Asianet Suvarna News

Jasprit Bumrah Net Worth: ಐಪಿಎಲ್‌ನಲ್ಲಿ ಕೋಟಿ ಕೋಟಿ, ಜಸ್ಪ್ರೀತ್ ಬುಮ್ರಾ ಸಂಪಾದನೆ ಎಷ್ಟು ಗೊತ್ತಾ?

Naveen Kodase — Sat, 03 Oct 2026 19:30:14 +0530

ಟೀಂ ಇಂಡಿಯಾದ ಸ್ಟಾರ್ ಪೇಸರ್ ಜಸ್ಪ್ರೀತ್ ಬುಮ್ರಾ ವಿಶ್ವ ಕ್ರಿಕೆಟ್‌ನ ಬೆಸ್ಟ್ ಫಾಸ್ಟ್ ಬೌಲರ್‌ಗಳಲ್ಲಿ ಒಬ್ಬರು. ಮೈದಾನದಲ್ಲಿ ತಮ್ಮ ಬೆಂಕಿ ಯಾರ್ಕರ್‌ಗಳಿಂದ ವಿಕೆಟ್ ಉರುಳಿಸುವ ಬುಮ್ರಾ, ಸಂಪಾದನೆಯಲ್ಲೂ ದೊಡ್ಡ ರೆಕಾರ್ಡ್ ಬರೆಯುತ್ತಿದ್ದಾರೆ.

ಟೀಂ ಇಂಡಿಯಾದ ಫಾಸ್ಟ್ ಬೌಲಿಂಗ್ ಸೆನ್ಸೇಷನ್ ಜಸ್ಪ್ರೀತ್ ಬುಮ್ರಾ ಮೈದಾನದಲ್ಲಿ ಯಾರ್ಕರ್ ಹಾಕಿದರೆ ಎದುರಾಳಿ ಬ್ಯಾಟರ್‌ಗಳ ವಿಕೆಟ್ ಹೇಗೆ ಹಾರುತ್ತದೆ ಅನ್ನೋದು ಎಲ್ಲರಿಗೂ ಗೊತ್ತು. ವಿಶ್ವ ಕ್ರಿಕೆಟ್‌ನ ಡೇಂಜರಸ್ ಬೌಲರ್ ಎನಿಸಿಕೊಂಡಿರುವ ಬುಮ್ರಾ, ಮೈದಾನದ ಹೊರಗೂ ತಮ್ಮ ಬ್ರಾಂಡ್ ವ್ಯಾಲ್ಯೂ ಮೂಲಕ ಭಾರಿ ಹಣ ಸಂಪಾದಿಸುತ್ತಿದ್ದಾರೆ.

ಫೈನಾನ್ಷಿಯಲ್ ಟ್ರ್ಯಾಕರ್‌ಗಳ ವರದಿ ಪ್ರಕಾರ, 2026ರ ಹೊತ್ತಿಗೆ ಬುಮ್ರಾ ಅವರ ಒಟ್ಟು ಆಸ್ತಿ ಮೌಲ್ಯ ಸುಮಾರು ₹60 ಕೋಟಿಯಿಂದ ₹80 ಕೋಟಿ ಇರಲಿದೆ. 2013ರಲ್ಲಿ ಕೇವಲ ₹10 ಲಕ್ಷದ ಐಪಿಎಲ್ ಡೀಲ್‌ನೊಂದಿಗೆ ಕೆರಿಯರ್ ಶುರು ಮಾಡಿದ ಬುಮ್ರಾ, ಇಂದು ದೇಶದ ಅತ್ಯಂತ ದುಬಾರಿ ಕ್ರೀಡಾಪಟುಗಳಲ್ಲಿ ಒಬ್ಬರಾಗಿದ್ದಾರೆ. ಈ ಕೋಟ್ಯಂತರ ರೂಪಾಯಿ ಹಣ ಬುಮ್ರಾಗೆ ಎಲ್ಲಿಂದ ಬರುತ್ತದೆ, ಅವರ ಕಾರುಗಳು ಮತ್ತು ಆಸ್ತಿ ವಿವರ ಇಲ್ಲಿದೆ.

ಮುಂಬೈ ಇಂಡಿಯನ್ಸ್ ಐಪಿಎಲ್ ಸಂಭಾವನೆ: ಮೆಗಾ ರಿಟೆನ್ಷನ್

ಬುಮ್ರಾ ಅವರ ಆದಾಯದ ಮೂಲಗಳಲ್ಲಿ ಅತಿ ದೊಡ್ಡ ಪಾಲು ಐಪಿಎಲ್ ಲೀಗ್‌ನಿಂದಲೇ ಬರುತ್ತದೆ. 2013ರಿಂದ ಮುಂಬೈ ಇಂಡಿಯನ್ಸ್ (MI) ಫ್ರಾಂಚೈಸಿಗೆ ಬೆನ್ನೆಲುಬಾಗಿ ನಿಂತಿರುವ ಬುಮ್ರಾ ಅವರನ್ನು 2026ರ ಐಪಿಎಲ್ ಸೀಸನ್‌ಗಾಗಿ ಮ್ಯಾನೇಜ್‌ಮೆಂಟ್ ಬರೋಬ್ಬರಿ ₹18 ಕೋಟಿಗೆ ರಿಟೇನ್ ಮಾಡಿಕೊಂಡಿದೆ. ಲೀಗ್‌ನಲ್ಲಿ ಅತಿ ಹೆಚ್ಚು ಸಂಭಾವನೆ ಪಡೆಯುವ ಟಾಪ್ ಆಟಗಾರರ ಪಟ್ಟಿಯಲ್ಲಿ ಬುಮ್ರಾ ಮುಂದಿದ್ದಾರೆ. ಪ್ರತಿ ಸೀಸನ್‌ಗೆ ಸಿಗುವ ಈ ₹18 ಕೋಟಿ ಫಿಕ್ಸ್ಡ್ ಸ್ಯಾಲರಿ ಅವರ ಬ್ಯಾಂಕ್ ಬ್ಯಾಲೆನ್ಸ್ ಅನ್ನು ಭಾರಿ ಮಟ್ಟದಲ್ಲಿ ಹೆಚ್ಚಿಸಿದೆ.

ಬಿಸಿಸಿಐ ಕಾಂಟ್ರಾಕ್ಟ್ ಮತ್ತು ಮ್ಯಾಚ್ ಫೀಸ್

ಭಾರತೀಯ ಕ್ರಿಕೆಟ್ ಮಂಡಳಿ (BCCI) ನೀಡುವ ವಾರ್ಷಿಕ ಕಾಂಟ್ರಾಕ್ಟ್ ಕೂಡ ಬುಮ್ರಾ ಅವರ ಪ್ರಮುಖ ಆದಾಯದ ಮೂಲ. ಬಿಸಿಸಿಐ 2025-26ರ ಕಾಂಟ್ರಾಕ್ಟ್ ಸೈಕಲ್‌ನಲ್ಲಿ ಬುಮ್ರಾ ಎ+ (A+) ಕೆಟಗರಿಯಲ್ಲಿದ್ದಾರೆ. ಈ ವಾರ್ಷಿಕ ಸಂಭಾವನೆ ಜೊತೆಗೆ ಪ್ರತಿ ಪಂದ್ಯಕ್ಕೂ ಬೋರ್ಡ್ ಮ್ಯಾಚ್ ಫೀಸ್ ಕೂಡ ನೀಡುತ್ತದೆ.

• ಟೆಸ್ಟ್ ಮ್ಯಾಚ್: ಪ್ರತಿ ಪಂದ್ಯಕ್ಕೆ ₹15 ಲಕ್ಷ

• ಏಕದಿನ ಮ್ಯಾಚ್: ಪ್ರತಿ ಪಂದ್ಯಕ್ಕೆ ₹6 ಲಕ್ಷ

• ಟಿ20 ಮ್ಯಾಚ್: ಪ್ರತಿ ಪಂದ್ಯಕ್ಕೆ ₹3 ಲಕ್ಷ

ಈ ಮ್ಯಾಚ್ ಫೀಸ್ ಮತ್ತು ಪರ್ಫಾರ್ಮೆನ್ಸ್ ಇನ್ಸೆಂಟಿವ್ಸ್ ಮೂಲಕವೇ ಬುಮ್ರಾ ಖಾತೆಗೆ ಪ್ರತಿ ವರ್ಷ ಸುಮಾರು ₹3 ಕೋಟಿಯಿಂದ ₹5 ಕೋಟಿ ಹೆಚ್ಚುವರಿ ಆದಾಯ ಜಮೆಯಾಗುತ್ತದೆ.

ಬ್ರಾಂಡ್ ಎಂಡಾರ್ಸ್‌ಮೆಂಟ್ ಮತ್ತು ಜಾಹೀರಾತುಗಳ ಅಬ್ಬರ

ಕೇವಲ ಕ್ರಿಕೆಟ್ ಗ್ರೌಂಡ್ ಮಾತ್ರವಲ್ಲ, ಜಾಹೀರಾತು ಮತ್ತು ಬ್ರಾಂಡ್ ಎಂಡಾರ್ಸ್‌ಮೆಂಟ್ ಪ್ರಪಂಚದಲ್ಲೂ ಬುಮ್ರಾ ಸಿಕ್ಕಾಪಟ್ಟೆ ಕ್ರೇಜ್ ಸಂಪಾದಿಸಿದ್ದಾರೆ. ಡ್ರೀಮ್ 11, ಬೋಟ್, ಆಸಿಕ್ಸ್, ಒನ್‌ಪ್ಲಸ್, ಥಮ್ಸ್ ಅಪ್, ಜೆಪ್ಟೋ, ಯಿಪ್ಪೀ, ಸ್ಕೆಚರ್ಸ್, ಜಾಗಲ್, ಟಾಟಾ ಮೋಟಾರ್ಸ್‌ನಂತಹ ಟಾಪ್ ಕ್ಲಾಸ್ ಬ್ರಾಂಡ್‌ಗಳಿಗೆ ಅವರು ರಾಯಭಾರಿಯಾಗಿದ್ದಾರೆ. ವರದಿಯೊಂದರ ಪ್ರಕಾರ, ಬುಮ್ರಾ ಸುಮಾರು 20 ಬ್ರಾಂಡ್‌ಗಳ ಜೊತೆ ಕಾಂಟ್ರಾಕ್ಟ್ ಹೊಂದಿದ್ದಾರೆ. ಒಂದೊಂದು ಜಾಹೀರಾತು ಶೂಟ್‌ಗೆ ಬುಮ್ರಾ ದಿನಕ್ಕೆ ₹1.5 ಕೋಟಿಯಿಂದ ₹3 ಕೋಟಿವರೆಗೆ ಚಾರ್ಜ್ ಮಾಡುತ್ತಾರೆ. ಇದರಿಂದ ಪ್ರತಿ ವರ್ಷ ಅವರಿಗೆ ₹8 ಕೋಟಿಯಿಂದ ₹15 ಕೋಟಿವರೆಗೆ ಆದಾಯ ಬರುತ್ತದೆ.

ಅಹಮದಾಬಾದ್ ಡ್ರೀಮ್ ಹೋಮ್ ಮತ್ತು ಪ್ರಾಪರ್ಟಿ ಹೂಡಿಕೆ

ಸಂಪಾದಿಸಿದ ಹಣವನ್ನು ಬುಮ್ರಾ ರಿಯಲ್ ಎಸ್ಟೇಟ್ ಮತ್ತು ಡಿಜಿಟಲ್ ಅಸೆಟ್‌ಗಳಲ್ಲಿ ಬಹಳ ಬುದ್ಧಿವಂತಿಕೆಯಿಂದ ಹೂಡಿಕೆ ಮಾಡುತ್ತಿದ್ದಾರೆ. ತಮ್ಮ ಹುಟ್ಟೂರಾದ ಅಹಮದಾಬಾದ್‌ನಲ್ಲಿ ಅವರು ಒಂದು ಐಷಾರಾಮಿ ಡಿಸೈನರ್ ಮನೆ ಹೊಂದಿದ್ದಾರೆ. ಈ ಮನೆಯ ಮಾರುಕಟ್ಟೆ ಮೌಲ್ಯ ಸುಮಾರು ₹3 ಕೋಟಿಯಿಂದ ₹4 ಕೋಟಿ ಇರಬಹುದು ಎಂದು ಅಂದಾಜಿಸಲಾಗಿದೆ. ಇದರ ಜೊತೆಗೆ ಮುಂಬೈನಲ್ಲೂ ಬುಮ್ರಾ ದುಬಾರಿ ರೆಸಿಡೆನ್ಷಿಯಲ್ ಪ್ರಾಪರ್ಟಿಗಳನ್ನು ಹೊಂದಿದ್ದಾರೆ. ಬೇರೆ ಕಡೆಗಳಲ್ಲೂ ರಿಯಲ್ ಎಸ್ಟೇಟ್ ಹೂಡಿಕೆ ಮಾಡಿದ್ದಾರೆ ಎಂದು ಹಲವು ವರದಿಗಳು ಹೇಳಿವೆ.

ಕಣ್ಮನ ಸೆಳೆಯುವ ಬುಮ್ರಾ ಲಕ್ಸುರಿ ಕಾರ್ ಕಲೆಕ್ಷನ್

ಕ್ರಿಕೆಟ್ ಸ್ಟಾರ್‌ಗಳಿಗೆ ಕಾರುಗಳ ಮೇಲಿರುವ ಕ್ರೇಜ್ ಬಗ್ಗೆ ಬಿಡಿಸಿ ಹೇಳಬೇಕಿಲ್ಲ. ಬುಮ್ರಾ ಗ್ಯಾರೇಜ್‌ನಲ್ಲೂ ಸೂಪರ್ ಫಾಸ್ಟ್ ಮತ್ತು ಲಕ್ಸುರಿ ಕಾರುಗಳ ಕಲೆಕ್ಷನ್ ಇದೆ.

• Mercedes-Maybach S560: ಅತಿ ದುಬಾರಿ ಮತ್ತು ಲಕ್ಸುರಿ ಫೀಚರ್ಸ್ ಇರುವ ಈ ಕಾರಿನ ಬೆಲೆ ಸುಮಾರು ₹2 ಕೋಟಿಗೂ ಹೆಚ್ಚು.

• Nissan GT-R: ವೇಗಕ್ಕೆ ಹೆಸರಾಗಿರುವ ಈ ಸೂಪರ್ ಕಾರಿನ ಬೆಲೆ ಕೂಡ ₹2 ಕೋಟಿಗಿಂತ ಹೆಚ್ಚಿದೆ.

• Range Rover Velar: ಸುಮಾರು ₹90 ಲಕ್ಷ ಬೆಲೆಯ ಮೋಸ್ಟ್ ರಾಯಲ್ ಎಸ್‌ಯುವಿ.

• Toyota Innova Crysta, Hyundai Verna: ದಿನನಿತ್ಯದ ಓಡಾಟಕ್ಕೆ ಬಳಸುವ ಕಂಫರ್ಟಬಲ್ ಕಾರುಗಳು.

ಕ್ರಿಕೆಟ್ ಮೈದಾನದಲ್ಲಿ ಟೀಂ ಇಂಡಿಯಾವನ್ನು ಗೆಲ್ಲಿಸುವ ವಿಕೆಟ್ ಟೇಕಿಂಗ್ ಬೌಲರ್ ಆಗಿ ಬೆಳೆದಿರುವ ಬುಮ್ರಾ, ತಮ್ಮ ಕಠಿಣ ಪರಿಶ್ರಮದಿಂದಲೇ ಈ ಮಟ್ಟದ ಆರ್ಥಿಕ ಸಾಮ್ರಾಜ್ಯವನ್ನು ಕಟ್ಟಿದ್ದಾರೆ.

Cricket; ಪಾಕ್ ವಿರುದ್ಧ ವೈಭವ್-ಅಭಿಷೇಕ್ ಅಬ್ಬರಕ್ಕೆ ಯುವಿ 14 ವರ್ಷದ ಯುವಿ ದಾಖಲೆ ಧೂಳೀಪಟ!

Bhimasi M Koleppanavar — Sat, 03 Oct 2026 12:57:39 +0530

Asian Games 2026 IND vs PAK final; ವೈಭವ್ ಸೂರ್ಯವಂಶಿ ಮತ್ತು ಅಭಿಷೇಕ್ ಶರ್ಮಾ ಪಾಕಿಸ್ತಾನದ ವಿರುದ್ಧ ಸ್ಪೋಟಕ ಬ್ಯಾಟಿಂಗ್ ಪ್ರದರ್ಶಿಸಿದ್ದಾರೆ. ಇವರು ಸಾದ್ ಮಸೂದ್ ಅವರ ಒಂದೇ ಓವರ್‌ನಲ್ಲಿ 24 ರನ್ ಚಚ್ಚುವ ಮೂಲಕ 2012ರಲ್ಲಿ ಯುವರಾಜ್ ಸಿಂಗ್ ನಿರ್ಮಿಸಿದ್ದ ದಾಖಲೆ ಧೂಳೀಪಟ ಮಾಡಿದ್ದಾರೆ.

ಏಷ್ಯನ್ ಗೇಮ್ಸ್ 2026ರ ಹೈ-ವೋಲ್ಟೇಜ್ ಫೈನಲ್ ಕಳಗದಲ್ಲಿ ಸಾಂಪ್ರದಾಯಿಕ ವೈರಿ ಪಾಕಿಸ್ತಾನದ ವಿರುದ್ಧ ಭಾರತೀಯ ಆರಂಭಿಕ ಆಟಗಾರರಾದ ವೈಭವ್ ಸೂರ್ಯವಂಶಿ ಮತ್ತು ಅಭಿಷೇಕ್ ಶರ್ಮಾ ಪವರ್‌ಪ್ಲೇನಲ್ಲೇ ನೆಟ್ ರನ್ ರೇಟ್ ಚೇಸ್ ಮಾಡುವ ಶೈಲಿಯಲ್ಲಿ ಅಟ್ಯಾಕಿಂಗ್ ಕ್ರಿಕೆಟ್ ಪ್ರದರ್ಶಿಸಿದ್ದಾರೆ. ಈ ವಿಧ್ವಂಸಕ ಬ್ಯಾಟಿಂಗ್‌ ಮೂಲಕ ಭಾರತೀಯ ಜೋಡಿಯು ಟಿ20 ಅಂತರರಾಷ್ಟ್ರೀಯ (T20I) ಕ್ರಿಕೆಟ್ ಇತಿಹಾಸದಲ್ಲಿ ಭಾರತ-ಪಾಕಿಸ್ತಾನ ಮುಖಾಮುಖಿಯಲ್ಲಿ ಅತ್ಯಂತ ದುಬಾರಿ ಓವರ್‌ನ ಆಲ್-ಟೈಮ್ ರೆಕಾರ್ಡ್ ಧೂಳೀಪಟ ಮಾಡಿದೆ. ಈ ಪ್ರಕ್ರಿಯೆಯಲ್ಲಿ 2012ರಲ್ಲಿ ಲೆಜೆಂಡರಿ ಆಲ್-ರೌಂಡರ್ ಯುವರಾಜ್ ಸಿಂಗ್ ನಿರ್ಮಿಸಿದ್ದ 14 ವರ್ಷಗಳ ಹಳೆಯ ದಾಖಲೆಯೂ ಮುರಿದುಬಿದ್ದಿದೆ.

ಇನ್ನಿಂಗ್ಸ್‌ನ ಎರಡನೇ ಓವರ್ ಎಸೆಯಲು ಬಂದ ಪಾಕಿಸ್ತಾನಿ ರೈಟ್-ಆರ್ಮ್ ಪೇಸರ್ ಸಾದ್ ಮಸೂದ್ ಬೌಲಿಂಗ್ ಲೈನ್ ಅಂಡ್ ಲೆಂಗ್ತ್ ಕಂಡುಕೊಳ್ಳುವಲ್ಲಿ ಸಂಪೂರ್ಣ ವಿಫಲರಾದರು. ಕ್ರೀಸ್‌ನಲ್ಲಿ ಆನ್‌-ಫೈರ್‌ನಲ್ಲಿದ್ದ 15 ವರ್ಷದ ಎಡಗೈ ಓಪನರ್ ವೈಭವ್ ಸೂರ್ಯವಂಶಿ, ಓವರ್‌ನ ಮೊದಲ ಮೂರು ಎಸೆತಗಳಲ್ಲಿ ಶಾರ್ಟ್-ಪಿಚ್ ಹಾಗೂ ಸ್ಲಾಟ್‌ನಲ್ಲಿದ್ದ ಬಾಲ್‌ಗಳನ್ನು ಸತತ ಎರಡು ಬೃಹತ್ ಸಿಕ್ಸರ್‌ಗಳಾಗಿ ಕನ್ವರ್ಟ್ ಮಾಡಿದರು.

ಅಲ್ಲಿಂದ ಸ್ಟ್ರೈಕ್ ರೊಟೇಟ್ ಆದ ನಂತರ ಕ್ರೀಸ್‌ಗೆ ಬಂದ ಅಭಿಷೇಕ್ ಶರ್ಮಾ, ತಮ್ಮ ಸಿಗ್ನೇಚರ್ ಆಫ್-ಸೈಡ್ ಹಾಗೂ ಲೆಗ್-ಸೈಡ್ ಪವರ್-ಹಿಟ್ಟಿಂಗ್ ಪ್ರದರ್ಶಿಸಿದರು. ಮಸೂದ್ ಎಸೆದ ಫ್ರೀ-ಹಿಟ್ ಹಾಗೂ ನೋ-ಬಾಲ್ ಅವಕಾಶವನ್ನು ಸಂಪೂರ್ಣವಾಗಿ ಎನ್‌ಕ್ಯಾಶ್ ಮಾಡಿಕೊಂಡ ಅಭಿಷೇಕ್, ಒಂದು ಬೌಂಡರಿ ಹಾಗೂ ಒಂದು ಎಂಪಿಟಿವ್ ಸಿಕ್ಸರ್ ಚಚ್ಚಿದರು. ಪರಿಣಾಮವಾಗಿ, ಈ ಸಿಂಗಲ್ ಓವರ್‌ನಲ್ಲಿ ಲೀಗಲ್ ಎಕ್ಸ್‌ಟ್ರಾ ಸೇರಿದಂತೆ ಭಾರತ ಬೊಂಬಾಟ್ 24 ರನ್ ಕಲೆಹಾಕಿತು.

ಭಾರತ-ಪಾಕಿಸ್ತಾನ ಟಿ20 ಕಳಗದ ಇತಿಹಾಸದಲ್ಲೇ ಇದು ಬೌಲರ್‌ಗೆ ಲಭಿಸಿದ ಅತ್ಯಂತ ದುಬಾರಿ (Costliest Over) ಓವರ್ ಎನಿಸಿಕೊಂಡಿದೆ. ಇದಕ್ಕೂ ಮುನ್ನ ಈ ಅಪ್ರತಿಮ ದಾಖಲೆ 2012ರ ಅಹಮದಾಬಾದ್ ಟಿ20 ಪಂದ್ಯದಲ್ಲಿ ದಾಖಲಾಗಿತ್ತು. ಅಂದು ಪಾಕಿಸ್ತಾನದ ಚತುರ ಆಫ್-ಸ್ಪಿನ್ನರ್ ಸಯೀದ್ ಅಜ್ಮಲ್ ಎಸೆದ 19ನೇ ಓವರ್‌ನಲ್ಲಿ ಸಿಕ್ಸರ್ ಕಿಂಗ್ ಯುವರಾಜ್ ಸಿಂಗ್ ಸತತ 3 ಡೌನ್-ದಿ-ಟ್ರ್ಯಾಕ್ ಸಿಕ್ಸರ್‌ಗಳನ್ನು ಸಿಡಿಸಿ ಒಟ್ಟು 22 ರನ್ ಕಸಿದುಕೊಂಡಿದ್ದರು. 2012ರ ನಂತರ ಸುದೀರ್ಘ 14 ವರ್ಷಗಳ ಕಾಲ ಅಜೇಯವಾಗಿದ್ದ ಅಜ್ಮಲ್ ಅವರ ಈ ಅನ್-ವಾಂಟೆಡ್ ರೆಕಾರ್ಡ್ ಅನ್ನು, ಇದೀಗ ಸಾದ್ ಮಸೂದ್ ವಿರುದ್ಧ 24 ರನ್ ಕಲೆಹಾಕುವ ಮೂಲಕ ವೈಭವ್-ಅಭಿಷೇಕ್ ಜೋಡಿ ಇತಿಹಾಸದ ಪುಟಕ್ಕೆ ಸೇರಿಸಿದೆ.

