Asianet Suvarna News

Kannada Dasara wishes 2026: ಸರ್ವರಿಗೂ ದಸರಾ, ವಿಜಯದಶಮಿ ಹಬ್ಬದ ಹಾರ್ದಿಕ ಶುಭಾಶಯಗಳು

Sushma Hegde — Mon, 19 Oct 2026 10:12:47 +0530

ನಾಡಿನಾದ್ಯಂತ ದಸರಾ ಹಬ್ಬದ ಸಂಭ್ರಮ ಮನೆಮಾಡಿದೆ. ನವರಾತ್ರಿಯ ಒಂಬತ್ತು ದಿನಗಳ ಆಚರಣೆಯ ಬಳಿಕ ಆಯುಧ ಪೂಜೆ ಮತ್ತು ವಿಜಯದಶಮಿಯನ್ನು ಭಕ್ತಿಭಾವದಿಂದ ಆಚರಿಸಲಾಗುತ್ತದೆ. ಈ ಶುಭ ಸಂದರ್ಭದಲ್ಲಿ ಸ್ನೇಹಿತರು, ಬಂಧುಗಳು, ಕುಟುಂಬದವರು ಹಾಗೂ ಆತ್ಮೀಯರಿಗೆ ಹಬ್ಬದ ಶುಭಾಶಯಗಳನ್ನು ತಿಳಿಸುವುದು ವಿಶೇಷ ಸಂಭ್ರಮವನ್ನು ತರುತ್ತದೆ. ತಾಯಿ ಚಾಮುಂಡೇಶ್ವರಿಯ ಆಶೀರ್ವಾದ ಎಲ್ಲರ ಮೇಲಿರಲಿ, ಪ್ರತಿಯೊಬ್ಬರ ಜೀವನದಲ್ಲಿ ಸುಖ, ಶಾಂತಿ, ಆರೋಗ್ಯ ಮತ್ತು ಸಮೃದ್ಧಿ ನೆಲೆಸಲಿ ಎಂಬುದು ಎಲ್ಲರ ಹಾರೈಕೆ.

1. ಕುಟುಂಬದವರಿಗೆ ಆಯುಧ ಪೂಜೆ ಶುಭಾಶಯಗಳು

ನಿಮಗೂ ಮತ್ತು ನಿಮ್ಮ ಕುಟುಂಬದವರಿಗೂ ಆಯುಧ ಪೂಜೆಯ ಹಾರ್ದಿಕ ಶುಭಾಶಯಗಳು. ನಾಡದೇವತೆ ತಾಯಿ ಚಾಮುಂಡೇಶ್ವರಿಯ ಆಶೀರ್ವಾದ ಸದಾ ನಿಮ್ಮ ಮೇಲಿರಲಿ. ದೇವಿಯು ನಿಮಗೆ ಉತ್ತಮ ಆರೋಗ್ಯ, ದೀರ್ಘಾಯುಷ್ಯ, ನೆಮ್ಮದಿ ಹಾಗೂ ಸಮೃದ್ಧಿಯನ್ನು ಕರುಣಿಸಲಿ.

2. ವೃತ್ತಿ ಮತ್ತು ವ್ಯಾಪಾರದಲ್ಲಿ ಯಶಸ್ಸು ಸಿಗಲಿ

ಆಯುಧ ಪೂಜೆಯ ಈ ಶುಭ ದಿನದಂದು ನೀವು ಪೂಜಿಸುವ ಉಪಕರಣಗಳು ನಿಮ್ಮ ಯಶಸ್ಸಿನ ಮೆಟ್ಟಿಲುಗಳಾಗಲಿ. ನಿಮ್ಮ ವೃತ್ತಿ, ವ್ಯಾಪಾರ ಹಾಗೂ ಉದ್ಯೋಗದಲ್ಲಿ ಪ್ರಗತಿ ದೊರೆಯಲಿ. ನೀವು ಕೈಗೊಳ್ಳುವ ಪ್ರತಿಯೊಂದು ಕೆಲಸದಲ್ಲೂ ಜಯ ನಿಮ್ಮದಾಗಲಿ. ಆಯುಧ ಪೂಜೆಯ ಶುಭಾಶಯಗಳು!

3. ಸುಖ, ಶಾಂತಿ ಮತ್ತು ಸಮೃದ್ಧಿಯ ಹಾರೈಕೆ

ಸರಸ್ವತಿ ದೇವಿ ಹಾಗೂ ದುರ್ಗಾ ಮಾತೆಯ ಕೃಪೆಯಿಂದ ನಿಮ್ಮ ಬದುಕು ಜ್ಞಾನ, ಧೈರ್ಯ ಮತ್ತು ಸಕಾರಾತ್ಮಕತೆಯಿಂದ ತುಂಬಿರಲಿ. ನಿಮ್ಮ ಕುಟುಂಬದಲ್ಲಿ ಸಂತೋಷ ನೆಲೆಸಲಿ, ಎಲ್ಲ ಸಂಕಷ್ಟಗಳು ದೂರವಾಗಲಿ. ನಿಮಗೂ ನಿಮ್ಮ ಮನೆಯವರಿಗೂ ಆಯುಧ ಪೂಜೆಯ ಹಾರ್ದಿಕ ಶುಭಾಶಯಗಳು.

4. ತಾಯಿ ಚಾಮುಂಡೇಶ್ವರಿಯ ಆಶೀರ್ವಾದ ಸದಾ ಇರಲಿ

ವಿಜಯದಶಮಿ ಹಬ್ಬದ ಹಾರ್ದಿಕ ಶುಭಾಶಯಗಳು. ತಾಯಿ ಚಾಮುಂಡೇಶ್ವರಿಯು ನಿಮ್ಮೆಲ್ಲ ಕಷ್ಟಗಳನ್ನು ದೂರ ಮಾಡಿ, ಜೀವನದಲ್ಲಿ ಸುಖ, ಶಾಂತಿ, ಸಂಪತ್ತು ಮತ್ತು ನೆಮ್ಮದಿಯನ್ನು ಕರುಣಿಸಲಿ. ನಿಮ್ಮ ಮನೆ ಸದಾ ಸಂತೋಷದಿಂದ ತುಂಬಿರಲಿ.

5. ಕೆಟ್ಟದ್ದರ ಮೇಲೆ ಒಳ್ಳೆಯದರ ವಿಜಯವಾಗಲಿ

ಕೆಟ್ಟದ್ದರ ಮೇಲಿನ ಒಳ್ಳೆಯದರ ವಿಜಯವನ್ನು ಸಾರುವ ವಿಜಯದಶಮಿಯು ನಿಮ್ಮ ಜೀವನದಲ್ಲಿ ಹೊಸ ಭರವಸೆ ಮತ್ತು ಹುರುಪನ್ನು ಮೂಡಿಸಲಿ. ನಿಮ್ಮ ಕನಸುಗಳೆಲ್ಲ ನನಸಾಗಲಿ, ಪ್ರತಿಯೊಂದು ಹೆಜ್ಜೆಯೂ ಯಶಸ್ಸಿನತ್ತ ಸಾಗಲಿ. ನಿಮಗೂ ನಿಮ್ಮ ಕುಟುಂಬದವರಿಗೂ ವಿಜಯದಶಮಿಯ ಶುಭಾಶಯಗಳು!

6. ಸಮಸ್ತ ನಾಡಿನ ಜನತೆಗೆ ದಸರಾ ಶುಭಾಶಯಗಳು

ಸಮಸ್ತ ನಾಡಿನ ಜನತೆಗೆ ನಾಡಹಬ್ಬ ದಸರಾ ಹಾಗೂ ವಿಜಯದಶಮಿಯ ಹಾರ್ದಿಕ ಶುಭಾಶಯಗಳು. ತಾಯಿ ಚಾಮುಂಡೇಶ್ವರಿಯ ಆಶೀರ್ವಾದದಿಂದ ಎಲ್ಲರ ಬದುಕಿನಲ್ಲಿ ಆರೋಗ್ಯ, ಆಯಸ್ಸು, ಶಾಂತಿ ಮತ್ತು ಸಮೃದ್ಧಿ ನೆಲೆಸಲಿ. ನಾಡಿನಾದ್ಯಂತ ಸುಖ-ಸಂತೋಷ ತುಂಬಿರಲಿ.

7. ಹೊಸ ಕನಸುಗಳಿಗೆ ನಾಂದಿಯಾಗಲಿ ವಿಜಯದಶಮಿ

ಈ ವಿಜಯದಶಮಿಯು ನಿಮ್ಮ ಜೀವನದಲ್ಲಿ ಹೊಸ ಅವಕಾಶಗಳನ್ನು ತೆರೆದಿಡಲಿ. ನೀವು ಕಂಡ ಕನಸುಗಳು ನನಸಾಗಲಿ, ನಿಮ್ಮ ಪರಿಶ್ರಮಕ್ಕೆ ತಕ್ಕ ಪ್ರತಿಫಲ ದೊರೆಯಲಿ. ಪ್ರತಿಯೊಂದು ದಿನವೂ ಹೊಸ ಉತ್ಸಾಹ ಮತ್ತು ಸಂತೋಷದಿಂದ ಕೂಡಿರಲಿ. ವಿಜಯದಶಮಿಯ ಶುಭಾಶಯಗಳು!

ಮೈಸೂರು ದಸರಾ: ಅಂಬಾರಿಯನ್ನು ಆನೆಯ ಮೇಲೆಯೇ ಹೊರಿಸುವುದೇಕೆ? ಕುದುರೆ ಗಾಡಿ, ಎತ್ತಿನ ಬಂಡಿ ಯಾಕೆ ಬಳಸಲಿಲ್ಲ?

Sathish Kumar KH — Tue, 20 Oct 2026 19:09:39 +0530

ಮೈಸೂರು ದಸರಾದಲ್ಲಿ 750 ಕೆಜಿ ತೂಕದ ಚಿನ್ನದ ಅಂಬಾರಿಯನ್ನು ಆನೆಯ ಮೇಲೆ ಹೊರಿಸಲಾಗುತ್ತದೆ. ಆದರೆ, ಆನೆಯೇ ಏಕೆ ಚಿನ್ನದ ಅಂಬಾರಿಯನ್ನು ಹೊರಬೇಕು? ಇದರ ಹಿಂದಿನ ಪೌರಾಣಿಕ, ಐತಿಹಾಸಿನ ಹಿನ್ನೆಲೆ ಮತ್ತು ಅಚ್ಚರಿಯ ಕಾರಣಗಳನ್ನು ತಿಳಿಯಿರಿ.

ವಿಶ್ವವಿಖ್ಯಾತ ಮೈಸೂರು ದಸರಾದ ಪ್ರಮುಖ ಆಕರ್ಷಣೆಯೇ ‘ಜಂಬೂ ಸವಾರಿ’. 750 ಕೆಜಿ ತೂಕದ ಚಿನ್ನದ ಅಂಬಾರಿಯಲ್ಲಿ ವಿರಾಜಮಾನಳಾದ ನಾಡದೇವತೆ ತಾಯಿ ಚಾಮುಂಡೇಶ್ವರಿಯನ್ನು ಗಜಪಡೆ ಹೊತ್ತು ಸಾಗುವ ಆ ಭವ್ಯ ಕ್ಷಣವನ್ನು ಕಣ್ತುಂಬಿಕೊಳ್ಳಲು ಲಕ್ಷಾಂತರ ಜನ ಜಮಾಯಿಸುತ್ತಾರೆ. ಆದರೆ, ಎಂದಾದರೂ ಯೋಚಿಸಿದ್ದೀರಾ? ಅಂಬಾರಿಯ ಮೆರವಣಿಗೆಗೆ ಕುದುರೆ ಗಾಡಿ ಅಥವಾ ಅಲಂಕೃತ ಎತ್ತಿನ ಬಂಡಿಯನ್ನು ಬಳಸದೆ, ಕೇವಲ ಆನೆಯ ಬೆನ್ನಿನ ಮೇಲೆಯೇ ಏಕೆ ಹೊರಿಸಲಾಗುತ್ತದೆ? ಇದರ ಹಿಂದೆ ಅದ್ಭುತ ಧಾರ್ಮಿಕ ಮತ್ತು ಪ್ರಾಯೋಗಿಕ ಇತಿಹಾಸವಿದೆ.

ಸನಾತನ ಪರಂಪರೆಯಲ್ಲಿ ಆನೆಯು ಕೇವಲ ಪ್ರಾಣಿಯಲ್ಲ, ಅದು ಮಂಗಳದಾಯಕ ಶಕ್ತಿಯಾದ ಶ್ರೀ ಗಣೇಶ ಮತ್ತು ಇಂದ್ರನ ವಾಹನ ಐರಾವತದ ಸಂಕೇತ. ಪುರಾಣಗಳ ಪ್ರಕಾರ, ದುಷ್ಟ ಮಹಿಷಾಸುರನನ್ನು ಸಂಹರಿಸಿದ ಬಳಿಕ ದೇವತೆಗಳು ತಾಯಿ ದುರ್ಗೆಯನ್ನು ಆನೆಗಳ ಮೂಲಕ ಗಜಪೂಜೆ ಸಲ್ಲಿಸಿ ಗೌರವಿಸಿದರು. ರಾಜಧರ್ಮದಲ್ಲೂ ತಾಯಿಯ ಪಟ್ಟಾಭಿಷೇಕವನ್ನು 'ಗಜಲಕ್ಷ್ಮಿ' ಸ್ವರೂಪದಲ್ಲಿ ಆಚರಿಸುವುದು ಪರಮ ಮಂಗಳಕರ ಎಂಬ ನಂಬಿಕೆಯಿದೆ.

ಮೈಸೂರು ಅರಮನೆಯ ಇತಿಹಾಸದ ಪ್ರಕಾರ, ಚಿನ್ನದ ಅಂಬಾರಿಯ ತೂಕವೇ ಬರೋಬ್ಬರಿ 750 ಕೆಜಿ. ಅದರೊಳಗೆ ಪ್ರತಿಷ್ಠಾಪಿಸುವ ಉತ್ಸವ ಮೂರ್ತಿ, ಪೂಜಾ ಪರಿಕರಗಳು ಎಲ್ಲವನ್ನೂ ಸೇರಿಸಿದರೆ ತೂಕ ಮತ್ತಷ್ಟು ಹೆಚ್ಚಾಗುತ್ತದೆ. ಕುದುರೆ ಅಥವಾ ಎತ್ತುಗಳು ಭಾರವನ್ನು ಎಳೆಯಬಲ್ಲವೇ ಹೊರತು, ಇಷ್ಟು ಅಪಾರ ತೂಕವನ್ನು ತಮ್ಮ ಬೆನ್ನಿನ ಮೇಲೆ ಲೀಲಾಜಾಲವಾಗಿ ಹೊತ್ತು ನಿಲ್ಲುವ ಶಕ್ತಿ ಕೇವಲ ಆನೆಗಳಿಗೆ ಮಾತ್ರವಿದೆ.

ದಸರಾ ಮೆರವಣಿಗೆಯಲ್ಲಿ 8 ರಿಂದ 10 ಲಕ್ಷಕ್ಕೂ ಹೆಚ್ಚು ಭಕ್ತರು ರಸ್ತೆಯ ಎರಡೂ ಬದಿ ನೆರೆದಿರುತ್ತಾರೆ. ಒಂದು ವೇಳೆ ಕುದುರೆ ಗಾಡಿ ಅಥವಾ ಎತ್ತಿನ ಬಂಡಿಯಲ್ಲಿ ಅಂಬಾರಿ ಇಟ್ಟಿದ್ದರೆ, ನೆಲಮಟ್ಟದಿಂದ ಕೇವಲ ಮುಂಭಾಗದಲ್ಲಿರುವ ಕೆಲವರಿಗೆ ಮಾತ್ರ ದೇವಿಯ ದರ್ಶನವಾಗುತ್ತಿತ್ತು. ಆದರೆ, 10 ರಿಂದ 11 ಅಡಿ ಎತ್ತರದ ಬೃಹತ್ ಆನೆಯ ಮೇಲೆ ಅಂಬಾರಿ ಇರಿಸಿದಾಗ, ನೂರಾರು ಮೀಟರ್ ದೂರದಲ್ಲಿ ನಿಂತ ಭಕ್ತರಿಗೂ ನಾಡದೇವತೆಯ ಸ್ಪಷ್ಟ ದರ್ಶನ ಲಭ್ಯವಾಗುತ್ತದೆ.

ವಿಜಯನಗರ ಸಾಮ್ರಾಜ್ಯದಿಂದ ಆರಂಭವಾಗಿ ಒಡೆಯರ್ ಕಾಲದವರೆಗೆ ಸೈನ್ಯದಲ್ಲಿದ್ದ ‘ಚತುರಂಗ ಬಲ’ದಲ್ಲಿ ಆನೆಗೆ ಅತ್ಯುನ್ನತ ಸ್ಥಾನವಿತ್ತು. ಪಟಾಕಿ, ವಾದ್ಯ-ಮೇಳ, ಅಪಾರ ಜನಸಂದಣಿಯ ನಡುವೆಯೂ ವಿಚಲಿತವಾಗದೆ ಗಾಂಭೀರ್ಯದಿಂದ ಹೆಜ್ಜೆ ಹಾಕುವ ಗುಣ ಆನೆಗೆ ಮಾತ್ರ ಸಾಧ್ಯ. ಕುದುರೆಗಳು ಗದ್ದಲಕ್ಕೆ ಸುಲಭವಾಗಿ ಬೆದರುತ್ತವೆ, ಎತ್ತಿನ ಬಂಡಿಗೆ ರಾಜವೈಭವ ತರುವ ಗಾಂಭೀರ್ಯವಿರುವುದಿಲ್ಲ. ಆದ್ದರಿಂದಲೇ ಆನೆಯ ‘ಗಜಗಮನ’ವೇ ಅಂಬಾರಿಯ ಮೆರವಣಿಗೆಗೆ ಇಂದಿಗೂ ಶಾಶ್ವತ ಶೋಭೆ.

ರಾವಣನಿಗೆ ಹತ್ತು ತಲೆಗಳು ಸಿಕ್ಕಿದ್ದು ಹೇಗೆ? ಬ್ರಹ್ಮದೇವ ನೀಡಿದ ವರದ ಹಿಂದಿದೆ ರೋಚಕ ಪೌರಾಣಿಕ ಕಥೆ!

Pavna Das — Tue, 20 Oct 2026 16:46:15 +0530

ದಶಾನನ ರಾವಣನ ರೋಚಕ ಕಥೆ

ಲಂಕೆಯ ರಾಜ ರಾವಣನಿಗೆ ದಶಾನನ, ದಶಕಂಠ ಎಂಬ ಹೆಸರೂ ಇದೆ. ದಶಾನನ ಎಂದರೆ ಹತ್ತು ಮುಖಗಳನ್ನು ಹೊಂದಿರುವವನು ಎಂದರ್ಥ. ದಸರಾ ಸಂದರ್ಭದಲ್ಲಿ ರಾವಣನ ಹತ್ತು ತಲೆಗಳನ್ನು ಹೊಂದಿರುವ ಪ್ರತಿಕೃತಿಗಳನ್ನು ನೀವು ನೋಡಿರಬಹುದು. ಹಾಗಾದರೆ, ಒಬ್ಬ ವ್ಯಕ್ತಿಗೆ ಹತ್ತು ತಲೆಗಳು ಹೇಗೆ ಇರಲು ಸಾಧ್ಯ? ರಾವಣನಿಗೆ ಹುಟ್ಟಿನಿಂದಲೇ ಹತ್ತು ತಲೆಗಳು ಇರಲಿಲ್ಲ. ಅದಕ್ಕಾಗಿ ಅವನು ಕಠಿಣ ತಪಸ್ಸು ಮಾಡಿದ್ದನು ಎಂಬುದು ಪೌರಾಣಿಕ ಕಥನಗಳಲ್ಲಿ ಉಲ್ಲೇಖವಾಗಿದೆ. ಅಷ್ಟೇ ಅಲ್ಲ, ರಾವಣನ ಹತ್ತು ತಲೆಗಳಿಗೆ ವಿಶೇಷ ಸಾಂಕೇತಿಕ ಅರ್ಥವೂ ಇದೆ.

ರಾವಣನಿಗೆ ಹತ್ತು ತಲೆಗಳು ಹೇಗೆ ಬಂದವು?

ವಾಲ್ಮೀಕಿ ರಾಮಾಯಣ, ಶ್ರೀರಾಮಚರಿತಮಾನಸ ಮತ್ತು ಶ್ರೀಮದ್ಭಾಗವತ ಪುರಾಣಗಳಲ್ಲಿ ರಾವಣನ ಹತ್ತು ತಲೆಗಳ ಕುರಿತು ಉಲ್ಲೇಖಗಳಿವೆ. ವಾಲ್ಮೀಕಿ ರಾಮಾಯಣದ ಉತ್ತರಕಾಂಡದ 10ನೇ ಸರ್ಗದ ಪ್ರಕಾರ, ರಾವಣನು ಬ್ರಹ್ಮದೇವನನ್ನು ಮೆಚ್ಚಿಸಲು ಗೋಕರ್ಣ ತೀರ್ಥದಲ್ಲಿ 10,000 ವರ್ಷಗಳ ಕಾಲ ಕಠಿಣ ತಪಸ್ಸು ಮಾಡಿದನು ಎಂದು ಹೇಳಲಾಗಿದೆ. ರಾವಣನು 1,000 ವರ್ಷಗಳ ಕಾಲ ತಪಸ್ಸು ಮಾಡಿದರೂ ಬ್ರಹ್ಮದೇವನು ಪ್ರತ್ಯಕ್ಷನಾಗಲಿಲ್ಲ. ಆಗ ರಾವಣನು ತನ್ನ ತಲೆಯನ್ನು ಕತ್ತರಿಸಿ ಅಗ್ನಿಕುಂಡಕ್ಕೆ ಅರ್ಪಿಸಿದನು. ಆದರೆ ಬ್ರಹ್ಮದೇವನು ಅವನಿಗೆ ಮತ್ತೆ ತಲೆಯನ್ನು ಕರುಣಿಸಿದನು ಎಂದು ಪೌರಾಣಿಕ ಕಥನ ತಿಳಿಸುತ್ತದೆ. ಇದೇ ರೀತಿ ರಾವಣನು ಒಟ್ಟು 9,000 ವರ್ಷಗಳ ಕಾಲ ತಪಸ್ಸು ಮುಂದುವರಿಸಿದನು. ಪ್ರತಿ 1,000 ವರ್ಷಗಳ ತಪಸ್ಸಿನ ನಂತರ ತನ್ನ ಒಂದು ತಲೆಯನ್ನು ಕತ್ತರಿಸಿ ಅಗ್ನಿಗೆ ಅರ್ಪಿಸುತ್ತಿದ್ದನು. ಪ್ರತಿ ಬಾರಿಯೂ ಅವನಿಗೆ ಮತ್ತೆ ತಲೆ ದೊರೆಯುತ್ತಿತ್ತು ಎಂದು ಹೇಳಲಾಗುತ್ತದೆ.

10,000ನೇ ವರ್ಷದಲ್ಲಿ ಹತ್ತು ತಲೆಗಳು ಮತ್ತು ಅಮೃತದ ವರ ಪಡೆದ ರಾವಣ!

ರಾವಣನು 10,000ನೇ ವರ್ಷದಲ್ಲಿ ತನ್ನ ಕೊನೆಯ ತಲೆಯನ್ನು ಕತ್ತರಿಸಲು ಮುಂದಾದಾಗ ಬ್ರಹ್ಮದೇವನು ಪ್ರತ್ಯಕ್ಷನಾದನು. ರಾವಣನ ತಪಸ್ಸಿಗೆ ಮೆಚ್ಚಿ ಅವನಿಗೆ ಹತ್ತು ತಲೆಗಳು ಹಾಗೂ ನಾಭಿಯಲ್ಲಿ ಅಮೃತವಿರುವ ವರವನ್ನು ನೀಡಿದನು ಎನ್ನುತ್ತದೆ ಪೌರಾಣಿಕ ಕಥೆ. ಹೀಗೆ ಹತ್ತು ತಲೆಗಳನ್ನು ಪಡೆದ ಕಾರಣ ರಾವಣನು ದಶಾನನ ಎಂಬ ಹೆಸರಿನಿಂದ ಪ್ರಸಿದ್ಧನಾದನು. ಇನ್ನು ಲಂಕಾ ಯುದ್ಧದ ಸಂದರ್ಭದಲ್ಲಿ ವಿಭೀಷಣನು ಶ್ರೀರಾಮನಿಗೆ ರಾವಣನ ನಾಭಿಯಲ್ಲಿ ಅಮೃತವಿದೆ ಎಂದು ತಿಳಿಸಿದನು. ರಾವಣನ ನಾಭಿಗೆ ಬಾಣ ಪ್ರಯೋಗಿಸಿದಾಗ ಮಾತ್ರ ಅವನನ್ನು ಸಂಹರಿಸಲು ಸಾಧ್ಯ ಎಂದು ವಿಭೀಷಣನು ತಿಳಿಸಿದನು. ಅದರಂತೆ ಶ್ರೀರಾಮನು ರಾವಣನ ನಾಭಿಗೆ ಬಾಣ ಬಿಟ್ಟು ಅವನನ್ನು ಸಂಹರಿಸಿದನು ಎಂದು ರಾಮಾಯಣದಲ್ಲಿ ವಿವರಿಸಲಾಗಿದೆ.

