Asianet Suvarna News

ಪಂದ್ಯಕ್ಕೂ ಮುನ್ನ ಅಭ್ಯಾಸದಲ್ಲಿದ್ದ ಫುಟ್ಬಾಲರ್ ಮೇಲೆ ಹರಿದ ರೋಲರ್, ಅಪಘಾತ ದೃಶ್ಯ ಲೈವ್

Chethan Kumar — Sun, 20 Sep 2026 16:46:18 +0530

ಪಟ್ಟಾನಿ (ಸೆ.20) ಥಾಯ್ ಲೀಗ್ ಫುಟ್ಬಾಲ್ ಟೂರ್ನಿಯ ಪಂದ್ಯಕ್ಕೆ ಕೌಂಟ್‌ಡೌನ್ ಆರಂಭಗೊಂಡಿತ್ತು. ಕ್ರೀಡಾಂಗಣದಲ್ಲಿ ಪ್ರೇಕ್ಷಕರು ಕಿಕ್ಕಿರಿದು ತುಂಬಿದ್ದರು. ಪಂದ್ಯಕ್ಕೆ ಆರಂಭಕ್ಕೆ ಕೆಲವೇ ಕ್ಷಣಗಳು ಮಾತ್ರ ಬಾಕಿ ಇತ್ತು. ಮೈದಾನದಲ್ಲಿ ಉಭಯ ತಂಡದ ಫುಟ್ಬಾಲ್ ಪಟುಗಳು ಅಭ್ಯಾಸ ನಡೆಸುತ್ತಿದ್ದರು. ಲೈಟ್ ವಾರ್ಮ್ಅಪ್ ಮಾಡಿ ಪಂದ್ಯಕ್ಕೆ ರೆಡಿಯಾಗುತ್ತಿದ್ದರು. ಇತ್ತ ಸಿಬ್ಬಂದಿಗಳು ಪಿಚ್ ರೋಲರ್ ಸೇರಿದಂತೆ ಇತರ ಸಲಕರಣೆಗಳ ಮೂಲಕ ಅಂತಿಮ ಹಂತದ ತಯಾರಿ ನಡೆಸುತ್ತಿದ್ದರು. ಹೀಗೆ ಅಭ್ಯಾಸ ನಡೆಸುತ್ತಿದ್ದ ಇಂಗ್ಲೆಂಡ್ ಮಾಜಿ ಫುಟ್ಬಾಲ್ ಪಟು, ಪಿಟಿ ಪ್ರಚೌಪ್ ತಂಡದ ಕೀ ಪ್ಲೇಯರ್ ವಿಂಗರ್ ಆ್ಯಂಡ್ರೂಸ್ ಟೌನ್‌ಸೆಂಡ್ ಮೇಲೆ ಹರಿದ ಘಟನೆ ನಡೆದಿದೆ. ಪಂದ್ಯ ಲೈವ್ ಆರಂಭಗೊಂಡ ಕೆಲವೇ ಕ್ಷಣಗಳಲ್ಲಿ ಈ ಘಟನೆ ನಡೆದಿದೆ.

ಹಿಂದಿನಿಂದ ಆಗಮಿಸಿದ ಪಿಚ್ ರೋಲರ್

ಪಟ್ಟಾನಿ ಎಫ್‌ಸಿ ವಿರುದ್ಧದ ಲೀಗ್ ಪಂದ್ಯಕ್ಕಾಗಿ ವಿಂಗರ್ ಆ್ಯಂಡ್ರೂಸ್ ವಾರ್ಮ್ಅಪ್ ನಡೆಸುತ್ತಿದ್ದ ವೇಳೆ ಈ ಘಟನೆ ನಡೆದಿದೆ. ಕೆಲವೇ ಕ್ಷಣಗಳಲ್ಲಿ ಪಂದ್ಯ ಆರಂಭಗೊಳ್ಳುತ್ತಿತ್ತು. ಆಟಗಾರರು ಮೈದಾನದಲ್ಲಿ ವಾರ್ಮ್ಅಪ್ ಮಾಡುತ್ತಿದ್ದರು. ಆದರೆ ಸಿಬ್ಬಂದಿಗಳಿಗೆ ಪಂದ್ಯಕ್ಕೂ ಮುನ್ನ ಅಂತಿಮ ಹಂತದ ಕೆಲ ತಯಾರಿ ಮಾಡಬೇಕಿತ್ತು. ಹೀಗಾಗಿ ಪಿಚ್ ರೋಲರ್ ಮೂಲಕ ಇಡೀ ಮೈದಾನ ಸಜ್ದುಗೊಳಿಸುವ ಕಾರ್ಯವೂ ನಡೆಯುತ್ತಿತ್ತು. ವಿಂಗರ್ ಆ್ಯಂಡ್ರೂಸ್ ವಾರ್ಮ್ಅಪ್ ಮಾಡುತ್ತಿದ್ದಂತೆ ಹಿಂದಿನಿಂದ ಪಿಚ್ ರೋಲರ್ ಆಗಮಿಸಿದೆ.

ಅರ್ಧ ಭಾಗಕ್ಕೆ ಹರಿದ ಪಿಚ್ ರೋಲರ್

ಪಿಚ್ ರೋಲರ್ ಸಿಬ್ಬಂದಿ ತನ್ನ ಪಾಡಿಗೆ ರೋಲರ್ ಕೆಲಸ ಮಾಡುತ್ತಿದ್ದ. ಆದರೆ ಫುಟ್ಬಾಲರ್ ನಡುವೆ ಪಿಚ್ ರೋಲರ್ ವಾಹನ ಕೊಂಡೊಯ್ಯುವಾಗ ಎಚ್ಚರವಹಿಸಬೇಕಿತ್ತು. ಪಿಚ್ ರೋಲರ್ ಅಡಿಗೆ ಕಾಲು ಸಿಲುಕಿದ ಕಾರಣ ವಿಂಗರ್ ಆ್ಯಂಡ್ರೂಸ್ ಮೈದಾನಕ್ಕೆ ಬಿದ್ದಿದ್ದಾರೆ. ಅಷ್ಟರಲ್ಲೇ ಅರ್ಧ ಭಾಗಕ್ಕೆ ಪಿಚ್ ರೋಲರ್ ಹರಿದಿದೆ. ಇತ್ತ ಪ್ರೇಕ್ಷಕರು ಚೀರಾಡಿದ್ದಾರೆ. ತಂಡದ ಆಟಗಾರರು ಓಡೋಡಿ ಬಂದಿದ್ದಾರೆ. ಪಿಚ್ ರೋಲರ್ ವಾಹನ ಸಿಬ್ಬಂದಿ ತಕ್ಷಣವೇ ವಾಹನದಿಂದ ಕೆಳಕ್ಕೆ ಇಳಿದಿದ್ದಾರೆ.

ಕಾಲು ಸೇರಿದಂತೆ ಸಣ್ಣ ಗಾಯ, ಪ್ರಾಣಾಪಾಯದಿಂದ ಪಾರು

ಪಿಚ್ ರೋಲರ್ ವಿಂಗರ್‌ನ ಕಾಲು ಸೇರಿದಂತೆ ಅರ್ಧ ಭಾಗಕ್ಕೆ ಹರಿದಿದೆ. ಅಷ್ಟರಲ್ಲೇ ಇತರರು ಆಗಮಿಸಿ ವಿಂಗರ್ ಆ್ಯಂಡ್ರೂಸ್‌ನ ರಕ್ಷಿಸಿದ್ದಾರೆ. ಕಾರಿನ ಮೇಲಿನಿಂದ ಹರಿದ ಕಾರು ಕಾಲು, ಮೊಣಕಾಲುಗಳಲ್ಲಿ ಗಾಯಗಳಾಗಿದೆ. ಚುರ್ತು ಚಿಕಿತ್ಸೆ ನೀಡಲಾಗಿದೆ. ಬಳಿಕ ವಿಶ್ರಾಂತಿಗೆ ಸೂಚಿಸಿದ್ದಾರೆ. ಆದರೆ ವಿಂಗರ್ ಆ್ಯಂಡ್ರೂಸ್ ವಿಶ್ರಾಂತಿ ಪಡೆಯಲು ನಿರಾಕರಿಸಿದ್ದಾರೆ. ಈ ಪಂದ್ಯದಲ್ಲೇ ಆಡುವುದಾಗಿ ಹೇಳಿದ್ದಾರೆ.

ಸಬ್ಸಿಟಿಟ್ಯೂಟ್ ಆಗಿ ವಿಂಗರ್ ಆ್ಯಂಡ್ರೂಸ್ 93ನೇ ನಿಮಿಷದಲ್ಲಿ ಮೈದಾನಕ್ಕಿಳಿದು ಅಚ್ಚರಿ ಮೂಡಿಸಿದ್ದರು. ಈ ವೇಳೆ ನೆರೆದಿದ್ದ ಪ್ರೇಕ್ಷಕರು ಅದ್ಭುತ ಪ್ರೋತ್ಸಾಹ ನೀಡಿದ್ದಾರೆ. ಈ ಪಂದ್ಯದಲ್ಲಿ ವಿಂಗರ್ ಆ್ಯಂಡ್ರೂಸ್ ತಂಡ ಪಿಟಿ ಪ್ರಚೌಪ್ 3-0 ಅಂತರದಲ್ಲಿ ಪಂದ್ಯ ಗೆದ್ದುಕೊಂಡಿತು.

| Unfortunate scenes for Andros Townsend as he suffered an accident during the warm-up before PT Prachuap’s clash with Pattani. pic.twitter.com/M4wxxsqMTG

— CentreGoals. (@centregoals) September 19, 2026

ಲಿಯೋನೆಲ್ ಮೆಸ್ಸಿ ಯುಗಾಂತ್ಯ: 2016ರಲ್ಲಿ ನಿವೃತ್ತಿ ಘೋಷಿಸಿ ಬಳಿಕ ಹಿಂಪಡೆದಿದ್ದೇಕೆ ಫುಟ್ಬಾಲ್ ಲೆಜೆಂಡ್?

Kannadaprabha News — Tue, 01 Sep 2026 11:03:14 +0530

ಬ್ಯೂನಸ್‌ ಐರಿಸ್‌(ಅರ್ಜೆಂಟೀನಾ): ವಿಶ್ವದ ಸಾರ್ವಕಾಲಿಕ ಶ್ರೇಷ್ಠ ಫುಟ್ಬಾಲ್‌ ಆಟಗಾರರಲ್ಲಿ ಓರ್ವರಾಗಿದ್ದ, ಅರ್ಜೆಂಟೀನಾದ ಮಾಂತ್ರಿಕ ಫುಟ್ಬಾಲಿಗ ಲಿಯೋನಲ್‌ ಮೆಸ್ಸಿ ತಮ್ಮ ಅಂತಾರಾಷ್ಟ್ರೀಯ ಫುಟ್ಬಾಲ್‌ ವೃತ್ತಿಬದುಕಿಗೆ ತೆರೆ ಎಳೆದಿದ್ದಾರೆ. ಇತ್ತೀಚೆಗಷ್ಟೇ ಫಿಫಾ ವಿಶ್ವಕಪ್‌ ಫೈನಲ್‌ನಲ್ಲಿ ಸೋತು ಕಣ್ಣೀರಿಟ್ಟಿದ್ದ 39 ವರ್ಷದ ಮೆಸ್ಸಿ, ಸೋಮವಾರ ಇನ್‌ಸ್ಟಾಗ್ರಾಂನಲ್ಲಿ ಭಾವನಾತ್ಮಕ ಪತ್ರವನ್ನು ಹಂಚಿಕೊಳ್ಳುವ ಮೂಲಕ ತಮ್ಮ ನಿವೃತ್ತಿ ನಿರ್ಧಾರ ಪ್ರಕಟಿಸಿದ್ದಾರೆ.

ಈ ಬಗ್ಗೆ ತಾವು ಕೈಯಾರೆ ಬರೆದ ನಿವೃತ್ತಿ ಪತ್ರದ ಫೋಟೋವನ್ನು ಅವರು ಇನ್‌ಸ್ಟಾಗ್ರಾಂನಲ್ಲಿ ಶೇರ್‌ ಮಾಡಿದ್ದಾರೆ. ‘ನಾನು ರಾಷ್ಟ್ರೀಯ ತಂಡದಿಂದ ನಿವೃತ್ತಿ ಹೊಂದುತ್ತಿದ್ದೇನೆ. ಇದು ನನ್ನ ಮನಸ್ಸಿಗೆ ನೋವುಂಟು ಮಾಡುತ್ತಿರುವ ನಿರ್ಧಾರ. ಆದರೆ ಇದು ಸರಿಯಾದ ಸಮಯ ಎಂದು ನಾನು ಅರ್ಥಮಾಡಿಕೊಂಡಿದ್ದೇನೆ. ಈವರೆಗೂ ಫುಟ್ಬಾಲ್‌ಗಾಗಿ ನಾನು ಎಲ್ಲವನ್ನೂ ಕೊಟ್ಟಿದ್ದೇನೆ. ಅದು ನನ್ನ ತಂಡ ಗೆದ್ದಾಗ ಮಾತ್ರವಲ್ಲ, ಅದಕ್ಕೂ ಮೊದಲು ಕೂಡಾ. ಫುಟ್ಬಾಲ್‌ ಮೂಲಕ ನಿಮ್ಮಲ್ಲಿ ಸಂತೋಷ ತರಲು, ಅರ್ಜೆಂಟೀನಿಯನ್‌ ಆಗಿರುವುದರ ಬಗ್ಗೆ ಹೆಮ್ಮೆಪಡುವಂತೆ ಮಾಡಲು ನಾನು ಯಾವಾಗಲೂ ಹೋರಾಡಿದ್ದೇನೆ, ನನ್ನಿಂದಾಗುವ ಎಲ್ಲವನ್ನೂ ಕೊಟ್ಟಿದ್ದೇನೆ’ ಎಂದಿದ್ದಾರೆ.

ಮೆಸ್ಸಿ 2005ರಲ್ಲಿ ಅಂತಾರಾಷ್ಟ್ರೀಯ ಫುಟ್ಬಾಲ್‌ಗೆ ಕಾಲಿಟ್ಟಿದ್ದು, ಇತ್ತೀಚೆಗೆ ಫಿಫಾ ವಿಶ್ವಕಪ್‌ ಫೈನಲ್‌ವರೆಗೂ ತಂಡವನ್ನು ಪ್ರತಿನಿಧಿಸಿದ್ದಾರೆ. 207 ಪಂದ್ಯಗಳನ್ನಾಡಿರುವ ಅವರು 125 ಗೋಲು ಬಾರಿಸಿದ್ದು, ಇದು ವಿಶ್ವದಲ್ಲೇ 2ನೇ ಗರಿಷ್ಠ. ಪೋರ್ಚುಗಲ್‌ನ ಕ್ರಿಸ್ಟಿಯಾನೊ ರೊನಾಲ್ಡೊ 146 ಗೋಲುಗಳೊಂದಿಗೆ ಸಾರ್ವಕಾಲಿಕ ಗರಿಷ್ಠ ಗೋಲು ಸರದಾರ ಎನಿಸಿಕೊಂಡಿದ್ದಾರೆ.

ಸದ್ಯ ಮೆಸ್ಸಿ ಅಂತಾರಾಷ್ಟ್ರೀಯ ಫುಟ್ಬಾಲ್‌ಗೆ ನಿವೃತ್ತಿ ಪ್ರಕಟಿಸಿದ್ದರೂ, ಕ್ಲಬ್‌ಗಳಲ್ಲಿ ಆಟ ಮುಂದುವರಿಸುವ ನಿರೀಕ್ಷೆಯಿದೆ. ಬಾರ್ಸಿಲೋನಾ ಮೂಲಕ ವಿಶ್ವದೆಲ್ಲೆಡೆ ಖ್ಯಾತಿ ಗಳಿಸಿದ್ದ ಅವರು ಈಗ ಅಮೆರಿಕದ ಇಂಟರ್‌ ಮಿಯಾಮಿ ತಂಡದ ಪರ ಆಡುತ್ತಿದ್ದಾರೆ.

ಜೂ.21ಕ್ಕೇ ನಿವೃತ್ತಿ ಪತ್ರ: ತಂದೆ ಆರೋಗ್ಯ ಕಾರಣ 2 ತಿಂಗಳ ಬಳಿಕ ಪ್ರಕಟ!

ಮೆಸ್ಸಿ ತಮ್ಮ ನಿವೃತ್ತಿ ಪತ್ರವನ್ನು ಜೂ.21ರಂದೇ ಬರೆದಿದ್ದರು. ಈ ಬಗ್ಗೆ ಸ್ವತಃ ಅವರೇ ಮಾಹಿತಿ ನೀಡಿದ್ದಾರೆ. ವಿಶ್ವಕಪ್‌ ಸೋಲಿನ 2 ದಿನಗಳ ಬಳಿಕವೇ ಈ ಪತ್ರ ಬರೆದಿದ್ದೇನೆ ಎಂದಿದ್ದಾರೆ. ಆದರೆ ತಮ್ಮ ತಂದೆಯ ಆರೋಗ್ಯ ಸಮಸ್ಯೆ ಕಾರಣಕ್ಕೆ ಪತ್ರವನ್ನು ಬಹಿರಂಗಪಡಿಸಿರಲಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಮೆಸ್ಸಿ ಅವರ ತಂದೆ ಜೊರ್ಜ್ ಮೆಸ್ಸಿ ಆ.8ರಂದು ನಿಧನರಾಗಿದ್ದಾರೆ.

ಮೆಸ್ಸಿ ಪ್ರಮುಖ ದಾಖಲೆಗಳು

- 207 ಪಂದ್ಯ: ಅರ್ಜೆಂಟೀನಾ ಪರ ಗರಿಷ್ಠ ಪಂದ್ಯವಾಡಿದ ಆಟಗಾರ.

- 125 ಗೋಲು: ಅರ್ಜೆಂಟೀನಾದ ಸಾರ್ವಕಾಲಿಕ ಗರಿಷ್ಠ ಗೋಲು ಸರದಾರ.

- 34 ಪಂದ್ಯ: ಫಿಫಾ ವಿಶ್ವಕಪ್‌ನಲ್ಲಿ ಅತಿ ಹೆಚ್ಚು ಪಂದ್ಯವಾಡಿದ ಆಟಗಾರ.

- 21 ಗೋಲು: ಫಿಫಾ ವಿಶ್ವಕಪ್‌ನಲ್ಲಿ 2ನೇ ಗರಿಷ್ಠ ಗೋಲಿನ ದಾಖಲೆ.

- 05 ವಿಶ್ವಕಪ್‌: 5 ವಿಶ್ವಕಪ್‌ ಅವೃತ್ತಿಗಳಲ್ಲಿ ಗೋಲು ಬಾರಿಸಿದ ವಿಶ್ವದ ಮೊದಲಿಗ.

ನೇಯ್ಮರ್‌, ಮೆಸ್ಸಿಯ ಬಳಿಕ ಇನ್ನು ರೊನಾಲ್ಡೋ ಸರದಿ?

ಈ ಯುಗದ ಶ್ರೇಷ್ಠ ಫುಟ್ಬಾಲಿಗರ ಪಟ್ಟಿಯಲ್ಲಿ ಮೆಸ್ಸಿ, ರೊನಾಲ್ಡೊ, ನೇಯ್ಮರ್‌ ಹೆಸರು ಮುಂಚೂಣಿಯಲ್ಲಿವೆ. ಆದರೆ ಬ್ರೆಜಿಲ್‌ನ ತಾರಾ ಸ್ಟ್ರೈಕರ್‌ ನೇಯ್ಮರ್‌ ಇತ್ತೀಚೆಗೆ ವಿಶ್ವಕಪ್‌ ಬಳಿಕ ಅಂತಾರಾಷ್ಟ್ರೀಯ ಫುಟ್ಬಾಲ್‌ಗೆ ವಿದಾಯ ಪ್ರಕಟಿಸಿದ್ದಾರೆ. ಈಗ ಮೆಸ್ಸಿ ಕೂಡಾ ರಾಷ್ಟ್ರೀಯ ತಂಡದಿಂದ ನಿವೃತ್ತಿಯಾಗಿದ್ದಾರೆ. 41 ವರ್ಷದ ರೊನಾಲ್ಡೊ ಕೂಡಾ ಶೀಘ್ರದಲ್ಲೇ ತಮ್ಮ ಅಂತಾರಾಷ್ಟ್ರೀಯ ವೃತ್ತಿಬದುಕಿಗೆ ತೆರೆ ಎಳೆಯುವ ಸಾಧ್ಯತೆಯೂ ಇದೆ.

2016ರಲ್ಲಿ ನಿವೃತ್ತಿ ಘೋಷಿಸಿ ಬಳಿಕ ಹಿಂಪಡೆದಿದ್ದರು ಮೆಸ್ಸಿ

ಮೆಸ್ಸಿ ಅಂತಾರಾಷ್ಟ್ರೀಯ ಫುಟ್ಬಾಲ್‌ಗೆ ನಿವೃತ್ತಿ ಘೋಷಿಸುವುದು ಇದು ಮೊದಲೇನಲ್ಲ. ಈ ಹಿಂದೆ ಕೋಪಾ ಅಮೆರಿಕ ಫೈನಲ್‌ ಸೋಲಿನ ಬಳಿಕ ನಿವೃತ್ತಿ ಪ್ರಕಟಿಸಿದ್ದರು. ಆದರೆ ಕೆಲ ಸಮಯದ ಬಳಿಕ ನಿವೃತ್ತಿ ನಿರ್ಧಾರವನ್ನು ಹಿಂಪಡೆದಿದ್ದರು.

ಆಸ್ಟ್ರೇಲಿಯಾದಲ್ಲಿ ಸನಾತನ ಧರ್ಮದ ಪವರ್: 12ರ ಬಾಲಕನ ಮುಂದೆ ಮಂಡಿಯೂರಿದ ಫುಟ್ಬಾಲ್ ಮಂಡಳಿ

Suchethana D — Fri, 11 Sep 2026 14:32:25 +0530

ಆಟಕ್ಕಿಂತ ಧರ್ಮವೇ ಮುಖ್ಯ ಎಂದ 12 ವರ್ಷದ ಬಾಲಕ, ತುಳಸಿಮಾಲೆಯನ್ನು ತೆಗೆಯಲು ನಿರಾಕರಿಸಿ ಫುಟ್ಬಾಲ್ಪಂದ್ಯದಿಂದ ಹೊರಕ್ಕೆ ಬಂದಿರುವ ಘಟನೆ ಭಾರಿ ಸದ್ದು ಮಾಡುತ್ತಿದೆ. ಆದರೆ ಕೊನೆಗೆ ನಡೆದ ಘಟನೆ ಇನ್ನೂ ರೋಚಕವಾಗಿದೆ. ಇದು ನಡೆದಿರುವುದು, ಆಸ್ಟ್ರೇಲಿಯಾದ ಬ್ರಿಸ್ಬೇನ್‌ನಲ್ಲಿ. ಆಸ್ಟ್ರೇಲಿಯಾದ ನಿವಾಸಿ ಭಾರತ ಮೂಲದ 12 ವರ್ಷದ ಬಾಲಕ ಶುಭ್ ಪಟೇಲ್ ಫುಟ್ಬಾಲ್ ಆಟಗಾರ. ಈತ ಈ ಪಂದ್ಯಕ್ಕೆ ಬರಲು ಸಾಕಷ್ಟು ಶ್ರಮವಹಿಸಿದ್ದ. ಕೊನೆಗೂ ಸೆಲೆಕ್ಟ್ ಆಗಿದ್ದ. ಆತನ ಆಸೆ ಇನ್ನೇನು ಈಡೇರುವುದರಲ್ಲಿ ಇತ್ತು. ಆದರೆ, ಆ ಸಮಯದಲ್ಲಿ ಆತನ ಕೊರಳಿನಲ್ಲಿ ಇದ್ದ ತುಳಸಿ ಮಾಲೆ ತೆಗೆಯಲು ಹೇಳಲಾಯಿತು. ಇದು ಆಟಕ್ಕೆ ಸೂಕ್ತವಲ್ಲ ಎಂದು ಮಂಡಳಿ ಆದೇಶಿಸಿತು.

