Asianet Suvarna News

ಗ್ರಾಮಕ್ಕೆ ನುಗ್ಗಿ ಹಸುವನ್ನು ಧರಧರನೇ ಎಳೆದೊಯ್ದ ಕಳ್ಳರು: ಹಿಂದೆಯೇ ಬಂದ ತಾಯಿ ಹಸು

Sathish Kumar KH — Mon, 05 Oct 2026 08:12:11 +0530

ಚಿಕ್ಕಮಗಳೂರು (ಅ.05): ಹಸುವೊಂದನ್ನು ಕಳ್ಳತನ ಮಾಡಿ ಹೊತ್ತೊಯ್ಯುತ್ತಿದ್ದ ವೇಳೆ ತಾಯಿ ಹಸು ಹಿಂದಿನಿಂದ ಓಡಿಬಂದ ಮನಕಲಕುವ ಘಟನೆ ಚಿಕ್ಕಮಗಳೂರು ಜಿಲ್ಲೆಯ ಮೂಡಿಗೆರೆ ತಾಲೂಕಿನ ಬಿಳಗುಳ ಗ್ರಾಮದಲ್ಲಿ ನಡೆದಿದೆ.

ರಾಷ್ಟ್ರೀಯ ಹೆದ್ದಾರಿ-173ರ ಸಮೀಪವೇ ಘಟನೆ ನಡೆದಿದ್ದು, ಗೋಕಳ್ಳರು ಹಸುವಿನ ಕುತ್ತಿಗೆಗೆ ಹಗ್ಗ ಹಾಕಿ ಧರಧರನೆ ಎಳೆದುಕೊಂಡು ಹೋಗುತ್ತಿರುವ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಹಸುವನ್ನು ಕರೆದೊಯ್ಯುತ್ತಿದ್ದವರ ಹಿಂದೆ ತಾಯಿ ಹಸು ಓಡುತ್ತಿರುವ ದೃಶ್ಯವೂ ಕಂಡುಬಂದಿದ್ದು, ಸ್ಥಳೀಯರಲ್ಲಿ ಆಕ್ರೋಶಕ್ಕೆ ಕಾರಣವಾಗಿದೆ.

ರಸ್ತೆ ಬದಿ ಕಟ್ಟಿರುವ ಜಾನುವಾರುಗಳ ಕಳ್ಳತನ

ಮೂಡಿಗೆರೆ ತಾಲೂಕಿನ ವಿವಿಧೆಡೆ ಇತ್ತೀಚೆಗೆ ಗೋ-ಕಳ್ಳತನ ಪ್ರಕರಣಗಳು ಹೆಚ್ಚಾಗುತ್ತಿವೆ ಎಂದು ಸ್ಥಳೀಯರು ಆರೋಪಿಸಿದ್ದಾರೆ. ರಾತ್ರಿ ವೇಳೆ ಮನೆಗಳ ಸಮೀಪ ಹಾಗೂ ರಸ್ತೆ ಬದಿಯಲ್ಲಿ ಕಟ್ಟಿರುವ ಜಾನುವಾರುಗಳನ್ನು ಗುರಿಯಾಗಿಸಿ ಕೊಂಡು ಕಳ್ಳತನ ಮಾಡಲಾಗುತ್ತಿದೆ ಎಂದು ದೂರಲಾಗಿದೆ.

ಸಿಸಿಟೀವಿ ದೃಶ್ಯಾವಳಿಗಳನ್ನು ಆಧರಿಸಿ ಆರೋಪಿಗಳನ್ನು ಪತ್ತೆಹಚ್ಚಿ, ಗೋ ಕಳ್ಳತನಕ್ಕೆ ಕಡಿವಾಣ ಹಾಕುವಂತೆ ಹಿಂದೂ ಸಂಘಟನೆಗಳ ಮುಖಂಡರು ಪೊಲೀಸರಿಗೆ ಮನವಿ ಮಾಡಿದ್ದಾರೆ. ಮೂಡಿಗೆರೆ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಪ್ರಕರಣ ನಡೆದಿದ್ದು, ಕಳ್ಳರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ.

ಪ್ರಸಿದ್ಧ ಪ್ರವಾಸಿ ತಾಣ ಸಿರಿಮನೆ ಫಾಲ್ಸ್‌ಗೆ ಮೊಬೈಲ್ ಟವರ್ ಇಲ್ಲ; ಪ್ರವಾಸಿಗರು, ಗ್ರಾಮಸ್ಥರ ಪರದಾಟ

Kannadaprabha News — Wed, 28 Oct 2026 08:20:36 +0530

ನೆಮ್ಮಾರ್ ಅಬೂಬಕರ್

ಶೃಂಗೇರಿ: ಶೃಂಗೇರಿಯಿಂದ ಸುಮಾರು 11 ಕಿಲೋಮೀಟರ್ ದೂರದಲ್ಲಿರುವ ಸಿರಿಮನೆ ಫಾಲ್ಸ್ ಜಿಲ್ಲೆಯ ಪ್ರಸಿದ್ದ ಪ್ರವಾಸಿ ತಾಣಗಳಲ್ಲಿ ಒಂದಾಗಿದೆ. ಜಲಪಾತ ವೀಕ್ಷಣೆಗೆ ವ್ಯವಸ್ಥಿತ ಮೆಟ್ಟಿಲುಗಳಿವೆ. ಶೌಚಾಲಯ, ವಿಶ್ರಾಂತಿ ಕೊಠಡಿ, ಸ್ನಾನ ಕೊಠಡಿ,ವೀಕ್ಷಣಾ ಗೋಪುರ, ಅಂಗಡಿ,ಹೋಟೇಲು ಮಳಿಗೆಗಳು ಸೇರಿದಂತೆ ಎಲ್ಲಾ ಮೂಲಭೂತ ಸೌಲಭ್ಯಗಳಿವೆ.

ಆದರೆ ಇಲ್ಲಿಗೆ ಅಗತ್ಯವಾಗಿರುವ ಮೊಬೈಲ್ ಟವರ್ ಮಾತ್ರ ಇಲ್ಲದೆ ಬರುವ ಪ್ರವಾಸಿಗರಿಗೆ, ಸುತ್ತಮುತ್ತಲ ಹಳ್ಳಿ, ಕುಗ್ರಾಮಗಳ ಗ್ರಾಮಸ್ಥರಿಗೆ ತೀವ್ರ ತೊಂದರೆಯಾಗಿದೆ. ತಾಲೂಕಿನ ಬಹುತೇಕ ಗ್ರಾಮಗಳಲ್ಲಿ ಮೊಬೈಲ್ ಟವರ್ ಗಳಿದ್ದರೂ ಸಿರಿಮನೆ ಗ್ರಾಮ ಪ್ರಸಿದ್ಧ ಸಿರಿಮನೆ ಫಾಲ್ಸ್ ಹೊಂದಿರುವ ಪ್ರವಾಸಿ ತಾಣವಾಗಿದ್ದರೂ ಇಲ್ಲಿಗೊಂದು ಮೊಬೈಲ್ ಟವರ್ ನಿರ್ಮಾಣಕ್ಕೆ ಯಾವುದೇ ಇಲಾಖೆಯಾಗಲೀ, ಜನಪ್ರತಿನಿದಿಗಳಾಗಲೀ, ಸರ್ಕಾರವಾಗಲೀ ಮುಂದಾಗದಿರುವುದು ಅಚ್ಚರಿಯೇ ಸರಿ.

ವರ್ಷವಿಡೀ ಇಲ್ಲಿ ಜಲಪತಾದಲ್ಲಿ ನೀರು ಸದಾ ಬೋರ್ಗರೆಯುತ್ತಾ ಧುಮುಕುತ್ತಿದೆ. ಇಲ್ಲಿನ ವಿಹಂಗಮ ನೋಟ ವೀಕ್ಷಸಲು ರಾಜ್ಯದ ವಿವಿಧೆಡೆಗಳಿಂದ ಪ್ರವಾಸಿಗರು ಮಳೆಗಾಲ, ಸುಡು ಬಿಸಿಲ ಬೇಸಿಗೆ ಎನ್ನದೇ ಭೇಟಿ ನೀಡುತ್ತಲೇ ಇರುತ್ತಾರೆ. ದಕ್ಷಿಣ ಕನ್ನಡ, ಉಡುಪಿ, ಕೊಡಗು, ಶಿವಮೊಗ್ಗ, ಚಿಕ್ಕಮಗಳೂರು ಸೇರಿದಂತೆ ಧಾರ್ಮಿಕ ಕ್ಷೇತ್ರ ಶೃಂಗೇರಿಗೆ ಭೇಟಿ ನೀಡುವ ಪ್ರವಾಸಿಗರು ಇಲ್ಲಿಗೂ ಬರುತ್ತಾರೆ.

ಯಡದಳ್ಳಿ ಗ್ರಾಮ ವ್ಯಾಪ್ತಿಗೆ ಒಳಪಡುವ ಸಿರಿಮನೆ ಗ್ರಾಮದ ಸುತ್ತಮುತ್ತ ಮಘೆಬೈಲು,ಮಾಲ್ ಸಂಪಿಗೆ, ಸಿಂದೋಡಿ, ಕಿತ್ಲೆಮನೆ ಕೊಡಿಗೆ, ಹುಲುಗಾರುಬೈಲು ಸೇರಿದಂತೆ ಅನೇಕ ಗ್ರಾಮಗಳಿವೆ. ಗ್ರಾಮಸ್ಥರು ಹಲವು ವರ್ಷಗಳಿಂದ ಮೊಬೈಲ್ ಟವರ್ ನಿರ್ಮಾಣಕ್ಕಾಗಿ ಮನವಿ ಮಾಡುತ್ತಲೇ ಬರುತ್ತಿದ್ದಾರೆ. ಸುತ್ತಮುತ್ತಲ ಅನೇಕ ಹಳ್ಳಿಗಳಿಗೆ ಓಡಾಡಲು ಸರಿಯಾದ ರಸ್ತೆಯೂ ಇಲ್ಲ. ಸೇತುವೆಗಳು ಇಲ್ಲ. ಕಾಲುದಾರಿ, ಹಳ್ಳ, ಕಾಲು ಸಂಕಗಳನ್ನು ದಾಟಿ ಓಡಾಡುವ ದಯನೀಯ ಸ್ಥಿತಿ.ಆದರೂ ತುರ್ತು ಸೇವೆಗೆ ಮೊಬೈಲ್ ನೆಟವರ್ಕ್ ಇಲ್ಲದೇ ಪರದಾಡುವ ಪರಿಸ್ಥಿತಿ ಇವರದು.

ನೆಟ್‌ವರ್ಕ್ ಸಮಸ್ಯೆಯಿಂದ ಪರದಾಡುತ್ತಿರುವ ಸ್ಥಳೀಯರು

ಇನ್ನು ಕಿಗ್ಗಾದಿಂದ ಸುಮಾರು ಮೂರು ಕಿಲೋಮೀಟರ್ ಇರುವ ಮಾರ್ಗದುದ್ದಕ್ಕೂ ನೆಟ್ ವರ್ಕ್ ಇಲ್ಲದಿರುವುದರಿಂದ ಕಿರಿದಾದ ರಸ್ತೆ,ಅಪಾಯಕಾರಿ ತಿರುವುಗಳಿಂದ ಕೂಡಿದ್ದು ಅಪಘಾತ , ಇತರೆ ತೊಂದರೆಗಳು ಉಂಟಾದರೆ ಅಗತ್ಯ ತುರ್ತು ಸೇವೆಗೂ ಸಂಪರ್ಕ ಸಿಗದೆ ಸಾಕಷ್ಟು ಬಾರಿ ಪರದಾಡಿದ ನಿದರ್ಶನಗಳು ಉಂಟು. ಆದರೂ ಇದನ್ನು ಯಾರು ಗಂಭೀರವಾಗಿ ಪರಿಗಣಿಸುತ್ತಿಲ್ಲ.

ಸಮೀಪದ ಕಿಗ್ಗಾ ಗ್ರಾಮವಿದ್ದು ಇದೂ ಜಿಲ್ಲೆಯ ಪ್ರಸಿದ್ಧ ಧಾರ್ಮಿಕ ಕ್ಷೇತ್ರಗಳಲ್ಲಿ ಒಂದಾಗಿದೆ. ಮಲೆನಾಡಿನ ಪ್ರಸಿದ್ಧ ಮಳೆ ದೇವರು ಎಂದೇ ಪ್ರಖ್ಯಾತಿಯ ಶ್ರೀ ಋಷ್ಯಶೃಂಗೇಶ್ವರ ಸ್ವಾಮಿ ದೇವಾಲಯಕ್ಕೂ ವಿವಿಧೆಡೆಗಳಿಂದ ಪ್ರವಾಸಿಗರು ಭೇಟಿ ನೀಡುತ್ತಾರೆ.ಇದೂ ಕೂಡ ನೆಟ್ ವರ್ಕ್ ಸಮಸ್ಯೆಯಿಂದ ಹೊರತಾಗಿಲ್ಲ. ಇಲ್ಲಿ ನಾಡಕಚೇರಿ, ನೆಮ್ಮದಿ ಕೇಂದ್ರ,ಗ್ರಾಮ ಒನ್ ಕೇಂದ್ರಗಳಿದ್ದು ಅಗತ್ಯ ಕೆಲಸ ಕಾರ್ಯಗಳಿಗೆ ಬರುವ ಜನರು ಒಟಿಪಿಗಾಗಿ ಪರದಾಡಬೇಕಿದೆ. ನಾಲ್ಕೈದು ಕಿಲೋ ಮೀಟರ್ ದೂರದ ನೆಮ್ಮಾರು,ಗಂಡಘಟ್ಟ ಗ್ರಾಮಗಳಲ್ಲಿರುವ ಟವರ್ ಗಳಿಂದ ಒಮ್ಮೊಮ್ಮೊ ಸಿಗ್ನಲ್ ಸಿಗುವುದೇ ಪುಣ್ಯವಾಗಿದೆ.

ಸಿರಿಮನೆ ಪ್ರಸಿದ್ಧ ಪ್ರವಾಸಿ ತಾಣವಾಗಿರುವುದರಿಂದ ಪ್ರವಾಸಿಗರ ಅನುಕೂಲ ದೃಷ್ಠಿಯಿಂದ, ಸುತ್ತಮುತ್ತಲ ಹಳ್ಳಿ,ಕುಗ್ರಾಮಗಳ ಗ್ರಾಮಸ್ಥರಿಗೆ ತುರ್ತು ಸೇವೆ ಅವಷ್ಯಕತೆ ಹಿನ್ನೆಯಿಂದ ಸಂಬಂಧಪಟ್ಟ ಇಲಾಖೆ, ಜನಪ್ರತಿನಿದಿಗಳು, ಸರ್ಕಾರ ಕೂಡಲೇ ತುರ್ತಾಗಿ ಇಲ್ಲಿಗೊಂದು ಮೊಬೈಲ್ ಟವರ್ ನಿರ್ಮಾಣಕ್ಕೆ ಮುಂದಾಗಬೇಕಿದೆ.

ಮೊಬೈಲ್ ಟವರ್ ನಿರ್ಮಾಣ ಮಾಡಿ.

ಇದು ಪ್ರಸಿದ್ಧ ಪ್ರವಾಸಿ ತಾಣವಾಗಿದ್ದರೂ ಇಲ್ಲಿಗೆ ಅಗತ್ಯವಾಗಿ ಬೇಕಾದ ಮೊಬೈಲ್ ಟವರ್ ನಿರ್ಮಾಣ ಮಾಡಿಲ್ಲ. ಸುತ್ತಮುತ್ತಲ ಗ್ರಾಮಸ್ಥರು ಅನೇಕ ವರ್ಷಗಳಿಂದ ಮನವಿ ಮಾಡುತ್ತಲೇ ಬಂದಿದ್ದಾರೆ. ಇನ್ನಾದರೂ ಗಂಭೀರವಾಗಿ ಪರಿಗಣಿಸಿ ಮೊಬೈಲ್ ಟವರ್ ನಿರ್ಮಿಸಬೇಕು.

-ಸುನಿಲ್ ಸಿರಿಮನೆ

ಟೈರ್ ಬ್ಲಾಸ್ಟ್ ಆಗಿ ನಿಯಂತ್ರಣ ತಪ್ಪಿ ಕೆರೆಗೆ ಬಿದ್ದ ಮೂವರು ಪ್ರಯಾಣಿಸುತ್ತಿದ್ದ ಕಾರ್

Kannadaprabha News — Mon, 05 Oct 2026 07:30:45 +0530

ಚಿಕ್ಕಮಗಳೂರು: ಚಲಿಸುತ್ತಿದ್ದ ಕಾರಿನ ಟೈರ್ ಏಕಾಏಕಿ ಬ್ಲಾಸ್ಟ್ ಆಗಿ ಚಾಲಕನ ನಿಯಂತ್ರಣ ತಪ್ಪಿದ ಪರಿಣಾಮ ಕಾರೊಂದು ನಗರದ ಕೋಟೆಕೆರೆಯೊಳಗೆ ಬಿದ್ದ ಘಟನೆ ಭಾನುವಾರ ಮಧ್ಯಾಹ್ನ ನಡೆದಿದೆ. ಕಾರಿನಲ್ಲಿದ್ದ ಮೂವರು ಅದೃಷ್ಟವಶಾತ್ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ಚಿಕ್ಕಮಗಳೂರು ನಗರದ ಕೋಟೆಕೆರೆ ರಸ್ತೆಯಲ್ಲಿ ಕಾರು ಸಂಚರಿಸುತ್ತಿದ್ದ ವೇಳೆ ಏಕಾಏಕಿ ಟೈರ್ ಬ್ಲಾಸ್ಟ್ ಆಗಿದೆ. ಇದರಿಂದ ಚಾಲಕನ ನಿಯಂತ್ರಣ ತಪ್ಪಿದ ಕಾರು ರಸ್ತೆ ಬದಿ ವಿದ್ಯುತ್ ದೀಪದ ಕಂಬಕ್ಕೆ ರಭಸವಾಗಿ ಡಿಕ್ಕಿ ಹೊಡೆದಿದೆ. ಡಿಕ್ಕಿಯ ರಭಸಕ್ಕೆ ವಿದ್ಯುತ್ ಕಂಬ ಮುರಿದು ರಸ್ತೆಯ ಮೇಲೆ ಬಿದ್ದಿದ್ದು, ಬಳಿಕ ಕಾರು ಕೆರೆಯ ಸುರಕ್ಷತೆಗೆ ಅಳವಡಿಸಿದ್ದ ಕಬ್ಬಿಣದ ತಡೆಬೇಲಿಗೆ ಡಿಕ್ಕಿ ಹೊಡೆದು ಅದನ್ನು ಮುರಿದುಕೊಂಡು ಕೋಟೆಕೆರೆಯೊಳಗೆ ಬಿದ್ದಿದೆ.

ಸ್ಥಳೀಯರಿಂದ ರಕ್ಷಣೆ

ಕಾರು ಕೆರೆಗೆ ಬಿದ್ದಿರುವುದನ್ನು ಗಮನಿಸಿದ ಸ್ಥಳೀಯರು ತಕ್ಷಣ ನೆರವಿಗೆ ಧಾವಿಸಿದ್ದಾರೆ. ಕಾರಿನಲ್ಲಿದ್ದ ಮೂವರನ್ನು ಸುರಕ್ಷಿತ ವಾಗಿ ಹೊರಕ್ಕೆ ಕರೆತರಲಾಗಿದ್ದು, ಅದೃಷ್ಟವಶಾತ್ ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ. ಗಾಯಗೊಂಡಿರುವವರನ್ನು ಸ್ಥಳೀಯರು ವಿಚಾರಿಸಿ ನೆರವು ನೀಡಿದ್ದಾರೆ.

ಘಟನೆಯ ಮಾಹಿತಿ ತಿಳಿದು ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಕ್ರೇನ್‌ ಸಹಾಯದಿಂದ ಕೆರೆಯೊಳಗೆ ಬಿದ್ದಿದ್ದ ಕಾರನ್ನು ಮೇಲಕ್ಕೆತ್ತಿದರು. ಅಪಘಾತದ ಪರಿಣಾಮ ರಸ್ತೆ ಮೇಲೆ ವಿದ್ಯುತ್ ಕಂಬ ಬಿದ್ದಿದ್ದರಿಂದ ಕೆಲಕಾಲ ವಾಹನ ಸಂಚಾರಕ್ಕೂ ಅಡಚಣೆ ಉಂಟಾಯಿತು.

ಇದೇ ಮಾರ್ಗದಲ್ಲಿ ತೆರಳುತ್ತಿದ್ದ ವಿಧಾನಪರಿಷತ್ ಸದಸ್ಯ ಸಿ.ಟಿ.ರವಿ ಅವರು ಘಟನೆ ಗಮನಿಸಿ ಗಾಯಾಳುಗಳ ಯೋಗಕ್ಷೇಮ ವಿಚಾರಿಸಿದರು. ಬಳಿಕ ಪೊಲೀಸರು ಹಾಗೂ ಸ್ಥಳೀಯರಿಂದ ಘಟನೆಯ ವಿವರ ಪಡೆದರು.

ಚಿಕ್ಕಮಗಳೂರು ನಗರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಘಟನೆ ನಡೆದಿದ್ದು, ಪೊಲೀಸರು ಪರಿಶೀಲನೆ ನಡೆಸಿ ಮುಂದಿನ ಕ್ರಮ ಕೈಗೊಂಡಿದ್ದಾರೆ.

