಿದ್ದು, ಮುಂದಿನ ದಿನಗಳಲ್ಲಿ ಎರಡನೇ ಹಾಗೂ ಅಂತಿಮ ಹಂತದ ತರಬೇತಿಯನ್ನೂ ಆಯೋಜಿಸಲಾಗುತ್ತದೆ. ಇದರಿಂದ ದರ್ಶನೋತ್ಸವದ ಸಂದರ್ಭದಲ್ಲಿ ಇಲಾಖೆಗಳ ನಡುವೆ ಸಮನ್ವಯ ಸಾಧಿಸಿ, ಭಕ್ತರಿಗೆ ಅಗತ್ಯ ಸೌಲಭ್ಯಗಳನ್ನು ಒದಗಿಸಲು ಅನುಕೂಲವಾಗಲಿದೆ ಎಂದು ಉಪವಿಭಾಗಾಧಿಕಾರಿ ತಿಳಿಸಿದರು.

ಈ ಸಂದರ್ಭದಲ್ಲಿ ಅಪರ ಜಿಲ್ಲಾಧಿಕಾರಿ ಕೃಷ್ಣಮೂರ್ತಿ, ಹೆಚ್ಚುವರಿ ಪೊಲೀಸ್ ಅಧೀಕ್ಷಕ ಶ್ರೀನಿಧಿ ಹಾಗೂ ಸಂಬಂಧಪಟ್ಟ ವಿವಿಧ ಇಲಾಖೆಗಳ ಅಧಿಕಾರಿಗಳು ಹಾಗೂ ದೇವಾಲಯದ ಆಡಳಿತಕ್ಕೆ ಸಂಬಂಧಿಸಿದ ಅಧಿಕಾರಿಗಳು ಇದ್ದರು.

ಆರತಿ ತಟ್ಟೆಗೆ ಹಣ ಹಾಕಲು ಡಿಸಿಗೆ ಹಣ ಕೊಟ್ಟ ಎಸ್‌ಪಿ

ಹಾಸನ ನಗರದ ಪೆಂಡಾಲ್‌ ಗಣಪತಿಯನ್ನು ದೇವಿಗೆರೆಯಲ್ಲಿ ವಿಸರ್ಜನೆ ಮಾಡಲು ಅವಕಾಶ ಮಾಡಿಕೊಟ್ಟ ವಿಚಾರಕ್ಕೆ ಸಂಬಂಧಿಸಿದಂತೆ ಎಸ್ಪಿಗೆ ನೋಟಿಸ್‌ ನೀಡಿದ್ದ ಡಿಸಿ ನಡೆ ಕಳೆದ ಕೆಲ ದಿನಗಳಿಂದ ತೀವ್ರ ಚರ್ಚೆಗೆ ಗ್ರಾಸವಾಗಿತ್ತು. ಇದೇ ವಿಚಾರಕ್ಕೆ ಸ್ಥಳೀಯ ಶಾಸಕರೊಂದಿಗೂ ಮುಸುಕಿನ ಗುದ್ದಾಟ ನಡೆಯುತ್ತಿತ್ತು. ಕಡೆಗೆ ಕೇಂದ್ರ ಸಚಿವ ಎಚ್‌. ಡಿ. ಕುಮಾರಸ್ವಾಮಿ ಕೂಡ ಈ ವಿಚಾರವಾಗಿ ಡಿಸಿ ಮೇಲೆ ಅಸಮಾಧಾನ ಹೊರಹಾಕಿದ್ದರು. ಆದರೆ, ಇದಕ್ಕೂ ಸುಮ್ಮನಿರದ ಡಿಸಿ ಸಾಮಾಜಿಕ ಜಾಲತಾಣದಲ್ಲಿ ಅದಕ್ಕೂ ತಿರುಗೇಟು ನೀಡಿದ್ದರು. ಇಷ್ಟೆಲ್ಲಾ ಆದ ನಂತರ ರಾಜ್ಯ ಸರ್ಕಾರದ ಪ್ರದಾನ ಕಾರ್ಯದರ್ಶಿ ಶಾಲಿನಿ ರಜನೀಶ್‌ ಅವರು ಡಿಸಿ ಹಾಗೂ ಎಸ್ಪಿಯವರನ್ನು ಬೆಂಗಳೂರಿಗೆ ಕರೆಸಿಕೊಂಡು ಬುದ್ಧಿ ಹೇಳಿ ಇಬ್ಬರನ್ನೂ ಒಂದು ಮಾಡಿ ಕಳುಹಿಸಿದ್ದರು.

ಇದರ ಫಲವೆನ್ನುವಂತೆ ಶುಕ್ರವಾರ ಹಾಸನಾಂಬಾ ದೇವಸ್ಥಾನದ ಆವರಣಕ್ಕೆ ಭೇಟಿ ನೀಡಿದ್ದ ಡಿಸಿ ಹಾಗೂ ಎಸ್ಪಿ ಇಬ್ಬರೂ ಪರಸ್ಪರ ಕೈ ಕುಲುಕಿ, ನಂತರ ಹೆಗಲ ಮೇಲೆ ಕೈ ಹಾಕಿಕೊಂಡು ಪರಸ್ಪರ ಹತ್ತಿರದಿಂದ ಮಾತನಾಡಿದರು. ಬಳಿಕ ಇಬ್ಬರೂ ದೇವಿಗೆ ಕುಂಕುಮಾರ್ಚನೆ ಸಲ್ಲಿಸಿ, ಮಂಗಳಾರತಿ ಸ್ವೀಕರಿಸಿದರು. ಈ ವೇಳೆ ಮಂಗಳಾರತಿ ತಟ್ಟೆಗೆ ಕಾಣಿಕೆ ಹಾಕಲು ಎಸ್ಪಿ ಅವರು ಡಿಸಿಗೆ ಹಣ ನೀಡಿದ ಪ್ರಸಂಗವೂ ನಡೆಯಿತು.

ಕೇಂದ್ರ ಸಚಿವ ಕುಮಾರಸ್ವಾಮಿಗೆ ಹಾಸನ ಡಿಸಿ ಲತಾಕುಮಾರಿ ತಿರುಗೇಟು: ವಾಟ್ಸ್‌ಆ್ಯಪ್‌ನಲ್ಲಿ ಮಾರ್ಮಿಕ ಸ್ಟೇಟಸ್!

Sathish Kumar KH — Sun, 11 Oct 2026 18:24:32 +0530

ಹಾಸನ (ಅ.11): ಹಾಸನ ಜಿಲ್ಲಾಧಿಕಾರಿ ವಿರುದ್ಧ ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಅವರು ತೀವ್ರ ವಾಗ್ದಾಳಿ ನಡೆಸಿದ ಬೆನ್ನಲ್ಲೇ, ಹಾಸನ ಜಿಲ್ಲಾಧಿಕಾರಿ ಲತಾಕುಮಾರಿ ಅವರು ಸಾಮಾಜಿಕ ಜಾಲತಾಣದಲ್ಲಿ ಮಾರ್ಮಿಕವಾಗಿ ಪೋಸ್ಟ್‌ ಹಂಚಿಕೊಳ್ಳುವ ಮೂಲಕ ತಿರುಗೇಟು ನೀಡಿದ್ದಾರೆ. ಈ ಮೂಲಕ ರಾಜಕಾರಣಿ ಹಾಗೂ ಐಎಎಸ್ ಅಧಿಕಾರಿಯ ನಡುವಿನ ಈ ತಿಕ್ಕಾಟ ಈಗ ರಾಜ್ಯ ರಾಜಕೀಯ ಹಾಗೂ ಆಡಳಿತ ವಲಯದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ.

ಕುಮಾರಸ್ವಾಮಿ ಮಾಡಿದ ಗಂಭೀರ ಆರೋಪವೇನು?

ಹಾಸನ ಜಿಲ್ಲಾಡಳಿತದ ಕಾರ್ಯವೈಖರಿ ವಿರುದ್ಧ ತೀವ್ರ ಆಕ್ರೋಶ ಹೊರಹಾಕಿದ್ದ ಕೇಂದ್ರ ಸಚಿವ ಹೆಚ್‌.ಡಿ. ಕುಮಾರಸ್ವಾಮಿ, ನೇರವಾಗಿ ಜಿಲ್ಲಾಧಿಕಾರಿಯನ್ನೇ ಗುರಿಯಾಗಿಸಿ ವಾಗ್ದಾಳಿ ನಡೆಸಿದ್ದರು.

'ಕರ್ನಾಟಕ ಪರೀಕ್ಷಾ ಪ್ರಾಧಿಕಾರದ ಕೇಸಿನಲ್ಲಿ (KPSC) ಅಮಾನತು ಆಗಬೇಕಿದ್ದ ಅಧಿಕಾರಿಯನ್ನು ತಂದು ಹಾಸನಕ್ಕೆ ಜಿಲ್ಲಾಧಿಕಾರಿಯನ್ನಾಗಿ ಕೂರಿಸಿದ್ದಾರೆ. ಇವರ ಬಂಡವಾಳವನ್ನು ನಾನೀಗ ಬಿಚ್ಚಿಡಬೇಕಾ? ಸರ್ಕಾರ ಯಾರನ್ನು ರಕ್ಷಣೆ ಮಾಡುತ್ತಿದೆ?' ಎಂದು ಗುಡುಗಿದ್ದರು. ಕುಮಾರಸ್ವಾಮಿ ಅವರ ಈ ಹೇಳಿಕೆಯು ಹಾಸನ ಜಿಲ್ಲಾ ರಾಜಕೀಯದಲ್ಲಿ ಸಂಚಲನ ಮೂಡಿಸಿತ್ತು.

ವಾಟ್ಸ್‌ಆ್ಯಪ್ ಸ್ಟೇಟಸ್ ಮೂಲಕ ಡಿಸಿ ಉತ್ತರ:

ಹೆಚ್‌ಡಿಕೆ ಈ ಹೇಳಿಕೆ ನೀಡಿದ ಬೆನ್ನಲ್ಲೇ ಡಿಸಿ ಲತಾಕುಮಾರಿ ಅವರು ತಮ್ಮ ವಾಟ್ಸ್‌ಆ್ಯಪ್‌ ಸ್ಟೇಟಸ್‌ನಲ್ಲಿ ಪೋಸ್ಟ್‌ ಒಂದನ್ನು ಹಾಕಿಕೊಂಡಿದ್ದಾರೆ. 'ನೀವು ನನ್ನ ಮೇಲೆ ಸುಳ್ಳುಗಳಿಂದ ದಾಳಿ ಮಾಡಬಹುದು,

ಆದರೆ ಸುಳ್ಳುಗಳಿಂದ ನನ್ನನ್ನು ಒಡೆಯಲಾಗದು. 'ಸುಳ್ಳು ದಾಳಿ ಮಾಡುತ್ತವೆ, ಸತ್ಯ ಉಳಿಸುತ್ತದೆ' (You can attack me with lies, But you cannot break me with lies. Lies attack, truth protect) ಎಂದು ಬರೆದುಕೊಂಡಿದ್ದಾರೆ.

ಹಾಸನದಲ್ಲಿ ಅಧಿಕಾರಿ vs ಜನಪ್ರತಿನಿಧಿ ಸಮರ

ಹಾಸನ ಜಿಲ್ಲೆಯಲ್ಲಿ ಇತ್ತೀಚಿನ ದಿನಗಳಲ್ಲಿ ಅಧಿಕಾರಿಗಳು ಮತ್ತು ಜೆಡಿಎಸ್ ನಾಯಕರ ನಡುವೆ ಸಣ್ಣಪುಟ್ಟ ವಿಚಾರಗಳಿಗೂ ಘರ್ಷಣೆಗಳು ನಡೆಯುತ್ತಲೇ ಇವೆ. ಈ ಹಿಂದೆ ಕೂಡ ಹಲವು ಅಧಿಕಾರಿಗಳ ವರ್ಗಾವಣೆ ಮತ್ತು ಕಾರ್ಯವೈಖರಿ ಕುರಿತು ಹೆಚ್‌ಡಿಕೆ ಅಸಮಾಧಾನ ವ್ಯಕ್ತಪಡಿಸಿದ್ದರು. ಆದರೆ, ಇದೀಗ ಕೇಂದ್ರ ಸಚಿವರ ಮಟ್ಟದ ನಾಯಕರೊಬ್ಬರ ಆರೋಪಕ್ಕೆ, ಜಿಲ್ಲೆಯ ಅತ್ಯುನ್ನತ ಅಧಿಕಾರಿಯೊಬ್ಬರು ಸೋಷಿಯಲ್ ಮೀಡಿಯಾ ಮೂಲಕ ತಿರುಗೇಟು ನೀಡಿರುವುದು ಜಿಲ್ಲಾಡಳಿತ ಹಾಗೂ ರಾಜಕೀಯ ವಲಯದಲ್ಲಿ ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ.

ಎತ್ತಿನಹೊಳೆ ಯೋಜನೆ ವೆಚ್ಚ ಏರಿಕೆ 23 ಸಾವಿರ ಕೋಟಿಗೆ ಏರಿಕೆ; ವರ್ಷಾಂತ್ಯಕ್ಕೆ ತುಮಕೂರಿಗೆ ನೀರು, MC ಸುಧಾಕರ್ ಭರವಸೆ

Kannadaprabha News — Thu, 15 Oct 2026 13:01:28 +0530

ಸಕಲೇಶಪುರ: ಈ ವರ್ಷದ ಅಂತ್ಯದ ವೇಳೆಗೆ ಎತ್ತಿನಹೊಳೆ ಕುಡಿಯುವ ನೀರು ತುಮಕೂರು ಜಿಲ್ಲೆ ತಲುಪಲಿದೆ ಎಂದು ಸಾರ್ವಜನಿಕ ಉದ್ಯಮಗಳ ಸಮಿತಿ ಅಧ್ಯಕ್ಷ ಎಂ.ಸಿ. ಸುಧಾಕರ್ ತಿಳಿಸಿದರು.

ಕಾಮಗಾರಿ ಸ್ಥಳಗಳಿಗೆ ಎಂ.ಸಿ ಸುಧಾಕರ್ ಭೇಟಿ, ಪರಿಶೀಲನೆ

ಕರ್ನಾಟಕ ವಿಧಾನಮಂಡಲದ ಸಾರ್ವಜನಿಕ ಉದ್ಯಮಗಳ ಸಮಿತಿಯು ಬುಧವಾರ ಸಕಲೇಶಪುರ ತಾಲೂಕಿನ ಎತ್ತಿನಹೊಳೆ ಯೋಜನೆಯ ವಿವಿಧ ಕಾಮಗಾರಿ ಸ್ಥಳಗಳಿಗೆ ಭೇಟಿ ನೀಡಿ ಪರಿಶೀಲಿಸಿದ ಬಳಿಕ ಮಾತನಾಡಿದ ಅವರು, ಯೋಜನೆಯ ಮೂಲ ಅಂದಾಜು, ನಂತರದ ಪರಿಷ್ಕರಣೆಗಳು ಹಾಗೂ ವೆಚ್ಚ ಏರಿಕೆಗೆ ಕಾರಣಗಳೇನು ಎಂಬುದರ ಕುರಿತು ಅಧಿಕಾರಿಗಳಿಂದ ಮಾಹಿತಿ ಪಡೆದು ಪರಿಶೀಲಿಸಲಾಗುತ್ತಿದೆ. ಕಾಮಗಾರಿಗಳಲ್ಲಿ ಬದಲಾವಣೆ ಮಾಡಿರುವುದು ಸೂಕ್ತವಾಗಿದೆಯೇ, ಯೋಜನೆ ಪೂರ್ಣಗೊಳ್ಳಲು ಇನ್ನೆಷ್ಟು ಸಮಯ ಬೇಕಾಗುತ್ತದೆ ಎಂಬುದನ್ನೂ ಸಮಿತಿ ಗಮನಿಸುತ್ತಿದೆ ಎಂದರು.

