Asianet Suvarna News

ನನ್ನ ಉದ್ದೇಶವೇ ಬೇರೆ: ಸತ್ಯ ಹೇಳಿದ್ದ CJP ಅಭಿಜೀತ್ ದೀಪ್ಕೆ ಹಳೆ ವಿಡಿಯೋ ಲೀಕ್- ಬಿಸಿಬಿಸಿ ಚರ್ಚೆ

Suchethana D — Sun, 11 Oct 2026 19:32:37 +0530

ದೆಹಲಿ: ಭಾರತದಲ್ಲಿ ಅರಾಜಕತೆ ಸೃಷ್ಟಿಸಿ, ನೆರೆಯ ಕೆಲವು ರಾಷ್ಟ್ರಗಳಂತೆ Gen Zಗಳನ್ನು ಉತ್ತೇಜಿಸಿ, ಭಾರತದಲ್ಲಿ ಬೆಂಕಿ ಹಚ್ಚಿಸುವ ಏಕಮಾತ್ರ ಉದ್ದೇಶದಿಂದ ಕಾಕ್ರೋಚ್ ಜನತಾ ಪಕ್ಷ (CJP) ಆರಂಭಿಸಿರುವ ಗಂಭೀರ ಆರೋಪ ಎದುರಿಸುತ್ತಿರುವ, ಸದ್ಯ ಅಮೆರಿಕದಲ್ಲಿ ನೆಲೆಸಿರುವ ಅಭಿಜೀತ್ ದೀಪ್ಕೆಯ ನಾಲ್ಕು ತಿಂಗಳ ಹಿಂದಿನ ವಿಡಿಯೋ ಒಂದು ಇದೀಗ ಲೀಕ್ ಆಗಿದ್ದು, ಇದು ಬಿಜೆಪಿ ನಾಯಕರು ಹಾಗೂ ಬಿಜೆಪಿ ಬೆಂಬಲಿಗರ ಆರೋಪಕ್ಕೆ ಮತ್ತಷ್ಟು ಪುಷ್ಟಿ ನೀಡುತ್ತಿದೆ. ಈ ವಿಡಿಯೋ ಬಗ್ಗೆ ಜಾಲತಾಣದಲ್ಲಿ ಬಿಸಿಬಿಸಿ ಚರ್ಚೆ ಶುರುವಾಗಿದ್ದು, ಶಿಕ್ಷಣದ ಉದ್ಧಾರದ ಹೆಸರಿನಲ್ಲಿ, ಇದೀಗ SIR ನೆಪ ಇಟ್ಟುಕೊಂಡು ದೀಪ್ಕೆ, ಯುಟ್ಯೂಬರ್ ಧ್ರುವ್ ರಾಠಿಯಂಥವರು ಭಾರತಕ್ಕೆ ಬಂದಿರುವ ಉದ್ದೇಶ ಸ್ಪಷ್ಟವಾಗಿದೆ ಎನ್ನುವ ಮಾತು ಕೇಳಿಬರುತ್ತಿದೆ.

Arfa Khanum Sherwani ಯುಟ್ಯೂಬ್ ಚಾನೆಲ್ಗೆ ನಾಲ್ಕು ತಿಂಗಳ ಹಿಂದಷ್ಟೇ ಅಭಿಜೀತ್ ದೀಪ್ಕೆ ಸಂದರ್ಶನ ನೀಡಿದ್ದರು. ಆಗಿನ್ನೂ ಕಾಕ್ರೋಚ್ ಜನತಾ ಪಕ್ಷದ ಉಗಮ ಆಗಿತ್ತು ಬಿಟ್ಟರೆ, ಅದರ ಬಗ್ಗೆ ಅಷ್ಟೊಂದು ಪ್ರಚಾರವೂ ಇರಲಿಲ್ಲ. ಅವರಿನ್ನೂ ಪ್ರತಿಭಟನೆಯನ್ನೂ ಆರಂಭಿಸಿರಲಿಲ್ಲ. ಆಗ ಪತ್ರಕರ್ತೆ ಅವರ ಉದ್ದೇಶದ ಬಗ್ಗೆ ಕೇಳಿದಾಗ, ದೀಪ್ಕೆ ಹೇಳಿದ ಮಾತೀಗ ದೊಡ್ಡ ಪ್ರಮಾಣದಲ್ಲಿ ಚರ್ಚೆಯಾಗುತ್ತಿದೆ. ಭಾರತದ ಉದ್ಧಾರ ತಮ್ಮ ಉದ್ದೇಶವಲ್ಲ, ಬದಲಿಗೆ ಬಿಜೆಪಿ ಮತ್ತು RSS ವಿರುದ್ಧ ತಮ್ಮ ಸಮರ ಎನ್ನುವ ಅರ್ಥದಲ್ಲಿ ಅವರು ಮಾತನಾಡಿರುವುದು ಸಾಕಷ್ಟು ಚರ್ಚೆಯನ್ನು ಹುಟ್ಟುಹಾಕಿದೆ.

ನನ್ನ ಏಕೈಕ ಉದ್ದೇಶವೆಂದರೆ...

ಇದರಲ್ಲಿ ದೀಪ್ಕೆ ಅವರು, ನನ್ನ ಏಕೈಕ ಉದ್ದೇಶ ಭಾರತದಲ್ಲಿ ಬಿಜೆಪಿ ಮತ್ತು RSS ಇರಬಾರದು ಎನ್ನುವುದು. ನಾನು AAP ಬೆಂಬಲಿಗ. ಬಿಜೆಪಿಯನ್ನು ಈ ದೇಶದಿಂದ ಓಡಿಸುವುದೇ ನನ್ನ ಗುರಿ ಎಂದುಮಾತನಾಡಿದ್ದಾರೆ. ಬೇರೆ ಬೇರೆ ವಿಧದಲ್ಲಿ ಕಳೆದ 15 ವರ್ಷಗಳಿಂದ ಇದೇ ಕೆಲಸವನ್ನು ನಾನು ಮಾಡುತ್ತಾ ಬಂದಿದ್ದೇನೆ. ಆದರೆ ಅದು ಅಷ್ಟು ಸಕ್ಸಸ್ ಆಗಿರಲಿಲ್ಲ. ಆದರೆ ಈಗ ಮಜಾಮಜಾಕ್ ಮೇ ಅರ್ಥಾತ್ ತಮಾಷೆಯಾಗಿ ಹುಟ್ಟಿದ ಕಾಕ್ರೋಚ್ ಜನತಾ ಪಕ್ಷ (CJP) ಇದನ್ನು ಪೂರೈಸಲು ನನಗೆ ಅವಕಾಶ ನೀಡಿದೆ. ಇದನ್ನು ಬಳಸಿಕೊಂಡು ನಾನು ಬಿಜೆಪಿಯನ್ನು ಓಡಿಸುತ್ತೇನೆ. ಇದೇ ನನ್ನ ಎಜೆಂಡಾ ಆಗಿದೆ ಎಂದು ಹೇಳಿದ್ದಾರೆ.

ನನ್ನ ಇತಿಹಾಸ ನೋಡಿ

ನೀವು ಬೇಕಿದ್ರೆ ನನ್ನ 15 ವರ್ಷಗಳ ಯುಟ್ಯೂಬ್ ಓಪನ್ ಬೇಕಿದ್ರೆ ಮಾಡಿ ನೋಡಿ. ಬಿಜೆಪಿ ಮತ್ತು ಆರ್ಎಸ್ಎಸ್ ಅನ್ನು ಬೈಯದ ಒಂದೇಒಂದು ವಿಡಿಯೋ ಕಾಣಲು ಸಿಗುವುದಿಲ್ಲ. ಕಾಂಗ್ರೆಸ್ ಪರವಾಗಿ ಇರುವವನ ನಾನು. ನನ್ನ ಇತಿಹಾಸ ನೋಡಿದರೆ ನಿಮಗೇ ತಿಳಿಯುತ್ತದೆ. 15 ವರ್ಷಗಳಿಂದಲೂ ಇದನ್ನೇ ಮಾಡಿಕೊಂಡು ಬಂದಿದ್ದೇನೆ. ಮುಂದೆನೂ ಇದನ್ನೇ ಮಾಡುತ್ತೇನೆ ಎಂದು ಸ್ಪಷ್ಟವಾಗಿ ತಮ್ಮ ನಿಲುವನ್ನು ವ್ಯಕ್ತಪಡಿಸಿದ್ದಾರೆ ದೀಪ್ಕೆ.

ಇದಾದ ಬಳಿಕ ನೀಟ್ ಪರೀಕ್ಷೆ ಸೋರಿಕೆಯ ನೆಪದಲ್ಲಿ ನಡೆದ ಮಾರಾಮಾರಿ, ಹಿಂಸಾಚಾರ ಇದೀಗ SIR ನೆಪದಲ್ಲಿ ಮಾಡುತ್ತಿರುವ ಪ್ರತಿಭಟನೆ ಎಲ್ಲವೂ ಕಣ್ಣಮುಂದೆ ಇದೆ. ಬಹುಶಃ ಮುಂದೊಂದು ದಿನ ಹೀಗೆಲ್ಲಾ ಮಾಡಬಹುದು ಎಂದು ತಿಳಿದಿದ್ದರೆ ತಮ್ಮ ವಿಚಾರಧಾರೆಯನ್ನು, ತಮ್ಮ ಹೃದಯದ ಮಾತುಗಳನ್ನು ದೀಪ್ಕೆ ಅಂದು ಹೇಳುತ್ತಲೇ ಇರಲಿಲ್ಲ. ಆದರೆ ಈಗ ಎಲ್ಲವೂ ಸ್ಪಷ್ಟವಾಗಿದೆ ಎಂದು ಕಮೆಂಟ್ಗಳಲ್ಲಿ ಸಿಕ್ಕಾಪಟ್ಟೆ ಜನ ಹೇಳುತ್ತಿದ್ದಾರೆ.

ಮರ್ಚೆಂಟ್ ನೇವಿ ಅಧಿಕಾರಿಯನ್ನು ಕೊಚ್ಚಿ ಸಿಮೆಂಟ್ ಡ್ರಮ್‌ನಲ್ಲಿ ತುಂಬಿದ್ದ ಕಿರಾತಕರಿಗೆ ಗಲ್ಲು: ಮಹಾಭಾರತ ಉದಾಹರಿಸಿ ಮೀರತ್ ಕೋರ್ಟ್‌ ತೀರ್ಪು

Santosh Naik — Wed, 14 Oct 2026 17:18:59 +0530

ಮೀರತ್ (ಅ.14): ಇಡೀ ದೇಶವನ್ನೇ ಬೆಚ್ಚಿಬೀಳಿಸಿದ್ದ ಉತ್ತರ ಪ್ರದೇಶದ ಮೀರತ್‌ನ ಕುಖ್ಯಾತ 'ಬ್ಲೂ ಡ್ರಮ್' (Blue Drum) ಕೊಲೆ ಪ್ರಕರಣದಲ್ಲಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯವು ಐತಿಹಾಸಿಕ ತೀರ್ಪು ಪ್ರಕಟಿಸಿದೆ. ಮರ್ಚೆಂಟ್ ನೇವಿ ಅಧಿಕಾರಿಯಾಗಿದ್ದ ಪತಿಯನ್ನೇ ಭೀಕರವಾಗಿ ಕೊಲೆ ಮಾಡಿ, ದೇಹದ ಭಾಗಗಳನ್ನು ತುಂಡರಿಸಿ ಸಿಮೆಂಟ್ ತುಂಬಿದ ಬ್ಲೂ ಡ್ರಮ್‌ನಲ್ಲಿ ಅಡಗಿಸಿಟ್ಟಿದ್ದ ಕಿರಾತಕ ಪತ್ನಿ ಮುಸ್ಕಾನ್ ರಸ್ತೋಗಿ (Muskan Rastogi) ಹಾಗೂ ಆಕೆಯ ಪ್ರಿಯಕರ ಸಾಹಿಲ್ ಶುಕ್ಲಾ (Sahil Shukla) ಇಬ್ಬರಿಗೂ ಗರಿಷ್ಠ 'ಮರಣದಂಡನೆ' (Death Penalty) ಶಿಕ್ಷೆ ವಿಧಿಸಲಾಗಿದೆ. ಪ್ರಕರಣ ನಡೆದು ಸುಮಾರು ಎರಡು ವರ್ಷಗಳ ಬಳಿಕ ಮೀರತ್ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶರಾದ ಅರವಿಂದ್ ಕುಮಾರ್ ಮಿಶ್ರಾ ಅವರು ಬುಧವಾರ ಈ ಮಹತ್ವದ ತೀರ್ಪನ್ನು ನೀಡಿದ್ದಾರೆ.

ಮಹಾಭಾರತದ ಉಲ್ಲೇಖ - ಕೋರ್ಟ್‌ ಅಂಗಳದಲ್ಲಿ 'ಭಾರತ್ ಮಾತಾ ಕಿ ಜೈ' ಘೋಷಣೆ:

ತೀರ್ಪು ಪ್ರಕಟಿಸುವ ಸಂದರ್ಭದಲ್ಲಿ ನ್ಯಾಯಾಧೀಶರು ಮಹಾಭಾರತವನ್ನು ಉಲ್ಲೇಖಿಸಿ, ತಪ್ಪಿತಸ್ಥರಿಗೆ ಸೂಕ್ತ ಶಿಕ್ಷೆಯನ್ನು ನೀಡುವುದು ಸಹ ಧರ್ಮದ ಒಂದು ಭಾಗವಾಗಿದೆ ಎಂದು ಬಲವಾಗಿ ಹೇಳಿದರು. ಜೈಲಿನಿಂದ ವಿಡಿಯೋ ಕಾನ್ಫರೆನ್ಸಿಂಗ್ (Video Conferencing) ಮೂಲಕ ಜಡ್ಜ್ ಮುಂದೆ ಹಾಜರಾಗಿದ್ದ ಇಬ್ಬರೂ ಆರೋಪಿಗಳಿಗೆ ಗಲ್ಲು ಶಿಕ್ಷೆಯ ತೀರ್ಪನ್ನು ಓದಿ ಹೇಳಲಾಯಿತು. ಈ ವೇಳೆ ಕೋರ್ಟ್‌ ಹಾಲ್‌ನಲ್ಲಿ ಮೃತ ಸೌರಭ್ ರಜಪೂತ್ ಅವರ ತಾಯಿ ರೇಣು ರಜಪೂತ್ ಹಾಗೂ ಸೋದರ ಉಪಸ್ಥಿತರಿದ್ದರು.

ನ್ಯಾಯಾಧೀಶರು ಮರಣದಂಡನೆ ಶಿಕ್ಷೆ ಘೋಷಿಸುತ್ತಿದ್ದಂತೆ ಕೋರ್ಟ್‌ ಹಾಲ್‌ನಲ್ಲಿದ್ದ ವಕೀಲರು ಹಾಗೂ ಸಾರ್ವಜನಿಕರು 'ಭಾರತ್ ಮಾತಾ ಕಿ ಜೈ' ಎಂಬ ಹರ್ಷೋದ್ಗಾರಗಳನ್ನು ಕೂಗಿದರು ಹಾಗೂ ಕೋರ್ಟ್ ಆವರಣದ ಹೊರಗೆ ಸಂಭ್ರಮಾಚರಣೆಗಳು ನಡೆದವು. ಇಬ್ಬರೂ ಆರೋಪಿಗಳಿಗೆ ಎಸಗಿದ ಘೋರ ಅಪರಾಧಕ್ಕಾಗಿ ಮರಣದಂಡನೆ ವಿಧಿಸಲಾಗಿದೆ ಎಂದು ಸಾರ್ವಜನಿಕ ಅಭಿಯೋಜಕರ ಪರ ವಕೀಲ ಕೃಷ್ಣ ಕುಮಾರ್ ದುಬೆ ದೃಢಪಡಿಸಿದ್ದಾರೆ.

ಸಾವಿರ ಜೀವ ತೆಗೆಯುವ ಬದಲು ದೂರವಾಗಿ: ಭಾವುಕರಾದ ಮೃತನ ತಾಯಿ

ತೀರ್ಪಿನ ಬಳಿಕ ಭಾವುಕರಾಗಿ ಪ್ರತಿಕ್ರಿಯಿಸಿದ ಮೃತ ಸೌರಭ್ ತಾಯಿ ರೇಣು ರಜಪೂತ್, ಒಟ್ಟಿಗೆ ಬಾಳಲು ಇಷ್ಟವಿಲ್ಲದ ದಂಪತಿಗಳು ದೌರ್ಜನ್ಯ ಮತ್ತು ಕೊಲೆಗೆ ಇಳಿಯುವ ಬದಲು ಪ್ರತ್ಯೇಕವಾಗಿ ವಿಚ್ಛೇದನ ಪಡೆದು ಬಾಳುವುದು ಲೇಸು. ಕೇವಲ ತಮ್ಮ ಸ್ವಾರ್ಥಕ್ಕಾಗಿ ಇನ್ನೊಬ್ಬರ ಹೊಟ್ಟೆಯಲ್ಲಿ ಹುಟ್ಟಿದ ಮಗುವನ್ನು ಕೊಲ್ಲಬೇಡಿ. ನಮ್ಮ ಪಾಲಿಗೆ ನಮ್ಮ ಮಗ ಎಲ್ಲೂ ಹೋಗಿಲ್ಲ, ಅವನ ನೆನಪುಗಳು ಮನೆಯ ಪ್ರತಿಯೊಂದು ಮೂಲೆಯಲ್ಲೂ ಇವೆ. ಇಂತಹ ಪೈಶಾಚಿಕ ಕೃತ್ಯ ಎಸಗುವ ಪ್ರತಿಯೊಬ್ಬರಿಗೂ ಕೊನೆಗೆ ಮರಣದಂಡನೆಯೇ ಸಿಗಬೇಕು ಎಂದು ಕಣ್ಣೀರಿಟ್ಟರು. ಈ ತೀರ್ಪು ಬರುವ ಮುನ್ನವೇ ಆರೋಪಿ ಮುಸ್ಕಾನ್ ಪೋಷಕರು ನ್ಯಾಯಾಲಯಕ್ಕೆ ಲಿಖಿತ ಹೇಳಿಕೆ ಸಲ್ಲಿಸಿ, ತಮ್ಮ ಮಗಳಿಗೆ ಮರಣದಂಡನೆ ಶಿಕ್ಷೆ ವಿಧಿಸಿದರೂ ತಾವೇನೂ ವಿರೋಧಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದರು.

ತೀರ್ಪಿಗೂ ಮುನ್ನ ರಾತ್ರಿಯೆಲ್ಲಾ ನಿದ್ರಿಸದೆ ಕಳೆದ ಆರೋಪಿಗಳು!

ಗಲ್ಲು ಶಿಕ್ಷೆಯ ಆತಂಕದಲ್ಲಿದ್ದ ಆರೋಪಿಗಳಾದ ಮುಸ್ಕಾನ್ ಹಾಗೂ ಸಾಹಿಲ್ ಮಂಗಳವಾರ ರಾತ್ರಿಯಿಡೀ ನಿದ್ರೆಯಿಲ್ಲದೆ ಕಳೆದಿದ್ದರು ಎಂದು ಹಿರಿಯ ಜೈಲು ಸೂಪರಿಂಟೆಂಡೆಂಟ್ ವೀರೇಶ್ ರಾಜ್ ಶರ್ಮಾ ತಿಳಿಸಿದ್ದಾರೆ. ಇಬ್ಬರೂ ಮಂಗಳವಾರ ರಾತ್ರಿ ಸರಿಯಾಗಿ ಊಟ ಮಾಡಿರಲಿಲ್ಲ, ಬುಧವಾರ ಬೆಳಗಿನ ಉಪಹಾರವನ್ನೂ ಮುಟ್ಟಿರಲಿಲ್ಲ.

ವಿಚಾರಣೆ ವೇಳೆ ಜಡ್ಜ್, ಸಾಹಿಲ್‌ಗೆ ಈ ಹಿಂದೆ ಯಾವುದೇ ಅಪರಾಧ ಎಸಗಿದ್ದೀಯಾ ಹಾಗೂ ಶಿಕ್ಷೆಯ ಕುರಿತು ಏನಾದರೂ ಹೇಳುವುದಿದೆಯೇ ಎಂದು ಕೇಳಿದಾಗ, ಆತ ಯಾವುದೇ ಹೇಳಿಕೆ ನೀಡದೆ ಮೌನಕ್ಕೆ ಶರಣಾಗಿದ್ದ. ದೋಷಿ ಎಂದು ತೀರ್ಪು ಬಂದ ದಿನದಿಂದಲೂ ಮುಸ್ಕಾನ್ ಜೈಲಿನಲ್ಲಿ ಯಾರೊಂದಿಗೂ ಮಾತನಾಡದೆ, ಮಹಿಳಾ ಬ್ಯಾರಾಕ್‌ನಲ್ಲಿ ಏಕಾಂಗಿಯಾಗಿ ಪ್ರಾರ್ಥನೆಯಲ್ಲಿ ತೊಡಗಿದ್ದಳು. ಜೈಲಿನಲ್ಲಿದ್ದಾಗ ತನ್ನ ಮಗಳನ್ನು ನೋಡಲು ಆಕೆ ಹಂಬಲಿಸಿದ್ದಳು.

ನ್ಯಾಯಾಲಯದ ಅಂತಿಮ ತೀರ್ಪಿನ ಬಳಿಕ ಇಬ್ಬರನ್ನೂ ಜೈಲು ಕೈದಿಗಳ ಕಡ್ಡಾಯ ಸಮವಸ್ತ್ರಕ್ಕೆ (Prison Uniform) ಬದಲಾಯಿಸಲಾಗಿದ್ದು, ನಿಯಮಾವಳಿ ಪ್ರಕಾರ ಪ್ರತ್ಯೇಕ ಕಠಿಣ ಜೈಲುಗಳಿಗೆ ವರ್ಗಾಯಿಸಲು ಜೈಲು ಆಡಳಿತ ಮಂಡಳಿ ಕ್ರಮ ಕೈಗೊಂಡಿದೆ.

ಏನಿದು ಭೀಕರ 'ಬ್ಲೂ ಡ್ರಮ್' ಕೊಲೆ ಪ್ರಕರಣ?

2025 ರ ಮಾರ್ಚ್ 3 ರಂದು ಮರ್ಚೆಂಟ್ ನೇವಿ ಅಧಿಕಾರಿಯಾಗಿದ್ದ ಸೌರಭ್ ರಜಪೂತ್‌ನನ್ನು ಆತನ ಪತ್ನಿ ಮುಸ್ಕಾನ್ ಹಾಗೂ ಆಕೆಯ ಪ್ರಿಯಕರ ಸಾಹಿಲ್ ಭೀಕರವಾಗಿ ಹತ್ಯೆ ಮಾಡಿದ್ದರು. ಬಳಿಕ ಆತನ ಮೃತದೇಹವನ್ನು ಸಣ್ಣ ಸಣ್ಣ ತುಂಡುಗಳಾಗಿ ಕೊಚ್ಚಿ, ಮನೆಯಲ್ಲಿದ್ದ ನೀಲಿ ಬಣ್ಣದ ಪ್ಲಾಸ್ಟಿಕ್ ಡ್ರಮ್‌ನಲ್ಲಿ (Blue Drum) ಹಾಕಿ, ಅದರ ಮೇಲೆ ಸಿಮೆಂಟ್ ಕಾಂಕ್ರೀಟ್ ತುಂಬಿ ಮುಚ್ಚಿಟ್ಟಿದ್ದರು. ಮರುದಿನವೇ ಪೊಲೀಸರು ಕಾರ್ಯಾಚರಣೆ ನಡೆಸಿ ಈ ಸಿಮೆಂಟ್ ತುಂಬಿದ್ದ ಬ್ಲೂ ಡ್ರಮ್ ಅನ್ನು ವಶಪಡಿಸಿಕೊಂಡು, ಇಬ್ಬರನ್ನೂ ಬಂಧಿಸಿದ್ದರು. 2025 ರ ಜುಲೈನಲ್ಲಿ ಮೀರತ್ ಕೋರ್ಟ್‌ನಲ್ಲಿ ತನಿಖೆ ಆರಂಭಗೊಂಡು, ಪೊಲೀಸರು ಬರೋಬ್ಬರಿ 1,000 ಪುಟಗಳ ಬೃಹತ್ ದೋಷಾರೋಪಣೆ ಪಟ್ಟಿಯನ್ನು (Chargesheet) ಸಲ್ಲಿಸಿದ್ದರು. ಒಟ್ಟು 13 ತಿಂಗಳ ಸುದೀರ್ಘ ತನಿಖೆ ಹಾಗೂ 126 ಹಂತಗಳ ಸರಣಿ ವಿಚಾರಣೆಗಳ ಬಳಿಕ ಕೋರ್ಟ್‌ ಸೆಪ್ಟೆಂಬರ್ 30 ರಂದು ಇಬ್ಬರನ್ನೂ ತಪ್ಪಿತಸ್ಥರು ಎಂದು ಘೋಷಿಸಿತ್ತು. ಇದೀಗ ಇಬ್ಬರಿಗೂ ಮರಣದಂಡನೆ ಶಿಕ್ಷೆ ವಿಧಿಸಿ ಇತಿಹಾಸ ಬರೆದಿದೆ.