ದಿಢೀರ್ ಕುಸಿದ ಅಡಕೆ ಧಾರಣೆ: ಬರಗಾಲದಲ್ಲಿಯೂ ಕಷ್ಟಪಟ್ಟು ಬೆಳೆದ ಅಡಿಕೆ ಬೆಲೆ ₹12 ಸಾವಿರ ಕುಸಿತ

Sathish Kumar KH — Sun, 04 Oct 2026 09:07:30 +0530

ವರದಿ-ಯಡಗೆರೆ ಮಂಜುನಾಥ್

ಚಿಕ್ಕಮಗಳೂರು (ಅ.04): ಮಲೆನಾಡು ರೈತರ ಆರ್ಥಿಕ ಬೆಳೆ ಹಾಗೂ ಜೀವನಾಡಿಯಾಗಿರುವ ಅಡಕೆಗೆ ಸದಾ ಸಂಕಷ್ಟ ಎದುರಾಗುತ್ತಲೇ ಇದೆ. ಈ ಬಾರಿ ಅಡಕೆ ರಾಶಿ ಇಡಿಗೆ ಕಳೆದ ವರ್ಷಕ್ಕಿಂತ ₹12 ಸಾವಿರ ಕುಸಿತ ಕಂಡು ಬೆಳೆಗಾರರು ಕಂಗಾಲಾಗಿದ್ದಾರೆ.

ಕಳೆದ ವರ್ಷ ಸೆಪ್ಟೆಂಬರ್, ಅಕ್ಟೋಬರ್ ನಲ್ಲಿ ರಾಶಿ ಇಡಿಗೆ ₹63 ರಿಂದ 65 ಸಾವಿರದವರೆಗೆ ಮಾರಾಟವಾಗಿದ್ದ ಅಡಕೆ ನಂತರದ ತಿಂಗಳಲ್ಲಿ ಧಾರಣೆ ನಿಧಾನವಾಗಿ ಇಳಿಯುತ್ತಾ ₹50- ₹55 ಸಾವಿರಕ್ಕೆ ಮಾರಾಟವಾಗುತ್ತಿತ್ತು. ಆದರೆ, ಕಳೆದ 2 ತಿಂಗಳಿಂದ ಅಡಕೆ ಮತ್ತಷ್ಟು ಕುಸಿದಿದ್ದು ಪ್ರಸ್ತುತ ರಾಶಿ ಇಡಿ ₹40-₹45 ಸಾವಿರಕ್ಕೆ ಮಾತ್ರ ಮಾರಾಟವಾಗುತ್ತಿದೆ. ಕಳೆದ ವರ್ಷ ರಾಶಿ ಇಡಿ ₹50ರಿಂದ ₹55 ಸಾವಿರಕ್ಕೆ ಬಂದಾಗ ₹60 ಸಾವಿರ ಬರಲಿದೆ ಎಂದು ಹಲವಾರು ಬೆಳೆಗಾರರು ಅಡಕೆ ಮಾರಾಟ ಮಾಡದೆ ಕಾಯುತ್ತಾ ಕುಳಿತಿದ್ದರು. ಈಗ ಮಾರಿದರೆ ಲಕ್ಷಾಂತರ ನಷ್ಟವಾಗಲಿದೆ.

ಮಲೆನಾಡು ಭಾಗದ ಕೊಪ್ಪ, ಶೃಂಗೇರಿ ತಾಲೂಕುಗಳಲ್ಲಿ ಅಡಕೆಗೆ ಹಳದಿ ಎಲೆ ರೋಗ ಬಂದು ಸಂಪೂರ್ಣ ನಾಶವಾಗಿದೆ. ಇದರ ಜೊತೆಗೆ ಕಳೆದ 5 ವರ್ಷದಿಂದ ಎಲೆ ಚುಕ್ಕಿ ರೋಗ ಕಾಣಿಸಿಕೊಂಡು ಗಾಯದ ಮೇಲೆ ಬರೆ ಹಾಕಿದಂತಾಗಿತ್ತು. 2011 ರಲ್ಲಿ ಅಡಕೆ ಕ್ವಿಂಟಲ್ ಗೆ ₹12 ರಿಂದ ₹18 ಸಾವಿರ ಮಾತ್ರ ಇತ್ತು. 2012 ರ ನಂತರ ಅಡಕೆಗೆ ಚಿನ್ನದ ಬೆಲೆ ಬಂದು ಬೆಳೆಗಾರರು ಸಂಭ್ರಮದಲ್ಲಿದ್ದರು. ರೈತರು ಸದ್ಯಕ್ಕೆ ಎಲ್ಲಾ ಬೆಳೆಗಳನ್ನು ಬಿಟ್ಟು ಅಡಕೆ ಬೆಳೆ ಮಾತ್ರ ನೆಚ್ಚಿಕೊಂಡಿದ್ದಾರೆ. ಬಹುತೇಕ ಉತ್ತರ ಭಾರತದ ರಾಜ್ಯಗಳಲ್ಲಿರುವ ಪಾನ್ ಮಸಾಲ ಕಂಪನಿಗಳೇ ಅಡಕೆಗೆ ಉತ್ತಮ ಧಾರಣೆ ಬರಲು ಕಾರಣವಾಗಿವೆ.

ಅಡಕೆ ದರ ಕುಸಿತಕ್ಕೆ ಕಾರಣಗಳೇನೇನು?

1. ಕಳೆದ ಅಕ್ಟೋಬರ್ ವೇಳೆಗೆ ಇಡೀ ಮಾರುಕಟ್ಟೆಯಲ್ಲಿ ಅಡಕೆ ದಾಸ್ತಾನೇ ಇರಲಿಲ್ಲ. ಹಾಗಾಗಿ ಪಾನ್ ಮಸಾಲ ಕಂಪನಿಗಳು ಡಿಮ್ಯಾಂಡ್ ಮಾಡಿ ಉತ್ತಮ ಧಾರಣೆ ನೀಡಿ ಅಡಕೆ ಖರೀದಿಸಿವೆ.

2. ಈ ವರ್ಷ ಅಡಕೆ ಗುಣಮಟ್ಟ ಕಡಿಮೆಯಾಗಿದೆ ಎಂದು ಪಾನ್ ಮಸಾಲ ಕಂಪನಿಗಳು ಧಾರಣೆ ಇಳಿಸುತ್ತಿವೆ. ರಾಶಿ ಇಡಿ ಅಡಕೆಯನ್ನು ಸರಿಯಾಗಿ ಬೇಯಿಸಿ ಒಣಗಿಸದೆ ಇರುವುದು, ರಾಶಿ ಇಡಿಗೆ ಗೊರಬಲು ಅಡಕೆ ಸಿಪ್ಪೆ ತೆಗೆದು ಬೇಯಿಸಿ ರಾಶಿ ಇಡಿಗೆ ಮಿಕ್ಸ್ ಮಾಡುವುದು, ಶಿರಸಿ, ಸಿದ್ದಾಪುರ, ಹಳೇ ಮೈಸೂರು ಭಾಗದ ಚಾಲಿ ಅಡಕೆಗೆ ಕಲರ್ ಹಾಕಿ ರಾಶಿ ಇಡಿಗೆ ಮಿಕ್ಸ್ ಮಾಡುತ್ತಿದ್ದು ಅಡಕೆ ಗುಣಮಟ್ಟ ಕಡಿಮೆಯಾಗುತ್ತಿದೆ ಎಂದು ಕಂಪನಿಗಳು ದೂರುತ್ತಿವೆ.

3. ಈ ಹಿಂದೆ ಪಾನ್ ಮಸಾಲಕ್ಕೆ ಎಕ್ಸೈಸ್‌ ಸುಂಕ ₹28 ಇತ್ತು. ಈಗ ₹40 ಕ್ಕೆ ಏರಿಸಲಾಗಿದೆ.

4. ರೈತರು, ಮಾಮ್ ಕೋಸ್, ಕ್ಯಾಂಪ್ಕೋ, ಅಡಕೆ ಮಂಡಿಗಳು, ವ್ಯಾಪಾರಿಗಳು ಸೇರಿ ಅಡಕೆ ಮಾರುಕಟ್ಟೆಯಲ್ಲಿ ಬರುವ ವಾರ್ಷಿಕ ಅಡಕೆಯಲ್ಲಿ ಶೇ. 30 ರಿಂದ 40 ರಷ್ಟು ಅಡಕೆ ದಾಸ್ತಾನು ಇದೆ. ಅಂದಾಜು 30 ಸಾವಿರ ಅಡಕೆ ಮೂಟೆ ಉಳಿದಿವೆ.

5. 50 ವರ್ಷಗಳ ಹಿಂದೆ ಮಲೆನಾಡು ಭಾಗವಾದ ಶಿವಮೊಗ್ಗ, ಚಿಕ್ಕಮಗಳೂರು, ಉತ್ತರ ಕನ್ನಡ ಜಿಲ್ಲೆಗೆ ಅಡಕೆ ಸೀಮಿತವಾಗಿತ್ತು.ಈಗ ಬಯಲು ಸೀಮೆ ಜಿಲ್ಲೆಗಳಿಗೆ ಅಡಕೆ ವಿಸ್ತರಣೆಯಾಗುತ್ತಾ ರಾಜ್ಯದ 10 ಜಿಲ್ಲೆಗಳಲ್ಲಿ ಅಡಕೆ ಬೆಳೆಯ ಲಾಗುತ್ತದೆ. ಬೇಡಿಕೆಗಿಂತ ಜಾಸ್ತಿ ಅಡಕೆ ಮಾರುಕಟ್ಟೆಗೆ ಬರುತ್ತಿರುವುದು ಸಹ ಅಡಕೆ ಬೆಲೆ ಕುಸಿಯಲು ಕಾರಣ.

6. ಅಡಕೆಗೆ ಕೃತಕ ಬಣ್ಣ ಹಾಕದೆ ನೈಸರ್ಗಿಕವಾಗಿ ಸಂಸ್ಕರಣೆ ಮಾಡಬೇಕು ಎಂಬುದು ಈ ಕಂಪನಿಗಳ ಬೇಡಿಕೆ.

7. ರಾಶಿ ಇಡಿಯಲ್ಲಿ ಶೇ.30 ರಷ್ಟು ಚಿಕಣಿ ( ಕಪ್ಪು ಉಂಡೆ) ಇರಬೇಕು. ಆದರೆ, ಈಗ ತಯಾರಿಸುತ್ತಿರುವ ಅಡಕೆಯಲ್ಲಿ ಚಿಕಣಿ ಇರುವುದಿಲ್ಲ. ಇದೂ ಅಡಕೆ ಧಾರಣೆ ಇಳಿಕೆಗೆ ಕಾರಣ.

----

ಬೆಳೆಗಾರರು ಉತ್ತಮ ಗುಣ ಮಟ್ಟದ ಅಡಕೆ ತಯಾರಿಸಬೇಕು. ಈ ವರ್ಷ ಮಾರುಕಟ್ಟೆಯಲ್ಲಿ ಶೇ. 40 ರಷ್ಟು ಅಡಕೆ ದಾಸ್ತಾನು ಇರುವುದು ಧಾರಣೆ ಕುಸಿತಕ್ಕೆ ಮುಖ್ಯ ಕಾರಣ. ರೈತರು, ಎಪಿಎಂಸಿ, ವ್ಯಾಪಾರಿಗಳು, ಸಹಕಾರ ಸಂಸ್ಥೆಗಳಲ್ಲಿ ಅಡಕೆ ದಾಸ್ತಾನು ಇದೆ.

-ಯಡಗೆರೆ ಸುಬ್ರಮಣ್ಯ, ವೃತ್ತಿ ಪರ ನಿರ್ದೇಶಕ, ರಾಜ್ಯ ಅಡಕೆ ಮಾರಾಟ ಸಹಕಾರ ಸಂಘಗಳ ಮಹಾ ಮಂಡಳ

----

ಅಡಕೆ ರಾಶಿ ಇಡಿಗೆ ಕನಿಷ್ಠ ₹50 ಸಾವಿರ ಬರಬೇಕು. ಈಗಾಗಲೇ ಕೃಷಿ ಕೂಲಿ ಕಾರ್ಮಿಕರ ಧಾರಣೆ, ಅಡಕೆಗೆ ಕೊಳೆ ಬಾರದಂತೆ ಸಿಂಪಡಿಸುವ ಬೋರ್ಡೋ ಮಿಶ್ರಣದ ಖರ್ಚು ಗಗನಕ್ಕೇರಿದೆ. ಇನ್ನಷ್ಟು ಉತ್ತಮ ಧಾರಣೆ ಬರಬಹುದು ಎಂದು ಬಹುತೇಕ ಅಡಕೆ ಬೆಳೆಗಾರರು ದಾಸ್ತಾನು ಮಾಡಿದ್ದಾರೆ. ರೈತರು ಅಡಕೆ ಮಾರಾಟ ಮಾಡದೆ ಇಟ್ಟುಕೊಂಡಿದ್ದಾರೆ. ಸರ್ಕಾರ ಪಾನ್ ಮಸಾಲಕ್ಕೆ ತೆರಿಗೆ ಏರಿಸಿದೆ. ಶಿವಮೊಗ್ಗ ಮಾಮ್ ಕೋಸ್ ಸಂಸ್ಥೆಯಲ್ಲೇ ಕಳೆದ ವರ್ಷಕ್ಕಿಂತ 3 ಪಟ್ಟುಹೆಚ್ಚು ಅಡಕೆ ದಾಸ್ತಾನು ಇದೆ. ಸದ್ಯಕ್ಕೆ ಅಡಕೆ ಧಾರಣೆ ಏರುವ ಲಕ್ಷಣ ಇಲ್ಲ.

-ಕೃಪಾಲ್ ಗೌಡ, ಅಡಕೆ ಬೆಳೆಗಾರ, ಮುತ್ತಿನಕೊಪ್ಪ

ಕಾಫಿನಾಡಲ್ಲಿ ಬೆಳ್ಳಂಬೆಳಗ್ಗೆ ಭರ್ಜರಿ ಮಳೆ: ಎರಡು ತಿಂಗಳ ಬಳಿಕ ಮಲೆನಾಡಿಗೆ ವರುಣನ ಎಂಟ್ರಿ, ರೈತರ ಮೊಗದಲ್ಲಿ ಸಂತಸ

Sathish Kumar KH — Mon, 05 Oct 2026 10:30:17 +0530

ಮುಂಗಾರು ಮಳೆ ಕೈಕೊಟ್ಟಿದ್ದರಿಂದ ಕಂಗಾಲಾಗಿದ್ದ ಚಿಕ್ಕಮಗಳೂರು ಜಿಲ್ಲೆಯ ಜನರಿಗೆ ವರುಣದೇವ ಸಿಹಿಸುದ್ದಿ ನೀಡಿದ್ದಾನೆ. ಎರಡು ತಿಂಗಳ ಬಳಿಕ ಜಿಲ್ಲೆಯಾದ್ಯಂತ ಭರ್ಜರಿ ಮಳೆಯಾಗಿದ್ದು, ಕಾಫಿ, ಮೆಣಸು ಮತ್ತು ಅಡಿಕೆ ಬೆಳೆಗಾರರಲ್ಲಿ ಮಂದಹಾಸ ಮೂಡಿದೆ. ರಸ್ತೆಗಳು ಜಲಾವೃತ, ಕಾಲುವೆಗಳಲ್ಲಿ ನೀರು ಹರಿಯುತ್ತಿದೆ.

ಚಿಕ್ಕಮಗಳೂರು (ಅ.05): ಮುಂಗಾರು ಮಳೆ ಕೈಕೊಟ್ಟ ಹಿನ್ನೆಲೆಯಲ್ಲಿ ಕಂಗಾಲಾಗಿದ್ದ ಕಾಫಿನಾಡು ಚಿಕ್ಕಮಗಳೂರು ಜಿಲ್ಲೆಯ ಮಲೆನಾಡು ಭಾಗದ ಜನರಿಗೆ ವರುಣದೇವ ಭರ್ಜರಿ ಸಿಹಿಸುದ್ದಿ ನೀಡಿದ್ದಾನೆ. ಸುಮಾರು ಎರಡು ತಿಂಗಳ ಸುದೀರ್ಘ ವಿರಾಮದ ಬಳಿಕ ಜಿಲ್ಲೆಯಾದ್ಯಂತ ಬೆಳ್ಳಂಬೆಳಗ್ಗೆಯೇ ಭರ್ಜರಿ ಮಳೆಯಾಗಿದ್ದು, ರೈತರ ಮೊಗದಲ್ಲಿ ಮಂದಹಾಸ ಮೂಡಿದೆ.

ಮಲೆನಾಡು ಭಾಗದ ಪ್ರಮುಖ ತಾಲೂಕುಗಳಾದ ಶೃಂಗೇರಿ, ಎನ್.ಆರ್.ಪುರ, ಮೂಡಿಗೆರೆ, ಕಳಸ ಹಾಗೂ ಕೊಪ್ಪದಲ್ಲಿ ಮುಂಜಾನೆಯಿಂದಲೇ ಉತ್ತಮ ಮಳೆಯಾಗುತ್ತಿದೆ. ಚಿಕ್ಕಮಗಳೂರು ನಗರದಲ್ಲಿಯೂ ಬೆಳಗ್ಗೆಯಿಂದ ನಿರಂತರವಾಗಿ ಮಳೆ ಸುರಿಯುತ್ತಿದ್ದು, ತಂಪಾದ ವಾತಾವರಣ ನಿರ್ಮಾಣವಾಗಿದೆ. ನಿರಂತರವಾಗಿ ಸುರಿಯುತ್ತಿರುವ ಮಳೆಯಿಂದಾಗಿ ರಸ್ತೆಗಳು ಜಲಾವೃತಗೊಂಡಿದ್ದು, ಬತ್ತಿ ಹೋಗಿದ್ದ ಕಾಲುವೆಗಳಲ್ಲಿ ನೀರು ಹರಿಯಲಾರಂಭಿಸಿದೆ.

ಆಕಾಶ ನೋಡುತ್ತಿದ್ದ ಬೆಳೆಗಾರರು ಫುಲ್ ಖುಷ್:

ಈ ಬಾರಿಯ ಮುಂಗಾರು ಹಂಗಾಮಿನಲ್ಲಿ ಮಲೆನಾಡಿಗೆ ಮಳೆರಾಯ ಸಂಪೂರ್ಣವಾಗಿ ಕೈಕೊಟ್ಟಿದ್ದ. ಮಳೆಗಾಲದಲ್ಲೇ ಮಳೆ ಇಲ್ಲದೆ ಕಾಫಿ, ಮೆಣಸು, ಅಡಿಕೆ ಬೆಳೆಗಾರರು ಹಾಗೂ ರೈತರು ಆಕಾಶ ನೋಡುವಂತಾಗಿತ್ತು. ಬೆಳೆಗಳು ಒಣಗುವ ಭೀತಿಯಲ್ಲಿದ್ದ ಕೃಷಿಕರಿಗೆ ಇಂದಿನ ಮುಂಜಾನೆಯ ಮಳೆ ಸಂಜೀವಿನಿಯಂತೆ ಪರಿಣಮಿಸಿದೆ. ಬೆಳಗ್ಗೆಯಿಂದ ಸುರಿಯುತ್ತಿರುವ ಮಳೆಯನ್ನು ಕಂಡು ಮಲೆನಾಡಿಗರು ಹರ್ಷ ವ್ಯಕ್ತಪಡಿಸಿದ್ದಾರೆ.

ಒಂದೆಡೆ ಮಲೆನಾಡು ಭಾಗದಲ್ಲಿ ಉತ್ತಮ ಮಳೆಯಾಗುತ್ತಿದ್ದರೆ, ಇನ್ನೊಂದೆಡೆ ಬಯಲುಸೀಮೆ ಭಾಗಗಳಾದ ಕಡೂರು, ತರೀಕೆರೆ ಹಾಗೂ ಅಜ್ಜಂಪುರ ಭಾಗದಲ್ಲಿ ಮಳೆಯ ಮುನ್ಸೂಚನೆಯಾಗಿ ಮೋಡ ಕವಿದ ವಾತಾವರಣ ನಿರ್ಮಾಣವಾಗಿದೆ. ಒಟ್ಟಾರೆಯಾಗಿ ಬಹಳ ದಿನಗಳ ನಂತರ ಬಂದ ಮಳೆ ಮಲೆನಾಡಿಗೆ ಮರುಜೀವ ನೀಡಿದೆ.

