Asianet Suvarna News

ಶಿವಣ್ಣನ ಬಳಿಯೇ ಪಟಾಕಿ ಸ್ಫೋಟ, ಅದೃಷ್ಟವಶಾತ್ ತಪ್ಪಿದ ದೊಡ್ಡ ಅಪಾಯ

Ganesh Mabla Gowda — Mon, 05 Oct 2026 23:09:52 +0530

ನಟ ಡಾ. ಶಿವ ರಾಜ್‌ಕುಮಾರ್ ಬಳಿಯೇ ಪಟಾಕಿ ಸ್ಫೋಟ ಮಾಡಿ ಆತಂಕ ಸೃಷ್ಟಿಸಿದ ಘಟನೆ ಚಿತ್ರದುರ್ಗದಲ್ಲಿ ನಡೆದಿದೆ. ಇದರಿಂದ ಕೆಲ ಕ್ಷಣಗಳು ಆತಂಕದ ವಾತಾವರಣ ನಿರ್ಮಾಣವಾಗಿತ್ತು. ಅಷ್ಟಕ್ಕೂ ಕೋಟೆ ನಾಡಲ್ಲಿ ಆಗಿದ್ದೇನು? ಸ್ಟೋರಿ ಓದಿ.

ಚಿತ್ರದುರ್ಗ: ಡಾ.ಶಿವ ರಾಜ್‌ಕುಮಾರ್ ಅಭಿನಯದ 'ಬೇಲ್' ಸಿನಿಮಾ ರಿಲೀಸ್ ಆಗಿದ್ದು, ಥಿಯೇಟರ್‍‌ಗಳಲ್ಲಿ ಭರ್ಜರಿಯಾಗಿ ಪ್ರದರ್ಶನ ಕಾಣ್ತಿದೆ. ಈ ಮಧ್ಯೆ ಶಿವಣ್ಣ ಅವರು ಇಂದು ಚಿತ್ರದುರ್ಗಕ್ಕೆ ಭೇಟಿ ನೀಡಿದ್ದರು. ಈ ವೇಳೆ ಪಟಾಕಿ ಅನಾಹುತ ಸಂಭವಿಸಿದ್ದು, ಅದೃಷ್ಟವಶಾತ್ ದೊಡ್ಡ ಅಪಾಯ ತಪ್ಪಿದೆ.

ಬೇಲ್ ಸಿನಿಮಾದ ಪ್ರಚಾರ ಹಿನ್ನೆಲೆಯಲ್ಲಿ ಶಿವಣ್ಣ ಇವತ್ತು ಕೋಟೆನಾಡಿಗೆ ಭೇಟಿ ನೀಡಿದ್ದರು. ಶಿವಣ್ಣ ಅವರು ನಗರದ ಖಾಸಗಿ ಶೋ ರೂಮ್‌ ಬಳಿ ತಮ್ಮ ಸಿನಿಮಾ ಕುರಿತು ಸುದ್ದಿಗೋಷ್ಟಿ ನಡೆಸಲಿದ್ದರು. ಖಾಸಗಿ ಶೋ ರೂಮ್‌ಗೆ ಎಂಟ್ರಿ ಆಗ್ತಿದ್ದಂತೆಯೇ ಅವರ ಬಳಿಯೇ ಪಟಾಕಿ ಸ್ಫೋಟಗೊಂಡಿದೆ. ಅಭಿಮಾನಿಗಳು ಪಟಾಕಿ ಸ್ಫೋಟ ಮಾಡುತ್ತಿದ್ದಂತೆಯೇ ಅಲ್ಲಿದ್ದ ಗಣ್ಯರಲ್ಲ ಆಘಾತಕ್ಕೆ ಒಳಗಾಗಿದ್ದಾರೆ. ಶಿವಣ್ಣ ಕೂಡ ಒಂದು ಕ್ಷಣ ಶಾಕ್‌ಗೆ ಒಳಗಾದರು. ಅದೃಷ್ಟವಶಾತ್ ಯಾವುದೇ ಅಪಾಯ ಸಂಭವಿಸಿಲ್ಲ.

ಇನ್ನು ಸುದ್ದಿಗೋಷ್ಟಿಯಲ್ಲಿ ತಮ್ಮ ಬೇಲ್ ಚಿತ್ರದ ಬಗ್ಗೆ ಮಾತನ್ನಾಡಿ.. ಬೇಲ್ ಸಿನೆಮಾ ಬಗ್ಗೆ ಎಲ್ಲೆಡೆ ಉತ್ತಮ ಪ್ರತಿಕ್ರಿಯೆ ಇದೆ. ಬೇಲ್ ಮೂವಿ ಫ್ಯಾಮಿಲಿ ಎಂಟರ್ಟೈನ್ಮೆಂಟ್ ಸಿನೆಮಾ ಆಗಿದೆ. ಎಲ್ಲಾ ಸಿನೆಮಾಗಳು ಸಿನೆಮಾಗಳು ಅಷ್ಟೇ. ಬಿಗ್ ಬಜೆಟ್, ಸ್ಮಾಲ್‌ ಬಜೆಟ್ ಸಿನೆಮಾ ಎಂಬುದು ಇಲ್ಲ. ಸಿನಿಮಾ ಸಿನಿಮಾ ಅಷ್ಟೇ. ಬಿಗ್ ಬಜೆಟ್ ಹಾಕಿ ಸಿನಿಮಾ ಮಾಡಿದರೆ ಅದು ಓಡುತ್ತದೆ ಅನ್ನೋದೆಲ್ಲ ಸುಳ್ಳು. ಸಿನಿಮಾದ ಕತೆಯು ವೀಕ್ಷಕರನ್ನು ಆಕರ್ಷಿಸಬೇಕು ಎಂದರು.

ಇದೇ ವೇಳೆ ಪ್ರೇಮದ ಊರಲ್ಲಿ ಚಿತ್ರದ ಬಗ್ಗೆ ಪ್ರತಿಕ್ರಿಯಿಸಿರುವ ಶಿವಣ್ಣ.. ಈಗ ಬೇಲ್ ಸೇರಿ ಕೆಲ‌ ಸಿನಿಮಾ ಜನರನ್ನು ಸೆಳೆದಿವೆ. ಜನರಿಗೆ ಸಬ್ಜೆಕ್ಟ್ ಅರ್ಥ ಆಗಬೇಕು, ಫ್ಯಾಮಿಲಿ ಜತೆ ನೋಡಬೇಕು. ಒಂದೊಂದ್ಸಲ ಒಳ್ಳೆಯ ಸಿನೆಮಾಗಳೇ ಓಡಲ್ಲ, ಏನೂ ಮಾಡೋಕಾಗಲ್ಲ. ದುಡ್ಡು ಸುರಿದರೆ ಸಿನಿಮಾ ಓಡುತ್ತೆ ಎಂಬುದು ಭ್ರಮೆ. ಭ್ರಮೆಯಲ್ಲಿ ಬದುಕಬಾರದು, ರಿಯಾಲಿಯಲ್ಲಿ ಬದುಕಬೇಕು. ಸಿನಿಮಾ ಸರಳವಾಗಿ ಅರ್ಥ ಆಗುವಂತೆ ಇರಬೇಕು ಎಂದು ಪ್ರತಿಪಾದಿಸಿದ್ದಾರೆ.

ಬೇಲ್ ಚಿತ್ರದಲ್ಲಿ ಶಿವಣ್ಣ ಅವರು ನಿವೃತ್ತ ಪೊಲೀಸ್ ಆಯುಕ್ತರಾಗಿ ಶಾಂತ, ಗಂಭೀರ ಅಭಿನಯ ಮಾಡಿದ್ದಾರೆ. ಮಗಳ ಸಾವಿಗೆ ನ್ಯಾಯ ಕೊಡಿಸಲು ಕಾನೂನನ್ನು ಕೈಗೆತ್ತಿಕೊಳ್ಳುವ ಕಥೆ ಪ್ರೇಕ್ಷಕರನ್ನು ಮನ ತಟ್ಟುತ್ತದೆ. ಪವನ್ ಒಡೆಯರ್ ನಿರ್ದೇಶನದಲ್ಲಿ ಹೊಸ ಲುಕ್‌ನಲ್ಲಿ ಶಿವಣ್ಣನ ಅಭಿನಯ ಮೆಚ್ಚುಗೆಗೆ ಪಾತ್ರವಾಗಿದೆ. ಈಗಾಗಲೇ ಸಿನಿಮಾ ಮಂದಿರಗಳಲ್ಲಿ ಭರ್ಜರಿ ಪ್ರದರ್ಶನ ಕಾಣ್ತಿದೆ. ಗಾಂಧಿ ಜಯಂತಿ ದಿನ ಅಂದರೆ ಅಕ್ಟೋಬರ್ 2 ರಂದು ಸಿನಿಮಾ ರಿಲೀಸ್ ಆಗಿದೆ.

ಪ್ರೀತಿಸಿ ಮದ್ವೆ ಆಗಿದ್ದ ಮಹಿಳೆ ಅನುಮಾನಾಸ್ಪದ ಸಾವು; ಚಿತ್ರದುರ್ಗದಲ್ಲಿ 'ಲವ್ ಜಿಹಾದ್' ಆರೋಪ, ಮಗು ಅನಾಥ

Ganesh Mabla Gowda — Mon, 12 Oct 2026 23:52:10 +0530

ಚಿತ್ರದುರ್ಗ: ಮೂರು ವರ್ಷದ ಹಿಂದೆ ಪ್ರೀತಿಸಿ ಮದುವೆ (Love Marriage) ಆಗಿದ್ದ ಮಹಿಳೆ ಹಠಾತ್ ನಿಧನ ಹೊಂದಿದ್ದು, ಹಲವು ಅನುಮಾನಗಳಿಗೆ ದಾರಿ ಮಾಡಿಕೊಟ್ಟಿದೆ. 30 ವರ್ಷದ ಆಶಾ ಮೃತ ದುರ್ದೈವಿ.

ಏನಿದು ಪ್ರಕರಣ?

ಮೃತ ಆಶಾ ಅವರು ಚಿತ್ರದುರ್ಗ ಜಿಲ್ಲೆಯ ಹಿರಿಯೂರು ತಾಲೂಕಿನ ಹೊಸ ಯಳನಾಡು ಗ್ರಾಮದ ನಿವಾಸಿ ಆಗಿದ್ದರು. ಕಳೆದ ಕೆಲವು ವರ್ಷಗಳಿಂದ ಹಿರಿಯೂರು ಪಟ್ಟಣದ ಇಮ್ರಾನ್(40) ಎಂಬಾತನನ್ನು ಪ್ರೀತಿಸಿ ಮದುವೆ ಆಗಿದ್ದರು. ಕಳೆದ ಮೂರು ವರ್ಷಗಳ ಹಿಂದೆ ಪ್ರೀತಿಸಿ ಮದುವೆ ಆಗಿದ್ದರು. ಇದೀಗ ಆಶಾ, ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದು, ಲವ್ ಜಿಹಾದ್ (love jihad) ಆರೋಪ ಕೇಳಿಬಂದಿದೆ.

ಇನ್ನು ಆಶಾ ನೇಣು ಬಿಗಿದ್ದ ಸ್ಥಿತಿಯಲ್ಲಿ ಪತ್ತೆಯಾದ ಬೆನ್ನಲ್ಲೇ ಆಕೆಯ ಪತಿ ಹಿರಿಯೂರು ಆಸ್ಪತ್ರೆಗೆ ಗಾಬರಿಯಲ್ಲಿ ಕರೆ ತಂದಿದ್ದಾನೆ. ಯಾವಾಗ ಆಕೆ ಪ್ರಾಣ ಬಿಟ್ಟಿದ್ದಾಳೆ ಎಂಬ ವಿಚಾರ ಗೊತ್ತಾಗುತ್ತಿದ್ದಂತೆಯೇ ಆತ ಅಲ್ಲಿಂದ ಪರಾರಿ ಆಗಿ, ನಾಪತ್ತೆ ಆಗಿದ್ದಾನೆ ಎಂದು ವರದಿಯಾಗಿದೆ.

ಪೋಷಕರಿಂದ ಲವ್ ಜಿಹಾದ್ ಆರೋಪ

ಆಶಾ ಇಮ್ರಾನ್ ಎಂಬಾತನನ್ನು ಪ್ರೀತಿಸಿ ಮದುವೆ ಆಗಿದ್ದಳು. ಆಶಾಳನ್ನು ಮದುವೆಯಾದ ಬೆನ್ನಲ್ಲೇ ಆಕೆಯ ಪತಿಯ ಮನೆಯಲ್ಲಿ ಕಿರುಕುಳ ಶುರುವಾಗಿತ್ತು. ಪತಿ ಹಣ ತೆಗೆದುಕೊಂಡು ಬರುವಂತೆ ಪೀಡಿಸುತ್ತಿದ್ದರು. ಆಕೆಯ ನೋವುಗಳನ್ನ ನೋಡಲಾಗದೇ ಒಂದು ತಿಂಗಳ ಹಿಂದಷ್ಟೇ ನಾವು ಒಂದು ಲಕ್ಷ ರೂಪಾಯಿ ಹಣವನ್ನು ಸಾಲ ಮಾಡಿ ನೀಡಿದ್ದೇವು ಎಂದು ಮೃತ ಆಶಾಳ ತಂದೆ ನಾಗರಾಜ್ ಆರೋಪಿಸಿದ್ದಾರೆ.

ಪೊಲೀಸರಿಗೆ ದೂರು

ಇನ್ನು ಮೃತ ಆಶಾಳ ತಂದೆ ನಾಗರಾಜ್ ಹಿರಿಯೂರು ಪೊಲೀಸ್ ಠಾಣೆಗೆ ಬಂದು ದೂರು ನೀಡಿದ್ದಾರೆ. ನನ್ನ ಮಗಳಿಗೆ ಕಿರುಕುಳ ನೀಡಿ ಸಾಯಿಸಲಾಗಿದೆ. ಇದೊಂದು ಕೊಲೆ. ಮಗಳ ಸಾವಿಗೆ ಕಾರಣ ಆಗಿರುವ ಇಮ್ರಾನ್ ಹಾಗೂ ಆತನ ಕುಟುಂಬಸ್ಥರ ವಿರುದ್ಧ ಕ್ರಮ ಆಗಬೇಕು. ಮಗಳ ಸಾವಿಗೆ ನ್ಯಾಯ ಕೊಡಿಸಬೇಕು ಎಂದು ಪೊಲೀಸರ ಮುಂದೆ ಕಣ್ಣೀರು ಇಟ್ಟಿದ್ದಾರೆ.

ಇದರ ಮಧ್ಯೆ ಜಿಲ್ಲೆಯ ಹಿಂದೂ ಜಾಗರಣ ವೇದಿಕೆ ಭಜರಂಗದಳ, ವಿಶ್ವಹಿಂದೂ ಪರಿಷದ್ ಲವ್ ಜಿಹಾದ್ ಅನುಮಾನ ವ್ಯಕ್ತಪಡಿಸಿದೆ. ಲವ್ ಜಿಹಾದ್ ಆರೋಪ ವ್ಯಕ್ತಪಡಿಸಿರುವ ಹಿಂದೂಪರ ಕಾರ್ಯಕರ್ತರು.. ಖುದ್ದು ಪೊಲೀಸ್ ಅಧಿಕಾರಿಗಳನ್ನ ಭೇಟಿಯಾಗಿ ಕ್ರಮ ತೆಗೆದುಕೊಳ್ಳುವಂತೆ ಆಗ್ರಹಿಸಿದ್ದಾರೆ.

ಮೃತ ಆಶಾಗೆ ಮಗು ಇದೆ

ಬೇಸರದ ಇನ್ನೊಂದು ವಿಚಾರ ಏನೆಂದರೆ.. ಮೃತ ಆಶಾಗೆ ಎರಡೂವರೆ ವರ್ಷದ ಮಗು ಇದೆ. ಅಮ್ಮನನ್ನು ಕಳೆದುಕೊಂಡ ಪುಟಾಣಿ ಕಂದಮ್ಮ ಅನಾಥವಾಗಿದ್ದು, ಅಮ್ಮನಿಗಾಗಿ ಹಂಬಲಿಸುತ್ತಿದೆ. ಸದ್ಯ ಹಿರಿಯೂರು ಟೌನ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಲವ್ ಜಿಹಾದ್ ಆರೋಪ ಕೇಳಿಬಂದ ಹಿನ್ನೆಲೆಯಲ್ಲಿ ಪ್ರಕರಣ ಮತ್ತಷ್ಟು ಗಂಭೀರ ಸ್ವರೂಪ ಪಡೆದುಕೊಂಡಿದೆ. ಪೊಲೀಸರು ಆದಷ್ಟು ಬೇಗ ತನಿಖೆ ನಡೆಸಿ ನೊಂದ ಕುಟುಂಬಕ್ಕೆ ನ್ಯಾಯ ಕೊಡಿಸಬೇಕಿದೆ.

ಮೊಳಕಾಲ್ಮೂರು ಕ್ಷೇತ್ರದಿಂದ ಬಿಜೆಪಿ ಟಿಕೆಟ್‌ ನಿರೀಕ್ಷೆಯಲ್ಲಿದ್ದ ರಿಯಲ್‌ ಎಸ್ಟೇಟ್‌ ಉದ್ಯಮಿ ಬೆಂಗಳೂರಿನಲ್ಲಿ ದುರಂತ ಸಾವು

Santosh Naik — Wed, 14 Oct 2026 15:43:13 +0530

ಬೆಂಗಳೂರು/ದೇವನಹಳ್ಳಿ (ಅ.14): ರಾಜಧಾನಿ ಬೆಂಗಳೂರಿನ ಹೊರವಲಯದ ದೇವನಹಳ್ಳಿ ಬಳಿ ರಾಷ್ಟ್ರೀಯ ಹೆದ್ದಾರಿ-648 ರಲ್ಲಿ ಭೀಕರ ರಸ್ತೆ ಅಪಘಾತ ಸಂಭವಿಸಿದೆ. ರೇಂಜ್ ರೋವರ್ ಕಾರು ಹೆದ್ದಾರಿಯಲ್ಲಿ ನಿಲ್ಲಿಸಲಾಗಿದ್ದ ಎಲ್‌ಪಿಜಿ ಗ್ಯಾಸ್ ಸಿಲಿಂಡರ್ ತುಂಬಿದ್ದ ಲಾರಿಗೆ ಹಿಂಬದಿಯಿಂದ ಭೀಕರವಾಗಿ ಡಿಕ್ಕಿ ಹೊಡೆದ ಪರಿಣಾಮ, ಕೋಲಾರ ಜಿಲ್ಲೆ ಮಾಲೂರಿನ ಪ್ರಭಾವಿ ರಿಯಲ್ ಎಸ್ಟೇಟ್ ಉದ್ಯಮಿ ಹಾಗೂ ಬಿಜೆಪಿ ನಾಯಕ ಶಿವಕುಮಾರ್ ಎಂ. (36) ಅವರು ದಾರುಣವಾಗಿ ಪ್ರಾಣ ಕಳೆದುಕೊಂಡಿದ್ದಾರೆ.

ಈ ಭೀಕರ ಅಪಘಾತದಲ್ಲಿ ಕಾರಿನಲ್ಲಿದ್ದ ವಿನೋದ್ ಕುಮಾರ್, ಪ್ರದೀಪ್, ಚಂದನ್ ಹಾಗೂ ಚಾಲಕ ಪವನ್ ಗಂಭೀರವಾಗಿ ಗಾಯಗೊಂಡಿದ್ದು, ಅವರನ್ನು ದೇವನಹಳ್ಳಿಯ ಖಾಸಗಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ.

ಮದಕರಿ ನಾಯಕ ಜಯಂತಿ ಕಾರ್ಯಕ್ರಮದಿಂದ ವಾಪಸಾಗುವಾಗ ದುರಂತ

ಮೃತ ಶಿವಕುಮಾರ್ ಎಂ. ಅವರು ಕೋಲಾರ ಜಿಲ್ಲೆಯ ಮಾಲೂರು ತಾಲೂಕಿನ ಮದನಹಟ್ಟಿ ಗ್ರಾಮದ ನಿವಾಸಿಯಾಗಿದ್ದು, ಮಾಲೂರು ನಗರದಲ್ಲಿ 'ಐಶ್ವರ್ಯ ಡೆವಲಪರ್ಸ್' (Aishwarya Developers) ಹೆಸರಿನಲ್ಲಿ ರಿಯಲ್ ಎಸ್ಟೇಟ್ ಉದ್ಯಮ ನಡೆಸುತ್ತಿದ್ದರು. ಸಕ್ರಿಯ ಬಿಜೆಪಿ ನಾಯಕರಾಗಿದ್ದ ಶಿವಕುಮಾರ್ ಅವರು ಮುಂಬರುವ ವಿಧಾನಸಭಾ ಚುನಾವಣೆಯಲ್ಲಿ ಚಿತ್ರದುರ್ಗ ಜಿಲ್ಲೆಯ 'ಮೊಳಕಾಲ್ಮೂರು' ಕ್ಷೇತ್ರದಿಂದ ಸ್ಪರ್ಧಿಸಲು ಭಾರಿ ಸಿದ್ಧತೆ ನಡೆಸುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಮಂಗಳವಾರ ಸಂಜೆ ದೇವನಹಳ್ಳಿ ಬಳಿಯ ರಾಣಿ ಕ್ರಾಸ್ ಫ್ಲೈಓವರ್ (Rani Cross Flyover) ಬಳಿ ರಾತ್ರಿ 7.30 ರ ಸುಮಾರಿಗೆ ಈ ಭೀಕರ ಅಪಘಾತ ಸಂಭವಿಸಿದೆ. ಮೃತ ಶಿವಕುಮಾರ್ ಅವರು ತಮ್ಮ ನಾಲ್ವರು ಸ್ನೇಹಿತರು ಹಾಗೂ ಚಾಲಕನೊಂದಿಗೆ ಚಿತ್ರದುರ್ಗದಲ್ಲಿ ನಡೆದ ವೈಭವದ 'ವೀರ ಮದಕರಿ ನಾಯಕ ಜಯಂತಿ' ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾಲೂರಿಗೆ ಹಿಂತಿರುಗುತ್ತಿದ್ದರು.

