Asianet Suvarna News

ಧನ್‌ತೇರಸ್, ದೀವಾಪಳಿಗೆ ಯಾವ ಜ್ಯುವೆಲ್ಲರಿಯಲ್ಲಿದೆ ಚಿನ್ನಕ್ಕೆ ಬೆಸ್ಟ್ ಡಿಸ್ಕೌಂಟ್ ಆಫರ್?

Chethan Kumar — Fri, 06 Nov 2026 15:30:04 +0530

ದೇಶದೆಲ್ಲೆಡೆ ದನ್‌ತೇರಸ್ ಹಾಗೂ ದೀಪಾವಳಿ ಹಬ್ಬದ ಸಂಭ್ರಮ ಮನೆ ಮಾಡಿದೆ. ನಗರಗಳಿಂದ ಜನರ ತಮ್ಮ ಮನೆ ಸೇರಿಕೊಂಡು ಹಬ್ಬದ ಆಚರಣೆಯಲ್ಲಿದ್ದಾರೆ. ಪ್ರಮುಖವಾಗಿ ಧನ್‌ತೇರಸ್ ಹಾಗೂ ದೀಪಾವಳಿ ಹಬ್ಬಕ್ಕೆ ಹಲವು ಜ್ಯೂವೆಲ್ಲರಿ ಶಾಪ್ ಭರ್ಜರಿ ಆಫರ್ ಮೂಲಕ ಗ್ರಾಹಕರ ಸೆಳೆಯುತ್ತದೆ. ಈ ಬಾರಿಯೂ ಹಲವು ಜ್ಯೂವೆಲ್ಲರಿ ಶಾಪ್ ಕೆಲ ಆಫರ್ ಘೋಷಣೆ ಮಾಡಿದೆ.

ದೇಶದ ಪ್ರಮುಖ ಜ್ಯುವೆಲ್ಲರಿ ಬ್ರ್ಯಾಂಡ್‌ಗಳಾದ ತನಿಷ್ಕ್ , ಕಲ್ಯಾಣ್, ಮಾಲಾಬಾರ್ ಗೋಲ್ಡ್, ಜೋಯಾಲುಕ್ಕಾಸ್ ಸೇರಿದಂತೆ ಕೆಲ ಪ್ರಮುಖ ಜ್ಯೂವೆಲ್ಲರಿ ಬ್ರ್ಯಾಂಡ್ ರಿಯಾಯಿತಿ ಹಾಗೂ ಆಕರ್ಷಕ ಕೊಡುಗೆ ಘೋಷಿಸಿದೆ. ಮೇಕಿಂಗ್ ಚಾರ್ಜ್‌ಗಳಲ್ಲಿ ರಿಯಾಯಿತಿ, ಹಳೆಯ ಚಿನ್ನದ ಎಕ್ಸ್‌ಚೇಂಜ್ ಆಫರ್, ಗೋಲ್ಡ್ ರೇಟ್ ಪ್ರೊಟೆಕ್ಷನ್ ಸೇರಿದಂತೆ ಹಲವು ಸೌಲಭ್ಯಗಳನ್ನು ಘೋಷಿಸಿದೆ.

ತನಿಷ್ಕ್ (Tanishq) ದೀಪಾವಳಿ ಕೊಡುಗೆ

ಮೇಕಿಂಗ್ ಚಾರ್ಜ್ ರಿಯಾಯಿತಿ: ಚಿನ್ನದ ಆಭರಣಗಳ ಪ್ರತಿ ಗ್ರಾಮ್ ಮೇಕಿಂಗ್ ಚಾರ್ಜ್ ಮೇಲೆ ₹301 ರಷ್ಟು ನೇರ ರಿಯಾಯಿತಿ ಸಿಗಲಿದೆ.

ವಜ್ರದ ಆಭರಣಗಳು: ವಜ್ರದ (Diamond) ಮೌಲ್ಯ ಹಾಗೂ ಮೇಕಿಂಗ್ ಚಾರ್ಜ್ ಮೇಲೆ ಬರೋಬ್ಬರಿ ಶೇಕಡಾ 35 ರವರೆಗೆ ರಿಯಾಯಿತಿ ಲಭ್ಯವಿದೆ.

ಗೋಲ್ಡ್ ರೇಟ್ ಪ್ರೊಟೆಕ್ಷನ್: 25% ರಷ್ಟು ಮುಂಗಡ ಹಣ ಪಾವತಿಸಿ ಬುಕ್ ಮಾಡಿಕೊಂಡರೆ, ಬುಕಿಂಗ್ ದಿನದ ದರ ಅಥವಾ ಬಿಲ್ಲಿಂಗ್ ದಿನದ ದರ - ಇವೆರಡರಲ್ಲಿ ಯಾವುದು ಕಡಿಮೆಯಿರುತ್ತದೆಯೋ ಆ ದರದಲ್ಲಿ ಚಿನ್ನ ಖರೀದಿಸಬಹುದು.

ಹಳೆಯ ಚಿನ್ನದ ಎಕ್ಸ್‌ಚೇಂಜ್: 22 ಕ್ಯಾರಟ್ ಹಾಗೂ ಅದಕ್ಕಿಂತ ಹೆಚ್ಚಿನ ಶುದ್ಧತೆಯ ಹಳೆಯ ಚಿನ್ನಕ್ಕೆ ಶೇಕಡಾ 0 ರಷ್ಟು ಕಡಿತ (Zero Deduction) ಸೌಲಭ್ಯವಿದೆ. (9 ರಿಂದ 18 ಕ್ಯಾರಟ್ ಚಿನ್ನಕ್ಕೆ 2% ಕಡಿತ).

ಮಾಲಾಬಾರ್ ಗೋಲ್ಡ್ & ಡೈಮಂಡ್ಸ್

ಮೇಕಿಂಗ್ ಚಾರ್ಜ್ ಆಫರ್: ಚಿನ್ನ, ಅನ್‌ಕಟ್ ಮತ್ತು ರತ್ನದ ಆಭರಣಗಳ ಮೇಕಿಂಗ್ ಚಾರ್ಜ್‌ (Value Addition) ಮೇಲೆ ಶೇಕಡಾ 30 ರವರೆಗೆ ರಿಯಾಯಿತಿ ಇದೆ.

ಡೈಮಂಡ್ ಆಫರ್: ವಜ್ರದ ಆಭರಣಗಳ ಮೌಲ್ಯದ ಮೇಲೆ ಶೇಕಡಾ 30 ರವರೆಗೆ ರಿಯಾಯಿತಿ ಲಭ್ಯ. ಈ ಪ್ರಮುಖ ಆಫರ್ ಅಕ್ಟೋಬರ್ 9 ರಿಂದ ನವೆಂಬರ್ 15 ರವರೆಗೆ ಜಾರಿಯಲ್ಲಿರುತ್ತದೆ.

ಉಚಿತ ಬೆಳ್ಳಿ ನಾಣ್ಯ: 10% ಮುಂಗಡ ಹಣ ನೀಡಿ ಬುಕಿಂಗ್ ಮಾಡುವ ಗ್ರಾಹಕರಿಗೆ ಉಚಿತ ಬೆಳ್ಳಿ ನಾಣ್ಯ (Silver Coin) ದೊರೆಯಲಿದೆ.

ಬ್ಯಾಂಕ್ ಕ್ಯಾಶ್‌ಬ್ಯಾಕ್: ಎಸ್‌ಬಿಐ (SBI) ಕ್ರೆಡಿಟ್ ಕಾರ್ಡ್ ಬಳಸಿ ಖರೀದಿಸುವವರಿಗೆ ಗರಿಷ್ಠ ₹4,000 ವರೆಗೆ ಕ್ಯಾಶ್‌ಬ್ಯಾಕ್ ಸಿಗಲಿದೆ. ಹಳೆಯ ಚಿನ್ನದ ಎಕ್ಸ್‌ಚೇಂಜ್ ಮೇಲೆ ಶೂನ್ಯ ಕಡಿತದ ಆಫರ್ ಇದೆ.

ಕಲ್ಯಾಣ್ ಜ್ಯುವೆಲ್ಲರ್ಸ್

ಮೇಕಿಂಗ್ ಚಾರ್ಜ್‌ನಲ್ಲಿ ಭಾರಿ ರಿಯಾಯಿತಿ: ಆಭರಣಗಳ ಮೇಕಿಂಗ್ ಚಾರ್ಜ್‌ಗಳ ಮೇಲೆ ಬರೋಬ್ಬರಿ ಶೇಕಡಾ 40 ರವರೆಗೆ ಭರ್ಜರಿ ರಿಯಾಯಿತಿಯನ್ನು ಪ್ರಕಟಿಸಲಾಗಿದೆ.

ಮೆಗಾ ಪ್ರಶಸ್ತಿಗಳು: ಹಬ್ಬದ ಮಾರಾಟದ ಭಾಗವಾಗಿ ಒಟ್ಟು ₹50 ಕೋಟಿ ಮೌಲ್ಯದ ಬಹುಮಾನಗಳನ್ನು ಗೆಲ್ಲುವ ಅವಕಾಶವನ್ನು ಕಲ್ಯಾಣ್ ಜ್ಯುವೆಲ್ಲರ್ಸ್ ಕಲ್ಪಿಸಿದೆ.

ಎಕ್ಸ್‌ಚೇಂಜ್ ಆಫರ್: ಹಳೆಯ ಚಿನ್ನದ ಆಭರಣಗಳ ವಿನಿಮಯದ ಮೇಲೆ ಶೇಕಡಾ 0 ರಷ್ಟು ಕಡಿತದ ಸೌಲಭ್ಯ ಲಭ್ಯವಿದೆ.

ಜೋಯಾಲುಕ್ಕಾಸ್

ಫ್ಲ್ಯಾಟ್ 50% ಮೇಕಿಂಗ್ ಚಾರ್ಜ್ ರಿಯಾಯಿತಿ: ಚಿನ್ನ, ವಜ್ರ, ಪ್ಲಾಟಿನಂ, ಸಿಲ್ವರ್ ಆಭರಣಗಳು ಹಾಗೂ ಗೋಲ್ಡ್/ಸಿಲ್ವರ್ ನಾಣ್ಯಗಳು (Bullion) ಸೇರಿದಂತೆ ಎಲ್ಲಾ ಮಾದರಿಯ ಮೇಕಿಂಗ್ ಚಾರ್ಜ್‌ಗಳ ಮೇಲೆ ಫ್ಲ್ಯಾಟ್ 50% ರಷ್ಟು ರಿಯಾಯಿತಿ ನೀಡಲಾಗುತ್ತಿದೆ.

ಗೋಲ್ಡ್ ರೇಟ್ ಪ್ರೊಟೆಕ್ಷನ್: 10% ಮುಂಗಡ ನೀಡಿ ಪ್ರಸ್ತುತ ದರವನ್ನು ಬುಕ್ ಮಾಡಿಕೊಳ್ಳುವ ಅವಕಾಶವಿದ್ದು, ನವೆಂಬರ್ 8 ರವರೆಗೆ ಈ ಆಫರ್ ಇರಲಿದೆ.

ಹಳೆಯ ಚಿನ್ನಕ್ಕೆ ತತ್ಕ್ಷಣ ನಗದು: ಹಳೆಯ ಚಿನ್ನದ ಎಕ್ಸ್‌ಚೇಂಜ್‌ಗೆ 0% ಕಡಿತದ ಜೊತೆಗೆ, ಬೇರೆ ಯಾವುದೇ ಶೋರೂಂನಲ್ಲಿ ಖರೀದಿಸಿದ ಹಳೆಯ ಚಿನ್ನವನ್ನು ಮೌಲ್ಯಮಾಪನ ಮಾಡಿ ತಕ್ಷಣವೇ ನಗದು ನೀಡುವ ವಿಶೇಷ ಸೌಲಭ್ಯವನ್ನೂ ನೀಡುತ್ತಿದೆ.

ವಿಶೇಷ ಸೂಚನೆ

ಆಭರಣಗಳನ್ನು ಖರೀದಿಸುವ ಮುನ್ನ ಕೇವಲ ರಿಯಾಯಿತಿಯನ್ನು ಅಷ್ಟೇ ನೋಡದೆ, ಮೇಕಿಂಗ್ ಚಾರ್ಜ್‌ಗಳ ಒಟ್ಟು ಮೊತ್ತ, ಪ್ರಸ್ತುತ ದಿನದ ಚಿನ್ನದ ದರ, ಜಿಎಸ್‌ಟಿ (GST) ಹಾಗೂ ಆಫರ್‌ಗಳ ನಿಯಮಗಳನ್ನು ಪರಿಶೀಲಿಸುವುದು ಒಳಿತು. ಪ್ರತಿಯೊಂದು ಶೋರೂಂ ಹಾಗೂ ಡಿಸೈನ್‌ಗೆ ಅನುಗುಣವಾಗಿ ರಿಯಾಯಿತಿಯ ಶೇಕಡಾವಾರು ಬದಲಾಗುವ ಸಾಧ್ಯತೆ ಇರುವುದರಿಂದ ಹತ್ತಿರದ ಸ್ಟೋರ್‌ಗೆ ಭೇಟಿ ನೀಡಿ ಖಾತರಿಪಡಿಸಿಕೊಳ್ಳಿ. ರಾಜ್ಯದಿಂದ ರಾಜ್ಯ, ನಗರದಿಂದ ನಗರಕ್ಕೆ, ಜ್ಯೂವೆಲ್ಲರಿ ಶಾಪ್‌ಗೆ ಅನುಗುಣವಾಗಿ ಆಫರ್ ಬದಲಾಗುವ ಸಾಧ್ಯತೆ ಇದೆ. ಹೀಗಾಗಿ ಆಫರ್ ಖಚಿತಪಡಿಸಿಕೊಳ್ಳಿ.

ಚೀನಾ ಹೂಡಿದ ರಹಸ್ಯ ಜಾಲದಲ್ಲಿ ಅಮೆರಿಕದ AI ತಂತ್ರಜ್ಞಾನ ಲೋಕದ 63ರ ಸಿಇಒ, ಡೇಟಿಂಗ್ ನೆರಳಲ್ಲಿ ಗೂಢಚಾರಿಕೆ!

Gowthami K — Mon, 09 Nov 2026 14:47:14 +0530

ವಾಷಿಂಗ್ಟನ್ / ಬೀಜಿಂಗ್: ಜಾಗತಿಕ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನ ಕ್ರಾಂತಿಯ ಹರಿಕಾರ, ಎನ್‌ವಿಡಿಯಾ (Nvidia) ಸಂಸ್ಥೆಯ ಸಿಇಒ 63 ವರ್ಷದ ಜೆನ್ಸನ್ ಹುವಾಂಗ್ ಚೀನಾದ ಗೂಢಚಾರಿಕೆ ಕಾರ್ಯಾಚರಣೆಯ ಗುರಿಯಾಗಿದ್ದಾರೆ ಎಂಬ ಆಘಾತಕಾರಿ ವರದಿ ಹೊರಬಿದ್ದಿದೆ. ಬೀಜಿಂಗ್‌ನ ಗುಪ್ತಚರ ಸಂಸ್ಥೆಗಳ ಪರ ಕೆಲಸ ಮಾಡುತ್ತಿದ್ದಾರೆಂದು ಶಂಕಿಸಲಾದ ಚೀನಾದ ಉದ್ಯಮಿ ಆಲಿಸ್ ಹುವಾಂಗ್ ಅವರೊಂದಿಗೆ ಜೆನ್ಸನ್ ಹುವಾಂಗ್ ನಿಕಟ ಪ್ರೇಮ- ಪ್ರಣಯ ಸಂಬಂಧ ಹೊಂದಿದ್ದು, ಈ ಮೂಲಕ ಜಾಗತಿಕ AI ಉದ್ಯಮದ ಮೇಲೆ ಪ್ರಭಾವ ಬೀರಲು ಚೀನಾ ಯತ್ನಿಸುತ್ತಿದೆ ಎಂದು ಅಮೆರಿಕದ ಗುಪ್ತಚರ ಸಂಸ್ಥೆಗಳು ಶಂಕೆ ವ್ಯಕ್ತಪಡಿಸಿವೆ.

ಅಮೆರಿಕದ ಅತ್ಯಂತ ಪ್ರಭಾವಶಾಲಿ ತಂತ್ರಜ್ಞಾನ ದಿಗ್ಗಜನ ಸುತ್ತ ಹೆಣೆದುಕೊಂಡಿರುವ ಈ ಗೂಢಚಾರಿಕಾ ಜಾಲವು ತಂತ್ರಜ್ಞಾನ ವಲಯದಲ್ಲಿ ತೀವ್ರ ಸಂಚಲನ ಮೂಡಿಸಿದೆ.

ಅಮೆರಿಕನ್ ಪತ್ರಿಕೆಯಿಂದ ಗೌಪ್ಯ ಮೌಲ್ಯಮಾಪನ ವರದಿ

ಅಮೆರಿಕ ಪ್ರಕಟಿಸಿರುವ ತನಿಖಾ ವರದಿಗಳ ಪ್ರಕಾರ, ಅಮೆರಿಕದ ಗುಪ್ತಚರ ಸಂಸ್ಥೆಗಳು ಜೆನ್ಸನ್ ಹುವಾಂಗ್ ಹಾಗೂ ಆಲಿಸ್ ಹುವಾಂಗ್ ನಡುವಿನ ನಿಕಟ ಸಂಬಂಧವನ್ನು ವಿವರಿಸುವ ವರ್ಗೀಕೃತ ಜ್ಞಾಪಕ ಪತ್ರವನ್ನು ಸಿದ್ಧಪಡಿಸಿವೆ. ಈ ರಹಸ್ಯ ವರದಿಯನ್ನು ಯುಎಸ್ ಸರ್ಕಾರದ ಉನ್ನತ ಮಟ್ಟದ ಅತ್ಯಂತ ಸಣ್ಣ ಅಧಿಕಾರಿಗಳ ಬಳಗಕ್ಕೆ ಪ್ರಸಾರ ಮಾಡಲಾಗಿದೆ.

ಜೂನ್ 2024 (ತೈಪೆ): ತೈವಾನ್‌ನ ತೈಪೆಯಲ್ಲಿ ನಡೆದ ಬಿಸಿನೆಸ್ ಟ್ರೇಡ್ ಶೋ ಒಂದರ ನಂತರ ಬಾರ್‌ನಲ್ಲಿ ಇಬ್ಬರೂ ಒಟ್ಟಿಗೆ ವಿಸ್ಕಿ ಕುಡಿಯುತ್ತಿರುವ ಛಾಯಾಚಿತ್ರಗಳು 'ನೆಟ್‌ಥಂಡರ್' ಸಂಸ್ಥೆಯ ಲಿಂಕ್ಡ್‌ಇನ್ ಪ್ರೊಫೈಲ್‌ನಲ್ಲಿ ಕಂಡುಬಂದಿದ್ದವು.

ಮೇ 2025 (ಕಂಪ್ಯೂಟೆಕ್ಸ್): ತೈಪೆಯ ಪ್ರಸಿದ್ಧ 'ಕಂಪ್ಯೂಟೆಕ್ಸ್' ತಂತ್ರಜ್ಞಾನ ಮೇಳದ ವೇಳೆ ಜೆನ್ಸನ್ ಹುವಾಂಗ್ ಆಯೋಜಿಸಿದ್ದ ಭೋಜನಕೂಟದಲ್ಲಿ ಆಲಿಸ್ ಹುವಾಂಗ್ ಸಿಇಒ ಪಕ್ಕದಲ್ಲೇ ಕುಳಿತು, ಅತ್ಯಂತ ನಿಕಟವಾಗಿ ಬೆರೆತಿರುವುದು ಹಾಗೂ ಕಾರ್ಯಕ್ರಮದ ನಂತರ ಇಬ್ಬರೂ ಒಂದೇ ಕಾರಿನಲ್ಲಿ ತೆರಳಿರುವುದು ವಿಡಿಯೋ ಮತ್ತು ಫೋಟೋ ಸಾಕ್ಷ್ಯಗಳಿಂದ ತಿಳಿದುಬಂದಿದೆ.

ಯಾರು ಈ ಆಲಿಸ್ ಹುವಾಂಗ್? ಮೆಗಾಸ್ಪೀಡ್ ಸಂಸ್ಥೆಯ ಚೀನಾ ಲಿಂಕ್!

ಆಲಿಸ್ ಹುವಾಂಗ್ (ಹುವಾಂಗ್ ಲೆ) ಆರಂಭದಲ್ಲಿ ಚೀನಾದ ಸರ್ಕಾರಿ ಸುದ್ದಿ ವಾಹಿನಿಗಳಾದ CCTV, ಹುನಾನ್ ಟಿವಿ ಹಾಗೂ HSBC ಬ್ಯಾಂಕ್‌ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ನಂತರ ಅವರು ಸಿಂಗಾಪುರ ಮೂಲದ 'ಮೆಗಾಸ್ಪೀಡ್ ಇಂಟರ್ನ್ಯಾಷನಲ್' ಸಂಸ್ಥೆಯ ಹಿರಿಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ ಆಯ್ಕೆಯಾದರು.

ಮೆಗಾಸ್ಪೀಡ್ ಸಂಸ್ಥೆಯು ಏಷ್ಯಾ-ಪೆಸಿಫಿಕ್ ಪ್ರದೇಶದಲ್ಲಿ ಎನ್‌ವಿಡಿಯಾದ ಪ್ರಮುಖ ಕ್ಲೌಡ್ ಕಂಪ್ಯೂಟಿಂಗ್ ಪಾಲುದಾರ ಸಂಸ್ಥೆಯಾಗಿದೆ. ಈ ಕಂಪನಿಯು ಕೇವಲ ಎರಡೇ ವರ್ಷಗಳಲ್ಲಿ ಅಂದಾಜು ₹40,000 ಕೋಟಿಗೂ ಹೆಚ್ಚು ಮೌಲ್ಯದ ಎನ್‌ವಿಡಿಯಾ AI ಚಿಪ್‌ಗಳನ್ನು ಖರೀದಿಸಿದೆ.

ಯುಎಸ್ ನಿರ್ಬಂಧ ಮತ್ತು ಅಕ್ರಮ ಚಿಪ್ ಸರಬರಾಜು ಆರೋಪ

ಚೀನಾದ ಮಿಲಿಟರಿ ಸಾಮರ್ಥ್ಯ ಮತ್ತು ತಾಂತ್ರಿಕ ಪ್ರಗತಿಯನ್ನು ತಡೆಯುವ ಉದ್ದೇಶದಿಂದ ವಾಷಿಂಗ್ಟನ್ ಆಡಳಿತವು ತನ್ನ ಅತ್ಯಾಧುನಿಕ AI ಪ್ರೊಸೆಸರ್ ಹಾಗೂ ಚಿಪ್‌ಗಳ ರಫ್ತಿನ ಮೇಲೆ ತೀವ್ರ ನಿರ್ಬಂಧ ಹೇರಿದೆ. ಆದರೆ, ಮೆಗಾಸ್ಪೀಡ್ ಸಂಸ್ಥೆಯು ಈ ನಿಯಮಗಳನ್ನು ಉಲ್ಲಂಘಿಸಿ ಎನ್‌ವಿಡಿಯಾ ಪ್ರೊಸೆಸರ್‌ಗಳನ್ನು ಕದ್ದುಮುಚ್ಚಿ ಚೀನಾಕ್ಕೆ ಸರಬರಾಜು ಮಾಡುತ್ತಿದೆ ಎಂಬ ಗಂಭೀರ ಅನುಮಾನ 2024ರಿಂದಲೇ ಅಮೆರಿಕನ್ ಏಜೆನ್ಸಿಗಳಿಗಿತ್ತು.

ಈ ತನಿಖೆಯ ಭಾಗವಾಗಿ 2025ರಲ್ಲಿ ಸಿಂಗಾಪುರ ತನಿಖಾಧಿಕಾರಿಗಳು ಆಲಿಸ್ ಹುವಾಂಗ್ ಅವರನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದ್ದರು. ಸದ್ಯ ಮೆಗಾಸ್ಪೀಡ್ ಹಾಗೂ ಎನ್‌ವಿಡಿಯಾ ಕಂಪನಿಗಳು ಈ ಎಲ್ಲಾ ಅಕ್ರಮ ನಿಯಮ ಉಲ್ಲಂಘನೆಯ ಆರೋಪಗಳನ್ನು ತಳ್ಳಿಹಾಕಿವೆಯಾದರೂ, ಯುಎಸ್ ಗುಪ್ತಚರ ಸಂಸ್ಥೆಗಳು ಈ ಚೀನೀ ಗೂಢಚಾರಿಕೆಯ ಜಾಲವನ್ನು ಅತ್ಯಂತ ಗಂಭೀರವಾಗಿ ಪರಿಶೀಲಿಸುತ್ತಿವೆ.

ಅಕ್ಕಿ ಮೂಟೆ 26KGಯೇ ಯಾಕೆ ಪ್ಯಾಕ್ ಮಾಡ್ತಾರೆ? ಇದರ ಹಿಂದೆ ಇಷ್ಟೊಂದು ದೊಡ್ಡ ಪ್ಲ್ಯಾನ್ ಇದೆಯಾ?

Sumanth SN — Mon, 09 Nov 2026 15:38:10 +0530

ಸಾಮಾನ್ಯವಾಗಿ ಅಕ್ಕಿ ಖರೀದಿ ಮಾಡುವ ಸಂದರ್ಭದಲ್ಲಿ 25 ಕೆಜಿಯ ಮೂಟೆಗಳು ಹೆಚ್ಚಾಗಿ ಕಾಣುತ್ತವೆ. ಆದರೆ ಇತ್ತೀಚಿನ ದಿನಗಳಲ್ಲಿ ಅಕ್ಕಿ ಮೂಟೆಯ ತೂಕ 26ಕೆಜಿ ಮೂಟೆಯ ಮಾರಾಟ ಹೆಚ್ಚಾಗಿದೆ. ಹಾಗಾದರೆ ಮೂಟೆಯ ತೂಕವನ್ನು ಒಂದು ಕೆಜಿ ಹೆಚ್ಚು ಮಾಡಲು ಕಾರಣವೇನು? ಹೆಚ್ಚುವರಿಯಾಗಿ ಒಂದು ಕಿಲೋ ಹೆಚ್ಚಾಗಿ ಮಾರಾಟ ಮಾಡಿದರೆ ವ್ಯಾಪಾರಿಗಳಿಗೆ ಏನೆಲ್ಲಾ ಪ್ರಯೋಜನ ಆಗುತ್ತದೆ? ಜಿಎಸ್ಟಿಯಿಂದ ತಪ್ಪಿಸಿಕೊಳ್ಳಲು ಈ ಮಾರ್ಗವನ್ನು ಬಳಸುತ್ತಿದ್ದಾರಾ? ಎಂಬ ಪ್ರಶ್ನೆಗಳು ಹಲವರಿಗೆ ಎದುರಾಗಿದೆ.

ಅಕ್ಕಿ ಮೂಟೆಗಳನ್ನು 25 ಕೆಜಿಯ ಬದಲಾಗಿ, 26 ಕೆಜಿ ತೂಕದ ಮೂಟೆಗಳನ್ನು ಮಾರಾಟ ಮಾಡಲು ಜಿಎಸ್‌ಟಿ ಮತ್ತು ಪ್ಯಾಕೇಜ್ ಮೇಲಿನ ನಿರ್ಬಂದಗಳು ಕಾರಣ ಎಂಬ ಚರ್ಚೆ ಜೋರಾಗಿದೆ. 2022ರಲ್ಲಿ ಪ್ಯಾಕ್ ಮಾಡಿ ಲೆಬಲ್ ಮಾಡಿದ ಆಹಾರ ಧಾನ್ಯಗಳ ಮೇಲೆ ಶೇಕಡಾ 5ರಷ್ಟು ಜಿಎಸ್‌ಟಿ ವಿಧಿಸಲು ಆರಂಭಿಸಿರುವುದೇ ಇದಕ್ಕೆ ಕಾರಣವಂತೆ. ವ್ಯಾಪಾರಿಗಳು ಜಿಎಸ್ಟಿ ತಪ್ಪಿಸಿಕೊಳ್ಳಲು ಮೂಟೆಗಳ ತೂಕವನ್ನು ಹೆಚ್ಚು ಮಾಡಿದ್ದಾರೆ.

ಇದರ ಹಿಂದೆ ಗೂಡ್ಸ್ ಅಂಡ್ ಸರ್ವೀಸ್ ಟ್ಯಾಕ್ಸ್ (ಜಿಎಸ್‌ಟಿ), ಪ್ಯಾಕೇಜಿಂಗ್ಗೆ ಸಂಬಂಧಿಸಿದ ನಿರ್ಬಂಧಗಳೇ ಕಾರಣವಾಗುತ್ತಿದೆ. 2022ರಲ್ಲಿ ಜುಲೈನಲ್ಲಿ ಕೇಂದ್ರ ಸರ್ಕಾರ ಪ್ಯಾಕ್ ಮಾಡಿ, ಲೆಬಲ್ ಮಾಡಿದ ಆಹಾರ ಧಾನ್ಯಗಳ ಮೇಲೆ ಶೇಕಡಾ 5ರಷ್ಟು ಜಿಎಸ್ಟಿ ಜಾರಿ ಮಾಡಿತ್ತು. ಇದಕ್ಕೂ ಮುನ್ನ ಬ್ರಾಂಡೆಡ್, ಪ್ರೀ ಪ್ಯಾಕೇಜ್ ಆಹಾರ ಪದಾರ್ಥಗಳ ಮೇಲೆ ವಿಧಿಸುತ್ತಿದ್ದ ತೆರಿಗೆ ಮೇಲೆ ಬದಲಾವಣೆ ಆಯ್ತು. ಇದರ ಪ್ರಭಾವ ಅಕ್ಕಿ ಮಾರಾಟ ಮೇಲೂ ಕೂಡ ಆಯ್ತು. ನಿರ್ದಿಷ್ಟ ನಿರ್ಬಂಧಗಳಿಗೆ ಅನುಗುಣವಾಗಿ ಮೊದಲೇ ಪ್ಯಾಕ್ ಮಾಡಿದ ಮತ್ತು ಲೆಬಲ್ ಹಾಕಿದ ಅಕ್ಕಿ ಮೇಲೂ ತೆರಿಗೆ ಜಾರಿ ಆಗಿತ್ತು. ಇದರೊಂದಿಗೆ ಅಕ್ಕಿ ಮಿಲ್ ಮಾಲೀಕರು ಮತ್ತು ವ್ಯಾಪಾರಿಗಳು ಪ್ಯಾಕೇಜ್ ತೂಕವನ್ನು 25 ರಿಂದ 16 ಕೆಜಿಗೆ ಹೆಚ್ಚಿಸಿದ್ದರು. ಇದರೊಂದಿಗೆ ತೆರಿಗೆ ಭಾರ ಕೂಡ ಕಡಿಮೆಯಾಗಿತ್ತು.

ನಮ್ಮ ದೇಶದಲ್ಲಿ 2011ರ ಕಾನೂನು ಮಾಪನಶಾಸ್ತ್ರ ನಿಯಮಗಳ ಅನ್ವಯ, 25 ಕೆಜಿಗಿಂತ ಹೆಚ್ಚಿನ ತೂಕದ ಪ್ಯಾಕೇಜ್‌ಗಳ ಮೇಲೆ ಚಿಲ್ಲರೆ ಪ್ಯಾಕೇಜ್ಗಳಿಗೆ ಅನ್ವಹಿಸುವ ಕೆಲವು ನಿಯಮಗಳಿಂದ ವಿನಾಯತಿ ನೀಡಲಾಗಿದೆ. ಇದರಂತೆ ಕೆಲವು ರೈಸ್ ಮಿಲ್ ಮಾಲೀಕರು 25 ಕೆಜಿ ಬದಲಿಗೆ 26 ಕೆಜಿ ತೂಕದ ಮೂಟೆ ಮಾರಾಟ ಮಾಡಲು ಮುಂದಾಗಿದ್ದಾರೆ. ಇದರಿಂದ ನೀವು 26 ಕೆಜಿ ಅಕ್ಕಿ ಮಾರಾಟ ಮಾಡಿದರೂ, 25 ಕೆಜಿಯ ಮೂಟೆಗೆ ನೀಡುವ ಶೇಕಡಾ 5ರಷ್ಟು ತೆರಿಗೆ ಮಾತ್ರ ನೀಡಲಾಗುತ್ತದೆ. ಇದರಿಂದ ಉಳಿದ ಒಂದು ಕೆಜಿಗೆ ಯಾವುದೇ ಜಿಎಸ್ಟಿ ಪಾವತಿ ಮಾಡುವ ಅಗತ್ಯ ಇರುವುದಿಲ್ಲ. ದೇಶದಲ್ಲಿ ಮೊದಲು ತಮಿಳುನಾಡಿನ ತಿರುಪ್ಪೂರು ರೈಸ್ ಮಿಲ್ ಮಾಲೀಕರು ಈ ಉಪಾಯವನ್ನು ಕಂಡುಕೊಂಡಿದ್ದರು. ಆ ಬಳಿಕ ಇದು ದೇಶದಾದ್ಯಂತ ಹೆಚ್ಚಾಯ್ತು ಎಂದು ಹೇಳಲಾಗಿದೆ.