2011–12ರಲ್ಲಿ ಯೋಜನೆಯ ಅಂದಾಜು ವೆಚ್ಚ ಸುಮಾರು 8,300 ಕೋಟಿ ಇತ್ತು. 2014–15ರಲ್ಲಿ ಪರಿಷ್ಕೃತ ಅಂದಾಜು 12,700 ಕೋಟಿಗೂ ಅಧಿಕವಾಗಿದ್ದು, 2023ರಲ್ಲಿ ಮತ್ತೊಮ್ಮೆ ಪರಿಷ್ಕರಿಸಿದಾಗ ವೆಚ್ಚ 23 ಸಾವಿರ ಕೋಟಿಗೂ ಹೆಚ್ಚಾಗಿದೆ. ಈ ಹಿನ್ನೆಲೆಯಲ್ಲಿ ವೆಚ್ಚ ಹೆಚ್ಚಳ ಮತ್ತು ವಿಳಂಬಕ್ಕೆ ಸಂಬಂಧಿಸಿದ ಅಂಶಗಳನ್ನು ಪರಿಶೀಲಿಸುವುದು ಸಮಿತಿಯ ಭೇಟಿಯ ಪ್ರಮುಖ ಉದ್ದೇಶವಾಗಿದೆ ಎಂದು ಹೇಳಿದರು.

16ರಿಂದ 17 ಟಿಎಂಸಿ ನೀರು ಲಭ್ಯ

ಯೋಜನೆಯ ಮೂಲ ಉದ್ದೇಶ ಕೋಲಾರ, ಚಿಕ್ಕಬಳ್ಳಾಪುರ ಸೇರಿದಂತೆ ಏಳು ಜಿಲ್ಲೆಗಳ ನಗರ ಹಾಗೂ ಗ್ರಾಮೀಣ ಪ್ರದೇಶಗಳ ಸುಮಾರು 6,000 ಹಳ್ಳಿಗಳಿಗೆ ಕುಡಿಯುವ ನೀರು ಒದಗಿಸುವುದಾಗಿದೆ. ಆರಂಭದಲ್ಲಿ 24.01 ಟಿಎಂಸಿ ನೀರು ಲಭ್ಯವಾಗುವ ನಿರೀಕ್ಷೆ ಇತ್ತು. ಆದರೆ, ಕಳೆದ ಐದಾರು ವರ್ಷಗಳ ಮಳೆಯ ಪ್ರಮಾಣವನ್ನು ಗಮನಿಸಿದಾಗ ಸರಾಸರಿ 16ರಿಂದ 17 ಟಿಎಂಸಿ ನೀರು ಲಭ್ಯವಾಗುತ್ತಿದೆ. 2023ರ ಬರಗಾಲದ ಸಂದರ್ಭದಲ್ಲಿ ಸುಮಾರು 7ರಿಂದ 8 ಟಿಎಂಸಿ ಹಾಗೂ ಪ್ರಸಕ್ತ ಸಾಲಿನ ತೀವ್ರ ಬರ ಪರಿಸ್ಥಿತಿಯಲ್ಲಿ ಸುಮಾರು 4 ಟಿಎಂಸಿ ನೀರು ಮಾತ್ರ ಲಭ್ಯವಾಗಿದೆ ಎಂಬ ಮಾಹಿತಿ ದೊರೆತಿದೆ ಎಂದರು.

ಯೋಜನೆಗೆ ನೀರು ಲಭ್ಯವಾಗುವುದಿಲ್ಲ ಎಂಬ ಆತಂಕ ಜನರಲ್ಲಿ ಇತ್ತು. ಆದರೆ, ಈ ಹಿಂದೆ ಎದುರಾಗಿದ್ದ ಅರಣ್ಯ ಇಲಾಖೆಯ ಅನುಮತಿ ಹಾಗೂ ರೈತರ ಭೂಮಿಗೆ ಪರಿಹಾರ ನೀಡುವಂತಹ ಹಲವು ತೊಡಕುಗಳು ನಿವಾರಣೆಯಾಗಿವೆ. ಕೇಂದ್ರ ಸರ್ಕಾರದ ಅರಣ್ಯ ಮತ್ತು ಪರಿಸರ ಇಲಾಖೆಯ ಅನುಮತಿಯೂ ಇತ್ತೀಚಿನ ತಿಂಗಳುಗಳಲ್ಲಿ ದೊರೆತಿರುವುದರಿಂದ ಕಾಮಗಾರಿಗಳಿಗೆ ವೇಗ ಬಂದಿದೆ ಎಂದು ತಿಳಿಸಿದರು. ಈ ವರ್ಷದ ಅಂತ್ಯದ ವೇಳೆಗೆ ತುಮಕೂರು ಜಿಲ್ಲೆಯ ಒಂದು ಭಾಗಕ್ಕೆ ನೀರು ತಲುಪುವ ನಿರೀಕ್ಷೆಯಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಮುಂದಿನ ವರ್ಷದ ಅಂತ್ಯದ ವೇಳೆಗೆ ಕೋಲಾರ, ಚಿಕ್ಕಬಳ್ಳಾಪುರ, ಬೆಂಗಳೂರು ಗ್ರಾಮಾಂತರ ಹಾಗೂ ರಾಮನಗರ ಸೇರಿದಂತೆ ಸಂಬಂಧಪಟ್ಟ ಜಿಲ್ಲೆಗಳಿಗೆ ನೀರು ತಲುಪಿಸುವ ಪ್ರಕ್ರಿಯೆ ಮುಂದುವರಿಯುವ ನಿರೀಕ್ಷೆಯಿದೆ. ನೀರನ್ನು ಸಂಸ್ಕರಿಸಿ ಕುಡಿಯಲು ಯೋಗ್ಯವಾಗಿಸುವ ವ್ಯವಸ್ಥೆಗಳ ಬಗ್ಗೆಯೂ ಸಮಿತಿ ಸಭೆಯಲ್ಲಿ ಚರ್ಚಿಸಿದೆ ಎಂದು ಹೇಳಿದರು.

ಸಮಿತಿಯು ಎತ್ತಿನಹೊಳೆ ಯೋಜನೆಯ ವಿಯರ್‌-1, ಡಿಸಿ-1 ಪಂಪ್‌ಹೌಸ್, ದೊಡ್ಡನಗರದ ಡಿಸಿ-3 ಪಂಪ್‌ಹೌಸ್, ಡಿಸಿ-4 ಕಾಮಗಾರಿ ಸ್ಥಳ, ಹೆಬ್ಬನಹಳ್ಳಿಯ 400 ಕೆವಿ ಉಪಕೇಂದ್ರ, ಸುರಂಗ ನಿರ್ಗಮನ ಸ್ಥಳ ಹಾಗೂ ಕಾಲುವೆಗಳ ಕಾಮಗಾರಿಗಳನ್ನು ಪರಿಶೀಲಿಸಿತು.

ಈ ಸಂದರ್ಭದಲ್ಲಿ ವಿಧಾನಸಭಾ ಸದಸ್ಯರಾದ ವೆಂಕಟಶಿವಾರೆಡ್ಡಿ, ಶಾಂತನಗೌಡ, ಸಮರ್ಥ್‌ ಶಾಮನೂರು, ಶಿವಶಂಕರಪ್ಪ ಹಾಗೂ ವಿಧಾನ ಪರಿಷತ್ ಸದಸ್ಯರಾದ ಐವಾನ್ ಡಿಸೋಜಾ, ಕಿಶೋರ್ ಕುಮಾರ್‌ ಪುತ್ತೂರು ಸೇರಿದಂತೆ ಸಮಿತಿಯ ಸದಸ್ಯರು, ಜಲಸಂಪನ್ಮೂಲ ಇಲಾಖೆಯ ಕಾರ್ಯದರ್ಶಿ ಸತ್ಯನಾರಾಯಣ, ವಿಶ್ವೇಶ್ವರಯ್ಯ ಜಲ ನಿಗಮದ ವ್ಯವಸ್ಥಾಪಕ ನಿರ್ದೇಶಕ ರಾಮೆಂದ್ರ, ಮುಖ್ಯ ಎಂಜಿನಿಯರ್‌ ಆನಂದ್, ಕಾರ್ಯಪಾಲಕ ಎಂಜಿನಿಯರ್ ಗೋಪಾಲ್ ಟಿ., ಸಹಾಯಕ ಕಾರ್ಯಪಾಲಕ ಎಂಜಿನಿಯರ್ ಮೊಹಮ್ಮದ್ ಇಕ್ಬಾಲ್, ಪ್ರಮೋದ್, ಶಶಿಕುಮಾರ್‌, ಶಶಿಧರ್ ಹಾಗೂ ಇತರ ಅಧಿಕಾರಿಗಳು ಉಪಸ್ಥಿತರಿದ್ದರು.

2028ಕ್ಕೆ ನನ್ನ ಇನ್ನೊಂದು ಮುಖ ತೋರಿಸ್ತೇನೆ, ರಾಜ್ಯದಲ್ಲಿ ಬಿಜೆಪಿ ದಳ ಅಧಿಕಾರಕ್ಕೆ ಬರುತ್ತಾ? ಹೆಚ್‌ಡಿಕೆ ಹೇಳಿದ್ದೇನು?

Kannadaprabha News — Tue, 20 Oct 2026 07:50:03 +0530

ಹಾಸನ (ಅ.20) : 2028ರ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿ-ಜೆಡಿಎಸ್‌ ಸಮ್ಮಿಶ್ರ ಸರ್ಕಾರ ಅಧಿಕಾರಕ್ಕೆ ಬರುವುದು ಶತಸಿದ್ಧ ಎಂದು ಕೇಂದ್ರ ಸಚಿವ ಎಚ್‌.ಡಿ.ಕುಮಾರಸ್ವಾಮಿ ವಿಶ್ವಾಸ ವ್ಯಕ್ತಪಡಿಸಿದರು.

ನನಗೂ ಚದುರಂಗದ ಆಟ ಬರುತ್ತದೆ

ಈ ಕುರಿತು ಮಾತನಾಡಿದ ಅವರು, ನನಗೂ ಚದುರಂಗದ ಆಟ ಬರುತ್ತದೆ. ಸಮಯ ಬಂದಾಗ ಪಾನ್‌ ಮುಂದೆ ಇಡುತ್ತೇನೆ. ಈ ಬಾರಿ ಕುಮಾರಸ್ವಾಮಿಯ ಇನ್ನೊಂದು ಮುಖವನ್ನು ತೋರಿಸುತ್ತೇನೆ ಎಂಬ ಅವರ ಹೇಳಿಕೆ ರಾಜಕೀಯ ವಲಯದಲ್ಲಿ ಗಮನ ಸೆಳೆಯುವಂತಿತ್ತು. ರಾಜ್ಯದಲ್ಲಿ ಪ್ರಸ್ತುತ ನಡೆಯುತ್ತಿರುವ ಆಡಳಿತಕ್ಕೆ ಮುಂದಿನ ದಿನಗಳಲ್ಲಿ ಬೆಲೆ ತೆರಬೇಕಾಗುತ್ತದೆ ಎಂದು ಎಚ್ಚರಿಸಿದ ಅವರು, ಸರ್ಕಾರದ ಕಾರ್ಯವೈಖರಿ ಕುರಿತು ಮುಕ್ತ ಚರ್ಚೆ ನಡೆಯಬೇಕು ಎಂದರು.

ಬಹಿರಂಗವಾಗಿ ಒಪ್ಪಿಕೊಂಡು ಸರಿಪಡಿಸಿಕೊಳ್ಳುವುದಾಗಿ ಹೇಳಿದ್ದೇನೆ

ಹಿಂದೆ ತಮ್ಮಿಂದ ತಪ್ಪುಗಳಾಗಿದ್ದರೆ ಅವುಗಳನ್ನು ಬಹಿರಂಗವಾಗಿ ಒಪ್ಪಿಕೊಂಡು ಸರಿಪಡಿಸಿಕೊಳ್ಳುವುದಾಗಿ ಹೇಳಿದ್ದೇನೆ. ತಪ್ಪುಗಳನ್ನು ಒಪ್ಪಿಕೊಳ್ಳುವುದು ದೌರ್ಬಲ್ಯವಲ್ಲ. ಜನರು ನೀಡಿರುವ ಶಕ್ತಿಯನ್ನು ಬಳಸಿಕೊಂಡು ಜನಪರ ವಿಚಾರಗಳಿಗಾಗಿ ಹೋರಾಟ ನಡೆಸುವುದು ತಮ್ಮ ಉದ್ದೇಶ ಎಂದು ಹೇಳಿದರು.

ಬೆಂಗ್ಳೂರಲ್ಲಿ 5 ತಿಂಗಳು ಲಿವ್‌ ಇನ್ ರಿಲೇಶನ್‌ಶಿಪ್; ಹಾಸನ ಗೆಳೆಯನ ಮನೆ ಮುಂದೆ ಯುವತಿ ಧರಣಿ

Mahmad Rafik — Mon, 26 Oct 2026 13:07:49 +0530

ಬೆಂಗಳೂರಿನಲ್ಲಿ ಒಟ್ಟಿಗೆ ಕೆಲಸ ಮಾಡುತ್ತಿದ್ದ ಸೂರ್ಯ ಮತ್ತು ಗಾಯಿತ್ರಿ ಐದು ತಿಂಗಳು ಲಿವಿಂಗ್ ರಿಲೇಷನ್‌ಶಿಪ್‌ನಲ್ಲಿದ್ದರು. ಮದುವೆಯಾಗುವುದಾಗಿ ನಂಬಿಸಿದ್ದ ಸೂರ್ಯ ಮತ್ತು ಆತನ ಪೋಷಕರು ಈಗ ಪರಾರಿಯಾಗಿದ್ದಾರೆ.

ಕಾಸರಗೋಡು ಮೂಲದ ಗಾಯಿತ್ರಿ (ಹೆಸರು ಬದಲಾಯಿಸಲಾಗಿದೆ) ಮತ್ತು ಹಾಸನ ಜಿಲ್ಲೆಯ ಚನ್ನರಾಯಪಟ್ಟಣ ತಾಲೂಕಿನ ಕಲ್ಲೇಸೋಮನಹಳ್ಳಿ ಗ್ರಾಮದ ಸೂರ್ಯ ಎಂಬುವವರು ಬೆಂಗಳೂರಿನ ಖಾಸಗಿ ಕಂಪನಿಯೊಂದರಲ್ಲಿ ಒಟ್ಟಿಗೆ ಕೆಲಸ ಮಾಡುತ್ತಿದ್ದರು. ಪರಸ್ಪರ ಪ್ರೀತಿಸುತ್ತಿದ್ದ ಇವರಿಬ್ಬರು ಕಳೆದ ಐದು ತಿಂಗಳುಗಳಿಂದ ಲಿವಿಂಗ್ ರಿಲೇಷನ್‌ಶಿಪ್‌ನಲ್ಲಿದ್ದರು.

