Asianet Suvarna News

ಬ್ಲಾಕ್ ಗೌನ್‌ನಲ್ಲಿದ್ದ ಐಶ್ವರ್ಯಾ ರೈ ತಲೆಯ ಮೇಲಿದ್ದ ಆ ವಸ್ತು ಏನು? ಪ್ಯಾರಿಸ್‌ನಲ್ಲಿ ಸಖತ್ ವೈರಲ್!

Govindaraj S — Wed, 30 Sep 2026 16:50:27 +0530

ಪ್ಯಾರಿಸ್ ಫ್ಯಾಷನ್ ವೀಕ್‌ನಲ್ಲಿ ಐಶ್ವರ್ಯಾ ರೈ ಬಚ್ಚನ್ ತಮ್ಮ ಬ್ಲಾಕ್ ಕೌಚರ್ ಗೌನ್, ಕ್ರಿಸ್ಟಲ್ ಕೇಪ್ ಮತ್ತು ಡೈಮಂಡ್ ಕಿರೀಟದ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ. ಕೆಂಪು ಬಣ್ಣದ ಕೂದಲು, ಬೋಲ್ಡ್ ರೆಡ್ ಲಿಪ್‌ಸ್ಟಿಕ್ ಹಾಗೂ ರಾಯಲ್ ಲುಕ್ ಮೂಲಕ ಲೊರಿಯಲ್ ಪ್ಯಾರಿಸ್ ರನ್‌ವೇಯಲ್ಲಿ ಅವರು ಸಖತ್ ಗ್ಲಾಮರಸ್ ಆಗಿ ಕಾಣಿಸಿಕೊಂಡರು. ಐಶ್ವರ್ಯಾ ರೈ ಬಚ್ಚನ್ ಸೆಪ್ಟೆಂಬರ್ 28ರಂದು ನಡೆದ ಲೊರಿಯಲ್ ಪ್ಯಾರಿಸ್ ಲೆ ಡೆಫಿಲೆ ಶೋನಲ್ಲಿ ರನ್‌ವೇ ಮೇಲೆ ಹೆಜ್ಜೆ ಹಾಕುವ ಮೂಲಕ ಪ್ಯಾರಿಸ್ ಫ್ಯಾಷನ್ ವೀಕ್‌ಗೆ ಹಳೆಯ ಕಾಲದ ಗ್ಲಾಮರ್ ತಂದರು.

ರಾಯಲ್ ಲುಕ್ ನೀಡಿದ ಬ್ಲಾಕ್ ಕೌಚರ್ ಡ್ರೆಸ್

ಐಫೆಲ್ ಟವರ್ ಮತ್ತು ಎಕೋಲ್ ಮಿಲಿಟೇರ್ ಹಿನ್ನೆಲೆಯಲ್ಲಿ, ಆಕರ್ಷಕ ಆಲ್-ಬ್ಲಾಕ್ ಕೌಚರ್ ಲುಕ್‌ನಲ್ಲಿ ಅವರು ಈ ಶೋವನ್ನು ಅದ್ಭುತವಾಗಿ ಮುಕ್ತಾಯಗೊಳಿಸಿದರು. 'ಎಕ್ಸ್‌ಪ್ರೆಸ್ ಯುವರ್ ವರ್ತ್' ಹೆಸರಿನಲ್ಲಿ ನಡೆದ ಲೊರಿಯಲ್ ಪ್ಯಾರಿಸ್‌ನ 9ನೇ ಆವೃತ್ತಿಯ ಶೋ, ಫ್ಯಾಷನ್ ಮತ್ತು ಮನರಂಜನಾ ಜಗತ್ತಿನ ಹಲವು ಜಾಗತಿಕ ರಾಯಭಾರಿಗಳು ಹಾಗೂ ಖ್ಯಾತನಾಮರನ್ನು ಒಟ್ಟುಗೂಡಿಸಿತ್ತು. ಸಿರಿಯಾದ ಐಷಾರಾಮಿ ಲೇಬಲ್ 'ಯಾರಾ ಶೂಮೇಕರ್' ವಿನ್ಯಾಸಗೊಳಿಸಿದ ಕಸ್ಟಮ್ ಡ್ರೆಸ್ ಅನ್ನು ಐಶ್ವರ್ಯಾ ಧರಿಸಿದ್ದರು. ಸೆಲೆಬ್ರಿಟಿ ಸ್ಟೈಲಿಸ್ಟ್ ಮೋಹಿತ್ ರೈ ಈ ಲುಕ್ ಅನ್ನು ಸ್ಟೈಲ್ ಮಾಡಿದ್ದರು.

ಐಶ್ವರ್ಯಾ ಅವರ ಈ ಉಡುಪು 3D ಫ್ರಿಂಜ್ ಎಂಬ್ರಾಯ್ಡರಿಯಿಂದ ಅಲಂಕೃತವಾದ ಟೂ-ಪೀಸ್ ಬ್ಲಾಕ್ ವೆಲ್ವೆಟ್ ಗೌನ್ ಆಗಿತ್ತು. ಸೊಂಟದ ಭಾಗವನ್ನು ಹೈಲೈಟ್ ಮಾಡುವ ಈ ಡ್ರೆಸ್, ನೆಲದವರೆಗೂ ಹರಡಿಕೊಂಡು ರನ್‌ವೇ ಮೇಲೆ ನಾಟಕೀಯ ಮೆರುಗು ನೀಡಿತು. ಯಾರಾ ಶೂಮೇಕರ್ ಅವರ ಫಾಲ್/ವಿಂಟರ್ 2026-2027 ಕೌಚರ್ ಕಲೆಕ್ಷನ್‌ನಿಂದ ಆಯ್ಕೆ ಮಾಡಿದ, ಕ್ರಿಸ್ಟಲ್-ಎಂಬೆಲಿಶ್ಡ್ ವೆಲ್ವೆಟ್ ಕೇಪ್ ಅನ್ನು ಅವರು ಗೌನ್ ಮೇಲೆ ಧರಿಸಿದ್ದರು. ಈ ಕೇಪ್‌ನ ಅಂಚುಗಳಲ್ಲಿ ಮುತ್ತು ಮತ್ತು ಕ್ರಿಸ್ಟಲ್ ವಿನ್ಯಾಸಗಳಿದ್ದು, ಡಾರ್ಕ್ ಡ್ರೆಸ್‌ಗೆ ಒಂದು ರಾಯಲ್ ಟಚ್ ಕೊಟ್ಟಿತ್ತು.

ಗಮನ ಸೆಳೆದ ಐಶ್ವರ್ಯಾ ಅವರ ಕೆಂಪು ಕೂದಲು

ವಜ್ರದ ಕಿರೀಟ, ಡೈಮಂಡ್ ಉಂಗುರಗಳು ಮತ್ತು ಪಂಪ್ಸ್ ಧರಿಸುವ ಮೂಲಕ ನಟಿ ತಮ್ಮ ಲುಕ್ ಪೂರ್ಣಗೊಳಿಸಿದರು. ಫ್ಯಾಷನ್ ಪೇಜ್ 'ಡಯಟ್ ಸಬ್ಯ' ಕೂಡ ಐಶ್ವರ್ಯಾ ಅವರ ರನ್‌ವೇ ವಿಡಿಯೋವನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಶೇರ್ ಮಾಡಿದ್ದು, ನಟಿಯ ಡಿವಾ ಲುಕ್ ಅನ್ನು ಹಾಡಿಹೊಗಳಿದೆ. ಕೌಚರ್ ಡ್ರೆಸ್ ಒಂದು ಕಡೆ ಸದ್ದು ಮಾಡಿದರೆ, ಐಶ್ವರ್ಯಾ ಅವರ ಹೇರ್ ಸ್ಟೈಲ್ ಕೂಡ ಅಷ್ಟೇ ವೇಗವಾಗಿ ಎಲ್ಲರ ಗಮನ ಸೆಳೆಯಿತು. ಪ್ಯಾರಿಸ್ ಶೋಗಾಗಿ ನಟಿ ತಮ್ಮ ಕೂದಲಿಗೆ ಕೆಂಪು ಬಣ್ಣ ಬಳಿದುಕೊಂಡಿದ್ದು, ಸೈಡ್ ಪಾರ್ಟಿಂಗ್‌ನೊಂದಿಗೆ ಸಾಫ್ಟ್ ವೇವ್ಸ್ ಸ್ಟೈಲ್ ಮಾಡಿದ್ದರು.

ವಿಂಗ್ಡ್ ಐಲೈನರ್, ಫೆದರ್ಡ್ ಬ್ರೋಸ್, ಕೆಂಪಾದ ಕೆನ್ನೆಗಳು, ಸಟಲ್ ಕಾಂಟೂರಿಂಗ್ ಮತ್ತು ಸ್ಟೇಟ್‌ಮೆಂಟ್ ರೆಡ್ ಲಿಪ್‌ಸ್ಟಿಕ್ ಮೂಲಕ ಅವರ ಬ್ಯೂಟಿ ಲುಕ್ ಕೂಡ ಅದ್ಭುತವಾಗಿತ್ತು. ಲೊರಿಯಲ್ ಪ್ಯಾರಿಸ್ ಈವೆಂಟ್‌ನಲ್ಲಿ ಐಶ್ವರ್ಯಾ ಹಲವು ಸ್ಟಾರ್‌ಗಳ ಜೊತೆ ಕಾಣಿಸಿಕೊಂಡರು. ವಯೋಲಾ ಡೇವಿಸ್, ಕೆಂಡಾಲ್ ಜೆನ್ನರ್, ಕಾರಾ ಡೆಲಿವಿಂಗ್ನೆ, ಜೇನ್ ಫೋಂಡಾ, ಇವಾ ಲೊಂಗೋರಿಯಾ, ಆಂಡಿ ಮ್ಯಾಕ್‌ಡೊವೆಲ್, ಸಿಮೋನ್ ಆಶ್ಲೇ ಮತ್ತು ಮೇರಿ ಬೋಚೆಟ್ ಅವರಂತಹ ದಿಗ್ಗಜರೊಂದಿಗೆ ಅವರು ರನ್‌ವೇ ಹಂಚಿಕೊಂಡರು.

22 ವರ್ಷಗಳ ಬಳಿಕ 'ಖ್ಯಾತ ಡೈರೆಕ್ಟರ್' ಚಿತ್ರಕ್ಕೆ ಮತ್ತೆ ಒಂದಾದ 'H2O' ಜೋಡಿ ಉಪೇಂದ್ರ-ಪ್ರಭುದೇವ!

Shriram Bhat — Wed, 30 Sep 2026 14:25:18 +0530

H2O actors Upendra and Prabhu Deva acts again together after 22 Years: ಕನ್ನಡ ಚಿತ್ರರಂಗದ ಕೆಲವು ಸಿನಿಮಾಗಳು ಬಿಡುಗಡೆಯಾಗಿ ವರ್ಷಗಳು ಕಳೆದರೂ ಪ್ರೇಕ್ಷಕರ ನೆನಪಿನಿಂದ ಮಾಸುವುದಿಲ್ಲ. ಅಂತಹ ಸಿನಿಮಾಗಳ ಪಟ್ಟಿಯಲ್ಲಿ ಉಪೇಂದ್ರ ಮತ್ತು ಪ್ರಭುದೇವ ನಟನೆಯ ‘ಎಚ್2ಓ’ ಕೂಡ ಒಂದು. 2002ರಲ್ಲಿ ತೆರೆಕಂಡ ಈ ಸಿನಿಮಾ ಅಂದು ಸಾಕಷ್ಟು ಚರ್ಚೆ, ವಿವಾದ, ಪ್ರತಿಭಟನೆ ಮತ್ತು ವಿಮರ್ಶೆಗಳಿಗೆ ಕಾರಣವಾಗಿತ್ತು. ಅದೇ ಸಮಯದಲ್ಲಿ ಸಿನಿಮಾದ ವಿಭಿನ್ನ ಪ್ರಯತ್ನಕ್ಕೆ ಮೆಚ್ಚುಗೆಯೂ ವ್ಯಕ್ತವಾಗಿತ್ತು. ಇದೀಗ ‘ಎಚ್2ಓ’ ಚಿತ್ರದ ವಿಶೇಷ ಜೋಡಿ ಬರೋಬ್ಬರಿ 24 ವರ್ಷಗಳ ಬಳಿಕ ಮತ್ತೆ ಒಂದಾಗುತ್ತಿದೆ ಎಂಬ ಸುದ್ದಿ ಅಭಿಮಾನಿಗಳ ಗಮನ ಸೆಳೆದಿದೆ.

ಆದರೆ ಈ ಬಾರಿ ಕಥೆ ಕನ್ನಡದಲ್ಲಲ್ಲ, ತಮಿಳಿನಲ್ಲಿ. ಅಷ್ಟೇ ಅಲ್ಲ, ಇವರಿಬ್ಬರ ಕಾಂಬಿನೇಷನ್ ಅನ್ನು ತೆರೆಗೆ ತರುತ್ತಿರುವುದು ತಮಿಳಿನ ವಿಭಿನ್ನ ಸಿನಿಮಾಗಳ ಮೂಲಕ ಗಮನ ಸೆಳೆದಿರುವ ನಿರ್ದೇಶಕ ಕಾರ್ತಿಕ್ ಸುಬ್ಬರಾಜು.

‘ಎಚ್2ಓ’ ಬಳಿಕ ಮತ್ತೆ ಒಂದಾದ ಉಪ್ಪಿ-ಪ್ರಭುದೇವ!

ಉಪೇಂದ್ರ ಮತ್ತು ಪ್ರಭುದೇವ ‘ಎಚ್2ಓ’ ಸಿನಿಮಾದಲ್ಲಿ ಒಟ್ಟಿಗೆ ನಟಿಸಿದ್ದರು. ಕರ್ನಾಟಕ ಮತ್ತು ತಮಿಳುನಾಡಿನ ನಡುವೆ ಹಲವು ವರ್ಷಗಳಿಂದ ಚರ್ಚೆಯಲ್ಲಿದ್ದ ಕಾವೇರಿ ವಿವಾದವನ್ನು ಸಿನಿಮಾದ ಕಥಾವಸ್ತುವಾಗಿ ಬಳಸಿಕೊಂಡಿದ್ದರಿಂದ ಚಿತ್ರ ಬಿಡುಗಡೆಯ ಸಮಯದಲ್ಲಿ ಸಾಕಷ್ಟು ಚರ್ಚೆ ಹುಟ್ಟಿಸಿತ್ತು. ಪ್ರತಿಭಟನೆ, ಟೀಕೆ, ಪರ-ವಿರೋಧದ ಅಭಿಪ್ರಾಯಗಳ ನಡುವೆಯೇ ಸಿನಿಮಾ ಪ್ರೇಕ್ಷಕರ ಗಮನ ಸೆಳೆದಿತ್ತು.

‘ಎಚ್2ಓ’ ಬಳಿಕ ಉಪೇಂದ್ರ ಮತ್ತು ಪ್ರಭುದೇವ ಮತ್ತೊಂದು ಸಿನಿಮಾದಲ್ಲಿ ಒಟ್ಟಿಗೆ ಕಾಣಿಸಿಕೊಂಡಿರಲಿಲ್ಲ. ಹೀಗಾಗಿ ಎರಡು ದಶಕಗಳಿಗೂ ಹೆಚ್ಚು ಕಾಲದ ಬಳಿಕ ಇವರಿಬ್ಬರು ಮತ್ತೊಮ್ಮೆ ಒಂದೇ ಸಿನಿಮಾದಲ್ಲಿ ಕಾಣಿಸಿಕೊಳ್ಳುತ್ತಿರುವುದು ಸಹಜವಾಗಿಯೇ ಕುತೂಹಲ ಮೂಡಿಸಿದೆ.

ಕಾರ್ತಿಕ್ ಸುಬ್ಬರಾಜು ನಿರ್ದೇಶನದ ಹೊಸ ಸಿನಿಮಾ

‘ಜಿಗರ್‌ಥಂಡಾ’, ‘ಪೆಟ್ಟ’, ‘ಜಗಮೇ ಥಂದಿರಮ್’ ಸೇರಿದಂತೆ ವಿಭಿನ್ನ ಕಥಾಹಂದರದ ಸಿನಿಮಾಗಳನ್ನು ನಿರ್ದೇಶಿಸಿರುವ ಕಾರ್ತಿಕ್ ಸುಬ್ಬರಾಜು ಇದೀಗ ಮತ್ತೊಂದು ಕುತೂಹಲಕಾರಿ ಪ್ರಾಜೆಕ್ಟ್ ಕೈಗೆತ್ತಿಕೊಂಡಿದ್ದಾರೆ. ಈ ಸಿನಿಮಾದಲ್ಲಿ ಉಪೇಂದ್ರ ಮತ್ತು ಪ್ರಭುದೇವ ಜೊತೆಗೆ ಯುವ ನಟ ಅಥರ್ವ ಕೂಡ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಸಿನಿಮಾದ ವಿಶೇಷತೆ ಮತ್ತೊಂದಿದೆ. ಕಾರ್ತಿಕ್ ಸುಬ್ಬರಾಜು ಅವರ ಹೇಳಿಕೆಯ ಪ್ರಕಾರ, ಈ ಚಿತ್ರವನ್ನು ಸಾಂಪ್ರದಾಯಿಕವಾಗಿ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಮಾಡುವ ಬದಲು ನೇರವಾಗಿ ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆ ಮಾಡುವ ಯೋಜನೆ ಇದೆ. ಹೀಗಾಗಿ ಸಿನಿಮಾ ಥಿಯೇಟರ್‌ನಲ್ಲಿ ಹೇಗೆ ಸದ್ದು ಮಾಡಲಿದೆ ಎಂಬ ಪ್ರಶ್ನೆಗೆ ಬದಲಾಗಿ, ಓಟಿಟಿ ಪ್ರೇಕ್ಷಕರ ಮುಂದೆ ಯಾವ ರೀತಿಯ ಅನುಭವ ನೀಡಲಿದೆ ಎಂಬ ಕುತೂಹಲ ಹೆಚ್ಚಾಗಿದೆ.

‘ಹುಲಿ ಕುಣಿತ’ದ ಸುತ್ತ ಕಥೆ!

ಇನ್ನು ಸಿನಿಮಾದ ಕಥಾಹಂದರ ಕೂಡ ಸಾಕಷ್ಟು ವಿಭಿನ್ನವಾಗಿದೆ. ‘ಹುಲಿ ಕುಣಿತ’ದ ಹಿನ್ನೆಲೆಯನ್ನು ಒಳಗೊಂಡಿರುವ ಈ ಸಿನಿಮಾ ಒಂದು ಕಾದಂಬರಿಯನ್ನು ಆಧರಿಸಿದೆ ಎಂದು ಕಾರ್ತಿಕ್ ಸುಬ್ಬರಾಜು ತಿಳಿಸಿದ್ದಾರೆ. ಗ್ರಾಮೀಣ ಪ್ರದೇಶದ ವಾತಾವರಣದಲ್ಲಿ ಸಾಗುವ ಕಥೆಯಲ್ಲಿ ಆಕ್ಷನ್ ಮತ್ತು ಡ್ರಾಮಾಗೆ ಹೆಚ್ಚಿನ ಪ್ರಾಮುಖ್ಯತೆ ಇರಲಿದೆ ಎನ್ನಲಾಗಿದೆ.

ಹೀಗಾಗಿ ಉಪೇಂದ್ರ ಅವರ ವಿಭಿನ್ನ ಅಭಿನಯ, ಪ್ರಭುದೇವ ಅವರ ವಿಶೇಷ ಸ್ಕ್ರೀನ್ ಪ್ರೆಸೆನ್ಸ್ ಮತ್ತು ಕಾರ್ತಿಕ್ ಸುಬ್ಬರಾಜು ಅವರ ಕಥೆ ಹೇಳುವ ಶೈಲಿ ಒಂದೇ ಸಿನಿಮಾದಲ್ಲಿ ಸೇರುತ್ತಿರುವುದು ಅಭಿಮಾನಿಗಳಲ್ಲಿ ನಿರೀಕ್ಷೆ ಮೂಡಿಸಿದೆ. ‘ಎಚ್2ಓ’ನಲ್ಲಿ ವಿಭಿನ್ನ ವಿಷಯದ ಮೂಲಕ ಗಮನ ಸೆಳೆದಿದ್ದ ಈ ಜೋಡಿ, ಈ ಬಾರಿ ಸಂಪೂರ್ಣ ವಿಭಿನ್ನ ಕಥೆಯಲ್ಲಿ ಹೇಗೆ ಕಾಣಿಸಿಕೊಳ್ಳಲಿದೆ ಎಂಬುದು ಕುತೂಹಲದ ವಿಷಯವಾಗಿದೆ.

ಕೈತುಂಬಾ ಸಿನಿಮಾಗಳಲ್ಲಿ ಉಪ್ಪಿ ಬ್ಯುಸಿ

ಇನ್ನು ಉಪೇಂದ್ರ ಅವರ ಸಿನಿಮಾಗಳ ಪಟ್ಟಿಯೂ ದಿನದಿಂದ ದಿನಕ್ಕೆ ದೊಡ್ಡದಾಗುತ್ತಿದೆ. ಇತ್ತೀಚೆಗಷ್ಟೇ ಅವರು ನಟಿಸಿದ್ದ ತಮಿಳು ಸಿನಿಮಾ ‘ಕೂಲಿ’ ಬಿಡುಗಡೆಯಾಗಿ ಗಮನ ಸೆಳೆದಿತ್ತು. ಇದೀಗ ಮತ್ತೊಂದು ತಮಿಳು ಸಿನಿಮಾದ ಮೂಲಕ ಪ್ರಭುದೇವ ಜೊತೆ ಸ್ಕ್ರೀನ್ ಹಂಚಿಕೊಳ್ಳುತ್ತಿದ್ದಾರೆ.

ಇದರ ಜೊತೆಗೆ ಉಪೇಂದ್ರ ಅವರ ಕೈಯಲ್ಲಿ ಹಲವು ಕನ್ನಡ ಮತ್ತು ಇತರ ಭಾಷೆಗಳ ಸಿನಿಮಾಗಳೂ ಇವೆ. ‘ಬುದ್ಧಿವಂತ 2’ ಚಿತ್ರದ ಕೆಲಸ ಬಹುತೇಕ ಪೂರ್ಣಗೊಂಡಿದೆ ಎನ್ನಲಾಗುತ್ತಿದ್ದು, ‘ತ್ರಿಶೂಲಂ’ ಸಿನಿಮಾದ ಕೆಲಸವೂ ಮುಗಿದಿದೆ ಎನ್ನಲಾಗಿದೆ. ಸದ್ಯ ‘ಗೊರಿಲ್ಲಾ ವಾರ್’ ಸಿನಿಮಾದಲ್ಲೂ ಅವರು ನಟಿಸುತ್ತಿದ್ದಾರೆ. ಇದಲ್ಲದೆ ತೆಲುಗಿನ ‘ಜಾಂಬಿ ರೆಡ್ಡಿ ನೆಕ್ಸ್ಟ್ ಲೆವೆಲ್’ ಸಿನಿಮಾದಲ್ಲೂ ಉಪೇಂದ್ರ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗಿದೆ.

ಒಟ್ಟಿನಲ್ಲಿ, ‘ಎಚ್2ಓ’ ಮೂಲಕ ಎರಡು ದಶಕಗಳ ಹಿಂದೆ ಪ್ರೇಕ್ಷಕರ ಗಮನ ಸೆಳೆದಿದ್ದ ಉಪೇಂದ್ರ-ಪ್ರಭುದೇವ ಜೋಡಿ ಈಗ 24 ವರ್ಷಗಳ ಬಳಿಕ ಮತ್ತೊಮ್ಮೆ ಒಂದಾಗುತ್ತಿರುವುದು ಸಿನಿರಸಿಕರಿಗೆ ವಿಶೇಷ ಸುದ್ದಿಯಾಗಿದೆ. ಈ ಬಾರಿ ತಮಿಳು ಚಿತ್ರರಂಗದ ಖ್ಯಾತ ನಿರ್ದೇಶಕ ಕಾರ್ತಿಕ್ ಸುಬ್ಬರಾಜು ಅವರ ಸಾರಥ್ಯದಲ್ಲಿ, ಗ್ರಾಮೀಣ ಹಿನ್ನೆಲೆಯ ಆಕ್ಷನ್-ಡ್ರಾಮಾ ಕಥೆಯಲ್ಲಿ ಈ ಇಬ್ಬರು ಹೇಗೆ ಮಿಂಚಲಿದ್ದಾರೆ ಎಂಬುದನ್ನು ಕಾದು ನೋಡಬೇಕಿದೆ.

Viral Song: ಎಲ್ಲರ ಬಾಯಲ್ಲಿ ಗುನುಗುತ್ತಿರುವ ಜಬ್ ಜಿದ್ ಪೆ ಆ ಗಯೀ ಪಾರ್ವತಿ ಹಾಡಿಗೆ ಮತ್ತೊಂದು ಗರಿ

Roopa Hegde — Wed, 30 Sep 2026 13:42:48 +0530

ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಸದ್ದು ಮಾಡುತ್ತಿರುವ ‘ಜಬ್ ಜಿದ್ ಪೆ ಆ ಗಯೀ ಪಾರ್ವತಿ’ ಹಾಡು ಇದೀಗ ಮತ್ತೊಂದು ಮಹತ್ವದ ಮೈಲಿಗಲ್ಲು ತಲುಪಿದೆ. ‘ಹನುಮಾನ್ ಅಂಶ್’ ಸಿನಿಮಾದ ಈ ಹಾಡು ಯೂಟ್ಯೂಬ್‌ ಇಂಡಿಯಾ ವೀಕ್ಲಿ ಟಾಪ್‌ ಸಾಂಗ್‌ ಚಾರ್ಟ್ (YouTube India Weekly Top Songs Chart)ನಲ್ಲಿ ನಂ.1 ಸ್ಥಾನಕ್ಕೇರಿದ್ದು, ಯೂಟ್ಯೂಬ್ ಗ್ಲೋಬಲ್‌ ಮ್ಯೂಜಿಕ್‌ ಚಾರ್ಟ್ (YouTube Global Music Chart)ನಲ್ಲಿ ನಂ.2 ಸ್ಥಾನ ಪಡೆದಿದೆ. ಹಾಡು ಈಗಾಗಲೇ ಯೂಟ್ಯೂಬ್ನಲ್ಲಿ 100 ಮಿಲಿಯನ್ಗೂ ಹೆಚ್ಚು ವೀಕ್ಷಣೆಗಳನ್ನು ಪಡೆದುಕೊಂಡಿದೆ.

ಬುಂದೇಲಿ ಜಾನಪದ ಸಂಗೀತದಲ್ಲಿ ಪಾರ್ವತಿ-ಶಿವನ ಕಥೆ

ಜಬ್ ಜಿದ್ ಪೆ ಆ ಗಯೀ ಪಾರ್ವತಿ ಹಾಡು ದೇವಿ ಪಾರ್ವತಿ ಶಿವನನ್ನು ವಿವಾಹವಾಗಲು ತೋರಿದ ದೃಢಸಂಕಲ್ಪದ ಕಥೆಯನ್ನು ಆಧರಿಸಿದೆ. ಹಾಡಿನ ವಿಶೇಷತೆ ಎಂದರೆ ಇದನ್ನು ಆಧುನಿಕ ಪಾಪ್ ಶೈಲಿಗಿಂತ ಬುಂದೇಲಿ ಜಾನಪದ ಸಂಗೀತ, ಅಲ್ಲಿನ ಸಾಂಪ್ರದಾಯಿಕ ಭಾಷೆ ಮತ್ತು ದೇಸಿ ಕಥೆ ಹೇಳುವ ಶೈಲಿಯಲ್ಲಿ ಪ್ರಸ್ತುತಪಡಿಸಲಾಗಿದೆ. ಹಾಡನ್ನು ಸಾಧು ಎಸ್. ತಿವಾರಿ ಬರೆದು, ಹಾಡಿ, ಸಂಗೀತ ಸಂಯೋಜಿಸಿದ್ದಾರೆ. ಹನುಮಾನ್ ಅಂಶ್ ಚಿತ್ರವನ್ನು ಡಾ. ವಿಶಾಲ್ ಚತುರ್ವೇದಿ ನಿರ್ದೇಶಿಸಿದ್ದಾರೆ.

100 ಮಿಲಿಯನ್ಗೂ ಹೆಚ್ಚು ವೀಕ್ಷಣೆ

ಹಾಡು ಬಿಡುಗಡೆಯಾದ ಕೆಲವೇ ದಿನಗಳಲ್ಲಿ ಸೋಶಿಯಲ್ ಮೀಡಿಯಾದಲ್ಲಿ ವೇಗವಾಗಿ ವೈರಲ್ ಆಗಿತ್ತು. ಹಾಡಿನ ಆಡಿಯೋಗೆ ಮಾತ್ರವಲ್ಲ, ಇದರೊಂದಿಗೆ ಮಾಡಲಾಗುತ್ತಿರುವ ನೃತ್ಯ, ರೀಲ್ಸ್ ಮತ್ತು ಎಐ ವಿಡಿಯೋಗಳಿಗೂ ದೊಡ್ಡ ಮಟ್ಟದಲ್ಲಿ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಸೆಪ್ಟೆಂಬರ್ 23ರ ನವಭಾರತ್ ಟೈಮ್ಸ್ ವರದಿಯ ಪ್ರಕಾರ, ಹಾಡು ಬಿಡುಗಡೆಯಾದ ಸುಮಾರು 15 ದಿನಗಳಲ್ಲೇ 1.3 ಕೋಟಿ ವೀಕ್ಷಣೆಗಳನ್ನು ಪಡೆದಿದೆ. ಇನ್ಸ್ಟಾಗ್ರಾಮ್‌ ನಲ್ಲಿ ಮಕ್ಕಳಿಂದ ಹಿಡಿದು ಪೊಲೀಸ್ ಅಧಿಕಾರಿಗಳವರೆಗೆ ಹಲವರು ಈ ಹಾಡಿನಗೆ ರೀಲ್ಸ್ ಮಾಡ್ತಿದ್ದಾರೆ.

ದೇಶದ ಗಡಿ ದಾಟಿದ ಬುಂದೇಲಿ ಹಾಡು

ಒಂದು ಪ್ರಾದೇಶಿಕ ಜಾನಪದ ಶೈಲಿಯ ಹಾಡು ಇಷ್ಟೊಂದು ದೊಡ್ಡ ಮಟ್ಟದಲ್ಲಿ ಜನಪ್ರಿಯವಾಗಿರುವುದು ಈ ಹಾಡಿನ ಮತ್ತೊಂದು ವಿಶೇಷತೆ. ಬುಂದೇಲಿ ಭಾಷೆ ಮತ್ತು ಜಾನಪದ ಸಂಗೀತದ ಸೊಗಡನ್ನು ಉಳಿಸಿಕೊಂಡೇ ಹಾಡು ದೇಶದ ವಿವಿಧ ಭಾಗಗಳ ಪ್ರೇಕ್ಷಕರನ್ನು ತಲುಪಿದೆ.

ಪಿಎಂ ಮೋದಿ ಎದುರಲ್ಲೂ ಮೊಳಗಿದ ‘ಪಾರ್ವತಿ’

ಇತ್ತೀಚೆಗೆ ದೆಹಲಿಯಲ್ಲಿ ನಡೆದ ವಿಶೇಷ ಭಜನ್ ಕ್ಲಬ್ಬಿಂಗ್ ಕಾರ್ಯಕ್ರಮದಲ್ಲೂ ಹನುಮಾನ್ ಅಂಶ್ ತಂಡ ಭಾಗವಹಿಸಿತ್ತು. ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಉಪಸ್ಥಿತಿಯಲ್ಲಿ ಗಾಯಕ ಸಾಧು ಎಸ್. ತಿವಾರಿ ‘ಪಾರ್ವತಿ’ ಹಾಡನ್ನು ಲೈವ್ ಆಗಿ ಪ್ರಸ್ತುತಪಡಿಸಿದ್ದರು. ನಿರ್ದೇಶಕ ವಿಶಾಲ್ ಚತುರ್ವೇದಿ ಇದೇ ಕಾರ್ಯಕ್ರಮದಲ್ಲಿ ಹೃದಯ್ ಮೇ ಜಿನ್ಕೆ ಸಿಯಾರಾಮ್ ಹಾಡನ್ನು ಹಾಡಿದ್ದರು. ಹೀಗೆ ಒಂದು ಸ್ಥಳೀಯ ಜಾನಪದ ಶೈಲಿಯ ಕಥೆಯನ್ನು ಆಧರಿಸಿದ ‘ಜಬ್ ಜಿದ್ ಪೆ ಆ ಗಯೀ ಪಾರ್ವತಿ’ ಹಾಡು ಇದೀಗ ದೇಶದ ನಂ.1 ಮತ್ತು ಜಾಗತಿಕವಾಗಿ ನಂ.2 ಸ್ಥಾನಕ್ಕೇರುವ ಮೂಲಕ ಹನುಮಾನ್ ಅಂಶ್ ಚಿತ್ರದ ಸಂಗೀತಕ್ಕೆ ಹೊಸ ಗುರುತನ್ನು ತಂದುಕೊಟ್ಟಿದೆ.

Actor Venkatesh: ಸಾವಿರ ರೂಪಾಯಿ ಕೊಟ್ಟರೆ ಮಾತ್ರ ನಟನೆ ಮಾಡ್ತೀನಿ, ತಂದೆಗೆ ಕಂಡಿಷನ್ ಹಾಕಿದ್ದ ನಟ ವೆಂಕಟೇಶ್‌!

Sumanth SN — Wed, 30 Sep 2026 12:28:34 +0530

ನಟ ವೆಂಕಟೇಶ್ ಅವರ 'ಆದರ್ಶ ಕುಟುಂಬಂ ಇಂಟಿ ನಂಬರ್ 47' ಸಿನಿಮಾ ಅಕ್ಟೋಬರ್ 9ರಂದು ಬಿಡುಗಡೆಯಾಗಲಿದೆ. 'ಪ್ರೇಮ ನಗರಂ' ಚಿತ್ರದಲ್ಲಿ ಬಾಲನಟನಾಗಿ 1000 ರೂ. ಸಂಭಾವನೆ ಪಡೆದು ಚಿತ್ರರಂಗ ಪ್ರವೇಶಿಸಿದ ಇವರು, ಇಂದು ಕೋಟಿ ಕೋಟಿ ಸಂಭಾವನೆ ಪಡೆಯುವ ಮಟ್ಟಕ್ಕೆ ಬೆಳೆದಿದ್ದಾರೆ.

ಬ್ಯಾಕ್ ಟು ಬ್ಯಾಕ್ ಹಿಟ್ ಸಿನಿಮಾಗಳೊಂದಿಗೆ ನಟ ವಿಕ್ಟರಿ ವೆಂಕಟೇಶ್ ಮುನ್ನುಗುತ್ತಿದ್ದಾರೆ. 'ಸಂಕ್ರಾಂತಿಗೆ ವಸ್ತುನಾಂ' ಸಿನಿಮಾದಿಂದ ಫಾರ್ಮ್‌ಗೆ ಬಂದಿದ್ದ ವೆಂಕಟೇಶ್, 'ಮನ ಶಂಕರವರ ಪ್ರಸಾದ್' ಮೂವಿಯಲ್ಲಿ ಮಾಡಿದ್ದರು. ಸದ್ಯ ತ್ರಿವಿಕ್ರಮ್ ಶ್ರೀನಿವಾಸ್ ನಿರ್ದೇಶನದ 'ಆದರ್ಶ ಕುಟುಂಬಂ ಇಂಟಿ ನಂಬರ್ 47' ಎಕೆ 47 ಸಿನಿಮಾದೊಂದಿಗೆ ಪ್ರೇಕ್ಷಕರ ಎದುರು ಬರಲು ಸಿದ್ಧರಾಗಿದ್ದಾರೆ. ಅಕ್ಟೋಬರ್ 09ರಂದು ಈ ಸಿನಿಮಾ ಬಿಡುಗಡೆಯಾಗಲಿದೆ. ಇದರೊಂದಿಗೆ ಸಿನಿಮಾ ಪ್ರಚಾರದಲ್ಲಿ ವೆಂಕಟೇಶ್ ಹಾಗೂ ಸಿನಿಮಾ ತಂಡ ಬ್ಯುಸಿಯಾಗಿದೆ.

ವೆಂಕಟೇಶ್ ಅವರ ತಂದೆ ರಾಮಾನಾಯುಡು ಟಾಲಿವುಡ್‌ನಲ್ಲಿ ಅತೀ ದೊಡ್ಡ ನಿರ್ಮಾಪಕರು. ಸುರೇಶ್ ಪ್ರೋಡಕ್ಷನ್ ಅಡಿ ಹಲವು ಸಿನಿಮಾಗಳನ್ನು ನಿರ್ಮಾಣ ಮಾಡಿದ್ದಾರೆ. ಅಲ್ಲದೇ ಗಿನ್ನಿಸ್ ಬುಕ್ ಆಫ್ ರೆಕಾರ್ಡ್ ನಿರ್ಮಿಸಿದ್ದಾರೆ. 1971ರಲ್ಲಿ ರಾಮಾನಾಯುಡು ಅವರು ನಟ ಅಕ್ಕಿನೇನಿ ನಾಗೇಶ್ವರಾವ್ ಅವರೊಂದಿಗೆ 'ಪ್ರೇಮ ನಗರಂ' ಸಿನಿಮಾ ಮಾಡಿದ್ದರು. ಈ ಸಿನಿಮಾ ಬಿಗ್ ಹಿಟ್ ಆಗಿತ್ತು. ಈ ಸಿನಿಮಾದಲ್ಲಿ ಒಂದು ಚೈಲ್ಡ್ ಆರ್ಟಿಸ್ಟ್ ಪಾತ್ರ ಇತ್ತು.

ಪ್ರೇಮ ನಗರಂ ಸಿನಿಮಾದಲ್ಲಿ ಎಎನ್‌ಆರ್ ಅವರೊಂದಿಗೆ ಕೈಕಾಲ ಸತ್ಯನಾರಾಯಣ ಅವರು ಕೂಡ ನಟಿಸಿದ್ದರು. ಕೈಕಾಲ ಸತ್ಯನಾರಾಯಣ ಅವರ ನಟಿಸಿದ್ದ ಕೇಶವ ಪಾತ್ರದ ಬಾಲ್ಯದ ಭಾಗದಲ್ಲಿ ವೆಂಕಟೇಶ್ ಚೈಲ್ಟ್ ಆರ್ಟಿಸ್ಟ್ ಆಗಿ ನಟಿಸಿದ್ದರು. ಇದು ವೆಂಕಟೇಶ್ ಅವರ ಮೊದಲ ಸಿನಿಮಾ. ಸಿನಿಮಾ ಶೂಟಿಂಗ್ ಸಮಯದಲ್ಲಿ ಬಾಲಕನ ಅಗತ್ಯವಿದ್ದಾಗ, ಬೇರೆ ಯಾರನ್ನೋ ಆಯ್ಕೆ ಮಾಡುವುದು ಏಕೆ? ಈ ಪಾತ್ರ ವೆಂಕಟೇಶ್ ಅವರನ್ನೇ ಆಯ್ಕೆ ಮಾಡೋಣಾ ಅಂತ ನಿರ್ದೇಶಕರು ಹೇಳಿದ್ದರಂತೆ. ಇದಕ್ಕೆ ರಾಮನಾಯುಡು ಕೂಡ ಓಕೆ ಎಂದಿದ್ದರಂತೆ.