ಆದರೆ ಬಾಲಕ ಇದನ್ನು ಸುತರಾಂ ಒಪ್ಪಲಿಲ್ಲ. ಟೂವಾಂಗ್ ಸಾಕರ್ ಕ್ಲಬ್‌ನ ಶುಭ್ ಪಟೇಲ್, ನಾನು ಐದು ವರ್ಷದಿಂದಲೂ ಇದನ್ನು ಧರಿಸುತ್ತಿದ್ದೇನೆ. ಇದಾಗಲೇ ಇದನ್ನು ಧರಿಸಿ 15 ಪಂದ್ಯಗಳನ್ನು ಆಡಿದ್ದೇನೆ. ಈ ಹಿಂದೆ ಯಾವುದೇ ತರಬೇತುದಾರ ಅಥವಾ ತಂಡದ ಸಹ ಆಟಗಾರ ಅದನ್ನು ತೆಗೆದುಹಾಕಲು ಕೇಳಿರಲಿಲ್ಲ. ಈಗ ತೆಗೆಯಲೇ ಬೇಕು ಎಂದು ಆಟಕ್ಕಿಂತ ನನ್ನ ಧರ್ಮವೇ ಮುಖ್ಯ. ನಾನು ನನ್ನ ಧರ್ಮವನ್ನು ಅನುಸರಿಸಲು ಬಯಸುತ್ತೇನೆ.ಏಕೆಂದರೆ ಇದು ನನಗೆ ಕೇವಲ ಒಂದು ಪರಿಕರವಲ್ಲ. ಸ್ವಾಮಿನಾರಾಯಣ ಸಂಪ್ರದಾಯವನ್ನು ಅನುಸರಿಸುವ ನನಗೆ ಧರ್ಮಕ್ಕಿಂತ ಮುಖ್ಯವಾದದ್ದು ಮತ್ತೊಂದಿಲ್ಲ ಎಂದು ಪಂದ್ಯವನ್ನೇ ರಿಜೆಕ್ಟ್ ಮಾಡಿ ಬಂದು ಬಿಟ್ಟ!

ಕ್ಷಮೆಯಾಚಿಸಿದ ಮಂಡಳಿ

ಶುಭ್ ಆಟವಾಡದೇ ಇರಲು ನಿರ್ಧರಿಸಿ ಪಕ್ಕದಲ್ಲೇ ಬಂದು ಕುಳಿತ. ತಂಡದ ಸದಸ್ಯರು ಪಂದ್ಯವನ್ನು ಮುಂದುವರಿಸಿದರು. ಆದರೆ ಈ ಮಾತು ಬಹಳ ವೇಗದಲ್ಲಿ ಫುಟ್ಬಾಲ್ ಮಂಡಳಿಯನ್ನು ತಲುಪಿತು. ಆಮೇಲೆ ಆದದ್ದು ರೋಚಕ. ಫುಟ್‌ಬಾಲ್ ಮತ್ತು ಫುಟ್ಸಲ್‌ನ ಆಡಳಿತ ಮಂಡಳಿಯಾದ ಫುಟ್‌ಬಾಲ್ ಕ್ವೀನ್ಸ್‌ಲ್ಯಾಂಡ್ ತನಿಖೆಯನ್ನು ಪ್ರಾರಂಭಿಸಿತು. ಬಳಿಕ ತನ್ನಿಂದ ತಪ್ಪಾಗಿದೆ ಎಂದು ಶುಭ್ ಮತ್ತು ಅವರ ಕುಟುಂಬದವರಲ್ಲಿ ಕ್ಷಮೆಯಾಚಿಸಿತು. ಕ್ವೀನ್ಸ್‌ಲ್ಯಾಂಡ್‌ನಲ್ಲಿ ಫುಟ್‌ಬಾಲ್ ವಿವಿಧ ಸಂಸ್ಕೃತಿಗಳು ಮತ್ತು ಧರ್ಮಗಳ ಜನರನ್ನು ಗೌರವಿಸುವ ಒಂದು ಒಳಗೊಳ್ಳುವ ಕ್ರೀಡೆಯಾಗಬೇಕೆಂದು ಹೇಳಿದ ಸಂಸ್ಥೆ, ಶುಭ್‌ಗೆ ಧಾರ್ಮಿಕ ಹಾರವನ್ನು ಧರಿಸಿ ಆಡಲು ಅವಕಾಶ ನೀಡಿತು.

ನಿಜಕ್ಕೂ ಮಾಲೆ ನಿಷೇಧಿಸಲಾಗಿದೆಯೇ?

ಇಲ್ಲಿಯೇ ಕಥೆ ಹೆಚ್ಚು ಜಟಿಲವಾಯಿತು. ಫಿಫಾದ ಆಟದ ನಿಯಮಗಳ 4 ನೇ ನಿಯಮವು ಸುರಕ್ಷತಾ ಕಾರಣಗಳಿಗಾಗಿ ಪಂದ್ಯಗಳ ಸಮಯದಲ್ಲಿ ಹಾರಗಳು, ಉಂಗುರಗಳು ಮತ್ತು ಬಳೆಗಳಂತಹ ಆಭರಣಗಳನ್ನು ಧರಿಸುವುದನ್ನು ನಿಷೇಧಿಸುತ್ತದೆ. ಅಂದರೆ ರೆಫರಿಯ ಸೂಚನೆಯು ಹಿಂದೂ ಧಾರ್ಮಿಕ ಚಿಹ್ನೆಗಳನ್ನು ಗುರಿಯಾಗಿರಿಸಿಕೊಂಡು ಮಾಡಿದ ನಿಯಮವಾಗಿರಲಿಲ್ಲ. ಆಭರಣಗಳ ವಿರುದ್ಧದ ವಿಶಾಲವಾದ ಕ್ರೀಡಾ ನಿಯಮವು ಶುಭ್‌ಗೆ ಮಾಲಾವನ್ನು ತೆಗೆದುಹಾಕಲು ಕೇಳಲು ಆಧಾರವಾಗಿತ್ತು.

ಆದಾಗ್ಯೂ, ಈ ಪ್ರಸಂಗವು ಕ್ರೀಡಾ ಸಂಸ್ಥೆಗಳು ಕ್ರೀಡಾಪಟುಗಳು ತಮ್ಮ ಆಳವಾದ ನಂಬಿಕೆಗಳ ಭಾಗವಾಗಿ ಗೌರವಿಸುವ ಧಾರ್ಮಿಕ ವಸ್ತುಗಳ ವಿಷಯವನ್ನು ಹೇಗೆ ಸಮೀಪಿಸಬೇಕು ಎಂಬುದರ ಸುತ್ತಲಿನ ನಿಜವಾದ ಮತ್ತು ನಿರ್ಣಾಯಕ ಚರ್ಚೆಯನ್ನು ಹುಟ್ಟುಹಾಕಿತು. ಶುಭ್‌ಗೆ, ಮಾಲೆಯನ್ನು ತೆಗೆದುಹಾಕುವ ಕ್ರಿಯೆಯು ಕೇವಲ ಸರಳ ರಿಯಾಯಿತಿಯಾಗಿರಲಿಲ್ಲ; ಬದಲಾಗಿ, ಅದು ಆತನ ವೈಯಕ್ತಿಕ ನಂಬಿಕೆ ಮತ್ತು ಆಧ್ಯಾತ್ಮಿಕ ಗುರುತಿನ ಆಳವಾದ ರಾಜಿಯಾಗಿತ್ತು. ಮತ್ತೊಂದೆಡೆ, ರೆಫರಿಯ ದೃಷ್ಟಿಕೋನದಿಂದ, ಪರಿಸ್ಥಿತಿಯನ್ನು ವಿಶಾಲವಾದ ಸುರಕ್ಷತಾ ನಿಯಮದಿಂದ ನಿಯಂತ್ರಿಸಲಾಗುತ್ತದೆ, ಇದು ಹಾರಗಳು ಮತ್ತು ಇತರ ಅಲಂಕಾರಗಳು ಸೇರಿದಂತೆ ವಿವಿಧ ರೀತಿಯ ಆಭರಣಗಳಿಗೆ ಏಕರೂಪವಾಗಿ ಅನ್ವಯಿಸುತ್ತದೆ.

ಆರಂಭದಲ್ಲಿ ಯುವ ಫುಟ್ಬಾಲ್ ಆಟಗಾರನನ್ನು ಒಳಗೊಂಡ ಸಂಕ್ಷಿಪ್ತ ಘಟನೆಯಂತೆ ಕಂಡುಬಂದಿದ್ದು, ಧಾರ್ಮಿಕ ಗುರುತಿನ ಬಹು ಆಯಾಮಗಳು, ಕ್ರೀಡಾ ನಿಯಮಗಳ ಜಾರಿ ಮತ್ತು ವಿವಾದಾತ್ಮಕವೆಂದು ವ್ಯಾಖ್ಯಾನಿಸಬಹುದಾದ ನಿರ್ಧಾರಗಳ ಹಿಂದೆ ಸಮಗ್ರ ಸಂದರ್ಭವನ್ನು ತಲುಪಿಸುವಲ್ಲಿ ಮಾಧ್ಯಮಗಳ ಜವಾಬ್ದಾರಿಯೊಂದಿಗೆ ನಿರ್ಣಾಯಕ ಪಾತ್ರದ ಬಗ್ಗೆ ಹೆಚ್ಚು ವ್ಯಾಪಕವಾದ ಸಂಭಾಷಣೆಯಾಗಿ ತ್ವರಿತವಾಗಿ ರೂಪಾಂತರಗೊಂಡಿತು. ಬಳಿಕ ಈ ಕುರಿತು ಕ್ರೀಡಾ ಮಂಡಳಿ ಇನ್ನಷ್ಟು ಚರ್ಚೆಯನ್ನು ನಡೆಸಿದೆ.

FIFA World Cup 2026 ಕನಸಿನ ಸಂಭಾವ್ಯ ತಂಡ ಪ್ರಕಟ; ರೋಡ್ರಿ ಕ್ಯಾಪ್ಟನ್, ಸ್ಪೇನ್ ಆಟಗಾರರದ್ದೇ ಪಾರುಪತ್ಯ!

Naveen Kodase — Mon, 20 Jul 2026 23:18:34 +0530

ಅರ್ಜೆಂಟೀನಾವನ್ನು ಸೋಲಿಸಿ ಸ್ಪೇನ್ ವಿಶ್ವಕಪ್ ಗೆದ್ದ ನಂತರ, ಟೂರ್ನಮೆಂಟ್‌ನ ಅತ್ಯುತ್ತಮ ಆಟಗಾರರನ್ನು ಸೇರಿಸಿ ಒಂದು ಡ್ರೀಮ್ ಟೀಮ್ ಅನ್ನು ಆಯ್ಕೆ ಮಾಡಿದರೆ, ಅದರಲ್ಲಿ ಯಾರೆಲ್ಲಾ ಇರುತ್ತಾರೆ? ಇಲ್ಲಿದೆ ಸಂಭಾವ್ಯ ತಂಡ.

ಅರ್ಜೆಂಟೀನಾವನ್ನು ಸೋಲಿಸಿ ಸ್ಪೇನ್ ವಿಶ್ವಕಪ್ ಗೆದ್ದ ನಂತರ, ಟೂರ್ನಿಯ ಅತ್ಯುತ್ತಮ ಆಟಗಾರರನ್ನು ಒಳಗೊಂಡ ಡ್ರೀಮ್ ಟೀಮ್ ಅನ್ನು ಆಯ್ಕೆ ಮಾಡಿದರೆ ಅದರಲ್ಲಿ ಯಾರೆಲ್ಲಾ ಇರುತ್ತಾರೆ? ಫಿಫಾ ಅಧಿಕೃತವಾಗಿ ಘೋಷಿಸಿಲ್ಲವಾದರೂ, ಸಂಭಾವ್ಯ ತಂಡದಲ್ಲಿ ಯಾರೆಲ್ಲಾ ಇರಬಹುದು ಎಂದು ನೋಡೋಣ.

ಲೂಯಿಸ್ ಡಿ ಲಾ ಫ್ಯೂಂಟೆ ಅವರ ಕೋಚಿಂಗ್‌ನಲ್ಲಿ ಕಣಕ್ಕಿಳಿದ ಸ್ಪೇನ್ ತಂಡದ 6 ಆಟಗಾರರು ಈ ಡ್ರೀಮ್ ಟೀಮ್‌ನಲ್ಲಿ ಸ್ಥಾನ ಪಡೆಯಲು ಅರ್ಹರಾಗಿದ್ದಾರೆ. ಇದರಲ್ಲಿ ಗೋಲ್ಡನ್ ಬಾಲ್, ಗೋಲ್ಡನ್ ಗ್ಲೋವ್ ಮತ್ತು ಬೆಸ್ಟ್ ಯಂಗ್ ಪ್ಲೇಯರ್ ಪ್ರಶಸ್ತಿ ವಿಜೇತರು ಸೇರಿದ್ದಾರೆ.

ಟೂರ್ನಿಯುದ್ದಕ್ಕೂ ಕೇವಲ ಒಂದು ಗೋಲು ಬಿಟ್ಟುಕೊಟ್ಟು 6 ಕ್ಲೀನ್ ಶೀಟ್‌ಗಳನ್ನು ಗಳಿಸಿದ ಸ್ಪೇನ್‌ನ ಗೋಡೆ ಉನೈ ಸಿಮೋನ್, ಈ ಡ್ರೀಮ್ ಟೀಮ್‌ನ ಗೋಲ್‌ಕೀಪರ್ ಆಗಿರುತ್ತಾರೆ. ಇವರು ವಿಶ್ವಕಪ್‌ನ ಗೋಲ್ಡನ್ ಗ್ಲೋವ್ ಪ್ರಶಸ್ತಿ ವಿಜೇತರು.

ರಕ್ಷಣಾ ವಿಭಾಗದಲ್ಲಿ ವಿಶ್ವ ಚಾಂಪಿಯನ್ ಸ್ಪೇನ್ ತಂಡದ ಆಟಗಾರರಾದ ಮಾರ್ಕ್ ಕುಕುರೆಲ್ಲಾ, ಪೆಡ್ರೊ ಪೊರೊ, ಅನುಭವಿ ಆಟಗಾರ ಐಮರಿಕ್ ಲಾಪೋರ್ಟೆ ಮತ್ತು ವಿಶ್ವಕಪ್‌ನ ಅತ್ಯುತ್ತಮ ಯುವ ಆಟಗಾರನಾಗಿ ಆಯ್ಕೆಯಾದ 19 ವರ್ಷದ ಪೌ ಕುಬಾರ್ಸಿ ಸ್ಥಾನ ಪಡೆಯಲಿದ್ದಾರೆ.

ತಂಡದ ಆಧಾರಸ್ತಂಭ, ಗೋಲ್ಡನ್ ಬಾಲ್ ವಿಜೇತ ಸ್ಪ್ಯಾನಿಷ್ ಮಿಡ್‌ಫೀಲ್ಡರ್ ರೋಡ್ರಿ ನಾಯಕನಾಗಿ ತಂಡವನ್ನು ಮುನ್ನಡೆಸಲಿದ್ದಾರೆ. ಟೂರ್ನಿಯುದ್ದಕ್ಕೂ 93.2% ನಿಖರತೆಯೊಂದಿಗೆ 756 ಪಾಸ್‌ಗಳನ್ನು ನೀಡಿದ ರೋಡ್ರಿ ಈ ತಂಡದ ಪ್ರಮುಖ ಸಂಘಟಕರಾಗಲಿದ್ದಾರೆ.

ಮಿಡ್‌ಫೀಲ್ಡ್‌ನಲ್ಲಿ ರೋಡ್ರಿ ಜೊತೆಗೆ ಫ್ರಾನ್ಸ್‌ನ ಕ್ರಿಯೇಟಿವ್ ಮಿಡ್‌ಫೀಲ್ಡರ್ ಮೈಕೆಲ್ ಒಲಿಸೆ (ಅತಿ ಹೆಚ್ಚು ಅಸಿಸ್ಟ್‌ಗಳು - 7) ಮತ್ತು ಇಂಗ್ಲೆಂಡ್‌ನ ಡೆಕ್ಲಾನ್ ರೈಸ್ ಇರುತ್ತಾರೆ. ಇಂಗ್ಲೆಂಡ್‌ ಪರ ವಿಶ್ವಕಪ್‌ನಲ್ಲಿ ಅತಿ ಹೆಚ್ಚು ಗೋಲು (7 ಗೋಲು) ಗಳಿಸಿ ಕಂಚಿನ ಬೂಟ್ ಗೆದ್ದ ಜೂಡ್ ಬೆಲ್ಲಿಂಗ್‌ಹ್ಯಾಮ್ ಅಟ್ಯಾಕಿಂಗ್ ಮಿಡ್‌ಫೀಲ್ಡರ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ವಿಶ್ವ ಫುಟ್ಬಾಲ್‌ನ ಇಬ್ಬರು ಅಪಾಯಕಾರಿ ಸ್ಟ್ರೈಕರ್‌ಗಳು ಈ ತಂಡದ ಫಾರ್ವರ್ಡ್ ಲೈನ್ ಅನ್ನು ಮುನ್ನಡೆಸಲಿದ್ದಾರೆ. 39ನೇ ವಯಸ್ಸಿನಲ್ಲೂ 8 ಗೋಲು ಮತ್ತು 4 ಅಸಿಸ್ಟ್‌ಗಳೊಂದಿಗೆ ಅರ್ಜೆಂಟೀನಾವನ್ನು ಫೈನಲ್‌ಗೆ ತಲುಪಿಸಿದ ದಿಗ್ಗಜ ಲಿಯೋನೆಲ್ ಮೆಸ್ಸಿ ಮತ್ತು 10 ಗೋಲುಗಳೊಂದಿಗೆ ಟೂರ್ನಿಯ ಟಾಪ್ ಸ್ಕೋರರ್ ಆಗಿ ಗೋಲ್ಡನ್ ಬೂಟ್ ಗೆದ್ದ ಫ್ರೆಂಚ್ ಸೂಪರ್‌ಸ್ಟಾರ್ ಕಿಲಿಯನ್ ಎಂಬಾಪೆ ಒಟ್ಟಿಗೆ ಆಡಿದರೆ, ಈ ಅಟ್ಯಾಕಿಂಗ್ ಲೈನ್ ಯಾವುದೇ ರಕ್ಷಣಾ ವಿಭಾಗಕ್ಕೆ ದುಸ್ವಪ್ನವಾಗಲಿದೆ.

ಉನೈ ಸಿಮೋನ್ (ಸ್ಪೇನ್); ಪೆಡ್ರೊ ಪೊರೊ (ಸ್ಪೇನ್), ಪೌ ಕುಬಾರ್ಸಿ (ಸ್ಪೇನ್), ಐಮರಿಕ್ ಲಾಪೋರ್ಟೆ (ಸ್ಪೇನ್), ಮಾರ್ಕ್ ಕುಕುರೆಲ್ಲಾ (ಸ್ಪೇನ್); ರೋಡ್ರಿ (ಸ್ಪೇನ್ - ಕ್ಯಾಪ್ಟನ್); ಮೈಕೆಲ್ ಒಲಿಸೆ (ಫ್ರಾನ್ಸ್), ಡೆಕ್ಲಾನ್ ರೈಸ್ (ಇಂಗ್ಲೆಂಡ್); ಜೂಡ್ ಬೆಲ್ಲಿಂಗ್‌ಹ್ಯಾಮ್ (ಇಂಗ್ಲೆಂಡ್); ಲಿಯೋನೆಲ್ ಮೆಸ್ಸಿ (ಅರ್ಜೆಂಟೀನಾ), ಕೈಲಿಯನ್ ಎಂಬಾಪೆ (ಫ್ರಾನ್ಸ್).

ಭಿಕ್ಷಾಟನೆಯಲ್ಲಿದ್ದ ಇಂಡಿಯಾನಾ ಮಾಜಿ ಫುಟ್ಬಾಲ್ ತಾರೆ ಬದುಕು ಬದಲಿಸಿದ ಆ ಬ್ಯಾಗ್, ಹೊಸ ಮನೆ ಕೊಡಿಸಿದ ಯೂಟ್ಯೂಬರ್!

Gowthami K — Wed, 16 Sep 2026 18:20:11 +0530

ಕೆಲವೊಮ್ಮೆ ತೀರಾ ಸಣ್ಣ ವಿಷಯಗಳೂ ಸಹ ವ್ಯಕ್ತಿಯೊಬ್ಬರ ಜೀವನದಲ್ಲಿ ಊಹಿಸಲಾಗದ ದೊಡ್ಡ ಬದಲಾವಣೆಯನ್ನು ತಂದು ಕೊಡುತ್ತದೆ. ಅಮೆರಿಕದ ಇಂಡಿಯಾನಾ ವಿಶ್ವವಿದ್ಯಾಲಯದ ಮಾಜಿ ಫುಟ್‌ಬಾಲ್ ಆಟಗಾರ ಸ್ಯಾಂಪ್ಸನ್ ಜೇಮ್ಸ್ (Sampson James) ಅವರ ಜೀವನದಲ್ಲಿ ಕೂಡ ಇದೇ ರೀತಿ ನಡೆದಿದೆ. ಸುಮಾರು ಎಂಟು ತಿಂಗಳಿನಿಂದ ನಿರಾಶ್ರಿತರಾಗಿ ಟೆಕ್ಸಾಸ್‌ನ ಆಸ್ಟಿನ್ ಬೀದಿಗಳಲ್ಲಿ ವಾಸಿಸುತ್ತಿದ್ದ ಈ ಮಾಜಿ ಕ್ರೀಡಾಪಟುವಿಗೆ, ಕೇವಲ ಒಂದು ಬ್ಯಾಗ್ ಅವರ ಕತ್ತಲೆಯಾಗಿದ್ದ ಜೀವನದಲ್ಲಿ ಹೊಸ ಭರವಸೆಯನ್ನು ಮೂಡಿಸಿದೆ.

ಆಕಸ್ಮಿಕ ಭೇಟಿ ಮತ್ತು ಹಳೆಯ ನೆನಪು

ಅಂದು ಆಸ್ಟಿನ್ ನಗರದ ರಸ್ತೆಯಲ್ಲಿ ಸಾಗುತ್ತಿದ್ದ ಇತ್ತೀಚೆಗಷ್ಟೇ ಇಂಡಿಯಾನಾ ವಿಶ್ವವಿದ್ಯಾಲಯದಿಂದ ಪದವಿ ಪಡೆದ ಜಾಸ್ಪರ್ ಸ್ಟೈನ್ಮೆಟ್ಜ್ (Jasper Steinmetz), ನಿರಾಶ್ರಿತ ವ್ಯಕ್ತಿಯೊಬ್ಬನ ಬಳಿ ಇದ್ದ ಕೆಂಪು ಬಣ್ಣದ ಐಯು ಅಥ್ಲೆಟಿಕ್ ಬ್ಯಾಗ್ ಅನ್ನು ನೋಡಿದರು. ತಮ್ಮದೇ ವಿಶ್ವವಿದ್ಯಾಲಯದ ಲೋಗೋ ಹೊಂದಿದ್ದ ಆ ಬ್ಯಾಗ್‌ ನೋಡಿ ಕುತೂಹಲಗೊಂಡ ಜಾಸ್ಪರ್, ಆ ವ್ಯಕ್ತಿಯನ್ನು ಮಾತನಾಡಿಸಲು ಮುಂದಾದರು.

ಅವರ ಮಾತುಕತೆ ವೇಳೆ ಜಾಸ್ಪರ್ ಅವರಿಗೆ ಶಾಕಿಂಗ್ ಸತ್ಯವೊಂದು ಗೊತ್ತಾಯ್ತು. ತಮ್ಮೆದುರು ನಿಂತಿದ್ದ ಆ ನಿರಾಶ್ರಿತ ವ್ಯಕ್ತಿ ಬೇರಾರೂ ಅಲ್ಲ, ಒಂದು ಕಾಲದಲ್ಲಿ ಇಂಡಿಯಾನಾ ಫುಟ್‌ಬಾಲ್ ತಂಡದ ಅಪ್ರತಿಮ ಆಟಗಾರನಾಗಿದ್ದ ಸ್ಯಾಂಪ್ಸನ್ ಜೇಮ್ಸ್ ಎಂಬುದು ಅವರಿಗೆ ತಿಳಿಯಿತು.

