Asianet Suvarna News

ಹುಬ್ಬಳ್ಳಿ ಸೇರಿದಂತೆ ದೇಶದ 11 ಏರ್‌ಪೋರ್ಟ್‌ ಮುಂದಿನ 50 ವರ್ಷ ಖಾಸಗಿ ತೆಕ್ಕೆಗೆ, ಡಿಸೆಂಬರ್‌ನಲ್ಲಿ ಬಿಡ್ಡಿಂಗ್‌ ಕರೆಯಲು ನಿರ್ಧರಿಸಿದ ಕೇಂದ್ರ ಸರ್ಕಾರ!

Santosh Naik — Sat, 24 Oct 2026 18:54:14 +0530

ನವದೆಹಲಿ (ಅ.24): ಭಾರತದ ವಿಮಾನ ನಿಲ್ದಾಣಗಳ ಖಾಸಗೀಕರಣ ಪ್ರಕ್ರಿಯೆಯು ಇದೀಗ ಭಾರಿ ವೇಗ ಪಡೆದುಕೊಂಡಿದೆ. ಸಾರ್ವಜನಿಕ-ಖಾಸಗಿ ಸಹಭಾಗಿತ್ವ (PPP) ಮಾದರಿಯಡಿಯಲ್ಲಿ ದೇಶದ ವಿವಿಧ ಭಾಗಗಳಲ್ಲಿರುವ ಕರ್ನಾಟಕದ ಹುಬ್ಬಳ್ಳಿಯೂ ಸೇರಿದಂತೆ 11 ವಿಮಾನ ನಿಲ್ದಾಣಗಳನ್ನು 5 ಪ್ಯಾಕೇಜ್‌ಗಳಾಗಿ (Bundles) ವಿಂಗಡಿಸಿ, 50 ವರ್ಷಗಳ ದೀರ್ಘಾವಧಿ ಗುತ್ತಿಗೆ (Concession) ಆಧಾರದ ಮೇಲೆ ಖಾಸಗೀಕರಣಗೊಳಿಸಲು ಕೇಂದ್ರ ಸರ್ಕಾರ ಅನುಮೋದನೆ ಪಡೆದುಕೊಂಡಿದೆ ಎಂದು ಅಕ್ಟೋಬರ್ 20 ರ ವರದಿಗಳು ದೃಢಪಡಿಸಿವೆ.

ಈ ಬೃಹತ್ ಯೋಜನೆಯಡಿ ಸುಮಾರು ₹8,622 ಕೋಟಿ ಖಾಸಗಿ ಹೂಡಿಕೆಯನ್ನು ಆಕರ್ಷಿಸುವ ನಿರೀಕ್ಷೆಯಿದ್ದು, ಮುಂಚೂಣಿಯಲ್ಲಿರುವ ಅದಾನಿ ಎಂಟರ್‌ಪ್ರೈಸಸ್ (Adani Airport Holdings) ಹಾಗೂ ಜಿಎಂಆರ್ ಏರ್‌ಪೋರ್ಟ್ಸ್ (GMR Airports) ಸಂಸ್ಥೆಗಳಿಗೆ ಹೊಸ ವಿಸ್ತರಣೆಯ ಬೃಹತ್ ಅವಕಾಶಗಳು ತೆರೆದುಕೊಂಡಿವೆ. ಮುಂದಿನ ಹಂತದಲ್ಲಿ ಚೆನ್ನೈ ಮತ್ತು ಕೋಲ್ಕತ್ತಾ ವಿಮಾನ ನಿಲ್ದಾಣಗಳನ್ನೂ ಸಹ ಖಾಸಗೀಕರಣಕ್ಕೆ ಒಳಪಡಿಸುವ ಸಾಧ್ಯತೆಯಿದೆ.

ಪ್ರಸ್ತಾವಿತ 5 ಪ್ಯಾಕೇಜ್‌ಗಳು ಮತ್ತು 11 ವಿಮಾನ ನಿಲ್ದಾಣಗಳ ವಿವರ

ಖಾಸಗೀಕರಣದ ಈ ಮಾದರಿಯಲ್ಲಿ ಕೇವಲ ದೊಡ್ಡ ವಿಮಾನ ನಿಲ್ದಾಣಗಳನ್ನಷ್ಟೇ ನೀಡದೆ, ಪ್ರಮುಖ ವಿಮಾನ ನಿಲ್ದಾಣದ ಜೊತೆಗೆ ಸಣ್ಣ ಪ್ರಾದೇಶಿಕ ವಿಮಾನ ನಿಲ್ದಾಣಗಳನ್ನು ಜೋಡಿಸಿ 'ಬಂಡಲ್' ಮಾಡಲಾಗಿದೆ. ಹೆಚ್ಚು ಲಾಭ ತರುವ ವಿಮಾನ ನಿಲ್ದಾಣಗಳ ಆದಾಯವನ್ನು ಬಳಸಿಕೊಂಡು ಸಣ್ಣ ವಿಮಾನ ನಿಲ್ದಾಣಗಳನ್ನು ಅಭಿವೃದ್ಧಿಪಡಿಸುವುದು ಸರ್ಕಾರದ ಮುಖ್ಯ ಉದ್ದೇಶವಾಗಿದೆ. ಸಾರ್ವಜನಿಕ ಖಾಸಗಿ ಸಹಭಾಗಿತ್ವ ಮೌಲ್ಯಮಾಪನ ಸಮಿತಿ (PPPAC) ಯಿಂದ ತತ್ವಶಾಸ್ತ್ರೀಯ ಒಪ್ಪಿಗೆ ಪಡೆದಿರುವ ಪ್ರಸ್ತಾವಿತ 5 ಪ್ಯಾಕೇಜ್‌ಗಳು ಹೀಗಿವೆ.

ಅಮೃತಸರ ಮತ್ತು ಕಾಂಗ್ರಾ-ಗಗ್ಗಲ್
ವಾರಣಾಸಿ, ಗಯಾ ಮತ್ತು ಕುಶಿನಗರ
ಭುವನೇಶ್ವರ ಮತ್ತು ಹುಬ್ಬಳಿ
ರಾಯ್‌ಪುರ ಮತ್ತು ಔರಂಗಾಬಾದ್
ತಿರುಚಿರಾಪಳ್ಳಿ ಮತ್ತು ತಿರುಪತಿ

ಏಕಸ್ವಾಮ್ಯ ತಡೆಗೆ ಸರ್ಕಾರದಿಂದ 'ಕ್ಯಾಪ್' ನಿಗದಿ

ಈ ಬಾರಿಯ ಹರಾಜು ಪ್ರಕ್ರಿಯೆಯಲ್ಲಿ ಯಾವುದೇ ಒಂದು ನಿರ್ದಿಷ್ಟ ಸಂಸ್ಥೆ ಅಥವಾ ಬಿಡ್‌ದಾರರು ಹೆಚ್ಚಿನ ಸಂಖ್ಯೆಯ ಪ್ಯಾಕೇಜ್‌ಗಳನ್ನು ಪಡೆದುಕೊಂಡು ಕ್ಷೇತ್ರದಲ್ಲಿ ಏಕಸ್ವಾಮ್ಯ ಸಾಧಿಸುವುದನ್ನು (Excessive Concentration) ತಡೆಯಲು ಕೇಂದ್ರ ನಾಗರಿಕ ವಿಮಾನಯಾನ ಸಚಿವಾಲಯ ನಿಯಮ ರೂಪಿಸುತ್ತಿದೆ.

ಒಬ್ಬ ಬಿಡ್‌ದಾರ ಗರಿಷ್ಠ ಎಷ್ಟು ಪ್ಯಾಕೇಜ್‌ಗಳನ್ನು ಗೆಲ್ಲಬಹುದು ಎನ್ನುವ ಮಿತಿಯನ್ನು (Cap) ಶೀಘ್ರದಲ್ಲೇ ಅಂತಿಮಗೊಳಿಸಲಾಗುವುದು. ವಿಮಾನ ನಿಲ್ದಾಣ ನಿರ್ವಾಹಕರು ವಿಪರೀತ ಸಾಲ ಮಾಡುವುದರಿಂದ ಉಂಟಾಗುವ ಆರ್ಥಿಕ ಅಪಾಯಗಳ ಕುರಿತು ಹಣಕಾಸು ಸಚಿವಾಲಯ ಕಳವಳ ವ್ಯಕ್ತಪಡಿಸಿದ ಹಿನ್ನೆಲೆಯಲ್ಲಿ ಈ ಮಿತಿ ಹೇರಲು ನಿರ್ಧರಿಸಲಾಗಿದೆ.

ಬಿಡ್ಡಿಂಗ್ ಪ್ರಕ್ರಿಯೆ ಮತ್ತು ಜಾಗತಿಕ ಹೂಡಿಕೆದಾರರ ಸೆಳೆತ

ಭಾರತೀಯ ವಿಮಾನ ನಿಲ್ದಾಣಗಳ ಪ್ರಾಧಿಕಾರವು (AAI) 2026 ರ ಡಿಸೆಂಬರ್ ವೇಳೆಗೆ ಜಾಗತಿಕ ಬಿಡ್‌ಗಳನ್ನು ಆಹ್ವಾನಿಸಲು ಸಿದ್ಧತೆ ನಡೆಸುತ್ತಿದ್ದು, 2026-27 ರ ಹಣಕಾಸು ವರ್ಷದ ಅಂತ್ಯದ ವೇಳೆಗೆ ಪ್ರಕ್ರಿಯೆಯನ್ನು ಪೂರ್ಣಗೊಳಿಸುವ ಗುರಿ ಹೊಂದಿದೆ. ಜಾಗತಿಕ ಹೂಡಿಕೆದಾರರು, ಸ್ವತಂತ್ರ ವೆಲ್ತ್ ಫಂಡ್‌ಗಳು ಹಾಗೂ ಬೃಹತ್ ಕಾರ್ಪೊರೇಟ್ ಸಂಸ್ಥೆಗಳನ್ನು ಆಕರ್ಷಿಸಲು ದುಬೈ ಮತ್ತು ಸಿಂಗಾಪುರ ಸೇರಿದಂತೆ ಪ್ರಮುಖ ಅಂತರರಾಷ್ಟ್ರೀಯ ಹಣಕಾಸು ಕೇಂದ್ರಗಳಲ್ಲಿ 'ರೋಡ್‌ಶೋ'ಗಳನ್ನು ನಡೆಸಲು ಯೋಜಿಸಲಾಗಿದೆ.

ಕೇವಲ ಹಾಲಿ ವಿಮಾನ ನಿಲ್ದಾಣ ನಿರ್ವಾಹಕರಷ್ಟೇ ಅಲ್ಲದೆ, ಇತರ ಮೂಲಸೌಕರ್ಯ ವಲಯಗಳಲ್ಲಿ (Infrastructure Sectors) ಅನುಭವ ಹೊಂದಿರುವ ಸಂಸ್ಥೆಗಳೂ ಸಹ ಹರಾಜಿನಲ್ಲಿ ಭಾಗವಹಿಸಲು ಅವಕಾಶ ನೀಡುವಂತೆ ಅರ್ಹತಾ ಮಾನದಂಡಗಳನ್ನು ಸಡಿಲಗೊಳಿಸಲಾಗುತ್ತಿದೆ.

ಪ್ರಸ್ತಾವಿತ ಒಪ್ಪಂದದಂತೆ, ಖಾಸಗಿ ಸಂಸ್ಥೆಗಳು ವಿಮಾನ ನಿಲ್ದಾಣದ ಕಾರ್ಯಾಚರಣೆ, ನಿರ್ವಹಣೆ, ಹೊಸ ಟರ್ಮಿನಲ್ ನಿರ್ಮಾಣ ಹಾಗೂ ಸಿಟಿ-ಸೈಡ್ ಮೂಲಸೌಕರ್ಯಗಳ ವಿಸ್ತರಣೆಯ ಹೊಣೆ ಹೊರಲಿವೆ. ಆದರೆ, ಏರ್ ಟ್ರಾಫಿಕ್ ಕಂಟ್ರೋಲ್ (ATC) ಹಾಗೂ ಕಮ್ಯುನಿಕೇಷನ್ ಸೇವೆಗಳನ್ನು AAI ವಹಿಸಿಕೊಂಡರೆ, ಕಾರ್ಗೋ ಕಾರ್ಯಾಚರಣೆಯನ್ನು 'AAI ಕಾರ್ಗೋ ಲಾಜಿಸ್ಟಿಕ್ಸ್ ಆಂಡ್ ಅಲೈಡ್ ಸರ್ವಿಸಸ್' ಸಂಸ್ಥೆಯೇ ಮುಂದುವರಿಸಲಿದೆ.

ಅದಾನಿ vs ಜಿಎಂಆರ್: ಯಾರಿಗೆ ಹೆಚ್ಚಿನ ಲಾಭ?:

ಈ ಹಿಂದೆ 2019 ರಲ್ಲಿ ನಡೆದ ಖಾಸಗೀಕರಣದ ಹರಾಜಿನಲ್ಲಿ ಅಹಮದಾಬಾದ್, ಜೈಪುರ, ಲಕ್ನೋ, ಮಂಗಳೂರು, ತಿರುವನಂತಪುರಂ ಹಾಗೂ ಗುವಾಹಟಿ ಸೇರಿದಂತೆ ಒಟ್ಟು 6 ವಿಮಾನ ನಿಲ್ದಾಣಗಳ 50 ವರ್ಷಗಳ ಗುತ್ತಿಗೆಯನ್ನು 'ಅದಾನಿ ಗ್ರೂಪ್' ಸಂಪೂರ್ಣವಾಗಿ ತನ್ನದಾಗಿಸಿಕೊಂಡಿತ್ತು.

ಪ್ರಸ್ತುತ ಮಾರುಕಟ್ಟೆಯಲ್ಲಿ ಜಿಎಂಆರ್ ಏರ್‌ಪೋರ್ಟ್ಸ್ (GMR Airports) ಪ್ರಯಾಣಿಕರ ದಟ್ಟಣೆ ನಿರ್ವಹಣೆ ಹಾಗೂ ಬಳಸಿದ ಬಂಡವಾಳದ ಮೇಲಿನ ಗಳಿಕೆಯಲ್ಲಿ (ROCE) ಮುಂಚೂಣಿಯಲ್ಲಿದೆ. ಹಾಗೂ ಅದಾನಿ ಎಂಟರ್‌ಪ್ರೈಸಸ್ (Adani Enterprises) ವೈವಿಧ್ಯಮಯ ಮೂಲಸೌಕರ್ಯ ಪೋರ್ಟ್‌ಫೋಲಿಯೋ ಹೊಂದಿದ್ದು, ಕ್ಷಿಪ್ರವಾಗಿ ತನ್ನ ಏರ್‌ಪೋರ್ಟ್ ಉದ್ಯಮವನ್ನು ವಿಸ್ತರಿಸುತ್ತಿದೆ.

ಈ ಬಾರಿ ಭಾರತೀಯ ವಿಮಾನ ನಿಲ್ದಾಣಗಳ ಪ್ರಾಧಿಕಾರಕ್ಕೆ (AAI) ಪಾವತಿಸಬೇಕಾದ 'ಪ್ರತಿ ಪ್ರಯಾಣಿಕರ ಶುಲ್ಕ' (Per-passenger fee) ಆಧಾರದ ಮೇಲೆ ಬಿಡ್ಡಿಂಗ್ ನಡೆಯಲಿದೆ. ಕೇವಲ ವಿಮಾನ ನಿಲ್ದಾಣಗಳನ್ನು ಗೆಲ್ಲುವುದು ಮಾತ್ರವಲ್ಲದೆ, ಹುಬ್ಬಳಿ, ಗಯಾ, ಕುಶಿನಗರದಂತಹ ಸಣ್ಣ ವಿಮಾನ ನಿಲ್ದಾಣಗಳಲ್ಲಿ ಪ್ರಯಾಣಿಕರ ಸಂಖ್ಯೆ ಹೆಚ್ಚಿಸಿ, ವಾಣಿಜ್ಯ ಆದಾಯ (Commercial Revenue) ಗಳಿಸುವ ಜೊತೆಗೆ ಸಂಸ್ಥೆಯ ಬ್ಯಾಲೆನ್ಸ್ ಶೀಟ್ ಮತ್ತು ಸಾಲದ ಸುಳಿಗೆ ಸಿಲುಕದಂತೆ ನಿರ್ವಹಿಸುವುದು ಸಂಸ್ಥೆಗಳಿಗೆ ದೊಡ್ಡ ಸವಾಲಾಗಲಿದೆ. ಒಟ್ಟಾರೆಯಾಗಿ, ಡಿಸೆಂಬರ್‌ನಲ್ಲಿ ಆರಂಭವಾಗಲಿರುವ ಈ ಜಾಗತಿಕ ಹರಾಜು ಪ್ರಕ್ರಿಯೆಯು ಭಾರತೀಯ ವಿಮಾನಯಾನ ರಂಗದಲ್ಲಿ ಮತ್ತೊಂದು ಹೊಸ ಸಂಚಲನಕ್ಕೆ ನಾಂದಿ ಹಾಡಲಿದೆ.

ಸ್ಕೂಟಿಯಲ್ಲಿ ಹೋಗುವಾಗ ಕುತ್ತಿಗೆಗೆ ಬಿಗಿದ ಗಾಳಿಪಟದ ಮಾಂಜಾ ದಾರ, ಮಹಿಳೆ ದಾರುಣ ಸಾವು

Santosh Naik — Thu, 22 Oct 2026 16:21:23 +0530

ಹುಬ್ಬಳ್ಳಿ (ಅ.22): ವಾಣಿಜ್ಯ ನಗರಿ ಹುಬ್ಬಳ್ಳಿಯಲ್ಲಿ ಗಾಳಿಪಟ ಹಾರಿಸಲು ಬಳಸುವ ಮಾರಕ 'ಮಾಂಜಾ ದಾರ'ಕ್ಕೆ ಮತ್ತೊಂದು ಬಲಿಯಾಗಿದೆ. ಸ್ಕೂಟಿಯಲ್ಲಿ ತೆರಳುತ್ತಿದ್ದ ಮಹಿಳೆಯೊಬ್ಬರ ಕುತ್ತಿಗೆಗೆ ಮಾಂಜಾ ದಾರ ಸಿಲುಕಿ, ಅತಿಯಾದ ರಕ್ತಸ್ರಾವದಿಂದ ದಾರುಣವಾಗಿ ಮೃತಪಟ್ಟ ಘಟನೆ ನಗರದ ಶಿವಶಂಕರ ಕಾಲೋನಿ ಬಳಿ ನಡೆದಿದೆ. ಹುಬ್ಬಳ್ಳಿಯ ಭರತ್ ನಗರದ ನಿವಾಸಿ, ಲ್ಯಾಬ್ ಟೆಕ್ನಿಷಿಯನ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ವಿದ್ಯಾ ಮಂಜುನಾಥ ಗೌಡರ (38) ಮೃತಪಟ್ಟ ದುರ್ದೈವಿ ಮಹಿಳೆಯಾಗಿದ್ದಾರೆ.

ಇಂದು ಮಧ್ಯಾಹ್ನ ಸುಮಾರು 1 ಗಂಟೆಯ ಸಮಯದಲ್ಲಿ ವಿದ್ಯಾ ಅವರು ತಮ್ಮ ಮನೆಯಿಂದ ಕೆಲಸ ಮಾಡುವ ಲ್ಯಾಬ್‌ಗೆ ಸ್ಕೂಟಿ ಮೇಲೆ ಹೊರಟಿದ್ದರು. ಹುಬ್ಬಳ್ಳಿ ನಗರದ ಶಿವಶಂಕರ ಕಾಲೋನಿ ಬಳಿ ಸಾಗುತ್ತಿದ್ದಾಗ, ಗಾಳಿಪಟ ಹಾರಿಸಲು ಬಳಸಲಾಗುವ ಹರಿತವಾದ ಮಾಂಜಾ ದಾರ ದಿಢೀರನೆ ಅವರ ಕುತ್ತಿಗೆಗೆ ಬಿಗಿಯಾಗಿ ಸಿಲುಕಿದೆ.

ದಾರ ಕುತ್ತಿಗೆಯನ್ನು ಸೀಳಿದ್ದರಿಂದ ತೀವ್ರ ನೋವಿನಿಂದ ವಿದ್ಯಾ ಅವರು ಸ್ಕೂಟಿಯಿಂದ ರಸ್ತೆಗೆ ಬಿದ್ದಿದ್ದಾರೆ. ತಕ್ಷಣವೇ ಅತಿಯಾದ ರಕ್ತಸ್ರಾವ ಉಂಟಾಗಿದ್ದು, ಸ್ಥಳೀಯರು ಹಾಗೂ ಹತ್ತಿರದಲ್ಲಿದ್ದವರು ಅವರನ್ನು ತಕ್ಷಣ ಆಸ್ಪತ್ರೆಗೆ ಕರೆದೊಯ್ಯಲು ಯತ್ನಿಸಿದ್ದಾರೆ. ಆದರೆ, ತೀವ್ರ ರಕ್ತಸ್ರಾವದಿಂದಾಗಿ ಆಸ್ಪತ್ರೆಗೆ ತಲುಪಿಸುವಷ್ಟರಲ್ಲೇ ವಿದ್ಯಾ ಅವರು ಕೊನೆಯುಸಿರೆಳೆದಿದ್ದಾರೆ. ಘಟನೆಗೆ ಸಂಬಂಧಿಸಿದಂತೆ ಹಳೆ ಹುಬ್ಬಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಆರಂಭಿಸಿದ್ದಾರೆ.

ಕಿಮ್ಸ್ ಶವಾಗಾರಕ್ಕೆ ಪೊಲೀಸ್ ಆಯುಕ್ತರ ಭೇಟಿ

ಘಟನೆಯ ವಿಷಯ ತಿಳಿಯುತ್ತಿದ್ದಂತೆ ಹುಬ್ಬಳ್ಳಿ-ಧಾರವಾಡ ಪೊಲೀಸ್ ಆಯುಕ್ತ ಭೂಷಣ್ ಜಿ. ಬೋರಸೆ ಅವರು ಹುಬ್ಬಳ್ಳಿಯ ಕಿಮ್ಸ್ (KIMS) ಆಸ್ಪತ್ರೆಯ ಶವಾಗಾರಕ್ಕೆ ಭೇಟಿ ನೀಡಿದರು. ಮೃತ ಮಹಿಳೆಯ ದೇಹವನ್ನು ಪರಿಶೀಲಿಸಿದ ಅವರು, ಕಣ್ಣೀರಿಡುತ್ತಿದ್ದ ಕುಟುಂಬಸ್ಥರಿಂದ ಘಟನೆಯ ವಿವರ ಪಡೆದು ಸಾಂತ್ವನ ಹೇಳಿದರು. ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ಪೊಲೀಸ್ ಆಯುಕ್ತ ಭೂಷಣ್ ಬೋರಸೆ, ಮಾಂಜಾ ದಾರ ಬಳಸುವವರ ಮತ್ತು ಮಾರಾಟ ಮಾಡುವವರ ವಿರುದ್ಧ ಅತ್ಯಂತ ಕಠಿಣ ಎಚ್ಚರಿಕೆ ನೀಡಿದ್ದಾರೆ.

"ಯಾರು ಈ ಅಪಾಯಕಾರಿ ಮಾಂಜಾ ದಾರವನ್ನು ಬಳಕೆ ಮಾಡುತ್ತಿದ್ದಾರೋ ಅವರನ್ನು ತಕ್ಷಣವೇ ಪತ್ತೆ ಹಚ್ಚಿ ಬಂಧಿಸುತ್ತೇವೆ. ಯಾವುದೇ ಕಾರಣಕ್ಕೂ ಸಾರ್ವಜನಿಕರು ಗಾಳಿಪಟ ಹಾರಿಸಲು ಮಾಂಜಾ ದಾರವನ್ನು ಬಳಸಬಾರದು. ಒಂದು ವೇಳೆ ಬಳಸಿದ್ದು ಕಂಡುಬಂದರೆ ಅವರ ವಿರುದ್ಧ ಕಠಿಣ ಕ್ರಿಮಿನಲ್ ಪ್ರಕರಣ ದಾಖಲಿಸಲಾಗುತ್ತದೆ. ಅಷ್ಟೇ ಅಲ್ಲದೆ, ಇಂತಹ ಅಪಾಯಕಾರಿ ದಾರಗಳನ್ನು ಕಾನೂನುಬಾಹಿರವಾಗಿ ಮಾರಾಟ ಮಾಡುವ ಅಂಗಡಿಯವರು ಹಾಗೂ ವ್ಯಕ್ತಿಗಳ ಮೇಲೆಯೂ ಕ್ರಿಮಿನಲ್ ಕೇಸ್ ದಾಖಲಿಸಿ ಜೈಲಿಗಟ್ಟಲಾಗುವುದು" ಎಂದು ಆಯುಕ್ತರು ಖಡಕ್ ಎಚ್ಚರಿಕೆ ನೀಡಿದ್ದಾರೆ.