Bengaluru: ಆಸ್ತಿಗಾಗಿ ಅಣ್ಣನ ಮಗನ ಕೊಂದು ಠಾಣೆಗೆ ಹೋಗಿ ಶರಣಾದ ಚಿಕ್ಕಪ್ಪ, ಮತ್ತೋರ್ವ ಯುವಕನ ಜೀವ ಉಳಿಸಿದ 'ಸಿನಿಮಾ'

Kannadaprabha News — Wed, 14 Oct 2026 12:40:05 +0530

ಬೆಂಗಳೂರು: ಆಸ್ತಿ ವಿವಾದದಿಂದಾಗಿ ಮಲಗಿದ್ದ ಬಾಲಕನ ಮೇಲೆ ಮಾರಕಾಸ್ತ್ರದಿಂದ ಹೊಡೆದು ಕೊಲೆ ಮಾಡಿದ ಆರೋಪದ ಮೇಲೆ ಬಾಲಕನ ಚಿಕ್ಕಪ್ಪನನ್ನು ಸೋಲದೇವನಹಳ್ಳಿ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಮೋಹನ್‌ ಬಂಧಿತ ಆರೋಪಿ. ಕೃಷ್ಣ (15) ಮೃತ ಬಾಲಕ. ಬಾಲಕನ ಸಂಬಂಧಿ ನೀಡಿದ ದೂರಿನನ್ವಯ ಪ್ರಕರಣ ದಾಖಲಿಸಿ ಆರೋಪಿಯನ್ನು ಬಂಧಿಸಲಾಗಿದೆ. ಆತನನ್ನು ಪೊಲೀಸ್‌ ಕಸ್ಟಡಿಗೆ ಪಡೆದು ಹೆಚ್ಚಿನ ವಿಚಾರಣೆ ನಡೆಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

1 ಎಕರೆ ಜಮೀನು ವಿಚಾರವಾಗಿ ಕೊಲೆ

ಕೃಷ್ಣ ಅವರ ತಾಯಿ 14 ವರ್ಷಗಳ ಹಿಂದೆಯೇ ಮಕ್ಕಳು ಮತ್ತು ಗಂಡನನ್ನು ಬಿಟ್ಟು ಹೋಗಿದ್ದರು. ಅದೇ ಕೊರಗಿನಲ್ಲಿ ಕೃಷ್ಣ ಅವರ ತಂದೆ ಮುನಿರಾಜು ಮೃತಪಟ್ಟಿದ್ದರು. ಕೃಷ್ಣ ಮತ್ತು ಆತನ ಅಣ್ಣ ಯಶವಂತ ಇಬ್ಬರೂ ಮನೆಯೊಂದರಲ್ಲಿ ವಾಸ ಮಾಡುತ್ತಿದ್ದರು. ಯಶವಂತ ಕೂಲಿ ಕೆಲಸ ಮಾಡಿಕೊಂಡಿದ್ದ. ಕೃಷ್ಣ ಐವರಕಂಡಪುರದ ಶಾಲೆಯೊಂದರಲ್ಲಿ 10ನೇ ತರಗತಿ ಓದುತ್ತಿದ್ದ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಆಸ್ತಿಗಾಗಿ ಹತ್ಯೆ

ಕೃಷ್ಣ ಅವರ ತಂದೆ ಮುನಿರಾಜುವಿಗೆ ದೇವನಹಳ್ಳಿ ಕುಂದಾಣ ಹತ್ತಿರ ಸುಮಾರು 1 ಎಕರೆ ಪಿತ್ರಾರ್ಜಿತ ಜಮೀನು ಇದೆ. ಕಳೆದ ವರ್ಷ ಆ ಜಮೀನನ್ನು ಆರೋಪಿ ಮೋಹನ್‌, ತನ್ನ ಅಕ್ಕ ಪುಪ್ಪ ಹಾಗೂ ಅಣ್ಣನ ಮಕ್ಕಳಾದ ಯಶವಂತ್ ಹಾಗೂ ಕೃಷ್ಣನಿಗೆ ಗೊತ್ತಾಗದ ಹಾಗೇ ಸಹಿಗಳನ್ನು ನಕಲು ಮಾಡಿ ಜಮೀನನ್ನು ಯಲಹಂಕ ಜಿ.ಕೆ.ಬಿಲ್ಡರ್ಸ್‌ರ್‌ಗೆ ಮಾರಾಟ ಮಾಡಿದ್ದ.

ಮಚ್ಚಿನಿಂದ ಕೊಚ್ಚಿ ಕೊಂದ ಆರೋಪಿ

ಈ ಸಂಬಂಧ ಪುಪ್ಪ ಅವರು ವಿಶ್ವನಾಥಪುರ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದರು. ಈ ನಡುವೆ ನಕಲು ವಿಚಾರ ಬಿಲ್ಡರ್ಸ್‌ರಿಗೆ ಗೊತ್ತಾಗಿ ಪುಷ್ಪ ಹಾಗೂ ಮುನಿರಾಜು ಅವರ ಮಕ್ಕಳಾದ ಯಶವಂತ ಹಾಗೂ ಕೃಷ್ಣ ಅವರ ಅಕೌಂಟ್‌ಗೆ ಹಣ ಹಾಕಿದ್ದರು. ಇದರಿಂದ ಕೋಪಗೊಂಡ ಆರೋಪಿ ಮೋಹನ್ ಆಗಾಗ್ಗೆ ಬಂದು ಯಶವಂತ ಮತ್ತು ಕೃಷ್ಣನ ಮೇಲೆ ಗಲಾಟೆ ಮಾಡುತ್ತಿದ್ದ. ಆರೋಪಿ ಮೋಹನ್ ಸೋಮವಾರ ರಾತ್ರಿ 10ರ ಸುಮಾರಿಗೆ ಕೃಷ್ಣನ ಮನೆಗೆ ಬಂದು ಮಚ್ಚಿನಿಂದ ಆತನನ್ನು ಕೊಚ್ಚಿ ಕೊಲೆ ಮಾಡಿದ್ದ. ಕೃತ್ಯ ನಡೆದಾಗ ಕೃಷ್ಣನ ಅಣ್ಣ ಯಶವಂತ ಸಿನಿಮಾ ನೋಡಲು ಹೋಗಿದ್ದ, ಆದ್ದರಿಂದ ಆತನ ಜೀವ ಉಳಿದಿದೆ ಎನ್ನಲಾಗಿದೆ.

ಠಾಣೆಗೆ ಹೋಗಿ ಶರಣಾದ ಆರೋಪಿ

ಆರೋಪಿ ಮೋಹನ್ ಕೃತ್ಯ ಎಸಗಿದ ಬಳಿಕ ತಾನು ಕೃಷ್ಣ ಎಂಬಾತನನ್ನು ಕೊಲೆ ಮಾಡಿರುವುದಾಗಿ ಮಂಗಳವಾರ ಬೆಳಗ್ಗೆ ವಿಶ್ವನಾಥಪುರ ಪೊಲೀಸ್ ಠಾಣೆಗೆ ಹೋಗಿ ಶರಣಾಗಿದ್ದಾನೆ. ವಿಶ್ವನಾಥಪುರ ಪೊಲೀಸರು, ಕೂಡಲೇ ಸೋಲದೇವನಹಳ್ಳಿ ಪೊಲೀಸರಿಗೆ ಮಾಹಿತಿ ನೀಡಿದ್ದು, ಪೊಲೀಸರು ದೌಡಾಯಿಸಿ ಕೃಷ್ಣನ ಮನೆಗೆ ಹೋಗಿ ನೋಡಿದ್ದಾಗ ಆತ ಮನೆಯ ರೂಮಿನಲ್ಲಿ ಬೋರಲಾಗಿ ಸತ್ತು ಬಿದಿದ್ದ, ಆತನ ತಲೆಯಿಂದ ರಕ್ತಸ್ರಾವವಾಗಿತ್ತು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

Mandya: ಪ್ರೀತಿಗೆ ಅಡ್ಡಿ, ಅಜ್ಜಿಯನ್ನು ಲವರ್ ಜೊತೆಗೆ ಸೇರಿ ಕೊಂದ ಮೊಮ್ಮಗಳು

Kannadaprabha News — Tue, 13 Oct 2026 12:35:01 +0530

ಮಂಡ್ಯ: ಪ್ರೀತಿಗೆ ಅಡ್ಡಿಯಾದ ಅಜ್ಜಿಯನ್ನು ಪ್ರಿಯಕರನ ಜೊತೆ ಸೇರಿ ಅಪ್ರಾಪ್ತೆ ಮೊಮ್ಮಗಳು ಹತ್ಯೆ ಮಾಡಿರುವ ಘಟನೆ ತಾಲೂಕಿನ ಮಂಡ್ಯ ಜಿಲ್ಲೆ ಕೆ.ಆರ್‌.ಪೇಟೆ ತಾಲೂಕಿನ ಬೂಕನಕೆರೆ ಗ್ರಾಮದಲ್ಲಿ ಬೆಳಕಿಗೆ ಬಂದಿದೆ. ಮಹದೇವಮ್ಮ(50) ಕೊಲೆಯಾದ ಅಜ್ಜಿ. ಪ್ರಥಮ ಪಿಯು ವಿದ್ಯಾರ್ಥಿನಿ (16), ಆಕೆಯ ಪ್ರಿಯಕರ ಆಕಾಶ್ (28) ಕೊಲೆ ಆರೋಪಿಗಳು.

ಬಾಲಕಿ ಮತ್ತು ಬೆಳತೂರು ಗ್ರಾಮದ ಆಕಾಶ್ ಪರಸ್ಪರ ಪ್ರೀತಿಸುತ್ತಿದ್ದರು. ಇದಕ್ಕೆ ಅಜ್ಜಿ ಮಹದೇವಮ್ಮ ಅವರ ವಿರೋಧವಿತ್ತು. ಈ ಹಿಂದೆ ಆಕಾಶ್ ಮತ್ತು ಮಹದೇವಮ್ಮ ಅವರ ನಡುವೆ ಗಲಾಟೆಯಾಗಿತ್ತು ಎನ್ನಲಾಗಿದೆ. ಅಜ್ಜಿ ಮಹದೇವಮ್ಮ ಬೇರೊಂದು ಕಡೆ ಸಂಬಂಧ ಹುಡುಕುವ ಸಿದ್ಧತೆಯಲ್ಲಿದ್ದರು. ರಾತ್ರಿ ಬೂಕನಕೆರೆಯ ಅಜ್ಜಿ ಮನೆಗೆ ಮೊಮ್ಮಗಳು ಹಿಂತಿರುಗಿದ್ದಾಳೆ. ರಾತ್ರಿ ಆಕಾಶ್‌ಗೆ ಕರೆ ಮಾಡಿ ಮನೆಗೆ ಕರೆಯಿಸಿಕೊಂಡು ಆತನ ಜೊತೆ ಸೇರಿ ಅಜ್ಜಿಯನ್ನು ಹೊಡೆದು ಸಾಯಿಸಿದ್ದಾರೆ.

ಮದುವೆ ಆಗಬೇಕಿದ್ದ ಅಪ್ರಾಪ್ತೆಯನ್ನೇ ಗರ್ಭಿಣಿ ಮಾಡಿದ ಯುವಕ: ದೂರು

ದಾವಣಗೆರೆ: ಅಪ್ರಾಪ್ತೆಗೆ 18 ವರ್ಷ ತುಂಬಿದ ನಂತರ ಮದುವೆ ಮಾಡಲು ಎರಡೂ ಕುಟುಂಬಗಳ ಮಧ್ಯೆ ಮಾತಿನ ಒಪ್ಪಂದ ಆಗಿದ್ದರೂ, ಯುವಕನೊಬ್ಬ ಅಪ್ರಾಪ್ತೆಯನ್ನು ಗರ್ಭಿಣಿ ಮಾಡಿದ ಘಟನೆ ದಾವಣಗೆರೆಯಲ್ಲಿ ನಡೆದಿದೆ. ಯುವಕನ ವಿರುದ್ಧ ಪೋಕ್ಸೋ ಕೇಸ್ ದಾಖಲಾಗಿದೆ.

ಯುವಕನ ಕುಟುಂಬದವರು ಹಾಗೂ ಅಪ್ರಾಪ್ತೆ ಕುಟುಂಬದವರು ಬಾಲಕಿಗೆ 18 ವರ್ಷವಾದ ಬಳಿಕ ಇಬ್ಬರಿಗೂ ಮದುವೆ ಮಾಡುವ ಬಗ್ಗೆ ತೀರ್ಮಾನ ಕೈಗೊಂಡಿದ್ದರು. ಈ ಮಧ್ಯೆ ಯುವಕ ಆಗಾಗ ಅಪ್ರಾಪ್ತೆಯ ಮನೆಗೆ ಬಂದು ಹೋಗುತ್ತಿದ್ದ. ಇದರಿಂದ ಸಲುಗೆ ಬೆಳೆದಿತ್ತು ಎನ್ನಲಾಗಿದೆ.

ಯುವಕ ಅಪ್ರಾಪ್ತೆಯನ್ನು ಲೈಂಗಿಕವಾಗಿ ಬಳಸಿಕೊಂಡಿದ್ದ. ತೀವ್ರಹೊಟ್ಟೆ ನೋವಿನಿಂದ ಬಳಲುತ್ತಿದ್ದ ಅಪ್ರಾಪ್ತೆಯನ್ನು ಪಾಲಕರು ಆಸ್ಪತ್ರೆಗೆ ಕರೆದುಕೊಂಡು ಹೋದಾಗ ಗರ್ಭಿಣಿ ಆಗಿರುವುದು ಬೆಳಕಿಗೆ ಬಂದಿದೆ. ಆ ಯುವಕನ ಜೊತೆಗೆ ಮದುವೆ ಮಾಡೋಣ ಎಂದರೆ ಹುಡುಗಿ ಇನ್ನೂ ಅಪ್ರಾಪ್ತೆ, 18 ವರ್ಷ ತುಂಬದೇ ಮದುವೆ ಮಾಡುವಂತಿಲ್ಲ ಎಂಬ ಚಿಂತೆ ಪೋಷಕರಲ್ಲಿ ಕಾಡತೊಡಗಿದೆ.

ಭಾರತದ ಗಡಿಯಲ್ಲಿ ತಾವೇ ಇಟ್ಟ ಬಾಂಬ್ನಿಂದ ಜೀವ ಕಳಕೊಂಡ ಉಗ್ರರು? ನುಸುಳಲು ಹೋಗಿ ಸತ್ತ ಪಾಕಿಗಳು

Suchethana D — Tue, 13 Oct 2026 12:47:46 +0530

ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದ ಪೂಂಚ್ ಜಿಲ್ಲೆಯ ನಿಯಂತ್ರಣ ರೇಖೆಯ (ಎಲ್‌ಒಸಿ) ಬಳಿ ನಡೆದ ನೆಲಬಾಂಬ್ ಸ್ಫೋಟದಲ್ಲಿ ಲಷ್ಕರ್-ಎ-ತಯಬಾದ ಹಿರಿಯ ಕಮಾಂಡರ್ ಎನ್ನಲಾದ ಪಾಕಿಸ್ತಾದ ಪ್ರಜೆ ಸೇರಿದಂತೆ ನಾಲ್ವರು ಭಯೋತ್ಪಾದಕರು ಸಾವನ್ನಪ್ಪಿದ್ದಾರೆ. ನಿನ್ನೆ ಕೃಷ್ಣ ಘಾಟಿ ವಲಯದ ನಾಗಿ ತಕ್ರಿ ಪ್ರದೇಶದಲ್ಲಿ ನಡೆದ ಈ ಘಟನೆಯಲ್ಲಿ, ಪಾಕಿಸ್ತಾನ ಆಕ್ರಮಿತ ಜಮ್ಮು ಮತ್ತು ಕಾಶ್ಮೀರ (ಪಿಒಕೆ) ದಿಂದ ಭಾರತೀಯ ಪ್ರದೇಶಕ್ಕೆ ನುಸುಳಲು ಭಯೋತ್ಪಾದಕರ ಗುಂಪು ಪ್ರಯತ್ನಿಸುತ್ತಿದ್ದಾಗ ಈ ಘಟನೆ ಸಂಭವಿಸಿದೆ. ಮೆಂಧರ್ ಸೆಕ್ಟರ್‌ನ ಬಸೋನಿ ಪ್ರದೇಶದ ಗಡಿ ಬೇಲಿಯ ಬಳಿ ಭಾರತೀಯ ಸೇನಾ ಸೈನಿಕರು ಎರಡು ತುಕ್ಕು ಹಿಡಿದ ನೆಲಬಾಂಬುಗಳನ್ನು ಪತ್ತೆ ಮಾಡಿದ್ದಾರೆ. ಅಧಿಕಾರಿಗಳ ಪ್ರಕಾರ, ಬೆಳಿಗ್ಗೆ 8:25 ಮತ್ತು ಮಧ್ಯಾಹ್ನ 12:10 ಕ್ಕೆ ಟ್ರಾಲಿಂಗ್ ಕಾರ್ಯಾಚರಣೆಯ ಸಮಯದಲ್ಲಿ ಇದನ್ನು ಪತ್ತೆಹಚ್ಚಲಾಯಿತು. ನಂತರ ಎರಡನ್ನೂ ನಿಷ್ಕ್ರಿಯಗೊಳಿಸಲಾಯಿತು. ಇದರಿಂದ ತಾವೇ ಇಟ್ಟ ಬಾಂಬ್ನಿಂದ ಈ ಉಗ್ರರು ಜೀವ ಕಳೆದುಕೊಂಡರಾ ಎನ್ನುವ ಅನುಮಾನ ಎಲ್ಲರನ್ನೂ ಕಾಡುತ್ತಿದೆ.

ಹತ್ಯೆಗೊಳಗಾದ ಭಯೋತ್ಪಾದಕರ ಗುರುತು

ವರದಿಗಳ ಪ್ರಕಾರ, ಹತ್ಯೆಗೀಡಾದ ಭಯೋತ್ಪಾದಕರನ್ನು ಮುಹಮ್ಮದ್ ಇಶ್ತಿಯಾಕ್, ಮುಹಮ್ಮದ್ ಫೈಜಾನ್, ಮುಹಮ್ಮದ್ ವಕಾಸ್ ಮತ್ತು ಮುಹಮ್ಮದ್ ಅಸಿಮ್ ಎಂದು ಗುರುತಿಸಲಾಗಿದೆ. ಫೈಜಾನ್ ಲಷ್ಕರ್-ಎ-ತಯಬಾದ ಉನ್ನತ ಕಮಾಂಡರ್ ಎಂದು ಹೇಳಲಾಗುತ್ತದೆ. ನಾಲ್ವರೂ ಪಾಕ್ ಆಕ್ರಮಿತ ಜಮ್ಮು ಮತ್ತು ಕಾಶ್ಮೀರದ ಹಾಜಿರಾ ತಹಸಿಲ್‌ನ ಮಂಡಲ ಮತ್ತು ಮದರ್‌ಪುರ್ ಪ್ರದೇಶಗಳ ನಿವಾಸಿಗಳು. ಘಟನೆಯ ನಂತರ, ಕೃಷ್ಣ ಘಾಟಿ ವಲಯದಲ್ಲಿ ಭದ್ರತಾ ಎಚ್ಚರಿಕೆಯನ್ನು ನೀಡಲಾಯಿತು ಮತ್ತು ನಿಯಂತ್ರಣ ರೇಖೆಯ ಉದ್ದಕ್ಕೂ ಸೂಕ್ಷ್ಮ ಪ್ರದೇಶಗಳಲ್ಲಿ ಕಣ್ಗಾವಲು ಹೆಚ್ಚಿಸಲಾಯಿತು. ಏತನ್ಮಧ್ಯೆ, ಮೆಂಧರ್ ವಲಯದ ಬಸೋನಿ ಪ್ರದೇಶದ ಗಡಿ ಬೇಲಿಯ ಬಳಿ ಎರಡು ತುಕ್ಕು ಹಿಡಿದ ನೆಲಬಾಂಬುಗಳು ಪತ್ತೆಯಾಗಿದ್ದು, ಅವುಗಳನ್ನು ಸೇನಾ ತಜ್ಞರು ನಿಯಂತ್ರಿತ ಸ್ಫೋಟದ ಮೂಲಕ ನಾಶಪಡಿಸಿದ್ದಾರೆ.

ವರದಿಗಳ ಪ್ರಕಾರ, ಸೋಮವಾರ ಕೃಷ್ಣ ಘಾಟಿ ಸೆಕ್ಟರ್‌ನ ಸತ್ವಾಲ್-ನಾಕಿ ಪ್ರದೇಶದಲ್ಲಿ ಸ್ಫೋಟ ಸಂಭವಿಸಿದೆ. ಸತ್ವಾಲ್-ನಾಕಿ ಪ್ರದೇಶದಲ್ಲಿ ಈ ಹಿಂದಿನಿಂದಲೂ ಒಳನುಸುಳುವಿಕೆ ಯತ್ನಗಳು ನಡೆಯುತ್ತಿದ್ದವು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ, ಭಯೋತ್ಪಾದಕರು ಈ ಮಾರ್ಗದ ಮೂಲಕ ಭಾರತದ ಗಡಿಯನ್ನು ಪ್ರವೇಶಿಸಲು ಪ್ರಯತ್ನಿಸಿದ್ದಾರೆ.ಭದ್ರತಾ ಸಂಸ್ಥೆಗಳಿಂದ ತನಿಖೆ

ಸ್ಫೋಟದ ಸಂದರ್ಭಗಳನ್ನು ಭದ್ರತಾ ಸಂಸ್ಥೆಗಳು ತನಿಖೆ ನಡೆಸುತ್ತಿವೆ. ಈ ಪ್ರದೇಶದಲ್ಲಿ ಈ ಹಿಂದೆಯೂ ಇದೇ ರೀತಿಯ ಘಟನೆಗಳು ನಡೆದಿವೆ. ಅಧಿಕಾರಿಗಳ ಪ್ರಕಾರ, ಪಾಕಿಸ್ತಾನದ ಗಡಿ ಕ್ರಿಯಾ ತಂಡದ (ಬಿಎಟಿ) ಆರರಿಂದ ಏಳು ಸದಸ್ಯರು ಇದೇ ರೀತಿಯಲ್ಲಿ ಸಾವನ್ನಪ್ಪಿದ್ದಾರೆ. ಇತ್ತೀಚಿನ ಘಟನೆಯ ನಂತರ, ಭದ್ರತಾ ಪಡೆಗಳು ವಲಯದಾದ್ಯಂತ ಎಚ್ಚರಿಕೆಯನ್ನು ಹೊರಡಿಸಿವೆ. ಯಾವುದೇ ಹೆಚ್ಚಿನ ಒಳನುಸುಳುವಿಕೆ ಪ್ರಯತ್ನಗಳನ್ನು ತಡೆಗಟ್ಟಲು ಮತ್ತು ಪ್ರದೇಶದಲ್ಲಿ ಭದ್ರತಾ ವ್ಯವಸ್ಥೆಗಳನ್ನು ಪರಿಶೀಲಿಸಲು ನಿಯಂತ್ರಣ ರೇಖೆಯ ಉದ್ದಕ್ಕೂ ಕಣ್ಗಾವಲು ಹೆಚ್ಚಿಸಲಾಗಿದೆ.

ಏತನ್ಮಧ್ಯೆ, ಭಾರತೀಯ ಸೇನಾ ಸೈನಿಕರು ಸೋಮವಾರ ಮೆಂಧರ್ ವಲಯದ ಬಸೋನಿ ಪ್ರದೇಶದ ಗಡಿ ಬೇಲಿಯ ಬಳಿ ಎರಡು ಹಳೆಯ ನೆಲಬಾಂಬುಗಳನ್ನು ಪತ್ತೆಹಚ್ಚಿದ್ದಾರೆ. ಬೆಳಿಗ್ಗೆ 8:25 ಮತ್ತು ಮಧ್ಯಾಹ್ನ 12:10 ಕ್ಕೆ ರಸ್ತೆ ನಿರ್ಮಾಣದ ಸಮಯದಲ್ಲಿ ಗಣಿಗಳನ್ನು ಕಂಡುಹಿಡಿಯಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ನಂತರ ಸೇನಾ ತಜ್ಞರು ನಿಯಂತ್ರಿತ ಸ್ಫೋಟಗಳ ಮೂಲಕ ಎರಡೂ ಗಣಿಗಳನ್ನು ನಾಶಪಡಿಸಿದರು. ಕಳೆದ ವಾರದಲ್ಲಿ, ಸೇನೆಯು ಈ ಪ್ರದೇಶದಲ್ಲಿ ಸುಮಾರು 12 ನೆಲಬಾಂಬುಗಳನ್ನು ಪತ್ತೆಹಚ್ಚಿ ನಿಷ್ಕ್ರಿಯಗೊಳಿಸಿದೆ.

Bengaluru: ಪ್ರಿಯಕರನಿಗೆ ಕಳಿಸಿದ್ದ ಟೆಕ್ಕಿ ಖಾಸಗಿ ಫೋಟೋ ಅಶ್ಲೀಲ ಸೈಟ್‌ನಲ್ಲಿ ಪ್ರಸಾರ

Mahmad Rafik — Sun, 18 Oct 2026 10:00:13 +0530

ಬೆಂಗಳೂರು: ಸಿಲಿಕಾನ್ ಸಿಟಿಯ ಇಂದಿರಾನಗರ ನಿವಾಸಿ ಹಾಗೂ 28 ವರ್ಷದ ಟೆಕ್ಕಿ ಚಾರುಮತಿ (ಹೆಸರು ಬದಲಾಯಿಸಲಾಗಿದೆ) ತಮ್ಮ ಪ್ರಿಯಕರ ದೇವಾನಂದ್ (ಹೆಸರು ಬದಲಾಯಿಸಲಾಗಿದೆ) ಕೋರಿಕೆಯಂತೆ ಕೆಲವೊಂದು ಖಾಸಗಿ ಫೋಟೋಗಳನ್ನು ರವಾನಿಸಿದ್ದರು. ಈ ಫೋಟೋಗಳನ್ನು ಚಾರುಮತಿ ಸ್ನ್ಯಾಪ್‌ಚಾಟ್ (Snapchat) ಖಾತೆಯ ಮೂಲಕ ದೇವಾನಂದ್‌ಗೆ ಕಳುಹಿಸಿದ್ದರು. ಆದರೆ ತಮ್ಮ ಖಾಸಗಿ ನಗ್ನ ಫೋಟೋ ಮತ್ತು ವೀಡಿಯೋಗಳು ಅಶ್ಲೀಲ ವೆಬ್‌ಸೈಟ್‌ನಲ್ಲಿ ಅಪ್‌ಲೋಡ್ ಆಗಿರುವ ವಿಷಯ ತಿಳಿದು ಚಾರುಮತಿ ಶಾಕ್ ಆಗಿದ್ದಾರೆ.