ವಾಲ್ಮೀಕಿ ರಾಮಾಯಣದ ಉತ್ತರಕಾಂಡದಲ್ಲಿ, ಶ್ರೀರಾಮಚರಿತಮಾನಸದಲ್ಲಿಯೂ ತುಳಸೀದಾಸರು ಉತ್ತರಕಾಂಡದಲ್ಲಿ ಹಾಗೂ ಶ್ರೀಮದ್ಭಾಗವತ ಪುರಾಣದ ಏಳನೇ ಸ್ಕಂಧದ 10ನೇ ಅಧ್ಯಾಯದಲ್ಲಿಯೂ ರಾವಣನ ಕಠಿಣ ತಪಸ್ಸಿನ ಕುರಿತು, ಹತ್ತು ತಲೆಗಳನ್ನು ಅಗ್ನಿಗೆ ಅರ್ಪಿಸಿದುದರ ಕುರಿತು ಉಲ್ಲೇಖಿಸಲಾಗಿದೆ.

ರಾವಣನ ಹತ್ತು ತಲೆಗಳ ಅರ್ಥವೇನು?

ರಾವಣನು ಬ್ರಾಹ್ಮಣ ಮತ್ತು ಅಸುರ ವಂಶದ ಗುಣಗಳನ್ನು ಹೊಂದಿದ್ದ ವ್ಯಕ್ತಿ ಎಂದು ಪೌರಾಣಿಕ ಕಥನಗಳಲ್ಲಿ ವಿವರಿಸಲಾಗುತ್ತದೆ. ಅವನ ತಂದೆ ಬ್ರಾಹ್ಮಣನಾಗಿದ್ದರೆ, ತಾಯಿ ಅಸುರ ವಂಶದವಳಾಗಿದ್ದಳು. ಈ ಕಾರಣದಿಂದ ರಾವಣನು ಮಹಾಜ್ಞಾನಿ, ಪಂಡಿತ ಮತ್ತು ಶಿವಭಕ್ತನಾಗಿದ್ದರೂ ಅವನಲ್ಲಿ ಅಸುರ ಪ್ರವೃತ್ತಿಗಳೂ ಇದ್ದವು. ರಾವಣನ ಹತ್ತು ತಲೆಗಳನ್ನು ಅವನಲ್ಲಿದ್ದ ಹತ್ತು ಬಗೆಯ ದೋಷಗಳು ಮತ್ತು ದುರ್ಗುಣಗಳ ಸಾಂಕೇತಿಕ ರೂಪವೆಂದೂ ಪರಿಗಣಿಸಲಾಗುತ್ತದೆ. ಅವು ಯಾವುವೆಂದರೆ: ಕಾಮ, ಕ್ರೋಧ, ಮೋಹ, ಲೋಭ, ಮದ, ಮಾತ್ಸರ್ಯ, ಚಂಚಲತೆ, ತಪ್ಪು ಬುದ್ಧಿ, ಅಹಂಕಾರದಿಂದ ಆವೃತವಾದ ಮನಸ್ಸು, ಅಹಂಕಾರ .

ದಸರಾ ಹಬ್ಬವು ಕೇವಲ ರಾವಣನ ಪ್ರತಿಕೃತಿ ದಹಿಸುವ ಹಬ್ಬವಲ್ಲ; ನಮ್ಮೊಳಗಿನ ದುರ್ಗುಣಗಳನ್ನು ತೊರೆದು ಸತ್ಯ, ಧರ್ಮ ಮತ್ತು ಸಜ್ಜನಿಕೆಯ ಹಾದಿಯಲ್ಲಿ ನಡೆಯಬೇಕೆಂಬ ಸಂದೇಶವನ್ನೂ ನೀಡುತ್ತದೆ. ಆದ್ದರಿಂದ, ಈ ವಿಜಯದಶಮಿಯಂದು ನಮ್ಮೊಳಗಿನ ಕಾಮ, ಕ್ರೋಧ, ಮೋಹ, ಲೋಭ, ಅಹಂಕಾರ ಸೇರಿದಂತೆ ಎಲ್ಲ ನಕಾರಾತ್ಮಕ ಗುಣಗಳನ್ನು ದೂರಮಾಡಿ ಶ್ರೀರಾಮನ ಆದರ್ಶಗಳನ್ನು ಜೀವನದಲ್ಲಿ ಅಳವಡಿಸಿಕೊಳ್ಳೋಣ.

ನಿಮ್ಮ ಗಿಫ್ಟ್ ನೆನಪಿನಲ್ಲಿ ಉಳಿಯಬೇಕಾ? ನವರಾತ್ರಿಗೆ ಈ 15 ಐಡಿಯಾಗಳಲ್ಲಿ ಒಂದನ್ನು ಆಯ್ಕೆ ಮಾಡಿ

Govindaraj S — Sat, 17 Oct 2026 16:18:23 +0530

ನವರಾತ್ರಿ ಅಂದ್ರೆ ಭಕ್ತಿ, ಸಂಭ್ರಮ ಹಾಗೂ ಪ್ರೀತಿಪಾತ್ರರೊಂದಿಗೆ ಉಡುಗೊರೆ ಹಂಚಿಕೊಳ್ಳುವ ಸಮಯ. ಹೆಚ್ಚು ಖರ್ಚು ಮಾಡದೆ ಹಬ್ಬದ ಖುಷಿಯನ್ನು ಹೆಚ್ಚಿಸಲು ನೀವು ಯೋಚಿಸುತ್ತಿದ್ದರೆ, ಸಂಪ್ರದಾಯ ಹಾಗೂ ಕ್ರಿಯೇಟಿವಿಟಿ ಇರುವ ಹಲವು ಬಜೆಟ್ ಸ್ನೇಹಿ ಆಯ್ಕೆಗಳಿವೆ. ಈ ಒಂಬತ್ತು ದಿನಗಳ ಹಬ್ಬವನ್ನು ಇನ್ನಷ್ಟು ಸ್ಪೆಷಲ್ ಮಾಡಲು ಇಲ್ಲಿವೆ 15 ಬೆಸ್ಟ್ ಗಿಫ್ಟ್ ಐಡಿಯಾಗಳು.

1. ಸಾಂಪ್ರದಾಯಿಕ ಬಳೆಗಳು

ಬಣ್ಣಬಣ್ಣದ ಗಾಜಿನ ಬಳೆಗಳು ಹಾಗೂ ಆಕ್ಸಿಡೈಸ್ಡ್ ಬ್ರೇಸ್‌ಲೆಟ್‌ಗಳು ಹಬ್ಬದ ಉಡುಪಿಗೆ ಮ್ಯಾಚ್ ಆಗುತ್ತವೆ. ಇವುಗಳನ್ನು ನೀವು ಕಡಿಮೆ ಬೆಲೆಗೆ ಗಿಫ್ಟ್ ಆಗಿ ನೀಡಬಹುದು.

2. ಅಲಂಕಾರಿಕ ದೀಪಗಳು

ಕೈಯಿಂದ ಪೇಂಟ್ ಮಾಡಿದ ಮಣ್ಣಿನ ದೀಪಗಳು ಹಾಗೂ ಟೀ-ಲೈಟ್ ಹೋಲ್ಡರ್‌ಗಳು ಮನೆಗೆ ಹಬ್ಬದ ಕಳೆ ತರುತ್ತವೆ.

3. ಮಿನಿ ಫೆಸ್ಟಿವ್ ಹ್ಯಾಂಪರ್ಸ್

ಚಾಕೊಲೇಟ್, ಸಿಹಿತಿಂಡಿ, ಡ್ರೈ ಫ್ರೂಟ್ಸ್ ಅಥವಾ ಸಾಂಪ್ರದಾಯಿಕ ಸ್ನ್ಯಾಕ್ಸ್ ಸೇರಿಸಿ ನೀವೇ ಒಂದು ಸುಂದರವಾದ ಹ್ಯಾಂಪರ್ ರೆಡಿ ಮಾಡಬಹುದು.

4. ಎಥ್ನಿಕ್ ದುಪಟ್ಟಾಗಳು

ಗಾರ್ಬಾ ನೈಟ್ಸ್ ಹಾಗೂ ಫ್ಯಾಮಿಲಿ ಫಂಕ್ಷನ್‌ಗಳಿಗೆ ಬ್ರೈಟ್ ಕಲರ್ ದುಪಟ್ಟಾಗಳು ಮತ್ತು ಸ್ಟೋಲ್‌ಗಳು ಹೇಳಿಮಾಡಿಸಿದ ಗಿಫ್ಟ್.

5. ಇಂಡೋರ್ ಪ್ಲಾಂಟ್ಸ್

ಸಣ್ಣ ಸಕ್ಯುಲೆಂಟ್ಸ್, ಲಕ್ಕಿ ಬ್ಯಾಂಬೂ ಹಾಗೂ ಇತರ ಇಂಡೋರ್ ಗಿಡಗಳು ಬೆಳವಣಿಗೆ ಮತ್ತು ಪಾಸಿಟಿವಿಟಿಯ ಸಂಕೇತ. ಇವು ಬೆಸ್ಟ್ ಗಿಫ್ಟ್ ಆಗಬಲ್ಲವು.

6. ಸುವಾಸನೆಯ ಕ್ಯಾಂಡಲ್‌ಗಳು

ಹೂವು ಅಥವಾ ಹಬ್ಬದ ಸುವಾಸನೆ ಬೀರುವ ಅಲಂಕಾರಿಕ ಕ್ಯಾಂಡಲ್‌ಗಳು ನೋಡಲು ರಿಚ್ ಆಗಿದ್ದರೂ, ಕಡಿಮೆ ಬೆಲೆಗೆ ಸಿಗುತ್ತವೆ.

7. ಹ್ಯಾಂಡ್‌ಮೇಡ್ ಗ್ರೀಟಿಂಗ್ ಕಾರ್ಡ್ಸ್

ಪ್ರೀತಿಯಿಂದ ಕೈಯಾರೆ ಬರೆದ ಶುಭಾಶಯದ ಸಂದೇಶವು ಎಂಥದ್ದೇ ಸಿಂಪಲ್ ಗಿಫ್ಟ್‌ನ ಮೌಲ್ಯವನ್ನೂ ಹೆಚ್ಚಿಸುತ್ತದೆ.

8. ಆಕ್ಸಿಡೈಸ್ಡ್ ಜ್ಯುವೆಲರಿ

ಎಥ್ನಿಕ್ ಫ್ಯಾಷನ್ ಇಷ್ಟಪಡುವ ಸ್ನೇಹಿತರಿಗೆ ಜುಮುಕಿ, ಸ್ಟೇಟ್‌ಮೆಂಟ್ ಕಿವಿಯೋಲೆ ಹಾಗೂ ಸಾಂಪ್ರದಾಯಿಕ ನೆಕ್ಲೇಸ್‌ಗಳನ್ನು ಉಡುಗೊರೆಯಾಗಿ ನೀಡಬಹುದು.

9. ಪರ್ಸನಲೈಸ್ಡ್ ಕೀಚೈನ್‌ಗಳು

ಹೆಸರಿನ ಮೊದಲ ಅಕ್ಷರ, ಫೋಟೋ ಅಥವಾ ವಿಶೇಷ ಸಂದೇಶವಿರುವ ಕಸ್ಟಮೈಸ್ಡ್ ಕೀಚೈನ್‌ಗಳು ನಿಮ್ಮ ಪ್ರೀತಿಯನ್ನು ವ್ಯಕ್ತಪಡಿಸುತ್ತವೆ.

10. ಮಿನಿ ಪೂಜಾ ತಟ್ಟೆಗಳು

ದೀಪ, ಕುಂಕುಮ ಹಾಗೂ ಇತರ ಪೂಜಾ ಸಾಮಗ್ರಿಗಳಿರುವ ಸಣ್ಣ ಪೂಜಾ ತಟ್ಟೆಯು ಹಬ್ಬಕ್ಕೆ ಹೇಳಿಮಾಡಿಸಿದ ಸಾಂಪ್ರದಾಯಿಕ ಉಡುಗೊರೆ.

11. ಅಲಂಕಾರಿಕ ತೋರಣಗಳು

ಮಣಿಗಳು, ಬಟ್ಟೆ ಅಥವಾ ಕೃತಕ ಹೂವುಗಳಿಂದ ಮಾಡಿದ ಬಣ್ಣಬಣ್ಣದ ತೋರಣಗಳು ಹಬ್ಬದ ಸಮಯದಲ್ಲಿ ಮನೆಯ ಬಾಗಿಲಿನ ಅಂದ ಹೆಚ್ಚಿಸುತ್ತವೆ.

12. ಪೋಟ್ಲಿ ಬ್ಯಾಗ್‌ಗಳು

ಎಂಬ್ರಾಯ್ಡರಿ ಮಾಡಿದ ಪೋಟ್ಲಿ ಬ್ಯಾಗ್‌ಗಳು ಸ್ಟೈಲಿಶ್ ಆಗಿರುತ್ತವೆ. ಹಬ್ಬದ ಓಡಾಟದ ವೇಳೆ ಅಗತ್ಯ ವಸ್ತುಗಳನ್ನು ಇಟ್ಟುಕೊಳ್ಳಲು ಇವು ತುಂಬಾ ಉಪಯುಕ್ತ.

13. ಸಾಂಪ್ರದಾಯಿಕ ಜುಟ್ಟಿಗಳು

ಕಡಿಮೆ ಬೆಲೆಗೆ ಸಿಗುವ ಎಂಬ್ರಾಯ್ಡರಿ ಜುಟ್ಟಿಗಳು ಎಥ್ನಿಕ್ ಡ್ರೆಸ್‌ಗಳಿಗೆ ಪರ್ಫೆಕ್ಟ್ ಮ್ಯಾಚ್. ಹಬ್ಬದ ಸಂಭ್ರಮಕ್ಕೆ ಇವು ಹೇಳಿಮಾಡಿಸಿದಂತಿವೆ.

14. ಫೆಸ್ಟಿವ್ ಮಗ್‌ಗಳು

ಬಣ್ಣಬಣ್ಣದ ಪ್ರಿಂಟ್, ಸಾಂಪ್ರದಾಯಿಕ ಡಿಸೈನ್ ಅಥವಾ ಪರ್ಸನಲ್ ಮೆಸೇಜ್ ಇರುವ ಮಗ್‌ಗಳನ್ನು ನೀವು ದಿನನಿತ್ಯದ ಬಳಕೆಗೆ ಗಿಫ್ಟ್ ಮಾಡಬಹುದು.

15. ಮನೆಯಲ್ಲೇ ಮಾಡಿದ ಸಿಹಿತಿಂಡಿಗಳು

ಲಡ್ಡು, ಬರ್ಫಿ ಅಥವಾ ಮನೆಯಲ್ಲೇ ಮಾಡಿದ ಇತರ ಹಬ್ಬದ ಸಿಹಿತಿಂಡಿಗಳನ್ನು ಹಂಚಿಕೊಳ್ಳುವ ಮೂಲಕ ನವರಾತ್ರಿಯ ಖುಷಿಯನ್ನು ಇಮ್ಮಡಿಗೊಳಿಸಬಹುದು.

ಇನ್ನು ನವರಾತ್ರಿ ಗಿಫ್ಟಿಂಗ್ ಅಂದ್ರೆ ಸಂಬಂಧಗಳನ್ನು ಸಂಭ್ರಮಿಸುವುದು ಹಾಗೂ ಖುಷಿ ಹಂಚಿಕೊಳ್ಳುವುದು. ಒಂದು ಸ್ಪೆಷಲ್ ಗಿಫ್ಟ್ ದುಬಾರಿಯಾಗಿರಲೇಬೇಕು ಅಂತೇನಿಲ್ಲ. ಅದು ಸಾಂಪ್ರದಾಯಿಕ ವಸ್ತುವಿರಲಿ, ಕೈಯಾರೆ ಮಾಡಿದ ಗಿಫ್ಟ್ ಇರಲಿ ಅಥವಾ ಮನೆಯಲ್ಲೇ ಮಾಡಿದ ಸಿಹಿತಿಂಡಿಗಳ ಬಾಕ್ಸ್ ಇರಲಿ, ಆ ಗಿಫ್ಟ್ ಹಿಂದಿರುವ ನಿಮ್ಮ ಪ್ರೀತಿಯೇ ಅದನ್ನು ಸದಾ ನೆನಪಿನಲ್ಲಿ ಉಳಿಯುವಂತೆ ಮಾಡುತ್ತದೆ.

ಮನೆಯಿನಿಂದ ಹೊರಡುವಾಗ ಸೀನು ಬಂದರೆ ಶುಭವೋ ಅಶುಭವೋ? ಉಸಿರಾಟದ ಗತಿಯೂ ನೀಡುತ್ತಾ ಸೂಚನೆ?

Pavna Das — Mon, 19 Oct 2026 18:00:52 +0530

ಮನೆಯಿಂದ ಹೊರ ನಡೆಯುವಾಗಿನ ಶುಭ-ಅಶುಭ ಸೂಚನೆಗಳು!

ಮನೆಯಿಂದ ಯಾವುದಾದರೂ ಪ್ರಮುಖ ಕೆಲಸಕ್ಕಾಗಿ ಹೊರಡುವಾಗ ಪ್ರತಿಯೊಬ್ಬರೂ ತಮ್ಮ ಕೆಲಸ ಯಶಸ್ವಿಯಾಗಲಿ ಮತ್ತು ದಾರಿಯಲ್ಲಿ ಯಾವುದೇ ತೊಂದರೆ ಎದುರಾಗದಿರಲಿ ಎಂದು ಬಯಸುತ್ತಾರೆ. ಹೀಗಾಗಿ ಕೆಲವರು ಮನೆಯಿಂದ ಹೊರಡುವ ಮೊದಲು ದೇವರನ್ನು ಸ್ಮರಿಸುತ್ತಾರೆ. ಇನ್ನು ಕೆಲವರು ಶುಭ-ಅಶುಭದ ಸೂಚನೆಗಳನ್ನು ಗಮನಿಸುತ್ತಾರೆ. ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ಮನೆಯಿಂದ ಹೊರಡುವಾಗ ಉಸಿರಾಟದ ಗತಿ, ಸಕಾರಾತ್ಮಕ ಚಿಂತನೆ ಮತ್ತು ಸೀನು ಬರುವುದನ್ನು ಕೆಲವು ಜನರು ಮಹತ್ವದ ಸೂಚನೆಗಳೆಂದು ಪರಿಗಣಿಸುತ್ತಾರೆ. ಅವುಗಳ ಬಗ್ಗೆ ವಿವರವಾಗಿ ತಿಳಿಯೋಣ.

ಸೂರ್ಯ ಸ್ವರ ಮತ್ತು ಚಂದ್ರ ಸ್ವರ

ನಮ್ಮ ಮೂಗಿನ ಎರಡೂ ಹೊಳ್ಳೆಗಳಲ್ಲಿ ಉಸಿರಾಟದ ಗತಿ ಒಂದೇ ರೀತಿಯಾಗಿರದೆ ಬದಲಾಗಬಹುದು. ಎಡ ಮೂಗಿನ ಹೊಳ್ಳೆಯ ಮೂಲಕ ನಡೆಯುವ ಉಸಿರಾಟವನ್ನು ಚಂದ್ರ ಸ್ವರ ಎಂದೂ, ಬಲ ಮೂಗಿನ ಹೊಳ್ಳೆಯ ಮೂಲಕ ನಡೆಯುವ ಉಸಿರಾಟವನ್ನು ಸೂರ್ಯ ಸ್ವರ ಎಂದೂ ಕರೆಯಲಾಗುತ್ತದೆ. ಯಾವ ಮೂಗಿನ ಹೊಳ್ಳೆಯಲ್ಲಿ ಉಸಿರಾಟದ ಹರಿವು ಹೆಚ್ಚಾಗಿದೆಯೋ, ಆ ಬದಿಯ ಕಾಲನ್ನು ಮೊದಲು ಮನೆಯ ಹೊಸ್ತಿಲಿನಿಂದ ಹೊರಗೆ ಇಡಬೇಕು ಎಂಬುದು ಸಾಂಪ್ರದಾಯಿಕ ನಂಬಿಕೆಯಾಗಿದೆ. ಇದರಿಂದ ಕೆಲಸದಲ್ಲಿ ಯಶಸ್ಸು ದೊರೆಯುತ್ತದೆ ಎನ್ನುವ ನಂಬಿಕೆ ಇದೆ. ಯಾವುದೇ ಪ್ರಮುಖ ಕೆಲಸ ಅಥವಾ ವ್ಯಾಪಾರಕ್ಕಾಗಿ ಮನೆಯಿಂದ ಹೊರಡುವಾಗ ಯಶಸ್ಸಿನ ನಿರೀಕ್ಷೆ ಹೊಂದಿರಬೇಕು. ಉಸಿರಾಟದ ಗತಿಗೆ ಅನುಗುಣವಾಗಿ ಅದೇ ಬದಿಯ ಕಾಲನ್ನು ಮೊದಲು ಹೊರಗಿಡುವ ಸಂಪ್ರದಾಯವಿದೆ. ಇದರಿಂದ ಕೆಲಸಕಾರ್ಯಗಳಲ್ಲಿ ಮತ್ತು ವ್ಯಾಪಾರದಲ್ಲಿ ಲಾಭವಾಗುತ್ತದೆ ಎಂಬ ನಂಬಿಕೆಯೂ ಇದೆ.

ಸಕಾರಾತ್ಮಕ ಆಲೋಚನೆಗಳನ್ನು ಹೊಂದಿರಿ

ಮನೆಯಿಂದ ಹೊರಡುವಾಗ ಮನಸ್ಸಿನಲ್ಲಿ ಸಕಾರಾತ್ಮಕ ಆಲೋಚನೆಗಳನ್ನು ಹೊಂದಿರುವುದು ಮುಖ್ಯ. ಮನಸ್ಸು ಶಾಂತವಾಗಿ ಮತ್ತು ಸಂತೋಷದಿಂದ ಇದ್ದರೆ, ವ್ಯಕ್ತಿಯು ತನ್ನ ಕೆಲಸದ ಮೇಲೆ ಉತ್ತಮವಾಗಿ ಗಮನ ಹರಿಸಲು ಸಾಧ್ಯವಾಗುತ್ತದೆ. ಮನಸ್ಸು ಚಂದ್ರನೊಂದಿಗೆ ಸಂಬಂಧ ಹೊಂದಿದೆ. ಉತ್ತಮ ಆಲೋಚನೆಗಳು ಕಷ್ಟಕರ ಸಂದರ್ಭಗಳನ್ನು ಎದುರಿಸುವ ಧೈರ್ಯವನ್ನು ನೀಡುತ್ತವೆ. ಸಕಾರಾತ್ಮಕ ಮನೋಭಾವವು ದೈನಂದಿನ ಜೀವನದಲ್ಲಿ ಆತ್ಮವಿಶ್ವಾಸದಿಂದ ಮುಂದುವರಿಯಲು ಸಹಾಯ ಮಾಡುತ್ತದೆ.

ಕೆಲಸಕ್ಕೆ ಹೊರಡುವಾಗ ಸೀನು ಬಂದರೆ ಏನು ಮಾಡಬೇಕು?

