Asianet Suvarna News

ಅಬ್ಬಬ್ಬಾ! ಮಂಗಳೂರು ಸೆಂಟ್ರಲ್‌ಗೆ ಬಂಪರ್ ಆದಾಯ, ಒಂದೇ ವರ್ಷದಲ್ಲಿ ಗಳಿಸಿದ್ದೆಷ್ಟು ಗೊತ್ತಾ?

Kannadaprabha News — Thu, 15 Oct 2026 06:54:02 +0530

ಮಂಗಳೂರು (ಅ.15): 2025-26ರ ಅವಧಿಯಲ್ಲಿ ಮಂಗಳೂರು ಸೆಂಟ್ರಲ್ ರೈಲು ನಿಲ್ದಾಣದಲ್ಲಿ ಟಿಕೆಟ್ 16,99,232 ಕಾಯ್ದಿರಿಸಿದ ಮತ್ತು 39,85,579 ಟಿಕೆಟ್ ಕಾಯ್ದಿರಿಸದ ಪ್ರಯಾಣಿಕರು ಸೇರಿದಂತೆ ಒಟ್ಟು 56,84,811 ಪ್ರಯಾಣಿಕರನ್ನು ನಿರ್ವಹಿಸಲಾಗಿದೆ.

ಮಂಗಳೂರು ಜಂಕ್ಷನ್ 5,70,828 ಟಿಕೆಟ್ ಕಾಯ್ದಿರಿಸಿದ ಮತ್ತು 6,61,877 ಟಿಕೆಟ್ ಕಾಯ್ದಿರಿಸದ ಪ್ರಯಾಣಿಕರನ್ನೊಳಗೊಂಡಂತೆ ಒಟ್ಟು 12,32,705 ಪ್ರಯಾಣಿಕರನ್ನು ನಿರ್ವಹಿಸಿದರೆ, ಉಳ್ಳಾಲ 27,978 ಟಿಕೆಟ್ ಕಾಯ್ದಿರಿಸಿದ ಮತ್ತು 65,277 ಟಿಕೆಟ್ ಕಾಯ್ದಿರಿಸದ ಪ್ರಯಾಣಿಕರು ಸೇರಿದಂತೆ ಒಟ್ಟು 93,255 ಪ್ರಯಾಣಿಕರನ್ನು ನಿರ್ವಹಿಸಿದೆ. ಒಟ್ಟಾರೆಯಾಗಿ ಈ ಮೂರು ನಿಲ್ದಾಣಗಳು 70,10,771 ಪ್ರಯಾಣಿಕರ ಸಂಚಾರವನ್ನು ದಾಖಲಿಸಿದ್ದು, ಇದರಲ್ಲಿ ಮಂಗಳೂರು ಸೆಂಟ್ರಲ್ ಒಂದೇ ಶೇಕಡಾ 81ಕ್ಕಿಂತ ಹೆಚ್ಚು ಪಾಲನ್ನು ಹೊಂದಿರುವ ಸಂಗತಿ ರೈಲ್ವೆ ಸಂಘಟನೆಗಳು ಪಡೆದ ಮಾಹಿತಿ ಹಕ್ಕಿನಲ್ಲಿ ತಿಳಿದುಬಂದಿದೆ.

ಪ್ರಯಾಣಿಕ ರೈಲುಗಳ ಆದಾಯ:

ವರದಿಯಾದ ಅವಧಿಯಲ್ಲಿ ಮಂಗಳೂರು ಸೆಂಟ್ರಲ್ ₹ 133.06 ಕೋಟಿ, ಮಂಗಳೂರು ಜಂಕ್ಷನ್ ₹ 62.10 ಕೋಟಿ ಮತ್ತು ಉಳ್ಳಾಲ ₹ 32.72 ಲಕ್ಷ ಪ್ರಯಾಣಿಕ ಆದಾಯವನ್ನು ಗಳಿಸಿವೆ. ಈ ಮೂರು ನಿಲ್ದಾಣಗಳ ಒಟ್ಟು ಆದಾಯ ಸರಿಸುಮಾರು ₹ 195.48 ಕೋಟಿಗಳಾಗಿದ್ದು, ಇದು ಮಂಗಳೂರು ರೈಲ್ವೆ ಜಾಲದ ಗಣನೀಯ ಕೊಡುಗೆಯನ್ನು ತೋರಿಸುತ್ತದೆ.

ನಾನ್-ಸಬರ್ಬನ್ ಗ್ರೂಪ್ (ಎನ್‌ಎಸ್‌ಜಿ) ವರ್ಗೀಕರಣ:

ಮಂಗಳೂರು ಸೆಂಟ್ರಲ್‌ನ್ನು NSG-2, ಮಂಗಳೂರು ಜಂಕ್ಷನ್‌ನ್ನು NSG-3 ಮತ್ತು ಉಳ್ಳಾಲವನ್ನು NSG-4 ಎಂದು ವರ್ಗೀಕರಿಸಲಾಗಿದೆ. ಮೂಲಸೌಕರ್ಯ, ಪ್ರಯಾಣಿಕರ ಸೌಲಭ್ಯಗಳು, ರೈಲು ಸೇವೆಗಳು ಮತ್ತು ಕಾರ್ಯಾಚರಣಾ ಸೌಲಭ್ಯಗಳನ್ನು ಯೋಜಿಸುವಾಗ ಪ್ರಯಾಣಿಕರ ದಟ್ಟಣೆ, ಆದಾಯ ಮತ್ತು ಪ್ರದೇಶದ ಭವಿಷ್ಯದ ಅಗತ್ಯಗಳೊಂದಿಗೆ ಈ ವರ್ಗೀಕರಣಗಳನ್ನು ಪರಿಗಣಿಸುತ್ತಾರೆ. ಪ್ರಮುಖ ರೈಲ್ವೆ ಟರ್ಮಿನಲ್ ಆಗಿರುವ ಮಂಗಳೂರು ಸೆಂಟ್ರಲ್ ಆಧುನೀಕರಣ ಮತ್ತು ಸಾಮರ್ಥ್ಯ ವಿಸ್ತರಣೆಯಲ್ಲಿ ಸೂಕ್ತ ಆದ್ಯತೆಗೆ ಅರ್ಹವಾಗಿದೆ ಎಂಬುದು ರೈಲ್ವೆ ಸಂಘಟನೆಗಳ ಅಭಿಪ್ರಾಯ.

ಸರಕು ಸಾಗಣೆ ಮತ್ತು ನಿರ್ವಹಣೆ:

ಮಂಗಳೂರು ಸೆಂಟ್ರಲ್ ಮತ್ತು ಉಳ್ಳಾಲ ನಿಲ್ದಾಣಗಳ ಸರಕು ಸಾಗಣೆಯ ಅಂಕಿಅಂಶಗಳು ನಿರಂತರ ಬೆಳವಣಿಗೆಯನ್ನು ದಾಖಲಿಸಿವೆ.

2024-25ರಲ್ಲಿ ಸಾಗಿಸಿದ ಸರಕು 38,816 ಟನ್‌ ಮತ್ತು ಸರಕು ಆದಾಯ ₹ 13,78,416 ಆಗಿತ್ತು. 2025-26ರಲ್ಲಿ ಸಾಗಿಸಿದ ಸರಕು 53,293 ಟನ್‌ಗೆ ಏರಿಕೆಯಾಗಿ ಆದಾಯ ₹ 43,49,281 ತಲುಪಿದೆ. 2026-27ರ ಏಪ್ರಿಲ್-ಸೆಪ್ಟೆಂಬರ್ ಅವಧಿಯಲ್ಲಿ ಸಾಗಿಸಿದ ಸರಕು 38,859 ಟನ್‌ ಮತ್ತು ಸರಕು ಆದಾಯ ₹ 25,98,729 ತಲುಪಿದೆ. ಉತ್ತಮ ಸರಕು ನಿರ್ವಹಣಾ ಸೌಲಭ್ಯಗಳು ಮತ್ತು ರೈಲ್ವೆ ಮೂಲಸೌಕರ್ಯಗಳ ಸಮರ್ಪಕ ಬಳಕೆಯಿಂದ ಇದು ಸಾಧ್ಯವಾಗಿದೆ ಎಂದು ಮಾಹಿತಿಯಲ್ಲಿ ತಿಳಿಸಲಾಗಿದೆ.

ಸೌಜನ್ಯ ಕೇಸ್, 2012ರಲ್ಲಿ ಮೃತ ವಿದ್ಯಾರ್ಥಿನಿ ಮಾವ, ಪೋಷಕರ ಸುದ್ದಿಗೋಷ್ಠಿ ವಿಡಿಯೋ ಕೋಲಾಹಲ

Chethan Kumar — Tue, 13 Oct 2026 13:32:46 +0530

ಬೆಳ್ತಗಂಡಿ (ಅ.13) ಬೆಳ್ತಂಗಡಿ ತಾಲೂಕಿನ ವಿದ್ಯಾರ್ಥಿನ ಸೌಜನ್ಯ ಪ್ರಕರಣ 14 ವರ್ಷದ ಬಳಿಕ ಮರು ತನಿಖೆ ಆರಂಭಗೊಂಡಿದೆ. ಐಜಿಪಿ ಶಶಿಕುಮಾರ್ ಇಂದು (ಅ.13) ಮಂಗಳೂರಿನ ಎಸ್ಐಟಿ ಕಚೇರಿಯಲ್ಲಿ ಮಹತ್ವದ ಸಭೆ ನಡೆಸಿದ್ದಾರೆ. ಇದರ ಬೆನ್ನಲ್ಲೇ ಇದೀಗ ಸೌಜನ್ಯ ಪ್ರಕರಣ ಕುರಿತು ವಕೀಲ ಅಮೃತೇಶ್ ಸ್ಫೋಟಕ ಹೇಳಿಕೆ ನೀಡಿದ್ದಾರೆ. ನ್ಯಾಯವಾದಿ ಅಮೃತೇಶ್ ಸುದ್ದಿಗೋಷ್ಠಿ ವೇಳೆ ಸೌಜನ್ಯ ತಾಯಿ, ತಂದೆ ಹಾಗೂ ಮಾವ ಮಾಡಿದ್ದ ಹಳೆಯ ಸುದ್ದಿಗೋಷ್ಠಿ ವಿಡಿಯೋ ಪ್ರಸಾರ ಮಾಡಲಾಗಿದೆ. ಇದು ಕೋಲಾಹಲಕ್ಕೆ ಕಾರಣವಾಗಿದೆ.

ಸೌಜನ್ಯ ಪೋಷಕರು, ಮಾವನ ಸುದ್ದಿಗೋಷ್ಠಿಯಲ್ಲಿ ಏನಿದೆ

ಸೌಜನ್ಯ ಘಟನೆ ನಡೆದ ಬಳಿಕ 2012ರಲ್ಲಿ ಸೌಜನ್ಯ ತಾಯಿ, ತಂದೆ ಹಾಗೂ ಮಾವ ಜೊತೆ ಸೇರಿ ಸುದ್ದಿಗೋಷ್ಠಿ ಮಾಡಿದ್ದರು. ಈ ಸುದ್ದಿಗೋಷ್ಠಿ ವಿಡಿಯೋವನ್ನು ನ್ಯಾಯವಾದಿ ಅಮೃತೇಷ್ ಪ್ರಸಾರ ಮಾಡಿ ಹಲವು ವಿಚಾರ ಪ್ರಸ್ತಾಪಿಸಿದ್ದಾರೆ. ಸೌಜನ್ಯ ಪೋಷಕರು 2012ರಲ್ಲಿ ನಡೆಸಿದ ಸುದ್ದಿಗೋಷ್ಠಿಯಲ್ಲಿ ಧರ್ಮಸ್ಥಳದ ಪರವಾಗಿ ಹೇಳಿಕೆ ನೀಡಿದ್ದಾರೆ. ಧರ್ಮಸ್ಥಳದವರು ಬೆಂಬಲ ನೀಡಿದ್ದಾರೆ. ಧರ್ಮಸ್ಥಳದವರು ಯಾವುದೇ ಭೂಮಿಯ ವಿಚಾರಕ್ಕಾಗಿ ಒತ್ತಡ ಮಾಡಿರಲಿಲ್ಲ ಎಂದು ಹೇಳಿದ್ದಾರೆ. ಬಳಿಕ ನಿಧಾನವಾಗಿ ಈ ಪ್ರಕರಣದಲ್ಲಿ ಸೌಜನ್ಯ ಪೋಷಕರು ಧರ್ಮಸ್ಥಳ ವಿರುದ್ಧ ಹೇಳಿಕೆ ಆರಂಭಿಸಿದ್ದಾರೆ ಎಂದು ನ್ಯಾಯವಾದಿ ಹೇಳಿದ್ದಾರೆ.

17/11/2012 ನಡೆದ ಸುದ್ದಿಗೋಷ್ಠಿಯಲ್ಲಿ ಧರ್ಮಸ್ಥಳದಿಂದ ಯಾವುದೇ ಒತ್ತಡ ಇರಲಿಲ್ಲ ಎಂದಿದ್ದಾರೆ. ಪ್ರಕರಣದಲ್ಲಿ ಧರ್ಮಸ್ಥಳದವರು ಸಪೋರ್ಟ್ ಮಾಡಿದ್ದಾರೆ ಎಂದು ಹೇಳಿಕೆ ಕೊಟ್ಟಿದ್ದರು. ಸೌಜನ್ಯ ಪೋಷಕರ ಸುದ್ದಿಗೋಷ್ಠಿ ಬಳಿಕ 2012ರಲ್ಲಿ ನಡೆಸಿದ ಸ್ಥಳ ಮಹಜರು ವಿಡಿಯೋವನ್ನು ಪ್ರಸಾರ ಮಾಡಲಾಗಿದೆ. ಈ ಪ್ರಕರಣ ಸಂಬಂಧ ನ್ಯಾಯವಾದಿ ಅಮೃತೇಶ್ ಕೆಲ ವಿಚಾರ ಪ್ರಸ್ತಾಪಿಸಿದ್ದಾರೆ.

ದೇವಸ್ಥಾನ, ಮಠಗಳ ಟಾರ್ಗೆಟ್

ಹಲವಾರು ವರ್ಷಗಳಿಂದ ಸೌಜನ್ಯ ಹೆಸರೇಳಿದ ಕೂಡಲೇ ಕುತೂಹಲ ಶುರುವಾಗುತ್ತೆ. ಕರ್ನಾಟಕ ರಾಜ್ಯ ಮಾತ್ರವಲ್ಲ ದೇಶದಲ್ಲೇ ಕುತೂಹಲ ಮೂಡಿಸಿದ ಪ್ರಕರಣ ಇದು. 14 ವರ್ಷಗಳ ನಂತರ ಧರ್ಮಸ್ಥಳ ಪೊಲೋಸರು ಮಿಸ್ಸಿಂಗ್ ಕಂಪ್ಲೈಂಟ್ ತಗೋತಾರೆ. ಸಿಐಡಿ, ಎಸ್ಐಟಿ ಹೀಗೆ ಹಂತ ಹಂತವಾಗಿ ತನಿಖಾ ಸಂಸ್ಥೆಗಳು ತನಿಖೆ ಮಾಡುತ್ತಲೇ ಇದೆ. ದೇವಸ್ಥಾನಗಳನ್ನು, ಮಠ ಮಾನ್ಯಗಳನ್ನ ಟಾರ್ಗೆಟ್ ಮಾಡುವ ಒಂದು ಗುಂಪಿದೆ. ಸೌಜನ್ಯ ಪ್ರಕರಣದಲ್ಲಿ ಧರ್ಮಸ್ಥಳ ಕ್ಷೇತ್ರದವರ ಕೈವಾಡ ಅನ್ನೋ ಗುಲ್ಲೇಬ್ಬಿಸಿದ್ದರು. ಹಲವು ಆರೋಪಗಳನ್ನು ಮಾಡಿದರು. ಸಾಕ್ಷ್ಯವಿದೆ ಎಂದು ಅಲೆದಾಡಿದರು. ಆದರೆ ಕೋರ್ಟ್‌ಗಾಗಲಿ, ಪೊಲೀಸರಿಗಾಗಲಿ ಈ ಸಾಕ್ಷ್ಯ ಕೊಡಲೇ ಇಲ್ಲ. ಆದರೆ ಪ್ರಕರಣದ ಹೆಸರಿನಲ್ಲಿ ಹೋರಾಟಗಳನ್ನು ನಡೆಸುತ್ತಾ ಬಂದಿದ್ದಾರೆ ಎಂದು ಅಮೃತೇಶ್ ಹೇಳಿದ್ದಾರೆ.

ರಾಜ್ಯಕ್ಕೆ ಹಿಂಗಾರು ಪ್ರವೇಶ: ಕರಾವಳಿಯಲ್ಲಿ ಮೋಡ, ದಕ್ಷಿಣ ಒಳನಾಡಿನ ಜಿಲ್ಲೆಗಳಲ್ಲಿ ಅ.21ರ ವರೆಗೆ ಮಳೆ ಮುನ್ಸೂಚನೆ,

Gowthami K — Fri, 16 Oct 2026 10:16:15 +0530

ಬೆಂಗಳೂರು: ರಾಜ್ಯದಲ್ಲಿ ನೈರುತ್ಯ ಮುಂಗಾರು ರಾಜ್ಯದಿಂದ ಗುರುವಾರ ಅಧಿಕೃತವಾಗಿ ನಿರ್ಗಮನವಾಗಿದ್ದು, ಇದರ ಬೆನ್ನಲ್ಲೇ ದಕ್ಷಿಣ ಒಳನಾಡಿನ ವಿವಿಧೆಡೆ ಮಳೆಯೊಂದಿಗೆ ಹಿಂಗಾರು ಪ್ರವೇಶವಾಗಿದೆ. ಹಾಸನ, ಚಿಕ್ಕಮಗಳೂರು, ಕೊಡಗು ಸೇರಿ ರಾಜ್ಯದ ದಕ್ಷಿಣ ಒಳನಾಡಿನ ವಿವಿಧ ಜಿಲ್ಲೆಗಳಲ್ಲಿ ಅ.16ರಿಂದ 21ರವರೆಗೆ ಭಾರಿ ಮಳೆಯಾಗುವ ಮುನ್ಸೂಚನೆಯನ್ನು ಹವಾಮಾನ ಇಲಾಖೆ ನೀಡಿದೆ. 30 ರಿಂದ 40 ಕಿ.ಮೀ ವೇಗದಲ್ಲಿ ಗಾಳಿಯೊಂದಿಗೆ ಗುಡುಗು ಸಹಿತ ಚಿಕ್ಕಮಗಳೂರು, ಹಾಸನ, ಕೊಡಗು ಜಿಲ್ಲೆಗಳ ಭಾರಿ ಮಳೆಯಾಗುವ ಮುನ್ಸೂಚನೆಯಿದ್ದು, ಅ.16ರಂದು ಯೆಲ್ಲೋ ಅಲರ್ಟ್ ಘೋಷಿಸಲಾಗಿದೆ. ಉಳಿದಂತೆ ಮೈಸೂರು, ಶಿವಮೊಗ್ಗ, ಬೆಂಗಳೂರು ನಗರ, ಗ್ರಾಮಾಂತರ, ತುಮಕೂರು, ಚಿತ್ರದುರ್ಗ, ಚಿಕ್ಕಬಳ್ಳಾಪುರ, ಕೋಲಾರ, ಮಂಡ್ಯ, ಚಾಮರಾಜನಗರ ಜಿಲ್ಲೆಗಳ ವಿವಿಧೆಡೆ ಸಾಧಾರಣ ಮತ್ತು ಕೆಲವೆಡೆ ಭಾರಿ ಮಳೆಯಾಗಲಿದೆ.

ಇನ್ನು ಅ.17ರಿಂದ ಅ.21ರ ವರೆಗೆ ಉತ್ತರ ಒಳನಾಡಿನ ದಾವಣಗೆರೆ, ವಿಜಯನಗರ ಮತ್ತು ಬಳ್ಳಾರಿ ಜಿಲ್ಲೆಗಳಲ್ಲಿ ಸಾಧಾರಣ ಮಳೆಯಾಗುವ ಸಾಧ್ಯತೆ ಇದೆ.

ಗುರುವಾರದಂದು ಬೆಂಗಳೂರು ನಗರ, ಬೆಂಗಳೂರು ಗ್ರಾಮಾಂತರ, ಕೊಡಗು, ಹಾಸನ, ಚಿಕ್ಕಮಗಳೂರು, ರಾಮನಗರ, ಕೋಲಾರ, ಚಿಕ್ಕಬಳ್ಳಾಪುರದ ವಿವಿಧೆಡೆ ಉತ್ತಮ ಮಳೆಯಾಗಿದೆ. ಕರಾವಳಿ ಮತ್ತು ಉತ್ತರ ಒಳನಾಡಿನಲ್ಲಿ ಒಣಹವೆ ಮುಂದುವರೆದಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಆದರೆ ಕರಾವಳಿ ಜಿಲ್ಲೆಯಲ್ಲಿ ಅಕ್ಟೋಬರ್ 15ರ ರಾತ್ರಿ ಅಲ್ಲಲ್ಲಿ ಮಳೆ ಹನಿ ಹಾಕಿದ್ದು, ಅಕ್ಟೋಬರ್ 16ರಿಂದ ಬೆಳಗ್ಗಿನಿಂದಲೇ ಮೋಡ ಕವಿದ ವಾತಾವರಣವಿದೆ.

ಬೆಂಗಳೂರಲ್ಲಿ ಗರಿಷ್ಠ 40 ಮಿಮೀ ದಾಖಲು!

ನಗರದಲ್ಲಿ ಗುರುವಾರ ಸಂಜೆ ಬಿರುಸಿನ ಮಳೆಯಾಗಿದ್ದು, ತಗ್ಗು ಪ್ರದೇಶಗಳು, ರಸ್ತೆಗಳಲ್ಲಿ ನೀರು ನಿಂತು ಟ್ರಾಫಿಕ್ ಜಾಮ್‌ ಉಂಟಾಗಿ ವಾಹನ ಸವಾರರು ಪರದಾಡಿದರು. ದಿಢೀರ್‌ ಸುರಿದ ಮಳೆಯಿಂದ ಮನೆಗೆ ತೆರಳುತ್ತಿದ್ದ ಸಾರ್ವಜನಿಕರು ಮಳೆಗೆ ಸಿಲುಕಿದರು.

ವೈಟ್‌ಫೀಲ್ಡ್, ಶಾಂತಿನಗರ, ಸಾರಕ್ಕಿ ಮಾರತ್ತಹಳ್ಳಿ, ಕಾಡುಬೀಸನಹಳ್ಳಿ, ಬೆನ್ನಿಗಾನಹಳ್ಳಿ, ಮೆಜೆಸ್ಟಿಕ್, ಶಿವಾನಂದ ಸರ್ಕಲ್, ಪ್ಯಾಲಸ್ ಗುಟ್ಟಹಳ್ಳಿ, ಟೌನ್‌ಹಾಲ್, ಅಶೋಕ ಪಿಲ್ಲರ್, ಆಚಾರ್ಯ ಲೇಔಟ್, ಎಂ.ಜಿ.ರಸ್ತೆ, ಶಾಂತಿನಗರ, ಕಮೀಷನರೆಟ್ ರಸ್ತೆ, ಸಿಲ್ಕ್‌ಬೋರ್ಡ್ ಮೆಟ್ರೋ ನಿಲ್ದಾಣ ಸೇರಿದಂತೆ ಹಲವೆಡೆ ರಸ್ತೆಗಳು, ಫ್ಲೈಓವರ್, ಅಂಡರ್‌ಪಾಸ್‌ಗಳು ಜಲಾವೃತಗೊಂಡಿದ್ದವು. ಆನಂದರಾವ್ ವೃತ್ತದ ಬಳಿಯ ಒಳಚರಂಡಿಯ ಮ್ಯಾನ್‌ಹೋಲ್‌ ಉಕ್ಕಿ ಹರಿದ ಪರಿಣಾಮ ಅಪಾರ ಪ್ರಮಾಣದ ಗಲೀಜು ನೀರು ಹರಿದು ವಾಹನಗಳ ಸಂಚಾರಕ್ಕೆ ತೊಡಕುಂಟಾಯಿತು.