ದೂರು ಸಲ್ಲಿಕೆ ಮಾಡಿರುವ ಟೆಕ್ಕಿ

ದುಷ್ಕರ್ಮಿಗಳು ಯುವತಿಯ ಸ್ನ್ಯಾಪ್‌ಚಾಟ್ ಖಾತೆಯನ್ನು ಹ್ಯಾಕ್ ಮಾಡಿ, ಅದರಲ್ಲಿದ್ದ ಅತ್ಯಂತ ವೈಯಕ್ತಿಕ ದೃಶ್ಯಗಳನ್ನು ಕದ್ದು ಪೋ*ರ್ನ್ ವೆಬ್‌ಸೈಟ್‌ಗೆ ಹರಿದುಬಿಟ್ಟಿದ್ದಾರೆ. ತಮ್ಮ ಖಾಸಗಿ ಫೋಟೋಗಳನ್ನು ಪೋರ್ನ್ ತಾಣದಲ್ಲಿ ನೋಡಿ ತೀವ್ರ ದಿಗ್ಭ್ರಮೆಗೊಂಡ ಟೆಕ್ಕಿ ಚಾರುಮತಿ, ತಕ್ಷಣವೇ ಪೂರ್ವ ವಿಭಾಗದ ಸೆನ್ (CEN) ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.

ಚಾರುಮತಿ ಸಲ್ಲಿಕೆ ಮಾಡಿರುವ ದೂರಿನಲ್ಲಿ ಏನಿದೆ?

ಚಾರುಮತಿ ಸಲ್ಲಿಸಿರುವ ದೂರಿನಲ್ಲಿ ಸಾಮಾಜಿಕ ಜಾಲತಾಣಗಳಿಂದ ತಮ್ಮ ಖಾಸಗಿ ಫೋಟೋ-ವೀಡಿಯೋಗಳನ್ನು ತಕ್ಷಣವೇ ತೆಗೆದುಹಾಕಲು (Take down) ಮತ್ತು ಈ ಕೃತ್ಯದ ಹಿಂದಿರುವ ಹ್ಯಾಕರ್ ಅಥವಾ ದುಷ್ಕರ್ಮಿಗಳನ್ನು ಪತ್ತೆಹಚ್ಚಿ ಕಠಿಣ ಕಾನೂನು ಕ್ರಮ ಕೈಗೊಳ್ಳುವಂತೆ ಮನವಿ ಮಾಡಿದ್ದಾರೆ.

ಪ್ರಿಯಕರ ಅಥವಾ ಪರಿಚಿತರು ಕೇಳಿದರೆಂದು ಖಾಸಗಿ ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುವ ಮುನ್ನ ಯುವತಿಯರು ಎಷ್ಟು ಜಾಗರೂಕರಾಗಿರಬೇಕು ಎಂಬುದಕ್ಕೆ ಈ ಘಟನೆ ಕಣ್ಣುಮುಂದಿರುವ ಉದಾಹರಣೆಯಾಗಿದೆ.

ಸತ್ಯದ ತಲೆ ಮೇಲೆ ಹೊಡೆದಂತೆ ಸುಳ್ಳು ಹೇಳಿದ್ರಾ ಜಿರಳೆ ದೀಪ್ಕೆ: ವಿಡಿಯೋ ರಿಲೀಸ್ ಮಾಡಿ ಸಿಕ್ಕಿಹಾಕಿಸಿದ ಪೊಲೀಸರು

Suchethana D — Mon, 12 Oct 2026 11:38:08 +0530

ದೆಹಲಿ: ಕಾಕ್ರೋಚ್ ಜನತಾ ಪಕ್ಷ (CJP) ಸಂಸ್ಥಾಪಕ ಅಭಿಜೀತ್ ದೀಪ್ಕೆ ದೆಹಲಿ ಪೊಲೀಸರ ವಿರುದ್ಧ ಗಂಭೀರ ಆರೋಪ ಮಾಡಿ ತಮ್ಮ ಎಕ್ಸ್ ಖಾತೆಯಲ್ಲಿ ಪೋಸ್ಟ್ ಮಾಡಿಕೊಂಡಿದ್ದಾರೆ. ಸತ್ಯದ ತಲೆಯ ಮೇಲೆ ಹೊಡೆದಂತೆ ಪೊಲೀಸರ ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಿದ್ದಾರೆ. ಆದರೆ ಇಂಥವರ ಉದ್ದೇಶವನ್ನು ಮೊದಲೇ ಅರಿತಿದ್ದ ದೆಹಲಿ ಪೊಲೀಸರು, ಪ್ರತಿಯೊಂದು ಘಟನೆಯ ವಿಡಿಯೋ ಮಾಡಿದ್ದು, ಅದನ್ನು ರಿಲೀಸ್ ಮಾಡುವ ಮೂಲಕ ದೀಪ್ಕೆಯ ಆಟಕ್ಕೆ ತೆರೆ ಬೀಳಿಸಿದ್ದಾರೆ. ಸತ್ಯ ಏನು ಎನ್ನುವ ವಿಡಿಯೋ ರಿಲೀಸ್ ಮಾಡಿರುವ ಕಾರಣದಿಂದ ದೀಪ್ಕೆ ಪೋಸ್ಟ್ಗೆ ನೆಟ್ಟಿಗರು ಛೀಮಾರಿ ಹಾಕುತ್ತಿದ್ದಾರೆ.

ದೀಪ್ಕೆ ಪೋಸ್ಟ್ನಲ್ಲಿ ಹಾಕಿದ್ದೇನು

ದೆಹಲಿಯ ಜಂತರ್ಮಂತರ್ನಲ್ಲಿ ನಡೆದ ಪ್ರತಿಭಟನೆಯ ಸಮಯದಲ್ಲಿ ಅಭಿಜೀತ್ ದೀಪ್ಕೆ ಅವರ ಅಜ್ಜಿ ತೀರಿಕೊಂಡರು. ಆ ಸಮಯದಲ್ಲಿ ತಮಗೆ ಮಾಹಿತಿಯೇ ನೀಡಲಿಲ್ಲ ಎಂದು ಜನರು ಕಣ್ಣೀರು ಹಾಕುವಂಥ ಪೋಸ್ಟ್ ಒಂದನ್ನು ದೀಪ್ಕೆ ಹಾಕಿಕೊಂಡಿದ್ದಾರೆ. , ತಮ್ಮ ಸೋದರಸಂಬಂಧಿ ಜೊತೆ ಮಾತನಾಡಲು ಪೊಲೀಸರು ಅವಕಾಶ ನೀಡಲಿಲ್ಲ ಎಂದು ಇದರಲ್ಲಿ ಅವರು ಆರೋಪಿಸಿದ್ದಾರೆ. "ನನ್ನ ಅಜ್ಜಿಯೊಂದಿಗೆ ವಾಸಿಸುವ ನನ್ನ ಸೋದರಸಂಬಂಧಿ ಜೊತೆ ಮಾತನಾಡಲು ಅವಕಾಶ ನೀಡುವಂತೆ ನಾನು ವಿನಂತಿಸಿದ್ದೆ. ಕನಿಷ್ಠ ನನ್ನ ಸೋದರಸಂಬಂಧಿಯ ಸಂಖ್ಯೆಯನ್ನು ತೆಗೆದುಕೊಳ್ಳಲು ಕೇವಲ ಒಂದೆರಡು ನಿಮಿಷಗಳ ಕಾಲ ನನ್ನ ಫೋನ್ ಕೇಳಿದ್ದೆ. ದೆಹಲಿ ಪೊಲೀಸರು ನನ್ನ ಫೋನ್ ಬಳಸಲು ಏಕೆ ಬಿಡಲಿಲ್ಲ? ನಾನು ವಕೀಲರೊಂದಿಗೆ ಕರೆ ಮಾಡಲು ಸಹ ಕೇಳಿದ್ದೆ, ಅದನ್ನು ಮತ್ತೆ ನಿರಾಕರಿಸಲಾಯಿತು" ಎಂದು ಅವರು X ನಲ್ಲಿ ಬರೆದಿದ್ದಾರೆ.

ವಿಡಿಯೋ ರಿಲೀಸ್: ಸಿಕ್ಕಿಬಿದ್ದ ದೀಪ್ಕೆ

"ಬೆಳಿಗ್ಗೆ 3:30 ಕ್ಕೆ, ದೆಹಲಿ ಪೊಲೀಸರು ನನ್ನ ತಂದೆಗೆ ಕರೆ ಮಾಡಿ ನಾಳೆ ನಾನು ದೀರ್ಘಕಾಲ ಜೈಲಿಗೆ ಹೋಗುತ್ತೇನೆ ಎಂದು ತಿಳಿಸಲು ಕೇಳಿಕೊಂಡರು. ತಾಯಿಯನ್ನು ಕಳೆದುಕೊಂಡ ಅದೇ ತಂದೆಗೆ ಅವರು ಕರೆ ಮಾಡಿದ್ದರು. ನಾವು ಈಗಾಗಲೇ ನನ್ನ ಅಜ್ಜಿಯನ್ನು ಕಳೆದುಕೊಂಡ ನಂತರ ನೀವು ನನ್ನ ಕುಟುಂಬಕ್ಕೆ ಇನ್ನೂ ಎಷ್ಟು ಆಘಾತವನ್ನುಂಟುಮಾಡಲು ಬಯಸಿದ್ದೀರಿ ಎಂದೆಲ್ಲಾ ಎಕ್ಸ್ನಲ್ಲಿ ಆರೋಪಿಸಿದ್ದಾರೆ. ಆದರೆ ಅಜ್ಜಿ ಸತ್ತ ವಿಷಯವನ್ನು ದೆಹಲಿಯ ಪೊಲೀಸರು ಕಾಲ ಮೇಲೆ ಕಾಲು ಹಾಕಿ ಕುಳಿತಿದ್ದ ದೀಪ್ಕೆಗೆ ಎಷ್ಟು ವಿನಮ್ರದಿಂದ ಹೇಳಿದ್ದರು ಎನ್ನುವ ವಿಡಿಯೋ ಅನ್ನು ಪೊಲೀಸರು ರಿಲೀಸ್ ಮಾಡುವ ಮೂಲಕ ದೀಪ್ಕೆಯ ಸುಳ್ಳಿನ ಸರಮಾಲೆಗೆ ಅಂತ್ಯ ಹಾಡಿದ್ದಾರೆ!

ವೈರಲ್ ಆಗಿರೋ ವಿಡಿಯೋದಲ್ಲಿ ಮೊದಲಿಗೆ ಲೇಡಿ ಪೊಲೀಸರು ದೀಪ್ಕೆ ಬಳಿ ಬಂದು ಸಾವಿನ ಸುದ್ದಿಯನ್ನು ತಿಳಿಸಿದ್ದಾರೆ. ಬಳಿಕ ಪೊಲೀಸರೇ ಬಂದು ಒಂದು ಸಾವಿನ ಸುದ್ದಿಯನ್ನು ಹೇಗೆ ತಿಳಿಸಬೇಕು ಎನ್ನುವ ನೋವಿನಲ್ಲಿಯೇ ದೀಪ್ಕೆಗೆ ತಿಳಿಸಿದ್ದು, ಅದನ್ನು ಕೇಳಿ ದೀಪ್ಕೆ ಒಂದು ಕ್ಷಣ ವಿಚಲಿತ ಆಗಿರುವುದನ್ನು ವಿಡಿಯೋದಲ್ಲಿ ನೋಡಬಹುದು. ಆದರೆ ದೀಪ್ಕೆ ತಮ್ಮ ಎಕ್ಸ್ ಪೋಸ್ಟ್ನಲ್ಲಿ ಹೇಳಿದ್ದೇ ಬೇರೆ. ಪೊಲೀಸರು ತಮ್ಮ ವಿರುದ್ಧ ಅನುಚಿತವಾಗಿ ನಡೆಸಿಕೊಂಡರು ಎನ್ನುವುದಾಗಿ ಹೇಳಿ ಈಗ ಸಿಕ್ಕಿಬಿದ್ದಿದ್ದಾರೆ.

View this post on Instagram

A post shared by DD News (@ddnews_official)

ಗುಂಡಿನ ದಾಳಿ ಬಳಿಕ ಡ್ರೈವಿಂಗ್ ಮಾಡಿ ಚಾಲಕನನ್ನು ಆಸ್ಪತ್ರೆಗೆ ಕರೆದೊಯ್ದ ಟೈಗರ್ ಶ್ರಾಫ್; ನೆಟ್ಟಿಗರು ಹೇಳಿದ್ದೇನು ಗೊತ್ತಾ?

Shriram Bhat — Mon, 19 Oct 2026 18:10:59 +0530

ಗುಂಡಿನ ದಾಳಿ ಬಳಿಕ ಡ್ರೈವಿಂಗ್ ಮಾಡಿ ಚಾಲಕನನ್ನು ಆಸ್ಪತ್ರೆಗೆ ಕರೆದೊಯ್ದ ಟೈಗರ್ ಶ್ರಾಫ್. Tiger Shroff for moving to driver seat and taking him to Nanavati hospital after gun fire incident.

ಗುಂಡಿನ ದಾಳಿ ಬಳಿಕ ಚಾಲಕನ ಜೀವ ಉಳಿಸಲು ಮುಂದಾದ ಟೈಗರ್ ಶ್ರಾಫ್; ‘ನಿಜವಾದ ಧೈರ್ಯ ಅಂದ್ರೆ ಇದೇ’ ಎಂದ ನೆಟ್ಟಿಗರು!

ಬಾಲಿವುಡ್ ನಟ ಟೈಗರ್ ಶ್ರಾಫ್ ಅವರ ಕಾರಿನ ಮೇಲೆ ಮುಂಬೈನಲ್ಲಿ ನಡೆದ ಗುಂಡಿನ ದಾಳಿ ಅಭಿಮಾನಿಗಳಲ್ಲಿ ಆತಂಕ ಮೂಡಿಸಿತ್ತು. ಆದರೆ, ಈ ಘಟನೆಯ ಬಳಿಕ ನಟ ತೋರಿದ ಸಮಯಪ್ರಜ್ಞೆ ಮತ್ತು ಮಾನವೀಯ ನಡೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಗುಂಡಿನ ದಾಳಿಯಲ್ಲಿ ಗಾಯಗೊಂಡ ತಮ್ಮ ಚಾಲಕನನ್ನು ಆಸ್ಪತ್ರೆಗೆ ಕರೆದೊಯ್ಯಲು ಟೈಗರ್ ಸ್ವತಃ ಡ್ರೈವರ್ ಸೀಟ್‌ಗೆ ತೆರಳಿ ಕಾರು ಚಲಾಯಿಸಿದ್ದಾರೆ ಎನ್ನಲಾದ ವಿಡಿಯೋ ಇದೀಗ ಗಮನ ಸೆಳೆಯುತ್ತಿದೆ.

ಭಾನುವಾರ ಸಂಜೆ ಜುಹೂ ಪ್ರದೇಶದ ಫುಟ್‌ಬಾಲ್ ಕ್ಲಬ್‌ನಿಂದ ಮನೆಗೆ ಮರಳುತ್ತಿದ್ದ ವೇಳೆ ಟೈಗರ್ ಶ್ರಾಫ್ ಅವರ ಕಾರಿನ ಮೇಲೆ ಅಪರಿಚಿತ ದುಷ್ಕರ್ಮಿಗಳು ಗುಂಡು ಹಾರಿಸಿದ್ದಾರೆ ಎಂದು ವರದಿಯಾಗಿದೆ. ಮೋಟಾರ್‌ಸೈಕಲ್‌ನಲ್ಲಿ ಬಂದ ಮೂವರು ಕಾರನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಿದ್ದಾರೆ ಎನ್ನಲಾಗಿದೆ. ಈ ವೇಳೆ ಕಾರಿನಲ್ಲಿದ್ದ ಚಾಲಕ ಫಿರ್ದೌಸ್ ಗಾಯಗೊಂಡಿದ್ದು, ಟೈಗರ್ ಶ್ರಾಫ್ ಯಾವುದೇ ಗುಂಡೇಟಿನ ಗಾಯಗಳಿಲ್ಲದೆ ಪಾರಾಗಿದ್ದಾರೆ. ಗನ್‌ಪೌಡರ್ ಮತ್ತು ಒಡೆದ ಗಾಜಿನ ಚೂರುಗಳಿಂದ ಅವರಿಗೆ ಸಣ್ಣಪುಟ್ಟ ಗಾಯಗಳಾಗಿವೆ ಎಂದು ವರದಿಗಳು ತಿಳಿಸಿವೆ.

ಚಾಲಕನಿಗಾಗಿ ತಾವೇ ಕಾರು ಚಲಾಯಿಸಿದ ನಟ!

ಆನ್‌ಲೈನ್‌ನಲ್ಲಿ ಹರಿದಾಡುತ್ತಿರುವ ವಿಡಿಯೋದಲ್ಲಿ, ಚಾಲಕ ಗಾಯಗೊಂಡ ಬಳಿಕ ಟೈಗರ್ ಶ್ರಾಫ್ ಡ್ರೈವರ್ ಸೀಟ್‌ಗೆ ಬಂದು ಕಾರನ್ನು ಮುಂಬೈನ ನಾನಾವತಿ ಆಸ್ಪತ್ರೆಗೆ ಕರೆದೊಯ್ಯುತ್ತಿರುವ ದೃಶ್ಯವಿದೆ ಎನ್ನಲಾಗಿದೆ. ತುರ್ತು ಪರಿಸ್ಥಿತಿಯಲ್ಲಿ ನೆರವಿಗಾಗಿ ಕಾಯದೆ ಗಾಯಾಳು ಚಾಲಕನಿಗೆ ತಕ್ಷಣ ವೈದ್ಯಕೀಯ ಚಿಕಿತ್ಸೆ ದೊರೆಯುವಂತೆ ಮಾಡಿದ ಅವರ ನಡೆಗೆ ಅಭಿಮಾನಿಗಳು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ವರದಿಯೊಂದರ ಪ್ರಕಾರ, ಚಾಲಕ ಫಿರ್ದೌಸ್ ಅವರ ಎಡಗೈನಲ್ಲಿ ಗುಂಡಿನ ಗಾಯದಿಂದಾಗಿ ವಿದೇಶಿ ವಸ್ತುವೊಂದು ಸಿಲುಕಿರುವುದು ಪ್ರಾಥಮಿಕ ಸ್ಕ್ಯಾನ್‌ನಲ್ಲಿ ಕಂಡುಬಂದಿದೆ. ಘಟನೆಯ ಕುರಿತು ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.

‘ನಿಜವಾದ ಹೀರೋ ಅಂದ್ರೆ ಇವರೇ!’

ವಿಡಿಯೋ ನೋಡಿದ ನೆಟ್ಟಿಗರು ಟೈಗರ್ ಅವರ ಸಮಯಪ್ರಜ್ಞೆಯನ್ನು ಕೊಂಡಾಡುತ್ತಿದ್ದಾರೆ. “ನಿಜವಾದ ಧೈರ್ಯ ಮತ್ತು ಸಾಹಸ ಎಂದರೆ ಇದೇ” ಎಂದು ಒಬ್ಬರು ಕಾಮೆಂಟ್ ಮಾಡಿದ್ದಾರೆ. ಮತ್ತೊಬ್ಬರು, “ಗುಂಡಿನ ದಾಳಿಯ ಬಳಿಕವೂ ಗಾಬರಿಯಾಗದೆ ಚಾಲಕನ ಸೀಟ್‌ಗೆ ಬಂದು ಕಾರು ಚಲಾಯಿಸಿದ ಟೈಗರ್ ಶ್ರಾಫ್ ಅವರ ಸಮಯಪ್ರಜ್ಞೆ ಅದ್ಭುತ” ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಈ ಗುಂಡಿನ ದಾಳಿಯ ಹಿಂದಿನ ಕಾರಣವೇನು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಮುಂಬೈ ಪೊಲೀಸರು ಪ್ರಕರಣದ ತನಿಖೆ ನಡೆಸುತ್ತಿದ್ದು, ಚಾಲಕನ ಹೇಳಿಕೆಯನ್ನೂ ದಾಖಲಿಸಿಕೊಂಡಿದ್ದಾರೆ ಎನ್ನಲಾಗಿದೆ. ಸದ್ಯ ಟೈಗರ್ ಶ್ರಾಫ್ ಅವರ ಸಾಹಸದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಯ ವಿಷಯವಾಗಿದ್ದು, ಅಭಿಮಾನಿಗಳು ಅವರನ್ನು ನಿಜ ಜೀವನದ ಹೀರೋ ಎಂದು ಬಣ್ಣಿಸುತ್ತಿದ್ದಾರೆ.

'ವಂದೇ ಮಾತರಂ' ಹೇಳಿದಾಕೆಯ ಕಣ್ಣಿಗೆ ಪೆಪ್ಪರ್ ಸ್ಪ್ರೇ ಹಾಕಿದ ಲೇಡಿ ಜಿರಳೆ: ವಿಡಿಯೋ ವೈರಲ್

Suchethana D — Sun, 11 Oct 2026 18:29:17 +0530

ದೆಹಲಿ: ಭಾರತದ ಉದ್ಧಾರ ಮಾಡಲು, ಇಲ್ಲಿನ ಶಿಕ್ಷಣ ಸುಧಾರಣೆ ಮಾಡುವ ಸಲುವಾಗಿ ಅಮೆರಿಕದಿಂದ, ಜರ್ಮನಿಯಿಂದ ಬಂದಿರೋ ಅಭಿಜೀತ್ ದೀಪ್ಕೆ, ಧ್ರುವ್ ರಾಠೀ ಅವರ ಕಾಕ್ರೋಚ್ ಜನತಾ ಪಕ್ಷ (CJP)ದ ಹಿಂದಿರುವ ಉದ್ದೇಶ ಏನು, ಹೇಳಿದ ತಕ್ಷಣ ತಮ್ಮವರನ್ನೆಲ್ಲಾ ಕರೆದುಕೊಂಡು ವಿಮಾನದ ಐಷಾರಾಮಿ ಕ್ಲಾಸ್ನಲ್ಲಿಯೇ ಭಾರತಕ್ಕೆ ಓಡೋಡಿ ಬರಲು ಇವರಿಗೆ ಲಕ್ಷ ಲಕ್ಷ ಹಣ ಫಂಡಿಂಗ್ ಎಲ್ಲಿಂದ ಬರುತ್ತಿದೆ ಎನ್ನುವ ಬಗ್ಗೆ ಇದಾಗಲೇ ಸಾಕಷ್ಟು ಚರ್ಚೆ ನಡೆಯುತ್ತಿದೆ. ಇವರ ಎಜೆಂಡಾ ಏನು, ಶಿಕ್ಷಣ ಸುಧಾರಣೆ ಹೆಸರಲ್ಲಿ ಈಗ SIR ಹೆಸರಿನಲ್ಲಿ ಭಾರತದ ಜೆನ್ ಜೀಗಳನ್ನು ಪ್ರಚೋದಿಸಿ, ಇಲ್ಲಿ ನೇಪಾಳನೋ, ಫ್ರಾನ್ಸ್ ರೀತಿಯೋ ಬೆಂಕಿ ಹಚ್ಚಿಸುವ ವಿಫಲ ಪ್ರಯತ್ನ ನಡೆಯುತ್ತಲೇ ಇದೆ. ಇವರಿಗೆ ಇಲ್ಲಿ ಬೇಕಿರುವುದು ಅಮಾಯಕರ ಸಾವು. ಲಾಠಿ ಚಾರ್ಜ್ ಮಾಡಿಯೋ, ಇನ್ನೇನೋ ಮಾಡಿ ಒಂದೆರಡು ಸಾವು ಆದ ಮೇಲೆ ಕೇಂದ್ರ ಸರ್ಕಾರದ ಮೇಲೆ ಗೂಬೆ ಕೂಡಿಸುವವರೆಗೂ ಇವರು ಇಲ್ಲಿಂದ ಹೋಗಲ್ಲ ಎನ್ನುವ ಗಂಭೀರ ಆರೋಪಗಳೂ ಇವರ ಮೇಲಿದೆ. ಇದಕ್ಕೆ ತಕ್ಕಂತೆ ದೇಶದ ಒಳಗೇ ಇದ್ದು, ಇವರಿಗೆ ಕೈಜೋಡಿಸುತ್ತಿರುವವರೂ ಇದ್ದಾರೆ.

