Asianet Suvarna News

2026-27ರಲ್ಲಿ ಸಕ್ಕರೆ ಆಧಾರಿತ ಎಥೆನಾಲ್‌ ಖರೀದಿಸದಿರಲು ಕೇಂದ್ರ ಸರ್ಕಾರ ನಿರ್ಧಾರ, ಸಕ್ಕರೆ ಅಭಾವದ ಕಾರಣ ಈ ಕ್ರಮ

Gowthami K — Mon, 19 Oct 2026 09:01:36 +0530

ನವದೆಹಲಿ: 2026-27ನೇ ಸಾಲಿನಲ್ಲಿ ಕೇಂದ್ರ ಸರ್ಕಾರ ಅಧೀನದ ತೈಲ ಕಂಪನಿಗಳು ಸಕ್ಕರೆ ಆಧಾರಿತ ಕಚ್ಚಾವಸ್ತುಗಳಿಂದ ತಯಾರಿಸುವ ಎಥೆನಾಲ್‌ ಖರೀದಿಸದಿರಲು ನಿರ್ಧರಿಸಿವೆ. ಮಳೆ ಅಭಾವ ಹಾಗೂ ಮಾರುಕಟ್ಟೆಯಲ್ಲಿ ಸಕ್ಕರೆಯ ಆತಂಕ ಸರಿದೂಗಿಸಲು ಈ ನಿರ್ಧಾರ ಕೈಗೊಳ್ಳಲಾಗಿದೆ.

ಈ ಸಾಲಿನ ಟೆಂಡರ್‌ನಲ್ಲಿ ಕಬ್ಬಿನ ರಸ, ಸಕ್ಕರೆ ಶಿರಪ್‌ ಮತ್ತು ಕಾಕಂಬಿಯಿಂದ (ಬಿ-ಹೆವಿ ಮೊಲಾಸಿಸ್‌) ತಯಾರಿಸುವ ಎಥೆನಾಲ್‌ ಅನ್ನು ಟೆಂಡರ್‌ನಿಂದ ಹೊರಗಿಡಲು ಸರ್ಕಾರಿ ತೈಲ ಕಂಪನಿಗಳು ತೀರ್ಮಾನಿಸಿವೆ.

ಎಥೆನಾಲ್‌ ಪೂರೈಕೆದಾರ ಬಿಡ್‌ನಲ್ಲಿ ಪಾಲ್ಗೊಳ್ಳಬಹುದು

ತೈಲ ಕಂಪನಿಗಳ ಪರ ಭಾರತ್‌ ಪೆಟ್ರೋಲಿಯಂ ಕಾರ್ಪೋರೇಷನ್‌ (ಬಿಪಿಸಿಎಲ್‌) ಅ.16ರಂದು ಟೆಂಡರ್‌ ಆಹ್ವಾನಿಸಿದ್ದು, ಈ ನವೆಂಬರ್‌ನಿಂದ ಮುಂದಿನ ಅಕ್ಟೋಬರ್‌ ವರೆಗೆ 11 ಶತಕೋಟಿ ಲೀಟರ್‌ ಎಥೆನಾಲ್‌ ಖರೀದಿಗೆ ಉದ್ದೇಶಿಸಿದೆ. ಪೆಟ್ರೋಲ್‌ ಜತೆ ಶೇ.20ರಷ್ಟು ಎಥೆನಾಲ್‌ ಮಿಶ್ರಣ ಮಾಡುವ ಸರ್ಕಾರದ ನಿರ್ಧಾರದ ಭಾಗವಾಗಿ ಈ ಟೆಂಡರ್‌ ಆಹ್ವಾನಿಸಲಾಗಿದೆ. ಮೆಕ್ಕೆಜೋಳ, ಅಕ್ಕಿ, ಎಫ್‌ಸಿಐನಿಂದ ಖರೀದಿಸಿದ ಹೆಚ್ಚುವರಿ ಅಕ್ಕಿ, ಸಿ-ದರ್ಜೆಯ ಕಾಕಂಬಿಯಿಂದ ಉತ್ಪಾದಿಸಿದ ಎಥೆನಾಲ್‌ ಪೂರೈಕೆದಾರರಷ್ಟೇ ಈ ಬಿಡ್‌ನಲ್ಲಿ ಪಾಲ್ಗೊಳ್ಳಬಹುದಾಗಿದೆ.

ಇದೇ ವೇಳೆ ಮೆಕ್ಕೆಜೋಳ ಆಧಾರಿತ ಎಥೆನಾಲ್‌ಗೆ ನೀಡಲಾಗುವ ಪ್ರೋತ್ಸಾಹ ಧನವನ್ನು ಲೀಟರ್‌ಗೆ 71.86 ರು.ನಿಂದ 68.86 ರು.ಗೆ ಇಳಿಸಿದೆ. ಈವರೆಗೆ ಮೆಕ್ಕೆಜೋಳದಿಂದ ಉತ್ಪಾದಿಸುವ ಪ್ರತಿ ಲೀಟರ್‌ ಎಥೆನಾಲ್‌ಗೆ 5.79 ರು. ಪ್ರೋತ್ಸಾಹಧನ ನೀಡಲಾಗುತ್ತಿತ್ತು. ಅದನ್ನೀಗ 2.79 ರು.ಗೆ ಇಳಿಸಲಾಗಿದೆ.

Warranty vs Guarantee: ವಾರಂಟಿ ಮತ್ತು ಗ್ಯಾರಂಟಿ ನಡುವಿನ ವ್ಯತ್ಯಾಸವೇನು? ವಸ್ತು ಖರೀದಿಸುವಾಗ ಈ ವಿಚಾರ ನಿಮಗೆ ಗೊತ್ತಿರಲಿ

Naveen Kodase — Tue, 20 Oct 2026 08:26:34 +0530

Warranty vs Guarantee: Key Differences Explained ಟಿವಿ, ಫ್ರಿಡ್ಜ್, ಫೋನ್ ಅಥವಾ ವಾಷಿಂಗ್ ಮೆಷಿನ್ ಖರೀದಿಸುವಾಗ ಅಂಗಡಿಯವರು ಒಂದು ಅಥವಾ ಎರಡು ವರ್ಷದ ವಾರಂಟಿ, ಗ್ಯಾರಂಟಿ ಇದೆ ಅಂತ ಹೇಳ್ತಾರೆ. ಇವೆರಡರ ನಡುವಿನ ಅಸಲಿ ವ್ಯತ್ಯಾಸವೇನು? ಹೊಸ ವಸ್ತು ಖರೀದಿಸುವಾಗ ನೀವು ಯಾವೆಲ್ಲಾ ಎಚ್ಚರಿಕೆ ವಹಿಸಬೇಕು ಅನ್ನೋದರ ಕಂಪ್ಲೀಟ್ ಡೀಟೇಲ್ಸ್ ಇಲ್ಲಿದೆ.

ವಾರಂಟಿ ಅಂದ್ರೆ ಏನು?

ವಾರಂಟಿ (Warranty) ಅಂದ್ರೆ ನೀವು ಖರೀದಿಸಿದ ವಸ್ತುವಿನಲ್ಲಿ ಏನಾದರೂ ದೋಷ ಕಂಡುಬಂದರೆ, ಕಂಪನಿಯು ನಿರ್ದಿಷ್ಟ ಸಮಯದವರೆಗೆ ಅದನ್ನು ಉಚಿತವಾಗಿ ರಿಪೇರಿ ಮಾಡಿಕೊಡುವ ಭರವಸೆ. ಉದಾಹರಣೆಗೆ, ನೀವು ಟಿವಿ ಖರೀದಿಸಿದ್ದೀರಿ ಮತ್ತು ಅದಕ್ಕೆ 2 ವರ್ಷದ ವಾರಂಟಿ ಇದೆ ಅಂದುಕೊಳ್ಳಿ. ಆ ಸಮಯದಲ್ಲಿ ಟಿವಿ ಕೆಟ್ಟುಹೋದರೆ, ಕಂಪನಿಯವರು ಅದನ್ನು ಫ್ರೀಯಾಗಿ ರಿಪೇರಿ ಮಾಡಿಕೊಡ್ತಾರೆ ಅಥವಾ ಹಾಳಾದ ಪಾರ್ಟ್ಸ್ ಬದಲಾಯಿಸ್ತಾರೆ. ಆದರೆ, ಕೈಯಿಂದ ಬಿದ್ದು ಒಡೆದುಹೋದರೆ, ನೀರು ಬಿದ್ದರೆ ಅಥವಾ ನಿಮ್ಮ ತಪ್ಪಿನಿಂದ ಹಾಳಾದರೆ ವಾರಂಟಿ ಕವರ್ ಆಗಲ್ಲ ಅನ್ನೋದು ನೆನಪಿರಲಿ.

ಗ್ಯಾರಂಟಿ ಅಂದ್ರೆ ಏನು?

ಗ್ಯಾರಂಟಿ (Guarantee) ಅಂದ್ರೆ ವಸ್ತುವಿನ ಗುಣಮಟ್ಟ ಮತ್ತು ಕಾರ್ಯಕ್ಷಮತೆಯ ಬಗ್ಗೆ ಕಂಪನಿ ನೀಡುವ ಪಕ್ಕಾ ಭರವಸೆ. ಗ್ಯಾರಂಟಿ ಇರುವ ವಸ್ತು ನಿರ್ದಿಷ್ಟ ಸಮಯದೊಳಗೆ ಹಾಳಾದರೆ, ಕಂಪನಿಯು ನಿಮಗೆ ಸಂಪೂರ್ಣವಾಗಿ ಹೊಸ ವಸ್ತುವನ್ನು (Replacement) ಕೊಡುತ್ತದೆ ಅಥವಾ ನಿಮ್ಮ ಹಣವನ್ನು ವಾಪಸ್ (Refund) ಮಾಡುತ್ತದೆ. ವಾರಂಟಿ ಅಂದ್ರೆ ರಿಪೇರಿ, ಗ್ಯಾರಂಟಿ ಅಂದ್ರೆ ಹೊಸ ವಸ್ತು ಅಥವಾ ಹಣ ವಾಪಸ್ ಅಂತ ನಾವು ಸುಲಭವಾಗಿ ಅರ್ಥ ಮಾಡಿಕೊಳ್ಳಬಹುದು. ಆದರೆ, ಕಂಪನಿಗಳು ವಿಧಿಸುವ ಷರತ್ತುಗಳ ಆಧಾರದ ಮೇಲೆ ಈ ನಿಯಮಗಳು ಬದಲಾಗಬಹುದು. ಹಾಗಾಗಿ ಕೇವಲ ಹೆಸರನ್ನು ನೋಡಿ ನಿರ್ಧಾರ ತೆಗೆದುಕೊಳ್ಳಬೇಡಿ.

ವಸ್ತು ಖರೀದಿಸುವಾಗ ಏನು ಗಮನಿಸಬೇಕು?

ಯಾವುದೇ ವಸ್ತು ಖರೀದಿಸುವ ಮುನ್ನ ವಾರಂಟಿ ಮತ್ತು ಗ್ಯಾರಂಟಿ ಎಷ್ಟು ತಿಂಗಳು ಅಥವಾ ವರ್ಷ ಇದೆ ಅನ್ನೋದನ್ನು ನೀವು ಕಡ್ಡಾಯವಾಗಿ ಚೆಕ್ ಮಾಡಬೇಕು. ಇದು ಇಡೀ ವಸ್ತುವಿಗೆ ಅನ್ವಯಿಸುತ್ತದೆಯೋ ಅಥವಾ ಕೇವಲ ಮೋಟಾರ್, ಕಂಪ್ರೆಸರ್, ಬ್ಯಾಟರಿಗೆ ಮಾತ್ರ ಸೀಮಿತವೋ ಎಂಬುದನ್ನು ಸ್ಪಷ್ಟವಾಗಿ ಕೇಳಿ ತಿಳಿದುಕೊಳ್ಳಿ. ಬಿಡಿಭಾಗಗಳು, ಸರ್ವೀಸ್ ಚಾರ್ಜ್ ಮತ್ತು ಸಾರಿಗೆ ವೆಚ್ಚ ಉಚಿತವೇ ಎಂದು ಕೇಳಿ. ಯಾವ ಕಾರಣಗಳಿಗೆ ವಾರಂಟಿ ಅನ್ವಯಿಸಲ್ಲ ಅನ್ನೋದನ್ನು ಮೊದಲೇ ಓದಿ. ಖರೀದಿಸಿದ ಬಿಲ್, ವಾರಂಟಿ ಕಾರ್ಡ್ ಮತ್ತು ಆನ್‌ಲೈನ್ ಪೇಮೆಂಟ್ ಡೀಟೇಲ್ಸ್ ಅನ್ನು ಭದ್ರವಾಗಿ ಇಟ್ಟುಕೊಳ್ಳಿ.

ಹೆಚ್ಚುವರಿ ಹಣ ಕೊಟ್ಟು ಎಕ್ಸ್‌ಟೆಂಡೆಡ್ ವಾರಂಟಿ (Extended Warranty) ಪಡೆಯುತ್ತಿದ್ದರೆ, ಅದರ ಲಾಭಗಳು ಮತ್ತು ಷರತ್ತುಗಳನ್ನು ಪರಿಶೀಲಿಸಿ. ಭಾರತ ಸರ್ಕಾರದ ಗ್ರಾಹಕ ವ್ಯವಹಾರಗಳ ಇಲಾಖೆಯ ಸೂಚನೆಯಂತೆ, ವಸ್ತುವಿನ ಗುಣಮಟ್ಟ, ಬೆಲೆ ಮತ್ತು ಗ್ಯಾರಂಟಿ ವಿವರಗಳನ್ನು ಸಂಪೂರ್ಣವಾಗಿ ತಿಳಿದುಕೊಂಡ ನಂತರವೇ ಖರೀದಿಸುವ ನಿರ್ಧಾರ ತೆಗೆದುಕೊಳ್ಳಿ.

ಸಮಸ್ಯೆ ಬಂದರೆ ಏನು ಮಾಡಬೇಕು?

ನೀವು ಖರೀದಿಸಿದ ವಸ್ತುವಿನಲ್ಲಿ ದೋಷ ಕಂಡುಬಂದರೆ, ಮೊದಲು ತಯಾರಕರು ಅಥವಾ ಅಧಿಕೃತ ಸರ್ವೀಸ್ ಸೆಂಟರ್ ಅನ್ನು ಸಂಪರ್ಕಿಸಿ. ದೂರು ದಾಖಲಿಸಿದ ನಂಬರ್, ಬಿಲ್ ಮತ್ತು ರಿಪೇರಿ ವಿವರಗಳನ್ನು ಸೇಫ್ ಆಗಿ ಇಟ್ಟುಕೊಳ್ಳಿ. ಸಮಸ್ಯೆ ಬಗೆಹರಿಯದಿದ್ದರೆ, ನೀವು ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿ (National Consumer Helpline) 1915 ಗೆ ಕರೆ ಮಾಡಿ ದೂರು ನೀಡಬಹುದು. ವಾರಂಟಿ ಇದೆಯೋ ಅಥವಾ ಗ್ಯಾರಂಟಿ ಇದೆಯೋ ಅನ್ನೋದಕ್ಕಿಂತ, ಆ ಭರವಸೆಯ ಅಡಿಯಲ್ಲಿ ನಮಗೆ ಯಾವೆಲ್ಲಾ ಲಾಭ ಸಿಗುತ್ತದೆ ಅನ್ನೋದು ಬಹಳ ಮುಖ್ಯ.

ವೈರ್ ಬೇಡ, ಕರೆಂಟ್ ಕೆಲಸವೂ ಬೇಡ: ಕೇವಲ ₹500ಕ್ಕೆ ಸಿಗುತ್ತೆ ವೈರ್‌ಲೆಸ್ ಡೋರ್‌ಬೆಲ್!

Govindaraj S — Sat, 17 Oct 2026 16:45:29 +0530

ಡೋರ್‌ಬೆಲ್ ಹಾಕಿಸಬೇಕು ಅಂದ್ರೆ ವೈರಿಂಗ್, ಎಲೆಕ್ಟ್ರಿಷಿಯನ್ ಅಂತ ಒದ್ದಾಡಬೇಕು. ಆದ್ರೆ ಈಗ ಬಂದಿರೋ ವೈರ್‌ಲೆಸ್ ಡೋರ್‌ಬೆಲ್ ಕಿಟ್‌ಗಳು ಈ ಕೆಲಸನ ತುಂಬಾ ಸುಲಭ ಮಾಡಿವೆ. ಯಾವುದೇ ಕಷ್ಟದ ವೈರಿಂಗ್ ಇಲ್ಲದೆ ನೀವೇ ಇದನ್ನ ಫಿಕ್ಸ್ ಮಾಡಬಹುದು.

ಈ ವೈರ್‌ಲೆಸ್ ಡೋರ್‌ಬೆಲ್‌ಗೆ ಯಾವುದೇ ಸ್ಪೆಷಲ್ ವೈರಿಂಗ್ ಬೇಕಿಲ್ಲ. ಮೇನ್ ಡೋರ್ ಹತ್ರ ಪುಶ್ ಬಟನ್ ಅಂಟಿಸಿ, ರಿಸೀವರ್‌ನ ಮನೆಯೊಳಗೆ ಎಲ್ಲಿ ಬೇಕೋ ಅಲ್ಲಿ ಪ್ಲಗ್ ಮಾಡಿ. ಟೆಕ್ನಿಕಲ್ ನಾಲೆಡ್ಜ್ ಇಲ್ಲದವರೂ ಇದನ್ನ ಸುಲಭವಾಗಿ ಸೆಟ್ ಮಾಡಬಹುದು. ಮನೆ ಶಿಫ್ಟ್ ಮಾಡುವಾಗ ಇದನ್ನ ಕಿತ್ತು ಬೇರೆ ಕಡೆಗೂ ತಗೊಂಡು ಹೋಗಬಹುದು. ಅಮೆಜಾನ್‌ನಲ್ಲಿ 'Amazon Gadgets Heroes Wireless Doorbell Kit' ಹೆಸರಲ್ಲಿ ಇದು ಸಿಗುತ್ತಿದೆ. ಇದರ ಅಸಲಿ ಬೆಲೆ ₹1,000, ಆದ್ರೆ ಈಗ 50% ಡಿಸ್ಕೌಂಟ್‌ನಲ್ಲಿ ಕೇವಲ ₹499ಕ್ಕೆ ಲಭ್ಯವಿದೆ.

ಮಳೆ, ತೇವಾಂಶ ಮತ್ತು ಧೂಳನ್ನು ತಡೆದುಕೊಳ್ಳುವಂತೆ ಈ ಔಟ್‌ಡೋರ್ ಬಟನ್ ಡಿಸೈನ್ ಮಾಡಿದ್ದಾರೆ. ಹಾಗಾಗಿ ಮೇನ್ ಗೇಟ್ ಅಥವಾ ಬಾಗಿಲ ಬಳಿ ಇದನ್ನ ಆರಾಮಾಗಿ ಹಾಕಬಹುದು. ಬೇರೆ ಬೇರೆ ಹವಾಮಾನದಲ್ಲೂ ಇದು ಚೆನ್ನಾಗಿ ಕೆಲಸ ಮಾಡುತ್ತದೆ. ಆದರೂ, ಮಳೆಗೆ ಪೂರ್ತಿ ಒದ್ದೆಯಾಗುವ ಜಾಗದಲ್ಲಿ ಹಾಕುವ ಮುನ್ನ ಕಂಪನಿ ನೀಡಿರುವ ವಾಟರ್‌ಪ್ರೂಫ್ ರೇಟಿಂಗ್ ಚೆಕ್ ಮಾಡಿಕೊಳ್ಳುವುದು ಒಳ್ಳೆಯದು.

ಈ ಡೋರ್‌ಬೆಲ್ ಬ್ಯಾಟರಿ ಮೇಲೆ ಕೆಲಸ ಮಾಡುವುದರಿಂದ, ಬಟನ್‌ಗೆ ಡೈರೆಕ್ಟ್ ಕರೆಂಟ್ ಕನೆಕ್ಷನ್ ಬೇಕಿಲ್ಲ. ನಿಮ್ಮ ಹಾಲ್, ಬೆಡ್‌ರೂಮ್ ಅಥವಾ ಆಫೀಸ್‌ನಲ್ಲಿ ಎಲ್ಲಿ ಬೇಕಾದರೂ ರಿಸೀವರ್ ಇಟ್ಟುಕೊಳ್ಳಬಹುದು. ಬ್ಯಾಟರಿ ಖಾಲಿಯಾದಾಗ ಹೊಸದು ಹಾಕಿ ಮತ್ತೆ ಬಳಸಬಹುದು. ಎಲೆಕ್ಟ್ರಿಕ್ ವೈರಿಂಗ್ ಕಷ್ಟ ಇರುವ ಜಾಗಗಳಿಗೆ ಇದು ಹೇಳಿ ಮಾಡಿಸಿದ ಪ್ರಾಡಕ್ಟ್.

ವೈರ್‌ಲೆಸ್ ಡೋರ್‌ಬೆಲ್ ಕೇವಲ ಮನೆಗಳಿಗೆ ಮಾತ್ರವಲ್ಲ, ಅಪಾರ್ಟ್‌ಮೆಂಟ್, ಆಫೀಸ್, ಕ್ಲಿನಿಕ್, ಗೋಡೌನ್ ಹಾಗೂ ಅಂಗಡಿಗಳಿಗೂ ತುಂಬಾ ಉಪಯುಕ್ತ. ಹೊರಗಡೆ ಯಾರಾದರೂ ಬಟನ್ ಒತ್ತಿದ ತಕ್ಷಣ, ಒಳಗಿರುವ ರಿಸೀವರ್ ಸೌಂಡ್ ಮಾಡುತ್ತದೆ. ಮನೆಯವರು ಬೇರೆ ರೂಮ್‌ನಲ್ಲಿದ್ದಾಗ ಯಾರೋ ಬಾಗಿಲು ತಟ್ಟುವ ಸೌಂಡ್ ಕೇಳಿಸದಿದ್ದರೆ, ಈ ಬೆಲ್ ತುಂಬಾ ಸಹಾಯಕ್ಕೆ ಬರುತ್ತದೆ.

ಈ ವೈರ್‌ಲೆಸ್ ಡೋರ್‌ಬೆಲ್ ಕಿಟ್‌ನಲ್ಲಿ ಬೇರೆ ಬೇರೆ ರಿಂಗ್‌ಟೋನ್‌ಗಳು ಮತ್ತು ವಾಲ್ಯೂಮ್ ಅಡ್ಜಸ್ಟ್ ಮಾಡುವ ಆಯ್ಕೆ ಇದೆ. ನಿಮಗೆ ಇಷ್ಟವಾದ ಸೌಂಡ್ ಸೆಟ್ ಮಾಡಿಕೊಂಡು, ಬೇಕಾದಷ್ಟು ವಾಲ್ಯೂಮ್ ಇಟ್ಟುಕೊಳ್ಳಬಹುದು. ಮನೆಯಲ್ಲಿ ಚಿಕ್ಕ ಮಕ್ಕಳು ಅಥವಾ ವಯಸ್ಸಾದವರು ಇದ್ದರೆ ಈ ಫೀಚರ್ ತುಂಬಾ ಉಪಯೋಗಕ್ಕೆ ಬರುತ್ತದೆ. ಕಡಿಮೆ ಬೆಲೆಗೆ ವೈರಿಂಗ್ ಇಲ್ಲದ ಡೋರ್‌ಬೆಲ್ ಹುಡುಕುವವರಿಗೆ ಇದು ಬೆಸ್ಟ್ ಆಯ್ಕೆ.

ಸೂಚನೆ: ಖರೀದಿಸುವ ಮುನ್ನ ಪ್ರಾಡಕ್ಟ್ ಫೀಚರ್ಸ್, ಬ್ಯಾಟರಿ ಡೀಟೇಲ್ಸ್ ಮತ್ತು ಸ್ಪೆಸಿಫಿಕೇಶನ್‌ಗಳನ್ನು ಒಮ್ಮೆ ಚೆಕ್ ಮಾಡಿಕೊಳ್ಳಿ.

ಹಬ್ಬದ ಸೀಸನ್‌ಗೆ ರಾಯಲ್ ಎಂಟ್ರಿ: 'ಬಿಎಸ್‌ಎ ಗೋಲ್ಡ್ ಸ್ಟಾರ್ 650'ಯ 2 ಹೊಸ ಎಡಿಷನ್‌ಗಳು ಬಿಡುಗಡೆ! ದರ ಎಷ್ಟು?

Gowthami K — Mon, 19 Oct 2026 14:03:57 +0530

ಬೆಂಗಳೂರು: ಹಬ್ಬದ ಸೀಸನ್ ಸಂಭ್ರಮವನ್ನು ಹೆಚ್ಚಿಸಲು ಬಿಎಸ್‌ಎ ಮೋಟಾರ್‌ಸೈಕಲ್ಸ್ ಭಾರತದಲ್ಲಿ ತನ್ನ ಪ್ರಸಿದ್ಧ ಗೋಲ್ಡ್ ಸ್ಟಾರ್ 650 ಬೈಕ್‌ನ ಎರಡು ಹೊಸ ಆವೃತ್ತಿಗಳನ್ನು ಬಿಡುಗಡೆ ಮಾಡಿದೆ. ಎಂಸಿಎನ್‌ನ ಬೆಸ್ಟ್ ರೆಟ್ರೊ ಬೈಕ್ ಪ್ರಶಸ್ತಿ ವಿಜೇತ ಈ ಬೈಕ್ ಇದೀಗ 'ಬ್ರೂಕ್‌ಲ್ಯಾಂಡ್ಸ್ ಬ್ಲ್ಯಾಕ್ ಲೆಗಸಿ ಎಡಿಷನ್' ಮತ್ತು ಬರ್ಮಿಂಗ್ಹ್ಯಾಮ್ ಬ್ಲೂ ಎಡಿಷನ್ ಎಂಬ ಎರಡು ಆಕರ್ಷಕ ಬಣ್ಣಗಳಲ್ಲಿ ಮಾರುಕಟ್ಟೆಗೆ ಲಗ್ಗೆ ಇಟ್ಟಿದೆ.

ಬಿಎಸ್‌ಎ ಬ್ರ್ಯಾಂಡ್‌ನ ಐತಿಹಾಸಿಕ ಮೈಲಿಗಲ್ಲುಗಳನ್ನು ಆಚರಿಸುವ ಉದ್ದೇಶದಿಂದ ಈ ಎರಡು ಹೊಸ ಎಡಿಷನ್‌ಗಳನ್ನು ವಿನ್ಯಾಸಗೊಳಿಸಲಾಗಿದೆ. ಪ್ರೀಮಿಯಂ ಲುಕ್ ಹೊಂದಿರುವ ಈ ಬೈಕ್‌ಗಳು ಬಿಎಸ್‌ಎ ಮರುಹುಟ್ಟಿನ ಪ್ರಮುಖ ಆಕರ್ಷಣೆಯಾಗಿವೆ.

ಇದರಲ್ಲಿ 'ಬ್ರೂಕ್‌ಲ್ಯಾಂಡ್ಸ್ ಬ್ಲ್ಯಾಕ್ ಲೆಗಸಿ ಎಡಿಷನ್' ಬ್ರಿಟನ್‌ನ ಐತಿಹಾಸಿಕ ಬ್ರೂಕ್‌ಲ್ಯಾಂಡ್ಸ್ ರೇಸ್ ಟ್ರ್ಯಾಕ್‌ನಿಂದ ಸ್ಫೂರ್ತಿ ಪಡೆದಿದೆ. 1937ರಲ್ಲಿ ವಾಲ್ ಹ್ಯಾಂಡ್ಲಿ ಎಂಬ ರೇಸರ್ ಇದೇ ಟ್ರ್ಯಾಕ್‌ನಲ್ಲಿ ತೋರಿದ ಅದ್ಭುತ ಸಾಧನೆಗಾಗಿ 'ಗೋಲ್ಡ್ ಸ್ಟಾರ್' ಬ್ಯಾಡ್ಜ್ ಪಡೆದಿದ್ದರು. ಆ ಐತಿಹಾಸಿಕ ಕ್ಷಣದ ನೆನಪಿಗಾಗಿ ಈ ಆವೃತ್ತಿಯನ್ನು ಹೊರತರಲಾಗಿದೆ. ಈ ಬೈಕ್ ಆಕರ್ಷಕವಾದ ಕಪ್ಪು ಬಣ್ಣ, ಕ್ರೋಮ್ ಫಿನಿಶ್ ಹೊಂದಿರುವ ಟ್ಯಾಂಕ್ ಮತ್ತು ಫೆಂಡರ್‌ಗಳ ಮೇಲೆ ಚಿನ್ನದ ಬಣ್ಣದ ಗೆರೆಗಳು ಹಾಗೂ ಪ್ರೀಮಿಯಂ ಕ್ವಿಲ್ಟೆಡ್ ಸೀಟ್ ಅನ್ನು ಹೊಂದಿದ್ದು ಅತ್ಯಂತ ಗಾಂಭೀರ್ಯದಿಂದ ಕೂಡಿದೆ.

ಮತ್ತೊಂದೆಡೆ, 'ಬರ್ಮಿಂಗ್ಹ್ಯಾಮ್ ಬ್ಲೂ' ಆವೃತ್ತಿಯು ಬಿಎಸ್‌ಎ ಬ್ರ್ಯಾಂಡ್ ಹುಟ್ಟಿದ 'ಬರ್ಮಿಂಗ್ಹ್ಯಾಮ್' ನಗರಕ್ಕೆ ಗೌರವ ಸಲ್ಲಿಸುತ್ತದೆ. ಬಿಎಸ್‌ಎ ಹುಟ್ಟಿನಿಂದ ಹಿಡಿದು ಜಗತ್ತಿನಾದ್ಯಂತ ಅದು ಬೆಳೆದ ಪರಿಯ ಹಿಂದೆ ಈ ನಗರದ ಪಾತ್ರ ದೊಡ್ಡದಿದೆ. ಈ ಬೈಕ್ ಗಾಢವಾದ ನೀಲಿ ಬಣ್ಣದ ಪೇಂಟ್, ವಿಶೇಷವಾದ ಬೆಳ್ಳಿಯ ಸೈಡ್-ಪ್ಯಾನಲ್ ಬ್ಯಾಡ್ಜ್ ಹಾಗೂ ವಿಶಿಷ್ಟವಾದ ಎಂಜಿನ್ ಫಿನಿಶ್ ಅನ್ನು ಹೊಂದಿದೆ. ಇದು ಗೋಲ್ಡ್ ಸ್ಟಾರ್‌ನ ಹಳೆಯ ಕ್ಲಾಸಿಕ್ ಡಿಎನ್‌ಎಯನ್ನು ಉಳಿಸಿಕೊಂಡು, ಇಂದಿನ ಯುವಜನತೆಗೆ ಒಪ್ಪುವಂತಹ ಸಮಕಾಲೀನ ಸ್ಪರ್ಶವನ್ನು ನೀಡಿದೆ.