ಯಾವುದೇ ಪ್ರಮುಖ ಕೆಲಸಕ್ಕಾಗಿ ಮನೆಯಿಂದ ಹೊರಡುವಾಗ ಸೀನು ಬಂದರೆ ಸ್ವಲ್ಪ ಸಮಯ ನಿಲ್ಲಬೇಕು ಎಂಬ ಸಾಂಪ್ರದಾಯಿಕ ನಂಬಿಕೆಯಿದೆ. ಕೆಲವು ಧಾರ್ಮಿಕ ಮತ್ತು ಜನಪದ ನಂಬಿಕೆಗಳಲ್ಲಿ ಒಂದು, ಎರಡು ಅಥವಾ ಮೂರು ಬಾರಿ ಸೀನು ಬಂದಾಗ ಬೇರೆಬೇರೆ ಸೂಚನೆಗಳಿವೆ ಎಂದು ಹೇಳಲಾಗುತ್ತದೆ. ಜೋರಾಗಿ ಸೀನು ಬರುವುದನ್ನೂ ಕೆಲವರು ಅಶುಭವೆಂದು ಪರಿಗಣಿಸುತ್ತಾರೆ.

ಮನೆಯಿಂದ ಹೊರಡುವಾಗ ಉಸಿರಾಟದ ಸ್ವರ, ಸೀನು ಮತ್ತು ಶುಭ-ಅಶುಭ ಸೂಚನೆಗಳಿಗೆ ಸಂಬಂಧಿಸಿದ ಹಲವು ನಂಬಿಕೆಗಳನ್ನು ಪ್ರಾಚೀನ ಸಂಪ್ರದಾಯಗಳಲ್ಲಿ ಕಾಣಬಹುದು. ಜನರು ತಮ್ಮ ನಂಬಿಕೆ ಮತ್ತು ಆಚರಣೆಗಳಿಗೆ ಅನುಗುಣವಾಗಿ ಇವುಗಳನ್ನು ಪಾಲಿಸುತ್ತಾರೆ. ಆದರೆ ಮುಖ್ಯವಾಗಿ, ಪ್ರತಿಯೊಬ್ಬರೂ ಸಕಾರಾತ್ಮಕ ಚಿಂತನೆ ಹೊಂದಿರಬೇಕು. ತಾವು ಕೈಗೆತ್ತಿಕೊಳ್ಳುವ ಕೆಲಸ ಯಶಸ್ವಿಯಾಗಲು ಅಗತ್ಯವಾದ ಸಿದ್ಧತೆ, ಪರಿಶ್ರಮ ಮತ್ತು ಆತ್ಮವಿಶ್ವಾಸದೊಂದಿಗೆ ಮುನ್ನಡೆಯಬೇಕು.

ಆಯುಧ ಪೂಜೆಗೆ ನೀವು ಒಡೆದ ಕುಂಬಳಕಾಯಿ ಎಷ್ಟು ಹೋಳು ಆಯ್ತು? ಹೋಳುಗಳ ಮೇಲೆ ವರ್ಷದ ಭವಿಷ್ಯ ತಿಳಿಯಿರಿ

Sathish Kumar KH — Tue, 20 Oct 2026 18:31:23 +0530

ನಾಡಹಬ್ಬ ದಸರಾದ ಪ್ರಮುಖ ಆಕರ್ಷಣೆಗಳಲ್ಲಿ 'ಆಯುಧ ಪೂಜೆ' ಪ್ರಮುಖವಾದದ್ದು. ಕಾರ್ಖಾನೆಯ ಯಂತ್ರಗಳಿಂದ ಹಿಡಿದು ಮನೆಯ ವಾಹನಗಳವರೆಗೆ ಎಲ್ಲವನ್ನೂ ತೊಳೆದು, ಸಿಂಗರಿಸಿ ಪೂಜಿಸಲಾಗುತ್ತದೆ. ಆದರೆ, ಪೂಜೆಯ ಕೊನೆಯಲ್ಲಿ ವಾಹನಗಳ ಮುಂದೆ ಬೂದುಗುಂಬಳಕಾಯಿಗೆ ಕುಂಕುಮ, ನಾಣ್ಯಗಳನ್ನಿಟ್ಟು ರಸ್ತೆಗೆ ಒಡೆದು ದೃಷ್ಟಿ ತೆಗೆಯುವುದು ಎಲ್ಲೆಡೆ ಕಂಡುಬರುವ ಸಂಪ್ರದಾಯ. ಈ ಆಚರಣೆಯ ಹಿಂದಿನ ಧಾರ್ಮಿಕ ರಹಸ್ಯವೇನು? ಕುಂಬಳಕಾಯಿ ಒಡೆದ ಹೋಳುಗಳು ನಿಮ್ಮ ಭವಿಷ್ಯವನ್ನು ಸೂಚಿಸುತ್ತವೆಯೇ? ಇಲ್ಲಿದೆ ಕುತೂಹಲಕಾರಿ ಮಾಹಿತಿ.

ಕುಂಬಳಕಾಯಿ ಒಡೆಯುವುದು ಏಕೆ?

ಶಾಸ್ತ್ರಗಳ ಪ್ರಕಾರ, ವಾಹನ ಮತ್ತು ಯಂತ್ರೋಪಕರಣಗಳು ನಿರಂತರವಾಗಿ ಚಲಿಸುವಾಗ ಅಥವಾ ಬಳಕೆಯಾಗುವಾಗ ಜನರ ಕೆಟ್ಟ ದೃಷ್ಟಿ (ದೃಷ್ಟಿದೋಷ) ಹಾಗೂ ನಕಾರಾತ್ಮಕ ಶಕ್ತಿಗಳು ಆವರಿಸುತ್ತವೆ ಎಂಬ ನಂಬಿಕೆಯಿದೆ. ಪ್ರಾಚೀನ ಕಾಲದಲ್ಲಿ ದುಷ್ಟಶಕ್ತಿಗಳ ನಿವಾರಣೆಗೆ 'ಪ್ರಾಣಿ ಬಲಿ' ನೀಡುವ ಪದ್ಧತಿಯಿತ್ತು. ಆದರೆ, ಸನಾತನ ಪರಂಪರೆಯಲ್ಲಿ ಅಹಿಂಸೆಯನ್ನು ಉತ್ತೇಜಿಸಲು ಪ್ರಾಣಿ ಬಲಿಯ ಬದಲಿಗೆ 'ಕೂಷ್ಮಾಂಡ ಬಲಿ' (ಬೂದುಗುಂಬಳಕಾಯಿ ಬಲಿ) ಆಚರಣೆಗೆ ಬಂತು. ಕುಂಬಳಕಾಯಿಯು ಪರಿಸರದಲ್ಲಿರುವ ನಕಾರಾತ್ಮಕ ಶಕ್ತಿಯನ್ನು ಹೀರಿಕೊಳ್ಳುವ ಅದ್ಭುತ ಸಾಮರ್ಥ್ಯ ಹೊಂದಿದೆ ಎಂದು ನಂಬಲಾಗಿದೆ. ಇದನ್ನು ಒಡೆಯುವುದರಿಂದ ವಾಹನಕ್ಕೆ ಬರಬಹುದಾದ ಸಂಭಾವ್ಯ ಅಪಘಾತ ಹಾಗೂ ವಿಘ್ನಗಳು ದೂರವಾಗುತ್ತವೆ ಎಂಬ ನಂಬಿಕೆಯಿದೆ.

ಕುಂಬಳಕಾಯಿ ಎಷ್ಟು ಹೋಳಾದರೆ ಏನು ಫಲ? (ಜಾನಪದ ನಂಬಿಕೆಗಳು):

ಕುಂಬಳಕಾಯಿ ನೆಲಕ್ಕೆ ಬಿದ್ದಾಗ ಒಡೆಯುವ ರೀತಿಯನ್ನು ನೋಡಿ ಮುಂದಿನ ವರ್ಷದ ಶುಭಾಶುಭಗಳನ್ನು ಲೆಕ್ಕಾಚಾರ ಮಾಡುವ ಪದ್ಧತಿ ಗ್ರಾಮೀಣ ಮತ್ತು ಜಾನಪದ ನಂಬಿಕೆಗಳಲ್ಲಿದೆ:

ಸಮನಾಗಿ ಎರಡು ಹೋಳಾದರೆ: ಕುಂಬಳಕಾಯಿ ನೇರವಾಗಿ ಎರಡು ಸಮ ಭಾಗಗಳಾಗಿ ಸೀಳಿದರೆ, ಅದು ಅತ್ಯಂತ ಶುಭ ಶಕುನವೆನ್ನಲಾಗುತ್ತದೆ. ಬರುವ ವರ್ಷದಲ್ಲಿ ಆರ್ಥಿಕ ಸ್ಥಿರತೆ, ಮನೆಯಲ್ಲಿ ನೆಮ್ಮದಿ ಮತ್ತು ಉದ್ಯೋಗ-ವ್ಯವಹಾರದಲ್ಲಿ ಸಮತೋಲನ ಇರಲಿದೆ ಎಂದರ್ಥ.

ಹಲವು ಚೂರುಗಳಾಗಿ ಪುಡಿಯಾದರೆ: ಕುಂಬಳಕಾಯಿ ಛಿದ್ರಗೊಂಡು ನೂರಾರು ಹೋಳುಗಳಾಗಿ, ಬೀಜಗಳು ರಸ್ತೆಯುದ್ದಕ್ಕೂ ಹರಡಿದರೆ ನಿಮ್ಮ ಮೇಲಿದ್ದ ದೊಡ್ಡ ಮಟ್ಟದ ದೃಷ್ಟಿದೋಷ, ಕಂಟಕಗಳು ಸಂಪೂರ್ಣವಾಗಿ ಧ್ವಂಸವಾಗಿವೆ ಎಂದೇ ಭಾವಿಸಲಾಗುತ್ತದೆ. ಇದು ಹಠಾತ್ ಧನಾಗಮನ ಮತ್ತು ಆರ್ಥಿಕ ಏಳಿಗೆಯ ಸೂಚಕ.

ಒಂದೇ ಏಟಿಗೆ ಒಡೆಯದಿದ್ದರೆ: ಒಂದು ವೇಳೆ ಮೊದಲ ಪ್ರಯತ್ನದಲ್ಲೇ ಕಾಯಿ ಒಡೆಯದಿದ್ದರೆ, ಕೆಲಸ-ಕಾರ್ಯಗಳಲ್ಲಿ ಸ್ವಲ್ಪ ಅಡೆತಡೆಗಳು ಎದುರಾಗಬಹುದು, ಜಾಗರೂಕತೆ ವಹಿಸಬೇಕು ಎಂದು ನಂಬಲಾಗುತ್ತದೆ.

ಒಟ್ಟಾರೆಯಾಗಿ, ಈ ಆಚರಣೆಯು ಕೇವಲ ಭವಿಷ್ಯ ನೋಡುವುದಕ್ಕಿಂತ ಹೆಚ್ಚಾಗಿ ಮನಸ್ಸಿನ ಅಹಂಕಾರವನ್ನು ಮುರಿದು, ನಕಾರಾತ್ಮಕತೆಯನ್ನು ಹೋಗಲಾಡಿಸಿ ಹೊಸ ವರ್ಷವನ್ನು ಸಕಾರಾತ್ಮಕವಾಗಿ ಆರಂಭಿಸುವ ಸಂಕೇತವಾಗಿದೆ.

ಮಾಹಿತಿಯ ಮೂಲ (Source of Information): ಹಿಂದೂ ಧರ್ಮಶಾಸ್ತ್ರಗಳು, ಮಾರ್ಕಂಡೇಯ ಪುರಾಣ (ದೇವೀ ಮಹಾತ್ಮೆ), ಕೂಷ್ಮಾಂಡ ಬಲಿ ವಿಧಿವಿಧಾನಗಳು ಹಾಗೂ ತಲೆಮಾರುಗಳಿಂದ ನಡೆದುಬಂದಿರುವ ಜಾನಪದ ಮತ್ತು ವಾಸ್ತು ಸಂಪ್ರದಾಯಗಳು.

ದೇವರಗುಡ್ಡ ಕಾರ್ಣಿಕ ವಿಶ್ಲೇಷಣೆ: 'ಸಾಧು-ಸಂತರು ದೇಶದ ಪ್ರಧಾನಿಯಾಗ್ತಾರೆ, ಕೆಂಪುಕೋಟೆ ಮೇಲೆ ಧ್ವಜ ಹಾರಿಸ್ತಾರೆ'!

Sathish Kumar KH — Mon, 19 Oct 2026 21:04:01 +0530

ಹಾವೇರಿ ಜಿಲ್ಲೆ ದೇವರಗುಡ್ಡದಲ್ಲಿ ನುಡಿಯಲಾದ ಮಾಲತೇಶ ದೇವರ ಕಾರ್ಣಿಕವು ರಾಜ್ಯ ಮತ್ತು ರಾಷ್ಟ್ರ ಮಟ್ಟದಲ್ಲಿ ಸಂಚಲನ ಮೂಡಿಸಿದೆ. 'ಕೆಂಪುಕೋಟೆಯ ಮೇಲೆ ಮುತ್ತು ಚಲ್ಲಿತ್ತಲೇ ಪರಾಕ್' ಎಂಬ ದೈವವಾಣಿಯು ದೇಶವನ್ನು ಸಾಧು-ಸಂತರು ಮುನ್ನಡೆಸಲಿದ್ದಾರೆ ಹಾಗೂ ರೈತರಿಗೆ ಉತ್ತಮ ಮಳೆಯಾಗಲಿದೆ ಎಂಬ ಮುನ್ಸೂಚನೆ ನೀಡಿದೆ.

ಹಾವೇರಿ (ಅ.19): ದಸರಾ ಮತ್ತು ನವರಾತ್ರಿ ಮಹೋತ್ಸವದ ಅಂಗವಾಗಿ ಐತಿಹಾಸಿಕ ಧಾರ್ಮಿಕ ಕ್ಷೇತ್ರವಾದ ಹಾವೇರಿ ಜಿಲ್ಲೆ ರಾಣೇಬೆನ್ನೂರು ತಾಲೂಕಿನ ದೇವರಗುಡ್ಡದಲ್ಲಿ ನುಡಿಯಲಾದ ಮಾಲತೇಶ (ಮೈಲಾರಲಿಂಗೇಶ್ವರ) ದೇವರ ಕಾರ್ಣಿಕ ದೈವವಾಣಿ ಇದೀಗ ರಾಜ್ಯ ಮತ್ತು ರಾಷ್ಟ್ರ ಮಟ್ಟದಲ್ಲಿ ಭಾರೀ ಸಂಚಲನ ಸೃಷ್ಟಿಸಿದೆ.

'ಕೆಂಪುಕೋಟೆಯ ಮೇಲೆ ಮುತ್ತು ಚಲ್ಲಿತ್ತಲೇ ಪರಾಕ್...' ಎಂದು ನುಡಿಯಲಾದ ಈ ವರ್ಷದ ದೈವವಾಣಿಗೆ ದೇವಸ್ಥಾನದ ಪ್ರಧಾನ ಅರ್ಚಕರಾದ ಸಂತೋಷ್ ಭಟ್ ಗುರೂಜಿ ಅವರು ಸ್ಪೋಟಕ ವಿಶ್ಲೇಷಣೆ ನೀಡಿದ್ದಾರೆ. ದೇಶದ ರಾಜಕೀಯ ಮತ್ತು ಕೃಷಿ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ ನೀಡಿರುವ ಈ ವಿವರಣೆ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ.

ಕಾರ್ಣೀಕದ ನುಡಿಯನ್ನು ರಾಜಕೀಯವಾಗಿ ವಿಶ್ಲೇಷಿಸಿದ ಪ್ರಧಾನ ಅರ್ಚಕ ಸಂತೋಷ್ ಭಟ್ ಗುರೂಜಿ, 'ಕೆಂಪುಕೋಟೆ ಎಂಬುದು ದೇಶದ ಅತ್ಯುನ್ನತ ಆಡಳಿತ ಮತ್ತು ನಾಯಕತ್ವದ ಶಕ್ತಿಕೇಂದ್ರ. ಈ ದೈವವಾಣಿಯ ಪ್ರಕಾರ, ಮುಂದಿನ ದಿನಗಳಲ್ಲಿ ಕೆಂಪುಕೋಟೆಯ ಮೇಲೆ ಸಾಧು-ಸಂತರು ತ್ರಿವರ್ಣ ಧ್ವಜವನ್ನು ಹಾರಿಸಲಿದ್ದಾರೆ.

ಅಂದರೆ ಭಾರತ ದೇಶವನ್ನು ಸಾಧು-ಸಂತರು ಮುನ್ನಡೆಸಲಿದ್ದಾರೆ ಹಾಗೂ ಅವರೇ ದೇಶದ ಪ್ರಧಾನ ಮಂತ್ರಿಯಾಗುವ (Prime Minister) ಸ್ಪಷ್ಟ ಮುನ್ಸೂಚನೆಯನ್ನು ಮಾಲತೇಶ ದೇವರು ನೀಡಿದ್ದಾರೆ. ದೇಶದ ಚುಕ್ಕಾಣಿ ಸಂತರ ಕೈಸೇರಲಿದೆ" ಎಂದು ಸ್ಫೋಟಕ ಭವಿಷ್ಯ ನುಡಿದಿದ್ದಾರೆ.

ಇನ್ನು ದೇಶದ ಬೆನ್ನೆಲುಬಾದ ಅನ್ನದಾತರಿಗೆ ಈ ಕಾರ್ಣೀಕ ಹೇಗೆ ಅನ್ವಯವಾಗುತ್ತದೆ ಎಂಬುದನ್ನೂ ವಿವರಿಸಿದ ಅವರು, ಈ ಬಾರಿ ಮುಂಗಾರು ಮಳೆ ಕೈಕೊಟ್ಟ ಪರಿಣಾಮ ರೈತರು ಭೀಕರ ಬರಗಾಲ ಮತ್ತು ಸಂಕಷ್ಟಕ್ಕೆ ಸಿಲುಕಿದ್ದರು. ಆದರೆ, 'ಮುತ್ತು ಚಲ್ಲಿತು' ಎಂಬ ಮಾತಿನಂತೆ ಮುಂದಿನ ಹಿಂಗಾರು ಮಳೆ ಅತ್ಯಂತ ಸಮೃದ್ಧವಾಗಿ ಸುರಿಯಲಿದೆ. ರೈತರು ತಮ್ಮ ಹೊಲಗಳಲ್ಲಿ ಮುತ್ತಿನಂತಹ ಉತ್ತಮ ಬೆಳೆಗಳನ್ನು ಬೆಳೆಯಲಿದ್ದಾರೆ. ಅನ್ನದಾತರು ಎಲ್ಲಾ ಆರ್ಥಿಕ ಸಂಕಷ್ಟಗಳಿಂದ ಪಾರಾಗಿ, ರೈತರ ಬಾಳಿನಲ್ಲಿ ಸಮೃದ್ಧಿ ಮತ್ತು ನೆಮ್ಮದಿ ನೆಲೆಸಲಿದೆ ಎಂದು ರೈತ ಸಮುದಾಯಕ್ಕೆ ಸಂತಸದ ಸುದ್ದಿ ನೀಡಿದ್ದಾರೆ.

ನವರಾತ್ರಿ ಪ್ರಯುಕ್ತ ಸತತ 9 ದಿನಗಳ ಕಾಲ ಕಠಿಣ ಉಪವಾಸ ವ್ರತ ಆಚರಿಸಿದ್ದ ಗೊರವಯ್ಯ ನಾಗಪ್ಪ ಅಜ್ಜ ಉರ್ಮಿ ಅವರು, ದೇವರಗುಡ್ಡದ ಪವಿತ್ರ ಕರಿಯಾಲ್ ಕಟ್ಟಿಯ ಬಳಿ 15 ಅಡಿ ಎತ್ತರದ ಬಿಲ್ಲನ್ನೇರಿ ಈ ದೈವವಾಣಿಯನ್ನು ನುಡಿದು ಕೆಳಗೆ ಜಿಗಿದಿದ್ದರು.

ಒಟ್ಟಿನಲ್ಲಿ ದೇವರಗುಡ್ಡದ ಮಾಲತೇಶ ದೇವರ ಈ ಬಾರಿಯ ಕಾರ್ಣೀಕವು ರೈತರಿಗೆ ಸಮೃದ್ಧಿಯ ಆಶಾಕಿರಣ ಮೂಡಿಸಿದ್ದರೆ, ರಾಜಕೀಯ ವಲಯದಲ್ಲಿ ದೇಶದ ಮುಂದಿನ ಪ್ರಧಾನಿ ಯಾರು ಎಂಬ ಬಗ್ಗೆ ಹೊಸದೊಂದು ಕುತೂಹಲಕಾರಿ ಚರ್ಚೆಗೆ ಮುನ್ನುಡಿ ಬರೆದಿದೆ.

ಇನ್ನು ಜನಸಾಮಾನ್ಯರು ಹಾಗೂ ರಾಜಕೀಯ ಆಸಕ್ತರು ದೇಶದಲ್ಲಿ ಮುಂದಿನ ಬಾರಿಯೂ ಬಿಜೆಪಿ ಅಧಿಕಾರಕ್ಕೆ ಬರಲಿದ್ದು, ಈಗಾಗಲೇ ಸಾಧು-ಸಂತರ ಪೈಕಿ ಉತ್ತರ ಪ್ರದೇಶ ರಾಜ್ಯದ ಮುಖ್ಯಮಂತ್ರಿ ಆಗಿರುವ ಯೋಗಿ ಆದಿತ್ಯನಾಥ ಅವರು ದೇಶದ ಪ್ರಧಾನಮಂತ್ರಿ ಆಗಲಿದ್ದಾರೆ ಎಂದು ವಿಶ್ಲೇಷಣೆ ಮಾಡುತ್ತಿದ್ದಾರೆ.

ಆಯುಧ ಪೂಜೆಯಂದು ಯದುವೀರ ದತ್ತ ಒಡೆಯರ್ ಪತ್ನಿ, ಪುತ್ರರ ಸುಂದರ ಝಲಕ್ ವೈರಲ್

Suchethana D — Tue, 20 Oct 2026 17:06:49 +0530

ಮೈಸೂರು ಅರಮನೆಯಲ್ಲಿ ರಾಜವಂಶಸ್ಥ ಹಾಗೂ ಸಂಸದ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ಅವರು ಪರಂಪರೆಯಂತೆ ವಿಜಯದಶಮಿ ಹಬ್ಬದ ಹಿಂದಿನ ದಿನ ಆಯುಧ ಪೂಜೆಯನ್ನು ನೆರವೇರಿಸುತ್ತಾರೆ. ಈ ಬಾರಿಯೂ ಅವರು ಇದೇ ಸಂಪ್ರದಾಯವನ್ನು ಮುಂದುವರೆಸಿದ್ದಾರೆ. ಈ ಸಂದರ್ಭದಲ್ಲಿ, ಅರಮನೆಯ ಕಲ್ಯಾಣ ಮಂಟಪದಲ್ಲಿ ಚಂಡಿಕಾ ಹೋಮದ ನಂತರ, ಸವಾರಿ ತೊಟ್ಟಿಯಲ್ಲಿ ರಾಜವಂಶಸ್ಥರ ಪಟ್ಟದ ಕತ್ತಿ, ಹಳೆಯ ಶಸ್ತ್ರಾಸ್ತ್ರಗಳು, ಫಿರಂಗಿ, ರಾಜಮನೆತನದ ವಾಹನಗಳು ಹಾಗೂ ಕಾರುಗಳಿಗೆ ಪೂಜೆ ಸಲ್ಲಿಸಲಾಗುತ್ತದೆ. ಪರಂಪರೆಯಂತೆ ಪಟ್ಟದ ಆನೆ, ಕುದುರೆ, ಹಸು ಸೇರಿದಂತೆ ಅರಮನೆಯ ಸಾಕುಪ್ರಾಣಿಗಳಿಗೂ ಸಹ ಯದುವೀರ್ ಒಡೆಯರ್ ವಿಶೇಷ ಪೂಜೆ ನೆರವೇರಿಸುತ್ತಾರೆ.