ಈ ಮೊದಲ ರನ್-ರೇಟ್ ಆಕ್ಸಲರೇಷನ್‌ನಿಂದಾಗಿ ಪಾಕಿಸ್ತಾನಿ ಬೌಲಿಂಗ್ ಲೈನ್-ಅಪ್‌ ಮೇಲಿನ ಪ್ರೆಶರ್ ತೀವ್ರಗೊಂಡಿತು. ಫೀಲ್ಡ್ ರೆಸ್ಟ್ರಿಕ್ಷನ್ಸ್ (Powerplay) ಸಂಪೂರ್ಣ ಲಾಭ ಪಡೆದ ಭಾರತೀಯ ಓಪನರ್‌ಗಳು, ಪವರ್‌ಪ್ಲೇನಲ್ಲೇ ಮ್ಯಾಚ್‌ ಅನ್ನು ಕಂಟ್ರೋಲ್‌ಗೆ ತೆಗೆದುಕೊಂಡರು. ಮೊದಲ ಎರಡು ಓವರ್‌ಗಳಲ್ಲೇ ಬೌಂಡರಿ ಬ್ಲಿಟ್ಜ್‌ಕ್ರಿಗ್ ನಡೆಸಿದ ಪರಿಣಾಮ, ಪಾಕ್ ಕ್ಯಾಪ್ಟನ್ ಸಾಹಿಬ್ಜಾದಾ ಫರ್ಹಾನ್ ತಮ್ಮ ಬೌಲಿಂಗ್ ರೊಟೇಶನ್ ಹಾಗೂ ಫೀಲ್ಡ್ ಸೆಟ್ಟಿಂಗ್ಸ್‌ನಲ್ಲಿ ಸಂಪೂರ್ಣ ಗೊಂದಲಕ್ಕೊಳಗಾದರು. ಈ ಮಾಸ್ ಪವರ್-ಹಿಟ್ಟಿಂಗ್ ಪ್ರದರ್ಶನವು ಏಷ್ಯನ್ ಗೇಮ್ಸ್‌ನ ಹೈ-ಸ್ಟೇಕ್ಸ್ ಫೈನಲ್‌ನಲ್ಲಿ ಭಾರತಕ್ಕೆ ಗೆಲುವಿನ ಸ್ಪಷ್ಟ ಡೊಮಿನೆನ್ಸ್ ತಂದುಕೊಟ್ಟಿತು.

ಟೀಂ ಇಂಡಿಯಾಗೆ ಆರ್‌ಸಿಬಿ ವೇಗಿ ಭುವನೇಶ್ವರ್ ಕುಮಾರ್ ಕರೆತನ್ನಿ, ಸೋಲಿನ ಬೆನ್ನಲ್ಲೇ ಕ್ರಿಕೆಟಿನ ಸೂಚನೆ

Chethan Kumar — Sun, 04 Oct 2026 21:14:05 +0530

ನವದೆಹಲಿ (ಅ.04) ವೆಸ್ಟ್ ಇಂಡೀಸ್ ವಿರುದ್ಧದ 3ನೇ ಏಕದಿನ ಪಂದ್ಯದಲ್ಲಿ ಭಾರತ 351 ರನ್ ಸಿಡಿಸಿಯೂ ಮುಗ್ಗರಿಸಿತು. ಟೀಂ ಇಂಡಿಯಾ ಬೌಲಿಂಗ್ ದಾಳಿ ಕುರಿತು ಹಲವು ಪ್ರಶ್ನೆಗಳು ಎದ್ದಿದೆ. ಜಸ್ಪ್ರೀತ್ ಬುಮ್ರಾ ಏಷ್ಯನ್ ಗೇಮ್ಸ್ ಆಡುತ್ತಿದ್ದರೆ, ಅನುಪಸ್ಥಿತಿ ಟೀಂ ಇಂಡಿಯಾ ಏಕದಿನ ತಂಡಕ್ಕೆ ಕಾಡಿತ್ತು. ಇದೀಗ ಟೀಂ ಇಂಡಿಯಾಗೆ ಆರ್‌ಸಿಬಿ ವೇಗಿ ಭುವನೇಶ್ವರ್ ಕುಮಾರ್ ಹಾಗೂ ಮೊಹಮ್ಮದ್ ಶಮಿ ಆಯ್ಕೆ ಮಾಡಲು ಒತ್ತಡ ಹೆಚ್ಚಾಗುತ್ತಿದೆ. ಈ ಕುರಿತು ಟೀಂ ಇಂಡಿಯಾ ಕ್ರಿಕೆಟಿಗ ಹನುಮಾ ವಿಹಾರಿ ಖಡಕ್ ಸೂಚನೆ ನೀಡಿದ್ದಾರೆ.

2027ರ ವಿಶ್ವಕಪ್‌ಗೆ ಭುವಿ, ಶಮಿ ಅಗತ್ಯ ಎಂದ ವಿಹಾರಿ

ಟೀಂ ಇಂಡಿಯಾ ಏಕದಿನ ತಂಡ ಪ್ರತಿ ಬಾರಿ ಜಸ್ಪ್ರೀತ್ ಬುಮ್ರಾ ಹಾಗೂ ಹಾರ್ದಿಕ್ ಮೇಲೆ ಹೆಚ್ಚು ಅವಲಂಬಿತವಾಗಿದೆ. ಆದರೆ 2027ರ ವಿಶ್ವಕಪ್ ಟೂರ್ನಿಗೆ ಇವರಿಬ್ಬರ ಮೇಲೆ ಹೆಚ್ಚು ಅವಲಂಬಿತರಾಗಲು ಸಾಧ್ಯವಿಲ್ಲ. ಇದರಿಂದ ಅಪಾಯವೇ ಹೆಚ್ಚು. ಹೀಗಾಗಿ ಏಕದಿನ ತಂಡಕ್ಕೆ ಭುವನೇಶ್ವರ್ ಕುಮಾರ್ ಹಾಗೂ ಮೊಹಮ್ಮದ್ ಶಮಿ ಕರೆತರಬೇಕು ಎಂದು ವಿಹಾರಿ ಸಲಹೆ ನೀಡಿದ್ದಾರೆ.

ವೆಸ್ಟ್ ಇಂಡೀಸ್ ವಿರುದ್ಧದ 3ನೇ ಏಕದಿನದಲ್ಲಿ ಭಾರತ 351 ರನ್ ಸಿಡಿಸಿತ್ತು. ಆದರೆ ಈ ಮೊತ್ತವನ್ನು ವೆಸ್ಟ್ ಇಂಡೀಸ್ ಕೇವಲ 48.2 ಓವರ್‌ಗಳಲ್ಲಿ ಚೇಸ್ ಮಾಡಿ ಗೆಲುವು ಸಾಧಿಸಿತು. ಇಷ್ಟೇ ಅಲ್ಲ ದಾಖಲೆ ರನ್ ಚೇಸ್ ಮಾಡುವ ಮೂಲಕ ವಿಂಡೀಸ್ ಹೊಸ ಇತಿಹಾಸ ರಚಿಸಿತು. ಈ ಕುರಿತು ಪ್ರತಿಕ್ರಿಯಿಸಿರುವ ವಿಹಾರಿ, 2023ರ ವಿಶ್ವಕಪ್ ಟೂರ್ನಿಯಲ್ಲಿ ಜಸ್ಪ್ರೀತ್ ಬುಮ್ರಾ, ಮೊಹಮ್ಮದ್ ಶಮಿ ಹಾಗೂ ಮೊಹಮ್ಮದ್ ಸಿರಾಜ್ ಪವರ್‌ಪ್ಲೇನಲ್ಲಿ ವಿಕೆಟ್ ಕಬಳಿಸಿದ್ದರು. ಸದ್ಯ ಬುಮ್ರಾ ಕೀ ಬೌಲರ್ ಆದರೆ, ಬುಮ್ರಾ ಜೊಗೆ ಫಾರ್ಮ್‌ನಲ್ಲಿರುವವ ಭುವನೇಶ್ವರ್ ಕುಮಾರ್ ಹಾಗೂ ಮೊಹಮ್ಮದ್ ಶಮಿಗೆ ಅವಕಾಶ ನೀಡಬೇಕು. ಭುವಿ ಹಾಗೂ ಶಮಿ ಇಬ್ಬರು ಭಾರತದ ಅತ್ಯುತ್ತಮ ಬೌಲರ್ಸ್. ಐಪಿಎಲ್ ಟೂರ್ನಿ ಹಾಗೂ ದೇಸಿ ಟೂರ್ನಿಗಳಲ್ಲಿ ಇಬ್ಬರು ಸಾಮರ್ಥ್ಯ ಸಾಬೀತುಪಡಿಸಿದ್ದಾರೆ ಎಂದು ವಿಹಾರಿ ಹೇಳಿದ್ದಾರೆ.

ಭುವಿ-ಶಮಿ ಅಗತ್ಯವಿದೆ

ಹೊಸ ಬಾಲ್‌ನಲ್ಲಿ ಭುವನೇಶ್ವರ್ ಕುಮಾರ್ ಉತ್ತಮ ಪರ್ಫಾಮೆನ್ಸ್ ನೀಡುತ್ತಾರೆ. ಇಷ್ಟೇ ಅಲ್ಲ ಭುವಿ ತಾಳ್ಮೆಯಿಂದ ಪರಿಸ್ಥಿತಿ ಎದುರಿಸುತ್ತಾರೆ. ಟೀಂ ಇಂಡಿಯಾಗೆ ಆಡಿದ ಅನುಭವವೂ ಇದೆ. ಹೀಗಾಗಿ ಭುವನೇಶ್ವರ್ ಕುಮಾರ್ ಅಗತ್ಯತೆ ಇದೆ. ಬುಮ್ರಾ ಹಾಗೂ ಹಾರ್ದಿಕ್‌ಗೆ ಬ್ಯಾಕ್ಅಪ್ ಆಗಿ ಬೌಲರ್ ಬೇಕು. ಹೀಗಾಗಿ ಭುವನೇಶ್ವರ್ ಕುಮಾರ್ ಹಾಗೂ ಮೊಹಮ್ಮದ್ ಶಮಿಗಿಂತ ಉತ್ತಮ ಆಯ್ಕೆ ಬೇರೆ ಇಲ್ಲ ಎಂದು ವಿಹಾರಿ ಹೇಳಿದ್ದಾರೆ.

ಆರ್‌ಸಿಬಿಗೆ 2 ಟ್ರೋಫಿ ಗೆಲ್ಲಿಸಿಕೊಟ್ಟಿದ್ದಾರೆ

ಆರ್‌ಸಿಬಿಗೆ ಸತತ 2 ಟ್ರೋಫಿ ಗೆಲುವಿನಲ್ಲಿ ಭುವನೇಶ್ವರ್ ಕುಮಾರ್ ಕೊಡುಗೆ ಎಲ್ಲರಿಗೂ ನೆನಪಿದೆ ಎಂದು ವಿಹಾರಿ ಹೇಳಿದ್ದಾರೆ. 2025 ಹಾಗೂ 2026ರ ಐಪಿಎಲ್ ಟೂರ್ನಿಯ ಒಟ್ಟು 30 ಪಂದ್ಯಗಳಲ್ಲಿ ಭುವನೇಶ್ವರ್ ಕುಮಾರ್ 45 ವಿಕೆಟ್ ಕಬಳಿಸಿದ್ದಾರೆ. ಭಾರತ 351 ರನ್ ಡಿಫೆಂಡ್ ಮಾಡಿಕೊಳ್ಳಲು ಸಾಧ್ಯವಾಗಲಿಲ್ಲ ಎಂದರೆ ಬೌಲಿಂಗ್ ಸಮಸ್ಯೆ ಇದೆ ಎಂದರ್ಥ ಎಂದು ವಿಹಾರಿ ಹೇಳಿದ್ದಾರೆ.

ಏಷ್ಯನ್ ಗೇಮ್ಸ್‌ನಲ್ಲಿ ಪಾಕ್ ಹಾರಾಟಕ್ಕೆ ಬ್ರೇಕ್‌; ಮತ್ತೊಮ್ಮೆ ಚಿನ್ನ ಗೆದ್ದ ಟೀಂ ಇಂಡಿಯಾ!

Naveen Kodase — Sat, 03 Oct 2026 13:53:10 +0530

ಟೋಕಿಯೋ: ಶ್ರೇಯಸ್ ಅಯ್ಯರ್ ನೇತೃತ್ವದ ಟೀಂ ಇಂಡಿಯಾ ಬದ್ದ ಎದುರಾಳಿ ಪಾಕಿಸ್ತಾನವನ್ನು ಫೈನಲ್‌ನಲ್ಲಿ ರೋಚಕವಾಗಿ ಸೋಲಿಸುವ ಮೂಲಕ ಏಷ್ಯನ್ ಗೇಮ್ಸ್‌ನಲ್ಲಿ ಮತ್ತೊಮ್ಮೆ ಚಿನ್ನದ ಪದಕ ಮುಡಿಗೇರಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ಕಳೆದ ಬಾರಿ ಆಫ್ಘಾನಿಸ್ತಾನ ಮಣಿಸಿ ಚಿನ್ನ ಗೆದ್ದಿದ್ದ ಟೀಂ ಇಂಡಿಯಾ, ಈ ಬಾರಿ ಬದ್ದ ಎದುರಾಳಿ ಪಾಕಿಸ್ತಾನವನ್ನು ಬಗ್ಗುಬಡಿದು ಭಾರತ ಚಿನ್ನದ ಪದಕಕ್ಕೆ ಕೊರಳೊಡ್ಡಿದೆ. ಹಸನ್ ನವಾಜ್ ಕೆಚ್ಚೆದೆಯ ಹೋರಾಟದ ಹೊರತಾಗಿಯೂ ಭಾರತ ಕೊನೆಗೂ ಗೆಲುವಿನ ನಗೆ ಬೀರುವಲ್ಲಿ ಯಶಸ್ವಿಯಾಗಿದೆ.

ಭಾರತ ಎದುರು ಮತ್ತೆ ಮಂಡಿಯೂರಿದ ಪಾಕ್

ಗೆಲ್ಲಲು 212 ರನ್‌ಗಳ ಕಠಿಣ ಗುರಿ ಬೆನ್ನತ್ತಿದ ಪಾಕಿಸ್ತಾನ ತಂಡವು ನಿಗದಿತ 20 ಓವರ್‌ಗಳಲ್ಲಿ ಆರು ವಿಕೆಟ್ ಕಳೆದುಕೊಂಡು 192 ರನ್ ಗಳಿಸಲಷ್ಟೇ ಶಕ್ತವಾಯಿತು. ಟೀಂ ಇಂಡಿಯಾ ಪರ ಅಕ್ಷರ್ ಪಟೇಲ್, ವಾಷಿಂಗ್ಟನ್ ಸುಂದರ್ ಹಾಗೂ ಶಿವಂ ದುಬೆ ತಲಾ ಎರಡು ವಿಕೆಟ್ ಕಬಳಿಸುವ ಮೂಲಕ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. 2025ರಲ್ಲಿ ಏಷ್ಯಾಕಪ್‌ ಟೂರ್ನಿಯಲ್ಲಿ ಪಾಕಿಸ್ತಾನವನ್ನು ಬಗ್ಗುಬಡಿದಿದ್ದ ಭಾರತ ಇದೀಗ ಮತ್ತೊಮ್ಮೆ ಸಾಂಪ್ರದಾಯಿಕ ಎದುರಾಳಿಗೆ ಸೋಲಿನ ಶಾಕ್ ನೀಡುವಲ್ಲಿ ಯಶಸ್ವಿಯಾಗಿದೆ.ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಟೀಂ ಇಂಡಿಯಾ ಆರಂಭದಲ್ಲೇ ವೈಭವ್ ಸೂರ್ಯವಂಶಿ ಹಾಗೂ ಸಂಜು ಸ್ಯಾಮ್ಸನ್ ವಿಕೆಟ್ ಕಳೆದುಕೊಂಡಿತು. ಆದರೆ ಮತ್ತೋರ್ವ ಆರಂಭಿಕ ಬ್ಯಾಟರ್ ಅಭಿಷೇಕ್ ಶರ್ಮಾ ಕೇವಲ 28 ಎಸೆತಗಳಲ್ಲಿ 3 ಬೌಂಡರಿ ಹಾಗೂ 7 ಮುಗಿಲೆತ್ತರದ ಸಿಕ್ಸರ್ ಸಹಿತ ಸ್ಪೋಟಕ 61 ರನ್ ಸಿಡಿಸಿ ಪಾಕ್ ಬೌಲರ್‌ಗಳ ಚಳಿ ಬಿಡಿಸಿದರು. ಇನ್ನು ನಾಯಕ ಶ್ರೇಯಸ್ ಅಯ್ಯರ್ 21 ರನ್ ಗಳಿಸಿ ಅಬ್ರಾರ್ ಅಹಮದ್‌ಗೆ ವಿಕೆಟ್‌ ಒಪ್ಪಿಸಿದರು./

ಮತ್ತೆ ಪಾಕ್‌ಗೆ ಸಿಂಹಸ್ವಪ್ನರಾದ ತಿಲಕ್ ವರ್ಮಾ:

ಸೆಮಿಫೈನಲ್‌ನಲ್ಲಿ ಶ್ರೀಲಂಕಾ ಎದುರು ಕೊಂಚ ಮಂಕಾಗಿದ್ದ ತಿಲಕ್ ವರ್ಮಾ, ಪಾಕ್ ಎದುರಿನ ಫೈನಲ್‌ನಲ್ಲಿ ಮತ್ತೊಮ್ಮೆ ಪಾಕಿಸ್ತಾನ ಬೌಲರ್‌ಗಳನ್ನು ಇನ್ನಿಲ್ಲದಂತೆ ಕಾಡಿದರು. 2025ರ ಏಷ್ಯಾಕಪ್ ಟೂರ್ನಿಯಲ್ಲೂ ತಿಲಕ್ ವರ್ಮಾ ಪಾಕ್ ಬೌಲರ್‌ಗಳ ನಿದ್ದೆಗೆಡಿಸಿದ್ದರು. ಇದೀಗ ಏಷ್ಯನ್ ಗೇಮ್ಸ್ ಫೈನಲ್‌ನಲ್ಲಿ ತಿಲಕ್ ವರ್ಮಾ ಕೇವಲ 22 ಎಸೆತಗಳನ್ನು ಎದುರಿಸಿ 3 ಬೌಂಡರಿ ಹಾಗೂ 4 ಸಿಕ್ಸರ್ ಸಹಿತ 51 ರನ್ ಬಾರಿಸುವ ಮೂಲಕ ತಂಡದ ಮೊತ್ತವನ್ನು ಇನ್ನೂರರ ಗಡಿ ದಾಟಿಸಿದರು. ಅಂತಿಮವಾಗಿ ಭಾರತ ತಂಡವು 6 ವಿಕೆಟ್ ಕಳೆದುಕೊಂಡು 211 ರನ್ ಕಲೆಹಾಕಿತು.

ಇನ್ನು ಸವಾಲಿನ ಗುರಿ ಬೆನ್ನತ್ತಿದ ಪಾಕಿಸ್ತಾನ ತಂಡವು ಮೊದಲ 6.1 ಓವರ್‌ಗಳಲ್ಲಿ 39 ರನ್ ಗಳಿಸುವಷ್ಟರಲ್ಲಿ ಅಗ್ರಕ್ರಮಾಂಕದ ಮೂರು ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಆದರೆ ಇದಾದ ಬಳಿಕ ನಾಲ್ಕನೇ ವಿಕೆಟ್‌ಗೆ ಹಸನ್ ನವಾಜ್ ಹಾಗೂ ಸೈಮ್ ಆಯೂಬ್ ಆಕರ್ಷಕ ಜತೆಯಾಟವಾಡುವ ಮೂಲಕ ತಂಡಕ್ಕೆ ಆಸರೆಯಾದರು. ಆಯೂಬ್ 29 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. ಇನ್ನು ಅಬ್ದುಲ್ ಸಮದ್ ಬ್ಯಾಟಿಂಗ್ ಕೇವಲ 9 ರನ್‌ಗಳಿಗೆ ಸೀಮಿತವಾಯಿತು. ಒಂದು ಕಡೆ ನಿರಂತರವಾಗಿ ವಿಕೆಟ್ ಬೀಳುತ್ತಿದ್ದರೂ ಮತ್ತೊಂದು ತುದಿಯಲ್ಲಿ ವಿಸ್ಪೋಟಕ ಬ್ಯಾಟಿಂಗ್ ನಡೆಸಿದ ಹಸನ್ ನವಾಜ್ 51 ಎಸೆತಗಳಲ್ಲಿ 96 ರನ್ ಸಿಡಿಸಿದಾದರೂ ತಂಡವನ್ನು ಸೋಲಿನಿಂದ ಪಾರು ಮಾಡಲು ಸಾಧ್ಯವಾಗಲಿಲ್ಲ. ಅಂತಿಮವಾಗಿ ಪಾಕಿಸ್ತಾನ ನಿಗದಿತ 20 ಓವರ್‌ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 192 ರನ್ ಗಳಿಸಲಷ್ಟೇ ಶಕ್ತವಾಯಿತು. ಇದರೊಂದಿಗೆ ಭಾರತ 19 ರನ್‌ಗಳ ಗೆಲುವು ಸಾಧಿಸುವ ಮೂಲಕ ಚಿನ್ನದ ಪದಕ ಜಯಿಸಿತು.

ಶಾಯ್ ಹೋಪ್ ಟೀಂ ಇಂಡಿಯಾಗೆ ಸೋಲಿನ ರುಚಿ ತೋರಿಸಿದ್ದು ಹೇಗೆ? ಅವರ ತಂತ್ರದ ಹಿಂದೆ ಭಾರತದ ದಿಗ್ಗಜನ ಕೈವಾಡ

Ganesh Mabla Gowda — Sun, 04 Oct 2026 16:05:35 +0530

ನಿನ್ನೆ ಭಾರತ ಹಾಗೂ ವೆಸ್ಟ್ ವಿಂಡೀಸ್ ತಂಡಗಳು ಏಕದಿನ ಸರಣಿಯ ಮೂರನೇ ಪಂದ್ಯವನ್ನು ಚಂಡಿಗಡದಲ್ಲಿ ಆಡಿದವು. ಮೊದಲು ಬ್ಯಾಟ್ ಮಾಡಿದ್ದ ಟೀಂ ಇಂಡಿಯಾ 351 ರನ್‌ ಗಳಿಸಿತ್ತು. ಈ 352 ರನ್‌ಗಳ ಗುರಿ ಬೆನ್ನು ಹತ್ತಿದ್ದ ವೆಸ್ಟ್‌ ವಿಂಡೀಸ್, 48.2 ಓವರ್‍ನಲ್ಲಿ ಐದು ವಿಕೆಟ್‌ ಕಳೆದುಕೊಂಡು ನಿಗಧಿತ ಗುರಿ ಮುಟ್ಟಿತು. ಇನ್ನು ವೆಸ್ಟ್ ವಿಂಡೀಸ್ ಗೆಲುವಿಗೆ ಕಾರಣರಾಗಿದ್ದು, ನಾಯಕ ಶಾಯ್ ಹೋಪ್!