'12 ವರ್ಷದ ಬಳಿಕ ಅರಳಿರುವ ನೀಲಕುರಿಂಜಿ' ಅನ್ನೋ ವಿಡಿಯೋ ನೋಡಿ ಚಿಕ್ಕಮಗಳೂರಿಗೆ ಹೋಗ್ತಿದ್ದೀರಾ? ಅದಕ್ಕೂ ಮುನ್ನ ಈ ಸುದ್ದಿ ನೋಡಿ

Santosh Naik — Sat, 03 Oct 2026 15:43:41 +0530

ಚಿಕ್ಕಮಗಳೂರು (ಅ.3): ಜಿಲ್ಲೆಯ ಪ್ರಸಿದ್ಧ ಚಂದ್ರದ್ರೋಣ ಪರ್ವತ ಶ್ರೇಣಿಯ ಮುಳ್ಳಯ್ಯನಗಿರಿ ಹಾಗೂ ಬಾಬಾಬುಡನ್‌ಗಿರಿ ಬೆಟ್ಟಗಳಲ್ಲಿ ಅಪರೂಪದ 'ನೀಲಕುರಿಂಜಿ' (Neelakurinji) ಹೂವುಗಳು ಕಣ್ಮನ ಸೆಳೆಯುವಂತೆ ಅರಳಿವೆ ಎಂಬ ಗಾಳಿ ಸುದ್ದಿಗೆ ಮರುಳಾಗಿ, ರಾಜ್ಯದ ವಿವಿಧ ಭಾಗಗಳಿಂದ ಆಗಮಿಸುತ್ತಿರುವ ನೂರಾರು ಪ್ರವಾಸಿಗರು ತೀವ್ರ ನಿರಾಶೆಯಿಂದ ಹಿಂತಿರುಗುತ್ತಿದ್ದಾರೆ. ಸೋಶಿಯಲ್‌ ಮಿಡಿಯಾದಲ್ಲಿ ಹಳೆಯ ವೀಡಿಯೋಗಳನ್ನು ಪ್ರಸ್ತುತ ಹರಿಬಿಡಲಾಗುತ್ತಿದ್ದು, ಇದನ್ನು ನಂಬಿ ಪ್ರವಾಸಿಗರು ಬೆಟ್ಟಗುಡ್ಡಗಳಿಗೆ ದಂಡೆತ್ತಿ ಬರುತ್ತಿದ್ದಾರೆ. ಆದರೆ, ಈ ವರ್ಷ ಬೆಟ್ಟಗಳಲ್ಲಿ ಅಂತಹ ಯಾವುದೇ ಬೃಹತ್ ಮಟ್ಟದ ನೀಲಕುರಿಂಜಿ ಹೂವುಗಳ ಸಮೃದ್ಧವಾಗಿ ಅರಳಿಲ್ಲ ಎಂದು ಅರಣ್ಯಾಧಿಕಾರಿಗಳು ಹಾಗೂ ಸಸ್ಯಶಾಸ್ತ್ರಜ್ಞರು ಸ್ಪಷ್ಟಪಡಿಸಿದ್ದಾರೆ.

ಪರ್ವತದ ಇಳಿಜಾರಿನುದ್ದಕ್ಕೂ ನೇರಳೆ ಬಣ್ಣದ ಹೂವುಗಳ ರತ್ನಗಂಬಳಿ ಹಾಸಿರುವುದನ್ನು ನೋಡಲು ಬಂದ ಪ್ರವಾಸಿಗರಿಗೆ ನಿರಾಶೆಯಾಗುತ್ತಿದ್ದರೆ, ಇನ್ನೊಂದೆಡೆ ಇದ್ದಕ್ಕಿದ್ದಂತೆ ಹೆಚ್ಚಿದ ಪ್ರವಾಸಿಗರ ದಟ್ಟಣೆಯಿಂದಾಗಿ ಪರಿಸರ ಸೂಕ್ಷ್ಮ ಪ್ರದೇಶಗಳಾದ ಶೋಲಾ ಅರಣ್ಯ ಹಾಗೂ ಹುಲ್ಲುಗಾವಲುಗಳ ಮೇಲೆ ತೀವ್ರ ಒತ್ತಡ ಉಂಟಾಗುತ್ತಿದೆ. ಅಧಿಕೃತ ಮೂಲಗಳಿಂದ ಮಾಹಿತಿ ದೃಢಪಡಿಸಿಕೊಂಡ ನಂತರವೇ ಪ್ರವಾಸ ಕೈಗೊಳ್ಳುವಂತೆ ತಜ್ಞರು ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ.

"ವೀಡಿಯೋ ನೋಡಿ ಬಂದೆವು, ಇಲ್ಲಿ ಏನೂ ಇಲ್ಲ!":

ಚಂದ್ರದ್ರೋಣ ಪರ್ವತ ಸಾಲಿನಲ್ಲಿ ನೇರಳೆ ಹೂವುಗಳನ್ನು ಕಣ್ತುಂಬಿಕೊಳ್ಳಲು ಮೈಸೂರಿನಿಂದ ಗೆಳೆಯರೊಂದಿಗೆ ಬಂದಿದ್ದ ಅರ್ಜುನ್ ಎಂಬ ಪ್ರವಾಸಿಗರು ತಮ್ಮ ಬೇಸರ ವ್ಯಕ್ತಪಡಿಸಿ, "ಸೋಶಿಯಲ್ ಮೀಡಿಯಾದಲ್ಲಿದ್ದ ಒಂದು ವೀಡಿಯೋ ನಮ್ಮನ್ನು ತಪ್ಪುದಾರಿಗೆಳೆಯಿತು. ನಮಗೆ ಈ ಭಾಗಕ್ಕೆ ಬರುವ ಯಾವುದೇ ಯೋಜನೆಯಿರಲಿಲ್ಲ, ಕೇವಲ ನೀಲಕುರಿಂಜಿ ಹೂವುಗಳನ್ನು ನೋಡಲೆಂದೇ ಬಂದಿದ್ದೆವು. ಆದರೆ ಇಲ್ಲಿಗೆ ಬಂದಾಗ ನಿರಾಶೆಯಾಯಿತು, ಮುಂದಿನ ಬಾರಿ ಪ್ರಯತ್ನಿಸುತ್ತೇವೆ" ಎಂದಿದ್ದಾರೆ.

ಶ್ರೀ ಗುರು ದತ್ತಾತ್ರೇಯ ಬಾಬಾಬುಡನ್ ಸ್ವಾಮಿ ದರ್ಗಾದಿಂದ ಗಿರಿಕಂಡದ ಗಾಳಿಕೆರೆಗೆ ಹೋಗುವ ರಸ್ತೆಯುದ್ದಕ್ಕೂ ಅಲ್ಲಲ್ಲಿ ಒಂದೊಂದು ಗಿಡಗಳಲ್ಲಿ ಕೆಲವೇ ಕೆಲವು ನೀಲಿ ಹೂವುಗಳು ಬಿಡಿಬಿಡಿಯಾಗಿ ಅರಳಿವೆಯೇ ಹೊರತು, ಇಡೀ ಬೆಟ್ಟ ಪ್ರದೇಶವನ್ನು ಆವರಿಸಿಲ್ಲ.

ನೀಲಕುರಿಂಜಿ ಅರಳುವುದು 12 ವರ್ಷಗಳಿಗೊಮ್ಮೆ ಮಾತ್ರ!

ವೈಜ್ಞಾನಿಕವಾಗಿ Strobilanthes kunthiana ಎಂದು ಕರೆಯಲ್ಪಡುವ ನೀಲಕುರಿಂಜಿ ಸಸ್ಯವು 12 ವರ್ಷಗಳಿಗೊಮ್ಮೆ ಮಾತ್ರ ಸಂಪೂರ್ಣವಾಗಿ ಅರಳುತ್ತದೆ. 2022 ರಲ್ಲಿ ಈ ಬೆಟ್ಟಗಳಲ್ಲಿ ಲಕ್ಷಾಂತರ ಸಂಖ್ಯೆಯಲ್ಲಿ ನೀಲಕುರಿಂಜಿ ಹೂವುಗಳು ಅರಳಿ ಇಡೀ ಪರ್ವತ ಪ್ರದೇಶವನ್ನು ನೇರಳೆ ಮಯವಾಗಿಸಿದ್ದವು. ಮತ್ತೆ ಅದೇ ಪ್ರಮಾಣದಲ್ಲಿ ಈ ಅಪರೂಪದ ಸೌಂದರ್ಯವನ್ನು ಕಣ್ತುಂಬಿಕೊಳ್ಳಬೇಕೆಂದರೆ ಪ್ರವಾಸಿಗರು ಇನ್ನು ಬರೋಬ್ಬರಿ 8 ವರ್ಷಗಳ ಕಾಲ ಕಾಯಲೇಬೇಕಾಗಿದೆ.

ಕೆಲವು ಕಿಡಿಗೇಡಿಗಳು ಬಿಡಿ ಗಿಡಗಳಲ್ಲಿ ಅರಳಿದ ಹೂವುಗಳನ್ನು ವೀಡಿಯೋ ಮಾಡಿ, ಅದಕ್ಕೆ ಹಳೆಯ ವೀಡಿಯೋಗಳನ್ನು ಜೋಡಿಸಿ ಸೋಶಿಯಲ್ ಮೀಡಿಯಾದಲ್ಲಿ ಹರಿಬಿಡುತ್ತಿರುವುದರಿಂದ ಈ ಗೊಂದಲ ನಿರ್ಮಾಣವಾಗಿದೆ. ಚಂದ್ರದ್ರೋಣ ಶ್ರೇಣಿಯಲ್ಲಿ ಬೀಡುಬಿಟ್ಟಿರುವ ಪರಿಸರವಾದಿಗಳು ಹಾಗೂ ಸಸ್ಯಶಾಸ್ತ್ರ ಸಂಶೋಧಕರ ಬಳಿ ಬರುವ ಪ್ರವಾಸಿಗರು ಹೂವುಗಳು ಎಲ್ಲಿವೆ ಎಂದು ವಿಚಾರಿಸುತ್ತಿದ್ದಾರೆ, ಆದರೆ ಅವರಿಗೆ ತೋರಿಸಲು ಅಲ್ಲಿ ಯಾವುದೇ ಹೂವುಗಳಿಲ್ಲ.

ದಾಖಲೆಗಳ ಪ್ರಕಾರ, 2006 ರಲ್ಲಿ ಈ ಬೆಟ್ಟಗಳು ಸಂಪೂರ್ಣವಾಗಿ ನೀಲಕುರಿಂಜಿಯಿಂದ ಆವೃತವಾಗಿದ್ದವು. ತದನಂತರ 2022 ರಲ್ಲಿ ಮಾಣಿಕ್ಯಧಾರ ಜಲಪಾತ ರಸ್ತೆ, ಸೀತಾಳಯ್ಯನಗಿರಿ ಹಾಗೂ ಕವಿಕಲ್ ಮಠದ ಬಳಿ ಅರಳಿತ್ತು. 2021 ರಲ್ಲಿ ಸೀತಾಳಯ್ಯನಗಿರಿಯ ಕೆಲವು ಭಾಗಗಳಲ್ಲಿ ಹಾಗೂ 2020 ರಲ್ಲಿ ಮೂಡಿಗೆರೆ ತಾಲೂಕಿನ ದೇವರ ಬೆಟ್ಟದಲ್ಲಿ ಭಾಗಶಃ ಅರಳಿತ್ತು.

ಅರಳಿರುವುದು ನೀಲಕುರಿಂಜಿ ಅಲ್ಲ, 'ಗುರಿಂಜೆ' ಹೂವು!

ಪ್ರಸ್ತುತ ಗಾಳಿಕೆರೆ ರಸ್ತೆಯಲ್ಲಿ ಅರಳಿರುವುದು ನೀಲಕುರಿಂಜಿ ಅಲ್ಲ, ಬದಲಾಗಿ 'ಗುರಿಂಜೆ' (Gurige) ಹೂವು ಎಂದು ನಿಸರ್ಗ ಪ್ರೇಮಿಗಳು ಸ್ಪಷ್ಟಪಡಿಸಿದ್ದಾರೆ. ವೈಜ್ಞಾನಿಕವಾಗಿ Strobilanthes heyneana Nees ಎಂದು ಕರೆಯಲಾಗುವ ಈ ಗುರಿಂಜೆ ಸಸ್ಯವು ಪ್ರತಿ ವರ್ಷವೂ ಅರಳುತ್ತದೆ. ಪ್ರಸ್ತುತ ಅರಳಿದ್ದ ಗುರಿಂಜೆ ಹೂವುಗಳು ಕೂಡ ಈಗ ಬಾಡಲು ಆರಂಭಿಸಿವೆ. ನೀಲಕುರಿಂಜಿ ಹುಡುಕಿಕೊಂಡು ಬಂದ ಪ್ರವಾಸಿಗರು ಈ ಗುರಿಂಜೆ ಹೂವುಗಳನ್ನೇ ನೋಡಿ ಹಿಂತಿರುಗುತ್ತಿದ್ದಾರೆ. "ನೀಲಕುರಿಂಜಿ ಅರಳಿದೆ ಎಂಬ ವೀಡಿಯೋ ನೋಡಿ ನಾನೂ ಬಂದಿದ್ದೆ. ಆದರೆ ಇಲ್ಲಿರುವುದು ನೀಲಕುರಿಂಜಿ ಅಲ್ಲ. ಇದು ಪ್ರತಿ ವರ್ಷವೂ ಅರಳುವ Strobilanthes heyneana Nees (ಗುರಿಂಜೆ) ಹೂವು" ಎಂದು ಪ್ರಕೃತಿ ತಜ್ಞ ಮಧು ಕುಮಾರ್ ತಿಳಿಸಿದ್ದಾರೆ.

ಭದ್ರೆಯ ಕೃಪೆಯಿಂದ ಕೋಡಿಬಿದ್ದ ಕುಕ್ಕಸಮುದ್ರ ಕೆರೆ; ರೈತರಿಂದ ಇಂದು ಬಾಗಿನ ಅರ್ಪಣೆ!

Kannadaprabha News — Tue, 06 Oct 2026 06:52:35 +0530

ಚಿಕ್ಕಮಗಳೂರು: ಭದ್ರಾ ಮೇಲ್ದಂಡೆಯ ಚಿತ್ರದುರ್ಗ ಶಾಖಾ ಕಾಲುವೆ ಮೂಲಕ ಹರಿದು ಬಂದ ಭದ್ರಾ ನೀರು ಕಡೂರು ತಾಲೂಕಿನ ಗಡಿಭಾಗದ ಬಯಲುಸೀಮೆ ರೈತರಿಗೆ ಪುನರ್ಜನ್ಮ ನೀಡಿದೆ. ಅಂತರಘಟ್ಟೆ ಕೆರೆ, ಕಲ್ಕೆರೆಯ ಕುಕ್ಕಸಮುದ್ರ ಕೆರೆಗಳು ಕೋಡಿ ಬಿದ್ದಿದ್ದರೆ ಹೂಲಿಹಳ್ಳಿ ಕೆರೆ ಭರ್ತಿ ಆಗಿದೆ, ಚೌಳಹಿರಿಯೂರು ಊರ ಮುಂದಿನ ಕೆರೆಗೆ ನೀರು ಹರಿದುಬರುತ್ತಿದೆ.

ಮುಂಗಾರು ಕೈಕೊಟ್ಟು ಅತ್ತ ಬಿತ್ತನೆಯೂ ಆಗದ, ಕೆರೆ-ಕಟ್ಟೆಗಳು ಒಣಗಿ ಜನ-ಜಾನುವಾರುಗಳಿಗೆ ಕುಡಿವ ನೀರಿಗೂ ತತ್ವಾರ ಎದುರಾಗುವ ಸನ್ನಿವೇಶದಲ್ಲಿ ವರದಾನವೋ ಎಂಬಂತೆ ಚಿತ್ರದುರ್ಗ ಶಾಖಾ ಕಾಲುವೆ ಮೂಲಕ ಚಿತ್ರದುರ್ಗಕ್ಕೆ ಪ್ರಾಯೋಗಿಕವಾಗಿ ನೀರು ಹರಿಸಲು ಮತ್ತು ಮಾರ್ಗದಲ್ಲಿ ಬರುವ ಕೆರೆಗಳನ್ನು ತುಂಬಿಸಲು ಸರ್ಕಾರದ ಆದೇಶದಂತೆ ವಿಶ್ವೇಶ್ವರಯ್ಯ ಜಲ ನಿಗಮ ಮುಂದಾಗಿತ್ತು. ಈ ವೇಳೆ ಕೆಲವು ಗೊಂದಲದ ಸನ್ನಿವೇಶಗಳೂ ಉಂಟಾಗಿ, ಕಡೂರು ಭಾಗದ ರೈತರು ಹೋರಾಟವೂ ನಡೆಯಿತು.

ಅಂತರಘಟ್ಟೆ ಕೆರೆ ಬಳಿಕ ಕುಕ್ಕಸಮುದ್ರ ಕೆರೆಗೆ ಹರಿದ ನೀರು

ಕಳೆದ ಸೆ.6ರಂದು ಪ್ರಾಯೋಗಿಕವಾಗಿ ನೀರಿನ ಹರಿವು ಆರಂಭದ ಬಳಿಕ ತರೀಕೆರೆ-ಅಜ್ಜಂಪುರ ಭಾಗದ ಕೆರೆಗಳಿಗೂ ನೀರು ಹರಿದು ಕಡೂರಿನ ಅಂತರಘಟ್ಟೆ ಕೆರೆ ಮೊದಲು ತುಂಬಿತ್ತು. ಕುಕ್ಕಸಮುದ್ರ ಕೆರೆಗೆ ನೀರು ಹರಿಸುವ ಸಂದರ್ಭದಲ್ಲಿ ಒಂದೆರಡು ಬಾರಿ ತಾಂತ್ರಿಕ ದೋಷ ಮತ್ತು ಹೆಬ್ಬೂರು "ವೈʼಜಂಕ್ಷನ್‌ ಬಳಿ ರೈತರ ಜಮೀನುಗಳನ್ನು ನೀರು ಕೊರೆದು ಕೊಂಡು ಹೋಗುತ್ತಿದೆ ಎನ್ನುವ ದೂರು ಮತ್ತು ರೈತರಿಂದ ಅಡಚಣೆ ಉಂಟಾದಾಗ ನೀರಿನ ಹರಿವಿನಲ್ಲಿ ಲೋಪ ಉಂಟಾಗಿತ್ತು. ಕಡೂರು ಶಾಸಕರ ಮಧ್ಯಪ್ರವೇಶ, ಚೌಳಹಿರಿಯೂರು ಭಾಗದ ರೈತ ಮುಖಂಡರು ಮತ್ತು ಮಾಜಿ ಶಾಸಕರ ಹೋರಾಟದ ಫಲವೂ ಸೇರಿ ಕೆರೆಗಳಿಗೆ ಸರಾಗವಾಗಿ ನೀರು ಹರಿದು ಬರಲು ಆರಂಭಿಸಿದೆ.

ಭದ್ರೆ ಕೃಪೆಯಿಂದ ಕೋಡಿ ಬಿದ್ದ ಕೆರೆ

ಕಲ್ಕೆರೆ ಕುಕ್ಕಸಮುದ್ರ ಕೆರೆ 162 ಹೆ.ವಿಸ್ತೀರ್ಣದಲ್ಲಿ ನೀರು ಹಿಡಿಯುವ ಸಾಮರ್ಥ್ಯ ಹೊಂದಿದ್ದು 3.85 ಎಂಸಿಎಫ್ಟಿ ನೀರು ಸಂಗ್ರಹಿಸುವ ಹಾಗೂ ಸಾವಿರಾರು ಎಕರೆ ಭೂಮಿಗೆ ನೀರುಣಿಸುವ, ನೂರಾರು ಕೊಳವೆ ಬಾವಿಗಳಿಗೆ ಪುನಃಶ್ಚೇತನ ಹಾಗೂ ಹಲವಾರು ಕೆರೆ-ಕಟ್ಟೆಗಳನ್ನು ತುಂಬಿಸುವ ಸಾಮರ್ಥ್ಯ ಹೊಂದಿದೆ. ಭಾನುವಾರ ಭದ್ರೆ ಕೃಪೆಯಿಂದ ಕೋಡಿ ಬಿದ್ದಿದೆ. ಅಲ್ಲಿಂದ ಹರಿದು ಹೋಗುವ ನೀರು ಹೊಸದುರ್ಗ ತಾಲೂಕಿನ ಶೆಟ್ಟಿಹಳ್ಳಿ, ಕೊರಟೀಕೆರೆ, ಕಂಗುವಳ್ಳಿ, ಕಡದಿನ ಕೆರೆ, ಕಬ್ಬಳ ಗ್ರಾಮಪಂಚಾಯಿತಿ ವ್ಯಾಪ್ತಿಗೆ ಕುಡಿಯುವ ನೀರೊದಗಿಸಿ ಅಲ್ಲಿಂದ ಕೆಲ್ಲೋಡು ಗ್ರಾಮದ ಚೆಕ್‌ ಡ್ಯಾಂ ತುಂಬಿಸುವ ಮೂಲಕ ಹೊಸದುರ್ಗ ಪಟ್ಟಣದ ಕುಡಿಯುವ ನೀರು ಪೂರೈಕೆಗೆ ನೆರವಾಗಲಿದೆ.

ಚೌಳಹಿರಿಯೂರಿನ ಊರಮುಂದಿನ ಕೆರೆ ತುಂಬಿದರೆ ಸುತ್ತಮುತ್ತಲ ಗ್ರಾಮಗಳ ಕೊಳವೆಬಾವಿಗಳು ರೀಚಾರ್ಜ್ಆಗುವ ಜತೆಗೆ ಚೌಳಹಿರಿಯೂರಿನ ಜನರಿಗೆ ಕುಡಿವ ನೀರಿಗೂ ಬಳಕೆ ಆಗಲಿದೆ. ಕಲ್ಕೆರೆ ಕೆರೆ ತುಂಬಿಸುವ ಸಮಯದಲ್ಲಿ 9 ಕಿ.ಮೀ ನಾಲೆ ಹೊಂದಿದ ಊರಮುಂದಿನ ಕೆರೆಯಲ್ಲಿ ರಂಗಾಪುರ ಭಾಗದ ನಾಲೆಯಲ್ಲಿ ಸುಮಾರು 3 ಕಿ.ಮೀ ಜಂಗಲ್‌ ತೆರವು ಮೂಲಕ ಸಣ್ಣ ನೀರಾವರಿ ಇಲಾಖೆ ನೀರು ಸರಾಗವಾಗಿ ಹರಿದು ಬರಲು ಅನುವು ಮಾಡಿಕೊಟ್ಟಿದೆ. ಪರಿಣಾಮ ಇನ್ನು 8-10 ದಿನಗಳಲ್ಲಿ ಊರಮುಂದಿನ ಕೆರೆ ಕೂಡಾ ಭರ್ತಿ ಸಾಧ್ಯತೆ ಇದೆ.