ಇದರೊಂದಿಗೆ ಅವರ ಮ್ಯಾನೇಜರ್ ನಿಮ್ಮ ಅಪ್ಪ ಕರೆಯುತ್ತಿದ್ದಾರೆ ಅಂತ ಶಾಲೆಯಿಂದ ವೆಂಕಟೇಶ್ ಅವರನ್ನು ಕರೆದುಕೊಂಡು ಹೋಗಿದ್ದರಂತೆ. ಆದರೆ ಸಿನಿಮಾದಲ್ಲಿ ನಟಿಸಲು ಆಗ ವೆಂಕಟೇಶ್ ನೋ ಎಂದಿದ್ದರಂತೆ. ಸಿನಿಮಾದಲ್ಲಿ ನಟಿಸಲು ಸಾವಿರ ರೂಪಾಯಿ ಕೊಟ್ಟರೆ ಕೊಡಬೇಕು ಎಂದು ಷರತ್ತು ಹಾಕಿದ್ದರಂತೆ. ಶಾಲೆ ಇಲ್ಲ ಸಂದರ್ಭದಲ್ಲಿ ಸಿನಿಮಾ ಶೂಟಿಂಗ್ ನೋಡಲು ತೆರಳುತ್ತಿದ್ದ ವೆಂಕಟೇಶ್, ಜ್ಯೂನಿಯರ್ ನಟರಿಗೆ ಹಣ ಕೊಡುವುದನ್ನು ನೋಡಿದ್ದರಂತೆ. ಇದರಂತೆ ತಮಗೆ ನಟಿಸಲು ಅವಕಾಶ ಸಿಕ್ಕಾಗ ಹಣ ತೆಗೆದುಕೊಂಡು ಆ ಬಳಿಕವೇ ನಟಿಸಲು ಒಕೆ ಎಂದಿದ್ದರಂತೆ.

ವೆಂಕಟೇಶ್, ತ್ರಿವಿಕ್ರಮ್ ಕಾಂಬಿನೇಷನ್‌ನಲ್ಲಿ ಬರುತ್ತಿರುವ 'ಆದರ್ಶ ಕುಟುಂಬ' ಸಿನಿಮಾ, ಪ್ಯಾಮಿಲಿ ಅಡಿಯನ್ಸ್‌ಗಾಗಿಯೇ ಮಾಡಿದ ಸಿನಿಮಾ ಆಗಿದ್ದು, ತನ್ನ ಕುಟುಂಬಕ್ಕೆ ಕಷ್ಟ ಎದುರಾದರೆ, ಹೀರೋ ತನ್ನ ಸಾಮರ್ಥ್ಯಕ್ಕೂ ಮೀರಿ ಹೇಗೆ ತನ್ನವರನ್ನು ರಕ್ಷಣೆ ಮಾಡುತ್ತಾರೆ ಅನ್ನೋದು ಸಿನಿಮಾದ ಕಥೆಯಾಗಿದೆ. ಶ್ರೀನಿಧಿ ಶೆಟ್ಟಿ ಸಿನಿಮಾದಲ್ಲಿ ಹೀರೋಯಿನ್ ಆಗಿ ನಟಿಸುತ್ತಿದ್ದು, ಈ ಸಿನಿಮಾಗೆ ವೆಂಕಟೇಶ್ 30-40 ಕೋಟಿ ರೂಪಾಯಿ ಸಂಭಾವನೆ ಪಡೆದುಕೊಂಡಿದ್ದಾರೆ. ಒಂದು ಸಾವಿರ ರೂಪಾಯಿಯೊಂದಿಗೆ ಶುರುವಾದ ಅವರ ಕೆರಿಯರ್, ಈಗ ಒಂದು ಸಿನಿಮಾಗೆ ಸುಮಾರು ನಾಲವತ್ತು ಕೋಟಿ ರೂಪಾಯಿ ವರೆಗೂ ತೆಗೆದುಕೊಳ್ಳುವ ಮಟ್ಟಕ್ಕೆ ಬೆಳೆದಿದ್ದಾರೆ.

'ಚಂದ್ರ'ನ ಜೊತೆಗಿನ ಸಕ್ಸಸ್ ಬಳಿಕ ನಟನೆಗೆ ಗುಡ್ಬೈ ಹೇಳಿದ್ದೇಕೆ ಈ 'ಚಕೋರಿ'? ಕೊನೆಗೂ ಸತ್ಯ ರಿವೀಲ್ ಆಗೋಯ್ತು!

Shriram Bhat — Wed, 30 Sep 2026 11:42:03 +0530

Chandra Chakori Actress Priya Chabria Comesback: ಕನ್ನಡ ಚಿತ್ರರಂಗದಲ್ಲಿ ಒಂದು ಕಾಲದಲ್ಲಿ ಭಾರಿ ಸದ್ದು ಮಾಡಿದ್ದ ಸಿನಿಮಾಗಳ ಪೈಕಿ ‘ಚಂದ್ರ ಚಕೋರಿ’ ಸಿನಿಮಾಗೆ ವಿಶೇಷ ಸ್ಥಾನವಿದೆ. ಶ್ರೀಮುರಳಿ ಮತ್ತು ಪ್ರಿಯಾ ಜೋಡಿಯಾಗಿ ನಟಿಸಿದ್ದ ಈ ಸಿನಿಮಾ ಪ್ರೇಕ್ಷಕರ ಮನ ಗೆದ್ದು ಬ್ಲಾಕ್‌ಬಸ್ಟರ್ ಆಗಿತ್ತು. ಚಿತ್ರದಲ್ಲಿ ಶ್ರೀಮುರಳಿ ಪುಟ್ಟರಾಜು ಪಾತ್ರದಲ್ಲಿ ಕಾಣಿಸಿಕೊಂಡರೆ, ಪ್ರಿಯಾ ಅವರು ಸುಧಾ ಪಾತ್ರದ ಮೂಲಕ ಗಮನ ಸೆಳೆದಿದ್ದರು. ಸಿನಿಮಾದ ಯಶಸ್ಸಿನ ಬಳಿಕ ಪ್ರಿಯಾ ಕನ್ನಡ ಚಿತ್ರರಂಗದಲ್ಲಿ ಮತ್ತಷ್ಟು ಅವಕಾಶಗಳನ್ನು ಪಡೆಯುವ ನಿರೀಕ್ಷೆ ಇತ್ತು. ಆದರೆ ಆಗಿದ್ದೇ ಬೇರೆ!

‘ಚಂದ್ರ ಚಕೋರಿ’ ಚಿತ್ರದ ನಂತರ ಪ್ರಿಯಾ ದಿಢೀರನೆ ಚಿತ್ರರಂಗದಿಂದ ದೂರವಾದರು. ವರ್ಷಗಳು ಕಳೆದರೂ ಅವರು ಮತ್ತೆ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳದಿದ್ದರಿಂದ ಅಭಿಮಾನಿಗಳಲ್ಲೂ ಸಹಜವಾಗಿಯೇ ಹಲವು ಪ್ರಶ್ನೆಗಳು ಮೂಡಿದ್ದವು. ಅಷ್ಟಕ್ಕೂ ಪ್ರಿಯಾ ಎಲ್ಲಿದ್ದರು? ಯಾಕೆ ಸಿನಿಮಾಗಳಿಂದ ದೂರ ಉಳಿದರು? ಈಗ ಮತ್ತೆ ಬಣ್ಣದ ಲೋಕಕ್ಕೆ ಮರಳಲು ಕಾರಣವೇನು? ಈ ಎಲ್ಲಾ ಪ್ರಶ್ನೆಗಳಿಗೆ ನಟಿಯೇ ಸಾಮಾಜಿಕ ಜಾಲತಾಣದ ಮೂಲಕ ಉತ್ತರ ನೀಡಿದ್ದಾರೆ.

ತಂದೆಯ ಆರೋಗ್ಯಕ್ಕಾಗಿ ಚಿತ್ರರಂಗಕ್ಕೆ ಗುಡ್‌ಬೈ

‘ಚಂದ್ರ ಚಕೋರಿ’ ಸಿನಿಮಾ ಬಿಡುಗಡೆಯಾದ ಕೆಲವೇ ದಿನಗಳಲ್ಲಿ ಪ್ರಿಯಾ ಅವರ ತಂದೆಯ ಆರೋಗ್ಯದಲ್ಲಿ ಗಂಭೀರ ಏರುಪೇರು ಉಂಟಾಯಿತು. ಕುಟುಂಬದ ಪರಿಸ್ಥಿತಿಯನ್ನು ಗಮನಿಸಿದ ಅವರು, ಸಿನಿಮಾಗಳಿಗಿಂತ ಕುಟುಂಬವೇ ಮುಖ್ಯ ಎಂದು ನಿರ್ಧರಿಸಿ ಸೌದಿ ಅರೇಬಿಯಾಗೆ ವಾಪಸ್ ತೆರಳಿದರು. ಆ ಸಮಯದಲ್ಲಿ ಕನ್ನಡ ಚಿತ್ರರಂಗದಿಂದ ಹಲವು ಸಿನಿಮಾಗಳ ಅವಕಾಶಗಳು ಅವರನ್ನು ಹುಡುಕಿಕೊಂಡು ಬಂದಿದ್ದರೂ, ತಂದೆಯ ಆರೋಗ್ಯದ ಕಾರಣದಿಂದ ಎಲ್ಲ ಅವಕಾಶಗಳಿಗೂ ಅವರು ನಿರಾಕರಿಸಿದರು.

ತಂದೆ ಚೇತರಿಸಿಕೊಳ್ಳುವವರೆಗೆ ಸುಮಾರು ಎರಡು ವರ್ಷಗಳ ಕಾಲ ಸೌದಿಯಲ್ಲೇ ಉಳಿದುಕೊಂಡಿದ್ದರು. ಇದೇ ಅವಧಿಯಲ್ಲಿ ಪ್ರಿಯಾ ಇನ್ನು ಮುಂದೆ ಭಾರತಕ್ಕೆ ಮರಳುವುದಿಲ್ಲ ಎಂಬ ಮಾತುಗಳೂ ಹರಿದಾಡಿದ್ದವು. ಆದರೆ ಎರಡು ವರ್ಷಗಳ ಬಳಿಕ ಅವರು ಭಾರತಕ್ಕೆ ಮರಳಿದರು. ಆದರೆ ಅಷ್ಟರೊಳಗೆ ಪರಿಸ್ಥಿತಿ ಬದಲಾಗಿತ್ತು.

ಪ್ರಿಯಾ ಭಾರತಕ್ಕೆ ವಾಪಸ್ ಬಂದಾಗ ಅವರಿಗೆ ಬರುತ್ತಿದ್ದ ಸಿನಿಮಾದ ಅವಕಾಶಗಳು ಬಹುತೇಕ ಕಡಿಮೆಯಾಗಿದ್ದವು. ಹೀಗಾಗಿ ಅವರು ಜಾಹೀರಾತುಗಳು ಮತ್ತು ಡ್ಯಾನ್ಸ್ ಕಾರ್ಯಕ್ರಮಗಳ ಮೂಲಕ ತಮ್ಮ ವೃತ್ತಿಜೀವನವನ್ನು ಮುಂದುವರಿಸಿದರು. ನಂತರ ವಿವಾಹವಾದ ಬಳಿಕ ಅವರು ಸಂಪೂರ್ಣವಾಗಿ ಚಿತ್ರರಂಗದಿಂದ ದೂರ ಉಳಿದರು.

ಸೋಶಿಯಲ್ ಮೀಡಿಯಾ ಮತ್ತೆ ಹಳೆಯ ನೆನಪು ತಂದಿತು!

ಕಾಲ ಬದಲಾಯಿತು, ಸಾಮಾಜಿಕ ಜಾಲತಾಣಗಳ ಯುಗ ಆರಂಭವಾಯಿತು. ವಿಶೇಷವಾಗಿ ಇನ್‌ಸ್ಟಾಗ್ರಾಮ್ ಮೂಲಕ ‘ಚಂದ್ರ ಚಕೋರಿ’ ಸಿನಿಮಾದ ನೆನಪುಗಳು ಮತ್ತೆ ಅಭಿಮಾನಿಗಳ ಮುಂದೆ ಬರತೊಡಗಿದವು. ಕಳೆದ ಒಂದು ವರ್ಷದಿಂದ ಚಿತ್ರದ ಹಾಡುಗಳು ಮತ್ತು ಪ್ರಿಯಾ ಅವರ ಪಾತ್ರಕ್ಕೆ ಸಂಬಂಧಿಸಿದ ವಿಡಿಯೋಗಳು ಮತ್ತೆ ವೈರಲ್ ಆಗಲು ಆರಂಭಿಸಿದವು.

ಅಭಿಮಾನಿಗಳಿಂದ ಬರುತ್ತಿದ್ದ ಸಂದೇಶಗಳು, ಹಳೆಯ ಸಿನಿಮಾದ ಮೇಲಿನ ಪ್ರೀತಿ ಮತ್ತು ಪ್ರಿಯಾ ಅವರನ್ನು ಮತ್ತೆ ತೆರೆ ಮೇಲೆ ನೋಡಬೇಕು ಎಂಬ ಆಸೆ ನಟಿಯ ಗಮನ ಸೆಳೆದಿದೆ. ಇದೇ ಕಾರಣಕ್ಕೆ ಅಭಿಮಾನಿಗಳೊಂದಿಗೆ ಮತ್ತೆ ಸಂಪರ್ಕ ಸಾಧಿಸಲು ಅವರು ‘ಚಂದ್ರ ಚಕೋರಿ’ ಚಿತ್ರದ ಹಾಡುಗಳಿಗೆ ರೀಲ್ಸ್ ಮಾಡಲು ಆರಂಭಿಸಿದರು. ಈ ಮೂಲಕ ವರ್ಷಗಳ ಬಳಿಕ ಪ್ರಿಯಾ ಮತ್ತೊಮ್ಮೆ ಅಭಿಮಾನಿಗಳ ನಡುವೆ ಕಾಣಿಸಿಕೊಳ್ಳಲು ಶುರುಮಾಡಿದರು.

ಮತ್ತೆ ಬಣ್ಣದ ಲೋಕದಲ್ಲಿ ಸಕ್ರಿಯ!

ಇದೀಗ ಪ್ರಿಯಾ ಅಧಿಕೃತವಾಗಿ ಮತ್ತೆ ಬಣ್ಣದ ಲೋಕದತ್ತ ಹೆಜ್ಜೆ ಇಟ್ಟಿದ್ದಾರೆ. ಜಾಹೀರಾತುಗಳು, ನಾಟಕಗಳು, ಸಿನಿಮಾಗಳು ಮಾತ್ರವಲ್ಲದೆ ಸಾಮಾಜಿಕ ಜಾಲತಾಣಗಳಲ್ಲಿ ಕಂಟೆಂಟ್ ಕ್ರಿಯೇಟರ್ ಆಗಿಯೂ ಸಕ್ರಿಯರಾಗಿರುವುದಾಗಿ ಅವರು ತಿಳಿಸಿದ್ದಾರೆ.

ಇಷ್ಟೇ ಅಲ್ಲದೆ, ತಮ್ಮ ಕೈಯಲ್ಲಿ ಕೆಲವು ಹೊಸ ಯೋಜನೆಗಳೂ ಇವೆ ಎಂಬ ಸುಳಿವನ್ನು ನೀಡಿದ್ದಾರೆ. ಆದರೆ ಆ ಪ್ರಾಜೆಕ್ಟ್‌ಗಳ ಬಗ್ಗೆ ಈಗಲೇ ಮಾಹಿತಿ ನೀಡದೆ, ಸರಿಯಾದ ಸಮಯ ಬಂದಾಗ ಎಲ್ಲವನ್ನೂ ಅಭಿಮಾನಿಗಳೊಂದಿಗೆ ಹಂಚಿಕೊಳ್ಳುವುದಾಗಿ ಹೇಳಿದ್ದಾರೆ.

ಒಟ್ಟಿನಲ್ಲಿ, ‘ಚಂದ್ರ ಚಕೋರಿ’ಯ ಸುಧಾ ಎಂದೇ ಇಂದಿಗೂ ಅಭಿಮಾನಿಗಳ ಮನಸ್ಸಿನಲ್ಲಿ ಉಳಿದಿರುವ ಪ್ರಿಯಾ, ಹಲವು ವರ್ಷಗಳ ವಿರಾಮದ ಬಳಿಕ ಮತ್ತೆ ಬಣ್ಣದ ಲೋಕಕ್ಕೆ ಮರಳುತ್ತಿರುವುದು ಹಳೆಯ ಸಿನಿಪ್ರೇಕ್ಷಕರಿಗೆ ಖುಷಿಯ ವಿಚಾರವಾಗಿದೆ. ಒಂದು ಕಾಲದಲ್ಲಿ ಸಿನಿಮಾದ ಹಾಡುಗಳ ಮೂಲಕ ಮನ ಗೆದ್ದಿದ್ದ ನಟಿ, ಇದೀಗ ಸೋಶಿಯಲ್ ಮೀಡಿಯಾ ಮೂಲಕ ಮತ್ತೆ ಅಭಿಮಾನಿಗಳೊಂದಿಗೆ ಸಂಪರ್ಕ ಬೆಳೆಸುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಅವರ ಹೊಸ ಸಿನಿಮಾಗಳು ಮತ್ತು ಯೋಜನೆಗಳು ಯಾವ ರೀತಿಯಲ್ಲಿ ಮೂಡಿಬರಲಿವೆ ಎಂಬ ಕುತೂಹಲ ಈಗಾಗಲೇ ಶುರುವಾಗಿದೆ.

Instagram Reshma: 'ಮುಸ್ಲಿಂ ಆಗಿ ಬೊಟ್ಟು ಇಡ್ತೀಯಾ? ಎಷ್ಟು ತಗೋತಿರಾ ಅಂತಾನೇ' ಗಿಚ್ಚಿ ಗಿಲಿಗಿಲಿ ರೇಷ್ಮಾಗೆ ಕಿರುಕುಳ!

Sumanth SN — Wed, 30 Sep 2026 11:27:13 +0530

ಸೋಶಿಯಲ್ ಮೀಡಿಯಾ ಸ್ಟಾರ್, ಖಾಸಗಿ ರಿಯಾಲಿಟಿ ಶೋದಲ್ಲಿ ಭಾಗಿಯಾಗಿದ್ದ ನಟಿ ರೇಷ್ಮಾ ಅವರಿಗೆ ಕಿರುಕುಳ ನೀಡುತ್ತಿರುವ ಆರೋಪ ಕೇಳಿ ಬಂದಿದೆ. ಈ ಸಂಬಂಧ ನಟಿ ಇಂದು ಪೊಲೀಸರಿಗೆ ನೀಡಲು ಮುಂದಾಗಿದ್ದು, ತಮಗೆ ಶಿವಮೊಗ್ಗ ಮೂಲದ ಭದ್ರಾವತಿ ಫಯಾಜ್ ಎಂಬಾತ ನಿರಂತರವಾಗಿ ಕಿರುಕುಳ ನೀಡುತ್ತಿದ್ದಾನೆ. ಇದರಿಂದ ನನಗೆ ಹಾಗೂ ಕುಟುಂಬಕ್ಕೆ ತೀವ್ರ ಸಮಸ್ಯೆ ಆಗ್ತಿದೆ ಎಂದು ಆರೋಪಿಸಿದ್ದಾರೆ.

ರಿಯಾಲಿಟಿ ಶೋ ನಟಿ ರೇಷ್ಮಾಗೆ ಕಂಟಕವಾದ ಆ ಅಪರಿಚಿತ ಯಾರು? ರೇಷ್ಮಾ ಹೇಳಿದ್ದೇನು?

ನಾನು ಯಾರು ಅಂತ ಬಹುತೇಕ ಮಂದಿಗೆ ಗೊತ್ತಿದೆ. ಕೆಲವರು ನನ್ನನ್ನು ಇನ್‌ಸ್ಟಾದಲ್ಲಿ ನೋಡಿದ್ದರೆ, ಇನ್ನರ್ಧ ಜನರಿಗೆ ನಾನು ಟಿವಿ ರಿಯಾಲಿಟಿ ಶೋ ಮೂಲಕ ಪರಿಚಯ ಆಗಿದ್ದೀನಿ. ಆದರೆ ಹೆಣ್ಣು ಮಕ್ಕಳು ಏನೋ ಬೆಳೆಯುತ್ತಿದ್ದಾರೆ ಅಂದರೆ ಅವರನ್ನು ತಿಳಿಯುವ ಕೆಲಸ ಮಾಡುತ್ತಾರೆ. ಕೆಟ್ಟದಾಗಿ ಕಾಮೆಂಟ್ ಮಾಡ್ತಾರೆ. ಕೆಟ್ಟದಾಗಿ ಟ್ರೋಲ್ ಮಾಡ್ತಾರೆ. ಯಾರೇ ಆದರೂ ಅವರ ಸಾಮರ್ಥ್ಯಕ್ಕೆ ತಕ್ಕಂತೆ ಬೆಳೆದರೆ ಸಮಸ್ಯೆ ಇಲ್ಲ, ಆದರೆ ಇನ್ನೊಬ್ಬರನ್ನು ಕೆಟ್ಟದಾಗಿ ಬಿಂಬಿಸುವ ಮೂಲಕ ತಾವು ಫಾಲೋವರ್ಸ್ ಹೆಚ್ಚಿಸಿಕೊಳ್ಳುವುದು ಎಷ್ಟು ಸರಿ ಎಂದು ರೇಷ್ಮಾ ಪ್ರಶ್ನಿಸಿದ್ದಾರೆ.

ಅಸಲಿಗೆ ಆಗಿದ್ದೇನು?

ಯಾರೋ ಒಬ್ಬ ಫಯಾಜ್ ಅಂತೆ, ಆತ ಯಾರು ಅಂತಲೇ ನನಗೆ ಗೊತ್ತಿಲ್ಲ. ಭದ್ರವಾತಿ ಫಯಾಜ್ ಅಂತ ನನಗೆ ಗೊತ್ತಾಗಿದೆ. ಈತ ತನ್ನ ಸಾಮಾಜಿಕ ಜಾಲತಾಣದಲ್ಲಿ ಸಲ್ಮಾನ್ ಎಂಬ ಹೆಸರಿನೊಂದಿಗೆ ಅಕೌಂಟ್ ಕ್ರಿಯೇಟ್ ಮಾಡಿದ್ದಾನೆ. ಆತ ನನಗೆ ತೀವ್ರ ಕಿರುಕುಳ ನೀಡುತ್ತಿದ್ದಾನೆ. ಆತ ತನ್ನ ಹೆಂಡತಿ ಮಕ್ಕಳಿಗೆ ಊಟ ಹಾಕಲು ನನ್ನನ್ನು ಕೆಟ್ಟದಾಗಿ ಟ್ರೋಲ್ ಮಾಡ್ತಿದ್ದಾನೆ. ಫಾಲೋವರ್ಸ್ ಹೆಚ್ಚಿಸಿಕೊಳ್ಳಲು ಕೆಟ್ಟ ಕೆಟ್ಟದಾಗಿ ನನ್ನ ವಿಡಿಯೋಗಳನ್ನ ಮಾಡುತ್ತಿದ್ದಾನೆ. ಆತನ ಐಡಿಯಲ್ಲಿ ಎಲ್ಲವೂ ನನ್ನನ್ನು ಕೆಟ್ಟದಾಗಿ ತೋರಿಸಿ ಟ್ರೋಲ್ ಮಾಡುತ್ತಿದ್ದಾರೆ ಎಂದು ರೇಷ್ಮಾ ಆರೋಪಿಸಿದ್ದಾರೆ.

ಸಲ್ಮಾನ್ ಅಲಿಯಾಸ್ ಭದ್ರಾವತಿ ಫಯಾಜ್ ಎಂಬಾತನಿಂದ ಕಿರುಕುಳ!

ಟ್ರೋಲ್ ಮಾಡುವವರು ಸಾಕಷ್ಟು ಮಂದಿ ಇದ್ದರೆ, ಅವರಿಂದಲೇ ನಾವು ಸ್ವಲ್ಪ ಫೇಮಸ್ ಕೂಡ ಆಗಿದ್ದೇವೆ. ಟ್ರೋಲರ್ ಗಳನ್ನು ನನ್ನ ಪಾಲಿಗೆ ದೇವರು ಆಗಿದ್ದರು. ಆದರೆ ಈಗ ಈತ ತೀವ್ರವಾಗಿ ಕೆಟ್ಟದಾಗಿ ತೋರಿಸುವ ಕೆಲಸ ಮಾಡ್ತಿದ್ದಾನೆ. ಪದೇ ಪದೇ ಫೋನ್ ಮಾಡಿ ಕಿರುಕುಳ ಕೊಡುತ್ತಾನೆ. ನಾವು ದರ್ಗಾಗೆ ಹೋದರೆ ಎಲ್ಲರೂ ನಮ್ಮನ್ನು ಓಡಿಸಿಕೊಂಡು ಬರ್ತಿದ್ದಾರೆ. ನಾನು ಮುಸ್ಲಿಮ್ ಏರಿಯಾಗೆ ಹೋಗಲು ಆಗುತ್ತಿಲ್ಲ. ನಮಗೆ ಗೌರವ ಇಲ್ಲದಂತೆ ಮಾಡಿದ್ದಾನೆ. ನನಗೆ ಕೆಟ್ಟ ಕೆಟ್ಟ ಪದಗಳನ್ನು ಎಡಿಟ್ ಮಾಡಿ ಟ್ರೋಲ್ ಮಾಡ್ತಿದ್ದಾರೆ ಎಂದು ಗಂಭೀರ ಆರೋಪ ಮಾಡಿದ್ದಾರೆ.

ಸಲ್ಮಾನ್ ಖಾನ್, ಶಾರುಖ್ ಖಾನ್ ಮನೆಯಲ್ಲೂ ಗಣೇಶ ಮೂರ್ತಿ ಇಟ್ಟಿದ್ದಾರೆ ಅಲ್ವಾ?

ಒಳ್ಳೆಯ ದಾರಿಯಲ್ಲಿ ಜೀವನ ನಡೆಸಲು ಬಂದಿದ್ದೇವೆ. ಆದರೆ ಒಂದು ಸಣ್ಣ ರೀಲ್ಸ್ ಮಾಡಿದರೆ ಸಾಕು, ಕೆಟ್ಟದಾಗಿ ವಿಡಿಯೋ ಮಾಡಿ ಟ್ರೋಲ್ ಮಾಡ್ತಾರೆ. ನನಗೆ ಒಮ್ಮೆ ಫೋನ್ ಮಾಡಿ ನಮ್ಮ ಅಂಗಡಿ ಇದೆ, ಅದಕ್ಕೆ ಪ್ರಚಾರ ಮಾಡಬೇಕು ಎಷ್ಟು ಹಣ ತಗೋತೀರಿ ಎಂದು ಕೇಳಿದ್ದ, ಆಗ ನಾನು 10-15 ಸಾವಿರ ರೂಪಾಯಿ ತಗೋತಿವಿ. ಅಂಗಡಿಗೆ ಬೇಕಾಗಿರುವ ಪ್ರಚಾರ ಮಾಡುತ್ತೇವೆ ಎಂದು ಹೇಳಿದ್ದೆ. ಆದರೆ ಆ ವಿಡಿಯೋ ಇಟ್ಟುಕೊಂಡು ಕೆಟ್ಟದಾಗಿ ವಿಡಿಯೋ ಮಾಡಿದ್ದಾರೆ. ನನ್ನ ಮೊಬೈಲ್ ನಂಬರ್ ಹಲವರಿಗೆ ನೀಡಿದ್ದಾನೆ, ಹಲವು ನಂಬರ್ ಗಳಿಂದ ಫೋನ್ ಮಾಡಿ ಕಿರುಕುಳ ನೀಡುತ್ತಾರೆ.

ಆತನ ಮಾತನಾಡಿರುವ ಆಡಿಯೋ ನನ್ನ ಬಳಿ ಇದೆ. ನೀನು ಮುಸ್ಲಿಂ ಆಗಿದ್ದು, ಹಣೆಗೆ ಬೊಟ್ಟು ಇಟ್ಟುಕೊಳ್ಳಿತ್ತೀಯ.. ಕನ್ನಡ ಜನರ ತರ ಕುಣಿಯುತ್ತೀಯಾ.. ರಸ್ತೆಯಲ್ಲಿ ಡ್ಯಾನ್ಸ ಮಾಡ್ತೀಯಾ ಎಂದು ಕಿರುಕುಳ ನೀಡಿದ್ದ. ಆದರೆ ಇದು ನನಗೆ, ನನ್ನ ಕುಟುಂಬಕ್ಕೆ ಊಟ ಕೊಡುತ್ತಿದೆ. ನಟನೆಯನ್ನು ಒಂದು ವೃತ್ತಿಯಾಗಿ ಮಾಡುತ್ತಿದ್ದೇನೆ. ಸಲ್ಮಾನ್ ಖಾನ್, ಶಾರುಖ್ ಖಾನ್ ಮನೆಯಲ್ಲೂ ಗಣೇಶ ಮೂರ್ತಿ ಪ್ರತಿಷ್ಠಾಪನೆ ಮಾಡುತ್ತಾರೆ ಅಲ್ವಾ? ಅವರಿಗೂ ಇದೇ ರೀತಿ ಕೇಳಲು ಆಗುತ್ತಾ? ಎಂದು ರೇಷ್ಮಾ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಬನಶಂಕರಿ ಪೊಲೀಸರಿಗೆ ದೂರು ನೀಡಲು ಮುಂದಾದ ರೇಷ್ಮಾ!

ಈಗ ನಾವು ಬನಶಂಕರಿ ಪೊಲೀಸರಿಗೆ ದೂರು ನೀಡಲು ಮುಂದಾಗಿದ್ದೇನೆ. ಆತನ ವಿರುದ್ಧ ಕ್ರಮಕೈಗೊಳ್ಳಲು ಮನವಿ ಮಾಡಿದ್ದೇನೆ. ಆತನ ಕಿರುಕುಳಕ್ಕೆ ನಾವು ಕೆಲಸಕ್ಕೆ ಹೋಗಲು ಆಗುತ್ತಿಲ್ಲ. ನನ್ನ ಮಕ್ಕಳು ನಮಾಜ್ ಮಾಡಲು ಹೋಗಲು ಆಗುತ್ತಿಲ್ಲ. ಫಯಾಜ್ ಯಾರು ಅಂತ ನನಗೆ ಗೊತ್ತಿಲ್ಲ, ಆತನ ಪರಿಚಯ ನನಗೆ ಇಲ್ಲ. ಆದರೆ ಆತನಿಗೆ ನನ್ನ ನಂಬರ್ ಹೇಗೆ ಸಿಕ್ತು ಗೊತ್ತಿಲ್ಲ. ಫೋನ್ ಮಾಡಿ ಕಿರುಕುಳ ನೀಡಲಾಗುತ್ತಿದೆ. ಆತ ನನ್ನ ನಂಬರ್ ಹಲವರಿಗೆ ನೀಡಿದ್ದಾನೆ. ನೀವು ಎಷ್ಟು ತಗೋತಿರಾ ಅಂತ ಕೇಳುತ್ತಾನೆ. ನನ್ನೊಂದಿಗೆ ರೀಲ್ಸ್ ಮಾಡುವ ಜೊತೆ ಕೆಟ್ಟದಾಗಿ ಸಂಬಂಧ ಕ್ರಿಯೇಟ್ ಮಾಡುತ್ತಿದ್ದಾನೆ. ಆದರೆ ನಾನು ಏನು ಅಂತ ನನ್ನ ಗಂಡನಿಗೆ ಗೊತ್ತಿದೆ. ಆದರೆ ಹೆಣ್ಣು ಮಕ್ಕಳಿಗೆ ಈ ರೀತಿ ಮಾಡುವುದು ತಪ್ಪು ಎಂದು ರೇಷ್ಮಾ ಹೇಳಿದ್ದಾರೆ.

Jr NTR: 'ಯಂಗ್ ಟೈಗರ್' ಹೊಸ ಸಿನಿಮಾದ ಬಗ್ಗೆ ಹೊರಬಿತ್ತು ಪ್ರಮುಖ ಅಪ್‌ಡೇಟ್; ಯಾರು ಡೈರೆಕ್ಟರ್?

Shriram Bhat — Wed, 30 Sep 2026 11:16:43 +0530

Jr NTR-Prashanth Neel movie Dragon- Then Jr NTR to act in Trivikram Srinivas Movie: ತೆಲುಗು ಚಿತ್ರರಂಗದ ಯಂಗ್ ಟೈಗರ್ ಜೂ ಎನ್‌ಟಿಆರ್ ಅಭಿಮಾನಿಗಳಿಗೆ ಮತ್ತೊಂದು ಗುಡ್‌ನ್ಯೂಸ್ ಸಿಕ್ಕಿದೆ. ಸದ್ಯ ಪ್ರಶಾಂತ್ ನೀಲ್ ನಿರ್ದೇಶನದ ಬಹುನಿರೀಕ್ಷಿತ ‘ಡ್ರ್ಯಾಗನ್’ ಸಿನಿಮಾದಲ್ಲಿ ಬ್ಯುಸಿಯಾಗಿರುವ ಜೂ ಎನ್‌ಟಿಆರ್, ಈ ಚಿತ್ರದ ಬಳಿಕ ಮತ್ತೊಮ್ಮೆ ನಿರ್ದೇಶಕ ತ್ರಿವಿಕ್ರಮ್ ಶ್ರೀನಿವಾಸ್ ಜೊತೆ ಕೈಜೋಡಿಸಲಿದ್ದಾರೆ. ಈ ಕಾಂಬಿನೇಷನ್ ಈಗಾಗಲೇ ಸಿನಿರಸಿಕರಲ್ಲಿ ಸಾಕಷ್ಟು ನಿರೀಕ್ಷೆ ಮೂಡಿಸಿದ್ದು, ಇದೀಗ ಸ್ವತಃ ತ್ರಿವಿಕ್ರಮ್ ಅವರೇ ತಮ್ಮ ಮುಂದಿನ ಪ್ರಾಜೆಕ್ಟ್ ಕುರಿತು ಕುತೂಹಲಕಾರಿ ಮಾಹಿತಿಗಳನ್ನು ಹಂಚಿಕೊಂಡಿದ್ದಾರೆ.

ಜೂ ಎನ್‌ಟಿಆರ್ ಕಳೆದ ಎರಡು ವರ್ಷಗಳಿಂದ ‘ಡ್ರ್ಯಾಗನ್’ ಸಿನಿಮಾಗಾಗಿ ಸಾಕಷ್ಟು ಸಮಯ ಮೀಸಲಿಟ್ಟಿದ್ದಾರೆ. ಪಾತ್ರಕ್ಕಾಗಿ ತಮ್ಮ ದೇಹವನ್ನು ಸಿದ್ಧಪಡಿಸಿಕೊಂಡಿರುವ ಅವರು ತೂಕವನ್ನೂ ಇಳಿಸಿಕೊಂಡಿದ್ದಾರೆ ಎನ್ನಲಾಗಿದೆ. ಕಠಿಣ ಡಯಟ್ ಮತ್ತು ವರ್ಕೌಟ್ ಮೂಲಕ ತಮ್ಮ ಲುಕ್ ಬದಲಿಸಿಕೊಂಡಿರುವ ಜೂ ಎನ್‌ಟಿಆರ್ ಅವರನ್ನು ದೊಡ್ಡ ಪರದೆಯ ಮೇಲೆ ನೋಡಲು ಅಭಿಮಾನಿಗಳು ಕಾತರರಾಗಿದ್ದಾರೆ. ಪ್ರಶಾಂತ್ ನೀಲ್ ನಿರ್ದೇಶನದ ಈ ಸಿನಿಮಾ 2027ರಲ್ಲಿ ತೆರೆಗೆ ಬರುವ ನಿರೀಕ್ಷೆಯಿದೆ.

ಇದರ ನಡುವೆ ಜೂ ಎನ್‌ಟಿಆರ್ ಅವರ ಮುಂದಿನ ಸಿನಿಮಾದ ಕುರಿತು ಚರ್ಚೆ ಜೋರಾಗಿದೆ. ಈ ಚಿತ್ರವನ್ನು ನಿರ್ದೇಶಿಸಲಿರುವುದು ‘ಅತಡು’, ‘ಜಲ್ಸಾ’, ‘ಅತ್ತಾರಿಂಟಿಕಿ ದಾರೇದಿ’, ‘ಜುಲಾಯಿ’ ಸೇರಿದಂತೆ ಹಲವು ಯಶಸ್ವಿ ಸಿನಿಮಾಗಳನ್ನು ನೀಡಿರುವ ತ್ರಿವಿಕ್ರಮ್ ಶ್ರೀನಿವಾಸ್. ಈಗಾಗಲೇ ಜೂ ಎನ್‌ಟಿಆರ್ ಮತ್ತು ತ್ರಿವಿಕ್ರಮ್ ಕಾಂಬಿನೇಷನ್‌ಗೆ ಸಂಬಂಧಿಸಿದಂತೆ ಅಧಿಕೃತ ಘೋಷಣೆ ಹೊರಬಿದ್ದಿದೆ. ಆದರೆ ಚಿತ್ರದ ಕಥೆ, ಹೆಸರು ಮತ್ತು ಶೂಟಿಂಗ್ ಯಾವಾಗ ಎಂಬ ಪ್ರಶ್ನೆಗಳು ಅಭಿಮಾನಿಗಳಲ್ಲಿತ್ತು.

ಸಿನಿಮಾ ಕಥೆ ಸಂಪೂರ್ಣ!

ಇದೀಗ ಆ ಕುತೂಹಲಕ್ಕೆ ತ್ರಿವಿಕ್ರಮ್ ಅವರೇ ಉತ್ತರ ನೀಡಿದ್ದಾರೆ. ತಮ್ಮ ಹೊಸ ಕೌಟುಂಬಿಕ ಮನರಂಜನಾ ಸಿನಿಮಾ ‘ಆದರ್ಶ ಕುಟುಂಬಂ’ ಪ್ರಚಾರದ ಭಾಗವಾಗಿ ನೀಡಿದ ಸಂದರ್ಶನದಲ್ಲಿ ಅವರು ಜೂ ಎನ್‌ಟಿಆರ್ ಜೊತೆಗಿನ ಸಿನಿಮಾದ ಬಗ್ಗೆ ಮಾತನಾಡಿದ್ದಾರೆ. ಜನಪ್ರಿಯ ನಿರೂಪಕಿ ಸುಮಾ ಅವರೊಂದಿಗೆ ನಡೆದ ಸಂಭಾಷಣೆಯಲ್ಲಿ ನಿರ್ದೇಶಕರು ಸಿನಿಮಾದ ಪ್ರಮುಖ ಮಾಹಿತಿಯನ್ನು ಬಹಿರಂಗಪಡಿಸಿದ್ದಾರೆ.