ಗುರಿ ಬೆನ್ನು ಹತ್ತಿದ್ದ ಶಾಯ್ ಹೋಪ್ ಅದ್ಭುತ್ ಬ್ಯಾಟಿಂಗ್ ನಡೆಸಿದರು. ಬಂಡೆಯಾಗಿ ನಿಂತು ತಂಡವನ್ನು ಗೆಲ್ಲಿಸಿಕೊಟ್ಟರು. ತಮ್ಮ ಇನ್ನಿಂಗ್ಸ್‌ನಲ್ಲಿ 143 ಬಾಲ್‌ಗಳನ್ನ ಎದುರಿಸಿ 162 ರನ್‌ಗಳನ್ನ ಚಚ್ಚಿದರು. 113.29 ಸ್ಟ್ರೈಕ್‌ರೇಟ್‌ನಲ್ಲಿ ಬ್ಯಾಟ್ ಬೀಸಿದ ಅವರು.. ಮೂರು ಸಿಕ್ಸರ್, 17 ಬೌಂಡರಿ ಬಾರಿಸಿದರು. ಇನ್ನು ಪಂದ್ಯವನ್ನು ಗೆಲ್ಲಿಸಿದ ಬಳಿಕ ಗೆಲುವಿನ ಹಿಂದಿನ ಸಿಕ್ರೇಟ್ ಬಿಚ್ಚಿಟ್ಟಿದ್ದಾರೆ.

ಏನಂದ್ರು ಶಾಯ್ ಹೋಪ್?

ಪಂದ್ಯ ಶ್ರೇಷ್ಠ ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಹೋಪ್.. ಪಂದ್ಯ ಆರಂಭಕ್ಕೂ ಮುನ್ನ ನಾನು ಭಾರತದ ದಿಗ್ಗಜ ಮಹೇಂದ್ರ ಸಿಂಗ್ ಧೋನಿ ಅವರನ್ನು ಭೇಟಿ ಆಗಿದ್ದೆ. ನಾವಿಬ್ಬರು ತುಂಬಾ ಮುಕ್ತವಾಗಿ ಮಾತನಾಡಿದೆ. ಈ ವೇಳೆ ಅವರು ನೀಡಿದ ಸಲಹೆ ನನಗೆ ತುಂಬಾ ಸಹಾಯ ಆಯಿತು. ತಂಡದ ಗೆಲುವಿಗೆ ಮತ್ತು ನನ್ನ ಇನ್ನಿಂಗ್ಸ್‌ಗೆ ಸ್ಫೂರ್ತಿ ನೀಡಿತು ಎಂದಿದ್ದಾರೆ.

ಧೋನಿ ಸಲಹೆ ಏನಾಗಿತ್ತು?

ಶಾಯ್ ಹೋಪ್ ನೀಡಿರುವ ಮಾಹಿತಿ ಪ್ರಕಾರ.. ನಾನು ಧೋನಿ ನೀಡಿದ್ದ ಸಲಹೆಯನ್ನು ಖುದ್ದು ಇನ್ನಿಂಗ್ಸ್ ಆರಂಭಿಸುವ ಮೊದಲು ನೆನಪಿಸಿಕೊಂಡೆ. ಅವರು ನೀಡಿದ ಟ್ರಿಕ್ ಅನ್ನೇ ಬಳಸಬೇಕು ಎಂದುಕೊಂಡಿದೆ. ನಿಮಗೆ ಮೈದಾನದಲ್ಲಿ ಯೋಚಿಸಲು ಹೆಚ್ಚು ಸಮಯ ಸಿಗಲಿದೆ. ಅದನ್ನು ಸರಿಯಾಗಿ ಆಯಾ ಸಮಯಕ್ಕೆ ಬಳಸಿಕೊಂಡು ಆಟವಾಡಿ ಎಂದಿದ್ದರು. ಈ ಚಿಂತನೆ ಹೋಪ್ ಅವರ ಬ್ಯಾಟಿಂಗ್ ತಂತ್ರದ ಭಾಗವಾಗಿತ್ತು. ಧೋನಿ ಸಲಹೆ ನಮಗೆ ಆಂಭದಲ್ಲಿ ಎದುರಾಗುವ ಅಪಾಯವನ್ನು ತಪ್ಪಿಸಿಕೊಳ್ಳುವಂತೆ ಮಾಡಿತು. ನಮ್ಮ ಮುಂದೆ ದೊಡ್ಡ ಟಾರ್ಗೆಟ್ ಇತ್ತು. ಆದರೆ ನಾವು ಅದನ್ನು ಸಣ್ಣ ಸಣ್ಣ ವಿಭಾಗವಾಗಿ ಮುರಿಯುವ ಮೂಲಕ ಗುರಿಯನ್ನ ಹತ್ತಿರಕ್ಕೆ ಕೊಂಡೊಯ್ದೇವು.

ನಾವು ತಂಡದ ಫಲಿತಾಂಶದ ಮೇಲೆ ಹೆಚ್ಚು ಗಮನ ಹರಿಸಲು ಪ್ರಯತ್ನಿಸಲಿಲ್ಲ. ಮಾಡಬೇಕಾಗಿದ್ದ ಕೆಲಸದ ಮೇಲೆ ಹೆಚ್ಚು ಕೇಂದ್ರೀಕರಿಸಿದೆ. ಕೊನೆಯ ಕ್ಷಣಗಳಲ್ಲಿ ಬೌಂಡರಿಗಳನ್ನ ಹೊಡೆಯಲು ಪ್ರಯತ್ನಿಸಿದೆ. ಜೊತೆಗೆ ಭಾರತ ತಂಡದ ನಿಧಾನಗತಿ ಓವರ್‍‌ಗಳ ಮೇಲೂ ಗಮನಹರಿಸಿದ್ದೆ. ಇದರಿಂದ ಅವರು ಅಂತಿಮ ಹಂತದಲ್ಲಿ ಕೆಲವು ಫೀಲ್ಡರ್‍‌ಗಳು ಮುಂದೆ ಬರುತ್ತಾರೆ ಅನ್ನೋ ವಿಚಾರವನ್ನೂ ತಿಳಿದುಕೊಂಡಿದ್ದೆ. ಒಬ್ಬ ಬ್ಯಾಟ್ಸ್‌ಮನ್‌ ಆಗಿ ಈ ಎಲ್ಲಾ ವಿಚಾರಗಳನ್ನ ಗಮನದಲ್ಲಿ ಇಟ್ಟುಕೊಂಡು ಬ್ಯಾಟಿಂಗ್ ಮಾಡುತ್ತ ಹೋದೆ. ಗೆಲುವಿನ ಗುರಿ ಹತ್ತಿರವಾಯಿತು ಎಂದು ಶಾಯ್ ಹೋಪ್ ತಿಳಿಸಿದ್ದಾರೆ. ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಭಾರತ ತಂಡವು ಎರಡು ಪಂದ್ಯಗಳನ್ನ ಗೆದ್ದು ಸರಣಿ ಗೆದ್ದುಕೊಂಡಿದೆ. ವೆಸ್ಟ್ ವಿಂಡೀಸ್ ಅಂತಿಮ ಪಂದ್ಯವನ್ನು ಗೆದ್ದಿದೆ.

ಭಾರತದ ವಿರುದ್ಧ ಸೋಲಿನ ಬೆನ್ನಲ್ಲೇ ಪಾಕ್ ತಂಡದಲ್ಲಿ ಕೋಲಾಹಲ, ನಾಯಕ ಸಲ್ಮಾನ್ ತಲೆದಂಡ?

Chethan Kumar — Sun, 04 Oct 2026 22:27:46 +0530

ಇಸ್ಲಾಮಾಬಾದ್ (ಅ.04) ಏಷ್ಯನ್ ಗೇಮ್ಸ್‌ನ ಕ್ರಿಕೆಟ್ ಟೂರ್ನಿಯಲ್ಲಿ ಭಾರತ ಪಾಕಿಸ್ತಾನ ಫೈನಲ್ ಪಂದ್ಯದಲ್ಲಿ ಮುಖಾಮುಖಿಯಾಗಿತ್ತು. ಅದ್ಭುತ ಪ್ರದರ್ಶನ ನೀಡಿದ ಟೀಂ ಇಂಡಿಯಾ ಗೆಲುವಿನ ಮೂಲಕ ಚಿನ್ನದ ಪದಕ ಗೆದ್ದುಕೊಂಡಿತು. ಪಾಕಿಸ್ತಾನ ಬೆಳ್ಳಿಗೆ ತೃಪ್ತಿಪಟ್ಟುಕೊಂಡಿತು. ಭಾರತ ವಿರುದ್ದ ಸೋಲಿನ ಬೆನ್ನಲ್ಲೇ ಇದೀಗ ಪಾಕಿಸ್ತಾನ ತಂಡದಲ್ಲಿ ಮೇಜರ್ ಸರ್ಜರಿ ಮಾಡಲಾಗುತ್ತಿದೆ. ಏಷ್ಯನ್ ಗೇಮ್ಸ್ ಟೂರ್ನಿಯಲ್ಲಿ ಪಾಕಿಸ್ತಾನ ತಂಡವನ್ನು ಸಾಹೀಬ್‌ಜಾದ ಫರ್ಹಾನ್ ಮುನ್ನಡೆಸಿದ್ದರು. ಇದೀಗ ಪಾಕಿಸ್ತಾನ ಖಾಯಂ ಟಿ20 ನಾಯಕ ಸಲ್ಮಾನ್ ಅಲಿ ಅಘಾ ಹಾಗೂ ಫರ್ಹಾನ್ ಇಬ್ಬರಿಗೂ ಕೊಕ್ ನೀಡಲು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಮುಂದಾಗಿದೆ.

ಪಾಕಿಸ್ತಾನ ಖಾಯಂ ಟಿ20 ನಾಯಕನ ಸಲ್ಮಾನ್ ಅಲಿ ಅಘಾಗೆ ಕೊಕ್ ನೀಡಲಾಗುತ್ತಿದೆ. 2026ರ ಏಷ್ಯಾಕಪ್ ಟೂರ್ನಿ ಹಾಗೂ ಟಿ20 ವಿಶ್ವಕಪ್ 2026ರಲ್ಲಿ ಪಾಕಿಸ್ತಾನ ತಂಡ ಮುನ್ನಡೆಸಿದ್ದರು. ಇದೀಗ ಸಲ್ಮಾನ್ ಅಲಿ ಅಘಾಗೆ ಕೇವಲ ನಾಯಕತ್ವದಿಂದ ಮಾತ್ರವಲ್ಲ, ತಂಡದಿಂದಲೇ ಹೊರಗಿಡಲು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಮುಂದಾಗಿದೆ.

ಲಂಕಾ ವಿರುದ್ದ ಸರಣಿಗೆ ಹೊಸ ತಂಡ

ಶ್ರೀಲಂಕಾ ವಿರುದ್ಧದ ತವರಿನ ಟಿ20 ಸರಣಿಗೆ ಪಾಕಿಸ್ತಾನ ತಂಡದ ಆಯ್ಕೆ ನಡೆಯಲಿದೆ. ಅಕ್ಟೋಬರ್ 9 ರಿಂದ 13ರವರೆಗೆ ಟಿ20 ಟೂರ್ನಿ ನಡೆಯಲಿದೆ. ಸಲ್ಮಾನ್ ಅಲಿ ಅಘಾ ನಾಯಕತ್ವದಲ್ಲಿ ಪಾಕಿಸ್ತಾನ ಟಿ20 ತಂಡದ ಪ್ರಮುಖ ಸರಣಿಗಳನ್ನು ಸೋತಿದೆ. ಪ್ರಮುಖವಾಗಿ ಭಾರತದ ವಿರುದ್ಧ ಸೋಲು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಆಕ್ರೋಶಕ್ಕೆ ಕಾರಣವಾಗಿದೆ. ಇದೀಗ ಸಲ್ಮಾನ್ ಅಲ್ ಅಘಾಗೆ ತಂಡದಿಂದ ಕೊಕ್ ನೀಡಲಾಗುತ್ತಿದೆ.

ಶದಬ್ ಖಾನ್‌ಗೆ ನಾಯಕತ್ವ ಸ್ಥಾನ

ಸಲ್ಮಾನ್ ಅಲಿ ಅಘಾ ಬದಲು ಶದಬ್ ಖಾನ್‌ಗೆ ನಾಯಕತ್ವ ನೀಡಲು ಪಿಸಿಬಿ ಮುಂದಾಗಿದೆ. ಸ್ಪಿನ್ ಬೌಲರ್ ಶದಬ್ ಖಾನ್ ಏಕದಿನ ಮಾದರಿಯಲ್ಲಿ ಪಾಕಿಸ್ತಾನ ತಂಡವನ್ನು ಮುನ್ನಡೆಸುತ್ತಿದ್ದಾರೆ. ಇದೀಗ ಟಿ20 ಮಾದರಿಗೂ ಶದಬ್ ಖಾನ್‌ಗೆ ನಾಯಕ ಸ್ಥಾನ ನೀಡಲು ಪಿಸಿಬಿ ಮುಂದಾಗಿದೆ.

ಭಾರತ ವಿರುದ್ಧ ಸೋಲಿಗೆ ಪಾಕಿಸ್ತಾನದಲ್ಲಿ ಭಾರಿ ಆಕ್ರೋಶ

ಭಾರತ ವಿರುದ್ಧ ಏಷ್ಯಾಕಪ್ ಟೂರ್ನಿಯಲ್ಲಿನ ಸೋಲಿಗೆ ಭಾರಿ ಆಕ್ರೋಶ ವ್ಯಕ್ತವಾಗುತ್ತಿದೆ. ಏಷ್ಯಾಕಪ್ ಟೂರ್ನಿಯಲ್ಲೂ ಭಾರತದ ವಿರುದ್ದ ಮುಗ್ಗರಿಸಿತ್ತು. ಇದೀಗ ಏಷ್ಯನ್ ಗೇಮ್ಸ್ ಕ್ರೀಡಾಕೂಟದಲ್ಲಿ ಭಾರತ ವಿರುದ್ದ ಪಾಕಿಸ್ತಾನ ಸೋಲು ಕಂಡಿದೆ. ಪಾಕಿಸ್ತಾನ ಅಭಿಮಾನಿಗಳು ಈ ಸೋಲಿಗೆ ತೀವ್ರ ಆಕ್ರೋಶ ಹೊರಹಾಕಿದ್ದಾರೆ. ಬಲಿಷ್ಠ ತಂಡ ಕಟ್ಟಲು ಪಿಸಿಬಿಗೆ ಆಗ್ರಹಿಸಿದ್ದಾರೆ.

'ಓಯ್ ಬಿರಿಯಾನಿ, ಇನ್ನೊಂದು ಕ್ಯಾಚ್ ಬಿಡು' ರೋಹಿತ್ ಶರ್ಮಾರ ಫೇಮಸ್ ಡೈಲಾಗ್ ಹೊಡೆದು ಪಾಕ್ ಆಟಗಾರನ ಕೆಣಕಿದ್ರು

Ganesh Mabla Gowda — Sat, 03 Oct 2026 15:18:50 +0530

ಏಷ್ಯನ್ ಗೇಮ್ಸ್‌ನ‌ ಪುರುಷರ ವಿಭಾಗದ ಕ್ರಿಕೆಟ್‌ನ ಫೈನಲ್ ಪಂದ್ಯದಲ್ಲಿ ಪಾಕಿಸ್ತಾನ ತಂಡವನ್ನು ಬಗ್ಗು ಬಡಿದು ಟೀಂ ಇಂಡಿಯಾ ಚಿನ್ನದ ಪದಕಕ್ಕೆ ಮುತ್ತಿಟ್ಟಿದೆ. ಹೈ-ವೋಲ್ಟೇಜ್ ಪಂದ್ಯದಲ್ಲಿ ಮೈದಾನದಲ್ಲಿ ಒಂದಷ್ಟು ಹೈಡ್ರಾಮಾಗಳು ನಡೆದ್ರೆ, ಮೈದಾನದ ಆಚೆಗೂ ನಡೆಯಿತು. ಏನದು? ಸ್ಟೋರಿ ಓದಿ..

ಏಷ್ಯನ್ ಗೇಮ್ಸ್ 2026ರ ಹೈವೋಲ್ಟೇಜ್ ಫೈನಲ್ ಪಂದ್ಯದಲ್ಲಿ ಒಂದು ತಮಾಷೆಯ ಪ್ರಸಂಗ ನಡೆಯಿತು. ಮೈದಾನದಲ್ಲಿ ಸುಲಭದ ಕ್ಯಾಚ್‌ಗಳನ್ನು ಕೈಚೆಲ್ಲಿದ ಪಾಕಿಸ್ತಾನದ ಆಟಗಾರ ಸೈಮ್ ಅಯೂಬ್ (Saim Ayub) ಅವರನ್ನು ಭಾರತೀಯ ಕ್ರಿಕೆಟ್ ಅಭಿಮಾನಿಗಳು ಗ್ಯಾಲರಿಯಿಂದಲೇ ಗೇಲಿ ಮಾಡಿದರು.

ಸೋಶಿಯಲ್ ಮೀಡಿಯಾಲ್ಲಿ ವೈರಲ್ ಆಗ್ತಿರುವ ವಿಡಿಯೋದಲ್ಲಿ ಬೌಂಡರಿ ಲೈನ್ ಬಳಿ ಫೀಲ್ಡಿಂಗ್ ಮಾಡುತ್ತಿದ್ದ ಸೈಮ್ ಅಯೂಬ್ ಅವರನ್ನು ಭಾರತದ ಅಭಿಮಾನಿಗಳು ಟ್ರೋಲ್ ಮಾಡಿದರು. ಒಬ್ಬ ಅಭಿಮಾನಿ 'ಓಯ್... ಬಿರಿಯಾನಿ...' ಎಂದು ಕೂಗಿದರೆ, ಇನ್ನೊಬ್ಬ ಅಭಿಮಾನಿ 'ಅಣ್ಣಾ, ಇನ್ನೊಂದು ಕ್ಯಾಚ್ ಬಿಟ್ಟುಬಿಡು ಪ್ಲೀಸ್!' (ಏಕ್ ಔರ್ ಕ್ಯಾಚ್ ಛೋಡ್ ನಾ) ಎಂದು ತಮಾಷೆ ಮಾಡಿದ್ದಾನೆ. ಅಷ್ಟೇ ಅಲ್ಲದೆ.. ಇಡೀ ಪ್ರೇಕ್ಷಕರ ಗುಂಪು 'ಛೋಡೇಗಾ ಭಾಯ್ ಛೋಡೇಗಾ... ಪಾಕಿಸ್ತಾನ್ ಕ್ಯಾಚ್ ಛೋಡೇಗಾ' (ಬಿಡ್ತಾನೆ ಭಾಯ್ ಬಿಡ್ತಾನೆ... ಪಾಕಿಸ್ತಾನ ಕ್ಯಾಚ್ ಬಿಡ್ತಾನೆ) ಎಂದು ಜೋರಾಗಿ ಕೂಗಿದ್ದಾರೆ.

ಅಭಿಮಾನಿಗಳ ತಮಾಷೆ ಅಷ್ಟಕ್ಕೇ ನಿಲ್ಲಲಿಲ್ಲ. ರೋಹಿತ್ ಶರ್ಮಾರ ಪ್ರಸಿದ್ಧ ಡೈಲಾಗ್ 'ಕೋಯಿ ಗಾರ್ಡನ್ ಮೇ ನಹೀ ಘೂಮೇಗಾ' (ಯಾರೂ ತೋಟದಲ್ಲಿ ವಾಕಿಂಗ್ ಮಾಡಿದಂತೆ ಮೈದಾನದಲ್ಲಿ ಅಡ್ಡಾಡಬಾರದು) ಎಂಬ ಮಾತನ್ನು ಕೂಗಿ ಅಯೂಬ್ ಅವರ ಕಳಪೆ ಫೀಲ್ಡಿಂಗ್ ಅಣಕಿಸಿದ್ದಾರೆ.

ಭಾರತೀಯ ಅಭಿಮಾನಿಗಳು ಅಯೂಬ್‌ನನ್ನು ಟ್ರೋಲ್ ಮಾಡಲು ಮುಖ್ಯ ಕಾರಣವೂ ಇತ್ತು. ಅಯೂಬ್ ಬರೋಬ್ಬರಿ ಎರಡು ಕ್ಯಾಚ್‌ಗಳನ್ನು ಕೈಚೆಲ್ಲಿದ್ದರು. ಟೀಮ್ ಇಂಡಿಯಾ ನಾಯಕ ಶ್ರೇಯಸ್ ಅಯ್ಯರ್ ಮತ್ತು ಸ್ಫೋಟಕ ಬ್ಯಾಟರ್ ಅಭಿಷೇಕ್ ಶರ್ಮಾ ಅವರ ಸುಲಭದ ಕ್ಯಾಚ್‌ಗಳನ್ನು ಡ್ರಾಪ್ ಮಾಡಿದ್ದ.

ಕ್ಯಾಚ್ ಡ್ರಾಪ್‌ನ ಲಾಭ ಪಡೆದ ಅಭಿಷೇಕ್ ಶರ್ಮಾ.. ಕೇವಲ 28 ಎಸೆತಗಳಲ್ಲಿ 61 ರನ್ ಚಚ್ಚಿ ಪಾಕಿಸ್ತಾನದ ಬೌಲರ್‌ಗಳನ್ನು ಬೆಂಡೆತ್ತಿದರು. ಪಾಕ್ ಕಳಪೆ ಫೀಲ್ಡಿಂಗ್ ಮತ್ತು ಭಾರತೀಯ ಅಭಿಮಾನಿಗಳ ತಮಾಷೆಯ ಸ್ಲೆಡ್ಜಿಂಗ್ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗ್ತಿದೆ.

Indian Fans Sledging Saim Ayub Saying - Koi garden me nahi ghumega.... Varna IYKYK - Oyeeee... Biryani.- Ek aur catch drop kar na. pic.twitter.com/IsYKRlSrM1

— Mukku (@Cric_Mukku) October 3, 2026

ವಿಂಡೀಸ್ ವಿರುದ್ಧ ಭಾರತ ಸೋಲಿಗೆ ಮೂರು ದೊಡ್ಡ ಕಾರಣಗಳು, ಕೊಹ್ಲಿ ಕೂಡ ಒಂದು ತಪ್ಪು ಮಾಡಿಬಿಟ್ರು

Ganesh Mabla Gowda — Sun, 04 Oct 2026 11:44:48 +0530

ವೆಸ್ಟ್ ವಿಂಡೀಸ್ ವಿರುದ್ಧದ ಅಂತಿಮ ಏಕದಿನ ಪಂದ್ಯದಲ್ಲಿ ಟೀಂ ಇಂಡಿಯಾ ಸೋಲಿಗೆ ಶರಣಾಗಿದೆ. ಟೀಂ ಇಂಡಿಯಾ ಸೋಲಿಗೆ 351 ರನ್‌ಗಳಿಸಿದರೂ ಭಾರತಕ್ಕೆ ಗೆಲುವು ಸಿಗಲಿಲ್ಲ. ಅದಕ್ಕೆ ಮೂರು ದೊಡ್ಡ ಕಾರಣಗಳಿವೆ.

ಚಂಡಿಗಡದಲ್ಲಿ ನಡೆದ ಪಂದ್ಯದಲ್ಲಿ ಭಾರತ ಮೊದಲು ಬ್ಯಾಟ್ ಮಾಡಿತ್ತು. ಭಾರತ 7 ವಿಕೆಟ್ ಕಳೆದುಕೊಂಡು 351 ರನ್‌ಗಳಿಸಿತ್ತು. 352 ರನ್‌ಗಳ ಗುರಿ ಬೆನ್ನು ಹತ್ತಿದ್ದ ವಿಂಡೀಸ್, ಕೆರಿಬಿಯನ್ ನಾಯಕ ಶೈ ಹೋಪ್ ಅಜೇಯ 162 ರನ್‌ಗಳ ಸಹಾಯದಿಂದ ಪಂದ್ಯವನ್ನು ಸುಲಭವಾಗಿ ಗೆದ್ದುಕೊಂಡಿತು. ಇನ್ನು ಟೀಂ ಇಂಡಿಯಾ ಸೋಲಿಗೆ ಕಾರಣ ಏನು ಅಂತಾ ನೋಡೋದಾದ್ರೆ..