" ಚೌಳಹಿರಿಯೂರು ಭಾಗದ ರೈತರು ಹೋರಾಟ ಆರಂಭಿಸಿದೆವು. ಶಾಸಕರ ಸಹಕಾರ, ವಿಶ್ವೇಶ್ವರಯ್ಯ ಜಲ ನಿಗಮದ ಎಂಜಿಯರ್‌ ಮತ್ತು ಅಧಿಕಾರಿಗಳ ಸಹಾಯದಿಂದ ನಾವು ಬರದ ಬೇಗೆಯಿಂದ ಸ್ವಲ್ಪ ಮಟ್ಟಿಗೆ ಪಾರಾಗಲು ನೆರವಾಗಿದೆ. ಬೇಸಿಗೆವರೆಗೆ ನಮಗೆ ಇನ್ನು ಭಯವಿಲ್ಲ. ನಮ್ಮ ಹೋರಾಟಕ್ಕೆ ನೆರವಾದ ಕಡೂರು ಮಾಜಿ ಶಾಸಕರು ಮತ್ತು ರೈತ ಹೋರಾಟಗಾರರ ಸಹಾಯಹಸ್ತ ಬೆಂಬಲ ನೀಡಿದೆ. ಆದರೆ, ಮುಂದಿನ ದಿನಗಳಲ್ಲಿ ಸರ್ಕಾರ ಜಲನೀತಿ-ಜಲಶಿಕ್ಷಣ ರೂಪಿಸಿ, ಪಂಚಾಯಿತಿವಾರು ಕೆರೆಗಳ ಮಾಹಿತಿ ಪಡೆದು ಅವುಗಳ ಹೂಳೆತ್ತಿಸಿ ಸಂಗ್ರಹಣಾ ಸಾಮರ್ಥ್ಯ ಹೆಚ್ಚಿಸಬೇಕು. ಪೈಪ್ಲೈನ್ಅ ಳವಡಿಸಿ ಕೆರೆ ತುಂಬಿಸುವ ಯೋಜನೆಯಲ್ಲಿ ಬಾಕಿ ಇರುವ ಕಾಮಗಾರಿ ಶೀಘ್ರ ಕೈಗೆತ್ತಿಕೊಳ್ಳಬೇಕು.ಇದರ ಜತೆಗೆ ನೀರಿನ ಸದ್ಬಳಕೆ ಕುರಿತು ಜಾಗೃತಿ ಮೂಡಿಸುವ, ಜಮೀನುಗಳಲ್ಲಿ ಇಂಗುಗುಂಡಿ ನಿರ್ಮಿಸಲು ಉತ್ತೇಜಿಸುವ ಕ್ರಮಗಳ ಮೂಲಕ ಜನರನ್ನು ಜಲಸಾಕ್ಷರರನ್ನಾಗಿಸಬೇಕುʼ ಎನ್ನುತ್ತಾರೆ ಚೌಳಹಿರಿಯೂರಿನ ರೈತ ಮುಖಂಡ ಜಿ.ಅಶೋಕ್‌ ಕುಮಾರ್.

" ಕೆರೆಗಳನ್ನು ತುಂಬಿಸುವ ಮೂಲಕ ರೈತರ ಬದುಕಿಗೆ ಬಲ ತುಂಬಲು ಹೊರಟ ಸರ್ಕಾರ ಮತ್ತು ಜಲ ನಿಗಮದ ಕೆಲಸ ಸ್ವಾಗತಾರ್ಹ. ಆದರೆ ಹೆಬ್ಬೂರು ಭಾಗದಲ್ಲಿ "ವೈ ಜಂಕ್ಷನ್ಮೂಲಕ ಬೇಗೂರು ಹಳ್ಳದ ಮೂಲಕ ಹರಿದು ನಮ್ಮ ಜಮೀನುಗಳಲ್ಲಿ ಕೊರಕಲು ಉಂಟಾಗಿ ಭೂಮಿ ಹಾಳಾಗುತ್ತಿದೆ. ನಮಗೆ ಪರಿಹಾರ ಕೊಡುವವರು ಯಾರೂ ಇಲ್ಲ. ಸರ್ಕಾರ ಮತ್ತು ಜನಪ್ರತಿನಿಧಿಗಳು ಮನಸ್ಸು ಮಾಡಿ ನಮಗೆ ಪರಿಹಾರ ಒದಗಿಸಲಿʼ ಎನ್ನುವುದು ಹೆಬ್ಬೂರು ಭಾಗದ ಕೆಲವು ರೈತರ ಅಳಲು.

" ಸಿ.ಡಿ.ಗೊಲ್ಲರಹಟ್ಟಿ, ಗುಮ್ಮನಹಳ್ಳಿ ಪಂಪ್ಹೌಸ್, ಮಂಜುನಾಥ ಪುರದ ಮೂಲಕ ಕುರುಬರಹಳ್ಳಿಯ ಕಟ್ಟೆವರೆಗೆ ಅಲ್ಪಸ್ವಲ್ಪ ಕೆಲಸಗಳು, ಪರಿಹಾರ ವಿತರಣೆ, ಒಂದು ವಿದ್ಯುತ್ಕಂಬ ಅಳವಡಿಕೆ ಬಾಕಿ ಇದೆ. ಇವೆಲ್ಲ ಕೆಲಸ ಮುಗಿಸಿಕೊಟ್ಟರೆ ಈ ಭಾಗದ ರೈತರಿಗೂ ನೆರವಾಗಲಿದೆʼ ಎನ್ನುತ್ತಾರೆ ಈ ಭಾಗದ ಕೃಷಿಕರು.

ಹರಿದುಬಂದ ಭದ್ರೆಯಿಂದ ಸಾವಿರಾರು ರೈತರು ಸಂತಸ ವ್ಯಕ್ತಪಡಿಸಿದ್ದು, ಇದೇ ಸಂಭ್ರಮದಲ್ಲಿ ಚೌಳಹಿರಿಯೂರು ಭಾಗದ ರೈತರು ಕುಕ್ಕಸಮುದ್ರ ಕೆರೆಗೆ ಮಂಗಳವಾರ ಬಾಗಿನ ಅರ್ಪಿಸಿ ಪೂಜೆ ಸಲ್ಲಿಸಲು ನಿರ್ಧರಿಸಿದ್ದಾರೆ. ರೈತರ ಮೊಗದಲ್ಲಿ ಸಂತಸ ಮೂಡಿದೆ.

SIR ವಿಚಾರದಲ್ಲಿ ಜ್ಞಾನೇಶ್ ರಾಜೀನಾಮೆ ಕೇಳುವ ಕಾಂಗ್ರೆಸ್‌ಗೆ ಸಿಟಿ ರವಿ ಓಪನ್ ಚಾಲೆಂಜ್!

Ravi Janekal — Wed, 28 Oct 2026 14:33:48 +0530

ಚಿಕ್ಕಮಗಳೂರು (ಅ.28): ಮತದಾರರ ಪಟ್ಟಿ ಪರಿಷ್ಕರಣೆ(SIR) ಹೆಸರಲ್ಲಿ ಕೇಂದ್ರ ಸರ್ಕಾರ ಮತಗಳ್ಳತನ ಮಾಡಿದೆ ಎಂದು ಆರೋಪಿಸಿ ನವೆಂಬರ್ 1 ರಂದು ಕಾಂಗ್ರೆಸ್ ಪ್ರತಿಭಟನೆಗೆ ಕರೆ ಕೊಟ್ಟಿರುವ ಬೆನ್ನಲ್ಲೇ ಎಂಎಲ್‌ಸಿ ಸಿಟಿ ರವಿ ಪ್ರತಿಕ್ರಿಯಿಸಿದ್ದು, ಎಸ್‌ಐಆರ್ ವಿಚಾರದಲ್ಲಿ ಜ್ಞಾನೇಶ್ ರಾಜೀನಾಮೆ ಕೇಳುವ ಕಾಂಗ್ರೆಸ್ ನಾಯಕರಿಗೆ ಸವಾಲು ಹಾಕಿದ್ದಾರೆ.

ಎಸ್‌ಐಆರ್ ವಿಚಾರದಲ್ಲಿ ಕಾಂಗ್ರೆಸ್‌ಗೆ ಸಿಟಿ ರವಿ ಸವಾಲೇನು?

ಎಸ್‌ಐಆರ್‌ನಲ್ಲಿ ಕೇಂದ್ರ ಸರ್ಕಾರ ಅನ್ಯಾಯ, ಅಕ್ರಮ ಮಾಡಿದೆ ಎಂದು ಬೊಬ್ಬೆ ಹೊಡೆಯುವ ಕಾಂಗ್ರೆಸ್, ತನ್ನದೇ ಆಡಳಿತವಿರುವ ಕರ್ನಾಟಕದಲ್ಲಿ ಬರೋಬ್ಬರಿ 99 ಲಕ್ಷ ಮತಗಳು ಎಎಸ್‌ಡಿಡಿ ಆಗಿವೆ. ಹಾಗಾದ್ರೆ ಅಷ್ಟು ಜನರನ್ನು ಕರೆತಂದು ಅರ್ಜಿ ಹಾಕಿಸಲಿ. 99 ಲಕ್ಷ ಬೇಡ, ನಾವು ಸತ್ತಿಲ್ಲ, ಡಬಲ್ ವೋಟ್ ಇಲ್ಲ, ಊರು ಬಿಟ್ಟಿಲ್ಲ ಅಂತಾ ಕನಿಷ್ಠ 9 ಲಕ್ಷ ಜನರನ್ನು ಕರೆತಂದು ಅರ್ಜಿ ಹಾಕಿಸಲಿ. ಆಗ ನಿಮ್ಮ ಆರೋಪದಲ್ಲಿ ಸತ್ಯವಿದೆ ಅಂತಾ ಜನ ನಂಬುತ್ತಾರೆ. ಅದು ಸಾಧ್ಯವಾಗದಿದ್ದರೆ ನೀವು ಸುಳ್ಳುಬುರುಕರು, ವಂಚಕರು ಎಂದು ಜನ ತೀರ್ಮಾನಿಸುತ್ತಾರೆ ಎಂದು ಎಸ್‌ಐಆರ್ ವಿರುದ್ಧ ಆರೋಪಿಸುತ್ತಿರುವ ಕಾಂಗ್ರೆಸ್ ನಾಯಕರಿಗೆ ಸಿಟಿ ರವಿ ಓಪನ್ ಚಾಲೆಂಜನ್ ಮಾಡಿದರು.

ಪ್ರಧಾನಿ ಮೋದಿಗಿರೋ ಜನಬೆಂಬಲ ಕಂಡು ಕಾಂಗ್ರೆಸ್‌ಗೆ ಹೊಟ್ಟೆ ಉರಿ

ಎಸ್‌ಐಆರ್ ವಿರೋಧಿಸುವ ಕಾಂಗ್ರೆಸ್ ಪಕ್ಷಕ್ಕೆ ಅಸಲಿಗೆ ಅದರ ಹೊಟ್ಟೆ ಉರಿ ಎಸ್‌ಐಆರ್ ಮೇಲಿನದ್ದಲ್ಲ, ದೇಶದ ಜನರು ಪ್ರಧಾನಿ ಮೋದಿಯವನ್ನ ಬೆಂಬಲಿಸುತ್ತಿರುವ ರೀತಿ, ಪ್ರೀತಿಸುತ್ತಿರುವ ಪರಿ ಈ ಕಾಂಗ್ರೆಸ್ ಪಕ್ಷಕ್ಕೆ ಸಹಿಸಿಕೊಳ್ಳಲಿಕ್ಕೆ ಆಗುತ್ತಿಲ್ಲ. ಹೊಟ್ಟೆ ಉರಿ ಶುರುವಾಗಿದೆ. ಪ್ರಧಾನಿ ಮೋದಿಯವರನ್ನ ವಿರೋಧಿಸಲು ಈ ರೀತಿ ಎಸ್‌ಐಆರ್‌ ಬಗ್ಗೆ ಪ್ರತಿಭಟನೆ ಮಾಡುತ್ತಿದ್ದಾರೆ ಎಂದು ಕಿಡಿಕಾರಿದರು.

ನಿಮಗಿರೋ ಅರ್ಹತೆ ಏನು?(ರಾಹುಲ್ ಗಾಂಧಿ) ನಮ್ಮ ಮುತ್ತಜ್ಜ, ಅಜ್ಜಿ ಪ್ರಧಾನಿ ಆಗಿದ್ರು, ನಾನು ಹುಟ್ಟಿರೋದೇ ಪ್ರಧಾನಿ ಆಗೋಕೆ ಅನ್ನೋದು ಇದೇ ತಾನೇ ನಿಮ್ಮ ಅರ್ಹತೆ? ಇದು ಪ್ರಜಾಪ್ರಭುತ್ವ ದೇಶ. ತಾತ ಪ್ರಧಾನಿ ಆಗಿದ್ದ, ತಂದೆ ಪ್ರಧಾನಿ ಆಗಿದ್ದ ಅನ್ನೋದೇ ನಿಮಗೆ ಪ್ರಧಾನಿ ಆಗಲು ಅರ್ಹತೆ ಎಂದು ಭಾವಿಸಿದ್ದೀರಾ? ಎಂದು ಪರೋಕ್ಷವಾಗಿ ರಾಹುಲ್ ಗಾಂಧಿ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ ಸಿಟಿ ರವಿ ಅವರು, ಸುಮ್ಮನೆ ಸೋಲಿನಿಂದ ಹತಾಶೆಯಾಗಿ ಮಾತನಾಡಬೇಡಿ ಡಿಕೆಶಿಯವರೇ ಕನಿಷ್ಠ ಒಂಭತ್ತು ಲಕ್ಷ ಜನರನ್ನಾದರೂ ಕರೆತಂದು ತೋರಿಸಿ, ಆಗ ಚುನಾವಣಾ ಆಯೋಗದ ಕಚೇರಿ ಮುಂದೆ ಧರಣಿ ಮಾಡಿದ್ದಕ್ಕೆ ಸಾರ್ಥಕವಾಗುತ್ತದೆ ಎಂದು ಮುಖ್ಯಮಂತ್ರಿ ಡಿಕೆ ಶಿವಕುಮಾರ ವಿರುದ್ಧವೂ ಹರಿಹಾಯ್ದರು.

ಚಿಕ್ಕಮಗಳೂರಲ್ಲಿ ಮಳೆಗಾಗಿ ಕಪ್ಪೆಗಳಿಗೆ ಮದುವೆ, ಮೆರವಣಿಗೆ: ಸಾಮೂಹಿಕ ಬಾಡೂಟ

Santosh Naik — Mon, 12 Oct 2026 08:49:20 +0530

ಚಿಕ್ಕಮಗಳೂರು (ಅ.12): ಜಿಲ್ಲೆಯಾದ್ಯಂತ ಪ್ರಸಕ್ತ ಸಾಲಿನಲ್ಲಿ ಬರದ ಛಾಯೆ ತೀವ್ರವಾಗಿ ಆವರಿಸುತ್ತಿರುವ ಹಿನ್ನೆಲೆಯಲ್ಲಿ, ಮಳೆರಾಯನ ಕೃಪೆಗಾಗಿ ಗ್ರಾಮಸ್ಥರೆಲ್ಲರೂ ಸೇರಿ ಕಪ್ಪೆಗಳಿಗೆ ಸಂಪ್ರದಾಯಬದ್ಧವಾಗಿ ಮದುವೆ ಮಾಡಿಸಿ, ಊರಲ್ಲಿ ಮೆರವಣಿಗೆ ನಡೆಸಿ ಬಳಿಕ ಭರ್ಜರಿ ಸಾಮೂಹಿಕ ಬಾಡೂಟ ಸವಿದ ಅಪರೂಪದ ಘಟನೆ ಚಿಕ್ಕಮಗಳೂರು ಜಿಲ್ಲೆಯ ಕಡೂರು ತಾಲೂಕಿನ ನಿಲೇಗೌಡನ ಕೊಪ್ಪಲು ಗ್ರಾಮದಲ್ಲಿ ಭಾನುವಾರ (ಅ.11) ನಡೆದಿದೆ. ಗ್ರಾಮದ ಶ್ರೀ ಸೇವಾಲಾಲ್ ಸಮಿತಿಯ ನೇತೃತ್ವದಲ್ಲಿ ನಡೆದ ಈ ವಿಶಿಷ್ಟ ಆಚರಣೆಯಲ್ಲಿ ಒಟ್ಟು ಮೂರು ಕಪ್ಪೆಗಳನ್ನು ಬಳಸಿಕೊಳ್ಳಲಾಗಿತ್ತು. ಗ್ರಾಮದ ಗ್ರಾಮದೇವತೆ ಶ್ರೀ ಕರಿಯಮ್ಮದೇವಿ ದೇವಸ್ಥಾನದ ಆವರಣದಲ್ಲಿ ಕಪ್ಪೆಗಳನ್ನು ಇರಿಸಿ, ಶಾಸ್ತ್ರೋಕ್ತವಾಗಿ ಪೂಜೆ ಸಲ್ಲಿಸಲಾಯಿತು.

ಕೆಂಚರಾಯ ನಾಮಕರಣ ಹಾಗೂ ವಿವಾಹ ಮಹೋತ್ಸವ

ದೇವಸ್ಥಾನದ ಆವರಣದಲ್ಲಿ ತಂದಿದ್ದ ಮೂರು ಕಪ್ಪೆಗಳ ಪೈಕಿ ಒಂದನ್ನು 'ಗಂಡು ಕಪ್ಪೆ' (ವರ) ಹಾಗೂ ಮತ್ತೊಂದನ್ನು 'ಹೆಣ್ಣು ಕಪ್ಪೆ' (ವಧು) ಎಂದು ಪರಿಭಾವಿಸಿ, ಮಂಗಲವಾದ್ಯಗಳೊಂದಿಗೆ ಸಂಪ್ರದಾಯಬದ್ಧವಾಗಿ ವಿವಾಹ ನೆರವೇರಿಸಲಾಯಿತು. ವಿಶೇಷವೆಂದರೆ, ತಂದಿದ್ದ ಮೂರನೇ ಕಪ್ಪೆಯನ್ನು ಸ್ವತಃ ಮಳೆರಾಯನ ರೂಪವೆಂದೇ ಭಾವಿಸಿದ ಗ್ರಾಮಸ್ಥರು, ಅದಕ್ಕೆ 'ಕೆಂಚರಾಯ' ಎಂದು ಸಾಂಪ್ರದಾಯಿಕವಾಗಿ ನಾಮಕರಣ ಮಾಡಿದರು. ವಿವಾಹದ ಬಳಿಕ ಕಪ್ಪೆಗಳನ್ನು ಅಲಂಕೃತ ಮಾಡಿ ಇಡೀ ಗ್ರಾಮದ ಬೀದಿಗಳಲ್ಲಿ ಸಡಗರದಿಂದ ಮೆರವಣಿಗೆ ಮಾಡಲಾಯಿತು.

ರಾಗಿ ಮುದ್ದೆ, ಕೋಳಿ ಸಾಂಬಾರ್ ಬಾಡೂಟ

ಕಪ್ಪೆಗಳ ಮದುವೆಯ ಶುಭ ಸಂದರ್ಭದಲ್ಲಿ ಇಡೀ ಗ್ರಾಮಸ್ಥರಿಗೆ ಬೃಹತ್ ಬಾಡೂಟ ಏರ್ಪಡಿಸಲಾಗಿತ್ತು. ಇದಕ್ಕಾಗಿ ಬರೋಬ್ಬರಿ 200 ರಾಗಿ ಮುದ್ದೆಗಳನ್ನು ಹಾಗೂ ಸುಮಾರು 40 ರಿಂದ 50 ನಾಟಿ ಕೋಳಿಗಳನ್ನು ಬಳಸಿ ಚಿಕನ್ ಸಾಂಬಾರ್ ಸಿದ್ಧಪಡಿಸಲಾಗಿತ್ತು. ಕಪ್ಪೆಗಳ ಮದುವೆ ಕಾರ್ಯಕ್ರಮ ಮುಗಿಯುತ್ತಿದ್ದಂತೆ ಗ್ರಾಮಸ್ಥರು, ಮಹಿಳೆಯರು ಹಾಗೂ ಮಕ್ಕಳು ಒಂದೆಡೆ ಸೇರಿ ಸಾಮೂಹಿಕವಾಗಿ ಬಾಡೂಟ ಸವಿದು ಮಳೆಗಾಗಿ ಪ್ರಾರ್ಥಿಸಿದರು.

ಭಾರತೀಯ ಗ್ರಾಮೀಣ ಸಂಸ್ಕೃತಿ ಹಾಗೂ ಜಾನಪದ ನಂಬಿಕೆಗಳಲ್ಲಿ ಮಳೆ ಬಾರದಿದ್ದಾಗ ಕಪ್ಪೆಗಳ ಮದುವೆ ಮಾಡಿಸುವುದು ಶತಮಾನಗಳಿಂದಲೂ ನಡೆದುಬಂದಿರುವ ನಂಬಿಕೆ. ಕಪ್ಪೆಗಳನ್ನು ಜಲಚರ ಹಾಗೂ ಮಳೆಯ ಸಂಕೇತವೆಂದು ಜಾನಪದದಲ್ಲಿ ಪರಿಗಣಿಸಲಾಗುತ್ತದೆ. ಕಪ್ಪೆಗಳು ಗಟ್ಟಿಯಾಗಿ ಶಬ್ದ ಮಾಡಿದರೆ ಮಳೆ ಬರುತ್ತದೆ ಎಂಬ ನಂಬಿಕೆಯಿದೆ. ಕಪ್ಪೆಗಳಿಗೆ ಮದುವೆ ಮಾಡಿಸುವುದರಿಂದ ವರುಣ ದೇವ ಹಾಗೂ ಇಂದ್ರ ದೇವ ಪ್ರಸನ್ನರಾಗಿ ತಕ್ಷಣವೇ ಧರೆಗೆ ಮಳೆ ತರುತ್ತಾರೆ ಎಂಬುದು ಗ್ರಾಮೀಣ ಭಾರತದ ಆಳವಾದ ನಂಬಿಕೆ ಎನ್ನಲಾಗುತ್ತದೆ.

