Asianet Suvarna News

ಬೆಂಗಳೂರಿನಲ್ಲಿ ಹೊಸ ಕ್ರಾಂತಿಗೆ ಮುಂದಾದ Yulu, ರಾಜಧಾನಿಯಲ್ಲಿ ಫ್ಲೀಟ್ ಹೆಚ್ಚಿಸಲು ಮುಂದಾದ ಎಲೆಕ್ಟ್ರಿಕ್ ಬೈಕ್!

Gowthami K — Thu, 16 Jul 2026 17:01:41 +0530

ಬೆಂಗಳೂರು: ದೇಶದ ಪ್ರಮುಖ ಎಲೆಕ್ಟ್ರಿಕ್ ಸ್ಕೂಟರ್ ಕಂಪೆನಿಯಾದ (Electric Mobility Platform) 'ಯುಲು' (Yulu), ಇ-ಕಾಮರ್ಸ್ ಮತ್ತು ಕ್ವಿಕ್ ಕಾಮರ್ಸ್ (ತ್ವರಿತ ಡೆಲಿವರಿ ಸೇವೆಗಳು) ವಲಯದಿಂದ ಬರುತ್ತಿರುವ ಭಾರಿ ಬೇಡಿಕೆಯಿಂದಾಗಿ ಅಭೂತಪೂರ್ವ ಪ್ರಗತಿ ಸಾಧಿಸುತ್ತಿದೆ. ಪ್ರಸ್ತುತ ಮಾರುಕಟ್ಟೆಯಲ್ಲಿನ ಬೇಡಿಕೆ ಮತ್ತು ಬೆಳವಣಿಗೆಯನ್ನು ಗಮನದಲ್ಲಿಟ್ಟುಕೊಂಡು, ಕಂಪನಿಯು ಮುಂಬರುವ ಹಣಕಾಸು ವರ್ಷ 2027ರ (FY27) ಅಂತ್ಯದ ವೇಳೆಗೆ ಕೇವಲ ಬೆಂಗಳೂರು ನಗರವೊಂದರಲ್ಲೇ ತನ್ನ ವಾಹನಗಳ ಸಂಖ್ಯೆಯನ್ನು (Fleet Size) 30,000 ದಿಂದ 35,000 ಕ್ಕೆ ವಿಸ್ತರಿಸುವ ಬೃಹತ್ ಗುರಿಯನ್ನು ಹೊಂದಿದೆ.

2 ಬಿಲಿಯನ್ ಕಿಲೋಮೀಟರ್‌ಗಳ ಐತಿಹಾಸಿಕ ಮೈಲಿಗಲ್ಲು

ಯುಲು ಸಂಸ್ಥೆಯು ಇತ್ತೀಚೆಗಷ್ಟೇ ತನ್ನ ಪ್ಲಾಟ್‌ಫಾರ್ಮ್‌ನಲ್ಲಿ ಒಟ್ಟು 2 ಬಿಲಿಯನ್ (200 ಕೋಟಿ) ಸಂಚಿತ ಕಿಲೋಮೀಟರ್‌ಗಳ ಪ್ರಯಾಣವನ್ನು ಪೂರ್ಣಗೊಳಿಸಿ ಹೊಸ ದಾಖಲೆ ಬರೆದಿದೆ. ವಿಶೇಷವೆಂದರೆ, ಇದರಲ್ಲಿ 1 ಬಿಲಿಯನ್ ಕಿಲೋಮೀಟರ್‌ಗಳಷ್ಟು ಪ್ರಯಾಣವು ಕಂಪನಿಯ ಅತಿ ದೊಡ್ಡ ಮಾರುಕಟ್ಟೆಯಾದ ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲೇ ದಾಖಲಾಗಿದೆ. ಪ್ರಸ್ತುತ ದೇಶದ 10 ಪ್ರಮುಖ ನಗರಗಳಲ್ಲಿ ಸುಮಾರು 48,000 ಎಲೆಕ್ಟ್ರಿಕ್ ವಾಹನಗಳನ್ನು ಯುಲು ನಿರ್ವಹಿಸುತ್ತಿದ್ದು, ಈ ಪೈಕಿ 21,000ಕ್ಕೂ ಹೆಚ್ಚು ಬೈಕ್‌ಗಳು ಬೆಂಗಳೂರಿನ ರಸ್ತೆಗಳಲ್ಲಿ ಸಂಚರಿಸುತ್ತಿವೆ.

13 ತಿಂಗಳಲ್ಲಿ ಹೊಸ ದಾಖಲೆ

ನಮ್ಮ ಮೊದಲ 1 ಬಿಲಿಯನ್ ಕಿಲೋಮೀಟರ್ ತಲುಪಲು ಸುಮಾರು 6 ವರ್ಷಗಳು ಬೇಕಾದವು. ಆದರೆ, ನಂತರದ 1 ಬಿಲಿಯನ್ ಕಿಲೋಮೀಟರ್‌ಗಳ ಮೈಲಿಗಲ್ಲು ಕೇವಲ 13 ರಿಂದ 14 ತಿಂಗಳುಗಳಲ್ಲಿ ಸಾಧ್ಯವಾಯ್ತು ಎಂದು ಯುಲು ಸಹ-ಸಂಸ್ಥಾಪಕ ಮತ್ತು ಸಿಇಒ ಅಮಿತ್ ಗುಪ್ತಾ ಸಂತಸ ಹಂಚಿಕೊಂಡಿದ್ದಾರೆ.

ಕ್ವಿಕ್ ಕಾಮರ್ಸ್‌ನಿಂದ ಹೆಚ್ಚಿದ ಬೇಡಿಕೆ

ಬ್ಲಿಂಕಿಟ್ (Blinkit), ಸ್ವಿಗ್ಗಿ ಇನ್‌ಸ್ಟಾಮಾರ್ಟ್ (Swiggy Instamart), ಜೆಪ್ಟೊ (Zepto), ಬಿಗ್‌ಬಾಸ್ಕೆಟ್, ಅಮೆಜಾನ್ ಮತ್ತು ಫ್ಲಿಪ್‌ಕಾರ್ಟ್‌ನಂತಹ ಪ್ರಮುಖ ಸಂಸ್ಥೆಗಳ ವಿತರಣಾ ಪಾಲುದಾರರಿಂದ (Delivery Partners) ಯುಲು ಬೈಕ್‌ಗಳಿಗೆ ಭಾರಿ ಬೇಡಿಕೆ ವ್ಯಕ್ತವಾಗುತ್ತಿದೆ. ಗಿಗ್ ಕಾರ್ಮಿಕರಿಗೆ (Gig Workers) ಹೊರೆಯಾಗದಂತೆ ದಿನಕ್ಕೆ ಕೇವಲ ₹220 ರೂಪಾಯಿಗಳ ಅತ್ಯಂತ ಕಡಿಮೆ ಬಾಡಿಗೆ ದರದಲ್ಲಿ ಯುಲು ಇ-ಬೈಕ್‌ಗಳನ್ನು ನೀಡುತ್ತಿದೆ. ಈ ದರದಲ್ಲೇ ಬ್ಯಾಟರಿ ವಿನಿಮಯ (Battery Swapping), ವಾಹನ ನಿರ್ವಹಣೆ (Maintenance), ವಿಮೆ ಮತ್ತು ತಾಂತ್ರಿಕ ಸೇವೆಗಳೂ ಸೇರಿವೆ.

ಮಾರುಕಟ್ಟೆಯಲ್ಲಿ ಇನ್ನೂ ಹೆಚ್ಚಿನ ಬೆಳವಣಿಗೆಗೆ ಅವಕಾಶವಿದೆ ಎಂದು ಅಮಿತ್ ಗುಪ್ತಾ ಅಭಿಪ್ರಾಯಪಟ್ಟಿದ್ದಾರೆ. ಉದಾಹರಣೆಗೆ, ಕೇವಲ ಜೆಪ್ಟೊ ಸಂಸ್ಥೆಯೊಂದರಲ್ಲೇ ದೇಶಾದ್ಯಂತ ಸುಮಾರು 2 ಲಕ್ಷಕ್ಕೂ ಹೆಚ್ಚು ಡೆಲಿವರಿ ಪಾಲುದಾರರಿದ್ದು, ಯುಲು ಕಂಪನಿಗೆ ತನ್ನ ವ್ಯಾಪ್ತಿಯನ್ನು ವಿಸ್ತರಿಸಲು ಅಪಾರ ಅವಕಾಶಗಳಿವೆ. ಸದ್ಯ ಬೆಂಗಳೂರು, ಮುಂಬೈ ಮತ್ತು ಹೈದರಾಬಾದ್ ಪ್ರಮುಖ ಮಾರುಕಟ್ಟೆಗಳಾಗಿದ್ದರೂ, ಈ ಹಣಕಾಸು ವರ್ಷದಲ್ಲಿ ದೆಹಲಿ-ಎನ್‌ಸಿಆರ್ (Delhi-NCR) ವಲಯದಲ್ಲಿ ಅತಿ ವೇಗದ ವಿಸ್ತರಣೆ ನಡೆಯಲಿದೆ.

ಆನ್‌ಲೈನ್ ಗೃಹ-ಸೇವೆಗಳತ್ತ (Home Services) ಯುಲು ಹೆಜ್ಜೆ

ಕೇವಲ ಸರಕುಗಳ ವಿತರಣೆಯಷ್ಟೇ ಅಲ್ಲದೆ, ಯುಲು ಈಗ ಆನ್‌ಲೈನ್ ಗೃಹ-ಸೇವೆಗಳ ವಿಭಾಗಕ್ಕೂ ಲಗ್ಗೆ ಇಟ್ಟಿದೆ. ಅರ್ಬನ್ ಕಂಪನಿ (Urban Company), ಸ್ನ್ಯಾಬಿಟ್ ಮತ್ತು ಪ್ರಾಂಟೊ ಸಂಸ್ಥೆಗಳ ಅಡಿಯಲ್ಲಿ ಕೆಲಸ ಮಾಡುವ 12 ನಗರಗಳ 12,000ಕ್ಕೂ ಹೆಚ್ಚು ಮಹಿಳಾ ಸೇವಾ ವೃತ್ತಿಪರರು ಇಂದು ಯುಲು ಪ್ಲಾಟ್‌ಫಾರ್ಮ್ ಬಳಸುತ್ತಿದ್ದಾರೆ.

ಕಡಿಮೆ ವೇಗದ (Low Speed) ಈ ಎಲೆಕ್ಟ್ರಿಕ್ ವಾಹನಗಳು ಮಹಿಳಾ ವೃತ್ತಿಪರರ ಪ್ರಯಾಣದ ಸಮಯವನ್ನು ಉಳಿಸುತ್ತಿದ್ದು, ಪ್ರತಿದಿನ ಶೇಕಡಾ 25 ರಿಂದ 30 ರಷ್ಟು ಹೆಚ್ಚಿನ ಆರ್ಡರ್‌ಗಳನ್ನು ಪೂರ್ಣಗೊಳಿಸಲು ನೆರವಾಗುತ್ತಿವೆ. ರೆಡ್‌ಸೀರ್ (RedSeer) ಸ್ಟ್ರಾಟಜಿ ಕನ್ಸಲ್ಟೆಂಟ್ಸ್ ವರದಿಯ ಪ್ರಕಾರ, ಭಾರತದ ಆನ್‌ಲೈನ್ ಗೃಹ-ಸೇವೆಗಳ ಮಾರುಕಟ್ಟೆಯು ಶೇ. 18-22ರಷ್ಟು ಪ್ರಗತಿ ಕಾಣುತ್ತಿದ್ದು, 2030ರ ವೇಳೆಗೆ ಸುಮಾರು $1 ಬಿಲಿಯನ್ ಡಾಲರ್ ಮೌಲ್ಯವನ್ನು ತಲುಪುವ ನಿರೀಕ್ಷೆಯಿದೆ.

ಲಾಭದಾಯಕತೆ ಮತ್ತು ಮುಂದಿನ ಹೂಡಿಕೆ ಯೋಜನೆ

ಕಳೆದ ಹಣಕಾಸು ವರ್ಷದ 12 ತಿಂಗಳುಗಳಲ್ಲಿ 11 ತಿಂಗಳು ಯುಲು ಕಂಪನಿಯು ಕಾರ್ಯಾಚರಣೆಯ ಮಟ್ಟದಲ್ಲಿ (EBITDA Profitability) ಲಾಭದಾಯಕತೆಯನ್ನು ಕಾಯ್ದುಕೊಂಡಿದೆ. ಈ ಹಣಕಾಸು ವರ್ಷದಲ್ಲಿ ಆದಾಯವು ಹಲವು ಪಟ್ಟು ಹೆಚ್ಚಾಗಲಿದ್ದು, ಪರೋಕ್ಷ ವೆಚ್ಚಗಳು ನಿಯಂತ್ರಣದಲ್ಲಿ ಇರಲಿವೆ. ಉದ್ಯಮದ ವಿಸ್ತರಣೆಗಾಗಿ ಯುಲು ಈ ವರ್ಷ ಈಕ್ವಿಟಿ, ಸಾಲ ಮತ್ತು ಗುತ್ತಿಗೆ ಹಣಕಾಸಿನ ಮಿಶ್ರಣದ ಮೂಲಕ ಸುಮಾರು $100 ಮಿಲಿಯನ್ ಡಾಲರ್ ಬಂಡವಾಳ ಸಂಗ್ರಹಿಸಲು ಯೋಜಿಸಿದೆ. ಕಂಪನಿಯು ಈಗಾಗಲೇ ಸುಮಾರು $250 ಮಿಲಿಯನ್ ಡಾಲರ್ ಸಾಲ ಸೌಲಭ್ಯಗಳಿಗೆ (Debt Facilities) ಪ್ರವೇಶ ಪಡೆದಿದೆ.

ದೂರದ ಪ್ರಯಾಣದ ಲಾಜಿಸ್ಟಿಕ್ಸ್ ಮತ್ತು ಬೈಕ್-ಟ್ಯಾಕ್ಸಿ ಸೇವೆಗಳಿಗಾಗಿ ಕಂಪನಿಯು ತನ್ನ ಹೆಚ್ಚಿನ ವೇಗದ ಎಲೆಕ್ಟ್ರಿಕ್ ವಾಹನ ಮಾದರಿಯಾದ 'ಯುಲು ಎಕ್ಸ್‌ಪ್ರೆಸ್' (Yulu Express) ಅನ್ನು ಅಭಿವೃದ್ಧಿಪಡಿಸುತ್ತಿದೆ. ಆದಾಗ್ಯೂ, ಹೆಚ್ಚಿನ ಲಾಭದಾಯಕತೆಯ ಗುರಿ ತಲುಪುವವರೆಗೂ ತನ್ನ ವೈಯಕ್ತಿಕ ಮೊಬಿಲಿಟಿ ಸ್ಕೂಟರ್‌ಗಳ (Personal Mobility Scooters) ವಾಣಿಜ್ಯ ಬಿಡುಗಡೆಯನ್ನು ಕಂಪನಿ ಸದ್ಯಕ್ಕೆ ಮುಂದೂಡಿದೆ.

ಬಿಸಿಲಿನಲ್ಲಿ ಕಾರಿನ ಬ್ರೇಕ್ ದಿಢೀರ್ ಫೇಲ್ ಸಾಧ್ಯತೆ, ಲಾಂಗ್ ಡ್ರೈವ್‍‌ಗೂ ಮೊದಲು 5 ವಿಚಾರ ಗಮನದಲ್ಲಿರಲಿ

Chethan Kumar — Mon, 22 Jun 2026 16:25:07 +0530

ಮಳೆಗಾಲ ಶುರುವಾದರೂ ಮಳೆ ಇಲ್ಲ, ಎಲ್ಲೆಡೆ ಬಿಸಿಲು ಹೆಚ್ಚಾಗುತ್ತಿದೆ. ಇದರ ನಡುವೆ ಕಾರಿನಲ್ಲಿ ಲಾಂಗ್ ಡ್ರೈವ್ ಪ್ಲಾನ್ ಮಾಡಿದ್ದರೆ, ಸಮಸ್ಸೆಗೂ ಮೊದಲೇ ನಿಮ್ಮ ಕಾರು ಚೆಕ್ ಮಾಡಿ. ತಾಪಮಾನದಿಂದ ಕಾರಿನ ಬ್ರೇಕ್ ಫೇಲಾಗುವ ಸಾಧ್ಯತೆ ಇದೆ.

ಮಳೆಗಾಲ ಶುರುವಾಗಿದೆ. ಆದರೆ ಮಳೆ ಮಾತ್ರ ಇಲ್ಲ. ಕರ್ನಾಟಕ ಸೇರಿದಂತೆ ದೇಶದಲ್ಲೇ ಮಳೆ ಕೊರತೆ ಕಾಣುತ್ತಿದೆ. ಜಿಟಿಜಿಟಿ ಮಳೆ, ಭಾರಿ ಮಳೆ ಕಾಣಬೇಕಿದ್ದ ಹಲವು ಪ್ರದೇಶಗಳಲ್ಲಿ ಮಳೆ ಇಲ್ಲದಾಗಿದೆ. ಪರಿಣಾಮ ಬಿಸಿಲಿನ ತಾಪಮಾನ ಹೆಚ್ಚಾಗುತ್ತಿದೆ. ಇನ್ನು ಭಾರಿ ಪ್ಲಾನ್ ಮಾಡಿ ಲಾಂಗ್ ಡ್ರೈವ್ ಹೋಗುತ್ತಿದ್ದರೆ ಈ ತಾಪಮಾನದಲ್ಲಿ ಕಾರಿನ ಬ್ರೇಕ್ ಫೇಲ್ ಆಗುವ ಸಾಧ್ಯತೆ ಇದೆ. ಹೀಗಾಗಿ ಪ್ರಯಾಣಕ್ಕೂ ಮೊದಲೇ ಕೆಲ ವಿಚಾರಗಳ ಬಗ್ಗೆ ಗಮನ ನೀಡಿದರೆ ಆತಂಕ ಇರುವುದಿಲ್ಲ.

ತೀವ್ರ ಬಿಸಿಲಿನಲ್ಲಿ ಕಾರು ಚಲಾಸುವಾಗ ಕಾರಿನ ಎಂಜಿನ್ ಸೇರಿದಂತೆ ಹಲವು ಬಿಡಿ ಭಾಗಗಳ ಮೇಲೆ ಪರಿಣಾಮ ಬೀರುತ್ತದೆ. ಅದರಲ್ಲೂ ಲಾಂಗ್ ಡ್ರೈವ್‌ನಲ್ಲಿ ಕಾರು ಹೆಚ್ಚು ಸಮಸ್ಯೆಗೆ ಸಿಲುಕಿಕೊಳ್ಳುತ್ತದೆ. ಏರುತ್ತಿರುವ ತಾಪಮಾನಗಳಲ್ಲಿ ಲಾಂಗ್ ಟ್ರಿಪ್, ಲಾಂಗ್ ಡ್ರೈವ್ ಪ್ಲಾನ್ ಮಾಡಿದ್ದರೆ, ಕೆಲ ಸೂಕ್ಷ್ಮ ಅಂಶಗಳ ಬಗ್ಗೆ ಗಮನ ಹರಿಸಿದರೆ ಸಮಸ್ಯೆಯಿಂದ ದೂರವಿರಬಹುದು. ಪ್ರಮುಖವಾಗಿ ಕಾರಿನ ಬ್ರೇಕ್ ಹೆಚ್ಚು ಘರ್ಷಣೆ ಜೊತೆಗೆ ತಾಪಮಾನದಿಂದ ಫೇಲ್ ಆಗುವ ಸಾಧ್ಯತೆ ಇದೆ.

ಲಾಂಗ್ ಡ್ರೈವ್‌ನಲ್ಲಿ ಕಾರಿನ ಬ್ರೇಕ್ ಹೆಚ್ಚು ಬಾರಿ ಪ್ರಯೋಗ ಮಾಡುತ್ತೇವೆ. ಇದರಿಂದ ಕಾರಿನ ಡಿಸ್ಕ್ ಹಾಗೂ ಪ್ಯಾಡ್ ನಡುವಿನ ಘರ್ಷಣೆಯಿಂದ ಸಾಮಾನ್ಯವಾಗಿ ಬಿಸಿಯಾಗುತ್ತದೆ. ಚಳಿಗಾಲ, ಮಳಗಾಲದಲ್ಲಿ ಹೆಚ್ಚಿನ ಸಮಸ್ಯೆಯಾಗುವುದಿಲ್ಲ. ಆದರೆ ಬಿಸಿಲಿನ ತಾಪಮಾನ ಹೆಚ್ಚಿದ್ದಾಗ, ವಾತಾವರಣ ಬಿಸಿಯಾಗಿದ್ದಾಗ, ಕಾರಿನ ಬ್ರೇಕ್ ಕೂಲಿಂಗ್ ಆಗಲು ತಾಪಮಾನವೂ ಬಿಡುವುದಿಲ್ಲ. ಇದರಿಂದ ಬ್ರೇಕ್ ಫೇಲ್ ಸಾಧ್ಯತೆ ಇದೆ.

ಬ್ರೇಕ್ ಹಾಕುವಾಗ ಸ್ಮೂತ್ ಆಗಿ ಬ್ರೇಕ್ ಹಿಡಿಯುತ್ತಿಲ್ಲ, ಶಬ್ದ ಬರುತ್ತಿದೆ, ಸ್ಮೂತ್‌ನೆಸ್ ಇಲ್ಲ ಎಂದಾದರೆ ನಿಮ್ಮ ಬ್ರೇಕ್ ಪ್ಯಾಡ್ ಹಾಗೂ ಡಿಸ್ಕ್ ಚೆಕ್ ಮಾಡಿ. ಸವೆದು ಹೋಗಿದ್ದರೆ ಬದಲಾಯಿಸುವುದು ಉತ್ತಮ. ಇನ್ನು ಬ್ರೇಕ್ ಆಯಿಲ್ ಅಥವಾ ಫ್ಲೂಯಿಡ್ ಮಟ್ಟ ಪರಿಶೀಲಿಸುವುದು ಉತ್ತಮ. ಅಹತ್ಯವಿದ್ದರೆ ಆಯಿಲ್ ಬದಲಾಯಿಸಿ, ಪ್ರವಾಸ ಆರಂಭಿಸುವುದು ಬ್ರೇಕ್ ದೃಷ್ಟಿಯಿಂದ ಉತ್ತಮ.