ಇದು ನಿಯಮಗಳ ಉಲ್ಲಂಘನೆ ಆಗೋದಿಲ್ವಾ?

ಅಕ್ಕಿ ಚೀಲದ ತೂಕವನ್ನು 25 ಕೆಜಿಯಿಂದ 26ಕೆಜಿಗೆ ಹೆಚ್ಚಿಗೆ ಮಾಡಿ ಮಾರಾಟ ಮಾಡುವುದು ಕಾನೂನು ಬಾಹಿರ ಆಗೋದಿಲ್ಲ. ಇಲ್ಲಿ ಪ್ಯಾಕೇಜ್ ಮಾಡಿದ ಸರಕುಗಳ ನಿಯಮಗಳಲ್ಲಿ ಇರುವ ಕೆಲವು ವಿನಾಯಿತಿಗಳು ಹಾಗೂ ಜಿಎಸ್ಟಿ ಕಾಯ್ದೆಯಲ್ಲಿರುವ ಕೆಲವು ನಿರ್ಬಂಧನೆಗಳು ಬೇರೆ ಬೇರೆ ಆಗಿದೆ. ಇದರಿಂದ ಒಂದು ಕೆಜಿ ಹೆಚ್ಚು ಮಾಡಿದರೂ ಯಾವುದೇ ಬದಲಾವಣೆ ಆಗೋದಿಲ್ಲ. ಆದ್ದರಿಂದ ತಜ್ಞರು ಜಿಎಸ್ಟಿ ಸಂದರ್ಭದಲ್ಲಿಯೂ ತೆರಿಗೆ ವಿಧಿಸಲು ಕಾನೂನಿನ ಬದಲಾವಣೆ ಅಗತ್ಯವಿದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಇದರಿಂದ ಗ್ರಾಹಕರಿಗೆ ನಷ್ಟ ಆಗುತ್ತಾ?

25 ಕೆಜಿ ಮೂಟೆಯ ಬದಲಿಗೆ 26 ಕೆಜಿ ಅಕ್ಕಿ ಮಾರಾಟ ಗ್ರಾಹಕರಿಗೂ ಲಾಭವನ್ನು ನೀಡುತ್ತದೆ. ತೂಕ ಹೆಚ್ಚಾದ ಮಾತ್ರಕ್ಕೆ ಇದಕ್ಕೆ ವ್ಯಾಪಾರಿಗಳು ಹೆಚ್ಚಿನ ಬೆಲೆ ನಮೂಡಿಸುವುದಿಲ್ಲ. ಅಥವಾ ಚೀಲದ ತೂಕ ಹೆಚ್ಚಾದರೂ ಕಡಿಮೆ ಹಣ ತೆಗೆದುಕೊಳ್ಳುತ್ತಾರೆ ಎಂದು ಅರ್ಥವಲ್ಲ. ಗ್ರಾಹಕರಿಗೆ ವ್ಯಾಪಾರಿಗಳು ಮೂಟೆಗೆ ಬೆಲೆ ನಿಗದಿ ಮಾಡುವ ಬದಲಿಗೆ ಕೆಜಿ ಅಕ್ಕಿಗೆ ಎಷ್ಟು ಎಂದು ಬೆಲೆ ಮೇಲೆ ಮಾರಾಟ ಮಾಡುತ್ತಾರೆ. ಉದಾಹರಣೆಗೆ 25 ಕೆಜಿ ಅಕ್ಕಿ ಮೂಟೆ 1250 ರೂಪಾಯಿ ದರವಿದ್ದರೆ, 26 ಕೆಜಿ ಮೂಟೆಯನ್ನು 1,300 ರೂಪಾಯಿಗೆ ಮಾರಾಟ ಮಾಡುತ್ತಾರೆ. ಇದರಿಂದ ಗ್ರಾಹಕರಿಗೆ ದರದಲ್ಲಿ ಯಾವುದೇ ನಷ್ಟ ಆಗೋದಿಲ್ಲ. ಒಂದೊಮ್ಮೆ ಗ್ರಾಹಕರಿಗೆ 26 ಕೆಜಿ ಅಕ್ಕಿ ಮೂಟೆಯನ್ನು 1250 ರೂಪಾಯಿಗೆ ಮಾರಾಟ ಮಾಡಿದರೆ ಲಾಭ ಸಿಗುತ್ತದೆ.

ಮುಂದಿನ 6 ತಿಂಗಳಲ್ಲೇ ಚಿನ್ನದ ಮಾರುಕಟ್ಟೆಯಲ್ಲಿ ಭಾರೀ ಏರಿಳಿತ; ತಜ್ಞರ ಭವಿಷ್ಯ ಬಯಲು!

Shriram Bhat — Mon, 09 Nov 2026 14:21:43 +0530

ಮುಂದಿನ 6-12 ತಿಂಗಳಲ್ಲಿ ಚಿನ್ನದ ಬೆಲೆ ₹1.68 ಲಕ್ಷಕ್ಕೆ ಏರಿಕೆಯಾಗುತ್ತಾ? ಮಹತ್ವದ ಮಾಹಿತಿ ಇಲ್ಲಿದೆ ನೋಡಿ!

ಚಿನ್ನದ ಮಾರುಕಟ್ಟೆಯಲ್ಲಿ ಮುಂದಿನ ಆರು ತಿಂಗಳು ಹಲವು ಬದಲಾವಣೆಗಳಿಗೆ ಸಾಕ್ಷಿಯಾಗುವ ಸಾಧ್ಯತೆಯಿದೆ. ಇತ್ತೀಚಿನ ದಿನಗಳಲ್ಲಿ ಬಂಗಾರದ ಬೆಲೆಯಲ್ಲಿ ಕಂಡುಬಂದಿರುವ ಭಾರಿ ಏರಿಳಿತ ಹೂಡಿಕೆದಾರರು ಹಾಗೂ ಆಭರಣ ಖರೀದಿಸಲು ಯೋಜಿಸುತ್ತಿರುವವರಲ್ಲಿ ಆತಂಕ ಮೂಡಿಸಿದೆ. ಈಗ ಚಿನ್ನ ಖರೀದಿಸಬೇಕೇ ಅಥವಾ ಬೆಲೆ ಇಳಿಯುವವರೆಗೆ ಕಾಯಬೇಕೇ ಎಂಬ ಗೊಂದಲವೂ ಹೆಚ್ಚಾಗಿದೆ. ಇಂತಹ ಸಂದರ್ಭದಲ್ಲಿ ಮೋತಿಲಾಲ್ ಓಸ್ವಾಲ್ ಫೈನಾನ್ಷಿಯಲ್ ಸರ್ವೀಸಸ್ ಬಿಡುಗಡೆ ಮಾಡಿರುವ ವರದಿಯೊಂದು ಚಿನ್ನದ ಭವಿಷ್ಯದ ಬೆಲೆಯ ಕುರಿತು ಮಹತ್ವದ ಅಂದಾಜನ್ನು ಮುಂದಿಟ್ಟಿದೆ.

ಮುಂದಿನ 6ರಿಂದ 12 ತಿಂಗಳ ಅವಧಿಯಲ್ಲಿ ಭಾರತೀಯ ಮಾರುಕಟ್ಟೆಯಲ್ಲಿ ಏನಾಗಲಿದೆ?

ವರದಿಯ ಪ್ರಕಾರ, ಮುಂದಿನ 6ರಿಂದ 12 ತಿಂಗಳ ಅವಧಿಯಲ್ಲಿ ಭಾರತೀಯ ಮಾರುಕಟ್ಟೆಯಲ್ಲಿ 10 ಗ್ರಾಂ ಚಿನ್ನದ ಬೆಲೆ ₹1.60 ಲಕ್ಷದಿಂದ ₹1.68 ಲಕ್ಷದವರೆಗೆ ತಲುಪುವ ಸಾಧ್ಯತೆಯಿದೆ. ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಒಂದು ಔನ್ಸ್ ಚಿನ್ನದ ದರ 4,500ರಿಂದ 4,700 ಅಮೆರಿಕನ್ ಡಾಲರ್‌ಗೆ ಏರಬಹುದು ಎಂದು ಅಂದಾಜಿಸಲಾಗಿದೆ. ಆದರೆ ಅಲ್ಪಾವಧಿಯಲ್ಲಿ ಬೆಲೆಯಲ್ಲಿ ಏರಿಳಿತ ಮುಂದುವರಿಯುವ ಸಾಧ್ಯತೆಯಿದ್ದು, 10 ಗ್ರಾಂ ಚಿನ್ನದ ದರ ₹1.48 ಲಕ್ಷದ ಆಸುಪಾಸಿನಲ್ಲಿ ಇರಬಹುದು ಎಂದು ವರದಿ ತಿಳಿಸಿದೆ.

2026ರಲ್ಲಿ ಚಿನ್ನದ ಬೆಲೆಯಲ್ಲಿ ಏಕೆ ಇಷ್ಟೊಂದು ಏರಿಳಿತ?

ಕಳೆದ ವರ್ಷದಿಂದ ಚಿನ್ನದ ಬೆಲೆ ನಿರಂತರವಾಗಿ ಏರಿಕೆ ಕಂಡಿದ್ದರೂ, 2026ರಲ್ಲಿ ಮಾರುಕಟ್ಟೆಯ ಪರಿಸ್ಥಿತಿ ವಿಭಿನ್ನವಾಗಿದೆ. ಅಮೆರಿಕದ ಬಡ್ಡಿದರ ನೀತಿ, ಹಣದುಬ್ಬರ, ಬಾಂಡ್ ಇಳುವಳಿ ಮತ್ತು ಜಾಗತಿಕ ರಾಜಕೀಯ ಬೆಳವಣಿಗೆಗಳು ಚಿನ್ನದ ದರದ ಮೇಲೆ ನೇರ ಪರಿಣಾಮ ಬೀರುತ್ತಿವೆ.

2026ರ ಜನವರಿಯಲ್ಲಿ ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಒಂದು ಔನ್ಸ್ ಚಿನ್ನದ ಬೆಲೆ ಸುಮಾರು 5,600 ಡಾಲರ್‌ನ ಐತಿಹಾಸಿಕ ಗರಿಷ್ಠ ಮಟ್ಟ ತಲುಪಿತ್ತು. ನಂತರ ದಿಢೀರ್ ಕುಸಿತ ಕಂಡು 4,000 ಡಾಲರ್‌ಗಿಂತ ಕೆಳಕ್ಕೆ ಇಳಿದಿತ್ತು. ಇದೀಗ ಮತ್ತೆ ಚೇತರಿಕೆಯ ಲಕ್ಷಣಗಳು ಕಾಣಿಸಿಕೊಂಡಿವೆ. ಬೆಳ್ಳಿ ಮಾರುಕಟ್ಟೆಯಲ್ಲೂ ಇದೇ ರೀತಿಯ ಏರಿಳಿತ ದಾಖಲಾಗಿದೆ.

ಇದರ ಜೊತೆಗೆ ಅಮೆರಿಕನ್ ಡಾಲರ್ ಎದುರು ಭಾರತೀಯ ರೂಪಾಯಿ ಮೌಲ್ಯದಲ್ಲಿನ ಬದಲಾವಣೆಗಳು ದೇಶೀಯ ಚಿನ್ನದ ಬೆಲೆಯ ಮೇಲೂ ಪ್ರಭಾವ ಬೀರುತ್ತಿವೆ. ಹೀಗಾಗಿ ಅಂತರರಾಷ್ಟ್ರೀಯ ಮಾರುಕಟ್ಟೆಯ ಬೆಳವಣಿಗೆಗಳನ್ನು ಭಾರತೀಯ ಖರೀದಿದಾರರು ಗಮನಿಸಬೇಕಾಗಿದೆ.

ಒಂದು ದಶಕದಲ್ಲಿ ಐದು ಪಟ್ಟು ಹೆಚ್ಚಾದ ಚಿನ್ನದ ಬೆಲೆ!

ಚಿನ್ನದ ದೀರ್ಘಕಾಲದ ಬೆಲೆ ಏರಿಕೆಯನ್ನು ಗಮನಿಸಿದರೆ ಅಚ್ಚರಿಯಾಗುತ್ತದೆ. 2016ರ ದೀಪಾವಳಿ ಸಂದರ್ಭದಲ್ಲಿ 10 ಗ್ರಾಂ ಚಿನ್ನದ ಬೆಲೆ ಸುಮಾರು ₹30,000 ಇತ್ತು. 2026ರ ದೀಪಾವಳಿ ವೇಳೆಗೆ ಇದೇ ಪ್ರಮಾಣದ ಚಿನ್ನದ ಬೆಲೆ ಸುಮಾರು ₹1.5 ಲಕ್ಷದ ಮಟ್ಟ ತಲುಪಿದೆ. ಅಂದರೆ ಹತ್ತು ವರ್ಷಗಳಲ್ಲಿ ಬಂಗಾರದ ಬೆಲೆ ಸುಮಾರು ಐದು ಪಟ್ಟು ಹೆಚ್ಚಾಗಿದೆ.

ಜಾಗತಿಕ ಯುದ್ಧದ ಆತಂಕ, ರಾಜಕೀಯ ಉದ್ವಿಗ್ನತೆ ಮತ್ತು ಆರ್ಥಿಕ ಅನಿಶ್ಚಿತತೆ ಹೆಚ್ಚಾದಾಗ ಹೂಡಿಕೆದಾರರು ಸುರಕ್ಷಿತ ಹೂಡಿಕೆಯತ್ತ ಮುಖ ಮಾಡುತ್ತಾರೆ. ಈ ಸಂದರ್ಭದಲ್ಲಿ ಚಿನ್ನಕ್ಕೆ ಬೇಡಿಕೆ ಹೆಚ್ಚಾಗುವ ಸಾಧ್ಯತೆಯಿದೆ.

ಒಟ್ಟಿನಲ್ಲಿ, ಮೋತಿಲಾಲ್ ಓಸ್ವಾಲ್ ವರದಿ ಮುಂದಿನ 6ರಿಂದ 12 ತಿಂಗಳಲ್ಲಿ ಚಿನ್ನದ ಬೆಲೆ ಮತ್ತಷ್ಟು ಏರಬಹುದು ಎಂಬ ನಿರೀಕ್ಷೆ ಮೂಡಿಸಿದೆ. ಆದರೆ ಇವು ಮಾರುಕಟ್ಟೆ ಆಧಾರಿತ ಅಂದಾಜುಗಳಾಗಿದ್ದು, ಖಚಿತ ಬೆಲೆ ಭವಿಷ್ಯವಲ್ಲ. ಹೂಡಿಕೆ ಮಾಡುವವರು ಮಾರುಕಟ್ಟೆಯ ಏರಿಳಿತ ಮತ್ತು ತಮ್ಮ ಹಣಕಾಸಿನ ಸಾಮರ್ಥ್ಯವನ್ನು ಗಮನದಲ್ಲಿಟ್ಟುಕೊಂಡು ನಿರ್ಧಾರ ಕೈಗೊಳ್ಳುವುದು ಮುಖ್ಯ.

ಲಾಡ್ಜ್‌, ಹೋಟೆಲ್‌ ರೂಂನಲ್ಲಿರೋ ಈ ವಸ್ತುಗಳನ್ನು ತಗೊಂಡು ಹೋಗ್ಬಹುದು; ಆದ್ರೆ ಇವುಗಳನ್ನು ತಗೊಂಡ್ರೆ ಕೇಸ್ ಪಕ್ಕಾ!

Shriram Bhat — Fri, 06 Nov 2026 15:13:33 +0530

Certain items in hotel room cannot be secretly taken. ಹೋಟೆಲ್ ರೂಮ್‌ನಲ್ಲಿರುವ ಈ ವಸ್ತುಗಳನ್ನು ಮನೆಗೆ ತರಬಹುದು! ಯಾವುದು ಉಚಿತ, ಯಾವುದನ್ನು ತೆಗೆದುಕೊಂಡು ಹೋದರೆ ದಂಡ ಬೀಳುತ್ತೆ?

ಪ್ರವಾಸಕ್ಕೆ ಹೋದಾಗ ಹೋಟೆಲ್‌ನಲ್ಲಿ ತಂಗುವುದು ಬಹುತೇಕ ಎಲ್ಲರಿಗೂ ಇಷ್ಟ. ಆರಾಮದಾಯಕವಾದ ಹಾಸಿಗೆ, ಸುಂದರವಾದ ಕೊಠಡಿ, ಸ್ವಚ್ಛವಾದ ಬಾತ್‌ರೂಂ ಹಾಗೂ ಅತಿಥಿಗಳಿಗಾಗಿ ಇಟ್ಟಿರುವ ವಿವಿಧ ಸೌಲಭ್ಯಗಳು ಹೋಟೆಲ್ ವಾಸ್ತವ್ಯವನ್ನು ಮತ್ತಷ್ಟು ಸುಂದರವಾಗಿಸುತ್ತವೆ. ಆದರೆ ಚೆಕ್ ಔಟ್ ಮಾಡುವ ಸಮಯದಲ್ಲಿ ಹೋಟೆಲ್ ರೂಮ್‌ನಲ್ಲಿರುವ ಕೆಲವು ವಸ್ತುಗಳನ್ನು ಮನೆಗೆ ತೆಗೆದುಕೊಂಡು ಹೋಗಬಹುದೇ ಎಂಬ ಗೊಂದಲ ಹಲವರಲ್ಲಿರುತ್ತದೆ. ಕೆಲವರು ಸಣ್ಣಪುಟ್ಟ ವಸ್ತುಗಳನ್ನು ತಮ್ಮ ಬ್ಯಾಗ್‌ಗೆ ಹಾಕಿಕೊಂಡರೆ, ಇನ್ನು ಕೆಲವರು ಯಾವ ವಸ್ತುಗಳನ್ನು ತೆಗೆದುಕೊಳ್ಳುವುದು ಸರಿಯೆಂದು ತಿಳಿಯದೆ ಹಾಗೆಯೇ ಬಿಡುತ್ತಾರೆ.

ಹೋಟೆಲ್‌ನಲ್ಲಿ ಅತಿಥಿಗಳಿಗಾಗಿ ಇಟ್ಟಿರುವ ಕೆಲವು ವಸ್ತುಗಳು ಉಚಿತವಾಗಿರುತ್ತವೆ. ಅವುಗಳನ್ನು ಬಳಸಿದ ಬಳಿಕ ಮನೆಗೆ ತೆಗೆದುಕೊಂಡು ಹೋಗುವುದಕ್ಕೂ ಸಾಮಾನ್ಯವಾಗಿ ಅವಕಾಶವಿರುತ್ತದೆ. ಆದರೆ ಕೊಠಡಿಯಲ್ಲಿರುವ ಎಲ್ಲ ವಸ್ತುಗಳೂ ನಿಮ್ಮ ಸ್ವಂತದ್ದಾಗುವುದಿಲ್ಲ. ಹೀಗಾಗಿ ಯಾವುದು ತೆಗೆದುಕೊಂಡು ಹೋಗಬಹುದು, ಯಾವುದು ಹೋಟೆಲ್‌ನಲ್ಲೇ ಬಿಡಬೇಕು ಎಂಬುದನ್ನು ತಿಳಿದುಕೊಳ್ಳುವುದು ಮುಖ್ಯ.

ಹೋಟೆಲ್ ರೂಮ್‌ನಿಂದ ಮನೆಗೆ ತರಬಹುದಾದ ವಸ್ತುಗಳು ಯಾವುವು?

1. ಶ್ಯಾಂಪೂ, ಸೋಪ್ ಮತ್ತು ಲೋಷನ್

ಹೋಟೆಲ್‌ನ ಬಾತ್‌ರೂಂನಲ್ಲಿ ಅತಿಥಿಗಳಿಗಾಗಿ ಸಣ್ಣ ಬಾಟಲಿಗಳಲ್ಲಿ ಶ್ಯಾಂಪೂ, ಕಂಡಿಷನರ್, ಸೋಪ್ ಹಾಗೂ ಬಾಡಿ ಲೋಷನ್ ಇಡಲಾಗುತ್ತದೆ. ಇವು ವೈಯಕ್ತಿಕ ಬಳಕೆಗಾಗಿ ನೀಡುವ ಸೌಲಭ್ಯಗಳಾಗಿದ್ದು, ಸಾಮಾನ್ಯವಾಗಿ ಮನೆಗೆ ತೆಗೆದುಕೊಂಡು ಹೋಗಲು ಅವಕಾಶವಿರುತ್ತದೆ. ಕೆಲ ಹೋಟೆಲ್‌ಗಳು ಸಣ್ಣ ಪ್ಯಾಕೆಟ್‌ಗಳ ಬದಲಿಗೆ ಗೋಡೆಗೆ ಅಳವಡಿಸಿದ ದೊಡ್ಡ ಬಾಟಲಿಗಳನ್ನು ಬಳಸುತ್ತವೆ. ಅಂತಹ ಬಾಟಲಿಗಳನ್ನು ತೆಗೆದುಕೊಂಡು ಹೋಗುವಂತಿಲ್ಲ.

2. ಟೂತ್‌ಬ್ರಷ್ ಮತ್ತು ಟೂತ್‌ಪೇಸ್ಟ್

ಪ್ರವಾಸಿಗರ ಅನುಕೂಲಕ್ಕಾಗಿ ಹೋಟೆಲ್‌ಗಳು ಟೂತ್‌ಬ್ರಷ್, ಟೂತ್‌ಪೇಸ್ಟ್, ರೇಸರ್ ಹಾಗೂ ಬಾಚಣಿಗೆಯಂತಹ ವೈಯಕ್ತಿಕ ಬಳಕೆಯ ವಸ್ತುಗಳನ್ನು ಒದಗಿಸುತ್ತವೆ. ಇವು ಸಾಮಾನ್ಯವಾಗಿ ಒಮ್ಮೆ ಬಳಸಿ ಬಿಸಾಡುವ ಅಥವಾ ಅತಿಥಿಗಳಿಗೆ ನೀಡುವ ವಸ್ತುಗಳಾಗಿರುವುದರಿಂದ, ಹೋಟೆಲ್ ನೀತಿಗೆ ಅನುಗುಣವಾಗಿ ಮನೆಗೆ ತೆಗೆದುಕೊಂಡು ಹೋಗಬಹುದು.

3. ಯೂಸ್ ಆಂಡ್ ಥ್ರೋ ಚಪ್ಪಲಿಗಳು

ಕೆಲವು ಐಷಾರಾಮಿ ಹೋಟೆಲ್‌ಗಳಲ್ಲಿ ಅತಿಥಿಗಳಿಗಾಗಿ ಮೃದುವಾದ ಚಪ್ಪಲಿಗಳನ್ನು ಇಡಲಾಗುತ್ತದೆ. ಇವು ಸಾಮಾನ್ಯವಾಗಿ ಒಬ್ಬ ಅತಿಥಿಯ ಬಳಕೆಗೆಂದು ನೀಡುವ ವಸ್ತುಗಳಾಗಿರುತ್ತವೆ. ಹೋಟೆಲ್‌ನ ನಿಯಮಗಳು ಅನುಮತಿಸಿದರೆ, ಚೆಕ್ ಔಟ್ ವೇಳೆ ಈ ಚಪ್ಪಲಿಗಳನ್ನು ನಿಮ್ಮೊಂದಿಗೆ ತೆಗೆದುಕೊಂಡು ಹೋಗಬಹುದು.

4. ಚಹಾ, ಕಾಫಿ ಮತ್ತು ಸಕ್ಕರೆ ಪ್ಯಾಕೆಟ್‌ಗಳು

ಹೋಟೆಲ್ ರೂಮ್‌ನಲ್ಲಿ ಟೀ ಬ್ಯಾಗ್, ಕಾಫಿ ಪುಡಿ, ಸಕ್ಕರೆ ಪ್ಯಾಕೆಟ್‌ಗಳು ಹಾಗೂ ಹಾಟ್ ಚಾಕೊಲೇಟ್ ಮಿಕ್ಸ್ ಇತ್ಯಾದಿಗಳನ್ನು ಇಟ್ಟಿರುತ್ತಾರೆ. ಇವು ಅತಿಥಿಗಳ ಬಳಕೆಗೆ ನೀಡುವ ಉಚಿತ ಸಾಮಗ್ರಿಗಳಾಗಿದ್ದು, ಸಾಮಾನ್ಯವಾಗಿ ತೆಗೆದುಕೊಂಡು ಹೋಗಲು ಅವಕಾಶವಿರುತ್ತದೆ. ಆದರೆ ಮಿನಿಬಾರ್‌ನಲ್ಲಿರುವ ಪಾವತಿಸಬೇಕಾದ ಆಹಾರ ಅಥವಾ ಪಾನೀಯಗಳನ್ನು ಉಚಿತವೆಂದು ಭಾವಿಸಬಾರದು.

5. ಸೀಲ್ ಮಾಡಿದ ಕುಡಿಯುವ ನೀರಿನ ಬಾಟಲಿ

ಕೆಲ ಹೋಟೆಲ್‌ಗಳಲ್ಲಿ ಅತಿಥಿಗಳಿಗಾಗಿ ಉಚಿತವಾಗಿ ಕುಡಿಯುವ ನೀರಿನ ಬಾಟಲಿಗಳನ್ನು ಒದಗಿಸಲಾಗುತ್ತದೆ. ಇವು ಉಚಿತ ಸೌಲಭ್ಯಗಳಾಗಿದ್ದರೆ, ನಿಮ್ಮೊಂದಿಗೆ ತೆಗೆದುಕೊಂಡು ಹೋಗಬಹುದು. ಆದರೆ ಮಿನಿಬಾರ್‌ನಲ್ಲಿರುವ ನೀರಿನ ಬಾಟಲಿಗಳಿಗೆ ಶುಲ್ಕ ವಿಧಿಸುವ ಹೋಟೆಲ್‌ಗಳೂ ಇವೆ. ಆದ್ದರಿಂದ ಮೊದಲು ಪರಿಶೀಲಿಸುವುದು ಉತ್ತಮ.

6. ನೋಟ್‌ಪ್ಯಾಡ್, ಪೆನ್ ಮತ್ತು ಪೆನ್ಸಿಲ್

ಹೋಟೆಲ್‌ನ ಲೋಗೋ ಹೊಂದಿರುವ ನೋಟ್‌ಪ್ಯಾಡ್, ಪೆನ್ ಅಥವಾ ಪೆನ್ಸಿಲ್‌ಗಳನ್ನು ಅತಿಥಿಗಳಿಗಾಗಿ ನೀಡಲಾಗುತ್ತದೆ. ಇವು ಪ್ರಚಾರ ಸಾಮಗ್ರಿಗಳಾಗಿರಬಹುದು ಅಥವಾ ಅತಿಥಿಗಳ ಬಳಕೆಗೆ ನೀಡುವ ವಸ್ತುಗಳಾಗಿರಬಹುದು. ಸಾಮಾನ್ಯವಾಗಿ ಇವುಗಳನ್ನು ಮನೆಗೆ ತೆಗೆದುಕೊಂಡು ಹೋಗಲು ಅನುಮತಿ ಇರುತ್ತದೆ.

ಈ ವಸ್ತುಗಳನ್ನು ಮಾತ್ರ ತೆಗೆದುಕೊಂಡು ಹೋಗಬೇಡಿ!

ಹೋಟೆಲ್ ರೂಮ್‌ನಲ್ಲಿ ಕಾಣುವ ಎಲ್ಲ ವಸ್ತುಗಳೂ ಉಚಿತವಲ್ಲ. ಹೇರ್ ಡ್ರೈಯರ್, ದಿಂಬುಗಳು, ಬೆಡ್‌ಶೀಟ್‌ಗಳು, ಟವೆಲ್‌ಗಳು, ಕರ್ಟನ್‌ಗಳು, ದೀಪಗಳು, ಎಲೆಕ್ಟ್ರಾನಿಕ್ ಉಪಕರಣಗಳು ಹಾಗೂ ಅಲಂಕಾರಿಕ ವಸ್ತುಗಳು ಹೋಟೆಲ್‌ನ ಆಸ್ತಿಯಾಗಿರುತ್ತವೆ. ಇವುಗಳನ್ನು ಅನುಮತಿಯಿಲ್ಲದೆ ತೆಗೆದುಕೊಂಡು ಹೋಗುವುದು ಕಳ್ಳತನವೆಂದು ಪರಿಗಣಿಸಬಹುದು. ಇಂತಹ ಪ್ರಕರಣಗಳಲ್ಲಿ ಹೋಟೆಲ್ ಶುಲ್ಕ ವಿಧಿಸುವುದರ ಜೊತೆಗೆ, ಸಂದರ್ಭಕ್ಕೆ ಅನುಗುಣವಾಗಿ ಕಾನೂನು ಕ್ರಮವೂ ಕೈಗೊಳ್ಳಬಹುದು.

ಚೆಕ್ ಔಟ್ ಮಾಡುವ ಮುನ್ನ ಈ ವಿಷಯ ನೆನಪಿಡಿ

ಹೋಟೆಲ್‌ನಿಂದ ಮನೆಗೆ ತೆಗೆದುಕೊಂಡು ಹೋಗಬಹುದಾದ ವಸ್ತುಗಳ ಬಗ್ಗೆ ಸ್ಪಷ್ಟ ನಿಯಮಗಳು ಎಲ್ಲೆಡೆ ಒಂದೇ ರೀತಿ ಇರುವುದಿಲ್ಲ. ಹೋಟೆಲ್‌ನ ವರ್ಗ, ನೀತಿ ಹಾಗೂ ನೀಡಿರುವ ಸೌಲಭ್ಯಗಳ ಆಧಾರದ ಮೇಲೆ ವ್ಯತ್ಯಾಸ ಇರಬಹುದು. ಹೀಗಾಗಿ ಯಾವುದಾದರೂ ವಸ್ತುವಿನ ಬಗ್ಗೆ ಅನುಮಾನವಿದ್ದರೆ, ಅದನ್ನು ತೆಗೆದುಕೊಳ್ಳುವ ಮೊದಲು ಹೋಟೆಲ್ ಸಿಬ್ಬಂದಿಯನ್ನು ಕೇಳುವುದು ಉತ್ತಮ.

ಪ್ರವಾಸದ ನೆನಪಿಗಾಗಿ ಸಣ್ಣ ಶ್ಯಾಂಪೂ ಬಾಟಲಿ, ಟೀ ಬ್ಯಾಗ್ ಅಥವಾ ಹೋಟೆಲ್ ಲೋಗೋ ಇರುವ ಪೆನ್‌ಗಳನ್ನು ಮನೆಗೆ ತರುವುದು ತಪ್ಪಲ್ಲ. ಆದರೆ ಹೋಟೆಲ್‌ನ ಆಸ್ತಿಯನ್ನು ನಿಮ್ಮದೆಂದು ಭಾವಿಸಿ ತೆಗೆದುಕೊಂಡು ಹೋಗುವುದು ಮಾತ್ರ ಸರಿಯಲ್ಲ. ಹೋಟೆಲ್‌ನಲ್ಲಿ ತಂಗುವಾಗ ಈ ಸಣ್ಣ ನಿಯಮಗಳನ್ನು ಪಾಲಿಸಿದರೆ, ನಿಮ್ಮ ಪ್ರವಾಸವೂ ಆರಾಮದಾಯಕವಾಗಿರುತ್ತದೆ ಮತ್ತು ಅನಗತ್ಯ ತೊಂದರೆಗಳನ್ನೂ ತಪ್ಪಿಸಬಹುದು.

ಏರ್‌ಟೆಲ್ ನಿಂದ ಗ್ರಾಹಕರಿಗೆ ಬಂಪರ್ ಆಫರ್: ಆ್ಯಪ್ ಮೂಲಕ ರೀಚಾರ್ಜ್‌ಗೆ ಬೈ ಒನ್ ಗೆಟ್ ಒನ್ ಫ್ರೀ!

Gowthami K — Mon, 09 Nov 2026 08:42:00 +0530

ಬೆಂಗಳೂರು: ಭಾರತದ ಪ್ರಮುಖ ಟೆಲಿಕಾಂ ಸಂಸ್ಥೆಯಾದ ಭಾರ್ತಿ ಏರ್‌ಟೆಲ್ ತನ್ನ ಅರ್ಹ ಪ್ರಿಪೇಯ್ಡ್ ಗ್ರಾಹಕರಿಗಾಗಿ ಅತ್ಯಂತ ಆಕರ್ಷಕ ಹಾಗೂ ಸೀಮಿತ ಅವಧಿಯ ಒಂದಕ್ಕೆ 1 ಉಚಿತ ಆಫರ್ ಅನ್ನು ಅಧಿಕೃತವಾಗಿ ಘೋಷಿಸಿದೆ. ಕಂಪನಿಯು ತನ್ನ ಸ್ವಂತ 'ಏರ್‌ಟೆಲ್ ಥ್ಯಾಂಕ್ಸ್' ಆಪ್ ಮೂಲಕ ಆಯ್ದ ಪ್ರಿಪೇಯ್ಡ್ ಪ್ಲಾನ್‌ಗಳನ್ನು ರೀಚಾರ್ಜ್ ಮಾಡುವ ಬಳಕೆದಾರರಿಗೆ ಈ ಉಚಿತ ಕೊಡುಗೆಯನ್ನು ನೀಡುತ್ತಿದೆ.