ತ್ರಿವಿಕ್ರಮ್ ಹೇಳಿರುವ ಪ್ರಕಾರ, ಜೂ ಎನ್‌ಟಿಆರ್‌ಗಾಗಿ ಸಿದ್ಧಪಡಿಸುತ್ತಿರುವ ಸಿನಿಮಾದ ಚಿತ್ರಕಥೆ ಈಗಾಗಲೇ ಸಂಪೂರ್ಣವಾಗಿದೆ. ಆದರೆ ಸಿನಿಮಾಗೆ ಅಂತಿಮವಾಗಿ ಯಾವ ಹೆಸರನ್ನು ಇಡಬೇಕು ಎಂಬ ನಿರ್ಧಾರ ಇನ್ನೂ ಆಗಿಲ್ಲ. ವಿಶೇಷವೆಂದರೆ, ಈ ಹಿಂದೆ ಪೋಸ್ಟರ್ ಮೂಲಕ ಗಮನ ಸೆಳೆದಿದ್ದ ‘ಗಾಡ್ ಆಫ್ ವಾರ್’ ಎಂಬ ಪದವೇ ಸಿನಿಮಾದ ಶೀರ್ಷಿಕೆ ಅಲ್ಲವಂತೆ. ಅದು ಕೇವಲ ಟ್ಯಾಗ್‌ಲೈನ್ ಎಂದು ತ್ರಿವಿಕ್ರಮ್ ಸ್ಪಷ್ಟಪಡಿಸಿದ್ದಾರೆ.

ಇದರೊಂದಿಗೆ ಸಿನಿಮಾದ ನಿಜವಾದ ಹೆಸರು ಏನಿರಬಹುದು ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಮತ್ತಷ್ಟು ಹೆಚ್ಚಾಗಿದೆ. ಚಿತ್ರತಂಡವು ಶೀರ್ಷಿಕೆಯನ್ನು ಯಾವಾಗ ಬಹಿರಂಗಪಡಿಸಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

ಪೌರಾಣಿಕ ಕಥೆಗೆ ಆಧುನಿಕ ಸ್ಪರ್ಶ?

ಜೂ ಎನ್‌ಟಿಆರ್ ಮತ್ತು ತ್ರಿವಿಕ್ರಮ್ ಅವರ ಮುಂದಿನ ಸಿನಿಮಾ ಮುರುಗನ್ ಅಥವಾ ಕಾರ್ತಿಕೇಯ ಸ್ವಾಮಿಯ ಹಿನ್ನೆಲೆಯ ಕಥೆಯನ್ನು ಹೊಂದಿರಲಿದೆ ಎಂಬ ಮಾತುಗಳು ಈ ಹಿಂದೆ ಕೇಳಿಬಂದಿದ್ದವು. ಮುರುಗನ್ ಅವರನ್ನು ಯುದ್ಧದ ದೇವತೆಯಾಗಿ ಪೂಜಿಸಲಾಗುತ್ತದೆ. ಹೀಗಾಗಿ ‘ಗಾಡ್ ಆಫ್ ವಾರ್’ ಎಂಬ ಟ್ಯಾಗ್‌ಲೈನ್ ಕೂಡ ಸಾಕಷ್ಟು ಗಮನ ಸೆಳೆದಿತ್ತು.

ಈ ಸಿನಿಮಾದ ಪೋಸ್ಟರ್‌ನಲ್ಲಿರುವ ಅಂಶವೂ ಕುತೂಹಲ ಹೆಚ್ಚಿಸಿದೆ. ಮುರುಗನ್ ಸ್ವಾಮಿಯ ಆಯುಧದ ಜೊತೆಗೆ ಡಿಎನ್‌ಎಯನ್ನು ಹೋಲುವ ವಿನ್ಯಾಸ ಕಾಣಿಸಿಕೊಂಡಿದ್ದು, ಕಥೆಯಲ್ಲಿ ಪೌರಾಣಿಕ ಅಂಶಗಳ ಜೊತೆಗೆ ಆಧುನಿಕ ವಿಜ್ಞಾನ ಅಥವಾ ಸಮಕಾಲೀನ ವಿಚಾರಗಳನ್ನೂ ಬೆಸೆದಿರಬಹುದೇ ಎಂಬ ಚರ್ಚೆ ಆರಂಭವಾಗಿದೆ. ಆದರೆ ಚಿತ್ರದ ಸಂಪೂರ್ಣ ಕಥೆಯ ಬಗ್ಗೆ ಚಿತ್ರತಂಡದಿಂದ ಇನ್ನೂ ವಿವರವಾದ ಮಾಹಿತಿ ಹೊರಬಂದಿಲ್ಲ.

ಮತ್ತೆ ಒಂದಾದ ‘ಅರವಿಂದ ಸಮೇತ’ ಜೋಡಿ

ಜೂ ಎನ್‌ಟಿಆರ್ ಮತ್ತು ತ್ರಿವಿಕ್ರಮ್ ಶ್ರೀನಿವಾಸ್ ಈಗಾಗಲೇ ‘ಅರವಿಂದ ಸಮೇತ ವೀರ ರಾಘವ’ ಸಿನಿಮಾದ ಮೂಲಕ ಪ್ರೇಕ್ಷಕರನ್ನು ರಂಜಿಸಿದ್ದಾರೆ. ಆ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿತ್ತು. ಹೀಗಾಗಿ ಈ ಯಶಸ್ವಿ ಕಾಂಬಿನೇಷನ್ ಮತ್ತೊಮ್ಮೆ ಒಂದಾಗುತ್ತಿರುವುದು ಅಭಿಮಾನಿಗಳ ನಿರೀಕ್ಷೆಯನ್ನು ಸಹಜವಾಗಿಯೇ ಹೆಚ್ಚಿಸಿದೆ.

ಈ ಬಾರಿ ಪೌರಾಣಿಕ ಹಿನ್ನೆಲೆ, ಆಧುನಿಕತೆಯ ಸ್ಪರ್ಶ ಮತ್ತು ಜೂ ಎನ್‌ಟಿಆರ್ ಅವರಂತಹ ಸ್ಟಾರ್ ನಟನನ್ನು ಒಳಗೊಂಡಿರುವ ಕಥೆಯನ್ನು ತ್ರಿವಿಕ್ರಮ್ ಹೇಗೆ ತೆರೆಗೆ ತರಲಿದ್ದಾರೆ ಎಂಬುದೇ ಸದ್ಯದ ಕುತೂಹಲ. ನಿರ್ದೇಶಕರ ಹೇಳಿಕೆಯಂತೆ ಚಿತ್ರದ ಚಿತ್ರೀಕರಣ 2027ರಲ್ಲಿ ಆರಂಭವಾಗಲಿದೆ.

ಅಂದರೆ, ಜೂ ಎನ್‌ಟಿಆರ್ ಅಭಿಮಾನಿಗಳಿಗೆ ಮುಂದಿನ ಕೆಲವು ವರ್ಷಗಳು ಸಖತ್ ಸಿನಿಮಾ ಹಬ್ಬವಾಗುವ ಸಾಧ್ಯತೆ ಇದೆ. ಒಂದೆಡೆ ಪ್ರಶಾಂತ್ ನೀಲ್ ಅವರ ‘ಡ್ರ್ಯಾಗನ್’, ಮತ್ತೊಂದೆಡೆ ತ್ರಿವಿಕ್ರಮ್ ಜೊತೆಗಿನ ಈ ಬಹುನಿರೀಕ್ಷಿತ ಸಿನಿಮಾ—ಎರಡೂ ಪ್ರಾಜೆಕ್ಟ್‌ಗಳ ಅಪ್‌ಡೇಟ್‌ಗಾಗಿ ಅಭಿಮಾನಿಗಳು ಈಗಿನಿಂದಲೇ ಕಣ್ಣಿಟ್ಟಿದ್ದಾರೆ. ಚಿತ್ರದ ನಿಜವಾದ ಶೀರ್ಷಿಕೆ ಮತ್ತು ಹೆಚ್ಚಿನ ವಿವರಗಳು ಯಾವಾಗ ಹೊರಬರುತ್ತವೆ ಎಂಬುದನ್ನು ಕಾದು ನೋಡಬೇಕಿದೆ.

ಅಮೆರಿಕಾ AI ಕಂಪನಿಗೆ ₹7,000 ಕೋಟಿ ಲೀಗಲ್ ನೋಟಿಸ್ ಕಳಿಸಿ ಶಾಕ್ ಕೊಟ್ಟ ಊರ್ವಶಿ ರೌಟೇಲಾ.. ಆಗಿದ್ದೇನು?

Shriram Bhat — Wed, 30 Sep 2026 10:02:42 +0530

Urvashi Rautela Legal Notice, Urvashi Rautela AI Case: ಬಾಲಿವುಡ್ ನಟಿ ಊರ್ವಶಿ ರೌಟೇಲಾ ಎಂದರೆ ಸಿನಿಮಾಗಳಿಗಿಂತ ಮೊದಲು ನೆನಪಿಗೆ ಬರುವುದು ಅವರ ಗ್ಲಾಮರಸ್ ಲುಕ್, ಫ್ಯಾಷನ್ ಸ್ಟೇಟ್‌ಮೆಂಟ್ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿನ ಭರ್ಜರಿ ಹಾಜರಾತಿ. ಇದೀಗ ಇದೇ ನಟಿ ಮತ್ತೊಂದು ಕಾರಣಕ್ಕೆ ಸುದ್ದಿಯ ಕೇಂದ್ರಬಿಂದುವಾಗಿದ್ದಾರೆ. ಆದರೆ ಈ ಬಾರಿ ವಿಷಯ ಫ್ಯಾಷನ್ ಅಥವಾ ಸಿನಿಮಾ ಅಲ್ಲ, ಬದಲಾಗಿ ಕಾನೂನು ವಿವಾದ. ಲಾಸ್ ಏಂಜಲೀಸ್ ಮೂಲದ AI ಕಂಪನಿಯೊಂದು ತಮ್ಮ ಹೆಸರು, ಫೋಟೋಗಳು ಮತ್ತು ವೀಡಿಯೊಗಳನ್ನು ಅನುಮತಿಯಿಲ್ಲದೆ ವಾಣಿಜ್ಯ ಉದ್ದೇಶಕ್ಕೆ ಬಳಸಿಕೊಂಡಿದೆ ಎಂದು ಊರ್ವಶಿ ರೌಟೇಲಾ ಅವರ ತಂಡ ಆರೋಪಿಸಿದೆ.

ಈ ಆರೋಪ ಹೊರಬಿದ್ದ ಬೆನ್ನಲ್ಲೇ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮತ್ತೊಂದು ಅಚ್ಚರಿಯ ಅಂಶವೂ ಚರ್ಚೆಗೆ ಬಂದಿದೆ. ನಟಿಯ ತಂಡ ಹೇಳಿರುವ ಪ್ರಕಾರ, ಈ ಬಳಕೆಯಿಂದ ಉಂಟಾಗಿದೆ ಎನ್ನಲಾದ ಹಾನಿಯ ಮೊತ್ತ ಬರೋಬ್ಬರಿ ₹7,000 ಕೋಟಿ ಎಂದು ಅಂದಾಜಿಸಲಾಗಿದೆ. ಇಷ್ಟು ದೊಡ್ಡ ಮೊತ್ತದ ಕಾನೂನು ವಿವಾದದ ಸುದ್ದಿ ಹೊರಬಿದ್ದಿರುವುದು ಇದೀಗ ಸಿನಿರಂಗದಲ್ಲೂ ಕುತೂಹಲ ಮೂಡಿಸಿದೆ.

ಅನುಮತಿಯಿಲ್ಲದೆ ಫೋಟೋ, ವೀಡಿಯೊ ಬಳಕೆ?

ಊರ್ವಶಿ ರೌಟೇಲಾ ಅವರ ತಂಡದ ಹೇಳಿಕೆಯ ಪ್ರಕಾರ, ಲಾಸ್ ಏಂಜಲೀಸ್‌ನಲ್ಲಿರುವ AI ಕಂಪನಿಯೊಂದು ನಟಿಯ ಹೆಸರು, ಫೋಟೋಗಳು ಮತ್ತು ವೀಡಿಯೊಗಳನ್ನು ಯಾವುದೇ ಪೂರ್ವ ಸೂಚನೆ ಅಥವಾ ಅನುಮತಿ ಪಡೆಯದೆ ಬಳಸಿಕೊಂಡಿದೆ ಎನ್ನಲಾಗಿದೆ. ಸಾಮಾನ್ಯವಾಗಿ ಒಬ್ಬ ಸೆಲೆಬ್ರಿಟಿಯ ಫೋಟೋ ಅಥವಾ ವೀಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಕಾಣಿಸಿಕೊಳ್ಳುವುದು ಹೊಸದೇನಲ್ಲ. ಆದರೆ ಇಲ್ಲಿ ವಾಣಿಜ್ಯ ಉದ್ದೇಶಕ್ಕಾಗಿ ನಟಿಯ ಗುರುತು ಮತ್ತು ಡಿಜಿಟಲ್ ವಿಷಯವನ್ನು ಬಳಸಲಾಗಿದೆ ಎಂಬುದು ತಂಡದ ಪ್ರಮುಖ ಆರೋಪವಾಗಿದೆ.

ನಟಿಯ ತಂಡದ ಪ್ರಕಾರ, ಊರ್ವಶಿಯವರ ಚಿತ್ರಗಳು ಮತ್ತು ವೀಡಿಯೊಗಳನ್ನು ಬಳಸಿಕೊಂಡು ಸಂಬಂಧಪಟ್ಟ ಕಂಪನಿಯು ಗಮನಾರ್ಹ ಪ್ರಮಾಣದ ವಾಣಿಜ್ಯ ಮೌಲ್ಯವನ್ನು ಪಡೆದುಕೊಂಡಿದೆ ಎನ್ನಲಾಗಿದೆ. ಹೀಗಾಗಿ ಈ ವಿಚಾರವನ್ನು ಸಾಮಾನ್ಯ ಡಿಜಿಟಲ್ ಬಳಕೆಯಾಗಿ ಪರಿಗಣಿಸದೆ, ಕಾನೂನು ಮಾರ್ಗದಲ್ಲಿ ಪರಿಹಾರ ಪಡೆಯುವ ಪ್ರಕ್ರಿಯೆಯನ್ನು ಆರಂಭಿಸಲಾಗಿದೆ ಎಂದು ತಂಡ ತಿಳಿಸಿದೆ.

₹7,000 ಕೋಟಿ ಮೊತ್ತ ಏಕೆ ಚರ್ಚೆಗೆ ಬಂದಿದೆ?

ಈ ಪ್ರಕರಣದಲ್ಲಿ ಸದ್ಯ ಎಲ್ಲರ ಗಮನ ಸೆಳೆಯುತ್ತಿರುವ ಪ್ರಮುಖ ವಿಚಾರ ₹7,000 ಕೋಟಿ ಎಂಬ ಮೊತ್ತ. ಊರ್ವಶಿ ರೌಟೇಲಾ ಅವರ ತಂಡವು AI ಕಂಪನಿಯ ಬಳಕೆಯಿಂದ ಉಂಟಾಗಿದೆ ಎಂದು ಹೇಳಲಾಗುತ್ತಿರುವ ನಷ್ಟವನ್ನು ಈ ಮೊತ್ತದಲ್ಲಿ ಅಂದಾಜಿಸಿದೆ ಎನ್ನಲಾಗಿದೆ.

ಆದರೆ ಈ ಮೊತ್ತಕ್ಕೆ ಸಂಬಂಧಿಸಿದ ಅಂತಿಮ ಕಾನೂನು ತೀರ್ಪು ಅಥವಾ ನ್ಯಾಯಾಲಯದ ನಿರ್ಧಾರವೇನು ಎಂಬುದು ಪ್ರತ್ಯೇಕ ವಿಚಾರ. ಸದ್ಯಕ್ಕೆ ₹7,000 ಕೋಟಿ ಎಂಬುದು ನಟಿಯ ತಂಡದ ಹೇಳಿಕೆಯಲ್ಲಿ ಉಲ್ಲೇಖವಾಗಿರುವ ನಷ್ಟದ ಅಂದಾಜು ಎಂಬುದನ್ನು ಗಮನಿಸಬೇಕಾಗಿದೆ.

ಸಾಮಾಜಿಕ ಜಾಲತಾಣದಲ್ಲಿ ತಂಡದ ಹೇಳಿಕೆ

ವಿವಾದಕ್ಕೆ ಸಂಬಂಧಿಸಿದಂತೆ ಊರ್ವಶಿ ರೌಟೇಲಾ ಅವರ ತಂಡ ಸಾಮಾಜಿಕ ಮಾಧ್ಯಮದ ಮೂಲಕ ತಮ್ಮ ನಿಲುವನ್ನು ಬಹಿರಂಗಪಡಿಸಿದೆ. ಲಾಸ್ ಏಂಜಲೀಸ್ ಮೂಲದ AI ಕಂಪನಿಯ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲಾಗಿದ್ದು, ಅದನ್ನು ಮುಂದುವರಿಸಲಾಗುತ್ತಿದೆ ಎಂದು ತಂಡ ತಿಳಿಸಿದೆ.

ಕಂಪನಿಯು ನಟಿಯ ಹೆಸರು, ಫೋಟೋಗಳು ಮತ್ತು ವೀಡಿಯೊಗಳನ್ನು ಯಾವುದೇ ಸೂಚನೆ ಅಥವಾ ಅನುಮತಿಯಿಲ್ಲದೆ ಬಳಸಿಕೊಂಡಿದೆ ಎಂಬ ಆರೋಪವನ್ನು ತಂಡ ಪುನರುಚ್ಚರಿಸಿದೆ. ಇದರ ಮೂಲಕ ಕಂಪನಿಯು ದೊಡ್ಡ ಪ್ರಮಾಣದ ವಾಣಿಜ್ಯ ಪ್ರಯೋಜನ ಪಡೆದಿದೆ ಎಂಬುದು ಅವರ ಹೇಳಿಕೆಯಾಗಿದೆ.

AI ಕಂಪನಿಗಳಿಗೆ ಊರ್ವಶಿ ತಂಡದ ಸಂದೇಶ

ಈ ಪ್ರಕರಣದ ಮೂಲಕ ನಟಿಯ ತಂಡ AI ಕ್ಷೇತ್ರದಲ್ಲಿರುವ ಕಂಪನಿಗಳಿಗೆ ಒಂದು ಮಹತ್ವದ ಸಂದೇಶವನ್ನೂ ನೀಡಿದೆ. ಯಾವುದೇ ಸಂಸ್ಥೆ ತನ್ನದೇ ಆದ AI ತಂತ್ರಜ್ಞಾನ, ಬ್ರ್ಯಾಂಡ್ ಅಥವಾ ಏಜೆನ್ಸಿಯನ್ನು ನಿರ್ಮಿಸಿಕೊಳ್ಳಬಹುದು. ಆದರೆ ಮತ್ತೊಬ್ಬ ವ್ಯಕ್ತಿಯ ಹೆಸರು, ಫೋಟೋ, ವೀಡಿಯೊ ಅಥವಾ ಗುರುತನ್ನು ಬಳಸುವಾಗ ಸೂಕ್ತ ಅನುಮತಿ ಪಡೆಯುವುದು ಅಗತ್ಯ ಎಂಬ ನಿಲುವನ್ನು ತಂಡ ವ್ಯಕ್ತಪಡಿಸಿದೆ.

AI ತಂತ್ರಜ್ಞಾನ ವೇಗವಾಗಿ ಬೆಳೆಯುತ್ತಿರುವ ಸಂದರ್ಭದಲ್ಲಿ ಸೆಲೆಬ್ರಿಟಿಗಳ ಡಿಜಿಟಲ್ ಗುರುತು, ಫೋಟೋ ಮತ್ತು ವೀಡಿಯೊಗಳ ಬಳಕೆಯ ಕುರಿತ ಚರ್ಚೆಯೂ ಹೆಚ್ಚುತ್ತಿದೆ. ಇದೇ ಹಿನ್ನೆಲೆಯಲ್ಲಿ ಊರ್ವಶಿ ರೌಟೇಲಾ ಅವರ ತಂಡ ಮಾಡಿರುವ ಈ ಆರೋಪವೂ ಗಮನ ಸೆಳೆದಿದೆ.

ಸದ್ಯ ಪ್ರಕರಣ ಕಾನೂನು ಪ್ರಕ್ರಿಯೆಯಲ್ಲಿರುವುದರಿಂದ ಮುಂದಿನ ದಿನಗಳಲ್ಲಿ ಈ ವಿವಾದ ಯಾವ ತಿರುವು ಪಡೆಯಲಿದೆ ಎಂಬುದು ಕುತೂಹಲ ಮೂಡಿಸಿದೆ. ₹7,000 ಕೋಟಿ ನಷ್ಟದ ಅಂದಾಜು, AI ಕಂಪನಿಯ ವಿರುದ್ಧದ ಆರೋಪ ಮತ್ತು ಅನುಮತಿಯಿಲ್ಲದೆ ಡಿಜಿಟಲ್ ಕಂಟೆಂಟ್ ಬಳಕೆಯ ವಿಚಾರ—ಈ ಮೂರು ಅಂಶಗಳಿಂದಾಗಿ ಊರ್ವಶಿ ರೌಟೇಲಾ ಅವರ ಈ ಕಾನೂನು ವಿವಾದ ಬಾಲಿವುಡ್ ವಲಯದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.

ದೀಪಾವಳಿಗೂ ಮೊದಲೇ 'ರಾಮಾಯಣ' ಬಿಡುಗಡೆ; ಡೇಟ್‌ನಲ್ಲಿ ಮಹತ್ವದ ಬದಲಾವಣೆ ಆಗಿದ್ದು ಏಕೆ?!

Shriram Bhat — Wed, 30 Sep 2026 09:30:15 +0530

Change in Ramayana Release Date News to know here- ದೀಪಾವಳಿಗೂ ಮೊದಲೇ 'ರಾಮಾಯಣ' ಬಿಡುಗಡೆ; ಡೇಟ್‌ನಲ್ಲಿ ಮಹತ್ವದ ಬದಲಾವಣೆ ಆಗಿದ್ದು ಏಕೆ?!

ನಿತೇಶ್ ತಿವಾರಿ ನಿರ್ದೇಶನದ ಬಹುನಿರೀಕ್ಷಿತ ಪೌರಾಣಿಕ ಚಿತ್ರ ‘ರಾಮಾಯಣ’ ದಿನದಿಂದ ದಿನಕ್ಕೆ ಸಿನಿಪ್ರೇಕ್ಷಕರ ಕುತೂಹಲವನ್ನು ಮತ್ತಷ್ಟು ಹೆಚ್ಚಿಸುತ್ತಿದೆ. ಭಾರತೀಯ ಚಿತ್ರರಂಗದ ಅತ್ಯಂತ ದೊಡ್ಡ ಮತ್ತು ಮಹತ್ವಾಕಾಂಕ್ಷೆಯ ಸಿನಿಮಾಗಳಲ್ಲಿ ಒಂದಾಗಿ ಗಮನ ಸೆಳೆಯುತ್ತಿರುವ ಈ ಚಿತ್ರವನ್ನು ವಿಶ್ವಮಟ್ಟದಲ್ಲಿ ಪ್ರೇಕ್ಷಕರಿಗೆ ತಲುಪಿಸುವ ಉದ್ದೇಶದಿಂದ ನಿರ್ಮಾಪಕ ನಮಿತ್ ಮಲ್ಲೋತ್ರಾ ನೇತೃತ್ವದ ತಂಡ ಭರ್ಜರಿ ತಯಾರಿ ನಡೆಸುತ್ತಿದೆ. ಸಿನಿಮಾ ಘೋಷಣೆಯಾದ ದಿನದಿಂದಲೂ ಅದರ ಪಾತ್ರಗಳು, ದೃಶ್ಯ ವೈಭವ, ವಿಎಫ್‌ಎಕ್ಸ್ ಮತ್ತು ತಾಂತ್ರಿಕ ಕೆಲಸಗಳ ಬಗ್ಗೆ ಸಾಕಷ್ಟು ಚರ್ಚೆ ನಡೆಯುತ್ತಿದೆ.

ಸಾಮಾನ್ಯ ಪೌರಾಣಿಕ ಸಿನಿಮಾಗಳಂತೆ ‘ರಾಮಾಯಣ’ವನ್ನು ಭಾರತೀಯ ಮಾರುಕಟ್ಟೆಗೆ ಮಾತ್ರ ಸೀಮಿತಗೊಳಿಸುವ ಉದ್ದೇಶ ಚಿತ್ರತಂಡಕ್ಕಿಲ್ಲ ಎನ್ನಲಾಗುತ್ತಿದೆ. ಭಾರತೀಯ ಪುರಾಣದ ಈ ಮಹಾಕಾವ್ಯದ ಕಥೆಯನ್ನು ಜಾಗತಿಕ ಪ್ರೇಕ್ಷಕರಿಗೂ ಪರಿಚಯಿಸುವ ನಿಟ್ಟಿನಲ್ಲಿ ಸಿನಿಮಾದ ನಿರ್ಮಾಣದಲ್ಲಿ ಅಂತಾರಾಷ್ಟ್ರೀಯ ಮಟ್ಟದ ತಂತ್ರಜ್ಞಾನ ಮತ್ತು ವಿಎಫ್‌ಎಕ್ಸ್‌ ಬಳಕೆಗೆ ಹೆಚ್ಚಿನ ಒತ್ತು ನೀಡಲಾಗಿದೆ. ಹಲವು ವರ್ಷಗಳಿಂದ ಈ ಬೃಹತ್ ಯೋಜನೆಯ ಹಿಂದೆ ಕೆಲಸ ಮಾಡುತ್ತಿರುವ ನಿರ್ಮಾಪಕ ನಮಿತ್ ಮಲ್ಲೋತ್ರಾ, ಸಿನಿಮಾವನ್ನು ದೊಡ್ಡ ಪರದೆಯ ಮೇಲೆ ಅದ್ಧೂರಿಯಾಗಿ ಕಟ್ಟಿಕೊಡಲು ಸಿದ್ಧತೆ ನಡೆಸಿದ್ದಾರೆ.

ಇತ್ತೀಚೆಗೆ ಚಿತ್ರದ ಪ್ರಮುಖ ಪಾತ್ರಗಳ ಪೋಸ್ಟರ್‌ಗಳು ಬಿಡುಗಡೆಯಾಗಿ ಅಭಿಮಾನಿಗಳ ಗಮನ ಸೆಳೆದಿದ್ದವು. ಅದರ ಬೆನ್ನಲ್ಲೇ ಸಿನಿಮಾದ ಹಾಡುಗಳೂ ಪ್ರೇಕ್ಷಕರ ಮುಂದೆ ಬಂದಿದ್ದು, ಹಾಡುಗಳಲ್ಲಿ ಕಾಣಿಸಿಕೊಂಡಿರುವ ಸೆಟ್‌ಗಳು, ಪಾತ್ರಗಳ ಲುಕ್ ಮತ್ತು ದೃಶ್ಯ ವೈಭವ ಸಿನಿರಸಿಕರಲ್ಲಿ ನಿರೀಕ್ಷೆ ಹೆಚ್ಚಿಸಿವೆ. ವಿಶೇಷವಾಗಿ ವಿಎಫ್‌ಎಕ್ಸ್ ಕೆಲಸದ ಗುಣಮಟ್ಟದ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ ನಡೆಯುತ್ತಿದೆ.

ನವೆಂಬರ್ 6 ಬದಲು ನವೆಂಬರ್ 5ಕ್ಕೆ ಬರಲಿದೆಯೇ ‘ರಾಮಾಯಣ’?

ಈಗ ‘ರಾಮಾಯಣ’ ಸಿನಿಮಾದ ಬಿಡುಗಡೆ ದಿನಾಂಕದ ಕುರಿತು ಹೊಸದೊಂದು ಸುದ್ದಿ ಸದ್ದು ಮಾಡುತ್ತಿದೆ. ಈ ಹಿಂದೆ ಸಿನಿಮಾ ನವೆಂಬರ್ 6ರಂದು ಚಿತ್ರಮಂದಿರಗಳಿಗೆ ಬರಲಿದೆ ಎಂಬ ಮಾಹಿತಿ ಹರಿದಾಡಿತ್ತು. ಆದರೆ ಇದೀಗ ಬಿಡುಗಡೆಯನ್ನು ಒಂದು ದಿನ ಮುಂಚಿತವಾಗಿ, ಅಂದರೆ ನವೆಂಬರ್ 5ಕ್ಕೆ ನಿಗದಿಪಡಿಸುವ ಸಾಧ್ಯತೆ ಇದೆ ಎಂಬ ವರದಿಗಳು ಕೇಳಿಬರುತ್ತಿವೆ.

ಮೂಲವೊಂದನ್ನು ಉಲ್ಲೇಖಿಸಿರುವ ವರದಿಯ ಪ್ರಕಾರ, ನವೆಂಬರ್ 5ರಂದು ಚಿತ್ರವನ್ನು ಬಿಡುಗಡೆ ಮಾಡುವ ವಿಚಾರದಲ್ಲಿ ಸಂಬಂಧಪಟ್ಟವರ ನಡುವೆ ಬಹುತೇಕ ಒಮ್ಮತ ಮೂಡಿದೆ ಎನ್ನಲಾಗಿದೆ. ಆದರೆ ಈ ಕುರಿತು ಇನ್ನೂ ಅಂತಿಮ ಅನುಮೋದನೆ ದೊರೆಯಬೇಕಿದ್ದು, ಅಧಿಕೃತ ಘೋಷಣೆಯನ್ನು ಚಿತ್ರತಂಡವೇ ಮಾಡಬೇಕಿದೆ. ಹೀಗಾಗಿ ಸದ್ಯಕ್ಕೆ ನವೆಂಬರ್ 5 ಎಂಬ ದಿನಾಂಕವನ್ನು ಖಚಿತ ಎಂದು ಪರಿಗಣಿಸುವಂತಿಲ್ಲ.

ಭಾರತ-ವಿದೇಶಗಳಲ್ಲಿ ಒಂದೇ ದಿನ ಸಿನಿಮಾ?

‘ರಾಮಾಯಣ’ ಚಿತ್ರದ ಬಿಡುಗಡೆಗೆ ಸಂಬಂಧಿಸಿದಂತೆ ಮತ್ತೊಂದು ಕುತೂಹಲಕಾರಿ ವಿಚಾರವೂ ಹೊರಬಿದ್ದಿದೆ. ಭಾರತದಲ್ಲಿ ಮಾತ್ರವಲ್ಲದೆ ವಿದೇಶಗಳಲ್ಲಿಯೂ ಒಂದೇ ದಿನ ಸಿನಿಮಾವನ್ನು ಬಿಡುಗಡೆ ಮಾಡುವ ಯೋಜನೆಯನ್ನು ನಿರ್ಮಾಪಕರು ಹೊಂದಿದ್ದಾರೆ ಎನ್ನಲಾಗುತ್ತಿದೆ. ಈ ಯೋಜನೆ ಜಾರಿಯಾದರೆ, ವಿಶ್ವದ ವಿವಿಧ ಭಾಗಗಳಲ್ಲಿರುವ ಭಾರತೀಯ ಸಿನಿಪ್ರೇಕ್ಷಕರು ಒಂದೇ ದಿನ ರಾಮಾಯಣದ ಕಥೆಯನ್ನು ದೊಡ್ಡ ಪರದೆಯ ಮೇಲೆ ವೀಕ್ಷಿಸುವ ಅವಕಾಶ ಪಡೆಯಲಿದ್ದಾರೆ.

ಈ ಹಿಂದೆ ವಿದೇಶಗಳಲ್ಲಿ ಸಿನಿಮಾ ಭಾರತಕ್ಕಿಂತ ಎರಡು ದಿನ ಮುಂಚಿತವಾಗಿ ಬಿಡುಗಡೆಯಾಗಬಹುದು ಎಂಬ ಮಾತುಗಳು ಕೇಳಿಬಂದಿದ್ದವು. ಆದರೆ ಇದೀಗ ಭಾರತ ಮತ್ತು ವಿದೇಶಗಳಲ್ಲಿ ಏಕಕಾಲಿಕ ಬಿಡುಗಡೆಯತ್ತ ಚಿತ್ರತಂಡ ಗಮನ ಹರಿಸಿದೆ ಎನ್ನಲಾಗಿದೆ. ಈ ಕುರಿತೂ ಅಂತಿಮ ನಿರ್ಧಾರ ಹೊರಬಂದ ಬಳಿಕವಷ್ಟೇ ಅಧಿಕೃತ ಚಿತ್ರಣ ಸಿಗಲಿದೆ.

ಈಗಾಗಲೇ ಶುರುವಾಗಿದೆ ಭರ್ಜರಿ ಪ್ರಚಾರ

ಚಿತ್ರದ ಪ್ರಮುಖ ಪಾತ್ರಗಳ ಪೋಸ್ಟರ್‌ಗಳನ್ನು ಬಿಡುಗಡೆ ಮಾಡುವ ಮೂಲಕ ‘ರಾಮಾಯಣ’ ತಂಡ ಪ್ರಚಾರಕ್ಕೆ ಚಾಲನೆ ನೀಡಿದೆ. ಸಿನಿಮಾ ಬಿಡುಗಡೆಯಾಗಲು ಇನ್ನೂ ಸಮಯವಿದ್ದರೂ, ಈಗಿನಿಂದಲೇ ಚಿತ್ರದ ಬಗ್ಗೆ ದೊಡ್ಡ ಮಟ್ಟದ ಚರ್ಚೆ ಆರಂಭವಾಗಿದೆ. ಭಾರತ ಮಾತ್ರವಲ್ಲದೆ ವಿದೇಶಗಳಲ್ಲಿಯೂ ಪ್ರಚಾರ ನಡೆಸಲು ತಂಡ ಸಿದ್ಧತೆ ಮಾಡಿಕೊಳ್ಳುತ್ತಿದೆ ಎನ್ನಲಾಗುತ್ತಿದೆ.

ಚಿತ್ರದ ತಾರಾಗಣವೂ ಅಭಿಮಾನಿಗಳ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದೆ. ರಣಬೀರ್ ಕಪೂರ್ ರಾಮನ ಪಾತ್ರದಲ್ಲಿ ಕಾಣಿಸಿಕೊಂಡರೆ, ಸಾಯಿ ಪಲ್ಲವಿ ಸೀತೆಯಾಗಿ ನಟಿಸುತ್ತಿದ್ದಾರೆ. ಕನ್ನಡದ ಜನಪ್ರಿಯ ನಟ ಯಶ್ ರಾವಣನ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವುದು ಸಿನಿಮಾದ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾಗಿದೆ. ರವಿ ದುಬೆ ಲಕ್ಷ್ಮಣನ ಪಾತ್ರವನ್ನು ನಿರ್ವಹಿಸುತ್ತಿದ್ದಾರೆ.

ಹೀಗಾಗಿ ‘ರಾಮಾಯಣ’ ತೆರೆಗೆ ಬರುವ ದಿನಕ್ಕಾಗಿ ಸಿನಿಪ್ರೇಕ್ಷಕರು ಕಾತರದಿಂದ ಕಾಯುತ್ತಿದ್ದಾರೆ. ಅದರಲ್ಲೂ ಸಿನಿಮಾ ನವೆಂಬರ್ 5ರಂದು ಬಿಡುಗಡೆಯಾಗಲಿದೆಯೇ ಅಥವಾ ಈ ಹಿಂದೆ ಹೇಳಲಾಗಿದ್ದ ನವೆಂಬರ್ 6ರಂದೇ ಚಿತ್ರಮಂದಿರಗಳಿಗೆ ಬರಲಿದೆಯೇ ಎಂಬ ಪ್ರಶ್ನೆ ಸದ್ಯ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ. ಬಿಡುಗಡೆ ದಿನಾಂಕದ ಬಗ್ಗೆ ಅಂತಿಮ ಸ್ಪಷ್ಟನೆ ಸಿಗಬೇಕಾದರೆ ಚಿತ್ರತಂಡದ ಅಧಿಕೃತ ಘೋಷಣೆಯವರೆಗೆ ಕಾಯಲೇಬೇಕಾಗಿದೆ. ಆದರೆ ಒಂದು ಸಂಗತಿ ಮಾತ್ರ ಸ್ಪಷ್ಟ—ಸಿನಿಮಾ ತೆರೆಗೆ ಬರುವ ಮುನ್ನವೇ ‘ರಾಮಾಯಣ’ದ ಸುತ್ತಲಿನ ನಿರೀಕ್ಷೆ ದಿನದಿಂದ ದಿನಕ್ಕೆ ಮತ್ತಷ್ಟು ಗರಿಗೆದರಿದೆ.

ಫಹಾದ್ ಅಹ್ಮದ್ ಜೊತೆ ಮದ್ವೆಗೂ ಮುನ್ನವೇ ಎರಡು ಬಾರಿ ಗರ್ಭಧಾರಣೆ: ಆ ರಹಸ್ಯ ತೆರೆದಿಟ್ಟ Swara Bhasker

Suchethana D — Tue, 29 Sep 2026 22:47:48 +0530

ಮುಂಬೈ: ನಟಿಯಾಗಿದ್ದ ಸ್ವರಾ ಭಾಸ್ಕರ್ ಈಗ ಸಮಾಜವಾದಿ ಪಕ್ಷದ ನಾಯಕ ಫಹಾದ್ ಝಿರಾರ್ ಅಹ್ಮದ್ ಪತ್ನಿ ಎನ್ನುವುದು ಎಲ್ಲರಿಗೂ ತಿಳಿದಿರುವ ವಿಷಯವೇ. ಹೆಣ್ಣುಮಕ್ಕಳ ರಕ್ಷಣೆ, ಅವರ ಸ್ವಾತಂತ್ರ, ಹೆಣ್ಣುಮಕ್ಕಳ ಶಿಕ್ಷಣದ ಬಗ್ಗೆ ಹೋರಾಟ ಎಂದೆಲ್ಲಾ ಭಾಷಣ ಬೀಗುತ್ತಾ ಹೆಸರು ಗಿಟ್ಟಿಸಿಕೊಂಡಾಕೆ, ಮದುವೆಯಾದ ಬಳಿಕ ಸ್ತ್ರೀ ಶಿಕ್ಷಣದ ವಿರೋಧಿ ಎಂದೇ ಫೇಮಸ್ ಆಗಿರುವ ಮೌಲಾನಾ ಸಜ್ಜದ್ ನೊಮಾನಿ ಅವರನ್ನು ಭೇಟಿಯಾಗಿ ಅವರ ಬಗ್ಗೆ ಹಾಡಿ ಕೊಂಡಾಡಿದ್ದರು. ಇದರಿಂದ ಸಾಕಷ್ಟು ಟ್ರೋಲ್ಗೆ ಒಳಗಾಗುತ್ತಲೇ ಇದ್ದಾರೆ. ನಾನು ಜಾತ್ಯಾತೀತದಲ್ಲಿ ನಂಬಿಕೆ ಇಟ್ಟವಳು. ಭಾರತದ ಸಂವಿಧಾನದಲ್ಲಿ ನಂಬಿಕೆ ಇಟ್ಟವಳು ಎಂದು ಭಾಷಣ ಮಾಡಿದ್ದ ಸ್ವರಾ, ನಟಿಯಾಗಿದ್ದ ಸಂದರ್ಭದಲ್ಲಿ ಬಹುತೇಕ ನಗ್ನ ಆಗಿದ್ದರ ವಿಡಿಯೋಗಳು ಶೇರ್ ಆಗಿದ್ದವು. ಕೇಂದ್ರ ಸರ್ಕಾರದ ವಿರುದ್ಧ ನಡೆಯುತ್ತಿದ್ದ ಸಿಎಎ ವಿರೋಧ ಪ್ರತಿಭಟನೆಯಲ್ಲಿ ಮುಂಚೂಣಿ ವಹಿಸಿದ್ದ ಸ್ವರಾ ಅವರು, ನನ್ನ ಬಳಿ ಆಧಾರ್ ಕಾರ್ಡ್ ಇಲ್ಲ, ಪಾಸ್‌ಪೋರ್ಟ್ ಇಲ್ಲ, ರೇಷನ್‌ ಕಾರ್ಡ್ ಇಲ್ಲ, ಅಡ್ರೆಸ್‌ ಪ್ರೂಫ್‌ ಇಲ್ಲ, ಹುಟ್ಟಿದ ಪ್ರಮಾಣ ಪತ್ರ ಇಲ್ಲ... ಎನ್ನುವ ಮೂಲಕ ಮತ್ತಷ್ಟು ಟೀಕೆ ಎದುರಿಸಿದ್ದರು.

