Asianet Suvarna News

ಬ್ಯಾಡ್ಮಿಂಟನ್ ಆಡುತ್ತಿದ್ದ ದೀಪಿಕಾ ನಟಿಯಾಗಿದ್ದೇಗೆ?: ನಿರ್ದೇಶಕ ಇಂದ್ರಜಿತ್ ಲಂಕೇಶ್ ಹೇಳಿದ್ದು ಇದೇ!

Govindaraj S — Sun, 20 Sep 2026 17:42:03 +0530

ಸ್ಯಾಂಡಲ್‌ವುಡ್‌ ನಿರ್ದೇಶಕ ಇಂದ್ರಜಿತ್ ಲಂಕೇಶ್ ಅವರಿಗೆ ಪ್ರತಿಭೆಯನ್ನು ಗುರುತಿಸುವ ಸಾಮರ್ಥ್ಯವೇ ತಮ್ಮ ದೊಡ್ಡ ಶಕ್ತಿ ಎಂಬ ನಂಬಿಕೆ ಸದಾ ಇದೆ. ದೀಪಿಕಾ ಪಡುಕೋಣೆ ಭಾರತೀಯ ಚಿತ್ರರಂಗದ ದೊಡ್ಡ ಹೆಸರುಗಳಲ್ಲಿ ಒಂದಾಗುವ ಹಲವು ವರ್ಷಗಳ ಮೊದಲೇ, ಅವರಲ್ಲಿದ್ದ ಪ್ರತಿಭೆ ಹಾಗೂ ಸಾಮರ್ಥ್ಯವನ್ನು ತಾವು ಗುರುತಿಸಿದ್ದಾಗಿ ಇಂದ್ರಜಿತ್ ಲಂಕೇಶ್ 'ಟೈಮ್ಸ್ ಆಫ್ ಇಂಡಿಯಾ'ಗೆ ಹೇಳಿದ್ದಾರೆ. ವಿಶೇಷವೆಂದರೆ, ದೀಪಿಕಾ ಪಡುಕೋಣೆ ನಟಿಯಾಗಿ ಚಿತ್ರರಂಗಕ್ಕೆ ಕಾಲಿಡುವುದಕ್ಕೂ ಮುನ್ನವೇ ಅವರ ಪರಿಚಯ ಇಂದ್ರಜಿತ್ ಲಂಕೇಶ್ ಅವರಿಗಿತ್ತು. ಆಗ ದೀಪಿಕಾ ಬ್ಯಾಡ್ಮಿಂಟನ್ ಆಟಗಾರ್ತಿಯಾಗಿದ್ದರು.

ಬ್ಯಾಡ್ಮಿಂಟನ್ ಆಡುತ್ತಿದ್ದ ದೀಪಿಕಾ; ಬಳಿಕ ನಟಿಯಾದರು

'ದೀಪಿಕಾ ಪಡುಕೋಣೆ ರಾಜ್ಯ ಮಟ್ಟದಲ್ಲಿ ಬ್ಯಾಡ್ಮಿಂಟನ್ ಆಡುತ್ತಿದ್ದಾಗ ನಾನು ಅವರೊಂದಿಗೆ ಬ್ಯಾಡ್ಮಿಂಟನ್ ಆಡಿದ್ದೆ. ನಂತರ ನಾನು ನಿರ್ದೇಶಕನಾದೆ, ಅವರು ನಟಿಯಾದರು. ನಾನು ನಿರ್ದೇಶಕನಾಗಿ ನಾಲ್ಕು ಸಿನಿಮಾಗಳನ್ನು ಮಾಡಿದ್ದ ಬಳಿಕ ದೀಪಿಕಾರನ್ನು ನನ್ನ ಸಿನಿಮಾಗೆ ಆಯ್ಕೆ ಮಾಡಬೇಕು ಎಂದುಕೊಂಡಿದ್ದೆ. ಆಗ ಅವರು ಮಾಡೆಲ್ ಆಗಿದ್ದರು' ಎಂದು ಲಂಕೇಶ್ ನೆನಪಿಸಿಕೊಂಡಿದ್ದಾರೆ.

''ಐಶ್ವರ್ಯ' ಸಿನಿಮಾದ ಕಥೆಯನ್ನು ಹೇಳಲು ಮೊದಲ ಬಾರಿ ಅವರನ್ನು ಭೇಟಿಯಾದ ದಿನವೇ, ಅವರು ದೊಡ್ಡ ಸ್ಟಾರ್ ಆಗುವ ಹಾದಿಯಲ್ಲಿದ್ದಾರೆ ಎಂಬುದು ನನಗೆ ಅರ್ಥವಾಗಿತ್ತು. ದೀಪಿಕಾ ಮೊದಲ ಭೇಟಿಗೇ ಮ್ಯಾನೇಜರ್ ಜೊತೆ ಬಂದಿದ್ದರು. ಆಗ ಪೂಜಾ ದದ್ಲಾನಿ ಅವರ ವೃತ್ತಿಪರ ಕೆಲಸಗಳನ್ನು ನಿರ್ವಹಿಸುತ್ತಿದ್ದರು. ಅವರಲ್ಲಿದ್ದ ಆ ಪ್ರೊಫೆಷನಲಿಸಂ ನನಗೆ ತುಂಬಾ ಇಷ್ಟವಾಯಿತು. ಆ ಬಳಿಕ ನಡೆದದ್ದೆಲ್ಲ ಇತಿಹಾಸ' ಎಂದು ಹೇಳಿದ್ದಾರೆ.

'ಮೊದಲೇ ದೀಪಿಕಾರಲ್ಲಿದ್ದ ಗುಣಗಳನ್ನು ಗುರುತಿಸಿದ್ದೆ'

ದೀಪಿಕಾ ಕ್ಯಾಮೆರಾ ಎದುರು ನಿಲ್ಲುವುದಕ್ಕೂ ಮುನ್ನವೇ ಅವರಲ್ಲಿದ್ದ ಏಕಾಗ್ರತೆ ಮತ್ತು ವೃತ್ತಿಪರತೆಯಿಂದ ತಾವು ಪ್ರಭಾವಿತರಾಗಿದ್ದಾಗಿ ಇಂದ್ರಜಿತ್ ಹೇಳಿದ್ದಾರೆ. 'ಅವರಲ್ಲಿದ್ದ ಏಕಾಗ್ರತೆ, ಸಾಧಿಸುವ ಹಂಬಲ, ಮಹತ್ವಾಕಾಂಕ್ಷೆ ಮತ್ತು ಶಿಸ್ತು ನನಗೆ ಕಾಣಿಸಿತ್ತು. ಶೂಟಿಂಗ್ ಸಮಯದಲ್ಲೇ ನಾನು ಅವರಿಗೆ ಒಂದು ಮಾತು ಹೇಳಿದ್ದೆ. ಅವರು ಕೇವಲ ಕನ್ನಡ ಅಥವಾ ಬಾಲಿವುಡ್‌ಗೆ ಸೀಮಿತವಾಗುವುದಿಲ್ಲ. ಜಾಗತಿಕ ಮಟ್ಟದ ಸ್ಟಾರ್ ಆಗುವ ಸಾಮರ್ಥ್ಯ ಅವರಲ್ಲಿದೆ ಎಂದು ನನಗೆ ಅನಿಸಿತ್ತು' ಎಂದು ಲಂಕೇಶ್ ಹೇಳಿದ್ದಾರೆ.

'8 ಗಂಟೆಗಿಂತ ಹೆಚ್ಚು ಕೆಲಸ ಮಾಡಿದರೆ ಕ್ಯಾಮೆರಾದಲ್ಲಿ ಅದು ಕಾಣಿಸುತ್ತದೆ'

ಇತ್ತೀಚೆಗೆ ದೀಪಿಕಾ ಪಡುಕೋಣೆ ಎಂಟು ಗಂಟೆಗಳ ಕೆಲಸದ ಅವಧಿಯ ಬಗ್ಗೆ ಮಾತನಾಡಿದ್ದು ಚರ್ಚೆಗೆ ಕಾರಣವಾಗಿತ್ತು. ಈ ವಿಚಾರದಲ್ಲಿ ತಾವು ಸಂಪೂರ್ಣವಾಗಿ ದೀಪಿಕಾ ಮಾತನ್ನು ಒಪ್ಪುತ್ತೇನೆ ಎಂದು ಇಂದ್ರಜಿತ್ ಲಂಕೇಶ್ ಹೇಳಿದ್ದಾರೆ. 'ನಾನು ಅವರ ಮಾತನ್ನು ಸಂಪೂರ್ಣವಾಗಿ ಒಪ್ಪುತ್ತೇನೆ. ವಾಸ್ತವವಾಗಿ ನಿರ್ದೇಶಕನಾಗಿ ನಾನು ಸಾಮಾನ್ಯವಾಗಿ ಆರು ಅಥವಾ ಏಳು ಗಂಟೆಗಳ ಕಾಲವೇ ಶೂಟಿಂಗ್ ಮಾಡುತ್ತೇನೆ. ಒಬ್ಬ ನಟ ಎಂಟು ಗಂಟೆಗಳಿಗಿಂತ ಹೆಚ್ಚು ಕಾಲ ಕೆಲಸ ಮಾಡಿದರೆ ಅದರ ಪರಿಣಾಮ ಕ್ಯಾಮೆರಾದಲ್ಲೂ ಕಾಣಿಸಬಹುದು' ಎಂದು ಅವರು ಹೇಳಿದ್ದಾರೆ.

ಹೊಸ ಪ್ರತಿಭೆಗಳಿಗೆ ಅವಕಾಶ ನೀಡುವುದೇ ಲಂಕೇಶ್ ಶೈಲಿ

ಪ್ರತಿಭೆಯನ್ನು ಗುರುತಿಸುವ ತಮ್ಮ ಗುಣವನ್ನು ಇಂದ್ರಜಿತ್ ಲಂಕೇಶ್ ಈಗಲೂ ಮುಂದುವರಿಸಿಕೊಂಡು ಬರುತ್ತಿದ್ದಾರೆ. ಅವರ ಮುಂಬರುವ 'ಜೈ ಹಿಂದ್, ಜೈ ಸಿಂಧ್: ಎ ಲವ್ ಸ್ಟೋರಿ' ಸಿನಿಮಾದಲ್ಲಿ ಹೊಸ ಪ್ರತಿಭೆ ಅಕೈಶಾ ವಾಟ್ಸ್ ಅವರನ್ನು ನಾಯಕಿಯಾಗಿ ಪರಿಚಯಿಸುತ್ತಿದ್ದಾರೆ. ಸ್ಯಾಮಿ ನಾನ್ವಾನಿ ನಿರ್ಮಾಣದ ಈ ರೊಮ್ಯಾಂಟಿಕ್ ಸಿನಿಮಾ ಈ ವರ್ಷ ಹಿಂದಿ, ತಮಿಳು, ತೆಲುಗು ಮತ್ತು ಕನ್ನಡ ಭಾಷೆಗಳಲ್ಲಿ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಚಿತ್ರಮಂದಿರಗಳಿಗೆ ಬಿಡುಗಡೆಯಾಗಲಿದೆ.

'ಹೊಸಬರು ಕಚ್ಚಾ ವಜ್ರಗಳಿದ್ದಂತೆ. ಅವರೊಂದಿಗೆ ಯಾವುದೇ ಹಿಂದಿನ ಇಮೇಜ್ ಅಥವಾ ಪೂರ್ವನಿರ್ಧರಿತ ಅಭಿಪ್ರಾಯ ಇರುವುದಿಲ್ಲ. ಹಾಗಾಗಿ ನಿರ್ದೇಶಕರಿಗೆ ಅವರನ್ನು ಪಾತ್ರಕ್ಕೆ ತಕ್ಕಂತೆ ಬೆಳೆಸಲು, ರೂಪಿಸಲು ಮತ್ತು ಹೊಳಪು ನೀಡಲು ಹೆಚ್ಚಿನ ಸ್ವಾತಂತ್ರ್ಯ ಸಿಗುತ್ತದೆ. ಇದು ನಿರ್ದೇಶಕರಿಗೆ ಅಪಾರ ಸೃಜನಶೀಲ ಸ್ವಾತಂತ್ರ್ಯ ನೀಡುತ್ತದೆ' ಎಂದು ಲಂಕೇಶ್ ಹೇಳಿದ್ದಾರೆ.

ಅಕೈಶಾ ಬಗ್ಗೆ ಇಂದ್ರಜಿತ್ ಲಂಕೇಶ್ ಹೇಳಿದ್ದೇನು?

ಅಕೈಶಾ ಅವರನ್ನು ಮೊದಲ ಬಾರಿ ನೋಡಿದಾಗಲೇ, ಆ ಪಾತ್ರಕ್ಕೆ ಬೇಕಾದ ಹೊಸತನ ಮತ್ತು ಸಾಮರ್ಥ್ಯ ಅವರಲ್ಲಿದೆ ಎಂದು ಅನಿಸಿತ್ತು ಎಂದು ಲಂಕೇಶ್ ಹೇಳಿದ್ದಾರೆ. 'ಅಕೈಶಾರನ್ನು ನೋಡಿದಾಗ, ಆ ಪಾತ್ರಕ್ಕೆ ಬೇಕಾದ ಫ್ರೆಶ್‌ನೆಸ್ ಮತ್ತು ಸಾಮರ್ಥ್ಯ ಅವರಲ್ಲಿದೆ ಎಂದು ನನಗೆ ಅನಿಸಿತು. ಯುವ ಪ್ರತಿಭೆಗಳಿಗೆ ವೇದಿಕೆ ನೀಡುವುದನ್ನು ನಾನು ಯಾವಾಗಲೂ ನಂಬಿದ್ದೇನೆ. ಯಾರಲ್ಲಾದರೂ ಸ್ಪಾರ್ಕ್ ಮತ್ತು ನಿಜವಾದ ಪ್ರತಿಭೆ ಕಾಣಿಸಿದರೆ, ಅವರಿಗೆ ಅವಕಾಶ ನೀಡಬೇಕು ಎಂಬುದು ನನ್ನ ಆಶಯ' ಎಂದು ಹೇಳಿದ್ದಾರೆ.

'ಪ್ರತಿಯೊಬ್ಬ ನಟನಿಗೂ ಅವರದ್ದೇ ಆದ ಜರ್ನಿ ಇರುತ್ತದೆ'

ದೀಪಿಕಾರನ್ನು ಗುರುತಿಸಿದ ಸಂದರ್ಭದಿಂದ ಅಕೈಶಾಗೆ ಅವಕಾಶ ನೀಡುವವರೆಗಿನ ತಮ್ಮ ಪಯಣದ ಹಿಂದೆ ಒಂದೇ ರೀತಿಯ ನಂಬಿಕೆ ಇದೆ ಎಂದು ಇಂದ್ರಜಿತ್ ಹೇಳಿದ್ದಾರೆ. 'ನಾನು ಎಂದಿಗೂ ಒಬ್ಬ ನಟನನ್ನು ಮತ್ತೊಬ್ಬ ನಟನೊಂದಿಗೆ ಹೋಲಿಸುವುದಿಲ್ಲ. ಏಕೆಂದರೆ ಪ್ರತಿಯೊಬ್ಬರಿಗೂ ಅವರದ್ದೇ ಆದ ಪಯಣ ಇರುತ್ತದೆ. ಆದರೆ ಹೊಸಬರಲ್ಲಿ ಆ ಸ್ಪಾರ್ಕ್ ಕಾಣಿಸಿದಾಗ, ತಮ್ಮ ಸಾಮರ್ಥ್ಯವನ್ನು ಸಾಬೀತುಪಡಿಸಲು ಅವರಿಗೆ ಒಂದು ಅವಕಾಶ ನೀಡಬೇಕು ಎಂದು ಅನಿಸುತ್ತದೆ' ಎಂದು ಲಂಕೇಶ್ ಹೇಳಿದ್ದಾರೆ. ಇನ್ನು 'ಚಿತ್ರ ನಿರ್ದೇಶಕನಾಗಿ ನಾನು ಯಾವಾಗಲೂ ಮಾಡುತ್ತಾ ಬಂದಿರುವ ಮತ್ತು ನನಗೆ ಅತ್ಯಂತ ಖುಷಿ ನೀಡುವ ಕೆಲಸ ಇದೇ' ಎಂದು ಇಂದ್ರಜಿತ್ ಲಂಕೇಶ್ ಹೇಳಿದ್ದಾರೆ.

'ನಾನು ಹೀರೋ ಅಲ್ಲ, ವಿಲನ್‌': ‘ಸ್ಪಾರ್ಕ್’ ಪಾತ್ರದ ಬಗ್ಗೆ ಲವ್ಲಿ ಸ್ಟಾರ್‌ ಪ್ರೇಮ್‌ ಬಿಚ್ಚಿಟ್ಟ ಸೀಕ್ರೆಟ್ ಏನು?

Govindaraj S — Thu, 24 Sep 2026 19:50:56 +0530

‘ಲವ್ಲಿ ಸ್ಟಾರ್’ ಪಟ್ಟದಿಂದ ಪ್ರೇಮ್‌ ದೂರವಾಗಿಲ್ಲ. ಆದರೆ ‘ಸ್ಪಾರ್ಕ್’ ಸಿನಿಮಾದಲ್ಲಿ ಮೃದುವಾದ ಪ್ರೇಮಕಥೆಯ ನಾಯಕನ ಇಮೇಜ್‌ ಬಿಟ್ಟು ಸಿಗಾರ್‌ ಸೇದುತ್ತಾ ಕಾಣಿಸಿಕೊಳ್ಳುವ ಕ್ರೂರ ಖಳನಾಯಕನ ಪಾತ್ರಕ್ಕೆ ಬಣ್ಣ ಹಚ್ಚಿದ್ದಾರೆ. ಹೀರೋ-ವಿಲನ್‌ ಮುಖಾಮುಖಿ ಪರಿಣಾಮಕಾರಿಯಾಗಬೇಕಾದರೆ ಸ್ಟಾರ್‌ ಇಗೋವನ್ನು ಬದಿಗಿಡಲೇಬೇಕು ಎನ್ನುತ್ತಾರೆ ಪ್ರೇಮ್‌.

‘ನೆನಪಿರಲಿ’ ಸಿನಿಮಾ ಮೂಲಕ ಎರಡು ದಶಕಗಳಿಗೂ ಹಿಂದೆ ಸಿಕ್ಕ ‘ಲವ್ಲಿ ಸ್ಟಾರ್’ ಎಂಬ ಬಿರುದನ್ನು ಪ್ರೇಮ್‌ ಇಂದಿಗೂ ಪ್ರೀತಿಯಿಂದ ಸ್ವೀಕರಿಸುತ್ತಾರೆ. ಜನರು ತೋರಿಸಿದ ಅಪಾರ ಪ್ರೀತಿಯಿಂದಲೇ ಆ ಹೆಸರು ನನಗೆ ಬಂದಿದೆ. ಅದನ್ನು ಅಳಿಸಿಹಾಕಲು ಸಾಧ್ಯವಿಲ್ಲ ಎಂದು ಅವರು ಹೇಳುತ್ತಾರೆ.

ಆದರೆ ಆರಂಭಿಕ ಯಶಸ್ಸು ಕೆಲವೊಮ್ಮೆ ನಟನನ್ನೇ ಒಂದು ನಿರ್ದಿಷ್ಟ ಇಮೇಜ್‌ನಲ್ಲಿ ಬಂಧಿಸಿಬಿಡುತ್ತದೆ. ನಮ್ಮ ಚಿತ್ರರಂಗದಲ್ಲಿ ಒಬ್ಬ ನಟ ಲವರ್‌ ಬಾಯ್‌ ಆಗಿ ಒಂದು ಹಿಟ್‌ ಕೊಟ್ಟರೆ, ಮರುದಿನವೇ ಅದೇ ರೀತಿಯ ಇಪ್ಪತ್ತು ಕಥೆಗಳು ಮನೆ ಬಾಗಿಲಿಗೆ ಬರುತ್ತವೆ. ವೃತ್ತಿಜೀವನದ ಆರಂಭದಲ್ಲಿ ನೀವು ಇನ್ನೂ ನಿಮ್ಮ ಸ್ಥಾನ ಹುಡುಕುತ್ತಿರುವಾಗ, ಆಯ್ಕೆ ಮಾಡುವಷ್ಟು ಅವಕಾಶ ಇರುವುದಿಲ್ಲ. ಸಿಕ್ಕಿದ್ದನ್ನು ಒಪ್ಪಿಕೊಳ್ಳಬೇಕಾಗುತ್ತದೆ ಎನ್ನುತ್ತಾರೆ ಪ್ರೇಮ್‌.

ನನ್ನ ಅಭಿಮಾನಿಗಳೂ ಕೂಡ, ‘ಸರ್‌, ನಿಮ್ಮ ಲುಕ್‌ ಬೇರೆ ಪಾತ್ರಗಳಿಗೂ ಚೆನ್ನಾಗಿ ಹೊಂದುತ್ತದೆ. ಯಾಕೆ ಲವರ್‌ ಬಾಯ್‌ ಪಾತ್ರಗಳನ್ನೇ ಮಾಡುತ್ತೀರಿ?’ ಎಂದು ಕೇಳುತ್ತಿದ್ದರು. ‘ಸ್ಪಾರ್ಕ್’ ನನಗೆ ಆ ಇಮೇಜ್‌ನಿಂದ ಹೊರಬರಲು ಅವಕಾಶ ನೀಡಿತು. ಪ್ರೇಕ್ಷಕರಲ್ಲೂ ಈ ಪಾತ್ರದ ಬಗ್ಗೆ ಕುತೂಹಲ ಮೂಡಿತು. ಇತ್ತೀಚಿನ ಕಾರ್ಯಕ್ರಮವೊಂದರಲ್ಲಿ ಜನರು ‘ಲವ್ಲಿ ಸ್ಟಾರ್’ ಎನ್ನುವುದರ ಬದಲು ‘ರಾಕರ-ಕರ-ರಾಕ್ಷಸ!’ ಎಂದು ಕೂಗಿದ್ದನ್ನು ನೋಡಿ ನನ್ನ ಮಗ ಕೂಡ ತಮಾಷೆ ಮಾಡಿದ್ದ ಎಂದು ಅವರು ನೆನಪಿಸಿಕೊಳ್ಳುತ್ತಾರೆ.

‘ಸ್ಪಾರ್ಕ್‌’ನಲ್ಲಿ ಪ್ರೇಮ್‌ ಖಳನಾಯಕ

ಡಿ. ಮಹಾಂತೇಶ್‌ ಹಂದ್ರಾಳ್‌ ನಿರ್ದೇಶನದ, ಡಾ. ಗರಿಮಾ ಹಾಗೂ ಅವಿನಾಶ್‌ ವಶಿಷ್ಠ ನಿರ್ಮಾಣದ ‘ಸ್ಪಾರ್ಕ್’ ಸಿನಿಮಾದಲ್ಲಿ ಪ್ರೇಮ್‌ ಇದೇ ಸೆಪ್ಟೆಂಬರ್‌ 25ರಂದು ವಿಭಿನ್ನ ಅವತಾರದಲ್ಲಿ ಪ್ರೇಕ್ಷಕರ ಮುಂದೆ ಬರಲಿದ್ದಾರೆ. ನಿರಂಜನ್‌ ಸುಧೀಂದ್ರ ಎದುರು ಪ್ರೇಮ್‌ ಇಲ್ಲಿ ಕ್ರೂರ ಖಳನಾಯಕನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಕೈಯಲ್ಲಿ ಸಿಗಾರ್‌, ಮುಖದಲ್ಲಿ ಕಠಿಣ ಭಾವ, ಕಣ್ಣಲ್ಲಿ ತಣ್ಣನೆಯ ನೋಟ-ಇದು ಅವರ ಈವರೆಗಿನ ನಾಯಕನ ಇಮೇಜ್‌ಗೆ ಸಂಪೂರ್ಣ ಭಿನ್ನವಾದ ಲುಕ್‌.

ಆದರೆ ಧೂಮಪಾನ ಮಾಡದ ಪ್ರೇಮ್‌ಗೆ ಈ ಪಾತ್ರಕ್ಕಾಗಿ ಸಿಗಾರ್‌ ಹಿಡಿಯುವುದೇ ಸುಲಭವಾಗಿರಲಿಲ್ಲ. ನನಗೆ ಸ್ಮೋಕಿಂಗ್‌ ಎಂದರೆ ಅಸಹ್ಯ. ಶೂಟಿಂಗ್‌ ಮುಗಿದ ಬಳಿಕ ಸುಮಾರು ಒಂದು ತಿಂಗಳ ಕಾಲ ತೀವ್ರ ಗಂಟಲು ಸೋಂಕಿನಿಂದ ಬಳಲಿದ್ದೆ. ನಟನೆಯಲ್ಲಿ ಕಣ್ಣುಗಳು ಮತ್ತು ದೇಹಭಾಷೆಯ ಮೂಲಕವೂ ಭಾವನೆಗಳನ್ನು ತೋರಿಸಬಹುದು. ಆದರೆ ಒಂದು ಪ್ರಾಪ್‌ ಪಾತ್ರದೊಳಗಿನ ಭಾವನೆಯನ್ನು ಇನ್ನಷ್ಟು ಗಟ್ಟಿಯಾಗಿ ಕಟ್ಟಿಕೊಡುತ್ತದೆ ಎಂದು ಪ್ರೇಮ್‌ ಹೇಳುತ್ತಾರೆ.

ಜನರು ತಮ್ಮ ಕುಟುಂಬದ ಮೇಲೆ ತೋರಿಸಲಾಗದ ಕೋಪವನ್ನು ಕೆಲವೊಮ್ಮೆ ಸ್ಮೋಕ್‌ ಮಾಡುವ ಮೂಲಕ ಹೊರಹಾಕುತ್ತಾರೆ. ಹೊಗೆಯೊಂದಿಗೆ ಆ ಕೋಪವನ್ನೂ ಹೊರಗೆ ಬಿಡುತ್ತಾರೆ. ಈ ಪಾತ್ರದ ಸಿಗಾರ್‌ ಕೂಡ ಅವನೊಳಗಿನ ಕೋಪದ ಪ್ರತೀಕ. ಆದರೆ ಇದು ಸಿನಿಮಾಗೆ ಮಾತ್ರ ಸೀಮಿತ; ಜೀವನದಲ್ಲಿ ಯಾರೂ ಇದನ್ನು ಅನುಸರಿಸಬೇಡಿ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

‘ಸೆಟ್‌ಗೆ ಕಾಲಿಟ್ಟ ಕ್ಷಣವೇ ಇಗೋ ಸಾಯಬೇಕು’

ತಮ್ಮಗಿಂತ ಕಿರಿಯ ನಟ ನಿರಂಜನ್‌ ಸುಧೀಂದ್ರ ಎದುರು ಖಳನಾಯಕನ ಪಾತ್ರದಲ್ಲಿ ನಟಿಸುವಾಗ ಹಿರಿಯ ನಟನಾಗಿ ಯಾವುದೇ ಹಿಂಜರಿಕೆ ಇರಲಿಲ್ಲ ಎನ್ನುತ್ತಾರೆ ಪ್ರೇಮ್‌. ನೀವು ಸೆಟ್‌ಗೆ ಕಾಲಿಟ್ಟ ಕ್ಷಣವೇ ಇಗೋ ಸಾಯಬೇಕು. ‘ನನಗೆ 25 ವರ್ಷಗಳ ಅನುಭವವಿದೆ, ಇವನು ಈಗಷ್ಟೇ ಆರಂಭಿಸುತ್ತಿದ್ದಾನೆ. ನಾನು ಯಾಕೆ ಎರಡನೇ ಸ್ಥಾನದಲ್ಲಿ ನಟಿಸಬೇಕು?’ ಎಂದು ಯೋಚಿಸಿದ ಕ್ಷಣವೇ ಆ ದೃಶ್ಯ ಸತ್ತುಹೋಗುತ್ತದೆ ಎಂದು ಅವರು ಖಡಕ್‌ ಆಗಿ ಹೇಳುತ್ತಾರೆ.

ನಾನು ಮೊದಲೇ ನನ್ನ ಮನಸ್ಸನ್ನು ಸಿದ್ಧಪಡಿಸಿಕೊಂಡಿದ್ದೆ. ನಿರಂಜನ್‌ ಹೀರೋ, ನಾನು ವಿಲನ್‌. ಹೀರೋ ಪಾತ್ರಕ್ಕೆ ನೂರು ರೀತಿಯ ನಿರ್ಬಂಧಗಳಿರುತ್ತವೆ. ಆತ ಒಳ್ಳೆಯವನಾಗಿರಬೇಕು, ಕೆಟ್ಟ ಚಟಗಳಿಂದ ದೂರವಿರಬೇಕು, ಎಲ್ಲರನ್ನೂ ಮೆಚ್ಚಿಸಬೇಕು. ಆದರೆ ವಿಲನ್‌ಗೆ ಅಂತಹ ಯಾವುದೇ ಬಂಧನವಿರುವುದಿಲ್ಲ. ಆತ ತನ್ನದೇ ನಿಯಮಗಳ ಮೇಲೆ ಬದುಕುತ್ತಾನೆ. ನಟನಾಗಿ ಆ ಸ್ವಾತಂತ್ರ್ಯ ನನಗೆ ತುಂಬಾ ಇಷ್ಟವಾಯಿತು ಎಂದು ಪ್ರೇಮ್‌ ವಿವರಿಸುತ್ತಾರೆ.

ನಿರ್ದೇಶಕರ ಸ್ಪಷ್ಟತೆಯೇ ಆತ್ಮವಿಶ್ವಾಸ ನೀಡಿತು

‘ಸ್ಪಾರ್ಕ್’ ಸಿನಿಮಾದ ನಿರ್ದೇಶಕ ಮಹಾಂತೇಶ್‌ ಅವರ ಸ್ಕ್ರಿಪ್ಟ್‌ ಮೇಲಿನ ಹಿಡಿತವೂ ತಮ್ಮ ಆತ್ಮವಿಶ್ವಾಸ ಹೆಚ್ಚಿಸಿತು ಎಂದು ಪ್ರೇಮ್‌ ಹೇಳಿದ್ದಾರೆ. ಪಾತ್ರದ ಸ್ಟೈಲಿಂಗ್‌, ಟೋನ್‌ ಹಾಗೂ ಅದರ ಮಿತಿಗಳ ಬಗ್ಗೆ ನಾನು ನಿರ್ದೇಶಕರನ್ನು ನಿರಂತರವಾಗಿ ಪ್ರಶ್ನಿಸುತ್ತಿದ್ದೆ. ಪಾತ್ರದ ಸ್ವಭಾವವನ್ನೇ ಬದಲಿಸುವ ರೀತಿಯಲ್ಲಿ ನಾನು ಯಾವುದಾದರೂ ಹೊಸ ಸಲಹೆ ನೀಡಿದರೆ, ‘ಸರ್‌, ಟ್ರ್ಯಾಕ್‌ ತಪ್ಪುವಷ್ಟು ಬಾಕ್ಸ್‌ನ ಹೊರಗೆ ಯೋಚಿಸಬೇಡಿ’ ಎಂದು ಅವರು ಹೇಳುತ್ತಿದ್ದರು.

ಆ ಸ್ಪಷ್ಟತೆ ನನಗೆ ಧೈರ್ಯ ನೀಡಿತು. ಹೀರೋನನ್ನು ಎತ್ತಿ ಹಿಡಿಯಲು ಮಾತ್ರ ನನ್ನನ್ನು ಸಿನಿಮಾಕ್ಕೆ ಕರೆತಂದಿಲ್ಲ ಎಂಬ ನಂಬಿಕೆ ಮೂಡಿತು ಎಂದು ಪ್ರೇಮ್‌ ಹೇಳಿದ್ದಾರೆ. ‘ಸ್ಪಾರ್ಕ್’ ಸಿನಿಮಾದಲ್ಲಿ ರಚನಾ ಇಂದರ್‌ ನಾಯಕಿಯಾಗಿ ನಟಿಸಿದ್ದು, ಭಾವನಾ ಕನ್ನಡ ಚಿತ್ರರಂಗಕ್ಕೆ ಮತ್ತೆ ಮರಳಿದ್ದಾರೆ. ಅವರು ಸಿನಿಮಾದಲ್ಲಿ ವಕೀಲೆಯ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಧರ್ಮಣ್ಣ ಕಡೂರ್‌ ಸೇರಿದಂತೆ ಹಲವರು ತಾರಾಗಣದಲ್ಲಿದ್ದಾರೆ.

‘ಹಿರಿಯ ನಟರಿಗೆ ಒಳ್ಳೆಯ ಪಾತ್ರಗಳು ಕಡಿಮೆಯಾಗುತ್ತಿಲ್ಲ’

ತಮ್ಮ ವೃತ್ತಿಜೀವನದ ಏಳು-ಬೀಳುಗಳನ್ನು ನೆನಪಿಸಿಕೊಂಡಿರುವ ಪ್ರೇಮ್‌, ಹಿರಿಯ ನಟರಿಗೆ ಉತ್ತಮ ಪಾತ್ರಗಳು ಸಿಗುತ್ತಿಲ್ಲ ಎಂಬ ಮಾತನ್ನು ಒಪ್ಪುವುದಿಲ್ಲ. ಇನ್ನು ಕಷ್ಟಪಟ್ಟು ಕೆಳಮಟ್ಟದಿಂದ ಮೇಲಕ್ಕೆ ಬಂದಾಗ ಮತ್ತು ಬದುಕುಳಿಯುವುದನ್ನು ಕಲಿತಾಗ ಮಾತ್ರ ಯಶಸ್ಸಿನ ನಿಜವಾದ ಅರ್ಥ ಗೊತ್ತಾಗುತ್ತದೆ. ಒಳ್ಳೆಯ ಪಾತ್ರಗಳು ಕಡಿಮೆಯಾಗುತ್ತಿಲ್ಲ. ವಾಸ್ತವವನ್ನು ಅರ್ಥಮಾಡಿಕೊಳ್ಳಬೇಕು. ಹಳೆಯ ಯಶಸ್ಸಿನ ಮೇಲೆಯೇ ಅವಲಂಬಿತರಾಗುವುದನ್ನು ನಿಲ್ಲಿಸಿ, ಹೊಸ ಪ್ರಯೋಗಗಳಿಗೆ ಸಿದ್ಧರಾಗಬೇಕು ಎಂದು ಪ್ರೇಮ್‌ ಹೇಳಿದ್ದಾರೆ.

ಎಲ್ಲಾ ವರ್ಗದ ಪ್ರೇಕ್ಷಕರನ್ನು ತಟ್ಟುವ ಸಿನಿಮಾ ಅಮೆರಿಕಾ ಅಮೆರಿಕಾ: ನಾಗತಿಹಳ್ಳಿ ಚಂದ್ರಶೇಖರ್‌ ಸಂದರ್ಶನ

Govindaraj S — Fri, 11 Sep 2026 08:45:17 +0530

ಆರ್. ಕೇಶವಮೂರ್ತಿ

* ಅಮೆರಿಕಾ ಅಮೆರಿಕಾ ಮೊದಲ ಭಾಗ ಸಕ್ಸಸ್‌ ಆಗಿದ್ದಕ್ಕೆ ಪಾರ್ಟ್‌ 2 ಮಾಡಿದ್ದಾ?

ಮೊದಲಿನ ಭಾಗದ ಸಕ್ಸಸ್‌ಗೇ ಮಾಡಬೇಕು ಅಂತಿದ್ರೆ 30 ವರ್ಷ ಕಾಯುತ್ತಿರಲಿಲ್ಲ. ಕಾಡುವ ಮತ್ತು ಯೋಚಿಸುವಂತಹ ಒಂದು ಕತೆ ಸಿಕ್ಕಿತು. ಅದು ‘ಅಮೆರಿಕಾ ಅಮೆರಿಕಾ’ ಶೀರ್ಷಿಕೆಗೆ ತುಂಬಾ ಹೊಂದಾಣಿಕೆ ಆಗುತ್ತಿತ್ತು. ಕತೆ ಮತ್ತು ಟೈಟಲ್‌ ಎರಡೂ ಕೂಡಿ ಬಂದಿದ್ದರಿಂದ ‘ಅಮೆರಿಕಾ ಅಮೆರಿಕಾ 2’ ಸಿನಿಮಾ ಆಯಿತು.

* ಈಗ ಕಾದಂಬರಿಯನ್ನು ಸಿನಿಮಾ ಮಾಡೋದು, ಅದನ್ನು ನೋಡುಗರಿಗೆ ಒಪ್ಪಿಸೋದು ಸವಾಲು ಅಲ್ಲವೇ?

ಇದು ಸಹನಾ ವಿಜಯ್‌ ಕುಮಾರ್‌ ಅವರು ಬರೆದಿರುವ ‘ಕ್ಷಮೆ’ ಕಾದಂಬರಿ ಆಧಾರಿತ ಚಿತ್ರ. ನನಗೆ ಕಾದಂಬರಿಯನ್ನು ಸಿನಿಮಾಗೆ ಅಳವಡಿಸುವ ಸವಾಲುಗಿಂತ ‘ಇದು ನಿನ್ನಿಂದ ಸಿನಿಮಾ ಮಾಡಲು ಸಾಧ್ಯವೇ, ಇದು ಆಗುತ್ತಾ, ನೋಡು’ ಹಿತೈಷಿಗಳು ಕೊಟ್ಟ ಎಚ್ಚರಿಕೆಗಳೇ ನನಗೆ ಸವಾಲಾಗಿದ್ದವು.

* ಹೊರದೇಶಗಳು ಈಗ ಬಹುತೇಕರಿಗೆ ಅಪರಿಚಿತವಲ್ಲದ ಹೊತ್ತಿನಲ್ಲಿ ‘ಅಮೆರಿಕಾ ಅಮೆರಿಕಾ 2’ ಕತೆ ಹೇಗೆ ಪ್ರಸ್ತುತ?

ಆ ಕಾರಣಕ್ಕೆ ಮೊದಲ ಭಾಗದಲ್ಲಿ ಮಾಡಿದ್ದನ್ನು ಇಲ್ಲಿ ಮಾಡಕ್ಕೆ ಹೋಗಿಲ್ಲ. ಆಗ ಅಮೆರಿಕಾದ ಆಕರ್ಷಣಿಯ ಸ್ಥಳಗಳನ್ನು ದರ್ಶನ ಮಾಡಿಸಿದ್ದೆ. ಈಗ ಸಿಯಾಟಲ್‌, ಚಾರಿತ್ರಿಕ ನಗರ, ಸಾಫ್ಟ್‌ವೇರ್‌, ದುಡಿಯುವ ಮಹಿಳೆ, ತಂದೆ, ತಾಯಿ, ಸಂಬಂಧಗಳು, ಪ್ರೀತಿ- ಪ್ರೇಮ, ಸಂಸಾರದ ತಲ್ಲಣಗಳು... ಇತ್ಯಾದಿಗಳ ಜೊತೆಗೆ ಅಮೆರಿಕಾದ ಕತೆ ಹೇಳಿದ್ದೇನೆ. ಇದು ನುಡಿ ಎನ್ನುವ ಕನ್ನಡದ ಸಾಫ್ಟ್‌ವೇರ್‌ ಹೆಣ್ಣು ಮಗಳ ಕತೆಯಾದರೂ ಭಾರತದ ಬಹುತೇಕ ದುಡಿಯುವ ಹೆಣ್ಣುಮಕ್ಕಳ ಬದುಕು ಹೀಗೆಯೇ ಇದೆ. ಅವರೆಲ್ಲರನ್ನು ಇಲ್ಲಿನ ನುಡಿ ಪಾತ್ರಧಾರಿ ಸಾಂಕೇತಿಕವಾಗಿ ಬಿಂಬಿಸುತ್ತಾಳೆ.

* ಮೊದಲ ಭಾಗದ ನೆನಪಿನಲ್ಲಿರುವ ಬರುವ ಪ್ರೇಕ್ಷಕರಿಗೆ ಏನು ಹೇಳುತ್ತೀರಿ?

ಹಾಗೆಯೇ ಬನ್ನಿ. ಬಂದ ಮೇಲೆ ‘ಅಮೆರಿಕಾ ಅಮೆರಿಕಾ 2’ ನಿಮಗೆ ಹೊಸ ಸ್ವಾದ, ಹೊಸ ಅನುಭವ ನೀಡುತ್ತದೆ. ಹಳೆಯದನ್ನು ಮರೆಯಬೇಕು ಅಂತ ನಾನು ಬಯಸಲ್ಲ. ಈ ಚಿತ್ರದ ಟ್ಯಾಗ್‌ ಲೈನ್‌ ‘ಹಳೆಯ ಕಥೆಗಳಿಂದ್ಲೆ ಹೊಸ ಕಥೆಗಳು ಹುಟ್ಟೋದು..’ ಅಂತಿರೋದು ಅದೇ ಕಾರಣಕ್ಕೆ. 30 ವರ್ಷಗಳ ಹಿಂದಿನ ಭೂಮಿಕ, ಈಗಿನ ನುಡಿ ಪಾತ್ರ, ತ್ರಿಕೋನ ಪ್ರೇಮ ಕತೆ, ಮೈಸೂರು- ಸಿಯಾಟಲ್‌ ನಡುವಿನ ಪ್ರಯಾಣ... ಈ ಎಲ್ಲವೂ ಹೊಸ ಅನುಭವ ನೀಡುತ್ತವೆ.

* ಈಗಿನ ಜನರೇಷನ್‌ಗೆ ಈ ಸಿನಿಮಾ ಹೇಗೆ ಕನೆಕ್ಟ್‌ ಆಗಬಹುದು?

ಈಗಿನ ಜನರೇಷನ್‌ ಅಂದರೆ ಜೆನ್‌ ಝೀಗಳು. ಪ್ರಶ್ನೆ ಮತ್ತು ಪ್ರತಿಭಟನೆ ಮಾಡುವ ಮನೋಭಾವದ ಈ ಜನರೇಷನ್‌ ಬಗ್ಗೆ ನನಗೆ ಗೌರವ ಮತ್ತು ಪ್ರೀತಿ ಇದೆ. ಚಿತ್ರದಲ್ಲಿ ಮಧ್ಯ ವಯಸ್ಸಿನ ತಂದೆ, ಜಗತ್ತನ್ನು ಕುತೂಹಲದಿಂದ ನೋಡುವ ಪ್ರತಿಯೊಂದನ್ನು ಪ್ರಶ್ನಿಸುವ ಪುಟ್ಟ ಮಗು, ತಾಳ್ಮೆ ಇಲ್ಲದೆ ಯುವ ಮನಸ್ಸುಗಳು, ಎಐ ತಂತ್ರಜ್ಞಾನ, ದುಡಿಮೆಯ ಅನಿವಾರ್ಯತೆ.... ಹೀಗೆ ಎಲ್ಲವೂ ಈ ಚಿತ್ರದಲ್ಲಿದೆ. ನಾನು ಒಟ್ಟಾರೆ ಪ್ರೇಕ್ಷಕರನ್ನು ಅಡ್ರೆಸ್‌ ಮಾಡಿ ಮಾಡಿರುವ ಸಿನಿಮಾ ಇದು.

* ಎಲ್ಲವೂ ಗೊತ್ತು ಎನ್ನುವ ಜನರೇಷನ್‌ ಇದು. ಇಂಥವರ ನಡುವೆ ಕತೆ ಹೇಳುವುದು ಎಷ್ಟು ಸವಾಲು?

ತುಂಬಾ ತುಂಬಾ ಸವಾಲು. ಯಾಕೆಂದರೆ ಕೌತುಕತೆ ಹೋಗಿದೆ. ಗೊತ್ತಿದೆ ಅಂದರೆ ನನಗೇನು ಹೇಳಬೇಡಿ ಎನ್ನುವ ಅರ್ಥ. ಆದರೆ, ನಾವುಗಳು ತಾಳ್ಮೆ ಕಳೆದುಕೊಳ್ಳುವುದೇ ಹೇಳಬೇಕಿದೆ. ಬುದ್ಧಿವಾದ, ಸಂದೇಶ ಏನೇ ಇದ್ದರೂ ತುಂಬಾ ಆಪ್ತವಾಗಿ ಬಹುಬೇಗ ಅರ್ಥವಾಗುವಂತೆ ಹೇಳಬೇಕಿದೆ. ಆ ರೀತಿ ದೃಶ್ಯಗಳು ಈ ಚಿತ್ರದಲ್ಲಿ ತುಂಬಾ ಇವೆ.

