Asianet Suvarna News

ಈ ವರ್ಷದಿಂದಲೇ ವಾಹನ to ವಾಹನ ಟೆಕ್ನಾಲಜಿ ಜಾರಿ ಎಂದ ಗಡ್ಕರಿ, ಏನಿದು ಹೊಸ ನೀತಿ?

Chethan Kumar — Fri, 09 Jan 2026 12:09:58 +0530

ಈ ವರ್ಷದಿಂದಲೇ ವಾಹನ to ವಾಹನ ಟೆಕ್ನಾಲಜಿ ಜಾರಿ ಎಂದ ಗಡ್ಕರಿ, 2026ರ ಅಂತ್ಯದ ವೇಳೆ ಹೊಸ ತಂತ್ರಜ್ಞಾನ ಜಾರಿಯಾಗುತ್ತಿದೆ. ಇದು ವಾಹನಗಳಿಗೆ ಕಡ್ಡಾಯವಾಗಿದೆ. ಈ ಕುರಿತು ಕೇಂದ್ರ ಸಚಿವ ಮಾಹಿತಿ ಹಂಚಿಕೊಂಡಿದ್ದಾರೆ.

ಭಾರತದಲ್ಲಿ ವಾಹನ, ರಸ್ತೆ ಸಾರಿಗೆ ವಿಚಾರದಲ್ಲಿ ಹಲವು ಸುಧಾರಣೆ ಮಾಡಲಾಗುತ್ತಿದೆ. ಅತ್ಯಾಧುನಿಕ ಟೆಕ್ನಾಲಜಿ ಬಳಲಿ ವಾಹನ ಸವಾರರ ಸಮಯ,ಪ್ರಯಾಣ ಸುಖಕರ ಮಾಡಲು ಮಹತ್ವದ ಹೆಜ್ಜೆ ಇಡಲಾಗಿದೆ. ಈಗಾಗಲೇ ಫಾಸ್ಟಾಗ್ ತಂತ್ರಜ್ಞಾನವನ್ನು ಜಿಪಿಎಸ್ ಆಧಾರಿತ ಮಾಡಲು ಪ್ರಯತ್ನಗಳು ನಡೆಯುತ್ತಿದೆ. ಇದರ ಬೆನ್ನಲ್ಲೇ ಇದೇ ವರ್ಷದ ಅಂತ್ಯದಲ್ಲಿ ವೆಹಿಕಲ್ ಟು ವೆಹಿಕಲ್ ತಂತ್ರಜ್ಞಾನ ಜಾರಿಯಾಗುತ್ತಿದೆ.

ಹೊಸ ತಂತ್ರಜ್ಞಾನ, ಜಾರಿ, ಅಳವಡಿಕೆ ಕುರಿತು ಕೇಂದ್ರ ಹೆದ್ದಾರಿ ಹಾಗೂ ರಸ್ತೆ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಮಾಹಿತಿ ನೀಡಿದ್ದಾರೆ. ಇದು ದೇಶದಲ್ಲಿ ಹೆಚ್ಚುತ್ತಿರುವ ಅಪಘಾತ ಇಳಿಸಲು ಹಾಗೂ ರಸ್ತೆ ಸುರಕ್ಷತೆಗೆ ತಂದಿರುವ ಹೊಸ ತಂತ್ರಜ್ಞಾನ. ಈ ಟೆಕ್ನಾಲಜಿ ಮೂಲಕ ರಸ್ತೆ ಅಪಘಾತ ತಡೆಯಲು ಸಾಧ್ಯವಾಗಲಿದೆ ಎಂದಿದ್ದಾರೆ. ರಸ್ತೆ ಬದಿಯಲ್ಲಿ ಪಾರ್ಕ್ ಮಾಡಿರುವ ವಾಹನಗಳಿಗೆ ಇತರ ವಾಹನ ಡಿಕ್ಕಿ ಪ್ರಮಾಣವನ್ನು ಈ ತಂತ್ರಜ್ಞಾನ ತಗ್ಗಿಸಲಿದೆ. ದಟ್ಟ ಮಂಜು ಕಾರಣ ಸಂಭವಿಸುವ ಅಪಘಾತಗಳ ಪ್ರಮಾಣವನ್ನು ಹೊಸ ತಂತ್ರಜ್ಞಾನ ಕಡಿಮೆ ಮಾಡಲಿದೆ. ಪ್ರಮುಖವಾಗಿ ರಸ್ತೆ ಸುರಕ್ಷತೆ ದೃಷ್ಟಿಯಿಂದ ಹೊಸ ತಂತ್ರಜ್ಞಾನ ಇದೇ ವರ್ಷ ಜಾರಿಯಾಗುತ್ತಿದೆ.

ವೆಹಿಕಲ್ ಟು ವೆಹಿಕಲ್ ತಂತ್ರಜ್ಞಾನ ಒಳಗೊಂಡಿರುವ ಚಿಪ್ ವಾಹನಕ್ಕೆ ಅಳವಡಿಸಲಾಗುತ್ತದೆ. ಇದು ಯಾವುದೇ ನೆಟ್‌ವರ್ಕ್ ಇಲ್ಲದೆ ಒಂದು ವಾಹನದಿಂದ ಮತ್ತೊಂದು ವಾಹನ ಜೊತೆ ಸಂವಹನ ನಡೆಸಲಿದೆ. ಜೊತೆಗೆ ಸಂದೇಶಗಳನ್ನು ಕಳುಹಿಸಲಿದೆ. ಈ ತಂತ್ರಜ್ಞಾನದಿಂದ ಯಾವುದೇ ವಾಹನ ಹತ್ತಿರ ಬರುತ್ತಿದ್ದಂತೆ ಅಥವಾ ವಾಹನಗಳು ಪಾರ್ಕ್ ಮಾಡಿದ್ದ, ಸಾಗುತ್ತಿರುವ ವಾಹನಗಳ ಸಮೀಪಕ್ಕೆ ಬರುತ್ತದ್ದಂತೆ ಅಲರ್ಟ್ ನೀಡಲಿದೆ. ಇನ್ನು ಪಾರ್ಕ್ ಮಾಡಿದ ವಾಹನಗಳು ಕೂಡ ಅಲರ್ಟ್ ಸಂದೇಶ ನೀಡಲಿದೆ. ಇದರಿಂದ ವಾಹನ ಚಾಲಕರು ಪಾರ್ಕ್ ಮಾಡಿರುವ ವಾಹನ, ದಟ್ಟಮಂಜು ವಾತಾವರಣದಲ್ಲಿ ಚಾಲನೆ ಮಾಡುವಾಗ ಇತರ ವಾಹನಗಳ ಗೋಚರಿಸಿದ್ದರೂ ಅಲರ್ಟ್ ಸಂದೇಶ ಬರಲಿದೆ ಎಂದು ನಿತಿನ್ ಗಡ್ಕರಿ ಹೇಳಿದ್ದಾರೆ.

ಮೊಬೈಲ್ ಸಿಮ್ ರೀತಿಯ ಚಿಪ್ ಅಳವಡಿಕೆ ಮಾಡಲಾಗುತ್ತದೆ. ಇದು ರಿಯಲ್ ಟೈಮ್ ಅಲರ್ಟ್ ನೀಡಲಿದೆ. ಇದರಿಂದ ವಾಹನ ಸವಾರರಿಗೆ ನೆರವಾಗಲಿದೆ. ವಿಶೇಷ ಅಂದರೆ ವಾಹನ ಚಲಿಸುತ್ತಿರುವ ದಾರಿಯಲ್ಲಿ ಪಾರ್ಕ್ ಆಗಿರುವ ವಾಹನ ನಿಖರವಾಗಿ ಲೋಕೇಶನ್ ತಿಳಿಸಲಿದೆ. ಇನ್ನು ಯಾವುದೇ ವಾಹನ ಹತ್ತಿರಕ್ಕೆ ಬಂದರೂ ಅಲರ್ಟ್ ನೀಡಲಿದೆ. ಇದರಿಂದ ಚಾಲಕರು ಎಚ್ಚರಿಕೆಯಿಂದ ವಾಹನ ಚಲಾಯಿಸಲು ಹಾಗೂ ಅಪಘಾತವಾಗುವುದನ್ನು ತಪ್ಪಿಸಲು ನೆರವಾಗಲಿದೆ. ವಾಹನದ ಯಾವುದೇ ಭಾಗದಿಂದ ವಾಹನ ಬಂದರೂ, ಇದ್ದರೂ ಅಲರ್ಟ್ ನೀಡಲಿದೆ. 360 ಡಿಗ್ರಿ ಸಂವಹನ ನಡೆಸಲಿದೆ.

2026ರ ಅಂತ್ಯದಲ್ಲಿ ಹೊಸ ತಂತ್ರಜ್ಞಾನ ಜಾರಿಯಾಗುತ್ತಿದೆ. ಆರಂಭಿಕ ಹಂತದಲ್ಲಿ ಇದು ಹೊಸ ವಾಹನಗಳಿ ಅಳವಡಿಕೆ ಮಾಡಲಾಗುತ್ತದೆ. ಬಳಿಕ ಹಂತ ಹಂತವಾಗಿ ಇತರ ವಾಹನಗಳಿಗೆ ಅಳವಡಿಕೆ ಮಾಡಲಾಗುತ್ತದೆ. ಇದು ಬರೋಬ್ಬರಿ 5000 ಕೋಟಿ ರೂಪಾಯಿ ವೆಚ್ಚದ ಯೋಜನೆ ಪ್ರಗತಿಯಲ್ಲಿದೆ. ಈ ಸಿಮ್ ಚಿಪ್‌ಗೆ ಗ್ರಾಹಕರು ಎಷ್ಟು ಪಾವತಿಸಬೇಕು ಅನ್ನೋ ಮಾಹಿತಿ ಇನ್ನೂ ಲಭ್ಯವಾಗಿಲ್ಲ.

ಎಲ್ಲಾ ವಾಹನಗಳಿಗೆ ಅಳವಡಿಸಲಾಗುತ್ತಾ?

ಹೊಸ ಕಾರುಗಳಲ್ಲಿ ADAS (ಅಡ್ವಾನ್ಸ್ ಡ್ರೈವರ್ ಅಸಿಸ್ಟೆನ್ಸ್ ಸಿಸ್ಟಮ್) ತಂತ್ರಜ್ಞಾನ ಜೊತೆ ಈ ಸಿಮ್ ಚಿಪ್ ಕಾರ್ಡಿನೇಟ್ ಮಾಡಲಿದೆ. ಇದರಿದಂದ ರಸ್ತೆ ಸುರಕ್ಷತೆ ಪ್ರಮುಖ ಆಧ್ಯತೆ ಸಿಗಲಿದೆ. V2V ತಂತ್ರಜ್ಞಾನದಿಂದ ಭಾರತದಲ್ಲಿ ರಸ್ತೆ ಸುರಕ್ಷತೆ ಹಾಗೂ ಟ್ರಾಫಿಕ್ ನಿಯಮ ಪಾಲನೆಯಲ್ಲೂ ಸುಧಾರಣೆ ಕಾಣಲಿದೆ ಎಂದು ನಿತಿನ್ ಗಡ್ಕರಿ ಹೇಳಿದ್ದಾರೆ.

ADAS ಟೆಕ್ ಜೊತೆ ಕಾರ್ಡಿನೇಟ್

5.35 ಲಕ್ಷ ಮಾರುತಿ ಇಗ್ನಿಸ್ ಕಾರಿನ ಫ್ಯಾನ್ಸಿ ನಂಬರ್‌ಗೆ 2 ಕೋಟಿ ಕೊಟ್ಟ ಉದ್ಯಮಿ, ದುಬಾರಿ ದಾಖಲೆ

Chethan Kumar — Tue, 03 Feb 2026 14:01:30 +0530

5.35 ಲಕ್ಷ ಮಾರುತಿ ಇಗ್ನಿಸ್ ಕಾರಿನ ಫ್ಯಾನ್ಸಿ ನಂಬರ್‌ಗೆ 2 ಕೋಟಿ ಕೊಟ್ಟ ಉದ್ಯಮಿ, ಇದು ಭಾರತದ ಅತೀ ದುಬಾರಿ ರಿಜಿಸ್ಟ್ರೇಶನ್ ನಂಬರ್. ಸಾಮಾನ್ಯವಾಗಿ ಲಕ್ಷುರಿ ಕಾರಿಗೆ ಈ ರೀತಿ ನಂಬರ್ ಖರೀದಿಸುತ್ತಾರೆ. ಆದರೆ ಇದೇ ಮೊದಲ ಬಾರಿಗೆ ಅಗ್ಗದ ಕಾರಿಗೆ 2.08 ಕೋಟಿ ನಂಬರ್ ಖರೀದಿಸಲಾಗಿದೆ.

ಭಾರತದಲ್ಲಿ ಶ್ರೀಮಂತರು, ಉದ್ಯಮಿಗಳು, ರಾಜಕಾರಣಿಗಳು ತಮ್ಮ ಕಾರುಗಳ ರಿಜಿಸ್ಟ್ರೇಶನ್ ನಂಬರ್‌ಗೆ ಹೆಚ್ಚು ಶ್ರಮವಹಿಸುತ್ತಾರೆ. ಹರಾಜಿನ ಮೂಲಕ ತಮ್ಮ ನೆಚ್ಚಿನ, ಲಕ್ಕಿ, ಅದೃಷ್ಠದ ನಂಬರ್ ಖರೀದಿಸುತ್ತಾರೆ. ಕೋಟಿ ಕೋಟಿ ರೂಪಾಯಿ ಬೆಲೆ ಬಾಳುವ ಕಾರಿಗೆ ಲಕ್ಷ ಲಕ್ಷ ರೂಪಾಯಿ ನೀಡಿ ನೋಂದಣಿ ಸಂಖ್ಯೆ ಖರೀದಿಸುತ್ತಾರೆ. ಆದರೆ ಭಾರತದಲ್ಲಿ ಇದೇ ಮೊದಲ ಬಾರಿಗೆ ಜನಸಾಮಾನ್ಯರು ಖರೀದಿಸುವ ಮಾರುತಿ ಇಗ್ನಿಸ್ ಕಾರಿಗೆ ದುಬಾರಿ ನೋಂದಣಿ ಸಂಖ್ಯೆ ಖರೀದಿಸಲಾಗಿದೆ. ಇದು ದಾಖಲೆಯಾಗಿದೆ.

ಆಂಧ್ರ ಪ್ರದೇಶದ ಶ್ರೀಮಂತ ಉದ್ಯಮಿ ಕಿರಣ್ ಕೊಲ್ಪಾಕುಲಾ ಈ ದುಬಾರಿ ರಿಜಿಸ್ಟ್ರೇಶನ್ ನಂಬರ್ ಖರೀದಿಸಿ ದಾಖಲೆ ಬರೆದಿದ್ದಾರೆ. ಮಾರುತಿ ಇಗ್ನಿಸ್ ಕಾರಿನ ಆರಂಭಿಕ ಬೆಲೆ 5.35 ಲಕ್ಷ ರೂಪಾಯಿ, ಟಾಪ್ ಮಾಡೆಲ್ ಬೆಲೆ 7.55 ಲಕ್ಷ ರೂಪಾಯಿ. ಈ ಕಾರಿಗೆ ಉದ್ಯಮಿ ಕಿರಣ್ ಕೋಲ್ಪಾಕುಲಾ ಹರಾಜಿನ ಮೂಲಕ ಖರೀದಿಸಿದ ರಿಜಿಸ್ಟ್ರೇಶನ್ ನಂಬರ್ ಬೆಲೆ 2.08 ಕೋಟಿ ರೂಪಾಯಿ

ಉದ್ಯಮಿ ಕಿರಣ್ 2.08 ಕೋಟಿ ರೂಪಾಯಿ ನೀಡಿದ ಖರೀದಿಸಿದ ರಿಜಿಸ್ಟ್ರೇಶನ್ ನಂಬರ್ DDC 001. ಇದು ಭಾರತದಲ್ಲಿ ಅತೀ ದುಬಾರಿ ನೋಂದಣಿ ಸಂಖ್ಯೆಯಾಗಿದೆ. ಇದಕ್ಕೂ ಮೊದಲು 1.17 ಕೋಟಿ ರೂಪಾಯಿ ನೀಡಿ ಉದ್ಯಮಿಯೊಬ್ಬರು HR 88 B8888 ನಂಬರ್ ದೇಶದ ಅತೀ ದುಬಾರಿ ನಂಬರ್ ಆಗಿತ್ತು. ಆದರೆ ಕಿರಣ್ ಎಲ್ಲಾ ದಾಖಲೆ ಮುರಿದಿದ್ದಾರೆ. ವಿಶೇಷ ಅಂದರೆ ಒಂದು ಅತೀ ದುಬಾರಿ ಕಾರು, ಮತ್ತೊಂದು ಅತೀ ಅಗ್ಗದ ಕಾರಿಗೆ ಈ ದುಬಾರಿ ನಂಬರ್ ಪ್ಲೇಟ್ ದಾಖಲೆ ಬರೆದಿದ್ದಾರೆ.

ಬಿಗ್ ಬಾಯ್ ಟಾಯ್ಸ್ ಈ ಹರಾಜು ಪ್ರಕ್ರಿಯೆ ನಡೆಸಿತ್ತು. ಕಾರಣ ಈ ನಂಬರ್ ಹೊಸದಾಗಿ ಆರ್‌ಟಿಒ ಕಚೇರಿಯಿಂದ ಖರೀದಿಸಿದ ನಂಬರ್ ಅಲ್ಲ. ಕಿರಣ್ ಕೋಲ್ಪಾಕುಲಾ ಈ ದುಬಾರಿ ನಂಬರ್ ಪ್ಲೇಟ್‌ನ್ನು ಬಿಗ್ ಬಾಯ್ ಟಾಯ್ಸ್ ಸಂಸ್ಥಾಪಕ ಜತೀನ್ ಅಹುಜಾ ಅವರಿಂದ ಖರೀದಿಸಿದ್ದರೆ. ಈ ನಂಬರ್‌ಗೆ ಬಾರಿ ಬೇಡಿಕೆ ಬಂದ ಕಾರಣ ಹರಾಜು ಹಾಕಲಾಗಿತ್ತು. ಹರಾಜಿನಲ್ಲಿ ಉದ್ಯಮಿ ಕಿರಣ್ ಕೋಲ್ಪಾಕುಲಂ 2.08 ಕೋಟಿ ರೂಪಾಯಿ ನೀಡಿ ಖರೀದಿಸಿದ್ದರು.

ಮಾರುತಿ ಸುಜುಗಿ ಇಗ್ನಿಸ್ ಕಾರು ಅಗ್ಗದ ಕಾರಾಗಿ ಗುರುತಿಸಿಕೊಂಡಿದೆ. ಶ್ರೀಮಂತರು, ಉದ್ಯಮಿಗಳು ಸಾಮಾನ್ಯವಾಗಿ ಐಷಾರಾಮಿ ಕಾರು ಖರೀದಿಸುತ್ತಾರೆ. ಆದರೆ ಕಿರಣ್ ಕೋಲ್ಪಾಕುಲಾ 5.35 ರಿಂದ 7.55ಲಕ್ಷ ರೂಪಾಯಿ ಮೌಲ್ಯದ ಮಾರುತಿ ಇಗ್ನಿಸ್ ಕಾರು ಖರೀದಿಸಿ ಅದಕ್ಕೆ 2.08 ಕೋಟಿ ಫ್ಯಾನ್ಸಿ ನಂಬರ್ ಖರೀದಿಸಿದ್ದಾರೆ.ಇದೀಗ ಕಾರಿಗಿಂತ ನಂಬರ್ ಪ್ಲೇಟ್ ಭಾರವೇ ಹೆಚ್ಚಾಗಿದೆ.

ಭಾರತದಲ್ಲಿ ಫ್ಯಾನ್ಸಿ ನಂಬರ್ ಕ್ರೇಜ್ ಹೊಸದೇನಲ್ಲ. 1.17 ಕೋಟಿ ರೂಪಾಯಿ ನೀಡಿ ಖರೀದಿಸಿದ HR 88 B8888 ನಂಬರ್, ಇನ್ನು ಕೇರಳದ ಉದ್ಯಮಿ ತಮ್ಮ ಲ್ಯಾಂಬೋರ್ಗಿನಿ ಉರುಸ್ ಕಾರಿಗೆ 46 ಲಕ್ಷ ರೂಪಾಯಿ ನೀಡಿ KL 07 DG 0007 ನಂಬರ್ ಖರೀದಿಸಿದ್ದರು.

ಭಾರತದಲ್ಲಿ ನಂಬರ್ ಪ್ಲೇಟ್ ಕ್ರೇಜ್

ಪೆಟ್ರೋಲ್ ಟೆನ್ಶನ್ ಬಿಡಿ! ದಿನನಿತ್ಯದ ಓಡಾಟಕ್ಕೆ ಈ ಸೈಕಲ್ ಇದ್ರೆ ಸಾಕು, ಜೇಬಿಗೂ ಹಗುರ!

Mahmad Rafik — Tue, 17 Mar 2026 12:29:36 +0530

ಪೆಟ್ರೋಲ್ ಬೆಲೆ ಏರಿಕೆಯಿಂದಾಗಿ, ದಿನನಿತ್ಯದ ಓಡಾಟಕ್ಕೆ ಎಲೆಕ್ಟ್ರಿಕ್ ಸೈಕಲ್‌ಗಳು ಉತ್ತಮ ಪರ್ಯಾಯವಾಗಿವೆ. ₹50,000ದೊಳಗಿನ ಈ ಇ-ಬೈಕ್‌ಗಳು ಒಂದೇ ಚಾರ್ಜ್‌ನಲ್ಲಿ 60 ಕಿ.ಮೀ ವರೆಗೆ ಮೈಲೇಜ್ ನೀಡಿ, ಖರ್ಚು ಕಡಿಮೆ ಮಾಡಿ ಪರಿಸರವನ್ನೂ ಉಳಿಸುತ್ತವೆ.

ಪೆಟ್ರೋಲ್ ಬೆಲೆ ಏರಿಕೆ ಮತ್ತು ಜಾಗತಿಕ ಇಂಧನ ಕೊರತೆಯಂತಹ ಸಮಸ್ಯೆಗಳು ಹೆಚ್ಚಾಗುತ್ತಿವೆ. ಈ ಹಿನ್ನೆಲೆಯಲ್ಲಿ, ಪರ್ಯಾಯ ಸಾರಿಗೆ ವ್ಯವಸ್ಥೆಗಳ ಹುಡುಕಾಟ ಅನಿವಾರ್ಯವಾಗಿದೆ. ಅದರಲ್ಲೂ, ಪ್ರತಿದಿನ ಕಡಿಮೆ ದೂರ ಪ್ರಯಾಣಿಸುವ ವಿದ್ಯಾರ್ಥಿಗಳು ಮತ್ತು ಕಚೇರಿ ಉದ್ಯೋಗಿಗಳು ಈಗ ಎಲೆಕ್ಟ್ರಿಕ್ ಸೈಕಲ್‌ಗಳ (ಇ-ಬೈಕ್‌) ಕಡೆಗೆ ಹೆಚ್ಚು ಗಮನ ಹರಿಸುತ್ತಿದ್ದಾರೆ.