ಸೂಚನೆ ನೀಡದೆ ನಿಲ್ಲಿಸಿದ್ದ ಸಿಲಿಂಡರ್ ಲಾರಿಗೆ ಡಿಕ್ಕಿ!

ಅಪಘಾತದಲ್ಲಿ ಗಾಯಗೊಂಡ ವಿನೋದ್ ಕುಮಾರ್ ಪೊಲೀಸರಿಗೆ ನೀಡಿದ ದೂರಿನ ಪ್ರಕಾರ, ಅವರು ಸಾಯಂಕಾಲ 4.30 ಕ್ಕೆ ಚಿತ್ರದುರ್ಗದಿಂದ ಹೊರಟು ಮಾಲೂರಿನತ್ತ ಪ್ರಯಾಣಿಸುತ್ತಿದ್ದರು. ದೇವನಹಳ್ಳಿ ತಲುಪುತ್ತಿದ್ದಂತೆ ರೇಂಜ್ ರೋವರ್ ಕಾರಿನ ಚಾಲಕ ಮುಂದಿನ ವಾಹನವನ್ನು ಓವರ್‌ಟೇಕ್ (Overtake) ಮಾಡಲು ಯತ್ನಿಸಿದಾಗ ಕಾರು ಆತನ ನಿಯಂತ್ರಣ ತಪ್ಪಿದೆ.

ಈ ವೇಳೆ ರಾಷ್ಟ್ರೀಯ ಹೆದ್ದಾರಿಯ ಮೂರನೇ ಪಥದಲ್ಲಿ (Third Lane) ಯಾವುದೇ ಮುನ್ನೆಚ್ಚರಿಕಾ ಪಾರ್ಕಿಂಗ್ ಸೂಚನೆಗಳು ಅಥವಾ ಬ್ಲಿಂಕರ್ ಲೈಟ್‌ಗಳನ್ನು ಹಾಕದೆ ಅಪಾಯಕಾರಿಯಾಗಿ ನಿಲ್ಲಿಸಲಾಗಿದ್ದ 'AP39WC2560' ನೋಂದಣಿ ಸಂಖ್ಯೆಯ ಎಲ್‌ಪಿಜಿ ಸಿಲಿಂಡರ್ ಲಾರಿಯ ಬಲ ಹಿಂಭಾಗಕ್ಕೆ ರೇಂಜ್ ರೋವರ್ ಕಾರು ಭೀಕರವಾಗಿ ಡಿಕ್ಕಿಯಾಗಿದೆ.

ಮುಂಭಾಗದ ಸೀಟಿನಲ್ಲಿದ್ದ ಶಿವಕುಮಾರ್

ಡಿಕ್ಕಿಯ ಭರಕ್ಕೆ ರೇಂಜ್ ರೋವರ್ ಕಾರು ಸಂಪೂರ್ಣವಾಗಿ ಲಾರಿಯ ಹಿಂಭಾಗಕ್ಕೆ ನುಜ್ಜುಗುಜ್ಜಾಗಿ ಸಿಲುಕಿಕೊಂಡಿದೆ. ಕಾರಿನ ಮುಂಭಾಗದ ಪ್ಯಾಸೆಂಜರ್ ಸೀಟಿನಲ್ಲಿ (Front Passenger Seat) ಕುಳಿತಿದ್ದ ಶಿವಕುಮಾರ್ ಅವರಿಗೆ ತೀವ್ರ ರಕ್ತಸ್ರಾವ ಹಾಗೂ ಗಂಭೀರ ಗಾಯಗಳಾಗಿದ್ದರಿಂದ ತಕ್ಷಣವೇ ದೇವನಹಳ್ಳಿಯ ಖಾಸಗಿ ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಅವರು ಮೃತಪಟ್ಟಿದ್ದಾರೆ ಎಂದು ವೈದ್ಯರು ಪ್ರಕಟಿಸಿದ್ದಾರೆ.

ಅಪಘಾತ ಸಂಭವಿಸುತ್ತಿದ್ದಂತೆ ಎಲ್‌ಪಿಜಿ ಸಿಲಿಂಡರ್ ಲಾರಿಯ ಚಾಲಕ ಸ್ಥಳದಲ್ಲೇ ಲಾರಿಯನ್ನು ಬಿಟ್ಟು ಕಾಲ್ಕಿತ್ತಿದ್ದಾನೆ. ಈ ಕುರಿತು ವಿನೋದ್ ಕುಮಾರ್ ನೀಡಿದ ದೂರಿನ ಅನ್ವಯ ದೇವನಹಳ್ಳಿ ಸಂಚಾರ ಪೊಲೀಸ್ ಠಾಣೆಯಲ್ಲಿ (Devanahalli Traffic Police) ಲಾರಿ ಚಾಲಕನ ನಿರ್ಲಕ್ಷ್ಯದ ವಿರುದ್ಧ ಪ್ರಕರಣ ದಾಖಲಾಗಿದ್ದು, ಪರಾರಿಯಾಗಿರುವ ಚಾಲಕನಿಗಾಗಿ ಪೊಲೀಸರು ಬಲೆ ಬೀಸಿದ್ದಾರೆ.

ಅಭಿಮಾನಿಯ ಕಪಾಳಕ್ಕೆ ಬಾರಿಸಿದ ಕಿಚ್ಚ ಸುದೀಪ್ ಅವರ ಗನ್‌ಮ್ಯಾನ್ - ವಿಡಿಯೋ

Ganesh Mabla Gowda — Tue, 13 Oct 2026 22:17:07 +0530

ಚಿತ್ರದುರ್ಗ: ಕಿಚ್ಚ ಸುದೀಪ್ (Kiccha Sudeep) ಅವರು ಇವತ್ತು ಕೋಟೆನಾಡು ಚಿತ್ರದುರ್ಗದಲ್ಲಿ (Chitradurga) ನಡೆದ ಮದಕರಿ ನಾಯಕ ಜಯಂತಿ ಆಚರಣೆಗೆ ಆಗಮಿಸಿದ್ದರು. ಈ ಕಾರ್ಯಕ್ರಮ ಮುಗಿಸಿ ಹೊರಡುವ ವೇಳೆ ಸುದೀಪ್ ಅವರ ಗನ್‌ಮ್ಯಾನ್ ಯಡವಟ್ಟು ಒಂದನ್ನು ಮಾಡಿದ್ದಾರೆ.

ಅಸಲಿಗೆ ಆಗಿದ್ದೇನು?

ಮದಕರಿ ನಾಯಕ ಜಯಂತಿ ಆಚರಣೆ ನಂತರ ಸುದೀಪ್ ಅಲ್ಲಿಂದ ಹೊರಡಲು ಮುಂದಾಗಿದ್ದಾರೆ. ಸುದೀಪ್ ಅವರನ್ನು ನೋಡಲು ಸಾವಿರಾರು ಅಭಿಮಾನಿಗಳು ದೌಡಾಯಿಸಿದ್ದರು. ಸುದೀಪ್ ಹೊರಡುತ್ತಿದ್ದಂತೆಯೇ ನೂಕು ನುಗ್ಗಲು ಉಂಟಾಗಿದೆ. ಆಗ ಸುದೀಪ್ ಅವರಿಗೆ ರಕ್ಷಣೆ ನೀಡುವ ಧಾವಂತದಲ್ಲಿ ಅಭಿಮಾನಿಗಳ ಮೇಲೆ ತಾಳ್ಮೆ ಕಳೆದುಕೊಂಡಿದ್ದಾರೆ. ಕಿಚ್ಚ ನಡೆದುಕೊಂಡು ಬರುತ್ತಿರುವಾಗ ದೂಡುತ್ತಿದ್ದ ಅಭಿಮಾನಿಗಳನ್ನ ನಿಯಂತ್ರಿಸಲು ಸಾಧ್ಯವಾಗದೇ ಓರ್ವ ಅಭಿಮಾನಿಯ ಕೆನ್ನೆಗೆ ಬಾರಿಸಿದ್ದಾರೆ. ಕೆನ್ನೆಗೆ ಹೊಡೆಯುವ ದೃಶ್ಯ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದು, ಭಾರೀ ಚರ್ಚೆಗೆ ಕಾರಣವಾಗಿದೆ.

ಸುದೀಪ್ ನೋಡಲು ಮುಗಿಬಿದ್ದ ಫ್ಯಾನ್ಸ್

ಈ ಘಟನೆಗೂ ಮುನ್ನ ಸುದೀಪ್ ಅವರನ್ನು ನೋಡಲು ಸಾವಿರಾರು ಸಂಖ್ಯೆಯಲ್ಲಿ ಅಭಿಮಾನಿಗಳು ಸೇರಿದ್ದರು. ಅಪಾರ ಸಂಖ್ಯೆಯಲ್ಲಿ ಸೇರಿದ್ದ ಅಭಿಮಾನಿಗಳು ಸುದೀಪ್ ಜೊತೆ ಸೆಲ್ಫಿ ಕ್ಲಿಕ್ಕಿಸಿಕೊಳ್ಳಲು ಮತ್ತು ಅವರನ್ನು ಹತ್ತಿರದಿಂದ ಕಾಣಲು ಮುಗಿಬಿದ್ದಿದ್ದಾರೆ. ಆಗ ಕೆಲ ಕಾಲ ಆತಂಕದ ವಾತಾವರಣ ನಿರ್ಮಾಣ ಆಗಿತ್ತು. ನೂಕು-ನುಗ್ಗಲು ಉಂಟಾದ ಹಿನ್ನೆಲೆಯಲ್ಲಿ ಪೊಲೀಸರು ಅಭಿಮಾನಿಗಳ ನಿಯಂತ್ರಿಸಲು ಹರಸಾಹಸ ಪಟ್ಟರು. ವೇದಿಕೆ ಮೇಲೆ ಜಮಾಯಿಸಿದ್ದ ಫ್ಯಾನ್ಸ್‌ನ ಕಂಟ್ರೋಲ್‌ಗೆ ತೆಗೆದುಕೊಳ್ಳುವುದು ತುಂಬಾ ಕಷ್ಟ ಆಯಿತು.

ಇನ್ನು ಕಾರ್ಯಕ್ರಮದಲ್ಲಿ ಮಾತನ್ನಾಡಿರುವ ಸುದೀಪ್.. ನೀವೆಲ್ಲ ಹೇಗಿದ್ದೀರಿ ಎಂದು ಕೇಳುತ್ತ ಮಾತನ್ನ ಆರಂಭಿಸಿದರು. ಇನ್ನು ಕಳೆದ ಬಾರಿ ಬಂದಿದ್ದ ಘಟನೆಯನ್ನೂ ಸ್ಮರಿಸಿದರು. ನಾನು ಚಿತ್ರದುರ್ಗಕ್ಕೆ ಕರೆದಾಗ ತಾವು ಯಾವತ್ತೂ ತಪ್ಪಿಸಿಕೊಳ್ಳುವುದಿಲ್ಲ. ಆಗಾಗ ನಿಮ್ಮನ್ನು ನೋಡಲು ಬರುತ್ತೇನೆ. ನೀವೆಲ್ಲರೂ ಚೆನ್ನಾಗಿರಬೇಕು ಎಂದು ಆಶಿಸುತ್ತೇನೆ ಎಂದರು.

View on Threads

ಕಾರ್ಯಕ್ರಮಕ್ಕೆ ಬರುವುದಕ್ಕೂ ಮೊದಲು ಸುದೀಪ್ ಬಸವಮೂರ್ತಿ ಮಾದಾರ ಚನ್ನಯ್ಯ ಮಠಕ್ಕೆ ಭೇಟಿ ನೀಡಿ ಶ್ರೀಗಳ ಆರ್ಶೀವಾದ ಪಡೆದರು. ಮಾದಾರ ಚನ್ನಯ್ಯ ಸ್ವಾಮೀಜಿಗಳು ಸುದೀಪ್ ಅವರನ್ನು ಅಭಿನಂದಿಸಿ ಕೆಲಕಾಲ ಅವರೊಂದಿಗೆ ಮಾತುಕತೆ ನಡೆಸಿದರು. ಈ ಸಂದರ್ಭದಲ್ಲಿ ಶಾಸಕ ರಾಜುಗೌಡ ಸೇರಿದಂತೆ ಹಲವು ಗಣ್ಯರ ಉಪಸ್ಥಿತರಿದ್ದರು.

ಒಟ್ಟಾರೆ ಇವತ್ತು ಚಿತ್ರದುರ್ಗದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಸುದೀಪ್ ಅವರನ್ನು ಕಣ್ತುಂಬಿಕೊಂಡು ಅಭಿಮಾನಿಗಳು ಫುಲ್ ಖುಷಿಯಾಗಿದ್ದಾರೆ. ತಮ್ಮ ನೆಚ್ಚಿನ ನಟನನ್ನು ಹತ್ತಿರದಿಂದ ಕಂಡು ಸಂತೋಷಗೊಂಡಿದ್ದಾರೆ. ಆದರೆ ಸುದೀಪ್ ಆಗಮನದ ವೇಳೆ ಉಂಟಾಗಿರುವ ನೂಕು ನುಗ್ಗಲುಗಳು ಕೆಲ ಕಾಲ ಆಂತಕ ಸೃಷ್ಟಿಸಿರೋದು ಅಲ್ಲಿನ ವ್ಯವಸ್ಥಾಪಕರ ಮೇಲೆ ಪ್ರಶ್ನೆಗಳು ಇದ್ದಿವೆ. ಸುದೀಪ್ ಬರುತ್ತಾರೆ ಎಂದು ಗೊತ್ತಿದ್ದರೂ ಭದ್ರತಾ ಕ್ರಮಗಳ ಬಗ್ಗೆ ಪೊಲೀಸ್ ಇಲಾಖೆ ಯಾವುದೇ ಕ್ರಮ ತೆಗೆದುಕೊಂಡಿರಲಿಲ್ಲವಾ? ಎಂಬ ಪ್ರಶ್ನೆ ಶುರುವಾಗಿದೆ.

ಕೆರೆಗಳಿಗೆ ನೀರು ತುಂಬಿಸದಿದ್ದರೆ ಚುನಾವಣೇಲಿ ನೋಟಾಕ್ಕೆ ಮತ; ಸಿಎಂಗೆ ಈ ಊರಿನ ರೈತರಿಂದ ಎಚ್ಚರಿಕೆ!

Kannadaprabha News — Tue, 06 Oct 2026 07:38:14 +0530

ಹಿರಿಯೂರು (ಅ.6): ತಾಲೂಕಿನ ನಾಲ್ಕು ಹೋಬಳಿಗಳ ಕೆರೆಗಳಿಗೆ ನೀರು ತುಂಬಿಸದಿದ್ದರೆ ಉಪ ಚುನಾವಣೆಯಲ್ಲಿ ನೋಟಾಕ್ಕೆ ಮತ ಹಾಕಲಾಗುವುದು ಎಂದು ರೈತ ಸಂಘದ ಪದಾಧಿಕಾರಿಗಳು ತಹಸೀಲ್ದಾರ್ ಕಚೇರಿ ಮೂಲಕ ಮುಖ್ಯಮಂತ್ರಿಗಳಿಗೆ ಮನವಿ ಸಲ್ಲಿಸಿದರು.

ವಾಣಿವಿಲಾಸ ಜಲಾಶಯ 5TMC ನೀರು ಮೀಸಲಿಡಬೇಕು

ಹಿರಿಯೂರು ತಾಲೂಕಿನಲ್ಲಿ ಕಳೆದ ನಾಲ್ಕೈದು ವರ್ಷಗಳಿಂದ ನಿರಂತರವಾಗಿ ಕೆರೆಗಳಿಗೆ ನೀರು ತುಂಬಿಸುವಂತೆ ವಿವಿಧ ಮಾದರಿಯಲ್ಲಿ ಹೋರಾಟ ಮಾಡುತ್ತಾ ಬರಲಾಗಿದೆ. ಆದರೆ ಇದುವರೆಗೂ ಕೆರೆಗಳಿಗೆ ನೀರು ತುಂಬಿಸಿರುವುದಿಲ್ಲ. ವಾಣಿವಿಲಾಸ ಜಲಾಶಯಕ್ಕೆ ಪ್ರತಿ ವರ್ಷ ಐದು ಟಿಎಂಸಿ ನೀರು ಮೀಸಲು ಇಡಬೇಕು. ಈ ವರ್ಷ ಭದ್ರಾ ಜಲಾಶಯದಿಂದ ಎರಡು ಟಿಎಂಸಿ ನೀರು ಹರಿಸಬೇಕು.

ಗಾಯತ್ರಿ ಜಲಾಶಯದಿಂದ 16 ಕೆರೆಗಳಿಗೆ ನೀರು ತುಂಬಿಸಿ

ಜೆಜಿ ಹಳ್ಳಿ ಹೋಬಳಿಯ ಕಲ್ವಳ್ಳಿ ಭಾಗದ ಗಾಯತ್ರಿ ಜಲಾಶಯ ಸೇರಿ 16 ಕೆರೆಗಳಿಗೆ ನೀರು ತುಂಬಿಸುವ ಕಾಮಗಾರಿಯನ್ನು ತುರ್ತಾಗಿ ಪ್ರಾರಂಭಿಸಿ ನೀರು ಹರಿಸಬೇಕು. ಕಸಬಾ ಹಾಗೂ ಐಮಂಗಲ ಭಾಗದ ಕೆರೆಗಳಿಗೆ ಭದ್ರಾ ಮೇಲ್ದಂಡೆ ಯೋಜನೆಯ ಕಾಮಗಾರಿಯನ್ನು ತ್ವರಿತಗತಿಯಲ್ಲಿ ಮುಗಿಸಿ ಕೆರೆಗಳಿಗೆ ನೀರು ತುಂಬಿಸಬೇಕು. ಧರ್ಮಪುರ ಹೋಬಳಿಯ ವಿವಿಧ ಕೆರೆಗಳಿಗೆ ಏತ ನೀರಾವರಿ ಮಾಡಿದ್ದು ಈ ಕೆರೆಗಳಿಗೆ ವಾಟರ್ ಅಲೋಕೇಶನ್ ಮಾಡಬೇಕು ಮತ್ತು ಇನ್ನು ಉಳಿದಿರುವ ಕೆರೆಗಳಿಗೆ ಪೈಪ್‌ಲೈನ್ ಕಾಮಗಾರಿ ಮಾಡಿ ನೀರು ತುಂಬಿಸಬೇಕು. ವಾಣಿವಿಲಾಸ ಜಲಾಶಯದಿಂದ ಯಾವುದೇ ಭಾಗಕ್ಕೂ ವಾಟರ್ ಅಲೊಕೇಶನ್ ಮಾಡಬಾರದು. ವಾಣಿವಿಲಾಸ ಸಕ್ಕರೆ ಕಾರ್ಖಾನೆಯನ್ನು ಪುನರಾರಂಭ ಮಾಡಬೇಕು. ಈ ಎಲ್ಲಾ ಬೇಡಿಕೆಗಳ ಈಡೇರಿಕೆಗೆ ಸರ್ಕಾರ ತುರ್ತು ಕ್ರಮ ವಹಿಸದಿದ್ದರೆ ಬರಲಿರುವ ಉಪ ಚುನಾವಣೆಯಲ್ಲಿ ನೋಟಾಕ್ಕೆ ಮತ ಹಾಕುವ ಮೂಲಕ ಚುನಾವಣೆ ಬಹಿಷ್ಕಾರ ಮಾಡುತ್ತೇವೆ ಎಂದು ರೈತ ಮುಖಂಡರು ಒತ್ತಾಯಿಸಿದರು.

ಈ ಸಂದರ್ಭದಲ್ಲಿ ರೈತ ಸಂಘದ ಜಿಲ್ಲಾಧ್ಯಕ್ಷ ಕೆ.ಟಿ.ತಿಪ್ಪೇಸ್ವಾಮಿ, ತಾಲೂಕು ಅಧ್ಯಕ್ಷ ವೆಂಕಟೇಶ್, ರೈತ ಮುಖಂಡರಾದ ಸಿದ್ದರಾಮಣ್ಣ, ವೀರಣ್ಣಗೌಡ, ಕನ್ಯಪ್ಪ, ಎಂ.ಆರ್.ಈರಣ್ಣ, ಜೆಜಿಹಳ್ಳಿ ಹೋಬಳಿ ಅಧ್ಯಕ್ಷ ಈರಣ್ಣ, ಸಣ್ಣ ತಿಮ್ಮಣ್ಣ, ವಿರುಪಾಕ್ಷಪ್ಪ, ಮಂಜುನಾಥ್, ಬಾಲಕೃಷ್ಣ, ಹೊರಕೇರಪ್ಪ, ಜಗನ್ನಾಥ್, ಗಿರೀಶ್, ನಿಂಗಪ್ಪ, ಆರ್.ಕೆ.ಗೌಡ, ನಿರಂಜನ್, ಗೋವಿಂದಪ್ಪ ಸಿಂಪಣ್ಣ ಮುಂತಾದವರು ಹಾಜರಿದ್ದರು.