ರಾಜ್ಯಕ್ಕೆ ಹಿಂಗಾರು ಪ್ರವೇಶ: ಕರಾವಳಿಯಲ್ಲಿ ಮೋಡ, ದಕ್ಷಿಣ ಒಳನಾಡಿನ ಜಿಲ್ಲೆಗಳಲ್ಲಿ ಅ.21ರ ವರೆಗೆ ಮಳೆ ಮುನ್ಸೂಚನೆ,

Gowthami K — Fri, 16 Oct 2026 10:16:15 +0530

ಬೆಂಗಳೂರು: ರಾಜ್ಯದಲ್ಲಿ ನೈರುತ್ಯ ಮುಂಗಾರು ರಾಜ್ಯದಿಂದ ಗುರುವಾರ ಅಧಿಕೃತವಾಗಿ ನಿರ್ಗಮನವಾಗಿದ್ದು, ಇದರ ಬೆನ್ನಲ್ಲೇ ದಕ್ಷಿಣ ಒಳನಾಡಿನ ವಿವಿಧೆಡೆ ಮಳೆಯೊಂದಿಗೆ ಹಿಂಗಾರು ಪ್ರವೇಶವಾಗಿದೆ. ಹಾಸನ, ಚಿಕ್ಕಮಗಳೂರು, ಕೊಡಗು ಸೇರಿ ರಾಜ್ಯದ ದಕ್ಷಿಣ ಒಳನಾಡಿನ ವಿವಿಧ ಜಿಲ್ಲೆಗಳಲ್ಲಿ ಅ.16ರಿಂದ 21ರವರೆಗೆ ಭಾರಿ ಮಳೆಯಾಗುವ ಮುನ್ಸೂಚನೆಯನ್ನು ಹವಾಮಾನ ಇಲಾಖೆ ನೀಡಿದೆ. 30 ರಿಂದ 40 ಕಿ.ಮೀ ವೇಗದಲ್ಲಿ ಗಾಳಿಯೊಂದಿಗೆ ಗುಡುಗು ಸಹಿತ ಚಿಕ್ಕಮಗಳೂರು, ಹಾಸನ, ಕೊಡಗು ಜಿಲ್ಲೆಗಳ ಭಾರಿ ಮಳೆಯಾಗುವ ಮುನ್ಸೂಚನೆಯಿದ್ದು, ಅ.16ರಂದು ಯೆಲ್ಲೋ ಅಲರ್ಟ್ ಘೋಷಿಸಲಾಗಿದೆ. ಉಳಿದಂತೆ ಮೈಸೂರು, ಶಿವಮೊಗ್ಗ, ಬೆಂಗಳೂರು ನಗರ, ಗ್ರಾಮಾಂತರ, ತುಮಕೂರು, ಚಿತ್ರದುರ್ಗ, ಚಿಕ್ಕಬಳ್ಳಾಪುರ, ಕೋಲಾರ, ಮಂಡ್ಯ, ಚಾಮರಾಜನಗರ ಜಿಲ್ಲೆಗಳ ವಿವಿಧೆಡೆ ಸಾಧಾರಣ ಮತ್ತು ಕೆಲವೆಡೆ ಭಾರಿ ಮಳೆಯಾಗಲಿದೆ.

ಇನ್ನು ಅ.17ರಿಂದ ಅ.21ರ ವರೆಗೆ ಉತ್ತರ ಒಳನಾಡಿನ ದಾವಣಗೆರೆ, ವಿಜಯನಗರ ಮತ್ತು ಬಳ್ಳಾರಿ ಜಿಲ್ಲೆಗಳಲ್ಲಿ ಸಾಧಾರಣ ಮಳೆಯಾಗುವ ಸಾಧ್ಯತೆ ಇದೆ.

ಗುರುವಾರದಂದು ಬೆಂಗಳೂರು ನಗರ, ಬೆಂಗಳೂರು ಗ್ರಾಮಾಂತರ, ಕೊಡಗು, ಹಾಸನ, ಚಿಕ್ಕಮಗಳೂರು, ರಾಮನಗರ, ಕೋಲಾರ, ಚಿಕ್ಕಬಳ್ಳಾಪುರದ ವಿವಿಧೆಡೆ ಉತ್ತಮ ಮಳೆಯಾಗಿದೆ. ಕರಾವಳಿ ಮತ್ತು ಉತ್ತರ ಒಳನಾಡಿನಲ್ಲಿ ಒಣಹವೆ ಮುಂದುವರೆದಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಆದರೆ ಕರಾವಳಿ ಜಿಲ್ಲೆಯಲ್ಲಿ ಅಕ್ಟೋಬರ್ 15ರ ರಾತ್ರಿ ಅಲ್ಲಲ್ಲಿ ಮಳೆ ಹನಿ ಹಾಕಿದ್ದು, ಅಕ್ಟೋಬರ್ 16ರಿಂದ ಬೆಳಗ್ಗಿನಿಂದಲೇ ಮೋಡ ಕವಿದ ವಾತಾವರಣವಿದೆ.

ಬೆಂಗಳೂರಲ್ಲಿ ಗರಿಷ್ಠ 40 ಮಿಮೀ ದಾಖಲು!

ನಗರದಲ್ಲಿ ಗುರುವಾರ ಸಂಜೆ ಬಿರುಸಿನ ಮಳೆಯಾಗಿದ್ದು, ತಗ್ಗು ಪ್ರದೇಶಗಳು, ರಸ್ತೆಗಳಲ್ಲಿ ನೀರು ನಿಂತು ಟ್ರಾಫಿಕ್ ಜಾಮ್‌ ಉಂಟಾಗಿ ವಾಹನ ಸವಾರರು ಪರದಾಡಿದರು. ದಿಢೀರ್‌ ಸುರಿದ ಮಳೆಯಿಂದ ಮನೆಗೆ ತೆರಳುತ್ತಿದ್ದ ಸಾರ್ವಜನಿಕರು ಮಳೆಗೆ ಸಿಲುಕಿದರು.

ವೈಟ್‌ಫೀಲ್ಡ್, ಶಾಂತಿನಗರ, ಸಾರಕ್ಕಿ ಮಾರತ್ತಹಳ್ಳಿ, ಕಾಡುಬೀಸನಹಳ್ಳಿ, ಬೆನ್ನಿಗಾನಹಳ್ಳಿ, ಮೆಜೆಸ್ಟಿಕ್, ಶಿವಾನಂದ ಸರ್ಕಲ್, ಪ್ಯಾಲಸ್ ಗುಟ್ಟಹಳ್ಳಿ, ಟೌನ್‌ಹಾಲ್, ಅಶೋಕ ಪಿಲ್ಲರ್, ಆಚಾರ್ಯ ಲೇಔಟ್, ಎಂ.ಜಿ.ರಸ್ತೆ, ಶಾಂತಿನಗರ, ಕಮೀಷನರೆಟ್ ರಸ್ತೆ, ಸಿಲ್ಕ್‌ಬೋರ್ಡ್ ಮೆಟ್ರೋ ನಿಲ್ದಾಣ ಸೇರಿದಂತೆ ಹಲವೆಡೆ ರಸ್ತೆಗಳು, ಫ್ಲೈಓವರ್, ಅಂಡರ್‌ಪಾಸ್‌ಗಳು ಜಲಾವೃತಗೊಂಡಿದ್ದವು. ಆನಂದರಾವ್ ವೃತ್ತದ ಬಳಿಯ ಒಳಚರಂಡಿಯ ಮ್ಯಾನ್‌ಹೋಲ್‌ ಉಕ್ಕಿ ಹರಿದ ಪರಿಣಾಮ ಅಪಾರ ಪ್ರಮಾಣದ ಗಲೀಜು ನೀರು ಹರಿದು ವಾಹನಗಳ ಸಂಚಾರಕ್ಕೆ ತೊಡಕುಂಟಾಯಿತು.

ಸಾರಕ್ಕಿಯಲ್ಲಿ ಗರಿಷ್ಠ 40 ಮಿ.ಮೀ, ಶಾಂತಿನಗರ 38, ಶ್ರೀನಗರದಲ್ಲಿ 22 ಮಿ.ಮೀ ಮಳೆಯಾಗಿದೆ. ದೀಪಾಂಜಲಿ ನಗರ 22, ಎಚ್‌ಎಎಲ್ ವಿಮಾನ ನಿಲ್ದಾಣ 20, ಮಹದೇವಪುರ 13, ವರ್ತೂರು 18, ಎ. ನಾರಾಯಣಪುರ 14, ದೇವಸಂದ್ರದಲ್ಲಿ 14, ಉಲ್ಲಾಳ 6.5 ಮಿ.ಮೀ ಮಳೆಯಾಗಿದೆ. ಶುಕ್ರವಾರವೂ ನಗರದ ಬಹುತೇಕ ಭಾಗಗಳಲ್ಲಿ ಗುಡುಗು ಸಹಿತ ಮಳೆಯಾಗಲಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.

Dharwad: ಅಪರೂಪದ ಬಾಂಬೆ ಬ್ಲಡ್‌ ದಾನ ಮಾಡಿ 3 ವರ್ಷದ ಕಂದನ ಪ್ರಾಣ ಉಳಿಸಿದ ರಕ್ಷಕ!

Kannadaprabha News — Sun, 18 Oct 2026 07:44:30 +0530

ಧಾರವಾಡ: ತೀರಾ ಅಪರೂಪದ ಆನುವಂಶಿಕ ರಕ್ತಸ್ರಾವದ ಕಾಯಿಲೆಯಿಂದ ಬಳಲುತ್ತಿದ್ದ ಮೂರು ವರ್ಷದ ಬಾಲಕನೊಬ್ಬನ ಜೀವ ಉಳಿಸಲು ಅಪರೂಪದ ರಕ್ತದ ಗುಂಪಾಗಿರುವ ''''ಬಾಂಬೆ ಬ್ಲಡ್'''' ಹೊಂದಿರುವ ವ್ಯಕ್ತಿಯೊಬ್ಬರು ಚಿಕ್ಕಮಗಳೂರಿನಿಂದ ಧಾರವಾಡಕ್ಕೆ ಬರೋಬ್ಬರಿ 300 ಕಿಮೀ ಪ್ರಯಾಣಿಸಿ ರಕ್ತದಾನ ಮಾಡುವ ಮೂಲಕ ಮಾನವೀಯತೆಯ ಮೆರೆದಿದ್ದಾರೆ.

ಅತ್ಯಂತ ಅಪರೂಪವಾದ ರಕ್ತದ ಗುಂಪು

ಇಲ್ಲಿಯ ಎಸ್‌ಡಿಎಂ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಅಭಿನಂದನ್ ಎಂಬ ಬಾಲಕನಿಗೆ ತೀವ್ರ ರಕ್ತಸ್ರಾವ ಉಂಟಾದ ಪರಿಣಾಮ, ಅವನ ದೇಹದಲ್ಲಿನ ಹಿಮೋಗ್ಲೋಬಿನ್ ಮಟ್ಟ ಗಣನೀಯವಾಗಿ ಕುಸಿದು, ಸ್ಥಿತಿ ಗಂಭೀರವಾಗಿತ್ತು. ಮಗುವಿಗೆ ತುರ್ತಾಗಿ ಒಂದು ಯುನಿಟ್ ''''ಬಾಂಬೆ ಬ್ಲಡ್'''' ಅಗತ್ಯವಿತ್ತು. ಆದರೆ, ಈ ರಕ್ತದ ಗುಂಪು ಅತ್ಯಂತ ಅಪರೂಪದ್ದಾಗಿದ್ದರಿಂದ, ಸೂಕ್ತ ದಾನಿಯನ್ನು ಹುಡುಕುವುದು ಸವಾಲಿನ ಕೆಲಸವಾಗಿತ್ತು.

ಮಹೇಶ್ ಅವರನ್ನು ಸಂಪರ್ಕಿಸಿದ ಮಗುವಿನ ತಂದೆ

ಮಗುವಿನ ತಂದೆ ಮಹಾಂತೇಶ್ ಅವರ ಮನವಿಗೆ ಸ್ಪಂದಿಸಿದ ''''ಸ್ವಾಮಿ ವಿವೇಕಾನಂದ ಬ್ಲಡ್ ಡೋನರ್ಸ್ ಫೌಂಡೇಶನ್" ರಕ್ತದಾನಿಗಾಗಿ ಹುಡುಕಾಟ ಆರಂಭಿಸಿತು. ಸಂಸ್ಥೆಯ ಸ್ಥಾಪಕರಾದ ಶಿವಕುಮಾರ ರಟ್ಟೀಹಳ್ಳಿ, ಚಿಕ್ಕಮಗಳೂರಿನಲ್ಲಿರುವ ''''ಬಾಂಬೆ ಬ್ಲಡ್'''' ಹೊಂದಿರುವ ಮಹೇಶಕುಮಾರ್ ಅವರನ್ನು ಸಂಪರ್ಕಿಸಿ, ಮಗುವಿನ ಗಂಭೀರ ಸ್ಥಿತಿಯ ಬಗ್ಗೆ ವಿವರಿಸಿದರು.

ಅಗತ್ಯದ ತುರ್ತನ್ನು ಅರಿತ ಮಹೇಶಕುಮಾರ್, ರಕ್ತದಾನ ಮಾಡಲು ತಕ್ಷಣವೇ ಒಪ್ಪಿಕೊಂಡು, ವಿಳಂಬ ಮಾಡದೆ ಧಾರವಾಡದತ್ತ ಪ್ರಯಾಣ ಬೆಳೆಸಿದರು. ಐದು ಗಂಟೆಗಳಿಗೂ ಹೆಚ್ಚು ಕಾಲ ಪ್ರಯಾಣಿಸಿ 300 ಕಿಮೀಗಿಂತಲೂ ಹೆಚ್ಚು ದೂರ ಕ್ರಮಿಸಿ ಎಸ್‌ಡಿಎಂ ಆಸ್ಪತ್ರೆಯನ್ನು ತಲುಪಿದರು. ಅಲ್ಲಿ ಆಸ್ಪತ್ರೆಯ ರಕ್ತನಿಧಿಯಲ್ಲಿ ಅಗತ್ಯವಿರುವ ಪ್ರಕ್ರಿಯೆಗಳನ್ನು ಪೂರೈಸಿ, ಮಗುವಿಗಾಗಿ ಒಂದು ಯುನಿಟ್ ''''ಬಾಂಬೆ ಬ್ಲಡ್'''' ದಾನ ಮಾಡಿದರು. ಈ ಸಂದರ್ಭದಲ್ಲಿ ರಕ್ತನಿಧಿಯ ಸಿಬ್ಬಂದಿ ಪುನೀತ್ ಇದ್ದರು.

ಜಾತಿ, ಧರ್ಮ, ಪ್ರದೇಶದ ಗಡಿಗಳನ್ನು ಮೀರಿದ ಮಾನವೀಯತೆಯೇ ನಿಜವಾದ ಸೇವೆ ಎಂಬುದಕ್ಕೆ ಮಹೇಶಕುಮಾರ್ ಅವರ ಅಪರೂಪದ ರಕ್ತದಾನ ಹಾಗೂ ಸ್ವಾಮಿ ವಿವೇಕಾನಂದ ರಕ್ತದಾನ ಫೌಂಡೇಶನ್‌ನ ಸಮಯೋಚಿತ ಸ್ಪಂದನೆ ಸಾಕ್ಷಿಯಾಗಿದೆ. ಜತೆಗೆ ಮಹೇಶಕುಮಾರ ಅವರ ಈ ಕಾರ್ಯಕ್ಕೆ ಎಲ್ಲೆಡೆ ಶ್ಲಾಘನೆ ಸಹ ವ್ಯಕ್ತವಾಗುತ್ತಿದೆ.

ಏನಿದು ಬಾಂಬೆ ಬ್ಲಡ್‌?

ಬಾಂಬೆ ಬ್ಲಡ್ ಗ್ರೂಪ್ ಪ್ರಪಂಚದಲ್ಲೇ ಅತ್ಯಂತ ಅಪರೂಪದ ರಕ್ತದ ಗುಂಪುಗಳಲ್ಲಿ ಒಂದು. ವೈಜ್ಞಾನಿಕವಾಗಿ ಇದನ್ನು ''''hh'''' ಅಥವಾ ''''Oh'''' ಫಿನೋಟೈಪ್ ಎಂದು ಕರೆಯಲಾಗುತ್ತದೆ. ಇದನ್ನು ಮೊದಲ ಬಾರಿಗೆ 1952ರಲ್ಲಿ ಡಾ. ವೈ.ಎಂ. ಭೇಂಡೆ ಅವರು ಮುಂಬೈ ನಗರದಲ್ಲಿ ಪತ್ತೆ ಹಚ್ಚಿದ್ದರಿಂದ ಇದಕ್ಕೆ ಬಾಂಬೆ ಬ್ಲಡ್ ಎಂಬ ಹೆಸರು ಬಂದಿತು. ಬಾಂಬೆ ರಕ್ತದ ಗುಂಪಿನ ವ್ಯಕ್ತಿಗಳು ಕೇವಲ ಮತ್ತೊಬ್ಬ ಬಾಂಬೆ ರಕ್ತದ ಗುಂಪಿನ ವ್ಯಕ್ತಿಯಿಂದ ಮಾತ್ರ ರಕ್ತವನ್ನು ಸ್ವೀಕರಿಸಲು ಸಾಧ್ಯ.

ಅರಿಶಿನ, ಮೆಣಸಿನ ಪುಡಿಯಿಂದಲೇ 1,892 ಚದರ ಅಡಿ ಚಿತ್ರ! ಗಿನ್ನೆಸ್‌ ದಾಖಲೆ ಬರೆದ ಕನ್ನಡಿಗ ಟೆಕ್ಕಿ

Sushma Hegde — Thu, 22 Oct 2026 15:09:24 +0530

ಸಾಮಾನ್ಯವಾಗಿ ಅಡುಗೆ ಮನೆಯಲ್ಲಿ ಬಳಸುವ ಅರಿಶಿನ ಮತ್ತು ಮೆಣಸಿನ ಪುಡಿ ಅಡುಗೆಗೆ ಬಣ್ಣ, ರುಚಿ ನೀಡುತ್ತವೆ. ಆದರೆ ಇದೇ ಸಾಮಗ್ರಿಗಳನ್ನು ಬಳಸಿ ಒಬ್ಬ ಕಲಾವಿದ ಬರೋಬ್ಬರಿ 1,892.5 ಚದರ ಅಡಿ ವಿಸ್ತೀರ್ಣದ ಚಿತ್ರ ಬಿಡಿಸಿದ್ದಾರೆ ಎಂದರೆ ನಂಬುತ್ತೀರಾ? ಕರ್ನಾಟಕದ ಧಾರವಾಡದ ಕಲಾವಿದ ಅಮರ್‌ ಕಾಳೆ ತಮ್ಮ ವಿಭಿನ್ನ ಪ್ರಯತ್ನದ ಮೂಲಕ ಗಿನ್ನೆಸ್‌ ವಿಶ್ವ ದಾಖಲೆ ಪುಸ್ತಕದಲ್ಲಿ ಸ್ಥಾನ ಪಡೆದಿದ್ದಾರೆ.

ಅರಿಶಿನ, ಮೆಣಸಿನ ಪುಡಿಯಿಂದ ಮೂಡಿಬಂದ ಕರ್ನಾಟಕದ ಚಿತ್ರ!

2026ರ ಜನವರಿಯಲ್ಲಿ ಧಾರವಾಡದಲ್ಲಿ ಅಮರ್‌ ಕಾಳೆ ಈ ವಿಶೇಷ ಚಿತ್ರವನ್ನು ರಚಿಸಿದ್ದಾರೆ. ಸುಮಾರು 175.82 ಚದರ ಮೀಟರ್‌ ಅಂದರೆ 1,892.5 ಚದರ ಅಡಿ ವಿಸ್ತೀರ್ಣದ ಈ ಕಲಾಕೃತಿಯನ್ನು ತಯಾರಿಸಲು ಅವರು ಸುಮಾರು 6 ಕೆ.ಜಿ. ಅರಿಶಿನ ಪುಡಿ ಮತ್ತು 5 ಕೆ.ಜಿ. ಮೆಣಸಿನ ಪುಡಿಯನ್ನು ಬಳಸಿದ್ದಾರೆ. ಸಾಮಾನ್ಯ ಬಣ್ಣಗಳ ಬದಲಿಗೆ ಅಡುಗೆಗೆ ಬಳಸುವ ಮಸಾಲೆ ಪದಾರ್ಥಗಳನ್ನೇ ಆಯ್ಕೆ ಮಾಡಿಕೊಂಡಿದ್ದು ಈ ಕಲಾಕೃತಿಯ ವಿಶೇಷತೆ. ಅರಿಶಿನದ ಹಳದಿ ಮತ್ತು ಮೆಣಸಿನ ಪುಡಿಯ ಕೆಂಪು ಬಣ್ಣಗಳನ್ನು ಬಳಸಿ ಅವರು ಕರ್ನಾಟಕದ ಭೂಪಟವನ್ನು ಚಿತ್ರಿಸಿದ್ದಾರೆ. ಅದರ ಮಧ್ಯಭಾಗದಲ್ಲಿ ರಾಜ್ಯದ ಐತಿಹಾಸಿಕ ಪರಂಪರೆಯನ್ನು ಸಾರುವ ಹಂಪಿಯ ಕಲ್ಲಿನ ರಥಕ್ಕೆ ಪ್ರಮುಖ ಸ್ಥಾನ ನೀಡಿದ್ದಾರೆ. ಈ ಮೂಲಕ ಮಸಾಲೆ ಪದಾರ್ಥಗಳಿಂದ ರಚಿಸಿದ ಅತಿದೊಡ್ಡ ಚಿತ್ರ ಎಂಬ ಗಿನ್ನೆಸ್‌ ವಿಶ್ವ ದಾಖಲೆಯನ್ನು ಅಮರ್‌ ಕಾಳೆ ತಮ್ಮದಾಗಿಸಿಕೊಂಡಿದ್ದಾರೆ. ಈ ಸಾಧನೆ 2026ರ ಜನವರಿ 27ರಂದು ಧಾರವಾಡದಲ್ಲಿ ದಾಖಲಾಗಿದೆ.

ಕರ್ನಾಟಕದ ಕಲೆ, ಸಂಸ್ಕೃತಿ ಮತ್ತು ಪರಂಪರೆಯನ್ನು ಜಗತ್ತಿಗೆ ತೋರಿಸುವ ಪ್ರಯತ್ನ

ಅಮರ್‌ ಕಾಳೆ ಈ ಚಿತ್ರವನ್ನು ಕೇವಲ ದಾಖಲೆಯ ಉದ್ದೇಶದಿಂದ ರಚಿಸಿಲ್ಲ. ಕರ್ನಾಟಕದ ಶ್ರೀಮಂತ ಸಂಸ್ಕೃತಿ, ಇತಿಹಾಸ ಮತ್ತು ವಾಸ್ತುಶಿಲ್ಪವನ್ನು ಜಗತ್ತಿಗೆ ಪರಿಚಯಿಸುವ ಉದ್ದೇಶವೂ ಇದರ ಹಿಂದಿದೆ. ವಿಶ್ವವಿಖ್ಯಾತ ಹಂಪಿಯ ಕಲ್ಲಿನ ರಥವು ವಿಜಯನಗರ ಸಾಮ್ರಾಜ್ಯದ ವಾಸ್ತುಶಿಲ್ಪದ ಪ್ರಮುಖ ಸಂಕೇತಗಳಲ್ಲಿ ಒಂದಾಗಿದೆ. ಯುನೆಸ್ಕೋ ವಿಶ್ವ ಪರಂಪರೆಯ ತಾಣವಾಗಿರುವ ಹಂಪಿಯ ಈ ಸ್ಮಾರಕವನ್ನು ಕರ್ನಾಟಕದ ಭೂಪಟದ ಮಧ್ಯದಲ್ಲಿ ಚಿತ್ರಿಸುವ ಮೂಲಕ ರಾಜ್ಯದ ಭೌಗೋಳಿಕ ಗುರುತು ಮತ್ತು ಸಾಂಸ್ಕೃತಿಕ ಪರಂಪರೆಯನ್ನು ಒಂದೇ ಕಲಾಕೃತಿಯಲ್ಲಿ ಬೆಸೆದಿದ್ದಾರೆ.

“ಕರ್ನಾಟಕದ ಶ್ರೀಮಂತ ಸಂಸ್ಕೃತಿ, ಪರಂಪರೆ, ಕಲೆ ಮತ್ತು ವಾಸ್ತುಶಿಲ್ಪವನ್ನು ಜಗತ್ತಿಗೆ ಪರಿಚಯಿಸಲು ಈ ಕಲಾಕೃತಿ ನನ್ನ ಸಣ್ಣ ಕೊಡುಗೆ” ಎಂದು ಅಮರ್‌ ಕಾಳೆ ಗಿನ್ನೆಸ್‌ ವಿಶ್ವ ದಾಖಲೆ ಸಂಸ್ಥೆಗೆ ತಿಳಿಸಿದ್ದಾರೆ. ಈ ಬೃಹತ್‌ ಚಿತ್ರವನ್ನು ಪೂರ್ಣಗೊಳಿಸಲು ಅವರಿಗೆ ಸುಮಾರು 10 ಗಂಟೆಗಳು ಬೇಕಾಗಿವೆ. ಚಿತ್ರ ರಚನೆಯ ಬಳಿಕ ಉಳಿದ ಹೆಚ್ಚುವರಿ ಮಸಾಲೆ ಪುಡಿಯನ್ನು ವ್ಯರ್ಥ ಮಾಡದೆ ದಾನ ಮಾಡಿರುವುದು ಕೂಡ ಅವರ ಪರಿಸರ ಕಾಳಜಿಯನ್ನು ತೋರಿಸುತ್ತದೆ.

