Asianet Suvarna News

ಯಾವ ಸಿಹಿತಿನಿಸನ್ನು ‘King of Sweets’ ಎನ್ನುತ್ತಾರೆ ಅನ್ನೋದು ಗೊತ್ತಾ? ಕೇಳಿದ್ರೆ ಶಾಕ್ ಆಗ್ತೀರಿ!

Pavna Das — Thu, 29 Oct 2026 21:48:46 +0530

‘ಸಿಹಿತಿಂಡಿಗಳ ರಾಜ’ ಎಂದು ಯಾವ ಸಿಹಿತಿಂಡಿಯನ್ನು ಕರೆಯುತ್ತಾರೆ ಗೊತ್ತಾ?

ಭಾರತದಲ್ಲಿ ನೂರಾರು ಬಗೆಯ ಸಾಂಪ್ರದಾಯಿಕ ಸಿಹಿತಿಂಡಿಗಳಿವೆ. ಪ್ರತಿಯೊಂದು ಸಿಹಿತಿಂಡಿಯೂ ತನ್ನದೇ ಆದ ರುಚಿ, ತಯಾರಿಸುವ ವಿಧಾನ ಮತ್ತು ಸಾಂಸ್ಕೃತಿಕ ಮಹತ್ವವನ್ನು ಹೊಂದಿದೆ. ದೇಶದ ವಿವಿಧ ಭಾಗಗಳಲ್ಲಿ ವಿಶೇಷ ಸಿಹಿತಿಂಡಿಗಳು ಜನಪ್ರಿಯವಾಗಿದ್ದರೂ, ದಕ್ಷಿಣ ಭಾರತದ ಒಂದು ಸಿಹಿತಿಂಡಿ ‘ಸಿಹಿತಿಂಡಿಗಳ ರಾಜ’ ಎಂಬ ಖ್ಯಾತಿಯನ್ನು ಗಳಿಸಿದೆ. ಅದುವೇ ಕರ್ನಾಟಕದ ಹೆಮ್ಮೆಯ ಮೈಸೂರ್ ಪಾಕ್. ಈ ಸಿಹಿತಿಂಡಿಗೆ ಮೈಸೂರಿನ ರಾಜಮನೆತನದ ಇತಿಹಾಸದೊಂದಿಗೂ ನಿಕಟ ಸಂಬಂಧವಿದೆ.

ಮೈಸೂರ್ ಪಾಕ್‌ನ ವಿಶೇಷತೆ ಏನು?

ಮೈಸೂರ್ ಪಾಕ್ ಕರ್ನಾಟಕದ ಮೈಸೂರಿನಲ್ಲಿ ಹುಟ್ಟಿಕೊಂಡ ಸಾಂಪ್ರದಾಯಿಕ ಸಿಹಿತಿಂಡಿಯಾಗಿದೆ. ಇದನ್ನು ಮುಖ್ಯವಾಗಿ ಕಡಲೆ ಹಿಟ್ಟು, ಸಕ್ಕರೆ ಮತ್ತು ತುಪ್ಪ ಎಂಬ ಮೂರು ಪದಾರ್ಥಗಳಿಂದ ತಯಾರಿಸಲಾಗುತ್ತದೆ. ಈ ಪದಾರ್ಥಗಳನ್ನು ಸರಿಯಾದ ಪ್ರಮಾಣದಲ್ಲಿ ಬೆರೆಸಿ, ಸೂಕ್ತ ರೀತಿಯಲ್ಲಿ ಬೇಯಿಸುವುದರಿಂದ ಮೈಸೂರ್ ಪಾಕ್‌ಗೆ ವಿಶಿಷ್ಟವಾದ ರುಚಿ ಮತ್ತು ವಿನ್ಯಾಸ ದೊರೆಯುತ್ತದೆ. ಚೆನ್ನಾಗಿ ತಯಾರಿಸಿದ ಮೈಸೂರ್ ಪಾಕ್ ಬೆಣ್ಣೆಯಂತಹ ರಿಚ್ ಟೇಸ್ಟ್ ಹೊಂದಿರುತ್ತದೆ.

ಮೈಸೂರ್ ಪಾಕ್‌ನ ಹಿಂದಿದೆ ರಾಜಮನೆತನದ ಕಥೆ

ಮೈಸೂರ್ ಪಾಕ್‌ನ ಇತಿಹಾಸವು ಮೈಸೂರು ಸಂಸ್ಥಾನವನ್ನು ಆಳಿದ ಒಡೆಯರ್ ರಾಜವಂಶದೊಂದಿಗೆ ನಿಕಟ ಸಂಬಂಧ ಹೊಂದಿದೆ. ಜನಪ್ರಿಯ ಕಥೆಗಳ ಪ್ರಕಾರ, ಈ ಸಿಹಿತಿಂಡಿಯನ್ನು ಮೊದಲು ರಾಜಮನೆತನದ ಅಡುಗೆಮನೆಯಲ್ಲಿ ಅರಮನೆಯವರಿಗಾಗಿ ತಯಾರಿಸಲಾಗಿತ್ತು. ಅರಮನೆಯ ಅಡುಗೆಯವರು ಭಾರತೀಯ ಅಡುಗೆಮನೆಗಳಲ್ಲಿ ಸಾಮಾನ್ಯವಾಗಿ ಬಳಸುವ ಪದಾರ್ಥಗಳನ್ನು ಪ್ರಯೋಗಿಸಿ ಈ ಸಿಹಿತಿಂಡಿ ತಯಾರಿಸಿದರು. ಇದರ ರುಚಿ ರಾಜಮನೆತನದವರ ಮೆಚ್ಚುಗೆಗೆ ಪಾತ್ರವಾಯಿತು ಎನ್ನಲಾಗುತ್ತದೆ.

ನಂತರ ಈ ಸಿಹಿತಿಂಡಿ ಅರಮನೆಯಿಂದ ಹೊರಬಂದು ಸ್ಥಳೀಯ ಸಿಹಿತಿಂಡಿ ಅಂಗಡಿಗಳು ಮತ್ತು ಮನೆಗಳನ್ನು ತಲುಪಿತು. ಕಾಲಕ್ರಮೇಣ ಮೈಸೂರ್ ಪಾಕ್ ಕರ್ನಾಟಕದ ಪಾಕಪದ್ಧತಿಯ ಪ್ರಮುಖ ಭಾಗವಾಯಿತು. ರಾಜಮನೆತನದ ಅಡುಗೆಮನೆಯೊಂದಿಗಿನ ಇದರ ಸಂಬಂಧವು ಇಂದಿಗೂ ಈ ಸಿಹಿತಿಂಡಿಯ ಆಕರ್ಷಣೆಯನ್ನು ಹೆಚ್ಚಿಸಿದೆ.

ಮೈಸೂರ್ ಪಾಕ್ ತಯಾರಿಸುವುದು ಅಷ್ಟು ಸುಲಭವಲ್ಲ!

ಮೈಸೂರ್ ಪಾಕ್ ತಯಾರಿಸಲು ಬೇಕಾಗುವ ಪದಾರ್ಥಗಳು ಸರಳವಾಗಿದ್ದರೂ, ಅದನ್ನು ಪರಿಪೂರ್ಣವಾಗಿ ತಯಾರಿಸಲು ಸಾಕಷ್ಟು ಕೌಶಲ ಮತ್ತು ತಾಳ್ಮೆ ಅಗತ್ಯವಿದೆ. ಕಡಲೆ ಹಿಟ್ಟು, ಸಕ್ಕರೆ ಮತ್ತು ತುಪ್ಪದ ಸರಿಯಾದ ಪ್ರಮಾಣವನ್ನು ಬಳಸುವುದು ಹಾಗೂ ಮಿಶ್ರಣವನ್ನು ಸೂಕ್ತ ಹಂತದವರೆಗೆ ಬೇಯಿಸುವುದು ಬಹಳ ಮುಖ್ಯ. ತುಪ್ಪವು ಸಿಹಿತಿಂಡಿಗೆ ರಿಚ್ ರುಚಿಯನ್ನು ನೀಡಿದರೆ, ತಯಾರಿಸುವ ವಿಧಾನವು ಅದರ ಅಂತಿಮ ವಿನ್ಯಾಸವನ್ನು ನಿರ್ಧರಿಸುತ್ತದೆ.

ಕೆಲವು ಸಿಹಿತಿಂಡಿ ತಯಾರಕರು ಸ್ವಲ್ಪ ಗಟ್ಟಿಯಾಗಿ, ಪುಡಿಯಾಗುವಂತಹ ಮೈಸೂರ್ ಪಾಕ್ ತಯಾರಿಸಿದರೆ, ಇನ್ನು ಕೆಲವರು ಬಾಯಲ್ಲಿ ಕರಗುವಷ್ಟು ಮೃದುವಾದ ರೂಪದಲ್ಲಿ ತಯಾರಿಸುತ್ತಾರೆ. ಹೀಗಾಗಿ ಗ್ರಾಹಕರು ತಮ್ಮ ಇಷ್ಟಕ್ಕೆ ತಕ್ಕಂತೆ ವಿವಿಧ ಬಗೆಯ ಮೈಸೂರ್ ಪಾಕ್‌ಗಳನ್ನು ಸವಿಯಬಹುದು.

ಇಂದಿಗೂ ಕಡಿಮೆಯಾಗದ ಮೈಸೂರ್ ಪಾಕ್‌ನ ಜನಪ್ರಿಯತೆ

ಮೈಸೂರಿನ ರಾಜಮನೆತನದ ಅಡುಗೆಮನೆಯಿಂದ ಆರಂಭವಾಯಿತು ಎಂದು ಹೇಳಲಾಗುವ ಮೈಸೂರ್ ಪಾಕ್ ಇಂದು ಭಾರತದಾದ್ಯಂತ ಸಿಹಿತಿಂಡಿ ಅಂಗಡಿಗಳಲ್ಲಿ ಲಭ್ಯವಿದೆ. ಇದರ ವಿಶಿಷ್ಟ ರುಚಿ, ಸಾಂಪ್ರದಾಯಿಕ ತಯಾರಿಕಾ ವಿಧಾನ ಮತ್ತು ರಾಜಮನೆತನದೊಂದಿಗಿನ ಐತಿಹಾಸಿಕ ಸಂಬಂಧವು ಈ ಸಿಹಿತಿಂಡಿಗೆ ವಿಶೇಷ ಸ್ಥಾನವನ್ನು ತಂದುಕೊಟ್ಟಿದೆ. ಕರ್ನಾಟಕದ ಪಾಕಪರಂಪರೆಯ ಹೆಮ್ಮೆಯ ಸಂಕೇತವಾಗಿರುವ ಮೈಸೂರ್ ಪಾಕ್ ಇಂದಿಗೂ ಸಿಹಿಪ್ರಿಯರ ನೆಚ್ಚಿನ ಆಯ್ಕೆಯಾಗಿದೆ.

Food: ಸೂಪರ್‌ಫುಡ್‌ ಆಲೂಗಡ್ಡೆ; ದೇಶದ ಅಪೌಷ್ಟಿಕತೆ ಓಡಿಸಲು ಸಜ್ಜಾದ 'ಪರ್ಪಲ್ ಪೊಟಾಟೊ!

Bhimasi M Koleppanavar — Thu, 29 Oct 2026 18:56:32 +0530

ಮಾರುಕಟ್ಟೆಗೆ ನೇರಳೆ ಬಣ್ಣದ ಆಲೂಗಡ್ಡೆ ಬಂದಿದೆ. ಈ ಹೊಸ ನೇರಳೆ ಬಣ್ಣದ ಆಲೂಗಡ್ಡೆ ತಳಿಗೆ ಕುಫ್ರಿ ಜಮುನಿಯಾ ಎಂದು ಹೆಸರಿಡಲಾಗಿದ್ದು, ಇದನ್ನು ಕೇಂದ್ರ ಆಲೂಗಡ್ಡೆ ಸಂಶೋಧನಾ ಸಂಸ್ಥೆಅಭಿವೃದ್ಧಿಪಡಿಸಿದೆ. ಇನ್ನು ಇದರ ಉದ್ದೇಶ ನೋಡ ಹೋರಟರೆ, ಸಾಮಾನ್ಯ ಜನರು ಪ್ರತಿದಿನ ಬಳಸುವ ಆಹಾರದಲ್ಲೇ ಪೌಷ್ಟಿಕಾಂಶವನ್ನು ಹೆಚ್ಚಿಸುವ ಮೂಲಕ ದೇಶದಲ್ಲಿನ 'ಮರೆಮಾಚಿದ ಹಸಿವು' ನೀಗಿಸಲು ಸರ್ಕಾರ ಇದನ್ನು ಪ್ರೋತ್ಸಾಹಿಸುತ್ತಿದೆ.

ಬಿಡುಗಡೆ ಆಗಿದ್ದು ಯಾವಾಗ?

ಈ ತಳಿಯನ್ನು ಅಧಿಕೃತವಾಗಿ 2024 ರಲ್ಲಿ ಬಿಡುಗಡೆ ಮಾಡಲಾಗಿದೆ. ಪೌಷ್ಟಿಕಾಂಶಗಳ ಹೋಲಿಕೆ ನೋಡಿದರೆ, ಕಬ್ಬಿನಾಂಶ ಸಾಮಾನ್ಯ ಆಲೂಗಡ್ಡೆಯಲ್ಲಿ 23.15 ಮಿಗ್ರಾಂ ಇದ್ದರೆ, ಕುಫ್ರಿ ಜಮುನಿಯಾದಲ್ಲಿ 42.75 ಮಿಗ್ರಾಂ ಇದೆ. ಅದರಂತೆ ಸಾಮಾನ್ಯ ತಳಿಯಲ್ಲಿ 0.57 ಮಿಗ್ರಾಂ ಇದ್ದರೆ, ಇದರಲ್ಲಿ 3.22 ಮಿಗ್ರಾಂ ನಷ್ಟಿದೆ. ಸತು ಸಾಮಾನ್ಯ ಆಲೂಗಡ್ಡೆಯಲ್ಲಿ 0.28 ಮಿಗ್ರಾಂ ಇದ್ದರೆ, ಇದರಲ್ಲಿ 2.28 ಮಿಗ್ರಾಂ ಇದೆ. ಅಲ್ಲದೇ ಇದರ ನೇರಳೆ ಬಣ್ಣಕ್ಕೆ ಕಾರಣವಾಗಿರುವ 'ಆಂಥೋಸಯಾನಿನ್' ಎಂಬ ನೈಸರ್ಗಿಕ ವರ್ಣದ್ರವ್ಯವು ಉತ್ತಮ ಆಂಟಿಆಕ್ಸಿಡೆಂಟ್ ಆಗಿ ಕೆಲಸ ಮಾಡುತ್ತದೆ.

ಕೃಷಿ ಮತ್ತು ಇಳುವರಿ!

ನಿಗದಿಪಡಿಸಿದ ಕೃಷಿ ಪದ್ಧತಿಗಳ ಅಡಿಯಲ್ಲಿ ಪ್ರತಿ ಹೆಕ್ಟೇರ್‌ಗೆ 32 ರಿಂದ 35 ಟನ್ ಇಳುವರಿ ಪಡೆಯಬಹುದು. ಪ್ರಾಯೋಗಿಕ ಪರೀಕ್ಷೆಗಳಲ್ಲಿ ಇದು 90 ದಿನಗಳಲ್ಲಿ ಸುಮಾರು 49 ಟನ್‌ಗಳಷ್ಟು ಗರಿಷ್ಠ ಇಳುವರಿ ನೀಡಿದೆ. ಇದನ್ನು ಉತ್ತರ ಭಾರತದ ಬಯಲು ಸೀಮೆಗಳಲ್ಲಿ ಬೆಳೆಯಲು ಶಿಫಾರಸು ಮಾಡಲಾಗಿದೆ ಹಾಗೂ ಇದು ಉತ್ತಮ ಶೇಖರಣಾ ಸಾಮರ್ಥ್ಯವನ್ನು ಹೊಂದಿದೆ.

ಬಯೋಫೋರ್ಟಿಫಿಕೇಶನ್!

ಇದು ಸಾಮಾನ್ಯ ಆಹಾರದ ಕೋಟಾಗಳಲ್ಲಿ ಪೌಷ್ಟಿಕಾಂಶ ಸೇರಿಸುವ ಕೃತಕ ಪದ್ಧತಿಯಲ್ಲ. ಬದಲಿಗೆ, ಸಸ್ಯ ತಳಿ ಅಭಿವೃದ್ಧಿ ಮತ್ತು ಸುಧಾರಿತ ಬೇಸಾಯದ ಮೂಲಕ ಬೆಳೆ ಬೆಳೆಯುವಾಗಲೇ ಅದರಲ್ಲಿ ನೈಸರ್ಗಿಕವಾಗಿ ಪೋಷಕಾಂಶಗಳು ಹೆಚ್ಚಾಗುವಂತೆ ಮಾಡುವ 'ಬಯೋಫೋರ್ಟಿಫಿಕೇಶನ್' ತಂತ್ರಜ್ಞಾನವಾಗಿದೆ.

ರೈತರ ಮತ್ತು ಗ್ರಾಹಕರ ಸ್ವೀಕೃತಿ!

ಇದರ ವಿಭಿನ್ನ ಬಣ್ಣವನ್ನು ಗ್ರಾಹಕರು ಹೇಗೆ ಸ್ವೀಕರಿಸುತ್ತಾರೆ ಮತ್ತು ಮಾರುಕಟ್ಟೆಯಲ್ಲಿ ರೈತರಿಗೆ ಇದು ಆರ್ಥಿಕವಾಗಿ ಎಷ್ಟು ಲಾಭ ತರಲಿದೆ ಎಂಬುದು ಮುಖ್ಯವಾಗಿದೆ. ಆಲೂಗಡ್ಡೆಯನ್ನು ಬೇಯಿಸಿದ ನಂತರವೂ ಅದರಲ್ಲಿನ ಪೋಷಕಾಂಶಗಳು ಎಷ್ಟು ಪ್ರಮಾಣದಲ್ಲಿ ಉಳಿಯುತ್ತವೆ ಮತ್ತು ಅದನ್ನು ದೇಹವು ಎಷ್ಟು ಹೀರಿಕೊಳ್ಳುತ್ತದೆ ಎಂಬುದರ ಕುರಿತು ಇನ್ನಷ್ಟು ಸಂಶೋಧನೆ ಅಗತ್ಯವಾಗಿವೆ.

60 ದಿನದಲ್ಲಿ 6 ಕೆಜಿ ತೂಕ ಇಳಿಸಿ, ವಯಸ್ಸಾಗೋದನ್ನ ತಡೆಯಿರಿ, ಹೆಲ್ತ್ ಸಪ್ಲಿಮೆಂಟ್ ಜಾಹೀರಾತುಗಳ ಬಣ್ಣ ASCI ನಿಂದ ಬಯಲು

Gowthami K — Thu, 29 Oct 2026 15:47:15 +0530

ಆರೋಗ್ಯದ ಕಾಳಜಿಯಿಂದ ನೀವು ಹೆಲ್ತ್ ಸಪ್ಲಿಮೆಂಟ್ಸ್ (ನ್ಯೂಟ್ರಾಸುಟಿಕಲ್ಸ್), ಪ್ರೋಟೀನ್ ಪೌಡರ್ ಅಥವಾ ವಿಟಮಿನ್ ಮಾತ್ರೆಗಳನ್ನು ಖರೀದಿಸುತ್ತಿದ್ದೀರಾ? ಟಿವಿ, ಮೊಬೈಲ್‌ಗಳಲ್ಲಿ ಬರುವ ಜಾಹೀರಾತುಗಳನ್ನು ನೋಡಿ ಈ ಉತ್ಪನ್ನಗಳು 'ಮ್ಯಾಜಿಕ್' ಮಾಡುತ್ತವೆ ಎಂದು ನಂಬಿದ್ದರೆ, ನೀವು ಎಚ್ಚರಗೊಳ್ಳಲೇಬೇಕು!

ಭಾರತೀಯ ಜಾಹೀರಾತು ಗುಣಮಟ್ಟ ಮಂಡಳಿ (ಎಎಸ್‌ಸಿಐ) ಬಿಡುಗಡೆ ಮಾಡಿರುವ ಎ ಪಿಲ್ ಫಾರ್ ಥಾಟ್ ಎಂಬ ಹೊಸ ವರದಿಯಲ್ಲಿ, ಆರೋಗ್ಯ ಮತ್ತು ವೆಲ್‌ನೆಸ್‌ ಉತ್ಪನ್ನಗಳ ಜಾಹೀರಾತುಗಳಲ್ಲಿ ಮಾಡಲಾಗುತ್ತಿರುವ ಸುಳ್ಳು ಭರವಸೆಗಳನ್ನು ಬಯಲಿಗೆಳೆಯಲಾಗಿದೆ.

ಜುಲೈನಿಂದ ಸೆಪ್ಟೆಂಬರ್ 2026ರವರೆಗೆ ಎಎಸ್‌ಸಿಐ ಪರಿಶೀಲಿಸಿದ 61 ಜಾಹೀರಾತುಗಳ ಪೈಕಿ ಬರೋಬ್ಬರಿ 60 ಜಾಹೀರಾತುಗಳು ಗ್ರಾಹಕರನ್ನು ದಾರಿತಪ್ಪಿಸುತ್ತಿವೆ ಮತ್ತು ನಿಯಮಗಳನ್ನು ಉಲ್ಲಂಘಿಸಿವೆ ಎಂಬ ಆಘಾತಕಾರಿ ಸತ್ಯ ಹೊರಬಿದ್ದಿದೆ.

ಯಾವೆಲ್ಲಾ ಸುಳ್ಳು ಭರವಸೆಗಳನ್ನು ನೀಡಲಾಗುತ್ತಿದೆ?

60 ದಿನಗಳಲ್ಲಿ 6 ಕೆ.ಜಿ ತೂಕ ಇಳಿಸಿʼ, 12 ವಾರಗಳಲ್ಲಿ ತೊಡೆಯ ಬೊಜ್ಜು ಕರಗಿಸಿʼ, ಯುವಿ ಕಿರಣಗಳಿಂದ ಶೇ. 300ರಷ್ಟು ರಕ್ಷಣೆ ಹೀಗೆ ತೂಕ ಇಳಿಕೆ, ವಯಸ್ಸಾಗುವುದನ್ನು ತಡೆಯುವುದು, ಚರ್ಮದ ಕಾಂತಿ ಹೆಚ್ಚಿಸುವ ಜಾಹೀರಾತುಗಳು ಯಾವುದೇ ವೈಜ್ಞಾನಿಕ ಪುರಾವೆಗಳಿಲ್ಲದೆ ಪ್ರಸಾರವಾಗುತ್ತಿವೆ.

ಅಷ್ಟೇ ಅಲ್ಲದೆ, ಕೆಲವೊಂದು ಉತ್ಪನ್ನಗಳು ಅಸ್ತಮಾ, ರಕ್ತದೊತ್ತಡ (ಬಿಪಿ), ಕೊಲೆಸ್ಟ್ರಾಲ್ ಮತ್ತು ಪಿಸಿಓಎಸ್‌ನಂತಹ ಗಂಭೀರ ಕಾಯಿಲೆಗಳನ್ನು ಗುಣಪಡಿಸುತ್ತವೆ ಎಂದು ಹೇಳಿಕೊಳ್ಳುತ್ತಿರುವುದು ಆತಂಕಕಾರಿ ಸಂಗತಿಯಾಗಿದೆ. ಜನರ ಅನಾರೋಗ್ಯವನ್ನೇ ಬಂಡವಾಳ ಮಾಡಿಕೊಂಡು ಕಂಪನಿಗಳು ಭ್ರಮೆ ಹುಟ್ಟಿಸುತ್ತಿವೆ ಎಂದು ವರದಿ ಹೇಳಿದೆ.

ಕಂಪನಿಗಳು ಜನರನ್ನು ಯಾಮಾರಿಸುವುದು ಹೇಗೆ?

ಎಎಸ್‌ಸಿಐ ವರದಿಯ ಪ್ರಕಾರ, ಈ ಕಂಪನಿಗಳು ಪ್ರಮುಖವಾಗಿ 3 ವಿಧಾನಗಳಲ್ಲಿ ಜನರನ್ನು ಯಾಮಾರಿಸುತ್ತಿವೆ.

ಮೊದಲನೆಯದ್ದು ಅರ್ಧ ಸತ್ಯ. ಉತ್ಪನ್ನದಲ್ಲಿರುವ ಯಾವುದೋ ಒಂದು ಮೂಲವಸ್ತುವಿಗೆ (ಉದಾಹರಣೆಗೆ: ಅಶ್ವಗಂಧ ಅಥವಾ ವಿಟಮಿನ್ ಸಿ) ಒಳ್ಳೆಯ ಗುಣವಿರುತ್ತದೆ. ಆ ಒಂದು ವಸ್ತುವಿನ ಲಾಭವನ್ನೇ ಮುಂದಿಟ್ಟುಕೊಂಡು, ಇಡೀ ಉತ್ಪನ್ನವೇ ಅದ್ಭುತ ಎಂದು ಬಿಂಬಿಸಲಾಗುತ್ತದೆ. ಆದರೆ ಆ ಅಂತಿಮ ಉತ್ಪನ್ನದಿಂದ ನಿಜಕ್ಕೂ ಲಾಭವಿದೆಯೇ ಎಂಬುದಕ್ಕೆ ಕಂಪನಿಗಳ ಬಳಿ ಯಾವುದೇ ಕ್ಲಿನಿಕಲ್ ಸಾಕ್ಷ್ಯಗಳಿರುವುದಿಲ್ಲ.