ಮಕ್ಕಳ ಜೊತೆ ವೀಕ್ಷಣೆ

ಈ ಧಾರ್ಮಿಕ ಆಚರಣೆಯ ವೇಳೆ ರಾಜಮಾತೆ ಪ್ರಮೋದಾ ದೇವಿ ಒಡೆಯರ್ ಹಾಗೂ ಯದುವೀರ್ ಅವರ ಪತ್ನಿ ತ್ರಿಷಿಕಾ ಕುಮಾರಿ ಒಡೆಯರ್ ಸೇರಿದಂತೆ ಕುಟುಂಬದವರು ಅರಮನೆಯಿಂದ ವೀಕ್ಷಿಸುತ್ತಾರೆ. ಇದೀಗ ತ್ರಿಷಿಕಾ ಕುಮಾರಿ ಅವರು ತಮ್ಮ ಇಬ್ಬರು ಪುತ್ರರೊಂದಿಗೆ ಆಯುಧ ಪೂಜೆಯನ್ನು ವೀಕ್ಷಿಸುತ್ತಿರುವ ದೃಶ್ಯ ವೈರಲ್ ಆಗಿದೆ. ಅಂದಹಾಗೆ, ಮೈಸೂರಿನ ರಾಜ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ಮತ್ತು ತ್ರಿಷಿಕಾ ಕುಮಾರಿ ದಂಪತಿಗೆ ಇಬ್ಬರು ಗಂಡು ಮಕ್ಕಳಿದ್ದಾರೆ. 6 ಡಿಸೆಂಬರ್ 2017ರಲ್ಲಿ ಮೊದಲ ಮಗ ಆದ್ಯಾವೀರ್ ನರಸಿಂಹರಾಜ ಒಡೆಯರ್ ಹುಟ್ಟಿದ್ದರೆ, 11 ಅಕ್ಟೋಬರ್ 2024ರಂದು ಯುಗಾಧ್ಯಕ್ಷ ಕೃಷ್ಣರಾಜ ಒಡೆಯರ್ ಹುಟ್ಟಿರುವುದು.

ಹೇಗಿರುತ್ತೆ ಮೈಸೂರು ದಸರಾ

ಇನ್ನು ಮೈಸೂರು ದಸರಾ ಕುರಿತು ಹೇಳುವುದೇ ಬೇಡ. ಇಡೀ ಮೈಸೂರು ನಗರ ಮತ್ತು ಮೈಸೂರು ಅರಮನೆಯು ಲಕ್ಷಾಂತರ ವಿದ್ಯುತ್ ದೀಪಗಳಿಂದ ಕಂಗೊಳಿಸುತ್ತದೆ.ವಿಜಯದಶಮಿಯ ದಿನದಂದು 750 ಕೆಜಿ ತೂಕದ ಚಿನ್ನದ ಅಂಬಾರಿಯಲ್ಲಿ ಚಾಮುಂಡೇಶ್ವರಿ ದೇವಿಯ ಉತ್ಸವ ಮೂರ್ತಿಯನ್ನು ಆನೆಗಳ ಮೆರವಣಿಗೆಯೊಂದಿಗೆ ಅರಮನೆಯಿಂದ ಬನ್ನಿಮಂಟಪದವರೆಗೆ ಕೊಂಡೊಯ್ಯಲಾಗುತ್ತದೆ. ಬನ್ನಿಮಂಟಪ ಮೈದಾನದಲ್ಲಿ ವಿಜಯದಶಮಿ ರಾತ್ರಿ ನಡೆಯುವ ಭವ್ಯವಾದ ಪಂಜಿನ ಕವಾಯತು ನಡೆಯುತ್ತದೆ.

ಮೈಸೂರು ಅರಮನೆ ಆವರಣ ಸೇರಿದಂತೆ ವಿವಿಧ ವೇದಿಕೆಗಳಲ್ಲಿ ಶಾಸ್ತ್ರೀಯ ಸಂಗೀತ, ನೃತ್ಯ ಮತ್ತು ನಾಟಕ ಪ್ರದರ್ಶನಗಳು ನಡೆಯುತ್ತವೆ. ಭಾರತೀಯ ವಾಯುಪಡೆಯ 'ಸೂರ್ಯಕಿರಣ್' ಏರೋಬ್ಯಾಟಿಕ್ ತಂಡದಿಂದ ಆಕಾಶದಲ್ಲಿ ಸಾಹಸ ಪ್ರದರ್ಶನ ಕೂಡ ನಡೆದಿದೆ. ಅರಮನೆಯಲ್ಲಿ ಪರಂಪರೆಯಂತೆ ರಾಜವಂಶಸ್ಥರಿಂದ ವಿಶೇಷ ಪೂಜೆಗಳು ಮತ್ತು ದರ್ಬಾರ್ ನಡೆಯುವುದು ವಿಶೇಷವಾಗಿದೆ. ಇದನ್ನು ಕಣ್ತುಂಬಿಸಿಕೊಳ್ಳಲು ವಿದೇಶಗಳಿಂದಲೂ ಪ್ರವಾಸಿಗಳ ದಂಡ ಬರುವುದು ವಿಶೇಷ.

ಆಯುಧ ಪೂಜೆಗೆ ಹೊಸ ಕಾರು ಖರೀದಿಸಿ, ಶೋರೂಮಿನಿಂದ ಹೊರಗೆ ತೆಗೆಯುತ್ತಲೇ ಆಕ್ಸಿಡೆಂಟ್! ಬೈಕ್ ಸವಾರರ ಸ್ಥಿತಿ ಗಂಭೀರ

Sathish Kumar KH — Tue, 20 Oct 2026 17:25:06 +0530

ಶಿವಮೊಗ್ಗ (ಅ.20): ನಾಡಹಬ್ಬ ದಸರಾದ ಸಂಭ್ರಮದಲ್ಲಿ ಆಯುಧ ಪೂಜೆ ದಿನದಂದು ಹೊಸ ಕಾರು ಖರೀದಿಸಲು ಶೋರೂಂಗೆ ಬಂದಿದ್ದ ಗ್ರಾಹಕರಿಗೆ ದುರಂತವೊಂದು ಎದುರಾಗಿದೆ. ಹೊಸ ಕಾರು ಡೆಲಿವರಿ ಪಡೆಯುವ ಸಂದರ್ಭದಲ್ಲಿ ವಾಹನ ಏಕಾಏಕಿ ನಿಯಂತ್ರಣ ತಪ್ಪಿ ರಸ್ತೆಗೆ ನುಗ್ಗಿ ಬೈಕ್‌ಗೆ ಡಿಕ್ಕಿ ಹೊಡೆದ ಭೀಕರ ಘಟನೆ ಶಿವಮೊಗ್ಗ ಜಿಲ್ಲೆಯ ಸಾಗರ ನಗರದಲ್ಲಿ ನಡೆದಿದೆ.

ಕಾರು ಶೋರೂಂನ ಬ್ಯಾರಿಕೇಡ್ ಮುರಿದು ನಡುರಸ್ತೆಯಲ್ಲಿ ಚಲಿಸುತ್ತಿದ್ದ ಬೈಕ್‌ಗೆ ಡಿಕ್ಕಿ ಹೊಡೆದ ಈ ಆತಂಕಕಾರಿ ದೃಶ್ಯ ಸಮೀಪದ ಸಿಸಿಟಿವಿ (CCTV) ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ನೋಡುಗರ ಎದೆ ಝಲ್ಲೆನಿಸುವಂತಿದೆ.

ಅಪಘಾತ ನಡೆದಿದ್ದು ಹೇಗೆ?

ದಸರಾ ಮತ್ತು ಆಯುಧ ಪೂಜೆ ಪ್ರಯುಕ್ತ ಸಾಗರ ನಗರದಲ್ಲಿರುವ ಮಾರುತಿ ಕಾರು ಶೋರೂಂನಲ್ಲಿ ಗ್ರಾಹಕರೊಬ್ಬರು ಹೊಸ ಕಾರು ಖರೀದಿಸಿದ್ದರು. ಪೂಜೆ ಮುಗಿಸಿ ಕಾರಿನ ಡೆಲಿವರಿ ಪಡೆದು ಶೋರೂಂನಿಂದ ಹೊರಗೆ ತರುವ ವೇಳೆ ಚಾಲಕನ ನಿಯಂತ್ರಣ ತಪ್ಪಿದೆ. ಅತಿಯಾದ ಎಕ್ಸಿಲೇಟರ್ ನೀಡಿದ್ದರಿಂದಲೋ ಅಥವಾ ಗೇರ್ ಬದಲಾವಣೆಯ ಯಡವಟ್ಟಿನಿಂದಲೋ ಕಾರು ರಾಕೆಟ್ ವೇಗದಲ್ಲಿ ಮುನ್ನುಗ್ಗಿದೆ. ಶೋರೂಂ ಮುಂಭಾಗದಲ್ಲಿದ್ದ ಬ್ಯಾರಿಕೇಡ್‌ಗಳನ್ನು ಕ್ಷಣಾರ್ಧದಲ್ಲಿ ಧ್ವಂಸಗೊಳಿಸಿ, ರಸ್ತೆಗೆ ನುಗ್ಗಿದ ಕಾರು, ಅದೇ ಮಾರ್ಗವಾಗಿ ಸಾಗುತ್ತಿದ್ದ ಬೈಕ್‌ಗೆ ನೇರವಾಗಿ ಗುದ್ದಿದೆ.

ಬೈಕ್ ಸವಾರರಿಗೆ ಗಂಭೀರ ಗಾಯ:

ಅಪಘಾತದ ಭೀಕರತೆಗೆ ಬೈಕ್ ನಜ್ಜುಗುಜ್ಜಾಗಿದ್ದು, ಬೈಕ್ ಸವಾರ ಹಾಗೂ ಹಿಂಬದಿ ಸವಾರ ರಸ್ತೆಗೆ ಬಿದ್ದು ಗಂಭೀರವಾಗಿ ಗಾಯಗೊಂಡಿದ್ದಾರೆ. ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಇಬ್ಬರನ್ನೂ ಕೂಡಲೇ ಸ್ಥಳೀಯರು ಹಾಗೂ ಶೋರೂಂ ಸಿಬ್ಬಂದಿ ರಕ್ಷಿಸಿ ಹತ್ತಿರದ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಗಾಯಾಳುಗಳಿಗೆ ತೀವ್ರ ನಿಗಾ ಘಟಕದಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಕಣ್ಣುಮುಚ್ಚಿ ತೆರೆಯುವುದರೊಳಗೆ ನಡೆದ ಈ ಭೀಕರ ಅವಘಡದ ದೃಶ್ಯ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಹಬ್ಬದ ದಿನವೇ ಸಂಭವಿಸಿದ ಈ ದುರ್ಘಟನೆ ಇಡೀ ಪ್ರದೇಶದಲ್ಲಿ ಆತಂಕ ಮೂಡಿಸಿದೆ.

ಘಟನೆ ಸಂಬಂಧ ಸಾಗರ ಟೌನ್ ಪೊಲೀಸ್ ಠಾಣೆಯ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ಮುಂದಿನ ತನಿಖೆ ಕೈಗೊಂಡಿದ್ದಾರೆ. ಹೊಸ ವಾಹನಗಳನ್ನು ಚಾಲನೆ ಮಾಡುವಾಗ ಎಚ್ಚರಿಕೆ ವಹಿಸುವುದು ಎಷ್ಟು ಮುಖ್ಯ ಎಂಬುದಕ್ಕೆ ಈ ಘಟನೆ ಎಚ್ಚರಿಕೆಯ ಗಂಟೆಯಾಗಿದೆ.

ದಸರಾ ಹಬ್ಬದಂದು ಈ 7 ಪರಿಹಾರಗಳನ್ನು ಮಾಡಿದ್ರೆ ಆರ್ಥಿಕ ಪ್ರಗತಿ, ಉದ್ಯೋಗದಲ್ಲಿ ಯಶಸ್ಸು ನಿಮ್ದೇ

Pavna Das — Fri, 16 Oct 2026 18:26:34 +0530

ದಸರಾ ಹಬ್ಬ

ದಸರಾ ಹಬ್ಬದಂದು ದುರ್ಗಾ ದೇವಿ ಮತ್ತು ಭಗವಾನ್ ಶ್ರೀರಾಮನ ಆಶೀರ್ವಾದ ಪಡೆಯುವ ಹಬ್ಬವಾಗಿದೆ. ಈ ಹಬ್ಬದಂದು ಯಾವುದೇ ಶುಭಕಾರ್ಯವನ್ನು ಮಾಡಲು ವಿಶೇಷ ಮುಹೂರ್ತದ ಅಗತ್ಯವಿಲ್ಲ ಎಂಬ ನಂಬಿಕೆಯೂ ಇದೆ. ಇಂತಹ ಸಂದರ್ಭದಲ್ಲಿ ದಸರಾ ದಿನದಂದು ಕೆಲವು ವಿಶೇಷ ಪರಿಹಾರಗಳನ್ನು ಮಾಡುವುದರಿಂದ ಜೀವನದ ಅನೇಕ ಸಮಸ್ಯೆಗಳನ್ನು ಎದುರಿಸಲು ಸಾಧ್ಯವಾಗುತ್ತದೆ. ಜೊತೆಗೆ, ಜೀವನದ ಪ್ರತಿಯೊಂದು ಹಂತದಲ್ಲೂ ಗೆಲುವು ಮತ್ತು ಯಶಸ್ಸು ಸಾಧಿಸುವ ಮಾರ್ಗಗಳು ತೆರೆದುಕೊಳ್ಳುತ್ತದೆ. ನೀವು ಮಾಡುವ ಪರಿಹಾರಗಳು ಯಾವುವು ನೋಡೋಣ.

ಯಾವಾಗ ದಸರಾ?

ಹಿಂದೂ ಪಂಚಾಂಗದ ಪ್ರಕಾರ ಆಶ್ವಯುಜ ಶುಕ್ಲ ದಶಮಿ ತಿಥಿಯು 2026ರ ಅಕ್ಟೋಬರ್ 20ರಂದು ಮಧ್ಯಾಹ್ನ 12 ಗಂಟೆ 50 ನಿಮಿಷಕ್ಕೆ ಆರಂಭವಾಗಿ, ಅಕ್ಟೋಬರ್ 21ರಂದು ಮಧ್ಯಾಹ್ನ 2 ಗಂಟೆ 11 ನಿಮಿಷಕ್ಕೆ ಮುಕ್ತಾಯವಾಗಲಿದೆ. ಹೀಗಾಗಿ ಉದಯ ತಿಥಿಯ ಆಧಾರದ ಮೇಲೆ ದಸರಾ ಹಬ್ಬ ಅಥವಾ ವಿಜಯದಶಮಿ ಹಬ್ಬವನ್ನು 2026ರ ಅಕ್ಟೋಬರ್ 20, ಮಂಗಳವಾರದಂದು ಆಚರಿಸಲಾಗುತ್ತದೆ. ಕರ್ನಾಟಕದಲ್ಲಿ ಬುಧವಾರ ಅಕ್ಟೋಬರ್ 21ರಂದು ವಿಜಯದಶಮಿ ಆಚರಿಸಲಾಗುತ್ತದೆ.

ದಸರಾ ಹಬ್ಬದಂದು ಯಾವ ಪರಿಹಾರಗಳನ್ನು ಮಾಡಬೇಕು?

ಉದ್ಯೋಗಕ್ಕಾಗಿ ಪರಿಹಾರ

ಉದ್ಯೋಗದಲ್ಲಿ ಸಮಸ್ಯೆಗಳು ಎದುರಾಗುತ್ತಿದ್ದರೆ ಅಥವಾ ಹೊಸ ಉದ್ಯೋಗದ ಹುಡುಕಾಟದಲ್ಲಿದ್ದರೆ, ದಸರಾ ಹಬ್ಬದ ಶುಭ ದಿನದಂದು ದುರ್ಗೆಯನ್ನು ಪೂಜಿಸಿ 10 ಹಣ್ಣುಗಳನ್ನು ಅರ್ಪಿಸಿ. ನಂತರ ಆ ಪ್ರಸಾದವನ್ನು ಬಡವರಿಗೆ ಹಂಚಿ.

ಎಲ್ಲ ಕ್ಷೇತ್ರಗಳಲ್ಲೂ ಗೆಲುವು ಸಾಧಿಸಲು

ಜೀವನದ ಎಲ್ಲ ಕ್ಷೇತ್ರಗಳಲ್ಲೂ ಗೆಲುವು ಸಾಧಿಸಲು ಈ ದಿನ ದೇವಿಯನ್ನು ಪೂಜಿಸಿ, ‘ಓಂ ವಿಜಯಾಯೈ ನಮಃ’ ಎಂಬ ಮಂತ್ರವನ್ನು ಜಪಿಸಿ. ಶುಭ ಮುಹೂರ್ತದಲ್ಲಿ ನಡೆಯುವ ಪೂಜೆಯ ಸಂದರ್ಭದಲ್ಲಿ ಈ ಪರಿಹಾರ ಮಾಡಬೇಕು. ಮಾತೆ ದುರ್ಗೆಯ ಕೃಪೆಯಿಂದ ಎಲ್ಲ ಕ್ಷೇತ್ರಗಳಲ್ಲೂ ಗೆಲುವು ಸಾಧಿಸಬಹುದು.

ನ್ಯಾಯಾಲಯದ ಪ್ರಕರಣಗಳಿಂದ ಮುಕ್ತಿ ಪಡೆಯಲು

ನ್ಯಾಯಾಲಯದ ಪ್ರಕರಣಗಳಿಂದ ಮುಕ್ತಿ ಪಡೆಯಲು ಯಾವುದೇ ಮಾರ್ಗ ಕಾಣದಿದ್ದರೆ, ದಸರಾ ಹಬ್ಬದಂದು ಶಮಿ ಮರವನ್ನು ಪೂಜಿಸಿ, ಮರದ ಕೆಳಗೆ ದೀಪ ಬೆಳಗಿಸಿ. ಇದರಿಂದ ಎಲ್ಲ ರೀತಿಯ ನ್ಯಾಯಾಲಯದ ಪ್ರಕರಣಗಳಿಂದ ಮುಕ್ತಿ ದೊರೆಯುತ್ತದೆ.

ಆರೋಗ್ಯ ಸುಧಾರಣೆಗಾಗಿ

ಕಾಯಿಲೆ ಅಥವಾ ದೊಡ್ಡ ಸಂಕಷ್ಟ ದೂರವಾಗದಿದ್ದರೆ, ನೀರು ತುಂಬಿರುವ ಒಂದು ಸಂಪೂರ್ಣ ತೆಂಗಿನಕಾಯಿಯನ್ನು ನಿಮ್ಮ ದೇಹದ ಸುತ್ತ 21 ಬಾರಿ ನಿವಾಳಿಸಿ. ನಂತರ ಅದನ್ನು ರಾವಣ ದಹನದ ಅಗ್ನಿಗೆ ಹಾಕಿ. ಮನೆಯ ಎಲ್ಲ ಸದಸ್ಯರಿಗೂ ಇದೇ ರೀತಿ ತೆಂಗಿನಕಾಯಿಯಿಂದ ನಿವಾಳಿಸಬಹುದು.

ಹಣ ಮತ್ತು ಸಮೃದ್ಧಿಗಾಗಿ ಪರಿಹಾರ

ದಸರಾ ಹಬ್ಬದಂದು ಸಂಜೆ ಭಕ್ತಿಯಿಂದ ಮಾತೆ ಲಕ್ಷ್ಮಿಯನ್ನು ಸ್ಮರಿಸಿ. ನಂತರ ಯಾರಿಗೂ ತಿಳಿಯದಂತೆ ಯಾವುದಾದರೂ ದೇವಸ್ಥಾನಕ್ಕೆ ಪೊರಕೆಯನ್ನು ದಾನ ಮಾಡಿ. ಇದರಿಂದ ಮನೆಯಲ್ಲಿ ಹಣ ಹಾಗೂ ಸಮೃದ್ಧಿ ಹೆಚ್ಚಾಗುತ್ತದೆ.

ಆರ್ಥಿಕ ಪ್ರಗತಿಗಾಗಿ ಪರಿಹಾರ

ವ್ಯಾಪಾರದಲ್ಲಿ ಲಾಭವಾಗುತ್ತಿಲ್ಲವೇ? ಆರ್ಥಿಕ ನಷ್ಟವನ್ನು ಎದುರಿಸುತ್ತಿದ್ದೀರಾ? ಹಾಗಿದ್ದರೆ ದಸರಾ ಹಬ್ಬದ ದಿನದಿಂದ ಸತತ 43 ದಿನಗಳವರೆಗೆ ನಾಯಿಗೆ ಗೌರವದಿಂದ ಬೇಸನ್ ಲಡ್ಡು ತಿನ್ನಿಸಿ. ಈ ಪರಿಹಾರವನ್ನು ಮಾಡುವುದರಿಂದ ಹಣಕ್ಕೆ ಸಂಬಂಧಿಸಿದ ಸಮಸ್ಯೆಗಳು ಕೊನೆಗೊಳ್ಳುತ್ತವೆ ಎಂಬ ನಂಬಿಕೆಯಿದೆ.

ದೊಡ್ಡ ಸಂಕಷ್ಟದಿಂದ ಮುಕ್ತಿ ಪಡೆಯಲು

ದೊಡ್ಡ ಸಂಕಷ್ಟ ಎದುರಾಗುವ ಸಾಧ್ಯತೆ ಕಾಣಿಸುತ್ತಿದ್ದರೆ ಅಥವಾ ಕುಟುಂಬವು ಈಗಾಗಲೇ ಗಂಭೀರ ಸಮಸ್ಯೆಗಳಿಂದ ಸುತ್ತುವರಿದಿದ್ದರೆ, ದಸರಾ ಹಬ್ಬದಂದು ಶ್ರದ್ಧಾಭಕ್ತಿಯಿಂದ ಸುಂದರಕಾಂಡವನ್ನು ಪಠಿಸಿ. ಇದರಿಂದ ಎಲ್ಲ ರೀತಿಯ ಸಮಸ್ಯೆಗಳು ದೂರವಾಗುತ್ತವೆ.

ದೀಪಾವಳಿಯ ನಂತರ ಬುಧನ ನೇರ ಸಂಚಾರ; ಈ 8 ರಾಶಿಯವರಿಗೆ ಉದ್ಯೋಗ, ವ್ಯಾಪಾರದಲ್ಲಿ ಭರ್ಜರಿ ಲಾಭ!

Sushma Hegde — Wed, 21 Oct 2026 16:45:48 +0530

ದೀಪಾವಳಿಯ ಸ್ವಲ್ಪ ಸಮಯದ ನಂತರ, ನಿರ್ದಿಷ್ಟವಾಗಿ ನವೆಂಬರ್ 13 ರಂದು ರಾತ್ರಿ 9:22 ರ ಸುಮಾರಿಗೆ, ಬುಧ ಗ್ರಹವು ತುಲಾ ರಾಶಿಯಲ್ಲಿ ತನ್ನ ಹಿಮ್ಮುಖ ಸಂಚಾರವನ್ನು ಪೂರ್ಣಗೊಳಿಸುತ್ತದೆ ಮತ್ತು ನೇರ ಸಂಚಾರಕ್ಕೆ (ಮಾರ್ಗ) ಮರಳುತ್ತದೆ. ಅಕ್ಟೋಬರ್ 24 ರಿಂದ ಹಿಮ್ಮುಖದಲ್ಲಿದ್ದ ಬುಧವು ಈಗ ನೇರ ಸಂಚಾರಕ್ಕೆ ಮರಳುತ್ತಿರುವುದರಿಂದ, ಅನೇಕ ಸ್ಥಗಿತಗೊಂಡ ಯೋಜನೆಗಳು ವೇಗವನ್ನು ಪಡೆಯುತ್ತವೆ. ವ್ಯವಹಾರದಲ್ಲಿ ಗಮನಾರ್ಹ ಬೆಳವಣಿಗೆ ಇರುತ್ತದೆ.

ಮೇಷ

ಮೇಷ ರಾಶಿಯವರಿಗೆ ಕಚೇರಿಯಲ್ಲಿ ತಮ್ಮ ಸಾಮರ್ಥ್ಯಗಳನ್ನು ಸಾಬೀತುಪಡಿಸಲು ಇದು ಸರಿಯಾದ ಸಮಯ. ಅವರಿಗೆ ಹೊಸ ವೃತ್ತಿಪರ ಜವಾಬ್ದಾರಿಗಳು ಸಿಗುತ್ತವೆ. ಉದ್ಯಮಿಗಳು ತಮ್ಮ ಸಂಪರ್ಕಗಳ ಮೂಲಕ ಹೊಸ ಒಪ್ಪಂದಗಳಿಗೆ ಸಹಿ ಹಾಕಬಹುದು.

ವೃಷಭ

ವೃಷಭ ರಾಶಿಯವರಿಗೆ, ಯೋಜಿಸಲಾದ ಯೋಜನೆಗಳು ಯಶಸ್ವಿಯಾಗಿ ಕಾರ್ಯಗತಗೊಳ್ಳುತ್ತವೆ. ಮೇಲಧಿಕಾರಿಗಳೊಂದಿಗೆ ಪರಿಣಾಮಕಾರಿ ಸಂವಹನವು ಕಚೇರಿಯಲ್ಲಿ ಮನ್ನಣೆಯನ್ನು ತರುತ್ತದೆ. ಆದಾಯ ಮತ್ತು ವೆಚ್ಚಗಳ ನಡುವೆ ಸಮತೋಲನವನ್ನು ಕಾಯ್ದುಕೊಳ್ಳುವುದು ಒಳ್ಳೆಯದು.