ಸೂರ್ಯ ಎಂಬ ಯುವಕನು ತನ್ನನ್ನು ಮದುವೆಯಾಗುವುದಾಗಿ ನಂಬಿಸಿ, ಈಗ ತನಗೆ ಮೋಸ ಮಾಡಿ ಎಸ್ಕೇಪ್ ಆಗಿದ್ದಾನೆ ಎಂದು ಯುವತಿ ಗಾಯಿತ್ರಿ ಆರೋಪಿಸಿದ್ದಾರೆ. ಯುವತಿ ಅನ್ಯ ಜಾತಿಯವಳು ಮತ್ತು ಬೇರೆ ರಾಜ್ಯದವಳು ಎಂಬ ಕಾರಣಕ್ಕೆ ಸೂರ್ಯನ ಪೋಷಕರು ಇವರ ಮದುವೆಗೆ ತೀವ್ರ ವಿರೋಧ ವ್ಯಕ್ತಪಡಿಸಿದ್ದಾರೆ ಎಂದು ಹೇಳಲಾಗುತ್ತಿದೆ.

ಮೋಸ ಹೋದ ಯುವತಿ ಗಾಯಿತ್ರಿ ಅವರು ಕಲ್ಲೇಸೋಮನಹಳ್ಳಿ ಗ್ರಾಮದಲ್ಲಿರುವ ಸೂರ್ಯನ ಮನೆಯ ಮುಂಭಾಗದಲ್ಲಿಯೇ ಧರಣಿ ಕುಳಿತಿದ್ದಾರೆ. ಈ ಹಿಂದೆ ನ್ಯಾಯ ಸಿಗದಿದ್ದಾಗ ಯುವತಿ ಆತ್ಮ*ತ್ಯೆ ಮಾಡಿಕೊಳ್ಳುವುದಾಗಿ ವಿಡಿಯೋ ಮಾಡಿದ್ದರೂ ಸಹ ಯಾವುದೇ ಪ್ರಯೋಜನವಾಗದ ಹಿನ್ನೆಲೆಯಲ್ಲಿ, ಈಗ ಹಗಲು-ರಾತ್ರಿ ಎನ್ನದೇ ಪ್ರಿಯಕರನ ಮನೆ ಮುಂದೆ ಪ್ರತಿಭಟನೆ ನಡೆಸುತ್ತಿದ್ದಾರೆ.

ಈ ವಿಷಯವಾಗಿ ಅಕ್ಟೋಬರ್ 22 ರಂದು ಚನ್ನರಾಯಪಟ್ಟಣ ಗ್ರಾಮಾಂತರ ಪೊಲೀಸರು ಎರಡೂ ಕಡೆಯವರನ್ನು ಠಾಣೆಗೆ ಕರೆಸಿ ಮಾತುಕತೆ ನಡೆಸಿದ್ದರು. ಭಾನುವಾರ ಠಾಣೆಗೆ ಬರುವುದಾಗಿ ಹೇಳಿದ್ದ ಸೂರ್ಯನ ಪೋಷಕರು, ಈಗ ಮನೆಗೆ ಬೀಗ ಹಾಕಿ ಎಸ್ಕೇಪ್ ಆಗಿದ್ದಾರೆ.

ಪ್ರಿಯಕರನ ಮೋಸದ ವಿರುದ್ಧ ಯುವತಿ ಬೆಂಗಳೂರಿನ ಮಹಾಲಕ್ಷ್ಮಿ ಲೇಔಟ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಪ್ರಿಯಕರ ಸೂರ್ಯ ಸಹ ಗಾಯಿತ್ರಿ ಸಂಪರ್ಕಕ್ಕೆ ಸಿಗದೇ ಎಸ್ಕೇಪ್ ಆಗಿದ್ದಾರೆ. ಲಿವ್ ಇನ್ ರಿಲೇಶನ್‌ಶಿಪ್‌ ನಲ್ಲಿರೋ ವಿಷಯ ಸೂರ್ಯನ ತಂಗಿಗೂ ಗೊತ್ತಿತ್ತು. ಆಕೆಯೂ ನಮ್ಮೊಂದಿಗೆ ಮೂರು ತಿಂಗಳು ನಮ್ಮೊಂದಿಗೆ ಇದ್ದಳು. ತಂಗಿ ಮದುವೆ ನಂತ್ರ ಸೂರ್ಯನಿಗೆ ಮದುವೆಯಾಗುವಂತೆ ಆತನ ಪೋಷಕರು ಹೇಳಿದ್ದರು ಎಂದು ಗಾಯಿತ್ರಿ ಹೇಳುತ್ತಾರೆ.

ಹಾಸನ: ಗಣೇಶ ವಿಸರ್ಜನೆ ನಿಷೇಧ ಉಲ್ಲಂಘನೆ - ಎಸ್‌ಪಿ ಶುಭನ್ವಿತಾಗೆ ಡಿಸಿ ಲತಾಕುಮಾರಿ ನೋಟಿಸ್‌ ಬಿಸಿ!

Sathish Kumar KH — Mon, 05 Oct 2026 16:26:23 +0530

ಹಾಸನ (ಅ.05): ಜಿಲ್ಲೆಯಲ್ಲಿ ಆಡಳಿತಾತ್ಮಕವಾಗಿ ಇಬ್ಬರು ಹಿರಿಯ ಅಧಿಕಾರಿಗಳ ನಡುವೆ ಶೀತಲ ಸಮರ ಮುಂದುವರೆದಿದ್ದು, ದೇವಿಗೆರೆ ಕೆರೆಯಲ್ಲಿ ಗಣೇಶ ವಿಸರ್ಜನೆ ನಿಷೇಧಿಸಿದ್ದರೂ ಕ್ರಮ ಕೈಗೊಳ್ಳದ ಹಿನ್ನೆಲೆಯಲ್ಲಿ ಹಾಸನ ಜಿಲ್ಲಾಧಿಕಾರಿ ಕೆ.ಎಸ್. ಲತಾಕುಮಾರಿ ಅವರು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ (SP) ಶುಭನ್ವಿತಾ ಅವರಿಗೆ ಕಠಿಣ ‘ಕಾರಣ ಕೇಳಿ ನೋಟಿಸ್’ ಜಾರಿ ಮಾಡಿದ್ದಾರೆ.

ಪ್ರಕರಣದ ಹಿನ್ನೆಲೆ:

ಪರಿಸರ ಸಂರಕ್ಷಣೆ ಮತ್ತು ಜಲಮೂಲಗಳ ಮಾಲಿನ್ಯ ತಡೆಯುವ ನಿಟ್ಟಿನಲ್ಲಿ ಹಾಸನ ನಗರದ ದೇವಿಗೆರೆ ಕೆರೆ ಆವರಣದಲ್ಲಿ ಗಣೇಶ ಮತ್ತು ಗೌರಿ ಮೂರ್ತಿಗಳ ವಿಸರ್ಜನೆಗೆ ನಿಷೇಧ ಹೇರಿ ಜಿಲ್ಲಾಧಿಕಾರಿಗಳು ಅಕ್ಟೋಬರ್ 3 ರಂದು ಆದೇಶ ಹೊರಡಿಸಿದ್ದರು. ಈ ಆದೇಶದ ಬೆನ್ನಲ್ಲೇ ಕೆರೆಯ ಗೇಟ್‌ಗಳಿಗೆ ಬೀಗವನ್ನೂ ಹಾಕಲಾಗಿತ್ತು. ಆದರೂ, ಅಂದು ರಾತ್ರಿ 9 ಗಂಟೆಯ ನಂತರ ನಿಷೇಧವಿದ್ದರೂ ಸಹ ಪೆಂಡಾಲ್ ಗಣಪತಿಯನ್ನು ವಿಸರ್ಜನೆ ಮಾಡಲಾಗಿದೆ ಎಂದು ತಿಳಿದುಬಂದಿದೆ.

ನೋಟಿಸ್‌ನಲ್ಲಿ ಡಿಸಿ ಉಲ್ಲೇಖಿಸಿರುವುದು ಏನು?

ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿರುವ ಜಿಲ್ಲಾಧಿಕಾರಿಗಳು, ಎಸ್‌ಪಿ ಅವರಿಗೆ ಜಾರಿ ಮಾಡಿರುವ ನೋಟಿಸ್‌ನಲ್ಲಿ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. "ನಿಷೇಧಾಜ್ಞೆ ಜಾರಿಯಲ್ಲಿದ್ದರೂ ಆಯೋಜಕರ ವಿರುದ್ಧ ಯಾವುದೇ ಪ್ರಕರಣ ದಾಖಲಿಸದಿರುವುದು ಮತ್ತು ಸೂಕ್ತ ಕಾನೂನು ಕ್ರಮ ಜರುಗಿಸದಿರುವುದು ನಿಮ್ಮ ನಿರ್ಲಕ್ಷ್ಯಕ್ಕೆ ಸಾಕ್ಷಿ. ಸರ್ಕಾರಿ ನೌಕರರಾಗಿ ನಿಮ್ಮ ಈ ಬೇಜವಾಬ್ದಾರಿತನ ಹಾಗೂ ಉದ್ಧಟತನ ತರವಲ್ಲ" ಎಂದು ಕಿಡಿಕಾರಿದ್ದಾರೆ.

ಶಿಸ್ತು ಕ್ರಮದ ಎಚ್ಚರಿಕೆ:

ನೋಟಿಸ್ ತಲುಪಿದ ತಕ್ಷಣ ಖುದ್ದು ಹಾಜರಾಗಿ ಲಿಖಿತ ಉತ್ತರ ನೀಡುವಂತೆ ಡಿಸಿ ಸೂಚಿಸಿದ್ದಾರೆ. ಒಂದು ವೇಳೆ ಉತ್ತರ ನೀಡಲು ವಿಫಲವಾದರೆ, ತಮ್ಮ ಬಳಿ ಹೇಳಿಕೊಳ್ಳಲು ಏನೂ ಇಲ್ಲ ಎಂದು ಭಾವಿಸಿ, ಎಸ್‌ಪಿ ಅವರ ವಿರುದ್ಧ ಶಿಸ್ತು ಕ್ರಮ ಕೈಗೊಳ್ಳಲು ಸಕ್ಷಮ ಪ್ರಾಧಿಕಾರಕ್ಕೆ (ಸರ್ಕಾರಕ್ಕೆ) ಶಿಫಾರಸು ಮಾಡುವುದಾಗಿ ಎಚ್ಚರಿಕೆ ನೀಡಿದ್ದಾರೆ. ಜಿಲ್ಲೆಯ ಇಬ್ಬರು ಉನ್ನತ ಅಧಿಕಾರಿಗಳ ಈ ಜಟಾಪಟಿ ಹಾಸನದಲ್ಲಿ ಈಗ ಸಾರ್ವಜನಿಕವಾಗಿ ದೊಡ್ಡ ಚರ್ಚೆಗೆ ಗ್ರಾಸವಾಗಿದೆ.

ವಾಹನದಲ್ಲಿ ಪ್ರೇಮದ ಊರಿಗೆ ಹೋಗುವಂತಿಲ್ಲ, ನಿಷೇಧ ಹೇರಿದ ಹಾಸನ ಜಿಲ್ಲಾಧಿಕಾರಿ!

Santosh Naik — Wed, 28 Oct 2026 16:27:15 +0530

ಹಾಸನ (ಅ.28): ಒಂದೇ ಒಂದು ಹಿಟ್ ಸಿನಿಮಾ ಇಡೀ ಊರಿನ ಅಥವಾ ಅಜ್ಞಾತ ತಾಣದ ಭವಿಷ್ಯವನ್ನೇ ಬದಲಾಯಿಸಿಬಿಡಬಹುದು ಎಂಬುದಕ್ಕೆ ಹಾಸನ ತಾಲೂಕಿನ ಸಾಲಗಾಮೆ ಹೋಬಳಿಯಲ್ಲಿರುವ ಪ್ರಶಾಂತ ಬೆಟ್ಟ 'ಸೀಗೆಗುಡ್ಡ' ಹಾಗೂ ಐತಿಹಾಸಿಕ 'ಶ್ರೀ ಮಳೆ ಮಲ್ಲೇಶ್ವರ ದೇವಸ್ಥಾನ'ವೇ ಸಾಕ್ಷಿ. ಇತ್ತೀಚೆಗೆ ಸದ್ದು ಮಾಡಿದ 'ಪ್ರೇಮದ ಊರಲಿ' ಕನ್ನಡ ಚಿತ್ರದ ಪ್ರಮುಖ ಸನ್ನಿವೇಶಗಳು ಇಲ್ಲಿ ಚಿತ್ರೀಕರಣಗೊಂಡ ನಂತರ, ಈ ತಾಣ ರಾತ್ರೋರಾತ್ರಿ ಕರ್ನಾಟಕದ ಹಾಟ್ ಟೂರಿಸ್ಟ್ ಸ್ಪಾಟ್ ಆಗಿ ಮಾರ್ಪಟ್ಟಿದೆ.

ಸಿನಿಮಾದಲ್ಲಿನ ರಮಣೀಯ ದೃಶ್ಯಗಳಿಗೆ ಮಾರುಹೋದ ಜನಸಾಗರವೇ ಹರಿದುಬರುತ್ತಿದ್ದು, ಕಿರಿದಾದ ಬೆಟ್ಟದ ರಸ್ತೆಯಲ್ಲಿ ಕಿಲೋಮೀಟರ್‌ಗಟ್ಟಲೆ ಭಾರಿ ಟ್ರಾಫಿಕ್ ಜಾಮ್ ಉಂಟಾಗುತ್ತಿದೆ. ಪ್ರವಾಸಿಗರ ಸಂಖ್ಯೆ ನಿರೀಕ್ಷೆಗೂ ಮೀರಿ ಹೆಚ್ಚಾದ ಹಿನ್ನೆಲೆಯಲ್ಲಿ ಹಾಗೂ ರಸ್ತೆ ಅಪಾಯಕಾರಿಯಾಗಿರುವುದರಿಂದ, ಹಾಸನ ಜಿಲ್ಲಾಧಿಕಾರಿ ಕೆ.ಎಸ್. ಲತಾಕುಮಾರಿ ಅವರು ಸೀಗೆಗುಡ್ಡ ಮಳೆ ಮಲ್ಲೇಶ್ವರ ದೇವಸ್ಥಾನದ ರಸ್ತೆಯಲ್ಲಿ ಖಾಸಗಿ ಹಾಗೂ ಪ್ರವಾಸಿ ವಾಹನಗಳ ಸಂಚಾರವನ್ನು ನವೆಂಬರ್ 11 ರವರೆಗೆ ಸಂಪೂರ್ಣವಾಗಿ ನಿಷೇಧಿಸಿ ಆದೇಶ ಹೊರಡಿಸಿದ್ದಾರೆ.

ದಿನಕ್ಕೆ 50 ಬರುತ್ತಿದ್ದ ಜಾಗಕ್ಕೆ ಇದೀಗ 5,000 ಜನರ ಲಗ್ಗೆ!