ಕನ್ನಡ ರಾಜ್ಯೋತ್ಸವ: ಕರ್ನಾಟಕದ ಹಿರಿಮೆ-ಗರಿಮೆ ಹೆಚ್ಚಿಸುವ, ನಾವು ಭೇಟಿ ನೀಡಲೇಬೇಕಾದ 10 ಐತಿಹಾಸಿಕ ಸ್ಥಳಗಳು

Santosh Naik — Sat, 31 Oct 2026 10:49:15 +0530

ಬೆಂಗಳೂರು (ಅ.31): ಕನ್ನಡ ನಾಡು ಕೇವಲ ಸಾಹಿತ್ಯ, ಕಲೆಗೆ ಮಾತ್ರವಲ್ಲದೆ ವಿಶ್ವದಲ್ಲೇ ಅಪರೂಪವೆನಿಸುವ ಭವ್ಯ ವಾಸ್ತುಶಿಲ್ಪ ಮತ್ತು ಇತಿಹಾಸಕ್ಕೆ ಹೆಸರುವಾಸಿಯಾಗಿದೆ: ಕದಂಬರು, ಗಂಗರು, ಚಾಲುಕ್ಯರು, ರಾಷ್ಟ್ರಕೂಟರು, ಹೊಯ್ಸಳರು, ವಿಜಯನಗರ ಸಾಮ್ರಾಜ್ಯ ಹಾಗೂ ಮೈಸೂರು ಒಡೆಯರ ಆಳ್ವಿಕೆಯಲ್ಲಿ ನಿರ್ಮಾಣಗೊಂಡ ಹಲವು ಶಿಲ್ಪಕಲಾ ಕಾವ್ಯಗಳು ಇಂದಿಗೂ ನಮಗೆ ಹೆಮ್ಮೆಯ ಸಂಕೇತವಾಗಿ ನಿಂತಿವೆ. ಕನ್ನಡಿಗರಷ್ಟೇ ಅಲ್ಲದೆ ಜಗತ್ತಿನಾದ್ಯಂತ ಜನರು ವೀಕ್ಷಿಸಲೇಬೇಕಾದ ಕರ್ನಾಟಕದ Top-10 ಐತಿಹಾಸಿಕ ತಾಣಗಳ ವಿವರ ಇಲ್ಲಿದೆ. ದೀಪಾವಳಿಯ ರಜಾ ಕಾಲದಲ್ಲಿ ನೀವು ಭೇಟಿ ನೀಡಲೇಬೇಕಾದ 10 ಐತಿಹಾಸಿಕ ಸ್ಥಳಗಳು ಇಲ್ಲಿವೆ.

ಹಂಪಿ (Hampi - ವಿಜಯನಗರ)

ವಿಜಯನಗರ ಸಾಮ್ರಾಜ್ಯದ ರಾಜಧಾನಿಯಾಗಿದ್ದ ಹಂಪಿ 'ಯುನೆಸ್ಕೋ' (UNESCO) ವಿಶ್ವ ಪರಂಪರೆಯ ತಾಣವಾಗಿದೆ. ತುಂಗಭದ್ರಾ ನದಿಯ ದಂಡೆಯಲ್ಲಿರುವ ಈ ತಾಣದಲ್ಲಿನ ಕಲ್ಲಿನ ರಥ, ವಿರೂಪಾಕ್ಷ ದೇವಾಲಯ, ವಿಜಯ ವಿಠ್ಠಲ ದೇವಾಲಯದ ಸಂಗೀತ ಕಂಬಗಳು ಹಾಗೂ ಉಗ್ರ ನರಸಿಂಹ ಮೂರ್ತಿಗಳು ವಿಜಯನಗರ ಶೈಲಿಯ ಸುಂದರ ವಾಸ್ತುಶಿಲ್ಪಕ್ಕೆ ಸಾಕ್ಷಿಯಾಗಿವೆ.

ಮೈಸೂರು ಅರಮನೆ (Mysore Palace - ಮೈಸೂರು)

ಮೈಸೂರು ಸಂಸ್ಥಾನದ ಯದುವಂಶದ ಒಡೆಯರ ವೈಭವವನ್ನು ಸಾರುವ ಮೈಸೂರು ಅರಮನೆ ಭಾರತದಲ್ಲೇ ಅತ್ಯಂತ ಹೆಚ್ಚು ಪ್ರವಾಸಿಗರು ಭೇಟಿ ನೀಡುವ ತಾಣಗಳಲ್ಲಿ ಒಂದಾಗಿದೆ. ಇಂಡೋ-ಸಾರ್ಸೆನಿಕ್ ಶೈಲಿಯಲ್ಲಿ ನಿರ್ಮಾಣಗೊಂಡಿರುವ ಈ ಅರಮನೆಯು ದಸರಾ ಮಹೋತ್ಸವದ ಸಮಯದಲ್ಲಿ ಲಕ್ಷಾಂತರ ದೀಪಗಳಿಂದ ಕಂಗೊಳಿಸುತ್ತದೆ.

ಬೇಲೂರು ಮತ್ತು ಹಳೇಬೀಡು (Belur & Halebidu - ಹಾಸನ)

ಹೊಯ್ಸಳ ರಾಜವಂಶದ ಕಲಾತ್ಮಕ ಶಿಲ್ಪಕಲೆಗೆ ಸಾಕ್ಷಿ ಪ್ರಜ್ಞೆಯಂತಿರುವ ಬೇಲೂರಿನ ಚನ್ನಕೇಶವ ದೇವಾಲಯ ಹಾಗೂ ಹಳೇಬೀಡಿನ ಹೊಯ್ಸಳೇಶ್ವರ ದೇವಾಲಯ ಇತ್ತೀಚೆಗೆ 'ಯುನೆಸ್ಕೋ' ವಿಶ್ವ ಪರಂಪರೆಯ ಪಟ್ಟಿಗೆ ಸೇರ್ಪಡೆಯಾಗಿವೆ. ನಕ್ಷತ್ರಾಕಾರದ ಜಗಲಿಗಳು ಹಾಗೂ ಕಲ್ಲಿನಲ್ಲಿ ಕೆತ್ತಲಾದ ಮದನಿಕೆ ವಿಗ್ರಹಗಳು ಪ್ರವಾಸಿಗರನ್ನು ಮೂಕವಿಸ್ಮಿತರನ್ನಾಗಿಸುತ್ತವೆ.

ಬಾದಾಮಿ, ಐಹೊಳೆ ಮತ್ತು ಪಟ್ಟದಕಲ್ಲು (Badami, Aihole & Pattadakal - ಬಾಗಲಕೋಟೆ)

ಬಾದಾಮಿ ಚಾಲುಕ್ಯರ ಸಾಮ್ರಾಜ್ಯದ ರಾಜಧಾನಿಯಾಗಿದ್ದ ಬಾದಾಮಿಯ ಗುಹಾಂತರ ದೇವಾಲಯಗಳು (Cave Temples) ವಿಶ್ವಪ್ರಸಿದ್ಧ. ಭಾರತೀಯ ದೇವಾಲಯ ವಾಸ್ತುಶಿಲ್ಪದ ತೊಟ್ಟಿಲು ಎಂದೇ ಕರೆಯಲ್ಪಡುವ ಐಹೊಳೆ ಹಾಗೂ ಯುನೆಸ್ಕೋ ಪಟ್ಟಿಯಲ್ಲಿರುವ ಪಟ್ಟದಕಲ್ಲಿನ ಮಲ್ಲಿಕಾರ್ಜುನ ಮತ್ತು ವಿರೂಪಾಕ್ಷ ದೇವಾಲಯಗಳು ಶಿಲ್ಪಕಲೆಯ ಅದ್ಭುತಗಳಾಗಿವೆ.

ಗೋಲ್ ಗುಂಬಜ್ (Gol Gumbaz - ವಿಜಯಪುರ)

ಆದಿಲ್ ಶಾಹಿ ರಾಜವಂಶದ ಮೊಹಮ್ಮದ್ ಆದಿಲ್ ಶಾ ಸಮಾಧಿ ಸ್ಥಳವಾದ ವಿಜಯಪುರದ ಗೋಲ್ ಗುಂಬಜ್, ಜಗತ್ತಿನ ಎರಡನೇ ಅತಿ ದೊಡ್ಡ ಆಸರೆಯಿಲ್ಲದ ಗಮ್ಮಟ (Dome) ಹೊಂದಿದೆ. ಇಲ್ಲಿರುವ 'ಪಿಸುಮಾತಿನ ಗ್ಯಾಲರಿ'ಯಲ್ಲಿ (Whispering Gallery) ಸಣ್ಣ ಶಬ್ದ ಮಾಡಿದರೂ ಅದು ಏಳು ಬಾರಿ ಪ್ರತಿಧ್ವನಿಸುವುದು ಇದರ ವಿಶೇಷ.

ಶ್ರವಣಬೆಳಗೊಳ (Shravanabelagola - ಹಾಸನ)

ವಿಶ್ವದ ಅತ್ಯಂತ ಎತ್ತರದ ಏಕಶಿಲಾ ವಿಗ್ರಹಗಳಲ್ಲಿ ಒಂದಾದ ಗೊಮ್ಮಟೇಶ್ವರನ 57 ಅಡಿ ಎತ್ತರದ ಮೂರ್ತಿ ಶ್ರವಣಬೆಳಗೊಳದ ವಿಂಧ್ಯಗಿರಿ ಬೆಟ್ಟದಲ್ಲಿದೆ. ಗಂಗರ ದಂಡನಾಯಕ ಚಾವುಂಡರಾಯ ನಿರ್ಮಿಸಿದ ಈ ಜೈನ ಪುಣ್ಯಕ್ಷೇತ್ರದಲ್ಲಿ 12 ವರ್ಷಗಳಿಗೊಮ್ಮೆ ನಡೆಯುವ ಮಹಾಮಸ್ತಕಾಭಿಷೇಕ ಜಾಗತಿಕ ಗಮನ ಸೆಳೆಯುತ್ತದೆ.

ಚಿತ್ರದುರ್ಗದ ಕೋಟೆ (Chitradurga Fort - ಚಿತ್ರದುರ್ಗ)

'ಏಳು ಸುತ್ತಿನ ಕೋಟೆ' ಎಂದೇ ಖ್ಯಾತವಾಗಿರುವ ಚಿತ್ರದುರ್ಗದ ರಕ್ಷಣೆ ಮತ್ತು ಆಡಳಿತ ವೈಭವ ಭಾರತೀಯ ಕೋಟೆ ನಿರ್ಮಾಣ ಕಲೆಗೆ ಮಾದರಿಯಾಗಿದೆ. ಪಾಳೆಗಾರರ ಆಳ್ವಿಕೆ, ಒನಕೆ ಓಬವ್ವಳ ಶೌರ್ಯದ ಕಥೆಗಳು ಹಾಗೂ ಕೋಟೆಯ ಒಳಗಿರುವ ಹೈದರಾಲಿ ಗರಡಿ, ಎಣ್ಣೆ ಕೊಳಗಳು ಮತ್ತು ದೇವಾಲಯಗಳು ರೋಚಕ ಇತಿಹಾಸವನ್ನು ಬಿಚ್ಚಿಡುತ್ತವೆ.

ಬೀದರ್‌ ಕೋಟೆ (Bidar Fort - ಬೀದರ್‌)

ಬಹುಮನಿ ಸುಲ್ತಾನರ ರಾಜಧಾನಿಯಾಗಿದ್ದ ಬೀದರ್‌ ಕೋಟೆಯು ಪರ್ಷಿಯನ್ ಹಾಗೂ ಇಸ್ಲಾಮಿಕ್ ವಾಸ್ತುಶಿಲ್ಪದ ಅಪರೂಪದ ಸಮ್ಮಿಲನವಾಗಿದೆ. ರಂಗೀನ್ ಮಹಲ್, ತಖ್ತ್‌ ಮಹಲ್, ಮಹಮೂದ್ ಗವಾನ್ ಮದರಸಾ ಹಾಗೂ ಜಲ ನಿರ್ವಹಣೆಯ 'ಕರೇಜ್ ಸಿಸ್ಟಮ್' (Karez Water System) ಬೀದರ್‌ ಕೋಟೆಯ ವೈಶಿಷ್ಟ್ಯಗಳಾಗಿವೆ.

ಬನವಾಸಿ (Banavasi - ಉತ್ತರ ಕನ್ನಡ)

ಬನವಾಸಿಯು ಕನ್ನಡದ ಪ್ರಥಮ ರಾಜವಂಶವಾದ ಕದಂಬರ ರಾಜಧಾನಿಯಾಗಿತ್ತು. ವರದಾ ನದಿಯ ದಂಡೆಯಲ್ಲಿರುವ ಇಲ್ಲಿನ ಮಧುಕೇಶ್ವರ ದೇವಾಲಯವು ಪ್ರಾಚೀನ ಕನ್ನಡ ಕಲೆ ಮತ್ತು ಸಂಸ್ಕೃತಿಗೆ ದ್ಯೋತಕವಾಗಿದೆ.

ಶ್ರೀರಂಗಪಟ್ಟಣ (Srirangapatna - ಮಂಡ್ಯ)

ಕಾವೇರಿ ನದಿಯಿಂದ ಸುತ್ತುವರಿಯಲ್ಪಟ್ಟ ನಗರವಾದ ಶ್ರೀರಂಗಪಟ್ಟಣವು ವಿಜಯನಗರ ಮಂಡಲೇಶ್ವರ ಮತ್ತು ಮೈಸೂರು ಹುಲಿ ಟಿಪ್ಪು ಸುಲ್ತಾನ್‌ನ ರಾಜಧಾನಿಯಾಗಿತ್ತು. ರಂಗನಾಥಸ್ವಾಮಿ ದೇವಾಲಯ, ಟಿಪ್ಪುವಿನ ಬೇಸಿಗೆ ಅರಮನೆ (ದರಿಯಾ ದೌಲತ್ ಬಾಗ್), ಗುಂಬಜ್ ಹಾಗೂ ಐತಿಹಾಸಿಕ ಕೋಟೆಗಳು ಶ್ರೀರಂಗಪಟ್ಟಣದ ಪ್ರಮುಖ ಆಕರ್ಷಣೆಗಳಾಗಿವೆ.

ಚಿತ್ರದುರ್ಗ: ಆಮೆ ಸಂಸ್ಕಾರಕ್ಕೆ ನೆಲ ಅಗೆಯುವಾಗ ಪುರಾತನ ಕಾಲದ ನಾಣ್ಯಗಳ ಕುಡಿಕೆ ಪತ್ತೆ!

Gowthami K — Tue, 27 Oct 2026 10:58:56 +0530

ಚಿತ್ರದುರ್ಗ: ಕರ್ನಾಟಕದ ಇತಿಹಾಸವೆಂದರೆ ಕೋಟೆ, ರಾಜರ ಯುದ್ಧಗಳ ಕಥೆಯಷ್ಟೇ ಅಲ್ಲ, ಜನಸಾಮಾನ್ಯರು ಬಳಸುತ್ತಿದ್ದ ವಸ್ತುಗಳು ಇತಿಹಾಸವನ್ನು ನೆನಪಿಸುತ್ತವೆ. ಹಳೆಯ ನಾಣ್ಯಗಳು ಕೇವಲ ವ್ಯಾಪಾರದ ಮಾಧ್ಯಮಗಳಲ್ಲ. ಅವು ಅಂದಿನ ಸಾಮ್ರಾಜ್ಯದ ಆರ್ಥಿಕ ಸ್ಥಿತಿಗತಿ ಮತ್ತು ಇತಿಹಾಸವನ್ನು ತಿಳಿಸುವ ಜ್ಞಾನದ ನಿಧಿ. ಜಿಲ್ಲೆಯ ಚಳ್ಳಕೆರೆ ತಾಲೂಕಿನ ಗೋಪನಹಳ್ಳಿ ಗ್ರಾಮದಲ್ಲಿ ಅಪರೂಪದ ಹಳೆಯ ಕಾಲದ ನಾಣ್ಯಗಳು ಪತ್ತೆಯಾಗಿದ್ದು, ಸ್ಥಳೀಯರಲ್ಲಿ ತೀವ್ರ ಕುತೂಹಲ ಮೂಡಿಸಿದೆ. ಮಕ್ಕಳು ಆಟವಾಡುವಾಗ ನಡೆದ ಅಕಸ್ಮಿಕ ಘಟನೆಯೊಂದು ಐತಿಹಾಸಿಕ ನಿಧಿಯ ಶೋಧಕ್ಕೆ ಕಾರಣವಾಗಿದೆ.

ಗೋಪನಹಳ್ಳಿ ಗ್ರಾಮದ ನಿವಾಸಿ ರಂಗಮ್ಮ ಎಂಬುವರ ಮನೆಯ ಅಂಗಳದಲ್ಲಿ ಈ ಘಟನೆ ನಡೆದಿದೆ. ರಂಗಮ್ಮ ಅವರ ಮನೆಯಲ್ಲಿದ್ದ ಮಕ್ಕಳು ಆಮೆ ಆಟವಾಡುತ್ತಾ ಮನೆಯ ಅಂಗಳದಲ್ಲಿ ನೆಲವನ್ನು ಅಗೆಯುತ್ತಿದ್ದರು. ಈ ವೇಳೆ ಮಣ್ಣಿನ ಅಡಿಯಲ್ಲಿ ಸಣ್ಣ ಕುಡಿಕೆಯೊಂದು ಸಿಕ್ಕಿದೆ. ಕುಡಿಕೆಯನ್ನು ತೆಗೆದು ಪರಿಶೀಲಿಸಿದಾಗ ಅದರೊಳಗೆ ಪುರಾತನ ಕಾಲದ ನಾಣ್ಯಗಳು ಇರುವುದು ಕಂಡುಬಂದಿದೆ.

ಸ್ಥಳಕ್ಕೆ ಕಂದಾಯ ಅಧಿಕಾರಿಗಳ ಭೇಟಿ

ವಿಷಯ ತಿಳಿದ ತಕ್ಷಣ ಚಳ್ಳಕೆರೆ ತಾಲೂಕು ತಹಸೀಲ್ದಾರ್ ರಹೆನ್ ಪಾಶಾ ಅವರು ಸಿಬ್ಬಂದಿಯೊಂದಿಗೆ ಗೋಪನಹಳ್ಳಿಯ ರಂಗಮ್ಮ ಅವರ ಮನೆಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಸ್ಥಳದಲ್ಲಿದ್ದ ಸಾರ್ವಜನಿಕರಿಂದ ಮಾಹಿತಿ ಪಡೆದ ಅಧಿಕಾರಿಗಳು, ನಾಣ್ಯಗಳಿದ್ದ ಕುಡಿಕೆಯನ್ನು ತಮ್ಮ ವಶಕ್ಕೆ ಪಡೆದುಕೊಂಡಿದ್ದಾರೆ.

ಪುರಾತತ್ವ ಇಲಾಖೆಗೆ ಮಾಹಿತಿ ರವಾನೆ

ಈ ನಾಣ್ಯಗಳು ಯಾವ ಕಾಲಘಟ್ಟಕ್ಕೆ ಸೇರಿದವು, ಯಾವ ಲೋಹದಿಂದ ಮಾಡಲ್ಪಟ್ಟಿವೆ ಮತ್ತು ಇವುಗಳ ಐತಿಹಾಸಿಕ ಮಹತ್ವವೇನು ಎಂಬುದನ್ನು ಕಂಡುಕೊಳ್ಳಲು ಕಂದಾಯ ಇಲಾಖೆಯು ರಾಜ್ಯ ಪುರಾತತ್ವ ಇಲಾಖೆಯ ಅಧಿಕಾರಿಗಳಿಗೆ ಅಧಿಕೃತ ಮಾಹಿತಿ ರವಾನಿಸಿದೆ. ಪುರಾತತ್ವ ತಜ್ಞರು ಸ್ಥಳಕ್ಕೆ ಆಗಮಿಸಿ ವೈಜ್ಞಾನಿಕ ಪರಿಶೀಲನೆ ನಡೆಸಿದ ಬಳಿಕವಷ್ಟೇ ಈ ನಾಣ್ಯಗಳ ಹಿಂದಿನ ರಾಜವಂಶ ಹಾಗೂ ಇತಿಹಾಸ ಸ್ಪಷ್ಟವಾಗಲಿದೆ.