ತಾರಾಪಟ್ಟದಿಂದ ರಸ್ತೆಪಾಲಾಗುವವರೆಗೆ ಜೇಮ್ಸ್ ಜೀವನ

ಇಂಡಿಯಾನಾದ ಏವನ್ ಹೈಸ್ಕೂಲ್‌ನಿಂದ 'ಫೋರ್-ಸ್ಟಾರ್' ಆಟಗಾರನಾಗಿ ಹೊರಹೊಮ್ಮಿದ್ದ ಜೇಮ್ಸ್, 2019 ರಲ್ಲಿ ದೊಡ್ಡ ಕನಸುಗಳೊಂದಿಗೆ ಇಂಡಿಯಾನಾ ವಿಶ್ವವಿದ್ಯಾಲಯದ ಫುಟ್‌ಬಾಲ್ ತಂಡವನ್ನು 'ರನ್ನಿಂಗ್ ಬ್ಯಾಕ್' ಆಗಿ ಸೇರಿಕೊಂಡಿದ್ದರು. ಆದರೆ, ಕ್ರೀಡಾ ಜೀವನದ ಉತ್ತುಂಗದಲ್ಲಿದ್ದಾಗಲೇ ಅವರಿಗೆ ಎದುರಾದ ತೀವ್ರ ಸ್ವರೂಪದ ಮೊಣಕಾಲು ಗಾಯ ಅವರ ವೃತ್ತಿಜೀವನಕ್ಕೆ ಕಂಟಕವಾಯಿತು.

ಇದರ ಬೆನ್ನಲ್ಲೇ ಅವರಿಗೆ 'ಬೈಪೋಲಾರ್ ಡಿಸಾರ್ಡರ್' (Bipolar Disorder) ಎಂಬ ಮಾನಸಿಕ ಆರೋಗ್ಯ ಸಮಸ್ಯೆ ಇರುವುದು ತಿಳಿದುಬಂತು. ದೈಹಿಕ ಹಾಗೂ ಮಾನಸಿಕ ಸವಾಲುಗಳನ್ನು ತಡೆಯಲಾಗದೆ ಜೇಮ್ಸ್ 2023 ರಲ್ಲಿ ಶಿಕ್ಷಣವನ್ನು ಅರ್ಧಕ್ಕೇ ಮೊಟಕುಗೊಳಿಸುವ ಅನಿವಾರ್ಯತೆ ಎದುರಾಯ್ತು. ಮಾತ್ರವಲ್ಲ ಅವನ ಸಹೋದರ ಅವನನ್ನು ಹೂಸ್ಟನ್‌ನಲ್ಲಿನಲ್ಲಿರುವ ಮನೆಯಿಂದ ಹೊರ ಹಾಕಿದ. ಆತನ ಮಾನಸಿಕ ಆರೋಗ್ಯ ಸಮಸ್ಯೆಯಿಂದ ಕೆಲಸವೂ ಹೋಯ್ತು. ಆಶ್ರಯವಿಲ್ಲದೆ, ಕ್ರೀಡಾ ಕನಸುಗಳೆಲ್ಲ ನುಚ್ಚುನೂರಾಗಿ ಅಂತಿಮವಾಗಿ ಆಸ್ಟಿನ್ ಬೀದಿಗಳಲ್ಲಿ ನಿರಾಶ್ರಿತರಾಗಿ ಬಿಕ್ಷೆ ಬೇಡಲು ಆರಂಭಿಸಿದ್ದರು. ಎಲ್ಲವನ್ನು ಕಳೆದುಕೊಂಡ ಅವರ ಜೊತೆ ಉಳಿದಿದ್ದು ಆ ಕೆಂಪು ಬ್ಯಾಗ್ ಮಾತ್ರ.

17,000 ಡಾಲರ್ ದೇಣಿಗೆಯಿಂದ ಹೊಸ ಬದುಕು

ಜೇಮ್ಸ್ ಅವರ ದುರಂತ ಕಥೆಯನ್ನು ತಿಳಿದ ಜಾಸ್ಪರ್ ಸ್ಟೈನ್ಮೆಟ್ಜ್ ಸುಮ್ಮನೆ ಕುಳಿತುಕೊಳ್ಳಲಿಲ್ಲ. ತಮ್ಮ ವಿಶ್ವವಿದ್ಯಾಲಯದ ಹಳೆಯ ವಿದ್ಯಾರ್ಥಿಗೆ ಸಹಾಯ ಮಾಡಲು ಆನ್‌ಲೈನ್‌ನಲ್ಲಿ ನಿಧಿಸಂಗ್ರಹಣೆ ಅಭಿಯಾನವನ್ನು ಪ್ರಾರಂಭಿಸಿದರು. ಕ್ರೀಡಾಭಿಮಾನಿಗಳು ಹಾಗೂ ಸಾರ್ವಜನಿಕರಿಂದ ಅಭೂತಪೂರ್ವ ಸ್ಪಂದನೆ ದೊರೆತು, ಕೆಲವೇ ದಿನಗಳಲ್ಲಿ ಸುಮಾರು ಅಂದಾಜು ₹14 ಲಕ್ಷಕ್ಕೂ ಹೆಚ್ಚು ಹಣ ಸಂಗ್ರಹವಾಯಿತು. ಸಂಗ್ರಹವಾದ ಹಣದಿಂದ ಜಾಸ್ಪರ್ ಅವರು ಜೇಮ್ಸ್‌ಗೆ ಹೊಸ ಅಪಾರ್ಟ್‌ಮೆಂಟ್ ಬಾಡಿಗೆಗೆ ಕೊಡಿಸಿ, ಮನೆಗೆ ಅಗತ್ಯವಿದ್ದ ಎಲ್ಲಾ ವಸ್ತುಗಳನ್ನು ಖರೀದಿಸಿಕೊಟ್ಟರು. ಅವನಿಗೆ ವಾಸಿಸಲು ಒಂದು ಸ್ಥಳ ಮಾತ್ರವಲ್ಲ ಉದ್ಯೋಗ ಸಿಗುವಂತೆ ನಾವು ಸಹಾಯ ಮಾಡಲಿದ್ದೇವೆ. ಆತ ಈಗ ಚೆನ್ನಾಗಿದ್ದಾನೆ. ಪದವಿ ಇದೆ. ಅವನು ಯಾವುದೇ ದುರಾಭ್ಯಾಸಗಳನ್ನು ಕೂಡ ಹೊಂದಿಲ್ಲ ಎಂದು ಜಾಸ್ಪರ್ ತಮ್ಮ ವಿಡಿಯೋದಲ್ಲಿ ಹೇಳಿದ್ದಾರೆ. ಜೊತೆಗೆ ಜೇಮ್ಸ್ ಬಾಡಿಗೆ ಮನೆಯನ್ನು ನೋಡಿ ಅತ್ಯಂತ ಖುಷಿ ಪಟ್ಟಿದ್ದಾರೆ.

ವರ್ಷಗಳ ಕಾಲ ನಿರಾಶ್ರಿತರಾಗಿ ಭವಿಷ್ಯವೇ ಇಲ್ಲದೆ ಬಳಲುತ್ತಿದ್ದ ಸ್ಯಾಂಪ್ಸನ್ ಜೇಮ್ಸ್‌ಗೆ ಈಗ ಸ್ವಂತ ಮನೆಯಿದೆ, ಅವರನ್ನು ಪ್ರೀತಿಸುವ ಮತ್ತು ಬೆಂಬಲಿಸುವ ಜನರಿದ್ದಾರೆ. ನನ್ನ ಮೇಲೆ ನಂಬಿಕೆಯಿಟ್ಟು ಸಹಾಯ ಮಾಡಿದ ಜನರನ್ನು ನಾನು ಎಂದಿಗೂ ನಿರಾಸೆಗೊಳಿಸುವುದಿಲ್ಲ ಎಂದು ಜೇಮ್ಸ್ ಭರವಸೆಯಿಂದ ಹೇಳುತ್ತಾರೆ. ಒಂದು ಸಣ್ಣ ಬೆನ್ನಿನ ಬ್ಯಾಗ್‌ನಿಂದ ಆರಂಭವಾದ ಈ ಆಕಸ್ಮಿಕ ಸಂಭಾಷಣೆ, ಕತ್ತಲಲ್ಲಿ ಕಳೆದುಹೋಗಿದ್ದ ಜೀವನಕ್ಕೀಗ ಎರಡನೇ ಅವಕಾಶವನ್ನು ನೀಡಿದೆ.

ಫಿಫಾ ಫೈನಲ್‌ನ ಒಂದೂವರೆ ಗಂಟೆಯಲ್ಲಿ 15.92 ಕೋಟಿ ರೂ ಗಳಿಸಿದ ಮಾಜಿ ತಾರೆ ಮಿಯಾ ಖಲೀಫಾ

Chethan Kumar — Tue, 21 Jul 2026 14:59:01 +0530

ನ್ಯೂಜರ್ಸಿ (ಜು.21) ಫಿಫಾ ವಿಶ್ವಕಪ್ ಫುಟ್ಬಾಲ್ ಟೂರ್ನಿಯ ಪ್ರತಿ ಪಂದ್ಯಕ್ಕೆ ಹಲವು ಸೆಲೆಬ್ರೆಟಿಗಳು ಹಾಜರಾಗಿದ್ದಾರೆ. ಈ ಪೈಕಿ ಮಾಜಿ ನೀಲಿ ಚಿತ್ರ ತಾರೆ ಮಿಯಾ ಖಲೀಫಾ ಹಾಜರಾತಿ ಭಾರಿ ಸದ್ದು ಮಾಡಿದೆ. ಕೆಲ ಪಂದ್ಯಗಳಿಗೆ ಮಿಯಾ ಖಲೀಫಾ ಹಾಜರಾಗಿದ್ದರು. ಸ್ಪೇನ್ ಹಾಗೂ ಅರ್ಜೆಂಟೀನಾ ನಡುವಿನ ಫೈನಲ್ ಪಂದ್ಯಕ್ಕೆ ಮಿಯಾ ಖಲೀಫಾ ಹಾಜರಾಗಿದ್ದರು. ಸ್ಪೇನ್ ತಂಡದ ಜರ್ಸಿ ಧರಿಸಿ ಕ್ರೀಡಾಂಗಣಕ್ಕೆ ಆಗಮಿಸಿದ್ದ ಮಿಯಾ ಖಲೀಫಾ ಆಸೆಯಂತೆ ಸ್ಪೇನ್ ಗೆಲುವಿನ ಸಂಭ್ರಮ ಆಚರಿಸಿತ್ತು.ಸ್ಪೇನ್ ಸಿಡಿಸಿದ ಒಂದು ಗೋಲು ಮಿಯಾ ಖಲಿಫಾಗೆ 15.92 ಕೋಟಿ ರೂಪಾಯಿ ತಂದುಕೊಟ್ಟಿದೆ.

15.92 ಕೋಟಿ ರೂಪಾಯಿ ಗೆದ್ದ ಮಿಯಾ ಖಲಿಫಾ

ಮಿಯಾ ಖಲೀಫಾ ಸದ್ಯ ನೀಲಿ ಚಿತ್ರಗಳಿಂದ ದೂರವಿದ್ದಾರೆ. ಸದ್ಯ ಸೋಶಿಯಲ್ ಮೀಡಿಯಾ ಪರ್ಸನಾಲಿಟಿಯಾಗಿ ಗುರುತಿಸಿಕೊಂಡಿದ್ದಾರೆ. ವೃತ್ತಿಯಿಂದ ದೂರವಿರುವ ಮಿಯಾ ಖಲೀಫಾ ಒಂದು ಗೋಲಿನಿಂದ 15.92 ಕೋಟಿ ರೂಪಾಯಿ ಸಂಪಾದಿಸಿದ್ದು ಹೇಗೆ ಅನ್ನೋ ಪ್ರಶ್ನೆಗಳು ಕಾಡುವುದು ಸಹಜ. ಫಿಫಾ ವಿಶ್ವಕಪ್ ಫುಟ್ಬಾಲ್ ಫೈನಲ್ ಪಂದ್ಯದಲ್ಲಿ ಮಿಯಾ ಖಲೀಫಾ ಬೆಟ್ ಕಟ್ಟಿದ್ದರು. ದುಬಾರಿ ಮೊತ್ತದ ಬೆಟ್ ಕಟ್ಟಿ ಸ್ಪೇನ್ ಗೆಲುವಿನೊಂದಿಗೆ ಸಂಭ್ರಮಿಸಿದ್ದಾರೆ. ಸ್ಪೇನ್ ವಿಶ್ವಕಪ್ ಗೆಲ್ಲಲಿದೆ ಎಂದು ಬೆಟ್ಟಿಂಗ್ ಕಟ್ಟಿದ್ದ ಮಿಯಾ ಖಲಿಫಾ 15.92 ಕೋಟಿ ರೂಪಾಯಿ ಗೆದ್ದಿದ್ದಾರೆ.

ಒಂದೂವರೆ ಗಂಟೆಯಲ್ಲಿ 15.92 ಕೋಟಿ ರೂಪಾಯಿ

ಫೈನಲ್ ಪಂದ್ಯಕ್ಕೆ ಸ್ಪೇನ್ ಫುಟ್ಬಾಲ್ ಸ್ಟಾರ್ ಲ್ಯಾಮೈನ್ ಯಮಾಲ್ ಜರ್ಸಿ ಧರಿಸಿ ಕ್ರೀಡಾಂಗಣಕ್ಕೆ ಆಗಮಿಸಿದ್ದ ಮಿಯಾ ಖಲೀಫಾ, ಬೆಟ್ಟಿಂಗ್ ಆ್ಯಪ್ ಮೂಲಕ ಹಣ ಹೂಡಿಕೆ ಮಾಡಿದ್ದಾರೆ. 1 ಮಿಲಿಯನ್ ಅಮೆರಿಕನ್ ಡಾಲರ್ ಅಂದರೆ 9.65 ಕೋಟಿ ರೂಪಾಯಿ ಮೊತ್ತವನ್ನು ಸ್ಪೇನ್ ಗೆಲ್ಲಲಿದೆ ಎಂದು ಬೆಟ್ಟಿಂಗ್ ಕಟ್ಟಿದ್ದರು. ಸ್ಪೇನ್ ಗೆಲುವಿನಿಂದ ಮಿಯಾ ಖಲೀಫಾ ಹೂಡಿಕೆ ಮಾಡಿದ 9.62 ಕೋಟಿ ರೂಪಾಯಿ ಒಟ್ಟು 15.92 ಕೋಟಿ ರೂಪಾಯಿ ಆಗಿದೆ. ಒಂದೂವರೆ ಗಂಟೆಯಲ್ಲಿ ಮಿಯಾ ಖಲೀಫಾ 6.27 ಕೋಟಿ ರೂಪಾಯಿ ಲಾಭ ಮಾಡಿಕೊಂಡಿದ್ದಾರೆ.

ಭಾರಿ ಟ್ಯಾಕ್ಸ್ ಟ್ವಿಸ್ಟ್ ಕೊಟ್ಟ ಮಿಯಾ ಖಲೀಫಾ

ಮಿಯಾ ಖಲೀಫಾಗೂ ಸ್ಪೇನ್‌ಗೂ ಯಾವದೇ ಸಂಬಂಧವಿಲ್ಲ. ಆದರೂ ಸ್ಪೇನ್ ಬೆಂಬಲಿಸುತ್ತಿದ್ದೇನೆ, ಸ್ಪೇನ್ ಪರ ಬೆಟ್ಟಿಂಗ್ ಕಟ್ಟಿದ್ದೇನೆ ಎಂದು ಮಿಯಾ ಖಲೀಫಾ ಪಂದ್ಯದ ವೇಳೆ ಹೇಳಿಕೊಂಡಿದ್ದರು. ನಾನು ಸ್ಪೇನ್ ಮೂಲದವಳಲ್ಲ, ಆದರೂ ಇಡೀ ಟೂರ್ನಿಯಲ್ಲಿ ಸ್ಪೇನ್ ಬೆಂಬಲಿಸುತ್ತಿದ್ದೇನೆ ಎಂದಿದ್ದರು. ಆದರೆ ಅಮೆರಿಕ ನನ್ನ ಮೇಲೆ ಈ ಬೆಟ್ಟಿಂಗ್ ಹಣಕ್ಕೆ ದುಬಾರಿ ಮೊತ್ತ ತೆರಿಗೆ ವಿಧಿಸಲಿದೆ. ಬಳಿಕ ನನ್ನ ಮೂಲ ರಾಜ್ಯವಾಗಿರುವ ಲೆಬೆನಾನ್ ಮೇಲೆ ಬಾಂಬ್ ಹಾಕಲಿದೆ ಎಂದು ಮಿಯಾ ಖಲೀಫಾ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಫಿಫಾ ವಿಶ್ವಕಪ್ ಫೈನಲ್ ಪಂದ್ಯದ ನಿಗದಿತ ಸಮಯದಲ್ಲಿ ಯಾವುದೇ ಗೋಲು ದಾಖಲಾಗಲಿಲ್ಲ. ಅತ್ಯಂತ ರೋಚಕ ಘಟ್ಟದತ್ತ ಪಂದ್ಯ ಸಾಗಿತ್ತು. ಆದರೆ ಹೆಚ್ಚುವರಿ ಸಮಯದಲ್ಲಿ ಸ್ಪೇನ್ ತಂಡದ ಫೆರಾನ್ ಟೊರೆಸ್ ಗೋಲು ಸಿಡಿಸಿ ಸ್ಪೇನ್ ತಂಡದ ಗೆಲುವಿನಲ್ಲಿ ಪ್ರಮುಖ ರೂವಾರಿಯಾದರು. ಅರ್ಜೆಂಟೀನಾ ತಂಡ ಗೋಲು ಸಿಡಿಸಲು ಸಾಧ್ಯವಾಗಲಿಲ್ಲ. ಪರಿಣಾಮ ಸ್ಪೇನ್ ಗೆಲುವಿನ ದಡ ಸೇರಿತು.

ಫಿಫಾ ವಿಶ್ವಕಪ್ ಗೆದ್ದ ಸ್ಪೇನ್‌ಗೆ ಡಬಲ್ ಧಮಾಕ: ಫಿಫಾ ರ‍್ಯಾಂಕಿಂಗ್‌ನಲ್ಲೂ ನಂ.1, ಕುಸಿದ ಮೆಸ್ಸಿ ನೇತೃತ್ವದ ಅರ್ಜೆಂಟೀನಾ

Naveen Kodase — Mon, 20 Jul 2026 22:51:06 +0530

ಜ್ಯೂರಿಕ್: ಫಿಫಾ ವಿಶ್ವಕಪ್ ಚಾಂಪಿಯನ್ ಸ್ಪೇನ್, ಸೋಮವಾರ ಬಿಡುಗಡೆಯಾದ ಫಿಫಾ ಪುರುಷರ ಫುಟ್ಬಾಲ್ ರ‍್ಯಾಂಕಿಂಗ್‌ನಲ್ಲಿ ಮತ್ತೆ ನಂಬರ್ 1 ಸ್ಥಾನಕ್ಕೇರಿದೆ. ಫೈನಲ್‌ನಲ್ಲಿ ಹಾಲಿ ಚಾಂಪಿಯನ್ ಅರ್ಜೆಂಟೀನಾವನ್ನು ಹೆಚ್ಚುವರಿ ಸಮಯದಲ್ಲಿ 1-0 ಗೋಲುಗಳಿಂದ ಸೋಲಿಸಿ ಸ್ಪೇನ್ ತನ್ನ ಎರಡನೇ ವಿಶ್ವಕಪ್ ಕಿರೀಟವನ್ನು ಮುಡಿಗೇರಿಸಿಕೊಂಡಿತ್ತು. ಈ ಗೆಲುವಿನೊಂದಿಗೆ, ಸ್ಪೇನ್ ತಂಡ ಅರ್ಜೆಂಟೀನಾವನ್ನು ಹಿಂದಿಕ್ಕಿ ಅಗ್ರಸ್ಥಾನ ಪಡೆದಿದೆ. ಭಾನುವಾರ ನ್ಯೂಜೆರ್ಸಿಯಲ್ಲಿ ನಡೆದ ಫೈನಲ್ ಪಂದ್ಯದ ಹೆಚ್ಚುವರಿ ಸಮಯದಲ್ಲಿ ಫೆರಾನ್ ಟೊರೆಸ್ ಬಾರಿಸಿದ ಗೋಲು ಸ್ಪೇನ್‌ನ ಗೆಲುವನ್ನು ಖಚಿತಪಡಿಸಿತ್ತು.

ಎರಡನೇ ಸ್ಥಾನಕ್ಕೆ ಕುಸಿದ ಅರ್ಜೆಂಟೀನಾ

ಕಳೆದ ಜನವರಿ ನಂತರ ಇದೇ ಮೊದಲ ಬಾರಿಗೆ ಲೂಯಿಸ್ ಡಿ ಲಾ ಫ್ಯೂಯೆಂಟೆ ಅವರ ತಂಡ ರ‍್ಯಾಂಕಿಂಗ್‌ನಲ್ಲಿ ಅಗ್ರಸ್ಥಾನಕ್ಕೇರಿದೆ. ಫೈನಲ್‌ನಲ್ಲಿ ಸೋತ ಅರ್ಜೆಂಟೀನಾ ಎರಡನೇ ಸ್ಥಾನಕ್ಕೆ ಇಳಿದಿದೆ. ವಿಶ್ವಕಪ್‌ನಲ್ಲಿನ ಪ್ರದರ್ಶನದಲ್ಲಿ ಏರಿಳಿತಗಳಿದ್ದರೂ, ಫ್ರಾನ್ಸ್ ಮತ್ತು ಇಂಗ್ಲೆಂಡ್ ಕ್ರಮವಾಗಿ ಮೂರು ಮತ್ತು ನಾಲ್ಕನೇ ಸ್ಥಾನಗಳನ್ನು ಉಳಿಸಿಕೊಂಡಿವೆ. ಮೂರನೇ ಸ್ಥಾನಕ್ಕಾಗಿ ನಡೆದ ಪಂದ್ಯದಲ್ಲಿ ಥಾಮಸ್ ಟುಕೆಲ್ ಅವರ ಇಂಗ್ಲೆಂಡ್ ತಂಡವು ಫ್ರಾನ್ಸ್ ವಿರುದ್ಧ 6-4 ಗೋಲುಗಳಿಂದ ಗೆದ್ದು ನಾಲ್ಕನೇ ಸ್ಥಾನವನ್ನು ಭದ್ರಪಡಿಸಿಕೊಂಡರೆ, ಫ್ರಾನ್ಸ್ ಮೂರನೇ ಸ್ಥಾನದಲ್ಲಿ ಮುಂದುವರಿದಿದೆ.

ಬ್ರೆಜಿಲ್ ಒಂದು ಸ್ಥಾನ ಮೇಲೇರಿ ಐದನೇ ಸ್ಥಾನಕ್ಕೇರಿದೆ. ಇತ್ತ, ಮೊರಾಕ್ಕೊ ತನ್ನ ಐತಿಹಾಸಿಕ ಓಟವನ್ನು ಮುಂದುವರಿಸಿ, ಇದೇ ಮೊದಲ ಬಾರಿಗೆ ಆರನೇ ಸ್ಥಾನಕ್ಕೆ ಲಗ್ಗೆ ಇಟ್ಟಿದೆ. ವಿಶ್ವಕಪ್‌ನಲ್ಲಿನ ಅಮೋಘ ಪ್ರದರ್ಶನವೇ ಮೊರಾಕ್ಕೊಗೆ ಈ ಸ್ಥಾನ ತಂದುಕೊಟ್ಟಿದೆ. ಪ್ರೀ-ಕ್ವಾರ್ಟರ್‌ನಲ್ಲಿ ಸ್ಪೇನ್ ವಿರುದ್ಧ ಸೋತಿದ್ದ ಪೋರ್ಚುಗಲ್ ಎರಡು ಸ್ಥಾನ ಕುಸಿದು ಏಳನೇ ಸ್ಥಾನಕ್ಕೆ ತೃಪ್ತಿಪಟ್ಟಿದೆ. ಬೆಲ್ಜಿಯಂ ಎಂಟನೇ ಸ್ಥಾನಕ್ಕೇರಿದರೆ, ನೆದರ್ಲೆಂಡ್ಸ್ ಒಂಬತ್ತನೇ ಸ್ಥಾನಕ್ಕೆ ಕುಸಿದಿದೆ. ಪ್ರೀ-ಕ್ವಾರ್ಟರ್ ಹಂತ ತಲುಪಿದ್ದ ಮೆಕ್ಸಿಕೊ ನಾಲ್ಕು ಸ್ಥಾನಗಳ ಜಿಗಿತ ಕಂಡು ಟಾಪ್ 10 ಪಟ್ಟಿಗೆ ಸೇರಿಕೊಂಡಿದೆ.