'ಪ್ರೇಮದ ಊರಲಿ' ಸಿನಿಮಾ ತೆರೆಕಾಣುವ ಮುನ್ನ ಹಾಸನದ ಸೀಗೆಗುಡ್ಡ ಹಾಗೂ ಮಳೆ ಮಲ್ಲೇಶ್ವರ ಸ್ವಾಮಿ ಸನ್ನಿಧಿ ಕೇವಲ ಬೆರಳೆಣಿಕೆಯಷ್ಟು ಸ್ಥಳೀಯ ಭಕ್ತರಿಗೆ ಮಾತ್ರ ಸೀಮಿತವಾಗಿತ್ತು. ಪ್ರತಿದಿನ ಸರಾಸರಿ 50 ಜನರಷ್ಟೇ ಇಲ್ಲಿಗೆ ಭೇಟಿ ನೀಡುತ್ತಿದ್ದರು. ಆದರೆ ಸಿನಿಮಾ ಬಿಡುಗಡೆಯಾಗಿ ಸೂಪರ್ ಹಿಟ್ ಆಗುತ್ತಿದ್ದಂತೆ, ಚಿತ್ರದಲ್ಲಿ ಅದ್ಭುತವಾಗಿ ಚಿತ್ರಿತಗೊಂಡ ಸೀಗೆಗುಡ್ಡದ ನೈಸರ್ಗಿಕ ಸೌಂದರ್ಯಕ್ಕೆ ಸಿನಿರಸಿಕರು ಸಂಪೂರ್ಣವಾಗಿ ಮಾರುಹೋಗಿದ್ದಾರೆ.

ಪ್ರಸ್ತುತ ಪ್ರತಿದಿನ ಬರೋಬ್ಬರಿ 5,000 ಕ್ಕೂ ಹೆಚ್ಚು ಪ್ರವಾಸಿಗರು ಮತ್ತು ಯುವಜನತೆ ಸೀಗೆಗುಡ್ಡಕ್ಕೆ ವಾಹನಗಳಲ್ಲಿ ಲಗ್ಗೆ ಇಡುತ್ತಿದ್ದಾರೆ. ದೇವಸ್ಥಾನದ ಬಳಿ ನಿಂತು ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುವುದು ಹಾಗೂ ಸಿನಿಮಾದ ಹಿಟ್ ಹಾಡುಗಳಿಗೆ ಬೆಟ್ಟದ ಹಿನ್ನೆಲೆಯಲ್ಲಿ ಇನ್‌ಸ್ಟಾಗ್ರಾಮ್ ರೀಲ್ಸ್ (Instagram Reels) ಮಾಡುತ್ತಾ ಡ್ಯಾನ್ಸ್ ಮಾಡುವುದು ಸಾಮಾನ್ಯ ದೃಶ್ಯವಾಗಿದೆ. ಇದು ಸ್ಥಳೀಯ ಸಣ್ಣಪುಟ್ಟ ವ್ಯಾಪಾರಿಗಳ ಮುಖದಲ್ಲಿ ಮಂದಹಾಸ ಮೂಡಿಸಿದೆಯಾದರೂ, ಸಂಚಾರ ನಿರ್ವಹಣೆ ಭಾರಿ ಸವಾಲಾಗಿ ಪರಿಣಮಿಸಿದೆ.

ವಾಹನ ಸಂಚಾರ ನಿಷೇಧಕ್ಕೆ 3 ಪ್ರಮುಖ ಕಾರಣಗಳು

ಜಿಲ್ಲಾಡಳಿತವು ಈ ಕಠಿಣ ನಿರ್ಧಾರ ಕೈಗೊಳ್ಳಲು ಪ್ರಮುಖ ಕಾರಣಗಳೂ ಇವೆ. ಮಳೆ ಮಲ್ಲೇಶ್ವರ ಬೆಟ್ಟಕ್ಕೆ ತೆರಳುವ ರಸ್ತೆಯು ಅತ್ಯಂತ ಕಿರಿದಾಗಿದ್ದು, ಕಡಿದಾದ ಇಳಿಜಾರಿನಿಂದ ಕೂಡಿದೆ. ಜೊತೆಗೆ ರಸ್ತೆಯ ಬದಿಯಲ್ಲಿ ತಡೆಗೋಡೆ ಇಲ್ಲದಿರುವುದರಿಂದ ವಾಹನ ಸಂಚಾರಕ್ಕೆ ತೀವ್ರ ಅಪಾಯಕಾರಿಯಾಗಿದೆ. ಪ್ರಸಿದ್ಧ ಹಾಸನಾಂಬೆ ಮತ್ತು ಶ್ರೀ ಸಿದ್ದೇಶ್ವರಸ್ವಾಮಿ ದೇವಾಲಯದ ಜಾತ್ರಾ ಮಹೋತ್ಸವದ ಹಿನ್ನೆಲೆಯಲ್ಲಿ ಜಿಲ್ಲೆಗೆ ಲಕ್ಷಾಂತರ ಭಕ್ತರು ಆಗಮಿಸುತ್ತಿದ್ದಾರೆ. ಈ ವೇಳೆ ಯಾವುದೇ ಅಹಿತಕರ ಘಟನೆ ಅಥವಾ ಭೀಕರ ಅಪಘಾತಗಳು ಸಂಭವಿಸದಂತೆ ಮುಂಜಾಗೃತಾ ಕ್ರಮ ವಹಿಸಲಾಗಿದೆ. ಪೊಲೀಸ್ ಇಲಾಖೆ ಹಾಗೂ ಅರಣ್ಯ ಇಲಾಖೆಯ ಉನ್ನತ ಮಟ್ಟದ ಶಿಫಾರಸಿನ ಮೇರೆಗೆ ಸುರಕ್ಷತೆಯ ದೃಷ್ಟಿಯಿಂದ ಈ ತಡೆ ಹೇರಲಾಗಿದೆ.

ನವೆಂಬರ್ 11 ರವರೆಗೆ ನಿಷೇಧಿತ ಮಾರ್ಗಗಳು & ಭಕ್ತರಿಗೆ ಸೂಚನೆ

ಮೋಟಾರು ವಾಹನ ಕಾಯ್ದೆ 1988 ರ ಸೆಕ್ಷನ್ 115 ಹಾಗೂ 1989 ರ ನಿಯಮ 221ಎ(5) ರ ಅಡಿಯಲ್ಲಿ ಹೊರಡಿಸಲಾಗಿರುವ ಈ ಆದೇಶವು ಅಕ್ಟೋಬರ್ 25 ರಿಂದ ನವೆಂಬರ್ 11 ರವರೆಗೆ ಜಾರಿಯಲ್ಲಿರಲಿದೆ.

ಸಂಚಾರ ನಿಷೇಧಿಸಲಾದ ಪ್ರಮುಖ ಮಾರ್ಗಗಳು

ಬೇಲೂರು ಮಾರ್ಗ: ಕಲ್ಕೆರೆ ಗ್ರಾಮದಿಂದ ವೀರಾಪುರ ಗ್ರಾಮಕ್ಕೆ ತೆರಳುವ ರಸ್ತೆ.
ಹಳೇಬೀಡು ಮಾರ್ಗ: ಸೀಗೆ ಮತ್ತು ವೀರಾಪುರ ಗ್ರಾಮದ ರಸ್ತೆ.
ಗೋಳೇನಹಳ್ಳಿ ಮಾರ್ಗ: ಗೋಳೇನಹಳ್ಳಿ ಮಾರ್ಗವಾಗಿ ಸೀಗೆಗುಡ್ಡಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆ.

ವಾಹನ ಸಂಚಾರವನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆಯಾದರೂ, ಸೀಗೆಗುಡ್ಡದ ಶ್ರೀ ಮಳೆ ಮಲ್ಲೇಶ್ವರ ಸ್ವಾಮಿಯ ದರ್ಶನ ಪಡೆಯಲು ಬಯಸುವ ಭಕ್ತಾದಿಗಳು ಹಾಗೂ ಪ್ರವಾಸಿಗರಿಗೆ ಕಾಲ್ನಡಿಗೆಯಲ್ಲಿ (By Walk) ತೆರಳಲು ಮಾತ್ರ ಮುಕ್ತ ಅವಕಾಶ ಕಲ್ಪಿಸಲಾಗಿದೆ. ಸಾರ್ವಜನಿಕರು ಜಿಲ್ಲಾಡಳಿತದ ಈ ಸುರಕ್ಷತಾ ಆದೇಶಕ್ಕೆ ಸಹಕರಿಸಬೇಕಾಗಿ ಜಿಲ್ಲಾಧಿಕಾರಿಗಳು ವಿನಂತಿಸಿದ್ದಾರೆ.

'ಪ್ರೇಮದ ಊರಲಿ' ಶೂಟಿಂಗ್ ಸ್ಪಾಟ್‌ನಲ್ಲಿ ಭಾರೀ ಟ್ರಾಫಿಕ್ ಜಾಮ್; ಸೀಗೆಗುಡ್ಡ ಮಳೆ ಮಲ್ಲೇಶ್ವರ ಬೆಟ್ಟದಲ್ಲಿ ಜನವೋ ಜನ!

Sathish Kumar KH — Thu, 22 Oct 2026 17:42:57 +0530

'ಪ್ರೇಮದ ಊರಲಿ' ಸಿನಿಮಾ ಬಿಡುಗಡೆಯಾದ ನಂತರ ಹಾಸನದ ಸೀಗೆಗುಡ್ಡ ಮತ್ತು ಮಳೆ ಮಲ್ಲೇಶ್ವರ ದೇವಸ್ಥಾನ ಪ್ರವಾಸಿಗರ ನೆಚ್ಚಿನ ತಾಣವಾಗಿ ಬದಲಾಗಿದೆ. ಸಿನಿಮಾದಲ್ಲಿನ ದೃಶ್ಯಗಳಿಗೆ ಮಾರುಹೋದ ಜನಸಾಗರವೇ ಹರಿದುಬರುತ್ತಿದ್ದು, ಟ್ರಾಫಿಕ್ ಜಾಮ್ ಉಂಟಾಗುತ್ತಿದೆ. ಈ ದೃಶ್ಯಗಳನ್ನು ನೋಡಿ ನಿಮಗೇ ತಿಳಿಯುತ್ತದೆ.

ಹಾಸನ: ಸಿನಿಮಾಗಳ ಶಕ್ತಿ ಎಂಥದ್ದು ಎಂಬುದಕ್ಕೆ ಇಲ್ಲೊಂದು ಸ್ಪಷ್ಟ ನಿದರ್ಶನ ಸಿಕ್ಕಿದೆ. ಒಂದೇ ಒಂದು ಹಿಟ್ ಸಿನಿಮಾ ಇಡೀ ಊರಿನ ಅಥವಾ ಒಂದು ಅಜ್ಞಾತ ಸ್ಥಳದ ಭವಿಷ್ಯವನ್ನೇ ಬದಲಾಯಿಸಿಬಿಡಬಹುದು. ಇದಕ್ಕೆ ತಾಜಾ ಉದಾಹರಣೆ ಹಾಸನ ತಾಲೂಕಿನಲ್ಲಿರುವ ಪ್ರಶಾಂತ ಬೆಟ್ಟ ‘ಸೀಗೆಗುಡ್ಡ’ ಮತ್ತು ಅಲ್ಲಿನ ಐತಿಹಾಸಿಕ ‘ಶ್ರೀ ಮಳೆ ಮಲ್ಲೇಶ್ವರ ದೇವಸ್ಥಾನ’.

ಇತ್ತೀಚೆಗೆ ಸದ್ದು ಮಾಡಿದ ‘ಪ್ರೇಮದ ಊರಲಿ’ ಚಿತ್ರದ ಪ್ರಮುಖ ದೃಶ್ಯಗಳು ಇಲ್ಲಿ ಚಿತ್ರೀಕರಣಗೊಂಡ ನಂತರ, ಈ ತಾಣ ರಾತ್ರೋರಾತ್ರಿ ಪ್ರವಾಸಿಗರ ನೆಚ್ಚಿನ ಹಾಟ್‌ಸ್ಪಾಟ್ (Tourist Hotspot) ಆಗಿ ಮಾರ್ಪಟ್ಟಿದೆ!

ಒಂದು ಕಾಲದಲ್ಲಿ ಖಾಲಿ ಇದ್ದ ಜಾಗದಲ್ಲಿಂದು ಕಾಲಿಡಲು ಜಾಗವಿಲ್ಲ!

‘ಪ್ರೇಮದ ಊರಲಿ’ ಸಿನಿಮಾ ತೆರೆಕಾಣುವ ಮುನ್ನ ಹಾಸನದ ಸೀಗೆಗುಡ್ಡ ಹಾಗೂ ಮಳೆ ಮಲ್ಲೇಶ್ವರ ಸ್ವಾಮಿ ಸನ್ನಿಧಿ ಬೆರಳೆಣಿಕೆಯಷ್ಟು ಸ್ಥಳೀಯ ಭಕ್ತರಿಗೆ ಮಾತ್ರ ಸೀಮಿತವಾಗಿತ್ತು. ಆದರೆ ಸಿನಿಮಾ ಬಿಡುಗಡೆಯಾಗಿ ಜನಮೆಚ್ಚುಗೆ ಗಳಿಸುತ್ತಿದ್ದಂತೆ, ಚಿತ್ರದಲ್ಲಿ ಅದ್ಭುತವಾಗಿ ಸೆರೆಹಿಡಿಯಲಾದ ಸೀಗೆಗುಡ್ಡದ ನೈಸರ್ಗಿಕ ಸೌಂದರ್ಯಕ್ಕೆ ಸಿನಿರಸಿಕರು ಮಾರುಹೋಗಿದ್ದಾರೆ.

ವಿಶೇಷವಾಗಿ ವಾರಾಂತ್ಯ ಹಾಗೂ ರಜಾ ದಿನಗಳಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಜನರು ವಾಹನಗಳಲ್ಲಿ ಸೀಗೆಗುಡ್ಡಕ್ಕೆ ಲಗ್ಗೆ ಇಡುತ್ತಿದ್ದಾರೆ. ದೇವಸ್ಥಾನದ ರಸ್ತೆಗಳಲ್ಲಿ ಹಿಂದೆಂದೂ ಕಾಣದ ರೀತಿಯಲ್ಲಿ ಕಿಲೋಮೀಟರ್‌ಗಟ್ಟಲೆ ಭಾರಿ ಟ್ರಾಫಿಕ್ ಜಾಮ್ ಉಂಟಾಗುತ್ತಿದೆ.

ಸೆಲ್ಫಿ ಕ್ರೇಜ್ ಮತ್ತು ಹಾಡಿಗೆ ರೀಲ್ಸ್ ಧಮಾಕಾ:

ಸೀಗೆಗುಡ್ಡಕ್ಕೆ ಬರುತ್ತಿರುವ ಯುವಜನತೆ ಮತ್ತು ಪ್ರವಾಸಿಗರು ದೇವರ ದರ್ಶನ ಪಡೆಯುವುದರ ಜೊತೆಗೆ, ಸಿನಿಮಾದಲ್ಲಿ ಕಾಣಿಸಿಕೊಂಡ ಮಲ್ಲೇಶ್ವರ ದೇವರ ವಿಗ್ರಹದ ಮುಂದೆ ನಿಂತು ಮುಗಿಬಿದ್ದು ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುತ್ತಿದ್ದಾರೆ. ಅಷ್ಟೇ ಅಲ್ಲ, ಸಿನಿಮಾದ ಹಿಟ್ ಹಾಡುಗಳಿಗೆ ವಿಗ್ರಹ ಮತ್ತು ಬೆಟ್ಟದ ಹಿನ್ನೆಲೆಯಲ್ಲಿ ಇನ್‌ಸ್ಟಾಗ್ರಾಮ್ ರೀಲ್ಸ್‌ಗಳನ್ನು ಮಾಡುತ್ತಾ ಡ್ಯಾನ್ಸ್ ಮಾಡುತ್ತಿರುವುದು ಸಾಮಾನ್ಯ ದೃಶ್ಯವಾಗಿದೆ.