ಜಸ್ಪ್ರೀತ್ ಬುಮ್ರಾ ಮತ್ತು ಅರ್ಶ್ದೀಪ್ ಸಿಂಗ್ ಇಲ್ಲದೇ ಪರದಾಟ ನಡೆಸಿತು
ಟೀಮ್ ಇಂಡಿಯಾ ಡೆತ್ ಓವರ್‌ಗಳಲ್ಲಿ ಕಳಪೆ ಬೌಲಿಂಗ್ ಮಾಡಿತು
ವಿಂಡೀಸ್‌ಗೆ ಕೊನೆಯ ಐದು ಓವರ್‌ಗಳಲ್ಲಿ 56 ರನ್‌ಗಳು ಬೇಕಾಗಿದ್ದವು
ಭಾರತೀಯ ಬೌಲರ್‌ಗಳು 10 ಎಸೆತಗಳ ಮೊದಲೇ ಪಂದ್ಯ ಮುಗಿಸಿದರು
ರಿಬಿಯನ್ ಬ್ಯಾಟ್ಸ್‌ಮನ್‌ಗಳು 20 ಎಸೆತಗಳಲ್ಲಿ 56 ರನ್‌ ಗಳಿಸಿದರು
ಮನಸ್ಸು ಮಾಡಿದ್ರೆ ಸುಲಭವಾಗಿ ತಂಡವನ್ನು ಕಟ್ಟಿ ಹಾಕಬಹುದಿತ್ತು
ಡೆತ್‌ ಓವರ್‍‌ಗಳಲ್ಲಿ ಬೌಲಿಂಗ್ ಅನುಭವದ ಕೊರತೆ ಎದ್ದು ಕಂಡಿತು

ಎರಡೂ ತಂಡಗಳು ಒಟ್ಟು ಒಂಬತ್ತು ಕ್ಯಾಚ್‌ಗಳನ್ನು ಕೈಬಿಟ್ಟವು
ಭಾರತೀಯ ಫೀಲ್ಡರ್‌ಗಳು ಇದರಲ್ಲಿ ಮೂರನ್ನು ಕೈಬಿಟ್ಟರು
ವಿರಾಟ್ ಕೊಹ್ಲಿ ಆಮಿರ್ ಜಂಗೂ ಅವರ ಕ್ಯಾಚ್ ಕೈಬಿಟ್ಟರು
ನಂತರ ಆಮಿರ್ ಜಂಗೂ 67 ರನ್ ಗಳಿಸಿದರು
ಗುರ್ನೂರ್ ಬ್ರಾರ್ ಜಾನ್ ಕ್ಯಾಂಪ್‌ಬೆಲ್‌ಗೆ ಕ್ಯಾಚ್ ಹಿಡಿಯಲು ವಿಫಲರಾದರು
ಭಾರತದ ಸೋಲಿಗೆ ಕಳಪೆ ಫೀಲ್ಡಿಂಗ್ ಪ್ರಮುಖ ಕಾರಣವಾಯಿತು

ಶುಭಮನ್ ಗಿಲ್ ಅವರ ಕಳಪೆ ನಾಯಕತ್ವವು ಸ್ಪಷ್ಟವಾಗಿತ್ತು
ನಿತೀಶ್ ಕುಮಾರ್ ರೆಡ್ಡಿ ಐದನೇ ಬೌಲರ್ ಆಗಿ ಕಣಕ್ಕಿಳಿದಿದ್ದರು
ನಿತೀಶ್ ಕುಮಾರ್ ರೆಡ್ಡಿ ತುಂಬಾ ದುಬಾರಿ ಬೌಲರ್ ಎನಸಿಕೊಂಡರು
ಆರನೇ ಬೌಲಿಂಗ್ ಆಯ್ಕೆಯಾದ ನಮನ್ ಧೀರ್ ಸರಿಯಾಗಿ ಬಳಸಿಕೊಳ್ಳಲಿಲ್ಲ
5ನೇ, 6ನೇ ಬೌಲಿಂಗ್ ಆಯ್ಕೆಯಾ ನಿತೀಶ್, ನಮನ್ ಒಟ್ಟಿಗೆ ಬೌಲಿಂಗ್ ಮಾಡುತ್ತಿದ್ದರು
ಬೌಲಿಂಗ್ ದಾಳಿ ಪರಿಣಾಮಕಾರಿ ಆಗಿರಬೇಕಾದರೆ ಕ್ಯಾಪ್ಟನ್ಸಿ ಮುಖ್ಯ
ಗಿಲ್ ರಕ್ಷಣಾತ್ಮಕ ನಾಯಕತ್ವವು ಟೀಮ್ ಇಂಡಿಯಾಕ್ಕೆ ದುಬಾರಿಯಾಗಿ ಪರಿಣಮಿಸಿತು

ಮತ್ತೊಮ್ಮೆ ಪಾಕಿಸ್ತಾನವನ್ನು ಚೆಂಡಾಡಿದ, ಅಭಿಷೇಕ್ ಶರ್ಮಾ ತಿಲಕ್ ವರ್ಮಾ! ಚಿನ್ನಕ್ಕೆ ಟೀಂ ಇಂಡಿಯಾ ಇನ್ನಷ್ಟು ಹತ್ತಿರ

Naveen Kodase — Sat, 03 Oct 2026 12:18:24 +0530

India vs Pakistan Final ಟೋಕಿಯೋ: ಏಷ್ಯನ್ ಗೇಮ್ಸ್ ಪುರುಷರ ಕ್ರಿಕೆಟ್ ಫೈನಲ್ ಪಂದ್ಯದಲ್ಲಿ ಪಾಕಿಸ್ತಾನದ ವಿರುದ್ಧ ಟೀಂ ಇಂಡಿಯಾ 212 ರನ್ ಸಿಡಿಸಿದೆ. ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಭಾರತದ ಪರ ಅಭಿಷೇಕ್ ಶರ್ಮಾ (28 ಎಸೆತಗಳಲ್ಲಿ 61 ರನ್) ಭರ್ಜರಿ ಆಟವಾಡಿದರು. ತಿಲಕ್ ವರ್ಮಾ (22 ಎಸೆತಗಳಲ್ಲಿ ಅಜೇಯ 51 ರನ್) ಇನ್ನಿಂಗ್ಸ್ ಕೂಡ ಬಹಳ ನಿರ್ಣಾಯಕವಾಯಿತು. ಏಷ್ಯಾಕಪ್ ಟೂರ್ನಿಯಲ್ಲಿ ಪಾಕಿಸ್ತಾನ ತಂಡವನ್ನು ಇನ್ನಿಲ್ಲದಂತೆ ಕಾಡಿದ್ದ ತಿಲಕ್ ವರ್ಮಾ, ಇದೀಗ ಏಷ್ಯನ್ ಗೇಮ್ಸ್‌ನಲ್ಲೂ ಬದ್ದ ಎದುರಾಳಿ ಪಾಕಿಸ್ತಾನವನ್ನು ಕಂಗಾಲಾಗುವಂತೆ ಮಾಡಿದರು. ಪಾಕಿಸ್ತಾನದ ಪರ ಅರಾಫತ್ ಮಿನ್ಹಾಸ್ ಎರಡು ವಿಕೆಟ್ ಪಡೆದರು.

ಭಾರತಕ್ಕೆ ಆರಂಭಿಕ ಆಘಾತ

ಭಾರತಕ್ಕೆ ಸಾಧಾರಣ ಆರಂಭ ಸಿಕ್ಕಿತು. ವೈಭವ್ ಸೂರ್ಯವಂಶಿ (15) ಮತ್ತು ಅಭಿಷೇಕ್ ಮೊದಲ ವಿಕೆಟ್‌ಗೆ 28 ರನ್ ಸೇರಿಸಿದರು. ಆದರೆ ಮೂರನೇ ಓವರ್‌ನ ಮೊದಲ ಎಸೆತದಲ್ಲೇ ವೈಭವ್ ಔಟಾದರು. ಸೈಮ್ ಅಯೂಬ್ ಬೌಲಿಂಗ್‌ನಲ್ಲಿ ರಿವರ್ಸ್ ಸ್ವೀಪ್ ಮಾಡಲು ಹೋಗಿ ವಿಕೆಟ್ ಕೀಪರ್ ಉಸ್ಮಾನ್ ಖಾನ್‌ಗೆ ಕ್ಯಾಚ್ ನೀಡಿದರು. ನಂತರ ಬಂದ ಸಂಜು ಕೇವಲ ನಾಲ್ಕು ಎಸೆತಗಳನ್ನಷ್ಟೇ ಎದುರಿಸಿದರು. ಅಹ್ಮದ್ ದಾನಿಯಾಲ್ ಅವರ ವೇಗದ ಬೌಲಿಂಗ್‌ನಲ್ಲಿ ಸಂಜು ಎಡವಿದರು. ಬೌನ್ಸರ್ ಎಸೆತವನ್ನು ಲಾಂಗ್ ಆನ್ ಕಡೆ ಬಾರಿಸಲು ಯತ್ನಿಸಿದ ಸಂಜು, ಮಿಡ್ ಆನ್‌ನಲ್ಲಿ ಕ್ಯಾಚ್ ನೀಡಿ ಪೆವಿಲಿಯನ್ ಸೇರಿದರು.

ಅಭಿಷೇಕ್ ಶರ್ಮಾ ಸ್ಪೋಟಕ ಬ್ಯಾಟಿಂಗ್:

ಈ ನಡುವೆ ಅಭಿಷೇಕ್ ತಮ್ಮ ಅಬ್ಬರ ಮುಂದುವರಿಸಿದರು. ಶ್ರೇಯಸ್ ಅಯ್ಯರ್ (24 ಎಸೆತಗಳಲ್ಲಿ 21) ಜೊತೆಗೂಡಿ ಅಭಿಷೇಕ್ 42 ರನ್‌ಗಳ ಜೊತೆಯಾಟವಾಡಿದರು. ಎಂಟನೇ ಓವರ್‌ನಲ್ಲಿ ಔಟಾಗುವ ಮುನ್ನ ಅಭಿಷೇಕ್ ಬ್ಯಾಟ್‌ನಿಂದ ಏಳು ಸಿಕ್ಸರ್ ಹಾಗೂ ಮೂರು ಬೌಂಡರಿಗಳು ಸಿಡಿದಿದ್ದವು. ಬ್ಯಾಟಿಂಗ್‌ಗೆ ಕಷ್ಟಕರವಾಗಿದ್ದ ಪಿಚ್‌ನಲ್ಲಿ ಶ್ರೇಯಸ್ ಮತ್ತು ಇಶಾನ್ ಕಿಶನ್ (18 ಎಸೆತಗಳಲ್ಲಿ 20) ಮಹತ್ವದ ಕಾಣಿಕೆ ನೀಡಿದರು. ಇವರಿಬ್ಬರು ಔಟಾದ ಬಳಿಕ ತಿಲಕ್ ಹಾಗೂ ಶಿವಂ ದುಬೆ (15 ಎಸೆತಗಳಲ್ಲಿ 27) ಸ್ಕೋರ್ ಅನ್ನು 200ರ ಗಡಿ ದಾಟಿಸಿದರು. ಈ ಜೋಡಿ 62 ರನ್ ಕಲೆಹಾಕಿತು. ಪಾಕ್ ಬೌಲರ್‌ಗಳನ್ನು ಮೈಚಳಿ ಬಿಟ್ಟು ಬ್ಯಾಟ್ ಬೀಸಿದ ತಿಲಕ್ ವರ್ಮಾ ಕೇವಲ 22 ಎಸೆತಗಳನ್ನು ಎದುರಿಸಿ 3 ಬೌಂಡರಿ ಹಾಗೂ 4 ಸಿಕ್ಸರ್ ಸಹಿತ ಅಜೇಯ 51 ರನ್ ಸಿಡಿಸಿದರು. ಕೊನೆಯಲ್ಲಿ ಬಂದ ಅಕ್ಷರ್ ಪಟೇಲ್ (1) ತಿಲಕ್ ಜೊತೆ ಅಜೇಯರಾಗಿ ಉಳಿದರು.

Asian Games ಟ್ರೋಫಿ ಕದಿಯಲು ಮೈದಾನಕ್ಕಿಳಿಯಲಿದ್ದಾರಾ ನಖ್ವಿ? ಇಂಡೋ-ಪಾಕ್ ಫೈನಲ್ ಹೈ-ಡ್ರಾಮಾಗೆ ಎಸಿಸಿ ಕೊಟ್ಟ ಸ್ಪಷ್ಟನೆ ಏನು?

Bhimasi M Koleppanavar — Fri, 02 Oct 2026 20:19:44 +0530

ಶನಿವಾರ ಕ್ರಿಕೆಟ್ ಅಭಿಮಾನಿಗಳಿಗೆ ಅತ್ಯಂತ ರೋಮಾಂಚಕಾರಿ ದಿನವಾಗಲಿದೆ. ಏಷ್ಯನ್ ಗೇಮ್ಸ್‌ನ ಮಹಾ ಫೈನಲ್ ಪಂದ್ಯದಲ್ಲಿ ಸಾಂಪ್ರದಾಯಿಕ ವೈರಿಗಳಾದ ಭಾರತ ಮತ್ತು ಪಾಕಿಸ್ತಾನ ತಂಡಗಳು ಮುಖಾಮುಖಿಯಾಗುತ್ತಿದ್ದು, ಬೆಳಿಗ್ಗೆ 10 ಗಂಟೆಗೆ ಈ ಹೈ-ವೋಲ್ಟೇಜ್ ಕಾದಾಟ ಆರಂಭವಾಗಲಿದೆ. ಮೈದಾನದಲ್ಲಿ ಭಾರತ ಮತ್ತು ಪಾಕಿಸ್ತಾನ ಎದುರಾಗುತ್ತವೆ ಎಂದರೆ ಅಲ್ಲಿ ಕ್ರಿಕೆಟ್‌ಗಿಂತಲೂ ಹೆಚ್ಚಾಗಿ ಭಾವನೆಗಳು, ಉತ್ಸಾಹ ಮತ್ತು ಅಭಿಮಾನಿಗಳ ರೋಮಾಂಚನ ಉನ್ನತ ಮಟ್ಟದಲ್ಲಿರುತ್ತದೆ. ಹೀಗಾಗಿ ಈ ಮಹಾಸಮರವನ್ನು ಕಣ್ಣುಂಬಿಕೊಳ್ಳಲು ಜಗತ್ತಿನಾದ್ಯಂತ ಇರುವ ಕ್ರಿಕೆಟ್ ಪ್ರೇಮಿಗಳು ಕಾತುರದಿಂದ ಕಾಯುತ್ತಿದ್ದಾರೆ.

ಬರ್ತಾರಾ ನಖ್ವಿ!

ಆದರೆ, ಈ ಫೈನಲ್ ಪಂದ್ಯ ಆರಂಭವಾಗುವ ಮುನ್ನವೇ ಮೈದಾನದ ಹೊರಗೆ ಒಂದು ದೊಡ್ಡ ಮಟ್ಟದ ಹೈ-ಡ್ರಾಮಾ ಮತ್ತು ಚರ್ಚೆ ಹುಟ್ಟಿಕೊಂಡಿತ್ತು. ಅದೇನೆಂದರೆ, ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ (ACC) ಅಧ್ಯಕ್ಷ ಹಾಗೂ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (PCB) ಮುಖ್ಯಸ್ಥರಾಗಿರುವ ಮೊಹ್ಸಿನ್ ನಖ್ವಿ ಈ ಪಂದ್ಯಕ್ಕೆ ಹಾಜರಾಗಲಿದ್ದಾರೆಯೇ ಎಂಬ ಪ್ರಶ್ನೆ. ಏಷ್ಯನ್ ಗೇಮ್ಸ್‌ನಲ್ಲಿ ಕ್ರಿಕೆಟ್ ಪಂದ್ಯಾವಳಿ ನಡೆಯುತ್ತಿರುವುದರಿಂದ ಎಸಿಸಿ ಅಧ್ಯಕ್ಷರಾಗಿ ಅವರು ಪ್ರಶಸ್ತಿ ಪ್ರದಾನ ಸಮಾರಂಭಕ್ಕೆ ಬರುವುದು ಸಹಜ ಪ್ರಕ್ರಿಯೆಯಾಗಿತ್ತು.

ಈ ಹಿಂದಿನ 'ಟ್ರೋಫಿ ವಿವಾದ' ಮತ್ತು ನಖ್ವಿ ಗೊಂದಲ!

ಈ ಹಿಂದಿನ ಘಟನೆಗಳನ್ನು ಗಮನಿಸಿದರೆ, ಪುರುಷರ ಮತ್ತು ಮಹಿಳೆಯರ ಏಷ್ಯಾ ಕಪ್ ಫೈನಲ್‌ನಲ್ಲಿ ಭಾರತ ತಂಡಗಳು ಪಾಕಿಸ್ತಾನವನ್ನು ಮಣ್ಣು ಮುಕ್ಕಿಸಿ ಚಾಂಪಿಯನ್ ಆಗಿ ಹೊರಹೊಮ್ಮಿದ್ದವು. ಆದರೆ, ಪ್ರಶಸ್ತಿ ವಿತರಣಾ ಸಮಾರಂಭದಲ್ಲಿ ಎಸಿಸಿ ಅಧ್ಯಕ್ಷ ಮೊಹ್ಸಿನ್ ನಖ್ವಿ ಅವರ ಕೈಯಿಂದ ಟ್ರೋಫಿ ಸ್ವೀಕರಿಸಲು ಭಾರತೀಯ ನಾಯಕರು ಸಮ್ಮತಿಸಿರಲಿಲ್ಲ. ಪುರುಷರ ತಂಡದ ನಾಯಕ ಶ್ರೇಯಸ್ ಅಯ್ಯರ್ ನೇತೃತ್ವದ ಪಡೆ ಹಾಗೂ ಮಹಿಳಾ ತಂಡದ ನಾಯಕಿ ಹರ್ಮನ್‌ಪ್ರೀತ್ ಕೌರ್ ನೇತೃತ್ವದ ಪಡೆ ಮೊಹ್ಸಿನ್ ನಖ್ವಿ ಅವರಿಂದ ಪ್ರಶಸ್ತಿ ಪಡೆಯಲು ಸ್ಪಷ್ಟವಾಗಿ ನಿರಾಕರಿಸಿದ್ದವು. ಈ ರಾಜಕೀಯ ಮತ್ತು ಕ್ರೀಡಾ ತಂಟೆಯಿಂದಾಗಿ ಭಾರತ ಗೆದ್ದ ಆ ಎರಡೂ ಏಷ್ಯಾ ಕಪ್ ಟ್ರೋಫಿಗಳು ಇಂದಿಗೂ ಟೀಮ್ ಇಂಡಿಯಾದ ಪ್ರಶಸ್ತಿ ಕ್ಯಾಬಿನೆಟ್ ತಲುಪದೇ ವಿವಾದದ ಸುಳಿಯಲ್ಲಿ ಸಿಲುಕಿದ್ದವು.

ಟ್ರೋಪಿ ನಿರಾಕರಿಸುತ್ತಾ ಭಾರತ?

ಇದೀಗ ಏಷ್ಯನ್ ಗೇಮ್ಸ್ ಫೈನಲ್‌ನಲ್ಲೂ ಭಾರತವೇ ಗೆಲ್ಲುವ ನೆಚ್ಚಿನ ತಂಡವಾಗಿರುವುದರಿಂದ, ಮತ್ತೆ ಅದೇ ರೀತಿಯ ಮುಜುಗರದ ಸನ್ನಿವೇಶ ಮತ್ತು ಹೈ-ಡ್ರಾಮಾ ಸೃಷ್ಟಿಯಾಗಲಿದೆಯೇ ಎಂಬ ಆತಂಕ ಅಭಿಮಾನಿಗಳಲ್ಲಿ ಇತ್ತು. ನಖ್ವಿ ಅವರೇನಾದರೂ ವೇದಿಕೆಗೆ ಬಂದು ಟ್ರೋಫಿ ನೀಡಲು ಮುಂದಾದರೆ ಭಾರತ ತಂಡ ಮತ್ತೆ ಅದನ್ನು ನಿರಾಕರಿಸುತ್ತದೆಯೇ ಎಂಬ ಕೌತುಕ ಮೂಡಿತ್ತು.

ಭಾರತಕ್ಕೆ ಸಿಕ್ತು ಬಹುದೊಡ್ಡ ರಿಲೀಫ್!

ಆದರೆ, ಫೈನಲ್ ಪಂದ್ಯದ ಕೆಲವೇ ಗಂಟೆಗಳ ಮುಂಚಿತವಾಗಿ ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ (ACC) ಈ ಎಲ್ಲಾ ವದಂತಿಗಳು ಮತ್ತು ಗೊಂದಲಗಳಿಗೆ ತೆರೆ ಎಳೆದಿದೆ. ಪಿಸಿಬಿ ಅಧ್ಯಕ್ಷ ಹಾಗೂ ಎಸಿಸಿ ಮುಖ್ಯಸ್ಥ ಮೊಹ್ಸಿನ್ ನಖ್ವಿ ಅವರು ತಮ್ಮ ಪೂರ್ವ ನಿಯೋಜಿತ ವೇಳಾಪಟ್ಟಿ ಮತ್ತು ಕೆಲಸದ ಒತ್ತಡದ ಕಾರಣದಿಂದಾಗಿ ಈ ಏಷ್ಯನ್ ಗೇಮ್ಸ್ ಫೈನಲ್ ಪಂದ್ಯಕ್ಕೆ ಹಾಜರಾಗುತ್ತಿಲ್ಲ ಎಂದು ಎಸಿಸಿ ಅಧಿಕೃತವಾಗಿ ಸ್ಪಷ್ಟಪಡಿಸಿದೆ. ಎಸಿಸಿಯ ಈ ಪ್ರಕಟಣೆಯು ಭಾರತೀಯ ಕ್ರಿಕೆಟ್ ಅಭಿಮಾನಿಗಳಿಗೆ ಮತ್ತು ಟೀಮ್ ಇಂಡಿಯಾಗೆ ದೊಡ್ಡ ಸಮಾಧಾನ ತಂದಿದೆ. ನಖ್ವಿ ಅವರ ಗೈರುಹಾಜರಿಯಿಂದಾಗಿ, ಪಂದ್ಯದ ನಂತರ ನಡೆಯುವ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಯಾವುದೇ ರೀತಿಯ ರಾಜಕೀಯ ಅಥವಾ ಕ್ರೀಡಾ ವಿವಾದಗಳು ಎದುರಾಗುವುದಿಲ್ಲ.

ಹಾದಿ ಸುಗುಮ!

ಇದೀಗ ಶನಿವಾರ ನಡೆಯಲಿರುವ ಮಹಾಸಮರದಲ್ಲಿ ಭಾರತ ತಂಡ ಪಾಕಿಸ್ತಾನವನ್ನು ಸೋಲಿಸಿ ಚಾಂಪಿಯನ್ ಪಟ್ಟಕ್ಕೇರಿದರೆ, ಯಾವುದೇ ಅಡೆತಡೆ ಅಥವಾ ಮುಜುಗರವಿಲ್ಲದೆ ಪ್ರಶಸ್ತಿಯನ್ನು ಎತ್ತಿಹಿಡಿದು ವಿಜಯೋತ್ಸವ ಆಚರಿಸಲು ಹಾದಿ ಸಂಪೂರ್ಣ ಸುಗಮವಾಗಿದೆ. ಮೈದಾನದಲ್ಲಿ ಶ್ರೇಯಸ್ ಅಯ್ಯರ್ ಪಡೆ ಪಾಕಿಸ್ತಾನಕ್ಕೆ ಧೂಳೀಪಟ ಮಾಡಿ ಬಂಗಾರದ ಪದಕ ಹಾಗೂ ವಿಶ್ವ ಶ್ರೇಷ್ಠ ಟ್ರೋಫಿಯನ್ನು ಭಾರತಕ್ಕೆ ತರಲಿದೆಯೇ ಎಂಬುದನ್ನು ನೋಡಲು ಇಡೀ ದೇಶವೇ ಕಾಯುತ್ತಿದೆ!