ಸಾರಕ್ಕಿಯಲ್ಲಿ ಗರಿಷ್ಠ 40 ಮಿ.ಮೀ, ಶಾಂತಿನಗರ 38, ಶ್ರೀನಗರದಲ್ಲಿ 22 ಮಿ.ಮೀ ಮಳೆಯಾಗಿದೆ. ದೀಪಾಂಜಲಿ ನಗರ 22, ಎಚ್‌ಎಎಲ್ ವಿಮಾನ ನಿಲ್ದಾಣ 20, ಮಹದೇವಪುರ 13, ವರ್ತೂರು 18, ಎ. ನಾರಾಯಣಪುರ 14, ದೇವಸಂದ್ರದಲ್ಲಿ 14, ಉಲ್ಲಾಳ 6.5 ಮಿ.ಮೀ ಮಳೆಯಾಗಿದೆ. ಶುಕ್ರವಾರವೂ ನಗರದ ಬಹುತೇಕ ಭಾಗಗಳಲ್ಲಿ ಗುಡುಗು ಸಹಿತ ಮಳೆಯಾಗಲಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.

ಗೃಹಲಕ್ಷ್ಮಿ ಹಣದಿಂದ ಕನಸಿನ ವಸ್ತ್ರಮಳಿಗೆ ಕಟ್ಟಿದ ಶಕುಂತಲಾ: ಮಹಿಳಾ ಸ್ವಾವಲಂಬನೆ!

Kannadaprabha News — Sat, 17 Oct 2026 10:18:17 +0530

ಬಂಟ್ವಾಳ: ತಿಂಗಳಿಗೆ ಬರುತ್ತಿದ್ದ 2 ಸಾವಿರ ರು.. ಅಷ್ಟೇನೂ ದೊಡ್ಡ ಮೊತ್ತವಲ್ಲ. ಆದರೆ ಅದನ್ನು ಖರ್ಚು ಮಾಡದೆ, ಮೂರು ವರ್ಷಗಳ ಕಾಲ ಕೂಡಿಟ್ಟಾಗ ಅದೇ ಹಣ ಒಂದು ಕನಸಿಗೆ ಬುನಾದಿಯಾಯಿತು. ಮಣಿನಾಲ್ಕೂರು ಗ್ರಾಮದ ಮಾವಿನಕಟ್ಟೆಯ ಶಕುಂತಳಾ ಅವರ ಪಾಲಿಗೆ ‘ಗೃಹಲಕ್ಷ್ಮಿ’ ಹಣ ಸ್ವಾವಲಂಬನೆಯ ದಾರಿಗೆ ಬೆಳಕಾಯಿತು.

ಟೈಲರಿಂಗ್ ಯಂತ್ರಗಳ ಸಹಿತ ‘ಶ್ರೀ ದುರ್ಗಾ ಗೃಹಲಕ್ಷ್ಮಿ ಟೆಕ್ಸ್‌ಟೈಲ್ಸ್ & ಗಾರ್ಮೆಂಟ್ಸ್’

ಅಂಗನವಾಡಿ ಕಾರ್ಯಕರ್ತೆಯಾಗಿರುವ ಶಕುಂತಳಾ, ಕಳೆದ ಮೂರು ವರ್ಷಗಳಿಂದ ಗೃಹಲಕ್ಷ್ಮಿ ಯೋಜನೆಯಡಿ ದೊರೆತ ಹಣದಲ್ಲಿ ರು. 72 ಸಾವಿರವನ್ನು ಉಳಿತಾಯ ಮಾಡಿದ್ದರು. ತಮ್ಮದೇ ಆದ ಉದ್ಯಮ ಆರಂಭಿಸಬೇಕೆಂಬ ಕನಸಿಗೆ ಈ ಹಣವನ್ನು ಬಳಸಿಕೊಂಡ ಅವರು, ಕುಟುಂಬದ ಉಳಿತಾಯವನ್ನೂ ಸೇರಿಸಿ ಒಟ್ಟು ರು. 2.50 ಲಕ್ಷ ವೆಚ್ಚದಲ್ಲಿ ಎರಡು ಟೈಲರಿಂಗ್ ಯಂತ್ರಗಳ ಸಹಿತ ‘ಶ್ರೀ ದುರ್ಗಾ ಗೃಹಲಕ್ಷ್ಮಿ ಟೆಕ್ಸ್‌ಟೈಲ್ಸ್ & ಗಾರ್ಮೆಂಟ್ಸ್’ ಆರಂಭಿಸಿದ್ದಾರೆ.

ನವರಾತ್ರಿ ಉತ್ಸವದ ಹಿನ್ನೆಲೆಯಲ್ಲಿ ಗುರುವಾರ ಮಳಿಗೆಯ ಶುಭಾರಂಭ ನಡೆಯಿತು. ಗೃಹಲಕ್ಷ್ಮಿ ಯೋಜನೆಯ ಹಣವನ್ನು ಕೇವಲ ದಿನನಿತ್ಯದ ಖರ್ಚಿಗೆ ಬಳಸದೆ, ಅದನ್ನೇ ಹೂಡಿಕೆಯಾಗಿ ಪರಿವರ್ತಿಸಿ ಸ್ವಾವಲಂಬನೆಯ ಹೆಜ್ಜೆ ಇಟ್ಟಿರುವ ಶಕುಂತಳಾ ಅವರ ಪ್ರಯತ್ನ ಗಮನ ಸೆಳೆಯಿತು.

ಮಹಿಳಾ ಸ್ವಾವಲಂಬನೆ

ಮಳಿಗೆಗೆ ಭೇಟಿ ನೀಡಿದ ಬಂಟ್ವಾಳ ತಾಲೂಕು ಪಂಚಗ್ಯಾರಂಟಿ ಅನುಷ್ಠಾನ ಸಮಿತಿ ಅಧ್ಯಕ್ಷೆ ಜಯಂತಿ ವಿ. ಪೂಜಾರಿ, ಶಿಶು ಅಭಿವೃದ್ಧಿ ಯೋಜನಾಧಿಕಾರಿ ಮಮ್ತಾಜ್ ಹಾಗೂ ಜಿಲ್ಲಾ ಸಮಿತಿ ಉಪಾಧ್ಯಕ್ಷ ನಾರಾಯಣ ನಾಯ್ಕ ಅವರು ಶಕುಂತಳಾ ಅವರನ್ನು ಅಭಿನಂದಿಸಿದರು.

‘ಶಕುಂತಳಾ ಅವರ ಸಾಧನೆ ಇತರ ಮಹಿಳೆಯರಿಗೂ ಸ್ಪೂರ್ತಿಯಾಗಿದ್ದು, ಮಹಿಳಾ ಸ್ವಾವಲಂಬನೆಗೆ ಪ್ರೇರಣಾದಾಯಕವಾಗಿದೆ,’ ಎಂದು ಜಯಂತಿ ವಿ. ಪೂಜಾರಿ ಹೇಳಿದರು.

ಚಾಲಕ ವೃತ್ತಿಯಲ್ಲಿರುವ ಪತಿ ಜಯಾನಂದ ಹಾಗೂ ಇಬ್ಬರು ವಿದ್ಯಾರ್ಥಿ ಪುತ್ರರಿರುವ ಕುಟುಂಬದಲ್ಲಿ, ಶಕುಂತಳಾ ಅವರು ತಮ್ಮದೇ ಆದ ಉದ್ಯಮದ ಮೂಲಕ ಕುಟುಂಬಕ್ಕೆ ಮತ್ತೊಂದು ಆದಾಯದ ದಾರಿ ತೆರೆದಿದ್ದಾರೆ.

ತಿಂಗಳಿಗೆ ಬಂದ 2 ಸಾವಿರ ರು. ವನ್ನು ಕೂಡಿಟ್ಟರು

ಮೂರು ವರ್ಷಗಳಲ್ಲಿ ರು. 72 ಸಾವಿರವಾಯಿತು. ಆ ಉಳಿತಾಯಕ್ಕೆ ಕುಟುಂಬದ ಹಣ ಸೇರಿಸಿ 2.50 ಲಕ್ಷ ರು. ದ ಉದ್ಯಮ ಕಟ್ಟಿದರು. ಗೃಹಲಕ್ಷ್ಮಿ ಹಣ ಶಕುಂತಳಾ ಅವರ ಪಾಲಿಗೆ ನೆರವಷ್ಟೇ ಅಲ್ಲ, ಸ್ವಾವಲಂಬನೆಯ ಮೊದಲ ಹೆಜ್ಜೆಯಾಯಿತು

ಉಚ್ಚಿಲ ದೇವಸ್ಥಾನದ ದಸರಾ ಮಹೋತ್ಸವದಲ್ಲಿ ಸಿಎಂ ಡಿಕೆಶಿ ಭಾಗಿ: ಕರಾವಳಿಗೆ ಪ್ರತ್ಯೇಕ ಟೂರಿಸಂ ಪಾಲಿಸಿ ಘೋಷಣೆ!

Gowthami K — Thu, 15 Oct 2026 19:53:40 +0530

ಉಡುಪಿ:ಕರಾವಳಿಯ ಪ್ರಸಿದ್ಧ ಧಾರ್ಮಿಕ ಕ್ಷೇತ್ರವಾದ ಉಡುಪಿಯ ಉಚ್ಚಿಲ ಶ್ರೀ ಮಹಾಲಕ್ಷ್ಮಿ ದೇವಸ್ಥಾನದ ಐದನೇ ವರ್ಷದ ದಸರಾ ಮಹೋತ್ಸವ ಹಾಗೂ ಸಾರ್ವಜನಿಕ ಮಹಿಳಾ ದಸರಾ ಕಾರ್ಯಕ್ರಮದಲ್ಲಿ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಪಾಲ್ಗೊಂಡರು. ದೇವಸ್ಥಾನದ ವಸ್ತುಪ್ರದರ್ಶನವನ್ನು ಉದ್ಘಾಟಿಸಿದ ಅವರು, ಶ್ರೀ ಮಹಾಲಕ್ಷ್ಮಿ ದೇವಿಗೆ ವಿಶೇಷ ಪೂಜೆ ಸಲ್ಲಿಸಿ, ಮೋಗವೀರ ಕುಲಗುರು ಶ್ರೀ ಮಾಧವ ಮಂಗಲ ಗುರುಗಳ ಕಂಚಿನ ಪುತ್ಥಳಿಗೆ ಪುಷ್ಪಾರ್ಚನೆ ಮಾಡಿದರು.

ತುಳು ಭಾಷೆಯಲ್ಲಿ ಭಾಷಣ ಆರಂಭಿಸಿ ತಾಯಂದಿರ ಆಶೀರ್ವಾದ ಪಡೆದ ಸಿಎಂ ಸಭೆಯನ್ನುದ್ದೇಶಿಸಿ ಮಾತು ಆರಂಭಿಸುವಾಗ ತುಳು ಭಾಷೆಯಲ್ಲೇ ಶುಭಾಶಯ ಕೋರಿದ ಸಿಎಂ ಡಿ.ಕೆ.ಶಿವಕುಮಾರ್, ಕರಾವಳಿ ಜನರ ಮನಗೆದ್ದರು.

"ಈ ಹಿಂದೆ ಉಪಮುಖ್ಯಮಂತ್ರಿಯಾಗಿ ಬಂದು ದೇವಿಯ ಆಶೀರ್ವಾದ ಪಡೆದಿದ್ದೆ. ಇಂದು ಈ ನಾಡಿನ ಪ್ರಜಾಸೇವಕನಾಗಿ, ಮುಖ್ಯಮಂತ್ರಿಯಾಗಿ ದೇವಿಯ ದರ್ಶನ ಪಡೆದಿದ್ದೇನೆ. 'ಇದು ಭಾಗ್ಯ, ಇದು ಭಾಗ್ಯ, ಇದು ಭಾಗ್ಯವಯ್ಯಾ' ಎಂದು ಭಾವಿಸುತ್ತೇನೆ. ಬೃಹತ್ ಸಂಖ್ಯೆಯಲ್ಲಿ ನೆರೆದಿರುವ ತಾಯಂದಿರು ಹಾಗೂ ನವದುರ್ಗೆಯರ ಆಶೀರ್ವಾದ ಪಡೆಯುವ ಭಾಗ್ಯ ನನಗೆ ಸಿಕ್ಕಿದೆ. ಮಹಾಲಕ್ಷ್ಮಿ ಎಂದರೆ ಸಂಪತ್ತು, ಮಹಾಸರಸ್ವತಿ ಎಂದರೆ ಜ್ಞಾನ ಮತ್ತು ಮಹಾಕಾಳಿ ಎಂದರೆ ಶಕ್ತಿ. ಹೆಣ್ಣು ಕುಟುಂಬದ ಕಣ್ಣಿದ್ದಂತೆ. ನಾವು ಮಾತೃಭಾಷೆಗೆ ಪ್ರಾಧಾನ್ಯತೆ ಕೊಟ್ಟವರೇ ಹೊರತು ತಂದೆಯ ಭಾಷೆಗಲ್ಲ," ಎಂದು ಅವರು ಹೇಳಿದರು.

ಮೀನುಗಾರ ಮಹಿಳೆಯರ ಬೇಡಿಕೆ ಮತ್ತು ಸರ್ಕಾರದ ನಿಲುವು

ನಾಡೋಜ ಡಾ. ಜಿ. ಶಂಕರ ಅವರ ನೇತೃತ್ವದಲ್ಲಿ ಮೀನುಗಾರ ಮಹಿಳೆಯರ ವಿವಿಧ ತೊಡಕುಗಳು, ಬಡ್ಡಿರಹಿತ ಸಾಲ ಸೌಲಭ್ಯ ಹಾಗೂ ಬಂದರು ನಿರ್ಮಾಣಕ್ಕೆ ಸಂಬಂಧಿಸಿದಂತೆ ಮುಖ್ಯಮಂತ್ರಿಗಳಿಗೆ ಮನವಿ ಪತ್ರ ಸಲ್ಲಿಸಲಾಯಿತು.

ಮೀನುಗಾರರ ಬೇಡಿಕೆಗಳನ್ನು ಸ್ವೀಕರಿಸಿ ಮಾತನಾಡಿದ ಮುಖ್ಯಮಂತ್ರಿಗಳು, ಮೀನುಗಾರ ಮಹಿಳೆಯರ ಸಮಸ್ಯೆಗಳ ಬಗ್ಗೆ ನಮಗೆ ಸಂಪೂರ್ಣ ಅರಿವಿದೆ. ಪ್ರಸ್ತುತ ಚುನಾವಣಾ ನೀತಿ ಸಂಹಿತೆ ಜಾರಿಯಲ್ಲಿರುವುದರಿಂದ ನಾನು ಇಲ್ಲೇ ಯಾವುದೇ ಹೊಸ ಯೋಜನೆಗಳನ್ನು ಅಧಿಕೃತವಾಗಿ ಘೋಷಣೆ ಮಾಡಲು ಸಾಧ್ಯವಿಲ್ಲ. ಬೆಂಗಳೂರಿಗೆ ತೆರಳಿ ಅಧಿಕಾರಿಗಳೊಂದಿಗೆ ಚರ್ಚಿಸಿ ಸೂಕ್ತ ನಿರ್ಧಾರ ಕೈಗೊಳ್ಳುತ್ತೇನೆ. ನನ್ನ ಮೇಲೆ ಮತ್ತು ಸರ್ಕಾರದ ಮೇಲೆ ನಂಬಿಕೆ ಇಡಿ, ಕೊಟ್ಟ ಮಾತಿನಂತೆ ಗೃಹಲಕ್ಷ್ಮಿ ಯೋಜನೆ ಸೇರಿದಂತೆ ಎಲ್ಲಾ ಗ್ಯಾರಂಟಿಗಳನ್ನು ನಾವು ಈಡೇರಿಸಿದ್ದೇವೆ ಎಂದು ಭರವಸೆ ನೀಡಿದರು.

ಕರಾವಳಿ ಮತ್ತು ಮಲೆನಾಡಿಗೆ ಪ್ರತ್ಯೇಕ ಪ್ರವಾಸೋದ್ಯಮ ನೀತಿ

ಕರಾವಳಿ ಹಾಗೂ ಮಲೆನಾಡು ಭಾಗದ ಸಮಗ್ರ ಅಭಿವೃದ್ಧಿಗೆ ಸರ್ಕಾರದ ಮಾಸ್ಟರ್ ಪ್ಲಾನ್ ಕುರಿತು ವಿವರಿಸಿದ ಮುಖ್ಯಮಂತ್ರಿಗಳು, ಪ್ರವಾಸೋದ್ಯಮಕ್ಕೆ ಹೊಸ ಕಳೆ ನೀಡುವ ಯೋಜನೆಗಳನ್ನು ಪ್ರಕಟಿಸಿದರು.

ವಿಶ್ವಮಟ್ಟದ ಟೂರಿಸಂ ಹಬ್: ಅಲೆಗಳಿಲ್ಲದಿದ್ದರೆ ಸಮುದ್ರಕ್ಕೆ ಬೆಲೆಯಿಲ್ಲ, ಕರಾವಳಿಯಿಲ್ಲದಿದ್ದರೆ ಕರ್ನಾಟಕ ರಾಜ್ಯಕ್ಕೇ ಬೆಲೆಯಿಲ್ಲ. ಕರಾವಳಿಯ ತೀರ ಪ್ರದೇಶಗಳನ್ನು ವಿಶ್ವಮಟ್ಟದ ಪ್ರವಾಸೋದ್ಯಮ ಕೇಂದ್ರವಾಗಿ ಅಭಿವೃದ್ಧಿಪಡಿಸಲಾಗುವುದು. ಶೀಘ್ರದಲ್ಲೇ ಮಂಗಳೂರಿನಲ್ಲಿ ಈ ಕುರಿತು ವಿಶೇಷ ಸಭೆ ನಡೆಸಲಾಗುವುದು.

ಕರಾವಳಿಯ ಯುವಜನತೆ ಉದ್ಯೋಗ ಅರಸಿ ಹೊರನಾಡು ಹಾಗೂ ಹೊರದೇಶಗಳಿಗೆ ವಲಸೆ ಹೋಗುವುದನ್ನು ತಡೆಯಲು ಪ್ರವಾಸೋದ್ಯಮ ಕ್ಷೇತ್ರದಿಂದ ಸ್ಥಳೀಯವಾಗಿಯೇ ಉದ್ಯೋಗ ಸೃಷ್ಟಿಸಲಾಗುವುದು. ದಸರಾ ಎನ್ನುವುದು ಕೇವಲ ಹಬ್ಬವಲ್ಲ, ಅದು ಆರ್ಥಿಕತೆಯ ಚಕ್ರ.

ಕರಾವಳಿಯ ಸಾಂಪ್ರದಾಯಿಕ ಮರ ಮತ್ತು ಚಿನ್ನದ ಕೆತ್ತನೆ ಕಲೆಯನ್ನು ಉಳಿಸಲು ಹಾಗೂ ಉದ್ಯೋಗ ಸೃಷ್ಟಿಸಲು ಕಾರ್ಕಳದಲ್ಲಿ ವಿಶೇಷ ಪಾರ್ಕ್ ನಿರ್ಮಾಣ ಮಾಡುವ ಕುರಿತು ಸಚಿವ ಸಂಪುಟದಲ್ಲಿ ತೀರ್ಮಾನಿಸಲಾಗಿದೆ.

ಕಸ್ತೂರಿರಂಗನ್ ವರದಿ ಮತ್ತು ಕೇಂದ್ರಕ್ಕೆ ರಾಜ್ಯದ ವಿರೋಧ

ಮಲೆನಾಡು ಹಾಗೂ ಕರಾವಳಿ ಭಾಗದಲ್ಲಿ ತೀವ್ರ ಆತಂಕ ಸೃಷ್ಟಿಸಿರುವ ಕಸ್ತೂರಿರಂಗನ್ ವರದಿಯ ಕುರಿತು ಸ್ಪಷ್ಟನೆ ನೀಡಿದ ಅವರು, ಕಸ್ತೂರಿರಂಗನ್ ವರದಿ ಜಾರಿ ವಿಚಾರದಲ್ಲಿ ರಾಜ್ಯ ಸರ್ಕಾರವು ಅತ್ಯಂತ ದಿಟ್ಟ ಹಾಗೂ ಸ್ಪಷ್ಟ ತೀರ್ಮಾನ ತಳೆದಿದೆ. ಜನಸಾಮಾನ್ಯರ ಹಿತಾಸಕ್ತಿಗೆ ಧಕ್ಕೆಯಾಗುವ ಈ ವರದಿಯನ್ನು ಜಾರಿಗೊಳಿಸಬಾರದು ಎಂದು ಕೇಂದ್ರ ಸರ್ಕಾರಕ್ಕೆ ನಮ್ಮ ಸರ್ಕಾರದ ಪರವಾಗಿ ಪ್ರಬಲ ವಿರೋಧವನ್ನು ದಾಖಲಿಸಿದ್ದೇವೆ ಎಂದು ತಿಳಿಸಿದರು.

ಅಂತಿಮವಾಗಿ, ಜಾತಿ-ಧರ್ಮಗಳ ಭೇದಭಾವ ಮರೆತು ಮಾನವೀಯತೆಯ ಧರ್ಮವನ್ನು ಎತ್ತಿಹಿಡಿಯುವಂತೆ ಕರೆ ನೀಡಿದ ಮುಖ್ಯಮಂತ್ರಿಗಳು, ಉಡುಪಿಯ ದಸರಾ ಮಹೋತ್ಸವವು ಇಡೀ ನಾಡಿಗೆ ಸಮೃದ್ಧಿ ಹಾಗೂ ಶಾಂತಿಯನ್ನು ತರಲಿ ಎಂದು ಹಾರೈಸಿದರು.

ದಸರಾಗೆ ಉಡುಪಿ ಮಾರ್ಗವಾಗಿ ಕಾರವಾರ, ಮಡಗಾವ್‌ಗೆ ಸ್ಪೆಷಲ್ ರೈಲು ಘೋಷಣೆ; ಮಂಗಳೂರಿಗರ ಅಸಮಾಧಾನಕ್ಕೆ ಕಾರಣವೇನು?