ತಂದೆಯಿಂದ ಪ್ರೇರಣೆ; ಬಾಲ್ಯದ ಹವ್ಯಾಸವೇ ವೃತ್ತಿಯಾಯಿತು

ಅಮರ್‌ ಕಾಳೆ ಅವರ ಕಲಾ ಪಯಣದ ಹಿಂದೆ ಬಾಲ್ಯದ ಆಸಕ್ತಿ ಮತ್ತು ತಂದೆಯ ಪ್ರೇರಣೆ ಇದೆ. ಅವರ ತಂದೆಯೂ ಕಲಾವಿದರಾಗಿದ್ದು, ಬಾಲ್ಯದಿಂದಲೇ ಚಿತ್ರಕಲೆಯ ವಾತಾವರಣದಲ್ಲಿ ಬೆಳೆದ ಅಮರ್‌ ಅವರಿಗೆ ಸಹಜವಾಗಿಯೇ ಕಲೆಯ ಬಗ್ಗೆ ಆಸಕ್ತಿ ಮೂಡಿತ್ತು. ಬಣ್ಣಗಳು, ಕುಂಚಗಳು ಮತ್ತು ವಿಭಿನ್ನ ಚಿತ್ರಕಲಾ ತಂತ್ರಗಳನ್ನು ಪ್ರಯೋಗಿಸುತ್ತಾ ತಮ್ಮ ಕೌಶಲವನ್ನು ಬೆಳೆಸಿಕೊಂಡರು. ಆರಂಭದಲ್ಲಿ ಹವ್ಯಾಸವಾಗಿದ್ದ ಚಿತ್ರಕಲೆ ಕ್ರಮೇಣ ಜನರ ಗಮನ ಸೆಳೆಯಿತು. ಚಿತ್ರ ಬಿಡಿಸಿಕೊಡುವಂತೆ ಬೇಡಿಕೆಗಳೂ ಬರತೊಡಗಿದವು.

ಆದರೆ ಅಮರ್‌ ಮೆಕ್ಯಾನಿಕಲ್‌ ಎಂಜಿನಿಯರಿಂಗ್‌ನಲ್ಲಿ ಡಿಪ್ಲೊಮಾ ಪೂರ್ಣಗೊಳಿಸಿ ಉದ್ಯೋಗವನ್ನೂ ಪಡೆದಿದ್ದರು. ಎಲ್ಲರಂತೆ ಉದ್ಯೋಗ ಜೀವನ ಮುಂದುವರಿಸುವ ಅವಕಾಶವಿದ್ದರೂ, 2018ರಲ್ಲಿ ಅವರು ಮಹತ್ವದ ನಿರ್ಧಾರ ಕೈಗೊಂಡರು. ಎಂಜಿನಿಯರಿಂಗ್‌ ಉದ್ಯೋಗವನ್ನು ತೊರೆದು ಪೂರ್ಣಾವಧಿ ಕಲಾವಿದರಾಗಲು ಮುಂದಾದರು. ಗಿನ್ನೆಸ್‌ ವಿಶ್ವ ದಾಖಲೆ ಸಂಸ್ಥೆಯ ಮಾಹಿತಿಯ ಪ್ರಕಾರ, ಅವರು ಸುಮಾರು ಎಂಟು ವರ್ಷಗಳಿಂದ ವೃತ್ತಿಪರವಾಗಿ ಕಲಾ ಕ್ಷೇತ್ರದಲ್ಲಿ ತೊಡಗಿಸಿಕೊಂಡಿದ್ದಾರೆ. ಯಾವುದೇ ಔಪಚಾರಿಕ ಕಲಾ ತರಬೇತಿಯಿಲ್ಲದೆ ಸ್ವಯಂ ಕಲಿತ ಕಲಾವಿದರಾಗಿರುವ ಅವರು, ಆಯಿಲ್‌ ಮತ್ತು ಅಕ್ರಿಲಿಕ್‌ ಬಣ್ಣಗಳಲ್ಲಿಯೂ ಕೆಲಸ ಮಾಡುತ್ತಾರೆ.

ಒಂದಲ್ಲ, ಮೂರು ಬಾರಿ ಗಿನ್ನೆಸ್‌ ವಿಶ್ವ ದಾಖಲೆ!

ಅರಿಶಿನ ಮತ್ತು ಮೆಣಸಿನ ಪುಡಿಯಿಂದ ಬೃಹತ್‌ ಚಿತ್ರ ಬಿಡಿಸಿರುವುದು ಅಮರ್‌ ಕಾಳೆ ಅವರ ಮೊದಲ ದಾಖಲೆ ಸಾಧನೆಯಲ್ಲ. ಅವರು ಈಗಾಗಲೇ ವಿಭಿನ್ನ ಕಲಾ ಪ್ರಯೋಗಗಳ ಮೂಲಕ ಗಿನ್ನೆಸ್‌ ವಿಶ್ವ ದಾಖಲೆಗಳಲ್ಲಿ ಹೆಸರು ದಾಖಲಿಸಿದ್ದಾರೆ.

2021: ಒಂದು ನಿಮಿಷದಲ್ಲಿ 98 ಕೈಮುದ್ರೆಗಳನ್ನು ಚಿತ್ರಿಸುವ ಮೂಲಕ ದಾಖಲೆ ನಿರ್ಮಿಸಿದ್ದರು. ಈ ದಾಖಲೆಯನ್ನು ಬಳಿಕ ಮತ್ತೊಬ್ಬರು ಮೀರಿಸಿದ್ದಾರೆ.

ಫೆಬ್ರವರಿ 2026: ಬಾಯಿಯಿಂದ ಚಿತ್ರ ಬಿಡಿಸುವ ಮೂಲಕ 112.36 ಚದರ ಮೀಟರ್‌ (1,209.43 ಚದರ ಅಡಿ) ವಿಸ್ತೀರ್ಣದ ಬೃಹತ್‌ ಕಲಾಕೃತಿ ರಚಿಸಿದರು. ಆಪರೇಷನ್‌ ಸಿಂದೂರ್‌ನಿಂದ ಪ್ರೇರಿತವಾದ ಈ ಚಿತ್ರದಲ್ಲಿ ಭಾರತೀಯ ಸೈನಿಕನನ್ನು ಚಿತ್ರಿಸಿದ್ದರು.

ಜನವರಿ 2026: ಅರಿಶಿನ ಮತ್ತು ಮೆಣಸಿನ ಪುಡಿಯನ್ನು ಬಳಸಿ 1,892.5 ಚದರ ಅಡಿ ವಿಸ್ತೀರ್ಣದ ಚಿತ್ರ ರಚಿಸಿ, ಅತಿದೊಡ್ಡ ಮಸಾಲೆ ಚಿತ್ರ ಎಂಬ ದಾಖಲೆ ನಿರ್ಮಿಸಿದರು.

2018ರಲ್ಲಿ ಉದ್ಯೋಗ ತೊರೆದಾಗ ಗಿನ್ನೆಸ್‌ ದಾಖಲೆ ನಿರ್ಮಿಸುವುದೇ ತಮ್ಮ ಗುರಿಯಾಗಿರಲಿಲ್ಲ. ಬಾಲ್ಯದಿಂದ ಪ್ರೀತಿಸಿದ ಕಲೆಯಲ್ಲೇ ಮುಂದುವರಿಯಬೇಕು ಎಂಬ ಆಸೆ ಮಾತ್ರ ಅವರಲ್ಲಿತ್ತು. ಇಂದು ಅದೇ ನಿರ್ಧಾರ ಅವರನ್ನು ಜಾಗತಿಕ ಮಟ್ಟದಲ್ಲಿ ಗುರುತಿಸಿಕೊಳ್ಳುವಂತೆ ಮಾಡಿದೆ. ಮುಂದೆಯೂ ವಿಭಿನ್ನ ಪ್ರಯೋಗಗಳ ಮೂಲಕ ಹೊಸ ಕಲಾಕೃತಿಗಳನ್ನು ರಚಿಸಿ ದಾಖಲೆ ನಿರ್ಮಿಸುವ ಆಸೆ ಅಮರ್‌ ಕಾಳೆ ಅವರಿಗಿದೆ. ದೊಡ್ಡ ಸಾಧನೆ ಮಾಡಲು ದುಬಾರಿ ಉಪಕರಣಗಳೇ ಬೇಕೆಂದಿಲ್ಲ; ವಿಭಿನ್ನ ಆಲೋಚನೆ, ಸೃಜನಶೀಲತೆ ಮತ್ತು ಅದನ್ನು ಕಾರ್ಯರೂಪಕ್ಕೆ ತರುವ ಧೈರ್ಯವಿದ್ದರೆ ಸಾಕು ಎಂಬುದನ್ನು ಕರ್ನಾಟಕದ ಈ ಕಲಾವಿದ ಸಾಬೀತುಪಡಿಸಿದ್ದಾರೆ.

ರೈಲು ಪ್ರಯಾಣಿಕರಿಗೆ ಗುಡ್‌ ನ್ಯೂಸ್‌: ದಸರಾ ಹಿನ್ನೆಲೆ ಬೆಂಗಳೂರು-ಬೆಳಗಾವಿಗೆ ಸ್ಪೆಷಲ್‌ ಎಕ್ಸ್‌ಪ್ರೆಸ್!

Kannadaprabha News — Wed, 07 Oct 2026 06:51:33 +0530

ಹುಬ್ಬಳ್ಳಿ (ಅ.7): ವಾರಾಂತ್ಯ ಹಾಗೂ ದಸರಾ ಹಬ್ಬ(Dasara festival)ದ ಸಂದರ್ಭದಲ್ಲಿ ಪ್ರಯಾಣಿಕರ ಹೆಚ್ಚುವರಿ ದಟ್ಟಣೆ ನಿರ್ವಹಿಸಲು, ನೈಋತ್ಯ ರೈಲ್ವೆಯು ಬೆಂಗಳೂರಿನ ಸರ್ ಎಂ. ವಿಶ್ವೇಶ್ವರಯ್ಯ ಟರ್ಮಿನಲ್ ಮತ್ತು ಬೆಳಗಾವಿ ನಡುವೆ ಎರಡು ಮಾರ್ಗಗಳಲ್ಲಿ ತಲಾ ಒಂದು ವಿಶೇಷ ಎಕ್ಸ್‌ಪ್ರೆಸ್ ರೈಲು ಸಂಚಾರ ನಡೆಸಲಿದೆ.

ಬೆಂಗಳೂರು-ಬೆಳಗಾವಿ ವಿಶೇಷ ಎಕ್ಸ್‌ಪ್ರೆಸ್ ರೈಲು

ರೈಲು ಸಂಖ್ಯೆ 06563 ಎಸ್‌ಎಂವಿಟಿ ಬೆಂಗಳೂರು-ಬೆಳಗಾವಿ ವಿಶೇಷ ಎಕ್ಸ್‌ಪ್ರೆಸ್ ರೈಲು ಅ. 16ರಂದು ಎಸ್‌ಎಂವಿಟಿ ಬೆಂಗಳೂರಿನಿಂದ ಸಂಜೆ 7ಕ್ಕೆ ಹೊರಟು, ಮರುದಿನ ಬೆಳಗ್ಗೆ 8.25 ಗಂಟೆಗೆ ಬೆಳಗಾವಿ ತಲುಪಲಿದೆ. ಮರುಪ್ರಯಾಣದಲ್ಲಿ, ರೈಲು ಸಂಖ್ಯೆ 06564 ಬೆಳಗಾವಿ-ಎಸ್‌ಎಂವಿಟಿ ಬೆಂಗಳೂರು ವಿಶೇಷ ಎಕ್ಸ್‌ಪ್ರೆಸ್ ರೈಲು ಅ. 17ರಂದು ಬೆಳಗಾವಿಯಿಂದ ಸಂಜೆ 5.30ಕ್ಕೆ ಹೊರಟು, ಮರುದಿನ 5 ಗಂಟೆಗೆ ಎಸ್‌ಎಂವಿಟಿ ಬೆಂಗಳೂರು ತಲುಪಲಿದೆ.

ಬೆಂಗಳೂರು-ಬೆಳಗಾವಿ ಟ್ರೈನ್ ಎಲ್ಲೆಲ್ಲಿ ನಿಲುಗಡೆ?

ಮಾರ್ಗ ಮಧ್ಯದಲ್ಲಿ ಈ ರೈಲು ಎರಡೂ ಮಾರ್ಗಗಳಲ್ಲಿ ಚಿಕ್ಕಬಾಣಾವರ, ತುಮಕೂರು, ಅರಸೀಕೆರೆ, ಬೀರೂರು, ದಾವಣಗೆರೆ, ಹರಿಹರ, ಎಸ್‌ಎಂಎಂ ಹಾವೇರಿ, ಎಸ್‌‌ಎಸ್‌ಎಸ್ ಹುಬ್ಬಳ್ಳಿ, ಧಾರವಾಡ, ಅಳ್ನಾವರ, ಲೋಂಡಾ ಮತ್ತು ಖಾನಾಪುರ ನಿಲ್ದಾಣಗಳಲ್ಲಿ ನಿಲುಗಡೆಯಾಗಲಿದೆ.

ವಿಶೇಷ ಎಕ್ಸ್‌ಪ್ರೆಸ್ ರೈಲು ಎಷ್ಟು ಬೋಗಿಗಳನ್ನ ಹೊಂದಿದೆ?

ಈ ರೈಲು 18 ಬೋಗಿಗಳನ್ನು ಹೊಂದಿದ್ದು, ಇದರಲ್ಲಿ 1 ಎಸಿ, 2-ಟೈರ್, 3 ಎಸಿ 3-ಟೈರ್, 8 ಸ್ಲೀಪರ್ ಕ್ಲಾಸ್, 4 ಜನರಲ್ ದ್ವಿತೀಯ ದರ್ಜೆ ಬೋಗಿಗಳು ಮತ್ತು 2 ದಿವ್ಯಾಂಗ ಸ್ನೇಹಿ ಕಂಪಾರ್ಟ್‌ಮೆಂಟ್‌ಗಳನ್ನು ಹೊಂದಿರುವ ದ್ವಿತೀಯ ದರ್ಜೆ ಲಗೇಜ್- ಕಮ್- ಬ್ರೇಕ್ ವ್ಯಾನ್‌ಗಳು ಇರಲಿವೆ ಎಂದು ನೈಋತ್ಯ ರೈಲ್ವೆ ಪ್ರಕಟಣೆ ತಿಳಿಸಿದೆ.

ಹು-ಧಾ ನಡುವೆ ದೇಶದ ಮೊದಲ ಐರೋಪ್ಯ ಮಾದರಿ ಟ್ರ್ಯಾಮ್? ಇನ್ಮುಂದೆ ಪ್ರಯಾಣ ಮತ್ತಷ್ಟು ಸೂಪರ್!

Kannadaprabha News — Fri, 09 Oct 2026 07:05:04 +0530

ಏಕೇ ಬೇಕು ಹೊಸ ಟ್ರ್ಯಾಮ್‌?

ಅವಳಿ ನಗರದಲ್ಲೀಗ 23 ಕಿ.ಮೀ ಉದ್ದದ ಬಿಆರ್‌ಟಿಎಸ್‌ ಮಾರ್ಗ
ಈ ಮಾರ್ಗದಲ್ಲೇ ಹಳಿ ಹಾಕಿ ಟ್ರ್ಯಾಮ್‌ ವ್ಯವಸ್ಥೆ ಜಾರಿಗೆ ಪ್ಲ್ಯಾನ್‌
ಇದು ಪರಿಸರ ಸ್ನೇಹಿ ಜೊತೆಗೆ ಹೆಚ್ಚು ಜನರ ಹೊತ್ತೊಯ್ಯಬಲ್ಲದು
ಸದ್ಯ ವಿದೇಶಗಳಲ್ಲಿ ಮಾತ್ರವೇ ಇಂಥ ಆಧುನಿಕ ಟ್ರ್ಯಾಮ್‌ ಇದೆ
ಮೆಟ್ರೋಗಿಂತ ಕಡಿಮೆ ಟಿಕೆಟ್‌ ದರ, ನಿರ್ವಹಣಾ ವೆಚ್ಚವೂ ಕಡಿಮೆ

ಮಂಜುನಾಥ ನಾಗಲೀಕರ್

ಬೆಂಗಳೂರು (ಅ.9): ಹುಬ್ಬಳ್ಳಿ-ಧಾರವಾಡ ಅವಳಿ ನಗರಗಳ ನಡುವೆ ಜನ ಸಂಚಾರಕ್ಕೆ ಹವಾನಿಯಂತ್ರಣ (ಎಸಿ) ವ್ಯವಸ್ಥೆಯೊಂದಿಗೆ ‘ಆಧುನಿಕ ಟ್ರ್ಯಾಮ್’ ಸಾರಿಗೆ ವ್ಯವಸ್ಥೆ ನಿರ್ಮಾಣಕ್ಕೆ ತಾಂತ್ರಿಕ-ಆರ್ಥಿಕ ಕಾರ್ಯಸಾಧ್ಯತೆ ಅಧ್ಯಯನ ಕೈಗೊಳ್ಳಲು ನಗರಾಭಿವೃದ್ಧಿ ಇಲಾಖೆಯ ನಗರ ಭೂ ಸಾರಿಗೆ ನಿರ್ದೇಶನಾಲಯ ಮುಂದಾಗಿದೆ.

ವಿದೇಶಗಳಲ್ಲಿ ಮಾತ್ರ ಇದೆ ಟ್ರ್ಯಾಮ್ ಸಂಚಾರ

ಒಂದು ವೇಳೆ ಈ ಯೋಜನೆ ಕಾರ್ಯಸಾಧು ಎಂದು ಅಧ್ಯಯನ ವರದಿಯಲ್ಲಿ ಕಂಡು ಬಂದು ಜಾರಿಯಾದರೆ, ಆಧುನಿಕ ಟ್ರ್ಯಾಮ್ ವ್ಯವಸ್ಥೆ ಹೊಂದಿರುವ ದೇಶದ ಮೊದಲ ನಗರಗಳು ಎಂಬ ಹೆಗ್ಗಳಿಕೆಗೆ ಹುಬ್ಬಳ್ಳಿ-ಧಾರವಾಡ ಪಾತ್ರವಾಗಲಿವೆ. ಫ್ರಾನ್ಸ್, ಜರ್ಮನಿ, ಸ್ವಿಜರ್ಲೆಂಡ್‌ ಸೇರಿದಂತೆ ಇನ್ನಿತರ ಯುರೋಪಿಯನ್ ದೇಶಗಳ ಪ್ರಮುಖ ನಗರಗಳಲ್ಲಿ ಆಧುನಿಕ ಟ್ರ್ಯಾಮ್ ಸಾರಿಗೆ ವ್ಯವಸ್ಥೆ ಇದೆ. ರಸ್ತೆ ಮೇಲೆ ಅಳವಡಿಸುವ ಹಳಿಗಳ ಮೇಲೆ ಸಂಚರಿಸುವ ಟ್ರ್ಯಾಮ್‌ಗೆ ಕನಿಷ್ಠ 2 ಕೋಚ್‌ಗಳು ಹಾಗೂ ಗರಿಷ್ಠ 5 ಕೋಚ್‌ಗಳನ್ನು ಅಳವಡಿಸಬಹುದು. ಪ್ರಯಾಣಿಕರ ತಂಗುದಾಣಗಳಿಗೂ ಹೆಚ್ಚು ವೆಚ್ಚ ಮಾಡಬೇಕಿಲ್ಲ.

ಟ್ರ್ಯಾಮ್ ಸಾರಿಗೆ ವ್ಯವಸ್ಥೆ ಜಾರಿಯಾದರೆ ಏನು ಬದಲಾವಣೆ?

ಹಾಲಿ ಹುಬ್ಬಳ್ಳಿ-ಧಾರವಾಡ ನಡುವಣ 23 ಕಿ.ಮೀ. ಉದ್ದದ ಬಿಆರ್‌ಟಿಎಸ್ ಮಾರ್ಗದಲ್ಲಿ ಸಂಚರಿಸುವ ಚಿಗರಿ ಬಸ್‌ಗಳಲ್ಲಿ ನಿತ್ಯ 1 ಲಕ್ಷಕ್ಕೂ ಹೆಚ್ಚು ಜನ ಸಂಚರಿಸುತ್ತಿದ್ದಾರೆ. ಟ್ರ್ಯಾಮ್ ಸಾರಿಗೆ ವ್ಯವಸ್ಥೆ ಜಾರಿಯಾದರೆ ವಿದ್ಯುತ್ ಚಾಲಿತ ಟ್ರ್ಯಾಮ್ ಕೋಚ್‌ಗಳಲ್ಲಿ ಏಕ ಕಾಲದಲ್ಲಿ ಹೆಚ್ಚು ಜನ ಪ್ರಯಾಣಿಸಬಹುದು. ಅಲ್ಲದೇ, ಮಾಲಿನ್ಯವೂ ಇರುವುದಿಲ್ಲ. ಟ್ರ್ಯಾಮ್ ಹಳಿ ಅಳವಡಿಸಲು ಹೆಚ್ಚು ವೆಚ್ಚವಾಗುವುದಿಲ್ಲ. ಈ ಹಿನ್ನೆಲೆಯಲ್ಲಿ ಅವಳಿ ನಗರಗಳ ನಡುವೆ ಟ್ರ್ಯಾಮ್ ಪರಿಚಯಿಸಲು ನಗರಾಭಿವೃದ್ಧಿ ಇಲಾಖೆ ಯೋಜಿಸಿದೆ.

ಟ್ರ್ಯಾಮ್ ಟಿಕೆಟ್ ದರ ಮೆಟ್ರೋ ರೈಲುಗಳಿಗಿಂತ ಕಡಿಮೆ

ಟ್ರ್ಯಾಮ್‌ ಸಾರಿಗೆ ವ್ಯವಸ್ಥೆಯಲ್ಲಿ ನಿರ್ವಹಣೆ ಕಡಿಮೆ ಇರುತ್ತದೆ. ಹಾಲಿ ಇರುವ ಬಿಆರ್‌ಟಿಎಸ್ ಮಾರ್ಗದಲ್ಲೇ ತ್ವರಿತವಾಗಿ ಅನುಷ್ಠಾನಗೊಳಿಸಬಹುದು. ಟಿಕೆಟ್ ದರ ಕೂಡ ಮೆಟ್ರೋ ರೈಲುಗಳಿಗಿಂತ ಕಡಿಮೆ ಇರಲಿದೆ. ಇನ್ನು ಹಾಲಿ ನೂರಾರು ಬಸ್‌ಗಳನ್ನು ನಿಯಮಿತವಾಗಿ ನಿರ್ವಹಿಸುವಷ್ಟು ನಿರ್ವಹಣೆ ಟ್ರ್ಯಾಮ್ ಸಾರಿಗೆ ವ್ಯವಸ್ಥೆಗೆ ಇರುವುದಿಲ್ಲ. ಆದರೆ, ಯೋಜನೆಯು ದೀರ್ಘಾವಧಿಯಲ್ಲಿ ಆರ್ಥಿಕವಾಗಿ ಕಾರ್ಯಸಾಧುವೇ ಎನ್ನುವುದು ಪ್ರಮುಖ ಪ್ರಶ್ನೆಯಾಗಿದೆ. ಇದಕ್ಕೆ ಕಾರ್ಯಸಾಧ್ಯತೆ ಅಧ್ಯಯನ ವರದಿಯಿಂದ ಸ್ಪಷ್ಟತೆ ನೀಡಲಿದೆ ಎಂದು ನಗರಾಭಿವೃದ್ಧಿ ಇಲಾಖೆ ಮೂಲಗಳು ಹೇಳಿವೆ.

ಕೋಲ್ಕತ್ತಾದಲ್ಲಿದೆ ಹಳೇ ಟ್ರ್ಯಾಮ್:

ದೇಶದಲ್ಲಿ ಪಶ್ಟಿಮ ಬಂಗಾಳದ ಕೋಲ್ಕತ್ತಾದಲ್ಲಿ ಮಾತ್ರ ಅತ್ಯಂತ ಹಳೇ ಟ್ರ್ಯಾಮ್ ಸಾರಿಗೆ ವ್ಯವಸ್ಥೆಯಿದೆ. ಬ್ರಿಟಿಷರ ಅವಧಿಯಲ್ಲಿ ಆರಂಭವಾಗಿರುವ ಈ ಟ್ರ್ಯಾಮ್ ಶತಮಾನದಷ್ಟು ಹಳೆಯದಾಗಿದೆ. ಮೇಲ್ದರ್ಜೆಗೆ ಏರಿಸುವ ಪ್ರಯತ್ನವನ್ನು ಕೂಡ ಮಾಡಿಲ್ಲ.