6, 6, 6, 6, 6 ಮತ್ತೆ ಆರ್ಭಟಿಸಿದ RCB ಹಳೇ ಹುಲಿ; ಮತ್ತೆ ತಂಡಕ್ಕೆ ಬನ್ನಿ ಎಂದ ಬೆಂಗಳೂರು ಫ್ಯಾನ್ಸ್

Ganesh Mabla Gowda — Sun, 04 Oct 2026 22:00:59 +0530

ಆರ್‍‌ಸಿಬಿ ತಂಡದ ಹಳೆ ಹುಲಿ, ‘ಮಿಸ್ಟರ್ 360 ಡಿಗ್ರಿ’ ಎಬಿ ಡಿವಿಲಿಯರ್ಸ್ (AB de Villiers) ಮತ್ತೆ ಮೈದಾನದಲ್ಲಿ ಆರ್ಭಟಿಸಿದ್ದಾರೆ. ಆ ಮೂಲಕ ಅಂತರರಾಷ್ಟ್ರೀಯ ಕ್ರಿಕೆಟ್‌ನಿಂದ ನಿವೃತ್ತಿಯಾದರೂ ಬ್ಯಾಟಿಂಗ್‌ನಲ್ಲಿರುವ ಖದರ್ ಕಿಂಚಿತ್ತೂ ಕಡಿಮೆಯಾಗಿಲ್ಲ ಎಂಬುದನ್ನ ಮತ್ತೆ ತೋರಿಸಿಕೊಟ್ಟರು.

ಹೌದು.. ವರ್ಲ್ಡ್ ಚಾಂಪಿಯನ್‌ಶಿಪ್ ಆಫ್ ಲೆಜೆಂಡ್ಸ್ (WCL 2026) ಟೂರ್ನಿಯಲ್ಲಿ ಎಬಿಡಿ ಮಿಂಚಿದ್ದಾರೆ. WCL ಮೂರನೇ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ಪರ ಕಣಕ್ಕಿಳಿದ ಎಬಿಡಿ.. ವೆಸ್ಟ್ ಇಂಡೀಸ್ ಚಾಂಪಿಯನ್ಸ್ ವಿರುದ್ಧ ಸಿಡಿಲಬ್ಬರದ ಅರ್ಧಶತಕ ಸಿಡಿಸಿ ಅಭಿಮಾನಿಗಳಿಗೆ ಹಳೆಯ ದಿನಗಳನ್ನು ನೆನಪಿಸಿದ್ದಾರೆ.

ಶಾರ್ಜಾ ಕ್ರಿಕೆಟ್ ಮೈದಾನದಲ್ಲಿ ಟಾಸ್ ಗೆದ್ದು ದಕ್ಷಿಣ ಆಫ್ರಿಕಾ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಡಿತ್ತು. ಫಾಫ್ ಡುಪ್ಲೆಸಿಸ್ (14 ರನ್) ಗಳಿಸಿ ಆರಂಭದಲ್ಲೇ ವಿಕೆಟ್ ಒಪ್ಪಿಸಿಬಿಟ್ಟರು. ನಂತರ ಕ್ರೀಸ್‌ಗೆ ಬಂದ ನಾಯಕ ಎಬಿ ಡಿವಿಲಿಯರ್ಸ್..ಆರಂಭಿಕ ಆಟಗಾರ ರಿಚರ್ಡ್ ಲೆವಿ ಜೊತೆಗೂಡಿ ವಿಂಡೀಸ್ ಬೌಲರ್‌ಗಳನ್ನು ಮನಬಂದಂತೆ ದಂಡಿಸಿದರು. ಈ ಜೋಡಿ ಎರಡನೇ ವಿಕೆಟ್‌ಗೆ ಬರೋಬ್ಬರಿ 104 ರನ್‌ಗಳ ಸ್ಫೋಟಕ ಜೊತೆಯಾಟ ನೀಡಿತು.

ರಿಚರ್ಡ್ ಲೆವಿ ಕೇವಲ 39 ಎಸೆತಗಳಲ್ಲಿ 8 ಸಿಕ್ಸರ್

ರಿಚರ್ಡ್ ಲೆವಿ ಕೇವಲ 39 ಎಸೆತಗಳಲ್ಲಿ 8 ಸಿಕ್ಸರ್, 5 ಬೌಂಡರಿಗಳೊಂದಿಗೆ ಭರ್ಜರಿ 87 ರನ್ ಚಚ್ಚಿದರು. ನಾಯಕ ಎಬಿ ಡಿವಿಲಿಯರ್ಸ್ 39 ಎಸೆತಗಳಲ್ಲಿ 5 ಸಿಕ್ಸರ್ ಹಾಗೂ 4 ಬೌಂಡರಿಗಳ ಬಾರಿಸಿದರು. 179 ಸ್ಟ್ರೈಕ್ ರೇಟ್‌ನಲ್ಲಿ ಬ್ಯಾಟ್ ಬೀಸಿ 70 ರನ್‌ಗಳಿಸಿದರು. ಅಂತಿಮವಾಗಿ ಡ್ವೇನ್ ಬ್ರಾವೋ ಅವರ ಅದ್ಭುತ ಕ್ಯಾಚ್‌ಗೆ ಎಬಿಡಿ ಇನ್ನಿಂಗ್ಸ್ ಅಂತ್ಯಗೊಂಡಿತು. ಆ ಮೂಲಕ ದಕ್ಷಿಣ ಆಫ್ರಿಕಾ ತಂಡ ವೆಸ್ಟ್ ಇಂಡೀಸ್ ವಿರುದ್ಧ 243 ರನ್‌ಗಳ ಬೃಹತ್ ಮೊತ್ತ ಪೇರಿಸಿತು.

243 ರನ್‌ಗಳ ಗುರಿ ಬೆನ್ನಟ್ಟಿದ ವೆಸ್ಟ್ ವಿಂಡೀಸ್.. 52 ರನ್‌ಗಳಿಗೆ ಪ್ರಮುಖ 3 ವಿಕೆಟ್ ಕಳೆದುಕೊಂಡು ಆಘಾತ ಅನುಭವಿಸಿತು. ಆದರೆ ಯೂನಿವರ್ಸ್ ಬಾಸ್ ಕ್ರಿಸ್ ಗೇಲ್ ಅಬ್ಬರದ ಆಟವಾಡಿದರು. 31 ಎಸೆತಗಳನ್ನು ಎದುರಿಸಿದ ಗೇಲ್.. 5 ಸಿಕ್ಸರ್ ಮತ್ತು 4 ಬೌಂಡರಿಗಳ ನೆರವಿನಿಂದ 60 ರನ್ ಬಾರಿಸಿದರು. ಕೊನೆಗೆ ಸ್ಪಿನ್ನರ್ ಆರೋನ್ ಫಂಗಿಸೊ ಎಸೆತದಲ್ಲಿ ಗೇಲ್ ಎಲ್ಬಿಡಬ್ಲ್ಯೂ ಬಲೆಗೆ ಬಿದ್ದರು. ಇದರೊಂದಿಗೆ ವೆಸ್ಟ್ ವಿಂಡೀಸ್ ಗೆಲುವಿನ ಕನಸು ಕಮರಿ ಹೋಯಿತು. ಒಟ್ಟಾರೆ ಈ ಪಂದ್ಯದಲ್ಲಿ ಮೂವರು ಬ್ಯಾಟರ್‍‌ಗಳು ಭರ್ಜರಿ ಮನರಂಜನೆ ನೀಡಿದರು.

ಆರ್‍‌ಸಿಬಿಗೆ ಕಂಬ್ಯಾಕ್ ಮಾಡ್ತಾರಾ ಎಬಿಡಿ

ಇನ್ನು ಎಬಿಡಿ ಆಟವನ್ನು ಕಣ್ತುಂಬಿಕೊಂಡ ಆರ್‍‌ಸಿಬಿ ಅಭಿಮಾನಿಗಳು ತುಂಬಾ ಎಕ್ಸೈಟ್ ಆಗಿದ್ದಾರೆ. ತುಂಬಾ ದಿನಗಳ ನಂತರ ಎಬಿಡಿ ಆಟವನ್ನು ನೋಡಿ ಖುಷಿ ಪಟ್ಟಿದ್ದಾರೆ. ಮಿಸ್ಟರ್ 360 ಡಿಗ್ರಿ ಆರ್‍‌ಸಿಬಿ ಪರ ಆಡಲು ಬಂದರೆ ಅದರ ಮಜವೇ ಬೇರೆ ಇರುತ್ತದೆ. ಎಬಿಡಿ ಮತ್ತೆ ಬನ್ನಿ ನಾವು ನಿಮ್ಮನ್ನ ಹೊತ್ತು ಮರೆಸ್ತೀವಿ ಎಂಬ ಮಾತುಗಳನ್ನ ಆರ್‍‌ಸಿಬಿ ಫ್ಯಾನ್ಸ್ ಸೋಶಿಯಲ್ ಮೀಡಿಯಾದಲ್ಲಿ ಕಾಮೆಂಟ್ ಮಾಡುತ್ತಿದ್ದಾರೆ. ಪ್ರತಿವರ್ಷ ಐಪಿಎಲ್ ಹತ್ತಿರ ಬರುತ್ತಿದ್ದಂತೆಯೇ ಎಬಿಡಿಯನ್ನ ಆರ್‍‌ಸಿಬಿ ಅಭಿಮಾನಿಗಳು ನೆನಪಿಸಿಕೊಳ್ತಾರೆ. ಮತ್ತೆ ಆರ್‍‌ಸಿಬಿಗೆ ಜಾಯಿನ್ ಆಗ್ತಾರೆ ಎಂದು ಹೇಳ್ತಾರೆ. ಆದರೆ ಕೊನೆಯಲ್ಲಿ ಅದೆಲ್ಲ ಮತ್ತೆ ಮತ್ತೆ ಸುಳ್ಳಾಗ್ತಿದೆ. ಅದೇನೇ ಇರಲಿ, ಎಬಿಡಿ ಈಗಲೂ ಕೂಡ ಅದೇ ಖದರ್‍‌ನಲ್ಲಿ ಬ್ಯಾಟ್ ಬೀಸುತ್ತಿರೋದು ನಿಜಕ್ಕೂ ಗ್ರೇಟ್!

Cricket; ಕೊನೆಯ ಏಕದಿನದಲ್ಲಿ ಗಳಿಸಿದ್ದು 1 ರನ್ ಮಾತ್ರ, ಆದ್ರೂ ವರ್ಲ್ಡ್ ರೆಕಾರ್ಡ್ ಬರೆದ ಗಿಲ್: ಕೊಹ್ಲಿಗೂ ಸಾಧ್ಯವಾಗದ್ದನ್ನು ಸಾಧಿಸಿದ ಶುಭಮನ್!

Bhimasi M Koleppanavar — Sun, 04 Oct 2026 12:31:32 +0530

ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಿನ ಏಕದಿನ ಸರಣಿಯು ಅತ್ಯಂತ ಕುತೂಹಲಕಾರಿಯಾಗಿ ಮುಕ್ತಾಯಗೊಂಡಿದೆ. ಈ ಸರಣಿಯುದ್ದಕ್ಕೂ ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ತಮ್ಮ ಅನುಭವದ ಬ್ಯಾಟಿಂಗ್ ಮೂಲಕ ಅನೇಕ ಹಳೆಯ ದಾಖಲೆಗಳನ್ನು ಧೂಳೀಪಟ ಮಾಡಿದರು. ಆದರೆ, ಸರಣಿಯ ಕೊನೆಯಲ್ಲಿ ಸಂಪೂರ್ಣ ವಿಶ್ವದ ಗಮನ ಸೆಳೆದಿದ್ದು ಮಾತ್ರ ಭಾರತ ತಂಡದ ಯುವ ನಾಯಕ ಶುಭಮನ್ ಗಿಲ್. ಸರಣಿಯ ನಿರ್ಣಾಯಕ ಹಾಗೂ ಕೊನೆಯ ಏಕದಿನ ಪಂದ್ಯದಲ್ಲಿ ಗಿಲ್ ಕೇವಲ 1 ರನ್ ಗಳಿಸಿ ನಿರಾಸೆಯಿಂದ ಪೆವಿಲಿಯನ್‌ಗೆ ಮರಳಿರಬಹುದು, ಆದರೆ ಅಷ್ಟರಲ್ಲಾಗಲೇ ಅವರು ಏಕದಿನ ಕ್ರಿಕೆಟ್ ಇತಿಹಾಸದಲ್ಲೇ ಯಾರೂ ಮಾಡದ ಬೃಹತ್ ವಿಶ್ವದಾಖಲೆಯೊಂದನ್ನು ತಮ್ಮ ಹೆಸರಿಗೆ ಬರೆದುಕೊಂಡಿದ್ದರು.

ಸರಣಿಯಾದ್ಯಂತ ಶುಭಮನ್ ಗಿಲ್ ಭರ್ಜರಿ ಅಬ್ಬರ!

ವೆಸ್ಟ್ ಇಂಡೀಸ್ ವಿರುದ್ಧದ ಈ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಶುಭಮನ್ ಗಿಲ್ ನಾಯಕನಾಗಿ ಅದ್ಭುತವಾಗಿ ತಂಡವನ್ನು ಮುನ್ನಡೆಸಿದ್ದಲ್ಲದೆ, ಬ್ಯಾಟಿಂಗ್‌ನಲ್ಲೂ ಎದುರಾಳಿ ಬೌಲರ್‌ಗಳಿಗೆ ಸಿಂಹಸ್ವಪ್ನವಾಗಿದ್ದರು. ಮೂರು ಪಂದ್ಯಗಳಿಂದ ಒಟ್ಟು 334 ರನ್ ಪೇರಿಸಿದ ಗಿಲ್, 'ಪ್ಲೇಯರ್ ಆಫ್ ದಿ ಸಿರೀಸ್' (ಸರಣಿಯ ಆಟಗಾರ) ಪ್ರಶಸ್ತಿಯನ್ನು ಅತ್ಯಂತ ಅರ್ಹವಾಗಿ ತಮ್ಮದಾಗಿಸಿಕೊಂಡರು. ವಿಶೇಷವಾಗಿ, ಸರಣಿಯ ಎರಡನೇ ಏಕದಿನ ಪಂದ್ಯದಲ್ಲಿ ಗಿಲ್ ಬಾರಿಸಿದ ಬೃಹತ್ 223 ರನ್‌ಗಳ ದ್ವಿಶತಕದ ಇನ್ನಿಂಗ್ಸ್ ಇಡೀ ಕ್ರಿಕೆಟ್ ಲೋಕವೇ ತಿರುಗಿ ನೋಡುವಂತೆ ಮಾಡಿತು. ಈ ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದಲೇ ಅವರು ವಿಶ್ವದಾಖಲೆಯ ಶಿಖರವೇರಲು ಸಾಧ್ಯವಾಯಿತು.

ಮೂರು ಪಂದ್ಯಗಳ ಸರಣಿಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ನಾಯಕ!

ಈ ಅದ್ಭುತ ಪ್ರದರ್ಶನದ ಮೂಲಕ ಶುಭಮನ್ ಗಿಲ್, ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ನಾಯಕನಾಗಿ ಅತಿ ಹೆಚ್ಚು ರನ್ ಗಳಿಸಿದ ವಿಶ್ವದ ಮೊದಲ ಬ್ಯಾಟ್ಸ್‌ಮನ್ ಎಂಬ ಐತಿಹಾಸಿಕ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ ಅಥವಾ ಎಂ.ಎಸ್. ಧೋನಿಯಂತಹ ಶ್ರೇಷ್ಠ ನಾಯಕರಿಗೂ ತಮ್ಮ ನಾಯಕತ್ವದ ಅವಧಿಯಲ್ಲಿ 3 ಪಂದ್ಯಗಳ ಸರಣಿಯಲ್ಲಿ ಈ ಮಟ್ಟದ ರನ್ ಗಳಿಸಲು ಸಾಧ್ಯವಾಗಿರಲಿಲ್ಲ. ಅಷ್ಟೇ ಅಲ್ಲದೆ, 3 ಪಂದ್ಯಗಳ ಏಕದಿನ ಸರಣಿಯಲ್ಲಿ ನಾಯಕನಾಗಿ 300ಕ್ಕೂ ಹೆಚ್ಚು ರನ್‌ಗಳ ಗಡಿ ದಾಟಿದ ವಿಶ್ವದ ಎರಡನೇ ನಾಯಕ ಎಂಬ ಕೀರ್ತಿಯೂ ಈಗ ಗಿಲ್ ವಶವಾಗಿದೆ.

ಬ್ರೆಂಡನ್ ಟೇಲರ್, ಶಾಯ್ ಹೋಪ್ ಮತ್ತು ಬಾಬರ್ ಅಜಮ್ ಹಿಂದಿಕ್ಕಿದ ಗಿಲ್!

ಇದಕ್ಕೂ ಮೊದಲು ಈ ಮಹತ್ವದ ವಿಶ್ವದಾಖಲೆ ಜಿಂಬಾಬ್ವೆಯ ಮಾಜಿ ನಾಯಕ ಬ್ರೆಂಡನ್ ಟೇಲರ್ ಅವರ ಹೆಸರಿನಲ್ಲಿತ್ತು. ಟೇಲರ್ ಮೂರು ಪಂದ್ಯಗಳ ಸರಣಿಯಲ್ಲಿ ನಾಯಕನಾಗಿ 310 ರನ್ ಗಳಿಸಿ ಅಗ್ರಸ್ಥಾನದಲ್ಲಿದ್ದರು. ಈಗ 334 ರನ್ ಬಾರಿಸುವ ಮೂಲಕ ಗಿಲ್, ಟೇಲರ್ ಅವರ ಹಳೆಯ ದಾಖಲೆಯನ್ನು ಇತಿಹಾಸದ ಪುಟಕ್ಕೆ ತಳ್ಳಿದ್ದಾರೆ.

ಮೂರನೇ ಸ್ಥಾನದಲ್ಲಿ ಹೋಪ್‌!

ಈ ಪಟ್ಟಿಯಲ್ಲಿ ಪ್ರಸ್ತುತ ವೆಸ್ಟ್ ಇಂಡೀಸ್ ನಾಯಕ ಶಾಯ್ ಹೋಪ್ ಮೂರನೇ ಸ್ಥಾನದಲ್ಲಿದ್ದಾರೆ. ಹೋಪ್ ಪ್ರಸ್ತುತ ಸರಣಿಯಲ್ಲೇ ಎರಡು ಭರ್ಜರಿ ಶತಕಗಳನ್ನು ಸಿಡಿಸಿ ಬಲಿಷ್ಠ ಪ್ರದರ್ಶನ ನೀಡಿದ್ದರು. ಇನ್ನು ಇತ್ತೀಚಿನ ದಿನಗಳಲ್ಲಿ ನಿಧಾನಗತಿಯ ಬ್ಯಾಟಿಂಗ್‌ಗಾಗಿ (ಟುಕುಟುಕು ಆಟ) ಆಗಾಗ ಟೀಕೆಗೆ ಒಳಗಾಗುತ್ತಿರುವ ಪಾಕಿಸ್ತಾನದ ಮಾಜಿ ನಾಯಕ ಬಾಬರ್ ಅಜಮ್ ಈ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನದಲ್ಲಿದ್ದಾರೆ. ಬಾಬರ್ ಅಜಮ್ 2021 ರಲ್ಲಿ ಆಸ್ಟ್ರೇಲಿಯಾ ವಿರುದ್ಧದ 3 ಪಂದ್ಯಗಳ ಏಕದಿನ ಸರಣಿಯಲ್ಲಿ ನಾಯಕನಾಗಿ 276 ರನ್ ಕಲೆಹಾಕಿದ್ದರು.

ಟೀಮ್ ಇಂಡಿಯಾಗೆ ಹೊಸ ಭರವಸೆ!

ಕೊನೆಯ ಪಂದ್ಯದಲ್ಲಿ ಕೇವಲ 1 ರನ್‌ಗೆ ಔಟ್ ಆದರೂ, ಸರಣಿಯುದ್ದಕ್ಕೂ ತೋರಿಸಿದ ಸ್ಥಿರತೆ ಮತ್ತು ನಾಯಕತ್ವದ ಬದ್ಧತೆ ಗಿಲ್ ಅವರನ್ನು ಕ್ರಿಕೆಟ್ ಜಗತ್ತಿನ ಹೊಸ ನಾಯಕನಾಗಿ ಎತ್ತಿ ಹಿಡಿದಿದೆ. ರೋಹಿತ್ ಮತ್ತು ವಿರಾಟ್ ಅವರಂತಹ ದಿಗ್ಗಜರ ಸಮ್ಮುಖದಲ್ಲೇ ಈ ರೀತಿಯ ವಿಶ್ವದಾಖಲೆ ಬರೆದಿರುವುದು ಭಾರತೀಯ ಕ್ರಿಕೆಟ್‌ನ ಭವಿಷ್ಯ ಅತ್ಯಂತ ಸುರಕ್ಷಿತ ಕೈಗಳಲ್ಲಿದೆ ಎಂಬುದನ್ನು ಸಾಬೀತುಪಡಿಸಿದೆ.

ಸೆಹ್ವಾಗ್ ಮಗನಿಗೆ ಅತಿದೊಡ್ಡ ಜವಾಬ್ದಾರಿ, ಜಸ್ಟ್ 18 ವರ್ಷಕ್ಕೆ ಕನಸು ನನಸು ಮಾಡಿಕೊಂಡ ತಂದೆಗೆ ತಕ್ಕ ಮಗ

Ganesh Mabla Gowda — Sun, 04 Oct 2026 19:06:43 +0530

ಟೀಂ ಇಂಡಿಯಾದ ಮಾಜಿ ಸ್ಟಾರ್ ಕ್ರಿಕೆಟಿಗ ವೀರೇಂದ್ರ ಸೆಹ್ವಾಗ್ ಅವರ ಪುತ್ರ ಆರ್ಯವೀರ್ ಸೆಹ್ವಾಗ್‌ಗೆ ಅತೀ ದೊಡ್ಡ ಜವಾಬ್ದಾರಿ ಒಲಿದು ಬಂದಿದೆ. ಆ ಮೂಲಕ ತಮ್ಮ 18ನೇ ವಯಸ್ಸಿನಲ್ಲಿಯೇ ಅಂದುಕೊಡಿದ್ದನ್ನು ಸಾಧಿಸಿದ್ದು, ಅವರ ಕಾರ್ಯವೈಖರಿ ಬಗ್ಗೆ ಭಾರೀ ಕುತೂಹಲ ಮೂಡಿಸಿದೆ.

ಆರ್ಯವೀರ್ ಸೆಹ್ವಾಗ್, ಟೀಂ ಇಂಡಿಯಾದ ಮಾಜಿ ಸ್ಟಾರ್ ವೀರೇಂದ್ರ ಸೆಹ್ವಾಗ್ ಅವರ ಪುತ್ರ. ತಮ್ಮ 18ನೇ ವಯಸ್ಸಿನಲ್ಲಿಯೇ ನಾಯಕತ್ವದ ಗುಣಗಳನ್ನು ಪ್ರದರ್ಶಿಸಲು ಒಳ್ಳೆಯ ಅವಕಾಶ ಒಲಿದು ಬಂದಿದೆ. ಅಂದರೆ ಕ್ಯಾಪ್ಟನ್ ಆಗಿ ಭರ್ತಿ ಪಡೆದಿದ್ದಾರೆ. ಅಂದ್ಹಾಗೆ ಆರ್ಯವೀರ್ ಇದೇ ತಿಂಗಳು 19 ರಂದು 19ನೇ ವರ್ಷಕ್ಕೆ ಕಾಲಿಡಲಿದ್ದಾರೆ.

ಕಳೆದ ತಿಂಗಳು ಆಸ್ಟ್ರೇಲಿಯಾ ಅಂಡರ್-19 ತಂಡದ ವಿರುದ್ಧ ನಡೆದ ಮೂರು ಯೂತ್ ಏಕದಿನ ಪಂದ್ಯಗಳನ್ನ ಆಡಿದ್ದರು. ಮೊದಲ ಪಂದ್ಯದಲ್ಲಿ 28, ಎರಡನೇ ಪಂದ್ಯದಲ್ಲಿ 47 ಮತ್ತು ಮೂರನೇ ಪಂದ್ಯದಲ್ಲಿ 34 ರನ್ ಗಳಿಸಿದ್ದರು. 2024 ರಲ್ಲಿ ಅವರು ಕೂಚ್ ಬೆಹಾರ್ ಟ್ರೋಫಿಯಲ್ಲಿ ಮೇಘಾಲಯ ವಿರುದ್ಧ 297 ರನ್ ಗಳಿಸಿದರು. ಪ್ರಸ್ತುತ ದೆಹಲಿ ಪ್ರೀಮಿಯರ್ ಲೀಗ್‌ನಲ್ಲಿ ಸೆಂಟ್ರಲ್ ದೆಹಲಿ ಕಿಂಗ್ಸ್ ಮತ್ತು ವೆಸ್ಟ್ ದೆಹಲಿ ಲಯನ್ಸ್ ಪರ ಆಡಿದ್ದಾರೆ.