Kannadaprabha News — Thu, 15 Oct 2026 05:38:53 +0530

ಮಂಗಳೂರು (ಅ.15): ದಸರಾ ಹಬ್ಬದ ಅಂಗವಾಗಿ ಪ್ರಯಾಣಿಕರ ದಟ್ಟಣೆ ನಿವಾರಿಸಲು ನೈಋತ್ಯ ರೈಲ್ವೆಯು ಯಶವಂತಪುರ-ಮಡಗಾವ್‌- ಬೆಂಗಳೂರು ದಂಡು ಮಧ್ಯೆ ವಿಶೇಷ ರೈಲು ಸಂಚಾರಕ್ಕೆ ವ್ಯವಸ್ಥೇ ಮಾಡಿದೆ. 06591 ಸಂಖ್ಯೆಯ ಯಶವಂತಪುರ-ಮಡಗಾವ್‌ ಎಕ್ಸ್‌ಪ್ರೆಸ್ ವಿಶೇಷ ರೈಲು ಅ.16ರ ರಾತ್ರಿ 11.55ಕ್ಕೆ ಯಶವಂತಪುರದಿಂದ ಹೊರಟು, 17ರ ಸಂಜೆ 6.10ಕ್ಕೆ ಮಡಗಾವ್ ತಲುಪಲಿದೆ. 06592 ರೈಲು 18ರಂದು ಬೆಳಗ್ಗೆ 8.40ಕ್ಕೆ ಮಡಗಾವ್‌ನಿಂದ ಹೊರಟು ಅದೇ ದಿನ ರಾತ್ರಿ 11.55ಕ್ಕೆ ಬೆಂಗಳೂರು ದಂಡು ತಲುಪಲಿದೆ.

ಎರಡೂ ದಿಕ್ಕುಗಳಲ್ಲಿ ಕುಣಿಗಲ್, ಚನ್ನರಾಯಪಟ್ಟಣ, ಹಾಸನ, ಸಕಲೇಶಪುರ, ಸುಬ್ರಹ್ಮಣ್ಯ ರೋಡ್‌, ಕಬಕ ಪುತ್ತೂರು, ಬಂಟ್ವಾಳ, ಸುರತ್ಕಲ್, ಮೂಲ್ಕಿ, ಉಡುಪಿ, ಬಾರ್ಕೂರು, ಕುಂದಾಪುರ, ಬೈಂದೂರು, ಭಟ್ಕಳ, ಮುರ್ಡೇಶ್ವರ, ಹೊನ್ನಾವರ, ಕುಮಟಾ, ಗೋಕರ್ಣ ರಸ್ತೆ, ಅಂಕೋಲಾ, ಕಾರವಾರ ಮತ್ತು ಕಣಕೋಣ ನಿಲ್ದಾಣಗಳಲ್ಲಿ ನಿಲುಗಡೆ ಹೊಂದಲಿದೆ. ಈ ವಿಶೇಷ ರೈಲಿನಲ್ಲಿ 18 ಕೋಚ್ ಇರಲಿವೆ ಎಂದು ನೈಋತ್ಯ ರೈಲ್ವೆಯ ಮುಖ್ಯ ಸಾರ್ವಜನಿಕ ಸಂಪರ್ಕ ಅಧಿಕಾರಿ ಡಾ. ಮಂಜುನಾಥ್ ಕನಮಡಿ ತಿಳಿಸಿದ್ದಾರೆ.

ಈ ರೈಲು ಮಡಗಾವ್‌ನಿಂದ ಬರುವಾಗ ಯಶವಂತಪುರದ ಬದಲಿಗೆ ಎಸ್‌ಎಂವಿಟಿ ರೈಲು ನಿಲ್ದಾಣದಲ್ಲಿ ನಿಲುಗಡೆ ಇರಲಿದೆ.

ಮಂಗಳೂರಿಗರ ಅಸಮಾಧಾನ:

ದಸರಾ ಸಂದರ್ಭವೂ ಮಂಗಳೂರು ಜಂಕ್ಷನ್ ಮತ್ತು ಮಂಗಳೂರು ಸೆಂಟ್ರಲ್ ನಿಲ್ದಾಣಗಳು ಬೆಂಗಳೂರಿನ ವಿಶೇಷ ರೈಲು ಸಂಚಾರದಿಂದ ವಂಚಿತಗೊಂಡಿವೆ. ಚೌತಿ ವೇಳೆಯೂ ಬೆಂಗಳೂರಿನಿಂದ ಮಂಗಳೂರಿಗೆ ವಿಶೇಷ ರೈಲು ಸೌಲಭ್ಯ ಇರಲಿಲ್ಲ. ಮಂಗಳೂರು ರೈಲ್ವೆ ಪ್ರದೇಶ ಮೈಸೂರು ವಿಭಾಗಕ್ಕೆ ಸೇರ್ಪಡೆಯಾದ ಬಳಿಕವೂ ಮಂಗಳೂರನ್ನು ವಿಶೇಷ ರೈಲು ಹೋರಾಟದಿಂದ ನೈರುತ್ಯ ರೈಲ್ವೆ ಹೊರಗಿಡುತ್ತಿರುವುದು ವಿಪರ್ಯಾಸ ಎಂದು ರೈಲ್ವೆ ಸಂಘಟನೆಗಳು ಅಸಮಾಧಾನ ವ್ಯಕ್ತಪಡಿಸಿವೆ.

ಮಂಗಳೂರು ಏರ್‌ಪೋರ್ಟ್‌ ಯೂಸರ್‌ ಡೆವಲಪ್‌ಮೆಂಟ್‌ ಶುಲ್ಕ ಭಾರೀ ಪ್ರಮಾಣದಲ್ಲಿ ಏರಿಸಲು ಅದಾನಿ ತಯಾರಿ

Santosh Naik — Tue, 20 Oct 2026 19:23:14 +0530

ನವದೆಹಲಿ/ಮಂಗಳೂರು (ಅ.20): ಮಂಗಳೂರು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ (MIA) ವಿಮಾನ ಏರಿ ಹಾರಾಟ ನಡೆಸುವುದು ಮುಂಬರುವ ಐದು ವರ್ಷಗಳಲ್ಲಿ ಅತ್ಯಂತ ದುಬಾರಿಯಾಗುವ ಲಕ್ಷಣಗಳು ಕಂಡುಬರುತ್ತಿವೆ. ವಿಮಾನ ನಿಲ್ದಾಣದ ಮೂಲಸೌಕರ್ಯ ಅಭಿವೃದ್ಧಿಗಾಗಿ ಕೈಗೊಳ್ಳಲು ಉದ್ದೇಶಿಸಿರುವ ₹4,200 ಕೋಟಿ ರೂಪಾಯಿಗಳ ಬೃಹತ್ ಹೂಡಿಕೆ ಯೋಜನೆಗೆ ಅಗತ್ಯವಾದ ಹಣವನ್ನು ಕ್ರೋಡೀಕರಿಸಲು, ವಿಮಾನ ನಿಲ್ದಾಣದ ನಿರ್ವಹಣೆ ವಹಿಸಿಕೊಂಡಿರುವ 'ಅದಾನಿ ಏರ್‌ಪೋರ್ಟ್ಸ್' (Adani Airport) ಸಂಸ್ಥೆಯು ಬಳಕೆದಾರರ ಅಭಿವೃದ್ಧಿ ಶುಲ್ಕವನ್ನು (UDF - User Development Fee) 2031 ರ ಹಣಕಾಸು ವರ್ಷದ ವೇಳೆಗೆ (FY31) ಸರಿಸುಮಾರು ದ್ವಿಗುಣಗೊಳಿಸಲು ಪ್ರಸ್ತಾವನೆ ಸಲ್ಲಿಸಿದೆ.

ಪ್ರಸ್ತುತ ಮಂಗಳೂರು ವಿಮಾನ ನಿಲ್ದಾಣದಿಂದ ಹೊರಡುವ ದೇಶೀಯ (Domestic) ವಿಮಾನ ಪ್ರಯಾಣಿಕರಿಗೆ ₹735 ಹಾಗೂ ಅಂತರರಾಷ್ಟ್ರೀಯ (International) ವಿಮಾನ ಪ್ರಯಾಣಿಕರಿಗೆ ₹1,120 ಯುಡಿಎಫ್ ಶುಲ್ಕವನ್ನು ವಿಧಿಸಲಾಗುತ್ತಿದೆ. ನಿಯಂತ್ರಣ ಪ್ರಾಧಿಕಾರದ ಅಂತಿಮ ಅನುಮೋದನೆಗೆ ಒಳಪಟ್ಟು, 2026 ರ ಡಿಸೆಂಬರ್ 1 ರಿಂದಲೇ ಈ ದರಗಳನ್ನು ಕ್ರಮವಾಗಿ ₹890 ಹಾಗೂ ₹1,360 ಕ್ಕೆ ಏರಿಸಲು ಪ್ರಸ್ತಾವಿಸಲಾಗಿದೆ. ತದನಂತರ ಹಂತ ಹಂತವಾಗಿ ಹೆಚ್ಚಳ ಮಾಡಿ, 2031 ರ ಮಾರ್ಚ್ ವೇಳೆಗೆ ದೇಶೀಯ ನಿರ್ಗಮನ ಶುಲ್ಕವನ್ನು ₹1,440 ಕ್ಕೆ (ಶೇ. 96 ರಷ್ಟು ಏರಿಕೆ) ಹಾಗೂ ಅಂತರರಾಷ್ಟ್ರೀಯ ನಿರ್ಗಮನ ಶುಲ್ಕವನ್ನು ₹2,210 ಕ್ಕೆ (ಶೇ. 97 ರಷ್ಟು ಏರಿಕೆ) ಹೆಚ್ಚಿಸುವ ಗುರಿ ಹೊಂದಲಾಗಿದೆ.

ಪ್ರಸ್ತಾವಿತ ಪರಿಷ್ಕರಣೆಯ ಪ್ರಕಾರ, ಮೊದಲ ಮೂರು ಹಂತಗಳಲ್ಲಿ ಪ್ರತಿಬಾರಿ ಶೇ. 20 ರಿಂದ ಶೇ. 22 ರಷ್ಟು ಶುಲ್ಕ ಹೆಚ್ಚಳವಾಗಲಿದ್ದು, 2031 ರ ಅಂತಿಮ ಹಂತದಲ್ಲಿ ಶೇ. 10 ರಷ್ಟು ದರ ಏರಿಕೆಯಾಗಲಿದೆ. ಗಮನಾರ್ಹವೆಂದರೆ, ಕಳೆದ ಕೆಲವು ವರ್ಷಗಳಲ್ಲೂ ಇಲ್ಲಿ ತೀವ್ರ ದರ ಏರಿಕೆ ಮಾಡಲಾಗಿತ್ತು; 2022 ರಲ್ಲಿ ಕೇವಲ ₹150 ಇದ್ದ ದೇಶೀಯ ನಿರ್ಗಮನ ಶುಲ್ಕವು 2026 ರ ಹಣಕಾಸು ವರ್ಷದ ವೇಳೆಗೆ ಶೇ. 390 ರಷ್ಟು ಏರಿಕೆಯಾಗಿ ₹735 ಕ್ಕೆ ತಲುಪಿತ್ತು.

ವಿಮಾನ ನಿಲ್ದಾಣಕ್ಕೆ ಆಗಮಿಸುವ (Arrival) ಪ್ರಯಾಣಿಕರಿಗೂ ದರ ಏರಿಕೆ ಬಿಸಿ

ಕೇವಲ ವಿಮಾನ ಏರಿ ಹೊರಡುವ ಪ್ರಯಾಣಿಕರಷ್ಟೇ ಅಲ್ಲದೆ, ಮಂಗಳೂರು ವಿಮಾನ ನಿಲ್ದಾಣಕ್ಕೆ ಬಂದು ಇಳಿಯುವ (Arrival) ಪ್ರಯಾಣಿಕರ ಮೇಲೆಯೂ ಹೆಚ್ಚುವರಿ ಶುಲ್ಕ ವಿಧಿಸಲು ಯೋಜನೆ ರೂಪಿಸಲಾಗಿದೆ.

ದೇಶೀಯ ಆಗಮನ ಶುಲ್ಕ: ಪ್ರಸ್ತುತ ಇರುವ ₹315 ರಿಂದ ಆರಂಭದಲ್ಲಿ ₹380 ಕ್ಕೆ ಏರಿಕೆಯಾಗಿ, 2031 ರ ವೇಳೆಗೆ ₹620 ಕ್ಕೆ ತಲುಪಲಿದೆ.

ಅಂತರರಾಷ್ಟ್ರೀಯ ಆಗಮನ ಶುಲ್ಕ: ಪ್ರಸ್ತುತ ಇರುವ ₹480 ರಿಂದ ಮೊದಲ ವರ್ಷ ₹580 ಕ್ಕೆ ಏರಿಕೆಯಾಗಿ, 2031 ರ ವೇಳೆಗೆ ₹940 ಕ್ಕೆ ಏರಿಕೆಯಾಗಲಿದೆ.

ಬಳಕೆದಾರರ ಅಭಿವೃದ್ಧಿ ಶುಲ್ಕವನ್ನು ವಿಮಾನಯಾನ ಸಂಸ್ಥೆಗಳು (Airlines) ಟಿಕೆಟ್ ಬುಕಿಂಗ್ ಮಾಡುವಾಗಲೇ ನೇರವಾಗಿ ಟಿಕೆಟ್ ದರದಲ್ಲಿ ಸೇರಿಸಿ ಸಂಗ್ರಹಿಸುತ್ತವೆ ಹಾಗೂ ಬಳಿಕ ವಿಮಾನ ನಿಲ್ದಾಣ ನಿರ್ವಾಹಕರಿಗೆ ವರ್ಗಾಯಿಸುತ್ತವೆ. ಹೀಗಾಗಿ ಈ ದರ ಏರಿಕೆಯಿಂದಾಗಿ ಮಂಗಳೂರಿನ ವಿಮಾನ ಟಿಕೆಟ್ ದರಗಳು ಗಣನೀಯವಾಗಿ ಏರಿಕೆಯಾಗಲಿವೆ.

ಇತರ ಪ್ರಮುಖ ನಗರಗಳ ವಿಮಾನ ನಿಲ್ದಾಣಗಳಿಗಿಂತ ಮಂಗಳೂರು ತೀರಾ ದುಬಾರಿ!

ದೇಶದ ಇತರ ಪ್ರಮುಖ ನಗರಗಳಿಗೆ ಹೋಲಿಸಿದರೆ ಮಂಗಳೂರು ವಿಮಾನ ನಿಲ್ದಾಣವು ಈಗಾಗಲೇ ಅತ್ಯಂತ ಹೆಚ್ಚಿನ ದೇಶೀಯ ನಿರ್ಗಮನ ಯುಡಿಎಫ್ ಶುಲ್ಕವನ್ನು ಹೊಂದಿರುವ ನಿಲ್ದಾಣಗಳಲ್ಲಿ ಒಂದಾಗಿದೆ. 2026 ರ ಸೆಪ್ಟೆಂಬರ್‌ನಿಂದ ಜಾರಿಯಲ್ಲಿರುವ ದರಗಳ ಪ್ರಕಾರ, ಹೈದರಾಬಾದ್ ವಿಮಾನ ನಿಲ್ದಾಣದಲ್ಲಿ ₹515 ಹಾಗೂ ಬೆಂಗಳೂರಿನ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ₹300 ಮಾತ್ರ ಶುಲ್ಕವಿದೆ. ಇನ್ನು ದೆಹಲಿ ಮತ್ತು ಮುಂಬೈನಂತಹ ದೇಶದ ಬೃಹತ್ ಮೆಟ್ರೋ ವಿಮಾನ ನಿಲ್ದಾಣಗಳಲ್ಲಿ ಈ ಶುಲ್ಕ ಕೇವಲ ₹120 ರಿಂದ ₹130 ರ ವ್ಯಾಪ್ತಿಯಲ್ಲಿದೆ.

ಒಂದೆಡೆ ದರಗಳು ಭಾರಿ ಹೆಚ್ಚಾಗುತ್ತಿದ್ದರೆ, ಕಾರ್ಯಾಚರಣೆಯ ಪ್ರಮಾಣದಲ್ಲಿ ಮಂಗಳೂರು ಇವುಗಳ ಸಣ್ಣ ಭಾಗದಷ್ಟಿದೆ. 2026 ರ ಹಣಕಾಸು ವರ್ಷದಲ್ಲಿ ಮಂಗಳೂರು ನಿಲ್ದಾಣವು ದಿನಕ್ಕೆ ಸರಾಸರಿ 50 ವಿಮಾನಗಳ ಸಂಚಾರವನ್ನು ಕಂಡಿದ್ದರೆ, ಬೆಂಗಳೂರು ದಿನಕ್ಕೆ 769 ಹಾಗೂ ಹೈದರಾಬಾದ್ 570 ವಿಮಾನಗಳ ಸಂಚಾರವನ್ನು ನಿರ್ವಹಿಸುತ್ತವೆ. ಈ ಹಿನ್ನೆಲೆಯಲ್ಲಿ, ಪ್ರಯಾಣಿಕರ ಸಂಖ್ಯೆಗೆ ಹೋಲಿಸಿದರೆ ಇಷ್ಟೊಂದು ಭಾರಿ ಪ್ರಮಾಣದ ದರ ಏರಿಕೆ ಎಷ್ಟು ಸಮಂಜಸ ಎಂಬ ಪ್ರಶ್ನೆಗಳು ಎದ್ದಿವೆ.

ಆದರೆ, ವಿಮಾನ ನಿಲ್ದಾಣದ ಮೂಲಸೌಕರ್ಯವನ್ನು ಮೇಲ್ದರ್ಜೆಗೇರಿಸಲು ಹಾಗೂ ಭವಿಷ್ಯದ ಪ್ರಯಾಣಿಕರ ದಟ್ಟಣೆಯನ್ನು ನಿಭಾಯಿಸಲು ಈ ಬಂಡವಾಳ ಹೂಡಿಕೆ (Capex) ಅತ್ಯಗತ್ಯ ಎಂದು ಮಂಗಳೂರು ಇಂಟರ್ನ್ಯಾಷನಲ್ ಏರ್‌ಪೋರ್ಟ್ ಲಿಮಿಟೆಡ್ (MgIAL) ಸಮರ್ಥಿಸಿಕೊಂಡಿದೆ.

ಈ ಕುರಿತು ನೀತಿ ವಿಶ್ಲೇಷಕ ಹಾಗೂ 'ಬಾಸ್ಪಿನ್ ಕನ್ಸಲ್ಟಿಂಗ್' ಸಂಸ್ಥಾಪಕ ಅಂಕುರ್ ಸಿಂಘಾಲ್ ಮಾತನಾಡಿ, "ವಿಮಾನ ನಿಲ್ದಾಣದ ಅಭಿವೃದ್ಧಿ ಅಗತ್ಯ ನಿಜ, ಆದರೆ ಪ್ರಮುಖ ಬಂಡವಾಳ ಹೂಡಿಕೆಯನ್ನು ಪ್ರಯಾಣಿಕರ ಅಗತ್ಯಕ್ಕೆ ತಕ್ಕಂತೆ ಹಂತ ಹಂತವಾಗಿ ಮಾಡಬೇಕು. ತೀರಾ ಹೆಚ್ಚಿನ ಶುಲ್ಕಗಳು ವಿಮಾನ ಪ್ರಯಾಣಿಕರು ಹಾಗೂ ವಿಮಾನಯಾನ ಸಂಸ್ಥೆಗಳ ಮೇಲೆ ಭಾರಿ ಹೊರೆಯಾಗಲಿವೆ. ದರ ವಸೂಲಾತಿಯು ಯೋಜನೆಯ ಸಕಾಲಿಕ ಪೂರ್ಣಗೊಳಿಸುವಿಕೆ ಮತ್ತು ಉತ್ತಮ ಸೇವೆಯೊಂದಿಗೆ ಜೋಡಣೆಯಾಗಿರಬೇಕು" ಎಂದಿದ್ದಾರೆ.

ಭಾರತೀಯ ವಿಮಾನ ನಿಲ್ದಾಣಗಳ ಆರ್ಥಿಕ ನಿಯಂತ್ರಣ ಪ್ರಾಧಿಕಾರಕ್ಕೆ (AERA) ಅಕ್ಟೋಬರ್ 7 ರಂದು ಬರೆದ ಪತ್ರದಲ್ಲಿ MgIAL ನ ಅಧಿಕೃತ ಸಹಿ ಮಾಡಿರುವ ಮಧುರ್ ಅರೋರಾ, "AERA ಕಾಯ್ದೆಯ ಸೆಕ್ಷನ್ 13 ಅನ್ನು ಪಾಲಿಸುವಾಗ ವಿಮಾನ ನಿಲ್ದಾಣದ ಆರ್ಥಿಕವಾಗಿ ಲಾಭದಾಯಕ ಕಾರ್ಯಾಚರಣೆಯನ್ನು ಖಚಿತಪಡಿಸಿಕೊಳ್ಳುವುದು ಅಗತ್ಯ" ಎಂದು ಉಲ್ಲೇಖಿಸಿದ್ದಾರೆ.

₹4,200 ಕೋಟಿ ರೂಪಾಯಿಗಳ ಮಾಸ್ಟರ್ ಪ್ಲಾನ್ ವಿಸ್ತರಣಾ ಯೋಜನೆ

ಮಂಗಳೂರು ವಿಮಾನ ನಿಲ್ದಾಣವು 2026 ರ ಹಣಕಾಸು ವರ್ಷದಲ್ಲಿ 2.55 ಮಿಲಿಯನ್ (25.5 ಲಕ್ಷ) ಪ್ರಯಾಣಿಕರ ಸಂಚಾರವನ್ನು ನಿರ್ವಹಿಸಿದೆ. ಅದಾನಿ ಸಂಸ್ಥೆಯ ಅಂದಾಜಿನಂತೆ ಇದು 2027 ರಲ್ಲಿ 2.92 ಮಿಲಿಯನ್, 2028 ರಲ್ಲಿ 3.34 ಮಿಲಿಯನ್, 2029 ರಲ್ಲಿ 3.59 ಮಿಲಿಯನ್, 2030 ರಲ್ಲಿ 3.85 ಮಿಲಿಯನ್ ಹಾಗೂ 2031 ರ ಹಣಕಾಸು ವರ್ಷದ ವೇಳೆಗೆ 4.11 ಮಿಲಿಯನ್ (41.1 ಲಕ್ಷ) ಪ್ರಯಾಣಿಕರಿಗೆ ಏರಿಕೆಯಾಗಲಿದೆ. ಅಂದರೆ ಐದು ವರ್ಷಗಳಲ್ಲಿ ಶೇಕಡಾ 61 ರಷ್ಟು ಪ್ರಯಾಣಿಕರ ಬೆಳವಣಿಗೆಯಾಗಲಿದೆ.

2035 ರ ವೇಳೆಗೆ ವಾರ್ಷಿಕ 5 ಮಿಲಿಯನ್ (50 ಲಕ್ಷ) ಪ್ರಯಾಣಿಕರನ್ನು ನಿರ್ವಹಿಸುವ ಸಾಮರ್ಥ್ಯ ಹೊಂದುವಂತೆ ವಿಮಾನ ನಿಲ್ದಾಣದ ಮಾಸ್ಟರ್ ಪ್ಲಾನ್ ರೂಪಿಸಲಾಗಿದೆ. 2027–2031 ರ ಅವಧಿಗೆ ಒಟ್ಟು ₹4,205.87 ಕೋಟಿ ಬಂಡವಾಳ ಹೂಡಿಕೆಯನ್ನು ಅಂದಾಜಿಸಲಾಗಿದೆ.