Chikkamagaluru: 5 ದಿನಗಳ ಹಿಂದಷ್ಟೇ ಮದುವೆ, ಜೀವಂತವಾಗಿ ಸುಟ್ಟು ಕರಕಲಾದ ನವವಿವಾಹಿತ

Sumanth SN — Mon, 26 Oct 2026 15:39:48 +0530

ಚಿಕ್ಕಮಗಳೂರು: ಐದು ದಿನಗಳ ಹಿಂದಷ್ಟೇ ಮದುವೆಯಾಗಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದ ನವವಿವಾಹಿತ ಭೀಕರ ಅಪಘಾತದಲ್ಲಿ ಕೊನೆಯುಸಿರೆಳೆದಿರುವ ಘಟನೆ ಚಿಕ್ಕಮಗಳೂರು ಜಿಲ್ಲೆ ಶೃಂಗೇರಿ ತಾಲೂಕಿನ ಮೆಣಸೆ ಬಳಿ ನಡೆದಿದೆ. ಮೃತ ದುರ್ದೈವಿಯನ್ನು 32 ವರ್ಷದ ನಾಗರಾಜ್ ಎಂದು ಗುರುತಿಸಲಾಗಿದೆ.

ಮೃತ ನಾಗರಾಜ್ ಶೃಂಗೇರಿ ತಾಲೂಕಿನ ಕುಂಚೇಬೈಲು ನಿವಾಸಿಯಾಗಿದ್ದು, ಜಯಪುರದಿಂದ ಶೃಂಗೇರಿಗೆ ಹೋಗುತ್ತಿದ್ದ ಸರ್ಕಾರಿ ಬಸ್ಸಿಗೆ ಬೈಕ್ ಡಿಕ್ಕಿ ಹೊಡೆದಿದೆ. ಡಿಕ್ಕಿ ರಭಸಕ್ಕೆ ರಸ್ತೆ ಮಧ್ಯೆ ಬೈಕ್ ಹೊತ್ತಿ ಉರಿದಿದ್ದು, ಬೈಕ್ ಗೆ ಬೆಂಕಿ ಹತ್ತುತ್ತಿದ್ದಂತೆ ಬೈಕ್ ಸವಾರನಿಗೂ ಬೆಂಕಿ ಹೊತ್ತಿಕೊಂಡಿದೆ. ಇದರೊಂದಿಗೆ ಜೀವಂತ ಇರುವಾಗಲೇ ಬೈಕ್ ಸವಾರನ ದೇಹ ಬೆಂಕಿಯಲ್ಲಿ ಅರ್ಧಂಬರ್ಧ ಸುಟ್ಟು ಹೋಗಿದೆ.

ಅಪಘಾತದ ಬಳಿಕ ರಸ್ತೆ ಬದಿಯ ಕಂದಕದಲ್ಲಿ ಸರ್ಕಾರಿ ಬಸ್ ಉರುಳಿ ಬಿದಿದ್ದು, ಘಟನೆ ಸಂಬಂಧ ಶೃಂಗೇರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲು ಮಾಡಲಾಗಿದೆ.

ದಿಮ್ಮಿ ಎಳೆಯಲು ಕಟ್ಟಿದ್ದ ಹಗ್ಗ ಸಿಲುಕಿ ವ್ಯಕ್ತಿ ಸಾವು

ರಸ್ತೆಗೆ ಅಡ್ಡಲಾಗಿ ಕಟ್ಟಿದ್ದ ಹಗ್ಗ ಕುತ್ತಿಗೆಗೆ ಸಿಲುಕಿ ಸ್ಕೂಟರ್ ಸವಾರ ಮೃತಪಟ್ಟಿರುವ ಘಟನೆ ಚಿಕ್ಕಮಗಳೂರು ನಗರದ ಹೊರವಲಯದ ತೇಗೂರು ಗ್ರಾಮದಲ್ಲಿ ನಡೆದಿದೆ.

ನಗರದ ಸೈಯದ್ ಗಲ್ಲಿಯ ನಿವಾಸಿ ಮಹಮ್ಮದ್ ಗೌಸ್ ಖಾನ್ (36) ಮೃತ ಸವಾರ. ಪತ್ನಿಯೊಂದಿಗೆ ಸ್ಕೂಟರ್‌ನಲ್ಲಿ ತೇಗೂರು ಗ್ರಾಮದಿಂದ ಚಿಕ್ಕಮಗಳೂರು ನಗರಕ್ಕೆ ಬರುತ್ತಿದ್ದಾಗ ಈ ದುರ್ಘಟನೆ ಸಂಭವಿಸಿದೆ. ತೇಗೂರು ಗ್ರಾಮದಲ್ಲಿ ಟ್ರ್ಯಾಕ್ಟರ್‌ಗೆ ಮರದ ದಿಮ್ಮಿಗಳನ್ನು ಎಳೆದು ಲೋಡ್ ಮಾಡುವ ಉದ್ದೇಶದಿಂದ ರಸ್ತೆಗೆ ಅಡ್ಡಲಾಗಿ ಹಗ್ಗ ಕಟ್ಟಲಾಗಿತ್ತು ಎನ್ನಲಾಗಿದೆ.

ಈ ಹಗ್ಗ ಸವಾರನಿಗೆ ಸರಿಯಾಗಿ ಕಾಣಿಸದ ಹಿನ್ನೆಲೆಯಲ್ಲಿ ಸ್ಕೂಟರ್‌ನಲ್ಲಿ ಬರುತ್ತಿದ್ದ ಮಹಮ್ಮದ್ ಗೌಸ್ ಖಾನ್ ಅವರ ಕುತ್ತಿಗೆಗೆ ಸಿಲುಕಿ ಗಾಯಗೊಂಡು ಮೃತಪಟ್ಟಿದ್ದಾರೆ ಎಂದು ತಿಳಿದುಬಂದಿದೆ. ಘಟನೆ ಸಂಬಂಧ ಚಿಕ್ಕಮಗಳೂರು ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಕೊಳವೆಬಾವಿ ಮೋಟಾರ್ ಕೇಬಲ್ ಕಳ್ಳತನಕ್ಕೆ ಯತ್ನ

ಲಕ್ಯಾ ಗ್ರಾಮದ ಜಮೀನಿನಲ್ಲಿ ಕೊಳವೆಬಾವಿಯ ಮೋಟಾರ್‌ಗೆ ಅಳವಡಿಸಿದ್ದ ಕೇಬಲ್ ವೈರ್ ಕತ್ತರಿಸಿ ಕಳ್ಳತನಕ್ಕೆ ಯತ್ನಿಸಿದ ಘಟನೆಗೆ ಸಂಬಂಧಿಸಿದಂತೆ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಲಕ್ಯಾ ಗ್ರಾಮದ ಯೋಗೀಶ್ ಎಲ್.ಒ. ಅವರ ಜಮೀನಿನಲ್ಲಿದ್ದ ಸುಮಾರು 5 ಮೀಟರ್ ಉದ್ದದ, ₹1,500 ಮೌಲ್ಯದ ಕೇಬಲ್ ವೈರ್ ಅನ್ನು ಅ.24ರಂದು ಕತ್ತರಿಸಲಾಗಿದೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ. ಇದೇ ವೇಳೆ ಗ್ರಾಮದ ನಂಜುಂಡಪ್ಪ ಅವರ ಬಾವಿಯಲ್ಲಿದ್ದ ವಿದ್ಯುತ್ ಮೋಟಾರ್ ಕಳವು ಮಾಡಲು ಇಬ್ಬರು ಯತ್ನಿಸಿದ್ದು, ಪ್ರಶ್ನಿಸಿದಾಗ ಚಾಕು ತೋರಿಸಿ ಪರಾರಿಯಾಗಲು ಯತ್ನಿಸಿದ್ದಾರೆ ಎನ್ನಲಾಗಿದೆ.

ಗ್ರಾಮಸ್ಥರು ಸೇರಿ ರಾಮಚಂದ್ರಗೌಡ ಎಂಬಾತನನ್ನು ಹಿಡಿದಿದ್ದು, ಮತ್ತೊಬ್ಬ ಆರೋಪಿ ಉಮೇಶ್ ಪರಾರಿಯಾಗಿದ್ದಾನೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ. ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

ಚಿಕ್ಕಮಗಳೂರು: ಸರ್ಕಾರಿ ಬಸ್‌ಗೆ ಢಿಕ್ಕಿಯಾಗಿ ಬೈಕ್‌ಗೆ ಹೊತ್ತಿಕೊಂಡ ಬೆಂಕಿ, ಐದು ದಿನದ ಹಿಂದೆ ಮದುವೆಯಾಗಿದ್ದ ಯುವಕ ಸುಟ್ಟು ಕರಕಲು!

Santosh Naik — Mon, 26 Oct 2026 15:57:09 +0530

ಚಿಕ್ಕಮಗಳೂರು (ಅ.26): ಕಾಫಿನಾಡು ಚಿಕ್ಕಮಗಳೂರು ಜಿಲ್ಲೆಯ ಶೃಂಗೇರಿ ತಾಲೂಕಿನಲ್ಲಿ ಭಾನುವಾರ ಅತ್ಯಂತ ದಾರುಣ ರಸ್ತೆ ಅಪಘಾತ ಸಂಭವಿಸಿದೆ. ಸರ್ಕಾರಿ ಬಸ್ ಹಾಗೂ ಬೈಕ್ ನಡುವೆ ನಡೆದ ಭೀಕರ ಮುಖಾಮುಖಿ ಡಿಕ್ಕಿಯ ರಭಸಕ್ಕೆ ಬೈಕ್‌ಗೆ ಬೆಂಕಿ ಹೊತ್ತಿಕೊಂಡು, ನವವಿವಾಹಿತ ಯುವಕನೊಬ್ಬ ಬೆಂಕಿಯ ಜ್ವಾಲೆಯಲ್ಲಿ ಅರ್ಧಂಬರ್ಧ ಸುಟ್ಟು ರಸ್ತೆ ಮಧ್ಯದಲ್ಲೇ ಸಜೀವವಾಗಿ ದಹನಗೊಂಡ ಆಘಾತಕಾರಿ ಘಟನೆ ವರದಿಯಾಗಿದೆ.

ಶೃಂಗೇರಿ ತಾಲೂಕಿನ ಕುಂಚೇಬೈಲು ನಿವಾಸಿ ನಾಗರಾಜ್ (32) ಮೃತಪಟ್ಟ ದುರ್ದೈವಿ. ಕೇವಲ ಐದು ದಿನಗಳ ಹಿಂದಷ್ಟೇ ಹಸೆಮಣೆ ಏರಿ ನೂತನ ಜೀವನಕ್ಕೆ ಕಾಲಿಟ್ಟಿದ್ದ ನವವರ ನಾಗರಾಜ್, ಹೀಗೆ ದುರಂತವಾಗಿ ಪ್ರಾಣ ಕಳೆದುಕೊಂಡಿರುವುದು ಇಡೀ ತಾಲೂಕಿನಲ್ಲಿ ತೀವ್ರ ಶೋಕಕ್ಕೆ ಕಾರಣವಾಗಿದೆ.

ಘಟನೆಯ ವಿವರ - ರಸ್ತೆ ಮಧ್ಯದಲ್ಲೇ ಹೊತ್ತಿ ಉರಿದ ಬೈಕ್!:

ಶೃಂಗೇರಿ ತಾಲೂಕಿನ 'ಮೆಣಸೆ' ಗ್ರಾಮದ ಬಳಿ ಈ ಭೀಕರ ಅಪಘಾತ ನಡೆದಿದೆ. ನಾಗರಾಜ್ ಅವರು ತಮ್ಮ ಬೈಕ್‌ನಲ್ಲಿ ತೆರಳುತ್ತಿದ್ದಾಗ, ಜಯಪುರದಿಂದ ಶೃಂಗೇರಿ ಕಡೆಗೆ ಸಂಚರಿಸುತ್ತಿದ್ದ ಸರ್ಕಾರಿ ಬಸ್ ಮುಖಾಮುಖಿ ಡಿಕ್ಕಿಯಾಗಿದೆ. ಡಿಕ್ಕಿಯ ರಭಸಕ್ಕೆ ಬೈಕ್ ತಕ್ಷಣವೇ ರಸ್ತೆ ಮಧ್ಯದಲ್ಲೇ ಬೆ ಹೊತ್ತಿಕೊಂಡು ಭಸ್ಮವಾಗಲು ಪ್ರಾರಂಭಿಸಿದೆ. ಅಪಘಾತ ಸಂಭವಿಸಿದ ತಕ್ಷಣ ಬೈಕ್‌ನಿಂದ ಬಿದ್ದ ನಾಗರಾಜ್ ಅವರ ಮೇಲೆಯೂ ಬೆಂಕಿಯ ಜ್ವಾಲೆ ವ್ಯಾಪಿಸಿದ್ದು, ಪರಿಣಾಮವಾಗಿ ಅವರು ರಸ್ತೆಯಲ್ಲೇ ಅರ್ಧಂಬರ್ಧ ಸುಟ್ಟುಹೋಗಿ ಸ್ಥಳದಲ್ಲೇ ಕೊನೆಯುಸಿರೆಳೆದಿದ್ದಾರೆ.

ಕಂದಕಕ್ಕೆ ಉರುಳಿದ ಬಸ್ - ಪೊಲೀಸರ ತನಿಖೆ

ಬೈಕ್‌ಗೆ ಡಿಕ್ಕಿ ಹೊಡೆದ ರಭಸಕ್ಕೆ ಚಾಲಕನ ನಿಯಂತ್ರಣ ತಪ್ಪಿದ ಸರ್ಕಾರಿ ಬಸ್, ರಸ್ತೆ ಬದಿಯ ಆಳವಾದ ಕಂದಕಕ್ಕೆ ಇಳಿದು ನಿಂತಿದೆ. ಬಸ್‌ನಲ್ಲಿದ್ದ ಪ್ರಯಾಣಿಕರು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ ಎಂದು ತಿಳಿದುಬಂದಿದೆ. ಮದುವೆಯಾಗಿ ವಾರವೂ ಕಳೆಯುವ ಮುನ್ನವೇ ಮಗನನ್ನು ಕಳೆದುಕೊಂಡ ಕುಟುಂಬಸ್ಥರ ಹಾಗೂ ನವವಧುವಿನ ಕ್ರಂದನ ಮುಗಿಲು ಮುಟ್ಟಿದೆ. ಈ ಸಂಬಂಧ ಶೃಂಗೇರಿ ಪೊಲೀಸ್ ಠಾಣೆಯ ಅಧಿಕಾರಿಗಳು ಘಟನಾ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕಾನೂನು ಕ್ರಮ ಜರುಗಿಸಿದ್ದಾರೆ.

ರಾಜ್ಯದಲ್ಲಿ ಭೀಕರ ಬರಗಾಲದ ನಡುವೆಯೂ 4 ಜಿಲ್ಲೆಗಳಿಗೆ ಯೆಲ್ಲೋ ಅಲರ್ಟ್, ಹಲವೆಡೆ ಭಾರಿ ಮಳೆ ಮುನ್ಸೂಚನೆ!

Sathish Kumar KH — Sun, 04 Oct 2026 08:54:13 +0530

ಬೆಂಗಳೂರು (ಅ.04): ರಾಜ್ಯದಲ್ಲಿ ಬಿಸಿಲಿನ ತಾಪ ಮತ್ತು ಬರದ ಆತಂಕದ ನಡುವೆ ಕೃಷಿಕರಿಗೆ ಹಾಗೂ ಜನಸಾಮಾನ್ಯರಿಗೆ ಹವಾಮಾನ ಇಲಾಖೆ ಸಿಹಿಸುದ್ದಿ ನೀಡಿದೆ. ಮುಂಗಾರು ಮಾರುತಗಳು ಸದ್ಯ ದುರ್ಬಲವಾಗಿದ್ದರೂ, ಮುಂಬರುವ ದಿನಗಳಲ್ಲಿ ರಾಜ್ಯದ ದಕ್ಷಿಣ ಒಳನಾಡು ಮತ್ತು ಮಲೆನಾಡು ಭಾಗಗಳಲ್ಲಿ ಮಳೆಯ ಪ್ರಮಾಣ ಚುರುಕಾಗುವ ಸಾಧ್ಯತೆಯಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (IMD) ಮುನ್ಸೂಚನೆ ನೀಡಿದೆ.

ನಾಲ್ಕು ಜಿಲ್ಲೆಗಳಿಗೆ ‘ಯೆಲ್ಲೋ ಅಲರ್ಟ್’:

ಅಕ್ಟೋಬರ್ 5 ಮತ್ತು 6 ರಂದು ದಕ್ಷಿಣ ಒಳನಾಡಿನ ನಾಲ್ಕು ಪ್ರಮುಖ ಜಿಲ್ಲೆಗಳಲ್ಲಿ ಭಾರಿ ಮಳೆಯಾಗುವ ಸಾಧ್ಯತೆ ಹಿನ್ನೆಲೆಯಲ್ಲಿ ಹವಾಮಾನ ಇಲಾಖೆ 'ಯೆಲ್ಲೋ ಅಲರ್ಟ್' ಎಚ್ಚರಿಕೆ ನೀಡಿದೆ. ಪ್ರಮುಖವಾಗಿ ಮಲೆನಾಡು ಭಾಗದ ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ ಮತ್ತು ಕೊಡಗು ಜಿಲ್ಲೆಗಳ ಒಂದೆರಡು ಕಡೆಗಳಲ್ಲಿ ಭಾರೀ ಮಳೆಯಾಗುವ ಸಾಧ್ಯತೆಯಿದೆ. ಮಳೆಯ ಕೊರತೆಯಿಂದ ಕಂಗಾಲಾಗಿದ್ದ ಮಲೆನಾಡಿನ ಭಾಗಗಳಿಗೆ ಈ ಮಳೆ ಕೊಂಚ ನೆಮ್ಮದಿ ತರುವ ನಿರೀಕ್ಷೆಯಿದೆ.

ಕರಾವಳಿ ಮತ್ತು ಒಳನಾಡಿನ ಸ್ಥಿತಿಗತಿ:

ಕರಾವಳಿ ಕರ್ನಾಟಕದ ದಕ್ಷಿಣ ಕನ್ನಡ, ಉಡುಪಿ ಹಾಗೂ ಉತ್ತರ ಕನ್ನಡ ಜಿಲ್ಲೆಗಳಲ್ಲಿ ಮುಂದಿನ ಒಂದು ವಾರ ಬಹುತೇಕ ಭಾಗಗಳಲ್ಲಿ ಸಾಧಾರಣದಿಂದ ಉತ್ತಮ ಮಳೆಯಾಗುವ ಮುನ್ಸೂಚನೆ ಇದೆ. ಇನ್ನು ಉತ್ತರ ಒಳನಾಡಿನ ಬೆಳಗಾವಿ, ಧಾರವಾಡ, ಹಾವೇರಿ ಹಾಗೂ ಕೊಪ್ಪಳ ಜಿಲ್ಲೆಗಳಲ್ಲಿ ಅಲ್ಲಲ್ಲಿ ತುಂತುರು ಅಥವಾ ಲಘು ಮಳೆಯಾಗುವ ಸಾಧ್ಯತೆಯಿದ್ದು, ಬಾಗಲಕೋಟೆ, ವಿಜಯಪುರ, ರಾಯಚೂರು, ಯಾದಗಿರಿ, ಬೀದರ್, ಗದಗ ಮತ್ತು ಕಲಬುರಗಿ ಜಿಲ್ಲೆಗಳಲ್ಲಿ ಒಣಹವೆ ಮುಂದುವರಿಯಲಿದೆ ಎಂದು ಇಲಾಖೆ ಸ್ಪಷ್ಟಪಡಿಸಿದೆ.

ಬೆಂಗಳೂರು ಹವಾಮಾನ ವರದಿ:

ರಾಜಧಾನಿ ಬೆಂಗಳೂರು ನಗರ ಹಾಗೂ ಗ್ರಾಮಾಂತರ ಪ್ರದೇಶಗಳಲ್ಲಿ ಮುಂದಿನ 48 ಗಂಟೆಗಳ ಕಾಲ ಭಾಗಶಃ ಮೋಡ ಕವಿದ ವಾತಾವರಣ ಇರಲಿದ್ದು, ಸಂಜೆಯ ವೇಳೆಗೆ ಮೋಡಗಳು ದಟ್ಟೈಸಲಿವೆ. ನಗರದ ಕೆಲವೆಡೆ ಲಘುವಾಗಿ ಸಾಧಾರಣ ಮಳೆಯಾಗುವ ಸಾಧ್ಯತೆಯಿದೆ. ನಗರದಲ್ಲಿ ಗರಿಷ್ಠ ಉಷ್ಣಾಂಶ 31 ಡಿಗ್ರಿ ಸೆಲ್ಸಿಯಸ್ ಹಾಗೂ ಕನಿಷ್ಠ ಉಷ್ಣಾಂಶ 21 ಡಿಗ್ರಿ ಸೆಲ್ಸಿಯಸ್ ಆಸುಪಾಸಿನಲ್ಲಿ ದಾಖಲಾಗುವ ಸಾಧ್ಯತೆಯಿದೆ ಎಂದು ಹವಾಮಾನ ತಜ್ಞರು ತಿಳಿಸಿದ್ದಾರೆ.