ಇ-ಬೈಕ್‌ಗಳು ಸಾಮಾನ್ಯ ಸೈಕಲ್‌ಗಳಲ್ಲ. ಇದರಲ್ಲಿರುವ ಎಲೆಕ್ಟ್ರಿಕ್ ಮೋಟಾರ್ ಮತ್ತು ಬ್ಯಾಟರಿ, ನೀವು ಹೆಚ್ಚು ಶ್ರಮವಿಲ್ಲದೆ ಪ್ರಯಾಣಿಸಲು ಸಹಾಯ ಮಾಡುತ್ತದೆ. ಒಮ್ಮೆ ಚಾರ್ಜ್ ಮಾಡಿದರೆ 40 ರಿಂದ 60 ಕಿಲೋಮೀಟರ್‌ವರೆಗೂ ಚಲಿಸುವ ಸಾಮರ್ಥ್ಯವಿರುವುದರಿಂದ, ದಿನನಿತ್ಯದ ಓಡಾಟಕ್ಕೆ ಇದು ಅತ್ಯುತ್ತಮ ಆಯ್ಕೆಯಾಗಿದೆ.

ಮಾರುಕಟ್ಟೆಯಲ್ಲಿ ₹50,000 ಕ್ಕಿಂತ ಕಡಿಮೆ ಬೆಲೆಯಲ್ಲಿ ಹಲವು ಉತ್ತಮ ಮಾದರಿಗಳು ಲಭ್ಯವಿವೆ. EMotorad T-Rex Air, BSA Urban Ranger ನಂತಹ ಮಾಡೆಲ್‌ಗಳು ಉತ್ತಮ ರೇಂಜ್ ಮತ್ತು ಸ್ಟೈಲಿಶ್ ವಿನ್ಯಾಸದೊಂದಿಗೆ ಬರುತ್ತವೆ.

Eco-Bike Red ನಂತಹ ಸೈಕಲ್‌ಗಳು ಕಡಿಮೆ ಬೆಲೆಯಲ್ಲೂ ಉಪಯುಕ್ತ ಫೀಚರ್‌ಗಳನ್ನು ನೀಡುತ್ತವೆ. ಹಾಗೆಯೇ, Hero Lectro Y3, Y5 ಮಾದರಿಗಳು ತಮ್ಮ ವಿಶ್ವಾಸಾರ್ಹತೆ ಮತ್ತು ಕಡಿಮೆ ನಿರ್ವಹಣಾ ವೆಚ್ಚಕ್ಕೆ ಹೆಸರುವಾಸಿಯಾಗಿವೆ.

ಈ ಹಲವು ಮಾದರಿಗಳಲ್ಲಿ ತೆಗೆಯಬಹುದಾದ ಬ್ಯಾಟರಿ, ಎಲ್‌ಇಡಿ ಡಿಸ್‌ಪ್ಲೇ, ಡಿಸ್ಕ್ ಬ್ರೇಕ್‌ಗಳು ಮತ್ತು ವಾಟರ್ ರೆಸಿಸ್ಟೆನ್ಸ್‌ನಂತಹ ಸೌಲಭ್ಯಗಳಿವೆ. ಕೆಲವು ಮಾಡೆಲ್‌ಗಳು ಪೆಡಲ್ ಅಸಿಸ್ಟ್ ಸೌಲಭ್ಯವನ್ನೂ ನೀಡುತ್ತವೆ. ಇದರಿಂದಾಗಿ, ಸೈಕಲ್ ತುಳಿಯುವಾಗ ಬ್ಯಾಟರಿಯ ಸಹಾಯವೂ ಸಿಗುತ್ತದೆ. ಇದು ಪ್ರಯಾಣವನ್ನು ಇನ್ನಷ್ಟು ಸುಲಭ ಮತ್ತು ಆರಾಮದಾಯಕವಾಗಿಸುತ್ತದೆ.

ಇದನ್ನೂ ಓದಿ: ಮಹಿಳೆಯಿಂದ ಟಾಟಾ ಸಿಯೆರಾ ಟೆಸ್ಟ್ ಡ್ರೈವ್, 3 ವಾಹನಕ್ಕೆ ಡಿಕ್ಕಿಯಾಗಿ 20 ಅಡಿ ಗುಂಡಿಗೆ ಬಿದ್ದ ಕಾರು

ಒಟ್ಟಾರೆಯಾಗಿ, ಇ-ಬೈಕ್‌ಗಳು ಕಡಿಮೆ ಖರ್ಚಿನ, ಪರಿಸರ ಸ್ನೇಹಿ ಸಾರಿಗೆ ಕ್ರಾಂತಿಯೆಂದೇ ಹೇಳಬಹುದು. ಪೆಟ್ರೋಲ್ ಚಿಂತೆಯಿಲ್ಲದೆ, ದೈಹಿಕ ಆರೋಗ್ಯವನ್ನು ಕಾಪಾಡಿಕೊಂಡು, ದೈನಂದಿನ ಜೀವನವನ್ನು ಸುಲಭವಾಗಿಸುವ ಈ ಬದಲಾವಣೆಯನ್ನು ಅಳವಡಿಸಿಕೊಳ್ಳಲು ಇದು ಸಕಾಲ.

ಇದನ್ನೂ ಓದಿ: ಟಿವಿಎಸ್‌ನಿಂದ ಅತಿ ಅಗ್ಗದ ಇ-ಸ್ಕೂಟರ್‌ ಲಾಂಚ್; 50 ಸಾವಿರಕ್ಕಿಂತ ಕಡಿಮೆ ಬೆಲೆಗೆ ಸಿಗಲಿದೆ ಹೊಸ ಆರ್ಬಿಟರ್ V1!

ಓ ಹೆಣ್ಮಗು ಹೆಣ್ಮಗು, ಲೆಫ್ಟ್ ರೈಟ್ ಗೊಂದಲಕ್ಕೆ ಕೈಯಲ್ಲೇ ಬರೆದು ಡ್ರೈವಿಂಗ್, ಅಡ್ಡ ಬರಬೇಡಿ ಅಷ್ಟೆ

Chethan Kumar — Wed, 18 Feb 2026 15:46:41 +0530

ಓ ಹೆಣ್ಮಗು ಹೆಣ್ಮಗು, ಈ ವೈರಲ್ ಮೀಮ್ಸ್‌ಗೆ ಪರ ವಿರೋಧಗಳಿವೆ. ಇದಕ್ಕೆ ಅನ್ವರ್ಥವಾಗುವ ಮತ್ತೊಂದು ಘಟನೆ ಬೆಳಕಿಗೆ ಬಂದಿದೆ. ಮಹಿಳೆಗೆ ಡ್ರೈವಿಂಗ್ ವೇಳೆ ಯಾವತ್ತೂ ಗೊಂದಲ. ಇದಕ್ಕೆ ಮಹಿಳೆ ಮಾಡಿದ ಐಡಿಯಾ ಚೆನ್ನಾಗಿದೆ. ಆದರೆ ರಸ್ತೆ ಖಾಲಿ ಇರಬೇಕು ಅಷ್ಟೆ.

ಓ ಹೆಣ್ಮಗು ಹೆಣ್ಣಗು ವೈರಲ್ ವಿಡಿಯೋ ಭಾರಿ ಸಂಚಲನ ಸೃಷ್ಟಿಸಿತ್ತು. ಇದೇ ವೇಳೆ ಪರ ವಿರೋಧಗಳು ವ್ಯಕ್ತವಾಗಿತ್ತು. ವಿಶೇಷವಾಗಿ ಮಹಿಳೆಯರು ವಾಹನ ಚಲಾಯಿಸುವಾಗ ಇತರರು ಎಚ್ಚರಿಕೆಯಿಂದ ಇರಬೇಕು ಅನ್ನೋದನ್ನು ಮೀಮ್ಸ್ ಮೂಲಕ, ಮಾರ್ಮಿಕವಾಗಿ ಹೇಳಲಾಗಿತ್ತು. ಒಂದೆರಡು ಘಟನೆ ಹಿಡಿದು ಮಹಿಳೆಯರನ್ನು ಟೀಕಿಸುವುದು ಉತ್ತಮವಲ್ಲ ಅನ್ನೋ ಅಭಿಪ್ರಾಯಗಳು ಇದೇ ಅದು ಏನೇ ಇರಲಿ. ಇದೀಗ ಮಹಿಳೆಯೊಬ್ಬರು ಡ್ರೈವಿಂಗ್ ಮಾಡುವಾಗ ಎದುರಾಗುವ ಗೊಂದಲ ಪರಿಹಾರಕ್ಕೆ ಮಾಡಿದ ಐಡಿಯಾ ಭಾರಿ ಚರ್ಚೆಯಾಗುತ್ತಿದೆ.

ಮಹಿಳೆ ಕಾರು ಚಲಾಯಿಸುವಾಗ ವಿಶೇಷವಾಗಿ ಸವಾಲಿನ ಸಂದರ್ಭಗಳಲ್ಲಿ ಲೆಫ್ಟ್ ಯಾವುದು ರೈಟ್ ಯಾವುದು ಅನ್ನೋ ಗೊಂದಲ ಎದುರಾಗುತ್ತದೆ. ಇದಕ್ಕೆ ಪರಿಹಾರ ಕಂಡುಕೊಳ್ಳಲು ಹೊಸ ಐಡಿಯಾ ಮಾಡಿದ್ದಾಳೆ. ತನ್ನ ಎರಡು ಕೈಗಳಿಗೆ ಗ್ಲೌವ್ಸ್ ಹಾಕಿ ಡ್ರೈವಿಂಗ್ ಮಾಡಲು ಮುಂದಾಗಿದ್ದಾಳೆ. ಇಷ್ಟೇ ಅಲ್ಲ ಎಡಗೈ ಗ್ಲೌವ್ಸ್ ಮೇಲೆ ಲೆಫ್ಟ್ ಎಂದು, ಬಲಗೈ ಗ್ಲೌವ್ಸ್ ಮೇಲೆ ರೈಟ್ ಎಂದು ಬರೆದುಕೊಂಡಿದ್ದಾಳೆ.

ಸೋಶಿಯಲ್ ಮೀಡಿಯಾದಲ್ಲಿ ಈ ಫೋಟೋ ವೈರಲ್ ಆಗಿದೆ. ಇದು ಭಾರಿ ಪ್ರತಿಕ್ರಿಯೆ ಪಡೆದಿದೆ.ಹಲವರು ಮಹಿಳೆ ಗೊಂದಲ ಪರಿಹಾರಕ್ಕೆ ಕ್ಯೂಟ್ ಐಡಿಯಾ ಕಂಡುಕೊಂಡಿದ್ದಾಳೆ. ಡ್ರೈವಿಂಗ್ ಮಾಡುತ್ತಾ ಆಕೆ ಗೊಂದಲ ಮರೆಯುತ್ತಾಳೆ. ತಮ್ಮದೆ ರೀತಿಯಲ್ಲಿ ಈ ರೀತಿ ಗೊಂದಲಕ್ಕೆ ಪರಿಹಾರ ಕಂಡುಕೊಳ್ಳುವುದು ಉತ್ತಮ ಎಂದು ಹಲವರು ಕಮೆಂಟ್ ಮಾಡಿದ್ದಾರೆ.

ಮಹಿಳೆ ತಾನು ರಸ್ತೆಯಲ್ಲಿ ಲೆಫ್ಟ್‌ನಲ್ಲಿ ಹೋಗುತ್ತಿದ್ದೇನಾ, ರೈಟ್‌ನಲ್ಲಿ ಸಾಗುತ್ತಿದ್ದೇನಾ ಅನ್ನೋದು ತನ್ನ ಕೈಗಳನ್ನು ನೋಡಿ ಅರ್ಥ ಮಾಡಿಕೊಳ್ಳುವಷ್ಟು ಗೊಂದಲ ಇದೆ ಎಂದರೆ ಕಾರಿನ ಹಿಂಬದಿ ಸೀಟಿನಲ್ಲಿ ಕುಳಿತುಕೊಳ್ಳುವುದು ಉತ್ತಮ. ಕೈಗಳನ್ನು ನೋಡಿ ಲೆಫ್ಟ್ ರೈಟ್ ಅರ್ಥಮಾಡಿಕೊಳ್ಳುವಷ್ಟರಲ್ಲಿ ರಸ್ತೆಯಲ್ಲಿ ಏನಾಗಿರುತ್ತೋ ದೇವರೆ ಬಲ್ಲ ಎಂದು ಕಮೆಂಟ್ ಮಾಡಿದ್ದಾರೆ.

ಲೆಫ್ಟ್ ರೈಟ್ ಗೊಂದಲ ಇರುವ ಈ ಮಹಿಳೆ ಡ್ರೈವಿಂಗ್ ಮಾಡುವಾಗ ಅಡ್ಡ ಬರಬಾರದು ಅಷ್ಟೆ. ಕಾರಣ ವಾಹನ ಅಥವಾ ಯಾರೇ ಅಡ್ಡ ಬಂದರೂ ತನ್ನ ಕೈ ನೋಡಿ ಲೆಫ್ಟ್ ರೈಟ್ ಅರ್ಥ ಮಾಡಿಕೊಂಡು ಸ್ಟೀರಿಂಗ್ ತಿರುಗಿಸುವಷ್ಟರಲ್ಲೇ ಅನಾಹುತ ಸಂಭವಿಸಿರುತ್ತೆ ಎಂದು ಹಲವರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಅಡ್ಡ ಬರಬಾರದು ಅಷ್ಟೆ

ಟ್ರಾಫಿಕ್ ದಂಡ ಇನ್ನೂ ಕಟ್ವಿಲ್ವಾ? ಹೀಗೆ ಭಾರತದಲ್ಲಿ ಬಾಕಿ ಉಳಿದಿರುವ ಮೊತ್ತ 39000 ಕೋಟಿ ರೂ

Chethan Kumar — Sun, 28 Dec 2025 00:03:05 +0530

ಟ್ರಾಫಿಕ್ ದಂಡ ಇನ್ನೂ ಕಟ್ವಿಲ್ವಾ? ಹೀಗೆ ಭಾರತದಲ್ಲಿ ಬಾಕಿ ಉಳಿದಿರುವ ಮೊತ್ತ 39000 ಕೋಟಿ ರೂ, ಎಐ ಕ್ಯಾಮೆರಾಗಳ ಮೂಲಕ ಇದೀಗ ಇ ಚಲನ್ ಮೂಲಕ ದಂಡ ವಿಧಿಸಲಾಗುತ್ತದೆ. ಆದರೆ ದಂಡ ಕಟ್ಟಿರುವುದಕ್ಕಿಂತ ಕಟ್ಟದೇ ಬಾಕಿ ಉಳಿಸಿಕೊಂಡವರೇ ಹೆಚ್ಚು.

ಭಾರತದಲ್ಲಿ ಎಲ್ಲಾ ರಾಜ್ಯಗಳು ಎಐ ಕ್ಯಾಮೆರಾ ಸೇರಿದಂತೆ ಅತ್ಯಾಧುನಿಕ ವ್ಯವಸ್ಥೆ ಮೂಲಕ ಟ್ರಾಫಿಕ್ ನಿಯಮ ಉಲ್ಲಂಘನೆಗಳಿಗೆ ದಂಡ ವಿಧಿಸಲಾಗುತ್ತದೆ. ಸಿಗ್ನಲ್ ಜಂಪ್, ಒನ್ ವೇ, ಹೈಸ್ಪೀಡ್, ಹೆಲ್ಮೆಟ್, ಡ್ರಿಂಕ್ ಆ್ಯಂಡ್ ಡ್ರೈವ್ ಸೇರಿದಂತೆ ಹಲವು ನಿಯಮ ಉಲ್ಲಂಘನೆಗಳಿಗೆ ದಂಡ ವಿಧಿಸಲಾಗುತ್ತದೆ. ದಂಡ ವಸೂಲಿಗಾಗಿ ಹಲವು ಬಾರಿ ಶೇಕಡಾ 50ರ ಡಿಸ್ಕೌಂಟ್ ಕೂಡ ನೀಡಲಾಗುತ್ತದೆ. ಇಷ್ಟೆಲ್ಲಾ ಮಾಡಿ ಭಾರತದಲ್ಲಿ ಕಳೆದ 10 ವರ್ಷದಲ್ಲಿ ಕಟ್ಟದೆ ಬಾಕಿ ಉಳಿದಿರುವ ದಂಡದ ಮೊತ್ತ 39,000 ಕೋಟಿ ರೂಪಾಯಿ.

2015ರಿಂದ 2015ರವರೆಗೆ ಕಳೆದ 10 ವರ್ಷದಲ್ಲಿ ದೇಶದಲ್ಲಿ ಬರೋಬ್ಬರಿ 61,130 ಕೋಟಿ ರೂಪಾಯಿ ಇ ಚಲನ್ ನೀಡಲಾಗಿದೆ. ಆದರೆ ಇದರಲ್ಲಿ 39,000 ಕೋಟಿ ರೂಪಾಯಿ ಪಾವತಿಯಾಗಿಲ್ಲ. ಇನ್ನು ಪಾವತಿಯಾಗಿರುವ ಮೊತ್ತ 22,124 ಕೋಟಿ ರೂಪಾಯಿ ಮಾತ್ರ. ಪಾವತಿ ಮಾಡದೇ ಬಾಕಿ ಉಳಿಸಿಕೊಂಡ ಮೊತ್ತವೇ ಹೆಚ್ಚಿದೆ.

ಪ್ರತಿ ದಿನ ಭರಾತದಲ್ಲಿ ಸರಾಸರಿ 15 ಕೋಟಿ ರೂಪಾಯಿ ಮೊತ್ತದ ಇ ಚಲನ್ ನೀಡಲಾಗುತ್ತದೆ. ಎಲ್ಲಾ ರಾಜ್ಯಗಳಲ್ಲಿ ನಿಯಮ ಉಲ್ಲಂಘನೆಯ ಸರಾಸರಿ ಮೊತ್ತದಲ್ಲಿ ಪಾವತಿಯಾಗುವ ದಂಡದ ಮೊತ್ತ ಕೇವಲ 5.5 ಕೋಟಿ ರೂಪಾಯಿ ಮಾತ್ರ. ಮುಕ್ಕಾಲು ಭಾಗದಷ್ಟು ಮೊತ್ತ ಪಾವತಿಯಾಗುತ್ತಿಲ್ಲ. ಪ್ರತಿ ದಿನ ಸರಿಸುಮಾರು 10 ಕೋಟಿ ರೂಪಾಯಿ ಮೊತ್ತ ಬಾಕಿ ಉಳಿಯುತ್ತಿದೆ.

ಜನವರಿ 1, 2025ರಿಂದ ಡಿಸೆಂಬರ್ 25, 2025ರ ವರೆಗಿನ 10 ವರ್ಷದಲ್ಲಿ ದೇಶದಲ್ಲಿ ಬರೋಬ್ಬರಿ 40.20 ಕೋಟಿ ಇ ಚಲನ್ ನೀಡಲಾಗಿದೆ. ಇದರಲ್ಲಿ ಶೇಕಡಾ 38ರಷ್ಟು ಇ ಚಲನ್ ಮಾಲೀಕರ ಕೈಸೇರಿದೆ. ಇನ್ನುಳಿದ ಶೇಕಡಾ 62ರಷ್ಟು ಅಂದರೆ 25 ಕೋಟಿ ಇ ಚಲನ್ ಮಾಲೀಕರೇ ಸಿಗದೆ ಪೆಂಡಿಂಗ್‌ನಲ್ಲಿದೆ.

40.20 ಕೋಟಿ ಇ ಚಲನ್

ಗರಿಷ್ಠ ನಿಯಮ ಉಲ್ಲಂಘನೆ, ಇ ಚಲನ್ ನೀಡಿ ಅತೀ ಕಡಿಮೆ ದಂಡ ವಸೂಲಿ ಮಾಡಿದ ರಾಜ್ಯ ಪೈಕಿ ಉತ್ತರ ಪ್ರದೇಶ ಮೊದಲ ಸ್ಥಾನದಲ್ಲಿದೆ.ಯುಪಿಯಲ್ಲಿ 7.93 ಕೋಟಿ ಇ ಚಲನ್ ನೀಡಲಾಗಿದೆ. ತಮಿಳುನಾಡು 7.58 ಕೋಟಿ, ಕೇರಲ 3.99 ಕೋಟಿ, ಹರ್ಯಾಣ 2.04 ಕೋಟಿ, ಗುಜರಾತ್ 1.69 ಕೋಟಿ ಇ ಚಲನ್ ನೀಡಲಾಗಿದೆ.

ಉತ್ತರ ಪ್ರದೇಶಕ್ಕೆ ಮೊದಲ ಸ್ಥಾನ

ಹೊಸ ವರ್ಷಕ್ಕೆ ಹೊಸ ಫಾಸ್ಟಾಗ್ ನೀತಿ, ಟೋಲ್ ಪ್ಲಾಜಾದಲ್ಲಿ ಗೇಟ್ ಇರಲ್ಲ,ಸ್ಲೋ ಮಾಡಬೇಕಿಲ್ಲ

Chethan Kumar — Thu, 18 Dec 2025 18:21:09 +0530

ನವದೆಹಲಿ (ಡಿ.18) ಹೊಸ ವರ್ಷ ಸಮೀಪಿಸುತ್ತಿದೆ. ಇದರ ಜೊತೆಗೆ ಹಲವು ಹೊಸ ನೀತಿ ನಿಯಮಗಳು ಜಾರಿಯಾಗುತ್ತಿದೆ. ಈ ಪೈಕಿ ಫಾಸ್ಟ್ಯಾಗ್‌ ನೀತಿಯಲ್ಲೂ ಮಹತ್ತರ ಬದಲಾವಣೆಯಾಗುತ್ತಿದೆ. ಹೆದ್ದಾರಿ, ಎಕ್ಸ್‌ಪ್ರೆಸ್ ವೇ ಸೇರಿದಂತೆ ಪ್ರಮುಖ ರಸ್ತೆಗಳಲ್ಲಿ ಟೋಲ್ ಪ್ಲಾಜಾ ಮೂಲಕ ಪಾವತಿ ಮಾಡಿ ಸಾಗಬೇಕು. ವಾಹನಗಳಿಗೆ ಫಾಸ್ಟಾಗ್ ಕಡ್ಡಾಯ ಮಾಡಲಾಗಿದೆ. ಇವೆಲ್ಲವೂ ಹಳೇ ನಿಯಮ. ಆದರೆ 2026ರಲ್ಲಿ ಟೋಲ್ ಪ್ಲಾಜಾಗಳಲ್ಲಿನ ನೀತಿ ನಿಯಮಗಳಲ್ಲಿ ಹೊಸ ವೇಗ ತರಲಾಗಿದೆ. ಸದ್ಯ ಟೋಲ್ ಪ್ಲಾಜಾ ಬಳಿ ಸರದಿ ಸಾಲಿನಲ್ಲಿ ನಿಧಾನವಾಗಿ ವಾಹನ ಸಾಗಬೇಕು. ಫಾಸ್ಟಾಗ್ ಸ್ಕ್ಯಾನ್ ಆಗಿ ಪಾವತಿಯಾಗುತ್ತಿದ್ದಂತೆ ಟೋಲ್ ಗೇಟ್ ತೆರೆದುಕೊಳ್ಳಲಿದೆ. ವಾಹನ ಸಂಖ್ಯೆ ಹೆಚ್ಚಾದಂತೆ ಟೋಲ್ ಪ್ಲಾಜಾಗಳಲ್ಲಿ ಸಮಯವೂ ಹೆಚ್ಚಾಗಲಿದೆ. ಆದರೆ ಹೊಸ ವರ್ಷದಲ್ಲಿ ಹೀಗಲ್ಲ, ಟೋಲ್ ಪ್ಲಾಜಾ ಬಳಿ ಕಾರು ಸ್ಲೋ ಮಾಡಬೇಕಿಲ್ಲ, ಗೇಟ್ ತೆರೆಯುವ ವರೆಗೆ ಕಾಯಬೇಕಿಲ್ಲ. ಕಾರಣ ಟೋಲ್ ಪ್ಲಾಜಾದಲ್ಲಿ 80ರ ವೇಗದಲ್ಲಿ ಸಾಗಲು ಸಾಧ್ಯವಾಗಲಿದೆ.