ಲಾಂಗ್ ಡ್ರೈವ್‌ಗಳಲ್ಲಿ ಘಾಟ್ ಸೆಕ್ಷನ್ ಇಳಿಯುವಾಗ, ಹಚ್ಚಿನ ಇಳಿಜಾರು ಪ್ರದೇಶ ಇಳಿಯುವಾಗ ಪದೇ ಪದೇ ಬ್ರೇಕ್ ತುಳಿದು ಗಾಡಿ ನಿಧಾನ ಮಾಡುವುದಕ್ಕಿಂತ ಎಂಜಿನ್ ಮೂಲಕ ಅಂದರೆ ಲೋವರ್ ಗೇರ್ ಮೂಲಕ ಕಾರು ಹೆಚ್ಚು ನಿಯಂತ್ರಣಕ್ಕೆ ತೆಗೆದುಕೊಳ್ಳಿ. ಇದರಿಂದ ಬ್ರೇಕ್ ಘರ್ಷಣೆ ತಪ್ಪಿಸಬಹುದು. ಜೊತೆಗೆ ಅಪಾಯಕಾರಿ ಘಾಟ್ ಸೆಕ್ಷನ್‌ನಲ್ಲಿ ಬ್ರೇಕ್ ಸುಸ್ಥಿತಿಯಲ್ಲಿಡಲು ಸಾಧ್ಯಲಿದೆ. ಸಾಮಾನ್ಯವಾಗಿ ಘಾಟ್ ಸೆಕ್ಷನ್‌ನಲ್ಲಿ ಅತೀ ಹೆಚ್ಚು ಬ್ರೇಕ್ ಬಳಕೆಯಾಗುವ ಕಾರಣ ಬಿಸಿಯಾಗಿ ತಕ್ಷಣಕ್ಕೆ ಬ್ರೇಕ್ ಸರಿಯಾಗಿ ಕಾರ್ಯನಿರ್ವಹಿಸದೆ ಇರುವ ಸಾಧ್ಯತೆ ಇದೆ.

ಲಾಂಗ್ ಡ್ರೈವ್ ಹೋಗುವಾಗ ನಡುವೆ ವಿರಾಮ ಉತ್ತಮ. ಚಾಲನೆ, ಪ್ರಯಾಣದ ದೃಷ್ಟಿಯಿಂದ ಹಾಗೂ ಕಾರಿನ ದೃಷ್ಟಿಯಿಂದಲೂ ವಿರಾಮ ಅತ್ಯಗತ್ಯ. ಪ್ರತಿ 2 ರಿಂದ 3 ಗಂಟೆಗೊಮ್ಮೆ ಕಾರು ನಿಲ್ಲಿಸಿ ತಣ್ಣಗಾಗಲು ಬಿಡಿ. ಈ ವೇಳೆ ಬ್ರೇಕ್ ಸಿಸ್ಟಮ್‌ನಿಂದ ಹಿಡಿದು ಕಾರಿನ ಎಂಜಿನ್‌ವರೆಗೂ ತಣ್ಣಗಾಗಲಿದೆ.

ಪೆಟ್ರೋಲ್ ಟೆನ್ಶನ್ ಬಿಡಿ! ದಿನನಿತ್ಯದ ಓಡಾಟಕ್ಕೆ ಈ ಸೈಕಲ್ ಇದ್ರೆ ಸಾಕು, ಜೇಬಿಗೂ ಹಗುರ!

Mahmad Rafik — Tue, 17 Mar 2026 12:29:36 +0530

ಪೆಟ್ರೋಲ್ ಬೆಲೆ ಏರಿಕೆಯಿಂದಾಗಿ, ದಿನನಿತ್ಯದ ಓಡಾಟಕ್ಕೆ ಎಲೆಕ್ಟ್ರಿಕ್ ಸೈಕಲ್‌ಗಳು ಉತ್ತಮ ಪರ್ಯಾಯವಾಗಿವೆ. ₹50,000ದೊಳಗಿನ ಈ ಇ-ಬೈಕ್‌ಗಳು ಒಂದೇ ಚಾರ್ಜ್‌ನಲ್ಲಿ 60 ಕಿ.ಮೀ ವರೆಗೆ ಮೈಲೇಜ್ ನೀಡಿ, ಖರ್ಚು ಕಡಿಮೆ ಮಾಡಿ ಪರಿಸರವನ್ನೂ ಉಳಿಸುತ್ತವೆ.

ಪೆಟ್ರೋಲ್ ಬೆಲೆ ಏರಿಕೆ ಮತ್ತು ಜಾಗತಿಕ ಇಂಧನ ಕೊರತೆಯಂತಹ ಸಮಸ್ಯೆಗಳು ಹೆಚ್ಚಾಗುತ್ತಿವೆ. ಈ ಹಿನ್ನೆಲೆಯಲ್ಲಿ, ಪರ್ಯಾಯ ಸಾರಿಗೆ ವ್ಯವಸ್ಥೆಗಳ ಹುಡುಕಾಟ ಅನಿವಾರ್ಯವಾಗಿದೆ. ಅದರಲ್ಲೂ, ಪ್ರತಿದಿನ ಕಡಿಮೆ ದೂರ ಪ್ರಯಾಣಿಸುವ ವಿದ್ಯಾರ್ಥಿಗಳು ಮತ್ತು ಕಚೇರಿ ಉದ್ಯೋಗಿಗಳು ಈಗ ಎಲೆಕ್ಟ್ರಿಕ್ ಸೈಕಲ್‌ಗಳ (ಇ-ಬೈಕ್‌) ಕಡೆಗೆ ಹೆಚ್ಚು ಗಮನ ಹರಿಸುತ್ತಿದ್ದಾರೆ.

ಇ-ಬೈಕ್‌ಗಳು ಸಾಮಾನ್ಯ ಸೈಕಲ್‌ಗಳಲ್ಲ. ಇದರಲ್ಲಿರುವ ಎಲೆಕ್ಟ್ರಿಕ್ ಮೋಟಾರ್ ಮತ್ತು ಬ್ಯಾಟರಿ, ನೀವು ಹೆಚ್ಚು ಶ್ರಮವಿಲ್ಲದೆ ಪ್ರಯಾಣಿಸಲು ಸಹಾಯ ಮಾಡುತ್ತದೆ. ಒಮ್ಮೆ ಚಾರ್ಜ್ ಮಾಡಿದರೆ 40 ರಿಂದ 60 ಕಿಲೋಮೀಟರ್‌ವರೆಗೂ ಚಲಿಸುವ ಸಾಮರ್ಥ್ಯವಿರುವುದರಿಂದ, ದಿನನಿತ್ಯದ ಓಡಾಟಕ್ಕೆ ಇದು ಅತ್ಯುತ್ತಮ ಆಯ್ಕೆಯಾಗಿದೆ.

ಮಾರುಕಟ್ಟೆಯಲ್ಲಿ ₹50,000 ಕ್ಕಿಂತ ಕಡಿಮೆ ಬೆಲೆಯಲ್ಲಿ ಹಲವು ಉತ್ತಮ ಮಾದರಿಗಳು ಲಭ್ಯವಿವೆ. EMotorad T-Rex Air, BSA Urban Ranger ನಂತಹ ಮಾಡೆಲ್‌ಗಳು ಉತ್ತಮ ರೇಂಜ್ ಮತ್ತು ಸ್ಟೈಲಿಶ್ ವಿನ್ಯಾಸದೊಂದಿಗೆ ಬರುತ್ತವೆ.

Eco-Bike Red ನಂತಹ ಸೈಕಲ್‌ಗಳು ಕಡಿಮೆ ಬೆಲೆಯಲ್ಲೂ ಉಪಯುಕ್ತ ಫೀಚರ್‌ಗಳನ್ನು ನೀಡುತ್ತವೆ. ಹಾಗೆಯೇ, Hero Lectro Y3, Y5 ಮಾದರಿಗಳು ತಮ್ಮ ವಿಶ್ವಾಸಾರ್ಹತೆ ಮತ್ತು ಕಡಿಮೆ ನಿರ್ವಹಣಾ ವೆಚ್ಚಕ್ಕೆ ಹೆಸರುವಾಸಿಯಾಗಿವೆ.

ಈ ಹಲವು ಮಾದರಿಗಳಲ್ಲಿ ತೆಗೆಯಬಹುದಾದ ಬ್ಯಾಟರಿ, ಎಲ್‌ಇಡಿ ಡಿಸ್‌ಪ್ಲೇ, ಡಿಸ್ಕ್ ಬ್ರೇಕ್‌ಗಳು ಮತ್ತು ವಾಟರ್ ರೆಸಿಸ್ಟೆನ್ಸ್‌ನಂತಹ ಸೌಲಭ್ಯಗಳಿವೆ. ಕೆಲವು ಮಾಡೆಲ್‌ಗಳು ಪೆಡಲ್ ಅಸಿಸ್ಟ್ ಸೌಲಭ್ಯವನ್ನೂ ನೀಡುತ್ತವೆ. ಇದರಿಂದಾಗಿ, ಸೈಕಲ್ ತುಳಿಯುವಾಗ ಬ್ಯಾಟರಿಯ ಸಹಾಯವೂ ಸಿಗುತ್ತದೆ. ಇದು ಪ್ರಯಾಣವನ್ನು ಇನ್ನಷ್ಟು ಸುಲಭ ಮತ್ತು ಆರಾಮದಾಯಕವಾಗಿಸುತ್ತದೆ.

ಇದನ್ನೂ ಓದಿ: ಮಹಿಳೆಯಿಂದ ಟಾಟಾ ಸಿಯೆರಾ ಟೆಸ್ಟ್ ಡ್ರೈವ್, 3 ವಾಹನಕ್ಕೆ ಡಿಕ್ಕಿಯಾಗಿ 20 ಅಡಿ ಗುಂಡಿಗೆ ಬಿದ್ದ ಕಾರು

ಒಟ್ಟಾರೆಯಾಗಿ, ಇ-ಬೈಕ್‌ಗಳು ಕಡಿಮೆ ಖರ್ಚಿನ, ಪರಿಸರ ಸ್ನೇಹಿ ಸಾರಿಗೆ ಕ್ರಾಂತಿಯೆಂದೇ ಹೇಳಬಹುದು. ಪೆಟ್ರೋಲ್ ಚಿಂತೆಯಿಲ್ಲದೆ, ದೈಹಿಕ ಆರೋಗ್ಯವನ್ನು ಕಾಪಾಡಿಕೊಂಡು, ದೈನಂದಿನ ಜೀವನವನ್ನು ಸುಲಭವಾಗಿಸುವ ಈ ಬದಲಾವಣೆಯನ್ನು ಅಳವಡಿಸಿಕೊಳ್ಳಲು ಇದು ಸಕಾಲ.

ಇದನ್ನೂ ಓದಿ: ಟಿವಿಎಸ್‌ನಿಂದ ಅತಿ ಅಗ್ಗದ ಇ-ಸ್ಕೂಟರ್‌ ಲಾಂಚ್; 50 ಸಾವಿರಕ್ಕಿಂತ ಕಡಿಮೆ ಬೆಲೆಗೆ ಸಿಗಲಿದೆ ಹೊಸ ಆರ್ಬಿಟರ್ V1!

1 ಲಕ್ಷ ರೂ ಸಬ್ಸಿಡಿ, ರಿಜಿಸ್ಟ್ರೇಶನ್ ಉಚಿತ, ಹೊಸ ಎಲೆಕ್ಟ್ರಿಕ್ ವಾಹನ ಪಾಲಿಸಿಗೆ ಸರ್ಕಾರದಿಂದ ಅನುಮೋದನೆ

Chethan Kumar — Mon, 29 Jun 2026 18:48:14 +0530

ನವದೆಹಲಿ (ಜೂ.29) ತೈಲ ಆಮದು ಕಡಿತಗೊಳಿಸಲಿ ಅವಲಂಬನೆ ತಪ್ಪಿಸಲು, ವಾಯು ಮಾಲಿನ್ಯ ಸೇರಿದಂತೆ ತೀವ್ರ ಆರೋಗ್ಯ ಸಮಸ್ಯೆಗಳಿಗೆ ಕಡಿವಾಣ ಹಾಕಲು ದೆಹಲಿ ಸರ್ಕಾರ ಮಹತ್ವದ ಇವಿ ಪಾಲಿಸಿಗೆ ಅನುಮೋದನೆ ನೀಡಿದೆ. ಬರೋಬ್ಬರಿ 1 ಲಕ್ಷ ರೂಪಾಯಿ ಸಬ್ಸಿಡಿ, ಎಲೆಕ್ಟ್ರಿಕ್ ವಾಹನ ಖರೀದಿ ವೇಳೆ ರಿಜಿಸ್ಟ್ರೇಶನ್ ಉಚಿತ ಸೇರಿದಂತೆ ಹಲವು ಕೊಡುಗೆಗಳನ್ನು ನೀಡುತ್ತಿದೆ. ವಿಶೇಷ ಅಂದರೆ ಜುಲೈ 1 ರಿಂದ ಈ ಹೊಸ ಪಾಲಿಸಿ ಜಾರಿಯಾಗುತ್ತಿದೆ. ಈ ಕುರಿತು ದೆಹಲಿ ಸರ್ಕಾರ ಮಹತ್ವದ ಘೋಷಣೆ ಮಾಡಿದೆ.

ಜುಲೈ1, 2026ರಿಂದ ಮಾರ್ಚ್ 31, 2030ರ ವರೆಗೆ ಎಲೆಕ್ಟ್ರಿಕ್ ವಾನಹ ಪಾಲಿಸಿ ಜಾರಿಯಲ್ಲಿರಲಿದೆ ಎಂದು ದೆಹಲಿ ಮುಖ್ಯಮಂತ್ರಿ ರೇಖಾ ಗುಪ್ತ ಹೇಳಿದ್ದಾರೆ. ಇದರೊಂದಿಗೆ ದೆಹಲಿಯಲ್ಲಿ ಇಂಧನ ವಾಹನಗಳನ್ನು ಕಡಿತಗೊಳಿಸಿ ಎಲೆಕ್ಟ್ರಿಕ್ ವಾಹನಗಳ ಹೆಚ್ಚಿಸಲು ಭಾರಿ ಪ್ರಯತ್ನ ಮಾಡಲಾಗುತ್ತಿದೆ. ಇದರ ಭಾಗವಾಗಿ ಇದೀಗ ಇವಿ ಪಾಲಿಸಿ ತರಲಾಗಿದೆ.

ವಾಹನಗಳಿಗೆ ಸಬ್ಸಿಡಿ ಘೋಷಣೆ

ಜುಲೈ 1, 2026ರಿಂದ ಎಲೆಕ್ಟ್ರಿಕ್ ವಾಹನ ಖರೀದಿಸುವ ಗ್ರಾಹಕರಿಗೆ ಮೂರು ಹಂತದಲ್ಲಿ ಸಬ್ಸಿಡಿ ನೀಡಲಾಗುತ್ತದೆ. ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ಖರೀದಿದಾರರಿಗೆ 30,000 ರೂಪಾಯಿ,20,000 ರೂಪಾಯಿ ಹಾಗೂ 10,000 ರೂಪಾಯಿ ಮೊದಲ ವರ್ಷ, 2ನೇ ವರ್ಷ ಹಾಗೂ 3ನೇ ವರ್ಷ ನೀಡಲಾಗುತ್ತದೆ. ಇನ್ನು ಎಲೆಕ್ಟ್ರಿಕ್ ರಿಕ್ಷಾ ಖರೀದಿಸುವ ಗ್ರಾಹಕರು ಇದೇ ರೀತಿ ಮೂರು ವರ್ಷ 50,000 ರೂಪಾಯಿ, 40,000 ರೂಪಾಯಿ ಹಾಗೂ 30,000 ರೂಪಾಯಿ ಸಬ್ಸಿಡಿ ಪಡೆಯಲಿದ್ದಾರೆ. ವಿಶೇಷ ಅಂದರೆ ಎನ್1 ಕೆಟಗರಿ ಎಲೆಕ್ಟ್ರಿಕ್ ಟ್ರಕ್ ಖರೀದಿಸುವ ಗ್ರಾಹಕರಿಗೆ ಬರೋಬ್ಬರಿ 1 ಲಕ್ಷ ರೂಪಾಯಿ ಸಬ್ಸಿಡಿ ನೀಡಲಾಗುತ್ತದೆ. ಇನ್ನು BS-IV ಹಾಗೂ ಅದಕ್ಕಿಂತ ಹಳೇ ಎಮಿಷನ್ ವಾಹನಗಳನ್ನು ಸ್ಕಾಪ್‌ಗೆ ಹಾಕಿ ಹೊಸ ಎಲೆಕ್ಟ್ರಿಕ್ ವಾಹನ ಖರೀದಿಸುವ ಗ್ರಾಹಕರಿ 1 ಲಕ್ಷ ರೂಪಾಯಿ ಇನ್ಸೆಂಟೀವ್ ನೀಡಲಾಗುತ್ತದೆ.

ಆದರೆ ಹೈಬ್ರಿಡ್ ವಾಹನಗಳಿಗೆ ಯಾವುದೇ ಸಬ್ಸಿಡಿ ನೀಡಲಾಗುವುದಿಲ್ಲ ಎಂದು ದೆಹಲಿ ಸರ್ಕಾರ ಸ್ಪಷ್ಟಪಡಿಸಿದೆ. ಈ ಇವಿ ಪಾಲಿಸಿ ಕೇವಲ ಶೂನ್ಯ ಎಮಿಶನ್ ವಾಹನಗಳಿಗೆ ಮಾತ್ರ ಅನ್ವಯಿಸುತ್ತದೆ ಎಂದು ದೆಹಲಿ ಸರ್ಕಾರ ಹೇಳಿದೆ.

15,000 ಕೋಟಿ ರೂಪಾಯಿ ಹೂಡಿಕೆ

ದೆಹಲಿಯಲ್ಲಿ ವಾಯು ಮಾಲಿನ್ಯ ತಗ್ಗಿಸಲು ಈಗಿನಿಂದಲೇ ಪ್ರಯತ್ನ ಮಾಡಲಾಗುತ್ತದೆ. ಚಳಿಗಾಲ ಆರಂಭಗೊಳ್ಳುತ್ತಿದ್ದಂತೆ ದೆಹಲಿಯಲ್ಲಿ ವಾಯು ಮಾಲಿನ್ಯ ವಿಪರೀತವಾಗುತ್ತದೆ. ಹೀಗಾಗಿ ಅಕ್ಟೋಬರ್ ತಿಂಗಳಿನಿಂದ ದೆಹಲಿಯಲ್ಲಿ ಗಣನೀಯವಾಗಿ ವಾಯು ಮಾಲಿನ್ಯ ತಗ್ಗಿಸಲು ಇವಿ ವಾಹನಗಳಿಗೆ ಒತ್ತು ನೀಡಲಾಗುತ್ತದೆ. ಜೊತೆಗೆ ತೈಲ ಅವಲಂಬನೆಯೂ ಕಡಿಮೆಯಾಗಲಿದೆ ಎಂದು ರೇಖಾ ಗುಪ್ತ ಹೇಳಿದ್ದಾರೆ.ಮುಂದಿನ ನಾಲ್ಕು ವರ್ಷಗಳಲ್ಲಿ ದೆಹಲಿ ಸರ್ಕಾರ ಇವಿ ಪಾಲಿಸಿಗಾಗಿ ಬರೋಬ್ಬರಿ 15 ಸಾವಿರ ಕೋಟಿ ರೂಪಾಯಿ ಹೂಡಿಕೆ ಮಾಡುತ್ತಿದೆ. ಈ ಪೈಕಿ 7,000 ಕೋಟಿ ರೂಪಾಯಿಗಳನ್ನು ಸಬ್ಸಿಡಿಗಳಿಗೆ ನೀಡಲಾಗುತ್ತದೆ. ಇನ್ನುಳಿದ 8000 ರೂಪಾಯಿ ಮೊತ್ತವನ್ನು ಇವಿ ಮೂಲಭೂತ ಸೌಕರ್ಯ ಹೆಚ್ಚಿಸಲು ನೀಡಲಾಗುತ್ತದೆ. ದೆಹಲಿಯಲ್ಲಿ 32000 ಎಲೆಕ್ಟ್ರಿಕ್ ವಾಹನ ಚಾರ್ಜಿಂಗ್ ಸ್ಟೇಶನ್ ಅಳವಡಿಕೆ ಕಾರ್ಯಗಳು ಪ್ರಗತಿಯಲ್ಲಿದೆ ಎಂದು ರೇಖಾ ಗುಪ್ತ ಹೇಳಿದ್ದಾರೆ.

ಒಬ್ಬರಿಗೆ ಒಂದು ಕಾರು ಮಾತ್ರ, ಹೆಚ್ಚುವರಿ ವಾಹನ ಬಳಕೆಗೆ ಬ್ರೇಕ್, ಕೇಂದ್ರದಿಂದ ಹೊಸ ನೀತಿ ಜಾರಿ

Chethan Kumar — Wed, 29 Jul 2026 12:41:49 +0530

ನವದೆಹಲಿ (ಜು.29) ಭಾರತದಲ್ಲಿ ವಾಹನ ಖರೀದಿಯಲ್ಲಿ ಬಳಕೆಯಲ್ಲಿ ಇದುವರೆಗೆ ಯಾವುದೇ ನಿರ್ಬಂಧ ಇರಲಿಲ್ಲ. ಎಷ್ಟು ಕಾರು ಬೇಕಾದರೂ ಖರೀದಿಸಬಹುದು. ಇದೀಗ ಕೇಂದ್ರ ಸರ್ಕಾರ ಹೊಸ ನೀತಿಯೊಂದನ್ನು ಜಾರಿಗೆ ತಂದಿದೆ. ಇದು ನೇರವಾಗಿ ಹಿರಿಯ ಅಧಿಕಾರಿಗಳು ಹಾಗೂ ಐಎಎಸ್ ಅಧಿಕಾರಿಗಳ ಕಾರು ಬಳಕೆಯನ್ನು ನಿಯಂತ್ರಿಸುತ್ತದೆ. ಒಬ್ಬ ಅಧಿಕಾರಿಗೆ ಒಂದು ಕಾರು ಮಾತ್ರ ಅನ್ನೋ ನೀತಿಯನ್ನು ಕೇಂದ್ರ ಸರ್ಕಾರ ಜಾರಿಗೆ ತಂದಿದೆ. ವಾಹನಗಳ ದುರುಪಯೋಗ, ಹೆಚ್ಚುವರಿ ವೆಚ್ಚ ಕಡಿತಕ್ಕೆ ಕೇಂದ್ರ ಸರ್ಕಾರ ಮುಂದಾಗಿದ್ದು ಹೊಸ ನೀತಿ ಜಾರಿಗೆ ತಂದಿದೆ.

ಏನಿದು ಹೊಸ ನಿಯಮ?

ಸರ್ಕಾರದ ಅಧಿಕಾರಿಗಳು ಹೆಚ್ಚುವರಿ ಕಾರು ಬಳಸುವಂತಿಲ್ಲ. ಒಬ್ಬ ಅಧಿಕಾರಿ ಒಂದು ಸರ್ಕಾರಿ ಕಾರು ಮಾತ್ರ ಬಳಕೆ ಮಾಡಬೇಕು.ಕೇಂದ್ರ ಹಣಕಾಸು ಸಚಿವಾಲಯದ ವೆಚ್ಚಗಳ ಇಲಾಖೆ ಹೊಸ ಆದೇಶ ಹೊರಡಿಸಿದೆ. ವಿಶೇಷವಾಗಿ ಹಿರಿಯ ಅಧಿಕಾರಿಗಳು, ಐಎಎಸ್ ಅಧಿಕಾರಿಗಳು ಒಂದಕ್ಕಿಂತ ಹೆಚ್ಚು ಜವಾಬ್ದಾರಿ ಹೊಂದಿರುತ್ತಾರೆ. ಒಂದಕ್ಕಿಂತ ಹೆಚ್ಚುವರಿ ಇಲಾಖೆಗಳಲ್ಲಿ ಕಾರ್ಯನಿರ್ವಹಿಸುತ್ತಾರೆ. ಸಚಿವಾಲ, ಇಲಾಖೆ, ಸಾರ್ವಜನಿಕ ವಲಯದ ಉದ್ಯಮ, ಸ್ವಾಯತ್ತ ಸಂಸ್ಥೆಯ ಹೆಚ್ಚುವರಿ ಜವಾಬ್ದಾರಿ ಹೊಂದಿರುತ್ತಾರೆ. ಹಾಗಂತೆ ಎಲ್ಲಾ ಇಲಾಖೆಯಿಂದ ಕಾರುಗಳನ್ನು ಬಳಸುವಂತಿಲ್ಲ. ಮೂಲ ಹುದ್ದೆಯಲ್ಲಿನ ಇಲಾಖೆ ನೀಡುವ ಕಾರನ್ನು ಮಾತ್ರ ಬಳಕೆ ಮಾಡಬೇಕು ಎಂಬುದು ಹೊಸ ಆದೇಶ.