ಹಾಸನದ ಸುಂದರ ಹಸಿರು ಪರಿಸರ, ತಂಪಾದ ಗಾಳಿ ಹಾಗೂ ಬೆಟ್ಟದ ತುದಿಯ ರಮಣೀಯ ದೃಶ್ಯ ಪ್ರವಾಸಿಗರನ್ನು ಇನ್ನಿಲ್ಲದಂತೆ ಸೆಳೆಯುತ್ತಿದ್ದು, ಸ್ಥಳೀಯ ವ್ಯಾಪಾರಿಗಳ ಮುಖದಲ್ಲೂ ಮಂದಹಾಸ ಮೂಡಿಸಿದೆ. ಒಟ್ಟಿನಲ್ಲಿ, ‘ಪ್ರೇಮದ ಊರಲಿ’ ಚಿತ್ರವು ಹಾಸನದ ಈ ಪುಟ್ಟ ಗುಡ್ಡವನ್ನು ಕರ್ನಾಟಕದ ಹೊಸ ಟೂರಿಸ್ಟ್ ಸ್ಪಾಟ್ ಆಗಿ ಪರಿವರ್ತಿಸಿದೆ!

ಪೂರ್ಣ ವಿಡಿಯೋ ನೋಡಲು ಇಲ್ಲಿ ಕ್ಲಿಕ್ ಮಾಡಿ

'ಪ್ರೇಮದ ಊರಲಿ' ಸಿನಿಮಾ ಎಫೆಕ್ಟ್, ಈ ಊರಿಗೆ ಹರಿದು ಬರುತ್ತಿದೆ ಜನಸಾಗರ

Ganesh Mabla Gowda — Sun, 11 Oct 2026 20:22:20 +0530

'ಪ್ರೇಮದ ಊರಲಿ' (Premada Oorali) .. ಕನ್ನಡಕ್ಕೆ ಮತ್ತೊಮ್ಮೆ ಒಂದೊಳ್ಳೆ ಸಿನಿಮಾ ಸಿಕ್ಕಾಗಿದೆ. ಸಿನಿ ರಸಿಕರು ಪ್ರೇಮದ ಊರನ್ನು ಮೆಚ್ಚಿಕೊಂಡಿದ್ದಾಗಿದೆ. ಥಿಯೇಟರ್‍‌ಗಳು ಹೌಸ್ ಫುಲ್ ಆಗಿವೆ. ಸಿನಿಮಾ ಮಂದಿರಗಳಿಗೆ ಹೊಸ ಕಳೆ ಬಂದಾಗಿದೆ. ಗಣ್ಯರು ಭೇಷ್ ಎಂದಿದ್ದೂ ಆಗಿದೆ. ವಿದೇಶದಲ್ಲೂ ಹೆಂಗಿದೆ ನೋಡೇ ಬಿಡುವಾ ಅಂತಾ ಫಾರಿನ್ ಥಿಯೇಟರ್‍‌ಗಳಲ್ಲಿ ಹಾಕಿಸಿ ರಂಜಿದ್ದೂ ಆಗಿದೆ. ಈಗ ಶೂಟಿಂಗ್ ನಡೆದ ಸ್ಥಳವೊಂದು ಸಖತ್ ಫೇಮಸ್ ಆಗ್ತಿದೆ.

ಅದ್ಯಾವ ಊರು?

ಪ್ರೇಮದ ಊರಿನ ಸಿನಿಮಾ.. ನಮ್ಮ ಮನಸ್ಸನ್ನೂ ನಿಮ್ಮ ಮನಸ್ಸನ್ನೂ ಕದ್ದಿದೆ ನಿಜ. ಜೊತೆಗೆ ಚಿತ್ರದಲ್ಲಿ ಕಾಣುವ ಇನ್ನೊಂದು ಊರ ಇದೀಗ ಪ್ರವಾಸಿಗರ ಮನಸ್ಸು ಕದ್ದಿದೆ. ಅದು ಬೇರೆ ಯಾವುದೂ ಅಲ್ಲ. ನಮ್ಮದೇ ರಾಜ್ಯದ ಹಾಸನ ಜಿಲ್ಲೆಯಲ್ಲಿರುವ ಒಂದು ಸ್ಥಳ. ಸಿನಿಮಾ ಫೇಮಸ್ ಆಗ್ತಿದ್ದಂತೆಯೇ ಚಿತ್ರೀಕರಣ ನಡೆದ ಸ್ಥಳ ಪ್ರಸಿದ್ಧ ಸೀಗೇಗುಡ್ಡಕ್ಕೆ ಮತ್ತೊಮ್ಮೆ ಜನ ಮುಗಿ ಬೀಳ್ತಿದ್ದಾರೆ. ಸಿನಿಮಾ ನೋಡಿದ ಬಹುತೇಕ ಪ್ರೇಕ್ಷಕರಿಗೆ ಸೀಗೇಗುಡ್ಡದ ಮೇಲೂ ಸಾಣೆ ಲವ್ ಆಗಿದೆ. ಅದೇ ಕಾರಣಕ್ಕೆ ಸೀಗೇಗುಡ್ಡವನ್ನೂ (Seege Gudda) ಕಣ್ತುಂಬಿಕೊಂಡು ಬರೋಣ ಅಂತಾ ವೀಕೆಂಡ್ ಹಾಗೂ ರಜಾ ದಿನಗಳಲ್ಲಿ ಪ್ರವಾಸಿಗರ ಸಂಖ್ಯೆ ದಿನೇ ದಿನೇ ಹೆಚ್ಚಾಗುತ್ತಿದೆ.

ಆಶ್ಚರ್ಯಕ್ಕೆ ಒಳಗಾದ ಸ್ಥಳೀಯ ಜನ

ಸೀಗೇಗುಡ್ಡ ಮೊದಲಿನಿಂದಲೂ ಪ್ರಸಿದ್ಧಿಯೇನೋ ಪಡೆದಿದೆ. ಆದರೆ ಇಲ್ಲಿಗೆ ಪ್ರವಾಸಿಗರ ಸಂಖ್ಯೆ ಕಮ್ಮಿ ಆಗಿತ್ತು. ಈಗ ಇದ್ದಕ್ಕಿದ್ದಂತೆ ಗುಡ್ಡ ವೀಕ್ಷಣೆಗೆ ಬರುವವರ ಸಂಖ್ಯೆ ಹೆಚ್ಚಾಗ್ತಿದೆ. ಯಾಕೆ ಇಷ್ಟೊಂದು ಜನ ಬರ್ತಿದ್ದಾರೆ ಎಂದು ಸ್ಥಳೀಯರು ಓರೆ ಹೆಚ್ಚಿದಾಗ ಗೊತ್ತಾಗಿದ್ದು, ಇದು 'ಪ್ರೇಮದ ಊರಲಿ' ಸಿನಿಮಾ ಎಫೆಕ್ಟ್ ಅಂತಾ. ಆದರೆ ಇಲ್ಲೊಂದು ಸಮಸ್ಯೆ ಕೂಡ ಎದುರಾಗಿದೆ. ಅದು ಏನು ಅಂತಾ ನೋಡೋದಾದ್ರೆ ಸೇಗೇಗುಡ್ಡದಲ್ಲಿ ಇಲ್ಲ ಮೂಲಕ ಸೌಕರ್ಯ.

ಕೆಲವು ವರದಿಗಳ ಪ್ರಕಾರ.. ಹಠಾತ್ ಜನಸಂದಣಿ ನಿಯಂತ್ರಿಸಲು ಇಲ್ಲಿ ಕಷ್ಟವಾಗ್ತಿದೆಯಂತೆ. ಸ್ಥಳೀಯ ಆಡಳಿತ ಪ್ರವಾಸಿಗರಿಗೆ ಮೂಲ ಸೌಕರ್ಯ ಹಾಗೂ ಜನಸಂದಣಿಯನ್ನು ನಿಯಂತ್ರಿಸುವಲ್ಲಿ ವಿಫಲವಾಗಿರುವುದರಿಂದ ಪ್ರಸಿದ್ಧ ಪ್ರವಾಸಿ ತಾಣವು ಸೌಲಭ್ಯಗಳಿಲ್ಲದೇ ಅವ್ಯವಸ್ಥೆಯ ಗೂಡಾಗಿ ಬದಲಾಗುತ್ತಿದೆ ಎಂಬುದು ಹಲವರ ಆರೋಪವಾಗಿದೆ.

ಸೀಗೇಗುಡ್ಡದ ವಿಶೇಷತೆ ಏನು?

ಸೀಗೇಗುಡ್ಡ ಹಾಸನದಿಂದ ಸುಮಾರು 15–20 ಕಿ.ಮೀ ದೂರದಲ್ಲಿದೆ. ಭೂ ಲೋಕದ ಸ್ವರ್ಗದಂತಿರುವ ಸೀಗೆಗುಡ್ಡ, ಪ್ರಕೃತಿ ಸೌಂದರ್ಯ ಮತ್ತು ಶಿವನ ಭಕ್ತಿಯನ್ನು ಒಂದೇ ಕಡೆ ಅನುಭವಿಸಬಹುದಾದ ಸುಂದರ ತಾಣವಾಗಿದೆ. ಸೀಗೆಗುಡ್ಡ ಕಾವಲ್ / ಸಿದ್ಧೇಶ್ವರ ಬೆಟ್ಟ ಎಂದೂ ಕರೆಯಲ್ಪಡುವ ಈ ಪ್ರದೇಶದಲ್ಲಿರುವ ಶ್ರೀ ಮಲೆಮಲ್ಲೇಶ್ವರ ಸ್ವಾಮಿ ದೇವಸ್ಥಾನ, ಇಲ್ಲಿನ ಭವ್ಯ ಶಿವನ ಮೂರ್ತಿ, ಹಸಿರು ಬೆಟ್ಟಗಳು, ತಂಪಾದ ವಾತಾವರಣ ಮತ್ತು ಸುತ್ತಲಿನ ಗಾಳಿ ಯಂತ್ರಗಳಿಂದ ಪ್ರಮುಖ ಆಕರ್ಷಣೆ. ಸ್ಥಳೀಯ ಪೌರಾಣಿಕ ನಂಬಿಕೆಗಳ ಪ್ರಕಾರ.. ಈ ಬೆಟ್ಟಕ್ಕೆ ಅರ್ಜುನನ ಬಾಣದಿಂದ ಜಿನುಗಿದ ನೀರು ಹಾಗೂ ಋಷಿಮುನಿಗಳ ತಪಸ್ಸಿಗೆ ಸಂಬಂಧಿಸಿದ ಕಥೆಗಳಿವೆ.

ನೈಸ್ ವಿವಾದ: ಧೈರ್ಯವಿದ್ದರೆ ಜೇನುಕಲ್ ಸಿದ್ದೇಶ್ವರನ ಮುಂದೆ ನಿಂತು ಸತ್ಯ ಹೇಳಲಿ!: ರೇವಣ್ಣ ಸವಾಲ್

Gowthami K — Tue, 06 Oct 2026 17:22:55 +0530

ಹಾಸನ: ನೈಸ್ ಯೋಜನೆಯ ಅಕ್ರಮ ಹಾಗೂ ಜಿಲ್ಲೆಯ ಪ್ರಸ್ತುತ ಆಡಳಿತಾತ್ಮಕ ಬೆಳವಣಿಗೆಗಳ ಕುರಿತು ಮಾಜಿ ಸಚಿವ ಮತ್ತು ಜೆಡಿಎಸ್ ಹಿರಿಯ ನಾಯಕ ಹಾಗೂ ಹೊಳೆನರಸೀಪುರ ಕ್ಷೇತ್ರದ ಶಾಸಕ ಹೆಚ್.ಡಿ. ರೇವಣ್ಣ ಅವರು ಅಭಿಪ್ರಾಯ ವ್ಯಕ್ತಪಡಿಸಿದರು . ಹಾಸನದಲ್ಲಿ ಮಾತನಾಡಿದ ಅವರು, ಹೆಸರು ಪ್ರಸ್ತಾಪಿಸದೆಯೇ ಜಿಲ್ಲಾ ಉಸ್ತುವಾರಿ ಸಚಿವರ ವಿರುದ್ಧ ವಾಗ್ದಾಳಿ ನಡೆಸಿದ್ದಲ್ಲದೆ, ಜಿಲ್ಲೆಯಲ್ಲಿ 72 ವರ್ಷಗಳ ಇತಿಹಾಸವಿರುವ ಗಣಪತಿ ವಿಸರ್ಜನೆಗೆ ನಿಷೇಧ ಹೇರಿರುವ ಆಡಳಿತದ ಕ್ರಮವನ್ನು ಬಲವಾಗಿ ಖಂಡಿಸಿದ್ದಾರೆ.

'ನಮ್ಮ ಪಾರ್ಟಿಯಲ್ಲಿ ನಾನೇ ಬುದ್ಧಿವಂತ ಎಂದಿದ್ದರು': ನೈಸ್ ಅಕ್ರಮದ ಕುರಿತು ಸವಾಲು

ನೈಸ್ ಯೋಜನೆಗೆ ಸಂಬಂಧಿಸಿದಂತೆ ರಚನೆಯಾಗಿದ್ದ ಸದನ ಸಮಿತಿಯ ಇತಿಹಾಸವನ್ನು ನೆನಪಿಸಿಕೊಂಡ ಹೆಚ್.ಡಿ. ರೇವಣ್ಣ, ಪ್ರಸ್ತುತ ಜಿಲ್ಲಾ ಉಸ್ತುವಾರಿ ಸಚಿವರ ನಡೆಯನ್ನು ತೀವ್ರವಾಗಿ ಲೇವಡಿ ಮಾಡಿದರು. ಈಗಿನ ನಮ್ಮ ಜಿಲ್ಲಾ ಉಸ್ತುವಾರಿ ಸಚಿವರು ಹಿಂದೆ ನಮ್ಮ ಪಕ್ಷದಲ್ಲಿದ್ದಾಗ ನೈಸ್ ಅಕ್ರಮದ ವಿರುದ್ಧದ ಸದನ ಸಮಿತಿಯ ಸದಸ್ಯರಾಗಿದ್ದರು. ನಮ್ಮ ಪಾರ್ಟಿಯಲ್ಲಿ ಯಾರೂ ಬುದ್ಧಿವಂತರಿಲ್ಲ ನಾನೇ ಬುದ್ಧಿವಂತ ಎಂದು ಹೇಳಿ ಕುಮಾರಣ್ಣನಿಗೆ ಒತ್ತಡ ಹೇರಿ ಸ್ವತಃ ಆ ಸಮಿತಿಗೆ ಸೇರಿಕೊಂಡಿದ್ದರು. ಇಲ್ಲಿ ನಡೆದಿರುವ ಅವ್ಯವಹಾರ ಯಾರಿಗೂ ಹೇಳೋದಕ್ಕೆ ಬರೋದಿಲ್ಲ. ನಮ್ಮ ಪಾರ್ಟಿಯಲ್ಲಿ ನಾನೇ ಸೇರಿಕೊಳ್ಳುತ್ತೇನೆ ಎಂದು ಒತ್ತಡ ಹಾಕಿದ್ದರು. ಇದನ್ನು ಜೇನುಕಲ್ ಸಿದ್ದೇಶ್ವರ ಬೆಟ್ಟದ ಮುಂದೆ ಹೇಳಲಿ ಎಂದು ಸವಾಲು ಹಾಕಿದರು. ಯಾರ್ಯಾರ್ ದುಡ್ಡು ಹೊಡೆದಿದ್ದಾರೆ ಲೂಟಿ ಮಾಡಿಬಿಟ್ಟಿದ್ದಾರೆ ಎಂದು ಕುಮಾರಣ್ಣನಿಗೆ ಹೇಳಿ ಸದಸ್ಯರಾಗಿದ್ದರು. ಅವರು ಸದಸ್ಯರಾಗಿ ಏನು ಬರೆಸಿ ಬಂದಿದ್ದಾರೋ ಅದನ್ನ ಸಾರ್ವಜನಿಕವಾಗಿ ಹೇಳಲಿ, ಈ ಬಗ್ಗೆ ಸ್ಪಷ್ಟಪಡಿಸಲಿ ಎಂದು ರೇವಣ್ಣ ಆಗ್ರಹಿಸಿದರು.