* ಈ ಚಿತ್ರಕ್ಕೆ ನಿರೂಪ್‌ ಭಂಡಾರಿ, ಪೃಥ್ವಿ ಅಂಬರ್‌, ಶಾನ್ವಿ ಶ್ರೀವಾಸ್ತವ್‌ ಆಯ್ಕೆ ಹೇಗೆ?

ತುಂಬಾ ಜನರ ಆಡಿಷನ್‌, ಸಂದರ್ಶನ ಮಾಡಿದ ನಂತರ ಕೊನೆಗೆ ಸಿಕ್ಕ ಕಲಾವಿದರು ಇವರು. ನನ್ನೊಳಗಿನ ಟಿಪಿಕಲ್‌ ಟೀಚರ್‌ ವ್ಯಕ್ತಿತ್ವವೇ ಈ ಕಲಾವಿದರನ್ನು ಆಯ್ಕೆ ಮಾಡಿಕೊಂಡಿದೆ. ತುಂಬಾ ಇಂಟಲಿಜೆಂಟ್‌ ಹಾಗೂ ಸೂಕ್ಷ್ಮಗ್ರಾಹಿಗಳಾಗಿದ್ದರಿಂದ ಇವರು ಈ ಚಿತ್ರಕ್ಕೆ ಆಯ್ಕೆ ಆಗಿದ್ದಾರೆ.

ಕಾರ್ಟೂನ್‌ ನೆಟ್‌ವರ್ಕ್‌ ನೋಡಿಕೊಂಡಿದ್ದವಳು, ಹೀರೋಯಿನ್‌ ಆಗ್ಬಿಟ್ಟೆ: ಪ್ರೇಮದ ಊರಲಿ ನಟಿ ಸಂದರ್ಶನ

Govindaraj S — Fri, 16 Oct 2026 08:00:35 +0530

- ಆರ್‌.ಕೇಶವಮೂರ್ತಿ

* ಅದ್ದೂರಿ ಪ್ರತಿಕ್ರಿಯೆ ಯಾವ ರೀತಿಯ ಸಂತೋಷ, ಆತ್ಮವಿಶ್ವಾಸವನ್ನು ಮೂಡಿಸಿದೆ?

ಇದು ಜನರ ಪ್ರೀತಿಯಿಂದ ಸಿಕ್ಕ ಜಯ. ಎಂಥ ಸಂದರ್ಭದಲ್ಲೂ ಒಳ್ಳೆಯ ಸಿನಿಮಾ ಗೆದ್ದೇ ಗೆಲ್ಲುತ್ತದೆ ಎಂಬ ವಿಶ್ವಾಸ ಮೂಡಿಸಿದೆ. ಈ ಯಶಸ್ಸಿನ ಶ್ರೇಯ ಇಡೀ ತಂಡಕ್ಕೆ ಸಲ್ಲಬೇಕು.

* ಈ ಪಾತ್ರವನ್ನು ಒಪ್ಪಿಕೊಳ್ಳಲು ಪ್ರೇರೇಪಿಸಿದ ಅಂಶ ಯಾವುದು? ಸಿದ್ಧತೆಗಳೇನು?

ಮೊದಲ ಕಾರಣ ನಿರ್ದೇಶಕ ಮನೋಜ್ ಕುಮಾರ್. ನಂತರ ಅವರು ಹೇಳಿದ ಕತೆ ಮತ್ತು ಪಾತ್ರದ ತೂಕ. ಹೆಚ್ಚು ಸಂಭಾಷಣೆ ಇಲ್ಲದೆ ಕಣ್ಣೋಟದಲ್ಲೇ ಭಾವನೆಗಳನ್ನು ಕಟ್ಟಿಕೊಡುವ ಸವಾಲಿತ್ತು. ಚಿತ್ರೀಕರಣಕ್ಕೂ ಮುನ್ನ ನಡೆದ ವರ್ಕ್‌ಶಾಪ್ ಈ ಪಾತ್ರದ ಪೋಷಣೆಗೆ ಸಾಕಷ್ಟು ನೆರವಾಯಿತು.

* ಪ್ರೇಕ್ಷಕರು ರುಕ್ಮಿಣಿ ಪಾತ್ರವನ್ನು ಇಷ್ಟಪಡುತ್ತಿರುವುದಕ್ಕೆ ಕಾರಣ ಏನಿರಬಹುದು?

ನನ್ನ ಪಾತ್ರಕ್ಕೆ ಇದ್ದ ಸರಳತೆ ಮತ್ತು ಸಹಜತೆ. ದೊಡ್ಡ ಫ್ಯಾಮಿಲಿ, ಶ್ರೀಮಂತರು, ವಿದೇಶದಿಂದ ಬಂದವಳು, ಓದಿದ್ದಾಳೆ... ಇಷ್ಟೆಲ್ಲಾ ಇದ್ದಾಗಲೂ ಯಾವುದೇ ಆಡಂಬರ, ಇಗೋ ಇಲ್ಲದೆ ಡೌನ್ ಟು ಅರ್ತ್‌ ಎನ್ನುವಂತೆ ಮೂಡಿ ಬಂದಿರುವುದಕ್ಕೇ ಪ್ರೇಕ್ಷಕರಿಗೆ ನನ್ನ ಪಾತ್ರ ಇಷ್ಟವಾಗಿದೆ.

* ಈ ಚಿತ್ರದಲ್ಲಿ ನಟಿಸುವಾಗ ನಿಮಗೆ ವೈಯಕ್ತಿಕವಾಗಿ ಹೆಚ್ಚು ಆಪ್ತವೆನಿಸಿದ ಸನ್ನಿವೇಶ ಯಾವುದು, ಯಾಕೆ?

ರಂಗಾಯಣ ರಘು ಅವರ ಜೊತೆಗೆ ನಟಿಸಿದ ದೃಶ್ಯಗಳು. ಇವು ಆಪ್ತವಾಗಿರುವುದು ಮಾತ್ರವಲ್ಲ, ಈಗಲೂ ನಾನು ಮರೆಯಲಾಗದ ಸನ್ನಿವೇಶಗಳು. ಅದರಲ್ಲೂ ಮಳೆಯಲ್ಲಿ ರಾತ್ರಿ ಹೊತ್ತಿನಲ್ಲಿ ಶೂಟ್‌ ಮಾಡಿದ ಕ್ಲೈಮ್ಯಾಕ್ಸ್‌, ರಂಗಾಯಣ ರಘು ಅವರ ಕಾಲು ಮುಟ್ಟಿ ನಮಸ್ಕರಿಸುವ ಸನ್ನಿವೇಶಗಳನ್ನು ನೆನಪಿಸಿಕೊಂಡರೆ ಮಾತೇ ಹೊರಡಲ್ಲ. ಯಾಕೆಂದರೆ ಅವರಿಂದ ನಾನು ತುಂಬಾ ಕಲಿತಿದ್ದೇನೆ.

* ನಿಮ್ಮ ಪಾತ್ರಕ್ಕೆ ತನ್ನದೇ ಆದ ಭಾವನಾತ್ಮಕ ನೆಲೆ ಹಾಗೂ ಸ್ವತಂತ್ರ ವ್ಯಕ್ತಿತ್ವವಿದೆ ಎಂದು ನಿಮಗೆ ಅನಿಸಿದೆಯೇ?

ಖಂಡಿತ ಇದೆ. ಹಾಗೆ ಇದ್ದಿದ್ದಕ್ಕೆನೇ ರುಕ್ಮಿಣಿ ಎನ್ನುವ ಪಾತ್ರ ಪ್ರತಿಯೊಬ್ಬರಿಗೂ ಕನೆಕ್ಟ್‌ ಆಗಿರುವುದು. ನಾನು ಕತೆ ಕೇಳುವಾಗಲೇ ಇಲ್ಲಿ ಪ್ರತಿ ಪಾತ್ರಕ್ಕೂ ಅದರದ್ದೇ ಆದ ತೂಕ ಇದೆ. ಆ ತೂಕದ ತಕ್ಕಡಿಯಲ್ಲಿ ಪಾತ್ರಗಳು ಸಾಗುತ್ತವೆ ಎನ್ನುವ ಚಿತ್ರಣ ಇತ್ತು. ಇದು ತಾಯಿ ಇಲ್ಲದೆ ಬೆಳೆದ ಮಗನ ತಂದೆಯ ಕತೆ. ರಂಗಾಯಣ ರಘು ಪಾತ್ರದ ಲೈಫಿನ ಕತೆ. ಆ ಲೈಫಿನ ಸುತ್ತಾ ನನ್ನ ಪಾತ್ರವೂ ಸೇರಿದಂತೆ ಎಲ್ಲರೂ ಬರುತ್ತಾರೆ.

* ನಾಯಕಿಯಾಗಿ ಗುರುತಿಸಿಕೊಳ್ಳುವ ನಿಮ್ಮ ಪ್ರಯಾಣದಲ್ಲಿ ‘ಪ್ರೇಮದ ಊರಲಿ’ ಚಿತ್ರ ಯಾವ ರೀತಿಯ ತಿರುವು ನೀಡಲಿದೆ?

ಗೆಲುವನ್ನು ಅತಿಯಾದ ಸಂಭ್ರಮವಿಲ್ಲದೆ ಸಹಜವಾಗಿಯೇ ಸ್ವೀಕರಿಸಿದ್ದೇನೆ. ಮುಂದೆ ಏನಾಗಲಿದೆ ಎಂದು ಲೆಕ್ಕಾಚಾರ ಹಾಕುತ್ತಿಲ್ಲ. ಉತ್ತಮ ಪಾತ್ರಗಳು ಬರಬಹುದೆಂಬ ನಿರೀಕ್ಷೆಯಷ್ಟೇ ಇದೆ.

* ಈಗ ಪ್ರೇಕ್ಷಕರು ಪ್ರೇಮಕತೆಗಳಲ್ಲಿ ಯಾವ ರೀತಿಯ ಭಾವನೆಗಳನ್ನು ಹಾಗೂ ಹೊಸತನವನ್ನು ನಿರೀಕ್ಷಿಸುತ್ತಿದ್ದಾರೆ?

ಟ್ರೂ ಲವ್‌ ಎಲ್ಲರಿಗೂ ಬೇಕಿದೆ. ಅದು ಸಿನಿಮಾಗಳಲ್ಲೂ ಕೂಡ. ಈಗ ಜೆನ್‌ ಜೀ ಜಮಾನ ಅಂತೀವಿ. ಅವರು ಕೂಡ ಹುಡುಕುತ್ತಿರುವುದು ಅಥವಾ ನಿರೀಕ್ಷೆ ಮಾಡುತ್ತಿರುವುದು ನೈಜ ಮತ್ತು ನಿಜವಾದ ಪ್ರೀತಿ, ಫ್ಯಾಮಿಲಿ ಬಾಂಡಿಂಗ್‌, ಹೆಣ್ಣ ಮಕ್ಕಳನ್ನು ಗೌರವಿಸುವಂತಹ ವಿಷಯಗಳಿಗೆ ತುಂಬಾ ಮಹತ್ವ ಕೊಡುತ್ತಿದ್ದಾರೆ. ಅಂಥ ಅಂಶಗಳು ಚಿತ್ರಗಳಿದ್ದರೆ ಎಲ್ಲರಿಗೂ ಮೆಚ್ಚುಗೆ ಆಗುತ್ತದೆ.

* ನಿಮಗೆ ಎದುರಾದ ಅಂಥ ಸವಾಲುಗಳು ಯಾವುವು, ಅದರಿಂದ ಕಲಿತ ಪಾಠಗಳೇನು?

ಸವಾಲುಗಳು ನನಗೆ ಖುಷಿ ಕೊಡುತ್ತದೆ. ಅವುಗಳನ್ನು ದಾಟಿದಾಗಲೇ ಸಕ್ಸಸ್‌ ಸಿಗೋದು ಅನ್ನೋ ಸತ್ಯ ಗೊತ್ತಿದೆ. ಪಾಠಗಳು ಕಲಿತಿದ್ದು ಅವಮಾನಗಳಿಂದ. ಯಶಸ್ಸು ಇಲ್ಲದಿದ್ದಾಗ ನಮ್ಮ ನೋಡುವ ರೀತಿ, ಮಾತನಾಡಿಸುವ ಸಂದರ್ಭಗಳು, ನಡೆಸಿಕೊಳ್ಳುವ ರೀತಿಯೇ ಬೇರೆ. ಅದನ್ನು ಹೇಳಕ್ಕಾಗಲ್ಲ. ಆದರೆ, ಅಂಥವನ್ನು ನೋಡಿ ಜೋರಾಗಿ ಮಾತನಾಡುವುದಕ್ಕಿಂತ ಸೈಲೆಂಟಾಗಿದ್ದರೆ ಒಂದು ದಿನ ನಮ್ಮ ಕೆಲಸವೇ ಉತ್ತರಿಸುತ್ತದೆ. ನಾವು ಶೋ ಮಾಡಬೇಕಿರೋದು ನಮ್ಮ ಯಶಸ್ಸನ್ನೇ.

* ಮುಂದೆ ನಿಮ್ಮಿಂದ ಪ್ರೇಕ್ಷಕರು ಯಾವ ರೀತಿಯ ಪಾತ್ರಗಳನ್ನು ನಿರೀಕ್ಷಿಸಬಹುದು? ನಿಮ್ಮ ಕನಸಿನ ಪಾತ್ರ ಯಾವುದು?

ನನಗೆ ಎಲ್ಲಾ ರೀತಿಯ ಪಾತ್ರಗಳನ್ನು ಮಾಡುವಾಸೆ. ಎಕ್ಸ್‌ಪ್ಲೋರ್‌ ಮಾಡುವ ಮನಸ್ಥಿತಿಯವಳು ನಾನು. ಅಂಥ ಎಕ್ಸ್‌ಪ್ಲೋರ್‌ ಆಗುವಂತಹ ಪಾತ್ರಗಳಿಗೆ ಕಾಯುತ್ತಿದ್ದೇನೆ. ಮೈಥಾಲಾಜಿಕಲ್‌ ಹಾಗೂ ಹಿಸ್ಟಾರಿಕಲ್‌ ಕತೆಗಳಲ್ಲಿ ಪಾತ್ರ ಮಾಡುವ ಕನಸು ಇದೆ.

* ನೀವು ‘ಹರಿಕಥೆ ಅಲ್ಲ ಗಿರಿಕಥ’ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಬಂದವರು ಅಂತ ಗೊತ್ತು. ಈ ಚಿತ್ರಕ್ಕೆ ನೀವು ಕನೆಕ್ಟ್‌ ಆಗಿದ್ದು ಹೇಗೆ?

ಇದಕ್ಕೆ ನಟ, ನಿರ್ದೇಶಕ ರಿಷಬ್‌ ಶೆಟ್ಟಿ ಅವರಿಗೆ ಥಾಂಕ್ಸ್‌ ಹೇಳಬೇಕು. ಯಾಕೆಂದರೆ 2500 ಮಂದಿ ಹುಡುಗಿಯರಲ್ಲಿ ನನ್ನ ಒಂದು ಕ್ಯಾಂಡಿಡ್‌ ಫೋಟೋ ನೋಡಿ ಚಿತ್ರಕ್ಕೆ ಸೆಲೆಕ್ಟ್‌ ಮಾಡಿಕೊಂಡರು. ಮೂರು ತಿಂಗಳು ಅಭಿನಯ ತರಬೇತಿ ಕೊಟ್ಟರು. ಈ ಎಲ್ಲಾ ಕ್ರೆಡಿಟ್ಟು ರಿಷಬ್‌ ಶೆಟ್ಟಿ ಅವರಿಗೆ ಸೇರಬೇಕು.

* ನೀವು ಚಿತ್ರರಂಗಕ್ಕೆ ಬರಬೇಕೆಂದು ತಯಾರಿ ಮಾಡಿಕೊಳ್ಳುತ್ತಿದ್ರಾ?

ಖಂಡಿತ ಇಲ್ಲ. ಯಾಕೆಂದರೆ ಆಕಸ್ಮಿಕವಾಗಿ ನಾನು ಆಡಿಷನ್‌ಗೆ ಫೋಟೋ ಕಳುಹಿಸಿದೆ. ಅದನ್ನು ನೋಡಿ ರಿಷಬ್‌ ಆಯ್ಕೆ ಮಾಡಿದರು ಅಂತ ಗೊತ್ತಾಗಿ ನನಗೇ ಶಾಕ್‌ ಆಯಿತು. ಮಾಡೆಲಿಂಗ್‌ ಇಲ್ಲ, ಸೀರಿಯಲ್‌ ಇಲ್ಲ. ರಂಗಭೂಮಿಯ ನಂಟು ಇಲ್ಲ. ಕಾರ್ಟೂನ್‌ ನೆಟ್ವರ್ಕ್‌ ಚಾನಲ್‌ ನೋಡಿಕೊಂಡಿದ್ದವಳು ನಾನು... ಹ್ಹಹ್ಹಹ್ಹ. ಹೀಗೆ ನಟಿಯಾಗಿ ಬಂದಿದ್ದೇ ಆಕಸ್ಮಿಕ.

* ನಿಮ್ಮ ಮುಂದಿನ ಸಿನಿಮಾ ಯಾವಾಗ?

ಡಿ.4ಕ್ಕೆ ಮಿಸ್ಟರ್ ಜಾಕ್‌ ಎನ್ನುವ ಸಿನಿಮಾ ತೆರೆಗೆ ಬರಲಿದೆ. ಈ ಚಿತ್ರದಲ್ಲಿ ನಾನು ಟೀಚರ್‌ ಪಾತ್ರ ಮಾಡಿದ್ದೇನೆ. ಬೇರೆ ಹೊಸ ಚಿತ್ರಗಳು ಒಪ್ಪಿಕೊಂಡಿಲ್ಲ.

ನಾಯಕ್‌ ನಹಿ ಖಳನಾಯಕ್‌ ಹೂಂ ಮೈ: ಲವರ್‌ ಬಾಯ್‌ ಇಮೇಜ್‌ ಬಿಟ್ಟ ನೆನಪಿರಲಿ ಪ್ರೇಮ್‌ ಸಂದರ್ಶನ

Govindaraj S — Fri, 25 Sep 2026 15:46:19 +0530

ಆರ್‌. ಕೇಶವಮೂರ್ತಿ

* ಸ್ಪಾರ್ಕ್‌ ಚಿತ್ರದಲ್ಲಿ ನಿಮ್ಮ ಪಾತ್ರ ಹೇಗಿರುತ್ತದೆ?

ಕ್ಯಾರೆಕ್ಟರ್‌ ಅಂತ ಬಂದಾಗ ನಾನು ಇಲ್ಲಿ ಪೊಲೀಸ್‌ ಪಾತ್ರಧಾರಿ. ಈ ರೀತಿಯ ಪಾತ್ರ ಮಾಡಬೇಕೆಂದು ತುಂಬಾ ದಿನಗಳಿಂದ ಅಂದುಕೊಳ್ಳುತ್ತಿದ್ದೆ. ಅದು ಈ ಚಿತ್ರದಲ್ಲಿ ಈಡೇರಿದೆ.

* ಆದರೆ, ಪೊಲೀಸ್‌ ಪಾತ್ರ ಮಾಡಿದ್ದೀರಲ್ಲ?

ಪೊಲೀಸ್‌ ಪಾತ್ರದಲ್ಲಿರುವ ಪ್ರತಿನಾಯಕ ನಾನು. ಆಂಟಗನಿಸ್ಟ್‌ ಪಾತ್ರವನ್ನು ನಾನು ಇದುವರೆಗೂ ಮಾಡಿಲ್ಲ. ತೆರೆ ಮೇಲೆ ನನ್ನ ನಾನು ಬೇರೆ ರೀತಿ ತೋರಿಸಿಕೊಳ್ಳಬೇಕು, ಬೇರೆ ಬೇರೆ ರೀತಿಯ ಪಾತ್ರಗಳಲ್ಲಿ ನಟಿಸಬೇಕು ಎಂದುಕೊಳ್ಳುತ್ತಿದ್ದೆ. ಅದಕ್ಕೆ ತಕ್ಕಂತೆ ‘ಸ್ಪಾರ್ಕ್‌’ ಚಿತ್ರದಲ್ಲಿ ನನಗೆ ಪಾತ್ರ ಸಿಕ್ಕಿದೆ.

* ಪಾತ್ರಗಳ ವಿಚಾರದಲ್ಲಿ ಈಗ ಇಂಥ ಆಲೋಚನೆ- ಬದಲಾವಣೆ ಬರಲು ಕಾರಣ ಏನು?

ನನ್ನ ಎಲ್ಲರು ಲವರ್‌ ಬಾಯ್‌ ಅಮೇಜ್‌ನಲ್ಲೇ ಬ್ರಾಂಡ್‌ ಮಾಡಿದ್ದರು. ಎಲ್ಲರು ಅದೇ ರೀತಿಯ ಪಾತ್ರಗಳಲ್ಲೇ ನೋಡುತ್ತಿದ್ದರು. ಒಬ್ಬ ನಟನಾಗಿ ಬ್ರಾಂಡು, ಇಮೇಜ್‌ ಮೀರಬೇಕು. ನನ್ನ ಒಳಗೂ ಬೇರೆ ಬೇರೆ ಇಮೇಜಿನ ಕಲಾವಿದ ಇದ್ದಾನೆ ಅಂತ ಸಾಬೀತು ಮಾಡಬೇಕೆಂಬುದೇ ಕಾರಣ.

* ‘ಸ್ಪಾರ್ಕ್‌’ ಚಿತ್ರ ಒಪ್ಪಿಕೊಳ್ಳುವುಕ್ಕೆ ಪಾತ್ರವೇ ಮುಖ್ಯನಾ?

ಹೌದು. ಹಾಗೆ ನೋಡಿದರೆ ಈ ಕತೆ ನನಗೇ ನೇರವಾಗಿ ಬಂದಿದ್ದಲ್ಲ. ನಿರ್ದೇಶಕರು ಬೇರೊಬ್ಬರಿಗೆ ಕತೆ ಹೇಳುವಾಗ ಅವರು ನನ್ನ ಲುಕ್ಕು ನೋಡಿ, ತಾನು ಅಂದುಕೊಂಡ ಪಾತ್ರಕ್ಕೆ ಸೂಕ್ತ ಅನಿಸಿ ಆ ಮೇಲೆ ನನಗೆ ಕತೆ ಹೇಳಿದರು. ಕತೆ ಮತ್ತು ಪಾತ್ರವೇ ಈ ಚಿತ್ರದಲ್ಲಿ ನಾನು ನಟಿಸಲು ಕಾರಣವಾಯಿತು.

* ಈ ಚಿತ್ರದ ಕತೆ ಏನು?

ಪತ್ರಿಕೋದ್ಯಮದ ಸುತ್ತಾ ಇರುವ ಕತೆ. ರಾಜಿಯಾಗುವಂತಹ ಸಂದರ್ಭ, ಸನ್ನಿವೇಶಗಳು ಬಂದಾಗಲೂ ಅದಕ್ಕೆ ಎದುರಾಗಿ ನಿಂತು ಸತ್ಯ, ನಿಷ್ಠೆಗೆ ಮಾತ್ರ ಬದ್ಧ ಎನ್ನುವ ಪತ್ರಕರ್ತನ ಕತೆ ಇಲ್ಲಿದೆ. ತನಿಖಾ ಪತ್ರಿಕೋದ್ಯಮ, ಪತ್ರಕರ್ತರ ಕುಟುಂಬಗಳು, ಅವರ ನೋವು- ನಲಿವು, ಸಂಕಷ್ಟಗಳು, ಸತ್ಯಕ್ಕೆ ಎಷ್ಟೇ ಹತ್ತಿರವಾದ ಸುದ್ದಿ ಮಾಡಿದರೂ ಅದು ಪ್ರಕಟಣೆ ಆಗುವ ರೀತಿ, ಇದರ ನಡುವೆ ಒಬ್ಬ ಪೊಲೀಸ್‌... ಇತ್ಯಾದಿಗಳು ಚಿತ್ರದಲ್ಲಿವೆ.

* ಪ್ರೇಕ್ಷಕರಿಗೆ ಈ ಚಿತ್ರ ಹೇಗೆ ಕನೆಕ್ಟ್‌ ಆಗುತ್ತದೆ?

ಪ್ರತಿಯೊಬ್ಬರಿಗೂ ಇಷ್ಟವಾಗುತ್ತದೆ ಎಂಬುದರಲ್ಲಿ ಅನುಮಾನ ಇಲ್ಲ. ಪ್ರತಿ ನಿತ್ಯ ನಾವು ಎದ್ದ ಕೂಡಲೇ ನೋಡುವುದು ಪತ್ರಿಕೆ, ಮಾಧ್ಯಮಗಳತ್ತ. ಅಂಥ ಕ್ಷೇತ್ರದ ಕತೆ ಇದು. ‘ಕನ್ನಡ ಸಿನಿಮಾಗಳಲ್ಲಿ ಕತೆಗಳೇ ಇರಲ್ಲ’ ಎಂದು ಹೇಳುವ ಪ್ರೇಕ್ಷಕರು ಈ ಚಿತ್ರ ನೋಡಿದರೆ ಖಂಡಿತ ಸಿನಿಮಾ ಅವರಿಗೆ ಕನೆಕ್ಟ್‌ ಆಗುತ್ತದೆ.

* ಯಂಗ್ ಹೀರೋ ನಿರಂಜನ್ ಸುಧೀಂದ್ರ ತೆರೆ ಹಂಚಿಕೊಂಡಿದ್ದು ಹೇಗಿತ್ತು?

ತುಂಬಾ ತಯಾರಿ ಮಾಡಿಕೊಂಡು ಬಂದಿರುವ ನಟ ನಿರಂಜನ್‌ ಸುಧೀಂದ್ರ. ಎಂಟು ವರ್ಷದ ತಯಾರಿ ಅವನಲ್ಲಿದೆ. ಆತನ ಮುಂದೆ ನಿಂತು ನಟಿಸುವಾಗ ಹೊಸಬ, ಯಂಗ್‌ ಅಂತ ಅನಿಸಲೇ ಇಲ್ಲ. ತುಂಬಾ ಕಷ್ಟಪಟ್ಟು ಪ್ರೀತಿಯಿಂದ ನಟನೆ ಕಲಿಯುತ್ತಿರುವ ಹುಡುಗ. ಸ್ಟಾರ್‌ ಕುಟುಂಬದ ಕಿಡ್‌ ಅಂತ ಸುಮ್ಮಲೆ ಬಂದಿಲ್ಲ. ಈ ಚಿತ್ರದಲ್ಲಿ ನಿರಂಜನ್‌ ಸುಧೀಂದ್ರ ನೆಕ್ಟ್ಸ್‌ ಲೆವಲ್‌ ನಟನೆ ಮಾಡಿದ್ದಾರೆ.

* ನಿಮ್ಮ ಮುಂದಿನ ಚಿತ್ರಗಳು ಯಾವುವು?

ಡಿಡಿ ಡಿಕ್ಕಿ ಹಾಗೂ ಕೆಂಬಾಬುದಿ. ಈ ಎರಡೂ ಚಿತ್ರಗಳಿಗೆ ಶೂಟಿಂಗ್‌ ಮುಗಿದಿದೆ. ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳು ನಡೆಯುತ್ತಿವೆ. ಈ ಎರಡೂ ಕೂಡ ಬೇರೆ ರೀತಿಯ ಸಿನಿಮಾಗಳು. ಆಗಲೇ ಹೇಳಿದಂತೆ ಬೇರೆ ರೀತಿಯ ಚಿತ್ರಗಳಲ್ಲೂ ನಟಿಸಬೇಕೆಂಬ ಯೋಚನೆಯ ಭಿನ್ನ ಚಿತ್ರಗಳ ಆಯ್ಕೆಗೆ ಕಾರಣವಾಗುತ್ತಿದೆ.

* ಮಕ್ಕಳು ಏನು ಮಾಡುತ್ತಿದ್ದಾರೆ?

ಮಗಳು ಅಮೃತಾ ‘ಪಬ್ಬಾರ್‌’ ಚಿತ್ರ ಶೂಟಿಂಗ್‌ ಮುಗಿಸಿದ್ದಾಳೆ. ‘ಗುರು ಶಿಷ್ಯರು’ ಚಿತ್ರದ ಮೂಲಕ ಬಂದ ಮಗ ಏಕಾಂತ್‌ ಪ್ರೇಮ್‌ ಹೀರೋ ಆಗುವುದಕ್ಕೆ ತಯಾರಿ ಮಾಡಿಕೊಂಡಿದ್ದಾನೆ. ಅವನನ್ನು ಲಾಂಚ್‌ ಮಾಡಬೇಕು. ಸಿನಿಮಾ ಬಿಟ್ಟು ಬೇರೆ ಏನೂ ಮಾಡಲ್ಲ ಅಂತಿದ್ದಾನೆ.

ನಾನು ಕಾಯುತ್ತಿರುವ ಯಶಸ್ಸು 'ಕಾಮನ್‌ ಮ್ಯಾನ್‌'ನಿಂದ ಸಿಗಲಿದೆ: ಗೌರಿಶಂಕರ್ ಸಂದರ್ಶನ

Govindaraj S — Fri, 18 Sep 2026 09:00:09 +0530

* ‘ಕೆರೆಬೇಟೆ’ ನಂತರ ಬಹಳ ಸಮಯದ ಬಳಿಕ ‘ಕಾಮನ್ ಮ್ಯಾನ್’ ಸಿನಿಮಾ ಒಪ್ಪಿಕೊಳ್ಳಲು ಮುಖ್ಯ ಕಾರಣವೇನು?

ಒಬ್ಬ ಕಲಾವಿದನಿಗೆ ಕಥೆಯ ಜೊತೆಗೆ ನಿರ್ಮಾಣ ಸಂಸ್ಥೆ, ನಿರ್ದೇಶಕರು ಮತ್ತು ಇಡೀ ತಂಡದ ವಿಷನ್ ಬಹಳ ಮುಖ್ಯವಾಗುತ್ತದೆ. ನಿರ್ಮಾಪಕ ಎನ್. ನರಸಿಂಹಮೂರ್ತಿಯವರು ಕಥೆಯ ಒಂದು ಮುಖ್ಯ ಎಳೆ ಹೇಳಿದ ನಂತರ, ದೊಡ್ಡ ರೈಟಿಂಗ್ ಟೀಮ್ ಮತ್ತು ನಿರ್ದೇಶಕರು ಸೇರಿ ಅತ್ಯುತ್ತಮ ಚಿತ್ರಕಥೆ ಸಿದ್ಧಪಡಿಸಿದ್ದರು. ಎಲ್ಲಕ್ಕಿಂತ ಹೆಚ್ಚಾಗಿ ಕಥೆ ಕೇಳುತ್ತಿದ್ದಂತೆ ನನಗೆ ತುಂಬಾ ಕನೆಕ್ಟ್ ಆಯ್ತು. ನನ್ನ ಕುಟುಂಬದಲ್ಲಿ ಎಲ್ಲರೂ ವಕೀಲರು. ರೈತಾಪಿ ಕುಟುಂಬದಿಂದ ಬಂದವರು ಸುಲಭವಾಗಿ ಓದಲು ಆಯ್ಕೆ ಮಾಡಿಕೊಳ್ಳುವುದು ಎಲ್‌ಎಲ್‌ಬಿ. ಈ ಚಿತ್ರದ ನಾಯಕ ಕೂಡ ಅಡ್ವೊಕೇಟ್. ಆಮೇಲೆ ಮುಖ್ಯಮಂತ್ರಿ. ಹಾಗಾಗಿ ಈ ಕಥೆ, ಪಾತ್ರ ನನ್ನ ಮನಸ್ಸಿಗೆ ತೀರ ಹತ್ತಿರವಾಯಿತು.

* ‘ಕಾಮನ್ ಮ್ಯಾನ್’ ಚಿತ್ರ ಯಾವ ಜಾನರ್‌ಗೆ ಸೇರುತ್ತದೆ? ಪ್ರೇಕ್ಷಕರಿಗೆ ಇದು ಎಂಥ ಅನುಭವ ನೀಡಲಿದೆ?

ಇದು ಸಂಪೂರ್ಣವಾಗಿ 2 ಗಂಟೆ 20 ನಿಮಿಷಗಳ ಪಕ್ಕಾ ಎಂಟರ್‌ಟೈನ್‌ಮೆಂಟ್ ಸಿನಿಮಾ. ಎಲ್ಲೂ ಬೋರ್ ಹೊಡೆಸಲ್ಲ. ಇದೊಂದು ಮೃಷ್ಟಾನ್ನ ಭೋಜನ ಅಲ್ಲದಿರಬಹುದು, ಆದರೆ ದೇಹಕ್ಕೆ ಹಿತ ನೀಡುವ ಆರೋಗ್ಯಕರ ‘ಮಜ್ಜಿಗೆ ಅನ್ನ’ದಂತಹ ಸಿನಿಮಾ. ಸಾಯಿಪ್ರಕಾಶ್ ಅವರಂತಹ ಅನುಭವಿ ನಿರ್ದೇಶಕರು ತುಂಬಾ ಅಚ್ಚುಕಟ್ಟಾಗಿ ಈ ಚಿತ್ರವನ್ನು ಕಟ್ಟಿಕೊಟ್ಟಿದ್ದಾರೆ. ಅವರದ್ದು ಅಪ್ರತಿಮ ಅನುಭವ ಮತ್ತು ಅದ್ಭುತ ಜಡ್ಜ್‌ಮೆಂಟ್. ಅದೇ ರೀತಿ ನಿರ್ಮಾಪಕರು ಉತ್ತಮ ರೀತಿಯಲ್ಲಿ ಸಿನಿಮಾ ಮಾಡಿದ್ದಾರೆ.

* ಒಬ್ಬ ಕಾಮನ್ ಮ್ಯಾನ್ ಮುಖ್ಯಮಂತ್ರಿಯಾಗುವ ಪಾತ್ರ ಇದೆಯಂತೆ. ಈ ಪಾತ್ರಕ್ಕೆ ಸಿದ್ಧತೆ ಹೇಗಿತ್ತು?

ಹೌದು, ಆರಂಭದಲ್ಲಿ ‘ನಾನೇ ಸಿಎಂ’ ಅಂತೆಲ್ಲ ಟೈಟಲ್ ಯೋಚನೆ ಇತ್ತು. ಆದರೆ ಒಬ್ಬ ಸಾಮಾನ್ಯ ವ್ಯಕ್ತಿ ಸಿಎಂ ಆಗ್ತಾನೆ ಅಂದಾಗ ಸಾರ್ವಜನಿಕರಿಗೆ ತಕ್ಷಣ ರಿಲೇಟ್ ಆಗಬೇಕು ಎಂಬ ಕಾರಣಕ್ಕೆ ‘ಕಾಮನ್ ಮ್ಯಾನ್’ ಅಂತ ಇಟ್ಟೆವು. ಈ ಪಾತ್ರದಲ್ಲಿ ನಟನೆ ಬಹಳ ಸವಾಲಾಗಿತ್ತು. ಒಬ್ಬ ವಕೀಲನಾಗಿ ಹುಮ್ಮಸ್ಸು ತೋರಬೇಕು. ಅದೇ ವ್ಯಕ್ತಿ ಸಿಎಂ ಆದಾಗ ಗಾಂಭೀರ್ಯ ಇರಬೇಕು. ಗತ್ತು ಇರಬೇಕು, ದೌಲತ್ತು ಇರಬಾರದು. ಅದೆಲ್ಲಾ ಯೋಚಿಸಿ ಯಾವುದೇ ವರ್ಕ್‌ಶಾಪ್ ಮಾಡದೆ ನಾನೇ ಸ್ವತಃ ಬಾಡಿ ಲ್ಯಾಂಗ್ವೇಜ್ ಮತ್ತು ಲುಕ್ ಮೇಲೆ ಸಾಕಷ್ಟು ಅಭ್ಯಾಸ ಮಾಡಿ ಈ ಪಾತ್ರ ಮಾಡಿದ್ದೇನೆ.

* ‘ಕೆರೆಬೇಟೆ’ ನಿಮಗೆ ವಿಮರ್ಶಾತ್ಮಕವಾಗಿ ದೊಡ್ಡ ಹೆಸರು ತಂದುಕೊಟ್ಟಿತು. ಆದರೆ ಈ ಸಿನಿಮಾದಿಂದ ನಿಮ್ಮ ನಿರೀಕ್ಷೆಯೇನು?

‘ಕೆರೆಬೇಟೆ’ ನನಗೆ ಹೆಸರು ತಂದುಕೊಟ್ಟಿದ್ದು ನಿಜ, ಆದರೆ ಕಮರ್ಷಿಯಲ್ ಆಗಿ ದೊಡ್ಡ ಹಣ ಮಾಡಲಿಲ್ಲ. ಚಿತ್ರರಂಗದಲ್ಲಿ ಕಮರ್ಷಿಯಲ್ ಸಕ್ಸಸ್ ಬಹಳ ಮುಖ್ಯ. ಈ ಚಿತ್ರದಲ್ಲಿ ಆ ಎಲ್ಲಾ ಕಮರ್ಷಿಯಲ್ ಅಂಶಗಳೂ ಇವೆ. ಆಕರ್ಷಕ ಹಾಡುಗಳು, ಮಾಸ್ ಎಲಿಮೆಂಟ್ಸ್ ಇವೆ. ಈ ಸಿನಿಮಾ ಗೆದ್ದರೆ ನಾನು ಒಬ್ಬ ಮಾಸ್ ಮತ್ತು ಕಮರ್ಷಿಯಲ್ ಹೀರೋ ಆಗಿ ಇಂಡಸ್ಟ್ರಿಯಲ್ಲಿ ಗುರುತಿಸಿಕೊಳ್ಳಬಲ್ಲೆ ಎಂಬ ನಂಬಿಕೆಯಿದೆ.

* ಈ ಸಿನಿಮಾದ ಮೂಲಕ ಪ್ರೇಕ್ಷಕರಿಗೆ ಟೇಕ್ಅವೇ ಏನು?

ಇವತ್ತಿನ ಸಮಾಜದಲ್ಲಿ ಜನಸಾಮಾನ್ಯರ ದಿನನಿತ್ಯದ ಬದುಕಿನ ಪ್ರತಿ ಹಂತದಲ್ಲೂ ರಾಜಕೀಯ ಬೆರೆತುಹೋಗಿದೆ. ಆಡಳಿತ, ಕಾನೂನು, ವ್ಯವಸ್ಥೆಯಲ್ಲಿನ ಸಮಸ್ಯೆಗಳನ್ನು ಒಬ್ಬ ಸಾಮಾನ್ಯ ಮನುಷ್ಯನಿಗೆ ಅರ್ಥವಾಗುವ ಭಾಷೆಯಲ್ಲೇ ಸಿನಿಮಾದಲ್ಲಿ ಹೇಳಲಾಗಿದೆ. ಭ್ರಷ್ಟಾಚಾರವನ್ನು ಹೇಗೆ ಕಿತ್ತೊಗೆಯಬಹುದು ಎಂಬುದನ್ನು ಮನರಂಜನೆಯ ಜೊತೆಗೆ ಅರ್ಥಪೂರ್ಣವಾಗಿ ಚರ್ಚಿಸಲಾಗಿದೆ.

* ಈ ಪಯಣ ಹೇಗಿದೆ?

‘ಜೋಕಾಲಿ’, ‘ರಾಜಹಂಸ’, ‘ಕೆರೆಬೇಟೆ’ ಹೀಗೆ ಏಳುಬೀಳುಗಳನ್ನು ಕಂಡಿದ್ದೇನೆ. ಈ ಸೋಲುಗಳೇ ನನಗೆ ಬದುಕನ್ನು ಮತ್ತು ಧೈರ್ಯವನ್ನು ಕಲಿಸಿವೆ. ಚಿತ್ರರಂಗದಲ್ಲಿ ಯಾರೂ ಸುಲಭವಾಗಿ ಅವಕಾಶ ಕೊಡಲ್ಲ, ಅವಕಾಶ ಸಿಕ್ಕಾಗ ಪೂರ್ತಿಯಾಗಿ ಕೊಟ್ಟುಕೊಳ್ಳಬೇಕು. ನನ್ನದು ಎರಡು ದಶಕಗಳ ಹೋರಾಟ. ಕನ್ನಡಿಗರು ನನ್ನನ್ನು ಚಿತ್ರರಂಗದಲ್ಲಿ ಶಾಶ್ವತವಾಗಿ ಉಳಿಸಿಕೊಳ್ಳುವ ಸಂದರ್ಭ ಈ ಸಿನಿಮಾದಲ್ಲಿ ಒದಗಲಿ ಎಂಬುದೇ ನನ್ನ ಆಶಯ. ಪ್ರಾಮಾಣಿಕವಾಗಿ ಪ್ರಯತ್ನ ಮಾಡಿದ್ದೇವೆ. ಈ ಸಿನಿಮಾ ಜನರಿಗೆ ಖಂಡಿತ ಇಷ್ಟವಾಗುತ್ತದೆ ಎಂಬ ಸಂಪೂರ್ಣ ವಿಶ್ವಾಸ ನನಗಿದೆ.

‘ಬೇಲ್’ನಲ್ಲಿ ಜೋರಾದ ಹೀರೋಯಿಸಂ ಇಲ್ಲ: ಪೊಲೀಸ್ ಕಮಿಷನರ್ ಆದ ಶಿವಣ್ಣ ಹೇಳಿದಿಷ್ಟು..

Govindaraj S — Thu, 01 Oct 2026 17:56:06 +0530

ಕನ್ನಡ ಚಿತ್ರರಂಗದ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಅವರು ಪ್ರತಿ ಸಿನಿಮಾದಲ್ಲೂ ವಿಭಿನ್ನ ಪಾತ್ರಗಳ ಮೂಲಕ ಪ್ರೇಕ್ಷಕರನ್ನು ಸೆಳೆಯುತ್ತಲೇ ಬಂದಿದ್ದಾರೆ. ಇದೀಗ ‘ಬೇಲ್’ ಸಿನಿಮಾದಲ್ಲಿ ಪೊಲೀಸ್ ಕಮಿಷನರ್ ವಿಜಯ್ ಕುಮಾರ್ ಅಲಿಯಾಸ್ ವಿಜಿಯಾಗಿ ಹೊಸ ಶೇಡ್‌ನಲ್ಲಿ ಕಾಣಿಸಿಕೊಳ್ಳಲು ಸಜ್ಜಾಗಿದ್ದಾರೆ. ಅಕ್ಟೋಬರ್ 2ರಂದು ತೆರೆಗೆ ಬರಲಿರುವ ಈ ಸಿನಿಮಾದಲ್ಲಿ ಶಿವಣ್ಣ ಅವರ ಖಾಕಿ ಲುಕ್ ಈಗಾಗಲೇ ಗಮನ ಸೆಳೆಯುತ್ತಿದೆ.

ಸುಮಾರು 130ಕ್ಕೂ ಹೆಚ್ಚು ಸಿನಿಮಾಗಳ ಅನುಭವ ಹೊಂದಿರುವ ಶಿವರಾಜ್‌ಕುಮಾರ್ ಅವರಿಗೆ ‘ಬೇಲ್’ ನಿರ್ದೇಶಕ ಪವನ್ ಒಡೆಯರ್ ಅವರೊಂದಿಗೆ ಮೊದಲ ಸಿನಿಮಾ. ಕೆವಿಎನ್ ಪ್ರೊಡಕ್ಷನ್ಸ್ ಬ್ಯಾನರ್ ಅಡಿಯಲ್ಲಿ ವೆಂಕಟ್ ಕೆ. ನಾರಾಯಣ್ ನಿರ್ಮಿಸಿರುವ ಈ ಚಿತ್ರದ ಬಿಡುಗಡೆಗೂ ಮುನ್ನ ಶಿವಣ್ಣ ತಮ್ಮ ಪಾತ್ರ, ಹಿರಿಯ ಹಾಗೂ ಕಿರಿಯ ಕಲಾವಿದರೊಂದಿಗಿನ ಅನುಭವ, ‘ಜೈಲರ್ 2’ ಮತ್ತು ಪ್ರಸ್ತುತ ಸಿನಿಮಾ ಜಗತ್ತಿನ ಬಗ್ಗೆ ಮಾತನಾಡಿದ್ದಾರೆ.