ಮಿಥುನ

ಬುಧ ಮಿಥುನ ರಾಶಿಯ ಅಧಿಪತಿಯಾಗಿರುವುದರಿಂದ, ಈ ಗ್ರಹದ ನೇರ ಚಲನೆಯು ನಿಮಗೆ ಶುಭ ಫಲಿತಾಂಶಗಳನ್ನು ತರುತ್ತದೆ. ನಿಮ್ಮ ಆಲೋಚನೆಗಳನ್ನು ಸ್ಪಷ್ಟವಾಗಿ ವ್ಯಕ್ತಪಡಿಸುವ ಮೂಲಕ ನೀವು ಎಲ್ಲರ ಗಮನವನ್ನು ಸೆಳೆಯುವಿರಿ. ಮಾಧ್ಯಮ ಮತ್ತು ಮಾರ್ಕೆಟಿಂಗ್ ಕ್ಷೇತ್ರಗಳಲ್ಲಿರುವವರಿಗೆ ಇದು ಲಾಭದಾಯಕ ಅವಧಿಯಾಗಿದೆ.

ಕನ್ಯಾ

ಕನ್ಯಾ ರಾಶಿಯವರಿಗೆ, ಕಾರ್ಯಕ್ಷಮತೆ ಸುಧಾರಿಸುತ್ತದೆ. ಬಾಕಿ ಇರುವ ಯೋಜನೆಗಳನ್ನು ನೀವು ಸುಲಭವಾಗಿ ಪೂರ್ಣಗೊಳಿಸಲು ಸಾಧ್ಯವಾಗುತ್ತದೆ. ವ್ಯಾಪಾರ ವಿಸ್ತರಣೆ ಮತ್ತು ಹೊಸ ಗ್ರಾಹಕರನ್ನು ಆಕರ್ಷಿಸಲು ಇದು ಅತ್ಯಂತ ಅನುಕೂಲಕರ ಸಮಯ.

ಸಿಂಹ

ಸಿಂಹ ರಾಶಿಯಲ್ಲಿ ಜನಿಸಿದವರಿಗೆ ತಮ್ಮ ಕೌಶಲ್ಯ ಮತ್ತು ಕಠಿಣ ಪರಿಶ್ರಮಕ್ಕೆ ವೇದಿಕೆ ಸಿಗುತ್ತದೆ. ಇದು ವೃತ್ತಿಪರ ಬೆಳವಣಿಗೆಗೆ ಕಾರಣವಾಗುತ್ತದೆ. ಉದ್ಯಮಿಗಳು ತಮ್ಮ ಉತ್ಪನ್ನಗಳೊಂದಿಗೆ ಹೆಚ್ಚಿನ ಪ್ರೇಕ್ಷಕರನ್ನು ತಲುಪುವಲ್ಲಿ ಯಶಸ್ವಿಯಾಗುತ್ತಾರೆ.

ತುಲಾ

ಬುಧನು ತುಲಾ ರಾಶಿಯಲ್ಲಿ ತನ್ನ ನೇರ ಚಲನೆಯನ್ನು ಪ್ರಾರಂಭಿಸುತ್ತಿದ್ದಂತೆ, ನಿಮ್ಮ ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯವು ಸುಧಾರಿಸುತ್ತದೆ. ಸ್ಥಗಿತಗೊಂಡ ವ್ಯವಹಾರಗಳು ಪುನರುಜ್ಜೀವನಗೊಳ್ಳುತ್ತವೆ ಮತ್ತು ನೀವು ಹೊಸ ಉದ್ಯೋಗಾವಕಾಶಗಳನ್ನು ಪಡೆಯುತ್ತೀರಿ.

ಮಕರ

ಮಕರ ರಾಶಿಯವರಿಗೆ ಕೆಲಸದಲ್ಲಿ ಸಹೋದ್ಯೋಗಿಗಳಿಂದ ಸಂಪೂರ್ಣ ಬೆಂಬಲ ಸಿಗುತ್ತದೆ, ಆದ್ದರಿಂದ ಕೆಲಸಗಳು ಸುಗಮವಾಗಿ ನಡೆಯುತ್ತವೆ. ವ್ಯಾಪಾರ ಕ್ಷೇತ್ರದಲ್ಲಿ, ಹಳೆಯ ಗ್ರಾಹಕರೊಂದಿಗೆ ಸಂಬಂಧವನ್ನು ನವೀಕರಿಸುವುದು ಲಾಭದಾಯಕವಾಗಿರುತ್ತದೆ.

ಕುಂಭ

ಕುಂಭ ರಾಶಿಯವರಿಗೆ, ಹೊಸ ಯೋಜನೆಗಳನ್ನು ಪ್ರಾರಂಭಿಸಲು ಮತ್ತು ವೃತ್ತಿಪರ ಸಂಪರ್ಕಗಳನ್ನು ವಿಸ್ತರಿಸಲು ಇದು ತುಂಬಾ ಒಳ್ಳೆಯ ಸಮಯ. ಉದ್ಯೋಗ ಬದಲಾವಣೆಗಾಗಿ ಕಾಯುತ್ತಿರುವವರಿಗೆ ಒಳ್ಳೆಯ ಸುದ್ದಿ ಸಿಗುವ ಸಾಧ್ಯತೆಯಿದೆ. ಅಲ್ಲದೆ, ಮಾರುಕಟ್ಟೆ ಪರಿಸ್ಥಿತಿಗಳ ಉತ್ತಮ ತಿಳುವಳಿಕೆಯೊಂದಿಗೆ ಮಾಡಿದ ಹೂಡಿಕೆಗಳು ಉತ್ತಮ ಲಾಭವನ್ನು ತರುತ್ತವೆ.

ಮಂಗಳೂರು: ಕದ್ರಿ ದೇವಸ್ಥಾನದಲ್ಲಿ ನಡೆದ ಯಕ್ಷಗಾನದಲ್ಲಿ ಜಗನ್ಮಾತೆ ಪಾತ್ರಕ್ಕೆ ಬಣ್ಣ ಹಚ್ಚಿದ ಮುಸ್ಲಿಂ ಯುವತಿ!

Gowthami K — Thu, 22 Oct 2026 16:12:27 +0530

ಮಂಗಳೂರು: ಮಂಗಳೂರಿನ ಕದ್ರಿ ಶ್ರೀಮಂಜುನಾಥ ದೇವಸ್ಥಾನದ ಆವರಣದಲ್ಲಿ ಮಂಗಳವಾರ ನಡೆದ ‘ಶ್ರೀದೇವಿ ಮಹಾತ್ಮೆ’ ತೆಂಕುತಿಟ್ಟು ಯಕ್ಷಗಾನ ಬಯಲಾಟದಲ್ಲಿ ಹವ್ಯಾಸಿ ಕಲಾವಿದೆ, ಮುಸ್ಲಿಂ ಯುವತಿ ಶ್ರೀದೇವಿ ಮಹಾತ್ಮೆ ಪ್ರಸಂಗದ ಪ್ರಮುಖ ಪಾತ್ರ ಅಷ್ಟಭುಜೆಯ ಜಗನ್ಮಾತೆ ದೇವಿಯ ಪಾತ್ರದಲ್ಲಿ ಅಭಿನಯಿಸುವ ಮೂಲಕ ಕಲಾಪ್ರೇಮಿಗಳ ಮನೆ ಸೆಳೆದಿದ್ದಾರೆ.

ದ.ಕ. ಜಿಲ್ಲೆಯ ಬಂಟ್ವಾಳ ತಾಲೂಕಿನ ವಿಟ್ಲ ಮಾಡ ಮೂಲದ ‘ಯಕ್ಷಪ್ರಿಯೆ’ ತನು ವಿಟ್ಲ ಎಂದೇ ಖ್ಯಾತಿ ಪಡೆದ ಆರ್ಷಿಯಾ ಖಾನ್‌ ಅಷ್ಟಭುಜೆ ದೇವಿ ಪಾತ್ರದಲ್ಲಿ ರಂಗಸ್ಥಳ ಪ್ರವೇಶಿಸಿದ ಮೊದಲ ಮುಸ್ಲಿಂ ಮಹಿಳೆ ಎಂದ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಗುರುಮುಖೇನ ಯಕ್ಷಗಾನ ಅಭ್ಯಸಿಸಿರುವ ಈಕೆ ಈ ಹಿಂದೆ ಮಹಿಷಾಸುರ, ದೇವಿ ಸೇರಿದಂತೆ ಅನೇಕ ಪಾತ್ರ ನಿರ್ವಹಿಸಿ ಸೈ ಎನಿಸಿದ್ದರು.

ಕದಳಿ ಕಲಾ ಕೇಂದ್ರ ದಸರಾ ಅಂಗವಾಗಿ ಕದಳಿ ದಶಾಹ ಹೆಸರಿನಲ್ಲಿ ಈ ಯಕ್ಷಗಾನ ಕಾರ್ಯಕ್ರಮ ಆಯೋಜಿಸಿತ್ತು. ಕಲೆಗೆ ಜಾತಿ, ಧರ್ಮದ ಹಂಗಿಲ್ಲ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿರುವ ಆರ್ಷಿಯಾ ಖಾನ್‌ ಅವರ ಈ ಸಾಧನೆಯನ್ನು ಯಕ್ಷಗಾನ ಪ್ರೇಮಿಗಳು ಕೊಂಡಾಡಿದ್ದಾರೆ.

9 ತಿಂಗಳ ಗರ್ಭಿಣಿಯಿಂದ ಯಕ್ಷಗಾನ!

9 ತಿಂಗಳ ತುಂಬು ಗರ್ಭಿಣಿಯೊಬ್ಬರು ಯಕ್ಷಗಾನ ರಂಗ ಪ್ರವೇಶ ಮಾಡಿ ಗಮನ ಸೆಳೆದಿರುವ ಘಟನೆ ದಕ್ಷಿಣ ಕನ್ನಡ ಜಿಲ್ಲೆಯ ಸುರತ್ಕಲ್‌ನಲ್ಲಿ ನಡೆದಿದೆ. ದಿಶಾ ಶೆಟ್ಟಿ ಹವ್ಯಾಸಿ ಕಲಾವಿದೆಯಾಗಿದ್ದು, ಯಕ್ಷಗುರು ರಾಕೇಶ್‌ ರೈ ನಿರ್ದೇಶನದ ದಶಾವತಾರ ಯಕ್ಷಗಾನ ಪ್ರದರ್ಶನದಲ್ಲಿ ಪ್ರಹ್ಲಾದನ ತಾಯಿ ಕಯಾದು ಪಾತ್ರ ನಿರ್ವಹಿಸಿ ಸೈ ಎನಿಸಿಕೊಂಡಿದ್ದಾರೆ. ಇವರ ಅಭಿನಯದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಈ ಬಗ್ಗೆ ಮಾತನಾಡಿದ ದಿಶಾ, ‘ನಮ್ಮದು ಯಕ್ಷಗಾನದ ಕುಟುಂಬ. ನನ್ನ ಅಮ್ಮ ಹಾಗೂ ಚಿಕ್ಕಮ್ಮ ಕೂಡ ಗರ್ಭಿಣಿಯಾಗಿದ್ದ ಸಂದರ್ಭದಲ್ಲಿ ಯಕ್ಷಗಾನ ಪಾತ್ರ ಮಾಡಿದ್ದು ಪ್ರೇರಣೆಯಾಗಿತ್ತು. ಸುರತ್ಕಲ್‌ನಲ್ಲಿ ನಡೆದ ಯಕ್ಷಗಾನದಲ್ಲಿ ಪ್ರಹ್ಲಾದನ ತಾಯಿಯ ಪಾತ್ರ ಮಾಡಿದ್ದೇನೆ. ಸುಮಾರು 20 ವರ್ಷದಿಂದ ಪುಂಡು ವೇಷ ಮಾಡುತ್ತಿದ್ದು, ಪ್ರಹ್ಲಾದನ ತಾಯಿಯ ಪಾತ್ರ ತಾಯ್ತನದ ಭಾವನೆಗೆ ಪೂರಕವಾಗಿತ್ತು’ ಎಂದಿದ್ದಾರೆ.

ಇದನ್ನು ಸಾಧನೆ ಎಂದು ಹೇಳುವುದಿಲ್ಲ. ಪ್ರತಿಯೊಬ್ಬ ಮಹಿಳೆಯರಲ್ಲಿ ಗರ್ಭಿಣೆ ಸಮಯ ಬೇರೆ ಬೇರೆ ರೀತಿಯಾಗಿದ್ದು, ತುಂಬಾ ಸೂಕ್ಷ್ಮವಾದ ಸಮಯವಾಗಿರುವುದರಿಂದ, ಇದನ್ನು ಅನುಕರಣೆ ಮಾಡಬೇಡಿ. ನಾನು ಮಾಡಿದ್ದೇನೆಂದು ಬೇರೆಯವರು ಮಾಡಬೇಡಿ. ನಾನು ಸಕ್ರಿಯವಾಗಿ ಇದ್ದ ಕಾರಣ ಸಾಧ್ಯವಾಗಿದೆ. ವಿಡಿಯೋ ವೈರಲ್‌ ಆದ ಬಳಿಕ ಜನರು ಇದನ್ನು ಯಾವ ರೀತಿ ತೆಗೆದುಕೊಳ್ಳುತ್ತಾರೆಂಬ ಹೆದರಿಕೆಯಿತ್ತು ಎಂದು ದಿಶಾ ಶೆಟ್ಟಿ ಹೇಳಿದ್ದಾರೆ.

ಸ್ವಾತಿ ನಕ್ಷತ್ರಕ್ಕೆ ಸೂರ್ಯನ ಚಲನೆ: ಅಕ್ಟೋಬರ್ 24 ರಿಂದ 15 ದಿನ 4 ರಾಶಿಗೆ ಬಂಪರ್

Mahmad Rafik — Wed, 21 Oct 2026 12:56:32 +0530

ಅಕ್ಟೋಬರ್ 24 ರಿಂದ ನವೆಂಬರ್ 8 ರವರೆಗೆ ಸೂರ್ಯನು ಸ್ವಾತಿ ನಕ್ಷತ್ರಕ್ಕೆ ಪ್ರವೇಶಿಸಲಿದ್ದಾನೆ. ಈ ವಿಶೇಷ ಚಲನೆಯಿಂದ 4 ರಾಶಿಯವರ ವೃತ್ತಿ ಹಾಗೂ ಆರ್ಥಿಕ ಜೀವನದಲ್ಲಿ ಸಕಾರಾತ್ಮಕ ಬದಲಾವಣೆಗಳಾಗಲಿವೆ.

ಸೂರ್ಯನನ್ನು ಆತ್ಮ ವಿಶ್ವಾಸ, ಗೌರವ, ನಾಯಕತ್ವದ ಅಂಶ ಎಂದು ಪರಿಗಣಿಸಲಾಗುತ್ತದೆ. ಹಾಗಾಗಿ ಸೂರ್ಯನ ಚಲನೆಯು ಎಲ್ಲಾ 12 ರಾಶಿಚಕ್ರದ ಮೇಲೆ ಪರಿಣಾಮ ಬೀರುತ್ತದೆ. ಇದೇ ಅಕ್ಟೋಬರ್ 24ರಂದು ಸೂರ್ಯನು ಸ್ವಾತಿ ನಕ್ಷತ್ರಕ್ಕೆ ಚಲಿಸಲಿದ್ದು, ನವೆಂಬರ್‌ 8ರವರೆಗೆ ಇಲ್ಲಿರಲಿದ್ದಾನೆ. ಈ ವಿಶೇಷವಾದ ಚಲನೆಯಿಂದ 4 ರಾಶಿಚಕ್ರದವರು ಮುಂದಿನ 15 ದಿನಗಳಲ್ಲಿ ವೃತ್ತಿ, ಆರ್ಥಿಕ ಸ್ಥಿತಿ ಮತ್ತು ವೈಯಕ್ತಿಕ ಜೀವನದಲ್ಲಿ ಸಕಾರಾತ್ಮಕ ಬೆಳವಣಿಗೆ ಕಾಣುತ್ತಾರೆ. ಜ್ಯೋತಿಷ್ಯದಲ್ಲಿ ಸೂರ್ಯನನ್ನು ರಾಜಗ್ರಹ ಎಂದು ಕರೆಯಲಾಗುವುದರಿಂದ, ಈ ಗೋಚಾರವು ಪ್ರಮುಖ ಬದಲಾವಣೆಗಳಿಗೆ ಕಾರಣವಾಗುತ್ತದೆ.

ಕೆಲಸಕ್ಕೆ ಸಂಬಂಧಿಸಿದಂತಹ ವಿಷಯಗಳಲ್ಲಿ ಗುಡ್‌ನ್ಯೂಸ್ ಸಿಗಲಿದೆ.
ದೀರ್ಘಕಾಲದಿಂದ ಬಾಕಿ ಉಳಿದಿರೋ ಕೆಲಸಗಳು ಪೂರ್ಣಗೊಳ್ಳಲಿವೆ.
ಮೇಲಾಧಿಕಾರಿಗಳಿಂದ ಮೆಚ್ಚುಗೆ ಪಡೆದುಕೊಳ್ಳಲು ಅವಕಾಶ ಸಿಗಲಿದೆ.
ಹಣಕಾಸಿನ ವ್ಯವಹಾರದಿಂದ ಲಾಭ, ಹಣದ ಹೊಸ ಮಾರ್ಗ ತೆರೆದುಕೊಳ್ಳಲಿದೆ
ವೈಯಕ್ತಿಕ ಜೀವನದಲ್ಲಿ ಸಮತೋಲನ

ದೀರ್ಘಸಮಯದಿಂದ ಕೆಲಸ ಹುಡುಕುತ್ತಿರೋರಿಗೆ ಒಳ್ಳೆಯ/ನೆಚ್ಚಿನ ಉದ್ಯೋಗ ಸಿಗಲಿದೆ
ಉದ್ಯೋಗಿಗಳಿಗೆ ಹೆಚ್ಚಿನ ಜವಾಬ್ದಾರಿ ಸಿಗಲಿದ್ದು, ನಿಮ್ಮ ಸಾಮರ್ಥ್ಯ ಸಾಬೀತುಪಡಿಸಿಕೊಳ್ಳಲು ಇದು ಸುವರ್ಣವಕಾಶ
ವ್ಯವಹಾರ ವಿಸ್ತರಣೆಗೆ ಸೂಕ್ತ ಸಮಯ
ಆರ್ಥಿಕ ಪರಿಸ್ಥಿತಿಯ ಸುಧಾರಣೆ, ಹಳೆಯ ಹೂಡಿಕೆಗಳಿಂದ ಉತ್ತಮ ಪ್ರತಿಫಲ

ಮೇಲಾಧಿಕಾರಿಗಳಿಂದ ಕೆಲಸದಲ್ಲಿ ಪ್ರೋತ್ಸಾಹ, ಬೆಂಬಲ ಸಿಗಲಿದೆ
ಬಡ್ತಿ/ಹೊಸ ಉದ್ಯೋಗದ ಹುಡುಕಾಟ ಮಾಡೋರಿಗೆ ಶುಭ ಸುದ್ದಿ
ಹಿಂದಿನ ಪ್ರಯತ್ನಗಳಿಂದಾಗಿ ಆರ್ಥಿಕ ಪರಿಸ್ಥಿತಿ ಸುಧಾರಣೆ
ಕುಟುಂಬ ಮತ್ತು ಕೆಲಸದ ನಡುವೆ ಸಮತೋಲನ ಕಾಯ್ದುಕೊಳ್ಳಿ. ಖರ್ಚಿನ ಮೇಲೆ ಹಿಡಿತವಿರಲಿ

ಆರ್ಥಿಕ ಮತ್ತು ವೃತ್ತಿಜೀವನಕ್ಕೆ ಹೊಸ ಮಾರ್ಗ ತೆರೆದುಕೊಳ್ಳಲಿದೆ
ಪ್ರತಿಭೆ ಪ್ರದರ್ಶನಕ್ಕೆ ವೇದಿಕೆ ಸಿಗಲಿದೆ
ಹೊಸ ಜವಾಬ್ದಾರಿ ಜೊತೆ ಕೆಲಸದ ಒತ್ತಡ ಹೆಚ್ಚಳ, ಕೆಲಸಕ್ಕ ಸಂಬಂಧಿಸಿದ ವಿಷಯದಲ್ಲಿ ಒಳ್ಳೆಯ ಸುದ್ದಿ
ಆದಾಯ ಮತ್ತು ವೆಚ್ಚಗಳಲ್ಲಿ ಸಮತೋಲನದ ಅವಶ್ಯಕತೆ, ಉಳಿತಾಯ ಹೆಚ್ಚಿಸಿ
ಸಮಸ್ಯೆಗಳನ್ನು ನೇರವಾಗಿ ಚರ್ಚಿಸಿ ಬಗೆಹರಿಸಿಕೊಳ್ಳಿ
ಕೆಲಸಕ್ಕೆ ಸಂಬಂಧಿಸಿದಂತೆ ದೀರ್ಘ ಪ್ರಯಾಣ ಸಾಧ್ಯತೆ

Rudraksha Mala: ಯಾವ ಮುಖದ ರುದ್ರಾಕ್ಷಿ ಧರಿಸಿದ್ರೆ ಏನು ಲಾಭ ? ರುದ್ರಾಕ್ಷಿ ಧರಿಸುವ ಮುನ್ನ ಇದು ನೆನಪಿರಲಿ

Roopa Hegde — Thu, 22 Oct 2026 13:48:23 +0530

ಹಿಂದೂ ಧರ್ಮದಲ್ಲಿ ರುದ್ರಾಕ್ಷಿಗೆ ವಿಶೇಷ ಮಹತ್ವವಿದೆ. ಇದನ್ನು ಶಿವನ ಕಣ್ಣೀರಿನಿಂದ ಉದ್ಭವಿಸಿದ ಪವಿತ್ರ ಮಣಿ ಎಂದು ನಂಬಲಾಗುತ್ತದೆ. ಒಂದರಿಂದ 14 ಮುಖಿಗಳವರೆಗೆ ವಿವಿಧ ರುದ್ರಾಕ್ಷಗಳಿದ್ದು, ಪ್ರತಿಯೊಂದಕ್ಕೂ ತನ್ನದೇ ಆದ ಧಾರ್ಮಿಕ ಮಹತ್ವವಿದೆ ಎಂದು ನಂಬಲಾಗಿದೆ.

ರುದ್ರಾಕ್ಷಿಯನ್ನು ಕೇವಲ ಭಕ್ತಿಯ ಸಂಕೇತವಾಗಿ ಮಾತ್ರವಲ್ಲದೆ, ರಕ್ಷಣೆಯ ಕವಚವಾಗಿಯೂ ಪರಿಗಣಿಸಲಾಗುತ್ತದೆ. ಹಿಂದೂ ಧರ್ಮದಲ್ಲಿ 1ರಿಂದ 21 ಮುಖಿಗಳವರೆಗಿನ ರುದ್ರಾಕ್ಷಿಗಳ ಉಲ್ಲೇಖವಿದೆ. ಶಿವಪುರಾಣದಲ್ಲಿ 1ರಿಂದ 14 ಮುಖಿ ರುದ್ರಾಕ್ಷಿಗಳಿಗೂ ವಿಶೇಷ ಮಹತ್ವ ನೀಡಲಾಗಿದೆ. ಏಕಮುಖಿ ರುದ್ರಾಕ್ಷಿಯಲ್ಲಿ ಒಂದು ಮುಖವಿರುತ್ತದೆ. ಇದು ಅಪರೂಪವಾಗಿ ದೊರೆಯುತ್ತದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಇದನ್ನು ಧರಿಸುವುದರಿಂದ ಮನಸ್ಸಿಗೆ ಶಾಂತಿ ಸಿಗುತ್ತದೆ. ಪೂಜೆ, ಧ್ಯಾನದ ಕಡೆಗೆ ಹೆಚ್ಚು ಗಮನ ಹರಿಸಲು ಸಹಾಯವಾಗುತ್ತದೆ. ಇದನ್ನು ಶಿವನ ಅನುಗ್ರಹ ಪಡೆಯುವ ಸಂಕೇತವೆಂದೂ ಪರಿಗಣಿಸಲಾಗುತ್ತದೆ.