19ನೇ ಸ್ಥಾನಕ್ಕೇರಿದ ನಾರ್ವೆ

ದಶಕಗಳಲ್ಲೇ ಅತ್ಯುತ್ತಮ ಪ್ರದರ್ಶನ ನೀಡಿ ಕ್ವಾರ್ಟರ್ ಫೈನಲ್ ತಲುಪಿದ್ದ ನಾರ್ವೆ, 12 ಸ್ಥಾನಗಳ ಭರ್ಜರಿ ಜಿಗಿತ ಕಂಡು 19ನೇ ಸ್ಥಾನಕ್ಕೇರಿದೆ. ಈ ಬಾರಿಯ ರ‍್ಯಾಂಕಿಂಗ್‌ ಅತಿ ದೊಡ್ಡ ಏರಿಕೆ ಕಂಡ ತಂಡ ಇದಾಗಿದೆ. ಮತ್ತೊಂದು ನಿರಾಶಾದಾಯಕ ವಿಶ್ವಕಪ್ ಅಭಿಯಾನದ ನಂತರ ಜರ್ಮನಿ ಟಾಪ್ 10ರಿಂದ ಹೊರಬಿದ್ದು 12ನೇ ಸ್ಥಾನಕ್ಕೆ ಕುಸಿದಿದೆ. ಕ್ರೊಯೇಷಿಯಾ 11ನೇ ಸ್ಥಾನದಲ್ಲಿದೆ. ಸತತ ಮೂರನೇ ಬಾರಿಗೆ ವಿಶ್ವಕಪ್‌ಗೆ ಅರ್ಹತೆ ಪಡೆಯಲು ವಿಫಲವಾದ ಇಟಲಿ 15ನೇ ಸ್ಥಾನಕ್ಕೆ ಜಾರಿದೆ.

ಕೆಳ ಕ್ರಮಾಂಕದ ರ‍್ಯಾಂಕಿಂಗ್‌ನಲ್ಲಿ, ಗ್ರೂಪ್ ಹಂತದಲ್ಲೇ ಹೊರಬಿದ್ದ ಟುನೀಶಿಯಾ 12 ಸ್ಥಾನಗಳನ್ನು ಕಳೆದುಕೊಂಡು 57ನೇ ಸ್ಥಾನಕ್ಕೆ ಕುಸಿದಿದೆ. ಪ್ರೀ-ಕ್ವಾರ್ಟರ್ ತಲುಪಿದ್ದ ಈಜಿಪ್ಟ್ ಐದು ಸ್ಥಾನ ಮೇಲೇರಿ 24ನೇ ಸ್ಥಾನ ಪಡೆದಿದೆ. ನಾಕೌಟ್ ಹಂತ ಪ್ರವೇಶಿಸಿದ್ದ ಪರಾಗ್ವೆ ಏಳು ಸ್ಥಾನಗಳ ಸುಧಾರಣೆ ಕಂಡು 34ನೇ ಸ್ಥಾನದಲ್ಲಿದೆ. ರೌಂಡ್ ಆಫ್ 32 ತಲುಪಿದ್ದ ಕೇಪ್ ವರ್ಡೆ ಮೂರು ಸ್ಥಾನ ಏರಿ 64ನೇ ಸ್ಥಾನದಲ್ಲಿದ್ದರೆ, ನಾಕೌಟ್ ಹಂತ ತಲುಪಿದ್ದ ಘಾನಾ ಎಂಟು ಸ್ಥಾನ ಮೇಲೇರಿ 65ನೇ ಸ್ಥಾನದಲ್ಲಿದೆ.

ರೋಚಕ ಪಂದ್ಯದ ನಡುವೆ ಸಿಡಿಲು ಬಡಿದು ಫುಟ್ಬಾಲ್ ಪಟು ಸಾವು, ಭೀಕರ ದೃಶ್ಯ ಮೊಬೈಲ್‌ನಲ್ಲಿ ಸೆರೆ

Chethan Kumar — Thu, 06 Aug 2026 14:30:14 +0530

ಥಾಯ್ಲೆಂಡ್ (ಆ.06) ಫುಟ್ಬಾಲ್ ಪಂದ್ಯಗಳು ಮಳೆಯಲ್ಲೂ ನಡೆಯುತ್ತದೆ. ಆದರೆ ಇದು ಅತ್ಯಂತ ಅಪಾಯಕಾರಿ ಅನ್ನೋದು ಮತ್ತೊಮ್ಮೆ ಸಾಬೀತಾಗಿದೆ. ಇದೀಗ ರೋಚಕ ಫುಟ್ಬಾಲ್ ಪಂದ್ಯ ನಡೆಯುತ್ತಿದ್ದಂತೆ ಸಿಡಿಲು ಬಡಿದು ಫುಟ್ಬಾಲ್ ಪಟು ಮೃತಪಟ್ಟ ಘಟನೆ ದಕ್ಷಿಣ ಥಾಯ್ಲೆಂಡ್‌ನಲ್ಲಿ ನಡೆದಿದೆ. ಘಟನೆಯಲ್ಲಿ 12 ಆಟಗಾರರು ಗಾಯಗೊಂಡಿದ್ದಾರೆ. ತಕ್ಷಣವೇ ಫುಟ್ಬಾಲ್ ಪಂದ್ಯ ಸ್ಥಗಿತಗೊಳಿಸಿ ಆಟಾಗಾರರನ್ನು ಆಸ್ಪತ್ರೆ ದಾಖಲಿಸಲಾಗಿದೆ.

ಗೊಲೊಕ್ FA ಕಪ್ ಪಂದ್ಯದಲ್ಲಿ ಘಟನೆ

ಥಾಯ್ಲೆಂಡ್‌ನಲ್ಲಿ ನಡೆಯುವ ಜನಪ್ರಿಯ ಗೊಲೊಕ್ FA ಕಪ್ ಟೂರ್ನಿಯಲ್ಲಿ ಈ ದುರಂತ ಸಂಭವಿಸಿದೆ. ಥಾಯಿ ಮಲೇಷಿಯನ್ ಹಾಗೂ ಅಮೆಚ್ಯೂರ್ ನಡುವಿನ ರೋಚಕ ಹೋರಾಟದ ನಡುವೆ ಸಿಡಿಲು ಬಡಿದು ಫುಟ್ಬಾಲಿಗ ಬಲಿಯಾಗಿದ್ದಾನೆ. ಫುಟ್ಬಾಲ್ ಪಂದ್ಯ ವೀಕ್ಷಿಸಲು ಅಭಿಮಾನಿಗಳು ನೆರೆದಿದ್ದರು. ಹಲವರು ಫುಟ್ಬಾಲ್ ರೋಚಕತೆಯನ್ನು ತಮ್ಮ ಮೊಬೈಲ್ ಮೂಲಕ ಸೆರೆಯುತ್ತಿದ್ದರು. ಈ ವೇಳೆ ಸಿಡಿಲು ಬಡಿದ ದುರಂತವೂ ಈ ಮೊಬೈಲ್ ಮೂಲಕ ಸೆರೆಯಾಗಿದೆ.

ಪಂದ್ಯ ರೋಚಕ ಘಟ್ಟ ತಲುಪಿತ್ತು. ಮಳೆ ತೀವ್ರಗೊಂಡಿತ್ತು. ಆದರೆ ಫುಟ್ಬಾಲ್ ಪಂದ್ಯ ಸಾಗಿತ್ತು. ಅಲ್ಲೊಂದು ಇಲ್ಲೊಂದು ಸಣ್ಣ ಪ್ರಮಾಣದ ಮಿಂಚು ಪ್ರತ್ಯಕ್ಷವಾಗಿತ್ತು. ಆದರೆ ಯಾರೂ ಗಂಭೀರವಾಗಿ ಪರಿಗಣಿಸಿರಲಿಲ್ಲ. ಕಾರಣ ಇದಕ್ಕೂ ಮೊದಲಿನ ಹಲವು ಪಂದ್ಯಗಳು ಮಳೆಯಲ್ಲೇ ನಡೆದಿತ್ತು. ಹೀಗಾಗಿ ಪಂದ್ಯ ಸ್ಥಗಿತಗೊಳಿಸುವ ನಿರ್ಧಾರ ತೆಗೆದುಕೊಂಡಿರಲಿಲ್ಲ. ಮಳೆಯಲ್ಲಿ ಪಂದ್ಯ ಸಾಗಿತ್ತು. ಉಭಯ ತಂಡದ ಆಟಗಾರರು ಗೋಲ್‌ಗಾಗಿ ಹೋರಾಟ ತೀವ್ರಗೊಳಿಸಿದ್ದರು. ಈ ವೇಳೆ ಒಂದೇ ಸಮನೆ ಸಿಡಿಲು ಬಡಿದಿದೆ.

ಆಟದ ನಡುವೆ ಸಿಡಿಲು ಬಡಿಯುವ ದೃಶ್ಯವೂ ಅಭಿಮಾನಿಗಳ ಮೊಬೈಲ್‌ನಲ್ಲಿ ಸೆರೆಯಾಗಿದೆ. ಈ ದೃಶ್ಯ ಇದೀಗ ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದೆ. ರೋಚಕ ಪಂದ್ಯದ ನಡುವೆ ದಿಢೀರ್ ಸಿಡಿಲು ಬಡಿದು ತಂಡದ ಪ್ರಮುಖ ಫುಟ್ಬಾಲ್ ಪಟು ಮೈದಾನದಲ್ಲಿ ಮೃತಪಟ್ಟಿದ್ದಾನೆ. ಇತ್ತ 12 ಆಟಗಾರರು ಗಾಯಗೊಂಡಿದ್ದಾರೆ. ಸಿಡಿಲು ಬಡಿದ ಬೆನ್ನಲ್ಲೇ ಯುವಕ ಮೈದಾನದಲ್ಲಿ ಪ್ರಾಣಬಿಟ್ಟಿದ್ದಾನೆ. ಇತರ ಫುಟ್ಬಾಲ್ ಪಟುಗಳು ತಕ್ಷಣವೇ ತೆರಳಿ ಯುವಕನ ಬದುಕಿಸುವ ಪ್ರಯತ್ನ ಮಾಡಿದ್ದಾರೆ. ಸಿಪಿಆರ್ ಮಾಡಿ ಜೀವ ಉಳಿಸಲು ಪ್ರಯತ್ನಿಸಿದ್ದಾರೆ. ಆದರೆ ಸಾಧ್ಯವಾಗಲಿಲ್ಲ. ಇತ್ತ ಹಲವರು ಗಾಯಗೊಂಡು ಮೈದಾನದಲ್ಲಿ ಕುಸಿದು ಬಿದ್ದಿದ್ದರು.

ಆ್ಯಂಬುಲೆನ್ಸ್ ಮೂಲಕ ಆಟಗಾರರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಾಗಿದೆ. ಗಾಯಗೊಂಡ ಆಟಗಾರರು ಚೇತರಿಕೆ ಕಾಣುತ್ತಿದ್ದಾರೆ. ಇತ್ತ ಪ್ರಮುಖ ಪ್ಲೇಯರ್ ದುರಂತ ಅಂತ್ಯಕಂಡಿದ್ದಾನೆ.

FIFA World Cup Final ಸೋಲಿನ ಬಳಿಕ ಅರ್ಜೆಂಟೀನಾ ಗೂಂಡಾಗಿರಿ! ಹೊಡೆದಾಟ ನಡೆಯುತ್ತಿದ್ದರೂ ಸುಮ್ಮನಿದ್ದ ಮೆಸ್ಸಿ

Kannadaprabha News — Tue, 21 Jul 2026 11:11:27 +0530

ನ್ಯೂಜೆರ್ಸೀ: ಸ್ಪೇನ್‌-ಅರ್ಜೆಂಟೀನಾ ನಡುವಿನ ಫೈನಲ್‌ ಪಂದ್ಯ ದೊಡ್ಡ ಗದ್ದಲವಿಲ್ಲದೇ ಮುಗಿದರೂ, ಪಂದ್ಯದ ಬಳಿಕ ಆಟಗಾರರು ಕಿತ್ತಾಡಿದರು. ಅದರಲ್ಲೂ ಅರ್ಜೆಂಟೀನಾ ಆಟಗಾರ ಲಿಯಾಂಡ್ರೊ ಪೆರೆಡೆಸ್‌ ಸ್ಪೇನ್‌ ಆಟಗಾರ ಎರಿಕ್‌ ಗಾರ್ಸಿಯಾ ಅವರ ಕತ್ತು ಹಿಸುಕಿದ್ದಲ್ಲದೇ, ಮತ್ತೋರ್ವ ಸ್ಪೇನ್‌ ಆಟಗಾರನ ಜೆರ್ಸಿ ಹಿಡಿದೆಳೆದು ನೆಲಕ್ಕುರುಳುವಂತೆ ಮಾಡಿದರು. ಈ ವೇಳೆ ಕೋಚ್‌ಗಳು, ಇತರ ಆಟಗಾರರು ಮಧ್ಯಪ್ರವೇಶಿಸಿ ಗಲಾಟೆ ನಿಲ್ಲಿಸದರು. ಆದರೆ ಸೋಲಿನ ಬೇಸರದಲ್ಲಿದ್ದ ಲಿಯೋನಲ್‌ ಮೆಸ್ಸಿ, ತಮ್ಮ ಪಕ್ಕದಲ್ಲೇ ಗಲಾಟೆ ನಡೆಯುತ್ತಿದ್ದರೂ ಅದನ್ನು ನಿಲ್ಲಿಸುವ ಗೋಜಿಗೆ ಹೋಗದೆ ತಮ್ಮ ಪಾಡಿಗೆ ತಾವು ನಿಂತಿದ್ದರು.

ಅರ್ಜೆಂಟೀನಾದಲ್ಲೂ ಗಲಾಟೆ

ಇನ್ನು, ಫೈನಲ್‌ ಸೋಲಿನ ಬಳಿಕ ಅರ್ಜೆಂಟೀನಾದ ಬ್ಯೂನಸ್‌ ಐರಿಸ್‌ನಲ್ಲಿ ಅಭಿಮಾನಿಗಳು ಪೊಲೀಸರ ಮೇಲೆ ಬಾಟಲಿ, ಕಲ್ಲು ಎಸೆದಿದ್ದರಿಂದ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಅಪಾರ ಪ್ರಮಾಣದಲ್ಲಿ ನೆರೆದಿದ್ದ ಪ್ರೇಕ್ಷಕರನ್ನು ಚದುರಿಸಲು ಪೊಲೀಸರು ಲಾಠಿ ಚಾರ್ಜ್‌ ಮಾಡಿ, ಅಶ್ರುವಾಯು ಸಿಡಿಸಿದರು. ಘಟನೆಗೆ ಸಂಬಂಧಿಸಿದಂತೆ 15 ಜನರನ್ನು ಪೊಲೀಸರು ಬಂಧಿಸಿದ್ದಾರೆ ಎಂದು ವರದಿಯಾಗಿದೆ.

ಮೆಸ್ಸಿಗೆ ಮಿಸ್ಸಾದ ಗೋಲ್ಡನ್‌ ಬಾಲ್‌: ಸ್ಪೇನ್‌ ವಿರುದ್ಧ ಬೆನ್ನು ತಿರುಗಿಸಿದ ಅರ್ಜೆಂಟೀನಾ!

ಪ್ರಶಸ್ತಿ ಪ್ರದಾನ ಸಮಾರಂಭದ ವೇಳೆ ಅರ್ಜೆಂಟೀನಾ ಆಟಗಾರರು ನಡೆದುಕೊಂಡ ರೀತಿ ಟೀಕೆಗೆ ಗುರಿಯಾಗಿದೆ. ಗೋಲ್ಡನ್‌ ಬಾಲ್‌ ಪ್ರಶಸ್ತಿ ರೇಸ್‌ನಲ್ಲಿ ಮೆಸ್ಸಿ ಮುಂಚೂಣಿಯಲ್ಲಿದ್ದರೂ, ಅದು ಸ್ಪೇನ್‌ ನಾಯಕ ರೋಡ್ರಿ ಪಾಲಾಯಿತು. ಆಯೋಜಕರು ರೋಡ್ರಿ ಹೆಸರು ಘೋಷಿಸಿದಾಗ ಅರ್ಜೆಂಟೀನಾ ಆಟಗಾರರು ‘ಮೆಸ್ಸಿ, ಮೆಸ್ಸಿ’ ಎಂದು ಕೂಗಿದರು. ಬಳಿಕ ಬೆಳ್ಳಿ ಪದಕ ಸ್ವೀಕರಿಸಲು ಅರ್ಜೆಂಟೀನಾ ಆಟಗಾರರು ವೇದಿಕೆಯತ್ತ ತೆರಳುವಾಗ ಅವರಿಗೆ ಗೌರವ ಸೂಚಕವಾಗಿ ಎರಡು ಕಡೆಯಲ್ಲಿ ನಿಂತು ಚಪ್ಪಾಳೆ ತಟ್ಟುವ ಮೂಲಕ ಸ್ಪೇನ್‌ ಆಟಗಾರರು ‘ಗಾರ್ಡ್‌ ಆಫ್‌ ಹಾನರ್‌’ ನೀಡಿದರು. ಆದರೆ ಸ್ಪೇನ್‌ ತಂಡ ಟ್ರೋಫಿ ಎತ್ತಿಹಿಡಿದು ಸಂಭ್ರಮಿಸುವಾಗ ಮೆಸ್ಸಿ ಸೇರಿದಂತೆ ಅರ್ಜೆಂಟೀನಾ ಆಟಗಾರರರು ಬೆನ್ನು ತಿರುಗಿಸಿಕೊಂಡು ನಿಂತಿದ್ದರು.

ಪಾತಾಳಕ್ಕೆ ಕುಸಿದಿದ್ದ ಸ್ಪೇನ್‌ 16 ವರ್ಷಗಳ ಬಳಿಕ ಫಿಫಾ ವಿಶ್ವಕಪ್‌ ಗೆದ್ದಿದ್ದು ಹೇಗೆ?

Kannadaprabha News — Tue, 21 Jul 2026 09:41:30 +0530

2010ರಲ್ಲಿ ಚಾಂಪಿಯನ್‌ ಆದ ಬಳಿಕ ಪಾತಳಕ್ಕೆ ಕುಸಿದಿದ್ದ ಸ್ಪೇನ್‌ ಫುಟ್ಬಾಲ್‌ ತಂಡ. 2014ರಲ್ಲಿ ಗುಂಪು ಹಂತದಲ್ಲೇ ಔಟ್‌. 2018ರಲ್ಲಿ ಅಂತಿಮ-16ರ ಸುತ್ತಿನಿಂದ ಹೊರಕ್ಕೆ, 2022ರ ಅಂತಿಮ-16ರ ಸುತ್ತಿನಲ್ಲಿ ಪೆನಾಲ್ಟಿಯಲ್ಲಿ ಹಾರ್ಟ್‌ಬ್ರೇಕ್‌ ಅನುಭವಿಸಿದ್ದ ಲಾ ರೋಜಾ.

ತಂಡದ ದಿಕ್ಕು ಬದಲಿಸಿದ 2022ರ ಯುರೋಪಿಯನ್‌ ಚಾಂಪಿಯನ್‌ಶಿಪ್‌. ಆ ಅನುಭವವನ್ನು ವಿಶ್ವಕಪ್‌ಗೂ ಹೊತ್ತು ತಂದ ಸ್ಪ್ಯಾನಿಶ್‌ ತಂಡ.

ಟಿಕಿ ಟಾಕ ಆಟದ ಶೈಲಿ ಬಗ್ಗೆ ಎದುರಾಗಿದ್ದ ಪ್ರಶ್ನೆ. ಆ ಶೈಲಿಯನ್ನು ಈಗಿನ ಆಟದ ವೇಗಕ್ಕೆ ತಕ್ಕಂತೆ ಆಧುನೀಕರಣಗೊಳಿಸಿ ಯಶಸ್ವಿಯಾದ ಸ್ಪೇನ್‌ .

ಲ್ಯಾಮಿನೆ ಯಮಾಲ್‌, ನಿಕೊ ವಿಲಿಯಮ್ಸ್‌, ಪೆಡ್ರಿ, ಕುಬಾರ್ಸಿಯಂತಹ ಯುವ ಆಟಗಾರರ ಮೇಲೆ ನಂಬಿಕೆಯಿಟ್ಟು, ಅವರನ್ನೇ ಪ್ರಮುಖ ಅಸ್ತ್ರಗಳನ್ನಾಗಿ ಬಳಸಿ ಫಲ ಕಂಡ ಕೋಚ್‌ ಫ್ಯುಂಟೆ.

ವಿಶ್ವಕಪ್‌ಗೆ ಕಾಲಿಡುವ ಮುನ್ನ ಯುರೋಪ್‌ನ ಪ್ರತಿಷ್ಠಿತ ಲೀಗ್‌ಗಳಲ್ಲಿ ಆಡಿ ಅನುಭವ ಪಡೆದಿದ್ದ ಯುವ ಆಟಗಾರರು. ಇದರಿಂದ ಒತ್ತಡ ನಿರ್ವಹಣೆಯಲ್ಲಿ ಸಂಪೂರ್ಣ ಮೇಲುಗೈ.

ಇಡೀ ವಿಶ್ವಕಪ್‌ನಲ್ಲಿ ಗುಂಪು ಹಂತದ ಮೊದಲ ಪಂದ್ಯದಿಂದ ಫೈನಲ್‌ ವರೆಗೂ ಒಟ್ಟು 8 ಪಂದ್ಯಗಳಲ್ಲಿ ಸ್ಪೇನ್‌ ಬಿಟ್ಟುಕೊಟ್ಟಿದ್ದು ಕೇವಲ ಒಂದು ಗೋಲು. ಗೋಲ್‌ಕೀಪರ್‌ ಉನೈ ಸೈಮನ್‌ ಅಸಾಧಾರಣ ಸಾಧನೆ. 6 ಪಂದ್ಯಗಳಲ್ಲಿ ಕ್ಲೀನ್‌ಶೀಟ್‌. ಸೈಮನ್‌ ಜೊತೆ ಹೆಗಲಿಗೆ ಹೆಗಲು ಕೊಟ್ಟು ನಿಂತ ಡಿಫೆಂಡರ್‌ಗಳು ಪ್ರತ್ಯೇಕವಾಗಿ ಶ್ಲಾಘನೆಗೆ ಅರ್ಹರು. ಅದರಲ್ಲೂ 19ರ ಕುಬಾರ್ಸಿಯ ಪ್ರದರ್ಶನ ಎಲ್ಲರನ್ನೂ ಬೆರಗಾಗಿಸಿತು.

ಮಿಡ್‌ಫೀಲ್ಡ್‌ನಲ್ಲಿ ಪೆಡ್ರೋ ಪೊರ್ರೊ, ಮಿಕೆಲ್‌ ಮೆರಿನೊರಂತಹ ರನ್ನಿಂಗ್‌ ಮಷಿನ್‌ಗಳ ಬಲ. ಆರಂಭಿಕ ಪಂದ್ಯದಿಂದ ಫೈನಲ್‌ವರೆಗೂ ಮೈದಾನದಲ್ಲಿ 45 ಕಿ.ಮೀ.ಗೂ ಹೆಚ್ಚು ದೂರ ಓಡಿದ ಪೊರ್ರೊ. ಬದಲಿ ಆಟಗಾರನಾಗಿ ಪಂದ್ಯದ ಅಂತಿಮ ಕ್ಷಣಗಳಲ್ಲಿ ಮೈದಾನಕ್ಕಿಳಿದರೂ ಅಂದಾಜು 15 ಕಿ.ಮೀ. ಓಡಿರುವ ಮೆರಿನೊ.