ಎರಡನೆಯದ್ದು ಸಾಕ್ಷ್ಯವಿಲ್ಲದ ಹೋಲಿಕೆ. ನಮ್ಮ ಉತ್ಪನ್ನ ಇತರರಿಗಿಂತ ವೇಗವಾಗಿ ಕೆಲಸ ಮಾಡುತ್ತದೆ , ಬಹಳ ಎಫೆಕ್ಟಿವ್ ಎಂದು ಹೇಳುತ್ತಾರೆ. ಆದರೆ ಯಾರಿಗೆ ಅಥವಾ ಯಾವ ಉತ್ಪನ್ನಕ್ಕೆ ಹೋಲಿಸಿ ಈ ಮಾತು ಹೇಳುತ್ತಿದ್ದಾರೆ ಎಂಬುದಕ್ಕೆ ಯಾವುದೇ ಆಧಾರ ಇರುವುದಿಲ್ಲ.

ಮೂರನೆಯದ್ದು ಸುಳ್ಳು ಬಿಫೋರ್-ಆಫ್ಟರ್ ಫೋಟೋಗಳು ಮತ್ತು ಎಸ್ಕೇಪ್ ತಂತ್ರ. ಗ್ರಾಹಕರನ್ನು ಸೆಳೆಯಲು ನಕಲಿ 'ಬಿಫೋರ್-ಆಫ್ಟರ್' ಫೋಟೋಗಳನ್ನು ಬಳಸಲಾಗುತ್ತಿದೆ. ವಿಪರ್ಯಾಸವೆಂದರೆ, ಎಸ್‌ಸಿಐ ಈ ಬಗ್ಗೆ ಸಾಕ್ಷ್ಯ ಕೇಳಿ ನೋಟಿಸ್ ನೀಡಿದಾಗ, 31 ಕಂಪನಿಗಳು ಯಾವುದೇ ಸಾಕ್ಷ್ಯ ಒದಗಿಸಲು ವಿಫಲವಾಗಿವೆ. ಹಲವು ಕಂಪನಿಗಳು ಸಾಕ್ಷ್ಯ ನೀಡುವ ಬದಲು ತಮ್ಮ ಜಾಹೀರಾತುಗಳನ್ನೇ ದಿಢೀರ್ ಹಿಂಪಡೆದಿವೆ.

ಭಾರೀ ದೊಡ್ಡ ಮಾರುಕಟ್ಟೆ

ಜನರಲ್ಲಿ ಆರೋಗ್ಯದ ಬಗ್ಗೆ ಅರಿವು ಹೆಚ್ಚಾದಂತೆ, ರೋಗ ಬರುವ ಮುನ್ನವೇ ತಡೆಯಬೇಕು ಎಂಬ ಉದ್ದೇಶದಿಂದ ನ್ಯೂಟ್ರಾಸ್ಯುಟಿಕಲ್ಸ್ (ಆರೋಗ್ಯ ವರ್ಧಕಗಳು) ಬಳಕೆ ಹೆಚ್ಚಾಗಿದೆ. 2025ರ ಹೊತ್ತಿಗೆ ಭಾರತದಲ್ಲಿ ಈ ಮಾರುಕಟ್ಟೆ 38.77 ಬಿಲಿಯನ್ ಡಾಲರ್ ಮೌಲ್ಯ ತಲುಪಿದ್ದು, 2033ರ ವೇಳೆಗೆ ಇದು ಬರೋಬ್ಬರಿ 1,151.5 ಬಿಲಿಯನ್ ಡಾಲರ್‌ಗೆ ಏರಿಕೆಯಾಗುವ ಅಂದಾಜಿದೆ. ಇದೇ ಕಾರಣಕ್ಕೆ ಕಂಪನಿಗಳು ಆಕರ್ಷಕ ಜಾಹೀರಾತುಗಳ ಮೊರೆ ಹೋಗುತ್ತಿವೆ.

ಜನರು ತಮ್ಮ ಆರೋಗ್ಯ ಸಮಸ್ಯೆಗಳಿಗೆ ಪರಿಹಾರ ಸಿಗುತ್ತದೆ ಎಂಬ ನಂಬಿಕೆಯಿಂದ ಇಂತಹ ಉತ್ಪನ್ನಗಳನ್ನು ಖರೀದಿಸುತ್ತಾರೆ. ದಿಢೀರ್ ತೂಕ ಇಳಿಕೆ ಅಥವಾ ವಯಸ್ಸಾಗುವಿಕೆಯನ್ನು ತಡೆಯುವಂತಹ ಜಾಹೀರಾತುಗಳನ್ನು ನೀಡುವಾಗ, ಕಂಪನಿಗಳು ಅದಕ್ಕೆ ತಕ್ಕ ಬಲವಾದ ವೈಜ್ಞಾನಿಕ ಪುರಾವೆಗಳನ್ನು ನೀಡಲೇಬೇಕು. ಯಾವುದೋ ಒಂದು ಕಚ್ಚಾವಸ್ತುವಿನ ಗುಣವನ್ನು ಇಡೀ ಉತ್ಪನ್ನದ ಗುಣ ಎಂದು ಹೇಳಬಾರದು. ಕಂಪನಿಗಳ ಜಾಹೀರಾತಿನ ಭರವಸೆಗಳು ಸಾಕ್ಷ್ಯಾಧಾರಿತವಾಗಿರಬೇಕು, ಗ್ರಾಹಕರ ನಂಬಿಕೆಯನ್ನು ಒಡೆಯಬಾರದು ಎಂದು ಎಎಸ್‌ಸಿಐ ಸಿಇಒ ಮನೀಶಾ ಕಪೂರ್ ಎಚ್ಚರಿಸಿದ್ದಾರೆ.

ಗ್ರಾಹಕರಿಗೆ ಪಾಠ

ಟಿವಿಯಲ್ಲಿ, ಇನ್‌ಸ್ಟಾಗ್ರಾಮ್‌ನಲ್ಲಿ ಬರುವ ಜಾಹೀರಾತುಗಳನ್ನು ನೋಡಿ, ದಿಢೀರ್ ಮ್ಯಾಜಿಕ್ ನಡೆಯುತ್ತದೆ ಎಂದು ನಂಬಿ ಸಾವಿರಾರು ರೂಪಾಯಿ ಸುರಿದು ಹೆಲ್ತ್ ಸಪ್ಲಿಮೆಂಟ್ಸ್ ಖರೀದಿಸುವ ಮುನ್ನ ಗ್ರಾಹಕರು ಎಚ್ಚರ ವಹಿಸುವುದು ಅತ್ಯಗತ್ಯ.

ಅಕ್ಕಿ-ಬೇಳೆ ನೆನೆಸೋ ಕೆಲಸವೇ ಇಲ್ಲ.. ಹತ್ತೇ ನಿಮಿಷದಲ್ಲಿ ಮಾಡಿ ಹೊರಗೆ ಕ್ರಿಸ್ಪಿ, ಒಳಗೆ ಸಾಫ್ಟ್ ಆದ ಪಡ್ಡು

Ashwini HR — Thu, 29 Oct 2026 15:10:39 +0530

ಬೆಳಗಿನ ಉಪಾಹಾರಕ್ಕೆ ಅಥವಾ ಸಂಜೆಯ ಸ್ನ್ಯಾಕ್ಸ್‌ಗೆ ದಿಢೀರನೆ ಏನಾದರೂ ರುಚಿಕರವಾಗಿ ಮಾಡಬೇಕು ಎಂದರೆ ಈ ಇನ್‌ಸ್ಟಂಟ್ ಪಡ್ಡು’ ಅತ್ಯುತ್ತಮ ಆಯ್ಕೆ. ಇದಕ್ಕೆ ಅಕ್ಕಿ ನೆನೆಸಿ, ಹಿಟ್ಟು ರುಬ್ಬಿ ರಾತ್ರಿಯಿಡೀ ಹುದುಗಿಸುವ (Fermentation) ಅಗತ್ಯವಿಲ್ಲ. ಕೇವಲ 10 ನಿಮಿಷದಲ್ಲಿ ಹೊರಗಡೆ ಗರಿಗರಿಯಾಗಿ, ಒಳಗಡೆ ಮೃದುವಾಗಿರುವ ಪಡ್ಡನ್ನು ಸುಲಭವಾಗಿ ತಯಾರಿಸಬಹುದು.

ಬೇಕಾಗುವ ಸಾಮಗ್ರಿಗಳು

ಇಡ್ಲಿ ರವೆ (ಅಕ್ಕಿ ತರಿ): 1 ಕಪ್ಅವಲಕ್ಕಿ (ಮೀಡಿಯಂ): 1/4 ಕಪ್ಅಕ್ಕಿ ಹಿಟ್ಟು: 1/4 ಕಪ್ಮೊಸರು: 1/4 ಕಪ್ಈರುಳ್ಳಿ: 1 (ಸಣ್ಣದಾಗಿ ಹೆಚ್ಚಿದ್ದು)ಹಸಿಮೆಣಸಿನಕಾಯಿ: 2-3 (ಖಾರಕ್ಕೆ ತಕ್ಕಂತೆ)ಶುಂಠಿ: ಸ್ವಲ್ಪ (ತುರಿದದ್ದು ಅಥವಾ ಸಣ್ಣಗೆ ಹೆಚ್ಚಿದ್ದು)ತೆಂಗಿನತುರಿ: 2-3 ಚಮಚಕೊತ್ತಂಬರಿ ಸೊಪ್ಪು: ಸ್ವಲ್ಪ (ಸಣ್ಣಗೆ ಹೆಚ್ಚಿದ್ದು)ಉಪ್ಪು: ರುಚಿಗೆ ತಕ್ಕಷ್ಟುಕುದಿಯುವ ಬಿಸಿ ನೀರು: ರವೆ ನೆನೆಸಲು ಅಗತ್ಯವಿರುವಷ್ಟುಇನೋ (Eno) ಅಥವಾ ಅಡುಗೆ ಸೋಡಾ: 1/4 ಚಮಚ (ಆಪ್ಷನಲ್ / ಕಡ್ಡಾಯವಲ್ಲ)ಎಣ್ಣೆ: ಪಡ್ಡು ಬೇಯಿಸಲು

ಮಾಡುವ ವಿಧಾನ

ನೆನೆಯಲು ಬಿಡಿಒಂದು ಕಪ್ ಇಡ್ಲಿ ರವೆಯನ್ನು ನೀರಿನಲ್ಲಿ ಒಂದು ಬಾರಿ ತೊಳೆದು ನೀರು ಬಸಿದುಕೊಳ್ಳಿ. ನಂತರ ಅದಕ್ಕೆ ಕುದಿಯುವ ಬಿಸಿ ನೀರನ್ನು ಹಾಕಿ 10 ನಿಮಿಷ ನೆನೆಯಲು ಬಿಡಿ.ಮತ್ತೊಂದು ಬಟ್ಟಲಿನಲ್ಲಿ 1/4 ಕಪ್ ಅವಲಕ್ಕಿಯನ್ನು ಮಾಮೂಲಿ ನೀರಿನಲ್ಲಿ ತೊಳೆದು 10 ನಿಮಿಷ ನೆನೆಸಿಡಿ.

ರುಬ್ಬಿಕೊಳ್ಳಿ10 ನಿಮಿಷಗಳ ನಂತರ ರವೆ ಮತ್ತು ಅವಲಕ್ಕಿಯಲ್ಲಿರುವ ಹೆಚ್ಚುವರಿ ನೀರನ್ನು ಬಸಿದು ತೆಗೆಯಿರಿ.ಮೊದಲು ನೆನೆಸಿದ ಇಡ್ಲಿ ರವೆಯನ್ನು ಮಿಕ್ಸಿ ಜಾರಿಗೆ ಹಾಕಿ, ನೀರು ಹಾಕದೆ ತರಿತರಿಯಾಗಿ ರುಬ್ಬಿಕೊಳ್ಳಿ.ನಂತರ ಅದಕ್ಕೆ ನೆನೆಸಿದ ಅವಲಕ್ಕಿ, 1/4 ಕಪ್ ಅಕ್ಕಿ ಹಿಟ್ಟು ಮತ್ತು 1/4 ಕಪ್ ಮೊಸರು ಸೇರಿಸಿ ಮತ್ತೊಮ್ಮೆ ನುಣ್ಣಗೆ ರುಬ್ಬಿಕೊಳ್ಳಿ (ಹಿಟ್ಟು ಬಿಸಿಯಾಗದಂತೆ ನೋಡಿಕೊಳ್ಳಿ).

ಹಿಟ್ಟು ಸಿದ್ಧಪಡಿಸಿಕೊಳ್ಳಿರುಬ್ಬಿದ ಹಿಟ್ಟನ್ನು ಪಾತ್ರೆಗೆ ಹಾಕಿ, ಅಗತ್ಯವಿದ್ದರೆ ಸ್ವಲ್ಪ ನೀರು ಸೇರಿಸಿ ಪಡ್ಡು ಅಥವಾ ದೋಸೆ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ.ಈಗ ಇದಕ್ಕೆ ಹೆಚ್ಚಿದ ಈರುಳ್ಳಿ, ಹಸಿಮೆಣಸು, ಶುಂಠಿ, ತೆಂಗಿನತುರಿ, ಕೊತ್ತಂಬರಿ ಸೊಪ್ಪು ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. (ಹೆಚ್ಚು ಮೃದುವಾಗಿ ಬೇಕಿದ್ದರೆ ಮಾತ್ರ 1/4 ಚಮಚ ಇನೋ ಅಥವಾ ಸೋಡಾ ಸೇರಿಸಿ, ಇಲ್ಲದಿದ್ದರೂ ಚೆನ್ನಾಗಿ ಬರುತ್ತದೆ).

ಪಡ್ಡು ಬೇಯಿಸಿಪಡ್ಡು ತವಾವನ್ನು (ಗುಳಿಯಪ್ಪದ ಹಂಚು) ಬಿಸಿ ಮಾಡಿ, ಪ್ರತಿಯೊಂದು ಗುಳಿಗೆ ಸ್ವಲ್ಪ ಎಣ್ಣೆ ಹಾಕಿ.ಸಿದ್ಧಪಡಿಸಿದ ಹಿಟ್ಟನ್ನು ಗುಳಿಗಳಿಗೆ ತುಂಬಿಸಿ, ಮಧ್ಯಮ ಉರಿಯಲ್ಲಿ ಮುಚ್ಚಳ ಮುಚ್ಚಿ ಬೇಯಿಸಿ.ಒಂದು ಬದಿ ಗೋಲ್ಡನ್ ಬ್ರೌನ್ (ಹೊಂಬಣ್ಣ) ಬಂದ ನಂತರ ಮೇಲಿಂದ ಸ್ವಲ್ಪ ಎಣ್ಣೆ ಹಾಕಿ, ಮಗುಚಿ ಹಾಕಿ ಎರಡೂ ಬದಿ ಗರಿಗರಿಯಾಗುವಂತೆ ಬೇಯಿಸಿ.ಈಗ ಬಿಸಿಬಿಸಿಯಾದ ರುಚಿಕರ ಇನ್‌ಸ್ಟಂಟ್ ಪಡ್ಡು ಸವಿಯಲು ಸಿದ್ಧ! ಇದನ್ನು ತೆಂಗಿನಕಾಯಿ ಚಟ್ನಿ, ಸಾಂಬಾರ್ ಅಥವಾ ಚಟ್ನಿ ಪುಡಿ-ತುಪ್ಪದ ಜೊತೆ ಸವಿಯಲು ಅದ್ಭುತವಾಗಿರುತ್ತದೆ.

ಇದು ಗಮನದಲ್ಲಿರಲಿ

ಕುದಿಯುವ ನೀರೇ ಮುಖ್ಯ (Hot Water Trick)ಇಡ್ಲಿ ರವೆ ಬೇಗ ಮೆತ್ತಗಾಗಲು ಮತ್ತು ಪಡ್ಡು ಒಳಗಡೆ ಮೃದುವಾಗಿ ಬರಲು ಚೆನ್ನಾಗಿ ಕುದಿಯುವ ನೀರನ್ನೇ ಬಳಸಬೇಕು. ತಣ್ಣೀರು ಅಥವಾ ಉಗುರುಬೆಚ್ಚಗಿನ ನೀರು ಹಾಕಿದರೆ ರವೆ ಬೇಗ ನೆನೆಯುವುದಿಲ್ಲ.

ಹಿಟ್ಟಿನ ಹದ (Batter Consistency)ಹಿಟ್ಟು ತುಂಬಾ ತೆಳುವಾಗಬಾರದು (ದೋಸೆ ಹಿಟ್ಟಿಗಿಂತ ಸ್ವಲ್ಪ ಗಟ್ಟಿಯಾಗಿ, ಇಡ್ಲಿ ಹಿಟ್ಟಿನ ಹದದಲ್ಲಿರಬೇಕು). ನೀರು ಜಾಸ್ತಿಯಾದರೆ ಪಡ್ಡು ತವಾಕ್ಕೆ ಅಂಟಿಕೊಳ್ಳುತ್ತದೆ ಅಥವಾ ಎಣ್ಣೆ ಜಾಸ್ತಿ ಹೀರಿಕೊಳ್ಳುತ್ತದೆ.

ಹೊರಗೆ ಕ್ರಿಸ್ಪಿ, ಒಳಗೆ ಸಾಫ್ಟ್ ಆಗಲು (Crispy Secret)ನಾವು ಸೇರಿಸುವ ಅಕ್ಕಿ ಹಿಟ್ಟು ಪಡ್ಡಿಗೆ ಹೊರಗಡೆ ಗರಿಗರಿ (ಕ್ರಿಸ್ಪಿ) ತನ ಕೊಡುತ್ತದೆ, ಮತ್ತು ಅವಲಕ್ಕಿ ಹಾಗೂ ಮೊಸರು ಒಳಗಡೆ ಮೃದುವಾಗಿರಲು (ಸಾಫ್ಟ್) ಸಹಾಯ ಮಾಡುತ್ತದೆ. ಹಾಗಾಗಿ ಈ ಅಳತೆಯನ್ನು ಮಿಸ್ ಮಾಡಬೇಡಿ.

ಹಂಚು ಸರಿಯಾಗಿ ಕಾದಿರಬೇಕು (Pan Temperature)ಪಡ್ಡು ತವಾವನ್ನು (ಹಂಚು) ಮೊದಲು ಚೆನ್ನಾಗಿ ಬಿಸಿ ಮಾಡಿ, ನಂತರ ಉರಿಯನ್ನು ಮಧ್ಯಮ (Medium Flame) ಮಟ್ಟಕ್ಕೆ ಇಟ್ಟು ಬೇಯಿಸಬೇಕು. ತವಾ ಸರಿಯಾಗಿ ಕಾಯದಿದ್ದರೆ ಪಡ್ಡು ಎದ್ದೇಳುವುದಿಲ್ಲ, ಹಂಚಿಗೆ ಅಂಟಿಕೊಳ್ಳುತ್ತದೆ.

ಹೋಟೆಲ್ ಶೈಲಿಯ ಪುಲಾವ್ ಮಾಡಬೇಕಾ? ಮನೆಯಲ್ಲೇ ಪುಲಾವ್ ಮಸಾಲೆ ತಯಾರಿಸುವ ಸುಲಭ ವಿಧಾನ ಇಲ್ಲಿದೆ

Pavna Das — Thu, 29 Oct 2026 14:32:54 +0530

ಮನೆಯಲ್ಲಿಯೇ ತಯಾರಿಸಿ ರುಚಿಯಾದ ಪುಲಾವ್ ಮಸಾಲ

ಮನೆಯಲ್ಲಿ ತಯಾರಿಸಿದ ಮಸಾಲೆ ಆಹಾರದ ರುಚಿಯನ್ನು ಹೆಚ್ಚಿಸುವುದರ ಜೊತೆಗೆ, ಅದರಲ್ಲಿ ಬಳಸುವ ಪದಾರ್ಥಗಳನ್ನು ನಮ್ಮ ಇಷ್ಟಕ್ಕೆ ತಕ್ಕಂತೆ ಆಯ್ಕೆ ಮಾಡಿಕೊಳ್ಳಲು ಸಹಾಯ ಮಾಡುತ್ತದೆ. ಪುಲಾವ್‌ಗಾಗಿ ಮನೆಯಲ್ಲೇ ವಿಶೇಷವಾದ ಮಸಾಲೆ ತಯಾರಿಸಬಹುದು. ಈ ಮಸಾಲೆಯ ಪರಿಮಳ ಅನ್ನ ಬೇಯುವಾಗಲೇ ಮನೆಯೆಲ್ಲ ಹರಡುತ್ತದೆ. ಇದನ್ನು ತಯಾರಿಸಲು ಹೆಚ್ಚಿನ ಪದಾರ್ಥಗಳ ಅಗತ್ಯವಿಲ್ಲ. ಸರಿಯಾದ ಮಸಾಲೆಗಳ ಮಿಶ್ರಣವೇ ಪುಲಾವ್‌ಗೆ ವಿಶೇಷ ರುಚಿ ಮತ್ತು ಸುವಾಸನೆ ನೀಡುತ್ತದೆ. ಮಾರುಕಟ್ಟೆಯಲ್ಲಿ ಸಿಗುವ ಸಿದ್ಧ ಮಸಾಲೆಗಳಿಗಿಂತ ಮನೆಯಲ್ಲೇ ತಯಾರಿಸಿದ ತಾಜಾ ಮಸಾಲೆ ಇಷ್ಟಪಡುವವರಿಗೆ ಈ ರೆಸಿಪಿ ಬೆಸ್ಟ್.

ಪುಲಾವ್ ಮಸಾಲೆ ತಯಾರಿಸಲು ಬೇಕಾಗುವ ಪದಾರ್ಥಗಳು

ಪುಲಾವ್ ಮಸಾಲೆಯ ರುಚಿ ಮುಖ್ಯವಾಗಿ ಸಾಂಬಾರ ಪದಾರ್ಥಗಳಿಂದ ಬರುತ್ತದೆ. ಇದಕ್ಕಾಗಿ ಜೀರಿಗೆ, ಕೊತ್ತಂಬರಿ ಬೀಜ, ಕಾಳುಮೆಣಸು, ಲವಂಗ, ದಾಲ್ಚಿನ್ನಿ, ದೊಡ್ಡ ಏಲಕ್ಕಿ, ಸಣ್ಣ ಏಲಕ್ಕಿ, ಬಿರಿಯಾನಿ ಎಲೆ ಮತ್ತು ಸೋಂಪು ಬೇಕಾಗುತ್ತದೆ. ಇದರ ಜೊತೆಗೆ ಸ್ವಲ್ಪ ಜಾಪತ್ರಿ ಮತ್ತು ಜಾಯಿಕಾಯಿ ಸೇರಿಸಿದರೆ ಮಸಾಲೆಗೆ ವಿಶೇಷವಾದ ಪರಿಮಳ ಸಿಗುತ್ತದೆ. ನಿಮಗೆ ಸ್ವಲ್ಪ ಖಾರವಾದ ಪರಿಮಳ ಇಷ್ಟವಿದ್ದರೆ ಅಲ್ಪ ಪ್ರಮಾಣದಲ್ಲಿ ಒಣ ಕೆಂಪು ಮೆಣಸಿನಕಾಯಿಯನ್ನೂ ಸೇರಿಸಬಹುದು. ಎಲ್ಲಾ ಮಸಾಲೆಗಳನ್ನು ಸಮಾನ ಪ್ರಮಾಣದಲ್ಲಿ ಬಳಸಬಾರದು ಎಂಬುದನ್ನು ನೆನಪಿಡಿ. ಜೀರಿಗೆ ಮತ್ತು ಕೊತ್ತಂಬರಿ ಬೀಜಗಳು ಮಸಾಲೆಗೆ ಮೂಲ ರುಚಿಯನ್ನು ನೀಡುತ್ತವೆ. ದಾಲ್ಚಿನ್ನಿ, ಲವಂಗ ಮತ್ತು ಏಲಕ್ಕಿಯಂತಹ ಪದಾರ್ಥಗಳು ಗಾಢವಾದ ಪರಿಮಳ ನೀಡುವುದರಿಂದ ಅವುಗಳನ್ನು ಕಡಿಮೆ ಪ್ರಮಾಣದಲ್ಲಿ ಬಳಸುವುದು ಉತ್ತಮ.