‘ಬೇಲ್’ನಲ್ಲಿ ವಿಜಿಯ ಪಾತ್ರ ಹೇಗಿದೆ?

‘ಬೇಲ್’ ಸಿನಿಮಾದಲ್ಲಿನ ತಮ್ಮ ಪಾತ್ರದ ವಿಶೇಷತೆಯನ್ನು ವಿವರಿಸಿರುವ ಶಿವಣ್ಣ, ಇಲ್ಲಿ ‘ವಿಜಿ’ ಎಂಬ ಹೆಸರು Vigilance ಅನ್ನು ಪ್ರತಿನಿಧಿಸುತ್ತದೆ ಎಂದು ಹೇಳಿದ್ದಾರೆ. ವಿಜಿ ಎಲ್ಲವನ್ನೂ ತುಂಬಾ ಸೂಕ್ಷ್ಮವಾಗಿ ಗಮನಿಸುವ ವ್ಯಕ್ತಿ. ಹೆಚ್ಚು ಮಾತನಾಡದೆ, ತನ್ನ ನೋಟ ಮತ್ತು ಭಾವನೆಗಳ ಮೂಲಕವೇ ಸಾಕಷ್ಟು ವಿಷಯಗಳನ್ನು ವ್ಯಕ್ತಪಡಿಸುತ್ತಾನೆ. ಕುಟುಂಬದ ಜೊತೆ ಆತ ತುಂಬಾ ಆತ್ಮೀಯವಾಗಿರುತ್ತಾನೆ. ಆಪ್ತ ಸ್ನೇಹಿತರೊಂದಿಗೆ ನಗುತ್ತಾ, ಖುಷಿಯಾಗಿ ಸಮಯ ಕಳೆಯುತ್ತಾನೆ. ಆದರೆ ಒಳಗೊಳಗೆ ತನ್ನದೇ ಆದ ಕೆಲವು ನೋವು ಹಾಗೂ ಹೋರಾಟಗಳನ್ನು ಹೊತ್ತುಕೊಂಡಿರುತ್ತಾನೆ.

ಪತ್ನಿಯ ಎದುರೂ ಆತ ಎಚ್ಚರಿಕೆಯಿಂದ ವರ್ತಿಸುತ್ತಾನೆ. ಅದು ಭಯದಿಂದಲ್ಲ, ಬದಲಿಗೆ ಆಕೆಯ ಮೇಲಿರುವ ಆಳವಾದ ಗೌರವದಿಂದ. ಹೀಗಾಗಿ ತನ್ನ ವಯಸ್ಸಿಗೆ ತಕ್ಕಂತೆ ಅತ್ಯಂತ ನೈಜವಾದ ಸಂಬಂಧವನ್ನು ಈ ಪಾತ್ರದಲ್ಲಿ ಕಟ್ಟಿಕೊಡಲಾಗಿದೆ ಎಂದು ಶಿವಣ್ಣ ಹೇಳಿದ್ದಾರೆ.

‘ಜೋರಾದ ಹೀರೋಯಿಸಂ ಇಲ್ಲ.. ಕಥೆಯೇ ಮುಖ್ಯ’

ಪಾತ್ರದ ಲುಕ್ ಮತ್ತು ಟೋನ್ ಅನ್ನು ಸರಿಯಾಗಿ ರೂಪಿಸಿದ ಕೀರ್ತಿಯನ್ನು ನಿರ್ದೇಶಕ ಪವನ್ ಒಡೆಯರ್ ಅವರಿಗೆ ಶಿವಣ್ಣ ನೀಡಿದ್ದಾರೆ. ಖಾಕಿ ಯೂನಿಫಾರ್ಮ್ ಧರಿಸಿದಾಗ ಸಹಜವಾಗಿಯೇ ಒಂದು ರೀತಿಯ ಗೌರವ ಹಾಗೂ ಅಧಿಕಾರದ ಭಾವ ಮೂಡುತ್ತದೆ. ಆದರೆ ‘ಬೇಲ್’ ಸಿನಿಮಾದಲ್ಲಿ ಜೋರಾದ ಅಥವಾ ಎಂದಿನ ಹೀರೋಯಿಸಂಗೆ ಜಾಗವಿಲ್ಲ. ಚಿತ್ರದ ಆರಂಭದ ದೃಶ್ಯದಲ್ಲೇ ಪ್ರೇಕ್ಷಕರಿಗೆ ನಿರೀಕ್ಷಿಸದ ರೀತಿಯ ಶಾಂತವಾದ ಸರ್ಪ್ರೈಸ್ ಸಿಗುತ್ತದೆ. ಅಲ್ಲಿ ಹೀರೋಯಿಸಂಗಿಂತ ಕಥೆಗೆ ಹೆಚ್ಚಿನ ಆದ್ಯತೆ ನೀಡಲಾಗಿದೆ ಎಂದು ಶಿವಣ್ಣ ಹೇಳಿದ್ದಾರೆ.

ಸಾಯಿಕುಮಾರ್, ಜಯರಾಮ್ ಜೊತೆ ನಟಿಸಿದ್ದು ಹೇಗಿತ್ತು?

‘ಬೇಲ್’ ಸಿನಿಮಾದ ಮತ್ತೊಂದು ಪ್ರಮುಖ ಆಕರ್ಷಣೆ ಚಿತ್ರದ ತಾರಾಬಳಗ. ಶಿವರಾಜ್‌ಕುಮಾರ್ ಅವರೊಂದಿಗೆ ಹಿರಿಯ ನಟರಾದ ಸಾಯಿಕುಮಾರ್ ಮತ್ತು ಜಯರಾಮ್ ನಟಿಸಿದ್ದಾರೆ. ಸಂಗೀತಾ ಜೊತೆಗೆ ಯೋಗಿ, ದೀಕ್ಷಿತ್ ಶೆಟ್ಟಿ ಹಾಗೂ ಸಂಜನಾ ಆನಂದ್ ಸೇರಿದಂತೆ ಯುವ ಕಲಾವಿದರೂ ಸಿನಿಮಾದ ಭಾಗವಾಗಿದ್ದಾರೆ.

ಸಾಯಿಕುಮಾರ್ ಮತ್ತು ಜಯರಾಮ್ ಅವರೊಂದಿಗೆ ಒಂದೇ ಸಿನಿಮಾದಲ್ಲಿ ನಟಿಸಿದ್ದು ತುಂಬಾ ಖುಷಿ ನೀಡಿದೆ ಎಂದು ಶಿವಣ್ಣ ಹೇಳಿದ್ದಾರೆ. ಸೆಟ್‌ನಲ್ಲಿ ಪರಸ್ಪರ ಗೌರವ ಮತ್ತು ಉತ್ತಮ ಸ್ನೇಹಭಾವ ಇತ್ತು. ಗಂಭೀರ ದೃಶ್ಯಗಳ ನಡುವೆ ಹಾಸ್ಯವನ್ನೂ ಸಮತೋಲನದಿಂದ ತಂದುಕೊಂಡಿದ್ದೇವೆ. ಅಷ್ಟೇ ಅಲ್ಲ, ಒಟ್ಟಿಗೆ ಕೆಲಸ ಮಾಡಿದ ಅನುಭವ ಎಷ್ಟು ಚೆನ್ನಾಗಿತ್ತೆಂದರೆ ‘ಬೇಲ್ 2’ ಬಗ್ಗೆಯೂ ಮಾತುಕತೆ ನಡೆಸಿದ್ದೇವೆ ಎಂದು ಶಿವಣ್ಣ ಹೇಳಿದ್ದಾರೆ.

ಯುವ ಕಲಾವಿದರ ಎನರ್ಜಿ ಬಗ್ಗೆ ಶಿವಣ್ಣ ಮಾತು

ಯೋಗಿ, ದೀಕ್ಷಿತ್ ಶೆಟ್ಟಿ ಮತ್ತು ಸಂಜನಾ ಆನಂದ್ ಅವರೊಂದಿಗಿನ ಕೆಲಸದ ಅನುಭವವೂ ಉತ್ತಮವಾಗಿತ್ತು ಎಂದು ಶಿವಣ್ಣ ತಿಳಿಸಿದ್ದಾರೆ. ಯುವ ಕಲಾವಿದರು ಸೆಟ್‌ಗೆ ತಂದ ಉತ್ಸಾಹ ಮತ್ತು ತಮ್ಮ ಪಾತ್ರಗಳನ್ನು ಅತ್ಯುತ್ತಮವಾಗಿ ನೀಡಬೇಕೆಂಬ ಹಂಬಲ ಗಮನ ಸೆಳೆಯಿತು. ಅವರ ಬಾಡಿ ಲ್ಯಾಂಗ್ವೇಜ್ ಮತ್ತು ಎನರ್ಜಿ ಸಿನಿಮಾಗೆ ಮತ್ತಷ್ಟು ಬಲ ನೀಡಿದೆ ಎಂದು ಶಿವಣ್ಣ ಹೇಳಿದ್ದಾರೆ.

ಸ್ಕ್ರಿಪ್ಟ್ ವಿಚಾರದಲ್ಲಿ ಶಿವಣ್ಣ ‘ಓಲ್ಡ್ ಸ್ಕೂಲ್’

ನಿರ್ದೇಶಕ ಪವನ್ ಒಡೆಯರ್ ಅವರ ಕೆಲಸದ ಶೈಲಿಯನ್ನೂ ಶಿವಣ್ಣ ಮೆಚ್ಚಿಕೊಂಡಿದ್ದಾರೆ. ಸಿನಿಮಾ ಆರಂಭಿಸುವ ಮುನ್ನ ಸಂಪೂರ್ಣ ಸ್ಕ್ರಿಪ್ಟ್ ಅನ್ನು ಲಾಕ್ ಮಾಡುವುದು ಪವನ್ ಅವರ ಶಿಸ್ತು ಎಂದು ಅವರು ಹೇಳಿದ್ದಾರೆ. ತಾವು ಕೂಡ ಸಂಪೂರ್ಣ ಸ್ಕ್ರಿಪ್ಟ್ ಸಿದ್ಧಪಡಿಸಿಕೊಂಡ ನಂತರವೇ ಕ್ಯಾಮೆರಾ ಮುಂದೆ ಹೋಗುವ ‘ಓಲ್ಡ್ ಸ್ಕೂಲ್’ಗೆ ಸೇರಿದವರು ಎಂದು ಶಿವಣ್ಣ ಹೇಳಿದ್ದಾರೆ. ಶೂಟಿಂಗ್ ಸಂದರ್ಭದಲ್ಲಿ ಅಗತ್ಯವಿದ್ದರೆ ಇಂಪ್ರೊವೈಸ್ ಮಾಡಬಹುದು. ಆದರೆ ಅದಕ್ಕೆ ಗಟ್ಟಿಯಾದ ಅಡಿಪಾಯ ಇರಬೇಕು ಎಂಬುದು ತಮ್ಮ ನಂಬಿಕೆ ಎಂದು ಅವರು ತಿಳಿಸಿದ್ದಾರೆ.

‘ಜೈಲರ್ 2’ನಲ್ಲಿ ಶಿವಣ್ಣ ಪಾತ್ರ ದೊಡ್ಡದಾಗಿದೆ!

ಕನ್ನಡದಾಚೆಯೂ ಶಿವರಾಜ್‌ಕುಮಾರ್ ಅವರಿಗೆ ಸಿಗುತ್ತಿರುವ ಜನಪ್ರಿಯತೆ ಬಗ್ಗೆ ಮಾತನಾಡಿದ ಅವರು, ಹಲವು ಭಾಷೆಗಳ ನಿರ್ದೇಶಕರು ತಮ್ಮ ಸಹಜವಾದ ಸ್ಕ್ರೀನ್ ಔರಾ ಮತ್ತು ಎನರ್ಜಿಗಾಗಿ ತಮ್ಮನ್ನು ಸಂಪರ್ಕಿಸುತ್ತಾರೆ ಎಂದು ಹೇಳಿದ್ದಾರೆ. ಇದೀಗ ನೆಲ್ಸನ್ ದಿಲೀಪ್‌ಕುಮಾರ್ ನಿರ್ದೇಶನದ ‘ಜೈಲರ್ 2’ ಸಿನಿಮಾದ ಮೇಲೂ ಶಿವಣ್ಣ ಅವರ ಗಮನವಿದೆ.

ಈ ಚಿತ್ರದಲ್ಲಿ ತಮ್ಮ ಸ್ಕ್ರೀನ್ ಟೈಮ್ ಸ್ವಲ್ಪ ಹೆಚ್ಚಾಗಿದೆ ಎಂದು ಹೇಳಿರುವ ಅವರು, ನೆಲ್ಸನ್ ಅವರ ವಿಭಿನ್ನ ಶೈಲಿಯೇ ಸಿನಿಮಾದ ನಿಜವಾದ ಥ್ರಿಲ್ ಎಂದಿದ್ದಾರೆ. ಅದರ ಜೊತೆಗೆ ಸೂಪರ್‌ಸ್ಟಾರ್ ರಜನಿಕಾಂತ್ ಅವರೊಂದಿಗೆ ಮತ್ತೆ ಸಮಯ ಕಳೆಯುವುದು ಸಂತೋಷದ ಸಂಗತಿ. ರಜನಿಕಾಂತ್ ಅವರು ಅಪ್ಪಾಜಿ ಡಾ. ರಾಜ್‌ಕುಮಾರ್ ಬಗ್ಗೆ ಅಪಾರ ಪ್ರೀತಿಯಿಂದ ಮಾತನಾಡುತ್ತಾರೆ ಎಂದು ಶಿವಣ್ಣ ಹೇಳಿದ್ದಾರೆ.

ದೊಡ್ಡ ಬಜೆಟ್‌ಗಿಂತ ಒಳ್ಳೆಯ ಕಥೆ ಮುಖ್ಯ!

ಕನ್ನಡ ಚಿತ್ರರಂಗದಲ್ಲಿ ಹೆಚ್ಚುತ್ತಿರುವ ಬೃಹತ್ ಬಜೆಟ್ ಸಿನಿಮಾಗಳ ಬಗ್ಗೆಯೂ ಶಿವಣ್ಣ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ದೊಡ್ಡ ಬಜೆಟ್ ಅಥವಾ ದೊಡ್ಡ ಸಂಖ್ಯೆಗಳು ಮಾತ್ರ ಸಿನಿಮಾವನ್ನು ಶ್ರೇಷ್ಠವಾಗಿಸುವುದಿಲ್ಲ. ಪ್ರಾಮಾಣಿಕ ಭಾವನೆ ಮತ್ತು ಬಲವಾದ ಕಥೆಯೇ ಸಿನಿಮಾವನ್ನು ಜನರ ಮನಸ್ಸಿನಲ್ಲಿ ಉಳಿಸುತ್ತದೆ ಎಂಬುದು ಶಿವಣ್ಣ ಅವರ ಅಭಿಪ್ರಾಯ. ‘ಬಂಗಾರದ ಮನುಷ್ಯ’, ‘ಓಂ’ನಂತಹ ಸಿನಿಮಾಗಳು ದೊಡ್ಡ ಬಜೆಟ್‌ಗಿಂತ ಬಲವಾದ ಕಥೆ ಮತ್ತು ಭಾವನೆಯಿಂದ ಇಂದಿಗೂ ಜನರ ನೆನಪಿನಲ್ಲಿ ಉಳಿದಿವೆ ಎಂದು ಅವರು ಉದಾಹರಿಸಿದ್ದಾರೆ.

ಸಿನಿಮಾ ಸೆನ್ಸಾರ್ ಚರ್ಚೆ ಬಗ್ಗೆ ಶಿವಣ್ಣ ಹೇಳಿದ್ದೇನು?

ಸಿನಿಮಾಗಳಿಗೆ ಸಂಬಂಧಿಸಿದ ಪ್ರಮಾಣೀಕರಣ ಹಾಗೂ ಸೆನ್ಸಾರ್ ವಿಚಾರದ ಚರ್ಚೆಗಳ ಬಗ್ಗೆ ಮಾತನಾಡಿದ ಶಿವಣ್ಣ, ಈ ವಿಷಯದಲ್ಲಿ ಸಮತೋಲಿತ ದೃಷ್ಟಿಕೋನ ಅಗತ್ಯ ಎಂದು ಹೇಳಿದ್ದಾರೆ. ಸಿನಿಮಾಗಳು ನಿರಂತರವಾಗಿ ಪರಿಶೀಲನೆಗೆ ಒಳಗಾಗುತ್ತವೆ. ಆದರೆ ನೈಜ ಜೀವನದ ಆಡಳಿತ ವ್ಯವಸ್ಥೆಯ ಬಗ್ಗೆಯೂ ಇದೇ ರೀತಿಯ ಹೊಣೆಗಾರಿಕೆಯನ್ನು ಸಮಾಜ ಪ್ರಶ್ನಿಸಬೇಕು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ‘ಬೇಲ್’ ಸಿನಿಮಾದಲ್ಲಿ ಹಿಂಸೆಯನ್ನು ಮಿತವಾಗಿ ಬಳಸಲಾಗಿದ್ದು, ಅದು ಕಥೆಯ ಅಗತ್ಯಕ್ಕೆ ಮಾತ್ರ ಸೀಮಿತವಾಗಿದೆ. ಹೀಗಾಗಿ ಸಿನಿಮಾ ಕುಟುಂಬ ಸಮೇತ ವೀಕ್ಷಿಸಬಹುದಾದ ರೀತಿಯಲ್ಲಿದೆ ಎಂದು ಶಿವಣ್ಣ ಹೇಳಿದ್ದಾರೆ.

ಅಧಿಕಾರ ಸಿಕ್ಕರೆ ಶಿಕ್ಷಣ ಕ್ಷೇತ್ರದಲ್ಲಿ ಬದಲಾವಣೆ ಮಾಡ್ತೀನಿ!

ಒಂದು ವೇಳೆ ಆಡಳಿತಾತ್ಮಕ ಅಧಿಕಾರ ಸಿಕ್ಕರೆ ಯಾವ ಕ್ಷೇತ್ರದಲ್ಲಿ ಬದಲಾವಣೆ ತರಲು ಬಯಸುತ್ತೀರಿ ಎಂಬ ಪ್ರಶ್ನೆಗೆ ಶಿವಣ್ಣ ಶಿಕ್ಷಣ ಕ್ಷೇತ್ರವನ್ನು ಆಯ್ಕೆ ಮಾಡಿದ್ದಾರೆ. ಶಾಲಾ ಶುಲ್ಕಗಳ ಹೆಚ್ಚಳ ಕುಟುಂಬಗಳ ಮೇಲೆ ದೊಡ್ಡ ಹೊರೆ ಬೀರುತ್ತಿದೆ. ಮಗುವಿನ ಭವಿಷ್ಯ ಪೋಷಕರ ಆರ್ಥಿಕ ಸಾಮರ್ಥ್ಯದ ಮೇಲೆ ಅಲ್ಲ, ಅದರ ಬುದ್ಧಿವಂತಿಕೆ ಮತ್ತು ಪ್ರತಿಭೆಯ ಮೇಲೆ ನಿರ್ಧಾರವಾಗಬೇಕು. ಗುಣಮಟ್ಟದ ಶಿಕ್ಷಣ ಮೂಲಭೂತ ಹಕ್ಕಾಗಿರಬೇಕು, ಶ್ರೀಮಂತರಿಗೆ ಮಾತ್ರ ಸಿಗುವ ಸೌಲಭ್ಯವಾಗಬಾರದು ಎಂದು ಶಿವಣ್ಣ ಹೇಳಿದ್ದಾರೆ.

‘ಬೇಲ್’ನಲ್ಲಿ ಶಿವಣ್ಣ ಅವರ ಹೊಸ ಶೇಡ್!

ಈ ವಾರ ಚಿತ್ರಮಂದಿರಗಳಿಗೆ ಬರಲಿರುವ ‘ಬೇಲ್’ ಸಿನಿಮಾ ಮೂಲಕ ತಮ್ಮ ಅಭಿನಯದ ಮತ್ತೊಂದು ಮುಖವನ್ನು ಪ್ರೇಕ್ಷಕರು ನೋಡಲಿದ್ದಾರೆ ಎಂದು ಶಿವರಾಜ್‌ಕುಮಾರ್ ಹೇಳಿದ್ದಾರೆ. ಇನ್ನು ಶಾಂತ, ಭಾವನಾತ್ಮಕವಾಗಿ ಸಮತೋಲನ ಹೊಂದಿರುವ ಹಾಗೂ ವಾಸ್ತವಕ್ಕೆ ಹತ್ತಿರವಾದ ಪಾತ್ರದಲ್ಲಿ ತಮ್ಮನ್ನು ಪ್ರೇಕ್ಷಕರು ನೋಡಲಿದ್ದಾರೆ. ಎಂದಿನ ಜೋರಾದ ಹೀರೋಯಿಸಂ ಬದಲಿಗೆ ಕಥೆ ಮತ್ತು ಪಾತ್ರದ ಭಾವನೆಗಳಿಗೆ ಹೆಚ್ಚಿನ ಒತ್ತು ನೀಡಿರುವ ಸಿನಿಮಾ ಇದಾಗಿದೆ ಎಂಬುದು ಶಿವಣ್ಣ ಅವರ ಮಾತು.

ರಂಗಭೂಮಿ ಕಲಾವಿದರ ಬದುಕಿನಿಂದ ಹುಟ್ಟಿದ 'ಟಾಸ್': ಅರ್ಜುನ್ ಕಾಪಿಕಾಡ್ ಜೊತೆ ವಿಶೇಷ ಸಂದರ್ಶನ

Govindaraj S — Fri, 18 Sep 2026 08:45:23 +0530

* ‘ಟಾಸ್’ ಕಥೆಯ ಎಳೆ ಹೊಳೆದದ್ದು ಹೇಗೆ ಮತ್ತು ಇದು ನಿಮಗೆ ಯಾಕೆ ಆಪ್ತವೆನಿಸಿತು?

ಈ ಕಥೆಯ ಮೂಲ ನಮ್ಮ ಮನೆಯಲ್ಲೇ ಇದೆ. ನಮ್ಮ ತಂದೆಯವರು ರಂಗಭೂಮಿ ಕಲಾವಿದರಾಗಿ ಸುದೀರ್ಘ ವರ್ಷಗಳಿಂದ ಬದುಕನ್ನು ಕಟ್ಟಿಕೊಂಡು ಬಂದವರು. ಅವರ ಬದುಕಿನ ಅನುಭವಗಳನ್ನು ಮತ್ತು ನಾನು ನೋಡಿದ, ಒಡನಾಡಿದ ಜೀವನವನ್ನು ಆಧಾರವಾಗಿಟ್ಟುಕೊಂಡು, ಅದಕ್ಕೆ ಸಿನಿಮಾ ವ್ಯಾಕರಣಕ್ಕೆ ತಕ್ಕಂತೆ ಕಾಮಿಡಿ, ಎಮೋಷನ್ಸ್ ಮತ್ತು ಬದುಕಿನ ಮೌಲ್ಯಗಳನ್ನು ಹದವಾಗಿ ಬೆರೆಸಿ ಈ ಕಥೆ ಸಿದ್ಧಪಡಿಸಿದ್ದೇವೆ. ಮುಖ್ಯವಾಗಿ ಅಪ್ಪ-ಮಗನ ನಡುವಿನ ಸಂಬಂಧ ಹಾಗೂ ಕಲಾವಿದರ ಬದುಕಿನ ಹಿನ್ನೆಲೆಯನ್ನು ಪರಿಚಯಿಸಲಾಗಿದೆ. ರಂಗಭೂಮಿಯ ಹಿನ್ನೆಲೆ ನನಗೂ ರಕ್ತಗತವಾಗಿ ಬಂದಿರುವುದರಿಂದ ಈ ಕಥೆಯನ್ನು ಹೇಳುವುದು ತುಂಬಾ ಸುಲಭ ಮತ್ತು ಆಪ್ತವಾಯಿತು.

* ಕನ್ನಡಕ್ಕೆ ದೊಡ್ಡದಾಗಿ ಹೆಜ್ಜೆ ಇಡುತ್ತಿದ್ದೀರಿ. ದೊಡ್ಡ ಮಟ್ಟದ ಮಾರುಕಟ್ಟೆಗೆ ಬರುವಾಗ ಭಯ ಅಥವಾ ಆತಂಕ ಇತ್ತಾ?

ಒಳ್ಳೆಯ ಕಥೆಯನ್ನು ಪ್ರಾಮಾಣಿಕವಾಗಿ ಕಟ್ಟಿ ಜನರಿಗೆ ತಲುಪಿಸಿದರೆ, ಕೊನೆಗೆ ಪ್ರೇಕ್ಷಕರು ಅದ್ಭುತ ಸಿನಿಮಾವನ್ನೇ ನೋಡಲು ಬಯಸುತ್ತಾರೆ ಎಂಬ ಧೈರ್ಯ ನನಗಿತ್ತು. ಆದರೆ ಕನ್ನಡದಂತಹ ದೊಡ್ಡ ಮಾರುಕಟ್ಟೆಗೆ ರೀಚ್ ಆಗಲು ಒಂದು ಬಲಿಷ್ಠ ಬ್ಯಾನರ್ ಅಗತ್ಯವಿತ್ತು. ಆ ಸಮಯದಲ್ಲಿ ದೇವರ ದಯೆಯಿಂದ ಗೋಲ್ಡನ್ ಸ್ಟಾರ್ ಗಣೇಶ್ ಸರ್ ನಮ್ಮ ಬೆಂಬಲಕ್ಕೆ ನಿಂತು, ತಮ್ಮ ಬ್ಯಾನರ್ ಮೂಲಕ ನಮ್ಮ ಬೆನ್ನಿಗೆ ನಿಂತರು. ಗಣೇಶ್ ಸರ್ ಅವರಂತಹ ದೊಡ್ಡ ಸೆಲೆಬ್ರಿಟಿಯ ಬೆಂಬಲ ಸಿಕ್ಕಿದ್ದು ನಮಗೆ ಆನೆಬಲ ತಂದುಕೊಟ್ಟಿತು. ಮಂಗಳೂರು ಪ್ರೀಮಿಯರ್ ಮತ್ತು ಶಿವಮೊಗ್ಗದ ಶೋಗಳಲ್ಲಿ ಜನ ನೀಡಿದ ಭರ್ಜರಿ ರೆಸ್ಪಾನ್ಸ್, ಶಿಳ್ಳೆ-ಚಪ್ಪಾಳೆಗಳು ನಮ್ಮ ಧೈರ್ಯವನ್ನು ಇನ್ನಷ್ಟು ಹೆಚ್ಚಿಸಿವೆ.

* ದೊಡ್ಡ ಸ್ಕೇಲ್, ನಿರ್ದೇಶನ ಮತ್ತು ನಟನೆ ಎಲ್ಲವನ್ನೂ ಒಟ್ಟಿಗೆ ನಿಭಾಯಿಸುವುದು ಸುಲಭವಾಗಿತ್ತೇ?

ಖಂಡಿತವಾಗಿಯೂ ಇದು ಸುಲಭದ ಕೆಲಸವಲ್ಲ. ಆದರೆ ಚಿತ್ರತಂಡದ ಶ್ರಮ ಮತ್ತು ವ್ಯವಸ್ಥಿತ ಪ್ಲಾನಿಂಗ್ ಇದನ್ನು ಸುಲಭವಾಗಿಸಿತು. ಶೂಟಿಂಗ್ ಆರಂಭಕ್ಕೂ ಮುನ್ನವೇ ನಾವು ಇಡೀ ಸಿನಿಮಾವನ್ನು ‘ಮಾಕ್ ಶೂಟ್’ ಮಾಡಿಕೊಂಡಿದ್ದೆವು. ಪ್ರತಿ ಶಾಟ್ ಹೇಗಿರಬೇಕು, ಆರ್ಟಿಸ್ಟ್‌ಗಳ ಪರ್ಫಾರ್ಮೆನ್ಸ್ ಹೇಗಿರಬೇಕು, ಎಡಿಟ್ ಪ್ಯಾಟರ್ನ್ ಹೇಗಿರಬೇಕು ಎಂಬುದು ಮೊದಲೇ ನಿಖರವಾಗಿ ಗೊತ್ತಿತ್ತು. ಹಾಗಾಗಿ ಸೆಟ್‌ಗೆ ಹೋದಾಗ ಕೇವಲ ನಟನೆಯ ಕಡೆಗೆ ಹೆಚ್ಚು ಗಮನಹರಿಸಲು ಸಾಧ್ಯವಾಯಿತು. ಪೂರ್ವಸಿದ್ಧತೆ ಚೆನ್ನಾಗಿದ್ದ ಕಾರಣ ಯಾವುದೇ ಗೊಂದಲವಿಲ್ಲದೆ ಶೆಡ್ಯೂಲ್ ಪ್ರಕಾರ ಶೂಟಿಂಗ್ ಮುಗಿಯಿತು.

* ನಿಮ್ಮ ತಂದೆ ದೇವದಾಸ್ ಕಾಪಿಕಾಡ್ ಅವರೊಂದಿಗೆ ಸ್ಕ್ರಿಪ್ಟ್ ಚರ್ಚೆ ಹೇಗಿತ್ತು?

ಅವರೊಂದಿಗೆ ಬ್ರೈನ್‌ಸ್ಟಾರ್ಮಿಂಗ್ ಮತ್ತು ಡಿಸ್ಕಷನ್ ಮಾಡುವುದು ಯಾವಾಗಲೂ ಉತ್ತಮ ಅನುಭವ. ಒಂದು ಸೀನ್ ಅನ್ನು ಹೇಗೆ ಎಲಿವೇಟ್ ಮಾಡಬೇಕು, ಸ್ಕ್ರೀನ್‌ಪ್ಲೇಯಲ್ಲಿ ಭಾವನೆಗಳನ್ನು ಹೇಗೆ ಕಟ್ಟಿಕೊಡಬೇಕು ಎಂಬುದನ್ನು ಸದಾ ಚರ್ಚಿಸುತ್ತಿದ್ದೆವು. ಅಪ್ಪ-ಮಗನ ಸಂಬಂಧದ ಜತೆಗೆ ಕ್ರಿಯೇಟಿವ್ ಆಗಿ ಇಬ್ಬರ ನಡುವೆ ಅದ್ಭುತ ಹೊಂದಾಣಿಕೆ ಇತ್ತು.

* ನಿಮ್ಮ ಚಿತ್ರರಂಗದ ಪಯಣವನ್ನು ಹಿಂತಿರುಗಿ ನೋಡಿದಾಗ ಏನನ್ನಿಸುತ್ತದೆ?

ಚಿತ್ರರಂಗ ಅಂದಮೇಲೆ ಏಳುಬೀಳುಗಳು ಸಹಜ. ಕ್ರಿಯೇಟಿವ್ ಫೀಲ್ಡ್‌ನಲ್ಲಿ ಕೆಲವೊಮ್ಮೆ ನಾವು ಅಂದುಕೊಂಡ ಐಡಿಯಾಗಳು ವರ್ಕ್ ಆಗುತ್ತವೆ, ಕೆಲವೊಮ್ಮೆ ಆಗಲ್ಲ. ಆದರೆ ಪ್ರತಿಯೊಂದು ಹೆಜ್ಜೆಯಲ್ಲೂ ಕಲಿಕೆ ನಿರಂತರವಾಗಿರುತ್ತದೆ. ನಾವು ಪ್ರಾಮಾಣಿಕವಾಗಿ ಶ್ರಮಪಟ್ಟು ಸಿನಿಮಾ ಮಾಡಿದ್ದೇವೆ. ಮಾನವೀಯ ಭಾವನೆಗಳು ಎಲ್ಲರಿಗೂ ಒಂದೇ. ಹಾಗಾಗಿ ಇಡೀ ಕರ್ನಾಟಕದ ಪ್ರೇಕ್ಷಕರಿಗೆ ಈ ಸಿನಿಮಾ ಕನೆಕ್ಟ್ ಆಗುತ್ತದೆ ಎಂಬ ಭರವಸೆಯಿದೆ.

* ಈ ಸಿನಿಮಾ ಯಾಕೆ ನೋಡಬೇಕು?

ಅಪ್ಪ, ಮಗನ ಬಾಂಧವ್ಯ ಈ ಚಿತ್ರದ ಹೈಲೈಟ್. ಈ ಸಿನಿಮಾ ನೋಡಲು ಬಂದವರು ಹೊಟ್ಟೆ ತುಂಬಾ ನಗಬಹುದು, ಕೆಲವೊಮ್ಮೆ ಅಳಬಹುದು, ಕೌಟುಂಬಿಕ ಭಾವನಾತ್ಮಕ ದೃಶ್ಯಗಳನ್ನು ನೋಡಬಹುದು, ಜೊತೆಗೆ ಆ್ಯಕ್ಷನ್ ಕೂಡ ಎಂಜಾಯ್ ಮಾಡಬಹುದು. ಕನ್ನಡಕ್ಕೆ ಬರಲು ಒಂದು ಅವಕಾಶಕ್ಕಾಗಿ ಕಾಯುತ್ತಿದ್ದೆ. ಇದೇ ಸರಿಯಾದ ಅವಕಾಶ ಅನ್ನಿಸಿತು. ಪ್ರೇಕ್ಷಕರು ಬಂದು ಒಮ್ಮೆ ಈ ಸಿನಿಮಾ ನೋಡಿ ಆಶೀರ್ವದಿಸುತ್ತಾರೆ ಎಂಬ ನಂಬಿಕೆ ಇದೆ.

ಮೆಜೆಸ್ಟಿಕ್‌ನಲ್ಲಿ ನೈಜ ಬದುಕು ಕಂಡ ಮೋನಿಷಾ: 'ಸಿಟಿ ಲೈಟ್ಸ್' ಕುರಿತು ವಿನಯ್ ಹಂಚಿಕೊಂಡ ಅನುಭವವೇನು?

Govindaraj S — Thu, 17 Sep 2026 18:12:54 +0530

ಬೆಂಗಳೂರು ನಗರದ ಮತ್ತೊಂದು ಮುಖವನ್ನು ತೆರೆದಿಡುವ ‘ಸಿಟಿ ಲೈಟ್ಸ್’ ಸಿನಿಮಾ ಕುರಿತು ವಿನಯ್ ರಾಜ್‌ಕುಮಾರ್ ಮತ್ತು ಚೊಚ್ಚಲ ನಟಿ ಮೋನಿಷಾ ವಿಜಯ್ ಕುಮಾರ್ ಜೊತೆ ಮಾತುಕತೆ. ಪಾತ್ರಕ್ಕಾಗಿ ತಮ್ಮೊಳಗಿನ ಪೂರ್ವಗ್ರಹಗಳನ್ನು ಬದಿಗಿಟ್ಟು, ಮೆಜೆಸ್ಟಿಕ್ ಹಾಗೂ ನಗರದ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಕಾಣುವ ನೈಜ ಬದುಕಿನಿಂದ ಭಾವನೆಗಳನ್ನು ಗ್ರಹಿಸಿಕೊಂಡ ಅನುಭವವನ್ನು ಇಬ್ಬರೂ ಹಂಚಿಕೊಂಡಿದ್ದಾರೆ.

ನಿರ್ದೇಶಕ ವಿಜಯ್ ಕುಮಾರ್ ಅವರ ‘ಸಿಟಿ ಲೈಟ್ಸ್’ ಸಿನಿಮಾ ವಿನಯ್ ರಾಜ್‌ಕುಮಾರ್ ಮತ್ತು ಚೊಚ್ಚಲ ನಟಿ ಮೋನಿಷಾ ವಿಜಯ್ ಕುಮಾರ್ ಅವರಿಗೆ ಸುಲಭದ ಪ್ರಯಾಣವಾಗಿರಲಿಲ್ಲ. ಬೆಂಗಳೂರಿನ ಹೊಳೆಯುವ ಮುಖಕ್ಕಿಂತ ನಗರದ ಮತ್ತೊಂದು, ಹೆಚ್ಚು ಕಠಿಣವಾದ ವಾಸ್ತವವನ್ನು ಸಿನಿಮಾ ತೆರೆದಿಡುತ್ತದೆ. ಅಲಂಕೃತ ಸೆಟ್‌ಗಳ ಬದಲು, ಸಾಮಾನ್ಯವಾಗಿ ಯಾರ ಕಣ್ಣಿಗೂ ಬೀಳದ ನಗರದ ಮೂಲೆ-ಮೂಲೆಗಳ ನೈಜ ಬದುಕನ್ನು ಚಿತ್ರ ಹಿಡಿದಿಡುತ್ತದೆ.

ಈ ಸಿನಿಮಾ ಇಬ್ಬರೂ ನಟರಿಗೆ ತಮ್ಮ ಸಹಜ ಅಭಿನಯ, ಸುತ್ತಲಿನ ಬದುಕನ್ನು ಗಮನಿಸುವ ಗುಣ ಮತ್ತು ಕೃತಕತೆಯನ್ನು ಬದಿಗಿಟ್ಟು ಪಾತ್ರದಲ್ಲಿ ಬೆರೆಯುವ ಸಾಮರ್ಥ್ಯದ ಪರೀಕ್ಷೆಯಾಯಿತು. ವಿನಯ್ ರಾಜ್‌ಕುಮಾರ್ ಅವರಂತೂ ಈ ಸಿನಿಮಾದ ಮೂಲಕ ಬೆಂಗಳೂರನ್ನು ಸಂಪೂರ್ಣ ಹೊಸ ದೃಷ್ಟಿಕೋನದಲ್ಲಿ ನೋಡುವುದನ್ನು ಕಲಿತಿದ್ದಾರಂತೆ.

ವಿಜಯ್ ಸರ್ ಜೀವನದಲ್ಲಿ ಸಾಕಷ್ಟು ವಿಷಯಗಳನ್ನು ನೋಡಿದ್ದಾರೆ. ಅವರು ತಮ್ಮ ಜೀವನದಲ್ಲಿ ನಡೆದ ಹಲವು ನೈಜ ಘಟನೆಗಳನ್ನು ನಮ್ಮೊಂದಿಗೆ ಹಂಚಿಕೊಂಡರು. ತೀವ್ರ ಪರಿಸ್ಥಿತಿಗಳಲ್ಲಿ ಜನರು ನಿಜವಾಗಿ ಹೇಗೆ ಪ್ರತಿಕ್ರಿಯಿಸುತ್ತಾರೆ ಎಂಬುದನ್ನು ವಿವರಿಸಿದರು. ನಿಜ ಹೇಳಬೇಕೆಂದರೆ, ಅವರ ಸ್ಕ್ರಿಪ್ಟ್‌ನಲ್ಲೇ ಎಲ್ಲವನ್ನೂ ಅಷ್ಟು ಚೆನ್ನಾಗಿ ಬರೆದಿದ್ದರು. ನೀವು ಒಂದು ದೃಶ್ಯವನ್ನು ಓದಿದ ತಕ್ಷಣ ಅದಕ್ಕೆ ಬೇಕಾದ ಉತ್ತರಗಳು ಸಿಗುತ್ತವೆ ಎಂದು ವಿನಯ್ ಹೇಳಿದ್ದಾರೆ.

‘ಭಾವನೆಗಳು ಎಲ್ಲರಿಗೂ ಒಂದೇ’

ಸಾಮಾನ್ಯ ವ್ಯಕ್ತಿಯ ಪಾತ್ರಕ್ಕೆ ಹೊಂದಿಕೊಳ್ಳುವುದು ಕೇವಲ ದೈಹಿಕ ರೂಪ ಬದಲಿಸಿಕೊಳ್ಳುವುದಲ್ಲ. ಬದಲಿಗೆ ಎಲ್ಲರಲ್ಲೂ ಇರುವ ಮೂಲಭೂತ ಭಾವನೆಗಳನ್ನು ಅರ್ಥಮಾಡಿಕೊಳ್ಳುವುದು ಮುಖ್ಯ ಎಂದು ವಿನಯ್ ಹೇಳುತ್ತಾರೆ.

ಹೊರನೋಟದಲ್ಲಿ ನಾನು ಹೇಗೇ ಕಾಣಿಸಿಕೊಳ್ಳಬಹುದು. ಆದರೆ ಒಳಗಿರುವ ಮಾನವೀಯ ಭಾವನೆಗಳು ಎಲ್ಲರಿಗೂ ಒಂದೇ. ಒಬ್ಬ ವ್ಯಕ್ತಿ ಪ್ರೀತಿಯನ್ನು ವ್ಯಕ್ತಪಡಿಸುವ ರೀತಿ ಅಥವಾ ದುಃಖವನ್ನು ಅನುಭವಿಸುವ ರೀತಿ ಬದಲಾಗಬಹುದು. ನನ್ನ ನೋವು ಇನ್ನೊಬ್ಬರ ನೋವಿಗಿಂತ ವಿಭಿನ್ನವಾಗಿ ಕಾಣಿಸಬಹುದು. ಆದರೆ ನೋವು ಅನ್ನೋದು ನೋವೇ. ಆ ಮೂಲ ಸತ್ಯವನ್ನು ನೀವು ಅರ್ಥಮಾಡಿಕೊಂಡಾಗ ಪ್ರೇಕ್ಷಕರು ಸಹಜವಾಗಿಯೇ ಪಾತ್ರದೊಂದಿಗೆ ಕನೆಕ್ಟ್ ಆಗುತ್ತಾರೆ ಎಂದು ವಿನಯ್ ವಿವರಿಸಿದ್ದಾರೆ.

ತಂದೆಯ ಸಿನಿಮಾದಲ್ಲೇ ಮೋನಿಷಾ ಎಂಟ್ರಿ

ನಿರ್ದೇಶಕ ವಿಜಯ್ ಕುಮಾರ್ ಅವರ ಪುತ್ರಿ ಮೋನಿಷಾ ವಿಜಯ್ ಕುಮಾರ್ ಇದೇ ಸಿನಿಮಾದ ಮೂಲಕ ನಾಯಕಿಯಾಗಿ ಸ್ಯಾಂಡಲ್‌ವುಡ್‌ಗೆ ಪಾದಾರ್ಪಣೆ ಮಾಡುತ್ತಿದ್ದಾರೆ. ಆದರೆ ತಂದೆಯ ಸಿನಿಮಾದಲ್ಲಿ ಅವಕಾಶ ಸಿಕ್ಕಿದ್ದಕ್ಕೆ ಯಾವುದೇ ಸುಲಭ ದಾರಿ ಇರಲಿಲ್ಲ ಎನ್ನುತ್ತಾರೆ ಮೋನಿಷಾ.

ನಾನು ಅವರ ಮಗಳು ಎಂಬ ಕಾರಣಕ್ಕೆ ಅವರು ನನ್ನನ್ನು ಆಯ್ಕೆ ಮಾಡಿಲ್ಲ ಎಂದು ಹೇಳಿದರೆ ಅದು ಸುಳ್ಳಾಗುತ್ತದೆ. ಆದರೆ ಈ ಪಾತ್ರವನ್ನು ನಾನು ನಿಭಾಯಿಸಬಲ್ಲೆ ಎಂಬ ನಂಬಿಕೆಯೂ ಅವರಿಗಿತ್ತು. ಅದಕ್ಕಿಂತ ಮುಖ್ಯವಾಗಿ, ಅವರು ಮೊದಲ ದಿನವೇ ನನಗೆ ಒಂದು ವಿಷಯ ಸ್ಪಷ್ಟವಾಗಿ ಹೇಳಿದ್ದರು. ‘ನೀನು ಸಂಪೂರ್ಣವಾಗಿ ನಿನ್ನನ್ನು ಈ ಪಾತ್ರಕ್ಕೆ ಅರ್ಪಿಸಿಕೊಳ್ಳಬೇಕು. ತುಂಬಾ ಕಷ್ಟಪಟ್ಟು ಕೆಲಸ ಮಾಡಬೇಕು. ಆಗ ಮಾತ್ರ ಈ ಪಾತ್ರವನ್ನು ಮಾಡಲು ಸಾಧ್ಯ’ ಎಂದು ಹೇಳಿದರು. ಅವರ ಪ್ರೀತಿ ಮತ್ತು ನಂಬಿಕೆಯೊಂದಿಗೆ ನನಗೆ ಈ ಪಾತ್ರ ನೀಡಿದರು ಎಂದು ಮೋನಿಷಾ ಹೇಳಿದ್ದಾರೆ.