ಸಿಜೆಪಿ ಪ್ರತಿಭಟನೆ

ಇದೀಗ SIR ಪ್ರಕ್ರಿಯೆ ಮುಂದಿಟ್ಟುಕೊಂಡು ಸಿಜೆಪಿ ಪ್ರತಿಭಟನೆ ನಡೆಸುತ್ತಿದೆ. ಹಿಂದೆ ಇದೇ ನೆಪ ಇಟ್ಟುಕೊಂಡು ಪ್ರತಿಭಟನೆ ಮಾಡಿದಾಗ, ಕಲ್ಲು ತೂರಲು ಒಂದಿಷ್ಟು ಜನ ಬಂದಿದ್ದರು. ಅರಾಜಕತೆ ಸೃಷ್ಟಿಸಲು ಮತ್ತೊಂದಿಷ್ಟು ಜನ ಸೇರಿದ್ದರು. ಈ ಬಾಹ್ಯ ಶಕ್ತಿಗಳು ಎಲ್ಲಿಂದ ಬಂದಿವೆ ಎಂದು ಅರಿತೇ ಈ ಬಾರಿ ಅವರಿಗೆ ದೆಹಲಿಯ ಜಂತರ್ಮಂತರ್ನಲ್ಲಿ ಅವಕಾಶ ಕಲ್ಪಿಸಿರಲಿಲ್ಲ. ಇದರ ನಡುವೆಯೂ ಈ ಜಿರಳೆಗಳು ಸೃಷ್ಟಿಸಿರುವ ಅವಾಂತರಗಳ ಬಗ್ಗೆ ಶಾಕಿಂಗ್ ಎನ್ನುವಂಥ ವಿಡಿಯೋಗಳು ವೈರಲ್ ಆಗುತ್ತಲೇ ಇವೆ.

ಇದೀಗ, ಯುಟ್ಯೂಬರ್ ಯುವತಿಯೊಬ್ಬಳು, ಈ ಪ್ರತಿಭಟನೆಯ ಹಿಂದಿರುವ ಉದ್ದೇಶ ಏನು ಎಂದು ಪ್ರಶ್ನಿಸಿದಾಗ, ಲೇಡಿ ಜಿರಳೆಗಳು ಈಕೆಯನ್ನು ಸುತ್ತುವರೆದು ಧಮ್ಕಿ ಹಾಕಲು ಶುರು ಮಾಡಿದರು. ಅದರ ಮಧ್ಯೆಯೇ ಈ ಯುವತಿ ವಂದೇ ಮಾತರಂ ಎಂದು ಹಾಡಿದಾಗ, ಹಿಂಬದಿಯಿದ್ದ ಲೇಡಿ ಕಾಕ್ರೋಚ್ ಪೆಪ್ಪರ್ ಸ್ಪ್ರೇಯನ್ನು ಕಣ್ಣಿಗೆ ಸಿಡಿಸಿದ್ದಾಳೆ ಎಂದರೆ, ಪ್ರತಿಭಟನೆಗೆ ಅದನ್ನೂ ತಂದಿರುವುದು ಖಚಿತವಾಗಿದೆ. ಗಂಡಸರು ಕಲ್ಲು ತಂದರೆ, ಹೆಣ್ಣು ಜಿರಳೆಗಳು ಪೆಪ್ಪರ್ ಸ್ಪ್ರೇ ತಂದಿರುವುದು ಇದೀಗ ಈ ಪ್ರತಿಭಟನೆಯ ಹಿಂದಿರುವ ಉದ್ದೇಶದ ಬಗ್ಗೆ ದೊಡ್ಡ ಮಟ್ಟದಲ್ಲಿ ಚರ್ಚೆಯಾಗುತ್ತಿದೆ.

ವಂದೇ ಮಾತರಂ

ಭಾರತದಲ್ಲಿ ಇದ್ದುಕೊಂಡು ವಂದೇ ಮಾತರಂ ಕೇಳಲು ಆಗದ ಈ ಯುವ ಮನಸ್ಸುಗಳು ನಿಜಕ್ಕೂ ಭಾರತ ಉದ್ಧಾರ ಮಾಡಲು ಬಂದಿವ್ಯಾ? ಇವರಿಗೆ ಶಿಕ್ಷಣದ ಸುಧಾರಣೆ, ಮತದಾರರ ಪಟ್ಟಿಯಲ್ಲಿನ ಸುಧಾರಣೆ ಆಗಬೇಕೋ ಅಥವಾ ಇನ್ನೇನೋ ಎನ್ನುವ ಪ್ರಶ್ನೆಯನ್ನು ನೆಟ್ಟಿಗರು ಕೇಳುತ್ತಿದ್ದಾರೆ. ಇದಾಗಲೇ ಬೆಂಗಳೂರಿಗೆ ಬಂದಿದ್ದ ಪ್ರತಿಭಟನಾಕಾರರನ್ನು ಮಾಧ್ಯಮಗಳು ಮಾತನಾಡಿಸಿದಾಗ ನಮಗೆ ಪ್ರತಿಭಟನೆಗೆ ಬಂದರೆ ನಿವೇಶನ ಕೊಡಿಸುತ್ತೇವೆ ಎಂದಿದ್ದರು, ಅದಕ್ಕಾಗಿ ಬಂದಿದ್ದೇವೆ ಎನ್ನುತ್ತಿದ್ದಾರೆಯೇ ವಿನಾ ತಾವ್ಯಾಕೆ ಬಂದಿದ್ದು ಎನ್ನೋದೇ ಇವರಿಗೆ ಗೊತ್ತಿರಲಿಲ್ಲ ಎಂದ ಮೇಲೆ, ಇವರ ಉದ್ದೇಶ ಏನು ಎಂದು ನೆಟ್ಟಿಗರು ಪ್ರಶ್ನೆ ಮಾಡುತ್ತಿದ್ದಾರೆ.

TIGER SHROFF: ಗುಂಡಿನ ದಾಳಿ ಬಳಿಕ ಟೈಗರ್‌ ಶ್ರಾಫ್‌ ಹೇಗಿದ್ದಾರೆ? ಅವ್ರ ಬಂಗ್ಲೆಯಲ್ಲಿ ಪರಿಸ್ಥಿತಿ ಹೇಗಿದೆ?

Shriram Bhat — Mon, 19 Oct 2026 10:34:27 +0530

ಗುಂಡಿನ ದಾಳಿ ಬಳಿಕ ಟೈಗರ್ ಶ್ರಾಫ್ ಹೇಗಿದ್ದಾರೆ? ಬ್ಯಾಂಡೇಜ್ ಹಾಕಿಕೊಂಡಿರುವ ನಟನ ಫೋಟೋ ವೈರಲ್!

ಬಾಲಿವುಡ್‌ನ ಆ್ಯಕ್ಷನ್ ಹೀರೋ ಟೈಗರ್ ಶ್ರಾಫ್ (Tiger Shroff) ಅವರ ಮೇಲೆ ನಡೆದ ಗುಂಡಿನ ದಾಳಿಯ ಘಟನೆ ಅಭಿಮಾನಿಗಳಲ್ಲಿ ಆತಂಕ ಮೂಡಿಸಿದೆ. ಮುಂಬೈನ ಜುಹೂ ಪ್ರದೇಶದಲ್ಲಿ ನಡೆದ ಈ ಘಟನೆ ಬಳಿಕ ನಟನ ಆರೋಗ್ಯದ ಬಗ್ಗೆ ಹಲವು ಚರ್ಚೆಗಳು ನಡೆಯುತ್ತಿದ್ದು, ಇದೀಗ ಅವರ ನಿವಾಸದಲ್ಲಿ ತೆಗೆದ ಫೋಟೋವೊಂದು ವೈರಲ್ ಆಗಿದೆ. ಎದೆ, ಹೆಗಲು ಮತ್ತು ಎಡಗೈಗೆ ವೈದ್ಯಕೀಯ ಬ್ಯಾಂಡೇಜ್ ಹಾಕಿಕೊಂಡು ಸೋಫಾದ ಮೇಲೆ ಕುಳಿತಿರುವ ಟೈಗರ್ ಅವರ ಚಿತ್ರ ಅಭಿಮಾನಿಗಳ ಗಮನ ಸೆಳೆದಿದೆ. ಟೈಗರ್ ಶ್ರಾಫ್ ಮನೆಯಲ್ಲಿ ಸಹಜವಾಗಿಯೇ ನೀರವ ಮೌನ ಆವರಿಸಿದೆ. ಟೈಗರ್ ಶ್ರಾಫ್ ಜೀವಕ್ಕೇನೂ ಅಪಾಯವಾಗಿಲ್ಲ, ಆದರೆ ಜೀವಭಯದಿಂದ ಓಡಾಡುವಂತಾಗಿದೆ ಎಂಬ ಸಹಜ ಚಿಂತೆ ಅವರನ್ನು ಕಾಡುತ್ತಿದೆ ಎನ್ನಲಾಗಿದೆ.

ವರದಿಗಳ ಪ್ರಕಾರ, ಭಾನುವಾರ ಸಂಜೆ ಜುಹೂನ ಪುಷ್ಪಾ ಪಾರ್ಕ್ ಸಮೀಪದ ಫುಟ್ಬಾಲ್ ಮೈದಾನದಿಂದ ಟೈಗರ್ ಶ್ರಾಫ್ ತಮ್ಮ ಬಿಎಂಡಬ್ಲ್ಯೂ ಕಾರಿನಲ್ಲಿ ಹೊರಡುತ್ತಿದ್ದಾಗ ಈ ಘಟನೆ ನಡೆದಿದೆ. ಮೋಟಾರ್ ಸೈಕಲ್‌ನಲ್ಲಿ ಬಂದ ಮೂವರು ದುಷ್ಕರ್ಮಿಗಳು ನಟನ ಕಾರನ್ನು ಗುರಿಯಾಗಿಸಿಕೊಂಡು ಐದು ಸುತ್ತು ಗುಂಡು ಹಾರಿಸಿದ್ದಾರೆ ಎನ್ನಲಾಗಿದೆ. ಅದೃಷ್ಟವಶಾತ್, ಈ ಘಟನೆಯಲ್ಲಿ ನಟ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಕಾರಿನ ಗಾಜಿನ ಚೂರುಗಳು ಮತ್ತು ಗನ್‌ಪೌಡರ್‌ನಿಂದ ಅವರಿಗೆ ಸಣ್ಣಪುಟ್ಟ ಗಾಯಗಳಾಗಿವೆ ಎಂದು ವರದಿಯಾಗಿದೆ.

ಟೈಗರ್ ಆರೋಗ್ಯ ವಿಚಾರಿಸಿದ ಏಕನಾಥ್ ಶಿಂಧೆ

ಘಟನೆಯ ಬಳಿಕ ಮಹಾರಾಷ್ಟ್ರದ ಉಪಮುಖ್ಯಮಂತ್ರಿ ಏಕನಾಥ್ ಶಿಂಧೆ ಅವರು ಟೈಗರ್ ಶ್ರಾಫ್ ನಿವಾಸಕ್ಕೆ ಭೇಟಿ ನೀಡಿ ಆರೋಗ್ಯ ವಿಚಾರಿಸಿದ್ದಾರೆ. ಈ ಸಂದರ್ಭದಲ್ಲಿ ನಟನ ತಾಯಿ ಆಯೇಷಾ ಶ್ರಾಫ್ ಕೂಡ ಉಪಸ್ಥಿತರಿದ್ದರು. ಘಟನೆಯ ಗಂಭೀರತೆಯನ್ನು ಪರಿಗಣಿಸಿದ ಶಿಂಧೆ, ಮುಂಬೈ ಪೊಲೀಸ್ ಕಮಿಷನರ್ ಅವರೊಂದಿಗೆ ಮಾತುಕತೆ ನಡೆಸಿ, ದಾಳಿಕೋರರನ್ನು ಪತ್ತೆಹಚ್ಚಿ ಬಂಧಿಸಲು ವಿಶೇಷ ಪೊಲೀಸ್ ತಂಡಗಳನ್ನು ರಚಿಸುವಂತೆ ಸೂಚಿಸಿದ್ದಾರೆ.

ಭೇಟಿಯ ಬಳಿಕ ಮಾತನಾಡಿದ ಉಪಮುಖ್ಯಮಂತ್ರಿಗಳು, ಮುಂಬೈನಲ್ಲಿ ಬೆದರಿಕೆ ಮತ್ತು ಹಿಂಸಾಚಾರದ ಮೂಲಕ ಪ್ರಾಬಲ್ಯ ಸಾಧಿಸಲು ಯಾರಿಗೂ ಅವಕಾಶ ನೀಡುವುದಿಲ್ಲ ಎಂದು ಖಡಕ್ ಎಚ್ಚರಿಕೆ ನೀಡಿದ್ದಾರೆ. ಭಯದ ವಾತಾವರಣ ಸೃಷ್ಟಿಸುವ ಯಾವುದೇ ಗ್ಯಾಂಗ್‌ಗಳ ವಿರುದ್ಧ ಸರ್ಕಾರ ಕಠಿಣ ಕ್ರಮ ಕೈಗೊಳ್ಳಲಿದೆ ಎಂದು ಹೇಳಿದ್ದಾರೆ. ಇದೇ ವೇಳೆ, 1990ರ ದಶಕದಲ್ಲಿ ಮುಂಬೈನಲ್ಲಿ ಹೆಚ್ಚಾಗಿದ್ದ ಗ್ಯಾಂಗ್‌ವಾರ್‌ಗಳನ್ನು ನಿಯಂತ್ರಿಸಿದ ದಿನಗಳನ್ನು ಅವರು ನೆನಪಿಸಿಕೊಂಡಿದ್ದಾರೆ.

ಸೆಲೆಬ್ರಿಟಿಗಳ ಸುರಕ್ಷತೆ ಬಗ್ಗೆ ಮತ್ತೆ ಚರ್ಚೆ

ಟೈಗರ್ ಶ್ರಾಫ್ ಮೇಲಿನ ದಾಳಿಯ ಹಿನ್ನೆಲೆಯಲ್ಲಿ ಬಾಲಿವುಡ್ ಸೆಲೆಬ್ರಿಟಿಗಳ ಭದ್ರತೆ ವಿಚಾರ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ. ನಟ ಸಲ್ಮಾನ್ ಖಾನ್ ಅವರ ಹೆಸರನ್ನೂ ಉಲ್ಲೇಖಿಸಲಾಗಿದೆ ಎನ್ನಲಾದ ಬಿಷ್ಣೋಯ್ ಗ್ಯಾಂಗ್‌ನ ಆಡಿಯೋ ಸಂದೇಶದ ಕುರಿತು ಚರ್ಚೆಗಳು ನಡೆಯುತ್ತಿರುವ ಬೆನ್ನಲ್ಲೇ ಈ ಘಟನೆ ಆತಂಕ ಹೆಚ್ಚಿಸಿದೆ. ಸೆಲೆಬ್ರಿಟಿಗಳಾಗಲಿ, ಸಾಮಾನ್ಯ ನಾಗರಿಕರಾಗಲಿ ಪ್ರತಿಯೊಬ್ಬರ ಜೀವದ ರಕ್ಷಣೆ ಸರ್ಕಾರದ ಜವಾಬ್ದಾರಿ ಎಂದು ಶಿಂಧೆ ಒತ್ತಿಹೇಳಿದ್ದಾರೆ.

ಟೈಗರ್ ಅವರ ಬ್ಯಾಂಡೇಜ್ ಹಾಕಿಕೊಂಡಿರುವ ಫೋಟೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ನಟ ಶೀಘ್ರವಾಗಿ ಚೇತರಿಸಿಕೊಳ್ಳಲಿ ಎಂದು ಅಭಿಮಾನಿಗಳು ಹಾರೈಸುತ್ತಿದ್ದಾರೆ.

Who Is Anil Pandit: ಟೈಗರ್ ಶ್ರಾಫ್ ಮೇಲೆ ಫೈರಿಂಗ್, ಸಲ್ಮಾನ್ ಖಾನ್‌ಗೆ ಬೆದರಿಕೆ ಹಾಕಿದ ಅನಿಲ್ ಪಂಡಿತ್ ಯಾರು, ಎಲ್ಲಿದ್ದಾನೆ?

Shriram Bhat — Mon, 19 Oct 2026 10:58:57 +0530

ಅನಿಲ್ ಪಂಡಿತ್ ಯಾರು, ಎಲ್ಲಿದ್ದಾನೆ?

ಮುಂಬೈನಲ್ಲಿ ನಟ ಟೈಗರ್ ಶ್ರಾಫ್ ಕಾರಿನ ಮೇಲೆ ನಡೆದ ಫೈರಿಂಗ್ ಪ್ರಕರಣ ಈಗ ಅಮೆರಿಕದಲ್ಲಿರುವ ಗ್ಯಾಂಗ್‌ಸ್ಟರ್ ಅನಿಲ್ ಪಂಡಿತ್ ಕಡೆ ತಿರುಗಿದೆ. ಭದ್ರತಾ ಏಜೆನ್ಸಿಗಳಿಗೆ ಸಿಕ್ಕಿರುವ ಆಡಿಯೋದಲ್ಲಿ ಈ ದಾಳಿಯ ಹೊಣೆಯನ್ನು ಪಂಡಿತ್ ಹೊತ್ತುಕೊಂಡಿದ್ದಾನೆ. ಈ ಆಡಿಯೋದಲ್ಲಿ ಆತ ಬಾಲಿವುಡ್ ಗಣ್ಯರಿಗೆ ಬೆದರಿಕೆ ಹಾಕಿದ್ದಾನೆ. ಜೊತೆಗೆ ತನ್ನ ಸಹಚರನ ಹೆಸರನ್ನು ಹೇಳಿ, ಸಲ್ಮಾನ್ ಖಾನ್ ಜೊತೆ ಗುರುತಿಸಿಕೊಂಡವರಿಗೂ ವಾರ್ನಿಂಗ್ ಕೊಟ್ಟಿದ್ದಾನೆ. ಆದರೆ, ಈ ಘಟನೆಯಲ್ಲಿ ಆತನ ಪಾತ್ರವನ್ನು ತನಿಖಾಧಿಕಾರಿಗಳು ಇನ್ನೂ ಖಚಿತಪಡಿಸಿಲ್ಲ.

ಅನಿಲ್ ಪಂಡಿತ್ ಯಾರು? ಬಿಷ್ಣೋಯ್ ಗ್ಯಾಂಗ್ ಜೊತೆ ಈತನ ನಂಟೇನು?

ಅನಿಲ್ ಪಂಡಿತ್ ಹರಿಯಾಣದ ಪಾಣಿಪತ್ ಮೂಲದವನು. ಆತನ ಹಿನ್ನೆಲೆ ಬಲ್ಲ ಮೂಲಗಳ ಪ್ರಕಾರ, ಭಾರತ ಬಿಡುವ ಮುನ್ನ ಆತನ ಮೇಲೆ ಯಾವುದೇ ಕ್ರಿಮಿನಲ್ ಕೇಸ್‌ಗಳು ಇರಲಿಲ್ಲ. 2024ರಲ್ಲಿ ಆತ 'ಡಂಕಿ ರೂಟ್' (ಅಕ್ರಮ ವಲಸೆ ಮಾರ್ಗ) ಮೂಲಕ ಅಮೆರಿಕಕ್ಕೆ ಹೋಗಿದ್ದಾನೆ ಎಂದು ಹೇಳಲಾಗಿದೆ.

(A post shared by indiainlast24hr ™ (@indiainlast24hr)

ಅಮೆರಿಕಕ್ಕೆ ಹೋದ ಬಳಿಕ ಪಂಡಿತ್, ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್ ಜೊತೆ ಕೆಲಸ ಮಾಡಲು ಶುರು ಮಾಡಿದ್ದಾನೆ. ಸುಮಾರು ಎಂಟು ತಿಂಗಳ ಹಿಂದೆ, ರಣದೀಪ್ ಮಲಿಕ್ ಎಂಬ ಗ್ಯಾಂಗ್ ಸದಸ್ಯನ ಜಾಗಕ್ಕೆ ಈತ ಬಂದಿದ್ದಾನೆ. ಅಂದಿನಿಂದ ಈತನ ಮೇಲೆ ಹಲವು ಕ್ರಿಮಿನಲ್ ಕೇಸ್‌ಗಳು ದಾಖಲಾಗಿವೆ ಎಂದು ಮೂಲಗಳು ತಿಳಿಸಿವೆ.

ವೈರಲ್ ಆಡಿಯೋದಲ್ಲಿ ಪಂಡಿತ್, ಲಾರೆನ್ಸ್ ಬಿಷ್ಣೋಯ್ ಹೆಸರನ್ನು ಬಳಸಿದ್ದಾನೆ. ಆದರೆ, ಆತ ನೇರವಾಗಿ ಬಿಷ್ಣೋಯ್‌ನಿಂದ ಸೂಚನೆಗಳನ್ನು ಪಡೆಯುತ್ತಿಲ್ಲ. 2022ರಿಂದ ಅಮೆರಿಕದಲ್ಲಿ ಕುಳಿತು ಆಪರೇಟ್ ಮಾಡುತ್ತಿರುವ ಹರಿ ಚಂದ್ ಜಾಟ್ ಅಲಿಯಾಸ್ ಹ್ಯಾರಿ ಬಾಕ್ಸರ್ ಈತನ ಹ್ಯಾಂಡ್ಲರ್ ಆಗಿದ್ದಾನೆ. ಈ ಬಾಕ್ಸರ್ ಮೇಲೆ ರಾಜಸ್ಥಾನ, ಪಂಜಾಬ್ ಮತ್ತು ದೆಹಲಿಯಲ್ಲಿ ಸುಲಿಗೆ, ದರೋಡೆ ಮತ್ತು ಕೊಲೆ ಯತ್ನದ ಕೇಸ್‌ಗಳಿವೆ.

ವೈರಲ್ ಆಡಿಯೋದಲ್ಲಿ ಅನಿಲ್ ಪಂಡಿತ್ ಹೇಳಿದ್ದೇನು?

ಟೈಗರ್ ಶ್ರಾಫ್ ಕಾರಿನ ಮೇಲಿನ ಫೈರಿಂಗ್ ಕೇವಲ ಒಂದು ಎಚ್ಚರಿಕೆ ಆಗಿತ್ತು, ಆದರೆ ನಟ ಅದನ್ನು ನಿರ್ಲಕ್ಷಿಸಿದ್ದಾನೆ ಎಂದು ಆಡಿಯೋದಲ್ಲಿ ಪಂಡಿತ್ ಹೇಳಿದ್ದಾನೆ. ಸಲ್ಮಾನ್ ಖಾನ್ ಜೊತೆ ಕೆಲಸ ಮಾಡುವ ಚಿತ್ರರಂಗದ ಇತರರಿಗೂ ಆತ ಬೆದರಿಕೆ ಹಾಕಿದ್ದಾನೆ.

ಲಾರೆನ್ಸ್ ಬಿಷ್ಣೋಯ್ ಮತ್ತು ಬಿಷ್ಣೋಯ್ ಸಮುದಾಯದ ಬಳಿ ಸಲ್ಮಾನ್ ಖಾನ್ ಕ್ಷಮೆ ಕೇಳಬೇಕು ಎಂದು ಆಡಿಯೋದಲ್ಲಿ ಡಿಮ್ಯಾಂಡ್ ಮಾಡಿದ್ದಾನೆ. ಇದು "ಮೊದಲ ಮತ್ತು ಕೊನೆಯ ಎಚ್ಚರಿಕೆ" ಎಂದಿರುವ ಪಂಡಿತ್, ಖಾನ್ ಕುಟುಂಬಕ್ಕೂ ಬೆದರಿಕೆ ಹಾಕಿದ್ದಾನೆ.

ಈ ಆಡಿಯೋದಲ್ಲಿ ಹರ್ಮನ್ ಸಂಧು ಎಂಬಾತನನ್ನು ತನ್ನ ಸಹಚರ ಎಂದು ಆತ ಹೆಸರಿಸಿದ್ದಾನೆ. ಆದರೆ, ಆಡಿಯೋದಲ್ಲಿರುವ ಈ ಹೇಳಿಕೆಗಳನ್ನು ಪೊಲೀಸರು ಇನ್ನೂ ದೃಢಪಡಿಸಿಲ್ಲ. ಘಟನೆಯಲ್ಲಿ ಭಾಗಿಯಾದವರ ಗುರುತು ಮತ್ತು ಪಾತ್ರವನ್ನು ತನಿಖೆ ಇನ್ನಷ್ಟೇ ಖಚಿತಪಡಿಸಬೇಕಿದೆ.

ಬಾಲಿವುಡ್‌ಗೆ ಸರಣಿ ಬೆದರಿಕೆಗಳ ಬೆನ್ನಲ್ಲೇ ಟೈಗರ್ ಶ್ರಾಫ್ ಘಟನೆ

ಜುಹುವಿನಲ್ಲಿ ನಡೆದ ಈ ಘಟನೆ, ಮನರಂಜನಾ ಕ್ಷೇತ್ರದ ಗಣ್ಯರ ಮೇಲೆ ನಡೆಯುತ್ತಿರುವ ಸರಣಿ ದಾಳಿ ಮತ್ತು ಬೆದರಿಕೆಗಳ ಮುಂದುವರಿದ ಭಾಗವಾಗಿದೆ.

ಫೆಬ್ರವರಿ 1ರಂದು ಮುಂಬೈನಲ್ಲಿರುವ ನಿರ್ದೇಶಕ ರೋಹಿತ್ ಶೆಟ್ಟಿ ಮನೆ ಹೊರಗೆ ಗುಂಡಿನ ದಾಳಿ ನಡೆದಿತ್ತು. ಆ ಬಳಿಕ ನಟ ರಣವೀರ್ ಸಿಂಗ್, ಸಲ್ಮಾನ್ ಖಾನ್ ಭಾವ ಆಯುಷ್ ಶರ್ಮಾ ಮತ್ತು ಮತ್ತೊಬ್ಬ ವ್ಯಕ್ತಿಗೆ ಬೆದರಿಕೆಗಳು ಬಂದಿದ್ದವು.