ತಯಾರಿಸುವ ಸುಲಭ ವಿಧಾನ

ಪುಲಾವ್ ಮಸಾಲೆ ತಯಾರಿಸಲು ಮೊದಲು ಸಾಂಬಾರ ಪದಾರ್ಥಗಳನ್ನು ಹಗುರವಾಗಿ ಹುರಿಯಬೇಕು. ಇದಕ್ಕಾಗಿ ಬಾಣಲೆಯನ್ನು ಕಡಿಮೆ ಉರಿಯಲ್ಲಿ ಬಿಸಿ ಮಾಡಿ ಅದಕ್ಕೆ ಮಸಾಲೆಗಳನ್ನು ಹಾಕಿ.
ಮಸಾಲೆಗಳು ಸುಡದಂತೆ ನಿರಂತರವಾಗಿ ಕೈಯಾಡಿಸುತ್ತಾ ಕೆಲವು ನಿಮಿಷಗಳ ಕಾಲ ಹುರಿಯಿರಿ. ಅವುಗಳಿಂದ ಪರಿಮಳ ಬರಲು ಪ್ರಾರಂಭಿಸಿದ ತಕ್ಷಣ ಗ್ಯಾಸ್ ಆಫ್ ಮಾಡಿ. ನಂತರ ಮಸಾಲೆಗಳನ್ನು ಒಂದು ತಟ್ಟೆಗೆ ಹಾಕಿ ಸಂಪೂರ್ಣವಾಗಿ ತಣ್ಣಗಾಗಲು ಬಿಡಿ. ಹೆಚ್ಚಿಗೆ ಹುರಿದರೆ ಕಹಿಯಾಗುತ್ತದೆ.
ಹುರಿದ ಮಸಾಲೆಗಳು ಸಂಪೂರ್ಣವಾಗಿ ತಣ್ಣಗಾದ ನಂತರ ಅವುಗಳನ್ನು ಮಿಕ್ಸರ್ ಗ್ರೈಂಡರ್‌ಗೆ ಹಾಕಿ ನುಣ್ಣಗೆ ಪುಡಿ ಮಾಡಿ.
ನಿಮಗೆ ಬೇಕಿದ್ದರೆ ಮಸಾಲೆಯನ್ನು ತುಂಬಾ ನುಣ್ಣಗೆ ಮಾಡುವ ಬದಲು ಸ್ವಲ್ಪ ತರಿತರಿಯಾಗಿಯೂ ಇಟ್ಟುಕೊಳ್ಳಬಹುದು. ತರಿತರಿಯಾದ ಮಸಾಲೆ ಪುಲಾವ್‌ಗೆ ವಿಭಿನ್ನವಾದ ರುಚಿ ಮತ್ತು ಪರಿಮಳ ನೀಡುತ್ತದೆ.
ಮಸಾಲೆ ಪುಡಿ ಸಿದ್ಧವಾದ ಬಳಿಕ ಅದನ್ನು ಗಾಳಿಯಾಡದ ಡಬ್ಬಿಯಲ್ಲಿ ತುಂಬಿ ಸಂಗ್ರಹಿಸಿ.

ಪುಲಾವ್ ತಯಾರಿಸುವಾಗ ಮಸಾಲೆಯನ್ನು ಹೇಗೆ ಬಳಸಬೇಕು?

ನಾಲ್ಕು ಜನರಿಗೆ ಪುಲಾವ್ ತಯಾರಿಸಲು ಸಾಮಾನ್ಯವಾಗಿ ಒಂದರಿಂದ ಎರಡು ಟೀ ಚಮಚಗಳಷ್ಟು ಮನೆಯಲ್ಲೇ ತಯಾರಿಸಿದ ಪುಲಾವ್ ಮಸಾಲೆ ಸಾಕಾಗಬಹುದು. ಆದರೆ ನಿಮ್ಮ ರುಚಿ ಮತ್ತು ಮಸಾಲೆಯ ತೀವ್ರತೆಗೆ ಅನುಗುಣವಾಗಿ ಪ್ರಮಾಣವನ್ನು ಹೊಂದಿಸಿಕೊಳ್ಳಿ. ಮೊದಲು ಈರುಳ್ಳಿ ಅಥವಾ ತರಕಾರಿಗಳನ್ನು ಹುರಿದ ಬಳಿಕ ತಯಾರಿಸಿದ ಮಸಾಲೆಯನ್ನು ಸೇರಿಸಿ ಸ್ವಲ್ಪ ಹೊತ್ತು ಹುರಿಯಿರಿ. ನಂತರ ಅಕ್ಕಿ ಮತ್ತು ನೀರನ್ನು ಸೇರಿಸಿ ಪುಲಾವ್ ತಯಾರಿಸಿ. ಈ ವಿಧಾನದಿಂದ ಮಸಾಲೆಯ ಪರಿಮಳ ಅಕ್ಕಿಯಲ್ಲಿ ಚೆನ್ನಾಗಿ ಬೆರೆತು, ಪುಲಾವ್ ರುಚಿಕರವಾಗಿ ತಯಾರಾಗುತ್ತದೆ.

Paan Mukhwas Recipe: ಪೂಜೆಗೆ ತಂದ ವೀಳ್ಯದೆಲೆ ಉಳಿದಿದೆಯಾ? ಕೆಲವೇ ನಿಮಿಷದಲ್ಲಿ ಪಾನ್ ಮುಖವಾಸ್ ತಯಾರಿಸಿ

Roopa Hegde — Thu, 29 Oct 2026 13:31:41 +0530

ಪೂಜೆಗಾಗಿ ತಂದ ವೀಳ್ಯದೆಲೆಗಳು ಉಳಿದಿದ್ದರೆ, ಅವುಗಳಿಂದ ಪಾನ್ ಮುಖವಾಸ್ ತಯಾರಿಸಬಹುದು. ಊಟದ ಬಳಿಕ ಸಿಹಿ ಹಾಗೂ ಪರಿಮಳಭರಿತವಾದದ್ದನ್ನು ತಿನ್ನಲು ಬಯಸುವವರು ಈ ರೆಸಿಪಿಯನ್ನು ಒಮ್ಮೆ ಟ್ರೈ ಮಾಡಿ.

ಪಾನ್ ಮುಖವಾಸ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

ಮನೆಯಲ್ಲೇ ಪಾನ್ ಮುಖವಾಸ್ ತಯಾರಿಸಲು ಹೆಚ್ಚು ಸಾಮಗ್ರಿಗಳ ಅಗತ್ಯವಿಲ್ಲ. ನಿಮ್ಮ ರುಚಿಗೆ ತಕ್ಕಂತೆ ಪದಾರ್ಥಗಳನ್ನು ಆಯ್ಕೆ ಮಾಡಬಹುದು. 10–12 ವೀಳ್ಯದೆಲೆಗಳು, ದೊಡ್ಡ ಚಮಚ ಸೋಂಪು, 2 ದೊಡ್ಡ ಚಮಚ ಧನಿಯಾ, 2 ದೊಡ್ಡ ಚಮಚ ಸಣ್ಣಗೆ ಹೆಚ್ಚಿದ ಒಣ ತೆಂಗಿನಕಾಯಿ, ದೊಡ್ಡ ಚಮಚ ಎಳ್ಳು, ಅರ್ಧ ಚಮಚ ಏಲಕ್ಕಿ ಪುಡಿ, ರುಚಿಗೆ ತಕ್ಕಷ್ಟು ಕಲ್ಲುಸಕ್ಕರೆಯ ಸಣ್ಣ ತುಂಡು. ಪಾನ್ನ ರುಚಿ ಹೆಚ್ಚಿಸಲು ಆಹಾರದಲ್ಲಿ ಬಳಸಲು ಸ್ವಲ್ಪ ಒಣ ಗುಲ್ಕಂದವನ್ನೂ ಸೇರಿಸಬಹುದು. ಆದರೆ ಗುಲ್ಕಂದ ಸೇರಿಸಿದರೆ ಮುಖವಾಸ್ನಲ್ಲಿ ತೇವಾಂಶ ಹೆಚ್ಚಾಗಬಹುದು. ಹಾಗಾಗಿ ಕಡಿಮೆ ಪ್ರಮಾಣದಲ್ಲಿ ಸೇರಿಸಿ,

ಪಾನ್ ಮುಖವಾಸ್ ತಯಾರಿಸುವ ವಿಧಾನ

ಮೊದಲು ವೀಳ್ಯದೆಲೆಗಳನ್ನು ಸ್ವಚ್ಛವಾಗಿ ತೊಳೆದು, ಬಟ್ಟೆಯಿಂದ ನೀರಿನಂಶವನ್ನು ಒರೆಸಿಕೊಳ್ಳಿ. ನಂತರ ಎಲೆಗಳನ್ನು ಸಣ್ಣ ತುಂಡುಗಳಾಗಿ ಕತ್ತರಿಸಿ, ಬಿಸಿಲಿನಲ್ಲಿ ಅಥವಾ ಆಹಾರವನ್ನು ಒಣಗಿಸಲು ಸೂಕ್ತವಾದ ವಿಧಾನದಲ್ಲಿ ಸಂಪೂರ್ಣ ಒಣಗಿಸಿ. ಎಲೆಗಳಲ್ಲಿ ತೇವಾಂಶ ಉಳಿಯದಂತೆ ನೋಡಿಕೊಳ್ಳಿ. ಒಣಗಿದ ಎಲೆಗಳನ್ನು ಕೈಯಿಂದ ಪುಡಿ ಮಾಡಿಕೊಳ್ಳಿ ಅಥವಾ ಸಣ್ಣ ಚೂರುಗಳಾಗಿ ಇಟ್ಟುಕೊಳ್ಳಿ.

ಮೊದಲು ಒಂದು ಪ್ಯಾನ್ ಅನ್ನು ಕಡಿಮೆ ಉರಿಯಲ್ಲಿ ಬಿಸಿ ಮಾಡಿ. ಅದಕ್ಕೆ ಸೋಂಪು, ಧನಿಯಾ ದಾಲ್ ಮತ್ತು ಎಳ್ಳು ಹಾಕಿ 2–3 ನಿಮಿಷಗಳ ಕಾಲ ಹುರಿಯಿರಿ. ಪದಾರ್ಥಗಳು ಹೆಚ್ಚು ಕಪ್ಪಾಗದಂತೆ ಅಥವಾ ಸುಡದಂತೆ ನೋಡಿಕೊಳ್ಳಿ. ಹುರಿದ ಪದಾರ್ಥಗಳನ್ನು ಒಂದು ತಟ್ಟೆಗೆ ಹಾಕಿ ತಣ್ಣಗಾಗಲು ಬಿಡಿ. ಅವು ತಣ್ಣಗಾದ ಬಳಿಕ ಸಣ್ಣಗೆ ಹೆಚ್ಚಿದ ಒಣ ತೆಂಗಿನಕಾಯಿ, ವೀಳ್ಯದೆಲೆ ಪುಡಿ, ಏಲಕ್ಕಿ ಪುಡಿ ಮತ್ತು ಕಲ್ಲುಸಕ್ಕರೆಯ ತುಂಡುಗಳನ್ನು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಇಷ್ಟು ಮಾಡಿದರೆ ರುಚಿಕರವಾದ ಪಾನ್ ಮುಖವಾಸ್ ಸಿದ್ಧ. ಇದನ್ನು ತಯಾರಿಸಲು ಸುಮಾರು 10–15 ನಿಮಿಷ ಸಾಕು.

ಮುಖವಾಸ್ ರುಚಿ ಹೆಚ್ಚಿಸಲು ಈ ಟಿಪ್ಸ್ ಅನುಸರಿಸಿ

ಪಾನ್ ಮುಖವಾಸ್ನ ರುಚಿ ಪದಾರ್ಥಗಳ ಸರಿಯಾದ ಪ್ರಮಾಣವನ್ನು ಅವಲಂಬಿಸಿರುತ್ತದೆ. ಸಿಹಿ ರುಚಿ ಇಷ್ಟಪಡುವವರು ಕಲ್ಲುಸಕ್ಕರೆಯ ಪ್ರಮಾಣವನ್ನು ಸ್ವಲ್ಪ ಹೆಚ್ಚಿಸಬಹುದು. ಇಷ್ಟವಿದ್ದರೆ ತಿನ್ನಲು ಸುರಕ್ಷಿತವಾದ ಒಣ ಗುಲಾಬಿ ದಳಗಳನ್ನೂ ಸೇರಿಸಬಹುದು.

ಹೀಗೆ ಸಂಗ್ರಹಿಸಿ

ಮುಖವಾಸ್ ಸಂಪೂರ್ಣ ತಣ್ಣಗಾದ ಬಳಿಕ ಸ್ವಚ್ಛವಾದ, ಒಣಗಿದ ಗಾಳಿಯಾಡದ ಡಬ್ಬಿಯಲ್ಲಿ ಹಾಕಿಡಿ. ತೇವಾಂಶ ಮತ್ತು ನೇರ ಬಿಸಿಲಿನಿಂದ ದೂರವಿಡಿ. ಗುಲ್ಕಂದ ಅಥವಾ ಬೇರೆ ತೇವಾಂಶವಿರುವ ಪದಾರ್ಥಗಳನ್ನು ಸೇರಿಸಿದ್ದರೆ, ಕೋಣೆಯ ಉಷ್ಣಾಂಶದಲ್ಲಿ ಹೆಚ್ಚು ದಿನ ಇಡದೆ ಬೇಗನೆ ಬಳಸಿ. ದುರ್ವಾಸನೆ, ಶಿಲೀಂಧ್ರ ಅಥವಾ ಬೇರೆ ಅಸಹಜ ಬದಲಾವಣೆ ಕಂಡುಬಂದರೆ ಅದನ್ನು ಸೇವಿಸಬೇಡಿ.

Coconut water: ಪ್ರತಿದಿನ ಎಳನೀರು ಕುಡಿಯಿರಿ, ಹದಿನೈದು ಬಳಿಕ ಮ್ಯಾಜಿಕ್ ನೋಡಿ!

Ravi Janekal — Thu, 29 Oct 2026 14:08:53 +0530

What Happens when you Drink Coconut water after 15 days? ಪ್ರತಿದಿನ ಎಳನೀರು ಕುಡಿಯುವುದರಿಂದ ಏನೆಲ್ಲ ಪ್ರಯೋಜನೆಗಳಿವೆ. ತಿಳಿದರೆ ಅಚ್ಚರಿಯಾಗುತ್ತೆ. ಕೆಳಗೆ ಎಳನೀರು ಕುಡಿಯುವುದರಿಂದಾಗು ಲಾಭಗಳ ಬಗ್ಗೆ ವಿವರಿಸಿದೆ.

ಮಣ್ಣಿನ ಮಡಕೆಯಲ್ಲಿ ಮಾಡಿದ ಬೇಳೆ ಸಾರಿನ ರುಚಿಯೇ ಬೇರೆ! ಆರೋಗ್ಯಕ್ಕೂ ಸಿಕ್ಕಾಪಟ್ಟೆ ಪ್ರಯೋಜನ!

Pavna Das — Thu, 29 Oct 2026 13:35:33 +0530

ಮಣ್ಣಿನ ಮಡಕೆಯಲ್ಲಿ ಅಡುಗೆ

ಹಿಂದಿನ ಕಾಲದಲ್ಲಿ ಮಹಿಳೆಯರು ಅಡುಗೆ ಮಾಡಲು ಸ್ಟೀಲ್ ಪಾತ್ರೆಗಳಿಗಿಂತ ಮಣ್ಣಿನ ಪಾತ್ರೆಗಳನ್ನು ಹೆಚ್ಚಾಗಿ ಬಳಸುತ್ತಿದ್ದರು. ಇಂದು ಪ್ರೆಶರ್ ಕುಕ್ಕರ್, ನಾನ್‌ಸ್ಟಿಕ್ ಪ್ಯಾನ್ ಮತ್ತು ಸ್ಟೇನ್‌ಲೆಸ್ ಸ್ಟೀಲ್ ಪಾತ್ರೆಗಳು ಅಡುಗೆಮನೆಯಲ್ಲಿ ಪ್ರಮುಖ ಸ್ಥಾನ ಪಡೆದಿವೆ. ಆದರೆ ಹಿಂದೆ ಮಣ್ಣಿನ ಬಾಣಲೆ, ಹಂಡೆ ಮತ್ತು ತವಾವನ್ನು ಹೆಚ್ಚಾಗಿ ಬಳಸಲಾಗುತ್ತಿತ್ತು. ಮಣ್ಣಿನ ಮಡಕೆಯಲ್ಲಿ ಬೇಯಿಸಿದ ಬೇಳೆಯ ರುಚಿ ಪ್ರೆಶರ್ ಕುಕ್ಕರ್‌ನಲ್ಲಿ ಮಾಡಿದ ಬೇಳೆಗಿಂತ ವಿಭಿನ್ನವಾಗಿರುತ್ತದೆ ಎಂದು ಅನೇಕರು ಹೇಳುತ್ತಾರೆ. ಇದರಿಂದ ಹೆಚ್ಚು ಪ್ರಯೋಜನ ಕೂಡ ಇದೆ. ಅವುಗಳ ಬಗ್ಗೆ ನೋಡೋಣ.

ಮಣ್ಣಿನ ಮಡಕೆಯಲ್ಲಿ ಬೇಳೆ ಬೇಯಿಸುವುದರ ಪ್ರಯೋಜನಗಳು ಯಾವುವು?

ಕಡಿಮೆ ಎಣ್ಣೆಯಲ್ಲಿ ಅಡುಗೆ

ಮಣ್ಣಿನ ಪಾತ್ರೆಯಲ್ಲಿ ಬೇಳೆ ಬೇಯಿಸುವಾಗ ಹೆಚ್ಚು ಎಣ್ಣೆ ಅಥವಾ ತುಪ್ಪ ಬಳಸುವ ಅಗತ್ಯವಿಲ್ಲ. ಬೇಳೆಯನ್ನು ನೀರಿನೊಂದಿಗೆ ನಿಧಾನವಾಗಿ ಬೇಯಿಸಬಹುದು. ಇದರಿಂದ ಅಡುಗೆಯಲ್ಲಿ ಅನಗತ್ಯ ಕೊಬ್ಬಿನ ಪ್ರಮಾಣವನ್ನು ಕಡಿಮೆ ಮಾಡಬಹುದು.

ಜೀರ್ಣಕ್ರಿಯೆಗೆ ಸಹಾಯಕ

ಬೇಳೆಯಲ್ಲಿ ಪ್ರೋಟೀನ್ ಮತ್ತು ನಾರಿನಂಶ ಹೇರಳವಾಗಿರುತ್ತವೆ. ಬೇಳೆಯನ್ನು ಸರಿಯಾಗಿ ಬೇಯಿಸುವುದರಿಂದ ಅದು ಮೃದುವಾಗಿ, ತಿನ್ನಲು ಸುಲಭವಾಗುತ್ತದೆ. ಇದರಿಂದ ಜೀರ್ಣಕ್ರಿಯೆಗೆ ಸಹಾಯವಾಗಬಹುದು.

ಬೇಳೆಯ ನೈಸರ್ಗಿಕ ರುಚಿ ಮತ್ತು ಸುವಾಸನೆ ಉಳಿಯುತ್ತದೆ

ಮಣ್ಣಿನ ಮಡಕೆಯಲ್ಲಿ ಕಡಿಮೆ ಉರಿಯಲ್ಲಿ ನಿಧಾನವಾಗಿ ಬೇಳೆ ಬೇಯಿಸಿದಾಗ ಅದರ ರುಚಿ ಮತ್ತು ಸುವಾಸನೆ ವಿಭಿನ್ನವಾಗಿರಬಹುದು. ನಿಧಾನವಾದ ಅಡುಗೆ ವಿಧಾನವು ಬೇಳೆ ಸಮವಾಗಿ ಬೇಯಲು ಸಹಾಯ ಮಾಡುತ್ತದೆ. ಮಸಾಲೆ ಮತ್ತು ಇತರ ಪದಾರ್ಥಗಳೊಂದಿಗೆ ಬೇಯಿಸಿದಾಗ ಬೇಳೆಗೆ ವಿಶೇಷವಾದ ರುಚಿ ಸಿಗುತ್ತದೆ. ಹೀಗಾಗಿ ಸಾಂಪ್ರದಾಯಿಕ ಅಡುಗೆಯ ರುಚಿಯನ್ನು ಇಷ್ಟಪಡುವವರಿಗೆ ಮಣ್ಣಿನ ಪಾತ್ರೆಗಳು ಉತ್ತಮ ಆಯ್ಕೆಯಾಗಬಹುದು.

ನೈಸರ್ಗಿಕ ಖನಿಜಾಂಶ

ಮಣ್ಣು ನೈಸರ್ಗಿಕವಾಗಿ ವಿವಿಧ ಖನಿಜಗಳನ್ನು ಹೊಂದಿರುತ್ತದೆ. ಆದರೆ ಮಣ್ಣಿನ ಪಾತ್ರೆಯಲ್ಲಿ ಬೇಳೆ ಬೇಯಿಸುವುದರಿಂದ ಕಬ್ಬಿಣ, ಸತು, ಗಂಧಕ ಮತ್ತು ಕ್ಯಾಲ್ಸಿಯಂನಂತಹ ಪೋಷಕಾಂಶಗಳು ಅಗತ್ಯ ಪ್ರಮಾಣದಲ್ಲಿ ಆಹಾರಕ್ಕೆ ಸೇರುತ್ತವೆ ಎಂದು ಖಚಿತವಾಗಿ ಹೇಳಲು ಸಾಧ್ಯವಿಲ್ಲ. ಆದರೆ ಸಣ್ಣ ಪ್ರಮಾಣದಲ್ಲಿ ಸಿಗುತ್ತವೆ.

ನಿಧಾನವಾಗಿ ಬೇಯಿಸುವ ಅಡುಗೆ ವಿಧಾನ

ಮಣ್ಣಿನ ಪಾತ್ರೆಗಳಲ್ಲಿ ನಿಧಾನವಾಗಿ ಅಡುಗೆ ಮಾಡುವುದರಿಂದ ಬೇಳೆ ಚೆನ್ನಾಗಿ ಮೃದುವಾಗಲು ಮತ್ತು ಅದರ ರುಚಿ ಉತ್ತಮವಾಗಲು ಸಹಾಯವಾಗಬಹುದು. ಈ ವಿಧಾನದಲ್ಲಿ ಸರಿಯಾದ ಪ್ರಮಾಣದ ನೀರು ಬಳಸಿದರೆ ಬೇಳೆ ಒಣಗದಂತೆ ಬೇಯಿಸಬಹುದು.

ಮಣ್ಣಿನ ಪಾತ್ರೆಗಳನ್ನು ಬಳಸುವ ಸರಿಯಾದ ವಿಧಾನ

ಹೊಸ ಪಾತ್ರೆಯನ್ನು ಸಿದ್ಧಪಡಿಸಿ: ಪಾತ್ರೆಯ ತಯಾರಕರು ನೀಡಿರುವ ಸೂಚನೆಗಳನ್ನು ಅನುಸರಿಸಿ. ಕೆಲವು ಮಣ್ಣಿನ ಪಾತ್ರೆಗಳನ್ನು ಮೊದಲ ಬಳಕೆಗೆ ಮುನ್ನ ನೀರಿನಲ್ಲಿ ನೆನೆಸಬೇಕಾಗಬಹುದು. ಎಲ್ಲ ಪಾತ್ರೆಗಳಿಗೂ 8–10 ಗಂಟೆಗಳ ಕಾಲ ನೆನೆಸುವುದು ಕಡ್ಡಾಯವಲ್ಲ.

ಸ್ವಚ್ಛತೆಗೆ ಆದ್ಯತೆ ನೀಡಿ: ಪಾತ್ರೆಯನ್ನು ಬಳಸಿದ ನಂತರ ಚೆನ್ನಾಗಿ ತೊಳೆಯಿರಿ ಮತ್ತು ಸಂಪೂರ್ಣ ಒಣಗಲು ಬಿಡಿ.

ತೀವ್ರ ಉರಿಯಲ್ಲಿ ಇಡಬೇಡಿ: ಪಾತ್ರೆ ನೇರವಾಗಿ ಗ್ಯಾಸ್ ಮೇಲೆ ಬಳಸಲು ಸೂಕ್ತವಾಗಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ. ಉಷ್ಣತೆಯನ್ನು ನಿಧಾನವಾಗಿ ಹೆಚ್ಚಿಸಿ. ಹಠಾತ್ ಉಷ್ಣತೆಯ ಬದಲಾವಣೆಯಿಂದ ಪಾತ್ರೆ ಬಿರುಕು ಬಿಡಬಹುದು.

ಆಹಾರಕ್ಕೆ ಸುರಕ್ಷಿತವಾದ ಪಾತ್ರೆ ಆಯ್ಕೆಮಾಡಿ: ಆಹಾರ ಬೇಯಿಸಲು ತಯಾರಿಸಲಾದ, ಸುರಕ್ಷಿತ ಲೇಪನವಿರುವ ಮಣ್ಣಿನ ಪಾತ್ರೆಗಳನ್ನು ಮಾತ್ರ ಬಳಸಿ. ಹಾನಿಗೊಂಡ ಅಥವಾ ಸುರಕ್ಷಿತವಲ್ಲದ ಪಾತ್ರೆಗಳನ್ನು ಬಳಸಬೇಡಿ.