ಇತ್ತೀಚೆಗೆ ದೇಶಾದ್ಯಂತ ಟೆಲಿಕಾಂ ದರಗಳ ಏರಿಕೆಯಾದ ಬಳಿಕ, ಗ್ರಾಹಕರು ಬೇರೆ ನೆಟ್‌ವರ್ಕ್‌ಗಳಿಗೆ ಪೋರ್ಟ್ ಆಗುತ್ತಿದ್ದಾರೆ ಇದನ್ನು ತಡೆಯುವ ನಿಟ್ಟಿನಲ್ಲಿ ಮತ್ತು ತನ್ನ ಸ್ವಂತ ಆಪ್ ಬಳಕೆಯನ್ನು ಹೆಚ್ಚಿಸಲು ಏರ್‌ಟೆಲ್ ಈ ಆಕ್ರಮಣಕಾರಿ ತಂತ್ರವನ್ನು ರೂಪಿಸಿದೆ.

₹349 ಪ್ಲಾನ್‌ನ ಪ್ರಯೋಜನಗಳು ಹಾಗೂ 1+1 ಆಫರ್ ವಿವರ

ಏರ್‌ಟೆಲ್‌ನ ಹೆಚ್ಚು ಜನಪ್ರಿಯವಾಗಿರುವ ₹349 ಪ್ರಿಪೇಯ್ಡ್ ಪ್ಲಾನ್ ದಿನನಿತ್ಯದ ಡೇಟಾ ಬಳಕೆದಾರರಿಗೆ ಸೂಕ್ತವಾಗಿದೆ.

28 ದಿನಗಳ ಮಾನ್ಯತೆ, ಪ್ರತಿದಿನ 2GB ಹೈ-ಸ್ಪೀಡ್ ಡೇಟಾ, ಅನಿಯಮಿತ ಧ್ವನಿ ಕರೆಗಳು, ದಿನಕ್ಕೆ 100 SMS ಹಾಗೂ 5G ನೆಟ್‌ವರ್ಕ್ ಲಭ್ಯವಿರುವ ಪ್ರದೇಶಗಳಲ್ಲಿ ಅನಿಯಮಿತ 5G ಡೇಟಾ.

ಈ ಪ್ಲಾನ್‌ಗೆ ₹349 ಪಾವತಿಸಿ ರೀಚಾರ್ಜ್ ಮಾಡಿದರೆ, ಹೆಚ್ಚುವರಿ ಶುಲ್ಕವಿಲ್ಲದೆ ಮತ್ತೊಂದು 28 ದಿನಗಳ ಉಚಿತ ರೀಚಾರ್ಜ್ ಸಿಗಲಿದೆ. ಇದರಿಂದ ಒಟ್ಟು 56 ದಿನಗಳ ಮಾನ್ಯತೆ ಹಾಗೂ 112GB ಡೇಟಾ ದೊರೆಯಲಿದ್ದು, ಮಾಸಿಕ ವೆಚ್ಚವು ಕೇವಲ ₹174.50 ಕ್ಕೆ ಇಳಿಯುತ್ತದೆ.

ಸುಮಾರು ₹4,000 ಮೌಲ್ಯದ 12 ತಿಂಗಳ 'ಅಡೋಬ್ ಎಕ್ಸ್‌ಪ್ರೆಸ್ ಪ್ರೀಮಿಯಂ' ಚಂದಾದಾರಿಕೆ, ಏರ್‌ಟೆಲ್‌ನ ಸುರಕ್ಷಿತ AI ಸ್ಪ್ಯಾಮ್ ರಕ್ಷಣೆ ಮತ್ತು ಉಚಿತ ಹೆಲೋಟ್ಯೂನ್ ಸೌಲಭ್ಯ.

₹399 ಪ್ಲಾನ್

ಯಾವುದೇ ದೈನಂದಿನ ಮಿತಿಯಿಲ್ಲದ ನಿಜವಾದ ಅನಿಯಮಿತ 4G/5G ಡೇಟಾ

ಹೆಚ್ಚು ಇಂಟರ್ನೆಟ್ ಬಳಸುವ ಗ್ರಾಹಕರಿಗಾಗಿ ಏರ್‌ಟೆಲ್ ₹399 ಪ್ಲಾನ್ ಮೇಲೆ BOGO ಸೌಲಭ್ಯ ಒದಗಿಸಿದೆ.

ಈ ಪ್ಲಾನ್‌ನಲ್ಲಿ ಯಾವುದೇ ದೈನಂದಿನ ಡೇಟಾ ಮಿತಿ ಇರುವುದಿಲ್ಲ. 4G ಹಾಗೂ 5G ಹ್ಯಾಂಡ್‌ಸೆಟ್‌ಗಳನ್ನು ಹೊಂದಿರುವ ಎಲ್ಲಾ ಬಳಕೆದಾರರೂ ನಿಜವಾದ ಅನಿಯಮಿತ ಡೇಟಾವನ್ನು ಪಡೆಯಬಹುದು.

ಬೈ ಒನ್ ಗೆಟ್‌ ಒನ್ ಆಫರ್ ಲಾಭ: ₹399 ಪಾವತಿಸುವ ಮೂಲಕ ಗ್ರಾಹಕರು ಸತತ 56 ದಿನಗಳ ಕಾಲ (28 ದಿನ + 28 ದಿನ) ಅಡೆತಡೆಯಿಲ್ಲದ ಹೈ-ಸ್ಪೀಡ್ ಇಂಟರ್ನೆಟ್ ಪಡೆಯಬಹುದು. ಇದರಿಂದ ಪರಿಣಾಮಕಾರಿ ಮಾಸಿಕ ವೆಚ್ಚ ತಿಂಗಳಿಗೆ ₹200 ಕ್ಕಿಂತ ಕಡಿಮೆಯಾಗಲಿದೆ. ಈ ಯೋಜನೆಯಲ್ಲೂ 12 ತಿಂಗಳ ಅಡೋಬ್ ಎಕ್ಸ್‌ಪ್ರೆಸ್ ಪ್ರೀಮಿಯಂ ಉಚಿತವಾಗಿ ಸಿಗಲಿದೆ.

ಕೊಡುಗೆಯನ್ನು ಪರಿಶೀಲಿಸುವುದು ಮತ್ತು ಪಡೆದುಕೊಳ್ಳುವುದು ಹೇಗೆ?

ಈ ಆಫರ್ ಕೇವಲ 'Airtel Thanks App' ನಲ್ಲಿ ಮಾತ್ರ ಲಭ್ಯವಿದ್ದು, ಆಯ್ದ ಬಳಕೆದಾರರಿಗೆ ಮಾತ್ರ ನೀಡಲಾಗುತ್ತಿದೆ.

ನಿಮ್ಮ ಮೊಬೈಲ್‌ನಲ್ಲಿ ಏರ್‌ಟೆಲ್ ಥ್ಯಾಂಕ್ಸ್ ಅಪ್ಲಿಕೇಶನ್ ತೆರೆಯಿರಿ.

ರೀಚಾರ್ಜ್ ವಿಭಾಗಕ್ಕೆ ಹೋಗಿ ₹349 ಅಥವಾ ₹399 ಪ್ಲಾನ್ ಆಯ್ಕೆಮಾಡಿ.

ಪಾವತಿ ಮಾಡುವ ಮೊದಲು ಯೋಜನೆಯ ವಿವರಗಳಲ್ಲಿ "1+1 Recharge Free" ಎಂಬ ಟ್ಯಾಗ್ ಕಾಣಿಸುತ್ತಿದೆಯೇ ಎಂದು ಖಚಿತಪಡಿಸಿಕೊಳ್ಳಿ.

ಈ ಟ್ಯಾಗ್ ಕಾಣಿಸಿದರೆ ಮಾತ್ರ ನಿಮಗೆ ಉಚಿತ ರೀಚಾರ್ಜ್ ಪ್ರಯೋಜನ ದೊರೆಯುತ್ತದೆ.

ಮೊದಲ 28 ದಿನಗಳ ಚಂದಾದಾರಿಕೆ ಅವಧಿ ಮುಗಿದ ನಂತರ, ಉಚಿತವಾಗಿ ನೀಡಲಾದ ಎರಡನೇ ಚಕ್ರದ ರೀಚಾರ್ಜ್ ಆಟೋಮ್ಯಾಟಿಕ್ ಆಗಿ ಅಥವಾ ವೋಚರ್ ರೂಪದಲ್ಲಿ ಸಕ್ರಿಯಗೊಳ್ಳುತ್ತದೆ.

ವಿಜಯ್ ಮಲ್ಯ ನೆರಳಿನಿಂದ ಹೊರಬಂದಿರುವ ಪುತ್ರ ಸಿದ್ಧಾರ್ಥ್ ಮಲ್ಯ ಆಸ್ತಿ ಎಷ್ಟು? ಮಾಡೆಲಿಂಗ್‌, ನಟನೆ, ಬರವಣಿಗೆ ಜೀವನ!

Gowthami K — Sat, 07 Nov 2026 15:44:59 +0530

ಭಾರತದಿಂದ ಪರಾರಿಯಾಗಿರುವ ಉದ್ಯಮಿ ವಿಜಯ್ ಮಲ್ಯ ಅವರ ಹೆಸರು ಕೇಳಿದಾಗಲೆಲ್ಲಾ ಸಾವಿರಾರು ಕೋಟಿ ರೂಪಾಯಿ ಬ್ಯಾಂಕ್ ಸಾಲದ ವಿವಾದ, ಕಾನೂನು ಹೋರಾಟ ಹಾಗೂ ವಿದೇಶದಲ್ಲಿ ನೆಲೆಸಿರುವ ವಿಚಾರಗಳು ಯಾವಾಗಲು ಚರ್ಚೆಗೆ ಬರುತ್ತವೆ. ಆದರೆ ಅವರ ಪುತ್ರ ಸಿದ್ಧಾರ್ಥ್ ಮಲ್ಯ ಅವರ ಜೀವನದ ಹಾದಿ ತಂದೆಯ ಉದ್ಯಮ ಜಗತ್ತಿಗಿಂತ ಭಿನ್ನವಾಗಿದೆ. ಮಾಡೆಲಿಂಗ್, ನಟನೆ, ಡಿಜಿಟಲ್ ಮಾಧ್ಯಮ ಮತ್ತು ಪುಸ್ತಕ ಬರವಣಿಗೆಯಲ್ಲಿ ತಮ್ಮದೇ ಆದ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ. ಎರಡು ವರ್ಷಗಳ ಹಿಂದೆ ಜಾಸ್ಮಿನ್ ಅವರೊಂದಿಗೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿರುವ ಸಿದ್ಧಾರ್ಥ್ ಅವರ ವೃತ್ತಿಜೀವನ, ವೈಯಕ್ತಿಕ ಬದುಕು ಮತ್ತು ಅಂದಾಜು ಆಸ್ತಿ ಮೌಲ್ಯದ ಕುರಿತು ಮತ್ತೆ ಚರ್ಚೆ ಆರಂಭವಾಗಿದೆ. ಮಾತ್ರವಲ್ಲ ಇನ್ಸ್ಟಾದಲ್ಲಿ 1 ಮಿಲಿಯನ್ ಫಾಲೋವರ್ಸ್ ಕೂಡ ಹೊಂದಿದ್ದಾರೆ.

ಕೆಲವು ವರದಿಗಳಲ್ಲಿ ಸಿದ್ಧಾರ್ಥ್ ಮಲ್ಯ ಅವರ ನಿವ್ವಳ ಆಸ್ತಿ ಮೌಲ್ಯ ಸುಮಾರು 380 ಮಿಲಿಯನ್ ಡಾಲರ್ ಎಂದು ಉಲ್ಲೇಖಿಸಲಾಗಿದೆ. ಭಾರತೀಯ ರೂಪಾಯಿ ಲೆಕ್ಕದಲ್ಲಿ ಇದು ಅಂದಾಜು ₹3,175 ಕೋಟಿಯಿಂದ ₹3,176 ಕೋಟಿ ಆಗುತ್ತದೆ. ಆದರೆ ಈ ಮೊತ್ತಕ್ಕೆ ಸಂಬಂಧಿಸಿದಂತೆ 2026ರ ವೇಳೆಗೆ ಯಾವುದೇ ಅಧಿಕೃತ, ಸಾರ್ವಜನಿಕವಾಗಿ ಲಭ್ಯವಿರುವ ಲೆಕ್ಕಪರಿಶೋಧಿತ ಹಣಕಾಸು ದಾಖಲೆ ಪ್ರಕಟವಾಗಿಲ್ಲ.

ಯಾರು ಈ ಸಿದ್ಧಾರ್ಥ್ ಮಲ್ಯ?

ಸಿದ್ಧಾರ್ಥ್ ಮಲ್ಯ ಅವರು ವಿಜಯ್ ಮಲ್ಯ ಅವರ ಏಕೈಕ ಪುತ್ರ. ಅಮೆರಿಕದ ಲಾಸ್ ಏಂಜಲೀಸ್‌ನಲ್ಲಿ ಜನಿಸಿದ ಅವರು ಲಂಡನ್ ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್‌ನಲ್ಲಿ ಬೆಳೆದರು. ಬಾಲ್ಯದಿಂದಲೇ ವಿಭಿನ್ನ ಸಾಂಸ್ಕೃತಿಕ ವಾತಾವರಣದಲ್ಲಿ ಬೆಳೆದ ಸಿದ್ಧಾರ್ಥ್ ಅವರಿಗೆ ನಟನೆ, ಫ್ಯಾಷನ್ ಮತ್ತು ಮನರಂಜನಾ ಕ್ಷೇತ್ರಗಳ ಬಗ್ಗೆ ಆಸಕ್ತಿ ಇತ್ತು.

ಅವರು ಇಂಗ್ಲೆಂಡ್‌ನ ಬರ್ಕ್‌ಷೈರ್‌ನಲ್ಲಿರುವ ವೆಲ್ಲಿಂಗ್ಟನ್ ಕಾಲೇಜಿನಲ್ಲಿ ಶಿಕ್ಷಣ ಪಡೆದರು. ಬಳಿಕ ಲಂಡನ್‌ನ ಕ್ವೀನ್ ಮೇರಿ ವಿಶ್ವವಿದ್ಯಾಲಯದಲ್ಲಿ ಪದವಿ ಶಿಕ್ಷಣ ಪೂರ್ಣಗೊಳಿಸಿದರು. ಶೈಕ್ಷಣಿಕ ವಿದ್ಯಾಭ್ಯಾಸದ ಜತೆಗೆ ಅಭಿನಯ ಮತ್ತು ರಂಗಭೂಮಿಯಲ್ಲೂ ಆಸಕ್ತಿ ಬೆಳೆಸಿಕೊಂಡ ಅವರು, ಲಂಡನ್‌ನ ರಾಯಲ್ ಸೆಂಟ್ರಲ್ ಸ್ಕೂಲ್ ಆಫ್ ಸ್ಪೀಚ್ ಅಂಡ್ ಡ್ರಾಮಾದಲ್ಲಿ ನಟನೆಯ ತರಬೇತಿ ಪಡೆದರು.

ನಟನಾಗಬೇಕೆಂಬ ಆಸೆಯಿಂದ ಮನರಂಜನಾ ಕ್ಷೇತ್ರದತ್ತ ಹೆಜ್ಜೆ ಇಟ್ಟ ಸಿದ್ಧಾರ್ಥ್, ಮಾಡೆಲಿಂಗ್ ಮೂಲಕವೂ ತಮ್ಮ ವೃತ್ತಿಜೀವನವನ್ನು ಬೆಳೆಸಿಕೊಳ್ಳಲು ಪ್ರಯತ್ನಿಸಿದರು. ವಿವಿಧ ಫ್ಯಾಷನ್ ವಿನ್ಯಾಸಕರ ಕಾರ್ಯಕ್ರಮಗಳಲ್ಲಿ ರ‍್ಯಾಂಪ್ ಮೇಲೆ ಹೆಜ್ಜೆ ಹಾಕುವ ಮೂಲಕ ಗಮನ ಸೆಳೆದರು.

ಡಿಯಾಜಿಯೊ ಕಂಪನಿಯಲ್ಲಿ ಉದ್ಯೋಗ, ಆರ್‌ಸಿಬಿ ನಿರ್ದೇಶಕ ಹುದ್ದೆ

ಮನರಂಜನಾ ಕ್ಷೇತ್ರಕ್ಕೆ ಪ್ರವೇಶಿಸುವ ಮೊದಲು ಸಿದ್ಧಾರ್ಥ್ ಕಾರ್ಪೊರೇಟ್ ವಲಯದಲ್ಲಿಯೂ ಕೆಲಸ ಮಾಡಿದ್ದಾರೆ. ತಮ್ಮ ವೃತ್ತಿಜೀವನದ ಆರಂಭದಲ್ಲಿ ಡಿಯಾಜಿಯೊ ಕಂಪನಿಯಲ್ಲಿ ಗಿನ್ನೆಸ್ ಬ್ರ್ಯಾಂಡ್‌ನ ಸಹಾಯಕ ಬ್ರ್ಯಾಂಡ್ ಮ್ಯಾನೇಜರ್ ಆಗಿ ಕಾರ್ಯನಿರ್ವಹಿಸಿದ್ದರು.

2010ರಲ್ಲಿ ಯುನೈಟೆಡ್ ಬ್ರೂವರೀಸ್ ಸಮೂಹದ ಭಾಗವಾಗಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಿರ್ದೇಶಕರಾಗಿ ನೇಮಕಗೊಂಡರು. ಈ ಹುದ್ದೆಯ ಮೂಲಕ ಭಾರತೀಯ ಕ್ರಿಕೆಟ್ ಮತ್ತು ಐಪಿಎಲ್ ವಲಯದಲ್ಲಿಯೂ ಅವರ ಹೆಸರು ಗುರುತಿಸಿಕೊಂಡಿತು. ಆರ್‌ಸಿಬಿ ತಂಡದ ಆಡಳಿತಾತ್ಮಕ ಹಾಗೂ ಪ್ರಚಾರ ಚಟುವಟಿಕೆಗಳಲ್ಲಿ ಅವರ ಪಾತ್ರದ ಬಗ್ಗೆ ಆ ಸಮಯದಲ್ಲಿ ಸಾಕಷ್ಟು ಚರ್ಚೆಯಾಗಿತ್ತು.

2012ರಲ್ಲಿ 'ನೋ ಬೌಂಡರೀಸ್' ಎಂಬ ಸಂವಾದ ಕಾರ್ಯಕ್ರಮವನ್ನು ಆರಂಭಿಸಿದರು. ಕ್ರೀಡೆ, ಮನರಂಜನೆ ಮತ್ತು ಸಾರ್ವಜನಿಕ ಜೀವನಕ್ಕೆ ಸಂಬಂಧಿಸಿದ ವಿಚಾರಗಳನ್ನು ಒಳಗೊಂಡ ಈ ಕಾರ್ಯಕ್ರಮದ ಮೂಲಕ ಮಾಧ್ಯಮ ಕ್ಷೇತ್ರದಲ್ಲಿಯೂ ತಮ್ಮ ಆಸಕ್ತಿಯನ್ನು ವ್ಯಕ್ತಪಡಿಸಿದರು.

ಲಕ್ಮೆ ಫ್ಯಾಷನ್ ವೀಕ್ ಮೂಲಕ ಮಾಡೆಲಿಂಗ್‌ಗೆ ಪ್ರವೇಶ

ಸಿದ್ಧಾರ್ಥ್ ಮಲ್ಯ ಅವರ ಮಾಡೆಲಿಂಗ್ ಪಯಣಕ್ಕೆ 2012ರಲ್ಲಿ ಮಹತ್ವದ ತಿರುವು ಸಿಕ್ಕಿತು. ಮುಂಬೈನಲ್ಲಿ ನಡೆದ ಲಕ್ಮೆ ಫ್ಯಾಷನ್ ವೀಕ್‌ನಲ್ಲಿ ಫ್ಯಾಷನ್ ವಿನ್ಯಾಸಕಿ ಕೋಮಲ್ ಸೂದ್ ಅವರ ಶೋಸ್ಟಾಪರ್ ಆಗಿ ರ‍್ಯಾಂಪ್ ಮೇಲೆ ಮೊದಲ ಬಾರಿಗೆ ಕಾಣಿಸಿಕೊಂಡರು.

ಇದಾದ ಬಳಿಕ ವಿವಿಧ ಫ್ಯಾಷನ್ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿ ಮಾಡೆಲಿಂಗ್ ಕ್ಷೇತ್ರದಲ್ಲಿ ತಮ್ಮನ್ನು ತೊಡಗಿಸಿಕೊಂಡರು. ಫ್ಯಾಷನ್ ಜಗತ್ತಿನೊಂದಿಗೆ ಸಂಪರ್ಕ ಬೆಳೆಸಿಕೊಂಡ ಅವರು, ಸಾಮಾಜಿಕ ಮಾಧ್ಯಮ ಮತ್ತು ಡಿಜಿಟಲ್ ವೇದಿಕೆಗಳಲ್ಲಿಯೂ ಸಕ್ರಿಯರಾದರು.

2014ರಲ್ಲಿ 'ಸಿಡ್ ಸೆಷನ್ಸ್' ಹೆಸರಿನ ಯೂಟ್ಯೂಬ್ ಚಾನೆಲ್ ಆರಂಭಿಸಿದರು. ಈ ವೇದಿಕೆಯ ಮೂಲಕ ತಮ್ಮ ಅಭಿಪ್ರಾಯಗಳು, ವೈಯಕ್ತಿಕ ಅನುಭವಗಳು ಮತ್ತು ವಿವಿಧ ವಿಷಯಗಳ ಕುರಿತಾದ ವಿಡಿಯೊಗಳನ್ನು ಹಂಚಿಕೊಳ್ಳಲು ಮುಂದಾದರು.

ಸಿನಿಮಾದಲ್ಲೂ ಅದೃಷ್ಟ ಪರೀಕ್ಷೆ

ಮಾಡೆಲಿಂಗ್ ಮತ್ತು ಡಿಜಿಟಲ್ ಮಾಧ್ಯಮದ ಜತೆಗೆ ಸಿದ್ಧಾರ್ಥ್ ನಟನೆಯಲ್ಲಿಯೂ ಅವಕಾಶಗಳನ್ನು ಹುಡುಕಿದರು. ಸ್ಟೀವ್ ಬ್ಯಾರನ್ ನಿರ್ದೇಶನದ 'ಬ್ರಹ್ಮನ್ ನಾಮನ್' ಚಿತ್ರದಲ್ಲಿ ನಟಿಸುವ ಮೂಲಕ ಚಲನಚಿತ್ರ ಕ್ಷೇತ್ರಕ್ಕೆ ಪ್ರವೇಶಿಸಿದರು. ಇದು ಹಾಸ್ಯಪ್ರಧಾನ ಚಿತ್ರವಾಗಿದ್ದು, ಅಂತರರಾಷ್ಟ್ರೀಯ ಮಟ್ಟದಲ್ಲಿಯೂ ಪ್ರದರ್ಶನ ಕಂಡಿತ್ತು. ಆದರೆ ಈ ಚಿತ್ರ ಅವರಿಗೆ ದೊಡ್ಡ ಮಟ್ಟದ ವಾಣಿಜ್ಯ ಯಶಸ್ಸು ತಂದುಕೊಡಲಿಲ್ಲ.

ನಟನೆಯ ಮೇಲಿನ ಆಸಕ್ತಿಯನ್ನು ಮುಂದುವರಿಸಿರುವ ಅವರು, ಚಲನಚಿತ್ರ ಮತ್ತು ಡಿಜಿಟಲ್ ಮನರಂಜನಾ ಕ್ಷೇತ್ರಗಳಲ್ಲಿ ಕೆಲಸ ಮಾಡುವ ಪ್ರಯತ್ನ ನಡೆಸಿದ್ದಾರೆ.

ಎರಡು ಪುಸ್ತಕಗಳ ಮೂಲಕ ವೈಯಕ್ತಿಕ ಅನುಭವ ಹಂಚಿಕೊಂಡ ಸಿದ್ಧಾರ್ಥ್

ಸಿದ್ಧಾರ್ಥ್ ಮಲ್ಯ ಅವರ ವೃತ್ತಿಜೀವನದಲ್ಲಿ ಬರವಣಿಗೆಯೂ ಒಂದು ಪ್ರಮುಖ ಭಾಗವಾಗಿದೆ. ಅವರು ಎರಡು ಪುಸ್ತಕಗಳನ್ನು ಪ್ರಕಟಿಸಿದ್ದು, ಅವುಗಳಲ್ಲಿ ತಮ್ಮ ವೈಯಕ್ತಿಕ ಅನುಭವಗಳು ಮತ್ತು ಮಾನಸಿಕ ಆರೋಗ್ಯಕ್ಕೆ ಸಂಬಂಧಿಸಿದ ವಿಚಾರಗಳನ್ನು ಪ್ರಸ್ತಾಪಿಸಿದ್ದಾರೆ.

2021ರಲ್ಲಿ 'ಇಫ್ ಐ ಆಮ್ ಹಾನೆಸ್ಟ್: ಎ ಮೆಂಟಲ್ ಹೆಲ್ತ್ ಜರ್ನಿ' ಎಂಬ ಆತ್ಮಕಥನಾತ್ಮಕ ಪುಸ್ತಕವನ್ನು ಪ್ರಕಟಿಸಿದರು. ಈ ಕೃತಿಯಲ್ಲಿ ಖಿನ್ನತೆ, ಮದ್ಯಪಾನದ ಸಮಸ್ಯೆ, ಕುಟುಂಬದ ಪರಿಸ್ಥಿತಿ ಮತ್ತು ಪೋಷಕರ ವಿಚ್ಛೇದನದಿಂದ ಉಂಟಾದ ಭಾವನಾತ್ಮಕ ಪರಿಣಾಮಗಳ ಕುರಿತು ತಮ್ಮ ಅನುಭವಗಳನ್ನು ಹಂಚಿಕೊಂಡಿದ್ದಾರೆ.

2024ರಲ್ಲಿ 'ಸ್ಯಾಡ್/ಗ್ಲಾಡ್' ಎಂಬ ಮತ್ತೊಂದು ಪುಸ್ತಕವನ್ನು ಬಿಡುಗಡೆ ಮಾಡಿದರು. ಈ ಕೃತಿಯಲ್ಲಿಯೂ ಭಾವನೆಗಳು, ಮಾನಸಿಕ ಸಂಘರ್ಷಗಳು ಮತ್ತು ಬಾಲ್ಯದ ಅನುಭವಗಳಿಗೆ ಸಂಬಂಧಿಸಿದ ವಿಷಯಗಳನ್ನು ಪ್ರಸ್ತಾಪಿಸಿದ್ದಾರೆ. ತಮ್ಮ ವೈಯಕ್ತಿಕ ಬದುಕಿನ ಸವಾಲುಗಳ ಕುರಿತು ಮುಕ್ತವಾಗಿ ಮಾತನಾಡುವ ಮೂಲಕ ಮಾನಸಿಕ ಆರೋಗ್ಯದ ಬಗ್ಗೆ ಜಾಗೃತಿ ಮೂಡಿಸುವ ಪ್ರಯತ್ನವನ್ನೂ ಮಾಡಿದ್ದಾರೆ.

ನೆಟ್‌ಫ್ಲಿಕ್ಸ್‌ನ 'ಬ್ಯಾಡ್ ಬಾಯ್ ಬಿಲಿಯನೇರ್ಸ್: ಇಂಡಿಯಾ' ಸಾಕ್ಷ್ಯಚಿತ್ರ ಸರಣಿಯಲ್ಲಿಯೂ ಸಿದ್ಧಾರ್ಥ್ ಮಲ್ಯ ಕಾಣಿಸಿಕೊಂಡಿದ್ದರು. ಈ ಸರಣಿಯಲ್ಲಿ ತಮ್ಮ ತಂದೆ ವಿಜಯ್ ಮಲ್ಯ ಅವರ ವಿರುದ್ಧದ ಆರೋಪಗಳು ಮತ್ತು ವಿವಾದಗಳ ಕುರಿತು ಮಾತನಾಡಿದ್ದರು.

ಸುಮಾರು ₹9,000 ಕೋಟಿ ಬ್ಯಾಂಕ್ ಸಾಲದ ಸುಸ್ತಿಗೆ ಸಂಬಂಧಿಸಿದ ಪ್ರಕರಣಗಳು ಮತ್ತು ಕಾನೂನು ವಿವಾದಗಳ ಹಿನ್ನೆಲೆಯಲ್ಲಿ ವಿಜಯ್ ಮಲ್ಯ ಭಾರತವನ್ನು ತೊರೆದು ಬ್ರಿಟನ್‌ನಲ್ಲಿ ನೆಲೆಸಿದ್ದಾರೆ. ಈ ವಿಚಾರದ ಕುರಿತು ಮಾತನಾಡಿದ್ದ ಸಿದ್ಧಾರ್ಥ್, ತಮ್ಮ ತಂದೆಯನ್ನು ಸಮರ್ಥಿಸಿಕೊಂಡಿದ್ದರು. ಸರ್ಕಾರದೊಂದಿಗಿನ ಸಂಘರ್ಷದ ಹಿನ್ನೆಲೆಯಲ್ಲಿ ತಮ್ಮ ತಂದೆಯನ್ನು ರಾಜಕೀಯವಾಗಿ ಗುರಿಯಾಗಿಸಲಾಗಿದೆ ಎಂಬ ಅರ್ಥದಲ್ಲಿ ಅವರು ಹೇಳಿಕೆ ನೀಡಿದ್ದರು. ಈ ಹೇಳಿಕೆಗಳು ಸಾಕ್ಷ್ಯಚಿತ್ರದ ಬಿಡುಗಡೆಯ ಸಂದರ್ಭದಲ್ಲಿ ಗಮನ ಸೆಳೆದಿದ್ದವು.

ಸಿದ್ಧಾರ್ಥ್ ಮಲ್ಯ ಅವರ ನಿವ್ವಳ ಆಸ್ತಿ ಮೌಲ್ಯ ಎಷ್ಟು?

ಸಿದ್ಧಾರ್ಥ್ ಮಲ್ಯ ಅವರ ಆಸ್ತಿ ಮೌಲ್ಯದ ಕುರಿತು ಅಂತರ್ಜಾಲದಲ್ಲಿ ಹಲವು ಅಂಕಿಅಂಶಗಳು ಹರಿದಾಡುತ್ತಿವೆ. ಕೆಲವು ಹಿಂದಿನ ಮಾಧ್ಯಮ ಮತ್ತು ಹಣಕಾಸು ವರದಿಗಳ ಪ್ರಕಾರ, ಅವರ ನಿವ್ವಳ ಆಸ್ತಿ ಮೌಲ್ಯ ಸುಮಾರು 380 ಮಿಲಿಯನ್ ಡಾಲರ್ ಎಂದು ಅಂದಾಜಿಸಲಾಗಿದೆ. ಭಾರತೀಯ ರೂಪಾಯಿಯಲ್ಲಿ ಇದು ಸುಮಾರು ₹3,175 ಕೋಟಿ ಆಗುತ್ತದೆ. 2026ರ ವೇಳೆಗೆ ಅವರ ವೈಯಕ್ತಿಕ ನಿವ್ವಳ ಆಸ್ತಿಯನ್ನು ದೃಢೀಕರಿಸುವ ನವೀಕೃತ ಫೋರ್ಬ್ಸ್ ಅಥವಾ ಹುರುನ್ ಶ್ರೇಯಾಂಕವೂ ಉಲ್ಲೇಖಿತವಾಗಿಲ್ಲ.

ಅವರ ಆದಾಯದ ಮೂಲಗಳ ಬಗ್ಗೆ ಮಾತನಾಡುವಾಗ ಮಾಡೆಲಿಂಗ್, ನಟನೆ, ಬರವಣಿಗೆ, ಡಿಜಿಟಲ್ ಮಾಧ್ಯಮ ಮತ್ತು ಹಿಂದಿನ ಕಾರ್ಪೊರೇಟ್ ಹುದ್ದೆಗಳನ್ನು ಪರಿಗಣಿಸಬಹುದು. ಆದರೆ ₹3,175 ಕೋಟಿ ಸಂಪತ್ತು ಸಂಪೂರ್ಣವಾಗಿ ಈ ವೃತ್ತಿಪರ ಚಟುವಟಿಕೆಗಳಿಂದಲೇ ಬಂದಿದೆ ಎಂಬುದಕ್ಕೆ ಸ್ವತಂತ್ರವಾಗಿ ದೃಢೀಕರಿಸಿದ ಮಾಹಿತಿ ಇಲ್ಲ. ತಂದೆಯ ಆಸ್ತಿಯನ್ನೇ ಸಿದ್ಧಾರ್ಥ್ ಅವರ ವೈಯಕ್ತಿಕ ಆಸ್ತಿ ಎಂದು ಪರಿಗಣಿಸುವುದೂ ಸರಿಯಲ್ಲ.

