Asianet Suvarna News

ಮಗುವಿನ ಪ್ರಾಣ ಉಳಿಸಲು ಕೊನೆಗೆ ತನ್ನ ಶೂ, ಜರ್ಸಿ ಹರಾಜು ಹಾಕಿದ್ದ ಗಿಲ್ ಈಗ ಫಿಫಾ ವಿಶ್ವಕಪ್‌ ಹೀರೋ

Chethan Kumar — Tue, 30 Jun 2026 19:54:20 +0530

ಮಗು ಹುಟ್ಟಿದ ಸಂಭ್ರಮ ಗಿಲ್‌ಗೆ ಇರಲಿಲ್ಲ. ಕಾರಣ ಮಾರಣಾಂತಿಕ ಆರೋಗ್ಯ ಸಮಸ್ಯೆಯಿಂದ ಬಳಲಿದ ತನ್ನ ಕಂದನ ಉಳಿಸಲು ಹೋರಾಡಿದ್ದ. ಮನೆ, ಕಾರು, ಆಸ್ತಿ ಎಲ್ಲಾ ಮಾರಾಟ ಮಾಡಿದರೂ ಆಸ್ಪತ್ರೆ ಬಿಲ್ ಭರಿಸಲಾಗಲಿಲ್ಲ, ಕೊನೆಗೆ ತನ್ನ ಫುಟ್ಬಾಲ್ ಕಿಟ್, ಶೂಟ, ಜರ್ಸಿ ಹರಾಜು ಹಾಕಿದ್ದ ಈಗ ಫಿಫಾ ಹೀರೋ.

ಫಿಫಾ ವಿಶ್ವಕಪ್ ಟೂರ್ನಿಯಲ್ಲಿ ಇದೀಗ ಪರಾಗ್ವೆಯದ್ದೇ ಸದ್ದು. ಟ್ರೋಫಿ ಗೆಲ್ಲೋ ನೆಚ್ಚಿನ ತಂಡವಾಗಿ ಗುರುತಿಸಿಕೊಂಡಿದ್ದ ಜರ್ಮನಿ ತಂಡವನ್ನೇ ಟೂರ್ನಿಯಿಂದ ಹೊರದಬ್ಬಿದ ಪರಾಗ್ವೆ ಹೊಸ ಇತಿಹಾಸ ರಚಿಸಿದೆ. ಜರ್ಮನಿ ವಿರುದ್ದ ಪರಾಗ್ವೆ ಗೆಲುವಿನ ಹೀರೋ ಎಂದರೆ ಅದು ಒರ್ಲಾಂಡೋ ಗಿಲ್. ಪೆನಾಲ್ಟಿಯಲ್ಲಿ ಜರ್ಮನಿ ಗೋಲು ತಡೆದು ಪರಾಗ್ವೆ ಗೆಲುವಿನಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದ ಒರ್ಲಾಂಡೋ ಗಿಲ್, ಕೆಲ ತಿಂಗಳ ಹಿಂದೆ ತನ್ನ ಮಗುವಿನ ಪ್ರಾಣ ಉಳಿಸಲು ಹೋರಾಟ ಮಾಡಿ ಬರಿಗೈಯಲ್ಲಿ ನಿಂತಿದ್ದ.

ಕಳೆದ ವರ್ಷ ಒರ್ಲಾಂಡೋ ಗಿಲ್ ತಂದೆಯಾಗಿ ಬಡ್ತಿ ಪಡೆದಿದ್ದ.ಆದರೆ ಗಿಲ್‌ಗೆ ಖುಷಿಗಿಂತ ಆತಂಕ ಹೆಚ್ಚಾಗಿತ್ತು. ಕಾರಣ ವೈದ್ಯರು ಮಗುವಿನ ಮಾರಣಾಂತಿಕ ಆರೋಗ್ಯ ಸಮಸ್ಯೆ ಇದೆ. ಹೀಗಾಗಿ ಶಸ್ತ್ರಚಿಕಿತ್ಸೆ, ಚಿಕಿತ್ಸೆಗಳು ಅನಿವಾರ್ಯ ಎಂದಿದ್ದರು. ವೈದ್ಯರ ಬಳಿ ಗಿಲ್ ಹೇಳಿದ್ದು ಒಂದೇ ಮಾತು, ನನಗೆ ಕಂದನ ಉಳಿಸಿಕೊಡಿ ಎಂದಿದ್ದರು.

ಪರಾಗ್ವೆ ಫುಟ್ಬಾಲ್ ಗೋಲ್‌ಕೀಪರ್ ಒರ್ಲಾಂಡೋ ಗಿಲ್ ಮಗುವಿನ ಸರ್ಜರಿ, ಚಿಕಿತ್ಸೆಗೆ ಕೋಟಿ ಕೋಟಿ ಖರ್ಚಾಗಿತ್ತು. ಖಾತೆಯಲ್ಲಿದ್ದ ಉಳಿತಾಯ, ಕಾರು, ಬಂಗಲೆ ಎಲ್ಲವೂ ಮಾರಾಟ ಮಾಡಿದ್ದ ಗಿಲ್, ಕೊನೆಗೆ ತನ್ನ ಜರ್ಸಿ, ಶೂ, ಫುಟ್ಬಾಲ್ ಕಿಟ್ ಹರಾಜು ಹಾಕಿದ್ದ. ಆಪ್ತ ಗೆಳೆಯರ ಬಳಿ ಸಾಲ ಮಾಡಿ ಮಗುವಿನ ಆಸ್ಪತ್ರೆ ಬಿಲ್ ಕಟ್ಟಿದ್ದ ಗಿಲ್ ಇದೀಗ ಫಿಫಾ ವಿಶ್ವಕಪ್‌ನ ಹೀರೋ ಆಗಿ ಮಿಂಚಿದ್ದಾರೆ.

ಪರಾಗ್ವೆ ಫಿಫಾ ವಿಶ್ವಕಪ್ ಟೂರ್ನಿಯಲ್ಲಿ 16ರ ಘಟ್ಟ ತಲುಪಿದೆ. ಇದಕ್ಕೆ ಕಾರಣ ಒರ್ಲಾಂಡೋ ಗಿಲ್. ಜರ್ಮನಿ ಹಾಗೂ ಪರಾಗ್ವೆ ನಡುವಿನ ಪಂದ್ಯ 1-1 ಅಂತರದಲ್ಲಿ ಸಮಬಲಗೊಂಡು ಪೆನಾಲ್ಟಿ ಹಂತಕ್ಕೆ ತಲುಪಿತ್ತು. ಫಿಫಾ ವಿಶ್ವಕಪ್‌ನಲ್ಲಿ ಚಾಂಪಿಯನ್ ಆಗಿದ್ದ ತಂಡ ಜರ್ಮನಿ. ಪೆನಾಲ್ಟಿ ಅವಕಾಶವನ್ನು ಗೋಲಾಗಿ ಪರಿವರ್ತಿಸುವುದು ಜರ್ಮನಿಗೆ ಗೊತ್ತಿತ್ತು. ಆದರೆ ಈ ಆಟ ಗಿಲ್ ಮುಂದೆ ನಡೆಯಲಿಲ್ಲ.

ಪೆನಾಲ್ಟಿ ಶೂಟೌಟ್‌ನಲ್ಲಿ ಒರ್ಲಾಂಡೋ ಗಿಲ್ ತನ್ನ ಅದ್ಭುತ ಕೈಚಳಕ ತೋರಿದ್ದಾರೆ. ಜರ್ಮನಿ ಪೆನಾಲ್ಟಿ ತಡೆದು 4-3 ಅಂತರದಲ್ಲಿ ಗೆಲುವು ತಂದುಕೊಟ್ಟಿದ್ದಾರೆ. 26ರ ಹರೆಯದ ಒರ್ಲಾಂಡೋ ಗಿಲ್ ಪರಾಗ್ವೆ ಪರ 10ನೇ ಪಂದ್ಯ ಆಡುತ್ತಿದ್ದಾರೆ. ಈ ಹತ್ತೂ ಪಂದ್ಯದಲ್ಲೂ ಗಿಲ್ ಕೊಡುಗೆ ಮುಖ್ಯ. ಇದೇ ಕಾರಣದಿಂದ ಪರಾಗ್ವೆ ಇದೀಗ ಫಿಫಾ ವಿಶ್ವಕಪ್ ಟೂರ್ನಿಯ 16ರ ಹಂತಕ್ಕೆ ಪ್ರವೇಶ ಪಡೆದಿದೆ.

ಫಿಫಾ ವಿಶ್ವಕಪ್ 2026ರ ಟೂರ್ನಿಯಲ್ಲಿ ಜರ್ಮನಿ ಪರಾಗ್ವೆ ಮಣಿಸಿ 16ರ ಘಟ್ಟ ತಲುಪುವ ವಿಶ್ವಾಸದಲ್ಲಿತ್ತು. ಆದರೆ ಒರ್ಲಾಂಡೋ ಗಿಲ್ ಗೋಲ್‌ಕೀಪಿಂಗ್ ಮುಂದೆ ಜರ್ಮನಿಗೆ ಮಾತೇ ಬರದಾಯಿತು. ಸೋಲಿನಿಂದ ಟೂರ್ನಯಿಂದಲೇ ಹೊರಬಿತ್ತು. ಮೈದಾನದಲ್ಲಿ ಜರ್ಮನಿ ಕಣ್ಣೀರಿಟ್ಟಿತು. ಇದೀಗ ಒರ್ಲಾಂಡೋ ಗಿಲ್ ಫಿಫಾ 2026ರ ವಿಶ್ವಕಪ್ ಹೀರೋ ಆಗಿ ಮಿಂಚಿದ್ದಾರೆ.

FIFA ವಿಶ್ವಕಪ್ 2026ರಲ್ಲಿ ಹೊಸ ದಾಖಲೆ ಬರೆದ ಫ್ಯಾನ್ಸ್, ಅಭಿಮಾನಿಗಳ ಹಾಜರಾತಿ ಏಷ್ಟಾಗಿದೆ ಗೊತ್ತಾ?

Chethan Kumar — Fri, 26 Jun 2026 12:58:39 +0530

ಫಿಫಾ ವಿಶ್ವಕಪ್ 2026 ಟೂರ್ನಿಯಲ್ಲಿ ತಂಡಗಳು, ಫುಟ್ಬಾಲ್ ಪಟುಗಳು ದಾಖಲೆ ಬರೆಯುವುದು ಸಾಮಾನ್ಯ ಆದರೆ ಈ ಬಾರಿ ಅಭಿಮಾನಿಗಳು ಹೊಸ ದಾಖಲೆ ಬರೆದಿದ್ದಾರೆ. ವಿಶೇಷ ಅಂದರೆ ಆರಂಭಿಕ 56 ಪಂದ್ಯದಲ್ಲಿ ಫ್ಯಾನ್ಸ್ ಬರೆದ ದಾಖಲೆ ಏನು?

ಫುಟ್ಬಾಲ್ FIFA World cup 2026 ಹಲವು ದಾಖಲೆಗಳಿಗೆ ಸಾಕ್ಷಿಯಾಗಿದೆ. ಲಿಯೋನಲ್ ಮೆಸ್ಸಿ ಹ್ಯಾಟ್ರಿಕ್ ಗೋಲು ಸೇರಿದಂತೆ ಐತಿಹಾಸಿಕ ಕ್ಷಣಗಳಲ್ಲಿ ಅಭಿಮಾನಿಗಳು ಮಿಂದೆದ್ದಿದ್ದಾರೆ. ಇದೀಗ ಅಭಿಮಾನಿಗಳು ಹೊಸ ದಾಖಲೆ ಬರೆದಿದ್ದಾರೆ. ಅಮೆರಿಕದ ಆಯೋಜಿಸಿರುವ ಫಿಫಾ ವಿಶ್ವಕಪ್ ಟೂರ್ನಿಯಲ್ಲಿ ಈ ಬಾರಿ ಗರಿಷ್ಠ ಹಾಜರಾತಿ ದಾಖಲೆಯನ್ನು ಫ್ಯಾನ್ಸ್ ಸೃಷ್ಟಿಸಿದ್ದಾರೆ.

ಈ ಬಾಯಿ ಫಿಫಾ ವಿಶ್ವಕಪ್ ಟೂರ್ನಿಯನ್ನು ಅಮೆರಿಕ ಆಯೋಜಿಸುತ್ತಿದೆ. ಹಲವು ಅಭಿಮಾನಿಗಳು ಅಮೆರಿಕ ವಿರುದ್ಧ ಕಿಡಿ ಕಾರಿದ್ದಾರೆ. ಪ್ರಮುಖವಾಗಿ ಪ್ರಯಾಣದ ನಿರ್ಬಂಧ, ಆಯೋಜನೆ ಸಮಸ್ಯೆ, ಬಲು ದುಬಾರಿ ಟೆಕೆಟ್ ಬೆಲೆ ಸೇರಿದಂತೆ ಹಲವು ಆರೋಪಗಳು ಕೇಳಿಬಂದಿದೆ ಇದರ ನಡುವೆಯೂ ಅಮೆರಿಕಗೆ ತೆರಳಿ ಅಭಿಮಾನಿಗಳು ಫಿಫಾ ವಿಶ್ವಕಪ್ ಪಂದ್ಯ ವೀಕ್ಷಿಸಿದ್ದಾರೆ. ಆರಂಭಿಕ 56 ಪಂದ್ಯಗಳಲ್ಲಿ ಒಟ್ಟು 3.60 ಕೋಟಿ ಅಭಿಮಾನಿಗಳು ಕ್ರೀಡಾಂಗಣದಲ್ಲಿ ಕುಳಿತು ಪಂದ್ಯ ವೀಕ್ಷಿಸಿದ್ದಾರೆ.

1994ರಲ್ಲಿ ಅಮೆರಿಕ ಫಿಫಾ ವಿಶ್ವಕಪ್ ಟೂರ್ನಿ ಆಯೋಜಿಸಿತ್ತು. ಈ ವೇಳೆ ಆರಂಭಿಕ 56 ಪಂದ್ಯಗಳಲ್ಲಿ 3.587 ಮಿಲಿಯನ್ ಅಭಿಮಾನಿಗಳು ಕ್ರೀಡಾಂಗಣದಲ್ಲಿ ಕುಳಿತು ಪಂದ್ಯ ವೀಕ್ಷಿಸಿದ್ದರು. ಇದೀಗ ಈ ದಾಖಲೆಯನ್ನು ಈ ಬಾರಿ ಅಮೆರಿಕ ಆಯೋಜಿಸಿದ ಫಿಫಾ ವಿಶ್ವಕಪ್ ಟೂರ್ನಿ ಬ್ರೇಕ್ ಮಾಡಿದೆ.

ಜೂನ್ 16ರಂದು ಒಂದೇ ದಿನ ಮೂರು ಪಂದ್ಯ ನಡೆದಿತ್ತು. ಈ ಮೂರು ಪಂದ್ಯಗಳ ಒಟ್ಟು ಅಭಿಮಾನಿಗಳ ಸಂಖ್ಯೆ 2.81 ಲಕ್ಷ. ಈ ಮೂಲಕ ಒಂದೇ ದಿನ ಗರಿಷ್ಠ ಮಂದಿ ಫುಟ್ಬಾಲ್ ಪಂದ್ಯ ವೀಕ್ಷಣೆ ಮಾಡಿದ ದಾಖಲೆಯೂ ಸೃಷ್ಟಿಯಾಗಿದೆ. ಅತೀ ಹೆಚ್ಚಿನ ಸಂಖ್ಯೆಯಲ್ಲಿ ಅಭಿಮಾನಿಗಳು ಪ್ರತಿ ಪಂದ್ಯಕ್ಕೆ ಹಾಜರಾಗುತ್ತಿದ್ದಾರೆ.

ಫಿಫಾ ಫುಟ್ಬಾಲ್ ಅಭಿಮಾನಿಗಳು ಅಮೆರಿಕ ವಿರುದ್ದ ಆಕ್ರೋಶ ಹೊರಹಾಕುತ್ತಿದ್ದಾರೆ. ಫುಟ್ಬಾಲ್ ಅಭಿಮಾನಿಗಳು ಪಂದ್ಯ ವೀಕ್ಷಿಸಲು ಹಲವು ನಿರ್ಬಂಧ ಹೇರುತ್ತಿದ್ದಾರೆ. ಅಮೆರಿಕ ಪ್ರಯಾಣ ತೀವ್ರ ಸಂಕಷ್ಟ ತರುತ್ತಿದೆ ಎಂದಿದ್ದಾರೆ. ಇತ್ತ ಅಮೆರಿಕದಲ್ಲಿ ಫುಟ್ಬಾಲ್ ಪಂದ್ಯದ ಟಿಕೆಟ್ ಬೆಲೆ ಬಲು ದುಬಾರಿಯಾಗಿದೆ. ಇತರ ಯಾವುದೇ ದೇಶಗಳು ಆಯೋಜನೆ ಮಾಡುವಾಗ ಈ ಸಮಸ್ಯೆಗಳು ಇರಲಿಲ್ಲ ಎಂದು ಆಕ್ರೋಶ ಹೊರಹಾಕಿದ್ದಾರೆ.

ಫಿಫಾ ವಿಶ್ವಕಪ್: 4 ದಶಕಗಳ ಬಳಿಕ ನಾಕೌಟ್ ಮ್ಯಾಚ್ ಗೆದ್ದು ಐತಿಹಾಸಿಕ ದಾಖಲೆ ಬರೆದ ಮೆಕ್ಸಿಕೊ

Kannadaprabha News — Thu, 02 Jul 2026 07:54:17 +0530

ಮೆಕ್ಸಿಕೊ ಸಿಟಿ: ಬರೋಬ್ಬರಿ 40 ವರ್ಷಗಳ ಕಾಯುವಿಕೆ ಬಳಿಕ ಮೆಕ್ಸಿಕೊ ತಂಡ ಫಿಫಾ ವಿಶ್ವಕಪ್‌ನ ನಾಕೌಟ್‌ ಪಂದ್ಯವೊಂದರಲ್ಲಿ ಗೆಲುವು ಸಾಧಿಸಿದ್ದು, ಪ್ರಿ ಕ್ವಾರ್ಟರ್‌ ಫೈನಲ್‌ಗೆ ಲಗ್ಗೆ ಇಟ್ಟಿದೆ. ತಂಡ ಬುಧವಾರ ಈಕ್ವೆಡಾರ್‌ ವಿರುದ್ಧ ಅಂತಿಮ 32ರ ಸುತ್ತಿನಲ್ಲಿ 2-0 ಗೋಲಿನಿಂದ ಗೆಲುವು ಸಾಧಿಸಿತು. ಜೂಲಿಯನ್‌ ಕ್ವಿನೋನಸ್‌ ಹಾಗೂ ರೌಲ್ ಜಿಮೆನೆಜ್‌ ತಂಡದ ಪರ ಗೋಲು ದಾಖಲಿಸಿದರು.

ಮೆಕ್ಸಿಕೊ ಕೊನೆ ಬಾರಿ 1986ರಲ್ಲಿ ಅಂತಿಮ 16ರ ಸುತ್ತಿನಲ್ಲಿ ಗೆಲುವು ಸಾಧಿಸಿ, ಕ್ವಾರ್ಟರ್ ಫೈನಲ್‌ವರೆಗೂ ತಲುಪಿತ್ತು. ಆ ಬಳಿಕ 1994ರಿಂದ 2018ರ ವರೆಗೆ ತಂಡ ಸತತವಾಗಿ 7 ಬಾರಿ ಗುಂಪು ಹಂತದಿಂದ ನಾಕೌಟ್‌ ತಲುಪಿತ್ತು. ಆದರೆ ನಾಕೌಟ್‌ ಪಂದ್ಯದಲ್ಲಿ ಗೆದ್ದಿರಲಿಲ್ಲ. ಕಳೆದ ಬಾರಿ ತಂಡ ಗುಂಪು ಹಂತದಲ್ಲೇ ಹೊರಬಿದ್ದಿತ್ತು. ಈ ಬಾರಿ ತಂಡ ನಾಕೌಟ್‌ನ ಮೊದಲ ಪಂದ್ಯದಲ್ಲಿ ಜಯಗಳಿಸಿ 4 ದಶಕಗಳ ಗೆಲುವಿನ ಬರ ನೀಗಿಸಿದೆ.

ಬಿರುಗಾಳಿ: ಪಂದ್ಯ 1 ಗಂಟೆ ವಿಳಂಬ

ಬಿರುಗಾಳಿಯಿಂದಾಗಿ ಮೆಕ್ಸಿಕೊ ಸಿಟಿ ಕ್ರೀಡಾಂಗಣದಲ್ಲಿ ಮೆಕ್ಸಿಕೊ ಹಾಗೂ ಈಕ್ವೆಡಾರ್‌ ನಡುವಿನ ಪಂದ್ಯ 1 ಗಂಟೆ ವಿಳಂಬವಾಗಿ ಆರಂಭಗೊಂಡಿತು. ಕ್ರೀಡಾಂಗಣ ಸುತ್ತಮುತ್ತ ಭೀಕರ ಗಾಳಿ ಬೀಸುತ್ತಿದ್ದ ಕಾರಣ ಪಂದ್ಯ ನಿಗದಿತ ಸಮಯಕ್ಕೆ ಆರಂಭಗೊಳ್ಳಲಿಲ್ಲ. ಇತ್ತೀಚೆಗೆ ಫ್ರಾನ್ಸ್-ಇರಾಕ್‌ ನಡುವೆ ಅಮೆರಿಕದ ಫಿಲಡೆಲ್ಫಿಯಾದಲ್ಲಿ ನಡೆಯುತ್ತಿದ್ದ ಪಂದ್ಯ, ಮೊದಲಾರ್ಧದ ಬಳಿಕ ಬರೋಬ್ಬರಿ 2 ಗಂಟೆ 11 ನಿಮಿಷಗಳ ಕಾಲ ಸ್ಥಗಿತಗೊಂಡಿತ್ತು.

ಕೇನ್‌ 2 ಗೋಲು: ಕಾಂಗೊ ವಿರುದ್ಧ ಗೆದ್ದ ಇಂಗ್ಲೆಂಡ್‌ ಪ್ರಿ ಕ್ವಾರ್ಟರ್‌ಗೆ ಲಗ್ಗೆ

ಜಾರ್ಜಿಯಾ(ಅಮೆರಿಕ): ಡೆಮಾಕ್ರಟಿಕ್‌ ರಿಪಬ್ಲಿಕ್‌ ಆಫ್‌ ಕಾಂಗೊ ವಿರುದ್ಧ 2-1 ಗೋಲಿನ ಅಂತರದಲ್ಲಿ ಗೆದ್ದ ಇಂಗ್ಲೆಂಡ್‌, ಈ ಬಾರಿ ಫಿಫಾ ವಿಶ್ವಕಪ್‌ನಲ್ಲಿ ಪ್ರಿ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದೆ. ಮಾಜಿ ಚಾಂಪಿಯನ್‌ ತಂಡ 13ನೇ ಬಾರಿ ಅಂತಿಮ 16ರ ಸುತ್ತು ತಲುಪಿದೆ. ಕಾಂಗೊ ತಂಡದ ಮೊದಲ ಪ್ರಿ ಕ್ವಾರ್ಟರ್‌ ಪ್ರವೇಶದ ಕನಸು ಭಗ್ನಗೊಂಡಿತು.

7ನೇ ನಿಮಿಷದಲ್ಲೇ ಬ್ರಿಯಾನ್‌ ಕಿಪೆಂಗ ಬಾರಿಸಿದ ಗೋಲಿನಿಂದಾಗಿ ಕಾಂಗೊ ಮುನ್ನಡೆ ಸಾಧಿಸಿತು. ಆ ಬಳಿಕ 75ನೇ ನಿಮಿಷದವರೆಗೂ ಇಂಗ್ಲೆಂಡ್‌ಗೆ ಗೋಲು ದಾಖಲಿಸಲಾಗಲಿಲ್ಲ. ಆ ಬಳಿಕ ಹ್ಯಾರಿ ಕೇನ್‌ ಜಾದೂ ಮಾಡಿದರು. 11 ನಿಮಿಷಗಳ ಅಂತರದಲ್ಲಿ 2 ಗೋಲು ದಾಖಲಿಸಿ ತಂಡದ ಗೆಲುವಿನ ರೂವಾರಿಯಾದರು. ತಂಡಕ್ಕೆ ಪ್ರಿ ಕ್ವಾರ್ಟರ್‌ನಲ್ಲಿ ಮೆಕ್ಸಿಕೊ ಸವಾಲು ಎದುರಾಗಲಿದೆ.