ಮೆಜೆಸ್ಟಿಕ್‌ನಲ್ಲಿ ನೈಜ ಬದುಕನ್ನು ಕಂಡ ಮೋನಿಷಾ

ನಗರದ ಅಂಚಿನಲ್ಲಿ ಬದುಕುವ, ಆರ್ಥಿಕವಾಗಿ ಹಿಂದುಳಿದ ಯುವತಿಯ ಪಾತ್ರವನ್ನು ನಿರ್ವಹಿಸುವುದು ಮೋನಿಷಾಗೆ ತಮ್ಮ ಕಂಫರ್ಟ್ ಝೋನ್‌ನಿಂದ ಸಾಕಷ್ಟು ಹೊರಬರುವಂತೆ ಮಾಡಿತಂತೆ. ನಾವು ಚಿಕ್ಕವರಿದ್ದಾಗಲೇ ಅಪ್ಪ ನಮಗೆ ಫ್ಯಾನ್ಸಿ ಶಾಲೆಗಳಲ್ಲಿ ಓದಿಸದೆ, ಸಾಮಾನ್ಯ ನೆರೆಹೊರೆಯ ಶಾಲೆಗಳಿಗೆ ಕಳುಹಿಸುತ್ತಿದ್ದರು. ಸಮಾಜದ ವಿವಿಧ ವರ್ಗಗಳ ಜನರ ನಡುವೆ ನಾವು ಬೆಳೆದುಬರಬೇಕು ಎಂಬುದು ಅವರ ಉದ್ದೇಶವಾಗಿತ್ತು ಎಂದು ಮೋನಿಷಾ ಹೇಳಿದ್ದಾರೆ. ಪಾತ್ರವನ್ನು ಅರ್ಥಮಾಡಿಕೊಳ್ಳಲು ಅವರು ನೈಜ ಬದುಕನ್ನು ಹತ್ತಿರದಿಂದ ಗಮನಿಸಿದ್ದಾರೆ.

ನಾನು ಮೆಜೆಸ್ಟಿಕ್‌ಗೆ ಹೋದಾಗ ಕೆಲವು ಹುಡುಗಿಯರು ಯಾವುದೇ ಗುರಿಯಿಲ್ಲದೆ, ಅಸಹಾಯಕ ಸ್ಥಿತಿಯಲ್ಲಿ ಅಲೆದಾಡುವುದನ್ನು ನೋಡಿದೆ. ಆಗ ಅಪ್ಪ, ‘ನಿನ್ನ ಪಾತ್ರ ಬದುಕುವ ಜಗತ್ತು ಇದೇ. ನೀನು ಅವರನ್ನು ಅನುಕರಿಸುವ ಅಗತ್ಯವಿಲ್ಲ. ಅವರನ್ನು ಗಮನಿಸು, ಅವರ ವಾಸ್ತವವನ್ನು ಅರ್ಥಮಾಡಿಕೋ’ ಎಂದು ಹೇಳಿದರು. ಅದು ಪಾತ್ರವನ್ನು ಅರ್ಥಮಾಡಿಕೊಳ್ಳಲು ನನಗೆ ಬೇಕಾದ ಮೂಲಭೂತ ನೆಲೆಯನ್ನು ನೀಡಿತು ಎಂದು ಅವರು ನೆನಪಿಸಿಕೊಂಡಿದ್ದಾರೆ.

ಸೆಟ್‌ನಲ್ಲಿ ವಾದವಲ್ಲ, ಆರೋಗ್ಯಕರ ಚರ್ಚೆ

ನಟ ಹಾಗೂ ನಿರ್ದೇಶಕರಾಗಿ ವಿಜಯ್ ಕುಮಾರ್ ಅವರೊಂದಿಗೆ ಕೆಲಸ ಮಾಡುವಾಗ ಸೆಟ್‌ನಲ್ಲಿ ಭಿನ್ನಾಭಿಪ್ರಾಯಗಳಿಗಿಂತ ಚರ್ಚೆಗಳೇ ಹೆಚ್ಚಾಗಿದ್ದವು ಎಂದು ವಿನಯ್ ಹೇಳಿದ್ದಾರೆ. ಸೆಟ್‌ನಲ್ಲಿ ನಮ್ಮ ನಡುವೆ ದೊಡ್ಡ ವಾದಗಳೇನೂ ನಡೆಯುತ್ತಿರಲಿಲ್ಲ. ಯಾವಾಗಲೂ ಆರೋಗ್ಯಕರ ಚರ್ಚೆಗಳೇ ನಡೆಯುತ್ತಿದ್ದವು. ದೃಶ್ಯ ಚೆನ್ನಾಗಿ ಮೂಡಿಬರಬೇಕು ಎಂಬುದು ನಮ್ಮೆಲ್ಲರ ಉದ್ದೇಶವಾಗಿತ್ತು. ವಿಜಯ್ ಸರ್ ಈ ಕಥೆಯೊಂದಿಗೆ ಆರಂಭದಿಂದ ಕೊನೆಯವರೆಗೂ ಬದುಕಿದ್ದಾರೆ. ಆದರೆ ನಟನಾಗಿ ನಾನು ನನ್ನ ಪಾತ್ರದೊಂದಿಗೆ ಮಾತ್ರ ಪ್ರಯಾಣಿಸುತ್ತೇನೆ. ಹಾಗಾಗಿ ಅವರ ದೃಷ್ಟಿಕೋನವೇ ಇಲ್ಲಿ ಅತ್ಯಂತ ಮುಖ್ಯವಾಗಿತ್ತು ಎಂದು ವಿನಯ್ ಹೇಳಿದ್ದಾರೆ.

ಸೆಟ್‌ನಲ್ಲಿ ಸಿಕ್ಕ ಸ್ವಾತಂತ್ರ್ಯವೇ ತಮ್ಮ ಅಭಿನಯಕ್ಕೆ ಮತ್ತಷ್ಟು ಸಹಾಯ ಮಾಡಿತು ಎಂದು ಮೋನಿಷಾ ಕೂಡ ಹೇಳಿದ್ದಾರೆ. ಅಪ್ಪ ಎಂದಿಗೂ ‘ಇದನ್ನೇ ಹೀಗೆ ಮಾಡಬೇಕು’ ಎಂದು ನನಗೆ ಹೇಳುತ್ತಿರಲಿಲ್ಲ. ‘ಇದು ಪರಿಸ್ಥಿತಿ, ನಿನಗೆ ಹೇಗೆ ಬೇಕೋ ಹಾಗೆ ಮಾಡು. ನಾನು ಕ್ಯಾಮೆರಾ ಕಟ್ ಮಾಡುವುದಿಲ್ಲ’ ಎಂದು ಹೇಳುತ್ತಿದ್ದರು. ಆ ಸ್ವಾತಂತ್ರ್ಯದಿಂದ ನಾವು ಸಾಕಷ್ಟು ಇಂಪ್ರೊವೈಸ್ ಮಾಡಲು ಸಾಧ್ಯವಾಯಿತು ಎಂದು ಮೋನಿಷಾ ಹೇಳಿದ್ದಾರೆ. ಅಲ್ಲದೆ, ಆರಂಭದ ಹಂತದಲ್ಲಿದ್ದಾಗ ತಮ್ಮೊಂದಿಗೆ ವಿನಯ್ ಇದ್ದದ್ದು ದೊಡ್ಡ ಬೆಂಬಲವಾಗಿತ್ತು ಎಂದು ಅವರು ತಿಳಿಸಿದ್ದಾರೆ.

ನಾವಿಬ್ಬರೂ ಕೆಲವು ರೀತಿಯಲ್ಲಿ ಒಂದೇ ರೀತಿಯ ಹಿನ್ನೆಲೆಯಿಂದ ಬಂದಿರುವುದರಿಂದ, ನನಗೆ ಯಾವುದಾದರೂ ಅನುಮಾನ ಅಥವಾ ಆತ್ಮವಿಶ್ವಾಸದ ಕೊರತೆ ಬಂದಾಗ ವಿನಯ್ ಬಳಿ ಹೋಗಿ ಕೇಳುತ್ತಿದ್ದೆ. ಅವರು ತಮ್ಮ ಆರಂಭದ ದಿನಗಳಲ್ಲಿ ಇಂತಹ ಸಂದರ್ಭಗಳನ್ನು ಹೇಗೆ ನಿಭಾಯಿಸಿದ್ದರು ಎಂಬುದನ್ನು ಹೇಳುತ್ತಿದ್ದರು ಎಂದು ಮೋನಿಷಾ ಹೇಳಿದ್ದಾರೆ.

‘ಸಿಟಿ ಲೈಟ್ಸ್’ ಬಳಿಕ ಬೆಂಗಳೂರು ಬದಲಾಗುತ್ತೆ!

ಸಿನಿಮಾ ಬಿಡುಗಡೆಗೆ ಸಜ್ಜಾಗುತ್ತಿರುವ ಸಂದರ್ಭದಲ್ಲಿ ‘ಸಿಟಿ ಲೈಟ್ಸ್’ ಬೆಂಗಳೂರಿನ ರಾತ್ರಿ ಬದುಕನ್ನು ನೋಡುವ ಪ್ರೇಕ್ಷಕರ ದೃಷ್ಟಿಕೋನವನ್ನೇ ಬದಲಿಸಲಿದೆ ಎಂಬ ವಿಶ್ವಾಸವನ್ನು ವಿನಯ್ ವ್ಯಕ್ತಪಡಿಸಿದ್ದಾರೆ. ಈ ಸಿನಿಮಾ ನೋಡಿದ ನಂತರ ನೀವು ಬೆಂಗಳೂರನ್ನು ಹೊಸ ದೃಷ್ಟಿಕೋನದಲ್ಲಿ ನೋಡುತ್ತೀರಿ. ವರ್ಷಗಳಿಂದ ನಿಮಗೆ ಪರಿಚಯವಿರುವ ಅದೇ ರಸ್ತೆಯಲ್ಲಿ ನೀವು ನಡೆದುಕೊಂಡು ಹೋಗಬಹುದು. ಆದರೆ ಈ ಸಿನಿಮಾ ನೋಡಿದ ಬಳಿಕ, ಈ ಹಿಂದೆ ಗಮನಿಸದೇ ಹೋಗಿದ್ದ ಹಲವು ವಿಷಯಗಳು ನಿಮ್ಮ ಕಣ್ಣಿಗೆ ಬೀಳಲು ಶುರುವಾಗುತ್ತವೆ ಎಂದು ವಿನಯ್ ರಾಜ್‌ಕುಮಾರ್ ಹೇಳಿದ್ದಾರೆ.

ಇನ್ನು ‘ದುನಿಯಾ ಟಾಕೀಸ್’ ಮತ್ತು ‘ಯಂತ್ರೋದ್ಧಾರಕ’ ಬ್ಯಾನರ್‌ಗಳ ಅಡಿಯಲ್ಲಿ ವಿಜಯ್ ಕುಮಾರ್ ಹಾಗೂ ವಿಕ್ರಮ್ ಆರ್ಯ ನಿರ್ಮಿಸಿರುವ ‘ಸಿಟಿ ಲೈಟ್ಸ್’ ಸಿನಿಮಾವನ್ನು ಕೆವಿಎನ್ ಪ್ರೊಡಕ್ಷನ್ಸ್ ವಿತರಿಸುತ್ತಿದೆ. ವಿಜಯ್ ಕುಮಾರ್ ಅವರೇ ಚಿತ್ರಕಥೆ ಬರೆದು ನಿರ್ದೇಶಿಸಿದ್ದಾರೆ. ಚರಣ್ ರಾಜ್ ಸಂಗೀತ, ಶಿವಸೇನಾ ಛಾಯಾಗ್ರಹಣ, ದೀಪು ಎಸ್. ಕುಮಾರ್ ಸಂಕಲನ ಮತ್ತು ಮಾಸ್ತಿ ಸಂಭಾಷಣೆ ಚಿತ್ರಕ್ಕಿದೆ.

ಅಪಸ್ವರವೇ ಮಹತ್ವ ಪಡೆದುಕೊಂಡಿರುವ ಕಾಲವಿದು: ಹಿರಿಯ ನಟ ಅನಂತ್ ನಾಗ್‌ ವಿಶೇಷ ಸಂದರ್ಶನ

Govindaraj S — Fri, 25 Sep 2026 15:30:39 +0530

ರಾಜೇಶ್ ಶೆಟ್ಟಿ

* ಫಾಲ್ಕೆ ಪ್ರಶಸ್ತಿ ಸ್ವೀಕರಿಸಿದ ಕ್ಷಣ ಹೇಗಿತ್ತು?

ಈ ಪ್ರಶಸ್ತಿ ನಾನು ನಿರೀಕ್ಷೆ ಮಾಡಿರಲಿಲ್ಲ. ನಾನು ಚಿತ್ರರಂಗದಲ್ಲಿ ಇದ್ದ ಐವತ್ತು ವರ್ಷ ಒಂದೇ ಒಂದು ರಾಷ್ಟ್ರಪ್ರಶಸ್ತಿ ಬಂದಿರಲಿಲ್ಲ. ಕಳೆದ ವರ್ಷ ಪದ್ಮಭೂಷಣ ಬಂದಿತ್ತು. ಮರುವರ್ಷವೇ ಮತ್ತೊಂದು ಇಷ್ಟು ದೊಡ್ಡ ಗೌರವ ಬರುತ್ತದೆ ಮತ್ತು ನಮ್ಮ ಜನ ಇಷ್ಟೊಂದು ದೊಡ್ಡದಾಗಿ ಸಂಭ್ರಮಿಸುತ್ತಾರೆ ಎಂಬ ಕಲ್ಪನೆಯೇ ಇರಲಿಲ್ಲ. ಹಾಗಾಗಿ ವೇದಿಕೆ ಹತ್ತುವಾಗ ಸಣ್ಣದೊಂದು ಕಂಪನವಿತ್ತು. ನಾನು ನನ್ನ ಮಾತಲ್ಲಿ ಹೇಳಿದಂತೆ ಈ ಪ್ರಶಸ್ತಿ ನನ್ನ ಸಿನಿಮಾಗಳಿಗೆ ಹಿನ್ನೆಲೆಯಲ್ಲಿ ದುಡಿದವರಿಗೆ ಸಂದ ಪ್ರಶಸ್ತಿ. ಪರದೆಯ ಮೇಲೆ ನಾಯಕ ಅಥವಾ ನಾಯಕಿಯಷ್ಟೇ ಕಾಣಿಸುತ್ತಾರೆ. ತೆರೆ ಹಿಂದಿನ ಮುಖಗಳು ಕಾಣಿಸುವುದಿಲ್ಲ. ನಾವೆಲ್ಲರೂ ಕೇವಲ ನಿಮಿತ್ತ ಮಾತ್ರ.

* ಪ್ರಶಸ್ತಿ ಸ್ವೀಕರಿಸುವ ಆ ಮಹತ್ವದ ಕ್ಷಣದಲ್ಲಿ ಯಾವುದಾದರೂ ಚಿತ್ರ ಕಣ್ಣ ಮುಂದೆ ಬಂದುಹೋಯಿತೇ?

ಮಠ, ಆಶ್ರಮಗಳಲ್ಲಿ ಬೆಳೆದ ಆ ಬಾಲ್ಯದ ಸಂಸ್ಕಾರಗಳು ಮುನ್ನೆಲೆಗೆ ಬಂದವು. ಅದಕ್ಕಾಗಿಯೇ ನನ್ನ ಭಾಷಣವನ್ನು ಶಂಕರಾಚಾರ್ಯರ ಭಜಗೋವಿಂದಂನ ಶ್ಲೋಕದಿಂದಲೇ ಆರಂಭಿಸಿದೆ. ಕಳೆದ 55 ವರ್ಷಗಳಿಂದ (5 ವರ್ಷ ರಂಗಭೂಮಿ, 50 ವರ್ಷ ಸಿನೆಮಾ) ನಾನೂ ಸಹ ಹೊಟ್ಟೆಪಾಡಿಗಾಗಿ ನಾನಾ ವೇಷ ಹಾಕಿಕೊಂಡು ತಿರುಗಿದವನೇ. ನನ್ನ 78 ವರ್ಷಗಳ ಬದುಕಿನಲ್ಲಿ 55 ವರ್ಷಗಳು ಬಣ್ಣ ಹಚ್ಚುವುದರಲ್ಲೇ ಕಳೆದುಹೋದವು. ಈಗಲೂ ನನಗೆ ಆ ಕಾಲದ ನನ್ನ ಕಥಾ ಜಗತ್ತೇ ಕಣ್ಣ ಮುಂದೆ ಬರುತ್ತದೆ.

* ಈ ಸಂದರ್ಭದಲ್ಲಿ ಮೋದಿಯವರ ಬಗೆಗಿನ ನಿಮ್ಮ ಹೇಳಿಕೆಗಳು ಮುನ್ನೆಲೆಗೆ ಬಂದವು?

ಅಪಸ್ವರಗಳೇ ಮಹತ್ವ ಪಡೆಯುತ್ತಿರುವ ಕಾಲವಿದು. ಜನರ ಮನಸ್ಸಿನಲ್ಲಿ ಕಲ್ಮಶಗಳಿಲ್ಲ. ಆದರೆ ಈ ಸೋಷಿಯಲ್ ಮೀಡಿಯಾ ಬಂದಾಗಿನಿಂದ ಕಲ್ಮಷವನ್ನು ಬಿತ್ತಲಾಗುತ್ತಿದೆ. ಕೆಲವರು ಯಾರ ಮೇಲೋ ಇರುವ ದ್ವೇಷವನ್ನು, ಕೋಪವನ್ನು ತೀರಿಸಿಕೊಳ್ಳಲು ಇಂತಹ ಸುಸಮಯವನ್ನು ಹಾಳುಮಾಡುತ್ತಾರೆ. ನಾನು ಯಾವುದೋ ಒಂದು ಸಂದರ್ಭದಲ್ಲಿ ನಮ್ಮ ದೇಶದ ಪ್ರಧಾನಮಂತ್ರಿಯವರಿಗೆ ನಿಂದಿಸಿದ್ದು ಸರಿಯಲ್ಲ ಎಂದು ಹೇಳಿದ್ದಕ್ಕೆ ಇದೆಲ್ಲಾ ಮಾತು ಬಂತು. ಹಾಗಾಗಿ ಭಾಷಣದಲ್ಲಿಯೂ ಅವರ ಪ್ರಸ್ತಾಪ ಮಾಡಲಿಲ್ಲ. ಈಗ ಎಲ್ಲವೂ ರಾಜಕೀಯಮಯವಾಗಿದೆ. ಪಾಶ್ಚಾತ್ಯ ಸೋಷಿಯಲ್ ಮೀಡಿಯಾ ಸಂಸ್ಕೃತಿ ನಮ್ಮಲ್ಲಿ ಕಲುಷಿತ ವಾತಾವರಣ ಉಂಟು ಮಾಡಿದೆ. ಅದಕ್ಕೆ ನಾನು ಸೋಷಿಯಲ್ ಮೀಡಿಯಾದಲ್ಲಿ ಇಲ್ಲವೇ ಇಲ್ಲ. ಅಪಸ್ವರಗಳನ್ನು ಕಡೆಗಣಿಸುವುದೇ ಏಕೈಕ ದಾರಿ.

* ಆ ಕಾಲ ಚೆನ್ನಾಗಿದೆ ಯಾಕೆ?

70 ಮತ್ತು 80ರ ದಶಕದಲ್ಲಿ ಕನ್ನಡ ಚಿತ್ರರಂಗ ಅತ್ಯಂತ ವಿಶೇಷವಾಗಿತ್ತು. ಕಲಾತ್ಮಕ ಚಿತ್ರಗಳು, ಹೊಸ ಅಲೆಯ ಚಿತ್ರಗಳು, ಕೌಟುಂಬಿಕ ಸಿನೆಮಾಗಳು ಮತ್ತು ಕಮರ್ಷಿಯಲ್ ಚಿತ್ರಗಳು ಎಲ್ಲವೂ ಸಮತೋಲನದಲ್ಲಿದ್ದವು. ಮದ್ರಾಸ್‌ನಲ್ಲಿದ್ದ ಉದ್ಯಮ ಕರ್ನಾಟಕಕ್ಕೆ ಬಂದು ನೆಲೆ ನಿಂತಿತು. ಕನ್ನಡದ ಮಹಿಳಾ ಲೇಖಕಿಯರ ಕಾದಂಬರಿಗಳು ಸಿನೆಮಾಗಳಾಗಿ ಅದ್ಭುತ ಯಶಸ್ಸು ಕಂಡವು. ಉದಯಶಂಕರ್ ಅವರಂತಹ ಗೀತರಚನೆಕಾರರು ಅದ್ಭುತ ಸಾಹಿತ್ಯ ನೀಡಿದರು. ಬಾಲಮುರಳಿಕೃಷ್ಣ, ಭೀಮಸೇನ್ ಜೋಷಿ, ಎಸ್.ಪಿ. ಬಾಲಸುಬ್ರಹ್ಮಣ್ಯಂ ಅವರಂತಹ ದಿಗ್ಗಜರು ಹಾಡಿದರು. ಹಂಸಗೀತೆಯಲ್ಲೇ ನನಗಾಗಿ 25 ಹಾಡುಗಳಿದ್ದವು. ಸಿನೆಮಾ ಎಂದರೆ ಕೇವಲ ಮನರಂಜನೆ ಮಾತ್ರವಲ್ಲ, ಅದರಲ್ಲಿ ಜ್ಞಾನ, ಮಾರ್ಗದರ್ಶನ ಎಲ್ಲವೂ ಇರಬೇಕು. ‘ಬಾಂಬೆಯಲ್ಲಿದ್ದಿದ್ದರೆ ನೀವು ಹೆಚ್ಚು ಸಂಪಾದನೆ ಮಾಡಬಹುದಿತ್ತು’ ಎನ್ನುತ್ತಿದ್ದರು. ಆದರೆ ನನಗೆ ಸಂಪಾದನೆಯೊಂದೇ ಮುಖ್ಯವಾಗಿರಲಿಲ್ಲ. ಹೆಮ್ಮೆ ಪಡುವಂತಹ ವಾತಾವರಣ ಬೇಕಿತ್ತು. ಅದು ನನಗೆ ಕನ್ನಡದಲ್ಲಿ ಸಿಕ್ಕಿತು. ಇವತ್ತು ಆ ಸಾಹಿತ್ಯ, ಕಾವ್ಯ ಎರಡೂ ಇಲ್ಲದಂತಾಗಿದೆ.

* ಕಲಾವಿದರ ಪ್ರಪಂಚ ಹೇಗಿತ್ತು?

ರಾಜ್‌ಕುಮಾರ್‌ ನಂತರ ನನಗೂ ಮೊದಲು ವಿಷ್ಣುವರ್ಧನ್, ಅಂಬರೀಶ್ ಬಂದಿದ್ದರು. ನನ್ನ ನಂತರ ತಮ್ಮ ಶಂಕರ ಬಂದ. ಕೆಲವರು ಹೋಲಿಕೆ ಮಾಡಿ, ‘ನೀವು ಕೇವಲ ನಟರಷ್ಟೇ, ಸ್ಟಾರ್ ಅಲ್ಲ’ ಎನ್ನುತ್ತಿದ್ದರು. ನಾನು ಕೂಡ ಯಾವತ್ತೂ ಸ್ಟಾರ್‌ಡಮ್‌ ಬಯಸಿದವನಲ್ಲ. ನನಗೆ ವೈವಿಧ್ಯಮಯವಾದ, ಸವಾಲಿನ ಪಾತ್ರಗಳು ಬೇಕಾಗಿದ್ದವು. ನಾನೊಬ್ಬ ಪರಿಪೂರ್ಣ ನಟನಾಗಿರಲು ಇಷ್ಟಪಟ್ಟೆ.

* ನಟನೆಯಿಂದ ದೂರಾಗಿದ್ದಿರಿ, ನಟನೆಗೆ ಮರಳುತ್ತೀರಾ?

ಒಳ್ಳೆಯ ಸ್ಕ್ರಿಪ್ಟ್ ಮತ್ತು ಸಮಾಜಕ್ಕೆ ಒಳ್ಳೆಯ ಪ್ರಭಾವ ಬೀರುವಂತಹ ಗಟ್ಟಿಯಾದ ಕಥೆ ಬಂದರೆ ಮಾಡುತ್ತೇನೆ. ಈಗ 25-30 ವರ್ಷದ ಯುವ ನಿರ್ದೇಶಕರು ಕಥೆ ತರುತ್ತಾರೆ. ಅವರಿಗೆ ನಿರ್ದೇಶನ ಮಾಡಲು ಅನುಭವದ ಕೊರತೆಯಿರುತ್ತದೆ, ಸರಿಯಾದ ಮಾರ್ಗದರ್ಶನವಿರುವುದಿಲ್ಲ. ಈಗ ಕಲಿಸುವವರೂ ಇಲ್ಲ, ಕಲಿಯುವವರೂ ಇಲ್ಲ. ಅವರಿಗೆ ಇಲ್ಲ ಎಂದು ಹೇಳಲು ಬೇಸರವಾಗುತ್ತದೆ. ನನ್ನ ಸಲಹೆ ಬಹಳಷ್ಟು ಸಲ ತೆಗೆದುಕೊಳ್ಳುವುದು ಕಡಿಮೆ. ಯಾಕೆಂದರೆ ಐವತ್ತು ವರ್ಷಗಳ ಅಂತರವಿರುತ್ತದೆ. ಈಗಲೂ ನನಗೆ ಒಪ್ಪುವಂತಹ ಪಾತ್ರ, ಚಿತ್ರಕತೆ ಬಂದರೆ ನಾನು ನಟನೆ ಮಾಡುತ್ತೇನೆ. ಈಗಲೂ ಸ್ಕ್ರಿಪ್ಟ್‌ ಬರುತ್ತಿರುತ್ತದೆ. ಆದರೆ ನಾನೇ ಕೊಂಚ ಮೌನವಾಗಿರುತ್ತೇನೆ.

* ಪ್ರಶಸ್ತಿ ಪ್ರದಾನ ಸಮಾರಂಭ ಹೇಗಿತ್ತು?

ಸಾಮಾನ್ಯವಾಗಿ ಇಂತಹ ಸಿನೆಮಾ ಕಾರ್ಯಕ್ರಮಗಳು, ಪ್ರಶಸ್ತಿ ಸಮಾರಂಭಗಳು ದೆಹಲಿಯಲ್ಲೇ ನಡೆಯುತ್ತಿದ್ದವು. ಆದರೆ ಈ ಬಾರಿ ಜನಸಾಮಾನ್ಯರಿಗೆ ಹತ್ತಿರವಾಗಿಸಬೇಕು, ದೆಹಲಿಯಿಂದ ಹೊರಗೂ ತರಬೇಕು ಎಂಬ ಪ್ರಧಾನಿ ಮೋದಿಯವರು ಮತ್ತು ಸಚಿವರಾದ ಅಶ್ವಿನಿ ವೈಷ್ಣವ್ ಅವರ ಪರಿಕಲ್ಪನೆಯಂತೆ ಮೊದಲ ಬಾರಿಗೆ ಕೇವಡಿಯಾಗೆ ತಂದಿದ್ದರು. ಕೇವಡಿಯಾ ಮೂಲತಃ ಒಂದು ಸಣ್ಣ ಹಳ್ಳಿ. ಮೋದಿಯವರು ಸರ್ದಾರ್ ವಲ್ಲಭಭಾಯಿ ಪಟೇಲರ ಬೃಹತ್ ಪ್ರತಿಮೆಯನ್ನು ಅಲ್ಲಿ ನಿರ್ಮಿಸಿ, ನರ್ಮದಾ ನದಿಯ ಹಿನ್ನೀರು, ಬೆಟ್ಟ-ಕಣಿವೆಗಳ ನಡುವೆ ಒಂದು ಅದ್ಭುತ ಪ್ರವಾಸಿ ತಾಣವನ್ನಾಗಿ ರೂಪಿಸಿದ್ದಾರೆ. ಆ ಪ್ರತಿಮೆಯ ಕೆಳಭಾಗದಲ್ಲೇ ಬೃಹತ್ ಟೆಂಟ್ ಹಾಕಿ, ಸಭಾಂಗಣ ನಿರ್ಮಿಸಿ ಕಾರ್ಯಕ್ರಮ ಮಾಡಿದ್ದರು. ನಮಗೆ ಅಲ್ಲಿ ಸುಂದರ ಸ್ಥಳದಲ್ಲಿ ವಸತಿ ವ್ಯವಸ್ಥೆ ಕಲ್ಪಿಸಿದ್ದರು. ಸುತ್ತಲೂ ಪರ್ವತಗಳು, ನರ್ಮದಾ ನದಿ, ಶುದ್ಧ ಶಾಕಾಹಾರಿ ಊಟ, ಯಾವುದೇ ರೂಮ್‌ನಲ್ಲೂ ಟಿವಿ ಇರಲಿಲ್ಲ. ಒಂದು ರೀತಿಯಲ್ಲಿ ಆಶ್ರಮದ ವಾತಾವರಣದಂತಿತ್ತು.

* ಈ ಪ್ರಶಸ್ತಿ ನಿಮ್ಮಲ್ಲಿ ಏನನ್ನು ಮೂಡಿಸಿದೆ?

ನನಗೆ ಈಗ 78 ವರ್ಷ. ನಾನು ಆಶ್ರಮ, ಮಠದಲ್ಲಿ ಬೆಳೆದವನು. ಮನುಷ್ಯನಿಗೆ ಎಲ್ಲವನ್ನೂ ಮೀರಿ ಕೊನೆಯಲ್ಲಿ ದಕ್ಕಬೇಕಾದದ್ದು ಮೌನ. ಮೌನದಲ್ಲಿ ಧ್ಯಾನ, ಮನನ ಮತ್ತು ಚಿಂತನ. ಇಷ್ಟು ವರ್ಷಗಳ ಲೌಕಿಕ ಜಂಜಾಟದ ನಂತರ ಮತ್ತೆ ಆ ಧ್ಯಾನಕ್ಕೆ ಮರಳುವ, ಪರಮಾರ್ಥದ ಹಾದಿಯಲ್ಲಿದ್ದೆ. ಆದರೆ ಈ ಪ್ರಶಸ್ತಿ ಮತ್ತೆ ನನ್ನನ್ನು ಪ್ರಪಂಚಕ್ಕೆ ಕರೆತಂದಿದೆ. ಕಳೆದ ಒಂದು ವಾರದಿಂದ ಬಂದ ಫೋನ್ ಕರೆ, ಸಂದೇಶಗಳು ನನ್ನನ್ನು ಚಕಿತಗೊಳಿಸಿವೆ. ಮತ್ತೆ ಒಳ್ಳೆಯ ಕತೆ ಬಂದರೆ ನಟಿಸುವ ಮನಸ್ಸು ತರಿಸಿದೆ. ‘ಇಲ್ಲಿರಲಾರೆ ಅಲ್ಲಿಗೆ ಹೋಗಲಾರೆ’ ಎಂಬ ಸಾಲು ಎಷ್ಟು ಅರ್ಥಪೂರ್ಣ.

ಜನ್ಮಭೂಮಿ, ಧರ್ಮಭೂಮಿ ಮತ್ತು ಕರ್ಮಭೂಮಿ

1948ರಲ್ಲಿ ನಾನು ಹುಟ್ಟಿದಾಗ ಭಾಷಾವಾರು ರಾಜ್ಯಗಳಿರಲಿಲ್ಲ. 1956ರಲ್ಲಿ ಪೊಟ್ಟಿ ಶ್ರೀರಾಮುಲು ಅವರ ಬಲಿದಾನದ ಬಳಿಕ ನಡೆದ ಹೋರಾಟಗಳ ಪರಿಣಾಮವಾಗಿ ಭಾಷಾವಾರು ರಾಜ್ಯಗಳ ಪುನರ್ವಿಂಗಡಣೆ ನಡೆಯಿತು. ಆಗ ಇಂದಿನ ಕರ್ನಾಟಕದ ಭಾಗಗಳು ಮದ್ರಾಸ್ ಮತ್ತು ಬಾಂಬೆ ಪ್ರಾಂತ್ಯಗಳಲ್ಲಿ ಹರಿದುಹಂಚಿಕೊಂಡಿದ್ದವು. ಕಚ್‌ನಿಂದ ಕೊಚ್ಚಿವರೆಗಿನ ಪಶ್ಚಿಮ ಕರಾವಳಿಯ ಈ ಭೂಭಾಗವೇ ನನ್ನ ಜನ್ಮಭೂಮಿ ಎಂಬ ಭಾವನೆ ನನ್ನದು. ಅಯೋಧ್ಯೆ, ಮಥುರಾ ಮುಂತಾದ ಪುಣ್ಯಕ್ಷೇತ್ರಗಳಿರುವ ಭಾರತ ನನ್ನ ಧರ್ಮಭೂಮಿ; ನಾನು ಬದುಕಿ, ಕಲೆ ಸೇವೆ ಮಾಡಿದ ಕರ್ನಾಟಕ ನನ್ನ ಕರ್ಮಭೂಮಿ. ವೇದಿಕೆಯ ಮೇಲೆ ಅದನ್ನು ವಿಸ್ತರಿಸದೆ, ‘ಜನ್ಮಭೂಮಿ ಭಾರತ, ಕರ್ಮಭೂಮಿ ಕರ್ನಾಟಕ, ಧರ್ಮಭೂಮಿ ದೇಶ’ ಎಂದು ಸಂಕ್ಷಿಪ್ತವಾಗಿ ಹೇಳಿದೆ.

'ಅಮೆರಿಕಾ ಅಮೆರಿಕಾ'ದ ಲೆಗಸಿಯ ಭಾರ ನನ್ನ ಮೇಲಿರಲಿಲ್ಲ: ನಟ ಪೃಥ್ವಿ ಅಂಬಾರ್ ಸಂದರ್ಶನ

Govindaraj S — Thu, 10 Sep 2026 20:39:57 +0530

‘ದಿಯಾ’ ಸಿನಿಮಾ ನಟ ಪೃಥ್ವಿ ಅಂಬಾರ್ ಅವರಿಗೆ ಈವರೆಗಿನ ಹೆಸರು ಮತ್ತು ಖ್ಯಾತಿಯನ್ನು ತಂದುಕೊಟ್ಟ ಸಿನಿಮಾ. ಆ ಸಿನಿಮಾದ ನಂತರ ಪ್ರೇಕ್ಷಕರು ಅವರನ್ನು ಪ್ರೇಮಕಥೆಗಳ ನಟನಾಗಿ ಗುರುತಿಸತೊಡಗಿದರು. ಹೀಗಾಗಿ ಅದೇ ರೀತಿಯ ರೊಮ್ಯಾಂಟಿಕ್ ಸಿನಿಮಾಗಳಲ್ಲೇ ಮುಂದುವರಿಯಬಹುದಾಗಿದ್ದರೂ, ಪೃಥ್ವಿ ಆ ಹಾದಿಯನ್ನು ಆಯ್ಕೆ ಮಾಡಿಕೊಳ್ಳಲಿಲ್ಲ. ಬದಲಾಗಿ ವಿಭಿನ್ನ ರೀತಿಯ ಸಿನಿಮಾಗಳು ಮತ್ತು ಪಾತ್ರಗಳನ್ನು ಮಾಡುತ್ತಾ ತಮ್ಮದೇ ಆದ ದಾರಿಯಲ್ಲಿ ಸಾಗಿದರು. ‘ದಿಯಾ’ದ ನೆರಳು ಮಾತ್ರ ಅವರ ಹಿಂದಿನಿಂದ ಮುಂದುವರಿಯುತ್ತಲೇ ಇತ್ತು.

ಇದೀಗ ಮತ್ತೊಂದು ಪ್ರೇಮಕಥೆಯೊಂದಿಗೆ ಪೃಥ್ವಿ ಅಂಬಾರ್ ವಾಪಸಾಗಿದ್ದಾರೆ. ಆದರೆ ಈ ಬಾರಿ ಸಿನಿಮಾಗೆ ವಿಭಿನ್ನ ರೀತಿಯ ಲೆಗಸಿ ಇದೆ. ಹಿರಿಯ ನಿರ್ದೇಶಕ ನಾಗತಿಹಳ್ಳಿ ಚಂದ್ರಶೇಖರ್ ಅವರ ‘ಅಮೆರಿಕಾ ಅಮೆರಿಕಾ 2’ ಚಿತ್ರದಲ್ಲಿ ಪೃಥ್ವಿ ಪ್ರಮುಖ ಪಾತ್ರವೊಂದರಲ್ಲಿ ಕಾಣಿಸಿಕೊಂಡಿದ್ದಾರೆ. ಚಿತ್ರದಲ್ಲಿ ಅವರೊಂದಿಗೆ ಶಾನ್ವಿ ಶ್ರೀವಾಸ್ತವ ಮತ್ತು ನಿರೂಪ್ ಭಂಡಾರಿ ನಟಿಸಿದ್ದಾರೆ. ಈ ಸಿನಿಮಾ ಇದೇ ವಾರ ವಿಶ್ವಾದ್ಯಂತ ಚಿತ್ರಮಂದಿರಗಳಿಗೆ ಬರಲು ಸಜ್ಜಾಗಿದೆ. ಸಹನಾ ವಿಜಯಕುಮಾರ್ ಅವರ ಕಾದಂಬರಿಯನ್ನು ಆಧರಿಸಿರುವ ಈ ಸಿನಿಮಾ ಪ್ರೀತಿ, ಕುಟುಂಬ ಮತ್ತು ಉತ್ತಮ ಭವಿಷ್ಯಕ್ಕಾಗಿ ತಾಯ್ನಾಡು ತೊರೆದು ವಿದೇಶಕ್ಕೆ ತೆರಳುವ ಜನರ ಬದುಕಿನ ಕಥೆಯನ್ನು ಒಳಗೊಂಡಿದೆ.

‘ದಿಯಾ’ ಹ್ಯಾಂಗೋವರ್‌ನಿಂದ ಹೊರಬರಲು ಈ ಸಿನಿಮಾ ಸಹಾಯ ಮಾಡುತ್ತಾ?

‘ಅಮೆರಿಕಾ ಅಮೆರಿಕಾ 2’ ಮೂಲಕ ಪೃಥ್ವಿ ಅಂಬಾರ್ ‘ದಿಯಾ’ ಸಿನಿಮಾದ ಪ್ರಭಾವದಿಂದ ಹೊರಬರಲು ಸಾಧ್ಯವಾಗುತ್ತದೆಯೇ ಎಂಬುದು ಸಹಜವಾಗಿಯೇ ಎದುರಾಗುವ ಪ್ರಶ್ನೆ. ‘ದಿಯಾ’ ನಂತರ ನಾನು ಸಾಕಷ್ಟು ಸಿನಿಮಾಗಳನ್ನು ಮಾಡಿದ್ದೇನೆ. ಆದರೆ ಯಾವುದೂ ‘ಡಿಯಾ’ವನ್ನು ಮೀರಿಸುವ ಅಥವಾ ಅದರ ಮೇಲೆ ತನ್ನ ಛಾಯೆ ಬೀರುವ ಪ್ರಯತ್ನ ಮಾಡಿಲ್ಲ. ಮುಂದೆಯೂ ಹಾಗೆ ಆಗುತ್ತದೆಯೇ ಎಂಬುದು ನನಗೆ ಗೊತ್ತಿಲ್ಲ. ಏಕೆಂದರೆ ಆ ಸಿನಿಮಾ ಅಷ್ಟು ಹೃದಯಪೂರ್ವಕವಾಗಿ ನಿರ್ಮಾಣವಾಗಿತ್ತು. ಈಗ ‘ಅಮೆರಿಕಾ ಅಮೆರಿಕಾ 2’ ಎಂಬ ಮತ್ತೊಂದು ಸಿನಿಮಾದಲ್ಲಿ ಅದೇ ರೀತಿಯ ಭಾವನಾತ್ಮಕ ಥೀಮ್ ಇದೆ.

ಇದು ‘ದಿಯಾ’ ಹ್ಯಾಂಗೋವರ್‌ನಿಂದ ನನ್ನನ್ನು ಹೊರತರಬಹುದೇ? ಖಂಡಿತವಾಗಿಯೂ ‘ಅಮೆರಿಕಾ ಅಮೆರಿಕಾ 2’ನಲ್ಲಿ ಆ ಆಳವಿದೆ ಎಂದು ನನಗೆ ಅನಿಸುತ್ತದೆ. ಅದೂ ಕೂಡ ಪ್ರೇಮಕಥೆಗಳನ್ನು ಅದ್ಭುತವಾಗಿ ಕಟ್ಟಿಕೊಟ್ಟಿರುವ ನಾಗತಿಹಳ್ಳಿ ಚಂದ್ರಶೇಖರ್ ಅವರಿಂದ ಬರುತ್ತಿದೆ. ಹೀಗಾಗಿ ಈ ಸಿನಿಮಾ ಖಂಡಿತವಾಗಿಯೂ ವಿಭಿನ್ನವಾಗಿ ನಿಲ್ಲುತ್ತದೆ. ಪ್ರೇಕ್ಷಕರು ಇದನ್ನು ಹೇಗೆ ಸ್ವೀಕರಿಸುತ್ತಾರೆ ಎಂಬುದನ್ನು ನೋಡಲು ನಾನು ಕಾಯುತ್ತಿದ್ದೇನೆ ಎನ್ನುತ್ತಾರೆ ಪೃಥ್ವಿ.

ಕೆಲವು ಸಮಯ ಪ್ರೇಮಕಥೆಗಳಿಂದ ದೂರ ಉಳಿದಿದ್ದರೂ, ಪ್ರೇಕ್ಷಕರು ಅವರನ್ನು ಆ ಜಾನರ್‌ನೊಂದಿಗೆ ಗುರುತಿಸುವುದನ್ನು ಮುಂದುವರಿಸಿದ್ದಾರೆ. ಆದರೆ ಅದನ್ನು ಅವರು ಸಮಸ್ಯೆಯಾಗಿ ನೋಡುವುದಿಲ್ಲ. ಅದೇ ಸಮಯದಲ್ಲಿ, ಒಂದೇ ರೀತಿಯ ಪಾತ್ರಗಳನ್ನು ಮತ್ತೆ ಮತ್ತೆ ಮಾಡಲು ಕೂಡ ಪೃಥ್ವಿಗೆ ಆಸಕ್ತಿಯಿಲ್ಲ.

ಜನರು ನನ್ನನ್ನು ಪ್ರೇಮಕಥೆಗಳ ಸಿನಿಮಾಗಳೊಂದಿಗೆ ಕನೆಕ್ಟ್ ಮಾಡುತ್ತಾರೆ. ಅದು ನನಗೆ ತುಂಬಾ ಚೆನ್ನಾಗಿ ವರ್ಕ್ ಆಗಿದೆ. ಈಗ ‘ಅಮೆರಿಕಾ ಅಮೆರಿಕಾ 2’ ಚಿತ್ರವನ್ನು ಚಿತ್ರಮಂದಿರದಲ್ಲಿ ಪ್ರೇಕ್ಷಕರು ನೋಡಿದಾಗ ಅವರ ಪ್ರತಿಕ್ರಿಯೆ ಹೇಗಿರುತ್ತದೆ ಎಂಬುದನ್ನು ನೋಡಲು ಕಾಯುತ್ತಿದ್ದೇನೆ. ಆದರೆ ನಾನು ನನ್ನನ್ನೇ ಮತ್ತೆ ಮತ್ತೆ ರಿಪೀಟ್ ಮಾಡಿಕೊಳ್ಳಲು ಇಷ್ಟಪಡುವುದಿಲ್ಲ. ನಟನಾಗಿ ವಿಭಿನ್ನ ರೀತಿಯ ಪಾತ್ರಗಳು ಮತ್ತು ಕಥೆಗಳ ಮೂಲಕ ಸಾಗಬೇಕು ಎಂಬುದು ನನ್ನ ಆಸೆ. ಅದು ನನಗೆ ಬಹಳ ಮುಖ್ಯ ಎಂದು ಅವರು ಹೇಳುತ್ತಾರೆ.