ಇಲಾಖೆಗೆ ಕಾರು ನಿರ್ವಹಣಾ ಜವಾಬ್ದಾರಿ

ಒಬ್ಬ ಅಧಿಕಾರಿಗೆ ಒಂದು ಕಾರು ಮಾತ್ರ ಬಳಕೆ ಆದೇಶ ಹೊಸದೇನಲ್ಲ. 2022ರಲ್ಲೇ ಈ ಆದೇಶ ಜಾರಿ ಮಾಡಲಾಗಿತ್ತು. ಆದರೆ ಕಟ್ಟುನಿಟ್ಟಾಗಿ ಪಾಲನೆ ಆಗಿರಲಿಲ್ಲ. ಈ ಬಾರಿ ಇದೇ ಆದೇಶವನ್ನು ಹೊಸದಾಗಿ ಜಾರಿಗೊಳಿಸಲಾಗಿದೆ.ಆದರೆ ಈ ಬಾರಿ ಕೆಲ ಮಾರ್ಪಾಡು ಮಾಡಲಾಗಿದೆ. ಅಧಿಕಾರಿಗಳು ಹೆಚ್ಚುವರಿಯಾಗಿ ಬಳಸುತ್ತಿದ್ದ ಕಾರುಗಳನ್ನು ಆಯಾ ಇಲಾಖೆ ವಶಕ್ಕೆ ಪಡೆಯಬೇಕು. ಬಳಿಕ ಕಾರುಗಳನ್ನು ಸುಸ್ಥಿತಿಯಲ್ಲಿ ನಿರ್ವಹಣೆ ಮಾಡಬೇಕು ಎಂದಿದೆ. ಇನ್ನು ಅಧಿಕಾರಿಗಳು ಎರಡು ಇಲಾಖೆಯ ಕೆಲಸಕ್ಕಾಗಿ ತೆರಳುವಾಗಲೂ ಮೂಲ ಇಲಾಖೆಯ ಕಾರನ್ನು ಮಾತ್ರ ಬಳಕೆ ಮಾಡಬೇಕು. ಎರಡೂ ಇಲಾಖೆ ಸಿಬ್ಬಂದಿಗಳು ಒಂದೇ ಕಾರಿನಲ್ಲಿ ಪ್ರಯಾಣಿಸಬೇಕು ಎಂದಿದೆ.

ಈ ಆದೇಶ ಕಟ್ಟು ನಿಟ್ಟಾಗ ಜಾರಿಯಾದರೆ ಸರ್ಕಾರದ ಹಿರಿಯ ಅಧಿಕಾರಿಗಳು, ಐಎಎಸ್ ಅಧಿಕಾರಿಗಳು ಹೆಚ್ಚುವರಿಯಾಗಿ ಬಳಸುತ್ತಿದ್ದ ಕಾರುಗಳ ಸೇವೆಗೆ ಕಡಿವಾಣ ಬೀಳಲಿದೆ. ಇದರಿಂದ ಸರ್ಕಾರದ ಖರ್ಚು ವೆಚ್ಚ ಇಳಿಕೆಯಾಗಲಿದೆ. ಜೊತೆಗೆ ಹಲವು ಇಲಾಖೆಗಳ ಸಿಬ್ಬಂದಿಗಳು ಬಾಡಿಗೆ ಕಾರುಗಳಲ್ಲಿ ಪ್ರಯಾಣಿಸುತ್ತಿದ್ದಾರೆ. ಈ ಸಮಸ್ಯೆಯನ್ನು ತಪ್ಪಿಸಲು ಸಾಧ್ಯವಿದೆ.

ದಾಳಿ ವೇಳೆ ಸೀಜ್ ಮಾಡಿದ ಖಾಸಗಿ ಜೆಟ್ ಹರಾಜು ಹಾಕಿದ ಇಡಿ, ಕೈಗೆಟುಕವ ದರದಲ್ಲಿ ವಿಮಾನ ಖರೀದಿಗೆ ಅವಕಾಶ

Chethan Kumar — Fri, 03 Jul 2026 21:09:46 +0530

ಹೈದರಾಬಾದ್ (ಜು.03) ಅಕ್ರಮ ಹಣ ವರ್ಗಾವಣೆ ಪ್ರಕರಣ, ಅಕ್ರಮ ಹಣ ಸಂಪಾದನೆ ಸೇರಿದಂತೆ ಹಲವು ಪ್ರಕರಣ ಸಂಬಂಧ ಇಡಿ ಅಧಿಕಾರಿಗಳು ದೇಶಾದ್ಯಂತ ದಾಳಿ ಮಾಡುವುದು ಹೊಸದೇನಲ್ಲ. ದಾಳಿ ವೇಳೆ ಕೋಟಿ ಕೋಟಿ ರೂಪಾಯಿ ನಗದು, ಆಸ್ತಿಗಳನ್ನು ಜಪ್ತಿ ಮಾಡುತ್ತಾರೆ. ಹೀಗೆ ಜಪ್ತಿ ಮಾಡಿದ ಆಸ್ತಿಗಳ ಪೈಕಿ ಇಡಿ ಅಧಿಕಾರಿಗಳು ಇದೇ ಮೊದಲ ಬಾರಿಗೆ ಜೆಟ್ ವಿಮಾನವನ್ನು ಮಾರಾಟ ಮಾಡಲು ಮುಂದಾಗಿದ್ದಾರೆ. ಖಾಸಗಿ ಜೆಟ್ ಹರಾಜಿನ ಮೂಲಕ ಮಾರಾಟ ಮಾಡಲು ಇಡಿ ಅಧಿಕಾರಿಗಳು ಮುಂದಾಗಿದ್ದಾರೆ. ದುಬಾರಿ ಮೌಲ್ಯದ ಜೆಟ್ ಇದೀಗ ಕೈಗೆಟುಕುವ ಬೆಲೆಯಲ್ಲಿ ಲಭ್ಯವಾಗುತ್ತಿದೆ.

ಹಾಕರ್ 800 ಎ ಖಾಸಗಿ ಜೆಟ್

ಹೈದರಾಬಾದ್‌ನ ಕ್ಯಾಪಿಟಲ್ ಪ್ರೊಟೆಕ್ಷನ್ ಫೋರ್ಸ್ ಕಂಪನಿ ಮೇಲೆ ಇಡಿ ಅಧಿಕಾರಿಗಳು ದಾಳಿ ಮಾಡಿದ್ದರು. ಅಮರದೀಪ್ ಕುಮಾರ್ ಮಾಲೀಕತ್ವದ ಕಂಪನಿಯಲ್ಲಿ ನಡೆದಿರುವ ಅಕ್ರಮ ಹಣವರ್ಗಾವಣೆ ಪ್ರಕರಣ ಸಂಬಂಧ ದಾಳಿ ನಡೆದಿತ್ತು. ಇದು ಬರೋಬ್ಬರಿ 7892 ಕೋಟಿ ರೂಪಾಯಿ ಪ್ರಕರಣವಾಗಿತ್ತು.ದಾಳಿ ವೇಳೆ ಅಮರದೀಪ್ ಕುಮಾರ್ ಅವರ ಹಾಕರ್ 800ಎ ಖಾಸಗಿ ಜೆಟ್ ಕೂಡ ಜಪ್ತಿ ಮಾಡಲಾಗಿತ್ತು. ಇದೀಗ ಈ ವಿಮಾನವನ್ನು ಹರಾಜಿನ ಮೂಲಕ ಇಡಿ ಅಧಿಕಾರಿಗಳು ಮಾರಾಟ ಮಾಡುತ್ತಿದ್ದಾರೆ. ಹೈದರಾಬಾದ್ ಇಡಿ ಝೋನಲ್ ಕಚೇರಿ ಅಧಿಕಾರಿಗಳು ಹರಾಜು ಹಾಕಿದ್ದಾರೆ.

ಕೇವಲ 3 ಕೋಟಿ ರೂಪಾಯಿಗೆ ಜೆಟ್

2025ರ ಮಾರ್ಚ್ 7 ರಂದು ಈ ಹಾಕರ್ 800ಎ ಖಾಸಗಿ ಜೆಟ್ ವಶಕ್ಕೆ ಪಡೆಯಲಾಗಿತ್ತು. ಇದೀಗ ಈ ವಿಮಾನವನ್ನು ಹರಾಜಿನ ಮೂಲಕ ಮಾರಾಟ ಮಾಡಲಾಗುತ್ತಿದೆ. ಜೆಟ್ ಖರೀದಿದಾರರಿಗೆ ಇದು ಕೈಗೆಟುಕುವ ದರವಾಗಿದೆ. ಕಾರಣ ಹಾಕರ್ 800 ಜೆಟ್ ಬೆಲೆ ದುಬಾರಿ. ಕೆಲ ಬಾಲಿವುಡ್ ನಟರ ಬಳಿಕ ಇದೇ ಕಂಪನಿಯ 800ಎ ಜೆಟ್ ಇದೆ. ಇದರ ಬೆಲೆ ಸರಿಸುಮಾರು 84 ಕೋಟಿ ರೂಪಾಯಿ. ಹಾಕರ್ 800 ಜೆಟ್ ಬೆಲೆ 18 ಕೋಟಿ ರೂಪಾಯಿಯಿಂದ ಆರಂಭಗೊಳ್ಳುತ್ತಿದೆ. ಈ ಬೆಲೆಗೆ ಹೋಲಿಸಿದರೆ ಸದ್ಯ 3 ಕೋಟಿ ರೂಪಾಯಿಗೆ ಹಾಕರ್ 800ಎ ಜೆಟ್ ಲಭ್ಯವಾಗುತ್ತಿದೆ. 3 ಕೋಟಿ ರೂಪಾಯಿಯಿಂದ ಹಾಕರ್ 800ಎ ಜೆಟ್ ಹರಾಜು ಆರಂಭಗೊಳ್ಳಲಿದೆ.

ಫಾಲ್ಕಮ್ ಗ್ರೂಪ್ ಅಮರದೀಪ್ ಕುಮಾರ್ ಅವರ ಹಲವು ಕಂಪನಿಗಳ ಪೈಕಿ ಕ್ಯಾಪಿಟಲ್ ಪ್ರೊಟೆಕ್ಷನ್ ಫೋರ್ಸ್ ಕಂಪನಿ ಕೂಡ ಒಂದು. ಈ ಕಂಪನಿಯಲ್ಲಿ ಬರೋಬ್ಬರಿ 792 ಕೋಟಿ ರೂಪಾಯಿ ಅವ್ಯಹಾರ ನಡೆದಿತ್ತು. ಸೆಪ್ಟೆಂಬರ್ 2025ರಲ್ಲಿ ದೂರು ದಾಖಲಾಗಿತ್ತು. ತನಿಖೆ ವೇಳೆ ಭಾರಿ ಅವ್ಯವಹಾರ ಪತ್ತೆಯಾಗುತ್ತಿದ್ದಂತೆ ಇಡಿ ತನಿಖೆ ಚುರುಕುಗೊಳಿಸಿತ್ತು. ಹಲವೆಡೆ ದಾಳಿ ನಡೆಸಿ ಕೋಟಿ ಕೋಟಿ ರೂಪಾಯಿ ಹಣ, ಆಸ್ತಿಗಳನ್ನು ಜಪ್ತಿ ಮಾಡಿತ್ತು. ಇದೇ ವೇಳೆ ಜೆಟ್ ವಿಮಾನ ಕೂಡ ಜಪ್ತಿಯಾಗಿತ್ತು.

ವಿಮಾನದ ಹರಾಜಿನಿಂದ ಬರುವ ಮೊತ್ತವನ್ನು ಕ್ಯಾಪಿಟಲ್ ಪ್ರೊಟೆಕ್ಷನ್ ಕಂಪನಿಯಲ್ಲಿ ಹೂಡಿಕೆ ಮಾಡಿ ಹಣ ಕಳೆದುಕೊಂಡವರಿಗೆ ನೀಡಲಾಗುತ್ತದೆ ಎಂದು ಇಡಿ ಅಧಿಕಾರಿಗಳು ಹೇಳಿದ್ದಾರೆ.

ಡ್ರೈವಿಂಗ್‌ನಲ್ಲಿ ಪುರುಷರಿಗಿಂತ ಮಹಿಳೆಯರು ಬೆಟರ್, ರಾತ್ರಿ 9 ರಿಂದ 10 ರಿಸ್ಕಿ ಟೈಮ್, ಸಮೀಕ್ಷಾ ವರದಿ ಅಚ್ಚರಿ

Chethan Kumar — Wed, 01 Jul 2026 18:38:13 +0530

ವಾಹನ ಡ್ರೈವಿಂಗ್‌ನಲ್ಲಿ ಯಾರು ಬೆಟರ್? ಪುರುಷರೋ,ಮಹಿಳೆಯರೋ? ಸಮೀಕ್ಷಾ ವರದಿ ಇದೀಗ ಭಾರಿ ಕುತೂಹಲಕ್ಕೆ ಕಾರಣವಾಗಿದೆ. ಡ್ರೈವಿಂಗ್ ಕುರಿತ ಹಲವು ಅಂಕಿ ಅಂಶಗಳನ್ನು ಈ ವರದಿ ನೀಡಿದೆ. ರಿಪೋರ್ಟ್‌ನಲ್ಲಿ ಏನಿದೆ?

ಕಾರು ಸೇರಿದಂತೆ ವಾಹನ ಡ್ರೈವಿಂಗ್ ವಿಚಾರದಲ್ಲಿ ಪುರುಷರು ಹಾಗೂ ಮಹಿಳೆಯರ ಪತ್ಯೇಕ ಮೀಮ್ಸ್‌ಗಳಿವೆ. ಈ ಪೈಕಿ ಹೆಣ್ಣು ಮಗು ಹೆಣ್ಣು ಮಗು ಭಾರಿ ವೈರಲ್ ಆಗಿದೆ. ಡ್ರೈವಿಂಗ್ ವಿಚಾರದಲ್ಲಿ ಯಾವತ್ತೂ ಮಹಿಳೆಯರನ್ನು ಟ್ರೋಲ್ ಮಾಡಲಾಗುತ್ತದೆ. ಆದರೆ ಸುರಕ್ಷತಾ ಡ್ರೈವಿಂಗ್ ವಿಚಾರಕ್ಕೆ ಬಂದರೆ ಪುರುಷರಿಗಿಂತ ಮಹಿಳೆಯರು ಕೊಂಚ ಬೆಟರ್ ಅನ್ನೋದು ಅಧ್ಯಯನ ವರದಿ ಹೇಳುತ್ತಿದೆ.

ಝುನೋ ಜನರಲ್ ಇನ್ಶೂರೆನ್ಸ್ ಕಂಪನಿ ಭಾರತದ ರಸ್ತೆ ಸುರಕ್ಷತೆ ಕುರಿತು ಸಮೀಕ್ಷಾ ವರದಿ ತಯಾರಿಸಿದೆ. ಈ ವರದಿ ಭಾರತದ ರಸ್ತೆ ಸುರಕ್ಷತೆ ಹಾಗೂ ಡ್ರೈವಿಂಗ್ ಕುರಿತು ಹಲವು ಅಂಕಿ ಅಂಶ ತೆರೆದಿಟ್ಟಿದೆ. ಈ ವರದಿ ಪ್ರಕಾರ ಭಾರತದಲ್ಲಿ ಪುರುಷರು ಹಾಗೂ ಮಹಿಳೆಯರ ಡ್ರೈವಿಂಗ್, ಡೇಂಜರ್ ಸಮಯ, ತಡ ರಾತ್ರಿ ಡ್ರೈವಿಂಗ್ ಸೇರಿದಂತೆ ಹಲವು ಮಾಹಿತಿಗಳನ್ನು ತೆರೆದಿಟ್ಟಿದೆ.

ಭಾರತದಲ್ಲಿ ಶೇಕಡಾ 80ರಷ್ಟು ಅಪಘಾತಗಳು ಚಾಲಕರ ವರ್ತನೆ, ಡ್ರೈವಿಂಗ್ ಮೇಲೆ ಅವಲಂಬಿತವಾಗಿದೆ. ಇನ್ನುಳಿದ ಶೇಕಡಾ 20ರಷ್ಟು ಕೆಟ್ಟ ರಸ್ತೆ ಸೇರಿದಂತೆ ಭೌಗೋಳಿಕ ಕಾರಣಗಳಿಂದಾಗಿದೆ. ರಾತ್ರಿ 9 ರಿಂದ 10 ಗಂಟೆ ಸಮಯದ ಡ್ರೈವಿಂಗ್ ಡೇಂಜರಸ್ ಎಂದು ಅಂಕಿ ಅಂಶ ಹೇಳುತ್ತಿದೆ. ಇನ್ನು ತಡ ರಾತ್ರಿ ಡ್ರೈವಿಂಗ್ ಅತ್ಯಂತ ಅಪಾಯಕಾರಿ ಅನ್ನೋದು ಅಂಕಿ ಅಂಶಗಳು ಹೇಳುತ್ತಿದೆ.

ಸುರಕ್ಷತಾ ರೀತಿಯಲ್ಲಿ ಡ್ರೈವಿಂಗ್ ವಿಚಾರದಲ್ಲಿ ಮಹಳೆಯರು ಸರಾಸರಿ ಸ್ಕೋರ್ 92.86. ಇನ್ನು ಪುರುಷರ ಸ್ಕೋರ್ 92.43. ಈ ಮೂಲಕ ಪುರುಷರಿಗಿಂತ ಮಹಿಳೆಯರು ಸುರಕ್ಷತಾ ಡ್ರೈವಿಂಗ್ ವಿಚಾರದಲ್ಲಿ ಮುಂದಿದ್ದಾರೆ ಎಂದು ಸಮೀಕ್ಷಾ ವರದಿ ಹೇಳಿದೆ. ವಿಶೇಷವಾಗಿ ರ್ಯಾಶ್ ಡ್ರೈವಿಂಗ್ ಸೇರಿದಂತೆ ಅತೀ ವೇಗದ ಚಾಲನೆಯಲ್ಲಿ ಮಹಿಳೆಯರು ಹೆಚ್ಚು ಜವಾಬ್ದಾರಿಯುತರಾಗಿದ್ದಾರೆ ಎಂದು ಅಂಕಿ ಅಂಶ ಹೇಳುತ್ತಿದೆ.

ವೇಗವಾಗಿ ಹೋಗುತ್ತಿದ್ದಂತೆ ದಿಢೀರ್ ಬ್ರೇಕ್ ಹಾಕಿ ಲೆಫ್ಟ್ ಅಥವಾ ರೈಟ್‌ಗೆ ಟರ್ನ್ ಮಾಡುವುದು, ಲೇನ್ ಬದಲಾಯಿಸುವುದು, ಅಜಾಗರೂಕತೆ ಚಾಲನೆಗಳು ಭಾರತದ ಡ್ರೈವಿಂಗ್ ಸರಾಸರಿಯಲ್ಲಿ ಗರಿಷ್ಠ ಸ್ಕೋರ್ ಪಡೆದಿದೆ. ಹೀಗೆ ಅಡ್ಡಾದಿಡ್ಡಿ ಚಾಲನೆಯಲ್ಲಿ ಭಾರತ 87 ರಿಂದ 91 ಸ್ಕೋರ್ ಪಡೆದಿದೆ. ಈ ಮೂಲಕ ಪ್ರತಿ ರಸ್ತೆಯಲ್ಲಿ 10 ವಾಹನಗಳಿದ್ದರೆ 5 ಕ್ಕಿಂಚ ಹೆಚ್ಚು ವಾಹನ ಇದರಲ್ಲಿ ಯಾವುದಾದರು ಒಂದು ತಪ್ಪು ಮಾಡುತ್ತಾರೆ ಅನ್ನೋದು ಸಮೀಕ್ಷಾ ವರದಿಯಲ್ಲಿ ಉಲ್ಲೇಖಿಸಿದೆ.

ರಸ್ತೆ ಅಪತಾದಲ್ಲಿ ಮೃತಪಡುತ್ತಿರುವವ ಪೈಕಿ ಶೇಕಡಾ 50ರಷ್ಟು ದ್ವಿಚಕ್ರ ವಾಹನಗಳಿಂದ ಎಂದು ಅಂಕಿ ಅಂಶ ಹೇಳುತ್ತಿದೆ. ವಾಹನ ಡಿಕ್ಕಿಯಾಗಿ ಮೃತಪಡುತ್ತಿರುವ ಪಾದಾಚಾರಿಗಳ ಸಂಖ್ಯೆ ಶೇಕಡಾ 19 . ಇನ್ನು ಮಳೆಗಾಲ ಆಗಲಿ, ಚಳಿಗಾಲ ಇರಲಿ ಭಾರತದ ವಾಹನ ಚಾಲಕರ ಡ್ರೈವಿಂಗ್‌ನಲ್ಲಿ ಹೆಚ್ಚಿನ ಬದಲಾವಣೆ ಎಲ್ಲ ಎಂದು ಅಂಕಿ ಅಂಶ ಹೇಳುತ್ತಿದೆ.

Honda Activa: 20 ಸಾವಿರ ರೂ.ಯಲ್ಲಿ ಮನೆಗೆ ತನ್ನಿ ನಿಮಿಷ್ಟದ ಹೋಂಡಾ ಆಕ್ಟಿವಾ ಸ್ಕೂಟಿ

Mahmad Rafik — Sun, 26 Jul 2026 09:16:49 +0530

ಭಾರತದ ಜನಪ್ರಿಯ ಸ್ಕೂಟರ್ ಹೋಂಡಾ ಆಕ್ಟಿವ್ ಅನ್ನು ಕೇವಲ 20,000 ರೂಪಾಯಿ ಡೌನ್‌ಪೇಮೆಂಟ್ ಪಾವತಿಸಿ ಖರೀದಿಸಬಹುದಾಗಿದೆ. ಉಳಿದ ಮೊತ್ತವನ್ನು ಸುಲಭ ಮಾಸಿಕ ಕಂತುಗಳಲ್ಲಿ (EMI) ಪಾವತಿಸುವ ಮೂಲಕ ಹೊಸ ಸ್ಕೂಟರ್ ಅನ್ನು ಮನೆಗೆ ತರಬಹುದು.