ಐವರು ಮಕ್ಕಳ ಸಮ್ಮುಖದಲ್ಲಿ ಜಾರ್ಜಿನಾರನ್ನು ಮದುವೆಯಾದ ಕ್ರಿಸ್ಟಿಯಾನೋ ರೊನಾಲ್ಡೊ!

Naveen Kodase — Wed, 12 Aug 2026 10:28:16 +0530

ಲಿಸ್ಬನ್: ಹಲವು ವರ್ಷಗಳ ಪ್ರೀತಿಗೆ ಕೊನೆಗೂ ಅಧಿಕೃತ ಮುದ್ರೆ ಬಿದ್ದಿದೆ. ಪೋರ್ಚುಗಲ್ ಫುಟ್ಬಾಲ್ ದಿಗ್ಗಜ ಕ್ರಿಸ್ಟಿಯಾನೋ ರೊನಾಲ್ಡೊ ಮತ್ತು ಅವರ ಗೆಳತಿ ಜಾರ್ಜಿನಾ ರೋಡ್ರಿಗಸ್ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಪೋರ್ಚುಗಲ್‌ನ ಕ್ಯಾಸ್ಕೈಸ್‌ನಲ್ಲಿ ನಡೆದ ಅತ್ಯಂತ ಖಾಸಗಿ ಸಮಾರಂಭದಲ್ಲಿ ಇವರಿಬ್ಬರೂ ಮದುವೆಯಾಗಿದ್ದಾರೆ.

41 ವರ್ಷದ ರೊನಾಲ್ಡೊ ಮತ್ತು 32 ವರ್ಷದ ಜಾರ್ಜಿನಾ, 10 ವರ್ಷಗಳಿಂದ ಒಟ್ಟಿಗೆ ವಾಸಿಸುತ್ತಿದ್ದರು. ಈಗ ಅಧಿಕೃತವಾಗಿ ಗಂಡ-ಹೆಂಡತಿಯಾಗಿದ್ದಾರೆ. ತಮ್ಮ ಮದುವೆಯ ವಿಷಯವನ್ನು ಇಬ್ಬರೂ ಸೋಷಿಯಲ್ ಮೀಡಿಯಾದಲ್ಲಿ ಖಚಿತಪಡಿಸಿದ್ದು, ಮದುವೆ ಉಂಗುರ ಧರಿಸಿದ ಕೈಗಳನ್ನು ಹಿಡಿದಿರುವ ಫೋಟೋವನ್ನು ಶೇರ್ ಮಾಡಿಕೊಂಡಿದ್ದಾರೆ. ಇನ್‌ಸ್ಟಾಗ್ರಾಮ್‌ನಲ್ಲಿ ಈ ಫೋಟೋ ಪೋಸ್ಟ್ ಮಾಡಿದ ಕೇವಲ ಅರ್ಧ ಗಂಟೆಯಲ್ಲೇ 30 ಲಕ್ಷಕ್ಕೂ ಹೆಚ್ಚು ಮಂದಿ ಲೈಕ್ ಮಾಡಿದ್ದಾರೆ.

View this post on Instagram

A post shared by Cristiano Ronaldo (@cristiano)

ಐದು ಮಕ್ಕಳ ತಂದೆ ರೊನಾಲ್ಡೊ:

ಕ್ರಿಸ್ಟಿಯಾನೊ ರೊನಾಲ್ಡೊ ತಮ್ಮ ಐದು ಮಕ್ಕಳ ಮುಂದೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿರುವುದು ವಿಶೇಷ. ರೊನಾಲ್ಡೊ-ಜಾರ್ಜಿಯಾ ಮದುವೆಗೆ ಮುಂಚೆಯೇ ಪೋಷಕರಾಗಿದ್ದಾರೆ. ಕ್ರಿಸ್ಟಿಯಾನೊ ರೊನಾಲ್ಡೊ ಅವರಿಗೆ ಒಂದಲ್ಲ ಎರಡಲ್ಲ ಬರೋಬ್ಬರಿ ಐದು ಮಕ್ಕಳಿದ್ದಾರೆ. ಕ್ರಿಸ್ಟಿಯಾನೊ ಜೂನಿಯರ್, ಅವಳಿ ಮಕ್ಕಳಾದ ಇವಾ ಮತ್ತು ಮಾಟಿಯೊ, ಅಲಾನಾ ಮಾರ್ಟಿನಾ ಹಾಗೂ ಬೆಲ್ಲಾ ಎಸ್ಲೆರಾಲ್ಡಾ ಎನ್ನುವ ಐದು ಮಕ್ಕಳಿದ್ದಾರೆ. ಈ ಐವರು ಮಕ್ಕಳು ಹಾಗೂ ಆಪ್ತರ ಸಮ್ಮುಖದಲ್ಲಿ ರೊನಾಲ್ಡೊ ಹಾಗೂ ಜಾರ್ಜಿಯಾ ದಾಂಪತ್ಯ ಜೀವನಕ್ಕೆ ಕಾಲಿರಿಸಿದ್ದಾರೆ.

2025ರ ಆಗಸ್ಟ್ 11 ರಂದು ತಮ್ಮ ನಿಶ್ಚಿತಾರ್ಥದ ಸುದ್ದಿಯನ್ನು ಜಾರ್ಜಿನಾ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದರು. ಆಗ ತಮ್ಮ ನಿಶ್ಚಿತಾರ್ಥದ ಉಂಗುರದ ಫೋಟೋ ಜೊತೆ ಸ್ಪ್ಯಾನಿಷ್ ಭಾಷೆಯಲ್ಲಿ, "ಪೂರ್ಣ ಮನಸ್ಸಿನಿಂದ ಒಪ್ಪಿಕೊಳ್ಳುತ್ತಿದ್ದೇನೆ... ಈ ಜನ್ಮದಲ್ಲೂ, ಮುಂದಿನ ಎಲ್ಲಾ ಜನ್ಮಗಳಲ್ಲೂ" ಎಂದು ಬರೆದುಕೊಂಡಿದ್ದರು. ಈಗ, ನಿಶ್ಚಿತಾರ್ಥದ ಒಂದು ವರ್ಷದ ನಂತರ ಇವರಿಬ್ಬರ ಮದುವೆ ನಡೆದಿದೆ. ಈ ಸರಳ ಸಮಾರಂಭದಲ್ಲಿ ಅವರ ಮಕ್ಕಳು ಮತ್ತು ಆಪ್ತ ಸಂಬಂಧಿಕರು ಮಾತ್ರ ಭಾಗವಹಿಸಿದ್ದರು.

2016ರಲ್ಲಿ ಮೊದಲ ಬಾರಿ ಭೇಟಿಯಾಗಿದ್ದ ರೊನಾಲ್ಡೊ-ಜಾರ್ಜಿಯಾ

ರೊನಾಲ್ಡೊ ಮತ್ತು ಜಾರ್ಜಿನಾ ಮೊದಲ ಬಾರಿಗೆ ಭೇಟಿಯಾಗಿದ್ದು 2016ರಲ್ಲಿ, ಮ್ಯಾಡ್ರಿಡ್‌ನ ಗೂಚಿ ಸ್ಟೋರ್‌ನಲ್ಲಿ. ಆಗ ರೊನಾಲ್ಡೊ ರಿಯಲ್ ಮ್ಯಾಡ್ರಿಡ್ ತಂಡದ ಆಟಗಾರನಾಗಿದ್ದರು. ಆ ಪರಿಚಯವೇ ನಂತರ ಪ್ರೀತಿಗೆ ತಿರುಗಿತ್ತು. ರಿಯಲ್ ಮ್ಯಾಡ್ರಿಡ್, ಮ್ಯಾಂಚೆಸ್ಟರ್ ಯುನೈಟೆಡ್, ಯುವೆಂಟಸ್ ಮತ್ತು ಸದ್ಯ ಅಲ್ ನಾಸರ್ ಕ್ಲಬ್‌ಗಳ ಪರವಾಗಿ ಹಾಗೂ ಪೋರ್ಚುಗಲ್ ರಾಷ್ಟ್ರೀಯ ತಂಡಕ್ಕಾಗಿ ಸುಮಾರು ಸಾವಿರ ಗೋಲುಗಳನ್ನು ಗಳಿಸಿರುವ ರೊನಾಲ್ಡೊ, ಸೌದಿ ಪ್ರೊ ಲೀಗ್ ಸೀಸನ್ ಆರಂಭಕ್ಕೂ ಮುನ್ನವೇ ಮದುವೆ ಸಂಭ್ರಮ ಮುಗಿಸಿದ್ದಾರೆ. ವಿಶ್ವದಾದ್ಯಂತ ಲಕ್ಷಾಂತರ ಅಭಿಮಾನಿಗಳು ಮತ್ತು ಕ್ರೀಡಾಪಟುಗಳು ಈ ಜೋಡಿಗೆ ಶುಭಾಶಯಗಳನ್ನು ತಿಳಿಸುತ್ತಿದ್ದಾರೆ.

ಮರಡೋನಾ ‘ಹ್ಯಾಂಡ್‌ ಆಫ್‌ ಗಾಡ್‌’ ಗೋಲಿನ ಚೆಂಡು ₹32 ಕೋಟಿಗೆ ಹರಾಜು; ಖರೀದಿದಾರ ಯಾರು?

Kannadaprabha News — Tue, 25 Aug 2026 10:21:34 +0530

ಡಲ್ಲಾಸ್: ಫುಟ್ಬಾಲ್‌ ದಂತಕಥೆ, ಅರ್ಜೆಂಟೀನಾದ ಡಿಗೋ ಮರಡೋನಾ ಅವರ ಕುಖ್ಯಾತ ‘ಹ್ಯಾಂಡ್‌ ಆಫ್‌ ಗಾಡ್‌’ ಗೋಲಿಗೆ ಬಳಕೆಯಾಗಿದ್ದ ಚೆಂಡು, ಬರೋಬ್ಬರಿ 3.35 ಮಿಲಿಯನ್‌ ಅಮೆರಿಕನ್‌ ಡಾಲರ್‌ (ಅಂದಾಜು 32 ಕೋಟಿ ರು.)ಗೆ ಹರಾಜಾಗಿದೆ. ಖರೀದಿ ಮಾಡಿದವರ ಹೆಸರನ್ನು ಸಂಸ್ಥೆಯು, ಭದ್ರತಾ ಕಾರಣಗಳಿಂದಾಗಿ ಬಹಿರಂಗಪಡಿಸಿಲ್ಲ.

ಇತ್ತೀಚೆಗೆ ಹರಾಜು ಪ್ರಕ್ರಿಯೆ ನಡೆಸಿದ್ದ ಅಮೆರಿಕದ ಡಲ್ಲಾಸ್‌ ಮೂಲದ ಹೆರಿಟೇಜ್‌ ಸಂಸ್ಥೆ, ಚೆಂಡು ಕನಿಷ್ಠ 10 ಮಿಲಿಯನ್‌ ಡಾಲರ್‌ಗೆ ಬಿಕರಿಯಾಗಬಹುದು ಎಂದು ನಿರೀಕ್ಷಿಸಿತ್ತು. ಈ ಬಗ್ಗೆ ಬಹಿರಂಗವಾಗಿಯೇ ಹೇಳಿಕೊಂಡಿತ್ತು. ಆದರೆ, ಸಂಸ್ಥೆ ನಿರೀಕ್ಷೆ ಮಾಡಿದ್ದ ಅರ್ಧ ಮೊತ್ತವೂ ದೊರೆಯದೆ ಇರುವುದು ಅನೇಕರ ಅಚ್ಚರಿಗೆ ಕಾರಣವಾಗಿದೆ.

1986ರ ಫಿಫಾ ವಿಶ್ವಕಪ್‌ನಲ್ಲಿ ಈ ವಿವಾದಾತ್ಮಕ ಗೋಲು

1986ರ ಫಿಫಾ ವಿಶ್ವಕಪ್‌ನಲ್ಲಿ ಇಂಗ್ಲೆಂಡ್‌ ವಿರುದ್ಧದ ಕ್ವಾರ್ಟರ್‌ ಫೈನಲ್‌ನಲ್ಲಿ ಮರಡೋನಾ, ತಮ್ಮ ಎಡಗೈ ಮೂಲಕ ಚೆಂಡನ್ನು ಗೋಲು ಪೆಟ್ಟಿಗೆಗೆ ತಳ್ಳಿದ್ದರು. ಈ ಘಟನೆಯನ್ನು ಟ್ಯುನೀಶಿಯಾದ ರೆಫ್ರಿ ಅಲಿ ಬಿನ್‌ ನಾಸ್ಸೆರ್‌ ಗಮನಿಸಿರಲಿಲ್ಲ. ಹೀಗಾಗಿ ಅವರು ಗೋಲು ನೀಡಿದ್ದರು. ಈ ವಿವಾದಾತ್ಮಕ ಗೋಲು ದಾಖಲಾದ 4 ನಿಮಿಷಗಳ ಬಳಿಕ ಮರಡೋನಾ, ಇಂಗ್ಲೆಂಡ್‌ನ 6 ಆಟಗಾರರನ್ನು ದಾಟಿಕೊಂಡು, 70 ಮೀ. ಓಡಿ ಗೋಲು ಬಾರಿಸಿದ್ದರು. ಅದು ಈ ಶತಮಾನದ ಶ್ರೇಷ್ಠ ಗೋಲು ಎನ್ನುವ ಹಿರಿಮೆಗೆ ಪಾತ್ರವಾಗಿತ್ತು. ಪಂದ್ಯವನ್ನು 2-1ರಲ್ಲಿ ಗೆದ್ದಿದ್ದ ಅರ್ಜೆಂಟೀನಾ ಬಳಿಕ ವಿಶ್ವ ಚಾಂಪಿಯನ್‌ ಕೂಡ ಆಗಿತ್ತು.

ಕ್ವಾರ್ಟರ್‌ ಫೈನಲ್‌ ಪಂದ್ಯದ ಬಳಿಕ ಚೆಂಡು ರೆಫ್ರಿ ನಾಸ್ಸರ್‌ ಬಳಿಯೇ ಸುಮಾರು 36 ವರ್ಷ ಉಳಿದಿತ್ತು. 2022ರಲ್ಲಿ ಅವರು 2.37 ಮಿಲಿಯನ್‌ ಅಮೆರಿಕನ್‌ ಡಾಲರ್‌ಗೆ ಮಾರಾಟ ಮಾಡಿದ್ದರು.

9.3 ಮಿಲಿಯನ್‌ ಡಾಲರ್‌ಗೆ ಹರಾಜಾಗಿದ್ದ ಜೆರ್ಸಿ!

ಮರಡೋನಾ ‘ಹ್ಯಾಂಡ್‌ ಆಫ್‌ ಗಾಡ್‌’ ಗೋಲು ಬಾರಿಸಿದ ಪಂದ್ಯದ ವೇಳೆ ಧರಿಸಿದ್ದ ಜೆರ್ಸಿ, 2022ರಲ್ಲಿ ಬರೋಬ್ಬರಿ 9.3 ಮಿಲಿಯನ್‌ ಡಾಲರ್‌ (ಅಂದಿನ ಡಾಲರ್‌ ಮೌಲ್ಯದ ಪ್ರಕಾರ 73 ಕೋಟಿ ರು.)ಗೆ ಹರಾಜಾಗಿತ್ತು.

ನಟನಾಗಲು ಎಂಜಿನಿಯರಿಂಗ್ ಬಿಟ್ಟರು, 2 ಲಕ್ಷ ಸಾಲ ಪಡೆದು ಇಡ್ಲಿ-ದೋಸೆ ಮಾರಿದರು; ಇಂದು ಕೋಟಿ ಆದಾಯದ ‘ರಾಮೇಶ್ವರಂ ಕೆಫೆ’ ಮಾಲೀಕ

Sushma Hegde — Tue, 04 Aug 2026 16:02:30 +0530

ಇಂದು ದಕ್ಷಿಣ ಭಾರತದ ಜನಪ್ರಿಯ ಕ್ವಿಕ್ ಸರ್ವಿಸ್ ರೆಸ್ಟೋರೆಂಟ್‌ (QSR) ಬ್ರ್ಯಾಂಡ್‌ಗಳಲ್ಲಿ ಒಂದಾಗಿ ಗುರುತಿಸಿಕೊಂಡಿರುವ ‘ದಿ ರಾಮೇಶ್ವರಂ ಕೆಫೆ’ಯ ಯಶೋಗಾಥೆ ಅನೇಕರಿಗೆ ಪ್ರೇರಣೆಯಾಗಿದೆ. ಆದರೆ ಈ ಬ್ರ್ಯಾಂಡ್‌ನ ಸಹ-ಸಂಸ್ಥಾಪಕ ರಾಘವೇಂದ್ರ ರಾವ್ ಅವರ ಉದ್ಯಮ ಪಯಣ ಅಷ್ಟು ಸುಲಭವಾಗಿರಲಿಲ್ಲ. ನಟನಾಗಬೇಕು ಎಂಬ ಕನಸಿಗಾಗಿ ಎಂಜಿನಿಯರಿಂಗ್‌ ಓದನ್ನು ಬಿಟ್ಟು, ಹಲವು ವರ್ಷಗಳ ಕಾಲ ನಗರದಿಂದ ನಗರಕ್ಕೆ ಅಲೆದಾಡಿ, ಜೀವನ ನಿರ್ವಹಣೆಗಾಗಿ ಹೋಟೆಲ್‌ಗಳು, ರೆಸ್ಟೋರೆಂಟ್‌ಗಳು ಮತ್ತು ರಸ್ತೆಬದಿಯ ತಿನಿಸುಗಳಲ್ಲಿ ಕೆಲಸ ಮಾಡಿದ್ದ ರಾಘವೇಂದ್ರ ರಾವ್, ಕೊನೆಗೆ ದಕ್ಷಿಣ ಭಾರತದ ಪ್ರಸಿದ್ಧ ರೆಸ್ಟೋರೆಂಟ್ ಸರಪಳಿಯೊಂದನ್ನು ಕಟ್ಟುವಲ್ಲಿ ಯಶಸ್ವಿಯಾಗಿದ್ದಾರೆ.

2021ರಲ್ಲಿ ಪತ್ನಿ ದಿವ್ಯಾ ಅವರೊಂದಿಗೆ ಆರಂಭಿಸಿದ ‘ದಿ ರಾಮೇಶ್ವರಂ ಕೆಫೆ’, ಬೆಂಗಳೂರಿನ ಇಂದಿರಾನಗರದಲ್ಲಿ ಕೇವಲ 700 ಚದರ ಅಡಿ ವಿಸ್ತೀರ್ಣದ ಒಂದು ಔಟ್‌ಲೆಟ್‌ನಿಂದ ಆರಂಭವಾಗಿ, ಇಂದು ಬೆಂಗಳೂರು, ಹೈದರಾಬಾದ್ ಮತ್ತು ಮುಂಬೈನಲ್ಲಿ ಮಳಿಗೆಗಳನ್ನು ಹೊಂದಿರುವ ಬಹು-ನಗರ ರೆಸ್ಟೋರೆಂಟ್ ಸರಪಳಿಯಾಗಿ ಬೆಳೆದಿದೆ. ವರದಿಗಳ ಪ್ರಕಾರ, ಕಂಪನಿಯು FY25ರಲ್ಲಿ 17.8 ಕೋಟಿ ಆದಾಯ ದಾಖಲಿಸಿದೆ. FY24ರಲ್ಲಿ ಈ ಆದಾಯ 11 ಕೋಟಿಯಷ್ಟಿತ್ತು. ಅಂದರೆ ಒಂದೇ ವರ್ಷದಲ್ಲಿ ಕಂಪನಿಯ ಆದಾಯದಲ್ಲಿ ಸುಮಾರು 62% ಏರಿಕೆಯಾಗಿದೆ. ಇದೇ ಅವಧಿಯಲ್ಲಿ ನಿವ್ವಳ ಲಾಭವೂ 1.8 ಕೋಟಿಯಿಂದ 2 ಕೋಟಿಗೆ ಏರಿಕೆಯಾಗಿದೆ.

ನಟನಾಗುವ ಕನಸಿಗಾಗಿ ಎಂಜಿನಿಯರಿಂಗ್ ಬಿಟ್ಟರು

2000ರ ದಶಕದ ಆರಂಭದಲ್ಲಿ ರಾಘವೇಂದ್ರ ರಾವ್ ಅವರಿಗೆ ನಟನಾಗುವ ಕನಸಿತ್ತು. ಈ ಕನಸನ್ನು ನನಸು ಮಾಡಿಕೊಳ್ಳಲು ಅವರು ಮೆಕ್ಯಾನಿಕಲ್ ಎಂಜಿನಿಯರಿಂಗ್‌ ಓದನ್ನು ಬಿಟ್ಟು ಸಿನಿಮಾ ಕ್ಷೇತ್ರಕ್ಕೆ ಪ್ರವೇಶಿಸಲು ಮುಂದಾದರು. ನಟನೆಯ ಅವಕಾಶಗಳನ್ನು ಹುಡುಕುತ್ತಾ ಅವರು ದೆಹಲಿ, ಮುಂಬೈ ಮತ್ತು ಚೆನ್ನೈ ಸೇರಿದಂತೆ ಹಲವು ನಗರಗಳಲ್ಲಿ ವರ್ಷಗಳ ಕಾಲ ಕಳೆದರು. ಆದರೆ ನಟನಾ ವೃತ್ತಿ ನಿರೀಕ್ಷಿಸಿದಂತೆ ಕೈಹಿಡಿಯಲಿಲ್ಲ. ಜೀವನ ನಿರ್ವಹಣೆಗಾಗಿ ಈ ಅವಧಿಯಲ್ಲಿ ಅವರು ವಿವಿಧ ಆತಿಥ್ಯ ಕ್ಷೇತ್ರಗಳಲ್ಲಿ ಕೆಲಸ ಮಾಡಿದರು. ಲೆ ಮೆರಿಡಿಯನ್‌ನಂತಹ ಹೋಟೆಲ್‌ಗಳಲ್ಲಿ ಕೆಲಸ ಮಾಡುವುದರ ಜೊತೆಗೆ, ರೆಸ್ಟೋರೆಂಟ್‌ಗಳು, ಧಾಬಾಗಳು ಮತ್ತು ರಸ್ತೆಬದಿಯ ತಿನಿಸುಗಳಲ್ಲಿಯೂ ಕೆಲಸ ಮಾಡಿದರು. ರಾಘವೇಂದ್ರ ರಾವ್ ಅವರಿಗೆ ಯಾವುದೇ ಔಪಚಾರಿಕ ಪಾಕಶಾಲೆಯ ತರಬೇತಿ ಇರಲಿಲ್ಲ. ಆದರೆ ಹೋಟೆಲ್ ಮತ್ತು ರೆಸ್ಟೋರೆಂಟ್‌ಗಳಲ್ಲಿ ಕೆಲಸ ಮಾಡಿದ ಅನುಭವದಿಂದ ಗ್ರಾಹಕರ ಅಗತ್ಯ, ಸೇವೆಯ ಗುಣಮಟ್ಟ ಮತ್ತು ಆಹಾರ ಉದ್ಯಮದ ಕಾರ್ಯವಿಧಾನಗಳನ್ನು ಅರ್ಥಮಾಡಿಕೊಳ್ಳಲು ಸಾಧ್ಯವಾಯಿತು.