ಹೀಗಾಗಿ ಸಿದ್ಧಾರ್ಥ್ ಮಲ್ಯ ಅವರ ನಿವ್ವಳ ಆಸ್ತಿ ಮೌಲ್ಯಕ್ಕೆ ಸಂಬಂಧಿಸಿದಂತೆ ವರದಿಯಾಗಿರುವ ₹3,175 ಕೋಟಿ ಅಂಕಿಯನ್ನು ಅಧಿಕೃತ ಹಣಕಾಸು ಬಹಿರಂಗಪಡಿಸುವಿಕೆ ಎಂದು ನೋಡದೆ, ಮಾಧ್ಯಮಗಳಲ್ಲಿ ಪ್ರಕಟವಾಗಿರುವ ಅಂದಾಜು ಎಂದು ಮಾತ್ರ ಪರಿಗಣಿಸಬೇಕು.

ಜಾಸ್ಮಿನ್ ಜೊತೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟ ಸಿದ್ಧಾರ್ಥ್

ಸಿದ್ಧಾರ್ಥ್ ಮಲ್ಯ ತಮ್ಮ ಗೆಳತಿ ಜಾಸ್ಮಿನ್ ಅವರೊಂದಿಗೆ ಅವರು ಜೂನ್ 23ರಂದು 2024ರಲ್ಲಿ ಲಂಡನ್ ಸಮೀಪ ಖಾಸಗಿ ಸಮಾರಂಭದಲ್ಲಿ ವಿವಾಹವಾದರು. ಸಿದ್ಧಾರ್ಥ್ ಮತ್ತು ಜಾಸ್ಮಿನ್ ಸುಮಾರು ಒಂದು ವರ್ಷದಿಂದ ಪರಸ್ಪರ ಪ್ರೀತಿಸುತ್ತಿದ್ದರು. ಕುಟುಂಬದವರು ಮತ್ತು ಆಪ್ತರ ಸಮ್ಮುಖದಲ್ಲಿ ನಡೆದ ಖಾಸಗಿ ಸಮಾರಂಭದಲ್ಲಿ ಇಬ್ಬರೂ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ.

ದೀಪಿಕಾ ಪಡುಕೋಣೆ ಸೇರಿದಂತೆ ಹಲವು ನಟಿಯರೊಂದಿಗೆ ಕೇಳಿಬಂದಿದ್ದ ಹೆಸರು

ಸಿದ್ಧಾರ್ಥ್ ಮಲ್ಯ ಅವರ ಹೆಸರು ಈ ಹಿಂದೆ ಕೆಲವು ನಟಿಯರೊಂದಿಗೆ ಕೇಳಿಬಂದಿತ್ತು. ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ಅವರೊಂದಿಗೆ ಅವರು ಸಂಬಂಧ ಹೊಂದಿದ್ದಾರೆ ಎಂಬ ವದಂತಿಗಳು ಒಂದು ಕಾಲದಲ್ಲಿ ಸಾಕಷ್ಟು ಚರ್ಚೆಯಾಗಿದ್ದವು. ಇಬ್ಬರೂ ಹಲವು ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಒಟ್ಟಿಗೆ ಕಾಣಿಸಿಕೊಂಡಿದ್ದರೂ, ತಮ್ಮ ಸಂಬಂಧದ ಬಗ್ಗೆ ಅಧಿಕೃತವಾಗಿ ದೃಢೀಕರಿಸಿರಲಿಲ್ಲ. ನಟಿ ಸೋನಲ್ ಚೌಹಾಣ್ ಅವರೊಂದಿಗೂ ಸಿದ್ಧಾರ್ಥ್ ಆಪ್ತ ಸಂಬಂಧ ಹೊಂದಿದ್ದಾರೆ ಎಂಬ ಮಾತುಗಳು ಕೇಳಿಬಂದಿದ್ದವು. ನಟಿ ಫ್ರೀಡಾ ಪಿಂಟೊ ಅವರೊಂದಿಗೆ 2016ರಲ್ಲಿ ನ್ಯೂಯಾರ್ಕ್‌ನಲ್ಲಿ ಒಟ್ಟಿಗೆ ಕಾಣಿಸಿಕೊಂಡ ಬಳಿಕ ಅವರಿಬ್ಬರ ನಡುವಿನ ಸಂಬಂಧದ ಕುರಿತು ವರದಿಗಳು ಪ್ರಕಟವಾಗಿದ್ದವು. ಇದಲ್ಲದೆ ನರ್ಗಿಸ್ ಫಕ್ರಿ, ಸೋಫಿ ಚೌಧರಿ ಮತ್ತು ಏಂಜೆಲಾ ಜಾನ್ಸನ್ ಅವರೊಂದಿಗೂ ಸಿದ್ಧಾರ್ಥ್ ಹೆಸರು ಜೋಡಿಸಲಾಗಿತ್ತು.

ತಂದೆಯ ನೆರಳಿನಿಂದ ಹೊರಬಂದು ಸ್ವಂತ ಗುರುತಿನ ಹುಡುಕಾಟ

ಕಾರ್ಪೊರೇಟ್ ಉದ್ಯೋಗದಿಂದ ಆರ್‌ಸಿಬಿ ಆಡಳಿತ, ಫ್ಯಾಷನ್ ರ‍್ಯಾಂಪ್, ಸಿನಿಮಾ ಮತ್ತು ಬರವಣಿಗೆಯವರೆಗೆ ವಿಭಿನ್ನ ಕ್ಷೇತ್ರಗಳಲ್ಲಿ ತೊಡಗಿಸಿಕೊಂಡಿರುವ ಅವರ ಪಯಣ ಗಮನಾರ್ಹವಾಗಿದೆ.

ಬೆಲೆ ಇಳಿಕೆ; ಒಂದೇ ದಿನ ಮಾರಾಟವಾಯ್ತು 60 ಸಾವಿರ ಕೋಟಿ ಮೌಲ್ಯದ ಚಿನ್ನ, ಬೆಳ್ಳಿ Dhan Trayodashi

Kannadaprabha News — Sat, 07 Nov 2026 09:04:21 +0530

ಚಿನ್ನದ ಬೆಲೆ ಏರಿಕೆಯಾಗಿದ್ದರೂ, ಇತ್ತೀಚಿನ ದರ ಇಳಿಕೆಯಿಂದಾಗಿ ಧನ ತ್ರಯೋದಶಿಯಂದು ದೇಶಾದ್ಯಂತ 60 ಸಾವಿರ ಕೋಟಿ ರೂ. ಮೌಲ್ಯದ ಚಿನ್ನ ಮಾರಾಟವಾಗಿದೆ. ಬೆಂಗಳೂರು ಮತ್ತು ದೆಹಲಿಯಲ್ಲಿ ಚಿನ್ನ ಹಾಗೂ ಬೆಳ್ಳಿಯ ಬೆಲೆಯಲ್ಲಿ ಗಣನೀಯ ಇಳಿಕೆ ಕಂಡುಬಂದಿದೆ.

ಚಿನ್ನದ ಬೆಲೆ ಗಗನಮುಖಿಯಾಗಿದ್ದ ಕಾರಣ ಕಳೆದ ಕೆಲ ತಿಂಗಳುಗಳಿಂದ ಅದನ್ನು ಕೊಳ್ಳಲು ಮನಸ್ಸು ಮಾಡಿರದ ಗ್ರಾಹಕರು ಶುಕ್ರವಾರದ ಧನ ತ್ರಯೋದಶಿಯಂದು ಹೊನ್ನನ್ನು ಖರೀದಿಸಲು ಮುಗಿಬಿದ್ದಿದ್ದಾರೆ. ಪರಿಣಾಮ, ದೇಶಾದ್ಯಂತ 60 ಸಾವಿರ ಕೋಟಿ ರು. ಮೌಲ್ಯದ ಚಿನ್ನ ಮಾರಾಟವಾಗಿರುವ ಅಂದಾಜಿದೆ.

ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಚಿನ್ನದ ಬೆಲೆ ಈ ವರ್ಷ ಶೇ.15- 20 ಏರಿಕೆಯಾಗಿದೆ. ಆದರೆ ಕಳೆದ ಕೆಲ ದಿನಗಳಿಂದ ದರ ಮತ್ತೆ ಇಳಿಕೆಯಾಗಿರುವ ಹಿನ್ನೆಲೆಯಲ್ಲಿ ಗ್ರಾಹಕರು ಹೆಚ್ಚಿನ ಸಂಖ್ಯೆಯಲ್ಲಿ ಖರೀದಿಗೆ ಮುಂದಾಗಿದ್ದರು ಎನ್ನಲಾಗಿದೆ.

ಶುಕ್ರವಾರ ಬೆಂಗಳೂರಿನಲ್ಲಿ 24 ಕ್ಯಾರಟ್‌ನ 10 ಗ್ರಾಂ ಚಿನ್ನದ ಬೆಲೆಯಲ್ಲಿ 2560 ರು. ಇಳಿಕೆಯಾಗಿದ್ದು, 1,43,460 ರು. ಆಗಿದೆ. ಇದೇ ಪ್ರಮಾಣದ 22 ಕ್ಯಾರಟ್‌ನ ಬೆಲೆ 2350 ರು. ಕುಸಿದು 1,31,500 ರು. ಆಗಿದೆ.

ಇದನ್ನೂ ಓದಿ: Reliance Jio ಉದ್ಯಮದಲ್ಲೇ ಇದೇ ಮೊದಲು, ಒಂದೇ ಒಂದು ರಿಚಾರ್ಜ್, ಭರ್ಜರಿ ಆಫರ್ಸ್, 3 ವರ್ಷಗಳವರೆಗೆ ಟೆನ್ಷನ್ ಫ್ರೀ!

ದೆಹಲಿಯಲ್ಲಿ 24 ಕ್ಯಾರಟ್‌ನ 10 ಗ್ರಾಂ ಚಿನ್ನದ ಬೆಲೆ 1,46,300 ರು. ಇದೆ. ಅತ್ತ ಬೆಳ್ಳಿ ಬೆಲೆಯಲ್ಲೂ ಇಳಿಕೆಯಾಗಿದ್ದು, ಬೆಂಗಳೂರಿನಲ್ಲಿ 1 ಕೆ.ಜಿ. ಬೆಲೆ 5 ಸಾವಿರ ರು. ಕುಸಿದು 2,05,000 ರು. ಆಗಿದೆ. ದೆಹಲಿಯಲ್ಲಿ ಇದು 1,92,500 ರು. ಆಗಿದೆ.

ಇದನ್ನೂ ಓದಿ: ದೇಶದ ಮನೆಮನೆಯ ಬ್ರ್ಯಾಂಡ್‌ ಆಗಿದ್ದ Videocon ದಿವಾಳಿ, ಕಂಪನಿ ಮಾಲೀಕ ವೇಣುಗೋಪಾಲ್‌ ಧೂತ್ ಆಸ್ತಿಗಳೆಲ್ಲಾ ಮುಟ್ಟುಗೋಲು!

ದೀಪಾವಳಿಗೆ ಬಂಪರ್ ಆಫರ್ ಘೋಷಿಸಿದ ಜಿಯೋ; ಒಂದೇ ರೀಚಾರ್ಜ್‌ಗೆ 3 ವರ್ಷ ವ್ಯಾಲಿಡಿಟಿ! ದಿನಕ್ಕೆ ಕೇವಲ ₹9.13, ವಾರ್ಷಿಕ ಪ್ಲಾನ್‌ಗಿಂತ ₹797 ಉಳಿತಾಯ!

Naveen Kodase — Sun, 08 Nov 2026 09:44:21 +0530

ಬೆಂಗಳೂರು(ನ.08) ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ರಿಲಯನ್ಸ್ ಜಿಯೋ (Reliance Jio) ತನ್ನ ಗ್ರಾಹಕರಿಗೆ ವಿಶೇಷ ರೀಚಾರ್ಜ್ ಪ್ಲಾನ್ ಪರಿಚಯಿಸಿದೆ. ಪದೇಪದೆ ಮೊಬೈಲ್ ರೀಚಾರ್ಜ್ ಮಾಡಿಸುವ ತಲೆನೋವು ತಪ್ಪಿಸಲು ಬಯಸುವವರಿಗೆ ಜಿಯೋ ಬರೋಬ್ಬರಿ ಮೂರು ವರ್ಷಗಳ ವ್ಯಾಲಿಡಿಟಿ ಹೊಂದಿರುವ ಹೊಸ ಪ್ರಿಪೇಯ್ಡ್ ಪ್ಲಾನ್ ಬಿಡುಗಡೆ ಮಾಡಿದೆ. ₹10,000 ಬೆಲೆಯ ಈ ಪ್ಲಾನ್‌ನಲ್ಲಿ ಒಮ್ಮೆ ಹಣ ಪಾವತಿಸಿದರೆ 36 ತಿಂಗಳ ಕಾಲ ಮೊಬೈಲ್ ಸೇವೆ ಪಡೆಯಬಹುದು.

ನವೆಂಬರ್ 7ರಿಂದ ದೇಶಾದ್ಯಂತ ಲಭ್ಯವಾಗಿರುವ ಈ ಪ್ಲಾನ್‌ನಲ್ಲಿ ಅನಿಯಮಿತ ವಾಯ್ಸ್ ಕರೆ, ಪ್ರತಿದಿನ ಹೈ-ಸ್ಪೀಡ್ ಡೇಟಾ, ಅನಿಯಮಿತ 5G ಡೇಟಾ ಸೇರಿದಂತೆ ಹಲವು ಪ್ರಯೋಜನಗಳನ್ನು ನೀಡಲಾಗಿದೆ. ಇದರ ಜತೆಗೆ ಡಿಜಿಟಲ್ ಸೇವೆಗಳ ಚಂದಾದಾರಿಕೆಯನ್ನೂ ಒದಗಿಸಲಾಗುತ್ತಿದೆ. ದಿ ಟೈಮ್ಸ್ ಆಫ್ ಇಂಡಿಯಾ ವರದಿಯ ಪ್ರಕಾರ, ಗ್ರಾಹಕರು ಪ್ರಸ್ತುತ ರೀಚಾರ್ಜ್ ಪ್ರಯೋಜನಗಳು ಮತ್ತು ದರವನ್ನು ಮೂರು ವರ್ಷಗಳ ಅವಧಿಗೆ ಒಂದೇ ಬಾರಿಗೆ ಪಡೆದುಕೊಳ್ಳಲು ಈ ಯೋಜನೆ ಅವಕಾಶ ನೀಡುತ್ತದೆ. ದೀರ್ಘಾವಧಿಯ ವ್ಯಾಲಿಡಿಟಿ ಬಯಸುವ ಗ್ರಾಹಕರನ್ನು ಗಮನದಲ್ಲಿಟ್ಟುಕೊಂಡು ಈ ಪ್ಲಾನ್ ರೂಪಿಸಲಾಗಿದೆ.

ಜಿಯೋ ₹10,000 ಪ್ಲಾನ್‌ನಲ್ಲಿ ಏನೆಲ್ಲಾ ಪ್ರಯೋಜನಗಳಿವೆ?

ಜಿಯೋ ಹೊಸ ಮೂರು ವರ್ಷಗಳ ರೀಚಾರ್ಜ್ ಪ್ಲಾನ್‌ನಲ್ಲಿ ಗ್ರಾಹಕರಿಗೆ ಹಲವು ಪ್ರಯೋಜನಗಳು ಸಿಗಲಿವೆ.

ವ್ಯಾಲಿಡಿಟಿ: 36 ತಿಂಗಳು ಅಥವಾ 1,095 ದಿನಗಳು.

ಡೇಟಾ: ಪ್ರತಿದಿನ 2.5GB ಹೈ-ಸ್ಪೀಡ್ ಡೇಟಾ.

ವಾಯ್ಸ್ ಕರೆ: ಎಲ್ಲಾ ನೆಟ್‌ವರ್ಕ್‌ಗಳಿಗೆ ಅನಿಯಮಿತ ಕರೆ.

SMS: ಪ್ರತಿದಿನ 100 SMS.

5G ಡೇಟಾ: ಅನಿಯಮಿತ 5G ಡೇಟಾ ಸೌಲಭ್ಯ. ಇದಕ್ಕೆ ಸೂಕ್ತವಾದ 5G ಮೊಬೈಲ್ ಸಾಧನ ಮತ್ತು ನೆಟ್‌ವರ್ಕ್ ಕವರೇಜ್ ಅಗತ್ಯ.

ಮೊಬೈಲ್ ಸೇವೆಗಳ ಜತೆಗೆ ಡಿಜಿಟಲ್ ಮನರಂಜನೆ ಮತ್ತು ಇತರ ಸೇವೆಗಳನ್ನೂ ಈ ಪ್ಲಾನ್‌ನಲ್ಲಿ ಒದಗಿಸಲಾಗಿದೆ.

JioHotstar ಚಂದಾದಾರಿಕೆ

ಈ ಪ್ಲಾನ್‌ನಲ್ಲಿ JioHotstar Mobile + Hollywood ಚಂದಾದಾರಿಕೆ ಲಭ್ಯವಿದೆ. ಇದರ ಮೂಲಕ ಲೈವ್ ಕ್ರೀಡಾಕೂಟಗಳು, ಮನರಂಜನಾ ಕಾರ್ಯಕ್ರಮಗಳು, ಹಾಟ್‌ಸ್ಟಾರ್ ಒರಿಜಿನಲ್ಸ್ ಮತ್ತು ಹಾಲಿವುಡ್ ಸಿನಿಮಾಗಳನ್ನು ವೀಕ್ಷಿಸಬಹುದು.

12 ತಿಂಗಳ Canva Pro Lite

ಗ್ರಾಹಕರಿಗೆ 12 ತಿಂಗಳ Canva Pro Lite ಚಂದಾದಾರಿಕೆಯನ್ನೂ ನೀಡಲಾಗುತ್ತದೆ. ಇದರ ಮೂಲಕ ಡಿಸೈನ್ ಟೆಂಪ್ಲೇಟ್‌ಗಳು ಹಾಗೂ ವಿವಿಧ ಕ್ರಿಯೇಟಿವ್ ಟೂಲ್‌ಗಳನ್ನು ಬಳಸಬಹುದು. ಆದರೆ, ಈ ಚಂದಾದಾರಿಕೆ ಕೇವಲ 12 ತಿಂಗಳವರೆಗೆ ಮಾತ್ರ ಲಭ್ಯವಿರುತ್ತದೆ. ಅಂದರೆ, ಮೂರು ವರ್ಷಗಳ ಸಂಪೂರ್ಣ ವ್ಯಾಲಿಡಿಟಿಗೆ Canva Pro Lite ಸೌಲಭ್ಯ ಇರುವುದಿಲ್ಲ.

50GB JioAICloud ಸ್ಟೋರೇಜ್

ಇದರ ಜತೆಗೆ 50GB ಉಚಿತ JioAICloud ಸ್ಟೋರೇಜ್ ಸೌಲಭ್ಯವಿದೆ. ಗ್ರಾಹಕರು ತಮ್ಮ ಫೋಟೋಗಳು, ದಾಖಲೆಗಳು ಮತ್ತು ಇತರ ಫೈಲ್‌ಗಳನ್ನು ಕ್ಲೌಡ್‌ನಲ್ಲಿ ಸಂಗ್ರಹಿಸಿಟ್ಟುಕೊಳ್ಳಬಹುದು.

ದಿನಕ್ಕೆ ಕೇವಲ ₹9.13 ಮಾತ್ರ!

ಜಿಯೋ ಹೊಸ ₹10,000 ರೀಚಾರ್ಜ್ ಪ್ಲಾನ್‌ನ ಮತ್ತೊಂದು ಪ್ರಮುಖ ಆಕರ್ಷಣೆ ಅದರ ದಿನದ ವೆಚ್ಚ. ಒಟ್ಟು 1,095 ದಿನಗಳ ವ್ಯಾಲಿಡಿಟಿಗೆ ₹10,000 ಪಾವತಿಸಬೇಕಾಗಿರುವುದರಿಂದ, ದಿನಕ್ಕೆ ಸರಾಸರಿ ಕೇವಲ ₹9.13 ಖರ್ಚಾಗುತ್ತದೆ. ಅದೇ ರೀತಿ, ತಿಂಗಳಿಗೆ ಸರಾಸರಿ ಸುಮಾರು ₹278 ವೆಚ್ಚವಾಗುತ್ತದೆ. ಪ್ರತಿ ತಿಂಗಳು ಅಥವಾ ಕೆಲವು ತಿಂಗಳಿಗೊಮ್ಮೆ ರೀಚಾರ್ಜ್ ಮಾಡಿಸುವ ಬದಲು ಒಮ್ಮೆಲೇ ಹಣ ಪಾವತಿಸಿ ದೀರ್ಘಾವಧಿಯ ಸೇವೆ ಪಡೆಯಲು ಬಯಸುವವರಿಗೆ ಈ ಪ್ಲಾನ್ ಅನುಕೂಲಕರವಾಗಬಹುದು.

ಜಿಯೋದ ವಾರ್ಷಿಕ ಪ್ಲಾನ್‌ಗಿಂತ ₹797 ಉಳಿತಾಯ!

ಜಿಯೋದ ಈಗಿರುವ ₹3,599 ವಾರ್ಷಿಕ ರೀಚಾರ್ಜ್ ಪ್ಲಾನ್‌ನಲ್ಲಿ 365 ದಿನಗಳ ವ್ಯಾಲಿಡಿಟಿ ಸಿಗುತ್ತದೆ. ಈ ಪ್ಲಾನ್‌ನಲ್ಲಿಯೂ ಪ್ರತಿದಿನ 2.5GB ಡೇಟಾ, ಅನಿಯಮಿತ 5G ಡೇಟಾ ಮತ್ತು ಅನಿಯಮಿತ ಕರೆ ಸೌಲಭ್ಯಗಳಿವೆ. ಮೂರು ವರ್ಷಗಳ ಅವಧಿಗೆ ಇದೇ ₹3,599 ಪ್ಲಾನ್ ಅನ್ನು ಮೂರು ಬಾರಿ ರೀಚಾರ್ಜ್ ಮಾಡಿಸಿದರೆ ಒಟ್ಟು ₹10,797 ವೆಚ್ಚವಾಗುತ್ತದೆ.

ಆದರೆ ಹೊಸ ₹10,000 ಪ್ಲಾನ್‌ನಲ್ಲಿ ಮೂರು ವರ್ಷಗಳ ವ್ಯಾಲಿಡಿಟಿ ಒಂದೇ ಬಾರಿಗೆ ಸಿಗುವುದರಿಂದ, ವಾರ್ಷಿಕ ಪ್ಲಾನ್ ಅನ್ನು ಮೂರು ಬಾರಿ ಖರೀದಿಸುವುದಕ್ಕೆ ಹೋಲಿಸಿದರೆ ₹797 ಉಳಿತಾಯವಾಗುತ್ತದೆ.

ವಿಪ್ರೋದಲ್ಲಿ ಕೆಲಸ ಕೇಳಿದ್ದ ನಾರಾಯಣ ಮೂರ್ತಿ; ಅಂದು ಅಜೀಂ ಪ್ರೇಮ್‌ಜಿ ರಿಜೆಕ್ಟ್ ಮಾಡಿದ್ದೇಕೆ? ಇಲ್ಲಿದೆ ಕುತೂಹಲಕಾರಿ ಕಥೆ

Naveen Kodase — Fri, 06 Nov 2026 15:11:32 +0530

ಬೆಂಗಳೂರು(ನ.06) ಭಾರತದ ಐಟಿ ಕ್ಷೇತ್ರದ ದಿಗ್ಗಜ ಕಂಪನಿಗಳೆಂದರೆ ತಕ್ಷಣ ನೆನಪಾಗುವ ಹೆಸರುಗಳು ಇನ್ಫೋಸಿಸ್ ಮತ್ತು ವಿಪ್ರೋ. ಈ ಎರಡೂ ಕಂಪನಿಗಳ ಬೆಳವಣಿಗೆಯ ಹಿಂದೆ ನಾರಾಯಣ ಮೂರ್ತಿ ಮತ್ತು ಅಜೀಂ ಪ್ರೇಮ್‌ಜಿ ಅವರಂತಹ ಉದ್ಯಮಿಗಳ ಪರಿಶ್ರಮವಿದೆ. ಆದರೆ, ಈ ಇಬ್ಬರು ದಿಗ್ಗಜರ ವೃತ್ತಿಜೀವನದಲ್ಲಿ ಒಂದು ಕುತೂಹಲಕಾರಿ ಘಟನೆ ನಡೆದಿದೆ. ಇನ್ಫೋಸಿಸ್ ಸ್ಥಾಪಿಸುವುದಕ್ಕೂ ಮುನ್ನ ನಾರಾಯಣ ಮೂರ್ತಿ ಅವರು ವಿಪ್ರೋ ಸಂಸ್ಥೆಯಲ್ಲಿ ಉದ್ಯೋಗಕ್ಕಾಗಿ ಅರ್ಜಿ ಸಲ್ಲಿಸಿದ್ದರು. ಆದರೆ, ಆಗ ವಿಪ್ರೋ ಮುಖ್ಯಸ್ಥರಾಗಿದ್ದ ಅಜೀಂ ಪ್ರೇಮ್‌ಜಿ ಅವರಿಗೆ ಕೆಲಸ ನೀಡಲಿಲ್ಲ!

ವಿಶೇಷವೆಂದರೆ, ಹಲವು ವರ್ಷಗಳ ಬಳಿಕ ಇದೇ ನಿರ್ಧಾರವನ್ನು ತಮ್ಮ ವೃತ್ತಿಜೀವನದ ದೊಡ್ಡ ತಪ್ಪುಗಳಲ್ಲಿ ಒಂದು ಎಂದು ಅಜೀಂ ಪ್ರೇಮ್‌ಜಿ ಒಪ್ಪಿಕೊಂಡಿದ್ದರಂತೆ. ಒಂದು ವೇಳೆ ಅಂದು ವಿಪ್ರೋದಲ್ಲಿ ನಾರಾಯಣ ಮೂರ್ತಿ ಅವರಿಗೆ ಕೆಲಸ ಸಿಕ್ಕಿದ್ದರೆ, ಭಾರತದ ಐಟಿ ಉದ್ಯಮದ ಇತಿಹಾಸವೇ ಬೇರೆಯಾಗಿರುತ್ತಿತ್ತೇ ಎಂಬ ಪ್ರಶ್ನೆ ಸಹಜವಾಗಿಯೇ ಮೂಡುತ್ತದೆ.

2024ರಲ್ಲಿ ಸಿಎನ್‌ಬಿಸಿ-ಟಿವಿ18ಗೆ ನೀಡಿದ ಸಂದರ್ಶನವೊಂದರಲ್ಲಿ ನಾರಾಯಣ ಮೂರ್ತಿ ಅವರೇ ಈ ಘಟನೆಯನ್ನು ನೆನಪಿಸಿಕೊಂಡಿದ್ದರು. ಅಜೀಂ ಪ್ರೇಮ್‌ಜಿ ನಂತರ ತಮ್ಮ ನಿರ್ಧಾರದ ಬಗ್ಗೆ ಪಶ್ಚಾತ್ತಾಪ ವ್ಯಕ್ತಪಡಿಸಿದ್ದನ್ನು ಅವರು ಬಹಿರಂಗಪಡಿಸಿದ್ದರು. "ನನ್ನನ್ನು ಕೆಲಸಕ್ಕೆ ತೆಗೆದುಕೊಳ್ಳದಿರುವುದು ತಾವು ಮಾಡಿದ ದೊಡ್ಡ ತಪ್ಪುಗಳಲ್ಲಿ ಒಂದು ಎಂದು ಅಜೀಂ ಒಮ್ಮೆ ನನಗೆ ಹೇಳಿದ್ದರು" ಎಂದು ನಾರಾಯಣ ಮೂರ್ತಿ ಹೇಳಿಕೊಂಡಿದ್ದರು.

1979ರಲ್ಲಿ ವಿಪ್ರೋದಲ್ಲಿ ಕೆಲಸ ಕೇಳಿದ್ದ ನಾರಾಯಣ ಮೂರ್ತಿ!

ನಾರಾಯಣ ಮೂರ್ತಿ ಮತ್ತು ಅಜೀಂ ಪ್ರೇಮ್‌ಜಿ ನಡುವಿನ ಈ ಘಟನೆ ನಡೆದಿದ್ದು 1979ರಲ್ಲಿ. ಆಗ ನಾರಾಯಣ ಮೂರ್ತಿ ಅವರು ಪುಣೆಯ ಪಟ್ನಿ ಕಂಪ್ಯೂಟರ್ ಸಿಸ್ಟಮ್ಸ್‌ನಲ್ಲಿ ಕೆಲಸ ಮಾಡುತ್ತಿದ್ದರು. ಅಲ್ಲಿಂದ ಬೇರೆ ಸಂಸ್ಥೆಗೆ ಸೇರಲು ಯೋಚಿಸುತ್ತಿದ್ದ ಅವರು ವಿಪ್ರೋದಲ್ಲಿ ಉದ್ಯೋಗಕ್ಕಾಗಿ ಪ್ರಯತ್ನಿಸಿದ್ದರು. ಆದರೆ, ಅಜೀಂ ಪ್ರೇಮ್‌ಜಿ ಅವರಿಗೆ ಕೆಲಸ ನೀಡುವ ನಿರ್ಧಾರ ತೆಗೆದುಕೊಳ್ಳಲಿಲ್ಲ.

ಅಷ್ಟೇ ಅಲ್ಲ, ನಾರಾಯಣ ಮೂರ್ತಿ ಅವರ ಸಾಮರ್ಥ್ಯದಿಂದ ತಮಗೆ ವೈಯಕ್ತಿಕವಾಗಿ ಅಭದ್ರತೆ ಅಥವಾ ಆತಂಕ ಉಂಟಾಗಿರಬಹುದು ಎಂಬುದನ್ನೂ ಪ್ರೇಮ್‌ಜಿ ಒಪ್ಪಿಕೊಂಡಿದ್ದರು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ಆ ಸಮಯದಲ್ಲಿ ವಿಪ್ರೋ ತಂತ್ರಜ್ಞಾನ ಕ್ಷೇತ್ರದಲ್ಲಿ ಇನ್ನೂ ಸಣ್ಣ ಮಟ್ಟದ ಸಂಸ್ಥೆಯಾಗಿತ್ತು. ಕೇವಲ ₹15 ಲಕ್ಷ ಹೂಡಿಕೆಯೊಂದಿಗೆ ಕಂಪನಿ ಐಟಿ ಕ್ಷೇತ್ರಕ್ಕೆ ಪ್ರವೇಶಿಸಿತ್ತು. ಹೀಗಾಗಿ ನಾರಾಯಣ ಮೂರ್ತಿ ಅವರಂತಹ ಉನ್ನತ ಸಾಮರ್ಥ್ಯದ ವ್ಯಕ್ತಿಯನ್ನು ನೇಮಿಸಿಕೊಳ್ಳಲು ಸಂಸ್ಥೆ ಆಗ ಸಿದ್ಧವಾಗಿರಲಿಲ್ಲ ಎಂಬುದು ಪ್ರೇಮ್‌ಜಿ ಅವರ ವಿವರಣೆಯಾಗಿತ್ತು.

ಕೆಲಸಕ್ಕೆ ನಿರಾಕರಿಸಲಿಲ್ಲ, ಮತ್ತೆ ಸಂಪರ್ಕವನ್ನೇ ಮಾಡಲಿಲ್ಲ!

ಈ ಘಟನೆಯ ಮತ್ತೊಂದು ಕುತೂಹಲಕಾರಿ ಸಂಗತಿಯೆಂದರೆ, ಅಜೀಂ ಪ್ರೇಮ್‌ಜಿ ಅವರು ನಾರಾಯಣ ಮೂರ್ತಿ ಅವರ ಅರ್ಜಿಯನ್ನು ಅಧಿಕೃತವಾಗಿ ತಿರಸ್ಕರಿಸಿರಲಿಲ್ಲ. ಬದಲಾಗಿ, ಉದ್ಯೋಗದ ಕುರಿತು ಯಾವುದೇ ಪ್ರತಿಕ್ರಿಯೆ ನೀಡದೆ ಸುಮ್ಮನಾಗಿದ್ದರು. ಅಂದರೆ, ಮೂರ್ತಿ ಅವರಿಗೆ ಕೆಲಸ ಸಿಗಲಿಲ್ಲ ಎಂಬುದಕ್ಕಿಂತಲೂ ಅವರನ್ನು ಮತ್ತೆ ಸಂಪರ್ಕಿಸಲೇ ಇಲ್ಲ ಎನ್ನುವುದು ಸರಿಯಾದ ವಿವರಣೆ. 2024ರ ಸಂದರ್ಶನದಲ್ಲಿ ಈ ಘಟನೆಯನ್ನು ಹಾಸ್ಯಭರಿತವಾಗಿ ನೆನಪಿಸಿಕೊಂಡಿದ್ದ ನಾರಾಯಣ ಮೂರ್ತಿ, "ಇಲ್ಲ, ಅವರು ನನಗೆ ಬೇಡ ಎಂದು ಹೇಳಲಿಲ್ಲ. ಮತ್ತೆ ಕರೆ ಮಾಡಲಿಲ್ಲ, ಅಷ್ಟೇ" ಎಂದು ಹೇಳಿದ್ದರು. ವರ್ಷಗಳ ಬಳಿಕ ಅಜೀಂ ಪ್ರೇಮ್‌ಜಿ ಅವರೇ ಈ ನಿರ್ಧಾರವನ್ನು ದೊಡ್ಡ ತಪ್ಪು ಎಂದು ಒಪ್ಪಿಕೊಂಡಿದ್ದು, ಇಬ್ಬರು ಉದ್ಯಮಿಗಳ ನಡುವಿನ ಈ ಹಳೆಯ ಘಟನೆಯನ್ನು ಮತ್ತೊಮ್ಮೆ ಸುದ್ದಿಯ ಕೇಂದ್ರಕ್ಕೆ ತಂದಿದೆ.