ಬೇಳೆಯನ್ನು ಚೆನ್ನಾಗಿ ಬೇಯಿಸಿ: ಬೇಳೆಯನ್ನು ಸರಿಯಾದ ಪ್ರಮಾಣದ ನೀರಿನಲ್ಲಿ ಸಂಪೂರ್ಣವಾಗಿ ಬೇಯಿಸಿ. ಇದರಿಂದ ತಿನ್ನಲು ಸುಲಭವಾಗುತ್ತದೆ ಮತ್ತು ಆಹಾರ ಸುರಕ್ಷತೆಯೂ ಕಾಪಾಡಲ್ಪಡುತ್ತದೆ.

ಆರೋಗ್ಯಕ್ಕೆ ಉತ್ತಮವಾಗಿರುವ ನೆಲ್ಲಿಕಾಯಿ ನಾಲ್ಕೇ ದಿನಕ್ಕೆ ಮೆದುವಾಗ್ತಿದ್ಯಾ? ಅಜ್ಜಿಯ ಈ ಟಿಪ್ಸ್‌ ಫಾಲೋ ಮಾಡಿ

Roopa Hegde — Thu, 29 Oct 2026 11:33:49 +0530

ಚಳಿಗಾಲ ಬರ್ತಿದ್ದಂತೆ ಮಾರ್ಕೆಟ್‌ ನಲ್ಲಿ ನೆಲ್ಲಿಕಾಯಿ ದರ್ಬಾರ್‌ ಜೋರಾಗುತ್ತೆ. ನೆಲ್ಲಿಕಾಯಿ ರುಚಿಯಲ್ಲಿ ಹುಳಿಯಾಗಿದ್ದರೂ, ಆರೋಗ್ಯಕ್ಕೆ ಸಾಕಷ್ಟು ಪ್ರಯೋಜನಕಾರಿ. ಪ್ರತಿ ದಿನ ನೆಲ್ಲಿಕಾಯಿ ಜ್ಯೂಸ್‌ ಕುಡಿಯುವವರು ನಮ್ಮಲ್ಲಿದ್ದಾರೆ. ಹಾಗಂತ ಒಂದೇ ದಿನ ಕೆಜಿ ಕೆಜಿ ನೆಲ್ಲಿಕಾಯಿ ಖರೀದಿ ಮಾಡಿದ್ರೆ ಅದು ಬೇಗ ಹಾಳಾಗುತ್ತದೆ. ಕೆಲವೇ ದಿನಗಳಲ್ಲಿ ಅದು ಮೆತ್ತಗಾಗಲು ಶುರುವಾಗುತ್ತೆ. ನೆಲ್ಲಿಕಾಯಿ ಬಹಳ ದಿನ ಚೆನ್ನಾಗಿರ್ಬೇಕು ಅಂದ್ರೆ ಈ ಟ್ರಿಕ್ಸ್‌ ಫಾಲೋ ಮಾಡಿ.

ಸಾಸಿವೆ ಎಣ್ಣೆ

ನೆಲ್ಲಿಕಾಯಿಯನ್ನು ದೀರ್ಘಕಾಲ ಸಂಗ್ರಹಿಸಿಡಲು ಹಳೆಯ ಕಾಲದಿಂದಲೂ ಬಳಸುತ್ತಿರುವ ಒಂದು ವಿಧಾನವೆಂದ್ರೆ ಅದರ ಮೇಲೆ ಸ್ವಲ್ಪ ಎಣ್ಣೆ ಹಚ್ಚುವುದು. ಇದಕ್ಕಾಗಿ ಮೊದಲು ತಾಜಾ ನೆಲ್ಲಿಕಾಯಿಯನ್ನು ಚೆನ್ನಾಗಿ ತೊಳೆದು, ಬಟ್ಟೆಯಿಂದ ಸಂಪೂರ್ಣವಾಗಿ ಒಣಗಿಸಬೇಕು. ನೆಲ್ಲಿಕಾಯಿಯ ಮೇಲೆ ನೀರು ಇರಬಾರದು. ಈಗ ಕೈಗೆ ಸ್ವಲ್ಪ ಸಾಸಿವೆ ಎಣ್ಣೆಯನ್ನು ತೆಗೆದುಕೊಂಡು ಒಂದೊಂದೇ ನೆಲ್ಲಿಕಾಯಿಗೆ ಚೆನ್ನಾಗಿ ಹಚ್ಚಿ. ಬಳಿಕ ಅವುಗಳನ್ನು ಪ್ಲಾಸ್ಟಿಕ್ ಬ್ಯಾಗ್ನಲ್ಲಿ ಹಾಕಿ ಫ್ರಿಜ್ನಲ್ಲಿ ಇಡಿ. ಹೀಗೆ ಮಾಡಿದ್ರೆ ಅನೇಕ ದಿನ ನೆಲ್ಲಿಕಾಯಿ ಹಾಳಾಗದೆ ಉಳಿಯುತ್ತದೆ.

ಏರ್ಟೈಟ್ ಕಂಟೇನರ್ ಬಳಸಿ

ಬೇರೆ ಯಾವುದೇ ಪದಾರ್ಥವನ್ನು ಬಳಸದೆ ನೆಲ್ಲಿಕಾಯಿಯನ್ನು ಸಂಗ್ರಹಿಸಿಡಲು ಏರ್ಟೈಟ್ ಕಂಟೇನರ್ ಕೂಡ ಸುಲಭವಾದ ವಿಧಾನವಾಗಿದೆ. ಮೊದಲು ನೆಲ್ಲಿಕಾಯಿಯನ್ನು ತೊಳೆದು ಸ್ವಚ್ಛಗೊಳಿಸಿ. ಬಳಿಕ ಕಿಚನ್ ಟವೆಲ್ ಅಥವಾ ಒಣ ಬಟ್ಟೆಯಿಂದ ಚೆನ್ನಾಗಿ ಒರೆಸಿ. ನೆಲ್ಲಿಕಾಯಿ ಸಂಪೂರ್ಣವಾಗಿ ಒಣಗಿದ ನಂತರ ಏರ್ಟೈಟ್ ಕಂಟೇನರ್ನಲ್ಲಿ ಹಾಕಿ ಫ್ರಿಜ್ನಲ್ಲಿ ಇಡಿ. ಕಂಟೇನರ್ ಅನ್ನು ಸರಿಯಾಗಿ ಮುಚ್ಚಬೇಕು. ಇದರಿಂದ ಒಳಗೆ ಗಾಳಿ ಮತ್ತು ತೇವಾಂಶದ ಪ್ರಭಾವ ಕಡಿಮೆಯಾಗುತ್ತದೆ. ಈ ವಿಧಾನವು ನೆಲ್ಲಿಕಾಯಿಯನ್ನು ಸ್ವಲ್ಪ ಸಮಯದವರೆಗೆ ತಾಜಾವಾಗಿಡಲು ಸಹಾಯ ಮಾಡುತ್ತದೆ.

ಕುದಿಸಿ, ಒಣಗಿಸಿ ಸಂಗ್ರಹಿಸಿ

ನೆಲ್ಲಿಕಾಯಿಯ ಶೆಲ್ಫ್ ಲೈಫ್ ಹೆಚ್ಚಿಸಲು ಅದನ್ನು ಕುದಿಸಿ, ಒಣಗಿಸಿಯೂ ಸಂಗ್ರಹಿಸಬಹುದು. ಇದಕ್ಕಾಗಿ ಮೊದಲು ನೆಲ್ಲಿಕಾಯಿಯ ಬೀಜಗಳನ್ನು ತೆಗೆದುಹಾಕಿ. ನಂತರ ಅವುಗಳನ್ನು ನೀರಿನಲ್ಲಿ ಸುಮಾರು 10ರಿಂದ 15 ನಿಮಿಷಗಳ ಕಾಲ ಕುದಿಸಿ. ಕುದಿಸಿದ ಬಳಿಕ ನೆಲ್ಲಿಕಾಯಿಯನ್ನು ಚೆನ್ನಾಗಿ ಒಣಗಿಸಿ. ನಂತರ ಒಂದರಿಂದ ಎರಡು ದಿನಗಳ ಕಾಲ ಬಿಸಿಲಿನಲ್ಲಿ ಇಡಿ. ಇದರಿಂದ ನೆಲ್ಲಿಕಾಯಿ ಸಂಪೂರ್ಣವಾಗಿ ಒಣಗುತ್ತದೆ. ನೆಲ್ಲಿಕಾಯಿ ಚೆನ್ನಾಗಿ ಒಣಗಿ ಗಟ್ಟಿಯಾದ ನಂತರ ಅದನ್ನು ಏರ್ಟೈಟ್ ಕಂಟೇನರ್ನಲ್ಲಿ ತುಂಬಿಸಿ ಇಡಿ. ಈ ರೀತಿ ನೆಲ್ಲಿಕಾಯಿಯನ್ನು ದೀರ್ಘಕಾಲ ಬಳಸಬಹುದು.

ನೆಲ್ಲಿಕಾಯಿ ಪುಡಿ ಮಾಡಿ ಸಂಗ್ರಹಿಸಿಡಿ

ನಿಮ್ಮ ಬಳಿ ಹೆಚ್ಚಿನ ಪ್ರಮಾಣದಲ್ಲಿ ನೆಲ್ಲಿಕಾಯಿ ಇದ್ದರೆ, ಅದನ್ನು ಪುಡಿ ಮಾಡಿಟ್ಟುಕೊಳ್ಳುವುದು ಕೂಡ ಉತ್ತಮ ಆಯ್ಕೆಯಾಗಿದೆ. ಇದಕ್ಕಾಗಿ ಮೊದಲು ನೆಲ್ಲಿಕಾಯಿಯನ್ನು ಕುದಿಸಿ, ಬಿಸಿಲಿನಲ್ಲಿ ಚೆನ್ನಾಗಿ ಒಣಗಿಸಬೇಕು. ನೆಲ್ಲಿಕಾಯಿ ಸಂಪೂರ್ಣವಾಗಿ ಒಣಗಿ ಗಟ್ಟಿಯಾದ ನಂತರ ಅದನ್ನು ಗ್ರೈಂಡರ್ನಲ್ಲಿ ಹಾಕಿ ನುಣ್ಣಗೆ ಪುಡಿ ಮಾಡಿಕೊಳ್ಳಿ. ತಯಾರಾದ ನೆಲ್ಲಿಕಾಯಿ ಪುಡಿಯನ್ನು ಏರ್ಟೈಟ್ ಕಂಟೇನರ್ನಲ್ಲಿ ಸಂಗ್ರಹಿಸಿಡಿ. ಅಗತ್ಯಕ್ಕೆ ತಕ್ಕಂತೆ ಈ ಪುಡಿಯನ್ನು ನೀರಿನಲ್ಲಿ ಬೆರೆಸಿ ಪಾನೀಯವಾಗಿ ಸೇವಿಸಬಹುದು ಅಥವಾ ತರಕಾರಿಗಳಲ್ಲಿಯೂ ಬಳಸಬಹುದು.

ನೆಲ್ಲಿಕಾಯಿ ಕ್ಯಾಂಡಿ

ನೆಲ್ಲಿಕಾಯಿಯನ್ನು ದೀರ್ಘಕಾಲ ಬಳಸಲು ಮತ್ತೊಂದು ವಿಧಾನವೆಂದರೆ ಅದರಿಂದ ಕ್ಯಾಂಡಿ ತಯಾರಿಸುವುದು. ನೆಲ್ಲಿಕಾಯಿಯನ್ನು ನೇರವಾಗಿ ತಿನ್ನಲು ಇಷ್ಟಪಡದವರಿಗೆ ಇದು ಉತ್ತಮ ಆಯ್ಕೆಯಾಗಿದೆ. ಮಕ್ಕಳಿಗೂ ಇದರ ರುಚಿ ಹೆಚ್ಚು ಇಷ್ಟವಾಗುತ್ತದೆ. ಇದಕ್ಕಾಗಿ ನೆಲ್ಲಿಕಾಯಿಯನ್ನು ಮೊದಲು ಕುದಿಸಿ, ಬಿಸಿಲಿನಲ್ಲಿ ಒಣಗಿಸಬೇಕು. ನಂತರ ಅದಕ್ಕೆ ಸಾಕಷ್ಟು ಪ್ರಮಾಣದಲ್ಲಿ ಸಕ್ಕರೆ ಸೇರಿಸಲಾಗುತ್ತದೆ. ಇದು ಹಲವು ತಿಂಗಳುಗಳವರೆಗೆ ಸಂಗ್ರಹಿಸಿಡಲು ಸಹಾಯ ಮಾಡುತ್ತದೆ.

ಈ ವಿಷಯ ನೆನಪಿರಲಿ

ನೆಲ್ಲಿಕಾಯಿಯನ್ನು ಸಂಗ್ರಹಿಸುವ ಮೊದಲು ಚೆನ್ನಾಗಿ ತೊಳೆದು ಸಂಪೂರ್ಣವಾಗಿ ಒಣಗಿಸುವುದು ಮುಖ್ಯ. ನೆಲ್ಲಿಕಾಯಿಯ ಮೇಲೆ ನೀರು ಅಥವಾ ತೇವಾಂಶ ಉಳಿದಿದ್ದರೆ ಅದು ಬೇಗನೆ ಹಾಳಾಗಬಹುದು. ನೆಲ್ಲಿಕಾಯಿಯನ್ನು ಸಂಗ್ರಹಿಸುವ ಕಂಟೇನರ್ ಕೂಡ ಸ್ವಚ್ಛವಾಗಿ ಮತ್ತು ಒಣಗಿರಬೇಕು.

“ಮನೆಯಂತೆ ಭಾಸವಾಗುತ್ತದೆ”: ಬೆಂಗಳೂರು ದೋಸೆ, ಫಿಲ್ಟರ್ ಕಾಫಿಗೆ ಮನಸೋತ ಜರ್ಮನ್ ವ್ಯಕ್ತಿ

Sushma Hegde — Thu, 29 Oct 2026 10:24:34 +0530

ಬೆಂಗಳೂರು: ಸಿಲಿಕಾನ್ ಸಿಟಿ ಬೆಂಗಳೂರಿಗೆ ಬಂದವರು ಇಲ್ಲಿನ ವಾತಾವರಣ, ಜನಜೀವನ ಮತ್ತು ಆಹಾರ ಸಂಸ್ಕೃತಿಗೆ ಮಾರುಹೋಗುವುದು ಹೊಸದೇನಲ್ಲ. ಅದರಲ್ಲೂ ದಕ್ಷಿಣ ಭಾರತದ ದೋಸೆ ಹಾಗೂ ಫಿಲ್ಟರ್ ಕಾಫಿಗೆ ಮನಸೋಲದವರೇ ಕಡಿಮೆ. ಬೆಂಗಳೂರಿನಲ್ಲಿ ವಾಸಿಸುತ್ತಿರುವ ಜರ್ಮನ್ ವ್ಯಕ್ತಿಯೊಬ್ಬರು ಇಲ್ಲಿನ ದೋಸೆ ಮತ್ತು ಫಿಲ್ಟರ್ ಕಾಫಿ ತಮ್ಮ ಪಾಲಿಗೆ ಮನೆಯಲ್ಲಿರುವಂತಹ ಆತ್ಮೀಯ ಭಾವನೆ ನೀಡುತ್ತದೆ ಎಂದು ಹೇಳಿಕೊಂಡಿದ್ದಾರೆ. ಈ ಕುರಿತ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಗಮನ ಸೆಳೆಯುತ್ತಿದೆ.

ದೋಸೆ, ಫಿಲ್ಟರ್ ಕಾಫಿಯಲ್ಲಿ ಕಂಡುಕೊಂಡ ಆತ್ಮೀಯತೆ!

ಮ್ಯಾಡ್ಸ್ ಎಂಬ ಕಂಟೆಂಟ್ ಕ್ರಿಯೇಟರ್ ಬೆಂಗಳೂರಿನ ಜಯನಗರದಲ್ಲಿರುವ ದಕ್ಷಿಣ್ ತಿಂಡಿಯಲ್ಲಿ ದೋಸೆ ಮತ್ತು ಫಿಲ್ಟರ್ ಕಾಫಿ ಸವಿಯುತ್ತಿರುವ ವಿಡಿಯೋವನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದಾರೆ. ಜಯನಗರದಲ್ಲಿ ಕಾಲೇಜು ಮುಗಿದ ಬಳಿಕ ದೋಸೆ ಮತ್ತು ಫಿಲ್ಟರ್ ಕಾಫಿ ಸೇವಿಸುವುದು ತಮ್ಮ ದಿನಚರಿಯ ಭಾಗವಾಗಿದ್ದು, ಈ ಅನುಭವ ಈಗ ತಮಗೆ ಮನೆಯಲ್ಲಿರುವಂತಹ ಭಾವನೆ ನೀಡುತ್ತಿದೆ ಎಂದು ಅವರು ವಿವರಿಸಿದ್ದಾರೆ. ವಿದೇಶದಿಂದ ಬಂದವರಿಗೆ ಹೊಸ ದೇಶದ ಆಹಾರ ಪದ್ಧತಿಗೆ ಹೊಂದಿಕೊಳ್ಳಲು ಸ್ವಲ್ಪ ಸಮಯ ಬೇಕಾಗಬಹುದು. ಆದರೆ, ಒಮ್ಮೆ ಅಲ್ಲಿನ ರುಚಿ ಮತ್ತು ಜೀವನಶೈಲಿಗೆ ಒಗ್ಗಿಕೊಂಡರೆ, ಅದೇ ಆಹಾರ ದಿನನಿತ್ಯದ ಬದುಕಿನ ಅವಿಭಾಜ್ಯ ಅಂಗವಾಗುತ್ತದೆ. ಮ್ಯಾಡ್ಸ್ ಅವರ ಅನುಭವವೂ ಇದನ್ನೇ ತೋರಿಸುತ್ತದೆ.

“ಮನೆಯಂತೆ ಭಾಸವಾಗುತ್ತದೆ” ಎಂದ ಜರ್ಮನ್ ವ್ಯಕ್ತಿ

ತಮ್ಮ ಇನ್‌ಸ್ಟಾಗ್ರಾಮ್ ಪೋಸ್ಟ್‌ನಲ್ಲಿ ಮ್ಯಾಡ್ಸ್, “ನೀವು ಜರ್ಮನ್ ಆಗಿದ್ದು, ಜಯನಗರದಲ್ಲಿ ಕಾಲೇಜು ಮುಗಿದ ನಂತರ ದೋಸೆ ಮತ್ತು ಫಿಲ್ಟರ್ ಕಾಫಿ ಸೇವಿಸುತ್ತಿದ್ದೀರಿ. ಹೇಗೋ ಅದು ಮನೆಯಲ್ಲಿರುವಂತೆ ಭಾಸವಾಗುತ್ತದೆ” ಎಂಬ ಅರ್ಥದ ಶೀರ್ಷಿಕೆಯನ್ನು ಬರೆದಿದ್ದಾರೆ. ದಕ್ಷಿಣ ಭಾರತದ ಜನರಿಗೆ ದೋಸೆ ಮತ್ತು ಫಿಲ್ಟರ್ ಕಾಫಿ ಕೇವಲ ಆಹಾರವಲ್ಲ; ಅದು ಬೆಳಗಿನ ಉಪಾಹಾರ, ಸ್ನೇಹಿತರೊಂದಿಗಿನ ಮಾತುಕತೆ ಮತ್ತು ದಿನನಿತ್ಯದ ಜೀವನದ ಒಂದು ಭಾಗ. ಇದೇ ಸರಳ ಅನುಭವ ವಿದೇಶಿ ವ್ಯಕ್ತಿಯೊಬ್ಬರಿಗೂ ಆತ್ಮೀಯತೆಯನ್ನು ನೀಡುತ್ತಿರುವುದು ಹಲವರ ಗಮನ ಸೆಳೆದಿದೆ.

ನೆಟ್ಟಿಗರಿಂದ ತಮಾಷೆಯ ಕಾಮೆಂಟ್‌ಗಳ ಸುರಿಮಳೆ!

ಮ್ಯಾಡ್ಸ್ ಅವರ ವಿಡಿಯೋಗೆ ಸಾಮಾಜಿಕ ಜಾಲತಾಣ ಬಳಕೆದಾರರು ತಮಾಷೆಯ ಹಾಗೂ ಆತ್ಮೀಯ ಪ್ರತಿಕ್ರಿಯೆಗಳನ್ನು ನೀಡಿದ್ದಾರೆ. ಒಬ್ಬರು, “ನಾನು ಇಲ್ಲಿ ಜರ್ಮನಿಯಲ್ಲಿ ಡೋನರ್ ತಿನ್ನುತ್ತಿದ್ದೇನೆ” ಎಂದು ಕಾಮೆಂಟ್ ಮಾಡಿದ್ದಾರೆ.

ಮತ್ತೊಬ್ಬರು, “ದೋಸೆ ಅವರನ್ನು ಅರ್ಧ ಭಾರತೀಯನನ್ನಾಗಿ ಮಾಡಿದೆ” ಎಂದು ತಮಾಷೆ ಮಾಡಿದ್ದಾರೆ. “ಸರ್ಕಾರದಿಂದ ಆಧಾರ್ ಕಾರ್ಡ್ ಅನುಮೋದಿಸಲಾಗಿದೆ” ಹಾಗೂ “ಅಧಿಕೃತವಾಗಿ ಜಯನಗರದ ಸ್ಥಳೀಯ” ಎಂಬ ಕಾಮೆಂಟ್‌ಗಳೂ ಗಮನ ಸೆಳೆದಿವೆ.

ಇನ್ನೊಬ್ಬ ಬಳಕೆದಾರರು, “ಕಾಫಿ ಕುಡಿದ ನಂತರ ದೋಸೆ ತಿಂದರೆ ಅದರ ರುಚಿಯೇ ಬೇರೆ” ಎಂದು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ಮತ್ತೊಬ್ಬರು, “ಬ್ರೋ ಕ್ಯಾಲಿಫೋರ್ನಿಯಾ ಬುರ್ರಿಟೋ ಬಿಟ್ಟು ದಕ್ಷಿಣ್ ತಿಂಡಿಯನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಸಂಸ್ಕೃತಿಯನ್ನು ಗೌರವಿಸುವುದು ಅಂದರೆ ಇದೇ” ಎಂದು ಬರೆದಿದ್ದಾರೆ.

ಬೆಂಗಳೂರಿನ ಆಹಾರ ಸಂಸ್ಕೃತಿಗೆ ಮತ್ತೊಂದು ಮೆಚ್ಚುಗೆ

ಬೆಂಗಳೂರು ಇಂದು ದೇಶ-ವಿದೇಶಗಳ ಜನರಿಗೆ ಉದ್ಯೋಗ, ಶಿಕ್ಷಣ ಮತ್ತು ಹೊಸ ಅವಕಾಶಗಳನ್ನು ನೀಡುತ್ತಿರುವ ನಗರ. ಇಲ್ಲಿಗೆ ಬರುವವರು ನಗರದ ವೈವಿಧ್ಯಮಯ ಆಹಾರ ಸಂಸ್ಕೃತಿಯನ್ನೂ ಅನುಭವಿಸುತ್ತಾರೆ. ಇಡ್ಲಿ, ದೋಸೆ, ವಡೆ ಮತ್ತು ಫಿಲ್ಟರ್ ಕಾಫಿಯಂತಹ ಸಾಂಪ್ರದಾಯಿಕ ತಿನಿಸುಗಳು ಸ್ಥಳೀಯರಷ್ಟೇ ಅಲ್ಲದೆ ವಿದೇಶಿಗರನ್ನೂ ಆಕರ್ಷಿಸುತ್ತಿವೆ.

ಜರ್ಮನ್ ವ್ಯಕ್ತಿಯೊಬ್ಬರಿಗೆ ಜಯನಗರದ ದೋಸೆ ಮತ್ತು ಫಿಲ್ಟರ್ ಕಾಫಿ ಮನೆಯ ನೆನಪನ್ನು ಮೂಡಿಸುತ್ತಿರುವುದು, ಆಹಾರವು ಭಾಷೆ ಮತ್ತು ದೇಶಗಳ ಗಡಿಯನ್ನು ಮೀರಿ ಜನರನ್ನು ಬೆಸೆಯಬಲ್ಲದು ಎಂಬುದಕ್ಕೆ ಮತ್ತೊಂದು ಉದಾಹರಣೆಯಾಗಿದೆ.

ಒಟ್ಟಿನಲ್ಲಿ, ಬೆಂಗಳೂರಿನ ದೋಸೆ ಮತ್ತು ಫಿಲ್ಟರ್ ಕಾಫಿ ಕೇವಲ ರುಚಿಗೆ ಮಾತ್ರವಲ್ಲ, ಆತ್ಮೀಯ ಅನುಭವಕ್ಕೂ ಹೆಸರಾಗಿವೆ ಎಂಬುದನ್ನು ಮ್ಯಾಡ್ಸ್ ಅವರ ವಿಡಿಯೋ ಮತ್ತೊಮ್ಮೆ ತೋರಿಸಿದೆ.

Gut Health Tips: ಕರುಳಿನ ಆರೋಗ್ಯ ಹೆಚ್ಚಿಸಲು ಸಹಾಯ ಮಾಡುವ ಈ ಆಹಾರಗಳನ್ನು ಅಗತ್ಯವಿದ್ದಾಗ ತಪ್ಪದೇ ಸೇವಿಸಿ!