ಅತ್ಯಂತ ಸ್ಟ್ರಾಂಗ್, ಬಜೆಟ್‌ ಫ್ರೆಂಡ್ಲಿ ಮತ್ತು ಆಕರ್ಷಕ ಸ್ಕೂಟಿ ಖರೀದಿಸಲು ಪ್ಲಾನ್ ಮಾಡುತ್ತಿದ್ದೀರಾ? ಹಾಗಿದ್ರೆ ಹೋಂಡಾ ಆಕ್ಟಿವ್ ಒಳ್ಳೆಯ ಆಯ್ಕೆಯಾಗಬಹುದು. ಭಾರತದ ಮಾರುಕಟ್ಟೆಯಲ್ಲಿ ಹೋಂಡಾ ಆಕ್ಟಿವ್ ತನ್ನದೇ ಆದ ಜನಪ್ರಿಯತೆಯನ್ನು ಹೊಂದಿದ್ದು, ಬಹುತೇಕರ ನೆಚ್ಚಿನ ಆಯ್ಕೆಗಳಲ್ಲಿ ಒಂದಾಗಿದೆ.

ಸ್ಕೂಟಿ ಖರೀದಿಸಲು ಪ್ಲಾನ್ ಮಾಡುತ್ತಿರೋರಿಗೆ ಒಳ್ಳೆಯ ಸುದ್ದಿಯೊಂದು ಬಂದಿದೆ. ಸ್ಕೂಟಿಯ ಒಟ್ಟು ಮೊತ್ತವನ್ನು ಏಕಕಾಲದಲ್ಲಿ ಪಾವತಿಸಬೇಕಾಗಿಲ್ಲ. ಕೇವಲ 20 ಸಾವಿರ ರೂಪಾಯಿ ಡೌನ್‌ಪೇಮೆಂಟ್ ಮೂಲಕ ಸ್ಕೂಟಿಯನ್ನು ಮನೆಗೆ ತೆಗೆದುಕೊಂಡು ಹೋಗಬಹುದಾಗಿದೆ.

ಹೋಂಡಾ ಆಕ್ಟಿವ್ ಲೇಟೆಸ್ಟ್ ಮಾಡೆಲ್ ಎಕ್ಸ್ ಶೋರೂಂ ಬೆಲೆ ಸುಮಾರು 76,000 ರೂ. ಆರಂಭಗೊಂಡು 91,000 ರೂ.ವರೆಗೆ ಇದೆ. ಆರ್‌ಟಿಒ, ವಿಮೆ ಬಳಿಕ ಆನ್-ರೋಡ್ ಬೆಲೆ 90 ರಿಂದ 98 ಸಾವಿರ ರೂಪಾಯಿ ಆಗುತ್ತದೆ. ಆನ್‌-ರೋಡ್ ಬೆಲೆ ನಗರದಿಂದ ನಗರಕ್ಕೆ ಬದಲಾಗುತ್ತಿರುತ್ತದೆ.

ಸದ್ಯ ಕಂಪನಿ ಸ್ಟ್ಯಾಂಡರ್ಡ್, ಡಿಲಕ್ಸ್ ಮತ್ತು ಹೆಚ್-ಸ್ಮಾರ್ಟ್ ಸೇರಿದಂತೆ ಹಲವು ವೇರಿಯಂಟ್‌ಗಳನ್ನು ನೀಡುತ್ತಿದೆ. ಬಜೆಟ್‌ನಲ್ಲಿ ಸ್ಕೂಟಿ ಖರೀದಿಗೆ ಯೋಚಿಸುತ್ತಿದ್ದರೆ ಡೌನ್ ಪೇಮೆಂಟ್ ಮಾಡಿ, ನಂತರದ ದಿನಗಳಲ್ಲಿ ಹಂತ ಹಂತವಾಗಿ EMI ಪಾವತಿಸಬಹುದು. ಹಾಗಾದ್ರೆ ಇಎಂಐ ಎಷ್ಟಾಗಬಹುದು ಎಂದು ನೋಡೋಣ ಬನ್ನ

ಶೋ ರೂಂನಲ್ಲಿ ₹20,000 ಡೌನ್ ಪೇಮೆಂಟ್ ಮಾಡಿದರೆ, ಉಳಿದ ಮೊತ್ತ ₹70,000 ರಿಂದ ₹75,000 ವರೆಗೆ ಬ್ಯಾಂಕ್ ಹಣಕಾಸು ಒದಗಿಸುತ್ತದೆ. ಬ್ಯಾಂಕುಗಳು ಸಾಮಾನ್ಯವಾಗಿ ವಾರ್ಷಿಕ 9.5% ರಿಂದ 10.5% ಬಡ್ಡಿದರದಲ್ಲಿ ದ್ವಿಚಕ್ರ ವಾಹನ ಸಾಲವನ್ನು ನೀಡುತ್ತವೆ. ಉದಾಹರಣೆಗೆ 3 ವರ್ಷಗಳ (36 ತಿಂಗಳು) ಸಾಲದ ಅವಧಿಯನ್ನು ಆಯ್ಕೆ ಮಾಡಿಕೊಂಡರೆ ನಿಮ್ಮ ಮಾಸಿಕ ಕಂತು (EMI) ಸುಮಾರು ₹2,400 ರಿಂದ ₹2,700 ಆಗಿರುತ್ತದೆ. ನೀವು ದಿನಕ್ಕೆ ₹80 ರಿಂದ ₹90 ಮಾತ್ರ ಉಳಿಸಿ ಹೊಸ ಆಕ್ಟಿವಾವನ್ನು ಹೊಂದಬಹುದು.

ಯಾವುದೇ ಕ್ಲೇಮ್ ಮಾಡದಿದ್ದರೆ ಇನ್ಶೂರೆನ್ಸ್‌ನಲ್ಲಿ ಸಿಗುತ್ತೆ ಶೇ 50ರಷ್ಟು ಡಿಸ್ಕೌಂಟ್, ಏನಿದು NCB?

Chethan Kumar — Sat, 16 May 2026 16:33:09 +0530

ನೀವು ವಾಹನ ವಿಮೆ ಮಾಡುವಾಗ ಎನ್‌ಸಿಬಿ ಲಾಭ ಪಡೆದಿದ್ದೀರಾ? NCB ಮೂಲಕ ನಿಮ್ಮ ಪ್ರಿಮಿಯಂ ಮೊತ್ತದಲ್ಲಿ ಶೇಕಡಾ 50ರಷ್ಟು ಡಿಸ್ಕೌಂಟ್ ಪಡೆಯಬಹುದು. ಇದರಿಂದ ವಿಮೆ ಪ್ರೀಮಿಯಂ ಮೊತ್ತ ಗಣನೀಯವಾಗಿ ಕಡಿಮೆಯಾಗುತ್ತದೆ.

ವಾಹನಗಳ ವಿಮೆ ಮಾಡಿಸುವಾಗ ಜಾಗರೂಕರಾಗಿರಬೇಕು. ಕೆಲ ವಿಚಾರಗಳಲ್ಲಿ ಮೋಸ ಹೋಗುವುದೇ ಹೆಚ್ಚು. ವಿಶೇಷವಾಗಿ ಇನ್ಶೂರೆನ್ಸ್ ರಿನೀವಲ್ ಮಾಡುವಾಗ ಎನ್‌ಸಿಬಿ ಪ್ರಮುಖ ಪಾತ್ರ ನಿರ್ವಹಿಸುತ್ತದೆ. ಹಲವರು ವಾಹನಗಳ ವಿಮೆಯಲ್ಲಿ ಯಾವುದೇ ಕ್ಲೇಮ್ ಮಾಡಿರುವುದಿಲ್ಲ. ಇಂತಹವರು ಗರಿಷ್ಠ ಅಂದರೆ ಶೇಕಡಾ 50ರಷ್ಟು ಎನ್‌ಸಿಬಿ ಪಡೆಯಲು ಸಾಧ್ಯವಿದೆ.

ವಾಹನ ಇನ್ಶೂರೆನ್ಸ್ ಪ್ರೀಮಿಯಂನಲ್ಲಿ ದೊಡ್ಡ ಮೊತ್ತ ಉಳಿತಾಯ ಮಾಡಲು 'ನೋ ಕ್ಲೇಮ್ ಬೋನಸ್ (NCB) ಒಂದು ಸೂಪರ್ ಐಡಿಯಾ. ಇನ್ಶೂರೆನ್ಸ್ ಪಾಲಿಸಿ ಅವಧಿಯಲ್ಲಿ ಯಾವುದೇ ಅಪಘಾತ ಅಥವಾ ಡ್ಯಾಮೇಜ್‌ಗೆ ನೀವು ಕ್ಲೇಮ್ ಮಾಡಿಲ್ಲ ಅಂದ್ರೆ, ಇನ್ಶೂರೆನ್ಸ್ ಕಂಪನಿಗಳು ಪಾಲಿಸಿದಾರರಿಗೆ ಒಂದು ರಿವಾರ್ಡ್ ಕೊಡುತ್ತವೆ. ಇದೇ ನೋ ಕ್ಲೇಮ್ ಬೋನಸ್. ಇದರ ಲಾಭವನ್ನು ಸರಿಯಾಗಿ ಪಡೆದುಕೊಂಡರೆ, ಇನ್ಶೂರೆನ್ಸ್ ಪ್ರೀಮಿಯಂ ಅನ್ನು ಅರ್ಧದಷ್ಟು ಕಡಿಮೆ ಮಾಡಬಹುದು.

ಇನ್ಶೂರೆನ್ಸ್ ರಿನ್ಯೂ ಮಾಡುವಾಗ 'ಓನ್ ಡ್ಯಾಮೇಜ್' (ನಿಮ್ಮ ಸ್ವಂತ ವಾಹನಕ್ಕಾಗುವ ಹಾನಿ) ಪ್ರೀಮಿಯಂ ಮೇಲೆ ಸಿಗುವ ಡಿಸ್ಕೌಂಟ್ ಇದು. ಮೊದಲ ವರ್ಷ ನೀವು ಯಾವುದೇ ಕ್ಲೇಮ್ ಮಾಡಿಲ್ಲ ಅಂದ್ರೆ, ಪ್ರೀಮಿಯಂನಲ್ಲಿ 20% ರಿಯಾಯಿತಿ ಸಿಗುತ್ತದೆ. ಇದೇ ರೀತಿ ಸತತ ಐದು ವರ್ಷ ಕ್ಲೇಮ್ ಮಾಡದೆ ಪಾಲಿಸಿ ಮುಂದುವರಿಸಿದರೆ, ಈ ರಿಯಾಯಿತಿ 50% ವರೆಗೆ ಹೆಚ್ಚಾಗುತ್ತದೆ. ಉದಾಹರಣೆಗೆ, ನಿಮ್ಮ ಗಾಡಿಯ ಪ್ರೀಮಿಯಂ 35,000 ರೂಪಾಯಿ ಅಂದುಕೊಳ್ಳಿ. ಮೊದಲ ಕ್ಲೇಮ್-ಫ್ರೀ ವರ್ಷದ ನಂತರ ನಿಮಗೆ 7,000 ರೂಪಾಯಿ ಕಡಿಮೆ ಆಗುತ್ತದೆ. ಇದೇ ರೀತಿ ಐದು ವರ್ಷ ಕ್ಲೇಮ್ ಮಾಡದಿದ್ದರೆ ಬರೋಬ್ಬರಿ 17,500 ರೂಪಾಯಿ ಉಳಿಸಬಹುದು.

NCBಯ ಅತಿದೊಡ್ಡ ಪ್ಲಸ್ ಪಾಯಿಂಟ್ ಅಂದ್ರೆ, ಇದು ಗಾಡಿಗಲ್ಲ, ಅದರ ಮಾಲೀಕರಿಗೆ ಸಿಗೋದು. ಹಾಗಾಗಿ, ನೀವು ಹಳೆ ಕಾರ್ ಮಾರುವಾಗ ಅಥವಾ ಹೊಸ ಕಾರ್ ಕೊಂಡುಕೊಳ್ಳುವಾಗ ನಿಮ್ಮ ಬೋನಸ್ ಅನ್ನು ಹೊಸ ಗಾಡಿಗೆ ವರ್ಗಾಯಿಸಬಹುದು. ಅಷ್ಟೇ ಅಲ್ಲ, ನೀವು ಇನ್ಶೂರೆನ್ಸ್ ಕಂಪನಿ ಬದಲಾಯಿಸಿದರೂ ಈ ಬೋನಸ್ ನಿಮ್ಮ ಕೈತಪ್ಪಿ ಹೋಗಲ್ಲ.

ಸಣ್ಣ ಮೊತ್ತದ ರಿಪೇರಿ ಖರ್ಚುಗಳಿಗೆಲ್ಲಾ ಇನ್ಶೂರೆನ್ಸ್ ಕ್ಲೇಮ್ ಮಾಡಿದರೆ, ದೀರ್ಘಾವಧಿಯಲ್ಲಿ ನಿಮಗೆ ನಷ್ಟವೇ ಹೆಚ್ಚು. ಯಾಕಂದ್ರೆ, ಸಣ್ಣ ಕ್ಲೇಮ್‌ನಿಂದಾಗಿ ನೀವು ದೊಡ್ಡ ಮೊತ್ತದ NCB ಕಳೆದುಕೊಳ್ಳಬೇಕಾಗಬಹುದು.ಹಳೆ ಗಾಡಿ ಮಾರುವಾಗ, ಆ ಮಾಹಿತಿಯನ್ನು ನಿಮ್ಮ ಇನ್ಶೂರೆನ್ಸ್ ಕಂಪನಿಗೆ ತಿಳಿಸಿ 'NCB ರಿಟೆನ್ಷನ್ ಸರ್ಟಿಫಿಕೇಟ್' ಪಡೆದುಕೊಳ್ಳಬೇಕು. ನಿಮ್ಮ NCB ಲಾಭವು ಗಾಡಿ ಖರೀದಿಸಿದವರಿಗೆ ಸಿಗುವುದಿಲ್ಲ. ಅದನ್ನು ನೀವು ಹೊಸ ಗಾಡಿ ಖರೀದಿಸುವಾಗ ಬಳಸಿಕೊಳ್ಳಬಹುದು.

ಇನ್ಶೂರೆನ್ಸ್ ಅವಧಿ ಮುಗಿದ 90 ದಿನಗಳ ಒಳಗೆ ಅದನ್ನು ರಿನ್ಯೂ ಮಾಡಿಲ್ಲ ಅಂದ್ರೆ, ನೀವು ಕಷ್ಟಪಟ್ಟು ಗಳಿಸಿದ NCB ಪೂರ್ತಿಯಾಗಿ ಲ್ಯಾಪ್ಸ್ ಆಗುತ್ತದೆ. ಒಂದು ವೇಳೆ ಗಾಡಿ ಕಳ್ಳತನವಾಗಿ, ನೀವು ಪಾಲಿಸಿ ಹಣವನ್ನು ಕ್ಲೇಮ್ ಮಾಡಿದರೆ, ನಿಮ್ಮ NCB ಸೊನ್ನೆ ಆಗುತ್ತದೆ. ಇನ್ನು IDV ಅಂದ್ರೆ ನಿಮ್ಮ ವಾಹನದ ಮಾರುಕಟ್ಟೆ ಮೌಲ್ಯ. NCBಯಿಂದ ಗಾಡಿಯ ಬೆಲೆ ಕಮ್ಮಿ ಆಗಲ್ಲ, ಬದಲಿಗೆ ನೀವು ಕಟ್ಟಬೇಕಾದ ಇನ್ಶೂರೆನ್ಸ್ ಪ್ರೀಮಿಯಂ ಮಾತ್ರ ಕಡಿಮೆಯಾಗುತ್ತದೆ

ಬೆಂಗಳೂರಲ್ಲಿ ಒಂದೇ ದಿನ 13,000 ಎಲೆಕ್ಟ್ರಿಕ್ ವಾಹನ ನೋಂದಣಿ, ಎಲ್ಲರೂ ಇವಿ ಖರೀದಿಗೆ ಇದೆ ಕಾರಣ

Chethan Kumar — Sat, 04 Apr 2026 15:36:22 +0530

ಬೆಂಗಳೂರಲ್ಲಿ ಒಂದೇ ದಿನ 13,000 ಎಲೆಕ್ಟ್ರಿಕ್ ವಾಹನ ನೋಂದಣಿ, ಎಲ್ಲರೂ ಇವಿ ಖರೀದಿಗೆ ಇದೆ ಕಾರಣ, ಇದು ಅತ್ಯಧಿಕ ದಾಖಲೆಯಾಗಿದೆ. ಅಷ್ಟಕ್ಕೂ ಬೆಂಗಳೂರಲ್ಲಿ ಇವಿ ಖರೀದಿ ಹೆಚ್ಚಾಗಲು ಕಾರಣವೇನು?

ಕರ್ನಾಟಕದಲ್ಲಿ ಎಲೆಕ್ಟ್ರಿಕ್ ವಾಹನಗಳ ಬಳಕೆ ತುಸು ಹೆಚ್ಚಿದೆ. ಆದರೆ ಇತ್ತೀಚಿನ ದಿನಗಳಲ್ಲಿ ಬೆಂಗಳೂರು ಸೇರಿದಂತೆ ಕರ್ನಾಟಕದಲ್ಲಿ ಭಾರಿ ಬದಲಾವಣೆ ಕಾಣುತ್ತಿದೆ. ವಿಶೇಷ ಅಂದರೆ ಒಂದೇ ದಿನ ಬೆಂಗಳೂರಿನಲ್ಲಿ ಬರೋಬ್ಬರಿ 13 ಸಾವಿರ ಎಲೆಕ್ಟ್ರಿಕ್ ವಾಹನಗಳು ರಿಜಿಸ್ಟ್ರೇಶನ್ ಆಗಿದೆ. ಈ ಮೂಲಕ ಹೊಸ ದಾಖಲೆ ಬರೆದಿದೆ. ಅಷ್ಟಕ್ಕೂ ಜನರು ದಿಢೀರ್ ಇವಿ ವಾಹನ ಮೊರೆ ಹೋಗಲು ಎರಡು ಕಾರಣಗಳಿವೆ.

ಮಾರ್ಚ್ 31ರಂದು ಬೆಂಗಳೂರಿನಲ್ಲಿ 13 ಸಾವಿರ ಇವಿ ವಾಹನಗಳು ನೋಂದಣಿಯಾಗಿದೆ. 11 ವಿವಿಧ ಆರ್‌ಟಿಒ ಕಚೇರಿಗಳಲ್ಲಿ ಈ ವಾಹನಗಳು ರಿಜಿಸ್ಟ್ರೇಶನ್ ಆಗಿದೆ. ಈ ಪೈಕಿ ಹೆಚ್ಚಿನ ವಾಹನಗಳು ದ್ವಿಚಕ್ರವಾಹನಗಳಾಗಿದೆ. ಇನ್ನು ಕೈಗೆಟುಕುವ ದರದ ಕಾರು ಸೇರಿದಂತೆ ಇತರ ಇವಿ ವಾಹನಗಳು ಸೇರಿದೆ.

ಬೆಂಗಳೂರಲ್ಲಿ ಪ್ರತಿ ದಿನ ನೋಂದಣಿಯಾಗುತ್ತಿರುವ ಇವಿ ವಾಹನಗಳ ಸಂಖ್ಯೆಯಲ್ಲಿ ಶೇಕಡಾ 400ರಷ್ಟು ಏರಿಕೆಯಾಗಿದೆ. 2026ರಲ್ಲಿ ಬೆಂಗಳೂರಲ್ಲಿ ಪ್ರತಿ ದಿನ ಸರಾಸರಿ 267 ಎಲೆಕ್ಟ್ರಿಕ್ ವಾಹನಗಳು ರಿಜಿಸ್ಟ್ರೇಶನ್ ಆಗುತ್ತಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇಕಡಾ 400ರಷ್ಟು ಏರಿಕೆಯಾಗಿದೆ.

ತೆರಿಗೆ ಸೌಲಭ್ಯದ ಕಾರಣ ಮಾರ್ಚ್ 31ರಂದು ಹಲವರ ಇವಿ ವಾಹನ ರಿಡಿಸ್ಟ್ರೇಶನ್ ಆಗಿದೆ. ಎಪ್ರಿಲ್ 1, 2026ರಿಂದ ಎಲೆಕ್ಟ್ರಿಕ್ ವಾಹನಗಳಿಗೆ ಹೊಸ ತೆರೆಗೆ ನೀತಿ ಅನ್ವಯವಾಗಲಿದೆ. ಹೀಗಾಗಿ ಮಾರ್ಚ್ 31ಕ್ಕೆ ಹಳೇ ತೆರಿಗೆ ನಿಯಮದಡಿ ವಾಹನ ಖರೀದಿಸಿ ಲಾಭ ಮಾಡಿಕೊಳ್ಳಲು ಜನರು ಮುಗಿಬಿದಿದ್ದರು.

ಯುದ್ಧದಿಂದ ಪೆಟ್ರೋಲ್, ಡೀಸೆಲ್, ಗ್ಯಾಸ್ ಸೇರಿದಂತೆ ಪ್ರಮುಖ ವಸ್ತುಗಳ ಪೂರೈಕೆಯಲ್ಲಿ ವ್ಯತ್ಯಯವಾಗುತ್ತಿದೆ. ಇದರಿಂದ ಬೆಲೆ ಏರಿಕೆ, ಕೊರತೆ ಸಮಸ್ಯೆಗಳು ಎದುರಾಗಿದೆ. ಇದರ ಬೆನ್ನಲ್ಲೇ ಹಲವರು ಎಲೆಕ್ಟ್ರಿಕ್ ವಾಹನಗಳತ್ತ ವಾಲಿದ್ದಾರೆ. ಸುಲಭ ಹಾಗೂ ಕಡಿಮೆ ನಿರ್ವಹಣೆ ವೆಚ್ಚದತ್ತ ಜನ ಆಕರ್ಷಿತರಾಗುತ್ತಿದ್ದಾರೆ.

ಕರ್ನಾಟಕದಲ್ಲಿ ಇವಿ ನೋಂದಣಿಯಲ್ಲಿ ದಾಖಲೆ ನಿರ್ಮಾಣವಾಗಿದೆ. 2026ರ ಜನವರಿ ತಿಂಗಳಿನಿಂದ ಮಾರ್ಚ್ ಅಂತ್ಯದವರೆಗೆ ಕರ್ನಾಟಕದಲ್ಲಿ 54,379 ಎಲೆಕ್ಟ್ರಿಕ್ ವಾಹನಗಳು ನೋಂದಣಿಯಾಗಿದೆ. ಕಳೆದ ವರ್ಷ ಇದೇ ಮೂರು ತಿಂಗಳಲ್ಲಿ ಕರ್ನಾಟಕದಲ್ಲಿ 35,000 ಎಲೆಕ್ಟ್ರಿಕ್ ವಾಹನಗಳು ನೋಂದಣಿಯಾಗಿತ್ತು.