ವಿನಿಶಿಯಸ್ ಜೂನಿಯರ್ ಡಬಲ್ ಗೋಲು ಮ್ಯಾಜಿಕ್! ಬ್ರೆಜಿಲ್ ಅಜೇಯವಾಗಿ ಫಿಫಾ ವಿಶ್ವಕಪ್ ನಾಕೌಟ್‌ಗೆ

Kannadaprabha News — Fri, 26 Jun 2026 09:42:08 +0530

ಮಿಯಾಮಿ ಗಾರ್ಡನ್ಸ್‌(ಅಮೆರಿಕ): ವಿನಿಶಿಯಸ್‌ ಜೂನಿಯರ್‌ ಬಾರಿಸಿದ 2 ಗೋಲುಗಳ ನೆರವಿನಿಂದ ಬ್ರೆಜಿಲ್‌ ತಂಡ ಸ್ಕಾಟ್ಲೆಂಡ್ ವಿರುದ್ಧ 3-0 ಗೆಲುವು ಸಾಧಿಸಿದ್ದು, ‘ಸಿ’ ಗುಂಪಿನಲ್ಲಿ ಅಜೇಯವಾಗಿ ನಾಕೌಟ್‌ ಪ್ರವೇಶಿಸಿದೆ. ತಂಡ ಗುಂಪು ಹಂತದ 3 ಪಂದ್ಯಗಳಲ್ಲಿ 2 ಗೆಲುವು, 1 ಡ್ರಾಗೊಂದಿಗೆ 7 ಅಂಕ ಸಂಪಾದಿಸಿತು.

ಆರಂಭಿಕ 2 ಪಂದ್ಯಗಳಲ್ಲಿ ತಲಾ 1 ಗೋಲು ಬಾರಿಸಿದ್ದ ವಿನಿಶಿಯಸ್‌, ಈ ಪಂದ್ಯದಲ್ಲಿ 7ನೇ ಮತ್ತು ಮೊದಲಾರ್ಧದ ಹೆಚ್ಚುವರಿ ಅವಧಿ(45+3ನೇ ನಿಮಿಷ)ಯಲ್ಲಿ ಗೋಲು ದಾಖಲಿಸಿ ಗೆಲುವಿನ ರೂವಾರಿಯಾದರು. ಮತ್ತೊಂದು ಗೋಲು ಮ್ಯಾಥ್ಯೂಸ್‌ ಕುನ್ಹಾ ಅವರಿಂದ 60ನೇ ನಿಮಿಷದಲ್ಲಿ ದಾಖಲಾಯಿತು.

ಹೈಟಿ ವಿರುದ್ಧ ಗೆದ್ದಿದ್ದ ಸ್ಕಾಟ್ಲೆಂಡ್‌ ತಂಡ ಮೊರಾಕ್ಕೊ ಹಾಗೂ ಬ್ರೆಜಿಲ್‌ ವಿರುದ್ಧ ಸೋತಿದ್ದು, 3 ಅಂಕಗಳೊಂದಿಗೆ 3ನೇ ಸ್ಥಾನದಲ್ಲಿದೆ. ಇತರ ಗುಂಪಿನ 3ನೇ ಸ್ಥಾನ ಪಡೆದ ತಂಡಗಳ ಫಲಿತಾಂಶ ಆಧರಿಸಿ ಸ್ಕಾಟ್ಲೆಂಡ್‌ಗೆ ನಾಕೌಟ್ ಪ್ರವೇಶಿಸುವ ಅವಕಾಶವಿದೆ.

ಈ ವಿಶ್ವಕಪ್‌ನಲ್ಲಿ ಮೊದಲ ಬಾರಿ ಆಡಿದ ನೇಯ್ಮರ್‌

ಬ್ರೆಜಿಲ್‌ ಫುಟ್ಬಾಲ್‌ ತಾರೆ ನೇಯ್ಮರ್‌ ಈ ಬಾರಿ ವಿಶ್ವಕಪ್‌ನಲ್ಲಿ ಕೊನೆಗೂ ಆಡಿದ್ದಾರೆ. ಅವರು ಬುಧವಾರ ಸ್ಕಾಟ್ಲೆಂಡ್‌ ವಿರುದ್ಧ ಪಂದ್ಯದಲ್ಲಿ 76ನೇ ನಿಮಿಷದಲ್ಲಿ ಸಬ್‌ಸ್ಟಿಟ್ಯೂಟ್‌ ಆಟಗಾರನಾಗಿ ಕಣಕ್ಕಿಳಿದರು. ಆದರೆ ಅವರಿಂದ ಯಾವುದೇ ಗೋಲು ದಾಖಲಾಗಲಿಲ್ಲ. ಗಾಯದಿಂದ ಬಳಲುತ್ತಿದ್ದ 34 ವರ್ಷದ ನೇಯ್ಮರ್‌ ಆರಂಭಿಕ 2 ಪಂದ್ಯಗಳಲ್ಲೂ ಆಡಿರಲಿಲ್ಲ.

ಆತಿಥೇಯ ಮೆಕ್ಸಿಕೊಗೆ ಹ್ಯಾಟ್ರಿಕ್‌ ಜಯದ ಸಿಹಿ

ಮೆಕ್ಸಿಕೊ ಸಿಟಿ: ಈ ಬಾರಿ ಫುಟ್ಬಾಲ್‌ ವಿಶ್ವಕಪ್‌ ಆತಿಥ್ಯ ವಹಿಸುತ್ತಿರುವ 3 ದೇಶಗಳ ಪೈಕಿ ಒಂದಾಗಿರುವ ಮೆಕ್ಸಿಕೊ ಗುಂಪು ಹಂತದಲ್ಲಿ ಹ್ಯಾಟ್ರಿಕ್‌ ಗೆಲುವು ಸಾಧಿಸಿದೆ. ತಂಡ ಗುರುವಾರ ಚೆಕ್‌ ಗಣರಾಜ್ಯದ ವಿರುದ್ಧ 3-0 ಗೋಲುಗಳ ಅಂತರದಲ್ಲಿ ಗೆಲುವು ಸಾಧಿಸಿತು. ಇದರೊಂದಿಗೆ ಫಿಫಾ ವಿಶ್ವಕಪ್‌ ಇತಿಹಾಸದಲ್ಲೇ ಮೆಕ್ಸಿಕೊ ತಂಡ ಇದೇ ಮೊದಲ ಬಾರಿ ಗುಂಪು ಎಲ್ಲಾ 3 ಪಂದ್ಯಗಳಲ್ಲೂ ಗೆದ್ದ ಸಾಧನೆ ಮಾಡಿದೆ. ಈ ಹಿಂದೆ 1986 ಹಾಗೂ 2002ರಲ್ಲಿ ಗುಂಪು ಹಂತದಲ್ಲಿ ತಲಾ 2 ಗೆಲುವು, 1 ಡ್ರಾ ಸಾಧಿಸಿತ್ತು.

ಮೆಕ್ಸಿಕೊದ ಬಾತುಕೋಳಿಗೆ ಕ್ರೀಡಾಂಗಣ ಪ್ರವೇಶವಿಲ್ಲ!

ಮೆಕ್ಸಿಕೊ ಸಿಟಿ: ಈ ಬಾರಿ ಫಿಫಾ ವಿಶ್ವಕಪ್‌ನ ಮೆಕ್ಸಿಕೊ ತಂಡದ ಆರಂಭಿಕ ಪಂದ್ಯದ ವೇಳೆ ತಂಡದ ಹಸಿರು ಬಣ್ಣದ ಜೆರ್ಸಿ ಧರಿಸಿ ಅಲ್ಲಿನ ನಗರದ ಬೀದಿಗಳಲ್ಲಿ ಓಡಾಡುವ ಮೂಲಕ ಭಾರೀ ವೈರಲ್‌ ಆಗಿದ್ದ ಬಾತುಕೋಳಿಗೆ ಕ್ರೀಡಾಂಗಣ ಪ್ರವೇಶಿಸಲು ಅವಕಾಶ ನಿರಾಕರಿಸಲಾಗಿದೆ. ಭಾರೀ ಜನಪ್ರಿಯತೆ ಗಿಟ್ಟಿಸಿದ್ದ ಈ ಬಾತುಕೋಳಿಗೆ ಮೆಕ್ಸಿಕೊ-ಚೆಕ್‌ ಗಣರಾಜ್ಯದ ಪಂದ್ಯದ ವೇಳೆ ಕ್ರೀಡಾಂಗಣಕ್ಕೆ ಪ್ರವೇಶ ನೀಡುವಂತೆ ಅಭಿಮಾನಿಗಳು ಒತ್ತಾಯಿಸಿದ್ದರು. ಆದರೆ ಫಿಫಾ ನಿಯಮದ ಪ್ರಕಾರ ಪಂದ್ಯದ ವೇಳೆ ಪ್ರಾಣಿಗಳಿಗೆ ಅವಕಾಶವಿಲ್ಲದ ಕಾರಣ ಬಾತುಕೋಳಿಗೆ ಕ್ರೀಡಾಂಗಣ ಪ್ರವೇಶ ನಿರಾಕರಿಸಲಾಯಿತು.

ಬೋಸ್ನಿಯಾಗೆ ಸೋತು ಕತಾರ್‌ ತಂಡ ಹೊರಕ್ಕೆ

ಸಿಯಾಟಲ್‌: ಬೋಸ್ನಿಯಾ-ಹೆರ್ಜೆಗೋವಿನಾ ವಿರುದ್ಧ ನಿರ್ಣಾಯಕ ಪಂದ್ಯದಲ್ಲಿ 1-3 ಗೋಲುಗಳ ಅಂತರದಲ್ಲಿ ಪರಾಭವಗೊಂಡ ಕತಾರ್‌ ತಂಡ ಈ ಬಾರಿ ಫಿಫಾ ವಿಶ್ವಕಪ್‌ನಲ್ಲಿ ಗುಂಪು ಹಂತದಲ್ಲೇ ಹೊರಬಿದ್ದಿದೆ. ತಂಡ ಆಡಿರುವ 3 ಪಂದ್ಯಗಳಲ್ಲಿ 1ರಲ್ಲಿ ಡ್ರಾ ಸಾಧಿಸಿದ್ದು, ಮತ್ತೆರಡು ಪಂದ್ಯಗಳಲ್ಲಿ ಸೋಲನುಭವಿಸಿದೆ. ಗುಂಪು ಹಂತದ ಕೊನೆ ಪಂದ್ಯದಲ್ಲಿ ಗೆದ್ದ ಬೋಸ್ನಿಯಾ ತಂಡ ನಾಕೌಟ್‌ ಪ್ರವೇಶಿಸುವ ಆಸೆ ಜೀವಂತವಾಗಿರಿಸಿಕೊಂಡಿದೆ. ತಂಡ 4 ಅಂಕಗಳೊಂದಿಗೆ ಈಗ 3ನೇ ಸ್ಥಾನದಲ್ಲಿದೆ.

ಕಾಲು ಮುರಿದ ಕತಾರ್‌ನ ಅಸಿಂ 5 ಪಂದ್ಯಕ್ಕೆ ಬ್ಯಾನ್‌

ಇತ್ತೀಚೆಗೆ ಕೆನಡಾದ ಮಿಡ್‌ಫೀಲ್ಡರ್ ಇಸ್ಮಾಯಿಲ್ ಕೋನೆ ಅವರ ಕಾಲಿಗೆ ಬಲವಾಗಿ ಒಡೆದು, ಕಾಲು ಮುರಿತಕ್ಕೆ ಕಾರಣವಾಗಿದ್ದ ಕತಾರ್ ಮಿಡ್‌ಫೀಲ್ಡರ್ ಅಸಿಮ್ ಮಡಿಬೊಗೆ ಐದು ಪಂದ್ಯಗಳ ನಿಷೇಧ ಹೇರಲಾಗಿದೆ. ಸದ್ಯ ಕೋನೆ ಅವರ ಕಾಲಿಗೆ ಶಸ್ತ್ರಚಿಕಿತ್ಸೆ ಮಾಡಲಾಗಿದೆ.

ವೆನುಜುವೆಲಾ ಭೂಕಂಪ, ಅರ್ಜೆಂಟೀನಾ ಫುಟ್‌ಬಾಲ್‌ ಆಟಗಾರನ ಇಡೀ ಕುಟುಂಬ ನಾಪತ್ತೆ

Santosh Naik — Sat, 27 Jun 2026 21:13:50 +0530

ಕರಾಕಸ್ (ಜೂ.27): ಇಡೀ ವಿಶ್ವವೇ ಫಿಫಾ ವಿಶ್ವಕಪ್ (FIFA World Cup 2026) ಸಂಭ್ರಮದಲ್ಲಿ ಮುಳುಗಿರುವ ಬೆನ್ನಲ್ಲೇ, ಜೂನ್ 24 ರಂದು ವೆನೆಜುವೆಲಾದಲ್ಲಿ ಸಂಭವಿಸಿದ ಭೀಕರ ಭೂಕಂಪವು ಅರ್ಜೆಂಟೀನಾದ ಹಿರಿಯ ಫುಟ್‌ಬಾಲ್ ಆಟಗಾರ ಲ್ಯೂಕಾಸ್ ಟ್ರೆಜೊ (Lucas Trejo) ಅವರ ಬದುಕಿನಲ್ಲಿ ಕತ್ತಲೆ ಆವರಿಸುವಂತೆ ಮಾಡಿದೆ. ಈ ವಿನಾಶಕಾರಿ ಭೂಕಂಪದಲ್ಲಿ ಅವರ ಇಡೀ ಕುಟುಂಬವೇ ನಾಪತ್ತೆಯಾಗಿದ್ದು, ಆಟಗಾರನಲ್ಲಿ ಆತಂಕ ಹೆಚ್ಚಾಗಿದೆ.

ಜೂನ್ 24 ರಂದು ವೆನೆಜುವೆಲಾದಲ್ಲಿ ಒಂದರ ಹಿಂದೆ ಒಂದರಂತೆ ಎರಡು ಅತ್ಯಂತ ಪ್ರಬಲ ಭೂಕಂಪದ ಧಕ್ಕೆಗಳು ಸಂಭವಿಸಿವೆ. ಮೊದಲ ಕಂಪನವು ರಿಕ್ಟರ್ ಮಾಪಕದಲ್ಲಿ 7.2 ರಷ್ಟು ತೀವ್ರತೆ ದಾಖಲಿಸಿತ್ತು. ಇದರಿಂದ ಜನರು ಚೇತರಿಸಿಕೊಳ್ಳುವ ಮುನ್ನವೇ 7.5 ರಷ್ಟು ತೀವ್ರತೆಯ ಮತ್ತೊಂದು ಅತ್ಯಂತ ವಿನಾಶಕಾರಿ ಭೂಕಂಪ ಇಡೀ ದೇಶವನ್ನು ಬೆಚ್ಚಿಬೀಳಿಸಿದೆ. ಈ ಭೂಕಂಪದ ತೀವ್ರತೆ ಎಷ್ಟಿತ್ತೆಂದರೆ ದೊಡ್ಡ ದೊಡ್ಡ ಬಹುಮಹಡಿ ಕಟ್ಟಡಗಳು ಇಟ್ಟಿಗೆಗಳಂತೆ ಧರೆಗುರುಳಿವೆ.

ಆ ಸಮಯದಲ್ಲಿ ಅರ್ಜೆಂಟೀನಾದ ಸ್ಟಾರ್ ಫುಟ್‌ಬಾಲ್ ಆಟಗಾರ ಲ್ಯೂಕಾಸ್ ಟ್ರೆಜೊ ಅವರು 'ಕೋಪಾ ವೆನೆಜುವೆಲಾ' ಟೂರ್ನಿಯ ಸಿದ್ಧತೆಗಾಗಿ ಕರಾಕಸ್‌ನಲ್ಲಿದ್ದರು. ಆಗಲೇ ಭೂಮಿ ಕಂಪಿಸಿದ್ದು, ಲೂಕಾಸ್ ಅವರ ಕುಟುಂಬ ವಾಸಿಸುತ್ತಿದ್ದ ಬಹುಮಹಡಿ ಕಟ್ಟಡವೂ ಸಂಪೂರ್ಣವಾಗಿ ಕುಸಿದು ಬಿದ್ದಿದೆ. ಕಟ್ಟಡದಲ್ಲಿದ್ದ ಅವರ ಪತ್ನಿ ಮತ್ತು ಇಬ್ಬರು ಮಕ್ಕಳ ಪರಿಸ್ಥಿತಿ ಏನಾಗಿದೆ ಎಂಬ ಭೀತಿ ಈಗ ಲೂಕಾಸ್ ಅವರನ್ನು ತೀವ್ರವಾಗಿ ಕಾಡುತ್ತಿದೆ.

ನೆಲಸಮವಾಯ್ತು ಹ್ಯಾಪಿ ಹೋಮ್; ಇನ್‌ಸ್ಟಾಗ್ರಾಮ್‌ನಲ್ಲಿ ಭಾವುಕ ಪೋಸ್ಟ್

ಲೂಕಾಸ್ ಟ್ರೆಜೊ ಅವರ ಕುಟುಂಬ ವಾಸಿಸುತ್ತಿದ್ದ 'ಲಾ ಗ್ವಾಯ್ರಾ' (La Guaira) ಪ್ರಾಂತ್ಯದ ಮನೆ ಈ ಭೂಕಂಪಕ್ಕೆ ಸಂಪೂರ್ಣವಾಗಿ ಜಖಂಗೊಂಡು ನೆಲಸಮವಾಗಿದೆ. ಧ್ವಂಸಗೊಂಡಿರುವ ಆ ಮನೆಯ ಸ್ಥಿತಿಯನ್ನು ನೋಡಿದರೆ ಯಾರಾದರೂ ಬದುಕುಳಿದಿದ್ದಾರೆಯೇ ಎಂದು ಊಹಿಸುವುದೂ ಕೂಡ ಕಷ್ಟಕರವಾಗಿದೆ. ತನ್ನ ಪ್ರೀತಿಯ ಕುಟುಂಬದ ಬಗ್ಗೆ ಯಾವುದೇ ಸುಳಿವು ಸಿಗದ ಹಿನ್ನೆಲೆಯಲ್ಲಿ ಹತಾಶರಾಗಿರುವ ಲೂಕಾಸ್, ಇನ್‌ಸ್ಟಾಗ್ರಾಮ್‌ನಲ್ಲಿ ಅತ್ಯಂತ ಭಾವುಕ ಪೋಸ್ಟ್ ಒಂದನ್ನು ಹಂಚಿಕೊಂಡಿದ್ದಾರೆ.

ಜಗತ್ತಿನಾದ್ಯಂತ ಇರುವ ತಮ್ಮ ಅಭಿಮಾನಿಗಳಲ್ಲಿ ಸಹಾಯಕ್ಕಾಗಿ ಮನವಿ ಮಾಡಿರುವ ಅವರು, "ಯಾರಾದರೂ ಲಾ ಗ್ವಾಯ್ರಾ ಮನೆಯ ಆಸುಪಾಸಿನಲ್ಲಿದ್ದರೆ ಅಥವಾ ಪರಿಹಾರ ಕಾರ್ಯಾಚರಣೆಯಲ್ಲಿದ್ದರೆ, ದಯವಿಟ್ಟು ನನ್ನ ಪತ್ನಿ ಯಾನಿನಾ ಮಾರಾನಿಲಾ (Yanina Maranilla), ಮಗ ಆರನ್ (Aaron) ಮತ್ತು ಮಗಳು ಐನ್ಹೋವಾ (Ainhoa) ಅವರ ಸುರಕ್ಷತೆಯ ಬಗ್ಗೆ ಮಾಹಿತಿ ಇದ್ದರೆ ನೀಡಿ," ಎಂದು ಕಣ್ಣೀರು ಹಾಕಿದ್ದಾರೆ. ಅವರ ಈ ಪೋಸ್ಟ್ ಸದ್ಯ ಅರ್ಜೆಂಟೀನಾ ಮತ್ತು ವೆನೆಜುವೆಲಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದ್ದು, ಜನರ ಕಣ್ಣಾಲಿಗಳು ಒದ್ದೆಯಾಗುವಂತೆ ಮಾಡಿದೆ.

ಯಾರು ಈ ಲೂಕಾಸ್ ಟ್ರೆಜೊ?

38 ವರ್ಷದ ಅನುಭವಿ ಆಟಗಾರ ಲ್ಯೂಕಾಸ್ ಟ್ರೆಜೊ ಅವರು ಪ್ರಸ್ತುತ ವೆನೆಜುವೆಲಾದ ಸೆಗುಂಡಾ ಡಿವಿಷನ್ ಕ್ಲಬ್ 'ಮಾರಿಟಿಮೊ' (Maritimo) ಪರ ಡಿಫೆಂಡರ್ ಆಗಿ ಆಡುತ್ತಿದ್ದಾರೆ. ಇದರೊಂದಿಗೆ ವೆನೆಜುವೆಲಾದ 'ಮೋನಾಗಾಸ್ ಸ್ಪೋರ್ಟ್ಸ್ ಕ್ಲಬ್' ಪರವಾಗಿಯೂ ಅವರು ಮೈದಾನಕ್ಕಿಳಿದಿದ್ದಾರೆ. ಈ ಹಿಂದೆ ಅವರು ಯುರೋಪ್, ಅಮೆರಿಕ, ಕೊಲಂಬಿಯಾ, ಪೆರು ಮತ್ತು ಮೆಕ್ಸಿಕೋದ ಹೆಸರಾಂತ ಫುಟ್‌ಬಾಲ್ ಕ್ಲಬ್‌ಗಳ ಪರವಾಗಿಯೂ ಆಡಿದ ದೀರ್ಘ ಅನುಭವ ಹೊಂದಿದ್ದಾರೆ. ಸದ್ಯ ಇಡೀ ಕ್ರೀಡಾ ಜಗತ್ತು ಅವರ ಕುಟುಂಬ ಸುರಕ್ಷಿತವಾಗಿ ಮರಳಿ ಬರಲಿ ಎಂದು ಪ್ರಾರ್ಥಿಸುತ್ತಿದೆ.

ನಿಜವಾಯ್ತು ಘಾನಾ ಮಂತ್ರವಾದಿ ಭವಿಷ್ಯ: ಕೊನೆಗೂ ಗೋಲು ಹೊಡೆದ ಇಂಗ್ಲೆಂಡ್ ಕ್ಯಾಪ್ಟನ್ ಹ್ಯಾರಿ ಕೇನ್‌!

Kannadaprabha News — Mon, 29 Jun 2026 09:36:26 +0530

ನ್ಯೂಯಾರ್ಕ್‌: ಘಾನಾ ವಿರುದ್ಧದ ಪಂದ್ಯದಲ್ಲಿ ಇಂಗ್ಲೆಂಡ್‌ ಗೋಲು ರಹಿತ ಡ್ರಾ ಸಾಧಿಸಿದಾಗ, ಘಾನಾದ ಮಂತ್ರಿವಾದಿ ನಾನಾ ಕ್ವಾಕು, ಇಂಗ್ಲೆಂಡ್‌ನ ನಾಯಕ ಹ್ಯಾರಿ ಕೇನ್‌ರನ್ನು ಕಟ್ಟಿಹಾಕಿದ್ದಾಗಿ ಹೇಳಿಕೊಂಡಿದ್ದರು. ಪಂದ್ಯದ ಬಳಿಕ ಕೇನ್‌ರನ್ನು ಬಿಡುಗಡೆಗೊಳಿಸಿದ್ದೇನೆ, ಮುಂದಿನ ಪಂದ್ಯದಲ್ಲಿ ಕೇನ್‌ ಗೋಲು ಬಾರಿಸಲಿದ್ದಾರೆ ಎಂದು ಭವಿಷ್ಯ ನುಡಿದಿದ್ದರು. ಅದು ನಿಜವಾಗಿದೆ. ಪನಾಮ ವಿರುದ್ಧ ಇಂಗ್ಲೆಂಡ್‌ 2-0 ಗೋಲುಗಳ ಜಯ ಸಾಧಿಸಿದೆ. ಜ್ಯೂಡ್‌ ಬೆಲ್ಲಿಂಗ್‌ಹ್ಯಾಮ್‌ 62, ಹ್ಯಾರಿ ಕೇನ್‌ 67ನೇ ನಿಮಿಷದಲ್ಲಿ ಗೋಲು ಬಾರಿಸಿದರು.

11ನೇ ಗೋಲು

ಹ್ಯಾರಿ ಕೇನ್‌ ವಿಶ್ವಕಪ್‌ನಲ್ಲಿ 11ನೇ ಗೋಲು ದಾಖಲಿಸಿದ್ದು, ಟೂರ್ನಿಯ ಇತಿಹಾಸದಲ್ಲಿ ಇಂಗ್ಲೆಂಡ್‌ ಪರ ಅತಿಹೆಚ್ಚು ಗೋಲು ಬಾರಿಸಿದ ಆಟಗಾರ ಎನಿಸಿದ್ದಾರೆ. 10 ಗೋಲು ಗಳಿಸಿದ್ದ ಗ್ಯಾರಿ ಲೆನೆಕರ್‌ ದಾಖಲೆಯನ್ನು ಕೇನ್‌ ಮುರಿದಿದ್ದಾರೆ.

ಅರ್ಜೆಂಟೀನಾಗೆ ಹ್ಯಾಟ್ರಿಕ್‌ ಜಯ!