ಸ್ಯಾಟಲೈಟ್ ಆಧಾರಿತ ಟೋಲ್ ಸಿಸ್ಟಮ್

ಹೊಸ ವರ್ಷದಲ್ಲಿ ಟೋಲ್ ಪ್ಲಾಜಾಗಳಲ್ಲಿರುವ ಕ್ಯಾಮೆರಾ, ಸ್ಕ್ಯಾನಿಂಗ್, ಪಾವತಿ ವ್ಯವಸ್ಥೆ ಬದಲಾಗುತ್ತಿದೆ. ಹೊಸ ವ್ಯವಸ್ಥೆಯಲ್ಲಿ ಹೈ ಸ್ಪೀಡ್‌ನಲ್ಲೂ ವಾಹನಗಳ ಫಾಸ್ಟಾಗ್, ನಂಬರ್ ಪ್ಲೇಟ್ ಸ್ಕ್ಯಾನ್ ಮಾಡಬಲ್ಲ ಕ್ಯಾಮೆರಾ ಅಳವಡಿಕೆ ಮಾಡಲಾಗುತ್ತದೆ. ಈಗಾಗಲೇ ಪ್ರಕ್ರಿಯೆ ಶುರುವಾಗಿದೆ. ಒಂದೇ ಸಾರಿ ಹಲವು ಕಾರುಗಳು ಬಂದರೂ ಪ್ರತಿ ಕಾರುಗಳ ಸ್ಕ್ಯಾನ್ ಮಾಡಲು ಸಾಧ್ಯವಾಗಲಿದ. ಟೋಲ್ ಗೇಟ್‌ಗಳು ಇರುವುದಿಲ್ಲ. ವಾಹನಗಳು ಯಾವುದೇ ಅಡೆ ತಡೆ ಇಲ್ಲದೆ ಟೋಲ್ ಪ್ಲಾಜಾ ಮೂಲಕ ಸಾಗಬಹುದು. ಈ ವೇಳೆ ಹೈಸ್ಪೀಡ್ ಕ್ಯಾಮೆರಾ ಮೂಲಕ ಫಾಸ್ಟಾಗ್, ನಂಬರ್ ಪ್ಲೇಟ್ ಸ್ಕ್ಯಾನ್ ಆಗಲಿದೆ. ಈ ಮೂಲಕ ಆಟೋಮ್ಯಾಟಿಕ್ ಆಗಿ ಫಾಸ್ಟಾಗ್ ಖಾತೆಯಿಂದ ಹಣ ಕಡಿತಗೊಳ್ಳಲಿದೆ ಎಂದು ಕೇಂದ್ರ ಹೆದ್ದಾರಿ ಹಾಗೂ ರಸ್ತೆ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಹೇಳಿದ್ದಾರೆ.

ಇದು ಸ್ಯಾಟಲೈಟ್ ಆಧಾರಿತ ಟೋಲ್ ಸಿಸ್ಟಮ್ ಆಗಿದೆ. ಈ ಕುರಿತು ಮಾತನಾಡಿದ ನಿತಿನ್ ಗಡ್ಕರಿ, 2026ರಲ್ಲಿ ಟೋಲ್ ವ್ಯವಸ್ಥೆ ಬದಲಾಗಲಿದೆ. ಈ ಕುರಿತು ನಾನು ಭರವಸೆ ನೀಡುತ್ತಿದ್ದೇನೆ, ಟೋಲ್ ಪ್ಲಾಜಾ ಬರುತ್ತಿದ್ದಂತೆ ವಾಹನ ವೇಗ ಕಡಿಮೆ ಮಾಡಬೇಕಿಲ್ಲ. ವೇಗವಾಗಿ ಸಾಗಲು ಸಾಧ್ಯವಾಗಲಿದೆ. 80 ಕಿಲೋಮೀಟರ್ ವೇಗದಲ್ಲಿ ಟೋಲ್ ಪ್ಲಾಜಾ ದಾಟಬಹುದು ಎಂದು ನಿತಿನ್ ಗಡ್ಕರಿ ಹೇಳಿದ್ದಾರೆ.

ಇಂಧನ ಉಳಿತಾಯ, ಸರ್ಕಾರಕ್ಕೂ ಉಳಿತಾಯ

ಟೋಲ್ ಪ್ಲಾಜಾ ಬಳಿ ಸರದಿ ಸಾಲಿನಲ್ಲಿ ವಾಹನ ಸಾಗುವ ಕಾರಣ ಇಂಧನ ಖರ್ಚು ಹೆಚ್ಚಾಗಲಿದೆ. ವಾಹನದ ವೇಗ ಕಡಿತಗೊಳ್ಳಲಿದೆ, ಜೊತೆಗೆ ಹೆಚ್ಚಿನ ಸಂಚಾರ ದಟ್ಟಣೆ ಇದ್ದರೆ, ಟೋಲ್ ಪ್ಲಾಜಾಗಳಲ್ಲಿ ಟ್ರಾಫಿಕ್ ಜಾಮ್ ಸಮಸ್ಯೆಯೂ ಎದುರಾಗಲಿದೆ. ಹೀಗಾಗಿ ಟೋಲ್ ಬಳಿ ಸೃಷ್ಟಿಯಾಗುವ ಟ್ರಾಫಿಕ್ ಜಾಮ್‌ಗಿಂದ ವಾರ್ಷಿಕವಾಗಿ 1,500 ಕೋಟಿ ರೂಪಾಯಿ ಇಂಧನ ಹೆಚ್ಚು ಖರ್ಚಾಗುತ್ತದೆ. ಆದರೆ ಹೊಸ ಟೋಲ್ ಪ್ಲಾಜಾ ನೀತಿಗಳಿಂದ ಇಂಧನ ಉಳಿತಾಯವಾಗಲಿದೆ. ಜೊತೆಗೆ ಸರ್ಕಾರದ ಬೊಕ್ಕಸಕ್ಕೆ 6,000 ಕೋಟಿ ರೂಪಾಯಿ ನೀಡಲಿದೆ ಎಂದು ನಿತಿನ್ ಗಡ್ಕರಿ ಹೇಳಿದ್ದಾರೆ.

ವೇಗ ಅತಿಯಾದರೆ ಅಲ್ಲೇ ಬೀಳುತ್ತೆ ದಂಡ

ವಿಶೇಷ ಅಂದರೆ ಹೆದ್ದಾರಿಯಲ್ಲಿ ನೀವು ನಿಗದಿತ ವೇಗಕ್ಕಿಂತ ವೇಗದಲ್ಲಿ ಸಾಗಿದರೆ ಅಂದರೆ ಒಂದು ಟೋಲ್ ಪ್ಲಾಜದಿಂದ ಮತ್ತೊಂದು ಟೋಲ್ ಪ್ಲಾಜೆಗೆ ತಲುಪಿದ ಸಮಯ ಹಾಗೂ ನಿಮ್ಮ ವೇಗದಲ್ಲಿ ನಿಯಮ ಉಲ್ಲಂಘನೆಯಾದರೆ ಅಲ್ಲಿ ಬೀಳುತ್ತೆ ದಂಡ. ಎಲ್ಲಾ ವ್ಯವಸ್ಥೆಗಳ ಟೋಲ್ ಪ್ಲಾಜಾ ಹಾಗೂ ಹೊಸ ಪದ್ಧತಿಯೂ ಜಾರಿಯಾಗುವ ಸಾಧ್ಯತೆ ಇದೆ.

ಹೊಸ ವರ್ಷದ ರೂಲ್ಸ್, ಜ.1ರಿಂದ ಎಲ್ಲಾ ಬೈಕ್ -ಸ್ಕೂಟರ್‌ಗೆ ಎಬಿಎಸ್ ಬ್ರೇಕ್, 2 ಹೆಲ್ಮೆಟ್ ಕಡ್ಡಾಯ

Chethan Kumar — Sat, 27 Dec 2025 22:41:44 +0530

ಹೊಸ ವರ್ಷದ ರೂಲ್ಸ್, ಜ.1ರಿಂದ ಎಲ್ಲಾ ಬೈಕ್ -ಸ್ಕೂಟರ್‌ಗೆ ಎಬಿಎಸ್ ಬ್ರೇಕ್, 2 ಹೆಲ್ಮೆಟ್ ಕಡ್ಡಾಯ, ಹಲವು ನಿಮಯಗಳು ಬದಲಾಗುತ್ತಿದೆ. ಕೆಲವು ಕಠಿಣಗೊಳ್ಳುತ್ತಿದೆ. ಇದೀಗ ಸುರಕ್ಷತಾ ದೃಷ್ಟಿಯಿಂದ ಮೋಟಾರು ವಾಹನ ನಿಯಮ ಬಿಗಿಯಾಗಿದೆ.

ಹೊಸ ವರ್ಷದಲ್ಲಿ ಹಲವು ನಿಯಮಗಳು ಬದಲಾಗುತ್ತದೆ. ಕೆಲವು ಪರಿಷ್ಕರಣೆಯಾಗುತ್ತದೆ. ಇನ್ನು ಕೆಲವು ಬಿಗಿಯಾಗತ್ತದೆ. ಇದೀಗ ಮೋಟಾರು ವಾಹನ ಕಾಯ್ದೆಯಡಿ ಕೆಲ ನಿಯಮಗಳು ಮತ್ತಷ್ಟು ಕಠಿಣವಾಗುತ್ತಿದೆ. ವಾಹನ ಸವಾರರು ಸುರಕ್ಷತೆಗೆ ಹೆಚ್ಚಿನ ಆದ್ಯತೆ ನೀಡಲಾಗಿದೆ. ಹೀಗಾಗಿ ಸುರಕ್ಷತಾ ಫೀಚರ್ಸ್ ಹೆಚ್ಚಿಸಲಾಗಿದೆ. ಜೊತೆಗೆ ಕಡ್ಡಾಯಗೊಳಿಸಲಾಗುತ್ತದೆ.

ಇದುವರೆಗೆ 125 ಸಿಸಿ ಮೇಲ್ಪಟ್ಟ ಬೈಕ್‌ ಹಾಗೂ ಸ್ಕೂಟರ್ ಎಲ್ಲಾ ಬೈಕ್‌ಗೆ ಎಬಿಎಸ್ ಕಡ್ಡಾಯ ಮಾಡಲಾಗಿದೆ. 125 ಸಿಸಿ ಒಳಗಿನ ಬೈಕ್ ಕಾಂಬಿ ಬ್ರೇಕ್ ಸಿಸ್ಟಮ್ ಕಡ್ಡಾಯ ಮಾಡಲಾಗಿತ್ತು. ಆದರೆ ಸುರಕ್ಷತಾ ದೃಷ್ಟಿಯಿಂದ 2026ರ ಜನವರಿ 1ರಿಂದ ಎಷ್ಟೇ ಸಿಸಿ, ಯಾವುದೇ ಬೈಕ್ ಅಥವಾ ಸ್ಕೂಟರ್ ಇರಲಿ ಎಬಿಎಸ್ ಬ್ರೇಕ್ ಕಡ್ಡಾಯ ಮಾಡಲಾಗಿದೆ. 2026ರಿಂದ ಮಾರಾಟವಾಗುವ ಎಲ್ಲಾ ಬೈಕ್ ಈ ನಿಯಮದಡಿ ಇರಲಬೇಕು.

ಆ್ಯಂಟಿ ಲಾಕ್ ಬ್ರೇಕ್ ಸಿಸ್ಟಮ್ (ಎಬಿಎಸ್) ಎಬಿಎಸ್ ಬ್ರೇಕ್ ಹೆಚ್ಚು ಸುರಕ್ಷಿತ, ವೇಗದಲ್ಲಿರುವ ವಾಹನಗಳನ್ನು ತಕ್ಷಣವೇ ನಿಧಾನ ಮಾಡಿ ನಿಲ್ಲಿಸುತ್ತದೆ. ಇಷ್ಟೇ ಅಲ್ಲ ಈ ವೇಳೆ ಸ್ಕಿಡ್ ಪ್ರಮಾಣವನ್ನು ತಗ್ಗಿಸುತ್ತದೆ. ಹೀಗಾಗಿ ಎಬಿಎಸ್ ಕಡ್ಡಾಯ ಮಾಡಲಾಗಿದೆ. ಈ ನಿಯಮಕ್ಕೆ ಮೊದಲಿನಿಂದಲು ಕಂಪನಿಗಳು ಅಸಮಾಧಾನ ವ್ಯಕ್ತಪಡಿಸಿದೆ. ಕಾರಣ ದ್ವಿಚಕ್ರ ವಾಹನ ಬೆಲೆ ದುಬಾರಿಯಾಗಲಿದೆ ಅನ್ನೋದು ಕಂಪನಿಗಳ ಅಳಲು.

2026ರ ಜನವರಿ 1 ರಿಂದ ನೀವು ಬೈಕ್ ಅಥವಾ ಸ್ಕೂಟರ್ ಖರೀದಿಸುವಾಗ 2 ಹೆಲ್ಮೆಟ್ ಕಡ್ಡಾಯವಾಗಿ ಖರೀದಿಸಬೇಕು. ಇದನ್ನು ಡೀಲರ್ ಅಥವಾ ಶೋ ರೂಂ ಉಚಿತವಾಗಿ ನೀಡಬಹುದು, ಅಥವಾ ಗ್ರಾಹಕರು ಖರೀದಿಸಬಹುದು. ಒಟ್ಟು ಬೈಕ್ ಖರೀದಿಸುವಾಗ 2 ಹೆಲ್ಮೆಟ್ ಕಡ್ಡಾಯವಾಗಿ ಇರಲೇಬೇಕು.

2026ರಿಂದ ಭಾರತೀಯ ಗುಣಮಟ್ಟ ಮಾನದಂಡ (ಬಿಐಎಸ್) ಹೊಂದಿರುವ ಹೆಲ್ಮೆಟ್ ಕಡ್ಡಾಯವಾಗಿದೆ. 2026ರಿಂದ ಮಾರಾಟವಾಗುವ ಹೊಸ ಹೆಲ್ಮೆಟ್ ಬಿಐಎಸ್ ಮಾನದಂಡ ಹೊಂದಿರಬೇಕು. ಇದು ಕಡ್ಡಾಯ ಮಾಡಲಾಗಿದೆ. ಸವಾರರು ಧರಿಸುವ ಹೆಲ್ಮೆಟ್ ಹೆಚ್ಚಿನ ಸುರಕ್ಷತೆ ನೀಡಬೇಕು ಅನ್ನೋ ಕಾರಣಕ್ಕೆ ಈ ನಿಯಮ ತರಲಾಗಿದೆ.

ಬಿಐಎಸ್ ಹೆಲ್ಮೆಟ್ ಮಾರ್ಕ್ ಕಡ್ಡಾಯ

ಈಗಾಗಲೇ ಬೈಕ್ ಅಥವಾ ಸ್ಕೂಟರ್ ಹೊಂದಿರುವವರಿಗೆ ಚಿಂತೆ ಶುರುವಾಗಿದೆ. ತಮ್ಮ ಸ್ಕೂಟರ್ ಹಾಗೂ ಬೈಕ್‌ನಲ್ಲಿ ಎಬಿಎಸ್ ಇಲ್ಲ ಎನು ಮಾಡಲಿ? 2026ರ ಕಡ್ಡಾಯ ನಿಯಮ ಹೊಸ ವರ್ಷದಲ್ಲಿ ಮಾರಾಟವಾಗುವ ಹೊಸ ಬೈಕ್‌ಗಳಿಗೆ ಅನ್ವಯವಾಗಲಿದೆ. ಈಗಾಗಲೇ ಖರೀದಿಸಿದ ವಾಹನಗಳಿಗಲ್ಲ. ಇತ್ತ ಸುರಕ್ಷತೆ ಹೆಲ್ಮೆಟ್‌ನಲ್ಲಿ ಈ ರೀತಿ ವಿನಾಯಿತಿ ಇಲ್ಲ. ಹೆಲ್ಮೆಟ್ ಅದು ಬಿಐಎಸ್ ಮಾನದಂಡಕ್ಕೆ ಒಳಪಟ್ಟಿರಲೇಬೇಕು.

ಎಬಿಎಸ್ ಇಲ್ಲದ, ಬಿಐಎಸ್ ಇಲ್ಲದೆ ಹಲ್ಮೆಟ್ ಸವಾರರು ಕತೆ ಏನು?

ಹೆಲ್ಮೆಟ್ ಇಲ್ಲದ ಬೈಕ್ ಸವಾರನ ಹಿಡಿದ ಪೊಲೀಸ್, ಒಂದೇ ಮಾತಿಗೆ ದಂಡ ವಿಧಿಸದೆ ಬಿಟ್ಟುಕಳುಹಿಸಿದ್ರು

Chethan Kumar — Tue, 16 Dec 2025 16:38:40 +0530

ಇಂದೋರ್ (ಡಿ.16) ದ್ವಿಚಕ್ರ ವಾಹನ ಸವಾರ, ಹಿಂಬದಿ ಸವಾರರಿಗೆ ಹೆಲ್ಮೆಟ್ ಕಡ್ಡಾಯ. ಇದರಿಂದ ಯಾರಿಗೂ ವಿನಾಯಿತಿ ಇಲ್ಲ. ಹೆಲ್ಮೆಟ್ ಧರಿಸದೆ ತೆರಳಿದರೆ ದಂಡ ವಿಧಿಸುವುದು ಖಚಿತ. ಆದರೆ ಇಲ್ಲೊಬ್ಬ ಬೈಕ್ ಸವಾರನ ಹಿಡಿದ ಟ್ರಾಫಿಕ್ ಪೊಲೀಸರು, ಎಲ್ಲಪ್ಪಾ ನಿನ್ ಹೆಲ್ಮೆಟ್ ಎಂದು ಪ್ರಶ್ನಿಸಿದ್ದಾರೆ. ಆದರೆ ಬೈಕ್ ಸವಾರನ ಒಂದೇ ಮಾತಿಗೆ ಪೊಲೀಸರು ಸವಾರನಿಗೆ ದಂಡ ವಿಧಿಸದೆ ಬಿಟ್ಟುಕಳುಹಿಸಿದ್ದಾರೆ. ಈ ವಿಡಿಯೋ ಭಾರಿ ಸಂಚಲನ ಸೃಷ್ಟಿಸಿದೆ. ಇದೇ ವಿಡಿಯೋದಲ್ಲಿ ಪೊಲೀಸ್ ವಿಶೇಷ ಮನವಿಯೊಂದನ್ನು ಮಾಡಿದ ಘಟನೆ ಮಧ್ಯಪ್ರದೇಶದಲ್ಲಿ ನಡೆದಿದೆ.

ಟಿವಿಎಸ್ ಬೈಕ್‌ನಲ್ಲಿ ಹೆಲ್ಮೆಟ್ ಇಲ್ಲದೆ ಬಂದ ಸವಾರ

ಮಧ್ಯ ಪ್ರದೇಶ ಟ್ರಾಫಿಕ್ ಪೊಲೀಸರು ಎಂದಿನಂತೆ ಟ್ರಾಫಿಕ್ ಉಲ್ಲಂಘನೆ ಚೆಕ್ ಮಾಡಲು ರಸ್ತೆಯಲ್ಲಿ ನಿಂತಿದ್ದಾರೆ. ಈ ದಾರಿಯಲ್ಲಿ ಬರುವ ಹಲವು ದ್ವಿಚಕ್ರ ವಾಹನ ಸವಾರರು, ಕಾರು ಸೇರಿದಂತೆ ಇತರ ವಾಹನ ಸವಾರರ ನಿಲ್ಲಿಸಿ ವಿಮೆ, ಎಮಿಶನ್, ಸೀಟ್ ಬೆಲ್ಟ್, ಹೆಲ್ಮೆಟ್ ಸೇರಿದಂತೆ ಇತರ ದಾಖಲೆಗಳ ಪರಿಶೀಲನೆ ಮಾಡುತ್ತಿದ್ದರು. ಇದೇ ವೇಳೆ ಟಿವಿಎಸ್ ಬೈಕ್ ಮೂಲಕ ವ್ಯಕ್ತಿಯೊಬ್ಬರು ಆಗಮಿಸಿದ್ದಾರೆ. ಯಾವುದೆ ಹೆಲ್ಮೆಟ್ ಇಲ್ಲದೆ ಪೊಲೀಸರು ನಿಂತಿದ್ದದರೂ ರಾಜಾರೋಷವಾಗಿ ಆಗಮಿಸಿದ ವ್ಯಕ್ತಿಯನ್ನು ಪೊಲೀಸರು ತಡೆದಿದ್ದಾರೆ. ಬೈಕ್ ಸವಾರನ ನಿಲ್ಲಿಸಿದ ಪೊಲೀಸರು ಹೆಲ್ಮೆಟ್ ಕುರಿತು ಪ್ರಶ್ನಿಸಿದ್ದಾರೆ.

ಬೈಕ್ ಸವಾರನ ಉತ್ತರಕ್ಕೆ ಸುಸ್ತಾದ ಪೊಲೀಸ್

ಹೆಲ್ಮೆಟ್ ಇಲ್ಲದೆ ಬೈಕ್ ಮೂಲಕ ಆಗಮಿಸಿದ್ದು ಸಾಮಾನ್ಯ ವ್ಯಕ್ತಿ. ಹೆಲ್ಮೆಟ್ ಎಲ್ಲಿ ಎಂದು ಕೇಳಿದಾಗ, ಫೋನ್ ತೆಗೆದು ಯಾರಿಗೂ ಫೋನ್ ಮಾಡಿ ನೆರವು ಕೇಳಲಿಲ್ಲ. ಬದಲಾಗಿ, ಸರ್ ನನ್ನ ತಲೆ ಸೈಝ್‌ಗೆ ಯಾವ ಊರಿನಲ್ಲೂ ಹೆಲ್ಮೆಟ್ ಇಲ್ಲಾ ಸಾರ್ ಎಂದಿದ್ದಾನೆ. ಈತನ ಮಾತಿಗೆ ಟ್ರಾಫಿಕ್ ಪೊಲೀಸ್ ಅರೆ ಇದು ಹೇಗೆ ಸಾಧ್ಯ ಎಂದು ಅನುಮಾನಗೊಂಡಿದ್ದಾರೆ. ಹೀಗಾಗಿ ತಮ್ಮ ಬಳಿ ಇರುವ ಹೆಲ್ಮೆಟ್ ನೀಡಿ ಇದನ್ನು ಧರಿಸಲು ಸೂಚಿಸಿದ್ದಾರೆ. ಆದರೆ ವ್ಯಕ್ತಿಯ ತಲೆ ಗಾತ್ರ ದೊಡ್ಡದಾಗಿರುವ ಕಾರಣ ಹೆಲ್ಮೆಟ್ ಧರಿಸಲು ಸಾಧ್ಯವಾಗಲಿಲ್ಲ. ಆತನ ತಲೆ ಮುಂದೆ ಹೆಲ್ಮೆಟ್ ಸಣ್ಣದಾಗಿತ್ತು. ಇತ್ತ ಟ್ರಾಫಿಕ್ ಪೊಲೀಸ್‌ಗೆ ನಗು ತಡೆಯಲಾಗಲಿಲ್ಲ. ದಂಡ ವಿಧಿಸಲು ಹೋದ ಪೊಲೀಸ್ ಕೊನೆಗೆ ವಿಶೇಷ ಮನವಿಯೊಂದನ್ನು ಮಾಡಿದ್ದಾರೆ.