ದ್ವಿಮುಖಿ ರುದ್ರಾಕ್ಷಿಯಲ್ಲಿ ಎರಡು ಮುಖಗಳಿರುತ್ತವೆ. ಇದನ್ನು ಏಕತೆ, ಸಾಮರಸ್ಯ ಮತ್ತು ಸಂಬಂಧಗಳಲ್ಲಿನ ಹೊಂದಾಣಿಕೆಯ ಸಂಕೇತವೆಂದು ನಂಬಲಾಗುತ್ತದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಇದನ್ನು ಧರಿಸುವುದರಿಂದ ಮನಸ್ಸಿನಲ್ಲಿ ಶಾಂತಿ ನೆಲೆಸುತ್ತದೆ ಮತ್ತು ಸಂಬಂಧಗಳಲ್ಲಿ ಸಾಮರಸ್ಯ ಹೆಚ್ಚುತ್ತದೆ.

ಮೂರು ಮುಖಗಳನ್ನು ಹೊಂದಿರುವ ತ್ರಿಮುಖಿ ರುದ್ರಾಕ್ಷಿಗೆ ಹಿಂದೂ ಧರ್ಮದಲ್ಲಿ ವಿಶೇಷ ಸ್ಥಾನವಿದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಇದನ್ನು ಧರಿಸುವುದರಿಂದ ಆತ್ಮವಿಶ್ವಾಸ ಮತ್ತು ಸಕಾರಾತ್ಮಕ ಚಿಂತನೆ ಹೆಚ್ಚುತ್ತದೆ ಎಂದು ಹೇಳಲಾಗುತ್ತದೆ.

ನಾಲ್ಕು ಮುಖಗಳಿರುವ ಚತುರ್ಮುಖಿ ರುದ್ರಾಕ್ಷಿಯನ್ನು ಜ್ಞಾನ ಮತ್ತು ಬುದ್ಧಿವಂತಿಕೆಯ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಇದನ್ನು ಧರಿಸುವುದರಿಂದ ಏಕಾಗ್ರತೆ ಮತ್ತು ನೆನಪಿನ ಶಕ್ತಿ ಹೆಚ್ಚುತ್ತದೆ ಎಂಬ ಧಾರ್ಮಿಕ ನಂಬಿಕೆಯಿದೆ.

ಪಂಚಮುಖಿ ರುದ್ರಾಕ್ಷಿ ಅತ್ಯಂತ ಜನಪ್ರಿಯವಾದ ರುದ್ರಾಕ್ಷಿಗಳಲ್ಲಿ ಒಂದಾಗಿದೆ. ಐದು ಮುಖಗಳನ್ನು ಹೊಂದಿರುವ ಇದನ್ನು ಶಾಂತಿ, ಸಕಾರಾತ್ಮಕತೆ ಮತ್ತು ನೆಮ್ಮದಿಯ ಸಂಕೇತವಾಗಿ ನೋಡಲಾಗುತ್ತದೆ. ಧಾರ್ಮಿಕ ಸಂಪ್ರದಾಯಗಳಲ್ಲಿ ಪುರುಷರು, ಮಹಿಳೆಯರು ಮತ್ತು ಮಕ್ಕಳು ಇದನ್ನು ಧರಿಸಬಹುದು ಎಂದು ನಂಬಲಾಗಿದೆ.

ಆರು ಮುಖಗಳನ್ನು ಹೊಂದಿರುವ ಷಣ್ಮುಖಿ ರುದ್ರಾಕ್ಷಿಯನ್ನು ವಿಶೇಷವಾಗಿ ಏಕಾಗ್ರತೆ ಮತ್ತು ಆತ್ಮವಿಶ್ವಾಸದೊಂದಿಗೆ ಸಂಬಂಧಿಸಿ ನೋಡಲಾಗುತ್ತದೆ. ಕೆಲವು ಧಾರ್ಮಿಕ ನಂಬಿಕೆಗಳ ಪ್ರಕಾರ, ಇದನ್ನು ಧರಿಸುವುದರಿಂದ ಮನಸ್ಸು ಶಾಂತವಾಗಿರುತ್ತದೆ ಮತ್ತು ಗಮನ ಕೇಂದ್ರೀಕರಿಸಲು ಸಹಾಯವಾಗುತ್ತದೆ.

ಏಳು ಮುಖಗಳಿರುವ ಸಪ್ತಮುಖಿ ರುದ್ರಾಕ್ಷಿಯನ್ನು ಒತ್ತಡ ಮತ್ತು ಮಾನಸಿಕ ಚಿಂತೆಗಳಿಂದ ನೆಮ್ಮದಿ ಪಡೆಯುವ ಸಂಕೇತವಾಗಿ ಪರಿಗಣಿಸಲಾಗುತ್ತದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಇದನ್ನು ಧರಿಸುವುದರಿಂದ ಕೆಲಸ ಮತ್ತು ವೃತ್ತಿಜೀವನದ ಕಡೆಗೆ ಗಮನ ಹರಿಸಲು ನೆರವಾಗುತ್ತದೆ.

ಎಂಟು ಮುಖಗಳನ್ನು ಹೊಂದಿರುವ ಅಷ್ಟಮುಖಿ ರುದ್ರಾಕ್ಷಿಗೂ ಧಾರ್ಮಿಕ ಮಹತ್ವವಿದೆ. ಇದನ್ನು ಧರಿಸುವುದರಿಂದ ಮನಸ್ಸಿಗೆ ಶಾಂತಿ ಮತ್ತು ನೆಮ್ಮದಿ ದೊರೆಯುತ್ತದೆ ಎಂಬ ನಂಬಿಕೆಯಿದೆ.

ಒಂಬತ್ತು ಮುಖಗಳಿರುವ ನವಮುಖಿ ರುದ್ರಾಕ್ಷಿಯನ್ನು ಧಾರ್ಮಿಕವಾಗಿ ಮಹತ್ವಪೂರ್ಣವೆಂದು ಪರಿಗಣಿಸಲಾಗುತ್ತದೆ. ಇದನ್ನು ಧರಿಸುವುದರಿಂದ ಸಕಾರಾತ್ಮಕ ಶಕ್ತಿ ದೊರೆಯುತ್ತದೆ ಮತ್ತು ಮನೋಬಲ ಹೆಚ್ಚುತ್ತದೆ ಎಂಬ ನಂಬಿಕೆಯಿದೆ.

ಹತ್ತು ಮುಖಗಳನ್ನು ಹೊಂದಿರುವ ದಶಮುಖಿ ರುದ್ರಾಕ್ಷಿಯನ್ನು ರಕ್ಷಣೆಯ ಸಂಕೇತವಾಗಿ ನೋಡಲಾಗುತ್ತದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಇದು ನಕಾರಾತ್ಮಕ ಶಕ್ತಿಗಳಿಂದ ರಕ್ಷಣೆ ನೀಡುತ್ತದೆ ಎಂದು ನಂಬಲಾಗಿದೆ.

ಹನ್ನೊಂದು ಮುಖಗಳಿರುವ ಏಕಾದಶಮುಖಿ ರುದ್ರಾಕ್ಷಿಯನ್ನು ಧೈರ್ಯ, ಆತ್ಮವಿಶ್ವಾಸ ಮತ್ತು ಮನೋಬಲದ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಇದನ್ನು ಧರಿಸುವುದರಿಂದ ಮನಸ್ಸಿನ ಮೇಲೆ ನಿಯಂತ್ರಣ ಸಾಧಿಸಲು ಸಹಾಯವಾಗುತ್ತದೆ ಎಂಬ ನಂಬಿಕೆಯಿದೆ.

ಹನ್ನೆರಡು ಮುಖಗಳನ್ನು ಹೊಂದಿರುವ ದ್ವಾದಶಮುಖಿ ರುದ್ರಾಕ್ಷಿಯನ್ನು ಶಕ್ತಿ, ತೇಜಸ್ಸು ಮತ್ತು ಆತ್ಮವಿಶ್ವಾಸದ ಸಂಕೇತವಾಗಿ ನೋಡಲಾಗುತ್ತದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಇದು ವ್ಯಕ್ತಿಯಲ್ಲಿ ಸಕಾರಾತ್ಮಕ ಭಾವನೆಗಳನ್ನು ಹೆಚ್ಚಿಸುತ್ತದೆ.

ಹದಿಮೂರು ಮುಖಗಳಿರುವ ತ್ರಯೋದಶಮುಖಿ ರುದ್ರಾಕ್ಷಿಯನ್ನು ಧಾರ್ಮಿಕ ಸಂಪ್ರದಾಯಗಳಲ್ಲಿ ವಿಶೇಷವೆಂದು ಪರಿಗಣಿಸಲಾಗುತ್ತದೆ. ಇದನ್ನು ಧರಿಸುವುದರಿಂದ ಆತ್ಮವಿಶ್ವಾಸ ಮತ್ತು ಮನಸ್ಸಿನ ನೆಮ್ಮದಿ ಹೆಚ್ಚುತ್ತದೆ ಎಂಬ ನಂಬಿಕೆಯಿದೆ.

ಹದಿನಾಲ್ಕು ಮುಖಗಳನ್ನು ಹೊಂದಿರುವ ಚತುರ್ದಶಮುಖಿ ರುದ್ರಾಕ್ಷಿಯನ್ನು ಅತ್ಯಂತ ವಿಶೇಷವಾದ ರುದ್ರಾಕ್ಷಿಗಳಲ್ಲಿ ಒಂದೆಂದು ಪರಿಗಣಿಸಲಾಗುತ್ತದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಇದನ್ನು ಧರಿಸುವುದರಿಂದ ಧೈರ್ಯ, ಮನೋಬಲ ಮತ್ತು ಮಾನಸಿಕ ನೆಮ್ಮದಿ ದೊರೆಯುತ್ತದೆ.

ದರ್ಶನ್ ಐಷಾರಾಮಿ ಕಾರು, ಬೈಕುಗಳಿಗೆ ಮಗ ವಿನೀಶ್ ಆಯುಧ ಪೂಜೆ: ಕ್ಯೂಟ್ ಫೋಟೋಗಳು ವೈರಲ್

Suchethana D — Wed, 21 Oct 2026 18:45:55 +0530

ನಟ ದರ್ಶನ್ ಜೈಲಿನಲ್ಲಿರುವ ಕಾರಣ ಈ ಬಾರಿಯ ಆಯುಧ ಪೂಜೆಯನ್ನು ಅವರ ಪುತ್ರ ವಿನೀಶ್ ನೆರವೇರಿಸಿದ್ದಾರೆ. ದುಬಾರಿ ಕಾರುಗಳಿಗೆ ಪೂಜೆ ಸಲ್ಲಿಸಿದ ಫೋಟೋಗಳು ವೈರಲ್ ಆಗಿವೆ. ಅಪ್ಪನಂತೆಯೇ ಕುದುರೆ ಸವಾರಿ ಕಲಿಯುತ್ತಿರುವ ವಿನೀಶ್, ಫಾರ್ಮ್‌ಹೌಸ್ ಜವಾಬ್ದಾರಿಯನ್ನೂ ನಿಭಾಯಿಸುತ್ತಿದ್ದಾರೆ.

ನಟ ದರ್ಶನ್ ಅವರು ಪ್ರತಿಬಾರಿಯೂ ತಮ್ಮ ಮನೆಯಲ್ಲಿ ಆಯುಧ ಪೂಜೆಯನ್ನು ಅದ್ದೂರಿಯಾಗಿಯೇ ಮಾಡುತ್ತಿದ್ದರು. ಅವರ ಬಳಿ ಹಲವಾರು ಐಷಾರಾಮಿ ಕಾರುಗಳಿವೆ, ಜೊತೆಗೆ ಒಂದಿಷ್ಟು ಬೈಕ್ಗಳೂ ಇವೆ. ಇವೆಲ್ಲಕ್ಕೂ ಭರ್ಜರಿಯಾಗಿ ಪೂಜೆ ನಡೆಯುತ್ತಿತ್ತು. ಆಯುಧ ಪೂಜೆಯ ಸಂದರ್ಭದಲ್ಲಿ ಅವರ ಮನೆ ಮತ್ತು ಫಾರ್ಮ್‌ಹೌಸ್‌ನಲ್ಲಿ ನಡೆಯುವ ಪೂಜಾ ಕಾರ್ಯಕ್ರಮಗಳು ಜೋರಾಗಿ ನಡೆಯುತ್ತವೆ.

ಆದರೆ ಕಳೆದ ಎರಡು ವರ್ಷಗಳಿಂದ, ದರ್ಶನ್ ಅವರು ಜೈಲಿನಲ್ಲಿ ಇರುವ ಕಾರಣ, ಅವರಿಲ್ಲದ ದಸರಾ ನಡೆಯುತ್ತಿದೆ. ಈ ಬಾರಿ ಅವರ ಪುತ್ರ ವಿನೀಶ್ ಪೂಜೆ ನೆರವೇರಿಸಿದ್ದಾರೆ. ಅದರ ಫೋಟೋಗಳು ವೈರಲ್ ಆಗುತ್ತಿವೆ.

ವಿನೀಶ್ ದರ್ಶನ್ ಅವರು, ದುಬಾರಿ ಕಾರುಗಳಿಗೆ ಪೂಜೆ ನೆರವೇರಿಸಿದ ವಿಶೇಷ ವಿಡಿಯೋ ಮತ್ತು ಫೋಟೋಗಳನ್ನು ಶೇರ್ ಮಾಡಿಕೊಂಡಿದ್ದಾರೆ. ಅವರ ಕೈಯಲ್ಲಿ ಎಲ್ಲ ಕಾರುಗಳ ಕೀಗಳನ್ನೂ ನೋಡಬಹುದಾಗಿದೆ. ಬೆಂಗಳೂರಿನ ಆರ್‌.ಆರ್‌.ನಗರದ ಮನೆಯಲ್ಲಿಯೇ ದಸರಾ ಹಬ್ಬ ಮಾಡಲಾಗಿದೆ. ಮನೆಯ ಮುಂದೆ ಸಾಲಾಗಿಯೇ ಕಾರು ನಿಲ್ಲಿಸಿ ಮಗ ವಿನೀಶ್ ಪೂಜೆ ಸಲ್ಲಿಸಿದ್ದಾರೆ.

ಅಂದಹಾಗೆ ಇದಾಗಲೇ ವಿನೀತ್ ಅಪ್ಪನಂತೆಯೇ ಕುದುರೆಗಳನ್ನು ಓಡಿಸೋದ್ರಲ್ಲಿ ನಿಸ್ಸೀಮ. ಸಮಯ ಸಿಕ್ಕಾಗ ಕುದುರೆಗಳ ದೇಖರೇಕೆಯಲ್ಲೇ ಸಮಯ ವ್ಯಯಿಸೋದು ಆತನಿಗೆ ಪ್ರಿಯ. ದರ್ಶನ್ ಜೈಲಿನಲ್ಲಿರೋವಾಗ ಅವರ ಫಾರ್ಮ್ ಹೌಸ್ ಮೆಂಟೈನ್ ಹೇಗೆ ಆಗುತ್ತೆ? ಅವರ ಬಳಿ ಇರೋ ಕುದುರೆಗಳ ಗತಿಯೇನು ಎಂದೇ ಅಂದುಕೊಳ್ಳಲಾಗಿತ್ತು. ಈಗ ಅಪ್ಪನ ಸ್ಥಾನದಲ್ಲಿ ಮಗನೇ ಎಲ್ಲವನ್ನೂ ನಿಭಾಯಿಸುತ್ತಿದ್ದಾನೆ.

ದರ್ಶನ್ ಪುತ್ರ ವಿನೀಶ್‌ಗೆ ಚಿಕ್ಕಬಳ್ಳಾಪುರದ ಅನಿಮಲ್ ಲವರ್ ಗೌತಮ್ ಸದ್ಯ ಕುದುರೆ ತರಬೇತಿಯನ್ನು ಕೊಡ್ತಿದ್ದಾರೆ. 16 ಕುದುರೆ, 16 ನಾಟಿ ಹಸುಗಳನ್ನು ಸಾಕಿರುವ ಗೌತಮ್, ವಿನೀಶ್‌ಗೂ ಪ್ರಾಣಿಗಳನ್ನು ಹೇಗೆ ನೋಡಿಕೋಳ್ಳಬೇಕು ಅನ್ನೋದನ್ನ ತಿಳಿಸಿ ಕೊಡ್ತಿದ್ದಾರೆ. ವಿನೀಶ್ ಲಭ್ಯರಿದ್ದಾಗ ತಮ್ಮ ಸಮಯ ನೋಡಿಕೊಂಡು ಕುದರೆ ಓಡಿಸೋದನ್ನ ಗೌತಮ್ ಕಲಿಸಿಕೊಡ್ತಾರೆ. ಚಿಂತಾಮಣಿ ತಾಲೂಕಿನ ನಾರಾಯಣ ಹಳ್ಳಿಯ ಗೌತಮ್ ತೋಟಕ್ಕೆ ಬಂದು ವಿನೀಶ್, ಕುದುರೆ ಓಡಿಸೋದನ್ನ ಕಲಿತಿದ್ದಾನೆ.

ನನ್ನ ಮಗನಿಗೆ ಪ್ರಾಣಿ ಪಕ್ಷಿ ಎಂದರೆ ತುಂಬ ಇಷ್ಟ. ಅವನು ಬೇಸಿಕ್‌ ಕಲಿಯಬೇಕು, ಎಲ್ಲವೂ ಗೊತ್ತಿರಬೇಕು, ಮೊದಲು ಕಷ್ಟಪಡಲಿ ಎಂದು ದರ್ಶನ್‌ ಅವರೇ ಕೆಲ ವರ್ಷಗಳ ಹಿಂದೆ ಏಷ್ಯಾನೆಟ್‌ ಸುವರ್ಣ ನ್ಯೂಸ್‌ಗೆ ನೀಡಿದ್ದ ಸಂದರ್ಶನದಲ್ಲಿ ಒಮ್ಮೆ ಹೇಳಿಕೊಂಡಿದ್ದರು.

ವೇ*ಶ್ಯೆ ಮನೆಯ ಮಣ್ಣು ಇಲ್ಲದೇ ದುರ್ಗಾ ದೇವಿ ಪ್ರತಿಮೆ ಅಪೂರ್ಣ: 500 ವರ್ಷಗಳ ರೋಚಕ ಸಂಪ್ರದಾಯದ ಹಿನ್ನೆಲೆ ಏನು

Suchethana D — Sun, 18 Oct 2026 17:06:50 +0530

ಹಿಂದೂ ಸಂಪ್ರದಾಯವೇ ರೋಚಕವಾದದ್ದು. ಇದರ ಪ್ರತಿಯೊಂದು ಆಚರಣೆಗಳಲ್ಲಿಯೂ ಅದರದ್ದೇ ಆದ ವಿಶೇಷತೆಗಳಿವೆ, ನಿಗೂಢತೆ ಇದೆ. ಹಿಂದೂ ಸಂಪ್ರದಾಯದಷ್ಟು ಪುರಾತನ ಸಂಪ್ರದಾಯ, ಅಂದಿನಿಂದ ನಡೆದುಕೊಂಡು ಬಂದಿರುವ ಆಚರಣೆಗಳ ಹಿಂದಿರುವ ಸತ್ಯಾಂಶ ವಿಭಿನ್ನವಾದದ್ದು, ಕೆಲವೊಂದು ಸಾಮಾನ್ಯ ಜನರ ತಲೆಯ ಒಳಗೆ ಹೋಗದೇ ಇರುವಂಥದ್ದು. ಅಂಥವುಗಳಲ್ಲಿ ಒಂದು ದುರ್ಗಾ ದೇವಿಯ ಪ್ರತಿಮೆ ಮಾಡುವ ವಿಧಾನ. ಇದೀಗ ನವರಾತ್ರಿ ನಡೆಯುತ್ತಿದೆ. ಭಾರತದ ಹಲವು ಕಡೆಗಳಲ್ಲಿ ದುರ್ಗಾ ದೇವಿಯ ವಿಗ್ರಹವನ್ನು ಸಂಪ್ರದಾಯ ಬದ್ಧವಾಗಿ ತಯಾರು ಮಾಡಲಾಗುತ್ತದೆ. ಅದರಲ್ಲಿಯೂ ಉತ್ತರ ಭಾರತದ ಕೆಲವು ಪ್ರದೇಶಗಳು ಇದಕ್ಕೆ ಫೇಮಸ್. ಹಾಗೆಂದು ಹೇಗೆ ಬೇಕೆಂದರೆ ಹಾಗೆ ದೇವರ ಮೂರ್ತಿಗಳನ್ನು ತಯಾರು ಮಾಡಲಾಗುವುದಿಲ್ಲ. ಅದಕ್ಕೆ ಅದರದ್ದೇ ಆದ ಸಂಪ್ರದಾಯ, ಕೆಲವೊಂದು ರೀತಿ-ನಿಯಮಗಳು ಇರುತ್ತವೆ.

ಅಂಥವುಗಳಲ್ಲಿ ಒಂದು ದುರ್ಗಾ ಮಾತೆಯ ಮೂರ್ತಿಯನ್ನು ತಯಾರು ಮಾಡುವಾಗ ಈ ಸಮಾಜದಿಂದ ಬಹಿಷ್ಕರಿಸಲ್ಪಟ್ಟಿರುವ ಲೈಂಗಿಕ ಅಲ್ಪಸಂಖ್ಯಾತರ ಮನೆಯ ಅಂಗಳದಿಂದ ಮಣ್ಣನ್ನು ತರುವುದು. ಆ ಮಣ್ಣನ್ನು ದುರ್ಗಾ ದೇವಿಯ ಮೂರ್ತಿಯ ಮಣ್ಣಿನಲ್ಲಿ ಕಲಸಿ ಮೂರ್ತಿಯನ್ನು ಕೆತ್ತುವುದು. ದುರ್ಗಾ ಪೂಜೆಯ ಸಮಯದಲ್ಲಿ, ವೇಶ್ಯಾವಾಟಿಕೆಗೆ ಸಂಬಂಧಿಸಿದ ಸ್ಥಳ ಅಥವಾ ವೇಶ್ಯಾಗೃಹದ ಮನೆ ಬಾಗಿಲಿನಿಂದ ಮಣ್ಣನ್ನು ತೆಗೆದುಕೊಂಡು ದುರ್ಗಾ ದೇವಿಯ ವಿಗ್ರಹವನ್ನು ತಯಾರಿಸಲಾಗುತ್ತದೆ, ಇದನ್ನು 'ಪುಣ್ಯ ಮಾಟಿ' (ಪವಿತ್ರ ಮಣ್ಣು) ಎಂದು ಕರೆಯಲಾಗುತ್ತದೆ. ಪಶ್ಚಿಮ ಬಂಗಾಳ ಮತ್ತು ಇತರ ಕೆಲವು ಪ್ರದೇಶಗಳಲ್ಲಿ, ವೇಶ್ಯಾಗೃಹದ ಮನೆ ಬಾಗಿಲಿನಿಂದ ಮಣ್ಣನ್ನು ಒಳಗೊಂಡಂತೆ, ದುರ್ಗಾ ದೇವಿಯ ವಿಗ್ರಹವನ್ನು ತಯಾರಿಸಲು ನಾಲ್ಕು ನಿರ್ದಿಷ್ಟ ಸ್ಥಳಗಳಿಂದ ಮಣ್ಣನ್ನು ಬೆರೆಸುವುದು ಶುಭವೆಂದು ಪರಿಗಣಿಸಲಾಗುತ್ತದೆ.