ಇಂತಿಪ್ಪ ಸ್ವರಾ ಭಾಸ್ಕರ್ ಇದೀಗ ಮದುವೆಗೂ ಮುನ್ನ ಎರಡು ಬಾರಿ ವಿಫಲ ಗರ್ಭಧಾರಣೆ ಮಾಡಿರುವ ಬಗ್ಗೆ ಓಪನ್ ಆಗಿ ಮಾತನಾಡಿದ್ದಾರೆ. ವೀರೇಂದ್ರ ಸೆಹ್ವಾಗ್ ನಡೆಸಿಕೊಡುವ "ರೈಸ್ ಅಂಡ್ ಫಾಲ್ 2" ರಿಯಾಲಿಟಿ ಶೋನಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಸಮಯದಲ್ಲಿ ನಡೆದ ಸಂದರ್ಶನದಲ್ಲಿ ಸ್ವರಾ ಮದುವೆಗೆ ಮೊದಲು ತಾಯಿಯಾಗಲು ಬಯಸಿದ್ದರು ಮತ್ತು ಎರಡು ಬಾರಿ ಪ್ರಯತ್ನಿಸಿದ್ದರು ಎನ್ನುವುದನ್ನು ಬಹಿರಂಗಪಡಿಸಿದ್ದಾರೆ. ಸ್ವರಾ ಭಾಸ್ಕರ್ ಒಂದು ಹಂತದಲ್ಲಿ, ತಾನು ಮದುವೆಯಾಗುವುದಿಲ್ಲ ಎಂದು ಒಪ್ಪಿಕೊಂಡಿದ್ದೆ, ಆದರೆ ತಾನು ಯಾವಾಗಲೂ ದೃಢನಿಶ್ಚಯದಿಂದ ಇದ್ದೆ ಎಂದು ವಿವರಿಸಿದರು.

ತಾಯಿಯಾಗಲು ಬಯಸಿದ್ದೆ

ನಾನು ತಾಯಿಯಾಗಲು ಬಯಸಿದ್ದೆ. ಆದ್ದರಿಂದ, ಮದುವೆಯವರೆಗೆ ಕಾಯುವ ಬದಲು, ತನ್ನದೇ ಆದ ನಿಯಮಗಳ ಮೇಲೆ ತಾಯ್ತನವನ್ನು ಅನುಭವಿಸಲು ನಿರ್ಧರಿಸಿದೆ. ಅನಾಮಧೇಯ ದಾನಿಯನ್ನು ಬಳಸಿಕೊಂಡು ಐವಿಎಫ್ ಮೂಲಕ ಗರ್ಭಧರಿಸಲು ಎರಡು ಬಾರಿ ಪ್ರಯತ್ನಿಸಿದೆ ಎಂದು ಸ್ವರಾ ಬಹಿರಂಗಪಡಿಸಿದರು, ಆದರೆ ಅದು ಕಾರ್ಯರೂಪಕ್ಕೆ ಬರಲಿಲ್ಲ ಎಂದರು. ಸ್ವರಾ ಭಾಸ್ಕರ್ ಅವರು ತಮ್ಮ ಪೋಷಕರೊಂದಿಗೆ ಐವಿಎಫ್ ಮೂಲಕ ಗರ್ಭಧರಿಸುವ ಸಾಧ್ಯತೆಯ ಬಗ್ಗೆ ಚರ್ಚಿಸಿದ್ದಾಗಿ ಬಹಿರಂಗಪಡಿಸಿದರು ಮತ್ತು ಅವರು ಸಿದ್ಧರಿದ್ದರು. ಸ್ವರಾ ಹೇಳುತ್ತಾರೆ, "ನಾನು ಐವಿಎಫ್‌ಗೆ ಸಿದ್ಧನಾಗಿದ್ದೆ. ನಾನು ನನ್ನ ಪೋಷಕರನ್ನು ಸಹ ಮನವೊಲಿಸಿದ್ದೆ. 'ನಾನು ಮದುವೆಯಾಗುತ್ತಿಲ್ಲ, ಐವಿಎಫ್ ಮೂಲಕ ಮಗುವನ್ನು ಪಡೆಯುತ್ತೇನೆ' ಎಂದು ನಾನು ಭಾವಿಸಿದೆ. ಮೊದಲಿಗೆ, ಅವರು ಅದರ ಬಗ್ಗೆ ಕೇಳಿ ಆಘಾತಕ್ಕೊಳಗಾದರು, ಆದರೆ ನಂತರ ನನ್ನ ಬಡ ಪೋಷಕರು ತುಂಬಾ ಸಿಹಿಯಾದ ಜನರು. ಅವರು, 'ಸರಿ' ಎಂದರು ಎಂದಿದ್ದಾರೆ.

ಎರಡು ಬಾರಿ ಪ್ರಯತ್ನ

ಫಹಾದ್ ಅಹ್ಮದ್ ಅವರನ್ನು ಮದುವೆಯಾಗುವ ಮೊದಲು, ಅವರು ಐವಿಎಫ್ ಮೂಲಕ ಎರಡು ಬಾರಿ ಪ್ರಯತ್ನಿಸಿದ್ದರು ಎಂದು ಸ್ವರಾ ಬಹಿರಂಗಪಡಿಸಿದರು. "ನಾನು ಅನಾಮಧೇಯ ದಾನಿಯೊಂದಿಗೆ ಐವಿಎಫ್ ಮೂಲಕ ಎರಡು ಬಾರಿ ಪ್ರಯತ್ನಿಸಿದೆ, ಆದರೆ ಅದು ಕಾರ್ಯರೂಪಕ್ಕೆ ಬರಲಿಲ್ಲ" ಎಂದು ಸ್ವರಾ ಹೇಳಿದರು.

'ಮೈಸಾ' ಸಿನಿಮಾಗೆ ರಶ್ಮಿಕಾ ಮಂದಣ್ಣ ಆಯ್ಕೆ ಹಿಂದಿರೋ ಸೀಕ್ರೆಟ್ ಹೊರಬಿತ್ತು! 'ಸೀತಾ ರಾಮಂ'ಗೆ ಟೈಂ-ಟ್ರಾವೆಲ್ ಮಾಡ್ಬೇಕು!

Shriram Bhat — Tue, 29 Sep 2026 19:23:19 +0530

Rashmika Mandanna selection for Mysaa movie Secret Revealed: ರಶ್ಮಿಕಾ ಮಂದಣ್ಣ ಅಭಿನಯದ ಸಿನಿಮಾಗಳು ಸತತವಾಗಿ ತೆರೆಗೆ ಬರುತ್ತಿವೆ. ಇತ್ತೀಚೆಗೆ ಶಾಹಿದ್ ಕಪೂರ್ ಹಾಗೂ ಕೃತಿ ಸನನ್ ಜೊತೆಗೆ ನಟಿಸಿದ್ದ ‘ಕಾಕ್‌ಟೇಲ್ 2’ ಸಿನಿಮಾ ಜೂನ್‌ನಲ್ಲಿ ಬಿಡುಗಡೆಯಾಗಿತ್ತು. ಇದೀಗ ಪತಿ ವಿಜಯ್ ದೇವರಕೊಂಡ ಜೊತೆಗೆ ನಟಿಸಿರುವ ‘ರಣಬಾಲಿ’ ಸಿನಿಮಾ ಬಿಡುಗಡೆಯ ನಿರೀಕ್ಷೆ ಹೆಚ್ಚಿಸಿದೆ. ಇದರ ಬೆನ್ನಲ್ಲೇ ರಶ್ಮಿಕಾ ನಟಿಸಿರುವ ವಿಭಿನ್ನ ಹಾಗೂ ಮೊದಲ ಆಕ್ಷನ್ ಸಿನಿಮಾ ‘ಮೈಸಾ’ ಕೂಡ ಪ್ರೇಕ್ಷಕರ ಮುಂದೆ ಬರಲು ಸಜ್ಜಾಗಿದೆ.

‘ಮೈಸಾ’ ಸಿನಿಮಾವನ್ನು ನಿರ್ದೇಶಿಸಿರುವ ರವೀಂದ್ರ ಪುಲ್ಲೆ ಇದೀಗ ಸಿನಿಮಾ ಮತ್ತು ರಶ್ಮಿಕಾ ಆಯ್ಕೆಯ ಹಿಂದಿನ ಕುತೂಹಲಕಾರಿ ಸಂಗತಿಯನ್ನು ಹಂಚಿಕೊಂಡಿದ್ದಾರೆ. ಇತ್ತೀಚಿನ ಸಂದರ್ಶನವೊಂದರಲ್ಲಿ ಮಾತನಾಡಿದ ಅವರು, ರಶ್ಮಿಕಾ ಅವರನ್ನು ‘ಮೈಸಾ’ ಸಿನಿಮಾಕ್ಕೆ ನಾಯಕಿಯಾಗಿ ಆಯ್ಕೆ ಮಾಡಲು ಪ್ರಮುಖ ಕಾರಣ ‘ಸೀತಾ ರಾಮಂ’ ಸಿನಿಮಾ ಎಂದು ಹೇಳಿದ್ದಾರೆ.

ದುಲ್ಕರ್ ಸಲ್ಮಾನ್ ಮತ್ತು ಮೃಣಾಲ್ ಠಾಕೂರ್ ಅಭಿನಯದ ‘ಸೀತಾ ರಾಮಂ’ ಸಿನಿಮಾದಲ್ಲಿ ರಶ್ಮಿಕಾ ಕೂಡ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇದೇ ಸಿನಿಮಾದಲ್ಲಿ ರವೀಂದ್ರ ಪುಲ್ಲೆ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದರು. ಅಷ್ಟೇ ಅಲ್ಲದೆ, ಸಹಾಯಕ ಸಂಭಾಷಣೆಕಾರ ಹಾಗೂ ಸೆಕೆಂಡ್ ಯೂನಿಟ್ ನಿರ್ದೇಶಕರಾಗಿಯೂ ಅವರು ಜವಾಬ್ದಾರಿ ನಿರ್ವಹಿಸಿದ್ದರಂತೆ.

‘ಸೀತಾ ರಾಮಂ’ ಚಿತ್ರೀಕರಣದ ಸಮಯದಲ್ಲಿ ರಶ್ಮಿಕಾ ನಟಿಸಿದ್ದ ಕೆಲವು ದೃಶ್ಯಗಳ ಚಿತ್ರೀಕರಣವನ್ನು ರವೀಂದ್ರ ಅವರೇ ನಿರ್ದೇಶಿಸಿದ್ದರು. ಈ ಸಂದರ್ಭದಲ್ಲಿ ಇಬ್ಬರ ನಡುವೆ ಉತ್ತಮ ಸ್ನೇಹ ಬೆಳೆದಿತ್ತು. ರಶ್ಮಿಕಾ ಅವರ ಕಣ್ಣುಗಳು ತಮಗೆ ಬಹಳ ಇಷ್ಟ ಎಂದು ಹೇಳಿರುವ ರವೀಂದ್ರ, ಅಂದೇ ತಮ್ಮ ಮನಸ್ಸಿನಲ್ಲಿದ್ದ ಮಾತೊಂದನ್ನು ನಟಿಗೆ ಹೇಳಿದ್ದರಂತೆ.

‘ನನ್ನ ಮೊದಲ ಸಿನಿಮಾಕ್ಕೆ ನೀವೇ ನಾಯಕಿಯಾಗಬೇಕು’ ಎಂದು ರಶ್ಮಿಕಾ ಬಳಿ ರವೀಂದ್ರ ಹೇಳಿದ್ದರಂತೆ. ಇದೀಗ ಆ ಮಾತು ನಿಜವಾಗಿದ್ದು, ತಮ್ಮ ಚೊಚ್ಚಲ ನಿರ್ದೇಶನದ ‘ಮೈಸಾ’ ಸಿನಿಮಾಕ್ಕೆ ರಶ್ಮಿಕಾರನ್ನೇ ನಾಯಕಿಯಾಗಿ ಆಯ್ಕೆ ಮಾಡಿಕೊಂಡಿದ್ದಾರೆ. ಹೀಗಾಗಿ ಈ ಸಿನಿಮಾ ಕೇವಲ ಮತ್ತೊಂದು ಚಿತ್ರವಾಗಿರದೆ, ‘ಸೀತಾ ರಾಮಂ’ ಸಮಯದಲ್ಲಿ ಹುಟ್ಟಿದ ವೃತ್ತಿಪರ ನಂಟಿನ ಮುಂದುವರಿಕೆಯೂ ಆಗಿದೆ.

ಇನ್ನು ‘ಮೈಸಾ’ ಟೀಸರ್ ಬಿಡುಗಡೆಯಾದ ಬಳಿಕ ರಶ್ಮಿಕಾ ಅವರ ಲುಕ್ ಮತ್ತು ಪಾತ್ರದ ಬಗ್ಗೆ ಭಾರೀ ಚರ್ಚೆ ನಡೆಯುತ್ತಿದೆ. ಇದುವರೆಗೆ ರಶ್ಮಿಕಾರನ್ನು ಹೆಚ್ಚಾಗಿ ಕ್ಯೂಟ್ ಹಾಗೂ ಗ್ಲಾಮರಸ್ ಪಾತ್ರಗಳಲ್ಲಿ ನೋಡಿದ್ದ ಅಭಿಮಾನಿಗಳಿಗೆ, ಕೈಯಲ್ಲಿ ಕತ್ತಿ ಹಿಡಿದು ಹಿಂಸಾತ್ಮಕ ಆಕ್ಷನ್ ಸನ್ನಿವೇಶಗಳಲ್ಲಿ ಕಾಣಿಸಿಕೊಂಡಿರುವ ಅವರ ಹೊಸ ಅವತಾರ ಅಚ್ಚರಿ ಮೂಡಿಸಿದೆ. ಟೀಸರ್‌ನಲ್ಲಿ ರಶ್ಮಿಕಾ ಪಾತ್ರ ಸಾಕಷ್ಟು ರಗಡ್ ಆಗಿ ಕಾಣಿಸಿಕೊಂಡಿದ್ದು, ಸಿನಿಮಾ ಹೇಗಿರಲಿದೆ ಎಂಬ ಕುತೂಹಲ ಹೆಚ್ಚಿಸಿದೆ.

ರಶ್ಮಿಕಾ ಅವರ ಸಿನಿಮಾ ಲೈನ್‌ಅಪ್ ಕೂಡ ಸದ್ಯ ಸಾಕಷ್ಟು ದೊಡ್ಡದಾಗಿದೆ. ವಿಜಯ್ ದೇವರಕೊಂಡ ಜೊತೆಗಿನ ‘ರಣಬಾಲಿ’ ಬಳಿಕ ‘ಮೈಸಾ’ ಬಿಡುಗಡೆಯಾಗಲಿದೆ. ಅಲ್ಲು ಅರ್ಜುನ್ ಜೊತೆಗಿನ ‘ರಾಕಾ’ ಸಿನಿಮಾದಲ್ಲಿ ಅವರು ವಿಲನ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗುತ್ತಿದೆ. ಇದರ ಜೊತೆಗೆ ಹಿಂದಿಯಲ್ಲಿ ಇನ್ನೂ ಎರಡು ಸಿನಿಮಾಗಳಿಗೂ ಅವರು ಸಹಿ ಹಾಕಿದ್ದಾರೆ.

ಅಷ್ಟೇ ಅಲ್ಲದೆ, ಖ್ಯಾತ ಗಾಯಕಿ ಎಂ.ಎಸ್. ಸುಬ್ಬಲಕ್ಷ್ಮಿ ಅವರ ಜೀವನ ಆಧಾರಿತ ಸಿನಿಮಾದಲ್ಲೂ ರಶ್ಮಿಕಾ ನಟಿಸುತ್ತಿದ್ದಾರೆ. ತಮಿಳಿನಲ್ಲಿ ಅಜಿತ್ ನಟನೆಯ ಮುಂಬರುವ ಸಿನಿಮಾದಲ್ಲೂ ನಾಯಕಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ ಎಂಬ ಸುದ್ದಿ ಇದೆ. ಹೀಗಾಗಿ ವಿಭಿನ್ನ ಭಾಷೆ, ವಿಭಿನ್ನ ಪಾತ್ರ ಹಾಗೂ ವಿಭಿನ್ನ ಜಾನರ್‌ಗಳ ಮೂಲಕ ರಶ್ಮಿಕಾ ತಮ್ಮ ಸಿನಿ ಪಯಣವನ್ನು ಮತ್ತಷ್ಟು ವಿಸ್ತರಿಸುತ್ತಿದ್ದಾರೆ.

'ತುಂಬಾ ಕ್ಲಾಸಿಸ್ಟ್.. ಹೀಗಾದರೆ ಸಿನಿಮಾಗಳನ್ನು ಯಾರು ನೋಡುತ್ತಾರೆ?' ಎಂದಿದ್ದಾರೆ 'ಟೀನ್ ಕೌವೆ' ನಟಿ!

Shriram Bhat — Tue, 29 Sep 2026 18:51:18 +0530

ಇಂದಿನ ಮಲ್ಟಿಪ್ಲೆಕ್ಸ್‌ಗಳ ವಾತಾವರಣವೇ ಕೆಲವರಿಗೆ ಅಪರಿಚಿತ ಅಥವಾ ಅಸೌಕರ್ಯದ ಅನುಭವ ನೀಡುತ್ತದೆ ಎಂದು ಫಾತಿಮಾ ಅಭಿಪ್ರಾಯಪಟ್ಟಿದ್ದಾರೆ. ತಾವು ಆ ಸ್ಥಳಕ್ಕೆ ಹೊಂದಿಕೆಯಾಗುವುದಿಲ್ಲ ಎಂಬ ಭಾವನೆಯಿಂದ ಕೆಲವರು ಚಿತ್ರಮಂದಿರಕ್ಕೆ ಹೋಗಲು ಹಿಂಜರಿಯುತ್ತಾರೆ. ಇಂತಹ ಪರಿಸ್ಥಿತಿಯಲ್ಲಿ ಹೀಗೆ ಮಾಡಿದರೆ?

Fatima Sana Shaikh talk about Entertainment tax hike: ಮುಂಬೈನಲ್ಲಿ ಸಿನಿಮಾ ನೋಡಲು ಹೋಗುವ ಪ್ರೇಕ್ಷಕರಿಗೆ ಶೀಘ್ರದಲ್ಲೇ ಖರ್ಚು ಮತ್ತಷ್ಟು ಹೆಚ್ಚಾಗಲಿದೆಯೇ? ಬೃಹನ್‌ಮುಂಬೈ ಮುನ್ಸಿಪಲ್ ಕಾರ್ಪೊರೇಷನ್ (BMC) ಏರ್‌ಕಂಡೀಷನ್ಡ್ ಚಿತ್ರಮಂದಿರಗಳು ಮತ್ತು ಮಲ್ಟಿಪ್ಲೆಕ್ಸ್‌ಗಳ ಮೇಲಿನ ಸ್ಥಳೀಯ ಮನರಂಜನಾ ತೆರಿಗೆಯನ್ನು ಶೇ.570ರಷ್ಟು ಹೆಚ್ಚಿಸುವ ಪ್ರಸ್ತಾಪ ಮುಂದಿಟ್ಟಿರುವುದು ಇದೀಗ ಬಾಲಿವುಡ್‌ನಲ್ಲಿ ಚರ್ಚೆಗೆ ಕಾರಣವಾಗಿದೆ. ಈ ಪ್ರಸ್ತಾಪದ ಬಗ್ಗೆ ನಟಿ ಫಾತಿಮಾ ಸನಾ ಶೇಖ್ ಕೂಡ ತಮ್ಮ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

NDTV Yuva 2026 ಕಾರ್ಯಕ್ರಮದಲ್ಲಿ ಮಾತನಾಡಿದ ಫಾತಿಮಾ, ಈಗಾಗಲೇ ಚಿತ್ರಮಂದಿರದಲ್ಲಿ ಸಿನಿಮಾ ನೋಡುವುದು ಸಾಮಾನ್ಯ ಕುಟುಂಬಕ್ಕೆ ದುಬಾರಿ ಅನುಭವವಾಗುತ್ತಿದೆ ಎಂದು ಹೇಳಿದ್ದಾರೆ. ತೆರಿಗೆ ಹೆಚ್ಚಳದಿಂದ ಟಿಕೆಟ್ ಸೇರಿದಂತೆ ಒಟ್ಟಾರೆ ಸಿನಿಮಾ ವೀಕ್ಷಣೆಯ ಖರ್ಚು ಮತ್ತಷ್ಟು ಹೆಚ್ಚಾದರೆ, ಜನರು ಚಿತ್ರಮಂದಿರಗಳತ್ತ ಬರುವುದೇ ಕಡಿಮೆಯಾಗಬಹುದು ಎಂಬ ಆತಂಕವನ್ನು ಅವರು ವ್ಯಕ್ತಪಡಿಸಿದ್ದಾರೆ.

“ಹೀಗಾದರೆ ಸಿನಿಮಾಗಳನ್ನು ಯಾರು ನೋಡುತ್ತಾರೆ? ಈಗಾಗಲೇ ಯಾರೂ ಸಿನಿಮಾ ನೋಡುತ್ತಿಲ್ಲ. ಸಿನಿಮಾ ನೋಡಲು ಹೋಗಬೇಕೆಂದರೆ ಸುಲಭವಾಗಿ 2,000ರಿಂದ 3,000 ರೂಪಾಯಿ ಖರ್ಚಾಗುತ್ತದೆ. ಪಾಪ್‌ಕಾರ್ನ್ ಒಂದಕ್ಕೇ 1,000 ರೂಪಾಯಿ ಆಗಿರುತ್ತದೆ. ಯಾರು ತಿನ್ನುತ್ತಾರೆ? ಹತ್ತು ಬಾರಿ ಯೋಚಿಸಬೇಕಾಗುತ್ತದೆ,” ಎಂದು ಫಾತಿಮಾ ಹೇಳಿದ್ದಾರೆ.

ಸಿನಿಮಾ ಟಿಕೆಟ್‌ಗಳ ಬೆಲೆಯೂ ಈಗಾಗಲೇ ಸುಮಾರು 700ರಿಂದ 800 ರೂಪಾಯಿ ಅಥವಾ ಅದಕ್ಕಿಂತ ಹೆಚ್ಚಾಗಿರಬಹುದು ಎಂದು ಅವರು ಹೇಳಿದ್ದಾರೆ. ಇದರ ಜತೆಗೆ ಪಾಪ್‌ಕಾರ್ನ್, ತಂಪು ಪಾನೀಯಗಳು ಮತ್ತು ಇತರ ಆಹಾರಗಳ ಖರ್ಚು ಸೇರಿಸಿದರೆ ಕುಟುಂಬವೊಂದು ಸಿನಿಮಾ ನೋಡಲು ಹೊರಡುವುದು ದೊಡ್ಡ ಮೊತ್ತದ ವೆಚ್ಚವಾಗುತ್ತದೆ ಎಂಬುದು ಅವರ ಮಾತಿನ ಸಾರಾಂಶ.

ತೆರಿಗೆ ಹೆಚ್ಚಳ ‘ಕ್ಲಾಸಿಸ್ಟ್’ ಎಂದು ಫಾತಿಮಾ

BMC ಪ್ರಸ್ತಾಪಿಸಿರುವ ತೆರಿಗೆ ಹೆಚ್ಚಳವನ್ನು ಫಾತಿಮಾ “ತುಂಬಾ ಕ್ಲಾಸಿಸ್ಟ್” ಎಂದು ಬಣ್ಣಿಸಿದ್ದಾರೆ. ಅಂದರೆ, ಹೆಚ್ಚುತ್ತಿರುವ ಸಿನಿಮಾ ವೀಕ್ಷಣೆಯ ವೆಚ್ಚ ಸಮಾಜದ ಕೆಲವು ವರ್ಗಗಳ ಜನರಿಗೆ ಚಿತ್ರಮಂದಿರಗಳನ್ನು ಮತ್ತಷ್ಟು ದೂರವಾಗಿಸಬಹುದು ಎಂಬ ಅಭಿಪ್ರಾಯವನ್ನು ಅವರು ವ್ಯಕ್ತಪಡಿಸಿದ್ದಾರೆ.

“ಸಿಂಗಲ್ ಸ್ಕ್ರೀನ್‌ಗಳು ಈಗಾಗಲೇ ಕಡಿಮೆಯಾಗಿವೆ. ಹೀಗಾಗಿ ನೀವು ಈಗಾಗಲೇ ನಿಮ್ಮ ಪ್ರೇಕ್ಷಕರ ಒಂದು ವರ್ಗವನ್ನು ದೂರ ಮಾಡಿದ್ದೀರಿ,” ಎಂದು ಅವರು ಹೇಳಿದ್ದಾರೆ.

ಸಿನಿಮಾ ಕೇವಲ ಮನರಂಜನೆಯ ಮಾಧ್ಯಮವಲ್ಲ, ಸಮಾಜವನ್ನು ತಲುಪುವ ಪ್ರಮುಖ ಮಾರ್ಗವೂ ಹೌದು ಎಂಬುದನ್ನು ಫಾತಿಮಾ ಒತ್ತಿ ಹೇಳಿದ್ದಾರೆ. ಸಿನಿಮಾಗಳ ಮೂಲಕ ಪ್ರೇಕ್ಷಕರಿಗೆ ವಿವಿಧ ಸಾಮಾಜಿಕ ಮತ್ತು ನೈತಿಕ ಪ್ರಶ್ನೆಗಳನ್ನು ತಲುಪಿಸಬಹುದು. ಆದರೆ ಸಿನಿಮಾ ನೋಡುವುದೇ ದುಬಾರಿಯಾದರೆ, ಸಮಾಜದ ದೊಡ್ಡ ವರ್ಗದ ಜನರನ್ನು ಆ ಅನುಭವದಿಂದ ದೂರ ಮಾಡಿದಂತಾಗುತ್ತದೆ ಎಂಬುದು ಅವರ ಅಭಿಪ್ರಾಯ.

ಸಾಮಾಜಿಕ ಜಾಲತಾಣದಲ್ಲೂ ಫಾತಿಮಾ ಮಾತಿಗೆ ಬೆಂಬಲ

ಫಾತಿಮಾ ಸನಾ ಶೇಖ್ ಅವರ ಹೇಳಿಕೆ ಸಾಮಾಜಿಕ ಜಾಲತಾಣಗಳಲ್ಲೂ ಚರ್ಚೆಗೆ ಕಾರಣವಾಗಿದೆ. ಕೆಲವರು ಅವರ ಪ್ರತಿಕ್ರಿಯೆ ಸಹಜವಾಗಿದ್ದು, ಚಿತ್ರಮಂದಿರಗಳ ಹೆಚ್ಚುತ್ತಿರುವ ವೆಚ್ಚದ ವಾಸ್ತವ ಸ್ಥಿತಿಯನ್ನು ಅವರು ಸರಿಯಾಗಿ ಗುರುತಿಸಿದ್ದಾರೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಮತ್ತೊಬ್ಬ ಸಾಮಾಜಿಕ ಜಾಲತಾಣ ಬಳಕೆದಾರರು “ಕೊನೆಗೂ ವಾಸ್ತವತೆಯನ್ನು ಅರ್ಥಮಾಡಿಕೊಂಡಿರುವ ಯಾರೋ ಒಬ್ಬರು ಮಾತನಾಡಿದ್ದಾರೆ” ಎಂಬರ್ಥದಲ್ಲಿ ಪ್ರತಿಕ್ರಿಯಿಸಿದ್ದಾರೆ.

ಇನ್ನು ಸಿನಿಮಾ ವಿಚಾರಕ್ಕೆ ಬಂದರೆ, ಫಾತಿಮಾ ಸನಾ ಶೇಖ್ ಇತ್ತೀಚೆಗೆ ‘ಹುಂಕಾರ್: ದಿ ರೋರ್’ ಎಂಬ ಒಟಿಟಿ ಸರಣಿಯಲ್ಲಿ ಪೊಲೀಸ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇದಲ್ಲದೆ ‘ಟೀನ್ ಕೌವೆ’ ವೆಬ್ ಸೀರಿಸ್ ಕೂಡ ಅವರ ಮುಂದಿನ ಯೋಜನೆಗಳ ಪಟ್ಟಿಯಲ್ಲಿದೆ.

ಒಟ್ಟಿನಲ್ಲಿ, BMCಯ ಪ್ರಸ್ತಾವಿತ ಮನರಂಜನಾ ತೆರಿಗೆ ಹೆಚ್ಚಳದ ಬಗ್ಗೆ ಫಾತಿಮಾ ಸನಾ ಶೇಖ್ ಅವರ ನೇರ ಮಾತುಗಳು ಇದೀಗ ಬಾಲಿವುಡ್ ವಲಯದಲ್ಲಿ ಗಮನ ಸೆಳೆದಿವೆ. ತೆರಿಗೆ ಹೆಚ್ಚಳದ ಪ್ರಸ್ತಾಪ ಅಂತಿಮವಾಗಿ ಯಾವ ರೂಪ ಪಡೆಯಲಿದೆ ಮತ್ತು ಅದು ಚಿತ್ರಮಂದಿರಗಳ ಟಿಕೆಟ್ ಹಾಗೂ ಒಟ್ಟಾರೆ ಸಿನಿಮಾ ವೀಕ್ಷಣೆಯ ವೆಚ್ಚದ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ ಎಂಬುದು ಮುಂದಿನ ದಿನಗಳಲ್ಲಿ ಸ್ಪಷ್ಟವಾಗಬೇಕಿದೆ.

ವಿಶ್ವದಾದ್ಯಂತ 'IMAX'ನಲ್ಲಿ ಯಶ್ 'ರಾಮಾಯಣ' ಬಿಡುಗಡೆ.. 'ರಾವಣ' ಪೋಸ್ಟರ್‌ ರಿಲೀಸ್ ಬಳಿಕ ಆಗಿರೋ ಬೆಳವಣಿಗೆ ಏನು?

Shriram Bhat — Tue, 29 Sep 2026 17:01:10 +0530

Worldwide Developement after Ramayana Yash official poster Release ‘ರಾಮಾಯಣ’ ಚಿತ್ರದಲ್ಲಿನ ರಾಕಿಂಗ್ ಸ್ಟಾರ್ ಯಶ್ ‘ರಾವಣ’ನ ಖಡಕ್ ಲುಕ್ ಬಿಡುಗಡೆ ನೋಡಿ ಜಗತ್ತು ಹೇಳುತ್ತಿರೋದೇನು?

ಭಾರತೀಯ ಚಿತ್ರರಂಗದ ಅತ್ಯಂತ ನಿರೀಕ್ಷಿತ ಬೃಹತ್ ದೃಶ್ಯಕಾವ್ಯ ‘ರಾಮಾಯಣ’ ಸಿನಿಮಾ. ಇದೀಗ ಇದೇ ಚಿತ್ರತಂಡ ರಾಕಿಂಗ್ ಸ್ಟಾರ್ ಯಶ್ ಅವರ 'ರಾವಣ' ಪಾತ್ರದ ಮೊದಲ ಅಧಿಕೃತ ಪೋಸ್ಟರ್ ಅನ್ನು ಬಿಡುಗಡೆ ಮಾಡಿದೆ. ಈ ಪೋಸ್ಟರ್‌ನಲ್ಲಿ ಯಶ್ ಅತ್ಯಂತ ಗಂಭೀರ ಹಾಗೂ ಶಕ್ತಿಯುತ ಅವತಾರದಲ್ಲಿ ಕಾಣಿಸಿಕೊಂಡಿದ್ದು, ಪ್ರೇಕ್ಷಕರಲ್ಲಿ ಚಿತ್ರದ ಮೇಲಿನ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಚಿತ್ರದ ಟ್ರೇಲರ್ ಬಿಡುಗಡೆಯಾದಾಗಿನಿಂದಲೂ ಯಶ್ ಅವರ ರಾವಣನ ಪಾತ್ರವು ಅಪಾರ ಕುತೂಹಲ ಮೂಡಿಸಿತ್ತು. ತಮ್ಮ ಮೊದಲ ನೋಟದಲ್ಲೇ ತೀವ್ರತೆ ಹಾಗೂ ಪ್ರಭಾವಶಾಲಿ ವ್ಯಕ್ತಿತ್ವದಿಂದ ಪ್ರೇಕ್ಷಕರ ಗಮನ ಸೆಳೆದಿದ್ದ ಯಶ್, ಇದೀಗ ಬಿಡುಗಡೆಯಾಗಿರುವ ಪೋಸ್ಟರ್‌ನಲ್ಲಿ ರಾಜ ಗಾಂಭೀರ್ಯದೊಂದಿಗೆ ವಿಜೃಂಭಿಸಿದ್ದಾರೆ.

ಹೊಳೆಯುವ ಚಿನ್ನದ ಕಿರೀಟ, ಮುತ್ತಿನ ಹಾರಗಳು

ಹೊಸ ಪೋಸ್ಟರ್‌ನಲ್ಲಿ ಯಶ್ ರತ್ನಖಚಿತವಾದ ಹೊಳೆಯುವ ಚಿನ್ನದ ಕಿರೀಟ, ಮುತ್ತಿನ ಹಾರಗಳು ಹಾಗೂ ಭಾರವಾದ ಚಿನ್ನದ ಬಳೆಗಳನ್ನು ಧರಿಸಿ ಕಂಗೊಳಿಸುತ್ತಿದ್ದಾರೆ. ಅವರ ತೀವ್ರ ನೋಟ ಮತ್ತು ಗಂಭೀರ ಉಪಸ್ಥಿತಿಯು ಪ್ರೇಕ್ಷಕರನ್ನು ಆಕರ್ಷಿಸುತ್ತದೆ. ಲಂಕಾಧಿಪತಿ ರಾವಣ ಮಹಾನ್ ಜ್ಞಾನಿ, ಅತ್ಯಂತ ಶಕ್ತಿಶಾಲಿ ರಾಜ ಹಾಗೂ ಅಪ್ರತಿಮ ಆಡಳಿತಗಾರ. ಆ ಪಾತ್ರದ ಗಾಂಭೀರ್ಯ ಮತ್ತು ಗತ್ತುಗಳನ್ನು ಯಶ್ ಅತ್ಯಂತ ನಿಖರವಾಗಿ ತಮ್ಮ ಅಭಿನಯ ಹಾಗೂ ಲುಕ್‌ನಲ್ಲಿ ತಂದಿದ್ದಾರೆ. ಈ ಪೋಸ್ಟರ್ ರಾವಣನ ಪಾತ್ರವನ್ನು ಬೆಳ್ಳಿತೆರೆಯ ಮೇಲೆ ಎಷ್ಟು ಅದ್ಧೂರಿಯಾಗಿ ಹಾಗೂ ಬೃಹತ್ ಪ್ರಮಾಣದಲ್ಲಿ ಕಲ್ಪಿಸಲಾಗಿದೆ ಎಂಬುದಕ್ಕೆ ಸಾಕ್ಷಿಯಾಗಿದೆ.

ಶ್ರೀರಾಮನಾಗಿ ರಣಬೀರ್ ಕಪೂರ್, ಸೀತೆಯಾಗಿ ಸಾಯಿ ಪಲ್ಲವಿ

ಮಹಾಕಾವ್ಯ ರಾಮಾಯಣದ ಭವ್ಯತೆ, ಭಾವನೆಗಳು ಹಾಗೂ ಕಾಲಾತೀತ ಪಾತ್ರಗಳನ್ನು ಬೆಳ್ಳಿತೆರೆಯ ಮೇಲೆ ವಿಶಾಲ ದೃಶ್ಯಕಾವ್ಯವಾಗಿ ತರಲು ನಿರ್ದೇಶಕ ನಿತೀಶ್ ತಿವಾರಿ ಶ್ರಮಿಸುತ್ತಿದ್ದಾರೆ. ಚಿತ್ರದಲ್ಲಿ ಶ್ರೀರಾಮನಾಗಿ ರಣಬೀರ್ ಕಪೂರ್, ಸೀತೆಯಾಗಿ ಸಾಯಿ ಪಲ್ಲವಿ, ರಾವಣನಾಗಿ ರಾಕಿಂಗ್ ಸ್ಟಾರ್ ಯಶ್, ಹನುಮಂತನಾಗಿ ಸನ್ನಿ ಡಿಯೋಲ್ ಹಾಗೂ ಲಕ್ಷ್ಮಣನಾಗಿ ರವಿ ದುಬೆ ಅಭಿನಯಿಸುತ್ತಿದ್ದಾರೆ. ಈ ಚಿತ್ರವು ಭಾರತದಲ್ಲಿ ಹಿಂದಿ, ತಮಿಳು, ತೆಲುಗು, ಕನ್ನಡ ಹಾಗೂ ಮಲಯಾಳಂ ಭಾಷೆಗಳಲ್ಲಿ ಬಿಡುಗಡೆಯಾಗಲಿದೆ.

ನಮಿತ್ ಮಲ್ಹೋತ್ರಾ ಅವರ 'ಪ್ರೈಮ್ ಫೋಕಸ್ ಸ್ಟುಡಿಯೋಸ್', 8 ಬಾರಿ ಆಸ್ಕರ್ ಪ್ರಶಸ್ತಿ ವಿಜೇತ 'DNEG' ಸಂಸ್ಥೆ ಹಾಗೂ ಯಶ್ ಅವರ 'ಮಾನ್ಸ್‌ಟರ್ ಮೈಂಡ್ ಕ್ರಿಯೇಷನ್ಸ್' ಜಂಟಿಯಾಗಿ ಈ ಬಿಗ್ ಬಜೆಟ್ ಸಿನಿಮಾವನ್ನು ನಿರ್ಮಿಸುತ್ತಿವೆ. ಎರಡು ಭಾಗಗಳಲ್ಲಿ ಮೂಡಿಬರುತ್ತಿರುವ ಈ ದೃಶ್ಯಕಾವ್ಯವು ವಿಶ್ವದಾದ್ಯಂತ IMAX ರೂಪದಲ್ಲಿ ಬಿಡುಗಡೆಯಾಗಲಿದ್ದು, 'ಭಾಗ 1' ಮುಂಬರುವ 2026ರ ದೀಪಾವಳಿಗೆ ಹಾಗೂ 'ಭಾಗ 2' 2027ರ ದೀಪಾವಳಿಗೆ ಜಾಗತಿಕವಾಗಿ ತೆರೆಕಾಣಲಿದೆ.

ದೊಡ್ಡ ಸ್ಟಾರ್‌ಗಳು, ಭರ್ಜರಿ ಆ್ಯಕ್ಷನ್: ಅಕ್ಟೋಬರ್‌ನಲ್ಲಿ ಥಿಯೇಟರ್‌ಗೆ ಬರ್ತಿವೆ ಈ ಬಹುನಿರೀಕ್ಷಿತ ಸಿನಿಮಾಗಳು!