ವಿಡಿಯೋ ಮೂಲಕ ಪೊಲೀಸ್ ಮನವಿ

ಹೆಲ್ಮೆಟ್ ಧರಿಸಲು ಸಾಧ್ಯವಾಗದ ಸಾಮಾನ್ಯ ವ್ಯಕ್ತಿ ಕುರಿತು ವಿಡಿಯೋ ಮೂಲಕ ಮಾತನಾಡಿದ ಪೊಲೀಸ್, ಎಲ್ಲಾ ಹೆಲ್ಮೆಟ್ ಕಂಪನಿಗೆ ಒಂದು ಮನವಿ ಮಾಡುತ್ತೇನೆ. ದಯವಿಟ್ಟು ಈ ರೀತಿಯ ಹಲವರಿಗೆ ದೊಡ್ಡ ಗಾತ್ರದ ಹೆಲ್ಮೆಟ್ ಉತ್ಪಾದಿಸಬೇಕು. ದಾದಾ ರೀತಿಯ ಹಲವು ವ್ಯಕ್ತಿಗಳ ತಲೆ ಗಾತ್ರ ದೊಡ್ಡದಿದೆ. ಅವರಿಗೆ ಹೆಲ್ಮೆಟ್ ಧರಿಸಲು ಸಾಧ್ಯವಾಗುತ್ತಿಲ್ಲ. ಸುರಕ್ಷತಾ ದೃಷ್ಟಿಯಿಂದ ಹೆಲ್ಮೆಟ್ ಅತ್ಯಂತ ಅವಶ್ಯಕವಾಗಿದೆ. ಹೀಗಾಗಿ ದೊಡ್ಡ ಗಾತ್ರದ ಹೆಲ್ಮೆಟ್ ಉತ್ಪಾದಿಸಿ ಎಂದು ಪೊಲೀಸ್ ಮನವಿ ಮಾಡಿದ್ದಾರೆ.

ಹೆಲ್ಮೆಟ್ ಗಿಫ್ಟ್ ಆಫರ್ ಮಾಡಿದ ಕಂಪನಿ

ಈ ವಿಡಿಯೋ ಭಾರಿ ವೈರಲ್ ಆಗಿದೆ. 26 ಮಿಲಿಯನ್‌ಗೂ ಅಧಿಕ ವೀವ್ಸ್ ಹಾಗೂ 1.2 ಲಕ್ಷ ಕಮೆಂಟ್ ವ್ಯಕ್ತವಾಗಿದೆ. ಹಲವರು ಈ ರೀತಿಯ ಸಮಸ್ಯೆ ಇದೆ ಎಂದಿದ್ದಾರೆ. ಇದೇ ವೇಳೆ ಅಂಕಲ್ ಚಲನ್, ದಂಡದಿಂದ ಪ್ರೀಮಿಯಂ ಡಿಸ್ಕೌಂಟ್ ಪಡೆದಿದ್ದಾರೆ ಎಂದು ಕಮೆಂಟ್ ಮಾಡಿದ್ದಾರೆ. ಇದೇ ವೇಳೆ ಜನಪ್ರಿಯ ಹೆಲ್ಮೆಟ್ ಕಂಪನಿ ಸ್ಟೀಲ್‌ಬರ್ಡ್ ಹೆಲ್ಮೆಟ್ ಗಿಫ್ಟ್ ನೀಡುವುದಾಗಿ ಹೇಳಿದೆ. ಈ ವಿಡಿಯೋಗೆ ಕಮೆಂಟ್ ಮಾಡಿದ ಕಂಪನಿ, ನಾವು ಈ ವ್ಯಕ್ತಿಗೆ ಹೆಲ್ಮೆಟ್ ಉಡುಗೊರೆ ನೀಡಲು ಬಯಸಿದ್ದೇವೆ. ದಯವಿಟ್ಟು ವ್ಯಕ್ತಿಯ ಸಂಪರ್ಕ ಇದ್ದರೆ ತಿಳಿಸಿ ಎಂದು ಕಮೆಂಟ್ ಮಾಡಿದೆ. ಇದೇ ವೇಳೆ ವೇಗಾ ಹೆಲ್ಮೆಟ್ ಕಂಪನಿ, ಈ ಸವಾಲು ನಾವು ಸ್ವೀಕರಿಸಿದ್ದೇವೆ ಎಂದಿದೆ.

View this post on Instagram

A post shared by Vivekanand Tiwari (@vivekanandtiwarithetrafficcop)

ಯಾವುದೇ ಕ್ಲೇಮ್ ಮಾಡದಿದ್ದರೆ ಇನ್ಶೂರೆನ್ಸ್‌ನಲ್ಲಿ ಸಿಗುತ್ತೆ ಶೇ 50ರಷ್ಟು ಡಿಸ್ಕೌಂಟ್, ಏನಿದು NCB?

Chethan Kumar — Sat, 16 May 2026 16:33:09 +0530

ನೀವು ವಾಹನ ವಿಮೆ ಮಾಡುವಾಗ ಎನ್‌ಸಿಬಿ ಲಾಭ ಪಡೆದಿದ್ದೀರಾ? NCB ಮೂಲಕ ನಿಮ್ಮ ಪ್ರಿಮಿಯಂ ಮೊತ್ತದಲ್ಲಿ ಶೇಕಡಾ 50ರಷ್ಟು ಡಿಸ್ಕೌಂಟ್ ಪಡೆಯಬಹುದು. ಇದರಿಂದ ವಿಮೆ ಪ್ರೀಮಿಯಂ ಮೊತ್ತ ಗಣನೀಯವಾಗಿ ಕಡಿಮೆಯಾಗುತ್ತದೆ.

ವಾಹನಗಳ ವಿಮೆ ಮಾಡಿಸುವಾಗ ಜಾಗರೂಕರಾಗಿರಬೇಕು. ಕೆಲ ವಿಚಾರಗಳಲ್ಲಿ ಮೋಸ ಹೋಗುವುದೇ ಹೆಚ್ಚು. ವಿಶೇಷವಾಗಿ ಇನ್ಶೂರೆನ್ಸ್ ರಿನೀವಲ್ ಮಾಡುವಾಗ ಎನ್‌ಸಿಬಿ ಪ್ರಮುಖ ಪಾತ್ರ ನಿರ್ವಹಿಸುತ್ತದೆ. ಹಲವರು ವಾಹನಗಳ ವಿಮೆಯಲ್ಲಿ ಯಾವುದೇ ಕ್ಲೇಮ್ ಮಾಡಿರುವುದಿಲ್ಲ. ಇಂತಹವರು ಗರಿಷ್ಠ ಅಂದರೆ ಶೇಕಡಾ 50ರಷ್ಟು ಎನ್‌ಸಿಬಿ ಪಡೆಯಲು ಸಾಧ್ಯವಿದೆ.

ವಾಹನ ಇನ್ಶೂರೆನ್ಸ್ ಪ್ರೀಮಿಯಂನಲ್ಲಿ ದೊಡ್ಡ ಮೊತ್ತ ಉಳಿತಾಯ ಮಾಡಲು 'ನೋ ಕ್ಲೇಮ್ ಬೋನಸ್ (NCB) ಒಂದು ಸೂಪರ್ ಐಡಿಯಾ. ಇನ್ಶೂರೆನ್ಸ್ ಪಾಲಿಸಿ ಅವಧಿಯಲ್ಲಿ ಯಾವುದೇ ಅಪಘಾತ ಅಥವಾ ಡ್ಯಾಮೇಜ್‌ಗೆ ನೀವು ಕ್ಲೇಮ್ ಮಾಡಿಲ್ಲ ಅಂದ್ರೆ, ಇನ್ಶೂರೆನ್ಸ್ ಕಂಪನಿಗಳು ಪಾಲಿಸಿದಾರರಿಗೆ ಒಂದು ರಿವಾರ್ಡ್ ಕೊಡುತ್ತವೆ. ಇದೇ ನೋ ಕ್ಲೇಮ್ ಬೋನಸ್. ಇದರ ಲಾಭವನ್ನು ಸರಿಯಾಗಿ ಪಡೆದುಕೊಂಡರೆ, ಇನ್ಶೂರೆನ್ಸ್ ಪ್ರೀಮಿಯಂ ಅನ್ನು ಅರ್ಧದಷ್ಟು ಕಡಿಮೆ ಮಾಡಬಹುದು.

ಇನ್ಶೂರೆನ್ಸ್ ರಿನ್ಯೂ ಮಾಡುವಾಗ 'ಓನ್ ಡ್ಯಾಮೇಜ್' (ನಿಮ್ಮ ಸ್ವಂತ ವಾಹನಕ್ಕಾಗುವ ಹಾನಿ) ಪ್ರೀಮಿಯಂ ಮೇಲೆ ಸಿಗುವ ಡಿಸ್ಕೌಂಟ್ ಇದು. ಮೊದಲ ವರ್ಷ ನೀವು ಯಾವುದೇ ಕ್ಲೇಮ್ ಮಾಡಿಲ್ಲ ಅಂದ್ರೆ, ಪ್ರೀಮಿಯಂನಲ್ಲಿ 20% ರಿಯಾಯಿತಿ ಸಿಗುತ್ತದೆ. ಇದೇ ರೀತಿ ಸತತ ಐದು ವರ್ಷ ಕ್ಲೇಮ್ ಮಾಡದೆ ಪಾಲಿಸಿ ಮುಂದುವರಿಸಿದರೆ, ಈ ರಿಯಾಯಿತಿ 50% ವರೆಗೆ ಹೆಚ್ಚಾಗುತ್ತದೆ. ಉದಾಹರಣೆಗೆ, ನಿಮ್ಮ ಗಾಡಿಯ ಪ್ರೀಮಿಯಂ 35,000 ರೂಪಾಯಿ ಅಂದುಕೊಳ್ಳಿ. ಮೊದಲ ಕ್ಲೇಮ್-ಫ್ರೀ ವರ್ಷದ ನಂತರ ನಿಮಗೆ 7,000 ರೂಪಾಯಿ ಕಡಿಮೆ ಆಗುತ್ತದೆ. ಇದೇ ರೀತಿ ಐದು ವರ್ಷ ಕ್ಲೇಮ್ ಮಾಡದಿದ್ದರೆ ಬರೋಬ್ಬರಿ 17,500 ರೂಪಾಯಿ ಉಳಿಸಬಹುದು.

NCBಯ ಅತಿದೊಡ್ಡ ಪ್ಲಸ್ ಪಾಯಿಂಟ್ ಅಂದ್ರೆ, ಇದು ಗಾಡಿಗಲ್ಲ, ಅದರ ಮಾಲೀಕರಿಗೆ ಸಿಗೋದು. ಹಾಗಾಗಿ, ನೀವು ಹಳೆ ಕಾರ್ ಮಾರುವಾಗ ಅಥವಾ ಹೊಸ ಕಾರ್ ಕೊಂಡುಕೊಳ್ಳುವಾಗ ನಿಮ್ಮ ಬೋನಸ್ ಅನ್ನು ಹೊಸ ಗಾಡಿಗೆ ವರ್ಗಾಯಿಸಬಹುದು. ಅಷ್ಟೇ ಅಲ್ಲ, ನೀವು ಇನ್ಶೂರೆನ್ಸ್ ಕಂಪನಿ ಬದಲಾಯಿಸಿದರೂ ಈ ಬೋನಸ್ ನಿಮ್ಮ ಕೈತಪ್ಪಿ ಹೋಗಲ್ಲ.

ಸಣ್ಣ ಮೊತ್ತದ ರಿಪೇರಿ ಖರ್ಚುಗಳಿಗೆಲ್ಲಾ ಇನ್ಶೂರೆನ್ಸ್ ಕ್ಲೇಮ್ ಮಾಡಿದರೆ, ದೀರ್ಘಾವಧಿಯಲ್ಲಿ ನಿಮಗೆ ನಷ್ಟವೇ ಹೆಚ್ಚು. ಯಾಕಂದ್ರೆ, ಸಣ್ಣ ಕ್ಲೇಮ್‌ನಿಂದಾಗಿ ನೀವು ದೊಡ್ಡ ಮೊತ್ತದ NCB ಕಳೆದುಕೊಳ್ಳಬೇಕಾಗಬಹುದು.ಹಳೆ ಗಾಡಿ ಮಾರುವಾಗ, ಆ ಮಾಹಿತಿಯನ್ನು ನಿಮ್ಮ ಇನ್ಶೂರೆನ್ಸ್ ಕಂಪನಿಗೆ ತಿಳಿಸಿ 'NCB ರಿಟೆನ್ಷನ್ ಸರ್ಟಿಫಿಕೇಟ್' ಪಡೆದುಕೊಳ್ಳಬೇಕು. ನಿಮ್ಮ NCB ಲಾಭವು ಗಾಡಿ ಖರೀದಿಸಿದವರಿಗೆ ಸಿಗುವುದಿಲ್ಲ. ಅದನ್ನು ನೀವು ಹೊಸ ಗಾಡಿ ಖರೀದಿಸುವಾಗ ಬಳಸಿಕೊಳ್ಳಬಹುದು.

ಇನ್ಶೂರೆನ್ಸ್ ಅವಧಿ ಮುಗಿದ 90 ದಿನಗಳ ಒಳಗೆ ಅದನ್ನು ರಿನ್ಯೂ ಮಾಡಿಲ್ಲ ಅಂದ್ರೆ, ನೀವು ಕಷ್ಟಪಟ್ಟು ಗಳಿಸಿದ NCB ಪೂರ್ತಿಯಾಗಿ ಲ್ಯಾಪ್ಸ್ ಆಗುತ್ತದೆ. ಒಂದು ವೇಳೆ ಗಾಡಿ ಕಳ್ಳತನವಾಗಿ, ನೀವು ಪಾಲಿಸಿ ಹಣವನ್ನು ಕ್ಲೇಮ್ ಮಾಡಿದರೆ, ನಿಮ್ಮ NCB ಸೊನ್ನೆ ಆಗುತ್ತದೆ. ಇನ್ನು IDV ಅಂದ್ರೆ ನಿಮ್ಮ ವಾಹನದ ಮಾರುಕಟ್ಟೆ ಮೌಲ್ಯ. NCBಯಿಂದ ಗಾಡಿಯ ಬೆಲೆ ಕಮ್ಮಿ ಆಗಲ್ಲ, ಬದಲಿಗೆ ನೀವು ಕಟ್ಟಬೇಕಾದ ಇನ್ಶೂರೆನ್ಸ್ ಪ್ರೀಮಿಯಂ ಮಾತ್ರ ಕಡಿಮೆಯಾಗುತ್ತದೆ

ಬೆಂಗಳೂರಲ್ಲಿ ಒಂದೇ ದಿನ 13,000 ಎಲೆಕ್ಟ್ರಿಕ್ ವಾಹನ ನೋಂದಣಿ, ಎಲ್ಲರೂ ಇವಿ ಖರೀದಿಗೆ ಇದೆ ಕಾರಣ

Chethan Kumar — Sat, 04 Apr 2026 15:36:22 +0530

ಬೆಂಗಳೂರಲ್ಲಿ ಒಂದೇ ದಿನ 13,000 ಎಲೆಕ್ಟ್ರಿಕ್ ವಾಹನ ನೋಂದಣಿ, ಎಲ್ಲರೂ ಇವಿ ಖರೀದಿಗೆ ಇದೆ ಕಾರಣ, ಇದು ಅತ್ಯಧಿಕ ದಾಖಲೆಯಾಗಿದೆ. ಅಷ್ಟಕ್ಕೂ ಬೆಂಗಳೂರಲ್ಲಿ ಇವಿ ಖರೀದಿ ಹೆಚ್ಚಾಗಲು ಕಾರಣವೇನು?

ಕರ್ನಾಟಕದಲ್ಲಿ ಎಲೆಕ್ಟ್ರಿಕ್ ವಾಹನಗಳ ಬಳಕೆ ತುಸು ಹೆಚ್ಚಿದೆ. ಆದರೆ ಇತ್ತೀಚಿನ ದಿನಗಳಲ್ಲಿ ಬೆಂಗಳೂರು ಸೇರಿದಂತೆ ಕರ್ನಾಟಕದಲ್ಲಿ ಭಾರಿ ಬದಲಾವಣೆ ಕಾಣುತ್ತಿದೆ. ವಿಶೇಷ ಅಂದರೆ ಒಂದೇ ದಿನ ಬೆಂಗಳೂರಿನಲ್ಲಿ ಬರೋಬ್ಬರಿ 13 ಸಾವಿರ ಎಲೆಕ್ಟ್ರಿಕ್ ವಾಹನಗಳು ರಿಜಿಸ್ಟ್ರೇಶನ್ ಆಗಿದೆ. ಈ ಮೂಲಕ ಹೊಸ ದಾಖಲೆ ಬರೆದಿದೆ. ಅಷ್ಟಕ್ಕೂ ಜನರು ದಿಢೀರ್ ಇವಿ ವಾಹನ ಮೊರೆ ಹೋಗಲು ಎರಡು ಕಾರಣಗಳಿವೆ.

ಮಾರ್ಚ್ 31ರಂದು ಬೆಂಗಳೂರಿನಲ್ಲಿ 13 ಸಾವಿರ ಇವಿ ವಾಹನಗಳು ನೋಂದಣಿಯಾಗಿದೆ. 11 ವಿವಿಧ ಆರ್‌ಟಿಒ ಕಚೇರಿಗಳಲ್ಲಿ ಈ ವಾಹನಗಳು ರಿಜಿಸ್ಟ್ರೇಶನ್ ಆಗಿದೆ. ಈ ಪೈಕಿ ಹೆಚ್ಚಿನ ವಾಹನಗಳು ದ್ವಿಚಕ್ರವಾಹನಗಳಾಗಿದೆ. ಇನ್ನು ಕೈಗೆಟುಕುವ ದರದ ಕಾರು ಸೇರಿದಂತೆ ಇತರ ಇವಿ ವಾಹನಗಳು ಸೇರಿದೆ.

ಬೆಂಗಳೂರಲ್ಲಿ ಪ್ರತಿ ದಿನ ನೋಂದಣಿಯಾಗುತ್ತಿರುವ ಇವಿ ವಾಹನಗಳ ಸಂಖ್ಯೆಯಲ್ಲಿ ಶೇಕಡಾ 400ರಷ್ಟು ಏರಿಕೆಯಾಗಿದೆ. 2026ರಲ್ಲಿ ಬೆಂಗಳೂರಲ್ಲಿ ಪ್ರತಿ ದಿನ ಸರಾಸರಿ 267 ಎಲೆಕ್ಟ್ರಿಕ್ ವಾಹನಗಳು ರಿಜಿಸ್ಟ್ರೇಶನ್ ಆಗುತ್ತಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇಕಡಾ 400ರಷ್ಟು ಏರಿಕೆಯಾಗಿದೆ.

ತೆರಿಗೆ ಸೌಲಭ್ಯದ ಕಾರಣ ಮಾರ್ಚ್ 31ರಂದು ಹಲವರ ಇವಿ ವಾಹನ ರಿಡಿಸ್ಟ್ರೇಶನ್ ಆಗಿದೆ. ಎಪ್ರಿಲ್ 1, 2026ರಿಂದ ಎಲೆಕ್ಟ್ರಿಕ್ ವಾಹನಗಳಿಗೆ ಹೊಸ ತೆರೆಗೆ ನೀತಿ ಅನ್ವಯವಾಗಲಿದೆ. ಹೀಗಾಗಿ ಮಾರ್ಚ್ 31ಕ್ಕೆ ಹಳೇ ತೆರಿಗೆ ನಿಯಮದಡಿ ವಾಹನ ಖರೀದಿಸಿ ಲಾಭ ಮಾಡಿಕೊಳ್ಳಲು ಜನರು ಮುಗಿಬಿದಿದ್ದರು.

ಯುದ್ಧದಿಂದ ಪೆಟ್ರೋಲ್, ಡೀಸೆಲ್, ಗ್ಯಾಸ್ ಸೇರಿದಂತೆ ಪ್ರಮುಖ ವಸ್ತುಗಳ ಪೂರೈಕೆಯಲ್ಲಿ ವ್ಯತ್ಯಯವಾಗುತ್ತಿದೆ. ಇದರಿಂದ ಬೆಲೆ ಏರಿಕೆ, ಕೊರತೆ ಸಮಸ್ಯೆಗಳು ಎದುರಾಗಿದೆ. ಇದರ ಬೆನ್ನಲ್ಲೇ ಹಲವರು ಎಲೆಕ್ಟ್ರಿಕ್ ವಾಹನಗಳತ್ತ ವಾಲಿದ್ದಾರೆ. ಸುಲಭ ಹಾಗೂ ಕಡಿಮೆ ನಿರ್ವಹಣೆ ವೆಚ್ಚದತ್ತ ಜನ ಆಕರ್ಷಿತರಾಗುತ್ತಿದ್ದಾರೆ.

ಕರ್ನಾಟಕದಲ್ಲಿ ಇವಿ ನೋಂದಣಿಯಲ್ಲಿ ದಾಖಲೆ ನಿರ್ಮಾಣವಾಗಿದೆ. 2026ರ ಜನವರಿ ತಿಂಗಳಿನಿಂದ ಮಾರ್ಚ್ ಅಂತ್ಯದವರೆಗೆ ಕರ್ನಾಟಕದಲ್ಲಿ 54,379 ಎಲೆಕ್ಟ್ರಿಕ್ ವಾಹನಗಳು ನೋಂದಣಿಯಾಗಿದೆ. ಕಳೆದ ವರ್ಷ ಇದೇ ಮೂರು ತಿಂಗಳಲ್ಲಿ ಕರ್ನಾಟಕದಲ್ಲಿ 35,000 ಎಲೆಕ್ಟ್ರಿಕ್ ವಾಹನಗಳು ನೋಂದಣಿಯಾಗಿತ್ತು.