ರಾಜ್ಯದಲ್ಲಿ ಹಲವು ಮಂದಿ ನಾಣ್ಯ ಸಂಗ್ರಹಕಾರರಿದ್ದಾರೆ. ಹಳೆಯ ನೋಟುಗಳ ಸಂಗ್ರಹಕಾರರೂ ಇದ್ದಾರೆ. ಕರ್ನಾಟಕವನ್ನು ಆಳಿದ ಕದಂಬರು, ಗಂಗರು, ಚಾಲುಕ್ಯರು, ರಾಷ್ಟ್ರಕೂಟರು, ಅಳುಪರು, ಹೊಯ್ಸಳರು, ವಿಜಯನಗರ ಮತ್ತು ಮೈಸೂರು ಅರಸರ ಕಾಲದ ನಾಣ್ಯಗಳು, ಹೈದರಾಲಿ ಹಾಗೂ ಟಿಪ್ಪು ಸುಲ್ತಾನ್ ಕಾಲದ ಚಿನ್ನ, ಬೆಳ್ಳಿ, ತಾಮ್ರ ಮತ್ತು ಸೀಸದ ನಾಣ್ಯಗಳು, ಶಾತವಾಹನರು, ಕ್ಷತ್ರಪರು, ಗುಪ್ತರು, ಕುಶಾನರು, ಇಂಡೋ-ಗ್ರೀಕರು, ಇಂಡೋ-ಪಾರ್ಥಿಯನ್ನರು, ರೋಮನ್ನರು ಸೇರಿ ವಿವಿಧ ರಾಜವಂಶಗಳ ನಾಣ್ಯಗಳು, ಪ್ರಾಚೀನ ಬೆಳ್ಳಿ ಮುದ್ರೆಯ ನಾಣ್ಯಗಳು, ದೆಹಲಿ ಸುಲ್ತಾನರು, ಮೊಘಲರು, ಬಹಮನಿ ಹಾಗೂ ವಿಜಯಪುರ ಸುಲ್ತಾನರ ಕಾಲದ ನಾಣ್ಯ, ಬ್ರಿಟಿಷರ ಆಳ್ವಿಕೆಯ ಕಾಲದ ನಾಣ್ಯಗಳು ಈಗ ಇತಿಹಾಸ.

ಚಿತ್ರದುರ್ಗ: ಗೋನೂರು ಕೆರೆ ಬಳಿ ಮುದ್ದಾದ ನವಜಾತ ಶಿಶು ಪತ್ತೆ, ಚೀಲದಲ್ಲಿ ಕಟ್ಟಿ ಬಿಸಾಕಿ ಹೋದ ಪಾಪಿಗಳು!

Gowthami K — Sat, 24 Oct 2026 08:51:08 +0530

ಚಿತ್ರದುರ್ಗ: ಚಿತ್ರದುರ್ಗ ತಾಲೂಕಿನ ಗೋನೂರು ಗ್ರಾಮದ ಬಳಿ ಇರುವ ಕೆರೆಯ ಪ್ರದೇಶದಲ್ಲಿ ನವಜಾತ ಹೆಣ್ಣು ಶಿಶುವನ್ನು ಚೀಲವೊಂದರಲ್ಲಿ ಕಟ್ಟಿ ಬಿಸಾಕಿ ಹೋಗಿರುವ ಅಮಾನವೀಯ ಘಟನೆ ಬೆಳಕಿಗೆ ಬಂದಿದೆ. ಅದೃಷ್ಟವಶಾತ್, ಸಮಯಕ್ಕೆ ಸರಿಯಾಗಿ ಮಗುವಿನ ಅಳು ಕೇಳಿ ಧಾವಿಸಿದ ಗ್ರಾಮಸ್ಥರ ಸಮಯಪ್ರಜ್ಞೆ ಹಾಗೂ ಮಾನವೀಯತೆಯಿಂದಾಗಿ ಮಗು ಪ್ರಾಣಾಪಾಯದಿಂದ ಪಾರಾಗಿದೆ.

ಗೋನೂರು ಕೆರೆಯ ಸೀಮೆ ಬಳಿ ಹಾದುಹೋಗುತ್ತಿದ್ದ ಕೆಲ ಗ್ರಾಮಸ್ಥರಿಗೆ ಚೀಲವೊಂದರಿಂದ ಮಗುವಿನ ಅಳುವಿನ ಶಬ್ದ ಕೇಳಿಬಂದಿದೆ. ಅನುಮಾನಗೊಂಡು ಹತ್ತಿರ ಹೋಗಿ ಪರಿಶೀಲಿಸಿದಾಗ, ನವಜಾತ ಹೆಣ್ಣು ಮಗುವನ್ನು ಚೀಲದಲ್ಲಿಟ್ಟು ಬಿಸಾಕಿರುವುದು ಕಂಡುಬಂದಿದೆ. ತಕ್ಷಣವೇ ಕಾರ್ಯಪ್ರವೃತ್ತರಾದ ಗ್ರಾಮಸ್ಥರು ಮಗುವನ್ನು ಚೀಲದಿಂದ ಹೊರತೆಗೆದು ಸುರಕ್ಷಿತವಾಗಿ ರಕ್ಷಿಸಿದ್ದಾರೆ.

ಸ್ಥಳೀಯ ಮಹಿಳೆಯರಿಂದ ಮಾತೃವಾತ್ಸಲ್ಯ:

ಕೆರೆಯ ದಂಡೆಯ ಬಳಿ ನಿರ್ಜನ ಪ್ರದೇಶದಲ್ಲಿದ್ದ ಮಗುವನ್ನು ಕಂಡ ಗೋನೂರು ಗ್ರಾಮದ ಮಹಿಳೆಯರು ತಕ್ಷಣವೇ ಮಗುವಿಗೆ ನೀರು ಹಾಕಿ, ಶುಚಿಗೊಳಿಸಿ, ಬೆಚ್ಚಗಿನ ಬಟ್ಟೆ ಹೊದಿಸಿ ಆರೈಕೆ ಮಾಡಿದ್ದಾರೆ. ಮಹಿಳೆಯರ ಸಮಯಪ್ರಜ್ಞೆಯಿಂದಾಗಿ ಶಿಶುವಿಗೆ ಜೀವದಾನ ಸಿಕ್ಕಂತಾಗಿದೆ. ಹೆತ್ತ ತಾಯಿಯೇ ತೊರೆದರೂ, ಗ್ರಾಮದ ಮಹಿಳೆಯರು ತೋರಿದ ಈ ಮಾತೃವಾತ್ಸಲ್ಯಕ್ಕೆ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ.

ಮಕ್ಕಳ ಕಲ್ಯಾಣ ಇಲಾಖೆಗೆ ಹಸ್ತಾಂತರ:

ಮಗುವನ್ನು ರಕ್ಷಿಸಿದ ತಕ್ಷಣವೇ ಗ್ರಾಮಸ್ಥರು ಸಂಬಂಧಪಟ್ಟ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಧಾವಿಸಿದ ಮಕ್ಕಳ ಕಲ್ಯಾಣ ಇಲಾಖೆಯ ಅಧಿಕಾರಿಗಳಿಗೆ ಶಿಶುವನ್ನು ಸುರಕ್ಷಿತವಾಗಿ ಹಸ್ತಾಂತರಿಸಲಾಯಿತು. ಅಧಿಕಾರಿಗಳು ತಕ್ಷಣವೇ ಮಗುವಿನ ಆರೋಗ್ಯ ತಪಾಸಣೆಗೆ ವ್ಯವಸ್ಥೆ ಮಾಡಿದರು.

ಜಿಲ್ಲಾಸ್ಪತ್ರೆಯಲ್ಲಿ ಚಿಕಿತ್ಸೆ:

ಸದ್ಯ ರಕ್ಷಿಸಲ್ಪಟ್ಟ ಹೆಣ್ಣು ಮಗುವನ್ನು ಚಿತ್ರದುರ್ಗದ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದ್ದು, ವೈದ್ಯರ ಮೇಲ್ವಿಚಾರಣೆಯಲ್ಲಿ ಅಗತ್ಯ ಚಿಕಿತ್ಸೆ ಮತ್ತು ಆರೈಕೆ ನೀಡಲಾಗುತ್ತಿದೆ. ಮಗುವಿನ ಆರೋಗ್ಯ ಸ್ಥಿತಿ ಸ್ಥಿರವಾಗಿದೆ ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ.

ಜನರ ಆಕ್ರೋಶ:

9 ತಿಂಗಳು ಹೊತ್ತು ಜನ್ಮ ನೀಡಿದ ಹಸುಗೂಸನ್ನು ಈ ರೀತಿ ಕೆರೆಯ ಬಳಿ ಚೀಲದಲ್ಲಿ ಕಟ್ಟಿ ಎಸೆದುಹೋದ ಕರುಣೆಯಿಲ್ಲದ ಪೋಷಕರ ವಿರುದ್ಧ ಗೋನೂರು ಗ್ರಾಮಸ್ಥರು ಹಾಗೂ ಸಾರ್ವಜನಿಕರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು, ಹಿಡಿಶಾಪ ಹಾಕುತ್ತಿದ್ದಾರೆ. ಘಟನೆಗೆ ಸಂಬಂಧಿಸಿದಂತೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು, ಮಗುವನ್ನು ಬಿಸಾಕಿ ಹೋದ ಕಿಡಿಗೇಡಿಗಳ ಪತ್ತೆಗೆ ಬಲೆ ಬೀಸಿದ್ದಾರೆ.

ಕೋಟೆನಾಡಿಗೆ ಚಪ್ಪಲಿ ಹಾಕದೇ ಬರಿಗಾಲಲ್ಲಿ ಬಂದು ಹೋದ ಕಿಚ್ಚ ಸುದೀಪ್, ಕಾರಣ ಏನು ಗೊತ್ತಾ?

Ganesh Mabla Gowda — Tue, 13 Oct 2026 23:06:07 +0530

ಚಿತ್ರದುರ್ಗ (ಅಕ್ಟೋಬರ್ 13): ಮದಕರಿ ನಾಯಕ ಜಯಂತಿ ಆಚರಣೆ ಹಿನ್ನೆಲೆಯಲ್ಲಿ ಕಿಚ್ಚ ಸುದೀಪ್ (Kiccha Sudeep) ಅವರು ಇವತ್ತು ಚಿತ್ರದುರ್ಗಕ್ಕೆ ಆಗಮಿಸಿದ್ದರು. ವಿಶೇಷ ಅಂದರೆ ಅವರು ಬರಿಗಾಲಲ್ಲೇ ಕೋಟೆ ನಾಡಿಗೆ ಎಂಟ್ರಿ ಆಗಿರೋದು ಅಭಿಮಾನಿಗಳ ಗಮನ ಸೆಳೆಯಿತು. ಹೆಲಿಕಾಪ್ಟರ್‍‌ನಿಂದ ಇಳಿದು ಬರೀಗಾಲಲ್ಲೇ ನಡೆದುಕೊಂಡು ಹೋಗುವ ದೃಶ್ಯ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.

ಬರೀಗಾಲಲ್ಲಿ ಬಂದಿದ್ದೇಕೆ ಕಿಚ್ಚ?

ಅಂದಹಾಗೆ ಸುದೀಪ್ ಅವರು ಬರಿಗಾಲಲ್ಲಿ ಬಂದಿರೋದಕ್ಕೆ ಪ್ರಮುಖ ಕಾರಣ ಇದೆ. ನಾಡಿನೆಲ್ಲೆಡೆ ನವರಾತ್ರಿಯ ಸಂಭ್ರಮ ಜೋರಾಗಿದೆ. ಸುದೀಪ್ ನವರಾತ್ರಿಯ ವ್ರತ ಮಾಡುತ್ತಿದ್ದು, ಉಪವಾಸದಲ್ಲಿದ್ದರು. ಹೀಗಾಗಿ ಚಿತ್ರದುರ್ಗದ ಎಸ್‌ಜೆಎಂ ಹೆಲಿಪ್ಯಾಡ್‌ಗೆ ಹೆಲಿಕಾಪ್ಟರ್‌ನಲ್ಲಿ ಬಂದಿಳಿದ ಅವರು, ಬರಿಗಾಲಲ್ಲೇ ಕೆಳಗಿಳಿದರು. ನಂತರ ಬರಿಗಾಲಲ್ಲೇ ನಡೆದುಕೊಂಡು ಕಾರ್ಯಕ್ರಮದ ವೇದಿಕೆಗೆ ತೆರಳಿದ್ದಾರೆ.

ಸುದೀಪ್ ನವರಾತ್ರಿ ಸಂಭ್ರಮದಲ್ಲಿ (Navratri Festival) ಬರಿಗಾಲಲ್ಲಿ ಓಡಾಡೋದು ಇದು ಹೊಸದಲ್ಲ. ಈ ಹಿಂದೆಯೂ ಕೂಡ ಅವರು ಇದೇ ವಿಚಾರಕ್ಕೆ ಸುದ್ದಿ ಆಗಿದ್ದರು. ಬಿಗ್‌ ಬಾಸ್ (Bigg Boss) ರಿಯಾಲಿಟಿ ಶೋನ ವಾರದ ಕತೆ ಕಿಚ್ಚನ ಜೊತೆಯ ಎಪಿಸೋಡ್‌ಗೆ ಒಮ್ಮೆ ಬರಿಗಾಲಲ್ಲಿ ಬಂದು ಕಾರ್ಯಕ್ರಮ ನಡೆಸಿಕೊಟ್ಟಿದ್ದರು. ಕೆಲವು ಮಾಹಿತಿಗಳ ಪ್ರಕಾರ ಸುದೀಪ್.. ನವರಾತ್ರಿಯಲ್ಲಿ ಸುದೀಪ್, 9 ದಿನವೂ ಒಂದು ಹೊತ್ತ ಮಾತ್ರ ಊಟ ಮಾಡುತ್ತಾರೆ. ಶೂಟಿಂಗ್ ಸಮಯದಲ್ಲೂ ಕಠಿಣ ವ್ರತ ಮಾಡುತ್ತಾರೆ. ಈ ವರ್ಷವೂ ತಮ್ಮ ಭಕ್ತಿಯ ಆರಾಧನೆಯನ್ನು ಮುಂದುವರಿಸಿದ್ದಾರೆ ಎಂದು ಅಭಿಮಾನಿಗಳು ಮಾತನ್ನಾಡಿಕೊಳ್ಳುತ್ತಿದ್ದಾರೆ.

ಚಿತ್ರದುರ್ಗದಲ್ಲಿ ಅಭಿಮಾನಿಗಳಿಗೆ ಹಬ್ಬ

ಇನ್ನು, ಚಿತ್ರದುರ್ಗದಲ್ಲಿ ಸುದೀಪ್ ಅವರನ್ನು ನೋಡಲು ಸಾವಿರಾರು ಸಂಖ್ಯೆಯಲ್ಲಿ ಅಭಿಮಾನಿಗಳು ಸೇರಿದ್ದರು. ಅಪಾರ ಸಂಖ್ಯೆಯಲ್ಲಿ ಸೇರಿದ್ದ ಅಭಿಮಾನಿಗಳು ಸುದೀಪ್ ಜೊತೆ ಸೆಲ್ಫಿ ಕ್ಲಿಕ್ಕಿಸಿಕೊಳ್ಳಲು ಮತ್ತು ಅವರನ್ನು ಹತ್ತಿರದಿಂದ ಕಾಣಲು ಮುಗಿಬಿದ್ದಿದ್ದಾರೆ. ಆಗ ಕೆಲ ಕಾಲ ಆತಂಕದ ವಾತಾವರಣ ನಿರ್ಮಾಣ ಆಗಿತ್ತು. ನೂಕು-ನುಗ್ಗಲು ಉಂಟಾದ ಹಿನ್ನೆಲೆಯಲ್ಲಿ ಪೊಲೀಸರು ಅಭಿಮಾನಿಗಳ ನಿಯಂತ್ರಿಸಲು ಹರಸಾಹಸ ಪಟ್ಟರು. ವೇದಿಕೆ ಮೇಲೆ ಜಮಾಯಿಸಿದ್ದ ಫ್ಯಾನ್ಸ್‌ನ ಕಂಟ್ರೋಲ್‌ಗೆ ತೆಗೆದುಕೊಳ್ಳುವುದು ತುಂಬಾ ಕಷ್ಟ ಆಯಿತು. ಇದರ ಮಧ್ಯೆ ನೆಚ್ಚಿನ ನಟನನ್ನು ಹತ್ತಿರದಿಂದ ಕಣ್ತುಂಬಿಕೊಂಡು ಫ್ಯಾನ್ಸ್ ತುಂಬಾ ಖುಷಿಪಟ್ಟರು.

ಇನ್ನು, ಕಾರ್ಯಕ್ರಮದಲ್ಲಿ ಮಾತನ್ನಾಡಿರುವ ಸುದೀಪ್.. ನೀವೆಲ್ಲ ಹೇಗಿದ್ದೀರಿ ಎಂದು ಕೇಳುತ್ತ ಮಾತನ್ನ ಆರಂಭಿಸಿದರು. ಇನ್ನು ಕಳೆದ ಬಾರಿ ಬಂದಿದ್ದ ಘಟನೆಯನ್ನೂ ಸ್ಮರಿಸಿದರು. ನಾನು ಚಿತ್ರದುರ್ಗಕ್ಕೆ ಕರೆದಾಗ ತಾವು ಯಾವತ್ತೂ ತಪ್ಪಿಸಿಕೊಳ್ಳುವುದಿಲ್ಲ. ಆಗಾಗ ನಿಮ್ಮನ್ನು ನೋಡಲು ಬರುತ್ತೇನೆ. ನೀವೆಲ್ಲರೂ ಚೆನ್ನಾಗಿರಬೇಕು ಎಂದು ಆಶಿಸುತ್ತೇನೆ ಎಂದು ಶುಭ ಹಾರೈಸಿದರು.

View this post on Instagram

A post shared by Media King (@thenameismediaking)

ರೇಣುಕಾಸ್ವಾಮಿ ಕೇಸ್: ನ್ಯಾಯ ಪೀಠದ ಮುಂದೆ ಸಾಕ್ಷಿ ಹೇಳುವಾಗ ಟೆನ್ಷನ್ ಆದ ಚಿಕ್ಕಣ್ಣ! ಸಮನ್ಸ್ ನೀಡಿದ ಕೋರ್ಟ್

Gowthami K — Tue, 13 Oct 2026 14:14:49 +0530

ಬೆಂಗಳೂರು: ನಟ ದರ್ಶನ್ ತೂಗುದೀಪ, ಪವಿತ್ರಾ ಗೌಡ ಹಾಗೂ ಡಿ ಗ್ಯಾಂಗ್ ವಿರುದ್ಧದ ಚಿತ್ರದುರ್ಗದ ರೇಣುಕಾಸ್ವಾಮಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬೆಂಗಳೂರಿನ 59ನೇ ಸಿಟಿ ಸಿವಿಲ್ ಮತ್ತು ಸೆಷನ್ಸ್ ನ್ಯಾಯಾಲಯದಲ್ಲಿ ವಿಚಾರಣೆ ನಡೆಯುತ್ತಿದೆ. ಪ್ರಕರಣದ ಹಿನ್ನೆಲೆ ತಮ್ಮ ಹೇಳಿಕೆ ದಾಖಲಿಸಲು ಪ್ರಮುಖ ಸಾಕ್ಷಿಗಳಾದ ನಟ ಚಿಕ್ಕಣ್ಣ ಹಾಗೂ ನಟ ಯಶಸ್ ಸೂರ್ಯ ಅವರು ಸೋಮವಾರ ಕೋರ್ಟ್‌ಗೆ ಹಾಜರಾಗಿದ್ದರು.

ಸಾಕ್ಷಿ ಪೀಠದಲ್ಲಿ ಟೆನ್ಷನ್ ಒಳಗಾದ ನಟ ಚಿಕ್ಕಣ್ಣ, ಸಮಯಾವಕಾಶ ನೀಡಿದ ಕೋರ್ಟ್

ಪ್ರಕರಣದ ಪ್ರಮುಖ ಸಾಕ್ಷಿಯಾಗಿರುವ ಹಾಸ್ಯನಟ ಚಿಕ್ಕಣ್ಣ ಬೆಳಿಗ್ಗೆಯೇ ನಗರದ 59ನೇ ಸೆಷನ್ಸ್ ನ್ಯಾಯಾಲಯಕ್ಕೆ ಆಗಮಿಸಿ, ತಮ್ಮ ಕಾರಿನಲ್ಲಿಯೇ ಕಾಯುತ್ತಿದ್ದರು. ಮಧ್ಯಾಹ್ನ 12 ಗಂಟೆಗೆ ವೇಳೆಗೆ ಕೋರ್ಟ್ ವಿಚಾರಣೆಗೆ ಪೀಠಕ್ಕೆ ಬಂದು "ನಾನು ಸತ್ಯವನ್ನೇ ಹೇಳುತ್ತೇನೆ" ಎಂದು ತಮ್ಮ ಹೇಳಿಕೆ ದಾಖಲಿಸಲು ಮುಂದಾದರು.