ಪ್ರಮುಖ ಹೂಡಿಕೆಗಳ ವಿವರ

ರನ್‌ವೇ, ಟ್ಯಾಕ್ಸಿವೇ ಹಾಗೂ ಆಪ್ರಾನ್ ಅಭಿವೃದ್ಧಿ: ₹1,674.2 ಕೋಟಿ.
ಟರ್ಮಿನಲ್ ಮಾರ್ಪಾಡು ಹಾಗೂ ವಿಸ್ತರಣೆ: ಸುಮಾರು ₹1,000 ಕೋಟಿ.
ಅನುಕೂಲಕರ ಮೂಲಸೌಕರ್ಯ (Ancillary Infrastructure): ₹1,118.65 ಕೋಟಿ.
ಸಂಪರ್ಕ ರಸ್ತೆಗಳ ಜಾಲ: ಸುಮಾರು ₹200 ಕೋಟಿ.
ಸುರಕ್ಷತೆ, ಕಾರ್ಯಾಚರಣೆ ಹಾಗೂ ಉಪಕರಣಗಳು: ಸುಮಾರು ₹300 ಕೋಟಿ.

MgIAL ತನ್ನ ನಿಯಂತ್ರಿತ ಆಸ್ತಿ ಆಧಾರದ ಮೇಲೆ (RAB) ಶೇ. 14.73 ರಷ್ಟು ನ್ಯಾಯಯುತ ಲಾಭದ ದರವನ್ನು (Rate of return) ಕೋರಿದೆ. 2020 ಮತ್ತು 2021 ರಲ್ಲಿ ಸರ್ಕಾರ ಖಾಸಗೀಕರಣಗೊಳಿಸಿದ 6 ವಿಮಾನ ನಿಲ್ದಾಣಗಳಲ್ಲಿ (ಮಂಗಳೂರು, ಅಹಮದಾಬಾದ್, ಲಕ್ನೋ, ಜೈಪುರ, ಗುವಾಹಾಟಿ, ತಿರುವನಂತಪುರಂ) ಮಂಗಳೂರು ಒಂದಾಗಿದ್ದು, ಈ ಆರನ್ನೂ ನಿರ್ವಹಿಸುವ ಹಕ್ಕನ್ನು ಅದಾನಿ ಸಮೂಹವೇ ಪಡೆದುಕೊಂಡಿತ್ತು.

Yakshagana: ಸುರತ್ಕಲ್‌ನಲ್ಲಿ ಒಂಭತ್ತು ತಿಂಗಳ ತುಂಬು ಗರ್ಭಿಣಿಯಿಂದ ಯಕ್ಷಗಾನ! ವೈರಲ್

Kannadaprabha News — Thu, 22 Oct 2026 07:52:47 +0530

ಮೂಲ್ಕಿ,ಸುರತ್ಕಲ್‌ (ಅ.22) ಬಂಟರ ಭವನದಲ್ಲಿ ಯಕ್ಷಸಿರಿಯ ನಾಲ್ಕನೇ ವರ್ಷದ ವಾರ್ಷಿಕೋತ್ಸವ ಸಂದರ್ಭ ಯಕ್ಷಗುರು ರಾಕೇಶ್‌ ರೈ ನಿರ್ದೇಶನದಲ್ಲಿ ನಡೆದ ದಶಾವತಾರ ಯಕ್ಷಗಾನ ಪ್ರದರ್ಶನದಲ್ಲಿ 9 ತಿಂಗಳ ತುಂಬು ಗರ್ಭಿಣಿ, ಹವ್ಯಾಸಿ ಕಲಾವಿದೆ ದಿಶಾ ಶೆಟ್ಟಿ(Disha Shetty) ಪ್ರಹ್ಲಾದನ ತಾಯಿ ಕಯಾದು ಪಾತ್ರ ಮಾಡಿ ಗಮನ ಸೆಳೆದಿದ್ದಾರೆ.

ಈ ವಿಚಾರ ಈಗ ಜಾಲತಾಣದಲ್ಲಿ ವೈರಲ್ ಆಗಿದೆ.

ನಮ್ಮದು ಯಕ್ಷಗಾನ(Yakshagana)ದ ಕುಟುಂಬವಾಗಿದ್ದು, ನನ್ನ ಅಮ್ಮ ಹಾಗೂ ಚಿಕ್ಕಮ್ಮ ಕೂಡ ಗರ್ಭಿಣಿಯಾಗಿದ್ದ ಸಂದರ್ಭದಲ್ಲಿ ಯಕ್ಷಗಾನ ಪಾತ್ರ ಮಾಡಿದ್ದು ಪ್ರೇರಣೆಯಾಗಿತ್ತು. ಸುರತ್ಕಲ್‌ ನಲ್ಲಿ ನಡೆದ ಯಕ್ಷಗಾನದಲ್ಲಿ ಪ್ರಹ್ಲಾದನ ತಾಯಿಯ ಪಾತ್ರ ಮಾಡಿದ್ದೇನೆ. ಗುರುಗಳಾದ ರಾಕೇಶ್‌ ರೈ(Director Rakesh Rai) ಬೆಂಬಲ ನೀಡಿದ್ದಾರೆ. ಪಾತ್ರ ಮಾಡುವ ಮುಂಚೆ ಅವಕಾಶ ಸಿಕ್ಕಿದ ಬಗ್ಗೆ ಮನೆಯವರಲ್ಲಿ ಚರ್ಚಿಸಿ, ನಿರ್ಧಾರ ತೆಗೆದುಕೊಂಡಿದ್ದೇನೆ. ಪುರುಷರು ಮಹಿಳೆ ಪಾತ್ರವನ್ನು ಮಾಡುತ್ತಿದ್ದು, ನಾನು ಮಹಿಳೆ ಪಾತ್ರವನ್ನು ಚಾಲೆಂಜ್‌ ಆಗಿ ಸ್ವೀಕರಿಸಿದ್ದೇನೆ. ಹೆಸರು ಮಾಡಬೇಕಂತ ಮಾಡಿಲ್ಲ ಎಂದು ದಿಶಾ ಸ್ಪಷ್ಟಪಡಿಸಿದ್ದಾರೆ.

ತಾಯ್ತನದ ಭಾವನೆಗೆ ಪಾತ್ರ ಪೂರಕವಾಗಿತ್ತು

ಪಾತ್ರ ಮಾಡುವ ವಿಚಾರ ರಹಸ್ಯವಾಗಿರಿಸಲಾಗಿತ್ತು. ಸುಮಾರು 20 ವರ್ಷದಿಂದ ಪುಂಡು ವೇಷ ಮಾಡುತ್ತಿದ್ದು ಪ್ರಹ್ಲಾದನ ತಾಯಿಯ ಪಾತ್ರ ತಾಯ್ತನದ ಭಾವನೆಗೆ ಪೂರಕವಾಗಿತ್ತು. ಇದನ್ನು ಸಾಧನೆ ಎಂದು ಹೇಳುವುದಿಲ್ಲ. ಪ್ರತಿಯೊಬ್ಬ ಮಹಿಳೆಯರಲ್ಲಿ ಗರ್ಭಿಣೆ ಸಮಯದಲ್ಲಿ ಬೇರೆ ಬೇರೆ ರೀತಿಯಾಗಿದ್ದು ತುಂಬಾ ಸೂಕ್ಷ್ಮವಾದ ಸಮಯವಾಗಿರುವುದರಿಂದ, ಇದನ್ನು ಅನುಕರಣೆ ಮಾಡಬೇಡಿ, ನಾನು ಮಾಡಿದ್ದೇನೆಂದು ಬೇರೆಯವರು ಮಾಡಬೇಡಿ. ನಾನು ಆ್ಯಕ್ಟೀವ್‌ ಇದ್ದ ಕಾರಣ ಸಾಧ್ಯವಾಗಿದೆ. ವಿಡಿಯೋ ವೈರಲ್‌ ಆದ ಬಳಿಕ ಜನರು ಇದನ್ನು ಯಾವ ರೀತಿ ತೆಗೆದುಕೊಳ್ಳುತ್ತಾರೆಂಬ ಹೆದರಿಕೆಯಿತ್ತು ಎಂದು ದಿಶಾ ಶೆಟ್ಟಿ ಹೇಳಿದ್ದಾರೆ.

ಮಂಗಳೂರಿನ ಜಂಬಿಟ್ಟಿಗೆಯಲ್ಲಿ ಯುರೋಪಿಯನ್ ರೋಲರ್ ಹಕ್ಕಿ ಪತ್ತೆ, ಕಲುಷಿತ ವಾತಾವರಣದಿಂದ ಹಕ್ಕಿಗೆ ಕುತ್ತು!

Gowthami K — Mon, 26 Oct 2026 14:56:01 +0530

ವರದಿ: ರಾಂ ಅಜೆಕಾರು

ಕಾರ್ಕಳ: ಮಂಗಳೂರಿನ ಜಂಬಿಟ್ಟಿಗೆ (ಲ್ಯಾಟರೈಟ್) ಪ್ರಸ್ಥಭೂಮಿಯಲ್ಲಿ ಅಪರೂಪದ ಯುರೋಪಿಯನ್ ರೋಲರ್ (Coracias garrulus) ಹಕ್ಕಿ ಕಾಣಿಸಿಕೊಂಡಿರುವುದು ಪಕ್ಷಿಪ್ರೇಮಿಗಳ ಗಮನ ಸೆಳೆದಿದೆ. ಆದರೆ, ಈ ಅಪರೂಪದ ವಲಸೆ ಹಕ್ಕಿಗೆ ಆಶ್ರಯ ನೀಡುವ ಜಂಬಿಟ್ಟಿಗೆ ಪರಿಸರವೇ ಇಂದು ಪ್ಲಾಸ್ಟಿಕ್ ಮತ್ತು ನಿರ್ಮಾಣ ತ್ಯಾಜ್ಯದ ಮಾಲಿನ್ಯಕ್ಕೆ ತುತ್ತಾಗುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ. ಮೇಲ್ನೋಟಕ್ಕೆ ಬಂಜರು ಭೂಮಿಯಂತೆ ಕಾಣುವ ಈ ಪ್ರದೇಶಗಳು ವಾಸ್ತವದಲ್ಲಿ ಹಲವು ಜೀವಿಗಳ ಬದುಕಿಗೆ ಆಧಾರವಾಗಿದ್ದು, ನಿರ್ಲಕ್ಷ್ಯ ಮುಂದುವರಿದರೆ ಅವುಗಳ ಆಹಾರ ಸರಪಳಿ ಹಾಗೂ ನೈಸರ್ಗಿಕ ಆವಾಸಸ್ಥಾನಕ್ಕೆ ಗಂಭೀರ ಹಾನಿಯಾಗುವ ಅಪಾಯವಿದೆ.

ಯುರೋಪ್ ಮತ್ತು ಮಧ್ಯ ಏಷ್ಯಾದಿಂದ ಉಪ-ಸಹಾರನ್ ಆಫ್ರಿಕಾಕ್ಕೆ ವಲಸೆ ಹೋಗುವ ಯುರೋಪಿಯನ್ ರೋಲರ್ ತನ್ನ ಆಕರ್ಷಕ ನೀಲಿ ಹಾಗೂ ತಾಮ್ರವರ್ಣದ ಗರಿಗಳಿಂದ ಗಮನ ಸೆಳೆಯುತ್ತದೆ. ಸಾಮಾನ್ಯ ವಲಸೆ ಮಾರ್ಗದಿಂದ ದಾರಿ ತಪ್ಪಿ ಮಂಗಳೂರಿಗೆ ಬಂದಿರುವ ಸಾಧ್ಯತೆಯಿದ್ದು, ಹವಾಮಾನ ವೈಪರೀತ್ಯವೂ ಇದಕ್ಕೆ ಕಾರಣವಾಗಿರಬಹುದು ಎಂದು ಅಂದಾಜಿಸಲಾಗಿದೆ.

ತ್ಯಾಜ್ಯದಿಂದ ಜೀವವೈವಿಧ್ಯಕ್ಕೆ ಕುತ್ತು :

ಮರಗಳ ಹೊದಿಕೆ ಕಡಿಮೆ ಇರುವುದರಿಂದ ಜಂಬಿಟ್ಟಿಗೆ ಪ್ರಸ್ಥಭೂಮಿಗಳನ್ನು ಸಾಮಾನ್ಯವಾಗಿ ಬಂಜರು ಪ್ರದೇಶಗಳೆಂದು ಭಾವಿಸಲಾಗುತ್ತದೆ. ಆದರೆ, ಈ ಪರಿಸರವು ಕೀಟಗಳು, ಸರೀಸೃಪಗಳು ಹಾಗೂ ಭಾರತೀಯ ರೋಲರ್ ಮತ್ತು ಹಳದಿ-ಗಂಟಲಿನ ಲ್ಯಾಪ್‌ವಿಂಗ್‌ನಂತಹ ಪಕ್ಷಿಗಳಿಗೆ ಸೂಕ್ತ ಆವಾಸಸ್ಥಾನವಾಗಿದೆ. ಇಲ್ಲಿ ದೊರೆಯುವ ಕೀಟಗಳು ಹಲವು ಪಕ್ಷಿಗಳಿಗೆ ಪ್ರಮುಖ ಆಹಾರ ಮೂಲವಾಗಿವೆ. ಹೀಗಾಗಿ, ಈ ಪ್ರದೇಶಗಳಲ್ಲಿ ಪ್ಲಾಸ್ಟಿಕ್ ಮತ್ತು ನಿರ್ಮಾಣ ತ್ಯಾಜ್ಯ ಸುರಿಯುವುದರಿಂದ ಕೇವಲ ಭೂಮಿಯ ಸ್ವಚ್ಛತೆ ಹಾಳಾಗುವುದಷ್ಟೇ ಅಲ್ಲದೆ, ಇಡೀ ಪರಿಸರ ವ್ಯವಸ್ಥೆಯ ಸಮತೋಲನಕ್ಕೂ ಧಕ್ಕೆ ಉಂಟಾಗುವ ಸಾಧ್ಯತೆಯಿದೆ. ತ್ಯಾಜ್ಯದಲ್ಲಿ ಬೆರೆತಿರುವ ಪ್ಲಾಸ್ಟಿಕ್ ಸಣ್ಣ ತುಂಡುಗಳಾಗಿ ವಿಭಜನೆಯಾಗಿ ಪರಿಸರದಲ್ಲಿ ದೀರ್ಘಕಾಲ ಉಳಿಯಬಹುದು. .

ಸಂರಕ್ಷಣೆ ನಿರ್ಲಕ್ಷಿಸಿದರೆ ಆವಾಸಸ್ಥಾನವೇ ನಾಶ:

ಜಂಬಿಟ್ಟಿಗೆ ಪ್ರಸ್ಥಭೂಮಿಗಳ ಪರಿಸರ ಮೌಲ್ಯವನ್ನು ಗುರುತಿಸಿ ಸಂರಕ್ಷಣಾ ಕ್ರಮಗಳನ್ನು ಕೈಗೊಳ್ಳದಿದ್ದರೆ, ಅಪರೂಪದ ವಲಸೆ ಹಕ್ಕಿಗಳು ಸೇರಿದಂತೆ ಸ್ಥಳೀಯ ಜೀವವೈವಿಧ್ಯಕ್ಕೆ ಆಶ್ರಯ ನೀಡುವ ನೈಸರ್ಗಿಕ ತಾಣಗಳು ಕ್ರಮೇಣ ಹದಗೆಡುವ ಅಪಾಯವಿದೆ.

ಯುರೋಪಿಯನ್ ರೋಲರ್ ಹಕ್ಕಿಯ ಆಗಮನ ನಮಗೆ ಎಚ್ಚರಿಕೆಯ ಕರೆಯಾಗಬೇಕು. ಜಂಬಿಟ್ಟಿಗೆ ಪ್ರಸ್ಥಭೂಮಿಗಳು ಬಂಜರು ಭೂಮಿಯಲ್ಲ, ಜೀವವೈವಿಧ್ಯದ ಆಶ್ರಯತಾಣಗಳು. ತ್ಯಾಜ್ಯ ಎಸೆಯುವಿಕೆಯನ್ನು ತಡೆದು, ಈ ಸೂಕ್ಷ್ಮ ಪರಿಸರ ವ್ಯವಸ್ಥೆಗಳನ್ನು ಸಂರಕ್ಷಿಸಲು ಕಟ್ಟುನಿಟ್ಟಿನ ಕ್ರಮ ಅಗತ್ಯ.”

-ಕಿರಣ್ ವಟಿ ಕೆ., ಸಹಾಯಕ ಪ್ರಾಧ್ಯಾಪಕರು, ಪ್ರಾಣಿಶಾಸ್ತ್ರ ವಿಭಾಗ, ಸೇಂಟ್ ಅಲೋಶಿಯಸ್ ಪರಿಗಣಿತ ವಿಶ್ವವಿದ್ಯಾನಿಲಯ ಮಂಗಳೂರು.

ಜಂಬಿಟ್ಟಿಗೆ ಪ್ರಸ್ಥಭೂಮಿಗಳು ಬಂಜರು ಭೂಮಿಯಲ್ಲ, ಅಪರೂಪದ ಸ್ಥಳೀಯ ಹಾಗೂ ವಲಸೆ ಹಕ್ಕಿಗಳಿಗೆ ಆಶ್ರಯ ನೀಡುವ ಜೀವವೈವಿಧ್ಯದ ತಾಣಗಳು. ಗುರುಪುರ–ಕೈಕಂಬದಲ್ಲಿ ಎಂಟು ಅಪರೂಪದ ಯುರೋಪಿಯನ್ ರೋಲರ್ ಹಕ್ಕಿಗಳು ಕಾಣಿಸಿಕೊಂಡಿರುವುದು ಇದರ ಮಹತ್ವವನ್ನು ಸಾರುತ್ತದೆ. ಈ ಸೂಕ್ಷ್ಮ ಪರಿಸರ ವ್ಯವಸ್ಥೆಗಳು ನಾಶವಾಗುವ ಮುನ್ನ ಸಂರಕ್ಷಣೆ ಅಗತ್ಯ.”

-ಮಹಿಮ್ ಭಟ್, ಪಿಎಚ್.ಡಿ. ಸಂಶೋಧಕರು, ಮಾಹೆ, ಮಣಿಪಾಲ.

ಈ ಪ್ರಸ್ಥಭೂಮಿಗಳು ಜೀವವೈವಿಧ್ಯ ಹಾಗೂ ವಲಸೆ ಹಕ್ಕಿಗಳಿಗೆ ಪ್ರಮುಖ ಆಶ್ರಯತಾಣಗಳು. ಆದರೆ ಹಳೆಯ ಕ್ವಾರಿ ಗುಂಡಿಗಳು ಪ್ಲಾಸ್ಟಿಕ್ ಮತ್ತು ನಿರ್ಮಾಣ ತ್ಯಾಜ್ಯಗಳಿಂದ ತುಂಬುತ್ತಿರುವುದು ಆತಂಕಕಾರಿ. ಆರ್ಥಿಕ ಲಾಭಕ್ಕಿಂತ ಪರಿಸರ ಸಂರಕ್ಷಣೆಗೆ ಆದ್ಯತೆ ನೀಡಿ, ಈ ಆವಾಸಸ್ಥಾನಗಳನ್ನು ಉಳಿಸಬೇಕು.”

-ಸಾತ್ವಿಕ್ ಪಿ.ಎಸ್., ವನ್ಯಜೀವಿ ಚಲನಚಿತ್ರ ನಿರ್ಮಾಪಕ ಮತ್ತು ಛಾಯಾಗ್ರಾಹಕ, ವೈಲ್ಡ್ ಡಿಕೆ ಪ್ರೊಡಕ್ಷನ್ಸ್.

ತಪ್ಪಿದ ಆದಾಯ, ಮೈಸೂರು ರೈಲ್ವೆ ವಿಭಾಗಕ್ಕೆ ಮಂಗಳೂರು ವಿರುದ್ಧ ಕೇರಳ ಅಸೆಂಬ್ಲಿ ನಿರ್ಣಯ!

Gowthami K — Fri, 16 Oct 2026 13:44:16 +0530

ತಿರುವನಂತಪುರಂ: ಪಾಲಕ್ಕಾಡ್ ರೈಲ್ವೆ ವಿಭಾಗದಿಂದ ಮಂಗಳೂರು ಪ್ರದೇಶವನ್ನು ವಿಭಜಿಸಿ ನೈಋತ್ಯ ರೈಲ್ವೆಯ ಮೈಸೂರು ವಿಭಾಗಕ್ಕೆ ಸೇರಿಸುವ ನಿರ್ಧಾರವನ್ನು ಮರುಪರಿಶೀಲಿಸುವಂತೆ ಕೇಂದ್ರ ಸರ್ಕಾರವನ್ನು ಒತ್ತಾಯಿಸುವ ನಿರ್ಣಯವನ್ನು ಕೇರಳ ವಿಧಾನಸಭೆ ಗುರುವಾರ ಅಂಗೀಕರಿಸಿದೆ. ಕಾಂಗ್ರೆಸ್ ಶಾಸಕ ರಮೇಶ್ ಪಿಶಾರಡಿ ಮಂಡಿಸಿದ ನಿರ್ಣಯವನ್ನು ಅಂಗೀಕರಿಸುವ ಮೂಲಕ, ವಿಭಾಗವನ್ನು ಅದರ ಮೂಲ ಸ್ಥಿತಿಗೆ ಪುನಃಸ್ಥಾಪಿಸಬೇಕೆಂದು ಒತ್ತಾಯಿಸಿತು. ಪ್ರಸ್ತಾವನೆ ಮೇಲಿನ ಚರ್ಚೆ ವೇಳೆ ಮುಖ್ಯಮಂತ್ರಿ ವಿ.ಡಿ. ಸತೀಶನ್ ಮಾತನಾಡಿ, ವಿಭಜನೆಯು ರಾಜ್ಯದ ರೈಲ್ವೆ ಅಭಿವೃದ್ಧಿ ಸಾಧ್ಯತೆಗಳ ಮೇಲೆ ಗಂಭೀರ ಪರಿಣಾಮ ಬೀರುತ್ತದೆ. ರಾಜ್ಯ ಸರ್ಕಾರ ಅಥವಾ ಕೇರಳದ ಸಂಸದರಿಗೆ ತಿಳಿಸದೆ ರೈಲ್ವೆ ಸಚಿವಾಲಯವು ಈ ನಿರ್ಧಾರವನ್ನು ತೆಗೆದುಕೊಂಡಿದೆ ಎಂದರು.