ಅರ್ಲಿಂಗ್‌ಟನ್‌: ಹಾಲಿ ಚಾಂಪಿಯನ್‌ ಅರ್ಜೆಂಟೀನಾ ಗುಂಪು ಹಂತದಲ್ಲಿ ಸತತ 3 ಗೆಲುವುಗಳೊಂದಿಗೆ, ಅಂತಿಮ-32ರ ಸುತ್ತಿಗೆ ಕಾಲಿಡಲಿದೆ. ಮೊದಲೆರಡು ಪಂದ್ಯಗಳಲ್ಲಿ ಕ್ರಮವಾಗಿ, ಅಲ್ಜೀರಿಯಾ ಹಾಗೂ ಆಸ್ಟ್ರಿಯಾ ವಿರುದ್ಧ ಗೆದ್ದಿದ್ದ ಅರ್ಜೆಂಟೀನಾ, ಗುಂಪು ಹಂತದ ಕೊನೆ ಪಂದ್ಯದಲ್ಲಿ ಭಾನುವಾರ ಜೋರ್ಡನ್‌ ವಿರುದ್ಧ 3-1 ಗೋಲುಗಳಲ್ಲಿ ಜಯಿಸಿತು.

ಈ ವಿಶ್ವಕಪ್‌ನಲ್ಲಿ ಮೊದಲ ಬಾರಿಗೆ ಮೆಸ್ಸಿ ಹೊರತುಪಡಿಸಿ, ಬೇರೆ ಆಟಗಾರರು ತಂಡದ ಪರ ಗೋಲು ದಾಖಲಿಸಿದರು. ಜಿಯೊವಾನಿ ಲೊ ಸೆಲ್ಸೊ 19ನೇ ನಿಮಿಷದಲ್ಲಿ ತಂಡದ ಪರ ಖಾತೆ ತೆರೆದರು. 31ನೇ ನಿಮಿಷದಲ್ಲಿ ಲುಟಾರೊ ಮಾರ್ಟಿನೆಜ್‌ ಪೆನಾಲ್ಟಿ ಮೂಲಕ 2ನೇ ಗೋಲು ಗಳಿಸಿದರು. 60ನೇ ನಿಮಿಷದಲ್ಲಿ ಮೈದಾನ ಪ್ರವೇಶಿಸಿದ ಮೆಸ್ಸಿ, 80ನೇ ನಿಮಿಷದಲ್ಲಿ ಗೋಲು ದಾಖಲಿಸಿದರು. 55ನೇ ನಿಮಿಷದಲ್ಲಿ ತಮಾರಿ, ಜೋರ್ಡನ್‌ ಪರ ಏಕೈಕ ಗೋಲು ದಾಖಲಿಸಿದರು.

ಮತ್ತೊಮ್ಮೆ ಡ್ರಾಗೆ ತೃಪ್ತಿಪಟ್ಟ ರೊನಾಲ್ಡೋರ ಪೋರ್ಚುಗಲ್‌

ಮಯಾಮಿ: ಕ್ರಿಸ್ಟಿಯಾನೋ ರೊನಾಲ್ಡೋರ ಪೋರ್ಚುಗಲ್‌, ಗುಂಪು ಹಂತದಲ್ಲಿ 2ನೇ ಬಾರಿಗೆ ಡ್ರಾಗೆ ತೃಪ್ತಿಪಟ್ಟಿದೆ. ಕೊಲೊಂಬಿಯಾ ವಿರುದ್ಧ ಭಾನುವಾರದ ಪಂದ್ಯ ಗೋಲು ರಹಿತ ಡ್ರಾಗೆ ತೃಪ್ತಿಪಟ್ಟಿತು. ಆದರೂ, ‘ಕೆ’ ಗುಂಪಿನ ಅಗ್ರಸ್ಥಾನಿಯಾಗಿ ನಾಕೌಟ್‌ ಪ್ರವೇಶಿಸಿದೆ. ಮೊದಲ ಪಂದ್ಯದಲ್ಲಿ ಕಾಂಗೋ ವಿರುದ್ಧ 1-1ರ ಡ್ರಾ ಸಾಧಿಸಿದ್ದ ಪೋರ್ಚುಗಲ್‌, ಉಜ್ಬೇಕಿಸ್ತಾನ ವಿರುದ್ಧ 5-0ಯಲ್ಲಿ ಗೆದ್ದಿತ್ತು.

ಇನ್ನು, ಅಲ್ಜೀರಿಯಾ-ಆಸ್ಟ್ರಿಯಾ ಪಂದ್ಯ 3-3ರಲ್ಲಿ ಡ್ರಾಗೊಂಡರೆ, ಉಜ್ಬೇಕಿಸ್ತಾನ ವಿರುದ್ಧ ಕಾಂಗೋ 3-1ರಲ್ಲಿ ಜಯಿಸಿತು. ಘಾನಾ ವಿರುದ್ಧ ಕ್ರೊವೇಷಿಯಾಗೆ 2-1ರ ಜಯ ದೊರೆಯಿತು.

ಒಂದೂ ಪಂದ್ಯ ಗೆಲ್ಲದ ಉರುಗ್ವೆಗೆ ‘ವಿಶಿಷ್ಟ’ ಶಿಕ್ಷೆ!

ಪ್ಲಾಯಾ ಡೆಲ್ ಕಾರ್ಮೆನ್ (ಮೆಕ್ಸಿಕೋ): ಫಿಫಾ ವಿಶ್ವಕಪ್‌ನಲ್ಲಿ ಒಂದೂ ಪಂದ್ಯ ಗೆಲ್ಲದ ಉರುಗ್ವೆ ತಂಡದ ವಿರುದ್ಧ ಆ ದೇಶದ ಫುಟ್ಬಾಲ್‌ ಸಂಸ್ಥೆ ಸಿಟ್ಟಾಗಿದೆ. ಗುಂಪು ಹಂತದ ಕೊನೆಯ ಪಂದ್ಯದಲ್ಲಿ ಸ್ಪೇನ್‌ ವಿರುದ್ಧ ಸೋತ ಉರುಗ್ವೆ ತಂಡಕ್ಕೆ ವಿಶಿಷ್ಟ ಶಿಕ್ಷೆ ವಿಧಿಸಿದೆ. ಆಟಗಾರರು ತವರಿಗೆ ವಾಪಸಾಗಲೆಂದು ಉರುಗ್ವೆ ಫುಟ್ಬಾಲ್‌ ಸಂಸ್ಥೆ ವಿಶೇಷ ವಿಮಾನದ ವ್ಯವಸ್ಥೆ ಮಾಡಿತ್ತು. ಆದರೆ ಅಭಿಮಾನಿಗಳು ತೀವ್ರ ಅಸಮಾಧಾನ ಹಾಗೂ ಆಕ್ರೋಶ ವ್ಯಕ್ತಪಡಿಸಿದ ಬೆನ್ನಲ್ಲೇ ವಿಶೇಷ ವಿಮಾನವನ್ನು ರದ್ದುಗೊಳಿಸಿ, ನಿಮ್ಮ ನಿಮ್ಮ ಖರ್ಚಿನಲ್ಲಿ ವಾಣಿಜ್ಯ ವಿಮಾನದಲ್ಲಿ ಸೀಟ್‌ ಬುಕ್ ಮಾಡಿಕೊಂಡು ಮನೆ ಸೇರಿಕೊಳ್ಳಿ ಎಂದು ಆಟಗಾರರಿಗೆ ಸೂಚಿಸಿದೆ ಎಂದು ಮಾಧ್ಯಮಗಳಲ್ಲಿ ವರದಿ ಆಗಿದೆ.

FIFA World Cup 2026: ಇಂಗ್ಲೆಂಡ್‌ಗೆ ಘಾನಾ ಶಾಕ್‌! ಇಂಗ್ಲೆಂಡ್‌ಗೆ ಘಾನಾ ಮಂತ್ರವಾದಿ ಕಾಟ?

Kannadaprabha News — Thu, 25 Jun 2026 08:58:16 +0530

ಬೋಸ್ಟನ್‌: ಘಾನಾ ವಿರುದ್ಧ ಇಂಗ್ಲೆಂಡ್‌ ಗೋಲು ರಹಿತ ಡ್ರಾನ ಆಘಾತ ಎದುರಿಸಿತು. ಮೊದಲ ಪಂದ್ಯದಲ್ಲಿ ಕ್ರೊವೇಷಿಯಾ ವಿರುದ್ಧ ಗೆದ್ದಿದ್ದ ಇಂಗ್ಲೆಂಡ್‌, ಸತತ 2ನೇ ಜಯದೊಂದಿಗೆ ನಾಕೌಟ್‌ ಹಂತಕ್ಕೇರುವ ನಿರೀಕ್ಷೆಯೊಂದಿಗೆ ಕಣಕ್ಕಿಳಿಯಿತು. ಆದರೆ, ಘಾನಾದ ಅತ್ಯುತ್ತಮ ಡಿಫೆನ್ಸ್‌ನ ಎದುರು ಗೋಲು ಗಳಿಸಲು ಇಂಗ್ಲಿಷ್‌ ಆಟಗಾರರಿಗೆ ಸಾಧ್ಯವಾಗಲಿಲ್ಲ. ಆದರೂ, ಆಫ್ರಿಕನ್‌ ರಾಷ್ಟ್ರಗಳ ವಿರುದ್ಧ ಇಂಗ್ಲೆಂಡ್‌ ಅಜೇಯವಾಗಿ ಉಳಿಯಿತು ಎನ್ನುವುದೊಂದೇ ಆ ದೇಶದ ಅಭಿಮಾನಿಗಳಿಗೆ ಸಮಾಧಾನ ತಂದ ವಿಷಯ.

ಇಂಗ್ಲೆಂಡ್‌ಗೆ ಪಂದ್ಯದ ಕೊನೆಯಲ್ಲಿ ಗೋಲು ಬಾರಿಸಲು ಉತ್ತಮ ಅವಕಾಶ ಸಿಕ್ಕಿತ್ತು. 86ನೇ ನಿಮಿಷದಲ್ಲಿ ನಿಕೊ ಒ ರೈಲಿ ಅವರ ಹೆಡ್ಡರ್‌, ಗೋಲುಪೆಟ್ಟಿಗೆಯ ಮೇಲ್ಭಾಗಕ್ಕೆ ಬಡಿದು ಹಿಂದಿರುಗಿತು. ಅದನ್ನು ಗೋಲಾಗಿಸುವ ಹ್ಯಾರಿ ಕೇನ್‌ರ ಪ್ರಯತ್ನ ಕೂಡ ವಿಫಲವಾಯಿತು. ಒಟ್ಟಾರೆ, ಪಂದ್ಯದಲ್ಲಿ ಇಂಗ್ಲೆಂಡ್‌ನ 3 ಗೋಲು ಗಳಿಸುವ ಪ್ರಯತ್ನವನ್ನು ಘಾನಾದ ಗೋಲ್‌ಕೀಪರ್‌ ಬೆನ್ಜಮಿನ್‌ ಅಸಾರೆ ವಿಫಲಗೊಳಿಸಿ, ಗಮನ ಸೆಳೆದರು.

ಇಂಗ್ಲೆಂಡ್‌ಗೆ ಘಾನಾ ಮಂತ್ರವಾದಿ ಕಾಟ?

ಘಾನಾದ ಮಂತ್ರವಾದಿ ನಾನಾ ಕ್ವಾಕು ಇಂಗ್ಲೆಂಡ್‌ ವಿರುದ್ಧದ ಪಂದ್ಯಕ್ಕೂ ಮುನ್ನ ಹೇಳಿದ್ದು ನಿಜವಾಗಿದ್ದು, ಸಾಮಾಜಿಕ ತಾಣಗಳಲ್ಲಿ ವೈರಲ್‌ ಆಗಿದೆ. ಪನಾಮ ವಿರುದ್ಧ ಆಡುವಾಗ, ಕ್ವಾಕು ಎದುರಾಳಿ ಆಟಗಾರರ ಮೇಲೆ ವಶೀಕರಣ ಪ್ರಯೋಗ ಮಾಡುತ್ತಿದ್ದ ದೃಶ್ಯಗಳು ಗಮನ ಸೆಳೆದಿದ್ದವು. ಆ ಬಳಿಕ ಇಂಗ್ಲೆಂಡ್‌ ಇಂಗ್ಲೆಂಡ್ ತಂಡವನ್ನು, ಪ್ರಮುಖವಾಗಿ ಹ್ಯಾರಿ ಕೇನ್‌ರನ್ನು ಗೋಲು ಬಾರಿಸದಂತೆ ಕಟ್ಟಿಹಾಕುತ್ತೇನೆ ಎಂದು ಕ್ವಾಕು ಹೇಳಿದ್ದರು. ಬುಧವಾರ ನಡೆದ ಪಂದ್ಯದಲ್ಲಿ ಕ್ವಾಕು ಹೇಳಿದಂತೆಯೇ ಆಯಿತು. ಪಂದ್ಯದಲ್ಲಿ ಇಂಗ್ಲೆಂಡ್‌ ಗೋಲು ಬಾರಿಸಲಿಲ್ಲ. ಕೇನ್‌ ಸುಲಭ ಅವಕಾಶ ಕೈಚೆಲ್ಲಿದರು.

ಪಂದ್ಯದ ಬಳಿಕ ವಿಡಿಯೋವೊಂದನ್ನು ಹರಿಬಿಟ್ಟಿರುವ ಕ್ವಾಕು, ತಾವು ಇಂಗ್ಲೆಂಡ್‌, ಕೇನ್‌ರನ್ನು ತಮ್ಮ ಕಪಿಮುಷ್ಠಿಯಿಂದ ಬಿಡುಗೊಳಿಸಿದ್ದಾಗಿ ಹೇಳಿಕೊಂಡಿದ್ದಾರೆ. ಜೊತೆಗೆ ಮುಂದಿನ ಪಂದ್ಯದಲ್ಲಿ ಕೇನ್‌ ಗೋಲು ಬಾರಿಸುವುದಾಗಿ ಭವಿಷ್ಯ ನುಡಿದಿದ್ದಾರೆ.

ಫಿಫಾ ವಿಶ್ವಕಪ್ ನಾಕೌಟ್‌ ಸೆಣಸಾಟಕ್ಕೆ ವೇದಿಕೆ ಸಿದ್ಧ! ನಾಕೌಟ್‌ನಲ್ಲಿ ಪಂದ್ಯ ಡ್ರಾ ಆದ್ರೆ ಫಲಿತಾಂಶ ನಿರ್ಧಾರ ಹೇಗೆ?

Kannadaprabha News — Mon, 29 Jun 2026 08:42:16 +0530

ನ್ಯೂಯಾರ್ಕ್‌: ಫಿಫಾ ಫುಟ್ಬಾಲ್‌ ವಿಶ್ವಕಪ್‌ ಮಹತ್ವದ ಘಟ್ಟ ತಲುಪಿದ್ದು, ಇನ್ನೇನಿದ್ದರೂ ಮಾಡು ಇಲ್ಲವೇ ಮಡಿ ಸ್ಥಿತಿ. ಅಂತಿಮ-32ರ ಸುತ್ತಿಗೆ ಸೋಮವಾರ ಚಾಲನೆ ದೊರೆಯಲಿದ್ದು, ಪ್ರತಿ ಗುಂಪಿನಲ್ಲಿ ಅಗ್ರ-2 ಸ್ಥಾನ ಪಡೆದ ತಂಡಗಳ ಜೊತೆಗೆ, ಅತ್ಯುತ್ತಮ ಆಟವಾಡಿ 3ನೇ ಸ್ಥಾನ ಗಳಿಸಿದ 8 ತಂಡಗಳು ಈ ಹಂತಕ್ಕೆ ಪ್ರವೇಶಿಸಿವೆ.

ಈ ಸುತ್ತಿನಲ್ಲಿ ಗೆಲ್ಲುವ ತಂಡ ಪ್ರಿ ಕ್ವಾಟರ್‌ ಫೈನಲ್‌ ಅಂದರೆ ಅಂತಿಮ-16ರ ಸುತ್ತು ಪ್ರವೇಶಿಸಲಿದ್ದು, ಸೋಲುವ ತಂಡ ಟೂರ್ನಿಯಿಂದಲೇ ಹೊರಬೀಳಲಿದೆ.

ಈ ಬಾರಿ ದಾಖಲೆಯ 48 ತಂಡಗಳೊಂದಿಗೆ ಆರಂಭಗೊಂಡ ಟೂರ್ನಿಯಲ್ಲಿ ಉರುಗ್ವೆ, ಟರ್ಕಿ ಸೇರಿ ಕೆಲ ಪ್ರಮುಖ ತಂಡಗಳು ಅಂತಿಮ-32ರ ಸುತ್ತಿಗೆ ಪ್ರವೇಶಿಸಲು ವಿಫಲವಾಗಿವೆ. ಆದರೆ 3 ಡ್ರಾ ಸಾಧಿಸಿದ ಕೇಪ್‌ ವರ್ಡೆ, ಕಾಂಗೋ, ಈಜಿಪ್ಟ್, ಬೋಸ್ನಿಯಾ-ಹರ್ಜೆಗೋವಿನಾನದಂತಹ ತಂಡಗಳು ನಾಕೌಟ್‌ ಹಂತಕ್ಕೇರಿ ಅಚ್ಚರಿ ಮೂಡಿಸಿವೆ. ಜು.4ರ ವರೆಗೂ ಅಂತಿಮ-32ರ ಸುತ್ತು ನಡೆಯಲಿದ್ದು, ಜು.5ಕ್ಕೆ ಪ್ರಿ ಕ್ವಾರ್ಟರ್‌ ಆರಂಭಗೊಳ್ಳಲಿದೆ.

ರೋಚಕ ಗುಂಪು ಹಂತ: ಗುಂಪು ಹಂತದ ಪಂದ್ಯಗಳಲ್ಲಿ ರೋಚಕತೆಗೆ ಕೊರತೆ ಇರಲಿಲ್ಲ. ಕೇಪ್‌ ವರ್ಡೆ, ಘಾನಾ, ಕಾಂಗೋದಂತಹ ಸಣ್ಣ ಫುಟ್ಬಾಲಿಂಗ್‌ ರಾಷ್ಟ್ರಗಳು ಬಲಿಷ್ಠರ ಎದುರು ಕೆಚ್ಚೆದೆಯ ಹೋರಾಟ ಪ್ರದರ್ಶಿಸಿದವು. ಇನ್ನು, ತಾರೆಯರಾದ ಮೆಸ್ಸಿ, ರೊನಾಲ್ಡೋ, ಎಂಬಾಪೆ, ಹಾಲ್ಯಾಂಡ್‌, ಕೇನ್‌ ಎಲ್ಲರೂ ಗೋಲು ದಾಖಲಿಸುವಲ್ಲಿ ಯಶಸ್ವಿಯಾದರು. ಈ ಆಟಗಾರರ ಮೇಲೆ ಮುಂದಿನ ಸುತ್ತುಗಳಲ್ಲೂ ನಿರೀಕ್ಷೆ ಇದ್ದು, ‘ಗೋಲ್ಡನ್‌ ಬೂಟ್‌’ (ಟೂರ್ನಿಯಲ್ಲಿ ಗರಿಷ್ಠ ಗೋಲು ಬಾರಿಸಿದ ಆಟಗಾರನಿಗೆ ಸಿಗುವ ಪ್ರಶಸ್ತಿ)ಗೆ ರೇಸ್‌ ಜೋರಾಗಿದೆ.

ಪಂದ್ಯ ಡ್ರಾ ಆದರೆ ಹೇಗೆ?

ಗುಂಪು ಹಂತದ ಪಂದ್ಯಗಳಲ್ಲಿ ಉಭಯ ತಂಡಗಳು ಡ್ರಾ ಸಾಧಿಸಿದರೆ, ಆಗ ಅಂಕ ಹಂಚಿಕೆ ಮಾಡಲಾಗುತ್ತಿತ್ತು. ಆದರೆ, ನಾಕೌಟ್‌ ಹಂತದಲ್ಲಿ ಫಲಿತಾಂಶ ಹೊರಬೀಳಲೇ ಬೇಕು. ನಿಗದಿತ 90 ನಿಮಿಷಗಳಲ್ಲಿ ಯಾವುದೇ ತಂಡ ಗೆಲುವು ಸಾಧಿಸದಿದ್ದರೆ, ಆಗ 30 ನಿಮಿಷಗಳ ಹೆಚ್ಚುವರಿ ಆಟ ನಡೆಯಲಿದೆ. ಆಗಲೂ ವಿಜೇತ ತಂಡ ನಿರ್ಧಾರವಾಗದಿದ್ದರೆ, ಶೂಟೌಟ್‌ ಮೂಲಕ ಗೆಲ್ಲುವ ತಂಡವನ್ನು ನಿರ್ಧರಿಸಲಾಗುತ್ತದೆ.

ಅಂತಿಮ-32ರ ಸುತ್ತಿನ ಎದುರಾಳಿಗಳು

ದಕ್ಷಿಣ ಆಫ್ರಿಕಾ vs ಕೆನಡಾ, ಬ್ರೆಜಿಲ್‌ vs ಜಪಾನ್‌, ಜರ್ಮನಿ vs ಪರಗ್ವೆ, ನೆದರ್‌ಲೆಂಡ್ಸ್ vs ಮೊರಾಕ್ಕೊ, ಐವರಿ ಕೋಸ್ಟ್‌ vs ನಾರ್ವೆ, ಫ್ರಾನ್ಸ್‌ vs ಸ್ವೀಡನ್‌, ಮೆಕ್ಸಿಕೋ vs ಈಕ್ವೆಡಾರ್‌, ಇಂಗ್ಲೆಂಡ್‌ vs ಕಾಂಗೋ, ಬೆಲ್ಜಿಯಂ vs ಸೆನೆಗಲ್‌, ಅಮೆರಿಕ vs ಬೋಸ್ನಿಯಾ-ಹರ್ಜೆಗೋವಿನಾ, ಸ್ಪೇನ್‌ vs ಆಸ್ಟ್ರಿಯಾ, ಪೋರ್ಚುಗಲ್‌ vs ಕ್ರೊವೇಷಿಯಾ, ಸ್ವಿಜರ್‌ಲೆಂಡ್‌ vs ಅಲ್ಜೀರಿಯಾ, ಆಸ್ಟ್ರೇಲಿಯಾ vs ಈಜಿಪ್ಟ್‌, ಅರ್ಜೆಂಟೀನಾ vs ಕೇಪ್‌ ವರ್ಡೆ, ಕೊಲೊಂಬಿಯಾ vs ಘಾನಾ

ಫುಟ್ಬಾಲ್ ಪಂದ್ಯದಲ್ಲಿ ನಿಗೂಢ ಬ್ಯೂಟಿ: ಕೆಲವೇ ಕ್ಷಣಗಳ ವೈರಲ್ ವಿಡಿಯೋಗೆ ವಿಶ್ವಾದ್ಯಂತ ಇನ್ನಿಲ್ಲದ ಡಿಮಾಂಡ್- ಯಾರೀಕೆ

Suchethana D — Mon, 29 Jun 2026 10:48:56 +0530

ಕೆಲವೊಮ್ಮೆ ಅದ್ಯಾವ ಗ್ರಹ ಅದೆಲ್ಲಿ ಬಂದಿರುತ್ತೋ ಗೊತ್ತಿಲ್ಲ. ಏಕಾಏಕಿಯಾಗಿ ಯಾರ್ಯಾರೋ ವೈರಲ್ ಆಗಿ ಬಿಡುತ್ತಾರೆ. ಕೆಲವೊಮ್ಮೆ ಅವರಲ್ಲಿ ಟ್ಯಾಲೆಂಟ್ ಇರುವುದು ನಿಜವಾದರೂ, ಮತ್ತೆ ಕೆಲವೊಮ್ಮೆ ಏನೂ ಟ್ಯಾಲೆಂಟ್ ಇಲ್ಲದಿದ್ದರೂ, ನೆಗೆಟಿವ್ ರೀತಿಯಾಗಿ ಟ್ರೋಲ್ ಆಗಿಯಾದರೂ ವೈರಲ್ ಆಗಿ ರಾಜ್ಯ, ದೇಶ, ವಿಶ್ವದ ಗಮನವನ್ನೇ ಸೆಳೆದು ಬಿಡುತ್ತಾರೆ. ಯಾರಿಗೂ ಇಲ್ಲದ ಅದೃಷ್ಟ ಪಾಸಿಟಿವ್ ಆಗಿ ಇಲ್ಲವೇ ನೆಗೆಟಿವ್ ಆಗಿ ಅವರಿಗೆ ಸಿಕ್ಕು, ಅವರ ಜೀವನದ ದಿಕ್ಕನ್ನೇ ಬದಲಾಯಿಸಿರುವ ಸಾಕಷ್ಟು ಘಟನೆಗಳನ್ನು ಇದಾಗಲೇ ಎಲ್ಲರೂ ನೋಡಿರುತ್ತೇವೆ. ಇದೀಗ ಫುಟ್ಬಾಲ್ ಪಂದ್ಯದ ವೇಳೆ ಸಹಜ ಸುಂದರಿಯೊಬ್ಬಳು ವೈರಲ್ ಆಗಿದ್ದು, ಜಾಲತಾಣದ ನಾಯಕಿಯಾಗಿ ಮೆರೆಯುತ್ತಿದ್ದಾಳೆ.