ಈ ಎರಡೂ ಹೊಸ ಬೈಕ್‌ಗಳ ಕಾರ್ಯಕ್ಷಮತೆ ಅತ್ಯುತ್ತಮವಾಗಿದೆ. ಇವುಗಳು ಶಕ್ತಿಶಾಲಿ 652ಸಿಸಿ ಲಿಕ್ವಿಡ್-ಕೂಲ್ಡ್ ಸಿಂಗಲ್ ಸಿಲಿಂಡರ್ ಎಂಜಿನ್ ಹೊಂದಿದ್ದು, 45ಎಚ್‌ಪಿ ಪವರ್ ಹಾಗೂ 55ಎನ್‌ಎಂ ಟಾರ್ಕ್ ಉತ್ಪಾದಿಸುತ್ತವೆ.

ದೊಡ್ಡ ಸಿಂಗಲ್ ಸಿಲಿಂಡರ್ ನೀಡುವ ವಿಶಿಷ್ಟ ಅನುಭವವನ್ನು ಗ್ರಾಹಕರು ಇದರಲ್ಲಿ ಪಡೆಯಲಿದ್ದಾರೆ. ಸುರಕ್ಷತೆ ಹಾಗೂ ಅತ್ಯುತ್ತಮ ನಿಯಂತ್ರಣಕ್ಕಾಗಿ ಬ್ರೆಂಬೊ ಬ್ರೇಕ್‌ಗಳು, ಡ್ಯುಯಲ್-ಚಾನೆಲ್ ಎಬಿಎಸ್ ಮತ್ತು ಕ್ಲಾಸಿಕ್ ಲುಕ್ ನೀಡುವ ವೈರ್-ಸ್ಪೋಕ್ ವೀಲ್‌ಗಳನ್ನು ಈ ಬೈಕ್‌ನಲ್ಲಿ ಅಳವಡಿಸಲಾಗಿದೆ.

ಈ ಹೊಸ ಬಿಡುಗಡೆಯ ಬಗ್ಗೆ ಮಾತನಾಡಿದ ಕ್ಲಾಸಿಕ್ ಲೆಜೆಂಡ್ಸ್‌ನ ಸಹ-ಸಂಸ್ಥಾಪಕ ಅನುಪಮ್ ಥರೇಜಾ, "ಒಂದು ಆಧುನಿಕ ರೆಟ್ರೊ-ರೋಡ್‌ಸ್ಟರ್ ಬೈಕ್ ಹೇಗಿರಬೇಕು ಎಂಬುದಕ್ಕೆ ಗೋಲ್ಡ್ ಸ್ಟಾರ್ ಅತ್ಯುತ್ತಮ ಉದಾಹರಣೆ. ಇದರ ಅಪ್ಪಟ ಬ್ರಿಟಿಷ್ ವಿನ್ಯಾಸದಿಂದ ಹಿಡಿದು ಎಂಜಿನ್ ನೀಡುವ ಅನುಭವದವರೆಗೆ ಪ್ರತಿಯೊಂದು ಅಂಶವೂ ಗೋಲ್ಡ್ ಸ್ಟಾರ್‌ನ ಪರಂಪರೆಯನ್ನು ಪ್ರತಿಬಿಂಬಿಸುತ್ತದೆ. ಬ್ರೂಕ್‌ಲ್ಯಾಂಡ್ಸ್ ಬ್ಲ್ಯಾಕ್ ಆವೃತ್ತಿಯು ಗೋಲ್ಡ್ ಸ್ಟಾರ್ ಹೆಸರು ಬಂದ ಐತಿಹಾಸಿಕ ಕ್ಷಣವನ್ನು ಗೌರವಿಸಿದರೆ, ಬರ್ಮಿಂಗ್ಹ್ಯಾಮ್ ಬ್ಲೂ ಆವೃತ್ತಿಯು ಇಂದಿನ ರೈಡರ್‌ಗಳಿಗೆ ತಕ್ಕಂತೆ ಆಧುನಿಕ ರೂಪವನ್ನು ನೀಡುತ್ತಿದೆ. ಇವೆರಡೂ ಸೇರಿ ಬಿಎಸ್‌ಎಯ ವಿಶಿಷ್ಟ ಇತಿಹಾಸವನ್ನು ಸಾರುತ್ತವೆ,” ಎಂದು ತಿಳಿಸಿದರು.

ಬೆಲೆ ಎಷ್ಟು?

ದೇಶಾದ್ಯಂತ ಇರುವ ಬಿಎಸ್‌ಎ ಡೀಲರ್‌ಶಿಪ್‌ಗಳಲ್ಲಿ ಈ ಎರಡು ಬಣ್ಣದ ಬೈಕ್‌ಗಳು ಲಭ್ಯವಿದ್ದು, ಬೆಲೆಗಳ ವಿವರ ಈ ಕೆಳಗಿನಂತಿದೆ:

ಬರ್ಮಿಂಗ್ಹ್ಯಾಮ್ ಬ್ಲೂ: 3,55,950 ರೂ.
ಬ್ರೂಕ್‌ಲ್ಯಾಂಡ್ಸ್ ಬ್ಲ್ಯಾಕ್ ಲೆಗಸಿ ಎಡಿಷನ್: 3,64,950 ರೂ.

ಗ್ರಾಹಕರ ತೃಪ್ತಿ ಹಾಗೂ ಸುಗಮ ನಿರ್ವಹಣೆಗಾಗಿ ಬಿಎಸ್‌ಎ ಮೋಟಾರ್‌ಸೈಕಲ್ಸ್ ಉದ್ಯಮದಲ್ಲೇ ಮೊದಲ ಬಾರಿಗೆ 'ಓನರ್‌ಶಿಪ್ ಅಶ್ಯೂರೆನ್ಸ್ ಪ್ರೋಗ್ರಾಂ' ಅನ್ನು ಪರಿಚಯಿಸಿದೆ. ಇದು ಈ ಕೆಳಗಿನ ಸೌಲಭ್ಯಗಳನ್ನು ಒಳಗೊಂಡಿದೆ:

4 ವರ್ಷ ಅಥವಾ 50,000 ಕಿ.ಮೀ ವರೆಗೆ ಸ್ಟ್ಯಾಂಡರ್ಡ್ ವಾರಂಟಿ.
ವಾರಂಟಿಯನ್ನು 6 ವರ್ಷಗಳವರೆಗೆ ವಿಸ್ತರಿಸುವ ಅವಕಾಶ.
8 ವರ್ಷಗಳವರೆಗೆ ರೋಡ್‌ಸೈಡ್ ಅಸಿಸ್ಟೆನ್ಸ್ ಸೌಲಭ್ಯ.
ದೇಶಾದ್ಯಂತ ಅನ್ವಯವಾಗುವಂತೆ 5 ವರ್ಷಗಳವರೆಗೆ ವಾರ್ಷಿಕ ನಿರ್ವಹಣಾ ಗುತ್ತಿಗೆ ಸೌಲಭ್ಯ.

ದೇಶಾದ್ಯಂತ ಇರುವ 450 ಕ್ಕೂ ಹೆಚ್ಚು ಸೇಲ್ಸ್ ಮತ್ತು ಸರ್ವಿಸ್ ಕೇಂದ್ರಗಳಲ್ಲಿ ಸಮಗ್ರ ಮಾಲೀಕತ್ವದ ಪ್ರಯೋಜನಗಳು ಸಿಗಲಿವೆ.

ಜಿಯೋ 6G : ಸಾಫ್ಟ್‌ವೇರ್ ಅಪ್‌ಗ್ರೇಡ್ ಮೂಲಕ ಕ್ರಾಂತಿಗೆ ಆಕಾಶ್ ಅಂಬಾನಿ ಮಾಸ್ಟರ್ ಪ್ಲಾನ್

Gowthami K — Mon, 19 Oct 2026 13:46:50 +0530

ಭಾರತೀಯ ಟೆಲಿಕಾಂ ಕ್ಷೇತ್ರದಲ್ಲಿ ಸಂಚಲನ ಮೂಡಿಸಿರುವ ಜಿಯೋ ಪ್ಲಾಟ್‌ಫಾರ್ಮ್ಸ್, ಮುಂದಿನ ಪೀಳಿಗೆಯ 6G ಸಂವಹನ ತಂತ್ರಜ್ಞಾನಕ್ಕೆ ಪರಿವರ್ತನೆಗೊಳ್ಳಲು ಸಂಪೂರ್ಣ ಹೊಸ ಮಾದರಿಯ ಕಾರ್ಯತಂತ್ರವನ್ನು ರೂಪಿಸಿದೆ. ಹೊಸದಾಗಿ ಬೃಹತ್ ಭೌತಿಕ ಮೂಲಸೌಕರ್ಯಗಳನ್ನು ನಿರ್ಮಿಸುವ ಬದಲಾಗಿ, ಪ್ರಸ್ತುತ ಚಾಲ್ತಿಯಲ್ಲಿರುವ ನೆಟ್‌ವರ್ಕ್ ಮತ್ತು ತಂತ್ರಜ್ಞಾನ ವ್ಯವಸ್ಥೆಗೆ 'ಸಾಫ್ಟ್‌ವೇರ್ ಅಪ್‌ಗ್ರೇಡ್‌ಗಳನ್ನು' ನೀಡುವ ಮೂಲಕ 6G ಗೆ ಹೆಜ್ಜೆ ಇಡಲು ಕಂಪನಿ ನಿರ್ಧರಿಸಿದೆ. ಅಕ್ಟೋಬರ್ 15 ರಂದು ನಡೆದ ಜಿಯೋ ಪ್ಲಾಟ್‌ಫಾರ್ಮ್ಸ್ ಐಪಿಒ ಪತ್ರಿಕಾಗೋಷ್ಠಿಯಲ್ಲಿ ವ್ಯವಸ್ಥಾಪಕ ನಿರ್ದೇಶಕ ಆಕಾಶ್ ಅಂಬಾನಿ ಈ ಮಹತ್ವದ ವಿಷಯವನ್ನು ಬಹಿರಂಗಪಡಿಸಿದ್ದಾರೆ.

ಸ್ವಾಮ್ಯದ ತಂತ್ರಜ್ಞಾನ ಹಾಗೂ ನೆಟ್‌ವರ್ಕ್ ಸಾಮರ್ಥ್ಯದ ಬಳಕೆ

ಕೇವಲ ಸಂಪರ್ಕ ಒದಗಿಸುವುದಕ್ಕಷ್ಟೇ ಸೀಮಿತವಾಗದೆ, ಕಂಪನಿಯು ತನ್ನದೇ ಆದ 'ಸ್ವಾಮ್ಯದ ತಂತ್ರಜ್ಞಾನ ಸ್ಟಾಕ್' ಅಭಿವೃದ್ಧಿಪಡಿಸಿ ಅದನ್ನು ಆರ್ಥಿಕವಾಗಿ ನಗದೀಕರಿಸುವ ಕಡೆಗೆ ಗಮನ ಹರಿಸುತ್ತಿದೆ. ಪ್ರಸ್ತುತ ಜಿಯೋ ದೇಶಾದ್ಯಂತ 3,60,000 ಕ್ಕೂ ಹೆಚ್ಚು ಟೆಲಿಕಾಂ ಟವರ್‌ಗಳನ್ನು ಹಾಗೂ 10 ಲಕ್ಷಕ್ಕೂ ಅಧಿಕ ರೂಟ್ ಕಿಲೋಮೀಟರ್ ಫೈಬರ್ ಜಾಲವನ್ನು ಹೊಂದಿದೆ. ಈ ಬೃಹತ್ ನೆಟ್‌ವರ್ಕ್ ಅನ್ನೇ ಅಡಿಪಾಯವಾಗಿಸಿಕೊಂಡು ಸಾಫ್ಟ್‌ವೇರ್ ಆಧಾರಿತವಾಗಿ 6G ಗೆ ಬದಲಾಗುವುದರಿಂದ, ಹಿಂದಿನ ತಲೆಮಾರಿನ ನೆಟ್‌ವರ್ಕ್‌ಗಳಂತೆ ಹೆಚ್ಚುವರಿ ಭೌತಿಕ ಮೂಲಸೌಕರ್ಯಗಳ ಮೇಲೆ ಶ್ರಮ ಮತ್ತು ಬಂಡವಾಳ ಹೂಡುವ ಅಗತ್ಯ ಇರುವುದಿಲ್ಲ.

ನಾಲ್ಕು ಪ್ರಮುಖ ಬೆಳವಣಿಗೆಯ ಮೈಲಿಗಲ್ಲುಗಳು

ಕಂಪನಿಯು ತನ್ನ ಮುಂಬರುವ ಬೆಳವಣಿಗೆಗಾಗಿ ನಾಲ್ಕು ಪ್ರಮುಖ ಚಾಲಕ ಶಕ್ತಿಗಳನ್ನು ಗುರುತಿಸಿದೆ.

ಮೊಬೈಲ್ ಕನೆಕ್ಟಿವಿಟಿ : ಸುಧಾರಿತ ಮೊಬೈಲ್ ಸೇವೆಗಳು.
ಹೋಮ್ ಬ್ರಾಡ್‌ಬ್ಯಾಂಡ್ : ಮನೆಮನೆಗೆ ವೇಗದ ಇಂಟರ್ನೆಟ್ ಸಂಪರ್ಕ.
ಎಂಟರ್‌ಪ್ರೈಸ್ ಸೇವೆಗಳು : ಕಾರ್ಪೊರೇಟ್ ಮತ್ತು ಉದ್ಯಮ ವಲಯಕ್ಕೆ ತಾಂತ್ರಿಕ ಪರಿಹಾರಗಳು.

ತಂತ್ರಜ್ಞಾನ ಸ್ಟಾಕ್ ನಗದೀಕರಣ: ಆಂತರಿಕವಾಗಿ ಅಭಿವೃದ್ಧಿಪಡಿಸಿದ ತಂತ್ರಜ್ಞಾನವನ್ನು ಸ್ವಂತ ನೆಟ್‌ವರ್ಕ್ ಹೊರತಾಗಿಯೂ ಇತರ ವ್ಯಾಪಾರ ಜಾಲಗಳಿಗೆ ವಿಸ್ತರಿಸುವುದು.

ಶಕ್ತಿಯುತ ಎಂಜಿನಿಯರಿಂಗ್ ಪಡೆ ಮತ್ತು ಪೇಟೆಂಟ್ ಸಾಧನೆ

ಜಿಯೋ ತಾಂತ್ರಿಕವಾಗಿ ಅತ್ಯಂತ ಬಲವಾದ ಸಾಮರ್ಥ್ಯವನ್ನು ಹೊಂದಿದೆ. ಕಂಪನಿಯು ಇದುವರೆಗೆ 7,220 ಕ್ಕೂ ಹೆಚ್ಚು ಪೇಟೆಂಟ್‌ಗಳನ್ನು ಸಲ್ಲಿಸಿದ್ದು, 12,000 ಕ್ಕೂ ಅಧಿಕ ಅನುಭವೀ ಎಂಜಿನಿಯರ್‌ಗಳ ಬೃಹತ್ ಕಾರ್ಯಪಡೆಯನ್ನು ಹೊಂದಿದೆ. ಮೊಬೈಲ್ ನೆಟ್‌ವರ್ಕ್, ಬ್ರಾಡ್‌ಬ್ಯಾಂಡ್, ಡಿಜಿಟಲ್ ಸಾಧನಗಳು, ಆಪರೇಟಿಂಗ್ ಸಿಸ್ಟಮ್‌ಗಳು ಮತ್ತು ಡಿಜಿಟಲ್ ಅಪ್ಲಿಕೇಶನ್‌ಗಳ ಕ್ಷೇತ್ರಗಳಲ್ಲಿ ಜಿಯೋದ ತಾಂತ್ರಿಕ ಪ್ರಾಬಲ್ಯ ವಿಸ್ತರಿಸಿದೆ.

ಜಾಗತಿಕ ಮಾರುಕಟ್ಟೆಗೆ ಭಾರತೀಯ ತಂತ್ರಜ್ಞಾನ ರಫ್ತು

ಅಭಿವೃದ್ಧಿ ಹೊಂದಿದ ಹಾಗೂ ಅಭಿವೃದ್ಧಿಶೀಲ ರಾಷ್ಟ್ರಗಳ ಪ್ರಮುಖ ಟೆಲಿಕಾಂ ಆಪರೇಟರ್‌ಗಳೊಂದಿಗೆ ಪಾಲುದಾರಿಕೆ ಮಾಡಿಕೊಳ್ಳುವ ಮೂಲಕ ತನ್ನ ತಂತ್ರಜ್ಞಾನವನ್ನು ಅಂತರರಾಷ್ಟ್ರೀಯ ಮಾರುಕಟ್ಟೆಗೆ ಕೊಂಡೊಯ್ಯಲು ಜಿಯೋ ನಿರ್ಧರಿಸಿದೆ. ಕೇವಲ ತಂತ್ರಜ್ಞಾನ ಮಾರಾಟಗಾರನಾಗಿ ಅಥವಾ ಸಾಫ್ಟ್‌ವೇರ್ ಪೂರೈಕೆದಾರನಾಗಿ ಉಳಿಯದೆ, ಸಮಗ್ರ ತಾಂತ್ರಿಕ ಸೇವೆಗಳನ್ನು ಒದಗಿಸುವ 'ಮ್ಯಾನೇಜ್ಡ್ ಸರ್ವಿಸಸ್ ಪಾರ್ಟ್ನರ್' ಆಗಿ ಜಾಗತಿಕ ಮಟ್ಟದಲ್ಲಿ ಹೊರಹೊಮ್ಮುವುದು ಜಿಯೋದ ಗುರಿಯಾಗಿದೆ.

ಇದುವರೆಗೆ ವಿದೇಶಿ ತಂತ್ರಜ್ಞಾನ ಹಾಗೂ ಪರಿಹಾರಗಳನ್ನು ಆಮದು ಮಾಡಿಕೊಳ್ಳುತ್ತಿದ್ದ ಭಾರತ, ಇನ್ಮುಂದೆ ಸ್ವದೇಶಿ ತಂತ್ರಜ್ಞಾನವನ್ನು ಜಗತ್ತಿಗೆ ರಫ್ತು ಮಾಡುವ ಹಂತಕ್ಕೆ ತಲುಪಲು ಜಿಯೋದ ಈ 6G ಅಂತರರಾಷ್ಟ್ರೀಯ ಕಾರ್ಯತಂತ್ರ ಬಹುದೊಡ್ಡ ಕೊಡುಗೆ ನೀಡಲಿದೆ.

ಅಂಬಾನಿvsಮಸ್ಕ್: ಸ್ಟಾರ್‌ಲಿಂಕ್‌ಗೆ ನಿಯಮವೇ ಮುಖ್ಯವೆಂದ ರಿಲಯನ್ಸ್, ಭಾರತದಲ್ಲಿ ಇಂಟರ್ನೆಟ್ ಸೇವೆಗೆ ಸಿದ್ಧವೆಂದ ಮಸ್ಕ್

Gowthami K — Sat, 17 Oct 2026 19:16:22 +0530

ನವದೆಹಲಿ: ಭಾರತದಲ್ಲಿ ಉಪಗ್ರಹ ಆಧಾರಿತ ಬ್ರಾಡ್‌ಬ್ಯಾಂಡ್ (ಸ್ಯಾಟಲೈಟ್ ಇಂಟರ್ನೆಟ್) ಸೇವೆಗಳನ್ನು ಒದಗಿಸುವ ವಿಷಯದಲ್ಲಿ ಜಾಗತಿಕ ಉದ್ಯಮಿ ಎಲಾನ್ ಮಸ್ಕ್ ಒಡೆತನದ 'ಸ್ಟಾರ್‌ಲಿಂಕ್' ಮತ್ತು ಮುಕೇಶ್ ಅಂಬಾನಿ ನೇತೃತ್ವದ 'ರಿಲಯನ್ಸ್ ಇಂಡಸ್ಟ್ರೀಸ್' ನಡುವೆ ಚರ್ಚೆಗಳು ನಡೆಯುತ್ತಿವೆ. ಭಾರತದ ಕಾನೂನುಗಳು ಹಾಗೂ ಭದ್ರತಾ ನೀತಿಗಳನ್ನು ಪ್ರತಿಯೊಂದು ಕಂಪನಿಯು ಕಡ್ಡಾಯವಾಗಿ ಪಾಲಿಸಿದರೆ, ಉಪಗ್ರಹ ಸಂವಹನ ಕ್ಷೇತ್ರದಲ್ಲಿ ಮುಕ್ತ ಸ್ಪರ್ಧೆಯನ್ನು ನಾವು ಸಂಪೂರ್ಣವಾಗಿ ಸ್ವಾಗತಿಸುತ್ತೇವೆ ಎಂಬ ರಿಲಯನ್ಸ್ ನೀಡಿದ್ದ ಹೇಳಿಕೆಗೆ ಸ್ಟಾರ್‌ಲಿಂಕ್ ಇದೀಗ ಅಧಿಕೃತವಾಗಿ ಪ್ರತಿಕ್ರಿಯಿಸಿದೆ. ತಾನು ಭಾರತದಲ್ಲಿ ಸೇವೆ ಆರಂಭಿಸಲು ಸಂಪೂರ್ಣವಾಗಿ ಸಜ್ಜಾಗಿರುವುದಾಗಿ ಸಂಸ್ಥೆ ತಿಳಿಸಿದೆ.

ಸ್ಟಾರ್‌ಲಿಂಕ್ ನೀಡಿರುವ ಅಧಿಕೃತ ಸ್ಪಷ್ಟನೆ

ತನ್ನ ಅಧಿಕೃತ 'X' ಖಾತೆಯಲ್ಲಿ ಪೋಸ್ಟ್ ಹಂಚಿಕೊಂಡಿರುವ ಸ್ಟಾರ್‌ಲಿಂಕ್ ಸಂಸ್ಥೆಯು, ನಾವು ಕಳೆದ ಐದಕ್ಕೂ ಹೆಚ್ಚು ವರ್ಷಗಳಿಂದ ಭಾರತೀಯ ನಿಯಂತ್ರಕರು, ಉದ್ಯಮ ಕ್ಷೇತ್ರದ ಗಣ್ಯರು ಮತ್ತು ಸಂಪರ್ಕ ನಿರ್ವಾಹಕರೊಂದಿಗೆ ನಿಕಟವಾಗಿ ಕೆಲಸ ಮಾಡಿದ್ದೇವೆ. ಭಾರತೀಯ ಇಂಟರ್ನೆಟ್ ಸಂಚಾರವನ್ನು ಅತ್ಯಂತ ಸುರಕ್ಷಿತವಾಗಿ ಪೂರೈಸಲು ಅಗತ್ಯವಿರುವ ಮೀಸಲಾದ ವ್ಯವಸ್ಥೆಗಳು, ಗೇಟ್‌ವೇಗಳು ಹಾಗೂ ತಾಂತ್ರಿಕ ಮೂಲಸೌಕರ್ಯಗಳ ಜಾಲವನ್ನು ದೇಶಾದ್ಯಂತ ಈಗಾಗಲೇ ನಿರ್ಮಿಸಿದ್ದೇವೆ. ಈ ಎಲ್ಲಾ ಮೂಲಸೌಕರ್ಯಗಳು ಸರ್ಕಾರದ ಅಗತ್ಯ ಅನುಮೋದನೆಗಳೊಂದಿಗೆ ಸಿದ್ಧಗೊಂಡಿವೆ. ಭಾರತದ ಮೂಲೆ ಮೂಲೆಗೂ ಹೈ-ಸ್ಪೀಡ್ ಇಂಟರ್ನೆಟ್ ಸಂಪರ್ಕ ಕಲ್ಪಿಸಲು ಸ್ಟಾರ್‌ಲಿಂಕ್ ಸಂಪೂರ್ಣವಾಗಿ ಸಿದ್ಧವಾಗಿದೆ ಎಂದು ಹೇಳಿದೆ.

ಮಸ್ಕ್ ಆರೋಪ ಮತ್ತು ರಿಲಯನ್ಸ್ ತಿರುಗೇಟು

ಕೆಲವು ಉದ್ಯಮ ಸಮೂಹಗಳು ಮತ್ತು ಭಾರಿ ಪ್ರಭಾವಿ ಉದ್ಯಮಿಗಳು ಸ್ಟಾರ್‌ಲಿಂಕ್ ಸಂಸ್ಥೆಯು ಭಾರತೀಯ ಮಾರುಕಟ್ಟೆಗೆ ಪ್ರವೇಶಿಸುವುದನ್ನು ತಡೆಯಲು ಯತ್ನಿಸುತ್ತಿದ್ದಾರೆ ಎಂದು ಎಲಾನ್ ಮಸ್ಕ್ ಇತ್ತೀಚೆಗೆ ಆರೋಪಿಸಿದ್ದರು. ಸರಣಿ ಪೋಸ್ಟ್‌ಗಳಲ್ಲಿ ಮುಕೇಶ್ ಅಂಬಾನಿ ಅವರ ಹೆಸರನ್ನು ಉಲ್ಲೇಖಿಸುವ ಮುನ್ನ ಮಸ್ಕ್ ಈ ವಾದ ಮುಂದಿಟ್ಟಿದ್ದರು.

ಆದರೆ, ಮಸ್ಕ್ ಅವರ ಈ ಆರೋಪಗಳನ್ನು ರಿಲಯನ್ಸ್ ಇಂಡಸ್ಟ್ರೀಸ್ ತಿರಸ್ಕರಿಸಿದೆ. ಈ ಬಗ್ಗೆ ರಿಲಯನ್ಸ್ ವಕ್ತಾರರು , ಭಾರತೀಯ ಮಾರುಕಟ್ಟೆ ಮತ್ತು ರಿಲಯನ್ಸ್ ಕುರಿತು ವ್ಯಕ್ತವಾಗಿರುವ ಹೇಳಿಕೆಗಳ ಹಿನ್ನೆಲೆಯಲ್ಲಿ ಸತ್ಯಾಂಶಗಳನ್ನು ಬಹಿರಂಗಪಡಿಸುವುದು ಅಗತ್ಯವಾಗಿದೆ. ಭಾರತೀಯ ಉದ್ಯಮ ರಂಗದ ಭಾಗವಾಗಿ ಬೆಳೆದಿರುವ ರಿಲಯನ್ಸ್, ಜನರ ಜೀವನಮಟ್ಟವನ್ನು ಸುಧಾರಿಸುವ ದೇಶೀಯ ಹಾಗೂ ಅಂತರರಾಷ್ಟ್ರೀಯ ಹೂಡಿಕೆಗಳನ್ನು ಯಾವಾಗಲೂ ಸ್ವಾಗತಿಸುತ್ತದೆ. ಆದರೆ, ಈ ಮುಕ್ತತೆಯು ದೇಶದ ಕಾನೂನಿನ ಚೌಕಟ್ಟಿಗೆ ಒಳಪಟ್ಟಿರಬೇಕು. ಕೇಂದ್ರ ಸರ್ಕಾರ ಸ್ಪಷ್ಟಪಡಿಸಿರುವಂತೆ, ದೇಶೀಯ ಅಥವಾ ವಿದೇಶಿ ಸಂಸ್ಥೆಯಾಗಿರಲಿ ಪ್ರತಿಯೊಬ್ಬ ಅರ್ಜಿದಾರರಿಗೂ ಒಂದೇ ರೀತಿಯ ನಿಯಮಗಳು ಮತ್ತು ಪ್ರಕ್ರಿಯೆಗಳು ಅನ್ವಯವಾಗುತ್ತವೆ. ರಿಲಯನ್ಸ್ ಜಿಯೋದ ಸ್ವಂತ ಉಪಗ್ರಹ ಸೇವೆಗಳು ಕೂಡ ಪ್ರಸ್ತುತ ಸರ್ಕಾರದ ಅಂತಿಮ ಅನುಮತಿಗಾಗಿ ಕಾಯುತ್ತಿವೆ ಎಂದು ನೆನಪಿಸಿದ್ದಾರೆ.

ಕೇಂದ್ರ ಸರ್ಕಾರದ ಸ್ಪಷ್ಟನೆ

ಎಲಾನ್ ಮಸ್ಕ್ ಅವರ ಆರೋಪಗಳನ್ನು ಕೇಂದ್ರ ಸರ್ಕಾರವೂ ತಳ್ಳಿಹಾಕಿದೆ. ಕೇಂದ್ರ ಸಂವಹನ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಈ ಬಗ್ಗೆ ಮಾತನಾಡಿ, ಸ್ಯಾಟಲೈಟ್ ಸ್ಪೆಕ್ಟ್ರಮ್ ನಿಯೋಜನೆಯು ನಿರ್ದಿಷ್ಟ ನಿಯಮಾವಳಿಗಳಿಗೆ ಬದ್ಧವಾಗಿದೆ. ಸರ್ಕಾರವು ಆದಾಯ ಹಂಚಿಕೆ ಚೌಕಟ್ಟನ್ನುಅಂತಿಮಗೊಳಿಸಿದ ನಂತರ ಮತ್ತು ಅರ್ಹ ಕಂಪನಿಗಳು ರಾಷ್ಟ್ರೀಯ ಭದ್ರತಾ ಮಾನದಂಡಗಳನ್ನು ಸಂಪೂರ್ಣವಾಗಿ ಪೂರೈಸಿದ ತಕ್ಷಣ ಉಪಗ್ರಹ ತರಂಗಾಂತರವನ್ನು ಹಂಚಿಕೆ ಮಾಡಲಾಗುತ್ತದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಭಾರತದಲ್ಲಿ ಬೆಳೆಯುತ್ತಿರುವ ಸ್ಯಾಟಲೈಟ್ ಇಂಟರ್ನೆಟ್ ಸ್ಪರ್ಧೆ

ಪ್ರಸ್ತುತ ಭಾರತದಲ್ಲಿ ಉಪಗ್ರಹ ಆಧಾರಿತ ಇಂಟರ್ನೆಟ್ ಸೇವೆಗಳನ್ನು ಒದಗಿಸಲು ಸ್ಟಾರ್‌ಲಿಂಕ್, ರಿಲಯನ್ಸ್ ಜಿಯೋ ಸ್ಯಾಟಲೈಟ್ ಮತ್ತು ಯುಟೆಲ್‌ಸ್ಯಾಟ್ ಒನ್‌ವೆಬ್ ಕಂಪನಿಗಳು ಅಗತ್ಯ ಆರಂಭಿಕ ಪರವಾನಗಿಗಳನ್ನು ಪಡೆದುಕೊಂಡಿವೆ. ಸಾಂಪ್ರದಾಯಿಕ ಕೇಬಲ್ ಅಥವಾ ಫೈಬರ್ ಬ್ರಾಡ್‌ಬ್ಯಾಂಡ್ ತಲುಪಲು ಕಷ್ಟಕರವಾದ ಹಿಮಾಲಯದ ಗಡಿ ಪ್ರದೇಶಗಳು, ಈಶಾನ್ಯ ರಾಜ್ಯಗಳು ಹಾಗೂ ಗ್ರಾಮೀಣ ಭಾಗಗಳಿಗೆ ತಡೆರಹಿತ ಇಂಟರ್ನೆಟ್ ಒದಗಿಸಲು ಈ ತಂತ್ರಜ್ಞಾನ ಕ್ರಾಂತಿಕಾರಿ ಬದಲಾವಣೆ ತರಲಿದೆ. ಇದರ ಜೊತೆಗೆ ಜಾಗತಿಕ ಇ-ಕಾಮರ್ಸ್ ದೈತ್ಯ ಅಮೆಜಾನ್ ಸಂಸ್ಥೆಯ 'ಪ್ರಾಜೆಕ್ಟ್ ಕೈಪರ್' ಕೂಡ ಭಾರತದಲ್ಲಿ ಉಪಗ್ರಹ ಸೇವೆ ಆರಂಭಿಸಲು ಪರವಾನಗಿಗಾಗಿ ಅರ್ಜಿ ಸಲ್ಲಿಸಿದೆ.