ಜೂನ್ 11ರಂದು ಪಶ್ಚಿಮ ದೆಹಲಿಯ ಪಶ್ಚಿಮ್ ವಿಹಾರ್‌ನಲ್ಲಿರುವ ಪಂಜಾಬಿ ಗಾಯಕ ಗುರು ರಾಂಧವಾ ಅವರ '24HS ಫಿಟ್‌ನೆಸ್ ಜಿಮ್' ಹೊರಗೆ ಬೆಳಗಿನ ಜಾವ 4 ಗಂಟೆ ಸುಮಾರಿಗೆ ಬೈಕ್‌ನಲ್ಲಿ ಬಂದ ಇಬ್ಬರು ಶೂಟರ್‌ಗಳು ಫೈರಿಂಗ್ ಮಾಡಿದ್ದರು. ಘಟನೆಯಲ್ಲಿ ಯಾರಿಗೂ ಗಾಯಗಳಾಗಿರಲಿಲ್ಲ. ಪೊಲೀಸರು ಸ್ಥಳದಿಂದ ಏಳು ಖಾಲಿ ಕಾಟ್ರಿಡ್ಜ್‌ಗಳನ್ನು ವಶಪಡಿಸಿಕೊಂಡಿದ್ದರು. ನಂತರ ಶೂಟರ್‌ಗಳನ್ನು ಪೊಲೀಸರು ಬಂಧಿಸಿದ್ದರು.

ಈ ಹಲವು ಘಟನೆಗಳಿಗೆ ಸಂಬಂಧಿಸಿದ ಬೆದರಿಕೆಗಳ ಹಿಂದೆ ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್ ಕೈವಾಡ ಇದೆ ಎಂದು ಹೇಳಲಾಗಿದೆ. ಇದೀಗ ಟೈಗರ್ ಶ್ರಾಫ್ ಕಾರಿನ ಮೇಲಿನ ಫೈರಿಂಗ್ ಬಳಿಕ ಪಂಡಿತ್ ಕೂಡ ಅದೇ ಗ್ಯಾಂಗ್ ಹೆಸರನ್ನು ಬಳಸಿದ್ದಾನೆ. ಹೀಗಾಗಿ ಈ ಹೊಸ ಹೇಳಿಕೆಗಳನ್ನು ಪರಿಶೀಲಿಸಿ, ಅಸಲಿ ಆರೋಪಿಗಳನ್ನು ಪತ್ತೆ ಹಚ್ಚುವ ಸವಾಲು ತನಿಖಾಧಿಕಾರಿಗಳ ಮುಂದಿದೆ.

EX LOVER: ಗುಂಡಿನ ದಾಳಿ ಬೆನ್ನಲ್ಲೇ ಟೈಗರ್ ಶ್ರಾಫ್ ಮನೆಗೆ ಓಡೋಡಿ ಬಂದ ಮಾಜಿ ಲವರ್ ದಿಶಾ ಪಟಾನಿ ಮಾಡಿದ್ದೇನು?

Shriram Bhat — Mon, 19 Oct 2026 18:55:34 +0530

ಗುಂಡಿನ ದಾಳಿಯ ಬಳಿಕ ಮಾಜಿ ಪ್ರಿಯಕರ ಟೈಗರ್ ಶ್ರಾಫ್ ಮನೆಗೆ ದೌಡಾಯಿಸಿದ ದಿಶಾ ಪಟಾಣಿ!

ಬಾಲಿವುಡ್ ನಟ ಟೈಗರ್ ಶ್ರಾಫ್ (Tiger Shroff) ಅವರ ಮುಂಬೈನ ಜುಹು ನಿವಾಸದ ಸಮೀಪ ನಡೆದ ಗುಂಡಿನ ದಾಳಿ ಚಿತ್ರರಂಗದಲ್ಲಿ ಆತಂಕ ಮೂಡಿಸಿದೆ. ಈ ಘಟನೆ ತಿಳಿಯುತ್ತಿದ್ದಂತೆ ನಟಿ ದಿಶಾ (Disha Patani) ಪಟಾಣಿ ತಕ್ಷಣವೇ ಟೈಗರ್ ಅವರ ಮನೆಗೆ ಭೇಟಿ ನೀಡಿ ಸಾಂತ್ವನ ಹೇಳಿದ್ದಾರೆ ಎನ್ನಲಾಗಿದೆ. ಪಾಪರಾಜಿಗಳ ಕ್ಯಾಮೆರಾಗಳತ್ತ ಗಮನ ಹರಿಸದೆ, ಗಂಭೀರ ಮುಖಭಾವದೊಂದಿಗೆ ಮನೆಯೊಳಗೆ ತೆರಳುತ್ತಿರುವ ದಿಶಾ ಅವರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಟೈಗರ್ ಕಾರಿನ ಮೇಲೆ ಗುಂಡಿನ ದಾಳಿ

ಭಾನುವಾರ ಸಂಜೆ ಜುಹುವಿನ ಪುಷ್ಪಾ ಪಾರ್ಕ್ ಸಮೀಪದ ಫುಟ್‌ಬಾಲ್ ಕ್ಲಬ್‌ನಿಂದ ಹಿಂದಿರುಗುತ್ತಿದ್ದ ವೇಳೆ ಟೈಗರ್ ಶ್ರಾಫ್ ಅವರ ಕಾರಿನ ಮೇಲೆ ಬೈಕ್‌ನಲ್ಲಿ ಬಂದ ಮೂವರು ದುಷ್ಕರ್ಮಿಗಳು ಗುಂಡು ಹಾರಿಸಿದ್ದಾರೆ ಎಂದು ವರದಿಯಾಗಿದೆ. ಈ ಘಟನೆಯಲ್ಲಿ ಟೈಗರ್ ಯಾವುದೇ ಗುಂಡೇಟಿನ ಗಾಯಗಳಿಲ್ಲದೆ ಪಾರಾಗಿದ್ದಾರೆ. ಆದರೆ, ಅವರ ಚಾಲಕ ಗಾಯಗೊಂಡಿದ್ದು, ಮತ್ತೊಬ್ಬ ಆಟೋರಿಕ್ಷಾ ಚಾಲಕನಿಗೂ ಗಾಯಗಳಾಗಿವೆ ಎನ್ನಲಾಗಿದೆ.

ಚಾಲಕನಿಗೆ ಗಾಯವಾದ ತಕ್ಷಣ ಟೈಗರ್ ಸ್ವತಃ ಕಾರಿನ ಸ್ಟೀರಿಂಗ್ ಹಿಡಿದು ನಾನಾವತಿ ಆಸ್ಪತ್ರೆಗೆ ಕರೆದೊಯ್ದರು ಎಂಬ ವರದಿಗಳು ಈ ಹಿಂದೆ ಗಮನ ಸೆಳೆದಿದ್ದವು. ಗಾಯಾಳುಗಳಿಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.

ಮಾಜಿ ಪ್ರಿಯಕರನಿಗಾಗಿ ಬಂದ ದಿಶಾ ಪಟಾಣಿ!

ಟೈಗರ್ ಶ್ರಾಫ್ ಮತ್ತು ದಿಶಾ ಪಟಾಣಿ ಹಲವು ವರ್ಷಗಳ ಕಾಲ ಪ್ರೀತಿಯಲ್ಲಿದ್ದರು ಎಂಬುದು ಬಾಲಿವುಡ್‌ನಲ್ಲಿ ಬಹುಚರ್ಚಿತ ವಿಚಾರ. ಆದರೆ, 2022ರಲ್ಲಿ ಈ ಜೋಡಿ ಬೇರ್ಪಟ್ಟಿರುವುದಾಗಿ ವರದಿಗಳು ಪ್ರಕಟವಾಗಿದ್ದವು. ಇದೀಗ ಟೈಗರ್ ಅವರ ಮೇಲೆ ದಾಳಿ ನಡೆದ ಸುದ್ದಿ ತಿಳಿದ ಬಳಿಕ ದಿಶಾ ಅವರ ನಿವಾಸಕ್ಕೆ ಭೇಟಿ ನೀಡಿದ್ದಾರೆ ಎನ್ನಲಾದ ಬೆಳವಣಿಗೆ ಅಭಿಮಾನಿಗಳ ಗಮನ ಸೆಳೆದಿದೆ.

ದಿಶಾ ಕಾರಿನಿಂದ ಇಳಿದ ಬಳಿಕ ಪಾಪರಾಜಿಗಳ ಪ್ರಶ್ನೆಗಳಿಗೆ ಪ್ರತಿಕ್ರಿಯಿಸದೆ ನೇರವಾಗಿ ಮನೆಯೊಳಗೆ ತೆರಳಿರುವ ದೃಶ್ಯ ಚರ್ಚೆಗೆ ಕಾರಣವಾಗಿದೆ. ಮಾಜಿ ಪ್ರಿಯಕರನ ಕಷ್ಟದ ಸಮಯದಲ್ಲಿ ದಿಶಾ ಭೇಟಿ ನೀಡಿರುವುದು ಅವರ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ.

ತನಿಖೆ ಚುರುಕುಗೊಳಿಸಿದ ಮುಂಬೈ ಪೊಲೀಸರು

ಘಟನೆಯ ಬಳಿಕ ಮಹಾರಾಷ್ಟ್ರ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್ ಮತ್ತು ಉಪಮುಖ್ಯಮಂತ್ರಿ ಏಕನಾಥ್ ಶಿಂಧೆ ಅವರು ಟೈಗರ್ ಅವರ ಯೋಗಕ್ಷೇಮ ವಿಚಾರಿಸಿದ್ದಾರೆ ಎನ್ನಲಾಗಿದೆ. ಆರೋಪಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ಇದೇ ವೇಳೆ, ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್‌ಗೆ ಸಂಬಂಧ ಹೊಂದಿರುವುದಾಗಿ ಹೇಳಿಕೊಳ್ಳುವ ಕೆಲವರು ಸಾಮಾಜಿಕ ಜಾಲತಾಣಗಳಲ್ಲಿ ದಾಳಿಯ ಹೊಣೆ ಹೊತ್ತಿದ್ದಾರೆ ಎನ್ನಲಾಗಿದೆ. ಅನಿಲ್ ಪಂಡಿತ್ ಮತ್ತು ಹರ್ಮನ್ ಸಂಧು ಅವರ ಹೆಸರുകളും ವರದಿಗಳಲ್ಲಿ ಪ್ರಸ್ತಾಪವಾಗಿವೆ. ಆದರೆ, ದಾಳಿಯ ಹಿಂದಿನ ನಿಖರ ಕಾರಣ ಹಾಗೂ ಆರೋಪಿಗಳ ಪಾತ್ರವನ್ನು ಪೊಲೀಸರು ತನಿಖೆಯ ಮೂಲಕ ದೃಢಪಡಿಸಬೇಕಿದೆ.

ಗುಂಡಿನ ದಾಳಿಯ ಬಳಿಕ ಟೈಗರ್ ಅವರ ಸುರಕ್ಷತೆ ಬಗ್ಗೆ ಅಭಿಮಾನಿಗಳು ಆತಂಕ ವ್ಯಕ್ತಪಡಿಸುತ್ತಿರುವ ನಡುವೆ, ದಿಶಾ ಪಟಾಣಿ ಅವರ ಭೇಟಿ ಈಗ ಬಾಲಿವುಡ್‌ನ ಪ್ರಮುಖ ಚರ್ಚೆಯ ವಿಷಯವಾಗಿದೆ.

ಧ್ರುವ್ ರಾಠಿ ಯೂ-ಟರ್ನ್: ನಾನು ಜಿರಳೆ ಅಲ್ಲ, CJPಗೂ ನಂಗೂ ಸಂಬಂಧ ಇಲ್ಲ! ಉದ್ದೇಶ ತೆರೆದಿಟ್ಟ ಯುಟ್ಯೂಬರ್

Suchethana D — Tue, 13 Oct 2026 12:05:44 +0530

ದೆಹಲಿ: ಕಾಕ್ರೋಚ್ ಜನತಾ ಪಕ್ಷ (CJP)ದ ಸಂಸ್ಥಾಪಕ ಅಭಿಜೀತ್ ದೀಪ್ಕೆಗೆ ಅಮೆರಿಕದಲ್ಲಿ ಕುಳಿತು ಭಾರತದ ಚಿಂತೆಯಾದರೆ, ಕಳೆದೊಂದು ದಶಕದಿಂದ ಭಾರತದ ಬಗ್ಗೆಯೇ ಯೋಚಿಸುತ್ತಾ, ಖ್ಯಾತಿ ಪಡೆದಿರುವ ಯುಟ್ಯೂಬರ್ ಧ್ರುವ್ ರಾಠಿಗೆ ಜರ್ಮನಿಯಲ್ಲಿ ಕುಳಿತು ಭಾರತ ಉದ್ಧಾರ ಮಾಡುವ ಚಿಂತೆ. ಇವರಿಬ್ಬರೂ ಸೇರಿ, ವಿಮಾನದ ಐಷಾರಾಮಿ ಕ್ಲಾಸ್ನಲ್ಲಿ ಮೇಲಿಂದ ಮೇಲೆ ಭಾರತಕ್ಕೆ ಲಕ್ಷಾಂತರ ರೂಪಾಯಿ ಖರ್ಚು ಮಾಡಿ ಬಂದು ಭಾರತವನ್ನು ಉದ್ಧಾರ ಮಾಡಲು ಪ್ರಯತ್ನಿಸುತ್ತಿದ್ದಾರೆ. ಇದಾಗಲೇ ಶಿಕ್ಷಣದ ಸುಧಾರಣೆ ಹೆಸರಿನಲ್ಲಿ ಸಚಿವ ಧಮೇಂದ್ರ ಪ್ರಧಾನ್ ಅವರ ರಾಜೀನಾಮೆ ಬಳಿಕ ಶಿಕ್ಷಣ ಸುಧಾರಣೆಯ ವಿಷ್ಯ ಅಲ್ಲಿಗೆ ಗಪ್ಚುಪ್ ಆಗಿದ್ದು, ಇದೀಗ ಒಂದೇ ಒಂದು ಪತ್ರಿಕೆಯಲ್ಲಿ ಬಂದಿದ್ದ ಚಿಕ್ಕದೊಂದು ಸುದ್ದಿಯನ್ನು ಹಿಡಿದುಕೊಂಡು SIR ವಿರುದ್ಧ ಭಾರತದ ಜನತೆಗೆ ನ್ಯಾಯ ಕೊಡಿಸಲು ವಿದೇಶದಿಂದ ಓಡೋಡಿ ಬಂದಿದ್ದಾರೆ ಇವರಿಬ್ಬರು.

ಬೆಂಗಳೂರಿನಲ್ಲಿ ಕೆಲವೇ ಕೆಲವು ಜನರು ಸೇರಿ ನಡೆಸಿದ ಪ್ರತಿಭಟನೆಯ ಬಳಿಕ ದೆಹಲಿಯ ಜಂತರ್ ಮಂತರ್ನಲ್ಲಿ ಅವಕಾಶ ಕೊಡದಿದ್ದರೂ, ಪ್ರತಿಭಟನೆಗೆ ಇಳಿದಿದ್ದ ಇವರನ್ನು ಪೊಲೀಸರು ಅರೆಸ್ಟ್ ಮಾಡಿ ಬಿಟ್ಟಿದ್ದರು. ಇಷ್ಟಾಗುತ್ತಿದ್ದಂತೆಯೇ ಇದೀಗ ಯೂಟ್ಯೂಬರ್ ಧ್ರುವ್ ರಾಠಿ ಅವರು ನೀಡಿರುವ ಹೇಳಿಕೆಯೊಂದು ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ. ದೇಶದ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ವಿರುದ್ಧ ಪ್ರತಿಭಟನೆ ನಡೆಸುತ್ತಿರುವ ಕಾಕ್ರೋಚ್ ಜನತಾ ಪಕ್ಷ (ಸಿಜೆಪಿ) ಯೊಂದಿಗೆ ಯಾವುದೇ ಸಂಪರ್ಕವನ್ನು ಯೂಟ್ಯೂಬರ್ ಧ್ರುವ್ ರಾಠಿ ನಿರಾಕರಿಸಿದ್ದಾರೆ. ಜರ್ಮನಿಯಲ್ಲಿ ವಾಸಿಸುವ ಮತ್ತು ಭಾರತೀಯ ರಾಜಕೀಯವನ್ನು, ವಿಶೇಷವಾಗಿ ನರೇಂದ್ರ ಮೋದಿ ಸರ್ಕಾರವನ್ನು ಟೀಕಿಸುವ ವೀಡಿಯೊಗಳಿಂದ ಜನಪ್ರಿಯರಾಗಿರುವ ಇವರು, ನನ್ನ ಉದ್ದೇಶ ಏನಿದ್ದರೂ ಆಗುತ್ತಿರುವ ಅನ್ಯಾಯವನ್ನು ತಡೆಯುವುದು ಅಷ್ಟೇ. ನಾನು ಜಿರಳೆ ಅಲ್ಲ, ಅದಕ್ಕೂ ನನಗೂ ಸಂಬಂಧವಿಲ್ಲ. ನಾನು ಭಾರತಕ್ಕೆ ಬಂದಿದ್ದು ವೈಯಕ್ತಿಕ ಮಟ್ಟದಿಂದ ಅಷ್ಟೇ. ಸಿಜೆಪಿಯೊಂದಿಗೆ ಯಾವುದೇ ಸಂಬಂಧವನ್ನು ಹೊಂದಿಲ್ಲ ಎಂದು ಹೇಳಿದ್ದಾರೆ.

ಯೂಟ್ಯೂಬ್‌ನಲ್ಲಿ ಸುಮಾರು 40 ಮಿಲಿಯನ್ ಚಂದಾದಾರರನ್ನು ಹೊಂದಿರುವ ಧ್ರುವ್ ರಾಠಿ, ಸಿಜೆಪಿ ನಾಯಕರಾದ ಅಭಿಜಿತ್ ದೀಪಕ್ ಮತ್ತು ಸೌರಭ್ ದಾಸ್ ಅವರ ಸ್ನೇಹಿತ ಎಂದು ಹೇಳಲಾಗುತ್ತದೆ. ನೀಟ್ ಪತ್ರಿಕೆ ಸೋರಿಕೆಯ ವಿರುದ್ಧ ಜಂತರ್ ಮಂತರ್‌ನಲ್ಲಿ ಸಿಜೆಪಿ ನಡೆಸಿದ ಮೊದಲ ಪ್ರತಿಭಟನೆಯ ಸಮಯದಲ್ಲಿ, ಅವರು ಆಗಾಗ್ಗೆ ವೀಡಿಯೊ ಕರೆಗಳಲ್ಲಿ ಅಭಿಜಿತ್ ದೀಪಕ್ ಅವರೊಂದಿಗೆ ಚಾಟ್ ಮಾಡುತ್ತಿರುವುದು ಕಂಡುಬಂದಿದೆ. ಈಗ, ಜ್ಞಾನೇಶ್ ಕುಮಾರ್ ವಿರುದ್ಧ ನಡೆಯುತ್ತಿರುವ ಪ್ರತಿಭಟನೆಯಲ್ಲಿ ವೈಯಕ್ತಿಕವಾಗಿ ಸೇರಲು ಅವರು ನಿರ್ಧರಿಸಿದ್ದಾರೆ. ಅಕ್ಟೋಬರ್ 8 ರಂದು ಪ್ರತಿಭಟನೆಗೆ ಸ್ವಲ್ಪ ಮೊದಲು ಬೆಂಗಳೂರಿಗೆ ಆಗಮಿಸಿದ ಧ್ರುವ್, ಆ ದಿನ ವೇದಿಕೆಯಿಂದ ಭಾಷಣ ಮಾಡಿದರು, ವಿಶೇಷ ತೀವ್ರ ಪರಿಷ್ಕರಣೆ (SIR) ಮೂಲಕ ಮತ ಕಳ್ಳತನವನ್ನು ಆರೋಪಿಸಿದರು. ಅಕ್ಟೋಬರ್ 10 ರಂದು ದೆಹಲಿಯಲ್ಲಿ ಸಿಜೆಪಿ ಘೋಷಿಸಿದ ಪ್ರತಿಭಟನೆಯಲ್ಲಿ ಭಾಗವಹಿಸಲು ರಥಿ ಕೂಡ ಬಯಸಿದ್ದರು. ಈ ಉದ್ದೇಶಕ್ಕಾಗಿ ಅವರು ದೆಹಲಿಗೆ ಬಂದಿದ್ದರು. ಶುಕ್ರವಾರ ಸಂಜೆ, ಅವರು ಇಂಡಿಯಾ ಗೇಟ್‌ಗೆ ಹೋಗಿ ಅಲ್ಲಿಂದ ವೀಡಿಯೊ ಮಾಡಿ, ಸಾಧ್ಯವಾದಷ್ಟು ಜನರನ್ನು ಪ್ರತಿಭಟನೆಯಲ್ಲಿ ಸೇರುವಂತೆ ಒತ್ತಾಯಿಸಿದರು.

ಅಕ್ಟೋಬರ್ 10 ರಂದು ಬಂಧನ

ಅಭಿಜೀತ್ ದಿಪ್ಕೆ ಅವರನ್ನು ಬೆಳಿಗ್ಗೆ ಮುಂಜಾನೆ ಗುರುಗ್ರಾಮ ಮನೆಯಿಂದ ವಶಕ್ಕೆ ತೆಗೆದುಕೊಳ್ಳಲಾಯಿತು. 20 ಗಂಟೆಗಳಿಗೂ ಹೆಚ್ಚು ಕಾಲ ಬಂಧನದಲ್ಲಿದ್ದ ನಂತರ ಬಿಡುಗಡೆಯಾದ ಧ್ರುವ್ ರಥಿ, ನಂತರ ಪೊಲೀಸರು ತಮ್ಮ ಮಲಗುವ ಕೋಣೆಯಿಂದ ಎಳೆದೊಯ್ದು ಕೃತ್ಯದ ಸಮಯದಲ್ಲಿ ಗಾಯಗೊಂಡಿದ್ದಾರೆ ಎಂದು ಆರೋಪಿಸಿದರು. ಧರ್ಮೇಂದ್ರ ಪ್ರಧಾನ್ ಮತ್ತು ಈಗ ಜ್ಞಾನೇಶ್ ಕುಮಾರ್ ಅವರ ರಾಜೀನಾಮೆಗಳನ್ನು ಒತ್ತಾಯಿಸುವಲ್ಲಿ ಧ್ರುವ್ ರಾಠಿ ಸಿಜೆಪಿಯೊಂದಿಗೆ ನಿಂತಿರುವಂತೆ ಕಂಡುಬಂದರೂ, ಅವರು ಸಿಜೆಪಿಯೊಂದಿಗೆ ಯಾವುದೇ ಸಂಬಂಧ ಅಥವಾ ಸಂಬಂಧವನ್ನು ನಿರಾಕರಿಸಿದ್ದಾರೆ. ಸಿಜೆಪಿಯಲ್ಲಿ ತನಗೆ ಯಾವುದೇ ಸ್ಥಾನವಿಲ್ಲ ಎಂದು ಅವರು ಹೇಳಿದ್ದಾರೆ. ಮಾಧ್ಯಮ ಸಂವಾದದಲ್ಲಿ ಅವರು, ತಮ್ಮ ನಿಲುವನ್ನು ಸ್ಪಷ್ಟಪಡಿಸುತ್ತಾ, "ನಾನು ಇಲ್ಲಿಗೆ ವೈಯಕ್ತಿಕ ಮಟ್ಟದಲ್ಲಿ ಬಂದಿದ್ದೇನೆ" ಎಂದು ಹೇಳಿದರು. ನಾನು ಸಿಜೆಪಿ ಅಥವಾ ಯಾವುದೇ ಇತರ (ಅಧಿಕಾರಿ) ಜೊತೆ ಸಂಬಂಧ ಹೊಂದಿಲ್ಲ. ದೇಶಾದ್ಯಂತ ಪ್ರತಿಭಟನೆ ನಡೆಸುತ್ತಿರುವ ಲಕ್ಷಾಂತರ ಜನರಂತೆ ನಾನು ನನ್ನ ವೈಯಕ್ತಿಕ ಸಾಮರ್ಥ್ಯದಲ್ಲಿ ಬಂದಿದ್ದೇನೆ ಎಂದಿದ್ದಾರೆ.

ಪ್ರತಿಭಟನೆಯಲ್ಲಿ ಭಾಗವಹಿಸಲು ಬಂದಿದ್ದೇನೆ

ಧ್ರುವ್ ರಾಠಿ ಅವರು ಈ ಪ್ರತಿಭಟನೆಯಲ್ಲಿ ಭಾಗವಹಿಸಲು ನಿರ್ದಿಷ್ಟವಾಗಿ ಭಾರತಕ್ಕೆ ಬಂದಿದ್ದೇನೆ ಎಂದು ಹೇಳಿದರು. "ವಾಸ್ತವವಾಗಿ, ನಾನು ಅದಕ್ಕಾಗಿ ಬಂದಿದ್ದೇನೆ. ಪ್ರತಿಭಟನೆಯಲ್ಲಿ ಭಾಗವಹಿಸಲು. ಚುನಾವಣಾ ಆಯೋಗವು ತಟಸ್ಥವಾಗಿರಬೇಕು ಎಂಬುದು ನನಗೆ ನಿಜವಾಗಿಯೂ ಅನಿಸುವ ಒಂದು ವಿಷಯ. ಮತ ಕಳ್ಳತನವು ಬಹಳ ಗಂಭೀರ ವಿಷಯವಾಗಿದೆ; ಅದು ಇಲ್ಲದೆ ಪ್ರಜಾಪ್ರಭುತ್ವ ಅಸ್ತಿತ್ವದಲ್ಲಿರಲು ಸಾಧ್ಯವಿಲ್ಲ. ಮತಗಳನ್ನು ಈ ರೀತಿ ಕದಿಯಲಾಗುತ್ತಿದ್ದರೆ, ಇದು ಪ್ರಜಾಪ್ರಭುತ್ವ ದೇಶವಲ್ಲ. ಇದು ಸರ್ವಾಧಿಕಾರದತ್ತ ಬಹಳ ದೂರ ಇಳಿದಿದೆ. ಇದು ಒಂದು ವರ್ಣಪಟಲ ಎಂದು ನಾನು ಯಾವಾಗಲೂ ಹೇಳಿದ್ದೇನೆ. 100 ಪ್ರತಿಶತ ಸರ್ವಾಧಿಕಾರ ಅಥವಾ 100 ಪ್ರತಿಶತ ಪ್ರಜಾಪ್ರಭುತ್ವವಿದೆ ಎಂದು ಹೇಳಬೇಡಿ. ನಾವು 2014 ರಲ್ಲಿ ಇದ್ದ ಸ್ಥಿತಿಗಿಂತ ಸರ್ವಾಧಿಕಾರಕ್ಕೆ ಹೆಚ್ಚು ಹತ್ತಿರವಾಗುತ್ತಿದ್ದೇವೆ" ಎಂದಿದ್ದಾರೆ.