ಸಾಮಾನ್ಯವಾಗಿ ಯಾವುದೇ ಪಂದ್ಯ ನಡೆದರೂ ಅದರಲ್ಲಿ ಲಕ್ಷಾಂತರ ಅಭಿಮಾನಿಗಳು ಪಂದ್ಯ ವೀಕ್ಷಣೆಗೆ ಬರುವುದು ಇದೆ. ಅವರಲ್ಲಿ ಸುಂದರ, ಸುಂದರಿಯರು ಬೇಕಾದಷ್ಟು ಮಂದಿ ಇರುತ್ತಾರೆ. ಅಂಥವರ ನಡುವೆ ಈ ಸುಂದರಿ ಎಲ್ಲರ ಕ್ರಷ್ ಆಗಿದ್ದಾಳೆ. ಸಾಮಾನ್ಯವಾಗಿ ಯಾವುದಾದರೂ ಸೆಲೆಬ್ರಿಟಿ ಬಂದರೆ ಕ್ಯಾಮೆರಾ ಕಣ್ಣು ಅವರ ಮೇಲೆ ನೆಟ್ಟು ಅವರು ಎಲ್ಲರ ಗಮನ ಸೆಳೆಯುವುದು ಇದೆ. ಇದು ಸರ್ವೇ ಸಾಮಾನ್ಯ. ಆದರೆ ಸಾಮಾನ್ಯ ಯುವತಿಯೊಬ್ಬಳು ಕ್ಯಾಮೆರಾ ಕಣ್ಣಿಗೆ ಕಂಡು ವೈರಲ್ ಆಗಿದ್ದು ಆಕೆಯನ್ನು ನೋಡಿದವರೆಲ್ಲರೂ ವ್ಹಾವ್ಹ್ ಎನ್ನುತ್ತಿದ್ದಾರೆ. ಬಹುಶಃ ಈಕೆಗೂ ಇಷ್ಟೊಂದು ವೈರಲ್ ಆಗುವುದು ತಿಳಿದಿರಲಿಲ್ಲ ಎನ್ನಿಸುತ್ತದೆ.

ಕೆಲವೇ ಸೆಕೆಂಡ್ಗಳ ವಿಡಿಯೋ

ಕೆಲವೇ ಸೆಕೆಂಡುಗಳ ಕಾಲದಲ್ಲಿ ಕಂಡ ಈ ಯುವತಿಯ ವಿಡಿಯೋ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿದ್ದು, ಲಕ್ಷಾಂತರ ವ್ಯೂವ್ಸ್ಕಂಡಿದೆ. ಅಂದಹಾಗೆ ಇದು ಕಂಡುಬಂದಿದ್ದು ಭಾರತದಲ್ಲಿ ಅಲ್ಲ, ಬದಲಿಗೆ ಇರಾಕ್‌ನ ಎರ್ಬಿಲ್‌ನಲ್ಲಿ ಎರ್ಬಿಲ್ ಮತ್ತು ಅಲ್-ನಾಫ್ಟ್ ನಡುವಿನ ಸ್ಥಳೀಯ ಲೀಗ್ ಪಂದ್ಯದ ಸಂದರ್ಭದಲ್ಲಿ ಕಂಡುಬಂದಿರುವ ಯುವತಿ ಈಕೆ. ಕ್ರೀಡಾಂಗಣದ ಕ್ಯಾಮೆರಾ ಪ್ರೇಕ್ಷಕರ ಕಡೆಗೆ ತಿರುಗಿದಾಗ, ಆ ಯುವತಿ ಕ್ಯಾಮೆರಾವನ್ನು ನೋಡಿ ಮುಗುಳ್ನಕ್ಕಳು, ಮತ್ತು ಆ ಸಂಕ್ಷಿಪ್ತ ಕ್ಷಣವು X, Facebook, Instagram ಮತ್ತು TikTok ಸೇರಿದಂತೆ ಎಲ್ಲಾ ವೇದಿಕೆಗಳಲ್ಲಿ ತ್ವರಿತವಾಗಿ ಹರಡಿದೆ. ಅನೇಕ ಬಳಕೆದಾರರು ಯುವತಿಯ ನೈಸರ್ಗಿಕ ನೋಟ ಮತ್ತು ಬೆಚ್ಚಗಿನ ನಗುವನ್ನು ಕಂಡು ಖುಷಿಪಡುತ್ತಿದ್ದಾರೆ. ಕೆಜಿಗಟ್ಟಲೆ ಮೇಕಪ್ ಹಾಕಿಕೊಂಡು ಬರುವ ಸೆಲೆಬ್ರಿಟಿಗಳಿಗೆ ಸೆಡ್ಡು ಹೊಡೆಯುವ ಈಕೆಯ ನೈಜ ಸೌಂದರ್ಯ ಎಲ್ಲರ ಗಮನ ಸೆಳೆಯುತ್ತಿದೆ.

ಫ್ಯಾಕ್ಟ್ ಚೆಕ್

ಕೆಲವರು ಇದನ್ನು ಎಐ ವಿಡಿಯೋ ಎಂದೂ ಊಹಿಸಿದ್ದಾರೆ. ಅದು ಎಷ್ಟರಮಟ್ಟಿಗೆ ವೈರಲ್ ಆಯಿತು ಎಂದರೆ, ಈಕೆಯ ಫ್ಯಾಕ್ಟ್ ಚೆಕ್ ಕೂಡ ಮಾಡಲಾಯಿತು. ಕೊನೆಗೆ ಇದ್ಯಾವ ಎಐ ಅಲ್ಲ, ಬದಲಿಗೆ ನಿಜವಾದ ಯುವತಿ ಎಂದು ಕಂಡುಕೊಂಡಿದ್ದಾರೆ. ಈಕೆ ಸೆಲೆಬ್ರಿಟಿ, ಮಾಡೆಲ್ ಅಥವಾ ಸಾಮಾಜಿಕ ಮಾಧ್ಯಮ ಪ್ರಭಾವಿ ಕೂಡ ಅಲ್ಲ ಎನ್ನುವುದು ತಿಳಿದಿದೆ. ಈಕೆ ಯಾರು ಎನ್ನುವ ಬಗ್ಗೆ ಅಭಿಮಾನಿಗಳು ಇನ್ನೂ ಪತ್ತೆ ಹಚ್ಚುತ್ತಿದ್ದಾರೆ.

ಈ ಬಾರಿ ಫಿಫಾ ವಿಶ್ವಕಪ್ ಗೆಲ್ಲೋದ್ಯಾರು? ಅರ್ಜೆಂಟೀನಾಗೆ 2ನೇ ಸ್ಥಾನ..! ಸೂಪರ್‌ ಕಂಪ್ಯೂಟರ್ ಭವಿಷ್ಯ!

Naveen Kodase — Tue, 30 Jun 2026 17:05:12 +0530

ಪ್ರಾಣಿಗಳನ್ನು ಬಳಸಿ ಅಥವಾ ವೈಯಕ್ತಿಕ ಇಷ್ಟ-ಕಷ್ಟಗಳ ಆಧಾರದ ಮೇಲೆ ಅನೇಕರು ಭವಿಷ್ಯ ನುಡಿಯುತ್ತಾರೆ. ಆದರೆ, ಪ್ರಮುಖ ಸ್ಪೋರ್ಟ್ಸ್ ಅನಾಲಿಟಿಕ್ಸ್ ಗ್ರೂಪ್ 'ಒಪ್ಟಾ' ತನ್ನ ಸೂಪರ್‌ಕಂಪ್ಯೂಟರ್ ಮೂಲಕ ನಿಖರವಾದ ಡೇಟಾ ಬಳಸಿ ಭವಿಷ್ಯವನ್ನು ಪ್ರಕಟಿಸಿದೆ.

ಫಿಫಾ ವಿಶ್ವಕಪ್‌ನ ಗ್ರೂಪ್ ಹಂತದ ಪಂದ್ಯಗಳು ಮುಗಿದು ನಾಕೌಟ್ ಹಂತದ ರೋಚಕತೆಗೆ ಕಾಲಿಟ್ಟಿದ್ದೇವೆ. ಈ ಬಾರಿ ಯಾರು ಕಪ್ ಗೆಲ್ಲುತ್ತಾರೆ ಎಂಬ ಚರ್ಚೆ ಜೋರಾಗಿದೆ. ಪ್ರಾಣಿಗಳನ್ನು ಬಳಸಿ ಅಥವಾ ವೈಯಕ್ತಿಕ ಇಷ್ಟದ ಆಧಾರದ ಮೇಲೆ ಹಲವರು ಭವಿಷ್ಯ ನುಡಿಯುತ್ತಿದ್ದಾರೆ. ಆದರೆ, ಪ್ರಖ್ಯಾತ ಸ್ಪೋರ್ಟ್ಸ್ ಅನಾಲಿಟಿಕ್ಸ್ ಸಂಸ್ಥೆ 'ಒಪ್ಟಾ' ತನ್ನ ಸೂಪರ್‌ಕಂಪ್ಯೂಟರ್ ಮೂಲಕ ನಿಖರ ಡೇಟಾ ಆಧರಿಸಿ ಭವಿಷ್ಯ ಪ್ರಕಟಿಸಿದೆ. ಗ್ರೂಪ್ ಹಂತದ ಪಂದ್ಯಗಳ ನಂತರ, ಒಪ್ಟಾದ ಸೂಪರ್‌ಕಂಪ್ಯೂಟರ್ ಉಳಿದ ಪಂದ್ಯಗಳನ್ನು 25,000 ಬಾರಿ ಸಿಮ್ಯುಲೇಟ್ ಮಾಡಿದೆ. ಈ ಭವಿಷ್ಯವಾಣಿಯ ಪ್ರಕಾರ, ಈ ಬಾರಿ ಫ್ರಾನ್ಸ್ ತಂಡಕ್ಕೆ ಕಪ್ ಗೆಲ್ಲುವ ಸಾಧ್ಯತೆ ಅತಿ ಹೆಚ್ಚಿದೆ. ಒಪ್ಟಾ ಭವಿಷ್ಯ ನಿಜವಾದರೆ, ಫುಟ್‌ಬಾಲ್ ಇತಿಹಾಸದಲ್ಲೇ ಅತ್ಯುತ್ತಮ ಫೈನಲ್ ಎಂದು ಬಣ್ಣಿಸಲಾದ 2022ರ ಅರ್ಜೆಂಟೀನಾ-ಫ್ರಾನ್ಸ್ ಫೈನಲ್ ಪಂದ್ಯದ ಪುನರಾವರ್ತನೆ ಈ ಬಾರಿಯೂ ಆಗಲಿದೆ.

ಫ್ರಾನ್ಸ್ ಮುಡಿಗೇರುತ್ತಾ ಫಿಫಾ ವಿಶ್ವಕಪ್ ಕಿರೀಟ?

ಕಳೆದ ಬಾರಿ ಲಿಯೋನೆಲ್ ಮೆಸ್ಸಿ ಬಳಗವು ಪೆನಾಲ್ಟಿ ಶೂಟೌಟ್‌ನಲ್ಲಿ ಫ್ರಾನ್ಸ್ ತಂಡವನ್ನು ಸೋಲಿಸಿ ಕಪ್ ಎತ್ತಿತ್ತು. ಆದರೆ ಈ ಬಾರಿ ಎಂಬಾಪೆ ನಾಯಕತ್ವದ ಫ್ರಾನ್ಸ್ ಕಿರೀಟವನ್ನು ಮರಳಿ ಪಡೆಯಲಿದೆ ಎಂದು ಸೂಪರ್‌ಕಂಪ್ಯೂಟರ್ ಹೇಳುತ್ತಿದೆ. ಒಪ್ಟಾ ಸೂಪರ್‌ಕಂಪ್ಯೂಟರ್ ಭವಿಷ್ಯದ ಪ್ರಕಾರ, ತಂಡಗಳ ಗೆಲುವಿನ ಸಾಧ್ಯತೆ ಹೀಗಿದೆ: ಫ್ರಾನ್ಸ್: 18.7%, ಅರ್ಜೆಂಟೀನಾ: 16.3%, ಸ್ಪೇನ್: 13.5%, ಇಂಗ್ಲೆಂಡ್: 9.7%, ಬ್ರೆಜಿಲ್: 6.5%.

ಟೂರ್ನಿ ಆರಂಭವಾದಾಗ ಫ್ರಾನ್ಸ್ ತಂಡವು ಕಪ್ ಗೆಲ್ಲುವ ಸಾಧ್ಯತೆಯಲ್ಲಿ ಎರಡನೇ ಸ್ಥಾನದಲ್ಲಿತ್ತು (13%). ಆದರೆ ಗ್ರೂಪ್ ಹಂತದ ಭರ್ಜರಿ ಪ್ರದರ್ಶನದೊಂದಿಗೆ 18.7% ಸಾಧ್ಯತೆಯೊಂದಿಗೆ ಮೊದಲ ಸ್ಥಾನಕ್ಕೆ ಏರಿದೆ. 1998ರಲ್ಲಿ ಚಾಂಪಿಯನ್ ಆದ ನಂತರ ಇದೇ ಮೊದಲ ಬಾರಿಗೆ ಫ್ರಾನ್ಸ್ ತನ್ನ ಮೂರೂ ಗ್ರೂಪ್ ಪಂದ್ಯಗಳನ್ನು ಗೆದ್ದಿದೆ. ರೌಂಡ್ ಆಫ್ 32ರಲ್ಲಿ ಸ್ವೀಡನ್ ಅನ್ನು ಎದುರಿಸಲಿರುವ ಫ್ರಾನ್ಸ್‌ಗೆ, ಮುಂದಿನ ಹಾದಿಯಲ್ಲಿ ಜರ್ಮನಿ ಮತ್ತು ಸ್ಪೇನ್‌ನಿಂದ ಕಠಿಣ ಸವಾಲು ಎದುರಾಗಲಿದೆ. ವಿಶ್ವಕಪ್ ಆರಂಭಕ್ಕೂ ಮುನ್ನ ಅಗ್ರಸ್ಥಾನದಲ್ಲಿದ್ದ ಸ್ಪೇನ್, ಇದೀಗ ಮೂರನೇ ಸ್ಥಾನಕ್ಕೆ ಕುಸಿದಿದೆ. ಪ್ರೀ-ಕ್ವಾರ್ಟರ್ ಫೈನಲ್‌ನಲ್ಲಿ ನೆರೆಯ ಪೋರ್ಚುಗಲ್ ವಿರುದ್ಧ ಸ್ಪೇನ್ ಕಠಿಣ ಹೋರಾಟ ನಡೆಸಬೇಕಾಗಿರುವುದು ಕೂಡ ಅವರ ಸಾಧ್ಯತೆಗಳ ಮೇಲೆ ಪರಿಣಾಮ ಬೀರಲಿದೆ.

ಅರ್ಜೆಂಟೀನಾಗೆ ಅನುಕೂಲಕರ ಹಾದಿ

ಹಾಲಿ ಚಾಂಪಿಯನ್ ಅರ್ಜೆಂಟೀನಾಗೆ ಫೈನಲ್‌ವರೆಗಿನ ಪಂದ್ಯಗಳ ವೇಳಾಪಟ್ಟಿ ಹೆಚ್ಚು ಅನುಕೂಲಕರವಾಗಿದೆ ಎಂದು ಒಪ್ಟಾ ಹೇಳಿದೆ. ರೌಂಡ್ ಆಫ್ 32ರಲ್ಲಿ ಅರ್ಜೆಂಟೀನಾದ ಎದುರಾಳಿ ಹೊಸಬರಾದ ಕೇಪ್ ವರ್ಡೆ. ಪ್ರೀ-ಕ್ವಾರ್ಟರ್‌ನಲ್ಲಿ ಆಸ್ಟ್ರೇಲಿಯಾ ಅಥವಾ ಈಜಿಪ್ಟ್ ಬರಬಹುದು. ಕ್ವಾರ್ಟರ್ ಫೈನಲ್‌ನಲ್ಲಿ ಸ್ವಿಟ್ಜರ್ಲೆಂಡ್, ಕೊಲಂಬಿಯಾ, ಘಾನಾ ಅಥವಾ ಅಲ್ಜೀರಿಯಾ ಪೈಕಿ ಒಬ್ಬರನ್ನು ಮೆಸ್ಸಿ ಪಡೆ ಎದುರಿಸಲಿದೆ. ಸೆಮಿಫೈನಲ್‌ವರೆಗೂ ಅರ್ಜೆಂಟೀನಾಗೆ ದೊಡ್ಡ ಸವಾಲುಗಳಿಲ್ಲ, ಸೆಮಿಫೈನಲ್‌ನಲ್ಲಿ ಬ್ರೆಜಿಲ್ ಅಥವಾ ಇಂಗ್ಲೆಂಡ್ ಮೊದಲ ಕಠಿಣ ಪರೀಕ್ಷೆಯಾಗಲಿದೆ ಎಂದು ಸೂಪರ್‌ಕಂಪ್ಯೂಟರ್ ಸ್ಪಷ್ಟಪಡಿಸಿದೆ.

ಮೂವರು ಆತಿಥೇಯ ರಾಷ್ಟ್ರಗಳ ಪೈಕಿ, ಅಮೆರಿಕ ಹೆಚ್ಚು ಮುನ್ನಡೆಯುವ ಸಾಧ್ಯತೆಯಿದೆ. ಯುಎಸ್‌ಎ ಕ್ವಾರ್ಟರ್ ಫೈನಲ್ ತಲುಪಲು 42.5% ಸಾಧ್ಯತೆ ಇದೆ. ಮೆಕ್ಸಿಕೊಗೆ 28.3% ಮತ್ತು ಕೆನಡಾಗೆ 25.2% ಕ್ವಾರ್ಟರ್ ಫೈನಲ್ ತಲುಪುವ ಸಾಧ್ಯತೆಯಿದೆ.

FIFA World Cup: 1934ರ ಬಳಿಕ ಮೊದಲ ಬಾರಿ ಪ್ರಿಕ್ವಾರ್ಟರ್‌ಗೇರದೇ ಹೊರಬಿದ್ದ ನೆದರ್‌ಲೆಂಡ್ಸ್‌

Kannadaprabha News — Wed, 01 Jul 2026 08:18:56 +0530

ಗ್ವಾಡಲುಪೆ(ಮೆಕ್ಸಿಕೊ): ಫಿಫಾ ವಿಶ್ವಕಪ್‌ನಲ್ಲಿ 3 ಬಾರಿ ರನ್ನರ್‌-ಅಪ್‌ ಆಗಿರುವ ನೆದರ್‌ಲೆಂಡ್ಸ್‌ ತಂಡ ಈ ಬಾರಿ ಟೂರ್ನಿಯಲ್ಲಿ ಅಂತಿಮ 32ರ ಸುತ್ತಿನಲ್ಲೇ ಹೊರಬಿದ್ದಿದೆ. ತಂಡ ಮಂಗಳವಾರ ಮೊರಾಕ್ಕೊ ವಿರುದ್ಧ ಪೆನಾಲ್ಟಿ ಶೂಟೌಟ್‌ನಲ್ಲಿ 2-3 ಗೋಲುಗಳ ಅಂತರದಲ್ಲಿ ಪರಾಭವಗೊಂಡಿತು.

ಕಳೆದ ವರ್ಷ ಸ್ಪೇನ್‌, ಪೋರ್ಚುಗಲ್‌ ತಂಡಗಳನ್ನು ಸೋಲಿಸಿ ಸೆಮಿಫೈನಲ್‌ವರೆಗೂ ತಲುಪಿದ್ದ ಮೊರಾಕ್ಕೊ, ಈ ಬಾರಿ ಡಚ್‌ ಪಡೆಗೆ ಆಘಾತ ನೀಡಿತು. ನಿಗದಿತ ಅವಧಿಯಲ್ಲಿ ಉಭಯ ತಂಡಗಳು 1-1 ಸಮಬಲ ಸಾಧಿಸಿದವು. 72ನೇ ನಿಮಿಷದಲ್ಲಿ ನೆದರ್‌ಲೆಂಡ್ಸ್ ಗೋಲು ಬಾರಿಸಿದರೆ, ಹೆಚ್ಚುವರಿ ನಿಮಿಷ(90+1)ದಲ್ಲಿ ಗೋಲು ದಾಖಲಿಸಿ ಮೊರಾಕ್ಕೊ ಪಂದ್ಯ ಸಮಬಲಗೊಳಿಸಿತು. ಬಳಿಕ ನಡೆದ ಪೆನಾಲ್ಟಿ ಶೂಟೌಟ್‌ನಲ್ಲಿ ಮೊರಾಕ್ಕೊ 3 ಗೋಲು ಗಳಿಸಿ ಗೆಲುವು ತನ್ನದಾಗಿಸಿಕೊಂಡಿತು.

ಮೊದಲ ಬಾರಿ ಪ್ರಿ ಕ್ವಾರ್ಟರ್‌ಗಿಲ್ಲ:

ನೆದರ್‌ಲೆಂಡ್ಸ್‌ 1934ರಿಂದ 2022ರ ವರೆಗೆ ಒಟ್ಟು 11 ವಿಶ್ವಕಪ್‌ ಆಡಿವೆ. ಎಲ್ಲಾ ಬಾರಿಯೂ ತಂಡ ಅಂತಿಮ 16ರ ಸುತ್ತು ಪ್ರವೇಶಿಸಿದ್ದವು. ಈ ಪೈಕಿ 3 ಬಾರಿ(1974, 1978, 2010) ಫೈನಲ್‌ನಲ್ಲಿ ಸೋತಿತ್ತು. ತಂಡ ಇದೇ ಮೊದಲ ಬಾರಿ ಅಂತಿಮ 16ರ ಸುತ್ತು ತಲುಪಲು ವಿಫಲವಾಗಿದೆ. ಇನ್ನು, ಮೊರಾಕ್ಕೊ 3ನೇ ಬಾರಿ ಪ್ರಿ ಕ್ವಾರ್ಟರ್‌ ಫೈನಲ್ ತಲುಪಿದೆ.

ಜಪಾನ್‌ ಶಾಕ್‌ನಿಂದ ಪಾರಾಗಿ ಬ್ರೆಜಿಲ್‌ ಪ್ರಿ ಕ್ವಾರ್ಟರ್‌ ಪ್ರವೇಶ

ಹ್ಯೂಸ್ಟನ್‌: ಫಿಫಾ ಫುಟ್ಬಾಲ್‌ ವಿಶ್ವಕಪ್‌ನಲ್ಲಿ 5 ಬಾರಿ ಚಾಂಪಿಯನ್‌ ಬ್ರೆಜಿಲ್‌ ತಂಡ ಪ್ರಿ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿವೆ. ಸೋಮವಾರ ನಡೆದ ಜಪಾನ್‌ ವಿರುದ್ಧದ ಅಂತಿಮ-32ರ ಸುತ್ತಿನ ಪಂದ್ಯದಲ್ಲಿ ಬ್ರೆಜಿಲ್‌ 2-1 ಗೋಲುಗಳ ಅಂತರದಲ್ಲಿ ಜಯ ಸಾಧಿಸಿತು.

29ನೇ ನಿಮಿಷದಲ್ಲೇ ಜಪಾನ್‌ ಮುನ್ನಡೆ ಸಾಧಿಸಿತು. ಕೈಶು ಸಾನೊ ಗೋಲು ಬಾರಿಸಿದರು. ಮೊದಲಾರ್ಧವನ್ನು ಜಪಾನ್‌ 1-0 ಮುನ್ನಡೆಯೊಂದಿಗೆ ಮುಕ್ತಾಯಗೊಳಿಸಿತು. 56ನೇ ನಿಮಿಷದಲ್ಲಿ ಕ್ಯಾಸಿಮಿರೊ ಬ್ರೆಜಿಲ್‌ಗೆ ಮೊದಲ ಗೋಲು ತಂದುಕೊಟ್ಟರು. ಪಂದ್ಯದ ಕೊನೆ ಕ್ಷಣದಲ್ಲಿ (90+6ನೇ ನಿಮಿಷ), ಗೇಬ್ರಿಯಾಲ್‌ ಮ್ಯಾರ್ಟಿನೆಲಿ ಬಾರಿಸಿದ ಗೋಲು, ಬ್ರೆಜಿಲ್‌ಗೆ ರೋಚಕ ಜಯ ತಂದುಕೊಟ್ಟಿತು.