50 ಸಾವಿರ ಇವಿ ನೋಂದಣಿ

ಕೇಂದ್ರ ಸರ್ಕಾರದಿಂದ ಗುಡ್ ನ್ಯೂಸ್, ವಾಹನ ಮಾಲೀಕರ ತಲೆನೋವು ತಪ್ಪಿಸಲು ಮಹತ್ವದ ನಿರ್ಧಾರ

Chethan Kumar — Tue, 28 Jul 2026 18:34:01 +0530

ನವದೆಹಲಿ (ಜು.28) ಭಾರತದ ವಾಹನ ಮಾಲೀಕರು ಪ್ರಮುಖವಾಗಿ ಕಾರು ಹಾಗೂ ದ್ವಿಚಕ್ರ ವಾಹನ ಮಾಲೀಕರಿಗೆ ಗುಡ್ ನ್ಯೂಸ್. ಕೇಂದ್ರ ರಸ್ತೆ ಸಾರಿಗೆ ಸಚಿವಾಲಯ ಮಹತ್ವದ ನಿರ್ಧಾರ ತೆಗೆದುಕೊಂಡಿದೆ. ವಾಹನಗಳ ಮಾಲಿನ್ಯ ನಿಯಂತ್ರಣ ಪ್ರಮಾಣ ಪತ್ರ (PUCC ) ಮಾನ್ಯತೆಯನ್ನು ವಿಸ್ತರಿಸಲು ಸಜ್ಜಾಗಿದೆ. ಸದ್ಯ ಒಂದು ವರ್ಷ ಅವಧಿಗೆ ನೀಡಲಾಗುತ್ತದೆ. ಇದನ್ನು ಇನ್ನು ಮುಂದೆ ಮೂರು ವರ್ಷ ಅವಧಿಗೆ ನೀಡಲು ಕೇಂದ್ರ ಸಚಿವಾಲಯ ಮುಂದಾಗಿದೆ. ಈ ಕುರಿತ ಪ್ರಸ್ತಾವನೆ ರೆಡಿಯಾಗಿದ್ದು ಶೀಘ್ರದಲ್ಲೇ ಅನುಮೋದನೆ ಸಿಗಲಿದೆ.

ಹೊಸ ನಿಯಮವೇನು?

ಕೇಂದ್ರ ರಸ್ತೆ ಸಾರಿಗೆ ಹಾಗೂ ಹೆದ್ದಾರಿ ಸಚಿವಾಲಯದ ಕರಡು ಪ್ರಸ್ತಾವನೆಯಲ್ಲಿ ಬಿಎಸ್‌6 ವಾಹನಗಳ ಎಮಿಶನ್ ಟೆಸ್ಟ್ ಮಾನ್ಯತೆ ಅವಧಿಯನ್ನು ಒಂದು ವರ್ಷದಿಂದ ಮೂರು ವರ್ಷಕ್ಕೆ ವಿಸ್ತರಣೆ ಮಾಡಲು ಮುಂದಾಗಿದೆ. ಈ ನಿಯಮ ಬಿಎಸ್6 ಎಮಿಶನ್ ವಾಹನಗಳಿಗೆ ಮಾತ್ರ ಅನ್ವಯವಾಗಲಿದೆ. ಬಿಎಸ್6ಗಿಂತ ಹಿಂದಿನ ವಾಹನಗಳಿಗೆ ಅನ್ವಯವಾಗುವುದಿಲ್ಲ. ಖಾಸಗಿ ಕಾರು ಹಾಗೂ ದ್ವಿಚಕ್ರ ವಾಹನಗಳ ಮಾಲೀಕರು ಪ್ರತಿ ವರ್ಷ ಎಮಿಶನ್ ಟೆಸ್ಟ್ ಅಥವಾ PUCC ಸರ್ಟಿಫಿಕೇಟ್ ಮಾಡಿಸಬೇಕು. ಇದೀಗ ಮೂರು ವರ್ಷವರೆಗೆ ಮಾನ್ಯತೆ ವಿಸ್ತರಿಸಲಾಗುತ್ತಿದೆ. ಇದರಿಂದ ಹೊಸ ವಾಹನಗಳ ಮಾಲೀಕರು ವರ್ಷ ವರ್ಷ ಮಾಲಿನ್ಯ ನಿಯಂತ್ರಕ ಸರ್ಟಿಫಿಕೇಟ್ ಮಾಡಲು ಪದೇ ಪದೇ ತೆರಳುವ ಕಿರಿಕಿರಿ ತಪ್ಪಲಿದೆ.

ಯಾವ ವಾಹನಗಳಿಗೆ pucc ಎಷ್ಟು ವರ್ಷದ ಮಾನ್ಯತೆ?

ಹೊಸ ಪ್ರಸ್ತಾವನೆ ಪ್ರಕಾರ ಬಿಎಸ್ 6 ವಾಹನಗಳಲ್ಲೂ ಅದರ ವರ್ಷದ ಆಧಾರದಲ್ಲಿ ವಿಂಗಡನೆ ಮಾಡಲಾಗಿದೆ. ವಾಹನಗಳ ವರ್ಷಗಳ ಆದಾರದಲ್ಲಿ ಮಾನ್ಯತೆಯೂ ಬೇರೆ ಬೇರೆಯಾಗಲಿದೆ.
6 ವರ್ಷದೊಳಗಿನ ವಾಹನಗಳು: ಪ್ರತಿ 3 ವರ್ಷಕ್ಕೊಮ್ಮೆ ಪಿಯುಸಿ ಸರ್ಟಿಫಿಕೇಟ್ ನವೀಕರಣ ಮಾಡಬೇಕು
6 ರಿಂದ 10 ವರ್ಷದೊಳಗಿನ ವಾಹನಗಳು: ಪ್ರತಿ ವರ್ಷ ಪಿಯುಸಿ ಸರ್ಟಿಫಿಕೇಟ್ ನವೀಕರಿಸಬೇಕು
10 ವರ್ಷಕ್ಕಿಂತ ಹಳೇ ವಾಹನಗಳು: ಪ್ರತಿ 6 ತಿಂಗಳಿಗೊಮ್ಮೆ ಪಿಯುಸಿ ಸರ್ಟಿಫಿಕೇಟ್ ನವೀಕರಿಸಬೇಕು

ಬಿಎಸ್‌6 ಗಿಂತ ಹಳೆ ವಾಹನಗಳ ನಿಯಮವೇನು?

ಖಾಸಗಿ ಬಿಎಸ್‌6 ವಾಹನಗಳ ವರ್ಷದ ಅವಧಿ ಮೇಲೆ ಅವಧಿ ವಿಸ್ತರಣೆ ಸಿಗಲಿದೆ. ಇನ್ನು ಬಿಎಸ್6ಗಿಂತ ಹಾಗೂ ವಾಣಿಜ್ಯ ವಾಹನಗಳ ಪಿಯುಸಿಸಿ ಸರ್ಟಿಫಿಕೇಟ್‌ ಮಾನ್ಯತೆ ಕುರಿತು ವಿವರಣೆ ನೀಡಲಾಗಿದೆ. ಬಿಎಸ್6 ವಾಣಿಜ್ಯ ಅಥವಾ ಸಾರಿಗೆ ವಾಹನ ಆರಂಭಿಕ 6 ವರ್ಷದವರೆಗೆ ಪ್ರತಿ 2 ವರ್ಷಕ್ಕೊಮ್ಮೆ ಪಿಯುಸಿಸಿ ನವೀಕರಿಸಬೇಕು. ಇನ್ನು ಬಿಎಸ್4 ವಾಹನಗಳಿಗೆ ಸದ್ಯ ಇರುವ ನಿಯಮ ಅನ್ವಯವಾಗಲಿದೆ. ಪ್ರತಿ 6 ತಿಂಗಳಿಗೊಮ್ಮೆ ಪಿಯುಸಿಸಿ ನವೀಕರಿಸಬೇಕು. ಬಿಎಸ್-I, ಬಿಎಸ್-II ಮತ್ತು ಬಿಎಸ್-III ವಾಹನಗಳಿಗೆ ಪ್ರತಿ 3 ತಿಂಗಳಿಗೊಮ್ಮೆ ಪಿಯುಸಿಸಿ ಸರ್ಟಿಫಿಕೇಟ್ ನವೀಕರಿಸಬೇಕು.

ಪ್ರತಿ ದಿನ 25 ಕಿ.ಮಿ ಇವಿ ಯೂನಿಸೈಕಲ್‌ನಲ್ಲಿ ಬೆಂಗಳೂರಿಗನ ಪ್ರಯಾಣ, ಪೊಲೀಸ್ ತಡೆದಿದ್ದೇಕೆ?

Chethan Kumar — Sun, 10 May 2026 15:43:01 +0530

ಬೆಂಗಳೂರು (ಮೇ.10) ಬೆಂಗಳೂರಿನ ಟ್ರಾಫಿಕ್‌ನಲ್ಲಿ ಬೈಕ್, ಸ್ಕೂಟರ್ ಕೂಡ ದೊಡ್ಡದಾಗುತ್ತಿದೆ. ನುಗ್ಗಿಸಲು ಸ್ಥಳವೇ ಇಲ್ಲದಾಗಿದೆ. ಈ ಕಿರಿಕಿರಿ ತಪ್ಪಿಸಲು ಬೆಂಗಳೂರಲ್ಲಿ ಹಲವರು ಎಲೆಕ್ಟ್ರಿಕ್ ಯೂನಿಸೈಕಲ್ ಮೂಲಕ ಪ್ರಯಾಣ ಮಾಡುತ್ತಾರೆ. ಈ ಪೈಕಿ ಯುವಕನೊಬ್ಬ ಪ್ರತಿ ದಿನ ತನ್ನ ಮನೆಯಿಂದ ಕಚೇರಿ ಹಾಗೂ ಕಚೇರಿಯಿಂದ ಮನೆಗೆ ಇದೇ ಇವಿ ಯೂನಿಸೈಕಲ್ ಮೂಲಕ ಪ್ರಯಾಣ ಮಾಡುತ್ತಿದ್ದಾನೆ. ಅಚಾನಕ್ಕಾಗಿ ಬೆಂಗಳೂರಿನ ಟ್ರಾಫಿಕ್ ಪೊಲೀಸರು ಈತನ ನೋಡಿದ್ದೇ ತಡೆದಿದ್ದಾರೆ. ಬಳಿಕ ನಡೆದ ಘಟನೆಯನ್ನು ಈತ ವಿವರಿಸಿದ್ದಾನೆ.

ಬೆಂಗಳೂರು ಪೊಲೀಸರು ತಡೆದಿದ್ದೇಕೆ?

ಎಂದಿನಂತೆ ಆಫೀಸ್‌ನಿಂದ ಮರಳಿ ಬರುತ್ತಿದ್ದ ವೇಳೆ ಈತನ ಯೂನಿಸೈಕಲ್ ನೋಡಿ ಟ್ರಾಫಿಕ್ ಪೊಲೀಸರು ಅಚ್ಚರಿಗೊಂಡಿದ್ದಾರೆ. ತಕ್ಷಣವೇ ನಿಲ್ಲಿಸಲು ಸೂಚಿಸಿದ್ದಾರೆ. ಬಳಿಕ ಈ ಹೊಸ ಮಾದರಿ ಇವಿ ಸೈಕಲ್ ಕುರಿತು ಯುವಕನ ಬಳಿ ಕೇಳಿದ್ದಾರೆ. ಪೊಲೀಸರು ತಡೆದಾಗ, ದಂಡ ಹಾಕುತ್ತಾರೋ, ಅಥವಾ ಹಲವು ದಾಖಲೆಗಳಿಗಾಗಿ ಅಲೆದಾಡಬೇಕಾಗುತ್ತೋ ಅನ್ನೋ ಸಣ್ಣ ಆತಂಕ ಕಾಡಿದ್ದು ಸುಳ್ಳಲ್ಲ. ಆದರೆ ಪೊಲೀಸರು ನಿಲ್ಲಿಸಿ ಕೇಳಿದ್ದು, ಈ ಇವಿ ಯೂನಿಸೈಕಲ್ ಕುರಿತು. ಇದರ ಪ್ರಯಾಣ, ಪ್ರಯೋಜನ, ಸಾಧಕ ಬಾಧಕ ಕುರಿತು ಟ್ರಾಫಿಕ್ ಪೊಲೀಸರು ಮಾಹಿತಿ ಕೇಳಿದ್ದಾರೆ.

ಟ್ರಾಫಿಕ್ ಪೊಲೀಸರು ಪ್ರಶ್ನೆಗಳಿಗೆ ಯುವಕ ಉತ್ತರ ನೀಡಿದ್ದಾರೆ. ಇದು ಎಲೆಕ್ಟ್ರಿಕ್ ಯೂನಿಸೈಕಲ್. ಬೆಂಗಳೂರಿಂತ ಟ್ರಾಫಿಕ್ ಸಿಟಿಗಳಲ್ಲಿ ಈ ರೀತಿಯ ಯೂನಿಸೈಕಲ್ ಉಪಯೋಗವಾಗುತ್ತದೆ. ಟ್ರಾಫಿಕ್ ನಡುವೆ ಸಾಗಬಹುದು. ಪಾರ್ಕಿಂಗ್ ಸಮಸ್ಯೆಗೂ ಉದ್ಭವಿಸುವುದಿಲ್ಲ. ಬ್ಯಾಲೆನ್ಸ್ ಕಲಿತರೆ ಸಾಕು ಸುಲಭವಾಗಿ ಮನೆಯಿಂದ ಕಚೇರಿ ಸೇರಿದಂತೆ ಬೆಂಗಳೂರು ಓಡಾಟಕ್ಕೆ ಉಪಯುಕ್ತ ಅನ್ನೋ ಮಾಹಿತಿ ನೀಡಿದ್ದಾರೆ.

ಇವಿ ಯೂನಿಸೈಕಲ್ ರೈಡ್ ಮಾಡಿದ ಟ್ರಾಫಿಕ್ ಪೊಲೀಸ್

ಟ್ರಾಫಿಕ್ ಪೊಲೀಸರಿಗೆ ಮಾಹಿತಿ ನೀಡಿದ ಯುವಕ ನೀವು ಒಂದು ಬಾರಿ ರೈಡ್ ಟ್ರೈ ಮಾಡಿ ಎಂದು ಸೂಚಿಸಿದ್ದಾನೆ. ಇದರಂತೆ ಪೊಲೀಸ್ ಯೂನಿಸೈಕಲ್ ಹತ್ತಿ ಕೆಲ ದೂರ ಪ್ರಯತ್ನಸಿದ್ದಾರೆ. ಯುವಕನ ಸಹಾಯದೊಂದಿಗೆ ರೈಡ್ ಮಾಡಿದ್ದಾರೆ. ಮುಂದೇ ಬೆಂಗಳೂರು ಟ್ರಾಫಿಕ್ ಅತಿಯಾಗಿ ಪೊಲೀಸರು ಕೂಡ ಈ ರೀತಿಯ ವಾಹನ ಉಪಯೋಗಿಸಿದರೂ ಅಚ್ಚರಿಯಿಲ್ಲ ಎಂದು ಯುವಕ ಹೇಳಿದ್ದಾನೆ.

View this post on Instagram

A post shared by Jerome anand (@jro_thestreetrider)

ಟ್ರಾಫಿಕ್ ಪೊಲೀಸರು ತಮ್ಮ ಕುತೂಹಲಕ್ಕಾಗಿ ಯೂನಿಸೈಕಲ್ ತಡೆದು ಮಾಹಿತಿ ಪಡೆದಿದ್ದಾರೆ. ಯುವಕನ ಜೊತೆ ಫೋಟೋ ಕ್ಲಿಕ್ಕಿಸಿದ್ದಾರೆ. ಇದೀಗ ಬೆಂಗಳೂರಲ್ಲಿ ಇವಿ ಯೂನಿಸೈಕಲ್ ಟ್ರೆಂಡ್ ಆಗುತ್ತಿದೆ.

ಅಕ್ಟೋಬರ್ 2028ರಿಂದ ವಾಹನಗಳ ನಡುವೆ ವಿ2ವಿ ಕಡ್ಡಾಯ, ಏನಿದು ಕೇಂದ್ರ ಸರ್ಕಾರದ ಹೊಸ ನೀತಿ?

Chethan Kumar — Tue, 04 Aug 2026 19:06:00 +0530

ನವದೆಹಲಿ (ಆ.04) ಕೇಂದ್ರ ಬಿಜೆಪಿ ಸರ್ಕಾರ ವಾಹನಗಳ ನೀತಿ, ನಿಯಮಗಳಲ್ಲಿ ಹಲವು ಬದಲಾವಣೆ ತಂದಿದೆ. ವಾಹನಗಳಲ್ಲಿ ಹಲವು ಸುರಕ್ಷತಾ ಮಾನದಂಡಗಳನ್ನು ಜಾರಿಗೆ ತರಲಾಗಿದೆ. ಇದೀಗ ನಿತಿನ್ ಗಡ್ಕರಿ ನೇತೃತ್ವದ ಕೇಂದ್ರ ರಸ್ತೆ ಸಾರಿಗೆ ಹಾಗೂ ಹೆದ್ದಾರಿ ಸಚಿವಾಲಯ ಮತ್ತೊಂದು ಕಟ್ಟು ನಿಟ್ಟಿನ ನೀತಿ ಜಾರಿಗೆ ತರುತ್ತಿದೆ. ಅಕ್ಟೋಬರ್ 2028ರಿಂದ ಭಾರತದಲ್ಲಿ ಎಲ್ಲಾ ವಾಹನಗಳಲ್ಲಿ ವಿ2ವಿ ಕಡ್ಡಾಯ ಮಾಡಲಾಗಿದೆ. ಹೌದು, ಹೊಸ ವಾಹನಗಳಲ್ಲಿ ವಿ2ವಿ ಸಂಪರ್ಕ ಕಡ್ಡಾಯಗೊಳಿಸುವ ಕರಡು ಅಧಿಸೂಚನೆಯನ್ನು ಕೇಂದ್ರ ಸರ್ಕಾರ ಹೊರಡಿಸಿದೆ.

ಏನಿದು ವಾಹನಗಳ ವಿ2ವಿ ಸಂಪರ್ಕ?

ರಸ್ತೆ ಸುರಕ್ಷತೆಗೆ ಪ್ರಮುಖ ಆದ್ಯತೆ ನೀಡುವ ಸಲುವಾಗಿ ಹೊಸ ತಂತ್ರಜ್ಞಾನ ಬಳಕೆ ಮಾಡಲಾಗುತ್ತಿದೆ. ವಿ2ವಿ ಎಂದರೆ ವೆಹಿಕಲ್ ಟು ವೆಹಿಕಲ್. ವಾಹನಗಳ ನಡುವೆ ರಿಯಲ್ ಟೈಮ್‌ನಲ್ಲಿ ವೈಯರ್‌ಲೆಸ್ ಮಾಹಿತಿ ವಿನಿಮಯ ಮಾಡುವ ತಂತ್ರಜ್ಞಾನ. ಅಂದರೆ ರಸ್ತೆಯಲ್ಲಿ ಸಾಗುತ್ತಿರುವಾಗ ಪಕ್ಕದಲ್ಲಿ, ಎದುರಿನಲ್ಲಿ ಅಥವಾ ಹಿಂಬದಿಯಲ್ಲಿ ಅಥವಾ ಅಕ್ಕ ಪಕ್ಕದ ವಾಹನಗಳ ಮಾಹಿತಿಯನ್ನು ಸಿಗ್ನಲ್ ಮೂಲಕ ರವಾನಿಸುತ್ತದೆ. ಇತರ ವಾಹನದ ವೇಗ, ಸ್ಥಳ, ಸಾಗುತ್ತಿರುವ ದಿಕ್ಕು, ಬ್ರೇಕಿಂಗ್ ಮಾಹಿತಿ ಸೇರಿದಂತೆ ಎಲ್ಲಾ ಮಾಹಿತಿಗಳನ್ನು ಸಿಗ್ನಲ್ ಮೂಲಕ ನೀಡಲಿದೆ. ಇದರಿಂದ ಚಾಲಕನಿಗೆ ತನ್ನ ಆಸುಪಾಸಿನ ವಾಹನಗಳ ಮಾಹಿತಿ ತಿಳಿಯಲಿದೆ.

ಮುಂಚಿತವಾಗಿ ನೀಡಲಿದೆ ಎಚ್ಚರಿಕೆ ಸಿಗ್ನಲ್

ದೀರ್ಘ ತಿರುವು, ಬ್ಲಂಡ್ ಕರ್ವ್, ಸಿಗ್ನಲ್, ರಾಂಗ್ ಸೈಡ್‌ನಲ್ಲಿ ಬರವು ವಾಹನಗಳ ಕುರಿತು ವಿಟುವಿ ತಂತ್ರಜ್ಞಾನ ಸಿಗ್ನಲ್ ನೀಡಲಿದೆ. ವಿ2ವಿ ಕಮ್ಯೂನಿಕೇಶನ್ ಎಲ್ಲಾ ವಾಹನಗಳಲ್ಲಿ ಅಳವಡಿಸಲಾಗುತ್ತದೆ. ಈ ತಂತ್ರಜ್ಞಾನದಿಂದ ಚಾಲಕರಿಗೆ ಮುಂಚಿತವಾಗಿ ಎಚ್ಚರಿಕೆ ಸಿಗ್ನಲ್ ನೀಡಲಿದೆ. ಅಕ್ಟೋಬರಿ 2028ರಿಂದ ಭಾರತದಲ್ಲಿ ಉತ್ಪಾದನೆಯಾಗುವ ವಾಹನಗಳಲ್ಲಿ ವಿ2ವಿ ತಂತ್ರಜ್ಞಾನ ಕಡ್ಡಾಯವಾಗಿದೆ.

ಸದ್ಯ ಅಡಾಸ್ ಲೆವೆನ್ ತಂತ್ರಜ್ಞಾನಗಳು ಕಾರಿನಲ್ಲಿದೆ. ಸೆನ್ಸಾರ್ ಕ್ಯಾಮೆರಾ, ರೆಡಾರ್ ಸೆನ್ಸಾರ್‌ಗಳಿವೆ. ಆದರೆ ಈ ಎಲ್ಲಾ ತಂತ್ರಜ್ಞಾನಗಳು ತನ್ನ ನೋಟಕ್ಕೆ ಕಾಣುವ ವಾಹನಗಳ ಬಗ್ಗೆ ಸೂಚಿಸುತ್ತದೆ. ಆದರೆ ವಿ2ವಿ ತಂತ್ರಜ್ಞಾನ ಕಣ್ಣಿಗೆ ಕಾಣದ, ತಿರುವಿನಲ್ಲಿರುವ ವಾಹನಗಳ ಬಗ್ಗೆಯೂ ಸೂಚನೆ ನೀಡುತ್ತದೆ. ಹೆದ್ದಾರಿಯಲ್ಲಿ ವೇಗವಾಗಿ ಸಾಗುತ್ತಿರುವಾಗ ಎದುರಿನ ವಾಹನ ದಿಢೀರ್ ಬ್ರೇಕ್ ಹಾಕಿದರೆ ತಕ್ಷಣವೇ ಸಿಗ್ನಲ್ ನೀಡುತ್ತದೆ. ಆ್ಯಂಬುಲೆನ್ಸ್ ಸೇರಿದಂತೆ ತುರ್ತು ಸೇವಾ ವಾಹನಗಳ ಬರುತ್ತಿದ್ದರೆ ಮೊದಲೇ ಸಿಗ್ನಲ್ ನೀಡಲಿದೆ. ಇದರಿಂದ ರಸ್ತೆ ಸುರಕ್ಷತೆಗೆ ನೆರವಾಗಲಿದೆ.