ಅಕ್ಟೋಬರ್‌ 1 ರಿಂದ ಮೈಸೂರು ವಿಭಾಗ

ದಕ್ಷಿಣ ರೈಲ್ವೆಯ ಪಾಲಕ್ಕಾಡ್ ರೈಲ್ವೆ ವಿಭಾಗದಿಂದ ಮಂಗಳೂರು ಪ್ರದೇಶವನ್ನು ವಿಭಜಿಸಿ ನೈಋತ್ಯ ರೈಲ್ವೆಯ ಮೈಸೂರು ವಿಭಾಗಕ್ಕೆ ಸೇರ್ಪಡೆ ಗೊಳಿಸಲಾಗಿದೆ. ಮಂಗಳೂರು ರೈಲು ಪ್ರದೇಶವನ್ನು ಮೈಸೂರು ವಿಭಾಗಕ್ಕೆ ಸೇರ್ಪಡೆಗೊಳಿಸಿರುವುದು ಆಡಳಿತಾತ್ಮಕ ಹಾಗೂ ಕಾರ್ಯಾಚರಣೆಯ ದೃಷ್ಟಿಯಿಂದ ಮಹತ್ವದ ಬೆಳವಣಿಗೆಯಾಗಿದೆ. ಹೊಸ ವ್ಯಾಪ್ತಿಯಡಿ ರೈಲುಗಳ ಸಂಚಾರ, ನಿರ್ವಹಣಾ ಚಟುವಟಿಕೆಗಳು, ಸುರಕ್ಷತಾ ಕ್ರಮಗಳು ಹಾಗೂ ಇತರ ರೈಲ್ವೆ ಸೇವೆಗಳು ಯಾವುದೇ ವ್ಯತ್ಯಯವಿಲ್ಲದೆ ಸುಗಮವಾಗಿ ಮುಂದುವರಿಯುವಂತೆ ಮೈಸೂರು ವಿಭಾಗ ಅಗತ್ಯ ವ್ಯವಸ್ಥೆಗಳನ್ನು ಕೈಗೊಂಡಿದೆ. ಅಕ್ಟೋಬರ್‌ 1 ರಿಂದ ಮೈಸೂರು ವಿಭಾಗಕ್ಕೆ ಮಂಗಳೂರು ಪ್ರದೇಶ ಸೇರ್ಪಡೆಯಾಗಿದೆ/

ವಿಧಾನಸಭೆಯಲ್ಲಿ ವಿಷಯ ಮಂಡಿಸಿದ ಪಾಲಕ್ಕಾಡ್ ಶಾಸಕ ಶಫಿ ಪಿಶಾರಡಿ, ಪಾಲಕ್ಕಾಡ್ ರೈಲ್ವೇ ವಿಭಾಗಕ್ಕೆ ಮಂಗಳೂರು ಪ್ರದೇಶವೇ ಆರ್ಥಿಕ ಬೆನ್ನೆಲುಬಾಗಿತ್ತು. ಈ ವಿಭಾಗವು ಪ್ರತಿದಿನ ಸುಮಾರು 2.75 ಕೋಟಿ ರೂಪಾಯಿ ಆದಾಯ ಗಳಿಸುತ್ತಿದ್ದು, ಅದರಲ್ಲಿ ಬಹುಪಾಲು ಆದಾಯವು ಮಂಗಳೂರು ವಲಯದ ಸರಕು ಹಾಗೂ ಪ್ರಯಾಣಿಕರ ಸೇವೆಯಿಂದಲೇ ಹರಿದುಬರುತ್ತಿತ್ತು. ಅಕ್ಟೋಬರ್ 1, 2026 ರಂದು ಮಂಗಳೂರು ವಲಯವು ಅಧಿಕೃತವಾಗಿ ಮೈಸೂರು ವಿಭಾಗದ ಪಾಲಾಗಿದೆ. ಇದರಿಂದ ಪಾಲಕ್ಕಾಡ್ ವಿಭಾಗದ ಶಕ್ತಿಯೇ ಕುಸಿದುಬಿದ್ದಂತಾಗಿದ್ದು, ಅಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ನೂರಾರು ನೌಕರರ ಭವಿಷ್ಯ ಹಾಗೂ ಭತ್ಯೆಗಳ ಮೇಲೆಯೂ ಗಂಭೀರ ಪರಿಣಾಮ ಬೀರಲಿದೆ " ಎಂದು ಕಳವಳ ವ್ಯಕ್ತಪಡಿಸಿದರು.

1,600 ಕೋಟಿ ರೂ. ನಷ್ಟದ ಆರೋಪ

ಚರ್ಚೆಯಲ್ಲಿ ಪಾಲ್ಗೊಂಡ ಯುಡಿಎಫ್ ಹಾಗೂ ಎಲ್‌ಡಿಎಫ್ ಶಾಸಕರು, ಮಂಗಳೂರನ್ನು ಬೇರ್ಪಡಿಸಿರುವುದರಿಂದ ಕೇರಳ ರಾಜ್ಯಕ್ಕೆ ವಾರ್ಷಿಕವಾಗಿ ಸುಮಾರು 1,600 ಕೋಟಿ ರೂಪಾಯಿಗಳ ಭಾರಿ ಆರ್ಥಿಕ ನಷ್ಟ ಸಂಭವಿಸಲಿದೆ ಎಂದು ಆರೋಪಿಸಿದರು. ಕೇಂದ್ರ ಸರ್ಕಾರವು ರಾಜ್ಯದ ಹಿತಾಸಕ್ತಿಯನ್ನು ಸತತವಾಗಿ ನಿರ್ಲಕ್ಷಿಸುತ್ತಿದೆ. ಯಾವುದೇ ಪೂರ್ವಭಾವಿ ಮಾತುಕತೆ ನಡೆಸದೆ ಏಕಪಕ್ಷೀಯವಾಗಿ ಇಂತಹ ನಿರ್ಧಾರಗಳನ್ನು ತಳೆಯುತ್ತಿರುವುದು ಕೇಂದ್ರದ ಸೌಹಾರ್ದಯುತ ಒಕ್ಕೂಟ ವ್ಯವಸ್ಥೆಗೆ ವಿರುದ್ಧವಾಗಿದೆ ಎಂದು ಕಾಂಗ್ರೆಸ್ ನಾಯಕ ವಿ.ಡಿ. ಸತೀಶನ್ ಮತ್ತು ಆಡಳಿತ ಪಕ್ಷದ ನಾಯಕರು ಸರ್ಕಾರದ ನಡೆಯನ್ನು ತೀವ್ರವಾಗಿ ಖಂಡಿಸಿದರು.

ಈ ವಿಚಾರವಾಗಿ ಕೇರಳ ವಿಧಾನಸಭೆಯಲ್ಲಿ ಆಡಳಿತಾರೂಢ ಎಲ್‌ಡಿಎಫ್ ಹಾಗೂ ವಿರೋಧ ಪಕ್ಷವಾದ ಯುಡಿಎಫ್ ಒಟ್ಟಾಗಿ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿ ನಿಲುವಳಿ ಸೂಚನೆ ಅಂಗೀಕರಿಸಿದ್ದರೆ, ಅತ್ತ ಬಿಜೆಪಿ ಈ ನಿರ್ಣಯವನ್ನು ಜನರ ಗಮನ ಬೇರೆಡೆಗೆ ಸೆಳೆಯುವ ತಂತ್ರ ಎಂದು ಲೇವಡಿ ಮಾಡಿದೆ.

ರೈನ್‌ಕೋಟ್ ಮಾರುತ್ತಿದ್ದವ ಐಸ್‌ಕ್ರೀಮ್ ಕಿಂಗ್ ಆದ ಕಥೆ, ಮಂಗಳೂರಿನ ಪಬ್ಬಾಸ್ ಯಶಸ್ಸಿನ ಹಿಂದಿನ ರೋಚಕ ಕಹಾನಿ

Gowthami K — Thu, 15 Oct 2026 15:00:58 +0530

ಮಂಗಳೂರು: ಇದು ಮಂಗಳೂರಿನ ಫೇಮಸ್ ಐಡಿಯಲ್ ಐಸ್ ಕ್ರೀಮ್ ಹುಟ್ಟಿದ ಕಥೆ. ರೈನ್ ಕೋಟ್ ಮಾರ್ತಿದ್ದಂತಹ 20 ವರ್ಷದ ಹುಡುಗ ಹೇಗೇ ಮಂಗಳೂರನ್ನು "ಐಸ್ ಕ್ರೀಮ್ ಕ್ಯಾಪಿಟಲ್" ಆಗಿ ಚೇಂಜ್ ಮಾಡಿದ್ರು ಎಂಬುದು ಕುತೂಹಲ. ಚಿಕ್ಕ ವಯಸ್ಸಿನಲ್ಲೇ ಹೆತ್ತವರನ್ನು ಕಳೆದುಕೊಂಡ ಪ್ರಭಾಕರ್ ಕಾಮತ್, ತಮ್ಮ ಕುಟುಂಬಕ್ಕೆ ಆಸರೆಯಾಗಲು ಆರಂಭದಲ್ಲಿ ರೈನ್‌ಕೋಟ್‌ಗಳನ್ನು ಮಾರಾಟ ಮಾಡುತ್ತಿದ್ದರು. ಆದರೆ, ಕೇವಲ ಮಳೆಗಾಲಕ್ಕೆ ಸೀಮಿತವಾಗಿದ್ದ ಈ ಸೀಸನಲ್ ಉದ್ಯಮವನ್ನು ತೊರೆದು, ವರ್ಷಪೂರ್ತಿ ನಡೆಯುವ ಶಾಶ್ವತ ವ್ಯಾಪಾರ ಕಟ್ಟಲು ನಿರ್ಧರಿಸಿದರು. 1975ರಲ್ಲಿ, ತಮ್ಮ ಮನೆಯ ಸಣ್ಣ ಅಡುಗೆಮನೆಯನ್ನೇ ಪ್ರಯೋಗಾಲಯವನ್ನಾಗಿ ಮಾಡಿಕೊಂಡು ಐಸ್‌ಕ್ರೀಮ್ ತಯಾರಿಸುವ ಹೊಸ ಹೊಸ ಪ್ರಯೋಗಗಳನ್ನು ಶುರು ಮಾಡಿದರು. ಇದು ಇಂದು ಕರ್ನಾಟಕದ ಹೆಮ್ಮೆಯ ಗುರುತಾಗಿದೆ

ಪಬ್ಬಾಸ್ ಮಾಮ್ ನಿಂದ ಪಬ್ಬಾಸ್ ಹುಟ್ಟಿತು!

ಕರಾವಳಿಯ ಸಾಂಸ್ಕೃತಿಕ ನಗರಿ ಮಂಗಳೂರಿಗೆ ಕಾಲಿಡುತ್ತಿದ್ದಂತೆಯೇ ಪ್ರತಿಯೊಬ್ಬರ ಮನಸ್ಸಿನಲ್ಲಿ ಮೂಡುವ ಮೊದಲ ಹೆಸರು 'ಐಡಿಯಲ್ ಐಸ್‌ಕ್ರೀಮ್' ಇಂದು ಮಂಗಳೂರು ನಗರವನ್ನು ಇಡೀ ದೇಶವೇ "ಭಾರತದ ಐಸ್‌ಕ್ರೀಮ್ ರಾಜಧಾನಿ" ಎಂದು ಕರೆಯಲು ಈ ಸಂಸ್ಥೆಯ ಕೊಡುಗೆ ಅಪಾರ. ಆದರೆ, ವಾರ್ಷಿಕ ₹150 ಕೋಟಿಗೂ ಅಧಿಕ ವಹಿವಾಟು ನಡೆಸುವ ಈ ಬೃಹತ್ ಸಾಮ್ರಾಜ್ಯ ಇಂದು ಮಂಗಳೂರಿನ ಫೇಮಸ್ ಪಬ್ಬಾಸ್. ಪಬ್ಬಾಸ್ ಹೆಸರು ಬರಲು ಕಾರಣವೂ ಇದೆ.

ಸವಾಲುಗಳ ನಡುವೆ ಬೆಳೆದ ಕನಸು

ಐಡಿಯಲ್ ಐಸ್‌ಕ್ರೀಮ್ ಸಂಸ್ಥಾಪಕರಾದ ಎಸ್. ಪ್ರಭಾಕರ್ ಕಾಮತ್ ಅವರ ಆರಂಭಿಕ ಜೀವನ ಅತ್ಯಂತ ಕಷ್ಟಕರವಾಗಿತ್ತು. ಚಿಕ್ಕ ವಯಸ್ಸಿನಲ್ಲೇ ತಾಯಿ-ತಂದೆಯನ್ನು ಕಳೆದುಕೊಂಡ ಪ್ರಭಾಕರ್, ಯಾವುದೇ ಹಣಕಾಸಿನ ಬೆಂಬಲ ಅಥವಾ ಉದ್ಯಮದ ಹಿನ್ನೆಲೆಯಿಲ್ಲದೆ ಕುಟುಂಬದ ಜವಾಬ್ದಾರಿಯನ್ನು ಹೊತ್ತುಕೊಳ್ಳಬೇಕಾಯಿತು.

ಕುಟುಂಬವನ್ನು ಪೋಷಿಸಲು ಅವರು ರಸ್ತೆಬದಿಯಲ್ಲಿ ರೈನ್‌ಕೋಟ್‌ಗಳು, ಪಟಾಕಿಗಳು ಹಾಗೂ ಟೈಲರಿಂಗ್ ಸಾಮಗ್ರಿಗಳನ್ನು ಮಾರಾಟ ಮಾಡುವ ಸಣ್ಣಪುಟ್ಟ ವ್ಯಾಪಾರಗಳನ್ನು ಮಾಡುತ್ತಿದ್ದರು. ಆದರೆ, ಇವು ಮಳೆಗಾಲಕ್ಕೆ ಮಾತ್ರ ಸೀಮಿತವಾಗಿದ್ದ 'ಸೀಸನಲ್' ವ್ಯಾಪಾರಗಳಾಗಿದ್ದವು. ವರ್ಷದ 365 ದಿನಗಳೂ ನಿರಂತರವಾಗಿ ನಡೆದುಕೊಂಡು ಹೋಗುವ ಶಾಶ್ವತ ಉದ್ಯಮವನ್ನು ಕಟ್ಟಬೇಕು ಎಂಬ ಹಂಬಲದಿಂದ ಅವರು ಐಸ್‌ಕ್ರೀಮ್ ಕ್ಷೇತ್ರದತ್ತ ಗಮನಹರಿಸಿದರು. 1970ರ ದಶಕದ ಆರಂಭದಲ್ಲಿಇದಕ್ಕಾಗಿ ಅವರು ಯಾವುದೇ ತಬೇತಿ ಇಲ್ಲದೆ ಐಸ್ ಕ್ರೀಂ ಮಾಡುವುದನ್ನು ಕಲಿತು ಅಕ್ಕಪಕ್ಕದ ಮನೆಗೆ ಸವಿಯಲು ನೀಡುತ್ತಿದ್ದರು.

ಕಡೆಗೂ 1975ರ ಮೇ 1 ರಂದು ಮಂಗಳೂರಿನ ಮಾರ್ಕೆಟ್ ರಸ್ತೆಯ ಹಂಪನಕಟ್ಟೆಯಲ್ಲಿ ಕೇವಲ 14 ರುಚಿಗಳೊಂದಿಗೆ ತಮ್ಮ ಮೊದಲ "ಐಡಿಯಲ್ ಐಸ್‌ಕ್ರೀಮ್" ಪಾರ್ಲರ್ ಅನ್ನು ಪ್ರಾರಂಭಿಸಿದರು. ದಿನಕಳೆದಂತೆ ಇವರ ಐಸ್‌ಕ್ರೀಂ ಸವಿಯಲು ಜನ ಸಾಲುಗಟ್ಟಿ ನಿಲ್ಲುತ್ತಿದ್ದರು. ಐಸ್‌ಕ್ರೀಂ ಸವಿಯಲು ಬಂದ ಜನ ಅವರನ್ನು ಪಬ್ಬಾಸ್ ಮಾಮ ಎಂದೇ ಕರೆಯುತ್ತಿದ್ದರು. ಅದೇ ಹೆಸರು ಫೇಮಸ್ ಆಯ್ತು. 1996 ರಲ್ಲಿ ಮಂಗಳೂರಿನ ಎಂ.ಜಿ ರಸ್ತೆಯಲ್ಲಿ ತೆರೆಯಲಾದ "ಪಬ್ಬಾಸ್" ಐಸ್‌ಕ್ರೀಮ್ ಪಾರ್ಲರ್ ಬ್ರ್ಯಾಂಡ್‌ನ ಶಕ್ತಿಯನ್ನು ಮತ್ತಷ್ಟು ಹೆಚ್ಚಿಸಿತು. ಇಂದು ದೇಶದ ಅತಿದೊಡ್ಡ ಪಾರ್ಲರ್‌ಗಳಲ್ಲಿ ಒಂದಾಗಿರುವ ಪಬ್ಬಾಸ್, ಮಂಗಳೂರಿಗೆ ಬರುವ ಪ್ರವಾಸಿಗರು ತಪ್ಪದೇ ಭೇಟಿ ನೀಡುವ ಪ್ರಮುಖ ಪ್ರವಾಸಿ ಹಾಗೂ ಸಾಂಸ್ಕೃತಿಕ ತಾಣವಾಗಿದೆ.

'ಗಡ್‌ಬಡ್' ಕ್ರಾಂತಿ ಹಾಗೂ 'ಪಬ್ಬಾಸ್' ಸಾಂಸ್ಕೃತಿಕ ಹೆಗ್ಗುರುತು

ಜನರ ನಾಲಿಗೆಗೆ ತಕ್ಕಂತೆ ರುಚಿ ಕೊಟ್ಟಿದ್ದು ಐಡಿಯಲ್‌ನ ಯಶಸ್ಸಿಗೆ ಮುಖ್ಯ ಕಾರಣ. ಲಭ್ಯವಿದ್ದ ಪದಾರ್ಥಗಳ ಸೃಜನಶೀಲ ಸಂಯೋಜನೆಯಿಂದ ಹುಟ್ಟಿಕೊಂಡ 'ಗಡ್‌ಬಡ್' ವಿವಿಧ ಐಸ್‌ಕ್ರೀಮ್ ಸ್ಕೂಪ್‌ಗಳು, ತಾಜಾ ಹಣ್ಣುಗಳು, ಜೆಲ್ಲಿ ಮತ್ತು ಡ್ರೈ ಫ್ರೂಟ್ಸ್‌ಗಳ ಸುಂದರ ಮಿಶ್ರಣ ಕರಾವಳಿಗರ ಟೇಸ್ಟ್‌ ನಲ್ಲಿ ಹೊಸ ಇತಿಹಾಸ ಸೃಷ್ಟಿಸಿತು.

ಉದ್ಯಮದ ಸವಾಲುಗಳು ಮತ್ತು ನವೀಕರಣ

ಒಂದೇ ಪಾರ್ಲರ್‌ನಿಂದ ಆರಂಭವಾದ ಐಡಿಯಲ್, ಕ್ರಮೇಣ ಚಿಲ್ಲರೆ ಮಾರುಕಟ್ಟೆಗೆ ವಿಸ್ತರಿಸಿತು. 2003 ರಲ್ಲಿ ಅತ್ಯಾಧುನಿಕ ಉತ್ಪಾದನಾ ಘಟಕ ಸ್ಥಾಪನೆಯಾದ ನಂತರ, ಸರಕು ಸಾಗಣೆ ಮತ್ತು ಕೋಲ್ಡ್-ಚೈನ್ ಲಾಜಿಸ್ಟಿಕ್ಸ್ ಸವಾಲುಗಳು ಎದುರಾದವು. ಹಾಳಾಗುವ ವಸ್ತುವಾದ್ದರಿಂದ ವಿತರಣೆಯಲ್ಲಿ ಎದುರಾದ ತೊಡಕುಗಳನ್ನು ಮೆಟ್ಟಿ ನಿಲ್ಲಲು ಸಂಸ್ಥೆಯು ಆಧುನಿಕ ವ್ಯವಸ್ಥೆಗಳನ್ನು ಅಳವಡಿಸಿಕೊಂಡಿತು.

ಪ್ರಭಾಕರ್ ಕಾಮತ್ ಅವರ ಪುತ್ರ ಎಸ್. ಮುಕುಂದ್ ಕಾಮತ್ ಅವರು ಉದ್ಯಮದ ಚುಕ್ಕಾಣಿ ಹಿಡಿದ ನಂತರ, SAP ನಂತಹ ಸಾಫ್ಟ್‌ವೇರ್ ಅಳವಡಿಕೆ, ಮಾಲ್‌ಗಳಲ್ಲಿ ಕೆಫೆ ಸ್ಥಾಪನೆ ಹಾಗೂ ಔಪಚಾರಿಕ ಆಡಳಿತ ಶೈಲಿಯನ್ನು ತಂದರು. ಏಪ್ರಿಲ್ 2024 ರಲ್ಲಿ, ಈ ಸಂಸ್ಥೆಯು 'ಐಡಿಯಲ್ ಐಸ್‌ಕ್ರೀಮ್ ಪ್ರೈವೇಟ್ ಲಿಮಿಟೆಡ್' ಆಗಿ ಖಾಸಗಿ ಸೀಮಿತ ಕಂಪನಿಯಾಗಿ ಪರಿವರ್ತನೆಯಾಯಿತು.

ರಾಷ್ಟ್ರೀಯ ಪುರಸ್ಕಾರಗಳು:

ಪ್ರತಿಷ್ಠಿತ 'ಡುಪಾಂಟ್–ಐಡಿಎ' ಗ್ರೇಟ್ ಇಂಡಿಯಾ ಐಸ್‌ಕ್ರೀಮ್ ಸ್ಪರ್ಧೆಯಲ್ಲಿ 'ಬೆಸ್ಟ್ ಇನ್ ಕ್ಲಾಸ್' ಹಾಗೂ ಹತ್ತಾರು ಚಿನ್ನದ ಪದಕಗಳು ಸೇರಿದಂತೆ ಒಟ್ಟು 27 ಕ್ಕೂ ಹೆಚ್ಚು ರಾಷ್ಟ್ರೀಯ ಪ್ರಶಸ್ತಿಗಳನ್ನು ಐಡಿಯಲ್ ಐಸ್‌ಕ್ರೀಮ್ ಪಡೆದುಕೊಂಡಿದೆ.

ಐಡಿಯಲ್ ಸಂಸ್ಥೆಯು ಕ್ಲಾಸಿಕ್ ರುಚಿಗಳಿಂದ ಹಿಡಿದು ಇಂದಿನ ಯುವಜನತೆಗೆ ಇಷ್ಟವಾಗುವ ಗೌರ್ಮೆಟ್ ಸುವಾಸನೆಗಳವರೆಗೆ 150ಕ್ಕೂ ಹೆಚ್ಚು ಉತ್ಪನ್ನಗಳನ್ನು ನೀಡುತ್ತಿದೆ. ವೆನಿಲ್ಲಾ, ಚಾಕೊಲೇಟ್, ಬಟರ್‌ಸ್ಕಾಚ್, ಮ್ಯಾಂಗೋ ಮತ್ತು ಕ್ರೀಮಿ ಮ್ಯಾಂಗೋ ಬಟರ್. ಟಿರಾಮಿಸು, ಬ್ಲೂಬೆರ್ರಿ ಚೀಸ್‌ಕೇಕ್, ಬಿಸ್ಕಾಫ್ ಕ್ಯಾರಮೆಲೈಸ್ಡ್, ಕ್ಯಾರಮೆಲ್ ಚಾಕೊ ಹ್ಯಾಝೆಲ್‌ನಟ್ ಹಾಗೂ ವಿಶಿಷ್ಟ ಡಬಲ್ ಕೋನ್‌ಗಳು.

ಇಂದು ಕರ್ನಾಟಕ, ಉತ್ತರ ಕೇರಳ ಹಾಗೂ ಗೋವಾದಾದ್ಯಂತ 8,500 ಕ್ಕೂ ಹೆಚ್ಚು ಚಿಲ್ಲರೆ ಮಾರಾಟ ಮಳಿಗೆಗಳು ಹಾಗೂ ವಿತರಕರ ಜಾಲವನ್ನು ಸಂಸ್ಥೆ ಹೊಂದಿದೆ. ಅಲ್ಲದೆ, ಸ್ವಿಗ್ಗಿ ಇನ್‌ಸ್ಟಾಮಾರ್ಟ್, ಬಿಗ್‌ಬಾಸ್ಕೆಟ್ ಮತ್ತು ಜಿಯೋಮಾರ್ಟ್‌ಗಳ ಮೂಲಕ ಪ್ರಮುಖ ನಗರಗಳಲ್ಲಿ ಮನೆಬಾಗಿಲಿಗೂ ಐಸ್‌ಕ್ರೀಮ್ ತಲುಪಿಸಲಾಗುತ್ತಿದೆ.