ವಿಪ್ರೋದಲ್ಲಿ ಕೆಲಸ ಸಿಗದಿದ್ದರೂ ಇನ್ಫೋಸಿಸ್ ಸ್ಥಾಪಿಸಿದ ಮೂರ್ತಿ!

1946ರ ಆಗಸ್ಟ್ 20ರಂದು ಕರ್ನಾಟಕದಲ್ಲಿ ಜನಿಸಿದ ನಾರಾಯಣ ಮೂರ್ತಿ ಅವರು 1967ರಲ್ಲಿ ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಎಂಜಿನಿಯರಿಂಗ್‌ನಲ್ಲಿ ಎಲೆಕ್ಟ್ರಿಕಲ್ ಎಂಜಿನಿಯರಿಂಗ್ ಪದವಿ ಪಡೆದರು. ನಂತರ ಕಾನ್ಪುರದ ಭಾರತೀಯ ತಂತ್ರಜ್ಞಾನ ಸಂಸ್ಥೆ (ಐಐಟಿ)ಯಲ್ಲಿ ಸ್ನಾತಕೋತ್ತರ ಪದವಿ ಪೂರ್ಣಗೊಳಿಸಿದರು.

ತಮ್ಮ ವೃತ್ತಿಜೀವನದ ಆರಂಭದಲ್ಲಿ ಅಹಮದಾಬಾದ್‌ನ ಭಾರತೀಯ ನಿರ್ವಹಣಾ ಸಂಸ್ಥೆಯಲ್ಲಿ (IIM) ಸಂಶೋಧನಾ ಸಹಾಯಕರಾಗಿ ಕೆಲಸ ಮಾಡಿದ್ದರು. ಬಳಿಕ ಮುಖ್ಯ ಸಿಸ್ಟಮ್ಸ್ ಪ್ರೋಗ್ರಾಮರ್ ಆಗಿ ಕಾರ್ಯನಿರ್ವಹಿಸಿದರು. ಈ ಅವಧಿಯಲ್ಲಿ ಎಲೆಕ್ಟ್ರಾನಿಕ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ ಲಿಮಿಟೆಡ್ (ECIL) ತಯಾರಿಸಿದ TDC 312 ಕಂಪ್ಯೂಟರ್‌ಗಾಗಿ ಭಾರತದ ಮೊದಲ BASIC ಇಂಟರ್‌ಪ್ರಿಟರ್ ಅಭಿವೃದ್ಧಿಪಡಿಸಲು ಸಹಕರಿಸಿದ್ದರು. ಇನ್ಫೋಸಿಸ್ ಸ್ಥಾಪಿಸುವುದಕ್ಕೂ ಮುನ್ನ ನಾರಾಯಣ ಮೂರ್ತಿ ಅವರು 'ಸಾಫ್ಟ್ರಾನಿಕ್ಸ್' (Softronics) ಹೆಸರಿನ ಐಟಿ ಉದ್ಯಮವನ್ನು ಆರಂಭಿಸಿದ್ದರು. ಆದರೆ, ಆ ಪ್ರಯತ್ನ ಯಶಸ್ವಿಯಾಗಲಿಲ್ಲ. ಬಳಿಕ ಅವರು ಪುಣೆಯ ಪಟ್ನಿ ಕಂಪ್ಯೂಟರ್ ಸಿಸ್ಟಮ್ಸ್‌ಗೆ ಸೇರಿಕೊಂಡರು.

ಆದರೆ, ಉದ್ಯಮಿಯಾಗಬೇಕೆಂಬ ಕನಸನ್ನು ಅವರು ಕೈಬಿಡಲಿಲ್ಲ. 1981ರಲ್ಲಿ ತಮ್ಮ ಆರು ಸಹೋದ್ಯೋಗಿಗಳೊಂದಿಗೆ ಸೇರಿ ಇನ್ಫೋಸಿಸ್ ಸಂಸ್ಥೆಯನ್ನು ಸ್ಥಾಪಿಸಿದರು. ಈ ಉದ್ಯಮಕ್ಕೆ ಆರಂಭಿಕ ಬಂಡವಾಳವಾಗಿ ಅವರ ಪತ್ನಿ ಸುಧಾ ಮೂರ್ತಿ ಅವರು ₹10,000 ನೀಡಿದ್ದರು. ಈ ಸಣ್ಣ ಮೊತ್ತವೇ ಇನ್ಫೋಸಿಸ್‌ನ ಆರಂಭಿಕ ಬಂಡವಾಳವಾಯಿತು.

ಇನ್ಫೋಸಿಸ್ ನಿರ್ಮಾಣದಲ್ಲಿ ಸುಧಾ ಮೂರ್ತಿ ಕೊಡುಗೆಯೂ ಮಹತ್ವದ್ದು!

ಇನ್ಫೋಸಿಸ್ ಆರಂಭಕ್ಕೆ ₹10,000 ಆರಂಭಿಕ ಬಂಡವಾಳ ನೀಡುವುದರ ಜೊತೆಗೆ ಸುಧಾ ಮೂರ್ತಿ ಅವರು ತಮ್ಮ ಪತಿಯ ಉದ್ಯಮದ ಕನಸಿಗೆ ಬೆಂಬಲವಾಗಿ ನಿಂತಿದ್ದರು. ಕಂಪನಿಯ ಬೆಳವಣಿಗೆಗೆ ವಿದೇಶಿ ಮಾರುಕಟ್ಟೆ, ವಿಶೇಷವಾಗಿ ರಫ್ತು ಕ್ಷೇತ್ರದತ್ತ ಗಮನ ಹರಿಸುವಂತೆ ಅವರು ಪ್ರೋತ್ಸಾಹಿಸಿದ್ದರು. ಆದರೆ, ಸ್ವತಃ ಎಂಜಿನಿಯರಿಂಗ್ ಪದವೀಧರೆಯಾಗಿದ್ದ ಸುಧಾ ಮೂರ್ತಿ ಅವರಿಗೆ ಆರಂಭದಲ್ಲಿ ಇನ್ಫೋಸಿಸ್‌ನಲ್ಲಿ ಕೆಲಸ ಮಾಡಲು ಅವಕಾಶ ನೀಡುವ ಬಗ್ಗೆ ನಾರಾಯಣ ಮೂರ್ತಿ ಹೆಚ್ಚು ಆಸಕ್ತಿ ತೋರಿರಲಿಲ್ಲ.

2024ರಲ್ಲಿ ಸಿಎನ್‌ಬಿಸಿ-ಟಿವಿ18ಗೆ ನೀಡಿದ ಸಂದರ್ಶನದಲ್ಲಿ ಈ ವಿಚಾರವನ್ನೂ ನಾರಾಯಣ ಮೂರ್ತಿ ಒಪ್ಪಿಕೊಂಡಿದ್ದರು. ಸುಧಾ ಮೂರ್ತಿ ಅವರನ್ನು ಕಂಪನಿಯಲ್ಲಿ ಸೇರಿಸಿಕೊಳ್ಳುವ ವಿಚಾರದಲ್ಲಿ ತಾವು 'ತಪ್ಪಾಗಿ ಆದರ್ಶವಾದಿಯಾಗಿದ್ದೆ' (Wrongly Idealistic) ಎಂದು ಹೇಳಿದ್ದರು. ಅಷ್ಟೇ ಅಲ್ಲ, "ನಮ್ಮ ಏಳು ಜನರಿಗಿಂತಲೂ ಅವರು ಹೆಚ್ಚು ಅರ್ಹರಾಗಿದ್ದರು" ಎಂದು ಸುಧಾ ಅವರ ಸಾಮರ್ಥ್ಯವನ್ನು ಮೆಚ್ಚಿಕೊಂಡಿದ್ದರು.

ನಾರಾಯಣ ಮೂರ್ತಿ ಮತ್ತು ಅಜೀಂ ಪ್ರೇಮ್‌ಜಿ: ಉದ್ಯಮದಲ್ಲಿ ವಿಭಿನ್ನ ಹಾದಿ!

ನಾರಾಯಣ ಮೂರ್ತಿ ಅವರು ಶೂನ್ಯದಿಂದ ಇನ್ಫೋಸಿಸ್ ಸಂಸ್ಥೆಯನ್ನು ಕಟ್ಟಿದರೆ, ಅಜೀಂ ಪ್ರೇಮ್‌ಜಿ ಅವರು ಕುಟುಂಬದ ಉದ್ಯಮದ ಜವಾಬ್ದಾರಿಯನ್ನು ಚಿಕ್ಕ ವಯಸ್ಸಿನಲ್ಲೇ ವಹಿಸಿಕೊಂಡರು. ಕೇವಲ 21ನೇ ವಯಸ್ಸಿನಲ್ಲಿ ಕುಟುಂಬದ ತರಕಾರಿ ಎಣ್ಣೆ ವ್ಯಾಪಾರದ ಹೊಣೆ ಹೊತ್ತ ಪ್ರೇಮ್‌ಜಿ, ಬಳಿಕ ವಿಪ್ರೋವನ್ನು ಪ್ರಮುಖ ತಂತ್ರಜ್ಞಾನ ಸೇವೆ, ಸಾಫ್ಟ್‌ವೇರ್ ಮತ್ತು ಕನ್ಸಲ್ಟಿಂಗ್ ಸಂಸ್ಥೆಯಾಗಿ ಪರಿವರ್ತಿಸಿದರು.

ಇಬ್ಬರೂ ವಿಭಿನ್ನ ಹಿನ್ನೆಲೆಯಿಂದ ಉದ್ಯಮ ಕ್ಷೇತ್ರಕ್ಕೆ ಬಂದರೂ, ಭಾರತದ ಐಟಿ ಉದ್ಯಮವನ್ನು ಜಾಗತಿಕ ಮಟ್ಟದಲ್ಲಿ ಗುರುತಿಸುವಂತೆ ಮಾಡುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ಇನ್ನು ಇನ್ಫೋಸಿಸ್‌ನಲ್ಲಿ ನಂದನ್ ನಿಲೇಕಣಿ ಅವರು ಆಗಸ್ಟ್ 2017ರಲ್ಲಿ ಮತ್ತೆ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡ ಬಳಿಕ ಕಂಪನಿಯ ನಿರ್ವಹಣೆಯಲ್ಲಿ ತಮಗೆ ಯಾವುದೇ ಪಾತ್ರವಿಲ್ಲ ಎಂದು ನಾರಾಯಣ ಮೂರ್ತಿ ಸ್ಪಷ್ಟಪಡಿಸಿದ್ದರು. ತಾವು ಕಂಪನಿಯ ಷೇರುದಾರರಾಗಿದ್ದರೂ, ನಿರ್ಧಾರ ತೆಗೆದುಕೊಳ್ಳುವ ಪ್ರಕ್ರಿಯೆಯಲ್ಲಿ ಭಾಗಿಯಾಗಿಲ್ಲ ಎಂದು ಹೇಳಿದ್ದರು.

2026ರಲ್ಲಿ ಇನ್ಫೋಸಿಸ್ ಮತ್ತು ವಿಪ್ರೋ ಮಾರುಕಟ್ಟೆ ಮೌಲ್ಯ ಎಷ್ಟು?

ನಾರಾಯಣ ಮೂರ್ತಿ ಅವರು 1981ರಿಂದ 2002ರವರೆಗೆ ಇನ್ಫೋಸಿಸ್‌ನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ (CEO) ಕಾರ್ಯನಿರ್ವಹಿಸಿದ್ದರು. ನಂತರ ಅಧ್ಯಕ್ಷರು ಮತ್ತು ಮುಖ್ಯ ಮಾರ್ಗದರ್ಶಕರೂ ಸೇರಿದಂತೆ ಹಲವು ಪ್ರಮುಖ ಹುದ್ದೆಗಳನ್ನು ನಿಭಾಯಿಸಿದ್ದರು. 2011ರಲ್ಲಿ ನಿವೃತ್ತರಾದ ಅವರು, ಕಂಪನಿ ಸಂಕಷ್ಟ ಎದುರಿಸುತ್ತಿದ್ದ ಸಂದರ್ಭದಲ್ಲಿ ಸ್ವಲ್ಪ ಅವಧಿಗೆ ಮತ್ತೆ ಕಾರ್ಯನಿರ್ವಾಹಕ ಅಧ್ಯಕ್ಷರಾಗಿ ಜವಾಬ್ದಾರಿ ವಹಿಸಿಕೊಂಡಿದ್ದರು.

ಇನ್ಫೋಸಿಸ್ 1995ರ ಫೆಬ್ರವರಿ 8ರಂದು ಭಾರತೀಯ ಷೇರು ಮಾರುಕಟ್ಟೆಯಲ್ಲಿ ಲಿಸ್ಟ್‌ ಆಯಿತು. ಇದಾದ ಎಂಟು ತಿಂಗಳ ಬಳಿಕ ವಿಪ್ರೋ ಕೂಡ ಷೇರು ಮಾರುಕಟ್ಟೆಗೆ ಪ್ರವೇಶಿಸಿತು. ಮೂರು ದಶಕಗಳಿಗೂ ಹೆಚ್ಚು ಕಾಲ ಕಳೆದಿರುವ ಇಂದಿನ ಸಂದರ್ಭದಲ್ಲಿ ಎರಡೂ ಕಂಪನಿಗಳ ಮಾರುಕಟ್ಟೆ ಮೌಲ್ಯದಲ್ಲಿ ದೊಡ್ಡ ವ್ಯತ್ಯಾಸ ಕಂಡುಬಂದಿದೆ. 2026ರ ನವೆಂಬರ್ 5ರ ಅಂಕಿಅಂಶಗಳ ಪ್ರಕಾರ, ಇನ್ಫೋಸಿಸ್‌ನ ಮಾರುಕಟ್ಟೆ ಬಂಡವಾಳೀಕರಣ (Market Capitalisation) ಸುಮಾರು ₹4.7 ಲಕ್ಷ ಕೋಟಿ ಇದ್ದರೆ, ವಿಪ್ರೋ ಮಾರುಕಟ್ಟೆ ಮೌಲ್ಯ ಸುಮಾರು ₹1.95 ಲಕ್ಷ ಕೋಟಿ ಆಗಿತ್ತು.

ಅಂದರೆ, ಮಾರುಕಟ್ಟೆ ಮೌಲ್ಯದ ದೃಷ್ಟಿಯಿಂದ ಇನ್ಫೋಸಿಸ್ ವಿಪ್ರೋಗಿಂತ ಸಾಕಷ್ಟು ಮುಂದಿದೆ. ಒಮ್ಮೆ ವಿಪ್ರೋದಲ್ಲಿ ಉದ್ಯೋಗ ಪಡೆಯಲು ಪ್ರಯತ್ನಿಸಿದ್ದ ನಾರಾಯಣ ಮೂರ್ತಿ, ಮುಂದೆ ಭಾರತದ ಪ್ರಮುಖ ಐಟಿ ಕಂಪನಿಗಳಲ್ಲೊಂದಾದ ಇನ್ಫೋಸಿಸ್‌ನ ಸಂಸ್ಥಾಪಕರಾಗಿ ಬೆಳೆದದ್ದು ಈ ಕಥೆಯ ಅತ್ಯಂತ ಕುತೂಹಲಕಾರಿ ತಿರುವು.

ದೇಶದ ಮನೆಮನೆಯ ಬ್ರ್ಯಾಂಡ್‌ ಆಗಿದ್ದ Videocon ದಿವಾಳಿ, ಕಂಪನಿ ಮಾಲೀಕ ವೇಣುಗೋಪಾಲ್‌ ಧೂತ್ ಆಸ್ತಿಗಳೆಲ್ಲಾ ಮುಟ್ಟುಗೋಲು!

Santosh Naik — Fri, 06 Nov 2026 16:13:16 +0530

ಮುಂಬೈ (ನ.6): ವೀಡಿಯೋಕಾನ್ ಇಂಡಸ್ಟ್ರೀಸ್ (Videocon Industries) ಸಂಸ್ಥೆಯ ಮಾಜಿ ಪ್ರವರ್ತಕ ಹಾಗೂ ನಿರ್ದೇಶಕ ವೇಣುಗೋಪಾಲ್ ನಂದಲಾಲ್ ಧೂತ್ (Venugopal Nandlal Dhoot) ಅವರನ್ನು ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಾಧಿಕರಣದ (NCLT) ಮುಂಬೈ ಪೀಠವು ಅಧಿಕೃತವಾಗಿ 'ದಿವಾಳಿ' (Bankrupt) ಎಂದು ಘೋಷಿಸಿದೆ. ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ಪೀಠವು, ಬರೋಬ್ಬರಿ ₹12,668 ಕೋಟಿ ಸಾಲದ ಸುಸ್ತಿದಾರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಈ ಮಹತ್ವದ ಆದೇಶ ಹೊರಡಿಸಿದೆ.

ವೇಣುಗೋಪಾಲ್ ಧೂತ್ ಅವರು ಸಲ್ಲಿಸಿದ್ದ ವೈಯಕ್ತಿಕ ದಿವಾಳಿತನ ಪರಿಹಾರ ಪ್ರಕ್ರಿಯೆ ಹಾಗೂ ಮರುಪಾವತಿ ಯೋಜನೆ ಸಂಪೂರ್ಣವಾಗಿ ವಿಫಲಗೊಂಡ ಹಿನ್ನೆಲೆಯಲ್ಲಿ ಎನ್‌ಸಿಎಲ್‌ಟಿ ಈ ಕಠಿಣ ಕ್ರಮ ಕೈಗೊಂಡಿದೆ. ವಿನಯ್ ಗೋಯಲ್ ಹಾಗೂ ಚರಂಜಿತ್ ಸಿಂಗ್ ಗುಲಾಟಿ ಅವರನ್ನೊಳಗೊಂಡ ಪೀಠವು ನವೆಂಬರ್ 5 ರಂದು ಭಾರತೀಯ ದಿವಾಳಿತನ ಮತ್ತು ದಿವಾಳಿತನ ಸಂಹಿತೆಯ (IBC) ಅಡಿಯಲ್ಲಿ ಈ ಆದೇಶವನ್ನು ಹೊರಡಿಸಿದೆ.

ವೈಯಕ್ತಿಕ ಗ್ಯಾರಂಟಿ ಹಾಗೂ ಸಾಲದ ಸುಸ್ತಿಯ ವಿವರ

ವೀಡಿಯೋಕಾನ್ ಇಂಡಸ್ಟ್ರೀಸ್ ಲಿಮಿಟೆಡ್ (VIL) ಬ್ಯಾಂಕ್‌ನಿಂದ ಪಡೆದುಕೊಂಡಿದ್ದ ಟರ್ಮ್ ಲೋನ್, ವೀಡಿಯೋಕಾನ್ ಟೆಲಿಕಮ್ಯೂನಿಕೇಷನ್ಸ್ ಲಿಮಿಟೆಡ್‌ಗೆ ಸಂಬಂಧಿಸಿದ ಸೌಲಭ್ಯಗಳು ಹಾಗೂ ದುಡಿಯುವ ಬಂಡವಾಳ (Working Capital) ಸಾಲ ಸೇರಿದಂತೆ ಹಲವು ಕ್ರೆಡಿಟ್ ಸೌಲಭ್ಯಗಳಿಗೆ ವೇಣುಗೋಪಾಲ್ ಧೂತ್ ಅವರು ಸ್ವತಃ 'ವೈಯಕ್ತಿಕ ಶೂರಿಟಿ' (Personal Guarantor) ನೀಡಿದ್ದರು. ವೀಡಿಯೋಕಾನ್ ಸಂಸ್ಥೆಯು ಸಾಲ ಮರುಪಾವತಿಸಲು ವಿಫಲವಾದಾಗ, ಎಸ್‌ಬಿಐ ಫೆಬ್ರವರಿ 2018 ರಲ್ಲೇ ಧೂತ್ ಅವರ ವೈಯಕ್ತಿಕ ಗ್ಯಾರಂಟಿಯನ್ನು ಮುಟ್ಟುಗೋಲು ಹಾಕಿಕೊಳ್ಳುವ (Invocate) ಪ್ರಕ್ರಿಯೆ ನಡೆಸಿ ಬೇಡಿಕೆ ನೋಟಿಸ್ ಜಾರಿಗೊಳಿಸಿತ್ತು.

ವೀಡಿಯೋಕಾನ್ ದಿವಾಳಿತನದ ಹಿನ್ನೆಲೆ

ವೀಡಿಯೋಕಾನ್ ಇಂಡಸ್ಟ್ರೀಸ್ ಅನ್ನು ಜೂನ್ 2018 ರಲ್ಲಿ ಕಾರ್ಪೊರೇಟ್ ದಿವಾಳಿತನ ಪರಿಹಾರ ಪ್ರಕ್ರಿಯೆಗೆ ಒಳಪಡಿಸಲಾಗಿತ್ತು. ಬಳಿಕ ಈ ಪ್ರಕ್ರಿಯೆಯನ್ನು ವೀಡಿಯೋಕಾನ್ ಸಮೂಹದ ಇತರ ಕಂಪನಿಗಳ ಜೊತೆ ವಿಲೀನಗೊಳಿಸಲಾಯಿತು. ತದನಂತರ, ಜೂನ್ 2021 ರಲ್ಲಿ ಟ್ವಿನ್ ಸ್ಟಾರ್ ಟೆಕ್ನಾಲಜೀಸ್ ಲಿಮಿಟೆಡ್ (Twin Star Technologies Limited) ಸಲ್ಲಿಸಿದ್ದ ಪರಿಹಾರ ಯೋಜನೆಯನ್ನು ಎನ್‌ಸಿಎಲ್‌ಟಿ ಅನುಮೋದಿಸಿತ್ತು.

ಮರುಪಾವತಿ ಯೋಜನೆ ವಜಾಗೊಂಡಿದ್ದೇಕೆ?

ಏಪ್ರಿಲ್ 2026 ರಲ್ಲಿ ವೇಣುಗೋಪಾಲ್ ಧೂತ್ ಅವರ ವೈಯಕ್ತಿಕ ದಿವಾಳಿತನ ಪರಿಹಾರ ಪ್ರಕ್ರಿಯೆ ಆರಂಭವಾಗಿತ್ತು. ಧೂತ್ ಅವರು ಸಿಲಿಗುರಿಯಲ್ಲಿ ತಾವು ನಡೆಸಲು ಉದ್ದೇಶಿಸಿದ್ದ ರಿಯಲ್ ಎಸ್ಟೇಟ್ ಡೆವಲಪ್‌ಮೆಂಟ್ ಪ್ರಾಜೆಕ್ಟ್ ಮೂಲಕ ಮುಂದಿನ 36 ತಿಂಗಳುಗಳಲ್ಲಿ ₹600 ಕೋಟಿ ಮರುಪಾವತಿ ಮಾಡುವುದಾಗಿ ಪ್ರಸ್ತಾವನೆ ಸಲ್ಲಿಸಿದ್ದರು. ಆದರೆ ಈ ಪ್ರಸ್ತಾವನೆಯು ಭವಿಷ್ಯದ ಯೋಜನೆಗಳು, ಅನುಮೋದನೆಗಳು ಹಾಗೂ ನಗದು ಹರಿವಿನ (Cash flow) ಮೇಲೆ ಆಧಾರಿತವಾಗಿತ್ತೇ ಹೊರತು ಯಾವುದೇ ಆರಂಭಿಕ ಮುಂಗಡ ಪಾವತಿಯನ್ನು ಒಳಗೊಂಡಿರಲಿಲ್ಲ. ಜೊತೆಗೆ ಐಬಿಸಿ ನಿಯಮಾವಳಿಗಳಂತೆ ರೆಸಲ್ಯೂಶನ್ ಪ್ರೊಫೆಷನಲ್ ಅವರೊಂದಿಗೆ ಸಮಾಲೋಚಿಸಿ ಈ ಯೋಜನೆಯನ್ನು ಸಿದ್ಧಪಡಿಸಿರಲಿಲ್ಲ.

ಹೀಗಾಗಿ ಸಾಲದಾತರ (ಬ್ಯಾಂಕ್‌ಗಳ) ಸಮಿತಿಯು ಈ ಪ್ರಸ್ತಾವನೆಯನ್ನು ತಿರಸ್ಕರಿಸಿ ದಿವಾಳಿ ಪ್ರಕ್ರಿಯೆಗೆ ಒತ್ತಾಯಿಸಿತು. ಜುಲೈ 17 ರಂದು ಎನ್‌ಸಿಎಲ್‌ಟಿ ಧೂತ್ ಅವರ ಪ್ರಸ್ತಾವನೆಯನ್ನು ವಜಾಗೊಳಿಸಿ, ಸಾಲದಾತರಿಗೆ ದಿವಾಳಿತನ ಅರ್ಜಿಸಲ್ಲಿಸಲು ಅವಕಾಶ ನೀಡಿತ್ತು.

ಸುಸ್ತಿದಾರ ಮೊತ್ತ ₹12,668 ಕೋಟಿಗೆ ಏರಿಕೆ

ಇದಾದ ಬಳಿಕ ಎಸ್‌ಬಿಐ ಎನ್‌ಸಿಎಲ್‌ಟಿಗೆ ಬ್ಯಾಂಕ್‌ಗೆ ಅರ್ಜಿ ಸಲ್ಲಿಸಿತು. ಸೆಪ್ಟೆಂಬರ್ 30ರ ವೇಳೆಗೆ ಬಡ್ಡಿ ಹಾಗೂ ದಂಡ ಸೇರಿದಂತೆ ಒಟ್ಟು ಬಾಕಿ ಸುಸ್ತಿದಾರ ಮೊತ್ತ ₹12,668 ಕೋಟಿ ರೂಪಾಯಿ ತಲುಪಿದೆ ಎಂದು ಎಸ್‌ಬಿಐ ನ್ಯಾಯಾಧಿಕರಣಕ್ಕೆ ತಿಳಿಸಿತು. ದಾಖಲೆಗಳನ್ನು ಪರಿಶೀಲಿಸಿದ ಪೀಠವು, ಅರ್ಜಿಯು ಐಬಿಸಿ ಕಾಯ್ದೆಯ ಸೆಕ್ಷನ್ 123 ರ ಎಲ್ಲಾ ಅಗತ್ಯ ಮಾನದಂಡಗಳನ್ನು ಪೂರೈಸಿದೆ ಎಂದು ತೃಪ್ತಿಪಟ್ಟು ಧೂತ್ ಅವರನ್ನು ದಿವಾಳಿ ಎಂದು ಘೋಷಿಸಿತು.

ಟ್ರಸ್ಟಿ ನೇಮಕ ಹಾಗೂ ಮುಂದಿನ ಪ್ರಕ್ರಿಯೆ

ಎನ್‌ಸಿಎಲ್‌ಟಿ ಧೂತ್ ಅವರನ್ನು ದಿವಾಳಿ ಎಂದು ಘೋಷಿಸಿ, ಆಶಿಶ್ ನಾರಾಯಣ್ ಅವರನ್ನು 'ದಿವಾಳಿತನದ ಟ್ರಸ್ಟಿ' (Bankruptcy Trustee) ಆಗಿ ನೇಮಕ ಮಾಡಿದೆ. ಧೂತ್ ಅವರ ಎಲ್ಲಾ ವೈಯಕ್ತಿಕ ಆಸ್ತಿಗಳು ತಕ್ಷಣದಿಂದಲೇ ಟ್ರಸ್ಟಿಯ ವಶಕ್ಕೆ ಬರಲಿದ್ದು, ಐಬಿಸಿ ಕಾಯ್ದೆಯಡಿ ಇವುಗಳನ್ನು ಮಾರಾಟ ಮಾಡಿ ಸಾಲದಾತ ಬ್ಯಾಂಕ್‌ಗಳಿಗೆ ಹಂಚಲಾಗುವುದು. ಧೂತ್ ಅವರು ತಮ್ಮ ಸಂಪೂರ್ಣ ಹಣಕಾಸು ಮತ್ತು ಆಸ್ತಿ ವಿವರಗಳನ್ನು 7 ದಿನಗಳ ಒಳಗೆ ಟ್ರಸ್ಟಿಗೆ ಸಲ್ಲಿಸುವಂತೆ ಸೂಚಿಸಲಾಗಿದೆ.

90 ದಿನಗಳಲ್ಲಿ ವರದಿ ಸಲ್ಲಿಕೆಗೆ ಆದೇಶ:

ಬ್ಯಾಂಕ್‌ರಪ್ಸಿ ಟ್ರಸ್ಟಿಯು ಸಾಲದಾತರಿಗೆ ನೋಟಿಸ್ ನೀಡಿ, ಹಕ್ಕುಸಲ್ಲಿಕೆಗೆ (Claims) ಸಾರ್ವಜನಿಕ ಪ್ರಕಟಣೆ ಹೊರಡಿಸಿ, 90 ದಿನಗಳ ಒಳಗೆ ಎನ್‌ಸಿಎಲ್‌ಟಿ ಹಾಗೂ ಸಾಲದಾತರ ಸಮಿತಿಗೆ (CoC) ಪ್ರಾಥಮಿಕ ವರದಿ ಸಲ್ಲಿಸಬೇಕು ಎಂದು ಕೋರ್ಟ್ ಆದೇಶಿಸಿದೆ. ಐಬಿಸಿ ಸೆಕ್ಷನ್ 138 ರ ಅಡಿಯಲ್ಲಿ ಧೂತ್ ಸಂಪೂರ್ಣ ಸಾಲಮುಕ್ತರಾಗುವವರೆಗೆ ಈ ಆದೇಶ ಜಾರಿಯಲ್ಲಿರುತ್ತದೆ.

ವೈಯಕ್ತಿಕ ಗ್ಯಾರಂಟಿ ಹಾಗೂ ದಿವಾಳಿತನ ಅಂದರೇನು?

ವೈಯಕ್ತಿಕ ಗ್ಯಾರಂಟಿ (Personal Guarantee): ಕಂಪನಿಯು ಬ್ಯಾಂಕ್‌ನಿಂದ ಪಡೆದ ಸಾಲಕ್ಕೆ ವ್ಯಕ್ತಿಯೊಬ್ಬ ತನ್ನ ವೈಯಕ್ತಿಕ ಆಸ್ತಿಯನ್ನು ಜಾಮೀನಾಗಿ ನೀಡಿದರೆ, ಕಂಪನಿಯು ಸಾಲ ತೀರಿಸಲು ವಿಫಲವಾದಾಗ ಬ್ಯಾಂಕ್ ಆ ವ್ಯಕ್ತಿಯ ವೈಯಕ್ತಿಕ ಆಸ್ತಿಯನ್ನು ಮುಟ್ಟುಗೋಲು ಹಾಕಿಕೊಂಡು ಸಾಲ ವಸೂಲಿ ಮಾಡಬಹುದು. ದಿವಾಳಿತನ (Bankruptcy): ಐಬಿಸಿ ಕಾಯ್ದೆಯಡಿ ಸಾಲಗಾರನು ತನ್ನ ಸಾಲವನ್ನು ಮರುಪಾವತಿಸಲು ಸಾಧ್ಯವೇ ಇಲ್ಲ ಎಂಬ ಸ್ಥಿತಿ ತಲುಪಿದಾಗ ಕೋರ್ಟ್ ಆತನನ್ನು 'ದಿವಾಳಿ' ಎಂದು ಘೋಷಿಸುತ್ತದೆ. ಆತನ ಎಲ್ಲಾ ಆಸ್ತಿಗಳನ್ನು ಕೋರ್ಟ್‌ನಿಂದ ನೇಮಕಗೊಂಡ ಟ್ರಸ್ಟಿಗೆ ವಹಿಸಿ, ಅವುಗಳನ್ನು ಹರಾಜು ಹಾಕಿ ಬಂದ ಹಣದಿಂದ ಬ್ಯಾಂಕ್ ಸಾಲ ತೀರಿಸಲಾಗುತ್ತದೆ.