Pavna Das — Tue, 29 Sep 2026 16:34:22 +0530

October Release: ಅಕ್ಟೋಬರ್ ತಿಂಗಳು ಸಿನಿ ರಸಿಕರ ಪಾಲಿಗೆ ಹಬ್ಬ. ಯಾಕಂದ್ರೆ ರಜನಿಕಾಂತ್, ಶಿವರಾಜಕುಮಾರ್, ಫಹಾದ್ ಫಾಜಿಲ್, ವಿಜಯ್ ದೇವರಕೊಂಡ ರಶ್ಮಿಕಾ ಮಂದಣ್ಣ ಸಿನಿಮಾಗಳು ಈ ತಿಂಗಳು ರಿಲೀಸ್ ಆಗಲಿವೆ. ಯಾವೆಲ್ಲಾ ಬಹುನಿರೀಕ್ಷಿತ ಸಿನಿಮಾಗಳಿವೆ ನೋಡಿ.

ಬಿಡುಗಡೆಗೆ 3 ದಿನ ಮೊದಲೇ 10 ಕೋಟಿ ಗಳಿಸಿದ 'ದೃಶ್ಯಂ 3'.. ಅಜಯ್ ದೇವಗನ್ ಮಾಡಿರೋ ಮ್ಯಾಜಿಕ್ ಏನು?

Shriram Bhat — Tue, 29 Sep 2026 16:14:49 +0530

Drishyam Hindi movie Release: ಭಾರತೀಯ ಚಿತ್ರರಂಗದಲ್ಲಿ ಒಂದೇ ಕಥೆ ಹಲವು ಭಾಷೆಗಳಲ್ಲಿ ರೀಮೇಕ್ ಆಗುವುದು ಹೊಸದೇನಲ್ಲ. ಆದರೆ ಒಂದು ಸಿನಿಮಾ ಇಷ್ಟೊಂದು ಭಾಷೆಗಳಲ್ಲಿ ರೀಮೇಕ್ ಆಗಿ, ಪ್ರತಿ ಅವತರಣಿಕೆಯಲ್ಲೂ ಪ್ರೇಕ್ಷಕರನ್ನು ಸೆಳೆಯುವುದು ಅಪರೂಪ. ಈ ಸಾಲಿನಲ್ಲಿ ‘ದೃಶ್ಯಂ’ ಸಿನಿಮಾ ಸರಣಿ ತನ್ನದೇ ಆದ ವಿಶೇಷ ಸ್ಥಾನ ಪಡೆದುಕೊಂಡಿದೆ. 2013ರಲ್ಲಿ ಮೋಹನ್‌ಲಾಲ್ ಅಭಿನಯದ ಮಲಯಾಳಂ ‘ದೃಶ್ಯಂ’ ಬಿಡುಗಡೆಯಾದ ಬಳಿಕ ಈ ಕಥೆ ಭಾರತೀಯ ಚಿತ್ರರಂಗದ ಹಲವು ಭಾಷೆಗಳಿಗೆ ಪಯಣ ಬೆಳೆಸಿತ್ತು.

ಇದೀಗ ಇದೇ ಜನಪ್ರಿಯ ಸರಣಿಯ ಹಿಂದಿ ಮೂರನೇ ಭಾಗದ ಮೇಲೆ ಸಿನಿಪ್ರೇಕ್ಷಕರ ಕಣ್ಣು ನೆಟ್ಟಿದೆ. ಅಜಯ್ ದೇವಗನ್ ನಾಯಕತ್ವದ ‘ದೃಶ್ಯಂ 3’ ಸಿನಿಮಾ ಅಕ್ಟೋಬರ್ 2ರಂದು ತೆರೆಗೆ ಬರಲು ಸಜ್ಜಾಗಿದ್ದು, ಬಿಡುಗಡೆಗೂ ಮುನ್ನವೇ ಬಾಕ್ಸ್ ಆಫೀಸ್‌ನಲ್ಲಿ ಸದ್ದು ಮಾಡುತ್ತಿದೆ. ಚಿತ್ರದ ಅಡ್ವಾನ್ಸ್ ಬುಕಿಂಗ್‌ಗೆ ಭರ್ಜರಿ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಈಗಾಗಲೇ ₹10 ಕೋಟಿಗೂ ಅಧಿಕ ಮೊತ್ತವನ್ನು ಮುಂಗಡ ಬುಕ್ಕಿಂಗ್ ಮೂಲಕವೇ ಗಳಿಸಿದೆ ಎನ್ನಲಾಗಿದೆ.

2015ರಿಂದ ಅಜಯ್ ದೇವಗನ್ ಅಭಿನಯದಲ್ಲಿ ‘ದೃಶ್ಯಂ’ ಫ್ರಾಂಚೈಸಿಯ ಹಿಂದಿ ಅವತರಣಿಕೆಗಳು ಪ್ರೇಕ್ಷಕರನ್ನು ರಂಜಿಸುತ್ತಿವೆ. ಮೊದಲ ಭಾಗದಲ್ಲಿ ಕುಟುಂಬವನ್ನು ಸಂಕಷ್ಟದಿಂದ ಪಾರು ಮಾಡಲು ನಾಯಕ ರೂಪಿಸುವ ತಂತ್ರ ಪ್ರೇಕ್ಷಕರನ್ನು ಕುತೂಹಲದ ಅಂಚಿನಲ್ಲಿಟ್ಟಿತ್ತು. ಬಳಿಕ ಬಂದ ‘ದೃಶ್ಯಂ 2’ ಕೂಡ ಬಾಕ್ಸ್ ಆಫೀಸ್‌ನಲ್ಲಿ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿತ್ತು. ಇದೀಗ ಮೂರನೇ ಭಾಗದಲ್ಲಿ ಕಥೆ ಯಾವ ತಿರುವು ಪಡೆಯಲಿದೆ ಎಂಬ ಪ್ರಶ್ನೆ ಅಭಿಮಾನಿಗಳಲ್ಲಿ ಸಾಕಷ್ಟು ಕುತೂಹಲ ಮೂಡಿಸಿದೆ.

ಆಸಕ್ತಿದಾಯಕ ಸಂಗತಿಯೆಂದರೆ, ಮಲಯಾಳಂನಲ್ಲಿ ‘ದೃಶ್ಯಂ 3’ ಸಿನಿಮಾದ ಚಿತ್ರೀಕರಣ ಆರಂಭವಾಗುವ ವೇಳೆಯಲ್ಲೇ ಹಿಂದಿ ಅವತರಣಿಕೆಯ ಪ್ರೀ-ಪ್ರೊಡಕ್ಷನ್ ಕೆಲಸಗಳೂ ಶುರುವಾಗಿದ್ದವು ಎನ್ನಲಾಗಿದೆ. ಆದರೆ ಮಲಯಾಳಂ ಮತ್ತು ಹಿಂದಿ ಆವೃತ್ತಿಗಳ ಕಥೆಯಲ್ಲಿ ಗಮನಾರ್ಹ ವ್ಯತ್ಯಾಸ ಇರಲಿದೆ ಎಂದು ಚಿತ್ರತಂಡ ಈಗಾಗಲೇ ತಿಳಿಸಿದೆ. ವಿಶೇಷವಾಗಿ ಹಿಂದಿ ‘ದೃಶ್ಯಂ 3’ ಮೂಲಕ ಕಥೆಯನ್ನು ಸಂಪೂರ್ಣವಾಗಿ ಮುಕ್ತಾಯಗೊಳಿಸುವ ಉದ್ದೇಶವಿದೆ ಎನ್ನಲಾಗಿದ್ದು, ಅದಕ್ಕಾಗಿಯೇ ಚಿತ್ರಕ್ಕೆ ‘ದಿ ಕನ್‌ಕ್ಲೂಷನ್’ ಎಂಬ ಅಡಿಬರಹ ನೀಡಲಾಗಿದೆ.

ಚಿತ್ರದ ತಾರಾಗಣವೂ ಹಿಂದಿನ ಎರಡು ಭಾಗಗಳ ಪ್ರಮುಖ ಆಕರ್ಷಣೆಯನ್ನು ಮುಂದುವರಿಸುತ್ತಿದೆ. ಅಜಯ್ ದೇವಗನ್ ಜೊತೆಗೆ ಶ್ರಿಯಾ ಶರಣ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಟಬು ಕೂಡ ತಮ್ಮ ಪಾತ್ರವನ್ನು ಮುಂದುವರಿಸಿದ್ದಾರೆ. ‘ದೃಶ್ಯಂ 2’ನಲ್ಲಿ ಅಕ್ಷಯ್ ಖನ್ನಾ ನಿರ್ವಹಿಸಿದ್ದ ಪಾತ್ರದ ಜಾಗದಲ್ಲಿ ಈ ಬಾರಿ ಜಯದೀಪ್ ಅಹ್ಲಾವತ್ ಕಾಣಿಸಿಕೊಳ್ಳುತ್ತಿದ್ದಾರೆ.

ಇನ್ನು ನಿರ್ದೇಶನದ ಹೊಣೆ ಮತ್ತೊಮ್ಮೆ ಅಭಿಷೇಕ್ ಪಾಠಕ್ ಅವರ ಹೆಗಲೇರಿದೆ. ಮಲಯಾಳಂ ಮೂಲ ಸಿನಿಮಾದ ಕಥೆಯನ್ನು ಅನುಸರಿಸುವ ಬದಲು ಹಿಂದಿ ಆವೃತ್ತಿಗೆ ವಿಭಿನ್ನ ಕಥಾಹಂದರ ಮತ್ತು ನಿರೂಪಣೆ ನೀಡಲಾಗಿದೆ ಎಂಬುದು ಈಗಾಗಲೇ ಕುತೂಹಲ ಹೆಚ್ಚಿಸಿದೆ.

ಹೀಗಾಗಿ ಅಕ್ಟೋಬರ್ 2ರಂದು ತೆರೆಗೆ ಬರಲಿರುವ ‘ದೃಶ್ಯಂ 3’ ಮೇಲೆ ನಿರೀಕ್ಷೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಅದರಲ್ಲೂ ಸಿನಿಮಾ ಬಿಡುಗಡೆಯಾಗುವುದಕ್ಕೂ ಮುನ್ನವೇ ₹10 ಕೋಟಿಗೂ ಅಧಿಕ ಅಡ್ವಾನ್ಸ್ ಬುಕಿಂಗ್ ಆಗಿರುವುದು ಚಿತ್ರದ ಮೇಲಿರುವ ಕ್ರೇಜ್‌ಗೆ ಮತ್ತೊಂದು ಉದಾಹರಣೆಯಾಗಿದೆ. ಈ ಬಾರಿ ಜಾರ್ಜ್‌ಕುಟ್ಟಿಯ ಹಿಂದಿ ಅವತಾರ ವಿಜಯ್ ಸಲ್ಗಾಂವ್ಕರ್ ಕಥೆಯನ್ನು ಯಾವ ಹಂತಕ್ಕೆ ಕೊಂಡೊಯ್ಯಲಿದ್ದಾನೆ? ಇಷ್ಟು ವರ್ಷಗಳಿಂದ ಕಾಡುತ್ತಿರುವ ರಹಸ್ಯಕ್ಕೆ ನಿಜಕ್ಕೂ ತೆರೆ ಬೀಳಲಿದೆಯೇ? ಎಂಬ ಪ್ರಶ್ನೆಗಳಿಗೆ ಅಕ್ಟೋಬರ್ 2ರಂದು ಉತ್ತರ ಸಿಗಲಿದೆ.

ಮಲಯಾಳಂನ NO-1 'ಈ ಸಿನಿಮಾ'ದಲ್ಲಿ ಅಂಥದ್ದೇನಿದೆ? ಮುಂಡಕಾಯಂನಿಂದ ಕರುಕುಟ್ಟಿಗೆ ಬಂದ ಹುಡುಗಿಗೆ ನೆರೆಮನೆಯನೊಂದಿಗೆ ಏನಾಯ್ತು?

Shriram Bhat — Tue, 29 Sep 2026 14:24:41 +0530

ಮಲೆಯಾಳಂ ಚಿತ್ರರಂಗದಲ್ಲಿ ಇತಿಹಾಸ ಬರೆದ ಸಿನಿಮಾ ಇದು!

ಮಲಯಾಳಂ ಚಿತ್ರರಂಗದಲ್ಲಿ ಒಂದರ ಹಿಂದೆ ಒಂದರಂತೆ ದಾಖಲೆ ಬರೆಯುತ್ತಿರುವ ಸಿನಿಮಾಗಳ ಸಾಲಿಗೆ ‘ಬೆತ್ಲಹೆಮ್ ಕುಟುಂಬ ಯುನಿಟ್’ ಕೂಡ ಸೇರ್ಪಡೆಯಾಗಿದೆ. ಚಿತ್ರಮಂದಿರಗಳಲ್ಲಿ ಪ್ರೇಕ್ಷಕರಿಂದ ಭರ್ಜರಿ ಪ್ರತಿಕ್ರಿಯೆ ಪಡೆದು ಬಾಕ್ಸ್ ಆಫೀಸ್‌ನಲ್ಲಿ ಸದ್ದು ಮಾಡಿದ್ದ ಈ ರೊಮ್ಯಾಂಟಿಕ್ ಕಾಮಿಡಿ ಸಿನಿಮಾ ಇದೀಗ ಒಟಿಟಿ ಅಂಗಳಕ್ಕೆ ಕಾಲಿಡಲು ಸಿದ್ಧವಾಗಿದೆ. ವಿಶೇಷವೆಂದರೆ ಮಲಯಾಳಂ ಮಾತ್ರವಲ್ಲದೆ ಕನ್ನಡ ಭಾಷೆಯಲ್ಲೂ ಈ ಸಿನಿಮಾ ವೀಕ್ಷಣೆಗೆ ಲಭ್ಯವಾಗಲಿದೆ.

ಗಿರೀಶ್ ಎಡಿ ನಿರ್ದೇಶನದ ಈ ಸಿನಿಮಾ

ನಿವಿನ್ ಪೌಳಿ ಹಾಗೂ ಮಮಿತಾ ಬೈಜು ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿರುವ ‘ಬೆತ್ಲಹೆಮ್ ಕುಟುಂಬ ಯುನಿಟ್’ ಚಿತ್ರಕ್ಕೆ ಚಿತ್ರಮಂದಿರಗಳಲ್ಲಿ ಸಿಕ್ಕ ಪ್ರತಿಕ್ರಿಯೆ ನಿರೀಕ್ಷೆಗೂ ಮೀರಿತ್ತು. ಗಿರೀಶ್ ಎಡಿ ನಿರ್ದೇಶನದ ಈ ಸಿನಿಮಾ ಪ್ರೀತಿ, ಕುಟುಂಬದ ಬಾಂಧವ್ಯ, ಹಳೆಯ ನೆನಪುಗಳು ಹಾಗೂ ಜೀವನದಲ್ಲಿ ಎದುರಾಗುವ ಬದಲಾವಣೆಗಳನ್ನು ರೊಮ್ಯಾಂಟಿಕ್ ಕಾಮಿಡಿ ಶೈಲಿಯಲ್ಲಿ ಪ್ರೇಕ್ಷಕರ ಮುಂದೆ ತಂದಿದೆ.

ಈ ವರ್ಷದ ಆಗಸ್ಟ್‌ನಲ್ಲಿ ತೆರೆಕಂಡ ಸಿನಿಮಾ ಬಿಡುಗಡೆಯಾದ ಬೆನ್ನಲ್ಲೇ ಪ್ರೇಕ್ಷಕರ ಗಮನ ಸೆಳೆಯಿತು. ಬಾಕ್ಸ್ ಆಫೀಸ್‌ನಲ್ಲೂ ಭರ್ಜರಿ ಪ್ರದರ್ಶನ ಕಂಡ ಈ ಚಿತ್ರ ಮಲಯಾಳಂ ಚಿತ್ರರಂಗದ ಹಲವು ದಾಖಲೆಗಳನ್ನು ಮುರಿದಿದೆ ಎನ್ನಲಾಗಿದೆ. ‘ಲೋಕಃ: ಚಾಪ್ಟರ್ 1 ಚಂದ್ರ’ ಸೇರಿದಂತೆ ಯಶಸ್ವಿ ಸಿನಿಮಾಗಳ ದಾಖಲೆಗಳನ್ನು ಹಿಂದಿಕ್ಕಿ ತನ್ನದೇ ಆದ ಹೊಸ ಮೈಲಿಗಲ್ಲುಗಳನ್ನು ನಿರ್ಮಿಸಿಕೊಂಡಿದೆ.

‘ಬೆತ್ಲಹೆಮ್ ಕುಟುಂಬ ಯುನಿಟ್’ ಸಿನಿಮಾದ ಮತ್ತೊಂದು ವಿಶೇಷತೆ ಅದರ ತಾರಾಗಣ. ನಿವಿನ್ ಪೌಳಿ ಮತ್ತು ಮಮಿತಾ ಬೈಜು ಜೋಡಿ ತೆರೆಮೇಲೆ ಹೇಗೆ ಕಮಾಲ್ ಮಾಡಿದೆ ಎಂಬುದನ್ನು ಚಿತ್ರಮಂದಿರಗಳಲ್ಲಿ ಪ್ರೇಕ್ಷಕರು ಮೆಚ್ಚಿಕೊಂಡಿದ್ದರು. ಇದೀಗ ಇದೇ ಜೋಡಿಯ ಕೆಮಿಸ್ಟ್ರಿಯನ್ನು ಮನೆಯಲ್ಲೇ ಕುಳಿತುಕೊಂಡು ಒಟಿಟಿಯಲ್ಲಿ ಎಂಜಾಯ್ ಮಾಡುವ ಅವಕಾಶ ಸಿಗಲಿದೆ.

ಭಾವನಾ ಸ್ಟುಡಿಯೋಸ್ ಬ್ಯಾನರ್ ಅಡಿಯಲ್ಲಿ ದಿಲೀಶ್ ಪೋತನ್, ಫಹಾದ್ ಫಾಸಿಲ್ ಮತ್ತು ಶ್ಯಾಮ್ ಪುಷ್ಕರನ್ ಚಿತ್ರವನ್ನು ನಿರ್ಮಿಸಿದ್ದಾರೆ. ಗಿರೀಶ್ ಎಡಿ ಮತ್ತು ಕಿರಣ್ ಜೋಶಿ ಜಂಟಿಯಾಗಿ ಸಿನಿಮಾದ ಕಥೆಯನ್ನು ಬರೆದಿದ್ದಾರೆ. ಪ್ರೀತಿ ಮತ್ತು ಕುಟುಂಬದ ಭಾವನೆಗಳನ್ನು ಹಾಸ್ಯದ ಲೇಪನದೊಂದಿಗೆ ಕಟ್ಟಿಕೊಟ್ಟಿರುವುದು ಚಿತ್ರದ ಪ್ರಮುಖ ಆಕರ್ಷಣೆ ಎನ್ನಲಾಗಿದೆ.

ಮುಂಡಕಾಯಂನಿಂದ ಕರುಕುಟ್ಟಿಗೆ ಬಂದ ಹುಡುಗಿ!

ಕಥೆಯ ವಿಚಾರಕ್ಕೆ ಬಂದರೆ, ಆಶ್ಲಿ ಎಂಬ ಯುವತಿ ತನ್ನ ಕುಟುಂಬದೊಂದಿಗೆ ಮುಂಡಕಾಯಂನಿಂದ ಕರುಕುಟ್ಟಿಗೆ ಸ್ಥಳಾಂತರಗೊಳ್ಳುತ್ತಾಳೆ. ಹೊಸ ಊರು, ಹೊಸ ಪರಿಸರ ಹಾಗೂ ಹೊಸ ಜನರ ನಡುವೆ ಆಕೆಯ ಜೀವನವೂ ಹೊಸ ತಿರುವು ಪಡೆದುಕೊಳ್ಳುತ್ತದೆ. ಇದೇ ಸಂದರ್ಭದಲ್ಲಿ ಆಕೆಗೆ ತನಗಿಂತ ಸುಮಾರು 12ರಿಂದ 13 ವರ್ಷ ಹಿರಿಯನಾದ ನೆರೆಹೊರೆಯ ಜಸ್ಟಿನ್ ಪರಿಚಯವಾಗುತ್ತಾನೆ. ಆಶ್ಲಿ ಮತ್ತು ಜಸ್ಟಿನ್ ನಡುವಿನ ಪರಿಚಯ ನಿಧಾನವಾಗಿ ಗಾಢವಾಗುತ್ತಾ ಹೋಗುತ್ತದೆ. ಅವರ ಸಂಬಂಧ, ಪ್ರೀತಿ, ಕುಟುಂಬದ ಭಾವನೆಗಳು ಮತ್ತು ಜೀವನದಲ್ಲಿ ಎದುರಾಗುವ ತಿರುವುಗಳೇ ಸಿನಿಮಾದ ಕಥೆಯ ಪ್ರಮುಖ ಭಾಗವಾಗಿವೆ.

ಚಿತ್ರಮಂದಿರಗಳಲ್ಲಿ ಮೊದಲಿಗೆ ಮಲಯಾಳಂ ಭಾಷೆಯಲ್ಲಿ ಬಿಡುಗಡೆಯಾಗಿದ್ದ ಈ ಸಿನಿಮಾ ಬಳಿಕ ತೆಲುಗು ಭಾಷೆಯಲ್ಲೂ ಪ್ರೇಕ್ಷಕರನ್ನು ತಲುಪಿತ್ತು. ಇದೀಗ ಒಟಿಟಿ ಬಿಡುಗಡೆಯ ಮೂಲಕ ಇನ್ನಷ್ಟು ಭಾಷೆಗಳ ಪ್ರೇಕ್ಷಕರಿಗೆ ಸಿನಿಮಾ ತಲುಪುತ್ತಿದೆ. ಅದರಲ್ಲೂ ಕನ್ನಡ ಆಡಿಯೋ ಲಭ್ಯವಾಗುತ್ತಿರುವುದು ಕರ್ನಾಟಕದ ಮಲಯಾಳಂ ಸಿನಿಮಾ ಪ್ರೇಮಿಗಳಿಗೆ ವಿಶೇಷ ಆಕರ್ಷಣೆಯಾಗಿದೆ.

ಚಿತ್ರಮಂದಿರಗಳಲ್ಲಿ ಸಿನಿಮಾ ಮಿಸ್ ಮಾಡಿಕೊಂಡಿದ್ದವರಿಗೆ ಇದೀಗ ಮನೆಯಲ್ಲೇ ಕುಳಿತು ನಿವಿನ್ ಪೌಳಿ ಮತ್ತು ಮಮಿತಾ ಬೈಜು ಅಭಿನಯದ ಈ ರೊಮ್ಯಾಂಟಿಕ್ ಕಾಮಿಡಿಯನ್ನು ನೋಡುವ ಅವಕಾಶ ಸಿಕ್ಕಂತಾಗಿದೆ. ಪ್ರೀತಿ, ನಗು, ಕುಟುಂಬದ ಭಾವನೆ ಮತ್ತು ಹಳೆಯ ನೆನಪುಗಳ ಮಿಶ್ರಣವಾಗಿರುವ ‘ಬೆತ್ಲಹೆಮ್ ಕುಟುಂಬ ಯುನಿಟ್’ ಒಟಿಟಿಯಲ್ಲಿ ಯಾವ ರೀತಿಯ ಪ್ರತಿಕ್ರಿಯೆ ಪಡೆದುಕೊಳ್ಳಲಿದೆ ಎಂಬುದು ಈಗ ಕುತೂಹಲ ಮೂಡಿಸಿದೆ.

ನಟಿಸಿದ ಸಿನಿಮಾಗಳೆಲ್ಲಾ ಹಿಟ್, ನಿರ್ಮಿಸಿದ ಸಿನಿಮಾಗಳೂ ಬ್ಲಾಕ್ಬಸ್ಟರ್.. ಯಾರು ಈ ಹೀರೋ ಗೊತ್ತಾ?

Shriram Bhat — Tue, 29 Sep 2026 12:29:11 +0530

Fahadh Faasil blockbuster films: ಮಲಯಾಳಂ ಚಿತ್ರರಂಗದ ಪ್ರತಿಭಾವಂತ ನಟರ ಪಟ್ಟಿಯಲ್ಲಿ ಫಹದ್ ಫಾಸಿಲ್ (Fahadh Faasil ) ಹೆಸರು ಯಾವಾಗಲೂ ಮುಂಚೂಣಿಯಲ್ಲಿರುತ್ತದೆ. ನಾಯಕನಾಗಿ ಕಾಣಿಸಿಕೊಂಡರೂ ಸರಿ, ಪೋಷಕ ಪಾತ್ರದಲ್ಲಿ ಬಂದರೂ ಸರಿ, ತಮ್ಮ ವಿಭಿನ್ನ ಅಭಿನಯದ ಮೂಲಕ ಪ್ರೇಕ್ಷಕರ ಗಮನ ಸೆಳೆಯುವುದು ಫಹದ್ ಅವರ ವಿಶೇಷತೆ. ‘ಪುಷ್ಪ’ದಂತಹ ಪ್ಯಾನ್ ಇಂಡಿಯಾ ಸಿನಿಮಾಗಳ ಮೂಲಕ ದಕ್ಷಿಣ ಭಾರತ ಮಾತ್ರವಲ್ಲದೆ ದೇಶಾದ್ಯಂತ ತಮ್ಮದೇ ಆದ ಅಭಿಮಾನಿ ಬಳಗವನ್ನು ಕಟ್ಟಿಕೊಂಡಿರುವ ಅವರು, ಇದೀಗ ನಟನಿಗಿಂತ ನಿರ್ಮಾಪಕನಾಗಿಯೇ ಹೆಚ್ಚು ಸದ್ದು ಮಾಡುತ್ತಿರುವಂತಿದೆ.

ಫಹದ್ ಫಾಸಿಲ್ ನಟಿಸಿರುವ ಹಲವು ಸಿನಿಮಾಗಳು ಬಾಕ್ಸ್ ಆಫೀಸ್‌ನಲ್ಲಿ ಉತ್ತಮ ಪ್ರದರ್ಶನ ಕಂಡಿವೆ. ‘ಬೆಂಗಳೂರು ಡೇಸ್’, ‘ಆವೇಶಂ’, ‘ವಿಕ್ರಂ’, ‘ಪುಷ್ಪ’ ಸೇರಿದಂತೆ ಹಲವು ಸಿನಿಮಾಗಳು ಅವರ ಸಿನಿ ಜರ್ನಿಯ ಯಶಸ್ಸಿನ ಭಾಗವಾಗಿವೆ. ಆದರೆ ಫಹದ್ ನಿರ್ಮಿಸಿರುವ ಸಿನಿಮಾಗಳ ಕಲೆಕ್ಷನ್ ಲೆಕ್ಕಾಚಾರ ನೋಡಿದರೆ ಅವರ ಮತ್ತೊಂದು ಪ್ರತಿಭೆ ಸ್ಪಷ್ಟವಾಗುತ್ತದೆ.

ನಿರ್ಮಾಪಕರಾಗಿ ಫಹದ್ ಫಾಸಿಲ್ ನಿರ್ಮಿಸಿದ ಪ್ರಮುಖ ಸಿನಿಮಾಗಳಲ್ಲಿ ‘ಪ್ರೇಮಲು’ ಮೊದಲಿಗೆ ಗಮನ ಸೆಳೆಯುತ್ತದೆ. ಮಮಿತಾ ಬೈಜು ಪ್ರಮುಖ ಪಾತ್ರದಲ್ಲಿ ನಟಿಸಿದ್ದ ಈ ರೊಮ್ಯಾಂಟಿಕ್ ಕಾಮಿಡಿ ಸಿನಿಮಾ ಮಲಯಾಳಂ ಮಾತ್ರವಲ್ಲದೆ ತೆಲುಗು ಪ್ರೇಕ್ಷಕರನ್ನೂ ಭರ್ಜರಿಯಾಗಿ ರಂಜಿಸಿತ್ತು. ವರದಿಗಳ ಪ್ರಕಾರ ಸುಮಾರು 9 ಕೋಟಿ ರೂಪಾಯಿ ಬಜೆಟ್‌ನಲ್ಲಿ ನಿರ್ಮಾಣವಾಗಿದ್ದ ಈ ಸಿನಿಮಾ ಬರೋಬ್ಬರಿ 130 ಕೋಟಿ ರೂಪಾಯಿ ಗಳಿಕೆ ಮಾಡಿತ್ತು ಎನ್ನಲಾಗಿದೆ. ಕಡಿಮೆ ಬಜೆಟ್‌ನಲ್ಲಿ ತಯಾರಾಗಿ ದೊಡ್ಡ ಕಲೆಕ್ಷನ್ ಮಾಡಿದ ಸಿನಿಮಾ ಎಂಬ ಕಾರಣಕ್ಕೂ ‘ಪ್ರೇಮಲು’ ಸದ್ದು ಮಾಡಿತ್ತು.

ಇನ್ನು ಫಹದ್ ಫಾಸಿಲ್ ಅವರೇ ಪ್ರಮುಖ ಪಾತ್ರದಲ್ಲಿ ನಟಿಸಿ ನಿರ್ಮಾಣದಲ್ಲೂ ಭಾಗಿಯಾಗಿದ್ದ ‘ಆವೇಶಂ’ ಕೂಡ ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಯಶಸ್ಸು ಕಂಡಿತ್ತು. ಬೆಂಗಳೂರಿನ ಹಿನ್ನೆಲೆಯಲ್ಲಿನ ಕಥೆ, ಕೇರಳದಿಂದ ನಗರಕ್ಕೆ ಬರುವ ವಿದ್ಯಾರ್ಥಿಗಳು, ಮಾಸ್ ಎಲಿಮೆಂಟ್ ಮತ್ತು ಭಾವನಾತ್ಮಕ ಅಂಶಗಳ ಮಿಶ್ರಣ ಈ ಸಿನಿಮಾದ ಪ್ರಮುಖ ಆಕರ್ಷಣೆಯಾಗಿತ್ತು. ಸುಮಾರು 30 ಕೋಟಿ ರೂಪಾಯಿ ಬಜೆಟ್‌ನಲ್ಲಿ ನಿರ್ಮಾಣವಾಗಿದ್ದ ಈ ಸಿನಿಮಾ ಸುಮಾರು 155 ಕೋಟಿ ರೂಪಾಯಿ ಗಳಿಸಿದೆ ಎನ್ನಲಾಗಿದೆ.

ಈಗ ಫಹದ್ ಫಾಸಿಲ್ ಅವರ ನಿರ್ಮಾಪಕನ ಸಾಮರ್ಥ್ಯದ ಬಗ್ಗೆ ಮತ್ತೊಮ್ಮೆ ಚರ್ಚೆ ಹುಟ್ಟಿಸಿರುವುದು ‘ಬೆತ್ಲಹೇಮ್ ಕುಟುಂಬ ಯುನಿಟ್’. ವಿಭಿನ್ನ ವಯಸ್ಸಿನ ಜೋಡಿಯ ಪ್ರೇಮಕಥೆಯನ್ನು ಆಧಾರವಾಗಿಟ್ಟುಕೊಂಡಿರುವ ಈ ಸಿನಿಮಾ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದು ಬಾಕ್ಸ್ ಆಫೀಸ್‌ನಲ್ಲಿ ದೊಡ್ಡ ಮಟ್ಟದ ಗಳಿಕೆ ಮಾಡಿದೆ ಎನ್ನಲಾಗಿದೆ. ಸುಮಾರು 35 ಕೋಟಿ ರೂಪಾಯಿ ಬಜೆಟ್‌ನಲ್ಲಿ ತಯಾರಾದ ಸಿನಿಮಾ 310 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿದೆ ಎಂಬ ವರದಿಗಳು ಹರಿದಾಡುತ್ತಿವೆ.

ಈ ಮೂರು ಸಿನಿಮಾಗಳ ಕಲೆಕ್ಷನ್ ಲೆಕ್ಕ ಹಾಕಿದರೆ ಫಹದ್ ಫಾಸಿಲ್ ನಿರ್ಮಾಪಕರಾಗಿ ಆಯ್ಕೆ ಮಾಡಿಕೊಳ್ಳುವ ಕಥೆಗಳ ಬಗ್ಗೆ ಕುತೂಹಲ ಮೂಡುತ್ತದೆ. ‘ಪ್ರೇಮಲು’ಗೆ ಯುವ ಪ್ರೇಕ್ಷಕರನ್ನು ಸೆಳೆಯುವ ರೊಮ್ಯಾಂಟಿಕ್ ಕಾಮಿಡಿ ಹಿನ್ನೆಲೆ ಇದ್ದರೆ, ‘ಆವೇಶಂ’ನಲ್ಲಿ ಮಾಸ್ ಮತ್ತು ಕಾಮಿಡಿಯ ಜತೆಗೆ ಭಾವನಾತ್ಮಕ ಅಂಶಗಳಿದ್ದವು. ‘ಬೆತ್ಲಹೇಮ್ ಕುಟುಂಬ ಯುನಿಟ್’ನಲ್ಲಿ ಪ್ರೀತಿ, ಕುಟುಂಬ ಮತ್ತು ಸಂಬಂಧಗಳ ಸುತ್ತ ಕಥೆ ಸಾಗುತ್ತದೆ.

ಅಂದರೆ ಫಹದ್ ಕೇವಲ ದೊಡ್ಡ ಸ್ಟಾರ್‌ಗಳನ್ನೇ ನಂಬಿಕೊಂಡು ಸಿನಿಮಾ ನಿರ್ಮಿಸುತ್ತಿಲ್ಲ. ಕಥೆ ಮತ್ತು ಪ್ರೇಕ್ಷಕರಿಗೆ ಅದು ಹೇಗೆ ಕನೆಕ್ಟ್ ಆಗುತ್ತದೆ ಎಂಬುದಕ್ಕೂ ಆದ್ಯತೆ ನೀಡುತ್ತಿದ್ದಾರೆ ಎನ್ನುವುದು ಅವರ ನಿರ್ಮಾಣದ ಸಿನಿಮಾಗಳ ಯಶಸ್ಸಿನಿಂದ ಕಾಣಿಸುತ್ತದೆ. ನಟನಾಗಿ ಹಲವು ಪ್ರಯೋಗಗಳನ್ನು ಮಾಡಿರುವ ಫಹದ್, ನಿರ್ಮಾಪಕರಾಗಿಯೂ ವಿಭಿನ್ನ ಕಥೆಗಳಿಗೆ ಬೆಂಬಲ ನೀಡುತ್ತಿರುವುದು ಮಲಯಾಳಂ ಚಿತ್ರರಂಗದಲ್ಲಿ ವಿಶೇಷ ಗಮನ ಸೆಳೆಯುತ್ತಿದೆ.

ಹೀಗಾಗಿ ಫಹದ್ ಫಾಸಿಲ್‌ರನ್ನು ಕೇವಲ ನಟ ಎಂದು ನೋಡುವುದಕ್ಕಿಂತ, ಕಥೆ ಆಯ್ಕೆ ಮತ್ತು ನಿರ್ಮಾಣದಲ್ಲೂ ಆಸಕ್ತಿ ಹೊಂದಿರುವ ಸಿನಿಮಾ ವ್ಯಕ್ತಿತ್ವವಾಗಿ ನೋಡುವಂತಾಗಿದೆ. ಮುಂದಿನ ದಿನಗಳಲ್ಲಿ ಅವರ ನಿರ್ಮಾಣ ಸಂಸ್ಥೆಯಿಂದ ಯಾವ ರೀತಿಯ ಸಿನಿಮಾಗಳು ಹೊರಬರಲಿವೆ ಎಂಬ ಕುತೂಹಲ ಇದೀಗ ಅಭಿಮಾನಿಗಳಲ್ಲೂ, ಸಿನಿಪ್ರೇಮಿಗಳಲ್ಲೂ ಹೆಚ್ಚಾಗಿದೆ.

'ಕಾಂತಾರ' ಕಮಾಯಿ ಮೀರಿಸಿದ 'ಹನುಮಾನ್ ಅಂಶ್'.. ವಿಶ್ವಾದ್ಯಂತ 400 ಕೋಟಿ ರೂ. ಮೀರಿಸಿ ನಾಗಾಲೋಟ!

Shriram Bhat — Tue, 29 Sep 2026 10:14:13 +0530

Hanuman Ansh box office, Hanuman Ansh ₹400 crore, Hanuman Ansh collection- ಬಾಕ್ಸ್ ಆಫೀಸ್‌ನಲ್ಲಿ ಸಿನಿಮಾ ಒಂದು ವಾರ, ಎರಡು ವಾರ ಯಶಸ್ಸು ಕಾಣುವುದು ಸಾಮಾನ್ಯ. ಆದರೆ ಬಿಡುಗಡೆಯಾಗಿ ಏಳು ವಾರಗಳು ಕಳೆದರೂ ತನ್ನ ಓಟವನ್ನು ನಿಲ್ಲಿಸದೆ, ಎಂಟನೇ ವಾರದಲ್ಲೂ ಪ್ರೇಕ್ಷಕರನ್ನು ಚಿತ್ರಮಂದಿರದತ್ತ ಸೆಳೆಯುವುದು ಮಾತ್ರ ಅಪರೂಪ. ಇದೀಗ ಇದೇ ರೀತಿಯ ಅಚ್ಚರಿಯ ಯಶಸ್ಸಿನ ಕಥೆಯನ್ನು ಭಕ್ತಿಪ್ರಧಾನ ಸಿನಿಮಾ ‘ಹನುಮಾನ್ ಅಂಶ್’ ಬರೆಯುತ್ತಿದೆ. ಆರಂಭದಲ್ಲಿ ನಿರೀಕ್ಷಿತ ಮಟ್ಟದ ಕಲೆಕ್ಷನ್ ಮಾಡದೆ ಸದ್ದು ಮಾಡದಿದ್ದ ಚಿತ್ರ, ಇದೀಗ ಬಾಕ್ಸ್ ಆಫೀಸ್‌ನಲ್ಲಿ ಒಂದರ ಹಿಂದೆ ಮತ್ತೊಂದು ಮೈಲಿಗಲ್ಲು ದಾಟುತ್ತಾ ಮುನ್ನುಗ್ಗುತ್ತಿದೆ.

ಬಿಡುಗಡೆಯಾದ ಮೊದಲ ದಿನ ‘ಹನುಮಾನ್ ಅಂಶ್’ ಗಳಿಸಿದ್ದು ಕೇವಲ 10 ಲಕ್ಷ ರೂಪಾಯಿ ಎನ್ನಲಾಗಿತ್ತು. ಮೊದಲ ಎರಡು ವಾರಗಳ ಒಟ್ಟು ಗಳಿಕೆಯೂ ಸುಮಾರು 1.50 ಕೋಟಿ ರೂಪಾಯಿಯಷ್ಟೇ ಆಗಿತ್ತು. ಹೀಗಾಗಿ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ನಿರೀಕ್ಷಿತ ಫಲಿತಾಂಶ ನೀಡುವುದಿಲ್ಲ ಎಂಬ ಮಾತುಗಳು ಕೇಳಿಬಂದಿದ್ದವು. ಆದರೆ ಪ್ರೇಕ್ಷಕರಿಂದ ಚಿತ್ರಕ್ಕೆ ಸಿಕ್ಕ ಉತ್ತಮ ಪ್ರತಿಕ್ರಿಯೆ ಇಡೀ ಲೆಕ್ಕಾಚಾರವನ್ನೇ ಬದಲಿಸಿತು.