50 ಸಾವಿರ ಇವಿ ನೋಂದಣಿ

Royal Enfield Price: ರಾಯಲ್ ಎನ್‌ಫೀಲ್ಡ್ ಬೈಕ್‌ಗಳ ಬೆಲೆಯಲ್ಲಿ ಇಳಿಕೆ ಇಲ್ಲಿದೆ ಪೂರ್ತಿ ಲಿಸ್ಟ್

Mahmad Rafik — Mon, 09 Feb 2026 13:28:59 +0530

ಹೊಸ ಜಿಎಸ್‌ಟಿ 2.0 ನಿಯಮಗಳಿಂದಾಗಿ ರಾಯಲ್ ಎನ್‌ಫೀಲ್ಡ್ ಬೈಕ್‌ಗಳ ಬೆಲೆಗಳು ಬದಲಾಗಿವೆ. ಇದರಿಂದಾಗಿ, ಗ್ರಾಹಕರು ತಮ್ಮ ಬಜೆಟ್‌ಗೆ ತಕ್ಕಂತೆ ಬೈಕ್‌ಗಳನ್ನು ಆಯ್ಕೆ ಮಾಡಿಕೊಳ್ಳಬೇಕಾಗಿದೆ. ಈ ಕುರಿತ ಸಂಪೂರ್ಣ ವಿವರ ಇಲ್ಲಿದೆ.ಭಾರತದಲ್ಲಿ ಬೈಕ್ ಪ್ರಿಯರ ನೆಚ್ಚಿನ ಬ್ರ್ಯಾಂಡ್ ಆಗಿರುವ ರಾಯಲ್ ಎನ್‌ಫೀಲ್ಡ್‌ನ ಕೆಲವು ಮಾಡೆಲ್‌ಗಳ ಬೆಲೆಗಳು ಈಗ ಬದಲಾಗಿವೆ. ಹೊಸ ಜಿಎಸ್‌ಟಿ 2.0 ನಿಯಮಗಳಿಂದಾಗಿ, ಕೆಲವು ಬೈಕ್‌ಗಳ ಬೆಲೆ ಕಡಿಮೆಯಾಗಿದ್ದರೆ, ಕೆಲವು ಹೈ-ಎಂಡ್ ಬೈಕ್‌ಗಳ ಬೆಲೆ ಹೆಚ್ಚಾಗಿದೆ. ಇದರಿಂದ ಬೈಕ್ ಖರೀದಿಸಲು ಪ್ಲ್ಯಾನ್ ಮಾಡುವವರು ಇನ್ನಷ್ಟು ಎಚ್ಚರಿಕೆಯಿಂದ ನಿರ್ಧಾರ ತೆಗೆದುಕೊಳ್ಳಬೇಕಾದ ಪರಿಸ್ಥಿತಿ ಬಂದಿದೆ.

350cc ಗಿಂತ ಕಡಿಮೆ ಸಾಮರ್ಥ್ಯದ ರಾಯಲ್ ಎನ್‌ಫೀಲ್ಡ್ ಬೈಕ್‌ಗಳಿಗೆ ಇದು ಗುಡ್ ನ್ಯೂಸ್. Hunter 350, Classic 350, Meteor 350, Bullet 350, Goan Classic 350 ನಂತಹ ಮಾಡೆಲ್‌ಗಳ ಮೇಲಿನ ಜಿಎಸ್‌ಟಿ ದರವನ್ನು 28% ರಿಂದ 18% ಕ್ಕೆ ಇಳಿಸಲಾಗಿದೆ. ಇದರ ಪರಿಣಾಮವಾಗಿ, ಈ ಬೈಕ್‌ಗಳ ಆರಂಭಿಕ ಬೆಲೆಯಲ್ಲಿ ಸುಮಾರು ₹15,000 ದಿಂದ ₹23,500 ವರೆಗೆ ಇಳಿಕೆಯಾಗುವ ನಿರೀಕ್ಷೆಯಿದೆ.

ದಿನನಿತ್ಯದ ಪ್ರಯಾಣ ಮತ್ತು ಲಾಂಗ್ ರೈಡ್ ಇಷ್ಟಪಡುವ ಸಾಮಾನ್ಯ ಬಳಕೆದಾರರಿಗೆ ಇದು ದೊಡ್ಡ ನಿರಾಳತೆ ನೀಡಿದೆ.

ರಾಯಲ್ ಎನ್‌ಫೀಲ್ಡ್ ಕಂಪನಿಯ ಒಟ್ಟು ಮಾರಾಟದಲ್ಲಿ ಸುಮಾರು 87% ಪಾಲು 350cc ಬೈಕ್‌ಗಳದ್ದೇ ಆಗಿದೆ. ಹಾಗಾಗಿ ಈ ತೆರಿಗೆ ಕಡಿತವು ಮೊದಲ ಬಾರಿಗೆ ಬೈಕ್ ಖರೀದಿಸುವವರು ಮತ್ತು ಮಧ್ಯಮ ವರ್ಗದ ಕುಟುಂಬಗಳನ್ನು ಹೆಚ್ಚು ಆಕರ್ಷಿಸಲಿದೆ. ಕಡಿಮೆ ಬೆಲೆ, ವಿಶ್ವಾಸಾರ್ಹ ಎಂಜಿನ್, ಮತ್ತು ಕ್ಲಾಸಿಕ್ ಲುಕ್ ಈ ಬೈಕ್‌ಗಳನ್ನು ಇನ್ನಷ್ಟು ಜನಪ್ರಿಯಗೊಳಿಸುವ ಸಾಧ್ಯತೆಯಿದೆ.ಇದೇ ಸಮಯದಲ್ಲಿ, 400cc ಗಿಂತ ಹೆಚ್ಚಿನ ಸಾಮರ್ಥ್ಯದ ಬೈಕ್‌ಗಳನ್ನು ಇಷ್ಟಪಡುವವರಿಗೆ ಇದು ಶಾಕಿಂಗ್ ಸುದ್ದಿ. ಹಿಮಾಲಯನ್ 450, ಗೆರಿಲ್ಲಾ 450, ಸ್ಕ್ರ್ಯಾಮ್ 440 ಮತ್ತು 650cc ಸರಣಿಯ ಬೈಕ್‌ಗಳ ಮೇಲಿನ ಜಿಎಸ್‌ಟಿಯನ್ನು 28% ರಿಂದ 40% ಕ್ಕೆ ಹೆಚ್ಚಿಸಲಾಗಿದೆ. ಇದರಿಂದಾಗಿ Scram 440 ಬೈಕ್ ಬೆಲೆ ಸುಮಾರು ₹18,700 ಮತ್ತು ಕೆಲವು 650cc ಬೈಕ್‌ಗಳ ಬೆಲೆ ₹33,000 ಕ್ಕಿಂತ ಹೆಚ್ಚು ಏರಿಕೆಯಾಗಿದೆ.

ಒಟ್ಟಾರೆಯಾಗಿ, ಜಿಎಸ್‌ಟಿ 2.0 ಬದಲಾವಣೆಗಳು ರಾಯಲ್ ಎನ್‌ಫೀಲ್ಡ್ ಗ್ರಾಹಕರ ಖರೀದಿ ನಿರ್ಧಾರಗಳ ಮೇಲೆ ಪರಿಣಾಮ ಬೀರಲಿವೆ. ಕಡಿಮೆ ಬಜೆಟ್‌ನಲ್ಲಿ ಬೈಕ್ ಖರೀದಿಸಲು ಬಯಸುವವರು 350cc ಮಾಡೆಲ್‌ಗಳನ್ನು ಆಯ್ಕೆ ಮಾಡಬಹುದು. ಅದೇ ಸಮಯದಲ್ಲಿ, ಅಡ್ವೆಂಚರ್ ಮತ್ತು ಪ್ರೀಮಿಯಂ ಬೈಕ್‌ಗಳನ್ನು ಇಷ್ಟಪಡುವವರು ತಮ್ಮ ಬಜೆಟ್‌ ಅನ್ನು ಮತ್ತೊಮ್ಮೆ ಪರಿಶೀಲಿಸಿ ನಿರ್ಧಾರ ತೆಗೆದುಕೊಳ್ಳಬೇಕಾದ ಸ್ಥಿತಿ ನಿರ್ಮಾಣವಾಗಿದೆ. ಬೈಕ್ ಬುಕ್ ಮಾಡುವ ಮೊದಲು ಹೊಸ ಬೆಲೆಗಳನ್ನು ಪರಿಶೀಲಿಸುವುದು ಈಗ ಬಹಳ ಮುಖ್ಯವಾಗಿದೆ.

ಪ್ರತಿ ದಿನ 25 ಕಿ.ಮಿ ಇವಿ ಯೂನಿಸೈಕಲ್‌ನಲ್ಲಿ ಬೆಂಗಳೂರಿಗನ ಪ್ರಯಾಣ, ಪೊಲೀಸ್ ತಡೆದಿದ್ದೇಕೆ?

Chethan Kumar — Sun, 10 May 2026 15:43:01 +0530

ಬೆಂಗಳೂರು (ಮೇ.10) ಬೆಂಗಳೂರಿನ ಟ್ರಾಫಿಕ್‌ನಲ್ಲಿ ಬೈಕ್, ಸ್ಕೂಟರ್ ಕೂಡ ದೊಡ್ಡದಾಗುತ್ತಿದೆ. ನುಗ್ಗಿಸಲು ಸ್ಥಳವೇ ಇಲ್ಲದಾಗಿದೆ. ಈ ಕಿರಿಕಿರಿ ತಪ್ಪಿಸಲು ಬೆಂಗಳೂರಲ್ಲಿ ಹಲವರು ಎಲೆಕ್ಟ್ರಿಕ್ ಯೂನಿಸೈಕಲ್ ಮೂಲಕ ಪ್ರಯಾಣ ಮಾಡುತ್ತಾರೆ. ಈ ಪೈಕಿ ಯುವಕನೊಬ್ಬ ಪ್ರತಿ ದಿನ ತನ್ನ ಮನೆಯಿಂದ ಕಚೇರಿ ಹಾಗೂ ಕಚೇರಿಯಿಂದ ಮನೆಗೆ ಇದೇ ಇವಿ ಯೂನಿಸೈಕಲ್ ಮೂಲಕ ಪ್ರಯಾಣ ಮಾಡುತ್ತಿದ್ದಾನೆ. ಅಚಾನಕ್ಕಾಗಿ ಬೆಂಗಳೂರಿನ ಟ್ರಾಫಿಕ್ ಪೊಲೀಸರು ಈತನ ನೋಡಿದ್ದೇ ತಡೆದಿದ್ದಾರೆ. ಬಳಿಕ ನಡೆದ ಘಟನೆಯನ್ನು ಈತ ವಿವರಿಸಿದ್ದಾನೆ.

ಬೆಂಗಳೂರು ಪೊಲೀಸರು ತಡೆದಿದ್ದೇಕೆ?

ಎಂದಿನಂತೆ ಆಫೀಸ್‌ನಿಂದ ಮರಳಿ ಬರುತ್ತಿದ್ದ ವೇಳೆ ಈತನ ಯೂನಿಸೈಕಲ್ ನೋಡಿ ಟ್ರಾಫಿಕ್ ಪೊಲೀಸರು ಅಚ್ಚರಿಗೊಂಡಿದ್ದಾರೆ. ತಕ್ಷಣವೇ ನಿಲ್ಲಿಸಲು ಸೂಚಿಸಿದ್ದಾರೆ. ಬಳಿಕ ಈ ಹೊಸ ಮಾದರಿ ಇವಿ ಸೈಕಲ್ ಕುರಿತು ಯುವಕನ ಬಳಿ ಕೇಳಿದ್ದಾರೆ. ಪೊಲೀಸರು ತಡೆದಾಗ, ದಂಡ ಹಾಕುತ್ತಾರೋ, ಅಥವಾ ಹಲವು ದಾಖಲೆಗಳಿಗಾಗಿ ಅಲೆದಾಡಬೇಕಾಗುತ್ತೋ ಅನ್ನೋ ಸಣ್ಣ ಆತಂಕ ಕಾಡಿದ್ದು ಸುಳ್ಳಲ್ಲ. ಆದರೆ ಪೊಲೀಸರು ನಿಲ್ಲಿಸಿ ಕೇಳಿದ್ದು, ಈ ಇವಿ ಯೂನಿಸೈಕಲ್ ಕುರಿತು. ಇದರ ಪ್ರಯಾಣ, ಪ್ರಯೋಜನ, ಸಾಧಕ ಬಾಧಕ ಕುರಿತು ಟ್ರಾಫಿಕ್ ಪೊಲೀಸರು ಮಾಹಿತಿ ಕೇಳಿದ್ದಾರೆ.

ಟ್ರಾಫಿಕ್ ಪೊಲೀಸರು ಪ್ರಶ್ನೆಗಳಿಗೆ ಯುವಕ ಉತ್ತರ ನೀಡಿದ್ದಾರೆ. ಇದು ಎಲೆಕ್ಟ್ರಿಕ್ ಯೂನಿಸೈಕಲ್. ಬೆಂಗಳೂರಿಂತ ಟ್ರಾಫಿಕ್ ಸಿಟಿಗಳಲ್ಲಿ ಈ ರೀತಿಯ ಯೂನಿಸೈಕಲ್ ಉಪಯೋಗವಾಗುತ್ತದೆ. ಟ್ರಾಫಿಕ್ ನಡುವೆ ಸಾಗಬಹುದು. ಪಾರ್ಕಿಂಗ್ ಸಮಸ್ಯೆಗೂ ಉದ್ಭವಿಸುವುದಿಲ್ಲ. ಬ್ಯಾಲೆನ್ಸ್ ಕಲಿತರೆ ಸಾಕು ಸುಲಭವಾಗಿ ಮನೆಯಿಂದ ಕಚೇರಿ ಸೇರಿದಂತೆ ಬೆಂಗಳೂರು ಓಡಾಟಕ್ಕೆ ಉಪಯುಕ್ತ ಅನ್ನೋ ಮಾಹಿತಿ ನೀಡಿದ್ದಾರೆ.

ಇವಿ ಯೂನಿಸೈಕಲ್ ರೈಡ್ ಮಾಡಿದ ಟ್ರಾಫಿಕ್ ಪೊಲೀಸ್

ಟ್ರಾಫಿಕ್ ಪೊಲೀಸರಿಗೆ ಮಾಹಿತಿ ನೀಡಿದ ಯುವಕ ನೀವು ಒಂದು ಬಾರಿ ರೈಡ್ ಟ್ರೈ ಮಾಡಿ ಎಂದು ಸೂಚಿಸಿದ್ದಾನೆ. ಇದರಂತೆ ಪೊಲೀಸ್ ಯೂನಿಸೈಕಲ್ ಹತ್ತಿ ಕೆಲ ದೂರ ಪ್ರಯತ್ನಸಿದ್ದಾರೆ. ಯುವಕನ ಸಹಾಯದೊಂದಿಗೆ ರೈಡ್ ಮಾಡಿದ್ದಾರೆ. ಮುಂದೇ ಬೆಂಗಳೂರು ಟ್ರಾಫಿಕ್ ಅತಿಯಾಗಿ ಪೊಲೀಸರು ಕೂಡ ಈ ರೀತಿಯ ವಾಹನ ಉಪಯೋಗಿಸಿದರೂ ಅಚ್ಚರಿಯಿಲ್ಲ ಎಂದು ಯುವಕ ಹೇಳಿದ್ದಾನೆ.

View this post on Instagram

A post shared by Jerome anand (@jro_thestreetrider)

ಟ್ರಾಫಿಕ್ ಪೊಲೀಸರು ತಮ್ಮ ಕುತೂಹಲಕ್ಕಾಗಿ ಯೂನಿಸೈಕಲ್ ತಡೆದು ಮಾಹಿತಿ ಪಡೆದಿದ್ದಾರೆ. ಯುವಕನ ಜೊತೆ ಫೋಟೋ ಕ್ಲಿಕ್ಕಿಸಿದ್ದಾರೆ. ಇದೀಗ ಬೆಂಗಳೂರಲ್ಲಿ ಇವಿ ಯೂನಿಸೈಕಲ್ ಟ್ರೆಂಡ್ ಆಗುತ್ತಿದೆ.

ರಾಜ್ಯ ಸರ್ಕಾರಗಳಿಂದ ಟಾಟಾ ಮೋಟಾರ್ಸ್‌ಗೆ ಬಂಪರ್ ಆರ್ಡರ್: 5,000+ ಹೊಸ ಬಸ್‌ಗಳಿಗೆ ಬುಕಿಂಗ್!

Sathish Kumar KH — Fri, 13 Mar 2026 18:29:52 +0530

ದೇಶದ ಪ್ರಮುಖ ವಾಣಿಜ್ಯ ವಾಹನ ತಯಾರಕ ಟಾಟಾ ಮೋಟಾರ್ಸ್‌ಗೆ ವಿವಿಧ ರಾಜ್ಯ ಸಾರಿಗೆ ಸಂಸ್ಥೆಗಳಿಂದ 5,000ಕ್ಕೂ ಹೆಚ್ಚು ಬಸ್ಸುಗಳ ಬೃಹತ್ ಆರ್ಡರ್ ಲಭಿಸಿದೆ. ಈ ಒಪ್ಪಂದದಲ್ಲಿ ಟಾಟಾ ಮ್ಯಾಗ್ನಾ, ಸಿಟಿ ರೈಡ್, ಸ್ಟಾರ್‌ಬಸ್‌ ಮಾದರಿಗಳು ಸೇರಿವೆ. ಈ ಸುದ್ದಿ ನಡುವೆಯೂ ಕಂಪನಿಯ ಷೇರುಗಳು ಕುಸಿತ ಕಂಡಿವೆ.

ದೇಶದ ಅತಿದೊಡ್ಡ ವಾಣಿಜ್ಯ ವಾಹನ ತಯಾರಕ ಕಂಪನಿ ಟಾಟಾ ಮೋಟಾರ್ಸ್‌ಗೆ 5,000ಕ್ಕೂ ಹೆಚ್ಚು ಬಸ್‌ಗಳು ಮತ್ತು ಬಸ್ ಚಾಸಿಗಳಿಗಾಗಿ ಬೃಹತ್ ಆರ್ಡರ್ ಸಿಕ್ಕಿದೆ. ದೇಶದ ಹಲವಾರು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಂದ ಕಂಪನಿಗೆ ಈ ಆರ್ಡರ್ ಬಂದಿದೆ. ಈ ಬಗ್ಗೆ ಟಾಟಾ ಮೋಟಾರ್ಸ್ ಶುಕ್ರವಾರ ಷೇರುಪೇಟೆಗೆ ಮಾಹಿತಿ ನೀಡಿದೆ. ವರದಿಗಳ ಪ್ರಕಾರ, ಇ-ಬಿಡ್ಡಿಂಗ್ ಮೂಲಕ ಟಾಟಾ ಮೋಟಾರ್ಸ್ ಈ ಆರ್ಡರ್ ಗಿಟ್ಟಿಸಿಕೊಂಡಿದೆ.

ಮಹಾರಾಷ್ಟ್ರ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ, ಗುಜರಾತ್ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ, ವಾಯುವ್ಯ ಕರ್ನಾಟಕ ಸಾರಿಗೆ ಸಂಸ್ಥೆ, ತೆಲಂಗಾಣ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ, ಬಿಹಾರ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ, ರಾಜಸ್ಥಾನ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ, ಕೇರಳ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ, ಹರಿಯಾಣ ರೋಡ್‌ವೇಸ್ ಮತ್ತು ಚಂಡೀಗಢ ಸಾರಿಗೆ ಇಲಾಖೆಯಿಂದ ಟಾಟಾ ಮೋಟಾರ್ಸ್‌ಗೆ ಈ ದೊಡ್ಡ ಆರ್ಡರ್ ಬಂದಿದೆ.

ಟಾಟಾ ಮ್ಯಾಗ್ನಾ, ಟಾಟಾ ಸಿಟಿ ರೈಡ್, ಟಾಟಾ ಸ್ಟಾರ್‌ಬಸ್ ಮತ್ತು ಟಾಟಾ ಸ್ಟಾಲ್‌ಬಸ್ ಮಾಡೆಲ್‌ಗಳಿಗೆ ಅತಿ ಹೆಚ್ಚು ಬೇಡಿಕೆ ವ್ಯಕ್ತವಾಗಿದೆ. ಈ ಆರ್ಡರ್‌ನಲ್ಲಿ ಟಾಟಾ ಎಲ್‌ಪಿಒ 1618, ಟಾಟಾ ಎಲ್‌ಪಿಒ 1622 ಮತ್ತು ಟಾಟಾ ಎಲ್‌ಪಿಒ 1822 ಚಾಸಿಗಳೂ ಸೇರಿವೆ. ಟಾಟಾ ಮೋಟಾರ್ಸ್‌ನ ಕಮರ್ಷಿಯಲ್ ಪ್ಯಾಸೆಂಜರ್ ಪೋರ್ಟ್‌ಫೋಲಿಯೋದಲ್ಲಿ 9 ಸೀಟರ್‌ಗಳಿಂದ ಹಿಡಿದು 55 ಸೀಟರ್‌ಗಳವರೆಗಿನ ಬಸ್‌ಗಳಿವೆ.

ಶುಕ್ರವಾರ ಬಿಎಸ್‌ಇಯಲ್ಲಿ ಕಂಪನಿಯ ಷೇರುಗಳು ಕುಸಿತದೊಂದಿಗೆ ವಹಿವಾಟು ಆರಂಭಿಸಿದವು. ದಿನದ ವಹಿವಾಟಿನ ವೇಳೆ ಟಾಟಾ ಮೋಟಾರ್ಸ್ ಲಿಮಿಟೆಡ್‌ನ ಷೇರುಗಳು 418 ರೂ.ಗೆ ಇಳಿದಿದ್ದವು. ಮಧ್ಯಾಹ್ನ 2:30ರ ಸುಮಾರಿಗೆ ಕಂಪನಿಯ ಷೇರುಗಳು ಸುಮಾರು 426 ರೂ.ನಲ್ಲಿ ವಹಿವಾಟು ನಡೆಸುತ್ತಿದ್ದವು. ಇದು ಶೇ. 3ಕ್ಕಿಂತ ಹೆಚ್ಚು ಕುಸಿತವಾಗಿದೆ.

ಕಳೆದ ಒಂದು ತಿಂಗಳಲ್ಲಿ ಟಾಟಾ ಮೋಟಾರ್ಸ್ ಷೇರು ಬೆಲೆ ಶೇ. 11ರಷ್ಟು ಕುಸಿದಿದೆ. ಈ ಕುಸಿತದ ನಡುವೆಯೂ, ಈ ಟಾಟಾ ಗ್ರೂಪ್ ಕಂಪನಿಯು ಮೂರು ತಿಂಗಳ ಅವಧಿಯಲ್ಲಿ ಹೂಡಿಕೆದಾರರಿಗೆ ಶೇ. 14ರಷ್ಟು ಆದಾಯವನ್ನು ನೀಡಿದೆ. ಬಿಎಸ್‌ಇಯಲ್ಲಿ ಟಾಟಾ ಮೋಟಾರ್ಸ್‌ನ 52 ವಾರಗಳ ಗರಿಷ್ಠ ಬೆಲೆ 508.95 ರೂ. ಮತ್ತು 52 ವಾರಗಳ ಕನಿಷ್ಠ ಬೆಲೆ 306 ರೂ. ಆಗಿದೆ.