ಮಂಗಳೂರು ಏರ್‌ಪೋರ್ಟ್‌ ಯೂಸರ್‌ ಡೆವಲಪ್‌ಮೆಂಟ್‌ ಶುಲ್ಕ ಭಾರೀ ಪ್ರಮಾಣದಲ್ಲಿ ಏರಿಸಲು ಅದಾನಿ ತಯಾರಿ

Santosh Naik — Tue, 20 Oct 2026 19:23:14 +0530

ನವದೆಹಲಿ/ಮಂಗಳೂರು (ಅ.20): ಮಂಗಳೂರು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ (MIA) ವಿಮಾನ ಏರಿ ಹಾರಾಟ ನಡೆಸುವುದು ಮುಂಬರುವ ಐದು ವರ್ಷಗಳಲ್ಲಿ ಅತ್ಯಂತ ದುಬಾರಿಯಾಗುವ ಲಕ್ಷಣಗಳು ಕಂಡುಬರುತ್ತಿವೆ. ವಿಮಾನ ನಿಲ್ದಾಣದ ಮೂಲಸೌಕರ್ಯ ಅಭಿವೃದ್ಧಿಗಾಗಿ ಕೈಗೊಳ್ಳಲು ಉದ್ದೇಶಿಸಿರುವ ₹4,200 ಕೋಟಿ ರೂಪಾಯಿಗಳ ಬೃಹತ್ ಹೂಡಿಕೆ ಯೋಜನೆಗೆ ಅಗತ್ಯವಾದ ಹಣವನ್ನು ಕ್ರೋಡೀಕರಿಸಲು, ವಿಮಾನ ನಿಲ್ದಾಣದ ನಿರ್ವಹಣೆ ವಹಿಸಿಕೊಂಡಿರುವ 'ಅದಾನಿ ಏರ್‌ಪೋರ್ಟ್ಸ್' (Adani Airport) ಸಂಸ್ಥೆಯು ಬಳಕೆದಾರರ ಅಭಿವೃದ್ಧಿ ಶುಲ್ಕವನ್ನು (UDF - User Development Fee) 2031 ರ ಹಣಕಾಸು ವರ್ಷದ ವೇಳೆಗೆ (FY31) ಸರಿಸುಮಾರು ದ್ವಿಗುಣಗೊಳಿಸಲು ಪ್ರಸ್ತಾವನೆ ಸಲ್ಲಿಸಿದೆ.

ಪ್ರಸ್ತುತ ಮಂಗಳೂರು ವಿಮಾನ ನಿಲ್ದಾಣದಿಂದ ಹೊರಡುವ ದೇಶೀಯ (Domestic) ವಿಮಾನ ಪ್ರಯಾಣಿಕರಿಗೆ ₹735 ಹಾಗೂ ಅಂತರರಾಷ್ಟ್ರೀಯ (International) ವಿಮಾನ ಪ್ರಯಾಣಿಕರಿಗೆ ₹1,120 ಯುಡಿಎಫ್ ಶುಲ್ಕವನ್ನು ವಿಧಿಸಲಾಗುತ್ತಿದೆ. ನಿಯಂತ್ರಣ ಪ್ರಾಧಿಕಾರದ ಅಂತಿಮ ಅನುಮೋದನೆಗೆ ಒಳಪಟ್ಟು, 2026 ರ ಡಿಸೆಂಬರ್ 1 ರಿಂದಲೇ ಈ ದರಗಳನ್ನು ಕ್ರಮವಾಗಿ ₹890 ಹಾಗೂ ₹1,360 ಕ್ಕೆ ಏರಿಸಲು ಪ್ರಸ್ತಾವಿಸಲಾಗಿದೆ. ತದನಂತರ ಹಂತ ಹಂತವಾಗಿ ಹೆಚ್ಚಳ ಮಾಡಿ, 2031 ರ ಮಾರ್ಚ್ ವೇಳೆಗೆ ದೇಶೀಯ ನಿರ್ಗಮನ ಶುಲ್ಕವನ್ನು ₹1,440 ಕ್ಕೆ (ಶೇ. 96 ರಷ್ಟು ಏರಿಕೆ) ಹಾಗೂ ಅಂತರರಾಷ್ಟ್ರೀಯ ನಿರ್ಗಮನ ಶುಲ್ಕವನ್ನು ₹2,210 ಕ್ಕೆ (ಶೇ. 97 ರಷ್ಟು ಏರಿಕೆ) ಹೆಚ್ಚಿಸುವ ಗುರಿ ಹೊಂದಲಾಗಿದೆ.

ಪ್ರಸ್ತಾವಿತ ಪರಿಷ್ಕರಣೆಯ ಪ್ರಕಾರ, ಮೊದಲ ಮೂರು ಹಂತಗಳಲ್ಲಿ ಪ್ರತಿಬಾರಿ ಶೇ. 20 ರಿಂದ ಶೇ. 22 ರಷ್ಟು ಶುಲ್ಕ ಹೆಚ್ಚಳವಾಗಲಿದ್ದು, 2031 ರ ಅಂತಿಮ ಹಂತದಲ್ಲಿ ಶೇ. 10 ರಷ್ಟು ದರ ಏರಿಕೆಯಾಗಲಿದೆ. ಗಮನಾರ್ಹವೆಂದರೆ, ಕಳೆದ ಕೆಲವು ವರ್ಷಗಳಲ್ಲೂ ಇಲ್ಲಿ ತೀವ್ರ ದರ ಏರಿಕೆ ಮಾಡಲಾಗಿತ್ತು; 2022 ರಲ್ಲಿ ಕೇವಲ ₹150 ಇದ್ದ ದೇಶೀಯ ನಿರ್ಗಮನ ಶುಲ್ಕವು 2026 ರ ಹಣಕಾಸು ವರ್ಷದ ವೇಳೆಗೆ ಶೇ. 390 ರಷ್ಟು ಏರಿಕೆಯಾಗಿ ₹735 ಕ್ಕೆ ತಲುಪಿತ್ತು.

ವಿಮಾನ ನಿಲ್ದಾಣಕ್ಕೆ ಆಗಮಿಸುವ (Arrival) ಪ್ರಯಾಣಿಕರಿಗೂ ದರ ಏರಿಕೆ ಬಿಸಿ

ಕೇವಲ ವಿಮಾನ ಏರಿ ಹೊರಡುವ ಪ್ರಯಾಣಿಕರಷ್ಟೇ ಅಲ್ಲದೆ, ಮಂಗಳೂರು ವಿಮಾನ ನಿಲ್ದಾಣಕ್ಕೆ ಬಂದು ಇಳಿಯುವ (Arrival) ಪ್ರಯಾಣಿಕರ ಮೇಲೆಯೂ ಹೆಚ್ಚುವರಿ ಶುಲ್ಕ ವಿಧಿಸಲು ಯೋಜನೆ ರೂಪಿಸಲಾಗಿದೆ.

ದೇಶೀಯ ಆಗಮನ ಶುಲ್ಕ: ಪ್ರಸ್ತುತ ಇರುವ ₹315 ರಿಂದ ಆರಂಭದಲ್ಲಿ ₹380 ಕ್ಕೆ ಏರಿಕೆಯಾಗಿ, 2031 ರ ವೇಳೆಗೆ ₹620 ಕ್ಕೆ ತಲುಪಲಿದೆ.

ಅಂತರರಾಷ್ಟ್ರೀಯ ಆಗಮನ ಶುಲ್ಕ: ಪ್ರಸ್ತುತ ಇರುವ ₹480 ರಿಂದ ಮೊದಲ ವರ್ಷ ₹580 ಕ್ಕೆ ಏರಿಕೆಯಾಗಿ, 2031 ರ ವೇಳೆಗೆ ₹940 ಕ್ಕೆ ಏರಿಕೆಯಾಗಲಿದೆ.

ಬಳಕೆದಾರರ ಅಭಿವೃದ್ಧಿ ಶುಲ್ಕವನ್ನು ವಿಮಾನಯಾನ ಸಂಸ್ಥೆಗಳು (Airlines) ಟಿಕೆಟ್ ಬುಕಿಂಗ್ ಮಾಡುವಾಗಲೇ ನೇರವಾಗಿ ಟಿಕೆಟ್ ದರದಲ್ಲಿ ಸೇರಿಸಿ ಸಂಗ್ರಹಿಸುತ್ತವೆ ಹಾಗೂ ಬಳಿಕ ವಿಮಾನ ನಿಲ್ದಾಣ ನಿರ್ವಾಹಕರಿಗೆ ವರ್ಗಾಯಿಸುತ್ತವೆ. ಹೀಗಾಗಿ ಈ ದರ ಏರಿಕೆಯಿಂದಾಗಿ ಮಂಗಳೂರಿನ ವಿಮಾನ ಟಿಕೆಟ್ ದರಗಳು ಗಣನೀಯವಾಗಿ ಏರಿಕೆಯಾಗಲಿವೆ.

ಇತರ ಪ್ರಮುಖ ನಗರಗಳ ವಿಮಾನ ನಿಲ್ದಾಣಗಳಿಗಿಂತ ಮಂಗಳೂರು ತೀರಾ ದುಬಾರಿ!

ದೇಶದ ಇತರ ಪ್ರಮುಖ ನಗರಗಳಿಗೆ ಹೋಲಿಸಿದರೆ ಮಂಗಳೂರು ವಿಮಾನ ನಿಲ್ದಾಣವು ಈಗಾಗಲೇ ಅತ್ಯಂತ ಹೆಚ್ಚಿನ ದೇಶೀಯ ನಿರ್ಗಮನ ಯುಡಿಎಫ್ ಶುಲ್ಕವನ್ನು ಹೊಂದಿರುವ ನಿಲ್ದಾಣಗಳಲ್ಲಿ ಒಂದಾಗಿದೆ. 2026 ರ ಸೆಪ್ಟೆಂಬರ್‌ನಿಂದ ಜಾರಿಯಲ್ಲಿರುವ ದರಗಳ ಪ್ರಕಾರ, ಹೈದರಾಬಾದ್ ವಿಮಾನ ನಿಲ್ದಾಣದಲ್ಲಿ ₹515 ಹಾಗೂ ಬೆಂಗಳೂರಿನ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ₹300 ಮಾತ್ರ ಶುಲ್ಕವಿದೆ. ಇನ್ನು ದೆಹಲಿ ಮತ್ತು ಮುಂಬೈನಂತಹ ದೇಶದ ಬೃಹತ್ ಮೆಟ್ರೋ ವಿಮಾನ ನಿಲ್ದಾಣಗಳಲ್ಲಿ ಈ ಶುಲ್ಕ ಕೇವಲ ₹120 ರಿಂದ ₹130 ರ ವ್ಯಾಪ್ತಿಯಲ್ಲಿದೆ.

ಒಂದೆಡೆ ದರಗಳು ಭಾರಿ ಹೆಚ್ಚಾಗುತ್ತಿದ್ದರೆ, ಕಾರ್ಯಾಚರಣೆಯ ಪ್ರಮಾಣದಲ್ಲಿ ಮಂಗಳೂರು ಇವುಗಳ ಸಣ್ಣ ಭಾಗದಷ್ಟಿದೆ. 2026 ರ ಹಣಕಾಸು ವರ್ಷದಲ್ಲಿ ಮಂಗಳೂರು ನಿಲ್ದಾಣವು ದಿನಕ್ಕೆ ಸರಾಸರಿ 50 ವಿಮಾನಗಳ ಸಂಚಾರವನ್ನು ಕಂಡಿದ್ದರೆ, ಬೆಂಗಳೂರು ದಿನಕ್ಕೆ 769 ಹಾಗೂ ಹೈದರಾಬಾದ್ 570 ವಿಮಾನಗಳ ಸಂಚಾರವನ್ನು ನಿರ್ವಹಿಸುತ್ತವೆ. ಈ ಹಿನ್ನೆಲೆಯಲ್ಲಿ, ಪ್ರಯಾಣಿಕರ ಸಂಖ್ಯೆಗೆ ಹೋಲಿಸಿದರೆ ಇಷ್ಟೊಂದು ಭಾರಿ ಪ್ರಮಾಣದ ದರ ಏರಿಕೆ ಎಷ್ಟು ಸಮಂಜಸ ಎಂಬ ಪ್ರಶ್ನೆಗಳು ಎದ್ದಿವೆ.

ಆದರೆ, ವಿಮಾನ ನಿಲ್ದಾಣದ ಮೂಲಸೌಕರ್ಯವನ್ನು ಮೇಲ್ದರ್ಜೆಗೇರಿಸಲು ಹಾಗೂ ಭವಿಷ್ಯದ ಪ್ರಯಾಣಿಕರ ದಟ್ಟಣೆಯನ್ನು ನಿಭಾಯಿಸಲು ಈ ಬಂಡವಾಳ ಹೂಡಿಕೆ (Capex) ಅತ್ಯಗತ್ಯ ಎಂದು ಮಂಗಳೂರು ಇಂಟರ್ನ್ಯಾಷನಲ್ ಏರ್‌ಪೋರ್ಟ್ ಲಿಮಿಟೆಡ್ (MgIAL) ಸಮರ್ಥಿಸಿಕೊಂಡಿದೆ.

ಈ ಕುರಿತು ನೀತಿ ವಿಶ್ಲೇಷಕ ಹಾಗೂ 'ಬಾಸ್ಪಿನ್ ಕನ್ಸಲ್ಟಿಂಗ್' ಸಂಸ್ಥಾಪಕ ಅಂಕುರ್ ಸಿಂಘಾಲ್ ಮಾತನಾಡಿ, "ವಿಮಾನ ನಿಲ್ದಾಣದ ಅಭಿವೃದ್ಧಿ ಅಗತ್ಯ ನಿಜ, ಆದರೆ ಪ್ರಮುಖ ಬಂಡವಾಳ ಹೂಡಿಕೆಯನ್ನು ಪ್ರಯಾಣಿಕರ ಅಗತ್ಯಕ್ಕೆ ತಕ್ಕಂತೆ ಹಂತ ಹಂತವಾಗಿ ಮಾಡಬೇಕು. ತೀರಾ ಹೆಚ್ಚಿನ ಶುಲ್ಕಗಳು ವಿಮಾನ ಪ್ರಯಾಣಿಕರು ಹಾಗೂ ವಿಮಾನಯಾನ ಸಂಸ್ಥೆಗಳ ಮೇಲೆ ಭಾರಿ ಹೊರೆಯಾಗಲಿವೆ. ದರ ವಸೂಲಾತಿಯು ಯೋಜನೆಯ ಸಕಾಲಿಕ ಪೂರ್ಣಗೊಳಿಸುವಿಕೆ ಮತ್ತು ಉತ್ತಮ ಸೇವೆಯೊಂದಿಗೆ ಜೋಡಣೆಯಾಗಿರಬೇಕು" ಎಂದಿದ್ದಾರೆ.

ಭಾರತೀಯ ವಿಮಾನ ನಿಲ್ದಾಣಗಳ ಆರ್ಥಿಕ ನಿಯಂತ್ರಣ ಪ್ರಾಧಿಕಾರಕ್ಕೆ (AERA) ಅಕ್ಟೋಬರ್ 7 ರಂದು ಬರೆದ ಪತ್ರದಲ್ಲಿ MgIAL ನ ಅಧಿಕೃತ ಸಹಿ ಮಾಡಿರುವ ಮಧುರ್ ಅರೋರಾ, "AERA ಕಾಯ್ದೆಯ ಸೆಕ್ಷನ್ 13 ಅನ್ನು ಪಾಲಿಸುವಾಗ ವಿಮಾನ ನಿಲ್ದಾಣದ ಆರ್ಥಿಕವಾಗಿ ಲಾಭದಾಯಕ ಕಾರ್ಯಾಚರಣೆಯನ್ನು ಖಚಿತಪಡಿಸಿಕೊಳ್ಳುವುದು ಅಗತ್ಯ" ಎಂದು ಉಲ್ಲೇಖಿಸಿದ್ದಾರೆ.

₹4,200 ಕೋಟಿ ರೂಪಾಯಿಗಳ ಮಾಸ್ಟರ್ ಪ್ಲಾನ್ ವಿಸ್ತರಣಾ ಯೋಜನೆ

ಮಂಗಳೂರು ವಿಮಾನ ನಿಲ್ದಾಣವು 2026 ರ ಹಣಕಾಸು ವರ್ಷದಲ್ಲಿ 2.55 ಮಿಲಿಯನ್ (25.5 ಲಕ್ಷ) ಪ್ರಯಾಣಿಕರ ಸಂಚಾರವನ್ನು ನಿರ್ವಹಿಸಿದೆ. ಅದಾನಿ ಸಂಸ್ಥೆಯ ಅಂದಾಜಿನಂತೆ ಇದು 2027 ರಲ್ಲಿ 2.92 ಮಿಲಿಯನ್, 2028 ರಲ್ಲಿ 3.34 ಮಿಲಿಯನ್, 2029 ರಲ್ಲಿ 3.59 ಮಿಲಿಯನ್, 2030 ರಲ್ಲಿ 3.85 ಮಿಲಿಯನ್ ಹಾಗೂ 2031 ರ ಹಣಕಾಸು ವರ್ಷದ ವೇಳೆಗೆ 4.11 ಮಿಲಿಯನ್ (41.1 ಲಕ್ಷ) ಪ್ರಯಾಣಿಕರಿಗೆ ಏರಿಕೆಯಾಗಲಿದೆ. ಅಂದರೆ ಐದು ವರ್ಷಗಳಲ್ಲಿ ಶೇಕಡಾ 61 ರಷ್ಟು ಪ್ರಯಾಣಿಕರ ಬೆಳವಣಿಗೆಯಾಗಲಿದೆ.

2035 ರ ವೇಳೆಗೆ ವಾರ್ಷಿಕ 5 ಮಿಲಿಯನ್ (50 ಲಕ್ಷ) ಪ್ರಯಾಣಿಕರನ್ನು ನಿರ್ವಹಿಸುವ ಸಾಮರ್ಥ್ಯ ಹೊಂದುವಂತೆ ವಿಮಾನ ನಿಲ್ದಾಣದ ಮಾಸ್ಟರ್ ಪ್ಲಾನ್ ರೂಪಿಸಲಾಗಿದೆ. 2027–2031 ರ ಅವಧಿಗೆ ಒಟ್ಟು ₹4,205.87 ಕೋಟಿ ಬಂಡವಾಳ ಹೂಡಿಕೆಯನ್ನು ಅಂದಾಜಿಸಲಾಗಿದೆ.

ಪ್ರಮುಖ ಹೂಡಿಕೆಗಳ ವಿವರ

ರನ್‌ವೇ, ಟ್ಯಾಕ್ಸಿವೇ ಹಾಗೂ ಆಪ್ರಾನ್ ಅಭಿವೃದ್ಧಿ: ₹1,674.2 ಕೋಟಿ.
ಟರ್ಮಿನಲ್ ಮಾರ್ಪಾಡು ಹಾಗೂ ವಿಸ್ತರಣೆ: ಸುಮಾರು ₹1,000 ಕೋಟಿ.
ಅನುಕೂಲಕರ ಮೂಲಸೌಕರ್ಯ (Ancillary Infrastructure): ₹1,118.65 ಕೋಟಿ.
ಸಂಪರ್ಕ ರಸ್ತೆಗಳ ಜಾಲ: ಸುಮಾರು ₹200 ಕೋಟಿ.
ಸುರಕ್ಷತೆ, ಕಾರ್ಯಾಚರಣೆ ಹಾಗೂ ಉಪಕರಣಗಳು: ಸುಮಾರು ₹300 ಕೋಟಿ.

MgIAL ತನ್ನ ನಿಯಂತ್ರಿತ ಆಸ್ತಿ ಆಧಾರದ ಮೇಲೆ (RAB) ಶೇ. 14.73 ರಷ್ಟು ನ್ಯಾಯಯುತ ಲಾಭದ ದರವನ್ನು (Rate of return) ಕೋರಿದೆ. 2020 ಮತ್ತು 2021 ರಲ್ಲಿ ಸರ್ಕಾರ ಖಾಸಗೀಕರಣಗೊಳಿಸಿದ 6 ವಿಮಾನ ನಿಲ್ದಾಣಗಳಲ್ಲಿ (ಮಂಗಳೂರು, ಅಹಮದಾಬಾದ್, ಲಕ್ನೋ, ಜೈಪುರ, ಗುವಾಹಾಟಿ, ತಿರುವನಂತಪುರಂ) ಮಂಗಳೂರು ಒಂದಾಗಿದ್ದು, ಈ ಆರನ್ನೂ ನಿರ್ವಹಿಸುವ ಹಕ್ಕನ್ನು ಅದಾನಿ ಸಮೂಹವೇ ಪಡೆದುಕೊಂಡಿತ್ತು.

ಕೇಂದ್ರ ಸರ್ಕಾರಿ ನೌಕರರಿಗೆ ಸಿಹಿ ಸುದ್ದಿ, ಅಕ್ಟೋಬರ್‌ 21ಕ್ಕೆ ಪ್ರಕಟವಾಗಲಿದ್ಯಾ ಡಿಎ ಹೈಕ್‌ ಘೋಷಣೆ?

Santosh Naik — Tue, 20 Oct 2026 17:59:01 +0530

ನವದೆಹಲಿ (ಅ.20): ಕೇಂದ್ರ ಸರ್ಕಾರದ ಲಕ್ಷಾಂತರ ನೌಕರರು ಹಾಗೂ ಪಿಂಚಣಿದಾರರು ಸುದೀರ್ಘ ದಿನಗಳಿಂದ ಕಾತರದಿಂದ ಕಾಯುತ್ತಿರುವ ತುಟ್ಟಿಭತ್ಯೆ (DA - Dearness Allowance) ಹೆಚ್ಚಳಕ್ಕೆ ಕೊನೆಗೂ ಮುಹೂರ್ತ ಕೂಡಿಬಂದಿದೆ. 2026 ರ ಜುಲೈ 1 ರಿಂದ ಪೂರ್ವಾನ್ವಯವಾಗುವಂತೆ ಜಾರಿಗೆ ಬರಬೇಕಿರುವ ಈ ಡಿಎ ಏರಿಕೆಯನ್ನು, ಅಕ್ಟೋಬರ್ 21 ರ ಬುಧವಾರ ನಡೆಯಲಿರುವ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸಚಿವ ಸಂಪುಟ ಸಭೆಯಲ್ಲಿ (Cabinet Meeting) ಅಧಿಕೃತವಾಗಿ ಪ್ರಕಟಿಸುವ ಭಾರಿ ಸಾಧ್ಯತೆಯಿದೆ. ಈ ಸಂಭಾವ್ಯ ಹೆಚ್ಚಳದಿಂದಾಗಿ ಕೇಂದ್ರ ಸರ್ಕಾರಿ ನೌಕರರ ಪ್ರಸ್ತುತ ಶೇಕಡಾ 60 ರಷ್ಟಿರುವ ಡಿಎ ದರವು ಶೇಕಡಾ 63 ಕ್ಕೆ ಏರಿಕೆಯಾಗಲಿದೆ.

ಇಂದು ವಿಜಯದಶಮಿ ಹಬ್ಬವಾಗಿದ್ದರೂ ಕೇಂದ್ರ ಸರ್ಕಾರವು ಜುಲೈ ಅವಧಿಯ ಡಿಎ ಏರಿಕೆಯನ್ನು ಇನ್ನೂ ಘೋಷಿಸಿಲ್ಲ. ಈ ತಿಂಗಳ ಆರಂಭದಲ್ಲಿ ಬುಧವಾರದಂದು ನಡೆದಿದ್ದ ಎರಡು ಸಂಪುಟ ಸಭೆಗಳಲ್ಲೂ ಡಿಎ ವಿಷಯ ನನೆಗುದಿಗೆ ಬಿದ್ದಿತ್ತಾದರೂ, ಬುಧವಾರ (ಅಕ್ಟೋಬರ್ 21) ನಡೆಯಲಿರುವ ಸಂಪುಟ ಸಭೆಯ ಮೇಲೆ ನೌಕರರ ನಿರೀಕ್ಷೆ ಹೆಚ್ಚಾಗಿದೆ.

ಅಕ್ಟೋಬರ್ 21 ರ ಸಭೆಯಲ್ಲೇ ಪ್ರಕಟಣೆ ಸಾಧ್ಯತೆ ಏಕೆ?

ಆಲ್ ಇಂಡಿಯಾ ನ್ಯೂ ಪೆನ್ಷನ್ ಸ್ಕೀಮ್ (AINPS) ಅಧ್ಯಕ್ಷ ಮಂಜೀತ್ ಸಿಂಗ್ ಪಟೇಲ್ ಈ ಕುರಿತು ಮಾತನಾಡಿ, ಬುಧವಾರ ನಡೆಯಲಿರುವ ಸಂಪುಟ ಸಭೆಯಲ್ಲಿ ಡಿಎ ಹೆಚ್ಚಳ ಘೋಷಣೆಯಾಗುವ ಸಕಲ ಸಾಧ್ಯತೆಗಳಿವೆ. ಏಕೆಂದರೆ ಈಗಾಗಲೇ ಈ ನಿರ್ಧಾರ ಕೈಗೊಳ್ಳುವಲ್ಲಿ ಸಾಕಷ್ಟು ವಿಳಂಬವಾಗಿದೆ ಎಂದಿದ್ದಾರೆ. ಅಂತೆಯೇ, ನಾಗರಿಕ ರಕ್ಷಣಾ ನೌಕರರ ಸಂಘಟನೆಯಾದ ‘ಆಲ್ ಇಂಡಿಯಾ ಡಿಫೆನ್ಸ್ ಎಂಪ್ಲಾಯೀಸ್ ಫೆಡರೇಶನ್’ (AIDEF) ಕಾರ್ಯದರ್ಶಿ ಸಿ. ಶ್ರೀಕುಮಾರ್ ಅವರು ಮಾತನಾಡಿ, ಬುಧವಾರದ ಸಂಪುಟ ಸಭೆಯ ನಂತರ ಸರ್ಕಾರ ಖಂಡಿತವಾಗಿಯೂ ಡಿಎ ಏರಿಕೆಯ ಅಧಿಕೃತ ಆದೇಶ ಹೊರಡಿಸಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಪ್ರಸ್ತುತ ನೌಕರರಿಗೆ ಶೇ. 60 ರಷ್ಟು ಡಿಎ ಸಿಗುತ್ತಿದ್ದು, ಜುಲೈ 2025 ರಿಂದ ಜೂನ್ 2026 ರವರೆಗಿನ 12 ತಿಂಗಳ ಚಿಲ್ಲರೆ ಹಣದುಬ್ಬರ (Retail Inflation) ಸರಾಸರಿ ಆಧಾರದ ಮೇಲೆ ಶೇಕಡಾ 3 ರಷ್ಟು ಡಿಎ ಹೆಚ್ಚಳವಾಗುವುದು ಖಚಿತವಾಗಿದೆ.

ಹಬ್ಬಗಳ ಋತುವಿನಲ್ಲಿ ಸಿಗಲಿದೆಯೇ ಬೋನಸ್?

ಸಾಮಾನ್ಯವಾಗಿ ಕೇಂದ್ರ ಸರ್ಕಾರವು ವರ್ಷಕ್ಕೆ ಎರಡು ಬಾರಿ (ಜನವರಿ ಮತ್ತು ಜುಲೈ) ಡಿಎ ಪರಿಷ್ಕರಣೆ ಮಾಡುತ್ತದೆ. ಆದರೆ ಈ ಪ್ರಕಟಣೆಗಳನ್ನು ಯಾವಾಗಲೂ ಅದೇ ತಿಂಗಳಲ್ಲಿ ಮಾಡುವುದಿಲ್ಲ; ಬದಲಾಗಿ ಹೋಳಿ, ದಸರಾ ಅಥವಾ ದೀಪಾವಳಿ ಹಬ್ಬಗಳ ಸಂದರ್ಭದಲ್ಲಿ ನೌಕರರಿಗೆ ಕೊಡುಗೆಯಾಗಿ ನೀಡುತ್ತದೆ.

ಕಳೆದ ಅಕ್ಟೋಬರ್ 14 ರ ಸಂಪುಟ ಸಭೆಯಲ್ಲೇ ಡಿಎ ಪ್ರಕಟಣೆಯಾಗಲಿದೆ ಎಂದು ನೌಕರರು ಭಾವಿಸಿದ್ದರು. ಆದರೆ ಸರ್ಕಾರ ರೈಲ್ವೇ ನೌಕರರಿಗೆ 'ಪರ್ಫಾರ್ಮೆನ್ಸ್ ಲಿಂಕ್ಡ್ ಬೋನಸ್' (PLB) ಮಾತ್ರ ಪ್ರಕಟಿಸಿತ್ತು. ತದನಂತರ ಅಕ್ಟೋಬರ್ 15 ರಂದು ನಾನ್-ಪಿಎಲ್‌ಬಿ (Non-PLB) ಬೋನಸ್ ಘೋಷಿಸಿತಾದರೂ, ಡಿಎ ಹೆಚ್ಚಳದ ನಿರ್ಧಾರವನ್ನು ಬಾಕಿ ಉಳಿಸಿಕೊಂಡಿತ್ತು.

ಡಿಎ ವಿಳಂಬ ಖಂಡಿಸಿ ನೌಕರರ ಲಂಚ್ ಅವರ್ ಪ್ರತಿಭಟನೆ

ಡಿಎ ಪ್ರಕಟಣೆಯಲ್ಲಿ ಉಂಟಾದ ವಿಳಂಬವನ್ನು ಖಂಡಿಸಿ ‘ಕಾನ್ಫೆಡರೇಷನ್ ಆಫ್ ಸೆಂಟ್ರಲ್ ಗವರ್ನ್‌ಮೆಂಟ್ ಎಂಪ್ಲಾಯೀಸ್ ಅಂಡ್ ವರ್ಕರ್ಸ್’ ಸಂಘಟನೆಯು ಅಕ್ಟೋಬರ್ 16 ರಂದು ತಮ್ಮ ಕಾರ್ಯಸ್ಥಳಗಳಲ್ಲಿ ಮಧ್ಯಾಹ್ನದ ಊಟದ ಸಮಯದಲ್ಲಿ (Lunch-Hour) ಭಾರಿ ಪ್ರತಿಭಟನೆ ನಡೆಸಿತ್ತು. ಅಕ್ಟೋಬರ್ 14 ರಂದೇ ಕ್ಯಾಬಿನೆಟ್ ಕಾರ್ಯದರ್ಶಿಗೆ ಪತ್ರ ಬರೆದಿದ್ದ ಒಕ್ಕೂಟವು, ನೌಕರರು ಹಾಗೂ ಪೆನ್ಷನರ್‌ಗಳಿಗೆ ಜುಲೈ 1 ರಿಂದ ಬರಬೇಕಿರುವ ಡಿಎ ಮತ್ತು 'ಡಿಯರ್ನೆಸ್ ರಿಲೀಫ್' (DR - ಪಿಂಚಣಿದಾರರ ತುಟ್ಟಿಭತ್ಯೆ) ಕಂತನ್ನು ತಕ್ಷಣ ಬಿಡುಗಡೆ ಮಾಡಬೇಕೆಂದು ಆಗ್ರಹಿಸಿತ್ತು.

