Asianet Suvarna News

ಎಲ್ಲರೂ ಕಾರ್ ತಗೊಳ್ತಿದ್ರೆ ಕನ್ನಡಿಗರ ನೆಚ್ಚಿನ ಗಾಯಕಿ ತಗೊಂಡ್ರು ಎಲೆಕ್ಟ್ರಿಕ್ ಬೈಕ್: ಅರ್ಚನಾ ಉಡುಪ ಬಾಲ್ಯದ ಕನಸು ನನಸು!

Santosh Naik — Tue, 25 Aug 2026 18:24:07 +0530

ಬೆಂಗಳೂರು (ಆ.25): ಸಿನಿಮಾ, ಧಾರವಾಹಿಗಳಲ್ಲಿ ನಟಿಸಿ ಫೇಮಸ್‌ ಆಗಿರುವ ಹಲವು ಮಂದಿ ತಮ್ಮ ಗ್ಯಾರೇಜ್‌ಗೆ ಒಂದು ಕಾರ್‌ ಇರಬೇಕು ಎನ್ನುವ ಕಾರಣಕ್ಕೆ ಹೊಸ ಹೊಸ ಕಾರ್‌ ಖರೀದಿ ಮಾಡಲು ಉತ್ಸಾಹ ತೋರುತ್ತಿದ್ದಾರೆ. ಇದರ ನಡುವೆ ಗಾಯಕಿ ಅರ್ಚನಾ ಉಡುಪ ಡಿಫರೆಂಟ್‌ ಆಗಿರುವ ಸಾಹಸ ಮಾಡಿದ್ದಾರೆ. ಹೌದು, ಎಲ್ಲರೂ ಕಾರ್‌ ಖರೀದಿ ಮಾಡ್ತಿರೋ ಟೈಮ್‌ನಲ್ಲಿ ಅರ್ಚನಾ ಉಡುಪ, ರಾಯಲ್‌ ಎನ್‌ಫೀಲ್ಡ್‌ ಕಂಪನಿಯ ಮೊಟ್ಟಮೊದಲ ಎಲೆಕ್ಟ್ರಿಕ್‌ ಬೈಕ್‌ Flying Felaಅನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಈ ಕುರಿತಾದ ವಿಡಿಯೋವೊಂದನ್ನು ಕೂಡ ಅವರು ಹಂಚಿಕೊಂಡಿದ್ದಾರೆ.

'ಚಿಕ್ಕ ವಯಸ್ಸಿನಲ್ಲೇ ಬೈಕ್ ಎಂದರೆ ಅದೇನೋ ಆಸೆ..ನನ್ನ ಹುಟ್ಟೂರಿನಲ್ಲಿ ಇದ್ದಾಗ, ನನ್ನ ಕಾಲುಗಳು ನೆಲಕ್ಕೆ ತಾಗದೇ ಇರುವಷ್ಟು ಪುಟ್ಟ ಹುಡುಗಿಯಾಗಿದ್ದಾಗಲೇ ಬೈಕ್ ಓಡಿಸಲು ಕಲಿತುಬಿಟ್ಟಿದ್ದೆ. ನನ್ನ ತಂದೆಯ ಸ್ನೇಹಿತ ಅಜಯ್ ನನ್ನ ಕುತೂಹಲವನ್ನು ಗಮನಿಸಿ ಅದಕ್ಕೆ ನೀರೆರೆದು ನನಗೆ ಬೈಕ್ ಓಡಿಸುವ ವಿದ್ಯೆ ಕಲಿಸಿದರು, ಆಗ ತಾನೇ ಹೊಸದಾಗಿ ಪರಿಚಯಿಸಲಾಗಿದ್ದ ಮೊಟ್ಟ ಮೊದಲ 4 ಸ್ಟ್ರೋಕ್ ಬೈಕ್ ಮೂಲಕ. ಅಲ್ಲಿಂದ ನನಗೆ ಮುಂದೊಂದು ದಿನ ನಾನೂ ಒಂದು ಬೈಕ್ ಖರೀದಿ ಮಾಡಬೇಕು, ಎಲ್ಲಾ ಕಡೆ ತಿರುಗಬೇಕು ಅನ್ನುವ ಹಂಬಲ ಮನದಲ್ಲಿ ಮನೆ ಮಾಡಿತ್ತು. ಅಂತೂ ಇಂತೂ ಇಂದು ನಾನು Royal Enfield ನ ಮೊಟ್ಟ ಮೊದಲ ವಿದ್ಯುತ್ ಚಾಲಿತ ವಾಹನ "Flying Fela" ಯನ್ನು ನನ್ನದಾಗಿಸಿಕೊಂಡಿದ್ದೇನೆ' ಎಂದು ಬರೆದುಕೊಂಡಿದ್ದಾರೆ.