ಕೆಲವು ತಿಂಗಳ ಹಿಂದೆ, ಟಾಟಾ ಮೋಟಾರ್ಸ್ ಕಂಪನಿಯನ್ನು ಎರಡು ಭಾಗಗಳಾಗಿ ವಿಂಗಡಿಸಿತ್ತು. ಟಾಟಾ ಮೋಟಾರ್ಸ್ ಪ್ಯಾಸೆಂಜರ್ ವೆಹಿಕಲ್ಸ್ ಲಿಮಿಟೆಡ್ ಮತ್ತು ಟಾಟಾ ಮೋಟಾರ್ಸ್ ಕಮರ್ಷಿಯಲ್ ಎಂದು ವಿಭಾಗಿಸಲಾಗಿದ್ದು, ಎರಡೂ ವಿಭಾಗಗಳಲ್ಲಿ ವ್ಯವಹಾರವನ್ನು ಬೆಳೆಸುವತ್ತ ಗಮನಹರಿಸಲು ಈ ನಿರ್ಧಾರ ಕೈಗೊಳ್ಳಲಾಗಿತ್ತು.

ವಾಹನ ಮಾಲೀಕರೇ ಎಚ್ಚರ ಬೆಂಗಳೂರಲ್ಲಿ ಮತ್ತೆ ಟೋಯಿಂಗ್ ಆರಂಭ, ಈ ಬಾರಿ ದಂಡ ಎಷ್ಟು?

Chethan Kumar — Wed, 25 Mar 2026 08:15:59 +0530

ಬೆಂಗಳೂರು (ಮಾ.25) ಸಿಲಿಕಾನ್ ಸಿಟಿ ಬೆಂಗಳೂರಲ್ಲಿ ನೋ ಪಾರ್ಕಿಂಗ್ ಸ್ಥಳಗಳಲ್ಲಿ ವಾಹನ ನಿಲ್ಲಿಸಿದರೆ ಟೋಯಿಂಗ್ ಮಾಡುವ ಪದ್ಧತಿಗೆ ಕೆಲ ವರ್ಷಗಳ ಕಾಲ ಬ್ರೇಕ್ ಹಾಕಲಾಗಿತ್ತು. ಬೆಂಗಳೂರು ರಸ್ತೆಯ ಬದಿಗಳಲ್ಲಿ ಇದೀಗ ಹೆಚ್ಚು ವಾಹನಗಳು ಪಾರ್ಕಿಂಗ್ ಆಗುತ್ತಿದ್ದು, ಸಂಚಾರ ದಟ್ಟಣೆ ತೀವ್ರಗೊಳ್ಳುತ್ತಿದೆ. ಹೀಗಾಗಿ ಇದೀಗ ಬೆಂಗಳೂರು ಟ್ರಾಫಿಕ್ ಪೊಲೀಸರ ವಾಹನ ಟೋಯಿಂಗ್ ಮತ್ತೆ ಜಾರಿಗೆ ತಂದಿದ್ದಾರೆ. ನೋ ಪಾರ್ಕಿಂಗ್ ಸ್ಥಳಗಳಲ್ಲಿ, ಎಲ್ಲೆಂದರಲ್ಲಿ ವಾಹನ ನಿಲ್ಲಿಸುವವರಿಗೆ ಎಚ್ಚರಿಕೆ ನೀಡಲಾಗಿದೆ. ಮತ್ತೆ ಹಳೆ ಟೋಯಿಂಗ್ ಪದ್ಧತಿಯನ್ನು ಜಾರಿಗೆ ತರಲಾಗಿದೆ. ಆದರೆ ಈ ಬಾರಿ ದಂಡ ದುಬಾರಿಯಾಗಿದೆ. ರಾಜಧಾನಿ ಕೇಂದ್ರ ವಾಣಿಜ್ಯ ಪ್ರದೇಶ (CBD)ಯಲ್ಲಿ ಮತ್ತೆ ಟೋಯಿಂಗ್ ಕಾರ್ಯಾಚರಣೆ ಆರಂಭಗೊಳ್ಳುತ್ತಿದೆ.

ಇನ್ನೆರಡು ದಿನಗಳಲ್ಲಿ ಪ್ರಾಯೋಗಿಕವಾಗಿ ಟೋಯಿಂಗ್ ಆರಂಭ

ಇನ್ನೆರಡು ದಿನಗಳಲ್ಲಿ ಪ್ರಾಯೋಗಿಕವಾಗಿ ಟೋಯಿಂಗ್ ಕ್ರಮ ಆರಂಭಗೊಳ್ಳುತ್ತಿದೆ. ನಗರದ ಎಂ.ಜಿ. ರಸ್ತೆ, ವಿಧಾನಸೌಧ ಸುತ್ತಮುತ್ತ ಸೇರಿದಂತೆ ನೋ-ಪಾರ್ಕಿಂಗ್ ಪ್ರದೇಶಗಳಲ್ಲಿ ಟೋಯಿಂಗ್ ಕ್ರಮ ಜಾರಿಯಾಗುತ್ತಿದೆ. ಎಲೆ ದರಲ್ಲಿ ವಾಹನ ನಿಲ್ಲಿಸಿದರೆ ಇನ್ನು ಮುಂದೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗುತ್ತಿದೆ. ಸಂಚಾರ ಪೊಲೀಸರು ಮತ್ತು ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ಜಂಟಿಯಾಗಿ ಕಾರ್ಯಾಚರಣೆ ನಡೆಸಲಿದ್ದಾರೆ. ಮೊದಲ ಹಂತದಲ್ಲಿ ಕೇಂದ್ರ ಹಾಗೂ ಪಶ್ಚಿಮ ನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಟೋಯಿಂಗ್ ಕ್ರಮ ಜಾರಿಗೆ ಬರಲಿದೆ.

ದಂಡ ಮತ್ತು ಶುಲ್ಕದ ವಿವರ

ಈ ಬಾರಿ ನೋ ಪಾರ್ಕಿಂಗ್ ಅಥವಾ ಎಲ್ಲೆಂದರಲ್ಲಿ ವಾಹನ ಪಾರ್ಕಿಂಗ್ ಮಾಡಿದರೆ ದಂಡ ದುಬಾರಿಯಾಗಿದೆ. ವಾಹನ ನೋ ಪಾರ್ಕಿಂಗ್ ನಿಯಮ ಉಲ್ಲಂಘನೆ ಮಾಡಿದರೆ 500 ರೂಪಾಯಿ ದಂಡ ವಿಧಿಸಲಾಗುತ್ತದೆ. ಇದರ ಜೊತೆಗೆ ಟೋಯಿಂಗ್ ಶುಲ್ಕ ವಿಧಿಸಲಾಗುತ್ತದೆ. ಇದು ವಾಹನಕ್ಕೆ ಅನುಗುಣವಾಗಿ ಬದಲಾಗುತ್ತದೆ. ಬೈಕ್ ಸೇರಿದಂತೆ ದ್ವಿಚಕ್ರ ವಾಹನಗಳ ಟೋಯಿಂಗ್ ಶುಲ್ಕ 650 ರೂಪಾಯಿ. ಇನ್ನು ಕಾರು ಸೇರಿದಂತೆ ಇತರ ವಾಹನಗಳ ಟೋಯಿಂಗ್ ಶುಲ್ಕ 1000 ರೂಪಾಯಿ.

ರಸ್ತೆಗಿಳಿದ ಮೂರು ಟೋಯಿಂಗ್ ವಾಹನ

ಜಿಬಿಎ ಅಧಿಕಾರಿಗಳು ಈಗಾಗಲೇ ವಾಹನ ಟೋಯಿಂಗ್ ಮಾಡಲು ಮೂರು ವಾಹನಗಳನ್ನು ನೀಡಿದೆ. ಇನ್ನು ಹಂತ ಹಂತವಾಗಿ ಎಲ್ಲಾ ಕಡೆ ಟೋಯಿಂಗ್ ವಾಹನಗಳು ರಸ್ತೆಗೆ ಇಳಿಯಲಿದೆ. ಈ ಮೂಲಕ ಸಂಚಾರ ದಟ್ಟಣೆ ತಗ್ಗಿಸಲು, ಟ್ರಾಫಿಕ್ ಸಮಸ್ಯೆಗೆ ಮುಕ್ತಿ ಹಾಡಲು ಬೆಂಗಳೂರು ಪೊಲೀಸರು ಮುಂದಾಗಿದ್ದಾರೆ.

ಮಹಿಳೆಯಿಂದ ಟಾಟಾ ಸಿಯೆರಾ ಟೆಸ್ಟ್ ಡ್ರೈವ್, 3 ವಾಹನಕ್ಕೆ ಡಿಕ್ಕಿಯಾಗಿ 20 ಅಡಿ ಗುಂಡಿಗೆ ಬಿದ್ದ ಕಾರು

Chethan Kumar — Sat, 14 Mar 2026 20:01:50 +0530

ಮುಂಬೈ (ಮಾ.14) ಟಾಟಾ ಕಾರುಗಳು ಗರಿಷ್ಠ ಸುರಕ್ಷತೆ ನೀಡುತ್ತದೆ ಎಂಬುದು ಈಗಾಗಲೇ ಸಾಬೀತಾಗಿದೆ. ಹೀಗಾಗಿ ಟಾಟಾ ಕಾರುಗಳಿಗೆ ಬಾರಿ ಬೇಡಿಕೆ ಇದೆ. ಇತ್ತೀಚೆಗೆ ಬಿಡುಗಡೆಯಾದ ಟಾಟಾ ಸಿಯೆರಾ ಕಾರು ಹಲವರನ್ನು ಆಕರ್ಷಿಸುತ್ತಿದೆ. ಹೀಗೆ ಮಹಿಳೆಯೊಬ್ಬರು ಟಾಟಾ ಸಿಯೆರಾ ಕಾರು ಖರೀದಿಸಲು ಶೋರೂಂಗೆ ತೆರಳಿದ್ದಾರೆ. ಕಾರು ಟೆಸ್ಟ್ ಡ್ರೈವ್ ಮಾಡಲು ಮುಂದಾಗಿದ್ದಾರೆ. ಇದರಂತೆ ಟಾಟಾ ಸಿಯೆರಾ ಕಾರು ಪಡೆದು ರಸ್ತೆಯಲ್ಲಿ ಡ್ರೈವ್ ಮಾಡಲು ಮುಂದಾಗಿದ್ದಾರೆ. ಆದರೆ ಕಾರು ನಿಯಂತ್ರಣ ತಪ್ಪಿದೆ. ಅತೀ ವೇಗವಾಗಿ ಸಾಗಿ ಆಟೋ, ದ್ವಿಚಕ್ರ ವಾಹನ ಸೇರಿದಂತೆ ಮೂರು ವಾಹನಗಳಿಗೆ ಡಿಕ್ಕಿಯಾಗಿ, ಬ್ಯಾರಿಕೇಡ್ ಮುರಿದು ಕಾಮಗಾರಿಯ 20 ಅಡಿ ಆಳದ ಗುಂಡಿಗೆ ಬಿದ್ದಿದೆ. ಆದರೆ ಮಹಿಳೆ, ಮಹಿಳೆಯ ಸಂಬಂಧಿಗಳು ಹಾಗೂ ಶೋ ರೂಂ ಸಿಬ್ಬಂದಿ ಸಣ್ಣ ಪುಟ್ಟಗಾಯಗೊಂಡಿದ್ದಾರೆ. ಆದರೆ ಪ್ರಾಣಾಪಾಯದಿಂಂದ ಪಾರಾದ ಘಟನೆ ಮುಂಬೈನಲ್ಲಿ ನಡೆದಿದೆ.

ಪಶ್ಚಿಮ ಥಾಣೆಯ ಪಂಚಕಡಿ ಬಳಿ ಈ ಘಟನೆ ನಡೆದಿದೆ. ಮಹಿಳೆ ತನ್ನ ಸಂಬಂಧಿಕರೊಂದಿಗೆ ಕಾರು ಖರೀದಿಗೆ ಆಗಮಿಸಿದ್ದಾರೆ. ಈ ವೇಳೆ ಟೆಸ್ಟ್ ಡ್ರೈವ್ ಮಾಡಲು ಮುಂದಾಗಿದ್ದಾರೆ. ಹೀಗಾಗಿ ಸಂಬಂಧಿಕರನ್ನು ಕೂರಿಸಿಕೊಂಡು ಟೆಸ್ಟ್ ಡ್ರೈವ್‌ಗೆ ತೆರಳಿದ್ದಾರೆ. ಇದೇ ವೇಳೆ ಶೋ ರೂಂ ಸಿಬ್ಬಂದಿಯೂ ಕಾರಿನಲ್ಲಿ ಕುಳಿತಿದ್ದಾರೆ. ಕಾರಿನ ಬಗ್ಗೆ ಮಾಹಿತಿ ನೀಡಲು ಆರಂಭಿಸದ ಬೆನ್ನಲ್ಲೇ ಮಹಿಳೆ ಕಾರು ಸ್ಟಾರ್ಟ್ ಮಾಡಿ ಮೂವ್ ಮಾಡಿದ್ದಾರೆ.ರಸ್ತೆಗೆ ಇಳಿದ ಬೆನ್ನಲ್ಲೇ ಕಾರು ಸಂಪೂರ್ಣ ನಿಯಂತ್ರಣ ಕಳೆದುಕೊಂಡಿದೆ. ಜನನಿಬಿಡಿ ರಸ್ತೆಯಲ್ಲಿ ಕಾರು ಅತೀವೇಗವಾಗಿ ಸಾಗಿದೆ. ರಸ್ತೆ ಬದಿಯಲ್ಲಿ ನಿಲ್ಲಿಸಿದ್ದ ವಾಹನಗಳಿಗೆ ಡಿಕ್ಕಿಯಾಗಿದೆ.

ಎಲ್ಲಾ ತಡೆಗೋಡೆ ಮುರಿದ ಟಾಟಾ

ಕಾಮಗಾರಿ ಸ್ಥಳದ ಕಾರಣ ಬ್ಯಾರಿಕೇಡ್‌ಗಳನ್ನು ಹಾಕಲಾಗಿತ್ತು. ಇಷ್ಟೇ ಅಲ್ಲ ತಾತ್ಕಾಲಿಕ ತಡೆಗೋಡೆಗಳನ್ನು ನಿರ್ಮಾಣ ಮಾಡಲಾಗಿದೆ. ಈ ಮಹಿಳೆಯ ಅತೀ ವೇಗದಲ್ಲಿ ಕಾರು ಚಲಾಯಿಸಿದ್ದಾರೆ. ಹೀಗಾಗಿ ಬ್ಯಾರಿಕೇಡ್, ತಡೆಗೋಡೆ ಎಲ್ಲಾ ಮುರಿದು ಕಾಮಗಾರಿಯ 20 ಅಡಿ ಆಳದ ಗುಂಡಿಗೆ ಬಿದ್ದಿದೆ. ಅಪಘಾತವಾಗುತ್ತಿದ್ದಂತೆ ಕಾರಿನ ಏರ್‌ಬ್ಯಾಗ್ ತೆರೆದುಕೊಂಡಿದೆ. ಇನ್ನು ಟಾಟಾ ಕಾರು 5 ಸ್ಟಾರ್ ಸುರಕ್ಷತೆ ಕಾರಣ ನಜ್ಜು ನುಜ್ಜಾಗಿಲ್ಲ. ಇತ್ತ ಅಗ್ನಿಶಾಮಕ ದಳ, ಪೊಲೀಸರು ಸ್ಥಳಕ್ಕೆ ಧಾವಿಸಿ ಕಾರಿನಲ್ಲಿದ್ದ ಮೂವರನ್ನು ರಕ್ಷಿಸಿ ಆಸ್ಪತ್ರೆ ದಾಖಲಿಸಿದ್ದಾರೆ.

ಮೂರು ವಾಹನ ಜಖಂ

5 ಸ್ಟಾರ್ ಸೇಫ್ಟಿ ಕಾರು ಮೂವರು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಟೆಸ್ಟ್ ಡ್ರೈವ್ ಮಾಡಲು ಹೋಗಿ ಮೂವರು ಗಾಯಗೊಂಡಿದ್ದಾರೆ. ಎರಡು ದ್ವಿಚಕ್ರ ವಾಹನ ಹಾಗೂ ಒಂದು ಆಟೋ ರಿಕ್ಷಾ ಸಂಪೂರ್ಣ ನಜ್ಜು ಗುಜ್ಜಾಗಿದೆ. ಇತ್ತ ಪೊಲೀಸರು ಪ್ರರಕರಣ ದಾಖಲಿಸಿಕೊಂಡಿದ್ದಾರೆ.

ಟಾಟಾ ಸಿಯೆರಾ ಕಾರಿನ ಬೆಲೆ 11.49 ಲಕ್ಷ ರೂಪಾಯಿಯಿಂದ ಆರಂಭಗೊಳ್ಳುತ್ತಿದೆ. 60hp ಪವರ್ ಹಾಗೂ 255Nm ಪೀಕ್ ಟಾರ್ಕ್ ಸಾಮರ್ಥ್ಯ ಹೊಂದಿದೆ. 1.5 ಲೀಟರ್ ಎಂಜಿನ್, 4 ಸಿಲಿಂಡರ್ ಹೊಂದಿದೆ. ಮ್ಯಾನ್ಯುಯೆಲ್ ಹಾಗೂ ಆಟೋ ಟ್ರಾನ್ಸ್‌ಮಿಶನ್ ಆಯ್ಕೆ ಲಭ್ಯವಿದೆ.ಅತ್ಯಂತ ಆಕರ್ಷಕ ಎಸ್‌ಯುವಿ ಕಾರಾಗಿದ್ದು, ದಾಖಲೆಯ ಬುಕಿಂಗ್ ಪಡೆದಿದೆ.

ಸ್ಟೈಲಿಶ್ ಲುಕ್ ಮತ್ತು ಸ್ಮಾರ್ಟ್ ಫೀಚರ್‌ಗಳೊಂದಿಗೆ ಮಾರುಕಟ್ಟೆಗೆ ಬಂದ ಟಿವಿಎಸ್ ಎನ್‌ಟಾರ್ಕ್ 150

Govindaraj S — Tue, 23 Dec 2025 09:26:19 +0530

ಕಾಲಕ್ಕೆ ತಕ್ಕಂತೆ ಬದಲಾಗುರುವ ಟಿವಿಎಸ್‌ ಕಂಪನಿ ಕಾಲಕ್ಕೆ ತಕ್ಕ ವೇಗ, ಮೆಚ್ಚಿಸಬಲ್ಲ ವಿನ್ಯಾಸ ಹೊಂದಿರುವ ಹೈಪರ್ ಸ್ಪೋರ್ಟ್‌ ಸ್ಕೂಟರ್‌ ತಂದಿದೆ. ಹೆಸರು ಟಿವಿಎಸ್‌ ಎನ್‌ಟಾರ್ಕ್‌ 150. ಕ್ಯೂಟ್‌ ಆದ ದೇಹಾಕಾರ, ಎದ್ದು ಕಾಣುವಂತಹ ಬಣ್ಣಗಳ ಸಂಯೋಜನೆ ಹೊಂದಿರುವ ಎನ್‌ಟಾರ್ಕ್‌ ಓಡಿಸುತ್ತಿದ್ದರೆ ಒಂದಿಬ್ಬರಾದರೂ ಹಿಂತಿರುಗಿ ನೋಡುತ್ತಾರೆ. ಅಷ್ಟರ ಮಟ್ಟಿಗೆ ಈ ಸ್ಕೂಟರ್‌ ಗೆದ್ದಿದೆ.

ಹಾಗಂತ ಎನ್‌ಟಾರ್ಕ್‌ ಸರಣಿ ಹೊಸತಲ್ಲ, ಆದರೆ ಈ 150 ಸಿಸಿ ರೇಸ್‌ ಎಡಿಷನ್‌ ಹೊಸತು. ಇದರ ಎಲ್‌ಇಡಿ ಪ್ರೊಜೆಕ್ಟರ್ ಹೆಡ್‌ಲ್ಯಾಂಪ್‌ಗಳು, ಡಿಆರ್‌ಎಲ್‌ಗಳು, ಟೈಲ್ ಲೈಟ್ ಎಲ್ಲವೂ ಈ ಸ್ಕೂಟರ್‌ ಅನ್ನು ಎಲ್ಲಿಯೇ ನಿಂತಿದ್ದರೂ ಎದ್ದು ಕಾಣಿಸುತ್ತವೆ. ಅದಕ್ಕೆ ತಕ್ಕಂತೆ ಇದರ 149.7 ಸಿಸಿ ಏರ್-ಕೂಲ್ಡ್ ಎಂಜಿನ್ ಅದ್ಭುತ ಪವರ್‌ ಹೊಂದಿದೆ. ಆಕ್ಸಲರೇಟರ್‌ ಕೊಟ್ಟರೆ ಸಾಕು ಸಕತ್ತಾಗಿ ಓಡುತ್ತಾದೆ. ರೋಡ್‌ ಗ್ರಿಪ್‌, ಬ್ರೇಕಿಂಗ್‌ ಸೂಪರಾಗಿದೆ. ಇದರಲ್ಲಿ ಸ್ಟ್ರೀಟ್‌ ಮತ್ತು ರೇಸ್‌ ಎಂಬ ಎರಡು ಮೋಡ್‌ಗಳಿವೆ. ರೇಸ್‌ ಮೋಡ್‌ ಹಾಕಿಟ್ಟರೆ ಓವರ್‌ಟೇಕ್‌ ಮಾಡುವಾಗ ಬಹಳ ಮೃದುವಾಗಿ ದಾಟಿಹೋಗುತ್ತದೆ.

770 ಎಂಎಂ ಸೀಟ್ ಎತ್ತರವಿರುವುದರಿಂದ ಎತ್ತರದ ಮಂದಿಯೂ ಸುಲಭವಾಗಿ ಕೂರಬಹುದು. ಪಿಲಿಯನ್‌ ರೈಡರ್‌ಗೂ ಆರಾಮದಾಯಕ ಸ್ಥಳವಿದೆ. ಸಿಂಗಲ್ ಚಾನಲ್ ಎಬಿಎಸ್‌ ಮತ್ತು ಟ್ರಾಕ್ಷನ್ ಕಂಟ್ರೋಲ್ ರೈಡಿಂಗ್‌ ಸೊಗಸು ಹೆಚ್ಚಿಸುತ್ತದೆ. ಸೀಟ್‌ ಕೆಳಗಿರುವುದು 22 ಲೀ ಸ್ಟೋರೇಜ್‌ ಮಾತ್ರ. ಒಂದು ಹೆಲ್ಮೆಟ್‌ ಇಡಬಹುದು. ಸೋರೆಕಾಯಿ, ಕುಂಬಳಕಾಯಿ ಇತ್ಯಾದಿ ಇಡುವುದು ಸ್ವಲ್ಪ ಕಷ್ಟ.