ವೇತನದ ಮೇಲಾಗುವ ಧನಾತ್ಮಕ ಪರಿಣಾಮವೇನು? (Salary Calculation)

ಪ್ರತಿಯೊಂದು ಡಿಎ ಏರಿಕೆಯು ನೌಕರರ ಒಟ್ಟು ವೇತನವನ್ನು (Gross Salary) ಹೆಚ್ಚಿಸುತ್ತದೆ. ಉದಾಹರಣೆಗೆ, ಪ್ರಸ್ತುತ ಶೇ. 60 ರಷ್ಟು ಡಿಎ ಆಧಾರದಲ್ಲಿ 'ಲೆವೆಲ್ 7' ಹಂತದ ನೌಕರನೊಬ್ಬನ ಮೂಲ ವೇತನ ₹44,900 ಇದ್ದರೆ, ಆತನಿಗೆ ಸಿಗುವ ಒಟ್ಟು ವೇತನ ಹೀಗಿರುತ್ತದೆ:

ಪ್ರಸ್ತುತ ಒಟ್ಟು ವೇತನ (60% DA): ₹71,840 (₹44,900 ಮೂಲ ವೇತನ + ₹26,940 ತುಟ್ಟಿಭತ್ಯೆ).
ಪರಿಷ್ಕೃತ ಒಟ್ಟು ವೇತನ (63% DA): ₹73,187 (₹44,900 ಮೂಲ ವೇತನ + ₹28,287 ತುಟ್ಟಿಭತ್ಯೆ).

ತಿಂಗಳ ವೇತನ ಏರಿಕೆ: ಬರೋಬ್ಬರಿ ₹1,347 ಹೆಚ್ಚಳ!

ಆದಾಗ್ಯೂ, ಈ ಶೇ. 3 ರಷ್ಟು ಏರಿಕೆಯು ಪ್ರಸ್ತುತ ಲೆಕ್ಕಾಚಾರದ ಅಂದಾಜಾಗಿದ್ದು, ಸರ್ಕಾರದ ಅಧಿಕೃತ ಪ್ರಕಟಣೆಯ ನಂತರವೇ ನಿಖರ ಅಂಕಿಅಂಶ ಹೊರಬೀಳಲಿದೆ. ಡಿಎ ಜೊತೆಗೆ ಲಕ್ಷಾಂತರ ನಿವೃತ್ತ ಪಿಂಚಣಿದಾರರಿಗೂ 'ಡಿಆರ್' (DR) ಹೆಚ್ಚಳದ ಲಾಭ ದೊರೆಯಲಿದೆ.

Google search: ಈ 4 ಬ್ಯಾಂಕ್‌ಗಳು ಗೂಗಲ್‌ನಲ್ಲಿ ಟ್ರೆಂಡಿಂಗ್‌ನಲ್ಲಿವೆ, ಎಲ್ಲರೂ ಇವುಗಳನ್ನು ಏಕೆ ಸರ್ಚ್ ಮಾಡುತ್ತಿದ್ದಾರೆ ಗೊತ್ತಾ?

Ravi Janekal — Sat, 17 Oct 2026 12:41:54 +0530

ಸದ್ಯದ ಬ್ಯಾಂಕಿಂಗ್ ಕ್ಷೇತ್ರದಲ್ಲಿನ ಮಹತ್ವದ ಬದಲಾವಣೆ ನಿರ್ಧಾರಗಳಿಂದಾಗಿ ಈ ಕೆಳಗಿನ ನಾಲ್ಕು ಬ್ಯಾಂಕ್‌ಗಳು ಸುದ್ದಿಯಲ್ಲಿವೆ. ಇವುಗಳೀಗೆ ಸಂಬಂಧಿಸಿದ ಸುದ್ದಿಗಳು ಈ ತಿಂಗಳು ಅಂದರೆ ಅಕ್ಟೋಬರ್‌ನಲ್ಲಿ ಗಮನ ಸೆಳೆದಿವೆ. ಮುಖ್ಯವಾಗಿ ಹೊಸ ಸಿಇಒ ನೇಮಕ, ಸುಪ್ರೀಂ ಕೋರ್ಟ್ ತೀರ್ಪು.. ವಿವರಗಳಿಗೆ ಪೂರ್ತಿ ಓದಿ.

ಸದ್ಯದ ಬ್ಯಾಂಕಿಂಗ್ ಕ್ಷೇತ್ರದಲ್ಲಿನ ಮಹತ್ವದ ಬದಲಾವಣೆಗಳು, ನಿರ್ಧಾರಗಳಿಂದಾಗಿ ಈ ಕೆಳಗಿನ ನಾಲ್ಕು ಬ್ಯಾಂಕ್‌ಗಳು ಸುದ್ದಿಯಲ್ಲಿವೆ. ಈ ಬ್ಯಾಂಕ್‌ಗಳಿಂಗೆ ಸಂಬಂಧಿಸಿದ ಸುದ್ದಿಗಳು ಈ ತಿಂಗಳು ಅಂದರೆ ಅಕ್ಟೋಬರ್‌ನಲ್ಲಿ ಗಮನ ಸೆಳೆದಿವೆ. ಮುಖ್ಯವಾಗಿ ಹೊಸ ಸಿಇಒ ನೇಮಕ, ಸುಪ್ರೀಂ ಕೋರ್ಟ್ ತೀರ್ಪು, ಸಾವಿರಾರು ಕೋಟಿ ರೂಪಾಯಿ ಒಪ್ಪಂದಗಳು ಇದರಲ್ಲಿ ಸೇರಿ. ಆ ನಾಲ್ಕು ಕಂಪನಿಗಳು ಯಾವವು ಎಂಬುದನ್ನ ಇಲ್ಲಿ ತಿಳಿಯೋಣ.

ಎಚ್‌ಡಿಎಫ್‌ಸಿ ಬ್ಯಾಂಕ್(HDFC Bank), ಯೆಸ್ ಬ್ಯಾಂಕ್(Yes Bank), ಐಡಿಬಿಐ ಬ್ಯಾಂಕ್(IDBI Bank) ಮತ್ತು ಆಕ್ಸಿಸ್ ಬ್ಯಾಂಕ್‌(Axis Bank)ಗಳು ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ಪ್ರಮುಖ ನಿರ್ಧಾರ, ನಿಯಮ ಬದಲಾವಣೆಗಳಿಂದ ಟ್ರೆಂಡಿಂಗ್‌ನಲ್ಲಿವೆ.ಈ ನಾಲ್ಕು ಬ್ಯಾಂಕುಗಳಿಗೆ ಸಂಬಂಧಿಸಿದ ಸುದ್ದಿಗಳು ಹೆಚ್ಚು ಚರ್ಚೆಯಾಗುತ್ತಿದೆ. ಜನರು ಗೂಗಲ್‌ನಲ್ಲಿ ಹುಡುಕಾಡುತ್ತಿದ್ದಾರೆ.

ಯೆಸ್ ಬ್ಯಾಂಕ್ ಒಳಗೊಂಡ AT-1 ಬಾಂಡ್ ಪ್ರಕರಣವೂ ಸುದ್ದಿಯಲ್ಲಿದೆ. ₹8,125 ಕೋಟಿ ಮೌಲ್ಯದ ಬಾಂಡ್‌ಗಳನ್ನು ವಜಾಗೊಳಿಸುವ ಬಗ್ಗೆ ಬಾಂಬೆ ಹೈಕೋರ್ಟ್ ನೀಡಿದ ಮಹತ್ವದ ತೀರ್ಪಿನಲ್ಲಿ ಮಧ್ಯಪ್ರವೇಶಿಸಲು ಸುಪ್ರೀಂ ಕೋರ್ಟ್ ನಿರಾಕರಿಸಿತು. ಈ ನಿರ್ಧಾರದ ನಂತರ, ಬ್ಯಾಂಕಿನ ಷೇರುಗಳು ಸರಿಸುಮಾರು 15% ರಷ್ಟು ಕುಸಿದವು. ಬ್ಯಾಂಕ್ ಈ ನಿರ್ಧಾರದ ಬಗ್ಗೆ ಪರಿಶೀಲಿಸುತ್ತಿದೆ. ಮುಂದಿನ ಕಾನೂನು ಹೋರಾಟದ ಬಗ್ಗೆ ಚಿಂತನೆ ನಡೆಸಿದೆ.

ಆಕ್ಸಿಸ್ ಬ್ಯಾಂಕ್‌ಗೆ ಅನಂತ್ ನಾರಾಯಣನ್ ಅವರನ್ನು ಸ್ವತಂತ್ರ ನಿರ್ದೇಶಕರನ್ನಾಗಿ ನೇಮಿಸಿರವುದು ಸದ್ಯ ಸುದ್ದಿಯಲ್ಲಿದೆ. ಅವರ ನಾಲ್ಕು ವರ್ಷಗಳ ಅವಧಿ ಅಕ್ಟೋಬರ್ 19, 2026 ರಂದು ಪ್ರಾರಂಭವಾಗಿ ಅಕ್ಟೋಬರ್ 18, 2030 ರಂದು ಕೊನೆಗೊಳ್ಳುತ್ತದೆ. ಹೂಡಿಕೆದಾರರು ಬ್ಯಾಂಕಿನ ಜುಲೈ-ಸೆಪ್ಟೆಂಬರ್ ತ್ರೈಮಾಸಿಕ ಫಲಿತಾಂಶಗಳನ್ನು ಬಗ್ಗೆ ಸುದ್ದಿಗಳನ್ನು ಗೂಗಲ್‌ನಲ್ಲಿ ಹೆಚ್ಚು ಹುಡುಕಾಡುತ್ತಿದ್ದಾರೆ..

ಇನ್ನು ಹೆಚ್‌ಡಿಎಫ್‌ಸಿ ಬ್ಯಾಂಕ್‌ಗೆ ಹೊಸ ಸಿಇಒ ನೇಮಕ ಭಾರೀ ಸುದ್ದಿಯಲ್ಲಿದೆ. ಅನುಪ್ ಬಾಗ್ಚಿ ಅಕ್ಟೋಬರ್ 27, 2026 ರಿಂದ HDFC ಬ್ಯಾಂಕಿನ ವ್ಯವಸ್ಥಾಪಕ ನಿರ್ದೇಶಕ ಮತ್ತು CEO ಹುದ್ದೆಯನ್ನು ವಹಿಸಿಕೊಳ್ಳಲಿದ್ದಾರೆ. ಅವರು ಪ್ರಸ್ತುತ ICICI ಪ್ರುಡೆನ್ಶಿಯಲ್ ಲೈಫ್ ಇನ್ಶುರೆನ್ಸ್‌ನ MD ಮತ್ತು CEO ಆಗಿದ್ದಾರೆ.

ಬ್ಯಾಂಕ್ ಅವರಿಗೆ ವಾರ್ಷಿಕವಾಗಿ ಸುಮಾರು ₹35.9 ಕೋಟಿ (ಸುಮಾರು ₹359 ಮಿಲಿಯನ್) ವೇತನ ಪ್ಯಾಕೇಜ್ ಅನ್ನು ಪ್ರಸ್ತಾಪಿಸಿದೆ. ಇದರಲ್ಲಿ ₹89.7 ಮಿಲಿಯನ್ (ಸುಮಾರು ₹269.2 ಮಿಲಿಯನ್) ಸ್ಥಿರ ವೇತನ ಮತ್ತು ಸುಮಾರು ₹269.2 ಮಿಲಿಯನ್ (ಸುಮಾರು ₹269.2 ಮಿಲಿಯನ್) ವೇರಿಯಬಲ್ ವೇತನ ಸೇರಿವೆ.

ಈ ಪ್ಯಾಕೇಜ್‌ಗೆ ಷೇರುದಾರರ ಅನುಮೋದನೆ ಅಗತ್ಯವಿದೆ. ನಾಯಕತ್ವ ಬದಲಾವಣೆಯಿಂದಾಗಿ ಹೂಡಿಕೆದಾರರು ಬ್ಯಾಂಕಿನ ಭವಿಷ್ಯದ ಕಾರ್ಯತಂತ್ರವನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದಾರೆ.

ಐಡಿಬಿಐ ಬ್ಯಾಂಕ್ ಷೇರು ಮಾರಾಟಕ್ಕೆ ಕೇಂದ್ರ ಸರ್ಕಾರ ಒಪ್ಪಿಗೆ ನೀಡಿದ್ದು ಮಹತ್ವದ ಬೆಳವಣಿಗೆಯಾಗಿದೆ. ಅಕ್ಟೋಬರ್ 14 ರಂದು, ಕ್ಯಾಬಿನೆಟ್ ಬ್ಯಾಂಕಿನ ಶೇ. 60.72 ರಷ್ಟು ಪಾಲನ್ನು ಕೆನಡಾದ ಫೇರ್‌ಫ್ಯಾಕ್ಸ್ ಫೈನಾನ್ಷಿಯಲ್ ಹೋಲ್ಡಿಂಗ್ಸ್‌ಗೆ ಮಾರಾಟ ಮಾಡಲು ಅನುಮೋದನೆ ನೀಡಿತು. ಈ ಒಪ್ಪಂದದ ಮೌಲ್ಯ ಸುಮಾರು ₹52,878 ಕೋಟಿ (ಸುಮಾರು ₹52,878 ಕೋಟಿ). ಇದರಲ್ಲಿ ಕೇಂದ್ರ ಸರ್ಕಾರದ ಶೇ. 30.48 ರಷ್ಟು ಪಾಲು ಮತ್ತು ಎಲ್‌ಐಸಿಯ ಶೇ. 30.24 ರಷ್ಟು ಪಾಲು ಸೇರಿವೆ.

ಹೂಡಿಕೆದಾರರಿಗೆ ಈ ಸುದ್ದಿ ಏಕೆ ಮುಖ್ಯ?

ಈ ಘಟನೆಗಳು ಬ್ಯಾಂಕುಗಳ ಕಾರ್ಯತಂತ್ರಗಳು, ಅವುಗಳ ಮಾರುಕಟ್ಟೆ ಇಮೇಜ್ ಮತ್ತು ಹೂಡಿಕೆದಾರರ ನಿರೀಕ್ಷೆಗಳ ಮೇಲೆ ಪರಿಣಾಮ ಬೀರಬಹುದು. ಆದ್ರೂ ಹೂಡಿಕೆ ನಿರ್ಧಾರಗಳನ್ನು ಕೇವಲ ಟ್ರೆಂಡಿಂಗ್ ಸುದ್ದಿಗಳು ಅಥವಾ ಷೇರು ಏರಿಳಿತಗಳ ಆಧಾರದ ಮೇಲೆ ತೆಗೆದುಕೊಳ್ಳಬಾರದು.

2027ರ ವೇಳೆಗೆ ಭಾರತದ ರಿಯಲ್ ಎಸ್ಟೇಟ್ ಬೆಲೆ ಗಗನ, ಇದಕ್ಕೆ ಕಾರಣವಿದು: ಸಿಎ ವಿಶ್ಲೇಷಣೆ

Gowthami K — Mon, 19 Oct 2026 14:54:07 +0530

ಭಾರತೀಯ ಹೂಡಿಕೆದಾರರಿಗೆ ರಿಯಲ್ ಎಸ್ಟೇಟ್ ಎಂದಿಗೂ ಅತ್ಯಂತ ನೆಚ್ಚಿನ ಹಾಗೂ ಭದ್ರವಾದ ಆಸ್ತಿಯಾಗಿದೆ. ಪ್ರಸ್ತುತ ಜಾಗತಿಕ ಸ್ಥೂಲ ಆರ್ಥಿಕ ಬದಲಾವಣೆಗಳು, ಸರ್ಕಾರದ ನಿಯಂತ್ರಣ ನೀತಿಗಳು ಹಾಗೂ ಭೌಗೋಳಿಕ ರಾಜಕೀಯ ಸನ್ನಿವೇಶಗಳು ಮುಂಬರುವ ತಿಂಗಳುಗಳಲ್ಲಿ ದೇಶದ ರಿಯಲ್ ಎಸ್ಟೇಟ್ ಬೆಲೆಗಳನ್ನು ಅಭೂತಪೂರ್ವ ಮಟ್ಟಕ್ಕೆ ತಳ್ಳಲಿವೆ ಎಂದು ಪ್ರಸಿದ್ಧ ಚಾರ್ಟರ್ಡ್ ಅಕೌಂಟೆಂಟ್ ಸಾರ್ಥಕ್ ಅಹುಜಾ ತಮ್ಮ ಸಾಮಾಜಿಕ ಜಾಲತಾಣ ವಿಶ್ಲೇಷಣೆ ಮಾಡಿದ್ದು ಈಗ ವೈರಲ್ ಆಗಿದೆ.

ದೇಶೀಯ ಮತ್ತು ಜಾಗತಿಕ ವಲಯದ ಮೂರು ಪ್ರಮುಖ ಕಾರಣಗಳಿಗಾಗಿ 2027ರ ವೇಳೆಗೆ ಭಾರತದಲ್ಲಿ ರಿಯಲ್ ಎಸ್ಟೇಟ್ ಆಸ್ತಿ ಮೌಲ್ಯಗಳು ಗಣನೀಯವಾಗಿ ಹೆಚ್ಚಾಗಲಿವೆ ಎಂದು ಅಹುಜಾ ಭವಿಷ್ಯ ನುಡಿದಿದ್ದಾರೆ. ಆ ಮೂರು ಕಾರಣಗಳು ಯಾವುದು ಎಂಬುದನ್ನು ಇಲ್ಲಿ ನೀಡಲಾಗಿದೆ.

1. ಅಸ್ಥಿರ ಷೇರು ಮಾರುಕಟ್ಟೆ ಮತ್ತು ಚಿನ್ನದ ಮೇಲಿನ ನಿಯಂತ್ರಣಗಳು

ಹೂಡಿಕೆದಾರರ ಮನಸ್ಸಿನಲ್ಲಿ ಉಂಟಾಗುತ್ತಿರುವ ಪ್ರಮುಖ ಬದಲಾವಣೆಯೇ ರಿಯಲ್ ಎಸ್ಟೇಟ್ ಬೇಡಿಕೆ ಹೆಚ್ಚಲು ಮೊದಲ ಕಾರಣವಾಗಿದೆ. ಇತ್ತೀಚಿನ ಮಾರುಕಟ್ಟೆ ತಿದ್ದುಪಡಿಗಳು ಹಾಗೂ ಜಾಗತಿಕ ಆರ್ಥಿಕ ಹಿಂಜರಿತದ ಭೀತಿಯಿಂದಾಗಿ ಚಿಲ್ಲರೆ ಮತ್ತು ಸಾಂಸ್ಥಿಕ ಹೂಡಿಕೆದಾರರು ಸುರಕ್ಷಿತ ಹೂಡಿಕೆ ಮಾರ್ಗಗಳನ್ನು ಹುಡುಕುತ್ತಿದ್ದಾರೆ. ಷೇರು ಮಾರುಕಟ್ಟೆಯಲ್ಲಿ ಏರುಪೇರು ಹೂಡಿಕೆದಾರರಲ್ಲಿ ಆತಂಕ ಮೂಡಿಸಿದೆ.

ಮತ್ತೊಂದೆಡೆ, ಸುರಕ್ಷಿತ ಹೂಡಿಕೆಯಾಗಿದ್ದ ಚಿನ್ನದ ಮೇಲೆಯೂ ನಿಯಂತ್ರಕ ಅಡೆತಡೆಗಳು ಎದುರಾಗಿವೆ. ಚಿನ್ನದ ಆಮದನ್ನು ಕಡಿತಗೊಳಿಸುವ ಉದ್ದೇಶದಿಂದ ಗೋಲ್ಡ್ 'ಫಂಡ್ ಆಫ್ ಫಂಡ್ಸ್' ಯೋಜನೆಗಳಲ್ಲಿ ಹೊಸ ಹೂಡಿಕೆಗಳನ್ನು ಸ್ವೀಕರಿಸದಂತೆ ಸೆಬಿ ಮ್ಯೂಚುವಲ್ ಫಂಡ್‌ಗಳಿಗೆ ಸೂಚನೆ ನೀಡಿದೆ. ಹೀಗಾಗಿ, ಷೇರು ಹಾಗೂ ಚಿನ್ನ ಎರಡೂ ಪ್ರಮುಖ ಮಾರ್ಗಗಳಲ್ಲಿ ಮಿತಿಗಳು ಎದುರಾಗಿರುವುದರಿಂದ, ಹೂಡಿಕೆದಾರರಿಗೆ ಭೌತಿಕವಾಗಿ ಕಾಣಿಸುವ ಮತ್ತು ಭದ್ರತೆ ನೀಡುವ ರಿಯಲ್ ಎಸ್ಟೇಟ್ ಏಕೈಕ ಅತ್ಯುತ್ತಮ ಪರ್ಯಾಯವಾಗಿ ಕಾಣಿಸುತ್ತಿದೆ.

2. ಅಮೆರಿಕದ ವಲಸೆ ನೀತಿ ಹಾಗೂ ಆಸ್ತಿ ಮಾರುಕಟ್ಟೆಗೆ NRIಗಳ ಮರಳುವಿಕೆ

ಸಾರ್ಥಕ್ ಅಹುಜಾ ಅವರ ವಿಶ್ಲೇಷಣೆಯ ಎರಡನೇ ಪ್ರಮುಖ ಅಂಶವೆಂದರೆ, ಪಾಶ್ಚಿಮಾತ್ಯ ದೇಶಗಳಲ್ಲಿ, ವಿಶೇಷವಾಗಿ ಅಮೆರಿಕದಲ್ಲಿ ಬದಲಾಗುತ್ತಿರುವ ವಲಸೆ ನೀತಿಗಳು. ಅಮೆರಿಕದಲ್ಲಿ ಕೆಲಸ ಮಾಡುತ್ತಿರುವ ಭಾರತೀಯ ತಂತ್ರಜ್ಞರಿಗೆ ಹಾಗೂ ಎನ್‌ಆರ್‌ಐ ಉದ್ಯೋಗಿಗಳಿಗೆ ಗ್ರೀನ್ ಕಾರ್ಡ್ ಪಡೆಯುವುದು ಕಷ್ಟಕರವಾಗುತ್ತಿದೆ.

ವಿದೇಶದಲ್ಲಿ ಅನಿಶ್ಚಿತ ಭವಿಷ್ಯ ಎದುರಿಸುತ್ತಿರುವ ಅನಿವಾಸಿ ಭಾರತೀಯರು ತಮ್ಮ ಸಂಪತ್ತನ್ನು ಅಮೆರಿಕದಲ್ಲೇ ಹೂಡಿಕೆ ಮಾಡಲು ಹಿಂಜರಿಯುತ್ತಿದ್ದಾರೆ. ಬದಲಾಗಿ, ತಾಯ್ನಾಡಿನಲ್ಲಿ ಸುರಕ್ಷತಾ ಜಾಲವನ್ನು ನಿರ್ಮಿಸಿಕೊಳ್ಳಲು ಭಾರತಕ್ಕೆ ಹಣ ರವಾನಿಸುತ್ತಿದ್ದಾರೆ. ಸ್ವಂತ ಬಳಕೆಗೆ ಅಥವಾ ಬಾಡಿಗೆ ಮೂಲಕ ನಿರಂತರ ಆದಾಯ ಗಳಿಸಲು ಭಾರತದಲ್ಲಿ ಆಸ್ತಿ ಖರೀದಿಸುತ್ತಿದ್ದಾರೆ. 2015-18ರ ಅವಧಿಯಲ್ಲಿ ರಿಯಲ್ ಎಸ್ಟೇಟ್ ವ್ಯವಹಾರಗಳಲ್ಲಿ NRIಗಳ ಪಾಲು ಶೇ. 7-10 ರಷ್ಟಿತ್ತು. ಆದರೆ, ಇತ್ತೀಚಿನ ವರದಿಗಳ ಪ್ರಕಾರ ಈ ಪಾಲು ಶೇ. 18-20ಕ್ಕೆ ಏರಿಕೆಯಾಗಿದ್ದು, ವಿದೇಶಿ ಬಂಡವಾಳ ಭಾರಿ ಪ್ರಮಾಣದಲ್ಲಿ ಭಾರತದ ರಿಯಲ್ ಎಸ್ಟೇಟ್‌ಗೆ ಹರಿದುಬರುತ್ತಿದೆ.

3. 'ಡೇಟಾ ಸೆಂಟರ್' ಸ್ಥಾಪನೆಗೆ ಕಾರ್ಪೊರೇಟ್ ಸಂಸ್ಥೆಗಳ ಜಮೀನು ಖರೀದಿ ಭರಾಟೆ

ರಿಯಲ್ ಎಸ್ಟೇಟ್ ಬೆಲೆ ಏರಿಕೆಗೆ ಮೂರನೇ ಮತ್ತು ಅತ್ಯಂತ ವೇಗದ ಕಾರಣವೆಂದರೆ ಕೃತಕ ಬುದ್ಧಿಮತ್ತೆ (AI) ಹಾಗೂ ಕ್ಲೌಡ್ ಕಂಪ್ಯೂಟಿಂಗ್ ಕ್ಷಿಪ್ರ ಬೆಳವಣಿಗೆ. ಇದರಿಂದಾಗಿ ದೊಡ್ಡ ಕಾರ್ಪೊರೇಟ್ ಸಂಸ್ಥೆಗಳು 'ಡೇಟಾ ಸೆಂಟರ್' ಸ್ಥಾಪಿಸಲು ಭಾರಿ ಪ್ರಮಾಣದ ಭೂಮಿಯನ್ನು ಕಬಳಿಸುತ್ತಿವೆ. ಅಮೆಜಾನ್ ಮುಂಬೈ ಬಳಿ 10 ಎಕರೆ ಜಮೀನು ಖರೀದಿಸಿದೆ. ಟಿಸಿಎಸ್ ಪುಣೆ ಬಳಿ 88 ಎಕರೆ ಹಾಗೂ ಆಂಧ್ರಪ್ರದೇಶದಲ್ಲಿ 200 ಎಕರೆ ಭೂಮಿಯನ್ನು ಸ್ವಾಧೀನಪಡಿಸಿಕೊಂಡಿದೆ. ಲೋಧಾ ಗ್ರೂಪ್ ಸುಮಾರು 100 ಎಕರೆ ಪ್ರದೇಶದಲ್ಲಿ 1GW ಸಾಮರ್ಥ್ಯದ ಡೇಟಾ ಸೆಂಟರ್ ಯೋಜನೆ ರೂಪಿಸುತ್ತಿದೆ.

ಡೇಟಾ ಸೆಂಟರ್‌ಗಳಿಗೆ ಬಳಸುವ ಭೂಮಿಯ ಮೇಲಿನ ಲಾಭಾಂಶವು ಸಾಮಾನ್ಯ ವಸತಿ ಅಥವಾ ವಾಣಿಜ್ಯ ಉದ್ದೇಶದ ಭೂಮಿಗಿಂತ ಅತ್ಯಧಿಕವಾಗಿರುತ್ತದೆ. ಬೃಹತ್ ಸಂಸ್ಥೆಗಳು ಆಯಕಟ್ಟಿನ ಕಾರಿಡಾರ್‌ಗಳಲ್ಲಿ ಜಮೀನುಗಳನ್ನು ಖರೀದಿಸುತ್ತಿರುವುದರಿಂದ, ಆಯಾ ಭಾಗಗಳಲ್ಲಿ ಭೂಮಿಯ ಬೆಲೆಗಳು ಗಗನಕ್ಕೇರುತ್ತಿವೆ.

ಹೂಡಿಕೆದಾರರ ನಡವಳಿಕೆಯಲ್ಲಿನ ಬದಲಾವಣೆ, ಎನ್‌ಆರ್‌ಐ ಬಂಡವಾಳ ಹರಿವು ಮತ್ತು ಬೃಹತ್ ಕಾರ್ಪೊರೇಟ್ ಜಮೀನು ಖರೀದಿ—ಈ ಮೂರು ಅಂಶಗಳು ಒಂದೇ ಬಾರಿಗೆ ಸಂಭವಿಸುತ್ತಿರುವುದರಿಂದ 2027ರ ವೇಳೆಗೆ ಭಾರತದಲ್ಲಿ ರಿಯಲ್ ಎಸ್ಟೇಟ್ ಬೆಲೆಗಳು ಅಭೂತಪೂರ್ವ ಎತ್ತರಕ್ಕೇರುವ ಸಾಧ್ಯತೆಯಿದೆ. ಆದಾಗ್ಯೂ, ಮಾರುಕಟ್ಟೆಯ ನಿಖರ ಚಲನೆಯನ್ನು ಕಾದು ನೋಡಬೇಕಾಗಿದ್ದು, ಈ ವಿಶ್ಲೇಷಣೆಯು ವೈಯಕ್ತಿಕ ವೀಕ್ಷಣೆಯಾಗಿದೆಯೇ ಹೊರತು ನೇರ ಹೂಡಿಕೆ ಸಲಹೆಯಲ್ಲ ಎಂದು ಅಹುಜಾ ಸ್ಪಷ್ಟಪಡಿಸಿದ್ದಾರೆ.

"ಅದೆಲ್ಲ ದುಡ್ಡಲ್ಲ, ಕಣ್ಣು ಮುಚ್ಚೋದ್ರೊಳಗೆ ಮಾಯವಾಗುತ್ತೆ".. ರೈತರಿಗೆ ಕಣ್ಣು ತೆರೆಸುವ ಆರ್ಥಿಕ ಪಾಠ ಹೇಳಿದ ವಿನೋದ್ ರಾಜ್

Ashwini HR — Tue, 20 Oct 2026 19:57:18 +0530

ಚಿತ್ರರಂಗದ ಗ್ಲಾಮರ್‌ನಿಂದ ದೂರವಿದ್ದು, ನೆಲಮಂಗಲದ ತೋಟದಲ್ಲಿ ಅಪ್ಪಟ ರೈತನಾಗಿ ಬದುಕುತ್ತಿರುವ ಹಿರಿಯ ನಟ ವಿನೋದ್ ರಾಜ್, ರೈತರು ಮತ್ತು ಸಾಮಾನ್ಯ ಜನರಿಗೆ ಕಣ್ಣು ತೆರೆಸುವಂತಹ ಆರ್ಥಿಕ ಪಾಠವೊಂದನ್ನು ಹೇಳಿಕೊಟ್ಟಿದ್ದಾರೆ. ಜಮೀನು ಮಾರಾಟವಾದಾಗಲೋ ಅಥವಾ ಬೆಳೆ ಬಂದಾಗಲೋ ಕೈಗೆ ದೊಡ್ಡ ಮೊತ್ತದ ಹಣ ಸೇರಿದಾಗ ಅದನ್ನು ಹೇಗೆ ಕಾಪಾಡಿಕೊಳ್ಳಬೇಕು ಎಂಬುದರ ಬಗ್ಗೆ ಅವರು ನೀಡಿರುವ 'FD ಸ್ಪ್ಲಿಟಿಂಗ್' ಲೆಕ್ಕಾಚಾರ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗಿದೆ.