ಸ್ಟಿಂಗ್ ಆಪರೇಷನ್ ಫುಲ್ ಡಿಟೇಲ್ಸ್ ಅವರ ಹತ್ರನೇ ಇರೋದಾ? ಸಿಟಿ ರವಿ ಹೇಳಿದ ಆ ನಾಯಕ ಯಾರು?

Ravi Janekal — Thu, 15 Oct 2026 13:14:07 +0530

ಹುಬ್ಬಳ್ಳಿ (ಅ.15): ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ವಿರುದ್ಧ ಮಾಡಿದ್ದಾರೆನ್ನಲಾದ ಸ್ಟಿಂಗ್ ಆಪರೇಷನ್ ಕಾಂಗ್ರೆಸ್ ಪಕ್ಷದಲ್ಲೇ ಕೋಲಾಹಲ ಸೃಷ್ಟಿಸಿದೆ. ಇತ್ತ ಬಿಜೆಪಿ ನಾಯಕರಿಗೆ ರಾಜ್ಯ ಸರ್ಕಾರದ ವಿರುದ್ಧ ಹೋರಾಟಕ್ಕೆ ಹೊಸ ಅಸ್ತ್ರ ಸಿಕ್ಕಂತಾಗಿದೆ. ಸ್ಟಿಂಗ್ ಆಪರೇಷನ್ ಹಲವು ಬಿಜೆಪಿ ನಾಯಕರು ಪ್ರತಿಕ್ರಿಯಿಸಿದ್ದು, ಇದೀಗ ಎಂಎಲ್‌ಸಿ ಸಿಟಿ ರವಿ ಅವರು ಕೂಡ ಸ್ಟಿಂಗ್ ಆಪರೇಷನ್ ಕುರಿತಂತೆ ಮಹತ್ವದ ಹೇಳಿಕೆ ನೀಡಿದ್ದಾರೆ.

ಸ್ಟಿಂಗ್ ಆಪರೇಷನ್ ಹೆಚ್ಚಿನ ಮಾಹಿತಿ ಸಿಎಂ ಬಳಿ ಇದೆ:

ಹುಬ್ಬಳ್ಳಿಯಲ್ಲಿಂದು ಸುದ್ದಿಗಾರರೊಂದಿಗೆ ಮಾತನಾಡಿದ ಎಂಎಲ್ಸಿ ಸಿಟಿ ರವಿ ಅವರು, ರಾಜ್ಯದಲ್ಲಿ ಬರಗಾಲ ಪರಿಸ್ಥಿತಿಯಿದೆ, ರೈತರಿಗೆ ಕೃಷಿಗೆ ನೀರಿಲ್ಲ, ಕುಡಿಯಲು ನೀರಿಲ್ಲ. ರಾಜ್ಯದ ಬರಗಾಲದ ಬಗ್ಗೆ ಚರ್ಚೆಯಾಗಬೇಕಿತ್ತು. ದುರಾದೃಷ್ಟ ಸಂಪುಟದಲ್ಲಿ ಸ್ಟಿಂಗ್ ಆಪರೇಷನ್, ಜಿಲೇಬಿ, ಜಾಮೂನು ಬಗ್ಗೆ ಚರ್ಚೆಯಾಗುತ್ತಿದೆ ಎಂದು ಬೇಸರ ವ್ಯಕ್ತಪಡಿಸಿದರು.

ಮಾಜಿ ಸಿಎಂ ಬಗ್ಗೆ ಒಂದು ಅಭಿಪ್ರಾಯ ಮೂಡಿಸುವಂತೆ ಬಿಟ್ಟಿರೋ ವಿಡಿಯೋ ಕಾಂಗ್ರೆಸ್‌ನ ಆಂತರಿಕ ರಾಜಕಾರಣದ ಕುತಂತ್ರದ ಭಾಗ ಸಿಎಂ ಪ್ರಮಾಣಿಕರಾಗಿರಿ ಅಂತಾ ಹೇಳಲಿಲ್ಲ. ಅದರ ಬದಲು ಹುಷರಾಗಿರಿ ಅಂತಾ ಹೇಳಿದರು. ಸ್ಟಿಂಗ್ ಆಪರೇಷನ್ ಅಂತಹ ಕೆಲಸ ವಿರೋಧ ಪಕ್ಷದವರು ಮಾಡೋದಾಗಿದ್ರೆ ಸಿದ್ದರಾಮಯ್ಯ ಸಿಎಂ ಆಗಿದ್ದಾಗಳೇ ವಿಡಿಯೋ ಬಿಡ್ತಿದ್ರು. ಸಿದ್ದರಾಮಯ್ಯರನ್ನ ಬಗ್ಗಿಸಲು ಆಡಳಿತ ಪಕ್ಷದವರೇ ಇದನ್ನ ಮಾಡ್ತಿದ್ದಾರೆ ಎಂದು ಗಂಭೀರ ಆರೋಪ ಮಾಡಿದರು.

ಸ್ಟಿಂಗ್ ಮಾಡಿದವರನ್ನ ಬಿಟ್ಟು ಪೋಸ್ಟ್ ಮಾಡಿದವರ ಬಂಧನ!

'ರೀ ಪ್ರಿಯಾಂಕ್ ಖರ್ಗೆಯವರೇ ಸ್ಟಿಂಗ್ ಆಪರೇಷನ್ ಮಾಡಿದವರನ್ನು ಹಿಡಿಯುವುದು ಬಿಟ್ಟು ಅದರ ಬಗ್ಗೆ ಪೋಸ್ಟ್ ಹಂಚಿಕೊಂಡವರನ್ನ ಅರೆಸ್ಟ್ ಮಾಡಿದ್ದೀರಲ್ಲ ಏನು ಹೇಳಬೇಕು ನಿಮಗೆ? ಸ್ಟಿಂಗ್ ಆಪರೇಷನ್ ಪ್ರಕರಣದ ಪಾತ್ರದಾರಿಗಳು ನಿಮ್ಮದೆ ಕಾಂಗ್ರೆಸ್ ಪಕ್ಷದವರಾಗಿದ್ದಾರೆ. ಇದರಲ್ಲಿ ಭಾಗಿಯಾದವರನ್ನು, ಸ್ಟಿಂಗ್ ಮಾಸ್ಟರ್‌ಗಳ ಮೇಲೆ ಕ್ರಮ ಜರುಗಿಸಲು ನಿಮ್ಮಿಂದಾಗದೆ? ಎಂದು ಸವಾಲೆಸೆದರು.

ಇವಿಎಂ ಮೇಲೆ ಗೆದ್ದವರು ರಾಜೀನಾಮೆ ಕೊಡಲಿ:

ಇವಿಎಂ ಸರಿಯಿಲ್ಲ ಎಂದು ಹೇಳುವ ಕಾಂಗ್ರೆಸ್ ನಾಯಕರು ಇವಿಎಂ ಮೇಲೆ ಗೆದ್ದವರು ತಮ್ಮ ಸ್ಥಾನಕ್ಕೆ ಮೊದಲು ರಾಜೀನಾಮೆ ನೀಡಲಿ ಆಮೇಲೆ ಅವರು ಜ್ಞಾನೇಶಕುಮಾರ್ ರಾಜೀನಾಮೆ ಕೇಳಲಿ. ಇವಿಎಂ ಆಗಲಿ, ಎಸ್‌ಐಆರ್ ಆಗಲಿ ಅನುಮಾನವನ್ನು ಪ್ರಶ್ನಿಸಲಿಕ್ಕೂ ಅದರದ್ದೇ ಸಾಂವಿಧಾನಿಕ ವಿಧಾನಗಳಿವೆ. ಅದುಬಿಟ್ಟು ಸುಪ್ರೀಂ ಕೋರ್ಟ್‌ ವರೆಗೆ ಹೋರಾಟ ತೆಗೆದುಕೊಂಡು ಹೋಗಿದ್ದು ಸರಿಯಾ? ಈ ಹಿಂದೆ ಯಾರೂ ಇಂಥ ಯತ್ನ ಮಾಡಿರಲಿಲ್ಲ. ಆದರೆ ಕಾಂಗ್ರೆಸ್ ಅಧಿಕಾರ ಇಲ್ಲದೆ ಎಷ್ಟೊಂದು ಹತಾಶೆಗೊಂಡಿದೆ ಎಂದರೆ ದೆಹಲಿ ಹೋರಾಟ, ಗಲಾಟೆ, ಸಂಘರಷಕ್ಕೆ ಪ್ರಚೋದನೆ ನೀಡುತ್ತಿದೆ. ತಮ್ಮ ಹೊಣೆಗಾರಿಕೆ ಮರೆತು ಸರ್ಕಾರದ ವಿರುದ್ಧ, ಎಸ್‌ಐಆರ್ ವಿರುದ್ಧ ಸುಳ್ಳು,ಅಪಪ್ರಚಾರ ಮಾಡುತ್ತಿದ್ದಾರೆ. ಚುನಾವಣಾ ಆಯುಕ್ತರೇ ಹೇಳಿದ್ದಾರಲ್ಲ, ಮೊದಲು ಅಫಿಡವಿಟ್ ಸಲ್ಲಿಸಿ ಅಂತಾ? ಈ ಕಾಂಗ್ರೆಸ್ ಅಫಿಡವಿಟ್ ಸಲ್ಲಿಸದೆ, ಸಹಿ ಹಾಕದೆ, ಸರಿಯಾದ ವಿಳಾಸ ನೀಡದೆ ಸುಪ್ರೀಂ ಕೋರ್ಟ್ ವಿರುದ್ಧ ದೂರುತ್ತಿದ್ದಾರೆ ಎಂದು ವಾಗ್ದಾಳಿ ನಡಸಿದರು.

ಇನ್ನು ಇದೇ ವೇಳೆ ರಾಜ್ಯದ ಕಬ್ಬು ಬೆಳೆಗಾರರ ಪ್ರತಿಭಟನೆ ತೀ್ವ್ರಗೊಂಡಿರುವ ವಿಚಾರವಾಗಿ ಮಾತನಾಡಿದ ಸಿಟಿ ರವಿ, ಕಬ್ಬು ಬೆಳೆಗಾರರ ಹೋರಾಟ ಬೆಂಬಲಿಸಿದರು. ಸರ್ಕಾರ ರೈತರ ಹಿತವನ್ನು ಕಾಪಾಡಬೇಕು. ಗ್ರಾಹಕರಿಗೆ ಹೊರೆಯಾಗದಂತೆ ಕೂಡಾ ನೋಡಿಕೊಳ್ಳಬೇಕು

ನಮ್ಮ ಸರ್ಕಾರ ರೈತರ ಪರವಾಗಿದೆ. ಗ್ರಾಹಕರಿಗೂ ಹೆಚ್ಚಿನ ಹೊರೆಯಾಗದಂತೆ ರೈತರ ಬೇಡಿಕೆ ಈಡೇರಿಸುತ್ತದೆ ಎಂದು ಭರವಸೆ ನೀಡಿದರು.

ನಸುಕಿನ ಜಾವ 3.30ರವರೆಗೆ ನಡೆದ ಸಂಧಾನ ಸಭೆ; ಕಬ್ಬು ಬೆಳೆಗಾರರು ನೀಡಿದ ಎಚ್ಚರಿಕೆ ಏನು?

Kannadaprabha News — Tue, 20 Oct 2026 07:20:56 +0530

ಹುಬ್ಬಳ್ಳಿ: ವಿವಿಧ ಬೇಡಿಕೆಗಳನ್ನಿಟ್ಟುಕೊಂಡು ಕಬ್ಬು ಬೆಳೆಗಾರರು ನಡೆಸುತ್ತಿದ್ದ ಹೋರಾಟಕ್ಕೆ ಸದ್ಯ ಬ್ರೇಕ್‌ ಬಿದ್ದಿದೆ. ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ನೇತೃತ್ವದಲ್ಲಿ ಸೋಮವಾರ ನಸುಕಿನ ಜಾವ 3.30ರವರೆಗೂ ನಡೆದ ಸಭೆಯು ರೈತರ ಮನವೊಲಿಸುವಲ್ಲಿ ಯಶಸ್ವಿಯಾಗಿದೆ. ಈ ನಡುವೆ ಸದ್ಯಕ್ಕೆ ಹೋರಾಟವನ್ನು ಹಿಂಪಡೆದಿರುವ ಕಬ್ಬು ಬೆಳೆಗಾರರು ಬೇಡಿಕೆ ಈಡೇರಿಸಲು ನ.26ರವರೆಗೆ ಗಡವು ನೀಡಿದ್ದಾರೆ. ಅಷ್ಟರೊಳಗೆ ಬೇಡಿಕೆ ಈಡೇರದಿದ್ದಲ್ಲಿ ನ.27ರಂದು ಹುಬ್ಬಳ್ಳಿಯಲ್ಲಿ 1 ಕೋಟಿ ರೈತರೊಂದಿಗೆ ಉಗ್ರ ಹೋರಾಟ ನಡೆಸುವುದಾಗಿ ಎಚ್ಚರಿಕೆ ನೀಡಿದ್ದಾರೆ.

ಕಬ್ಬಿಗೆ ದರ ಹೆಚ್ಚಳ ಮಾಡಬೇಕು. ಪ್ರತಿಟನ್‌ಗೆ ಕನಿಷ್ಠ 5500 ರು. ದರ ನಿಗದಿ ಪಡಿಸಬೇಕು. ಸ್ವಾಮಿನಾಥನ್‌ ಆಯೋಗದ ಶಿಫಾರಸ್ಸು ಜಾರಿ ಮಾಡಬೇಕು ಎಂಬುದು ಸೇರಿದಂತೆ ಹಲವು ಬೇಡಿಕೆಗಳನ್ನು ಮುಂದಿಟ್ಟುಕೊಂಡು ಅ.13ರಂದು ಬರೋಬ್ಬರಿ 36 ಗಂಟೆ ರಾಜ್ಯದ ವಿವಿಧೆಡೆ ರಾಷ್ಟ್ರೀಯ ಹೆದ್ದಾರಿ ತಡೆಯನ್ನು ರೈತರು ನಡೆಸಿದ್ದರು. ಬಳಿಕ ಅ.14ರಿಂದ ಬೆಳಗಾವಿಯಿಂದ ಹುಬ್ಬಳ್ಳಿ ಚಲೋ ಪಾದಯಾತ್ರೆ ಆರಂಭಿಸಿದ್ದರು. ಹುಬ್ಬಳ್ಳಿಗೆ ಆಗಮಿಸಿ ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ನಿವಾಸದ ಎದುರು ಪ್ರತಿಭಟನೆ ನಡೆಸುವುದಾಗಿ ಪಾದಯಾತ್ರೆ ನಡೆಸುತ್ತಿದ್ದರು.

ಸಂಧಾನ ಸಭೆ:

ಈ ನಡುವೆ ಯರಿಕೊಪ್ಪದ ಬಳಿ ಬೆಳಗಾವಿ, ಧಾರವಾಡ ಜಿಲ್ಲಾಧಿಕಾರಿಗಳು ರೈತರೊಂದಿಗೆ ಭಾನುವಾರ ಸಭೆ ನಡೆಸಿದ್ದರು. ಆದರೆ ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ಅವರು ಸಭೆ ನಡೆಸಿ ಭರವಸೆ ನೀಡಬೇಕು ಎಂದು ರೈತರು ಪಟ್ಟು ಹಿಡಿದಿದ್ದರು. ಅದರಂತೆ ಕೇಂದ್ರ ಸಚಿವ ಜೋಶಿ ನೇತೃತ್ವದಲ್ಲಿ ಭಾನುವಾರ ತಡರಾತ್ರಿ 1ರ ಸುಮಾರಿಗೆ ಹುಬ್ಬಳ್ಳಿ ಸರ್ಕೀಟ್‌ ಹೌಸ್‌ನಲ್ಲಿ ಸಭೆ ಆರಂಭವಾಯಿತು.

ಕಬ್ಬು ಬೆಳೆಗಾರರೊಂದಿಗೆ ಸುದೀರ್ಘವಾಗಿ ಚರ್ಚೆ ನಡೆಸಿದ ಸಚಿವ ಜೋಶಿ ಅವರು, ಕಬ್ಬು ಬೆಳೆಗಾರರ ಸಮಸ್ಯೆ ಆಲಿಸಿ ಕೇಂದ್ರಕ್ಕೆ ವರದಿ ಕೊಡಲು ಸಮಿತಿ ರಚಿಸಿಯಾಗಿದೆ. ಅದು ಶೀಘ್ರದಲ್ಲೇ ರಾಜ್ಯಕ್ಕೆ ಬರಲಿದೆ. ಜತೆಗೆ ಕಬ್ಬು ಬೆಳೆಯುವ ಎಲ್ಲ ರಾಜ್ಯಗಳಿಗೂ ಭೇಟಿ ನೀಡಿ ಪರಿಶೀಲನೆ ನಡೆಸಿ ವರದಿ ಸಲ್ಲಿಸಲಿದೆ. ಬಳಿಕ ರೈತರ ಬೇಡಿಕೆಗಳನ್ನು ಈಡೇರಿಸಲು ಅಗತ್ಯ ಕ್ರಮ ಕೈಗೊಳ್ಳಲಾಗುವುದು. ಕೇಂದ್ರದ ಮೋದಿ ನೇತೃತ್ವದ ಸರ್ಕಾರ ಯಾವಾಗಲೂ ರೈತರ ಪರವಾಗಿಯೇ ಇದೆ ಎಂದು ಭರವಸೆ ನೀಡಿದರು.

ಇದಕ್ಕೆ ಒಪ್ಪಿಕೊಂಡ ಕಬ್ಬು ಬೆಳೆಗಾರರು, ಈ ಬಗ್ಗೆ ರೈತರೊಂದಿಗೆ ಚರ್ಚಿಸಿ ಅಂತಿಮ ನಿರ್ಧಾರ ಪ್ರಕಟಿಸುವುದಾಗಿ ಘೋಷಿಸಿದರು. ಸಭೆಯಲ್ಲಿ ಮಾಜಿ ಮುಖ್ಯಮಂತ್ರಿ, ಬೆಳಗಾವಿ ಸಂಸದ ಜಗದೀಶ ಶೆಟ್ಟರ್‌, ಶಾಸಕ ಸಿ.ಸಿ.ಪಾಟೀಲ, ಮಹೇಶ ಟೆಂಗಿನಕಾಯಿ, ಕಬ್ಬು ಬೆಳೆಗಾರರ ಸಂಘದ ಅಧ್ಯಕ್ಷ ಚೂನಪ್ಪ ಪೂಜಾರಿ, ಶಶಿಕಾಂತ ಗುರೂಜಿ, ರಾಜೇಂದ್ರ ಗಡದರಿ, ನಿತಿನ್ ಮ್ಯಾಗೇರಿ, ಪ್ರೇಮ್ ಚೌಗುಲಾ, ಮಹಾಲಿಂಗಪ್ಪ ತೇಲಿ, ಮಲ್ಲಪ್ಪ ಅಂಗಡಿ ಹಾಗೂ ಕಿಶನ್ ನಂದಿ ಮತ್ತಿತರರು ಇದ್ದರು.

ಸರ್ಕಾರಕ್ಕೆ ಗಡುವು

ಈ ನಡುವೆ ಕಬ್ಬು ಬೆಳೆಗಾರರು ಹೋರಾಟ ನಡೆಸುತ್ತಿರುವ ಧಾರವಾಡ ತಾಲೂಕಿನ ಯರಿಕೊಪ್ಪದ ಬಳಿ ಮತ್ತೆ ಸೋಮವಾರ ಬೆಳಿಗ್ಗೆ 11ರ ಸುಮಾರಿಗೆ ರೈತರು ಸಭೆ ನಡೆಸಿದರು. ಎಂಎಸ್‌ಪಿ ಘೋಷಣೆಗೆ ಕೇಂದ್ರ ಸಚಿವರು ಕಾಲಾವಕಾಶ ಕೇಳಿದ್ದಾರೆ. ಅವರ ಮಾತಿಗೆ ಬೆಲೆಕೊಟ್ಟು ಸದ್ಯಕ್ಕೆ ಪ್ರತಿಭಟನೆ ಹಿಂಪಡೆಯೋಣ. ನ.26ರವರೆಗೆ ಕೇಂದ್ರ ಹಾಗೂ ರಾಜ್ಯ ಸರ್ಕಾರಕ್ಕೆ ಗಡುವು ನೀಡೋಣ ಎಂದು ರೈತ ಮುಖಂಡರು ತಿಳಿಸಿದರು.

ಇದರೊಂದಿಗೆ ಬೆಳಗಾವಿಯಲ್ಲಿ ನಾಲ್ಕೈದು ದಿನಗಳಲ್ಲಿ ಕಾರ್ಖಾನೆಯ ಮಾಲೀಕರ ಹಾಗೂ ರೈತರ ಮುಖಂಡರ ಸಭೆ ನಡೆಸಬೇಕು. ಸಕ್ಕರೆ ಕಾರ್ಖಾನೆಯಿಂದ ಯಾವುದೇ ಕಾರಣಕ್ಕೂ ಸಕ್ಕರೆ ಹೊರಗೆ ಹೋಗದಂತೆ ನೋಡಿಕೊಳ್ಳಬೇಕು. ನ.26ರೊಳಗೆ ಸಮಸ್ಯೆ ಬಗೆಹರಿಸದಿದ್ದಲ್ಲಿ ನ.27ರಂದು 1 ಕೋಟಿ ರೈತರನ್ನು ಸೇರಿಸಿ ಹುಬ್ಬಳ್ಳಿಯಲ್ಲಿ ಮತ್ತೆ ಹೋರಾಟ ಆರಂಭಿಸೋಣ ಎಂದು ಎಚ್ಚರಿಕೆಯನ್ನು ರೈತರ ಸಭೆಯಲ್ಲಿ ನೀಡಲಾಯಿತು.

ಅದರಂತೆ ಇದೀಗ ನ.26ರವರೆಗೆ ಗಡವು ನೀಡಿರುವ ರೈತರು, ಅಲ್ಲಿವರೆಗೂ ಕೇಂದ್ರ ನೇಮಿಸಿರುವ ಸಮಿತಿ ಬರಬೇಕು. ಅದು ತನ್ನ ವರದಿಯನ್ನೂ ನೀಡಬೇಕು. ಜತೆಗೆ ಕೇಂದ್ರ ಸರ್ಕಾರ ಕೂಡ ದರ ಏರಿಕೆ ಘೋಷಣೆಯನ್ನು ಅಷ್ಟರೊಳಗೆ ಮಾಡಬೇಕು ಎಂದು ಸಭೆಯಲ್ಲಿ ನಿರ್ಣಯ ಕೈಗೊಳ್ಳಲಾಯಿತು.

ಶೀಘ್ರದಲ್ಲಿ ಸಮಿತಿ ಭೇಟಿ

ರೈತ ಮುಖಂಡರ ಜೊತೆ ಸೌಹಾರ್ದಯುತವಾಗಿ ಸಭೆ ನಡೆದಿದೆ. ಕೇಂದ್ರ ಸರ್ಕಾರ ಸಮಿತಿ ರಚನೆ ಮಾಡಿದ್ದು, ಅದು ರಾಜ್ಯಕ್ಕೆ ಭೇಟಿ ನೀಡಬೇಕೆಂದರೆ ಹೋರಾಟ ನಿಲ್ಲಿಸಬೇಕು ಎನ್ನುವ ಕುರಿತು ತಿಳಿಸಲಾಗಿದೆ. ಅದಕ್ಕೆ ರೈತ ಮುಖಂಡರು ಸಕಾರಾತ್ಮಕವಾಗಿ ಸ್ಪಂದಿಸಿದ್ದಾರೆ. ಶೀಘ್ರದಲ್ಲೇ ಸಮಿತಿ ಬಂದು ರೈತರ ಸಮಸ್ಯೆ ಆಲಿಸಲಿದೆ.

- ಪ್ರಹ್ಲಾದ ಜೋಶಿ, ಕೇಂದ್ರ ಸಚಿವ

1 ಕೋಟಿ ರೈತರಿಂದ ಹೋರಾಟ

ಎಂಎಸ್‌ಪಿ ಘೋಷಣೆ ಸೇರಿದಂತೆ ವಿವಿಧ ಸಮಸ್ಯೆ ಬಗೆಹರಿಸಲು ಕೇಂದ್ರ ಸಚಿವರು ಸಮಯ ಕೇಳಿದ್ದಾರೆ. ಅದರಂತೆ ಸದ್ಯಕ್ಕೆ ಹೋರಾಟ ಹಿಂಪಡೆದಿದ್ದೇವೆ. ನಮ್ಮ ಬೇಡಿಕೆ ಈಡೇರಿಸಲು ನ.26ರವರೆಗೆ ಗಡುವು ನೀಡಲಾಗಿದೆ. ಅಷ್ಟರಲ್ಲೇ ನಮ್ಮ ಬೇಡಿಕೆ ಈಡೇರಿಸಬೇಕು. ಬೇಡಿಕೆ ಈಡೇರದಿದ್ದಲ್ಲಿ ನ.27ರಂದು 1 ಕೋಟಿ ರೈತರೊಂದಿಗೆ ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ಅವರ ಮನೆಗೆ ಮುತ್ತಿಗೆ ಹಾಕುತ್ತೇವೆ.