ವಿದೇಶದಲ್ಲಿ ಕೆಲಸ ಬಿಟ್ಟು ಊರು ಸೇರಿದರು; ಈಗ ಕೋಟಿ ಕೋಟಿ ಸಂಪಾದನೆ, ಆಪ್ತಮಿತ್ರರ ಬದುಕು ಬದಲಿಸಿತು 'ಬಿಸಾಡುವ ಬಾಳೆ ದಿಂಡು'

Ganesh Mabla Gowda — Mon, 09 Nov 2026 14:11:18 +0530

ಕಸದಿಂದ ರಸ ಅಂತಾರಲ್ಲ, ಹಾಗೆ. ಈ ಸ್ಟೋರಿ ಕೂಡ ಅದಕ್ಕೆ ಸಂಬಂಧಿಸಿದ್ದಾಗಿದೆ. ಬಾಳೆ ಮರ ಹಣ್ಣು ನೀಡಿದ ಮೇಲೆ ಅದನ್ನು ರೈತ ಕಟ್ ಮಾಡಿ, ಹೊಲದಲ್ಲೇ ಬೀಸಾಡುತ್ತಾನೆ. ಈಗ ಅದೇ ಬಾಳೆ ದಿಂಡಿನಿಂದ ಮೂವರು ಸ್ನೇಹಿತರು ವರ್ಷಕ್ಕೆ ಕೋಟ್ಯಾಂತರ ರೂಪಾಯಿ ಆದಾಯ ಗಳಿಸುತ್ತಿದ್ದಾರೆ. ಕಸವೆಂದು ಹೊಲದಲ್ಲಿ ಬಿಸಾಡಿದ್ದ ದಿಂಡಿನಿಂದ ಕೋಟ್ಯಾಂತರ ರೂಪಾಯಿ ಆದಾಯಗೊಳಿಸಿದ್ದು ಹೇಗೆ ಅನ್ನೋ ವಿವರ ಈ ಸ್ಟೋರಿಯಲ್ಲಿದೆ.

ಗೆಳೆಯರ ಸ್ಫೂರ್ತಿದಾಯಕ ಸ್ಟೋರಿ

ಬಿಹಾರದ ಜಗತ್ ಕಲ್ಯಾಣ್, ನಿತೀಶ್ ಕುಮಾರ್ ವರ್ಮಾ ಮತ್ತು ಸತ್ಯಂ ಕುಮಾರ್ ಮೂವರು ಸ್ನೇಹಿತರು. ಒಟ್ಟಿಗೆ ಎಂಬಿಎ ಓದಿದರು. ಓದುವಾಗ ಗಳಸ್ಯ ಕಂಠಸ್ಯ ಸ್ನೇಹ. ಓದು ಮುಗಿಯುತ್ತಿದ್ದಂತೆಯೇ ವಿದೇಶಗಳಿಂದ ಕೆಲಸ ಹುಡುಕಿಬಂತು. ವಿದೇಶಗಳಿಂದಲೂ ಕೆಲಸ ಹುಡುಕಿಕೊಂಡು ಬಂದಿತ್ತು. ಆದರೆ ಕೊರೊನಾ ಸಂದರ್ಭದಲ್ಲಿ ಅವರ ಆಲೋಚನೆಯೇ ಬದಲಾಯಿತು. ನಾವು ಕಷ್ಟಪಟ್ಟು ಕೆಲಸ ಮಾಡುವುದಾದರೆ ಬೇರೆಯವರಿಗಾಗಿ ಏಕೆ ಮಾಡಬೇಕು? ನಮ್ಮ ನೆಲದಲ್ಲೇ ಏನಾದರೂ ಹೊಸತು ಸೃಷ್ಟಿಸಿ, ಇಲ್ಲಿನ ಜನರಿಗೆ ಉದ್ಯೋಗ ನೀಡೋಣ ಎಂಬ ದೃಢ ಸಂಕಲ್ಪ ಮಾಡಿದರು.

ತರುವರ್ ಆಗ್ರೋ ಆರಂಭ

ಅಂದುಕೊಂಡಂತೆಯೇ 2021ರಲ್ಲಿ Taruwar Agro ಎಂಬ ಸ್ಟಾರ್ಟ್‌ಅಪ್ ಆರಂಭಿಸಿದರು. ಬಾಳೆ ಕಟಾವಿನ ರೈತರಿಗೆ ಬೇಡವಾಗಿದ್ದ ದಿಂಡುಗಳನ್ನ ಖರೀದಿಸಲು ಪ್ರಾರಂಭಿಸಿದರು. ಯಂತ್ರಗಳ ಸಹಾಯದಿಂದ ಆ ದಿಂಡುಗಳಿಂದ ನಾರನ್ನು ಹೊರತೆಗೆದು ಯೋಗ ಮ್ಯಾಟ್‌ಗಳು, ಕಚೇರಿಯ ಫೈಲ್ ಫೋಲ್ಡರ್‌ಗಳು, ಸುಂದರವಾದ ಬುಟ್ಟಿಗಳು ಮತ್ತು ಪ್ರಾರ್ಥನಾ ಮ್ಯಾಟ್‌ಗಳನ್ನು ತಯಾರಿಸಲು ಶುರು ಮಾಡಿಯೇ ಬಿಟ್ಟರು. ಕೇವಲ ನಾರು ತಯಾರಿಸುವುದು ಮಾತ್ರವಲ್ಲದೇ.. ನಾರು ತೆಗೆದ ನಂತರ ಉಳಿಯುವ ತಿರುಳಿನಿಂದ ಉತ್ಕೃಷ್ಟ ದರ್ಜೆಯ ಎರೆಹುಳು ಗೊಬ್ಬರ ಮತ್ತು ಗಿಡಗಳಿಗೆ ಪೋಷಕಾಂಶ ನೀಡುವ ದ್ರವ ಗೊಬ್ಬರ ತಯಾರಿಸಿ ಮಾರಾಟ ಮಾಡಿದರು.

20 ಲಕ್ಷ ಹೂಡಿಕೆ, 2.5 ಕೋಟಿ ವಹಿವಾಟು

ಆರಂಭದಲ್ಲಿ ಸುಮಾರು 20 ಲಕ್ಷ ರೂಪಾಯಿ ಬಂಡವಾಳ ಹೂಡಿದ ಇವರು, ನಂತರ ಯಾವುದೇ ಹೂಡಿಕೆ ಮಾಡಲಿಲ್ಲ. ಯಾಕೆಂದರೆ ಪರಿಶ್ರಮಕ್ಕೆ ತಕ್ಕಂತೆ ಪ್ರಿಫಲ ಸಿಕ್ಕಿತು. FY26 ರಲ್ಲಿ ಕಂಪನಿಯ ವಹಿವಾಟು ₹2.5 ಕೋಟಿ ದಾಟಿತು. ಕೇವಲ ಲಾಭವಷ್ಟೇ ಅಲ್ಲದೆ.. ಸಾಮಾಜಿಕ ಕಳಕಳಿಯನ್ನೂ ಮೆರೆದಿರುವ ಈ ಕಂಪನಿಯಲ್ಲಿ ಕೆಲಸ ಮಾಡುವವರಲ್ಲಿ ಶೇಕಡಾ 60ರಷ್ಟು ಗ್ರಾಮೀಣ ಮಹಿಳೆಯರಿದ್ದಾರೆ. ಜೊತೆಗೆ ಕಸವೆಂದು ಬೀಸಾಡುತ್ತಿದ್ದ ದಿಂಡಿನಿಂದ ಎರೆಹುಳು ಗೊಬ್ಬರ ತಯಾರಿಸಿ ಹೆಚ್ಚುವರಿ ಆದಾಯಗಳಿಸುತ್ತಿದ್ದಾರೆ.

ಭಾರೀ ಬೇಡಿಕೆ

ಅಮೆಜಾನ್, ಫ್ಲಿಪ್‌ಕಾರ್ಟ್, ಮೀಶೋ ಹಾಗೂ ತಮ್ಮ ಸ್ವಂತ ವೆಬ್‌ಸೈಟ್ ಮೂಲಕ ಇವರ ಪರಿಸರಸ್ನೇಹಿ ಉತ್ಪನ್ನಗಳು ದೇಶಾದ್ಯಂತ ಮಾರಾಟ ಮಾಡಲಾಗುತ್ತಿದೆ. ಫ್ರಾನ್ಸ್ ಮತ್ತು ಫಿಲಿಪೈನ್ಸ್‌ನಂತಹ ವಿದೇಶಗಳಿಗೂ ಇವರು ಉತ್ಪನ್ನಗಳ ಸ್ಯಾಂಪಲ್ ಕಳುಹಿಸಿದ್ದಾರೆ. ಆ ಮೂಲಕ ಜಾಗತಿಕ ಮಾರುಕಟ್ಟೆಯನ್ನ ಪ್ರವೇಶ ಮಾಡಲು ಸಜ್ಜಾಗಿದ್ದಾರೆ. ಸ್ವಂತ ಉದ್ಯೋಗ ಮಾಡಬೇಕು, ಬದುಕು ಕಟ್ಟಿಕೊಳ್ಳಬೇಕು ಎಂದು ಕನಸು ಕಂಡು ತಿರುಗಾಡುವ, ಕಷ್ಟಪಡುವ ಶ್ರಮಿಕ ಯುವಕರಿಗೆ ಈ ಆಪ್ತರ ಮಿತ್ರರ ಕತೆ ಸ್ಫೂರ್ತಿದಾಯಕವಾಗಿದೆ.

ಹಾಲಿನಿಂದ ಬಸ್‌ವರೆಗೆ ಎಲ್ಲದರ ದರ ಏರಿಕೆ ಮಾಡಿ ಸರ್ಕಾರಿ ನೌಕರರಿಗೆ DA ಹೆಚ್ಚಳ ಮಾಡಿದ ರಾಜ್ಯ ಸರ್ಕಾರ

Santosh Naik — Thu, 05 Nov 2026 16:51:06 +0530

ಬೆಂಗಳೂರು (ನ.5): ರಾಜ್ಯದಲ್ಲಿ ಹಾಲು, ಮೊಸರು, ತುಪ್ಪ, ಬಸ್‌ ದರ ಸೇರಿದಂತೆ ಎಲ್ಲವನ್ನೂ ಬಾಯಿಗೆ ಬಂದಂತೆ ಏರಿಕೆ ಮಾಡಿರುವ ರಾಜ್ಯ ಸರ್ಕಾರ ಈಗ ಸರ್ಕಾರಿ ನೌಕರರಿಗೆ ತುಟ್ಟಿಭತ್ಯೆ ಏರಿಕೆ ಮಾಡಿ ಸಮಾಧಾನ ನೀಡಿದೆ. ರಾಜ್ಯದ ಲಕ್ಷಾಂತರ ಸರ್ಕಾರಿ ನೌಕರರು ಹಾಗೂ ಪಿಂಚಣಿದಾರರಿಗೆ ರಾಜ್ಯ ಸರ್ಕಾರವು ದೀಪಾವಳಿ ಹಬ್ಬದ ಭಾರಿ ದೊಡ್ಡ ಸಿಹಿ ಸುದ್ದಿ ನೀಡಿದೆ: 2024 ರ ಪರಿಷ್ಕೃತ ವೇತನ ಶ್ರೇಣಿಯಲ್ಲಿ ವೇತನ ಪಡೆಯುತ್ತಿರುವ ರಾಜ್ಯ ಸರ್ಕಾರಿ ನೌಕರರ ತುಟ್ಟಿಭತ್ಯೆಯನ್ನು (Dearness Allowance - DA) ಮೂಲ ವೇತನದ ಶೇಕಡಾ 2.25 ರಷ್ಟು ಹೆಚ್ಚಳ ಮಾಡಿ ಆರ್ಥಿಕ ಇಲಾಖೆಯು ಅಧಿಕೃತ ಆದೇಶ ಹೊರಡಿಸಿದೆ!

ಸರ್ಕಾರದ ಈ ನೂತನ ಆದೇಶದ ಪ್ರಕಾರ, ಪ್ರಸ್ತುತ ಮೂಲ ವೇತನದ ಶೇಕಡಾ 15.75 ರಷ್ಟಿದ್ದ ತುಟ್ಟಿಭತ್ಯೆಯ ದರವನ್ನು ಶೇಕಡಾ 18 ಕ್ಕೆ ಪರಿಷ್ಕರಿಸಿ ಮಂಜೂರು ಮಾಡಲಾಗಿದೆ. ಈ ಹೆಚ್ಚಳವು 2026 ರ ಜುಲೈ 1 ರಿಂದ ಪೂರ್ವಾನ್ವಯವಾಗುವಂತೆ (Retroactive) ಜಾರಿಗೆ ಬರಲಿದೆ.

ಪಿಂಚಣಿದಾರರು ಹಾಗೂ ಅನುದಾನಿತ ಸಂಸ್ಥೆಗಳಿಗೂ ಅನ್ವಯ

ರಾಜ್ಯ ಸರ್ಕಾರದ ನಿವೃತ್ತಿ ವೇತನದಾರರು (Pensioners), ಕುಟುಂಬ ನಿವೃತ್ತಿ ವೇತನದಾರರು ಹಾಗೂ ಸಂಚಿತ ನಿಧಿಯಿಂದ ಪಿಂಚಣಿ ಪಡೆಯುತ್ತಿರುವ ಅನುದಾನಿತ ಶಿಕ್ಷಣ ಸಂಸ್ಥೆಗಳ ಪಿಂಚಣಿದಾರರಿಗೂ ದಿನಾಂಕ 1ನೇ ಜುಲೈ 2026 ರಿಂದ ಜಾರಿಗೆ ಬರುವಂತೆ ಮೂಲ ಪಿಂಚಣಿಯ ಶೇ. 15.75 ರಿಂದ ಶೇ. 18 ಕ್ಕೆ ಹೆಚ್ಚಿಸಿ ಆದೇಶಿಸಲಾಗಿದೆ. ಯುಜಿಸಿ (UGC), ಎಐಸಿಟಿಇ (AICTE) ಹಾಗೂ ಐಸಿಎಆರ್ (ICAR) ವೇತನ ಶ್ರೇಣಿಗಳಲ್ಲಿ ನಿವೃತ್ತರಾಗಿ ರಾಜ್ಯ ಪಿಂಚಣಿ ಪಡೆಯುತ್ತಿರುವವರಿಗೂ ಈ ಆದೇಶ ಅನ್ವಯಿಸುತ್ತದೆ. ಸರ್ಕಾರಿ ಹಾಗೂ ಜಿಲ್ಲಾ ಪಂಚಾಯಿತಿಗಳ ಪೂರ್ಣಾವಧಿ ನೌಕರರು, ಕಾಲಿಕ ವೇತನ ಶ್ರೇಣಿಯಲ್ಲಿರುವ ಪೂರ್ಣಾವಧಿ ವರ್ಕ್‌ಚಾರ್ಜ್ ನೌಕರರು ಮತ್ತು ಸರ್ಕಾರದಿಂದ ಸಹಾಯಾನುದಾನ ಪಡೆಯುತ್ತಿರುವ ಶಿಕ್ಷಣ ಸಂಸ್ಥೆಗಳು ಹಾಗೂ ವಿಶ್ವವಿದ್ಯಾಲಯಗಳ ನೌಕರರಿಗೂ ಈ ಹೆಚ್ಚಳದ ಲಾಭ ಸಿಗಲಿದೆ.

ಯುಜಿಸಿ/ಎಐಸಿಟಿಇ/ಐಸಿಎಆರ್ ವೇತನ ಶ್ರೇಣಿಯಲ್ಲಿ ಪ್ರಸ್ತುತ ಸೇವೆಯಲ್ಲಿರುವ ನೌಕರರು ಮತ್ತು ಎನ್‌ಜೆಪಿಸಿ ವೇತನ ಶ್ರೇಣಿಯ ನ್ಯಾಯಾಂಗ ಅಧಿಕಾರಿಗಳಿಗೆ ಪ್ರತ್ಯೇಕ ಆದೇಶ ಹೊರಡಿಸಲಾಗುವುದು ಎಂದು ಸರ್ಕಾರ ತಿಳಿಸಿದೆ.

ರಾಜ್ಯ ಸರ್ಕಾರಿ ನೌಕರರ ಮುಖದಲ್ಲಿ ಮಂದಹಾಸ

ಈ ಆದೇಶದ ಮೇರೆಗೆ ಲಭ್ಯವಾಗುವ ಹೆಚ್ಚುವರಿ ತುಟ್ಟಿಭತ್ಯೆಯನ್ನು ಮುಂದಿನ ಆದೇಶದವರೆಗೆ ನಗದಾಗಿ (Cash) ಪಾವತಿಸಲಾಗುವುದು. ಆದೇಶದನ್ವಯ ಲಭ್ಯವಾಗುವ ತುಟ್ಟಿಭತ್ಯೆ ಬಾಕಿ ಮೊತ್ತವನ್ನು (Arrears) ನವೆಂಬರ್ ತಿಂಗಳ ವೇತನ/ಪಿಂಚಣಿ ನೀಡುವ ಮೊದಲು ಪಾವತಿ ಮಾಡತಕ್ಕದಲ್ಲ. ಲೆಕ್ಕಾಚಾರದ ವೇಳೆ ಬರುವ 50 ಪೈಸೆ ಹಾಗೂ ಅದಕ್ಕಿಂತ ಹೆಚ್ಚಿನ ಭಿನ್ನಾಂಕಗಳನ್ನು ಮುಂದಿನ ಪೂರ್ಣ ರೂಪಾಯಿಗೆ ಪೂರ್ಣಗೊಳಿಸತಕ್ಕದ್ದು ಹಾಗೂ 50 ಪೈಸೆಗಿಂತ ಕಡಿಮೆ ಇರುವ ಭಿನ್ನಾಂಕಗಳನ್ನು ಕಡೆಗಣಿಸತಕ್ಕದ್ದು. ತುಟ್ಟಿಭತ್ಯೆಯನ್ನು ಸಂಭಾವನೆಯ ವಿಶಿಷ್ಟ ಅಂಶವಾಗಿ ಪ್ರತ್ಯೇಕವಾಗಿ ತೋರಿಸಬೇಕೇ ಹೊರತು, ಯಾವುದೇ ಉದ್ದೇಶಕ್ಕಾಗಿ ಇದನ್ನು 'ಮೂಲ ವೇತನ' ಎಂದು ಪರಿಗಣಿಸಲಾಗುವುದಿಲ್ಲ. ದೀಪಾವಳಿ ಹಬ್ಬದ ಬೆನ್ನಲ್ಲೇ ಕೈ ಸೇರಿದ ಈ ಪರಿಷ್ಕೃತ ತುಟ್ಟಿಭತ್ಯೆ ಆದೇಶವು ರಾಜ್ಯ ಸರ್ಕಾರದ ಲಕ್ಷಾಂತರ ನೌಕರರ ಮೊಗದಲ್ಲಿ ಮಂದಹಾಸ ತಂದಿದೆ.

ಕೇವಲ ಎರಡೇ ದಿನದಲ್ಲಿ ಎಲಾನ್‌ ಮಸ್ಕ್‌ ಸಂಪತ್ತಿನಲ್ಲಿ 10 ಲಕ್ಷ ಕೋಟಿಗೂ ಅಧಿಕ ನಷ್ಟ, ಅಮೆರಿಕದ ಬಿಲಿಯನೇರ್‌ಗಳಿಗೆ ನಡುಕ!

Santosh Naik — Fri, 06 Nov 2026 08:23:27 +0530

ಬೆಂಗಳೂರು (ನ.6): ಜಾಗತಿಕ ಶೇರು ಮಾರುಕಟ್ಟೆಯಲ್ಲಿ ತಂತ್ರಜ್ಞಾನ ವಲಯದ ಶೇರುಗಳು ತೀವ್ರ ಕುಸಿತ ಕಂಡ ಪರಿಣಾಮವಾಗಿ (Tech Rout), ವಿಶ್ವದ ಶ್ರೀಮಂತ ವ್ಯಕ್ತಿ ಎಲಾನ್ ಮಸ್ಕ್ (Elon Musk) ಅವರ ಆಸ್ತಿಯಲ್ಲಿ ಕೇವಲ ಎರಡೇ ದಿನಗಳಲ್ಲಿ ಬರೋಬ್ಬರಿ 113 ಬಿಲಿಯನ್ ಡಾಲರ್‌ಗಳಷ್ಟು (ಸುಮಾರು ₹10 ಲಕ್ಷ ಕೋಟಿಗೂ ಹೆಚ್ಚು) ಭಾರಿ ಪ್ರಮಾಣದ ಮೌಲ್ಯ ಧೂಳಿಪಟವಾಗಿದೆ!

ನವೆಂಬರ್ 5 ರಂದು ಜಾಗತಿಕ ಮಾರುಕಟ್ಟೆಯಲ್ಲಿ ಉಂಟಾದ ಭಾರಿ ಕುಸಿತದಿಂದಾಗಿ ಎಲಾನ್ ಮಸ್ಕ್ ಒಂದೇ ದಿನದಲ್ಲಿ ಬರೋಬ್ಬರಿ $80 ಬಿಲಿಯನ್ (ಸುಮಾರು ₹7.1 ಲಕ್ಷ ಕೋಟಿ) ನಷ್ಟ ಅನುಭವಿಸಿದ್ದಾರೆ. ಇದಕ್ಕೂ ಮುನ್ನ ನವೆಂಬರ್ 4 ರಂದು ಅವರು $33 ಬಿಲಿಯನ್ ಕಳೆದುಕೊಂಡಿದ್ದರು. ಇದರೊಂದಿಗೆ ಕೇವಲ 48 ಗಂಟೆಗಳ ಅವಧಿಯಲ್ಲಿ ಅವರ ಅಂದಾಜು ಸಂಪತ್ತಿನಿಂದ 113 ಬಿಲಿಯನ್ ಡಾಲರ್‌ಗಳಷ್ಟು ಬೃಹತ್ ಆಸ್ತಿಯು ಭಸ್ಮವಾಗಿದೆ.

ನ್ಯಾಸ್‌ಡಾಕ್‌ನಲ್ಲಿ 280 ಲಕ್ಷ ಕೋಟಿ ನಷ್ಟ – ಮಾರುಕಟ್ಟೆ 'ಕರೆಕ್ಷನ್' ಹಂತಕ್ಕೆ!

ಅಮೆರಿಕದ ಮಧ್ಯಂತರ ಚುನಾವಣೆಯ (US Midterm Elections) ಬೆನ್ನಲ್ಲೇ ಆರಂಭಿಕ ಚೇತರಿಕೆ ಕಂಡಿದ್ದ ನ್ಯಾಸ್‌ಡಾಕ್ (Nasdaq) ಸೂಚ್ಯಂಕವು, ನ್ಯೂಯಾರ್ಕ್‌ನಲ್ಲಿ ಗುರುವಾರ ಬೆಳಗಿನ ವಹಿವಾಟಿನಲ್ಲಿ ಶೇಕಡಾ 6.4 ರಷ್ಟು ಭಾರಿ ಕುಸಿತ ಕಂಡಿತು. ನ್ಯಾಸ್‌ಡಾಕ್ 100 ರಲ್ಲಿದ್ದ ತಂತ್ರಜ್ಞಾನ ದೈತ್ಯ ಸಂಸ್ಥೆಗಳ ಮೌಲ್ಯದಲ್ಲಿ ಒಂದೇ ದಿನದಲ್ಲಿ 280 ಲಕ್ಷ ಕೋಟಿಗಳಷ್ಟು ಭಾರಿ ನಷ್ಟವಾಯಿತು. ಅಕ್ಟೋಬರ್ 6 ರ ಸಾರ್ವಕಾಲಿಕ ಗರಿಷ್ಠಕ್ಕೆ ಹೋಲಿಸಿದರೆ ಈ ವಲಯವು ಒಟ್ಟಾರೆಯಾಗಿ 585 ಲಕ್ಷ ಕೋಟಿಗಳಷ್ಟು ನಷ್ಟ ಅನುಭವಿಸಿದೆ. ತನ್ನ ಸಾರ್ವಕಾಲಿಕ ಗರಿಷ್ಠ ಮಟ್ಟದಿಂದ ಶೇ. 15 ರಷ್ಟು ಕುಸಿದಿರುವ ನ್ಯಾಸ್‌ಡಾಕ್ ಸೂಚ್ಯಂಕವು ಇದೀಗ ಅಧಿಕೃತವಾಗಿ 'ಕರೇಕ್ಷನ್' (Correction - ಕನಿಷ್ಠ ಶೇ. 10 ರಷ್ಟು ಇಳಿಕೆ) ವಲಯವನ್ನು ಪ್ರವೇಶಿಸಿದೆ.

ಉಳಿದಂತೆ ಅಮೆರಿಕ ಮಾರುಕಟ್ಟೆಯ ಇತರ ಸೂಚ್ಯಂಕಗಳಾದ ಡೌ ಜೋನ್ಸ್ (Dow Jones) ಸುಮಾರು ಶೇ. 3 ರಷ್ಟು ಹಾಗೂ ಎಸ್ ಆಂಡ್ ಪಿ 500 (S&P 500) ಶೇ. 4 ರಷ್ಟು ಕುಸಿತ ಕಂಡವು. ಲಂಡನ್‌ನ ಎಫ್‌ಟಿಎಸ್‌ಇ 100 (FTSE 100) ಕೂಡ ಶೇ. 0.4 ರಷ್ಟು (46.55 ಅಂಕಗಳು) ಇಳಿಕೆಯಾಗಿ 10,782.66 ಅಂಕಗಳಿಗೆ ಕೊನೆಗೊಂಡಿತು.

ಎಐ ಹೂಡಿಕೆಗೆ ಎದುರಾಯ್ತಾ ಆತಂಕ?

ಅಮೆರಿಕದ ಚುನಾವಣೆಯಲ್ಲಿ ಡೆಮಾಕ್ರಟ್‌ಗಳು ಭಾರಿ ಜಯಗಳಿಸಿರುವುದು ಡಾಟಾ ಸೆಂಟರ್‌ಗಳ ನಿರ್ಮಾಣಕ್ಕೆ (Data Centres Construction) ಭಾರಿ ನೀತಿ ನಿಯಮಗಳು ಎದುರಾಗಬಹುದು. ಇದರಿಂದ ಕೃತಕ ಬುದ್ಧಿಮತ್ತೆ (AI) ಮೂಲಸೌಕರ್ಯ ಬೆಳವಣಿಗೆಗೆ ತಡೆ ಬೀಳಬಹುದು ಎಂಬ ಕಳವಳ ಹೂಡಿಕೆದಾರರಲ್ಲಿ ವ್ಯಕ್ತವಾಗಿದೆ. ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ತಂತ್ರಜ್ಞಾನಕ್ಕೆ ಸುರಿಯಲಾಗುತ್ತಿರುವ ಕೋಟ್ಯಂತರ ಡಾಲರ್ ಹೂಡಿಕೆಯು ಸೂಕ್ತವಾದ ಆದಾಯ (Returns) ತಂದುಕೊಡಲಿದೆಯೇ ಎಂಬ ಸಂಶಯ ಮಾರುಕಟ್ಟೆಯನ್ನು ಕಾಡುತ್ತಿದೆ. ಇನ್‌ಕ್ಲೈನ್ ಇನ್ವೆಸ್ಟ್‌ಮೆಂಟ್ ಮ್ಯಾನೇಜ್‌ಮೆಂಟ್‌ನ ಸಂಸ್ಥಾಪಕ ಟೆಡ್ ಪಾರ್ಕ್‌ಹಿಲ್ ಮಾತನಾಡಿ, "ಮಾರುಕಟ್ಟೆಯು ಇದೀಗ ಎಐ ನೀಡಿದ್ದ ಭರವಸೆಯ ಹಂತದಿಂದ ಎಐ ತಗುಲಿಸುತ್ತಿರುವ ವೆಚ್ಚ ಮತ್ತು ಬೆಲೆಯ ಹಂತಕ್ಕೆ ಬದಲಾಗುತ್ತಿದೆ" ಎಂದು ವಿಶ್ಲೇಷಿಸಿದ್ದಾರೆ.

ಶೇರು ಮಾರುಕಟ್ಟೆಯಲ್ಲಿ ಧೂಳಿಪಟವಾದ ದೈತ್ಯ ಸಂಸ್ಥೆಗಳು

ಇಡೀ ಮಾರುಕಟ್ಟೆ ಕುಸಿತದಲ್ಲಿ ಅತ್ಯಂತ ಹೆಚ್ಚಿನ ನಷ್ಟ ಅನುಭವಿಸಿದ್ದು ಇಲಾನ್ ಮಸ್ಕ್ ಒಡೆತನದ ಸಂಸ್ಥೆಗಳು.

ಟೆಸ್ಲಾ (Tesla): ಶೇರು ಮೌಲ್ಯದಲ್ಲಿ ಶೇ. 11 ರಷ್ಟು ಭಾರಿ ಕುಸಿತ.
ಸ್ಪೇಸ್‌ಎಕ್ಸ್ (SpaceX): ಶೇರು ಮೌಲ್ಯದಲ್ಲಿ ಶೇ. 9 ರಷ್ಟು ಇಳಿಕೆ.
ಎನ್‌ವಿಡಿಯಾ (Nvidia): ಶೇ. 8 ರಷ್ಟು ಕುಸಿತ.
ಸ್ಯಾಂಡಿಸ್ಕ್ (SanDisk): ಶೇ. 17 ರಷ್ಟು ಭಾರಿ ಪತನ.
ಎಎಂಡಿ (AMD): ಶೇ. 15 ರಷ್ಟು ಇಳಿಕೆ.
ಮೈಕ್ರಾನ್ ತಂತ್ರಜ್ಞಾನ (Micron): ಶೇ. 14 ರಷ್ಟು ಕುಸಿತ.

'VIX' ಶೇ. 70 ರಷ್ಟು ಜಿಗಿತ

ವಾಲ್ ಸ್ಟ್ರೀಟ್‌ನ ಅಪಾಯದ ಮಟ್ಟವನ್ನು ಅಳೆಯುವ ವೋಲಟಾಲಿಟಿ ಸೂಚ್ಯಂಕ ಅಥವಾ 'ಫಿಯರ್ ಗೇಜ್' (VIX Index) ಆರಂಭಿಕ ವಹಿವಾಟಿನಲ್ಲಿ ಶೇಕಡಾ 70 ರಷ್ಟು ಭಾರಿ ಜಿಗಿತ ಕಂಡು 28 ಅಂಕಗಳನ್ನು ಮುಟ್ಟಿತು. 2025 ರ ಏಪ್ರಿಲ್‌ನಲ್ಲಿ ಡೊನಾಲ್ಡ್ ಟ್ರಂಪ್ ಅವರು ಬಿಡುಗಡೆ ಮಾಡಿದ್ದ ‘ಲಿಬರೇಶನ್ ಡೇ’ ಸುಂಕಗಳ ಅವಧಿಗೆ ಹೋಲಿಸಿದರೆ ಇದು ಕಡಿಮೆಯಿದ್ದರೂ, ಪ್ರಸ್ತುತ ಹೂಡಿಕೆದಾರರಲ್ಲಿ ಭಾರಿ ಆತಂಕ ಮೂಡಿಸಿದೆ. ವೆಲ್ತ್ ಕ್ಲಬ್‌ನ ಮುಖ್ಯ ಹೂಡಿಕೆ ತಂತ್ರಜ್ಞ ಸುಸನ್ನಾ ಸ್ಟ್ರೀಟರ್ ಪ್ರತಿಕ್ರಿಯಿಸಿ, "ಎಐ ಮೂಲಸೌಕರ್ಯಗಳಿಗೆ ಸುರಿದ ಭಾರಿ ಹಣವು ನಿರೀಕ್ಷಿತ ಆದಾಯ ನೀಡದಿರುವ ಭೀತಿಯು ಡಾಟಾ ಸೆಂಟರ್ ನಿರ್ಮಾಣದ ಕುಸಿತದ ಜೊತೆ ಸೇರಿಕೊಂಡಿದ್ದು, ಇಡೀ ಜಾಗತಿಕ ಮಾರುಕಟ್ಟೆಯಲ್ಲಿ ತಲ್ಲಣ ಸೃಷ್ಟಿಸಿದೆ" ಎಂದು ತಿಳಿಸಿದ್ದಾರೆ.

27 ಸಾವಿರ ಕೋಟಿ ರೂಪಾಯಿಗೆ ನೆದರ್ಲೆಂಡ್ಸ್‌ನ ಇವೋಸ್ ಬಿವಿ ಕಂಪನಿ ಖರೀದಿ ಮಾಡಿದ ಅದಾನಿ ಪೋರ್ಟ್ಸ್‌

Santosh Naik — Thu, 05 Nov 2026 17:22:04 +0530

ಬೆಂಗಳೂರು (ನ.5): ಭಾರತದ ಅತಿದೊಡ್ಡ ಬಂದರು ನಿರ್ವಹಣಾ ಸಂಸ್ಥೆಯಾಗಿರುವ 'ಅದಾನಿ ಪೋರ್ಟ್ಸ್ ಆಂಡ್ ಸ್ಪೆಷಲ್ ಇಕನಾಮಿಕ್ ಝೋನ್ ಲಿಮಿಟೆಡ್' (APSEZ), ಯುರೋಪ್‌ನ ಎರಡನೇ ಅತಿದೊಡ್ಡ ಸ್ವತಂತ್ರ ದ್ರವ ಶೇಖರಣಾ (Independent Liquid Storage) ಸಂಸ್ಥೆಯಾದ ನೆದರ್‌ಲ್ಯಾಂಡ್ಸ್ ಮೂಲದ 'ಇವೋಸ್ ಬಿ.ವಿ.' (Evos B.V.) ಸಂಸ್ಥೆಯ ಶೇಕಡಾ 100 ರಷ್ಟು ಷೇರುಗಳನ್ನು ಬರೋಬ್ಬರಿ ₹27,145 ಕೋಟಿಗೆ (2.56 ಬಿಲಿಯನ್ ಯುರೋ) ಸಂಪೂರ್ಣವಾಗಿ ಖರೀದಿಸುವುದಾಗಿ ಗುರುವಾರ ಪ್ರಕಟಿಸಿದೆ.