ನಾಲ್ಕು ಮಿಶ್ರಣ ದುರ್ಗಾ ಮೂರ್ತಿಗೆ ಅಗತ್ಯವಾಗಿ ಬೇಕು. ಒಂದು ಗಂಗಾನದಿಯ ದಡದ ಮಣ್ಣು, ಇನ್ನೊಂದು ಗೋಮೂತ್ರ ಮತ್ತು 3ನೆಯದ್ದು ಗೋಮಯ ಮತ್ತು 4ನೆಯದ್ದು, ವೇಶ್ಯೆಯ ಮನೆಯಂಗಳದ ಮಣ್ಣು. ಅದನ್ನು ಕೂಡ ಈ ದೇವಿಯ ವಿಗ್ರಹವನ್ನು ತಯಾರಿಸಲು ಮಣ್ಣನ್ನು ಕೇಳಲು ವೇಶ್ಯೆಯ ಮನೆಗೆ ಪೂಜಾರಿ ಅಥವಾ ಶಿಲ್ಪಿಗಳು ಮಾತ್ರ ಹೋಗಬೇಕು. ಇಂತಹ ಸಮಯದಲ್ಲಿ ಅವರ ಮನಸ್ಸು ಮತ್ತು ದೇಹ ಎರಡೂ ಶುದ್ಧವಾಗಿರಬೇಕು, ಯಾವುದೇ ಕೆಟ್ಟ ಆಲೋಚನೆಗಳು ಇರಬಾರದು. ವೇಶ್ಯೆಯ ಮನೆಗೆ ಹೋದಾಗ ತಲೆ ಬಾಗಿಸಿ ಗೌರವದಿಂದ ಮಣ್ಣನ್ನು ಕೇಳಬೇಕು. ಒಂದು ವೇಳೆ ಆಕೆಗೆ ನೀವು ನೀಡಿದ ಗೌರವದ ಪರವಾಗಿ ಆಕೆ ನಿಮಗೆ ಮಣ್ಣನ್ನು ನೀಡಿದರೆ ಆ ಮಣ್ಣನ್ನು ತಂದು ಅದರಿಂದ ದುರ್ಗಾ ದೇವಿಯ ವಿಗ್ರಹವನ್ನು ಮಾಡಬೇಕು. ಆಗ ಮಾತ್ರ ದುರ್ಗಾ ವಿಗ್ರಹದಲ್ಲಿ ಶಕ್ತಿ ನೆಲೆಯಾಗುತ್ತದೆ.

ಇದಕ್ಕಿದೆ ಕುತೂಹಲದ ಕಾರಣ

ಇದಕ್ಕೆ ಹಲವು ಕಾರಣಗಳಿವೆ, ಶತಮಾನಗಳಿಂದ ಈ ಸಂಪ್ರದಾಯ ನಡೆದು ಬಂದಿದೆ. ಈ ಹಿಂದೆ ವೇಶ್ಯೆಯರು ಎಂದರೆ ರಾಜರು ಕೂಡ ಹೋಗುತ್ತಿದ್ದ ಕಾಲವದು. ಇಂದು ಈ ವೃತ್ತಿಯ ಸ್ವರೂಪ ಬದಲಾದರೂ ಸಂಪ್ರದಾಯ ಬದಲಾಗಿಲ್ಲ. ರಾಜ ಸೇರಿದಂತೆ ವೇಶ್ಯೆಯರನ್ನು ಹುಡುಕಿ ಹೋಗುವ ದೊಡ್ಡ ದೊಡ್ಡ ಮನುಷ್ಯರಿಂದ ಹಿಡಿದು ಸಾಮಾನ್ಯ ಮನುಷ್ಯರವರೆಗೂ ಆತ ವೇಶ್ಯೆಯ ಮನೆಗೆ ಪ್ರವೇಶಿಸಿದಾಗ, ಸಮಾಜವು ಸೂಚಿಸಿದಂತೆ ಅವನು ತನ್ನ ಶುದ್ಧತೆ, ತಾನು ಮಾಡಿದ ಪುಣ್ಯದ ಕೆಲಸ ಅಥವಾ ಅಹಂಕಾರವನ್ನು ಆಕೆಯ ಮನೆ ಬಾಗಿಲಲ್ಲಿ ಬಿಡುತ್ತಾನೆ. ರಾಜನಾದಿಯಾಗಿ ಎಲ್ಲರೂ ವೇಶ್ಯೆಯರಿಗೆ ತಲೆ ಬಾಗುತ್ತಾರೆ. ಅಲ್ಲಿ ಅಹಂಕಾರ ಎನ್ನುವುದು ಇರುವುದಿಲ್ಲ. ಇದೇ ಕಾರಣಕ್ಕೆ ಆ ಮನೆಯ ಅಂಗಳದ ಮಣ್ಣು ಅಷ್ಟೊಂದು ಪ್ರಾಮುಖ್ಯತೆ ಪಡೆದಿದೆ ಎನ್ನುತ್ತಾರೆ ಹಿರಿಯರು.

ಈ ಆಚರಣೆಯ ಆಳವಾದ ಸಾಮಾಜಿಕ ಸಂದೇಶವೆಂದರೆ ದುರ್ಗಾ 'ಶಕ್ತಿ'ಯ ಒಂದು ರೂಪ, ಮತ್ತು ಸಮಾಜದಿಂದ ಕಡೆಗಣಿಸಲ್ಪಟ್ಟ ಅಥವಾ ನಿರ್ಲಕ್ಷಿಸಲ್ಪಟ್ಟ ಮಹಿಳೆಯರನ್ನು ಸಹ ಗೌರವಿಸಬೇಕು ಮತ್ತು ದೇವತೆಯ ರೂಪದಲ್ಲಿ ಇರಿಸಬೇಕು. ಸಮಾಜವು ತಿರಸ್ಕರಿಸುವ ಮಹಿಳೆಯರ ಮನೆ ಬಾಗಿಲಿನಿಂದ ಬರುವ ಧೂಳನ್ನು ಈ ಪವಿತ್ರ ಹಬ್ಬದಂದು ಮಾತೃ ದೇವಿಯ ವಿಗ್ರಹದ ಭಾಗವಾಗಿ ಮಾಡಲಾಗುತ್ತದೆ ಎಂಬ ಕಹಿ ವಿರೋಧಾಭಾಸವನ್ನು ಇದು ಎತ್ತಿ ತೋರಿಸುತ್ತದೆ ಎನ್ನುವುದು. ವೇಶ್ಯರು ಎಂದ ಮಾತ್ರಕ್ಕೆ ಅವರನ್ನು ಅವಹೇಳನ ಮಾಡುವುದು, ಕೆಟ್ಟದಾಗಿ ನಡೆಸಿಕೊಳ್ಳುವುದು. ಅವರಿಗೂ ಸಮಾಜದಲ್ಲಿ ಗೌರವವನ್ನು ನೀಡಬೇಕೆನ್ನುವ ಕಾರಣದಿಂದ ಬಹುಶಃ ಈ ಪದ್ಧತಿ ಆರಂಭವಾಗಿರಬಹುದು ಎನ್ನಲಾಗಿದೆ.

ಪೌರಾಣಿಕ ಕಥೆಯೂ ಇದೆ

ಹಿಂದೂ ಸಂಪ್ರದಾಯವೆಂದರೆ, ಪ್ರತಿ ಘಟನೆಗೂ ಒಂದು ಪೌರಾಣಿಕ ಸ್ಟೋರಿ ಇದ್ದೇ ಇರುತ್ತದೆ. ಅದೇ ರೀತಿ ವೇಶ್ಯೆಯ ಮನೆಯಂಗಳದ ಮಣ್ಣಿಗೂ ಒಂದು ಕಥೆ ಇದೆ. ಒಮ್ಮೆ ವೇಶ್ಯೆಯರ ಗುಂಪೊಂದು ಸ್ನಾನ ಮಾಡಲು ಗಂಗಾನದಿಯ ತೀರಕ್ಕೆ ಹೋಗುತ್ತಿದ್ದದು ಆ ಸಮಯದಲ್ಲಿ ಅವರು ಓರ್ವ ಕುಷ್ಠ ರೋಗಿಯು ಗಂಗಾ ನದಿಯ ದಡದ ಬಳಿ ಕುಳಿತಿರುವುದನ್ನು ಗಮನಿಸುತ್ತಾರೆ. ಆ ಕುಷ್ಠರೋಗಿಯು ಸ್ನಾನ ಮಾಡದೆ ತುಂಬಾನ ಸಮಯಗಳಾಗಿತ್ತು, ಅವನು ತಾನು ಸ್ನಾನ ಮಾಡುವುದಕ್ಕಾಗಿ ಅಲ್ಲಿ ಅಲೆದಾಡುತ್ತಿದ್ದ ಒಂದಿಷ್ಟು ಜನರನ್ನು ಸಹಾಯ ಕೇಳುತ್ತಾರೆ. ಆದರೆ, ಯಾರೂ ಅವನಿಗೆ ಸಹಾಯ ಮಾಡಲು ಮುಂದೆ ಬರುವುದಿಲ್ಲ. ಅವನು ಮತ್ತೆ ಚಿಂತಿತನಾಗಿ ಅದೇ ಸ್ಥಳದಲ್ಲಿ ಕುಳಿತುಕೊಂಡನು. ಇದನ್ನೆಲ್ಲಾ ಗಮನಿಸಿದ ವೇಶ್ಯೆಯರ ಗುಂಪೊಂದು ಆತನಿಗೆ ಸಹಾಯ ಮಾಡಲು ಮುಂದೆ ಬರುತ್ತಾರೆ. ವೇಶ್ಯೆಯರು ಆತನಿಗೆ ಗಂಗಾ ನದಿಯಲ್ಲಿ ಸ್ನಾನ ಮಾಡಿಸಿ, ಶುದ್ಧನನ್ನಾಗಿ ಮಾಡುತ್ತಾರೆ.

ಆದರೆ, ಇವು ಕುಷ್ಠಿರೋಗಿಯಾಗಿರಲಿಲ್ಲ. ಸಾಕ್ಷಾತ್‌ ಶಿವನೇ ಅಲ್ಲಿ ಕುಷ್ಠರೋಗಿಯ ಅವತಾರದಲ್ಲಿ ಕುಳಿತುಕೊಂಡಿದ್ದನು. ವೇಶ್ಯೆಯರ ಸಹಾಯದಿಂದ ಸಂತಸಗೊಂಡ ಶಿವನು ಅವರ ಬಳಿ ನಿಮಗೆ ಯಾವ ವರಬೇಕಾದರೂ ಕೇಳಿ ನಾನು ಕೊಡಲು ಸಿದ್ಧನಿದ್ದೇನೆ ಎಂದು ಹೇಳುತ್ತಾನೆ. ನಂತರ ವೇಶ್ಯೆಯರು ಆತನ ಬಳಿ ದುರ್ಗಾ ದೇವಿಯ ವಿಗ್ರಹವನ್ನು ಮಾಡುವಾಗ ಅವರು ವೇಶ್ಯೆಯರ ಮನೆಯ ಅಂಗಳದ ಮಣ್ಣನ್ನು ಬಳಸಿ ದುರ್ಗಾ ದೇವಿಯ ವಿಗ್ರಹವನ್ನು ಮಾಡಬೇಕೆನ್ನುವ ವರವನ್ನು ಪಡೆದುಕೊಳ್ಳುತ್ತಾರೆ. ಇದಾದ ನಂತರ ಗಂಗಾ ದಡದ ಮಣ್ಣಿನಿಂದ ಹಾಗೂ ವೇಶ್ಯೆಯರ ಮನೆಯ ಅಂಗಳದಿಂದ ತಂದಿರುವ ಮಣ್ಣಿನಿಂದ ದುರ್ಗೆಯ ಮೂರ್ತಿಗಳನ್ನು ತಯಾರಿಸುವ ಸಂಪ್ರದಾಯ ಆರಂಭವಾಗಿ ಇಂದಿಗೂ ಈ ಸಂಪ್ರದಾಯ ಮುಂದುವರಿದುಕೊಂಡು ಬಂದಿದೆ.

ಆಯುಧ ಪೂಜೆಗೆ ದೇವರಂತೆ ಪೂಜಿಸುವ ಕಾರಿನ ಬಾನೆಟ್ ಮೇಲೆ ಪ್ರೇಯಸಿ ಹೆಜ್ಜೆ ಗುರುತು; ನೋಡಿ ಮುಂದೇನಾಯ್ತು..!

Sathish Kumar KH — Mon, 19 Oct 2026 16:30:29 +0530

ಇತ್ತೀಚಿನ ದಿನಗಳಲ್ಲಿ ಇನ್‌ಸ್ಟಾಗ್ರಾಮ್ ರೀಲ್ಸ್ ಮತ್ತು ಸೋಶಿಯಲ್ ಮೀಡಿಯಾದಲ್ಲಿ ವ್ಯೂವ್ಸ್ (Views), ಲೈಕ್ಸ್‌ಗಳಿಗಾಗಿ ಜನರು ಎಂತಹ ವಿಚಿತ್ರ ಕೆಲಸಗಳನ್ನು ಮಾಡಲೂ ಹೇಸುವುದಿಲ್ಲ. ಹುಡುಗಿಯನ್ನು ಇಂಪ್ರೆಸ್ ಮಾಡಲು ಹುಡುಗರು ಮಾಡುವ ಹುಚ್ಚಾಟಗಳಂತೂ ಕೆಲವೊಮ್ಮೆ ಎಲ್ಲೆ ಮೀರಿಬಿಡುತ್ತವೆ. ಇದೀಗ ಅಂತಹದ್ದೇ ಒಂದು ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಕಿಡಿಹೊತ್ತಿಸಿದೆ!

ಆಗಿದ್ದೇನು?

ಹೊಸ ಕಾರೊಂದನ್ನು ಖರೀದಿ ಮಾಡಿದ ವ್ಯಕ್ತಿ ತನ್ನ ಪ್ರೇಯಸಿಯನ್ನು ಎತ್ತಿಕೊಂಡು ಆಕೆಯ ಕಾಲಿಗೆ ಕೆಂಪು ಬಣ್ಣವನ್ನು ಹಚ್ಚಿ ಕಾಲಿನ ಹೆಜ್ಜೆ ಗುರುತನ್ನು ಕಾರು ಇಂಜಿನ್‌ನ ಬಾನೆಟ್ (Engine Hood) ಮೇಲೆ ಇಡಿಸುತ್ತಾನೆ. ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ವೈರಲ್ ಆಗಿದೆ. ಈ ದೃಶ್ಯವನ್ನು ಮಾನವ ಹಕ್ಕುಗಳ ಹೋರಾಟಗಾರ ಸ್ಯಾಮ್ ಸಿಫ್ (Sam Siff) ಎಂಬುವವರು ತಮ್ಮ 'X' (ಟ್ವಿಟರ್) ಖಾತೆಯಲ್ಲಿ ಹಂಚಿಕೊಂಡು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

'ಇದು ಅತ್ಯಂತ ದಯನೀಯ! ಆಕೆಯನ್ನು ಇಂಪ್ರೆಸ್ ಮಾಡಲು ಇಂಜಿನ್ ಬಾನೆಟ್ ಮೇಲೆ ಕಾಲಿಡಿಸುವುದಾ? ನಿಜವಾದ ಯಾವುದೇ ಕಾರ್ ಪ್ರೇಮಿ (Car Lover) ಇಂತಹ ಕೃತ್ಯವನ್ನು ಮೆಚ್ಚುವುದಿಲ್ಲ. ಈ ಡ್ರಾಮಾ ಮಾಡಲು ಆತ ಕಾರಿನ ಬಾಗಿಲು ಬಳಸಬಹುದಿತ್ತು, ಆದರೆ ಇಂಜಿನ್ ಇರುವಂತಹ ಬಾನೆಟ್‌ಗೆ ಅಗೌರವ ತೋರಿದ್ದಾರೆ. ಇದು ಯಾವುದೇ ಸ್ವಾಭಿಮಾನವಿಲ್ಲದ ನಾಚಿಕೆಗೇಡು ಕೃತ್ಯ. ಕಾರಿನ ಬಗ್ಗೆ ಗೌರವವೂ ಇಲ್ಲ, ತನ್ನ ಬಗ್ಗೆ ತನಗೇ ಗೌರವವಿಲ್ಲದ ವರ್ತನೆ' ಎಂದು ಸ್ಯಾಮ್ ಸಿಫ್ ತೀವ್ರವಾಗಿ ಖಂಡಿಸಿದ್ದಾರೆ.

Pathetic. ‍♂️

Putting her foot on the engine hood just to impress her?

No real car lover will ever appreciate this kind of simping.

He could have used the car door for this drama, but no — he had to disrespect the engine hood.

Shameless simp. Zero self-respect, zero respect for the car. https://t.co/IYPGRVFe1s

— The Forgotten ‘Man’ ‍⚖️ (@SamSiff) October 19, 2026

ನೆಟ್ಟಿಗರ ಮಿಶ್ರ ಪ್ರತಿಕ್ರಿಯೆ: ಪರ-ವಿರೋಧದ ದೊಡ್ಡ ಚರ್ಚೆ!

ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಕಮೆಂಟ್ ಬಾಕ್ಸ್‌ನಲ್ಲಿ ಪರ-ವಿರೋಧ ಚರ್ಚೆ ಆರಂಭಿಸಿದ್ದಾರೆ.

ಕಾರು ಪ್ರೇಮಿಗಳ ಆಕ್ರೋಶ: 'ಒಬ್ಬ ಒಳ್ಳೆಯ ಕಾರ್ ಲವರ್ಸ್ ಎಂದಿಗೂ ಕಾರಿನ ಮೇಲೆ ಕಾಲಿಡಲು ಬಿಡುವುದಿಲ್ಲ. ಬರೀ ಇನ್‌ಸ್ಟಾಗ್ರಾಮ್ ವ್ಯೂವ್ಸ್‌ಗಾಗಿ ಇಷ್ಟೊಂದು ಕೀಳು ಮಟ್ಟಕ್ಕೆ ಇಳಿಯಬೇಕಾ? ಇಂದಿನ ಪೀಳಿಗೆಯಲ್ಲಿ ಹುಡುಗಿಯರನ್ನು ಓಲೈಸಲು ಹುಡುಗರು ಇಂತಹ ಕೃತ್ಯಗಳನ್ನು ಎಸಗುತ್ತಾರೆ' ಎಂದು ಹಲವರು ಕಿಡಿಕಾರಿದ್ದಾರೆ.

ವೈಯಕ್ತಿಕ ಸ್ವಾತಂತ್ರ್ಯ: 'ಗಾಡಿ ಅವನದ್ದು, ಹುಡುಗಿ ಅವನವಳು, ಡ್ರಾಮಾ ಅವರದ್ದು... ನಡುವೆ ಇವರಿಗೇಕೆ ಉಸಾಬರಿ? ಆತನ ಕಾರನ್ನು ಆತ ಹೇಗೆ ಬೇಕಾದರೂ ಬಳಸಿಕೊಳ್ಳಲಿ, ಬೇರೆಯವರಿಗೆ ಏನು ನಷ್ಟ?' ಎಂದು ಕೆಲವರು ಯುವಕನ ಪರವಾಗಿ ಬ್ಯಾಟ್ ಬೀಸಿದ್ದಾರೆ.

ಸಂಸ್ಕೃತಿ ನೆನಪಿಸಿದ ಕೆಲವರು: 'ಭಾರತದಲ್ಲಿ ಹೆಣ್ಣುಮಕ್ಕಳನ್ನು ದೇವಿಯಂತೆ ಕಂಡು ಗೌರವಿಸುವ ಸಂಪ್ರದಾಯವಿದೆ. ಇದು ಆಕೆಯ ಮೇಲಿನ ಪ್ರೀತಿ ಇರಬಹುದು' ಎಂದು ಕಾರಿನ ಮೇಲೆ ಕಾಲಿಟ್ಟಿದ್ದನ್ನು ಸಮರ್ಥಿಸಿಕೊಂಡಿದ್ದಾರೆ.

ರೀಲ್ಸ್ ಹುಚ್ಚಿಗೆ ಟಾಂಗ್: 'ಕಾರಿನ ಎಂಜಿನ್ ಎನ್ನುವುದು ದೈವಿಕ ಸ್ವರೂಪ. ಅದನ್ನು ದೇವರ ಮುಂದೆ ಪೂಜಿಸುತ್ತೇವೆ. ಆದರೆ, ಇಲ್ಲಿ ಕೇವಲ ನಾಲ್ಕು ಲೈಕ್‌ಗಳಿಗಾಗಿ ಮನುಷ್ಯರು ಇಷ್ಟೊಂದು ಕೀಳು ಮಟ್ಟಕ್ಕೆ ಇಳಿಯುತ್ತಾರೆ ಅನ್ನೋದಕ್ಕೆ ಈ ರೀಲ್ಸ್ ಸಾಕ್ಷಿ' ಎಂದು ಹಲವರು ವ್ಯಂಗ್ಯವಾಡಿದ್ದಾರೆ.

ಒಟ್ಟಿನಲ್ಲಿ, ಯುವತಿಯೊಬ್ಬಳು ಕಾರಿನ ಬಾನೆಟ್ ಮೇಲೆ ಕಾಲಿಟ್ಟ ಈ ಒಂದು ಘಟನೆ, ಪ್ರೀತಿ ಮತ್ತು ಕಾರ್ ಕ್ರೇಜ್ ನಡುವಿನ ದೊಡ್ಡ ಚರ್ಚೆಗೆ ಕಾರಣವಾಗಿ ಸಾಮಾಜಿಕ ಜಾಲತಾಣದಲ್ಲಿ ಟ್ರೆಂಡಿಂಗ್ ಟಾಪಿಕ್ ಆಗಿದೆ.

ದಸರಾ ಹಬ್ಬದಂದು ಈ ಪಕ್ಷಿಯ ದರ್ಶನವಾದರೆ ಅದೃಷ್ಟ ಖುಲಾಯಿಸುತ್ತೆ! ಶ್ರೀರಾಮ, ಶಿವನಿಗೂ ಇದೆ ನಂಟು

Pavna Das — Mon, 19 Oct 2026 19:03:55 +0530

ದಸರಾ ಹಬ್ಬದಂದು ನೀಲಕಂಠ ಪಕ್ಷಿಯ ದರ್ಶನವಾದರೆ ಅದೃಷ್ಟ!

ದಸರಾ ಹಬ್ಬದಂದು ನೀಲಕಂಠ ಪಕ್ಷಿಯ ದರ್ಶನವಾದರೆ ಅತ್ಯಂತ ಶುಭವೆಂದು ಪರಿಗಣಿಸಲಾಗುತ್ತದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಈ ಪಕ್ಷಿಯನ್ನು ಶಿವನ ಪ್ರತೀಕವೆಂದು ಭಾವಿಸಲಾಗುತ್ತದೆ. ವಿಜಯದಶಮಿಯಂದು ನೀಲಕಂಠ ಪಕ್ಷಿಯನ್ನು ನೋಡುವುದು ಅದೃಷ್ಟ, ಸುಖ-ಸಮೃದ್ಧಿ ಮತ್ತು ಜೀವನದಲ್ಲಿ ಸಂತೋಷ ನೆಲೆಸುವ ಸೂಚನೆ ಎಂಬ ನಂಬಿಕೆಯಿದೆ. ದಸರಾ ಎಂದರೆ ಕೇವಲ ರಾವಣನ ದಹನ ಮತ್ತು ಕೆಟ್ಟದ್ದರ ಮೇಲೆ ಒಳ್ಳೆಯದರ ವಿಜಯವನ್ನು ಆಚರಿಸುವ ಹಬ್ಬವಷ್ಟೇ ಅಲ್ಲ. ಈ ಹಬ್ಬಕ್ಕೆ ಹಲವು ಧಾರ್ಮಿಕ ನಂಬಿಕೆಗಳು ಮತ್ತು ಸಂಪ್ರದಾಯಗಳೂ ಸಂಬಂಧಿಸಿವೆ. ಅವುಗಳಲ್ಲಿ ಒಂದು ನೀಲಕಂಠ ಪಕ್ಷಿಯ ದರ್ಶನ ಪಡೆಯುವುದು.

ವಿಜಯದಶಮಿಯ ದಿನ ಈ ಪಕ್ಷಿಯನ್ನು ನೋಡುವುದು ಅದೃಷ್ಟದ ಸಂಕೇತ ಎಂಬ ನಂಬಿಕೆ ಇದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ನೀಲಕಂಠ ಪಕ್ಷಿಯ ದರ್ಶನದಿಂದ ಜೀವನದಲ್ಲಿ ಸುಖ-ಸಮೃದ್ಧಿ ನೆಲೆಸುತ್ತದೆ ಮತ್ತು ಮುಂದಿನ ದಿನಗಳಲ್ಲಿ ಶುಭಫಲಗಳು ದೊರೆಯುತ್ತವೆ . ಈ ನಂಬಿಕೆಯು ಶ್ರೀರಾಮ, ರಾವಣನ ಸಂಹಾರ ಮತ್ತು ಶಿವನಿಗೆ ಸಂಬಂಧಿಸಿದ ಜನಪ್ರಿಯ ಪೌರಾಣಿಕ ಕಥೆಯೊಂದಕ್ಕೂ ಸಂಬಂಧಿಸಿದೆ.