- ಚೂನಪ್ಪ ಪೂಜಾರಿ, ಕಬ್ಬು ಹೋರಾಟಗಾರ

--ಏನೇನಾಯ್ತು?

- ಕಬ್ಬು ಬೆಳೆಗಾರರ ಮುಖಂಡರ ಜತೆ ಧಾರವಾಡ, ಬೆಳಗಾವಿ ಜಿಲ್ಲಾಧಿಕಾರಿಗಳಿಂದ ಭಾನುವಾರ ಸಭೆ

- ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ಅವರೇ ಸಭೆ ನಡೆಸಿ ಭರವಸೆ ನೀಡಬೇಕು ಎಂದು ರೈತರ ಬಿಗಿಪಟ್ಟು

- ಅದರಂತೆ ಭಾನುವಾರ ತಡ ರಾತ್ರಿ 1ಕ್ಕೆ ಹುಬ್ಬಳ್ಳಿ ಸರ್ಕೀಟ್‌ ಹೌಸ್‌ನಲ್ಲಿ ರೈತರು- ಜೋಶಿ ಮಧ್ಯೆ

- ರೈತರ ಬೇಡಿಕೆಗಳನ್ನು ಸುದೀರ್ಘವಾಗಿ ಆಲಿಸಿದ ಜೋಶಿ ಹಾಗೂ ಬಿಜೆಪಿ ಇತರೆ ಜನಪ್ರತಿನಿಧಿಗಳು

- ಕಬ್ಬು ಬೆಳೆಗಾರರ ಸಮಸ್ಯೆ ಆಲಿಸಲು ಸಮಿತಿ ರಚಿಸಲಾಗಿದೆ. ಅದು ವರದಿ ಕೊಡಲಿ ಎಂದ ಜೋಶಿ

- ಮೋದಿ ಸರ್ಕಾರ ರೈತರ ಪರವಾಗಿದ್ದು, ವರದಿ ಬಳಿಕ ಬೇಡಿಕೆ ಈಡೇರಿಕೆಗೆ ಕ್ರಮ ಎಂದು ಆಶ್ವಾಸನೆ

- ಹೋರಾಟ ಹಿಂಪಡೆಯುವ ಕುರಿತು ರೈತರ ಜತೆ ಚರ್ಚಿಸುವುದಾಗಿ ಹೇಳಿದ ರೈತ ಮುಖಂಡರು

- ಸೋಮವಾರ ಬೆಳಗ್ಗೆ 11ಕ್ಕೆ ರೈತರ ಸಭೆ. ನ.26ರವರೆಗೂ ಗಡುವು ನೀಡಲು ನಿರ್ಧರಿಸಿ ಹೋರಾಟ ಅಂತ್ಯ

ಬೇಗ ಮಧ್ಯಪ್ರವೇಶ ಮಾಡಿ: ಪ್ರಧಾನಿಗೆ ಡಿಕೆಶಿಯಿಂದ ಪತ್ರ

ಬೆಂಗಳೂರು: ರಾಜ್ಯಾದ್ಯಂತ ಕಬ್ಬು ಬೆಳೆಗಾರರ ಹೋರಾಟ ತೀವ್ರಗೊಂಡಿದ್ದು, ಸದ್ಯದಲ್ಲೇ ಕಬ್ಬು ಅರೆಯುವ ಋತು ಆರಂಭವಾಗಲಿದೆ. ಹೀಗಾಗಿ ರಾಜ್ಯ ಕಬ್ಬು ಬೆಳೆಗಾರರ ಬೇಡಿಕೆಗಳಿಗೆ ಸಂಬಂಧಿಸಿದಂತೆ ಕೇಂದ್ರ ಸರ್ಕಾರ ತುರ್ತಾಗಿ ಮಧ್ಯಪ್ರವೇಶಿಸಬೇಕು ಎಂದು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್‌ ಅವರು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಪತ್ರ ಬರೆದಿದ್ದಾರೆ. ಸಕ್ಕರೆಯ ಕನಿಷ್ಠ ಮಾರಾಟ ಬೆಲೆ ಪರಿಷ್ಕರಣೆ, ಗೃಹ ಮತ್ತು ವಾಣಿಜ್ಯ ಸಕ್ಕರೆಗೆ ಪ್ರತ್ಯೇಕ ಎಂಎಸ್ಪಿ ನಿಗದಿ, ಎಫ್ಆರ್‌ಪಿ ಮೂಲ ಇಳುವರಿಯನ್ನು ಶೇ. 9.50ಕ್ಕೆ ಮರುನಿಗದಿ ಮಾಡುವುದು. ಕಬ್ಬು ಆಧಾರಿತ ಎಥನಾಲ್ ಬೆಲೆಯನ್ನು ಹೆಚ್ಚಿಸುವುದು ಸೇರಿದಂತೆ ವಿವಿಧ ಬೇಡಿಕೆಗಳನ್ನು ತುರ್ತಾಗಿ ಪರಿಗಣಿಸಿ ಈಡೇರಿಸುವಂತೆ ಪತ್ರದಲ್ಲಿ ಮನವಿ ಮಾಡಿದ್ದಾರೆ.

ಸ್ಟಿಂಗ್ ಆಪರೇಷನ್, ಆರೆಸ್ಸೆಸ್, ರಾಹುಲ್ ಗಾಂಧಿ ಸೀಕ್ರೆಟ್ ವಿದೇಶ ಪ್ರವಾಸ... ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಮಹತ್ವದ ಹೇಳಿಕೆ!

Ravi Janekal — Sun, 25 Oct 2026 14:12:30 +0530

ಹುಬ್ಬಳ್ಳಿ (ಅ.25): ರಾಜ್ಯದಲ್ಲಿ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ವಿರುದ್ಧ ನಡೆದಿದೆ ಎನ್ನಲಾದ ಸ್ಟಿಂಗ್ ಆಪರೇಷನ್‌ನಿಂದಾಗಿ ಕಾಂಗ್ರೆಸ್ ಪಕ್ಷದೊಳಗೆ ಕೋಲಾಹಲ ಸೃಷ್ಟಿಸಿದ್ದಾರೆ. ಸಿದ್ದರಾಮಯ್ಯ 'ಇದು ನಮ್ಮ ಸರ್ಕಾರವಲ್ಲ' ಎಂದು ಅಸಮಾಧಾನಗೊಂಡಿದ್ದಾರೆ. ಇನ್ನೊಂದೆ ಆರೆಸ್ಸೆಸ್ ಪಥಸಂಚಲನ ವಿಚಾರದಲ್ಲಿ ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ಮತ್ತೆ ಸುದ್ದಿಯಲ್ಲಿದ್ದಾರೆ. ಈ ಎರಡೂ ವಿಚಾರಗಳಿಗೆ ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಅವರು ಹುಬ್ಬಳ್ಳಿಯಲ್ಲಿ ಪ್ರತಿಕ್ರಿಯಿಸಿದ್ದಾರೆ. ಸ್ಟಿಂಗ್ ಆಪರೇಷನ್, ಆರೆಸ್ಸೆಸ್ ಪಥಸಂಚಲನ ಕುರಿತಾಗಿ ಏನು ಹೇಳಿದರೂ ನೋಡೋಣ.

ಸ್ಟಿಂಗ್ ಆಪರೇಷನ್ ಸೂತ್ರಧಾರಿಯನ್ನ ಮೊದಲು ಬಂಧಿಸಿ

ಸ್ಟಿಂಗ್ ವಿಚಾರದಲ್ಲಿ ರಾಜ್ಯ ಸರ್ಕಾರ ಇಬ್ಬಗೆ ನೀತಿ ಅನುಸರಿಸುತ್ತಿದೆ. ವಿಡಿಯೋ ಶೇರ್ ಮಾಡಿದವರನ್ನು ಬಂಧಿಸಿದೆ. ಇನ್ನು ಕೆಲವರನ್ನ ಬಂಧಿಸುವ ಯತ್ನ ನಡೆಯುತ್ತಿದೆ. ಸ್ಟಿಂಗ್ ಆಪರೇಷನ್ ನಡೆಸಿರೋದು ಸ್ವಪಕ್ಷದವರೇ ಎಂದು ಯತೀಂದ್ರ ಸಿದ್ದರಾಮಯ್ಯ ಹೇಳಿದ್ದಾರೆ. ಕಾಂಗ್ರೆಸ್‌ನ ಮಹಿಳಾ ಮುಖಂಡರೊಬ್ಬರಿಗೆ ಪೊಲೀಸರು ಶೋಕಾಸ್ ನೋಟಿಸ್ ನೀಡಿದ್ದಾರೆ. ಆದರೆ ಸ್ಟಿಂಗ್ ಆಪರೇಷನ್ ಮೂಲ ಸೂತ್ರಧಾರಿಯನ್ನು ಬಂಧಿಸಿಲ್ಲ ಇದು ಕಾಂಗ್ರೆಸ್‌ನ ಡಬಲ್ ಸ್ಟಾಂಡರ್ಡ್ ನೀತಿ ತೋರಿಸುತ್ತಿದೆ. ಮೊದಲು ಆ ಸೂತ್ರಧಾರಿಯನ್ನ ಬಂಧಿಸಿ ಎಂದು ಆಗ್ರಹಿಸಿದರು.

ಸಿದ್ದರಾಮಯ್ಯರನ್ನ ಅವಮಾನಿಸಲು, ಅವರ ತೇಜೋವಧೆ ಮಾಡಲು ಪಕ್ಕಾ ಪ್ಲಾನ್ ಮಾಡಿದವರು ಯಾರು? ಎಂದು ಪ್ರಶ್ನಿಸಿದ ಸಚಿವರು, ವೀಡಿಯೋ ದಲ್ಲಿ ಕಾಣಿಸಿಕೊಂಡ ಮಹಿಳೆ ಯೂ ಟರ್ನ್ ವಿಚಾರದ ಬಗ್ಗೆಯೂ ಪ್ರಸ್ತಾಪಿಸಿ, ಆ ಮಹಿಳೆಗೆ ಈಗ ಸೂತ್ರಧಾರಿಗಳು ಏನು ಹೇಳಿಕೊಟ್ಟಿದ್ದಾರೋ ಅದನ್ನು ಹೇಳಿರುತ್ತಾಳೆ. ಬೋಗಸ್ ಹೊಸ ಕಥೆ ಕಟ್ಟಿ ಹಳೆಯ ಪ್ರಕರಣ ಮುಚ್ಚಿಹಾಕಲು ಸಾಧ್ಯವಿಲ್ಲ. ಹಾಗಾದ್ರೆ ಈ ಹಿಂದೆ ಈ ಮಹಿಳೆಯೇ ಯಾಕೆ ಹಾಗೆ ಹೇಳಿದ್ದರು? ಈಗ್ಯಾಕೆ ಯುಟರ್ನ್ ಹೇಳಿಕೆ ನೀಡುತ್ತಿದ್ದಾಳೆ? ಇದೆಲ್ಲವೂ ತನಿಖೆಯಾಗಬೇಕು ಎಂದು ಆಗ್ರಹಿಸಿದರು.

ಕಾಂಗ್ರೆಸ್‌ ಸರ್ಕಾರದಿಂದ ದ್ವೇಷದ ರಾಜಕಾರಣ: ಪ್ರಲ್ಹಾದ್ ಜೋಶಿ ಕಿಡಿ

ಆರೆಸ್ಸೆಸ್ ವಿಚಾರದಲ್ಲಿ ಕಾಂಗ್ರೆಸ್ ಸರ್ಕಾರ ದ್ವೇಷದ ರಾಜಕಾರಣ ಮಾಡುತ್ತಿದೆ. ಪಥಸಂಚಲನಕ್ಕೆ ಕೆಲವೆಡೆ ಅನುಮತಿ ನೀಡಿಲ್ಲ. ನೀತಿ ಸಂಹಿತೆ ನೆಪ ಹೇಳಲಾಗಿದೆ. ಆದರೆ ಚುನಾವಣೆ ನೀತಿ ಸಂಹಿತೆ ಇದ್ದರೂ ಹುಬ್ಬಳ್ಳಿಯಲ್ಲಿ ಅನುಮತಿ ನೀಡಿದ್ದಾರೆ. ಆರೆಸ್ಸೆಸ್ ಪಥಸಂಚಲನ ಇಂದು ನಿನ್ನೆಯದಲ್ಲ, ಕಳೆದ 70 ವರ್ಷಗಳಿಂದಲೂ ದೇಶಾದ್ಯಂತ ಪಥಸಂಚಲನ ನಡೆದಿದೆ. ಬೇರೆಯವರಿಗೆ ಸಹಿಷ್ಣು ಪಾಠ ಮಾಡುವ ಕಾಂಗ್ರೆಸ್ ವಾಸ್ತವದಲ್ಲಿ ಅದೇ ಪಕ್ಷವೇ ದ್ವೇಷದ ರಾಜಕಾರಣ ಮಾಡುತ್ತಿದೆ. ಪಥಸಂಚಲನಕ್ಕೆ ಕಳೆದ ಬಾರಿಯೂ ಅಡ್ಡಿಪಡಿಸಿದ್ದರು. ಈ ಬಾರಿಯೂ ಕೋಡ್ ಆಫ್ ಕಂಡಕ್ಟ್ ಅಂತ ಅನೇಕ ಕಡೆ ಕಾರಣ ನೀಡಿ ಅನುಮತಿ ನೀಡಿಲ್ಲ. ಆದರೆ ಹುಬ್ಬಳ್ಳಿಯಲ್ಲಿ ಇವತ್ತು ಪಥಸಂಚಲನ ಇದೆ. ಇಲ್ಲಿ ಚುನಾವಣೆಯೂ ನಡೆದಿದೆ. ಆದರೂ ಇಲ್ಲಿನ ಪೊಲೀಸರು ಅನುಮತಿ ನೀಡಿದ್ದಾರೆ ಎಂದರು.

ಸ್ಟಿಂಗ್ ವಿಷಯ ಡೈವರ್ಟ್ ಮಾಡಲು ಆರೆಸ್ಸೆಸ್ ವಿಚಾರ ಮುನ್ನಲೆಗೆ

ಕಾಂಗ್ರೆಸ್ ಸರ್ಕಾರ ಸ್ಟಿಂಗ್ ವಿಚಾರವನ್ನು ಡೈವರ್ಟ್ ಮಾಡಲು ಆರೆಸ್ಸೆಸ್ ವಿಚಾರ ಎಳೆದು ತರುವ ಪ್ರಯತ್ನ ಮಾಡ್ತಿದೆ. ಸ್ಟಿಂಗ್ ಹಿಂದೆ ಯಾರಿದ್ದಾರೆ? ನಿಮ್ಮದೇ ಪಕ್ಷದ ನಾಯಕರು. ಇದನ್ನ ಯತೀಂದ್ರ ಅವರೇ ಓಪನ್ ಆಗಿ ಹೇಳಿದ್ದಾರೆ. ಇದರಿಂದ ಗೊತ್ತಾಗುತ್ತಿದೆ ಕಾಂಗ್ರೆಸ್‌ನಲ್ಲಿ ಬೆಂಕಿ ಹೊತ್ತಿಕೊಂಡು ಉರಿಯುತ್ತಿದೆ. ಈಗ ಇವರ ಪರಿಸ್ಥಿತಿ ಹೇಗಾಗಿದೆ ಎಂದರೆ ಜ್ವಾಲಾಮುಖಿ ಕೆಳಗೆ ಕುಳಿತಂತಾಗಿದೆ. ಹೀಗಾಗಿ ಸ್ಟಿಂಗ್ ವಿಚಾರ ಡೈವರ್ಟ್ ಮಾಡಲು ಈ ರೀತಿ ಮಾಡ್ತಿದ್ದಾರೆ ಎಂದು ಆರೋಪಿಸಿದರು.

ಇನ್ನು ರಾಹುಲ್ ಗಾಂಧಿ ವಿದೇಶಕ್ಕೆ ಹಾರಿದ ವಿಚಾರ ಪ್ರಸ್ತಾಪಿಸಿದ ಸಚಿವರು, ರಾಹುಲ್ ಗಾಂಧಿ ಸೋಲಿನ ಸೆಂಚುರಿ ಬಾರಿಸಿದ್ದಾರೆ. ದೆಹಲಿ ಪ್ರತಿಭಟನೆ ವಿಫಲವಾಗುತ್ತಿದ್ದಂತೆ ರಾಹುಲ್ ಗಾಂಧಿ ವಿದೇಶಕ್ಕೆ ಹೋಗಿದ್ದಾರೆ. ಅವರು ಎಲ್ಲಿ ಹೋಗಿದ್ದಾರೆ, ಯಾಕೆ ಹೋಗಿದ್ದಾರೆ ಅಂತಾ ಯಾರಿಗೂ ಗೊತ್ತಿಲ್ಲ. ಸಿಕ್ರೇಟ್ ಆಗಿ ಎಲ್ಲಿ ಹೋಗ್ತಿದ್ತಾರೆ, ಯಾರನ್ನು ಭೇಟಿ ಮಾಡ್ತಿದ್ದಾರೆ? ವಿರೋಧ ಪಕ್ಷದ ನಾಯಕರಾಗಿ ಹೊಣೆಗಾರಿಕೆ ಇಲ್ಲದೆ ಇದನ್ನೆಲ್ಲ ಅವರು ಯಾಕೆ ಮಾಡುತ್ತಿದ್ದಾರೆ. ಹೋಗಿರುವ ವಿವರಗಳನ್ನೆಲ್ಲ ಯಾಕೆ ಮುಚ್ಚಿಡುತ್ತಿದ್ದಾರೆ.? ಎಂದು ಪ್ರಶ್ನಿಸಿದರು.

Hubballi-Ankola Line: 25 ವರ್ಷಗಳಿಂದ ನನೆಗುದಿಗೆ ಬಿದ್ದಿದ್ದ ಹುಬ್ಬಳ್ಳಿ-ಅಂಕೋಲಾ ರೈಲು ಮಾರ್ಗ ಶೀಘ್ರ!

Kannadaprabha News — Tue, 20 Oct 2026 06:20:52 +0530

ಶಂಕರ ಭಟ್ಟ ತಾರೀಮಕ್ಕಿ

ಯಲ್ಲಾಪುರ ಅ.20): ಹುಬ್ಬಳ್ಳಿ- ಅಂಕೋಲಾ ೧೬೩ ಕಿಮೀ ಉದ್ದದ ಜೋಡಿ ವಿದ್ಯುತ್ ರೈಲು ಮಾರ್ಗಕ್ಕೆ ನೈರುತ್ಯ ರೈಲ್ವೆ ವಲಯ ಅಧಿಸೂಚನೆ ಹೊರಡಿಸಿದ ಪರಿಣಾಮ ಭೂಸ್ವಾಧೀನ ಪ್ರಕ್ರಿಯೆಗೆ ಚಾಲನೆ ದೊರೆತಂತಾಗಿದೆ. ಈಗಾಗಲೇ ರಾಜ್ಯ ಸರ್ಕಾರ ಹಿರಿಯ ಕೆಎಎಸ್ ಅಧಿಕಾರಿಯೊಬ್ಬರನ್ನು ಭೂಸ್ವಾಧೀನ ಪ್ರಕ್ರಿಯೆಗೆ ನೇಮಿಸಿದ ಕುರಿತು ಮಾಹಿತಿ ಲಭಿಸಿದೆ. ಇದರಿಂದ ಶತಮಾನದ ಯೋಜನೆ ಶೀಘ್ರದಲ್ಲಿ ಜಾರಿಯಾಗಬಹುದೆಂಬ ಕನಸು ನನಸಾಗುವ ಲಕ್ಷಣ ಕಂಡುಬಂದಿದೆ.

25 ವರ್ಷಗಳ ಕಾಯುವಿಕೆಗೆ ಸಿಕ್ತು ಮುಕ್ತಿ!

1997-98ರಲ್ಲಿ ಮಂಜೂರಾಗಿದ್ದ ಈ ಯೋಜನೆಯನ್ನು ಅಂದಿನ ಪ್ರಧಾನಿ ವಾಜಪೇಯಿಯವರು ೨೦೦೦ರಲ್ಲಿ ಶಿಲಾನ್ಯಾಸ ನೆರವೇರಿಸಿ ಕಲಘಟಗಿವರೆಗೆ ಕಾಮಗಾರಿ ಪ್ರಾರಂಭಗೊಂಡಿತ್ತು. ಆದರೆ ಅನೇಕ ಪರಿಸರವಾದಿಗಳು ಮತ್ತು ಹಲವರು ಸೇರಿ ನ್ಯಾಯಾಲಯದಲ್ಲಿ ತಕರಾರು ಸಲ್ಲಿಸಿದ ಪರಿಣಾಮ ಇತ್ಯರ್ಥವಾಗದೇ ಕಳೆದ 25 ವರ್ಷಗಳ ಕಾಲ ಆಗಾಗ ಚರ್ಚೆಯಾಗುತ್ತಲೇ ಇತ್ತು.

ಭೂಸ್ವಾಧೀನ ಪ್ರಕ್ರಿಯೆಗೆ ಅಧಿಸೂಚನೆ

ಆದರೆ, ಯೋಜನೆ ಕಾರ್ಯರೂಪಕ್ಕೆ ಬರುವ ಯಾವ ಲಕ್ಷಣವೂ ಇಲ್ಲವಾಗಿತ್ತು. ಆದರೆ ಕೆಲವು ವರ್ಷಗಳ ಹಿಂದೆ ನ್ಯಾಯಾಲಯ ಅನುಮತಿ ನೀಡಿದ ಪರಿಣಾಮ ಪುನಃ ಯೋಜನೆಯ ಪ್ರಕ್ರಿಯೆಗೆ ಚಾಲನೆ ಸಿಕ್ಕಿತ್ತು. ಸಣ್ಣಪುಟ್ಟ ಕಾರಣಗಳಿಂದ ವಿಳಂಬವಾಗುತ್ತಲೇ ಸಾಗಿತ್ತು. ಈಗ ಭೂಸ್ವಾಧೀನ ಪ್ರಕ್ರಿಯೆಗೆ ಅಧಿಸೂಚನೆ ನೀಡಿರುವುದರಿಂದ ಹೊಸ ಭರವಸೆ ಈ ಪ್ರದೇಶದ ಜನರಿಗೆ ಮೂಡಿದೆ.

ಪ್ರಾರಂಭದಲ್ಲಿ ಈ ಯೋಜನೆಗೆ ₹483 ಕೋಟಿ ವೆಚ್ಚ ತಗುಲಬಹುದೆಂದು ಅಂದಾಜಿಸಲಾಗಿತ್ತು. ಆದರೆ ಅದೀಗ ₹16,435 ಕೋಟಿಗೆ ತಲುಪಿದೆ. ಇದಕ್ಕಾಗಿ 596 ಎಕರೆ ಖಾಸಗಿ ಜಮೀನು, 470 ಎಕರೆ ಸರ್ಕಾರಿ ಜಮೀನು, 1466 ಎಕರೆ ಅರಣ್ಯ ಪ್ರದೇಶ ಈ ಯೋಜನೆಗೆ ಅಗತ್ಯವಾಗಿದ್ದು, ಈ ಜಮೀನನ್ನು ಭೂಸ್ವಾದೀನ ಪ್ರಕ್ರಿಯೆ ಮೂಲಕ ರೈಲ್ವೆ ಮಂಡಳಿ ಪಡೆಯಲಿದೆ. ಈ ಅಧಿಸೂಚನೆಯ ಕುರಿತು ನೈರುತ್ಯ ವಲಯ ರೈಲ್ವೆ ಮಂಡಳಿ ಸಮಿತಿ ಸದಸ್ಯ ಮಹೇಂದ್ರ ಸಿಂಘಿ ಮಾಹಿತಿ ನೀಡಿದ್ದಾರೆ.

ಹುಬ್ಬಳ್ಳಿ-ಕರಾವಳಿಗೆ ಏಕೆ ಮುಖ್ಯ

ಹುಬ್ಬಳ್ಳಿ ಮತ್ತು ಕರಾವಳಿಗೆ ಈ ಯೋಜನೆಯಿಂದ ಉದ್ಯೋಗ, ವ್ಯವಹಾರಕ್ಕೆ ಹೆಚ್ಚಿನ ಅನುಕೂಲವಾಗಲಿದೆ. ಕಲಘಟಗಿ, ಯಲ್ಲಾಪುರ, ಅಂಕೋಲಾ ಈ ಮೂರೂ ತಾಲೂಕಿನ ಮೂಲಕ ಮಾರ್ಗ ಸಾಗಿದ್ದು, ಹುಬ್ಬಳ್ಳಿ, ಅಂಕೋಲಾ ರಾಷ್ಟ್ರೀಯ ಹೆದ್ದಾರಿಯ ಮೇಲೆ ಸಂಚರಿಸುವ ಜನರೂ ನಿಟ್ಟುಸಿರು ಬಿಡುವಂತಾಗಿದೆ.