ಇದೇ ವೇಳೆ, ನೈಸ್ ಯೋಜನೆಯನ್ನು 'ದೇವೇಗೌಡರ ಕೂಸು' ಎಂದು ಹಿಂದೆ ಟೀಕಿಸಿದ್ದ ನಾಯಕರ ನಡೆಗೆ ಆಕ್ಷೇಪ ವ್ಯಕ್ತಪಡಿಸಿದ ಅವರು, ಹಾಗಿರುವಾಗ ವರದಿ ನೀಡಲು ಸಮಿತಿಗೆ ಹೋಗಿದ್ದು ಏಕೆ ಎಂದು ಪ್ರಶ್ನಿಸಿದರು.

ಹಾಸನ ಎಸ್ಪಿಗೆ ಡಿಸಿ ನೋಟಿಸ್‌ ವಿಚಾರ

ಹಾಸನ ಜಿಲ್ಲಾಧಿಕಾರಿಗಳು ಎಸ್ಪಿಗೆ ನೋಟಿಸ್ ಜಾರಿ ಮಾಡಿರುವ ವಿಚಾರದ ಬಗ್ಗೆ ಮಾಧ್ಯಮಗಳು ಕೇಳಿದ ಪ್ರಶ್ನೆಗೆ ವ್ಯಂಗ್ಯವಾಗಿ ಪ್ರತಿಕ್ರಿಯಿಸಿದ ಅವರು, "ನಮಗೆ ಇನ್ನೂ ಯಾವುದೇ ನೋಟಿಸ್ ಬಂದಿಲ್ಲ. ಎಸ್ಪಿಗೆ ಕೊಟ್ಟವರು ಮುಂದೆ ನಮಗೂ ಕೊಟ್ಟರೆ ನೋಡೋಣ. ಎರಡು ದಶಕಗಳ ಕಾಲ ಅಧಿಕಾರ ನಡೆಸಿದ ಹಿರಿಯ ಅಧಿಕಾರಿಗಳಿದ್ದಾರೆ, ಅಂತವರ ಬಗ್ಗೆ ನಾವು ಮಾತನಾಡುವುದಿಲ್ಲ. ನಾವು ಹಾಸನಾಂಬ ದೇವಿ ದರ್ಶನದ ಬಗ್ಗೆಯೂ ತಲೆಕೆಡಿಸಿಕೊಳ್ಳುವುದಿಲ್ಲ. ದರ್ಶನಕ್ಕೆ ಹೋದರೆ ಸಾಮಾನ್ಯ ಜನರ ಕ್ಯೂನಲ್ಲೇ ನಿಂತು ತಾಯಿಯ ದರ್ಶನ ಪಡೆಯುತ್ತೇವೆ ಎಂದರು.

72 ವರ್ಷಗಳ ಹಳೆಯ ಗಣಪತಿ ವಿಸರ್ಜನೆಗೆ ನಿಷೇಧ

ಹಾಸನದಲ್ಲಿ ಸುದೀರ್ಘ 72 ವರ್ಷಗಳ ಸಾಂಪ್ರದಾಯಿಕ ಇತಿಹಾಸ ಹೊಂದಿರುವ ಗಣಪತಿ ವಿಸರ್ಜನೆಗೆ ಆಡಳಿತ ಮಂಡಳಿ ನಿಷೇಧಾಜ್ಞೆ ವಿಧಿಸಿರುವುದಕ್ಕೆ ರೇವಣ್ಣ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು. ಕಳೆದ ಒಂದು ವಾರದಿಂದ ಇತರ ಎಲ್ಲಾ ಗಣಪತಿ ವಿಸರ್ಜನೆಗಳಿಗೆ ಅವಕಾಶ ನೀಡಿದ ಜಿಲ್ಲಾಡಳಿತ, ಎಲ್ಲಾ ಸಮಾಜದವರೂ ಒಟ್ಟಾಗಿ ಪೂಜಿಸುವ ಈ 72 ವರ್ಷಗಳ ಸುದೀರ್ಘ ಇತಿಹಾಸದ ಗಣಪತಿಗೆ ಮಾತ್ರ ಏಕೆ ತಡೆ ನೀಡಿದೆ ಎಂದು ಪ್ರಶ್ನಿಸಿದರು.

ಜಿಲ್ಲೆಯಲ್ಲಿ ನಡೆಯುತ್ತಿರುವ ಈ ರೀತಿಯ ದೌರ್ಜನ್ಯ ಮತ್ತು ಏಕಪಕ್ಷೀಯ ತೀರ್ಮಾನಗಳ ಕುರಿತು ಸಮಗ್ರ ತನಿಖೆ ನಡೆಸುವಂತೆ ರಾಜ್ಯ ಸರ್ಕಾರದ ಮುಖ್ಯ ಕಾರ್ಯದರ್ಶಿಗಳಿಗೆ ಶೀಘ್ರದಲ್ಲೇ ಪತ್ರ ಬರೆಯುವುದಾಗಿ ತಿಳಿಸಿದರು. ಯಾವುದೇ ಗಲಾಟೆ ಇಲ್ಲದೆ ವಿಸರ್ಜನೆ ಮಾಡಲು ಸಂಘಟಕರನ್ನು ಕರೆಸಿ ಮಾತನಾಡಬಹುದಿತ್ತು. ಆದರೆ ಜನಪ್ರತಿನಿಧಿಗಳು ಬಂದರೆ ಅವಘಡ ಸಂಭವಿಸುತ್ತದೆ ಎಂಬ ನೆಪ ಹೇಳಲಾಗುತ್ತಿದೆ.

ಯಾವುದೇ ಅಹಿತಕರ ಘಟನೆ ನಡೆಯದಂತೆ ತಾನೇ ಸಂಪೂರ್ಣ ನಿಯಂತ್ರಣ ಮಾಡಿಕೊಳ್ಳುತ್ತೇನೆ ಎಂದು ಹೇಳಿರುವ ಜಿಲ್ಲಾ ಮುಖ್ಯಸ್ಥರಿಗೆ ಧನ್ಯವಾದಗಳು. ನಮಗೂ ಕೆಲಸ ಕಡಿಮೆಯಾಯಿತು, ಪೊಲೀಸ್ ಭದ್ರತೆಯೇ ಇಲ್ಲದೆ ಕಾರ್ಯಕ್ರಮ ಸಾಗಲಿ, ನಮ್ಮ ಕಡೆಯಿಂದ ಸಂಪೂರ್ಣ ಬೆಂಬಲ ನೀಡುತ್ತೇವೆ ಎಂದು ವ್ಯಂಗ್ಯವಾಗಿ ಚಟಾಕಿ ಹಾರಿಸಿದರು.

'ಪ್ರೇಮದ ಊರಲ್ಲಿ' ಸಿನಿಮಾದಿಂದ ಫೇಮಸ್ ಆದ ಸಿಗೇಗುಡ್ಡಕ್ಕೆ ಕಸದ ಕಾಟ! ಪ್ರಕೃತಿ ಸೌಂದರ್ಯಕ್ಕೆ ಕಂಟಕವಾದ ಪ್ಲಾಸ್ಟಿಕ್ ರಾಶಿ

Sushma Hegde — Fri, 16 Oct 2026 11:59:49 +0530

ಪ್ರಕೃತಿಯ ಸೌಂದರ್ಯ, ಹಸಿರಿನ ಬೆಟ್ಟಗಳು, ಮನಮೋಹಕ ಪರಿಸರದಿಂದ ಪ್ರವಾಸಿಗರನ್ನು ಆಕರ್ಷಿಸುತ್ತಿರುವ ಹಾಸನದ ಸಿಗೇಗುಡ್ಡ (Seegegudda) ಇದೀಗ ಕಸ ಮತ್ತು ಪ್ಲಾಸ್ಟಿಕ್ ತ್ಯಾಜ್ಯದ ಸಮಸ್ಯೆಯನ್ನು ಎದುರಿಸುತ್ತಿದೆ. ಇತ್ತೀಚೆಗೆ 'ಪ್ರೇಮದ ಊರಲ್ಲಿ' ಸಿನಿಮಾ ಮೂಲಕ ಜನಪ್ರಿಯತೆ ಗಳಿಸಿರುವ ಈ ಪ್ರವಾಸಿ ತಾಣಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಭೇಟಿ ನೀಡುತ್ತಿದ್ದಾರೆ. ಆದರೆ, ಪ್ರಕೃತಿಯ ಸೊಬಗನ್ನು ಸವಿಯಲು ಬರುವ ಕೆಲವರು ಪ್ಲಾಸ್ಟಿಕ್ ಬಾಟಲಿ ಹಾಗೂ ಇತರ ತ್ಯಾಜ್ಯಗಳನ್ನು ಎಲ್ಲೆಂದರಲ್ಲಿ ಎಸೆದು ಹೋಗುತ್ತಿರುವುದು ಪರಿಸರ ಪ್ರೇಮಿಗಳಲ್ಲಿ ಆತಂಕ ಮೂಡಿಸಿದೆ.

ಸಿನಿಮಾ ಮೂಲಕ ಫೇಮಸ್ ಆದ ಬೆಟ್ಟಕ್ಕೆ ಕಸದ ಕಾಟ!

ಹಾಸನದ ಸಿಗೇಗುಡ್ಡ ತನ್ನ ನೈಸರ್ಗಿಕ ಸೌಂದರ್ಯದಿಂದ ಪ್ರವಾಸಿಗರ ಗಮನ ಸೆಳೆಯುತ್ತಿದೆ. ಸಿನಿಮಾ ಮೂಲಕ ಜನಪ್ರಿಯತೆ ಹೆಚ್ಚಾದ ಬೆನ್ನಲ್ಲೇ ಇಲ್ಲಿಗೆ ಭೇಟಿ ನೀಡುವವರ ಸಂಖ್ಯೆಯೂ ಹೆಚ್ಚುತ್ತಿದೆ. ಆದರೆ, ಪ್ರವಾಸಿಗರು ತಾವು ತಂದ ಪ್ಲಾಸ್ಟಿಕ್ ಬಾಟಲಿಗಳು, ಕವರ್‌ಗಳು ಮತ್ತು ಇತರ ತ್ಯಾಜ್ಯಗಳನ್ನು ಸೂಕ್ತ ಸ್ಥಳದಲ್ಲಿ ವಿಲೇವಾರಿ ಮಾಡದೆ ಬೆಟ್ಟದ ಸುತ್ತಮುತ್ತ ಎಸೆಯುತ್ತಿರುವುದು ಸಮಸ್ಯೆಯಾಗಿ ಪರಿಣಮಿಸಿದೆ. ಪ್ರಕೃತಿಯ ಮಡಿಲಲ್ಲಿ ಸಮಯ ಕಳೆಯಲು ಬರುವವರು ಪರಿಸರದ ಸ್ವಚ್ಛತೆಯನ್ನೂ ಕಾಪಾಡಬೇಕು. ಆದರೆ, ಎಲ್ಲೆಂದರಲ್ಲಿ ಬಿಸಾಡುವ ಪ್ಲಾಸ್ಟಿಕ್ ತ್ಯಾಜ್ಯದಿಂದ ಸಿಗೇಗುಡ್ಡದ ಸಹಜ ಸೌಂದರ್ಯಕ್ಕೆ ಧಕ್ಕೆಯಾಗುವ ಆತಂಕ ಎದುರಾಗಿದೆ.

'ಪ್ಲಾಸ್ಟಿಕ್ ಮಯವಾದ ಸಿಗೇಗುಡ್ಡ' ಆಗದಿರಲಿ!

ಸಿಗೇಗುಡ್ಡದಲ್ಲಿ ಕಸ ಎಸೆಯುತ್ತಿರುವ ಬಗ್ಗೆ ಜಾಗೃತಿ ಮೂಡಿಸಿರುವ ಎಸ್.ಪಿ. ಕನ್ನಡಿಗ ಮತ್ತು ಐಬೋರ್ಡ್, ಪ್ರವಾಸಿಗರು ಪ್ರಕೃತಿಯನ್ನು ಕಲುಷಿತಗೊಳಿಸದೆ ಅದರ ಸೌಂದರ್ಯವನ್ನು ಕಾಪಾಡಬೇಕು ಎಂದು ಮನವಿ ಮಾಡಿದ್ದಾರೆ. ಪ್ರಕೃತಿ ಕೇವಲ ಮನುಷ್ಯರಿಗೆ ಮಾತ್ರ ಸೇರಿದ್ದಲ್ಲ. ಪ್ರಾಣಿ-ಪಕ್ಷಿಗಳು ಸೇರಿದಂತೆ ಅನೇಕ ಜೀವಿಗಳಿಗೆ ಇದು ಆವಾಸಸ್ಥಾನವಾಗಿದೆ. ಹೀಗಿರುವಾಗ, ಪ್ರವಾಸದ ಹೆಸರಿನಲ್ಲಿ ಪ್ಲಾಸ್ಟಿಕ್ ತ್ಯಾಜ್ಯವನ್ನು ಎಲ್ಲೆಂದರಲ್ಲಿ ಎಸೆಯುವುದು ಪರಿಸರಕ್ಕೆ ಹಾನಿ ಉಂಟುಮಾಡಬಹುದು ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ. ಇದೇ ರೀತಿ ಕಸ ಹಾಕುವುದನ್ನು ಮುಂದುವರಿಸಿದರೆ, ಸುಂದರ ಸಿಗೇಗುಡ್ಡ ಪ್ಲಾಸ್ಟಿಕ್ ತ್ಯಾಜ್ಯದಿಂದ ತುಂಬುವ ಅಪಾಯವಿದೆ. ಹೀಗಾಗಿ ಪ್ರವಾಸಿಗರು ಜವಾಬ್ದಾರಿಯಿಂದ ನಡೆದುಕೊಳ್ಳಬೇಕು ಎಂಬ ಸಂದೇಶವನ್ನು ಅವರು ನೀಡಿದ್ದಾರೆ.