ಆದರೆ, ಸಾಕ್ಷಿ ಪೀಠವೇರಿ ನ್ಯಾಯಾಧೀಶರ ಮುಂದೆ ಹೇಳಿಕೆ ನೀಡುವ ವೇಳೆ ಚಿಕ್ಕಣ್ಣ ತೀವ್ರ ಟೆನ್ಷನ್‌ಗೆ ಮಾಡುಕೊಂಡರು ಇದನ್ನು ಗಮನಿಸಿದ ಎಸ್‌ಪಿಪಿ ಮತ್ತು ನ್ಯಾಯಾಧೀಶರು, ಅಷ್ಟೊಂದು ಟೆನ್ಷನ್ ಮಾಡಿಕೊಳ್ಳಬೇಡಿ, ಘಟನೆಯ ದಿನ ನಟ ದರ್ಶನ್ ಜೊತೆ 'ಸ್ಟೋನಿ ಬ್ರೂಕ್' ರೆಸ್ಟೋರೆಂಟ್‌ನಲ್ಲಿ ಊಟಕ್ಕೆ ಹೋಗಿರುವುದರಲ್ಲಿ ಯಾವುದೇ ತಪ್ಪಲ್ಲ. ಧೈರ್ಯವಾಗಿರಿ. ಬೇಕಿದ್ದರೆ ಸ್ವಲ್ಪ ಸಮಯ ತೆಗೆದುಕೊಳ್ಳಿ ಎಂದು ಸಮಯ ನೀಡಿದರು. ಬಳಿಕ ಸಾಕ್ಷಿ ಹೇಳಿಕೆ ಮುಂದೂಡಲು ಚಿಕ್ಕಣ್ಣ ಸಮಯಾವಕಾಶ ಕೋರಿದರು. ಅವರ ಮನವಿಯನ್ನು ಪುರಸ್ಕರಿಸಿದ ನ್ಯಾಯಾಲಯವು ಸಾಕ್ಷಿ ಹೇಳಿಕೆಗೆ ಮುಂದಿನ ದಿನಾಂಕ ನೀಡಿ ಹೊಸದಾಗಿ ಸಮನ್ಸ್ ಜಾರಿ ಮಾಡಿದೆ.

ನಟ ಯಶಸ್ ಸೂರ್ಯ ಹೇಳಿಕೆ

ಮತ್ತೊಬ್ಬ ಪ್ರಮುಖ ಸಾಕ್ಷಿ ನಟ ಯಶಸ್ ಸೂರ್ಯ ನ್ಯಾಯಾಲಯದ ಕಟಕಟೆಯಲ್ಲಿ ತಮ್ಮ ಹೇಳಿಕೆ ದಾಖಲಿಸಿದರು. ಘಟನೆಯ ದಿನ ನಾವು ನಮ್ಮ ಮುಂಬರುವ ಸಿನಿಮಾವೊಂದರ ಬಗ್ಗೆ ಚರ್ಚಿಸಲು ದರ್ಶನ್ ಅವರನ್ನು ಭೇಟಿಯಾಗಿದ್ದೆವು. ಈ ಹಿಂದೆ ಪೊಲೀಸರ ಮುಂದೆ ಹಾಗೂ ಸೆಕ್ಷನ್ 164ರ ಅಡಿಯಲ್ಲಿ ನ್ಯಾಯಾಧೀಶರ ಎದುರು ಈ ಹೇಳಿಕೆ ನೀಡಿದ್ದೆ ಎಂದು ತಮ್ಮ ಹೇಳಿಕೆ ನೀಡಿದರು.

ವಿಚಾರಣೆ ವೇಳೆ, ಊಟದ ಸಮಯದಲ್ಲಿ ಪವನ್ ಬಂದು ಹೋದ ಬಗ್ಗೆ ಹೇಳುವಂತೆ ಪೊಲೀಸರು ಹೇಳಿದ್ದರು. ನಾನು ಪೋನ್ ನಲ್ಲಿ ಮಾತಾಡ್ತಾ ಇದ್ದರಿಂದ ಪವನ್ ಬಂದು ಹೋಗಿದ್ದು ನನ್ನ ಗಮನಕ್ಕೆ ಬಂದಿಲ್ಲ ಎಂದರು. ನಟ ಯಶಸ್ ಸೂರ್ಯ ಅವರನ್ನು 'ಭಾಗಶಃ ಹಾಸ್ಟೈಲ್ ವಿಟ್ನೆಸ್' ಎಂದು ಪರಿಗಣಿಸುವಂತೆ ಎಸ್‌ಪಿಪಿ ಕೋರ್ಟ್‌ಗೆ ಮನವಿ ಮಾಡಿದರು. ಸಾಕ್ಷಿಯನ್ನ ಹಾಸ್ಟೈಲ್‌ ವಿಟ್ನೆಸ್ ಎಂದು ಪರಿಗಣಿಸಲು ದರ್ಶನ್ ಪರ ವಕೀಲರು ಮನವಿ ಮಾಡಿದರು.

ಆರೋಪಿ ಪರ, ವಿರೋಧ ಏನು ಹೇಳೋಕೆ ಆಗಲ್ಲ

ವಿಚಾರಣೆ ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ದರ್ಶನ್ ಪರ ಹಿರಿಯ ವಕೀಲ ಹಷ್ಮತ್ ಪಾಷಾ, ಇಂದು ಇಬ್ಬರೂ ಸಾಕ್ಷಿಗಳು ಅರ್ಧಮರ್ಧ ಸಾಕ್ಷಿ ನುಡಿದಿದ್ದಾರೆ. ಯಶಸ್ ಸೂರ್ಯ ಅವರ ಸಾಕ್ಷಿಯನ್ನು ಪಬ್ಲಿಕ್ ಪ್ರಾಸಿಕ್ಯೂಟರ್ ಕ್ರಾಸ್ ಎಕ್ಸಾಮಿನ್ ಮಾಡಲು ಸಮಯಾವಕಾಶ ಕೋರಿದ್ದಾರೆ. ಚಿಕ್ಕಣ್ಣ ಅವರ ಸಾಕ್ಷಿಯೂ ಅರ್ಧಕ್ಕೆ ನಿಂತಿದ್ದು, ಮುಂದಿನ ದಿನಾಂಕ ನಿಗದಿಯಾಗಿದೆ. ಆರೋಪಿ ಪರವಾಗಿ ಸಾಕ್ಷಿ ಹೇಳಿದ್ರಾ ಎನ್ನುವ ಪ್ರಶ್ನೆಗೆ ಉತ್ತರಿಸಿದ ಪಾಷಾ, ಅವರ ಸಾಕ್ಷಿ ಪೂರ್ತಿ ಆಗೋವರೆಗೂ ಏನು ಹೇಳಲು ಆಗಲ್ಲ. ಆರೋಪಿ ಪರ, ವಿರೋಧ ಏನು ಹೇಳೋಕೆ ಆಗಲ್ಲ. ಸ್ಟೊನಿ ಬ್ರೂಕ್ ನಲ್ಲಿ ಊಟ ಮಾಡಿದ್ದರ ಬಗ್ಗೆ ಹೇಳಿದ್ದಾರೆ ಎಂದರು.

ಜೈಲಿನಲ್ಲಿ ಅವ್ಯವಸ್ಥೆ: ಸ್ವತಃ ಜಡ್ಜ್ ಭೇಟಿ ನೀಡಲು ಪವಿತ್ರಾ ಗೌಡ ವಕೀಲರ ಮನವಿ!

ಇದೇ ವೇಳೆ ಪ್ರಕರಣದ ಪ್ರಮುಖ ಆರೋಪಿ ಪವಿತ್ರಾ ಗೌಡ ಅವರ ಪರ ವಕೀಲ ನಾರಾಯಣ ಸ್ವಾಮಿ ಅವರು ನ್ಯಾಯಾಲಯಕ್ಕೆ ಮಹತ್ವದ ಅರ್ಜಿ ಸಲ್ಲಿಸಿದರು. "ಜೈಲು ಅಧಿಕಾರಿಗಳು ಕೋರ್ಟ್ ನೀಡಿರುವ ಆದೇಶಗಳನ್ನು ಗೌರವಿಸುತ್ತಿಲ್ಲ ಮತ್ತು ಪಾಲಿಸುತ್ತಿಲ್ಲ. ಪರಪ್ಪನ ಅಗ್ರಹಾರ ಜೈಲಿನಲ್ಲಿ ಪವಿತ್ರಾ ಗೌಡ ಅವರಿಗೆ ಮೂಲಭೂತ ಸೌಕರ್ಯಗಳಿಲ್ಲದೆ ತೀವ್ರ ಅವ್ಯವಸ್ಥೆಯಾಗಿದೆ. ಹೀಗಾಗಿ ನ್ಯಾಯಾಧೀಶರು ಸ್ವತಃ ಜೈಲಿಗೆ ಭೇಟಿ ನೀಡಿ ಪರಿಶೀಲಿಸಬೇಕು ಅಥವಾ ಕೋರ್ಟ್ ಕಮಿಷನರ್ ನೇಮಕ ಮಾಡಬೇಕು. ಜೈಲು ಅಧಿಕಾರಿಗಳು ಕೋರ್ಟ್ ಆದೇಶ ಪಾಲನೆ ಅಂತ ಹೇಳ್ತಾರೆ. ಆದ್ರೆ ಯಾವುದೇ ಪಾಲನೆ ಮಾಡಲ್ಲ ಎಂದು ಪವಿತ್ರಾಗೌಡ ಪರ ವಕೀಲ ನಾರಾಯಣ ಸ್ವಾಮಿ ಮತ್ತೆ ಆರೋಪ ಮಾಡಿದರು. ಈ ಬಗ್ಗೆ ಮಾಹಿತಿ ಪಡೆದು ತಿಳಿಸುವುದಾಗಿ ಎಸ್ಪಿಪಿ ಹೇಳಿದರು

ಕಿಚ್ಚ ಸುದೀಪ್‌ಗೆ ಸವಾಲೆಸೆದ ಮಾಜಿ ಸಂಸದ ವಿ.ಎಸ್. ಉಗ್ರಪ್ಪ; ಕ್ಷಮೆಯಾಚಿಸುವಂತೆ ಮಾಜಿ ಸಚಿವ ರಾಜುಗೌಡ ಆಗ್ರಹ!

Sathish Kumar KH — Wed, 14 Oct 2026 11:51:38 +0530

ಯಾದಗಿರಿ/ಚಿತ್ರದುರ್ಗ (ಅ.14): ಕನ್ನಡ ಚಿತ್ರರಂಗದ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ (Kichcha Sudeep) ವಿರುದ್ಧ ಕಾಂಗ್ರೆಸ್ ಮುಖಂಡ, ಮಾಜಿ ಸಂಸದ ವಿ.ಎಸ್. ಉಗ್ರಪ್ಪ (V.S. Ugrappa) ನೀಡಿದ್ದ ವಿವಾದಾತ್ಮಕ ಹೇಳಿಕೆ ರಾಜ್ಯ ರಾಜಕಾರಣದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಈ ಹೇಳಿಕೆಯನ್ನು ತೀವ್ರವಾಗಿ ಖಂಡಿಸಿರುವ ಮಾಜಿ ಸಚಿವ ಎಸ್‌ಜಿ ರಾಜುಗೌಡ (Raju Gowda) ಅವರು ಉಗ್ರಪ್ಪ ಅವರ ವಿರುದ್ಧ ಹರಿಹಾಯ್ದಿದ್ದಾರೆ.

ಯಾದಗಿರಿ ಜಿಲ್ಲೆಯ ಹುಣಸಗಿ ತಾಲೂಕಿನ ಕೋಡೆಕಲ್‌ನಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ರಾಜುಗೌಡ, "ಉಗ್ರಪ್ಪ ಅವರೇ, ನಿಮ್ಮ ವಯಸ್ಸಿಗೆ ತಕ್ಕಂತೆ ಮಾತನಾಡಿ. ಏಕವಚನದಲ್ಲಿ ಮಾತನಾಡAದು ಸರಿಯಲ್ಲ" ಎಂದು ಕಟುವಾಗಿ ತರಾಟೆಗೆ ತೆಗೆದುಕೊಂಡರು.

ಸುದೀಪ್ ಸಮಾಜದ ಆಸ್ತಿ:

'ಯಾವುದೇ ಗಾಡ್ ಫಾದರ್ ಇಲ್ಲದೆ, ಕೇವಲ ತನ್ನ ಪರಿಶ್ರಮದಿಂದ 33 ವರ್ಷಗಳ ಕಾಲ ಚಿತ್ರರಂಗದಲ್ಲಿ ಬೆಳೆದು ನಿಂತಿರುವ ದೊಡ್ಡ ಕಲಾವಿದ ಸುದೀಪ್. ಅವರನ್ನು ಏಕವಚನದಲ್ಲಿ ನಿಂದಿಸುವುದು ಸರಿಯಲ್ಲ. ಮದಕರಿ ನಾಯಕ ಜಯಂತಿಗೆ ಸುದೀಪ್ ಬಂದಿದ್ದು ತಪ್ಪಾ? ಜನ ಸುದೀಪ್-ಸುದೀಪ್ ಅಂತ ಕೇಕೆ ಹಾಕಿದರೆ ನಿಮಗೆ ಏಕೆ ಹೊಟ್ಟೆ ಉರಿಯುತ್ತದೆ?' ಎಂದು ರಾಜುಗೌಡ ಪ್ರಶ್ನಿಸಿದರು. ಕಲಾವಿದನಿಗೆ ಯಾವುದೇ ಜಾತಿಯಿಲ್ಲ, ಸುದೀಪ್ ಕೇವಲ ನಟರಷ್ಟೇ ಅಲ್ಲ, ಅವರು ಸಮಾಜದ ಆಸ್ತಿ. ಕೂಡಲೇ ಉಗ್ರಪ್ಪ ಅವರು ಸುದೀಪ್ ಅವರ ಬಳಿ ಕ್ಷಮೆ ಕೇಳಬೇಕು ಎಂದು ಆಗ್ರಹಿಸಿದರು.

'ನಿಮ್ಮ ಮನೆಯ ಮಗನೇ ನಿಮ್ಮ ಮಾತು ಕೇಳಲ್ಲ, ಇನ್ನು ನೀವು ಸುದೀಪ್ ಬಗ್ಗೆ ಮಾತನಾಡುತ್ತೀರಾ? 56% ಎಸ್‌ಸಿ/ಎಸ್‌ಟಿ ಮೀಸಲಾತಿ ಕೋರ್ಟ್‌ನಲ್ಲಿ ರದ್ದಾಗಲು ನಿಮ್ಮದೇ ಸರ್ಕಾರ ಕಾರಣ, ವೇದಿಕೆಯಲ್ಲಿ ಸುಮ್ಮನೆ ಡೈಲಾಗ್ ಹೊಡೆಯಬೇಡಿ. ಬೇಕಾದರೆ ನನ್ನ ಬಗ್ಗೆ ಅಥವಾ ಬಿ. ಶ್ರೀರಾಮುಲು ಬಗ್ಗೆ ಮಾತನಾಡಿ, ರಾಜಕೀಯ ಮಾಡಿ, ಆದರೆ ಯಾವುದೇ ಕಲಾವಿದರ ಬಗ್ಗೆ ಮಾತನಾಡಬೇಡಿ' ಎಂದು ರಾಜುಗೌಡ ಎಚ್ಚರಿಕೆ ನೀಡಿದರು.

ಅಷ್ಟಕ್ಕೂ ಉಗ್ರಪ್ಪ ಹೇಳಿದ್ದೇನು?:

ಚಿತ್ರದುರ್ಗದಲ್ಲಿ ಇತ್ತೀಚೆಗೆ ನಡೆದ ವೀರ ಮದಕರಿ ನಾಯಕ ಜಯಂತಿ ಕಾರ್ಯಕ್ರಮದಲ್ಲಿ ಮಾಜಿ ಸಂಸದ ವಿ.ಎಸ್. ಉಗ್ರಪ್ಪ ಭಾಷಣ ಮಾಡುತ್ತಿದ್ದರು. ಈ ವೇಳೆ ಸಭೆಯಲ್ಲಿದ್ದ ಅಭಿಮಾನಿಗಳು 'ಕಿಚ್ಚ... ಕಿಚ್ಚ...' ಎಂದು ಘೋಷಣೆ ಕೂಗುವುದು ಹಾಗೂ ಕೇಕೆ ಹಾಕುವುದು ಹೆಚ್ಚಾಯಿತು. ಇದರಿಂದ ಸಿಟ್ಟಿಗೆದ್ದ ಉಗ್ರಪ್ಪ, ಭಾಷಣದ ಮಧ್ಯೆಯೇ ಗರಂ ಆಗಿದ್ದರು. ಸುದೀಪ್ ಅವರತ್ತ ನೇರವಾಗಿ ನೋಡುತ್ತಾ, 'ನಾಯಕರು ಎಂದು ಹೇಳಿಕೊಂಡು ಕೇಕೆ ಹಾಕಿಸಿಕೊಳ್ಳೋದಲ್ಲ. ನಿಜವಾಗಿಯೂ ನಾಯಕರ ಮಗನಾಗಿದ್ದರೆ ಮೀಸಲಾತಿ ಹೆಚ್ಚಳದ ಹೋರಾಟಕ್ಕೆ ಬಾ ಸುದೀಪ್' ಎಂದು ಬಹಿರಂಗವಾಗಿ ಸವಾಲು ಹಾಕಿದ್ದರು. ಉಗ್ರಪ್ಪ ಅವರ ಈ ಮಾತಿಗೆ ಸುದೀಪ್ ಅಭಿಮಾನಿಗಳು ಹಾಗೂ ರಾಜಕೀಯ ವಲಯದಿಂದ ಭಾರಿ ವಿರೋಧ ವ್ಯಕ್ತವಾಗುತ್ತಿದ್ದು, ಇದೀಗ ರಾಜುಗೌಡ ಕೂಡ ಉಗ್ರಪ್ಪ ವಿರುದ್ಧ ಕಿಡಿಕಾರುವ ಮೂಲಕ ವಿವಾದವನ್ನು ಮತ್ತಷ್ಟು ಹೆಚ್ಚಿಸಿದ್ದಾರೆ.

Bengaluru: ಸಂಜೆ 6ರ ನಂತರ 8ನೇ ಮೈಲಿ ಬಳಿ KSRTC ಸಿಬ್ಬಂದಿ ಮಾಡೋದೇನು? ಅಸಲಿ ಮುಖ ಬಿಚ್ಚಿಟ್ಟ ಮಹಿಳೆ

Sathish Kumar KH — Wed, 07 Oct 2026 09:17:19 +0530

ಬೆಂಗಳೂರು (ಆ.07): ಬೆಂಗಳೂರಿನ ಹೊರವಲಯದ 8ನೇ ಮೈಲಿ ಸಿಗ್ನಲ್ ಬಳಿ ನಿತ್ಯ ಸಂಜೆ 6 ಗಂಟೆಯಾಗುತ್ತಿದ್ದಂತೆ ಕೆಎಸ್‌ಆರ್‌ಟಿಸಿ (KSRTC) ಚಾಲಕ ಮತ್ತು ನಿರ್ವಾಹಕರ ಅಸಲಿ ಮುಖವಾಡ ಕಳಚಿಬೀಳುತ್ತಿದೆ ಎಂಬ ಗಂಭೀರ ಆರೋಪ ಸಾರ್ವಜನಿಕ ವಲಯದಿಂದ ಕೇಳಿಬಂದಿದೆ. ಬಸ್‌ಗಳ ಮುಂಭಾಗದಲ್ಲಿ 'ವಯಾ ತುಮಕೂರು, ಚಿತ್ರದುರ್ಗ' ಎಂದು ಸ್ಪಷ್ಟವಾಗಿ ಬೋರ್ಡ್ ಹಾಕಿದ್ದರೂ, ಈ ಭಾಗದ ಪ್ರಯಾಣಿಕರನ್ನು ಬಸ್‌ಗೆ ಹತ್ತಿಸಿಕೊಳ್ಳದೆ ನಡುರಸ್ತೆಯಲ್ಲೇ ಬಿಟ್ಟುಹೋಗುವ ದಂಧೆ ಅವ್ಯಾಹತವಾಗಿ ಸಾಗಿದೆ.

ಉತ್ತರ ಕರ್ನಾಟಕ ಭಾಗದ ಜಿಲ್ಲೆಗಳಿಗೆ ತೆರಳುವ ಬಹುತೇಕ ಬಸ್‌ಗಳು ಕೇವಲ ‘ಲಾಂಗ್ ರೂಟ್’ (ದೂರದ ಊರುಗಳ) ಪ್ರಯಾಣಿಕರಿಗೆ ಮಾತ್ರ ಆದ್ಯತೆ ನೀಡುತ್ತಿವೆ. ತುಮಕೂರು, ಸಿರಾ, ಹಿರಿಯೂರು ಹಾಗೂ ಚಿತ್ರದುರ್ಗಕ್ಕೆ ತೆರಳುವ ಪ್ರಯಾಣಿಕರು ಎಷ್ಟೇ ಅಂಗಲಾಚಿದರೂ, ಬಸ್ ಬಾಗಿಲನ್ನೇ ತೆರೆಯದೆ 'ಸ್ಟಾಪ್ ಕೊಡಲ್ಲ, ಬಸ್ ಹೋಗಲ್ಲ' ಎಂದು ಸಿಬ್ಬಂದಿ ಉಡಾಫೆಯ ಉತ್ತರ ನೀಡುತ್ತಿದ್ದಾರೆ. ಬಸ್‌ನಲ್ಲಿ ಸೀಟುಗಳು ಸಂಪೂರ್ಣ ಖಾಲಿ ಇದ್ದರೆ ಮಾತ್ರ ಅನಿವಾರ್ಯವಾಗಿ ಸ್ಥಳೀಯರನ್ನು ಹತ್ತಿಸಿಕೊಳ್ಳುವ ಸಿಬ್ಬಂದಿ, ಇಲ್ಲದಿದ್ದರೆ ಗಂಟೆಗಟ್ಟಲೆ ನಿಲ್ಲಿಸಿ ತಮಾಷೆ ನೋಡುತ್ತಿದ್ದಾರೆ.