ದಿನನಿತ್ಯ ಈ ಹೆದ್ದಾರಿಯಲ್ಲಿ ೧೦ರಿಂದ ೧೫ ಸಾವಿರ ವಾಹನ ಅದರಲ್ಲೂ ಸಿಲಿಂಡರ್, ಭಾರೀ ವಾಹನ ಸೇರಿದಂತೆ ನಿತ್ಯವೂ ಸಾವಿರಾರು ಭಾರೀ ವಾಹನಗಳು ಸಂಚರಿರುವುದರಿಂದ ಸದಾ ಈ ರಸ್ತೆ ಅಪಘಾತದ ಕೇಂದ್ರವಾಗಿ ಪರಿಣಮಿಸಿತ್ತು. ಪೊಲೀಸರಿಗೆ ಸದಾ ರಸ್ತೆ ತೆರವು ಮಾಡುವ ಪ್ರಕ್ರಿಯೆಯೇ ದೊಡ್ಡ ಸವಾಲಾಗಿತ್ತು. ಈ ರೈಲ್ವೆ ಯೋಜನೆಯಿಂದ ಭಾರೀ ವಾಹನಗಳು ಸಂಚರಿಸುವುದು ಕಡಿಮೆಯಾಗುತ್ತದೆಂಬ ವಿಶ್ವಾಸ ಯಲ್ಲಾಪುರದ ನಾಗರಿಕರಿಗೆ ಮೂಡಿದೆ.

ಮುಂದಿನ 3 ಗಂಟೆಗಳಲ್ಲಿ ರಾಜ್ಯದ 5 ಜಿಲ್ಲೆಗಳಿಗೆ ಮಳೆ ಅಲರ್ಟ್: ಗುಡುಗು, ಬಿರುಗಾಳಿ ಸಹಿತ ಮಳೆಯಾಗುವ ಸಾಧ್ಯತೆ

Santosh Naik — Tue, 06 Oct 2026 18:05:18 +0530

ಬೆಂಗಳೂರು (ಅ.6): ರಾಜ್ಯದ ಹಲವು ಭಾಗಗಳಲ್ಲಿ ಹವಾಮಾನ ವೈಪರೀತ್ಯ ಉಂಟಾಗಿದ್ದು, ಮುಂದಿನ 3 ಗಂಟೆಗಳ ಅವಧಿಯಲ್ಲಿ ರಾಜ್ಯದ ಐದು ಪ್ರಮುಖ ಜಿಲ್ಲೆಗಳಲ್ಲಿ ಗುಡುಗು ಸಹಿತ ಮಳೆಯಾಗುವ ಸಾಧ್ಯತೆಯಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.

ಹವಾಮಾನ ಇಲಾಖೆಯ ಮಾಹಿತಿಯಂತೆ ಬೆಂಗಳೂರು ನಗರ, ಬೆಂಗಳೂರು ಗ್ರಾಮಾಂತರ, ತುಮಕೂರು, ಧಾರವಾಡ ಹಾಗೂ ಉತ್ತರ ಕನ್ನಡ ಜಿಲ್ಲೆಗಳಲ್ಲಿ ವಾತಾವರಣ ಬದಲಾಗಲಿದ್ದು, ಪ್ರತ್ಯೇಕ ಸ್ಥಳಗಳಲ್ಲಿ ಗುಡುಗು, ಸಿಡಿಲು ಸಹಿತ ಹಗುರದಿಂದ ಸಾಧಾರಣ ಮಳೆಯಾಗುವ ನಿರೀಕ್ಷೆಯಿದೆ.

ಬೀಸಲಿದೆ ಬಲವಾದ ಬಿರುಗಾಳಿ, ವಿದ್ಯುತ್ ವ್ಯತ್ಯಯ ಸಾಧ್ಯತೆ

ಮಳೆಯ ಜೊತೆಗೆ ವಾತಾವರಣದಲ್ಲಿ ಭಾರಿ ಗಾಳಿಯ ಒತ್ತಡ ಸೃಷ್ಟಿಯಾಗಲಿದ್ದು, ಗಂಟೆಗೆ 30 ರಿಂದ 40 ಕಿಲೋಮೀಟರ್ ವೇಗದಲ್ಲಿ ಬಿರುಗಾಳಿ ಬೀಸುವ ಸಾಧ್ಯತೆಯಿದೆ. ಭಾರಿ ಮಳೆಯಿಂದಾಗಿ ನಗರ ಹಾಗೂ ಗ್ರಾಮಾಂತರ ಪ್ರದೇಶಗಳ ತಗ್ಗು ಪ್ರದೇಶಗಳಲ್ಲಿ ನೀರು ನಿಂತು ವಾಹನ ಸಂಚಾರಕ್ಕೆ ಅಡಚಣೆ ಉಂಟಾಗಬಹುದು. ಗಾಳಿ ಮತ್ತು ಸಿಡಿಲಿನ ಆರ್ಭಟಕ್ಕೆ ಮರದ ಕೊಂಬೆಗಳು ಮುರಿದು ವಿದ್ಯುತ್ ತಂತಿಗಳ ಮೇಲೆ ಬೀಳುವ ಸಾಧ್ಯತೆಯಿರುವುದರಿಂದ ಕೆಲವೆಡೆ ವಿದ್ಯುತ್ ಪೂರೈಕೆಯಲ್ಲಿ ವ್ಯತ್ಯಯವಾಗಬಹುದು.ಬಿರುಗಾಳಿಯ ರಭಸಕ್ಕೆ ಹಳೆಯ ಅಥವಾ ದುರ್ಬಲ ಮರದ ಕೊಂಬೆಗಳು ಮುರಿದು ಬೀಳುವ ಅಪಾಯವಿದೆ.

ಸಾರ್ವಜನಿಕರಿಗೆ ಮುನ್ನೆಚ್ಚರಿಕಾ ಸೂಚನೆಗಳು

ಮಳೆ ಹಾಗೂ ಸಿಡಿಲ ಆರ್ಭಟದ ಹಿನ್ನೆಲೆಯಲ್ಲಿ ಸಾರ್ವಜನಿಕರು ಹಾಗೂ ವಾಹನ ಸವಾರರು ಜಾಗರೂಕರಾಗಿರಲು ಹವಾಮಾನ ಇಲಾಖೆ ಹಾಗೂ ಸ್ಥಳೀಯ ಆಡಳಿತ ಕೆಲ ಪ್ರಮುಖ ಮುನ್ನೆಚ್ಚರಿಕೆಗಳನ್ನು ನೀಡಿದೆ.ಮಳೆ ಹಾಗೂ ಗುಡುಗು ಸಿಡಿಲು ಇರುವ ಸಮಯದಲ್ಲಿ ವಿದ್ಯುತ್ ಕಂಬಗಳು, ಟ್ರಾನ್ಸ್‌ಫಾರ್ಮರ್‌ಗಳು ಮತ್ತು ವಿದ್ಯುತ್ ಉಪಕರಣಗಳಿಂದ ಸುರಕ್ಷಿತ ಅಂತರ ಕಾಯ್ದುಕೊಳ್ಳಿ.ರಸ್ತೆಗಳಲ್ಲಿ ನೀರು ನಿಂತಿರುವ ತಗ್ಗು ಪ್ರದೇಶಗಳು ಹಾಗೂ ಮ್ಯಾನ್‌ಹೋಲ್‌ಗಳ ಬಳಿ ಸಂಚರಿಸುವಾಗ ಹೆಚ್ಚಿನ ಎಚ್ಚರಿಕೆ ವಹಿಸಿ. ಬಿರುಗಾಳಿ ಬೀಸುವಾಗ ದೊಡ್ಡ ಮರಗಳ ಕೆಳಗೆ ಅಥವಾ ದುರ್ಬಲ ಕಟ್ಟಡಗಳ ಆಸರೆಯಲ್ಲಿ ನಿಲ್ಲಬಾರದು.

ಧಾರಾಕಾರ ಮಳೆಯಾಗುವ ಸಾಧ್ಯತೆ ಇರುವುದರಿಂದ ತುರ್ತು ಕೆಲಸಗಳಿದ್ದರೆ ಮಾತ್ರ ಸಾರ್ವಜನಿಕರು ಹೊರಬರಲು ಹಾಗೂ ಪ್ರಯಾಣದ ವೇಳೆ ಹೆಚ್ಚಿನ ಜಾಗ್ರತೆ ವಹಿಸಲು ಕೋರಲಾಗಿದೆ.

ಎರಡು ಮಾರ್ಗದಲ್ಲಿ ಬೆಂಗಳೂರು-ಮುಂಬೈ ವಂದೇ ಭಾರತ್ ಸ್ಲೀಪರ್ ಓಡಿಸುವಂತೆ ಮನವಿ ಸಲ್ಲಿಕೆ

Kannadaprabha News — Thu, 15 Oct 2026 08:49:22 +0530

ಹುಬ್ಬಳ್ಳಿ: ಪ್ರಸ್ತಾವಿತ ಬೆಂಗಳೂರು-ಮುಂಬೈ ವಂದೇ ಭಾರತ್ ಸ್ಲೀಪರ್ ಎಕ್ಸ್‌ಪ್ರೆಸ್ ರೈಲನ್ನು ಕರ್ನಾಟಕದ ಎರಡು ಪರ‍್ಯಾಯ ಮಾರ್ಗಗಳಲ್ಲಿ ವಾರದಲ್ಲಿ ಆರು ದಿನ ಸಂಚರಿಸುವಂತೆ ನೈಋತ್ಯ ರೈಲ್ವೆಯ ಪ್ರಾದೇಶಿಕ ರೈಲ್ವೆ ಬಳಕೆದಾರರ ಸಲಹಾ ಸಮಿತಿ ಸದಸ್ಯ ಮಹೇಂದ್ರ ಸಿಂಘಿ ನೇತೃತ್ವದ ನಿಯೋಗವು ಮಹಾಪ್ರಬಂಧಕ ಪಿ. ಅನಂತ್ ಅವರನ್ನು ಭೇಟಿ ಮಾಡಿ ಈ ಪ್ರಸ್ತಾವನೆ ಸಲ್ಲಿಸಿತು.

ಎರಡು ಮಾರ್ಗಗಳ ಪ್ರಸ್ತಾವನೆ

ಪ್ರಸ್ತಾವನೆಯಂತೆ ವಾರದಲ್ಲಿ ಮೂರು ದಿನ ಬೆಂಗಳೂರು-ಕಲಬುರಗಿ-ವಾಡಿ-ಸೋಲಾಪುರ-ಪುಣೆ-ಮುಂಬೈ ಮಾರ್ಗದಲ್ಲಿ ಹಾಗೂ ಉಳಿದ ಮೂರು ದಿನ ಬೆಂಗಳೂರು-ದಾವಣಗೆರೆ-ಹುಬ್ಬಳ್ಳಿ-ಧಾರವಾಡ-ಬೆಳಗಾವಿ-ಮಿರಜ್-ಸಾಂಗ್ಲಿ-ಪುಣೆ-ಮುಂಬೈ ಮಾರ್ಗದಲ್ಲಿ ರೈಲು ಸಂಚರಿಸಬೇಕು. ಕಲಬುರಗಿ-ವಾಡಿ ಮಾರ್ಗದ ಮೂಲಕ ಈಶಾನ್ಯ ಕರ್ನಾಟಕದ ಪ್ರಯಾಣಿಕರಿಗೆ, ದಾವಣಗೆರೆ-ಹುಬ್ಬಳ್ಳಿ-ಬೆಳಗಾವಿ ಮಾರ್ಗದ ಮೂಲಕ ಮಧ್ಯ ಮತ್ತು ವಾಯವ್ಯ ಕರ್ನಾಟಕದ ಜನರಿಗೆ ಮುಂಬೈ, ಪುಣೆ ಸೇರಿದಂತೆ ಮಹಾರಾಷ್ಟ್ರದ ಪ್ರಮುಖ ನಗರಗಳಿಗೆ ಪ್ರಯಾಣಿಸಲು ಅನುಕೂಲವಾಗಲಿದೆ. ವ್ಯಾಪಾರಿಗಳು, ವಿದ್ಯಾರ್ಥಿಗಳು, ಪ್ರವಾಸಿಗರು ಹಾಗೂ ವೈದ್ಯಕೀಯ ಸೇವೆಗಾಗಿ ತೆರಳುವವರಿಗೆ ಈ ರೈಲು ಸಂಪರ್ಕ ಪ್ರಯೋಜನಕಾರಿಯಾಗಲಿದೆ ಎಂದು ನಿಯೋಗ ತಿಳಿಸಿದೆ.

ಎರಡೂ ಪ್ರದೇಶಗಳಿಗೆ ಸಮಾನ ಆದ್ಯತೆ

ಎರಡೂ ಪ್ರದೇಶಗಳಿಗೆ ಸಮಾನ ಆದ್ಯತೆ ನೀಡುವ ಮೂಲಕ ರೈಲು ಸೇವೆಯ ಪ್ರಯೋಜನ ರಾಜ್ಯದ ಹೆಚ್ಚಿನ ಜನರಿಗೆ ತಲುಪಿಸಬೇಕು ಎಂದು ಮಹೇಂದ್ರ ಸಿಂಘಿ ಒತ್ತಾಯಿಸಿದ್ದಾರೆ. ಎರಡೂ ಮಾರ್ಗಗಳ ಪ್ರಯಾಣಿಕರ ಬೇಡಿಕೆ, ದೂರ, ವೇಳಾಪಟ್ಟಿ ಹಾಗೂ ಕಾರ್ಯಾಚರಣೆಯ ಸಾಧ್ಯತೆಗಳನ್ನು ಪರಿಶೀಲಿಸಿ ಸೂಕ್ತ ನಿರ್ಧಾರ ಕೈಗೊಳ್ಳುವಂತೆ ಮನವಿಯಲ್ಲಿ ಕೋರಲಾಗಿದೆ.

ಪ್ರಸ್ತಾವನೆ ಕುರಿತು ರೈಲ್ವೆ ಮಂಡಳಿಯೊಂದಿಗೆ ಚರ್ಚಿಸಿ ಅಗತ್ಯ ಕ್ರಮಕೈಗೊಳ್ಳಲು ಪ್ರಯತ್ನಿಸುವುದಾಗಿ ಮಹಾಪ್ರಬಂಧಕ ಪಿ. ಅನಂತ್ ಭರವಸೆ ನೀಡಿದ್ದಾರೆ.

ಈ ವೇಳೆ ಡಿಜಿಎಂ ಅನಿಲಕುಮಾರ, ಮಹಾವೀರ ಲಿಂಬ್, ಗೌತಮ್ ಗೋಲೆಚಾ, ಗಿರೀಶ ಸುಂಕದ, ಸುಭಾಷ್ ಚಂದ್ರ ಡಂಕ ಸೇರಿದಂತೆ ಇತರರು ಉಪಸ್ಥಿತರಿದ್ದರು.

2006ರ ಮೊದಲ ಹಂತದ ಕಾಮಗಾರಿ: 1 ಮರಕ್ಕೆ ಬದಲಾಗಿ 10 ಸಸಿಗಳನ್ನು ನೆಡ್ತೀವಿ ಎಂದಿದ್ದ BMRCL, 21,604 ಮರಗಳು ಎಲ್ಲಿ ಹೋದವು?

Kannadaprabha News — Fri, 09 Oct 2026 07:25:17 +0530

ಬೆಂಗಳೂರು : ಬಿಎಂಆರ್‌ಸಿಎಲ್ ಸಂಸ್ಥೆಯಿಂದ ಒಂದನೇ ಹಂತದಲ್ಲಿ ತೆರವುಗೊಳಿಸಿದ 2,106 ಮರಗಳಿಗೆ ಪರಿಹಾರವಾಗಿ ಬೆಳೆಸಬೇಕಾದ 21,604 ಗಿಡಗಳ ಬಗ್ಗೆ ಸಂಸ್ಥೆಯಲ್ಲಿ ಯಾವುದೇ ಮಾಹಿತಿ ಇಲ್ಲ ಎಂದು ಮೆಟ್ರೋ ತಿಳಿಸಿದ್ದು, ಇದರಿಂದಾಗಿ 20 ವರ್ಷದ ಹಿಂದೆ ತೆರವುಗೊಳಿಸಿದ 2106 ಮರಗಳ ಬದಲಿಗೆ ಪರ್ಯಾಯ ಪರಿಹಾರ ಕಲ್ಪಿಸದೆ ಮೆಟ್ರೋ ನಿರ್ಲಕ್ಷಿಸಿದೆ.

ನಗರದಲ್ಲಿ 2006ರಲ್ಲಿ ಆರಂಭಗೊಂಡ ಮೆಟ್ರೋ ಕಾಮಗಾರಿ

ನಗರದಲ್ಲಿ 2006ರಲ್ಲಿ ಆರಂಭಗೊಂಡ ಮೆಟ್ರೋ ಕಾಮಗಾರಿಗಳಿಗೆ ಅಡ್ಡಿಯಾಗಿದ್ದ 2,106 ಮರಗಳನ್ನು ತೆರವುಗೊಳಿಸಲು ಬಿಎಂಆರ್ ಸಿಎಲ್ ಅರಣ್ಯ ಇಲಾಖೆಯಿಂದ ಅನುಮತಿ ಪಡೆದಿತ್ತು. ಅರಣ್ಯ ಕಾಯ್ದೆಯಂತೆ ಪರಿಹಾರವಾಗಿ ತೆರವುಗೊಳಿಸಿದ ಅಥವಾ ಸ್ಥಳಾಂತರಿಸಿದ ಪ್ರತಿ 1 ಮರಕ್ಕೆ ಬದಲಾಗಿ 10 ಎತ್ತರದ ಮತ್ತು ಆರೋಗ್ಯಕರ ಸಸಿಗಳನ್ನು ನೆಡುವುದು ಹಾಗೂ ಅವುಗಳನ್ನು 3 ವರ್ಷಗಳ ಅವಧಿಗೆ ಸೂಕ್ತ ಹಾಗೂ ಪರಿಣಾಮಕಾರಿ ಆರೈಕೆ ಹಾಗೂ ನಿರ್ವಹಣೆ ಬಿಎಂಆರ್ ಸಿಎಲ್ ಜವಾಬ್ದಾರಿಯಾಗಿತ್ತು.

1 ಮರಕ್ಕೆ 10 ಮರ ಎಲ್ಲಿ ಹೋದವು?

ಈ ಕುರಿತು ಮೆಟ್ರೋ ಯೋಜನೆ ಆರಂಭಿಸುವ ಆರಂಭದಲ್ಲಿ ಅರಣ್ಯ ಇಲಾಖೆ ಜೊತೆ ಸಂಸ್ಥೆ ಒಪ್ಪಂದ ಮಾಡಿಕೊಂಡಿತ್ತು. ಮೊದಲ ಹಂತದಲ್ಲಿ ಬಿಎಂಆರ್ ಸಿಎಲ್ ಅಂದಿನ ಬಿಬಿಎಂಪಿ, ಬಿಡಿಎ ಎನ್‌ಜಿಒಗಳು ಹಾಗೂ ಇತರ ಇಲಾಖೆಗಳ ಮೂಲಕ 21,604 ಮರಗಳನ್ನು ನೆಡುವ ಪರಿಹಾರ ಕ್ರಮ ಕೈಗೊಂಡಿತ್ತು.

ಆದರೆ, ಅವುಗಳ ನಿರ್ವಹಣೆ ಜವಾಬ್ದಾರಿಯನ್ನು ಮಾತ್ರ ಸಂಸ್ಥೆ ಹೊರಲಿಲ್ಲ. ಈ ಕಾರಣದಿಂದಾಗಿ 21 ಸಾವಿರ ಗಿಡಗಳನ್ನು ಎಲ್ಲಿ ನೆಡಲಾಯಿತು. ಅವುಗಳು ಹೇಗೆ ಬೆಳೆದಿವೆ. ಪ್ರತಿನಿತ್ಯ ನೀರು ಹಾಕಿದವರು ಯಾರು ಎಂಬುದರ ಬಗ್ಗೆ ಬೇರೆ ಸಂಸ್ಥೆಗಳಲ್ಲೂ ಲೆಕ್ಕವಿಲ್ಲ. ಬಿಎಆರ್ ಸಿಎಲ್ ಸಂಸ್ಥೆಯಲ್ಲೂ ದಾಖಲೆ ಇಲ್ಲ.

ಸಂಸ್ಥೆಯಲ್ಲಿದ್ದ ಅಂದಿನ ಅಧಿಕಾರಿಗಳು ನಿರ್ವಹಣೆ ಬಗ್ಗೆ ಯಾವುದೇ ಕ್ರಮ ಕೈಗೊಂಡಿಲ್ಲ. ಈ ಕುರಿತು ಯಾವುದೇ ದಾಖಲೆ ಇಲ್ಲ ಎಂಬುದನ್ನು ಬಿಎಂಆರ್ ಸಿಎಲ್ ಒಪ್ಪಿಕೊಂಡಿದೆ ಎಂದು ಭಾರತದ ನಿಯಂತ್ರಕರು ಮತ್ತು ಮಹಾಲೆಕ್ಕಪರಿಶೋಧನಾ(ಸಿಎಜಿ) ತನ್ನ ವರದಿಯಲ್ಲಿ ಬಹಿರಂಗಪಡಿಸಿದೆ.

ಬಿಎಂಆರ್ ಸಿಎಲ್ 4,063 ಮರಗಳನ್ನು ತೆರವುಗೊಳಿಸಿತು

ಇದಲ್ಲದೆ, ಮೆಟ್ರೋ ಎರಡನೇ ಹಂತದಲ್ಲಿ ಬಿಎಂಆರ್ ಸಿಎಲ್ 4,063 ಮರಗಳನ್ನು (3,246 ಮರಗಳ ಕಡಿತ ಮತ್ತು 817 ಮರಗಳ ಸ್ಥಳಾಂತರ) ತೆರವುಗೊಳಿಸಿತು. ಪರಿಹಾರ ಕ್ರಮವಾಗಿ 40,630 ಸಸಿಗಳನ್ನು ನೆಡುವ ಜವಾಬ್ದಾರಿ ಹೊರಬೇಕಾಗಿತ್ತು. ಆದರೆ ಕೇವಲ 1,400 ಗಿಡ ನೆಡುವ ಮತ್ತು ನಿರ್ವಹಿಸುವ ಕಾರ್ಯವನ್ನು 40 ಲಕ್ಷ ರು.ವೆಚ್ಚದಲ್ಲಿ ‘ನಾಮನಿರ್ದೇಶನ’ ಆಧಾರದ ಮೇಲೆ ಸಂಸ್ಥೆ ವಹಿಸಿಕೊಟ್ಟಿದೆ ಎಂದು ಲೆಕ್ಕ ಪರಿಶೋಧನಾ ವರದಿ ತಿಳಿಸಿದೆ.

ಈ ಸಂಬಂಧ ಪ್ರತಿಕ್ರಿಯೆ ನೀಡಿರುವ ಬಿಎಂಆರ್‌ಸಿಎಲ್‌, ಫೆ.2024ರಿಂದ ಮುಕ್ತ ಟೆಂಡರ್‌ ಕರೆಯುವ ಮೂಲಕ ಕಂಪನಿಯು ಸಸಿ ನೆಡುವ ಕಾರ್ಯವನ್ನು ಕೈಗೊಳ್ಳುತ್ತಿದ್ದು, ಅತ್ಯಂತ ಕಡಿಮೆ ದರ ನಮೂದಿಸಿದ ಅರ್ಹ ಗುತ್ತಿಗೆದಾರರಿಗೆ ಈ ಕೆಲಸವನ್ನು ವಹಿಸಲಾಗುತ್ತಿದೆ ಎಂದಿದೆ.

ಆ ಸಮಯದಲ್ಲಿ ಸಂಸ್ಥೆಯಲ್ಲಿ ಅರಣ್ಯ ವಿಭಾಗ ಇರಲಿಲ್ಲ. ಇಂದು ಅರಣ್ಯ ವಿಭಾಗ ಇದೆ. ಮರಗಳನ್ನು ಬೆಂಗಳೂರಿನಿಂದ ಹೊರ ಜಿಲ್ಲೆಯಲ್ಲಿ ನೆಟ್ಟಿರಬಹುದು. ಆವುಗಳನ್ನು ನಿರ್ವಹಣೆ ಮಾಡಬೇಕಾಗಿತ್ತು. ಇದೊಂದು ಸಂಸ್ಥೆಯ ಲೋಪವಾಗಿದೆ ಎಂದು ಅಧಿಕಾರಿಯೊಬ್ಬರು ಕನ್ನಡಪ್ರಭಕ್ಕೆ ತಿಳಿಸಿದ್ದಾರೆ.