"ದುಡ್ಡು ನಿಮ್ಮನ್ನ ಆಳಬಾರದು, ನೀವೇ ದುಡ್ಡನ್ನ ಆಳಬೇಕು!"

ಏಷ್ಯಾನೆಟ್ ಸುವರ್ಣನ್ಯೂಸ್ ಜೊತೆ ಮಾತು ಆರಂಭಿಸಿದ ವಿನೋದ್ ರಾಜ್, "ದುಡ್ಡು ನಿಮ್ಮನ್ನ ನಿಯಂತ್ರಿಸಬಾರದು, ನೀವೇ ದುಡ್ಡನ್ನ ಗೌರವವಾಗಿಟ್ಟುಕೊಂಡು ನಿಯಂತ್ರಿಸಬೇಕು. ಕೈಗೆ ಹಣ ಬಂದ ತಕ್ಷಣ 'ಅಯ್ಯೋ ಇದೆಲ್ಲ ನಂದೇ ದುಡ್ಡು' ಅಂತ ಮೈಮರೆಯಬೇಡಿ. ಅದೆಲ್ಲ ದುಡ್ಡಲ್ಲ, ಕಣ್ಣು ಮುಚ್ಚಿ ತೆರೆಯುವುದರೊಳಗೆ ಮಾಯವಾಗಿಬಿಡುತ್ತದೆ. ಅದಕ್ಕೆ ಸರಿಯಾದ ಲೆಕ್ಕಾಚಾರ ಬೇಕು" ಎಂದು ಎಚ್ಚರಿಸಿದ್ದಾರೆ.

ವಿನೋದ್ ರಾಜ್ ಬಿಚ್ಚಿಟ್ಟ 40 ಲಕ್ಷದ ಲೆಕ್ಕಾಚಾರ

ಒಂದು ವೇಳೆ ನಿಮ್ಮ ಕೈಗೆ 50 ಲಕ್ಷ ರೂಪಾಯಿ ಹಣ ಬಂದರೆ, ಅದನ್ನು ಬ್ಯಾಂಕ್‌ನಲ್ಲಿ ಹೇಗೆ ಹೂಡಿಕೆ ಮಾಡಬೇಕು ಎಂಬುದನ್ನು ಅವರು ಹಂತ ಹಂತವಾಗಿ ವಿವರಿಸಿದ್ದಾರೆ..

1. ಒಂದು ವರ್ಷದ ಖರ್ಚು ಪ್ರತ್ಯೇಕವಾಗಿರಲಿ

"ನಿಮ್ಮ ಕೈಗೆ 50 ಲಕ್ಷ ಬಂದರೆ, ಅದರಲ್ಲಿ ಮುಂದಿನ 1 ವರ್ಷದ ಕುಟುಂಬದ ಗರಿಷ್ಠ ಖರ್ಚಿಗೆ 10 ಲಕ್ಷ ರೂಪಾಯಿ ಪ್ರತ್ಯೇಕವಾಗಿ ಎತ್ತಿಟ್ಟುಕೊಳ್ಳಿ. ಇನ್ನುಳಿದ 40 ಲಕ್ಷ ರೂಪಾಯಿಯನ್ನು ಸುರಕ್ಷಿತವಾದ ಮತ್ತು ಹೆಚ್ಚು ಬಡ್ಡಿ ನೀಡುವ ಉತ್ತಮ ಕೋ-ಆಪರೇಟಿವ್ (ಸಹಕಾರಿ) ಬ್ಯಾಂಕ್‌ಗಳಲ್ಲಿ ಇಡಿ."

2. ಒಟ್ಟಿಗೆ 40 ಲಕ್ಷ ಒಂದೇ FD ಮಾಡಬೇಡಿ

"ಬ್ಯಾಂಕ್‌ಗೆ ಹಾಕುವಾಗ 40 ಲಕ್ಷವನ್ನು ಒಂದೇ ಠೇವಣಿ ಮಾಡಬೇಡಿ. ಅದನ್ನು ತುಂಡು ತುಂಡಾಗಿ (Split ಮಾಡಿ) ಹಾಕಿ. 5-5 ಲಕ್ಷದಂತೆ 6 FD ಗಳನ್ನು ಮಾಡಿ (ಒಟ್ಟು 30 ಲಕ್ಷ). ಇನ್ನುಳಿದ 10 ಲಕ್ಷವನ್ನು 2-2 ಲಕ್ಷದಂತೆ 5 ಸಣ್ಣ FD ಗಳನ್ನು ಮಾಡಿ. ಹೀಗೆ ಮಾಡಿದಾಗ ಒಟ್ಟು 40 ಲಕ್ಷ ರೂಪಾಯಿ ಡೆಪಾಸಿಟ್ ಆಗುತ್ತದೆ."

3. ಈ ಐಡಿಯಾದಿಂದಾಗುವ ಲಾಭವೇನು?

"ನಾಳೆ ನಿಮಗೆ ಹಠಾತ್ ಆಗಿ ಆಸ್ಪತ್ರೆಗೋ ಅಥವಾ ಮನೆಗೋ ತೀರಾ ತುರ್ತಾಗಿ 2 ಲಕ್ಷ ರೂಪಾಯಿ ಬೇಕಾಯಿತು ಎಂದಿಟ್ಟುಕೊಳ್ಳಿ. ಆಗ ನೀವು ಕೇವಲ ಆ 2 ಲಕ್ಷದ ಒಂದು ಸಣ್ಣ FDಯನ್ನು ಮಾತ್ರ ಮುರಿದುಕೊಳ್ಳಬಹುದು! ಇದರಿಂದ ನಿಮ್ಮ ಉಳಿದ 38 ಲಕ್ಷ ರೂಪಾಯಿ ಅಸಲು ಹಾಗೇ ಇರುತ್ತದೆ, ಅದಕ್ಕೆ ಬರುವ ಬಡ್ಡಿಗೂ ಯಾವುದೇ ಕತ್ತರಿ ಬೀಳುವುದಿಲ್ಲ. ಎಲ್ಲವೂ ಮ್ಯಾನೇಜ್ ಆದಂತಾಗುತ್ತದೆ. ಈ ಆರ್ಥಿಕ ಲೆಕ್ಕಾಚಾರವನ್ನು ಪ್ರತಿಯೊಬ್ಬ ಜನಸಾಮಾನ್ಯರು, ಅದರಲ್ಲೂ ಮುಖ್ಯವಾಗಿ ನಮ್ಮ ರೈತರು ಅರ್ಥ ಮಾಡಿಕೊಳ್ಳಲೇಬೇಕು" ಎಂದು ವಿನೋದ್ ರಾಜ್ ಕಿವಿಮಾತು ಹೇಳಿದ್ದಾರೆ.

ನೆಲದ ನಂಟನ್ನು ಉಳಿಸಿಕೊಂಡು, ಕೃಷಿ ಬದುಕಿನ ವಾಸ್ತವವನ್ನು ಅರಿತಿರುವ ನಟ ವಿನೋದ್ ರಾಜ್ ಅವರ ಈ ಪ್ರಾಕ್ಟಿಕಲ್ ಮಾತುಗಳು, ಕಷ್ಟಪಟ್ಟು ದುಡಿದ ಹಣವನ್ನು ಕಳೆದುಕೊಳ್ಳುವ ಎಷ್ಟೋ ರೈತ ಕುಟುಂಬಗಳಿಗೆ ನಿಜಕ್ಕೂ ದಾರಿದೀಪವಾಗಿದೆ.

ವಿನೋದ್ ರಾಜ್ ಕೇವಲ ಬಾಯುಪಚಾರಕ್ಕೆ ಈ ಆರ್ಥಿಕ ಸಲಹೆಗಳನ್ನು ನೀಡುತ್ತಿಲ್ಲ. ಚಿತ್ರರಂಗದ ಏಳು-ಬೀಳುಗಳನ್ನು, ಕಡುಬಡತನವನ್ನು, ಹಣದ ಮುಖಗಳನ್ನು ಮತ್ತು ರೈತರ ನೈಜ ಕಷ್ಟಗಳನ್ನು ಅತ್ಯಂತ ಹತ್ತಿರದಿಂದ ಕಂಡವರು. ಪ್ರತಿದಿನ ತೋಟದಲ್ಲಿ ಬೆವರು ಸುರಿಸಿ ದುಡಿಯುವ ಇವರಿಗೆ, ದುಡ್ಡಿನ ನಿಜವಾದ ಮೌಲ್ಯ ಮತ್ತು ಕಷ್ಟಪಟ್ಟು ಸಂಪಾದಿಸಿದ ಹಣ ಹೇಗೆ ಮಣ್ಣುಪಾಲಾಗುತ್ತದೆ ಎಂಬ ಕಹಿ ವಾಸ್ತವ ಚೆನ್ನಾಗಿ ಗೊತ್ತು.

ಟಾಟಾ ಗ್ರೂಪ್‌ನಲ್ಲಿ ತೀವ್ರಗೊಂಡ ಬೋರ್ಡ್‌ರೂಂ ಸಂಘರ್ಷ: ಸರ್ ದೊರಾಬ್ಜಿ ಟ್ರಸ್ಟ್‌ನಿಂದ ಚಾರಿಟಿ ಕಮಿಷನರ್‌ಗೆ ಉತ್ತರ!

Gowthami K — Tue, 20 Oct 2026 15:55:37 +0530

ದೇಶದ ಅತ್ಯಂತ ನಂಬಿಕಸ್ಥ ಉದ್ದಿಮೆ ಸಮೂಹವಾದ 'ಟಾಟಾ ಗ್ರೂಪ್'ನ ದತ್ತಿ ಸಂಸ್ಥೆಗಳ ಒಳಗೆ ಆರಂಭವಾಗಿರುವ ಆಂತರಿಕ ಶೀತಲ ಸಮರ ಇದೀಗ ನಿರ್ಣಾಯಕ ಹಂತವನ್ನು ತಲುಪಿದೆ. ಟಾಟಾ ಗ್ರೂಪ್‌ನ ಅತ್ಯಂತ ಪ್ರಭಾವಶಾಲಿ ಟ್ರಸ್ಟ್‌ಗಳಲ್ಲಿ ಒಂದಾದ 'ಸರ್ ದೊರಾಬ್ಜಿ ಟಾಟಾ ಟ್ರಸ್ಟ್', ತನ್ನಿಬ್ಬರು ಹಿರಿಯ ಟ್ರಸ್ಟಿಗಳು ಸಲ್ಲಿಸಿದ್ದ ದೂರುಗಳಿಗೆ ಸಂಬಂಧಿಸಿದಂತೆ ಮಹಾರಾಷ್ಟ್ರ ಚಾರಿಟಿ ಕಮಿಷನರ್‌ಗೆ ಅಕ್ಟೋಬರ್ 19 ರಂದು ತನ್ನ ಅಧಿಕೃತ ಪ್ರತಿಕ್ರಿಯೆಯನ್ನು ಸಲ್ಲಿಕೆ ಮಾಡಿದೆ.

ಟಾಟಾ ಟ್ರಸ್ಟ್‌ಗಳ ಆಡಳಿತ ಶೈಲಿ, ಆಡಳಿತ ಮಂಡಳಿಯ ನಿರ್ಧಾರಗಳು ಮತ್ತು ಹೋಲ್ಡಿಂಗ್ ಕಂಪನಿಯಾದ 'ಟಾಟಾ ಸನ್ಸ್'ನ ಕಾರ್ಯತಂತ್ರಗಳಲ್ಲಿ ಟ್ರಸ್ಟಿಗಳ ಪಾತ್ರವೇನು ಎಂಬುದರ ಕುರಿತು ಮೂಡಿರುವ ಭಿನ್ನಾಭಿಪ್ರಾಯಗಳ ಹಿನ್ನೆಲೆಯಲ್ಲಿ ಈ ಬೆಳವಣಿಗೆ ನಡೆದಿದೆ.

ಸಾಮಾಜಿಕ ದೂರು ಮತ್ತು ಆಡಳಿತಾತ್ಮಕ ಆಕ್ಷೇಪಣೆಗಳು

ಎಸ್‍ಡಿಟಿಟಿ ಟ್ರಸ್ಟ್‌ನ ಉಪಾಧ್ಯಕ್ಷರಾದ ವೇಣು ಶ್ರೀನಿವಾಸನ್ ಮತ್ತು ವಿಜಯ್ ಸಿಂಗ್ ಅವರು ಚಾರಿಟಿ ಕಮಿಷನರ್‌ಗೆ ಜಂಟಿ ದೂರು ಸಲ್ಲಿಸಿದ್ದರು. ಟ್ರಸ್ಟ್‌ನ ಕಾರ್ಯನಿರ್ವಹಣೆ, ನಾಯಕತ್ವದ ನೇಮಕಾತಿ ಮತ್ತು ಟಾಟಾ ಸನ್ಸ್‌ನ ವಾಣಿಜ್ಯ ನಿರ್ಧಾರಗಳಲ್ಲಿ ಟ್ರಸ್ಟ್‌ಗಳ ಅನಗತ್ಯ ಹಸ್ತಕ್ಷೇಪದ ಬಗ್ಗೆ ಅವರು ತಮ್ಮ ದೂರಿನಲ್ಲಿ ತೀವ್ರ ಕಳವಳ ವ್ಯಕ್ತಪಡಿಸಿದ್ದರು.

ಪ್ರಮುಖವಾಗಿ ನೋಯೆಲ್ ಟಾಟಾ ಅವರಿಗೆ ನೀಡಲಾಗಿರುವ ಶಾಶ್ವತ ಟ್ರಸ್ಟಿ ಸ್ಥಾನ ಹಾಗೂ ಟಾಟಾ ಟ್ರಸ್ಟ್‌ಗಳ ಅಧ್ಯಕ್ಷ ಹುದ್ದೆಯ ವೈಧಾನಿಕತೆಯನ್ನು ದೂರುದಾರರು ಪ್ರಶ್ನಿಸಿದ್ದಾರೆ. ನೋಯೆಲ್ ಟಾಟಾ ಅವರ ಪುತ್ರ ನೆವಿಲ್ ಟಾಟಾ ಅವರನ್ನು ಟ್ರಸ್ಟಿಯಾಗಿ ನೇಮಕ ಮಾಡುವ ಪ್ರಕ್ರಿಯೆಯಲ್ಲಿ ಪಾರದರ್ಶಕತೆ ಕೊರತೆಯಿದೆ ಎಂದು ಆರೋಪಿಸಲಾಗಿದೆ. ದತ್ತಿ ಉದ್ದೇಶಗಳಿಗಾಗಿ ಸ್ಥಾಪಿತವಾದ ಟ್ರಸ್ಟ್‌ಗಳು, ಟಾಟಾ ಸನ್ಸ್‌ನ ಐಪಿಒ (IPO) ಪಟ್ಟಿ ಅಥವಾ ಕಂಪನಿಯ ವಾಣಿಜ್ಯ ತೀರ್ಮಾನಗಳಲ್ಲಿ ಭಾಗಿಯಾಗುವುದು ಟ್ರಸ್ಟ್‌ನ ಮೂಲ ಆಶಯಕ್ಕೆ ವಿರುದ್ಧವಾಗಿದೆ ಎಂದು ಅವರು ವಾದಿಸಿದ್ದಾರೆ.

ಚಾರಿಟಿ ಕಮಿಷನರ್ ಅಂತಿಮ ತೀರ್ಮಾನ ಏಕೆ ಮುಖ್ಯ?

ಟಾಟಾ ಟ್ರಸ್ಟ್‌ಗಳು ಕೇವಲ ಸಮಾಜಸೇವಾ ಸಂಸ್ಥೆಗಳಲ್ಲ, ಬದಲಿಗೆ ಅವು ಟಾಟಾ ಗ್ರೂಪ್ ಅನ್ನು ನಿಯಂತ್ರಿಸುವ ಬೃಹತ್ ಶಕ್ತಿಯಾಗಿವೆ. ಟಾಟಾ ಗ್ರೂಪ್‌ನ ಹೋಲ್ಡಿಂಗ್ ಕಂಪನಿಯಾದ 'ಟಾಟಾ ಸನ್ಸ್'ನಲ್ಲಿ ಸರ್ ದೊರಾಬ್ಜಿ ಟಾಟಾ ಟ್ರಸ್ಟ್ (SDTT) ಶೇಕಡಾ 27.98 ರಷ್ಟು ಪಾಲು ಹೊಂದಿದೆ. ಸರ್ ರತನ್ ಟಾಟಾ ಟ್ರಸ್ಟ್ (SRTT) ಶೇಕಡಾ 23.56 ರಷ್ಟು ಪಾಲು ಹೊಂದಿದೆ.

ಈ ಎರಡೂ ಟ್ರಸ್ಟ್‌ಗಳು ಒಟ್ಟಾಗಿ ಟಾಟಾ ಸನ್ಸ್‌ನ ಶೇ. 51.54 ರಷ್ಟು ಷೇರುಗಳನ್ನು ಹೊಂದಿದ್ದರೆ, ಟಾಟಾ ಟ್ರಸ್ಟ್‌ಗಳ ಅಡಿಯ ಎಲ್ಲಾ ದತ್ತಿ ಸಂಸ್ಥೆಗಳು ಸೇರಿ ಒಟ್ಟು ಶೇಕಡಾ 66 ರಷ್ಟು ಷೇರು ಮಾಲೀಕತ್ವ ಹೊಂದಿವೆ. ಆದ್ದರಿಂದ, ಚಾರಿಟಿ ಕಮಿಷನರ್ ಕೈಗೊಳ್ಳುವ ಯಾವುದೇ ನಿರ್ಧಾರವು ಟಾಟಾ ಸಮೂಹದ ನಿಯಂತ್ರಣ ಮತ್ತು ನಿರ್ಧಾರ ಕೈಗೊಳ್ಳುವ ಹಕ್ಕಿನ ಮೇಲೆ ನೇರ ಪರಿಣಾಮ ಬೀರಲಿದೆ.

ವಿವಾದದ ಮೂಲಃ ಚಂದ್ರಶೇಖರನ್ ಮರುನೇಮಕ ಮತ್ತು ಷೇರು ಮಾರುಕಟ್ಟೆ ಪಟ್ಟಿ

ಈ ಎಲ್ಲಾ ಭಿನ್ನಾಭಿಪ್ರಾಯಗಳ ಕೇಂದ್ರಬಿಂದುವಾಗಿರುವುದು ಎರಡು ಪ್ರಮುಖ ವಿಷಯಗಳು ಮೊದಲಿಗೆ ಫೆಬ್ರವರಿ 2027 ರಲ್ಲಿ ಮುಕ್ತಾಯಗೊಳ್ಳಲಿರುವ ಟಾಟಾ ಸನ್ಸ್ ಅಧ್ಯಕ್ಷ ಎನ್. ಚಂದ್ರಶೇಖರನ್ ಅವರ ಅಧಿಕಾರಾವಧಿಯನ್ನು ಮೂರನೇ ಬಾರಿಗೆ 5 ವರ್ಷಗಳ ಅವಧಿಗೆ ವಿಸ್ತರಿಸುವ ಪ್ರಸ್ತಾಪ. ಮತ್ತು ಎರಡನೆಯದಾಗಿ ರಿಸರ್ವ್ ಬ್ಯಾಂಕ್ ನಿಯಮಾವಳಿಗಳ ಪ್ರಕಾರ ಟಾಟಾ ಸನ್ಸ್ ಕಂಪನಿಯನ್ನು ಷೇರು ಮಾರುಕಟ್ಟೆಯಲ್ಲಿ ನೋಂದಾಯಿಸಬೇಕಾದ ಕಡ್ಡಾಯ ಸ್ಥಿತಿ.

ಟಾಟಾ ಟ್ರಸ್ಟ್ ಅಧ್ಯಕ್ಷ ನೋಯೆಲ್ ಟಾಟಾ ಅವರು ಚಂದ್ರಶೇಖರನ್ ಅವರ ಮರುನೇಮಕ ಹಾಗೂ ಟಾಟಾ ಸನ್ಸ್ ಐಪಿಒ ಪ್ರವೇಶವನ್ನು ವಿರೋಧಿಸುತ್ತಿದ್ದಾರೆ. ಆದರೆ ಆಡಳಿತ ಮಂಡಳಿಯ ಇತರ ಸದಸ್ಯರು ಈ ಪ್ರಸ್ತಾಪಗಳಿಗೆ ಬೆಂಬಲ ನೀಡುತ್ತಿರುವುದು ಭಿನ್ನಾಭಿಪ್ರಾಯ ತೀವ್ರಗೊಳ್ಳಲು ಕಾರಣವಾಗಿದೆ.

ಚಾರಿಟಿ ಕಮಿಷನರ್ ಸಲ್ಲಿಸಲಾದ ದಾಖಲೆಗಳನ್ನು ಕೂಲಂಕುಷವಾಗಿ ಪರಿಶೀಲಿಸಿದ ನಂತರ ಮುಂದಿನ ಕ್ರಮ ಕೈಗೊಳ್ಳಲಿದ್ದು, ಈ ತೀರ್ಪು ಭಾರತೀಯ ಕಾರ್ಪೊರೇಟ್ ರಂಗದ ಇತಿಹಾಸದಲ್ಲೇ ಅತ್ಯಂತ ಮಹತ್ವದ ಮೈಲಿಗಲ್ಲಾಗುವ ಸಾಧ್ಯತೆಯಿದೆ.

ಆರ್‌ಬಿಐ ಹಸ್ತಕ್ಷೇಪದಿಂದ ಚೇತರಿಸಿಕೊಂಡ ರೂಪಾಯಿ, ಈ ತಾತ್ಕಾಲಿಕ ಉಪಶಮನ ದೀರ್ಘಕಾಲ ಉಳಿಯುವುದೇ?

Gowthami K — Tue, 20 Oct 2026 16:28:32 +0530

ಭಾರತೀಯ ರಿಸರ್ವ್ ಬ್ಯಾಂಕ್ ಕೈಗೊಂಡ ದಿಟ್ಟ ಸರಣಿ ಕ್ರಮಗಳ ಹಿನ್ನೆಲೆಯಲ್ಲಿ ಅಮೆರಿಕನ್ ಡಾಲರ್ ಎದುರು ಕುಸಿಯುತ್ತಿದ್ದ ಭಾರತೀಯ ರೂಪಾಯಿ ಮೌಲ್ಯದಲ್ಲಿ ಮತ್ತೆ ಚೇತರಿಕೆ ಕಂಡುಬಂದಿದೆ. ಆದರೆ, ಈ ಚೇತರಿಕೆಯು ಹಣಕಾಸು ವಲಯದಲ್ಲಿ ಒಂದು ಪ್ರಮುಖ ಪ್ರಶ್ನೆಯನ್ನು ಹುಟ್ಟುಹಾಕಿದೆ. ಕೆಂದ್ರ ಬ್ಯಾಂಕ್‌ಗೆ ಈ ಮೌಲ್ಯವರ್ಧನೆಯನ್ನು ದೀರ್ಘಕಾಲ ಕಾಯ್ದುಕೊಳ್ಳಲು ಸಾಧ್ಯವೇ ಅಥವಾ ಇದು ಅತ್ಯಲ್ಪ ಅವಧಿಗಷ್ಟೇ ಸೀಮಿತವೇ?

ಕರೆನ್ಸಿಯ ಮೇಲಿನ ತಕ್ಷಣದ ಒತ್ತಡವನ್ನು ಕಡಿಮೆ ಮಾಡಲು ಆರ್‌ಬಿಐ ಹಲವು ತಂತ್ರಗಳನ್ನು ಬಳಸಿದೆ. ಪ್ರಮುಖವಾಗಿ, ತೈಲ ಆಮದು ಸಂಸ್ಥೆಗಳ ಡಾಲರ್ ಅಗತ್ಯತೆಗಳನ್ನು ನೇರವಾಗಿ ಪೂರೈಸುವುದು ಹಾಗೂ ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿ ನಡೆಯುವ ಊಹಾತ್ಮಕ ವಹಿವಾಟುಗಳನ್ನು ಕಟ್ಟುನಿಟ್ಟಾಗಿ ನಿಗ್ರಹಿಸುವುದು ಇದರಲ್ಲಿ ಸೇರಿವೆ.

ರೂಪಾಯಿ ಮೇಲೆ ನಿರಂತರ ಒತ್ತಡ ಏಕಿದೆ?

ರೂಪಾಯಿ ಮೌಲ್ಯದಲ್ಲಿ ಇತ್ತೀಚೆಗೆ ಕಂಡುಬಂದಿರುವ ಏರಿಕೆಯು ಶಾಶ್ವತ ಬದಲಾವಣೆಯ ಸಂಕೇತವಲ್ಲ ಎಂದು ಸಂಪತ್ತು ನಿರ್ವಹಣಾ ಸಂಸ್ಥೆಯಾದ Wealthy.in ನ ಉತ್ಪನ್ನ ಮತ್ತು ಸಂಶೋಧನಾ ಮುಖ್ಯಸ್ಥೆ ನಿಹಾರಿಕಾ ತ್ರಿಪಾಠಿ ವಿಶ್ಲೇಷಿಸಿದ್ದಾರೆ. ಆರ್‌ಬಿಐ ಕೈಗೊಂಡಿರುವ ಕ್ರಮಗಳನ್ನು ದೀರ್ಘಾವಧಿಯ ಅಂತಿಮ ಪರಿಹಾರವೆಂದು ಭಾವಿಸುವ ಬದಲಿಗೆ, ಜಾಗತಿಕ ಒತ್ತಡಗಳನ್ನು ಎದುರಿಸಲು ಸಮಯವನ್ನು ಪಡೆದುಕೊಳ್ಳುವ ಅಲ್ಪಾವಧಿಯ ತಂತ್ರವೆಂದು ನೋಡುವುದು ಒಳಿತು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ರೂಪಾಯಿಯ ಭವಿಷ್ಯವನ್ನು ನಿರ್ಧರಿಸುವ ಪ್ರಮುಖ ಜಾಗತಿಕ ಅಂಶಗಳು:

ಕಚ್ಚಾ ತೈಲದ ಭಾರಿ ಬೆಲೆ: ಭಾರತವು ತನ್ನ ಒಟ್ಟು ತೈಲ ಅಗತ್ಯತೆಯ ಬಹುಪಾಲನ್ನು ಆಮದು ಮಾಡಿಕೊಳ್ಳುತ್ತದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತೈಲ ಬೆಲೆ ಏರಿಕೆಯಾದಾಗ, ಡಾಲರ್‌ಗೆ ಇರುವ ಬೇಡಿಕೆ ಹೆಚ್ಚಾಗಿ ರೂಪಾಯಿಯ ಮೌಲ್ಯ ಕುಸಿಯುತ್ತದೆ.

ವಿದೇಶಿ ಹೂಡಿಕೆದಾರರ ಹಿಂತೆಗೆತ : ವಿದೇಶಿ ಬಂಡವಾಳ ಹೂಡಿಕೆದಾರರು ಭಾರತೀಯ ಷೇರು ಮತ್ತು ಸಾಲ ಮಾರುಕಟ್ಟೆಯಿಂದ ಹಣವನ್ನು ಹಿಂತೆಗೆದುಕೊಂಡಾಗ, ರೂಪಾಯಿಯನ್ನು ಮಾರಿ ಡಾಲರ್‌ಗೆ ಪರಿವರ್ತಿಸಿಕೊಳ್ಳುತ್ತಾರೆ. ಇದು ಕರೆನ್ಸಿಯ ದೌರ್ಬಲ್ಯವನ್ನು ಮತ್ತಷ್ಟು ಹೆಚ್ಚಿಸುತ್ತದೆ.

ಹಣದುಬ್ಬರ ಮತ್ತು ಜಾಗತಿಕ ಆರ್ಥಿಕತೆ: ಆರ್‌ಬಿಐ ಮಾರುಕಟ್ಟೆಯಲ್ಲಿ ಹಸ್ತಕ್ಷೇಪ ಮಾಡಿ ತೀವ್ರ ಕುಸಿತವನ್ನು ತಡೆಯಬಹುದೇ ಹೊರತು, ತೈಲ ಬೆಲೆ ಏರಿಕೆ ಅಥವಾ ಬಂಡವಾಳದ ಹೊರಹರಿವನ್ನು ಸಂಪೂರ್ಣವಾಗಿ ನಿಲ್ಲಿಸಲು ಸಾಧ್ಯವಿಲ್ಲ.

ಬಾಂಡ್ ಮಾರುಕಟ್ಟೆಯ ಮೇಲಿನ ಪರಿಣಾಮ ಮತ್ತು ವೆಚ್ಚ

ರೂಪಾಯಿಯನ್ನು ರಕ್ಷಿಸಲು ಆರ್‌ಬಿಐ ಕೈಗೊಳ್ಳುತ್ತಿರುವ ಕ್ರಮಗಳು ಬಾಂಡ್ ಮಾರುಕಟ್ಟೆಯ ಮೇಲೆ ಅಡ್ಡಪರಿಣಾಮ ಬೀರಿದ್ದು, ಸರ್ಕಾರದ 10 ವರ್ಷಗಳ ಬಾಂಡ್ ಲಾಭ ಶೇಕಡಾ7.37 ಕ್ಕೆ ತಲುಪಿದೆ. ಇದು ಅಕ್ಟೋಬರ್ 2023 ರ ನಂತರದ ಗರಿಷ್ಠ ಮಟ್ಟವಾಗಿದೆ.

ಬಾಂಡ್ ಬೆಲೆ ಮತ್ತು ಲಾಭ ಪರಸ್ಪರ ವಿರುದ್ಧ ದಿಕ್ಕಿನಲ್ಲಿ ಚಲಿಸುವುದರಿಂದ, ಇಳುವರಿ ಏರಿಕೆಯಾದಾಗ ಅಸ್ತಿತ್ವದಲ್ಲಿರುವ ಬಾಂಡ್‌ಗಳ ಮೌಲ್ಯ ಕುಸಿಯುತ್ತದೆ. ಬಡ್ಡಿದರಗಳ ವ್ಯತ್ಯಾಸಕ್ಕೆ ಬೇಗನೆ ಸ್ಪಂದಿಸುವ ದೀರ್ಘಾವಧಿಯ ಸಾಲ ನಿಧಿಗಳಲ್ಲಿ ಹೂಡಿಕೆ ಮಾಡಿರುವ ಹೂಡಿಕೆದಾರರಿಗೆ ಇದು ಚಂಚಲತೆಯನ್ನು ಹೆಚ್ಚಿಸಬಹುದು.