ಎರಡು ಹಂತಗಳಲ್ಲಿ ವಾಹನಗಳಲ್ಲಿ ವಿ2ವಿ ಸಂಪರ್ಕ ಅಳವಡಿತೆಯಾಗಲಿದೆ. ಅಕ್ಟೋಬರ್ 1, 2027ರಿಂದ ಮೊದಲ ಹಂತದಲ್ಲಿ ಬೈಕ್ ಸ್ಕೂಟರ್ ಸೇರಿ ದ್ವಿಚಕ್ರ ವಾಹನ, ತ್ರಿಚಕ್ರ ವಾಹನ, ಕಾರು ಸೇರಿದಂತೆ ಪ್ಯಾಸೇಂಜರ್ ವಾಹನ, ಸರಕು ಸಾಗಾಣೆ ವಾಹನಗಳಲ್ಲಿ ವಿ2ವಿ ತಂತ್ರಜ್ಞಾನ ಅಳವಡಿಕೆಯಾಗಲಿದೆ. ಎರಡನೇ ಹಂತದಲ್ಲಿ ಎಲ್, ಎಂ, ಹಾಗೂ ಎನ್ ವಿಭಾಗದ ವಾಹನಗಳಲ್ಲಿ ಅಳವಡಿಕೆಯಾಗಲಿದೆ.

Mahindra Thar Facelift: ಹೊಸ ಲುಕ್, ಹೈ-ಟೆಕ್ ಫೀಚರ್‌ಗಳೊಂದಿಗೆ ರಸ್ತೆಗಿಳಿಯಲು ಸಜ್ಜಾದ ಹೊಸ ಥಾರ್

Mahmad Rafik — Sat, 08 Aug 2026 11:05:32 +0530

Mahindra Thar facelift: ವಾಹನಗಳ ನಿರ್ಮಾಣ ಕಂಪನಿಯಾಗಿರುವ ಮಹೀಂದ್ರಾ ಹಲವು ಸೆಗ್ಮೆಂಟ್‌ಗಳಲ್ಲಿ SUV ಮಾರಾಟ ಮಾಡುತ್ತಿದೆ. ಕೆಲವು ಮಾಧ್ಯಮಗಳ ವರದಿ ಪ್ರಕಾರ, ಶೀಘ್ರದಲ್ಲಿಯೇ ಭಾರತದ ಮಾರುಕಟ್ಟೆಗೆ Mahindra Tharನ್ನು ಬಿಡುಗಡೆ ಮಾಡಲಿದೆ. ಇದೇ ಅಗಸ್ಟ್ 14 ಅಥವಾ 15ರಂದು Mahindra Thar ಬರುವ ನಿರೀಕ್ಷೆಗಳಿವೆ. ಸದ್ಯ ಈ ಹೊಸ SUV ಟೆಸ್ಟಿಂಗ್ ನಡೆಯುತ್ತಿದೆ. ಟೆಸ್ಟಿಂಗ್ ವೇಳೆ SUV ಲುಕ್ ಹೊರ ಬಂದಿದೆ.

ಹಲವು ನವೀಕರಣಗಳೊಂದಿಗೆ ಎಂಟ್ರಿ ಸಾಧ್ಯತೆ

ವರದಿಗಳ ಪ್ರಕಾರ Mahindra Thar facelift ಫ್ರಂಟ್ ಮತ್ತು ರಿಯರ್ ಜೊತೆಯಲ್ಲಯೇ ಆಲಾಯ್ ವ್ಹೀಲ್ಸ್ ಅಪ್‌ಡೇಟ್ ಹೊಂದಿದೆ. ಈ ಮಹೀಂದ್ರಾ ಥಾರ್ ಅಪ್‌ಡೇಟೆಡ್ ಮೂರು ಡೋರ್‌ ಗಳನ್ನು ಹೊಂದಿರಲಿದೆ. ಇದರ ಜೊತೆಯಲ್ಲಿಯೇ ಇನ್ನೂ ಹಲವು ನವೀಕರಣಗಳೊಂದಿಗೆ ಎಸ್‌ಯುವಿ ಮಾರುಕಟ್ಟೆಯನ್ನು ಪ್ರವೇಶ ಮಾಡಲಿದೆ. ಯಾವೆಲ್ಲಾ ಅಪ್‌ಡೇಟ್‌ಗಳೊಂದಿಗೆ Mahindra Thar facelift ಬರಲಿದೆ ಎಂಬುದರ ಬಗ್ಗೆ ಯಾವುದೇ ಹೆಚ್ಚಿನ ಮಾಹಿತಿಗಳು ಹೊರ ಬಂದಿಲ್ಲ.

ಒಳಗಡೆ ಏನೆಲ್ಲಾ ಇರಬಹುದು?

ಫೇಸ್‌ಲಿಫ್ಟೆಡ್ ಮಹೀಂದ್ರಾ ಥಾರ್ SUV ಒಳಗಡೆ ADAS (Advanced Driver Assistance Systems) ಸೂಟ್, ಫ್ರಂಟ್ ಸೀಟ್‌ನಲ್ಲಿ ವೆಂಟಿಲೇಟರ್ ಕಂಟ್ರೋಲ್, ಡಿಜಿಟಲ್ ಬಣ್ಣದ ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ಸೇರಿದಂತೆ ಇನ್ನೂ ಹೆಚ್ಚಿನ ಸೌಲಭ್ಯಗಳನ್ನು ಒಳಗೊಂಡಿರಲಿದೆ ಎಂದು ಹೇಳಲಾಗುತ್ತಿದೆ. 2.0-ಲೀಟರ್ ಟರ್ಬೊ-ಪೆಟ್ರೋಲ್, 1.5-ಲೀಟರ್ ಡೀಸೆಲ್ ಮತ್ತು 2.2-ಲೀಟರ್ ಡೀಸೆಲ್ ಮೋಟಾರ್‌ ಒಳಗೊಂಡಿರುವ ಪವರ್‌ಟ್ರೇನ್‌ಗಳನ್ನು ಆರು-ಸ್ಪೀಡ್ ಮ್ಯಾನುವಲ್ ಮತ್ತು ಆಟೋಮ್ಯಾಟಿಕ್ ಟ್ರಾನ್ಸಿಮಿಷನ್ ಹೊಂದಿರುವ ನಿರೀಕ್ಷೆಗಳಿವೆ. ಇದರ ಜೊತೆಯಲ್ಲಿ 4x4 ಮತ್ತು RWD ಟ್ರಿಮ್‌ಗಳು ಸಹ ಆಫರ್‌ನಲ್ಲಿ ಲಭ್ಯವಿರುತ್ತವೆ ಎಂಬ ಮಾಹಿತಿ ಹರಿದಾಡುತ್ತಿದೆ.

ಹೊಸದಾದ ಫ್ರಂಟ್ ಗ್ರಿಲ್ ಮತ್ತು ಪ್ರೊಜೆಕ್ಟರ್ ಹೆಡ್‌ಲೈಟ್‌ಗಳು, ಸಿ-ಆಕಾರದ ಎಲ್ಇಡಿ ಡಿಆರ್‌ಎಲ್‌ಗಳು ಮತ್ತು ಎಲ್ಇಡಿ ಟೈಲ್ಲ್ಯಾಂಪ್‌ಗಳನ್ನು ಹೊಂದಿರಲಿದೆ ಎಂದು ವರದಿಯಾಗಿದೆ.

ಬೆಲೆ ಎಷ್ಟು?

ಎಕ್ಸ್ ಶೋರೂಂ ಬೆಲೆ Rs. 9.50 - 17.00 ಲಕ್ಷಗಳಾಗಿರಬಹುದು ಎಂದು ಅಂದಾಜಿಸಲಾಗಿದೆ.

ಪ್ರಶ್ನೆ: ಮಹೀಂದ್ರಾ ಥಾರ್ ಫೇಸ್‌ಲಿಫ್ಟ್‌ನ ನಿರೀಕ್ಷಿತ ಬೆಲೆ ಎಷ್ಟು?

ಮಹೀಂದ್ರಾ ಥಾರ್ ಫೇಸ್‌ಲಿಫ್ಟ್ ಬೆಲೆ ರೂ. 9.50 - 17.00 ಲಕ್ಷ ವ್ಯಾಪ್ತಿಯಲ್ಲಿರಬಹುದು ಎಂದು ನಿರೀಕ್ಷಿಸಲಾಗಿದೆ.

ಪ್ರಶ್ನೆ: ಮಹೀಂದ್ರಾ ಥಾರ್ ಫೇಸ್‌ಲಿಫ್ಟ್‌ನ ನಿರೀಕ್ಷಿತ ಬಿಡುಗಡೆ ದಿನಾಂಕ ಯಾವುದು?

ಮಹೀಂದ್ರಾ ಥಾರ್ ಫೇಸ್‌ಲಿಫ್ಟ್ ಆಗಸ್ಟ್ 2027 ರಲ್ಲಿ ಬಿಡುಗಡೆಯಾಗಲಿದೆ.

ಇದನ್ನೂ ಓದಿ: ಮಾರುತಿ ಬ್ರೆಜಾಗೆ ಪೈಪೋಟಿ, ಕಿಯಾ ಸೊನೆಟ್ ಕಾರು ಸೇರಿ ಕೆಲ ಕಾರುಗಳು 1 ಲಕ್ಷ ರೂ ಡಿಸ್ಕೌಂಟ್ ಆಫರ್

ಇದನ್ನು ಓದಿ: ಬೆಂಗಳೂರಿನಿಂದ ಮತ್ತೊಂದು ಎಲೆಕ್ಟ್ರಿಕ್ ಸ್ಕೂಟರ್ ಲಾಂಚ್, ಎಐ ಟೆಕ್ ಜೊತೆ 165 ಕಿ.ಮೀ ಮೈಲೇಜ್

ಪ್ರಸ್ತುತ ಇರುವ ಥಾರ್‌ಗೆ ಹೋಲಿಸಿದರೆ ಬೆಲೆ ಹೆಚ್ಚಾಗಲಿದೆಯೇ?

ಹೌದು, ಹೊಸ ಫೇಸ್‌ಲಿಫ್ಟ್‌ನಲ್ಲಿ ADAS (ಸುಧಾರಿತ ಚಾಲಕ ಸಹಾಯ ವ್ಯವಸ್ಥೆ), ವೆಂಟಿಲೇಟೆಡ್ ಸೀಟ್‌ಗಳು, ಹೊಸ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್, LED ಪ್ರೊಜೆಕ್ಟರ್ ಹೆಡ್‌ಲೈಟ್‌ಗಳು ಮತ್ತು C-ಆಕಾರದ DRL ನಂತಹ ಆಧುನಿಕ ಫೀಚರ್‌ಗಳನ್ನು ಸೇರಿಸುತ್ತಿರುವುದರಿಂದ, ಪ್ರಸ್ತುತ ಲಭ್ಯವಿರುವ ಥಾರ್ ಮಾದರಿಗಿಂತ ಸುಮಾರು ₹30,000 ದಿಂದ ₹60,000 ದಷ್ಟು ಬೆಲೆ ಏರಿಕೆಯಾಗುವ ಸಾಧ್ಯತೆಯಿದೆ.

ವಾಹನ ಮಾಲೀಕರೇ ಎಚ್ಚರ ಬೆಂಗಳೂರಲ್ಲಿ ಮತ್ತೆ ಟೋಯಿಂಗ್ ಆರಂಭ, ಈ ಬಾರಿ ದಂಡ ಎಷ್ಟು?

Chethan Kumar — Wed, 25 Mar 2026 08:15:59 +0530

ಬೆಂಗಳೂರು (ಮಾ.25) ಸಿಲಿಕಾನ್ ಸಿಟಿ ಬೆಂಗಳೂರಲ್ಲಿ ನೋ ಪಾರ್ಕಿಂಗ್ ಸ್ಥಳಗಳಲ್ಲಿ ವಾಹನ ನಿಲ್ಲಿಸಿದರೆ ಟೋಯಿಂಗ್ ಮಾಡುವ ಪದ್ಧತಿಗೆ ಕೆಲ ವರ್ಷಗಳ ಕಾಲ ಬ್ರೇಕ್ ಹಾಕಲಾಗಿತ್ತು. ಬೆಂಗಳೂರು ರಸ್ತೆಯ ಬದಿಗಳಲ್ಲಿ ಇದೀಗ ಹೆಚ್ಚು ವಾಹನಗಳು ಪಾರ್ಕಿಂಗ್ ಆಗುತ್ತಿದ್ದು, ಸಂಚಾರ ದಟ್ಟಣೆ ತೀವ್ರಗೊಳ್ಳುತ್ತಿದೆ. ಹೀಗಾಗಿ ಇದೀಗ ಬೆಂಗಳೂರು ಟ್ರಾಫಿಕ್ ಪೊಲೀಸರ ವಾಹನ ಟೋಯಿಂಗ್ ಮತ್ತೆ ಜಾರಿಗೆ ತಂದಿದ್ದಾರೆ. ನೋ ಪಾರ್ಕಿಂಗ್ ಸ್ಥಳಗಳಲ್ಲಿ, ಎಲ್ಲೆಂದರಲ್ಲಿ ವಾಹನ ನಿಲ್ಲಿಸುವವರಿಗೆ ಎಚ್ಚರಿಕೆ ನೀಡಲಾಗಿದೆ. ಮತ್ತೆ ಹಳೆ ಟೋಯಿಂಗ್ ಪದ್ಧತಿಯನ್ನು ಜಾರಿಗೆ ತರಲಾಗಿದೆ. ಆದರೆ ಈ ಬಾರಿ ದಂಡ ದುಬಾರಿಯಾಗಿದೆ. ರಾಜಧಾನಿ ಕೇಂದ್ರ ವಾಣಿಜ್ಯ ಪ್ರದೇಶ (CBD)ಯಲ್ಲಿ ಮತ್ತೆ ಟೋಯಿಂಗ್ ಕಾರ್ಯಾಚರಣೆ ಆರಂಭಗೊಳ್ಳುತ್ತಿದೆ.

ಇನ್ನೆರಡು ದಿನಗಳಲ್ಲಿ ಪ್ರಾಯೋಗಿಕವಾಗಿ ಟೋಯಿಂಗ್ ಆರಂಭ

ಇನ್ನೆರಡು ದಿನಗಳಲ್ಲಿ ಪ್ರಾಯೋಗಿಕವಾಗಿ ಟೋಯಿಂಗ್ ಕ್ರಮ ಆರಂಭಗೊಳ್ಳುತ್ತಿದೆ. ನಗರದ ಎಂ.ಜಿ. ರಸ್ತೆ, ವಿಧಾನಸೌಧ ಸುತ್ತಮುತ್ತ ಸೇರಿದಂತೆ ನೋ-ಪಾರ್ಕಿಂಗ್ ಪ್ರದೇಶಗಳಲ್ಲಿ ಟೋಯಿಂಗ್ ಕ್ರಮ ಜಾರಿಯಾಗುತ್ತಿದೆ. ಎಲೆ ದರಲ್ಲಿ ವಾಹನ ನಿಲ್ಲಿಸಿದರೆ ಇನ್ನು ಮುಂದೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗುತ್ತಿದೆ. ಸಂಚಾರ ಪೊಲೀಸರು ಮತ್ತು ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ಜಂಟಿಯಾಗಿ ಕಾರ್ಯಾಚರಣೆ ನಡೆಸಲಿದ್ದಾರೆ. ಮೊದಲ ಹಂತದಲ್ಲಿ ಕೇಂದ್ರ ಹಾಗೂ ಪಶ್ಚಿಮ ನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಟೋಯಿಂಗ್ ಕ್ರಮ ಜಾರಿಗೆ ಬರಲಿದೆ.

ದಂಡ ಮತ್ತು ಶುಲ್ಕದ ವಿವರ

ಈ ಬಾರಿ ನೋ ಪಾರ್ಕಿಂಗ್ ಅಥವಾ ಎಲ್ಲೆಂದರಲ್ಲಿ ವಾಹನ ಪಾರ್ಕಿಂಗ್ ಮಾಡಿದರೆ ದಂಡ ದುಬಾರಿಯಾಗಿದೆ. ವಾಹನ ನೋ ಪಾರ್ಕಿಂಗ್ ನಿಯಮ ಉಲ್ಲಂಘನೆ ಮಾಡಿದರೆ 500 ರೂಪಾಯಿ ದಂಡ ವಿಧಿಸಲಾಗುತ್ತದೆ. ಇದರ ಜೊತೆಗೆ ಟೋಯಿಂಗ್ ಶುಲ್ಕ ವಿಧಿಸಲಾಗುತ್ತದೆ. ಇದು ವಾಹನಕ್ಕೆ ಅನುಗುಣವಾಗಿ ಬದಲಾಗುತ್ತದೆ. ಬೈಕ್ ಸೇರಿದಂತೆ ದ್ವಿಚಕ್ರ ವಾಹನಗಳ ಟೋಯಿಂಗ್ ಶುಲ್ಕ 650 ರೂಪಾಯಿ. ಇನ್ನು ಕಾರು ಸೇರಿದಂತೆ ಇತರ ವಾಹನಗಳ ಟೋಯಿಂಗ್ ಶುಲ್ಕ 1000 ರೂಪಾಯಿ.

ರಸ್ತೆಗಿಳಿದ ಮೂರು ಟೋಯಿಂಗ್ ವಾಹನ

ಜಿಬಿಎ ಅಧಿಕಾರಿಗಳು ಈಗಾಗಲೇ ವಾಹನ ಟೋಯಿಂಗ್ ಮಾಡಲು ಮೂರು ವಾಹನಗಳನ್ನು ನೀಡಿದೆ. ಇನ್ನು ಹಂತ ಹಂತವಾಗಿ ಎಲ್ಲಾ ಕಡೆ ಟೋಯಿಂಗ್ ವಾಹನಗಳು ರಸ್ತೆಗೆ ಇಳಿಯಲಿದೆ. ಈ ಮೂಲಕ ಸಂಚಾರ ದಟ್ಟಣೆ ತಗ್ಗಿಸಲು, ಟ್ರಾಫಿಕ್ ಸಮಸ್ಯೆಗೆ ಮುಕ್ತಿ ಹಾಡಲು ಬೆಂಗಳೂರು ಪೊಲೀಸರು ಮುಂದಾಗಿದ್ದಾರೆ.

ಪೆಟ್ರೋಲ್ ಬೇಡ, ಚಾರ್ಜ್ ಮಾಡಬೇಕಿಲ್ಲ, ವಾಹನಕ್ಕಿನ್ನು 60 ರೂನಲ್ಲಿ ಸಿಗೋ ಇ100 ಎಥೆನಾಲ್; ಗಡ್ಕರಿ

Chethan Kumar — Sun, 14 Jun 2026 16:00:11 +0530

ಇಂಧನ ಕ್ಷೇತ್ರದಲ್ಲಿ ಭಾರತ ಕ್ರಾಂತಿ ಮಾಡುತ್ತಿದೆ. ಇದುವರೆಗೆ ವಾಹನಗಳಿಗೆ ಇ20, ಇ30 ಎಥೆನಾಲ್ ಬಳಸಲಾಗುತ್ತಿತ್ತು. ಆದರೆ ಇದೀಗ ಇ100 ಎಥೆನಾಲ್ ಬಳಕೆಗೆ ಕೇಂದ್ರ ಸಚಿವ ನಿತಿನ್ ಗಡ್ಕರಿ ಸಹಿ ಹಾಕಿದ್ದಾರೆ. ಇನ್ನು ಕೇವಲ 60 ರೂನಲ್ಲ ಎಥೆನಾಲ್ ಲಭ್ಯವಿದೆ.

ಭಾರತದ ಆಟೋಮೊಬೈಲ್ ಹಾಗೂ ಇಂಧನ ವಲಯದಲ್ಲಿ ಮಹತ್ವದ ಕ್ರಾಂತಿಯಾಗಿದೆ. ವಾಹನಕ್ಕೆ ಇದುವರೆಗೆ ಇ20 ಅಥವಾ ಇ30ರಷ್ಟು ಮಾತ್ರ ಎಥೆನಾಲ್ ಬಳಕೆ ಮಾಡಲಾಗುತ್ತಿತ್ತು. ಇದೀಗ ಶೇಕಜಾ 100ರಷ್ಟು ಎಥೆನಾಲ್ ಇಂಧನ ಬಳಕೆಗೆ ಕೇಂದ್ರ ಸಚಿನ ನಿತಿನ್ ಗಡ್ಕರಿ ಸಹಿ ಹಾಕಿದ್ದಾರೆ. ಇದರೊಂದಿಗೆ ದೇಶದಲ್ಲಿ ಇನ್ನು ಮುಂದೆ ಸಂಪೂರ್ಣವಾಗಿ ಪರಿಸರಸ್ನೇಹಿ ಜೈವಿಕ ಇಂಧನದಲ್ಲೇ (Biofuel) ವಾಹನಗಳು ಓಡುವ ಇಂಧನ ಕ್ರಾಂತಿಯ ಯುಗಕ್ಕೆ ಅಧಿಕೃತ ಮುದ್ರೆ ಬಿದ್ದಿದೆ.

ನಾಗ್ಪುರದಲ್ಲಿ ನಡೆದ ಸಕ್ಕರೆ ಮತ್ತು ಜೈವಿಕ ಇಂಧನ ಸಮಾವೇಶದಲ್ಲಿ ಮಾತನಾಡಿದ ಕೇಂದ್ರ ಸಚಿವ ನಿತಿನ್ ಗಡ್ಕರಿ, ಜೂನ್ 12 ರ ರಾತ್ರಿ 8 ಗಂಟೆಗೆ ನಾನು ಶೇಕಡಾ 100 ರಷ್ಟು ಎಥನಾಲ್ ಇಂಧನ ಬಳಕೆಯನ್ನು ಕಾನೂನುಬದ್ಧಗೊಳಿಸುವ ಕಡತಕ್ಕೆ ಸಹಿ ಹಾಕಿದ್ದೇನೆ ಎಂದಿದ್ದಾರೆ. ಇದರೊಂದಿಗೆ ಭಾರತದಲ್ಲಿ ಪೆಟ್ರೋಲ್ ಡೀಸೆಲ್ ಮೇಲಿನ ಅವಲಂಬನೆ ಕಡಿಮೆ ಮಾಡುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆ ಇಡಲಾಗಿದೆ.

ಭಾರತವು ಪ್ರಸ್ತುತ ತನ್ನ ಒಟ್ಟು ಕಚ್ಚಾ ತೈಲದ ಅವಶ್ಯಕತೆಯಲ್ಲಿ ಶೇಕಡಾ 85 ಕ್ಕಿಂತ ಹೆಚ್ಚಿನ ಇಂಧನವನ್ನು ವಿದೇಶಗಳಿಂದ ಆಮದು ಮಾಡಿಕೊಳ್ಳುತ್ತಿದೆ. ಇದಕ್ಕಾಗಿ ದೇಶದ ಬೊಕ್ಕಸದಿಂದ ವಾರ್ಷಿಕವಾಗಿ ಬರೋಬ್ಬರಿ 22 ಲಕ್ಷ ಕೋಟಿ ರೂಪಾಯಿ ಹೊರದೇಶಗಳಿಗೆ ಹರಿದುಹೋಗುತ್ತಿದೆ. ಈಗ ದೇಶೀಯವಾಗಿಯೇ ತಯಾರಾಗುವ ಇ-100 (E100) ಇಂಧನ ಬಳಕೆಗೆ ಕಾನೂನು ಮಾನ್ಯತೆ ಸಿಕ್ಕಿರುವುದರಿಂದ, ಮುಂಬರುವ ದಿನಗಳಲ್ಲಿ ವಿದೇಶಿ ಕಚ್ಚಾ ತೈಲದ ಮೇಲಿನ ಅವಲಂಬನೆ ಗಣನೀಯವಾಗಿ ಕಡಿಮೆಯಾಗಲಿದ್ದು, ಭಾರತದ ಲಕ್ಷಾಂತರ ಕೋಟಿ ರೂಪಾಯಿ ವಿದೇಶಿ ವಿನಿಮಯ ಉಳಿತಾಯವಾಗಲಿದೆ.