ಒಟ್ಟಾರೆಯಾಗಿ ಹೇಳುವುದಾದರೆ, ಸದ್ಯಕ್ಕೆ ಒಣಹವೆ ಮುಂದುವರಿದರೂ ಅಕ್ಟೋಬರ್ 5ರಿಂದ ದಕ್ಷಿಣ ಒಳನಾಡಿನಲ್ಲಿ ವರುಣನ ಅಬ್ಬರ ಹೆಚ್ಚಾಗಲಿದ್ದು, ಅನ್ನದಾತರಲ್ಲಿ ಕೊಂಚ ಮಟ್ಟಿನ ಆಶಾಭಾವನೆ ಮೂಡಿಸಿದೆ.

ಕಡೂರು ರೈಲ್ವೆ ನಿಲ್ದಾಣದಲ್ಲಿ ದಿಢೀರ್ ಸ್ಥಗಿತಗೊಂಡ ಸೇವೆ: ಪ್ರಯಾಣಿಕರ ಪರದಾಟ, ಆಕ್ರೋಶ

Kannadaprabha News — Sat, 17 Oct 2026 08:17:57 +0530

ಚಿಕ್ಕಮಗಳೂರು: ಕಡೂರು ರೈಲ್ವೆ ನಿಲ್ದಾಣದಲ್ಲಿ ಯುಪಿಐ ಮೂಲಕ ಹಣ ಪಾವತಿಸಿ ಟಿಕೆಟ್ ಪಡೆಯಲು ಸಾಧ್ಯವಾಗದೆ ಶುಕ್ರವಾರ ಪ್ರಯಾಣಿಕರು ತೊಂದರೆ ಅನುಭವಿಸಿದರು.

ಸರ್ವರ್ ಸಮಸ್ಯೆಯಿಂದ ಡಿಜಿಟಲ್ ಪಾವತಿ ಸ್ಥಗಿತಗೊಂಡು ಕೈಯಲ್ಲಿ ಹಣವಿಲ್ಲದ ಪ್ರಯಾಣಿಕರು ಟಿಕೆಟ್ ಪಡೆಯಲು ಪರದಾಡಿದರು. ಪ್ರಯಾಣಿಕರಿಗೆ ಅನುಕೂಲ ಕಲ್ಪಿಸುವ ಉದ್ದೇಶದಿಂದ ರೈಲ್ವೆ ಇಲಾಖೆ ಟಿಕೆಟ್ ಖರೀದಿಗೆ ಯುಪಿಐ ಮೂಲಕ ಹಣ ಪಾವತಿ ಜಾರಿಗೊಳಿಸಿದೆ. ಇದರಿಂದ ನಗದು ಕೊಂಡೊಯ್ಯುವ ಅನಿವಾರ್ಯತೆ ತಪ್ಪಿ ಮೊಬೈಲ್ ಮೂಲಕವೇ ಹಣ ಪಾವತಿಸಿ ಟಿಕೆಟ್ ಪಡೆಯುತ್ತಾರೆ. ಆದರೆ, ಸರ್ವರ್ ಸಮಸ್ಯೆ ಎದುರಾದ ಹಿನ್ನೆಲೆಯಲ್ಲಿ ಕಡೂರು ರೈಲ್ವೆ ನಿಲ್ದಾಣದಲ್ಲಿ ಈ ಸೇವೆ ಬಳಸಲಾಗಿಲ್ಲ.

ಟಿಕೆಟ್ ಪಡೆಯಲು ಪರದಾಡುವ ಪರಿಸ್ಥಿತಿ

ಕೊನೆಯ ಕ್ಷಣದಲ್ಲಿ ರೈಲ್ವೆ ಸಿಬ್ಬಂದಿ ಯುಪಿಐ ಪಾವತಿ ವ್ಯವಸ್ಥೆ ಕಾರ್ಯನಿರ್ವಹಿಸುತ್ತಿಲ್ಲ ಎಂದು ತಿಳಿಸಿದ್ದರಿಂದ, ನಗದು ಹಣವಿಲ್ಲದೆ ಬಂದಿದ್ದ ಪ್ರಯಾಣಿಕರು ತೊಂದರೆ ಅನುಭವಿಸಬೇಕಾಯಿತು. ಪ್ರಯಾಣದ ತುರ್ತಿನಲ್ಲಿದ್ದವರು ಟಿಕೆಟ್ ಪಡೆಯಲು ಪರದಾಡುವ ಪರಿಸ್ಥಿತಿ ಉಂಟಾಯಿತು.

ಮುಂಚಿತ ಮಾಹಿತಿ ನೀಡಲು ಆಗ್ರಹ

ಡಿಜಿಟಲ್ ಪಾವತಿ ವ್ಯಾಪಕವಾಗಿ ಬಳಕೆಯಲ್ಲಿದೆ. ಪ್ರಯಾಣಿಕರು ನಗದಿಗಿಂತ ಮೊಬೈಲ್ ಪಾವತಿಯನ್ನೇ ಹೆಚ್ಚು ಅವಲಂಬಿಸಿದ್ದಾರೆ. ಇಂತಹ ಸಂದರ್ಭದಲ್ಲಿ ಸರ್ವರ್ ಸಮಸ್ಯೆಯಿಂದ ಯುಪಿಐ ಸೇವೆ ಸ್ಥಗಿತವಾದರೆ ಪರ್ಯಾಯ ವ್ಯವಸ್ಥೆ ಕಲ್ಪಿಸುವುದು ಅಥವಾ ಪ್ರಯಾಣಿಕರಿಗೆ ಮುಂಚಿತವಾಗಿ ಮಾಹಿತಿ ನೀಡುವುದು ಅಗತ್ಯ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.

ರೈಲ್ವೆ ಇಲಾಖೆ ಸರ್ವರ್ ಸಮಸ್ಯೆ ತ್ವರಿತವಾಗಿ ಪರಿಹರಿಸಿ, ಯುಪಿಐ ಪಾವತಿ ವ್ಯವಸ್ಥೆ ಸುಗಮವಾಗಿ ಕಾರ್ಯ ನಿರ್ವಹಿಸುವಂತೆ ಕ್ರಮ ಕೈಗೊಳ್ಳಬೇಕು. ತಾಂತ್ರಿಕ ದೋಷದಿಂದ ಸೇವೆ ಲಭ್ಯವಿಲ್ಲದ ಸಂದರ್ಭದಲ್ಲಿ ಪ್ರಯಾಣಿಕರಿಗೆ ಮೊದಲೇ ತಿಳಿಸುವಂತೆ ಟಿಕೆಟ್ ಕೌಂಟರ್ ಬಳಿ ಮಾಹಿತಿ ಫಲಕ ಅಳವಡಿಸಬೇಕು ಎಂದು ಪ್ರಯಾಣಿಕರು ಆಗ್ರಹಿಸಿದ್ದಾರೆ.

ಅಜ್ಜಂಪುರದ ತಾಲೂಕಿನ ಬರಗಾಲಕ್ಕೆ ಸೆಡ್ಡು ಹೊಡೆಯಲು ಜಿಲ್ಲಾಧಿಕಾರಿಗಳಿಂದ ಮಹಾ ಪ್ಲಾನ್

Kannadaprabha News — Fri, 09 Oct 2026 16:23:24 +0530

ಚಿಕ್ಕಮಗಳೂರು: ತೀವ್ರ ಬರಪೀಡಿತವಾದ ಅಜ್ಜಂಪುರ ತಾಲೂಕಿನಲ್ಲಿ ನೀರಿನ ಸಮಸ್ಯೆ ಎದುರಾಗದಂತೆ 10 ಹೊಸ ಕೆರೆಗಳನ್ನು ನಿರ್ಮಿಸಲು ಕ್ರಮ ಕೈಗೊಳ್ಳಲು ಜಿಲ್ಲಾಧಿಕಾರಿ ಭನ್ವರ್ ಸಿಂಗ್ ಮೀನಾ ಅಧಿಕಾರಿಗಳಿಗೆ ಸೂಚಿಸಿದರು.

ಗುರುವಾರ ಅಜ್ಜಂಪುರ ತಾಲೂಕಿನ ಬರಪೀಡಿತ ಪ್ರದೇಶಗಳಿಗೆ ಭೇಟಿ ನೀಡಿ ಬಗ್ಗವಳ್ಳಿಯ ಕೆರೆ ತುಂಬಿಸುವ ಯೋಜನೆ ಹಾಗೂ ಗೊಂಡೇದಹಳ್ಳಿಯಲ್ಲಿ ಹೊಸ ಕೆರೆ ನಿರ್ಮಿಸಲು ಗುರುತಿಸಿರುವ ಸ್ಥಳ ಪರಿಶೀಲಿಸಿದರು.

ಮೂರು ಕೆರೆಗಳ ನಿರ್ಮಾಣಕ್ಕೆ ಒಟ್ಟು 60 ಎಕರೆ ಜಾಗ

ಅಜ್ಜಂಪುರ ತಾಲೂಕಿನಲ್ಲಿ ಹೊಸ 10 ಕೆರೆ ನಿರ್ಮಿಸಿದರೆ ಸುತ್ತಮುತ್ತಲಿನ ಗ್ರಾಮದ ಜನರಿಗೆ ಅನುಕೂಲವಾಗಲಿದೆ. ಅಂತರ್ಜಲ ಹೆಚ್ಚಾಗಲಿದೆ ಎಂದರು. ಅದಕ್ಕೆ ಪ್ರಕ್ರಿಯಿಸಿದ ತಹಸೀಲ್ದಾರ್ ವಿನಾಯಕ ಸಾಗರ್, ಈಗಾಗಲೇ ಮೂರು ಕೆರೆಗಳ ನಿರ್ಮಾಣಕ್ಕೆ ಒಟ್ಟು 60 ಎಕರೆ ಜಾಗ ಗುರುತಿಸಿ ಪ್ರಸ್ತಾವನೆ ಸಲ್ಲಿಸಲಾಗಿದೆ ಎಂದರು.

54 ಗ್ರಾಮಗಳಲ್ಲಿ ನೀರಿನ ಸಮಸ್ಯೆ ಎದುರಾಗುವ ಸಾಧ್ಯತೆ

ಬಳಿಕ ತಾಪಂ ಸಭಾಂಗಣದಲ್ಲಿ ತಾಲೂಕು ಮಟ್ಟದ ಅಧಿಕಾರಿಗಳು ಹಾಗೂ ಗ್ರಾಪಂ ಅಭಿವೃದ್ಧಿ ಅಧಿಕಾರಿಗಳೊಂದಿಗೆ ಬರ ನಿರ್ವಹಣೆ ಕುರಿತು ಸಭೆ ನಡೆಸಿ, ಕುಡಿವ ನೀರಿನ ಸಮಸ್ಯೆ ಇರುವ ಗ್ರಾಮಗಳ ಮಾಹಿತಿ ಪಡೆದರು. ಸದ್ಯ ಅಜ್ಜಂಪುರ ತಾಲೂಕಿನ ಒಂದು ಗ್ರಾಮಕ್ಕೆ ಟ್ಯಾಂಕರ್ ಮೂಲಕ ನೀರು ಪೂರೈಸಲಾಗುತ್ತಿದೆ. ಮೂರು ಗ್ರಾಮಗಳಲ್ಲಿ ಖಾಸಗಿ ವ್ಯಕ್ತಿಗಳ ಬೋರ್‌ವೆಲ್‌ಗಳನ್ನು ಬಾಡಿಗೆಗೆ ಪಡೆದು ನೀರು ಸರಬರಾಜು ಮಾಡಲಾಗುತ್ತಿದೆ. ಮುಂದಿನ ಒಂದು ತಿಂಗಳಲ್ಲಿ ಸುಮಾರು 54 ಗ್ರಾಮಗಳಲ್ಲಿ ನೀರಿನ ಸಮಸ್ಯೆ ಎದುರಾಗುವ ಸಾಧ್ಯತೆ ಇದೆ ಎಂಬ ವರದಿ ಹಿನ್ನೆಲೆಯಲ್ಲಿ ಮುಂಜಾಗ್ರತಾ ಕ್ರಮ ಕೈ ಗೊಳ್ಳಲಾಗುವುದು ಎಂದು ತಹಸೀಲ್ದಾರ್ ತಿಳಿಸಿದರು.

ಮೇವಿಗೆ ಕೊರತೆ ಆಗದಂತೆ ಕ್ರಮವಹಿಸಿ

ಬರ ಪರಿಸ್ಥಿತಿಯಲ್ಲಿ ಜಾನುವಾರುಗಳಿಗೆ ಮೇವಿನ ಕೊರತೆಯಾಗದಂತೆ ಕ್ರಮ ಕೈಗೊಳ್ಳುವ ಉದ್ದೇಶದಿಂದ ಜಿಲ್ಲಾಧಿಕಾರಿ ಬೀರೂರು ಹಾಗೂ ಅಜ್ಜಂಪುರದ ಅಮೃತ್ ಮಹಲ್ ತಳಿ ಸಂವರ್ಧನ ಕೇಂದ್ರಗಳಿಗೆ ಭೇಟಿ ನೀಡಿ ಪರಿಶೀಲಿಸಿದರು. ಮೇವು ಬೆಳೆಯಲಾದ ಪ್ರದೇಶಗಳನ್ನು ವೀಕ್ಷಿಸಿ, 100 ಎಕರೆ ಪ್ರದೇಶದಲ್ಲಿ ಮೇವು ಬೆಳೆಯಲು ವಿಬಿಜಿ ರಾಂಜಿ ಯೋಜನೆಯಡಿ ಜಿಪಂ ನಿಂದ ಅನುದಾನ ಪಡೆದು ಕ್ರಮ ಕೈಗೊಳ್ಳಲು ಸೂಚಿಸಿದರು. ಬೆಳೆದ ಮೇವನ್ನು ತುರ್ತು ಸಂದರ್ಭದಲ್ಲಿ ವಿತರಿಸಲು ಶೇಖರಿಸಿಡುವಂತೆ ಕಡೂರು ತಾಪಂ ಕಾರ್ಯನಿರ್ವಾಹಕ ಅಧಿಕಾರಿಗೆ ತಿಳಿಸಿದರು.

ಅಮೃತ್ ಮಹಲ್ ತಳಿ ಸಂವರ್ಧನ ಕೇಂದ್ರದಲ್ಲಿ ಖಾಲಿ ಜಾಗದಲ್ಲಿ ಮೇವು ಬೆಳೆವಂತೆ ಸೂಚಿಸಿದಾಗ, ಆ ಜಾಗ ಕೇಂದ್ರದ ರಾಸುಗಳ ಮೇಯುವಿಕೆಗೆ ಬಳಸಲಾಗುತ್ತಿದೆ. ಉಳಿದ ಜಾಗದಲ್ಲಿ ಮೇವು ಬೆಳೆಯಲು ಕ್ರಮ ಕೈಗೊಳ್ಳಲಾಗುವುದು ಎಂದು ಕೇಂದ್ರದ ಉಪನಿರ್ದೇಶಕರು ತಿಳಿಸಿದರು.

ಸಭೆ ಬಳಿಕ ಹೆಬ್ಬೂರು ಲಿಫ್ಟ್ ಇರಿಗೇಶನ್ ಪಾಯಿಂಟ್ ಹಾಗೂ ಗೌರಾಪುರ ಗ್ರಾಮಗಳಿಗೆ ಭೇಟಿ ನೀಡಿದ ಜಿಲ್ಲಾಧಿಕಾರಿ, ಭದ್ರಾ ಮೇಲ್ದಂಡೆ ಯೋಜನೆಯಡಿ ಹನಿ ನೀರಾವರಿ ಮೂಲಕ ಜಮೀನುಗಳಿಗೆ ನೀರು ಒದಗಿಸುತ್ತಿರುವ ವ್ಯವಸ್ಥೆ ಪರಿಶೀಲಿಸಿದರು.

ಅಜ್ಜಂಪುರ ತಹಸೀಲ್ದಾರ್ ವಿನಾಯಕ ಸಾಗರ್, ಕಡೂರು ತಹಸೀಲ್ದಾರ್ ಪೂರ್ಣಿಮಾ, ಪಶುಪಾಲನೆ ಇಲಾಖೆಯ ಉಪ ನಿರ್ದೇಶಕ ಡಾ.ಬಿ.ಜಿ.ಗುರುಶಾಂತಪ್ಪ ಹಾಗೂ ಅಜ್ಜಂಪುರ ಮತ್ತು ಕಡೂರು ತಾಲೂಕಿನ ವಿವಿಧ ಇಲಾಖೆಗಳ ಅಧಿಕಾರಿಗಳು ಉಪಸ್ಥಿತರಿದ್ದರು.

ಲಂಗಾ-ದಾವಣಿಯಲ್ಲಿ ಮಿಂಚಿದ ಶಾಸಕಿ ನಯನಾ ಮೋಟಮ್ಮ; ನವರಾತ್ರಿ ಉತ್ಸವದಲ್ಲಿ ದಾಂಡಿಯಾ ಕುಣಿತಕ್ಕೆ ಜನರು ಫಿದಾ!

Sathish Kumar KH — Mon, 19 Oct 2026 23:10:03 +0530

ಚಿಕ್ಕಮಗಳೂರು (ಅ.19): ಕಾಫಿನಾಡು ಚಿಕ್ಕಮಗಳೂರಿನ ಮೂಡಿಗೆರೆಯಲ್ಲಿ ಶರನ್ನವರಾತ್ರಿ ಉತ್ಸವದ ಸಂಭ್ರಮ ಮುಗಿಲು ಮುಟ್ಟಿದ್ದು, ಯುವ ಶಾಸಕಿ ನಯನಾ ಮೋಟಮ್ಮ (Nayana Motamma) ಅವರು ಸಾರ್ವಜನಿಕರೊಂದಿಗೆ ಅತ್ಯಂತ ಲವಲವಿಕೆಯಿಂದ ದಾಂಡಿಯಾ ನೃತ್ಯಕ್ಕೆ (Dandiya Dance) ಹೆಜ್ಜೆ ಹಾಕುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ. ಸಾಮಾನ್ಯ ಮಹಿಳೆಯಂತೆ ಸಾಂಪ್ರದಾಯಿಕ ಉಡುಗೆಯಲ್ಲಿ ಕಣ್ಮನ ಸೆಳೆದ ಶಾಸಕಿಯ ಸರಳತೆ ಮತ್ತು ಉತ್ಸಾಹ ಸ್ಥಳೀಯರ ಮೆಚ್ಚುಗೆಗೆ ಪಾತ್ರವಾಗಿದೆ.

23ನೇ ವರ್ಷದ ಶರನ್ನವರಾತ್ರಿ ಉತ್ಸವದ ಸಂಭ್ರಮ:

ಮೂಡಿಗೆರೆಯ ಅಡ್ಯಂತಾಯ ರಂಗಮಂದಿರದಲ್ಲಿ ಶ್ರೀ ದುರ್ಗಾ ಸೇವಾ ಸಮಿತಿ ವತಿಯಿಂದ ಆಯೋಜಿಸಲಾಗಿದ್ದ 23ನೇ ವರ್ಷದ ಶರನ್ನವರಾತ್ರಿ ಉತ್ಸವ ಅತ್ಯಂತ ವೈಭವದಿಂದ ಜರುಗಿತು. ಧಾರ್ಮಿಕ ಪೂಜಾ ಕೈಂಕರ್ಯಗಳು ಹಾಗೂ ಆಕರ್ಷಕ ಸಾಂಸ್ಕೃತಿಕ ಕಾರ್ಯಕ್ರಮಗಳೊಂದಿಗೆ ನವರಾತ್ರಿ ಹಬ್ಬ ಕಳೆಗಟ್ಟಿತ್ತು. ಈ ಸಂಭ್ರಮಕ್ಕೆ ಮತ್ತಷ್ಟು ಕಳೆ ತಂದಿದ್ದು ಮಹಿಳೆಯರ ಸಾಂಪ್ರದಾಯಿಕ ದಾಂಡಿಯಾ ನೃತ್ಯ.

ದಾಂಡಿಯಾ ನೃತ್ಯದಲ್ಲಿ ಮಿಂಚಿದ ಶಾಸಕಿ:

ಕಾರ್ಯಕ್ರಮದಲ್ಲಿ ಅತಿಥಿಯಾಗಿ ಪಾಲ್ಗೊಂಡಿದ್ದ ಮೂಡಿಗೆರೆ ವಿಧಾನಸಭಾ ಕ್ಷೇತ್ರದ ಶಾಸಕಿ ನಯನಾ ಮೋಟಮ್ಮ ಅವರು ಕೇವಲ ವೇದಿಕೆಯ ಭಾಷಣಕ್ಕೆ ಸೀಮಿತವಾಗದೆ, ಕೆಳಗಿಳಿದು ಬಂದು ಮಹಿಳೆಯರೊಂದಿಗೆ ಕೈಜೋಡಿಸಿದರು. ಸುಂದರವಾದ ಸಾಂಪ್ರದಾಯಿಕ ಉಡುಗೆಯನ್ನು ತೊಟ್ಟಿದ್ದ ಶಾಸಕಿಯವರು ಕೈಯಲ್ಲಿ ದಾಂಡಿಯಾ ಕೋಲುಗಳನ್ನು ಹಿಡಿದು, ಹಿನ್ನೆಲೆಯಲ್ಲಿ ಮೊಳಗುತ್ತಿದ್ದ ಜಾನಪದ ಹಾಗೂ ಭಕ್ತಿಗೀತೆಗಳ ಲಯಕ್ಕೆ ತಕ್ಕಂತೆ ಹೆಜ್ಜೆ ಹಾಕಿದರು. ನಗುಮುಖದೊಂದಿಗೆ ಅತ್ಯಂತ ಲವಲವಿಕೆಯಿಂದ ಅವರು ಕುಣಿದ ರೀತಿ ನೆರೆದಿದ್ದವರಲ್ಲಿ ಮತ್ತಷ್ಟು ಹುರುಪು ತುಂಬಿತು.