ಎರಡೂವರೆ ಗಂಟೆ ಕಾದರೂ ಯಾವುದೇ ಬಸ್ ನಿಲ್ಲಿಸಲಿಲ್ಲ

ಇತ್ತೀಚೆಗೆ ಮಹಿಳಾ ಪ್ರಯಾಣಿಕರೊಬ್ಬರು ಸುಮಾರು 2.30 ಗಂಟೆಗಳ ಕಾಲ ಕಾದು ನಿಂತರೂ ಯಾವುದೇ ಬಸ್ ನಿಲ್ಲಿಸದಿದ್ದಾಗ, ರೊಚ್ಚಿಗೆದ್ದು ‘KA 29 F 1653’ ನೋಂದಣಿ ಸಂಖ್ಯೆಯ ಕೆಎಸ್‌ಆರ್‌ಟಿಸಿ ಬಸ್‌ಗೆ ಅಡ್ಡಗಟ್ಟಿ ಆಕ್ರೋಶ ವ್ಯಕ್ತಪಡಿಸಿದ ಬಳಿಕವಷ್ಟೇ ಅವರನ್ನು ಬಸ್ಸಿಗೆ ಹತ್ತಿಸಿಕೊಳ್ಳಲಾಗಿದೆ. 'ಪ್ರತಿದಿನ ಸಂಜೆಯಾದರೆ ಇದೇ ಗೋಳು, ಮಹಿಳೆಯರು-ವೃದ್ಧರು ಎನ್ನದೆ ಎಲ್ಲರನ್ನೂ ಸತಾಯಿಸಲಾಗುತ್ತದೆ' ಎಂದು ಪ್ರಯಾಣಿಕರು ಕಣ್ಣೀರಿಡುತ್ತಿದ್ದಾರೆ.

ಸರ್ಕಾರ ಸಾಮಾನ್ಯ ಜನರ ಸಾರಿಗೆಗಾಗಿ ಸಾವಿರಾರು ಬಸ್‌ಗಳನ್ನು ರಸ್ತೆಗಿಳಿಸಿದ್ದರೂ, ಕೆಲ ಸಿಬ್ಬಂದಿಯ ಈ ದುರ್ವರ್ತನೆಯಿಂದ ಸಂಸ್ಥೆಗೆ ಕೆಟ್ಟ ಹೆಸರು ಬರುತ್ತಿದೆ. ಕೆಎಸ್‌ಆರ್‌ಟಿಸಿ ಉನ್ನತಾಧಿಕಾರಿಗಳು ತಕ್ಷಣವೇ ಎಚ್ಚೆತ್ತುಕೊಂಡು 8ನೇ ಮೈಲಿ ಸಿಗ್ನಲ್ ಬಳಿ ಪರಿಶೀಲನೆ ನಡೆಸಿ, ಬೋರ್ಡ್ ಇದ್ದರೂ ಬಸ್ ನಿಲ್ಲಿಸದ ಬೇಜವಾಬ್ದಾರಿ ಚಾಲಕ-ನಿರ್ವಾಹಕರ ವಿರುದ್ಧ ಕಠಿಣ ಶಿಸ್ತುಕ್ರಮ ಕೈಗೊಳ್ಳಬೇಕಿದೆ.

ಟಿಪ್ಪು ಸುಲ್ತಾನ್, ಫರೂಕ್ ಕಾಲದ 26 ಅಪರೂಪದ ಬೆಳ್ಳಿ, ತಾಮ್ರದ ನಾಣ್ಯಗಳ ಹಸ್ತಾಂತರ

Kannadaprabha News — Sat, 31 Oct 2026 09:42:22 +0530

ಚಿತ್ರದುರ್ಗ: ಚಳ್ಳಕೆರೆ ತಾಲೂಕಿನ ಕಸಬಾ ಹೋಬಳಿ ಗೋಪನಹಳ್ಳಿ ಗ್ರಾಮದಲ್ಲಿ ಇತ್ತೀಚೆಗೆ ಪುರಾತನ ಕಾಲದ ಅಪರೂಪದ ಬೆಳ್ಳಿ ಮತ್ತು ತಾಮ್ರದ ನಾಣ್ಯಗಳು ಪತ್ತೆಯಾಗಿದ್ದವು.

ಹಿತ್ತಾಳೆ ಮುಚ್ಚಳವಿದ್ದ ಚೆಂಬಿನಲ್ಲಿದ್ದ ನಾಣ್ಯಗಳು

ಗೋಪನಹಳ್ಳಿ ರಂಗಮ್ಮ ಕೋಂ ಅಜ್ಜಪ್ಪ ಎಂಬುವರ ಪಾಳುಬಿದ್ದ ಮನೆಯ ಜಾಗದಲ್ಲಿ ಆಟವಾಡುತ್ತಿದ್ದ ಮಕ್ಕಳಿಗೆ ಹಿತ್ತಾಳೆ ಮುಚ್ಚಳವಿದ್ದ ಚೆಂಬಿನಲ್ಲಿ ಈ ನಾಣ್ಯಗಳು ಸಿಕ್ಕಿದ್ದು, ಮಕ್ಕಳು ಅವುಗಳನ್ನು ಜಾಗದ ಮಾಲೀಕರಿಗೆ ಒಪ್ಪಿಸಿದ್ದಾರೆ.

ಸಾರ್ವಜನಿಕರು ನೀಡಿದ ಮಾಹಿತಿಯ ಮೇರೆಗೆ ಅ.26ರಂದು ಚಳ್ಳಕೆರೆ ತಹಸೀಲ್ದಾರ್, ಪೊಲೀಸ್ ನಿರೀಕ್ಷಕರು, ರಾಜಸ್ವ ನಿರೀಕ್ಷಕರು ಹಾಗೂ ಗ್ರಾಮ ಆಡಳಿತಾಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದರು.

26 ಪುರಾತನ ನಾಣ್ಯಗಳು

ಅಕ್ಕಸಾಲಿಗರಲ್ಲಿ ತೂಕ ಮಾಡಿಸಿ ಪರಿಶೀಲಿಸಿದಾಗ ಒಟ್ಟು 26 ಪುರಾತನ ನಾಣ್ಯಗಳು ಇರುವುದು ದೃಢಪಟ್ಟಿದೆ. ಇದರಲ್ಲಿ 6 ಬೆಳ್ಳಿ ಹಾಗೂ 20 ತಾಮ್ರದ ನಾಣ್ಯಗಳಿವೆ. ಬೆಳ್ಳಿಯ ನಾಣ್ಯಗಳಲ್ಲಿ ಈಸ್ಟ್ ಇಂಡಿಯಾ ಕಂಪನಿಯ 1840ರ ಅವಧಿಯ 4 ನಾಣ್ಯಗಳು ಮತ್ತು 1857ರ ನಂತರದ ಬ್ರಿಟಿಷ್ ಇಂಡಿಯಾದ 2 ನಾಣ್ಯಗಳು 3 ಒಂದು ರುಪಾಯಿ ನಾಣ್ಯಗಳು, 2 ಅರ್ಧ ರುಪಾಯಿ ನಾಣ್ಯಗಳು ಹಾಗೂ 1 ಎರಡು ಆಣೆ ನಾಣ್ಯ ಸೇರಿವೆ. ಇವುಗಳನ್ನು ಕಲ್ಕತ್ತಾ ಮತ್ತು ಮದ್ರಾಸ್‍ಗಳಲ್ಲಿ ಟಂಕಿಸಲಾಗಿದೆ.

ನಾಣ್ಯಗಳ ಮಾಹಿತಿ

ತಾಮ್ರದ 20 ನಾಣ್ಯಗಳಲ್ಲಿ ಟಿಪ್ಪು ಸುಲ್ತಾನ್ ಕಾಲದ 19 ನಾಣ್ಯಗಳು ಶ್ರೀರಂಗಪಟ್ಟಣದಲ್ಲಿ ಮುದ್ರಿಸಲಾದ 8, ಶಿವಮೊಗ್ಗ ಜಿಲ್ಲೆಯ ನಗರದಲ್ಲಿ ಟಂಕಿಸಲಾದ 9, ಕೇರಳದ ಫರೂಕ್ ಹಾಗೂ ಆಂಧ್ರದ ಗುತ್ತಿಯಲ್ಲಿ ಟಂಕಿಸಲಾದ ತಲಾ 1 ನಾಣ್ಯ ಮತ್ತು ಮೈಸೂರು ಒಡೆಯರ್ ಆಡಳಿತಾವಧಿಯ 20 ಕಾಸಿನ 1 ನಾಣ್ಯ ಸೇರಿವೆ.

ಅ.28ರಂದು ತಹಸೀಲ್ದಾರ್ ಕಚೇರಿಯ ಶಿರಸೇದಾರ್ ಅವರಿಂದ ಪುರಾತತ್ವ ಸಂಗ್ರಹಾಲಯಗಳು ಮತ್ತು ಪರಂಪರೆ ಇಲಾಖೆಯ ಸಹಾಯಕ ನಿರ್ದೇಶಕ ಪ್ರಹ್ಲಾದ್ ಜಿ. ಅವರು ಈ ನಾಣ್ಯಗಳು ಹಾಗೂ ಹಿತ್ತಾಳೆ ಚೆಂಬಿನ ಮುಚ್ಚಳವನ್ನು ಹಸ್ತಾಂತರಿಸಿಕೊಂಡಿದ್ದಾರೆ.

ಸಿಕ್ಕಿರುವ ನಾಣ್ಯಗಳನ್ನು ಚಿತ್ರದುರ್ಗದ ಸರ್ಕಾರಿ ವಸ್ತು ಸಂಗ್ರಹಾಲಯದಲ್ಲಿ ಸಂರಕ್ಷಿಸಿಡಲಾಗಿದ್ದು, ಇವುಗಳ ಕುರಿತು ಮತ್ತಷ್ಟು ಸುದೀರ್ಘ ಅಧ್ಯಯನ ನಡೆಸಿ ಮುಂದಿನ ದಿನಗಳಲ್ಲಿ ಇತಿಹಾಸ ಆಸಕ್ತರು, ಸಂಶೋಧಕರು ಹಾಗೂ ವಿದ್ಯಾರ್ಥಿಗಳ ಮಾಹಿತಿಗಾಗಿ ಸಾರ್ವಜನಿಕ ಪ್ರದರ್ಶನಕ್ಕೆ ಇಡಲಾಗುವುದು ಎಂದು ಸಹಾಯಕ ನಿರ್ದೇಶಕರು ತಿಳಿಸಿದ್ದಾರೆ.

ಈ ನಾಣ್ಯಗಳ ಪರಿಶೀಲನೆಯಲ್ಲಿ ಸಹಕರಿಸಿದ ಹವ್ಯಾಸಿ ನಾಣ್ಯ ಸಂಶೋಧಕರಾದ ಬಿ.ಕೆ. ಇರ್ಫಾನುಲ್ಲಾ ಹಾಗೂ ಶಿವಶಂಕರ್ ಅವರಿಗೆ ಪುರಾತತ್ವ ಇಲಾಖೆ ಅಭಿನಂದನೆ ಸಲ್ಲಿಸಿದೆ.

ಪರಪ್ಪನ ಅಗ್ರಹಾರ ಜೈಲಿನಿಂದಲೇ ಕೋರ್ಟ್‌ ದಾರಿ ತಪ್ಪಿಸಿದ ಕಿಲ್ಲಿಂಗ್‌ ಸ್ಟಾರ್‌ ದರ್ಶನ್‌, ಸೆಷನ್ಸ್‌ ಕೋರ್ಟ್‌ ಬೇಸರ

Suvarna News — Thu, 08 Oct 2026 20:06:23 +0530

ಬೆಂಗಳೂರು (ಅ.8): ಚಿತ್ರದುರ್ಗದ ರೇಣುಕಾಸ್ವಾಮಿ ಪ್ರಕರಣದಲ್ಲಿ ಪರಪ್ಪನ ಅಗ್ರಹಾರ ಕೇಂದ್ರ ಜೈಲು ಪಾಲಾಗಿರುವ ನಟ, 'ಕಿಲ್ಲಿಂಗ್ ಸ್ಟಾರ್' ದರ್ಶನ್ ಹಾಗೂ ಆತನ ಗ್ಯಾಂಗ್‌ ನ್ಯಾಯಾಲಯದ ದಾರಿ ತಪ್ಪಿಸಲು ಜೈಲಿನಿಂದಲೇ ತಂತ್ರ ರೂಪಿಸಿದ್ದ ಆಘಾತಕಾರಿ ವಿಷಯ ಬಹಿರಂಗವಾಗಿದೆ. ಪ್ರಕರಣದ ಪ್ರಮುಖ ಆರೋಪಿಗಳಲ್ಲಿ ಒಬ್ಬನಾದ ಪ್ರದೂಷ್ ಮೂಲಕ ಸಲ್ಲಿಸಲಾಗಿದ್ದ ಅರ್ಜಿಯ ವಿಚಾರಣೆ ನಡೆಸಿದ ಬೆಂಗಳೂರಿನ ನಗರ ಸಿವಿಲ್ ಮತ್ತು ಸೆಷನ್ಸ್ ನ್ಯಾಯಾಲಯವು, ಆರೋಪಿಗಳ ನಡವಳಿಕೆ ಹಾಗೂ ಕೋರ್ಟ್‌ ದಾರಿ ತಪ್ಪಿಸುವ ಯತ್ನದ ವಿರುದ್ಧ ತೀವ್ರ ಬೇಸರ ವ್ಯಕ್ತಪಡಿಸಿದೆ.

ಪರಪ್ಪನ ಅಗ್ರಹಾರ ಜೈಲಿನಿಂದ ಕೋರ್ಟ್‌ಗೆ ಕರೆತರುವಾಗ ಮತ್ತು ವಿಚಾರಣೆ ನಡೆಸಿ ವಾಪಸ್ ಕರೆದೊಯ್ಯುವಾಗ ಕಾಮಾಕ್ಷಿಪಾಳ್ಯ ಠಾಣೆ ಪೊಲೀಸರು ಮಾಫಿ ಸಾಕ್ಷಿ ಆಗಿರುವ ಪ್ರದೂಷ್‌ ಮೇಲೆ ತೀವ್ರ ಒತ್ತಡ ಹೇರುತ್ತಿದ್ದಾರೆ ಎಂದು ಆರೋಪಿಸಿ ದರ್ಶನ್‌ ಪರ ವಕೀಲರು ಅರ್ಜಿ ಸಲ್ಲಿಸಿದ್ದರು. ಜತೆಗೆ, ಕಾಮಾಕ್ಷಿಪಾಳ್ಯ ಪೊಲೀಸರು ಪ್ರದೂಷ್‌ನನ್ನು ಎಸ್ಕಾರ್ಟ್ ಮಾಡಬಾರದು ಎಂದು ಮನವಿ ಮಾಡಿದ್ದರು.

ಹಳೆಯ ವಿಡಿಯೋ ಸಲ್ಲಿಸಿ ಕೋರ್ಟ್‌ಗೆ ಮಂಕುಬೂದಿ!

ಪೊಲೀಸ್ ಅಧಿಕಾರಿಗಳು ಪ್ರದೂಷ್ ಮೇಲೆ ಒತ್ತಡ ಹೇರುತ್ತಿದ್ದಾರೆ ಎಂಬುದಕ್ಕೆ ಪುರಾವೆಯಾಗಿ ಆರೋಪಿಗಳ ಪರ ವಕೀಲರು ನ್ಯಾಯಾಲಯಕ್ಕೆ ವಿಡಿಯೋ ತುಣುಕೊಂದನ್ನು ಸಾಕ್ಷಿಯಾಗಿ ಸಲ್ಲಿಸಿದ್ದರು. ಆದರೆ ಈ ವಿಡಿಯೋವನ್ನು ಕೂಲಂಕುಷವಾಗಿ ಪರಿಶೀಲಿಸಿದ ಸೆಷನ್ಸ್ ನ್ಯಾಯಾಲಯಕ್ಕೆ ಆರೋಪಿಗಳ ಅಸಲಿ ತಂತ್ರ ಗೊತ್ತಾಗಿದೆ.

ಮಾಧ್ಯಮಗಳಲ್ಲಿ ಹಿಂದೆ ಎಂದೋ ಪ್ರಸಾರವಾಗಿದ್ದ ಹಳೆಯ ವಿಡಿಯೋ ತುಣುಕನ್ನು ಈಗಿನದ್ದು ಎಂದು ಬಿಂಬಿಸಿ, ನ್ಯಾಯಾಲಯಕ್ಕೆ ತಪ್ಪು ಮಾಹಿತಿ ನೀಡುವ ಮೂಲಕ ಕೋರ್ಟ್‌ ದಾರಿ ತಪ್ಪಿಸಲು ಯತ್ನಿಸಲಾಗಿದೆ ಎಂಬುದನ್ನು ನ್ಯಾಯಾಲಯ ಸ್ಪಷ್ಟವಾಗಿ ಗುರುತಿಸಿದೆ. ಈ ಕುರಿತು ತನ್ನ ಆದೇಶದಲ್ಲಿ ಉಲ್ಲೇಖಿಸಿರುವ ಕೋರ್ಟ್, ಹಳೆಯ ವಿಡಿಯೋಗಳನ್ನು ಇಟ್ಟುಕೊಂಡು ಸುಳ್ಳು ಆರೋಪ ಮಾಡಿ ನ್ಯಾಯಾಲಯದ ದಾರಿ ತಪ್ಪಿಸಲು ಯತ್ನಿಸಿರುವುದಕ್ಕೆ ತೀವ್ರ ಬೇಸರ ವ್ಯಕ್ತಪಡಿಸಿದೆ.

ಆರೋಪಿ ದರ್ಶನ್ ನಡೆಗೆ ನ್ಯಾಯಾಲಯದ ಅಸಮಾಧಾನ

ಪ್ರಕರಣದ ಪ್ರಮುಖ ಆರೋಪಿಯಾಗಿರುವ ನಟ ದರ್ಶನ್ ಹಾಗೂ ಆತನ ಗ್ಯಾಂಗ್ ಜೈಲಿನಲ್ಲಿದ್ದರೂ ಸಹ ಇಂತಹ ಕಾನೂನುಬಾಹಿರ ತಂತ್ರಗಳ ಮೂಲಕ ಪ್ರಕರಣದ ತನಿಖೆ ಹಾಗೂ ವಿಚಾರಣೆಯ ದಿಕ್ಕು ತಪ್ಪಿಸಲು ಯತ್ನಿಸುತ್ತಿರುವುದು ಸೂಕ್ತವಲ್ಲ ಎಂದು ಅಭಿಪ್ರಾಯಪಟ್ಟಿದೆ. ಮಾಧ್ಯಮಗಳ ಹಳೆಯ ದೃಶ್ಯಗಳನ್ನು ಬಳಸಿ ತನಿಖಾಧಿಕಾರಿಗಳು ಹಾಗೂ ಕಾಮಾಕ್ಷಿಪಾಳ್ಯ ಪೊಲೀಸರ ಮೇಲೆ ಸುಳ್ಳು ಆರೋಪ ಹೊರಿಸಲು ಯತ್ನಿಸಿದ ಆರೋಪಿಗಳ ಈ ನಡೆಯನ್ನು ನ್ಯಾಯಾಲಯ ಗಂಭೀರವಾಗಿ ಪರಿಗಣಿಸಿದೆ. ರೇಣುಕಾಸ್ವಾಮಿ ಪ್ರಕರಣದಲ್ಲಿ ಈಗಾಗಲೇ ಸಾಕ್ಷ್ಯನಾಶ ಹಾಗೂ ವಿಚಾರಣೆ ವಿಳಂಬಗೊಳಿಸಲು ನಾನಾ ಸರ್ಕಸ್ ಮಾಡುತ್ತಿರುವ ದರ್ಶನ್ ಪಡೆಗೆ, ಸೆಷನ್ಸ್ ಕೋರ್ಟ್‌ನ ಈ ಅಸಮಾಧಾನ ಭಾರಿ ಮುಖಭಂಗ ತಂದೊಡ್ಡಿದೆ.

ಚಿತ್ರದುರ್ಗ: ಯುವಕನ ಕಿಡ್ನಾಪ್‌ ಮಾಡಿ ಗುಪ್ತಾಂಗ ಕತ್ತರಿಸಿದ ಮಂಗಳಮುಖಿಯರು!

Santosh Naik — Sat, 10 Oct 2026 08:14:05 +0530

ಕನ್ನಡಪ್ರಭ ವಾರ್ತೆ ಚಳ್ಳಕೆರೆ (ಅ.10): ತಾಲೂಕಿನ ಪರಶುರಾಂಪುರ ಹೋಬಳಿಯ ಗ್ರಾಮವೊಂದರ ಯುವಕನನ್ನು ಚಿತ್ರದುರ್ಗದ ಕೆಲವು ಮಂಗಳಮುಖಿಯರು ಕಿಡ್ನಾಪ್ ಮಾಡಿ ಗುಪ್ತಾಂಗ ಅಪರೇಷನ್ ಮಾಡಿಸಿ ವಿಕೃತ ಕ್ರೌರ್ಯ ಮೆರೆದಿರುವ ಆರೋಪ ಕೇಳಿ ಬಂದಿದೆ.