Shriram Bhat — Wed, 28 Oct 2026 21:53:13 +0530

ಕರುಳಿನ ಆರೋಗ್ಯ ಎಂದರೆ ನಮ್ಮ ಜೀರ್ಣಾಂಗ ವ್ಯವಸ್ಥೆಯಲ್ಲಿರುವ ಸೂಕ್ಷ್ಮಾಣುಜೀವಿಗಳ (ಗಟ್ ಮೈಕ್ರೋಬಯೋಮ್) ಸಮತೋಲನ ಕಾಪಾಡುವುದು. ಜೀರ್ಣಕ್ರಿಯೆ ಸುಗಮವಾಗಿ ನಡೆಯಲು ಇದು ಬಹಳ ಮುಖ್ಯ. ನಿಮ್ಮ ಕರುಳಿನ ಆರೋಗ್ಯಕ್ಕೆ ಅಗತ್ಯವಿದ್ದಾಗ ತಪ್ಪದೇ ಈ ಆಹಾರಗಳನ್ನು ಸೇವಿಸಿ!

ಕರುಳಿನ ಆರೋಗ್ಯ ಎಂದರೆ ನಮ್ಮ ಜೀರ್ಣಾಂಗ ವ್ಯವಸ್ಥೆಯಲ್ಲಿರುವ ಸೂಕ್ಷ್ಮಾಣುಜೀವಿಗಳ (ಗಟ್ ಮೈಕ್ರೋಬಯೋಮ್) ಸಮತೋಲನ ಕಾಪಾಡುವುದು. ಜೀರ್ಣಕ್ರಿಯೆ ಸುಗಮವಾಗಿ ನಡೆಯಲು ಇದು ಬಹಳ ಮುಖ್ಯ.

ಹುದುಗಿಸಿದ ಬೆಟ್ಟದ ನೆಲ್ಲಿಕಾಯಿ ಕರುಳನ್ನು ಆರೋಗ್ಯವಾಗಿಡುತ್ತದೆ. ಉಪ್ಪು ಮತ್ತು ನೀರನ್ನು ಬಳಸಿ ಮನೆಯಲ್ಲೇ ಇದನ್ನು ಸುಲಭವಾಗಿ ಹುದುಗಿಸಬಹುದು. ಮೊದಲು ನೆಲ್ಲಿಕಾಯಿಯನ್ನು ತೊಳೆದು ಚೆನ್ನಾಗಿ ಒರೆಸಿಕೊಳ್ಳಿ. ಇದನ್ನು ತುಂಡುಗಳಾಗಿ ಕತ್ತರಿಸಿ, ಸ್ವಚ್ಛವಾದ ಗಾಜಿನ ಬಾಟಲಿಗೆ ಹಾಕಿ. ನೆಲ್ಲಿಕಾಯಿಯ ತೂಕದ ಶೇ 2ರಷ್ಟು ಉಪ್ಪನ್ನು ಸೇರಿಸಿ. ನೆಲ್ಲಿಕಾಯಿ ಮುಳುಗುವಷ್ಟು ಕಾಯಿಸಿ ಆರಿಸಿದ ನೀರನ್ನು ಹಾಕಿ. ಮುಚ್ಚಳವನ್ನು ಭದ್ರವಾಗಿ ಮುಚ್ಚಿ, ರೂಮ್ ಟೆಂಪರೇಚರ್‌ನಲ್ಲಿ ಕೆಲವು ದಿನಗಳ ಕಾಲ ಹುದುಗಲು ಬಿಡಿ. ಆಮೇಲೆ ಇದನ್ನು ಫ್ರಿಡ್ಜ್‌ನಲ್ಲಿ ಇಟ್ಟುಕೊಳ್ಳಿ.

ಮನೆಯಲ್ಲೇ ತಯಾರಿಸಿದ ಗ್ರೀಕ್ ಯೋಗರ್ಟ್ ಮತ್ತೊಂದು ಅತ್ಯುತ್ತಮ ಪ್ರೋಬಯೋಟಿಕ್ ಆಹಾರ. 500 ಎಂಎಲ್ ಹಾಲನ್ನು ಬಿಸಿ ಮಾಡಿ, ಉಗುರುಬೆಚ್ಚಗಾಗುವವರೆಗೆ ತಣ್ಣಗಾಗಲು ಬಿಡಿ. ಇದಕ್ಕೆ 1 ರಿಂದ 2 ಟೀಸ್ಪೂನ್ ಸಾಮಾನ್ಯ ಮೊಸರು ಸೇರಿಸಿ ತಿರುಗಿಸಿ. ಪಾತ್ರೆಯನ್ನು ಮುಚ್ಚಿ, ಗಟ್ಟಿಯಾಗುವವರೆಗೆ 6 ರಿಂದ 10 ಗಂಟೆಗಳ ಕಾಲ ಬೆಚ್ಚಗಿನ ಜಾಗದಲ್ಲಿ ಇಡಿ. ನಂತರ ಸ್ವಚ್ಛವಾದ ಮಸ್ಲಿನ್ ಬಟ್ಟೆಯಲ್ಲಿ 2 ರಿಂದ 4 ಗಂಟೆಗಳ ಕಾಲ ಸೋಸಿಕೊಂಡರೆ, ಗಟ್ಟಿಯಾದ ಮತ್ತು ಕ್ರೀಮಿಯಾದ ಗ್ರೀಕ್ ಯೋಗರ್ಟ್ ಸಿಗುತ್ತದೆ. ಇದನ್ನು ಪ್ರತಿದಿನದ ಊಟ ಅಥವಾ ಸ್ನ್ಯಾಕ್ಸ್ ಜೊತೆ ತಿನ್ನಬಹುದು.

ಹುದುಗಿಸಿದ ರಾಗಿ ಗಂಜಿ ಕರುಳಿಗೆ ಅತ್ಯುತ್ತಮ ಆಹಾರ. ರಾಗಿ ಹಿಟ್ಟನ್ನು ನೀರಿನಲ್ಲಿ ಬೆರೆಸಿ, ಮೃದುವಾದ ಗಂಜಿಯಂತೆ ಬೇಯಿಸಿಕೊಳ್ಳಿ. ನಂತರ ಇದನ್ನು ತಣ್ಣಗಾಗಲು ಬಿಡಿ. ಇದಕ್ಕೆ ಒಂದು ಚಮಚ ಮೊಸರು ಸೇರಿಸಿ ಚೆನ್ನಾಗಿ ತಿರುಗಿಸಿ. ಒಂದು ಸ್ವಚ್ಛವಾದ ಪಾತ್ರೆಯಲ್ಲಿ ಹಾಕಿ, ಬೆಚ್ಚಗಿನ ಜಾಗದಲ್ಲಿ 6 ರಿಂದ 8 ಗಂಟೆಗಳ ಕಾಲ ಹುದುಗಲು ಬಿಡಿ. ಚೆನ್ನಾಗಿ ಹುದುಗಿದ ನಂತರ ಇದನ್ನು ಫ್ರಿಡ್ಜ್‌ನಲ್ಲಿ ಇಟ್ಟು ಬಳಸಬಹುದು.

ಹುದುಗಿಸಿದ ಗಂಜಿ ನೀರು ಕರುಳಿನ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಇದನ್ನು ತಯಾರಿಸುವುದು ಕೂಡ ಬಹಳ ಸುಲಭ. ರಾತ್ರಿ ಉಳಿದ ಅನ್ನವನ್ನು ಕುಡಿಯುವ ನೀರಿನಲ್ಲಿ ನೆನೆಸಿಡಿ. ಪಾತ್ರೆಯನ್ನು ಮುಚ್ಚಿ 8 ರಿಂದ 12 ಗಂಟೆಗಳ ಕಾಲ ರೂಮ್ ಟೆಂಪರೇಚರ್‌ನಲ್ಲಿ ಹಾಗೆಯೇ ಬಿಡಿ. ಮರುದಿನ ಬೆಳಿಗ್ಗೆ ಇದಕ್ಕೆ ಸ್ವಲ್ಪ ಉಪ್ಪು ಸೇರಿಸಿ ಕುಡಿಯಿರಿ.

ಹುದುಗಿಸಿದ ಆಹಾರಗಳು ಜೀರ್ಣಿಸಿಕೊಳ್ಳಲು ತುಂಬಾ ಸುಲಭ. ಇವು ನಮ್ಮ ದೇಹದ ಚಯಾಪಚಯ ಕ್ರಿಯೆಯನ್ನು (ಮೆಟಬಾಲಿಸಂ) ಸುಧಾರಿಸುತ್ತವೆ. ತೂಕ ಇಳಿಸಿಕೊಳ್ಳಲು ಕೂಡ ಇದು ಸಹಾಯ ಮಾಡುತ್ತದೆ. ಪ್ರೋಬಯೋಟಿಕ್ಸ್ ಜೀರ್ಣಕ್ರಿಯೆಯನ್ನು ಉತ್ತಮಗೊಳಿಸಿ, ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತವೆ ಮತ್ತು ತೂಕ ಕಡಿಮೆ ಮಾಡಲು ನೆರವಾಗುತ್ತವೆ ಎಂದು ಅಧ್ಯಯನಗಳು ಹೇಳುತ್ತವೆ. ಆ 4 ಆಹಾರಗಳು ಯಾವುವು ಎಂದು ನೋಡೋಣ.

ಕರುಳಿನ ಆರೋಗ್ಯವು ನಮ್ಮ ಜೀರ್ಣಕ್ರಿಯೆ, ರೋಗನಿರೋಧಕ ಶಕ್ತಿ, ಚಯಾಪಚಯ ಮತ್ತು ಮಾನಸಿಕ ಆರೋಗ್ಯದ ಮೇಲೆ ನೇರ ಪರಿಣಾಮ ಬೀರುತ್ತದೆ. ಪ್ರೋಬಯೋಟಿಕ್ಸ್ ಎನ್ನುವುದು ನಮ್ಮ ಹೊಟ್ಟೆ ಮತ್ತು ಕರುಳಿನಲ್ಲಿರುವ ಒಳ್ಳೆಯ ಬ್ಯಾಕ್ಟೀರಿಯಾಗಳ ಸಮತೋಲನವನ್ನು ಕಾಪಾಡುವ ಜೀವಂತ ಸೂಕ್ಷ್ಮಾಣುಜೀವಿಗಳು. ವೈವಿಧ್ಯಮಯ ಮತ್ತು ಸಮತೋಲಿತ ಗಟ್ ಮೈಕ್ರೋಬಯೋಮ್ ಇದ್ದರೆ, ಜೀರ್ಣಕ್ರಿಯೆ ಸುಗಮವಾಗಿ ನಡೆಯುತ್ತದೆ. ಪ್ರೋಬಯೋಟಿಕ್ಸ್ ನಮ್ಮ ಕರುಳಿನ ಒಟ್ಟಾರೆ ಕಾರ್ಯಕ್ಷಮತೆಯನ್ನು ಹೆಚ್ಚಿಸುತ್ತವೆ.

ಬ್ಯಾಕ್ಟೀರಿಯಾ ಮತ್ತು ಈಸ್ಟ್‌ನಂತಹ ಸೂಕ್ಷ್ಮಾಣುಜೀವಿಗಳು ಆಹಾರದಲ್ಲಿರುವ ಸಕ್ಕರೆ ಮತ್ತು ಪಿಷ್ಟವನ್ನು ಒಡೆಯುವ ನೈಸರ್ಗಿಕ ಪ್ರಕ್ರಿಯೆಯೇ 'ಫರ್ಮೆಂಟೇಶನ್' (ಹುದುಗುವಿಕೆ). ಇದರಿಂದ ಆಹಾರದ ರುಚಿ ಮತ್ತು ಪೋಷಕಾಂಶಗಳು ಹೆಚ್ಚಾಗುತ್ತವೆ. ಆದರೆ, ಹುದುಗಿಸಿದ ಎಲ್ಲಾ ಆಹಾರಗಳೂ 'ಪ್ರೋಬಯೋಟಿಕ್' ಆಗಿರುವುದಿಲ್ಲ. ಉದಾಹರಣೆಗೆ, ಇಡ್ಲಿ ಮತ್ತು ದೋಸೆ ಹಿಟ್ಟನ್ನು ಹುದುಗಿಸಿದರೂ, ಅದನ್ನು ಬೇಯಿಸಿದಾಗ ಅದರಲ್ಲಿರುವ ಒಳ್ಳೆಯ ಬ್ಯಾಕ್ಟೀರಿಯಾಗಳು ಸಾಯುತ್ತವೆ. ಹಾಗಾಗಿ, ನೈಸರ್ಗಿಕವಾಗಿ ಹುದುಗಿಸಿದ ಆಹಾರಗಳನ್ನು ನಮ್ಮ ದೈನಂದಿನ ಡಯಟ್‌ನಲ್ಲಿ ಸೇರಿಸುವುದು ಒಳ್ಳೆಯ ಬ್ಯಾಕ್ಟೀರಿಯಾಗಳನ್ನು ಹೆಚ್ಚಿಸಲು ಇರುವ ಸುಲಭ ದಾರಿ.

Brain Health Foods: ಮೆದುಳಿನ ಆರೋಗ್ಯ ಹೆಚ್ಚಿಸಲು ನೀವು ಈ 6 ಆಹಾರಗಳನ್ನು ತಪ್ಪದೇ ತಿನ್ನಲೇಬೇಕು!

Shriram Bhat — Wed, 28 Oct 2026 20:23:42 +0530

ಮೆದುಳಿನ ಆರೋಗ್ಯವನ್ನು ಸುಧಾರಿಸಲು ನೀವು ತಿನ್ನಲೇಬೇಕಾದ 7 ಆಹಾರಗಳ ಮಾಹಿತಿ ಇಲ್ಲಿದೆ ನೋಡಿ. ವಿಶ್ವ ಮಾನಸಿಕ ಆರೋಗ್ಯದ ಈ ದಿನ, ನಿಮ್ಮ ಮಾನಸಿಕ ನೆಮ್ಮದಿ ಹಾಗೂ ಸುಸೂತ್ರದ ಜೀವನಕ್ಕಾಗಿ ಈ ಆಹಾರಗಳನ್ನು ದಿನಾಲೂ ತಪ್ಪದೇ ತಿನ್ನಿ.

ಬೆಂಗಳೂರಿನ ಮಲ್ಲೇಶ್ವರದ ಪ್ರಸಿದ್ಧ CTR ದೋಸೆಯಲ್ಲಿ ಜಿರಳೆ ಪತ್ತೆ, ಗ್ರಾಹಕರ ಕ್ಷಮೆ ಕೋರಿದ ಹೋಟೆಲ್‌

Santosh Naik — Wed, 28 Oct 2026 19:23:54 +0530

ಬೆಂಗಳೂರು (ಅ.28): ಸಿಲಿಕಾನ್ ಸಿಟಿ ಬೆಂಗಳೂರಿನ ಅತ್ಯಂತ ಹಳೆಯ ಹಾಗೂ ಜನಪ್ರಿಯ ಉಪಾಹಾರ ತಾಣಗಳಲ್ಲಿ ಒಂದಾದ ಮಲ್ಲೇಶ್ವರಂನ ‘ಸಿಟಿಆರ್’ (Central Tiffin Room - CTR) ಹೋಟೆಲ್‌ನಲ್ಲಿ ಆಹಾರದ ನೈರ್ಮಲ್ಯ ಮತ್ತು ಸ್ವಚ್ಛತೆ ಕುರಿತಾಗಿ ಸೋಶಿಯಲ್‌ ಮೀಡಿಯಾದಲ್ಲಿ ದೊಡ್ಡ ಮಟ್ಟದ ವಿವಾದ ಸೃಷ್ಟಿಯಾದ ಬೆನ್ನಲ್ಲೇ, ಹೋಟೆಲ್‌ ಅಧಿಕೃತವಾಗಿ ಗ್ರಾಹಕರಲ್ಲಿ ಬಹಿರಂಗ ಕ್ಷಮೆಯಾಚನೆ ಮಾಡಿದೆ.

ಮಲ್ಲೇಶ್ವರಂ ಔಟ್‌ಲೆಟ್‌ನಲ್ಲಿ ಮಸಾಲೆ ದೋಸೆ ಸೇವಿಸುವಾಗ ಅದರೊಳಗೆ ಜಿರಳೆ ಪತ್ತೆಯಾಗಿದೆ ಎಂದು ಗ್ರಾಹಕರೊಬ್ಬರು ದೂರಿದ್ದ ವಿಡಿಯೋ ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್ ಆಗಿತ್ತು. ಈ ವಿಚಾರವಾಗಿ ತೀವ್ರ ಆಕ್ರೋಶ ವ್ಯಕ್ತವಾದ ಹಿನ್ನೆಲೆಯಲ್ಲಿ ತಕ್ಷಣವೇ ಪ್ರಕಟಣೆ ನೀಡಿರುವ 'ಟೀಮ್ ಸಿಟಿಆರ್' (Team CTR), ಆಗಿರುವ ಘಟನೆಗೆ ನಾವು ಕ್ಷಮೆ ಯಾಚಿಸುತ್ತೇವೆ. ನಮ್ಮಿಂದ ಯಾವುದೇ ನೆಪಗಳಿಲ್ಲ, ಆಹಾರ ಸುರಕ್ಷತೆ ಮತ್ತು ಸ್ವಚ್ಛತೆಯ ವಿಚಾರದಲ್ಲಿ ನಾವು ಎಂದಿಗೂ ರಾಜಿ ಮಾಡಿಕೊಳ್ಳುವುದಿಲ್ಲ ಎಂದು ಹೇಳಿದೆ.

ಬಹಿರಂಗ ಕ್ಷಮೆಯಾಚನೆಯಲ್ಲಿ ಸಿಟಿಆರ್ ಹೇಳಿದ್ದೇನು?

ಸಾಮಾಜಿಕ ಜಾಲತಾಣಗಳಲ್ಲಿ ಪತ್ರಿಕಾ ಪ್ರಕಟಣೆಯನ್ನು ಹಂಚಿಕೊಂಡಿರುವ ಹೋಟೆಲ್‌,

ಕ್ಷಮೆಯಾಚನೆ: ನಮ್ಮ ಮಲ್ಲೇಶ್ವರಂ ಶಾಖೆಯ ಆರೋಗ್ಯ ಮತ್ತು ನೈರ್ಮಲ್ಯದ ಮಾನದಂಡಗಳಿಗೆ ಸಂಬಂಧಿಸಿದಂತೆ ಆನ್‌ಲೈನ್‌ನಲ್ಲಿ ಹರಿದಾಡುತ್ತಿರುವ ವಿಡಿಯೋ ನಮ್ಮ ಗಮನಕ್ಕೆ ಬಂದಿದೆ. ಇದರಿಂದ ಅಸಮಾಧಾನಗೊಂಡ ಪ್ರತಿಯೊಬ್ಬರಿಗೂ ನಾವು ಮೊದಲಿಗೆ ಕ್ಷಮೆ ಯಾಚಿಸುತ್ತೇವೆ.

ಯಾವುದೇ ನೆಪಗಳಿಲ್ಲ: ಈ ಘಟನೆಗೆ ನಮ್ಮ ಬಳಿ ಯಾವುದೇ ನೆಪಗಳಿಲ್ಲ. ಆಹಾರ ಸುರಕ್ಷತೆ ಮತ್ತು ಸ್ವಚ್ಛತೆ ನಮಗೆ ಅತ್ಯಂತ ಪ್ರಮುಖವಾದ ವಿಷಯ. ಘಟನೆ ಗಮನಕ್ಕೆ ಬಂದ ಕೂಡಲೇ ನಮ್ಮ ಅಡುಗೆಮನೆಯನ್ನು (Kitchen) ಸಂಪೂರ್ಣವಾಗಿ ಪರಿಶೀಲಿಸಲು ಮತ್ತು ಭವಿಷ್ಯದಲ್ಲಿ ಇಂತಹ ಘಟನೆಗಳು ಎಂದಿಗೂ ಮರುಕಳಿಸದಂತೆ ನೋಡಿಕೊಳ್ಳಲು ಅಗತ್ಯ ಹಾಗೂ ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಳ್ಳಲಾಗಿದೆ.

ಗ್ರಾಹಕರ ನಂಬಿಕೆ ಮುಖ್ಯ: "ದಶಕಗಳಿಂದ ಸಿಟಿಆರ್ ಕೇವಲ ದೋಸೆ ತಿನ್ನುವ ಜಾಗವಾಗಿ ಉಳಿದಿಲ್ಲ. ಅದು ನಿಮ್ಮ ಬೆಳಗಿನ ಜೀವನದ, ನಿಮ್ಮ ಒಡನಾಟದ ಒಂದು ಭಾಗವಾಗಿದೆ. ನಿರಾಶೆ ವ್ಯಕ್ತಪಡಿಸಿದ ಹಾಗೂ ನಮ್ಮ ಪರವಾಗಿ ನಿಂತ ಪ್ರತಿಯೊಬ್ಬರ ಧ್ವನಿಯನ್ನು ನಾವು ಆಲಿಸಿದ್ದೇವೆ. ನಿಮ್ಮ ನಂಬಿಕೆಯನ್ನು ನಾವು ಎಂದಿಗೂ ಹಗುರವಾಗಿ ಪರಿಗಣಿಸುವುದಿಲ್ಲ. ಅತ್ಯುನ್ನತ ಮಾನದಂಡ ಕಾಯ್ದುಕೊಳ್ಳಲು ನಮಗೆ ಎಚ್ಚರಿಸಿದ ಎಲ್ಲರಿಗೂ ಧನ್ಯವಾದಗಳು ಎಂದು ಸಿಟಿಆರ್ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.

ವಿವಾದಕ್ಕೆ ಕಾರಣವಾದ ಘಟನೆಯೇನು?

ವೈರಲ್‌ ವಿಡಿಯೋದ ಪ್ರಕಾರ, ಗ್ರಾಹಕರೊಬ್ಬರು ಮಲ್ಲೇಶ್ವರಂ ಸಿಟಿಆರ್‌ನಲ್ಲಿ ಮಸಾಲೆ ದೋಸೆ ಸೇವಿಸುತ್ತಿದ್ದಾಗ ಅದರೊಳಗೆ ಜಿರಳೆ ಸಿಕ್ಕಿತ್ತು. ಈ ಬಗ್ಗೆ ಹೋಟೆಲ್ ಸಿಬ್ಬಂದಿಗೆ ದೂರಿದಾಗ, ಸಿಬ್ಬಂದಿ ಕೇವಲ ಮತ್ತೊಂದು ದೋಸೆಯನ್ನು ಬದಲಾಯಿಸಿಕೊಡುತ್ತೇವೆ ಎಂದು ಹೇಳಿದ್ದರು ಎನ್ನಲಾಗಿದೆ. ಆಹಾರದಲ್ಲಿ ಜಿರಳೆ ಸಿಕ್ಕಾಗ ಕೇವಲ ಮತ್ತೊಂದು ದೋಸೆ ನೀಡಿದರೆ ಸಾಲದು, ಆಹಾರ ತಯಾರಿಸುವ ಸ್ಥಳದ ಸ್ವಚ್ಛತೆ ಹಾಗೂ ಅಡುಗೆಮನೆಯ ನೈರ್ಮಲ್ಯದ ಬಗ್ಗೆ ಸ್ಪಷ್ಟನೆ ನೀಡಬೇಕು ಎಂದು ಆಕ್ರೋಶ ವ್ಯಕ್ತಪಡಿಸಿದ್ದರು. ರುಚಿಗೆ ನೀಡುವಷ್ಟೇ ಪ್ರಾಮುಖ್ಯತೆಯನ್ನು ಗ್ರಾಹಕರ ಆರೋಗ್ಯ ಮತ್ತು ನೈರ್ಮಲ್ಯಕ್ಕೂ ನೀಡಬೇಕು ಎಂದು ಹೇಳಿದ್ದರು.

ವಿರಾಟ್ ಕೊಹ್ಲಿ ದಂಪತಿಯೂ ಸವಿದಿದ್ದ ಸಿಟಿಆರ್ ದೋಸೆ

ಬೆಣ್ಣೆ ದೋಸೆ ಹಾಗೂ ಮಸಾಲೆ ದೋಸೆಗೆ ಭಾರಿ ಹೆಸರಾಗಿರುವ ಸಿಟಿಆರ್‌ಗೆ ಪ್ರತಿದಿನ ಸಾವಿರಾರು ಸಂಖ್ಯೆಯಲ್ಲಿ ಗ್ರಾಹಕರು ಭೇಟಿ ನೀಡುತ್ತಾರೆ. ಸ್ಥಳೀಯರಷ್ಟೇ ಅಲ್ಲದೆ ದೇಶದ ಪ್ರಸಿದ್ಧ ಗಣ್ಯರೂ ಇಲ್ಲಿನ ದೋಸೆ ರುಚಿಗೆ ಫಿದಾ ಆಗಿದ್ದಾರೆ. ಕಳೆದ 2023 ರ ಏಪ್ರಿಲ್ 22 ರಂದು ಟೀಮ್ ಇಂಡಿಯಾ ಕ್ರಿಕೆಟ್ ತಾರೆ ವಿರಾಟ್ ಕೊಹ್ಲಿ ಹಾಗೂ ಅವರ ಪತ್ನಿ, ಬಾಲಿವುಡ್ ನಟಿ ಅನುಷ್ಕಾ ಶರ್ಮಾ ಅವರು ಮಲ್ಲೇಶ್ವರಂನ ಇದೇ ಸಿಟಿಆರ್‌ಗೆ ಭೇಟಿ ನೀಡಿ ಮಸಾಲೆ ದೋಸೆ ಸವಿದಿದ್ದರು. ಆ ಸಮಯದಲ್ಲಿ ಈ ಭೇಟಿ ಭಾರಿ ಟ್ರೆಂಡ್ ಸೃಷ್ಟಿಸಿತ್ತು. ಇದೀಗ ಅಂತಹದೇ ಪ್ರತಿಷ್ಠಿತ ಹೋಟೆಲ್‌ನಲ್ಲಿ ಆಹಾರ ಭದ್ರತೆಯ ಲೋಪ ಕಂಡುಬಂದ ತಕ್ಷಣವೇ ಆಡಳಿತ ಮಂಡಳಿಯು ತಪ್ಪನ್ನು ಒಪ್ಪಿಕೊಂಡು ಕ್ಷಮೆ ಕೇಳುವ ಮೂಲಕ ಗ್ರಾಹಕರ ನಂಬಿಕೆಯನ್ನು ಕಾಯ್ದುಕೊಳ್ಳುವ ಪ್ರಯತ್ನ ಮಾಡಿದೆ.