ಸ್ಟೈಲಿಶ್‌ ಸ್ಕೂಟರ್‌

ಟಿಎಫ್‌ಟಿ ಡಿಸ್‌ಪ್ಲೇ ಮತ್ತು ಟಿಎಫ್‌ಟಿ ಇಲ್ಲದ ಡಿಸ್‌ಪ್ಲೇ ಹೊಂದಿರುವ ಎರಡು ವೇರಿಯೆಂಟ್‌ಗಳು ಲಭ್ಯ. ಸ್ಮಾರ್ಟ್‌ವಾಚ್‌ ಜೊತೆ ಕನೆಕ್ಟ್‌ ಮಾಡಬಹುದಾದಷ್ಟು ಇದು ಆಧುನಿಕ. ಜೊತೆಗೆ ನ್ಯಾವಿಗೇಷನ್, ಮ್ಯೂಸಿಕ್ ಕಂಟ್ರೋಲ್, ಅಲೆಕ್ಸಾ ಇಂಟಿಗ್ರೇಷನ್, ಕ್ರ್ಯಾಶ್ ಅಲರ್ಟ್ ಮುಂತಾದ ಫೀಚರ್‌ಗಳಿವೆ. ಒಟ್ಟಾರೆಯಾಗಿ ನೋಡುವುದಾದರೆ ₹1,09,400 ಲಕ್ಷದಿಂದ ₹1,18,400 ಲಕ್ಷ (ಎಕ್ಸ್-ಶೋರೂಂ) ಬೆಲೆಯನ್ನು ಹೊಂದಿರುವ ಈ ಸ್ಟೈಲಿಶ್‌ ಸ್ಕೂಟರ್‌, ತಕ್ಷಣದ ವೇಗ, ಆಕರ್ಷಕ ವಿನ್ಯಾಸ, ಅದ್ಭುತ ಕಾರ್ಯಕ್ಷಮತೆ, ಸಾಕಷ್ಟು ಫೀಚರ್‌ಗಳನ್ನು ಬಯಸುವ ಮಂದಿಗೆ ಉತ್ತಮ ಆಯ್ಕೆ.

ಫೆ.1ರಿಂದ ಫಾಸ್ಟಾಗ್ ನಿಯಮದಲ್ಲಿ ಮತ್ತೊಂದು ಬದಲಾವಣೆ, ವಾಹನ ಮಾಲೀಕರು ಫುಲ್ ಖುಷ್

Chethan Kumar — Thu, 29 Jan 2026 16:48:24 +0530

ಫೆ.1ರಿಂದ ಫಾಸ್ಟಾಗ್ ನಿಯಮದಲ್ಲಿ ಮತ್ತೊಂದು ಬದಲಾವಣೆ, ವಾಹನ ಮಾಲೀಕರಿಗೆ ಇನ್ನು ಮುಂದೆ ಫಾಸ್ಟಾಗ್ ಕಿರಿಕಿರಿ ಇರುವುದಿಲ್ಲ. ಫೆಬ್ರವರಿ 1 ರಿಂದ ಹೊಸ ನಿಯಮ ಜಾರಿಯಾಗುತ್ತಿದೆ. ಏನಿದು ಈ ನಿಯಮ?

ದೇಶಾದ್ಯಂತ ಟೋಲ್ ಪಾವತಿಯನ್ನು ಫಾಸ್ಟಾಗ್ ಮೂಲಕ ಮಾಡಲಾಗುತ್ತದೆ. ವಾಹನ ಪ್ರಯಾಣದ ವೇಳೆ ಹೆದ್ದಾರಿ ಸೇರಿದಂತೆ ಪ್ರಮಖ ರಸ್ತೆಗಳು ಟೋಲ್ ಗೇಟ್ ಒಳಗೊಂಡಿರುತ್ತದೆ. ಟೋಲ್ ಪ್ಲಾಜಾದಲ್ಲಿ ಫಾಸ್ಟಾಗ್ ಮೂಲಕ ಟೋಲ್ ಪಾವತಿ ಮಾಡಿ ಸಾಗಬೇಕು. ಇದೀಗ ಫೆಬ್ರವರಿ 1 ರಿಂದ ಫಾಸ್ಟಾಗ್ ನಿಯಮದಲ್ಲಿ ಮತ್ತೊಂದು ಬದಲಾವಣೆಯಾಗುತ್ತಿದೆ. ಈ ಬದಲಾವಣೆಯಿಂದ ವಾಹನ ಸವಾರರು, ಮಾಲೀರಿಗೆ ಫಾಸ್ಟಾಗ್ ಕಿರಿಕಿರಿ ತಪ್ಪಲಿದೆ.

ಫೆಬ್ರವರಿ 1 ರಿಂದ ಫಾಸ್ಟಾಗ್ ನೀತಿಯಲ್ಲಿ ಬದಲಾವಣೆಯಾಗುತ್ತಿದೆ. ಪ್ರಮುಖವಾಗಿ ಫಾಸ್ಟಾಗ್ ಕೆವೈಸಿ ನಿಯಮ ತೆಗೆದು ಹಾಕಲಾಗುತ್ತಿದೆ. ಮೊದಲ ಬಾರಿಗೆ ಫಾಸ್ಟಾಗ್ ಖರೀದಿಸುವಾಗ ಅಥವಾ, ಹೊಸ ವಾಹನ ಖರೀದಿ ವೇಳೆ ಫಾಸ್ಟಾಗ್ ನೋಂದಣಿಯಾಗಲಿದೆ. ಬಳಿಕ ಪ್ರತಿ ವರ್ಷ ಕೈವೆಸಿ ಮಾಡುವ ಅಗತ್ಯವಿಲ್ಲ.

ಸದ್ಯ ವಾಹನ ಮಾಲೀಕರು ಪ್ರತಿ ವರ್ಷ, ನಿರ್ದಿಷ್ಠ ಸಮಯದಲ್ಲಿ ಕೆವೈಸಿ ಪೂರ್ಣಗೊಳಿಸಬೇಕು. ವಾಹನ ದಾಖಲೆ, ಫೋಟೋ,ಸ್ಕ್ಯಾನಿಂಗ್ ಸೇರಿದಂತೆ ಹಲವು ದಾಖಲೆ ಸಲ್ಲಿಸಿ ಕೆವೈಸಿ ಪೂರ್ಣಗೊಳಿಸಬೇಕು. ನವೀಕರಣದಂತೆ ಕಾಲ ಕಾಲಕ್ಕೆ ದಾಖಲೆ ಸಲ್ಲಿಕೆ ಮಾಡಿ ಕೆವೈಸಿ ಪೂರ್ಣಗೊಳಿಸಬೇಕಿತ್ತು. ಆದರೆ ಹೊಸ ನಿಯಮದ ಪ್ರಕಾರ ಒಂದು ಬಾರಿ ಕೆವೈಸಿ ಪೂರ್ಣಗೊಳಿಸಿದರೆ ಮತ್ತೆ ಮಾಡಬೇಕಿಲ್ಲ. ಹೊಸ ನಿಯಮದ ಪ್ರಕಾರ ಫಾಸ್ಟಾಗ್ ಆ್ಯಕ್ಟಿವೇಶನ್ ಬಳಿಕ ಯಾವುದೇ ಕೆವೈಸಿ ಪ್ರಕ್ರಿಯೆ ಅಗತ್ಯವಿಲ್ಲ.

ಹೊಸ ನಿಯಮ ಪ್ರಕಾರ ಫಾಸ್ಟಾಗ್ ಸಕ್ರಿಯಗೊಂಡ ಬಳಿಕ ವರ್ಷದಿಂದ ವರ್ಷಕ್ಕೆ ಕೆವೈಸಿ ಅಗತ್ಯವಿಲ್ಲ. ಆದರೆ ದೂರು ದಾಖಲಾದಾಗ, ಅಥವಾ ಫಾಸ್ಟಾಗ್ ದುರ್ಬಳೆ ಅನುಮಾನಗಳು ಬಂದಾಗ, ಫಾಸ್ಟಾಗ್ ಕಳೆದು ಹೋದರೆ ಸೇರಿದಂತೆ ಕೆಲ ಸಂದರ್ಭಗಳಲ್ಲಿ ಫಾಸ್ಟಾಗ್ ಕೈವೆಸಿ ಅಗತ್ಯವಾಗಿದೆ. ಇನ್ನುಳಿದಂತೆ ಕೆವೈಸಿ ನಿಮಯ ಸಡಿಲ ಮಾಡಲಾಗಿದೆ.

ಫಾಸ್ಟಾಗ್ ಆ್ಯಕ್ಟಿವೇಶನ್ ಮಾಡುವಾಗ ಬ್ಯಾಂಕ್ ಸಂಪೂರ್ಣವಾಗಿ ವಾಹನ ವೆರಿಫಿಕೇಶನ್ ಮಾಡಲಿದೆ. ವಾಹನ ಮಾಲೀಕರು, ವಾಹನ ರಿಜಿಸ್ಟ್ರೇಶನ್ ನಂಬರ್, ಚಾಸಿ ನಂಬರ್ ಸೇರಿದಂತೆ ಎಲ್ಲಾ ಮಾಹಿತಿಗಳು ಫಾಸ್ಟಾಗ್ ಬ್ಯಾಂಕ್ ವೆರಿಫಿಕೇಶನ್ ಮಾಡಲಿದೆ. ಬಳಿಕ ಫಾಸ್ಟಾಗ್ ಆ್ಯಕ್ಟಿವೇಟ್ ಆಗಲಿದೆ.

ಆನ್‌ಲೈನ್ ಮೂಲಕ ಫಾಸ್ಟಾಗ್ ಖರೀದಿಸಿದರೆ ನಿಯಮವೇನು? ಇದೇ ನಿಯಮ ಅನ್ವಯವಾಗಲಿದೆ. ಆನ್‌ಲೈನ್ ಖರೀದಿ ವೇಳೆ ನೀವು ಫಾಸ್ಟಾಗ್ ಖರೀದಿಸುವ ಬ್ಯಾಂಕ್ ವಾಹನದ ವೆರಿಫಿಕೇಶನ್ ಮಾಡಿ ಫಾಸ್ಟಾಗ್ ನೀಡಲಿದೆ. ಆ್ಯಕ್ಟಿವೇಶನ್ ಪ್ರಕ್ರಿಯೆ ಮುಗಿದ ಬಳಿಕ ಮತ್ತೆ ಕೆವೈಸಿ ಮಾಡುವ ಅಗತ್ಯವಿಲ್ಲ.

ಆನ್‌ಲೈನ್ ಮೂಲಕ ಖರೀದಿಸಿದರೆ ನಿಯಮವೇನು?

ಹೆದ್ದಾರಿಗಳಲ್ಲಿ ಇನ್ಮುಂದೆ ಕಾಲ್ ಡ್ರಾಪ್ ಆಗಲ್ಲ, ಏನಿದು ಹೊಸ ರಸ್ತೆಗಳಲ್ಲಿ 5ಜಿ ನೆಟ್‌ವರ್ಕ್?

Chethan Kumar — Tue, 06 Jan 2026 19:02:01 +0530

ಹೆದ್ದಾರಿಗಳಲ್ಲಿ ಇನ್ಮುಂದೆ ಕಾಲ್ ಡ್ರಾಪ್ ಆಗಲ್ಲ, ಏನಿದು ಹೊಸ ರಸ್ತೆಗಳಲ್ಲಿ 5ಜಿ ನೆಟ್‌ವರ್ಕ್?, ಪ್ರಯಾಣದ ವೇಳೆ ನೆಟ್‌ವರ್ಕ್ ಸಮಸ್ಯೆಯಿಂದ ಕಾಲ್ ಡ್ರಾಪ್ ಸಮಸ್ಯೆಗಳನ್ನು ಬಹುತೇಕರು ಎದಿರಿಸಿದ್ದಾರೆ. ಇನ್ನು ಈ ಸಮಸ್ಯೆ ಇರುವುದಿಲ್ಲ

ಭಾರತದಲ್ಲಿ ಹೆದ್ದಾರಿ ರಸ್ತೆಗಳನ್ನು ಮೇಲ್ದರ್ಜೆಗೆ ಏರಿಸಲಾಗುತ್ತಿದೆ. ಬಹುತೇಕ ಹೆದ್ದಾರಿ ರಸ್ತೆಗಳು ಉತ್ತಮ ಗುಣಮಟ್ಟದಲ್ಲಿ ನಿರ್ಮಾಣಗೊಳ್ಳುತ್ತಿದೆ. ಎಕ್ಸ್‌ಪ್ರೆಸ್‌ವೇ ಕಾರಿಡಾರ್‌ಗಳು ಭಾರತದ ಸಾರಿಗೆ ಸಂಪರ್ಕ ಸುಲಭಗೊಳಿಸಿದೆ. ಇದೇ ವೇಳೆ ಪ್ರಯಾಣದಲ್ಲಿ ಹಲವು ಪ್ರಯಾಣಿಕರು ನೆಟ್‌ವರ್ಕ್ ಸಮಸ್ಯೆ ಎದುರಿಸುತ್ತಾರೆ. ಇನ್ಮುಂದೆ ಈ ಸಮಸ್ಯೆ ಇರುವುದಿಲ್ಲ.

ಹೆದ್ದಾರಿಗಳಲ್ಲಿ ಪ್ರಯಾಣ ಮಾಡುವಾಗ ದಿಢೀರ್ ಕಾಲ್ ಡ್ರಾಪ್ ಸಮಸ್ಯೆಗಳು ಸಹಜ. ಕೆಲ ಏರಿಯಾ ಬಂದಾಗ ನೆಟ್‌ವರ್ಕ್ ಸಮಸ್ಯೆಗಳಿಂದ ಕಾಲ್ ಡ್ರಾಪ್ ಆಗಲಿದೆ. ಆದರೆ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ, ದೂರಸಂಪರ್ಕ ಇಲಾಖೆ ಹಾಗೂ ಟ್ರಾಯ್ ಜಂಟಿಯಾಗಿ ಮಹತ್ವದ ಒಪ್ಪಂದ ಮಾಡಿಕೊಳ್ಳುತ್ತಿದೆ. ಈ ಮೂಲಕ ನೆಟ್‌ವರ್ಕ್ ಸಮಸ್ಯೆ ಬಗೆಹರಿಸುತ್ತಿದೆ.

NHAI, DoT ಹಾಗೂ TRAI ಜಂಟಿಯಾಗಿ ಹೆದ್ದಾರಿಗಳಲ್ಲಿ 5ಜಿ ಸೇವೆ ನೀಡಲಿದೆ. ಇದರಿಂದ ಭಾರತದ ಯಾವುದೇ ಹೆದ್ದಾರಿಗಳಲ್ಲಿ ನೆಟ್‌ವರ್ಕ್ ಸಮಸ್ಯೆಗಳು ಎದುರಾಗುವುದಿಲ್ಲ. ಇದು ಕೇವಲ ಕಾಲ್ ಡ್ರಾಮ್ ಸಮಸ್ಯೆಗೆ ಮಾತ್ರ ಉತ್ತರವಲ್ಲ. ತುರ್ತು ಸಂದರ್ಭದಲ್ಲೂ ಪ್ರಯಾಣಿಕರಿಗೆ ನೆರವಾಗಲಿದೆ.

ಭಾರತದ ಹೆದ್ದಾರಿಗಳನ್ನು ಇದೀಗ ಸ್ಮಾರ್ಟ್ ಹೈವೇ ಯೋಜನೆಯಡಿ ಅಭಿವೃದ್ಧಿಪಡಿಸಲಾಗುತ್ತದೆ. ಇದರಿಂದ ಎಲ್ಲಾ ಹೆದ್ದಾರಿಗಳು 5ಜಿ ಸೇವೆಯಿಂದ ಕೂಡಿರಲಿದೆ. ಮತ್ತೊಂದು ವಿಶೇಷ ಅಂದರೆ ಸುರಕ್ಷತಾ ಎಜೆನ್ಸಿಗಳಿಗೂ ಹೆದ್ದಾರಿ ಮೇಲೆ ನಿಗಾ ಇಡಲು ಸಾಧ್ಯವಾಗುತ್ತದೆ. ಸುರಕ್ಷತೆ, ಸೌಲಭ್ಯ ಸೇರಿದಂತೆ ಹಲವು ಕಾರಣಗಳಿಂದ ಭಾರತದಲ್ಲಿ ಸ್ಮಾರ್ಟ್ ಹೈವೇ ಯೋಜನೆಗಳು ವೇಗದಲ್ಲಿ ಸಾಗುತ್ತಿದೆ.

ಸ್ಮಾರ್ಟ್ ಹೈವೇ ಯೋಜನೆ

ಸದ್ಯ ಹೆದ್ದಾರಿಗಳ ಯಾವ ಭಾಗದಲ್ಲಿ ನೆಟ್‌ವರ್ಕ್ ಸಮಸ್ಯೆ ಎದುರಾಗುತ್ತೆ ಅನ್ನೋದು ಗುರುತಿಸಲಾಗುತ್ತದೆ. ಇದನ್ನು ಬ್ಲಾಕ್ ಸ್ಪಾಟ್ ಎಂದು ದಾಖಲಿಸಿ ಈ ಸ್ಥಳ, ಏರಿಯಾಗಳಲ್ಲಿ 5ಜಿ ನೆಟ್‌ವರ್ಕ್ ಸೇವೆ ನೀಡಲಾಗುತ್ತದೆ. ಟೆಲಿಕಾಂ , ಟ್ರಾಯ್ ಜೊತೆ ಮಾತುಕತೆ ನಡೆಸಿರುವ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರಿ ಶೀಘ್ರದಲ್ಲೇ ಸೇವೆ ನೀಡಲಿದೆ.

ಬ್ಲಾಕ್ ಸ್ಪಾಟ್ ಗುರುತಿಸುವಿಕೆ

ಕರ್ನಾಟಕಕ್ಕೆ ಪಿಎಂ-ಇ-ಡ್ರೈವ್ ಯೋಜನೆಯಡಿಯಲ್ಲಿ ಕೇಂದ್ರದಿಂದ 1,243 EV ಚಾರ್ಜಿಂಗ್ ಸ್ಟೇಷನ್‌ ಮಂಜೂರು

Gowthami K — Tue, 12 May 2026 20:02:06 +0530

ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಅವರು ಪ್ರಧಾನ ಮಂತ್ರಿ ಇ-ಡ್ರೈವ್ ಯೋಜನೆಯಡಿ ಕರ್ನಾಟಕಕ್ಕೆ 1,243 ಇವಿ ಚಾರ್ಜರ್‌ಗಳ ಸ್ಥಾಪನೆಗೆ ಅನುಮೋದನೆ ನೀಡಿದ್ದಾರೆ. ಒಟ್ಟು ರೂ. 123.26 ಕೋಟಿ ವೆಚ್ಚದ ಈ ಯೋಜನೆಯು ರಾಜ್ಯದ ವಿದ್ಯುತ್ ವಾಹನ ಮೂಲಸೌಕರ್ಯವನ್ನು ಬಲಪಡಿಸುವ ಗುರಿ ಹೊಂದಿದೆ.

ಬೆಂಗಳೂರುದಲ್ಲಿ ನಡೆದ ರಾಷ್ಟ್ರೀಯ ಸಮ್ಮೇಳನದಲ್ಲಿ ಭಾರತದ ವಿದ್ಯುತ್ ವಾಹನ (EV) ಚಾರ್ಜಿಂಗ್ ಮೂಲಸೌಕರ್ಯವನ್ನು ಬಲಪಡಿಸುವ ಕುರಿತಾಗಿ ಮಹತ್ವದ ಘೋಷಣೆ ಮಾಡಲಾಗಿದೆ. ಕೇಂದ್ರ ಬೃಹತ್ ಕೈಗಾರಿಕೆಗಳು ಮತ್ತು ಸಾರ್ವಜನಿಕ ಉದ್ಯಮಗಳ ಸಚಿವ H. D. ಕುಮಾರಸ್ವಾಮಿ ಅವರು ಅವರು ಮಂಗಳವಾರ ಪ್ರಧಾನ ಮಂತ್ರಿ ಇ-ಡ್ರೈವ್ ಯೋಜನೆಯಡಿ ಕರ್ನಾಟಕಕ್ಕೆ 1,243 ಇವಿ ಚಾರ್ಜರ್‌ಗಳ ಸ್ಥಾಪನೆಗೆ ಅನುಮೋದನೆ ನೀಡುವುದಾಗಿ ಘೋಷಿಸಿದರು. ಈ ಯೋಜನೆಗೆ ಒಟ್ಟು ರೂ. 123.26 ಕೋಟಿ ವೆಚ್ಚವಾಗಲಿದೆ.

ಪ್ರಧಾನ ಮಂತ್ರಿ ಇ-ಡ್ರೈವ್ ಯೋಜನೆಯಡಿ ದೇಶವ್ಯಾಪಿ ಇವಿ ಚಾರ್ಜಿಂಗ್ ಮೂಲಸೌಕರ್ಯವನ್ನು ವಿಸ್ತರಿಸುವ ಉದ್ದೇಶದಿಂದ ಬೆಂಗಳೂರುದಲ್ಲಿ ಆಯೋಜಿಸಲಾದ ಸಮ್ಮೇಳನವನ್ನು ಉದ್ದೇಶಿಸಿ ಮಾತನಾಡಿದ ಸಚಿವರು, ನಗರವು ಈಗಾಗಲೇ ಭಾರತದ ಪ್ರಮುಖ ಇವಿ ಚಾರ್ಜಿಂಗ್ ಕೇಂದ್ರಗಳಲ್ಲಿ ಒಂದಾಗಿ ಹೊರಹೊಮ್ಮಿರುವುದನ್ನು ಉಲ್ಲೇಖಿಸಿದರು. ಇದೇ ವೇಳೆ, ಸ್ವಚ್ಛ ಚಲನಶೀಲತೆಯತ್ತ ದೇಶದ ಪರಿವರ್ತನೆಗೆ ರಾಜ್ಯಗಳು ಸಕ್ರಿಯವಾಗಿ ಕೈಜೋಡಿಸಬೇಕೆಂದು ಅವರು ಕರೆ ನೀಡಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ದೇಶದ ವಿವಿಧ ರಾಜ್ಯಗಳು ಹಾಗೂ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ (IOCL), ಭಾರತ ಪೆಟ್ರೋಲಿಯಂ ಕಾರ್ಪೋರೇಷನ್ ಲಿಮಿಟೆಡ್ (BPCL) ಮತ್ತು ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೋರೇಷನ್ ಲಿಮಿಟೆಡ್ (HPCL) ಸೇರಿದಂತೆ ಕೇಂದ್ರ ಸಾರ್ವಜನಿಕ ವಲಯದ ಕಂಪನಿಗಳ ಮೂಲಕ 4,874 ಇವಿ ಚಾರ್ಜರ್‌ಗಳ ಸ್ಥಾಪನೆಗೆ ಇದುವರೆಗೆ ರೂ. 503.86 ಕೋಟಿ ಮೊತ್ತದ ಪ್ರಸ್ತಾವನೆಗಳಿಗೆ ಅನುಮೋದನೆ ನೀಡಲಾಗಿದೆ ಎಂದು ಮಾಹಿತಿ ನೀಡಿದರು.

ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ ಭಾರತವು 2070ರೊಳಗೆ ನಿವ್ವಳ ಶೂನ್ಯ ಕಾರ್ಬನ್ ಉತ್ಸರ್ಜನೆ ಸಾಧಿಸುವ ಗುರಿಯೊಂದಿಗೆ “ವಿಕಸಿತ ಭಾರತ್ 2047” ದೃಷ್ಟಿಕೋನದತ್ತ ಮುನ್ನಡೆಯುತ್ತಿದೆ ಎಂದು ಹೆಚ್‌ಡಿಕೆ ಹೇಳಿದರು. ವಾಹನ ವಲಯವು ದೇಶದ ಜಿಡಿಪಿಗೆ ಶೇಕಡಾ 7 ಕ್ಕಿಂತ ಹೆಚ್ಚು ಕೊಡುಗೆ ನೀಡುತ್ತಿದ್ದು, ಉತ್ಪಾದನಾ ಜಿಡಿಪಿಯ ಅರ್ಧದಷ್ಟು ಪಾಲು ಹೊಂದಿದೆ ಮತ್ತು ಸುಮಾರು 3 ಕೋಟಿ ಜನರ ಜೀವನೋಪಾಯಕ್ಕೆ ಆಧಾರವಾಗಿದೆ ಎಂದರು.