‘ದಿಯಾ’ ರೀತಿಯ ತ್ಯಾಗದ ಕಥೆಯೇ?

‘ಅಮೆರಿಕಾ ಅಮೆರಿಕಾ 2’ ಚಿತ್ರದಲ್ಲೂ ‘ದಿಯಾ’ದಂತೆಯೇ ಭಾವನಾತ್ಮಕ ತಿರುವು, ಅದರಲ್ಲೂ ತ್ಯಾಗದ ಅಂಶವಿದೆಯೇ ಎಂಬ ಪ್ರಶ್ನೆಗೆ ಪೃಥ್ವಿ ಉತ್ತರಿಸಲು ನಿರಾಕರಿಸಿದ್ದಾರೆ. ಅದನ್ನು ನಾನು ಬಹಿರಂಗಪಡಿಸಲು ಸಾಧ್ಯವಿಲ್ಲ. ನೀವು ಚಿತ್ರಮಂದಿರಕ್ಕೆ ಹೋಗಿ ಸಿನಿಮಾ ನೋಡಬೇಕು. ಇಲ್ಲಿ ಪ್ರಶ್ನೆ ಯಾರ ತ್ಯಾಗ ಮತ್ತು ಆ ತ್ಯಾಗ ಕಥೆಯಲ್ಲಿ ಏನನ್ನು ಸೂಚಿಸುತ್ತದೆ ಎಂಬುದರ ಬಗ್ಗೆಯೂ ಇದೆ. ಆ ಅನುಭವವನ್ನು ನಾನು ಪ್ರೇಕ್ಷಕರಿಂದ ಕಸಿದುಕೊಳ್ಳಲು ಬಯಸುವುದಿಲ್ಲ ಎನ್ನುತ್ತಾರೆ ಪೃಥ್ವಿ.

ವಿದೇಶಕ್ಕೆ ಹೋದವರ ಬದುಕಿನ ಕಥೆಯೂ ಇದೆ

‘ಅಮೆರಿಕಾ ಅಮೆರಿಕಾ 2’ ಸಿನಿಮಾ ಕುಟುಂಬ, ಸಂಬಂಧಗಳು ಮತ್ತು ಉತ್ತಮ ಭವಿಷ್ಯಕ್ಕಾಗಿ ತಾಯ್ನಾಡು ತೊರೆದು ವಿದೇಶಕ್ಕೆ ತೆರಳುವ ಜನರ ಬದುಕಿನ ಮೇಲೂ ಬೆಳಕು ಚೆಲ್ಲುತ್ತದೆ. ಈ ಅಂಶದೊಂದಿಗೆ ತಮ್ಮ ವೈಯಕ್ತಿಕ ಅನುಭವಗಳಿಗೂ ಸಾಮ್ಯವಿದೆ ಎಂದು ಪೃಥ್ವಿ ಹೇಳುತ್ತಾರೆ. ಕಾದಂಬರಿಯಲ್ಲಿ ಸಣ್ಣ ಸಣ್ಣ ವಿವರಗಳಿರುತ್ತವೆ. ಅದನ್ನು ತುಂಬಾ ಆಳವಾಗಿ ಬರೆಯಲಾಗಿರುತ್ತದೆ. ಈ ಸಿನಿಮಾದಲ್ಲೂ ಕುಟುಂಬದ ಮೌಲ್ಯಗಳಿವೆ. ಶಾನ್ವಿ, ನಿರೂಪ್ ಅಥವಾ ನನ್ನ ಪಾತ್ರವಾಗಿರಲಿ, ಪ್ರತಿಯೊಬ್ಬ ನಟನ ಪಾತ್ರಕ್ಕೂ ತನ್ನದೇ ಆದ ಜಾಗವಿದೆ. ಪ್ರೇಕ್ಷಕರ ಒಂದು ವರ್ಗ ಖಂಡಿತವಾಗಿಯೂ ಆ ಪಾತ್ರಗಳೊಂದಿಗೆ ಕನೆಕ್ಟ್ ಆಗಬಹುದು.

ಸಿನಿಮಾ ಒಂದು ಮೆಚ್ಯೂರ್ ಪ್ಲಾಟ್ ಹೊಂದಿದ್ದು, ಎನ್‌ಆರ್‌ಐ ಜೀವನದ ಬಗ್ಗೆಯೂ ಮಾತನಾಡುತ್ತದೆ. ಜನರು ವಿದೇಶಕ್ಕೆ ಹೋಗುತ್ತಾರೆ, ತಮ್ಮ ಮನೆ-ಕುಟುಂಬವನ್ನು ಬಿಟ್ಟು ಕೆಲಸ ಆರಂಭಿಸುತ್ತಾರೆ. ನನ್ನ ಸ್ನೇಹಿತರಲ್ಲೂ ಚಿಕ್ಕ ವಯಸ್ಸಿನಲ್ಲೇ ಮನೆ ಬಿಟ್ಟು ವಿದೇಶಕ್ಕೆ ಹೋದವರಿದ್ದಾರೆ. ಅಲ್ಲಿ ಒಂದು ತ್ಯಾಗವಿರುತ್ತದೆ. ಅವರಿಗೂ ಜೀವನದೊಂದಿಗೆ ತಮ್ಮದೇ ಆದ ಹೋರಾಟವಿದೆ. ಒಂದು ರೀತಿಯ ಏಕಾಂತವೂ ಇರುತ್ತದೆ. ಆದರೆ ವಿಧಿ ಅವರನ್ನು ಅಲ್ಲಿಗೆ ಕರೆದೊಯ್ಯುತ್ತದೆ. ತಮ್ಮ ಮನೆಯನ್ನು ಹಿಂದೆ ಬಿಟ್ಟು, ಅಲ್ಲಿ ಒಂದು ಆರಾಮದಾಯಕ ಜೀವನವನ್ನು ಕಟ್ಟಿಕೊಳ್ಳಬೇಕಾಗುತ್ತದೆ ಎಂದು ಪೃಥ್ವಿ ವಿವರಿಸುತ್ತಾರೆ.

ಶೂಟಿಂಗ್ ಮುಗಿಯುವವರೆಗೂ ಚಿತ್ರದ ಟೈಟಲ್ ಗೊತ್ತಿರಲಿಲ್ಲ!

ಕುತೂಹಲಕಾರಿ ಸಂಗತಿಯೆಂದರೆ, ಸಿನಿಮಾದ ಬಹುತೇಕ ಶೂಟಿಂಗ್ ಮುಗಿಯುವವರೆಗೂ ಈ ಚಿತ್ರಕ್ಕೆ ‘ಅಮೆರಿಕಾ ಅಮೆರಿಕಾ 2’ ಎಂಬ ಶೀರ್ಷಿಕೆ ಇಡಲಾಗುತ್ತದೆ ಎಂಬುದು ಪೃಥ್ವಿ ಅಂಬಾರ್ ಅವರಿಗೆ ತಿಳಿದಿರಲಿಲ್ಲ. ಮೂಲ ‘ಅಮೆರಿಕಾ ಅಮೆರಿಕಾ’ ಸಿನಿಮಾವನ್ನು ಚಿಕ್ಕಂದಿನಿಂದಲೇ ನೋಡಿದ್ದ ಪೃಥ್ವಿ, ಚಿತ್ರದ ಶೀರ್ಷಿಕೆ ಮೊದಲೇ ಗೊತ್ತಿದ್ದರೆ ಅನಗತ್ಯ ಒತ್ತಡ ಎದುರಾಗಬಹುದಿತ್ತು ಎಂದು ಹೇಳುತ್ತಾರೆ.

ನಾಗತಿಹಳ್ಳಿ ಸರ್ ಈ ಸಿನಿಮಾಗೆ ‘ಅಮೆರಿಕಾ ಅಮೆರಿಕಾ 2’ ಎಂದು ಟೈಟಲ್ ಇಡುತ್ತಾರೆ ಎಂಬುದು ನನಗೆ ಗೊತ್ತಿರಲಿಲ್ಲ. ಅದೃಷ್ಟವಶಾತ್ ಕೊನೆಯವರೆಗೂ ನನಗೆ ಟೈಟಲ್ ಗೊತ್ತಿರಲಿಲ್ಲ. ಹೀಗಾಗಿ ಇದು ‘ಅಮೆರಿಕಾ ಅಮೆರಿಕಾ 2’ ಆಗಲಿದೆ ಎಂಬ ಭಾರವನ್ನು ನಾನು ಹೊತ್ತುಕೊಳ್ಳಲಿಲ್ಲ. ಹಿಂದಿನ ‘ಅಮೆರಿಕಾ ಅಮೆರಿಕಾ’ ಸಿನಿಮಾ ಖಂಡಿತವಾಗಿಯೂ ಒಂದು ವರದಾನ. ನಾನು ಚಿಕ್ಕವನಿದ್ದಾಗ ಆ ಸಿನಿಮಾ ನೋಡಿದ್ದೆ.

ಅದು ಒಂದು ಲೆಗಸಿ ಹೊಂದಿರುವ, ದೊಡ್ಡ ಹಿಟ್ ಆಗಿದ್ದ ಸಿನಿಮಾ. ಆ ಹೆಸರನ್ನು ಹೊತ್ತುಕೊಂಡು ಬರುವುದು ಒಂದು ರೀತಿಯಲ್ಲಿ ಅನುಕೂಲ. ಆದರೆ ಅದೇ ಸಮಯದಲ್ಲಿ ಅದು ದೊಡ್ಡ ಜವಾಬ್ದಾರಿಯೂ ಹೌದು. ಇಂದಿನ ಭಾಷೆಯಲ್ಲಿ ಹೇಳುವುದಾದರೆ, ಅದು ಕೇವಲ ಸಿನಿಮಾವಲ್ಲ, ಒಂದು ಭಾವನೆ. ‘ಅಮೆರಿಕಾ ಅಮೆರಿಕಾ’ ಹಲವು ನೆನಪುಗಳ ಮೂಲಕ ಜನರ ಮನಸ್ಸಿನಲ್ಲಿ ಉಳಿದಿದೆ. ಹೀಗಾಗಿ ‘ಅಮೆರಿಕಾ ಅಮೆರಿಕಾ 2’ ಮೇಲೆ ಸಹಜವಾಗಿಯೇ ನಿರೀಕ್ಷೆಗಳಿರುತ್ತವೆ ಎಂದು ಪೃಥ್ವಿ ಹೇಳುತ್ತಾರೆ.

ಒಂದು ಶಾಲೆಯ ಅನುಭವ!

ನಾಗತಿಹಳ್ಳಿ ಚಂದ್ರಶೇಖರ್ ಅವರೊಂದಿಗೆ ಕೆಲಸ ಮಾಡಿರುವುದು ತಮ್ಮ ಪಾಲಿಗೆ ವಿಭಿನ್ನ ರೀತಿಯ ಕಲಿಕೆಯ ಅನುಭವ ಎಂದು ಪೃಥ್ವಿ ಹೇಳಿದ್ದಾರೆ. ಅವರು ಚಿತ್ರರಂಗದಲ್ಲಿ ಇಷ್ಟು ವರ್ಷಗಳಿಂದ ಕೆಲಸ ಮಾಡುತ್ತಿದ್ದರೂ, ಅವರಲ್ಲಿ ಒಂದು ರೀತಿಯ ಸ್ಯಾಚುರೇಶನ್ ಬಂದಿದೆ ಎಂದು ನನಗೆ ಎಂದಿಗೂ ಅನಿಸಲಿಲ್ಲ. ಇಂದಿಗೂ ಅವರು ಉತ್ಸಾಹಭರಿತರಾಗಿದ್ದಾರೆ, ಎನರ್ಜಿಟಿಕ್ ಆಗಿದ್ದಾರೆ ಮತ್ತು ಮುಂದಿನ ಶಾಟ್ ಹೇಗಿರಬೇಕು ಎಂಬ ಕುತೂಹಲ ಅವರಲ್ಲಿದೆ.

ಅವರ ಸಿನಿಮಾ ಮಾಡುವ ವಿಧಾನ ನನಗೆ ದೊಡ್ಡ ಕಲಿಕೆಯ ಅನುಭವವಾಗಿತ್ತು. ಒಂದು ರೀತಿಯಲ್ಲಿ ಅದು ಶಾಲೆಯ ವಾತಾವರಣದಂತಿತ್ತು. ನಾವೆಲ್ಲರೂ ಅವರನ್ನು ಇಂಪ್ರೆಸ್ ಮಾಡಲು ಪ್ರಯತ್ನಿಸುತ್ತಿದ್ದೆವು. ಒಂದು ದೃಶ್ಯ ಶೂಟ್ ಮಾಡಿದ ನಂತರ ಅವರು ನಮ್ಮನ್ನು ಮೆಚ್ಚುತ್ತಾರಾ ಎಂದು ಕಾಯುತ್ತಿದ್ದೆವು. ಅವರು ‘ಗುಡ್’ ಎಂದಾಗಲೆಲ್ಲ ನಮಗೆ ತುಂಬಾ ಖುಷಿಯಾಗುತ್ತಿತ್ತು. ನಾವು ಪ್ರತಿಯೊಂದು ದೃಶ್ಯಕ್ಕೂ ನಮ್ಮ ಹೃದಯವನ್ನೇ ಕೊಟ್ಟಿದ್ದೆವು ಎಂದು ಪೃಥ್ವಿ ನೆನಪಿಸಿಕೊಳ್ಳುತ್ತಾರೆ.

ಇತ್ತೀಚೆಗೆ ತಾವೇ ನಿರ್ದೇಶನಕ್ಕೂ ಕಾಲಿಟ್ಟಿರುವುದರಿಂದ ಈ ಕಲಿಕೆಯ ಅನುಭವ ಪೃಥ್ವಿಗೆ ಮತ್ತಷ್ಟು ಅರ್ಥಪೂರ್ಣವಾಗಿದೆ. ಹಲವು ನಿರ್ದೇಶಕರೊಂದಿಗೆ ಕೆಲಸ ಮಾಡಿದ ಅನುಭವದ ಬಳಿಕ ಇದೀಗ ಕ್ಯಾಮೆರಾದ ಹಿಂದಿನಿಂದಲೂ ಸಿನಿಮಾವನ್ನು ನೋಡುವ ಅವಕಾಶ ಅವರಿಗೆ ಸಿಕ್ಕಿದೆ.

ನಾನು ಕೆಲಸ ಮಾಡಿದ ಪ್ರತಿಯೊಬ್ಬ ನಿರ್ದೇಶಕರಿಂದಲೂ ಒಂದೊಂದು ಪಾಠ ಕಲಿತಿದ್ದೇನೆ. ಈಗ ನಿರ್ದೇಶಕನಾಗಿ ಸಿನಿಮಾವನ್ನು ಮತ್ತೊಂದು ದೃಷ್ಟಿಕೋನದಿಂದ ನೋಡುತ್ತಿದ್ದೇನೆ ಎನ್ನುತ್ತಾರೆ ಪೃಥ್ವಿ. ಅವರ ಪ್ರಕಾರ, ನಟನೆ ಮತ್ತು ನಿರ್ದೇಶನ ಸಿನಿಮಾದಲ್ಲಿ ಪರಸ್ಪರ ಸ್ಪರ್ಧಿಸುವ ಎರಡು ವಿಭಿನ್ನ ವಿಭಾಗಗಳಲ್ಲ. ಬದಲಾಗಿ ಅವು ಒಂದಕ್ಕೊಂದು ಪೂರಕ.

ಒಂದು ಇನ್ನೊಂದಕ್ಕೆ ಮಾಹಿತಿ ನೀಡುತ್ತದೆ. ಒಂದು ದೃಶ್ಯ ಯಾಕೆ ಚೆನ್ನಾಗಿ ಕೆಲಸ ಮಾಡುತ್ತದೆ, ಒಬ್ಬ ನಟ ಅದನ್ನು ಹೇಗೆ ಅಪ್ರೋಚ್ ಮಾಡುತ್ತಾನೆ ಮತ್ತು ನಿರ್ದೇಶಕನ ಉದ್ದೇಶವೇನು ಎಂಬುದನ್ನು ಅರ್ಥಮಾಡಿಕೊಳ್ಳಲು ಎರಡೂ ವಿಭಾಗಗಳು ಮತ್ತೊಂದು ದೃಷ್ಟಿಕೋನವನ್ನು ನೀಡುತ್ತವೆ ಎಂದು ಅವರು ವಿವರಿಸುತ್ತಾರೆ.

ನಿರೂಪ್ ಮತ್ತು ಶಾನ್ವಿ ಜೊತೆಗಿನ ಕೆಮಿಸ್ಟ್ರಿ ಹೇಗಿತ್ತು?

ಶಾನ್ವಿ ಶ್ರೀವಾಸ್ತವ ಮತ್ತು ನಿರೂಪ್ ಭಂಡಾರಿ ಜೊತೆಗಿನ ಕೆಲಸದ ಅನುಭವದ ಬಗ್ಗೆಯೂ ಪೃಥ್ವಿ ಮಾತನಾಡಿದ್ದಾರೆ. ನಟರ ನಡುವಿನ ಕೆಮಿಸ್ಟ್ರಿಯನ್ನು ಸ್ಪರ್ಧೆಯ ಮೂಲಕ ಸೃಷ್ಟಿಸಲು ಸಾಧ್ಯವಿಲ್ಲ ಎಂಬುದು ಅವರ ನಿಲುವು. ನನ್ನ ಪ್ರಕಾರ ನಟನೆ ಎಂದರೆ ಕೊಡು-ಕೊಳ್ಳುವಿಕೆ. ಸ್ಪರ್ಧೆ ಬಂದರೆ ನಾವು ಅಗತ್ಯಕ್ಕಿಂತ ಹೆಚ್ಚು ಮಾಡಲು ಪ್ರಯತ್ನಿಸಬಹುದು. ನಾನು ಅದನ್ನು ನಂಬುವುದಿಲ್ಲ.

ನಿರೂಪ್ ಮತ್ತು ನಾನು ಒಂದೇ ಕರಾವಳಿ ಭಾಗದವರು. ಆದರೆ ನಾವು ಮೊದಲ ಬಾರಿಗೆ ಭೇಟಿಯಾಗಿದ್ದು ಅಮೆರಿಕಾದಲ್ಲಿ ಶೂಟಿಂಗ್ ಮಾಡುವಾಗ. ನಾವು ಜೀವನದ ಬಗ್ಗೆ ಸಾಕಷ್ಟು ಮಾತನಾಡಿದೆವು ಮತ್ತು ಬಹಳ ಬೇಗ ಕನೆಕ್ಟ್ ಆದೆವು. ಶಾನ್ವಿ ಕೂಡ ತುಂಬಾ ಚೆನ್ನಾಗಿ ಅಭಿನಯಿಸಿದ್ದಾರೆ. ಕೆಲವು ದೃಶ್ಯಗಳಲ್ಲಿ ಅವರ ಮಟ್ಟಕ್ಕೆ ಸರಿಸಮನಾಗಿ ಅಭಿನಯಿಸುವುದು ನನಗೆ ಸವಾಲಾಗಿತ್ತು. ಅದೇ ಆನ್‌ಸ್ಕ್ರೀನ್ ಕೆಮಿಸ್ಟ್ರಿಯನ್ನು ಚೆನ್ನಾಗಿ ಕೆಲಸ ಮಾಡುವಂತೆ ಮಾಡುತ್ತದೆ ಎಂದು ಪೃಥ್ವಿ ಹೇಳಿದ್ದಾರೆ.

ಚಿತ್ರದಲ್ಲಿ ಯಾರಿಗೆ ಹೆಚ್ಚು ಸ್ಕ್ರೀನ್‌ಸ್ಪೇಸ್ ಸಿಗುತ್ತದೆ ಎಂಬ ವಿಚಾರವೂ ತಮ್ಮ ಮನಸ್ಸಿನಲ್ಲಿ ಇರಲಿಲ್ಲ ಎನ್ನುತ್ತಾರೆ ಅವರು. ನಾನು ಎಂದಿಗೂ ಆ ರೀತಿಯಲ್ಲಿ ಯೋಚಿಸಿಲ್ಲ. ಸಿನಿಮಾ ಪ್ರೇಕ್ಷಕರೊಂದಿಗೆ ಕನೆಕ್ಟ್ ಆಗುತ್ತಿದ್ದರೆ, ನನಗೆ ಕಡಿಮೆ ಸ್ಕ್ರೀನ್ ಟೈಮ್ ಸಿಕ್ಕರೂ ಯಾವುದೇ ಸಮಸ್ಯೆಯಿಲ್ಲ. ಕೊನೆಗೂ ಎಲ್ಲವೂ ಕಥೆಯ ಬಗ್ಗೆ ಎಂದು ಅವರು ಸ್ಪಷ್ಟಪಡಿಸುತ್ತಾರೆ.

‘ಪ್ರೀತಿ ಬದಲಾಗಿಲ್ಲ, ಜನರು ಬದಲಾಗಿದ್ದಾರೆ’

ಪ್ರೀತಿಯ ವಿಚಾರಕ್ಕೆ ಬಂದಾಗ, ಕಾಲ ಬದಲಾದರೂ ಪ್ರೀತಿ ಎಂಬ ಭಾವನೆ ಬದಲಾಗಿಲ್ಲ ಎಂಬುದು ಪೃಥ್ವಿ ಅಂಬಾರ್ ಅವರ ಅಭಿಪ್ರಾಯ. ಪ್ರೀತಿ ಸಾರ್ವತ್ರಿಕವಾದದ್ದು. ಆ ಭಾವನೆಯನ್ನು ನೀವು ಬದಲಾಯಿಸಲು ಸಾಧ್ಯವಿಲ್ಲ. ಟ್ರೆಂಡ್ ಬದಲಾಗಬಹುದು, ವ್ಯಕ್ತಿತ್ವಗಳು ಬದಲಾಗಬಹುದು, ಪರಿಸ್ಥಿತಿಗಳು ಬದಲಾಗಬಹುದು. ಆದರೆ ಪ್ರೀತಿ ಎಂದರೆ ಪ್ರೀತಿಯೇ. ಇಲ್ಲಿ ಸರಿ ಅಥವಾ ತಪ್ಪು ಎಂಬುದೂ ಇಲ್ಲ. ಪ್ರೇಕ್ಷಕರು ಯಾರದೋ ಒಂದು ಬದಿಯನ್ನು ತೆಗೆದುಕೊಳ್ಳಬಹುದು. ಅದು ಅವರ ದೃಷ್ಟಿಕೋನವನ್ನು ಅವಲಂಬಿಸಿರುತ್ತದೆ. ‘ದಿಯಾ’ ಸಿನಿಮಾದಲ್ಲೂ ಪ್ರತಿಯೊಬ್ಬರಿಗೂ ತಮ್ಮದೇ ಆದ ಅಭಿಪ್ರಾಯವಿತ್ತು ಎನ್ನುತ್ತಾರೆ ಪೃಥ್ವಿ.

‘ಸಿನಿಮಾ ಇಷ್ಟಪಡುವಂತೆ ಲಾಬಿ ಮಾಡಲು ಸಾಧ್ಯವಿಲ್ಲ’

‘ದಿಯಾ’ದಿಂದ ‘ಅಮೆರಿಕಾ ಅಮೆರಿಕಾ 2’ವರೆಗಿನ ಪ್ರಯಾಣ ಪೃಥ್ವಿ ಸಿನಿಮಾಗಳನ್ನು ನೋಡುವ ರೀತಿಯನ್ನು ಬದಲಿಸಿದೆ. ಆದರೆ ತಮ್ಮ ಮೇಲಿನ ನಿರೀಕ್ಷೆಗಳಲ್ಲಿ ಯಾವುದೇ ಬದಲಾವಣೆ ಆಗಿಲ್ಲ ಎನ್ನುತ್ತಾರೆ ಅವರು. ನಿರ್ದೇಶನಕ್ಕೆ ಕಾಲಿಟ್ಟಿರುವುದು ಅದೇ ಸಿನಿಮಾವನ್ನು ಮತ್ತೊಂದು ದೃಷ್ಟಿಕೋನದಿಂದ ಅರ್ಥಮಾಡಿಕೊಳ್ಳಲು ಸಹಾಯ ಮಾಡಿದೆ.

ನನ್ನ ಪ್ರಕಾರ ಪ್ರಾಮಾಣಿಕತೆ ಬಹಳ ಮುಖ್ಯ. ನಿಮ್ಮ ಕಥೆ ಮತ್ತು ಪ್ರಾಜೆಕ್ಟ್‌ನ ಹಿಂದಿರುವ ನಿಮ್ಮ ಉದ್ದೇಶ ಶುದ್ಧವಾಗಿರಬೇಕು. ಪ್ರೇಕ್ಷಕರು ಅದನ್ನು ಗಮನಿಸುತ್ತಾರೆ. ನೀವು ಕೂಡ ಒಬ್ಬ ಪ್ರೇಕ್ಷಕರೇ. ಹೀಗಾಗಿ ಪ್ರೇಕ್ಷಕರನ್ನು ಅರ್ಥಮಾಡಿಕೊಳ್ಳಲು ಪ್ರತ್ಯೇಕವಾಗಿ ಅಧ್ಯಯನ ಮಾಡುವ ಅಗತ್ಯವಿಲ್ಲ. ನೀವು ನಿಮ್ಮ ಕೆಲಸದಲ್ಲಿ ಪ್ರಾಮಾಣಿಕವಾಗಿರಬೇಕು ಎನ್ನುತ್ತಾರೆ ಪೃಥ್ವಿ.

ಪ್ರೇಕ್ಷಕರ ಮೇಲೆ ಹಾಕುವುದಕ್ಕೂ ಅವರು ಸಿದ್ಧರಿಲ್ಲ.

ನನ್ನ ಸಿನಿಮಾ ಕೆಲಸ ಮಾಡದಿದ್ದರೆ ನಾನು ಪ್ರೇಕ್ಷಕರನ್ನು ದೂಷಿಸುವುದಿಲ್ಲ. ಅವರ ತಲೆಗೆ ಗನ್ ಇಟ್ಟು ‘ನನ್ನ ಸಿನಿಮಾ ನೋಡಿ’ ಎಂದು ಹೇಳಲು ಸಾಧ್ಯವಿಲ್ಲ. ಸಿನಿಮಾವೊಂದು ಕಲೆಯಾಗಿ ಸುಂದರವಾಗಿರುವುದೇ ಇದರಿಂದ ಜನರನ್ನು ಸಿನಿಮಾ ಇಷ್ಟಪಡುವಂತೆ ನೀವು ಲಾಬಿ ಮಾಡಲು ಸಾಧ್ಯವಿಲ್ಲ. ಪ್ರೇಕ್ಷಕರು ಒಂದು ಸಿನಿಮಾವನ್ನು ಇಷ್ಟಪಟ್ಟರೆ, ಅದು ಚಿತ್ರಮಂದಿರದಲ್ಲಿರಲಿ ಅಥವಾ ಒಟಿಟಿಯಲ್ಲಿರಲಿ, ಆ ಸಿನಿಮಾಗೆ ಸಿಗಬೇಕಾದ ಕ್ರೆಡಿಟ್ ಸಿಗುತ್ತದೆ. ನಾನು ಇನ್ನೂ ಒಳ್ಳೆಯ ಸಿನಿಮಾಗಳನ್ನು ಮಾಡಲು ಮತ್ತು ಪ್ರೇಕ್ಷಕರಿಗೆ ಮತ್ತಷ್ಟು ಹತ್ತಿರವಾಗಲು ಕಾಯುತ್ತಿದ್ದೇನೆ ಎಂದು ಪೃಥ್ವಿ ಹೇಳಿದ್ದಾರೆ.

‘ಅಮೆರಿಕಾ ಅಮೆರಿಕಾ 2’ ಮೂಲಕ ಪೃಥ್ವಿ ಅಂಬಾರ್ ಮತ್ತೊಮ್ಮೆ ಪ್ರೇಕ್ಷಕರಿಗೆ ಹತ್ತಿರವಾದ ಭಾವನಾತ್ಮಕ ಜಗತ್ತಿಗೆ ಮರಳಿದ್ದಾರೆ. ಆದರೆ ಈ ಬಾರಿ ಅವರೊಂದಿಗೆ ಪ್ರೇಮಕಥೆಗಳನ್ನು ವಿಭಿನ್ನವಾಗಿ ಕಟ್ಟಿಕೊಟ್ಟಿರುವ ಮತ್ತೊಂದು ತಲೆಮಾರಿನ ನಿರ್ದೇಶಕ ನಾಗತಿಹಳ್ಳಿ ಚಂದ್ರಶೇಖರ್ ಇದ್ದಾರೆ. ಇನ್ನು ಪೃಥ್ವಿ ಅವರ ಮಾತಿನಲ್ಲೇ ಹೇಳುವುದಾದರೆ, ನಾಗತಿಹಳ್ಳಿ ಸರ್ ‘ಅಮೆರಿಕಾ ಅಮೆರಿಕಾ’ದ ವೈಬ್ ಮತ್ತು ಭಾವನೆಯನ್ನು ಉಳಿಸಿಕೊಂಡಿದ್ದಾರೆ. ಆದರೆ ಕಥೆ ಮಾತ್ರ ವಿಭಿನ್ನವಾಗಿದೆ.

ರೈತನ ಪಾತ್ರಕ್ಕಾಗಿ ಹಳ್ಳಿಗೆ ಹೋಗಿ ಒಂದು ತಿಂಗಳು ರೈತನಾಗಿದ್ದೆ: ‘ಪ್ರೇಮದ ಊರಲಿ’ ಶ್ರೀ ರಾಮ್ ಸಂದರ್ಶನ

Govindaraj S — Fri, 09 Oct 2026 08:00:37 +0530

ಆರ್. ಕೇಶವಮೂರ್ತಿ

* ‘ಪ್ರೇಮದ ಊರಲಿ’ ಯಶಸ್ಸು ನಿಮ್ಮ ಮನಸ್ಸಿನಲ್ಲಿ ಹುಟ್ಟಿಸಿದ ಮೊದಲ ಯೋಚನೆ ಏನು?

ನಟನಾಗಿ ನನಗೆ ಚಿತ್ರರಂಗದಲ್ಲಿ ಯಾವ ಸ್ಥಾನ, ಯಾವ ಜವಾಬ್ದಾರಿ ನಾನು ತಗೋಬೇಕಿತ್ತೋ ಅಂದುಕೊಳ್ಳುತ್ತಿದ್ನೋ ಕೊನೆಗೂ ಅದನ್ನು ‘ಪ್ರೇಮದ ಊರಲಿ’ ಸಿನಿಮಾ ಸಕ್ಸಸ್‌ ಕೊಟ್ಟಿತು.

* ‘ಪ್ರೇಮದ ಊರಲಿ’ ಬ್ರೇಕ್ ಕೊಟ್ಟ ಚಿತ್ರವೋ, ನಿಮ್ಮೊಳಗಿನ ನಟನನ್ನು ಪರಿಚಯಿಸಿದ ಸಿನಿಮಾನಾ?

ಎರಡೂ ಈ ಚಿತ್ರದಿಂದ ಆಗಿದೆ. ನಾನು ಈ ಹಿಂದೆ ನಾಲ್ಕೈದು ಚಿತ್ರಗಳಲ್ಲಿ ನಟಿಸಿದ್ದೇನೆ. ಆ ಸಿನಿಮಾಗಳಲ್ಲಿ ಜನ ನನ್ನ ನೋಡಿ ಹಾರೈಸುತ್ತಾ ಬಂದಿದ್ದಾರೆ. ಹಾಗೆ ಪ್ರೇಕ್ಷಕರ ಹಾರೈಕೆ ಪಡೆದುಕೊಳ್ಳುತ್ತಾ ‘ಪ್ರೇಮದ ಊರಲಿ’ ಚಿತ್ರದವರೆಗೂ ಬಂದಿರುವೆ.

* ‘ಹೊಸ ನಟ’ ಎಂದೇ ನೋಡುತ್ತಿದ್ದಾರಾ, ಅಥವಾ ‘ನಾಯಕ’ ಎಂದು ಗುರುತಿಸುವ ಹಂತಕ್ಕೆ ಬಂದಿದ್ದೀರಾ?

ನಾನು ಹೊಸ ನಟನೋ, ನಾಯಕನೋ ಅನ್ನೋದು ಪ್ರೇಕ್ಷಕರು ಹೇಳಬೇಕು. ಆದರೆ, ನನಗೆ ಪ್ರತಿ ಚಿತ್ರವೂ ಹೊಸದೆ. ಆದರೆ, ‘ಕನ್ನಡಕ್ಕೆ ಹೊಸ ಹೀರೋ ಬೇಕು ಗುರು’ ಎನ್ನುವವರಿಗೆ ನಾನು ನಾಯಕನೇ.

* ಯಶಸ್ಸನ್ನು ನೀವು ನಿರೀಕ್ಷಿಸಿದ್ದೀರಾ? ಅಥವಾ ಪ್ರೇಕ್ಷಕರ ಪ್ರತಿಕ್ರಿಯೆ ಅಚ್ಚರಿಗೊಳಿಸಿದೆಯಾ?

ಪ್ರತಿ ಚಿತ್ರದಲ್ಲಿ ನಾನು ಯಶಸ್ಸು ನಿರೀಕ್ಷೆ ಮಾಡುತ್ತಿದ್ದೆ. ಆದರೆ, ಈ ಚಿತ್ರದ ಬಿಡುಗಡೆ ದಿನ ಸಿಂಗಲ್‌ ಸ್ಕ್ರೀನ್‌ ಥಿಯೇಟರ್‌ನ ಮೆಟ್ಟಿಲುಗಳ ಮೇಲೆ ನಿಂತು, ನನ್ನ ಸಿನಿಮಾ ನೋಡಲು ಜನ ಇಲ್ಲಿ ನಿಲ್ಲುವಂತಾಗಲಿ ಎಂದು ಪ್ರಾರ್ಥಿಸಿದ್ದೆ. ನನ್ನ ಪ್ರಾರ್ಥನೆಯನ್ನು ಪ್ರೇಕ್ಷಕರು ದೊಡ್ಡದಾಗಿ ನಿಜವಾಗಿಸಿದ್ದಾರೆ. ಇಷ್ಟು ದೊಡ್ಡ ಸಕ್ಸಸ್‌ ನಾನು ನಿರೀಕ್ಷೆ ಮಾಡಿರಲಿಲ್ಲ.

* ಚಿತ್ರ ನೋಡಿದ ನಂತರ ಪ್ರೇಕ್ಷಕರು, ಆಪ್ತರು, ಅಭಿಮಾನಿಗಳು ನಿಮಗೆ ಹೇಳಿದ್ದೇನು?

ಕೆಲವರು ಅವರ ಮೊಬೈಲ್‌ಗಳಲ್ಲಿ ನನ್ನ ಹೆಸರನ್ನು ‘ಹೀರೋ’ ಅಂತ ಸೇವ್‌ ಮಾಡಿಕೊಂಡಿದ್ದೇವೆಂದು ತೋರಿಸುತ್ತಿದ್ದಾರೆ. ಈ ಹಿಂದೆ ಜಸ್ಟ್‌ ‘ಶ್ರೀ’ ಅಂತ ಸೇವ್‌ ಮಾಡಿಕೊಂಡಿದ್ದವರು, ‘ನಮ್ಮ ನಮಸ್ಸಿನಲ್ಲಿ ನಿಮಗೆ ಜಾಗ ಕೊಟ್ಟಿದ್ದೇವೆ’ ಎಂದು ತೋರಿಸುತ್ತಿದ್ದಾರೆ.

* ನಿಮ್ಮ ವೃತ್ತಿ ಜೀವನದಲ್ಲಿ ‘ಪ್ರೇಮದ ಊರಲಿ’ ಚಿತ್ರಕ್ಕೆ ಯಾವ ಸ್ಥಾನವಿದೆ?

ಅಗ್ರ ಸ್ಥಾನವಿದೆ. ಯಾವತ್ತಿಗೂ ಈ ಸಿನಿಮಾ ನಂಬರ್‌ 1 ಆಗಿರುತ್ತದೆ. ಯಾಕೆಂದರೆ ಈ ಸಿನಿಮಾ ನಂತರ ಶ್ರೀ, ಶ್ರೀ ಮಹದೇವ್‌, ಶ್ರೀ ರಾಮ್‌ ಯಾರು ಅಂತ ಹುಡುಕುತ್ತಿದ್ದಾರೆ.

* ಈ ಚಿತ್ರದ ಸಂತೋಷ್‌ ಪಾತ್ರದಲ್ಲಿ ನಿಮ್ಮನ್ನು ಹೆಚ್ಚು ಆಕರ್ಷಿಸಿದ ಅಂಶ ಯಾವುದು?

ಸ್ಕ್ರೀನ್‌ ಮೇಲೆ ಬಿಲ್ಡಪ್‌, ಫೈಟ್‌ಗಳು ಇಲ್ಲದೆ ಪ್ರೇಕ್ಷಕರ ಮನಸ್ಸಿನಲ್ಲಿ ಹೀರೋ ಆಗುವ ಎಲ್ಲ ಲಕ್ಷಗಳು ಸಂತೋಷ್‌ ಪಾತ್ರಕ್ಕಿತ್ತು. ಅದೇ ನನ್ನ ಆಕರ್ಷಿಸಿದ್ದು.

* ಈ ಪಾತ್ರಕ್ಕಾಗಿ ನಿಮ್ಮಲ್ಲಿ ನೀವು ಮಾಡಿಕೊಂಡ ವಿಶೇಷ ಬದಲಾವಣೆ ಏನು?

ನಾನು ರೈತನಾಗಲು ಹೊರಟಿದ್ದು. ಯಾಕೆಂದರೆ ನಾನು ಯಾವ ಆ್ಯಂಗಲ್‌ನಲ್ಲೂ ರೈತನ ರೀತಿ ಕಾಣಲ್ಲ. ಆದರೆ, ತೆರೆ ಮೇಲೆ ರೈತನ ಪಾತ್ರ ಮಾಡಬೇಕಿತ್ತು. ಅದಕ್ಕೆ ಪೂರ್ವ ತಯಾರಿ ಬೇಕಿತ್ತು. ಯಾಕೆಂದರೆ ಬೇರೆ ಪಾತ್ರಗಳಂತೆ ರೈತನ ಪಾತ್ರವನ್ನು ಇಮಿಟೇಟ್ ಮಾಡಕ್ಕಾಗಲ್ಲ. ಹಾಗೆ ಮಾಡಿದರೆ ರೈತ ಎನ್ನುವ ಹೆಸರಿಗೆ ಮೋಸ ಮಾಡಿದಂತೆ. ಹೀಗಾಗಿ ನಾನು ಹಳ್ಳಿಗೆ ಹೋಗಿ ಒಂದು ತಿಂಗಳು ವ್ಯವಸಾಯ ಮಾಡುತ್ತಾ, ಹಸು- ಎತ್ತುಗಳನ್ನು ಮೇಯಿಸುತ್ತಾ, ಉಳಿಮೆ ಮಾಡುತ್ತಾ ಪಕ್ಕಾ ರೈತನಾಗಿದ್ದೆ. ಅದಕ್ಕೆ ಸಂತೋಷ್‌ ಪಾತ್ರವು ತೆರೆ ಮೇಲೆ ಅಷ್ಟು ಆಪ್ತವಾಗಿ, ಮುಗ್ಧತೆಯಿಂದ ಮೂಡಿ ಬಂದಿರುವುದು.

* ‘ಈ ಒಂದು ದೃಶ್ಯ ಚೆನ್ನಾಗಿ ಬಂದರೆ ಸಾಕು, ಪ್ರೇಕ್ಷಕರು ನನ್ನ ಪಾತ್ರ ಒಪ್ಪಿಕೊಳ್ಳುತ್ತಾರೆ’ ಎಂದು ನಿಮಗೆ ಅನಿಸಿದ ದೃಶ್ಯ ಯಾವುದಾದರೂ ಇದೆಯೇ?

ಕತೆ ಕೇಳಿದಾಗ ಎಲ್ಲಾ ಸೀನ್‌, ಲೈನ್‌ ಮಹತ್ವ ಅನಿಸಿತು. ಸಂತೋಷ್‌ ಪಾತ್ರ ಹೋಗ್ತಾ ಹೋಗ್ತಾ ಜನರೇ ಅಪ್ಪಿಕೊಳ್ಳುತ್ತಾರೆ ಎನ್ನುವ ಅಂದಾಜು ಇತ್ತು. ಒಂದು ರೀತಿ ಎ.ಆರ್‌.ರೆಹಮಾನ್‌ ಹಾಡುಗಳನ್ನು ಕೇಳ್ತಾ ಕೇಳ್ತಾ ಮನಸೋಲುವಂತೆ.

* ಪ್ರೇಮಕಥೆಗಳು ಅಪರಿಚಿತವಲ್ಲ. ‘ಪ್ರೇಮದ ಊರಲಿ’ ಕನೆಕ್ಟ್ ಆಗಲು ಕಾರಣವೇನೆಂದು ನೀವು ಭಾವಿಸುತ್ತೀರಿ?

ಇದು ಪ್ರೂರ್‌ ಡೈರೆಕ್ಟ್‌ ಪ್ರೆಸೆಂಟ್‌ ಕತೆ. ನಮ್ಮೆಲ್ಲರ ಬಹುದೊಡ್ಡ ಎಮೋಷನ್‌ ಎಂದರೆ ಲವ್‌. ಏನೇ ಜಗಳ ಆಡಿದರೂ ಮನಸ್ಸಿನ ಮೂಲೆಯಲ್ಲಿ ಪ್ರೀತಿ ಅನ್ನೋದು ಇರುತ್ತದೆ. ಈ ಚಿತ್ರದ ಹೃದಯ ಕೂಡ ಅದೇ. ಈ ಹಾರ್ಟ್‌ ಆಫ್‌ ಸೋಲ್‌ ಕಾರಣಕ್ಕೆ ಸಿನಿಮಾ ಪ್ರೇಕ್ಷಕರಿಗೆ ಕನೆಕ್ಟ್‌ ಆಗುತ್ತಿದೆ.

* ಆರಂಭದ ದಿನಗಳಲ್ಲಿ ನೀವು ಎದುರಿಸಿದ ದೊಡ್ಡ ಸವಾಲು, ಸಂಕಷ್ಟಗಳೇನು?

ಆರಂಭದ ದಿನಗಳ ನನ್ನ ಹೋರಾಟ ಸವಾಲು, ಸಂಕಷ್ಟಗಳು ಅಂತ ನಾನು ಭಾವಿಸಲ್ಲ. ಬಹುಶಃ ಆ ಸವಾಲುಗಳನ್ನು ನೋಡದಿದ್ದರೆ ಇವತ್ತಿನ ಸಕ್ಸಸ್‌ ಬೆಲೆ ಗೊತ್ತಾಗುತ್ತಿರಲಿಲ್ಲ. ನಾನು ಏನೂ ಅಲ್ಲ. ನಾನು ಗ್ರೇಟ್‌ ಅಲ್ಲ ಅಂದುಕೊಂಡೇ ಚಿತ್ರರಂಗಕ್ಕೆ ಬಂದವನು. ಹೀಗಾಗಿ ಯಾವ ಹಿನ್ನೆಲೆ ಇಲ್ಲದಿರುವವನಿಗೆ ಯಾವುದು ಸವಾಲು, ಕಷ್ಟ ಅನಿಸಲ್ಲ.

* ಕನ್ನಡದ ಯಾವ ನಟನ ಸಿನಿಮಾಗಳನ್ನು ನೋಡಿ ‘ನಾನೂ ಹೀಗೆ ಮಾಡಬೇಕು’ ಎಂದುಕೊಳ್ಳುತ್ತೀರಿ?