ಹೂಡಿಕೆದಾರರು ಕೈಗೊಳ್ಳಬೇಕಾದ ಜಾಣತನದ ಕ್ರಮಗಳು

ರೂಪಾಯಿ ಮೌಲ್ಯದಲ್ಲಿ ಕಂಡುಬರುತ್ತಿರುವ ದಿನನಿತ್ಯದ ಏರಿಳಿತಗಳನ್ನು ಆಧರಿಸಿ ಹೂಡಿಕೆದಾರರು ತಮ್ಮ ಪೋರ್ಟ್‌ಫೋಲಿಯೋದಲ್ಲಿ ಹಠಾತ್ ಬದಲಾವಣೆಗಳನ್ನು ಮಾಡಬಾರದು.

ವೈವಿಧ್ಯಮಯ ಹೂಡಿಕೆ : ದುರ್ಬಲಗೊಳ್ಳುತ್ತಿರುವ ರೂಪಾಯಿಯ ಅಪಾಯದಿಂದ ತಪ್ಪಿಸಿಕೊಳ್ಳಲು ಚಿನ್ನ ಹಾಗೂ ಜಾಗತಿಕ ಸ್ವತ್ತುಗಳಲ್ಲಿ ಹೂಡಿಕೆಯನ್ನು ಹಂಚಿಕೆ ಮಾಡುವುದು ಉತ್ತಮ ಅಪಾಯ ನಿರ್ವಹಣಾ ತಂತ್ರವಾಗಿದೆ.

ಕಡಿಮೆ ಅವಧಿಯ ಸಾಲ ನಿಧಿಗಳು : ಸಾಲ ಮಾರುಕಟ್ಟೆಯ ಹೂಡಿಕೆದಾರರು ಬಡ್ಡಿದರಗಳು ಮತ್ತು ಕರೆನ್ಸಿ ಸ್ಥಿರಗೊಳ್ಳುವವರೆಗೆ ಕಡಿಮೆ ಅವಧಿಯ ಡೆಟ್ ಫಂಡ್‌ಗಳಲ್ಲಿ ಮುಂದುವರಿಯುವುದು ಸೂಕ್ತ. ಇವು ದೀರ್ಘಾವಧಿ ಫಂಡ್‌ಗಳಿಗಿಂತ ಕಡಿಮೆ ಅಪಾಯವನ್ನು ಹೊಂದಿರುತ್ತವೆ.

ಹೂಡಿಕೆದಾರರು ದಿನನಿತ್ಯದ ಕರೆನ್ಸಿ ಚಲನೆಯನ್ನು ಆಧರಿಸಿ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಬದಲು, ತಮ್ಮ ಹೂಡಿಕೆ ಅವಧಿ , ಅಪಾಯ ತಡೆಯುವ ಸಾಮರ್ಥ್ಯ ಹಾಗೂ ಆಸ್ತಿ ಹಂಚಿಕೆಯನ್ನು ಗಮನದಲ್ಲಿಟ್ಟುಕೊಂಡು ಹೂಡಿಕೆ ತಂತ್ರವನ್ನು ರೂಪಿಸಿಕೊಳ್ಳಬೇಕು.

ಮಾರುಕಟ್ಟೆಯಲ್ಲಿ ಗ್ರಾಹಕರಿಗೆ ಶಾಕ್ , ಆಯುಧ ಪೂಜೆ ಹಿನ್ನೆಲೆ ಹೂವು, ಹಣ್ಣುಗಳ ಬೆಲೆ ಗಗನಕ್ಕೆ!

Gowthami K — Mon, 19 Oct 2026 07:43:30 +0530

ಬೆಂಗಳೂರು: ಆಯುಧ ಪೂಜೆ, ವಿಜಯದಶಮಿ ಹಬ್ಬವನ್ನು ಸಂಭ್ರಮದಿಂದ ಆಚರಿಸಲು ಬೆಲೆ ಏರಿಕೆಯ ನಡುವೆಯೂ ಮಾರುಕಟ್ಟೆಗಳಿಗೆ ಆಗಮಿಸಿದ ಜನರು ಹೂವು, ಹಣ್ಣು, ಬಾಳೆದಿಂಡು, ಬೂದುಕುಂಬಳಕಾಯಿ ಖರೀದಿ ಭರ್ಜರಿಯಾಗಿ ಮಾಡಿದರು.

ನಗರದ ಪ್ರಮುಖ ಹೂವು, ಹಣ್ಣುಗಳ ಮಾರುಕಟ್ಟೆಯಾಗಿರುವ ಕೆ.ಆರ್.ಮಾರುಕಟ್ಟೆ, ಮಲ್ಲೇಶ್ವರ, ಯಶವಂತಪುರ, ಗಾಂಧಿಬಜಾರ್‌, ಜಯನಗರ ಸೇರಿದಂತೆ ನಗರದ ವಿವಿಧ ಮಾರುಕಟ್ಟೆಗಳಲ್ಲಿ ಭಾನುವಾರ ಅಪಾರ ಸಂಖ್ಯೆಯಲ್ಲಿ ಗ್ರಾಹಕರು ಖರೀದಿಯಲ್ಲಿ ತೊಡಗಿಸಿಕೊಂಡಿದ್ದರು.

ವಾಹನಗಳ ಪೂಜೆ ಸೇರಿದಂತೆ ಆಯುಧ ಪೂಜೆಗೆ ಪ್ರಮುಖವಾಗಿ ಬಳಸುವ ಒಂದು ಜೊತೆ ಬಾಳೆ ದಿಂಡು ಬೆಲೆ ನಗರದ ಬೇರೆ ಬೇರೆ ಭಾಗಗಳಲ್ಲಿ 120 ರು.ವರೆಗೂ ಇತ್ತು. ತಳಿರು ತೋರಣಗಳ ಮಾವಿನ ಎಲೆಗಳು ಕೂಡ ಒಂದು ಕಟ್ಟಿಗೆ 30 ರು.ನಿಂದ 50 ರು.ವರೆಗೆ ಮಾರಾಟವಾಗುತ್ತಿದೆ. ಬೂದುಕುಂಬಳಕಾಯಿ ದರವೂ ಗಾತ್ರದ ಆಧಾರದ ಮೇಲೆ ಒಂದಕ್ಕೆ 100 ರು.ನಿಂದ 150 ರು.ವರೆಗೂ ಮಾರಾಟವಾಗಿದೆ.

ಹೂವುಗಳ ದರ ಏರಿಕೆ:

ಸೇವಂತಿ ಪ್ರತಿ ಕೆ.ಜಿಗೆ ಈ ಮೊದಲು ಗರಿಷ್ಠ 80 ರು. ಸಿಗುತ್ತಿತ್ತು. ಈಗ 400 ರು.ವರೆಗೂ ಏರಿಕೆಯಾಗಿದೆ. ಬಿಡಿ ಗುಲಾಬಿ 80 ರು.ಯಿಂದ 250 ರು. ಆಗಿದೆ. ಕನಕಾಂಬರ 1,000 ರು. ಇದ್ದದ್ದು ಈಗ 4000 ರು.ವರೆಗೂ ಗೆ ಏರಿಕೆಯಾಗಿದೆ. ಮಲ್ಲಿಗೆ ಹೂವು 700 ರು.ನಿಂದ 1,000 ರು. ಇದ್ದದ್ದು, 1,800 ರು.ನಿಂದ 2,000 ರು.ಗೆ ಏರಿಕೆಯಾಗಿದೆ. ಗುಲಾಬಿ ಹೂವು ಕೆ.ಜಿಗೆ 500 ರು.ವರೆಗೆ ಏರಿಕೆಯಾಗಿದೆ.

ಹಣ್ಣುಗಳ ದರ ಏರಿಕೆ

ಬಹುತೇಕ ಹಣ್ಣುಗಳ ದರ ದುಪ್ಪಟ್ಟಾಗಿದೆ. ಪ್ರತಿ ಕೆ.ಜಿ ಸೇಬು 220 ರು.ಯಿಂದ 355 ರು.ಗೆ ಮಾರಾಟವಾಗುತ್ತಿದೆ. ಬಟರ್ ಫ್ರೂಟ್ 250 ರು., ದಾಳಿಂಬೆ 250 ರು., ಸಪೋಟಾ 85 ರು., ಮೊಸಂಬಿ 83 ರು., ಏಲಕ್ಕಿ ಬಾಳೆಹಣ್ಣು 120 ರು.ತಲುಪಿದೆ.

ಮಳೆ ಕೊರತೆ ಪರಿಣಾಮ

ಈ ವರ್ಷ ಮಳೆಗಾಲದಲ್ಲಿ ಮಳೆ ಕೈಕೊಟ್ಟಿರುವ ಹಿನ್ನೆಲೆಯಲ್ಲಿ ಫಸಲು ಬಹಳಷ್ಟು ಕಡಿಮೆಯಾಗಿದೆ. ಹೀಗಾಗಿ, ಹೂವು, ಹಣ್ಣುಗಳ ಬೆಲೆ ಕಳೆದ ವರ್ಷದ ಹಬ್ಬಕ್ಕೆ ಹೋಲಿಸಿದರೆ ಈ ವರ್ಷ ಬಹಳಷ್ಟು ಏರಿಕೆಯಾಗಿದೆ. ಪ್ರತಿ ವರ್ಷವೂ ಶೇ.5ರಿಂದ 10ರಷ್ಟು ಏರಿಕೆಯಾಗುವುದು ಸಹಜ. ಆದರೆ, ಈ ವರ್ಷ ಶೇ.50ರವರೆಗೂ ಏರಿಕೆಯಾಗಿದೆ. ಗ್ರಾಹಕರು ಕೂಡ ಈ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ ಎಂದು ಕೆ.ಆರ್. ಮಾರುಕಟ್ಟೆ ವ್ಯಾಪಾರಿಗಳು ಹೇಳಿದ್ದಾರೆ.

ನಗರದ ಮಾರುಕಟ್ಟೆಗಳಿಗೆ ಎಂದಿನಂತೆ ಕೋಲಾರ, ಬೆಂಗಳೂರು ಗ್ರಾಮಾಂತರ, ಚಿಕ್ಕಬಳ್ಳಾಪುರ, ದೊಡ್ಡಬಳ್ಳಾಪುರ ಮಾತ್ರವಲ್ಲದೇ, ನೆರೆಯ ಆಂಧ್ರಪ್ರದೇಶ ಮತ್ತು ತಮಿಳುನಾಡು ರಾಜ್ಯಗಳಿಂದಲೂ ಹೂವು, ಹಣ್ಣುಗಳು ಹರಿದು ಬಂದಿವೆ.

ಬೆಲೆ ಎಷ್ಟೇ ಏರಿಕೆಯಾದರೂ ವರ್ಷಕ್ಕೆ ಒಮ್ಮೆ ಬರುವ ಪ್ರಮುಖ ಹಬ್ಬದ ವೇಳೆ ಆಯುಧ ಪೂಜೆಗೆ ಹೂವು, ಹಣ್ಣುಗಳನ್ನು ಖರೀದಿಸಲೇಬೇಕು. ಹೀಗಾಗಿ, ಅಗತ್ಯವಿರುವಷ್ಟು ಖರೀದಿಸುತ್ತಿದ್ದೇವೆ. ಹಬ್ಬದ ನಂತರ ಮತ್ತೆ ದರ ಇಳಿಕೆಯಾಗಬಹುದು ಎಂದು ಕೆ.ಆರ್. ಮಾರುಕಟ್ಟೆಯಲ್ಲಿ ಖರೀದಿಯಲ್ಲಿ ತೊಡಗಿದ್ದ ಗ್ರಾಹಕರು ಹೇಳಿದರು.

Top 10 Billionaire Countries: ಅತಿ ಹೆಚ್ಚು ಬಿಲಿಯನೇರ್‌ಗಳಿರುವ ಟಾಪ್ 10 ದೇಶಗಳು, ಭಾರತದ ಸ್ಥಾನವೆಷ್ಟು?

Naveen Kodase — Sun, 18 Oct 2026 17:20:56 +0530

2026ರ ಫೋರ್ಬ್ಸ್ ಪಟ್ಟಿ ಬಿಡುಗಡೆಯಾಗಿದೆ. ಅತಿ ಹೆಚ್ಚು ಬಿಲಿಯನೇರ್‌ಗಳಿರುವ ದೇಶಗಳ ಪೈಕಿ ಅಮೆರಿಕ ಮತ್ತೆ ನಂಬರ್ ಒನ್ ಸ್ಥಾನದಲ್ಲಿದೆ. ಹಾಗಾದರೆ ಈ ಲಿಸ್ಟ್‌ನಲ್ಲಿ ಭಾರತದ ಸ್ಥಾನವೆಷ್ಟು? ಟಾಪ್ 10 ದೇಶಗಳು ಯಾವುವು ಅನ್ನೋದರ ಡೀಟೇಲ್ಸ್ ಇಲ್ಲಿದೆ.

ಪ್ರಪಂಚದ ಕುಬೇರರ ರೇಸ್‌ನಲ್ಲಿ ಭಾರತಕ್ಕೆ ಭರ್ಜರಿ ಸ್ಥಾನ

ಪ್ರಪಂಚದಾದ್ಯಂತ ಅತಿ ಹೆಚ್ಚು ಬಿಲಿಯನೇರ್‌ಗಳು ವಾಸಿಸುವ ದೇಶಗಳ ಹೊಸ ಪಟ್ಟಿ ರಿಲೀಸ್ ಆಗಿದೆ. ಈ ಗ್ಲೋಬಲ್ ರಿಚ್ ಲಿಸ್ಟ್‌ನಲ್ಲಿ ಅಮೆರಿಕ ತನ್ನ ಪಾರುಪತ್ಯ ಮುಂದುವರಿಸಿದೆ. ಭಾರತ ಕೂಡ ಈ ಪಟ್ಟಿಯಲ್ಲಿ ಭರ್ಜರಿ ಸಾಧನೆ ಮಾಡಿದ್ದು, ಅತಿ ಹೆಚ್ಚು ಕುಬೇರರಿರುವ ವಿಶ್ವದ 3ನೇ ಅತಿದೊಡ್ಡ ದೇಶವಾಗಿ ಹೊರಹೊಮ್ಮಿದೆ.

1. ಅಮೆರಿಕ

ವಿವಿಧ ದೇಶಗಳ ಆರ್ಥಿಕ ಬೆಳವಣಿಗೆ, ಷೇರುಪೇಟೆಗಳ ಏರಿಕೆ ಹಾಗೂ ಹೊಸ ಬ್ಯುಸಿನೆಸ್ ಮಾಡೆಲ್‌ಗಳಿಂದಾಗಿ ಈ ವರ್ಷ ಬಿಲಿಯನೇರ್‌ಗಳ ಸಂಖ್ಯೆ ಭಾರೀ ಏರಿಕೆಯಾಗಿದೆ. ಜಗತ್ತಿನ ಟಾಪ್ 10 ಶ್ರೀಮಂತ ದೇಶಗಳು, ಅವುಗಳ ಒಟ್ಟು ಸಂಪತ್ತು ಹಾಗೂ ಆಯಾ ದೇಶಗಳ ಟಾಪ್ ಕುಬೇರರ ಸಂಪೂರ್ಣ ಮಾಹಿತಿ ಇಲ್ಲಿದೆ.

ಅಮೆರಿಕ 989 ಬಿಲಿಯನೇರ್‌ಗಳೊಂದಿಗೆ ವಿಶ್ವದಲ್ಲೇ ಮೊದಲ ಸ್ಥಾನದಲ್ಲಿದೆ. ಈ ಎಲ್ಲಾ ಕುಬೇರರ ಒಟ್ಟು ಆಸ್ತಿ ಮೌಲ್ಯ ಬರೋಬ್ಬರಿ 8.4 ಟ್ರಿಲಿಯನ್ ಡಾಲರ್. ದಕ್ಷಿಣ ಆಫ್ರಿಕಾದಿಂದ ಅಮೆರಿಕಕ್ಕೆ ವಲಸೆ ಬಂದು ಜಗತ್ತಿನ ಅತಿ ಶ್ರೀಮಂತ ವ್ಯಕ್ತಿಯಾಗಿ ಬೆಳೆದ ಎಲಾನ್ ಮಸ್ಕ್, ಯುಎಸ್ ಬಿಲಿಯನೇರ್‌ಗಳ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದ್ದಾರೆ.

2. ಚೀನಾ

ಈ ವರ್ಷ ಚೀನಾದಲ್ಲಿ ಬಿಲಿಯನೇರ್‌ಗಳ ಸಂಖ್ಯೆ ದಾಖಲೆ ಮಟ್ಟಕ್ಕೆ ಏರಿದೆ. ಒಟ್ಟು 539 ಬಿಲಿಯನೇರ್‌ಗಳೊಂದಿಗೆ ಚೀನಾ ವಿಶ್ವದಲ್ಲಿ 2ನೇ ಸ್ಥಾನದಲ್ಲಿದೆ. ಇವರ ಒಟ್ಟು ಸಂಪತ್ತು 2.2 ಟ್ರಿಲಿಯನ್ ಡಾಲರ್. ಕಳೆದ ವರ್ಷ 495 ಬಿಲಿಯನೇರ್‌ಗಳಿದ್ದರು. ಟಿಕ್‌ಟಾಕ್ ಮಾತೃಸಂಸ್ಥೆ ಬೈಟ್‌ಡ್ಯಾನ್ಸ್ ಸಹ-ಸಂಸ್ಥಾಪಕ ಜಾಂಗ್ ಯಿಮಿಂಗ್ ಚೀನಾದ ಅತಿ ಶ್ರೀಮಂತ ವ್ಯಕ್ತಿಯಾಗಿದ್ದಾರೆ.

3. ಭಾರತ

ಅತಿ ಹೆಚ್ಚು ಬಿಲಿಯನೇರ್‌ಗಳಿರುವ ದೇಶಗಳ ಪಟ್ಟಿಯಲ್ಲಿ ಭಾರತ 3ನೇ ಸ್ಥಾನದಲ್ಲಿದೆ. ನಮ್ಮ ದೇಶದಲ್ಲಿ ಪ್ರಸ್ತುತ 229 ಬಿಲಿಯನೇರ್‌ಗಳಿದ್ದು, ಇವರ ಒಟ್ಟು ಸಂಪತ್ತು 1 ಟ್ರಿಲಿಯನ್ ಡಾಲರ್ ತಲುಪಿದೆ. ರಿಲಯನ್ಸ್ ಇಂಡಸ್ಟ್ರೀಸ್ ಮುಖ್ಯಸ್ಥ ಮುಖೇಶ್ ಅಂಬಾನಿ ಹಾಗೂ ಅದಾನಿ ಗ್ರೂಪ್ ಮುಖ್ಯಸ್ಥ ಗೌತಮ್ ಅದಾನಿ ಭಾರತದ ಅತಿ ಶ್ರೀಮಂತ ವ್ಯಕ್ತಿ ಪಟ್ಟಕ್ಕಾಗಿ ಪೈಪೋಟಿ ನಡೆಸುತ್ತಿದ್ದಾರೆ.

4. ಜರ್ಮನಿ

ಜರ್ಮನಿಯಲ್ಲಿ ಬಿಲಿಯನೇರ್‌ಗಳ ಸಂಖ್ಯೆ ಗಣನೀಯವಾಗಿ ಏರಿಕೆಯಾಗಿದ್ದು, 212ಕ್ಕೆ ತಲುಪಿದೆ. ಕಳೆದ ವರ್ಷ 171 ಬಿಲಿಯನೇರ್‌ಗಳಿದ್ದರು ಹಾಗೂ 793 ಬಿಲಿಯನ್ ಡಾಲರ್ ಸಂಪತ್ತಿತ್ತು. ಈ ಬಾರಿ ಇವರ ಒಟ್ಟು ಆಸ್ತಿ ಮೌಲ್ಯ 1 ಟ್ರಿಲಿಯನ್ ಡಾಲರ್‌ಗೆ ಏರಿಕೆಯಾಗಿದೆ. 67.2 ಬಿಲಿಯನ್ ಡಾಲರ್ ನಿವ್ವಳ ಸಂಪತ್ತಿನೊಂದಿಗೆ ಡೈಟರ್ ಶ್ವಾರ್ಜ್ ಜರ್ಮನಿಯ ಅತಿ ಶ್ರೀಮಂತ ವ್ಯಕ್ತಿಯಾಗಿದ್ದಾರೆ.

5. ರಷ್ಯಾ

ಫೋರ್ಬ್ಸ್ ಪಟ್ಟಿಯ ಪ್ರಕಾರ, ರಷ್ಯಾ ವಿಶ್ವದಲ್ಲಿ 5ನೇ ಸ್ಥಾನದಲ್ಲಿದೆ. ಅಲ್ಲಿ ಒಟ್ಟು 147 ಬಿಲಿಯನೇರ್‌ಗಳಿದ್ದು, ಇವರ ಒಟ್ಟು ಸಂಪತ್ತು 649 ಬಿಲಿಯನ್ ಡಾಲರ್ ಆಗಿದೆ. ಕಳೆದ ವರ್ಷ 140 ಬಿಲಿಯನೇರ್‌ಗಳಿದ್ದರು. 37 ಬಿಲಿಯನ್ ಡಾಲರ್ ಆಸ್ತಿಯೊಂದಿಗೆ ಅಲೆಕ್ಸಿ ಮೊರ್ಡಶೋವ್ ಮತ್ತು ಅವರ ಕುಟುಂಬ ರಷ್ಯಾದಲ್ಲಿ ಮೊದಲ ಸ್ಥಾನದಲ್ಲಿದೆ.

6 ರಿಂದ 10ನೇ ಸ್ಥಾನದಲ್ಲಿರುವ ದೇಶಗಳ ಪಟ್ಟಿ ಇಲ್ಲಿದೆ

• ಇಟಲಿ: 89 ಬಿಲಿಯನೇರ್‌ಗಳೊಂದಿಗೆ ಇಟಲಿ 6ನೇ ಸ್ಥಾನದಲ್ಲಿದೆ. ಇವರ ಒಟ್ಟು ಸಂಪತ್ತು 483 ಬಿಲಿಯನ್ ಡಾಲರ್. 89.3 ಬಿಲಿಯನ್ ಡಾಲರ್ ಸಂಪತ್ತಿನೊಂದಿಗೆ ಜಿಯಾನ್‌ಕಾರ್ಲೊ ದೇವಸಿನಿ ಇಟಲಿಯ ಟಾಪ್ ಶ್ರೀಮಂತರಾಗಿದ್ದಾರೆ.

• ಕೆನಡಾ: 82 ಬಿಲಿಯನೇರ್‌ಗಳೊಂದಿಗೆ ಕೆನಡಾ 7ನೇ ಸ್ಥಾನದಲ್ಲಿದೆ. ಇವರ ಒಟ್ಟು ಸಂಪತ್ತು 457 ಬಿಲಿಯನ್ ಡಾಲರ್. ಕಳೆದ ವರ್ಷ ಇಲ್ಲಿ 76 ಬಿಲಿಯನೇರ್‌ಗಳಿದ್ದರು ಹಾಗೂ 349 ಬಿಲಿಯನ್ ಡಾಲರ್ ಸಂಪತ್ತಿತ್ತು. 110 ಬಿಲಿಯನ್ ಡಾಲರ್ ಸಂಪತ್ತಿನೊಂದಿಗೆ ಚಾಂಗ್‌ಪೆಂಗ್ ಝಾವೋ ಕೆನಡಾದ ಅತಿ ಶ್ರೀಮಂತ ವ್ಯಕ್ತಿಯಾಗಿದ್ದಾರೆ.

• ಹಾಂಗ್ ಕಾಂಗ್: 71 ಬಿಲಿಯನೇರ್‌ಗಳೊಂದಿಗೆ ಹಾಂಗ್ ಕಾಂಗ್ 8ನೇ ಸ್ಥಾನದಲ್ಲಿದೆ. ಇವರ ಒಟ್ಟು ಸಂಪತ್ತು 420 ಬಿಲಿಯನ್ ಡಾಲರ್.

• ಬ್ರೆಜಿಲ್: 70 ಬಿಲಿಯನೇರ್‌ಗಳೊಂದಿಗೆ ಬ್ರೆಜಿಲ್ 9ನೇ ಸ್ಥಾನದಲ್ಲಿದೆ. ಇವರ ಒಟ್ಟು ಸಂಪತ್ತು 265 ಬಿಲಿಯನ್ ಡಾಲರ್. 35.9 ಬಿಲಿಯನ್ ಡಾಲರ್‌ನೊಂದಿಗೆ ಎಡ್ವರ್ಡೊ ಸವೆರಿನ್ ಬ್ರೆಜಿಲ್‌ನ ಟಾಪ್ ಶ್ರೀಮಂತರಾಗಿದ್ದಾರೆ.

• ತೈವಾನ್: 66 ಬಿಲಿಯನೇರ್‌ಗಳೊಂದಿಗೆ ತೈವಾನ್ 10ನೇ ಸ್ಥಾನದಲ್ಲಿದೆ. ಇವರ ಒಟ್ಟು ಸಂಪತ್ತು 245 ಬಿಲಿಯನ್ ಡಾಲರ್ ಆಗಿದೆ.

ಈ ದೀಪಾವಳಿಗೆ ನಿಮ್ಮ ಮಕ್ಕಳಿಗಾಗಿ ಸ್ವೀಟ್, ದುಬಾರಿ ಬಟ್ಟೆ ಬೇಡ, ಈ ಷೇರುಗಳನ್ನೇ ಗಿಫ್ಟ್ ಕೊಡಿ! ಮಕ್ಕಳ ಭವಿಷ್ಯಕ್ಕೆ ಸಂಪತ್ತು ಸೃಷ್ಟಿಸುತ್ತೆ!

Ravi Janekal — Tue, 20 Oct 2026 14:04:33 +0530

ದೀಪಾವಳಿ ಹಬ್ಬಕ್ಕಾಗಿ ಮಕ್ಕಳಿಗಾಗಿ ಸಾವಿರಾರು ರೂಪಾಯಿ ಖರ್ಚು ಮಾಡಿ ದುಬಾರಿ ಬಟ್ಟೆ, ಸುಟ್ಟು ಬೂದಿಯಾಗುವ ಪಟಾಕಿ ಕೊಡಿಸಲು ಬದಲು ಮ್ಯೂಚುವಲ್ ಫಂಡ್ ಯುನಿಟ್, ಷೇರುಗಳನ್ನ ಗಿಫ್ಟ್ ಆಗಿ ನೀಡಿದ್ರೆ ಹೇಗೆ? ಇದರಿಂದ ಮಕ್ಕಳ ಭವಿಷ್ಯಕ್ಕೆ ಸಂಪತ್ತು ಸೃಷ್ಟಿಯಾಗುತ್ತದೆ.. ಈ ಬಗ್ಗೆ ಐಡಿಯಾಗಳು ಇಲ್ಲಿವೆ.

ಭಾರತೀಯ ಪೋಷಕರು ತಮ್ಮ ಮಕ್ಕಳು ಸುಖವಾಗಿರಲು ಸಾಕಷ್ಟು ಖರ್ಚು ಮಾಡುತ್ತಾರೆ. ಮಕ್ಕಳ ಪ್ರತಿ ಬೇಡಿಕೆಯನ್ನ ನಿರಾಕರಿಸುವುದಿಲ್ಲ, ಹಬ್ಬಗಳಿಗೆ ದುಬಾರಿ ಬಟ್ಟೆ, ಸೈಕಲ್, ಬೈಕ್, ದೀಪಾವಳಿಗೆ ಸಾವಿರಾರು ರೂಪಾಯಿಯ ಪಟಾಕಿ, ಸ್ವೀಟ್ ಖರೀದಿಸಿ ತರುತ್ತಾರೆ. ಇದರಿಂದ ಮಕ್ಕಳು ಸಂತೋಷವಾಗಿರುತ್ತಾರೆ ಎಂಬ ಭಾವನೆ ಪೋಷಕರದ್ದು. ಆದರೆ ಮಕ್ಕಳ ಭವಿಷ್ಯಕ್ಕಾಗಿ ಉಳಿತಾಯ, ಅವರಿಗೆ ಭವಿಷ್ಯಕ್ಕೆ ಉಪಯೋಗವಾಗುವ ಸಂಪತ್ತು ಸೃಷ್ಟಿಸುವ ಬಗ್ಗೆ ಯೋಚಿಸುವುದೇ ಇಲ್ಲ. ಆಗಿಂದಾಗ್ಗೆ ಖರ್ಚು ಮಾಡುವುದೇ ಮಕ್ಕಳನ್ನು ಸುಖವಾಗಿಡುವುದು ಎಂದು ಕೊಂಡಿದ್ದಾರೆ. ಮಕ್ಕಳಿಗೆ ಸಾಕಷ್ಟು ಹಣ ಖರ್ಚು ಮಾಡುವ ಬದಲು ಮಕ್ಕಳ ಭವಿಷ್ಯಕ್ಕಾಗಿ ಅಷ್ಟೇ ಹಣ ಉಳಿತಾಯ ಮಾಡಿದ್ರೆ ಅದೆಷ್ಟು ಉಪಯೋಗಕ್ಕೆ ಬರುತ್ತದಲ್ಲವೇ?

ಹೌದು, ಈ ಬಾರಿ ದೀಪಾವಳಿ ಹಬ್ಬ ಸಮೀಪಿಸುತ್ತಿದೆ. ಈ ಬಾರಿ ದೀಪಾವಳಿಗಾಗಿ ಹಣ ಖರ್ಚು ಮಾಡುವ ಬದಲು ನಿಮ್ಮ ಮಕ್ಕಳಿಗೆ ಪ್ರೀತಿ ಪಾತ್ರರಿಗೆ ಚಿನ್ನ, ಬೆಳ್ಳಿ, ಸಾವಿರಾರು ಬೆಲೆಯ ಬಟ್ಟೆ, ಸ್ವೀಟ್ ಬಾಕ್ಸ್, ದುಬಾರಿ ವಸ್ತುಗಳನ್ನ ನೀಡುವ ಬದಲು ಷೇರುಗಳು ಅಥವಾ ಮ್ಯೂಚುವಲ್ ಫಂಡ್ ಯುನಿಟ್‌ಗಳ ಗಿಫ್ಟ್ ನೀಡಿ. ಏಕೆಂದರೆ ಸ್ವೀಟ್ ಖಾಲಿಯಾಗಬಹುದು, ಬಟ್ಟೇ ಹರಿದುಹೋಗಬಹುದು, ಪಟಾಕಿ ಸಿಡಿದು ಕ್ಷಣಾರ್ಥದಲ್ಲಿ ಬೂದಿಯಾಗಬಹುದು.ಆದರೆ ನೀವು ನೀಡುವ ಇಂತಹ ಈ ಗಿಫ್ಟ್ ಮಕ್ಕಳ, ಪ್ರೀತಿಪಾತ್ರರ ಭವಿಷ್ಯಕ್ಕಾಗಿ ಸಂಪತ್ತನ್ನ ಸೃಷ್ಟಿಸಲು ಮೊದಲ ಹೆಜ್ಜೆಯಾಗುತ್ತದೆ!