ಇಗ್ನಿಯೋ ಇನ್‌ಫ್ರಾಸ್ಟ್ರಕ್ಚರ್ ಪಾರ್ಟ್‌ನೆರ್ಸ್ ಸಂಸ್ಥೆಯಿಂದ 2.56 ಬಿಲಿಯನ್ ಯುರೋಗಳ (ಸುಮಾರು ₹27,145 ಕೋಟಿ) ಉದ್ಯಮ ಮೌಲ್ಯದಲ್ಲಿ (Enterprise Value) ಇವೋಸ್ ಸಂಸ್ಥೆಯನ್ನು ಸ್ವಾಧೀನಪಡಿಸಿಕೊಳ್ಳಲಾಗುತ್ತಿದೆ. ಈ ಪ್ರಸ್ತಾವಿತ ವಹಿವಾಟು ಸಂಪೂರ್ಣ ನಗದು ಪಾವತಿಯ (All-cash deal) ಒಪ್ಪಂದವಾಗಿದ್ದು, ಇದರ ಈಕ್ವಿಟಿ ಮೌಲ್ಯ 1.18 ಬಿಲಿಯನ್ ಯುರೋಗಳಾಗಿದೆ (ಸುಮಾರು ₹12,513 ಕೋಟಿ). ಇದು ಸಿವೈ25 ಇವಿ/ಇಬಿಐಟಿಡಿಎ (EV/EBITDA) ಲೆಕ್ಕಾಚಾರದಲ್ಲಿ 11.7x ರಷ್ಟು ಸ್ವಾಧೀನದ ಮಲ್ಟಿಪಲ್ ಮೌಲ್ಯವನ್ನು ಸೂಚಿಸುತ್ತದೆ.

ಲಾಭದಾಯಕ ವಹಿವಾಟು ಹಾಗೂ ಆರ್ಥಿಕ ಲೆಕ್ಕಾಚಾರ

ಕ್ಯಾಲೆಂಡರ್ ವರ್ಷ 2025 ರ ಅವಧಿಯಲ್ಲಿ 'ಇವೋಸ್' ಸಂಸ್ಥೆಯು ಭಾರಿ ಆದಾಯ ಗಳಿಸಿದೆ. ಕಂಪನಿಯ ಒಟ್ಟು ಆದಾಯ 392 ಮಿಲಿಯನ್ ಯುರೋಗಳು (ಸುಮಾರು ₹4,156 ಕೋಟಿ). ಇಬಿಐಟಿಡಿಎ (EBITDA) 219 ಮಿಲಿಯನ್ ಯುರೋಗಳು (ಸುಮಾರು ₹2,322 ಕೋಟಿ) ಅಂದರೆ ಶೇಕಡಾ 56 ರಷ್ಟು ಭಾರಿ ಕಾರ್ಯನಿರ್ವಹಣಾ ಲಾಭದ ಮಾರ್ಜಿನ್ ಗಳಿಸಿದೆ. ಈ ಇಡೀ ಸ್ವಾಧೀನ ಪ್ರಕ್ರಿಯೆಯನ್ನು ಸಾಲದ ಮೂಲಗಳಿಂದ (Debt) ಹಣಕಾಸು ಒದಗಿಸಲಾಗುತ್ತಿದ್ದು, ನಿಯಂತ್ರಕ ಸಂಸ್ಥೆಗಳ ಅನುಮೋದನೆ ಹಾಗೂ ಕೌನ್ಸಿಲ್ ಮಾತುಕತೆಗಳಿಗೆ ಒಳಪಟ್ಟಿರುತ್ತದೆ ಎಂದು ಎಪಿಎಸ್‌ಇಝಡ್ ತಿಳಿಸಿದೆ.

ಯುರೋಪ್ ಜಾಗತಿಕ ಇಂಧನ ಕೇಂದ್ರದಲ್ಲಿ ಪ್ರಮುಖ ಹೆಜ್ಜೆ: ಕರಣ್ ಅದಾನಿ

ಈ ಪ್ರಮುಖ ವಹಿವಾಟಿನ ಕುರಿತು ಸಂತಸ ವ್ಯಕ್ತಪಡಿಸಿರುವ ಅದಾನಿ ಪೋರ್ಟ್ಸ್ ಮ್ಯಾನೇಜಿಂಗ್ ಡೈರೆಕ್ಟರ್ ಕರಣ್ ಅದಾನಿ, 'ನಮ್ಮ ಪೋರ್ಟ್‌ಫೋಲಿಯೋಗೆ 'ಇವೋಸ್' ಸಂಸ್ಥೆಯನ್ನು ಸ್ವಾಗತಿಸಲು ನಾವು ಅತ್ಯಂತ ಹರ್ಷಿಸುತ್ತೇವೆ. ಈ ಒಪ್ಪಂದವು ಜಾಗತಿಕ ದ್ರವ ಶೇಖರಣೆ ಮತ್ತು ಇಂಧನ ಕೇಂದ್ರಗಳಲ್ಲಿ ನಮಗೆ ಗಮನಾರ್ಹ ಉಪಸ್ಥಿತಿಯನ್ನು ಒದಗಿಸುತ್ತದೆ. ಯುರೋಪ್‌ನ ಜೊತೆ ಪಾಲುದಾರಿಕೆ ವಹಿಸುತ್ತಾ, ಅದರ ಸುಸ್ಥಿರ ಇಂಧನ ಪರಿವರ್ತನೆಗೆ ಸಂಪೂರ್ಣ ಬೆಂಬಲ ನೀಡಲು ಹಾಗೂ ನಮ್ಮ ಹಣಕಾಸಿನ ಶಿಸ್ತನ್ನು ಕಾಯ್ದುಕೊಂಡು ಸುಸ್ಥಿರ ಮೌಲ್ಯವನ್ನು ಸೃಷ್ಟಿಸಲು ನಾವು ಎದುರು ನೋಡುತ್ತಿದ್ದೇವೆ' ಎಂದು ತಿಳಿಸಿದರು.

5 ದೇಶಗಳಲ್ಲಿ 8 ಬಂದರುಗಳು: ಅದಾನಿಯ ಜಾಗತಿಕ ವಿಸ್ತರಣೆ

ಈ ಸ್ವಾಧೀನ ಪ್ರಕ್ರಿಯೆಯೊಂದಿಗೆ ಅದಾನಿ ಸಂಸ್ಥೆಯು ಯುರೋಪ್ ಮಾರುಕಟ್ಟೆಯಲ್ಲಿ ಬೃಹತ್ ಲಿಕ್ವಿಡ್ ಪ್ಲಾಟ್‌ಫಾರ್ಮ್ ಅನ್ನು ಸ್ಥಾಪಿಸಿದಂತಾಗಿದೆ: 5 ದೇಶಗಳಲ್ಲಿ ಹರಡಿರುವ 8 ಪ್ರಮುಖ ಬಂದರು ಟರ್ಮಿನಲ್‌ಗಳು (Port Terminals) ಅದಾನಿ ವಶವಾಗಲಿವೆ. ನೆದರ್‌ಲ್ಯಾಂಡ್ಸ್, ಜರ್ಮನಿ, ಸ್ಪೇನ್, ಬೆಲ್ಜಿಯಂ ಹಾಗೂ ಮಾಲ್ಟಾ ದೇಶಗಳ ಅತ್ಯಂತ ಪ್ರಮುಖ ಕೈಗಾರಿಕಾ ಕೇಂದ್ರಗಳಲ್ಲಿ ಈ ಟರ್ಮಿನಲ್‌ಗಳಿವೆ. (ಆಮ್‌ಸ್ಟರ್‌ಡ್ಯಾಮ್-ರಾಟರ್‌ಡ್ಯಾಮ್-ಆಂಟ್‌ವರ್ಪ್ (ARA) ಪ್ರದೇಶ, ಹ್ಯಾಂಬರ್ಗ್ ಹಾಗೂ ಮೆಡಿಟರೇನಿಯನ್ ಪ್ರದೇಶಗಳು). ಇವೋಸ್ ಸಂಸ್ಥೆಯು 6.3 ಮಿಲಿಯನ್ ಕ್ಯೂಬಿಕ್ ಮೀಟರ್ ಶೇಖರಣಾ ಸಾಮರ್ಥ್ಯ ಹೊಂದಿದ್ದು, 2025 ರಲ್ಲಿ 37 ಎಂಎಂಟಿ (MMT) ಸರಕುಗಳನ್ನು ನಿರ್ವಹಿಸಿದೆ. ಈ ಒಪ್ಪಂದದ ಮೂಲಕ ಅದಾನಿ ಪೋರ್ಟ್ಸ್‌ನ ಜಾಗತಿಕ ಹೆಜ್ಜೆಯು ಇದೀಗ 10 ದೇಶಗಳಲ್ಲಿ 28 ಬಂದರುಗಳು ಮತ್ತು ಟರ್ಮಿನಲ್‌ಗಳಿಗೆ ವಿಸ್ತರಿಸಿದೆ.

ಅದ್ಭುತ ಮೂಲಸೌಕರ್ಯ ಹಾಗೂ ಇಂಧನ ವಿನ್ಯಾಸ

ಇವೋಸ್ ಪ್ಲಾಟ್‌ಫಾರ್ಮ್ 452 ಬೃಹತ್ ಶೇಖರಣಾ ಟ್ಯಾಂಕ್‌ಗಳು, 63 ನೌಕೆಗಳು ಹಾಗೂ ಬಾರ್ಜ್ ಬರ್ತ್‌ಗಳನ್ನು ಹೊಂದಿದೆ. ಜೊತೆಗೆ ಸ್ಕಿಪೋಲ್ ವಿಮಾನ ನಿಲ್ದಾಣ (Schiphol Airport) ಹಾಗೂ ಸೆಂಟ್ರಲ್ ಯುರೋಪ್ ಪೈಪ್‌ಲೈನ್ ವ್ಯವಸ್ಥೆಯೊಂದಿಗೆ ನೇರ ಸಂಪರ್ಕ ಹೊಂದಿದೆ. ಈ ಸಂಸ್ಥೆಯು ಸರಾಸರಿ ಶೇಕಡಾ 99 ರಷ್ಟು ವಾಣಿಜ್ಯ ಬಳಕೆಯ ಆಕ್ಯುಪೆನ್ಸಿ (Commercial Occupancy) ಹೊಂದಿದ್ದು, ಹೆಚ್ಚಿನ ಆದಾಯವು ಟೇಕ್-ಆರ್-ಪೇ (Take-or-pay) ಒಪ್ಪಂದಗಳ ಅಡಿಯಲ್ಲಿದೆ. ಸಾಂಪ್ರದಾಯಿಕ ಇಂಧನಗಳಾದ ಗ್ಯಾಸೋಲಿನ್, ಗ್ಯಾಸ್ ಆಯಿಲ್, ಸಾಗರ ಇಂಧನ ಹಾಗೂ ಜೆಟ್ ಇಂಧನಗಳ ಜೊತೆಗೆ, ಇವೋಸ್ ಸಂಸ್ಥೆಯು ಸುಸ್ಥಿರ ವಿಮಾನಯಾನ ಇಂಧನ (SAF), ಜೈವಿಕ ಇಂಧನಗಳು (Biofuels), ಮೆಥನಾಲ್ ಹಾಗೂ ಬಯೋಎಥನಾಲ್‌ನಂತಹ ಭವಿಷ್ಯದ ಪರಿವರ್ತನೆಯ ಇಂಧನಗಳನ್ನೂ ಕಾಯ್ದಿರಿಸುವ ವ್ಯವಸ್ಥೆ ಹೊಂದಿದೆ. ಯುರೋಪ್‌ನ ಹೂಡಿಕೆ-ದರ್ಜೆಯ (Investment-grade) ಮಾನ್ಯತೆ ಹೊಂದಿರುವ ಇವೋಸ್ ಸೇರ್ಪಡೆಯು ಅದಾನಿ ಪೋರ್ಟ್ಸ್‌ನ ಬಿಸಿನೆಸ್ ರಿಸ್ಕ್ ಪ್ರೊಫೈಲ್ ಅನ್ನು ಮತ್ತಷ್ಟು ಬಲಪಡಿಸಲಿದೆ.

ಕಾಲೇಜು ಜೊತೆ ಸಣ್ಣ ಉದ್ಯಮ ಆರಂಭಿಸಿದ 21 ವರ್ಷದ ವಿದ್ಯಾರ್ಥಿನಿ, 50 ದಿನಕ್ಕೆ 15 ಲಕ್ಷ ರೂ ಆದಾಯ

Chethan Kumar — Sat, 07 Nov 2026 21:33:08 +0530

ಗುರುಗಾಂವ್ (ನ.07) ಅಸೈನ್ಮೆಂಟ್, ಲೈಬ್ರರಿ, ಪರೀಕ್ಷೆ, ಓದು ಇವೆಲ್ಲಾ ಕಾಲೇಜು ದಿನಗಳಲ್ಲಿ ಸಾಮಾನ್ಯ. ಎಲ್ಲಾ ವಿದ್ಯಾರ್ಥಿಗಳು ಈ ವಿಷಯಗಳಲ್ಲೇ ಗಮನ ಕೇಂದ್ರಿಕರಿಸುತ್ತಾರೆ. ಆದರೆ 21 ವರ್ಷದ ಅನನ್ಯಾ ಅಗರ್ವಾಲ್ ಓದು, ಅಸೈನ್ಮೆಂಟ್ ಜೊತೆ ಸಣ್ಣ ಬ್ಯೂಸಿನೆಸ್ ಆರಂಭಿಸಿದ್ದಾಳೆ. ಆದರೆ ಯಶಸ್ಸು ಅಷ್ಟೇ ಬೇಗ ಒಲಿದು ಬಂದಿದೆ. ಉದ್ಯಮ ಆರಂಭಿಸಿದ ಆರಂಭಿಕ 50 ದಿನಗಲ್ಲಿ ಅನನ್ಯಾ 15 ಲಕ್ಷ ರೂಪಾಯಿ ಆದಾಯಗಳಿಸಿದ್ದಾಳೆ. ಇದೀಗ ಅನನ್ಯಾ ಕೇವಲ ವಿದ್ಯಾರ್ಥಿನಿ ಮಾತ್ರವಲ್ಲ, ಉದ್ಯಮಿಯಾಗಿ ಗುರುತಿಸಿಕೊಂಡಿದ್ದಾಳೆ.

ಅನನ್ಯಾ ಅಗರ್ವಾಲ್ ಮ್ಯಾನೇಜ್ಮೆಂಟ್ ಸ್ಟಡೀಸ್ ವಿದ್ಯಾರ್ಥಿನಿ. ಅಂತಿಮ ವರ್ಷದಲ್ಲಿ ಅಧ್ಯಯನ ಮಾಡುತ್ತಿರುವ ಅನನ್ಯಾ ಓದು, ಇತರ ಚಟುವಟಿಕೆ ಮೂಲಕ ಕಾಲೇಜಿನಲ್ಲಿ ಗುರುತಿಸಿಕೊಂಡಿದ್ದಾಳೆ. ಉತ್ತಮ ಅಂಕದೊಂದಿಗೆ ಹಲವು ಇತಿಹಾಸ ರಚಿಸಿದ್ದಾಳೆ. ಇದರ ನಡುವೆ ಗುರುಗಾಂವ್‌ನಲ್ಲಿ ಬಿಸ್ಟ್ರೋ ಸಸ್ಯಾಹಾರಿ ಕೆಫಿ ಆರಂಭಿಸಿದ್ದಾಳೆ. ತಂದೆ, ತಾಯಿ ಪ್ರೋತ್ಸಾಹ, ಬೆಂಬಲ ಜೊತೆ ಈಕೆ ಹೈಜಿನಿಕ್ ಕೆಫೆ ಆರೆಂಭಿಸಿದ್ದಾಳೆ. ಹಾಗಂತ ಇದು ಕೇವಲ ವೆಜಿಟೇರಿಯನ್ ಕೆಫೆ ಮಾತ್ರವಲ್ಲ. ಇದೇ ಕಾರಣದಿಂದ ಈ ಕೆಫೆ ಕ್ಲಿಕ್ ಅತ್ಯಂತ ಜನಪ್ರಿಯವಾಗಿದೆ. ಜೊತೆಗೆ ಭರ್ಜರಿ ಆದಾಯ ತರುತ್ತಿದೆ.

ಹರಟೆಗೂ ಇಲ್ಲಿದೆ ಪ್ರಾಮುಖ್ಯತೆ

ವೆಜಿಟೇರಿಯನ್ ಕೆಫೆಯಲ್ಲಿ ಹಲವು ಬಗೆಯ ಖಾದ್ಯಗಳು , ತಿನಿಸುಗಳು ಲಭ್ಯವಿದೆ. ಜೊತೆಗೆ ಇಲ್ಲಿ ಗೆಳೆಯರು, ಆಪ್ತರು, ಕುಟುಂಬಸ್ಥರ ಹರಟೆಗೂ ಪ್ರಾಮುಖ್ಯತೆ ನೀಡಲಾಗಿದೆ. ಆಹಾರದ ಜೊತೆ ಹರಟೆ, ಮಾತುಕತೆಗೂ ಇಲ್ಲಿ ಆದ್ಯತೆ ನೀಡಲಾಗಿದೆ. ತನ್ನ ಕೆಫೆಯಲ್ಲಿ ಆಹಾರ ಸವಿಯುವ ಪ್ರತಿಯೊಬ್ಬರು ಅದನ್ನು ಎಂಜಾಯ್ ಮಾಡಬೇಕು ಅನ್ನೋ ಉದ್ದೇಶದಿಂದ ಅನನ್ಯಾ ಅಗರ್ವಾಲ್ ಈ ರೀತಿಯ ಕೆಫೆ ಆರಂಭಿಸಿದ್ದಾರೆ. ಹೊಸ ರೀತಿಯ ಆಲೋಚನೆ ಕ್ಲಿಕ್ ಆಗಿದೆ.

ಇಟಾಲಿಯನ್ ಮೆಡಿಟೇರಿಯನ್, ಮೆಕ್ಸಿಕನ್ ಸೇರಿದಂತೆ ಹಲವು ಜನಪ್ರಿಯ ಖಾದ್ಯಗಳಿಗೆ ಭಾರತೀಯ ಫ್ಲೇವರ್ ಸೇರಿಸಲಾಗಿದೆ. ಇಲ್ಲಿನ ಆಹಾರ ಪದ್ಧತಿ, ರುಚಿ ಹಾಗೂ ಸಂಪ್ರದಾಯಕ್ಕೆ ತಕ್ಕಂತೆ ಬ್ಲೆಂಡ್ ಮಾಡಲಾಗಿದೆ. ಹೀಗಾಗಿ ಜನರು ಖಾದ್ಯಗಳನ್ನು ಇಷ್ಟಪಟ್ಟಿದ್ದಾರೆ. ಇದೀಗ ಪ್ರತಿ ದಿನ ಗ್ರಾಹಕರ ಸಂಖ್ಯೆ ಹೆಚ್ಚಾಗುತ್ತಿದೆ.

ಉದ್ಯಮ ಜೊತೆ ಕಾಲೇಜು

ಅಪ್ಪನ ಜೊತೆ ಕೆಫೆ ಆರಂಭಿಸಿದ ಅನನ್ಯಾ ಅಗರ್ವಾಲ್ ಪೋಷಕರ ಉದ್ಯಮ ಅನುಭವವನ್ನು ಬಳಸಿಕೊಂಡಿದ್ದಾರೆ. ಇದು ಅನನ್ಯಾ ಉದ್ಯಮ ಬಹುಬೇಗನೆ ಯಶಸ್ವಿಯಾಗಲು ನೆರವಾಗಿದೆ. ಸದ್ಯ ಅನನ್ಯಾ ಯಶಸ್ವಿ ಉದ್ಯಮಿಯಾಗಿದ್ದರೂ, ತನ್ನ ಕಾಲೇಜು, ಓದು, ಅಧ್ಯಯನ ಕುರಿತು ಹಿಂದೆ ಬಿದ್ದಿಲ್ಲ. ಕಾಲೇಜು ತರಗತಿ, ಪರೀಕ್ಷೆ, ಅಸೈನ್ಮೆಂಟ್ ಜೊತೆ ಉದ್ಯಮವನ್ನು ನಡೆಸುತ್ತಿದ್ದಾರೆ.

ಕೇವಲ 21ನೇ ವಯಸ್ಸಿಗೆ ಅನನ್ಯಾ ಯಶಸ್ವಿಯಾಗಿ ಉದ್ಯಮ ನಡೆಸುತ್ತಿದ್ದಾರೆ. ಕಾಲೇಜು ದಿನಗಳಲ್ಲೇ ತನ್ನ ಆಸಕ್ತಿ ಕ್ಷೇತ್ರದಲ್ಲಿ ತೊಡಗಿಸಿಕೊಂಡಿದ್ದಾರೆ. ಈ ಮೂಲಕ ಭವಿಷ್ಯದ ದಾರಿ ಸ್ಪಷ್ಪಪಡಿಸಿದ್ದಾರೆ. ಜೊತೆಗೆ ಮುಂದಿನ ದಿನಗಳಲ್ಲಿ ಆದಾಯ, ಕೆಲಸ, ಸ್ಯಾಲರಿ ಕುರಿತು ಈಗಲೇ ನಿಖರತೆ ಹೊಂದಿದ್ದಾರೆ.

ಬ್ಯಾಂಕ್ ಆಫ್ ಇಂಡಿಯಾಗೆ ₹19.30 ಕೋಟಿ ವಂಚನೆ: 'ನಟರಾಜ್ ರೈಸ್ ಮಿಲ್ಸ್' ವಿರುದ್ಧ ಸಿಬಿಐ ಎಫ್‌ಐಆರ್ ದಾಖಲು

Gowthami K — Fri, 06 Nov 2026 17:00:45 +0530

ರಾಂಚಿ: ಬ್ಯಾಂಕ್ ಆಫ್ ಇಂಡಿಯಾಗೆ ಸೇರಿದ ಸುಮಾರು ₹19.30 ಕೋಟಿ ಸಾಲದ ಹಣವನ್ನು ದುರುಪಯೋಗಪಡಿಸಿಕೊಂಡು ವಂಚಿಸಿದ ಆರೋಪದ ಮೇಲೆ ನಟರಾಜ್ ರೈಸ್ ಮಿಲ್ಸ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯ ಮಾಜಿ ನಿರ್ದೇಶಕರು ಸೇರಿದಂತೆ ಒಂಬತ್ತು ವ್ಯಕ್ತಿಗಳು ಮತ್ತು ಸಂಸ್ಥೆಗಳ ವಿರುದ್ಧ ಕೇಂದ್ರ ತನಿಖಾ ದಳ ಪ್ರಕರಣ ದಾಖಲಿಸಿದೆ. ಬ್ಯಾಂಕಿನಿಂದ ಪಡೆದ ಸಾಲದ ಹಣವನ್ನು ನಿಗದಿತ ಉದ್ದೇಶಗಳಿಗೆ ಬಳಸದೆ, ಬೇರೆಡೆಗೆ ವರ್ಗಾಯಿಸಲಾಗಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ.

ಸಿಬಿಐನ ಕೋಲ್ಕತ್ತಾ ಮೂಲದ ಆರ್ಥಿಕ ಅಪರಾಧಗಳ ವಿಭಾಗ ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಎಫ್‌ಐಆರ್ ದಾಖಲಿಸಿಕೊಂಡಿದ್ದು, ಸಾಲದ ಹಣದ ದುರುಪಯೋಗ, ಬ್ಯಾಂಕಿಗೆ ಉಂಟಾದ ಆರ್ಥಿಕ ನಷ್ಟ ಹಾಗೂ ಸಂಚಿನಲ್ಲಿ ಭಾಗಿಯಾಗಿರುವವರ ಕುರಿತು ತನಿಖೆ ಆರಂಭಿಸಿದೆ. ನವೆಂಬರ್ 3ರಂದು ಪ್ರಕರಣ ದಾಖಲಾಗಿದ್ದು, ಕೆಲವು ಅಪರಿಚಿತ ಸಾರ್ವಜನಿಕ ಸೇವಕರು ಮತ್ತು ಇತರ ವ್ಯಕ್ತಿಗಳ ಪಾತ್ರದ ಬಗ್ಗೆಯೂ ತನಿಖೆ ನಡೆಯಲಿದೆ.

ಬ್ಯಾಂಕ್ ಆಫ್ ಇಂಡಿಯಾದ ರಾಂಚಿ ವಲಯ ಕಚೇರಿಯ ರಿಕವರಿ ವಿಭಾಗದ ಉಪ ವಲಯ ವ್ಯವಸ್ಥಾಪಕ ಅಸೀಮ್ ಕುಮಾರ್ ನೀಡಿದ ಲಿಖಿತ ದೂರಿನ ಆಧಾರದ ಮೇಲೆ ಸಿಬಿಐ ಈ ಕ್ರಮ ಕೈಗೊಂಡಿದೆ.

2013ರಿಂದ 2025ರವರೆಗೆ ₹20.43 ಕೋಟಿ ಸಾಲ ಪಡೆದಿದ್ದ ಕಂಪನಿ

ಸಿಬಿಐ ಎಫ್‌ಐಆರ್‌ನಲ್ಲಿರುವ ಮಾಹಿತಿಯ ಪ್ರಕಾರ, ನಟರಾಜ್ ರೈಸ್ ಮಿಲ್ಸ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯು 2008ರ ಜುಲೈ 18ರಂದು ಕೋಲ್ಕತ್ತಾದಲ್ಲಿ ನೋಂದಣಿಯಾಗಿತ್ತು. ಅಕ್ಕಿ ಗಿರಣಿ ನಿರ್ವಹಣೆ, ಅಕ್ಕಿ ಸಂಸ್ಕರಣೆ, ಪ್ಯಾಕೇಜಿಂಗ್ ಮತ್ತು ಸಗಟು ವ್ಯಾಪಾರಿಗಳಿಗೆ ಅಕ್ಕಿ ಪೂರೈಕೆ ಮಾಡುವುದು ಸಂಸ್ಥೆಯ ಪ್ರಮುಖ ವ್ಯವಹಾರವಾಗಿತ್ತು.

ಕಂಪನಿಯು ತನ್ನ ವ್ಯಾಪಾರ ಚಟುವಟಿಕೆಗಳನ್ನು ಮುಂದುವರಿಸಲು 2013ರಿಂದ 2025ರ ಅವಧಿಯಲ್ಲಿ ಬ್ಯಾಂಕ್ ಆಫ್ ಇಂಡಿಯಾದಿಂದ ವಿವಿಧ ಸಾಲ ಸೌಲಭ್ಯಗಳನ್ನು ಪಡೆದುಕೊಂಡಿತ್ತು. ಈ ಅವಧಿಯಲ್ಲಿ ಬ್ಯಾಂಕ್ ಒಟ್ಟು ₹20.43 ಕೋಟಿ ಸಾಲ ಮಂಜೂರು ಮಾಡಿತ್ತು ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ. ಈ ಸಾಲದ ಮೊತ್ತದಲ್ಲಿ ₹17 ಕೋಟಿ ನಗದು ಸಾಲ ಸೌಲಭ್ಯ (Cash Credit Limit) ಹಾಗೂ ₹3.43 ಕೋಟಿ ಕಾರ್ಯನಿರತ ಬಂಡವಾಳ ಅವಧಿ ಸಾಲ (Working Capital Term Loan) ಸೇರಿವೆ.

ವ್ಯವಹಾರದ ಅಗತ್ಯತೆಗಳು, ಅಕ್ಕಿ ಖರೀದಿ, ಸಂಸ್ಕರಣೆ, ಪ್ಯಾಕೇಜಿಂಗ್ ಮತ್ತು ಇತರ ಕಾರ್ಯನಿರತ ಬಂಡವಾಳ ವೆಚ್ಚಗಳಿಗೆ ಈ ಸಾಲವನ್ನು ಬಳಸಬೇಕಿತ್ತು. ಆದರೆ, ಕಂಪನಿಯು ಸಾಲದ ಹಣವನ್ನು ನಿಗದಿತ ಉದ್ದೇಶಕ್ಕೆ ಬಳಸದೆ ಬೇರೆಡೆಗೆ ವರ್ಗಾಯಿಸಿದೆ ಎಂಬುದು ಸಿಬಿಐಗೆ ಸಲ್ಲಿಸಿರುವ ದೂರಿನ ಪ್ರಮುಖ ಆರೋಪವಾಗಿದೆ.

ಸಾಲ ಮರುಪಾವತಿ ಮಾಡದ ಹಿನ್ನೆಲೆ; ₹19.30 ಕೋಟಿ ಬಾಕಿ

ಬ್ಯಾಂಕಿನಿಂದ ಸಾಲ ಪಡೆದಿದ್ದರೂ ನಿಗದಿತ ಅವಧಿಯಲ್ಲಿ ಮರುಪಾವತಿ ಮಾಡದ ಕಾರಣ ಕಂಪನಿಯ ಸಾಲದ ಖಾತೆ ಬಾಕಿ ಉಳಿದಿತ್ತು. ಸಾಲದ ಕಂತುಗಳು ಮತ್ತು ಬಡ್ಡಿ ಪಾವತಿಯಲ್ಲಿ ವ್ಯತ್ಯಯ ಉಂಟಾದ ಹಿನ್ನೆಲೆಯಲ್ಲಿ 2025ರ ಜೂನ್ 24ರಂದು ಕಂಪನಿಯ ಸಾಲದ ಖಾತೆಯನ್ನು ಅನುತ್ಪಾದಕ ಆಸ್ತಿ (Non-Performing Asset - NPA) ಎಂದು ವರ್ಗೀಕರಿಸಲಾಗಿತ್ತು.

ಆ ಸಂದರ್ಭದಲ್ಲಿ ಬ್ಯಾಂಕ್‌ಗೆ ಕಂಪನಿಯಿಂದ ಒಟ್ಟು ₹19.30 ಕೋಟಿ ಬಾಕಿ ಬರಬೇಕಿತ್ತು ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಸಾಲದ ಹಣವನ್ನು ದುರುಪಯೋಗಪಡಿಸಿಕೊಂಡಿರುವುದು, ಹಣವನ್ನು ಬೇರೆಡೆಗೆ ವರ್ಗಾಯಿಸಿರುವುದು ಹಾಗೂ ಬ್ಯಾಂಕಿಗೆ ಆರ್ಥಿಕ ನಷ್ಟ ಉಂಟುಮಾಡಲು ಸಂಚು ರೂಪಿಸಿರುವ ಸಾಧ್ಯತೆಯ ಬಗ್ಗೆ ಸಿಬಿಐ ತನಿಖೆ ನಡೆಸುತ್ತಿದೆ.

ಕಂಪನಿ, ಅದರ ನಿರ್ದೇಶಕರು ಮತ್ತು ಮಾಜಿ ನಿರ್ದೇಶಕರು ಇತರ ವ್ಯಕ್ತಿಗಳ ಜತೆ ಸೇರಿ ಬ್ಯಾಂಕಿಗೆ ವಂಚನೆ ಎಸಗಿದ್ದಾರೆ ಎಂಬ ಆರೋಪವನ್ನು ಎಫ್‌ಐಆರ್‌ನಲ್ಲಿ ದಾಖಲಿಸಲಾಗಿದೆ.