ವರ್ಷಕ್ಕೆ ₹150 ಕೋಟಿಗೂ ಅಧಿಕ ಕಾರ್ಯಾಚರಣೆ ಆದಾಯ ಹೊಂದಿರುವ ಐಡಿಯಲ್ ಐಸ್‌ಕ್ರೀಮ್, "ಮಿಲ್ಕಿ ವೇ ಟು ಯುವರ್ ಹಾರ್ಟ್" ಎಂಬ ತಮ್ಮ ಧ್ಯೇಯವಾಕ್ಯಕ್ಕೆ ತಕ್ಕಂತೆ ಕೋಟಿ ಕೋಟಿ ಗ್ರಾಹಕರ ಹೃದಯ ಗೆದ್ದಿದೆ. ಸಾಮಾನ್ಯ ಹಿನ್ನೆಲೆಯಿಂದ ಬಂದು, ಕಠಿಣ ಪರಿಸ್ಥಿತಿಗಳಲ್ಲಿ ಪರ್ಯಾಯ ಮಾರ್ಗವನ್ನು ಕಂಡುಕೊಂಡು ಬೃಹತ್ ಸಾಮ್ರಾಜ್ಯ ಕಟ್ಟಿದ ಪ್ರಭಾಕರ್ ಕಾಮತ್ ಅವರ ಈ ಪ್ರಯಾಣವು ಒಂದು ನಿತ್ಯಸತ್ಯವನ್ನು ಸಾಬೀತುಪಡಿಸುತ್ತದೆ.

NITK ಸುರತ್ಕಲ್‌: 3 ಕೋಟಿ ಲೀ. ಸಾಮರ್ಥ್ಯದ ಮಳೆನೀರು ಸಂಗ್ರಹ ವ್ಯವಸ್ಥೆ ಕಾರ್ಯಾರಂಭ

Kannadaprabha News — Wed, 14 Oct 2026 11:07:27 +0530

ಮಂಗಳೂರು: ರಾಷ್ಟ್ರೀಯ ತಾಂತ್ರಿಕ ಸಂಸ್ಥೆ ಕರ್ನಾಟಕ (ಎನ್‌ಐಟಿಕೆ) ಸುರತ್ಕಲ್‌ನಲ್ಲಿ 3 ಕೋಟಿ ಲೀಟರ್ ಸಾಮರ್ಥ್ಯದ ಮಳೆನೀರು ಸಂಗ್ರಹ ಜಲಾಶಯವನ್ನು 1 ಎಂಎಲ್‌ಡಿ (ಪ್ರತಿದಿನ 10 ಲಕ್ಷ ಲೀಟರ್ ಸಾಮರ್ಥ್ಯ) ನೀರು ಶುದ್ಧೀಕರಣ ಘಟಕದೊಂದಿಗೆ 850 ಮೀಟರ್ ಉದ್ದದ ಪೈಪ್‌ಲೈನ್ ಮೂಲಕ ಸಂಪರ್ಕಿಸುವ ಮೂಲಕ ಎನ್‌ಐಟಿಕೆರೆ ಯೋಜನೆ ಕಾರ್ಯಗತಗೊಳಿಸಲಾಗಿದೆ.

ಎನ್‌ಐಟಿಕೆ ಆಡಳಿತ ಮಂಡಳಿ ಅಧ್ಯಕ್ಷ ಎಂ.ಎಂ.ಮುರುಗಪ್ಪನ್, ಎನ್‌ಐಟಿಕೆ ನಿರ್ದೇಶಕ ಪ್ರೊ.ಬಿ.ರವಿ ಅವರು ಈ ಸೌಲಭ್ಯವನ್ನು ಉದ್ಘಾಟಿಸಿದರು. ಏರ್ ಮಾರ್ಷಲ್ ಬಿ.ಯು.ಚೆಂಗಪ್ಪ, ಎನ್‌ಐಟಿಕೆ ಹಳೆ ವಿದ್ಯಾರ್ಥಿಗಳ ಸಂಘದ ಅಧ್ಯಕ್ಷ ನಿರಂಜನ್ ಮಹಾಬಳಪ್ಪ ಮತ್ತಿತರರು ಇದ್ದರು.

110 ಮೀಟರ್ ಉದ್ದ ಮತ್ತು 50 ಮೀಟರ್ ಅಗಲದಲ್ಲಿ ಸುಮಾರು 5 ಮೀಟರ್ ಆಳ

ಕ್ಯಾಂಪಸ್‌ನ ಈಶಾನ್ಯ ಭಾಗದಲ್ಲಿರುವ ತಗ್ಗು ಪ್ರದೇಶದಲ್ಲಿ 110 ಮೀಟರ್ ಉದ್ದ ಮತ್ತು 50 ಮೀಟರ್ ಅಗಲದಲ್ಲಿ ಸುಮಾರು 5 ಮೀಟರ್ ಆಳದವರೆಗೆ ಅಗೆದು 2025ರಲ್ಲಿ ಮಳೆನೀರು ಸಂಗ್ರಹ ಜಲಾಶಯ ನಿರ್ಮಿಸಲಾಯಿತು. ಈ ಕಾಮಗಾರಿಗೆ 1974, 1983 ಮತ್ತು 1999ನೇ ಸಾಲಿನ ಹಳೆಯ ವಿದ್ಯಾರ್ಥಿಗಳು ಹಾಗೂ ಹಳೆ ವಿದ್ಯಾರ್ಥಿಗಳ ಸಂಘ ಬೆಂಬಲ ನೀಡಿದೆ.

2026ರ ಫೆಬ್ರವರಿಯಲ್ಲಿ ಪೆಟ್ರೋನೆಟ್ ಎಂಎಚ್‌ಬಿ ಲಿಮಿಟೆಡ್‌ನ ಸಹಕಾರದಿಂದ ಪ್ರತಿದಿನ 10 ಲಕ್ಷ ಲೀಟರ್ ಸಾಮರ್ಥ್ಯದ ನೀರು ಶುದ್ಧೀಕರಣ ಘಟಕ ಸ್ಥಾಪಿಸಿ ಕಾರ್ಯಾರಂಭ ಮಾಡಲಾಯಿತು. ಜಲಾಶಯದಿಂದ ಶುದ್ಧೀಕರಣ ಘಟಕದವರೆಗೆ ತೇಲುವ ಪಂಪಿಂಗ್ ಕೇಂದ್ರ ಹಾಗೂ 850 ಮೀಟರ್ ಉದ್ದದ ಭೂಗತ ಪೈಪ್‌ಲೈನ್ ನಿರ್ಮಾಣಕ್ಕೆ ಫಿನ್ನೋವೇಷನ್ ಟೆಕ್ ಸೊಲ್ಯೂಶನ್ಸ್ ಪ್ರೈವೇಟ್ ಲಿಮಿಟೆಡ್ ಸಹಕಾರ ನೀಡಿದೆ. ಶುದ್ಧೀಕರಿಸಿದ ನೀರನ್ನು ಕ್ಯಾಂಪಸ್‌ನ ನೀರು ಸರಬರಾಜು ಜಾಲಕ್ಕೆ ಸಂಪರ್ಕಗೊಂಡಿರುವ ಸಂಪ್ ಟ್ಯಾಂಕ್‌ಗಳಲ್ಲಿ ಸಂಗ್ರಹಿಸಲಾಗುತ್ತದೆ.

15 ಎಚ್‌ಪಿ ತೆರೆದ ಬಾವಿ ಮಾದರಿಯ ಸಬ್‌ಮರ್ಸಿಬಲ್ ಪಂಪ್‌

ಈ ಪಂಪಿಂಗ್ ಕೇಂದ್ರ ಫೈಬರ್ ಬಲವರ್ಧಿತ ಪ್ಲಾಸ್ಟಿಕ್ ತೇಲುವ ತಟ್ಟೆಗಳ ಮೇಲೆ ಸ್ಥಾಪಿಸಲ್ಪಟ್ಟಿರುವುದರಿಂದ ಜಲಾಶಯದ ಜಿಯೋಮೆಂಬ್ರೇನ್ ಹೊಂದಿದ ತಳಭಾಗದಲ್ಲಿ ಪ್ರತ್ಯೇಕ ನೀರು ಸೆಳೆಯುವ ರಚನೆಯನ್ನು ನಿರ್ಮಿಸುವ ಅಗತ್ಯ ಉಂಟಾಗಿಲ್ಲ. ಪ್ರತಿ ಗಂಟೆಗೆ 25,200 ಲೀಟರ್ ನೀರನ್ನು ಪಂಪ್ ಮಾಡುವ ಸಾಮರ್ಥ್ಯದ ಎರಡು 15 ಎಚ್‌ಪಿ ತೆರೆದ ಬಾವಿ ಮಾದರಿಯ ಸಬ್‌ಮರ್ಸಿಬಲ್ ಪಂಪ್‌ಗಳನ್ನು ಅಳವಡಿಸಲಾಗಿದೆ.

ನೀರಿನ ಸಮಸ್ಯೆ ತಪ್ಪಿಸಲಿದೆ

ಬೇಸಿಗೆ ಅವಧಿಯಲ್ಲಿ ಇಲ್ಲಿ ನೀರಿನ ಕೊರತೆ ಪ್ರತಿವರ್ಷ ಉಂಟಾಗುತ್ತಿದ್ದು, ಹಿಂದೆ ಕ್ಯಾಂಪಸ್ ತಾತ್ಕಾಲಿಕವಾಗಿ ಮುಚ್ಚುವ ಪರಿಸ್ಥಿತಿಯೂ ಎದುರಾಗಿತ್ತು. ಈ ವರ್ಷ ರಾಜ್ಯಾದ್ಯಂತ ನಿರೀಕ್ಷೆಗಿಂತ ಕಡಿಮೆ ಮಳೆಯಾಗಿರುವುದರಿಂದ ಬರದ ಆತಂಕವೂ ವ್ಯಕ್ತವಾಗಿದೆ. ಈ ಹಿನ್ನೆಲೆಯಲ್ಲಿ ಮಳೆ ನೀರನ್ನು ಸಂಗ್ರಹಿಸಿ, ಶುದ್ಧೀಕರಣ ಘಟಕದ ಮೂಲಕ ಕ್ಯಾಂಪಸ್ ನೀರು ಸರಬರಾಜು ಜಾಲಕ್ಕೆ ಸಂಪರ್ಕಿಸಿರುವ ಈ ಯೋಜನೆ ಬೇಸಿಗೆ ಕಾಲದಲ್ಲಿ ಇಂತಹ ಸಮಸ್ಯೆಗಳನ್ನು ತಪ್ಪಿಸಲು ನೆರವಾಗಲಿದೆ ಎಂದು ಎಸ್‌ಐಟಿಕೆ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

ಇದನ್ನೂ ಓದಿ: ಉತ್ತರಕನ್ನಡದಲ್ಲೇ ಬೃಹತ್ ಯೋಜನೆ: ₹220 ಕೋಟಿ ವೆಚ್ಚದ, 46 ಕೆರೆಗಳಿಗೆ ನೀರುಣಿಸುವ ಕಾಳಿ ನದಿ ನೀರಾವರಿ ಯೋಜನೆ ಶೀಘ್ರ ಆರಂಭ!

ಮಂಗಳೂರು: ಕದ್ರಿ ದೇವಸ್ಥಾನದಲ್ಲಿ ನಡೆದ ಯಕ್ಷಗಾನದಲ್ಲಿ ಜಗನ್ಮಾತೆ ಪಾತ್ರಕ್ಕೆ ಬಣ್ಣ ಹಚ್ಚಿದ ಮುಸ್ಲಿಂ ಯುವತಿ!

Gowthami K — Thu, 22 Oct 2026 16:12:27 +0530

ಮಂಗಳೂರು: ಮಂಗಳೂರಿನ ಕದ್ರಿ ಶ್ರೀಮಂಜುನಾಥ ದೇವಸ್ಥಾನದ ಆವರಣದಲ್ಲಿ ಮಂಗಳವಾರ ನಡೆದ ‘ಶ್ರೀದೇವಿ ಮಹಾತ್ಮೆ’ ತೆಂಕುತಿಟ್ಟು ಯಕ್ಷಗಾನ ಬಯಲಾಟದಲ್ಲಿ ಹವ್ಯಾಸಿ ಕಲಾವಿದೆ, ಮುಸ್ಲಿಂ ಯುವತಿ ಶ್ರೀದೇವಿ ಮಹಾತ್ಮೆ ಪ್ರಸಂಗದ ಪ್ರಮುಖ ಪಾತ್ರ ಅಷ್ಟಭುಜೆಯ ಜಗನ್ಮಾತೆ ದೇವಿಯ ಪಾತ್ರದಲ್ಲಿ ಅಭಿನಯಿಸುವ ಮೂಲಕ ಕಲಾಪ್ರೇಮಿಗಳ ಮನೆ ಸೆಳೆದಿದ್ದಾರೆ.

ದ.ಕ. ಜಿಲ್ಲೆಯ ಬಂಟ್ವಾಳ ತಾಲೂಕಿನ ವಿಟ್ಲ ಮಾಡ ಮೂಲದ ‘ಯಕ್ಷಪ್ರಿಯೆ’ ತನು ವಿಟ್ಲ ಎಂದೇ ಖ್ಯಾತಿ ಪಡೆದ ಆರ್ಷಿಯಾ ಖಾನ್‌ ಅಷ್ಟಭುಜೆ ದೇವಿ ಪಾತ್ರದಲ್ಲಿ ರಂಗಸ್ಥಳ ಪ್ರವೇಶಿಸಿದ ಮೊದಲ ಮುಸ್ಲಿಂ ಮಹಿಳೆ ಎಂದ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಗುರುಮುಖೇನ ಯಕ್ಷಗಾನ ಅಭ್ಯಸಿಸಿರುವ ಈಕೆ ಈ ಹಿಂದೆ ಮಹಿಷಾಸುರ, ದೇವಿ ಸೇರಿದಂತೆ ಅನೇಕ ಪಾತ್ರ ನಿರ್ವಹಿಸಿ ಸೈ ಎನಿಸಿದ್ದರು.

ಕದಳಿ ಕಲಾ ಕೇಂದ್ರ ದಸರಾ ಅಂಗವಾಗಿ ಕದಳಿ ದಶಾಹ ಹೆಸರಿನಲ್ಲಿ ಈ ಯಕ್ಷಗಾನ ಕಾರ್ಯಕ್ರಮ ಆಯೋಜಿಸಿತ್ತು. ಕಲೆಗೆ ಜಾತಿ, ಧರ್ಮದ ಹಂಗಿಲ್ಲ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿರುವ ಆರ್ಷಿಯಾ ಖಾನ್‌ ಅವರ ಈ ಸಾಧನೆಯನ್ನು ಯಕ್ಷಗಾನ ಪ್ರೇಮಿಗಳು ಕೊಂಡಾಡಿದ್ದಾರೆ.

9 ತಿಂಗಳ ಗರ್ಭಿಣಿಯಿಂದ ಯಕ್ಷಗಾನ!

9 ತಿಂಗಳ ತುಂಬು ಗರ್ಭಿಣಿಯೊಬ್ಬರು ಯಕ್ಷಗಾನ ರಂಗ ಪ್ರವೇಶ ಮಾಡಿ ಗಮನ ಸೆಳೆದಿರುವ ಘಟನೆ ದಕ್ಷಿಣ ಕನ್ನಡ ಜಿಲ್ಲೆಯ ಸುರತ್ಕಲ್‌ನಲ್ಲಿ ನಡೆದಿದೆ. ದಿಶಾ ಶೆಟ್ಟಿ ಹವ್ಯಾಸಿ ಕಲಾವಿದೆಯಾಗಿದ್ದು, ಯಕ್ಷಗುರು ರಾಕೇಶ್‌ ರೈ ನಿರ್ದೇಶನದ ದಶಾವತಾರ ಯಕ್ಷಗಾನ ಪ್ರದರ್ಶನದಲ್ಲಿ ಪ್ರಹ್ಲಾದನ ತಾಯಿ ಕಯಾದು ಪಾತ್ರ ನಿರ್ವಹಿಸಿ ಸೈ ಎನಿಸಿಕೊಂಡಿದ್ದಾರೆ. ಇವರ ಅಭಿನಯದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಈ ಬಗ್ಗೆ ಮಾತನಾಡಿದ ದಿಶಾ, ‘ನಮ್ಮದು ಯಕ್ಷಗಾನದ ಕುಟುಂಬ. ನನ್ನ ಅಮ್ಮ ಹಾಗೂ ಚಿಕ್ಕಮ್ಮ ಕೂಡ ಗರ್ಭಿಣಿಯಾಗಿದ್ದ ಸಂದರ್ಭದಲ್ಲಿ ಯಕ್ಷಗಾನ ಪಾತ್ರ ಮಾಡಿದ್ದು ಪ್ರೇರಣೆಯಾಗಿತ್ತು. ಸುರತ್ಕಲ್‌ನಲ್ಲಿ ನಡೆದ ಯಕ್ಷಗಾನದಲ್ಲಿ ಪ್ರಹ್ಲಾದನ ತಾಯಿಯ ಪಾತ್ರ ಮಾಡಿದ್ದೇನೆ. ಸುಮಾರು 20 ವರ್ಷದಿಂದ ಪುಂಡು ವೇಷ ಮಾಡುತ್ತಿದ್ದು, ಪ್ರಹ್ಲಾದನ ತಾಯಿಯ ಪಾತ್ರ ತಾಯ್ತನದ ಭಾವನೆಗೆ ಪೂರಕವಾಗಿತ್ತು’ ಎಂದಿದ್ದಾರೆ.

ಇದನ್ನು ಸಾಧನೆ ಎಂದು ಹೇಳುವುದಿಲ್ಲ. ಪ್ರತಿಯೊಬ್ಬ ಮಹಿಳೆಯರಲ್ಲಿ ಗರ್ಭಿಣೆ ಸಮಯ ಬೇರೆ ಬೇರೆ ರೀತಿಯಾಗಿದ್ದು, ತುಂಬಾ ಸೂಕ್ಷ್ಮವಾದ ಸಮಯವಾಗಿರುವುದರಿಂದ, ಇದನ್ನು ಅನುಕರಣೆ ಮಾಡಬೇಡಿ. ನಾನು ಮಾಡಿದ್ದೇನೆಂದು ಬೇರೆಯವರು ಮಾಡಬೇಡಿ. ನಾನು ಸಕ್ರಿಯವಾಗಿ ಇದ್ದ ಕಾರಣ ಸಾಧ್ಯವಾಗಿದೆ. ವಿಡಿಯೋ ವೈರಲ್‌ ಆದ ಬಳಿಕ ಜನರು ಇದನ್ನು ಯಾವ ರೀತಿ ತೆಗೆದುಕೊಳ್ಳುತ್ತಾರೆಂಬ ಹೆದರಿಕೆಯಿತ್ತು ಎಂದು ದಿಶಾ ಶೆಟ್ಟಿ ಹೇಳಿದ್ದಾರೆ.

ಸೌಜನ್ಯ ಕೇಸ್ ತನಿಖೆಯಲ್ಲಿ ಮಹತ್ವದ ಬೆಳವಣಿಗೆ, ಬೆಳ್ತಂಗಡಿ ಕೋರ್ಟ್‌ನಲ್ಲಿ ತಾಯಿ ರಕ್ತ ಮಾದರಿ ಸಂಗ್ರಹ

Chethan Kumar — Fri, 23 Oct 2026 17:09:25 +0530

ಬೆಳ್ತಗಂಡಿ (ಅ.23) ಕಳೆದ ಹಲವು ವರ್ಷಗಳಿಂದ ಸತತವಾಗಿ ಚರ್ಚೆಯಾಗುತ್ತಿರುವ, ಪ್ರತಿಭಟನೆ, ಹೋರಾಟಗಳ ಮೂಲಕ ಜೀವಂತವಾಗಿರುವ ಬೆಳ್ತಂಗಡಿ ತಾಲೂಕಿನ ಸೌಜನ್ಯ ಪ್ರಕರಣದಲ್ಲಿ ಮಹತ್ವದ ಬೆಳವಣಿಗೆ ನಡೆದಿದೆ. ಸೌಜನ್ಯ ಪ್ರಕರಣ ಮರುತನಿಕೆಗೆ ಸುಪ್ರೀಂ ಕೋರ್ಟ್ ಸೂಚನೆ ಮೇರೆ ಸರ್ಕಾರ ಹೊಸ ಎಸ್ಐಟಿ ತಂಡ ರಚಿಸಿದೆ. ಇದೀಗ ತನಿಖೆ ಚುರುಕುಗೊಂಡಿದ್ದು, ಎಸ್ಐಟಿ ತಂಡ ಬೆಳ್ತಂಗಡಿಗೆ ಆಗಮಿಸಿದೆ. ಬೆಳ್ತಂಗಡಿ ನ್ಯಾಯಾಲಯದಲ್ಲೇ ಸೌಜನ್ಯ ತಾಯಿ ಕುಸುಮಾವತಿಯ ರಕ್ತ ಮಾದರಿಯನ್ನು ಸಂಗ್ರಹಿಸಲಾಗಿದೆ.

ಜಡ್ಜ್ ಸಮ್ಮುಖದಲ್ಲಿ ರಕ್ತ ಮಾದರಿ ಸಂಗ್ರಹ

ಎಎಸ್ಐಟಿ ಅಧಿಕಾರಿಗಳು ಬೆಳ್ತಗಂಡಿ ನ್ಯಾಯಾಲಯಕ್ಕೆ ಎಲ್ಲಾ ತಯಾರಿಯೊಂದಿಗೆ ಆಗಮಿಸಿದ್ದರು. ವೈದ್ಯರ ಜೊತೆ ಆಗಮಿಸಿದ ಎಸ್ಐಟಿ ಅಧಿಕಾರಿಗಳು ಬೆಳ್ತಂಗಡಿ ಕೋರ್ಟ್‌ನ ಜಡ್ಜ್ ಸಮ್ಮುಖದಲ್ಲೇ ರಕ್ತದ ಮಾದರಿ ಸಂಗ್ರಹಿಸಿದೆ. DNA ಟೆಸ್ಟ್ ಗಾಗಿ ರಕ್ತದ ಮಾದರಿ ಸಂಗ್ರಹಿಸಿರೋ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ.