ಡಾ ರಾಜ್‌ಕುಮಾರ್‌. ಹಾಗಂತ ನಾನು ಅವರಂತೆ ಆಗಲು ಸಾಧ್ಯವಿಲ್ಲ. ಆದರೆ ಅವರೆಂದರೆ ಪ್ರೀತಿ, ಅಭಿಮಾನ, ಪ್ರೇರಣೆ- ಸ್ಫೂರ್ತಿ ಎಲ್ಲವೂ ಹೌದು.

* ಈ ಯಶಸ್ಸಿನ ಜೊತೆಗೆ ಟೀಕೆಗಳೂ ಬಂದಿದ್ದರೆ ಅವುಗಳನ್ನು ನೀವು ಹೇಗೆ ಸ್ವೀಕರಿಸುತ್ತೀರಿ?

ನನ್ನ ಬಗ್ಗೆ ನಾನೇ ಟೀಕೆ ಮಾಡಿಕೊಂಡು ನಾನೇ ನಗುತ್ತಿರುತ್ತೇನೆ. ಹೀಗಾಗಿ ಬೇರೆ ಟೀಕೆಗಳು ನನಗೆ ದೊಡ್ಡದು ಅನಿಸಲ್ಲ. ಯಾಕೆಂದರೆ ನಾನು ಗ್ರೇಟ್‌ ಅಲ್ಲ. ಪರ್‌ಫೆಕ್ಟು ಅಲ್ಲ. ಕಲಿಯುತ್ತಾ ಹೆಜ್ಜೆಗಳನ್ನು ಹಾಕುತ್ತಿದ್ದೇನೆ.

* ಚಿತ್ರವನ್ನು ನೀವು ಮತ್ತೆ ನೋಡಿದಾಗ ‘ಈ ದೃಶ್ಯವನ್ನು ಇನ್ನೂ ಚೆನ್ನಾಗಿ ಮಾಡಬಹುದಿತ್ತು’ ಎಂದು ಅನಿಸಿದೆಯೇ?

ಕ್ಲೈಮ್ಯಾಕ್ಸ್‌ ಸೀನ್‌.

* ಮುಂದಿನ ಕಥೆ ಆಯ್ಕೆ ಮಾಡುವಾಗ ಯಾವ ಅಂಶಗಳಿಗೆ ಹೆಚ್ಚು ಆದ್ಯತೆ ನೀಡುತ್ತೀರಿ?

ಎಲ್ಲಾ ಅಂಶಗಳ ಮೇಲೆ ಗಮನ ಹರಿಸಬೇಕು. ಎಲ್ಲಕ್ಕಿಂತ ಮುಖ್ಯವಾಗಿ ನನಗೆ ಈಗ ನಿಜವಾಗಲೂ ಗೈಡ್‌ ಲೈನ್ಸ್‌.

* ಸಿನಿಮಾ ಕ್ಷೇತ್ರಕ್ಕೆ ಬರದೇ ಇದ್ದಿದ್ದರೆ ಇಂದು ಏನಾಗಿರುತ್ತಿದ್ದಿರಿ?

ಬಹುಶಃ ಪತ್ರಕರ್ತನಾಗಿರುತ್ತಿದ್ದೆ. ಯಾಕೆಂದರೆ ಪತ್ರಿಕೆಗಳಲ್ಲಿ ಬರುತ್ತಿದ್ದ ಲೇಖನಗಳನ್ನು ಹೆಚ್ಚು ಓದುತ್ತಿದ್ದೆ. ಈ ಓದಿನ ಆಸಕ್ತಿ ನನ್ನ ಪತ್ರಕರ್ತನನ್ನಾಗಿ ಮಾಡುವ ಸಾಧ್ಯತೆಗಳಿದ್ದವು.

* ನಿಮ್ಮ ಯಶಸ್ಸಿನಲ್ಲಿ ಕುಟುಂಬದ ಪಾತ್ರ ಎಷ್ಟು?

ನನ್ನ ತಂದೆ, ತಾಯಿ, ತಂಗಿ ಹೀಗೆ ನನ್ನ ಕುಟುಂಬದ ಪ್ರತಿಯೊಬ್ಬರು ನನ್ನ ಸಾಕಿದ್ದಾರೆ. ಮನೆಯ ಗಂಡು ಮಗನಾಗಿ ಏನನ್ನೂ ನಾನು ಮನೆಗೆ ಕೊಡುವ ಸ್ಥಿತಿಯಲ್ಲಿ ಇಲ್ಲವಲ್ಲ ಎನ್ನುವ ಗಿಲ್ಟ್‌ನಲ್ಲಿದ್ದಾಗಲೂ ಅವರು ನನಗೆ ಬೆನ್ನೆಲುಬಾಗಿದ್ದಾರೆ. ಮನೆಯವರ ಪ್ರೋತ್ಸಾಹ ಇಲ್ಲದೆ ಹೋಗಿದ್ದರೆ ಶ್ರೀ, ಶ್ರೀ ರಾಮ್‌, ಶ್ರೀ ಮಹದೇವ್‌... ಈ ಯಾವ ಹೆಸರು ಯಾರಿಗೂ ಗೊತ್ತಾಗುತ್ತಿರಲಿಲ್ಲ.

ಸಿನಿಮಾ ರೇಸ್‌ನಿಂದ ಶ್ರದ್ಧಾ ಶ್ರೀನಾಥ್ ದೂರ.. 'ನೆನಪಿನಲ್ಲಿ ಉಳಿಯಬೇಕು' ಎಂದಿದ್ಯಾಕೆ U ಟರ್ನ್‌ ನಟಿ!

Govindaraj S — Sun, 20 Sep 2026 16:53:24 +0530

ಕರಾವಳಿಯಲ್ಲಿ ಕೆಲ ದಿನಗಳನ್ನು ಕಳೆಯುತ್ತಿರುವ ನಟಿ ಶ್ರದ್ಧಾ ಶ್ರೀನಾಥ್ ಅಲ್ಲಿನ ಸೊಬಗನ್ನು ಮನಸಾರೆ ಆಸ್ವಾದಿಸುತ್ತಿದ್ದಾರೆ. ತುಪ್ಪದ ರೋಸ್ಟ್, ಬೆಚ್ಚಗಿನ ಕರಾವಳಿ ಬಿಸಿಲು, ಶೂಟಿಂಗ್ ನಡುವೆಯೇ ದೇವಸ್ಥಾನಗಳಿಗೆ ಭೇಟಿ... ಹೀಗೆ ಹಲವು ಅನುಭವಗಳನ್ನು ಸವಿಯುತ್ತಿದ್ದಾರೆ. ತಮ್ಮ ಮುಂಬರುವ ತೆಲುಗು ಸಿನಿಮಾದ ಶೂಟಿಂಗ್‌ಗಾಗಿ ಮಂಗಳೂರಿಗೆ ಬಂದಿರುವ ಶ್ರದ್ಧಾ, ಬರೋಬ್ಬರಿ ಹತ್ತು ವರ್ಷಗಳ ಬಳಿಕ ಮತ್ತೆ ಮಂಗಳೂರಿಗೆ ಮರಳಿದ್ದಾರೆ.

ಇಲ್ಲಿನ ಪರಿಸರದಲ್ಲಿ ತಮ್ಮದೇ ಮನೆಯ ಭಾವವನ್ನು ಮತ್ತೊಮ್ಮೆ ಕಂಡುಕೊಂಡಿದ್ದಾರೆ. ಸಿನಿಮಾ ಇಂಡಸ್ಟ್ರಿಯಲ್ಲಿ ಹತ್ತು ವರ್ಷಗಳನ್ನು ಪೂರೈಸಿರುವ ಶ್ರದ್ಧಾ ಶ್ರೀನಾಥ್, ತಮ್ಮ ವೃತ್ತಿಜೀವನ, ತಾವು ಆಯ್ಕೆ ಮಾಡಿಕೊಳ್ಳುವ ಪಾತ್ರಗಳು ಹಾಗೂ ರೇಸ್‌ನಿಂದ ಉದ್ದೇಶಪೂರ್ವಕವಾಗಿ ದೂರ ಉಳಿಯುತ್ತಿರುವ ಕಾರಣದ ಬಗ್ಗೆ 'ಬೆಂಗಳೂರು ಟೈಮ್ಸ್' ಜೊತೆ ಮಾತನಾಡಿದ್ದಾರೆ.

'ಯಾವ ರೀತಿಯ ಪಾತ್ರಗಳನ್ನು ಮಾಡಬೇಕು ಎಂಬುದು ಸ್ಪಷ್ಟವಾಗಿದೆ'

ಸಿನಿಮಾ ಕ್ಷೇತ್ರಕ್ಕೆ ಬಂದು ಒಂದು ದಶಕಕ್ಕೂ ಹೆಚ್ಚು ಸಮಯ ಕಳೆದಿರುವ ಶ್ರದ್ಧಾ ಶ್ರೀನಾಥ್, ತಮ್ಮ ಆದ್ಯತೆಗಳು ಈಗ ಬದಲಾಗಿವೆ ಎನ್ನುತ್ತಾರೆ. ನೀವು ಸಿನಿಮಾಗಳಿಗೆ ಹೊಸದಾಗಿ ಬಂದಾಗ ನಿಮ್ಮ ಆದ್ಯತೆಗಳೇ ಬೇರೆ ಇರುತ್ತವೆ. ಮೊದಲು ಇಂಡಸ್ಟ್ರಿಯಲ್ಲಿ ನಿಮ್ಮದೇ ಆದ ಸ್ಥಾನವನ್ನು ಗಟ್ಟಿಗೊಳಿಸಿಕೊಳ್ಳಬೇಕು ಎಂಬ ಆಸೆ ಇರುತ್ತದೆ. ಆದರೆ ಈಗ ನಾನು ಯಾವುದೇ ಪಾತ್ರವನ್ನು ನೋಡುವ ಮೊದಲು ಆ ಸಿನಿಮಾದ ತಂಡವನ್ನು ಗಮನಿಸುತ್ತೇನೆ ಎಂದು ಹೇಳಿದ್ದಾರೆ. ನಾನು ಕೆಲಸ ಮಾಡಲಿರುವ ಜನರೊಂದಿಗೆ ಒಂದೇ ರೀತಿಯ ಆಲೋಚನೆ ಮತ್ತು ಮನಸ್ಥಿತಿ ಹೊಂದಿರಬೇಕು.

ಕೆಲವೊಮ್ಮೆ ವ್ಯಕ್ತಿಗಳ ಬಗ್ಗೆ ನಿಮ್ಮ ಒಳಮನಸ್ಸು ಸಾಕಷ್ಟು ಹೇಳುತ್ತದೆ. ನಾನು ಆ ಒಳಗಿನ ಧ್ವನಿಯನ್ನು ನಂಬುತ್ತೇನೆ. ಒಂದು ಸಿನಿಮಾದ ಯಶಸ್ಸಿನಲ್ಲಿ ಇಡೀ ತಂಡದ ಪಾತ್ರವಿದೆ ಎಂಬುದನ್ನು ನಾನು ಗಾಢವಾಗಿ ನಂಬುತ್ತೇನೆ. ಸಿನಿಮಾದಲ್ಲಿ ಕೆಲವು ಅಭಿನಯಗಳು ನಿರೀಕ್ಷಿತ ಮಟ್ಟದಲ್ಲಿಲ್ಲದಿದ್ದರೂ, ಅತ್ಯುತ್ತಮ ತಂಡವಿದ್ದರೆ ಅದು ಸಿನಿಮಾವನ್ನು ಉಳಿಸಬಹುದು. ಆದರೆ ತಂಡವೇ ದುರ್ಬಲವಾಗಿದ್ದು, ಅಭಿನಯ ಚೆನ್ನಾಗಿದ್ದರೂ ಆ ಸಿನಿಮಾವನ್ನು ಉಳಿಸಲು ಸಾಧ್ಯವಿಲ್ಲ ಎಂದು ಶ್ರದ್ಧಾ ಹೇಳಿದ್ದಾರೆ. ಇದೇ ರೀತಿಯ ಒಳನೋಟ ಈಗ ಅವರು ಆಯ್ಕೆ ಮಾಡಿಕೊಳ್ಳುವ ಪಾತ್ರಗಳ ಮೇಲೂ ಪರಿಣಾಮ ಬೀರುತ್ತಿದೆ.

'ನಿಮ್ಮ ಅಭಿರುಚಿ ಬೆಳೆದಂತೆ ನೀವು ಆಯ್ಕೆ ಮಾಡುವ ಸಿನಿಮಾಗಳೂ ಬದಲಾಗುತ್ತವೆ'

ಶ್ರದ್ಧಾ ಶ್ರೀನಾಥ್ ಅವರ ಸೋಶಿಯಲ್ ಮೀಡಿಯಾ ಬಯೋದಲ್ಲಿರುವ 'actress, not heroine' ಎಂಬ ಸಾಲು ಅವರ ವೃತ್ತಿಜೀವನದ ದೃಷ್ಟಿಕೋನವನ್ನು ಬಹಳ ಚೆನ್ನಾಗಿ ಹೇಳುತ್ತದೆ. ನಾನು ಆರಂಭದಲ್ಲಿ ಹಲವು ಭಾಷೆಗಳ ಕಮರ್ಷಿಯಲ್ ಸಿನಿಮಾಗಳಲ್ಲಿ ನಟಿಸಿದ್ದೇನೆ. ಆದರೆ ಒಂದು ಹಂತದಲ್ಲಿ ನಾನು ಮಾಡುತ್ತಿದ್ದ ಕೆಲವು ಪಾತ್ರಗಳು ಕೃತಕವಾಗಿ ಅನಿಸತೊಡಗಿದವು. ಕೆಲವು ಸಿನಿಮಾಗಳಲ್ಲಿ ನಾನು ಹೇಳುತ್ತಿದ್ದ ಸಂಭಾಷಣೆಗಳ ಬಗ್ಗೆಯೂ ನನಗೆ ಸಂಪೂರ್ಣ ಒಪ್ಪಿಗೆ ಇರಲಿಲ್ಲ ಎಂದು ಅವರು ನೆನಪಿಸಿಕೊಂಡಿದ್ದಾರೆ.

ಆದರೂ ನಾನು ಪ್ರಯೋಗಗಳಿಗೆ ಯಾವತ್ತೂ ತೆರೆದಿದ್ದೇನೆ. ಯಾವುದಾದರೂ ಪಾತ್ರ ವಿಭಿನ್ನವಾಗಿದೆ ಅಥವಾ ಒಂದು ನಿರ್ದಿಷ್ಟ ಮಾದರಿಗೆ ಹೊಂದಿಕೆಯಾಗುವುದಿಲ್ಲ ಎಂಬ ಕಾರಣಕ್ಕೆ ಅದನ್ನು ನಾನು ಮಾಡುವುದಿಲ್ಲ ಎಂದಲ್ಲ. ಆದರೆ ಈಗ ನನ್ನ ಸಾಮರ್ಥ್ಯಗಳ ಬಗ್ಗೆ ನನಗೆ ಹೆಚ್ಚು ಸ್ಪಷ್ಟತೆ ಇದೆ. ನಾನು ಸಿನಿಮಾ ಒಪ್ಪಿಕೊಂಡಾಗ ಯಾವ ಉದ್ದೇಶದಿಂದ ಹೋಗುತ್ತೇನೋ, ಅದನ್ನೇ ಮಾಡಲು ಬಯಸುತ್ತೇನೆ. ನನ್ನ ಸಾಮರ್ಥ್ಯಕ್ಕೆ ತಕ್ಕಂತೆ ಪಾತ್ರವನ್ನು ನಿರ್ವಹಿಸಲು ಇಷ್ಟಪಡುತ್ತೇನೆ ಎನ್ನುತ್ತಾರೆ ಶ್ರದ್ಧಾ.

'ಹೊಸ ಜಾಗಗಳಲ್ಲಿ ಶೂಟಿಂಗ್ ಮಾಡುವುದು ನನಗೆ ತುಂಬಾ ಇಷ್ಟ'

ಹೈದರಾಬಾದ್ ಮತ್ತು ಚೆನ್ನೈ ಈಗ ನನಗೆ ಎರಡನೇ ಮನೆಯಂತಾಗಿವೆ. ಅಲ್ಲಿ ಸಾಕಷ್ಟು ಕೆಲಸ ಮಾಡುತ್ತೇನೆ. ಆದರೆ ಹೊಸ ಸ್ಥಳಕ್ಕೆ ಹೋದಾಗ ಸಿಗುವ ಅನುಭವವೇ ಬೇರೆ. ಅದು ತುಂಬಾ ಉತ್ಸಾಹ ನೀಡುತ್ತದೆ ಎಂದು ಶ್ರದ್ಧಾ ಹೇಳಿದ್ದಾರೆ. ಹತ್ತು ವರ್ಷಗಳ ಹಿಂದೆ 'ಉರ್ವಿ' ಸಿನಿಮಾದ ಶೂಟಿಂಗ್‌ಗಾಗಿ ಮಂಗಳೂರಿಗೆ ಬಂದಿದ್ದನ್ನು ಅವರು ನೆನಪಿಸಿಕೊಂಡಿದ್ದಾರೆ. ಮಂಗಳೂರಿಗೆ ಬರುತ್ತಿದ್ದಾಗ ನನಗೆ ತುಂಬಾ ಖುಷಿಯಾಗಿತ್ತು. ಇಡೀ ಪ್ರಯಾಣದ ವೇಳೆ ಕಿಟಕಿಯಿಂದ ಹೊರಗೆ ನೋಡುತ್ತಲೇ ಇದ್ದೆ.

ಹಸಿರು ಪ್ರದೇಶಗಳು ಕ್ರಮೇಣ ಹೆಚ್ಚಾಗುತ್ತಾ ಹೋಗುತ್ತಿದ್ದವು. ಮಂಗಳೂರಿಗೆ ಬಂದಾಗ ಪುಟ್ಟ ಪುಟ್ಟ ತೊರೆಗಳನ್ನು ನೋಡಿದ್ದು ಅದ್ಭುತ ಅನುಭವವಾಗಿತ್ತು. ಹೋಟೆಲ್‌ನಿಂದ ಹೊರಗೆ ಬಂದ ತಕ್ಷಣ ಕಡಲತೀರಕ್ಕೆ ತಲುಪಬಹುದಾದ ಅನುಭವವನ್ನು ಪದಗಳಲ್ಲಿ ವಿವರಿಸಲು ಸಾಧ್ಯವಿಲ್ಲ ಎಂದು ಅವರು ಹೇಳಿದ್ದಾರೆ. ಮಂಗಳೂರು ಕೇವಲ ಸುಂದರವಾದ ಶೂಟಿಂಗ್ ಲೊಕೇಶನ್ ಮಾತ್ರವಲ್ಲ, ತಮ್ಮ ವೃತ್ತಿಜೀವನದಲ್ಲಿ ತಾವು ಎಷ್ಟು ಬದಲಾಗಿದ್ದೇವೆ ಎಂಬುದನ್ನು ಅರಿತುಕೊಳ್ಳುವ ಅವಕಾಶವನ್ನೂ ಶ್ರದ್ಧಾಗೆ ನೀಡಿದೆ.

ಕಲಾವಿದೆಯಾಗಿ ಹೊಸ ಸ್ಥಳದಲ್ಲಿ ಶೂಟಿಂಗ್ ಮಾಡುವುದು ಯಾವಾಗಲೂ ಒಳ್ಳೆಯ ಪ್ರೇರಣೆ ನೀಡುತ್ತದೆ. ನಾವು ಕಾಪು ಲೈಟ್‌ಹೌಸ್, ಕಡಲತೀರಗಳು ಮತ್ತು ಸುತ್ತಮುತ್ತಲಿನ ಹಸಿರು ಪ್ರದೇಶಗಳಲ್ಲಿ ಶೂಟಿಂಗ್ ಮಾಡಿದ್ದೇವೆ. ಇವೆಲ್ಲವೂ ತುಂಬಾ ಸಾಮಾನ್ಯವಾಗಿ ಕಾಣಬಹುದು. ಆದರೆ ಇವು ನಮ್ಮ ಇಂದ್ರಿಯಗಳ ಮೇಲೆ ವಿಶೇಷ ಪರಿಣಾಮ ಬೀರುತ್ತವೆ. ಅದು ನನ್ನ ದೃಶ್ಯಗಳಲ್ಲೂ ಖಂಡಿತವಾಗಿ ಪ್ರತಿಫಲಿಸುತ್ತದೆ ಎಂದು ನನಗೆ ಅನಿಸುತ್ತದೆ ಎಂದು ಶ್ರದ್ಧಾ ನಗುತ್ತಾ ಹೇಳಿದ್ದಾರೆ.

'ಮಹಿಳಾ ಪ್ರಧಾನ ಸಿನಿಮಾ ಎಂದು ಪ್ರತ್ಯೇಕವಾಗಿ ಹೇಳುವುದೇಕೆ?'

ಒಂದು ಸಿನಿಮಾವನ್ನು ಮಹಿಳಾ ಪ್ರಧಾನ ಅಥವಾ ಮಹಿಳಾ ಕೇಂದ್ರಿತ ಸಿನಿಮಾ ಎಂದು ಕರೆಯುವುದರಿಂದಲೇ ಅದರ ಮಹತ್ವ ನಿರ್ಧಾರವಾಗುತ್ತದೆ ಎಂದು ನನಗೆ ಅನಿಸುವುದಿಲ್ಲ. ನನಗೆ ಮುಖ್ಯವಾಗಿರುವುದು ಆ ಪಾತ್ರದಲ್ಲಿ ಅಭಿನಯಕ್ಕೆ ಎಷ್ಟು ಅವಕಾಶವಿದೆ ಎಂಬುದು ಎಂದು ಶ್ರದ್ಧಾ ಹೇಳಿದ್ದಾರೆ. ನಾನು ಸಿನಿಮಾವನ್ನು ಸಂಪೂರ್ಣವಾಗಿ ಆವರಿಸಬೇಕು ಅಥವಾ ಅದರಲ್ಲೇ ಅತ್ಯಂತ ಪ್ರಮುಖ ವ್ಯಕ್ತಿಯಾಗಿರಬೇಕು ಎಂದು ಬಯಸುವುದಿಲ್ಲ.

ಚೆನ್ನಾಗಿ ಬರೆಯಲಾಗಿರುವ ಸಣ್ಣ ಪಾತ್ರವೂ ಅರ್ಥಪೂರ್ಣವಾಗಿರಬಹುದು. ಸಿನಿಮಾ ಮಹಿಳಾ ಪ್ರಧಾನ ಎಂಬ ಲೇಬಲ್ ಹೊಂದಿದೆಯೇ ಇಲ್ಲವೇ ಎಂಬುದಕ್ಕಿಂತ ಅದು ನನಗೆ ಹೆಚ್ಚು ಮುಖ್ಯ ಎನ್ನುತ್ತಾರೆ. ನಾನು ಆ ಸಿನಿಮಾದಲ್ಲಿ ನನ್ನ ಸ್ಥಾನವನ್ನು ಹಾಗೂ ನನ್ನ ಸಂಭಾವನೆಯನ್ನು ಸಂಪಾದಿಸಿದ್ದೇನೆ ಎಂಬ ಭಾವನೆಯೊಂದಿಗೆ ಮನೆಗೆ ಮರಳಬೇಕು ಎಂದು ಶ್ರದ್ಧಾ ಸ್ಪಷ್ಟಪಡಿಸಿದ್ದಾರೆ.

'ಹಲವು ವಿಷಯಗಳನ್ನು ಈಗ ಅರಿತುಕೊಂಡಿದ್ದೇನೆ'

ವೃತ್ತಿಜೀವನದ ಅನುಭವದ ಜೊತೆಗೆ ತಮ್ಮ ಬಗ್ಗೆ ತಮಗೇ ಹೊಸ ಅರಿವು ಮೂಡಿದೆ ಎಂದು ಶ್ರದ್ಧಾ ಹೇಳುತ್ತಾರೆ. ಕೆಲವೊಮ್ಮೆ ನಾನು ನನ್ನನ್ನೇ ತುಂಬಾ ಕಡಿಮೆ ಅಂದಾಜು ಮಾಡಿಕೊಳ್ಳುತ್ತೇನೆ ಎಂಬುದು ನನಗೆ ಈಗ ಅರ್ಥವಾಗಿದೆ. ವರ್ಷಗಳಲ್ಲಿ ನಾನು ಸಾಧಿಸಿರುವುದನ್ನು ನಿಲ್ಲಿಸಿ ಮೆಚ್ಚಿಕೊಳ್ಳುವ ಅಭ್ಯಾಸ ನನಗಿರಲಿಲ್ಲ. ಆದರೆ ಈಗ ನಿಧಾನವಾಗಿ ಅದನ್ನು ಒಪ್ಪಿಕೊಳ್ಳಲು ಮತ್ತು ನನ್ನ ಸಾಧನೆಗಳಿಗೆ ನಾನೇ ಕ್ರೆಡಿಟ್ ನೀಡಲು ಕಲಿಯುತ್ತಿದ್ದೇನೆ ಎಂದು ಹೇಳಿದ್ದಾರೆ.

ನಾನು ಸ್ಟಂಟ್ಸ್ ಮಾಡುವುದರಲ್ಲಿ ನಿಜಕ್ಕೂ ಚೆನ್ನಾಗಿದ್ದೇನೆ ಎಂಬುದೂ ನನಗೆ ಈಗ ಗೊತ್ತಾಗಿದೆ. ಎಷ್ಟೇ ಬೇಸರದ ದಿನವಾಗಿದ್ದರೂ ನನ್ನಲ್ಲಿ ಅಪಾರ ತಾಳ್ಮೆ ಮತ್ತು ಸಕಾರಾತ್ಮಕತೆ ಇದೆ. ಈ ಗುಣಗಳು ನನ್ನಲ್ಲಿವೆ ಎಂಬುದು ಈ ಹಿಂದೆ ನನಗೆ ಗೊತ್ತಿರಲಿಲ್ಲ ಎಂದು ಶ್ರದ್ಧಾ ಹೇಳಿದ್ದಾರೆ.

'ನೆನಪಿನಲ್ಲಿ ಉಳಿಯುವುದು ಮುಖ್ಯ'

ಇದಕ್ಕಿಂತ ಮುಖ್ಯವಾಗಿ, ತಮ್ಮ ವೃತ್ತಿಜೀವನವನ್ನು ಯಾವ ರೀತಿಯಲ್ಲಿ ಮುಂದುವರಿಸಬೇಕು ಎಂಬುದರ ಬಗ್ಗೆ ಈಗ ಶ್ರದ್ಧಾಗೆ ಸ್ಪಷ್ಟತೆ ಇದೆ. ನಾನು ಜೀವನಪೂರ್ತಿ ನಟಿಯಾಗಿ ಮುಂದುವರಿಯುವಂತೆ ನನ್ನ ವೃತ್ತಿಜೀವನವನ್ನು ನಿಧಾನವಾಗಿ ಸಾಗಿಸಲು ಬಯಸುತ್ತೇನೆ. ಹಾಗಾಗಿ ಉದ್ದೇಶಪೂರ್ವಕವಾಗಿಯೇ ಈ ರೇಸ್‌ನಿಂದ ದೂರ ಉಳಿಯಲು ನಿರ್ಧರಿಸಿದ್ದೇನೆ. ನನಗೆ ಯಾವಾಗಲೂ ಕಾಣಿಸಿಕೊಳ್ಳುತ್ತಿರಬೇಕು ಎಂಬುದು ಮುಖ್ಯವಲ್ಲ. ಜನರ ನೆನಪಿನಲ್ಲಿ ಉಳಿಯಬೇಕು ಎಂಬುದೇ ಮುಖ್ಯ ಎಂದು ಶ್ರದ್ಧಾ ಶ್ರೀನಾಥ್ ಹೇಳಿದ್ದಾರೆ.

'ನಾನು ಡಿಜಿಟಲ್ ಜಗತ್ತಿನ ಅನಲಾಗ್ ವ್ಯಕ್ತಿ': ಅಮೆರಿಕಾ ಅಮೆರಿಕಾ 2 ಕುರಿತು ನಿರೂಪ್ ಭಂಡಾರಿ ಸಂದರ್ಶನ

Govindaraj S — Thu, 10 Sep 2026 20:12:17 +0530

ನಟ ನಿರೂಪ್ ಭಂಡಾರಿಗೆ ಸಿನಿಮಾ ಹೊಸದೇನಲ್ಲ. ಅವರ ಪಾಲಿಗೆ ಸಿನಿಮಾ ಎಂಬುದು ಸಹೋದರ ಅನೂಪ್ ಭಂಡಾರಿ ಅವರೊಂದಿಗೆ ಮನೆಯಲ್ಲೇ ಆರಂಭವಾದ ಚರ್ಚೆಗಳಿಂದ ಬೆಳೆದ ಆಸಕ್ತಿ. ‘ರಂಗಿತರಂಗ’ ಸಿನಿಮಾ ಇವರಿಬ್ಬರನ್ನೂ ಚಿತ್ರರಂಗದಲ್ಲಿ ಗುರುತಿಸುವಂತೆ ಮಾಡುವ ಮುನ್ನವೇ, ಅವರ ಕನಸು ಸರಳವಾಗಿತ್ತು. ಒಳ್ಳೆಯ ಕಥೆ ಹೇಳಬೇಕು, ಆ ಕಥೆಯನ್ನು ಪ್ರೇಕ್ಷಕರ ಮುಂದೆ ತಲುಪಿಸಬೇಕು ಮತ್ತು ಜನರನ್ನು ಚಿತ್ರಮಂದಿರಕ್ಕೆ ಕರೆತರಬೇಕು.

ಅನೂಪ್ ಒಬ್ಬ ಅದ್ಭುತ ನಿರ್ದೇಶಕ ಎಂಬುದು ನನಗೆ ಗೊತ್ತಿತ್ತು. ಅವರು ಆ ಹಂತಕ್ಕೆ ತಲುಪಬೇಕು ಎಂಬುದು ನನ್ನ ಆಸೆಯಾಗಿತ್ತು. ಅಮೆರಿಕಾದಲ್ಲಿರುವ ಮೇಡಂ ಟುಸ್ಸಾಡ್ಸ್‌ಗೆ ಭೇಟಿ ನೀಡಿದ್ದಾಗ ಅಲ್ಲಿ ಆಸ್ಕರ್ ಪ್ರಶಸ್ತಿಯ ಪ್ರತಿಕೃತಿ ಇತ್ತು. ಅದನ್ನು ಖರೀದಿಸಿ ಅನೂಪ್‌ಗೆ ಉಡುಗೊರೆಯಾಗಿ ನೀಡಿದ್ದೆ. ಅದು ಅನೂಪ್‌ಗಾಗಿ ನಾನು ಕಂಡ ಕನಸು. ಅದೇ ಸಮಯದಲ್ಲಿ ನಾನೂ ಒಬ್ಬ ನಟನಾಗಬೇಕು ಎಂಬ ಆಸೆ ಹೊಂದಿದ್ದೆ ಎಂದು ನಿರೂಪ್ ತಮ್ಮ ಆರಂಭದ ದಿನಗಳನ್ನು ನೆನಪಿಸಿಕೊಳ್ಳುತ್ತಾರೆ.

ಅನೂಪ್ ಮತ್ತು ನಿರೂಪ್ ವರ್ಷಗಳ ಕಾಲ ಸಿನಿಮಾಗಳು ಹಾಗೂ ಸ್ಕ್ರಿಪ್ಟ್‌ಗಳ ಬಗ್ಗೆ ಚರ್ಚಿಸುತ್ತಿದ್ದರು. ಅನೂಪ್ ನಿರ್ದೇಶಿಸಿದ್ದ ಕಿರುಚಿತ್ರಗಳಲ್ಲೂ ನಿರೂಪ್ ಅಭಿನಯಿಸಿದ್ದರು. ನಾವು ಸಿನಿಮಾ ಆರಂಭಿಸಿದಾಗ ನಮ್ಮ ಉದ್ದೇಶ ಒಂದೇ ಆಗಿತ್ತು. ಒಳ್ಳೆಯ ಕಥೆ ಹೇಳಬೇಕು ಮತ್ತು ಪ್ರೇಕ್ಷಕರನ್ನು ಚಿತ್ರಮಂದಿರಕ್ಕೆ ಕರೆತರುವಂತಹ ಸಿನಿಮಾಗಳನ್ನು ಮಾಡಬೇಕು ಎನ್ನುತ್ತಾರೆ ನಿರೂಪ್.

‘ರಂಗಿತರಂಗ’ ಬಿಡುಗಡೆಗೂ ಮುನ್ನ ಏನಾಗಿತ್ತು?

‘ರಂಗಿತರಂಗ’ ಸಿನಿಮಾ ಬಿಡುಗಡೆಯ ಹಂತಕ್ಕೆ ಬಂದಾಗ ಈ ಕನಸು ನಿಜವಾಗುತ್ತದೆಯೇ ಎಂಬ ಅನುಮಾನಗಳೂ ಎದುರಾಗಿದ್ದವು. ನಾವು ಸಿನಿಮಾಕ್ಕೆ ಖರ್ಚು ಮಾಡಿದ ಹಣದಲ್ಲಿ ಪೋಸ್ಟರ್‌ಗಳಿಗೆ ಖರ್ಚಾದ ಹಣ ವಾಪಸ್ ಬಂದರೂ ಸಾಕು ಎಂದು ಕೆಲವರು ಹೇಳಿದ್ದರು. ಸಿನಿಮಾವನ್ನು ಕಡಿತಗೊಳಿಸುವಂತೆ ಕೂಡ ಸಲಹೆ ನೀಡಿದ್ದರು ಎಂದು ನಿರೂಪ್ ನೆನಪಿಸಿಕೊಳ್ಳುತ್ತಾರೆ.

ಆದರೆ ಅನೂಪ್ ಭಂಡಾರಿ ತಮ್ಮ ನಿರ್ಧಾರದಿಂದ ಹಿಂದೆ ಸರಿಯಲಿಲ್ಲ. ಆರಂಭದಲ್ಲಿ ಸೀಮಿತ ಪ್ರದರ್ಶನ ಕಂಡ ‘ರಂಗಿತರಂಗ’ ನಂತರ ಕರ್ನಾಟಕದ ಗಡಿಯನ್ನು ದಾಟಿ ದೊಡ್ಡ ಮಟ್ಟದಲ್ಲಿ ಪ್ರೇಕ್ಷಕರನ್ನು ತಲುಪಿತು. ಬಳಿಕ ನಿರೂಪ್ ಅವರು ಅನೂಪ್ ನಿರ್ದೇಶನದ ‘ರಾಜರಥ’ ಚಿತ್ರದಲ್ಲಿ ಮತ್ತೆ ಕಾಣಿಸಿಕೊಂಡರು. ನಂತರ ‘ವಿಕ್ರಾಂತ್ ರೋಣ’ ಮೂಲಕವೂ ಗಮನ ಸೆಳೆದರು.

10 ವರ್ಷಗಳ ವೃತ್ತಿಜೀವನದಲ್ಲಿ ಕೇವಲ ಐದು ಸಿನಿಮಾಗಳು!

ಚಿತ್ರರಂಗಕ್ಕೆ ಕಾಲಿಟ್ಟು ಹತ್ತು ವರ್ಷಗಳಾಗಿದ್ದರೂ ನಿರೂಪ್ ಭಂಡಾರಿ ನಟಿಸಿರುವ ಸಿನಿಮಾಗಳ ಸಂಖ್ಯೆ ಕೇವಲ ಐದು. ಇದಕ್ಕೆ ತಮ್ಮ ಐಟಿ ಹಿನ್ನೆಲೆಯನ್ನೂ ಅವರು ಕಾರಣವಾಗಿ ಹೇಳುತ್ತಾರೆ. ಐಟಿ ಕ್ಷೇತ್ರದಿಂದ ಬಂದವನಾಗಿರುವುದರಿಂದ ಅಲ್ಲಿ ಒಂದು ನಿರ್ದಿಷ್ಟ ವ್ಯವಸ್ಥೆ ಇರುತ್ತದೆ. ಆದರೆ ಚಿತ್ರರಂಗದಲ್ಲಿ ಕೆಲವೊಮ್ಮೆ ಒಂದು ಸಿನಿಮಾ ಪೂರ್ಣಗೊಂಡು ಚಿತ್ರಮಂದಿರಕ್ಕೆ ಬರುವುದಕ್ಕೆ ಒಂದು ವರ್ಷ ಅಥವಾ ಅದಕ್ಕಿಂತ ಹೆಚ್ಚು ಸಮಯ ಬೇಕಾಗುತ್ತದೆ. ಹೀಗಾಗಿ ಹತ್ತು ವರ್ಷಗಳಲ್ಲಿ ನಾನು ಕೇವಲ ಐದು ಸಿನಿಮಾಗಳನ್ನು ಮಾಡಿದ್ದೇನೆ. ಆದರೆ ಈಗ ಪರಿಸ್ಥಿತಿ ಬದಲಾಗಿದೆ. ನನ್ನ ಸಹೋದರನೊಂದಿಗಿನ ಸಿನಿಮಾ ಸೇರಿದಂತೆ ಹಲವು ಪ್ರಾಜೆಕ್ಟ್‌ಗಳನ್ನು ಒಟ್ಟಿಗೆ ಮಾಡುತ್ತಿದ್ದೇನೆ. ನನ್ನ ವೃತ್ತಿಜೀವನದ ಉತ್ತಮ ಹಂತದಲ್ಲಿದ್ದೇನೆ ಎನ್ನುತ್ತಾರೆ ಅವರು.

‘ಅಮೆರಿಕಾ ಅಮೆರಿಕಾ 2’ ಬಗ್ಗೆ ನಿರೂಪ್ ಹೇಳಿದ್ದೇನು?

ನಿರೂಪ್ ಅವರ ಹೊಸ ಸಿನಿಮಾ ‘ಅಮೆರಿಕಾ ಅಮೆರಿಕಾ 2’. ಹಿರಿಯ ನಿರ್ದೇಶಕ ನಾಗತಿಹಳ್ಳಿ ಚಂದ್ರಶೇಖರ್ ಅವರೊಂದಿಗೆ ಮೊದಲ ಬಾರಿಗೆ ಕೆಲಸ ಮಾಡಿರುವ ಅನುಭವವನ್ನು ಅವರು ವಿಶೇಷವಾಗಿ ಹಂಚಿಕೊಂಡಿದ್ದಾರೆ. ‘ವಿಕ್ರಾಂತ್ ರೋಣ’ ಚಿತ್ರದಲ್ಲಿನ ನಿರೂಪ್ ಅವರ ಅಭಿನಯವನ್ನು ಗಮನಿಸಿದ್ದ ನಾಗತಿಹಳ್ಳಿ ಚಂದ್ರಶೇಖರ್ ಅವರು ‘ಅಮೆರಿಕಾ ಅಮೆರಿಕಾ 2’ಗಾಗಿ ಅವರನ್ನು ಸಂಪರ್ಕಿಸಿದ್ದರು.

ನಾಗತಿಹಳ್ಳಿ ಸರ್ ಕರೆ ಮಾಡಿ ‘ಅಮೆರಿಕಾ ಅಮೆರಿಕಾ 2’ ಮಾಡುತ್ತಿರುವುದಾಗಿ ಹೇಳಿದಾಗ, ನಟನಾಗಿ ಮಾತ್ರವಲ್ಲ, ಪ್ರೇಕ್ಷಕನಾಗಿಯೂ ನನಗೆ ತುಂಬಾ ಖುಷಿಯಾಯಿತು. ಅವರ ಸಿನಿಮಾ ಮಾಡುವ ಶೈಲಿ ಮತ್ತು ಅಭಿರುಚಿ ನನಗೆ ಗೊತ್ತಿದೆ. ಹೀಗಾಗಿ ಅವರ ಮನಸ್ಸಿನಲ್ಲಿ ಖಂಡಿತವಾಗಿಯೂ ಏನಾದರೂ ಆಸಕ್ತಿದಾಯಕ ವಿಚಾರವಿರಬೇಕು ಎಂದು ಅನಿಸಿತು.

‘ಅಮೆರಿಕಾ ಅಮೆರಿಕಾ’ ಸಿನಿಮಾದ ಯಶಸ್ಸನ್ನು ಬಳಸಿಕೊಳ್ಳಬೇಕು ಎಂಬ ಉದ್ದೇಶ ಮಾತ್ರ ಇದ್ದಿದ್ದರೆ ಅವರು ಈ ಸಿನಿಮಾವನ್ನು ಬಹಳ ಹಿಂದೆಯೇ ಮಾಡಬಹುದಿತ್ತು. ಆದರೆ ಅವರು ಹಲವು ವರ್ಷಗಳ ಕಾಲ ಕಾದಿದ್ದಾರೆ ಎಂದು ನಿರೂಪ್ ಹೇಳಿದ್ದಾರೆ.

ಮುಂದುವರಿದ ಕಥೆಯಲ್ಲ!

ಸೆಪ್ಟೆಂಬರ್ 11ರಂದು ತೆರೆಗೆ ಬರುತ್ತಿರುವ ‘ಅಮೆರಿಕಾ ಅಮೆರಿಕಾ 2’ ಬಗ್ಗೆ ಮಾತನಾಡಿರುವ ನಿರೂಪ್, ಇದು 1997ರಲ್ಲಿ ಬಿಡುಗಡೆಯಾದ ‘ಅಮೆರಿಕಾ ಅಮೆರಿಕಾ’ ಚಿತ್ರದ ನೇರ ಮುಂದುವರಿದ ಭಾಗವಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಇದು ಮೂಲ ಚಿತ್ರದ ‘ಸ್ಪಿರಿಚುವಲ್ ಸೀಕ್ವೆಲ್’.

1990ರ ದಶಕದ ‘ಅಮೆರಿಕಾ ಅಮೆರಿಕಾ’ ಸಿನಿಮಾ ಸಂಬಂಧಗಳು ಮತ್ತು ಪ್ರೀತಿಯನ್ನು ವ್ಯಕ್ತಪಡಿಸುವಲ್ಲಿನ ಸವಾಲುಗಳ ಬಗ್ಗೆ ಮಾತನಾಡಿತ್ತು. ಆದರೆ ಇಂದು ಪರಿಸ್ಥಿತಿ ಬದಲಾಗಿದೆ. ಈಗ ‘ಐ ಲವ್ ಯೂ’ ಎಂದು ಹೇಳಲು ಒಂದು ಮೆಸೇಜ್ ಕಳುಹಿಸಿದರೆ ಸಾಕು. ನಾಗತಿಹಳ್ಳಿ ಸರ್ ಇಂದಿನ ಕಾಲಘಟ್ಟದ ಪ್ರೇಮವನ್ನು ಆ ಹಿನ್ನೆಲೆಯಲ್ಲಿ ನೋಡಲು ಪ್ರಯತ್ನಿಸಿದ್ದಾರೆ ಎನ್ನುತ್ತಾರೆ ನಿರೂಪ್.

ತ್ರಿಕೋನ ಪ್ರೇಮಕಥೆಯಲ್ಲಿ ನಿರೂಪ್

‘ಅಮೆರಿಕಾ ಅಮೆರಿಕಾ 2’ ಚಿತ್ರದಲ್ಲಿ ನಿರೂಪ್ ‘ನಿನಾದ್’ ಎಂಬ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಚಿತ್ರದಲ್ಲಿ ಪೃಥ್ವಿ ಅಂಬಾರ್ ಮತ್ತು ಶಾನ್ವಿ ಶ್ರೀವಾಸ್ತವ ಕೂಡ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ತ್ರಿಕೋನ ಪ್ರೇಮಕಥೆ ನಿರೂಪ್ ಅವರ ವೃತ್ತಿಜೀವನದಲ್ಲೇ ವಿಭಿನ್ನ ಅನುಭವವಂತೆ. ನಾನು ಯಾವಾಗಲೂ ಸಿನಿಮಾವನ್ನು ಪ್ರೇಕ್ಷಕರ ದೃಷ್ಟಿಕೋನದಿಂದ ನೋಡುತ್ತೇನೆ. ನಟನಾಗಿ ನನಗೆ ಇದುವರೆಗೆ ಮಾಡಿರದಂತಹ ಪಾತ್ರಗಳನ್ನು ಮಾಡಬೇಕು ಎಂಬ ಆಸೆ ಇರುತ್ತದೆ.