ಜನಪ್ರತಿನಿಧಿಯೊಬ್ಬರು ಯಾವುದೇ ಬಿಗುಮಾನವಿಲ್ಲದೆ ತಮ್ಮೊಂದಿಗೆ ಬೆರೆತು ಸಂತಸ ಹಂಚಿಕೊಂಡಿದ್ದನ್ನು ಕಂಡು ಸ್ಥಳೀಯ ಮಹಿಳೆಯರು ಹರ್ಷ ವ್ಯಕ್ತಪಡಿಸಿದರು. ಸದ್ಯ ಶಾಸಕಿ ನಯನಾ ಮೋಟಮ್ಮ ಅವರ ಈ ದಾಂಡಿಯಾ ನೃತ್ಯದ ವಿಡಿಯೋ ಮತ್ತು ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗುತ್ತಿದ್ದು, ನೆಟ್ಟಿಗರು ಶಾಸಕಿಯ ಎನರ್ಜಿ ಮತ್ತು ಸರಳತೆಗೆ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.

ಒಂದೇ ಘಟನೆಯ ದೂರು-ಪ್ರತಿದೂರಿಗೆ ಇಬ್ಬರು ಪೊಲೀಸರಿಂದ ತನಿಖೆ ಸಲ್ಲ: ಹೈಕೋರ್ಟ್‌

Santosh Naik — Sat, 03 Oct 2026 11:11:51 +0530

ವೆಂಕಟೇಶ್‌ ಕಲಿಪಿ

ಕನ್ನಡಪ್ರಭ ವಾರ್ತೆ ಬೆಂಗಳೂರು (ಅ.3): ಒಂದೇ ಘಟನೆಗೆ ಸಂಬಂಧಿಸಿ ದೂರು-ಪ್ರತಿದೂರು ದಾಖಲಾದ ಹಿನ್ನೆಲೆಯಲ್ಲಿ ಒಂದು ದೂರನ್ನು ಇನ್ಸ್‌ಪೆಕ್ಟರ್‌, ಮತ್ತೊಂದನ್ನು ಸಬ್‌ ಇನ್ಸ್‌ಪೆಕ್ಟರ್‌ ತನಿಖೆ ನಡೆಸಿರುವುದಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿರುವ ಹೈಕೋರ್ಟ್‌, ಇನ್ನು ಮುಂದೆ ಒಂದೇ ಘಟನೆಗೆ ಸಂಬಂಧಿಸಿ ದಾಖಲಾದ ಎರಡು ದೂರುಗಳನ್ನು ಒಬ್ಬನೇ ತನಿಖಾಧಿಕಾರಿ ತನಿಖೆ ನಡೆಸುವುದನ್ನು ಖಾತರಿಪಡಿಸಬೇಕು ಎಂದು ಸರ್ಕಾರಕ್ಕೆ ಹೈಕೋರ್ಟ್‌ ಆದೇಶಿಸಿದೆ.

ಆಸ್ತಿ ವಿವಾದ ಸಂಬಂಧ ಹಲ್ಲೆ, ಅತಿಕ್ರಮ ಪ್ರವೇಶ, ಶಾಂತಿ ಭಂಗ ಪ್ರಚೋದಿಸಲು ಉದ್ದೇಶಪೂರ್ವಕವಾಗಿ ಅವಮಾನಿಸಿರುವುದು ಸೇರಿ ಇನ್ನಿತರ ಆರೋಪಗಳ ಮೇಲೆ ತಮ್ಮ ವಿರುದ್ಧ ಚಿಕ್ಕಮಗಳೂರಿನ ಬಿಲ್ಲೂರು ಗ್ರಾಮದ ನಿವಾಸಿ ಎಂ.ಮಂಜುನಾಥ್‌ ದಾಖಲಿಸಿರುವ ದೂರು ರದ್ದುಪಡಿಸುವಂತೆ ಕೋರಿ ಪುಟ್ಟಸ್ವಾಮಿ ಗೌಡ ಹಾಗೂ ಇತರೆ 12 ಮಂದಿ ಸಲ್ಲಿಸಿದ್ದ ಕ್ರಿಮಿನಲ್‌ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಸಚಿನ್‌ ಶಂಕರ್‌ ಮಗದಂ ಅವರ ಪೀಠ ಈ ಆದೇಶ ಮಾಡಿದೆ.

ಪ್ರಕರಣ ಸಂಬಂಧ ಚಿಕ್ಕಮಗಳೂರು ಜಿಲ್ಲೆಯ ಬನಕಲ್‌ ಠಾಣೆಯಲ್ಲಿ ಅರ್ಜಿದಾರರ ವಿರುದ್ಧ ಮಂಜುನಾಥ್‌ ಹಾಗೂ ಮಂಜುನಾಥ್‌ ವಿರುದ್ಧ ಅರ್ಜಿದಾರರು ಎರಡು ಪ್ರತ್ಯೇಕ ದೂರು ದಾಖಲಿಸಿದ್ದಾರೆ. ಆದರೆ ಎರಡೂ ಬಣಗಳು ಒಂದೇ ಘಟನೆಗೆ ಸಂಬಂಧಿಸಿ ದೂರು-ಪ್ರತಿ ದೂರು ದಾಖಲಿಸಿವೆ. ಮಂಜುನಾಥ್‌ ದೂರನ್ನು ಪೊಲೀಸ್‌ ಇನ್ಸ್‌ಪೆಕ್ಟರ್‌ ಹಾಗೂ ಅರ್ಜಿದಾರರ ದೂರನ್ನು ಸಬ್‌ ಇನ್ಸ್‌ಪೆಕ್ಟರ್‌ ತನಿಖೆ ನಡೆಸಿ ವಿಚಾರಣಾ ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿ ಸಲ್ಲಿಸಿದ್ದಾರೆ ಎಂದು ಆದೇಶದಲ್ಲಿ ಪೀಠ ವಿವರಿಸಿದೆ.

ತನಿಖಾ ಹಂತದಲ್ಲೇ ಸರಿಪಡಿಸಬೇಕು

ಅರ್ಜಿದಾರರು ತಮ್ಮ ವಿರುದ್ಧದ ಎಫ್‌ಐಆರ್‌ ರದ್ದತಿಗೆ ಕೋರಿದ್ದಾರೆ. ಅವರ ಆಕ್ಷೇಪ ತಮ್ಮ ಮೇಲಿನ ಆರೋಪಗಳು ಸುಳ್ಳು ಎಂಬುದಷ್ಟೇ ಅಲ್ಲ. ಬದಲಾಗಿ ಒಂದೇ ಘಟನೆಗೆ ಸಂಬಂಧಿಸಿದ ಎರಡು ದೂರುಗಳಲ್ಲಿನ ವಿಭಿನ್ನ ರೀತಿಯ ಆರೋಪಗಳನ್ನು ಬೇರೆ ಬೇರೆ ತನಿಖಾಧಿಕಾರಿಗಳು ಪ್ರತ್ಯೇಕವಾಗಿ ನಡೆಸಿ ಪ್ರತ್ಯೇಕ ಅಂತಿಮ ವರದಿ ಸಲ್ಲಿಸಿರುವ ಬಗ್ಗೆ ಆಕ್ಷೇಪಿಸಿದ್ದಾರೆ. ವಿಭಿನ್ನ ಆರೋಪಗಳನ್ನು ಒಟ್ಟಾಗಿ ಪರಿಶೀಲಿಸಿದಾಗ ಮಾತ್ರ ತನಿಖಾಧಿಕಾರಿ ಘಟನೆಯ ಮೂಲ, ಎರಡೂ ಕಡೆಯ ವೈದ್ಯಕೀಯ ಸಾಕ್ಷ್ಯ ಸಂಗ್ರಹ, ಸಾಕ್ಷಿಗಳ ಹೇಳಿಕೆ ದಾಖಲಿಸಲು ಮತ್ತು ಸಂಪೂರ್ಣ ವಾಸ್ತವಾಂಶಗಳನ್ನು ಸಮರ್ಥವಾಗಿ ನ್ಯಾಯಾಲಯದ ಮುಂದೆ ಮಂಡಿಸಲು ಸಾಧ್ಯವಾಗುತ್ತಿತ್ತು ಎಂದು ಪೀಠ ಆದೇಶದಲ್ಲಿ ಉಲ್ಲೇಖಿಸಿದೆ.

ಮೇಲ್ನೋಟಕ್ಕೆ ದೂರಿನಲ್ಲಿನ ಅಪರಾಧಗಳನ್ನು ಸಾಬೀತುಪಡಿಸುವಂತಹ ಸಾಕ್ಷ್ಯಾಧಾರಗಳ ಅಸ್ತಿತ್ವ, ತನಿಖೆಯ ಕಾನೂನುಬದ್ಧತೆ ಮತ್ತು ಸಮಗ್ರತೆ ಪ್ರತ್ಯೇಕ ವಿಷಯಗಳಾಗಿವೆ. ಆ ಬಗ್ಗೆ ಈ ಹಂತದಲ್ಲಿ ಯಾವುದೇ ಅಭಿಪ್ರಾಯ ವ್ಯಕ್ತಪಡಿಸುವುದಿಲ್ಲ. ಆದರೆ, ಒಂದೇ ಘಟನೆಯಿಂದ ಉದ್ಭವಿಸಿರುವ ಎರಡು ಪ್ರತ್ಯೇಕ ದೂರುಗಳನ್ನು ಇಬ್ಬರು ವಿಭಿನ್ನ ತನಿಖಾಧಿಕಾರಿಗಳು ನಡೆಸಿದರೆ, ಅದರ ಆಧಾರದ ಮೇಲೆ ಎರಡು ಸಮಾನಾಂತರ ಅಭಿಯೋಜನೆಗೆ ಅನುಮತಿಸುವುದಿಲ್ಲ ಮತ್ತು ವಿಚಾರಣಾ ಪ್ರಕ್ರಿಯೆ ಮುಂದುವರಿಸುವುದು ನ್ಯಾಯಯುತವಲ್ಲ ಎಂದು ಆಕ್ಷೇಪಿಸಿರುವ ಪೀಠ, ಈ ಲೋಪವನ್ನು ತನಿಖಾ ಹಂತದಲ್ಲೇ ಸರಿಪಡಿಸಬೇಕಾದ ಅಗತ್ಯವಿದೆ. ಹಾಗಾಗಿ, ಎರಡೂ ದೂರುಗಳ ತನಿಖೆ, ದೋಷಾರೋಪ ಪಟ್ಟಿ ರದ್ದುಪಡಿಸಲಾಗುತ್ತಿದೆ ಎಂದು ತಿಳಿಸಿದೆ.

ಅಂತಿಮವಾಗಿ ಎರಡೂ ದೂರುಗಳನ್ನು ಪೊಲೀಸ್‌ ಇನ್ಸ್‌ಪೆಕ್ಟರ್‌ ಶ್ರೇಣಿಯ ಒಂದೇ ತನಿಖಾಧಿಕಾರಿ ಕಾನೂನು ಪ್ರಕಾರ ಹೊಸದಾಗಿ ತನಿಖೆ ನಡೆಸಬೇಕು. ಘಟನೆಯಲ್ಲಿ ಭಾಗಿಯಾಗಿರುವ ಪ್ರತಿಯೊಬ್ಬರ ಕೃತ್ಯ ಪರಿಶೀಲಿಸಿ ಮೂರು ತಿಂಗಳಲ್ಲಿ ತನಿಖೆ ಪೂರ್ಣಗೊಳಿಸಿ ವರದಿ ಸಲ್ಲಿಸಬೇಕು. ಅದರ ಆಧಾರದಲ್ಲಿ ಸಂಬಂಧಪಟ್ಟ ವಿಚಾರಣಾ ನ್ಯಾಯಾಲಯ ಮುಂದಿನ ಕ್ರಮ ಜರುಗಿಸಬೇಕೆಂದು ಪೀಠ ಆದೇಶಿಸಿದೆ.

ಪ್ರಕರಣದ ಹಿನ್ನೆಲೆ

2025ರ ಫೆ.4ರಂದು ಮಂಜುನಾಥ್‌ (76) ಅವರು ದೂರು ನೀಡಿ, ಅಂದು ಬೆಳಗ್ಗೆ 10ಕ್ಕೆ ನನ್ನ ಮನೆ ಮುಂದೆ ಕಾಫಿ ಬೀಜ ಒಣಗಿಸುತ್ತಿದ್ದಾಗ ಅರ್ಜಿದಾರರು ಬಂದು ನನಗೆ ಅಶ್ಲೀಲವಾಗಿ ಬೈದು ಹಲ್ಲೆ ನಡೆಸಿದರು ಎಂದು ಆರೋಪಿಸಿದ್ದರು. ಅಂದೇ ಅರ್ಜಿದಾರ ಪುಟ್ಟಸ್ವಾಮಿ ಗೌಡ, ನಾನು ಕಾಫಿ ತೋಟಕ್ಕೆ ಬೇಲಿ ಹಾಕುತ್ತಿರುವುದನ್ನು ಆಕ್ಷೇಪಿಸಿ ಮಂಜನಾಥ್‌ ಅಶ್ಲೀಲ ಶಬ್ದಗಳಿಂದ ನನಗೆ ನಿಂದಿಸಿ, ಕಲ್ಲಿನಿಂದ ಹಲ್ಲೆ ನಡೆಸಿದರು ಎಂದು ಆರೋಪಿಸಿ ಪ್ರತ್ಯೇಕ ದೂರು ದಾಖಲಿಸಿದ್ದರು.

Chikkamgaluru: 'ಮದಗಜಗಳ ಕಾದಾಟ', ರಾಮನ ಬಾಣಕ್ಕೆ ಹುಸಿಯಿಲ್ಲ; ಮಹಾನವಮಿಗೆ ಎಚ್ಚರಿಕೆಯ ಕಾರ್ಣಿಕ ನುಡಿ

Sumanth SN — Wed, 21 Oct 2026 09:30:30 +0530

ಚಿಕ್ಕಮಗಳೂರು: ಜಿಲ್ಲೆಯ ಕಡೂರು ತಾಲೂಕಿನ ಖ್ಯಾತ ಬೀರೂರು ಮೈಲಾರಲಿಂಗೇಶ್ವರಸ್ವಾಮಿಯ ಕಾರ್ಣಿಕದ ನುಡಿ ಸಂಚಲವನ್ನು ಮೂಡಿಸಿದೆ. 'ಸೃಷ್ಟಿಗೆ ನಾಡು ಸಿರಿಯಾಯಿತು. ಮದಗಜಗಳು ಕಾದಾಡಿದರು. ಕತ್ತಲೆಯ ದೀಪಕ್ಕೆ ಬೆಳಕಾಯಿತು. ಸರ್ವರು ಎಚ್ಚರದಿಂದರಬೇಕು ಎಂದು ದೇವಸ್ಥಾನದ ಅರ್ಚಕ ದಶರಥ ಪೂಜಾರ್ ಅವರು ಕಾರ್ಣಿಕ ನುಡಿದಿದ್ದಾರೆ.

ಐತಿಹಾಸಿಕ ಬೀರೂರು ಮೈಲಾರಲಿಂಗೇಶ್ವರಸ್ವಾಮಿಯ ಕಾರ್ಣಿಕದ ನುಡಿ

ಕಡೂರು ತಾಲೂಕಿನ ಬೀರೂರಿನ ಮಹಾನವಮಿ ಬಯಲಿನಲ್ಲಿ ಮೈಲಾರಲಿಂಗೇಶ್ವರ ಸ್ವಾಮಿಯ ಕಾರ್ಣಿಕ ನುಡಿಯನ್ನು, ರಾಮನ ಬಾಣದಂತೆ ನಿಖರ ಕಾರ್ಣಿಕ ನುಡಿ ಎಂದೇ ಭಕ್ತರು ನಂಬುತ್ತಾರೆ. ಆದ್ದರಿಂದಲೇ ಪ್ರತಿ ವರ್ಷ ಮಹಾನವಮಿಗೆ ಸಾವಿರಾರು ಭಕ್ತರು ಕಾರ್ಣಿಕಕ್ಕಾಗಿ ಎದುರು ನೋಡುತ್ತಾರೆ.

ಮೈಲಾರಲಿಂಗೇಶ್ವರಸ್ವಾಮಿಯ ಕಾರ್ಣಿಕ ವಿಶ್ಲೇಷಣೆ

ಬೆಳಗಿನ ಜಾವದಲ್ಲಿ ಹೊರ ಬಿದ್ದ ಕಾರ್ಣಿಕದ ನುಡಿಯನ್ನು ಅರ್ಚಕ ವಿಜೇತ್ ಅವರ ವಿಶ್ಲೇಷಣೆ ಮಾಡಿ ಭಕ್ತರಿಗೆ ತಿಳಿಸಿದ್ದಾರೆ. ಈ ಬಾರಿಯ ಕಾರ್ಣಿಕ ನುಡಿ ನೋಡುವುದಾದರೆ, 'ಇಟ್ಟ ರಾಮನ ಬಾಣಕ್ಕೆ ಹುಸಿಯಿಲ್ಲ. ಸೃಷ್ಟಿಗೆ ನಾಡು ಸಿರಿಯಾಯಿತು. ಮದಗಜಗಳು ಕಾದಾಡಿದರು. ಕತ್ತಲೆಯ ದೀಪಕ್ಕೆ ಬೆಳಕಾಯಿತು. ಸರ್ವರು ಎಚ್ಚರದಿಂದರಬೇಕು' ಎಂದು ದೇವಸ್ಥಾನದ ಅರ್ಚಕ ದಶರಥ ಪೂಜಾರ್ ಅವರಿಂದ ಕಾರ್ಣಿಕ ನುಡಿ ಹೊರಬಿದ್ದಿದೆ.

ರಾಜ್ಯದ ವಿವಿಧ ಮೂಲೆಗಳಿಂದ ಆಗಮಿಸಿದ್ದ ಸಾವಿರಾರು ಭಕ್ತರು ಈ ಕ್ಷಣಕ್ಕೆ ಸಾಕ್ಷಿಯಾಗಿದ್ದಾರೆ. ಇಲ್ಲಿನ ಕಾರ್ಣಿಕ ನುಡಿ ವರ್ಷದೊಳಗೆ ನಡೆಯುತ್ತೇ ಎಂಬ ನಂಬಿಕೆ ಭಕ್ತರಲ್ಲಿದೆ. ಮಹಾನವಮಿ ದಿನ ಗೊರವಯ್ಯ ಕಾರ್ಣಿಕ ನುಡಿಯೂ ಸಮಾಜದ ಆಗುಹೋಗುಗಳ ಬಗ್ಗೆ ಸುಳಿವು ನೀಡಿದೆ.

ಕಾರ್ಣಿಕದ ಮೂರು ವಾಕ್ಯಗಳ ಅರ್ಥ ವಿಶ್ಲೇಷಿಸಿದ ಮೈಲಾರಲಿಂಗೇಶ್ವರ ಸ್ವಾಮಿ ದೇವಾಲಯದ ಅರ್ಚಕ ವಿಜೇತ್, “ಸೃಷ್ಟಿಗೆ ನಾಡು ಸಿರಿಯಾಯ್ತು” – ಉತ್ತಮ ಮಳೆ, ಸಮೃದ್ಧ ಬೆಳೆ ಹಾಗೂ ವಾಣಿಜ್ಯ ಕ್ಷೇತ್ರದಲ್ಲಿ ಪ್ರಗತಿಯ ಸಂಕೇತವಾಗಿದೆ. “ಮದಗಜಗಳು ಕಾದಾಡಿದರು” – ಪ್ರಭಾವಿ ವ್ಯಕ್ತಿಗಳು ಅಥವಾ ಬಲಿಷ್ಠ ಗುಂಪುಗಳ ನಡುವೆ ಸಂಘರ್ಷ ಉಂಟಾಗುವ ಸೂಚನೆಯಾಗಿದೆ. “ಕತ್ತಲೆಯ ದೀಪಕ್ಕೆ ಬೆಳಕಾಯಿತು” – ಕಷ್ಟ, ಅಜ್ಞಾನ ಮತ್ತು ಅನ್ಯಾಯದ ನಡುವೆ ಜ್ಞಾನ, ಸತ್ಯ ಹಾಗೂ ನ್ಯಾಯದ ಬೆಳಕು ಮೂಡುವ ಸಂಕೇತ ಎಂದು ತಿಳಿಸಿದ್ದಾರೆ. ಕಾರ್ಣಿಕದ ನುಡಿಯಲ್ಲಿ ಎರಡು ಎಚ್ಚರಿಕೆಯ ಸಂದೇಶಗಳು, ಒಂದು ಶುಭ ಸೂಚನೆ ಇದೆ ಎಂದು ಅರ್ಚಕರು ತಿಳಿಸಿದ್ದಾರೆ.

ಮುಂದಿನ 3 ಗಂಟೆಗಳಲ್ಲಿ ಗುಡುಗು ಸಹಿತ ಭಾರಿ ಮಳೆ: ಕರಾವಳಿ, ಮಲೆನಾಡಿಗೆ 'ಎಲ್ಲೋ ಅಲರ್ಟ್' ನೀಡಿದ ಹವಾಮಾನ ಇಲಾಖೆ

Santosh Naik — Fri, 23 Oct 2026 19:43:21 +0530

ಬೆಂಗಳೂರು (ಅ.23): ರಾಜ್ಯದ ಕರಾವಳಿ ಮತ್ತು ಮಲೆನಾಡು ಭಾಗಗಳಲ್ಲಿ ಹವಾಮಾನ ವೈಪರೀತ್ಯ ತೀವ್ರಗೊಂಡಿದ್ದು, ಮುಂದಿನ 3 ಗಂಟೆಗಳ ಅವಧಿಯಲ್ಲಿ ಗುಡುಗು, ಸಿಡಿಲು ಸಹಿತ ಭಾರಿ ಮಳೆಯಾಗುವ ಸಾಧ್ಯತೆಯಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಈ ಹಿನ್ನೆಲೆಯಲ್ಲಿ ಕರಾವಳಿ ಮತ್ತು ಮಲೆನಾಡಿನ ಪ್ರಮುಖ ಜಿಲ್ಲೆಗಳಿಗೆ ಹವಾಮಾನ ಇಲಾಖೆಯು 'ಎಲ್ಲೋ ಅಲರ್ಟ್' (Yellow Alert) ಘೋಷಿಸಿದೆ.