ದೆಹಲಿ ಅಂಡರ್-19 ತಂಡದ ನಾಯಕನಾಗಿ ಆಯ್ಕೆಯಾದ ಆರ್ಯವೀರ್‍‌ಗೆ ವಿನೂ ಮಂಕಡ್ ಟ್ರೋಫಿಯ ಮಹತ್ವದ ಜವಾಬ್ದಾರಿ ನೀಡಲಾಗಿದೆ. ದೆಹಲಿ ಮತ್ತು ಜಿಲ್ಲಾ ಕ್ರಿಕೆಟ್ ಅಸೋಸಿಯೇಷನ್ ತಂಡವನ್ನು ಪ್ರಕಟಿಸಿದೆ. 16 ಸದಸ್ಯರ ತಂಡಕ್ಕೆ ಆರ್ಯವೀರ್ ಸೆಹ್ವಾಗ್ ಅವರನ್ನು ಆಯ್ಕೆ ಮಾಡಲಾಗಿದೆ. ಇದೇ ಮೊದಲ ಬಾರಿಗೆ ನಾಯಕರಾಗಿ ಆಡುತ್ತಿದ್ದು, ಅಕ್ಟೋಬರ್ 8 ರಿಂದ ವಿನೂ ಮಂಕಡ್ ಟ್ರೋಫಿ ಆರಂಭವಾಗಲಿದೆ.

ಆರ್ಯವೀರ್ ಸೆಹ್ವಾಗ್ (ನಾಯಕ), ತನ್ಮಯ್ ಚೌಧರಿ, ಅರ್ನವ್ ಬುಗ್ಗಾ (ಉಪನಾಯಕ), ಕಿರಿತ್ ಕೌಶಿಕ್, ವರುಣ್ ವಂಜನಿ ಧನ್ಯಾ ನಕ್ರಾ, ಉದಯ್ ಚಾವ್ಲಾ, ರುದ್ರ ದೇವ್ ಯಾದವ್, ಪ್ರದ್ಯುಮನ್ ಸನನ್, ಎಸ್‌.ಶರ್ಮಾ, ಗರ್ವ್ ಕುಮಾರ್, ತರುಣ್ ಸಿಂಗ್ (ವಿಕೆಟ್ ಕೀಪರ್), ಅಭಿರಾಜ್ ಗಗನ್ ಸಿಂಗ್ (ವಿಕೆಟ್ ಕೀಪರ್), ಆರ್ಯನ್ ಸಿಂಗ್, ಆರ್ಯನ್ ಸಿಂಗ್, ಆರ್ಯನ್ ಸಿಂಗ್, ಪಾರ್ಹ್ ಶರ್ಮಾ ಯಾದವ್ ತಂಡದಲ್ಲಿದ್ದಾರೆ.

Asian Games 2026: 2 ಫೈನಲ್‌, 2 ಚಿನ್ನದ ಮೇಲೆ ಭಾರತದ ಕಣ್ಣು; ಹಾಕಿಯಲ್ಲಿ ಮಲೇಷ್ಯಾ, ಕ್ರಿಕೆಟ್‌ನಲ್ಲಿ ಪಾಕ್‌ ಎದುರಾಳಿ!

Kannadaprabha News — Sat, 03 Oct 2026 08:35:39 +0530

ಏಷ್ಯಾಡ್‌ನಲ್ಲಿ ಶನಿವಾರ ಭಾರತ 2 ಪ್ರಮುಖ ಕ್ರೀಡೆಗಳ ಫೈನಲ್‌ನಲ್ಲಿ ಕಣಕ್ಕಿಳಿಯಲಿದ್ದು, ಎರಡರಲ್ಲೂ ಚಿನ್ನದ ಮೇಲೆ ಗುರಿ ಇಟ್ಟಿದೆ. ಕಳೆದ ಬಾರಿ ಚಾಂಪಿಯನ್‌ ಭಾರತ ಪುರುಷರ ಹಾಕಿ ತಂಡ ಈ ಬಾರಿ ಪ್ರಶಸ್ತಿ ಸುತ್ತಿನ ಸೆಣಸಾಟದಲ್ಲಿ ಮಲೇಷ್ಯಾ ವಿರುದ್ಧ ಆಡಲಿದೆ.

ಏಷ್ಯಾಡ್‌ನಲ್ಲಿ ಭಾರತ 4 ಬಾರಿ ಚಾಂಪಿಯನ್‌ ಆಗಿದೆ. ಆದರೆ ಈವರೆಗೂ ಸತತ 2ನೇ ಬಾರಿ ಗೆಲ್ಲಲು ಸಾಧ್ಯವಾಗಿಲ್ಲ. ಸೆಮಿಫೈನಲ್‌ನಲ್ಲಿ ಪಾಕಿಸ್ತಾನ ವಿರುದ್ಧ 4-3 ಅಂತರದಲ್ಲಿ ರೋಚಕವಾಗಿ ಗೆದ್ದಿರುವ ಭಾರತ, ಫೈನಲ್‌ನಲ್ಲಿ ಸುಧಾರಿತ ಪ್ರದರ್ಶನ ನೀಡಬೇಕಾದ ಅಗತ್ಯವಿದೆ. ಮತ್ತೊಂದೆಡೆ ಸೆಮೀಸ್‌ನಲ್ಲಿ ದಕ್ಷಿಣ ಕೊರಿಯಾ ವಿರುದ್ಧ ಗೆದ್ದು ಫೈನಲ್‌ಗೇರಿರುವ ಮಲೇಷ್ಯಾ, ಚೊಚ್ಚಲ ಚಿನ್ನದ ನಿರೀಕ್ಷೆಯಲ್ಲಿದೆ. ಈ ಹಿಂದೆ 2010, 2018ರಲ್ಲಿ ತಂಡ ಬೆಳ್ಳಿ ಜಯಿಸಿತ್ತು.

ಭಾರತಕ್ಕೆ ಫೈನಲ್‌ನಲ್ಲಿಂದು ಪಾಕಿಸ್ತಾನ ಎದುರಾಳಿ:

ಈ ಬಾರಿ ಚಿನ್ನ ಗೆಲ್ಲುವ ಫೇವರಿಟ್‌ ಎನಿಸಿಕೊಂಡೇ ಏಷ್ಯನ್‌ ಗೇಮ್ಸ್‌ನಲ್ಲಿ ಆಡುತ್ತಿರುವ ಭಾರತ ಕ್ರಿಕೆಟ್‌ ತಂಡ, ಶುಕ್ರವಾರ ಫೈನಲ್‌ನಲ್ಲಿ ಬದ್ಧವವೈರಿ ಪಾಕಿಸ್ತಾನ ವಿರುದ್ಧ ಕಾದಾಡಲಿದೆ. ಕಳೆದ ಬಾರಿ ಋತುರಾಜ್‌ ಗಾಯಕ್ವಾಡ್‌ ನೇತೃತ್ವದಲ್ಲಿ ಚಿನ್ನ ಗೆದ್ದಿದ್ದ ಭಾರತ, ಈ ಬಾರಿ ಶ್ರೇಯಸ್‌ ಅಯ್ಯರ್‌ ಸಾರಥ್ಯದಲ್ಲಿ ಚಾಂಪಿಯನ್‌ ಎನಿಸಿಕೊಳ್ಳುವ ವಿಶ್ವಾಸ ಹೊಂದಿದೆ.

ಈ ಪಂದ್ಯದಲ್ಲಿ ಸ್ಪಿನ್ನರ್‌ಗಳು ನಿರ್ಣಾಯಕ ಎನಿಸಿಕೊಳ್ಳುವ ಸಾಧ್ಯತೆಯಿದ್ದು, ಭಾರತ ಅಕ್ಷರ್‌ ಪಟೇಲ್‌, ವಾಷಿಂಗ್ಟನ್‌ ಸುಂದರ್‌, ರವಿ ಬಿಷ್ಣೋಯ್‌ ಮೇಲೆ ಹೆಚ್ಚಿನ ನಿರೀಕ್ಷೆ ಇಟ್ಟುಕೊಂಡಿದೆ. ಈ ಪಂದ್ಯಕ್ಕೂ ಮಳೆ ಭೀತಿ ಇದ್ದು, ಪಂದ್ಯ ನಡೆಯದಿದ್ದರೆ ಎರಡೂ ತಂಡಗಳು ಚಿನ್ನದ ಪದಕ ಪಡೆಯಲಿವೆ. ಪಾಕ್‌ ತಂಡಕ್ಕೆ ಸಾಹಿಬ್‌ಝಾದ ಫರ್ಹಾನ್ ನಾಯಕತ್ವ ವಹಿಸಲಿದ್ದಾರೆ.

ಭಾರತಕ್ಕೆ 3-0 ಸರಣಿ ಕ್ಲೀನ್‌ಸ್ವೀಪ್‌ ವಿಶ್ವಾಸ

ಮುಲ್ಲಾನ್‌ಪುರ: ಭಾರತ ಹಾಗೂ ವೆಸ್ಟ್‌ಇಂಡೀಸ್‌ ನಡುವಿನ 3ನೇ ಹಾಗೂ ಕೊನೆ ಏಕದಿನ ಪಂದ್ಯ ಶನಿವಾರ ನಡೆಯಲಿದೆ. ಈಗಾಗಲೇ ಮೊದಲೆರಡು ಪಂದ್ಯಗಳಲ್ಲಿ ಗೆದ್ದಿರುವ ಶುಭ್‌ಮನ್‌ ಗಿಲ್‌ ಪಡೆ ಸರಣಿಯನ್ನು 3-0 ಅಂತರದಲ್ಲಿ ಕ್ಲೀನ್‌ಸ್ವೀಪ್‌ ಮಾಡಿಕೊಳ್ಳುವ ವಿಶ್ವಾಸದಲ್ಲಿದೆ.

ಮೊದಲೆರಡು ಪಂದ್ಯಗಳಲ್ಲಿ ಭಾರತ ಬ್ಯಾಟಿಂಗ್‌ನಲ್ಲಿ ಅಮೋಘ ಪ್ರದರ್ಶನ ನೀಡಿದೆ. ಅದರಲ್ಲೂ 2ನೇ ಪಂದ್ಯದಲ್ಲಿ ವಿಂಡೀಸ್‌ ನೀಡಿದ್ದ 406 ರನ್‌ ಗುರಿಯನ್ನು ಭಾರತ ಯಶಸ್ವಿಯಾಗಿ ಬೆನ್ನತ್ತಿ ಗೆದ್ದಿತ್ತು. ಈ ಎರಡೂ ಪಂದ್ಯಗಳಲ್ಲಿ ತಂಡದ ಬೌಲಿಂಗ್‌ ಪಡೆ ನೀರಸ ಪ್ರದರ್ಶನ ನೀಡಿತ್ತು. ಹೀಗಾಗಿ 3ನೇ ಪಂದ್ಯದಲ್ಲಿ ಬೌಲಿಂಗ್‌ ಪಡೆ ಸುಧಾರಿತ ಪ್ರದರ್ಶನ ನೀಡಬೇಕಾದ ಅಗತ್ಯವಿದೆ. ಅನುಭವಿ ವೇಗಿ ಮೊಹಮ್ಮದ್‌ ಸಿರಾಜ್‌ಗೆ ಈ ಪಂದ್ಯದಲ್ಲಿ ಅವಕಾಶ ಸಿಗಬಹುದು. ಆಲ್ರೌಂಡರ್‌ ಜಡೇಜಾ ಲಯಕ್ಕೆ ಮರಳುವ ಕಾತರದಲ್ಲಿದ್ದಾರೆ.

ಪಂದ್ಯ ಆರಂಭ: ಮಧ್ಯಾಹ್ನ 2ಕ್ಕೆ

ಐಪಿಎಲ್‌ನಲ್ಲಿ ಕ್ರಿಸ್‌ ಗೇಲ್‌ ಬಾರಿಸಿದ್ದ 175 ರನ್‌ಗಳ ಗರಿಷ್ಠ ಟಿ20 ರನ್‌ ವಿಶ್ವ ದಾಖಲೆ ಮುರಿದ 20 ವರ್ಷದ ಪ್ರಿಟೋರಿಯಸ್‌

Santosh Naik — Sat, 03 Oct 2026 10:36:16 +0530

ಬೆಂಗಳೂರು (ಅ.3): ಪುರುಷರ ಟಿ20 ಕ್ರಿಕೆಟ್ ಇತಿಹಾಸದಲ್ಲೇ ಸುವರ್ಣ ಅಕ್ಷರಗಳಲ್ಲಿ ಬರೆದಿಡುವಂತಹ ಅದ್ಭುತ ವಿಶ್ವ ದಾಖಲೆಯೊಂದು ಸೃಷ್ಟಿಯಾಗಿದೆ. ದಕ್ಷಿಣ ಆಫ್ರಿಕಾದ 20 ವರ್ಷದ ಯುವ ಬ್ಯಾಟರ್ ಲುಹಾನ್-ಡ್ರೆ ಪ್ರಿಟೋರಿಯಸ್ (Lhuan-dre Pretorius), 'ಯೂನಿವರ್ಸ್ ಬಾಸ್' ಕ್ರಿಸ್ ಗೇಲ್ ಹೆಸರಿನಲ್ಲಿದ್ದ ಸಾರ್ವಕಾಲಿಕ ಅತಿ ಹೆಚ್ಚು ವೈಯಕ್ತಿಕ ಟಿ20 ಸ್ಕೋರ್‌ನ ಸುದೀರ್ಘ ದಾಖಲೆಯನ್ನು ಪುಡಿಪುಡಿ ಮಾಡಿದ್ದಾರೆ.

ಇಲ್ಲಿನ ಬ್ಲೂಮ್‌ಫಾಂಟೈನ್‌ನಲ್ಲಿ ನಡೆದ 'ಸಿಎಸ್‌ಎ ಟಿ20 ಚಾಲೆಂಜ್' (CSA T20 Challenge) ಪಂದ್ಯದಲ್ಲಿ 'ನೈಟ್ಸ್' (Knights) ತಂಡದ ವಿರುದ್ಧ 'ಟೈಟನ್ಸ್' (Titans) ಪರ ಕಣಕ್ಕಿಳಿದ ಪ್ರಿಟೋರಿಯಸ್, ಕೇವಲ 79 ಎಸೆತಗಳಲ್ಲಿ ಬರೋಬ್ಬರಿ 188 ರನ್ ಗಳಿಸಿ ಅಜೇಯರಾಗಿ ಉಳಿದರು. ಈ ಮೂಲಕ ಪುರುಷರ ಟಿ20 ಕ್ರಿಕೆಟ್‌ನಲ್ಲಿ ಹೊಸ ಇತಿಹಾಸ ಬರೆದ ಅವರು, ಟಿ20 ಕ್ರಿಕೆಟ್ ಇತಿಹಾಸದ ಪ್ರಥಮ ದ್ವಿಶತಕದ ಐತಿಹಾಸಿಕ ಸಾಧನೆಯಿಂದ ಕೇವಲ 12 ರನ್‌ಗಳ ಅಂತರದಲ್ಲಿ ವಂಚಿತರಾದರು.

13 ವರ್ಷಗಳ ಗೇಲ್ ಸುದೀರ್ಘ ದಾಖಲೆ ಪತನ

ತಮ್ಮ ಚೊಚ್ಚಲ ಹಾಗೂ ವೃತ್ತಿಜೀವನದ 3ನೇ ಟಿ20 ಶತಕ ಸಿಡಿಸಿದ ಪ್ರಿಟೋರಿಯಸ್, ಪ್ರಸಿದ್ಧ ವೆಸ್ಟ್ ಇಂಡೀಸ್ ದೈತ್ಯ ಬ್ಯಾಟರ್ ಕ್ರಿಸ್ ಗೇಲ್ ಅವರ ಹೆಸರಿನಲ್ಲಿದ್ದ ದಾಖಲೆಯನ್ನು ವರ್ಗಾಯಿಸಿಕೊಂಡರು. ಕ್ರಿಸ್ ಗೇಲ್ 2013ರ ಐಪಿಎಲ್ ಆವೃತ್ತಿಯಲ್ಲಿ 'ರಾಯಲ್ ಚಾಲೆಂಜರ್ಸ್ ಬೆಂಗಳೂರು' (RCB) ಪರ ಕಣಕ್ಕಿಳಿದು, ಈಗ ರದ್ದಾಗಿರುವ 'ಪುಣೆ ವಾರಿಯರ್ಸ್' ವಿರುದ್ಧ ಅಜೇಯ 175 ರನ್ ಗಳಿಸಿದ್ದು ಇದುವರೆಗೆ ಟಿ20 ಕ್ರಿಕೆಟ್‌ನಲ್ಲಿ ವ್ಯಕ್ತಿಯೊಬ್ಬರು ಗಳಿಸಿದ ಗರಿಷ್ಠ ಸ್ಕೋರ್ ಎನಿಸಿಕೊಂಡಿತ್ತು. ಪ್ರಿಟೋರಿಯಸ್ ಈಗ ಈ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ.

ಎಸೆತಕ್ಕೊಂದರಂತೆ ಬೌಂಡರಿ: 40 ಎಸೆತಗಳಲ್ಲಿ ಶತಕ

ಆರಂಭದಿಂದಲೇ ಎದುರಾಳಿ ಬೌಲರ್‌ಗಳ ಮೇಲೆ ಸವಾರಿ ಮಾಡಿದ ಈ ಎಡಗೈ ಆರಂಭಿಕ ಬ್ಯಾಟರ್, ಕೇವಲ 24 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ಅಲ್ಲಿಂದ ಮತ್ತಷ್ಟು ರೌದ್ರರೂಪ ತಾಳಿದ ಅವರು, ಮುಂದಿನ ಕೇವಲ 16 ಎಸೆತಗಳಲ್ಲಿ ಅಂದರೆ ಒಟ್ಟು 40 ಎಸೆತಗಳಲ್ಲಿ ತಮ್ಮ ಶತಕದ ಗಡಿ ತಲುಪಿದರು. ಬಳಿಕ ಕೇವಲ 58 ಎಸೆತಗಳಲ್ಲಿ 150 ರನ್ ಪೂರೈಸಿ ಅಬ್ಬರಿಸಿದರು.

ತಮ್ಮ ಬಿರುಸಿನ ಇನ್ನಿಂಗ್ಸ್‌ನಲ್ಲಿ ಒಟ್ಟು 13 ಭರ್ಜರಿ ಸಿಕ್ಸರ್ ಹಾಗೂ 15 ಬೌಂಡರಿಗಳನ್ನು ಬಾರಿಸಿದ ಪ್ರಿಟೋರಿಯಸ್, ನೈಟ್ಸ್ ತಂಡದ ಪ್ರತಿಯೊಬ್ಬ ಬೌಲರ್‌ಗಳ ಮೇಲೆ ಸವಾರಿ ಮಾಡಿದರು. ಅವರ ಎದುರು ಬೌಲಿಂಗ್ ಮಾಡಿದ ಪ್ರತಿಯೊಬ್ಬ ಬೌಲರ್ ಕೂಡ ಓವರ್‌ಗೆ 11 ಅಥವಾ ಅದಕ್ಕಿಂತ ಹೆಚ್ಚಿನ ಎಕಾನಮಿ ದರದಲ್ಲಿ ರನ್ ಬಿಟ್ಟುಕೊಟ್ಟರು. ಅಲ್ಲದೆ, ಟಿ20 ಇತಿಹಾಸದಲ್ಲೇ ಅತ್ಯಂತ ಹೆಚ್ಚು ಎಸೆತಗಳನ್ನು (79 ಎಸೆತ) ಎದುರಿಸಿದ ಜಾಗತಿಕ ದಾಖಲೆಯಲ್ಲಿ ಪ್ರಿಟೋರಿಯಸ್ ಅವರು ಆಸ್ಟ್ರೇಲಿಯಾದ ಆ್ಯರನ್ ಫಿಂಚ್ ಹಾಗೂ ಮಾರ್ಕಸ್ ಸ್ಟೋಯ್ನಿಸ್ ಅವರೊಂದಿಗೆ ಜಂಟಿ ಅಗ್ರಸ್ಥಾನ ಹಂಚಿಕೊಂಡಿದ್ದಾರೆ.

ಟೈಟನ್ಸ್ ದಾಖಲೆಗಳ ಸರಣಿ

ಪ್ರಿಟೋರಿಯಸ್ ಅವರ ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ಟೈಟನ್ಸ್ ತಂಡವು ನಿಗದಿತ 20 ಓವರ್‌ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 267 ರನ್‌ಗಳ ಬೃಹತ್ ಮೊತ್ತ ಕಲೆಹಾಕಿತು. ಇದು ಈ ಟೂರ್ನಿಯ ಇತಿಹಾಸದಲ್ಲೇ ಎರಡನೇ ಗರಿಷ್ಠ ತಂಡದ ಮೊತ್ತವಾಗಿದೆ. ವಿಶೇಷವೆಂದರೆ, 2022ರಲ್ಲಿ ಇದೇ ನೈಟ್ಸ್ ವಿರುದ್ಧ ಟೈಟನ್ಸ್ ಬಾರಿಸಿದ್ದ 271/3 ರನ್ ಮೊದಲ ಸ್ಥಾನದಲ್ಲಿದೆ. ಆ ಪಂದ್ಯದಲ್ಲೇ ಡೆವಾಲ್ಡ್ ಬ್ರೇವಿಸ್ 162 ರನ್ ಗಳಿಸಿ ಟೂರ್ನಿಯ ಗರಿಷ್ಠ ಸ್ಕೋರ್ ದಾಖಲೆ ಹೊಂದಿದ್ದರು, ಅದನ್ನು ಈಗ ಪ್ರಿಟೋರಿಯಸ್ ಮುರಿದಿದ್ದಾರೆ. ಈ ಪಂದ್ಯದೊಂದಿಗೆ ಸಿಎಸ್‌ಎ ಟಿ20 ಚಾಲೆಂಜ್ ಟೂರ್ನಿಯ ಇತಿಹಾಸದ ಟಾಪ್-5 ಗರಿಷ್ಠ ತಂಡದ ಮೊತ್ತಗಳ ಸಂಪೂರ್ಣ ದಾಖಲೆಗಳು ಈಗ 'ಟೈಟನ್ಸ್' ತಂಡದ ವಶದಲ್ಲಿವೆ.

ಭರ್ಜರಿ ಫಾರ್ಮ್‌ನಲ್ಲಿದ್ದ ಪ್ರಿಟೋರಿಯಸ್

2026-27ರ ಪ್ರಸಕ್ತ ಋತುವಿನಲ್ಲಿ ಪ್ರಿಟೋರಿಯಸ್ ಅವರಿಗೆ ಇದು ಮೊದಲ ಪಂದ್ಯವಾಗಿತ್ತು. ಈ ಟೂರ್ನಿಗೂ ಮುನ್ನ ಅವರು ಜಿಂಬಾಬ್ವೆ ಹಾಗೂ ನಮೀಬಿಯಾ ವಿರುದ್ಧ ನಡೆದ ತ್ರಿಕೋನ ಸರಣಿಯಲ್ಲಿ ಕ್ರಮವಾಗಿ 94 ಮತ್ತು 101 ರನ್ ಗಳಿಸಿ ಅತ್ಯುತ್ತಮ ಫಾರ್ಮ್‌ನಲ್ಲಿದ್ದರು. ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಇದುವರೆಗೆ ಎಲ್ಲಾ ಮಾದರಿ ಸೇರಿ ಕೇವಲ 22 ಪಂದ್ಯಗಳನ್ನಷ್ಟೇ ಆಡಿರುವ ಈ ಯುವ ತಾರೆ, ಟಿ20 ಮಾದರಿಯಲ್ಲಿ ಇದುವರೆಗೆ 91 ಪಂದ್ಯಗಳನ್ನು ಆಡಿದ್ದು, 150.44ರ ಭರ್ಜರಿ ಸ್ಟ್ರೈಕ್ ರೇಟ್ ಹೊಂದಿದ್ದಾರೆ.