ಕೇಂದ್ರ ಸರ್ಕಾರದ ಈ ಮಹತ್ವಾಕಾಂಕ್ಷಿ ನೀತಿಯಿಂದ ದೇಶದ ಕೃಷಿ ವಲಯಕ್ಕೆ, ವಿಶೇಷವಾಗಿ ಕಬ್ಬು ಬೆಳೆಗಾರರು ಮತ್ತು ಧಾನ್ಯ ಉತ್ಪಾದಕ ರೈತರಿಗೆ ಭಾರಿ ಆರ್ಥಿಕ ಭದ್ರತೆ ಸಿಗಲಿದೆ. ಮಾರುಕಟ್ಟೆಯಲ್ಲಿ ಹೆಚ್ಚುವರಿಯಾಗಿ ಉಳಿಯುವ ಕಬ್ಬು, ಮೆಕ್ಕೆಜೋಳ ಮತ್ತು ಗೋದಾಮುಗಳಲ್ಲಿ ಕೊಳೆತು ಹಾಳಾಗುವ ಅನ್ನದ ಧಾನ್ಯಗಳನ್ನು ನೇರವಾಗಿ ಬಯೋ-ರಿಫೈನರಿಗಳಿಗೆ (ಜೈವಿಕ ಇಂಧನ ಸಂಸ್ಕರಣಾಗಾರಗಳು) ರವಾನಿಸಿ ಅದರಿಂದ ದ್ವಿತೀಯ ಹಂತದ ಶುದ್ಧ ಎಥನಾಲ್ ಉತ್ಪಾದಿಸಲಾಗುತ್ತದೆ. ಇದು ರೈತರಿಗೆ ಪರ್ಯಾಯ ಮತ್ತು ಸ್ಥಿರ ಆದಾಯದ ಮೂಲವಾಗಿ ಮಾರ್ಪಡಲಿದೆ.

ಜೂನ್ ತಿಂಗಳಲ್ಲೇ ತನ್ನ ಜನಪ್ರಿಯ 'ವ್ಯಾಗನ್ಆರ್' (WagonR) ಕಾರಿನ 100% ಎಥನಾಲ್ ಚಾಲಿತ ಮಾದರಿಯನ್ನು ಪರಿಚಯಿಸಲು ಸಜ್ಜಾಗಿದೆ. ಟೊಯೋಟಾ, ಹ್ಯುಂಡೈ, ಎಂಜಿ ಮೋಟಾರ್ಸ್ ಮತ್ತು ಹೀರೋ ಮೋಟೋಕಾರ್ಪ್ ಕಂಪನಿಗಳು ಸಹ ಮುಂಬರುವ ಒಂದೂವರೆ ತಿಂಗಳೊಳಗೆ ತಮ್ಮ ಇ-100 ಹೊಂದಾಣಿಕೆಯ ಕಾರು ಮತ್ತು ಬೈಕ್‌ಗಳನ್ನು ಬಿಡುಗಡೆ ಮಾಡಲು ಸಿದ್ಧತೆ ನಡೆಸಿವೆ.

ಈಗಾಗಲೇ ಮಾರುಕಟ್ಟೆಯಲ್ಲಿ ಶೇಕಡಾ 20 ರಷ್ಟು ಎಥನಾಲ್ ಮಿಶ್ರಿತ ಪೆಟ್ರೋಲ್ (E20) ಲಭ್ಯವಿದ್ದು, ಯಶಸ್ವಿಯಾಗಿದೆ. ಆದರೆ ಈಗ ಇ-100 ನಿಯಮಾವಳಿಗಳಿಗೆ ಒಪ್ಪಿಗೆ ಸಿಕ್ಕಿರುವುದರಿಂದ ಆಟೋಮೊಬೈಲ್ ಕಂಪನಿಗಳು ಸಂಪೂರ್ಣ ಎಥನಾಲ್‌ನಲ್ಲೇ ಚಲಿಸುವ 'ಫ್ಲೆಕ್ಸ್-ಫ್ಯುಯೆಲ್ ವಾಹನಗಳನ್ನು' (FFVs) ಹೆಚ್ಚಿನ ಪ್ರಮಾಣದಲ್ಲಿ ತಯಾರಿಸಲು ಹೂಡಿಕೆ ಆರಂಭಿಸಲಿವೆ.

ಮಹಿಳೆಯಿಂದ ಟಾಟಾ ಸಿಯೆರಾ ಟೆಸ್ಟ್ ಡ್ರೈವ್, 3 ವಾಹನಕ್ಕೆ ಡಿಕ್ಕಿಯಾಗಿ 20 ಅಡಿ ಗುಂಡಿಗೆ ಬಿದ್ದ ಕಾರು

Chethan Kumar — Sat, 14 Mar 2026 20:01:50 +0530

ಮುಂಬೈ (ಮಾ.14) ಟಾಟಾ ಕಾರುಗಳು ಗರಿಷ್ಠ ಸುರಕ್ಷತೆ ನೀಡುತ್ತದೆ ಎಂಬುದು ಈಗಾಗಲೇ ಸಾಬೀತಾಗಿದೆ. ಹೀಗಾಗಿ ಟಾಟಾ ಕಾರುಗಳಿಗೆ ಬಾರಿ ಬೇಡಿಕೆ ಇದೆ. ಇತ್ತೀಚೆಗೆ ಬಿಡುಗಡೆಯಾದ ಟಾಟಾ ಸಿಯೆರಾ ಕಾರು ಹಲವರನ್ನು ಆಕರ್ಷಿಸುತ್ತಿದೆ. ಹೀಗೆ ಮಹಿಳೆಯೊಬ್ಬರು ಟಾಟಾ ಸಿಯೆರಾ ಕಾರು ಖರೀದಿಸಲು ಶೋರೂಂಗೆ ತೆರಳಿದ್ದಾರೆ. ಕಾರು ಟೆಸ್ಟ್ ಡ್ರೈವ್ ಮಾಡಲು ಮುಂದಾಗಿದ್ದಾರೆ. ಇದರಂತೆ ಟಾಟಾ ಸಿಯೆರಾ ಕಾರು ಪಡೆದು ರಸ್ತೆಯಲ್ಲಿ ಡ್ರೈವ್ ಮಾಡಲು ಮುಂದಾಗಿದ್ದಾರೆ. ಆದರೆ ಕಾರು ನಿಯಂತ್ರಣ ತಪ್ಪಿದೆ. ಅತೀ ವೇಗವಾಗಿ ಸಾಗಿ ಆಟೋ, ದ್ವಿಚಕ್ರ ವಾಹನ ಸೇರಿದಂತೆ ಮೂರು ವಾಹನಗಳಿಗೆ ಡಿಕ್ಕಿಯಾಗಿ, ಬ್ಯಾರಿಕೇಡ್ ಮುರಿದು ಕಾಮಗಾರಿಯ 20 ಅಡಿ ಆಳದ ಗುಂಡಿಗೆ ಬಿದ್ದಿದೆ. ಆದರೆ ಮಹಿಳೆ, ಮಹಿಳೆಯ ಸಂಬಂಧಿಗಳು ಹಾಗೂ ಶೋ ರೂಂ ಸಿಬ್ಬಂದಿ ಸಣ್ಣ ಪುಟ್ಟಗಾಯಗೊಂಡಿದ್ದಾರೆ. ಆದರೆ ಪ್ರಾಣಾಪಾಯದಿಂಂದ ಪಾರಾದ ಘಟನೆ ಮುಂಬೈನಲ್ಲಿ ನಡೆದಿದೆ.

ಪಶ್ಚಿಮ ಥಾಣೆಯ ಪಂಚಕಡಿ ಬಳಿ ಈ ಘಟನೆ ನಡೆದಿದೆ. ಮಹಿಳೆ ತನ್ನ ಸಂಬಂಧಿಕರೊಂದಿಗೆ ಕಾರು ಖರೀದಿಗೆ ಆಗಮಿಸಿದ್ದಾರೆ. ಈ ವೇಳೆ ಟೆಸ್ಟ್ ಡ್ರೈವ್ ಮಾಡಲು ಮುಂದಾಗಿದ್ದಾರೆ. ಹೀಗಾಗಿ ಸಂಬಂಧಿಕರನ್ನು ಕೂರಿಸಿಕೊಂಡು ಟೆಸ್ಟ್ ಡ್ರೈವ್‌ಗೆ ತೆರಳಿದ್ದಾರೆ. ಇದೇ ವೇಳೆ ಶೋ ರೂಂ ಸಿಬ್ಬಂದಿಯೂ ಕಾರಿನಲ್ಲಿ ಕುಳಿತಿದ್ದಾರೆ. ಕಾರಿನ ಬಗ್ಗೆ ಮಾಹಿತಿ ನೀಡಲು ಆರಂಭಿಸದ ಬೆನ್ನಲ್ಲೇ ಮಹಿಳೆ ಕಾರು ಸ್ಟಾರ್ಟ್ ಮಾಡಿ ಮೂವ್ ಮಾಡಿದ್ದಾರೆ.ರಸ್ತೆಗೆ ಇಳಿದ ಬೆನ್ನಲ್ಲೇ ಕಾರು ಸಂಪೂರ್ಣ ನಿಯಂತ್ರಣ ಕಳೆದುಕೊಂಡಿದೆ. ಜನನಿಬಿಡಿ ರಸ್ತೆಯಲ್ಲಿ ಕಾರು ಅತೀವೇಗವಾಗಿ ಸಾಗಿದೆ. ರಸ್ತೆ ಬದಿಯಲ್ಲಿ ನಿಲ್ಲಿಸಿದ್ದ ವಾಹನಗಳಿಗೆ ಡಿಕ್ಕಿಯಾಗಿದೆ.

ಎಲ್ಲಾ ತಡೆಗೋಡೆ ಮುರಿದ ಟಾಟಾ

ಕಾಮಗಾರಿ ಸ್ಥಳದ ಕಾರಣ ಬ್ಯಾರಿಕೇಡ್‌ಗಳನ್ನು ಹಾಕಲಾಗಿತ್ತು. ಇಷ್ಟೇ ಅಲ್ಲ ತಾತ್ಕಾಲಿಕ ತಡೆಗೋಡೆಗಳನ್ನು ನಿರ್ಮಾಣ ಮಾಡಲಾಗಿದೆ. ಈ ಮಹಿಳೆಯ ಅತೀ ವೇಗದಲ್ಲಿ ಕಾರು ಚಲಾಯಿಸಿದ್ದಾರೆ. ಹೀಗಾಗಿ ಬ್ಯಾರಿಕೇಡ್, ತಡೆಗೋಡೆ ಎಲ್ಲಾ ಮುರಿದು ಕಾಮಗಾರಿಯ 20 ಅಡಿ ಆಳದ ಗುಂಡಿಗೆ ಬಿದ್ದಿದೆ. ಅಪಘಾತವಾಗುತ್ತಿದ್ದಂತೆ ಕಾರಿನ ಏರ್‌ಬ್ಯಾಗ್ ತೆರೆದುಕೊಂಡಿದೆ. ಇನ್ನು ಟಾಟಾ ಕಾರು 5 ಸ್ಟಾರ್ ಸುರಕ್ಷತೆ ಕಾರಣ ನಜ್ಜು ನುಜ್ಜಾಗಿಲ್ಲ. ಇತ್ತ ಅಗ್ನಿಶಾಮಕ ದಳ, ಪೊಲೀಸರು ಸ್ಥಳಕ್ಕೆ ಧಾವಿಸಿ ಕಾರಿನಲ್ಲಿದ್ದ ಮೂವರನ್ನು ರಕ್ಷಿಸಿ ಆಸ್ಪತ್ರೆ ದಾಖಲಿಸಿದ್ದಾರೆ.

ಮೂರು ವಾಹನ ಜಖಂ

5 ಸ್ಟಾರ್ ಸೇಫ್ಟಿ ಕಾರು ಮೂವರು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಟೆಸ್ಟ್ ಡ್ರೈವ್ ಮಾಡಲು ಹೋಗಿ ಮೂವರು ಗಾಯಗೊಂಡಿದ್ದಾರೆ. ಎರಡು ದ್ವಿಚಕ್ರ ವಾಹನ ಹಾಗೂ ಒಂದು ಆಟೋ ರಿಕ್ಷಾ ಸಂಪೂರ್ಣ ನಜ್ಜು ಗುಜ್ಜಾಗಿದೆ. ಇತ್ತ ಪೊಲೀಸರು ಪ್ರರಕರಣ ದಾಖಲಿಸಿಕೊಂಡಿದ್ದಾರೆ.

ಟಾಟಾ ಸಿಯೆರಾ ಕಾರಿನ ಬೆಲೆ 11.49 ಲಕ್ಷ ರೂಪಾಯಿಯಿಂದ ಆರಂಭಗೊಳ್ಳುತ್ತಿದೆ. 60hp ಪವರ್ ಹಾಗೂ 255Nm ಪೀಕ್ ಟಾರ್ಕ್ ಸಾಮರ್ಥ್ಯ ಹೊಂದಿದೆ. 1.5 ಲೀಟರ್ ಎಂಜಿನ್, 4 ಸಿಲಿಂಡರ್ ಹೊಂದಿದೆ. ಮ್ಯಾನ್ಯುಯೆಲ್ ಹಾಗೂ ಆಟೋ ಟ್ರಾನ್ಸ್‌ಮಿಶನ್ ಆಯ್ಕೆ ಲಭ್ಯವಿದೆ.ಅತ್ಯಂತ ಆಕರ್ಷಕ ಎಸ್‌ಯುವಿ ಕಾರಾಗಿದ್ದು, ದಾಖಲೆಯ ಬುಕಿಂಗ್ ಪಡೆದಿದೆ.

Keeway Hypevolt-R: ಬಿಡುಗಡೆಯಾಯ್ತು ಪ್ರೀಮಿಯಂ ಸ್ಕೂಟರ್, ರೇಂಜ್, ಟಾಪ್ ಸ್ಪೀಡ್ ಎಷ್ಟು?

Mahmad Rafik — Sat, 04 Jul 2026 11:14:22 +0530

ಕೀವೇ ಇಂಡಿಯಾ ತನ್ನ ಹೊಸ ಪ್ರೀಮಿಯಂ ಎಲೆಕ್ಟ್ರಿಕ್ ಸ್ಕೂಟರ್ ಹೈಪ್‌ವೋಲ್ಟ್-ಆರ್ ಅನ್ನು ಭಾರತದಲ್ಲಿ ಬಿಡುಗಡೆ ಮಾಡಿದೆ. ಡ್ಯುಯಲ್-ಚಾನೆಲ್ ABS, TCS ನಂತಹ ಸುಧಾರಿತ ಸುರಕ್ಷತಾ ತಂತ್ರಜ್ಞಾನಗಳೊಂದಿಗೆ ಸ್ಕೂಟರ್ ಮಾರುಕಟ್ಟೆಗೆ ಬಂದಿದೆ.

ಭಾರತದಲ್ಲಿ ಎಲೆಕ್ಟ್ರಿಕ್ ಟು ವ್ಹೀಲರ್ ಮಾರುಕಟ್ಟೆ ವೇಗವಾಗಿ ಬೆಳವಣಿಗೆ ಕಾಣುತ್ತಿದೆ. ಕೀವೇ ಇಂಡಿಯಾ (Keeway Hypevolt-R) ತನ್ನ ಹೊಸ ಪ್ರಮುಖ ಪ್ರೀಮಿಯಂ-ಸೆಗ್ಮೆಂಟ್ ಎಲೆಕ್ಟ್ರಿಕ್ ಸ್ಕೂಟರ್ ಹೈಪ್‌ವೋಲ್ಟ್-ಆರ್ ಭಾರತದ ಮಾರುಕಟ್ಟೆಗೆ ಪರಿಚಯಿಸಿದೆ. ಸುಧಾರಿತ ತಂತ್ರಜ್ಞಾನ, ರೈಡರ್ ಫ್ರೆಂಡ್ಲಿ, ಪವರ್‌ಫುಲ್ ಪರ್ಫಾಮೆನ್ಸ್ ಹೊಂದಿರುವ ಪ್ರೀಮಿಯಂ ಸ್ಕೂಟರ್ ಇದಾಗಿದೆ ಎಂದು ಕೀವೇ ಹೇಳಿಕೊಂಡಿದೆ. ಪ್ರೀಮಿಯಂ ಸ್ಕೂಟರ್ ಹುಡುಕುತ್ತಿರೋರಿಗೆ ಇದು ಒಳ್ಳೆಯ ಆಯ್ಕೆಯಾಗಲಿದೆ ಎಂದು ಹೇಳಲಾಗುತ್ತಿದೆ.

5.04 kWh ಸಾಮರ್ಥ್ಯದ ಡ್ಯುಯಲ್ ರಿಮೂವೇಬಲ್ ಬ್ಯಾಟರಿ ಹೊಂದಿದೆ. NMC ಬ್ಯಾಟರಿ ಪ್ಯಾಕ್ ಹೊಂದಿದೆ. ಈ ಸ್ಕೂಟರ್ ಎರಡು 72V 35Ah ಬ್ಯಾಟರಿ ಯುನಿಟ್ ಒಳಗೊಂಡಿದೆ. ಫುಲ್ ಚಾರ್ಜ್‌ನಲ್ಲಿ 180 ಕಿಮೀ ಐಡಿಸಿ ಪ್ರಮಾಣೀಕೃತ (IDC-certified) ರೈಡಿಂಗ್ ರೇಂಜ್ ನೀಡುತ್ತದೆ. ಹಾಗೆಯೇ ಮಿಡ್-ಮೌಂಟೆಡ್ ಪರಮಾನೆಂಟ್ ಮ್ಯಾಗ್ನೆಟ್ ಸಿಂಕ್ರೋನಸ್ ಮೋಟಾರ್ ಅಳವಡಿಕೆ ಮಾಡಲಾಗಿದೆ. ಇದು 6 kW ರೇಟೆಡ್ ಪವರ್ ಮತ್ತು 12 kW ಪೀಕ್ ಪವರ್ ಜನರೇಟ್ ಮಾಡುತ್ತದೆ. ಇದ ಪೀಕ್ ಟಾರ್ಕ್ 72 Nm ಇದೆ.

ಸ್ಪೋರ್ಟ್ ಮೋಡ್‌ನಲ್ಲಿ ಈ ಸ್ಕೂಟರ್ ಕೇವಲ 2.3 ಸೆಕೆಂಡ್‌ಗಳಲ್ಲಿ 0 ರಿಂದ 40 ಕಿಮೀ/ಗಂಟೆ ವೇಗ ಪಡೆದುಕೊಳ್ಳಲಿದೆ ಎಂದು ಕೀವೇ ಹೇಳಿಕೊಂಡಿದೆ. ಟಾಪ್ ಸ್ಪೀಡ್ ಗಂಟೆಗೆ 115 ಕಿಮೀ ಮತ್ತು 30 ಡಿಗ್ರಿ ಎತ್ತರ ಏರುವ ಸಾಮರ್ಥ್ಯವನ್ನು ಸ್ಕೂಟರ್ ಹೊಂದಿದೆ. ಬಳಕೆದಾರರು Eco, Normal ಮತ್ತು Sport ಮೂರು ಡ್ರೈವಿಂಗ್ ಮೋಡ್‌ಗಳಲ್ಲಿ ಒಂದನ್ನು ಆಯ್ಕೆ ಮಾಡಿಕೊಳ್ಳಬಹುದು. ರಿಮೂವೇಬಲ್ ಬ್ಯಾಟರಿ ಹೊಂದಿರುವ ಕಾರಣ ಹೊರಗೆ ತೆಗೆದು ಅಥವಾ ಸ್ಕೂಟರ್ ಒಳಗೆಯ ಚಾರ್ಜಿಂಗ್ ಮಾಡುವ ಅವಕಾಶವನ್ನು ಕಲ್ಪಿಸಲಾಗಿದೆ. ಆನ್‌ಬೋರ್ಡ್ ಚಾರ್ಜರ್ ಸುಮಾರು 3 ಗಂಟೆಗಳಲ್ಲಿ ಬ್ಯಾಟರಿಯನ್ನು ಶೇಕಡಾ 0 ರಿಂದ 80 ರಷ್ಟು ಚಾರ್ಜ್ ಮಾಡುತ್ತದೆ

ಹೈಪ್‌ವೋಲ್ಟ್-ಆರ್ ಸ್ಕೂಟರ್ ಡ್ಯುಯಲ್-ಚಾನೆಲ್ ABS, ಟ್ರಾಕ್ಷನ್ ಕಂಟ್ರೋಲ್ ಸಿಸ್ಟಮ್ (TCS), ಹಿಲ್ ಹೋಲ್ಡ್ ಕಂಟ್ರೋಲ್, ಹಿಲ್ ಡಿಸೆಂಟ್ ಕಂಟ್ರೋಲ್, ಇಂಟೆಲಿಜೆಂಟ್ ಕ್ರೂಸ್ ಕಂಟ್ರೋಲ್, ಬ್ಲೈಂಡ್ ಸ್ಪಾಟ್ ಡಿಟೆಕ್ಷನ್ ಮತ್ತು ರಿಯರ್ ರಿವರ್ಸ್ ಕ್ಯಾಮೆರಾದಂತಹ ಸುಧಾರಿತ ಸುರಕ್ಷತಾ ತಂತ್ರಜ್ಞಾನಗಳನ್ನು ಹೊಂದಿದೆ. ಬ್ಲ್ಯೂ ಟೂತ್, 5-ಇಂಚಿನ TFT ಉಪಕರಣ ಕ್ಲಸ್ಟರ್ ಒಳಗೊಂಡಿದೆ. ಹಾಗೆಯೇ ಎಲ್‌ಇಡಿ ಲೈಟ್ ಸ್ಟ್ರಿಪ್‌ ಸಹ ಹೊಂದಿದೆ.

ಗ್ರೌಂಡ್ ಕ್ಲಿಯರೆನ್ಸ್: 130 ಮಿ.ಮೀ.

ಸೀಟ್ ಎತ್ತರ: 770 ಮಿ.ಮೀ.