ಮೂರನೇ ವಾರದಿಂದ ಚಿತ್ರಕ್ಕೆ ಪ್ರೇಕ್ಷಕರ ಸಂಖ್ಯೆ ದಿಢೀರ್ ಏರಿಕೆಯಾಯಿತು. ನಾಲ್ಕನೇ ವಾರದಿಂದೀಚೆಗೆ ಪ್ರತಿ ವಾರ ಸರಾಸರಿ 60 ಕೋಟಿ ರೂಪಾಯಿಗೂ ಅಧಿಕ ನಿವ್ವಳ ಗಳಿಕೆ ಮಾಡುತ್ತಾ ‘ಹನುಮಾನ್ ಅಂಶ್’ ತನ್ನ ವೇಗವನ್ನು ಮತ್ತಷ್ಟು ಹೆಚ್ಚಿಸಿಕೊಂಡಿತು. ಹೀಗೆ ನಿಧಾನವಾಗಿ ಆರಂಭವಾದ ಸಿನಿಮಾ, ಬಳಿಕ ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಓಟಗಾರನಾಗಿ ಬದಲಾಗಿದೆ.

ಚಿತ್ರದ 52ನೇ ದಿನವಾದ ಎಂಟನೇ ವಾರಾಂತ್ಯದಲ್ಲೂ ಕಲೆಕ್ಷನ್‌ನಲ್ಲಿ ಭಾರಿ ಏರಿಕೆ ಕಂಡುಬಂದಿದೆ. ಈ ಅವಧಿಯಲ್ಲಿ ಸಿನಿಮಾ ಬರೋಬ್ಬರಿ 18.95 ಕೋಟಿ ರೂಪಾಯಿ ನಿವ್ವಳ ಗಳಿಕೆ ಮಾಡಿದೆ ಎನ್ನಲಾಗಿದೆ. ಅದರಲ್ಲೂ ಭಾನುವಾರ ಒಂದೇ ದಿನ ಸುಮಾರು 9 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿರುವುದು ಚಿತ್ರದ ಕ್ರೇಜ್ ಇನ್ನೂ ಕಡಿಮೆಯಾಗಿಲ್ಲ ಎಂಬುದಕ್ಕೆ ಸಾಕ್ಷಿಯಾಗಿದೆ.

ಈ ಭರ್ಜರಿ ಗಳಿಕೆಯೊಂದಿಗೆ ಭಾರತದಲ್ಲಿ ‘ಹನುಮಾನ್ ಅಂಶ್’ನ ಒಟ್ಟು ನಿವ್ವಳ ಕಲೆಕ್ಷನ್ 307 ಕೋಟಿ ರೂಪಾಯಿಗೆ ತಲುಪಿದೆ. ಚಿತ್ರದ ಗ್ರಾಸ್ ಗಳಿಕೆ 362 ಕೋಟಿ ರೂಪಾಯಿ ಎನ್ನಲಾಗಿದೆ. ಇದರೊಂದಿಗೆ ಭಾರತದಲ್ಲಿ 300 ಕೋಟಿ ರೂಪಾಯಿ ನಿವ್ವಳ ಗಳಿಕೆ ದಾಟಿದ ಕೆಲವೇ ಕೆಲವು ಹಿಂದಿ ಸಿನಿಮಾಗಳ ಪಟ್ಟಿಯಲ್ಲೂ ಚಿತ್ರ ಸ್ಥಾನ ಪಡೆದುಕೊಂಡಿದೆ.

ವಿದೇಶಿ ಮಾರುಕಟ್ಟೆಯಲ್ಲೂ ಚಿತ್ರದ ಓಟಕ್ಕೆ ಬ್ರೇಕ್ ಬಿದ್ದಿಲ್ಲ. ಭಾರತದಲ್ಲಿ ಬಿಡುಗಡೆಯಾದ ಸುಮಾರು ಆರು ವಾರಗಳ ಬಳಿಕ ವಿದೇಶಗಳಲ್ಲಿ ಚಿತ್ರ ತೆರೆಕಂಡರೂ, ಕಡಿಮೆ ಅವಧಿಯಲ್ಲೇ ಗಮನಾರ್ಹ ಗಳಿಕೆ ಮಾಡಿದೆ. ವಿದೇಶಿ ಮಾರುಕಟ್ಟೆಯಿಂದ ಈಗಾಗಲೇ 4 ಮಿಲಿಯನ್ ಡಾಲರ್‌ಗೂ ಅಧಿಕ ಕಲೆಕ್ಷನ್ ಆಗಿದೆ ಎನ್ನಲಾಗಿದ್ದು, ಜಾಗತಿಕ ಮಟ್ಟದಲ್ಲಿ ಚಿತ್ರದ ಒಟ್ಟು ಗಳಿಕೆ 402 ಕೋಟಿ ರೂಪಾಯಿಗೆ ತಲುಪಿದೆ.

ಇದರೊಂದಿಗೆ ‘ಹನುಮಾನ್ ಅಂಶ್’ ಭಾರತೀಯ ಚಿತ್ರರಂಗದ ಸಾರ್ವಕಾಲಿಕ ಹೆಚ್ಚು ಗಳಿಕೆ ಮಾಡಿದ ಟಾಪ್ 50 ಸಿನಿಮಾಗಳ ಪಟ್ಟಿಗೂ ಸೇರ್ಪಡೆಯಾಗಿದೆ. ಅಷ್ಟೇ ಅಲ್ಲ, ಎಂಟನೇ ವಾರಾಂತ್ಯದ ಗಳಿಕೆಯ ಬಳಿಕ ‘ಕ್ರಿಶ್ 3’ ಮತ್ತು ‘ಚೆನ್ನೈ ಎಕ್ಸ್‌ಪ್ರೆಸ್’ ಸಿನಿಮಾಗಳ ದಾಖಲೆಗಳನ್ನು ಹಿಂದಿಕ್ಕಿದೆ ಎನ್ನಲಾಗಿದೆ. ನಂತರ 3 ಈಡಿಯಟ್ಸ್ ಮತ್ತು ‘ಕಾಂತಾರ’ ಸಿನಿಮಾಗಳ ಜೀವಮಾನದ ಗಳಿಕೆಯನ್ನೂ ದಾಟಿರುವುದಾಗಿ ವರದಿಯಾಗಿದೆ.

ಒಟ್ಟಿನಲ್ಲಿ, ಆರಂಭದಲ್ಲಿ ನಿಧಾನಗತಿಯಲ್ಲಿದ್ದ ‘ಹನುಮಾನ್ ಅಂಶ್’ ಇದೀಗ ಬಾಕ್ಸ್ ಆಫೀಸ್‌ನಲ್ಲಿ ಸರ್ಪ್ರೈಸ್ ಪ್ಯಾಕೇಜ್ ಆಗಿ ಹೊರಹೊಮ್ಮಿದೆ. ಮೊದಲ ಎರಡು ವಾರಗಳ ಕಲೆಕ್ಷನ್ ನೋಡಿದವರಿಗೆ ಸಿನಿಮಾ ಈ ಮಟ್ಟಿಗೆ ಮುನ್ನುಗ್ಗುತ್ತದೆ ಎಂದು ಊಹಿಸುವುದು ಕಷ್ಟವಾಗಿತ್ತು. ಆದರೆ ಪ್ರೇಕ್ಷಕರ ಬೆಂಬಲ ಸಿಕ್ಕ ಬಳಿಕ ಚಿತ್ರದ ಬಾಕ್ಸ್ ಆಫೀಸ್ ಕಥೆಯೇ ಬದಲಾಗಿದೆ. ಈಗ 400 ಕೋಟಿ ರೂಪಾಯಿ ಗಡಿ ದಾಟಿರುವ ‘ಹನುಮಾನ್ ಅಂಶ್’ ಮುಂದೆ ಇನ್ನೆಷ್ಟು ದಾಖಲೆಗಳನ್ನು ತನ್ನ ಹೆಸರಿಗೆ ಬರೆಯಲಿದೆ ಎಂಬ ಕುತೂಹಲ ಅಭಿಮಾನಿಗಳಲ್ಲಿದೆ.

ರಕುಲ್ ಪ್ರೀತ್ ಸಿಂಗ್, ವಾಸು ಭಗ್ನಾನಿ ಮನೆಗಳ ಮೇಲೆ ಐಟಿ ದಾಳಿ: ‘ಪನೋರಮಾ ಸ್ಟುಡಿಯೋಸ್’ ಮೇಲೂ ಕಣ್ಣು!

Shriram Bhat — Tue, 29 Sep 2026 09:20:54 +0530

IT Ride on Rakul Preet Singh, Vashu Bhagnani and Panorama Studios-ಬಾಲಿವುಡ್ ಹಾಗೂ ದಕ್ಷಿಣ ಭಾರತದ ಸಿನಿಮಾಗಳಲ್ಲಿ ತಮ್ಮದೇ ಛಾಪು ಮೂಡಿಸಿರುವ ನಟಿ ರಕುಲ್ ಪ್ರೀತ್ ಸಿಂಗ್ ಇದೀಗ ಮತ್ತೊಂದು ಕಾರಣಕ್ಕೆ ಸುದ್ದಿಯಲ್ಲಿದ್ದಾರೆ. ರಕುಲ್ ಅವರ ಪತಿ ಜಾಕಿ ಭಗ್ನಾನಿ ಅವರ ತಂದೆ ಹಾಗೂ ನಿರ್ಮಾಪಕ ವಾಸು ಭಗ್ನಾನಿ ಮತ್ತು ಪನೋರಮಾ ಸ್ಟುಡಿಯೋಸ್‌ಗೆ ಸಂಬಂಧಿಸಿದ ಹಲವು ಸ್ಥಳಗಳಲ್ಲಿ ಆದಾಯ ತೆರಿಗೆ ಇಲಾಖೆ ಶೋಧ ನಡೆಸಿರುವುದು ಚಿತ್ರರಂಗದಲ್ಲಿ ಚರ್ಚೆಗೆ ಕಾರಣವಾಗಿದೆ.

ವರದಿಗಳ ಪ್ರಕಾರ, ಮುಂಬೈ ಆದಾಯ ತೆರಿಗೆ ಇಲಾಖೆಯ ಅಧಿಕಾರಿಗಳು ಸೆಪ್ಟೆಂಬರ್ 28ರಂದು ರಕುಲ್ ಪ್ರೀತ್ ಸಿಂಗ್, ವಾಸು ಭಗ್ನಾನಿ ಹಾಗೂ ಅಜಯ್ ದೇವಗನ್ ನಟನೆಯ 'ದೃಶ್ಯಂ-3' ಸಿನಿಮಾ ನಿರ್ಮಾಣ ಸಂಸ್ಥೆ 'ಪನೋರಮಾ ಸ್ಟುಡಿಯೋಸ್‌'ಗೆ ಸಂಬಂಧಿಸಿದ ಸುಮಾರು 12 ಸ್ಥಳಗಳಲ್ಲಿ ಏಕಕಾಲದಲ್ಲಿ ಶೋಧ ಕಾರ್ಯಾಚರಣೆ ನಡೆಸಿದ್ದಾರೆ. ಚಿತ್ರ ನಿರ್ಮಾಣಕ್ಕೆ ಸಂಬಂಧಿಸಿದ ಹಣಕಾಸು ವ್ಯವಹಾರಗಳಲ್ಲಿ ಅನುಮಾನಾಸ್ಪದ ಅಂಶಗಳಿವೆಯೇ ಎಂಬುದನ್ನು ಅಧಿಕಾರಿಗಳು ಪರಿಶೀಲಿಸುತ್ತಿದ್ದಾರೆ. ವಿಶೇಷವಾಗಿ ಸಿನಿಮಾಗಳ ಹಣಕಾಸು ವ್ಯವಹಾರಗಳಿಗೆ ಸಂಬಂಧಿಸಿದ ಹಣ ವಿದೇಶಗಳಿಗೆ ವರ್ಗಾವಣೆಯಾಗಿರುವ ಸಾಧ್ಯತೆಯ ಬಗ್ಗೆ ತನಿಖೆ ನಡೆಯುತ್ತಿದೆ ಎಂದು ವರದಿಗಳು ತಿಳಿಸಿವೆ.

ಈ ಕಾರ್ಯಾಚರಣೆಯಲ್ಲಿ ಮುಂಬೈ ಆದಾಯ ತೆರಿಗೆ ಇಲಾಖೆಯ ಹಲವು ತಂಡಗಳು ಭಾಗಿಯಾಗಿವೆ ಎನ್ನಲಾಗಿದೆ. ಕಚೇರಿಗಳು ಹಾಗೂ ಇತರ ಸಂಬಂಧಿತ ಸ್ಥಳಗಳಲ್ಲಿ ಹಣಕಾಸು ದಾಖಲೆಗಳು, ವಹಿವಾಟಿನ ವಿವರಗಳು ಮತ್ತು ವಿದೇಶಿ ಹಣ ವರ್ಗಾವಣೆಗಳಿಗೆ ಸಂಬಂಧಿಸಿದ ದಾಖಲೆಗಳನ್ನು ಪರಿಶೀಲಿಸಲಾಗುತ್ತಿದೆ. ಆದರೆ ತನಿಖೆಯಿಂದ ಇದುವರೆಗೆ ಯಾವುದೇ ಅಂತಿಮ ನಿರ್ಣಯ ಅಥವಾ ತೆರಿಗೆ ಉಲ್ಲಂಘನೆ ಸಾಬೀತಾಗಿದೆ ಎಂದು ಅಧಿಕಾರಿಗಳು ಸಾರ್ವಜನಿಕವಾಗಿ ಘೋಷಿಸಿಲ್ಲ.

ಈ ಶೋಧ ಕಾರ್ಯಾಚರಣೆಯಲ್ಲಿ ಕುಮಾರ್ ಮಂಗತ್ ಪಾಠಕ್ ನೇತೃತ್ವದ ಪನೋರಮಾ ಸ್ಟುಡಿಯೋಸ್ ಕೂಡ ಪ್ರಮುಖವಾಗಿ ಚರ್ಚೆಗೆ ಬಂದಿದೆ. ಈ ಸಂಸ್ಥೆ ‘ದೃಶ್ಯಂ’ ಫ್ರಾಂಚೈಸಿ ಸೇರಿದಂತೆ ಹಲವು ಸಿನಿಮಾಗಳೊಂದಿಗೆ ಗುರುತಿಸಿಕೊಂಡಿದೆ. ಅಜಯ್ ದೇವಗನ್ ಅಭಿನಯದ ‘ದೃಶ್ಯಂ 3’ಗೂ ಈ ಸಂಸ್ಥೆಯ ಹೆಸರು ಸಂಬಂಧಿಸಿದೆ.

ಇನ್ನು ರಕುಲ್ ಪ್ರೀತ್ ಸಿಂಗ್ ಅವರ ವೈಯಕ್ತಿಕ ವಿಚಾರಗಳತ್ತ ಗಮನ ಹರಿಸಿದರೆ, ಅವರು ನಿರ್ಮಾಪಕ-ನಟ ಜಾಕಿ ಭಗ್ನಾನಿ ಅವರನ್ನು ವಿವಾಹವಾಗಿದ್ದಾರೆ. ಜಾಕಿ ಭಗ್ನಾನಿ, ವಾಸು ಭಗ್ನಾನಿ ಅವರ ಪುತ್ರರಾಗಿದ್ದು, ಭಗ್ನಾನಿ ಕುಟುಂಬದ ಪೂಜಾ ಎಂಟರ್‌ಟೈನ್‌ಮೆಂಟ್ ಚಿತ್ರ ನಿರ್ಮಾಣ ಕ್ಷೇತ್ರದಲ್ಲಿ ಹಲವು ವರ್ಷಗಳಿಂದ ಸಕ್ರಿಯವಾಗಿದೆ. ಹೀಗಾಗಿ ರಕುಲ್ ಕುಟುಂಬಕ್ಕೆ ಸಂಬಂಧಿಸಿದ ಸ್ಥಳಗಳೂ ಈ ಬೆಳವಣಿಗೆಯಿಂದ ಗಮನ ಸೆಳೆದಿವೆ.

ಸಿನಿಮಾ ವಿಚಾರಕ್ಕೆ ಬಂದರೆ, ರಕುಲ್ ಪ್ರೀತ್ ಸಿಂಗ್ ಸದ್ಯ ನಿತೇಶ್ ತಿವಾರಿ ನಿರ್ದೇಶನದ ಬಹುನಿರೀಕ್ಷಿತ ‘ರಾಮಾಯಣ’ ಸಿನಿಮಾದಲ್ಲಿ 'ಶೂರ್ಪನಖಿ' ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ರಣಬೀರ್ ಕಪೂರ್, ಸಾಯಿ ಪಲ್ಲವಿ, ಯಶ್ ಸೇರಿದಂತೆ ದೊಡ್ಡ ತಾರಾಗಣವಿರುವ ಈ ಸಿನಿಮಾದ ಬಗ್ಗೆ ಈಗಾಗಲೇ ಭಾರೀ ನಿರೀಕ್ಷೆ ಇದೆ.

ಒಟ್ಟಿನಲ್ಲಿ ರಕುಲ್ ಪ್ರೀತ್ ಸಿಂಗ್, ವಾಸು ಭಗ್ನಾನಿ ಮತ್ತು ಪನೋರಮಾ ಸ್ಟುಡಿಯೋಸ್‌ಗೆ ಸಂಬಂಧಿಸಿದ 12 ಸ್ಥಳಗಳಲ್ಲಿ ನಡೆದಿರುವ ಆದಾಯ ತೆರಿಗೆ ಇಲಾಖೆಯ ಶೋಧ ಬಾಲಿವುಡ್‌ನಲ್ಲಿ ಕುತೂಹಲ ಮೂಡಿಸಿದೆ. ಸದ್ಯ ತನಿಖೆ ಮುಂದುವರಿದಿದ್ದು, ಅಧಿಕಾರಿಗಳ ಪರಿಶೀಲನೆಯ ಬಳಿಕವೇ ಹಣಕಾಸು ವ್ಯವಹಾರಗಳ ಕುರಿತು ಸ್ಪಷ್ಟ ಚಿತ್ರಣ ಹೊರಬರಬೇಕಿದೆ. ಹೀಗಾಗಿ ಈಗ ಕೇಳಿಬರುತ್ತಿರುವ ಆರೋಪಗಳನ್ನು ಅಂತಿಮ ಸತ್ಯವೆಂದು ಪರಿಗಣಿಸುವ ಬದಲು, ತನಿಖೆಯ ಫಲಿತಾಂಶಕ್ಕಾಗಿ ಕಾಯಬೇಕಾಗಿದೆ.

ಇದೊಂದು ಐಟಿ ದಾಳಿಯಾಗಿದ್ದು, 'ಹಣಕಾಸು ವ್ಯವಹಾರಗಳಲ್ಲಿ ಅನುಮಾನಾಸ್ಪದ ಅಂಶಗಳಿವೆಯೇ' ಎಂಬುದನ್ನು ಅಧಿಕಾರಿಗಳು ಪರಿಶೀಲಿಸುತ್ತಿದ್ದಾರೆ. ಆದ್ದರಿಂದ ರಕುಲ್ ಪ್ರೀತ್ ಸಿಂಗ್, ವಾಸು ಭಗ್ನಾನಿ ಮತ್ತು ಪನೋರಮಾ ಸ್ಟುಡಿಯೋಸ್‌ ಗಳನ್ನು ಅಪರಾಧಿಗಳು ಎಂದು ನೋಡುವ ಬದಲು, ಆರೋಪಿಗಳಾಗಿ ವಿಚಾರಣೆ ಎದುರಿಸಲಿರುವವರು ಎನ್ನಬೇಕಷ್ಟೇ!

ನಟ ಕಾರ್ತಿ, ಆಶಿಕಾ ನಟನೆಯ 'ಸರ್ದಾರ್ 2' ಒಟಿಟಿಗೆ ಎಂಟ್ರಿ: ಎಲ್ಲಿ, ಯಾವಾಗ ರಿಲೀಸ್ ಗೊತ್ತಾ?

Govindaraj S — Tue, 29 Sep 2026 09:00:35 +0530

ನಟ ಕಾರ್ತಿ ದ್ವಿಪಾತ್ರದಲ್ಲಿ ಅಬ್ಬರಿಸಿರುವ 'ಸರ್ದಾರ್ 2' ಸಿನಿಮಾ ಒಟಿಟಿಗೆ ಲಗ್ಗೆ ಇಡುತ್ತಿದೆ. 2022ರಲ್ಲಿ ತೆರೆಕಂಡಿದ್ದ ಬ್ಲಾಕ್‌ಬಸ್ಟರ್ ಸ್ಪೈ ಆಕ್ಷನ್ ಥ್ರಿಲ್ಲರ್ 'ಸರ್ದಾರ್' ಚಿತ್ರದ ಮುಂದುವರಿದ ಭಾಗವಿದು. ಥಿಯೇಟರ್‌ಗಳಲ್ಲಿ ಮಿಶ್ರ ಪ್ರತಿಕ್ರಿಯೆ ಪಡೆದುಕೊಂಡಿದ್ದ ಈ ಸಿನಿಮಾ ಈಗ ಡಿಜಿಟಲ್ ಪ್ರೇಕ್ಷಕರ ಮುಂದೆ ಬರಲು ಸಜ್ಜಾಗಿದೆ. ಪ್ರೇಕ್ಷಕರು ಅಕ್ಟೋಬರ್ 1ರಿಂದ ಅಮೆಜಾನ್ ಪ್ರೈಮ್ ವಿಡಿಯೋದಲ್ಲಿ ಈ ಸಿನಿಮಾವನ್ನು ವೀಕ್ಷಿಸಬಹುದು. ಭಾರತದಲ್ಲಿ ಕನ್ನಡ, ತಮಿಳು ಹಾಗೂ ಮಲಯಾಳಂ ಭಾಷೆಗಳಲ್ಲಿ ಈ ಚಿತ್ರ ಸ್ಟ್ರೀಮ್ ಆಗಲಿದೆ.

ಪಿ.ಎಸ್. ಮಿತ್ರನ್ ಅವರು ಮೊದಲ ಭಾಗದಂತೆ 'ಸರ್ದಾರ್ 2' ಚಿತ್ರಕ್ಕೂ ಆಕ್ಷನ್ ಕಟ್ ಹೇಳಿದ್ದಾರೆ. ಆದರೆ, ಈ ಬಾರಿ ಬರಹಗಾರರ ತಂಡ ಬದಲಾಗಿದೆ. 'ಸರ್ದಾರ್' ಚಿತ್ರಕ್ಕೆ ನಿರ್ದೇಶಕರ ಜೊತೆ ಎಂ.ಆರ್. ಪೊನ್ ಪಾರ್ಥಿಪನ್, ರೋಜು, ಬಿಪಿನ್ ರಘು ಮತ್ತು ಜೀವಿ ಕಥೆ ಬರೆದಿದ್ದರು. ಆದರೆ 'ಸರ್ದಾರ್ 2' ಚಿತ್ರಕ್ಕೆ ನಿರ್ದೇಶಕ ರತ್ನ ಕುಮಾರ್ ಜೊತೆ ಆಶಮೀರಾ ಅಯ್ಯಪ್ಪನ್ ಹಾಗೂ ವಿಘ್ನೇಶ್ ಮುನಿಯಾಂಡಿ ಚಿತ್ರಕಥೆ ಹೆಣೆದಿದ್ದಾರೆ. ಚಿತ್ರತಂಡ ನಂಬಿ ಅವರಿಗೆ ಸ್ಕ್ರೀನ್‌ಪ್ಲೇ ಕ್ರೆಡಿಟ್ ನೀಡಿದೆ.

ಪ್ರೇಕ್ಷಕರಿಗೆ ಭರ್ಜರಿ ಮನರಂಜನೆ

ಪಿ.ಎಸ್. ಮಿತ್ರನ್ ಅವರ ಮೂಲ ಕಥೆ ಹಾಗೂ ಪಾತ್ರಗಳನ್ನೇ ಆಧರಿಸಿ ಈ ಹೊಸ ತಂಡ ಕಥೆ ರಚಿಸಿದೆ. ಬಾಕ್ಸ್ ಆಫೀಸ್ ವಿಚಾರಕ್ಕೆ ಬಂದರೆ, 'ಸರ್ದಾರ್ 2' ವಿಶ್ವಾದ್ಯಂತ 24 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ. ಭಾರತದಲ್ಲಿ ಒಟ್ಟು 19 ಕೋಟಿ ರೂಪಾಯಿ ಗಳಿಸಿದೆ. ಸರ್ದಾರ್ ಎಂಬ ಕೋಡ್ ನೇಮ್ ಹೊಂದಿರುವ ಚಂದ್ರ ಬೋಸ್ ಹಾಗೂ ಇನ್ಸ್‌ಪೆಕ್ಟರ್ ವಿಜಯ್ ಪ್ರಕಾಶ್ ಆಗಿ ಕಾರ್ತಿ ಪ್ರೇಕ್ಷಕರಿಗೆ ಭರ್ಜರಿ ಮನರಂಜನೆ ನೀಡಿದ್ದಾರೆ.

ಮೊದಲ ಭಾಗದಲ್ಲಿದ್ದ ನಟಿ ರಜಿಷಾ ವಿಜಯನ್ ಈ ಮುಂದುವರಿದ ಭಾಗದಲ್ಲೂ ನಟಿಸಿದ್ದಾರೆ. ಎಸ್.ಜೆ. ಸೂರ್ಯ ಅವರ ಎಂಟ್ರಿ ಚಿತ್ರದ ಮೇಲಿನ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದೆ. ಇವರ ಜೊತೆಗೆ ಆಶಿಕಾ ರಂಗನಾಥ್, ಮಾಳವಿಕಾ ಮೋಹನನ್, ಯೋಗಿ ಬಾಬು, ವಿಟಿವಿ ಗಣೇಶ್, ಶಾ ರಾ, ಬಾಬು ಆಂಟನಿ, ಒ.ಎ.ಕೆ. ಸುಂದರ್ ಹಾಗೂ ಅನ್ಬು ತಾಸನ್ ಮುಂತಾದವರು ಪ್ರಮುಖ ಪಾತ್ರಗಳಲ್ಲಿ ಬಣ್ಣ ಹಚ್ಚಿದ್ದಾರೆ. ಈ ಬಾರಿ ಸಂಗೀತ ನಿರ್ದೇಶಕರೂ ಬದಲಾಗಿದ್ದಾರೆ. ಮೊದಲ ಭಾಗಕ್ಕೆ ಜಿ.ವಿ. ಪ್ರಕಾಶ್ ಕುಮಾರ್ ಮ್ಯೂಸಿಕ್ ನೀಡಿದ್ದರೆ, 'ಸರ್ದಾರ್ 2' ಚಿತ್ರಕ್ಕೆ ಸ್ಯಾಮ್ ಸಿ.ಎಸ್. ಸಂಗೀತ ಸಂಯೋಜಿಸಿದ್ದಾರೆ.

ರಾಜೀವನ್ ನಂಬಿಯಾರ್ ಪ್ರೊಡಕ್ಷನ್ ಡಿಸೈನ್, ಎಂ.ಎಸ್.ಪಿ. ಮಾಧವನ್ ಮತ್ತು ಎ.ಪಿ. ಪಾಲ್‍ಪಾಂಡಿ ಕಲಾ ನಿರ್ದೇಶನದ ಜವಾಬ್ದಾರಿ ಹೊತ್ತಿದ್ದಾರೆ. ಇನ್ನು ಜಾರ್ಜ್ ಸಿ. ವಿಲಿಯಮ್ಸ್ ಛಾಯಾಗ್ರಹಣ ಮಾಡಿದ್ದಾರೆ ಮತ್ತು ವಿಜಯ್ ವೇಲುಕುಟ್ಟಿ ಸಂಕಲನ ಮಾಡಿದ್ದಾರೆ. ಪ್ರಿನ್ಸ್ ಪಿಕ್ಚರ್ಸ್ ಬ್ಯಾನರ್ ಅಡಿಯಲ್ಲಿ ಎಸ್. ಲಕ್ಷ್ಮಣ್ ಕುಮಾರ್ ಮತ್ತು ಐವಿ ಎಂಟರ್‌ಟೈನ್‌ಮೆಂಟ್ ಬ್ಯಾನರ್ ಅಡಿಯಲ್ಲಿ ಇಶಾನ್ ಸಕ್ಸೇನಾ ಜಂಟಿಯಾಗಿ ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದಾರೆ.

9ನೇ ಕ್ಲಾಸ್ ಫೇಲ್ ಆದ ಕನ್ನಡದ ನಟಿಗೆ ಇಂಗ್ಲಿಷ್ ಕಲಿಸಿದ್ದು ವೆಂಕಟೇಶ್, ನಾಗಾರ್ಜುನ: ಹೇಗೆ ಅಂತೀರಾ?

Govindaraj S — Tue, 29 Sep 2026 08:45:10 +0530

ಸೌತ್ ಸಿನಿಮಾ ಇಂಡಸ್ಟ್ರಿಯಲ್ಲಿ ಮಿಂಚಿದ ಈ ಟಾಪ್ ನಟಿ ಓದಿದ್ದು ಬರೀ 9ನೇ ಕ್ಲಾಸ್. ಆದರೆ ಇಂಗ್ಲಿಷ್ ಮಾತ್ರ ಸಖತ್ತಾಗಿ ಮಾತನಾಡುತ್ತಾರೆ. ಟಾಲಿವುಡ್ ಸ್ಟಾರ್ ನಟರಾದ ವೆಂಕಟೇಶ್ ಮತ್ತು ನಾಗಾರ್ಜುನ ಅವರಿಂದ ಇಂಗ್ಲಿಷ್ ಕಲಿತ ಆ ಖ್ಯಾತ ನಟಿ ಯಾರು ಗೊತ್ತಾ?

ಸಾಮಾನ್ಯವಾಗಿ ನಟಿಯರು ಇಂಗ್ಲಿಷ್‌ನಲ್ಲಿಯೇ ಹೆಚ್ಚು ಮಾತನಾಡುತ್ತಾರೆ. ಮಾತೃಭಾಷೆ ಬಂದರೂ ಇಂಗ್ಲಿಷ್‌ ಬಳಸುವುದೇ ಹೆಚ್ಚು. ಉನ್ನತ ವ್ಯಾಸಂಗ ಮಾಡುತ್ತಲೇ ಸಿನಿಮಾಗೆ ಬಂದವರು ಹಲವರಿದ್ದಾರೆ. ಆದರೆ ಈ ನಟಿ 9ನೇ ತರಗತಿಗೆ ಶಾಲೆ ಬಿಟ್ಟು ಹೀರೊಯಿನ್ ಆದರು. ತೆಲುಗು, ತಮಿಳು, ಕನ್ನಡದಲ್ಲಿ ಸ್ಟಾರ್ ನಟಿಯಾಗಿ ಮಿಂಚಿದ ಇವರು, ಕಡಿಮೆ ಓದಿದ್ದರೂ ಇಂಗ್ಲಿಷ್ ಮಾತ್ರ ಪಟಪಟನೆ ಮಾತನಾಡುತ್ತಾರೆ. ಇದಕ್ಕೆ ಕಾರಣ ವೆಂಕಟೇಶ್ ಮತ್ತು ನಾಗಾರ್ಜುನ ಎನ್ನುತ್ತಾರೆ. ಅಷ್ಟಕ್ಕೂ ಆ ನಟಿ ಯಾರು?

ಸಿನಿಮಾ ರಂಗದಲ್ಲಿ ಬಹುಭಾಷಾ ನಟಿಯಾಗಿ ಮಿಂಚಿದವರು ಖುಷ್ಬೂ. ಇವರ ಸ್ಪಷ್ಟವಾದ ಇಂಗ್ಲಿಷ್ ಉಚ್ಚಾರಣೆ ನೋಡಿ, ಇವರು ವಿದೇಶದಲ್ಲಿ ಓದಿರಬೇಕು ಎಂದು ಹಲವರು ಅಂದುಕೊಂಡಿದ್ದರು. ಆದರೆ ಸಂದರ್ಶನವೊಂದರಲ್ಲಿ ಮಾತನಾಡಿದ ಖುಷ್ಬೂ, ತಾವು 9ನೇ ತರಗತಿಗೆ ಶಾಲೆ ಬಿಟ್ಟಿದ್ದಾಗಿ (discontinue) ಹೇಳಿದ್ದಾರೆ. ಶಾಲೆ ಮುಗಿಸದಿದ್ದರೂ ಇಷ್ಟು ಚೆನ್ನಾಗಿ ಇಂಗ್ಲಿಷ್ ಹೇಗೆ ಮಾತನಾಡುತ್ತೀರಿ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, ತಮ್ಮ ಈ ಭಾಷಾ ಕೌಶಲ್ಯಕ್ಕೆ ಟಾಲಿವುಡ್ ಸ್ಟಾರ್ ನಟರಾದ ದಗ್ಗುಬಾಟಿ ವೆಂಕಟೇಶ್ ಮತ್ತು ಅಕ್ಕಿನೇನಿ ನಾಗಾರ್ಜುನ ಅವರೇ ಮುಖ್ಯ ಕಾರಣ ಎಂದಿದ್ದಾರೆ.

ತಮಿಳಿನಲ್ಲಿ ಹೀರೊಯಿನ್ ಆಗಿ ಪರಿಚಯವಾದ ಖುಷ್ಬೂ, ತೆಲುಗಿನಲ್ಲಿ ಮೊದಲ ಸಿನಿಮಾ ಮಾಡಿದ್ದು ವೆಂಕಟೇಶ್ ಜೊತೆ. ಎರಡನೇ ಸಿನಿಮಾ ನಾಗಾರ್ಜುನ ಜೊತೆ ಮಾಡಿದರು. ಆ ಸಮಯದಲ್ಲಿ ವೆಂಕಟೇಶ್ ಮತ್ತು ನಾಗಾರ್ಜುನ ಇಬ್ಬರೂ ಅಮೆರಿಕದಲ್ಲಿ ಓದು ಮುಗಿಸಿ ಭಾರತಕ್ಕೆ ಮರಳಿದ್ದರು. ಆಗ ಖುಷ್ಬೂಗೆ ಇಂಗ್ಲಿಷ್ ಅಷ್ಟಾಗಿ ಬರುತ್ತಿರಲಿಲ್ಲ. ಆದರೆ ಅವರಿಬ್ಬರೂ ಖುಷ್ಬೂಗೆ ಇಂಗ್ಲಿಷ್‌ನಲ್ಲೇ ಮಾತನಾಡುವಂತೆ ಪ್ರೋತ್ಸಾಹಿಸುತ್ತಿದ್ದರು. ಶೂಟಿಂಗ್ ಗ್ಯಾಪ್‌ನಲ್ಲಿ ಇಂಗ್ಲಿಷ್‌ನಲ್ಲಿ ಮಾತನಾಡುವುದು ಮತ್ತು ತಪ್ಪುಗಳನ್ನು ತಿದ್ದುವ ಕೆಲಸ ಮಾಡುತ್ತಿದ್ದರು.

ಇಂಗ್ಲಿಷ್ ಭಾಷೆಯ ಮೇಲೆ ಹಿಡಿತ ಸಾಧಿಸಲು ಪುಸ್ತಕಗಳನ್ನು ಓದುವುದು ಬಹಳ ಮುಖ್ಯ. ಈ ವಿಚಾರವನ್ನು ನಾಗಾರ್ಜುನ ಅವರು ಖುಷ್ಬೂಗೆ ವಿವರಿಸಿದರು. ಅವರು ಖುಷ್ಬೂಗೆ ಮೊದಲ ಇಂಗ್ಲಿಷ್ ಕಾದಂಬರಿಯನ್ನು ಉಡುಗೊರೆಯಾಗಿ ನೀಡಿ, ಇಂಗ್ಲಿಷ್ ಕಾದಂಬರಿಗಳನ್ನು ಓದಲು ಶುರುಮಾಡುವಂತೆ ಸಲಹೆ ನೀಡಿದರು. ನಾಗಾರ್ಜುನ ಕೊಟ್ಟ ಆ ಉಡುಗೊರೆಯೇ ತಮ್ಮಲ್ಲಿ ಇಂಗ್ಲಿಷ್ ಕಲಿಯುವ ಆಸಕ್ತಿ ಹೆಚ್ಚಿಸಿತು ಎಂದು ಖುಷ್ಬೂ ನೆನಪಿಸಿಕೊಂಡಿದ್ದಾರೆ. ವೆಂಕಟೇಶ್ ಮಾತನಾಡುವಾಗ ಹೆಚ್ಚು ಇಂಗ್ಲಿಷ್ ಪದಗಳನ್ನು ಬಳಸುತ್ತಿದ್ದರು, ಅವರನ್ನು ನೋಡಿ ತಾವೂ ಹಾಗೆ ಮಾತನಾಡಲು ಪ್ರಯತ್ನಿಸಿದೆ ಎಂದು ಖುಷ್ಬೂ ಹೇಳಿದ್ದಾರೆ.

ಈ ಸ್ಟಾರ್ ನಟನ ಜೊತೆ ಸಿನಿಮಾ ಅಂದಾಗ ಕುಣಿದು ಕುಪ್ಪಳಿಸಿದ್ರು: ಅರ್ಧ ಗಂಟೆಯಲ್ಲೇ ಕಥೆ ಕೇಳಿ ಓಕೆ ಎಂದ್ರು ಕಿಯಾರಾ!

Govindaraj S — Tue, 29 Sep 2026 08:30:24 +0530

ಮಹೇಶ್ ಬಾಬು ನಟನೆಯ 'ಭರತ್ ಅನೇ ನೇನು' ಸಿನಿಮಾ ದೊಡ್ಡ ಬ್ಲಾಕ್‌ಬಸ್ಟರ್ ಹಿಟ್ ಆಯ್ತು. ಮುಖ್ಯಮಂತ್ರಿ ಪಾತ್ರದಲ್ಲಿ ಮಹೇಶ್ ಬಾಬು ಆಕ್ಟಿಂಗ್ ಅಭಿಮಾನಿಗಳಿಗೆ ಸಖತ್ ಇಷ್ಟವಾಗಿತ್ತು. ಈ ಸಿನಿಮಾಗೂ ಮುನ್ನ ಸತತ ಫ್ಲಾಪ್‌ಗಳನ್ನು ಕಂಡಿದ್ದ ಸೂಪರ್ ಸ್ಟಾರ್, ಆಮೇಲೆ ಬ್ಯಾಕ್ ಟು ಬ್ಯಾಕ್ ಹಿಟ್ ಕೊಟ್ಟರು. ಈ ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿದ ಕಿಯಾರಾ ಅಡ್ವಾಣಿ ತಮ್ಮ ಮುಗ್ಧತೆ ಮತ್ತು ಸೌಂದರ್ಯದಿಂದ ಪ್ರೇಕ್ಷಕರ ಮನಸ್ಸು ಕದ್ದರು.

ಕಿಯಾರಾ ಅವರನ್ನೇ ಈ ಸಿನಿಮಾಗೆ ಆಯ್ಕೆ ಮಾಡಲು ಒಂದು ವಿಶೇಷ ಕಾರಣವಿದೆ ಎಂದು ನಿರ್ದೇಶಕ ಕೊರಟಾಲ ಶಿವ ಹೇಳಿದ್ದಾರೆ. ಮಹೇಶ್ ಬಾಬುಗೆ ಜೋಡಿಯಾಗಿ ಕಿಯಾರಾ ಅಡ್ವಾಣಿ ಅವರನ್ನು ಹೇಗೆ ಆಯ್ಕೆ ಮಾಡಿದೆವು ಅನ್ನೋದನ್ನ ನಿರ್ದೇಶಕ ಕೊರಟಾಲ ಶಿವ ಸಂದರ್ಶನವೊಂದರಲ್ಲಿ ಬಿಚ್ಚಿಟ್ಟಿದ್ದಾರೆ. ಸಿನಿಮಾದಲ್ಲಿ ಹೀರೋ ಮುಖ್ಯಮಂತ್ರಿ ಆಗಿರುತ್ತಾನೆ. ಅಂಥ ಪವರ್‌ಫುಲ್ ಪಾತ್ರದ ಪಕ್ಕದಲ್ಲಿ ಆಗಲೇ ಫೇಮಸ್ ಆಗಿರುವ ಸ್ಟಾರ್ ನಟಿಯನ್ನು ನಿಲ್ಲಿಸಿದರೆ ದೃಶ್ಯಕ್ಕೆ ತೂಕ ಬರುವುದಿಲ್ಲ ಎಂದು ಅವರು ಭಾವಿಸಿದ್ದರು.