384 ದಿನಗಳಿಂದ ಅವಮಾನಕ್ಕೆ ಒಳಗಾಗುತ್ತಿದೆ ಪಾಕ್‌, ಇವತ್ತಿನ ಪಂದ್ಯ ಆರಂಭಕ್ಕೂ ಮುನ್ನ ಆಗಿದ್ದೇನು?

Ganesh Mabla Gowda — Sat, 03 Oct 2026 13:25:04 +0530

IND vs PAK No Handshake: ಪಾಕಿಸ್ತಾನ ಮತ್ತೆ ಅವಮಾನಕ್ಕೆ ಒಳಗಾಗಿದೆ.. ಏಷ್ಯನ್‌ ಗೇಮ್ಸ್‌ನ ಚಿನ್ನದ ಪದಕ್ಕಾಗಿ ಜಪಾನ್‌ನಲ್ಲಿ ಭಾರತ ಮತ್ತು ಪಾಕಿಸ್ತಾನ ತಂಡಗಳು ಮುಖಾಮುಖಿ ಆಗಿವೆ. ಪಂದ್ಯ ಆರಂಭಕ್ಕೂ ಮುನ್ನ ನಡೆದ ಟಾಸ್‌ ಪ್ರಕ್ರಿಯೆ ವೇಳೆ ಪಾಕಿಸ್ತಾನ ಮತ್ತೊಮ್ಮೆ ಮುಜುಗರಕ್ಕೆ ಒಳಗಾಗಿದೆ. ಟಾಸ್ ಮುಗಿದ ತಕ್ಷಣ ಟೀಮ್ ಇಂಡಿಯಾ ನಾಯಕ ಶ್ರೇಯಸ್ ಅಯ್ಯರ್‌.. ಪಾಕ್ ನಾಯಕನಿಗೆ ಹ್ಯಾಂಡ್‌ಶೇಕ್ ಮಾಡಲಿಲ್ಲ. ಅಲ್ಲಿಂದ ನೇರವಾಗಿ ಹೊರಟು ಹೋಗಿದ್ದಾರೆ!

ಆಗಿದ್ದೇನು?

ಟಾಸ್‌ ಗೆದ್ದ ಅಯ್ಯರ್‌ ಬ್ಯಾಟಿಂಗ್‌ ಆಯ್ಕೆ ಮಾಡಿಕೊಂಡರು. ಇನ್ನು ಈ ಟಾಸ್‌ ಪ್ರಕ್ರಿಯೆ ವೇಳೆ ಪಾಕ್‌ ನಾಯಕ ಫರ್ಹಾನ್ ಜೊತೆ ಹ್ಯಾಂಡ್‌ಶೇಕ್ ಮಾಡದೆ ನಿರ್ಲಕ್ಷ್ಯ ಮಾಡಿದ್ದಾರೆ. ನಂತರ ನೇರವಾಗಿ ಡ್ರೆಸ್ಸಿಂಗ್ ರೂಮ್ ಕಡೆಗೆ ಹೆಜ್ಜೆ ಹಾಕಿದ್ದಾರೆ. ಆ ಮೂಲಕ ಭಾರತ ತಂಡವು ಪಾಕಿಸ್ತಾನದ ವಿರುದ್ಧ ʼನೋ-ಹ್ಯಾಂಡ್‌ಶೇಕ್ʼ ನೀತಿಯನ್ನು ಮುಂದುವರಿಸಿದೆ. ಅಂದ್ಹಾಗೆ ಭಾರತ ತಂಡವು ಪಾಕ್ ಆಟಗಾರರ ಜೊತೆ ಕೈಕುಲುಕದಿರಲು ನಿರ್ಧರಿಸಿ ಇಂದಿಗೆ 384 ದಿನಗಳು ಕಳೆದಿವೆ.

ಕಳೆದ ವರ್ಷದ ಏಷ್ಯಾ ಕಪ್‌ನಲ್ಲಿ ಈ ವಿವಾದ ಮೊದಲ ಬಾರಿಗೆ ಶುರುವಾಯಿತು. 2025ರ ಸೆಪ್ಟೆಂಬರ್ 14ರಂದು ನಡೆದ ಪಂದ್ಯದಲ್ಲಿ ಅಂದಿನ ನಾಯಕ ಸೂರ್ಯಕುಮಾರ್ ಯಾದವ್, ಪಾಕ್‌ ನಾಯಕ ಸಲ್ಮಾನ್ ಅಲಿ ಆಘಾ ಜೊತೆ ಹ್ಯಾಂಡ್‌ಶೇಕ್ ಮಾಡಿರಲಿಲ್ಲ. ಪಂದ್ಯ ಮುಗಿದ ಬಳಿಕವೂ ಕೈಕುಲುಕದೆ ನೇರವಾಗಿ ಪೆವಿಲಿಯನ್‌ಗೆ ಮರಳಿದ್ದರು. ಅವತ್ತಿನಿಂದ ಇವತ್ತಿಗೂ ಪಾಕ್‌ ಆಟಗಾರರ ಜೊತೆ ಭಾರತ ಹ್ಯಾಂಡ್‌ಶೇಕ್‌ ಮಾಡುತ್ತಿಲ್ಲ.

ಈ 384 ದಿನಗಳಲ್ಲಿ ಭಾರತ ಮತ್ತು ಪಾಕ್‌ ತಂಡಗಳು ನಾಲ್ಕು ಬಾರಿ ಮುಖಾಮುಖಿ ಆಗಿವೆ. ಏಷ್ಯಾ ಕಪ್‌ನಲ್ಲಿ 3 ಪಂದ್ಯ ಹಾಗೂ 2026ರ ಟಿ20 ವಿಶ್ವಕಪ್‌ನಲ್ಲಿ 1 ಪಂದ್ಯದಲ್ಲಿ ಮುಖಾಮುಖಿ ಆಗಿವೆ. ಈ ಎಲ್ಲಾ ಪಂದ್ಯಗಳಲ್ಲೂ ಭಾರತೀಯ ಆಟಗಾರರು ಪಾಕಿಸ್ತಾನಿ ಆಟಗಾರರಿಗೆ ಹ್ಯಾಂಡ್‌ಶೇಕ್ ಮಾಡಿಲ್ಲ. ಇದೀಗ ಫೈನಲ್‌ನಲ್ಲಿ ಶ್ರೇಯಸ್ ಅಯ್ಯರ್ ಪಾಕಿಸ್ತಾನ ನಾಯಕನೊಂದಿಗೆ ಕೈಕುಲುಕಲು ನಿರಾಕರಿಸಿದರು. ಇವತ್ತಿನ ಟಾಸ್‌ ವೇಳೆ ನಡೆದ ದೃಶ್ಯಗಳು ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿವೆ.

ಭಾರತದ ನಿಲುವು ಏನು?

ಇನ್ನು, ಕೇಂದ್ರ ಕ್ರೀಡಾ ಸಚಿವಾಲಯ ತನ್ನ ಸಂದೇಶವನ್ನು ಸ್ಪಷ್ಟಪಡಿಸಿದೆ. ಏಷ್ಯನ್ ಗೇಮ್ಸ್, ವಿಶ್ವಕಪ್ ಅಥವಾ ಏಷ್ಯಾ ಕಪ್‌ನಂತಹ ಬಹುರಾಷ್ಟ್ರಗಳ ಟೂರ್ನಿಗಳಲ್ಲಿ ಅಂತರರಾಷ್ಟ್ರೀಯ ನಿಯಮಗಳನ್ನು ಗೌರವಿಸಿ ಪಾಕಿಸ್ತಾನದ ವಿರುದ್ಧ ಆಡಲು ಭಾರತಕ್ಕೆ ಅಭ್ಯಂತರವಿಲ್ಲ. ಯಾವುದೇ ಕಾರಣಕ್ಕೂ ಪಾಕಿಸ್ತಾನದ ಜೊತೆ ದ್ವಿಪಕ್ಷೀಯ ಸರಣಿ ಆಡುವುದಿಲ್ಲ ಎಂದು ಹೇಳಿದೆ. ಮೈದಾನದಲ್ಲಿ ಆಟಕ್ಕಷ್ಟೇ ಸೀಮಿತವಾಗಿದ್ದು, ಯಾವುದೇ ಸೌಹಾರ್ದತೆಯ ಹಸ್ತಲಾಘವ ಪಾಕ್‌ಗೆ ಸಿಗುವುದಿಲ್ಲ ಅಂತಾ ಆಟಗಾರರು ಮತ್ತೆ ಮತ್ತೆ ಸಾಬೀತು ಮಾಡುತ್ತಿದ್ದಾರೆ.

2022ರ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತ ಚಿನ್ನದ ಪದಕವನ್ನು ಮುಡಿಗೇರಿಸಿಕೊಂಡಿದೆ. ಹೀಗಾಗಿ ಭಾರತ ಹಾಲಿ ಚಾಂಪಿಯನ್‌ ತಂಡ. ಇವತ್ತಿನ ಹೈವೋಲ್ಟೇಜ್‌ ಪಂದ್ಯವನ್ನ ಗೆದ್ದ ಚಾಫಿಯನ್‌ ಪಟ್ಟವನ್ನ ಭದ್ರವಾಗಿ ಉಳಿಸಿಕೊಳ್ಳಲಿದೆ.

Cricket; ಗಿಲ್‌ ಕಳಪೆ ನಾಯಕತ್ವದಿಂದಲ್ಲ, ಧೋನಿಯಿಂದಾಗಿ ಟೀಮ್ ಇಂಡಿಯಾ ಸೋತಿದ್ದು! ವಿಂಡೀಸ್ ಕ್ಯಾಪ್ಟನ್ ಹೇಳಿಕೆ ವೈರಲ್‌!

Bhimasi M Koleppanavar — Sun, 04 Oct 2026 15:56:39 +0530

ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವೆ ನಡೆದ ರೋಚಕ ಮೂರು ಪಂದ್ಯಗಳ ಏಕದಿನ (ODI) ಸರಣಿಯ ಅಂತಿಮ ಹೆಣಗಾಟದಲ್ಲಿ ಟೀಮ್ ಇಂಡಿಯಾ ಅನಿರೀಕ್ಷಿತ ಹಿನ್ನಡೆ ಅನುಭವಿಸಿದೆ. ಪ್ರವಾಸಿ ವೆಸ್ಟ್ ಇಂಡೀಸ್ ಪಡೆ ಪಂದ್ಯದ ಮೇಲಿನ ಹಿಡಿತವನ್ನು ಸಂಪೂರ್ಣವಾಗಿ ತನ್ನತ್ತ ಸೆಳೆದುಕೊಂಡು ಸ್ಮರಣೀಯ ಗೆಲುವಿನೊಂದಿಗೆ ಅಂತ್ಯಗೊಳಿಸಿದೆ. ಆದರೆ, ಪಂದ್ಯ ಮುಗಿದ ಬಳಿಕ ಭಾರತದ ನಾಯಕ ಶುಭ್‌ಮನ್ ಗಿಲ್ ಅವರ ಕ್ಯಾಪ್ಟನ್ಸಿಯನ್ನು ಟೀಕಿಸುವುದಕ್ಕಿಂತ ಹೆಚ್ಚಾಗಿ, ತಮ್ಮ ಈ ಚೇಸಿಂಗ್ ಮಾಸ್ಟರ್‌ಕ್ಲಾಸ್‌ಗೆ ಭಾರತದ ದಂತಕಥೆ ಮಹೇಂದ್ರ ಸಿಂಗ್ ಧೋನಿ ಅವರೇ ಪ್ರೇರಣೆ ಎಂದು ವಿಂಡೀಸ್ ಕ್ಯಾಪ್ಟನ್ ಶೈ ಹೋಪ್ ಬಹಿರಂಗಪಡಿಸಿರುವುದು ಕ್ರಿಕೆಟ್ ಜಗತ್ತಿನಲ್ಲಿ ಭಾರೀ ಸದ್ದು ಮಾಡುತ್ತಿದೆ.

ಡ್ಯೂ ಫ್ಯಾಕ್ಟರ್ ಮತ್ತು ಚೇಸಿಂಗ್ ಗೇಮ್ ಪ್ಲಾನ್!

ಪಂದ್ಯಶ್ರೇಷ್ಠ ಪ್ರಶಸ್ತಿ ಭಾಜನರಾದ ಶೈ ಹೋಪ್, ಭಾರತೀಯ ಪಿಚ್‌‌ಗಳ ಸ್ವರೂಪ ಮತ್ತು ಚೇಸಿಂಗ್ ತಂತ್ರಗಾರಿಕೆಯ ಬಗ್ಗೆ ತಾಂತ್ರಿಕವಾಗಿ ಮಾತನಾಡಿದರು. "ಭಾರತೀಯ ಮೈದಾನಗಳಲ್ಲಿ ದ್ವಿತೀಯಾರ್ಧದಲ್ಲಿ ‘ಡ್ಯೂ ಫ್ಯಾಕ್ಟರ್’ (ಇಬ್ಬನಿ) ಹೆಚ್ಚಿರುವುದರಿಂದ ರನ್ ಚೇಸ್ ಮಾಡುವುದು ಯಾವಾಗಲೂ ಸುಲಭ. ಆದರೆ, ಸರಣಿಯ ಅಂತಿಮ ಪಂದ್ಯದಲ್ಲಿ ಕ್ಲಚ್ ಸನ್ನಿವೇಶ ಎದುರಾದಾಗ ಗೆಲ್ಲುವುದು ಸುಲಭವಲ್ಲ. ನಮ್ಮ ಯುವ ಆಟಗಾರರು ಕಮಿಟ್‌ಮೆಂಟ್ ತೋರಿಸಿ ಪಂದ್ಯವನ್ನು ಮುಕ್ತಾಯಗೊಳಿಸಿದ್ದು ಸಂತಸ ತಂದಿದೆ" ಎಂದು ಶೈ ಹೋಪ್ ವಿವರಿಸಿದರು.

ತಮಗಾದ ಕ್ರಾಂಬ್ಸ್ ಹಂಚಿಕೊಂಡ ಕ್ಯಾಪ್ಟನ್‌!

ಇನ್ನಿಂಗ್ಸ್ ಮಧ್ಯದಲ್ಲಿ ತಮಗಾದ ಕ್ರಾಂಬ್ಸ್ (Muscular Cramps) ಮತ್ತು ಫಿಟ್‌ನೆಸ್ ಸವಾಲುಗಳ ಬಗ್ಗೆ ಪ್ರಸ್ತಾಪಿಸಿದ ಅವರು, "30 ಓವರ್‌‌ಗಳ ಬಳಿಕ ನನ್ನ ತೊಡೆಯ ಸ್ನಾಯುಗಳಲ್ಲಿ ಒತ್ತಡ ಕಾಣಿಸಿಕೊಂಡಿತು. ವಿಟ್ಟೆಲ್ ಲಾಡ್ಜ್ ಗಾಯದಿಂದಾಗಿ ತಂಡದಲ್ಲಿ ಇಬ್ಬರು ಸ್ಪೆಷಲಿಸ್ಟ್ ಬ್ಯಾಟರ್‌ಗಳ ಕೊರತೆಯಿತ್ತು. ಹೀಗಾಗಿ, ಆಂಕರ್ ರೋಲ್ (Anchor Role) ವಹಿಸಿ ಕೊನೆಯವರೆಗೂ ಕ್ರೀಸ್‌ನಲ್ಲಿ ನಿಲ್ಲುವುದು ನನ್ನ ಜವಾಬ್ದಾರಿಯಾಗಿತ್ತು" ಎಂದರು.

ಧೋನಿ ನೀಡಿದ 'ಗೋಲ್ಡನ್ ಟಿಪ್' ಮತ್ತು ಟಾರ್ಗೆಟ್ ಕ್ಯುಲ್ಕುಲೇಷನ್!

ತಮ್ಮ ಈ ಮ್ಯಾಚ್ ವಿನ್ನಿಂಗ್ ಇನ್ನಿಂಗ್ಸ್‌ನ ಹಿಂದಿನ ಅಸಲಿ ರಹಸ್ಯವನ್ನು ಬಿಚ್ಚಿಟ್ಟ ಹೋಪ್, ಮಹೇಂದ್ರ ಸಿಂಗ್ ಧೋನಿ ಜೊತೆಗಿನ ಮಾತುಕತೆಯನ್ನು ನೆನಪಿಸಿಕೊಂಡರು. "ನಾನು ಎಂ.ಎಸ್. ಧೋನಿ ಅವರೊಂದಿಗೆ ಸುದೀರ್ಘ ಸಂಭಾಷಣೆ ನಡೆಸಿದ್ದೆ. ಚೇಸಿಂಗ್ ವೇಳೆ ಬ್ಯಾಟರ್ ಅಂದುಕೊಳ್ಳುವುದಕ್ಕಿಂತ ಹೆಚ್ಚಿನ ಸಮಯ ಕ್ರೀಸ್‌ನಲ್ಲಿ ಇರುತ್ತದೆ; ಹಾಗಾಗಿ ಅಂತಿಮ ರನ್‌ರೇಟ್ ಅಥವಾ ಫಲಿತಾಂಶದ ಒತ್ತಡಕ್ಕೆ ಒಳಗಾಗದೆ ಪ್ರಕ್ರಿಯೆಗೆ (Process) ಆದ್ಯತೆ ನೀಡಿ ಎಂದು ಧೋನಿ ಸಲಹೆ ನೀಡಿದ್ದರು. ಈ ಪಂದ್ಯದಲ್ಲಿ ನಾನು ಅದನ್ನೇ ತೂಚ ತಪಾಸಣೆ ಮಾಡಿದೆ. ಪಂದ್ಯವನ್ನು ಸಣ್ಣ ಸಣ್ಣ 'ಫೇಸ್' (Phases) ಗಳಾಗಿ ವಿಂಗಡಿಸಿದ ವಿಂಡೀಸ್ ನಾಯಕ, ರಿಸ್ಕ್ ಮ್ಯಾನೇಜ್‌ಮೆಂಟ್ ಮೂಲಕ 'ಡೆತ್ ಓವರ್‌‌ಗಳಲ್ಲಿ' ಆಸ್ಕರ್ ಶಾಟ್‌ಗಳು ಹಾಗೂ ಬೌಂಡರಿ-ಸಿಕ್ಸರ್‌ಗಳನ್ನು ಬಾರಿಸುವ ಗೇಮ್ ಪ್ಲಾನ್ ರೂಪಿಸಿಕೊಂಡಿದ್ದರು.

ಓವರ್ ರೇಟ್ ಪೆನಾಲ್ಟಿ ಮತ್ತು ಫೀಲ್ಡ್ ರಿಸ್ಟ್ರಿಕ್ಷನ್ ತಂತ್ರ!

ಇಂಡಿಯಾ ಕ್ಯಾಪ್ಟನ್ ಗಿಲ್ ಪಡೆಗೆ ವಿಂಡೀಸ್ ನಾಯಕ ನೀಡಿದ ದೊಡ್ಡ ಆಘಾತವೆಂದರೆ 'ಸ್ಲೋ ಓವರ್ ರೇಟ್' ತಂತ್ರಗಾರಿಕೆ. ಭಾರತ ನಿಗದಿತ ಸಮಯಕ್ಕೆ ಸರಿಯಾಗಿ ಓವರ್‌ಗಳನ್ನು ಪೂರ್ಣಗೊಳಿಸದಿದ್ದಾಗ ಬಿದ್ದ ಪೆನಾಲ್ಟಿಯನ್ನು ಹೋಪ್ ತಮ್ಮನುಕೂಲಕ್ಕೆ ಬಳಸಿಕೊಂಡರು. "ಭಾರತ ಬೌಲಿಂಗ್ ವೇಳಾಪಟ್ಟಿಗಿಂತ ಹಿಂದೆ ಬಿದ್ದಿತ್ತು. ನಿಯಮದಂತೆ ಕೊನೆಯ ಓವರ್‌ಗಳಲ್ಲಿ '30-ಯಾರ್ಡ್ ಸರ್ಕಲ್' ಒಳಗೆ ಐದನೇ ಫೀಲ್ಡರ್ ಅನ್ನು ತರಬೇಕಾದ ಅನಿವಾರ್ಯತೆ ಭಾರತಕ್ಕೊದಗಿತು. ಪವರ್‌ಪ್ಲೇ ಮಾದರಿಯ ಈ ಫೀಲ್ಡ್ ರಿಸ್ಟ್ರಿಕ್ಷನ್ (Field Restriction) ನಮಗೆ ಗ್ಯಾಪ್‌ಗಳನ್ನು ಹುಡುಕಲು ಸಹಕಾರಿಯಾಯಿತು. ನಾನು ಬ್ಯಾಟಿಂಗ್ ಮಾಡುವಾಗಲೇ ಈ ಪ್ರತಿಯೊಂದು ಗಣಿತವನ್ನೂ (Calculation) ಲೆಕ್ಕ ಹಾಕಿದ್ದೆ" ಎಂದು ಶೈ ಹೋಪ್ ತಮ್ಮ ತಾಂತ್ರಿಕ ಚಾಣಾಕ್ಷತೆಯನ್ನು ತೆರೆದಿಟ್ಟರು. ಅಂತಿಮವಾಗಿ, ಗಿಲ್ ಅವರ ನಾಯಕತ್ವದ ಲೋಪಗಳಿಗಿಂತ ಹೆಚ್ಚಾಗಿ, ಕ್ರೀಸ್‌ನಲ್ಲಿದ್ದುಕೊಂಡೇ 'ಧೋನಿ ಶೈಲಿ'ಯ ಮೈಂಡ್ ಗೇಮ್ ಆಡಿದ ಶೈ ಹೋಪ್, ವೆಸ್ಟ್ ಇಂಡೀಸ್‌ಗೆ ಮತ್ತೊಂದು ಹೈ-ವೋಲ್ಟೇಜ್ ಜಯ ತಂದುಕೊಡುವಲ್ಲಿ ಯಶಸ್ವಿಯಾದರು.

ಐಪಿಎಲ್ 2027ರಲ್ಲಿ ಕೊಹ್ಲಿ, ರೋಹಿತ್‌ಗಿಂತ ಹೆಚ್ಚು ಸ್ಯಾಲರಿ ಪಡೆಯಲಿದ್ದಾರೆ ಈ ಇಬ್ಬರು ಕ್ರಿಕೆಟರ್ಸ್

Chethan Kumar — Sun, 04 Oct 2026 18:47:41 +0530

ಬೆಂಗಳೂರು (ಅ.04) ಐಪಿಎಲ್ 2027ರ ಟೂರ್ನಿಗೆ ಫ್ರಾಂಚೈಸಿಗಳ ತಯಾರಿ ಆರಂಭಗೊಂಡಿದೆ. ಆಟಗಾರ ರಿಟೆನ್ಶನ್, ರಿಲೀಸ್ ಪಟ್ಟಿ ತಯಾರಾಗಿದೆ. ಶೀಘ್ರದಲ್ಲೇ ಎಲ್ಲಾ ತಂಡಗಳು ಪಟ್ಟಿ ಬಿಡುಗಡೆ ಮಾಡಲಿದೆ. ಮಂಬರುವ ಐಪಿಎಲ್ ಟೂರ್ನಿಯಲ್ಲಿ ಗರಿಷ್ಠ ಸ್ಯಾಲರಿ ಪಡೆಯುವ ಕ್ರಿಕೆಟಿಗರು ಯಾರು ಅನ್ನೋ ಚರ್ಚೆ ಶುರುವಾಗಿದೆ. ಹರಾಜಿಗೂ ಮೊದಲು ಸದ್ಯ 10 ಫ್ರಾಂಚೈಸಿಗಳ ಪೈಕಿ ಇಬ್ಬರು ಕ್ರಿಕೆಟಿಗರು ವಿರಾಟ್ ಕೊಹ್ಲಿ ಹಾಗೂ ರೋಹಿತ್ ಶರ್ಮಾಗಿಂತ ಹೆಚ್ಚು ಸ್ಯಾಲರಿ ಪಡೆಯಲಿದ್ದಾರೆ.