ತ್ರಿಕೋನ ಪ್ರೇಮಕಥೆ ನನಗೆ ಮೊದಲ ಅನುಭವ ಎಂದು ಅವರು ಹೇಳಿದ್ದಾರೆ. ಇಂದಿನ ಯುವಜನರ ಸಂಬಂಧಗಳ ಬಗ್ಗೆ ಸಿನಿಮಾ ಮಾತನಾಡಲಿದೆ ಎಂಬ ನಿರೀಕ್ಷೆಯನ್ನೂ ಅವರು ವ್ಯಕ್ತಪಡಿಸಿದ್ದಾರೆ. ಎಲ್ಲರಿಗೂ ಪರಿಪೂರ್ಣ ಜೀವನ ಬೇಕು. ಆದರೆ ಅದನ್ನು ತಕ್ಷಣವೇ ಪಡೆಯಬೇಕು ಎಂಬ ಆಸೆ. ಅದಕ್ಕಾಗಿ ಕೆಲಸ ಮಾಡಲು ಯಾರೂ ಸಿದ್ಧರಿಲ್ಲ ಎಂದು ಇಂದಿನ ಸಂಬಂಧಗಳ ಸ್ವಭಾವದ ಬಗ್ಗೆ ನಿರೂಪ್ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.

‘ನಾನು ಡಿಜಿಟಲ್ ಜಗತ್ತಿನ ಅನಲಾಗ್ ವ್ಯಕ್ತಿ’

ತಮ್ಮ ವೈಯಕ್ತಿಕ ಪ್ರೇಮದ ದೃಷ್ಟಿಕೋನ ಹೇಗಿದೆ ಎಂಬ ಪ್ರಶ್ನೆಗೆ ನಿರೂಪ್ ನಗುತ್ತಲೇ ಉತ್ತರಿಸಿದ್ದಾರೆ. ನಾನು ಯಾವಾಗಲೂ ಹೇಳುತ್ತೇನೆ. ನಾನು ಡಿಜಿಟಲ್ ಜಗತ್ತಿನ ಅನಲಾಗ್ ವ್ಯಕ್ತಿ. ನಾನು ತುಂಬಾ ಹಳೆಯ ಮನಸ್ಸಿನವನು ಎನ್ನುತ್ತಾರೆ ಅವರು. ತಮ್ಮ ಪಾತ್ರಗಳ ವಿಚಾರದಲ್ಲೂ ಇದೇ ರೀತಿಯ ಕಾಳಜಿ ವಹಿಸುವುದಾಗಿ ನಿರೂಪ್ ಹೇಳಿದ್ದಾರೆ. ನಾನು ಮಾಡುವ ಪ್ರತಿಯೊಂದು ಪಾತ್ರಕ್ಕೂ ಕೆಲವು ರೀತಿಯ ತಯಾರಿ ಬೇಕು. ಪ್ರೇಕ್ಷಕರು ಪರದೆಯ ಮೇಲೆ ನೋಡುತ್ತಿರುವ ವ್ಯಕ್ತಿ ತಮಗೆ ಪರಿಚಿತನಂತೆ ಅನಿಸಿದರೆ, ಅದೇ ನಮಗೆ ಸಿಕ್ಕ ಗೆಲುವು ಎಂದು ಅವರು ವಿವರಿಸಿದ್ದಾರೆ.

ನಾಗತಿಹಳ್ಳಿ ಚಂದ್ರಶೇಖರ್ ಜೊತೆ ಕೆಲಸ ಮಾಡಿದ ಅನುಭವ

ನಾಗತಿಹಳ್ಳಿ ಚಂದ್ರಶೇಖರ್ ಅವರ ನಿರ್ದೇಶನದ ಶೈಲಿಯ ಬಗ್ಗೆಯೂ ನಿರೂಪ್ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಅವರು ನಟನ ಮೇಲೆ ಹೆಚ್ಚಿನ ಗಮನ ಹರಿಸುತ್ತಾರೆ. ಭಾವನೆಗಳು ಮತ್ತು ಪಾತ್ರದ ವರ್ತನೆಯ ಬಗ್ಗೆ ಚರ್ಚಿಸುತ್ತಾರೆ. ನನಗೆ ಇದೇ ಸರಿಯಾದ ಸಿನಿಮಾ ಮಾಡುವ ವಿಧಾನ ಎಂದು ಅನಿಸುತ್ತದೆ ಎನ್ನುತ್ತಾರೆ ನಿರೂಪ್. ಚಿತ್ರದ ಸಹನಟರಾದ ಪೃಥ್ವಿ ಅಂಬಾರ್ ಮತ್ತು ಶಾನ್ವಿ ಶ್ರೀವಾಸ್ತವ ಅವರೊಂದಿಗಿನ ಕೆಲಸದ ಅನುಭವವೂ ಉತ್ತಮವಾಗಿತ್ತು ಎಂದು ಅವರು ಹೇಳಿದ್ದಾರೆ.

ಪೃಥ್ವಿ ಮತ್ತು ನಾನು ಮೊದಲ ದಿನದಿಂದಲೇ ಚೆನ್ನಾಗಿ ಹೊಂದಿಕೊಂಡೆವು. ಈಗ ನಾವು ಉತ್ತಮ ಸ್ನೇಹಿತರಾಗಿದ್ದೇವೆ. ಶಾನ್ವಿ ಅವರನ್ನು ನಾನು ಮೊದಲೇ ತಿಳಿದಿದ್ದೆ. ಇಬ್ಬರೂ ಉತ್ತಮ ಕಲಾವಿದರು ಮತ್ತು ತಮ್ಮ ಕೆಲಸದ ಬಗ್ಗೆ ಚೆನ್ನಾಗಿ ತಿಳಿದುಕೊಂಡಿದ್ದಾರೆ. ನಟನೆ ಎಂದರೆ ಕೊಡು-ಕೊಳ್ಳುವಿಕೆ. ಅಭಿನಯ ಸರಿಯಾದ ರೀತಿಯಲ್ಲಿ ಮೂಡಿಬಂದಾಗ ಆ ಎನರ್ಜಿ ಮತ್ತೊಂದು ಹಂತಕ್ಕೆ ಹೋಗುತ್ತದೆ ಎಂದು ನಿರೂಪ್ ಹೇಳಿದ್ದಾರೆ.

‘ನನ್ನ ಸಿನಿಮಾ ನಿರ್ಧಾರಗಳಲ್ಲಿ ಅನೂಪ್ ಹಸ್ತಕ್ಷೇಪ ಮಾಡುವುದಿಲ್ಲ’

‘ರಂಗಿತರಂಗ’ ಮೂಲಕ ಸಹೋದರ ಅನೂಪ್ ಭಂಡಾರಿ ಅವರೊಂದಿಗೆ ಚಿತ್ರರಂಗಕ್ಕೆ ಬಂದ ಕಾರಣ, ತಮ್ಮ ಸಿನಿಮಾ ಆಯ್ಕೆಗಳಲ್ಲಿ ಅನೂಪ್ ಅವರ ಪಾತ್ರವಿದೆ ಎಂಬ ಮಾತುಗಳ ಬಗ್ಗೆ ನಿರೂಪ್ ಸ್ಪಷ್ಟನೆ ನೀಡಿದ್ದಾರೆ. ನಾನು ಅನೂಪ್ ಜೊತೆ ಸಿನಿಮಾದ ಬಗ್ಗೆ ಚರ್ಚಿಸುತ್ತೇನೆ. ಅವರ ಮಾರ್ಗದರ್ಶನ ಪಡೆಯುತ್ತೇನೆ. ನನ್ನ ಕೆಲಸದ ಬಗ್ಗೆ ಅವರಿಗೆ ವಿವರಿಸುತ್ತೇನೆ. ಆದರೆ ನನ್ನ ಕೆಲಸವನ್ನು ಅನೂಪ್ ಕೂಡ ಪರದೆಯ ಮೇಲೆ ನೋಡಿದ ನಂತರವೇ ನೋಡುತ್ತಾರೆ.

ನಾನು ‘ರಂಗಿತರಂಗ’ ಮೂಲಕ ಆರಂಭಿಸಿದ್ದೇನೆ ಎಂಬ ಕಾರಣಕ್ಕೆ ನಾನು ಮಾಡುವ ಎಲ್ಲದರಲ್ಲೂ ಅನೂಪ್ ಅವರ ಪಾತ್ರವಿದೆ ಎಂಬ ತಪ್ಪು ಕಲ್ಪನೆಯಿದೆ. ನಾನು ಒಂದು ನಿರ್ದಿಷ್ಟ ನಟನಾ ಶಾಲೆಯಿಂದ ಬಂದಿದ್ದೇನೆ ಮತ್ತು ಕೆಲವು ತತ್ವಗಳನ್ನು ಇಟ್ಟುಕೊಂಡು ಕೆಲಸ ಮಾಡುತ್ತೇನೆ ಎಂದು ನಿರೂಪ್ ಹೇಳಿದ್ದಾರೆ.

ಸಿನಿಮಾ ಸಮಾಜವನ್ನು ಬದಲಿಸಬಹುದೇ?

ಇಂದಿನ ಕಾಲದಲ್ಲಿ ಸಿನಿಮಾಗಳು ನೇರವಾಗಿ ಜನರನ್ನು ಬದಲಾಯಿಸುತ್ತವೆ ಎಂಬ ನಂಬಿಕೆ ನಿರೂಪ್ ಅವರಿಗೆ ಅಷ್ಟಾಗಿ ಇಲ್ಲ. ಆದರೆ ಸಿನಿಮಾ ಒಂದು ಚರ್ಚೆಗೆ ನಾಂದಿ ಹಾಡಬಹುದು ಎಂಬ ವಿಶ್ವಾಸ ಅವರಿಗಿದೆ. ಡಾ. ರಾಜ್‌ಕುಮಾರ್ ಅವರ ಸಿನಿಮಾಗಳ ವಿಚಾರದಲ್ಲಿ ಇದಕ್ಕೆ ಅಪವಾದಗಳಿವೆ. ‘ಬಂಗಾರದ ಮನುಷ್ಯ’ದಂತಹ ಸಿನಿಮಾಗಳು ಅದಕ್ಕೆ ಉತ್ತಮ ಉದಾಹರಣೆ. ಇಂದಿನ ಕಾಲದಲ್ಲಿ ಸಿನಿಮಾಗಳು ಜನರನ್ನು ಬದಲಾಯಿಸುತ್ತವೆಯೇ ಎಂಬುದು ನನಗೆ ಗೊತ್ತಿಲ್ಲ. ಆದರೆ ಒಂದು ಸಿನಿಮಾ ಚರ್ಚೆಯನ್ನು ಹುಟ್ಟುಹಾಕಲು ಸಾಧ್ಯವಾದರೆ, ಅದೇ ದೊಡ್ಡ ಮೌಲ್ಯ ಎನ್ನುತ್ತಾರೆ ಅವರು.

ಇನ್ನು ‘ಅಮೆರಿಕಾ ಅಮೆರಿಕಾ 2’ ಕೂಡ ಪ್ರೇಕ್ಷಕರ ನಡುವೆ ಅಂತಹ ಒಂದು ಚರ್ಚೆಯನ್ನು ಮತ್ತೆ ಹುಟ್ಟುಹಾಕುತ್ತದೆ ಎಂಬ ಭರವಸೆ ಇದೆ ಎಂದು ನಿರೂಪ್ ಭಂಡಾರಿ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಸೆಪ್ಟೆಂಬರ್ 11ರಂದು ‘ಅಮೆರಿಕಾ ಅಮೆರಿಕಾ 2’ ತೆರೆಗೆ ಬರಲಿದ್ದು, ನಿರೂಪ್ ಭಂಡಾರಿ, ಪೃಥ್ವಿ ಅಂಬಾರ್ ಮತ್ತು ಶಾನ್ವಿ ಶ್ರೀವಾಸ್ತವ ಅಭಿನಯಿಸಿರುವ ಈ ಸಿನಿಮಾ ಇಂದಿನ ಕಾಲಘಟ್ಟದ ಪ್ರೀತಿ, ಸಂಬಂಧಗಳು ಮತ್ತು ಅವುಗಳಲ್ಲಿನ ಬದಲಾವಣೆಗಳನ್ನು ಹೇಗೆ ತೆರೆಗೆ ತರುತ್ತದೆ ಎಂಬ ಕುತೂಹಲ ಮೂಡಿಸಿದೆ.

'ಫಿಲ್ಮ್‌ಮೇಕಿಂಗ್ ಅನ್ನೋದು ರಿಸ್ಕ್': ಕನ್ನಡ ಚಿತ್ರರಂಗದ ಬಗ್ಗೆ ನಟಿ ಶ್ರುತಿ ಹರಿಹರನ್ ಯಾಕೆ ಹೀಗಂದ್ರು

Govindaraj S — Sun, 06 Sep 2026 18:44:33 +0530

ಕಳೆದ ಕೆಲ ವರ್ಷಗಳಿಂದ ತುಸು ಸೈಲೆಂಟ್ ಆಗಿದ್ದ ನಟಿ ಶ್ರುತಿ ಹರಿಹರನ್ ಇದೀಗ ವಿಭಿನ್ನ ಸಿನಿಮಾಗಳ ಮೂಲಕ ಮತ್ತೆ ಪ್ರೇಕ್ಷಕರ ಮುಂದೆ ಬರಲು ಸಜ್ಜಾಗಿದ್ದಾರೆ. ‘ಮುಧೋಳ್’, ‘ಚೀತಾ’ ಹಾಗೂ ‘NH66’ ಸೇರಿದಂತೆ ಹಲವು ಸಿನಿಮಾಗಳು ಅವರ ಕೈಯಲ್ಲಿದ್ದು, ಈ ಚಿತ್ರಗಳು ಶ್ರುತಿಯನ್ನು ಈ ಹಿಂದೆ ನೋಡಿರದ ವಿಭಿನ್ನ ಪಾತ್ರಗಳಲ್ಲಿ ಪ್ರೇಕ್ಷಕರಿಗೆ ಪರಿಚಯಿಸುವ ನಿರೀಕ್ಷೆಯಿದೆ.

ಒಂದು ಕಾಲದಲ್ಲಿ ಸಾಂಪ್ರದಾಯಿಕ ನಾಯಕಿ ಪಾತ್ರಗಳಿಗೆ ಸೀಮಿತವಾಗಿದ್ದ ಶ್ರುತಿಗೆ ಇದೀಗ ಸಿಗುತ್ತಿರುವ ಪಾತ್ರಗಳಲ್ಲಿ ಹೆಚ್ಚು ವೈವಿಧ್ಯತೆ ಮತ್ತು ತೂಕವಿದೆ. ತಮ್ಮ ಈ ಹೊಸ ಹಂತದ ಸಿನಿಮಾ ಪಯಣ, ಎನ್ಸೆಂಬಲ್ ಸಿನಿಮಾಗಳಲ್ಲಿ ಕೆಲಸ ಮಾಡುವ ಖುಷಿ, ಚಿತ್ರಗಳ ಥಿಯೇಟ್ರಿಕಲ್ ಭವಿಷ್ಯ ಹಾಗೂ ತಾವು ನಂಬಿರುವ ಸಿನಿಮಾಗಳನ್ನು ಮಾಡುವ ಅಗತ್ಯದ ಬಗ್ಗೆ ಶ್ರುತಿ ಹರಿಹರನ್ ಮಾತನಾಡಿದ್ದಾರೆ.

‘ವಿಭಿನ್ನ ರೀತಿಯ ಪಾತ್ರಗಳು ನನ್ನತ್ತ ಬರಬೇಕು ಎಂಬ ಆಸೆ ಯಾವಾಗಲೂ ಇತ್ತು’

ಕಳೆದ ಎರಡು ವರ್ಷಗಳಿಂದ ನನ್ನ ಯಾವುದೇ ಸಿನಿಮಾ ಬಿಡುಗಡೆಯಾಗಿಲ್ಲ ಅನ್ನೋದು ನಿಜಕ್ಕೂ ಆಶ್ಚರ್ಯಕರ. ಆದರೆ ಕಳೆದ ಎರಡೂವರೆ-ಮೂರು ವರ್ಷಗಳಲ್ಲಿ ನಾನು ಕೆಲಸ ಮಾಡಿರುವ ಸಿನಿಮಾಗಳ ಪೈಕಿ ಬಹುತೇಕ ಚಿತ್ರಗಳು ಈ ವರ್ಷ ಅಥವಾ ಮುಂದಿನ ವರ್ಷದ ಆರಂಭದಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ ಎಂದು ಶ್ರುತಿ ಹೇಳುತ್ತಾರೆ. ಆ ಸಿನಿಮಾಗಳೆಲ್ಲವೂ ವಿಭಿನ್ನವಾಗಿವೆ. ಅವುಗಳಲ್ಲಿ ನಾನು ಸಾಮಾನ್ಯ ಅರ್ಥದಲ್ಲಿ ನಾಯಕಿಯ ಪಾತ್ರ ಮಾಡದೇ ಇರಬಹುದು.

ಆದರೆ ಆ ಪಾತ್ರಗಳಲ್ಲಿ ಸಾಕಷ್ಟು ತೂಕವಿದೆ, ನನ್ನನ್ನು ಸವಾಲಿಗೆ ಒಡ್ಡುವಂತಹ ಪಾತ್ರಗಳಾಗಿವೆ. ಇಂಥ ವಿಭಿನ್ನ ಕೆಲಸಗಳು ನನ್ನತ್ತ ಬರಬೇಕು ಎಂಬ ಆಸೆ ನನಗೆ ಯಾವಾಗಲೂ ಇತ್ತು ಎನ್ನುತ್ತಾರೆ. ನನಗೆ ಯಾವಾಗ ಅವಕಾಶ ಸಿಕ್ಕರೂ ಅದನ್ನು ಕೈಬಿಡಲು ಇಷ್ಟವಾಗುವುದಿಲ್ಲ. ‘ವಾವ್, ಇದು ನಿಜಕ್ಕೂ ಇಂಟರೆಸ್ಟಿಂಗ್ ಆಗಿದೆ’ ಎಂದುಕೊಂಡು ಆ ಅವಕಾಶವನ್ನು ಸ್ವೀಕರಿಸುತ್ತೇನೆ ಎಂದು ತಮ್ಮ ಪಾತ್ರಗಳ ಆಯ್ಕೆಯ ಬಗ್ಗೆ ಅವರು ಹೇಳುತ್ತಾರೆ.

ಉದಾಹರಣೆಗೆ, ಶ್ರುತಿ ನಟಿಸಿರುವ ‘ಮುಧೋಳ್’ ಒಂದು ಎನ್ಸೆಂಬಲ್ ಸಿನಿಮಾ. ಒಂದೇ ಚಿತ್ರದಲ್ಲಿ ಹಲವು ಕಲಾವಿದರು ಇರುವ ಇಂತಹ ಸಿನಿಮಾಗಳಲ್ಲಿ ಕೆಲಸ ಮಾಡುವುದನ್ನು ಅವರು ವಿಶೇಷವಾಗಿ ಇಷ್ಟಪಡುತ್ತಾರೆ. ಸೆಟ್‌ನಲ್ಲಿ ಸಾಕಷ್ಟು ಕಲಾವಿದರು ಇದ್ದಾಗ ಸುತ್ತಮುತ್ತ ತುಂಬಾ ಮಾತುಕತೆ, ಎನರ್ಜಿ ಇರುತ್ತದೆ. ಸಿನಿಮಾದಲ್ಲಿ ನಮ್ಮದೇ ಆದ ಜಾಗವನ್ನು ಹುಡುಕಿಕೊಳ್ಳಬೇಕಾಗುತ್ತದೆ. ಅದು ಬಹುತೇಕ ಸಂದರ್ಭಗಳಲ್ಲಿ ನನ್ನಿಂದ ಇನ್ನಷ್ಟು ಉತ್ತಮವಾಗಿ ಕೆಲಸ ಮಾಡಿಸುವಂತೆ ಮಾಡುತ್ತದೆ ಎನ್ನುತ್ತಾರೆ ಶ್ರುತಿ.

‘ಮನರಂಜನೆಯಾಚೆ ಕಲೆಗಿರುವ ಶಕ್ತಿ ಅಪಾರ’

ಶ್ರುತಿ ಹರಿಹರನ್‌ಗೆ ಸಿನಿಮಾದಲ್ಲಿ ಮಹಿಳೆಯರ ಪ್ರಾತಿನಿಧ್ಯವೂ ಅಷ್ಟೇ ಮುಖ್ಯ. ಕೇವಲ ಮನರಂಜನೆ ಎಂಬ ಕಾರಣಕ್ಕೆ ಪರದೆಯ ಮೇಲೆ ಮಹಿಳೆಯರನ್ನು ಹೇಗೆ ಬೇಕಾದರೂ ತೋರಿಸುವುದನ್ನು ಒಪ್ಪಿಕೊಳ್ಳಬಾರದು ಎಂಬುದು ಅವರ ಅಭಿಪ್ರಾಯ.

ಬರಹಗಾರರನ್ನು ಪ್ರಶ್ನಿಸುವುದು, ಪುರುಷರ ದೃಷ್ಟಿಕೋನವನ್ನು ಪ್ರಶ್ನಿಸುವುದು ಬಹಳ ಮುಖ್ಯ. ನಿಮ್ಮ ಲೈಂಗಿಕತೆಯನ್ನು ಸಂಭ್ರಮಿಸುವುದೇ ತಪ್ಪು ಎಂದು ನಾನು ಹೇಳುವುದಿಲ್ಲ. ಖಂಡಿತವಾಗಿಯೂ ಅಲ್ಲ. ಆದರೆ ಒಂದು ಹಂತದಲ್ಲಿ ಯಾವುದಾದರೂ ವಿಚಾರ ಮಹಿಳೆಯರನ್ನು ಕೀಳಾಗಿ ತೋರಿಸುತ್ತಿದೆಯೇ, ಅಥವಾ ಒಬ್ಬ ಮಹಿಳೆ ನಿಮ್ಮನ್ನು ಆ ದೃಶ್ಯದಲ್ಲಿ ನೋಡಿಕೊಂಡು ಮುಜುಗರಪಡಬಹುದೇ ಎಂಬುದನ್ನು ಅರ್ಥಮಾಡಿಕೊಳ್ಳುವುದು ಮುಖ್ಯ ಎಂದು ಶ್ರುತಿ ಹೇಳುತ್ತಾರೆ.

ಕಲೆಗೆ ಅಪಾರ ಶಕ್ತಿಯಿದೆ. ಫಿಲ್ಮ್‌ಮೇಕರ್‌ಗಳು ಮತ್ತು ನಟ-ನಟಿಯರಾದ ನಾವು ಮನರಂಜನೆ ನೀಡುತ್ತಲೇ ಒಂದು ಮುಖ್ಯವಾದ ವಿಚಾರವನ್ನು ಹೇಳುವ ಶಕ್ತಿಯನ್ನು ಹೊಂದಿದ್ದೇವೆ. ಮನರಂಜನೆಯೂ ಅಷ್ಟೇ ಮುಖ್ಯ. ಆದರೆ ನಮ್ಮ ಕೆಲಸದಿಂದ ಸಮಾಜದ ಮೇಲೆ ಯಾವ ರೀತಿಯ ಪರಿಣಾಮ ಉಂಟಾಗಬಹುದು ಎಂಬುದನ್ನೂ ನಾವು ಅರ್ಥಮಾಡಿಕೊಳ್ಳಬೇಕು ಎಂದು ಅವರು ವಿವರಿಸುತ್ತಾರೆ.

‘ಒಬ್ಬರನ್ನೊಬ್ಬರು ದೂಷಿಸುತ್ತಾ ಕೂರಬಹುದು; ಇಲ್ಲವೇ ಸಿನಿಮಾ ಮಾಡುತ್ತಲೇ ಇರಬಹುದು’

ಇತ್ತೀಚೆಗೆ ಉತ್ತಮ ಸಿನಿಮಾಗಳು ನಿರ್ಮಾಣವಾಗುತ್ತಿದ್ದರೂ ಅವುಗಳಿಗೆ ಥಿಯೇಟರ್‌ನಲ್ಲಿ ನಿರೀಕ್ಷಿತ ಪ್ರತಿಕ್ರಿಯೆ ಸಿಗದಿರುವ ಕುರಿತು ಕೇಳಿದಾಗ, ಶ್ರುತಿ ಕೂಡ ಇದಕ್ಕೆ ಸುಲಭವಾದ ಉತ್ತರ ಇಲ್ಲ ಎನ್ನುತ್ತಾರೆ. ಇದು ಯಾಕೆ ಆಗುತ್ತಿದೆ ಎಂದು ನಾವೆಲ್ಲರೂ ಯೋಚಿಸಿದ್ದೇವೆ. ಪ್ರೇಕ್ಷಕರು ಥಿಯೇಟರ್‌ಗೆ ಬರುತ್ತಿಲ್ಲ ಎಂದು ಹೇಳುತ್ತೇವೆ. ಆದರೆ ಮತ್ತೊಂದು ಕಡೆ, ಪ್ರೇಕ್ಷಕರು ಥಿಯೇಟರ್‌ಗೆ ಬರುವಷ್ಟು ಉತ್ತಮ ಸಿನಿಮಾಗಳನ್ನು ನಾವು ಮಾಡುತ್ತಿದ್ದೇವೆಯೇ ಎಂಬ ಪ್ರಶ್ನೆಯೂ ಇದೆ. ಇದು ಮೊದಲು ಕೋಳಿ ಬಂದಿತೋ, ಮೊಟ್ಟೆ ಬಂದಿತೋ ಎಂಬಂತಾಗಿದೆ ಎಂದು ಅವರು ಹೇಳುತ್ತಾರೆ. ಆದರೆ ಈ ಪರಿಸ್ಥಿತಿಯಲ್ಲಿ ತಮ್ಮ ನಿಲುವು ಮಾತ್ರ ಸ್ಪಷ್ಟವಾಗಿದೆ ಎನ್ನುತ್ತಾರೆ ಶ್ರುತಿ.

ವಿಶೇಷವಾಗಿ ಕನ್ನಡ ಚಿತ್ರರಂಗದಲ್ಲಿ ಫಿಲ್ಮ್‌ಮೇಕಿಂಗ್ ದೊಡ್ಡ ರಿಸ್ಕ್ ಆಗಿಬಿಟ್ಟಿದೆ. ಆದರೂ ಆ ರಿಸ್ಕ್ ತೆಗೆದುಕೊಂಡು ಸಿನಿಮಾಗಳನ್ನು ಮಾಡುತ್ತಿರುವವರು ಈಗಲೂ ಇದ್ದಾರೆ. ನಾವು ಒಬ್ಬರನ್ನೊಬ್ಬರು ದೂಷಿಸುತ್ತಾ ಕೂರಬಹುದು. ಇಲ್ಲವೇ ನಮ್ಮದೇ ಆದ ರೀತಿಯಲ್ಲಿ ನಾವು ನಂಬಿರುವ, ಉತ್ತಮ ಬರಹ ಹೊಂದಿರುವ ಸಿನಿಮಾಗಳನ್ನು ಮಾಡುವುದನ್ನು ಮುಂದುವರಿಸಬಹುದು ಎಂದು ಶ್ರುತಿ ಅಭಿಪ್ರಾಯಪಟ್ಟಿದ್ದಾರೆ.

‘ಒಂದು ಸಿನಿಮಾ ಎರಡು ಗಂಟೆಯ ಕೆಲಸವಲ್ಲ; ಅದರ ಹಿಂದೆ ವರ್ಷಗಳ ಶ್ರಮವಿರುತ್ತದೆ’

ಸಿನಿಮಾ ಕ್ಷೇತ್ರದ ಬಗ್ಗೆ ಪ್ರೇಕ್ಷಕರು ಇನ್ನಷ್ಟು ಅರ್ಥಮಾಡಿಕೊಳ್ಳಬೇಕಾದ ಒಂದು ವಿಚಾರವಿದೆ ಎಂದರೆ, ಪರದೆಯ ಮೇಲೆ ಕಾಣಿಸುವ ಎರಡು ಗಂಟೆಗಳ ಹಿಂದೆ ಇರುವ ಅಪಾರ ಪರಿಶ್ರಮ ಎನ್ನುತ್ತಾರೆ ಶ್ರುತಿ. ಒಂದು ಸಿನಿಮಾ ಎರಡರಿಂದ ಎರಡೂವರೆ ಗಂಟೆಗಳ ಮನರಂಜನೆಯಾಗಿರಬಹುದು. ಆದರೆ ಆ ಸಿನಿಮಾದ ಹಿಂದೆ ಹಲವಾರು ಜನರ ವರ್ಷಗಳ ಪರಿಶ್ರಮ ಇರುತ್ತದೆ. ಯಾವುದಾದರೂ ಸಿನಿಮಾವನ್ನು ತಕ್ಷಣವೇ ತಿರಸ್ಕರಿಸುವುದು ಸುಲಭ.

ಆದರೆ ಕನಿಷ್ಠ ಒಂದು ಅವಕಾಶ ನೀಡುವುದು ಮುಖ್ಯ. ಥಿಯೇಟರ್‌ಗೆ ಬಂದು ಸಿನಿಮಾವನ್ನು ನೋಡಿ, ಅದಕ್ಕೆ ಸ್ವಲ್ಪ ಸಮಯ ಕೊಡಿ ಎಂದು ಅವರು ಪ್ರೇಕ್ಷಕರಲ್ಲಿ ಮನವಿ ಮಾಡಿದ್ದಾರೆ. ಇನ್ನು ವಿಭಿನ್ನ ಪಾತ್ರಗಳ ಮೂಲಕ ಮತ್ತೆ ತೆರೆಮೇಲೆ ಬರಲು ಸಜ್ಜಾಗಿರುವ ಶ್ರುತಿ ಹರಿಹರನ್ ಅವರ ಮಾತುಗಳಲ್ಲಿ, ಸಿನಿಮಾ ಎನ್ನುವುದು ಕೇವಲ ಮನರಂಜನೆಯಲ್ಲ; ಅದು ರಿಸ್ಕ್, ಪರಿಶ್ರಮ ಮತ್ತು ನಂಬಿಕೆಯ ಫಲ ಎಂಬ ಸಂದೇಶವೂ ಸ್ಪಷ್ಟವಾಗಿದೆ.

'ಪರದೆಯ ಮೇಲೆ ಮಹಿಳೆಯರನ್ನು ನೈಜ ವ್ಯಕ್ತಿಗಳಾಗಿ ತೋರಿಸಬೇಕು': ಅದಿತಿ ಸಾಗರ್ ಮನದ ಮಾತೇನು?

Govindaraj S — Fri, 18 Sep 2026 21:03:38 +0530

ಕನ್ನಡ ನಟಿ ಹಾಗೂ ಗಾಯಕಿ ಅದಿತಿ ಸಾಗರ್ ಇದೀಗ ಮತ್ತೆ ದೊಡ್ಡ ಪರದೆಗೆ ಮರಳಿದ್ದಾರೆ. ನಟನೆ ಮಾತ್ರವಲ್ಲದೆ ಸಂಗೀತ ಸೇರಿದಂತೆ ಹಲವು ಕಲಾ ಪ್ರಕಾರಗಳಲ್ಲಿ ತಮ್ಮನ್ನು ತೊಡಗಿಸಿಕೊಂಡಿರುವ ಅವರು, ಪಾತ್ರವೊಂದನ್ನು ನಿರ್ವಹಿಸುವ ಮೊದಲು ಆ ವ್ಯಕ್ತಿಯನ್ನು ಅರ್ಥಮಾಡಿಕೊಳ್ಳುವುದು ಬಹಳ ಮುಖ್ಯ ಎಂದು ನಂಬುತ್ತಾರೆ. 'ಹೆಗ್ಗಣ ಮುದ್ದು' ಎಂಬ ಡ್ರಾಮಾ ಥ್ರಿಲ್ಲರ್ ಚಿತ್ರದ ಮೂಲಕ ಅದಿತಿ ಸಾಗರ್ ಮತ್ತೆ ಪ್ರೇಕ್ಷಕರ ಮುಂದೆ ಬರುತ್ತಿದ್ದಾರೆ.

ಚಿತ್ರದ ವಿಭಿನ್ನ ಬರವಣಿಗೆ ಹಾಗೂ ನಾಯಕಿ ಪಾತ್ರಕ್ಕೆ ನೀಡಿರುವ ಹಲವು ಪದರಗಳು ತಮ್ಮನ್ನು ಈ ಸಿನಿಮಾದತ್ತ ಸೆಳೆದವು ಎಂದು ಅವರು ಹೇಳಿದ್ದಾರೆ. ಇದೇ ವೇಳೆ ಹಿಂದಿಯ ವೆಬ್ ಸೀರಿಸ್‌ವೊಂದರ ಶೂಟಿಂಗ್ ಕೂಡ ಪೂರ್ಣಗೊಳಿಸಿರುವ ಅದಿತಿ, ಪಾತ್ರಕ್ಕಾಗಿ ವರ್ಕ್‌ಶಾಪ್‌ಗಳು ಹಾಗೂ ರಿಹರ್ಸಲ್‌ಗಳಲ್ಲಿ ಸಾಕಷ್ಟು ಸಮಯ ಕಳೆದಿರುವ ಅನುಭವವನ್ನೂ 'ಟೈಮ್ಸ್ ಆಫ್ ಇಂಡಿಯಾ' ಜೊತೆ ಹಂಚಿಕೊಂಡಿದ್ದಾರೆ.

'ನಾನು ಸಾಕಷ್ಟು ವಿಭಿನ್ನ ಪಾತ್ರಗಳನ್ನು ಮಾಡಬೇಕು'

ಸಿನಿಮಾ ಲೋಕದ ವಾತಾವರಣದಲ್ಲೇ ಬೆಳೆದ ಅದಿತಿಗೆ ಚಿತ್ರರಂಗದ ಪರಿಚಯವಾಗಲು ಪ್ರಮುಖ ಕಾರಣ ಅವರ ತಂದೆ, ನಟ ಹಾಗೂ ಕಲಾ ನಿರ್ದೇಶಕ ಅರುಣ್ ಸಾಗರ್. ನಾನು ಸಿನಿಮಾ ಕ್ಷೇತ್ರಕ್ಕೆ ಬರಲು ನನ್ನ ತಂದೆಯೇ ಸ್ಫೂರ್ತಿ. ಅವರನ್ನು ಸೆಟ್‌ನಲ್ಲಿ ನೋಡುತ್ತಾ ಬೆಳೆದಿದ್ದೇನೆ. ಹಾಗಾಗಿ ಸಿನಿಮಾ ನನಗೆ ಮೊದಲಿನಿಂದಲೂ ಪರಿಚಿತವಾದ ಜಗತ್ತು ಎಂದು ಅದಿತಿ ನೆನಪಿಸಿಕೊಂಡಿದ್ದಾರೆ.

ಚಿತ್ರದ ಸೆಟ್‌ಗಳ ಆ ವಾತಾವರಣವೇ ತಮ್ಮೊಳಗೆ ಪಾತ್ರಗಳ ಬಗ್ಗೆ ಒಂದು ರೀತಿಯ ಕುತೂಹಲ ಬೆಳೆಸಿತು ಎಂದು ಹೇಳಿರುವ ಅವರು, ವಿಭಿನ್ನ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುವ ಆಸೆ ವ್ಯಕ್ತಪಡಿಸಿದ್ದಾರೆ. ನಾನು ಸಾಕಷ್ಟು ವಿಭಿನ್ನ ಪಾತ್ರಗಳನ್ನು ಮಾಡಬೇಕು ಎಂದು ಬಯಸುತ್ತೇನೆ. ನಮ್ಮದೇ ವ್ಯಕ್ತಿತ್ವವನ್ನು ಬಿಟ್ಟು ಮತ್ತೊಬ್ಬ ವ್ಯಕ್ತಿಯಾಗಿ ಬದುಕುವುದರಲ್ಲಿ ಒಂದು ವಿಶೇಷವಾದ ಸೌಂದರ್ಯವಿದೆ ಎಂದು ಅದಿತಿ ಹೇಳಿದ್ದಾರೆ.

'ಯಾವುದಕ್ಕೂ ನನ್ನನ್ನು ಸೀಮಿತಗೊಳಿಸಿಕೊಳ್ಳಲು ಇಷ್ಟವಿಲ್ಲ'

ನಟನೆ ಜೊತೆಗೆ ಸಂಗೀತದಲ್ಲೂ ತಮ್ಮದೇ ಆದ ಪ್ರಯೋಗಗಳನ್ನು ಮಾಡುತ್ತಿರುವ ಅದಿತಿ, ತಾವು ಯಾವುದೇ ಒಂದು ಕ್ಷೇತ್ರಕ್ಕೆ ಸೀಮಿತವಾಗಿರಲು ಬಯಸುವುದಿಲ್ಲ ಎಂದು ಹೇಳಿದ್ದಾರೆ. ನಾನು ಮಾಡಲು ಬಯಸುವ ಎಲ್ಲವನ್ನೂ ಮಾಡಬೇಕು. ಯಾವುದಾದರೂ ಒಂದು ವಿಷಯಕ್ಕೆ ನನ್ನನ್ನು ಸೀಮಿತಗೊಳಿಸಿಕೊಳ್ಳಲು ನನಗೆ ಇಷ್ಟವಿಲ್ಲ. ಅದೇ ನನ್ನ ಉದ್ದೇಶ ಎಂದು ಅವರು ಹೇಳಿದ್ದಾರೆ.

'ಪರದೆಯ ಮೇಲೆ ಮಹಿಳೆಯರನ್ನು ನೈಜ ವ್ಯಕ್ತಿಗಳಾಗಿ ತೋರಿಸಬೇಕು'

ಸಿನಿಮಾಗಳಲ್ಲಿ ಮಹಿಳಾ ಪಾತ್ರಗಳ ಪ್ರಾತಿನಿಧ್ಯ ಇನ್ನಷ್ಟು ಆಳವಾಗಬೇಕು ಎಂಬ ಅಭಿಪ್ರಾಯ ಅದಿತಿ ಸಾಗರ್ ಅವರದ್ದು. ಪುರುಷ ಪಾತ್ರಗಳಿಗೆ ಸಿಗುವಷ್ಟು ಸಂಕೀರ್ಣತೆ ಮತ್ತು ಭಾವನಾತ್ಮಕ ಆಳ ಮಹಿಳಾ ಪಾತ್ರಗಳಿಗೂ ಸಿಗಬೇಕು ಎಂದು ಅವರು ಹೇಳಿದ್ದಾರೆ. ಬಹಳಷ್ಟು ಸಂದರ್ಭಗಳಲ್ಲಿ ಮಹಿಳಾ ಪಾತ್ರಗಳನ್ನು ಪುರುಷ ಪಾತ್ರಗಳಷ್ಟು ಚೆನ್ನಾಗಿ ಬರೆಯಲಾಗುವುದಿಲ್ಲ ಎಂದು ನನಗೆ ಅನಿಸುತ್ತದೆ.

ಬಹುಶಃ ನಮ್ಮ ಬಹುತೇಕ ಬರಹಗಾರರು ಪುರುಷರಾಗಿರುವುದೂ ಇದಕ್ಕೆ ಒಂದು ಕಾರಣವಾಗಿರಬಹುದು ಎಂದು ಅದಿತಿ ಹೇಳಿದ್ದಾರೆ. ಮಹಿಳಾ ಕಥೆಗಾರರು ಹಾಗೂ ಬರಹಗಾರರು ಹೆಚ್ಚಿನ ಸಂಖ್ಯೆಯಲ್ಲಿ ಬಂದರೆ ಮಹಿಳಾ ಪಾತ್ರಗಳನ್ನು ಇನ್ನಷ್ಟು ನೈಜವಾಗಿ ಹಾಗೂ ಸೂಕ್ಷ್ಮವಾಗಿ ಕಟ್ಟಿಕೊಡಲು ಸಾಧ್ಯವಾಗಬಹುದು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ನಮ್ಮ ದೃಷ್ಟಿಕೋನಗಳು ವಿಭಿನ್ನವಾಗಿರುವುದರಿಂದ, ಮಹಿಳೆಯೊಬ್ಬರು ಆಕೆಯ ಅನುಭವದ ಭಾಗವನ್ನು ಇನ್ನಷ್ಟು ಚೆನ್ನಾಗಿ ಪ್ರತಿನಿಧಿಸಬಹುದು. ಮಹಿಳೆಯರನ್ನು ಕೇವಲ ಕೆಲವು ಸ್ಟೀರಿಯೋಟೈಪ್‌ಗಳ ಮೂಲಕ ತೋರಿಸುವ ಬದಲು, ಅವರದೇ ಆದ ಭಾವನೆಗಳು, ವೈರುಧ್ಯಗಳು ಹಾಗೂ ಅನುಭವಗಳನ್ನು ಹೊಂದಿರುವ ವ್ಯಕ್ತಿಗಳಾಗಿ ತೋರಿಸುವುದು ಮುಖ್ಯ ಎಂದು ಅದಿತಿ ಹೇಳಿದ್ದಾರೆ.

ಮಹಿಳಾ ನಟಿಯರನ್ನು ಇನ್ನೂ ನಿರ್ದಿಷ್ಟ ಇಮೇಜ್‌ನಲ್ಲಿ ನೋಡುವ ಪ್ರವೃತ್ತಿ ಇದೆ ಎಂದಿರುವ ಅವರು, ಪರದೆಯ ಮೇಲೆ ಮಹಿಳೆಯರು ಗ್ಲಾಮರಸ್ ಆಗಿ ಕಾಣಬೇಕು ಎಂಬ ನಿರೀಕ್ಷೆ ಇದೆ. ಆ ಚೌಕಟ್ಟಿನಿಂದ ಹೊರಬಂದು ಹೆಚ್ಚು ನೈಜ ಪಾತ್ರಗಳನ್ನು ಮಾಡಿದರೆ ಮುಂದೆ ಕೆಲಸ ಸಿಗುತ್ತದೆಯೇ ಎಂಬ ಭಯವೂ ಕೆಲವೊಮ್ಮೆ ಇರುತ್ತದೆ ಎಂದು ಹೇಳಿದ್ದಾರೆ.

'ನೀವು ಹೆಚ್ಚು ಸ್ವತಂತ್ರರಾಗುತ್ತೀರಿ'

ಇತ್ತೀಚೆಗೆ ಮಾಡಿದ ಹಿಂದಿ ವೆಬ್ ಸೀರಿಸ್ ಅದಿತಿಗೆ ಪಾತ್ರ ತಯಾರಿಯ ಮತ್ತೊಂದು ವಿಭಿನ್ನ ಅನುಭವ ನೀಡಿದೆ. ಕ್ಯಾಮೆರಾ ಮುಂದೆ ನಿಲ್ಲುವ ಮುನ್ನ ವರ್ಕ್‌ಶಾಪ್‌ಗಳು, ಆನ್‌ಲೈನ್ ಸೆಷನ್‌ಗಳು ಹಾಗೂ ಡೈಲೆಕ್ಟ್ ಕೋಚ್‌ಗಳೊಂದಿಗೆ ಕೆಲಸ ಮಾಡಿರುವುದಾಗಿ ಅವರು ತಿಳಿಸಿದ್ದಾರೆ. ರಂಗಭೂಮಿಯ ಅನುಭವವನ್ನೂ ನೆನಪಿಸಿಕೊಂಡಿರುವ ಅದಿತಿ, ಪಾತ್ರಕ್ಕಾಗಿ ಮಾಡುವ ಪೂರ್ವತಯಾರಿ ಸೆಟ್‌ನಲ್ಲಿ ನಟನಿಗೆ ಇನ್ನಷ್ಟು ಸ್ವಾತಂತ್ರ್ಯ ನೀಡುತ್ತದೆ ಎಂದು ಹೇಳಿದ್ದಾರೆ.