28 ವರ್ಷದಿಂದ ಸಲ್ಮಾನ್ ಖಾನ್ ಬೆನ್ನುಬಿಡದ ಬಿಷ್ಣೋಯ್ ಗ್ಯಾಂಗ್, ಏನಿದು ಮ್ಯಾಟರ್? ಏಕಿಷ್ಟು ದ್ವೇಷದ ದಳ್ಳುರಿ?

Shriram Bhat — Mon, 19 Oct 2026 12:56:52 +0530

ಟೈಗರ್ ಶ್ರಾಫ್ ಮೇಲಿನ ದಾಳಿಯಿಂದ ಮತ್ತೆ ಸುದ್ದಿಯಲ್ಲಿ ಬಿಷ್ಣೋಯ್ ಗ್ಯಾಂಗ್: ಸಲ್ಮಾನ್ ಖಾನ್ ಜೊತೆಗಿನ ದ್ವೇಷಕ್ಕೆ ಕಾರಣವೇನು?

Lawrence Bishnoi Gang: ಬಾಲಿವುಡ್ ನಟ ಟೈಗರ್ ಶ್ರಾಫ್ ಅವರ ಕಾರಿನ ಮೇಲೆ ನಡೆದ ಗುಂಡಿನ ದಾಳಿಯ ಹೊಣೆ ಹೊತ್ತಿರುವುದಾಗಿ ಬಿಷ್ಣೋಯ್ ಗ್ಯಾಂಗ್ ಹೇಳಿಕೊಂಡಿದೆ ಎನ್ನಲಾದ ಬೆನ್ನಲ್ಲೇ, ಈ ಗ್ಯಾಂಗ್‌ನ ಕಾರ್ಯವೈಖರಿ ಮತ್ತು ಅದರ ಹಿಂದಿನ ಉದ್ದೇಶಗಳ ಬಗ್ಗೆ ಚರ್ಚೆ ಜೋರಾಗಿದೆ. ವಿಶೇಷವಾಗಿ ಬಾಲಿವುಡ್ ಸೂಪರ್‌ಸ್ಟಾರ್ ಸಲ್ಮಾನ್ ಖಾನ್ ಜೊತೆ ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್‌ಗೆ ದೀರ್ಘಕಾಲದಿಂದ ಇರುವ ವೈಷಮ್ಯ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ. ಹಾಗಾದರೆ ಈ ದ್ವೇಷಕ್ಕೆ ಕಾರಣವೇನು? ಟೈಗರ್ ಶ್ರಾಫ್ ಪ್ರಕರಣಕ್ಕೂ ಇದರ ಸಂಬಂಧವೇನು?

1998ರ ಕೃಷ್ಣಮೃಗ ಬೇಟೆ ಪ್ರಕರಣವೇ ದ್ವೇಷಕ್ಕೆ ಮೂಲ!

ಸಲ್ಮಾನ್ ಖಾನ್ ಮತ್ತು ಬಿಷ್ಣೋಯ್ ಗ್ಯಾಂಗ್ ನಡುವಿನ ವೈಷಮ್ಯಕ್ಕೆ ಪ್ರಮುಖ ಕಾರಣವೆಂದು ಹೇಳಲಾಗುವುದು 1998ರ ಕೃಷ್ಣಮೃಗ ಬೇಟೆ ಪ್ರಕರಣ. ರಾಜಸ್ಥಾನದ ಜೋಧ್‌ಪುರ ಸಮೀಪ ‘ಹಮ್ ಸಾಥ್ ಸಾಥ್ ಹೈ’ ಚಿತ್ರದ ಚಿತ್ರೀಕರಣದ ಸಂದರ್ಭದಲ್ಲಿ ಎರಡು ಕೃಷ್ಣಮೃಗಗಳನ್ನು ಬೇಟೆಯಾಡಿದ ಆರೋಪ ಸಲ್ಮಾನ್ ಖಾನ್ ವಿರುದ್ಧ ಕೇಳಿಬಂದಿತ್ತು. ಈ ಪ್ರಕರಣದಲ್ಲಿ 2018ರಲ್ಲಿ ವಿಚಾರಣಾ ನ್ಯಾಯಾಲಯ ಅವರಿಗೆ ಐದು ವರ್ಷಗಳ ಜೈಲು ಶಿಕ್ಷೆ ವಿಧಿಸಿತ್ತು. ಬಳಿಕ ಜಾಮೀನು ದೊರೆತಿದ್ದು, ಪ್ರಕರಣದ ಕಾನೂನು ಪ್ರಕ್ರಿಯೆ ಮುಂದುವರಿದಿದೆ.

ಬಿಷ್ಣೋಯ್ ಸಮುದಾಯಕ್ಕೆ ಕೃಷ್ಣಮೃಗ ಏಕೆ ಪವಿತ್ರ?

ರಾಜಸ್ಥಾನ ಮೂಲದ ಬಿಷ್ಣೋಯ್ ಸಮುದಾಯವು ಗುರು ಜಂಭೇಶ್ವರರು ಬೋಧಿಸಿದ 29 ನಿಯಮಗಳನ್ನು ಪಾಲಿಸುತ್ತದೆ. ಪ್ರಕೃತಿ ಸಂರಕ್ಷಣೆ, ಮರಗಳನ್ನು ಕಡಿಯದಿರುವುದು ಮತ್ತು ವನ್ಯಜೀವಿಗಳ ರಕ್ಷಣೆ ಈ ಸಮುದಾಯದ ಪ್ರಮುಖ ತತ್ವಗಳಾಗಿವೆ. ಕೃಷ್ಣಮೃಗಗಳನ್ನು ಅತ್ಯಂತ ಪವಿತ್ರವೆಂದು ಪರಿಗಣಿಸುವ ಈ ಸಮುದಾಯಕ್ಕೆ ಬೇಟೆಯ ಘಟನೆ ಧಾರ್ಮಿಕ ಭಾವನೆಗಳಿಗೆ ಧಕ್ಕೆಯುಂಟುಮಾಡಿದ ವಿಷಯವಾಗಿದೆ.

ಸಲ್ಮಾನ್ ಖಾನ್‌ಗೆ ಬಹಿರಂಗ ಬೆದರಿಕೆ

2018ರಲ್ಲಿ ನ್ಯಾಯಾಲಯದ ವಿಚಾರಣೆಯ ಸಂದರ್ಭದಲ್ಲಿ ಲಾರೆನ್ಸ್ ಬಿಷ್ಣೋಯ್, ಸಲ್ಮಾನ್ ಖಾನ್ ಅವರನ್ನು ಜೋಧ್‌ಪುರದಲ್ಲೇ ಹತ್ಯೆ ಮಾಡುವುದಾಗಿ ಬೆದರಿಕೆ ಹಾಕಿದ್ದಾನೆ ಎನ್ನಲಾಗಿದೆ. ಬಳಿಕ ಸಲ್ಮಾನ್ ಖಾನ್ ತಮ್ಮ ಸಮುದಾಯದ ದೇವಸ್ಥಾನಕ್ಕೆ ಭೇಟಿ ನೀಡಿ ಕ್ಷಮೆ ಯಾಚಿಸಬೇಕು ಎಂಬ ಬೇಡಿಕೆಯನ್ನೂ ಮುಂದಿಟ್ಟಿದ್ದಾನೆ ಎಂದು ವರದಿಯಾಗಿದೆ.

2024ರ ಏಪ್ರಿಲ್‌ನಲ್ಲಿ ಸಲ್ಮಾನ್ ಖಾನ್ ಅವರ ಮುಂಬೈ ನಿವಾಸದ ಮೇಲೆ ಗುಂಡಿನ ದಾಳಿ ನಡೆದಿತ್ತು. ಅದೇ ವರ್ಷ ಅವರ ಆಪ್ತರಾಗಿದ್ದ ಮಾಜಿ ಸಚಿವ ಬಾಬಾ ಸಿದ್ದಿಕಿ ಹತ್ಯೆಯೂ ಭದ್ರತೆಯ ಕುರಿತ ಆತಂಕವನ್ನು ಹೆಚ್ಚಿಸಿತ್ತು.

ಟೈಗರ್ ಶ್ರಾಫ್‌ಗೂ ಬೆದರಿಕೆ ಏಕೆ?

ಸಲ್ಮಾನ್ ಖಾನ್ ಜೊತೆ ನಿಕಟ ಸಂಪರ್ಕ ಹೊಂದಿರುವವರನ್ನು ಗುರಿಯಾಗಿಸುವುದಾಗಿ ಬಿಷ್ಣೋಯ್ ಗ್ಯಾಂಗ್ ಈ ಹಿಂದೆ ಬೆದರಿಕೆ ಹಾಕಿದೆ ಎನ್ನಲಾಗಿದೆ. ಟೈಗರ್ ಶ್ರಾಫ್ ಮತ್ತು ಅವರ ತಂದೆ ಜಾಕಿ ಶ್ರಾಫ್ ಅವರು ಸಲ್ಮಾನ್ ಖಾನ್ ಜೊತೆ ಉತ್ತಮ ಸಂಬಂಧ ಹೊಂದಿರುವುದು ಈ ಪ್ರಕರಣದ ಚರ್ಚೆಯಲ್ಲಿ ಪ್ರಸ್ತಾಪವಾಗುತ್ತಿದೆ. ಆದರೆ ಟೈಗರ್ ಶ್ರಾಫ್ ಮೇಲಿನ ದಾಳಿಗೆ ಇದೇ ಕಾರಣವೆಂದು ಸ್ವತಂತ್ರವಾಗಿ ದೃಢಪಟ್ಟಿಲ್ಲ.

ಪ್ರಚಾರ ಮತ್ತು ಸುಲಿಗೆ ಆರೋಪಗಳೂ ಚರ್ಚೆಯಲ್ಲಿ

ಗ್ಯಾಂಗ್‌ಸ್ಟರ್‌ಗಳು ಖ್ಯಾತ ವ್ಯಕ್ತಿಗಳಿಗೆ ಬೆದರಿಕೆ ಹಾಕುವ ಮೂಲಕ ಸುದ್ದಿಯಲ್ಲಿ ಉಳಿಯುವುದು, ಉದ್ಯಮಿಗಳು ಮತ್ತು ಚಿತ್ರರಂಗದವರಲ್ಲಿ ಭೀತಿ ಮೂಡಿಸುವುದು ಹಾಗೂ ಹಣ ಸುಲಿಗೆಗೆ ಯತ್ನಿಸುವುದು ಅಪರಾಧ ಲೋಕದಲ್ಲಿ ಕಂಡುಬರುವ ತಂತ್ರಗಳಾಗಿವೆ. ಬಿಷ್ಣೋಯ್ ಗ್ಯಾಂಗ್ ವಿರುದ್ಧವೂ ಇಂತಹ ಆರೋಪಗಳು ಕೇಳಿಬಂದಿವೆ.

ಟೈಗರ್ ಶ್ರಾಫ್ ಮೇಲಿನ ದಾಳಿಯ ಪ್ರಕರಣದಲ್ಲಿ ತನಿಖೆಯ ಮೂಲಕವೇ ನಿಖರ ಕಾರಣ ಮತ್ತು ಆರೋಪಿಗಳ ಪಾತ್ರ ಸ್ಪಷ್ಟವಾಗಬೇಕಿದೆ. ಬಾಲಿವುಡ್ ತಾರೆಯರ ಭದ್ರತೆ ಹಾಗೂ ಸಂಘಟಿತ ಅಪರಾಧಗಳ ವಿರುದ್ಧದ ಕ್ರಮಗಳ ಕುರಿತು ಈ ಘಟನೆ ಮತ್ತೆ ಗಂಭೀರ ಚರ್ಚೆಗೆ ಕಾರಣವಾಗಿದೆ.

ವಿಧಾನಸೌಧಕ್ಕೆ ಬಾಂಬ್ ಇಟ್ಟು ಸ್ಫೋಟಿಸಿದಂತೆ ವಿಡಿಯೋ ಹರಿಬಿಟ್ಟ ಯುವಕ! AI ಸೃಷ್ಟಿಕರ್ತ ಯಾರೀತ

Suchethana D — Tue, 20 Oct 2026 18:47:34 +0530

ಬೆಂಗಳೂರು: ಹೇಳಿ-ಕೇಳಿ ಇದು ಎಐ ಯುಗ. ಯಾರು ಏನು ಬೇಕಾದರೂ ಮಾಡಬಹುದು. ಇದು ಅಸಲಿನೋ, ನಕಲಿನೋ ಎಂದು ತಿಳಿಯದ ಮಟ್ಟಿಗೆ ಈ ವಿಡಿಯೋ ಕಾಣಿಸುತ್ತದೆ. ರಾಜಕಾರಣಿಗಳು, ಅವರ ಬೆಂಬಲಿಗರು ತಮಗೆ ಆಗದವರ ವಿರುದ್ಧ ಇದೇ ರೀತಿ ಏನೇನೋ ಎಐ ಫೋಟೋಗಳನ್ನು ಹರಿಬಿಟ್ಟು ಹೆಸರು ಕೆಡಿಸಲು ನೋಡುವುದು ಇದೆ. ಅಸಭ್ಯ, ಅಶ್ಲೀಲ ಎನ್ನಿಸುವಂಥ ಚಿತ್ರಗಳನ್ನು ಜಾಲತಾಣಗಳಲ್ಲಿ ಪೋಸ್ಟ್ ಮಾಡಿದರೂ, ಅವರ ವಿರುದ್ಧ ಯಾರೂ ಕ್ರಮ ತೆಗೆದುಕೊಳ್ಳದ ಹಿನ್ನೆಲೆಯಲ್ಲಿ, ಇದು ಅವ್ಯಾಹತವಾಗಿ ನಡೆಯುತ್ತಿದೆ. ರಾತ್ರೋರಾತ್ರಿ ಫೇಮಸ್ ಆಗಬೇಕು ಎನ್ನುವ ಕಾರಣದಿಂದ ಯುವಕನೊಬ್ಬ ಈಗ ಇದೇ ಎಐ ತಂತ್ರಜ್ಞಾನ ಬಳಸಿ ವಿಧಾನಸೌಧಕ್ಕೆ ಬಾಂಬ್ ಇಟ್ಟು ಬ್ಲಾಸ್ಟ್ ಮಾಡಿದಂತೆ ವಿಡಿಯೋ ಅಪ್ಲೋಡ್ ಮಾಡಿದ್ದಾನೆ.

ಇನ್‌ಸ್ಟಾಗ್ರಾಮ್‌ನಲ್ಲಿ ಅಪ್‌ಲೋಡ್ ಆಗಿರುವ ಈ ವೀಡಿಯೊದಲ್ಲಿ ಕಿಡಿಗೇಡಿ ಯುವಕ ತನ್ನನ್ನು ಭಯೋತ್ಪಾದಕನಂತೆ ಬಿಂಬಿಸಿಕೊಂಡಿದ್ದು, ದಸರಾ ವೇಳೆ ಆತಂಕ ಸೃಷ್ಟಿಸಲು ಯತ್ನಿಸಿದ್ದಾನೆ. Jnx king Hg ಎಂಬ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಕಿಡಿಗೇಡಿಯೊಬ್ಬ ಈ ವೀಡಿಯೊವನ್ನು ಅಪ್‌ಲೋಡ್ ಮಾಡಿದ್ದಾನೆ. ವಿಧಾನಸೌಧದ ಮುಂಭಾಗ ಶೂಟ್ ಮಾಡಿ, ಎಐ ತಂತ್ರಜ್ಞಾನ ಬಳಸಿ ಅದನ್ನು ಬಾಂಬ್ ಬ್ಲಾಸ್ಟ್ ಮಾಡಿದಂತೆ ಎಡಿಟ್ ಮಾಡಲಾಗಿದೆ. ಅಷ್ಟೇ ಅಲ್ಲದೆ, ವಿಧಾನಸೌಧವನ್ನು ಬಾಂಬ್‌ನಿಂದ ಉಡಾಯಿಸಿದ್ದೇನೆ ಎಂದು ಬರೆದುಕೊಂಡಿದ್ದಾನೆ.

ಉಗ್ರನಂತೆ ಬಿಂಬಿಸಿಕೊಂಡಿದ್ದಾನೆ!

ಈ ವಿವಾದಾತ್ಮಕ ವಿಡಿಯೋ ವೈರಲ್ ಆಗುತ್ತಿದ್ದಂತೆ, ನೆಟ್ಟಿಗರು ಈ ವಿಡಿಯೋ ಕೆಳಗೆ ಬೆಂಗಳೂರು ನಗರ ಪೊಲೀಸರನ್ನು ಟ್ಯಾಗ್ ಮಾಡುತ್ತಿದ್ದಾರೆ. ಪೊಲೀಸರನ್ನು ಟ್ಯಾಗ್ ಮಾಡಿ, ಹಬ್ಬದ ದಿನ ರಾಜ್ಯದ ಶಕ್ತಿಕೇಂದ್ರವಾದ ವಿಧಾನಸೌಧಕ್ಕೆ ಬಾಂಬ್ ಬೆದರಿಕೆ ಹಾಕಿರುವ ಈ ಯುವಕನ ವಿರುದ್ಧ ಕೂಡಲೇ ಕಾನೂನು ಕ್ರಮ ಜಾರಿಯಾಗಬೇಕೆಂದು ನೆಟ್ಟಿಗರು ಆಗ್ರಹಿಸಿದ್ದಾರೆ.

ಈಗ ವಿರೋಧ, ಆಮೇಲೆ...?

ಬಾಂಬ್ ಬ್ಲಾಸ್ಟ್ ಮಾಡುವಂಥ ಮನಸ್ಥಿತಿ ಇರುವಾಗ ಈತ ಯಾರಿರಬಹುದು, ನಿಜಕ್ಕೂ ಈತನ ಉದ್ದೇಶ ಏನು ಎನ್ನುವ ಬಗ್ಗೆ ದೊಡ್ಡ ಮಟ್ಟಿನ ಚರ್ಚೆಯಾಗುತ್ತಿದೆ. ಸಾಮಾನ್ಯವಾಗಿ ಮೊದಲೇ ಹೇಳಿದಂತೆ ತಮಗೆ ಆಗದವರ ವಿರುದ್ಧ ಎಐ ವಿಡಿಯೋ ಮಾಡಿ ಹರಿಬಿಡುವುದು ಇದೆ. ಆದರೆ ಈ ರೀತಿ ಬಾಂಬ್ ಬ್ಲಾಸ್ಟ್ ಮಾಡುವಂಥ ಮನಸ್ಥಿತಿ ಇರುವುದು ದೊಡ್ಡ ಮಟ್ಟಿನ ಅಪಾಯ, ಈ ಯುವಕನ ಹಿನ್ನೆಲೆ ಬಗ್ಗೆ ತನಿಖೆ ಆಗಬೇಕು. ಈತನಿಗೆ ಕಠಿಣಾತಿಕಠಿಣ ಶಿಕ್ಷೆ ಕೊಡಬೇಕು. ಇನ್ನು ಮುಂದೆ ಯಾರೂ ಇಂಥ ವಿಡಿಯೋ ಹಾಕಲು ಧೈರ್ಯ ಮಾಡದ ಸ್ಥಿತಿ ನಿರ್ಮಾಣ ಆಗಬೇಕು ಎಂದು ಸೋಷಿಯಲ್ ಮೀಡಿಯಾಗಳಲ್ಲಿ ವೈರಲ್ ಆಗುತ್ತಿದೆ.

ದುರದೃಷ್ಟ ಎಂದರೆ, ಈಗ ಹೀಗೆ ಶಿಕ್ಷೆಗೆ ಆಗ್ರಹಿಸುವವರೇ ಕೊನೆಗೆ ಆತನ ಜಾತಿ, ಧರ್ಮ ಎಲ್ಲವೂ ಹೊರಕ್ಕೆ ಬಂದಾಗ, ಶಿಕ್ಷೆ ನೀಡಿದ ಕೋರ್ಟ್ಗಳ ವಿರುದ್ಧವೇ ಮಾತನಾಡುವುದು ಹಿಂದಿನಿಂದಲೂ ನಡೆದು ಬಂದಿದೆ. ಏನೂ ಇಲ್ಲದಾಗ ಮಾನವ ಹಕ್ಕುಗಳ ಆಯೋಗ ಏನು ಮಾಡುತ್ತಿದೆ ಎಂದು ಕೇಳುವವರೂ ಇವರೇ. ಆದ್ದರಿಂದ ಇಂಥಮನಸ್ಥಿತಿ ನಿಲ್ಲುವವರೆಗೂ, ಈ ರೀತಿ ವಿಡಿಯೋ ಹರಿಬಿಡುವವರು, ವಿಡಿಯೋ ಮಾತ್ರವಲ್ಲದೇ, ನಿಜಕ್ಕೂ ಇಂಥಕೃತ್ಯ ಮಾಡಲೂ ಹೇಸದವರು ಮುಂದುವರೆಯುತ್ತಲೇ ಇರುತ್ತಾರೆ. ಜಾತಿ- ಧರ್ಮದ ವಿಷಯ ಬಂದಾಗ ಓಡೋಡಿ ಅವರ ಪರವಾಗಿ ನಿಲ್ಲುವ ಜನರು ಇರುವವರೆಗೂ ಇದು ಮುಂದುವರೆಯುತ್ತದೆ ಎಂದು ಸೋಷಿಯಲ್ ಮೀಡಿಯಾದಲ್ಲಿ ಭಾರಿ ಚರ್ಚೆಯೂ ಆಗುತ್ತಿದೆ.

ರೈಲು ಪ್ರಯಾಣಿಕರೇ, ಮೊಬೈಲ್ನಲ್ಲಿ ಜೋರಾಗಿ ಸಂಗೀತ ಹಾಕಿದ್ರೆ ಜೈಲಿನ ಹಾಗೂ ದಂಡ ಫಿಕ್ಸ್: ಹೊಸ ರೂಲ್ಸ್

Suchethana D — Mon, 19 Oct 2026 19:55:45 +0530

ದೆಹಲಿ: ಮೊಬೈಲ್ ಬಿಟ್ಟು ಬದುಕೇಇಲ್ಲ ಎನ್ನುವವರು ಹಲವರು. ಆದರೆ ಕೆಲವರಿಗೆ ಕಾಮನ್ಸೆನ್ಸ್ ಎನ್ನುವುದೂ ಇರದೇ, ಬೇರೆಯವರಿಗೆ ಡಿಸ್ಟರ್ಬ್ ಆಗುತ್ತದೆ ಎನ್ನುವ ಪರಿಜ್ಞಾನವೂ ಇರದೇ, ಮೊಬೈಲ್ನಲ್ಲಿ ಜೋರಾಗಿ ಸಂಗೀತ ಹಾಕುವುದು ಮಾಡುತ್ತಾರೆ. ಆ ಸಂಗೀತ ಅವರಿಗೆ ಸುಮಧುರ ಎನ್ನಿಸಿದರೂ ಮತ್ತೆ ಕೆಲವರಿಗೆ ಅದು ಕರ್ಕಶ ಎನ್ನಿಸಬಹುದು. ಇಯರ್ ಫೋನ್, ಇಯರ್ ಬಡ್ಸ್ ಏನೇ ಇದ್ದರೂ, ತಮ್ಮನ್ನು ಬೇರೆಯವರು ನೋಡಲಿ ಎನ್ನುವ ಖಯಾಲಿ ಕೆಲವರಿಗೆ ಆದರೆ, ಮತ್ತೆ ಕೆಲವರಿಗೆ ತಾವು ಎಲ್ಲಿ ಇದ್ದೇವೆ ಎನ್ನುವ ಜ್ಞಾನ ಇಲ್ಲದೇ ತಮ್ಮದೇ ಲೋಕದಲ್ಲಿ ತೇಲಾಡುತ್ತಿರುತ್ತಾರೆ. ತಮ್ಮಿಂದ ಬೇರೆಯವರಿಗೆ ಡಿಸ್ಟರ್ಬ್ ಆಗ್ತಿದೆಯೋ ನೋಡುವುದೇ ಇಲ್ಲ. ಇಂಥ ಸಮಸ್ಯೆ ಹೆಚ್ಚಾಗಿ ಬಸ್ಗಳಲ್ಲಿ, ರೈಲ್ವೆಗಳಲ್ಲಿ ಕಂಡು ಬರುವುದು ಇದೆ.