ಸಿಜೆಪಿ ಮಕ್ಕಳ ಬಿಡಿಸಲು ಲಾಯರ್ ಫೀಸ್ ಕೊಟ್ಟರೆ ಫಂಡಿಂಗಾ? HDK ಆರೋಪಕ್ಕೆ ಬಿಕೆ ಹರಿಪ್ರಸಾದ್ ತಿರುಗೇಟು

Chethan Kumar — Sat, 17 Oct 2026 20:20:29 +0530

ಧಾರವಾಡ (ಅ.17) ಕಾಕ್ರೋಚ್ ಜನತಾ ಪಾರ್ಟಿ ಹೋರಾಟಗಾರರಿಗೆ ಕಾಂಗ್ರೆಸ್ ಫಂಡಿಂಗ್ ಮಾಡುತ್ತಿದೆ ಎಂಬ ಹೆಚ್‌ಡಿ ಕುಮಾರಸ್ವಾಮಿ ಆರೋಪಕ್ಕೆ ಕರ್ನಾಟಕ ಕಾಂಗ್ರೆಸ್ ಅಧ್ಯಕ್ಷ ಬಿಕೆ ಹರಿಪ್ರಸಾದ್ ತಿರುಗೇಟು ನೀಡಿದ್ದಾರೆ. ಅನಾವಶ್ಯಕವಾಗಿ, ಕಾನೂನು ಬಾಹಿರವಾಗಿ ಸಿಜೆಪಿ ಮಕ್ಕಳನ್ನು ಜೈಲಿಗೆ ಹಾಕಿದಾಗ ಅವರನ್ನು ಬಿಡಿಸೋದು ಯಾರು? ಸಿಜೆಪಿ ಹೋರಾಟಗಾರರ ಬಳಿಕ ವಕೀಲರಿಗೆ ಕೊಡಲು ದುಡ್ಡಿದೆಯಾ? ಕಾಕ್ರೋಚ್ ಜನತಾ ಪಾರ್ಟಿ ಹೋರಾಟಗಾರರ ಬಿಡಿಸಲು ಲಾಯರ್ ಫೀಸ್ ಕೊಟ್ಟರೆ ಅದು ಫಂಡಿಂಗ್ ಆಗುತ್ತಾ ಎಂದು ಬಿಕೆ ಹರಿಪ್ರಸಾದ್ ಪ್ರಶ್ನಿಸಿದ್ದಾರೆ.

ಧಾರವಾಡದಲ್ಲಿ ಮಾತನಾಡಿದ ಕೆಪಿಸಿಸಿ ಅಧ್ಯಕ್ಷ ಬಿಕೆ ಹರಿಪ್ರಸಾದ್, ಹೋರಾಟ ಹಾಗೂ ಕಾಂಗ್ರೆಸ್ ಬೆಂಬಲ ಕುರಿತು ಸ್ಪಷ್ಟನೆ ನೀಡಿದ್ದಾರೆ. ಸಿಜೆಪಿ ಹೋರಾಟಗಾರರ ಮೇಲೆ ಕೇಂದ್ರ ಸರ್ಕಾರ ಮಾಡುತ್ತಿರುವುದೇನು? ಫಂಡಿಂಗ್ ಎಂದರೆ ವಕೀಲರಿಗೆ ಕೊಡುವ ಶುಲ್ಕ ಫಂಡಿಂಗಾ? ಎಂದು ಬಿಕೆ ಹರಿಪ್ರಸಾದ್ ಪ್ರಶ್ನಿಸಿದ್ದಾರೆ. ತ್ರಿವರ್ಣ ಧ್ವಜ ಹೊಲಿಸಲು ದುಡ್ಡು ಕೊಡ್ಡರೆ ಅದು ಫಂಡಿಂಗಾ ಎಂದು ಬಿಕೆ ಹರಿಪ್ರಸಾದ್ ಪ್ರಶ್ನಿಸಿದ್ದಾರೆ.

ಒಂದು ಪ್ರತಿಭಟನೆ ಮಾಡುವಾಗ ಏನು ಸಹಕಾರ ಕೊಡಬೇಕು ಅದನ್ನು ಕಾಂಗ್ರೆಸ್ ಮಾಡುತ್ತದೆ. ಸಹಕಾರ ಕೊಡುವುದಕ್ಕೂ ಫಂಡಿಂಗ್ ಮಾಡುವುದಕ್ಕೂ ವ್ಯತ್ಯಾಸವಿದೆ ಎಂದು ಬಿಕೆ ಹರಿಪ್ರಸಾದ್ ಹೇಳಿದ್ದಾರೆ. ಲಂಚ ಹೊಡೆಯೊರಿಗೆ ಭ್ರಷ್ಟಾಚಾರಿಗಳಿಗೆ ಮಾತ್ರ ಫಂಡಿಂಗ್ ಗೊತ್ತಿರೊದು. ನಾವು ಹೋರಾಟಗಾರರಿಗೆ ಸಹಕಾರ ನೀಡಿದ್ದೇವೆ, ಬೆಂಬಲ ನೀಡಿದ್ದೇವೆ. ಹೋರಾಟಕ್ಕೆ ನಮ್ಮ ಬೆಂಬಲ ಇದೆ. ಕಾರಣ ಸಂವಿಧಾನ ಉಳಿಸೋದಕ್ಕೆ ಹೋರಾಟ ಮಾಡುವವರಿಗೆ ನಾವು ಬೆಂಬಲ ಕೊಡುತ್ತೇವೆ ಎಂದು ಬಿಕೆ ಹರಿಪ್ರಸಾದ್ ಹೇಳಿದ್ದಾರೆ.

ಕಾಂಗ್ರೆಸ್, ಸಿಜೆಪಿ ಒಂದೇ ಹೇಳಿಕೆಗೆ ಸ್ಪಷ್ಟನೆ

ರಾಜ್ಯ ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ತಮ್ಮ ಭಾಷಣದಲ್ಲಿ ಕಾಂಗ್ರೆಸ್ ಹಾಗೂ ಸಿಜೆಪಿ ಒಂದೇ ಎಂದು ಹೇಳಿಕೆ ನೀಡಿದ್ದರು. ಈ ಕುರಿತು ಪ್ರತಿಕ್ರಿಯಿಸಿದ ಬಿಕೆ ಹರಿಪ್ರಸಾದ್, ಹಕ್ಕಿಗಾಗಿ ಹೋರಾಟ ಮಾಡುವ ಎಲ್ಲರೂ ನಮ್ಮವರೇ ಎಂದು ಬಿಕೆ ಹರಿಪ್ರಸಾದ್ ಹೇಳಿದ್ದಾರೆ.

ಹೆಚ್‌ಡಿ ಕುಮಾರಸ್ವಾಮಿ ವಿರುದ್ಧ ಹರಿಹಾಯ್ದ ಬಿಕೆ ಹರಿಪ್ರಸಾದ್, ಸ್ಟಿಂಗ್ ವಿಚಾರದಲ್ಲಿ ನಿಮ್ಮ ಟಿಆರ್‌ಪಿ ಹೆಚ್ಚಾಗುತ್ತಿದೆ. ತನಿಖೆ ಆಗುತ್ತಿದೆ. ಹೀಗಾಗಿ ನಾನು ಮಾತನಾಡುವುದಿಲ್ಲ. ಬೊಮ್ಮಾಯಿ ಇಡಿ, ಐಟಿ ತನಿಖೆ ಬಗ್ಗೆ ಯಾಕೆ ಹೇಳಲಿಲ್ಲ, ಕೇವಲ ಸಿಬಿಐ ಅಷ್ಟೇ ಯಾಕೆ ಹೇಳಿದ್ದರು. ಈ ಮಟ್ಟದ ರಾಜಕಾರಣವನ್ನು ಜನರು ನಮ್ಮಲ್ಲಿ ನಿರೀಕ್ಷೆ ಮಾಡಲಿಲ್ಲ. ಎಲ್ಲದಕ್ಕೂ ತೆರೆ ಎಳೆಯಬೇಕು, ಎಲ್ಲಿವರೆಗೆ ಹೋಗುತ್ತೆ ನೋಡೋಣ ಎಂದು ಬಿಕೆ ಹರಿಪ್ರಸಾದ್ ಹೇಳಿದ್ದಾರೆ.

Farmers: ಕಣ್ಣಾಲಿ ಒದ್ದೆಯಾಗಿಸಿದ ಹೋರಾಟದ ದೃಶ್ಯ; ನಡು ಬೀದಿಯಲ್ಲಿ ಬಿಕ್ಕಿ ಬಿಕ್ಕಿ ಅತ್ತ ರೈತರು, ವೈರಲ್‌ ಆದ ವಿಡಿಯೋ!

Bhimasi M Koleppanavar — Sat, 17 Oct 2026 20:50:56 +0530

ವಿಆರ್‍‌ ಫಾರ್ಮ್ಸ್ ಫಸ್ಟಲೀ ಆಂಡ್‌ ಲಾಸ್ಟಲೀ ಎನ್ನುವ ದಾಟಿಯಲ್ಲಿ ಕಬ್ಬು ಬೆಳೆಗಾರರ ಹೋರಾಟ ಮುನ್ನಡೆಯುತ್ತಿದೆ. ಅಲ್ಲಿ ನೋವು, ಆಕ್ರೋಶ, ಹತಾಶೆ, ಅಸಾಯಕತೆ ಒಂದೇ ಬಾರಿ ಸ್ಪೋಟಗೊಂಡರೆ ಹೇಗೆ ಇರುತ್ತದೆ ಹೇಳಿ, ಆದರೆ ಈ ಹಂತ ತಲುಪುವ ಹಂತಕ್ಕೆ ರೈತರು ದೂರವಿಲ್ಲ. ಆದರೆ ಸರ್ಕಾರಗಳು ಎಚ್ಚರಗೊಳ್ಳಬೇಕಾದ ಅನಿವಾರ್ಯತೆ ಇದೆ. ಈ ನಿಟ್ಟಿನಲ್ಲಿ ವೈರಲ್‌ ಆದ ಒಂದು ಪೋಟೋ ಅನ್ನದಾತನ, ಹಸಿವು, ಅಸಹಾಯಕತೆ ಮತ್ತು ಹತಾಶೆ ಎದ್ದು ಕಾಣಿಸುತ್ತದೆ, ಎಂಥವರ ಕಣ್ಣನ್ನು ಒದ್ದೆಗೊಳಿಸುತ್ತದೆ.

ಎದೆ ತಟ್ಟುವ ಕರುಣಾಜನಕ ದೃಶ್ಯ!

ರೈತ ಎಂದರೆ, ಕಿಡ್ನಿ, ಜಠರ, ಮತ್ತೊಂದು, ಮಗದೊಂದು ಎಂದು ಎಲ್ಲರನ್ನೂ ಉಬ್ಬಿಸಿಟ್ಟಾರ ಹೊರತೂ, ಅವರಿಗರ ಏನು ಬೇಕು ಎಂದು ಯಾರು ಕೇಳಲಿಲ್ಲ, ಆದ್ದರಿಂದಲೇ, ಇಂದು ಬೀದಿಗೆ ಇಳಿದಿದ್ದಾರೆ. ಕಬ್ಬು ಬೆಳೆಗಾರರ ನ್ಯಾಯಯುತ ಹಕ್ಕುಗಳಿಗಾಗಿ ಹಗಲಿರುಳು ರಸ್ತೆಯಲ್ಲೇ ಪಾದಯಾತ್ರೆ ನಡೆಸುತ್ತಿರುವ ರೈತರ ನೋವು ಈ ಚಿತ್ರದಲ್ಲಿ ಎದ್ದು ಕಾಣುತ್ತಿದೆ. ಹೋರಾಟದ ತೀವ್ರತೆಗೆ ಮನನೊಂದು ರೈತರೊಬ್ಬರು ಬಿಕ್ಕಿ ಬಿಕ್ಕಿ ಕಣ್ಣೀರು ಹಾಕುತ್ತಿರುವ ಅತ್ಯಂತ ಕರುಣಾಜನಕ ದೃಶ್ಯ.

ಭುಜಕೊಟ್ಟು ಸಾಂತ್ವನ ಹೇಳಿದ ರೈತ ಬಂಧುಗಳು!

ಕಣ್ಣೀರಾದ ರೈತನನ್ನು ಚೂನಪ್ಪ ಪೂಜಾರಿ ಭುಜದ ಮೇಲೆ ತಲೆ ಇಟ್ಟುಕೊಂಡು ತಬ್ಬಿ ಸಾಂತ್ವನ ಹೇಳುತ್ತಿದ್ದರೆ, ಸುತ್ತಲೂ ನೆರೆದಿರುವ ಸಹೋದರ ರೈತರ ಕಣ್ಣುಗಳೂ ಕೂಡ ಒದ್ದೆಯಾಗಿವೆ. ಕಣ್ಣಲ್ಲಿ ನೀರಿದ್ದರೂ ಕೈಯಲ್ಲಿ ಹಸಿರು ಶಾಲುಗಳನ್ನು ಬೀಸುತ್ತಾ, ನಮ್ಮ ಪ್ರಾಣ ಹೋದರೂ ಹೋರಾಟದಿಂದ ಹಿಂದೆ ಸರಿಯುವುದಿಲ್ಲ ಎಂಬ ಛಲ ನೆರೆದಿದ್ದ ರೈತರ ಮುಖದಲ್ಲಿ ಎದ್ದುಕಾಣುತ್ತಿತ್ತು. ಚಿತ್ರದಲ್ಲಿರುವ "ಪಾದಯಾತ್ರೆಯಲ್ಲಿ ಕಣ್ಣೀರು ಹಾಕಿದ ರೈತರು" ಎಂಬ ಸಾಲುಗಳು, ಈ ಪ್ರತಿಭಟನೆ ಕೇವಲ ಹಠದ್ದಲ್ಲ, ಬದಲಿಗೆ ಹೊಟ್ಟೆಪಾಡಿಗಾಗಿ ಬಿಸಿಲು-ಮಳೆ ಲೆಕ್ಕಿಸದೆ ನಡೆಸುತ್ತಿರುವ ಜೀವನ್ಮರಣದ ಹೋರಾಟ ಎಂಬುದನ್ನು ಬಿಂಬಿಸುತ್ತವೆ.

ಸರ್ಕಾರಗಳಿಗೆ ನೇರ ಎಚ್ಚರಿಕೆ!

ಈ ಕಣ್ಣೀರಿನ ದೃಶ್ಯ ಕೇವಲ ರೈತರ ನೋವನ್ನಷ್ಟೇ ತೋರಿಸುತ್ತಿಲ್ಲ, ಬದಲಿಗೆ ಅನ್ನದಾತನನ್ನು ಬೀದಿಗೆ ತಂದು ನಿಲ್ಲಿಸಿರುವ ಇಡೀ ವ್ಯವಸ್ಥೆ ಹಾಗೂ ಸರ್ಕಾರದ ವಿರುದ್ಧದ ತೀವ್ರ ಆಕ್ರೋಶ ಜಾಗೃತಗೊಳಿಸುವಂತಿದೆ. ವರ್ಷವಿಡೀ ಕಷ್ಟಪಟ್ಟು ಬೆಳೆದ ಬೆಳೆಗೆ ಯೋಗ್ಯ ಬೆಲೆ ಸಿಗದೆ, ಸಾಲದ ಸುಳಿಗೆ ಸಿಲುಕಿ ದೇಶಕ್ಕೆ ಅನ್ನ ನೀಡುವ ಅನ್ನದಾತನೇ ಇಂದು ಬೀದಿಯಲ್ಲಿ ನಿಂತು ಕಣ್ಣೀರು ಹಾಕುವಂತಾಗಿರುವ ಅಸಹಾಯಕ ಪರಿಸ್ಥಿತಿ ಈ ದೃಶ್ಯವು ಎದೆಗೊಡುವಂತೆ ನೆನಪಿಸುತ್ತಿದೆ. ಸೋತು ಕಣ್ಣೀರಿಟ್ಟ ರೈತನಿಗೆಧೈರ್ಯ ತುಂಬುತ್ತಿರುವ ಈ ಚಿತ್ರ, ಹೋರಾಟದ ಹಾದಿಯಲ್ಲಿ ಒಬ್ಬ ರೈತ ಕಣ್ಣೀರು ಹಾಕಿದರೂ, ಇಡೀ ರೈತ ಸಮುದಾಯವೇ ಅವನ ಬೆನ್ನಿಗೆ ಕಾವಲಾಗಿ ನಿಲ್ಲುತ್ತದೆ ಎಂಬ ಒಗ್ಗಟ್ಟಿನ ಮಹಾನ್ ಸಂದೇಶವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಸಾರುತ್ತಿದೆ.

ರೈತರನ್ನು ಬೀದಿಗೆ ತಂದು ನಿಲ್ಲಿಸಿದ ವ್ಯವಸ್ಥೆ!

ಹೌದು, ರೈತರನ್ನು ಇವತ್ತು ರಸ್ತೆಗೆ ತಂದು ನಿಲ್ಲಿಸಿದ ವ್ಯವಸ್ಥೆ ತನ್ನನ್ನು ತಾನೇ ಆತ್ಮಾವಲೋಕನ ಮಾಡಿಕೊಳ್ಳಬೇಕು. ಅವರ ಹಿತ ಕಾಪಾಡಿದ್ದೇ ಆದರೆ, ರೈತರು ಇವತ್ತು ಬೀದಿಗಳಿಯುವ ಪರಿಸ್ಥಿತಿ ನಿರ್ಮಾಣವಾಗುತ್ತಿತ್ತಾ ಎನ್ನುವುದನ್ನು. ಆದ್ದರಿಂದ ಇನ್ನಾದರೂ ಅವರ ಅವರ ಹೋರಾಟಕ್ಕೆ ನ್ಯಾಯಯುತ ಹೋರಾಟ ಸಿಗುತ್ತಾಎನ್ನುವುದನ್ನು ಕಾದು ನೋಡಬೇಕಿದೆ.

ಕೋಡಿಮಠ ಸ್ವಾಮೀಜಿ ದಸರಾ ಭವಿಷ್ಯ: 'ಹಿಂಗಾರು ಮಳೆಯಿಂದ ಜನರಿಗೆ ನೆಮ್ಮದಿ, ರಾಜಕಾರಣದಲ್ಲಿ ಮಹತ್ತರ ತಿರುವು'!

Sathish Kumar KH — Tue, 20 Oct 2026 16:19:03 +0530

ಧಾರವಾಡ (ಅ.20): ತಮ್ಮ ನಿಖರ ಮತ್ತು ಮಾರ್ಮಿಕ ಭವಿಷ್ಯವಾಣಿಗೆ ಹೆಸರಾಗಿರುವ ಅರಸೀಕೆರೆ ಕೋಡಿಮಠ ಸಂಸ್ಥಾನದ ಡಾ. ಶಿವಾನಂದ ಶಿವಯೋಗಿ ರಾಜೇಂದ್ರ ಸ್ವಾಮೀಜಿ ಅವರು ವಿದ್ಯಾಕಾಶಿ ಧಾರವಾಡದಲ್ಲಿ ಮತ್ತೊಮ್ಮೆ ಭವಿಷ್ಯ ನುಡಿದಿದ್ದಾರೆ. ಮುಂಗಾರು ಮಳೆಯ ವೈಫಲ್ಯ, ಬರಗಾಲ ಮತ್ತು ಪ್ರಾಕೃತಿಕ ವಿಕೋಪಗಳ ಕುರಿತು ತಾವು ಈ ಹಿಂದೆ ಹೇಳಿದ್ದ ಮಾತುಗಳನ್ನು ನೆನಪಿಸಿದ ಶ್ರೀಗಳು, ಮುಂಬರುವ ದಿನಗಳಲ್ಲಿ ರಾಜ್ಯದಲ್ಲಿ ಹಿಂಗಾರು ಮಳೆ ಉತ್ತಮವಾಗಿ ಸುರಿದು ಜನರಿಗೆ ಸುಭಿಕ್ಷೆ ಮತ್ತು ನೆಮ್ಮದಿ ಸಿಗಲಿದೆ ಎಂದು ತಿಳಿಸಿದ್ದಾರೆ.

ಧಾರವಾಡದಲ್ಲಿ ವಿಜೃಂಭಣೆಯಿಂದ ಜರುಗಿದ ಐತಿಹಾಸಿಕ ಜಂಬೂ ಸವಾರಿ ಉತ್ಸವದಲ್ಲಿ ಭಾಗವಹಿಸಿದ ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ಶ್ರೀಗಳು, ಮಳೆ, ಬೆಳೆ ಹಾಗೂ ರಾಜ್ಯ ರಾಜಕೀಯ ಬೆಳವಣಿಗೆಗಳ ಕುರಿತು ಮಾತನಾಡಿದರು.

ನಾನು ಮೊದಲೇ ಹೇಳಿದ್ದೆ, ಈಗ ಹಿಂಗಾರು ಮಳೆಯಿಂದ ನೆಮ್ಮದಿ:

ತಮ್ಮ ಹಿಂದಿನ ಭವಿಷ್ಯವನ್ನು ಸ್ಮರಿಸಿದ ಕೋಡಿಮಠ ಶ್ರೀಗಳು, 'ಮುಂಗಾರು ಮಳೆ ಆಗುವುದಿಲ್ಲ, ಜನಜೀವನ ಅತ್ಯಂತ ಕಷ್ಟವಾಗುತ್ತದೆ, ನೀರಿಗೆ ತೀವ್ರ ಹಾಹಾಕಾರ ಉಂಟಾಗಿ ಅನ್ನಕ್ಕೂ ಕೊರತೆ ಎದುರಾಗುತ್ತದೆ, ಜನರು ಸಾವು-ನೋವು ಅನುಭವಿಸುತ್ತಾರೆ ಹಾಗೂ ಪ್ರಪಂಚದಲ್ಲಿ ವಿಪರೀತ ಭೂಕಂಪಗಳು ಸಂಭವಿಸುತ್ತವೆ ಎಂದು ನಾನು ಮೊದಲೇ ಭವಿಷ್ಯ ನುಡಿದಿದ್ದೆ. ಅದರಂತೆ ನಡೆದಿದೆ. ಆದರೆ ಈಗ ಸದ್ಯಕ್ಕೆ ಆತಂಕ ಪಡುವ ಅಗತ್ಯವಿಲ್ಲ. ರಾಜ್ಯದಲ್ಲಿ ಹಿಂಗಾರು ಮಳೆ ಉತ್ತಮವಾಗಿ ಆಗಲಿದೆ. ಇದರಿಂದ ಸಮಸ್ತ ಜನರಿಗೆ ಸುಭಿಕ್ಷೆ ಮತ್ತು ನೆಮ್ಮದಿ ಸಿಗಲಿದ್ದು, ಜಲಚರಗಳಿಗೂ ಒಳಿತಾಗಲಿದೆ. ರೋಗ-ರುಜಿನಗಳು ದೂರವಾಗಿ ಎಲ್ಲರಿಗೂ ಒಳ್ಳೆಯದಾಗಲಿ' ಎಂದು ಹಾರೈಸಿದರು.

ರಾಜಕೀಯ ಬದಲಾವಣೆ: ಮಾರ್ಮಿಕ ಉತ್ತರ!

ಇದೇ ವೇಳೆ ರಾಜ್ಯ ರಾಜಕೀಯದಲ್ಲಿ ಸಿಎಂ ಬದಲಾವಣೆ ಅಥವಾ ಮಹತ್ವದ ರಾಜಕೀಯ ತಿರುವುಗಳು ಸಂಭವಿಸುತ್ತವೆಯೇ ಎಂದು ಪತ್ರಕರ್ತರು ಕೇಳಿದ ಪ್ರಶ್ನೆಗೆ ಎಂದಿನಂತೆ ತಮ್ಮ ನಿಗೂಢ ಶೈಲಿಯಲ್ಲೇ ಉತ್ತರಿಸಿದ ಶ್ರೀಗಳು, ‘ರಾಜಕೀಯ ಬದಲಾವಣೆಯ ವಿಚಾರ ನಮಗಿಂತ ಮಾಧ್ಯಮದವರಾದ ನಿಮಗೇ ಚೆನ್ನಾಗಿ ಗೊತ್ತಿದೆ. ಎಲ್ಲರಿಗೂ ಒಳ್ಳೆಯದಾಗಲಿ’ ಎಂದು ನಗುತ್ತಲೇ ಮಾರ್ಮಿಕವಾಗಿ ಜಾರಿಕೊಂಡರು. ಅವರ ಈ ಒಂದು ಸಾಲಿನ ಉತ್ತರ ರಾಜಕೀಯ ವಲಯದಲ್ಲಿ ಕುತೂಹಲಕ್ಕೆ ಕಾರಣವಾಗಿದೆ.

ಧಾರವಾಡ ಜಂಬೂ ಸವಾರಿ ಅಖಂಡ ಕರ್ನಾಟಕದ ಪ್ರತೀಕ:

ಧಾರವಾಡದ ದಸರಾ ಜಂಬೂ ಸವಾರಿಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದ ಸ್ವಾಮೀಜಿ, 'ಅಖಂಡ ಕರ್ನಾಟಕ ಒಂದಾಗಿ ಸಾಗಬೇಕು, ಸಮಸ್ತ ಮನುಕುಲಕ್ಕೂ ಒಳ್ಳೆಯದಾಗಬೇಕು ಎಂಬ ಸಂಕಲ್ಪದೊಂದಿಗೆ ಇಂದು ಧಾರವಾಡದಲ್ಲಿ ಜಂಬೂ ಸವಾರಿ ನಡೆಯುತ್ತಿದೆ. ಇದು ಅಖಂಡ ಕರ್ನಾಟಕದ ಭವ್ಯ ಸಂಸ್ಕೃತಿಯ ಪ್ರತೀಕ. ಮೈಸೂರಿನಲ್ಲಿ ದಕ್ಷಿಣ ಕರ್ನಾಟಕದ ಸಂಭ್ರಮವಾದರೆ, ಉತ್ತರ ಕರ್ನಾಟಕಕ್ಕೆ ಈ ಧಾರವಾಡ ದಸರಾ ಒಂದಾಗಿದೆ. ಇದು ಏಕತಾ ಮನೋಭಾವನೆಯ ಅದ್ಭುತ ಸಂದೇಶ ನೀಡುತ್ತದೆ' ಎಂದರು.