ಬೆಂಗಳೂರಿಗೆ ಮರಳಿ, ಮತ್ತೆ ಎಂಜಿನಿಯರಿಂಗ್ ಮುಗಿಸಿದರು

ನಟನೆ ತಮ್ಮ ನಿರೀಕ್ಷೆಯಂತೆ ಸಾಗುತ್ತಿಲ್ಲ ಎಂಬುದನ್ನು ಅರಿತ ಬಳಿಕ ರಾಘವೇಂದ್ರ ರಾವ್ ಬೆಂಗಳೂರಿಗೆ ಮರಳಿದರು. 2011ರಲ್ಲಿ ತಮ್ಮ ಎಂಜಿನಿಯರಿಂಗ್ ಪದವಿಯನ್ನು ಪೂರ್ಣಗೊಳಿಸಿದರು. ಆದರೆ ಉದ್ಯೋಗ ಹುಡುಕುವ ಬದಲು ಸ್ವಂತ ಉದ್ಯಮ ಆರಂಭಿಸುವ ನಿರ್ಧಾರ ಕೈಗೊಂಡರು. 2012ರಲ್ಲಿ ಸ್ನೇಹಿತರಿಂದ 2 ಲಕ್ಷ ಸಾಲ ಪಡೆದು ರಸ್ತೆಬದಿಯಲ್ಲಿ ಇಡ್ಲಿ ಮತ್ತು ದೋಸೆ ಮಾರಾಟ ಮಾಡುವ ಸಣ್ಣ ಅಂಗಡಿ ಆರಂಭಿಸಿದರು. ಈ ಆರಂಭಿಕ ಪ್ರಯತ್ನಗಳು ಗ್ರಾಹಕರನ್ನು ಆಕರ್ಷಿಸುವಲ್ಲಿ ಯಶಸ್ವಿಯಾದರೂ, ನಿರೀಕ್ಷಿತ ಮಟ್ಟದ ಲಾಭ ತಂದುಕೊಡಲಿಲ್ಲ. ನಂತರ ಪಾಲುದಾರಿಕೆಗಳ ಮೂಲಕ ಉದ್ಯಮ ವಿಸ್ತರಿಸುವ ಪ್ರಯತ್ನಗಳೂ ಅಂದುಕೊಂಡಂತೆ ಯಶಸ್ವಿಯಾಗಲಿಲ್ಲ. ಆದರೆ ಈ ವೈಫಲ್ಯಗಳೇ ಮುಂದೆ ‘ದಿ ರಾಮೇಶ್ವರಂ ಕೆಫೆ’ಯ ಯಶಸ್ಸಿಗೆ ಬುನಾದಿಯಾದವು. ಸಣ್ಣ ಉದ್ಯಮವನ್ನು ನಡೆಸುವುದರಿಂದ ಹಿಡಿದು ಗ್ರಾಹಕರನ್ನು ಸೆಳೆಯುವವರೆಗೆ ಅವರು ಪಡೆದ ಅನುಭವವನ್ನು ಮುಂದಿನ ಹಂತದಲ್ಲಿ ಸಮರ್ಥವಾಗಿ ಬಳಸಿಕೊಂಡರು.

ಫ್ರಾಂಚೈಸಿ ಕೇಳಿಕೊಂಡು ಬಂದ ದಿವ್ಯಾ, ಉದ್ಯಮ ಪಾಲುದಾರರಾದರು

ರಾಘವೇಂದ್ರ ರಾವ್ ಅವರ ಜೀವನದಲ್ಲಿ ಮತ್ತೊಂದು ಪ್ರಮುಖ ತಿರುವು ದಿವ್ಯಾ ಅವರ ಭೇಟಿಯೊಂದಿಗೆ ಬಂದಿತು. ಚಾರ್ಟರ್ಡ್ ಅಕೌಂಟೆಂಟ್ ಆಗಿರುವ ದಿವ್ಯಾ, ಐಐಎಂ ಅಹಮದಾಬಾದ್‌ನ ಪದವೀಧರೆ. ಅವರು ಆರಂಭದಲ್ಲಿ ರಾಘವೇಂದ್ರ ರಾವ್ ಅವರ ಉದ್ಯಮದ ಫ್ರಾಂಚೈಸಿ ಪಡೆಯುವ ಆಸಕ್ತಿಯಿಂದ ಅವರನ್ನು ಭೇಟಿಯಾಗಿದ್ದರು ಎನ್ನಲಾಗಿದೆ. ಆದರೆ ಮಾತುಕತೆ ಮುಂದುವರಿದಂತೆ, ಇಬ್ಬರೂ ಸೇರಿ ತಮ್ಮದೇ ಆದ ಹೊಸ ಬ್ರ್ಯಾಂಡ್ ಕಟ್ಟುವ ನಿರ್ಧಾರಕ್ಕೆ ಬಂದರು. ನಂತರ ಈ ಉದ್ಯಮ ಪಾಲುದಾರಿಕೆ ವೈಯಕ್ತಿಕ ಜೀವನದಲ್ಲೂ ಮುಂದುವರಿದು, ಇಬ್ಬರೂ ವಿವಾಹವಾದರು.

ಪತಿ-ಪತ್ನಿಯ ಜವಾಬ್ದಾರಿ ವಿಭಜನೆಯೇ ಯಶಸ್ಸಿನ ಗುಟ್ಟು

ರಾಮೇಶ್ವರಂ ಕೆಫೆಯ ಬೆಳವಣಿಗೆಯಲ್ಲಿ ರಾಘವೇಂದ್ರ ರಾವ್ ಮತ್ತು ದಿವ್ಯಾ ಅವರ ಜವಾಬ್ದಾರಿಗಳ ವಿಭಜನೆ ಪ್ರಮುಖ ಪಾತ್ರ ವಹಿಸಿದೆ. ರಾಘವೇಂದ್ರ ರಾವ್ ಅವರು ಅಡುಗೆಮನೆಯ ಕಾರ್ಯಾಚರಣೆ, ಆಹಾರದ ಗುಣಮಟ್ಟ ಮತ್ತು ಗ್ರಾಹಕರ ಅನುಭವದ ಮೇಲೆ ಗಮನಹರಿಸಿದರು. ಮತ್ತೊಂದೆಡೆ ದಿವ್ಯಾ ಅವರು ಹಣಕಾಸು, ವ್ಯವಹಾರ ತಂತ್ರ ಮತ್ತು ಕಂಪನಿಯ ಔಪಚಾರಿಕ ನಿರ್ವಹಣೆಯನ್ನು ನೋಡಿಕೊಂಡರು. ಇಬ್ಬರ ವಿಭಿನ್ನ ಪರಿಣತಿಯನ್ನು ಒಂದೇ ಉದ್ಯಮದಲ್ಲಿ ಸಮರ್ಥವಾಗಿ ಬಳಸಿಕೊಂಡ ಪರಿಣಾಮ, ಸಣ್ಣ ಮಟ್ಟದಲ್ಲಿ ಆರಂಭವಾದ ವ್ಯವಹಾರ ವೇಗವಾಗಿ ವಿಸ್ತರಿಸಲು ಸಾಧ್ಯವಾಯಿತು.

11 ಕೋಟಿಯಿಂದ 17.8 ಕೋಟಿಗೆ ಆದಾಯ ಏರಿಕೆ

ರಾಘವೇಂದ್ರ ರಾವ್ ಮತ್ತು ದಿವ್ಯಾ ಅವರ ನೇತೃತ್ವದಲ್ಲಿ ಬೆಳೆದ ಕಂಪನಿಯು ತನ್ನ ಬೆಳವಣಿಗೆಯನ್ನು ವೇಗಗೊಳಿಸಿದೆ. ಲಭ್ಯವಿರುವ ವರದಿಗಳ ಪ್ರಕಾರ, FY24ರಲ್ಲಿ 11 ಕೋಟಿ ಆದಾಯ ದಾಖಲಿಸಿದ್ದ ಕಂಪನಿ, FY25ರಲ್ಲಿ 17.8 ಕೋಟಿ ಆದಾಯ ಗಳಿಸಿದೆ. ಅಂದರೆ ಸುಮಾರು 62% ಬೆಳವಣಿಗೆ ಕಂಡಿದೆ. ಇದೇ ಅವಧಿಯಲ್ಲಿ ಕಂಪನಿಯ ನಿವ್ವಳ ಲಾಭ 1.8 ಕೋಟಿಯಿಂದ 2 ಕೋಟಿಗೆ ಏರಿಕೆಯಾಗಿದೆ. ಬಾಹ್ಯ ಹೂಡಿಕೆ ಅಥವಾ ದೊಡ್ಡ ಮಟ್ಟದ ನಿಧಿಯನ್ನು ಅವಲಂಬಿಸದೆ, ಸ್ವಂತ ಸಂಪನ್ಮೂಲಗಳ ಮೂಲಕ ಉದ್ಯಮವನ್ನು ಬೆಳೆಸಿದ ‘ಬೂಟ್‌ಸ್ಟ್ರಾಪ್’ ಮಾದರಿಯ ಕಂಪನಿಯಾಗಿ ರಾಮೇಶ್ವರಂ ಕೆಫೆ ಬೆಳೆಯುತ್ತಿದೆ ಎನ್ನಲಾಗಿದೆ. ಕಂಪನಿಯ ಬೆಳವಣಿಗೆಯಲ್ಲಿ ಸ್ವಂತ ನಿರ್ವಹಣೆಯ ಅಡುಗೆಮನೆಗಳು, ಫ್ರ್ಯಾಂಚೈಸ್ ಆಧಾರಿತ ವಿಸ್ತರಣೆ ಮತ್ತು ಕಟ್ಟುನಿಟ್ಟಾಗಿ ನಿಯಂತ್ರಿಸಲಾದ ಕಾರ್ಯಾಚರಣಾ ಮಾದರಿ ಪ್ರಮುಖ ಪಾತ್ರ ವಹಿಸುತ್ತಿವೆ.

ಮುಂಬೈ ಬಳಿಕ ದುಬೈಗೆ ಹೆಜ್ಜೆ?

ಬೆಂಗಳೂರು ಮತ್ತು ಹೈದರಾಬಾದ್ ಬಳಿಕ ಇದೀಗ ರಾಮೇಶ್ವರಂ ಕೆಫೆ ಮುಂಬೈಗೂ ಪ್ರವೇಶಿಸಿದೆ. ಚರ್ಚ್‌ಗೇಟ್‌ನ ಹೆರಿಟೇಜ್ ಎರೋಸ್ ಕಟ್ಟಡದಲ್ಲಿ ತನ್ನ ಪ್ರಮುಖ ಮಳಿಗೆಯನ್ನು ಆರಂಭಿಸಿದೆ. ಇದರೊಂದಿಗೆ ದಕ್ಷಿಣ ಭಾರತದ ರುಚಿಯನ್ನು ದೇಶದ ಮತ್ತಷ್ಟು ನಗರಗಳಿಗೆ ಕೊಂಡೊಯ್ಯುವ ಪ್ರಯತ್ನ ಮುಂದುವರಿದಿದೆ. ಇಷ್ಟೇ ಅಲ್ಲದೆ, ಕಂಪನಿ ತನ್ನ ಮೊದಲ ಅಂತಾರಾಷ್ಟ್ರೀಯ ಮಳಿಗೆಯನ್ನು ತೆರೆಯುವ ಸಿದ್ಧತೆಯಲ್ಲಿದೆ ಎನ್ನಲಾಗಿದೆ. 2026ರಲ್ಲಿ ದುಬೈ ಅನ್ನು ತನ್ನ ಮುಂದಿನ ಪ್ರಮುಖ ಮಾರುಕಟ್ಟೆಯಾಗಿ ಗುರುತಿಸಿಕೊಂಡಿದೆ.

Lionel Messi retirement: ಮೆಸ್ಸಿ ಫ್ಯಾನ್ಸ್‌ಗೆ ಬಿಗ್ ಶಾಕ್! ಅಂತರರಾಷ್ಟ್ರೀಯ ಫುಟ್‌ಬಾಲ್‌ಗೆ ಲಿಯೋನೆಲ್ ಮೆಸ್ಸಿ ವಿದಾಯ!

Ravi Janekal — Mon, 31 Aug 2026 22:22:00 +0530

Lionel Messi announces retirement from international football: ಫುಟ್‌ಬಾಲ್ ಜಗತ್ತಿನ ದಿಗ್ಗಜ, ಅರ್ಜೆಂಟೀನಾ ತಂಡದ ನಾಯಕ ಲಿಯೋನೆಲ್ ಮೆಸ್ಸಿ ಅಂತರರಾಷ್ಟ್ರೀಯ ಫುಟ್‌ಬಾಲ್ ವೃತ್ತಿಜೀವನಕ್ಕೆ ಅಂತ್ಯ ಹಾಡುವುದಾಗಿ ಘೋಷಿಸಿದ್ದಾರೆ. ಸೋಮವಾರ ಮೆಸ್ಸಿ ತಮ್ಮ ನಿರ್ಧಾರವನ್ನು ಪ್ರಕಟಿಸಿದ್ದಾರೆ.

ಬ್ಯೂನಸ್ ಐರಿಸ್: ಫುಟ್‌ಬಾಲ್ ಜಗತ್ತಿನ ದಿಗ್ಗಜ, ಅರ್ಜೆಂಟೀನಾ ತಂಡದ ನಾಯಕ ಲಿಯೋನೆಲ್ ಮೆಸ್ಸಿ ಅಂತರರಾಷ್ಟ್ರೀಯ ಫುಟ್‌ಬಾಲ್ ವೃತ್ತಿಜೀವನಕ್ಕೆ ಅಂತ್ಯ ಹಾಡುವುದಾಗಿ ಘೋಷಿಸಿದ್ದಾರೆ. ಸೋಮವಾರ ಮೆಸ್ಸಿ ತಮ್ಮ ನಿರ್ಧಾರವನ್ನು ಪ್ರಕಟಿಸಿದ್ದು, ಅಭಿಮಾನಿಗಳಿಗೆ ಇದು ಭಾರೀ ಆಘಾತ ನೀಡಿದೆ.

ಈ ಬಗ್ಗೆ ತಮ್ಮ ಇನ್‌ಸ್ಟಾಗ್ರಾಮ್ ಪೋಸ್ಟ್‌ನಲ್ಲಿ ಶೇರ್ ಮಾಡಿರುವ ಮೆಸ್ಸಿ, ಇದು ನೋವುಂಟುಮಾಡುವ ನಿರ್ಧಾರವಾಗಿದ್ದು, ಈಗ ಸಮಯ ಬಂದಿದೆ ಎಂಬುದು ಅರ್ಥವಾಗಿದೆ ಎಂದು ಹೇಳಿದ್ದಾರೆ. ಅರ್ಜೆಂಟೀನಾ ಜೆರ್ಸಿಗಾಗಿ ತಾನು ಯಾವಾಗಲೂ ಎಲ್ಲವನ್ನೂ ನೀಡಿದ್ದೇನೆ ಎಂದು ಅವರು ಭಾವುಕರಾಗಿ ಬರೆದಿದ್ದಾರೆ.

ಅರ್ಜೆಂಟೀನಾ ಪರ ಮೆಸ್ಸಿ 207 ಪಂದ್ಯಗಳನ್ನು ಆಡಿದ್ದು, 125 ಗೋಲುಗಳನ್ನು ಗಳಿಸಿದ್ದಾರೆ. ದೇಶದ ಪರ ಅತಿ ಹೆಚ್ಚು ಪಂದ್ಯ ಆಡಿದ ಮತ್ತು ಅತಿ ಹೆಚ್ಚು ಗೋಲು ಗಳಿಸಿದ ಆಟಗಾರ ಎಂಬ ದಾಖಲೆ ಕೂಡ ಅವರ ಹೆಸರಿನಲ್ಲಿದೆ.

ಮೆಸ್ಸಿಯ ವೃತ್ತಿಜೀವನದ ಅತ್ಯಂತ ದೊಡ್ಡ ಕ್ಷಣ 2022ರ ಕತಾರ್ ವಿಶ್ವಕಪ್. ಅರ್ಜೆಂಟೀನಾವನ್ನು ವಿಶ್ವಕಪ್ ಚಾಂಪಿಯನ್ ಮಾಡಿದ ಮೆಸ್ಸಿ, ತಮ್ಮ ಕನಸನ್ನು ನನಸು ಮಾಡಿಕೊಂಡಿದ್ದರು. ಇದಕ್ಕೂ ಮುನ್ನ 2021ರಲ್ಲಿ ಕೋಪಾ ಅಮೆರಿಕಾ ಪ್ರಶಸ್ತಿಯನ್ನು ಗೆದ್ದು ಪ್ರಮುಖ ಅಂತರರಾಷ್ಟ್ರೀಯ ಟ್ರೋಫಿಯ ಬರ ನೀಗಿಸಿದ್ದರು.

2024ರಲ್ಲೂ ಅರ್ಜೆಂಟೀನಾ ಪರ ಕೋಪಾ ಅಮೆರಿಕಾ ಪ್ರಶಸ್ತಿ ಗೆದ್ದ ಮೆಸ್ಸಿ, ಅಂತರರಾಷ್ಟ್ರೀಯ ಫುಟ್‌ಬಾಲ್ನಲ್ಲಿ ತಮ್ಮ ದೇಶಕ್ಕೆ ಹಲವು ಮಹತ್ವದ ಗೆಲುವುಗಳನ್ನು ತಂದುಕೊಟ್ಟಿದ್ದರು.

ಮೆಸ್ಸಿ ಯುಗ ಅಂತ್ಯ?

2005ರಲ್ಲಿ ಅರ್ಜೆಂಟೀನಾ ತಂಡಕ್ಕೆ ಪದಾರ್ಪಣೆ ಮಾಡಿದ ಮೆಸ್ಸಿ, ವರ್ಷಗಳ ಕಾಲ ತಂಡದ ಪ್ರಮುಖ ಆಟಗಾರರಾಗಿದ್ದರು. ಆರಂಭಿಕ ಸೋಲುಗಳು, ವಿಶ್ವಕಪ್ ಫೈನಲ್‌ನ ನಿರಾಸೆ ಹಾಗೂ ಕೋಪಾ ಅಮೆರಿಕಾ ಫೈನಲ್ ಸೋಲುಗಳ ಬಳಿಕ ಟೀಕೆ ಎದುರಿಸಿದ್ದ ಅವರು, ನಂತರ ಅರ್ಜೆಂಟೀನಾದ ಫುಟ್‌ಬಾಲ್ ಇತಿಹಾಸದಲ್ಲೇ ಅಳಿಸಲಾಗದ ಸ್ಥಾನ ಪಡೆದರು.

ಮರಡೋನಾ ನಂತರ ಮತ್ತೊಂದು ದಿಗ್ಗಜ

1986ರ ವಿಶ್ವಕಪ್ ವಿಜೇತ ನಾಯಕ ಡಿಯಾಗೋ ಮರಡೋನಾ ಅವರೊಂದಿಗೆ ಹೋಲಿಕೆಗೆ ಒಳಗಾಗುತ್ತಿದ್ದ ಮೆಸ್ಸಿ, ಕೊನೆಗೂ ತಮ್ಮದೇ ಆದ ಪರಂಪರೆಯನ್ನು ನಿರ್ಮಿಸಿದರು. ವಿಶ್ವಕಪ್, ಕೋಪಾ ಅಮೆರಿಕಾ ಸೇರಿದಂತೆ ಪ್ರಮುಖ ಟ್ರೋಫಿಗಳನ್ನು ಗೆದ್ದು ಅರ್ಜೆಂಟೀನಾ ಫುಟ್‌ಬಾಲ್‌ನ ಅತ್ಯಂತ ಯಶಸ್ವಿ ಅಧ್ಯಾಯಗಳಲ್ಲಿ ಒಂದನ್ನು ಬರೆದಿದ್ದಾರೆ.

ತಮ್ಮ ತಂಡದ ಸದಸ್ಯರೊಂದಿಗೆ ತಾವು ಒಮ್ಮೆ ಕನಸು ಕಂಡ ಕ್ಷಣಗಳನ್ನು ಅರ್ಜೆಂಟೀನಾ ಅಭಿಮಾನಿಗಳಿಗೆ ನೀಡಿದ ಹೆಮ್ಮೆಯೊಂದಿಗೆ ಹೊರಡುತ್ತಿರುವುದಾಗಿ ಮೆಸ್ಸಿ ಹೇಳಿದ್ದಾರೆ.

ಫುಟ್‌ಬಾಲ್ ಇತಿಹಾಸದ ಅತ್ಯಂತ ಶ್ರೇಷ್ಠ ಆಟಗಾರರಲ್ಲಿ ಒಬ್ಬರಾಗಿರುವ ಮೆಸ್ಸಿಯ ಅಂತಾರಾಷ್ಟ್ರೀಯ ವೃತ್ತಿಜೀವನಕ್ಕೆ ಈಗ ಭಾವುಕ ವಿದಾಯದ ಘಟ್ಟ ಎದುರಾಗಿದೆ.

Fuente success story: 13 ವರ್ಷಗಳ ಹಿಂದೆ ನಿರುದ್ಯೋಗಿ ಆಗಿದ್ದ ಫ್ಯುಂಟೆ ಈಗ ವಿಶ್ವಕಪ್‌ ವಿಜೇತ ಸ್ಪೇನ್‌ ಕೋಚ್‌!

Kannadaprabha News — Tue, 21 Jul 2026 07:39:31 +0530

ದಿನಪತ್ರಿಕೆಯಲ್ಲಿ ಬಂದಿದ್ದ ಜಾಹೀರಾತು ನೋಡಿ ಕೋಚ್‌ ಹುದ್ದೆಗೆ ಅರ್ಜಿ ಹಾಕಿದ್ದರು
2013ರಲ್ಲಿ ಅಂಡರ್‌-19 ಕೋಚ್‌ । 2022ರಲ್ಲಿ ಹಿರಿಯರ ಟೀಂ ಕೋಚ್‌ ಆಗಿ ನೇಮಕ

ಸ್ಪೇನ್‌ ತಂಡವನ್ನು ವಿಶ್ವ ಚಾಂಪಿಯನ್‌ ಪಟ್ಟಕ್ಕೇರಿಸಿದ ಕೋಚ್‌ ಲೂಯಿಸ್‌ ಡೆ ಲಾ ಫ್ಯುಂಟೆ, ಹಿರಿಯರ ತಂಡದೊಳಕ್ಕೆ ಬಂದಿದ್ದು 2022ರಲ್ಲಿ. ಆದರೆ ಅವರು ಸ್ಪೇನ್‌ನ ಫುಟ್ಬಾಲ್‌ ವ್ಯವಸ್ಥೆಯೊಳಕ್ಕೆ 2013ರಲ್ಲೇ ಕಾಲಿಟ್ಟಿದ್ದರು.

ದಿನಪತ್ರಿಕೆಯಲ್ಲಿ ಬಂದಿದ್ದ ಜಾಹೀರಾತು ನೋಡಿ ಕೋಚ್‌ ಹುದ್ದೆಗೆ ಅರ್ಜಿ

13 ವರ್ಷಗಳ ಹಿಂದೆ ಫ್ಯುಂಟೆ ನಿರುದ್ಯೋಗಿ. ಸ್ಪೇನ್‌ನ ಕಿರಿಯರ ತಂಡಕ್ಕೆ ಕೋಚ್‌ ಹುಡುಕಾಟದ ಬಗ್ಗೆ ದಿನಪತ್ರಿಕೆಯಲ್ಲಿ ಜಾಹೀರಾತು ನೋಡಿ, ಹುದ್ದೆಗೆ ಅರ್ಜಿ ಸಲ್ಲಿಸಿದ್ದರು. ಸ್ಪೇನ್‌ ಫುಟ್ಬಾಲ್‌ ಸಂಸ್ಥೆ 2013ರಲ್ಲಿ ಅವರನ್ನು ತನ್ನ ರಾಷ್ಟ್ರೀಯ ಅಂಡರ್‌-19 ತಂಡದ ಕೋಚ್‌ ಆಗಿ ನೇಮಿಸಿತು. ಅಲ್ಲಿಂದಾಚೆಗೆ ಫ್ಯುಂಟೆ ಮುಟ್ಟಿದ್ದೆಲ್ಲಾ ಚಿನ್ನ!