ರಿಷಬ್ ಪಂತ್‌ಗಿಲ್ಲ ದುಬಾರಿ ಪಟ್ಟ

ರಿಷಬ್ ಪಂತ್ ಕಳೆದ ಐಪಿಎಲ್ ಟೂರ್ನಿಯಲ್ಲಿ ಲಖನೌ ಸೂಪರ್‌ಜೈಂಟ್ಸ್ ತಂಡದಿಂದ 27 ಕೋಟಿ ರೂಪಾಯಿ ಸ್ಯಾಲರಿ ಪಡೆದಿದ್ದರು. ಆದರೆ ಈ ಬಾರಿ ಡೆಲ್ಲಿ ಕ್ಯಾಪಿಟಲ್ಸ್ ಡೀಲ್‌ನಲ್ಲಿ 15 ಕೋಟಿ ರೂಪಾಯಿ ಪಡೆದಿದ್ದಾರೆ. ಹೀಗಾಗಿ ಪಂತ್ ದುಬಾರಿ ಆಟಗಾರನಲ್ಲ. ಲಖನೌ ತಂಡದಿಂದ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಮರಳಿರುವ ರಿಷಬ್ ಪಂತ್, ಕೇವಲ 15 ಕೋಟಿ ರೂಪಾಯಿ ಪಡೆಯಲಿದ್ದಾರೆ.

ವಿರಾಟ್ ಕೊಹ್ಲಿ-ರೋಹಿತ್ ಶರ್ಮಾ ಸ್ಯಾಲರಿ ಎಷ್ಟು

ಕಳೆದ ಐಪಿಎಲ್ ಟೂರ್ನಿಯಲ್ಲಿ ವಿರಾಟ್ ಕೊಹ್ಲಿ 21 ಕೋಟಿ ರೂಪಾಯಿ ಸ್ಯಾಲರಿ ಪಡೆದಿದ್ದಾರೆ. ಇನ್ನು ರೋಹಿತ್ ಶರ್ಮಾ 16.30 ಕೋಟಿ ರೂಪಾಯಿ ಸ್ಯಾಲರಿ ಪಡೆದಿದ್ದಾರೆ. ರಿಟೇನ್ಸ್ ಮೂಲಕ ಕೊಂಚ ಸ್ಯಾಲರಿ ಹೆಚ್ಚಳವಾಗಲಿದೆ.

ಶ್ರೇಯಸ್ ಅಯ್ಯರ್-ಹೆನ್ರಿಚ್ ಸ್ಯಾಲರಿ

ಪಂಜಾಬ್ ಕಿಂಗ್ಸ್ ನಾಯಕ ಶ್ರೇಯಸ್ ಅಯ್ಯರ್ 26.75 ಕೋಟಿ ರೂಪಾಯಿ ಸ್ಯಾಲರಿ ಪಡೆಯಲಿದ್ದಾರೆ. ಇನ್ನು ಸನ್‌ರೈಸರ್ಸ್ ಹೈದರಾಬಾದ್ ತಂಡದ ಆಟಗಾರ ಹೆನ್ರಿಚ್ ಕ್ಲಾಸೆಲ್ 23 ಕೋಟಿ ರೂಪಾಯಿ ಪಡೆಯಲಿದ್ದಾರೆ. ಗರಿಷ್ಠ ವೇತನ ಪಡೆಯಲಿರುವ ವಿದೇಶಿ ಕ್ರಿಕೆಟಿಗ ಅನ್ನೋ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ಲಖನೌ ಸೂಪರ್ ಜೈಂಟ್ಸ್ ತಂಡದ ನಿಕೋಸಲ್ ಪೂರನ್ 21 ಕೋಟಿ ರೂಪಾಯಿ ಸ್ಯಾಲರಿ ಪಡೆಯುತ್ತಿದ್ದಾರೆ. ಪೂರನ್ ಹಾಗೂ ವಿರಾಟ್ ಕೊಹ್ಲಿ ವೇತನ ಒಂದೇ ಆಗಿದೆ. ಸದ್ಯ ರಿಟೇನ್ಶನ್ ಹಾಗೂ ರಿಲೀಸ್ ಪಟ್ಟಿ ಬಿಡುಗಡೆಯಾಗಿಲ್ಲ. ಜೊತೆಗೆ ಮಿನಿ ಹರಾಜು ನಡೆಯಲಿದೆ. ಇದರ ನಡುವೆ ಟ್ರೇಡ್ ಮಾತುಕತೆಗಳು ನಡೆಯುತ್ತಿದೆ. ಹೀಗಾಗಿ ಅಂತಿಮ ಕ್ಷಣದಲ್ಲಿ ಸ್ಯಾಲರಿಯಲ್ಲಿ ಕೆಲ ಬದಲಾವಣೆಗಳು ನಡೆಯಲಿದೆ.

ಭಾಷಣದ ನಡುವೆ ಕವಿ ಗುಲ್ಜಾರ್‌ಗೆ ನೀರು ಕೊಟ್ಟ ಸಚಿನ್ ತೆಂಡೂಲ್ಕರ್,ಹೃದಯಸ್ಪರ್ಶಿ ನಡೆಗೆ ಮೆಚ್ಚುಗೆ

Chethan Kumar — Sun, 04 Oct 2026 17:02:44 +0530

ಮುಂಬೈ (ಅ.03) ಬಾಲಿವುಡ್‌ನ ಖ್ಯಾತ ಗೀತೆರಚನೆಕಾರ, ಕವಿ ಗುಲ್ಜಾರ್ ಅವರಿಗೆ ದಿಗ್ಗಜ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಕುಡಿಯಲು ನೀರು ನೀಡಿದ ವಿಡಿಯೋ ಒಂದು ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಸದ್ದು ಮಾಡುತ್ತಿದೆ. ಪುಸ್ತಕ ಬಿಡುಗಡೆ ಕಾರ್ಯಕ್ರಮದಲ್ಲಿ ಗುಲ್ಜಾರ್, ಸಚಿನ್ ತೆಂಡೂಲ್ಕರ್ ಹಾಗೂ ಬಾಲಿವುಡ್ ನಟ ಅಮಿತಾಬ್ ಬಚ್ಚನ್ ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡಿದ್ದರು. ವೇದಿಕೆಯಲ್ಲಿ ಭಾಷಣ ಮಾಡುತ್ತಿದ್ದ ಗುಲ್ಜಾರ್ ತುಟಿಗಳು ಒಣಗಿದೆ. ತಕ್ಷಣವೇ ಸಚಿನ್ ತೆಂಡೂಲ್ಕರ್ ಯಾವುದೇ ಸಿಬ್ಬಂದಿಗಳನ್ನು ಕಾಯದೇ ತಾವೇ ನೀರು ನೀಡಿದ ಘಟನೆ ನಡೆದಿದೆ.

ಭಾಷಣದ ನಡುವೆ ನೀರು ಕೇಳಿದ ಗುಲ್ಜಾರ್

92ರ ಹರೆಯದ ಗುಲ್ಜಾರ್ ಕಾರ್ಯಕ್ರಮದಲ್ಲಿ ಪುಸ್ತಕ ಬಿಡುಗಡೆ ಮಾಡಿ ಭಾಷಣ ಮಾಡುತ್ತಿದ್ದರು. ಭಾಷಣದ ನಡುವೆ ಗುಲ್ಜಾರ್ ತುಟಿಗಳು ಒಣಗಿದೆ. ಹೀಗಾಗಿ ಗುಲ್ಜಾರ್ ನೀರು ಕೇಳಿದ್ದಾರೆ. ವೇದಿಕೆಯಲ್ಲಿ ಅಮಿತಾಬ್ ಬಚ್ಚನ್ ಜೊತೆ ಕುಳಿತಿದ್ದ ಸಚಿನ್ ತೆಂಡೂಲ್ಕರ್ ತಕ್ಷಣವೇ ಎದ್ದು, ನೀರು ನೀಡಿದ್ದಾರೆ. ಸಚಿನ್ ತೆಂಡೂಲ್ಕರ್ ಕೈಹಿಡಿದು ನೀರು ಕುಡಿದ ಗುಲ್ಜಾರ್, ಧನ್ಯವಾದ ತಿಳಿಸಿದ್ದಾರೆ. ತುಟಿ ತೇವಗೊಳಿಸಿಕೊಳ್ಳಿ ಎಂದು ಸಚಿನ್ ತೆಂಡೂಲ್ಕರ್, ಗುಲ್ಜಾರ್ ಅವರಿಗೆ ಸೂಚಿಸಿದ್ದಾರೆ. ಸಚಿನ್‌ಗೆ ಧನ್ಯವಾದ ಹೇಳಿದ ಗುಲ್ಜಾರ್ ಸಾಬ್ ಮತ್ತೆ ತಮ್ಮ ಭಾಷಣ ಮುಂದುವರಿಸಿದ್ದಾರೆ.

ಸಚಿನ್ ವಿನಮ್ರತೆಗೆ ಭಾರಿ ಮೆಚ್ಚುಗೆ

ನೀರು ಕೇಳಿದ ತಕ್ಷಣ ಕಾರ್ಯಕ್ರಮದ ಸಿಬ್ಬಂದಿಗಳು ಆಗಮಿಸುವ ಮೊದಲೇ ಸಚಿನ್ ತೆಂಡೂಲ್ಕರ್ ಸೀಟಿನಿಂದ ಎದ್ದು ಬಂದು ಗುಲ್ಜಾರ್ ಅವರಿಗೆ ನೀರು ನೀಡಿದ್ದಾರೆ. ಸಚಿನ್ ತೆಂಡೂಲ್ಕರ್ ಅವರ ವಿನಮ್ರತೆ, ಗುಲ್ಜಾರ್ ಮೇಲಿಟ್ಟಿರುವ ಗೌರವಕ್ಕೆ ಭಾರಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಸಚಿನ್ ಅವರ ಸರಳತೆ, ಇತರರಿಗೆ ನೀಡುವ ಗೌರವ ಕುರಿತು ಭಾರಿ ಚರ್ಚೆಯಾಗುತ್ತಿದೆ.

ಅಮಿತಾಬ್ ಬಚ್ಚನ್ ಹಾಗೂ ಗುಲ್ಜಾರ್ ನಡುವಿನ ಆತ್ಮೀಯತೆ ಹಲವು ದಶಕಗಳಿಂದ ಇದೆ. 1970ರಿಂದ ಅಮಿತಾಬ್ ಬಚ್ಚನ್ ಸಿನಿಮಾಗಳಿಗೆ ಹಾಡು, ಸಾಹಿತ್ಯ, ಸಂಗೀತ ನೀಡಿದ್ದಾರೆ. ಈ ಕಾರ್ಯಕ್ರಮದ ಮೂಲಕ ದಿಗ್ಗಜರು ಒಂದೇ ವೇದಿಕೆಯಲ್ಲಿ ಕಾಣಿಸಿಕೊಂಡಿದ್ದರು. ಅಮಿತಾಬ್ ಬಚ್ಚನ್ ಇತ್ತೀಚೆಗೆ ಕೌನ್ ಬನೆಗಾ ಕರೋಡ್ ಪತಿ ಸೆಟ್‌ನಲ್ಲಿ ಗಾಯಗೊಂಡಿದ್ದರು. ಮೊಣಕಾಲಿಗೆ ಗಾಯವಾಗಿತ್ತು. ಅಮಿತಾಬ್ ಬಚ್ಚನ್ ಜೊತೆ ಜಯಾ ಬಚ್ಚನ್ ಕೂಡ ಕಾರ್ಯಕ್ರಮಕ್ಕೆ ಆಗಮಿಸಿದ್ದರು.

ಈ ಕಾರ್ಯಕ್ರಮದ ಹಲವು ವಿಡಿಯೋಗಳು, ಫೋಟೋಗಳು ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಹರಿದಾಡುತ್ತಿದೆ. ದಿಗ್ಗಜರ ಸಮಾಗಮ. ಮೂವರು ದಿಗ್ಗಜರಾಗಿದ್ದರೂ ಅವರ ಸರಳತೆಗೆ ಎಲ್ಲರಿಗೂ ಮಾದರಿ ಎಂದು ಪ್ರತಿಕ್ರಿಯಿಸುತ್ತಿದ್ದಾರೆ.

Asian Games Final: ವೈಭವ್ ವಿಕೆಟ್ ಪತನದ ಬಳಿಕ ಪಾಕ್‌ ಕಿರಿಕ್; ಮೈದಾನದಲ್ಲೇ ಪ್ರತ್ಯುತ್ತರ ನೀಡಿದ ಭಾರತ!

Bhimasi M Koleppanavar — Sat, 03 Oct 2026 10:57:59 +0530

ಏಷ್ಯನ್ ಗೇಮ್ಸ್‌ನ ಹೈ-ವೋಲ್ಟೇಜ್ ಫೈನಲ್ ಪಂದ್ಯದಲ್ಲಿ ಭಾರತ ಮತ್ತು ಪಾಕಿಸ್ತಾನ ತಂಡಗಳು ಮುಖಾಮುಖಿಯಾಗಿದ್ದು, ಮೈದಾನದಲ್ಲಿ ತೀವ್ರ ಕುತೂಹಲ ಹಾಗೂ ಉದ್ವಿಗ್ನ ವಾತಾವರಣ ನಿರ್ಮಾಣವಾಗಿದೆ. ಕೇವಲ 15 ವರ್ಷದ ಯುವ ಉದಯೋನ್ಮುಖ ತಾರೆ ವೈಭವ್ ಸೂರ್ಯವಂಶಿ, ಅಂತರರಾಷ್ಟ್ರೀಯ ಕ್ರಿಕೆಟ್ ಮೈದಾನದಲ್ಲಿ ಮೊದಲ ಬಾರಿಗೆ ಸಾಂಪ್ರದಾಯಿಕ ವೈರಿ ಪಾಕಿಸ್ತಾನವನ್ನು ಎದುರಿಸುವ ಮೂಲಕ ಎಲ್ಲರ ಗಮನ ಸೆಳೆದರು. ವಯಸ್ಸಿನಲ್ಲಿ ಚಿಕ್ಕವರಾಗಿದ್ದರೂ, ತಮ್ಮ ಚುರುಕಿನ ಬ್ಯಾಟಿಂಗ್ ಮೂಲಕ ಪಾಕ್ ಬೌಲರ್‌ಗಳನ್ನು ಆರಂಭದಲ್ಲೇ ಬೆಚ್ಚಿಬೀಳಿಸಿದರು.

ಎರಡನೇ ಓವರ್‌ನಲ್ಲಿ ಬೌಂಡರಿಗಳ ಸುರಿಮಳೆ: ಬೆರಗಾದ ಪಾಕ್ ಪಡೆ!

ಪಂದ್ಯದ ಎರಡನೇ ಓವರ್‌ನಲ್ಲಿ ವೈಭವ್ ಸೂರ್ಯವಂಶಿ ತಮ್ಮ ಅಸಾಧಾರಣ ಬ್ಯಾಟಿಂಗ್ ಪ್ರತಿಭೆಯನ್ನು ಅನಾವರಣಗೊಳಿಸಿದರು. ಎದುರಾಳಿ ಪಾಕಿಸ್ತಾನಿ ಬೌಲರ್ ವಿರುದ್ಧ ಯಾವುದೇ ಮುಜುಗರವಿಲ್ಲದೆ ದಾಳಿಗಿಳಿದ ವೈಭವ್, ಓವರ್‌ನ ಎರಡನೇ ಹಾಗೂ ಮೂರನೇ ಎಸೆತಗಳಲ್ಲಿ ಸತತ ಎರಡು ಭರ್ಜರಿ ಸಿಕ್ಸರ್‌ಗಳನ್ನು ಬಾರಿಸಿದರು. ವೈಭವ್ ಅವರ ಈ ಆಕ್ರಮಣಕಾರಿ ಆಟವನ್ನು ಕಂಡ 21 ವರ್ಷದ ಪಾಕ್ ಬೌಲರ್ ಸಂಪೂರ್ಣವಾಗಿ ದಿಾhorns ಕಳೆದುಕೊಂಡರು.ವೈಭವ್ ನೀಡಿದ ಈ ಆಕ್ರಮಣಕಾರಿ ಆರಂಭಕ್ಕೆ ಇನ್ನೊಂದು ತುದಿಯಲ್ಲಿದ್ದ ಅನುಭವಿ ಬ್ಯಾಟರ್ ಅಭಿಷೇಕ್ ಶರ್ಮಾ ಕೂಡ ಸಾಥ್ ನೀಡಿದರು. ಬೌಂಡರಿ ಹಾಗೂ ಸಿಕ್ಸರ್‌ಗಳ ಸುರಿಮಳೆ ಗೈದ ಭಾರತೀಯ ಜೋಡಿ, ಎರಡನೇ ಓವರ್ ಒಂದರಲ್ಲೇ ಬೊಂಬಾಟ್ 24 ರನ್‌ಗಳನ್ನು ಚಚ್ಚಿ ಪಾಕಿಸ್ತಾನಿ ನಾಯಕನ ಲೆಕ್ಕಾಚಾರವನ್ನೇ ತಲೆಕೆಳಗಾಗಿಸಿತು.

ಸೈಮ್ ಅಯೂಬ್ ಕಿರಿಕ್!

ಎರಡನೇ ಓವರ್‌ನಲ್ಲಿ ಸಿಕ್ಕ ರನ್ ಪೆಟ್ಟು ತಡೆಯಲು ಪಾಕಿಸ್ತಾನ ನಾಯಕ, ಮೂರನೇ ಓವರ್ ಎಸೆಯಲು ತಮ್ಮ ಅನುಭವಿ ಆಟಗಾರ ಸೈಮ್ ಅಯೂಬ್‌ಗೆ ಚೆಂಡು ನೀಡಿದರು. ರನ್ ವೇಗ ಹೆಚ್ಚಿಸುವ ಯತ್ನದಲ್ಲಿ ವೈಭವ್ ಸೂರ್ಯವಂಶಿ, ಅಯೂಬ್ ಎಸೆತವನ್ನು ರಿವರ್ಸ್ ಸ್ವೀಪ್ ಮಾಡಲು ಪ್ರಯತ್ನಿಸಿದರು. ಆದರೆ ಚೆಂಡು ತಿರುವು ಪಡೆದು ನೇರವಾಗಿ ವಿಕೆಟ್ ಕೀಪರ್ ಕೈಸೇರಿತು. ಪರಿಣಾಮವಾಗಿ, ಕೇವಲ 9 ಎಸೆತಗಳಲ್ಲಿ 15 ರನ್ ಗಳಿಸಿದ್ದ ವೈಭವ್ ಅವರ ಬಿರುಗಾಳಿಯ ಇನ್ನಿಂಗ್ಸ್ ಅಂತ್ಯಗೊಂಡಿತು.

ವಿವಾದಕ್ಕೆ ಕಾರಣವಾದ ಅಯೂಬ್‌ ವರ್ತನೆ!

ಆದರೆ, ವೈಭವ್ ವಿಕೆಟ್ ಪಡೆಯುತ್ತಿದ್ದಂತೆ ಸೈಮ್ ಅಯೂಬ್ ನಡೆದುಕೊಂಡ ರೀತಿ ವಿವಾದಕ್ಕೆ ಕಾರಣವಾಯಿತು. 15 ವರ್ಷದ ವೈಭವ್ ಸೂರ್ಯವಂಶಿ ಅವರಿಗೆ ಕೈಯಿಂದ ಮಗುವನ್ನು ತೂಗುವಂತೆ ಸೈನ್ ಮಾಡುತ್ತಾ 'ಬೇಬಿ ಸೆಲೆಬ್ರೇಷನ್' ಮಾಡುವ ಮೂಲಕ ಕೀಟಲೆ ಮಾಡಿದರು. ಮೈದಾನದಲ್ಲೇ ಅನಗತ್ಯವಾಗಿ ಕೆರಳಿಸುವ ರೀತಿಯಲ್ಲಿ ಸೈಮ್ ಅಯೂಬ್ ಮಾಡಿದ ಈ ಹಾವಭಾವಕ್ಕೆ ಭಾರತೀಯ ಕ್ರೀಡಾಭಿಮಾನಿಗಳು ಹಾಗೂ ಡ್ರೆಸ್ಸಿಂಗ್ ರೂಮ್‌ನಿಂದ ತೀವ್ರ ಆಕ್ರೋಶ ವ್ಯಕ್ತವಾಯಿತು.

ಪವರ್‌ಪ್ಲೇನಲ್ಲೇ ಪಾಕ್‌ಗೆ ಅಭಿಷೇಕ್ ಶರ್ಮಾ ಕೌಂಟರ್ ಅಟ್ಯಾಕ್!

ವೈಭವ್ ವಿಕೆಟ್ ಬಿದ್ದಾಗ ಪಾಕಿಸ್ತಾನ ಆಟಗಾರರು ಮೆರೆದಾಡಲು ಯತ್ನಿಸಿದರಾದರೂ, ಆ ಸಂಭ್ರಮ ಹೆಚ್ಚು ಹೊತ್ತು ಉಳಿಯಲಿಲ್ಲ. ವೈಭವ್ ವಿಕೆಟ್ ಬಳಿಕ ಭಾರತದ ಆಕ್ರಮಣಕಾರಿ ಬ್ಯಾಟರ್ ಅಭಿಷೇಕ್ ಶರ್ಮಾ ಸಂಪೂರ್ಣವಾಗಿ ಪಂದ್ಯದ ಹಿಡಿತ ಸಾಧಿಸಿದರು. ಪಾಕ್ ಬೌಲರ್‌ಗಳ ವಿರುದ್ಧ ಸಿಡಿದೆದ್ದ ಅಭಿಷೇಕ್, ಪವರ್‌ಪ್ಲೇ ಓವರ್‌ಗಳಲ್ಲೇ ಸಿಕ್ಸರ್-ಬೌಂಡರಿಗಳ ಸುರಿಮಳೆ ಗೈದು ಪಾಕಿಸ್ತಾನವನ್ನು ಸಂಪೂರ್ಣವಾಗಿ ಕ್ಲೀನ್ ಸ್ವೀಪ್ ಮಾಡಿದರು. ಸೈಮ್ ಅಯೂಬ್ ಅವರ ಕಿರಿಕ್‌ಗೆ ಅಭಿಷೇಕ್ ತಮ್ಮ ಬ್ಯಾಟ್ ಮೂಲಕವೇ ತಕ್ಕ ಉತ್ತರ ನೀಡಿದರು.

ಉಭಯ ತಂಡಗಳ ಆಡುವ ಹನ್ನೊಂದರ ಬಳಗ (Playing XI)!

ಟೀಮ್ ಇಂಡಿಯಾ; ವೈಭವ್ ಸೂರ್ಯವಂಶಿ, ಅಭಿಷೇಕ್ ಶರ್ಮಾ, ಸಂಜು ಸ್ಯಾಮ್ಸನ್ (ವಿಕೆಟ್ ಕೀಪರ್), ಶ್ರೇಯಸ್ ಅಯ್ಯರ್ (ನಾಯಕ), ಇಶಾನ್ ಕಿಶನ್, ತಿಲಕ್ ವರ್ಮಾ, ಶಿವಂ ದುಬೆ, ಅಕ್ಷರ್ ಪಟೇಲ್, ವಾಷಿಂಗ್ಟನ್ ಸುಂದರ್, ರವಿ ಬಿಷ್ಣೋಯ್, ಜಸ್ಪ್ರೀತ್ ಬುಮ್ರಾ.

ಪಾಕಿಸ್ತಾನ; ಸಾಹಿಬ್ಜಾದಾ ಫರ್ಹಾನ್ (ನಾಯಕ), ಮೇಜ್ ಸದಾಕತ್, ಉಸ್ಮಾನ್ ಖಾನ್ (ವಿಕೆಟ್ ಕೀಪರ್), ಸೈಮ್ ಅಯೂಬ್, ಹಸನ್ ನವಾಜ್, ಅಬ್ದುಲ್ ಸಮದ್, ಅರಾಫತ್ ಮಿನ್ಹಾಸ್, ಅಹ್ಮದ್ ದಾನಿಯಾಲ್, ಸಾದ್ ಮಸೂದ್, ಅಬ್ರಾರ್ ಅಹ್ಮದ್, ಸುಫ್ಯಾನ್ ಮೊಕಿಮ್.