ಸ್ಕ್ರಿಪ್ಟ್ ಮತ್ತು ಸಂಭಾಷಣೆಗಳನ್ನು ಸಂಪೂರ್ಣವಾಗಿ ಮನಸ್ಸಿನಲ್ಲಿ ಅಳವಡಿಸಿಕೊಂಡ ಬಳಿಕ ಶೂಟಿಂಗ್ ವೇಳೆ ಪಾತ್ರವನ್ನು ಇನ್ನಷ್ಟು ಸುಲಭವಾಗಿ ರೂಪಿಸಿಕೊಳ್ಳಬಹುದು. ನಿಮ್ಮ ಭಾವನೆಯ ತೀವ್ರತೆ ಹಾಗೂ ದೃಷ್ಟಿಕೋನವನ್ನು ಬದಲಾಯಿಸಬಹುದು. ಇದರಿಂದ ಕಥೆಯನ್ನು ಕಟ್ಟುವ ಪ್ರಕ್ರಿಯೆಯೇ ಇನ್ನಷ್ಟು ಉತ್ತಮವಾಗುತ್ತದೆ ಎಂದು ಅದಿತಿ ವಿವರಿಸಿದ್ದಾರೆ.

'ನನ್ನದೇ ಕೆಲವು ಭಾಗಗಳನ್ನು ಕಂಡುಕೊಂಡಿದ್ದೇನೆ'

ಸಂಗೀತ, ನಟನೆ, ಚಿತ್ರಕಲೆ ಸೇರಿದಂತೆ ತಮ್ಮ ಸೃಜನಶೀಲ ಆಸಕ್ತಿಗಳನ್ನು ಅದಿತಿ ಪ್ರತ್ಯೇಕ ಜಗತ್ತುಗಳಂತೆ ನೋಡುವುದಿಲ್ಲ. ಒಂದೊಂದು ಕಲಾ ಪ್ರಕಾರವೂ ಮತ್ತೊಂದನ್ನು ಇನ್ನಷ್ಟು ಚೆನ್ನಾಗಿ ಅರ್ಥಮಾಡಿಕೊಳ್ಳಲು ಸಹಾಯ ಮಾಡುತ್ತದೆ ಎಂದು ಅವರು ಹೇಳಿದ್ದಾರೆ. ಒಂದು ಕಲಾ ಪ್ರಕಾರ ಮತ್ತೊಂದನ್ನು ಇನ್ನಷ್ಟು ಚೆನ್ನಾಗಿ ಮಾಡಲು ನನಗೆ ಸಹಾಯ ಮಾಡುತ್ತದೆ. ಒಂದು ಕೆಲಸವನ್ನು ಮಾಡುವಾಗ ಮತ್ತೊಂದು ಕಲೆಯ ಅನುಭವವೂ ಉಪಯೋಗವಾಗುತ್ತದೆ ಎಂದು ಅವರು ಹೇಳಿದ್ದಾರೆ.

ಹಾಡುವಾಗಲೂ ತಾವು ಆ ಹಾಡನ್ನು ಹಾಡುತ್ತಿರುವ ವ್ಯಕ್ತಿ ಯಾರು, ಆತ ಅಥವಾ ಆಕೆ ಯಾಕೆ ಹಾಡುತ್ತಿದ್ದಾರೆ ಹಾಗೂ ಆ ಧ್ವನಿ ಆ ಸನ್ನಿವೇಶಕ್ಕೆ ಏನು ಸೇರಿಸುತ್ತದೆ ಎಂಬುದನ್ನು ಯೋಚಿಸುತ್ತೇನೆ ಎಂದು ಅದಿತಿ ಹೇಳಿದ್ದಾರೆ. ಇದು ನಟನೆಗೆ ತುಂಬಾ ಹತ್ತಿರವಾದ ಪ್ರಕ್ರಿಯೆ. ನಟನೆ ಮತ್ತು ಸಂಗೀತ ಎರಡೂ ಅಭಿವ್ಯಕ್ತಿಯ ರೂಪಗಳು. ಎರಡಕ್ಕೂ ಆಲೋಚನೆ ಹಾಗೂ ಸಂದರ್ಭದ ಅರಿವು ಅಗತ್ಯ ಎಂದು ಅವರು ಹೇಳಿದ್ದಾರೆ.

'ಚಿತ್ರಕಲೆ ನನಗೆ ಒಂದು ರೀತಿಯ ಧ್ಯಾನದಂತೆ'

ಚಿತ್ರಕಲೆ ಹಾಗೂ ಮಲ್ಟಿಮೀಡಿಯಾ ಆರ್ಟ್ ತಮ್ಮ ಮನಸ್ಸಿಗೆ ಶಾಂತಿ ನೀಡುತ್ತವೆ ಎಂದು ಅದಿತಿ ಹೇಳಿದ್ದಾರೆ. ಚಿತ್ರ ಬಿಡಿಸುವುದು ಹಾಗೂ ಕಲೆ ಸೃಷ್ಟಿಸುವುದು ನನಗೆ ಒಂದು ರೀತಿಯ ಧ್ಯಾನದಂತೆ. ಪ್ರತಿಯೊಬ್ಬರಿಗೂ ಆ ಮೌನ ಅಥವಾ ತಲೆಯಲ್ಲಿ ನಿರಂತರವಾಗಿ ನಡೆಯುವ ಆಲೋಚನೆಗಳಿಂದ ಒಂದು ಸಣ್ಣ ವಿರಾಮ ಬೇಕು ಎಂದು ಅವರು ಹೇಳಿದ್ದಾರೆ. ವಿಭಿನ್ನ ಕಲಾ ಪ್ರಕಾರಗಳೊಂದಿಗೆ ತಮ್ಮನ್ನು ತೊಡಗಿಸಿಕೊಳ್ಳುವುದು ಭಾವನೆಗಳನ್ನು ನಿಯಂತ್ರಿಸಿಕೊಳ್ಳಲು ಸಹಾಯ ಮಾಡಿದೆ.

ಅದೇ ಅನುಭವ ನಟಿಯಾಗಿ ತಮ್ಮ ಪಾತ್ರಗಳನ್ನು ಅರ್ಥಮಾಡಿಕೊಳ್ಳಲು ಮತ್ತು ಅಭಿನಯದಲ್ಲಿ ಮತ್ತಷ್ಟು ಆಳಕ್ಕೆ ಹೋಗಲು ನೆರವಾಗುತ್ತಿದೆ ಎಂದು ಅದಿತಿ ಸಾಗರ್ ಹೇಳಿದ್ದಾರೆ. ಇನ್ನು ಸಿನಿಮಾ, ಸಂಗೀತ, ಚಿತ್ರಕಲೆ ಸೇರಿದಂತೆ ಹಲವು ಕಲಾ ಪ್ರಕಾರಗಳೊಂದಿಗೆ ಸಾಗುತ್ತಿರುವ ಅದಿತಿ ಸಾಗರ್ ಅವರ ಈ ವಿಭಿನ್ನ ಪಯಣ, 'ಹೆಗ್ಗಣ ಮುದ್ದು' ಚಿತ್ರದ ಮೂಲಕ ಮತ್ತೊಮ್ಮೆ ಬೆಳ್ಳಿತೆರೆಯಲ್ಲಿ ಹೇಗೆ ಮೂಡಿಬರಲಿದೆ ಎಂಬ ಕುತೂಹಲ ಮೂಡಿಸಿದೆ.

ವಿಜಯ್‌ ದೇವರಕೊಂಡ ಬಳಿ ರಶ್ಮಿಕಾ 100 ಬಾರಿ ಕೇಳಿದ್ದೇನು? ಕಾಫಿ ವಿತ್ ಕರಣ್ ಶೋ ಪ್ರೋಮೋದಲ್ಲಿ ಮದುವೆ ಸೀಕ್ರೆಟ್ ಲೀಕ್!

Ravi Janekal — Sun, 18 Oct 2026 15:04:21 +0530

Rashmika Mandanna Koffee With Karan 9 ರಶ್ಮಿಕಾ ಮಂದಣ್ಣ-ವಿಜಯ್ ದೇವರಕೊಂಡ ಜೋಡಿ ಇದೇ ಮೊದಲ ಬಾರಿಗೆ ಕಾಫಿ ವಿತ್ ಕರಣ್ ಶೋನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಒಟ್ಟಿಗೆ ಭಾಗವಹಿಸುತ್ತಿದ್ದು ಮದುವೆ ಹಿಂದಿನ ಅಸಲಿ ಕತೆ ರಿವೀಲ್ ಮಾಡಿದ್ದಾರೆ. ಇಬ್ಬರಲ್ಲಿ ಮೊದಲು ಪ್ರಪೋಸ್ ಮಾಡಿದ್ದು ಯಾರು ಗೊತ್ತಾ?

ರಶ್ಮಿಕಾ ಮಂದಣ್ಣ(Rashmika Mandanna) ಮತ್ತು ವಿಜಯ್ ದೇವರಕೊಂಡ(Vijay Deverakonda) ಈಗ ಸಂತೋಷದಿಂದ ದಾಂಪತ್ಯ ಜೀವನ ನಡೆಸುತ್ತಿದ್ದಾರೆ. ವೃತ್ತಿ ಮತ್ತು ವೈಯಕ್ತಿಕ ಜೀವನ ಎರಡನ್ನೂ ಚೆನ್ನಾಗಿ ನಿಭಾಯಿಸುತ್ತಿರುವ ಈ ಜೋಡಿ, ಇದೀಗ ಕರಣ್ ಜೋಹರ್ ಅವರ ‘ಕಾಫಿ ವಿತ್ ಕರಣ್ 9(Koffee With Karan 9)’ ಕಾರ್ಯಕ್ರಮದಲ್ಲಿ ಒಟ್ಟಿಗೆ ಕಾಣಿಸಿಕೊಳ್ಳಲಿದ್ದಾರೆ.

ಕಾರ್ಯಕ್ರಮದ ಪ್ರೋಮೋ ಬಿಡುಗಡೆಯಾಗಿದ್ದು, ಅದರಲ್ಲಿ ಇಬ್ಬರೂ ತಮ್ಮ ಮದುವೆ ಮತ್ತು ಪ್ರೀತಿಯ ಬಗ್ಗೆ ಹಲವು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ. ಕರಣ್ ಅವರ ಕಾರ್ಯಕ್ರಮದಲ್ಲಿ ರಶ್ಮಿಕಾ ಮತ್ತು ವಿಜಯ್ ಒಟ್ಟಿಗೆ ಕಾಣಿಸಿಕೊಳ್ಳುತ್ತಿರುವುದು ಇದೇ ಮೊದಲು.

ಈ ಹಿಂದೆ ವಿಜಯ್ ದೇವರಕೊಂಡ ಅವರು ‘ಕಾಫಿ ವಿತ್ ಕರಣ್ 7’ ಕಾರ್ಯಕ್ರಮದಲ್ಲಿ ನಟಿ ಅನನ್ಯಾ ಪಾಂಡೆ ಜೊತೆ ಕಾಣಿಸಿಕೊಂಡಿದ್ದರು. ಆಗ ಅವರಿಬ್ಬರೂ ‘ಲೈಗರ್’ ಚಿತ್ರದಲ್ಲಿ ಒಟ್ಟಿಗೆ ನಟಿಸಿದ್ದರು.

ಇದೀಗ ಬಿಡುಗಡೆಯಾಗಿರುವ ಪ್ರೋಮೋದಲ್ಲಿ ಕರಣ್ ಜೋಹರ್, 'ರಶ್ಮಿಕಾ ಮತ್ತು ವಿಜಯ್ ಅವರಲ್ಲಿ ಮೊದಲು ಪ್ರಪೋಸ್ ಮಾಡಿದ್ದು ಯಾರು' ಎಂದು ಕೇಳುತ್ತಾರೆ. ಇದಕ್ಕೆ ವಿಜಯ್, ರಶ್ಮಿಕಾ ಅವರೇ ಮೊದಲು ‘ಮದುವೆಯಾಗೋಣ’ ಎಂದು ಹೇಳಿದ್ದರು ಎಂಬರ್ಥದಲ್ಲಿ ಉತ್ತರಿಸುತ್ತಾರೆ. ಅದಕ್ಕೆ ತಮಾಷೆಯಾಗಿ ಪ್ರತಿಕ್ರಿಯಿಸುವ ಅವರು, 'ನೀನು 100 ಬಾರಿ ಕೇಳಿದಿ. ಅದಕ್ಕೆ ನಾನು ಒಕೆ ಮದುವೆಯಾಗೋಣ ಅಂದೆ' ಎಂದು ಹೇಳುತ್ತಾರೆ. ತಕ್ಷಣ ಕರಣ್, 'ನೀವು ನಿಜವಾಗಿಯೂ 100 ಬಾರಿ ಕೇಳಿದ್ದೀರಾ? ರಶ್ಮಿಕಾ?' ಎಂದು ಪ್ರಶ್ನಿಸುತ್ತಾರೆ. ಇದಕ್ಕೆ ರಶ್ಮಿಕಾ, 'ನಾನು ಅವರ ಬಳಿ ಒಂದು ವರ್ಷ ಪೂರ್ತಿ ಕೇಳಿದ್ದೆ' ಎಂದು ನಗುತ್ತಾ ಉತ್ತರಿಸುತ್ತಾರೆ.

ಕಾರ್ಯಕ್ರಮದಲ್ಲಿ ರಶ್ಮಿಕಾ ತಮ್ಮ ನೆಚ್ಚಿನ ಸಹನಟನ ಬಗ್ಗೆಯೂ ಮಾತನಾಡಿದ್ದಾರೆ. ರಣಬೀರ್ ಕಪೂರ್ ಮತ್ತು ಅಲ್ಲು ಅರ್ಜುನ್ ಅವರಲ್ಲಿ ಒಬ್ಬರನ್ನು ಆಯ್ಕೆ ಮಾಡುವಂತೆ ಕೇಳಿದಾಗ, ಅವರು ಅಲ್ಲು ಅರ್ಜುನ್ ಅವರ ಹೆಸರನ್ನು ಹೇಳುತ್ತಾರೆ. ಬಳಿಕ ಕರಣ್, 'ರಶ್ಮಿಕಾ ಅವರನ್ನು ಬಿಟ್ಟರೆ, ತೆರೆಯ ಮೇಲೆ ನಿಮಗೆ ಯಾರು ಉತ್ತಮ ಜೋಡಿ ಎನಿಸುತ್ತಾರೆ?' ಎಂದು ವಿಜಯ್ ಅವರನ್ನು ಕೇಳುತ್ತಾರೆ. ಆಗ ವಿಜಯ್ ಉತ್ತರಿಸುವ ಮೊದಲೇ ರಶ್ಮಿಕಾ, 'ಯಾರೂ ಇಲ್ಲ' ಎಂದು ತಕ್ಷಣ ಉತ್ತರಿಸುತ್ತಾರೆ. ಆಗ ವಿಜಯ್, 'ಮದುವೆಯಲ್ಲಿ ಮೊದಲ ನಿಯಮವೆಂದರೆ ಹೆಂಡತಿ ಹೇಳಿದ್ದಕ್ಕೆ ಒಪ್ಪಿಕೊಳ್ಳುವುದು' ಎಂದು ತಮಾಷೆ ಮಾಡುತ್ತಾರೆ. ಇದನ್ನು ಕೇಳಿ ರಶ್ಮಿಕಾ ಜೋರಾಗಿ ನಗುತ್ತಾರೆ.

ರಶ್ಮಿಕಾ ಮತ್ತು ವಿಜಯ್ ಅವರ ಮದುವೆ ಫೆಬ್ರವರಿ 26, 2026ರಂದು ಉದಯಪುರದಲ್ಲಿ ನಡೆದಿತ್ತು. ಮದುವೆಯ ಫೋಟೋಗಳು, ಅವರ ಮದುವೆಯ ಉಡುಗೆ ಸೋಷಿಯಲ್ ಮೀಡಿಯಾದ ಹೆಚ್ಚು ವೈರಲ್ ಆಗಿತ್ತು. ಇವರ ಮದುವೆ ಬಗ್ಗೆ ಅಭಿಮಾನಿಗಳಲ್ಲಿಯೂ ಸಾಕಷ್ಟು ಕುತೂಹಲ ಮೂಡಿತ್ತು.

ಈ ಜೋಡಿಯ ಪರಿಚಯ ‘ಗೀತ ಗೋವಿಂದಂ’ ಚಿತ್ರದ ಮೂಲಕ ಮತ್ತಷ್ಟು ಗಟ್ಟಿಯಾಯಿತು. 2017ರಲ್ಲಿ ಬಿಡುಗಡೆಯಾದ ಈ ಚಿತ್ರದಲ್ಲಿ ಇಬ್ಬರೂ ಒಟ್ಟಿಗೆ ನಟಿಸಿದ್ದರು. ನಂತರವೂ ಹಲವು ವರ್ಷಗಳ ಕಾಲ ಇವರಿಬ್ಬರ ನಡುವೆ ಪ್ರೀತಿ ಇದೆ ಎಂಬ ವದಂತಿಗಳು ಹರಿದಾಡಿದ್ದವು. ಆದರೆ, ರಶ್ಮಿಕಾ ಮತ್ತು ವಿಜಯ್ ತಮ್ಮ ಸಂಬಂಧದ ಬಗ್ಗೆ ಬಹಿರಂಗವಾಗಿ ಮಾತನಾಡಿರಲಿಲ್ಲ. ಕೊನೆಗೆ ಇಬ್ಬರು ಮದುವೆಯಾಗಲು ನಿರ್ಧರಿಸಿ ನಿಶ್ಚಿತಾರ್ಥವಾದಾಗಲೇ ಎಲ್ಲ ಊಹಾಪೋಹಗಳಿಗೆ ತೆರೆಬಿದ್ದಿತು.

ಮದ್ಯಪಾನ, ಮಧ್ಯವರ್ತಿ ಎರಡರಿಂದಲೂ ದೂರ: ‘ಬೇಲ್’ ಸಂದರ್ಶನದಲ್ಲಿ ಶಿವಣ್ಣ ಹೇಳಿದ್ದೇನು?

Govindaraj S — Fri, 02 Oct 2026 08:45:31 +0530

‘ಬೇಲ್’ ಬಿಡುಗಡೆ ಪ್ರಯುಕ್ತ ಶಿವರಾಜ್ ಕುಮಾರ್ ಮುಕ್ತ ಮಾತುಕತೆಗೆ ಸಿಕ್ಕಿದ್ದರು. ಈ ಸಂದರ್ಭದಲ್ಲಿ ತಮ್ಮ ಜೀವನದ ಕುರಿತು, ಪಾತ್ರಗಳು, ಸಿನಿಮಾ, ಜೀವನಶೈಲಿ ಕುರಿತು ಅತ್ಯಂತ ಲವಲವಿಕೆಯಿಂದ, ಮುಕ್ತವಾಗಿ ಮಾತನಾಡಿದರು. ಆ ಮಾತುಗಳು ಇಲ್ಲಿವೆ. ಅದು ನನ್ನ ಬದುಕಿನ ಅತ್ಯಂತ ಕಠಿಣ ಘಟ್ಟ. ಬ್ಲಾಡರ್ ಕ್ಯಾನ್ಸರ್ ಪತ್ತೆಯಾಗಿದ್ದ ದಿನಗಳವು. ಅಂತಹ ಕತ್ತಲೆಯ ಹೊತ್ತಿನಲ್ಲಿ ನಿರ್ದೇಶಕ ಪವನ್ ಒಡೆಯರ್ ಕಥೆ ಹೇಳಲು ಬಂದರು. ನಾನೀಗ ಅಮೆರಿಕಕ್ಕೆ ಸರ್ಜರಿಗೆ ಹೋಗಬೇಕು, ಸಿನಿಮಾ ಮಾಡಲು ಶಕ್ತಿ ಉಳಿಯುತ್ತೋ ಇಲ್ಲವೋ ಗೊತ್ತಿಲ್ಲ ಎಂದೆ.

ಆದರೆ ನಾನು ವಿಮಾನವೇರಲು ಕೇವಲ ಎರಡು ದಿನಗಳಿರುವಾಗ ಪವನ್ ಹಾಗೂ ಅವರ ಪತ್ನಿ ಅಪೇಕ್ಷಾ ಮನೆಗೆ ಬಂದು ನಾನು ಎಷ್ಟೇ ನಿರಾಕರಿಸಿದರೂ ಕೇಳದೆ, ‘ಶಿವಣ್ಣ, ನೀವೇ ಈ ಸಿನಿಮಾ ಮಾಡಬೇಕು, ನೀವು ಸಂಪೂರ್ಣ ಗುಣಮುಖರಾಗಿ ಬರುವವರೆಗೂ ಕಾಯುತ್ತೇವೆ’ ಎಂದು ಒತ್ತಾಯಪೂರ್ವಕವಾಗಿ ಕೈಗೆ ಅಡ್ವಾನ್ಸ್ ಇಟ್ಟು ಹೋದರು. ಆ ದಂಪತಿ ನನ್ನ ಮೇಲಿಟ್ಟ ವಿಶ್ವಾಸವೇ ನನ್ನಲ್ಲಿ ಸಾವನ್ನು ಗೆಲ್ಲುವ ಧೈರ್ಯ ತುಂಬಿತು. ಅಮೆರಿಕದಲ್ಲಿ ಮೇಜರ್ ಸರ್ಜರಿ ಮುಗಿದು ಪ್ರಜ್ಞೆ ಬಂದ ಕೇವಲ ಎರಡೇ ಗಂಟೆಯಲ್ಲಿ ನಾನು ಮೊದಲು ಕರೆ ಮಾಡಿದ್ದೇ ಪವನ್‌ಗೆ.

‘ಬೇಲ್’ ಚಿತ್ರದ ಒನ್‌ಲೈನ್ ಕೇಳಿದ ತಕ್ಷಣವೇ ನನಗೆ ಗಾಢವಾಗಿ ತಟ್ಟಿತು. ಇಂತಹ ಕಥೆಗಳು ಬಂದೇ ಇಲ್ಲ ಎಂದಲ್ಲ, ಆದರೆ ಪವನ್ ಈ ಕಥೆಯನ್ನು ತೆರೆಗೆ ತಂದಿರುವ ನಿರೂಪಣೆ ಇಡೀ ಚಿತ್ರಕ್ಕೆ ಹೊಸ ಕಳೆ ತಂದಿದೆ. ಇದು ಕೇವಲ ಒಂದು ಜಾನರ್‌ಗೆ ಸೀಮಿತವಾದ ಚಿತ್ರವಲ್ಲ. ಥ್ರಿಲ್ಲರ್, ಕಾಮಿಡಿ, ಫ್ಯಾಮಿಲಿ ಡ್ರಾಮಾ, ಕ್ರೈಮ್ ಹಾಗೂ ಸಮಾಜಕ್ಕೆ ಅಗತ್ಯವಿರುವ ಗಟ್ಟಿ ಸಂದೇಶ ಎಲ್ಲವೂ ಒಂದೇ ಕಡೆ ಇದೆ. ತೆಲುಗಿನ ‘ಪೆದ್ದಿ’ ಚಿತ್ರೀಕರಣದ ವೇಳೆ ನನ್ನ ಈ ಗೆಟಪ್ ನೋಡಿ ನಟ ರಾಮ್‌ಚರಣ್ ಕೂಡ ಮೆಚ್ಚಿದ್ದರು. ಚಿತ್ರದಲ್ಲಿ ಜಯರಾಮ್, ಸಾಯಿಕುಮಾರ್, ಸಂಗೀತಾ, ಸಂಜನಾ, ಲೂಸ್ ಮಾದ ಯೋಗಿ ಮತ್ತು ದೀಕ್ಷಿತ್ ಶೆಟ್ಟಿ ಸೇರಿದಂತೆ ಎಲ್ಲರ ಪಾತ್ರಗಳೂ ಕಥೆಯ ಜೀವಾಳವಾಗಿವೆ. ವೈದಿ ಅವರ ದೃಶ್ಯವೈಭವ ಮತ್ತು ಅಜನೀಶ್ ಲೋಕನಾಥ್ ಸಂಗೀತ ಚಿತ್ರದ ಬಲ.

ಹಳೆಯ ಅಬ್ಬರದ ಮಾಸ್ ಇಮೇಜ್ ಮಾಡಿ ಮಾಡಿ ಸಾಕಾಗಿಹೋಗಿದೆ. ಕೇವಲ ಉದ್ದುದ್ದ ಡೈಲಾಗ್ ಹೊಡೆದು ಕಿರುಚುವುದಷ್ಟೇ ನಟನೆಯಲ್ಲ. ಪಾತ್ರದ ಕಣ್ಣುಗಳಲ್ಲೇ ನೋವು, ಹತಾಶೆ ಮತ್ತು ಆಕ್ರೋಶ ಹೊಮ್ಮಬೇಕು. ಆ ನೈಜ ಅಭಿನಯಕ್ಕೆ ‘ಬೇಲ್’ನಲ್ಲಿ ಅಪಾರ ಜಾಗವಿದೆ. ಶೂಟಿಂಗ್ ವೇಳೆ ಅಪಾಯಕಾರಿ ಸಾಹಸ ದೃಶ್ಯಗಳಿಗೆ ಡ್ಯೂಪ್ ತರಲು ನಿರ್ಧರಿಸಿದ್ದರು. ಅವರು ಅದ್ಭುತವಾಗಿ ಸಾಹಸ ಮಾಡಬಹುದು, ಆದರೆ ನನ್ನದೇ ಆದ ಬಾಡಿ ಲಾಂಗ್ವೇಜ್ ಮತ್ತು ಆ ಸ್ವಾಗ್ ನನ್ನಿಂದ ಮಾತ್ರ ಸಾಧ್ಯ ಎಂದು ನಾನೇ ರಿಸ್ಕ್ ತೆಗೆದುಕೊಂಡು ಆ್ಯಕ್ಷನ್ ಮಾಡಿದೆ.

ಕೆಲವು ತಂಡಗಳು ಆರಂಭದಲ್ಲಿ ಬೆಟ್ಟದಷ್ಟು ಜೋಶ್‌ನಲ್ಲಿ ಬಂದು ನಂತರ ತಣ್ಣಗಾಗಿಬಿಡುತ್ತವೆ. ಚಿತ್ರರಂಗದ ತೆರೆಮರೆಯಲ್ಲಿ ಮಧ್ಯವರ್ತಿಗಳು ಕೆಲವರು ನನ್ನ ಹೆಸರನ್ನೇ ದಾಳವಾಗಿಟ್ಟುಕೊಂಡು ಆಟವಾಡುತ್ತಿದ್ದರು. ಅವರ ಹೆಸರನ್ನು ಪ್ರಸ್ತಾಪಿಸಿ ಹೊಸ ವಿವಾದ ಹುಟ್ಟುಹಾಕಲು ನಾನು ಬಯಸುವುದಿಲ್ಲ. ಆದರೆ ಅಂತಹ ಮಧ್ಯವರ್ತಿಗಳ ಜಾಲದಿಂದ ನಾನು ಸಂಪೂರ್ಣವಾಗಿ ಹೊರಬಂದಿದ್ದೇನೆ. ಈಗೇನಿದ್ದರೂ ನಿರ್ಮಾಪಕರು ಮತ್ತು ನಿರ್ದೇಶಕರೊಂದಿಗೆ ನಾನೇ ನೇರವಾಗಿ ಮುಖಾಮುಖಿ ಮಾತನಾಡುತ್ತೇನೆ.

ಆಪರೇಷನ್ ನಂತರ ಬದುಕಿನ ಲಯವೇ ಬದಲಾಗಿದೆ. ಕಳೆದ ಎರಡು ವರ್ಷಗಳಿಂದ ಧೂಮಪಾನ ಮತ್ತು ಮದ್ಯಪಾನವನ್ನು ಸಂಪೂರ್ಣವಾಗಿ ತ್ಯಜಿಸಿದ್ದೇನೆ. ದಿನವೂ ನಿಗದಿತ ಸಮಯಕ್ಕೆ ವಾಕಿಂಗ್, ಲಘು ವ್ಯಾಯಾಮ ಮತ್ತು ಕಟ್ಟುನಿಟ್ಟಿನ ಆಹಾರ ಪದ್ಧತಿ ಪಾಲಿಸುತ್ತಿದ್ದೇನೆ. 2015ರಲ್ಲಿ ಎದುರಾಗಿದ್ದ ಹೃದಯ ಸಮಸ್ಯೆಗೆ ಸಂಬಂಧಿಸಿದ ಕೆಲವು ನಿಯಮಿತ ಔಷಧಿಗಳನ್ನು ಹೊರತುಪಡಿಸಿದರೆ, ನಾನೀಗ ನೂರಕ್ಕೆ ನೂರು ಫಿಟ್ ಆಗಿದ್ದೇನೆ. ವೈದ್ಯರಾದ ಡಾ. ಮನೋಹರನ್ ಹದಿನೈದು ದಿನಕ್ಕೊಮ್ಮೆ ಕಾಲ್ ಮಾಡಿ ನನ್ನ ಆರೋಗ್ಯದ ನಿಗಾ ವಹಿಸುತ್ತಾರೆ.

ಅನಂತ್ ನಾಗ್ ಅವರಿಗೆ ಫಾಲ್ಕೆ ಸಂದಿದ್ದು ನಮ್ಮ ಹೆಮ್ಮೆ

‘ಅನಂತ್ ನಾಗ್ ಸರ್ ಸರ್ ನನ್ನ ಸದಾಕಾಲದ ಅಚ್ಚುಮೆಚ್ಚಿನ ನಟ. ಅವರ ಮೊದಲ ಸಿನಿಮಾ ‘ಅಂಕುರ್’ ದಿನಗಳಿಂದಲೂ ಅವರ ಅಭಿನಯವನ್ನು ಕಣ್ತುಂಬಿಕೊಂಡಿದ್ದೇನೆ. ಭಾರತೀಯ ಚಿತ್ರರಂಗದ ಅತ್ಯಂತ ಸ್ಫುರದ್ರೂಪಿ ಹಾಗೂ ಸಿನಿಮಾದ ನಾಡಿಮಿಡಿತವನ್ನು ಆಳವಾಗಿ ಬಲ್ಲ ಅಪರೂಪದ ಮೇರು ಕಲಾವಿದ ಅವರು. ಅವರ ಕಂಠ, ಸ್ಪಷ್ಟ ಕನ್ನಡ ಉಚ್ಚಾರಣೆ ಎಲ್ಲವೂ ಅನನ್ಯ. ಸಿಕ್ಕಾಗಲೆಲ್ಲ ಶಂಕರ್ ನಾಗ್ ಮತ್ತು ಅಪ್ಪಾಜಿಯವರ ಒಡನಾಟದ ದಿನಗಳನ್ನು ಮೆಲಕು ಹಾಕುತ್ತಾರೆ. ಅವರ ಜತೆ ಮಾತನಾಡುತ್ತಿದ್ದರೆ ಸಮಯ ಹೋಗುವುದೇ ತಿಳಿಯುವುದಿಲ್ಲ. ಅವರಿಗೆ ಫಾಲ್ಕೆ ಪ್ರಶಸ್ತಿ ಸಂದಿರುವುದು ನಿಜಕ್ಕೂ ಅರ್ಥಪೂರ್ಣ.’

ಯೋಗಿಗೆ ಭವಿಷ್ಯವಿದೆ

‘ಸಿನಿಮಾದಲ್ಲಿ ಕಾಸ್ಟಿಂಗ್ ತುಂಬಾ ಪರ್ಫೆಕ್ಟ್ ಆಗಿದೆ. ಯೋಗಿ ತುಂಬಾ ವಂಡರ್‌‌ಫುಲ್ ಆಕ್ಟರ್. ಆತ ನೋಡೋಕೆ ತುಂಬಾ ರಸ್ಟಿಕ್ ಆಗಿ ಕಾಣಿಸ್ತಾನೆ, ಈಗಂತೂ ಆ ಪಾತ್ರಕ್ಕೆ ಇನ್ನಷ್ಟು ರಫ್ & ರಸ್ಟಿಕ್ ಆಗಿ ಕಾಣಿಸ್ತಿದ್ದಾನೆ. ಆ ಹುಡುಗನಿಗೆ ತುಂಬಾ ಒಳ್ಳೆ ಭವಿಷ್ಯವಿದೆ.

ಮಗಳಿಗೇ ಬೈದು, ಸಿಟ್ಟಾದೆ! 'ಸಿಟಿ ಲೈಟ್ಸ್' ಸೆಟ್‌ನ ಆ ಸೀಕ್ರೆಟ್ ಬಿಚ್ಚಿಟ್ಟ ದುನಿಯಾ ವಿಜಯ್

Govindaraj S — Fri, 18 Sep 2026 08:30:39 +0530

ಆರ್. ಕೇಶವಮೂರ್ತಿ

* ಎರಡು ಚಿತ್ರಗಳಲ್ಲಿ ನಿರ್ದೇಶಕರಾಗಿ ಗೆದ್ದವರು. ಈಗ ಹ್ಯಾಟ್ರಿಕ್‌ ಡೈರೆಕ್ಟರ್‌ ಆಗಲು ಹೊರಟಿದ್ದೀರಿ?

ಅದು ಪ್ರೇಕ್ಷಕರಿಗೆ ಬಿಟ್ಟ ವಿಚಾರ. ಸಿನಿಮಾ ನೋಡಿ ಪ್ರೇಕ್ಷಕರು ಏನು ಹೇಳಿದರೂ ಸ್ವೀಕರಿಸುತ್ತೇನೆ. ‘ಸಲಗ’ ಹಾಗೂ ‘ಭೀಮ’ ಚಿತ್ರಗಳನ್ನೂ ಇದೇ ನಂಬಿಕೆಯಲ್ಲಿ ನಿರ್ದೇಶಿಸಿದ್ದೆ. ಪ್ರೇಕ್ಷಕರು ಕೈ ಹಿಡಿದರು. ‘ಸಿಟಿ ಲೈಟ್ಸ್‌’ ಕೈ ಹಿಡಿದು ಹ್ಯಾಟ್ರಿಕ್‌ ಡೈರೆಕ್ಟರ್‌ ಮಾಡೋದು ಕೂಡ ಈಗ ಪ್ರೇಕ್ಷಕರಿಗೆ ಬಿಟ್ಟಿದ್ದೇನೆ.

* ಪ್ರೇಕ್ಷಕರು ನಿಮ್ಮ ಕೈ ಹಿಡಿಯುತ್ತಾರೆಂಬ ಗ್ಯಾರಂಟಿಗಳು ‘ಸಿಟಿ ಲೈಟ್ಸ್‌’ ಚಿತ್ರದಲ್ಲಿ ಏನಿವೆ?

ಗ್ಯಾರಂಟಿ ಎನ್ನುವುದಕ್ಕಿಂತ ನಾನು ವಾಸ್ತವಗಳನ್ನು ಈ ಚಿತ್ರದ ಮೂಲಕ ಹೇಳಿದ್ದೇನೆ. ಅಂದರೆ ಸೂಕ್ಷ್ಮವಾದ ಎರಡು ವಿಚಾರಗಳು ಈ ಚಿತ್ರದಲ್ಲಿವೆ. ಅದು ಹೆಣ್ಣು ಮಕ್ಕಳ ಪರವಾಗಿರುವ ವಿಚಾರಗಳು. ಹೀಗಾಗಿ ‘ಸಿಟಿ ಲೈಟ್ಸ್‌’ ಅನ್ನೋದು ಬದುಕಿನ ವಾಸ್ತವಗಳನ್ನು ಹೇಳುವ ಬೆಳಕು.

* ಈ ಚಿತ್ರ ನೋಡಿದ ಮೇಲೆ ಪ್ರೇಕ್ಷಕರಲ್ಲಿ ಹುಟ್ಟಿಕೊಳ್ಳುವ ಯೋಚನೆ ಏನು?

ಬದುಕಿನ ಪಯಣದಲ್ಲಿ ಹುಷಾರಾಗಿ ಇರಬೇಕು ಎನ್ನುವ ಎಚ್ಚರಿಕೆಯ ಆಲೋಚನೆ ಹುಟ್ಟಿಸುತ್ತದೆ. ಅದರಲ್ಲೂ ಗುರುತು, ಪರಿಚಯ ಇಲ್ಲದ ಬೆಂಗಳೂರಿನಂತಹ ಮಹಾನಗರಗಳಿಗೆ ಬಂದ ಮೇಲೆ ಲೈಫು ಹೇಗಿರುತ್ತದೆ ಎಂಬುದನ್ನು ತೋರಿಸಿದ್ದೇನೆ. ಆದರೆ, ಹೇಗೆ ನಡೆದುಕೊಳ್ಳಬೇಕು ಅಂತ ಹೇಳುವಷ್ಟು ದೊಡ್ಡವನಲ್ಲ.

* ಈ ಚಿತ್ರದ ಕತೆ ಹೊಳೆದಿದ್ದೇಗೆ?

ನನಗೆ ಒಂದು ರಿಯಲ್‌ ಘಟನೆ ಗೊತ್ತಾಯಿತು. ಅದರ ಬಗ್ಗೆ ವಿಚಾರ ಮಾಡುತ್ತಾ, ಯೋಚನೆ ಮಾಡುತ್ತಾ, ಮಾಹಿತಿ ಸಂಗ್ರಹಿಸಲು ಹೊರಟಾಗ ‘ಸಿಟಿ ಲೈಟ್ಸ್‌’ ಕತೆ ಹುಟ್ಟಿಕೊಂಡಿತು. ಆ ಘಟನೆಯನ್ನು ಚಿತ್ರದಲ್ಲಿ ತೋರಿಸಿದ್ದೇನೆ. ಅದೇನು ಎಂಬುದನ್ನು ನೀವು ಸಿನಿಮಾ ನೋಡಿ ತಿಳಿಯಬೇಕು.

* ಕ್ರೈಮು, ಅಪರಾಧ, ರಕ್ತದ ಚಿತ್ರಣಗಳ ಮೂಲಕ ಸಂದೇಶ ಕೊಟ್ಟ ಬದಲಾವಣೆ ತರಲು ಸಾಧ್ಯವೆ?

ಗೊತ್ತಿಲ್ಲ. ಆದರೆ, ನನ್ನ ಹಿಂದಿನ ಎರಡು ಚಿತ್ರಗಳಾದ ‘ಸಲಗ’ ಹಾಗೂ ‘ಭೀಮ’ ಚಿತ್ರಗಳಲ್ಲಿ ಇದು ವರ್ಕ್‌ ಆಗಿತ್ತು. ಅದನ್ನೇ ಇಲ್ಲಿ ಟ್ರೈ ಮಾಡಿದ್ದೇನೆ. ಸಿನಿಮಾ ನೋಡಿದ ಮೇಲೆ ಜನರು ‘ಚಿತ್ರದಲ್ಲಿ ಹೇಳಿರುವುದು ಸತ್ಯ’ ಅಂತ ಅಂದುಕೊಂಡರೆ ಅದೇ ದೊಡ್ಡ ಬದಲಾವಣೆ.

* ‘ಸಿಟಿ ಲೈಟ್ಸ್‌’ ಕತೆ ಮಾಡುವಾಗಲೇ ಚಿತ್ರಕ್ಕೆ ಮೋನಿಷಾ, ವಿನಯ್‌ ರಾಜ್‌ಕುಮಾರ್‌ ಜೋಡಿ ಅಂದುಕೊಂಡಿದ್ರಾ?

ಇಲ್ಲ. ಮೊದಲು ಕತೆ ಬರೆದುಕೊಂಡಿದ್ದೆ. ಈ ಕತೆಗೆ ವಿನಯ್‌ ಹೀರೋ ಆಗಿ ಬಂದ ಮೇಲೆ ಕತೆಯನ್ನು ಮತ್ತೊಂದು ಹಂತಕ್ಕೆ ತೆಗೆದುಕೊಂಡು ಹೋದೆ. ಅದರ ಗ್ರಾಫ್‌ ಚೇಂಜ್‌ ಆಯಿತು. ವಿನಯ್‌ಗೆ ನಾಯಕಿಯಾಗಿ ಮೋನಿಷಾ ಸೂಕ್ತ ಅನಿಸಿತು. ಹೀಗಾಗಿ ಕತೆಯ ನಂತರವೇ ನಾಯಕ, ನಾಯಕಿ ಆಯ್ಕೆ ಆಗಿದ್ದು.

* ಚಿತ್ರದ ನಾಯಕಿ ಮೋನಿಷಾ ಪಾಲಿಗೆ ನೀವು ತಂದೆ ಮತ್ತು ನಿರ್ದೇಶಕ. ಸೆಟ್‌ನಲ್ಲಿ ಹೆಚ್ಚು ಕೆಲಸ ಮಾಡಿದ್ದು ತಂದೆಯ ಮನಸ್ಸಾ, ನಿರ್ದೇಶಕನ ಮನಸ್ಸಾ?

ನಿರ್ದೇಶಕನ ಮನಸ್ಸು. ಯಾಕೆಂದರೆ ನಾನು ಬರೆದುಕೊಂಡಿರುವ ಕತೆ ತೆರೆ ಮೇಲೆ ಅಚ್ಚುಕಟ್ಟಾಗಿ ಮೂಡಿಬರಬೇಕು ಎಂದರೆ ತಂದೆಯಾಗಿ ಯೋಚನೆ ಮಾಡಿದರೆ ಆಗಲ್ಲ. ನಿರ್ದೇಶಕನಾಗಿರಬೇಕು. ಸಿಟ್ಟು, ಕೋಪ, ಬೈದಿದ್ದು ಎಲ್ಲವೂ ಆಗಾಗ ನಡೆಯುತ್ತಿತ್ತು. ಅದು ಪ್ರೀತಿಯಿಂದ.

* ತಂದೆಯಾಗಿ ನಿಮ್ಮ ಮಗಳ ಪಾತ್ರ ಪೋಷನೆ, ನಟನೆ ನೋಡಿದಾಗ ಏನಿಸಿತು?

ನಾನೇ ಭಾವಕನಾಗುತ್ತಿದ್ದೆ. ಕಣ್ಣಲ್ಲಿ ನೀರು ತುಂಬಿಕೊಂಡಿದ್ದೆ. ಯಾಕೆಂದರೆ ಆ ಪಾತ್ರವನ್ನು ನಾನು ಆ ರೀತಿ ರೂಪಿಸಿದ್ದೆ. ‘ನನ್ನ ಮಗಳಂತೆಯೇ ಎಷ್ಟೊಂದು ನೊಂದ ಹೆಣ್ಣು ಮಕ್ಕಳು ಇರಬಹುದಲ್ಲಾ’ ಅಂತ ನೆನಪಿಸಿಕೊಂಡು ಭಾವುಕನಾಗಿದ್ದೇನೆ. ಇದರ ಜೊತೆಗೆ ಶ್ರದ್ಧೆ, ಪ್ರಾಮಾಣಿಕತೆ, ಸತ್ಯದ ದಾರಿಯಲ್ಲಿದ್ದರೆ ನನ್ನ ಮಗಳು ನಟಿಯಾಗಿ ಎಲ್ಲಿ ಬೇಕಾದರೂ ಯಶಸ್ಸು ಕಾಣುತ್ತಾಳೆ ಅನಿಸಿತು.

* ತೆರೆ ಮೇಲೆ ವಿನಯ್‌ ರಾಜ್‌ಕುಮಾರ್‌ ಹಾಗೂ ಮೋನಿಷಾ ಜೋಡಿ ಹೇಗಿದೆ?

ತುಂಬಾ ಮುದ್ದಾಗಿ ಕಾಣುತ್ತಾರೆ. ಸಿನಿಮಾ ನೋಡುವವರಿಗೆ ಈ ಇಬ್ಬರು ಹೀರೋ, ಹೀರೋಯಿನ್‌ ಎನ್ನುವುದಕ್ಕಿಂತ ಅವರ ಮನೆ ಮಕ್ಕಳಂತೆ ಕಾಣುತ್ತಾರೆ.

* ನಿಮ್ಮಿಂದ ಒಂದು ಸ್ವಚ್ಚವಾದ ಪ್ರೀತಿ- ಪ್ರೇಮ, ಸಾಂಸರಿಕ ಕತೆಯ ಚಿತ್ರ ನಿರೀಕ್ಷೆ ಮಾಡಬಹುದೇ?

‘ಸಿಟಿ ಲೈಟ್ಸ್‌’ ಪಾರ್ಟ್‌ 2ನಲ್ಲಿ ಮಾಡಬಹುದು. ಯುವ ಪ್ರೇಮಿಗಳ ಸಂಸಾರ, ಅವರ ಒದ್ದಾಟಗಳು, ಆಮಾಯಕತನಗಳನ್ನ ಸುತ್ತಾ ಕತೆ ರೂಪಿಸಬಹುದು.