2022ರಲ್ಲಿ ಹಿರಿಯರ ಟೀಂ ಕೋಚ್‌ ಆಗಿ ನೇಮಕ

ಫ್ಯುಂಟೆ ಮಾರ್ಗದರ್ಶನದಲ್ಲಿ ಸ್ಪೇನ್‌ 2015ರಲ್ಲಿ ಯುರೋಪಿಯನ್‌ ಅಂಡರ್‌-19 ಚಾಂಪಿಯನ್‌ಶಿಪ್‌ ಜಯಿಸಿತು. 2019ರಲ್ಲಿ ಯುರೋಪಿಯನ್‌ ಅಂಡರ್‌-21 ಚಾಂಪಿಯನ್‌ಶಿಪ್‌ ಸ್ಪೇನ್‌ ಪಾಲಾಯಿತು. 2022ರಲ್ಲಿ ಫ್ಯುಂಟೆ ಹಿರಿಯರ ತಂಡದ ಕೋಚ್‌ ಆಗಿ ಬಡ್ತಿ ಪಡೆದರು. ಆ ಬಳಿಕ ಸ್ಪೇನ್‌, 2023ರಲ್ಲಿ ಯುಇಎಫ್‌ಎ ನೇಷನ್ಸ್‌ ಕಪ್‌ ಜಯಿಸಿತು. 2024ರಲ್ಲಿ ಯುರೋ ಕಪ್‌ ಗೆದ್ದಿತು. ಇದೀಗ 2026ರಲ್ಲಿ ವಿಶ್ವ ಚಾಂಪಿಯನ್‌ ಆಗಿದೆ.

ಈ ವಿಶ್ವಕಪ್‌ನಲ್ಲಿ ಸ್ಪೇನ್‌ ತಂಡದ ಆಧಾರಸ್ತಂಭವಾಗಿದ್ದ ರೋಡ್ರಿ, ಫ್ಯಾಬಿಯನ್‌ ರೂಯಿಜ್‌, ಮಿಕೆಲ್‌ ಮೆರಿನಿ, ಉನೈ ಸೈಮನ್‌ ಫ್ಯುಂಟೆ ಗರಡಿಯಲ್ಲೇ ಬೆಳೆದವರು ಎನ್ನುವುದು ವಿಶೇಷ. ಸ್ಪ್ಯಾನಿಶ್‌ ಫುಟ್ಬಾಲ್‌ನ ಆಳ-ಅಗಲ ತಿಳಿದಿರುವ ಫ್ಯುಂಟೆಗೆ ಕೋಚಿಂಗ್‌ ಜವಾಬ್ದಾರಿ ನೀಡಿದ್ದು ಸ್ಪೇನ್‌ ಫುಟ್ಬಾಲ್‌ ಸಂಸ್ಥೆಯ ಮಾಸ್ಟರ್‌ ಸ್ಟ್ರೋಕ್‌.

FIFA Team Of The Tournament: ಫಿಫಾ ವಿಶ್ವಕಪ್‌ ಇಲೆವೆನ್‌ ಪ್ರಕಟ: ಹ್ಯಾರಿ ಕೇನ್‌, ಯಮಾಲ್‌ ಔಟ್‌!

Naveen Kodase — Thu, 23 Jul 2026 13:32:43 +0530

ಫಿಫಾ, ವಿಶ್ವಕಪ್ ಟೂರ್ನಿಯ ಅತ್ಯುತ್ತಮ ತಂಡವನ್ನು ಪ್ರಕಟಿಸಿದೆ. ಸ್ಪೇನ್ ಮತ್ತು ಫ್ರಾನ್ಸ್‌ನಿಂದ ತಲಾ ಮೂವರು ಆಟಗಾರರು ಹಾಗೂ ಅರ್ಜೆಂಟೀನಾದಿಂದ ಇಬ್ಬರು ಆಟಗಾರರು ಈ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ. ಫಿಫಾ ವಿಶ್ವಕಪ್‌ ಟೀಂ ಆಫ್‌ ದಿ ಟೂರ್ನಮೆಂಟ್‌ನಲ್ಲಿ ಯಾರೆಲ್ಲಾ ಸ್ಥಾನ ಪಡೆದಿದ್ದಾರೆ ನೋಡೋಣ ಬನ್ನಿ.

ವಿಶ್ವಕಪ್‌ನಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ 11 ಆಟಗಾರರನ್ನು ಸೇರಿಸಿ ಫಿಫಾ 'ಟೀಮ್ ಆಫ್ ದಿ ಟೂರ್ನಮೆಂಟ್' ಪ್ರಕಟಿಸಿದೆ. ಈ ತಂಡದಲ್ಲಿ ಹಲವು ಅಚ್ಚರಿಯ ಆಯ್ಕೆಗಳಿವೆ. ವಿಶ್ವ ಚಾಂಪಿಯನ್ ಸ್ಪೇನ್ ಮತ್ತು ಸೆಮಿಫೈನಲ್‌ನಲ್ಲಿ ಸೋತ ಫ್ರಾನ್ಸ್ ತಂಡಗಳಿಂದ ತಲಾ ಮೂವರು ಆಟಗಾರರು ಫಿಫಾ ವಿಶ್ವಕಪ್ ಇಲೆವೆನ್‌ನಲ್ಲಿ ಸ್ಥಾನ ಪಡೆದುಕೊಂಡಿದ್ದಾರೆ.

ವಿಶ್ವ ಚಾಂಪಿಯನ್ ಸ್ಪೇನ್ ತಂಡದಿಂದ ಡಿಫೆಂಡರ್ ಮಾರ್ಕ್ ಕುಕುರೆಲ್ಲಾ, ನಾಯಕ ರೋಡ್ರಿ ಮತ್ತು ಡಿಫೆಂಡರ್ ಪೆಡ್ರೊ ಪೊರೊ ಅವರು ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ.

ಸೆಮಿಫೈನಲ್‌ನಲ್ಲಿ ಸ್ಪೇನ್ ವಿರುದ್ಧ ಸೋತ ಫ್ರಾನ್ಸ್ ತಂಡದಿಂದ ನಾಯಕ ಕಿಲಿಯನ್ ಎಂಬಾಪೆ, ಡಿಫೆಂಡರ್ ಡಯೋಟ್ ಉಪಮೆಕಾನೊ ಮತ್ತು 7 ಅಸಿಸ್ಟ್‌ಗಳೊಂದಿಗೆ ಮಿಂಚಿದ ಮೈಕಲ್ ಒಲಿಸೆ ತಂಡದಲ್ಲಿದ್ದಾರೆ.

ವಿಶ್ವಕಪ್ ರನ್ನರ್-ಅಪ್ ಆದ ಅರ್ಜೆಂಟೀನಾ ತಂಡದಿಂದ ಇಬ್ಬರು ಆಟಗಾರರು ಫಿಫಾ ವಿಶ್ವಕಪ್ ಇಲೆವೆನ್‌ನಲ್ಲಿ ಸ್ಥಾನ ಪಡೆದಿದ್ದಾರೆ. ನಾಯಕ ಲಿಯೋನೆಲ್ ಮೆಸ್ಸಿ ಮತ್ತು ಡಿಫೆಂಡರ್ ಲಿಸಾಂಡ್ರೊ ಮಾರ್ಟಿನೆಜ್ ಈ ತಂಡದಲ್ಲಿದ್ದಾರೆ.

ನಾಕೌಟ್‌ನಲ್ಲಿ ಅರ್ಜೆಂಟೀನಾ ವಿರುದ್ಧ ಸೋತರೂ, ಅದ್ಭುತ ಸೇವ್‌ಗಳಿಂದ ಗಮನಸೆಳೆದಿದ್ದ ಕೇಪ್ ವರ್ಡೆ ಗೋಲ್‌ಕೀಪರ್ ವೊಸಿನ್ಹಾ ತಂಡಕ್ಕೆ ಆಯ್ಕೆಯಾಗಿದ್ದು ದೊಡ್ಡ ಅಚ್ಚರಿ. ಸ್ಪೇನ್‌ನ ಗೋಲ್ಡನ್ ಗ್ಲೌ ವಿಜೇತ ಉನೈ ಸಿಮೋನ್ ಮತ್ತು ಫೈನಲ್‌ನಲ್ಲಿ 11 ಸೇವ್ ಮಾಡಿದ್ದ ಅರ್ಜೆಂಟೀನಾದ ಎಮಿ ಮಾರ್ಟಿನೆಜ್‌ರನ್ನು ಹಿಂದಿಕ್ಕಿ ವೊಸಿನ್ಹಾ ಆಯ್ಕೆಯಾಗಿದ್ದಾರೆ.

ವಿಶ್ವಕಪ್‌ನಲ್ಲಿ 7 ಗೋಲು ಗಳಿಸಿ ಇಂಗ್ಲೆಂಡ್ ತಂಡವನ್ನು ಸೆಮಿಫೈನಲ್‌ಗೆ ಕೊಂಡೊಯ್ದ ನಾಯಕ ಹ್ಯಾರಿ ಕೇನ್‌ಗೆ ಫಿಫಾದ ವಿಶ್ವಕಪ್ ತಂಡದಲ್ಲಿ ಸ್ಥಾನ ಸಿಕ್ಕಿಲ್ಲ.

ಇನ್ನು ವಿಶ್ವಕಪ್‌ನಲ್ಲಿ ಏಳು ಗೋಲುಗಳೊಂದಿಗೆ ಮಿಂಚಿದ ಇಂಗ್ಲೆಂಡ್‌ನ ಜೂಡ್ ಬೆಲ್ಲಿಂಗ್‌ಹ್ಯಾಮ್, ವಿಶ್ವಕಪ್ ಇಲೆವೆನ್‌ನಲ್ಲಿ ಸ್ಥಾನ ಪಡೆದ ಏಕೈಕ ಇಂಗ್ಲಿಷ್ ಆಟಗಾರನಾಗಿದ್ದಾರೆ.

ಗೋಲ್‌ಕೀಪರ್: ವೊಸಿನ್ಹಾ (ಕೇಪ್ ವರ್ಡೆ), ಡಿಫೆಂಡರ್‌ಗಳು: ಮಾರ್ಕ್ ಕುಕುರೆಲ್ಲಾ (ಸ್ಪೇನ್), ಲಿಸಾಂಡ್ರೊ ಮಾರ್ಟಿನೆಜ್ (ಅರ್ಜೆಂಟೀನಾ), ಡಯೋಟ್ ಉಪಮೆಕಾನೊ (ಫ್ರಾನ್ಸ್), ಪೆಡ್ರೊ ಪೊರೊ (ಸ್ಪೇನ್). ಮಿಡ್‌ಫೀಲ್ಡರ್‌ಗಳು: ರೋಡ್ರಿ (ಸ್ಪೇನ್), ಜೂಡ್ ಬೆಲ್ಲಿಂಗ್‌ಹ್ಯಾಮ್ (ಇಂಗ್ಲೆಂಡ್), ಮೈಕಲ್ ಒಲಿಸೆ (ಫ್ರಾನ್ಸ್). ಫಾರ್ವರ್ಡ್‌ಗಳು: ಕೈಲಿಯನ್ ಎಂಬಾಪೆ (ಫ್ರಾನ್ಸ್), ಅರ್ಲಿಂಗ್ ಹಾಲೆಂಡ್ (ನಾರ್ವೆ), ಲಿಯೋನೆಲ್ ಮೆಸ್ಸಿ (ಅರ್ಜೆಂಟೀನಾ).

ಫುಟ್ಬಾಲ್‌ ವಿಶ್ವಕಪ್‌ ಬಹಿಷ್ಕಾರ: ಸ್ಪೇನ್‌ ಸೇರಿ 55 ದೇಶ ಎಚ್ಚರಿಕೆ! ಅಷ್ಟಕ್ಕೂ ಆಗಿದ್ದೇನು?

Kannadaprabha News — Fri, 31 Jul 2026 08:04:16 +0530

ಜಿನೇವಾ(ಸ್ವಿಜರ್‌ಲೆಂಡ್‌): ಫುಟ್ಬಾಲ್‌ನ ಜಾಗತಿಕ ಆಡಳಿತ ಮಂಡಳಿ ಫಿಫಾದ ವಾಣಿಜ್ಯ ಚಟುವಟಿಕೆಗಳಲ್ಲಿ ಖಾಸಗಿ ಹೂಡಿಕೆದಾರರಿಗೆ ಪಾಲು ನೀಡುವ ಯೋಜನೆಗೆ ಯುಇಎಫ್‌ಎ(ಯೂನಿಯನ್ ಆಫ್ ಯುರೋಪಿಯನ್ ಫುಟ್ಬಾಲ್ ಸಂಸ್ಥೆ) ತೀವ್ರ ವಿರೋಧ ವ್ಯಕ್ತಪಡಿಸಿದ್ದು, ವಿಶ್ವಕಪ್‌ ಸೇರಿದಂತೆ ಪ್ರಮುಖ ಟೂರ್ನಿಗಳನ್ನೇ ಬಹಿಷ್ಕರಿಸುವ ಎಚ್ಚರಿಕೆ ನೀಡಿದೆ.

ಫಿಫಾ ತನ್ನ ಪ್ರಮುಖ ಟೂರ್ನಿಗಳಾದ ಪುರುಷರ ವಿಶ್ವಕಪ್, ಮಹಿಳಾ ವಿಶ್ವಕಪ್ ಮತ್ತು ಕ್ಲಬ್ ವಿಶ್ವಕಪ್‌ಗಳಿಗೆ ಸಂಬಂಧಿಸಿದ ವಾಣಿಜ್ಯ ಮತ್ತು ಈವೆಂಟ್ ಕಾರ್ಯಾಚರಣೆಗಳನ್ನು ಏಕೀಕರಿಸುವ ಫಿಫಾ ಫಾರ್ವರ್ಡ್ ಎಂಟರ್‌ಪ್ರೈಸ್ (ಎಫ್‌ಎಫ್‌ಇ) ಎಂಬ ಹೊಸ ಸಹಾಯಕ ಸಂಸ್ಥೆಯನ್ನು ಸ್ಥಾಪಿಸುವ ಯೋಜನೆ ಹಾಕಿದೆ. ಇದು 20 ಬಿಲಿಯನ್‌ ಡಾಲರ್(ಅಂದಾಜು 1.91 ಲಕ್ಷ ಕೋಟಿ ರು.) ಮೌಲ್ಯ ಹೊಂದಿದೆ. ಈ ಸಂಸ್ಥೆಯ ಶೇ.20ರಷ್ಟು ಪಾಲನ್ನು ಖಾಸಗಿ ಹೂಡಿಕೆದಾರರಿಗೆ ನೀಡಲಾಗುತ್ತದೆ.

ಆದರೆ ಇದನ್ನು ಸ್ಪೇನ್‌, ಪೋರ್ಚುಗಲ್‌, ಇಂಗ್ಲೆಂಡ್‌, ಫ್ರಾನ್ಸ್‌ ಸೇರಿದಂತೆ ಯರೋಪಿಯನ್‌ ದೇಶಗಳು ವಿರೋಧಿಸಿವೆ. ಈ ಬಗ್ಗೆ ಗುರುವಾರ ಯುಇಎಫ್‌ಎ ಪ್ರಕಟಣೆ ಹೊರಡಿಸಿದೆ. ‘ಯುಇಎಫ್‌ಎ ಹಾಗೂ 55 ಸದಸ್ಯ ರಾಷ್ಟ್ರಗಳು ಒಟ್ಟಾಗಿ ನಿಲ್ಲಲಿವೆ. ವಿಶ್ವಕಪ್‌ ಹಾಗೂ ಇತರ ಟೂರ್ನಿಗಳ ಪಾಲನ್ನು ಖಾಸಗಿ ಹೂಡಿಕೆದಾರರಿಗೆ ನೀಡುವ ಫಿಫಾ ಪ್ರಸ್ತಾವನೆಯನ್ನು ನಾವು ವಿರೋಧಿಸುತ್ತೇವೆ. ಫಿಫಾ ವಿಶ್ವಕಪ್‌ ಎಂಬುದು ಫುಟ್ಬಾಲ್‌ಗೆ ಸೇರಿದೆ. ಅದು ಹಾಗೆಯೇ ಇರಲಿದೆ. ಯುರೋಪಿಯನ್‌ ದೇಶಗಳಿಗೆ ಧ್ವನಿ ಇರುವವರೆಗೂ ಫಿಫಾ ಮಾರಾಟ ಸಾಧ್ಯವಿಲ್ಲ. ಈ ಪ್ರಸ್ತಾವನೆ ಚಾಲ್ತಿಯಲ್ಲಿ ಇರುವವರೆಗೂ ಫಿಫಾ ಟೂರ್ನಿಗಳಲ್ಲಿ ಯುಇಎಫ್‌ಎ ದೇಶಗಳು ಪಾಲ್ಗೊಳ್ಳುವುದಿಲ್ಲ’ ಎಂದು ಎಚ್ಚರಿಸಿದೆ.

ಖಾಸಗಿ ಹೂಡಿಕೆ ಸಂಸ್ಥೆ ಟ್ರಂಪ್‌ ಕುಟುಂಬದ್ದು!

ಫಿಫಾ ಯೋಜನೆಯಲ್ಲಿ ಪ್ರಮುಖ ಖಾಸಗಿ ಹೂಡಿಕೆದಾರರಾಗಿ ನ್ಯೂಯಾರ್ಕ್‌ನ ಒಂದು ಹೂಡಿಕೆ ಸಂಸ್ಥೆ ಇರಲಿದೆ. ಈ ಸಂಸ್ಥೆಯನ್ನು ಜೋಶುವಾ ಕುಷ್ನರ್ ಸ್ಥಾಪಿಸಿದ್ದಾರೆ. ಜೋಶುವಾ ಕುಷ್ನರ್ ಅವರು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಅಳಿಯ ಜರೆಡ್ ಕುಷ್ನರ್ ಅವರ ಸಹೋದರ ಎಂಬುದು ಗಮನಾರ್ಹ.

ಅ.3ರಂದು ಕೋಲ್ಕತಾದಲ್ಲಿ ಭಾರತ-ಬ್ರೆಜಿಲ್ ಫುಟ್ಬಾಲ್

ಕೋಲ್ಕತಾ: ಬ್ರೆಜಿಲ್‌ ತಂಡ ಭಾರತದಲ್ಲಿ ಫುಟ್ಬಾಲ್ ಪಂದ್ಯ ಆಡುವುದು ಖಚಿತವಾಗಿದೆ. ಅ.3ರಂದು ಭಾರತ ಹಾಗೂ ಬ್ರೆಜಿಲ್‌ ತಂಡಗಳ ನಡುವೆ ಕೋಲ್ಕತಾದ ಸಾಲ್ಟ್‌ ಲೇಕ್‌ ಕ್ರೀಡಾಂಗಣದಲ್ಲಿ ಅಂತಾರಾಷ್ಟ್ರೀಯ ಸ್ನೇಹಾರ್ಥ ಪಂದ್ಯ ನಡೆಯಲಿದೆ ಎಂದು ಉಭಯ ದೇಶಗಳ ಫುಟ್ಬಾಲ್‌ ಒಕ್ಕೂಟಗಳು ಗುರುವಾರ ಘೋಷಿಸಿವೆ. ಇದು ಬ್ರೆಜಿಲ್‌ ತಂಡ ಭಾರತದಲ್ಲಿ ಆಡಲಿರುವ ಮೊದಲ ಪಂದ್ಯ ಎನಿಸಿಕೊಳ್ಳಲಿದೆ. ಅಲ್ಲದೆ, ಫಿಫಾ ವಿಶ್ವ ರ್‍ಯಾಂಕಿಂಗ್‌ ಜಾರಿಯಾದ 1992ರ ಬಳಿಕ ಭಾರತ ತಂಡ ಎದುರಿಸಲಿರುವ ಶ್ರೇಷ್ಠ ರ್‍ಯಾಂಕಿಂಗ್‌ ತಂಡವಾಗಿದೆ. ಬ್ರೆಜಿಲ್‌ ಈಗ ವಿಶ್ವ ರ್‍ಯಾಂಕಿಂಗ್‌ನಲ್ಲಿ 5ನೇ ಸ್ಥಾನದಲ್ಲಿದೆ. ಭಾರತ 138ನೇ ಸ್ಥಾನದಲ್ಲಿದೆ.

ಫಿಫಾ ವಿಶ್ವ ವಿಜೇತ ಸ್ಪೇನ್‌ ಟೀಂಗೆ ತವರಿನಲ್ಲಿ 20 ಲಕ್ಷ ಜನರ ಸ್ವಾಗತ! ಮ್ಯಾಡ್ರಿಡ್‌ನಲ್ಲಿ ಸಂಭ್ರಮದ ಮಹಾಪೂರ

Kannadaprabha News — Wed, 22 Jul 2026 10:35:35 +0530

ಮ್ಯಾಡ್ರಿಡ್‌: ಫುಟ್ಬಾಲ್‌ ವಿಶ್ವ ಚಾಂಪಿಯನ್‌ ಸ್ಪೇನ್‌ ತಂಡಕ್ಕೆ ತವರಿನಲ್ಲಿ ಅದ್ಧೂರಿ ಸ್ವಾಗತ ಲಭಿಸಿದೆ. ಸೋಮವಾರ ಅಮೆರಿಕದಿಂದ ಸ್ಪೇನ್‌ ರಾಜಧಾನಿ ಮ್ಯಾಡ್ರಿಡ್‌ಗೆ ಬಂದಿಳಿದ ಆಟಗಾರರನ್ನು ಸಹಸ್ರಾರು ಅಭಿಮಾನಿಗಳು ಸಂಭ್ರಮದಿಂದ ಬರಮಾಡಿಕೊಂಡರು. ಅಧಿಕಾರಿಗಳ ಮಾಹಿತಿ ಪ್ರಕಾರ, ಸಂಭ್ರಮಾಚರಣೆಯಲ್ಲಿ 20 ಲಕ್ಷಕ್ಕೂ ಹೆಚ್ಚಿನ ಅಭಿಮಾನಿಗಳು ಪಾಲ್ಗೊಂಡಿದ್ದರು ಎಂದು ವರದಿಯಾಗಿದೆ.

26 ಆಟಗಾರರ ತಂಡ ಹಾಗೂ ಕೋಚಿಂಗ್‌ ಸಿಬ್ಬಂದಿ ಮೊದಲು ಸ್ಪೇನ್‌ ರಾಜಮನೆತನವನ್ನು ಭೇಟಿ ಮಾಡಿತು. ದೊರೆ 6ನೇ ಫಿಲಿಪ್‌, ರಾಣಿ ಲೆಟಿಜಿಯಾ ಅವರು ತಂಡವನ್ನು ಗೌರವಿಸಿದರು. ಬಳಿಕ ಪ್ರಧಾನ ಮಂತ್ರಿ ಪೆಡ್ರೊ ಸ್ಯಾಂಚೆಜ್‌ ಅವರನ್ನು ತಂಡ ಭೇಟಿಯಾಯಿತು. ಅಲ್ಲಿಂದ ಮ್ಯಾಡ್ರಿಡ್‌ನ ಪ್ರಮುಖ ಸ್ಥಳಗಳಲ್ಲಿ ತೆರೆದ ಬಸ್‌ನಲ್ಲಿ ವಿಜಯಯಾತ್ರೆ ನಡೆಯಿತು. ‘ನಾವು ವಿಶ್ವ ಚಾಂಪಿಯನ್ಸ್‌’ ಎಂದು ಬರೆಯಲಾಗಿದ್ದ ವಿಶೇಷ ಟಿ-ಶರ್ಟ್‌ ಧರಿಸಿದ್ದ ಆಟಗಾರರು, ವಿಶ್ವಕಪ್‌ ಎತ್ತಿ ತೋರಿಸಿ ಸಂಭ್ರಮಿಸಿದರು. ಬಳಿಕ ವೇದಿಕೆ ಕಾರ್ಯಕ್ರಮ ನಡೆಯಿತು. ಆಟಗಾರರು ವೇದಿಕೆಯಲ್ಲೇ ಕುಣಿದಿದ್ದಲ್ಲದೇ, ಕೋಚ್‌ ಫ್ಯುಂಟೆ ಅವರನ್ನು ಎತ್ತಿ ಸಂಭ್ರಮಿಸಿದರು.