ಎಫ್ಐಆರ್‌ನಲ್ಲಿ ಹೆಸರಿಸಲಾಗಿರುವ 9 ಆರೋಪಿಗಳು, ಐವರು ಮಾಜಿ ನಿರ್ದೇಶಕರು

ಸಿಬಿಐ ದಾಖಲಿಸಿರುವ ಎಫ್‌ಐಆರ್‌ನಲ್ಲಿ ನಟರಾಜ್ ರೈಸ್ ಮಿಲ್ಸ್ ಸಂಸ್ಥೆ, ಅದರ ಮಾಜಿ ನಿರ್ದೇಶಕರು ಹಾಗೂ ಸಾಲದ ಹಣ ವರ್ಗಾವಣೆಗೊಂಡ ಸಂಬಂಧಿತ ಹೂಡಿಕೆ ಸಂಸ್ಥೆಗಳನ್ನು ಪ್ರಮುಖ ಆರೋಪಿಗಳನ್ನಾಗಿ ಸೇರಿಸಲಾಗಿದೆ:

ಮೆಸರ್ಸ್ ನಟರಾಜ್ ರೈಸ್ ಮಿಲ್ಸ್ ಪ್ರೈವೇಟ್ ಲಿಮಿಟೆಡ್

ವಿವೇಕ್ ಕುಮಾರ್ ಬಾಂಕಾ (ಮಾಜಿ ನಿರ್ದೇಶಕ)

ನೀಲು ಬಾಂಕಾ (ಮಾಜಿ ನಿರ್ದೇಶಕಿ)

ನೀರಜ್ ಕುಮಾರ್ ಬಾಂಕಾ (ಮಾಜಿ ನಿರ್ದೇಶಕ)

ಸಂದೀಪ್ ಕುಮಾರ್ (ಮಾಜಿ ನಿರ್ದೇಶಕ - ರಾಂಚಿ)

ರಿತೇಶ್ ಕುಮಾರ್ ಬಿಂಜರಾಜ್‌ಕಾ (ಮಾಜಿ ನಿರ್ದೇಶಕ - ರಾಂಚಿ)

ಮೆಸರ್ಸ್ ಡಿಲೈಟ್ ಇನ್ವೆಸ್ಟ್‌ಮೆಂಟ್ ಕನ್ಸಲ್ಟೆಂಟ್ಸ್ ಪ್ರೈವೇಟ್ ಲಿಮಿಟೆಡ್

ಮೆಸರ್ಸ್ ಲಕ್ಷ್ಮಿ ಡೀಲ್‌ಮಾರ್ಕ್ ಪ್ರೈವೇಟ್ ಲಿಮಿಟೆಡ್

ಮೆಸರ್ಸ್ ತಿರುಪತಿ ಸ್ಟಾಕ್ ಕನ್ಸಲ್ಟೆಂಟ್ಸ್ ಪ್ರೈವೇಟ್ ಲಿಮಿಟೆಡ್

ಈ ಸಂಸ್ಥೆಗಳ ಮೂಲಕ ಸಾಲದ ಹಣವನ್ನು ಬೇರೆಡೆಗೆ ವರ್ಗಾಯಿಸಲಾಗಿದೆಯೇ ಅಥವಾ ಹಣಕಾಸಿನ ವಹಿವಾಟುಗಳಲ್ಲಿ ಅವುಗಳ ಪಾತ್ರವೇನಾದರೂ ಇದೆಯೇ ಎಂಬ ಅಂಶಗಳನ್ನು ತನಿಖೆ ಮಾಡಲಾಗುತ್ತಿದೆ.

ಇದರ ಜತೆಗೆ, ಪ್ರಕರಣದಲ್ಲಿ ಭಾಗಿಯಾಗಿರುವ ಶಂಕೆಯಿರುವ ಅಪರಿಚಿತ ಸಾರ್ವಜನಿಕ ಸೇವಕರು ಮತ್ತು ಇತರ ವ್ಯಕ್ತಿಗಳ ವಿರುದ್ಧವೂ ಎಫ್‌ಐಆರ್ ದಾಖಲಿಸಲಾಗಿದೆ. ಬ್ಯಾಂಕ್ ಸಾಲ ಮಂಜೂರಾತಿ, ಹಣದ ವರ್ಗಾವಣೆ ಹಾಗೂ ಸಂಬಂಧಿತ ಹಣಕಾಸು ವಹಿವಾಟುಗಳಲ್ಲಿ ಯಾವುದೇ ಅಧಿಕಾರಿಗಳು ಭಾಗಿಯಾಗಿದ್ದಾರೆಯೇ ಎಂಬುದನ್ನು ಸಿಬಿಐ ಪರಿಶೀಲಿಸಲಿದೆ.

ಬ್ಯಾಂಕ್ ವಂಚನೆ ಪ್ರಕರಣದ ತನಿಖೆ ಚುರುಕುಗೊಳಿಸಿದ ಸಿಬಿಐ

ಈ ಪ್ರಕರಣದ ತನಿಖೆಯನ್ನು ಸಿಬಿಐನ ಕೋಲ್ಕತ್ತಾ ಆರ್ಥಿಕ ಅಪರಾಧಗಳ ವಿಭಾಗ ಕೈಗೆತ್ತಿಕೊಂಡಿದೆ. ಸಾಲದ ಹಣವನ್ನು ಕಂಪನಿ ಯಾವ ಉದ್ದೇಶಕ್ಕೆ ಬಳಸಿದೆ, ಹಣವನ್ನು ಯಾವ ಖಾತೆಗಳಿಗೆ ವರ್ಗಾಯಿಸಲಾಗಿದೆ ಮತ್ತು ಈ ವಹಿವಾಟುಗಳಲ್ಲಿ ಮಾಜಿ ನಿರ್ದೇಶಕರು ಹಾಗೂ ಇತರ ಸಂಸ್ಥೆಗಳ ಪಾತ್ರವೇನು ಎಂಬುದರ ಕುರಿತು ತನಿಖೆ ನಡೆಯಲಿದೆ. ಅಲ್ಲದೆ, ಬ್ಯಾಂಕಿಗೆ ನಷ್ಟ ಉಂಟಾಗಲು ಕಾರಣವಾದ ಹಣಕಾಸಿನ ವಹಿವಾಟುಗಳು ಮತ್ತು ಸಂಭಾವ್ಯ ಅಕ್ರಮಗಳ ಬಗ್ಗೆಯೂ ಅಧಿಕಾರಿಗಳು ಮಾಹಿತಿ ಸಂಗ್ರಹಿಸಲಿದ್ದಾರೆ.

ಒಟ್ಟಿನಲ್ಲಿ, ಬ್ಯಾಂಕ್ ಆಫ್ ಇಂಡಿಯಾಗೆ ₹19.30 ಕೋಟಿ ನಷ್ಟ ಉಂಟುಮಾಡಿದ ಆರೋಪಕ್ಕೆ ಸಂಬಂಧಿಸಿದಂತೆ ನಟರಾಜ್ ರೈಸ್ ಮಿಲ್ಸ್ ಪ್ರೈವೇಟ್ ಲಿಮಿಟೆಡ್ ಹಾಗೂ ಅದರ ಮಾಜಿ ನಿರ್ದೇಶಕರು ಮತ್ತು ಸಂಬಂಧಿತ ಸಂಸ್ಥೆಗಳ ವಿರುದ್ಧ ಸಿಬಿಐ ತನಿಖೆ ಆರಂಭಿಸಿದೆ. ಪ್ರಕರಣದ ಮುಂದಿನ ತನಿಖೆಯಲ್ಲಿ ಸಾಲದ ಹಣದ ವರ್ಗಾವಣೆ ಮತ್ತು ವಂಚನೆ ಆರೋಪಗಳ ಕುರಿತು ಹೆಚ್ಚಿನ ಮಾಹಿತಿ ಹೊರಬರುವ ನಿರೀಕ್ಷೆಯಿದೆ.

ಚಿನ್ನದ ಬೆಲೆ ವಿಶ್ವದಲ್ಲಿ ಶೇ.24, ಭಾರತದಲ್ಲಿ ಶೇ.20 ಕುಸಿತ; ಶೇ.4 ವ್ಯತ್ಯಾಸ ಏಕೆ?

Mahmad Rafik — Sun, 08 Nov 2026 13:26:13 +0530

Gold Price ಜಾಗತಿಕ ಮಟ್ಟದಲ್ಲಿ ಚಿನ್ನದ ಬೆಲೆ ಶೇ.24ರಷ್ಟು ಕುಸಿದಿದ್ದರೆ, ಭಾರತದಲ್ಲಿ ಕೇವಲ ಶೇ.20ರಷ್ಟು ಕಡಿಮೆಯಾಗಿದೆ. ಜನವರಿ 29ರ ಬೆಲೆಗೆ ಹೋಲಿಸಿದ್ರೆ ಭಾರತದಲ್ಲಿ ಚಿನ್ನದ ಬೆಲೆಯಲ್ಲಿ ಶೇ.20ರಷ್ಟು ಮಾತ್ರ ಕಡಿಮೆಯಾಗಿದೆ.

ಇತ್ತೀಚೆಗೆ ಜಾಗತಿಕ ಮಾರುಕಟ್ಟೆಯಲ್ಲಿ ಚಿನ್ನದ ಬೆಲೆ ಕುಸಿತವಾಗುತ್ತಿದೆ. ಶುಕ್ರವಾರ ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಸ್ಪಾಟ್ ಚಿನ್ನದ ಬೆಲೆಗಳು ಪ್ರತಿ ಔನ್ಸ್‌ಗೆ $4,068.71 ಕ್ಕೆ ಅಂತ್ಯಗೊಂಡಿವೆ. 29ನೇ ಜನವರಿ 2026ರ ಬೆಲೆ ಹೋಲಿಸಿದ್ರೆ ಶುಕ್ರವಾರದ ದರಕ್ಕೆ ಶೇ.24ರಷ್ಟು ಕಡಿಮೆಯಾಗಿದೆ. ಆದ್ರೆ ಭಾರತದಲ್ಲಿ ಮಾತ್ರ ಶೇ.20ರಷ್ಟು ಚಿನ್ನದ ಬೆಲೆ ಕುಸಿತಗೊಂಡಿದೆ.

ಅಖಿಲ ಭಾರತ ಸರಾಫಾ ಅಸೋಸಿಯೇಷನ್ ಪ್ರಕಾರ, ಜನವರಿ 29ರಂದ ದೇಶದಲ್ಲಿ ಚಿನ್ನದ ಬೆಲೆ 1,83,000 ರೂ.ಯ ಗರಿಷ್ಟಮಟ್ಟಕ್ಕೆ ತಲುಪಿತ್ತು. ಆದ್ರೆ ಧನ್‌ತರೇಸದ ವೇಳೆ ರಾಜಧಾನಿ ದೆಹಲಿಯ ಮಾರುಕಟ್ಟೆಯಲ್ಲಿ 99.9% ಶುದ್ಧ ಚಿನ್ನವು 10 ಗ್ರಾಂಗೆ ₹146,300 ಕ್ಕೆ ಮುಕ್ತಾಯಗೊಂಡಿದೆ. ಶುಕ್ರವಾರ ಮತ್ತು ಜನವರಿ 29ರ ಬೆಲೆಗೆ ಹೋಲಿಸಿದ್ರೆ ಭಾರತದಲ್ಲಿ ಚಿನ್ನದ ಬೆಲೆಯಲ್ಲಿ ಶೇ.20ರಷ್ಟು ಮಾತ್ರ ಕಡಿಮೆಯಾಗಿದೆ.

ಸರ್ಕಾರದ ತೆರಿಗೆ ನೀತಿ ಮತ್ತು ಕರೆನ್ಸಿ ಮಾರುಕಟ್ಟೆಯಲ್ಲಿನ ಬದಲಾವಣೆಯಿಂದಾಗಿ ಭಾರತದಲ್ಲಿ ಚಿನ್ನದ ಬೆಲೆ ಶೇ.4ರಷ್ಟು ವ್ಯತ್ಯಾಸವಾಗುತ್ತದೆ. ಭಾರತವು ಅತ್ಯಧಿಕವಾಗಿ ಚಿನ್ನವನ್ನು ಆಮದು ಮಾಡಿಕೊಳ್ಳುತ್ತದೆ. ಈ ಕಾರಣದಿಂದಾಗಿ ದೇಶದಲ್ಲಿ ಚಿನ್ನದ ಬೆಲೆಗಳು ಅಂತರರಾಷ್ಟ್ರೀಯ ಚಿನ್ನದ ದರದ ಜೊತೆಗೆ ಎರಡು ಪ್ರಮುಖ ಅಂಶಗಳಿಂದ ನಿರ್ಧರಿಸಲ್ಪಡುತ್ತವೆ.

ಜನವರಿಯಲ್ಲಿ ಚಿನ್ನದ ಬೆಲೆ ಗರಿಷ್ಠ ಮಟ್ಟ ತಲುಪಿದ ಸಂದರ್ಭದಲ್ಲಿ ಸರ್ಕಾರ ಬಂಗಾರದ ಮೇಲೆ ಶೇ.6ರಷ್ಟು ತೆರಿಗೆ ವಿಧಿಸಿತ್ತು. ಮೇ 13ರಂದು ಈ ಆಮದು ಸುಂಕ ಶೇ.6 ರಿಂದ ಶೇ.15ಕ್ಕೇರಿಕೆಯಾಗಿತ್ತು. ಇದರಲ್ಲಿ ಇದರಲ್ಲಿ 10% ಮೂಲ ಕಸ್ಟಮ್ಸ್ ಸುಂಕ ಮತ್ತು 5% ಕೃಷಿ ಮೂಲಸೌಕರ್ಯ ಸೆಸ್ ಸೇರಿದೆ. ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಬೆಲೆ ಕುಸಿತವಾದ್ರೂ Import Tax ಹೆಚ್ಚಿರೋ ಕಾರಣ ವ್ಯತ್ಯಾಸವನ್ನು ಕಾಣಬಹುದು.

ಚಿನ್ನದ ಬೆಲೆಯನ್ನು ಡಾಲರ್ ರೂಪದಲ್ಲಿ ನಿಗಧಿಪಡಿಸಲಾಗುತ್ತದೆ. ರೂಪಾಯಿ ಮೌಲ್ಯ ದುರ್ಬಲಗೊಂಡ್ರೆ ಜಾಗತಿಕ ಮಾರುಕಟ್ಟೆಯಲ್ಲಿ ಯಾವುದೇ ಬದಲಾವಣೆ ಇಲ್ಲದಿದ್ದರೂ ಸ್ಥಳೀಯವಾಗಿ ಚಿನ್ನದ ಬೆಲೆ ಏರಿಕೆಯಾಗುತ್ತದೆ. ಜನವರಿ 29ರಲ್ಲಿ ಡಾಲರ್ ವಿರುದ್ಧ ರೂಪಾಯಿ ಮೌಲ್ಯ 92ರ ಆಸುಪಾಸನಲ್ಲಿತ್ತು.

ಇದು ಇದುವರೆಗಿನ ಅತ್ಯಂತ ಕಡಿಮೆ ಮಟ್ಟವಾಗಿತ್ತು. ರೂಪಾಯಿ ಮೌಲ್ಯ ಕುಸಿತವಾದ್ರೆ ಹೆಚ್ಚಿನ ಡಾಲರ್ ನೀಡಿ ಚಿನ್ನ ಖರೀದಿಸಬೇಕಾಗುತ್ತದೆ. ಹಾಗಾಗಿ ಜಾಗತಿಕ ಮತ್ತು ಭಾರತದ ಮಾರುಕಟ್ಟೆ ನಡುವೆ ಚಿನ್ನದ ಬೆಲೆಯಲ್ಲಿ ವ್ಯತ್ಯಾಸ ಕಾಣಬಹುದು.

ರಿಲಯನ್ಸ್ ಜಿಯೋ ಉದ್ಯಮದಲ್ಲೇ ಇದೇ ಮೊದಲು, ಭರ್ಜರಿ ಆಫರ್ಸ್, ಒಂದೇ ಒಂದು ರಿಚಾರ್ಜ್, 3 ವರ್ಷಗಳವರೆಗೆ ಟೆನ್ಷನ್ ಫ್ರೀ!

Ravi Janekal — Sat, 07 Nov 2026 08:28:03 +0530

Reliance Jio ದೀಪಾವಳಿಗೆ ಒಂದು ದಿನ ಮೊದಲೇ ಜಿಯೋ ಬಳಕೆದಾರರಿಗೆ ಭರ್ಜರಿ ಗಿಫ್ಟ್ ನೀಡಿದೆ. ಇದೇ ಮೊದಲ ಬಾರಿಗೆ ಬರೋಬ್ಬರಿ 10,000 ರೂ. ಬೆಲೆಯ ಮೂರು ವರ್ಷಗಳ ಅನ್‌ಲಿಮಿಟೆಡ್ ಪ್ಲಾನ್ ಲಾಂಚ್ ಮಾಡಿದೆ. ಅಂದರೆ ಗ್ರಾಹಕರು ಒಮ್ಮೆ ಈ ಪ್ಲಾನ್ ರಿಚಾರ್ಜ್ ಮಾಡಿಸಿದರೆ ಮುಂದಿನ ಮೂರು ವರ್ಷಗಳವರೆಗೆ ಮತ್ತೆ ರಿಚಾರ್ಜ್ ಮಾಡಿಸುವ ಗೊಡವೆಯೇ ಬರೋಲ್ಲ. ನಿರಂತರ ಫೋನ್ ಕಾಲ್, ಮನರಂಜನೆ, ಓಟಿಟಿ ಸ್ಟ್ರೀಮಿಂಗ್, ಸಾಫ್ಟ್‌ವೇರ್ ಅಪ್ಡೇಟ್, ಕ್ಲೌಡ್ ಸ್ಟೋರೇಜ್ ಇನ್ನು ಅನೇಕ ಪ್ರಯೋಜನಗಳನ್ನು ಒಂದೇ ರಿಚಾರ್ಜ್ ಪ್ಲಾನ್‌ನಲ್ಲಿ ಪಡೆಯಬಹುದು.

ಪದೇ ಪದೆ ರಿಚಾರ್ಜ್ ಮಾಡಿಸುವ ಬದಲು ಒಮ್ಮೆ ರಿಚಾರ್ಜ್ ಮಾಡಿಸುವುದರಿಂದ ಮುಂದಿನ ಮೂರು ವರ್ಷಗಳವರೆಗೆ ಮೊಬೈಲ್ ವ್ಯಾಲಿಡಿಟಿ ಮುಗಿತಾ, ಡಾಟಾ ಖಾಲಿ ಆಯ್ತಾ ಅಂತಾ ಚೆಕ್ ಮಾಡುವ ಪ್ರಮೇಯವೇ ಬರುವುವದಿಲ್ಲ. ದೀರ್ಘಾವಧಿಯವರೆಗೆ ವ್ಯಾಲಿಡಿಟಿಗಾಗಿ ಈ ರಿಚಾರ್ಜ್ ಪ್ಲಾನ್ ವಿನ್ಯಾಸಗೊಳಿಸಲಾಗಿದೆ ಎಂದು ಜಿಯೋ ಹೇಳಿದೆ. ಈಗ ರಿಚಾರ್ಜ್ ಮಾಡಿಸುವುದರಿಂದ ಪ್ರಸ್ತುತ ಸುಂಕದ ಬೆಲೆ(Tariff price), ಆಫರ್‌ಗಳನ್ನು ಮುಂದಿನ 36 ತಿಂಗಳವರೆಗೆ ಪಡೆಯಬಹುದು.

ರಿಲಯನ್ಸ್ ಜಿಯೋ 10,000 ರೂ. ಪ್ಲಾನ್ ಹೇಗಿದೆ?

ಜಿಯೋ 10,000 ಬೆಲೆಯ ರಿಚಾರ್ಜ್ ಪ್ಲಾನ್ ಹೇಗಿದೆ, ಆಫರ್‌ಗಳೇನು ಎಂದರೆ ಒಮ್ಮೆ 10,000 ರೂಪಾಯಿ ಬೆಲೆ ಪ್ಲಾನ್ ರಿಚಾರ್ಜ್ ಮಾಡಿಸಿದರೆ ಮೂರು ವರ್ಷಗಳವರೆಗೆ ಅನ್‌ಲಿಮಿಟೆಡ್ ಪ್ರಯೋಜನ ಪಡೆಯಬಹುದು. ಇದು ಇಂದಿನಿಂದ ಅಂದರೆ(ನವೆಂಬರ್ 7) ದೇಶಾದ್ಯಂತ ಬಿಡುಗಡೆಯಾಗಿದೆ. Myjio ಅಪ್ಲಿಕೇಶನ್ ಅಥವಾ ಅಧಿಕೃತ jio.com ಪೋರ್ಟಲ್ ಮೂಲಕ ರೀಚಾರ್ಜ್ ಮಾಡಿಸಬಹುದು. ನಿಮಗೆ ಆನ್‌ಲೈನ್ ರೀಚಾರ್ಜ್ ತಿಳಿಯದಿದ್ದರೆ ಸಮೀಪದ ಜಿಯೋ ರಿಚಾರ್ಜ್ ಸೌಲಭ್ಯವಿರುವ ಅಂಗಡಿಗಳು, ಮೊಬೈಲ್ ಸರ್ವಿಸ್, ರಿಚಾರ್ಜ್ ಮಾಡುವ ಅಂಗಡಿಗಳಲ್ಲೂ ಈ ಪ್ಲಾನ್ ರಿಚಾರ್ಜ್ ಮಾಡಿಸಬಹುದು

ಜಿಯೋ 10,000 ರೂಪಾಯಿ ರಿಚಾರ್ಜ್ ಪ್ಲಾನ್ ಆಫರ್‌ಗಳೇನು?

ರಿಲಯನ್ಸ್ ಜಿಯೋ ಹೊಸ ಪ್ಲಾನ್ 10,000 ರೂಪಾಯಿ ಬೆಲೆ ರಿಚಾರ್ಜ್ ಮಾಡಿಸುವುದರಿಂದ ನೀವು ಮೂರು ವರ್ಷಗಳವರೆಗೆ ವ್ಯಾಲಿಡಿಟಿ ಪಡೆಯುವಿರಿ, ಈ ವ್ಯಾಲಿಡಿಟಿ ಮುಗಿಯುವವರಿಗೆ ಅನಿಯಮಿತ ಕರೆ ಅಷ್ಟೇ ಅಲ್ಲದೆ ಹಲವು ಸೌಲಭ್ಯಗಳನ್ನು ಇದರಲ್ಲಿ ಪಡೆಯಬಹುದು. ಅವುಗಳು ಯಾವ್ಯಾವು ಎಂದು ಕೆಳಗಿನ ಪಟ್ಟಿಯಲ್ಲಿ ವಿವರಿಸಲಾಗಿದೆ.

ವಾಯ್ಸ್ ಕಾಲ್: ಎಲ್ಲ ನೆಟ್‌ವರ್ಕ್‌ಗಳಲ್ಲೂ ಮೂರು ವರ್ಷಗಳವರೆಗೆ ನಿಜವಾಗಲೂ ಅನ್‌ಲಿಮಿಟೆಡ್ ಕಾಲ್ ಮಾಡಬಹುದು.
ದಿನಕ್ಕೆ 2.5 GB ಹೈ-ಸ್ಪೀಡ್ ಡೇಟಾ ಸಿಗಲಿದೆ.
5G ಡೇಟಾ ಸಿಗಲಿದೆ.
ದಿನಕ್ಕೆ 100 SMS ಫ್ರೀ.
ವ್ಯಾಲಿಡಿಟಿ ಮೂರು ವರ್ಷಗಳವರೆಗೆ ಇರುತ್ತದೆ.
ಜಿಯೋ ಹಾಟ್‌ಸ್ಪಾಟ್ ಮೊಬೈಲ್+ ಹಾಲಿವುಡ್ ಲೈವ್ ಸ್ಪೋರ್ಟ್ಸ್, ಹಾಟ್ ಸ್ಟಾರ್, ಒರಿಜಿನಲ್ಸ್ ಪ್ರಿಮಿಯಂ ಶೋಗಳು, ಹಾಲಿವುಡ್ ಬ್ಲಾಕ್‌ಬಸ್ಟರ್‌ಗಳನ್ನು ಸ್ಕ್ರೀಮ್ ಮಾಡಬಹದು.
ಕ್ಯಾನ್ವಾ ಪ್ರೋ ಲೈಟ್(Canva pro) ಫ್ರೀ. ಇದರಿಂದ ಟೆಂಪ್ಲೆಟ್‌ಗಳು, ಇಮೇಜ್, ವಿಡಿಯೋ ಎಡಿಟ್ ಟೂಲ್ಸ್ 12 ತಿಂಗಳು ಉಚಿತವಾಗಿ ಸಿಗಲಿದೆ.
ಜಿಯೋ ಎಐ 50GB ಸಾಮರ್ಥ್ಯದ ಕ್ಲೌಡ್(Jio AI Cloud) ಫ್ರೀ. ಇದರಿಂದಾಗಿ ಫೋಟೋಗಳು, ಡಾಕ್ಯುಮೆಂಟ್ ಅಥವಾ ಫೈಲ್‌ಗಳು ಸುರಕ್ಷಿತವಾಗಿ ಸೇವ್ ಮಾಡಿಟ್ಟುಕೊಳ್ಳಲು ಅನುಕೂಲ.

ಮೂರು ವರ್ಷಗಳ ವ್ಯಾಲಿಡಿಟಿ ಇರುವ ಈ ರಿಚಾರ್ಜ್ ಪ್ಲಾನ್ ಮಾಡಿಸುವುದರಿಂದ ಪದೇಪದೆ ರೀಚಾರ್ಜ್ ಮಾಡಿಸುವುದು ತಪ್ಪುತ್ತದೆ, ಇಂಟರ್‌ನೆಟ್ ಸ್ಲೋ ಸಮಸ್ಯೆ ಇಲ್ಲ, 5G ಹೈ-ಸ್ಪೀಡ್ ನೆಟ್ವರ್ಕ್ ಜೊತೆಗೆ ಜಿಯೋ ಎಐ ಕ್ಲೌಡ್ ಸೌಲಭ್ಯವೂ ಸಿಗುತ್ತದೆ

ಪಾನಿಪುರಿ ಮಾರಿ ಸ್ವಂತ ಮನೆ, ಸ್ಕಾರ್ಪಿಯೋ SUV ಖರೀದಿ! ತಿಂಗಳಿಗೆ ₹1.2 ಲಕ್ಷ ಲಾಭ ಗಳಿಸುವ ವ್ಯಾಪಾರಿಯ ರೋಚಕ ಕಥೆ!

Chandrashekar GS — Fri, 06 Nov 2026 16:10:42 +0530

ಪಾನಿಪುರಿ ಮಾರಾಟದಿಂದಲೇ ತಿಂಗಳಿಗೆ ₹1.2 ಲಕ್ಷ ಲಾಭ! IIT ಪದವೀಧರರನ್ನೇ ಅಚ್ಚರಿಗೊಳಿಸಿದ ವ್ಯಾಪಾರಿ

ಸಾಮಾನ್ಯವಾಗಿ ಪಾನಿಪುರಿ ಮಾರುವವರನ್ನು ನೋಡಿದಾಗ ಸಣ್ಣ ವ್ಯಾಪಾರ, ಸೀಮಿತ ಆದಾಯ ಎಂದೇ ಅನೇಕರು ಭಾವಿಸುತ್ತಾರೆ. ಆದರೆ ಒಬ್ಬ ಪಾನಿಪುರಿ ವ್ಯಾಪಾರಿಯ ಗಳಿಕೆಯ ಕಥೆ ಕೇಳಿದರೆ ನೀವು ಕೂಡ ಅಚ್ಚರಿಪಡುತ್ತೀರಿ. ಒಂದೇ ಪಾನಿಪುರಿ ಸ್ಟಾಲ್‌ನಿಂದ ತಿಂಗಳಿಗೆ ಬರೋಬ್ಬರಿ ₹1.2 ಲಕ್ಷ ಲಾಭ ಗಳಿಸುತ್ತಿರುವ ವ್ಯಕ್ತಿಯೊಬ್ಬರು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದ್ದಾರೆ. ಅಷ್ಟೇ ಅಲ್ಲ, ಅವರ ಬಳಿ ಸ್ವಂತ ಮನೆ ಮತ್ತು ಸ್ಕಾರ್ಪಿಯೋ ಕಾರು ಕೂಡ ಇದೆಯಂತೆ!

IIT ಪದವೀಧರರನ್ನೇ ಬೆರಗುಗೊಳಿಸಿದ ಪಾನಿಪುರಿ ವ್ಯಾಪಾರಿ!

IIT ಗುವಾಹಟಿ, IIT ದೆಹಲಿ, IIT ಕಾನ್ಪುರ ಮತ್ತು IIT ಹೈದರಾಬಾದ್‌ನಲ್ಲಿ ಓದಿದ ನಾಲ್ವರು ಸ್ನೇಹಿತರು ಈ ಪಾನಿಪುರಿ ವ್ಯಾಪಾರಿಯನ್ನು ಭೇಟಿಯಾಗಿದ್ದರು. ಈ ವೇಳೆ ಅವರ ವ್ಯಾಪಾರದ ಬಗ್ಗೆ ಮಾತನಾಡಿದಾಗ ಅಚ್ಚರಿಯ ಸಂಗತಿಗಳು ಬೆಳಕಿಗೆ ಬಂದಿವೆ.

IIT ಗುವಾಹಟಿಯ ಪದವೀಧರೆ ವೈಷ್ಣವಿ ಶ್ರೀವಾಸ್ತವ್ ಈ ಭೇಟಿಯ ವಿಡಿಯೋವನ್ನು ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ. ವ್ಯಾಪಾರಿಯೊಬ್ಬರು ತಮ್ಮ ಒಂದೇ ಸ್ಟಾಲ್‌ನಿಂದ ತಿಂಗಳಿಗೆ ₹1.2 ಲಕ್ಷ ಲಾಭ ಗಳಿಸುತ್ತಾರೆ ಎಂದು ತಿಳಿದಾಗ ಯುವಕರು ನಿಜಕ್ಕೂ ಬೆರಗಾಗಿದ್ದಾರೆ. ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ ಇದು ಒಟ್ಟು ಮಾರಾಟದ ಮೊತ್ತವಲ್ಲ, ಖರ್ಚುಗಳನ್ನು ಕಳೆದು ಉಳಿಯುವ ಲಾಭ ಎಂದು ವಿಡಿಯೋದಲ್ಲಿ ತಿಳಿಸಲಾಗಿದೆ.

ದಿನಕ್ಕೆ ಕೇವಲ 6 ಗಂಟೆ ಕೆಲಸ, ನಾಲ್ಕು ಸ್ಟಾಲ್‌ಗಳ ಮಾಲೀಕ!

ಈ ವ್ಯಾಪಾರಿಯ ಕೆಲಸದ ಸಮಯ ಕೂಡ ಯುವಕರ ಅಚ್ಚರಿಗೆ ಕಾರಣವಾಗಿದೆ. ಅವರು ಸಂಜೆ 4 ಗಂಟೆಗೆ ವ್ಯಾಪಾರ ಆರಂಭಿಸಿ ರಾತ್ರಿ 10 ಗಂಟೆಗೆ ಮುಗಿಸುತ್ತಾರಂತೆ. ಅಂದರೆ ದಿನಕ್ಕೆ ಸುಮಾರು ಆರು ಗಂಟೆಗಳ ಕಾಲ ಸ್ಟಾಲ್‌ನಲ್ಲಿ ಕೆಲಸ ಮಾಡುತ್ತಾರೆ.

ಇನ್ನೊಂದು ಅಚ್ಚರಿಯ ಸಂಗತಿಯೆಂದರೆ, ಅವರು ಒಂದೇ ಸ್ಟಾಲ್ ನಡೆಸುತ್ತಿಲ್ಲ. ಒಟ್ಟು ನಾಲ್ಕು ಪಾನಿಪುರಿ ಸ್ಟಾಲ್‌ಗಳನ್ನು ಹೊಂದಿದ್ದಾರೆ ಎಂದು ಯುವಕರು ವಿಡಿಯೋದಲ್ಲಿ ಹೇಳಿದ್ದಾರೆ. ನಾಲ್ಕೂ ಸ್ಟಾಲ್‌ಗಳಿಂದ ಸೇರಿ ತಿಂಗಳಿಗೆ ₹4.5 ಲಕ್ಷಕ್ಕೂ ಹೆಚ್ಚು ಲಾಭ ಗಳಿಸುತ್ತಾರೆ ಎಂಬುದು ಅವರ ಹೇಳಿಕೆ.

ಸ್ವಂತ ಮನೆ, ಸ್ಕಾರ್ಪಿಯೋ ಕಾರು ಕೂಡ ಇದೆ!

ವ್ಯಾಪಾರಿಯ ಬಳಿ ಸ್ವಂತ ಮನೆ ಇರುವುದಲ್ಲದೆ, ಸ್ಕಾರ್ಪಿಯೋ ಎಸ್‌ಯುವಿ ಕಾರು ಕೂಡ ಇದೆಯಂತೆ. ಈ ವಿಚಾರ ತಿಳಿದಾಗ ಯುವಕರ ಅಚ್ಚರಿ ಮತ್ತಷ್ಟು ಹೆಚ್ಚಾಗಿದೆ. ಈ ವಿಡಿಯೋಗೆ 'ಕಾರ್ಪೊರೇಟ್ ಉದ್ಯೋಗಿಗಳ ಜೀವನವೋ ಅಥವಾ ಸ್ವಂತ ಉದ್ಯಮಿಯ ಜೀವನವೋ?' ಎಂಬ ಚರ್ಚೆಯೂ ಶುರುವಾಗಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಹಲವರು ವ್ಯಾಪಾರಿಯ ಪರಿಶ್ರಮ ಮತ್ತು ಉದ್ಯಮಶೀಲತೆಯನ್ನು ಮೆಚ್ಚಿದ್ದಾರೆ. ಆದರೆ ಪಾನಿಪುರಿ ವ್ಯಾಪಾರದಲ್ಲಿ ತಯಾರಿ, ಸಾಮಗ್ರಿಗಳ ಖರೀದಿ, ಸ್ವಚ್ಛತೆ ಮತ್ತು ನಿರ್ವಹಣೆ ಸೇರಿದಂತೆ ಹಲವು ಕೆಲಸಗಳಿರುತ್ತವೆ ಎಂಬ ಅಭಿಪ್ರಾಯವನ್ನೂ ಕೆಲವರು ವ್ಯಕ್ತಪಡಿಸಿದ್ದಾರೆ.

View this post on Instagram

A post shared by Vaishnavi Srivastav (@vaish.on.break)