ನೀಲಕಂಠ ಪಕ್ಷಿಯನ್ನು ಶಿವನ ಪ್ರತೀಕವೆಂದು ಏಕೆ ಪರಿಗಣಿಸಲಾಗುತ್ತದೆ?

ನೀಲಕಂಠ ಪಕ್ಷಿಯನ್ನು ಶಿವನ ಪ್ರತೀಕವೆಂದು ಪರಿಗಣಿಸಲಾಗುತ್ತದೆ. ಪಕ್ಷಿಯ ಕುತ್ತಿಗೆ ನೀಲಿಬಣ್ಣದಲ್ಲಿರುವುದೇ ಇದಕ್ಕೆ ಕಾರಣ. ನೀಲಕಂಠ ಪಕ್ಷಿಯನ್ನು ಅದೃಷ್ಟದ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ವಿಜಯದಶಮಿಯಂದು ಈ ಪಕ್ಷಿಯ ದರ್ಶನವಾದರೆ ವ್ಯಕ್ತಿಯ ಜೀವನದಲ್ಲಿ ಸಕಾರಾತ್ಮಕತೆ ಹೆಚ್ಚುತ್ತದೆ ಮತ್ತು ಸುಖ-ಸಮೃದ್ಧಿಯ ಹಾದಿಗಳು ತೆರೆದುಕೊಳ್ಳುತ್ತವೆ ಎಂಬ ನಂಬಿಕೆಯಿದೆ.

ರಾವಣನ ಸಂಹಾರದ ಬಳಿಕ ಶಿವನ ಆರಾಧನೆ ಮಾಡಿದ್ದ ಶ್ರೀರಾಮ!

ಪೌರಾಣಿಕ ಕಥೆಯ ಪ್ರಕಾರ, ರಾವಣನು ಮಹಾನ್ ಪಂಡಿತನಾಗಿದ್ದಷ್ಟೇ ಅಲ್ಲದೆ, ಶಿವನ ಪರಮ ಭಕ್ತನೂ ಆಗಿದ್ದನು. ಲಂಕಾ ಯುದ್ಧದಲ್ಲಿ ರಾವಣನನ್ನು ಸಂಹರಿಸಿದ ಬಳಿಕ, ಬ್ರಹ್ಮಹತ್ಯೆಯ ಪಾಪದಿಂದ ಮುಕ್ತಿ ಪಡೆಯಲು ಶ್ರೀರಾಮನು ಶಿವನ ಆರಾಧನೆ ಮಾಡಿದನು ಎನ್ನಲಾಗುತ್ತದೆ. ಧಾರ್ಮಿಕ ಸಂಪ್ರದಾಯಕ್ಕೆ ಸಂಬಂಧಿಸಿದ ಒಂದು ನಂಬಿಕೆಯ ಪ್ರಕಾರ, ಶಿವನು ನೀಲಕಂಠ ಪಕ್ಷಿಯ ರೂಪದಲ್ಲಿ ಕಾಣಿಸಿಕೊಂಡು ಶ್ರೀರಾಮನಿಗೆ ಆಶೀರ್ವಾದ ನೀಡಿದನು ಎನ್ನಲಾಗುತ್ತದೆ. ಈ ಕಥೆಯ ಆಧಾರದ ಮೇಲೆ ವಿಜಯದಶಮಿಯಂದು ನೀಲಕಂಠ ಪಕ್ಷಿಯ ದರ್ಶನ ಪಡೆಯುವುದು ಶುಭವೆಂದು ಪರಿಗಣಿಸಲಾಗುತ್ತದೆ.

ಮನೆಯಲ್ಲಿ ಸುಖ-ಶಾಂತಿ ನೆಲೆಸುತ್ತದೆ

ವಿಜಯದಶಮಿಯಂದು ನೀಲಕಂಠ ಪಕ್ಷಿಯು ಮನೆಯ ಮೇಲ್ಛಾವಣಿ, ಅಂಗಳ ಅಥವಾ ಮನೆಯ ಸುತ್ತಮುತ್ತ ಕಾಣಿಸಿಕೊಂಡರೆ ಅದನ್ನು ಶುಭ ಸೂಚನೆ ಎನ್ನಲಾಗುತ್ತದೆ. ಇದರಿಂದ ಕುಟುಂಬದಲ್ಲಿ ಸುಖ-ಶಾಂತಿ ಮತ್ತು ಸಮೃದ್ಧಿ ನೆಲೆಸುತ್ತದೆ. ಇದರ ಜೊತೆಗೆ ಜೀವನದಲ್ಲಿನ ಸಮಸ್ಯೆಗಳು ಕಡಿಮೆಯಾಗಲಿ ಮತ್ತು ಕೈಗೆತ್ತಿಕೊಂಡ ಕೆಲಸಗಳಲ್ಲಿ ಯಶಸ್ಸು ದೊರೆಯಲಿ ಎಂದು ಜನರು ಆಶಿಸುತ್ತಾರೆ.

ನವರಾತ್ರಿಯಲ್ಲಿ ಹುಟ್ಟಿದ ಕಂದಮ್ಮನಿಗೆ 30 ದೈವಿಕ ಹೆಸರು ಅರ್ಥ ಸಹಿತ; ದೇವಿ ಕೃಪೆಗೆ ಪಾತ್ರರಾಗುವ ಸುಂದರ ನಾಮಗಳು

Suchethana D — Tue, 20 Oct 2026 20:07:52 +0530

ನವರಾತ್ರಿಯ ಸಂಭ್ರಮ ಇನ್ನೇನು ಕೆಲವೇ ಕ್ಷಣಗಳಲ್ಲಿ ಮುಗಿಯಲಿದೆ. ನವರಾತ್ರಿಯ 9 ದಿನಗಳು ದುರ್ಗಾ ದೇವಿಯ ಆರಾಧನೆ ಮತ್ತು ಕನ್ಯಾ ಪೂಜೆಗೆ ಬಹಳ ವಿಶೇಷವೆಂದು ಪರಿಗಣಿಸಲಾಗಿದೆ. ನವಮಿಯಂದು ಮಗಳು ಜನಿಸಿದರೆ, ಅವಳಿಗೆ ಸುಂದರವಾದ ಮತ್ತು ಅರ್ಥಪೂರ್ಣವಾದ ಹೆಸರನ್ನು ಆಯ್ಕೆ ಮಾಡಲು ಇದು ಸೂಕ್ತ ಸಮಯ. ಶಕ್ತಿ, ಸಮೃದ್ಧಿ, ಧೈರ್ಯ ಮತ್ತು ಸಂತೋಷಕ್ಕೆ ಸಂಬಂಧಿಸಿದ ದುರ್ಗಾ ದೇವಿಯ ವಿವಿಧ ರೂಪಗಳ ನಂತರ ನೀವು ನಿಮ್ಮ ಮಗಳಿಗೆ ಹೆಸರಿಸಬಹುದು.

ಸಾಮಾನ್ಯವಾಗಿ ನಕ್ಷತ್ರಗಳನ್ನು ನೋಡಿ ಮಕ್ಕಳಿಗೆ ಹೆಸರು ಇಡುವುದು ಹಿಂದೂ ಸಂಪ್ರದಾಯದಲ್ಲಿ ರೂಢಿ. ಈ ನವರಾತ್ರಿಯಂತೆ ಜನಿಸಿದ ಮಗಳಿಗೆ 30 ಸುಂದರ ಹೆಸರುಗಳು ಮತ್ತು ಅವುಗಳ ಅರ್ಥಗಳು ಇಲ್ಲಿವೆ. ಸಾಮಾನ್ಯವಾಗಿ ಇಂದು ಮಕ್ಕಳಿಗೆ ಏನೇನೋ ಹೆಸರು ಇಡುತ್ತಾರೆ. ಕರೆಯಲು ಬರುವುದಕ್ಕೆ ಕಷ್ಟವಾಗುವಂಥ, ಅರ್ಥವೇ ಇಲ್ಲದಂಥ, ಡಿಕ್ಷನರಿಯಲ್ಲಿ ಅರ್ಥ ಹುಡುಕಿದರೆ ಅದು ಕೆಟ್ಟದ್ದನ್ನು ಸೂಚಿಸುವಂಥ ಹೆಸರುಗಳನ್ನೇ ಇಡುವುದು ಇದೆ. ಆದರೆ ದೇವಿಯ ಅನುಗ್ರಹಕ್ಕೆ ಪಾತ್ರರಾಗುವಂಥ ಹೆಸರು ಹುಡುಕುತ್ತಿದ್ದರೆ, ಅಂಥವರಿಗೆ ಇಲ್ಲಿವೆ 30 ಹೆಸರುಗಳು, ಅದೂ ಅರ್ಥ ಸಹಿತವಾಗಿ. ನವಮಿಯಂದು ಜನಿಸಿದ ಮಗಳಿಗೆ ಹೆಸರನ್ನು ಆಯ್ಕೆಮಾಡುವಾಗ, ಕುಟುಂಬ ಸಂಪ್ರದಾಯ, ಹೆಸರಿನ ಅರ್ಥ ಮತ್ತು ಅದರ ಉಚ್ಚಾರಣೆಯನ್ನು ಪರಿಗಣಿಸಿ. ಆ ಹೆಸರು ದೈವಿಕ ಶಕ್ತಿ ಮತ್ತು ಸಕಾರಾತ್ಮಕ ಗುಣಗಳೊಂದಿಗೆ ಸಂಬಂಧ ಹೊಂದಿದ್ದರೆ, ಅದು ನಿಮ್ಮ ಮಗಳಿಗೆ ಇನ್ನಷ್ಟು ವಿಶೇಷವಾಗಿರುತ್ತದೆ.

ಮಹಾನವಮಿಯಂದು ಜನಿಸಿದ ಮಗಳಿಗೆ 30 ಹೆಸರುಗಳು

ಆದ್ಯ — ಮೊದಲ ಶಕ್ತಿಯಾದ ದುರ್ಗಾ ದೇವಿಯ ಹೆಸರು.

ಅದಿತಿ — ಮಿತಿಯಿಲ್ಲದ ಮತ್ತು ಸ್ವತಂತ್ರ.

ಆರಾಧ್ಯ — ಪೂಜಿಸಲ್ಪಡುವವಳು.

ಅನ್ಯಾ — ಸುಂದರ ಮತ್ತು ದಯೆ.

ಇಶಾನಿ — ಪಾರ್ವತಿ ಮತ್ತು ದುರ್ಗಾ ದೇವಿಯ ಹೆಸರು.

ಇಶಿತಾ — ಶ್ರೇಷ್ಠತೆ ಮತ್ತು ಶಕ್ತಿಯನ್ನು ಹೊಂದಿರುವವಳು.

ಉಮಾ — ಪಾರ್ವತಿ ದೇವಿಯ ಹೆಸರು.

ಕಾತ್ಯಾಯನಿ — ದುರ್ಗಾ ದೇವಿಯ ಒಂದು ರೂಪ.

ನವರಾತ್ರಿಯ ಸಮಯದಲ್ಲಿ ಜನಿಸಿದ ಹೆಣ್ಣುಮಕ್ಕಳ ಹೆಸರುಗಳು

ಕಾನಿಕಾ — ಚಿಕ್ಕ ಮತ್ತು ಸಿಹಿ.

ಕಾವ್ಯ — ಕಾವ್ಯದಂತೆ ಸುಂದರ ಮತ್ತು ಭಾವಪೂರ್ಣ.

ಚಾರ್ವಿ — ಸುಂದರ ಮತ್ತು ಆಕರ್ಷಕ.

ದಿವ್ಯ — ದೈವಿಕ ಮತ್ತು ಅಲೌಕಿಕ.

ದೇವಿಕಾ — ಪುಟ್ಟ ದೇವತೆ.

ನಂದಿನಿ — ಸಂತೋಷವನ್ನು ತರುವವಳು ಮತ್ತು ದುರ್ಗಾ ದೇವಿಯ ಹೆಸರು.

ನವ್ಯ — ಹೊಸ, ಯುವ ಮತ್ತು ಪ್ರಶಂಸನೀಯ.

ಪಾರ್ವತಿ — ಪರ್ವತರಾಜ ಮತ್ತು ಶಕ್ತಿ ದೇವತೆಯ ಮಗಳು.

ಅಪರೂಪದ ಹೆಣ್ಣು ಮಕ್ಕಳ ಹೆಸರುಗಳು

ಪ್ರಿಷಾ — ದೇವರ ಕೊಡುಗೆ.

ರಿದ್ಧಿ — ಸಮೃದ್ಧಿ ಮತ್ತು ಯಶಸ್ಸು.

ರುದ್ರಾಣಿ — ಶಿವ ಮತ್ತು ಶಕ್ತಿ ದೇವತೆಯ ಪತ್ನಿ.

ಶ್ರಿಯ — ಲಕ್ಷ್ಮಿ, ಸಮೃದ್ಧಿ ಮತ್ತು ಸೌಂದರ್ಯ.

ಸಿಯಾ — ತಾಯಿ ಸೀತೆಯ ಹೆಸರು.

ಸಿದ್ಧಿ — ಯಶಸ್ಸು ಮತ್ತು ಸಾಧನೆ.

ಸೌಮ್ಯ — ಶಾಂತ ಮತ್ತು ಸೌಮ್ಯ.

ತ್ರಿಶಾ — ಆಸೆ ಮತ್ತು ಆಕಾಂಕ್ಷೆ.

ಧೃತಿ — ತಾಳ್ಮೆ ಮತ್ತು ಧೈರ್ಯ.

ವೈಷ್ಣವಿ — ವಿಷ್ಣುವಿನ ಶಕ್ತಿ.

ಶಾಂಭವಿ — ಪಾರ್ವತಿ ದೇವಿಯ ಹೆಸರು.

ಶರ್ವಾಣಿ — ದುರ್ಗಾ ದೇವಿಯ ಹೆಸರು.

ಹರ್ಷಿತಾ — ಯಾವಾಗಲೂ ಸಂತೋಷವಾಗಿರುತ್ತಾಳೆ.

ಯಶಸ್ವಿ — ಖ್ಯಾತಿ ಮತ್ತು ವೈಭವವನ್ನು ಸಾಧಿಸುವವಳು.

ವರ್ಷದ 2 ನವರಾತ್ರಿಗಳಲ್ಲಿ ಪ್ರಧಾನಿಯ 18 ದಿನಗಳ ಉಪವಾಸ! 47 ವರ್ಷಗಳ ಮೋದಿಯ ರೋಚಕ ಪಯಣ

Suchethana D — Tue, 20 Oct 2026 17:52:44 +0530

ದೆಹಲಿ: ದಿನದಲ್ಲಿ ಕೇವಲ 4 ಗಂಟೆ ಮಾತ್ರ ವಿಶ್ರಮಿಸಿ, ದಿನಪೂರ್ತಿ ದುಡಿಯುವ, ಹತ್ತಾರು ಮೀಟಿಂಗ್ಗಳಲ್ಲಿ ಭಾಗವಹಿಸುವ, ವಿದೇಶಗಳಿಗೆ ಪ್ರಯಾಣಿಸುತ್ತಾ, ದೇಶದ ಅರ್ಥವ್ಯವಸ್ಥೆಯನ್ನು ಮೇಲಕ್ಕೆ ತರುತ್ತಾ, ಹೊರಗಿನ ಶತ್ರುಗಳ ದಮನದ ಬಗ್ಗೆ ಯೋಚಿಸುತ್ತಲೇ ದೇಶದ ಒಳಗಿರುವ ಶತ್ರುಗಳ ಬಗ್ಗೆಯೂ ಚರ್ಚಿಸುತ್ತಾ, ಲಕ್ಷ ಲಕ್ಷ ಕೋಟಿ ಹೂಡಿಕೆ ಮಾಡಲು ವಿದೇಶದ ಗಣ್ಯರು ಭಾರತಕ್ಕೆ ಆಗಮಿಸಿದಾಗ ಅವರ ಜೊತೆ ಚರ್ಚಿಸುವ ವಿಷಯಗಳನ್ನು ಪಟ್ಟಿ ಮಾಡುತ್ತಾ... ಅಬ್ಬಬ್ಬಾ ಎನ್ನಿಸುವಷ್ಟು ಕೆಲಸ ಮಾಡುವುದು ಪ್ರಧಾನಿ ನರೇಂದ್ರ ಮೋದಿ ಅವರು. ಇದೇ ಕಾರಣಕ್ಕೆ ಕೇವಲ 12 ವರ್ಷಗಳಲ್ಲಿ ದೇಶದ ಅರ್ಥವ್ಯವಸ್ಥೆ ಘಟಾನುಘಟಿ ದೇಶಗಳನ್ನು ಮೀರಿ 11ನೇ ಸ್ಥಾನದಿಂದ ನಾಲ್ಕನೇ ಸ್ಥಾನಕ್ಕೆ ಏರಿದೆ. ಪಾಶ್ಚಿಮಾತ್ಯ ರಾಷ್ಟ್ರಗಳಲ್ಲಿ ಇಷ್ಟೆಲ್ಲಾ ಹಿಂಸಾಚಾರ ನಡೆಯುತ್ತಿದ್ದರೂ, ಭಾರತದಲ್ಲಿಯೂ ಅದೇ ರೀತಿಯ ಹಿಂಸಾಚಾರಕ್ಕೆ ದೊಡ್ಡ ಮಟ್ಟದಲ್ಲಿ ಷಡ್ಯಂತ್ರ ನಡೆಯುತ್ತಿದ್ದರೂ ಅದನ್ನು ನಿಭಾಯಿಸುವ ಕೆಲಸವನ್ನೂ ಹೆಚ್ಚುವರಿಯಾಗಿ ಮಾಡುವ ಪ್ರಧಾನಿ ನರೇಂದ್ರ ಮೋದಿ ಅವರು, ನವರಾತ್ರಿಯ ಸಂದರ್ಭದಲ್ಲಿ ಮಾಡುವ ಉಪವಾಸದ ಬಗ್ಗೆ ಮಾತ್ರ ಬಹುತೇಕ ಮಂದಿಗೆ ತಿಳಿದಿರಲಿಕ್ಕಿಲ್ಲ!

ನವರಾತ್ರಿಯ ಸಂದರ್ಭದಲ್ಲಿ ಅನೇಕ ಮಂದಿ ಉಪವಾಸ ಮಾಡುವುದು ಇದೆ. ಆದರೆ ಮೇಲೆ ಹೇಳಿದ ಎಲ್ಲಾ ಕೆಲಸಗಳನ್ನೂ ಮಾಡುತ್ತಾ, ಕೇವಲ ಲಿಂಬು ನೀರನ್ನು ಕುಡಿದು ಅಷ್ಟು ಶಕ್ತಿಯನ್ನು ಎಲ್ಲಿಂದ ತರುತ್ತಾರೆ ಎನ್ನುವುದು ಮಾತ್ರ ಅವರನ್ನು ಹತ್ತಿರದಿಂದ ಬಲ್ಲವರಿಗೆ ಪ್ರಶ್ನೆಯಾಗಿಯೇ ಉಳಿದಿದೆ. ಹಾಗೆಂದು ಇದೇನು ಅವರು ಪ್ರಧಾನಿಯಾದಾಗಿನಿಂದ ಮಾಡುತ್ತಿರುವ ಉಪವಾಸವಲ್ಲ. ಬದಲಿಗೆ ನಾಲ್ಕೂವರೆ ದಶಕಗಳಿಂದ ಕಟ್ಟುನಿಟ್ಟಿನ ಉಪವಾಸವನ್ನು ಆಚರಿಸುತ್ತಲೇ ಬಂದವರು.

ಎರಡು ನವರಾತ್ರಿಗಳಲ್ಲಿನ ಉಪವಾಸ!

ಪ್ರಧಾನಿ ನರೇಂದ್ರ ಮೋದಿ ನಾಲ್ಕು ದಶಕಗಳಿಗೂ ಹೆಚ್ಚು ಕಾಲ ಚೈತ್ರ ಮತ್ತು ಶರದಿಯಾ ನವರಾತ್ರಿಯಂದು ಒಂಬತ್ತು ದಿನಗಳ ಉಪವಾಸವನ್ನು ಆಚರಿಸುತ್ತಾರೆ. ಸುಮಾರು 47 ವರ್ಷಗಳಿಂದ ಈ ಪದ್ಧತಿಯನ್ನು ಮುಂದುವರೆಸಿದ್ದಾರೆ. ಉಪವಾಸದ ಸಮಯದಲ್ಲಿ ಅವರ ಶಿಸ್ತಿನ ದಿನಚರಿ ಮತ್ತು ಶಕ್ತಿಯು ಸಾರ್ವಜನಿಕರ ಗಮನ ಸೆಳೆಯುತ್ತದೆ, ಧಾರ್ಮಿಕ ಆಚರಣೆಯ ಸಮಯದಲ್ಲಿ ಅವರು ಏನು ಸೇವಿಸುತ್ತಾರೆ ಎಂಬ ಮಾಹಿತಿ ಇಲ್ಲಿದೆ.

ಎರಡು ರೀತಿಯ ಉಪವಾಸ

ಅಮೆರಿಕನ್ ಪಾಡ್‌ಕ್ಯಾಸ್ಟರ್ ಲೆಕ್ಸ್ ಫ್ರಿಡ್‌ಮನ್ ಅವರೊಂದಿಗಿನ ಸಂದರ್ಶನದಲ್ಲಿ, ಪ್ರಧಾನಿ ಮೋದಿ ಅವರೇ ಖುದ್ದು ಈ ವಿಷಯವನ್ನು ಬಹಿರಂಗಪಡಿಸಿದ್ದರು. ತಾವು ನಿಂಬೆ ಹಣ್ಣಿನ ನೀರನ್ನು ಮಾತ್ರ ಸೇವಿಸುವುದಾಗಿ ಹೇಳಿದ್ದಾರೆ. ಎರಡು ನವರಾತ್ರಿ ಅವಧಿಗಳಲ್ಲಿ ಪ್ರಧಾನಿಯವರು ವಿಭಿನ್ನ ಆಹಾರ ನಿಯಮಗಳನ್ನು ಅನುಸರಿಸುತ್ತಾರೆ. ಶರತ್ಕಾಲದಲ್ಲಿ ಆಚರಿಸಲಾಗುವ ಶರದಿಯಾ ನವರಾತ್ರಿಯಂದು, ಪ್ರಧಾನಿ ಮೋದಿ ಎಲ್ಲಾ ಒಂಬತ್ತು ದಿನಗಳವರೆಗೆ ಆಹಾರದಿಂದ ದೂರವಿರುತ್ತಾರೆ ಮತ್ತು ಬೆಚ್ಚಗಿನ ನಿಂಬೆ ನೀರನ್ನು ಮಾತ್ರ ಸೇವಿಸುತ್ತಾರೆ. ವಸಂತಕಾಲದಲ್ಲಿ ಆಚರಿಸಲಾಗುವ ಚೈತ್ರ ನವರಾತ್ರಿಯಂದು, ಅವರು ವಿಭಿನ್ನ ದಿನಚರಿಯನ್ನು ಅನುಸರಿಸುತ್ತಾರೆ, ಒಂಬತ್ತು ದಿನಗಳಲ್ಲಿ ದಿನಕ್ಕೆ ಒಮ್ಮೆ ಒಂದು ರೀತಿಯ ಹಣ್ಣನ್ನು ಮಾತ್ರ ಸೇವಿಸುತ್ತಾರೆ. ಉದಾಹರಣೆಗೆ, ಪ್ರಧಾನಿ ಪಪ್ಪಾಯಿಯೊಂದಿಗೆ ಪ್ರಾರಂಭಿಸಿದರೆ, ಅವರು ಸಂಪೂರ್ಣ ಉಪವಾಸದ ಅವಧಿಗೆ ಪಪ್ಪಾಯಿಯನ್ನು ಮಾತ್ರ ತಿನ್ನುವುದನ್ನು ಮುಂದುವರಿಸುತ್ತಾರೆ. 76 ನೇ ವಯಸ್ಸಿನಲ್ಲಿ, ಪ್ರಧಾನಿ ಮೋದಿ ತಮ್ಮ ನಿಯಮಿತ ವೇಳಾಪಟ್ಟಿಯಲ್ಲಿ ಅಧಿಕೃತ ನಿಶ್ಚಿತಾರ್ಥಗಳು, ಅಂತರರಾಷ್ಟ್ರೀಯ ಭೇಟಿಗಳು, ರ್ಯಾಲಿಗಳು ಮತ್ತು ದೀರ್ಘ ಸಭೆಗಳಿಗೆ ಹಾಜರಾಗುವುದನ್ನು ಮುಂದುವರಿಸುತ್ತಾರೆ.