ವಿದ್ಯುತ್ ಚಲನಶೀಲ ಪರಿಸರ ವ್ಯವಸ್ಥೆಯನ್ನು ಬಲಪಡಿಸಲು ಕೇಂದ್ರ ಸರ್ಕಾರ ಕೈಗೊಂಡಿರುವ ಹಲವು ಪ್ರಮುಖ ಯೋಜನೆಗಳನ್ನೂ ಅವರು ಪ್ರಸ್ತಾಪಿಸಿದರು. ಬ್ಯಾಟರಿ ಸೆಲ್ ಉತ್ಪಾದನೆಗೆ ರೂ. 18,100 ಕೋಟಿ ವೆಚ್ಚದ ಪಿಎಲ್ಐ ಎಸಿಸಿ ಯೋಜನೆ, ಸ್ವಚ್ಛ ವಾಹನಗಳ ಉತ್ತೇಜನಕ್ಕಾಗಿ ರೂ. 25,938 ಕೋಟಿ ಪಿಎಲ್ಐ ಆಟೋ ಯೋಜನೆ ಹಾಗೂ ಅಪರೂಪದ ಭೂಮಿಯ ಮ್ಯಾಗ್ನೆಟ್ ಉತ್ಪಾದನೆಗಾಗಿ ಆರಂಭಿಸಲಾದ ರೂ. 7,280 ಕೋಟಿ ಆರ್‌ಇಪಿಎಂ ಯೋಜನೆಗಳು ದೇಶದ ಇವಿ ಕ್ಷೇತ್ರಕ್ಕೆ ಬಲ ತುಂಬಲಿವೆ ಎಂದು ಹೇಳಿದರು.

ಪ್ರಧಾನ ಮಂತ್ರಿ ಇ-ಡ್ರೈವ್ ಯೋಜನೆಯನ್ನು ದೇಶದ ಇವಿ ಕ್ರಾಂತಿಯ ಪ್ರಮುಖ ಆಧಾರವೆಂದು ಕರೆದ ಸಚಿವರು, ಸುಮಾರು ರೂ. 10,900 ಕೋಟಿ ಮೌಲ್ಯದ ಈ ಯೋಜನೆ ವಿದ್ಯುತ್ ದ್ವಿಚಕ್ರ ವಾಹನಗಳು, ತ್ರಿಚಕ್ರ ವಾಹನಗಳು, ಬಸ್ಸುಗಳು ಹಾಗೂ ಸರಕು ವಾಹನಗಳ ಬಳಕೆಯನ್ನು ವೇಗಗೊಳಿಸುವುದರ ಜೊತೆಗೆ ದೇಶವ್ಯಾಪಿ ಚಾರ್ಜಿಂಗ್ ಜಾಲವನ್ನು ನಿರ್ಮಿಸುವಲ್ಲಿ ಪ್ರಮುಖ ಪಾತ್ರವಹಿಸುತ್ತಿದೆ ಎಂದು ಹೇಳಿದರು. ಇದರೊಳಗೆ ರೂ. 2,000 ಕೋಟಿ ಸಾರ್ವಜನಿಕ ಇವಿ ಚಾರ್ಜಿಂಗ್ ಮೂಲಸೌಕರ್ಯಕ್ಕಾಗಿ ಮೀಸಲಾಗಿರುವುದು ಗಮನಾರ್ಹವಾಗಿದೆ.

ಇದೇ ವೇಳೆ, ದೇಶಾದ್ಯಂತ ಚಾರ್ಜಿಂಗ್ ಮೂಲಸೌಕರ್ಯ ವಿಸ್ತರಣೆಯಲ್ಲಿ ತೈಲ ಮಾರುಕಟ್ಟೆ ಕಂಪನಿಗಳಾದ BPCL, IOCL ಮತ್ತು HPCLಗಳ ಪಾತ್ರವನ್ನು ಅವರು ಶ್ಲಾಘಿಸಿದರು. FAME II Scheme ಯೋಜನೆಯಡಿ, ಈ ಕಂಪನಿಗಳು ಭಾರೀ ಕೈಗಾರಿಕಾ ಸಚಿವಾಲಯದ ರೂ. 873.5 ಕೋಟಿ ಸಬ್ಸಿಡಿ ಸಹಾಯದೊಂದಿಗೆ ದೇಶಾದ್ಯಂತ 8,932 ಇವಿ ಚಾರ್ಜರ್‌ಗಳನ್ನು ಸ್ಥಾಪಿಸಿವೆ. ಇದರಲ್ಲಿ ಕರ್ನಾಟಕದಲ್ಲಿಯೇ 721 ಚಾರ್ಜರ್‌ಗಳು ಸ್ಥಾಪಿತವಾಗಿವೆ.

ಇನ್ನು, ಇವಿ ಬಳಕೆದಾರರಿಗೆ ಅನುಕೂಲವಾಗುವಂತೆ ‘ಯುನಿಫೈಡ್ ಭಾರತ್ ಇ-ಚಾರ್ಜ್’ (UBC) ಎಂಬ ರಾಷ್ಟ್ರೀಯ ಏಕೀಕೃತ ಇವಿ ಚಾರ್ಜಿಂಗ್ ಅಪ್ಲಿಕೇಶನ್ ಅಭಿವೃದ್ಧಿಯಲ್ಲಿದೆ ಎಂದು ಕುಮಾರಸ್ವಾಮಿ ತಿಳಿಸಿದರು. ಈ ವೇದಿಕೆಯ ಮೂಲಕ ಬಳಕೆದಾರರು ಒಂದೇ ಅಪ್ಲಿಕೇಶನ್‌ನಲ್ಲಿ ವಿವಿಧ ಚಾರ್ಜಿಂಗ್ ನೆಟ್‌ವರ್ಕ್‌ಗಳನ್ನು ಅನ್ವೇಷಿಸಿ, ಬಳಸಿಕೊಂಡು, ಪಾವತಿಗಳನ್ನು ಮಾಡಬಹುದು. ಡಿಜಿಟಲ್ ಪಾವತಿಗಳಲ್ಲಿ ಯುಪಿಐ ಮಾಡಿದಂತೆಯೇ ಈ ಅಪ್ಲಿಕೇಶನ್ ಇವಿ ಕ್ಷೇತ್ರದಲ್ಲೂ ಕ್ರಾಂತಿ ತರಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.

ಭಾರತದ ಇವಿ ಮೂಲಸೌಕರ್ಯ ಮಾರ್ಗಸೂಚಿಗಳು ನಗರ ಹಾಗೂ ಗ್ರಾಮೀಣ ಪ್ರದೇಶಗಳಲ್ಲಿಯೂ ಚಾರ್ಜಿಂಗ್ ಸೌಲಭ್ಯಗಳ ಲಭ್ಯತೆ, ಕೈಗೆಟುಕುವಿಕೆ ಮತ್ತು ವಿಶ್ವಾಸಾರ್ಹತೆಯನ್ನು ಖಚಿತಪಡಿಸುವತ್ತ ಕೇಂದ್ರೀಕೃತವಾಗಿವೆ. ಈ ಪರಿವರ್ತನೆಯನ್ನು ಭಾರತದ ಭವಿಷ್ಯಕ್ಕೆ ನಿರ್ಣಾಯಕ ಘಟ್ಟವೆಂದು ವಿವರಿಸಿದ ಸಚಿವರು, ಇವಿ ಚಳವಳಿ ಕೇವಲ ಮೂಲಸೌಕರ್ಯ ನಿರ್ಮಾಣಕ್ಕೆ ಸೀಮಿತವಲ್ಲದೆ, ಪಳೆಯುಳಿಕೆ ಇಂಧನಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಿ, ಇಂಧನ ಭದ್ರತೆಯನ್ನು ಹೆಚ್ಚಿಸಿ, ಸುಸ್ಥಿರ ಭವಿಷ್ಯ ನಿರ್ಮಿಸುವತ್ತ ಮಹತ್ವದ ಹೆಜ್ಜೆಯಾಗಿದೆ ಎಂದು ಹೇಳಿದರು.

ಟಾಟಾದ 17 ಹೊಸ ದೈತ್ಯ ಟ್ರಕ್‌ಗಳು ಮಾರುಕಟ್ಟೆಗೆ

Kannadaprabha News — Sat, 24 Jan 2026 07:51:31 +0530

ಮೈತ್ರಿ ಎಸ್‌.

ದೆಹಲಿ: ದೇಶದ ವಾಹನ ಉತ್ಪಾದಕ ಕಂಪನಿಗಳ ಪೈಕಿ ಮುಂಚೂಣಿಯಲ್ಲಿ ಗುರುತಿಸಿಕೊಂಡಿರುವ ಟಾಟಾ ಮೋಟಾರ್ಸ್ ವಿವಿಧ ಶ್ರೇಣಿಯ 17 ಹೊಸ ಟ್ರಕ್‌ಗಳನ್ನು ಬಿಡುಗಡೆ ಮಾಡಿದೆ. ಮಂಗಳವಾರ ದೆಹಲಿಯ ಭಾರತ ಮಂಡಪಂನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಅವುಗಳ ಅನಾವರಣ ಮಾಡಲಾಯಿತು.

ಚಾಲಕರ ಸುರಕ್ಷತೆ ಮತ್ತು ಮಾಲೀಕರ ಲಾಭವನ್ನು ಗಮನದಲ್ಲಿಟ್ಟುಕೊಂಡು ವಿನ್ಯಾಸಗೊಳಿಸಲಾಗಿರುವ ಹೊಚ್ಚಹೊಸ ಅಜುರಾ, ಮೊದಲ ಬಾರಿ ಮಾರುಕಟ್ಟೆ ಪ್ರವೇಶಿಸಲಿರುವ ಇ.ವಿ. ಹಾಗೂ ಪ್ರೈಮಾ, ಸಿಗ್ನಾ, ಅಲ್ಟ್ರಾ ಮಾದರಿಯ ಸುಧಾರಿತ ಆವೃತ್ತಿಯನ್ನು ಕಂಪನಿಯ ಎಂಡಿ, ಸಿಇಓ ಆಗಿರುವ ಗಿರೀಶ್‌ ವಾಘ್‌, ಉಪಾಧ್ಯಕ್ಷ ರಾಜೇಶ್‌ ಕೌಲ್‌ ಉಪಸ್ಥಿತಿಯಲ್ಲಿ ಪ್ರದರ್ಶಿಸಲಾಯಿತು.

ಈ ವೇಳೆ ಮಾತನಾಡಿದ ವಾಘ್‌, ‘ದೇಶದ ಪ್ರಗತಿಪರ ನೀತಿಗಳು, ಆಧುನಿಕ ಮೂಲಸೌಕರ್ಯ ಮತ್ತು ಲಾಜಿಸ್ಟಿಕ್ಸ್‌ ಬೇಡಿಕೆಯಿಂದಾಗಿ ಟ್ರಕ್‌ ಕ್ಷೇತ್ರದಲ್ಲಿ ಕ್ಷಿಪ್ರ ಹಾಗೂ ಗಮನಾರ್ಹ ಬದಲಾವಣೆಗಳಾಗುತ್ತಿವೆ. ಹೀಗಿರುವಾಗ, ಭವಿಷ್ಯದ ಆವಶ್ಯಕತೆಗಳಿಗೆ ತಕ್ಕಹಾಗೆ ನಮ್ಮ ಟ್ರಕ್‌ಗಳನ್ನು ತಯಾರಿಸಿದ್ದೇವೆ. ನಮ್ಮ ಟ್ರಕ್‌ಗಳನ್ನು ಚಲಾಯಿಸುವವರು ಸುರಕ್ಷಿತವಾಗಿ ತಮ್ಮ ಮನೆ ತಲುಪಬೇಕು ಎಂಬುದೇ ನಮ್ಮ ಗುರಿ. ಬೆಟರ್ ಆಲ್ವೇಸ್ ಎಂಬ ಧ್ಯೇಯದಡಿ ಆತ್ಮನಿರ್ಭರ ಭಾರತ ತತ್ವಕ್ಕೆ ತಕ್ಕಹಾಗೆ ಹೊಸ ಆವಿಷ್ಕಾರಗಳನ್ನು ಮಾಡುತ್ತೇವೆ. ಪ್ರಸ್ತುತ ಬಿಡುಗಡೆಯಾಗಿರುವ ಟ್ರಕ್‌ಗಳು 4-5 ವರ್ಷಗಳ ಸಂಶೋಧನೆ ಮತ್ತು 2-3 ವರ್ಷದ ಪರೀಕ್ಷೆಯ ಫಲವಾಗಿದೆ’ ಎಂದರು.

2045ಕ್ಕೇ ಶೂನ್ಯ ಕಾರ್ಬನ್‌ ಗುರಿ:

ಭಾರತ 2070ರ ಹೊತ್ತಿಗೆ ನಿವ್ವಳ ಶೂನ್ಯ ಕಾರ್ಬನ್ ಹೊರಸೂಸುವಿಕೆಯನ್ನು ಸಾಧಿಸುವ ಗುರಿಯನ್ನು ಹಾಕಿಕೊಂಡಿದೆ. ಆದರೆ ಟಾಟಾ ಇದನ್ನು 2045ರ ಒಳಗಾಗಿ ಮಾಡುವ ಪ್ರಯತ್ನದಲ್ಲಿದ್ದೇವೆ. ಇದಕ್ಕೆ ಪೂರಕವಾಗಿ ವಿದ್ಯುತ್‌ ಚಾಲಿತ ಟ್ರಕ್‌ಗಳನ್ನು ಪರಿಚಯಿಸುವುದರ ಜತೆಗೆ ಡೀಸೆಲ್‌ ವಾಹನಗಳು ಕಡಿಮೆ ಇಂಧನ ಬಳಸುವಂತೆ ಉನ್ನತೀಕರಿಸಿದ್ದೇವೆಂದೂ ವಾಘ್‌ ಹೇಳಿದ್ದಾರೆ.

ಅಜೂರಾ ಅದ್ಭುತ:

ಟಾಟಾದ ಹೊಸ ‘ಅಜುರಾ’ ಮಾದರಿಯ ಟ್ರಕ್‌ಗಳು ಮಧ್ಯಮ ಮತ್ತು ಹಗುರ ವಾಣಿಜ್ಯ ವಾಹನ (ಐಎಲ್ಎಂಸಿವಿ) ವಿಭಾಗಕ್ಕೆ ಸೇರಿದವಾಗಿವೆ. ಇವುಗಳು 7ರಿಂದ 19 ಟನ್‌ ಸರಕನ್ನು ಹೊರುವ ವಿವಿಧ ಮಾದರಿಗಳು ಲಭ್ಯವಿವೆ. 3.6 ಲೀ. ಸಾಮರ್ಥ್ಯದ ಡೀಸೆಲ್ ಎಂಜಿನ್ ಹೊಂದಿರುವ ಇದು, ಇ-ಕಾಮರ್ಸ್, ಗೃಹೋಪಯೋಗಿ ವಸ್ತುಗಳು, ನಿರ್ಮಾಣ ಸಾಮಗ್ರಿ, ಕೃಷಿ ಉತ್ಪನ್ನ ಮತ್ತು ಕೈಗಾರಿಕಾ ಸರಕುಗಳ ಸಾಗಣೆಗೆ ಹೇಳಿಮಾಡಿಸಿದಂತಿದೆ. ಚಾಲಕರ ಅನುಕೂಲಕ್ಕಾಗಿ ಇಬ್ಬರು ಕೂರಬಹುದಾದಂತಹ ವಿಶಾಲವಾದ ಮತ್ತು ಸುರಕ್ಷಿತ ಕ್ಯಾಬಿನ್‌ಗಳನ್ನು ಒದಗಿಸಲಾಗಿದೆ.

ಇ.ವಿ. ಟ್ರಕ್‌:

ದ್ವಿಚಕ್ರ ಮತ್ತು 4 ಚಕ್ರದ ವಾಹನಗಳ ಉತ್ಪಾದಕರು ಮತ್ತು ಗ್ರಾಹಕರು ನಿಧಾನವಾಗಿ ಇ.ವಿ.ಗಳತ್ತ ಮುಖ ಮಾಡುತ್ತಿರುವ ಹೊತ್ತಿನಲ್ಲಿ ಟಾಟಾ ಮೋಟಾರ್ಸ್‌ ವಿದ್ಯುತ್‌ ಚಾಲಿತ ಟ್ರಕ್‌ಗಳ ಉತ್ಪಾದನೆಗೆ ಕೈಹಾಕಿದ್ದು, 7-55 ಟನ್ ತೂಕ ಹೊರಬಲ್ಲ ಟ್ರಕ್‌ಗಳನ್ನು ಪರಿಚಯಿಸಿದೆ. ಅವುಗಳ ಅಲ್ಟ್ರಾ ಸರಣಿಯು 7, 9, 12 ಟನ್ ಸಾಮರ್ಥ್ಯಗಳಲ್ಲಿ ಲಭ್ಯವಿವೆ. ಪ್ರೈಮಾ ಇ.55ಎಸ್‌ ಪ್ರೈಂ ಮೂವರ್ 470 ಕಿಲೋವಾಟ್‌ ಪವರ್ ಮತ್ತು 453 ಕಿಲೋವಾಟ್‌ ಬ್ಯಾಟರಿ ಸಾಮರ್ಥ್ಯ ಹೊಂದಿದೆ. ಗಣಿಗಾರಿಕೆ ಮತ್ತು ನಿರ್ಮಾಣ ಕ್ಷೇತ್ರಕ್ಕಾಗಿ ವಿನ್ಯಾಸಗೊಳಿಸಲಾದ ಪ್ರೈಮಾ ಇ.28ಕೆ ಟಿಪ್ಪರ್, ವೇಗದ ಕಾರ್ಯಾಚರಣೆ ಮತ್ತು ಪರಿಸರ ಸ್ನೇಹಿ ಗಣಿಗಾರಿಕೆಗೆ ಪೂರಕವಾಗಿದೆ.

ಈ ದೈತ್ಯದೇಹಿಗಳ ಬ್ಯಾಟರಿಗಳು ವೇಗವಾಗಿ (2 ತಾಸಲ್ಲಿ) ಚಾರ್ಜ್‌ ಆಗುವಂತಿದ್ದು, ಇದಕ್ಕೆ ಇನ್ನಷ್ಟು ವೇಗ ತುಂಬಲು 2 ಗನ್‌ ಬಳಸಿ ಏಕಕಾಲಕ್ಕೆ ಚಾರ್ಜ್‌ ಮಾಡುವ ವ್ಯವಸ್ಥೆಯನ್ನೂ ಮಾಡಲಾಗಿದೆ. ಇವುಗಳ ಬೆಲೆಯನ್ನು ಬಹಿರಂಗಪಡಿಸಿಲ್ಲವಾದರೂ, ಸಾಮರ್ಥ್ಯಕ್ಕೆ ಅನುಗುಣವಾಗಿ ನಿಗದಿಪಡಿಸಲಾಗುವುದು ಎನ್ನಲಾಗಿದೆ.

ಸುರಕ್ಷತೆಗೆ ಆದ್ಯತೆ:

ಚಾಲಕರ ಸುರಕ್ಷತೆಯನ್ನು ಖಚಿತಪಡಿಸುವ ಸಲುವಾಗಿ ಟಾಟಾದ ಎಲ್ಲಾ ಟ್ರಕ್‌ಗಳನ್ನು ಯುರೋಪಿಯನ್‌ ಕ್ರಾಶ್‌ ನಿಯಮಗಳ ಅಡಿಯಲ್ಲಿ ಪರೀಕ್ಷಿಸಲಾಗಿದೆ. ಕ್ಯಾಬಿನ್‌ನ ಮೇಲ್ಭಾಗ, ಮುಂಭಾಗ ಹಾಗೂ ಎರಡೂ ಕಡೆಗಳಿಂದ ಅಪಾಯವುಂಟಾದಾಗಲೂ ಅದನ್ನು ತಡೆದುಕೊಳ್ಳಲು ಅವು ಶಕ್ತವಾಗಿವೆ. ಇದರಿಂದಾಗಿ ವಾಹನಗಳ ಮುಖಾಮುಖಿ ಡಿಕ್ಕಿ ಅಥವಾ ಉರುಳಿಬಿದ್ದ ಸಂದರ್ಭಗಳಲ್ಲಿ ಚಾಲಕರು ಸುರಕ್ಷಿತವಾಗಿರಬಲ್ಲರು.

ಇದರೊಂದಿಗೆ, ರಸ್ತೆಯಲ್ಲಿ ಸಾಗುತ್ತಿರುವ ಅನ್ಯ ವಾಹನಗಳ ವೇಗಕ್ಕೆ ಅನುಗುಣವಾಗಿ ಟ್ರಕ್‌ನ ವೇಗವನ್ನು ಹೊಂದಿಸುವ, ಅವುಗಳಿಂದ ಸೂಕ್ತ ಅಂತರ ಕಾಯ್ದುಕೊಳ್ಳುವ, ಲೇನ್‌ ಬಿಟ್ಟು ಅತ್ತಿತ್ತ ಚಲಿಸಿದರೆ ಅಥವಾ ಚಾಲಕ ತೂಕಡಿಸಿದರೆ ಎಚ್ಚರಿಸುವ ವ್ಯವಸ್ಥೆಗಳು ಇವೆ.

ಪೇಲೋಡ್‌ ಸಾಮರ್ಥ್ಯ ಹೆಚ್ಚಳ:

ಮೇಲ್ದರ್ಜೆಗೆ ಏರಿಸಲಾಗಿರುವ ಟ್ರಕ್‌ಗಳಲ್ಲಿ ಮಾಡಲಾದ ಪ್ರಮುಖ ಬದಲಾವಣೆಯೆಂದರೆ, ಅವುಗಳ ಪೇಲೋಡ್‌ ಸಾಮರ್ಥ್ಯದ ಹೆಚ್ಚಿಸುವಿಕೆ. ಇದರಡಿಯಲ್ಲಿ ಟಾಟಾ ಟ್ರಕ್‌ಗಳಿನ್ನು ಮೊದಲಿಗಿಂತ 1.8 ಟನ್‌ ಅಧಿಕ ತೂಕ ಹೊರಬಲ್ಲವು. ಇದರಿಂದಾಗಿ ಇಂಧನ ಬಳಕೆ ಶೇ.7ರಷ್ಟು ಕಡಿಮೆಯಾಗುವುದಲ್ಲದೆ ಮಾಲೀಕರ ವೆಚ್ಚ ಶೇ.60ರಷ್ಟು ತಗ್ಗಲಿದೆ. ಟ್ರಕ್‌ಗಳ ಗಾತ್ರ ಅಥವಾ ಚಕ್ರಗಳ ಸಂಖ್ಯೆಯನ್ನು ಏರಿಸದೇ ಇದನ್ನು ಸಾಧಿಸಲಾಗಿರುವುದು ಗಮನಾರ್ಹ.