ಷೇರುಗಳು ಅಥವಾ ಮ್ಯೂಚುವಲ್ ಫಂಡ್‌ಗಳನ್ನು ಇತರರಿಗೆ ಉಡುಗೊರೆಯಾಗಿ ನೀಡುವ ಮೊದಲು ಅವುಗಳನ್ನು ಹೇಗೆ ಟ್ರಾನ್ಸ್‌ಫರ್ ಮಾಡಲಾಗುತ್ತೆ, ಅದರಿಂದ ಉಂಟಾಗುವ ತೆರಿಗೆ ಪರಿಣಾಮಗಳೇನು ಎಂಬುದನ್ನು ತಿಳಿದುಕೊಳ್ಳುವುದು ಬಹಳ ಮುಖ್ಯ. ಆ ಬಗ್ಗೆ ಇಲ್ಲಿ ವಿವರವಾಗಿ ತಿಳಿಸಲಾಗಿದೆ.

ಭಾರತದಲ್ಲಿ ಷೇರುಗಳು, ಮ್ಯೂಚುವಲ್ ಫಂಡ್‌ಗಳನ್ನುಉಡುಗೊರೆಯಾಗಿ ನೀಡಲು ಅದರದ್ದೇ ಆದ ನಿಯಮಗಳಿವೆ. ಮುಖ್ಯವಾಗಿ ಈ ಇಂತಹ ಉಡುಗೊರೆ ನೀಡುವಾಗ ಕುಟುಂಬದ ಸದಸ್ಯರಿಗೆ ನೀಡಲಾಗಿದೆಯೇ ಅಥವಾ ಸ್ನೇಹಿತರು ಅಥವಾ ಸಂಬಂಧಿಕರಲ್ಲದ ವ್ಯಕ್ತಿಗಳಿಗೆ ನೀಡಲಾಗಿದೆಯೇ ಎಂಬುದರ ಆಧಾರದ ಮೇಲೆ ತೆರಿಗೆಯ ನಿಯಮಗಳು ಬದಲಾಗಬಹುದು.

ನಿಮ್ಮ ಪೋರ್ಟ್‌ಫೋಲಿಯೊದಲ್ಲಿರುವ ಷೇರುಗಳನ್ನು ನಿಮ್ಮ ಪೋಷಕರು, ಒಡಹುಟ್ಟಿದವರು ಅಥವಾ ಸಂಗಾತಿಗೆ ಅಥವಾ ಬೇರೆ ಯಾವುದೇ ವ್ಯಕ್ತಿಗೆ ಗಿಫ್ಟ್ ನೀಡಬೇಕು ಅನಿಸಿದರೆ ಸಾಮಾನ್ಯವಾಗಿ ನೀವು ಅವುಗಳನ್ನು ಮಾರಾಟ ಮಾಡುವ ಬದಲು ನೇರವಾಗಿ ಟ್ರಾನ್ಸ್‌ಫರ್ ಮಾಡಬಹುದು. ಇದಕ್ಕಾಗಿನ ಷೇರುಗಳನ್ನು ನೀಡುವವರು ಮತ್ತು ಪಡೆಯುವವರು ಇಬ್ಬರೂ ಡಿಮ್ಯಾಟ್ (Demat) ಖಾತೆಯನ್ನು ಹೊಂದಿರಬೇಕು. ಷೇರುದಾರರು ತಮ್ಮ ಬ್ರೋಕರ್ ಅಥವಾ ಡಿಪಾಸಿಟರಿ ಪಾರ್ಟಿಸಿಪೆಂಟ್ (Depository Participant) ಮೂಲಕ 'ಆಫ್-ಮಾರುಕಟ್ಟೆ ಟ್ರಾನ್ಸ್‌ಫರ್(off-market transfer) ಮಾಡಬಹುದು. ಇದಕ್ಕೆ, ಷೇರುಗಳನ್ನು ಪಡೆಯುವವರ ಡಿಮ್ಯಾಟ್ ಅಕೌಂಟ್‌ ಸರಿಯಾದ ವಿವರ ಹಾಗೂ ಅಗತ್ಯ ಟ್ರಾನ್ಸ್‌ಫರ್ ಸೂಚನೆಗಳನ್ನ ನೀಡಬೇಕಾಗುತ್ತೆ.

ಯೆಸ್, ಮ್ಯೂಚುವಲ್ ಫಂಡ್ ಯುನಿಟ್‌ಗಳನ್ನು ಬೇರೆಯವರಿಗೆ ಉಡುಗೊರೆಯಾಗಿ ನೀಡಬಹುದು. ಆದರೆ ಟ್ರಾನ್ಸ್‌ಫರ್ ಪ್ರೊಸೆಸ್ ಆ ಯುನಿಟ್‌ಗಳು ಡಿಮ್ಯಾಟ್ ಖಾತೆಯಲ್ಲಿವೆಯೇ ಅಥವಾ 'ಸ್ಟೇಟ್‌ಮೆಂಟ್ ಆಫ್ ಅಕೌಂಟ್' (SoA) ರೂಪದಲ್ಲಿವೆಯೇ ಎಂಬುದರ ಮೇಲೆ ಅವಲಂಬಿತವಾಗಿರುತ್ತದೆ. ಒಂದು ವೇಳೆ ಡಿಮ್ಯಾಟ್ ಖಾತೆಯಲ್ಲಿದ್ದರೆ ಯುನಿಟ್‌ಗಳನ್ನು ಡೆಪಾಸಿಟರಿ (Depository) ಮೂಲಕ ವರ್ಗಾಯಿಸಬಹುದು. SoA ರೂಪದಲ್ಲಿರುವ ಯುನಿಟ್‌ಗಳ ವಿಷಯಕ್ಕೆ ಬಂದರೆ ಮ್ಯೂಚುವಲ್ ಫಂಡ್ ಸಂಸ್ಥೆ, ರಿಜಿಸ್ಟ್ರಾರ್ ಮತ್ತು ಟ್ರಾನ್ಸ್‌ಫರ್ ಏಜೆಂಟ್ (RTA) ಹಾಗೂ 'MF ಸೆಂಟ್ರಲ್' (MF Central) ನಿಗದಿಪಡಿಸಿದ ನಿಯಮಗಳು ಮತ್ತು ಅರ್ಹತಾ ಮಾನದಂಡಗಳನ್ನು ಪರಿಶೀಲಿಸಬೇಕಾಗುತ್ತದೆ. ಎಲ್ಲಾ ಮ್ಯೂಚುವಲ್ ಫಂಡ್ ಯೋಜನೆಗಳಿಗೂ ಎಲ್ಲ ರೀತಿಯ ವರ್ಗಾವಣೆ ಸೌಲಭ್ಯಗಳು ಲಭ್ಯವಿರುವುದಿಲ್ಲ ಎಂಬುದನ್ನು ಗಮನಿಸುವುದು ಮುಖ್ಯ.

₹50,000 ಮೀರಿದ ಗಿಫ್ಟ್ ಯಾವಾಗ ತೆರಿಗೆಗೆ ಒಳಪಡುತ್ತವೆ?

ಆದಾಯ ತೆರಿಗೆ ಕಾಯಿದೆ, 2025ರ ಸೆಕ್ಷನ್ 92ರ ಅಡಿಯಲ್ಲಿ, ನೀವು ಸಂಬಂಧಿಕರಲ್ಲದ ವ್ಯಕ್ತಿಯೊಬ್ಬರಿಂದ ಷೇರುಗಳು ಮತ್ತು ಸೆಕ್ಯೂರಿಟಿಗಳಂತಹ ನಿರ್ದಿಷ್ಟ ಆಸ್ತಿಗಳನ್ನು ಯಾವುದೇ ಹಣ ಪಾವತಿಸದೆ ಉಡುಗೊರೆಯಾಗಿ ಪಡೆದರೆ ಮತ್ತು ಒಂದು ಆರ್ಥಿಕ ವರ್ಷದಲ್ಲಿ ಅಂತಹ ಆಸ್ತಿಗಳ ಒಟ್ಟು fair market value ₹50,000 ಮೀರಿದರೆ, ಆಗ ಆ ಸಂಪೂರ್ಣ ಮೊತ್ತವು ತೆರಿಗೆಗೆ ಒಳಪಡಬಹುದು (ಕೇವಲ ₹50,000 ಮೀರಿದ ಭಾಗ ಮಾತ್ರವಲ್ಲದೆ, ಇಡೀ ಮೊತ್ತವೇ ತೆರಿಗೆಗೆ ಒಳಪಡಬಹುದು. ಆದರೆ ನಿರ್ದಿಷ್ಟ ಸಂಬಂಧಿಕರಿಂದ ಪಡೆಯುವ ಉಡುಗೊರೆಗಳಿಗೆ ಈ ನಿಯಮದಿಂದ ವಿನಾಯಿತಿ ಇದೆ. ಈ ವರ್ಗದಲ್ಲಿ ಸಂಗಾತಿ, ಸಹೋದರ-ಸಹೋದರಿಯರು, ಪೋಷಕರು, ಮಕ್ಕಳು ಮತ್ತು ಕಾನೂನಿನ ಪ್ರಕಾರ ವ್ಯಾಖ್ಯಾನಿಸಲಾದ ಇತರ ಕೆಲವು ಸಂಬಂಧಿಕರು ಸೇರುತ್ತಾರೆ.

ಷೇರುಗಳ ಮಾರಾಟದ ಮೇಲೆ ತೆರಿಗೆ ಪಾವತಿಸಲು ಯಾರು ಹೊಣೆಗಾರರು?

ಸಾಮಾನ್ಯವಾಗಿ ಒಬ್ಬ ವ್ಯಕ್ತಿ ಅಥವಾ HUF ನಿಂದ ಬಂಡವಾಳ ಆಸ್ತಿಯನ್ನು ಉಡುಗೊರೆಯಾಗಿ ನೀಡುವುದನ್ನು ಕೆಲವು ಷರತ್ತುಗಳನ್ನು ಪೂರೈಸಿದರೆ, ಬಂಡವಾಳ ಲಾಭ ತೆರಿಗೆಯ ಉದ್ದೇಶಕ್ಕಾಗಿ 'ಮಾರಾಟ' ಎಂದು ಪರಿಗಣಿಸಲಾಗುವುದಿಲ್ಲ. ಆದಾಗ್ಯೂ, ಸ್ವೀಕರಿಸುವವರು ತರುವಾಯ ಈ ಷೇರುಗಳನ್ನು ಅಥವಾ ಮ್ಯೂಚುಯಲ್ ಫಂಡ್ ಯುನಿಟ್‌ಗಳನ್ನು ಮಾರಾಟ ಮಾಡಿದಾಗ ತೆರಿಗೆ ಹೊಣೆಗಾರಿಕೆ ಉಂಟಾಗಬಹುದು. ಅಂತಹ ಸಂದರ್ಭಗಳಲ್ಲಿ ಮೂಲ ಮಾಲೀಕರ ಸ್ವಾಧೀನ ವೆಚ್ಚವನ್ನು ಸಾಮಾನ್ಯವಾಗಿ ಗಣನೆಗೆ ತೆಗೆದುಕೊಳ್ಳಲಾಗುತ್ತದೆ. ಇದಲ್ಲದೆ, ಆಸ್ತಿಯನ್ನು ಸಂಗಾತಿಗೆ ಅಥವಾ ಅಪ್ರಾಪ್ತ ಮಗುವಿಗೆ ಉಡುಗೊರೆಯಾಗಿ ನೀಡಿದರೆ 'ಆದಾಯವನ್ನು ಒಟ್ಟುಗೂಡಿಸುವ' ನಿಬಂಧನೆಗಳು ಅನ್ವಯಿಸಬಹುದು.

ಗಮನಿಸಿ: ಏಷ್ಯಾನೆಟ್ ಸುವರ್ಣ ನ್ಯೂಸ್ ಷೇರುಗಳು, ಮ್ಯೂಚುವಲ್ ಫಂಡ್‌ಗಳು, ಐಪಿಒಗಳು (IPOs) ಅಥವಾ ಸರಕುಗಳ (commodities) ಕುರಿತು ಯಾವುದೇ ಹೂಡಿಕೆ ಸಲಹೆಯನ್ನು ನೀಡುವುದಿಲ್ಲ. ಇಲ್ಲಿ ಒದಗಿಸಲಾದ ಮಾಹಿತಿಯು ಕೇವಲ ತಿಳುವಳಿಕೆಗಾಗಿ ಮಾತ್ರ. ಯಾವುದೇ ಹೂಡಿಕೆ ಮಾಡುವ ಮೊದಲು ದಯವಿಟ್ಟು ನಿಮ್ಮ ಆರ್ಥಿಕ ಸಲಹೆಗಾರರನ್ನು ಸಂಪರ್ಕಿಸಿ.

Jio ₹189 vs ₹123 ರೀಚಾರ್ಜ್ ಪ್ಲಾನ್‌; ಎರಡರ ವ್ಯಾಲಿಡಿಟಿ ಒಂದೇ, ಆದರೆ ಡೇಟಾದಲ್ಲಿ ಭಾರೀ ವ್ಯತ್ಯಾಸ!

Sushma Hegde — Tue, 20 Oct 2026 15:58:56 +0530

ರಿಲಯನ್ಸ್ ಜಿಯೋ ಗ್ರಾಹಕರಿಗೆ ₹189 ಮತ್ತು ₹123 ಬೆಲೆಯ ಎರಡು ಪ್ರೀಪೇಯ್ಡ್ ರೀಚಾರ್ಜ್ ಆಯ್ಕೆಗಳಿವೆ. ಎರಡೂ ಪ್ಲಾನ್‌ಗಳಲ್ಲಿ 28 ದಿನಗಳ ವ್ಯಾಲಿಡಿಟಿ ಮತ್ತು ಅನಿಯಮಿತ ಕರೆ ಸೌಲಭ್ಯವಿದ್ದರೂ, ಡೇಟಾ ಪ್ರಯೋಜನ ಹಾಗೂ ಯಾವ ಫೋನ್‌ನಲ್ಲಿ ಬಳಸಬಹುದು ಎಂಬುದರಲ್ಲಿ ಪ್ರಮುಖ ವ್ಯತ್ಯಾಸವಿದೆ. ಹಾಗಾದರೆ ಯಾವ ಪ್ಲಾನ್ ಯಾರಿಗೆ ಸೂಕ್ತ? ಇಲ್ಲಿದೆ ಮಾಹಿತಿ.

ಮೊಬೈಲ್ ರೀಚಾರ್ಜ್‌ಗೆ ಹೆಚ್ಚು ಹಣ ಖರ್ಚು ಮಾಡದೆ ಕರೆ, ಎಸ್‌ಎಂಎಸ್ ಮತ್ತು ಸ್ವಲ್ಪ ಇಂಟರ್ನೆಟ್ ಬಳಸಲು ಬಯಸುವವರಿಗೆ ಕಡಿಮೆ ಬೆಲೆಯ ಪ್ಲಾನ್‌ಗಳು ಉಪಯುಕ್ತವಾಗಬಹುದು. ಜಿಯೋ ನೀಡುವ ₹189 ಮತ್ತು ₹123 ಪ್ಲಾನ್‌ಗಳು ಇಂತಹ ಆಯ್ಕೆಗಳಲ್ಲಿ ಸೇರಿವೆ. ಆದರೆ ಕಡಿಮೆ ಬೆಲೆಯ ಪ್ಲಾನ್ ಆಯ್ಕೆ ಮಾಡುವ ಮೊದಲು ಅದರ ಡೇಟಾ ಮಿತಿ ಮತ್ತು ಫೋನ್‌ಗೆ ಹೊಂದಾಣಿಕೆಯನ್ನು ತಿಳಿದುಕೊಳ್ಳುವುದು ಮುಖ್ಯ.

ಜಿಯೋ ₹189 ಪ್ಲಾನ್‌ನಲ್ಲಿ ಏನೇನು ಸೌಲಭ್ಯಗಳಿವೆ?

ಜಿಯೋ ₹189 ಪ್ರೀಪೇಯ್ಡ್ ಪ್ಲಾನ್‌ನಲ್ಲಿ 28 ದಿನಗಳ ವ್ಯಾಲಿಡಿಟಿ ದೊರೆಯುತ್ತದೆ. ಈ ಅವಧಿಯಲ್ಲಿ ಗ್ರಾಹಕರು ಅನಿಯಮಿತ ವಾಯ್ಸ್ ಕರೆಗಳು, ಒಟ್ಟು 300 ಎಸ್‌ಎಂಎಸ್ ಮತ್ತು 2GB ಹೈ-ಸ್ಪೀಡ್ ಡೇಟಾ ಬಳಸಬಹುದು. ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ, ಈ ಪ್ಲಾನ್‌ನಲ್ಲಿ ಪ್ರತಿದಿನ 2GB ಡೇಟಾ ಸಿಗುವುದಿಲ್ಲ. ಬದಲಿಗೆ, 28 ದಿನಗಳ ಸಂಪೂರ್ಣ ಅವಧಿಗೆ ಒಟ್ಟು 2GB ಡೇಟಾ ಮಾತ್ರ ಲಭ್ಯವಿರುತ್ತದೆ. ಈ ಡೇಟಾ ಮುಗಿದ ಬಳಿಕ ಇಂಟರ್ನೆಟ್ ವೇಗ 64 Kbpsಗೆ ಇಳಿಯುತ್ತದೆ ಎಂದು ಪ್ಲಾನ್ ವಿವರಗಳು ತಿಳಿಸುತ್ತವೆ.

ಮನೆ ಅಥವಾ ಕಚೇರಿಯಲ್ಲಿ ವೈ-ಫೈ ಬಳಸುವವರು, ಮೊಬೈಲ್‌ನಲ್ಲಿ ಹೆಚ್ಚಾಗಿ ಕರೆ ಮಾಡುವವರು ಮತ್ತು ಸಾಂದರ್ಭಿಕವಾಗಿ ಇಂಟರ್ನೆಟ್ ಬಳಸುವ ಸ್ಮಾರ್ಟ್‌ಫೋನ್ ಗ್ರಾಹಕರಿಗೆ ಈ ಪ್ಲಾನ್ ಉಪಯುಕ್ತವಾಗಬಹುದು. ₹189 ಅನ್ನು 28 ದಿನಗಳಿಗೆ ಲೆಕ್ಕ ಹಾಕಿದರೆ ದಿನಕ್ಕೆ ಸರಾಸರಿ ಸುಮಾರು ₹6.75 ಖರ್ಚಾಗುತ್ತದೆ.

ಜಿಯೋ ₹123 ಪ್ಲಾನ್‌ನಲ್ಲಿ ಪ್ರತಿದಿನ 0.5GB ಡೇಟಾ!

ಜಿಯೋ ₹123 ಪ್ಲಾನ್‌ನಲ್ಲಿ 28 ದಿನಗಳ ವ್ಯಾಲಿಡಿಟಿಯೊಂದಿಗೆ ಅನಿಯಮಿತ ಕರೆಗಳು, ಒಟ್ಟು 300 ಎಸ್‌ಎಂಎಸ್ ಮತ್ತು ಪ್ರತಿದಿನ 0.5GB ಹೈ-ಸ್ಪೀಡ್ ಡೇಟಾ ಸಿಗುತ್ತದೆ. ಅಂದರೆ, 28 ದಿನಗಳ ಅವಧಿಯಲ್ಲಿ ಒಟ್ಟು 14GB ಹೈ-ಸ್ಪೀಡ್ ಡೇಟಾ ಬಳಸಬಹುದು. ದಿನದ ಡೇಟಾ ಮಿತಿ ಮುಗಿದ ಬಳಿಕ ವೇಗ 64 Kbpsಗೆ ಇಳಿಯುತ್ತದೆ ಎಂದು ನೀಡಿರುವ ಪ್ಲಾನ್ ವಿವರಗಳು ತಿಳಿಸುತ್ತವೆ.

ಈ ಪ್ಲಾನ್‌ನ ದಿನದ ಸರಾಸರಿ ವೆಚ್ಚ ಸುಮಾರು ₹4.39. ಆದರೆ ಇಲ್ಲಿ ಒಂದು ಮುಖ್ಯ ಅಂಶವಿದೆ: ₹123 ಪ್ಲಾನ್ ಅರ್ಹವಾದ 4G ಫೀಚರ್ ಫೋನ್‌ಗಳಿಗಾಗಿ ಇರುವ ಆಯ್ಕೆಯಾಗಿದೆ. ಆದ್ದರಿಂದ ಸ್ಮಾರ್ಟ್‌ಫೋನ್ ಬಳಕೆದಾರರು ಕಡಿಮೆ ಬೆಲೆ ಮತ್ತು ಹೆಚ್ಚು ಒಟ್ಟು ಡೇಟಾ ಇದೆ ಎಂಬ ಕಾರಣಕ್ಕೆ ಈ ಪ್ಲಾನ್ ತಮ್ಮ ಫೋನ್‌ನಲ್ಲಿ ಅದೇ ಪ್ರಯೋಜನ ನೀಡುತ್ತದೆ ಎಂದು ಭಾವಿಸಬಾರದು.

ಯಾವ ಪ್ಲಾನ್ ಆಯ್ಕೆ ಮಾಡುವುದು ಉತ್ತಮ?

ನೀವು ಸ್ಮಾರ್ಟ್‌ಫೋನ್ ಬಳಸುತ್ತಿದ್ದರೆ, ಕರೆ ಮತ್ತು ಮೆಸೇಜ್‌ಗಳ ಜೊತೆಗೆ ಸ್ವಲ್ಪ ಇಂಟರ್ನೆಟ್ ಸಾಕು ಎಂದಾದರೆ ₹189 ಪ್ಲಾನ್ ಪರಿಗಣಿಸಬಹುದು. ಅರ್ಹ 4G ಫೀಚರ್ ಫೋನ್ ಬಳಸುವವರಿಗೆ ₹123 ಪ್ಲಾನ್ ಕಡಿಮೆ ವೆಚ್ಚದಲ್ಲಿ ಕರೆ, ಎಸ್‌ಎಂಎಸ್ ಮತ್ತು ಪ್ರತಿದಿನದ ಡೇಟಾ ಸೌಲಭ್ಯ ನೀಡುತ್ತದೆ.

ಆದರೆ ಎರಡೂ ಪ್ಲಾನ್‌ಗಳ ವ್ಯಾಲಿಡಿಟಿ 28 ದಿನಗಳು ಎಂಬುದನ್ನು ಗಮನಿಸಿ. ಇದು ಪೂರ್ಣ ಕ್ಯಾಲೆಂಡರ್ ತಿಂಗಳಿಗೆ ಸಮಾನವಲ್ಲ. ರೀಚಾರ್ಜ್ ಮಾಡುವ ಮೊದಲು ನಿಮ್ಮ ಜಿಯೋ ಸಂಖ್ಯೆಗೆ ಯಾವ ಪ್ಲಾನ್ ಅನ್ವಯಿಸುತ್ತದೆ ಮತ್ತು ಅದರ ಪ್ರಸ್ತುತ ಪ್ರಯೋಜನಗಳೇನು ಎಂಬುದನ್ನು ಅಧಿಕೃತ ಜಿಯೋ ಆ್ಯಪ್ ಅಥವಾ ವೆಬ್‌ಸೈಟ್‌ನಲ್ಲಿ ಪರಿಶೀಲಿಸುವುದು ಉತ್ತಮ.

ಸೌಲಭ್ಯ	₹189 ಪ್ಲಾನ್	₹123 ಪ್ಲಾನ್
ಫೋನ್	ಸ್ಮಾರ್ಟ್‌ಫೋನ್‌ಗಳು	ಅರ್ಹ 4G ಫೀಚರ್ ಫೋನ್‌ಗಳು
ವ್ಯಾಲಿಡಿಟಿ	28 ದಿನ	28 ದಿನ
ವಾಯ್ಸ್ ಕರೆ	ಅನಿಯಮಿತ	ಅನಿಯಮಿತ
ಎಸ್‌ಎಂಎಸ್	ಒಟ್ಟು 300	ಒಟ್ಟು 300
ಹೈ-ಸ್ಪೀಡ್ ಡೇಟಾ	ಒಟ್ಟು 2GB	ದಿನಕ್ಕೆ 0.5GB
28 ದಿನಗಳ ಒಟ್ಟು ಡೇಟಾ	2GB	14GB
ದಿನದ ಸರಾಸರಿ ವೆಚ್ಚ	₹6.75	₹4.39

ಜಿಯೋ IPOಗೆ ಆರಂಭದಲ್ಲೇ 2.5 ಲಕ್ಷ ಕೋಟಿ ರೂ ಬೇಡಿಕೆ, ಅಕ್ಟೋಬರ್ 19ಕ್ಕೆ ಆಂಕರ್ ಬಿಡ್ಡಿಂಗ್

Chethan Kumar — Sun, 18 Oct 2026 17:27:45 +0530

ಮುಂಬೈ (ಅ.18) ಮುಕೇಶ್ ಅಂಬಾನಿ ನೇತೃತ್ವದ ಜಿಯೋ ಮಹತ್ವದ ಘಟ್ಟ ತಲುಪಿದ್ದು, ಷೇರು ಮಾರುಕಟ್ಟೆಯಲ್ಲಿ ಸಂಚಲನ ಸೃಷ್ಟಿಸಲು ಸಜ್ಜಾಗಿದೆ. ಜಿಯೋ ಪ್ಲಾಟ್‌ಫಾರ್ಮ್ಸ್ ಐಪಿಒ ಅಧಿಕೃತವಾಗಿ ಆರಂಭವಾಗುವ ಮುನ್ನವೇ ಮಾರುಕಟ್ಟೆಯಲ್ಲಿ ಭಾರಿ ಸಂಚಲನ ಸೃಷ್ಟಿಸಿದೆ. ಆದರೆ ಪ್ರಮುಖ ಬಿಸಿನೆಸ್ ಮಾಧ್ಯಮ ಸಂಸ್ಥೆಗಳ ವರದಿಗಳಪ್ರಕಾರ, ಜಿಯೋ ಐಪಿಒಗೆ ಈಗಾಗಲೇ ಜಾಗತಿಕ ಮತ್ತು ದೇಶೀಯ ಸಾಂಸ್ಥಿಕ ಹೂಡಿಕೆದಾರರಿಂದ ಸುಮಾರು 2.5 ಲಕ್ಷ ಕೋಟಿ ರೂ.ಗಳ ಆರಂಭಿಕ ಬೇಡಿಕೆ ಸೃಷ್ಟಿಯಾಗಿದೆ. ಇದು 30,200 ಕೋಟಿ ರೂಪಾಯಿಗಳ ಐಪಿಒ ಗಾತ್ರಕ್ಕಿಂತ ಎಂಟರಷ್ಟು ಹೆಚ್ಚಾಗಿರುವುದು ವಿಶೇಷ. ಹಾಗೆಯೇ ಚಿಲ್ಲರೆ ಹೂಡಿಕೆದಾರರು ಹಲವರು ಬ್ರೋಕಿಂಗ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಐಪಿಒಗಾಗಿ ಮುಂಚಿತವಾಗಿಯೇ ಅರ್ಜಿ ಸಲ್ಲಿಸಬಹುದು.

ಆ್ಯಂಕರ್ ಬುಕ್ ಆರಂಭಕ್ಕೂ ಮುನ್ನವೇ ಹೂಡಿಕೆ

2.5 ಲಕ್ಷ ಕೋಟಿ ರೂಪಾಯಿಗಳ ಮೊತ್ತವು ಔಪಚಾರಿಕ ಐಪಿಒ ಚಂದಾದಾರಿಕೆಯಂತಿರದೆ, ಸಾಂಸ್ಥಿಕ ಹೂಡಿಕೆದಾರರ ಗಣನೀಯ ಆಸಕ್ತಿಯನ್ನು ಬಿಂಬಿಸಿದೆ. ಆಂಕರ್ ಬುಕ್ ತೆರೆಯುವ ಮೊದಲು ಬಲವಾದ ಸಾಂಸ್ಥಿಕ ಬೇಡಿಕೆಯನ್ನ ಸೂಚಿಸಿದೆ. ವೆಲ್ತ್‌ ಫಂಡ್‌ಗಳು, ಜಾಗತಿಕ ಮಟ್ಟದ ದೀರ್ಘಕಾಲೀನ ಹೂಡಿಕೆದಾರರು, ದೇಶೀಯ ದಿಗ್ಗಜ ಮ್ಯೂಚುವಲ್‌ ಫಂಡ್‌ಗಳು ಮತ್ತು ವಿಮೆ ಕಂಪನಿಗಳು ಆಂಕರ್‌ ಬುಕ್‌ ಆರಂಭಕ್ಕೆ ಮುನ್ನವೇ ಹೂಡಿಕೆಯ ಊತ್ಸಾಹವನ್ನು ತೋರಿಸಿವೆ.

ಪ್ರಮುಖ ಜಾಗತಿಕ ಹೂಡಿಕೆದಾರರ ಪೈಕಿ, ಜಿಐಸಿ , ನಾರ್ಜಸ್ ಬ್ಯಾಂಕ್ ಇನ್ವೆಸ್ಟ್‌ಮೆಂಟ್ ಮ್ಯಾನೇಜ್‌ಮೆಂಟ್, ಅಬುಧಾಬಿ ಇನ್ವೆಸ್ಟ್‌ಮೆಂಟ್ ಅಥಾರಿಟಿ, ಕತಾರ್ ಇನ್ವೆಸ್ಟ್‌ಮೆಂಟ್ ಅಥಾರಿಟಿ, ಬ್ಲ್ಯಾಕ್‌ರಾಕ್, ಫಿಡೆಲಿಟಿ ಮತ್ತು ಕ್ಯಾಪಿಟಲ್ ಗ್ರೂಪ್ ಸೇರಿವೆ. ದೇಶೀಯವಾಗಿ, ಎಲ್‌ಐಸಿ , ಎಸ್‌ಬಿಐ ಮ್ಯೂಚುವಲ್ ಫಂಡ್ ಮತ್ತು ಎಚ್‌ಡಿಎಫ್‌ಸಿ ಮ್ಯೂಚುವಲ್ ಫಂಡ್ ಜಿಯೋ ಐಪಿಒದಲ್ಲಿ ಹೂಡಿಕೆಗೆ ಆಸಕ್ತಿ ಹೊಂದಿರುವ ಪ್ರಮುಖ ಸಂಸ್ಥೆಗಳಾಗಿವೆ.

ಆರ್ಡರ್ ಮುಂಗಡ ಸಲ್ಲಿಸಲು ಅವಕಾಶ

ಮತ್ತೊಂದೆಡೆ, ಚಿಲ್ಲರೆ ಹೂಡಿಕೆದಾರರು ಈಗಾಗಲೇ ಹಲವು ಬ್ರೋಕಿಂಗ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಐಪಿಒಗಾಗಿ ಮುಂಚಿತವಾಗಿ ಅರ್ಜಿ ಸಲ್ಲಿಸಬಹುದು. ಮುಂಚಿತವಾಗಿ ಅರ್ಜಿ ಸಲ್ಲಿಸುವುದರಿಂದ ಹೂಡಿಕೆದಾರರು ತಮ್ಮ ಆರ್ಡರ್ ಮುಂಗಡವಾಗಿ ಸಲ್ಲಿಸಲು ಅವಕಾಶ ನೀಡುತ್ತದೆ, ಆದರೆ ಇದು ಅಕ್ಟೋಬರ್ 21 ರಂದು ಐಪಿಒ ತೆರೆದ ನಂತರವೇ ಔಪಚಾರಿಕ ಬಿಡ್ಡಿಂಗ್ ಪ್ರಕ್ರಿಯೆಯ ಭಾಗವಾಗುತ್ತದೆ.