ಇದೇ ವೇಳೆ ಬೆಳ್ತಂಗಡಿ ನ್ಯಾಯಾಲಯಕ್ಕೆ ಎಸ್ಐಟಿ ಅಧಿಕಾರಿಗಳಾದ ಲೋಕೇಶ್ ಜಗಲ್ಸಾರ್, ಎಸಿಪಿ ಮನೋಜ್ ಕುಮಾರ್ ನಾಯ್ಕ್ ತಂಡ ಪ್ರಿಂಟರ್ ಮತ್ತು ಲ್ಯಾಪ್‌ಟಾಪ್‌ನ್ನು ಕೋರ್ಟ್‌ಗೆ ತಂದಿದ್ದಾರೆ. ಹಲವು ದಾಖಲೆ ಸೇರಿದಂತೆ ಕೆಲ ಮಹತ್ವದ ಮಾಹಿತಿಗಳನ್ನು ಜಡ್ಜ್ ಸಮ್ಮುಖದಲ್ಲಿ ಪಡೆಯಲು ಎಸ್ಐಟಿ ಮುಂದಾಗಿದೆ. ಸೌಜನ್ಯ ತಾಯಿಯ ರಕ್ತದ ಮಾದರಿ ಸಂಗ್ರಹ ಹಾಗೂ ಈ ಹಿಂದಿನ ಹಲವು ಸ್ಯಾಂಪಲ್‌ಗಳ ವರದಿ ಕಾರಣದಿಂದ ಎಸ್ಐಟಿ ಅಧಿಕಾರಿಗಳು ಬೆಳ್ತಂಗಡಿ ಸರ್ಕಾರಿ ಆಸ್ಪತ್ರೆ ವೈದ್ಯರನ್ನು ನ್ಯಾಯಾಲಯಕ್ಕೆ ಕರೆಸಿಕೊಂಡಿದ್ದರು. ಬ್ಲಡ್ ಸ್ಯಾಂಪಲ್ ಕಿಟ್ ಸಮೇತ ವೈದ್ಯಕೀಯ ಸಿಬ್ಬಂದಿಗಳು ಕೋರ್ಟ್‌ಗೆ ಆಗಮಿಸಿದ್ದರು.

ಎಸ್ ಐ ಟಿ ಮುಖ್ಯಸ್ಥ ಶಶಿಕುಮಾರ್, ಐಪಿಎಸ್ ಅಧಿಕಾರಿಗಳಾದ ನಿಶಾ ಜೇಮ್ಸ್, ಲೋಕೆಶ್ ಜಗಲ್ಸಾರ್,ಸುಧೀರ್ ಕುಮಾರ್ ರೆಡ್ಡಿ ಸೇರಿದ ತಂಡ ಇತ್ತೀಚೆಗ ಮಂಗಳೂರು ಎಸ್ಐಟಿ ಕಚೇರಿಗೆ ಆಗಮಿಸಿ ಸೌಜನ್ಯ ಪ್ರಕರಣ ಕುರಿತು ಹಲವು ದಾಖಲೆಗಳ ಪರಿಶೀಲನೆ ನಡೆಸಿತ್ತು. ಸೌಜನ್ಯ ಪ್ರಕರಣದ ಮರುತನಿಖೆ ಆರಂಭಿಕ ಹಂತದಲ್ಲಿ ಈ ಹಿಂದಿನ ತನಿಖೆಯಲ್ಲಿನ ಲೋಪದೋಷ ಪತ್ತೆ ಹಚ್ಚುವ ಕಾರ್ಯಕ್ಕೆ ಮುಂದಾಗಿತ್ತು. ಬೆಳ್ತಂಗಡಿ ಪೊಲೀಸ್, ಸಿಐಡಿ ಹಾಗೂ ಸಿಬಿಐ ತನಿಖೆಯ ಲೋಪ ಪತ್ತೆ ಹಚ್ಚಲು ಹಲವು ದಾಖಲೆಗಳು, ಕೇಸ್ ಡೈರಿ, ಚಾರ್ಜ್ ಶೀಟ್ ಪರಿಶೀಲನೆ ನಡೆಸಲಾಗಿತ್ತು. ಡಿಎನ್‌ಎ ಮಾದರಿ ಸಂಗ್ರಹಣೆ, ಪ್ರಯೋಗಾಲಯಕ್ಕೆ ಸಾಗಣೆ ಮತ್ತು ಪರೀಕ್ಷೆಯ ಮೂಲ ದಾಖಲೆಗಳ ಪರಿಶೀಲನೆ ಮಾಡಲಾಗಿತ್ತು. ಛತ್ರಿ, ಚಪ್ಪಲಿ, ಒಳ ಉಡುಪು ಮತ್ತು ಇತರ ವೈಯಕ್ತಿಕ ವಸ್ತುಗಳ ಹುಡುಕಾಟ ಹಾಗೂ ಜಪ್ತಿ ದಾಖಲೆಗಳ ಹೋಲಿಕೆ ಮಾಡಲಾಗಿತ್ತು.

2012ರ ಕ್ಯಾಮೆರಾ ಮಾಹಿತಿ ಪರಿಶೀಲನೆ

ಘಟನೆ ನಡೆದ 2012ರಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಕ್ಯಾಮೆರಾ, ಈ ಕುರಿತು ದಾಖಲೆಗಳನ್ನು ಎಸ್ಐಟಿ ತಂಡ ಪರಿಶೀಲನೆ ನಡೆಸಿದೆ. ಇದೇ ವೇಳೆ ಅಂದಿನ ಮೊಬೈಲ್ ಟವರ್ ದಾಖಲೆಗಳ ಕುರಿತು ಪರಿಶೀಲನೆ ನಡೆಸಿದೆ. ಸೌಜನ್ಯಳನ್ನ ಕೊನೆಯದಾಗಿ ನೋಡಿದ ಸಂಬಂಧಿಕರು ಮತ್ತು ಸ್ಥಳೀಯರ ಹೇಳಿಕೆಗಳ ಮರುಪರಿಶೀಲನೆ ನಡೆಸಲಾಗಿದೆ. ಇದೇ ವೇಳೆ ಸುಪ್ರೀಂ ಕೋರ್ಟ್‌ನಲ್ಲಿ ಉಲ್ಲೇಖಿಸಲಾದ ಎಂಟು ಸಂಭಾವ್ಯ ಸಾಕ್ಷಿಗಳ ಮಾಹಿತಿಯನ್ನು ಪರಿಶೀಲಿಸಲಾಗಿದೆ.

ಮರಣೋತ್ತರ ಪರೀಕ್ಷೆ, ವೈದ್ಯರ ಹೇಳಿಕೆಗಳು, ಗಾಯಗಳ ವಿವರ, ಸಾವಿನ ಅಂದಾಜು ಸಮಯ ಮತ್ತು ಮೂಲ ವೈದ್ಯಕೀಯ ದಾಖಲೆಗಳನ್ನು ಹೋಲಿಕೆ ಮಾಡಲಾಗಿದೆ. ಸಾಕ್ಷಿಗಳ ಹೇಳಿಕೆಗಳ ವ್ಯತ್ಯಾಸಗಳ ಬಗ್ಗೆಯೂ ಎಸ್ಐಟಿ ತಂಡ ನೋಟ್ ಮಾಡಿಕೊಂಡಿದೆ. ನ್ಯಾಯಾಲಯದ ಸಾಕ್ಷ್ಯ ಮತ್ತು ನಂತರದ ಹೇಳಿಕೆಗಳಲ್ಲಿನ ವ್ಯತ್ಯಾಸ, ಸಂತ್ರಸ್ತ ಕುಟುಂಬವು ಹಿಂದೆ ಹೆಸರಿಸಿದ್ದ ವ್ಯಕ್ತಿಗಳ ಬಗ್ಗೆ ಲಭ್ಯವಿರುವ ದಾಖಲೆಗಳನ್ನು ಮರುಪರಿಶೀಲಿಸುವುದು ಸೇರಿದಂತೆ ಹಲವು ದಾಖಲೆಗಳ ಪರಿಶೀಲನೆ ಮಾಡಲಾಗಿದೆ ಎಂದು ಎಸ್ಐಟಿ ತಂಡ ಹೇಳಿತ್ತು.

Rains: ದಕ್ಷಿಣ ಕನ್ನಡ, ಉಡುಪಿಯಲ್ಲಿ ಗುಡುಗು ಸಹಿತ ಭರ್ಜರಿ ಮಳೆ! ಇಂದಿನ ಹವಾಮಾನ ಹೇಗಿದೆ?

Kannadaprabha News — Fri, 23 Oct 2026 06:31:03 +0530

ಮಂಗಳೂರು/ಉಡುಪಿ (ಅ.22): ದಕ್ಷಿಣ ಕನ್ನಡ(Dakshina kannada) ಹಾಗೂ ಉಡುಪಿ(Udupi) ಜಿಲ್ಲೆಯ ಹಲವೆಡೆ ಗುರುವಾರ ಅಪರಾಹ್ನ ಗುಡುಗು ಸಹಿತ ಧಾರಕಾರ ಮಳೆಯಾಗಿದೆ.

ಭಾರೀ ಮಳೆಗೆ ಮಾಣಿ-ಮೈಸೂರು ಹೆದ್ದಾರಿಗೆ ನುಗ್ಗಿದ ನೀರು!

ದ.ಕ. ಜಿಲ್ಲೆಯ ಮಂಗಳೂರು ನಗರ ಸೇರಿದಂತೆ ಕಡಬ, ಪುತ್ತೂರು, ಬೆಳ್ತಂಗಡಿ, ಸುಳ್ಯ ಭಾಗದಲ್ಲಿ ಸಂಜೆ ವೇಳೆಗೆ ಗಾಳಿ, ಗುಡುಗು ಸಹಿತ ಉತ್ತಮ ಮಳೆಯಾಗಿದೆ. ಮಂಗಳೂರು ನಗರದ ಕೆಲವೆಡೆ ಸಾದಾರಣ ಮಳೆಯಾಗಿದೆ. ಬಾರೀ ಮಳೆಗೆ ಮಾಣಿ-ಮೈಸೂರು ಹೆದ್ದಾರಿಯ ಸುಳ್ಯ ಸಮೀಪದ ಬೊಳುಬೈಲು ಬಳಿ ಹೆದ್ದಾರಿ ಮಳೆ ನೀರು ನುಗ್ಗಿ ವಾಹನ ಸವಾರರು ತೊಂದರೆ ಅನುಭವಿಸಿದರು. ಕರಾವಳಿ ಜಿಲ್ಲೆಗಳಲ್ಲಿ ಅ.24ರ ತನಕ ಮಳೆ ಮುಂದುವರಿಯುವ ಲಕ್ಷಣಗಳಿವೆ.

ಬಹಳ ದಿನಗಳ ನಂತರ ಉಡುಪಿಯಲ್ಲಿ ಭರ್ಜರಿ ಮಳೆ

ಬಹಳ ದಿನಗಳ ನಂತರ ಉಡುಪಿ ಜಿಲ್ಲೆಯಲ್ಲಿ ಗುರುವಾರ ಸಂಜೆ ಸಿಡಿಲು ಗುಡುಗಿನೊಂದಿಗೆ ಉತ್ತಮ ಮಳೆಯಾಗಿದೆ. ಕಳೆದ ಕೆಲವು ದಿನಗಳಿಂದ ಬಿರುಬಿಸಿಲಿನಿಂದ ಕಂಗೆಟ್ಟಿದ್ದ ಜನರಿಗೆ ಈ ಮಳೆ ಸ್ವಲ್ಪ ಸಮಾಧಾನಕ್ಕೆ ಕಾರಣವಾಗಿದೆ.

ಹವಾಮಾನ ಇಲಾಖೆಯ ಮುನ್ಸೂಚನೆಯಂತೆ ಕಳೆದ ಕೆಲವು ದಿನಗಳಿಂದ ನಿತ್ಯವೂ ಸಂಜೆಯಾಗುತ್ತಿದ್ದಂತೆ ಮೋಡ ಕವಿಯುತಿದ್ದರೂ ಮಳೆಯಾಗುತ್ತಿರಲಿಲ್ಲ, ಬದಲಿಗೆ ಮರುದಿನ ಬಿಸಿಲಿ ಝಳ ಹೆಚ್ಚಾಗುತ್ತಿತ್ತು. ಆದರೆ ಗುರುವಾರ ಸಂಜೆ ಇದ್ದಕ್ಕಿದ್ದಂತೆ ಜೋರಾದ ಮಳೆ ಸುರಿದಿದೆ. ಇಂದು ಕೂಡ ಕರಾವಳಿಯಲ್ಲಿ ಗುಡುಗಮಿಂಚು ಸಹಿತ ಉತ್ತಮ ಮಳೆಯಾಗುವ ಬಗ್ಗೆ ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ, ಜೊತೆ ಸಮುದ್ರ ತೀರದಲ್ಲಿ 35 - 45 ಕಿ.ಮೀ. ವೇಗದಲ್ಲಿ ಗಾಳಿ ಬೀಸುವ ಮುನ್ನೆಚ್ಚರಿಕೆ ನೀಡಿದೆ.

ದಕ್ಷಿಣ ಕನ್ನಡ ಜಿಲ್ಲೆಗೆ ‘ಮಂಗಳೂರು’ ನಾಮಕರಣ: ಸಾರ್ವಜನಿಕರಿಂದ ಅಭಿಪ್ರಾಯ ಆಹ್ವಾನ

Kannadaprabha News — Wed, 14 Oct 2026 08:46:10 +0530

ಮಂಗಳೂರು: ದಕ್ಷಿಣ ಕನ್ನಡ ಜಿಲ್ಲೆಯನ್ನು ‘ಮಂಗಳೂರು ಜಿಲ್ಲೆ’ ಎಂದು ಮರುನಾಮಕರಣ ಮಾಡುವ ಕುರಿತು ರಾಜಕಾರಣಿಗಳು, ಸಾಮಾಜಿಕ ಚಿಂತಕರು, ಸರ್ವಧರ್ಮದ ಹಿರಿಯರು ಹಾಗೂ ದಕ್ಷಿಣ ಕನ್ನಡ ಜಿಲ್ಲೆಯ ವಿವಿಧ ಸಂಘಟನೆಗಳಿಂದ ಹಲವಾರು ಮನವಿಗಳು ಸರ್ಕಾರದಲ್ಲಿ ಸ್ವೀಕೃತಗೊಂಡಿರುತ್ತವೆ. ಈ ಕುರಿತು ಸಾರ್ವಜನಿಕರ ಬೇಡಿಕೆ ಹಾಗೂ ಆಡಳಿತಾತ್ಮಕ ಅನುಕೂಲತೆಗಳನ್ನು ಗಣನೆಗೆ ತೆಗೆದುಕೊಂಡು ದಕ್ಷಿಣ ಕನ್ನಡ ಜಿಲ್ಲೆಯನ್ನು ಮಂಗಳೂರು ಜಿಲ್ಲೆ ಎಂದು ಮರುನಾಮಕರಣ ಮಾಡಲು ಉದ್ದೇಶಿಸಲಾಗಿದೆ.

ಸಾರ್ವಜನಿಕರಿಂದ ಯಾವುದೇ ಸಲಹೆ/ಅಭಿಪ್ರಾಯ

ಭಾರತ ಸರ್ಕಾರದ ಗೃಹ ಮಂತ್ರಾಲಯದ ಮಾರ್ಗಸೂಚಿಗಳನ್ವಯ ಹಾಗೂ ಕರ್ನಾಟಕ ಭೂ ಕಂದಾಯ ಅಧಿನಿಯಮ 1964ರ ಸೆಕ್ಷನ್ 4(4A) ರಡಿ ಪ್ರದತ್ತವಾದ ಅಧಿಕಾರದನ್ವಯ ದಕ್ಷಿಣ ಕನ್ನಡ ಜಿಲ್ಲೆಯನ್ನು ಮಂಗಳೂರು ಜಿಲ್ಲೆ ಎಂದು ಮರುನಾಮಕರಣ ಮಾಡುವ ಕುರಿತು ಸಾರ್ವಜನಿಕರಿಂದ ಯಾವುದೇ ಸಲಹೆ/ಅಭಿಪ್ರಾಯಗಳು ಸ್ವೀಕೃತವಾದಲ್ಲಿ ಅವುಗಳನ್ನು ಪರಿಶೀಲಿಸಲಾಗುತ್ತದೆ.

ಅಭಿಪ್ರಾಯ ಕಳುಹಿಸುವ ವಿಳಾಸ ಈ ರೀತಿಯಾಗಿದೆ

ದಕ್ಷಿಣ ಕನ್ನಡ ಜಿಲ್ಲೆಯನ್ನು ಮಂಗಳೂರು ಜಿಲ್ಲೆ ಎಂದು ಮರುನಾಮಕರಣ ಮಾಡುವ ಕುರಿತು ಸಾರ್ವಜನಿಕರಿಂದ ಅಭಿಪ್ರಾಯ/ಸಲಹೆಗಳನ್ನು ಈ ಕೆಳಗಿನ ವಿಳಾಸಕ್ಕೆ ಕಳುಹಿಸಬಹುದಾಗಿದೆ

1)ಮುಖ್ಯಮಂತ್ರಿಯವರ ಸಚಿವಾಲಯ, ಕೊಠಡಿ ಸಂಖ್ಯೆ 235, 2ನೇ ಮಹಡಿ, ವಿಧಾನ ಸೌಧ ಬೆಂಗಳೂರು 560001 - e-mail: cm.kar@nic.in ಅಥವಾ

2)ಸರ್ಕಾರದ ಅಪರ ಮುಖ್ಯ ಕಾರ್ಯದರ್ಶಿ, ಕಂದಾಯ ಇಲಾಖೆ, ಕೊಠಡಿ ಸಂಖ್ಯೆ: 711, 7ನೇ ಮಹಡಿ, ಬಹುಮಹಡಿಗಳ ಕಟ್ಟಡ, ಡಾ ಬಿ.ಆರ್. ಅಂಬೇಡ್ಕರ್ ವೀದಿ, ಬೆಂಗಳೂರು-560001 - e-mail: Prs.revenue@gmail.com ಅಥವಾ

3)ಜಿಲ್ಲಾಧಿಕಾರಿಗಳು, ದಕ್ಷಿಣ ಕನ್ನಡ ಜಿಲ್ಲೆ ಪ್ರಜಾಸೌಧ, ದಕ್ಷಿಣ ಕನ್ನಡ ಜಿಲ್ಲಾಡಳಿತ ಕೇಂದ್ರ, ಜಿಲ್ಲಾಧಿಕಾರಿಗಳ ಕಾರ್ಯಾಲಯ, ಪಡೀಲು, ಮಂಗಳೂರು, -575007- e-mail: dc.mnglr@gmail.com ವಿಳಾಸಗಳಿಗೆ ಲಿಖಿತ ರೂಪದಲ್ಲಿ ಅಥವಾ ಇ-ಮೇಲ್ ಮೂಲಕ ಈ ಅಧಿಸೂಚನೆ ರಾಜ್ಯ ಪತ್ರದಲ್ಲಿ ಪ್ರಕಟಗೊಂಡ ದಿನಾಂಕದಿಂದ 30 ದಿನಗಳೊಳಗಾಗಿ ಸಲ್ಲಿಸಬಹುದು ಎಂದು ಜಿಲ್ಲಾಧಿಕಾರಿ ಕಚೇರಿ ಪ್ರಕಟಣೆ ತಿಳಿಸಿದೆ.

ಮಂಗಳೂರಿನಲ್ಲಿ ಶುಭಾ ಪೂಂಜಾ ಸಾಕು ಬೆಕ್ಕು ಕಾಣೆ, ಹುಡುಕಿಕೊಟ್ಟವರಿಗೆ ನಗದು ಬಹುಮಾನ ಘೋಷಿಷಿದ ನಟಿ!

Gowthami K — Thu, 15 Oct 2026 09:09:58 +0530

ಮಂಗಳೂರು: ಕನ್ನಡ ಚಿತ್ರರಂಗದ ನಟಿ ಹಾಗೂ ಬಿಗ್‌ಬಾಸ್ ಖ್ಯಾತಿಯ ಶುಭಾ ಪೂಂಜಾ (Shubha Poonja) ಅವರ ಮನೆಯಿಂದ ಅವರ ಪ್ರೀತಿಯ ಸಾಕು ಬೆಕ್ಕು ಕಾಣೆಯಾಗಿದೆ. ಮಂಗಳೂರಿನ ಲೋಹಿತ್ ನಗರದಲ್ಲಿರುವ ‘ಡಿ-ಮಾರ್ಟ್’ (D-Mart) ಮಳಿಗೆಯ ಆಸುಪಾಸಿನಲ್ಲಿ ಬೆಕ್ಕು ಕಳೆದುಹೋಗಿದ್ದು, ಈ ಕುರಿತು ನಟಿ ಸಾರ್ವಜನಿಕರಲ್ಲಿ ಸಹಾಯ ಕೋರಿ ತಮ್ಮ ಅಧಿಕೃತ ಸೋಷಿಯಲ್ ಮೀಡಿಯಾ ಪೇಜ್ ನಲ್ಲಿ ಭಾವುಕ ವಿಡಿಯೋ ಒಂದನ್ನು ಹಂಚಿಕೊಂಡಿದ್ದಾರೆ.

ಕಾಣೆಯಾಗಿರುವ ಬೆಕ್ಕಿನ ಹೆಸರು ‘ಜೆರ್ರಿ’ (Jerry). ಯಾರೋ ತಮ್ಮ ಬೆಕ್ಕನ್ನು ತೆಗೆದುಕೊಂಡು ಹೋಗಿದ್ದಾರೆ ಎಂಬ ಅನುಮಾನವನ್ನು ಶುಭಾ ಪೂಂಜಾ ವ್ಯಕ್ತಪಡಿಸಿದ್ದಾರೆ. "ಜೆರ್ರಿ ನಮ್ಮ ಕುಟುಂಬದ ಸದಸ್ಯನಂತಿದ್ದ. ಅದು ಯುನೀಕ್ ಬಣ್ಣವನ್ನು ಹೊಂದಿದೆ. ದಯವಿಟ್ಟು ಯಾರಾದರೂ ಅದನ್ನು ಕರೆದೊಯ್ದಿದ್ದರೆ, ದಯಮಾಡಿ ನಮಗೆ ಮರಳಿ ತಂದುಕೊಡಿ," ಎಂದು ವಿಡಿಯೋ ಮೂಲಕ ಮನವಿ ಮಾಡಿದ್ದಾರೆ.

ಹುಡುಕಿಕೊಟ್ಟವರಿಗೆ ನಗದು ಬಹುಮಾನ!

ತಮ್ಮ ಮುದ್ದಿನ ಜೆರ್ರಿಯನ್ನು ಸುರಕ್ಷಿತವಾಗಿ ಪತ್ತೆಹಚ್ಚಿ ನೀಡಿದವರಿಗೆ ನಗದು ಬಹುಮಾನ ನೀಡುವುದಾಗಿಯೂ ಶುಭಾ ಪೂಂಜಾ ಘೋಷಿಸಿದ್ದಾರೆ. ಮಂಗಳೂರಿನ ಜನ ಈ ವಿಷಯದಲ್ಲಿ ತಮಗೆ ನೆರವಾಗಬೇಕೆಂದು ವಿನಂತಿಸಿದ್ದಾರೆ. ಜೆರ್ರಿ ಬೆಕ್ಕಿನ ಕುರಿತು ಯಾವುದೇ ಸುಳಿವು ಅಥವಾ ಮಾಹಿತಿ ದೊರೆತಲ್ಲಿ ಸಾರ್ವಜನಿಕರು ತಕ್ಷಣ +91 96118 88877 ಮೊಬೈಲ್ ಸಂಖ್ಯೆಗೆ ಕರೆ ಮಾಡಿ ಮಾಹಿತಿ ನೀಡುವಂತೆ ಕೋರಲಾಗಿದೆ.