ಹಳ್ಳಿಯಿಂದ ಹೋಗಿ ಚಿತ್ರದುರ್ಗದಲ್ಲಿ ಹೂವಿನ ವ್ಯಾಪಾರ ಮಾಡುತ್ತಿದ್ದ ಯುವಕ ಅದ್ಹೇಗೋ ಮಂಗಳಮುಖಿಯರಿಗೆ ಪರಿಚಯವಾಗಿದ್ದಾನೆ. ಇಂತಹ ಪರಿಚಯವನ್ನೆ ಬಂಡವಾಳ ಮಾಡಿಕೊಂಡು ಬಲವಂತದಿಂದ ಗುಪ್ತಾಂಗ ಆಪರೇಷನ್ ಮಾಡಿಸಿದ್ದಾರೆ. ಇದರಿಂದಾಗಿ ಯುವಕ ಚಿತ್ರಹಿಂಸೆ ಅನುಭವಿಸುತ್ತಿದ್ದಾನೆ ಎಂದು ಕುಟುಂಬಸ್ಥರು ಆತಂಕಗೊಂಡಿದ್ದಾರೆ.

ಕಾಲಿನ ತೊಡೆಗಳಿಗೆ ಬಿಸಿ ನೀರು ಹಾಕಿ, ಸುಟ್ಟು ಬರೆ ಎಳೆದು ಚಿತ್ರಹಿಂಸೆ ನೀಡಿರುವುದು ಯುವಕನ ಪೋಟೋಗಳನ್ನು ನೋಡಿದರೆ ಯುವಕನ ಯಾತನೆ ಅರ್ಥವಾಗುತ್ತದೆ. ಪರಶುರಾಂಪುರ ಆಸ್ಪತ್ರೆಯಲ್ಲಿ ದಾಖಲಾಗಿರುವ ಗಾಯಾಳು ಯುವಕನ ನರಳಾಟ ಹೇಳ ತೀರದಾಗಿದೆ. ಮಂಗಳಮುಖಿಯರ ಕೃತ್ಯ ಕಂಡು ಕಣ್ಣಿರಿಡುತ್ತಿರುವ ಯುವಕನ ಪೋಷಕರು ದಾರಿ ತೋಚದಂತಹ ಸ್ಥಿತಿಯಲ್ಲಿದ್ದಾರೆ.

ಚಿತ್ರದುರ್ಗದ ಇಬ್ಬರು ಮಂಗಳಮುಖಿರು ಸೆ.1ರಂದು ಈ ಕೃತ್ಯ ಎಸಗಿದ್ದಾರೆ ಎನ್ನಲಾಗಿದ್ದು, ಒಮ್ನಿ ಕಾರಲ್ಲಿ ದಾವಣಗೆರೆಗೆ ಕರೆದೊಯ್ದು ಮತ್ತು ಬರಿಸಿ ಆಪರೇಷನ್ ಮಾಡಿಸಿರುವ ಬಗ್ಗೆ ಯುವಕ ಭಯದಿಂದಲೇ ಹೇಳಿದ್ದಾನೆ.

ದಾವಣಗೆರೆ ಖಾಸಗಿ ಆಸ್ಪತ್ರೆಯಲ್ಲಿ ಗುಪ್ತಾಂಗ ಆಪರೇಷನ್ ಮಾಡಿಸಿದ ಮೇಲೆ ಕಾದ ಬಿಸಿನೀರು ಗಾಯದ ಮೇಲೆ ಹಾಕಿದ ಬಳಿಕ ಯುವಕ ಚಿತ್ರಹಿಂಸೆಗೊಂಡು ಅಲ್ಲಿಂದ ಹೇಗೋ ತಪ್ಪಿಸಿಕೊಂಡು ಸ್ವಗ್ರಾಮಕ್ಕೆ ಬಂದಿದ್ದಾನೆ. ಮನೆಯಲ್ಲಿ ಪೋಷಕರಿಗೆ ಎಲ್ಲವನ್ನೂ ವಿವರಿಸಿದ್ದಾನೆ ಯುವಕ. ಮರ್ಯಾದೆಗೆ ಅಂಜಿ ಪೋಷಕರು ತಮ್ಮ ನೋವನ್ನು ಅದುಮಿಟ್ಟುಕೊಂಡಿದ್ದಾರೆ. ತಪ್ಪಿಸಿಕೊಂಡು ಊರಿಗೆ ಹೋಗಿರುವುದನ್ನು ಖಚಿತ ಪಡಿಸಿಕೊಂಡು ಮಂಗಳಮುಖಿಯರು ಗ್ರಾಮಕ್ಕೆ ಬಂದು ಯುವಕನ ಮನೆಯ ಮುಂದೆ ಗಲಾಟೆ ಮಾಡಿದ್ದಾರೆ. ಆಫರೇಷನ್ ಮಾಡಿಸಲು ಮೂರು ಲಕ್ಷ ಹಣ ಖರ್ಚಾಗಿದೆ ಕೊಡಿ ಎಂದು ತಗಾದೆ ತೆಗೆದಿದ್ದಾರೆ. ಇದಲ್ಲದೇ ಅವಾಚ್ಯ ಶಬ್ಧಗಳಿಂದ ನಿಂದಿಸಿದ್ದಲ್ಲದೇ ಅಸಭ್ಯ ವರ್ತನೆಯನ್ನೂ ಮಾಡಿ ಹೋದ ಮೇಲೆ ಈ ವಿಷಯ ಬೆಳೆಕಿಗೆ ಬಂದಿದೆ.

ಇದೀಗ ಪರಶುರಾಂಪುರದಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಯುವಕನಿಗೆ ಹೆಚ್ಚಿನ ಚಿಕಿತ್ಸೆ ಬೇಕು ಎಂಬ ಅಭಿಪ್ರಾಯವನ್ನು ಪ್ರತ್ಯಕ್ಷ ದರ್ಶಿಗಳು ವ್ಯಕ್ತಪಡಿಸುತ್ತಾರೆ. ಪರಶುರಾಂಪುರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಈ ಘಟನೆ ಬೆಳಕಿಗೆ ಬಂದಿದೆ.

'ಹೃದಯ ಜಾರಿತು ಪ್ರೀತಿ ಉಳಿಯಿತು' ನಾಟಕ ವೇಳೆ ಹೃದಯಾಘಾತ, ರಂಗಮಂಟಪದಲ್ಲೇ ಉಸಿರು ಬಿಟ್ಟ ಕಲಾವಿದ

Ganesh Mabla Gowda — Thu, 15 Oct 2026 21:10:22 +0530

ಚಿತ್ರದುರ್ಗ: ಜಿಲ್ಲೆಯ ಚಳ್ಳಕೆರೆ ತಾಲೂಕಿನ ಬೋಗನಹಳ್ಳಿ ಗ್ರಾಮದಲ್ಲಿ ದಾರುಣ ಘಟನೆ ನಡೆದಿದೆ. ನಾಟಕ ಪ್ರದರ್ಶನ ವೇಳೆಯೇ ಕಲಾವಿದರೊಬ್ಬರು ಕುಸಿದು ಬಿದ್ದು ಪ್ರಾಣ ಕಳೆದುಕೊಂಡಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.

ಬೋಗನಹಳ್ಳಿಯ ಕಲಾವಿದ ಶಿವಣ್ಣ (Shivanna) ಮೃತ ದುರ್ದೈವಿ. ಶಿವಣ್ಣ ಅವರಿಗೆ 45 ವರ್ಷಗಳಾಗಿತ್ತು. ಬೋಗನಹಳ್ಳಿ ಗ್ರಾಮದಲ್ಲಿ ಅಕ್ಟೋಬರ್ 14 ರಂದು ವಿಶೇಷ ನಾಟಕ ಆಯೋಜನೆ ಆಗಿತ್ತು. 'ಹೃದಯ ಜಾರಿತು ಪ್ರೀತಿ ಉಳಿಯಿತು' ಎಂಬ ನಾಟಕವನ್ನು ಪ್ರದರ್ಶ‌ನ ನಡೆಯುತ್ತಿತ್ತು. ನಾಟಕದಲ್ಲಿ ಅಭಿನಯ ಮಾಡುತ್ತಿದ್ದಾಗ ಶಿವಣ್ಣ ಏಕಾಏಕಿ ಕುಸಿದುಬಿದ್ದಿದ್ದಾರೆ.

ಕುಸಿದು ಬೀಳುತ್ತಿದ್ದಂತೆಯೇ ಸಹ ಕಲಾವಿದರಲ್ಲೇ ಆಘಾತಕ್ಕೆ ಒಳಗಾಗಿದ್ದಾರೆ. ಬೆನ್ನಲ್ಲೇ ಕುಸಿದು ಬಿದ್ದ ಶಿವಣ್ಣನನ್ನು ಆರೈಕೆ ಮಾಡಲು ಮುಂದಾಗಿದ್ದಾರೆ. ಆದರೆ ಚಿಕಿತ್ಸೆ ಫಲಿಸದೇ ಶಿವಣ್ಣ ಮೃತಪಟ್ಟಿದ್ದಾರೆ ಎಂದು ತಿಳಿದುಬಂದಿದೆ. ಅಕ್ಟೋಬರ್ 14ರಂದು ಪ್ರಕರಣ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ಶಿವಣ್ಣ ಅವರಿಗೆ ಹೃದಯಾಘಾತ ಸಂಭವಿಸಿದೆ.

ಆಘಾತಕ್ಕೆ ಒಳಗಾದ ಕಲಾವಿದರು

ಬಣ್ಣ ಹಚ್ಚಿಅಭಿನಯ ಮಾಡುತ್ತಿದ್ದಾಗಲೇ ಪ್ರಾಣ ಕಳೆದುಕೊಂಡಿರೋದು ಸಹ ಕಲಾವಿದರಿಗೆ ತುಂಬಾ ನೋವಿನ ಸಂಗತಿ ಆಗಿದೆ. ಅಪರೂಪದ ಕಲಾವಿದನನ್ನು ಕಳೆದುಕೊಂಡು ದುಃಖಿಸುತ್ತಿದ್ದಾರೆ. ಇನ್ನು ನಾಟಕ ವೀಕ್ಷಣೆ ಮಾಡುತ್ತಿದ್ದ ಪ್ರೇಕ್ಷಕರೂ ಕೂಡ ಒಂದು ಕ್ಷಣ ಆಘಾತಕ್ಕೆ ಒಳಗಾದರು. ದುರಂತ ಸಂಭವಿಸಿದ ಹಿನ್ನೆಲೆಯಲ್ಲಿ ನಾಟಕವನ್ನು ಮಧ್ಯಕ್ಕೆ ನಿಲ್ಲಿಸಲಾಯಿತು. ಇನ್ನೊಂದು ವಿಚಾರ ಅಂದ್ರೆ ಶಿವಣ್ಣ ಅದೇ ಗ್ರಾಮದವನಾಗಿದ್ದರಿಂದ, ಎಲ್ಲರಿಗೂ ಚಿರಪರಿಚಿತರಿದ್ದರು.

ಇನ್ನು, ನಟನೆ ವೇಳೆ ಶಿವಣ್ಣ ಕುಸಿದು ಬಿದ್ದ ಸುದ್ದಿ ಕೇಳಿ ಕುಟುಂಬಸ್ಥರು ಸ್ಥಳಕ್ಕೆ ಓಡೋಡಿ ಬಂದಿದ್ದರು. ಆದರೆ ಮನೆಯ ಸದಸ್ಯನನ್ನು ಉಳಿಸಿಕೊಳ್ಳಲು ಆಗಲಿಲ್ಲ. ಇದರಿಂದ ಕುಟುಂಬದ ಸದಸ್ಯರು ತುಂಬಾ ದುಃಖದಲ್ಲಿದ್ದಾರೆ. ಶಿವಣ್ಣನನ್ನು ಕಳೆದುಕೊಂಡ ಕುಟುಂಬ ಆಘಾತಕ್ಕೆ ಸಿಲುಕಿದೆ. ಇತ್ತ ಕಲಾವಿದ ಶಿವಣ್ಣನ ನಿವಾಸಕ್ಕೆ ಊರಿನ ಹಿರಿಯ ಮುಖಂಡರು, ಸಂಬಂಧಿಕರು, ಬಂಧುಗಳು ಆಗಮಿಸಿ ಕುಟುಂಬಕ್ಕೆ ಸಾಂತ್ವನ ಹೇಳ್ತಿದ್ದಾರೆ.

ಕಲಾವಿದನೊಬ್ಬ ತನ್ನ ಕಲೆಯಲ್ಲೇ ಕಳೆದುಹೋಗಿ ಹೃದಯಾಘಾತಕ್ಕೆ ಒಳಗಾಗಿರೋದು ತುಂಬಾನೇ ಬೇಸರದ ವಿಚಾರ. ಅವರು ಇನ್ನಷ್ಟು ದಿನಗಳ ಕಾಲ ಇರಬೇಕಿತ್ತು. ನಮ್ಮನ್ನು ರಂಜಿಸಬೇಕಿತ್ತು ಅನ್ನೋದು ಊರಿನ ಜನರ ನೋವಿನ ಮಾತುಗಳಾಗಿವೆ. ಇನ್ನು ಕಲಾವಿದ ಏಕಾಏಕಿ ಕುಸಿದು ಬೀಳುವ ದೃಶ್ಯ ಮೊಬೈಲ್‌ನಲ್ಲಿ ಸೆರೆಯಾಗಿದೆ. ಇದೀಗ ಅದು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.

ಕಟಾವಿಗೆ ಬಂದಿದ್ದ 1,100 ಮರಗಳ ಅಡಿಕೆ ರಾತ್ರೋರಾತ್ರಿ ಕಳ್ಳತನ; ಸಾಲ ಮಾಡಿ ಬೆಳೆದಿದ್ದ ರೈತ ಕಂಗಾಲು!

Sathish Kumar KH — Tue, 06 Oct 2026 09:14:28 +0530

ದಾವಣಗೆರೆ (ಅ.06): ದಾವಣಗೆರೆ ಜಿಲ್ಲೆಯ ಜಗಳೂರು ತಾಲೂಕಿನ ಕೆಳಗೋಟೆ ಗ್ರಾಮದಲ್ಲಿ ಅಡಿಕೆ ಕಳ್ಳತನದ ಪ್ರಕರಣವೊಂದು ವರದಿಯಾಗಿದ್ದು, ರೈತರು ಕಂಗಾಲಾಗಿದ್ದಾರೆ. ಅಡಿಕೆಗೆ ಮಾರುಕಟ್ಟೆಯಲ್ಲಿ ಭಾರಿ ಬೆಲೆ ಇರುವ ಹಿನ್ನೆಲೆಯಲ್ಲಿ, ಫಸಲಿಗೆ ಬಂದಿದ್ದ ಅಡಿಕೆ ತೋಟಕ್ಕೆ ಕಳ್ಳರು ರಾತ್ರೋರಾತ್ರಿ ಕನ್ನ ಹಾಕಿದ್ದಾರೆ.

ಕೆಳಗೋಟೆ ಗ್ರಾಮದ ರೈತ ಸಂತೋಷ್ ಎಂಬುವವರು ಸಾಲ ಮಾಡಿ ಅಡಿಕೆ ಬೆಳೆದಿದ್ದರು. ಇದೀಗ ಕಟಾವಿಗೆ ಬಂದಿದ್ದ ಸಂದರ್ಭದಲ್ಲಿ ಕಳ್ಳರು ಕೃತ್ಯ ಎಸಗಿದ್ದಾರೆ. ಸುಮಾರು 1,100 ಅಡಿಕೆ ಮರಗಳಲ್ಲಿ ಕಳ್ಳರು ಹಸಿ ಅಡಿಕೆ ಗೊನೆಗಳನ್ನು ಕಟಾವು ಮಾಡಿ ಪರಾರಿಯಾಗಿದ್ದಾರೆ. ಅಂದಾಜು 4 ಕ್ವಿಂಟಾಲ್ ಅಡಿಕೆ ಕಳ್ಳತನವಾಗಿರುವ ಬಗ್ಗೆ ಅಂದಾಜಿಸಲಾಗಿದೆ.

ಮೊದಲ ಫಸಲನ್ನೇ ಕದ್ದ ಕಳ್ಳ ಖದೀಮರು

ಪ್ರಸ್ತುತ ಮಾರುಕಟ್ಟೆಯಲ್ಲಿ ಪ್ರತಿ ಕ್ವಿಂಟಾಲ್ ಅಡಿಕೆಗೆ 48,000 ದಿಂದ 50,000 ರೂ.ಗಳಷ್ಟು ಬೆಲೆ ಇದೆ. ಇದನ್ನೇ ಬಂಡವಾಳ ಮಾಡಿಕೊಂಡ ಖದೀಮರು, ರೈತನ ಶ್ರಮವನ್ನು ಲೂಟಿ ಮಾಡಿದ್ದಾರೆ. ರಾತ್ರೋರಾತ್ರಿ ತೋಟಕ್ಕೆ ನುಗ್ಗಿ ಅಡಿಕೆ ಗೊನೆಗಳನ್ನು ಕದ್ದೊಯ್ದಿರುವುದು ರೈತ ಸಮುದಾಯದಲ್ಲಿ ಆತಂಕ ಮೂಡಿಸಿದೆ. ಇನ್ನು ಇದೇ ಮೊದಲನೆಯದಾಗಿ ಅಡಿಕೆ ತೋಟದಲ್ಲಿ ಜೋರಾಗಿ ಫಸಲು ಬಂದಿತ್ತು. ಒಳ್ಳೆಯ ಇಳುವರಿ ಬಂದಿದ್ದರಿಂದ ಆದಾಯವನ್ನೂ ನಿರೀಕ್ಷೆ ಮಾಡಲಾಗಿತ್ತು. ಆದರೆ, ಈ ಕಳ್ಳತನದಿಂದಾಗಿ ಬೆಳೆಗಾಗಿ ಮಾಡಿದ ಸಾಲವೂ ಮೈಮೇಲೆ ಬರುವ ಆತಂಕ ಎದುರಾಗಿದೆ.

ಈ ಕುರಿತು ಜಗಳೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಆರೋಪಿಗಳ ಪತ್ತೆಗೆ ಬಲೆ ಬೀಸಿದ್ದಾರೆ. ಬೆಲೆಬಾಳುವ ಬೆಳೆಗಳನ್ನು ರಕ್ಷಿಸಿಕೊಳ್ಳುವುದು ರೈತರಿಗೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಇನ್ನು ರೈತರು ಅಡಿಕೆ ತೋಟವನ್ನೂ ಕಾಯುವುದಕ್ಕೆ ತೋಟದಲ್ಲಿಯೇ ಕಾವಲು ಇರಬೇಕಾದ ಅನಿವಾರ್ಯತೆ ಎದುರಾಗಿದೆ. ಅಥವಾ ಇದಕ್ಕೆ ಒಬ್ಬ ರಾತ್ರಿ ಪಾಳಿಗೆ ಕಾವಲುಗಾರರನ್ನು ನೇಮಕ ಮಾಡಬೇಕಾಗಿದೆ.

ಕಾಲುವೆಯಲ್ಲಿ ಮೊದಲ ಪಯಣ ಮುಗಿಸುತ್ತಿದ್ದಾಳೆ ಭದ್ರೆ; ಯಾವೆಲ್ಲಾ ಕೆರೆಗಳಿಗೆ ಹೋಗಿದೆ ನೀರು

Kannadaprabha News — Thu, 08 Oct 2026 07:46:14 +0530

ಚಿಕ್ಕಪ್ಪನಹಳ್ಳಿ ಷಣ್ಮುಖ

ಕನ್ನಡಪ್ರಭ ವಾರ್ತೆ ಚಿತ್ರದುರ್ಗ: ಚಿತ್ರದುರ್ಗ ಶಾಖಾ ಕಾಲುವೆ ಮೂಲಕ ಮೊದಲ ಬಾರಿಗೆ ಬಯಲ ನಾಡಿಗೆ ಎಂಟ್ರಿ ಕೊಟ್ಟಿದ್ದ ಭದ್ರೆ ಇನ್ನೇನು ತನ್ನ ಮೊದಲ ಪಯಣವನ್ನು ಶೀಘ್ರ ಮುಗಿಸಲಿದ್ದಾಳೆ. ಚಿತ್ರದುರ್ಗ ಶಾಖಾ ಕಾಲುವೆಗೆ ಪರೀಕ್ಷಾರ್ಥ ಮೂರು ಟಿಎಂಸಿ ನೀರು ಹಂಚಿಕೆ ಮಾಡಿ ರಾಜ್ಯ ಸರ್ಕಾರ ಆದೇಶಿಸಿತ್ತು. ಸೆಪ್ಟಂಬರ್ 6 ರಿಂದ ಅಕ್ಟೋಬರ್ 6ರ ತನಕ ಒಂದು ತಿಂಗಳ ಅವಧಿಯಲ್ಲಿ ಬರೋಬ್ಬರಿ ಎರಡು ಟಿಎಂಸಿ ನೀರನ್ನು ಭದ್ರಾ ಜಲಾಶಯದಿಂದ ಲಿಪ್ಟ್ ಮಾಡಿ ಕಾಲುವೆಗೆ ಹರಿಸಲಾಗಿದೆ. ಇನ್ನೊಂದು ಟಿಎಂಸಿ ಮಾತ್ರ ಬಾಕಿ ಇದೆ.