ಒಬ್ಬ ಮುಖ್ಯಮಂತ್ರಿ ಸಾಮಾನ್ಯ ಮಧ್ಯಮ ವರ್ಗದ ಹುಡುಗಿಯನ್ನು ಪ್ರೀತಿಸುತ್ತಿದ್ದಾನೆ ಎಂಬ ಫೀಲ್ ಪ್ರೇಕ್ಷಕರಿಗೆ ಬರಬೇಕು. ಅದಕ್ಕೆ ಸ್ಟಾರ್‌ಡಮ್ ಇಲ್ಲದ ಹೊಸ ಮುಖವೇ ಪರ್ಫೆಕ್ಟ್ ಎಂದು ನಾವು ಮೊದಲೇ ನಿರ್ಧರಿಸಿದ್ದೆವು" ಎಂದು ಕೊರಟಾಲ ಹೇಳಿದ್ದಾರೆ. ಮಹೇಶ್ ಬಾಬು ಜೊತೆ ಹೊಸ ಮುಖಕ್ಕಾಗಿ ಹುಡುಕಾಡುತ್ತಿದ್ದಾಗ ನಿರ್ದೇಶಕರಿಗೆ ಹಿಂದಿಯ 'ಎಂ.ಎಸ್. ಧೋನಿ: ದಿ ಅನ್‌ಟೋಲ್ಡ್ ಸ್ಟೋರಿ' ಸಿನಿಮಾ ನೆನಪಾಯ್ತು. ಅದರಲ್ಲಿ ಧೋನಿ ಪತ್ನಿ ಸಾಕ್ಷಿ ಪಾತ್ರ ಮಾಡಿದ್ದ ಕಿಯಾರಾ ಅಡ್ವಾಣಿ ಅವರನ್ನು ಆಡಿಷನ್‌ಗೆ ಕರೆದರು.

ಕಿಯಾರಾ ಲುಕ್ ಹೋಮ್ಲಿ ಹಾಗೂ ಗ್ಲಾಮರಸ್ ಆಗಿದ್ದರ ಜೊತೆಗೆ ಅವರು ಅದ್ಭುತ ನಟಿಯೂ ಆಗಿದ್ದರಿಂದ ತಕ್ಷಣವೇ ಸಂಪರ್ಕಿಸಿದರು. ಚಿತ್ರತಂಡ ಕಥೆ ಹೇಳಲು ಹೋದಾಗ, ಕೇವಲ ಅರ್ಧ ಗಂಟೆಯಲ್ಲೇ ಕಥೆ ಕೇಳಿದ ಕಿಯಾರಾ ಸಖತ್ ಎಕ್ಸೈಟ್ ಆದರಂತೆ. ಸೂಪರ್ ಸ್ಟಾರ್ ಮಹೇಶ್ ಬಾಬು ಜೊತೆ ನಟಿಸುವ ಚಾನ್ಸ್ ಮತ್ತು ಇಂಥ ಸ್ಟ್ರಾಂಗ್ ಕಥೆ ಸಿಕ್ಕಿದ್ದರಿಂದ ಮರುಯೋಚನೆ ಮಾಡದೆ ತಕ್ಷಣ ಓಕೆ ಅಂದರು ಎಂದು ಕೊರಟಾಲ ಶಿವ ತಿಳಿಸಿದ್ದಾರೆ. ಆಮೇಲೆ ಫೋಟೋಶೂಟ್ ಮಾಡಿದಾಗ ಮಹೇಶ್ ಪಕ್ಕ ಕಿಯಾರಾ ಜೋಡಿ ಪರ್ಫೆಕ್ಟ್ ಆಗಿ ಮ್ಯಾಚ್ ಆಯ್ತು.

ಸಿನಿಮಾದಲ್ಲಿ ಸದಾ ನೆನಪಾಗುವ ದೃಶ್ಯಗಳು

ಭರತ್ ಅನೇ ನೇನು ಸಿನಿಮಾದಲ್ಲಿ ಹೀರೋ ಮಾತನಾಡುವ ಫೋನ್ ಕಾಲ್ಸ್, ತಮ್ಮ ರಿಲೇಶನ್‌ಶಿಪ್ ಬಗ್ಗೆ ಪ್ರೆಸ್ ಮೀಟ್‌ನಲ್ಲಿ ಮಹೇಶ್ ಬಾಬು ಹೇಳುವ ಪವರ್‌ಫುಲ್ ಡೈಲಾಗ್ಸ್ ಐದು ವರ್ಷಗಳಾದರೂ ನೆನಪಿನಲ್ಲಿ ಉಳಿಯುವಂತಿವೆ ಎಂದು ನಿರ್ದೇಶಕ ಕೊರಟಾಲ ಹೇಳಿದ್ದಾರೆ. ಏನೇ ಆಗಲಿ, ಸರಿಯಾದ ಪಾತ್ರಕ್ಕೆ ಸರಿಯಾದ ನಟಿಯನ್ನು ಆಯ್ಕೆ ಮಾಡಿದ್ದರಿಂದಲೇ ಈ ಸಿನಿಮಾ ಪ್ರೇಕ್ಷಕರಿಗೆ ಒಂದು ವಿಶೇಷ ಫೀಲ್ ಕೊಟ್ಟು ಬ್ಲಾಕ್‌ಬಸ್ಟರ್ ಹಿಟ್ ಆಯ್ತು ಎಂದಿದ್ದಾರೆ.

ಮದುವೆ ಬಗ್ಗೆ ಹೆಚ್ಚು ಮಾತನಾಡದ ನಟಿ ತಾಪ್ಸಿ ಪನ್ನು: ಈಗ 13 ವರ್ಷಗಳ ಸಂಬಂಧದ ಗುಟ್ಟು ಬಹಿರಂಗ!

Govindaraj S — Mon, 28 Sep 2026 19:32:19 +0530

ನಟಿ ತಾಪ್ಸಿ ಪನ್ನು ಮತ್ತು ಮಾಜಿ ಡೆನ್ಮಾರ್ಕ್ ಬ್ಯಾಡ್ಮಿಂಟನ್ ಆಟಗಾರ ಹಾಗೂ ಕೋಚ್ ಮಥಿಯಾಸ್ ಬೋ ಅವರ 13 ವರ್ಷಗಳ ಸಂಬಂಧದ ಬಗ್ಗೆ ನಟಿ ಮೊದಲ ಬಾರಿಗೆ ಹಲವು ಆಸಕ್ತಿಕರ ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.

ಸಿನಿಮಾ ತಾರೆಯರ ವೈಯಕ್ತಿಕ ಜೀವನದ ಬಗ್ಗೆ ತಿಳಿದುಕೊಳ್ಳುವ ಕುತೂಹಲ ಅಭಿಮಾನಿಗಳಲ್ಲಿ ಸದಾ ಇರುತ್ತದೆ. ಆದರೆ ಕೆಲವರು ಮಾತ್ರ ಕ್ಯಾಮೆರಾ ಮುಂದೆ ಎಷ್ಟೇ ಆಕ್ಟಿವ್ ಆಗಿದ್ದರೂ, ತಮ್ಮ ಪರ್ಸನಲ್ ಲೈಫ್‌ ಅನ್ನು ಮಾತ್ರ ತುಂಬಾ ಖಾಸಗಿಯಾಗಿಟ್ಟುಕೊಳ್ಳುತ್ತಾರೆ. ಬಾಲಿವುಡ್ ನಟಿ ತಾಪ್ಸಿ ಪನ್ನು ಕೂಡ ಇದೇ ಸಾಲಿಗೆ ಸೇರುತ್ತಾರೆ.

ತಮ್ಮ ಸಿನಿಮಾಗಳು ಹಾಗೂ ವೃತ್ತಿಜೀವನದ ವಿಚಾರಗಳನ್ನು ಅಭಿಮಾನಿಗಳೊಂದಿಗೆ ಹಂಚಿಕೊಳ್ಳುವ ತಾಪ್ಸಿ, ವೈಯಕ್ತಿಕ ಬದುಕಿನ ವಿಷಯಕ್ಕೆ ಬಂದಾಗ ಮಾತ್ರ ಹೆಚ್ಚು ಮಾತನಾಡುವುದಿಲ್ಲ. ಆದರೆ ಇತ್ತೀಚಿನ ಯೂಟ್ಯೂಬ್ ಸಂದರ್ಶನವೊಂದರಲ್ಲಿ ತಮ್ಮ ರಿಲೇಶನ್‌ಶಿಪ್ ಹಾಗೂ ವೈವಾಹಿಕ ಜೀವನದ ಬಗ್ಗೆ ಕೆಲವು ಆಸಕ್ತಿಕರ ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.

ಮಾಜಿ ಡೆನ್ಮಾರ್ಕ್ ಪ್ರೊಫೆಷನಲ್ ಬ್ಯಾಡ್ಮಿಂಟನ್ ಆಟಗಾರ ಹಾಗೂ ಕೋಚ್ ಮಥಿಯಾಸ್ ಬೋ ಅವರೊಂದಿಗೆ ತಾಪ್ಸಿ ಹಲವು ವರ್ಷಗಳಿಂದ ರಿಲೇಶನ್‌ಶಿಪ್‌ನಲ್ಲಿರುವುದು ಗೊತ್ತಿರುವ ವಿಚಾರ. ಇವರಿಬ್ಬರ ಸಂಬಂಧ ಬರೋಬ್ಬರಿ 13 ವರ್ಷಗಳಿಂದ ಮುಂದುವರಿದಿದೆ. 2024ರಲ್ಲಿ ತಾಪ್ಸಿ ಮತ್ತು ಮಥಿಯಾಸ್ ಬೋ ವಿವಾಹವಾದರು. ಆದರೆ ಮದುವೆ ಸೇರಿದಂತೆ ತಮ್ಮ ವೈಯಕ್ತಿಕ ಬದುಕಿನ ವಿಚಾರಗಳನ್ನು ತಾಪ್ಸಿ ಸಾರ್ವಜನಿಕವಾಗಿ ಹೆಚ್ಚು ಹಂಚಿಕೊಂಡಿಲ್ಲ. ಸೋಷಿಯಲ್ ಮೀಡಿಯಾದಲ್ಲೂ ತಮ್ಮ ಪರ್ಸನಲ್ ಲೈಫ್‌ಗೆ ಸಂಬಂಧಿಸಿದ ಪೋಸ್ಟ್‌ಗಳನ್ನು ಅವರು ಸೀಮಿತವಾಗಿಯೇ ಇಡುತ್ತಾರೆ.

ತಮ್ಮ ವೈವಾಹಿಕ ಸಂಬಂಧದ ಬಗ್ಗೆ ಮಾತನಾಡಿರುವ ತಾಪ್ಸಿ, ಪರಸ್ಪರ ಗೌರವವೇ ತಮ್ಮ ಸಂಬಂಧದ ಪ್ರಮುಖ ಆಧಾರ ಎಂದು ಹೇಳಿದ್ದಾರೆ. ತಾವು ಬಾಲಿವುಡ್‌ಗೆ ಎಂಟ್ರಿ ಕೊಟ್ಟ ಸಮಯದಲ್ಲೇ ಮಥಿಯಾಸ್ ಜೊತೆಗಿನ ಸಂಬಂಧ ಆರಂಭವಾಯಿತು ಎಂದು ಅವರು ತಿಳಿಸಿದ್ದಾರೆ. ಇಷ್ಟು ವರ್ಷಗಳ ಕಾಲ ಜೊತೆಯಾಗಿ ಜೀವನ ನಡೆಸಿರುವುದರಿಂದ ತಮ್ಮ ಸಂಬಂಧದ ಮೇಲೆ ಸಂಪೂರ್ಣ ನಂಬಿಕೆ ಇದೆ ಎಂದು ತಾಪ್ಸಿ ಹೇಳಿದ್ದಾರೆ. ಜೀವನದಲ್ಲಿ ತೆಗೆದುಕೊಂಡ ಹಲವು ನಿರ್ಧಾರಗಳ ಪೈಕಿ ಮಥಿಯಾಸ್ ಅವರನ್ನು ಜೀವನ ಸಂಗಾತಿಯಾಗಿ ಆಯ್ಕೆ ಮಾಡಿಕೊಂಡಿದ್ದು ತಮಗೆ ಅತ್ಯಂತ ತೃಪ್ತಿ ನೀಡಿದ ನಿರ್ಧಾರ ಎಂದು ಹೇಳಿದ್ದಾರೆ.

ತಮ್ಮ ಕುಟುಂಬವನ್ನು ಜೀವನದಲ್ಲಿ ದೊರೆತ ವರ ಎಂದು ಬಣ್ಣಿಸಿರುವ ತಾಪ್ಸಿ, ತಮ್ಮ ವೃತ್ತಿಜೀವನ ಅನಿರೀಕ್ಷಿತವಾಗಿ ದೊರೆತ ಅವಕಾಶ ಎಂದು ಹೇಳಿದ್ದಾರೆ. ಆದರೆ ಜೀವನ ಸಂಗಾತಿಯನ್ನು ಮಾತ್ರ ತಾವೇ ಆಯ್ಕೆ ಮಾಡಿಕೊಂಡಿರುವುದಾಗಿ ತಿಳಿಸಿದ್ದಾರೆ. ಅದಕ್ಕಾಗಿಯೇ ಈ ನಿರ್ಧಾರದ ಬಗ್ಗೆ ನನಗೆ ಹೆಮ್ಮೆ ಇದೆ ಎಂಬ ಅರ್ಥದಲ್ಲಿ ತಾಪ್ಸಿ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ಮಥಿಯಾಸ್ ಜೊತೆಗಿನ ತಮ್ಮ ಸಂಬಂಧದ ಬಗ್ಗೆ ಮಾತನಾಡುತ್ತಾ, ಇಷ್ಟು ವರ್ಷಗಳಲ್ಲಿ ಇಬ್ಬರ ನಡುವೆ ಭದ್ರತೆ, ನಂಬಿಕೆ ಹಾಗೂ ಪರಸ್ಪರ ಅರ್ಥಮಾಡಿಕೊಳ್ಳುವಿಕೆ ಬೆಳೆದಿದೆ ಎಂದು ಹೇಳಿದ್ದಾರೆ. ಆದರೆ ಇವೆಲ್ಲಕ್ಕಿಂತ ಮುಖ್ಯವಾಗಿ ಒಬ್ಬರ ಮೇಲೊಬ್ಬರಿಗೆ ಇರುವ ಗೌರವವೇ ತಮ್ಮ ಸಂಬಂಧವನ್ನು ಇಷ್ಟು ಗಟ್ಟಿಯಾಗಿ ಉಳಿಸಿದೆ ಎಂದು ತಾಪ್ಸಿ ಹೇಳಿದ್ದಾರೆ.

ಸಿನಿಮಾ ಇಂಡಸ್ಟ್ರಿಯಲ್ಲಿ ಕೆಲಸ ಮಾಡುತ್ತಿರುವ ಅನೇಕರು ತಮ್ಮ ಜೀವನದಲ್ಲಿ ಪ್ರೀತಿಯನ್ನು ಹುಡುಕುತ್ತಿದ್ದಾರೆ ಎಂದು ತಾಪ್ಸಿ ಹೇಳಿದ್ದಾರೆ. ಆದರೆ ಅದೇ ಸಮಯದಲ್ಲಿ ಸಂಬಂಧಗಳನ್ನು ದೀರ್ಘಕಾಲ ಮುಂದುವರಿಸಿಕೊಂಡು ಹೋಗುವುದು ಇಂದಿನ ದಿನಗಳಲ್ಲಿ ಹೆಚ್ಚು ಸವಾಲಿನ ಸಂಗತಿಯಾಗಿದೆ ಎಂಬ ಅಭಿಪ್ರಾಯವನ್ನೂ ವ್ಯಕ್ತಪಡಿಸಿದ್ದಾರೆ. ತಾತ್ಕಾಲಿಕ ಸಂತೋಷಗಳಿಗೆ ನಾವು ಹೆಚ್ಚು ಪ್ರಾಮುಖ್ಯತೆ ನೀಡುತ್ತಿದ್ದೇವೆಯೇ ಎಂಬ ಪ್ರಶ್ನೆಯನ್ನೂ ಅವರು ಮುಂದಿಟ್ಟಿದ್ದಾರೆ. ಆದರೆ ತಮ್ಮ ವೈಯಕ್ತಿಕ ಅನುಭವ ಇದಕ್ಕಿಂತ ಭಿನ್ನವಾಗಿದೆ ಎಂದು ತಾಪ್ಸಿ ಹೇಳಿದ್ದಾರೆ. ಇನ್ನು ತಮ್ಮ 13 ವರ್ಷಗಳ ಸಂಬಂಧ ಇಂದಿಗೂ ಗಟ್ಟಿಯಾಗಿ ಮುಂದುವರಿಯಲು ಪರಸ್ಪರ ಗೌರವ, ನಂಬಿಕೆ ಮತ್ತು ಒಬ್ಬರನ್ನೊಬ್ಬರು ಅರ್ಥಮಾಡಿಕೊಳ್ಳುವ ಗುಣವೇ ಕಾರಣ ಎಂದು ತಾಪ್ಸಿ ಪನ್ನು ಹೇಳಿದ್ದಾರೆ.

ಜೈಲರ್ 2, ರಾಮಾಯಣ ರೈಟ್ಸ್‌ಗೆ ಭಾರೀ ಪೈಪೋಟಿ: ರಜನಿಕಾಂತ್, ಯಶ್ ಸಿನಿಮಾಗಳ ಬಿಸಿನೆಸ್‌ಗೆ ಹೊಸ ಲೆಕ್ಕ!

Govindaraj S — Mon, 28 Sep 2026 18:22:49 +0530

ತೆಲುಗು ಸಿನಿಮಾ ಮಾರುಕಟ್ಟೆಯಲ್ಲಿ ಡಬ್ಬಿಂಗ್ ಸಿನಿಮಾಗಳ ಹವಾ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಒಂದು ಕಾಲದಲ್ಲಿ ಸ್ಟ್ರೈಟ್ ತೆಲುಗು ಸಿನಿಮಾಗಳಿಗೆ ಮಾತ್ರ ದೊಡ್ಡ ಮಟ್ಟದ ಬಿಸಿನೆಸ್ ಸಿಗುತ್ತಿತ್ತು. ಆದರೆ ಈಗ ಪರಿಸ್ಥಿತಿ ಬದಲಾಗಿದ್ದು, ಪರಭಾಷೆಯ ಸಿನಿಮಾಗಳು ಕೂಡ ತೆಲುಗು ರಾಜ್ಯಗಳಲ್ಲಿ ಭರ್ಜರಿ ಬಿಸಿನೆಸ್ ಮಾಡುತ್ತಿವೆ. ಅಷ್ಟೇ ಅಲ್ಲ, ನಮ್ಮದೇ ಸಿನಿಮಾಗಳಿಗೆ ಪೈಪೋಟಿ ನೀಡುವಷ್ಟು ದೊಡ್ಡ ಮೊತ್ತದ ಡೀಲ್ಸ್ ನಡೆಯುತ್ತಿವೆ.

ಮುಂದಿನ ಎರಡು ತಿಂಗಳಲ್ಲಿ ತೆರೆಗೆ ಬರಲಿರುವ ‘ಜೈಲರ್ 2’ ಮತ್ತು ‘ರಾಮಾಯಣ’ ಸಿನಿಮಾಗಳ ತೆಲುಗು ರೈಟ್ಸ್ ಡೀಲ್‌ಗಳು ಸದ್ಯ ಟ್ರೇಡ್ ವಲಯದಲ್ಲಿ ಭಾರೀ ಚರ್ಚೆಯಾಗುತ್ತಿವೆ. ವಿಶೇಷವಾಗಿ ‘ರಾಮಾಯಣ’ ಚಿತ್ರದ ತೆಲುಗು ಹಕ್ಕುಗಳಿಗಾಗಿ ನಡೆಯುತ್ತಿರುವ ಮಾತುಕತೆಗಳು ಕುತೂಹಲ ಮೂಡಿಸಿವೆ.

‘ರಾಮಾಯಣ’ ತೆಲುಗು ರೈಟ್ಸ್‌ಗೆ ₹100 ಕೋಟಿ ಚರ್ಚೆ?

‘ರಾಮಾಯಣ’ ಚಿತ್ರದ ತೆಲುಗು ರೈಟ್ಸ್‌ಗಾಗಿ ಬರೋಬ್ಬರಿ ₹100 ಕೋಟಿ ಮೊತ್ತದ ಡೀಲ್ ಬಗ್ಗೆ ಚರ್ಚೆಗಳು ನಡೆಯುತ್ತಿವೆ ಎನ್ನಲಾಗಿದೆ. ಇಷ್ಟು ದೊಡ್ಡ ಮೊತ್ತದ ಬಿಸಿನೆಸ್ ನಡೆಯುತ್ತಿರುವುದು ಟ್ರೇಡ್ ವಲಯದಲ್ಲಿ ಗಮನ ಸೆಳೆದಿದೆ. ಆದರೆ ಈ ಡೀಲ್‌ನಲ್ಲಿ ದಿಲ್ ರಾಜು ಮಾತ್ರ ಕೊಂಚ ಸೇಫ್ ಗೇಮ್ ಆಡಲು ಮುಂದಾಗಿದ್ದಾರೆ ಎನ್ನಲಾಗುತ್ತಿದೆ. ಭಾರೀ ಮೊತ್ತವನ್ನು ನೇರವಾಗಿ ಹೂಡಿಕೆ ಮಾಡುವ ಬದಲು, ಅಡ್ವಾನ್ಸ್ ಆಧಾರದ ಮೇಲೆ ರೈಟ್ಸ್ ಪಡೆದುಕೊಳ್ಳುವ ಲೆಕ್ಕಾಚಾರದಲ್ಲಿ ಅವರು ಆಸಕ್ತಿ ತೋರಿಸುತ್ತಿದ್ದಾರೆ ಎಂಬ ಮಾಹಿತಿ ಹರಿದಾಡುತ್ತಿದೆ.

‘ಟಾಕ್ಸಿಕ್’ ಲೆಕ್ಕ.. ‘ರಾಮಾಯಣ’ ಡೀಲ್!

ಇದರ ಹಿಂದೆ ಮತ್ತೊಂದು ಇಂಟರೆಸ್ಟಿಂಗ್ ಲೆಕ್ಕಾಚಾರವೂ ಇದೆ ಎನ್ನಲಾಗಿದೆ. ಯಶ್ ಅಭಿನಯದ ‘ಟಾಕ್ಸಿಕ್’ ಸಿನಿಮಾಕ್ಕೆ ಸಂಬಂಧಿಸಿದ ಬಾಕಿ ಹಣವನ್ನು ‘ರಾಮಾಯಣ’ ಚಿತ್ರದ ಡೀಲ್ ಮೂಲಕ ಬ್ಯಾಲೆನ್ಸ್ ಮಾಡಿಕೊಳ್ಳುವ ತಂತ್ರವನ್ನು ದಿಲ್ ರಾಜು ಅನುಸರಿಸುತ್ತಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಯಶ್ ಈ ಎರಡೂ ಸಿನಿಮಾಗಳ ನಿರ್ಮಾಣದೊಂದಿಗೆ ಸಂಬಂಧ ಹೊಂದಿರುವ ಕಾರಣ, ಹಿಂದಿನ ಬಾಕಿ ಲೆಕ್ಕಾಚಾರಗಳನ್ನು ಹೊಸ ಡೀಲ್ ಮೂಲಕ ಸೆಟಲ್ ಮಾಡಿಕೊಳ್ಳುವ ಪ್ರಯತ್ನ ನಡೆಯುತ್ತಿದೆ ಎನ್ನಲಾಗಿದೆ.

ಇನ್ನು ಡಬ್ಬಿಂಗ್ ಸಿನಿಮಾ ಎಂಬ ಟ್ಯಾಗ್ ಇದ್ದರೂ ತೆಲುಗು ಮಾರುಕಟ್ಟೆಯಲ್ಲಿ ಅವುಗಳ ಬಿಸಿನೆಸ್ ಮಾತ್ರ ಸ್ಟ್ರೈಟ್ ಸಿನಿಮಾಗಳ ಮಟ್ಟಕ್ಕೆ ಏರುತ್ತಿದೆ. ‘ಜೈಲರ್ 2’, ‘ರಾಮಾಯಣ’ ಸೇರಿದಂತೆ ದೊಡ್ಡ ಸಿನಿಮಾಗಳ ತೆಲುಗು ರೈಟ್ಸ್‌ಗೆ ನಡೆಯುತ್ತಿರುವ ಕೋಟ್ಯಂತರ ರೂಪಾಯಿ ಡೀಲ್ಸ್, ತೆಲುಗು ಮಾರುಕಟ್ಟೆಯಲ್ಲಿನ ಡಬ್ಬಿಂಗ್ ಸಿನಿಮಾಗಳ ಹೆಚ್ಚುತ್ತಿರುವ ಕ್ರೇಜ್‌ಗೆ ಮತ್ತೊಂದು ಉದಾಹರಣೆಯಾಗಿದೆ.

ಹೀರೋಯಿನ್ ಚಾನ್ಸ್ ಕಡಿಮೆಯಾಯ್ತು, ಆದ್ರೆ ಕ್ರೇಜ್ ಮಾತ್ರ ಕಮ್ಮಿಯಾಗಿಲ್ಲ: ಈ ನಟಿಯರ ಹೊಸ ಅಸ್ತ್ರವಿದು!

Govindaraj S — Mon, 28 Sep 2026 17:50:04 +0530

ಸಿನಿಮಾ ಇಂಡಸ್ಟ್ರಿಯಲ್ಲಿ ನಾಯಕಿಯರ ಕರಿಯರ್‌ ಗ್ರಾಫ್ ಯಾವಾಗಲೂ ಒಂದೇ ರೀತಿ ಇರುವುದಿಲ್ಲ. ಒಂದು ಹಂತದಲ್ಲಿ ಸಾಲು ಸಾಲು ಸಿನಿಮಾಗಳಲ್ಲಿ ಬ್ಯುಸಿಯಾಗಿರುವ ನಟಿಯರಿಗೆ, ಮತ್ತೊಂದು ಹಂತದಲ್ಲಿ ಅವಕಾಶಗಳು ಕಡಿಮೆಯಾಗಬಹುದು. ಆದರೆ ಈಗ ಸೀನಿಯರ್ ಹೀರೋಯಿನ್‌ಗಳಿಗೆ ಅಂತಹ ಸಂದರ್ಭದಲ್ಲೂ ತಮ್ಮ ಕ್ರೇಜ್ ಉಳಿಸಿಕೊಳ್ಳಲು ಹೊಸ ದಾರಿ ಸಿಕ್ಕಿದೆ. ಅದೇ ಸ್ಪೆಷಲ್ ಸಾಂಗ್ಸ್!

ಒಮ್ಮೆ ಸ್ಟಾರ್ ಹೀರೋಯಿನ್‌ಗಳಾಗಿ ಮಿಂಚಿದ್ದ ಹಲವು ನಟಿಯರು, ಸಿನಿಮಾಗಳಲ್ಲಿ ನಾಯಕಿಯಾಗಿ ಅವಕಾಶಗಳು ಕಡಿಮೆಯಾದ ಬಳಿಕ ಸ್ಪೆಷಲ್ ಸಾಂಗ್ಸ್‌ನತ್ತ ಮುಖ ಮಾಡುತ್ತಿದ್ದಾರೆ. ಗ್ಲಾಮರ್, ಎನರ್ಜಿಟಿಕ್ ಡ್ಯಾನ್ಸ್ ಹಾಗೂ ಒಂದೇ ಹಾಡಿನಲ್ಲಿ ಸಿಗುವ ದೊಡ್ಡ ಸ್ಕ್ರೀನ್ ಪ್ರೆಸೆನ್ಸ್ ಮೂಲಕ ಮತ್ತೆ ಪ್ರೇಕ್ಷಕರ ಗಮನ ಸೆಳೆಯುತ್ತಿದ್ದಾರೆ.

ಸ್ಪೆಷಲ್ ಸಾಂಗ್ಸ್‌ನಲ್ಲಿ ತಮನ್ನಾ ಜೋರು

ಈ ಟ್ರೆಂಡ್‌ನಲ್ಲಿ ತಮನ್ನಾ ಭಾಟಿಯಾ ಹೆಸರು ಪ್ರಮುಖವಾಗಿ ಕೇಳಿಬರುತ್ತಿದೆ. ನಾಯಕಿಯಾಗಿ ಅವಕಾಶಗಳು ಕೊಂಚ ಕಡಿಮೆಯಾಗುತ್ತಿದ್ದಂತೆ ಸ್ಪೆಷಲ್ ನಂಬರ್ಸ್‌ಗಳ ಮೂಲಕ ತಮ್ಮ ಸಿನಿ ಜರ್ನಿಯನ್ನು ಮುಂದುವರಿಸುತ್ತಿದ್ದಾರೆ. ಬ್ಯಾಕ್ ಟು ಬ್ಯಾಕ್ ಸ್ಪೆಷಲ್ ಸಾಂಗ್ಸ್‌ನಲ್ಲಿ ಕಾಣಿಸಿಕೊಳ್ಳುತ್ತಿರುವ ತಮನ್ನಾ, ವರ್ಷಕ್ಕೆ ಕನಿಷ್ಠ ಮೂರು-ನಾಲ್ಕು ಹಾಡುಗಳ ಮೂಲಕ ಪ್ರೇಕ್ಷಕರನ್ನು ರಂಜಿಸುತ್ತಿದ್ದಾರೆ.

ಶ್ರುತಿ ಹಾಸನ್ ಕೂಡ ಇದೇ ಹಾದಿಯಲ್ಲಿ!

ತಮನ್ನಾ ಹಾದಿಯಲ್ಲೇ ಶ್ರುತಿ ಹಾಸನ್ ಕೂಡ ಸ್ಪೆಷಲ್ ಸಾಂಗ್ಸ್ ಮೂಲಕ ತಮ್ಮದೇ ಛಾಪು ಮೂಡಿಸುತ್ತಿದ್ದಾರೆ. ‘ಹಾಯ್ ನಾನ್ನಾ’ ಸಿನಿಮಾದಲ್ಲಿ ಕಾಣಿಸಿಕೊಂಡ ಬಳಿಕ, ‘ಪೆದ್ದಿ’ ಸಿನಿಮಾದ ‘ಹೆಲ್ಲೆಲ್ಲೋ’ ಹಾಡಿನಲ್ಲೂ ತಮ್ಮದೇ ಸ್ಟೈಲ್‌ನ ಡ್ಯಾನ್ಸ್ ಮೂಲಕ ಗಮನ ಸೆಳೆದಿದ್ದಾರೆ.

ಕ್ಯಾಥರಿನ್‌ಗೆ ಮತ್ತೆ ಲೈಮ್‌ಲೈಟ್

ಕ್ಯಾಥರಿನ್ ಥೆರೆಸಾ ಕೂಡ ಸ್ಪೆಷಲ್ ಸಾಂಗ್ ಮೂಲಕ ಮತ್ತೆ ಸುದ್ದಿಯಾಗಿದ್ದಾರೆ. ‘ಸಿಗ್ಮಾ’ ಸಿನಿಮಾದಲ್ಲಿ ‘ಸುಲೋಚನಾ’ ಹಾಡಿನಲ್ಲಿ ವಿಶೇಷವಾಗಿ ಕಾಣಿಸಿಕೊಂಡ ಅವರು, ತಮ್ಮ ಗ್ಲಾಮರ್ ಮತ್ತು ಡ್ಯಾನ್ಸ್‌ನಿಂದ ಪ್ರೇಕ್ಷಕರ ಗಮನ ಸೆಳೆದಿದ್ದಾರೆ. ಈ ಹಾಡಿನ ಮೂಲಕ ಕ್ಯಾಥರಿನ್ ಮತ್ತೆ ಲೈಮ್‌ಲೈಟ್‌ಗೆ ಬಂದಿದ್ದಾರೆ.

‘ದಿ ಪ್ಯಾರಡೈಸ್’ನಲ್ಲಿ ಕೀರ್ತಿ ಸುರೇಶ್ ಸ್ಪೆಷಲ್ ಕಿಕ್

ಇತ್ತೀಚೆಗೆ ಕೀರ್ತಿ ಸುರೇಶ್ ಕೂಡ ಸ್ಪೆಷಲ್ ಸಾಂಗ್ ಟ್ರೆಂಡ್‌ಗೆ ಎಂಟ್ರಿ ಕೊಟ್ಟಿದ್ದಾರೆ. ನಾನಿ ಅಭಿನಯದ ‘ದಿ ಪ್ಯಾರಡೈಸ್’ ಸಿನಿಮಾದ ‘ಏಸು ನಾಗುಲ’ ಹಾಡಿನಲ್ಲಿ ಕಾಣಿಸಿಕೊಂಡ ಕೀರ್ತಿ, ತಮ್ಮ ಡ್ಯಾನ್ಸ್ ಮೂಲಕ ಥಿಯೇಟರ್‌ನಲ್ಲಿ ಪ್ರೇಕ್ಷಕರಿಗೆ ಮತ್ತೊಂದು ಎಂಟರ್‌ಟೈನ್ಮೆಂಟ್ ಟ್ರೀಟ್ ನೀಡಿದ್ದಾರೆ.

ಯಂಗ್ ಹೀರೋಯಿನ್‌ಗಳೂ ಹಿಂದೆ ಬಿದ್ದಿಲ್ಲ!

ಈ ಟ್ರೆಂಡ್ ಕೇವಲ ಸೀನಿಯರ್ ಹೀರೋಯಿನ್‌ಗಳಿಗೆ ಮಾತ್ರ ಸೀಮಿತವಾಗಿಲ್ಲ. ಶ್ರೀಲೀಲಾ ಸೇರಿದಂತೆ ಯಂಗ್ ಹೀರೋಯಿನ್‌ಗಳೂ ಆಗಾಗ ಸ್ಪೆಷಲ್ ಸಾಂಗ್ಸ್ ಮೂಲಕ ತಮ್ಮ ಕ್ರೇಜ್ ತೋರಿಸುತ್ತಿದ್ದಾರೆ. ನಾಯಕಿಯಾಗಿ ಪ್ರಮುಖ ಪಾತ್ರಗಳಲ್ಲಿ ಬ್ಯುಸಿಯಾಗಿದ್ದರೂ, ವಿಶೇಷ ಹಾಡುಗಳಲ್ಲಿ ಕಾಣಿಸಿಕೊಂಡು ಪ್ರೇಕ್ಷಕರಿಗೆ ಎಕ್ಸ್‌ಟ್ರಾ ಕಿಕ್ ನೀಡುತ್ತಿದ್ದಾರೆ.

ಇನ್ನು ಸ್ಪೆಷಲ್ ಸಾಂಗ್ಸ್ ಈಗ ಕೇವಲ ಸಿನಿಮಾದಲ್ಲಿನ ಒಂದು ಹಾಡಾಗಿ ಉಳಿದಿಲ್ಲ. ನಾಯಕಿಯರಿಗೆ ಮತ್ತೆ ಲೈಮ್‌ಲೈಟ್‌ಗೆ ಬರಲು, ತಮ್ಮ ಗ್ಲಾಮರ್ ಮತ್ತು ಡ್ಯಾನ್ಸ್ ಮೂಲಕ ಪ್ರೇಕ್ಷಕರ ಗಮನ ಸೆಳೆಯಲು ಹಾಗೂ ಹೊಸ ಅವಕಾಶಗಳನ್ನು ಪಡೆದುಕೊಳ್ಳಲು ಇದು ಒಂದು ಪ್ರಮುಖ ವೇದಿಕೆಯಾಗುತ್ತಿದೆ. ಇದೇ ಕಾರಣಕ್ಕೆ ಸೀನಿಯರ್‌ನಿಂದ ಯಂಗ್ ಹೀರೋಯಿನ್‌ಗಳವರೆಗೆ ಹಲವರು ಈ ಟ್ರೆಂಡ್‌ನತ್ತ ಹೆಜ್ಜೆ ಹಾಕುತ್ತಿದ್ದಾರೆ.

Salman Khan: 'ಸತ್ಯ ಗೊತ್ತಿದ್ದೂ ವಿಡಿಯೋ ಮಾಡುವವರ ಉದ್ದೇಶ'..?! ಜೈಲಿಗೆ ತಳ್ಳಿದರೆ ಬುದ್ಧಿ ಬರುತ್ತದೆ- ಬಾಲಿವುಡ್ 'ಟೈಗರ್' ಘರ್ಜನೆ!

Shriram Bhat — Mon, 28 Sep 2026 17:28:06 +0530

Salman Khan AI deepfake video- ಬಾಲಿವುಡ್ ಸೂಪರ್‌ಸ್ಟಾರ್ ಸಲ್ಮಾನ್ ಖಾನ್ ಸಿನಿಮಾ ವಿಚಾರಗಳಷ್ಟೇ ಅಲ್ಲ, ಇತ್ತೀಚೆಗೆ ತಂತ್ರಜ್ಞಾನದ ದುರ್ಬಳಕೆಯ ಬಗ್ಗೆಯೂ ತಮ್ಮ ಧ್ವನಿ ಎತ್ತಿದ್ದಾರೆ. ‘ಬಿಗ್ ಬಾಸ್ 20’ರ ವೇದಿಕೆಯಲ್ಲಿ ನಡೆದ ‘ವೀಕೆಂಡ್ ಕಾ ವಾರ್’ ಎಪಿಸೋಡ್‌ನಲ್ಲಿ ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್‌ ಅಥವಾ ಎಐ ತಂತ್ರಜ್ಞಾನ ಬಳಸಿ ಸೃಷ್ಟಿಸಲಾಗುತ್ತಿರುವ ಡೀಪ್‌ಫೇಕ್ ವಿಡಿಯೋಗಳ ಬಗ್ಗೆ ಅವರು ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ. ತಮ್ಮದೇ ಮುಖ ಮತ್ತು ಧ್ವನಿಯನ್ನು ಬಳಸಿಕೊಂಡು ನಕಲಿ ವಿಡಿಯೋಗಳನ್ನು ಸೃಷ್ಟಿಸಲಾಗುತ್ತಿದೆ ಎಂದು ಹೇಳಿರುವ ಸಲ್ಮಾನ್, ಇಂತಹ ಕೃತ್ಯಗಳ ಹಿಂದೆ ಇರುವವರ ವಿರುದ್ಧ ಕಠಿಣ ಕಾನೂನು ಕ್ರಮ ಅಗತ್ಯ ಎಂದು ಒತ್ತಾಯಿಸಿದ್ದಾರೆ.