ಹಬ್ಬಕ್ಕೆ ರೆಸ್ಟೋರೆಂಟ್‌ ಸ್ಟೈಲ್‌ ನಲ್ಲಿ ಉದುರಾದ ಮಟರ್‌ ಪುಲಾವ್‌ ತಯಾರಿಸ್ಬೇಕಾ? ಈ ಟಿಪ್ಸ್‌ ಫಾಲೋ ಮಾಡಿ

Roopa Hegde — Wed, 28 Oct 2026 18:04:35 +0530

ಹಬ್ಬದ ಸೀಸನ್ ಶುರುವಾಗಿದೆ. ಮನೆಯಲ್ಲಿ ಹಬ್ಬದೂಟದ ಜೊತೆಗೆ ಅತಿಥಿಗಳಿಗಾಗಿ ವಿಶೇಷವಾದ ಅಡುಗೆ ಮಾಡ್ಬೇಕು ಅಂತ ಪ್ಲಾನ್‌ ಮಾಡ್ತಿರ್ತೀರಿ. ಹಿಂದೊಮ್ಮೆ ಮಾಡಿದ್ದ ಮಟರ್‌ ಪುಲಾವ್‌ ಮುದ್ದೆಯಾಗಿತ್ತು, ಅದನ್ನು ಮಾಡೋಕೆ ಭಯ ಅನ್ನೋರು ಕೆಲ ಟಿಪ್ಸ್‌ ಫಾಲೋ ಮಾಡಿ, ಸುಲಭವಾಗಿ ಹಸಿರು ಬಟಾಣಿ ಪುಲಾವ್‌ತಯಾರಿಸಿ.

ಮಟರ್‌ ಪುಲಾವ್‌

ಬಾಸ್ಮತಿ ಅಕ್ಕಿಯ ಪರಿಮಳ, ಹಸಿರು ಬಟಾಣಿ ಮತ್ತು ಘಮಘಮಿಸುವ ಮಸಾಲೆಗಳ ರುಚಿ ಸೇರಿಕೊಂಡರೆ ಪುಲಾವ್ ಇನ್ನಷ್ಟು ರುಚಿಯಾಗುತ್ತದೆ. ಆದರೆ ಕೆಲವರು ಮನೆಯಲ್ಲಿ ಪುಲಾವ್ ಮಾಡುವಾಗ ಮಾಡುವ ಸಣ್ಣ ತಪ್ಪುಗಳಿಂದ ಅನ್ನ ಅಂಟಿಕೊಂಡು ಬಿಡುತ್ತದೆ.

ಮಟರ್ ಪುಲಾವ್ ಗೆ ಬೇಕಾಗುವ ಸಾಮಗ್ರಿಗಳು

• ಬಾಸ್ಮತಿ ಅಕ್ಕಿ – ಒಂದೂವರೆ ಕಪ್

• ತುಪ್ಪ – 2 ಚಮಚ

• ಪಲಾವ್ ಎಲೆ – 1

• ಹಸಿರು ಏಲಕ್ಕಿ – 4

• ದೊಡ್ಡ ಏಲಕ್ಕಿ – 1

• ಚಕ್ಕೆ – 1 ಇಂಚಿನ ತುಂಡು

• ಲವಂಗ – 3

• ಕಾಳುಮೆಣಸು – 10ರಿಂದ 12

• ಜೀರಿಗೆ – ಅರ್ಧ ಚಮಚ

• ಗೋಡಂಬಿ – ಮೂರನೇ ಒಂದು ಕಪ್

• ತುರಿದ ಶುಂಠಿ – 1 ಚಮಚ

• ಹಸಿಮೆಣಸಿನಕಾಯಿ – 3ರಿಂದ 4

• ಹಸಿರು ಬಟಾಣಿ – 1 ಕಪ್

• ಉಪ್ಪು – ರುಚಿಗೆ ತಕ್ಕಷ್ಟು

• ಗರಂ ಮಸಾಲಾ – ಅರ್ಧ ಚಮಚ

• ನೀರು – ಸುಮಾರು ಎರಡೂವರೆ ಕಪ್

• ನಿಂಬೆ ರಸ – ಸ್ವಲ್ಪ

• ಕೊತ್ತಂಬರಿ ಸೊಪ್ಪು – ಅಲಂಕಾರಕ್ಕೆ

ಮಟರ್ ಪುಲಾವ್ ಮಾಡುವ ವಿಧಾನ

ಮೊದಲು ಬಾಸ್ಮತಿ ಅಕ್ಕಿಯನ್ನು ಎರಡು ಅಥವಾ ಮೂರು ಬಾರಿ ಸ್ವಚ್ಛವಾದ ನೀರಿನಲ್ಲಿ ತೊಳೆಯಿರಿ. ನಂತರ ಸುಮಾರು 20 ನಿಮಿಷ ನೆನೆಸಿಡಿ. ಇದರಿಂದ ಅಕ್ಕಿ ಚೆನ್ನಾಗಿ ಹಿಗ್ಗುತ್ತದೆ. ಬಳಿಕ ನೀರನ್ನು ಸಂಪೂರ್ಣವಾಗಿ ಬಸಿದು ಅಕ್ಕಿಯನ್ನು ಪಕ್ಕಕ್ಕಿಡಿ. ಒಂದು ಪಾತ್ರೆಯಲ್ಲಿ ತುಪ್ಪ ಬಿಸಿ ಮಾಡಿ. ಅದಕ್ಕೆ ಪಲಾವ್ ಎಲೆ, ಹಸಿರು ಏಲಕ್ಕಿ, ದೊಡ್ಡ ಏಲಕ್ಕಿ, ಚಕ್ಕೆ, ಲವಂಗ, ಕಾಳುಮೆಣಸು ಮತ್ತು ಜೀರಿಗೆ ಸೇರಿಸಿ. ಮಸಾಲೆಗಳಿಂದ ಪರಿಮಳ ಬರುವವರೆಗೆ ಹುರಿಯಿರಿ. ನಂತರ ಗೋಡಂಬಿ ಸೇರಿಸಿ, ಸ್ವಲ್ಪ ಬಣ್ಣ ಬದಲಾಗುವವರೆಗೆ ಹುರಿಯಿರಿ. ಗೋಡಂಬಿ ಸೇರಿಸುವುದರಿಂದ ಪುಲಾವ್ಗೆ ಶಾಹಿ ರುಚಿ ಸಿಗುತ್ತದೆ.

ಈಗ ತುರಿದ ಶುಂಠಿ ಮತ್ತು ಕತ್ತರಿಸಿದ ಹಸಿಮೆಣಸಿನಕಾಯಿ ಸೇರಿಸಿ. ಹಸಿ ವಾಸನೆ ಹೋಗುವವರೆಗೆ ಹುರಿಯಿರಿ. ನಂತರ ಹಸಿರು ಬಟಾಣಿ ಸೇರಿಸಿ ಸುಮಾರು ಒಂದು ನಿಮಿಷ ಚೆನ್ನಾಗಿ ಮಿಶ್ರಣ ಮಾಡಿ. ನೆನೆಸಿಟ್ಟ ಅಕ್ಕಿಯನ್ನು ಪಾತ್ರೆಗೆ ಹಾಕಿ, ಅಕ್ಕಿ ಮುರಿಯದಂತೆ ನಿಧಾನವಾಗಿ ಮಿಕ್ಸ್ ಮಾಡಿ. ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಗರಂ ಮಸಾಲಾ ಸೇರಿಸಿ ಒಂದು ನಿಮಿಷ ಹುರಿಯಿರಿ.

ಈಗ ನೀರು ಮತ್ತು ಸ್ವಲ್ಪ ನಿಂಬೆ ರಸ ಸೇರಿಸಿ. ಪಾತ್ರೆಗೆ ಮುಚ್ಚಳ ಮುಚ್ಚಿ, ಅಕ್ಕಿ ಬೇಯುವವರೆಗೆ ಕಡಿಮೆ ಉರಿಯಲ್ಲಿ ಬೇಯಿಸಿ. ಒಂದೂವರೆ ಕಪ್ ಬಾಸ್ಮತಿ ಅಕ್ಕಿಗೆ ಸುಮಾರು ಎರಡೂವರೆ ಕಪ್ ನೀರು ಬೇಕು. ಆದರೆ ಅಕ್ಕಿಯ ವಿಧ ಮತ್ತು ನೆನೆಸಿದ ಸಮಯಕ್ಕೆ ಅನುಗುಣವಾಗಿ ನೀರಿನ ಪ್ರಮಾಣ ಬದಲಾಗುತ್ತದೆ. ಆದ್ದರಿಂದ ಅಕ್ಕಿಯ ಪ್ಯಾಕೆಟ್ನ ಸೂಚನೆಗಳನ್ನೂ ಗಮನಿಸಿ.

ನೀರು ಸಂಪೂರ್ಣವಾಗಿ ಹೀರಿಕೊಂಡು ಅಕ್ಕಿ ಬೆಂದ ನಂತರ ಗ್ಯಾಸ್ ಆರಿಸಿ. ಕೆಲವು ನಿಮಿಷ ಮುಚ್ಚಳ ಮುಚ್ಚಿಯೇ ಬಿಡಿ. ಬಳಿಕ ಫೋರ್ಕ್ ಅಥವಾ ಚಮಚದಿಂದ ನಿಧಾನವಾಗಿ ಅನ್ನವನ್ನು ಬಿಡಿಬಿಡಿ ಮಾಡಿ. ಮೇಲೆ ಕತ್ತರಿಸಿದ ತಾಜಾ ಕೊತ್ತಂಬರಿ ಸೊಪ್ಪು ಉದುರಿಸಿ ಬಿಸಿಬಿಸಿಯಾಗಿ ಸರ್ವ್ ಮಾಡಿ. ನೀವು ಪನೀರ್ ಗ್ರೇವಿ, ಚೋಲೆ ಅಥವಾ ನಿಮ್ಮಿಷ್ಟದ ಸೈಡ್ ಡಿಶ್ ಜೊತೆ ಇದನ್ನು ಸೇವಿಸಬಹುದು.

ರಾಗಿ ಮುದ್ದೆ ಗಟ್ಟಿಯಾಗುತ್ತಾ? ಸ್ವಲ್ಪವೂ ಗಂಟಿಲ್ಲದೆ ಮೃದುವಾಗಿ ಮಾಡಲು ಒಂದೇ ಒಂದು ಚಮಚ ಈ ಸೀಕ್ರೆಟ್ ಪದಾರ್ಥ ಸೇರಿಸಿ

Ashwini HR — Wed, 28 Oct 2026 16:52:09 +0530

ರಾಗಿ ಮುದ್ದೆ ಮಾಡುವುದು ಕಷ್ಟ, ಸರಿಯಾಗಿ ಬರುವುದಿಲ್ಲ, ಗಂಟು ಕಟ್ಟುತ್ತದೆ ಎಂದು ಹೆದರುತ್ತಿದ್ದೀರಾ? ಹಾಗಿದ್ದರೆ ಈ ಸುಲಭ ವಿಧಾನವನ್ನು ಒಮ್ಮೆ ಟ್ರೈ ಮಾಡಿ ನೋಡಿ! ಸ್ವಲ್ಪವೂ ಗಂಟಾಗದೆ, ಕೈಗೆ ಅಂಟದೆ, ಮೃದುವಾಗಿ ಮತ್ತು ಶೈನಿಂಗ್ ಆಗಿ ಬರುವ ಅಪ್ಪಟ ಹಳ್ಳಿ ಶೈಲಿಯ ರಾಗಿ ಮುದ್ದೆಯ ಪಕ್ಕಾ ಅಳತೆಯ ರೆಸಿಪಿ ಇಲ್ಲಿದೆ...

ಬೇಕಾಗುವ ಸಾಮಗ್ರಿಗಳು (ಪಕ್ಕಾ ಅಳತೆ)

ರಾಗಿ ಹಿಟ್ಟು: 1 ಗ್ಲಾಸ್ (+ 1 ಚಮಚ ಎಕ್ಸ್‌ಟ್ರಾ)ನೀರು: 2 ಗ್ಲಾಸ್ (ಯಾವ ಗ್ಲಾಸ್‌ನಲ್ಲಿ ಹಿಟ್ಟು ಅಳೆಯುತ್ತೀರೋ, ಅದೇ ಗ್ಲಾಸ್‌ನಲ್ಲಿ ನೀರು ಅಳೆಯಿರಿ)ಉಪ್ಪು: 1/4 ಚಮಚತುಪ್ಪ: 1/2 ಚಮಚ (ಮುದ್ದೆ ಶೈನಿಂಗ್ ಬರಲು ಸೀಕ್ರೆಟ್ ಪದಾರ್ಥ)

ರಾಗಿ ಮುದ್ದೆ ಮಾಡುವ ಹಂತ-ಹಂತದ ಸುಲಭ ವಿಧಾನ

ಹಂತ 1: ಹಿಟ್ಟಿನ ನೀರು (Slurry) ತಯಾರಿಒಂದು ಸಣ್ಣ ಬಟ್ಟಲಿನಲ್ಲಿ 1 ಚಮಚ ರಾಗಿ ಹಿಟ್ಟು ತೆಗೆದುಕೊಂಡು, ಸ್ವಲ್ಪ ನೀರು ಹಾಕಿ ಗಂಟಿಲ್ಲದಂತೆ ತೆಳುವಾಗಿ ಕಲಸಿ ಒಂದು ಕಡೆ ಇಡಿ.

ಹಂತ 2: ನೀರು ಕುದಿಸಿಒಂದು ಪ್ರೆಶರ್ ಕುಕ್ಕರ್ ಅಥವಾ ಹ್ಯಾಂಡಲ್ ಇರುವ ದಪ್ಪ ತಳದ ಪಾತ್ರೆಗೆ 2 ಗ್ಲಾಸ್ ನೀರು ಹಾಕಿ. (ಹ್ಯಾಂಡಲ್ ಇರುವ ಪಾತ್ರೆಯಾದರೆ ತಿರುಗಿಸಲು ತುಂಬಾ ಸುಲಭ). ಇದಕ್ಕೆ 1/4 ಚಮಚ ಉಪ್ಪು, 1/2 ಚಮಚ ತುಪ್ಪ ಹಾಗೂ ಮೊದಲೇ ಕಲಸಿಟ್ಟ 1 ಚಮಚ ರಾಗಿ ಹಿಟ್ಟಿನ ನೀರನ್ನು ಸೇರಿಸಿ ಚೆನ್ನಾಗಿ ಕುದಿಯಲು ಬಿಡಿ. (ತುಪ್ಪ ಸೇರಿಸುವುದರಿಂದ ಮುದ್ದೆ ನಯವಾಗಿ, ಹೊಳಪಿನಿಂದ ಕೂಡಿದ್ದು, ಕೈಗೆ ಅಂಟಿಕೊಳ್ಳುವುದಿಲ್ಲ).

ಹಂತ 3: ಹಿಟ್ಟು ಸೇರಿಸಿ ಹಬೆಯಲ್ಲಿ ಬೇಯಿಸಿನೀರು ಚೆನ್ನಾಗಿ ಕುದಿಯುವಾಗ, 1 ಗ್ಲಾಸ್ ರಾಗಿ ಹಿಟ್ಟನ್ನು ಮಧ್ಯಕ್ಕೆ ಸುರಿಯಿರಿ. ಹಿಟ್ಟನ್ನು ಪೂರ್ತಿಯಾಗಿ ಕಲಕದೆ, ಮೇಲ್ಮೈಯಲ್ಲಿ ಲಘುವಾಗಿ ಮುಟ್ಟಿಸಿ, ಮುಚ್ಚಳ ಮುಚ್ಚಿ ಮಧ್ಯಮ ಉರಿಯಲ್ಲಿ 2 ರಿಂದ 3 ನಿಮಿಷ ಚೆನ್ನಾಗಿ ಬೇಯಲು ಬಿಡಿ. ಹೀಗೆ ಮಾಡುವುದರಿಂದ ಹಿಟ್ಟು ಹಬೆಯಲ್ಲೇ ಚೆನ್ನಾಗಿ ಬೆಂದು ಹಸಿ ವಾಸನೆ ಹೋಗುತ್ತದೆ.

ಹಂತ 4: ಗಂಟಿಲ್ಲದಂತೆ ತಿರುಗಿಸಿ3 ನಿಮಿಷಗಳ ನಂತರ ಗ್ಯಾಸ್ ಉರಿಯನ್ನು ಪೂರ್ತಿ ಕಡಿಮೆ ಮಾಡಿ (Low Flame). ಮುದ್ದೆ ಕೋಲು ಅಥವಾ ಮರದ ಚಮಚದಿಂದ (Wooden Spatula) ಹಿಟ್ಟನ್ನು ಗಂಟಿಲ್ಲದಂತೆ ವೇಗವಾಗಿ ಮತ್ತು ನುಣ್ಣಗೆ ತಿರುಗಿಸಿ ಮಿಕ್ಸ್ ಮಾಡಿ. ಹಿಟ್ಟು ಚೆನ್ನಾಗಿ ಬೆರೆತ ನಂತರ, ಮತ್ತೆ ಮುಚ್ಚಳ ಮುಚ್ಚಿ ಸಣ್ಣ ಉರಿಯಲ್ಲಿ 2 ರಿಂದ 3 ನಿಮಿಷ ಹಬೆಯಲ್ಲಿ ಬೇಯಿಸಿ. ಹಿಟ್ಟಿನಿಂದ ಉತ್ತಮ ಪರಿಮಳ ಬಂದಾಗ ಗ್ಯಾಸ್ ಆಫ್ ಮಾಡಿ.

ಹಂತ 5: ಮುದ್ದೆ ಕಟ್ಟಿ (Rolling)ಒಂದು ಪಾತ್ರೆಯಲ್ಲಿ ತಣ್ಣೀರು ಇಟ್ಟುಕೊಳ್ಳಿ.ಮುದ್ದೆ ಕಟ್ಟುವ ಮಣೆ, ತಟ್ಟೆ ಅಥವಾ ಕಲ್ಲಿನ ಮೇಲೆ ಸ್ವಲ್ಪ ನೀರು ಚಿಮುಕಿಸಿ.ಪಾತ್ರೆಯಿಂದ ಬಿಸಿಬಿಸಿ ಹಿಟ್ಟನ್ನು ತೆಗೆದುಕೊಂಡು, ಕೈಗಳನ್ನು ನೀರಿನಲ್ಲಿ ತೇವ ಮಾಡಿಕೊಂಡು ಗುಂಡಗೆ ನಯವಾಗಿ ಮುದ್ದೆ ಕಟ್ಟಿ (ಬೇಕಿದ್ದರೆ ಮೇಲೆ ಸ್ವಲ್ಪ ತುಪ್ಪ ಸವರಬಹುದು).

ಹಳೇ ಕಾಲದ ವಿಶೇಷ ಟಿಪ್ (ಮುದ್ದೆ ಕೆರೆ ನೀರು)ಮುದ್ದೆ ಮಾಡಿದ ನಂತರ ಪಾತ್ರೆಯ ತಳದಲ್ಲಿ ಹಿಟ್ಟು ಅಂಟಿಕೊಂಡಿರುತ್ತದೆ (ತಳ). ಹಳ್ಳಿಗಳಲ್ಲಿ ಇದಕ್ಕೆ ನೀರು ಹಾಕಿ ನೆನೆಸಿ, ನಂತರ ಸಣ್ಣಗೆ ಹೆಚ್ಚಿದ ಈರುಳ್ಳಿ, ಹಸಿಮೆಣಸಿನಕಾಯಿ, ಕೊತ್ತಂಬರಿ ಸೊಪ್ಪು ಮತ್ತು ಉಪ್ಪು ಸೇರಿಸಿ ಕದಡಿ ಕುಡಿಯುತ್ತಾರೆ. ಇದು ಹೊಟ್ಟೆಗೆ ಅತ್ಯಂತ ತಂಪು ಹಾಗೂ ಅಮೃತ ಸಮಾನ!

ಬಡಿಸುವ ವಿಧಾನಈ ಬಿಸಿಬಿಸಿ ರಾಗಿ ಮುದ್ದೆಯನ್ನು ಹುರಿದ ಕಡಲೆಕಾಳು ಸಾರು, ಬಸ್ಸಾರು, ನಾಟಿಕೋಳಿ ಸಾರು ಅಥವಾ ಮಟನ್ ಸಾಂಬಾರ್ ಜೊತೆ ಸವಿಯಲು ಅದ್ಭುತವಾಗಿರುತ್ತದೆ.

ಬೆಂಗಳೂರಿನ ಐಕಾನಿಕ್ CTR ಹೋಟೆಲ್‌ಗೆ ಕಳಂಕ? ಮಸಾಲೆ ದೋಸೆಯಲ್ಲಿ ಜಿರಳೆ ಸಿಕ್ಕಿದ ವಿಡಿಯೋ ವೈರಲ್

Sushma Hegde — Wed, 28 Oct 2026 12:45:05 +0530

ಬೆಂಗಳೂರು: ಸಿಲಿಕಾನ್ ಸಿಟಿ ಬೆಂಗಳೂರಿನ ಬೆಸ್ಟ್‌ ಹೋಟೆಲ್‌ ಲೀಸ್ಟ್‌ನಲ್ಲಿ ಒಂದಾದ ಮಲ್ಲೇಶ್ವರಂನ CTR (ಸೆಂಟ್ರಲ್ ಟಿಫಿನ್ ರೂಮ್) ಇದೀಗ ಆಹಾರದ ಸ್ವಚ್ಛತೆ ವಿಚಾರವಾಗಿ ಚರ್ಚೆಗೆ ಬಂದಿದೆ. ಇಲ್ಲಿನ ಮಸಾಲೆ ದೋಸೆಯಲ್ಲಿ ಜಿರಳೆ ಪತ್ತೆಯಾಗಿದೆ ಎಂದು ಗ್ರಾಹಕರೊಬ್ಬರು ಆರೋಪಿಸಿರುವ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ಗಮನ ಸೆಳೆದಿದೆ. ಈ ಆರೋಪದ ಬೆನ್ನಲ್ಲೇ ಹೋಟೆಲ್‌ನ ಆಹಾರ ಸುರಕ್ಷತೆ ಮತ್ತು ನೈರ್ಮಲ್ಯದ ಬಗ್ಗೆ ಚರ್ಚೆ ಶುರುವಾಗಿದೆ.

ಬೆಂಗಳೂರಿನ ಪ್ರಸಿದ್ಧ ಬೆಣ್ಣೆ ದೋಸೆಗೆ ಹೆಸರುವಾಸಿಯಾಗಿರುವ CTRಗೆ ಪ್ರತಿದಿನ ಸಾಕಷ್ಟು ಸಂಖ್ಯೆಯಲ್ಲಿ ಗ್ರಾಹಕರು ಭೇಟಿ ನೀಡುತ್ತಾರೆ. ಸ್ಥಳೀಯರಷ್ಟೇ ಅಲ್ಲದೆ, ಹಲವು ಗಣ್ಯರೂ ಈ ಹೋಟೆಲ್‌ನ ದೋಸೆಯನ್ನು ಸವಿದಿದ್ದಾರೆ. ಕ್ರಿಕೆಟಿಗ ವಿರಾಟ್ ಕೊಹ್ಲಿ ಮತ್ತು ಅವರ ಪತ್ನಿ, ನಟಿ ಅನುಷ್ಕಾ ಶರ್ಮಾ ಅವರು 2023ರ ಏಪ್ರಿಲ್ 22ರಂದು ಮಲ್ಲೇಶ್ವರಂನಲ್ಲಿರುವ CTRಗೆ ಭೇಟಿ ನೀಡಿ ಮಸಾಲೆ ದೋಸೆ ಸವಿದಿದ್ದರು. ಈ ಭೇಟಿಯೂ ಆಗ ಹೋಟೆಲ್‌ ಬಗ್ಗೆ ಸಾಕಷ್ಟು ಗಮನ ಸೆಳೆದಿತ್ತು.