ವಿಶೇಷವಾಗಿ ದಕ್ಷಿಣ ಕನ್ನಡ, ಉಡುಪಿ ಹಾಗೂ ಚಿಕ್ಕಮಗಳೂರು ಜಿಲ್ಲೆಗಳಲ್ಲಿ ವರುಣನ ಅಬ್ಬರ ಹೆಚ್ಚಿರಲಿದ್ದು, ಕೆಲವು ಆಯಕಟ್ಟಿನ ಸ್ಥಳಗಳಲ್ಲಿ ತೀವ್ರ ಪ್ರಮಾಣದ ಮಳೆ ಸುರಿಯಲಿದೆ. ಸಂಜೆ 6 ಗಂಟೆಯಿಂದ ಆರಂಭಗೊಂಡು ಮುಂದಿನ ಮೂರು ಗಂಟೆಗಳ ಕಾಲ ಈ ಭಾಗಗಳಲ್ಲಿ ಹವಾಮಾನ ಸ್ಥಿತಿಗತಿಯಲ್ಲಿ ದಿಢೀರ್ ಮಾರ್ಪಾಡುಗಳು ಉಂಟಾಗಲಿವೆ ಎಂದು ಇಲಾಖೆ ತಿಳಿಸಿದೆ.

ಗಂಟೆಗೆ 30–40 ಕಿ.ಮೀ ವೇಗದಲ್ಲಿ ಬೀಸಲಿದೆ ಬಿರುಗಾಳಿ

ಮಳೆಯ ಜೊತೆಗೆ ಸೆಂಪೂರ್ಣ ಕರಾವಳಿ ಹಾಗೂ ಮಲೆನಾಡು ವ್ಯಾಪ್ತಿಯಲ್ಲಿ ಚಂಡಮಾರುತ ಮಾದರಿಯ ಬಿರುಗಾಳಿ ಬೀಸುವ ಸಾಧ್ಯತೆಯಿದೆ. ಮಳೆ ಸುರಿಯುವ ಸಂದರ್ಭದಲ್ಲಿ ಗಂಟೆಗೆ 30 ರಿಂದ 40 ಕಿಲೋಮೀಟರ್ ವೇಗದಲ್ಲಿ ಬಲವಾದ ಗಾಳಿ ಬೀಸಲಿದ್ದು, ಸಾರ್ವಜನಿಕರು ಹಾಗೂ ವಾಹನ ಸವಾರರು ಜಾಗರೂಕರಾಗಿರಲು ಹವಾಮಾನ ತಜ್ಞರು ಎಚ್ಚರಿಸಿದ್ದಾರೆ.

ಸಾಮಾನ್ಯವಾಗಿ ಸಂಜೆ ವೇಳೆಗೆ ವಾತಾವರಣದಲ್ಲಿ ಉಂಟಾಗುವ ಏರಿಳಿತಗಳು ಹಾಗೂ ಹವಾಮಾನ ವೈಪರೀತ್ಯದಿಂದಾಗಿ ಗುಡುಗು, ಸಿಡಿಲಿನ ಆರ್ಭಟ ಹೆಚ್ಚಿರಲಿದೆ. ಹೀಗಾಗಿ, ತೆರೆದ ಪ್ರದೇಶಗಳು, ಮರಗಳ ಕೆಳಗೆ ಹಾಗೂ ವಿದ್ಯುತ್ ಕಂಬಗಳ ಬಳಿ ನಿಲ್ಲದಂತೆ ಮತ್ತು ಕರಾವಳಿ ಭಾಗದ ಜನರು ಅಗತ್ಯ ಮುನ್ನೆಚ್ಚರಿಕೆ ವಹಿಸುವಂತೆ ಸೂಚಿಸಲಾಗಿದೆ. ಮಲೆನಾಡಿನ ಗಿರಿಪ್ರದೇಶಗಳು ಹಾಗೂ ಕರಾವಳಿಯ ತಗ್ಗು ಪ್ರದೇಶಗಳಲ್ಲಿ ಮಳೆಯಿಂದಾಗಿ ಸಂಚಾರಕ್ಕೆ ಅಡಚಣೆ ಉಂಟಾಗುವ ಸಾಧ್ಯತೆಯಿದ್ದು, ಮುಂದಿನ ಕೆಲ ಗಂಟೆಗಳಲ್ಲಿ ಮಳೆ ಮತ್ತಷ್ಟು ಚುರುಕುಗೊಳ್ಳಲಿದೆ.

ಚಿಕ್ಕಮಗಳೂರು ಆರೋಪಿ ಸತೀಶ್ ಪಾತ್ರಿಗೆ ಮಾಹಿತಿ ಸೋರಿಕೆ; ಎನ್.ಆರ್.ಪುರ ಪೇದೆ ಕಾಂತೇಶ್ ಸಸ್ಪೆಂಡ್!

Sathish Kumar KH — Wed, 07 Oct 2026 15:01:22 +0530

ಚಿಕ್ಕಮಗಳೂರು (ಅ.07): ಅಪ್ರಾಪ್ತ ಬಾಲಕಿಯ ಮೇಲೆ ಅತ್ಯಾ*ರ ಹಾಗೂ ಭೂತ ಬಿಡಿಸುವ ನೆಪದಲ್ಲಿ ಹಿಂಸೆ ನೀಡಿದ ಗಂಭೀರ ಪ್ರಕರಣದ ಪ್ರಮುಖ ಆರೋಪಿಯೊಂದಿಗೆ ನಿರಂತರ ಸಂಪರ್ಕದಲ್ಲಿದ್ದು ಕರ್ತವ್ಯಲೋಪ ಎಸಗಿದ ಪೊಲೀಸ್ ಪೇದೆಯನ್ನು ಸೇವೆಯಿಂದ ಅಮಾನತುಗೊಳಿಸಲಾಗಿದೆ. ಎನ್.ಆರ್. ಪುರ ಪೊಲೀಸ್ ಠಾಣೆಯ ಕಾನ್‌ಸ್ಟೆಬಲ್ ಕಾಂತೇಶ್ ಅಮಾನತಾದ ಸಿಬ್ಬಂದಿ ಆಗಿದ್ದಾನೆ.

ಚಿಕ್ಕಮಗಳೂರು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ (ಎಸ್ಪಿ) ಜಿತೇಂದ್ರ ಕುಮಾರ್ ದಯ್ಮಾ ಅವರು ಪೇದೆ ಕಾಂತೇಶ್ ವಿರುದ್ಧ ಈ ಶಿಸ್ತುಕ್ರಮ ಕೈಗೊಂಡು ಆದೇಶಿಸಿದ್ದಾರೆ. ಭೂತ ಬಿಡಿಸುವ ನೆಪದಲ್ಲಿ ಅಪ್ರಾಪ್ತ ಬಾಲಕಿಗೆ ಕೋಳಿ ರಕ್ತ ಕುಡಿಯುವಂತೆ ಬಲವಂತಪಡಿಸಿ ಹಿಂಸಿಸಿದ ಅಮಾನವೀಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿತ್ತು. ಈ ಸಂಬಂಧ ಆರೋಪಿ ಸತೀಶ್ ಪಾತ್ರಿ ವಿರುದ್ಧ ಎನ್.ಆರ್. ಪುರ ಹಾಗೂ ಕೊಪ್ಪ ಪೊಲೀಸ್ ಠಾಣೆಗಳಲ್ಲಿ ಪೋಕ್ಸೋ, ಅತ್ಯಾ*ರ ಹಾಗೂ ವಂಚನೆ ಪ್ರಕರಣಗಳು ದಾಖಲಾಗಿದ್ದವು. ಪ್ರಕರಣ ದಾಖಲಾದ ಬೆನ್ನಲ್ಲೇ ಕಳೆದ ಒಂದು ತಿಂಗಳಿನಿಂದ ಆರೋಪಿ ಪೊಲೀಸರ ಕೈಗೆ ಸಿಗದೆ ತಲೆಮರೆಸಿಕೊಂಡಿದ್ದಾನೆ.

ಆರೋಪಿಗೆ ಗೌಪ್ಯ ಮಾಹಿತಿ ರವಾನಿಸಿದ ಪೇದೆ

ಆರೋಪಿಯನ್ನು ಬಂಧಿಸಲು ಪೊಲೀಸರು ಬಲೆ ಬೀಸಿದ್ದರೆ, ಎನ್.ಆರ್. ಪುರ ಠಾಣೆಯ ಪೇದೆ ಕಾಂತೇಶ್ ಮಾತ್ರ ಆರೋಪಿ ಸತೀಶ್ ಕುಟುಂಬದೊಂದಿಗೆ ಸಂಪರ್ಕದಲ್ಲಿದ್ದು, ಇಲಾಖೆಯ ಚಲನವಲನ ಹಾಗೂ ಠಾಣೆಯ ಗೌಪ್ಯ ಮಾಹಿತಿಗಳನ್ನು ಆತನಿಗೆ ರವಾನಿಸುತ್ತಿದ್ದ ಎನ್ನಲಾಗಿದೆ. ಪೊಲೀಸರ ಆಂತರಿಕ ತನಿಖೆಯಲ್ಲಿ ಇದು ಬಯಲಾಗುತ್ತಿದ್ದಂತೆ ಎಸ್ಪಿ ಅವರು ಪೇದೆಯನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ಅಮಾನತುಗೊಳಿಸಿದ್ದಾರೆ.

'ಶೃಂಗೇರಿ ಕ್ಷೇತ್ರದ ಮತ ಎಣಿಕೆಯ ವೀಡಿಯೋ ನಾಪತ್ತೆ' ಚುನಾವಣಾ ಆಯೋಗದ ಮಾತಿಗೆ ಸುಪ್ರೀಂ ಕೋರ್ಟ್‌ ತರಾಟೆ

Santosh Naik — Thu, 15 Oct 2026 13:06:46 +0530

ನವದೆಹಲಿ (ಅ.15): ಕರ್ನಾಟಕದ ಶೃಂಗೇರಿ ವಿಧಾನಸಭಾ ಕ್ಷೇತ್ರದ 2023 ರ ಚುನಾವಣೆಯ ಮತ ಎಣಿಕೆಯ ವೀಡಿಯೋ ರೆಕಾರ್ಡಿಂಗ್ ಅನ್ನು ಪತ್ತೆಹಚ್ಚಲು ವಿಫಲವಾಗಿರುವ ಭಾರತೀಯ ಚುನಾವಣಾ ಆಯೋಗಕ್ಕೆ (ECI) ಸುಪ್ರೀಂ ಕೋರ್ಟ್ ಬುಧವಾರ ತೀವ್ರ ತರಾಟೆಗೆ ತೆಗೆದುಕೊಂಡಿದೆ. ಮುಂದಿನ ವಿಚಾರಣೆಯ ವೇಳೆಗೆ ಲಭ್ಯವಿರುವ ಎಲ್ಲಾ ದಾಖಲೆಗಳನ್ನು ನ್ಯಾಯಾಲಯಕ್ಕೆ ಸಲ್ಲಿಸಬೇಕು ಎಂದು ಕೋರ್ಟ್‌ ಆದೇಶಿಸಿದ್ದು, ಒಂದು ವೇಳೆ ದಾಖಲೆಗಳನ್ನು ಒದಗಿಸಲು ವಿಫಲವಾದರೆ ಆಯೋಗದ ವಿರುದ್ಧ 'ಕೆಟ್ಟ ತೀರ್ಮಾನ' (Adverse Inference) ಕೈಗೊಳ್ಳಲಾಗುವುದು ಎಂದು ಗಂಭೀರ ಎಚ್ಚರಿಕೆ ನೀಡಿದೆ. ಈ ಬೆಳವಣಿಗೆಯಿಂದಾಗಿ ಮುಖ್ಯ ಚುನಾವಣಾ ಆಯುಕ್ತ (CEC) ಜ್ಞಾನೇಶ್ ಕುಮಾರ್ ಅವರಿಗೆ ಕಷ್ಟಗಳು ಹೆಚ್ಚಾಗುವ ಲಕ್ಷಣಗಳು ಕಂಡುಬರುತ್ತಿವೆ.

"ದಾಖಲೆ ಕಳೆದುಹೋಯಿತು ಎನ್ನಲು ಹೇಗೆ ಸಾಧ್ಯ?" - ಸುಪ್ರೀಂ ಕೋರ್ಟ್ ಪ್ರಹಾರ

ನ್ಯಾಯಮೂರ್ತಿಗಳಾದ ಸಂಜಯ್ ಕುಮಾರ್ ಹಾಗೂ ಸಂಜೀವ್ ಸಚ್ದೇವ್ ಅವರನ್ನೊಳಗೊಂಡ ದ್ವಿ ಸದಸ್ಯ ಪೀಠವು ಶೃಂಗೇರಿ ಕ್ಷೇತ್ರದ ಮತ ಎಣಿಕೆ ವಿವಾದವನ್ನು ಆಯೋಗ ನಿರ್ವಹಿಸಿದ ರೀತಿಯನ್ನು ಕಟುವಾಗಿ ಪ್ರಶ್ನಿಸಿತು. "ಚುನಾವಣಾ ಆಯೋಗವೇ ತನ್ನ ಸ್ವಂತ ದಾಖಲೆಗಳನ್ನು ಕಳೆದುಕೊಂಡಿದೆ ಎಂದು ಹೇಗೆ ಹೇಳಲು ಸಾಧ್ಯ? ನಿಮ್ಮ ಇಡೀ ಸಂಸ್ಥೆಯ ಮೂಲ ಉದ್ದೇಶವೇ ನ್ಯಾಯಸಮ್ಮತವಾಗಿ ಚುನಾವಣೆ ನಡೆಸುವುದು. ಹಾಗಿರುವಾಗ ಪ್ರತಿಯೊಂದು ದಾಖಲೆಯೂ ನಿಮ್ಮ ಬಳಿ ಸುರಕ್ಷಿತವಾಗಿರಬೇಕಲ್ಲವೇ?" ಎಂದು ನ್ಯಾಯಪೀಠ ಪ್ರಶ್ನೆ ಮಾಡಿದೆ.

ಆಯೋಗದ ಪರ ವಕೀಲರು ವೀಡಿಯೋ ಪತ್ತೆಹಚ್ಚಲು ಪ್ರಯತ್ನಿಸುತ್ತಿದ್ದೇವೆ ಎಂದು ನೀಡಿದ ಸಮಜಾಯಿಷಿಯನ್ನು ಒಪ್ಪದ ಪೀಠವು, "ನಾವು ಪತ್ತೆಹಚ್ಚಲು ಯತ್ನಿಸುತ್ತಿದ್ದೇವೆ ಎಂಬಂತಹ ಸಬೂಬುಗಳನ್ನು ಸ್ವೀಕರಿಸುವುದಿಲ್ಲ. ನಿಮ್ಮ ಬಳಿ ಏನೇ ದಾಖಲೆಗಳಿದ್ದರೂ ಅದನ್ನು 2027 ರ ಫೆಬ್ರವರಿ 15 ರಂದು ನಡೆಯಲಿರುವ ಮುಂದಿನ ವಿಚಾರಣೆಯ ವೇಳೆ ಪೀಠದ ಮುಂದೆ ಹಾಜರುಪಡಿಸಬೇಕು. ಇಲ್ಲವಾದಲ್ಲಿ ನಿಮ್ಮ ವಿರುದ್ಧ ಸೂಕ್ತ ಕಾನೂನು ಕ್ರಮ ಜರುಗಿಸಬೇಕಾಗುತ್ತದೆ" ಎಂದು ಕಟ್ಟುನಿಟ್ಟಿನ ನಿರ್ದೇಶನ ನೀಡಿತು.

ಏನಿದು ಶೃಂಗೇರಿ ಕ್ಷೇತ್ರದ ಚುನಾವಣೆ ವಿವಾದ?

2023 ರ ಕರ್ನಾಟಕ ವಿಧಾನಸಭಾ ಚುನಾವಣೆಯಲ್ಲಿ ಶೃಂಗೇರಿ ಕ್ಷೇತ್ರದಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಟಿಡಿ ರಾಜೇಗೌಡ ಅವರು ಬಿಜೆಪಿ ಅಭ್ಯರ್ಥಿ ಡಿ.ಎನ್. ಜೀವರಾಜ್ ವಿರುದ್ಧ 201 ಮತಗಳ ಅಲ್ಪ ಅಂತರದಿಂದ ಜಯಗಳಿಸಿದ್ದರು. ಈ ಫಲಿತಾಂಶವನ್ನು ಪ್ರಶ್ನಿಸಿ ಜೀವರಾಜ್ ಕರ್ನಾಟಕ ಹೈಕೋರ್ಟ್ ಮೆಟ್ಟಿಲೇರಿದ್ದರು. ಪ್ರಕರಣದ ವಿಚಾರಣೆ ನಡೆಸಿದ್ದ ಹೈಕೋರ್ಟ್ ಏಪ್ರಿಲ್ 6 ರಂದು ಅಂಚೆ ಮತಗಳ (Postal Ballots) ಮರುಎಣಿಕೆಗೆ ಆದೇಶಿಸಿತ್ತು. ತದನಂತರ ಮೇ 3, 2026 ರಂದು ನಡೆದ ಮರುಎಣಿಕೆಯ ಬಳಿಕ, ರಾಜೇಗೌಡ ಅವರ ಮತಗಳ ಪೈಕಿ 255 ಮತಗಳು ಕಡಿಮೆಯಾಗಿದ್ದವು. ಪರಿಣಾಮವಾಗಿ ಹೈಕೋರ್ಟ್ ಬಿಜೆಪಿ ಅಭ್ಯರ್ಥಿ ಡಿ.ಎನ್. ಜೀವರಾಜ್ ಅವರನ್ನು ವಿಜಯಿ ಎಂದು ಘೋಷಿಸಿತ್ತು.

ಹೈಕೋರ್ಟ್ ಆದೇಶ ಮೀರಿ ಮರುಎಣಿಕೆ ನಡೆದಿದೆ ಎಂದು ರಾಜೇಗೌಡ ಆರೋಪ

ಹೈಕೋರ್ಟ್‌ನ ಈ ಮರುಎಣಿಕೆ ಪ್ರಕ್ರಿಯೆಯನ್ನು ಪ್ರಶ್ನಿಸಿ ಟಿ.ಡಿ. ರಾಜೇಗೌಡ ಸುಪ್ರೀಂ ಕೋರ್ಟ್‌ನಲ್ಲಿ ಮೇಲ್ಮನವಿ ಸಲ್ಲಿಸಿದ್ದಾರೆ. ಹೈಕೋರ್ಟ್ ಕೇವಲ ತಿರಸ್ಕೃತಗೊಂಡಿದ್ದ 279 ಅಂಚೆ ಮತಗಳ ಮರುಪರಿಶೀಲನೆಗೆ ಮಾತ್ರ ಆದೇಶಿಸಿತ್ತು, ಆದರೆ ಅಧಿಕಾರಿಗಳು ಅದನ್ನು ಮೀರಿ ಸ್ವೀಕೃತಗೊಂಡಿದ್ದ 562 ಅಂಚೆ ಮತಗಳನ್ನೂ ಮರುಪರಿಶೀಲಿಸಿದ್ದಾರೆ ಎಂದು ರಾಜೇಗೌಡ ಆಪಾದಿಸಿದ್ದಾರೆ.

ಈ ಹಿನ್ನೆಲೆಯಲ್ಲಿ 2023 ರ ಮೂಲ ಮತ ಎಣಿಕೆ ಹಾಗೂ ಮರುಎಣಿಕೆ ಪ್ರಕ್ರಿಯೆಯ ವೀಡಿಯೋ ತುಣುಕುಗಳು ಮತ್ತು ಚುನಾವಣಾ ವೀಕ್ಷಕರ ವರದಿಯನ್ನು ಒದಗಿಸುವಂತೆ ಅವರು ಮನವಿ ಮಾಡಿದ್ದರು. ಆದರೆ ಮೂಲ ಮತ ಎಣಿಕೆಯ ವೀಡಿಯೋ ಕಣ್ಮರೆಯಾಗಿದೆ ಎಂದು ಆಯೋಗ ನ್ಯಾಯಾಲಯಕ್ಕೆ ತಿಳಿಸಿದ್ದು ಸುಪ್ರೀಂ ಕೋರ್ಟ್‌ನ ತೀವ್ರ ಅಸಮಾಧಾನಕ್ಕೆ ಕಾರಣವಾಯಿತು. ಪ್ರಕರಣ ಅಂತಿಮವಾಗಿ ಇತ್ಯರ್ಥವಾಗುವವರೆಗೆ ಟಿ.ಡಿ. ರಾಜೇಗೌಡ ಅವರಿಗೆ ಶಾಸಕ ಸ್ಥಾನದಲ್ಲಿ ಮುಂದುವರಿಯಲು ಸುಪ್ರೀಂ ಕೋರ್ಟ್ ಈಗಾಗಲೇ ಮಧ್ಯಂತರ ಪರಿಹಾರ ನೀಡಿದೆ.