FIFA World Cup 2026: ಕ್ರಿಸ್ಟಿಯಾನೋ ರೊನಾಲ್ಡೋ ಮಿಂಚಿನ ಆಟ; ಪೋರ್ಚುಗಲ್‌ಗೆ 5-0 ಜಯ

Kannadaprabha News — Thu, 25 Jun 2026 07:49:29 +0530

ಹ್ಯೂಸ್ಟನ್‌: ಕ್ರಿಸ್ಟಿಯಾನೋ ರೊನಾಲ್ಡೋ ಭರ್ಜರಿ ಸ್ಟೈಲ್‌ನಲ್ಲಿ ಲಯಕ್ಕೆ ಮರಳಿದ ಪರಿಣಾಮವನ್ನು ಉಜ್ಬೇಕಿಸ್ತಾನ ಎದುರಿಸಬೇಕಾಯಿತು. ರೊನಾಲ್ಡೋ 2 ಗೋಲು ಬಾರಿಸಿ, ಪೋರ್ಚುಗಲ್‌ನ 5-0 ಅಂತರದ ಜಯದಲ್ಲಿ ಪ್ರಮುಖ ಪಾತ್ರ ವಹಿಸಿದರು.

ಮೊದಲ ಪಂದ್ಯದಲ್ಲಿ ಕಾಂಗೋ ವಿರುದ್ಧ 1-1ರ ಡ್ರಾಗೆ ತೃಪ್ತಿಪಟ್ಟಿದ್ದ ಪೋರ್ಚುಗಲ್‌, ಈ ಗೆಲುವಿನೊಂದಿಗೆ ನಾಕೌಟ್‌ ಹಂತಕ್ಕೇರುವ ಆಸೆಯನ್ನು ಜೀವಂತವಾಗಿರಿಸಿಕೊಂಡಿದೆ.

ಈ ಪಂದ್ಯಕ್ಕೂ ಮುನ್ನ ಸಾಮಾಜಿಕ ತಾಣಗಳಲ್ಲಿ ಅನೇಕರು, ರೊನಾಲ್ಡೋ ತಂಡದಲ್ಲಿ ಇರಬೇಕೇ ಬೇಡವೆ ಎನ್ನುವ ಚರ್ಚೆ ನಡೆಸಿದ್ದರು. ಕೆಲವರು, ಟೀಕೆ ಸಹ ಮಾಡಿದ್ದರು. ಎಲ್ಲ ಪ್ರಶ್ನೆಗಳಿಗೂ ರೊನಾಲ್ಡೋ ತಮ್ಮ ಪ್ರದರ್ಶನದ ಮೂಲಕವೇ ಉತ್ತರಿಸಿದರು. 6ನೇ ನಿಮಿಷದಲ್ಲೇ ಖಾತೆ ತೆರೆದ ರೊನಾಲ್ಡೋ, ಆರಂಭಿಕ ಮುನ್ನಡೆ ಒದಗಿಸಿದರು. 17ನೇ ನಿಮಿಷದಲ್ಲಿ ನ್ಯುನೊ ಮೆಂಡೆಸ್‌ ಗೋಲು ಗಳಿಸಿದರೆ, 39ನೇ ನಿಮಿಷದಲ್ಲಿ ರೊನಾಲ್ಡೋ 2ನೇ ಗೋಲು ಬಾರಿಸಿ, ಮೊದಲಾರ್ಧದ ಮುಕ್ತಾಯಕ್ಕೆ ತಂಡ 3-0 ಮುನ್ನಡೆ ಕಾಯ್ದುಕೊಳ್ಳಲು ನೆರವಾದರು.

60ನೇ ನಿಮಿಷದಲ್ಲಿ ಉಜ್ಬೇಕಿಸ್ತಾನದ ಅಬ್ದುವೊಹಿದ್‌ ಸ್ವಂತ ಗೋಲು ಬಾರಿಸಿ, ಪೋರ್ಚುಗಲ್‌ಗೆ ಉಡುಗೊರೆ ನೀಡಿದರೆ, 87ನೇ ನಿಮಿಷದಲ್ಲಿ ರಫೇಲ್‌ ಲಿಯೊ ತಂಡದ ಪರ 5ನೇ ಗೋಲು ದಾಖಲಿಸಿದರು. ಪೋರ್ಚುಗಲ್‌ಗೆ ಗುಂಪು ಹಂತದ ಕೊನೆಯ ಪಂದ್ಯದಲ್ಲಿ ಭಾನುವಾರ ಕೊಲಂಬಿಯಾ ಎದುರಾಗಲಿದೆ.

ಸತತ 6 ವಿಶ್ವಕಪ್‌ ಟೂರ್ನಿಗಳಲ್ಲಿ ಗೋಲು: ರೊನಾಲ್ಡೋ ದಾಖಲೆ!

ಸತತ 6 ಫಿಫಾ ವಿಶ್ವಕಪ್‌ಗಳಲ್ಲಿ ಗೋಲು ಬಾರಿಸಿದ ಮೊದಲ ಆಟಗಾರ ಎನ್ನುವ ದಾಖಲೆಯನ್ನು ಕ್ರಿಸ್ಟಿಯಾನೋ ರೊನಾಲ್ಡೋ ಬರೆದಿದ್ದಾರೆ. 20 ವರ್ಷಗಳ ಹಿಂದೆ ಮೊದಲ ಬಾರಿಗೆ ವಿಶ್ವಕಪ್‌ನಲ್ಲಿ ಆಡಿದ್ದ ರೊನಾಲ್ಡೋ, 2006, 2010, 2014, 2018, 2022, 2026ರ ವಿಶ್ವಕಪ್‌ನಲ್ಲಿ ಕನಿಷ್ಠ 1 ಗೋಲು ಬಾರಿಸಿದ್ದಾರೆ.

ಕಾಂಗೋ ವಿರುದ್ಧ ಗೆದ್ದ ಕೊಲೊಂಬಿಯಾ

ಗ್ವಾಡಲಜರಾ (ಮೆಕ್ಸಿಕೋ): ಡೇನಿಯಲ್‌ ಮುನೊಜ್‌ ಬಾರಿಸಿದ ಏಕೈಕ ಗೋಲು, ಕಾಂಗೋ ವಿರುದ್ಧ ಕೊಲೊಂಬಿಯಾ 1-0 ಅಂತರದಲ್ಲಿ ಗೆದ್ದು ನಾಕೌಟ್‌ ಹಂತಕ್ಕೇರುವ ಆಸೆಯನ್ನು ಜೀವಂತವಾಗಿರಿಸಿಕೊಳ್ಳಲು ನೆರವಾಯಿತು. ಪಂದ್ಯದ 76ನೇ ನಿಮಿಷದಲ್ಲಿ ಮುನೊಜ್‌ ಗೋಲು ದಾಖಲಿಸಿದರು.

ಕಾಂಗೋಗೆ ‘ಜೀವಂತ ಪ್ರತಿಮೆ’ಯ ಬೆಂಬಲ!

ಕಾಂಗೋ-ಕೊಲೊಂಬಿಯಾ ಪಂದ್ಯದಲ್ಲಿ ಫುಟ್ಬಾಲಿಗರಿಗಿಂತ ಹೆಚ್ಚು ಗಮನ ಸೆಳೆದಿದ್ದು ಪ್ರೇಕ್ಷಕರ ಸ್ಟ್ಯಾಂಡ್‌ನಲ್ಲಿದ್ದ ಮೈಕಲ್‌ ಎನ್‌ಕುಕಾ ಎನ್ನುವ ಅಭಿಮಾನಿ. ಇವರು ಕಾಂಗೋ ದೇಶದವರು. ಪಂದ್ಯ ಶುರುವಾದಾಗಿನಿಂದ ಮುಗಿಯುವ ವರೆಗೂ ಪ್ರತಿಮೆಯಂತೆ, ಚೂರೂ ಅಲುಗಾಡದೆ ನಿಂತಿದ್ದರು. ಮೈಕಲ್‌ ಜೀವಂತ ಪ್ರತಿಮೆ ಎಂದೇ ಖ್ಯಾತಿ ಪಡೆದಿರುವ ವ್ಯಕ್ತಿ. ಕಾಂಗೋ ದೇಶದ ಪ್ರಥಮ ಪ್ರಧಾನಿಯಾಗಿದ್ದ ಪ್ಯಾಟ್ರೈಸ್‌ ಲುಮುಂಬಾ ಅವರ ನೆನಪಿನಲ್ಲಿ, ಪ್ರತಿಮೆಯಂತೆ ನಿಲ್ಲುವುದಾಗಿ ಮೈಕಲ್‌ ಹೇಳಿಕೊಂಡಿದ್ದಾರೆ.

ನಾಕೌಟ್‌ ರೇಸ್‌ನಲ್ಲಿ ಉಳಿದ ಕ್ರೊವೇಷಿಯಾ

ಟೊರೊಂಟೊ: ಜೊಸಿಪ್‌ ಸ್ಟ್ಯಾನಿಸಿಚ್‌ 54ನೇ ನಿಮಿಷದಲ್ಲಿ ಬಾರಿಸಿದ ಗೋಲಿನ ನೆರವಿನಿಂದ ಪನಾಮ ವಿರುದ್ಧ 1-0 ಗೋಲಿನ ಜಯ ಸಾಧಿಸಿದ ಕ್ರೊವೇಷಿಯಾ, ನಾಕೌಟ್‌ ಹಂತಕ್ಕೇರುವ ಆಸೆಯನ್ನು ಜೀವಂತವಾಗಿರಿಸಿಕೊಂಡಿದೆ.

FIFA World Cup 2026: ಕೀಲಿಯನ್ ಎಂಬಾಪೆ ಮತ್ತೆರಡು ಗೋಲು, ಫ್ರಾನ್ಸ್‌ ಪ್ರಿ ಕ್ವಾರ್ಟರ್‌ಗೆ ಲಗ್ಗೆ

Kannadaprabha News — Thu, 02 Jul 2026 07:36:29 +0530

ಈಸ್ಟ್‌ ರುಥರ್‌ಫೋರ್ಡ್‌(ಅಮೆರಿಕ): ಕೀಲಿಯನ್ ಎಂಬಾಪೆ ಮತ್ತೆರಡು ಗೋಲು ಬಾರಿಸಿದ್ದು, ಈ ಮೂಲಕ ಫ್ರಾನ್ಸ್‌ ತಂಡವನ್ನು ಈ ಬಾರಿ ಫಿಫಾ ಫುಟ್ಬಾಲ್‌ ವಿಶ್ವಕಪ್‌ನಲ್ಲಿ ಪ್ರಿ ಕ್ವಾರ್ಟರ್‌ ಫೈನಲ್‌ಗೇರಿದ್ದಾರೆ. ಮಂಗಳವಾರ ಮಧ್ಯರಾತ್ರಿ ನಡೆದ ಪಂದ್ಯದಲ್ಲಿ ತಂಡಕ್ಕೆ ಸ್ವೀಡನ್‌ ವಿರುದ್ಧ 3-0 ಗೋಲಿನಿಂದ ಭರ್ಜರಿ ಗೆಲುವು ಲಭಿಸಿತು.

45ನೇ ನಿಮಿಷದಲ್ಲಿ ಮೊದಲು ಗೋಲು ದಾಖಲಿಸಿದ ಎಂಬಾಪೆ, ಫ್ರಾನ್ಸ್‌ನ ಖಾತೆ ತೆರೆದರು. 53ನೇ ನಿಮಿಷದಲ್ಲಿ ಬ್ರಾಡ್ಲಿ ಬಾರ್ಕೊಲಾ ತಂಡದ ಪರ 2ನೇ ಗೋಲು ಬಾರಿಸಿದರು. 74ನೇ ನಿಮಿಷದಲ್ಲಿ ಎಂಬಾಪೆ ಮತ್ತೊಂದು ಗೋಲು ದಾಖಲಿಸಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಅವರು ಈ ಬಾರಿ ಆಡಿರುವ 4 ಪಂದ್ಯಗಳ ಪೈಕಿ 3ರಲ್ಲಿ ತಲಾ 2 ಗೋಲು ದಾಖಲಿಸಿದ್ದಾರೆ. ತಂಡ ಅಂತಿಮ 16ರ ಸುತ್ತಿನಲ್ಲಿ ಪರಗ್ವೆ ವಿರುದ್ಧ ಸೆಣಸಾಡಲಿದ್ದು, ಗೆಲುವಿನ ವಿಶ್ವಾಸದಲ್ಲಿದೆ.

ಸತತ 4ನೇ ಬಾರಿ ಪ್ರಿ ಕ್ವಾರ್ಟರ್‌ಗೆ:

2 ಬಾರಿ ಚಾಂಪಿಯನ್ ಫ್ರಾನ್ಸ್ ತಂಡ ಸತತ 4ನೇ ಹಾಗೂ ಒಟ್ಟಾರೆ 11ನೇ ಬಾರಿ ಪ್ರಿ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದೆ. 2018ರಲ್ಲಿ ಚಾಂಪಿಯನ್‌ ಆಗಿದ್ದ ತಂಡ ಕಳೆದ ಬಾರಿ ಫೈನಲ್‌ನಲ್ಲಿ ಸೋತಿತ್ತು. ಈ ಬಾರಿಯೂ ಫೈನಲ್‌ ಪ್ರವೇಶಿಸುವ ನೆಚ್ಚಿನ ತಂಡಗಳಲ್ಲಿ ಒಂದು ಎನಿಸಿಕೊಂಡಿದೆ.

ವಿಶ್ವಕಪ್‌ನಲ್ಲಿ ಎಂಬಾಪೆ 18 ಗೋಲು: 2ನೇ ಗರಿಷ್ಠ

ಫ್ರಾನ್ಸ್‌ನ 27 ವರ್ಷದ ಎಂಬಾಪೆ ಈ ವಿಶ್ವಕಪ್‌ನಲ್ಲಿ 6ನೇ ಗೋಲು ದಾಖಲಿಸಿದ್ದಾರೆ. ಒಟ್ಟಾರೆ ಫಿಫಾ ವಿಶ್ವಕಪ್‌ನಲ್ಲಿದು 18ನೇ ಗೋಲು. ಈ ಮೂಲಕ ವಿಶ್ವಕಪ್‌ನ ಗರಿಷ್ಠ ಗೋಲ್‌ ಸ್ಕೋರರ್‌ಗಳ ಪಟ್ಟಿಯಲ್ಲಿ 2ನೇ ಸ್ಥಾನಕ್ಕೇರಿದ್ದಾರೆ. ಅವರು 3 ವಿಶ್ವಕಪ್‌ನ, 18 ಪಂದ್ಯಗಳಲ್ಲೇ ಈ ಸಾಧನೆ ಮಾಡಿದ್ದಾರೆ. 6ನೇ ವಿಶ್ವಕಪ್‌ ಆಡುತ್ತಿರುವ ಅರ್ಜೆಂಟೀನಾದ ಲಿಯೋನಲ್‌ ಮೆಸ್ಸಿ 29 ಪಂದ್ಯಗಳಲ್ಲಿ 19 ಗೋಲು ದಾಖಲಿಸಿದ್ದು, ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದಾರೆ.

ಫಿಫಾ ವಿಶ್ವಕಪ್‌ನಲ್ಲಿ ಸತತ ಐದು ಪಂದ್ಯಗಳಲ್ಲಿ ತಲಾ 3 ಗೋಲು: ಫ್ರಾನ್ಸ್‌ ದಾಖಲೆ

ಫಿಫಾ ವಿಶ್ವಕಪ್‌ನಲ್ಲಿ ಸತತ 5 ಪಂದ್ಯಗಳಲ್ಲಿ ತಲಾ 3 ಅಥವಾ ಅದಕ್ಕಿಂತ ಹೆಚ್ಚು ಗೋಲು ಬಾರಿಸಿದ ಮೊದಲ ತಂಡ ಎಂಬ ಖ್ಯಾತಿಗೆ ಫ್ರಾನ್ಸ್ ಪಾತ್ರವಾಗಿದೆ. ಕಳೆದ ಬಾರಿ ಫೈನಲ್‌ನಲ್ಲಿ ಅರ್ಜೆಂಟೀನಾ ವಿರುದ್ಧ 3-3 ಗೋಲು ದಾಖಲಿಸಿದ್ದ ಫ್ರಾನ್ಸ್‌, ಈ ಬಾರಿ ಸೆನೆಗಲ್‌ ವಿರುದ್ಧ 3-1, ಇರಾಕ್‌ ವಿರುದ್ಧ 3-0, ನಾರ್ವೆ ವಿರುದ್ಧ 4-1, ಸ್ವೀಡನ್‌ ವಿರುದ್ಧ 3-0 ಗೋಲು ದಾಖಲಿಸಿದೆ.

ಇಂದಿನ ಪಂದ್ಯಗಳು

ಅಮೆರಿಕ-ಬೋಸ್ನಿಯಾ, ಬೆಳಗ್ಗೆ 5.30ಕ್ಕೆ

ಸ್ಪೇನ್‌-ಆಸ್ಟ್ರಿಯಾ, ರಾತ್ರಿ 1.30ಕ್ಕೆ

ಪೋರ್ಚುಗಲ್‌-ಕ್ರೊವೇಷಿಯಾ, ನಸುಕಿನ 4.30ಕ್ಕೆ(ಶುಕ್ರ)

ಫಿಫಾ ವಿಶ್ವಕಪ್ ಅಚ್ಚರಿ: ನಾಲ್ಕು ಬಾರಿಯ ಚಾಂಪಿಯನ್ ಜರ್ಮನಿಯ ಪತನಕ್ಕೆ ಕಾರಣವಾದ ಆ ಹೀರೋ ಯಾರು?

Kannadaprabha News — Wed, 01 Jul 2026 08:03:05 +0530

Germany Knocked Out of FIFA World Cup 2026: ಈ ಬಾರಿ ಫಿಫಾ ವಿಶ್ವಕಪ್‌ನಲ್ಲಿ ಮತ್ತೊಂದು ಅಚ್ಚರಿಯ ಫಲಿತಾಂಶ ದಾಖಲಾಗಿದೆ. 4 ಬಾರಿ ಚಾಂಪಿಯನ್‌ ಜರ್ಮನಿ ತಂಡ ಅಂತಿಮ 32ರ ಹಂತದಲ್ಲೇ ಟೂರ್ನಿಯಿಂದ ನಿರ್ಗಮಿಸಿದೆ. 40ನೇ ರ್‍ಯಾಂಕಿಂಗ್‌ನೊಂದಿಗೆ ಈ ವಿಶ್ವಕಪ್‌ಗೆ ಕಾಲಿಟ್ಟಿದ್ದ ಪರಗ್ವೆ ವಿರುದ್ಧ ವಿಶ್ವ ನಂ.12 ಜರ್ಮನಿ ತಂಡ ಪೆನಾಲ್ಟಿ ಶೂಟೌಟ್‌ನಲ್ಲಿ 3-4 ಗೋಲುಗಳ ಅಂತರದಲ್ಲಿ ಸೋಲನುಭವಿಸಿದೆ.

ಗುಂಪು ಪಂದ್ಯ 3 ಪಂದ್ಯಗಳಲ್ಲಿ 10 ಗೋಲು ಬಾರಿಸಿ, ಅಜೇಯವಾಗಿಯೇ ನಾಕೌಟ್‌ ತಲುಪಿದ್ದ ಜರ್ಮನಿ ತಂಡವು ಪರಗ್ವೆಯ ರಕ್ಷಣಾ ಪಡೆಯನ್ನು ಭೇದಿಸಲು ಹರಸಾಹಸಪಟ್ಟಿತು. ನಿಗದಿತ ಅವಧಿಯಲ್ಲಿ ಉಭಯ ತಂಡಗಳು 1-1 ಗೋಲಿನಿಂದ ಸಮಬಲ ಸಾಧಿಸಿದವು. ಜ್ಯುಲಿಯೋ ಎನ್ಸಿಕೊ ಮೊದಲಾರ್ಧದಲ್ಲಿ ಗೋಲು ದಾಖಲಿಸಿ ಪರಗ್ವೆಗೆ ಮುನ್ನಡೆ ಒದಗಿಸಿದರು. 52ನೇ ನಿಮಿಷದಲ್ಲಿ ಕೇ ಹಾವರ್ಟ್ಜ್‌ ದಾಖಲಿಸಿದ ಗೋಲಿನಿಂದಾಗಿ ಜರ್ಮನಿ ಸಮಬಲ ಸಾಧಿಸಿತು. ಬಳಿಕ ಗೋಲು ದಾಖಲಾಗಲಿಲ್ಲ. ಹೀಗಾಗಿ ಪೆನಾಲ್ಟಿ ಶೂಟೌಟ್‌ ಮೊರೆ ಹೋಗಲಾಯಿತು.

ತಲಾ 5 ಪ್ರಯತ್ನಗಳಲ್ಲಿ ಉಭಯ ತಂಡಗಳು 3-3 ಸಮಬಲ ಸಾಧಿಸಿದವು. ಸಡನ್‌ ಡೆತ್‌ನಲ್ಲಿ ಜರ್ಮನಿ ಗೋಲು ಬಾರಿಸಲು ವಿಫಲವಾಯಿತು. ಪರಗ್ವೆ ಗೋಲು ದಾಖಲಿಸಿ ಜಯಭೇರಿ ಬಾರಿಸಿ ವಿಶ್ವಕಪ್‌ನಲ್ಲಿ 5ನೇ ಬಾರಿ ಪ್ರಿ ಕ್ವಾರ್ಟರ್‌ ಫೈನಲ್‌ಗೇರಿತು.

2014ರ ಬಳಿಕ ಸತತ ವೈಫಲ್ಯ:

ಜರ್ಮನಿ 2014ರಲ್ಲಿ ಚಾಂಪಿಯನ್‌ ಆಗಿತ್ತು. ಆ ಬಳಿಕ 2018, 2022ರ ವಿಶ್ವಕಪ್‌ನಲ್ಲಿ ತಂಡ ಗುಂಪು ಹಂತದಲ್ಲೇ ನಿರ್ಗಮಿಸಿತ್ತು. ಈ ಬಾರಿ ತಂಡ ನಾಕೌಟ್‌ ಪ್ರವೇಶಿಸಿದರೂ ಪ್ರಿ ಕ್ವಾರ್ಟರ್‌ ಫೈನಲ್‌ಗೇರಲು ವಿಫಲವಾಗಿದೆ.

--ಹಣವಿಲ್ಲದೆ ಹಳೆ ಕ್ಲಬ್‌ನ ಜೆರ್ಸಿ ಮಾರಿದ್ದ ಗಿಲ್‌ ಈಗ ಪರಗ್ವೆ ಹೀರೋ!

ಜರ್ಮನಿ ವಿರುದ್ಧ ಪರಗ್ವೆ ಪಾಲಿನ ಹೀರೋ ಆಗಿ ಮೂಡಿಬಂದ ಓರ್ಲಾಂಡೊ ಗಿಲ್‌, ಈ ಹಿಂದೆ ಆರ್ಥಿಕ ಸಂಕಷ್ಟದಿಂದಾಗಿ ತಮ್ಮ ಹಳೆ ಕ್ಲಬ್‌ನ ಜೆರ್ಸಿಗಳನ್ನು ಮಾರಾಟ ಮಾಡುವ ಸ್ಥಿತಿಗೆ ತಲುಪಿದ್ದರು. ಈ ಬಗ್ಗೆ ಅವರ ಪತ್ನಿ 2 ವರ್ಷದ ಹಿಂದೆ ಸಾಮಾಜಿಕ ತಾಣಗಳಲ್ಲಿ ಪೋಸ್ಟ್‌ ಮಾಡಿದ್ದು, ಸೋಮವಾರದ ಜರ್ಮನಿ ವಿರುದ್ಧ ಪಂದ್ಯದ ಬಳಿಕ ಅವರ ಪೋಸ್ಟ್‌ಗಳು ವೈರಲ್‌ ಆಗುತ್ತಿವೆ. ಪಂದ್ಯದಲ್ಲಿ ಹಲವು ಬಾರಿ ಜರ್ಮನಿಯ ಗೋಲು ಪ್ರಯತ್ನವನ್ನು ತಡೆದ ಗಿಲ್‌ ಬಳಿಕ ಪೆನಾಲ್ಟಿ ಕಾರ್ನರ್‌ನಲ್ಲೂ ಪರಗ್ವೆ ಪಾಲಿನ ಆಪತ್ಬಾಂಧವರಾದರು.