ಮಸಾಲೆ ದೋಸೆಯಲ್ಲಿ ಜಿರಳೆ ಪತ್ತೆಯಾಯಿತೇ?

ವಿಡಿಯೊದಲ್ಲಿ ಹೇಳಿರುವ ಪ್ರಕಾರ, ಗ್ರಾಹಕರೊಬ್ಬರು CTRನಲ್ಲಿ ಮಸಾಲೆ ದೋಸೆ ಸೇವಿಸುವಾಗ ಅದರೊಳಗೆ ಜಿರಳೆ ಕಂಡುಬಂದಿದೆ ಎಂದು ದೂರಿದ್ದಾರೆ. ಈ ಬಗ್ಗೆ ಹೋಟೆಲ್ ಸಿಬ್ಬಂದಿಗೆ ತಿಳಿಸಿದಾಗ, ದೋಸೆಯನ್ನು ಬದಲಿಸಿಕೊಡುವುದಾಗಿ ಹೇಳಲಾಗಿದೆ ಎಂದು ವಿಡಿಯೊದಲ್ಲಿ ಆರೋಪಿಸಲಾಗಿದೆ.

ದೋಸೆ ಬದಲಿಸಿಕೊಟ್ಟರೆ ಸಮಸ್ಯೆ ಪರಿಹಾರವಾಗುತ್ತದೆಯೇ?

ವಿಡಿಯೊದಲ್ಲಿ ವ್ಯಕ್ತಪಡಿಸಿರುವ ಅಸಮಾಧಾನದ ಪ್ರಕಾರ, ಆಹಾರದಲ್ಲಿ ಜಿರಳೆ ಕಂಡುಬಂದಿದೆ ಎಂಬ ಗಂಭೀರ ದೂರಿಗೆ ಕೇವಲ ಮತ್ತೊಂದು ದೋಸೆ ನೀಡುವುದು ಸಾಕಾಗುವುದಿಲ್ಲ. ಆಹಾರ ತಯಾರಿಸುವ ಸ್ಥಳದ ಸ್ವಚ್ಛತೆ, ಅಡುಗೆಮನೆಯ ನೈರ್ಮಲ್ಯ ಮತ್ತು ಆಹಾರ ಸುರಕ್ಷತಾ ಕ್ರಮಗಳ ಬಗ್ಗೆ ಸ್ಪಷ್ಟನೆ ನೀಡುವುದು ಅಗತ್ಯ ಎಂಬ ಪ್ರಶ್ನೆಯನ್ನು ವಿಡಿಯೊ ಎತ್ತಿದೆ.

ಹೋಟೆಲ್‌ನಲ್ಲಿ ಆಹಾರ ಸೇವಿಸುವ ಗ್ರಾಹಕರು ಕೇವಲ ರುಚಿಯನ್ನು ಮಾತ್ರ ನಿರೀಕ್ಷಿಸುವುದಿಲ್ಲ. ಆಹಾರ ಸ್ವಚ್ಛವಾಗಿ ತಯಾರಾಗಿರಬೇಕು, ಸುರಕ್ಷಿತವಾಗಿರಬೇಕು ಎಂಬುದು ಅವರ ಸಹಜ ನಿರೀಕ್ಷೆ. ಇಂತಹ ಆರೋಪಗಳು ಕೇಳಿಬಂದಾಗ ಅವುಗಳ ಬಗ್ಗೆ ಸೂಕ್ತ ಪರಿಶೀಲನೆ ನಡೆಸಿ, ಅಗತ್ಯವಿದ್ದರೆ ತಿದ್ದುಪಡಿ ಕ್ರಮ ಕೈಗೊಳ್ಳುವುದು ಮುಖ್ಯವಾಗುತ್ತದೆ.

ಪ್ರಸಿದ್ಧ ಹೋಟೆಲ್‌ಗಳಲ್ಲೂ ಆಹಾರ ಸುರಕ್ಷತೆ ಮುಖ್ಯ

ಬೆಂಗಳೂರಿನ ಹಳೆಯ ಮತ್ತು ಜನಪ್ರಿಯ ಉಪಾಹಾರ ತಾಣಗಳಲ್ಲಿ CTR ಕೂಡ ಒಂದು. ಇದರ ಬೆಣ್ಣೆ ದೋಸೆ ಬಹಳ ಪ್ರಸಿದ್ಧವಾಗಿದ್ದು, ಸ್ಥಳೀಯರು ಮತ್ತು ಪ್ರವಾಸಿಗರು ಇಲ್ಲಿಗೆ ಭೇಟಿ ನೀಡುತ್ತಾರೆ. ಆದರೆ ಯಾವುದೇ ಹೋಟೆಲ್‌ನ ಖ್ಯಾತಿಯಷ್ಟೇ ಆಹಾರದ ಗುಣಮಟ್ಟ ಮತ್ತು ನೈರ್ಮಲ್ಯಕ್ಕೂ ಮಹತ್ವ ನೀಡಬೇಕು. ಆಹಾರದಲ್ಲಿ ಕೀಟ ಕಂಡುಬಂದಿದೆ ಎಂಬ ದೂರು ಬಂದಾಗ, ಅದರ ಸತ್ಯಾಸತ್ಯತೆಯನ್ನು ಪರಿಶೀಲಿಸುವುದು, ಅಡುಗೆಮನೆಯ ಸ್ವಚ್ಛತೆಯನ್ನು ಖಚಿತಪಡಿಸಿಕೊಳ್ಳುವುದು ಮತ್ತು ಗ್ರಾಹಕರಿಗೆ ಸೂಕ್ತ ಉತ್ತರ ನೀಡುವುದು ಸಂಬಂಧಪಟ್ಟ ಸಂಸ್ಥೆಯ ಜವಾಬ್ದಾರಿಯಾಗಿದೆ.

ವಿರಾಟ್ ಕೊಹ್ಲಿ ಕೂಡ ದೋಸೆ ಸವಿದಿದ್ದ CTR!

ಮಲ್ಲೇಶ್ವರಂನ CTR ಬೆಂಗಳೂರಿನ ಜನಪ್ರಿಯ ಉಪಾಹಾರ ತಾಣಗಳಲ್ಲಿ ಒಂದಾಗಿದೆ. ಇಲ್ಲಿನ ಬೆಣ್ಣೆ ದೋಸೆ ಮತ್ತು ಮಸಾಲೆ ದೋಸೆ ಸಾಕಷ್ಟು ಪ್ರಸಿದ್ಧವಾಗಿವೆ. 2023ರ ಏಪ್ರಿಲ್‌ನಲ್ಲಿ ವಿರಾಟ್ ಕೊಹ್ಲಿ ಮತ್ತು ಅನುಷ್ಕಾ ಶರ್ಮಾ ಈ ಹೋಟೆಲ್‌ಗೆ ಭೇಟಿ ನೀಡಿದ್ದು ಸುದ್ದಿಯಾಗಿತ್ತು. ಅವರ ಭೇಟಿಯಿಂದಲೂ CTR ಬಗ್ಗೆ ಅಭಿಮಾನಿಗಳು ಮತ್ತು ಆಹಾರಪ್ರಿಯರಲ್ಲಿ ಕುತೂಹಲ ಮೂಡಿತ್ತು. ಆಹಾರ ಸುರಕ್ಷತೆ ಪ್ರತಿಯೊಬ್ಬ ಗ್ರಾಹಕನ ಹಕ್ಕು. ಪ್ರಸಿದ್ಧ ಹೋಟೆಲ್‌ಗಳಾಗಲಿ, ಸಣ್ಣ ಉಪಾಹಾರ ಮಳಿಗೆಗಳಾಗಲಿ, ಸ್ವಚ್ಛತೆ ಮತ್ತು ನೈರ್ಮಲ್ಯಕ್ಕೆ ಆದ್ಯತೆ ನೀಡುವುದು ಅತ್ಯಗತ್ಯ.

ಮುಖದ ಸುಕ್ಕು ನಿವಾರಿಸಿ, ತ್ವಚೆಯ ಅಂದ ಹೆಚ್ಚಿಸಿ 'ದಂತದ ಬೊಂಬೆ'ಯಂತೆ ಕಾಣಲು ದಿನಾಲೂ ಈ ಹಣ್ಣುಗಳನ್ನು ಸೇವಿಸಿ!

Shriram Bhat — Wed, 28 Oct 2026 16:19:54 +0530

Skin Care Tips: ಮುಖದ ಸುಕ್ಕು ನಿವಾರಿಸಿ, ತ್ವಚೆಯ ಅಂದ ಹೆಚ್ಚಿಸಿ 'ದಂತದ ಬೊಂಬೆ'ಯಂತೆ ಕಾಣಲು ದಿನಾಲೂ ಈ ಹಣ್ಣುಗಳನ್ನು ಸೇವಿಸಿ! ಈ ಹಣ್ಣುಗಳಲ್ಲಿರುವ ಹಲವು ಪೋಷಕ ಸತ್ವಗಳು ನಿಮ್ಮ ಚರ್ಮವು ರೇಷ್ಮೆಯಂತೆ ಹೊಳೆಯುವಂತೆ ಮಾಡುತ್ತವೆ.

Golden Milk magic: ಗೋಲ್ಡನ್ ಮಿಲ್ಕ್‌ಗೆ ಇದೊಂದು ಪದಾರ್ಥ ಸೇರಿಸಿ ಮ್ಯಾಜಿಕ್ ನೋಡಿ! ಚಳಿಗಾಲದಲ್ಲಿ ಕೆಮ್ಮು, ಕಫ, ನೆಗಡಿ ಬಂದ್ರೆ ಕೇಳಿ!

Ravi Janekal — Wed, 28 Oct 2026 09:30:31 +0530

ಚಳಿಗಾಲ ಶುರುವಾಗಿದೆ. ಬೆಳಗ್ಗೆ ಹಕ್ಕಿಗಳ ಕಲರವ ಕೇಳುವ ಬದಲು ಈಗ ಮಕ್ಕಳಿಂದ ಹಿರಿಯರವರೆಗೆ ಕೆಮ್ಮುವ ಸದ್ದು ಕೇಳುತ್ತಿದೆ. ಬೆಳಗ್ಗೆ ಉಸಿರಾಡೋಕೆ ಕಷ್ಟ ಅನ್ನುವಷ್ಟು ಮೂಗು ಕಟ್ಟುತ್ತಿದೆ. ಹಸುಗೂಸುಗಳಿಗೆ ನೆಗಡಿ, ಕಫ, ಮೂಗು ಕಟ್ಟುವುದು… ಅಬ್ಬಬ್ಬಾ ನೆನಸಿಕೊಂಡರೆ ಹೆತ್ತವರಿಗೆ ಭಯ. ಚಳಿಗಾಲದಲ್ಲಿ ದೊಡ್ಡವರದು ಒಂದು ಸಮಸ್ಯೆ ಆದರೆ ಇನ್ನು ಶಾಲೆಗೆ ಹೋಗುವ ಮಕ್ಕಳದು ಇನ್ನೊಂದು ಸಮಸ್ಯೆ. ನೆಗಡಿ ಬಂದಾಗಿನ ಮಕ್ಕಳ ಪಾಡು ಹೇಳತಿರದು.

ಸಾಮಾನ್ಯವಾಗಿ ನೆಗಡಿ ಬಂದ ತಕ್ಷಣ ಜನರು ಮೆಡಿಕಲ್ ಹೋಗಿ ಮಾತ್ರೆ ತೆಗೆದುಕೊಳ್ತಾರೆ. ಅದು ನೆಗಡಿನಾ, ಕೆಮ್ಮುನಾ ಅಥವಾ ಅಲರ್ಜಿಯಿಂದ ಬಂದಿದ್ದಾ?.. ಯಾವುದರ ಬಗ್ಗೆಯೂ ಯೋಚಿಸಲ್ಲ. ಕೆಮ್ಮು, ಕಫ ಬಂತೆಂದರೆ ಪಕ್ಕದ ಮೆಡಿಕಲ್‌ನಲ್ಲಿನ ಮಾತ್ರೆಗೆ ಮೊರೆ ಹೋಗುತ್ತಾರೆ. ಆಸ್ಪತ್ರೆಗೆ ಹೋದರೆ ಸಾವಿರಾರು ರೂಪಾಯಿ ಹಣ ತೆರಬೇಕು. ಹೀಗಾಗಿ ಚಳಿಗಾಲ ಮುಗಿಯುವವರೆಗೆ ಮಾತ್ರೆ ನುಂಗುತ್ತಲೇ ಇರುತ್ತಾರೆ! ಹೇಗೆಂದರೆ ನೆಗಡಿ ವಾಸಿಯಾಗುತ್ತಲೇ ಕೆಮ್ಮು ಶುರುವಾಗಿರುತ್ತದೆ, ಕೆಮ್ಮು ವಾಸಿಯಾಗುತ್ತಲೇ ನೆಗಡಿ ಶುರುವಾಗಿರುತ್ತದೆ. ಚಳಿಗಾಲ ಮುಗಿಯುವವರೆಗೆ ವೈದ್ಯರ ಸಂಪರ್ಕಿಸದೆ ಮಾತ್ರೆ ತೆಗೆದುಕೊಳ್ಳುತ್ತಲೇ ಇರುತ್ತಾರೆ. ಇದರಿಂದ ದೇಹಕ್ಕೆ ಎಷ್ಟು ಅಪಾಯಕಾರಿ?

ಹೀಗಾಗಿ ಚಳಿಗಾಲ ಮುಗಿಯುವವರೆಗೆ ಮಾತ್ರೆಗಳ ಗೊಡವೆ ಬೇಡ, ಸಾವಿರಾರು ರೂಪಾಯಿ ಚಿಕಿತ್ಸೆಯೂ ಬೇಡ. ಪ್ರತಿದಿನ ದಿನ ಚಹಾ ಬದಲು ಈ ಒಂದು ಅಮೃತ ಕುಡಿಯುವ ಅಭ್ಯಾಸ ಶುರು ಮಾಡಿದರೆ ಕೆಮ್ಮು ಬರೋದಿಲ್ಲ, ಕಫನೂ ಇರೋಲ್ಲ. ರೋಗ ನಿರೋಧಕ ಶಕ್ತಿಯೂ ಹೆಚ್ಚುತ್ತೆ.

ಹಾಗಾದರೆ ಚಳಿಗಾಲದಲ್ಲಿ ಕುಡಿಯುವ ಆ ಅಮೃತ ಯಾವುದು ಎಂಬ ಪ್ರಶ್ನೆ ಮೂಡಿದೆಯಲ್ಲವೇ? ಹೌದು ನಾನು ಹೇಳಹೊರಟುವುದು ಗೋಲ್ಡನ್ ಮಿಲ್ಕ್ ಬಗ್ಗೆ. ಗೋಲ್ಡನ್ ಮಿಲ್ಕ್ ಚಳಿಗಾಲಕ್ಕೆ ಯಾಕೆ ಮುಖ್ಯ,

ಹೇಗೆ ತಯಾರಿಸುವುದು, ಇದು ಚಳಿಗಾಲದ ಕೆಮ್ಮು, ಕಫ, ನೆಗಡಿಗಳಿಗೆ ಹೇಗೆ ರಾಮಬಾಣವಾಗಿ ಕೆಲಸ ಮಾಡುತ್ತೆ ಅನ್ನೋ ಸಮಗ್ರ ಮಾಹಿತಿ ಇಲ್ಲಿದೆ.

ಗೋಲ್ಡನ್ ಮಿಲ್ಕ್ ಮಾಡುವುದು ಹೇಗೆ?

ಗೋಲ್ಡನ್ ಮಿಲ್ಕ್ ಮಾಡುವುದು ತುಂಬಾ ಸುಲಭ, ಇದು ಚಹಾ ಮಾಡುವಷ್ಟೇ ಸಮಯ ಸಾಕು! ಆದರೆ ಅದರ ಪರಿಣಾಮ ಮಾತ್ರ ಅದ್ಭುತ. ಗೋಲ್ಡನ್ ಮಿಲ್ಕ್ ಮಾಡುವುದು ಹೇಗೆ ಎಂಬ ಬಗ್ಗೆ ಸ್ಟೆಪ್ ಬೈ ಸ್ಟೆಪ್ ಇಲ್ಲಿದೆ.

ಗೋಲ್ಡನ್ ಮಿಲ್ಕ್ ಮಾಡಲು ಬೇಕಾಗುವ ಪದಾರ್ಥಗಳು:

ಒಂದು ಗ್ಲಾಸ್ ಹಾಲು(ಹಸುವಿನ ಹಾಲು ಉತ್ತಮ)
ಶುದ್ಧ ಅರಶಿನ ಪುಡಿ (ಅರ್ಧ ಚಮಚ) ಕೊಂಬು ತುರಿದಿದ್ದು ಬಳಸಿದರೆ ಒಳ್ಳೆಯದು.
ಕರಿಮೆಣಸಿನ ಪುಡಿ (ಅರ್ಧ ಚಮಚ)
ತುರಿದ ಹಸಿಶುಂಠಿ
ಸಿಹಿ ಬೇಕಿದ್ದರೆ ಒಂದು ಚಮಚ ಜೇನು ತುಪ್ಪ ಅಥವಾ ಬೆಲ್ಲ
ಗೋಲ್ಡನ್ ಮಿಲ್ಕ್ ತಯಾರಿಸುವ ವಿಧಾನ:
ಮೊದಲಿಗೆ ಒಂದು ಪಾತ್ರೆಯಲ್ಲಿ ಹಾಲನ್ನು ಹಾಕಿ ಮಧ್ಯಮ ಉರಿಯಲ್ಲಿ ಬಿಸಿ ಮಾಡಿ.
ಹಾಲು ಬಿಸಿಯಾಗುತ್ತಿದ್ದಂತೆ ಅರಶಿನ, ಕರಿಮೆಣಸಿನ ಪುಡಿ, ಶುಂಠಿ ಸೇರಿಸಿ ಚೆನ್ನಾಗಿ ಕಲಸಿ.
ಉರಿ ಸಣ್ಣಗೆ ಇರಲಿ. 5-8 ನಿಮಿಷಗಳ ಕಾಲ ಕುದಿಯಲು ಬಿಡಿ. ಆಗಾಗ ಕಲಕುತ್ತ ಇರಿ.
ಹಾಲು ಈಗ ಬಂಗಾರದ ಬಣ್ಣಕ್ಕೆ ತಿರುಗಿರುತ್ತದೆ. ಗ್ಯಾಸ್ ಆಫ್ ಮಾಡಿ, ಪಾತ್ರೆಯಿಂದ ಲೋಟಕ್ಕೆ ಹಾಲು ಸೇರಿಸಿಕೊಳ್ಳಿ.

ಗಮನಿಸಿ, ಹಾಲು ಕುದಿಯುವಾ ಜೇನು ತುಪ್ಪ ಅಥವಾ ಬೆಲ್ಲ ಹಾಕಬಾರದು. ಹಾಲು ಉಗುರು ಬೆಚ್ಚಗೆ ಆದ ಬಳಿಕ ನಿಮಗೆ ಬೇಕಾದಷ್ಟು ಜೇನು ತುಪ್ಪ ಅಥವಾ ಸಾವಯವ ಬೆಲ್ಲ ಹಾಕಿ ಕಲಕಿ.

ಈಗ ಗೋಲ್ಡನ್ ಮಿಲ್ಕ್ ರೆಡಿಯಾಗಿರುತ್ತದೆ.

ಗೋಲ್ಡನ್ ಮಿಲ್ಕ್‌ಗೆ ಕರಿಮೆಣಸಿನ ಮ್ಯಾಜಿಕ್ ಏನು ಗೊತ್ತಾ?

ಅರಿಶಿನದಲ್ಲಿ ಕರ್ಕ್ಯುಮಿನ್(Curcumin) ಎಂಬ ಅದ್ಭುತ ಔಷಧೀಯ ಗುಣವಿದೆ. ಇದು ದೇಹದಲ್ಲಿನ ಪ್ರಬಲವಾದ ಉರಿಯೂತ ನಿವಾರಕ (Anti-inflammatory) ಮತ್ತು ರೋಗನಿರೋಧಕ (Antioxidant) ಅಂಶವಾಗಿದೆ. ಆದರೆ ಇದು ನಮ್ಮ ದೇಹದ ಜೀರ್ಣಾಂಗ ವ್ಯವಸ್ಥೆಯು ಕರ್ಕ್ಯುಮಿನ್ ಅನ್ನು ನೇರವಾಗಿ ಹೀರಿಕೊಳ್ಳುವ ಸಾಮರ್ಥ್ಯ ತೀರಾ ಕಡಿಮೆ.

ಇಲ್ಲಿಯೇ ಕರಿಮೆಣಸಿನ ಮ್ಯಾಜಿಕ್ ಶುರುವಾಗುವುದು. ಹೇಗೆ ಅಂತೀರಾ?

ಹಾಲಿಗೆ ಅರಿಶಿನ ಜೊತೆಗೆ ಕರಿಮೆಣಸು ಹಾಕಿದಾಗ ಅದರಲ್ಲಿನ ಪೈಪರಿನ್ (Piperine) ಎಂಬ ಅಂಶವು ಕರ್ಕ್ಯುಮಿನ್ ಜೊತೆ ಸೇರಿಕೊಳ್ಳುತ್ತೆ. ಇದು ದೇಹದಲ್ಲಿ ಅರಿಶಿನದ ಹೀರಿಕೆಯ ಸಾಮರ್ಥ್ಯ ಬರೋಬ್ಬರಿ 20 ಪಟ್ಟು ಹೆಚ್ಚಾಗುತ್ತದೆ. ಪೈಪರಿನ್ ಜೀರ್ಣಾಂಗದಲ್ಲಿ ಕಿಣ್ವಗಳನ್ನು ಉತ್ತೇಜಿಸಿ, ಅರಿಶಿನದಲ್ಲಿರುವ ಪ್ರತಿಯೊಂದು ಪೋಷಕಾಂಶವೂ ರಕ್ತಕ್ಕೆ ಸೇರಲು ದಾರಿ ಮಾಡಿಕೊಡುತ್ತದೆ. ಇದರಿಂದಾಗಿ ನೆಗಡಿ ಕೆಮ್ಮು ಕಫ ಅಷ್ಟೇ ಅಲ್ಲದೆ ಕೀಲು ನೋವು, ಮೈ-ಕೈ ನೋವು ಬೇಗನೇ ಕಡಿಮೆಯಾಗುತ್ತದೆ.

ಚಳಿಗಾಲದಲ್ಲಿ ಗೋಲ್ಡನ್ ಮಿಲ್ಕ್ ಯಾಕೆ ಕುಡಿಯಬೇಕು?

ಚಳಿಗಾಲದಲ್ಲಿ ನೆಗಡಿ, ಕೆಮ್ಮು, ಕಫ, ಮೂಗು ಕಟ್ಟುವುದು ತುಂಬಾ ಕಿರಿಕಿರಿ ಉಂಟು ಮಾಡುತ್ತೆ. ಹೀಗಾಗಿ ಗೋಲ್ಡನ್ ಮಿಲ್ಕ್ ಕುಡಿಯುವುದರಿಂದ ಆಂಟಿಬಯೋಟಿಕ್ ಆಗಿ ಕೆಲಸ ಮಾಡಿ ನೆಗಡಿ, ಕೆಫ, ಕೆಮ್ಮು ಬೇಗನೇ ವಾಸಿಯಾಗುತ್ತದೆ. ಅಲ್ಲದೆ ಪ್ರತಿ ದಿನ ಚಹ ಬದಲು ಗೋಲ್ಡನ್ ಮಿಲ್ಕ್ ಕುಡಿಯುವುದು ರೂಢಿಸಿಕೊಂಡರೆ ದೇಹದಲ್ಲಿನ ರೋಗ ನಿರೋಧಕ ಶ್ತಿ ಹೆಚ್ಚಾಗಿ ಚಳಿಗಾಲದಲ್ಲೂ ನೆಗಡಿ ಕೆಮ್ಮು ನಿಮ್ಮನ್ನು ಕಾಡುವುದಿಲ್ಲ.

ಗೋಲ್ಡನ್ ಮಿಲ್ಕ್ ಕುಡಿಯುವ ಒಳ್ಳೆಯ ಸಮಯ ಯಾವುದು?

ಚಳಿಗಾಲದಲ್ಲಿ Immunity Booster ಆಗಿ ಗೋಲ್ಡನ್ ಮಿಲ್ಕ್ ಕೆಲಸ ಮಾಡುತ್ತದೆ. ಹೀಗಾಗಿ ವೈರಲ್ ಮತ್ತು ಬ್ಯಾಕ್ಟೀರಿಯಾ ಸೋಂಕುಗಳು ಹರಡವುದು ತಪ್ಪುತ್ತದೆ. ರಾತ್ರಿ ಮಲಗುವ ಮುನ್ನ ಈ ಹಾಲು ಕುಡಿಯುವುದರಿಂದ ಬಿಳಿ ರಕ್ತಕಣಗಳ ಸಾಮರ್ಥ್ಯ ಹೆಚ್ಚಿ ರೋಗನಿರೋಧಕ ಶಕ್ತಿ ಹೆಚ್ಚುತ್ತದೆ.