ಅರ್ಜೆಂಟೀನಾದಲ್ಲೂ ಅದ್ಧೂರಿ ವಿಜಯಯಾತ್ರೆ, ಮೆಸ್ಸಿ ಗೈರು

ವಿಶ್ವಕಪ್‌ನಲ್ಲಿ ರನ್ನರ್‌-ಅಪ್‌ ಆದ ಅರ್ಜೆಂಟೀನಾ ತಂಡಕ್ಕೆ ತವರಿನಲ್ಲಿ ಅದ್ಧೂರಿ ಸ್ವಾಗತ ಲಭಿಸಿತು. ಬ್ಯೂನಸ್‌ ಐರಿಸ್‌ಗೆ ಬಂದಿಳಿದ ಕೋಚ್‌ ಲಿಯೋನಲ್‌ ಸ್ಕಲೋನಿ ಹಾಗೂ ಕೆಲ ಆಟಗಾರರನ್ನು ಅಪಾರ ಪ್ರಮಾಣದ ಅಭಿಮಾನಿಗಳು ಬರಮಾಡಿಕೊಂಡರು. ಆಟಗಾರರು ತೆರೆದ ಬಸ್‌ನಲ್ಲಿ ವಿಜಯಯಾತ್ರೆ ಕೂಡಾ ನಡೆಸಿದರು. ಲಿಯೋನಲ್‌ ಮೆಸ್ಸಿ ಅಮೆರಿಕದ ಮೇಜರ್‌ ಲೀಗ್‌ ಸಾಕರ್‌(ಎಂಎಲ್‌ಎಸ್‌)ನ ಇಂಟರ್‌ ಮಿಯಾಮಿ ತಂಡವನ್ನು ಕೂಡಿಕೊಳ್ಳುವ ಉದ್ದೇಶದಿಂದ ಅಮೆರಿಕದಲ್ಲೇ ಉಳಿದರು. ಇತರ ಕೆಲ ಆಟಗಾರರು ಕೂಡಾ ಅರ್ಜೆಂಟೀನಾಗೆ ಮರಳಲಿಲ್ಲ. ಹೀಗಾಗಿ ಸಂಭ್ರಮಾಚರಣೆ ತಪ್ಪಿಸಿಕೊಂಡರು.

ಅರ್ಜೆಂಟೀನಾ ದುರ್ವರ್ತನೆ: ಫಿಫಾದಿಂದ ತನಿಖೆ ಆರಂಭ

ಈಸ್ಟ್‌ ರುದರ್‌ಫೋರ್ಡ್‌(ಅಮೆರಿಕ): ಫಿಫಾ ವಿಶ್ವಕಪ್‌ ಫೈನಲ್‌ ಬಳಿಕ ಸ್ಪೇನ್‌ ಆಟಗಾರರ ವಿಜಯೋತ್ಸವದ ವೇಳೆ ಅರ್ಜೆಂಟೀನಾ ಆಟಗಾರರ ದುರ್ವರ್ತನೆಗೆ ಸಂಬಂಧಿಸಿದಂತೆ ಫಿಫಾ ಸೋಮವಾರ ತನಿಖೆ ಆರಂಭಿಸಿದೆ. ಅರ್ಜೆಂಟೀನಾದ ಪೆರೆಡೆಸ್‌ ಸ್ಪೇನ್‌ನ ಎರಿಕ್ ಗಾರ್ಸಿಯಾ ಅವರು ಕತ್ತು ಹಿಸುಕಿದ್ದು, ಈ ವೇಳೆ ಮಧ್ಯಪ್ರವೇಶಿಸಲು ಮುಂದಾದ ಗಾವಿ ಅವರನ್ನು ನೆಲಕ್ಕೆ ತಳ್ಳಿದ್ದರು. ಅಲ್ಲದೆ, ಅರ್ಜೆಂಟೀನಾದ ಡಿಫೆಂಡರ್‌ ನಹುಯೆಲ್‌ ಮೋಲಿನಾ ಅವರು ಸ್ಪೇನ್‌ ನಾಯಕ ರೋಡ್ರಿ ಅವರ ಹೊಟ್ಟೆಗೆ ಗುದ್ದಿದ್ದಾರೆ. ಇದರ ಬಗ್ಗೆ ತನಿಖೆತೆ ಫಿಫಾ ಶಿಸ್ತು ಸಮಿತಿಯು ನೈತಿಕ ಅಭಿಯೋಜಕರನ್ನು ನೇಮಿಸಿದೆ.

8 ಗೋಲು ಹೊಡೆದ ಮೆಸ್ಸಿಯನ್ನು ಹಿಂದಿಕ್ಕಿ 0 ಗೋಲಿನ ರೋಡ್ರಿಗೆ ಗೋಲ್ಡನ್‌ ಬಾಲ್ ಸಿಕ್ಕಿದ್ದು ಹೇಗೆ?

Kannadaprabha News — Tue, 21 Jul 2026 11:28:25 +0530

ಈ ಬಾರಿ ಗೋಲ್ಡನ್‌ ಬಾಲ್‌(ಟೂರ್ನಿಯ ಶ್ರೇಷ್ಠ ಆಟಗಾರ) ಪ್ರಶಸ್ತಿಯನ್ನು ಸ್ಪೇನ್‌ ನಾಯಕ ರೋಡ್ರಿ ತಮ್ಮದಾಗಿಸಿಕೊಂಡಿದ್ದಾರೆ. 8 ಗೋಲು ಬಾರಿಸಿ, 4 ಬಾರಿ ಗೋಲು ಗಳಿಸಲು ನೆರವು(ಅಸಿಸ್ಟ್‌) ನೀಡಿರುವ ಮೆಸ್ಸಿ ಈ ಪ್ರಶಸ್ತಿ ಗೆಲ್ಲುತ್ತಾರೆ ಎಂದೇ ಊಹಿಸಲಾಗಿತ್ತು. ಆದರೆ ಮಿಡ್‌ಫೀಲ್ಡ್‌ನಲ್ಲಿ ಅತ್ಯದ್ಭುತ ಪ್ರದರ್ಶನ ನೀಡಿರುವ ರೋಡ್ರಿ ಪ್ರಶಸ್ತಿ ಗೆದ್ದಿದ್ದಾರೆ.

ಅವರು ಟೂರ್ನಿಯಲ್ಲಿ 799 ಪಾಸ್‌ಗಳನ್ನು ಮಾಡಿದ್ದು, ಇದರಲ್ಲಿ ಶೇ.93ರಷ್ಟು ನಿಖರತೆ ಹೊಂದಿದ್ದರು. ಫಿಫಾ ಅಂಕಿ ಅಂಶ ಪ್ರಕಾರ ಅವರು 1803 ಪಾಸ್‌ನಲ್ಲಿ ಭಾಗಿಯಾಗಿದ್ದಾರೆ. 11 ಬಾರಿ ಗೋಲು ಅವಕಾಶ ಸೃಷ್ಟಿಸಿದ್ದು, 26 ಬಾರಿ ಎದುರಾಳಿಗಳನ್ನು ಟ್ಯಾಕಲ್‌ ಮಾಡಿ ಗೋಲು ಅವಕಾಶ ತಪ್ಪಿಸಿಕೊಂಡಿದ್ದಾರೆ. ಟೂರ್ನಿಯಲ್ಲಿ ಅವರು ಬರೋಬ್ಬರಿ 96 ಕಿ.ಮೀ. ಓಟ ಪೂರ್ತಿಗೊಳಿಸಿದ್ದಾರೆ. ಮೈದಾನದಲ್ಲಿ ಗೋಲ್‌ಕೀಪರ್‌ ಉನೈ ಸಿಮೋನ್‌ ಯಶಸ್ಸಿನ ಹಿಂದೆ ರೋಡ್ರಿ ಪಾತ್ರ ಪರಿಗಣಿಸಿ ಅವರಿಗೆ ಗೋಲ್ಡನ್‌ ಬಾಲ್‌ ಅವಾರ್ಡ್‌ ನೀಡಲಾಗಿದೆ.

ಕುಬಾರ್ಸಿ ಶ್ರೇಷ್ಠ ಯುವ ಆಟಗಾರ, ಸಿಮೋನ್‌ ಶ್ರೇಷ್ಠ ಗೋಲ್‌ಕೀಪರ್

ಈ ಬಾರಿ ವೈಯಕ್ತಿಕ 4 ಪ್ರಶಸ್ತಿಗಳ ಪೈಕಿ ಮೂರನ್ನು ಸ್ಪೇನ್‌ ಆಟಗಾರರು ತಮ್ಮದಾಗಿಸಿಕೊಂಡಿದ್ದಾರೆ. ಟೂರ್ನಿಯಲ್ಲಿ ಆಡಿರುವ 8 ಪಂದ್ಯಗಳಲ್ಲಿ ಕೇವಲ ಒಂದು ಗೋಲು ಬಿಟ್ಟುಕೊಟ್ಟಿರುವ ಉನೈ ಸಿಮೋನ್‌ ಶ್ರೇಷ್ಠ ಗೋಲ್‌ಕೀಪರ್‌ ಪ್ರಶಸ್ತಿ ಗೆದ್ದಿದ್ದಾರೆ. 19 ವರ್ಷದ ಡಿಫೆಂಡರ್‌ ಪೌ ಕುಬಾರ್ಸಿ ಟೂರ್ನಿಯ ಶ್ರೇಷ್ಠ ಯುವ ಆಟಗಾರ ಪ್ರಶಸ್ತಿಯನ್ನು ಪಡೆದುಕೊಂಡಿದ್ದಾರೆ. ಫೈನಲ್‌ನಲ್ಲೇ ಅವರು ಗರಿಷ್ಠ ಅಂದರೆ 124 ಪಾಸ್‌ ಮಾಡಿದ್ದಾರೆ. ಟೂರ್ನಿಯಲ್ಲಿ 25 ಬಾರಿ ಗೋಲು ಪ್ರಯತ್ನ ತಡೆದಿದ್ದು, 7 ಬಾರಿ ಗೋಲು ಅವಕಾಶ ಸೃಷ್ಟಿಸಿದ್ದಾರೆ.

ಗರಿಷ್ಠ ಗೋಲು: ಸತತ ಎರಡನೇ ಗೋಲ್ಡನ್‌ ಬೂಟ್‌ ಗೆದ್ದ ಎಂಬಾಪೆ

ಫ್ರಾನ್ಸ್‌ ತಾರಾ ಫುಟ್ಬಾಲಿಗ ಕೀಲಿಯನ್‌ ಎಂಬಾಪೆ ಸತತ 2ನೇ ವಿಶ್ವಕಪ್‌ನಲ್ಲೂ ಗೋಲ್ಡನ್‌ ಬೂಟ್‌ ಗೆದ್ದಿದ್ದಾರೆ. ಟೂರ್ನಿಯಲ್ಲಿ ಗರಿಷ್ಠ ಗೋಲು ಬಾರಿಸುವ ಆಟಗಾರರಿಗೆ ಸಿಗುವ ಈ ಪ್ರಶಸ್ತಿ ರೇಸ್‌ನಲ್ಲಿ ಸೆಮಿಫೈನಲ್‌ವರೆಗೆ ಲಿಯೋನಲ್‌ ಮೆಸ್ಸಿ ಮುಂದಿದ್ದರು. ಆದರೆ 3ನೇ ಸ್ಥಾನದ ಪಂದ್ಯದಲ್ಲಿ 2 ಗೋಲು ಗಳಿಸಿದ ಎಂಬಾಪೆ, ಒಟ್ಟಾರೆ ಟೂರ್ನಿಯ ಗೋಲು ಸಂಖ್ಯೆಯನ್ನು 10ಕ್ಕೆ ಹೆಚ್ಚಿಸಿ ಗೋಲ್ಡನ್‌ ಬೂಟ್‌ ಗೆದ್ದರು. ಮೆಸ್ಸಿ 8 ಗೋಲುಗಳೊಂದಿಗೆ 2ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು. 2022ರ ವಿಶ್ವಕಪ್‌ನಲ್ಲೂ ಎಂಬಾಪೆ(8 ಗೋಲು) ಗೋಲ್ಡನ್‌ ಬೂಟ್‌ ಗೆದ್ದಿದ್ದರೆ, ಮೆಸ್ಸಿ 2ನೇ ಸ್ಥಾನಿಯಾಗಿದ್ದರು.

ವಿಶ್ವಕಪ್‌ ಗೆಲ್ಲುವಿನಲ್ಲಿದೆ ಸ್ಪ್ಯಾನಿಶ್‌ ಕ್ಲಬ್‌ಗಳ ಪಾತ್ರ!

ಈ ವಿಶ್ವಕಪ್‌ನಲ್ಲಿ ಸ್ಪೇನ್‌ ತಂಡದಲ್ಲಿ ಆಡಿದ 26 ಆಟಗಾರರ ಪೈಕಿ 17 ಆಟಗಾರರು ಸ್ಪೇನ್‌ನಲ್ಲಿ ನಡೆಯುವ ವಿಶ್ವ ಪ್ರತಿಷ್ಠಿತ ಲಾ ಲೀಗಾದಲ್ಲಿ ಬೇರೆ ಬೇರೆ ಕ್ಲಬ್‌ಗಳ ಪರ ಆಡುತ್ತಾರೆ. ಈ ಪೈಕಿ 8 ಮಂದಿ ಜಗತ್ತಿನ ಅತ್ಯಂತ ಪ್ರಖ್ಯಾತ ಕ್ಲಬ್‌ಗಳಲ್ಲಿ ಒಂದಾದ ಬಾರ್ಸಿಲೋನಾ ಎಫ್‌ಸಿಯ ಆಟಗಾರರು.

ಸ್ಪ್ಯಾನಿಶ್‌ ಲೀಗ್‌ಗಳಲ್ಲಿ ಆಡುವ ಅನುಭವ ಆ ದೇಶದ ಆಟಗಾರರನ್ನು ವಿಶ್ವಕಪ್‌ ಕಾಳಗಕ್ಕೆ ಸಜ್ಜಾಗಿಸಿತು. ಇನ್ನು, ಉಳಿದ 9 ಆಟಗಾರರು ಇಂಗ್ಲಿಷ್‌ ಪ್ರೀಮಿಯರ್‌ ಲೀಗ್‌, ಜರ್ಮನಿಯ ಬಂಡೆಸ್‌ ಲೀಗಾ, ಫ್ರಾನ್ಸ್‌ನ ಫ್ರೆಂಚ್‌ ಲೀಗ್‌-1ನಲ್ಲಿ ಭಾಗಿ. ಹೀಗಾಗಿ ಎಲ್ಲರಿಗೂ ಜಾಗತಿಕ ಮಟ್ಟದಲ್ಲಿ ಆಡಿದ ಅನುಭವ ಹೊಂದಿದ್ದಾರೆ. ಈ ಕ್ಲಬ್‌ಗಳಲ್ಲಿ ವಿಶ್ವ ಶ್ರೇಷ್ಠ ಫುಟ್ಬಾಲಿಗರ ಜೊತೆ ಬೆರೆಯುವ, ಅವರಿಂದ ಕಲಿಯುವ ಅವಕಾಶ ಸಿಕ್ಕಿದ್ದು ವಿಶ್ವಕಪ್‌ನಲ್ಲಿ ಯಾವುದೇ ಒತ್ತಡಕ್ಕೆ ಒಳಗಾಗದಂತೆ, ನಿರ್ಭೀತ ಆಟವಾಡಲು ಸಹಕಾರಿಯಾಯಿತು.

ಫೀನಿಕ್ಸ್‌ನಂತೆ ಎದ್ದ ಟೀಮ್‌ ಸ್ಪ್ಯಾನಿಶ್‌! ಇದು ಕೇವಲ ವಿಶ್ವಕಪ್ ಗೆಲುವಲ್ಲ, ದಶಕದ ನಿರಾಸೆ ಬಳಿಕ ಮತ್ತೆ ವಿಶ್ವ ಫುಟ್ಬಾಲ್‌ನ ಶಿಖರಕ್ಕೇರಿದ ಕಥೆ

Kannadaprabha News — Tue, 21 Jul 2026 14:22:55 +0530

ಬೆಂಗಳೂರು: Spain Football Renaissance: 2010ರಲ್ಲಿ ಸ್ಪೇನ್‌ ಮೊದಲ ಬಾರಿಗೆ ವಿಶ್ವ ಚಾಂಪಿಯನ್‌ ಆಗಿ ಫುಟ್ಬಾಲ್‌ ಜಗತ್ತಿನ ಹೊಸ ಅಧಿಪತಿಯಾಗಿ ಮೆರೆದು, ಆ ಬಳಿಕ ಪಾತಾಳಕ್ಕೆ ಕುಸಿದಿದ್ದನ್ನು ನೋಡಿದ ಪ್ರತಿಯೊಬ್ಬರಿಗೂ ಖಂಡಿತವಾಗಿಯೂ ಸ್ಪ್ಯಾನಿಶ್‌ ಫುಟ್ಬಾಲ್‌ಗೆ ಮರುಜನ್ಮ ಸಿಕ್ಕಿದೆ ಎಂದು ಅನಿಸದೆ ಇರಲು ಸಾಧ್ಯವಿಲ್ಲ.

ಆ್ಯಂಡ್ರೆಸ್‌ ಇನಿಯೆಸ್ಟಾ, ಜೆರಾರ್ಡ್‌ ಪೀಕೆ, ಡೇವಿಡ್ ವಿಲ್ಲಾ, ಕಾರ್ಲೋಸ್‌ ಪುಯೋಲ್‌, ಐಕರ್‌ ಕ್ಯಾಸಿಯೆಸ್‌, ಕ್ಸಾವಿ, ಸರ್ಜಿಯೋ ರಾಮೋಸ್‌ ಹೀಗೆ 2010ರ ಗೆಲುವಿನ ವೇಳೆ ದಿಗ್ಗಜರ ದಂಡನ್ನೇ ಹೊಂದಿದ್ದ ಸ್ಪೇನ್‌ ಪಡೆ, ಇವರೆಲ್ಲರೂ ನೇಪತ್ಯಕ್ಕೆ ಸರಿದ ಬಳಿಕ ಮಂಕಾಗಿ ಹೋಗಿತ್ತು. ಇದೀಗ ಮತ್ತೆ ಸ್ಪೇನ್‌ ಫುಟ್ಬಾಲ್‌ ಲೋಕದಲ್ಲಿ ಎದ್ದು ನಿಂತಿದೆ. 2ನೇ ಬಾರಿಗೆ ವಿಶ್ವ ಚಾಂಪಿಯನ್‌ ಆಗಿ, ಕೋಟ್ಯಂತರ ಅಭಿಮಾನಿಗಳಿಗೆ ಸಂಭ್ರಮಿಸುವಂತೆ ಮಾಡಿದೆ. ತನ್ನ ಬತ್ತಳಿಕೆಯಲ್ಲಿದ್ದ ಎಲ್ಲಾ ಫುಟ್ಬಾಲ್‌ ಕೌಶಲ್ಯಗಳನ್ನು ಜಗತ್ತಿನೆದುರು ತೆರೆದಿಡುವ ಮೂಲಕ, ಸ್ಪೇನ್ ಮತ್ತೆ ತನ್ನ ಗತ್ತು ಪ್ರದರ್ಶಿಸಿದೆ. ಜಾಗತಿಕ ಫುಟ್ಬಾಲ್‌ನಲ್ಲಿ ತಾನೇಕೆ ಪವರ್‌ ಸೆಂಟರ್‌ ಎಂಬುದನ್ನು ಮತ್ತೊಮ್ಮೆ ತೋರಿಸಿಕೊಟ್ಟಿದೆ.

1950-60ರ ದಶಕದಲ್ಲಿ ಯುರೋಪಿಯನ್‌ ಫುಟ್ಬಾಲ್‌ನಲ್ಲಿ ಸ್ಪೇನ್‌ ಪ್ರಾಬಲ್ಯ ಸಾಧಿಸಿತ್ತು. 1950ರ ವಿಶ್ವಕಪ್‌ನಲ್ಲಿ 4ನೇ ಸ್ಥಾನಿಯಾಗಿದ್ದ ತಂಡ, 1964ರಲ್ಲಿ ಯುರೋ ಕಪ್‌ನಲ್ಲಿ ಚಾಂಪಿಯನ್‌ ಆಗಿ ಹೊರಹೊಮ್ಮಿತ್ತು. ಆ ಬಳಿಕ ತಂಡ ಪಾತಾಳಕ್ಕೆ ಕುಸಿದಿತ್ತು. ಸ್ಪೇನ್‌ನ ಫುಟ್ಬಾಲ್‌ ಸಂಸ್ಕೃತಿಯೇ ಹೇಳಹೆಸರಿಲ್ಲದಂತೆ ಕಣ್ಮರೆಯಾಗಿತ್ತು. ಆದರೆ 2008ರ ಹೊತ್ತಿಗೆ ತಂಡ ಮತ್ತೊಮ್ಮೆ ಜಾಗತಿಕ ಮಟ್ಟದಲ್ಲಿ ಪಾರಮ್ಯ ಮೆರೆದಿತ್ತು.

ಸ್ಪೇನ್‌ನ ಸುವರ್ಣ ಯುಗ:

2008-12ರ ಅವಧಿ ಸ್ಪೇನ್‌ ಫುಟ್ಬಾಲ್‌ನ ಸುವರ್ಣ ಯುಗ. ಇದು ಸ್ಪ್ಯಾನಿಶ್ ಫುಟ್ಬಾಲ್ ಇತಿಹಾಸದ ಉತ್ತುಂಗದ ಕಾಲ ಎಂಬುದು ಪ್ರತಿಯೋರ್ವ ಫುಟ್ಬಾಲ್‌ ಅಭಿಮಾನಿಗೂ ಗೊತ್ತಿದೆ. 2008ರಲ್ಲಿ ತಂಡ ಯುರೋಪಿಯನ್‌ ಚಾಂಪಿಯನ್‌ ಆಗಿತ್ತು. ಅದು 1964ರ ಬಳಿಕ ತಂಡಕ್ಕೆ ಸಿಕ್ಕ ಮೊದಲ ಟ್ರೋಫಿ. ಅದಾಗಿ 2 ವರ್ಷದಲ್ಲೇ 2010ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ನಡೆದಿದ್ದ ಫಿಫಾ ವಿಶ್ವಕಪ್‌ನಲ್ಲಿ ‘ವಾಕಾ ವಾಕಾ’ ಎಂದು ಕುಣಿದಿದ್ದು ಸ್ಪೇನ್‌. ಅರ್ಥಾತ್‌ ವಿಶ್ವ ಚಾಂಪಿಯನ್‌ ಆಗಿತ್ತು. 2012ರಲ್ಲಿ ತಂಡ ಮತ್ತೊಮ್ಮೆ ಯುರೋಪಿಯನ್‌ ಕಪ್‌ ಮುಡಿಗೇರಿಸಿಕೊಂಡಿತ್ತು. ಆದರೆ 2015-16ರ ಹೊತ್ತಿಗೆ ದಿಗ್ಗಜ ಫುಟ್ಬಾಲಿಗರು ಮರೆಗೆ ಸರಿಯುವುದರೊಂದಿಗೆ ತಂಡದ ಫುಟ್ಬಾಲ್‌ ಪರಂಪರೆಯೂ ಅವನತಿಯತ್ತ ಸಾಗಿತ್ತು.

ಈಗ ದಶಕದ ಬಳಿಕ ತಂಡ ಮತ್ತೊಮ್ಮೆ ಪುಟಿದೆದ್ದಿದೆ. ತನ್ನ ಸಾಂಪ್ರದಾಯಿಕ ‘ಟಿಕಿ ಟಾಕ’ ಆಟದ ಶೈಲಿಯನ್ನು ಆಧುನೀಕರಣಗೊಳಿಸಿ, ಈ ಕಾಲದ ಬೇಡಿಕೆಯಂತೆ ಆಟವಾಡುವುದನ್ನು ರೂಢಿಸಿಕೊಂಡ ತಂಡ ಮಗದೊಮ್ಮೆ ವಿಶ್ವ ಮಟ್ಟದಲ್ಲಿ ತನ್ನ ಪ್ರಭಾವವನ್ನು ವಿಸ್ತರಿಸಿದೆ.