ಅಂ.ರಾ. ಫುಟ್ಬಾಲ್‌ನಿಂದ ನಿವೃತ್ತಿಯಾದ ಜರ್ಮನಿ ಗೋಲ್‌ಕೀಪರ್‌ ನೋಯ

ಜರ್ಮನಿಯ ಗೋಲ್‌ಕೀಪರ್ ಮ್ಯಾನುಯೆಲ್ ನೋಯ ಅವರು ಅಂತಾರಾಷ್ಟ್ರೀಯ ಫುಟ್ಬಾಲ್‌ಗೆ ನಿವೃತ್ತಿ ಘೋಷಿಸಿದ್ದಾರೆ. ಫಿಫಾ ವಿಶ್ವಕಪ್‌ನಲ್ಲಿ ಪರಗ್ವೆ ವಿರುದ್ಧ ಸೋಲಿನ ಬೆನ್ನಲ್ಲೇ ಅವರು ಈ ನಿರ್ಧಾರ ಪ್ರಕಟಿಸಿದ್ದಾರೆ. ನೋಯ ಅವರು 2024ರ ಯುರೋಪಿಯನ್‌ ಚಾಂಪಿಯನ್‌ಶಿಪ್‌ ಬಳಿಕ ಅಂತಾರಾಷ್ಟ್ರೀಯ ಫುಟ್ಬಾಲ್‌ನಿಂದ ನಿವೃತ್ತಿಯಾಗಿದ್ದರು. ಆದರೆ ಈ ಬಾರಿ ವಿಶ್ವಕಪ್‌ಗೂ ಕೆಲ ದಿನ ಮೊದಲು ನಿವೃತ್ತಿಯಿಂದ ಹಿಂದೆ ಸರಿದಿದ್ದ 40 ವರ್ಷದ ನೋಯ, ಪರಗ್ವೆ ವಿರುದ್ಧ ಸೋಮವಾರದ ಅನಿರೀಕ್ಷಿತ ಸೋಲು ತಮ್ಮ ಕೊನೆಯ ಅಂತರರಾಷ್ಟ್ರೀಯ ಪಂದ್ಯ ಎಂದು ಸಂದರ್ಶನದಲ್ಲಿ ತಿಳಿಸಿದ್ದಾರೆ. 2009ರಿಂದ ಈವರೆಗೂ ಅವರು ಜರ್ಮನಿ ಪರ 128 ಪಂದ್ಯಗಳನ್ನಾಡಿದ್ದಾರೆ.

ಇಂದಿನ ಪಂದ್ಯಗಳು

ಮೆಕ್ಸಿಕೊ-ಈಕ್ವೆಡಾರ್, ಬೆಳಗ್ಗೆ 6.30ಕ್ಕೆ

ಇಂಗ್ಲೆಂಡ್‌-ಕಾಂಗೊ, ಬೆಳಗ್ಗೆ 9.30ಕ್ಕೆ

ಬೆಲ್ಜಿಯಂ-ಸೆನೆಗಲ್‌, ರಾತ್ರಿ 1.30ಕ್ಕೆ

FIFA World Cup 2026 ಅರ್ಧ ಟೂರ್ನಿ ಮುಗಿದಿದೆ! ನಾಕೌಟ್‌ಗೆ ಯಾರು, ಹೊರಬಿದ್ದವರು ಯಾರು?

Kannadaprabha News — Fri, 26 Jun 2026 08:55:38 +0530

ಫ್ಲೋರಿಡಾ(ಅಮೆರಿಕ): 23ನೇ ಆವೃತ್ತಿಯ ಫಿಫಾ ಫುಟ್ಬಾಲ್‌ ವಿಶ್ವಕಪ್‌ನ ಅರ್ಧ ಭಾಗ ಮುಕ್ತಾಯಗೊಂಡಿದೆ. ಜೂ.11ರಂದು ಟೂರ್ನಿ ಆರಂಭಗೊಂಡಿದ್ದು, ನಿಗದಿತ 104 ಪಂದ್ಯಗಳ ಪೈಕಿ ಒಟ್ಟು 54 ಪಂದ್ಯಗಳು ಪೂರ್ಣಗೊಂಡಿವೆ. ಜು.19ರ ವರೆಗೂ ನಡೆಯಲಿರುವ ಟೂರ್ನಿಯಲ್ಲಿ ಇನ್ನು 50 ಪಂದ್ಯಗಳಷ್ಟೇ ಬಾಕಿಯಿವೆ.

ಈ ಬಾರಿ ದಾಖಲೆಯ 48 ತಂಡಗಳು ಟೂರ್ನಿಯಲ್ಲಿ ಆಡುತ್ತಿವೆ. ಇದರಲ್ಲಿ 32 ತಂಡಗಳು ನಾಕೌಟ್‌ ಪ್ರವೇಶದಲಿವೆ. ಈಗಾಗಲೇ 13 ತಂಡಗಳು ನಾಕೌಟ್‌ ಸ್ಥಾನ ಖಚಿತಪಡಿಸಿಕೊಂಡಿದ್ದು, ಇನ್ನೂ 19 ತಂಡಗಳಿಗೆ ಮುಂದಿನ ಹಂತ ಪ್ರವೇಶಿಸುವ ಅವಕಾಶವಿದೆ. ಭಾನುವಾರ ಬೆಳಗ್ಗೆ ಗುಂಪು ಹಂತದ ಪಂದ್ಯಗಳು ಮುಕ್ತಾಯಗೊಳ್ಳಲಿದ್ದು, ಸೋಮವಾರದಿಂದ ನಾಕೌಟ್‌ ಹಂತದ ಪಂದ್ಯಗಳು ಶುರುವಾಗಲಿದೆ.

ಯಾವ ತಂಡ ನಾಕೌಟ್‌ಗೆ?:

ಬುಧವಾರದವರೆಗೂ ನಡೆದ ಪಂದ್ಯಗಳ ಆಧಾರದಲ್ಲಿ ಒಟ್ಟು 13 ತಂಡಗಳು ನಾಕೌಟ್‌ ಪ್ರವೇಶಿಸಿವೆ. ‘ಎ’ ಗುಂಪಿನ ಅಗ್ರಸ್ಥಾನಿ ಮೆಕ್ಸಿಕೊ, ‘ಬಿ’ ಗುಂಪಿನ ಅಗ್ರಸ್ಥಾನಿ ಸ್ವಿಜರ್‌ಲೆಂಡ್‌, ‘ಸಿ’ ಗುಂಪಿನ ಅಗ್ರಸ್ಥಾನಿ ಬ್ರೆಜಿಲ್‌, ‘ಡಿ’ ಗುಂಪಿನ ಅಗ್ರಸ್ಥಾನಿ ಅಮೆರಿಕ, ‘ಇ’ ಗುಂಪಿನ ಅಗ್ರಸ್ಥಾನಿ ಜರ್ಮನಿ, ‘ಜೆ’ ಗುಂಪಿನ ಅಗ್ರಸ್ಥಾನಿ ಅರ್ಜೆಂಟೀನಾ ಜೊತೆಗೆ ಫ್ರಾನ್ಸ್‌, ನಾರ್ವೆ, ಕೆನಡಾ, ಮೊರಾಕ್ಕೊ, ಕೊಲಂಬಿಯಾ, ಬೋಸ್ನಿಯಾ ಮತ್ತು ಹೆರ್ಜೆಗೋವಿನಾ, ದಕ್ಷಿಣ ಆಫ್ರಿಕಾ ತಂಡಗಳೂ ನಾಕೌಟ್‌ ಪ್ರವೇಶಿಸಿವೆ. ಗುಂಪಿನಲ್ಲಿ ಅಗ್ರ-2 ಸ್ಥಾನ ಪಡೆಯುವ ತಂಡಗಳು ಮತ್ತು 12 ಗುಂಪುಗಳಲ್ಲಿ 3ನೇ ಸ್ಥಾನಿಯಾಗುವ 12 ತಂಡಗಳ ಪೈಕಿ ಅಗ್ರ-8 ತಂಡಗಳೂ ನಾಕೌಟ್‌ಗೇರಲಿವೆ. ಕತಾರ್‌, ಚೆಕ್‌ ಗಣರಾಜ್ಯ, ಟರ್ಕಿ, ಟ್ಯುನೀಶಿಯಾ, ಜೋರ್ಡನ್‌, ಪನಾಮ ಹಾಗೂ ಹೈಟಿ ತಂಡಗಳು ಈಗಾಗಲೇ ನಾಕೌಟ್‌ ರೇಸ್‌ನಿಂದ ಹೊರಬಿದ್ದಿವೆ.

ಮೊದಲ ಸಲ ನಾಕೌಟ್‌ ಪ್ರವೇಶಿಸಿದ ದ.ಆಫ್ರಿಕಾ

ದಕ್ಷಿಣ ಆಫ್ರಿಕಾ ತಂಡ ಇದೇ ಮೊದಲ ಬಾರಿ ಫಿಫಾ ವಿಶ್ವಕಪ್‌ನಲ್ಲಿ ನಾಕೌಟ್‌ ಪ್ರವೇಶಿಸಿದೆ. ಬುಧವಾರ ರಾತ್ರಿ ದಕ್ಷಿಣ ಕೊರಿಯಾ ವಿರುದ್ಧ ಪಂದ್ಯದಲ್ಲಿ ದ.ಆಫ್ರಿಕಾ 1-0 ಗೋಲಿನಿಂದ ಗೆಲುವು ಸಾಧಿಸಿತು. 63ನೇ ನಿಮಿಷದಲ್ಲಿ ಥಪೇಲೊ ಮಸೇಕೊ ಬಾರಿಸಿದ ಗೋಲು ದ.ಆಫ್ರಿಕಾಗೆ ಗೆಲುವು ತಂದುಕೊಟ್ಟಿತು. ಇದರೊಂದಿಗೆ ತಂಡ ‘ಎ’ ಗುಂಪಿನಲ್ಲಿ 4 ಅಂಕದೊಂದಿಗೆ 2ನೇ ಸ್ಥಾನಿಯಾಗಿ ಅಂತಿಮ 32ರ ಘಟ್ಟ ಪ್ರವೇಶಿಸಿತು. ಈ ಹಿಂದೆ 1998, 2002 ಹಾಗೂ 2010ರಲ್ಲಿ ವಿಶ್ವಕಪ್ ಆಡಿದ್ದ ದ.ಆಫ್ರಿಕಾ ಗುಂಪು ಹಂತದಲ್ಲೇ ನಿರ್ಗಮಿಸಿತ್ತು.

ಕೆನಡಾ ವಿರುದ್ಧ 2-1 ಗೆದ್ದು ಸ್ವಿಸ್‌ ಟೀಂ ಗುಂಪಿನ ನಂ.1

ವ್ಯಾಂಕೋವರ್‌: ಆತಿಥೇಯ ಕೆನಡಾ ವಿರುದ್ಧ ಗುಂಪು ಹಂತದ ಕೊನೆ ಪಂದ್ಯದಲ್ಲಿ 2-1 ಗೋಲುಗಳ ಅಂತರದಲ್ಲಿ ಗೆದ್ದ ಸ್ವಿಜರ್‌ಲೆಂಡ್‌ನ, ‘ಬಿ’ ಗುಂಪಿನಲ್ಲಿ ಅಗ್ರಸ್ಥಾನಿಯಾಗಿ ನಾಕೌಟ್‌ ಪ್ರವೇಶಿಸಿತು. ತಂಡ ಆಡಿರುವ 3 ಪಂದ್ಯಗಳ ಪೈಕಿ 2ರಲ್ಲಿ ಗೆದ್ದಿದ್ದು, 1 ಡ್ರಾದೊಂದಿಗೆ ಒಟ್ಟು 7 ಅಂಕ ಕಲೆಹಾಕಿದೆ. ಮತ್ತೊಂದೆಡೆ ಕೆನಡಾ ಈ ಪಂದ್ಯದಲ್ಲಿ ಸೋತ ಹೊರತಾಗಿಯೂ 4 ಅಂಕದೊಂದಿಗೆ ಗುಂಪಿನಲ್ಲಿ 2ನೇ ಸ್ಥಾನಿಯಾಗಿ ನಾಕೌಟ್‌ ಪ್ರವೇಶಿಸಿದೆ. ಕೆನಡಾ ಇದೇ ಮೊದಲ ಬಾರಿ ವಿಶ್ವಕಪ್‌ನಲ್ಲಿ ನಾಕೌಟ್‌ಗೇರಿದ ಸಾಧನೆ ಮಾಡಿತು.

FIFA World Cup 2026: ಪ್ರಿ ಕ್ವಾರ್ಟರ್‌ಗೆ ಬ್ರೆಜಿಲ್‌, ಕೆನಡಾ ಲಗ್ಗೆ

Kannadaprabha News — Tue, 30 Jun 2026 07:48:00 +0530

ಹ್ಯೂಸ್ಟನ್‌/ ಲಾಸ್‌ ಏಂಜಲೀಸ್‌: ಫಿಫಾ ಫುಟ್ಬಾಲ್‌ ವಿಶ್ವಕಪ್‌ನಲ್ಲಿ ಬ್ರೆಜಿಲ್‌ ಹಾಗೂ ಕೆನಡಾ ಪ್ರಿ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿವೆ. ಸೋಮವಾರ ನಡೆದ ಜಪಾನ್‌ ವಿರುದ್ಧದ ಅಂತಿಮ-32ರ ಸುತ್ತಿನ ಪಂದ್ಯದಲ್ಲಿ ಬ್ರೆಜಿಲ್‌ 2-1 ಗೋಲುಗಳ ಅಂತರದಲ್ಲಿ ಜಯ ಸಾಧಿಸಿತು.

ಕೆನಡಾ ಇತಿಹಾಸ:

3ನೇ ಬಾರಿಗೆ ವಿಶ್ವಕಪ್‌ನಲ್ಲಿ ಆಡುತ್ತಿರುವ ಕೆನಡಾ, ಇದೇ ಚೊಚ್ಚಲ ಬಾರಿಗೆ ಅಂತಿಮ-16ರ ಸುತ್ತು ಪ್ರವೇಶಿಸಿದೆ. ಅಂತಿಮ-32ರ ಸುತ್ತಿನ ನಾಕೌಟ್‌ ಪಂದ್ಯದಲ್ಲಿ, ಕೆನಡಾ 1-0 ಗೋಲಿನ ಅಂತರದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಜಯ ಸಾಧಿಸಿತು.

ಈ ಮೊದಲು 1986, 2022ರಲ್ಲಿ ವಿಶ್ವಕಪ್‌ನಲ್ಲಿ ಆಡುವ ಅವಕಾಶ ಪಡೆದಿದ್ದ ಕೆನಡಾ, ಎರಡೂ ಆವೃತ್ತಿಗಳಲ್ಲಿ ಒಂದೂ ಗೆಲುವು ಕಾಣದೆ ಗುಂಪು ಹಂತದಲ್ಲೇ ಹೊರಬಿದ್ದಿತ್ತು.

ಕೊನೆಯ ಕ್ಷಣದ ಮ್ಯಾಜಿಕ್ ಗೋಲು:

ನಿಗದಿತ ಸಮಯದಲ್ಲಿ ಗೋಲು ದಾಖಲಾಗುವು ಲಕ್ಷಣಗಳು ಕಾಣಲಿಲ್ಲ. ಪಂದ್ಯ ಹೆಚ್ಚುವರಿ ಸಮಯಕ್ಕೆ ಹೋಗಬಹುದು ಎನ್ನುವಾಗ ಇಂಜುರಿ ಟೈಮ್‌ನಲ್ಲಿ (92ನೇ ನಿಮಿಷ) ಸ್ಟೀಫನ್ ಯುಸ್ಟಾಕಿಯೊ ಚೆಂಡನ್ನು ಗೋಲು ಪೆಟ್ಟಿಗೆಗೆ ಸೇರಿಸಿದರು. ಈ ಏಕೈಕ ಗೋಲು ಕೆನಡಾ ತಂಡದ ಐತಿಹಾಸಿಕ ಜಯಕ್ಕೆ ಕಾರಣವಾಯಿತು.

FIFA World Cup 2026: ನಾಲ್ಕು ಬಾರಿಯ ಚಾಂಪಿಯನ್ ಬಲಿಷ್ಠ ಜರ್ಮನಿಯ ಕೆಡವಿ ಈಕ್ವೆಡಾರ್‌ ನಾಕೌಟ್‌ಗೆ!

Kannadaprabha News — Sat, 27 Jun 2026 08:52:50 +0530

ಈಸ್ಟ್‌ ರುಥರ್‌ಫೋರ್ಡ್‌(ಅಮೆರಿಕ): ಫಿಫಾ ವಿಶ್ವಕಪ್‌ನ 4 ಬಾರಿ ಚಾಂಪಿಯನ್‌ ಜರ್ಮನಿಯನ್ನು ಸೋಲಿಸುವ ಮೂಲಕ ಈಕ್ವೆಡಾರ್‌ ಈ ಬಾರಿ ಟೂರ್ನಿಯಲ್ಲಿ ನಾಕೌಟ್‌ ಹಂತ ತಲುಪಿದೆ. ಗುರುವಾರ ಮಧ್ಯರಾತ್ರಿ ನಡೆದ ಪಂದ್ಯದಲ್ಲಿ 2014ರ ಟ್ರೋಫಿ ವಿಜೇತ ಜರ್ಮನಿಯನ್ನು ದಕ್ಷಿಣ ಆಮೆರಿಕಾದ ತಂಡ 2-1 ಗೋಲುಗಳ ಅಂತರದಲ್ಲಿ ಸೋಲಿಸಿತು. ಈ ಮೂಲಕ 2006ರ ಬಳಿಕ ಮೊದಲ ಬಾರಿ ವಿಶ್ವಕಪ್‌ನಲ್ಲಿ ನಾಕೌಟ್‌ ಪ್ರವೇಶಿಸಿತು.

ಪಂದ್ಯದ 2ನೇ ನಿಮಿಷದಲ್ಲೇ ಲೆರೋಯ್‌ ಸೇನ್‌ ಗೋಲು ಬಾರಿಸುವ ಮೂಲಕ ಜರ್ಮನಿಗೆ ಭರ್ಜರಿ ಮುನ್ನಡೆ ಒದಗಿಸಿಕೊಟ್ಟರು. ಇದಕ್ಕೆ ತಿರುಗೇಟು ಕೊಡಲು ಈಕ್ವೆಡಾರ್‌ಗೆ ಹೆಚ್ಚು ಸಮಯ ಬೇಕಾಗಲಿಲ್ಲ. 9ನೇ ನಿಮಿಷದಲ್ಲಿ ನಿಲ್ಸನ್‌ ಆ್ಯಂಗುಲೊ ಗೋಲು ದಾಖಲಿಸಿ 1-1 ಸಮಬಲಕ್ಕೆ ಕಾರಣರಾದರು. ಆ ಬಳಿಕವೂ ಚೆಂಡಿನ ಮೇಲೆ ಜರ್ಮನಿ ಹಿಡಿತ ಸಾಧಿಸಿತಾದರೂ ತಂಡದ ಗೋಲು ಗಳಿಸುವ ಅವಕಾಶಕ್ಕೆ ಈಕ್ವೆಡಾರ್‌ ಗೋಲ್‌ಕೀಪರ್‌ ಅಡ್ಡಿಯಾದರು. 77ನೇ ನಿಮಿಷದಲ್ಲಿ ಗೊಂಜಾಲೊ ಪ್ಲಾಟಾ ಬಾರಿಸಿದ ಗೋಲಿನಿಂದಾಗಿ ಈಕ್ವೆಡಾರ್ ಈ ವಿಶ್ವಕಪ್‌ನಲ್ಲಿ ಮೊದಲ ಗೆಲುವು ದಾಖಲಿಸಿತು.

ತಂಡ 3 ಪಂದ್ಯಗಳಲ್ಲಿ 4 ಅಂಕ ಸಂಪಾದಿಸಿ, ‘ಇ’ ಗುಂಪಿನಲ್ಲಿ 3ನೇ ಸ್ಥಾನಿಯಾಗಿ ಅಂತಿಮ 32ರ ಘಟ್ಟ ಪ್ರವೇಶಿಸಿತು. ಈ ಸೋಲಿನ ಹೊರತಾಗಿಯೂ ಜರ್ಮನಿ 6 ಅಂಕದೊಂದಿಗೆ ಗುಂಪಿನಲ್ಲಿ ಅಗ್ರಸ್ಥಾನಿಯಾಗಿಯೇ ನಾಕೌಟ್‌ ತಲುಪಿತು.

ಈಕ್ವೆಡಾರ್‌ನಲ್ಲಿ ರಾಷ್ಟ್ರೀಯ ರಜೆ!

ಗುರುವಾರ ರಾತ್ರಿ ಜರ್ಮನಿ ವಿರುದ್ಧ ಗೆದ್ದಿದ್ದಕ್ಕೆ ಈಕ್ವೆಡಾರ್‌ನಲ್ಲಿ ಶುಕ್ರವಾರ ರಾಷ್ಟ್ರೀಯ ರಜೆ ಸಾರಲಾಗಿತ್ತು. ಅಲ್ಲಿನ ಅಧ್ಯಕ್ಷ ಡೇನಿಯಲ್‌ ನೊಬೊವಾ ಸಾಮಾಜಿಕ ತಾಣಗಳಲ್ಲಿ ಖುಷಿ ವ್ಯಕ್ತಪಡಿಸಿ, ಶುಕ್ರವಾರ ರಾಷ್ಟ್ರೀಯ ರಜೆ ಎಂದು ಘೋಷಿಸಿದರು.

ನೆದರ್‌ಲೆಂಡ್ಸ್‌ಗೆ 2ನೇ ಜಯ

ಕಾನ್ಸಸ್‌ ಸಿಟಿ(ಅಮೆರಿಕ): ಟ್ಯುನೀಶಿಯಾ ವಿರುದ್ಧ ಪಂದ್ಯದಲ್ಲಿ 3-1 ಗೋಲುಗಳ ಅಂತರದಲ್ಲಿ ಗೆಲುವು ಸಾಧಿಸಿದ ನೆದರ್‌ಲೆಂಡ್ಸ್‌, ‘ಎಫ್‌’ ಗುಂಪಿನ ಅಗ್ರಸ್ಥಾನಿಯಾಗಿ ನಾಕೌಟ್‌ ತಲುಪಿದೆ. ತಂಡ 3 ಪಂದ್ಯಗಳಲ್ಲಿ 2ನೇ ಗೆಲುವು ದಾಖಲಿಸಿತು. ತಂಡ 1974ರ ಬಳಿಕ ಆಡಿರುವ ಎಲ್ಲಾ ವಿಶ್ವಕಪ್‌ನಲ್ಲೂ ನಾಕೌಟ್‌ ಹಂತ ಪ್ರವೇಶಿಸಿದೆ. ಟ್ಯುನೀಶಿಯಾ ಸತತ 3ನೇ ಸೋಲಿನೊಂದಿಗೆ ವಿಶ್ವಕಪ್‌ ಅಭಿಯಾನ ಕೊನೆಗೊಳಿಸಿತು.

ಇಂದಿನ ಪಂದ್ಯಗಳು

ಸೌದಿ-ಕೇಪ್‌ ವರ್ಡೆ, ಬೆಳಗ್ಗೆ 5.30ಕ್ಕೆ

ಉರುಗ್ವೆ-ಸ್ಪೇನ್‌, ಬೆಳಗ್ಗೆ 5.30ಕ್ಕೆ

ನ್ಯೂಜಿಲೆಂಡ್-ಬೆಲ್ಜಿಯಂ, ಬೆಳಗ್ಗೆ 8.30ಕ್ಕೆ

ಈಜಿಪ್ಟ್‌-ಇರಾನ್‌, ಬೆಳಗ್ಗೆ 8.30ಕ್ಕೆ

ಪನಾಮ-ಇಂಗ್ಲೆಂಡ್‌, ರಾತ್ರಿ 2.30ಕ್ಕೆ

ಕ್ರೊವೇಷಿಯಾ-ಘಾನಾ, ರಾತ್ರಿ 2.30ಕ್ಕೆ

ವಿರಾಟ್ ಕೊಹ್ಲಿಗೆ ಅವಮಾನ? 'ನನ್ನ ಅಂಡರ್-13 ಆಟಗಾರನ Yo-Yo ಸ್ಕೋರ್ ಹೆಚ್ಚು ಎಂದ ಫುಟ್‌ಬಾಲ್‌ ಕೋಚ್‌

Sushma Hegde — Tue, 30 Jun 2026 11:08:57 +0530

ಭಾರತ ಕ್ರಿಕೆಟ್‌ನ ಫಿಟ್ನೆಸ್ ಐಕಾನ್ ಎಂದೇ ಗುರುತಿಸಿಕೊಂಡಿರುವ Virat Kohli ಬಗ್ಗೆ ಭಾರತೀಯ ಫುಟ್‌ಬಾಲ್ ಆಡಳಿತಾಧಿಕಾರಿ ರಣಜಿತ್ ಬಜಾಜ್ ನೀಡಿರುವ ಹೇಳಿಕೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ.

ಮಿನರ್ವಾ ಅಕಾಡೆಮಿಯ ಸಂಸ್ಥಾಪಕ ಹಾಗೂ ಭಾರತೀಯ ಫುಟ್‌ಬಾಲ್ ಕ್ಷೇತ್ರದ ಪ್ರಮುಖ ವ್ಯಕ್ತಿಗಳಲ್ಲಿ ಒಬ್ಬರಾದ ರಣಜಿತ್ ಬಜಾಜ್, "ನನ್ನ ಅಂಡರ್-13 ತಂಡದ ಆಟಗಾರರ ಯೋ-ಯೋ ಟೆಸ್ಟ್ ಸ್ಕೋರ್ ಕೂಡ ವಿರಾಟ್ ಕೊಹ್ಲಿಗಿಂತ ಹೆಚ್ಚು ಬರುತ್ತದೆ" ಎಂದು ಹೇಳಿ ಅಚ್ಚರಿ ಮೂಡಿಸಿದ್ದಾರೆ.