ತಂತ್ರಜ್ಞಾನ ದಿನದಿಂದ ದಿನಕ್ಕೆ ವೇಗವಾಗಿ ಬೆಳೆಯುತ್ತಿರುವಂತೆ ಅದರ ಸದುಪಯೋಗದ ಜೊತೆಗೆ ದುರುಪಯೋಗವೂ ಹೆಚ್ಚಾಗುತ್ತಿದೆ. ವಿಶೇಷವಾಗಿ ಎಐ ತಂತ್ರಜ್ಞಾನ ಬಳಸಿ ಸೆಲೆಬ್ರಿಟಿಗಳ ಮುಖ, ಧ್ವನಿ ಹಾಗೂ ದೇಹಭಾಷೆಯನ್ನು ಹೋಲುವಂತೆ ನಕಲಿ ವಿಡಿಯೋಗಳನ್ನು ಸೃಷ್ಟಿಸುವುದು ಹೊಸ ಸವಾಲಾಗಿ ಪರಿಣಮಿಸಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಇಂತಹ ವಿಡಿಯೋಗಳು ಕ್ಷಣಾರ್ಧದಲ್ಲಿ ವೈರಲ್ ಆಗುವುದರಿಂದ, ನಿಜ ಮತ್ತು ನಕಲಿ ನಡುವಿನ ವ್ಯತ್ಯಾಸ ಕಂಡುಹಿಡಿಯುವುದು ಕೆಲವೊಮ್ಮೆ ಕಷ್ಟವಾಗುತ್ತದೆ.

ಇದೇ ವಿಚಾರವನ್ನು ಸಲ್ಮಾನ್ ಖಾನ್ ‘ಬಿಗ್ ಬಾಸ್ 20’ ವೇದಿಕೆಯಲ್ಲಿ ಪ್ರಸ್ತಾಪಿಸಿದ್ದಾರೆ. ತಮ್ಮ ಮುಖವನ್ನು ಬಳಸಿಕೊಂಡು ಕೆಲವು ನಕಲಿ ವಿಡಿಯೋಗಳನ್ನು ತಯಾರಿಸಲಾಗುತ್ತಿದೆ ಎಂದು ಅವರು ಹೇಳಿದ್ದಾರೆ. ಅಷ್ಟೇ ಅಲ್ಲದೆ, ತಮ್ಮ ಧ್ವನಿಯನ್ನೂ ನಕಲು ಮಾಡಿ, ತಾವು ಬೇರೆಯವರಿಗೆ ಅವಾಚ್ಯವಾಗಿ ಮಾತನಾಡುತ್ತಿರುವಂತೆ ವಿಡಿಯೋಗಳನ್ನು ಸೃಷ್ಟಿಸಲಾಗುತ್ತಿದೆ ಎಂದು ಆತಂಕವನ್ನು ವ್ಯಕ್ತಪಡಿಸಿದ್ದಾರೆ.

ಇಂತಹ ವಿಡಿಯೋಗಳನ್ನು ನೋಡಿದ ಕೆಲವರು ಅವು ನಿಜವೆಂದು ನಂಬಿ ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತಷ್ಟು ಹಂಚಿಕೊಳ್ಳುವ ಸಾಧ್ಯತೆ ಇದೆ. ಪರಿಣಾಮವಾಗಿ, ಒಂದು ಸುಳ್ಳು ವಿಡಿಯೋ ದೊಡ್ಡ ಪ್ರಮಾಣದಲ್ಲಿ ಜನರನ್ನು ತಲುಪಬಹುದು. ಇದೇ ಕಾರಣಕ್ಕೆ ಉದ್ದೇಶಪೂರ್ವಕವಾಗಿ ನಕಲಿ ವಿಷಯ ಸೃಷ್ಟಿಸುವವರ ವಿರುದ್ಧ ಕಠಿಣ ಕ್ರಮ ಅಗತ್ಯ ಎಂದು ಸಲ್ಮಾನ್ ಅಭಿಪ್ರಾಯಪಟ್ಟಿದ್ದಾರೆ.

ನಕಲಿ ವಿಡಿಯೋಗಳು ಮತ್ತು ಸುಳ್ಳು ಮಾಹಿತಿಯನ್ನು ಉದ್ದೇಶಪೂರ್ವಕವಾಗಿ ಸೃಷ್ಟಿಸಿ ಹರಡುವವರನ್ನು ಜೈಲಿಗೆ ಕಳುಹಿಸುವಂತಹ ಕಠಿಣ ಕ್ರಮ ಕೈಗೊಳ್ಳಬೇಕು ಎಂಬ ಅಭಿಪ್ರಾಯವನ್ನೂ ಅವರು ವ್ಯಕ್ತಪಡಿಸಿದ್ದಾರೆ. ಇಂತಹ ಪ್ರಕರಣಗಳಲ್ಲಿ ಕಠಿಣ ಶಿಕ್ಷೆಯ ಭಯ ಮೂಡಿದಾಗ ಮಾತ್ರ ಇಂಥ ಕೃತ್ಯಗಳಿಗೆ ಕಡಿವಾಣ ಬೀಳಬಹುದು ಎಂಬುದು ಅವರ ಮಾತಿನ ಸಾರವಾಗಿದೆ.

ಇದರ ಜೊತೆಗೆ ಸಾಮಾಜಿಕ ಜಾಲತಾಣಗಳಲ್ಲಿನ ಇಂತಹ ವಿಷಯಗಳ ಮೇಲೆ ಹೆಚ್ಚಿನ ನಿಯಂತ್ರಣ ಇರಬೇಕು ಎಂದೂ ಸಲ್ಮಾನ್ ಹೇಳಿದ್ದಾರೆ. ಎಐ ತಂತ್ರಜ್ಞಾನದ ದುರ್ಬಳಕೆಯನ್ನು ತಡೆಯಲು ಸಾಮಾಜಿಕ ಜಾಲತಾಣ ಸಂಸ್ಥೆಗಳು ಪರಿಣಾಮಕಾರಿ ಕ್ರಮಗಳನ್ನು ಕೈಗೊಳ್ಳಬೇಕು ಎಂಬುದು ಅವರ ಒತ್ತಾಯ. ಡೀಪ್‌ಫೇಕ್ ವಿಡಿಯೋಗಳನ್ನು ಗುರುತಿಸುವುದು, ಅವುಗಳ ಹರಡುವಿಕೆಯನ್ನು ತಡೆಯುವುದು ಹಾಗೂ ದುರುಪಯೋಗದ ವಿರುದ್ಧ ಕ್ರಮ ಕೈಗೊಳ್ಳುವ ವ್ಯವಸ್ಥೆ ಮತ್ತಷ್ಟು ಬಲಪಡಿಸಬೇಕಿದೆ ಎಂಬ ಚರ್ಚೆಯೂ ಇದರೊಂದಿಗೆ ಮುನ್ನೆಲೆಗೆ ಬಂದಿದೆ.

ಸಲ್ಮಾನ್ ಖಾನ್ ಅವರ ಈ ಹೇಳಿಕೆ ‘ಬಿಗ್ ಬಾಸ್’ ವೇದಿಕೆಯನ್ನು ಮೀರಿ ಸಾಮಾಜಿಕ ಜಾಲತಾಣಗಳಲ್ಲೂ ಚರ್ಚೆಗೆ ಕಾರಣವಾಗಿದೆ. ಸೆಲೆಬ್ರಿಟಿಗಳಷ್ಟೇ ಅಲ್ಲದೆ, ಸಾಮಾನ್ಯ ಜನರ ಮುಖ ಮತ್ತು ಧ್ವನಿಯನ್ನೂ ದುರುಪಯೋಗಪಡಿಸಿಕೊಳ್ಳುವ ಸಾಧ್ಯತೆ ಇರುವುದರಿಂದ ಎಐ ಡೀಪ್‌ಫೇಕ್ ತಂತ್ರಜ್ಞಾನದ ಬಗ್ಗೆ ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸುವ ಅಗತ್ಯ ಹೆಚ್ಚಾಗಿದೆ.

ಒಟ್ಟಿನಲ್ಲಿ ಮನರಂಜನೆಯ ವೇದಿಕೆಯಲ್ಲಿ ಸಲ್ಮಾನ್ ಖಾನ್ ಪ್ರಸ್ತಾಪಿಸಿದ ಎಐ ಡೀಪ್‌ಫೇಕ್‌ಗಳ ವಿಚಾರ ಇದೀಗ ಮತ್ತೊಮ್ಮೆ ಚರ್ಚೆಯ ಕೇಂದ್ರವಾಗಿದೆ. ತಂತ್ರಜ್ಞಾನವನ್ನು ನಿಲ್ಲಿಸುವುದಕ್ಕಿಂತ ಅದರ ದುರುಪಯೋಗವನ್ನು ತಡೆಯಲು ಜವಾಬ್ದಾರಿಯುತ ಬಳಕೆ, ಜಾಗೃತಿ ಮತ್ತು ಪರಿಣಾಮಕಾರಿ ಕಾನೂನು ಕ್ರಮ ಅಗತ್ಯ ಎಂಬ ವಿಚಾರ ಈ ಚರ್ಚೆಯ ಮೂಲಕ ಮುನ್ನೆಲೆಗೆ ಬಂದಿದೆ.

ಹೀರೋಯಿನ್‌ಗಳ ಕೊರತೆ ಅಂತಿದ್ರು: ಈಗ ಸ್ಟಾರ್ ಸಿನಿಮಾಗಳಲ್ಲಿ ಈ ಹೊಸ ಮುಖಗಳದ್ದೇ ಹವಾ!

Govindaraj S — Mon, 28 Sep 2026 17:26:41 +0530

ಟಾಲಿವುಡ್‌ನಲ್ಲಿ ನಾಯಕಿಯರ ಕೊರತೆ ಎಂಬ ಚರ್ಚೆ ಆಗಾಗ ಕೇಳಿಬರುತ್ತಲೇ ಇರುತ್ತದೆ. ಆದರೆ ಈಗ ಪರಿಸ್ಥಿತಿ ನಿಧಾನವಾಗಿ ಬದಲಾಗುತ್ತಿರುವಂತೆ ಕಾಣುತ್ತಿದೆ. ಒಂದು ಕಾಲದಲ್ಲಿ ಸಾಲು ಸಾಲು ಸಿನಿಮಾಗಳ ಮೂಲಕ ಸದ್ದು ಮಾಡಿದ್ದ ಪೂಜಾ ಹೆಗ್ಡೆ, ರಶ್ಮಿಕಾ ಮಂದಣ್ಣ, ಶ್ರೀಲೀಲಾ ಸೇರಿದಂತೆ ಹಲವು ನಾಯಕಿಯರು ಹೊಸ ತಲೆಮಾರಿನ ನಟಿಯರಿಗೆ ದಾರಿ ಮಾಡಿಕೊಡುತ್ತಿರುವ ಬೆನ್ನಲ್ಲೇ, ಟಾಲಿವುಡ್‌ಗೆ ಹೊಸ ಮುಖಗಳ ಎಂಟ್ರಿ ಜೋರಾಗಿದೆ.

ವಿಶೇಷವೆಂದರೆ, ಇನ್ನೂ ಒಂದು ಸಿನಿಮಾ ಕೂಡ ಬಿಡುಗಡೆಯಾಗದ ಕೆಲ ನಾಯಕಿಯರು ಈಗಾಗಲೇ ಸ್ಟಾರ್ ಹೀರೋಗಳ ಸಿನಿಮಾಗಳಲ್ಲಿ ಅವಕಾಶ ಪಡೆದುಕೊಂಡು ಗಮನ ಸೆಳೆಯುತ್ತಿದ್ದಾರೆ. ಪ್ರಭಾಸ್, ಎನ್‌ಟಿಆರ್, ರಾಮ್ ಚರಣ್‌ರಂತಹ ಟಾಪ್ ಹೀರೋಗಳ ಜೊತೆ ನಟಿಸುವ ಅವಕಾಶ ಫಸ್ಟ್ ಸಿನಿಮಾ ರಿಲೀಸ್‌ಗೂ ಮುನ್ನವೇ ಸಿಗುತ್ತಿರುವುದು ಈ ಹೊಸ ಮುಖಗಳ ಕ್ರೇಜ್‌ಗೆ ಸಾಕ್ಷಿಯಾಗಿದೆ.

ರುಕ್ಮಿಣಿ ವಸಂತ್‌ಗೆ ಬ್ಯಾಕ್ ಟು ಬ್ಯಾಕ್ ಕ್ರೇಜಿ ಆಫರ್ಸ್

ಕನ್ನಡದ ಬೆಡಗಿ ರುಕ್ಮಿಣಿ ವಸಂತ್ ಸದ್ಯ ಟಾಲಿವುಡ್‌ನಲ್ಲಿ ಭಾರೀ ಸದ್ದು ಮಾಡುತ್ತಿರುವ ಹೊಸ ನಾಯಕಿಯರಲ್ಲಿ ಒಬ್ಬರಾಗಿದ್ದಾರೆ. ಜೂನಿಯರ್ ಎನ್‌ಟಿಆರ್ ನಟನೆಯ ‘ಡ್ರ್ಯಾಗನ್’ ಸಿನಿಮಾದಲ್ಲಿ ನಾಯಕಿಯಾಗಿ ಕಾಣಿಸಿಕೊಳ್ಳುತ್ತಿರುವ ರುಕ್ಮಿಣಿ, ಈ ಸಿನಿಮಾ ತೆರೆಗೆ ಬರುವ ಮುನ್ನವೇ ಮತ್ತೊಂದು ಬಿಗ್ ಆಫರ್ ಪಡೆದುಕೊಂಡಿದ್ದಾರೆ ಎನ್ನಲಾಗಿದೆ.

ಸುಕುಮಾರ್ ನಿರ್ದೇಶನದಲ್ಲಿ ರಾಮ್ ಚರಣ್ ನಟಿಸಲಿರುವ ಮುಂದಿನ ಸಿನಿಮಾಗೂ ರುಕ್ಮಿಣಿ ವಸಂತ್ ಆಯ್ಕೆಯಾಗಿದ್ದಾರೆ ಎಂಬ ಸುದ್ದಿ ಹರಿದಾಡುತ್ತಿದೆ. ಹೀಗಾಗಿ ಒಂದರ ಹಿಂದೆ ಒಂದರಂತೆ ಸ್ಟಾರ್ ಹೀರೋಗಳ ಸಿನಿಮಾಗಳಲ್ಲಿ ಅವಕಾಶ ಪಡೆಯುತ್ತಿರುವ ರುಕ್ಮಿಣಿ ಹೆಸರು ಟಾಲಿವುಡ್‌ನಲ್ಲಿ ಮತ್ತಷ್ಟು ಜೋರಾಗಿ ಕೇಳಿಬರುತ್ತಿದೆ.

ಪ್ರಭಾಸ್ ಜೊತೆ ಇಮಾನ್‌ವಿ ಇಸ್ಮಾಯಿಲ್!

ಇನ್ನು ಸೋಷಿಯಲ್ ಮೀಡಿಯಾದಲ್ಲಿ ತಮ್ಮ ಕ್ಯೂಟ್ ಡ್ಯಾನ್ಸ್ ವೀಡಿಯೋಗಳ ಮೂಲಕ ಗಮನ ಸೆಳೆದಿದ್ದ ಇಮಾನ್‌ವಿ ಇಸ್ಮಾಯಿಲ್ ಕೂಡ ಈಗ ದೊಡ್ಡ ಅವಕಾಶದೊಂದಿಗೆ ಸದ್ದು ಮಾಡುತ್ತಿದ್ದಾರೆ. ಯಾವುದೇ ಫಿಲ್ಮಿ ಬ್ಯಾಕ್‌ಗ್ರೌಂಡ್ ಇಲ್ಲದ ಇಮಾನ್‌ವಿ, ನೇರವಾಗಿ ಪ್ಯಾನ್ ಇಂಡಿಯಾ ಸ್ಟಾರ್ ಪ್ರಭಾಸ್ ನಟನೆಯ ‘ಫೌಜಿ’ ಸಿನಿಮಾದಲ್ಲಿ ನಾಯಕಿಯಾಗಿ ಅವಕಾಶ ಪಡೆದುಕೊಂಡಿದ್ದಾರೆ.

‘ಫೌಜಿ’ ಇನ್ನೂ ಬಿಡುಗಡೆಯಾಗಬೇಕಿದೆ. ಆದರೆ ಸಿನಿಮಾ ತೆರೆಗೆ ಬರುವ ಮುನ್ನವೇ ಇಮಾನ್‌ವಿ ಹೆಸರು ಸಿನಿಪ್ರಿಯರ ನಡುವೆ ಚರ್ಚೆಯಾಗುತ್ತಿದೆ. ಪ್ರಭಾಸ್ ಜೊತೆಗಿನ ಸಿನಿಮಾ ಅವರ ಸಿನಿ ಜರ್ನಿಗೆ ದೊಡ್ಡ ಬ್ರೇಕ್ ನೀಡುವ ನಿರೀಕ್ಷೆಯೂ ಇದೆ. ಇನ್ನು ಫಸ್ಟ್ ಸಿನಿಮಾ ರಿಲೀಸ್ ಆಗುವ ಮುನ್ನವೇ ಟಾಪ್ ಸ್ಟಾರ್‌ಗಳ ಸಿನಿಮಾಗಳಿಗೆ ಎಂಟ್ರಿ ಪಡೆಯುತ್ತಿರುವ ಹೊಸ ನಾಯಕಿಯರು ಟಾಲಿವುಡ್‌ನಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಈ ನಟಿಯರ ಪಯಣ ಹೇಗೆ ಸಾಗಲಿದೆ ಎಂಬುದೇ ಸದ್ಯದ ಕುತೂಹಲ.

ಇಂಡಿಯನ್ ಸಿನಿಮಾಕ್ಕೆ ಗ್ಲೋಬಲ್ ಬ್ರ್ಯಾಂಡ್: 25 ವರ್ಷ ಪೂರೈಸಿದ ರಾಜಮೌಳಿ ಸಿನಿ ಪಯಣ ಸುಲಭವಾಗಿರಲಿಲ್ಲ!

Govindaraj S — Mon, 28 Sep 2026 16:52:56 +0530

ಭಾರತೀಯ ಚಿತ್ರರಂಗದ ಖ್ಯಾತ ನಿರ್ದೇಶಕ ಎಸ್.ಎಸ್. ರಾಜಮೌಳಿ ಚಿತ್ರರಂಗದಲ್ಲಿ 25 ವರ್ಷಗಳ ಸುದೀರ್ಘ ಪಯಣವನ್ನು ಪೂರ್ಣಗೊಳಿಸಿದ್ದಾರೆ. ‘ಸ್ಟೂಡೆಂಟ್ ನಂಬರ್ 1’ ಚಿತ್ರದ ಮೂಲಕ ಬೆಳ್ಳಿತೆರೆಗೆ ನಿರ್ದೇಶಕರಾಗಿ ಎಂಟ್ರಿ ಕೊಟ್ಟ ರಾಜಮೌಳಿ, ನಂತರ ‘ಸಿಂಹಾದ್ರಿ’, ‘ಮಗಧೀರ’, ‘ಈಗ’ ಸೇರಿದಂತೆ ವಿಭಿನ್ನ ಸಿನಿಮಾಗಳ ಮೂಲಕ ತಮ್ಮದೇ ಛಾಪು ಮೂಡಿಸಿದರು. ‘ಬಾಹುಬಲಿ’ ಸರಣಿಯ ಮೂಲಕ ಭಾರತೀಯ ಸಿನಿಮಾದ ಗಡಿಗಳನ್ನು ವಿಸ್ತರಿಸಿದ ಅವರು, ‘ಆರ್‌ಆರ್‌ಆರ್’ ಚಿತ್ರದ ಮೂಲಕ ಆಸ್ಕರ್ ವೇದಿಕೆಯಲ್ಲಿ ಭಾರತದ ಹೆಮ್ಮೆ ಹೆಚ್ಚಿಸಿದರು.

ಸದ್ಯ ಮಹೇಶ್ ಬಾಬು ನಾಯಕನಾಗಿ ನಟಿಸುತ್ತಿರುವ ಬಹುನಿರೀಕ್ಷಿತ ‘ವಾರಣಾಸಿ’ ಸಿನಿಮಾವನ್ನು ರಾಜಮೌಳಿ ನಿರ್ದೇಶಿಸುತ್ತಿದ್ದಾರೆ. ಜಾಗತಿಕ ಮಟ್ಟದ ಕಥಾಹಂದರ ಹೊಂದಿರುವ ಈ ಸಿನಿಮಾದ ಮೂಲಕ ಮತ್ತೊಂದು ಹೊಸ ಜಗತ್ತನ್ನು ಪ್ರೇಕ್ಷಕರಿಗೆ ಪರಿಚಯಿಸಲು ಅವರು ಸಜ್ಜಾಗಿದ್ದಾರೆ. ಈ ಸಂದರ್ಭದಲ್ಲಿ 25 ವರ್ಷಗಳ ಅವರ ಸಿನಿ ಪಯಣದ ಪ್ರಮುಖ ಹಂತಗಳತ್ತ ಒಂದು ನೋಟ ಇಲ್ಲಿದೆ.

ಕಿರುತೆರೆಯಿಂದ ಬೆಳ್ಳಿತೆರೆಗೆ ಎಂಟ್ರಿ

ರಾಜಮೌಳಿ ಅವರ ನಿರ್ದೇಶನದ ಪಯಣ ಕಿರುತೆರೆಯಿಂದ ಆರಂಭವಾಯಿತು. ‘ಶಾಂತಿ ನಿವಾಸ’ ಧಾರಾವಾಹಿಗೆ ನಿರ್ದೇಶನ ನೀಡಿದ್ದ ಅವರು, ಬಳಿಕ 2001ರಲ್ಲಿ ಜೂನಿಯರ್ ಎನ್‌ಟಿಆರ್ ನಾಯಕನಾಗಿ ನಟಿಸಿದ ‘ಸ್ಟೂಡೆಂಟ್ ನಂಬರ್ 1’ ಚಿತ್ರದ ಮೂಲಕ ಬೆಳ್ಳಿತೆರೆಗೆ ಕಾಲಿಟ್ಟರು.

ಕೆ. ರಾಘವೇಂದ್ರ ರಾವ್ ಅವರ ಮೇಲ್ವಿಚಾರಣೆಯಲ್ಲಿ ಮೂಡಿಬಂದ ಈ ಸಿನಿಮಾ ರಾಜಮೌಳಿಗೆ ಮೊದಲ ಯಶಸ್ಸು ತಂದುಕೊಟ್ಟಿತು. ಅಲ್ಲಿಂದ ಆರಂಭವಾದ ಅವರ ಸಿನಿ ಪಯಣ ಇಂದಿಗೂ ಗೆಲುವಿನ ಹಾದಿಯಲ್ಲೇ ಸಾಗುತ್ತಿದೆ. ‘ಸ್ಟೂಡೆಂಟ್ ನಂಬರ್ 1’ ಬಿಡುಗಡೆಯಾಗಿ 25 ವರ್ಷಗಳು ಪೂರ್ಣಗೊಂಡಿರುವ ಸಂದರ್ಭದಲ್ಲಿ ರಾಜಮೌಳಿಯ ಈ ಮೈಲಿಗಲ್ಲು ಮತ್ತಷ್ಟು ವಿಶೇಷವಾಗಿದೆ.

ಸತತ ಗೆಲುವುಗಳ ಮೂಲಕ ತನ್ನದೇ ಬ್ರ್ಯಾಂಡ್

ಮೊದಲ ಸಿನಿಮಾದಲ್ಲೇ ನಿರ್ದೇಶನದ ಸಾಮರ್ಥ್ಯ ತೋರಿಸಿದ ರಾಜಮೌಳಿ, ನಂತರ ಒಂದರ ಹಿಂದೆ ಒಂದರಂತೆ ವಿಭಿನ್ನ ಸಿನಿಮಾಗಳನ್ನು ನೀಡಿದರು. ‘ಸಿಂಹಾದ್ರಿ’, ‘ಛತ್ರಪತಿ’, ‘ವಿಕ್ರಮಾರ್ಕುಡು’ ಸಿನಿಮಾಗಳ ಮೂಲಕ ಮಾಸ್ ಪ್ರೇಕ್ಷಕರ ಮನ ಗೆದ್ದರು. ‘ಸೈ’ ಚಿತ್ರದ ಮೂಲಕ ರಗ್ಬಿ ಕ್ರೀಡೆಯನ್ನು ತೆಲುಗು ಪ್ರೇಕ್ಷಕರಿಗೆ ಪರಿಚಯಿಸಿದ ಅವರು, ಪ್ರತಿ ಸಿನಿಮಾದಲ್ಲೂ ಹೊಸ ಪ್ರಯೋಗಗಳನ್ನು ಮಾಡುವ ನಿರ್ದೇಶಕ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

ರಾಜಮೌಳಿಯ ಪ್ರಯೋಗಗಳಿಗೆ ಮಿತಿಯೇ ಇಲ್ಲ!

ಮಾಸ್ ಸಿನಿಮಾಗಳ ಮೂಲಕ ಗುರುತಿಸಿಕೊಂಡಿದ್ದ ರಾಜಮೌಳಿ, ‘ಯಮದೊಂಗ’ ಚಿತ್ರದ ಮೂಲಕ ದೃಶ್ಯ ಪರಿಣಾಮಗಳ ಬಳಕೆಯಲ್ಲಿ ಹೊಸ ಪ್ರಯೋಗ ಮಾಡಿದರು. ಬಳಿಕ ‘ಮಗಧೀರ’ ಸಿನಿಮಾ ಅವರ ವೃತ್ತಿಜೀವನದ ಮತ್ತೊಂದು ದೊಡ್ಡ ತಿರುವಾಯಿತು.

‘ಮಗಧೀರ’ ನಂತರ ಎಲ್ಲರೂ ರಾಜಮೌಳಿ ಮುಂದಿನ ಸಿನಿಮಾ ಯಾವ ರೀತಿಯದ್ದಾಗಿರಬಹುದು ಎಂದು ಕುತೂಹಲದಿಂದ ಕಾಯುತ್ತಿದ್ದಾಗ, ಅವರು ಕಮಿಡಿಯನ್ ಸುನೀಲ್ ಅವರನ್ನು ನಾಯಕನನ್ನಾಗಿ ಮಾಡಿಕೊಂಡು ‘ಮರ್ಯಾದ ರಾಮಣ್ಣ’ ಸಿನಿಮಾ ಮಾಡಿದರು. ಅದಾದ ಬಳಿಕ ಬಂದ ‘ಈಗ’ ಮತ್ತೊಂದು ಅಚ್ಚರಿಯ ಪ್ರಯೋಗ.

ಒಂದು ಸಣ್ಣ ಈಗೆಗೆ ನಾಯಕನ ಪಟ್ಟ ನೀಡಿ ಸಿನಿಮಾ ಮಾಡುವುದು ಸಾಮಾನ್ಯ ಕಲ್ಪನೆಯಲ್ಲ. ಆದರೆ ಆ ಸಣ್ಣ ಪಾತ್ರವನ್ನೇ ಕೇಂದ್ರವಾಗಿಟ್ಟುಕೊಂಡು ಭಾವನೆ, ಗ್ರಾಫಿಕ್ಸ್ ಮತ್ತು ಕಥೆಯನ್ನು ಬೆಸೆದು ಪ್ರೇಕ್ಷಕರನ್ನು ಸೆಳೆಯುವಲ್ಲಿ ರಾಜಮೌಳಿ ಯಶಸ್ವಿಯಾದರು. ಇದೇ ಅವರ ಸಿನಿಮಾ ಮಾಡುವ ವಿಭಿನ್ನ ಶೈಲಿಗೆ ಮತ್ತೊಂದು ಉದಾಹರಣೆಯಾಯಿತು.

‘ಬಾಹುಬಲಿ’.. ಭಾರತೀಯ ಸಿನಿಮಾದ ಗಡಿಗಳನ್ನು ವಿಸ್ತರಿಸಿದ ಸಿನಿಮಾ

ರಾಜಮೌಳಿ ಅವರ ವೃತ್ತಿಜೀವನದಲ್ಲಿ ‘ಬಾಹುಬಲಿ’ ಸರಣಿಗೆ ವಿಶೇಷ ಸ್ಥಾನವಿದೆ. ‘ಬಾಹುಬಲಿ: ದಿ ಬಿಗಿನಿಂಗ್’ ಮತ್ತು ‘ಬಾಹುಬಲಿ: ದಿ ಕನ್‌ಕ್ಲೂಷನ್’ ಸಿನಿಮಾಗಳು ಭಾಷೆ ಹಾಗೂ ಪ್ರದೇಶದ ಗಡಿಗಳನ್ನು ಮೀರಿ ದೇಶಾದ್ಯಂತ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಿದವು.

‘ಕಟ್ಟಪ್ಪ ಬಾಹುಬಲಿಯನ್ನು ಯಾಕೆ ಕೊಂದ?’ ಎಂಬ ಒಂದೇ ಪ್ರಶ್ನೆ ಇಡೀ ದೇಶದಲ್ಲಿ ಕುತೂಹಲ ಮೂಡಿಸಿತು. ಸಿನಿಮಾ ಬಿಡುಗಡೆಯಾದ ಬಳಿಕ ಭಾರತೀಯ ಚಿತ್ರರಂಗದಲ್ಲಿ ಪ್ಯಾನ್-ಇಂಡಿಯಾ ಸಿನಿಮಾಗಳಿಗೆ ಹೊಸ ರೀತಿಯ ಮಾರುಕಟ್ಟೆ ಸೃಷ್ಟಿಯಾಗಲು ಈ ಸರಣಿ ಪ್ರಮುಖ ಕಾರಣಗಳಲ್ಲಿ ಒಂದಾಯಿತು.

ವಿಶೇಷವಾಗಿ ‘ಬಾಹುಬಲಿ 2’ ಭಾರತೀಯ ಸಿನಿಮಾದ ಬಾಕ್ಸ್ ಆಫೀಸ್ ಇತಿಹಾಸದಲ್ಲಿ ಹಲವು ದಾಖಲೆಗಳನ್ನು ನಿರ್ಮಿಸಿತು. ಈ ಸಿನಿಮಾದ ಯಶಸ್ಸು ರಾಜಮೌಳಿಯನ್ನು ಭಾರತೀಯ ಚಿತ್ರರಂಗದ ಪ್ರಮುಖ ಜಾಗತಿಕ ನಿರ್ದೇಶಕರ ಸಾಲಿನಲ್ಲಿ ನಿಲ್ಲಿಸಿತು.

ಆಸ್ಕರ್ ವೇದಿಕೆಯಲ್ಲಿ ಮೊಳಗಿದ ‘ನಾಟು ನಾಟು’

‘ಬಾಹುಬಲಿ’ ಮೂಲಕ ಅಂತಾರಾಷ್ಟ್ರೀಯ ಪ್ರೇಕ್ಷಕರ ಗಮನ ಸೆಳೆದ ರಾಜಮೌಳಿ, ‘ಆರ್‌ಆರ್‌ಆರ್’ ಮೂಲಕ ಮತ್ತೊಂದು ಹಂತ ತಲುಪಿದರು. ಜೂನಿಯರ್ ಎನ್‌ಟಿಆರ್ ಮತ್ತು ರಾಮ್ ಚರಣ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ ಈ ಸಿನಿಮಾ ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆಯಿತು.

ಚಿತ್ರದ ‘ನಾಟು ನಾಟು’ ಹಾಡು ಆಸ್ಕರ್ ಪ್ರಶಸ್ತಿ ಗೆದ್ದುಕೊಂಡಿತು. ಇದೇ ಹಾಡು ಗೋಲ್ಡನ್ ಗ್ಲೋಬ್ ಪ್ರಶಸ್ತಿಯನ್ನೂ ಪಡೆದುಕೊಂಡಿತು. ಇದರೊಂದಿಗೆ ಭಾರತೀಯ ಸಿನಿಮಾ, ಅದರಲ್ಲೂ ತೆಲುಗು ಸಿನಿಮಾದ ಹೆಸರು ಜಾಗತಿಕ ಪ್ರಶಸ್ತಿ ವೇದಿಕೆಯಲ್ಲಿ ಮತ್ತೊಮ್ಮೆ ಪ್ರತಿಧ್ವನಿಸಿತು.

‘ಆರ್‌ಆರ್‌ಆರ್’ ಬಳಿಕ ರಾಜಮೌಳಿ ಅವರ ಅಂತಾರಾಷ್ಟ್ರೀಯ ಗುರುತು ಮತ್ತಷ್ಟು ಬಲವಾಯಿತು. ಅವರ ಕಥೆ ಹೇಳುವ ಶೈಲಿ ಮತ್ತು ಸಿನಿಮಾದ ದೃಶ್ಯ ವೈಭವದ ಬಗ್ಗೆ ಹಲವು ಅಂತಾರಾಷ್ಟ್ರೀಯ ಮಟ್ಟದ ಚಿತ್ರರಂಗದ ಗಣ್ಯರು ಮೆಚ್ಚುಗೆ ವ್ಯಕ್ತಪಡಿಸಿದ್ದರು.

ರಾಜಮೌಳಿಯ ಸಿನಿಮಾಗಳ ಯಶಸ್ಸಿನ ಸೂತ್ರವೇನು?

25 ವರ್ಷಗಳ ಸಿನಿ ಪಯಣದಲ್ಲಿ ರಾಜಮೌಳಿ ಪ್ರತಿ ಸಿನಿಮಾದಲ್ಲೂ ಹೊಸದನ್ನು ಪ್ರಯತ್ನಿಸುತ್ತಾ ಬಂದಿದ್ದಾರೆ. ಅವರ ಸಿನಿಮಾಗಳಲ್ಲಿ ಅದ್ಧೂರಿತನ, ಅತ್ಯಾಧುನಿಕ ದೃಶ್ಯ ಪರಿಣಾಮಗಳು ಮತ್ತು ದೊಡ್ಡ ಪ್ರಮಾಣದ ಆ್ಯಕ್ಷನ್ ಸೀಕ್ವೆನ್ಸ್‌ಗಳಿದ್ದರೂ, ಅದರ ಜೊತೆಗೆ ಬಲವಾದ ಭಾವನಾತ್ಮಕ ಕಥಾಹಂದರವೂ ಇರುತ್ತದೆ.

ಯಾವುದೇ ಜಾನರ್ ಆಯ್ಕೆ ಮಾಡಿಕೊಂಡರೂ, ಪ್ರೇಕ್ಷಕರಿಗೆ ಪಾತ್ರಗಳೊಂದಿಗೆ ಭಾವನಾತ್ಮಕವಾಗಿ ಕನೆಕ್ಟ್ ಆಗುವ ಅವಕಾಶ ನೀಡುವುದು ಅವರ ಸಿನಿಮಾ ಶೈಲಿಯ ಪ್ರಮುಖ ಅಂಶವಾಗಿದೆ. ಅದ್ಧೂರಿ ದೃಶ್ಯಗಳ ಜೊತೆಗೆ ಭಾವನೆಗಳಿಗೆ ಸಮಾನ ಪ್ರಾಮುಖ್ಯತೆ ನೀಡುವುದೇ ರಾಜಮೌಳಿ ಸಿನಿಮಾಗಳ ವಿಶೇಷತೆ ಎಂದು ಅವರ ಚಿತ್ರಗಳ ಯಶಸ್ಸನ್ನು ವಿಶ್ಲೇಷಿಸುವವರು ಅಭಿಪ್ರಾಯಪಡುತ್ತಾರೆ.

ಈಗ ‘ವಾರಣಾಸಿ’ ಮೇಲೆ ವಿಶ್ವದ ಕಣ್ಣು

ಸದ್ಯ ಎಸ್.ಎಸ್. ರಾಜಮೌಳಿ ಮಹೇಶ್ ಬಾಬು ನಾಯಕನಾಗಿ ನಟಿಸುತ್ತಿರುವ ‘ವಾರಣಾಸಿ’ ಸಿನಿಮಾದಲ್ಲಿ ಬ್ಯುಸಿಯಾಗಿದ್ದಾರೆ. ಈ ಸಿನಿಮಾ ರಾಜಮೌಳಿ ಅವರ ಹಿಂದಿನ ಸಿನಿಮಾಗಳಿಗಿಂತ ವಿಭಿನ್ನ ಜಗತ್ತನ್ನು ಪರಿಚಯಿಸುವ ನಿರೀಕ್ಷೆ ಮೂಡಿಸಿದೆ.

ಪುರಾಣ, ಸೈನ್ಸ್ ಫಿಕ್ಷನ್, ಟೈಮ್ ಟ್ರಾವೆಲ್, ಫ್ಯಾಂಟಸಿ, ಆ್ಯಕ್ಷನ್ ಹಾಗೂ ಅಡ್ವೆಂಚರ್ ಅಂಶಗಳನ್ನು ಒಳಗೊಂಡಿರುವ ಕಥಾಹಂದರವನ್ನು ‘ವಾರಣಾಸಿ’ ಹೊಂದಿದೆ ಎನ್ನಲಾಗಿದೆ. ಕಥೆ ತ್ರೇತಾಯುಗದ ಕಾಲಘಟ್ಟದಿಂದ 2027ರ ಕಾಲಘಟ್ಟದವರೆಗೆ, ಅಂಟಾರ್ಟಿಕಾ ಹಾಗೂ ಆಫ್ರಿಕಾ ಸೇರಿದಂತೆ ಹಲವು ಸ್ಥಳಗಳನ್ನು ಒಳಗೊಂಡಂತೆ ಸಾಗಲಿದೆ ಎಂದು ಚಿತ್ರತಂಡ ಈಗಾಗಲೇ ಸುಳಿವು ನೀಡಿದೆ.

ಈಗಾಗಲೇ ಬಿಡುಗಡೆಯಾಗಿರುವ ಟೈಟಲ್ ಗ್ಲಿಂಪ್ಸ್ ಚಿತ್ರದ ವಿಶಾಲ ಪ್ರಪಂಚದ ಒಂದು ಝಲಕ್ ತೋರಿಸಿದೆ. ಮಹೇಶ್ ಬಾಬು ಅವರೊಂದಿಗೆ ರಾಜಮೌಳಿ ಕೈಜೋಡಿಸಿರುವ ಈ ಗ್ಲೋಬ್-ಟ್ರಾಟಿಂಗ್ ಅಡ್ವೆಂಚರ್ ಸಿನಿಮಾ ಇದೀಗ ಭಾರತೀಯ ಮಾತ್ರವಲ್ಲದೆ ಜಾಗತಿಕ ಸಿನಿಮಾ ಪ್ರೇಕ್ಷಕರ ಗಮನವನ್ನೂ ಸೆಳೆಯುತ್ತಿದೆ.

ಇನ್ನು ‘ಸ್ಟೂಡೆಂಟ್ ನಂಬರ್ 1’ ಮೂಲಕ ಆರಂಭವಾದ ಪಯಣ ಇಂದು ‘ವಾರಣಾಸಿ’ಯಂತಹ ಜಾಗತಿಕ ಮಟ್ಟದ ಪ್ರಾಜೆಕ್ಟ್‌ವರೆಗೆ ಬಂದು ನಿಂತಿದೆ. 25 ವರ್ಷಗಳ ಈ ಪಯಣದಲ್ಲಿ ರಾಜಮೌಳಿ ನಿರ್ಮಿಸಿರುವ ಸಿನಿಮಾ ಜಗತ್ತು, ಅವರ ವಿಭಿನ್ನ ಕಥೆ ಹೇಳುವ ಶೈಲಿ ಮತ್ತು ಭಾರತೀಯ ಸಿನಿಮಾವನ್ನು ಜಾಗತಿಕ ಪ್ರೇಕ್ಷಕರಿಗೆ ತಲುಪಿಸುವ ಪ್ರಯತ್ನಗಳು ಅವರನ್ನು ಭಾರತೀಯ ಚಿತ್ರರಂಗದ ಗಮನಾರ್ಹ ನಿರ್ದೇಶಕರಲ್ಲಿ ಒಬ್ಬರನ್ನಾಗಿ ಮಾಡಿವೆ.