ಅದರಲ್ಲಿಯೂ ರೈಲ್ವೆಗೆ ಹೋಗುವವರಿಗೆ ಇದೊಂದು ನುಂಗಲಾಗದ ತುತ್ತಾಗಿ ಬಿಡುತ್ತದೆ. ರಾತ್ರಿಯ ವೇಳೆಯೂ ಜೋರಾಗಿ ಸಂಗೀತ ಹಾಕಿಕೊಂಡು ಬೇರೆಯವರಿಗೆ ಡಿಸ್ಟರ್ಬ್ ಮಾಡುವ ಒಂದಷ್ಟು ಜನರಿಗೆ ಪಾಠ ಕಲಿಸಲು ರೈಲ್ವೆ ಇಲಾಖೆ ಮುಂದಾಗಿದೆ. ರೈಲಿನ ಒಳಗೆ ಮಾತ್ರವಲ್ಲದೇ, ರೈಲ್ವೆ ಆವರಣಗಳಲ್ಲಿ ಮೊಬೈಲ್ ಫೋನ್‌ಗಳಲ್ಲಿ ಸ್ಪೀಕರ್ ಮೋಡ್ ಬಳಸಿ ಸಂಗೀತ, ವಿಡಿಯೋ ಅಥವಾ ಇತರ ಆಡಿಯೊಗಳನ್ನು ಪ್ಲೇ ಮಾಡದಂತೆ ಪ್ರಯಾಣಿಕರಿಗೆ ಭಾರತೀಯ ರೈಲ್ವೆಯು ಎಚ್ಚರಿಕೆ ನೀಡಿದೆ.

ರೈಲ್ವೆ ಇಲಾಖೆ ಎಚ್ಚರಿಕೆ

ಈ ಕುರಿತು ಇಲಾಖೆ ಮಾರ್ಗಸೂಚಿಯನ್ನು ಹೊರಡಿಸಿದೆ. ಈ ರೀತಿ ಮಾಡಿ ಇತರರಿಗೆ ತೊಂದರೆ ಉಂಟುಮಾಡುವ ಪ್ರಯಾಣಿಕರನ್ನು ರೈಲ್ವೆ ಆವರಣದಿಂದ ಹೊರಹಾಕಬಹುದು ಮತ್ತು ಅವರಿಗೆ ಒಂದು ಸಾವಿರ ರೂಪಾಯಿಗಳವರೆಗೆ ದಂಡ ವಿಧಿಸಬಹುದು ಎಂದು ತಿಳಿಸಲಾಗಿದೆ. ಸನ್ನಿವೇಶವನ್ನು ಗಮನದಲ್ಲಿಟ್ಟುಕೊಂಡು, ರೈಲ್ವೆ ಅಧಿಕಾರಿಗಳು ಅಂತಹ ಪ್ರಯಾಣಿಕರ ಟಿಕೆಟ್ ಅಥವಾ ಪಾಸ್ ಅನ್ನು ವಶಪಡಿಸಿಕೊಳ್ಳಬಹುದು. ಟಿಕೆಟ್ ಪರೀಕ್ಷಕರು ಮತ್ತು ರೈಲ್ವೆ ವಿಭಾಗದ ಹಿರಿಯ ಅಧಿಕಾರಿಗಳಿಗೆ ಈ ದಂಡವನ್ನು ವಿಧಿಸುವ ಅಧಿಕಾರ ನೀಡಲಾಗಿದೆ.

ಜೈಲೂಟ ಫಿಕ್ಸ್!

ಈ ಮಾರ್ಗಸೂಚಿಯ ಪ್ರಕಾರ, ಒಬ್ಬ ಪ್ರಯಾಣಿಕನು ಪದೇ ಪದೇ ಈ ನಿಯಮವನ್ನು ಉಲ್ಲಂಘಿಸಿದರೆ, ಆ ವ್ಯಕ್ತಿಗೆ ಆರು ತಿಂಗಳವರೆಗೆ ಜೈಲು ಶಿಕ್ಷೆ ಅಥವಾ ಐದು ಸಾವಿರ ರೂಪಾಯಿಗಳವರೆಗೆ ದಂಡ, ಅಥವಾ ಇವೆರಡನ್ನೂ ವಿಧಿಸಬಹುದಾಗಿದೆ ಎಂದು ಇಲಾಖೆ ತಿಳಿಸಿದೆ. ಈ ಕುರಿತು, ಸಾರ್ವಜನಿಕ ಘೋಷಣೆಗಳು ಮತ್ತು ನಿಲ್ದಾಣಗಳಲ್ಲಿನ ಸೂಚನಾ ಫಲಕಗಳ ಮೂಲಕ ಈ ಬಗ್ಗೆ ಜಾಗೃತಿ ಮೂಡಿಸುವಂತೆ ತನ್ನ ವಿವಿಧ ವಿಭಾಗಗಳಿಗೆ ನಿರ್ದೇಶನ ನೀಡಿದೆ.

ಸಲ್ಮಾನ್ ಖಾನ್ ಹಟಕ್ಕೆ ಸಾಲು ಸಾಲು ಕೊಲೆ, ಕೊಲೆ ಯತ್ನ- ನಟನಿಗೆ ಬಿಷ್ಣೋಯಿ ನಾಯಕ ಕೊಟ್ಟ ಸಲಹೆ ಏನು

Suchethana D — Tue, 20 Oct 2026 16:38:51 +0530

ಮುಂಬೈ: ಮೊನ್ನೆ ನಟ ಟೈಗರ್ ಶ್ರಾಫ್ ಮೇಲೆ ನಡೆದ ಕೊಲೆ ಯತ್ನದ ಹಿಂದೆ ಇರುವುದು ಬಿಷ್ಣೋಯಿ ಗ್ಯಾಂಗ್ನ ಸದಸ್ಯರು ಎಂದು ಪ್ರಾಥಮಿಕ ಹಂತದಲ್ಲಿ ತಿಳಿದುಬಂದಿದೆ. ಇದಕ್ಕೆ ಕಾರಣ ನಟ ಸಲ್ಮಾನ್ ಖಾನ್. ಸಲ್ಮಾನ್ ಖಾನ್ ಅವರ ಸಹವರ್ತಿಯಾಗಿರುವವರ ಪೈಕಿ ಇದಾಗಲೇ ನಟನ ಹಟದಿಂದಾಗಿ ಪ್ರಾಣ ಕಳೆದುಕೊಂಡಿದ್ದಾರೆ. ನಟನ ನಿಕಟವರ್ತಿಯಾಗಿರುವ ಕಾರಣಕ್ಕೆ ಟೈಗರ್ ಶ್ರಾಫ್ ಕೂಡ ಸಾವಿನ ಸಮೀಪ ಹೋಗಿ ಬಂದಿದ್ದಾರೆ. ಸಲ್ಮಾನ್ ಖಾನ್ನ ಒಂದೇ ಒಂದು ಕ್ಷಮೆ ಇನ್ನೂ ಟಾರ್ಗೆಟ್ ಲಿಸ್ಟ್ನಲ್ಲಿ ಇರುವವರ ಜೀವ ಕಾಪಾಡಬಹುದಾಗಿದೆ. ಆದರೆ ಖಾನ್ ಸಾಹೇಬ್ರು ಮಾತ್ರ ಕ್ಷಮೆ ಕೋರದೆ ತಮ್ಮ ಹಟದಿಂದ ಇನ್ನೂ ಹಲವರ ಜೀವಕ್ಕೆ ಅಪಾಯ ತಂದೊಡ್ಡುತ್ತಿದ್ದಾರೆ ಎಂದು ಜಾಲತಾಣಗಳಲ್ಲಿ ಭಾರಿ ಆಕ್ರೋಶ ವ್ಯಕ್ತವಾಗುತ್ತಿದೆ.

ಕ್ಷಮೆಗೆ ಆಗ್ರಹ

ಪ್ರಸಿದ್ಧ ಪಂಜಾಬಿ ಗಾಯಕ ಮತ್ತು ರಾಜಕಾರಣಿ ಸಿಧು ಮೂಸೆವಾಲಾ 2022ರಲ್ಲಿ ಕೊಲೆಯಾಗಿದ್ದರೆ, ಇನ್ನೂ ಕೆಲವು ಸಲ್ಮಾನ್ ನಿಕಟವರ್ತಿಗಳು ಬಿಷ್ಣೋಯಿ ಲಿಸ್ಟ್ನಲ್ಲಿ ಇದ್ದಾರೆ. 1998ರಿಂದ ಸಲ್ಮಾನ್ ಖಾನ್ ಮತ್ತು ಬಿಷ್ಣೋಯಿ ಸಮುದಾಯದ ನಡುವೆ ನಡೆಯುತ್ತಿರುವ ಈ ಜಟಾಪಟಿಯಿಂದ ಇದಾಗಲೇ ಹಲವಾರು ಬಾರಿ ಸಲ್ಮಾನ್ ಮೇಲೆ ಖುದ್ದು ದಾಳಿಯಾಗಿದ್ದರೂ ಅವರು ಬಚಾವ್ ಆಗಿದ್ದಾರೆ. ಆದರೆ ಪ್ರತಿಬಾರಿಯೂ ಎಲ್ಲರೂ ಬಚಾವಾಗಬೇಕೆಂದು ಇಲ್ಲ. ಲಾರೆನ್ಸ್ ಬಿಷ್ಣೋಯಿ ಜೈಲಿನಲ್ಲಿ ಇದ್ದರೂ, ಆತನ ಸಹಚರರು ಸಲ್ಮಾನ್ ಮೇಲಿನ ಸಿಟ್ಟನ್ನು ಅವರ ನಿಕಟವರ್ತಿಗಳ ಮೇಲೆ ತೆಗೆದುಕೊಳ್ಳುತ್ತಾ ಸೇಡು ತೀರಿಸಿಕೊಳ್ಳುತ್ತಿದ್ದಾರೆ. ಅವರನ್ನು ತಡೆಯುವವರೇ ಇಲ್ಲವಾಗಿರುವುದು ಒಂದೆಡೆಯಾದರೆ, ಸಲ್ಮಾನ್ ಖಾನ್ನ ಹಟದಿಂದ ಇನ್ನೆಷ್ಟು ಜೀವಗಳು ಬಲಿಯಾಗಬೇಕು ಎಂದು ಚರ್ಚೆಗಳು ನಡೆಯುತ್ತಿರುವ ನಡುವೆಯೇ, ಬಿಷ್ಣೋಯ್ ಸಮಾಜದ ರಾಷ್ಟ್ರೀಯ ಅಧ್ಯಕ್ಷ ದೇವೇಂದ್ರ ಬುಡಿಯಾ ಅವರು ಕ್ಷಮೆ ಕೋರದೇ ಹೋದರೆ ಇನ್ನೂ ಹಲವು ಜೀವಗಳ ಹೋಗುವ ಆತಂಕವನ್ನು ವ್ಯಕ್ತಪಡಿಸಿದ್ದಾರೆ. ಆದ್ದರಿಂದ ಸಲ್ಮಾನ್ ಖಾನ್ ಇದನ್ನು ತಡೆಯಬೇಕು ಎಂದಿರುವ ಅವರು, ಪರೋಕ್ಷವಾಗಿ ಕ್ಷಮೆ ಕೋರುವಂತೆ ಆಗ್ರಹಿಸಿದ್ದಾರೆ. ಆ ವ್ಯಕ್ತಿ ನಮ್ಮ ತತ್ವಗಳಿಗೆ ವಿರುದ್ಧವಾದದ್ದನ್ನು ಮಾಡಿದ್ದಾನೆ. ಇದಕ್ಕೂ ಮುಂಚೆಯೂ ಹಲವಾರು ಜಗಳಗಳು ಮತ್ತು ವಿವಾದಗಳು ನಡೆದಿವೆ. ಇದಕ್ಕೆ ಸಲ್ಮಾನ್ ಖಾನ್ ಏಕೆ ಅಂತ್ಯ ಹಾಡುವುದಿಲ್ಲ ಎಂದು ಅವರು ಪ್ರಶ್ನಿಸಿದ್ದಾರೆ.

ಅಷ್ಟಕ್ಕೂ ಸಲ್ಮಾನ್ ಖಾನ್ ಮೇಲೆ ಏಕಿಷ್ಟು ಕೋಪ?

ಬಿಷ್ಣೋಯಿ ಸಮುದಾಯದವರು ದೇವರು ಎಂದೇ ನಂಬುತ್ತಿರುವ ಕೃಷ್ಣಮೃಗವನ್ನು ಕೊಂದಿರುವ ಆರೋಪ ಸಲ್ಮಾನ್ ಖಾನ್ ಅವರ ಮೇಲೆ ಇದೆ. 1998ರಲ್ಲಿ ಈ ಘಟನೆ ನಡೆದಿದೆ. ಹಲವಾರು ಬಾರಿ ಲಾರೆನ್ಸ್ ಬಿಷ್ಣೋಯಿ ಸಮುದಾಯದವರು ನಟನಿಗೆ ಇಟ್ಟಿದ್ದ ಬೇಡಿಕೆ ಒಂದೇ. ಅದು ಅಂದು ಕೃಷ್ಣಮೃಗ ಕೊಂದ ತಪ್ಪಿಗೆ ಕ್ಷಮೆ ಕೋರಬೇಕು ಎನ್ನುವುದು. ದಶಕ ಕಳೆದರೂ ಇದುವರೆಗೂ ಸಲ್ಮಾನ್ ಖಾನ್ ಕ್ಷಮೆ ಕೋರಲಿಲ್ಲ. ಈ ಕ್ಷಮೆ ಎನ್ನುವ ಮಾತು ಹಂತ ಹಂತವಾಗಿ ಬೆಳೆಯುತ್ತಾ ಇಂದು ಸಲ್ಮಾನ್ ಖಾನ್ ಆಪ್ತರು ಎನಿಸಿಕೊಂಡವರ ಜೀವಕ್ಕೆ ಮುಳ್ಳಾಗುತ್ತಿದೆ. ಇದಾಗಲೇ ಮಹಾರಾಷ್ಟ್ರದ ಮಾಜಿ ಸಚಿವ ಬಾಬಾ ಸಿದ್ದಿಕಿ ಅವರ ಹತ್ಯೆ ಮಾಡಿರುವ ಬಿಷ್ಣೋಯಿ ಗ್ಯಾಂಗ್ನವರು, ಇದಕ್ಕೆ ಕಾರಣ ಕೂಡ ಸಲ್ಮಾನ್ ಖಾನ್ ಎಂದಿದ್ದಾರೆ. ಸಲ್ಮಾನ್ ನಿಕಟವರ್ತಿಗಳಿಗೆ ಇದೇ ಶಿಕ್ಷೆಯಾಗುತ್ತದೆ ಎಂದೂ ಹೇಳಿದ್ದಾರೆ. ಇಷ್ಟು ಆಗುತ್ತಿದ್ದಂತೆಯೇ ಸೋಷಿಯಲ್ ಮೀಡಿಯಾದಲ್ಲಿ ಕ್ಷಮೆ ಕೋರುವಂತೆ ಸಲ್ಮಾನ್ ಖಾನ್ಗೆ ಒತ್ತಡ ಹೆಚ್ಚಾದರೂ ನಟ ತಾನು ತಪ್ಪು ಮಾಡೇ ಇಲ್ಲ ಎನ್ನುತ್ತಿದ್ದಾರೆ.

ಕೃಷ್ಣಮೃಗ ಬೇಟೆ ಪ್ರಕರಣದಲ್ಲಿ ಸಲ್ಮಾನ್ ಖಾನ್ ಅವರ ಭವಿಷ್ಯವನ್ನು ಯಾವುದೇ ನ್ಯಾಯಾಲಯ ನಿರ್ಧರಿಸುವುದಿಲ್ಲ ಎಂದು ಲಾರೆನ್ಸ್ ಬಿಷ್ಣೋಯ್ ಇದಾಗಲೇ ಹೇಳಿದ್ದಾನೆ. ಪೊಲೀಸರ ಮುಂದೆ ನೀಡಿದ ಹೇಳಿಕೆಯಲ್ಲಿ, ಸಲ್ಮಾನ್ ಖಾನ್ ಮತ್ತು ಅವರ ತಂದೆ ಸಲೀಂ ಖಾನ್ ಈ ವಿಷಯದಲ್ಲಿ ಸಾರ್ವಜನಿಕವಾಗಿ ಕ್ಷಮೆಯಾಚಿಸಿದರೆ (Apology) ತಮ್ಮ ಮನಸ್ಸು ಕೂಡ ಬದಲಾಗಬಹುದು ಎಂದು ಲಾರೆನ್ಸ್ ಬಿಷ್ಣೋಯ್ ಈ ಹಿಂದೆ ಹೇಳಿದ್ದ. ಇದರ ಹೊರತಾಗಿಯೂ ಸಲ್ಮಾನ್ ಖಾನ್ ಕ್ಷಮೆ ಕೋರಿಲ್ಲ ಎನ್ನುವುದು ಅವರಿಗೆ ಇರುವ ಆಕ್ರೋಶ. ಕ್ಷಮೆ ಕೋರದೇ ಹೋದರೆ ಪರಿಣಾಮ ಎದುರಿಸಲು ಸಿದ್ಧ ಇರಿ ಎಂದು ಗ್ಯಾಂಗ್ ಎಚ್ಚರಿಕೆ ನೀಡುತ್ತಲೇ ಇದೆ. ಕ್ಷಮೆ ಕೋರದ ಸಲ್ಮಾನ್ ಅವರ ಅಹಂಕಾರವನ್ನು ಮುರಿಯುತ್ತೇವೆ ಎಂದಿದ್ದಾನೆ. ಇದರ ಬೆನ್ನಲ್ಲೇ ಕೊಲೆ ಬೆದರಿಕೆ, ಗುಂಡಿನ ದಾಳಿ ನಡೆಯುತ್ತಿದೆ.

Arrest Warrant: ರಾಖಿ ಸಾವಂತ್‌ ವಿರುದ್ಧ ಜಾಮೀನು ರಹಿತ ಅರೆಸ್ಟ್‌ ವಾರೆಂಟ್‌ ಜಾರಿ! 16 ವರ್ಷದ ಹಿಂದೆ ಏನು ನಡೆದಿತ್ತು ಗೊತ್ತಾ?

Shriram Bhat — Sun, 18 Oct 2026 15:57:19 +0530

16 ವರ್ಷಗಳ ಹಳೆಯ ಪ್ರಕರಣದಲ್ಲಿ ರಾಖಿ ಸಾವಂತ್‌ಗೆ ಸಂಕಷ್ಟ! ಜಾಮೀನು ರಹಿತ ಅರೆಸ್ಟ್ ವಾರೆಂಟ್ ಜಾರಿ

ಬಾಲಿವುಡ್‌ನ ವಿವಾದಾತ್ಮಕ ನಟಿ ರಾಖಿ ಸಾವಂತ್ ಮತ್ತೊಮ್ಮೆ ಸುದ್ದಿಯಲ್ಲಿದ್ದಾರೆ. ಸದಾ ಒಂದಲ್ಲ ಒಂದು ವಿಚಾರಕ್ಕೆ ಸುದ್ದಿಯಾಗುವ ‘ಡ್ರಾಮಾ ಕ್ವೀನ್’ ರಾಖಿ ಇದೀಗ 16 ವರ್ಷಗಳ ಹಿಂದಿನ ಪ್ರಕರಣವೊಂದರಿಂದ ಕಾನೂನು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಯುವಕನೊಬ್ಬನ ಸಾವಿಗೆ ಸಂಬಂಧಿಸಿದ ಪ್ರಕರಣದಲ್ಲಿ ಝಾನ್ಸಿ ನ್ಯಾಯಾಲಯವು ಅವರ ವಿರುದ್ಧ ಜಾಮೀನು ರಹಿತ ಬಂಧನ ವಾರಂಟ್ ಜಾರಿ ಮಾಡಿದೆ ಎಂಬ ವರದಿಗಳು ಹೊರಬಿದ್ದಿವೆ. ಈ ಬೆಳವಣಿಗೆ ಬಾಲಿವುಡ್ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ.

ಏನಿದು 2010ರ ಹಳೆಯ ಪ್ರಕರಣ?

2010ರಲ್ಲಿ ರಾಖಿ ಸಾವಂತ್ ನಿರೂಪಣೆ ಮಾಡುತ್ತಿದ್ದ ‘ರಾಖಿ ಕಾ ಇನ್ಸಾಫ್’ ಎಂಬ ರಿಯಾಲಿಟಿ ಶೋನಲ್ಲಿ ಝಾನ್ಸಿಯ ಲಕ್ಷ್ಮಣ್ ಅಹಿರ್ವರ್ ಎಂಬ ಯುವಕ ಭಾಗವಹಿಸಿದ್ದರು. ಪತ್ನಿಯೊಂದಿಗಿನ ಕೌಟುಂಬಿಕ ಕಲಹಕ್ಕೆ ಪರಿಹಾರ ಕಂಡುಕೊಳ್ಳುವ ಉದ್ದೇಶದಿಂದ ಅವರು ಕಾರ್ಯಕ್ರಮಕ್ಕೆ ಬಂದಿದ್ದರು ಎನ್ನಲಾಗಿದೆ. ಆದರೆ, ಕಾರ್ಯಕ್ರಮದಲ್ಲಿ ರಾಖಿ ಅವರನ್ನು ಸಾರ್ವಜನಿಕವಾಗಿ ಅವಮಾನಿಸಿ, ಅವಹೇಳನಕಾರಿ ಮಾತುಗಳನ್ನಾಡಿದ್ದರು ಎಂಬ ಆರೋಪ ಕೇಳಿಬಂದಿತ್ತು.

2010ರ ಅಕ್ಟೋಬರ್ 23ರಂದು ಕಾರ್ಯಕ್ರಮ ಪ್ರಸಾರವಾದ ಬಳಿಕ ಲಕ್ಷ್ಮಣ್ ಮಾನಸಿಕವಾಗಿ ತೀವ್ರವಾಗಿ ಕುಗ್ಗಿದ್ದರು ಎಂದು ವರದಿಗಳು ತಿಳಿಸಿವೆ. ಜನರನ್ನು ಎದುರಿಸಲು ಹಿಂಜರಿಯುತ್ತಿದ್ದ ಅವರು, ಊಟವನ್ನೂ ಸರಿಯಾಗಿ ಮಾಡದೆ ಅನಾರೋಗ್ಯಕ್ಕೆ ಒಳಗಾದರು ಎನ್ನಲಾಗಿದೆ. ನಂತರ ನವೆಂಬರ್ 9ರಂದು ಆಸ್ಪತ್ರೆಗೆ ದಾಖಲಾದ ಅವರು, ನವೆಂಬರ್ 10ರಂದು ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದರು.

ತಾಯಿಯ ಸುದೀರ್ಘ ಕಾನೂನು ಹೋರಾಟ

ಮಗನ ಸಾವಿಗೆ ಕಾರ್ಯಕ್ರಮದಲ್ಲಿ ನಡೆದ ಘಟನೆಗಳೇ ಕಾರಣ ಎಂದು ಆರೋಪಿಸಿ ಲಕ್ಷ್ಮಣ್ ಅವರ ತಾಯಿ ದೂರು ನೀಡಿದ್ದರು. ಈ ಪ್ರಕರಣದಲ್ಲಿ ರಾಖಿ ಸಾವಂತ್ ವಿರುದ್ಧ ಕಾನೂನು ಹೋರಾಟ ಮುಂದುವರಿದಿದೆ. ಆದರೆ, ಸಾವಿಗೆ ಸಂಬಂಧಿಸಿದ ಆರೋಪಗಳು ನ್ಯಾಯಾಲಯದಲ್ಲಿ ಸಾಬೀತಾಗಿವೆ ಎಂದು ಹೇಳಲು ಸಾಧ್ಯವಿಲ್ಲ.

ನ್ಯಾಯಾಲಯಕ್ಕೆ ಗೈರುಹಾಜರಿ ಸಂಕಷ್ಟ!

ಪ್ರಕರಣದ ವಿಚಾರಣೆಗೆ ಸಂಬಂಧಿಸಿದಂತೆ ಈ ಹಿಂದೆ ಹಲವು ಬಾರಿ ಸಮನ್ಸ್ ಜಾರಿಯಾಗಿದ್ದರೂ ರಾಖಿ ನ್ಯಾಯಾಲಯಕ್ಕೆ ಹಾಜರಾಗಿರಲಿಲ್ಲ ಎನ್ನಲಾಗಿದೆ. ಸತತ ಗೈರುಹಾಜರಿಯನ್ನು ಪರಿಗಣಿಸಿದ ನ್ಯಾಯಾಲಯ ಇದೀಗ ಜಾಮೀನು ರಹಿತ ಬಂಧನ ವಾರಂಟ್ ಹೊರಡಿಸಿದೆ ಎಂದು ವರದಿಯಾಗಿದೆ. ಮುಂದಿನ ವಿಚಾರಣೆ ಡಿಸೆಂಬರ್ 1ರಂದು ನಡೆಯಲಿದೆ ಎಂದು ತಿಳಿದುಬಂದಿದೆ.

ಒಟ್ಟಿನಲ್ಲಿ, ಹಲವು ವಿವಾದಗಳಿಂದಲೇ ಸುದ್ದಿಯಾಗುತ್ತಿದ್ದ ರಾಖಿ ಸಾವಂತ್ ಅವರಿಗೆ ಈ ಹಳೆಯ ಪ್ರಕರಣ ಹೊಸ ತಲೆನೋವಾಗಿ ಪರಿಣಮಿಸಿದೆ. ಮುಂದಿನ ವಿಚಾರಣೆಯಲ್ಲಿ ಪ್ರಕರಣ ಯಾವ ತಿರುವು ಪಡೆದುಕೊಳ್ಳಲಿದೆ ಎಂಬುದರ ಮೇಲೆ ಎಲ್ಲರ ಗಮನ ನೆಟ್ಟಿದೆ.

ಫೋನ್‌ನಲ್ಲಿ ನಿಮ್ಮವರ ಧ್ವನಿ ಕೇಳಿದರೂ ನಂಬಬೇಡಿ! AI ವಾಯ್ಸ್ ಕ್ಲೋನಿಂಗ್ ಮೂಲಕ ನಿಮ್ಮ ಖಾತೆಗೆ ಕನ್ನ!