ಪ್ರಾಣಿ ಪ್ರೇಮಿ ಶುಭಾ ಪೂಂಜಾ:

ನಟಿ ಶುಭಾ ಪೂಂಜಾ ಅವರು ಕೇವಲ ಅಭಿನಯಕ್ಕಷ್ಟೇ ಅಲ್ಲದೆ, ಪ್ರಾಣಿಗಳ ಮೇಲಿನ ಅಪಾರ ಪ್ರೀತಿಗೆ ಹೆಸರಾದವರು. ಸ್ವತಃ ಪ್ರಾಣಿ ಪ್ರೇಮಿಯಾಗಿರುವ ಅವರು, ಹಲವು ವರ್ಷಗಳಿಂದ ವಿವಿಧ ಪ್ರಾಣಿ ಕಲ್ಯಾಣ ಸಂಸ್ಥೆಗಳಿಗೆ ಬೆಂಬಲ ಹಾಗೂ ಧನಸಹಾಯ ನೀಡುತ್ತಾ ಬಂದಿದ್ದಾರೆ. ಪ್ರಾಣಿಗಳ ಹಕ್ಕುಗಳು ಮತ್ತು ಅವುಗಳ ಆರೈಕೆ ಕುರಿತು ಸದಾ ಜಾಗೃತಿ ಮೂಡಿಸುವ ನಟಿಯ ಪ್ರೀತಿಯ ಸಾಕುಪ್ರಾಣಿಯೇ ಈಗ ಕಾಣೆಯಾಗಿರುವುದು ಅವರ ಅಭಿಮಾನಿಗಳಲ್ಲಿ ಹಾಗೂ ಪ್ರಾಣಿ ಪ್ರಿಯರಲ್ಲಿ ಬೇಸರ ಮೂಡಿಸಿದೆ.

ಮುಂದಿನ 3 ಗಂಟೆಗಳಲ್ಲಿ ಗುಡುಗು ಸಹಿತ ಭಾರಿ ಮಳೆ: ಕರಾವಳಿ, ಮಲೆನಾಡಿಗೆ 'ಎಲ್ಲೋ ಅಲರ್ಟ್' ನೀಡಿದ ಹವಾಮಾನ ಇಲಾಖೆ

Santosh Naik — Fri, 23 Oct 2026 19:43:21 +0530

ಬೆಂಗಳೂರು (ಅ.23): ರಾಜ್ಯದ ಕರಾವಳಿ ಮತ್ತು ಮಲೆನಾಡು ಭಾಗಗಳಲ್ಲಿ ಹವಾಮಾನ ವೈಪರೀತ್ಯ ತೀವ್ರಗೊಂಡಿದ್ದು, ಮುಂದಿನ 3 ಗಂಟೆಗಳ ಅವಧಿಯಲ್ಲಿ ಗುಡುಗು, ಸಿಡಿಲು ಸಹಿತ ಭಾರಿ ಮಳೆಯಾಗುವ ಸಾಧ್ಯತೆಯಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಈ ಹಿನ್ನೆಲೆಯಲ್ಲಿ ಕರಾವಳಿ ಮತ್ತು ಮಲೆನಾಡಿನ ಪ್ರಮುಖ ಜಿಲ್ಲೆಗಳಿಗೆ ಹವಾಮಾನ ಇಲಾಖೆಯು 'ಎಲ್ಲೋ ಅಲರ್ಟ್' (Yellow Alert) ಘೋಷಿಸಿದೆ.

ವಿಶೇಷವಾಗಿ ದಕ್ಷಿಣ ಕನ್ನಡ, ಉಡುಪಿ ಹಾಗೂ ಚಿಕ್ಕಮಗಳೂರು ಜಿಲ್ಲೆಗಳಲ್ಲಿ ವರುಣನ ಅಬ್ಬರ ಹೆಚ್ಚಿರಲಿದ್ದು, ಕೆಲವು ಆಯಕಟ್ಟಿನ ಸ್ಥಳಗಳಲ್ಲಿ ತೀವ್ರ ಪ್ರಮಾಣದ ಮಳೆ ಸುರಿಯಲಿದೆ. ಸಂಜೆ 6 ಗಂಟೆಯಿಂದ ಆರಂಭಗೊಂಡು ಮುಂದಿನ ಮೂರು ಗಂಟೆಗಳ ಕಾಲ ಈ ಭಾಗಗಳಲ್ಲಿ ಹವಾಮಾನ ಸ್ಥಿತಿಗತಿಯಲ್ಲಿ ದಿಢೀರ್ ಮಾರ್ಪಾಡುಗಳು ಉಂಟಾಗಲಿವೆ ಎಂದು ಇಲಾಖೆ ತಿಳಿಸಿದೆ.

ಗಂಟೆಗೆ 30–40 ಕಿ.ಮೀ ವೇಗದಲ್ಲಿ ಬೀಸಲಿದೆ ಬಿರುಗಾಳಿ

ಮಳೆಯ ಜೊತೆಗೆ ಸೆಂಪೂರ್ಣ ಕರಾವಳಿ ಹಾಗೂ ಮಲೆನಾಡು ವ್ಯಾಪ್ತಿಯಲ್ಲಿ ಚಂಡಮಾರುತ ಮಾದರಿಯ ಬಿರುಗಾಳಿ ಬೀಸುವ ಸಾಧ್ಯತೆಯಿದೆ. ಮಳೆ ಸುರಿಯುವ ಸಂದರ್ಭದಲ್ಲಿ ಗಂಟೆಗೆ 30 ರಿಂದ 40 ಕಿಲೋಮೀಟರ್ ವೇಗದಲ್ಲಿ ಬಲವಾದ ಗಾಳಿ ಬೀಸಲಿದ್ದು, ಸಾರ್ವಜನಿಕರು ಹಾಗೂ ವಾಹನ ಸವಾರರು ಜಾಗರೂಕರಾಗಿರಲು ಹವಾಮಾನ ತಜ್ಞರು ಎಚ್ಚರಿಸಿದ್ದಾರೆ.

ಸಾಮಾನ್ಯವಾಗಿ ಸಂಜೆ ವೇಳೆಗೆ ವಾತಾವರಣದಲ್ಲಿ ಉಂಟಾಗುವ ಏರಿಳಿತಗಳು ಹಾಗೂ ಹವಾಮಾನ ವೈಪರೀತ್ಯದಿಂದಾಗಿ ಗುಡುಗು, ಸಿಡಿಲಿನ ಆರ್ಭಟ ಹೆಚ್ಚಿರಲಿದೆ. ಹೀಗಾಗಿ, ತೆರೆದ ಪ್ರದೇಶಗಳು, ಮರಗಳ ಕೆಳಗೆ ಹಾಗೂ ವಿದ್ಯುತ್ ಕಂಬಗಳ ಬಳಿ ನಿಲ್ಲದಂತೆ ಮತ್ತು ಕರಾವಳಿ ಭಾಗದ ಜನರು ಅಗತ್ಯ ಮುನ್ನೆಚ್ಚರಿಕೆ ವಹಿಸುವಂತೆ ಸೂಚಿಸಲಾಗಿದೆ. ಮಲೆನಾಡಿನ ಗಿರಿಪ್ರದೇಶಗಳು ಹಾಗೂ ಕರಾವಳಿಯ ತಗ್ಗು ಪ್ರದೇಶಗಳಲ್ಲಿ ಮಳೆಯಿಂದಾಗಿ ಸಂಚಾರಕ್ಕೆ ಅಡಚಣೆ ಉಂಟಾಗುವ ಸಾಧ್ಯತೆಯಿದ್ದು, ಮುಂದಿನ ಕೆಲ ಗಂಟೆಗಳಲ್ಲಿ ಮಳೆ ಮತ್ತಷ್ಟು ಚುರುಕುಗೊಳ್ಳಲಿದೆ.

'ಕೆ.ಎಲ್.ರಾಹುಲ್ ಬಿಟ್ಟರೆ ನಾನೇ ನಿಮ್ಮೂರಿನ ಮಗ' ತುಳು ಮಾತನಾಡಿ ಹೇಗಿದೆ ಎಂದ ದಿನೇಶ್ ಕಾರ್ತಿಕ್!

Sathish Kumar KH — Mon, 26 Oct 2026 21:20:53 +0530

ನಾನು ಕರ್ನಾಟಕದಾದ್ಯಂತ ಎಷ್ಟು ಹೆಚ್ಚು ಪ್ರಯಾಣಿಸುತ್ತೇನೋ, ಅಷ್ಟೂ ಈ ಸುಂದರ ರಾಜ್ಯ ನನ್ನನ್ನು 'ವಾವ್!' ಎನ್ನುವಂತೆ ಮಾಡುತ್ತಿದೆ. “ಕೆ.ಎಲ್. ರಾಹುಲ್ ಬಿಟ್ಟರೆ, ನಾನೇ ನಿಮ್ಮೂರಿನ ಮಗ” ಎಂದು ತುಳು ಭಾಷೆಯಲ್ಲೇ ಮಾತನಾಡುವ ಮೂಲಕ ಭಾರತ ಕ್ರಿಕೆಟ್‌ನ ಮಾಜಿ ಆಟಗಾರ, ಹಾಲಿ ಆರ್‌ಸಿಬಿ ಬ್ಯಾಟಿಂಗ್ ಕೋಚ್ ದಿನೇಶ್ ಕಾರ್ತಿಕ್ (Dinesh Karthik) ಕನ್ನಡಿಗರ ಮನಗೆದ್ದಿದ್ದಾರೆ.

ಕರಾವಳಿ ಕರ್ನಾಟಕದ ಸಾಂಸ್ಕೃತಿಕ ಹೆಗ್ಗುರುತು ಹಾಗೂ ತುಳುನಾಡಿನ ಗಂಡುಕಲೆಯಾಗಿರುವ 'ಹುಲಿವೇಷ' (ಪಿಲಿನಲಿಕೆ) ಇಂದು ಜಾಗತಿಕ ಮಟ್ಟದಲ್ಲಿ ರಾರಾಜಿಸುತ್ತಿದೆ. ಕರಾವಳಿಗೆ ಮಾತ್ರ ಸೀಮಿತವಾಗದೇ ಸಿನಿಮಾಗಳಲ್ಲೂ ಭಾರೀ ಸದ್ದು ಮಾಡುತ್ತಿರುವ ಹುಲಿವೇಷಕ್ಕೆ ಮತ್ತಷ್ಟು ಕಳೆಕಟ್ಟುವ ನಿಟ್ಟಿನಲ್ಲಿ ಯುವ ಮುಖಂಡ ಮಿಥುನ್ ರೈ ನೇತೃತ್ವದಲ್ಲಿ ಮಂಗಳೂರಿನ ಕರಾವಳಿ ಉತ್ಸವ ಮೈದಾನದಲ್ಲಿ ಅಕ್ಟೋಬರ್ 20 ರಿಂದ 11ನೇ ವರ್ಷದ 'ಪಿಲಿನಲಿಕೆ' ಸ್ಪರ್ಧೆಯನ್ನು ಅತ್ಯಂತ ಅದ್ಧೂರಿಯಾಗಿ ಆಯೋಜಿಸಲಾಗಿದೆ. ಈ ಜಾನಪದ ಮಹೋತ್ಸವಕ್ಕೆ ದಿನೇಶ್ ಕಾರ್ತಿಕ್ ಮುಖ್ಯ ಅತಿಥಿಯಾಗಿ ಆಗಮಿಸಿ, ತುಳು ಭಾಷೆಯಲ್ಲೇ ಮಾತನಾಡಿ ಇಡೀ ಕರಾವಳಿ ಜನತೆಯ ಮನಗೆದ್ದಿದ್ದಾರೆ.

"ಕೆ.ಎಲ್. ರಾಹುಲ್ ಬಿಟ್ರೆ ನಾನೇ ನಿಮ್ಮೂರಿನ ಮಗ":

ಪಿಲಿನಲಿಕೆ ವೇದಿಕೆ ಏರುತ್ತಿದ್ದಂತೆ ಮೈಕ್ ಕೈಗೆತ್ತಿಕೊಂಡ ದಿನೇಶ್ ಕಾರ್ತಿಕ್, ಸ್ಥಳೀಯರೊಂದಿಗೆ ಅಚ್ಚ ತುಳು ಭಾಷೆಯಲ್ಲೇ ಸಂಭಾಷಣೆ ನಡೆಸಿದರು. "ಕೆ.ಎಲ್. ರಾಹುಲ್ ಬಿಟ್ರೆ ನಾನೇ ನಿಮ್ಮೂರಿನ ಮಗ" ಎಂದು ತುಳುವಿನಲ್ಲಿ ಹೇಳುವ ಮೂಲಕ ಮೈದಾನದಲ್ಲಿದ್ದ ಸಾವಿರಾರು ಪ್ರೇಕ್ಷಕರನ್ನು ರೋಮಾಂಚನಗೊಳಿಸಿದರು. ಹುಲಿವೇಷಧಾರಿಗಳ ಅತ್ಯದ್ಭುತ ಕುಣಿತ ಹಾಗೂ ಕಸರತ್ತುಗಳನ್ನು ಕಣ್ತುಂಬಿಕೊಂಡು ಮನಸಾರೆ ಕೊಂಡಾಡಿದರು. ಕಾರ್ಯಕ್ರಮ ಮುಗಿದ ಬಳಿಕ ದಿನೇಶ್ ಕಾರ್ತಿಕ್ ಅವರು ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಪಿಲಿನಲಿಕೆಯ ಅದ್ಭುತ ಕ್ಷಣಗಳ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. ಮಂಗಳೂರಿನ ಕ್ರಿಕೆಟಿಗ ಕೆ.ಎಲ್. ರಾಹುಲ್ ಅವರನ್ನು ಟ್ಯಾಗ್ ಮಾಡುತ್ತಾ ಕರ್ನಾಟಕದ ಬಗ್ಗೆ ಮನದಾಳದ ಪ್ರೀತಿಯನ್ನು ಈ ಕೆಳಗಿನಂತೆ ವ್ಯಕ್ತಪಡಿಸಿದ್ದಾರೆ:

ದಿನೇಶ್ ಕಾರ್ತಿಕ್ ವೈರಲ್ ಇನ್‌ಸ್ಟಾಗ್ರಾಮ್ ಪೋಸ್ಟ್‌ನಲ್ಲೇನಿದೆ?

"ನನ್ನ ತುಳು ಹೇಗಿದೆ? ಮಂಗಳೂರಿಗೆ ಹಾರಿ ಬಂದು, ಪಿಲಿನಲಿಕೆಯ ಅದ್ಭುತ ಅನುಭವ ಪಡೆದುಕೊಳ್ಳಲು ಮತ್ತು ಅಭಿಮಾನಿಗಳ ಆರ್‌ಸಿಬಿ (RCB) ಜಯಘೋಷವನ್ನು ಕಣ್ತುಂಬಿಕೊಳ್ಳಲು ಸಿಕ್ಕ ಅವಕಾಶ ಅದ್ಭುತವಾಗಿತ್ತು! ನಾನು ಕರ್ನಾಟಕದಾದ್ಯಂತ ಎಷ್ಟು ಹೆಚ್ಚು ಪ್ರಯಾಣಿಸುತ್ತೇನೋ, ಅಷ್ಟೂ ಈ ಸುಂದರ ರಾಜ್ಯ ನನ್ನನ್ನು 'ವಾವ್!' ಎಂದು ಮೂಕವಿಸ್ಮಿತನನ್ನಾಗಿ ಮಾಡುತ್ತದೆ!" ಎಂದು ತಮ್ಮ ಇನ್‌ಸ್ಟಾಗ್ರಾಮ್ ಪೋಸ್ಟ್‌ನಲ್ಲಿ ಬರೆದುಕೊಂಡಿದ್ದಾರೆ. ಈ ಪೋಸ್ಟ್ ಸೋಷಿಯಲ್ ಮೀಡಿಯಾದಲ್ಲಿ ಕೆಲವೇ ನಿಮಿಷಗಳಲ್ಲಿ ವೈರಲ್ ಆಗಿದ್ದು, ಲಕ್ಷಾಂತರ ಲೈಕ್ಸ್‌ಗಳು ಹಾಗೂ ಮೆಚ್ಚುಗೆಯ ಕಾಮೆಂಟ್‌ಗಳು ಹರಿದುಬರುತ್ತಿವೆ.

View this post on Instagram

A post shared by Dinesh Karthik (@dk00019)

ಕನ್ನಡಿಗರ ಹೃದಯದಲ್ಲಿ 'ಡಿಕೆ'ಗೆ ಶಾಶ್ವತ ಸ್ಥಾನ:

ಐಪಿಎಲ್‌ನಲ್ಲಿ ಆರ್‌ಸಿಬಿ ಪರ ಹಲವು ಬಾರಿ ಅಸಾಧ್ಯವಾದ ಪಂದ್ಯಗಳನ್ನು ಗೆಲ್ಲಿಸಿಕೊಟ್ಟು ಅಭಿಮಾನಿಗಳ ಪಾಲಿಗೆ 'ಮ್ಯಾಚ್ ಫಿನಿಶರ್' ಆಗಿದ್ದ ದಿನೇಶ್ ಕಾರ್ತಿಕ್, ನಿವೃತ್ತಿಯ ಬಳಿಕವೂ ಕರ್ನಾಟಕದ ನೆಲ, ಜಲ, ಭಾಷೆ ಮತ್ತು ಸಂಸ್ಕೃತಿಯ ಬಗ್ಗೆ ಅಪಾರ ಗೌರವ ಉಳಿಸಿಕೊಂಡಿದ್ದಾರೆ. ಈ ಹಿಂದೆ ಹಲವು ವೇದಿಕೆಗಳಲ್ಲಿ ಕನ್ನಡ ಮತ್ತು ಬೆಂಗಳೂರಿನ ಜನರ ಬಗ್ಗೆ ಅಭಿಮಾನ ವ್ಯಕ್ತಪಡಿಸಿದ್ದ ಕಾರ್ತಿಕ್, ಈಗ ಕರಾವಳಿಯ ತುಳು ಭಾಷೆಯಲ್ಲೂ ಮಾತನಾಡಿ, 'ನಾನು ನಿಮ್ಮೂರಿನ ಮಗ' ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುವ ಮೂಲಕ ಕನ್ನಡಿಗರ ಹೃದಯಕ್ಕೆ ಮತ್ತಷ್ಟು ಆಪ್ತರಾಗಿದ್ದಾರೆ.

ಚೆನ್ನೈ-ಮಂಗಳೂರು-ರಾಮೇಶ್ವರಂ ಏಕಮುಖ ವಿಶೇಷ ರೈಲು, ಈ ಹೊಸ ಮಾರ್ಗಗಳ ಬಗ್ಗೆ ನಿಮಗೆ ಗೊತ್ತೇ?

Gowthami K — Mon, 19 Oct 2026 07:15:30 +0530

ಮಂಗಳೂರು: ಪ್ರಯಾಣಿಕರ ಹೆಚ್ಚುವರಿ ದಟ್ಟಣೆ ನಿವಾರಿಸುವ ಉದ್ದೇಶದಿಂದ ಚೆನ್ನೈ ಎಗ್ಮೋರ್‌ನಿಂದ ಮಂಗಳೂರು ಸೆಂಟ್ರಲ್‌ಗೆ ಹಾಗೂ ಮಂಗಳೂರು ಸೆಂಟ್ರಲ್‌ನಿಂದ ರಾಮೇಶ್ವರಂಗೆ ಏಕಮುಖ ಎಕ್ಸ್‌ಪ್ರೆಸ್ ವಿಶೇಷ ರೈಲುಗಳನ್ನು ಓಡಿಸಲು ದಕ್ಷಿಣ ರೈಲ್ವೆ ಅಧಿಸೂಚನೆ ಹೊರಡಿಸಿದೆ.

ರೈಲು ಸಂಖ್ಯೆ 06142 ಮಂಗಳೂರು ಸೆಂಟ್ರಲ್ - ರಾಮೇಶ್ವರಂ ಎಕ್ಸ್‌ಪ್ರೆಸ್ ವಿಶೇಷ ರೈಲು ಅ.19ರಂದು ಬೆಳಗ್ಗೆ 4.15ಕ್ಕೆ ಮಂಗಳೂರು ಸೆಂಟ್ರಲ್‌ನಿಂದ ಹೊರಟು ಅದೇ ದಿನ ಸಂಜೆ 7.30 ಗಂಟೆಗೆ ರಾಮೇಶ್ವರಂ ತಲುಪಲಿದೆ.

ಈ ವಿಶೇಷ ರೈಲುಗಳು ಒಟ್ಟು 21 ಬೋಗಿಗಳನ್ನು ಹೊಂದಿರಲಿವೆ. ಇವುಗಳಲ್ಲಿ ಪ್ರಥಮ ದರ್ಜೆ ಎಸಿ, ಎಸಿ ಟು ಟಯರ್, ಎಸಿ ತ್ರಿ ಟಯರ್, ಸ್ಲೀಪರ್ ಕ್ಲಾಸ್, ಸಾಮಾನ್ಯ ದರ್ಜೆ ಬೋಗಿಗಳು, ಲಗೇಜ್ ಕಮ್ ಬ್ರೇಕ್ ವ್ಯಾನ್ ಬೋಗಿಗಳು ಒಳಗೊಂಡಿರಲಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ನಾಗಪುರ ದೀಕ್ಷಾಭೂಮಿಗೆ ವಿಶೇಷ ರೈಲು

2026-27ನೇ ಸಾಲಿನಲ್ಲಿ ಅ. 20 (ವಿಜಯದಶಮಿ) ರಂದು ನಾಗಪುರ ದೀಕ್ಷಾಭೂಮಿಯಲ್ಲಿ ನಡೆಯುವ ಧಮ್ಮ ಪ್ರವರ್ತನ ದಿನ ಕಾರ್ಯಕ್ರಮಕ್ಕೆ ಪ್ರತಿ ವರ್ಷದಂತೆ ಈ ವರ್ಷವು ಬೀದರ್ ಜಿಲ್ಲೆಯಿಂದ ಮಹಾರಾಷ್ಟ್ರದ ನಾಗಾಪುರದಲ್ಲಿನ ದೀಕ್ಷಾ ಭೂಮಿಗೆ ಭೇಟಿ ನೀಡಲು ರೈಲಿನ ವ್ಯವಸ್ಥೆ ಮಾಡಲಾಗಿದೆ ಎಂದು ಸಮಾಜ ಕಲ್ಯಾಣ ಇಲಾಖೆಯ ಉಪ ನಿರ್ದೇಶಕರು ತಿಳಿಸಿದ್ದಾರೆ. ಬೀದರ್ ಜಿಲ್ಲೆಯಿಂದ ಮಹಾರಾಷ್ಟ್ರದ ನಾಗಪೂರದಲ್ಲಿನ ದೀಕ್ಷಾ ಭೂಮಿಗೆ ಪ್ರಯಾಣ ಬೆಳೆಸಲು ಡಾ. ಬಿ. ಆರ್. ಅಂಬೇಡ್ಕರ್ ಅವರ ಅನುಯಾಯಿಗಳಿಗೆ ಹೋಗಿ ಬರಲು ರೈಲ್ವೆಯ ವ್ವವಸ್ಥೆ ಕಲ್ಪಿಸಲಾಗಿದೆ, ಪ್ರಯಾಣ ಬೆಳೆಸುವವರು ರೈಲು ಸಂಖ್ಯೆ 07081 ಬೀದರ್‌ನಿಂದ ಅಜನಿಗೆ ಅ. 19ರಂದು ಸಂಜೆ 8.30ಗಂಟೆಗೆ ಹೊರಡಲಿದೆ. ರೈಲು ಸಂಖ್ಯೆ 07082 ರೈಲು ಅಜನಿಯಿಂದ ಬೀದರಿಗೆ ಅ.20ರಂದು ರಾತ್ರಿ 11.30 ಗಂಟೆಗೆ ಹೊರಡಲಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

----