ರಿಲಯನ್ಸ್‌ ಜಿಯೋ ಐಪಿಒದಲ್ಲಿ ಪ್ರತಿ ಷೇರಿಗೆ 1,065 ರಿಂದ 1,119 ರೂ.ಗಳ ದರ ಶ್ರೇಣಿಯನ್ನು ನಿಗದಿಪಡಿಸಲಾಗಿದೆ. ಕನಿಷ್ಠ ಬಿಡ್ ಲಾಟ್ 12 ಷೇರುಗಳನ್ನು ಹೊಂದಿದೆ. ದರ ಶ್ರೇಣಿಯ ಮೇಲ್ಮಟ್ಟದಲ್ಲಿ, ಒಂದು ಲಾಟ್‌ಗೆ 13,428 ರೂ.ಗಳ ಹೂಡಿಕೆ ಅಗತ್ಯವಿರುತ್ತದೆ. ಈ ಇಶ್ಯೂ ಅಕ್ಟೋಬರ್ 21 ರಂದು ತೆರೆಯಲಿದ್ದು, ಅಕ್ಟೋಬರ್ 23 ರಂದು ಮುಕ್ತಾಯಗೊಳ್ಳಲಿದೆ.

ಅದಕ್ಕೂ ಮೊದಲು, ಆಂಕರ್ ಹೂಡಿಕೆದಾರರ ಬುಕ್‌ ಪ್ರಕ್ರಿಯೆ ಅಕ್ಟೋಬರ್ 19 ರಂದು ತೆರೆಯಲಿದೆ. ಸಾರ್ವಜನಿಕ ಇಶ್ಯೂಗೆ ಮುಂಚಿತವಾಗಿ ಬಲವಾದ ಆರಂಭಿಕ ಸಾಂಸ್ಥಿಕ ಆಸಕ್ತಿಯು ಎಷ್ಟು ಮಟ್ಟಿಗೆ ನಿಜವಾದ ಭಾಗವಹಿಸುವಿಕೆಯಾಗಿ ಪರಿವರ್ತನೆಗೊಳ್ಳುತ್ತದೆ ಎಂಬುದರ ಮೊದಲ ಔಪಚಾರಿಕ ಸೂಚನೆಯನ್ನು ಆಂಕರ್ ಹಂಚಿಕೆಯು ನೀಡುತ್ತದೆ. ಒಟ್ಟಿನಲ್ಲಿ ಜಿಯೋ ಪ್ಲಾಟ್‌ಫಾರ್ಮ್ಸ್ ಐಪಿಒ ಭಾರಿ ಸಂಚಲನ ಸೃಷ್ಟಿಸಿದೆ.

Escalator vs Travelator: ಎಸ್ಕಲೇಟರ್ & ಟ್ರಾವೆಲೇಟರ್; ಇವುಗಳ ನಡುವಿನ ವ್ಯತ್ಯಾಸವೇನು?

Shriram Bhat — Mon, 19 Oct 2026 14:15:31 +0530

ಶಾಪಿಂಗ್ ಮಾಲ್, ರೈಲ್ವೆ ಸ್ಟೇಷನ್ ಅಥವಾ ಏರ್‌ಪೋರ್ಟ್‌ಗಳಿಗೆ ಹೋದಾಗ ನೀವು ಎಸ್ಕಲೇಟರ್ ಮತ್ತು ಟ್ರಾವೆಲೇಟರ್‌ಗಳನ್ನು ನೋಡಿರುತ್ತೀರಿ. ಇವೆರಡೂ ಜನರಿಗೆ ಸುಲಭವಾಗಿ ಓಡಾಡಲು ಸಹಾಯ ಮಾಡುತ್ತವೆ. ಆದರೆ ಇವುಗಳ ಕೆಲಸ ಬೇರೆ ಬೇರೆ. ಇವೆರಡರ ನಡುವಿನ ಅಸಲಿ ವ್ಯತ್ಯಾಸ ಏನು ಗೊತ್ತಾ?

ಎಸ್ಕಲೇಟರ್ ಅಂದರೆ ಚಲಿಸುವ ಮೆಟ್ಟಿಲುಗಳು. ಇದು ಜನರನ್ನು ಒಂದು ಮಹಡಿಯಿಂದ ಮತ್ತೊಂದು ಮಹಡಿಗೆ ಕರೆದೊಯ್ಯುತ್ತದೆ. ಇದು ಮೇಲಕ್ಕೆ ಅಥವಾ ಕೆಳಕ್ಕೆ ಚಲಿಸುತ್ತದೆ. ಇದರಿಂದ ಕಟ್ಟಡದ ಬೇರೆ ಬೇರೆ ಫ್ಲೋರ್‌ಗಳಿಗೆ ಹೋಗುವುದು ಸುಲಭ. ಎಲೆಕ್ಟ್ರಿಕ್ ಮೋಟಾರ್ ಸಹಾಯದಿಂದ ಈ ಮೆಟ್ಟಿಲುಗಳು ನಿರಂತರವಾಗಿ ಚಲಿಸುತ್ತವೆ. ಪ್ರಯಾಣಿಕರು ಇದರ ಮೇಲೆ ಸುಮ್ಮನೆ ನಿಲ್ಲಬಹುದು ಅಥವಾ ಬೇಕಿದ್ದರೆ ಮೆಟ್ಟಿಲು ಹತ್ತಿ ಇಳಿಯಬಹುದು. ಬ್ಯಾಲೆನ್ಸ್ ತಪ್ಪದಿರಲು ಎರಡು ಬದಿಯಲ್ಲಿ ಚಲಿಸುವ ಹ್ಯಾಂಡ್‌ರೈಲ್ ಇರುತ್ತದೆ. ಶಾಪಿಂಗ್ ಮಾಲ್, ಮೆಟ್ರೋ ಸ್ಟೇಷನ್, ರೈಲ್ವೆ ಸ್ಟೇಷನ್, ಏರ್‌ಪೋರ್ಟ್ ಮತ್ತು ದೊಡ್ಡ ಕಮರ್ಷಿಯಲ್ ಬಿಲ್ಡಿಂಗ್‌ಗಳಲ್ಲಿ ಎಸ್ಕಲೇಟರ್‌ಗಳನ್ನು ನೀವು ನೋಡಬಹುದು. ಒಂದೇ ಬಾರಿಗೆ ಬಹಳಷ್ಟು ಜನರು ಬೇರೆ ಬೇರೆ ಫ್ಲೋರ್‌ಗಳಿಗೆ ಹೋಗಬೇಕಾದಾಗ ಇದು ತುಂಬಾ ಉಪಯುಕ್ತ.

ಟ್ರಾವೆಲೇಟರ್ ಅನ್ನು ಮೂವಿಂಗ್ ವಾಕ್‌ವೇ ಅಥವಾ ಮೂವಿಂಗ್ ವಾಕ್ ಅಂತಲೂ ಕರೆಯುತ್ತಾರೆ. ಇದು ಸಮತಟ್ಟಾದ ಮೇಲ್ಮೈ ಹೊಂದಿರುವ ಚಲಿಸುವ ಪ್ಲಾಟ್‌ಫಾರ್ಮ್. ಇದು ಜನರನ್ನು ಒಂದೇ ಫ್ಲೋರ್‌ನಲ್ಲಿ ಒಂದು ಕಡೆಯಿಂದ ಮತ್ತೊಂದು ಕಡೆಗೆ ಕರೆದೊಯ್ಯುತ್ತದೆ. ಎಸ್ಕಲೇಟರ್‌ಗಳಂತೆ ಇದರಲ್ಲಿ ಮೆಟ್ಟಿಲುಗಳು ಇರುವುದಿಲ್ಲ. ಬದಲಾಗಿ, ನಿರಂತರವಾಗಿ ಚಲಿಸುವ ಫ್ಲಾಟ್ ಬೆಲ್ಟ್ ಇರುತ್ತದೆ. ಇದರ ಮೇಲೆ ನಿಂತರೆ ಸಾಕು, ಯಾವುದೇ ಶ್ರಮವಿಲ್ಲದೆ ಮುಂದೆ ಸಾಗಬಹುದು. ಬೇಗ ತಲುಪಬೇಕು ಎಂದರೆ ಇದರ ಮೇಲೆಯೇ ನಡೆದುಕೊಂಡು ಹೋಗಬಹುದು. ಕೆಲವು ಟ್ರಾವೆಲೇಟರ್‌ಗಳು ಸಂಪೂರ್ಣವಾಗಿ ಸಮತಟ್ಟಾಗಿದ್ದರೆ, ಇನ್ನು ಕೆಲವು ಬೇರೆ ಬೇರೆ ಲೆವೆಲ್‌ಗಳಿಗೆ ಹೋಗಲು ಸ್ವಲ್ಪ ಇಳಿಜಾರಾಗಿರುತ್ತವೆ. ಏರ್‌ಪೋರ್ಟ್, ದೊಡ್ಡ ಶಾಪಿಂಗ್ ಮಾಲ್ ಮತ್ತು ಟ್ರಾನ್ಸ್‌ಪೋರ್ಟ್ ಹಬ್‌ಗಳಲ್ಲಿ ಇವು ಹೆಚ್ಚಾಗಿ ಕಂಡುಬರುತ್ತವೆ. ಏರ್‌ಪೋರ್ಟ್‌ಗಳಲ್ಲಿ ಟರ್ಮಿನಲ್, ಬೋರ್ಡಿಂಗ್ ಗೇಟ್ ಮತ್ತು ಇತರ ಸೌಲಭ್ಯಗಳ ನಡುವೆ ನಡೆದುಕೊಂಡು ಹೋಗುವ ಬದಲು, ಈ ಟ್ರಾವೆಲೇಟರ್‌ಗಳು ಪ್ರಯಾಣಿಕರಿಗೆ ತುಂಬಾ ಸಹಾಯ ಮಾಡುತ್ತವೆ.

ಇವೆರಡೂ ಜನರನ್ನು ಕರೆದೊಯ್ಯಲು ಬಳಸುವ ಎಲೆಕ್ಟ್ರಿಕ್ ಸಿಸ್ಟಮ್‌ಗಳೇ ಆದರೂ, ಇವುಗಳ ವಿನ್ಯಾಸ, ಚಲಿಸುವ ದಿಕ್ಕು ಮತ್ತು ಉದ್ದೇಶ ಬೇರೆ ಬೇರೆ.

ವಿನ್ಯಾಸ: ಎಸ್ಕಲೇಟರ್‌ನಲ್ಲಿ ಚಲಿಸುವ ಮೆಟ್ಟಿಲುಗಳಿರುತ್ತವೆ. ಆದರೆ ಟ್ರಾವೆಲೇಟರ್‌ನಲ್ಲಿ ಸಮತಟ್ಟಾದ, ಚಲಿಸುವ ಬೆಲ್ಟ್ ಇರುತ್ತದೆ.

ಮುಖ್ಯ ಉದ್ದೇಶ: ಎಸ್ಕಲೇಟರ್‌ಗಳು ಜನರನ್ನು ಒಂದು ಫ್ಲೋರ್‌ನಿಂದ ಮತ್ತೊಂದು ಫ್ಲೋರ್‌ಗೆ ಕರೆದೊಯ್ಯುತ್ತವೆ. ಟ್ರಾವೆಲೇಟರ್‌ಗಳನ್ನು ಒಂದೇ ಫ್ಲೋರ್‌ನಲ್ಲಿ ಹೆಚ್ಚು ದೂರ ಸಾಗಲು ಬಳಸುತ್ತಾರೆ.

ಚಲಿಸುವ ದಿಕ್ಕು: ಎಸ್ಕಲೇಟರ್‌ಗಳು ಮೇಲಕ್ಕೆ ಅಥವಾ ಕೆಳಕ್ಕೆ ಚಲಿಸುತ್ತವೆ. ಟ್ರಾವೆಲೇಟರ್‌ಗಳು ಸಾಮಾನ್ಯವಾಗಿ ಅಡ್ಡಲಾಗಿ ಚಲಿಸುತ್ತವೆ. ಆದರೆ ಕೆಲವು ಸ್ವಲ್ಪ ಇಳಿಜಾರಾಗಿರುತ್ತವೆ.

ಲಗೇಜ್ ಸಾಗಣೆ: ಟ್ರಾವೆಲೇಟರ್‌ಗಳಲ್ಲಿ ಚಕ್ರವಿರುವ ಸೂಟ್‌ಕೇಸ್ ಮತ್ತು ಲಗೇಜ್ ಕಾರ್ಟ್‌ಗಳನ್ನು ಸುಲಭವಾಗಿ ಒಯ್ಯಬಹುದು. ಆದರೆ ಎಲ್ಲಾ ಟ್ರಾವೆಲೇಟರ್‌ಗಳು ಎಲ್ಲಾ ರೀತಿಯ ಟ್ರಾಲಿಗಳಿಗೆ ಸರಿಹೊಂದುವುದಿಲ್ಲ. ಎಸ್ಕಲೇಟರ್‌ಗಳಲ್ಲಿ ಶಾಪಿಂಗ್ ಟ್ರಾಲಿ ಅಥವಾ ಚಕ್ರವಿರುವ ಕಾರ್ಟ್‌ಗಳನ್ನು ಒಯ್ಯುವುದು ಸೇಫ್ ಅಲ್ಲ.

ಬಳಸುವ ಸ್ಥಳಗಳು: ಎಸ್ಕಲೇಟರ್‌ಗಳನ್ನು ಶಾಪಿಂಗ್ ಮಾಲ್, ಮೆಟ್ರೋ ಮತ್ತು ರೈಲ್ವೆ ಸ್ಟೇಷನ್‌ಗಳಲ್ಲಿ ಹೆಚ್ಚಾಗಿ ಬಳಸುತ್ತಾರೆ. ಟ್ರಾವೆಲೇಟರ್‌ಗಳನ್ನು ಏರ್‌ಪೋರ್ಟ್, ದೊಡ್ಡ ಮಾಲ್ ಮತ್ತು ಹೆಚ್ಚು ದೂರ ನಡೆಯಬೇಕಾದ ಟ್ರಾನ್ಸ್‌ಪೋರ್ಟ್ ಜಾಗಗಳಲ್ಲಿ ಬಳಸುತ್ತಾರೆ.

ಟ್ರಾವೆಲೇಟರ್‌ನ ಉದ್ದವು ಅದನ್ನು ಎಲ್ಲಿ ಅಳವಡಿಸಲಾಗಿದೆ, ಜನರು ಎಷ್ಟು ದೂರ ಕ್ರಮಿಸಬೇಕು ಮತ್ತು ಪ್ರಯಾಣಿಕರ ದಟ್ಟಣೆ ಎಷ್ಟಿದೆ ಎಂಬುದರ ಮೇಲೆ ಅವಲಂಬಿತವಾಗಿರುತ್ತದೆ. ಕೆಲವು ಟ್ರಾವೆಲೇಟರ್‌ಗಳು ಕೇವಲ ಕೆಲವು ಮೀಟರ್‌ಗಳಷ್ಟು ಉದ್ದವಿದ್ದರೆ, ಏರ್‌ಪೋರ್ಟ್‌ಗಳಲ್ಲಿರುವ ಟ್ರಾವೆಲೇಟರ್‌ಗಳು ಹತ್ತಾರು ಮೀಟರ್‌ಗಳಷ್ಟು ಉದ್ದವಿರುತ್ತವೆ. ವಿಶೇಷವಾಗಿ ವಿನ್ಯಾಸಗೊಳಿಸಿದ ಕೆಲವು ಸಿಸ್ಟಮ್‌ಗಳು 100 ಮೀಟರ್‌ಗಿಂತಲೂ ಹೆಚ್ಚು ಉದ್ದವಿರಬಹುದು.

ಉದಾಹರಣೆಗೆ, ದೊಡ್ಡ ಏರ್‌ಪೋರ್ಟ್‌ಗಳಲ್ಲಿ ಪ್ರಯಾಣಿಕರು ಒಂದು ಬೋರ್ಡಿಂಗ್ ಗೇಟ್‌ನಿಂದ ಮತ್ತೊಂದು ಗೇಟ್‌ಗೆ ಸಾಕಷ್ಟು ದೂರ ನಡೆಯಬೇಕಾಗುತ್ತದೆ. ಉದ್ದವಾದ ಟ್ರಾವೆಲೇಟರ್‌ಗಳು ಈ ದೂರವನ್ನು ಸುಲಭವಾಗಿ ಮತ್ತು ಆರಾಮದಾಯಕವಾಗಿ ಕ್ರಮಿಸಲು ಸಹಾಯ ಮಾಡುತ್ತವೆ.

ಶಾಪಿಂಗ್ ಮಾಲ್‌ಗಳಲ್ಲಿ, ಬಿಲ್ಡಿಂಗ್‌ನ ಬೇರೆ ಬೇರೆ ವಿಭಾಗಗಳ ನಡುವೆ ಓಡಾಡಲು ಚಿಕ್ಕ ಟ್ರಾವೆಲೇಟರ್‌ಗಳನ್ನು ಅಳವಡಿಸಿರುತ್ತಾರೆ.

ಲಭ್ಯವಿರುವ ಜಾಗ, ಪ್ರಯಾಣಿಕರ ಸಂಖ್ಯೆ, ಬಿಲ್ಡಿಂಗ್ ವಿನ್ಯಾಸ ಮತ್ತು ಸುರಕ್ಷತೆಯ ಆಧಾರದ ಮೇಲೆ ಟ್ರಾವೆಲೇಟರ್‌ನ ಉದ್ದವನ್ನು ನಿರ್ಧರಿಸಲಾಗುತ್ತದೆ.

ಒಟ್ಟಿನಲ್ಲಿ, ಎಸ್ಕಲೇಟರ್ ಮತ್ತು ಟ್ರಾವೆಲೇಟರ್ ಎರಡೂ ದೊಡ್ಡ ಬಿಲ್ಡಿಂಗ್‌ಗಳಲ್ಲಿ ಓಡಾಟವನ್ನು ಸುಲಭಗೊಳಿಸುತ್ತವೆ. ಇವೆರಡರ ನಡುವಿನ ಮುಖ್ಯ ವ್ಯತ್ಯಾಸ ತುಂಬಾ ಸಿಂಪಲ್.. ಎಸ್ಕಲೇಟರ್ ನಿಮ್ಮನ್ನು ಬೇರೆ ಬೇರೆ ಫ್ಲೋರ್‌ಗಳಿಗೆ ಕರೆದೊಯ್ದರೆ, ಟ್ರಾವೆಲೇಟರ್ ನೀವು ಹೆಚ್ಚು ನಡೆಯದಂತೆ ಒಂದೇ ಫ್ಲೋರ್‌ನಲ್ಲಿ ದೂರ ಸಾಗಲು ಸಹಾಯ ಮಾಡುತ್ತದೆ.

Gold Reserves: ಅತಿ ಹೆಚ್ಚು ಚಿನ್ನ ಸಂಗ್ರಹ ಮಾಡಿಕೊಂಡಿರುವ ಟಾಪ್ 10 ದೇಶಗಳು, ಭಾರತದ ಸ್ಥಾನವೆಷ್ಟು?

Sathish Kumar KH — Sun, 18 Oct 2026 22:36:38 +0530

ಜಗತ್ತಿನ ಹಲವು ದೇಶಗಳು ತಮ್ಮ ಚಿನ್ನದ ನಿಕ್ಷೇಪವನ್ನು ಹೆಚ್ಚಿಸಿಕೊಳ್ಳುತ್ತಿವೆ. ಜಾಗತಿಕ ಗೋಲ್ಡ್ ರಿಸರ್ವ್ ಪಟ್ಟಿಯಲ್ಲಿ ಚೀನಾ 5ನೇ ಸ್ಥಾನಕ್ಕೇರಿದೆ. ಹಾಗಾದರೆ ಭಾರತದ ಬಳಿ ಎಷ್ಟು ಚಿನ್ನವಿದೆ? ಎಷ್ಟನೇ ಸ್ಥಾನದಲ್ಲಿದೆ? ಸಂಪೂರ್ಣ ಮಾಹಿತಿ ಇಲ್ಲಿದೆ.

ಜಾಗತಿಕ ಆರ್ಥಿಕತೆಯಲ್ಲಿ ಚಿನ್ನ ಎಷ್ಟು ಮುಖ್ಯ ಅನ್ನೋದು ನಮಗೆಲ್ಲ ಗೊತ್ತೇ ಇದೆ. ಕಷ್ಟಕಾಲದಲ್ಲಿ ದೇಶದ ಆರ್ಥಿಕತೆಯನ್ನು ಕಾಪಾಡುವುದೇ ಈ ಚಿನ್ನದ ನಿಕ್ಷೇಪ. ಹೊಸ ಗ್ಲೋಬಲ್ ಡೇಟಾ ಪ್ರಕಾರ, ಅತಿ ಹೆಚ್ಚು ಚಿನ್ನ ಹೊಂದಿರುವ ದೇಶಗಳ ಪಟ್ಟಿಯಲ್ಲಿ ಚೀನಾ ಭಾರಿ ಮುನ್ನಡೆ ಸಾಧಿಸಿದೆ. ರಷ್ಯಾವನ್ನು ಹಿಂದಿಕ್ಕಿ ಜಗತ್ತಿನ 5ನೇ ಅತಿದೊಡ್ಡ ಗೋಲ್ಡ್ ರಿಸರ್ವ್ ಹೊಂದಿರುವ ದೇಶವಾಗಿ ಚೀನಾ ಹೊರಹೊಮ್ಮಿದೆ. ಸದ್ಯ ಚೀನಾಕ್ಕಿಂತ ಮುಂದೆ ಅಮೆರಿಕ, ಜರ್ಮನಿ, ಇಟಲಿ ಮತ್ತು ಫ್ರಾನ್ಸ್ ಮಾತ್ರ ಇವೆ.

ಪ್ರಮುಖ ಫೈನಾನ್ಷಿಯಲ್ ಪ್ಲಾಟ್‌ಫಾರ್ಮ್ 'ದಿ ಕೋಬೆಸ್ಸಿ ಲೆಟರ್' ಬಿಡುಗಡೆ ಮಾಡಿದ ವರದಿ ಪ್ರಕಾರ, ಚೀನಾ ಬಳಿ ಈಗ ಬರೋಬ್ಬರಿ 2,410 ಟನ್ ಚಿನ್ನದ ನಿಕ್ಷೇಪವಿದೆ. ಟಾಪ್-3 ಪಟ್ಟಿಗೆ ಸೇರಲು ಚೀನಾ ಈಗ ಬಹಳ ಹತ್ತಿರದಲ್ಲಿದೆ. ಫ್ರಾನ್ಸ್ ಬಳಿ 2,437 ಟನ್ ಹಾಗೂ ಇಟಲಿ ಬಳಿ 2,452 ಟನ್ ಚಿನ್ನವಿದೆ.

ಅಂದರೆ, ಚೀನಾ ಈಗ ಫ್ರಾನ್ಸ್‌ಗಿಂತ ಕೇವಲ 27 ಟನ್ ಮತ್ತು ಇಟಲಿಗಿಂತ 42 ಟನ್ ಮಾತ್ರ ಹಿಂದಿದೆ. ಇನ್ನು ಈ ಪಟ್ಟಿಯಲ್ಲಿ ಭಾರತ 881 ಟನ್ ಚಿನ್ನದೊಂದಿಗೆ 8ನೇ ಸ್ಥಾನದಲ್ಲಿದೆ. ಭಾರತಕ್ಕಿಂತ ಚೀನಾ ಬಳಿ ಸುಮಾರು 3 ಪಟ್ಟು ಹೆಚ್ಚು ಚಿನ್ನ ಇರುವುದು ಗಮನಾರ್ಹ.

ಚೀನಾದ ಸೆಂಟ್ರಲ್ ಬ್ಯಾಂಕ್ ಆಗಿರುವ 'ಪೀಪಲ್ಸ್ ಬ್ಯಾಂಕ್ ಆಫ್ ಚೀನಾ' ಸತತವಾಗಿ ಚಿನ್ನವನ್ನು ಖರೀದಿಸುತ್ತಲೇ ಇದೆ. ಇದೇ ವೇಗದಲ್ಲಿ ಖರೀದಿ ಮುಂದುವರಿದರೆ, ಈ ವರ್ಷದ ಅಂತ್ಯದ ವೇಳೆಗೆ ಚೀನಾ.. ಫ್ರಾನ್ಸ್ ಮತ್ತು ಇಟಲಿಯನ್ನು ಹಿಂದಿಕ್ಕಿ ಜಗತ್ತಿನ 3ನೇ ಅತಿದೊಡ್ಡ ಚಿನ್ನದ ನಿಕ್ಷೇಪ ಹೊಂದಿರುವ ದೇಶವಾಗುವ ಸಾಧ್ಯತೆಯಿದೆ ಎಂದು ತಜ್ಞರು ಅಂದಾಜಿಸಿದ್ದಾರೆ.

ಚೀನಾ ಕಳೆದ 23 ತಿಂಗಳುಗಳಿಂದ ಒಂದು ತಿಂಗಳೂ ಗ್ಯಾಪ್ ಕೊಡದೆ ನಿರಂತರವಾಗಿ ಚಿನ್ನ ಖರೀದಿಸುತ್ತಿದೆ. ಸೆಪ್ಟೆಂಬರ್ ತಿಂಗಳೊಂದರಲ್ಲೇ ಚೀನಾ ಬ್ಯಾಂಕ್ ಬರೋಬ್ಬರಿ 23 ಟನ್‌ಗೂ ಹೆಚ್ಚು ಚಿನ್ನವನ್ನು ಖರೀದಿಸಿದೆ. ಕಳೆದ ಒಂದು ವರ್ಷದಲ್ಲಿ ಚೀನಾ ಒಂದೇ ತಿಂಗಳಲ್ಲಿ ಮಾಡಿದ ಅತಿದೊಡ್ಡ ಖರೀದಿ ಇದಾಗಿದೆ. ಇದಕ್ಕೂ ಮುನ್ನ ಜುಲೈ ಮತ್ತು ಆಗಸ್ಟ್ ತಿಂಗಳುಗಳಲ್ಲೂ ತಲಾ 20 ಟನ್‌ಗೂ ಹೆಚ್ಚು ಚಿನ್ನವನ್ನು ತನ್ನ ಖಜಾನೆಗೆ ಸೇರಿಸಿಕೊಂಡಿತ್ತು. ಈ ವರ್ಷ ಸೆಪ್ಟೆಂಬರ್ ವರೆಗೆ ನೋಡಿದರೆ ಚೀನಾ ಒಟ್ಟು 103 ಟನ್‌ಗೂ ಹೆಚ್ಚು ಹೊಸ ಚಿನ್ನವನ್ನು ಖರೀದಿಸಿದೆ.

ಒಂದೆಡೆ ದೇಶಗಳು ತಮ್ಮ ಚಿನ್ನದ ನಿಕ್ಷೇಪವನ್ನು ಹೆಚ್ಚಿಸಿಕೊಳ್ಳುತ್ತಿದ್ದರೆ, ಮತ್ತೊಂದೆಡೆ ಗ್ಲೋಬಲ್ ಮಾರುಕಟ್ಟೆಯಲ್ಲಿ ಚಿನ್ನ ಮತ್ತು ಬೆಳ್ಳಿ ಬೆಲೆ ಮತ್ತೆ ಗಗನಕ್ಕೇರುತ್ತಿದೆ. ಬ್ಲೂಮ್‌ಬರ್ಗ್ ಡೇಟಾ ಪ್ರಕಾರ, ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಚಿನ್ನದ ಬೆಲೆ ದಾಖಲೆ ಮಟ್ಟದಲ್ಲಿ ಪ್ರತಿ ಔನ್ಸ್‌ಗೆ 4,207 ಡಾಲರ್ ತಲುಪಿದೆ. ಇನ್ನೊಂದೆಡೆ ಬೆಳ್ಳಿ ಬೆಲೆ ಕೂಡ ಏರಿಕೆಯಾಗಿದ್ದು, ಪ್ರತಿ ಔನ್ಸ್‌ಗೆ 61.12 ಡಾಲರ್‌ನಲ್ಲಿ ವಹಿವಾಟು ನಡೆಸುತ್ತಿದೆ.

ಚಿನ್ನದ ಬೆಲೆ ಹೀಗೆ ದಿಢೀರ್ ಏರಿಕೆಯಾಗಲು ಎರಡು ಪ್ರಮುಖ ಕಾರಣಗಳಿವೆ..

1. ಕಚ್ಚಾ ತೈಲ ಬೆಲೆ ಇಳಿಕೆಯಾಗಿರುವುದರಿಂದ ಹಣದುಬ್ಬರದ ಮೇಲಿನ ಆತಂಕ ಕೊಂಚ ಕಡಿಮೆಯಾಗಿದೆ.

2. ಅಮೆರಿಕನ್ ಸೆಂಟ್ರಲ್ ಬ್ಯಾಂಕ್ ಬಡ್ಡಿ ದರ ಏರಿಕೆಯನ್ನು ನಿಲ್ಲಿಸಲಿದೆ ಎಂದು ಹೂಡಿಕೆದಾರರು ಭಾವಿಸಿದ್ದಾರೆ. ಹೀಗಾಗಿ ಸುರಕ್ಷಿತ ಹೂಡಿಕೆ ಎಂದು ಪರಿಗಣಿಸಿ ಮತ್ತೆ ಚಿನ್ನದ ಮೇಲೆ ಭಾರಿ ಹೂಡಿಕೆ ಮಾಡುತ್ತಿದ್ದಾರೆ.

'ದಿ ಕೋಬೆಸ್ಸಿ ಲೆಟರ್' ಡೇಟಾ ಪ್ರಕಾರ.. ಚಿನ್ನದ ನಿಕ್ಷೇಪಗಳ (ಟನ್‌ಗಳಲ್ಲಿ) ಟಾಪ್ 10 ಲಿಸ್ಟ್ ಇಲ್ಲಿದೆ:

1. ಅಮೆರಿಕ - 8,133

2. ಜರ್ಮನಿ - 3,351

3. ಇಟಲಿ - 2,452

4. ಫ್ರಾನ್ಸ್ - 2,437

5. ಚೀನಾ - 2,410

6. ರಷ್ಯಾ - 2,305

7. ಸ್ವಿಟ್ಜರ್ಲೆಂಡ್ - 1,040

8. ಭಾರತ - 881

9. ಜಪಾನ್ - 846

10. ನೆದರ್ಲ್ಯಾಂಡ್ಸ್ - 613

ಗಮನಿಸಿ: ಈ ಲಿಸ್ಟ್‌ನಲ್ಲಿ ಇಂಟರ್ನ್ಯಾಷನಲ್ ಮಾನಿಟರಿ ಫಂಡ್ (IMF) ನಿಕ್ಷೇಪಗಳನ್ನು ಸೇರಿಸಿಲ್ಲ. ಐಎಂಎಫ್ ಬಳಿ ಸುಮಾರು 2,814 ಟನ್ ಚಿನ್ನವಿದೆ.