Pavna Das — Mon, 19 Oct 2026 22:55:36 +0530

ವಾಯ್ಸ್ ಕ್ಲೋನ್ ಸೈಬರ್ ವಂಚನೆ

ಫೋನ್ ರಿಂಗಣಿಸುತ್ತದೆ. ಮತ್ತೊಂದೆಡೆಯಿಂದ ನಿಮ್ಮ ಸಹೋದರ, ಮಗ, ಮಗಳು ಅಥವಾ ಆತ್ಮೀಯರ ಧ್ವನಿ ಕೇಳಿಸುತ್ತದೆ. ಅವರು ಗಾಬರಿಗೊಂಡ ಧ್ವನಿಯಲ್ಲಿ, “ನಾನು ತೊಂದರೆಯಲ್ಲಿದ್ದೇನೆ, ತಕ್ಷಣ ಹಣ ಕಳುಹಿಸು” ಎಂದು ಹೇಳುತ್ತಾರೆ. ಧ್ವನಿ ನಿಮ್ಮವರಂತೆಯೇ ಕೇಳಿಸುವುದರಿಂದ ನೀವು ಹೆಚ್ಚು ಯೋಚಿಸದೆ ಹಣ ವರ್ಗಾಯಿಸುತ್ತೀರಿ. ಆದರೆ ಈಗ ಕೇವಲ ಧ್ವನಿ ಕೇಳಿ ಯಾರನ್ನಾದರೂ ನಂಬುವುದು ಅಪಾಯಕಾರಿಯಾಗಬಹುದು. AI ತಂತ್ರಜ್ಞಾನ ಬಳಸಿ ಸೈಬರ್ ವಂಚಕರು ವ್ಯಕ್ತಿಯ ಧ್ವನಿಯನ್ನು ಬಹುತೇಕ ನೈಜವೆನಿಸುವಂತೆ ನಕಲು ಮಾಡುತ್ತಿದ್ದಾರೆ. ಇದನ್ನೇ ಬಳಸಿಕೊಂಡು ಜನರನ್ನು ವಂಚಿಸಲು ಪ್ರಯತ್ನಿಸುತ್ತಿದ್ದಾರೆ. ಆದ್ದರಿಂದ ಇಂತಹ ವಾಯ್ಸ್ ಕ್ಲೋನಿಂಗ್ ಸ್ಕ್ಯಾಮ್‌ಗಳ ಬಗ್ಗೆ ಎಚ್ಚರಿಕೆಯಿಂದಿರುವಂತೆ ದೂರಸಂಪರ್ಕ ಇಲಾಖೆ (DoT) ಸಲಹೆ ನೀಡಿದೆ.

ಈ ರೀತಿಯ ವಂಚನೆ ಹೇಗೆ ನಡೆಯುತ್ತದೆ?

ದೂರಸಂಪರ್ಕ ಇಲಾಖೆಯ ಪ್ರಕಾರ, ಸೈಬರ್ ವಂಚಕರು ಕೃತಕ ಬುದ್ಧಿಮತ್ತೆ (AI) ಬಳಸಿ ನಿಮಗೆ ಪರಿಚಯವಿರುವ ವ್ಯಕ್ತಿಯ ಧ್ವನಿಯನ್ನು ನಕಲು ಮಾಡಬಹುದು. ಬಳಿಕ ಕುಟುಂಬದ ಸದಸ್ಯರು ಅಥವಾ ಆತ್ಮೀಯರಂತೆ ನಟಿಸಿ ಕರೆ ಮಾಡುತ್ತಾರೆ. ಅಪಘಾತ, ಪೊಲೀಸ್ ಪ್ರಕರಣ, ಆಸ್ಪತ್ರೆಯ ತುರ್ತು ಪರಿಸ್ಥಿತಿ ಅಥವಾ ಇತರ ಸಂಕಷ್ಟಗಳ ನೆಪ ಹೇಳಿ ತಕ್ಷಣ ಹಣ ಕಳುಹಿಸುವಂತೆ ಒತ್ತಾಯಿಸಬಹುದು. ಪರಿಚಿತ ಧ್ವನಿ ಕೇಳುತ್ತಿದ್ದಂತೆ ಕರೆ ಸ್ವೀಕರಿಸಿದವರು ಗಾಬರಿಗೊಂಡು, ನಿಜವೇ ಎಂದು ಪರಿಶೀಲಿಸದೆ ಹಣ ವರ್ಗಾಯಿಸುವ ಸಾಧ್ಯತೆ ಇರುತ್ತದೆ. ವಂಚಕರು ಇದೇ ಭಯ ಮತ್ತು ಆತುರವನ್ನು ದುರುಪಯೋಗಪಡಿಸಿಕೊಳ್ಳುತ್ತಾರೆ.

AI ಮೂಲಕ ಧ್ವನಿಯ ನಕಲು ಹೇಗೆ ಸಿದ್ಧಪಡಿಸುತ್ತಾರೆ?

ವಾಯ್ಸ್ ಕ್ಲೋನ್ ಸಿದ್ಧಪಡಿಸಲು ವಂಚಕರು ಯಾವಾಗಲೂ ನಿಮ್ಮ ಖಾಸಗಿ ಮಾಹಿತಿಯನ್ನು ಕದಿಯಬೇಕೆಂದಿಲ್ಲ. ಸಾಮಾಜಿಕ ಜಾಲತಾಣಗಳಲ್ಲಿರುವ ರೀಲ್ಸ್, ವಿಡಿಯೋಗಳು ಅಥವಾ ಇತರ ಧ್ವನಿ ರೆಕಾರ್ಡಿಂಗ್‌ಗಳಿಂದಲೂ ವ್ಯಕ್ತಿಯ ಧ್ವನಿಯ ಮಾದರಿಯನ್ನು ಪಡೆಯಬಹುದು. ಇದಲ್ಲದೆ, ಖಾಸಗಿ ವಾಯ್ಸ್ ನೋಟ್‌ಗಳನ್ನೂ ದುರುಪಯೋಗಪಡಿಸಿಕೊಳ್ಳುವ ಸಾಧ್ಯತೆಯಿದೆ. AI ಉಪಕರಣಗಳ ಸಹಾಯದಿಂದ ಈ ಧ್ವನಿಯನ್ನು ಸಂಸ್ಕರಿಸಿ, ಫೋನ್‌ನಲ್ಲಿ ಕೇಳುವವರಿಗೆ ಅದು ನಿಜವಾದ ಧ್ವನಿಯಂತೆಯೇ ಅನಿಸುವಂತೆ ಮಾಡಬಹುದು.

ಸೈಬರ್ ವಂಚನೆಯಿಂದ ಪಾರಾಗುವುದು ಹೇಗೆ?

AI ಮೂಲಕ ಸೃಷ್ಟಿಸಿದ ಧ್ವನಿ ಅಸಲಿಯಂತೆಯೇ ಕೇಳಿಸಬಹುದು. ಹೀಗಾಗಿ ಧ್ವನಿ ಪರಿಚಿತವಾಗಿದೆ ಎಂಬ ಕಾರಣಕ್ಕೆ ಮಾತ್ರ ವ್ಯಕ್ತಿಯ ಗುರುತನ್ನು ಖಚಿತಪಡಿಸಿಕೊಳ್ಳಲು ಸಾಧ್ಯವಿಲ್ಲ.
ನಿಮ್ಮ ಆತ್ಮೀಯರಂತೆ ನಟಿಸಿ ಯಾರಾದರೂ ಹಠಾತ್ತನೆ ಹಣ ಕೇಳಿದರೆ, ತಕ್ಷಣ ಹಣ ಕಳುಹಿಸುವ ಬದಲು ಕೆಲವು ನಿಮಿಷ ಕಾಯಿರಿ. ಆ ವ್ಯಕ್ತಿಯ ಹಳೆಯ ಅಥವಾ ನಿಮ್ಮ ಫೋನ್‌ನಲ್ಲಿ ಈಗಾಗಲೇ ಸೇವ್ ಆಗಿರುವ ನಂಬರ್ ಗೆ ಕಾಲ್ ಮಾಡಿ ಖಚಿತಪಡಿಸಿಕೊಳ್ಳಿ.
ಕರೆ ಮಾಡುವವರು ಬ್ಯುಸಿ ಇದ್ದರೆ, ಸ್ವಲ್ಪ ಹೊತ್ತು ಕಾಯಿರಿ. ಹಣ ಕಳುಹಿಸುವ ಮೊದಲು ಆ ವ್ಯಕ್ತಿಯೊಂದಿಗೆ ನೇರವಾಗಿ ಮಾತನಾಡಿ ಪರಿಸ್ಥಿತಿಯ ಸತ್ಯಾಸತ್ಯತೆಯನ್ನು ಪರಿಶೀಲಿಸಿ.

ಗಾಬರಿಯಾಗುವ ಬದಲು ಈ ಪ್ರಶ್ನೆಗಳನ್ನು ಕೇಳಿ

ಸೈಬರ್ ವಂಚಕರು ಸಾಮಾನ್ಯವಾಗಿ ಜನರಲ್ಲಿ ಭಯ ಹುಟ್ಟಿಸಿ, ತಕ್ಷಣ ನಿರ್ಧಾರ ತೆಗೆದುಕೊಳ್ಳುವಂತೆ ಒತ್ತಡ ಹೇರುತ್ತಾರೆ. ಈಗಲೇ ಹಣ ಕಳುಹಿಸದಿದ್ದರೆ ದೊಡ್ಡ ಸಮಸ್ಯೆಯಾಗುತ್ತದೆ ಅಥವಾ ಈ ವಿಷಯವನ್ನು ಯಾರಿಗೂ ಹೇಳಬಾರದು ಎಂದು ಹೇಳಬಹುದು. ಇಂತಹ ಒತ್ತಡಕ್ಕೆ ಮಣಿದು ಹಣ ವರ್ಗಾಯಿಸಬೇಡಿ. ಕರೆ ಮಾಡಿದ ವ್ಯಕ್ತಿಗೆ ನಿಮ್ಮಿಬ್ಬರಿಗೆ ಮಾತ್ರ ತಿಳಿದಿರುವ ವಿಷಯದ ಬಗ್ಗೆ ಪ್ರಶ್ನೆ ಕೇಳಿ. ಕುಟುಂಬದ ಸದಸ್ಯರ ನಡುವೆ ಮೊದಲೇ ಒಂದು ರಹಸ್ಯ ಕೋಡ್ ವರ್ಡ್ ನಿಗದಿಪಡಿಸಿಕೊಳ್ಳುವುದೂ ಉತ್ತಮ. ಅಗತ್ಯವಿದ್ದಾಗ ಆ ಪದದ ಮೂಲಕ ವ್ಯಕ್ತಿಯ ಗುರುತನ್ನು ಖಚಿತಪಡಿಸಿಕೊಳ್ಳಬಹುದು.

ವಿಶೇಷವಾಗಿ ಮಕ್ಕಳು, ಹಿರಿಯ ನಾಗರಿಕರು ಮತ್ತು ಗಾಬರಿಯಲ್ಲಿ ತ್ವರಿತ ನಿರ್ಧಾರ ತೆಗೆದುಕೊಳ್ಳುವ ಸಾಧ್ಯತೆ ಇರುವವರಿಗೆ ಇಂತಹ AI ವಂಚನೆಗಳ ಬಗ್ಗೆ ತಿಳಿಸಿ ಜಾಗೃತಿ ಮೂಡಿಸಿ.
OTP ಮತ್ತು UPI PIN ಅನ್ನು ಯಾವುದೇ ಕಾರಣಕ್ಕೂ ಹಂಚಿಕೊಳ್ಳಬೇಡಿ
ಕರೆ ಮಾಡುವವರು ಎಷ್ಟೇ ಆತ್ಮೀಯರಂತೆ ಮಾತನಾಡಿದರೂ, ಫೋನ್‌ನಲ್ಲಿ OTP, UPI PIN, ಬ್ಯಾಂಕ್ ಖಾತೆಯ ವಿವರಗಳು, ಕಾರ್ಡ್ ಮಾಹಿತಿ ಅಥವಾ ಇಂಟರ್ನೆಟ್ ಬ್ಯಾಂಕಿಂಗ್‌ಗೆ ಸಂಬಂಧಿಸಿದ ಸೂಕ್ಷ್ಮ ಮಾಹಿತಿಯನ್ನು ಹಂಚಿಕೊಳ್ಳಬೇಡಿ.

ವಂಚನೆಗೆ ಸಂಬಂಧಿಸಿದ ಕರೆ ಬಂದರೆ ಎಲ್ಲಿ ದೂರು ನೀಡಬೇಕು?

ನಿಮಗೆ ಅನುಮಾನಾಸ್ಪದ ಕರೆ ಅಥವಾ ಸಂದೇಶ ಬಂದರೆ, ಸಂಚಾರ ಸಾಥಿ (Sanchar Saathi) ಪೋರ್ಟಲ್‌ನಲ್ಲಿರುವ ಚಕ್ಷು (Chakshu) ವಿಭಾಗದ ಮೂಲಕ ದೂರು ನೀಡಬಹುದು. ಈ ವ್ಯವಸ್ಥೆಯ ಮೂಲಕ ಅನುಮಾನಾಸ್ಪದ ಸಂವಹನದ ಬಗ್ಗೆ ವರದಿ ಮಾಡಬಹುದು. ಒಂದು ವೇಳೆ ನಿಮ್ಮ ಬ್ಯಾಂಕ್ ಖಾತೆಯಿಂದ ಈಗಾಗಲೇ ಹಣ ಕಡಿತವಾಗಿದ್ದರೆ ತಡಮಾಡಬೇಡಿ. ತಕ್ಷಣ 1930 ಸೈಬರ್ ವಂಚನೆ ಸಹಾಯವಾಣಿಗೆ ಕರೆ ಮಾಡಿ ಮತ್ತು ರಾಷ್ಟ್ರೀಯ ಸೈಬರ್ ಅಪರಾಧ ವರದಿ ಪೋರ್ಟಲ್‌ನಲ್ಲಿ ದೂರು ದಾಖಲಿಸಿ. ಎಷ್ಟು ಬೇಗ ದೂರು ನೀಡುತ್ತೀರೋ, ಅಷ್ಟು ಬೇಗ ಹಣವನ್ನು ಪತ್ತೆಹಚ್ಚಲು ಅಥವಾ ಅದರ ವರ್ಗಾವಣೆಯನ್ನು ತಡೆಯಲು ಪ್ರಯತ್ನಿಸಲು ಸಾಧ್ಯವಾಗುತ್ತದೆ.

TIGER: ಟೈಗರ್ ಶ್ರಾಫ್ ಶೂಟರ್‌ಗಳನ್ನು ಹಿಡಿದ ಐಪಿಎಸ್ ತೇಜಸ್ವಿನಿ ಗೌತಮ್ ಯಾರು? ಬರೀ ಅಧಿಕಾರಿ ಅಲ್ಲ, ರೋಚಕ ಕಥೆ ಇದೆ!

Shriram Bhat — Tue, 20 Oct 2026 10:53:38 +0530

ಟೈಗರ್ ಶ್ರಾಫ್ ಮೇಲೆ ಗುಂಡಿನ ದಾಳಿ: ಕೇವಲ 15 ನಿಮಿಷಗಳಲ್ಲಿ ಆರೋಪಿಗಳ ಬಂಧನ! ಮಹಿಳಾ IPS ಅಧಿಕಾರಿ ತೇಜಸ್ವಿನಿ ಗೌತಮ್‌ಗೆ ಸಿಎಂ ಮೆಚ್ಚುಗೆ

ಬಾಲಿವುಡ್ ನಟ ಟೈಗರ್ ಶ್ರಾಫ್ (Tiger Shroff) ಮೇಲೆ ನಡೆದ ಗುಂಡಿನ ದಾಳಿ ಪ್ರಕರಣದಲ್ಲಿ ರಾಜಸ್ಥಾನದ ಕೋಟಾ ಪೊಲೀಸರು ಮಿಂಚಿನ ಕಾರ್ಯಾಚರಣೆ ನಡೆಸಿ ಮೂವರು ಶಂಕಿತರನ್ನು ಬಂಧಿಸಿದ್ದಾರೆ. ಮುಂಬೈ ಪೊಲೀಸರಿಂದ ಮಾಹಿತಿ ಬಂದ ಕೇವಲ 15 ನಿಮಿಷಗಳಲ್ಲಿ ಆರೋಪಿಗಳನ್ನು ವಶಕ್ಕೆ ಪಡೆದಿರುವುದು ಈಗ ಭಾರಿ ಚರ್ಚೆಗೆ ಕಾರಣವಾಗಿದೆ. ಈ ಕಾರ್ಯಾಚರಣೆಯ ನೇತೃತ್ವ ವಹಿಸಿದ್ದ ಕೋಟಾ ನಗರ ಪೊಲೀಸ್ ವರಿಷ್ಠಾಧಿಕಾರಿ (SP) ತೇಜಸ್ವಿನಿ ಗೌತಮ್ ಅವರ ಸಮಯಪ್ರಜ್ಞೆ ಮತ್ತು ಧೈರ್ಯಕ್ಕೆ ಮೆಚ್ಚುಗೆ ವ್ಯಕ್ತವಾಗಿದೆ. ರಾಜಸ್ಥಾನದ ಮುಖ್ಯಮಂತ್ರಿ ಭಜನ್‌ಲಾಲ್ ಶರ್ಮಾ ಕೂಡ ಕರೆ ಮಾಡಿ ಪೊಲೀಸ್ ತಂಡವನ್ನು ಅಭಿನಂದಿಸಿದ್ದಾರೆ.

ಸಿನಿಮೀಯ ಶೈಲಿಯಲ್ಲಿ ನಡೆದ ಕಾರ್ಯಾಚರಣೆ!

ವರದಿಗಳ ಪ್ರಕಾರ, ಬೆಳಿಗ್ಗೆ ಸುಮಾರು 9:45ಕ್ಕೆ ಮುಂಬೈ ಕ್ರೈಂ ಬ್ರಾಂಚ್‌ನಿಂದ ತೇಜಸ್ವಿನಿ ಗೌತಮ್ ಅವರಿಗೆ ತುರ್ತು ಮಾಹಿತಿ ಬಂದಿತ್ತು. ಟೈಗರ್ ಶ್ರಾಫ್ ಮೇಲೆ ಗುಂಡಿನ ದಾಳಿ ನಡೆಸಿದ ಆರೋಪಿಗಳು ರೈಲಿನಲ್ಲಿ ಕೋಟಾ ಕಡೆಗೆ ಪ್ರಯಾಣಿಸುತ್ತಿದ್ದಾರೆ ಎಂಬ ಸುಳಿವು ಸಿಕ್ಕಿತ್ತು. ತಕ್ಷಣವೇ ಕಾರ್ಯಪ್ರವೃತ್ತರಾದ ಎಸ್‌ಪಿ, ತಮ್ಮ ತಂಡವನ್ನು ಅಲರ್ಟ್ ಮಾಡಿ ರೈಲಿನಲ್ಲಿ ಶೋಧ ಕಾರ್ಯಾಚರಣೆ ಆರಂಭಿಸಿದರು. ಕೊನೆಗೆ ಕೇವಲ 15 ನಿಮಿಷಗಳಲ್ಲಿ ಶಂಕಿತರನ್ನು ಬಂಧಿಸುವಲ್ಲಿ ಯಶಸ್ವಿಯಾದರು.

ಬಂಧಿತರನ್ನು ಹರಿಯಾಣದ ಸೋನಿಪತ್‌ನ ರೇಹನ್ ಅಲಿಯಾಸ್ ಸುಕ್ಕಾ, ಬಿಹಾರ ಮೂಲದ ಹೃತಿಕ್ ಕುರ್ಮಿ ಅಲಿಯಾಸ್ ರೋಷನ್ ಮತ್ತು ಒಬ್ಬ ಅಪ್ರಾಪ್ತ ಎಂದು ಗುರುತಿಸಲಾಗಿದೆ.

ಸಿಸಿಟಿವಿ ದೃಶ್ಯಗಳಿಂದ ಸಿಕ್ಕ ಸುಳಿವು!

ಜುಹು ಪ್ರದೇಶದಲ್ಲಿ ದಾಳಿ ನಡೆಸಿದ ಬಳಿಕ ಆರೋಪಿಗಳು ಮೋಟಾರ್‌ಸೈಕಲ್‌ನಲ್ಲಿ ಪರಾರಿಯಾಗಿದ್ದರು. ನಂತರ ಅಂಧೇರಿ ರೈಲು ನಿಲ್ದಾಣ ತಲುಪಿ, ಲೋಕಲ್ ರೈಲಿನಲ್ಲಿ ಬೊರಿವಿಲಿಗೆ ತೆರಳಿದ್ದರು. ಅಲ್ಲಿಂದ ಕ್ಯಾಬ್ ಮೂಲಕ ಸೂರತ್‌ಗೆ ಪ್ರಯಾಣಿಸಿ, ಬಳಿಕ ಕೋಟಾ ಕಡೆಗೆ ತೆರಳುತ್ತಿದ್ದ ರೈಲನ್ನು ಹತ್ತಿದ್ದರು.

ಸಿಸಿಟಿವಿ ದೃಶ್ಯಗಳು ಮತ್ತು ಆರೋಪಿಗಳ ಪ್ರಯಾಣದ ಹಾದಿಯನ್ನು ಆಧರಿಸಿ ಮುಂಬೈ ಪೊಲೀಸರು ನಿರಂತರವಾಗಿ ಅವರ ಚಲನವಲನಗಳನ್ನು ಪತ್ತೆಹಚ್ಚಿದ್ದರು. ಮಾಹಿತಿ ರಾಜಸ್ಥಾನ ಪೊಲೀಸರಿಗೆ ತಲುಪಿದ ತಕ್ಷಣ ಕೋಟಾ ಪೊಲೀಸರು ಮತ್ತು ಆಂಟಿ-ಗ್ಯಾಂಗ್‌ಸ್ಟರ್ ಟಾಸ್ಕ್ ಫೋರ್ಸ್ ಜಂಟಿಯಾಗಿ ಕಾರ್ಯಾಚರಣೆ ನಡೆಸಿದವು. ಪುಣೆ-ಜೈಪುರ ಎಕ್ಸ್‌ಪ್ರೆಸ್ ರೈಲಿನ ಜನರಲ್ ಬೋಗಿಯಿಂದ ಶಂಕಿತರನ್ನು ವಶಕ್ಕೆ ಪಡೆಯಲಾಯಿತು.

ಯಾರು ಈ IPS ತೇಜಸ್ವಿನಿ ಗೌತಮ್?

2013ರ ಬ್ಯಾಚ್‌ನ ರಾಜಸ್ಥಾನ ಕೇಡರ್ ಐಪಿಎಸ್ ಅಧಿಕಾರಿಯಾಗಿರುವ ತೇಜಸ್ವಿನಿ ಗೌತಮ್ ಮೂಲತಃ ದೆಹಲಿಯವರು. ಲೇಡಿ ಶ್ರೀರಾಮ್ ಕಾಲೇಜಿನಲ್ಲಿ ರಾಜಕೀಯ ವಿಜ್ಞಾನದಲ್ಲಿ ಪದವಿ ಪಡೆದಿರುವ ಅವರು, ಎಲ್‌ಎಲ್‌ಬಿ ಹಾಗೂ ಸಾರ್ವಜನಿಕ ಆಡಳಿತದಲ್ಲಿ ಸ್ನಾತಕೋತ್ತರ ಪದವಿಯನ್ನೂ ಪೂರ್ಣಗೊಳಿಸಿದ್ದಾರೆ. ದೆಹಲಿ ವಿಶ್ವವಿದ್ಯಾಲಯದಲ್ಲಿ ಚಿನ್ನದ ಪದಕ ಪಡೆದ ಹೆಗ್ಗಳಿಕೆ ಅವರದು.

ಚುರು, ಅಜ್ಮೀರ್ ಮತ್ತು ಬಿಕಾನೇರ್ ಸೇರಿದಂತೆ ಹಲವು ಜಿಲ್ಲೆಗಳಲ್ಲಿ ಸೇವೆ ಸಲ್ಲಿಸಿರುವ ಅವರು, ಪೊಲೀಸ್ ಕಾರ್ಯಾಚರಣೆಗಳ ಜೊತೆಗೆ ಸಮಾಜಮುಖಿ ಕಾರ್ಯಕ್ರಮಗಳಲ್ಲೂ ಗುರುತಿಸಿಕೊಂಡಿದ್ದಾರೆ. ಚುರು ಜಿಲ್ಲೆಯಲ್ಲಿ ಬೀದಿ ನಾಟಕಗಳ ಮೂಲಕ ಜನಜಾಗೃತಿ ಮೂಡಿಸಿದ್ದ ಅವರು, ಅಜ್ಮೀರ್‌ನಲ್ಲಿ ಮಾದಕ ವ್ಯಸನಕ್ಕೆ ಒಳಗಾದ ಮಕ್ಕಳ ಪುನರ್ವಸತಿಗಾಗಿ 'ಪ್ರೇರಣಾ' ಯೋಜನೆಯನ್ನು ಜಾರಿಗೆ ತಂದಿದ್ದರು.

ತ್ವರಿತ ನಿರ್ಧಾರ, ದಕ್ಷ ಆಡಳಿತ ಮತ್ತು ಸಾಮಾಜಿಕ ಕಳಕಳಿಯಿಂದ ಗಮನ ಸೆಳೆಯುತ್ತಿರುವ ತೇಜಸ್ವಿನಿ ಗೌತಮ್ ಅವರ ಈ ಕಾರ್ಯಾಚರಣೆ ಮತ್ತೊಮ್ಮೆ ಅವರ ನಾಯಕತ್ವದ ಸಾಮರ್ಥ್ಯವನ್ನು ಮುನ್ನೆಲೆಗೆ ತಂದಿದೆ.