ಯೋ-ಯೋ ಟೆಸ್ಟ್ ಬಗ್ಗೆ ಏನು ಹೇಳಿದರು?

ಬಜಾಜ್ ಅವರ ಪ್ರಕಾರ, ಫುಟ್‌ಬಾಲ್ ಮತ್ತು ಕ್ರಿಕೆಟ್ ನಡುವಿನ ದೈಹಿಕ ಬೇಡಿಕೆಗಳು ಸಂಪೂರ್ಣ ಭಿನ್ನವಾಗಿವೆ. ಫುಟ್‌ಬಾಲ್‌ನಲ್ಲಿ ಆಟಗಾರರು ನಿರಂತರವಾಗಿ 90 ನಿಮಿಷಗಳ ಕಾಲ ಓಡಬೇಕಾಗುತ್ತದೆ. ಆದ್ದರಿಂದ ಅವರ ಫಿಟ್ನೆಸ್ ಮಟ್ಟ ಕ್ರಿಕೆಟಿಗರಿಗಿಂತ ವಿಭಿನ್ನವಾಗಿರುತ್ತದೆ ಎಂದು ಅವರು ವಾದಿಸಿದ್ದಾರೆ.

ಅವರ ಮಾತಿನಂತೆ, ಯೋ-ಯೋ ಟೆಸ್ಟ್‌ನಲ್ಲಿ ಉತ್ತಮ ಅಂಕ ಗಳಿಸುವುದೇ ಒಬ್ಬ ಆಟಗಾರನ ಸಂಪೂರ್ಣ ಸಾಮರ್ಥ್ಯವನ್ನು ನಿರ್ಧರಿಸುವುದಿಲ್ಲ. ಪ್ರತಿ ಕ್ರೀಡೆಯ ಅವಶ್ಯಕತೆಗಳು ಬೇರೆಬೇರೆ ಎಂಬುದನ್ನು ಅವರು ಒತ್ತಿ ಹೇಳಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ಮಿಶ್ರ ಪ್ರತಿಕ್ರಿಯೆ

ಈ ಹೇಳಿಕೆ ವೈರಲ್ ಆದ ಬೆನ್ನಲ್ಲೇ ಅಭಿಮಾನಿಗಳು ಎರಡು ಗುಂಪುಗಳಾಗಿ ವಿಭಜನೆಯಾಗಿದ್ದಾರೆ.

ಕೆಲವರು ಫುಟ್‌ಬಾಲ್‌ಗೆ ಹೆಚ್ಚಿನ ಸ್ಟ್ಯಾಮಿನಾ ಅಗತ್ಯವಿರುವುದರಿಂದ ಈ ಹೋಲಿಕೆ ಸರಿಯೇ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇನ್ನೂ ಕೆಲವರು ವಿರಾಟ್ ಕೊಹ್ಲಿಯ ಫಿಟ್ನೆಸ್ ಬಗ್ಗೆ ಪ್ರಶ್ನೆ ಎತ್ತುವುದು ಸರಿಯಲ್ಲ ಎಂದು ಟೀಕಿಸಿದ್ದಾರೆ.

ಅನೇಕರು "ಕ್ರಿಕೆಟ್ ಮತ್ತು ಫುಟ್‌ಬಾಲ್‌ನ್ನು ಒಂದೇ ಮಾನದಂಡದಲ್ಲಿ ಅಳೆಯಲು ಸಾಧ್ಯವಿಲ್ಲ" ಎಂದು ಪ್ರತಿಕ್ರಿಯಿಸಿದ್ದಾರೆ.

ವಿರಾಟ್ ಕೊಹ್ಲಿ ಫಿಟ್ನೆಸ್‌ಗೆ ಮಾದರಿ

ವಿರಾಟ್ ಕೊಹ್ಲಿ ಹಲವು ವರ್ಷಗಳಿಂದ ಭಾರತೀಯ ಕ್ರಿಕೆಟ್‌ನಲ್ಲಿ ಫಿಟ್ನೆಸ್ ಸಂಸ್ಕೃತಿಗೆ ಹೊಸ ದಿಕ್ಕು ನೀಡಿದ ಆಟಗಾರರೆಂದು ಪರಿಗಣಿಸಲಾಗುತ್ತದೆ. ಕಟ್ಟುನಿಟ್ಟಾದ ಆಹಾರ ಪದ್ಧತಿ, ನಿಯಮಿತ ವರ್ಕೌಟ್ ಹಾಗೂ ಶಿಸ್ತುಬದ್ಧ ಜೀವನಶೈಲಿಯಿಂದ ಅವರು ಯುವ ಆಟಗಾರರಿಗೆ ಮಾದರಿಯಾಗಿದ್ದಾರೆ.

ಯೋ-ಯೋ ಟೆಸ್ಟ್ ಎಂದರೇನು?

ಯೋ-ಯೋ ಟೆಸ್ಟ್ ಎನ್ನುವುದು ಆಟಗಾರನ ಹೃದಯದ ಸಾಮರ್ಥ್ಯ, ಸಹಿಷ್ಣುತೆ ಮತ್ತು ಮರುಮರು ಓಡುವ ಸಾಮರ್ಥ್ಯವನ್ನು ಅಳೆಯುವ ಫಿಟ್ನೆಸ್ ಪರೀಕ್ಷೆ. ಕ್ರಿಕೆಟ್, ಫುಟ್‌ಬಾಲ್ ಸೇರಿದಂತೆ ಹಲವು ಕ್ರೀಡೆಗಳಲ್ಲಿ ಇದನ್ನು ಬಳಸಲಾಗುತ್ತದೆ. ಆದರೆ ಅಗತ್ಯ ಸ್ಕೋರ್ ಮತ್ತು ಅದರ ಮಹತ್ವವು ಪ್ರತಿ ಕ್ರೀಡೆಯ ಸ್ವರೂಪಕ್ಕೆ ಅನುಗುಣವಾಗಿ ಬದಲಾಗುತ್ತದೆ.

ರಣಜಿತ್ ಬಜಾಜ್ ಅವರ ಈ ಹೇಳಿಕೆ ಭಾರತೀಯ ಕ್ರೀಡಾ ವಲಯದಲ್ಲಿ ಹೊಸ ಚರ್ಚೆಗೆ ನಾಂದಿ ಹಾಡಿದ್ದು, ವಿಭಿನ್ನ ಕ್ರೀಡೆಗಳ ಫಿಟ್ನೆಸ್ ಮಾನದಂಡಗಳನ್ನು ಒಂದಕ್ಕೊಂದು ಹೋಲಿಸುವುದು ಎಷ್ಟು ಸಮಂಜಸ ಎಂಬ ಪ್ರಶ್ನೆಯನ್ನು ಮತ್ತೊಮ್ಮೆ ಮುನ್ನೆಲೆಗೆ ತಂದಿದೆ.

FIFA World Cup 2026 ಡೆಂಬೆಲೆ ಹ್ಯಾಟ್ರಿಕ್‌: ನಾರ್ವೆ ವಿರುದ್ಧ ಗೆದ್ದ ಫ್ರಾನ್ಸ್‌ ನಾಕೌಟ್ ಪ್ರವೇಶ

Kannadaprabha News — Mon, 29 Jun 2026 08:26:30 +0530

ಫಾಕ್ಸ್‌ಬೊರೊ(ಅಮೆರಿಕ): ಓಸ್ಮಾನ್‌ ಡೆಂಬೆಲೆ ಹ್ಯಾಟ್ರಿಕ್‌ ಗೋಲಿನ ನೆರವಿನಿಂದ ಮಾಜಿ ಚಾಂಪಿಯನ್ಸ್‌ ಫ್ರಾನ್ಸ್‌ ತಂಡ ಈ ಬಾರಿ ವಿಶ್ವಕಪ್‌ನ ಗುಂಪು ಹಂತದಲ್ಲಿ ಹ್ಯಾಟ್ರಿಕ್‌ ಗೆಲುವು ಸಾಧಿಸಿದ್ದು, ಅಜೇಯವಾಗಿಯೇ ನಾಕೌಟ್‌ ಹಂತ ಪ್ರವೇಶಿಸಿದೆ. ಶುಕ್ರವಾರ ರಾತ್ರಿ ನಾರ್ವೆ ವಿರುದ್ಧ ಫ್ರಾನ್ಸ್‌ 4-1 ಗೋಲಿನ ಅಂತರದಲ್ಲಿ ಭರ್ಜರಿ ಗೆಲುವು ಸಾಧಿಸಿತು. ಈ ಸೋಲಿನ ಹೊರತಾಗಿಯೂ ನಾರ್ವೆ(6 ಅಂಕ) ‘ಐ’ ಗುಂಪಿನಲ್ಲಿ 2ನೇ ಸ್ಥಾನಿಯಾಗಿ ನಾಕೌಟ್‌ಗೇರಿತು.

7ನೇ ನಿಮಿಷದಲ್ಲಿ ಮೊದಲ ಗೋಲು ಬಾರಿಸಿದ ಡೆಂಬೆಲೆ, ಬಳಿಕ 20 ಹಾಗೂ 32ನೇ ನಿಮಿಷಗಳಲ್ಲಿ ಮತ್ತೆರಡು ಗೋಲು ಹೊಡೆದು ಹ್ಯಾಟ್ರಿಕ್‌ ಪೂರೈಸಿದರು. ಇದು ವಿಶ್ವಕಪ್‌ನಲ್ಲಿ 1994ರ ಬಳಿಕ ಮೊದಲಾರ್ಧದಲ್ಲೇ ದಾಖಲಾದ ಮೊದಲ ಹ್ಯಾಟ್ರಿಕ್‌. ಪಂದ್ಯದ ಹೆಚ್ಚುವರಿ ನಿಮಿಷ(90+4)ದಲ್ಲಿ ಮತ್ತೊಂದು ಗೋಲು ದಾಖಲಿಸಿದ ಫ್ರಾನ್ಸ್‌, ಗೆಲುವಿನ ಅಂತರವನ್ನು ಹೆಚ್ಚಿಸಿಕೊಂಡಿತು. ಅಂತಿಮ 32ರ ಸುತ್ತಿನಲ್ಲಿ ತಂಡಕ್ಕೆ ಸ್ವೀಡನ್‌ ಸವಾಲು ಎದುರಾಗಲಿದೆ.

ಸ್ಪೇನ್, ಬೆಲ್ಜಿಯಂ ನಾಕೌಟ್‌ಗೆ ಲಗ್ಗೆ

ಫಿಫಾ ಫುಟ್ಬಾಲ್‌ ವಿಶ್ವಕಪ್‌ನಲ್ಲಿ ಇನ್ನೂ ಕೆಲ ತಂಡಗಳು ಗುಂಪು ಹಂತದಿಂದ ನಾಕೌಟ್‌ ಹಂತಕ್ಕೆ ತೇರ್ಗಡೆ ಪಡೆದಿವೆ. ಮಾಜಿ ಚಾಂಪಿಯನ್‌ ಸ್ಪೇನ್‌ ಜೊತೆಗೆ ಕೇಪ್‌ ವರ್ಡೆ, ಬೆಲ್ಜಿಯಂ, ಈಜಿಪ್ಟ್‌ ಕೂಡಾ ಅಂತಿಮ 32ರ ಸುತ್ತಿನಲ್ಲಿ ಸ್ಥಾನ ಖಚಿತಪಡಿಸಿಕೊಂಡವು.

ಉರುಗ್ವೆ ವಿರುದ್ಧ ಪಂದ್ಯದಲ್ಲಿ ಸ್ಪೇನ್‌ ತಂಡ 1-0 ಗೋಲಿನ ಅಂತರದಲ್ಲಿ ಗೆಲುವು ಸಾಧಿಸಿತು. ಈ ಮೂಲಕ ‘ಎಚ್‌’ ಗುಂಪಿನಲ್ಲಿ 2 ಗೆಲುವು, 1 ಡ್ರಾದೊಂದಿಗೆ 7 ಅಂಕ ಸಂಪಾದಿಸಿ ಅಗ್ರಸ್ಥಾನ ಪಡೆದುಕೊಂಡಿತು. ಉರುಗ್ವೆ ತಂಡ ಒಂದೂ ಗೆಲುವಿಲ್ಲದೆ ಟೂರ್ನಿಯಲ್ಲಿ ಅಭಿಯಾನ ಕೊನೆಗೊಳಿಸಿತು. ತಂಡ 3 ಪಂದ್ಯಗಳಲ್ಲಿ 2 ಅಂಕದೊಂದಿಗೆ 3ನೇ ಸ್ಥಾನಿಯಾಯಿತು.

ಸೆನೆಗಲ್‌ಗೆ ಭರ್ಜರಿ ಗೆಲುವು:

ಇರಾಕ್‌ ವಿರುದ್ಧ ನಿರ್ಣಾಯಕ ಪಂದ್ಯದಲ್ಲಿ 5-0 ಗೋಲುಗಳ ಅಂತರದಲ್ಲಿ ಭರ್ಜರಿ ಗೆಲುವು ಸಾಧಿಸಿದ ಸೆನೆಗಲ್‌, ನಾಕೌಟ್‌ ಪ್ರವೇಶಿಸುವ ಆಸೆಯನ್ನು ಜೀವಂತವಾಗಿರಿಸಿಕೊಂಡಿದೆ. ತಂಡ 3 ಪಂದ್ಯಗಳಲ್ಲಿ ಮೊದಲ ಗೆಲುವಿನೊಂದಿಗೆ 3 ಅಂಕ ಸಂಪಾದಿಸಿದ್ದು, ‘ಐ’ ಗುಂಪಿನಲ್ಲಿ 3ನೇ ಸ್ಥಾನ ಪಡೆದುಕೊಂಡಿತು. ಇತರ 12 ಗುಂಪಿನ 3ನೇ ಸ್ಥಾನ ಪಡೆದ 12 ತಂಡಗಳ ಪೈಕಿ ಅಗ್ರ-8ರಲ್ಲಿ ಸ್ಥಾನ ಗಿಟ್ಟಿಸಿಕೊಂಡರೆ ಸೆನೆಗಲ್‌ ನಾಕೌಟ್‌ ಹಂತ ತಲುಪಲಿದೆ. ಮತ್ತೊಂದೆಡೆ ಇರಾಕ್‌ ಸತತ 3 ಸೋಲಿನೊಂದಿಗೆ ಅಭಿಯಾನ ಕೊನೆಗೊಳಿಸಿತು.

ಒಂದೂ ಪಂದ್ಯ ಗೆಲ್ಲದಿದ್ದರೂ ನಾಕೌಟ್‌ಗೇರಿದ ಕೇಪ್‌ ವರ್ಡೆ

ಹಾಸ್ಟನ್‌: ಈ ಬಾರಿ ವಿಶ್ವಕಪ್‌ನ ಆರಂಭಿಕ ಪಂದ್ಯದಲ್ಲೇ ಬಲಿಷ್ಠ ಸ್ಪೇನ್‌ ವಿರುದ್ಧ ಗೋಲು ರಹಿತ ಡ್ರಾ ಸಾಧಿಸಿ ಭಾರೀ ಪ್ರಶಂಸೆಗೆ ಪಾತ್ರವಾಗಿದ್ದ ಕೇಪ್‌ ವರ್ಡೆ ತಂಡ, ಗುಂಪು ಹಂತದಲ್ಲಿ ಒಂದೂ ಗೆಲುವು ಸಾಧಿಸದಿದ್ದರೂ ನಾಕೌಟ್‌ ಹಂತ ತಲುಪಿದೆ. ಇದರೊಂದಿಗೆ ಫಿಫಾ ವಿಶ್ವಕಪ್‌ನಲ್ಲಿ ನಾಕೌಟ್‌ ತಲುಪಿದ ಅತಿ ಕಡಿಮೆ ಜನಸಂಖ್ಯೆಯ ದೇಶ ಎಂಬ ಖ್ಯಾತಿಗೆ ಪಾತ್ರವಾಗಿದೆ.

ಕೇಪ್‌ ವರ್ಡೆಯ ಜನಸಂಖ್ಯೆ ಕೇವಲ 5.30 ಲಕ್ಷ ಮಾತ್ರ. ತಂಡ ಈ ಬಾರಿ ಗುಂಪು ಹಂತದ ಮೂರೂ ಪಂದ್ಯಗಳಲ್ಲಿ ಡ್ರಾ ಸಾಧಿಸಿತು. ಸ್ಪೇನ್ ಬಳಿಕ ಉರುಗ್ವೆ ವಿರುದ್ಧ 2-2 ಗೋಲುಗಳಿಂದ ಡ್ರಾ ಮಾಡಿಕೊಂಡಿದ್ದ ತಂಡ, ಶನಿವಾರ ಸೌದಿ ಅರೇಬಿಯಾ ವಿರುದ್ಧ ಗೋಲು ರಹಿತ ಡ್ರಾ ಮಾಡಿಕೊಂಡಿತು. ಈ ಮೂಲಕ 3 ಅಂಕದೊಂದಿಗೆ ‘ಎಚ್‌’ ಗುಂಪಿನಲ್ಲಿ 2ನೇ ಸ್ಥಾನಿಯಾಯಿತು. ತಂಡಕ್ಕೆ ಅಂತಿಮ 32ರ ಸುತ್ತಿನಲ್ಲಿ ಹಾಲಿ ಚಾಂಪಿಯನ್‌ ಅರ್ಜೆಂಟೀನಾ ಸವಾಲು ಎದುರಾಗಲಿದೆ.

ಫಿಫಾ ವಿಶ್ವಕಪ್‌ನಲ್ಲಿ ಮೆಸ್ಸಿ ವಿಶ್ವದಾಖಲೆ; ಬ್ರೆಜಿಲ್ ದಂತಕಥೆಯ ರೆಕಾರ್ಡ್ ಬ್ರೇಕ್ ಮಾಡಿದ ಅರ್ಜೆಂಟೀನಾ ಕ್ಯಾಪ್ಟನ್!

Santosh Naik — Mon, 29 Jun 2026 07:57:38 +0530

ಆರ್ಲಿಂಗ್ಟನ್, ಯುಎಸ್‌ಎ (ಜೂ.29): ಅರ್ಜೆಂಟೀನಾ ತಂಡದ ನಾಯಕ ಲಿಯೋನೆಲ್ ಮೆಸ್ಸಿ (Lionel Messi) ಫಿಫಾ ವಿಶ್ವಕಪ್ ಇತಿಹಾಸದ ಮತ್ತೊಂದು ಅದ್ಭುತ ದಾಖಲೆಯನ್ನು ಬರೆದಿದ್ದಾರೆ. ಆರ್ಲಿಂಗ್ಟನ್‌ನ ಎಟಿ ಆಂಡ್ ಟಿ (AT&T) ಸ್ಟೇಡಿಯಂನಲ್ಲಿ ನಡೆದ ಗ್ರೂಪ್ 'ಜೆ' ಪಂದ್ಯದಲ್ಲಿ ಜೋರ್ಡಾನ್ ವಿರುದ್ಧ ಭರ್ಜರಿ ಫ್ರೀ-ಕಿಕ್ ಗೋಲು ಗಳಿಸುವ ಮೂಲಕ, ಮೆಸ್ಸಿ ಬ್ರೆಜಿಲ್‌ನ ದಂತಕಥೆ ರಿವೆಲಿನೋ (Rivellino) ಅವರ ಸುದೀರ್ಘ ಕಾಲದ ವಿಶ್ವದಾಖಲೆಯನ್ನು ಧೂಳೀಪಟ ಮಾಡಿದ್ದಾರೆ. ಶನಿವಾರ ನಡೆದ ಈ ಪಂದ್ಯದಲ್ಲಿ ಜೋರ್ಡಾನ್ ವಿರುದ್ಧ ಅರ್ಜೆಂಟೀನಾ 3-1 ಗೋಲುಗಳ ಅಂತರದಿಂದ ಭವ್ಯ ಜಯ ಸಾಧಿಸಿತು.

ವಿಶ್ವಕಪ್ ಪಂದ್ಯಾವಳಿಯ ಇತಿಹಾಸದಲ್ಲೇ ಪೆನಾಲ್ಟಿ ಬಾಕ್ಸ್‌ನ ಹೊರಗಿನಿಂದ (Outside the box) ಅತಿ ಹೆಚ್ಚು ಗೋಲು ಗಳಿಸಿದ ರಿವೆಲಿನೋ ಅವರ 5 ಗೋಲುಗಳ ದಾಖಲೆಯನ್ನು ಮೆಸ್ಸಿ ಇದೀಗ ಮುರಿದಿದ್ದಾರೆ. ಜೋರ್ಡಾನ್ ವಿರುದ್ಧದ ಈ ಗೋಲು ಮೆಸ್ಸಿ ಪೆನಾಲ್ಟಿ ಬಾಕ್ಸ್ ಹೊರಗಿನಿಂದ ಗಳಿಸಿದ 6ನೇ ವಿಶ್ವಕಪ್ ಗೋಲು ಆಗಿದೆ.

ಲಿಯೋನೆಲ್ ಮೆಸ್ಸಿ ಬರೆದ ದಾಖಲೆಗಳು

19 ವಿಶ್ವಕಪ್ ಗೋಲುಗಳು: ಈ ಪಂದ್ಯದ ಗೋಲಿನೊಂದಿಗೆ 8 ಬಾರಿ ಬ್ಯಾಲನ್ ಡಿ ಒರ್ (Ballon d'Or) ಪ್ರಶಸ್ತಿ ವಿಜೇತ ಮೆಸ್ಸಿ ಅವರ ಒಟ್ಟು ವಿಶ್ವಕಪ್ ಗೋಲುಗಳ ಸಂಖ್ಯೆ 19ಕ್ಕೆ ಏರಿಕೆಯಾಗಿದೆ. ಈ ಮೂಲಕ ಅರ್ಜೆಂಟೀನಾ ಪರ ವಿಶ್ವಕಪ್‌ನಲ್ಲಿ ಅತಿ ಹೆಚ್ಚು ಗೋಲು ಗಳಿಸಿದ ಆಟಗಾರನಾಗಿ ತಮ್ಮ ದಾಖಲೆಯನ್ನು ಮತ್ತಷ್ಟು ವಿಸ್ತರಿಸಿದ್ದಾರೆ. ಪ್ರಸಕ್ತ ವಿಶ್ವಕಪ್‌ನಲ್ಲೇ ಅವರು ಈಗಾಗಲೇ 6 ಗೋಲುಗಳನ್ನು ಸಿಡಿಸಿದ್ದಾರೆ.

ಸತತ 7 ಪಂದ್ಯಗಳಲ್ಲಿ ಗೋಲು: ಈ ಪಂದ್ಯದಲ್ಲಿ 39 ವರ್ಷದ ಮೆಸ್ಸಿಗೆ ಆರಂಭದಲ್ಲಿ ವಿಶ್ರಾಂತಿ ನೀಡಲಾಗಿತ್ತು. ಆದರೆ 60ನೇ ನಿಮಿಷದಲ್ಲಿ ಸಬ್‌ಸ್ಟಿಟ್ಯೂಟ್ ಆಗಿ ಮೈದಾನಕ್ಕಿಳಿದ ಅವರು, 80ನೇ ನಿಮಿಷದಲ್ಲಿ ತಮ್ಮದೇ ಟ್ರೇಡ್‌ಮಾರ್ಕ್ ಶೈಲಿಯ ಫ್ರೀ-ಕಿಕ್ ಮೂಲಕ ಗೋಲು ಬಾರಿಸಿದರು. ಈ ಮೂಲಕ ಸತತ 7 ಫಿಫಾ ವಿಶ್ವಕಪ್ ಪಂದ್ಯಗಳಲ್ಲಿ ಗೋಲು ಗಳಿಸಿದ ವಿಶ್ವದ ಮೊದಲ ಪುರುಷ ಆಟಗಾರ ಎಂಬ ಐತಿಹಾಸಿಕ ಸಾಧನೆ ಮಾಡಿದರು. ಮೆಸ್ಸಿ ಈ ಬಾರಿಯ ವಿಶ್ವಕಪ್‌ನಲ್ಲಿ ಅಲ್ಜೀರಿಯಾ ವಿರುದ್ಧ ಹ್ಯಾಟ್ರಿಕ್ ಹಾಗೂ ಆಸ್ಟ್ರಿಯಾ ವಿರುದ್ಧ ಎರಡು ಗೋಲುಗಳನ್ನು ಗಳಿಸಿ ಈ ಭರ್ಜರಿ ಫಾರ್ಮ್ ಮುಂದುವರಿಸಿದ್ದಾರೆ.