ಮೊದಲ ಹಂತದಲ್ಲಿ ನೀರು ಪಡೆಯುವಲ್ಲಿ ಎಂದಿನಂತೆ ಹೊಸದುರ್ಗ, ಹಿರಿಯೂರು, ಹೊಳಲ್ಕೆರೆ ತಾಲೂಕುಗಳು ಅಗ್ರ ಸ್ಥಾನದಲ್ಲಿದ್ದರೆ ಚಿತ್ರದುರ್ಗದ್ದು ದಯನೀಯ. ಡಿಪಿಆರ್ ಪ್ರಕಾರ ಹಿರಿಯೂರು ತಾಲೂಕಿನಲ್ಲಿ 12 ಕೆರೆಗೆ ನೀರು ತುಂಬಿಸಬೇಕಾಗಿದ್ದು ಇದರಲ್ಲಿ ಏಳು ಕೆರೆಗಳು ಭರ್ತಿಯಾಗಿವೆ. ಇನ್ನೂ ಐದು ಕೆರೆಗಳು ಭರ್ತಿ ನಿರೀಕ್ಷೆಯಲ್ಲಿವೆ. ಹಾಗೆ ನೋಡಿದರೆ ಭದ್ರೆ ಹಿರಿಯೂರು ತಾಲೂಕಿನ ರೈತರ ಅಲ್ಪ ಅವಧಿಯಲ್ಲಿಯೇ ಸಂತೃಪ್ತಗೊಳಿಸಿದ್ದಾಳೆ.

ಹಳ್ಳಗಳ ಮೂಲಕವೇ ಭದ್ರೆ ಹರಿದು ಕೆರೆಗಳ ತುಂಬಿಸುತ್ತಿರುವುದರಿಂದ ಸಹಜವಾಗಿಯೇ ಅಂತರ್ಜಲ ಹೆಚ್ಚಾಗುತ್ತಿದೆ. ಹಳ್ಳದೆ ದಂಡೆಯಲ್ಲಿ ಬಸಿ ನೀರು ಶುರುವಾಗಿದೆ. ತಾಲೂಕಿನ ತವಂದಿ ಕೆರೆ, ಔಟ್ ಲೆಟ್‌ನಿಂದ 16 ಕಿಮೀ ದೂರದಲ್ಲಿದೆ. ಹಳ್ಳಕ್ಕೆ ನೀರು ಬಿಟ್ಟು ತವನಿಧಿ ಕೆರೆ ತುಂಬಿಸುತ್ತಿರುವುದರಿಂದ ಭೂಮಿ ಕುಡಿದು ಕೊಳವೆ ಬಾವಿಗಳಲ್ಲಿ ಅಂತರ್ಜಲ ಮಟ್ಟ ಹೆಚ್ಚಿಸಿದೆ.

ಹೊಳಲ್ಕೆರೆ ತಾಲೂಕಿನ 20 ಕೆರೆಗಳಿಗೆ ನೀರು

ಹೊಳಲ್ಕೆರೆ ತಾಲೂಕಿನ 30 ಕೆರೆಗಳಲ್ಲಿ ಗ್ರಾವಿಟಿಯಲ್ಲಿ 20 ಕೆರೆಗಳಿಗೆ ನೀರು ಹೋಗಿದೆ. ಲಿಪ್ಟ್ ಮೂಲಕ ಏಳು ಕೆರೆಗಳಿಗೆ ನೀರು ಹಾಯಿಸಬೇಕಿದ್ದು ನಾಲ್ಕು ಬಾಕಿ ಇವೆ. ಕುಡಿನೀರ ಕಟ್ಟೆ ಬಳಿ ಎರಡು ದಿನಗಳ ಹಿಂದೆಯಷ್ಟೇ ಲಿಫ್ಟ್ ಮಾಡುವಾಗ ಪೈಪು ಹೊಡೆದು ಶಿವಮೊಗ್ಗ ರಸ್ತೆಯಲ್ಲಿ ನೀರು ಚಿಮ್ಮಿತ್ತು. ಇಡೀ ತಾಲೂಕಿಗೆ ಪೈಪುಗಳ ಮೂಲಕ ನೀರು ಹಾಯಿಸುತ್ತಿರುವುದರಿಂದ ಭೂಮಿ ಕುಡಿಯಲು ಅವಕಾಶವಿಲ್ಲ.

ಹೊಸದುರ್ಗ ತಾಲೂಕಿನ 28 ಕೆರೆಗಳಿಗೆ ನೀರು

ಹೊಸದುರ್ಗ ತಾಲೂಕಿನ 32ರ ಪೈಕಿ 28 ಕೆರೆಗಳ ಅರ್ಧದಷ್ಟು ತುಂಬಿಸಲಾಗಿದೆ. ಜಾನಕಲ್, ಬನ್ಸಿಹಳ್ಳಿ, ದೇವಪುರದ ಕೆರೆಗಳು ತುಸು ದೊಡ್ಡವಾಗಿದ್ದು ಶೇ.20 ರಷ್ಟು ತುಂಬಿವೆ. ಭದ್ರೆ ಹೊಸದುರ್ಗ ತಾಲೂಕಿಗೆ ಭರ್ಜರಿ ಎಂಟ್ರಿ ಕೊಟ್ಟು ರೈತರ ದಾಹ ತಣಿಸಿದ್ದಾಳೆ.

ಎಂದಿನಂತ ಚಿತ್ರದುರ್ಗದ ಕೆರೆಗಳು ಇಡೀ ನೀರು ಹಂಚಿಕೆಯ ವ್ಯವಸ್ಥೆಯ ದಿಟ್ಟಿರಿಸಿ ನೋಡುತ್ತಿವೆ. ಗೋನೂರು ಕೆರೆಗೆ ನೀರು ಎಂದು ಅಬ್ಬರದ ಪ್ರಚಾರ ಪಡೆದ ಭದ್ರೆ ಕೇವಲ ದ್ಯಾಮವ್ವನಹಳ್ಳಿ ಕೆರೆ ಮಾತ್ರ ತುಂಬಿಸಿದ್ದಾಳೆ. ಗೋನೂರು ಕೆರೆಗೆ ಮಲ್ಲಾಪುರ ಕೆರೆ ನೀರು ಹೋಗಿ ಸದಾ ಅರ್ಧದಷ್ಟಿರುತ್ತದೆ. ದ್ಯಾಮೇನಹಳ್ಳಿಯಿಂದ ಕಲ್ಲಹಳ್ಳಿಗೆ ನೀರು ಹರಿದಿದ್ದು ಹರಿವಿಕೆ ಪ್ರಮಾಣ ಕೂಡಾ ನೀರಸವಾಗಿದೆ.

ಭದ್ರೆ ಇನ್ನೇನು ತಮ್ಮ ಮೊದಲ ಪ್ರಯಾಣವ ಮುಗಿಸುತ್ತಿದ್ದಾಳೆ. ಗೋನೂರು ಕೆರೆಗೆ ನೀರು ಎಂಬ ಸಾರ್ಥಕತೆ ಜನಪ್ರತಿನಿಧಿಗಳಲ್ಲಿದ್ದರೆ, ಎಲ್ಲಿಂದ ಎಲ್ಲಿಗೆ ಬಂದೆಯವ್ವಾ ಎಂಬ ಸಂಕಟಗಳು ಚಳ್ಳಕೆರೆ, ಚಿತ್ರದುರ್ಗ, ಮೊಳಕಾಲ್ಮೂರು, ಜಗಳೂರು ತಾಲೂಕಿನಲ್ಲಿದೆ.

ಬೆಟ್ಟಿಂಗ್ ಹಗರಣ: ಶಾಸಕ ಕೆ.ಸಿ. ವೀರೇಂದ್ರ ಪಪ್ಪಿಯ ₹23.35 ಕೋಟಿ ಮೌಲ್ಯದ ಆಸ್ತಿ ಜಪ್ತಿ ಮಾಡಿದ ED!

Sathish Kumar KH — Tue, 27 Oct 2026 18:30:34 +0530

ಬೆಂಗಳೂರು/ನವದೆಹಲಿ: ದೇಶಾದ್ಯಂತ ಭಾರೀ ಸದ್ದು ಮಾಡಿದ್ದ ಬಹುಕೋಟಿ ಆನ್‌ಲೈನ್ ಬೆಟ್ಟಿಂಗ್ ಮತ್ತು ಅಕ್ರಮ ಹಣ ವರ್ಗಾವಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಚಿತ್ರದುರ್ಗ ಜಿಲ್ಲೆಯ ಮೊಳಕಾಲ್ಮೂರು ಕ್ಷೇತ್ರದ ಕಾಂಗ್ರೆಸ್ ಶಾಸಕ ಕೆ.ಸಿ. ವೀರೇಂದ್ರ (ಪಪ್ಪಿ) ಅವರಿಗೆ ಜಾರಿ ನಿರ್ದೇಶನಾಲಯ (ED) ಮತ್ತೊಂದು ಬಿಗ್ ಶಾಕ್ ನೀಡಿದೆ.

ಈ ಪ್ರಕರಣದ ಪ್ರಮುಖ ಆರೋಪಿಯಾಗಿರುವ ಶಾಸಕ ಕೆ.ಸಿ. ವೀರೇಂದ್ರ ಹಾಗೂ ಅವರ ಸಹಚರರಿಗೆ ಸೇರಿದ ಬರೋಬ್ಬರಿ ₹23.35 ಕೋಟಿ ಮೌಲ್ಯದ ಆಸ್ತಿಯನ್ನು ಇಡಿ ಅಧಿಕಾರಿಗಳು ತಾತ್ಕಾಲಿಕವಾಗಿ ಮುಟ್ಟುಗೋಲು (Provisional Attachment) ಹಾಕಿಕೊಂಡಿದ್ದಾರೆ. ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆ (PMLA) 2002ರ ಅಡಿಯಲ್ಲಿ ಇಡಿ ಕ್ರಮ ಕೈಗೊಂಡಿದೆ.

ಯಾರ್ಯಾರ ಆಸ್ತಿ ಜಪ್ತಿ? ಎಷ್ಟು ಮೌಲ್ಯ?

ಜಾರಿ ನಿರ್ದೇಶನಾಲಯ ನೀಡಿರುವ ಅಧಿಕೃತ ಮಾಹಿತಿ ಪ್ರಕಾರ, ಕೆ.ಸಿ. ವೀರೇಂದ್ರ ಸೇರಿದಂತೆ ಪ್ರಮುಖ ಆರೋಪಿಗಳಾದ ಗುಲ್ಷನ್ ಖಟ್ಟರ್ ಮತ್ತು ನೇಹಾ ಟಂಡನ್ ಅವರಿಗೆ ಸೇರಿದ ಚರ ಮತ್ತು ಸ್ಥಿರಾಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲಾಗಿದೆ.

ಚರಾಸ್ತಿಗಳು: ₹13.76 ಕೋಟಿ ಮೌಲ್ಯದ ಬ್ಯಾಂಕ್ ಠೇವಣಿ, ಹೂಡಿಕೆಗಳು ಸೇರಿದಂತೆ ಇತರೆ ಚರಾಸ್ತಿಗಳು.

ಸ್ಥಿರಾಸ್ತಿಗಳು: ₹9.58 ಕೋಟಿ ಮೌಲ್ಯದ ಭೂಮಿ, ವಾಣಿಜ್ಯ ಮತ್ತು ವಸತಿ ಕಟ್ಟಡಗಳು.

ಒಟ್ಟು ಮೌಲ್ಯ: ₹23.35 ಕೋಟಿ.

'ಕಿಂಗ್ 567' ಆ್ಯಪ್ ಮೂಲಕ ಬೆಟ್ಟಿಂಗ್ ದಂಧೆ!

ಆರೋಪಿಗಳು 'ಕಿಂಗ್ 567' (King 567) ಸೇರಿದಂತೆ ಹತ್ತಾರು ಅಕ್ರಮ ಆನ್‌ಲೈನ್ ಬೆಟ್ಟಿಂಗ್ ಅಪ್ಲಿಕೇಶನ್‌ಗಳು ಮತ್ತು ವೆಬ್‌ಸೈಟ್‌ಗಳನ್ನು ನಡೆಸುತ್ತಿದ್ದರು. ಆನ್‌ಲೈನ್ ಮೂಲಕ ಆಟಗಾರರನ್ನು ಆಕರ್ಷಿಸಿ, ವಂಚನೆಯ ಗೇಮಿಂಗ್ ಅಲ್ಗಾರಿದಮ್‌ಗಳನ್ನು ಬಳಸಿ ಕೋಟ್ಯಂತರ ರೂಪಾಯಿ ಲೂಟಿ ಮಾಡುತ್ತಿದ್ದರು ಎಂದು ಇಡಿ ತನಿಖೆಯಲ್ಲಿ ಬಯಲಾಗಿದೆ. ಈ ಬೆಟ್ಟಿಂಗ್ ದಂಧೆಯ ಕಪ್ಪುಹಣವನ್ನು ವೈಟ್ ಮಾಡಿಕೊಳ್ಳಲು ನೂರಾರು ನಕಲಿ (ಶೆಲ್) ಕಂಪನಿಗಳು ಮತ್ತು ಬಡವರ ಹೆಸರಿನಲ್ಲಿದ್ದ ನಕಲಿ 'ಮ್ಯೂಲ್ ಬ್ಯಾಂಕ್ ಖಾತೆ'ಗಳನ್ನು (Mule Accounts) ಬಳಸಲಾಗಿತ್ತು. ಇಷ್ಟೇ ಅಲ್ಲದೆ, ಹವಾಲಾ ಜಾಲದ ಮೂಲಕ ಭಾರತದಿಂದ ದುಬೈ ಸೇರಿದಂತೆ ಹಲವು ವಿದೇಶಿ ಬ್ಯಾಂಕ್ ಖಾತೆಗಳಿಗೆ ಹಣ ರವಾನಿಸಿರುವುದು ಪತ್ತೆಯಾಗಿದೆ.

ಬರೋಬ್ಬರಿ ₹2,300 ಕೋಟಿಗೂ ಅಧಿಕ ಅಕ್ರಮ ಹಣ ವರ್ಗಾವಣೆ!

ಈ ಜಾಲದ ಮೂಲಕ ಬರೋಬ್ಬರಿ ₹2,300 ಕೋಟಿಗೂ ಅಧಿಕ ಮೊತ್ತದ ಅಕ್ರಮ ಹಣ ವರ್ಗಾವಣೆ (Money Laundering) ನಡೆದಿರುವುದಾಗಿ ಇಡಿ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ಈ ಹಿಂದೆ ಇಡಿ ಅಧಿಕಾರಿಗಳು ದೇಶದ ವಿವಿಧ ರಾಜ್ಯಗಳ ಸುಮಾರು 60ಕ್ಕೂ ಹೆಚ್ಚು ಸ್ಥಳಗಳಲ್ಲಿ ಏಕಕಾಲಕ್ಕೆ ಭರ್ಜರಿ ದಾಳಿ ನಡೆಸಿದ್ದರು. ಆ ವೇಳೆ ಕಂತೆ ಕಂತೆ ನಗದು, ಕೋಟ್ಯಂತರ ಮೌಲ್ಯದ ಚಿನ್ನಾಭರಣಗಳು, ದುಬಾರಿ ಬೆಲೆಯ ಐಷಾರಾಮಿ ಕಾರುಗಳು ಹಾಗೂ ಅಪಾರ ಪ್ರಮಾಣದ ಡಿಜಿಟಲ್ ಪುರಾವೆಗಳನ್ನು ವಶಪಡಿಸಿಕೊಳ್ಳಲಾಗಿತ್ತು.

ಈವರೆಗೆ ₹343 ಕೋಟಿ ಆಸ್ತಿ ಜಪ್ತಿ!

ಈ ಜಾಲದ ಕಿಂಗ್‌ಪಿನ್ ಆಗಿದ್ದ ಶಾಸಕ ಕೆ.ಸಿ. ವೀರೇಂದ್ರ ಅವರನ್ನು ಈ ಹಿಂದೆಯೇ ಪಿಎಂಎಲ್‌ಎ ಕಾಯ್ದೆಯಡಿ ಇಡಿ ಬಂಧಿಸಿ ವಿಚಾರಣೆಗೆ ಒಳಪಡಿಸಿತ್ತು. ಈ ಹೈಪ್ರೊಫೈಲ್ ಹಗರಣದಲ್ಲಿ ಇಡಿ ಅಧಿಕಾರಿಗಳು ಹಂತ-ಹಂತವಾಗಿ ಕ್ರಮ ಕೈಗೊಳ್ಳುತ್ತಿದ್ದು, ಈವರೆಗೆ ಒಟ್ಟು ₹343 ಕೋಟಿಗೂ ಅಧಿಕ ಮೌಲ್ಯದ ಆಸ್ತಿಯನ್ನು ಮುಟ್ಟುಗೋಲು ಹಾಕಿಕೊಂಡಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಡಿ ತನಿಖೆ ಇನ್ನೂ ಚುರುಕಿನಿಂದ ಸಾಗುತ್ತಿದ್ದು, ಮತ್ತಷ್ಟು ಪ್ರಭಾವಿಗಳಿಗೆ ಸಂಕಷ್ಟ ಎದುರಾಗುವ ಸಾಧ್ಯತೆ ದಟ್ಟವಾಗಿದೆ.

ಏಕಾದಶಿ ದಿನವೇ ಚಿತ್ರದುರ್ಗದ ಬಳಿ ಬಸ್-ಲಾರಿ ನಡುವೆ ಭೀಕರ ಅಪಘಾತ: ಸಾವು ನೋವು ಎಷ್ಟು?

Ravi Janekal — Thu, 22 Oct 2026 14:27:58 +0530

ಚಿತ್ರದುರ್ಗ (ಅ.22) ಕೆಎಸ್‌ಆರ್‌ಟಿಸಿ ಬಸ್ ಮತ್ತು ಲಾರಿ ನಡುವೆ ಭೀಕರ ಡಿಕ್ಕಿ ಸಂಭವಿಸಿದ್ದು ಬಸ್‌ನಲ್ಲಿ ಪ್ರಯಾಣಿಸುತ್ತಿದ್ದ ಹದಿನೈದಕ್ಕೂ ಹೆಚ್ಚು ಮಂದಿ ಗಾಯಗೊಂಡ ಘಟನೆ ಚಿತ್ರದುರ್ಗ ತಾಲೂಕಿನ ಮಲ್ಲಾಪುರ ಬಳಿಯ ರಾಷ್ಟ್ರೀಯ ಹೆದ್ದಾರಿ 13 ರಲ್ಲಿ ನಡೆದಿದೆ.

ದುರಂತ ಘಟನೆಯಲ್ಲಿ ಗಾಯಗೊಂಡವರ ಪೈಕಿ ಐವರು ಪ್ರಯಾಣಿಕರು ಗಂಭೀರ ಗಾಯಗೊಂಡಿದ್ದು ಗಾಯಾಳುಗಳನ್ನು ಚಿತ್ರದುರ್ಗ ಜಿಲ್ಲಾಸ್ಪತ್ರೆಗೆ ದಾಖಲು ಮಾಡಲಾಗಿದೆ.

ಮಲ್ಲಾಪುರ ಗ್ರಾಮದ ಬಳಿ ಭೀಕರ ಅಪಘಾತ:

ಮುಂದೆ ಹೋಗುತ್ತಿದ್ದ ಲಾರಿಗೆ ಸಾರಿಗೆ ಬಸ್ ಹಿಂಬದಿಯಿಂದ ಡಿಕ್ಕಿ ಹೊಡೆದಿದೆ. ಮೇಲ್ನೋಟಕ್ಕೆ ಚಾಲಕನ ನಿರ್ಲಕ್ಷ್ಯವೇ ಕಾರಣ ಎಂದು ತಿಳಿದುಬಂದಿದೆ. ಹಿಂಬದಿಯಿಂದ ಡಿಕ್ಕಿ ಹೊಡೆದ ಪರಿಣಾಮ ಲಾರಿ ಅರ್ಧ ಭಾಗ ಬಸ್‌ನೊಳಗೆ ನುಗ್ಗಿ ಬಸ್‌ ಮುಂಭಾಗ ಸಂಪೂರ್ಣ ನುಜ್ಜುಗುಜ್ಜಾಗಿದೆ. ಸೀಟುಗಳು ಮುರಿದುಬಿದ್ದಿವೆ. ಅದೃಷ್ಟವಶಾತ್ ಸದ್ಯ ಯಾವುದೇ ಪ್ರಾಣಾಹಾನಿ ದಾಖಲಾಗಿಲ್ಲ.

ಸ್ಥಳಕ್ಕೆ ಪೊಲೀಸರು ಭೇಟಿ ಸ್ಥಳ ಪರಿಶೀಲನೆ

ಘಟನೆಯ ಮಾಹಿತಿ ತಿಳಿಯುತ್ತಿದ್ದಂತೆ ಚಿತ್ರದುರ್ಗ ಗ್ರಾಮಾಂತರ ಠಾಣೆ ಸಿಪಿಐ ಬಾಲಚಂದ್ರ ನಾಯ್ಕ್ ಸ್ಥಳಕ್ಕೆ ದೌಡಾಯಿಸಿದ್ದಾರೆ. ಘಟನೆ ನಡೆದ ಸ್ಥಳದ ಪರಿಶೀಲನೆ ನಡೆಸಿದ್ದಾರೆ. ಘಟನೆಗೆ ನಿಖರ ಕಾರಣ ತಿಳಿದುಬಂದಿಲ್ಲ. ಚಿತ್ರದುರ್ಗ ಗ್ರಾಮಾಂತರ ಠಾಣಾ ವ್ಯಾಪ್ತಿಯಲ್ಲಿ ಘಟನೆ ನಡೆದಿದೆ.