ಮುಂದುವರಿದು, 'ಇಂದಿನ ದಿನಗಳಲ್ಲಿ ಮನುಷ್ಯನ ದುರ್ನಡತೆಗಳು ಹೆಚ್ಚಾಗುತ್ತಿರುವಾಗ, ಮನುಷ್ಯ ಮನುಷ್ಯನಾಗಿ ಬದುಕಲು ನಮ್ಮ ಹಿರಿಯರು ಹಾಕಿಕೊಟ್ಟ ಆದರ್ಶಗಳ ಸಂಕೇತವೇ ಈ ಸಾಂಸ್ಕೃತಿಕ ಹಬ್ಬಗಳು. ಈ ಪವಿತ್ರ ಪರಂಪರೆ ಮುಂದೆಯೂ ನಿರಂತರವಾಗಿ ಸಾಗಲಿ' ಎಂದು ಆಶೀರ್ವದಿಸಿದರು.

ಸ್ಮಾರ್ಟ್ ಆಯ್ತು ಸಾರಿಗೆ ಸಂಸ್ಥೆ; 15 ಲಕ್ಷ ಡೌನ್‌ಲೋಡ್, 2.7 ಲಕ್ಷ ಸೀಟ್‌ ಬುಕ್ಕಿಂಗ್‌

Kannadaprabha News — Thu, 22 Oct 2026 09:34:09 +0530

ಅಜೀಜ ಅಹ್ಮದ ಬಳಗಾನೂರ

ಹುಬ್ಬಳ್ಳಿ: ರಾಜ್ಯದ ನಾಲ್ಕು ಸಾರಿಗೆ ಸಂಸ್ಥೆಗಳ ಸೇವೆಗಳನ್ನು ಒಂದೇ ವೇದಿಕೆಯಲ್ಲಿ ಒದಗಿಸುವ "ಒಂದು ಕರ್ನಾಟಕ ಮೊಬಿಲಿಟಿ (KSRTC AWATAR v2.0) ಆ್ಯಪ್‌"ಗೆ ಪ್ರಯಾಣಿಕರಿಂದ ಉತ್ತಮ ಸ್ಪಂದನೆ ವ್ಯಕ್ತವಾಗಿದೆ. ಬಸ್‌ ಟಿಕೆಟ್‌ಗಾಗಿ ಗಂಟೆಗಟ್ಟಲೆ ಕೌಂಟರ್‌ನಲ್ಲಿ ಸರದಿ ನಿಲ್ಲುವ ಸಮಸ್ಯೆಯಿಂದ ಮುಕ್ತಿ ದೊರೆತಂತಾಗಿದೆ.

2026ರ ಸೆ. 10ರಂದು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ವಿಧಾನಸೌಧದಲ್ಲಿ ಚಾಲನೆ ನೀಡಿದ ಈ ಡಿಜಿಟಲ್‌ ಸೌಲಭ್ಯ, ಒಂದೇ ತಿಂಗಳಲ್ಲಿ 15 ಲಕ್ಷ ಟಿಕೆಟ್‌ ಡೌನ್‌ಲೋಡ್‌ ಕಂಡಿದೆ. ಈ ಅವಧಿಯಲ್ಲಿ 2.7 ಲಕ್ಷ ಸೀಟು ಕಾಯ್ದಿರಿಸಲಾಗಿದೆ.

ವಾಟ್ಸ್‌ಆ್ಯಪ್‌ನಲ್ಲೂ ಟಿಕೆಟ್‌

ಮೊಬೈಲ್‌ ಆ್ಯಪ್‌ ಬಳಸುವ ಜತೆಗೆ ವಾಟ್ಸ್‌ಆ್ಯಪ್‌ ಮೂಲಕವೂ ಬಸ್‌ ಟಿಕೆಟ್‌ ಕಾಯ್ದಿರಿಸುವ ಸೌಲಭ್ಯ ಕಲ್ಪಿಸಲಾಗಿದೆ. ಆದರೆ, ಈ ವ್ಯವಸ್ಥೆ ಕೆಎಸ್‌ಆರ್‌ಟಿಸಿ, ವಾಯವ್ಯ ಕರ್ನಾಟಕ ಹಾಗೂ ಕಲ್ಯಾಣ ಕರ್ನಾಟಕ ಸಾರಿಗೆ ಸಂಸ್ಥೆಗಳ ಬಸ್‌ಗಳಿಗೆ ಮಾತ್ರ ಲಭ್ಯವಿದೆ. ಇದಕ್ಕಾಗಿ 6364940880 ಸಂಖ್ಯೆಗೆ ವಾಟ್ಸ್‌ಆ್ಯಪ್‌ ಸಂದೇಶ ಕಳುಹಿಸಬೇಕು. ಬಳಿಕ ಪ್ರಯಾಣ ಆರಂಭದ ಸ್ಥಳ, ತಲುಪಬೇಕಾದ ಸ್ಥಳ ಮತ್ತು ದಿನಾಂಕ ಆಯ್ಕೆ ಮಾಡಿ, ಬಸ್‌ ಹಾಗೂ ಸೀಟು ಕಾಯ್ದಿರಿಸಬಹುದು.

ಪ್ರಯಾಣಿಕರ ವಿವರಗಳನ್ನು ನಮೂದಿಸಿ, ಪರಿಶೀಲಿಸಿದ ಬಳಿಕ ಯುಪಿಐ, ಕ್ರೆಡಿಟ್‌ ಕಾರ್ಡ್‌, ಡೆಬಿಟ್‌ ಕಾರ್ಡ್‌ ಅಥವಾ ಡಿಜಿಟಲ್‌ ವ್ಯಾಲೆಟ್‌ ಮೂಲಕ ಹಣ ಪಾವತಿಸಬಹುದು. ಗರಿಷ್ಠ 30 ದಿನಗಳ ಮುಂಚಿತವಾಗಿ ಟಿಕೆಟ್‌ ಕಾಯ್ದಿರಿಸಲು ಅವಕಾಶವಿದೆ. ಪಾವತಿ ಪೂರ್ಣಗೊಂಡ ಬಳಿಕ ಟಿಕೆಟ್‌ ದೃಢೀಕರಣ ಮತ್ತು ಇ-ಟಿಕೆಟ್‌ ವಾಟ್ಸ್‌ಆ್ಯಪ್‌ ಹಾಗೂ ಇ-ಮೇಲ್‌ ಮೂಲಕ ತಲುಪುತ್ತವೆ.

ದೂರು ಸಲ್ಲಿಕೆ, ಟಿಕೆಟ್‌ ರದ್ದತಿ

ಆ್ಯಪ್‌ನಲ್ಲಿ ಹಿಂದಿನ ಟಿಕೆಟ್‌ ಬುಕ್ಕಿಂಗ್‌ ವಿವರಗಳನ್ನು ವೀಕ್ಷಿಸುವುದು, ವಹಿವಾಟು ನಿರ್ವಹಿಸುವುದು ಹಾಗೂ ನಾಲ್ಕು ಸಾರಿಗೆ ಸಂಸ್ಥೆಗಳಿಗೆ ಸಂಬಂಧಿಸಿದ ದೂರು ಸಲ್ಲಿಸುವ ಸೌಲಭ್ಯವಿದೆ. ಸಲ್ಲಿಸಿದ ದೂರಿನ ಸ್ಥಿತಿಯನ್ನು ಪರಿಶೀಲಿಸುವ ಜತೆಗೆ ಮುಂದಿನ ಕ್ರಮದ ಮಾಹಿತಿಯನ್ನೂ ಪಡೆಯಬಹುದು. ವಾಟ್ಸ್‌ಆ್ಯಪ್‌ ಮೂಲಕ ಕಾಯ್ದಿರಿಸಿದ ಟಿಕೆಟ್‌ ರದ್ದುಗೊಳಿಸಲು ಅದೇ ಸಂಖ್ಯೆಗೆ ಸಂದೇಶ ಕಳುಹಿಸಿ "ಟಿಕೆಟ್‌ ರದ್ದತಿ" ಆಯ್ಕೆ ಮಾಡಬೇಕು. ಬಳಿಕ ಪಿಎನ್‌ಆರ್‌ ಸಂಖ್ಯೆ, ಮೊಬೈಲ್‌ ಸಂಖ್ಯೆ ಮತ್ತು ಬುಕ್ಕಿಂಗ್‌ ವೇಳೆ ದೊರೆತ ವಹಿವಾಟಿನ ಪಾಸ್‌ವರ್ಡ್‌ ನಮೂದಿಸಿದರೆ ಟಿಕೆಟ್‌ ರದ್ದಾಗಲಿದೆ.

ದಾಖಲೆ ಬರೆದ ವಾಟ್ಸಪ್ ಬುಕ್ಕಿಂಗ್

ಮುಂದಿನ ಹಂತದಲ್ಲಿ ಡಿಜಿಟಲ್‌ ಮಾಸಿಕ ಬಸ್‌ ಪಾಸ್‌ ಬುಕ್ಕಿಂಗ್‌, ವಿತರಣೆ ಮತ್ತು ನಿರ್ವಹಣೆಯ ವ್ಯವಸ್ಥೆ ಜಾರಿಗೆ ತರಲು ಉದ್ದೇಶಿಸಲಾಗಿದೆ. ಪಾಸ್‌ಗಳ ಪರಿಶೀಲನೆಗೆ ಕ್ಯೂಆರ್‌ ಕೋಡ್‌ ವ್ಯವಸ್ಥೆಯನ್ನೂ ಪರಿಚಯಿಸುವ ಯೋಜನೆಯಿದೆ. ವಾಟ್ಸ್‌ಆ್ಯಪ್‌ ಮೂಲಕದ ಬುಕ್ಕಿಂಗ್‌ಗಳನ್ನು ಪ್ರತ್ಯೇಕವಾಗಿ ಗುರುತಿಸಲು ವರದಿಗಳು ಹಾಗೂ ಟಿಕೆಟ್‌ ದಾಖಲೆಗಳಲ್ಲಿ "ವಾಟ್ಸ್‌ಆ್ಯಪ್‌ ಬುಕ್ಕಿಂಗ್‌" ಎಂದು ನಮೂದಿಸಲಾಗುತ್ತದೆ.

ಸಹಾಯವಾಣಿ ಸಂಖ್ಯೆ ಈ ರೀತಿಯಾಗಿದೆ

ಕೆಎಸ್‌ಆರ್‌ಟಿಸಿ 24 ಗಂಟೆಗಳ ಸಹಾಯವಾಣಿ 080-26252625. AWATAR ಸೆಲ್‌ ಸಂಪರ್ಕ ಸಂಖ್ಯೆಗಳು 7760990034 ಮತ್ತು 7760990035(ಸಮಯ ಬೆಳಗ್ಗೆ 7ರಿಂದ ರಾತ್ರಿ 10ರ ವರೆಗೆ).

KSRTC AWATAR v2.0 ಆ್ಯಪ್

ನಾಲ್ಕು ಸಾರಿಗೆ ಸಂಸ್ಥೆಗಳು ಯಾವುದೇ ಖಾಸಗಿ ಸಾರಿಗೆ ಸಂಸ್ಥೆಗಳಿಗೂ ಕಡಿಮೆ ಇಲ್ಲ. ಆಧುನಿಕ ತಂತ್ರಜ್ಞಾನ ಅಳವಡಿಸಿಕೊಳ್ಳುವ ಮೂಲಕ ಜನರಿಗೆ ಉತ್ತಮ ಸಾರಿಗೆ ಸೌಲಭ್ಯ ಒದಗಿಸಲು ಸರ್ಕಾರ ಬದ್ಧವಾಗಿದೆ. ಈ ನಿಟ್ಟಿನಲ್ಲಿ KSRTC AWATAR v2.0 ಆ್ಯಪ್ ಜನಪ್ರಿಯವಾಗುತ್ತಿದ್ದು, ಹೆಚ್ಚಿನ ನಾಗರಿಕರು ಇದರ ಸದುಪಯೋಗ ಪಡೆದುಕೊಳ್ಳಬೇಕು.

ಭೈರತಿ ಸುರೇಶ, ಸಾರಿಗೆ ಸಚಿವರು

ಆ್ಯಪ್‌ ಆರಂಭವಾದ ಒಂದೇ ತಿಂಗಳಿಗೆ 15 ಲಕ್ಷ ಡೌನ್‌ಲೋಡ್, 2.7 ಲಕ್ಷ ಸೀಟ್‌ ಬುಕ್ಕಿಂಗ್‌
ಒಂದೇ ಆ್ಯಪ್‌ನಲ್ಲಿ ಕೆಎಸ್‌ಆರ್‌ಟಿಸಿ, ಎನ್‌ಡಬ್ಲ್ಯೂಕೆಆರ್‌ಟಿಸಿ, ಕೆಕೆಆರ್‌ಟಿಸಿ, ಬಿಎಂಟಿಸಿ ಸೇವೆ ಲಭ್ಯ
ಮೊಬೈಲ್‌ ಆ್ಯಪ್‌ ಜತೆಗೆ ವಾಟ್ಸ್‌ಆ್ಯಪ್‌ ಮೂಲಕವೂ ಬಸ್‌ ಟಿಕೆಟ್‌ ಕಾಯ್ದಿರಿಸುವ ಸೌಲಭ್ಯ

ಅ. 16ರಿಂದ 19ರವರೆಗೆ ಬೆಂಗಳೂರು ಸೇರಿದಂತೆ ಪ್ರಮುಖ ಸ್ಥಳಗಳಿಗೆ 400 ಹೆಚ್ಚುವರಿ ಬಸ್

Kannadaprabha News — Tue, 13 Oct 2026 07:53:54 +0530

ಹುಬ್ಬಳ್ಳಿ: ಮಹಾನವಮಿ, ಆಯುಧಪೂಜೆ ಹಾಗೂ ದಸರಾ ಹಬ್ಬದ ಪ್ರಯುಕ್ತ ಪ್ರಯಾಣಿಕರ ಅನುಕೂಲಕ್ಕಾಗಿ ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆ ವ್ಯಾಪ್ತಿಯ ವಿವಿಧ ವಿಭಾಗಗಳಿಂದ 400 ಹೆಚ್ಚುವರಿ ವಿಶೇಷ ಬಸ್‌ಗಳನ್ನು ಕಾರ್ಯಾಚರಣೆಗೊಳಿಸಲಾಗುತ್ತಿದೆ.

ಹೆಚ್ಚುವರಿ ಸಾರಿಗೆ ವ್ಯವಸ್ಥೆ

ಅ. 20ರಂದು ಮಹಾನವಮಿ ಹಾಗೂ ಆಯುಧಪೂಜೆ, ಅ. 21ರಂದು ವಿಜಯದಶಮಿ ಹಬ್ಬ ಇರುವ ಹಿನ್ನೆಲೆಯಲ್ಲಿ ಬೆಂಗಳೂರಿನಿಂದ ಹಾಗೂ ಇತರ ಪ್ರಮುಖ ಸ್ಥಳಗಳಿಂದ ಸ್ವಂತ ಊರುಗಳಿಗೆ ತೆರಳುವ ಪ್ರಯಾಣಿಕರ ಅನುಕೂಲಕ್ಕಾಗಿ ಹೆಚ್ಚುವರಿ ಸಾರಿಗೆ ವ್ಯವಸ್ಥೆ ಕಲ್ಪಿಸಲಾಗಿದೆ.

ಅ. 16ರಿಂದ 19ರ ವರೆಗೆ ವಿಶೇಷ ಬಸ್‌ಗಳ ಕಾರ್ಯಾಚರಣೆ

ಬೆಂಗಳೂರಿನ ಕೆಂಪೇಗೌಡ ಬಸ್ ನಿಲ್ದಾಣ, ವಿಜಯನಗರ ಟಿಟಿಎಂಸಿ, ಮಲ್ಲೇಶ್ವರಂ, ಶಾರದಾ ಕಾಲನಿ, ಯಶವಂತಪುರ ಟಿಟಿಎಂಸಿ ಹಾಗೂ ಬಸವೇಶ್ವರನಗರ ಟಿಟಿಎಂಸಿ ನಿಲ್ದಾಣಗಳಿಂದ ಸಂಸ್ಥೆಯ ವ್ಯಾಪ್ತಿಯ ವಿವಿಧ ಸ್ಥಳಗಳಿಗೆ ಅ. 16ರಿಂದ 19ರ ವರೆಗೆ ವಿಶೇಷ ಬಸ್‌ಗಳು ಸಂಚರಿಸಲಿವೆ.

ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯಿಂದ ಪ್ರಕಟಣೆ

ಹುಬ್ಬಳ್ಳಿ, ಧಾರವಾಡ, ಗದಗ, ಬೆಳಗಾವಿ, ಉತ್ತರ ಕನ್ನಡ, ಹಾವೇರಿ, ಚಿಕ್ಕೋಡಿ ಹಾಗೂ ಬಾಗಲಕೋಟೆ ವಿಭಾಗಗಳಿಂದ ಈ ಹೆಚ್ಚುವರಿ ಬಸ್‌ಗಳನ್ನು ಕಾರ್ಯಾಚರಣೆಗೊಳಿಸಲಾಗುತ್ತಿದೆ. ಪ್ರಯಾಣಿಕರು ಹೆಚ್ಚುವರಿ ಸಾರಿಗೆ ಸೌಲಭ್ಯದ ಸದುಪಯೋಗ ಪಡೆದುಕೊಳ್ಳುವಂತೆ ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯ ಪ್ರಕಟಣೆ ತಿಳಿಸಿದೆ.

ಕೋಡಿಂಗ್ ಇಲ್ಲದೇ ಮೊಬೈಲ್‌ ನಲ್ಲೇ ವೆಬ್‌ಸೈಟ್ ನಿರ್ಮಿಸಿದ ಹುಬ್ಬಳ್ಳಿಯ ಉದ್ಯಮಿಗಳು!

Kannadaprabha News — Tue, 13 Oct 2026 07:32:49 +0530

ಹುಬ್ಬಳ್ಳಿ : ಕೋಡಿಂಗ್ ಗೊತ್ತಿಲ್ಲ, ಕಂಪ್ಯೂಟರ್ ಬಳಕೆಯ ಅನುಭವವೂ ಕಡಿಮೆ. ಆದರೂ ಕೃತಕ ಬುದ್ಧಿಮತ್ತೆ (ಎಐ) ನೆರವಿನಿಂದ ಮೊಬೈಲ್‌ನಲ್ಲೇ ಸ್ವಂತ ಉದ್ಯಮದ ವೆಬ್‌ಸೈಟ್ ನಿರ್ಮಿಸಿ ಆನ್‌ಲೈನ್‌ನಲ್ಲಿ ಪ್ರಕಟಿಸುವುದು ಈಗ ಸಾಧ್ಯ. ಇದನ್ನು ನಗರದ ರೋಟರಿ ಕ್ಲಬ್‌ನಲ್ಲಿ ಈಚೆಗೆ ನಡೆದ ಪ್ರಾಯೋಗಿಕ ಕಾರ್ಯಾಗಾರ ಇದನ್ನು ತೋರಿಸಿಕೊಟ್ಟಿತು.

ಸ್ಕೈ ಮೌಂಟ್‌ ಸಂಸ್ಥಾಪಕ ಮನೀಷ್ ಐ. ಜೈನ್

ಸ್ಕೈ ಮೌಂಟ್‌ ಸಂಸ್ಥಾಪಕ ಮನೀಷ್ ಐ. ಜೈನ್ ನಡೆಸಿಕೊಟ್ಟ "ನಿಮ್ಮ ಡಿಜಿಟಲ್ ಐಡೆಂಟಿಟಿ ಕಟ್ಟಿಕೊಳ್ಳಿ" ಕಾರ್ಯಕ್ರಮದಲ್ಲಿ ವಿವಿಧ ವಯೋಮಾನದ ಉದ್ಯಮಿಗಳು ಪಾಲ್ಗೊಂಡು ವೆಬ್‌ಸೈಟ್ ನಿರ್ಮಾಣದ ಪೂರ್ವಾನುಭವವಿಲ್ಲದವರೂ ತಮ್ಮ ಸ್ಮಾರ್ಟ್‌ಫೋನ್‌ಗಳ ಮೂಲಕ ವೆಬ್‌ಸೈಟ್ ರೂಪಿಸಿ ಪ್ರಕಟಿಸುವ ವಿಧಾನ ಕಲಿತರು.

ಕಾರ್ಯಾಗಾರದಲ್ಲಿ "ಲವಬಲ್" ಎಐ ವೇದಿಕೆ ಬಳಸಿ ವೆಬ್‌ಸೈಟ್ ನಿರ್ಮಿಸುವ ಪ್ರಾತ್ಯಕ್ಷಿಕೆ ನೀಡಲಾಯಿತು. ಉದ್ಯಮದ ವಿವರಗಳನ್ನು ಸಾಮಾನ್ಯ ಭಾಷೆಯಲ್ಲಿ ಸೂಚಿಸಿದರೆ, ಅದರ ಆಧಾರದಲ್ಲಿ ವೆಬ್‌ಸೈಟ್ ರೂಪಿಸಬಹುದು. ಉತ್ಪನ್ನಗಳ ಮಾಹಿತಿ, ಫೋಟೋ ಗ್ಯಾಲರಿ, ಗ್ರಾಹಕರ ಅಭಿಪ್ರಾಯ ಹಾಗೂ ವಾಟ್ಸ್‌ಆ್ಯಪ್ ಸಂಪರ್ಕದಂತಹ ಸೌಲಭ್ಯಗಳನ್ನೂ ಸೇರಿಸಬಹುದು. ಬಣ್ಣ, ವಿನ್ಯಾಸ ಮತ್ತು ಮೊಬೈಲ್‌ನಲ್ಲಿನ ಪ್ರದರ್ಶನವನ್ನು ಸೂಚನೆಗಳ ಮೂಲಕವೇ ಬದಲಾಯಿಸಬಹುದು.

ವೆಬ್‌ಸೈಟ್ ನಿರ್ಮಿಸಲು ಕಂಪ್ಯೂಟರ್, ಕೋಡಿಂಗ್ ಜ್ಞಾನ ಅಥವಾ ತಾಂತ್ರಿಕ ತಂಡವೇ ಬೇಕೆಂಬುದು ಹಳೆಯ ಕಲ್ಪನೆ. ಉದ್ಯಮದ ಅಗತ್ಯಗಳನ್ನು ಸ್ಪಷ್ಟವಾಗಿ ವಿವರಿಸಲು ಬಂದರೆ ಎಐ ನೆರವಾಗುತ್ತದೆ ಎಂದು ಜೈನ್ ಹೇಳಿದರು.

ಸಣ್ಣ ಉದ್ಯಮಿಗಳಿಗೆ ಹೊಸ ಅವಕಾಶ

ಎಐ ತಂತ್ರಜ್ಞಾನವು ತಾಂತ್ರಿಕ ಪರಿಣತರು ಮತ್ತು ಸಾಮಾನ್ಯ ಬಳಕೆದಾರರ ನಡುವಿನ ಅಂತರವನ್ನು ಕಡಿಮೆ ಮಾಡುತ್ತಿದೆ. ಸಣ್ಣ ಮತ್ತು ಮಧ್ಯಮ ಉದ್ಯಮಿಗಳು ತಮ್ಮ ಕ್ಷೇತ್ರದ ಜ್ಞಾನವನ್ನು ಎಐ ಸಾಮರ್ಥ್ಯದೊಂದಿಗೆ ಜೋಡಿಸಿ ಕಡಿಮೆ ವೆಚ್ಚದಲ್ಲಿ ಡಿಜಿಟಲ್ ಗುರುತು ರೂಪಿಸಿಕೊಳ್ಳಬಹುದು. ಇದರಿಂದ ವೆಬ್‌ಸೈಟ್ ಮಾತ್ರವಲ್ಲದೆ, ಭವಿಷ್ಯದಲ್ಲಿ ಆ್ಯಪ್‌ಗಳು ಹಾಗೂ ಇತರ ಡಿಜಿಟಲ್ ಉತ್ಪನ್ನಗಳನ್ನು ರೂಪಿಸುವ ಅವಕಾಶವೂ ಹೆಚ್ಚಲಿದೆ. ಈ ಸಂದರ್ಭದಲ್ಲಿ ಉದ್ದಿಮೆದಾರರು, ಸಾರ್ವಜನಿಕರು ಪಾಲ್ಗೊಂಡಿದ್ದರು.