ವಿಶೇಷ ಕ್ಲಬ್‌ಗೆ ಸೇರ್ಪಡೆ: ಪ್ರಸ್ತುತ ವಿಶ್ವಕಪ್ ಸ್ವರೂಪ (1998ರಿಂದ ಜಾರಿಗೆ ಬಂದ ನಿಯಮ) ಆರಂಭವಾದ ಬಳಿಕ, ಒಂದೇ ವಿಶ್ವಕಪ್‌ನ ಎಲ್ಲಾ ಮೂರು ಗ್ರೂಪ್ ಹಂತದ ಪಂದ್ಯಗಳಲ್ಲೂ ಗೋಲು ಗಳಿಸಿದ ವಿಶ್ವದ ಕೇವಲ ನಾಲ್ಕನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಮೆಸ್ಸಿ ಪಾತ್ರರಾಗಿದ್ದಾರೆ. ಇದಕ್ಕೂ ಮುನ್ನ ಕ್ರಿಸ್ಟಿಯಾನೋ ರೊನಾಲ್ಡೊ (2018), ಡೇವಿಡ್ ವಿಲ್ಲಾ (2010) ಮತ್ತು ಫೆರ್ನಾಂಡೋ ಟೊರೆಸ್ (2010) ಈ ಸಾಧನೆ ಮಾಡಿದ್ದರು.

ಅರ್ಜೆಂಟೀನಾ ತಂಡದ 50ನೇ ವಿಶ್ವಕಪ್ ಜಯದ ಮೈಲಿಗಲ್ಲು!

ಈ ಪಂದ್ಯದ ಗೆಲುವಿನೊಂದಿಗೆ ಹಾಲಿ ವಿಶ್ವ ಚಾಂಪಿಯನ್ ಅರ್ಜೆಂಟೀನಾ ತಂಡವು ಫಿಫಾ ವಿಶ್ವಕಪ್ ಇತಿಹಾಸದಲ್ಲಿ ತನ್ನ 50ನೇ ವಿಜಯವನ್ನು ದಾಖಲಿಸಿದೆ. ಈ ಮೈಲಿಗಲ್ಲು ತಲುಪಿದ ವಿಶ್ವದ ಮೂರನೇ ದೇಶ ಎಂಬ ಕೀರ್ತಿಗೆ ಅರ್ಜೆಂಟೀನಾ ಪಾತ್ರವಾಗಿದ್ದು, ಇದಕ್ಕೂ ಮುನ್ನ ಬ್ರೆಜಿಲ್ ಮತ್ತು ಜರ್ಮನಿ ಮಾತ್ರ ಈ ಸಾಧನೆ ಮಾಡಿವೆ. ಗ್ರೂಪ್ ಹಂತದ ಮೂರಕ್ಕೆ ಮೂರೂ ಪಂದ್ಯಗಳನ್ನು ಗೆಲ್ಲುವ ಮೂಲಕ ಅರ್ಜೆಂಟೀನಾ ಪೂರ್ಣ ಅಂಕಗಳೊಂದಿಗೆ ಮುಂದಿನ ಹಂತಕ್ಕೆ ಲಗ್ಗೆ ಇಟ್ಟಿದೆ.

ಅರ್ಜೆಂಟೀನಾ-ಜೋರ್ಡನ್‌ ವಿರುದ್ಧದ ಪಂದ್ಯದ ಕ್ಷಣಗಳು

ಅರ್ಜೆಂಟೀನಾ ತಂಡವು ಈಗಾಗಲೇ ಮುಂದಿನ ಹಂತಕ್ಕೆ ಅರ್ಹತೆ ಪಡೆದಿದ್ದರಿಂದ, ಮುಖ್ಯ ತರಬೇತುದಾರ ಲಿಯೋನೆಲ್ ಸ್ಕಲೋನಿ ಅವರು ಆರಂಭಿಕ ಇಲೆವೆನ್‌ನಲ್ಲಿ (Starting XI) 9 ಪ್ರಮುಖ ಬದಲಾವಣೆಗಳನ್ನು ಮಾಡಿ ಹೊಸ ಆಟಗಾರರಿಗೆ ಅವಕಾಶ ನೀಡಿದ್ದರು. ಆದರೂ ಅರ್ಜೆಂಟೀನಾದ ಆಟದ ವೇಗಕ್ಕೆ ಯಾವುದೇ ಅಡ್ಡಿಯಾಗಲಿಲ್ಲ. 2022ರ ವಿಶ್ವಕಪ್‌ನಿಂದ ಗಾಯದ ಕಾರಣ ಹೊರಗುಳಿದಿದ್ದ ಜಿಯೋವಾನಿ ಲೋ ಸೆಲ್ಸೊ (Giovani Lo Celso), ತಮ್ಮ ಚೊಚ್ಚಲ ವಿಶ್ವಕಪ್ ಪಂದ್ಯದ 19ನೇ ನಿಮಿಷದಲ್ಲೇ ಅದ್ಭುತ ಫ್ರೀ-ಕಿಕ್ ಮೂಲಕ ಅರ್ಜೆಂಟೀನಾ ಪರ ಮೊದಲ ಗೋಲು ಖಾತೆ ತೆರೆದರು.

ಬಳಿಕ ಮಾರ್ಕೋಸ್ ಸೆನೆಸಿ ಮೇಲಿನ ಫೌಲ್‌ಗಾಗಿ ವಿಎಆರ್ (VAR) ಪರಿಶೀಲನೆಯ ನಂತರ ಅರ್ಜೆಂಟೀನಾಗೆ ಪೆನಾಲ್ಟಿ ನೀಡಲಾಯಿತು. ಇದನ್ನು ಇಂಟರ್ ಮಿಲನ್ ಸ್ಟ್ರೈಕರ್ ಲೌಟಾರೊ ಮಾರ್ಟಿನೆಜ್ (Lautaro Martinez) ಗೋಲಾಗಿ ಪರಿವರ್ತಿಸಿ ತಂಡದ ಮುನ್ನಡೆಯನ್ನು 2-0ಗೆ ಹೆಚ್ಚಿಸಿದರು. ಇದು ಮಾರ್ಟಿನೆಜ್ ಅವರ ವೃತ್ತಿಜೀವನದ ಚೊಚ್ಚಲ ವಿಶ್ವಕಪ್ ಗೋಲು ಆಗಿದೆ.

ಆದರೆ, 55ನೇ ನಿಮಿಷದಲ್ಲಿ ಜೋರ್ಡಾನ್‌ನ ಇಹ್ಸಾನ್ ಹದ್ದಾದ್ ನೀಡಿದ ಪಾಸ್ ಅನ್ನು ಮೂಸಾ ಅಲ್-ತಮಾರಿ ಗೋಲು ಪೆಟ್ಟಿಗೆಗೆ ಸೇರಿಸಿ ಅರ್ಜೆಂಟೀನಾಗೆ ತಿರುಗೇಟು ನೀಡಲು ಯತ್ನಿಸಿದರು (2-1). ಆದರೆ 60ನೇ ನಿಮಿಷದಲ್ಲಿ ಮೆಸ್ಸಿ ಮೈದಾನಕ್ಕೆ ಬರುತ್ತಿದ್ದಂತೆ ಪಂದ್ಯದ ನಿಯಂತ್ರಣ ಮತ್ತೆ ಅರ್ಜೆಂಟೀನಾ ವಶವಾಯಿತು. 80ನೇ ನಿಮಿಷದಲ್ಲಿ ಮೆಸ್ಸಿ ಬಾರಿಸಿದ ಆಕರ್ಷಕ ಫ್ರೀ-ಕಿಕ್ ಗೋಲು ಅರ್ಜೆಂಟೀನಾಗೆ 3-1 ಅಂತರದ ಭರ್ಜರಿ ಜಯವನ್ನು ತಂದುಕೊಟ್ಟಿತು.

ಮುಂದಿನ ಹಂತದ ಪಂದ್ಯ ಎಲ್ಲಿ?

ಈ ಸೋಲಿನೊಂದಿಗೆ ಜೋರ್ಡಾನ್ ತಂಡವು ಲೀಗ್‌ನ ಮೂರೂ ಪಂದ್ಯಗಳನ್ನು ಸೋತು ವಿಶ್ವಕಪ್‌ನಿಂದ ಹೊರಬಿದ್ದಿದೆ (ಆದರೆ ಮೂರೂ ಪಂದ್ಯಗಳಲ್ಲಿ ಗೋಲು ಗಳಿಸಿದ ಸಮಾಧಾನ ಜೋರ್ಡಾನ್ ತಂಡದ್ದಾಗಿದೆ). ಮತ್ತೊಂದೆಡೆ, ಭರ್ಜರಿಯಾಗಿ ಮುನ್ನುಗ್ಗುತ್ತಿರುವ ಅರ್ಜೆಂಟೀನಾ ತಂಡವು ಜುಲೈ 4 ರಂದು ಮಿಯಾಮಿಯಲ್ಲಿ ನಡೆಯಲಿರುವ 'ರೌಂಡ್ ಆಫ್ 32' ಪಂದ್ಯದಲ್ಲಿ ವಿಶ್ವಕಪ್‌ನ ಚೊಚ್ಚಲ ಪ್ರವೇಶ ಪಡೆದಿರುವ ಕೇಪ್ ವರ್ಡೆ (Cape Verde) ತಂಡವನ್ನು ಎದುರಿಸಲಿದೆ.

Asianet Suvarna News

ಮಗುವಿನ ಪ್ರಾಣ ಉಳಿಸಲು ಕೊನೆಗೆ ತನ್ನ ಶೂ, ಜರ್ಸಿ ಹರಾಜು ಹಾಕಿದ್ದ ಗಿಲ್ ಈಗ ಫಿಫಾ ವಿಶ್ವಕಪ್‌ ಹೀರೋ

FIFA ವಿಶ್ವಕಪ್ 2026ರಲ್ಲಿ ಹೊಸ ದಾಖಲೆ ಬರೆದ ಫ್ಯಾನ್ಸ್, ಅಭಿಮಾನಿಗಳ ಹಾಜರಾತಿ ಏಷ್ಟಾಗಿದೆ ಗೊತ್ತಾ?

ಫಿಫಾ ವಿಶ್ವಕಪ್: 4 ದಶಕಗಳ ಬಳಿಕ ನಾಕೌಟ್ ಮ್ಯಾಚ್ ಗೆದ್ದು ಐತಿಹಾಸಿಕ ದಾಖಲೆ ಬರೆದ ಮೆಕ್ಸಿಕೊ

ಬಿರುಗಾಳಿ: ಪಂದ್ಯ 1 ಗಂಟೆ ವಿಳಂಬ

ಕೇನ್‌ 2 ಗೋಲು: ಕಾಂಗೊ ವಿರುದ್ಧ ಗೆದ್ದ ಇಂಗ್ಲೆಂಡ್‌ ಪ್ರಿ ಕ್ವಾರ್ಟರ್‌ಗೆ ಲಗ್ಗೆ

ವಿನಿಶಿಯಸ್ ಜೂನಿಯರ್ ಡಬಲ್ ಗೋಲು ಮ್ಯಾಜಿಕ್! ಬ್ರೆಜಿಲ್ ಅಜೇಯವಾಗಿ ಫಿಫಾ ವಿಶ್ವಕಪ್ ನಾಕೌಟ್‌ಗೆ

ಈ ವಿಶ್ವಕಪ್‌ನಲ್ಲಿ ಮೊದಲ ಬಾರಿ ಆಡಿದ ನೇಯ್ಮರ್‌

ಆತಿಥೇಯ ಮೆಕ್ಸಿಕೊಗೆ ಹ್ಯಾಟ್ರಿಕ್‌ ಜಯದ ಸಿಹಿ

ಮೆಕ್ಸಿಕೊದ ಬಾತುಕೋಳಿಗೆ ಕ್ರೀಡಾಂಗಣ ಪ್ರವೇಶವಿಲ್ಲ!

ಬೋಸ್ನಿಯಾಗೆ ಸೋತು ಕತಾರ್‌ ತಂಡ ಹೊರಕ್ಕೆ

ಕಾಲು ಮುರಿದ ಕತಾರ್‌ನ ಅಸಿಂ 5 ಪಂದ್ಯಕ್ಕೆ ಬ್ಯಾನ್‌

ವೆನುಜುವೆಲಾ ಭೂಕಂಪ, ಅರ್ಜೆಂಟೀನಾ ಫುಟ್‌ಬಾಲ್‌ ಆಟಗಾರನ ಇಡೀ ಕುಟುಂಬ ನಾಪತ್ತೆ

ನೆಲಸಮವಾಯ್ತು ಹ್ಯಾಪಿ ಹೋಮ್; ಇನ್‌ಸ್ಟಾಗ್ರಾಮ್‌ನಲ್ಲಿ ಭಾವುಕ ಪೋಸ್ಟ್

ಯಾರು ಈ ಲೂಕಾಸ್ ಟ್ರೆಜೊ?

ನಿಜವಾಯ್ತು ಘಾನಾ ಮಂತ್ರವಾದಿ ಭವಿಷ್ಯ: ಕೊನೆಗೂ ಗೋಲು ಹೊಡೆದ ಇಂಗ್ಲೆಂಡ್ ಕ್ಯಾಪ್ಟನ್ ಹ್ಯಾರಿ ಕೇನ್‌!

ಅರ್ಜೆಂಟೀನಾಗೆ ಹ್ಯಾಟ್ರಿಕ್‌ ಜಯ!

ಮತ್ತೊಮ್ಮೆ ಡ್ರಾಗೆ ತೃಪ್ತಿಪಟ್ಟ ರೊನಾಲ್ಡೋರ ಪೋರ್ಚುಗಲ್‌

ಒಂದೂ ಪಂದ್ಯ ಗೆಲ್ಲದ ಉರುಗ್ವೆಗೆ ‘ವಿಶಿಷ್ಟ’ ಶಿಕ್ಷೆ!

FIFA World Cup 2026: ಇಂಗ್ಲೆಂಡ್‌ಗೆ ಘಾನಾ ಶಾಕ್‌! ಇಂಗ್ಲೆಂಡ್‌ಗೆ ಘಾನಾ ಮಂತ್ರವಾದಿ ಕಾಟ?

ಇಂಗ್ಲೆಂಡ್‌ಗೆ ಘಾನಾ ಮಂತ್ರವಾದಿ ಕಾಟ?

ಫಿಫಾ ವಿಶ್ವಕಪ್ ನಾಕೌಟ್‌ ಸೆಣಸಾಟಕ್ಕೆ ವೇದಿಕೆ ಸಿದ್ಧ! ನಾಕೌಟ್‌ನಲ್ಲಿ ಪಂದ್ಯ ಡ್ರಾ ಆದ್ರೆ ಫಲಿತಾಂಶ ನಿರ್ಧಾರ ಹೇಗೆ?

ಪಂದ್ಯ ಡ್ರಾ ಆದರೆ ಹೇಗೆ?

ಅಂತಿಮ-32ರ ಸುತ್ತಿನ ಎದುರಾಳಿಗಳು

ಫುಟ್ಬಾಲ್​ ಪಂದ್ಯದಲ್ಲಿ ನಿಗೂಢ ಬ್ಯೂಟಿ​: ಕೆಲವೇ ಕ್ಷಣಗಳ ವೈರಲ್ ವಿಡಿಯೋಗೆ ವಿಶ್ವಾದ್ಯಂತ ಇನ್ನಿಲ್ಲದ ಡಿಮಾಂಡ್​- ಯಾರೀಕೆ

ಕೆಲವೇ ಸೆಕೆಂಡ್​ಗಳ ವಿಡಿಯೋ

ಫ್ಯಾಕ್ಟ್​ ಚೆಕ್​

ಈ ಬಾರಿ ಫಿಫಾ ವಿಶ್ವಕಪ್ ಗೆಲ್ಲೋದ್ಯಾರು? ಅರ್ಜೆಂಟೀನಾಗೆ 2ನೇ ಸ್ಥಾನ..! ಸೂಪರ್‌ ಕಂಪ್ಯೂಟರ್ ಭವಿಷ್ಯ!

ಫ್ರಾನ್ಸ್ ಮುಡಿಗೇರುತ್ತಾ ಫಿಫಾ ವಿಶ್ವಕಪ್ ಕಿರೀಟ?

ಅರ್ಜೆಂಟೀನಾಗೆ ಅನುಕೂಲಕರ ಹಾದಿ

FIFA World Cup: 1934ರ ಬಳಿಕ ಮೊದಲ ಬಾರಿ ಪ್ರಿಕ್ವಾರ್ಟರ್‌ಗೇರದೇ ಹೊರಬಿದ್ದ ನೆದರ್‌ಲೆಂಡ್ಸ್‌

ಮೊದಲ ಬಾರಿ ಪ್ರಿ ಕ್ವಾರ್ಟರ್‌ಗಿಲ್ಲ:

ಜಪಾನ್‌ ಶಾಕ್‌ನಿಂದ ಪಾರಾಗಿ ಬ್ರೆಜಿಲ್‌ ಪ್ರಿ ಕ್ವಾರ್ಟರ್‌ ಪ್ರವೇಶ

FIFA World Cup 2026: ಕ್ರಿಸ್ಟಿಯಾನೋ ರೊನಾಲ್ಡೋ ಮಿಂಚಿನ ಆಟ; ಪೋರ್ಚುಗಲ್‌ಗೆ 5-0 ಜಯ

ಸತತ 6 ವಿಶ್ವಕಪ್‌ ಟೂರ್ನಿಗಳಲ್ಲಿ ಗೋಲು: ರೊನಾಲ್ಡೋ ದಾಖಲೆ!

ಕಾಂಗೋ ವಿರುದ್ಧ ಗೆದ್ದ ಕೊಲೊಂಬಿಯಾ

ಕಾಂಗೋಗೆ ‘ಜೀವಂತ ಪ್ರತಿಮೆ’ಯ ಬೆಂಬಲ!

ನಾಕೌಟ್‌ ರೇಸ್‌ನಲ್ಲಿ ಉಳಿದ ಕ್ರೊವೇಷಿಯಾ

FIFA World Cup 2026: ಕೀಲಿಯನ್ ಎಂಬಾಪೆ ಮತ್ತೆರಡು ಗೋಲು, ಫ್ರಾನ್ಸ್‌ ಪ್ರಿ ಕ್ವಾರ್ಟರ್‌ಗೆ ಲಗ್ಗೆ

ಸತತ 4ನೇ ಬಾರಿ ಪ್ರಿ ಕ್ವಾರ್ಟರ್‌ಗೆ:

ವಿಶ್ವಕಪ್‌ನಲ್ಲಿ ಎಂಬಾಪೆ 18 ಗೋಲು: 2ನೇ ಗರಿಷ್ಠ

ಫಿಫಾ ವಿಶ್ವಕಪ್‌ನಲ್ಲಿ ಸತತ ಐದು ಪಂದ್ಯಗಳಲ್ಲಿ ತಲಾ 3 ಗೋಲು: ಫ್ರಾನ್ಸ್‌ ದಾಖಲೆ

ಇಂದಿನ ಪಂದ್ಯಗಳು

ಫಿಫಾ ವಿಶ್ವಕಪ್ ಅಚ್ಚರಿ: ನಾಲ್ಕು ಬಾರಿಯ ಚಾಂಪಿಯನ್ ಜರ್ಮನಿಯ ಪತನಕ್ಕೆ ಕಾರಣವಾದ ಆ ಹೀರೋ ಯಾರು?

2014ರ ಬಳಿಕ ಸತತ ವೈಫಲ್ಯ:

--ಹಣವಿಲ್ಲದೆ ಹಳೆ ಕ್ಲಬ್‌ನ ಜೆರ್ಸಿ ಮಾರಿದ್ದ ಗಿಲ್‌ ಈಗ ಪರಗ್ವೆ ಹೀರೋ!

ಅಂ.ರಾ. ಫುಟ್ಬಾಲ್‌ನಿಂದ ನಿವೃತ್ತಿಯಾದ ಜರ್ಮನಿ ಗೋಲ್‌ಕೀಪರ್‌ ನೋಯ

FIFA World Cup 2026 ಅರ್ಧ ಟೂರ್ನಿ ಮುಗಿದಿದೆ! ನಾಕೌಟ್‌ಗೆ ಯಾರು, ಹೊರಬಿದ್ದವರು ಯಾರು?

ಯಾವ ತಂಡ ನಾಕೌಟ್‌ಗೆ?:

ಮೊದಲ ಸಲ ನಾಕೌಟ್‌ ಪ್ರವೇಶಿಸಿದ ದ.ಆಫ್ರಿಕಾ

ಕೆನಡಾ ವಿರುದ್ಧ 2-1 ಗೆದ್ದು ಸ್ವಿಸ್‌ ಟೀಂ ಗುಂಪಿನ ನಂ.1

FIFA World Cup 2026: ಪ್ರಿ ಕ್ವಾರ್ಟರ್‌ಗೆ ಬ್ರೆಜಿಲ್‌, ಕೆನಡಾ ಲಗ್ಗೆ

ಕೆನಡಾ ಇತಿಹಾಸ:

ಕೊನೆಯ ಕ್ಷಣದ ಮ್ಯಾಜಿಕ್ ಗೋಲು:

FIFA World Cup 2026: ನಾಲ್ಕು ಬಾರಿಯ ಚಾಂಪಿಯನ್ ಬಲಿಷ್ಠ ಜರ್ಮನಿಯ ಕೆಡವಿ ಈಕ್ವೆಡಾರ್‌ ನಾಕೌಟ್‌ಗೆ!

ಈಕ್ವೆಡಾರ್‌ನಲ್ಲಿ ರಾಷ್ಟ್ರೀಯ ರಜೆ!

ನೆದರ್‌ಲೆಂಡ್ಸ್‌ಗೆ 2ನೇ ಜಯ

ವಿರಾಟ್ ಕೊಹ್ಲಿಗೆ ಅವಮಾನ? 'ನನ್ನ ಅಂಡರ್-13 ಆಟಗಾರನ Yo-Yo ಸ್ಕೋರ್ ಹೆಚ್ಚು ಎಂದ ಫುಟ್‌ಬಾಲ್‌ ಕೋಚ್‌

ಯೋ-ಯೋ ಟೆಸ್ಟ್ ಬಗ್ಗೆ ಏನು ಹೇಳಿದರು?

ಸಾಮಾಜಿಕ ಜಾಲತಾಣಗಳಲ್ಲಿ ಮಿಶ್ರ ಪ್ರತಿಕ್ರಿಯೆ

ವಿರಾಟ್ ಕೊಹ್ಲಿ ಫಿಟ್ನೆಸ್‌ಗೆ ಮಾದರಿ

ಯೋ-ಯೋ ಟೆಸ್ಟ್ ಎಂದರೇನು?

FIFA World Cup 2026 ಡೆಂಬೆಲೆ ಹ್ಯಾಟ್ರಿಕ್‌: ನಾರ್ವೆ ವಿರುದ್ಧ ಗೆದ್ದ ಫ್ರಾನ್ಸ್‌ ನಾಕೌಟ್ ಪ್ರವೇಶ

ಸ್ಪೇನ್, ಬೆಲ್ಜಿಯಂ ನಾಕೌಟ್‌ಗೆ ಲಗ್ಗೆ

ಸೆನೆಗಲ್‌ಗೆ ಭರ್ಜರಿ ಗೆಲುವು:

ಒಂದೂ ಪಂದ್ಯ ಗೆಲ್ಲದಿದ್ದರೂ ನಾಕೌಟ್‌ಗೇರಿದ ಕೇಪ್‌ ವರ್ಡೆ

ಫಿಫಾ ವಿಶ್ವಕಪ್‌ನಲ್ಲಿ ಮೆಸ್ಸಿ ವಿಶ್ವದಾಖಲೆ; ಬ್ರೆಜಿಲ್ ದಂತಕಥೆಯ ರೆಕಾರ್ಡ್ ಬ್ರೇಕ್ ಮಾಡಿದ ಅರ್ಜೆಂಟೀನಾ ಕ್ಯಾಪ್ಟನ್!

ಲಿಯೋನೆಲ್ ಮೆಸ್ಸಿ ಬರೆದ ದಾಖಲೆಗಳು

ಅರ್ಜೆಂಟೀನಾ ತಂಡದ 50ನೇ ವಿಶ್ವಕಪ್ ಜಯದ ಮೈಲಿಗಲ್ಲು!

ಅರ್ಜೆಂಟೀನಾ-ಜೋರ್ಡನ್‌ ವಿರುದ್ಧದ ಪಂದ್ಯದ ಕ್ಷಣಗಳು

ಮುಂದಿನ ಹಂತದ ಪಂದ್ಯ ಎಲ್ಲಿ?

ಫುಟ್ಬಾಲ್ ಪಂದ್ಯದಲ್ಲಿ ನಿಗೂಢ ಬ್ಯೂಟಿ: ಕೆಲವೇ ಕ್ಷಣಗಳ ವೈರಲ್ ವಿಡಿಯೋಗೆ ವಿಶ್ವಾದ್ಯಂತ ಇನ್ನಿಲ್ಲದ ಡಿಮಾಂಡ್- ಯಾರೀಕೆ

ಕೆಲವೇ ಸೆಕೆಂಡ್ಗಳ ವಿಡಿಯೋ

ಫ್ಯಾಕ್ಟ್ ಚೆಕ್