ವೀಲ್‌ಬೇಸ್: 1,454 ಮಿ.ಮೀ

ಕರ್ಬ್ ತೂಕ: 140 ಕೆಜಿ

ಸೀಟಿನ ಕೆಳಗೆ ಶೇಖರಣಾ ಸ್ಥಳ (ಡಿಗ್ಗಿ): 27 ಲೀಟರ್‌ಗಳ ದೊಡ್ಡ ಸಾಮರ್ಥ್ಯ

ಹೈಪ್‌ವೋಲ್ಟ್-ಆರ್ ಸ್ಕೂಟರ್‌ನ್ನು ಟೋಕನ್ ಅಮೌಂಟ್ 5 ಸಾವಿರ ರೂಪಾಯಿ ನೀಡುವ ಮೂಲಕ ಬುಕ್ ಮಾಡಿಕೊಳ್ಳಬಹುದು. ಕೀವೇ ಹೈಪ್‌ವೋಲ್ಟ್-ಆರ್ ಅನ್ನು 1.99 ಲಕ್ಷ ರೂ.ಗಳ ಆರಂಭಿಕ ಎಕ್ಸ್-ಶೋರೂಂ ಬೆಲೆಯಲ್ಲಿ ಬಿಡುಗಡೆ ಮಾಡಲಾಗಿದ್ದು, Crystal White ಮತ್ತು Platinum Grey ಬಣ್ಣಗಳಲ್ಲಿ ಲಭ್ಯವಿದೆ. ಕಂಪನಿ ಶೀಘ್ರದಲ್ಲಿಯೇ ಸ್ಕೂಟರ್ ವಿತರಣೆ ಮಾಡಲಿದೆ ಎಂದು ವರದಿಯಾಗಿದೆ.

151 KM ರೇಂಜ್, ಅಡ್ವಾನ್ಸ್ ಫೀಚರ್ಸ್ ಜೊತೆ ಹೋಂಡಾದ ಹೊಸ QC3 ಎಲೆಕ್ಟ್ರಿಕ್ ಸ್ಕೂಟರ್

Mahmad Rafik — Sun, 26 Jul 2026 12:47:02 +0530

ಭಾರತದ ಮಾರುಕಟ್ಟೆಗೆ ಹೋಂಡಾ ಕಂಪನಿಯು ತನ್ನ ಹೊಸ QC3 ಎಲೆಕ್ಟ್ರಿಕ್ ಸ್ಕೂಟರ್ ಅನ್ನು ಪರಿಚಯಿಸಿದೆ. ಈ ಸ್ಕೂಟರ್ ಒಂದು ಪೂರ್ಣ ಚಾರ್ಜ್‌ನಲ್ಲಿ 151 ಕಿ.ಮೀ ರೇಂಜ್ ನೀಡಲಿದ್ದು, 32 ಲೀಟರ್‌ನಷ್ಟು ಅಂಡರ್ ಸೀಟ್ ಸ್ಟೋರೇಜ್ ಮತ್ತು ಸ್ಮಾರ್ಟ್ ಕೀ ಸಿಸ್ಟಮ್‌ನಂತಹ ಆಧುನಿಕ ಫೀಚರ್‌ಗಳನ್ನು ಹೊಂದಿದೆ.

ಭಾರತದಲ್ಲಿ ದಿನದಿಂದ ದಿನಕ್ಕೆ ಎಲೆಕ್ಟ್ರಿಕ್ ವಾಹನಗಳ ಬೇಡಿಕೆ ಏರಿಕೆಯಾಗುತ್ತಿದೆ. ಇಂಧನ ಬೆಲೆ ಏರಿಕೆಯಿಂದಾಗಿ ಜನರು ಬಜೆಟ್ ಫ್ರೆಂಡ್ಲಿ ಮತ್ತು ಉತ್ತಮ ಮೈಲೇಜ್ ವಾಹನಗಳನ್ನು ಖರೀದಿಸಲು ಮುಂದಾಗುತ್ತಿದ್ದಾರೆ. ಇದೀಗ ಭಾರತದ ಮಾರುಕಟ್ಟೆಗೆ ಹೊಸ ಎಲೆಕ್ಟ್ರಿಕ್ ಸ್ಕೂಟರ್ ಬಂದಿದೆ. ಹೋಂಡಾ ಕಂಪನಿ QC3 Electric Scooter ಪರಿಚಯಿಸಿದೆ.

ಈ ಸ್ಕೂಟರ್‌ನ್ನು ಭಾರತದ ನಗರವಾಸಿಗಳು, ಪ್ರತಿನಿತ್ಯ ಆಫಿಸ್, ಕಾಲೇಜಿಗೆ ತೆರಳುವ ವರ್ಗದವರನ್ನು ಗುರಿಯಾಗಿಸಿಕೊಂಡು ತಯಾರಿಸಲಾಗಿದೆ. ಈ ಸ್ಕೂಟರ್ ಒಂದು ಫುಲ್ ಚಾರ್ಜ್‌ನಲ್ಲಿ 151 ಕಿ.ಮೀ ವರೆಗೆ IDC ರೇಂಜ್ ನೀಡುತ್ತದೆ. ಇದರಿಂದ ಪದೇ ಪದೇ ಚಾರ್ಜಿಂಗ್ ಮಾಡುವ ಕಿರಿಕಿರಿ ಇರಲ್ಲ ಎಂದು ಹೋಂಡಾ ಹೇಳಿದೆ.

Honda QC3ನಲ್ಲಿ 3kWh ಫಿಕ್ಸಡ್ ಲಿಥಿಯಂ-ಅಯಾನ್ ಬ್ಯಾಟರಿ ಫಿಕ್ಸ್ ಮಾಡಲಾಗಿದೆ. ಪ್ರತಿದಿನ 30 ರಿಂದ 40 ಕಿಮೀ ಪ್ರಯಾಣಿಸುವ ಜನರಿಗೆ ಈ ಸ್ಕೂಟರ್ ಒಳ್ಳೆಯ ಆಯ್ಕೆಯಾಗಲಿದೆ ಎಂಬುವುದು ಕಂಪನಿಯ ಹೇಳಿಕೆಯಾಗಿದೆ.

ಇನ್ನು Honda QC3 ಬ್ಯಾಟರಿ ಶೂನ್ಯದಿಂದ ಶೇ.80ರಷ್ಟು ಚಾರ್ಜ್ ಆಗಲು 2 ಗಂಟೆ 40 ನಿಮಿಷ ತೆಗೆದುಕೊಳ್ಳುತ್ತದೆ. ಬ್ಯಾಟರಿ ಸಂಪೂರ್ಣವಾಗಿ ಚಾರ್ಜ್ ಆಗಲು 4 ಗಂಟೆ ಸಮಯ ತೆಗೆದುಕೊಳ್ಳುತ್ತದೆ.

Honda QC3 ಮತ್ತೊಂದು ವಿಶೇಷತೆ ಅಂದ್ರೆ ಇದು 32 ಲೀಟರ್‌ನಷ್ಟು ಅಂಡರ್ ಸೀಟ್ ಸ್ಟೋರೇಜ್ ಹೊಂದಿದೆ. ಈ ಸ್ಟೋರೇಜ್‌ನಲ್ಲಿ ಹೆಲ್ಮೇಟ್, ಬ್ಯಾಗ್ ಸೇರಿದಂತೆ ಇನ್ನಿತರ ಅವಶ್ಯಕ ವಸ್ತುಗಳನ್ನು ಇರಿಸಬಹುದಾಗಿದೆ. ಹೊಸ ಸ್ಕೂಟರ್ ಗಮನಿಸುತ್ತಿದ್ರೆ, ಇದನ್ನು ಮಿಸ್ ಮಾಡಿಕೊಳ್ಳಬೇಡಿ.

Honda QC3 ಮಾಡರ್ನ್ ಫೀಚರ್ ಹೊಂದಿದ್ದು, ಇದು Smart Key ಸಿಸ್ಟಮ್ ಒಳಗೊಂಡಿದೆ. ಇದರ ಜೊತೆಯಲ್ಲಿ 5 ಇಂಚಿನ TFT Display ನೀಡಲಾಗಿದೆ. ಕನೆಕ್ಟೆಡ್ ಫೀಚರ್ಸ್ ಮತ್ತು ನ್ಯಾವಿಗೇಷನ್ ಸಪೋರ್ಟ್ ನೀಡಲಾಗಿದ್ದು, ಸವಾರರಿಗೆ ಬೆಸ್ಟ್ ರೈಡಿಂಗ್ ಎಕ್ಸ್‌ಪಿರೀಯನ್ಸ್ ನೀಡುತ್ತದೆ. QC3 Electric Scooter ಎಕ್ಸ್ ಶೋರೂಂ ಬೆಲೆ 1,20,000 ರೂಪಾಯಿ ಆಗಿದೆ. ಇದೇ ವರ್ಷ ಡಿಸೆಂಬರ್‌ನಲ್ಲಿ ಗ್ರಾಹಕರಿಗೆ ಈ ಸ್ಕೂಟರ್ ಸಿಗಲಿದೆ.

ಕರ್ನಾಟಕಕ್ಕೆ ಪಿಎಂ-ಇ-ಡ್ರೈವ್ ಯೋಜನೆಯಡಿಯಲ್ಲಿ ಕೇಂದ್ರದಿಂದ 1,243 EV ಚಾರ್ಜಿಂಗ್ ಸ್ಟೇಷನ್‌ ಮಂಜೂರು

Gowthami K — Tue, 12 May 2026 20:02:06 +0530

ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಅವರು ಪ್ರಧಾನ ಮಂತ್ರಿ ಇ-ಡ್ರೈವ್ ಯೋಜನೆಯಡಿ ಕರ್ನಾಟಕಕ್ಕೆ 1,243 ಇವಿ ಚಾರ್ಜರ್‌ಗಳ ಸ್ಥಾಪನೆಗೆ ಅನುಮೋದನೆ ನೀಡಿದ್ದಾರೆ. ಒಟ್ಟು ರೂ. 123.26 ಕೋಟಿ ವೆಚ್ಚದ ಈ ಯೋಜನೆಯು ರಾಜ್ಯದ ವಿದ್ಯುತ್ ವಾಹನ ಮೂಲಸೌಕರ್ಯವನ್ನು ಬಲಪಡಿಸುವ ಗುರಿ ಹೊಂದಿದೆ.

ಬೆಂಗಳೂರುದಲ್ಲಿ ನಡೆದ ರಾಷ್ಟ್ರೀಯ ಸಮ್ಮೇಳನದಲ್ಲಿ ಭಾರತದ ವಿದ್ಯುತ್ ವಾಹನ (EV) ಚಾರ್ಜಿಂಗ್ ಮೂಲಸೌಕರ್ಯವನ್ನು ಬಲಪಡಿಸುವ ಕುರಿತಾಗಿ ಮಹತ್ವದ ಘೋಷಣೆ ಮಾಡಲಾಗಿದೆ. ಕೇಂದ್ರ ಬೃಹತ್ ಕೈಗಾರಿಕೆಗಳು ಮತ್ತು ಸಾರ್ವಜನಿಕ ಉದ್ಯಮಗಳ ಸಚಿವ H. D. ಕುಮಾರಸ್ವಾಮಿ ಅವರು ಅವರು ಮಂಗಳವಾರ ಪ್ರಧಾನ ಮಂತ್ರಿ ಇ-ಡ್ರೈವ್ ಯೋಜನೆಯಡಿ ಕರ್ನಾಟಕಕ್ಕೆ 1,243 ಇವಿ ಚಾರ್ಜರ್‌ಗಳ ಸ್ಥಾಪನೆಗೆ ಅನುಮೋದನೆ ನೀಡುವುದಾಗಿ ಘೋಷಿಸಿದರು. ಈ ಯೋಜನೆಗೆ ಒಟ್ಟು ರೂ. 123.26 ಕೋಟಿ ವೆಚ್ಚವಾಗಲಿದೆ.

ಪ್ರಧಾನ ಮಂತ್ರಿ ಇ-ಡ್ರೈವ್ ಯೋಜನೆಯಡಿ ದೇಶವ್ಯಾಪಿ ಇವಿ ಚಾರ್ಜಿಂಗ್ ಮೂಲಸೌಕರ್ಯವನ್ನು ವಿಸ್ತರಿಸುವ ಉದ್ದೇಶದಿಂದ ಬೆಂಗಳೂರುದಲ್ಲಿ ಆಯೋಜಿಸಲಾದ ಸಮ್ಮೇಳನವನ್ನು ಉದ್ದೇಶಿಸಿ ಮಾತನಾಡಿದ ಸಚಿವರು, ನಗರವು ಈಗಾಗಲೇ ಭಾರತದ ಪ್ರಮುಖ ಇವಿ ಚಾರ್ಜಿಂಗ್ ಕೇಂದ್ರಗಳಲ್ಲಿ ಒಂದಾಗಿ ಹೊರಹೊಮ್ಮಿರುವುದನ್ನು ಉಲ್ಲೇಖಿಸಿದರು. ಇದೇ ವೇಳೆ, ಸ್ವಚ್ಛ ಚಲನಶೀಲತೆಯತ್ತ ದೇಶದ ಪರಿವರ್ತನೆಗೆ ರಾಜ್ಯಗಳು ಸಕ್ರಿಯವಾಗಿ ಕೈಜೋಡಿಸಬೇಕೆಂದು ಅವರು ಕರೆ ನೀಡಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ದೇಶದ ವಿವಿಧ ರಾಜ್ಯಗಳು ಹಾಗೂ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ (IOCL), ಭಾರತ ಪೆಟ್ರೋಲಿಯಂ ಕಾರ್ಪೋರೇಷನ್ ಲಿಮಿಟೆಡ್ (BPCL) ಮತ್ತು ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೋರೇಷನ್ ಲಿಮಿಟೆಡ್ (HPCL) ಸೇರಿದಂತೆ ಕೇಂದ್ರ ಸಾರ್ವಜನಿಕ ವಲಯದ ಕಂಪನಿಗಳ ಮೂಲಕ 4,874 ಇವಿ ಚಾರ್ಜರ್‌ಗಳ ಸ್ಥಾಪನೆಗೆ ಇದುವರೆಗೆ ರೂ. 503.86 ಕೋಟಿ ಮೊತ್ತದ ಪ್ರಸ್ತಾವನೆಗಳಿಗೆ ಅನುಮೋದನೆ ನೀಡಲಾಗಿದೆ ಎಂದು ಮಾಹಿತಿ ನೀಡಿದರು.

ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ ಭಾರತವು 2070ರೊಳಗೆ ನಿವ್ವಳ ಶೂನ್ಯ ಕಾರ್ಬನ್ ಉತ್ಸರ್ಜನೆ ಸಾಧಿಸುವ ಗುರಿಯೊಂದಿಗೆ “ವಿಕಸಿತ ಭಾರತ್ 2047” ದೃಷ್ಟಿಕೋನದತ್ತ ಮುನ್ನಡೆಯುತ್ತಿದೆ ಎಂದು ಹೆಚ್‌ಡಿಕೆ ಹೇಳಿದರು. ವಾಹನ ವಲಯವು ದೇಶದ ಜಿಡಿಪಿಗೆ ಶೇಕಡಾ 7 ಕ್ಕಿಂತ ಹೆಚ್ಚು ಕೊಡುಗೆ ನೀಡುತ್ತಿದ್ದು, ಉತ್ಪಾದನಾ ಜಿಡಿಪಿಯ ಅರ್ಧದಷ್ಟು ಪಾಲು ಹೊಂದಿದೆ ಮತ್ತು ಸುಮಾರು 3 ಕೋಟಿ ಜನರ ಜೀವನೋಪಾಯಕ್ಕೆ ಆಧಾರವಾಗಿದೆ ಎಂದರು.

ವಿದ್ಯುತ್ ಚಲನಶೀಲ ಪರಿಸರ ವ್ಯವಸ್ಥೆಯನ್ನು ಬಲಪಡಿಸಲು ಕೇಂದ್ರ ಸರ್ಕಾರ ಕೈಗೊಂಡಿರುವ ಹಲವು ಪ್ರಮುಖ ಯೋಜನೆಗಳನ್ನೂ ಅವರು ಪ್ರಸ್ತಾಪಿಸಿದರು. ಬ್ಯಾಟರಿ ಸೆಲ್ ಉತ್ಪಾದನೆಗೆ ರೂ. 18,100 ಕೋಟಿ ವೆಚ್ಚದ ಪಿಎಲ್ಐ ಎಸಿಸಿ ಯೋಜನೆ, ಸ್ವಚ್ಛ ವಾಹನಗಳ ಉತ್ತೇಜನಕ್ಕಾಗಿ ರೂ. 25,938 ಕೋಟಿ ಪಿಎಲ್ಐ ಆಟೋ ಯೋಜನೆ ಹಾಗೂ ಅಪರೂಪದ ಭೂಮಿಯ ಮ್ಯಾಗ್ನೆಟ್ ಉತ್ಪಾದನೆಗಾಗಿ ಆರಂಭಿಸಲಾದ ರೂ. 7,280 ಕೋಟಿ ಆರ್‌ಇಪಿಎಂ ಯೋಜನೆಗಳು ದೇಶದ ಇವಿ ಕ್ಷೇತ್ರಕ್ಕೆ ಬಲ ತುಂಬಲಿವೆ ಎಂದು ಹೇಳಿದರು.

ಪ್ರಧಾನ ಮಂತ್ರಿ ಇ-ಡ್ರೈವ್ ಯೋಜನೆಯನ್ನು ದೇಶದ ಇವಿ ಕ್ರಾಂತಿಯ ಪ್ರಮುಖ ಆಧಾರವೆಂದು ಕರೆದ ಸಚಿವರು, ಸುಮಾರು ರೂ. 10,900 ಕೋಟಿ ಮೌಲ್ಯದ ಈ ಯೋಜನೆ ವಿದ್ಯುತ್ ದ್ವಿಚಕ್ರ ವಾಹನಗಳು, ತ್ರಿಚಕ್ರ ವಾಹನಗಳು, ಬಸ್ಸುಗಳು ಹಾಗೂ ಸರಕು ವಾಹನಗಳ ಬಳಕೆಯನ್ನು ವೇಗಗೊಳಿಸುವುದರ ಜೊತೆಗೆ ದೇಶವ್ಯಾಪಿ ಚಾರ್ಜಿಂಗ್ ಜಾಲವನ್ನು ನಿರ್ಮಿಸುವಲ್ಲಿ ಪ್ರಮುಖ ಪಾತ್ರವಹಿಸುತ್ತಿದೆ ಎಂದು ಹೇಳಿದರು. ಇದರೊಳಗೆ ರೂ. 2,000 ಕೋಟಿ ಸಾರ್ವಜನಿಕ ಇವಿ ಚಾರ್ಜಿಂಗ್ ಮೂಲಸೌಕರ್ಯಕ್ಕಾಗಿ ಮೀಸಲಾಗಿರುವುದು ಗಮನಾರ್ಹವಾಗಿದೆ.

ಇದೇ ವೇಳೆ, ದೇಶಾದ್ಯಂತ ಚಾರ್ಜಿಂಗ್ ಮೂಲಸೌಕರ್ಯ ವಿಸ್ತರಣೆಯಲ್ಲಿ ತೈಲ ಮಾರುಕಟ್ಟೆ ಕಂಪನಿಗಳಾದ BPCL, IOCL ಮತ್ತು HPCLಗಳ ಪಾತ್ರವನ್ನು ಅವರು ಶ್ಲಾಘಿಸಿದರು. FAME II Scheme ಯೋಜನೆಯಡಿ, ಈ ಕಂಪನಿಗಳು ಭಾರೀ ಕೈಗಾರಿಕಾ ಸಚಿವಾಲಯದ ರೂ. 873.5 ಕೋಟಿ ಸಬ್ಸಿಡಿ ಸಹಾಯದೊಂದಿಗೆ ದೇಶಾದ್ಯಂತ 8,932 ಇವಿ ಚಾರ್ಜರ್‌ಗಳನ್ನು ಸ್ಥಾಪಿಸಿವೆ. ಇದರಲ್ಲಿ ಕರ್ನಾಟಕದಲ್ಲಿಯೇ 721 ಚಾರ್ಜರ್‌ಗಳು ಸ್ಥಾಪಿತವಾಗಿವೆ.

ಇನ್ನು, ಇವಿ ಬಳಕೆದಾರರಿಗೆ ಅನುಕೂಲವಾಗುವಂತೆ ‘ಯುನಿಫೈಡ್ ಭಾರತ್ ಇ-ಚಾರ್ಜ್’ (UBC) ಎಂಬ ರಾಷ್ಟ್ರೀಯ ಏಕೀಕೃತ ಇವಿ ಚಾರ್ಜಿಂಗ್ ಅಪ್ಲಿಕೇಶನ್ ಅಭಿವೃದ್ಧಿಯಲ್ಲಿದೆ ಎಂದು ಕುಮಾರಸ್ವಾಮಿ ತಿಳಿಸಿದರು. ಈ ವೇದಿಕೆಯ ಮೂಲಕ ಬಳಕೆದಾರರು ಒಂದೇ ಅಪ್ಲಿಕೇಶನ್‌ನಲ್ಲಿ ವಿವಿಧ ಚಾರ್ಜಿಂಗ್ ನೆಟ್‌ವರ್ಕ್‌ಗಳನ್ನು ಅನ್ವೇಷಿಸಿ, ಬಳಸಿಕೊಂಡು, ಪಾವತಿಗಳನ್ನು ಮಾಡಬಹುದು. ಡಿಜಿಟಲ್ ಪಾವತಿಗಳಲ್ಲಿ ಯುಪಿಐ ಮಾಡಿದಂತೆಯೇ ಈ ಅಪ್ಲಿಕೇಶನ್ ಇವಿ ಕ್ಷೇತ್ರದಲ್ಲೂ ಕ್ರಾಂತಿ ತರಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.

ಭಾರತದ ಇವಿ ಮೂಲಸೌಕರ್ಯ ಮಾರ್ಗಸೂಚಿಗಳು ನಗರ ಹಾಗೂ ಗ್ರಾಮೀಣ ಪ್ರದೇಶಗಳಲ್ಲಿಯೂ ಚಾರ್ಜಿಂಗ್ ಸೌಲಭ್ಯಗಳ ಲಭ್ಯತೆ, ಕೈಗೆಟುಕುವಿಕೆ ಮತ್ತು ವಿಶ್ವಾಸಾರ್ಹತೆಯನ್ನು ಖಚಿತಪಡಿಸುವತ್ತ ಕೇಂದ್ರೀಕೃತವಾಗಿವೆ. ಈ ಪರಿವರ್ತನೆಯನ್ನು ಭಾರತದ ಭವಿಷ್ಯಕ್ಕೆ ನಿರ್ಣಾಯಕ ಘಟ್ಟವೆಂದು ವಿವರಿಸಿದ ಸಚಿವರು, ಇವಿ ಚಳವಳಿ ಕೇವಲ ಮೂಲಸೌಕರ್ಯ ನಿರ್ಮಾಣಕ್ಕೆ ಸೀಮಿತವಲ್ಲದೆ, ಪಳೆಯುಳಿಕೆ ಇಂಧನಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಿ, ಇಂಧನ ಭದ್ರತೆಯನ್ನು ಹೆಚ್ಚಿಸಿ, ಸುಸ್ಥಿರ ಭವಿಷ್ಯ ನಿರ್ಮಿಸುವತ್ತ ಮಹತ್ವದ ಹೆಜ್ಜೆಯಾಗಿದೆ ಎಂದು ಹೇಳಿದರು.