ಅಧಿಕಾರಿಗಳು ಗಮನಹರಿಸಬೇಕೆಂದು ಮನವಿ

ಸಿಗೇಗುಡ್ಡದ ಸ್ವಚ್ಛತೆ ಕಾಪಾಡಲು ಸ್ಥಳೀಯ ಆಡಳಿತ ಮತ್ತು ಸಂಬಂಧಪಟ್ಟ ಅಧಿಕಾರಿಗಳು ಸೂಕ್ತ ಕ್ರಮ ಕೈಗೊಳ್ಳಬೇಕೆಂಬ ಬೇಡಿಕೆ ವ್ಯಕ್ತವಾಗಿದೆ. ಪ್ರವಾಸಿ ತಾಣದಲ್ಲಿ ಕಸ ಹಾಕುವುದನ್ನು ತಡೆಯಲು ಮಾಹಿತಿ ಫಲಕಗಳನ್ನು ಅಳವಡಿಸುವುದು, ಕಸದ ಬುಟ್ಟಿಗಳನ್ನು ಇರಿಸುವುದು ಹಾಗೂ ಸ್ವಚ್ಛತೆಯ ಕುರಿತು ಜಾಗೃತಿ ಮೂಡಿಸುವುದು ಅಗತ್ಯವಾಗಿದೆ.

ಜೊತೆಗೆ, ಪ್ರವಾಸಿಗರು ತಾವು ತಂದ ಪ್ಲಾಸ್ಟಿಕ್ ಬಾಟಲಿ ಮತ್ತು ಇತರ ತ್ಯಾಜ್ಯಗಳನ್ನು ವಾಪಸ್ ಕೊಂಡೊಯ್ಯುವ ಅಥವಾ ನಿಗದಿತ ಸ್ಥಳದಲ್ಲಿ ವಿಲೇವಾರಿ ಮಾಡುವ ಅಭ್ಯಾಸ ಬೆಳೆಸಿಕೊಳ್ಳಬೇಕು. ಪ್ರಕೃತಿಯ ಸೌಂದರ್ಯವನ್ನು ಉಳಿಸುವ ಜವಾಬ್ದಾರಿ ಅಧಿಕಾರಿಗಳಿಗಷ್ಟೇ ಸೀಮಿತವಾಗಿಲ್ಲ; ಅಲ್ಲಿಗೆ ಭೇಟಿ ನೀಡುವ ಪ್ರತಿಯೊಬ್ಬರಿಗೂ ಇದೆ.

ವೀಕ್ಷಣೆಗಾಗಿ ಬರುವವರು ಸ್ವಚ್ಛತೆಯನ್ನೂ ಕಾಪಾಡಲಿ

ಸಿಗೇಗುಡ್ಡದ ಪರಿಸರದ ಬಗ್ಗೆ ಜಾಗೃತಿ ಮೂಡಿಸುತ್ತಿರುವವರು, ಈ ಪ್ರಯತ್ನವನ್ನು ಕೇವಲ ವೀಕ್ಷಣೆ ಅಥವಾ ಜನಪ್ರಿಯತೆಗಾಗಿ ಮಾಡುತ್ತಿಲ್ಲ; ಪ್ರಕೃತಿಯನ್ನು ಉಳಿಸುವ ಉದ್ದೇಶದಿಂದ ಮಾಡುತ್ತಿದ್ದೇವೆ ಎಂದು ಸ್ಪಷ್ಟಪಡಿಸಿದ್ದಾರೆ. ಈ ಕುರಿತ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆಯುತ್ತಿದ್ದು, ಸಿಗೇಗುಡ್ಡದ ಸ್ವಚ್ಛತೆ ಕಾಪಾಡಲು ಸೂಕ್ತ ಕ್ರಮ ಕೈಗೊಳ್ಳಬೇಕೆಂಬ ಅಭಿಪ್ರಾಯಗಳು ವ್ಯಕ್ತವಾಗುತ್ತಿವೆ.

ಪ್ರವಾಸಿ ತಾಣಗಳಿಗೆ ಭೇಟಿ ನೀಡುವುದು ಸಂತೋಷದ ಸಂಗತಿ. ಆದರೆ, ನಾವು ಹೋದ ಜಾಗವನ್ನು ಸ್ವಚ್ಛವಾಗಿ ಉಳಿಸಿ ಬರುವುದು ಅದಕ್ಕಿಂತಲೂ ಮುಖ್ಯ. ಸಿಗೇಗುಡ್ಡದ ಸೌಂದರ್ಯ ಮುಂದಿನ ಪೀಳಿಗೆಗೂ ಉಳಿಯಬೇಕಾದರೆ, ಪ್ರತಿಯೊಬ್ಬ ಪ್ರವಾಸಿಗರೂ ಪರಿಸರದ ಬಗ್ಗೆ ಜವಾಬ್ದಾರಿಯಿಂದ ನಡೆದುಕೊಳ್ಳಬೇಕಿದೆ.

ಸ್ಟಿಂಗ್‌ ವಿಚಾರ ಕೇಳ್ತಿದ್ದಂತೆ ಗರಂ ಆದ HD Revanna, 'ಅದನ್ನ ಕಟ್ಕೊಂಡು ನನಗೇನು ಆಗ್ಬೇಕಿದೆ' ಎಂದ ಮಾಜಿ ಸಚಿವ

Santosh Naik — Wed, 14 Oct 2026 15:57:34 +0530

ಹಾಸನ (ಅ.14): ಇತ್ತೀಚಿನ 'ಸ್ಟಿಂಗ್ ಕಾರ್ಯಾಚರಣೆ' (Sting Operation) ಕುರಿತು ಮಾಧ್ಯಮ ಪ್ರತಿನಿಧಿಗಳು ಕೇಳಿದ ಪ್ರಶ್ನೆಗೆ ಮಾಜಿ ಸಚಿವ ಹಾಗೂ ಹಿರಿಯ ಜೆಡಿಎಸ್ ನಾಯಕ ಹೆಚ್.ಡಿ. ರೇವಣ್ಣ (HD Revanna) ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. "ಸ್ಟಿಂಗ್ ವಿಚಾರವನ್ನು ಕಟ್ಟಿಕೊಂಡು ನನಗೇನು ಆಗಬೇಕಾಗಿದೆ? ನಾನಿಲ್ಲಿ ನನ್ನ ಜಿಲ್ಲೆಯ ಜನರ ಮತ್ತು ದನಕರುಗಳ ಪ್ರಾಣ ಉಳಿಸಲು ಹೋರಾಡುತ್ತಿದ್ದೇನೆ" ಎಂದು ವೇದಿಕೆಯಲ್ಲೇ ಗುಡುಗಿದ್ದಾರೆ. ಹಾಸನದಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಹೆಚ್.ಡಿ. ರೇವಣ್ಣ, ಜಿಲ್ಲೆಯಲ್ಲಿ ತಲೆದೋರಿರುವ ಭೀಕರ ಬರಗಾಲ ಹಾಗೂ ಕುಡಿಯುವ ನೀರಿನ ಅಭಾವದ ಕುರಿತು ಸರ್ಕಾರದ ನಿರ್ಲಕ್ಷ್ಯವನ್ನು ಕಟುವಾಗಿ ತರಾಟೆಗೆ ತೆಗೆದುಕೊಂಡರು.

ನನ್ನ ಹಾಸನದ ಜನರು, ದನಕರುಗಳು ಸಾಯತ್ತಿವೆ

ಸ್ಟಿಂಗ್ ವಿಚಾರವನ್ನು ತಳ್ಳಿಹಾಕಿದ ರೇವಣ್ಣ, "ಆ ಸ್ಟಿಂಗ್ ವಿಚಾರವನ್ನು ಕಟ್ಟಿಕೊಂಡು ನನಗೇನಾಗಬೇಕಿದೆ? ಪ್ರಸ್ತುತ ನನ್ನ ಹಾಸನ ಜಿಲ್ಲೆಯ ಜನರು, ರೈತರು ಹಾಗೂ ದನಕರುಗಳು ನೀರಿಲ್ಲದೆ ಸಾಯುತ್ತಿದ್ದಾರೆ. ದನಕರುಗಳಿಗೆ ಕುಡಿಯಲು ನೀರಿಲ್ಲ, ಕೆರೆಕಟ್ಟೆಗಳು ಸಂಪೂರ್ಣವಾಗಿ ಒಣಗಿ ಭೀಕರ ಪರಿಸ್ಥಿತಿ ನಿರ್ಮಾಣವಾಗಿದೆ. ಈ ಜಿಲ್ಲೆಯ ಜನ ನನ್ನನ್ನು ಕಳೆದ 30 ವರ್ಷಗಳಿಂದ ಶಾಸಕನನ್ನಾಗಿ ಮಾಡಿದ್ದಾರೆ. ಮಾಜಿ ಪ್ರಧಾನಿ ಹೆಚ್.ಡಿ. ದೇವೇಗೌಡರ ಕಾಲದಿಂದಲೂ ಈ ಜಿಲ್ಲೆಯ ಜನ ಈ ಪಕ್ಷವನ್ನು ಬೆಳೆಸಿ, ಉಳಿಸಿಕೊಂಡು ಬಂದಿದ್ದಾರೆ. ಅವರ ಋಣ ತೀರಿಸುವುದು ನನ್ನ ಮೊದಲ ಆದ್ಯತೆಯಾಗಿದೆ" ಎಂದು ಹೇಳಿದ್ದಾರೆ.

ತಮಿಳುನಾಡಿಗೆ ಹರಿಸಿದ ನೀರಿಗೆ ಲೆಕ್ಕ ಕೊಡಿ - ರೇವಣ್ಣ ಆಗ್ರಹ

ರಾಜ್ಯ ಸರ್ಕಾರದ ನೀರಾವರಿ ನೀತಿಯ ವಿರುದ್ಧ ಭಾರಿ ವಾಗ್ದಾಳಿ ನಡೆಸಿದ ಅವರು, "ಇಂತಹ ಭೀಕರ ಬರಗಾಲದ ಸಮಯದಲ್ಲಿ ಜನರ ಕಷ್ಟಕ್ಕೆ ಸ್ಪಂದಿಸಲು ಸರ್ಕಾರದ ಬಳಿ ಹತ್ತು ರೂಪಾಯಿ ದುಡ್ಡಿಲ್ಲ. ಕೆಆರ್‌ಎಸ್ ಹಾಗೂ ಇತರ ಜಲಾಶಯಗಳಲ್ಲಿ ಬರೋಬ್ಬರಿ 18 ಟಿಎಂಸಿ ನೀರಿತ್ತು, ಅದನ್ನು ತಗೊಂಡು ಹೋಗಿ ಎಲ್ಲಿಗೆ ಬಿಟ್ಟರು? ನೀರಾವರಿ ಇಲಾಖೆಯ ಅಧಿಕಾರಿಗಳು ಸಾರ್ವಜನಿಕವಾಗಿ ಬಂದು ಲೆಕ್ಕ ಕೊಡಲಿ; ತಮಿಳುನಾಡಿಗೆ ಎಷ್ಟು ನೀರು ಬಿಟ್ಟಿದ್ದಾರೆ? ಹೆಚ್‌ಆರ್‌ಬಿಸಿ (HRBC) ಹಾಗೂ ಹೆಚ್‌ಎಲ್‌ಬಿಸಿ (HLBC) ನಾಲೆಗಳಿಗೆ ಎಷ್ಟು ನೀರು ಹರಿಸಿದ್ದಾರೆ ಎಂಬುದಕ್ಕೆ ತಕ್ಷಣವೇ ಉತ್ತರ ನೀಡಲಿ. ಇಲ್ಲಿ ಕೇಳುವವರು, ಹೇಳುವವರು ಯಾರೂ ಇಲ್ಲದಂತಾಗಿದೆ" ಎಂದು ಕಿಡಿಕಾರಿದರು.

₹150 ಕೋಟಿ ವೆಚ್ಚದ ಡ್ಯಾಮ್‌ನಲ್ಲಿ ಹನಿ ನೀರಿಲ್ಲ!

ಜಿಲ್ಲೆಯ ಜಲಮೂಲಗಳ ಸ್ಥಿತಿಗತಿಯನ್ನು ವಿವರಿಸಿದ ರೇವಣ್ಣ, "ನಾವು ಬರೋಬ್ಬರಿ ₹150 ಕೋಟಿ ಖರ್ಚು ಮಾಡಿ 'ಶ್ರೀರಾಮ ದೇವರ ಕಟ್ಟೆ' ಡ್ಯಾಮ್ (Srirama Devara Katte Dam) ಕಟ್ಟಿಸಿದೆವು. ಆದರೆ ಇವತ್ತು ಆಣೆಕಟ್ಟಿನಲ್ಲಿ ಒಂದು ಡ್ರಾಪ್ ನೀರಿಲ್ಲದ ಹಾಗೆ ಸಂಪೂರ್ಣ ಖಾಲಿಯಾಗಿದೆ. ಬೇರೆ ಎಲ್ಲಾ ವಿಷಯಗಳು ನನಗೆ ಆಮೇಲೆ, ಮೊದಲು ನನ್ನ ಜಿಲ್ಲೆಯ ರೈತರನ್ನು ಮತ್ತು ಜನರನ್ನು ಉಳಿಸಬೇಕಾಗಿದೆ. ಇವತ್ತೇ ರಾಜಕಾರಣ ಮುಗಿದು ಹೋಗುವುದಿಲ್ಲ. ನನ್ನ ತಾಲೂಕಿನ ಜನರನ್ನು, ರೈತರನ್ನು ನನ್ನಿಂದ ಉಳಿಸಿಕೊಳ್ಳುವುದಕ್ಕೆ ಆಗುವುದಿಲ್ಲ ಅಂದರೆ ನಾನ್ಯಾಕೆ ಶಾಸಕನಾಗಿ ಇರಲಿ?" ಎಂದು ಕಟುವಾಗಿ ಪ್ರಶ್ನಿಸಿದರು.

ಸರ್ಕಾರಕ್ಕೆ 1 ವಾರದ ಗಡುವು, ಬೃಹತ್ ಹೋರಾಟದ ಎಚ್ಚರಿಕೆ

"ನಾನು ಹೋದ ಕಡೆಯಲ್ಲೆಲ್ಲಾ ಜನರು, 'ಅಣ್ಣ ಇನ್ನು ಸುಮ್ಮನಿರಬೇಡಿ, ನಮಗೆ ಕುಡಿಯಲು ನೀರು ಹಾಗೂ ದನಕರುಗಳಿಗೆ ಮೇವು-ನೀರು ಒದಗಿಸಿ' ಎಂದು ಕಣ್ಣೀರಿಡುತ್ತಿದ್ದಾರೆ. ಜಿಲ್ಲೆಯ ದನಕರುಗಳಿಗೆ ತಕ್ಷಣವೇ ಕುಡಿಯುವ ನೀರು ಹಾಗೂ ಮೇವಿನ ವ್ಯವಸ್ಥೆ ಮಾಡಬೇಕು. ನಾನು ರಾಜ್ಯ ಸರ್ಕಾರಕ್ಕೆ ಕಟ್ಟುನಿಟ್ಟಿನ 'ಒಂದು ವಾರದ ಗಡುವು' ನೀಡುತ್ತಿದ್ದೇನೆ. ಒಂದು ವೇಳೆ ವಾರದೊಳಗೆ ಸರ್ಕಾರ ತಕ್ಷಣವೇ ಸೂಕ್ತ ಕ್ರಮ ಕೈಗೊಳ್ಳದಿದ್ದರೆ ಬೀದಿಗಿಳಿದು ಬೃಹತ್ ಮಟ್ಟದ ಹೋರಾಟ ಮಾಡುತ್ತೇನೆ" ಎಂದು ಹೆಚ್.ಡಿ. ರೇವಣ್ಣ ಸರ್ಕಾರಕ್ಕೆ ಎಚ್ಚರಿಕೆ ನೀಡಿದ್ದಾರೆ.