ಚಳಿಗಾಲದಲ್ಲಿ ಕೀಲು ನೋವು ನಿವಾರಕ

ಚಳಿಗಾಲದಲ್ಲಿ ವಿಪರೀತ ಥಂಡಿ. ತಂಪಿನ ವಾತಾವರಣದಿಂದಾಗಿ ವಯಸ್ಕರಿಗೆ ಅದರಲ್ಲೂ ಮನೆಯಲ್ಲಿನ ಹಿರಿಯರಿಗೆ ಕೀಲುಗಳು ಬಿಗಿಯಾಗಿ, ಹಳೆಯ ನೋವುಗಳು ಮತ್ತೆ ಮರುಕಳಿಸುತ್ತವೆ. ಇಂಥ ಸಮಸ್ಯೆ ಬಾರದಿರಲು ಗೋಲ್ಡನ್ ಮಿಲ್ಕ್ ಕುಡಿಯುವುದು ಉತ್ತಮ. ಇದರಲ್ಲಿನ ಕರ್ಕ್ಯುಮಿನ್‌ನ ಉರಿಯೂತ ನಿವಾರಕ ಗುಣ ಸ್ನಾಯು ಮತ್ತು ಕೀಲುಗಳಿಗೆ ಶಕ್ತಿ ನೀಡಿ ನೋವನ್ನು ಕಡಿಮೆ ಮಾಡುತ್ತದೆ.

ಕಣ್ಮುಚ್ಚಿದ್ರೆ ನಿದ್ದೆ ಆವರಿಸುತ್ತೆ: ಇಂದು ಬಹುತೇಕರಿಗೆ ನಿದ್ರಾಹೀನತೆಯೂ ದೊಡ್ಡ ಸಮಸ್ಯೆ. ಕೆಲವರು ನಿದ್ದೆ ಮಾತ್ರೆ ತೆಗೆದುಕೊಂಡೇ ಮಲಗುವಂತಹ ಪರಿಸ್ಥಿತಿ ಇದೆ. ಉತ್ತಮವಾಗಿ ನಿದ್ದೆ ಬೇಕೆಂದರೆ ರಾತ್ರಿ ಮಲಗುವ ಮುನ್ನ ಒಂದು ಗ್ಲಾಸ್ ಗೋಲ್ಡನ್ ಮಿಲ್ಕ್ ಕುಡಿಯಿರಿ. ಹಾಲಿನಲ್ಲಿರುವ ಟ್ರಿಪ್ಟೊಫಾನ್ (Tryptophan) ಮತ್ತು ಅರಿಶಿನದ ಶಾಂತಿಯುತ ಗುಣ ಒತ್ತಡವನ್ನು ಕಡಿಮೆ ಮಾಡಿ, ಚಳಿಗಾಲದ ರಾತ್ರಿಗಳಲ್ಲಿ ಗಾಢ ಮತ್ತು ನೆಮ್ಮದಿಯ ನಿದ್ರೆ ಬರುವಂತೆ ಮಾಡುತ್ತದೆ. ರಾತ್ರಿ ಮಲಗಲು ಅರ್ಧ ಗಂಟೆ ಮುಂಚೆ ಬಿಸಿಬಿಸಿಯಾದ ಹಾಲು ಕುಡಿಯಿರಿ.

15 ಗ್ರಾಂ ಇರಬೇಕಾದ ಲೇಸ್ ಪ್ಯಾಕೆಟ್‌ನಲ್ಲಿ ಸಿಕ್ಕಿದ್ದು ಕೇವಲ 4 ಗ್ರಾಂ ಚಿಪ್ಸ್; ಕಂಪನಿಗೆ ಬಾರೀ ದಂಡ

Sushma Hegde — Wed, 28 Oct 2026 16:14:55 +0530

ಚಿಪ್ಸ್ ಪ್ಯಾಕೆಟ್ ಖರೀದಿಸುವಾಗ ಅದರ ಮೇಲೆ ನಮೂದಿಸಿರುವ ತೂಕದಷ್ಟಾದರೂ ಉತ್ಪನ್ನ ಇರುತ್ತದೆ ಎಂದು ಗ್ರಾಹಕರು ನಿರೀಕ್ಷಿಸುತ್ತಾರೆ. ಆದರೆ, ಲೇಸ್ (Lay’s) ಆಲೂಗಡ್ಡೆ ಚಿಪ್ಸ್ ಪ್ಯಾಕೆಟ್‌ನಲ್ಲಿ ನಮೂದಿಸಿದ್ದಕ್ಕಿಂತ ಕಡಿಮೆ ಪ್ರಮಾಣದ ಚಿಪ್ಸ್ ಇತ್ತು ಎಂಬ ದೂರಿನ ಪ್ರಕರಣವೊಂದು ಈಗ ಗಮನ ಸೆಳೆದಿದೆ. ಪ್ಯಾಕೆಟ್‌ನಲ್ಲಿ 15 ಗ್ರಾಂ ಚಿಪ್ಸ್ ಇರಬೇಕಾಗಿದ್ದರೆ, ಕೇವಲ 4 ಗ್ರಾಂ ಮಾತ್ರ ಇತ್ತು ಎಂದು ಗ್ರಾಹಕರೊಬ್ಬರು ಆರೋಪಿಸಿದ್ದರು. ಈ ಪ್ರಕರಣದಲ್ಲಿ ಪೆಪ್ಸಿಕೋ ಇಂಡಿಯಾ ಹೋಲ್ಡಿಂಗ್ಸ್ ಪ್ರೈವೇಟ್ ಲಿಮಿಟೆಡ್‌ಗೆ ಗ್ರಾಹಕ ಆಯೋಗವು ಪರಿಹಾರ ಪಾವತಿಸುವಂತೆ ಆದೇಶಿಸಿದೆ.

ಲೈವ್ ಲಾ ವರದಿಯ ಪ್ರಕಾರ, ರಾಜಸ್ಥಾನದ ಜೈಪುರದ ಜಿಲ್ಲಾ ಗ್ರಾಹಕ ವಿವಾದಗಳ ಪರಿಹಾರ ಆಯೋಗ-2 ಈ ಆದೇಶ ನೀಡಿದೆ. ಕಂಪನಿಯು ಗ್ರಾಹಕರಿಗೆ ₹5 ಮರುಪಾವತಿ ಮಾಡುವುದರ ಜೊತೆಗೆ, ಮಾನಸಿಕ ಕಿರುಕುಳಕ್ಕೆ ₹5,000 ಪರಿಹಾರ ಮತ್ತು ಕಾನೂನು ಹೋರಾಟದ ವೆಚ್ಚವಾಗಿ ₹3,000 ಪಾವತಿಸಬೇಕು ಎಂದು ಸೂಚಿಸಿದೆ.

ಏನಿದು ಪ್ರಕರಣ?

ಜೈಪುರದ ಎಂ/ಎಸ್ ಜಲನ್ ಬಿಲ್ಡಿಂಗ್ ಆ್ಯಂಡ್ ಹಾರ್ಡ್‌ವೇರ್ ಸ್ಟೋರ್‌ನ ಮಾಲೀಕ ಚಂದ್ರಮನ್ ಜಲನ್ ಅವರು 2020ರ ನವೆಂಬರ್ 10ರಂದು ಮೆಟ್ರೋ ಕ್ಯಾಶ್ ಆ್ಯಂಡ್ ಕ್ಯಾರಿ ಇಂಡಿಯಾ ಸಂಸ್ಥೆಯಿಂದ ವಿವಿಧ ಆಹಾರ ಪದಾರ್ಥಗಳನ್ನು ಖರೀದಿಸಿದ್ದರು. ತಮ್ಮ ಮನೆಗೆ ಬಂದ ಅತಿಥಿಗಳಿಗೆ ನೀಡಲು ಈ ಪದಾರ್ಥಗಳನ್ನು ಖರೀದಿಸಿದ್ದಾಗಿ ಅವರು ದೂರಿನಲ್ಲಿ ತಿಳಿಸಿದ್ದಾರೆ.

ಖರೀದಿಸಿದ ವಸ್ತುಗಳ ಪೈಕಿ ಪೆಪ್ಸಿಕೋ ಕಂಪನಿ ತಯಾರಿಸಿದ ಲೇಸ್ ಆಲೂಗಡ್ಡೆ ಚಿಪ್ಸ್ ಪ್ಯಾಕೆಟ್ ಕೂಡ ಇತ್ತು. ಅತಿಥಿಗಳಿಗೆ ಚಿಪ್ಸ್ ನೀಡುವಾಗ ಪ್ಯಾಕೆಟ್ ಸಾಮಾನ್ಯಕ್ಕಿಂತ ಹಗುರವಾಗಿದೆ ಎಂದು ಅವರಿಗೆ ಅನಿಸಿತು. ಬಳಿಕ ಪ್ಯಾಕೆಟ್‌ನಲ್ಲಿದ್ದ ಚಿಪ್ಸ್ ತೂಕ ಪರಿಶೀಲಿಸಿದಾಗ, ಪ್ಯಾಕೆಟ್ ಮೇಲೆ ನಮೂದಿಸಿದ್ದ 15 ಗ್ರಾಂ ಬದಲಿಗೆ ಕೇವಲ 4 ಗ್ರಾಂ ಚಿಪ್ಸ್ ಇತ್ತು ಎಂದು ಅವರು ಆರೋಪಿಸಿದರು.

ಅಂಗಡಿಗೆ ದೂರು ನೀಡಿದರೂ ತೃಪ್ತಿಯಾಗಲಿಲ್ಲ!

ಪ್ಯಾಕೆಟ್‌ನಲ್ಲಿ ಚಿಪ್ಸ್ ಪ್ರಮಾಣ ಕಡಿಮೆ ಇರುವುದನ್ನು ಗಮನಿಸಿದ ಬಳಿಕ ಜಲನ್ ಅವರು ಮೆಟ್ರೋ ಕ್ಯಾಶ್ ಆ್ಯಂಡ್ ಕ್ಯಾರಿ ಸಂಸ್ಥೆಯನ್ನು ಸಂಪರ್ಕಿಸಿದ್ದರು. ಆದರೆ, ಅಲ್ಲಿಂದ ದೊರೆತ ಪ್ರತಿಕ್ರಿಯೆಯಿಂದ ತೃಪ್ತರಾಗದ ಅವರು, ಗ್ರಾಹಕ ಸೇವೆಯಲ್ಲಿ ಲೋಪ ಮತ್ತು ಅನ್ಯಾಯದ ವ್ಯಾಪಾರ ಪದ್ಧತಿ ಅನುಸರಿಸಲಾಗಿದೆ ಎಂದು ಆರೋಪಿಸಿ 2022ರ ಏಪ್ರಿಲ್ 6ರಂದು ಗ್ರಾಹಕ ಆಯೋಗದ ಮೊರೆ ಹೋಗಿದ್ದರು.

ಚಿಪ್ಸ್ ಕಂಪನಿಗೆ ಹೊಣೆ, ಮಾರಾಟಗಾರನಿಗೆ ರಿಲೀಫ್

ಪ್ರಕರಣದ ವಿಚಾರಣೆ ವೇಳೆ ಮೆಟ್ರೋ ಕ್ಯಾಶ್ ಆ್ಯಂಡ್ ಕ್ಯಾರಿ ಸಂಸ್ಥೆಯು, ಚಿಪ್ಸ್ ಪ್ರಮಾಣದಲ್ಲಿ ವ್ಯತ್ಯಾಸವಾಗಿದ್ದರೆ ಅದು ಉತ್ಪಾದನಾ ಹಂತದಲ್ಲೇ ಸಂಭವಿಸಿರಬಹುದು. ಹೀಗಾಗಿ ತಯಾರಕ ಕಂಪನಿಯೇ ಹೊಣೆ ಹೊರಬೇಕು ಎಂದು ವಾದಿಸಿತು.

ಇತ್ತ ಪೆಪ್ಸಿಕೋ ಕಂಪನಿಗೆ ನೋಟಿಸ್ ನೀಡಲಾಗಿದ್ದರೂ ವಿಚಾರಣೆಗೆ ಹಾಜರಾಗಿರಲಿಲ್ಲ. ಲಭ್ಯವಿದ್ದ ದಾಖಲೆಗಳು ಮತ್ತು ಖರೀದಿ ಬಿಲ್ ಸೇರಿದಂತೆ ದೂರುದಾರರು ಸಲ್ಲಿಸಿದ ಸಾಕ್ಷ್ಯಗಳನ್ನು ಪರಿಶೀಲಿಸಿದ ಆಯೋಗವು, ಮಾರಾಟಗಾರನ ವಿರುದ್ಧದ ದೂರನ್ನು ವಜಾಗೊಳಿಸಿ ಪೆಪ್ಸಿಕೋ ವಿರುದ್ಧದ ದೂರನ್ನು ಪುರಸ್ಕರಿಸಿತು.

₹8,000 ಪರಿಹಾರ ಪಾವತಿಸಲು ಆದೇಶ

ಆಯೋಗದ ಆದೇಶದ ಪ್ರಕಾರ, ಪೆಪ್ಸಿಕೋ ಕಂಪನಿಯು ₹5 ಮೊತ್ತವನ್ನು 2022ರ ಏಪ್ರಿಲ್ 6ರಿಂದ ಪಾವತಿಸುವ ದಿನದವರೆಗೆ ವಾರ್ಷಿಕ ಶೇ. 6ರ ಬಡ್ಡಿಯೊಂದಿಗೆ ಮರುಪಾವತಿಸಬೇಕು. ಇದರ ಜೊತೆಗೆ ಮಾನಸಿಕ ಕಿರುಕುಳಕ್ಕೆ ₹5,000 ಮತ್ತು ಕಾನೂನು ವೆಚ್ಚವಾಗಿ ₹3,000 ಪಾವತಿಸಲು ಸೂಚಿಸಲಾಗಿದೆ.

ಆದೇಶದ ಪ್ರಕಾರ ಒಂದು ತಿಂಗಳೊಳಗೆ ₹8,000 ಪರಿಹಾರ ಮತ್ತು ಕಾನೂನು ವೆಚ್ಚವನ್ನು ಪಾವತಿಸದಿದ್ದರೆ, ಆ ಮೊತ್ತಕ್ಕೂ ಆದೇಶದ ದಿನಾಂಕದಿಂದ ಪಾವತಿಸುವವರೆಗೆ ವಾರ್ಷಿಕ ಶೇ. 6ರ ಬಡ್ಡಿ ಅನ್ವಯವಾಗಲಿದೆ.

Banana Buns: 3 ಬಾಳೆಹಣ್ಣು ಇದ್ರೆ ಸಾಕು, ಸಂಜೆ ಟೀ ಜೊತೆ ಸವಿಯಲು ರುಚಿಯಾದ ಬನ್ಸ್ ತಯಾರಿಸಿ!

Sushma Hegde — Wed, 28 Oct 2026 15:29:47 +0530

ಸಂಜೆಯ ಟೀ ಜೊತೆ ಏನಾದರೂ ಸಿಹಿಯಾದ, ಮೃದುವಾದ ತಿಂಡಿ ತಿನ್ನಬೇಕು ಎನಿಸಿದರೆ ಬಾಳೆಹಣ್ಣಿನ ಬನ್ಸ್‌ ಉತ್ತಮ ಆಯ್ಕೆ. ಮನೆಯಲ್ಲಿ ಸುಲಭವಾಗಿ ಸಿಗುವ ಬಾಳೆಹಣ್ಣು, ಮೈದಾ ಹಿಟ್ಟು ಮತ್ತು ಕೆಲವು ಸರಳ ಸಾಮಗ್ರಿಗಳನ್ನು ಬಳಸಿ ರುಚಿಕರವಾದ ಬನ್ಸ್ ತಯಾರಿಸಬಹುದು. ಮಕ್ಕಳು ಹಾಗೂ ದೊಡ್ಡವರು ಇಷ್ಟಪಡುವ ಈ ಬನ್ಸ್‌ಗಳನ್ನು ಬೆಳಗಿನ ಉಪಾಹಾರಕ್ಕೂ ಅಥವಾ ಸಂಜೆ ಸ್ನ್ಯಾಕ್ಸ್‌ ಆಗಿಯೂ ಸವಿಯಬಹುದು.

ಹಾಗಾದರೆ, ಮನೆಯಲ್ಲೇ ಬೇಕರಿ ಶೈಲಿಯ ಮೃದುವಾದ ಬಾಳೆಹಣ್ಣಿನ ಬನ್ಸ್ ತಯಾರಿಸುವುದು ಹೇಗೆ? ಇಲ್ಲಿದೆ ಸರಳ ರೆಸಿಪಿ.

ಬಾಳೆಹಣ್ಣಿನ ಬನ್ಸ್ ಮಾಡಲು ಬೇಕಾಗುವ ಸಾಮಗ್ರಿಗಳು

ಹಣ್ಣಾದ ಬಾಳೆಹಣ್ಣು – 3

ಮೈದಾ ಹಿಟ್ಟು – 2 ಕಪ್

ಸಕ್ಕರೆ – ಅರ್ಧ ಕಪ್

ಬೆಣ್ಣೆ – 3 ಟೇಬಲ್ ಸ್ಪೂನ್

ಬೆಚ್ಚಗಿನ ಹಾಲು – ಅರ್ಧ ಕಪ್

ಈಸ್ಟ್ – 1 ಟೀ ಸ್ಪೂನ್

ದಾಲ್ಚಿನ್ನಿ ಪುಡಿ – ಅರ್ಧ ಟೀ ಸ್ಪೂನ್

ಉಪ್ಪು – ಕಾಲು ಟೀ ಸ್ಪೂನ್

ಎಣ್ಣೆ – 2 ಟೇಬಲ್ ಸ್ಪೂನ್

ಬನ್ಸ್ ಮೇಲೆ ಹಚ್ಚಲು ಹಾಲು – ಸ್ವಲ್ಪ

ಬಾಳೆಹಣ್ಣಿನ ಬನ್ಸ್ ತಯಾರಿಸುವ ವಿಧಾನ

ಹಂತ 1: ಮೊದಲು ಹಣ್ಣಾದ ಮೂರು ಬಾಳೆಹಣ್ಣುಗಳ ಸಿಪ್ಪೆ ತೆಗೆದು, ಒಂದು ಪಾತ್ರೆಯಲ್ಲಿ ಹಾಕಿ ಚೆನ್ನಾಗಿ ಮೃದುವಾಗಿ ಮ್ಯಾಶ್ ಮಾಡಿಕೊಳ್ಳಿ.

ಹಂತ 2: ಒಂದು ದೊಡ್ಡ ಬೌಲ್‌ನಲ್ಲಿ ಮೈದಾ ಹಿಟ್ಟು, ಸಕ್ಕರೆ, ಈಸ್ಟ್, ದಾಲ್ಚಿನ್ನಿ ಪುಡಿ ಮತ್ತು ಉಪ್ಪನ್ನು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ.

ಹಂತ 3: ಈಗ ಈ ಮಿಶ್ರಣಕ್ಕೆ ಮ್ಯಾಶ್ ಮಾಡಿದ ಬಾಳೆಹಣ್ಣು, ಬೆಚ್ಚಗಿನ ಹಾಲು ಮತ್ತು ಕರಗಿಸಿದ ಬೆಣ್ಣೆಯನ್ನು ಸೇರಿಸಿ. ಎಲ್ಲವನ್ನೂ ಚೆನ್ನಾಗಿ ಕಲಸಿ ಮೃದುವಾದ ಹಿಟ್ಟನ್ನು ತಯಾರಿಸಿಕೊಳ್ಳಿ.

ಹಂತ 4: ಹಿಟ್ಟನ್ನು ಸುಮಾರು 8–10 ನಿಮಿಷಗಳ ಕಾಲ ಚೆನ್ನಾಗಿ ನಾದಿ. ನಂತರ ಹಿಟ್ಟಿನ ಮೇಲೆ ಸ್ವಲ್ಪ ಎಣ್ಣೆ ಸವರಿ, ಮುಚ್ಚಿ ಬೆಚ್ಚಗಿನ ಜಾಗದಲ್ಲಿ ಸುಮಾರು 1 ಗಂಟೆ ಅಥವಾ ಹಿಟ್ಟು ಎರಡು ಪಟ್ಟು ಉಬ್ಬುವವರೆಗೆ ಇಡಿ.

ಹಂತ 5: ಉಬ್ಬಿದ ಹಿಟ್ಟನ್ನು ತೆಗೆದು ಮತ್ತೊಮ್ಮೆ ಸ್ವಲ್ಪ ನಾದಿ. ನಂತರ ಸಣ್ಣ ಸಣ್ಣ ಉಂಡೆಗಳಾಗಿ ಮಾಡಿಕೊಂಡು ಬನ್ಸ್ ಆಕಾರದಲ್ಲಿ ತಯಾರಿಸಿಕೊಳ್ಳಿ.

ಹಂತ 6: ಬೇಕಿಂಗ್ ಟ್ರೇಗೆ ಸ್ವಲ್ಪ ಎಣ್ಣೆ ಸವರಿ, ಬನ್ಸ್‌ಗಳನ್ನು ಅಂತರವಿಟ್ಟು ಜೋಡಿಸಿ. ಮತ್ತೆ ಮುಚ್ಚಿ ಸುಮಾರು 30–60 ನಿಮಿಷಗಳ ಕಾಲ ಉಬ್ಬಲು ಬಿಡಿ. ಹಿಟ್ಟು ಚೆನ್ನಾಗಿ ಉಬ್ಬಿದ ಬಳಿಕ ಬನ್ಸ್‌ಗಳ ಮೇಲ್ಭಾಗಕ್ಕೆ ಸ್ವಲ್ಪ ಹಾಲು ಹಚ್ಚಿ.

ಹಂತ 7: ಮುಂಚಿತವಾಗಿ 180°Cಗೆ ಬಿಸಿ ಮಾಡಿದ ಓವನ್‌ನಲ್ಲಿ ಸುಮಾರು 18–20 ನಿಮಿಷ ಬೇಯಿಸಿ. ಬನ್ಸ್‌ಗಳ ಮೇಲ್ಭಾಗ ತಿಳಿ ಚಿನ್ನದ ಬಣ್ಣಕ್ಕೆ ತಿರುಗಿದಾಗ ಹೊರತೆಗೆದುಕೊಳ್ಳಿ. ಓವನ್‌ನ ತಾಪಮಾನಕ್ಕೆ ಅನುಗುಣವಾಗಿ ಬೇಯುವ ಸಮಯ ಸ್ವಲ್ಪ ಬದಲಾಗಬಹುದು.

ಹಂತ 8: ಬೇಯಿಸಿದ ಬನ್ಸ್‌ಗಳನ್ನು ಹೊರತೆಗೆದು ಸ್ವಲ್ಪ ತಂಪಾಗಲು ಬಿಡಿ. ಬೇಕಿದ್ದರೆ ಮೇಲ್ಭಾಗಕ್ಕೆ ಸ್ವಲ್ಪ ಬೆಣ್ಣೆ ಹಚ್ಚಬಹುದು. ಇದರಿಂದ ಬನ್ಸ್ ಇನ್ನಷ್ಟು ಮೃದುವಾಗಿ ಮತ್ತು ರುಚಿಯಾಗಿ ಇರುತ್ತವೆ.

ಸಾಫ್ಟ್‌ ಮತ್ತು ಸ್ವೀಟ್ ಬಾಳೆಹಣ್ಣಿನ ಬನ್ಸ್ ರೆಡಿ!

ಇಷ್ಟೇ, ಮೃದುವಾದ ಹಾಗೂ ಸಿಹಿಯಾದ ಬಾಳೆಹಣ್ಣಿನ ಬನ್ಸ್ ಸವಿಯಲು ಸಿದ್ಧ. ಬಾಳೆಹಣ್ಣಿನ ನೈಸರ್ಗಿಕ ಸಿಹಿ ಮತ್ತು ದಾಲ್ಚಿನ್ನಿಯ ಪರಿಮಳ ಈ ಬನ್ಸ್‌ಗೆ ವಿಶೇಷ ರುಚಿ ನೀಡುತ್ತವೆ. ಬಿಸಿ ಚಹಾ, ಕಾಫಿ ಅಥವಾ ಹಾಲಿನೊಂದಿಗೆ ಇದನ್ನು ಸವಿಯಬಹುದು.

ಟಿಪ್: ಹಿಟ್ಟು ಸರಿಯಾಗಿ ಉಬ್ಬಲು ಈಸ್ಟ್ ಬಳಸುವಾಗ ಹಾಲು ಬಿಸಿಬಿಸಿಯಾಗಿರದೆ ಬೆಚ್ಚಗಿರುವಂತೆ ನೋಡಿಕೊಳ್ಳಿ. ಹೆಚ್ಚು ಬಿಸಿಯಾದ ಹಾಲು ಈಸ್ಟ್‌ನ ಕಾರ್ಯಕ್ಷಮತೆಯನ್ನು ಕಡಿಮೆ ಮಾಡಬಹುದು. ಹಿಟ್ಟು ಉಬ್ಬಲು ಬೇಕಾದ ಸಮಯ ಕೋಣೆಯ ತಾಪಮಾನಕ್ಕೆ ಅನುಗುಣವಾಗಿ ಬದಲಾಗುತ್ತದೆ.