ಹಾಸನಾಂಬ ದೇಗುಲದ ಆವರಣದಲ್ಲಿ ಅವಘಡ, ವಿದ್ಯುತ್ ಶಾಕ್‌ಗೆ ಪ್ರಜ್ಞೆತಪ್ಪಿದ ಕಾರ್ಮಿಕ

Ganesh Mabla Gowda — Sun, 18 Oct 2026 17:44:55 +0530

ಹಾಸನ: ಜಗತ್ ಪ್ರಸಿದ್ಧ ಹಾಸನಾಂಬ ದೇವಸ್ಥಾನದ ಆವರಣದಲ್ಲಿ ಅವಘಡ ನಡೆದಿದೆ. ಕಾಮಗಾರಿ ಕೆಲಸದ ವೇಳೆ ವ್ಯಕ್ತಿಯೊಬ್ಬರಿಗೆ ವಿದ್ಯುತ್ ಶಾಕ್ ತಗುಲಿದೆ. ವಿದ್ಯುತ್ ಶಾಕ್ ಹೊಡೆದ ರಭಸಕ್ಕೆ ಕಾರ್ಮಿಕ ನೆಲಕ್ಕೆ ಬಿದ್ದಿದ್ದಾರೆ. ತೀವ್ರವಾಗಿ ಗಾಯಗೊಂಡಿದ್ದು, ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ.

ವರದಿಗಳ ಪ್ರಕಾರ.. ಹಾಸನ ಉಸ್ತುವಾರಿ ಸಚಿವ ಶಿವಲಿಂಗೇಗೌಡ ಅವರು ಜಿಲ್ಲಾಧಿಕಾರಿ, ತಹಸೀಲ್ದಾರ್ ಸೇರಿದಂತೆ ವಿವಿಧ ಅಧಿಕಾರಿಗಳ ಜೊತೆ ದೇಗುಲ ಆವರಣದಲ್ಲಿ ಮೀಟಿಂಗ್ ನಡೆಸುತ್ತಿದ್ದರು. ಇದೇ ವೇಳೆಯೇ ಅನಾಹುತ ಆಗಿದೆ. ವಿಷಯ ಗೊತ್ತಾಗುತ್ತಿದ್ದಂತೆಯೇ ಮೀಟಿಂಗ್ ಅರ್ಧಕ್ಕೆ ಮೊಟಕುಗೊಳಿಸಿ ಅಲ್ಲಿಗೆ ದೌಡಾಯಿಸಿದ್ದಾರೆ. ಸಚಿವರ ಜೊತೆ ಅಧಿಕಾರಿಗಳು ಕೂಡ ಹೋಗಿದ್ದರು.

ಬಳಿಕ ಸಚಿವರ ಸೂಚನೆ ಮೇರೆಗೆ ಕೂಡಲೇ ಅವರನ್ನು ಆಸ್ಪತ್ರೆಗೆ ರವಾನೆ ಮಾಡಲಾಗಿದೆ. ಗಾಯಾಳುವನ್ನು ಹಾಸನ ತಹಶಿಲ್ದಾರರೇ ತಮ್ಮ ವಾಹನದಲ್ಲಿ ಆಸ್ಪತ್ರೆಗೆ ಕರೆದುಕೊಂಡು ಹೋಗಿ ಚಿಕಿತ್ಸೆ ಕೊಡಿಸಿದ್ದಾರೆ. ಗಾಯಾಳುವನ್ನು ಆಸ್ಪತ್ರೆಗೆ ದಾಖಲಿಸಿದ ಬಳಿಕ ಸಚಿವರು, ಜಿಲ್ಲಾಧಿಕಾರಿಗಳು ಸ್ಥಳೀಯ ಸಿಬ್ಬಂದಿ ವಿರುದ್ಧ ಗರಂ ಆಗಿದ್ದಾರೆ.

ಇಂದು ಬೆಳಗ್ಗೆಯಿಂದ ಕೆಲಸ ಮಾಡುತ್ತಿದ್ದರು. ನಿರಂತರ ಕೆಲಸದಿಂದಾಗಿ ಅನಾಹುತ ಆಗಿರಬಹುದು ಎಂದು ಹೇಳಲಾಗುತ್ತಿದೆ. ಹಾಸನಾಂಬ ದೇವಸ್ಥಾನದ ಉತ್ತರ ಬಾಗಿಲು ಬಳಿ ಘಟನೆ ನಡೆದಿದೆ. ಘಟನೆ ಬಳಿಕ ವ್ಯಕ್ತಿ ಪ್ರಜ್ಞೆ ತಪ್ಪಿದ್ದಾರೆ. ಇದರಿಂದ ಕೆಲ ಕಾಲ ಆತಂಕಕ್ಕೆ ಕಾರಣವಾಗಿತ್ತು. ಇದೀಗ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದ್ದು, ಚಿಕಿತ್ಸೆಗೆ ಸ್ಪಂದಿಸುತ್ತಿದ್ದಾರೆ ಎಂದು ತಿಳಿದುಬಂದಿದೆ.

ಕುಟುಂಬಸ್ಥರಲ್ಲಿ ಹೆಚ್ಚಿದ ಆತಂಕ

ಇನ್ನು ವಿಚಾರ ತಿಳಿಯುತ್ತಿದ್ದಂತೆಯೇ ಹಾಸನಾಂಬ ದೇಗುಲದ ಆವರಣದತ್ತ ಕುಟುಂಬಸ್ಥರು ಓಡೋಡಿ ಬಂದಿದ್ದರು. ಆದರೆ ಅಷ್ಟರೊಳಗೆ ಆಸ್ಪತ್ರೆಗೆ ಸೇರಿಸಿದ್ದರಿಂದ ಅಲ್ಲಿಗೆ ಹೋಗಿದ್ದಾರೆ. ಮನೆಯ ಸದಸ್ಯನ ಸ್ಥಿತಿ ನೋಡಿ ಗಾಬರಿ ಆಗಿದ್ದಾರೆ.

ಹಾಸನಾಂಬಾ ಜಾತ್ರೆಗೆ ಹಾಸನಕ್ಕೆ ಬೆಂಗಳೂರು-ಅರಸೀಕೆರೆಯಿಂದ ವಿಶೇಷ ರೈಲುಗಳ ಸಂಚಾರ ಆರಂಭ

Kannadaprabha News — Sat, 24 Oct 2026 08:15:29 +0530

ಹಾಸನ: ಶ್ರೀ ಹಾಸನಾಂಬಾ ದೇವಿ ದರ್ಶನಕ್ಕೆ ಭಕ್ತಾದಿಗಳು ಆಗಮಿಸಲು ಅನುಕೂಲವಾಗುವಂತೆ ಎರಡು ವಿಶೇಷ ರೈಲುಗಳ ಸಂಚಾರಕ್ಕೆ ಕೇಂದ್ರ ಸರ್ಕಾರಕ್ಕೆ ಮನವಿ ಮಾಡಲಾಗಿದೆ ಎಂದು ಸಂಸದರಾದ ಶ್ರೇಯಸ್ ಎಂ ಪಟೇಲ್ ಅವರು ತಿಳಿಸಿದ್ದಾರೆ.

ಬೆಂಗಳೂರು-ಹಾಸನ ರೈಲು

ಜಿಲ್ಲಾಧಿಕಾರಿಗಳ ಕಚೇರಿಯಲ್ಲಿ ಸಭೆ ನಡೆಸಿ ಮಾತನಾಡಿದ ಅವರು, ಬೆಂಗಳೂರು ಹಾಸನ್ ಎಕ್ಸ್ ಪ್ರೆಸ್ ವಿಶೇಷ ರೈಲು ಬೆಂಗಳೂರಿನಿಂದ ಬೆಳಗ್ಗೆ 7.30 ಹೊರಟು ಹಾಸನಕ್ಕೆ ಬೆಳಗ್ಗೆ 11.30 ತಲುಪಲಿದೆ, ನಂತರ ಮಧ್ಯಾಹ್ನ 3.15ಕ್ಕೆ ಹಾಸನದಿಂದ ಹೊರಟು ಸಂಜೆ 7.00 ಗಂಟೆ ತಲುಪಲಿದೆ. ಈ ರೈಲು ಮಾರ್ಗ ಮಧ್ಯ ಯಶವಂತಪುರ, ನೆಲಮಂಗಲ, ಕುಣಿಗಲ್, ಯಡಿಯೂರು, ಬಿಜಿನಗರ. ಶ್ರವಣಬೆಳಗೂಳ, ಚನ್ನರಾಯಪಟ್ಟಣ ನಿಲ್ದಾಣದಲ್ಲಿ ನಿಲುಗಡೆ ಹೊಂದಿರುತ್ತದೆ ಎಂದರು.

ಅರಸೀಕೆರೆ - ಹಾಸನ ರೈಲು

ಅರಸೀಕೆರೆಯಿಂದ ಬೆಳಗ್ಗೆ 11.30 ಹೊರಟು ಹಾಸನಕ್ಕೆ 12.30 ತಲುಪಲಿದೆ, ಹಬ್ಬನಘಟ್ಟ ಹಾಗೂ ಬಾಗೇಶಪುರ ನಿಲ್ದಾಣಗಳಲ್ಲಿ ರೈಲು ನಿಲುಗಡೆಗೆ ಅವಕಾಶವಿರುತ್ತದೆ ನಂತರ ಹಾಸನದಿಂದ 12.45 ಹೊರಟು ಮಧ್ಯಾಹ್ನ 2 ಗಂಟೆಗೆ ಅರಸೀಕೆರೆ ತಲುಪಲಿದೆ ಎಂದರು. ಹಾಸನಾಂಬಾ ದೇವಿಯ ದರ್ಶನಕ್ಕೆ ಆಗಮಿಸುವ ಭಕ್ತಾದಿಗಳಿಗೆ ಅನುಕೂಲವಾಗುವಂತೆ ಸಾರಿಗೆ ವ್ಯವಸ್ಥೆ ಕಲ್ಪಿಸುವ ನಿಟ್ಟಿನಲ್ಲಿ ಈ ವಿಶೇಷ ರೈಲುಗಳ ಸಂಚಾರಕ್ಕೆ ಅವಕಾಶ ನೀಡಲಾಗಿದೆ.

ಬೆಂಗಳೂರು, ಅರಸೀಕೆರೆ ಹಾಗೂ ಮಾರ್ಗ ಮಧ್ಯದ ವಿವಿಧ ಪ್ರದೇಶಗಳಿಂದ ಹಾಸನಕ್ಕೆ ಆಗಮಿಸುವ ಪ್ರಯಾಣಿಕರಿಗೆ ಹೆಚ್ಚಿನ ಅನುಕೂಲವಾಗಲಿದೆ ಎಂದ ಅವರು ಪ್ರಯಾಣಿಕರು ಪ್ರಯಾಣ ಆರಂಭಿಸುವ ಮೊದಲು ನೈರುತ್ಯ ರೈಲ್ವೆಯ ಅಧಿಕೃತ ಮೂಲಗಳಿಂದ ರೈಲುಗಳ ವೇಳಾ ಪಟ್ಟಿ ಹಾಗೂ ಸಂಚಾರದ ಮಾಹಿತಿಯನ್ನು ಖಚಿತಪಡಿಸಿಕೊಳ್ಳುವಂತೆ ತಿಳಿಸಿದರು.

ಸ್ವಚ್ಛತೆಗೆ ಹೆಚ್ಚಿನ ಆದ್ಯತೆ

ರೈಲ್ವೆ ನಿಲ್ದಾಣದಲ್ಲಿ ಸ್ವಚ್ಛತೆಗೆ ಹೆಚ್ಚಿನ ಆದ್ಯತೆ ನೀಡಬೇಕು ಶೌಚಾಲಯಗಳು ಸ್ವಚ್ಚವಾಗಿರಬೇಕು, ಕುಡಿಯುವ ನೀರಿನ ಸೌಲಭ್ಯ ಒದಗಿಸಲು ಕ್ರಮ ಕೈಗೊಳ್ಳಲು ಅಧಿಕಾರಿಗಳಿಗೆ ಸೂಚಿಸಿದರು. ರೈಲ್ವೆ ನಿಲ್ದಾಣದಲ್ಲಿ ಹೆಲ್ಪ್ ಡೆಸ್ಕ್, ಭಕ್ತಾದಿಗಳು ದೇವಿ ದರ್ಶನಕ್ಕೆ ರೂ.300, 1000 ರೂಗಳ ಟಿಕೆಟ್ ಪಡೆಯಲು ಪ್ರತ್ಯೇಕ ಕೌಂಟರ್‌ ಇರುತ್ತದೆ ಎಂದು ತಿಳಿಸಿದರು.

ಇದೇ ಸಂದರ್ಭದಲ್ಲಿ ಜಾತ್ರಾ ಮಹೋತ್ಸವಕ್ಕೆ ಸಂಬಂಧಿಸಿದಂತೆ ಉಚಿತ ವೈಫೈ ಪೋಸ್ಟ್‌ರ್ ಬಿಡುಗಡೆ ಮಾಡಿ ಮಾತನಾಡಿದ ಅವರು ಹಾಸನಾಂಬಾ ದೇವಿ ದರ್ಶನಕ್ಕೆ ಆಗಮಿಸುವ ಭಕ್ತಾದಿಗಳಿಗೆ ಹೆಚ್ಚಿನ ಜನಸಂದಣಿಯಿಂದ ಇಂಟರ್ನೆಟ್ ಸಮಸ್ಯೆ ಎದುರಾಗುವುದರಿಂದ ಸಾರ್ವಜನಿಕರಿಗೆ ಅನುಕೂಲವಾಗುವಂತೆ ಸಂಸದರ ಅನುದಾನದಲ್ಲಿ ಉಚಿತ ವೈಫೈ ಸೌಲಭ್ಯವನ್ನು ಅ.29 ರಿಂದ ನ.11ರವರೆಗೆ ಕಲ್ಪಿಸಲಾಗುತ್ತಿದೆ ಎಂದು ತಿಳಿಸಿದರು.

ಜಿಲ್ಲಾಧಿಕಾರಿ ಲತಾ ಕುಮಾರಿ, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಶುಭನ್ವಿತಾ,ಅಪರ ಜಿಲ್ಲಾಧಿಕಾರಿ ಕೃಷ್ಣಮೂರ್ತಿ, ರೈಲ್ವೆ ಇಲಾಖೆ ಅಸಿಸ್ಟೆಂಟ್ ಮ್ಯಾನೇಜರ್ ರಮೇಶ್, ಚಂದ್ರೇಗೌಡ ಮತ್ತಿತರರು ಉಪಸ್ಥಿತರಿದ್ದರು.