Flying Fela ಮೂಲಕ ಬುಲೆಟ್ ಪ್ರಿಯರ ನೆಚ್ಚಿನ ರಾಯಲ್ ಎನ್‌ಫೀಲ್ಡ್ (Royal Enfield) ಸಂಸ್ಥೆಯು ಇವಿ ಮಾರುಕಟ್ಟೆಗೆ ಅಧಿಕೃತವಾಗಿ ಕಾಲಿಟ್ಟಿದೆ. ಹಳೆಯ ಕ್ಲಾಸಿಕ್ ವಿನ್ಯಾಸದ ಜೊತೆಗೆ ಆಧುನಿಕ ಟೆಕ್ನಾಲಜಿಯನ್ನು ಮೇಳೈಸಿರುವ ಈ ಬೈಕ್, ಪ್ರೀಮಿಯಂ ಎಲೆಕ್ಟ್ರಿಕ್ ಶ್ರೇಣಿಯಲ್ಲಿ ಭಾರಿ ಗಮನ ಸೆಳೆಯುತ್ತಿದೆ. ಮಹಾಯುದ್ಧದ ಸಮಯದಲ್ಲಿ ಪ್ಯಾರಾಚೂಟ್ ಮೂಲಕ ರವಾನಿಸುತ್ತಿದ್ದ ರಾಯಲ್ ಎನ್‌ಫೀಲ್ಡ್‌ನ ಹಗುರವಾದ 'ಫ್ಲೈಯಿಂಗ್ ಫ್ಲೀ' ಬೈಕ್‌ನ ಹೆಸರನ್ನೇ ಈ ಇವಿ ಮಾದರಿಗೂ ಮರುನಾಮಕರಣ ಮಾಡಲಾಗಿದೆ.

ಬೆಲೆ ಮತ್ತು ಬಣ್ಣಗಳು

ಬೆಲೆ: ₹2.79 ಲಕ್ಷ (ಎಕ್ಸ್‌-ಷೋರೂಮ್ ಬೆಂಗಳೂರು),
ಬಣ್ಣಗಳು: ಫ್ಲೀ ಗ್ರೀನ್ (Flea Green) ಮತ್ತು ಸ್ಟಾರ್ಮ್ ಬ್ಲ್ಯಾಕ್ (Storm Black).
ಸ್ಥಾನಮಾನ: ನಗರ ಪ್ರದೇಶದ ಸವಾರಿಯನ್ನು ಗಮನದಲ್ಲಿಟ್ಟುಕೊಂಡು ಇದನ್ನು ಪ್ರೀಮಿಯಂ ಇವಿ ವಿಭಾಗದಲ್ಲಿ ಬಿಡುಗಡೆ ಮಾಡಲಾಗಿದೆ.

ಬ್ಯಾಟರಿ, ಚಾರ್ಜಿಂಗ್ ಮತ್ತು ರೇಂಜ್ (Range)

ಬ್ಯಾಟರಿ ಸಾಮರ್ಥ್ಯ: 3.91kWh ಲಿಥಿಯಂ-ಐಯಾನ್ ಬ್ಯಾಟರಿ ಪ್ಯಾಕ್.
ಚಾಲನಾ ವ್ಯಾಪ್ತಿ (Range): ಒಂದೇ ಚಾರ್ಜ್‌ನಲ್ಲಿ ಗರಿಷ್ಠ 154 ಕಿ.ಮೀ ರೇಂಜ್ (IDC ಪ್ರಕಾರ) ನೀಡುತ್ತದೆ.
ಚಾರ್ಜಿಂಗ್ ಸಮಯ: 20% ರಿಂದ 80% ಚಾರ್ಜ್ ಆಗಲು ಕೇವಲ 65 ನಿಮಿಷ ಸಾಕು. ಸಂಪೂರ್ಣ (0-100%) ಚಾರ್ಜ್ ಆಗಲು 2 ಗಂಟೆ 16 ನಿಮಿಷ ಸಮಯ ತೆಗೆದುಕೊಳ್ಳುತ್ತದೆ.

ವೇಗ ಮತ್ತು ಪವರ್ (Performance)

ಮೋಟರ್ ಪವರ್: 15.4kW ಪೀಕ್ ಪವರ್ ಮತ್ತು 60Nm ಟಾರ್ಕ್ ಉತ್ಪಾದಿಸುವ ಮೋಟರ್ ಹೊಂದಿದ್ದು, ಗರಿಷ್ಠ 115kmph ವೇಗದಲ್ಲಿ ಚಲಿಸುತ್ತದೆ.
ಪಿಕಪ್: ಕೇವಲ 3.7 ಸೆಕೆಂಡುಗಳಲ್ಲಿ 0-60kmph ವೇಗ ಪಡೆದುಕೊಳ್ಳುತ್ತದೆ.
ತೂಕ: ಅಲ್ಯೂಮಿನಿಯಂ ಹಾಗೂ ಮೆಗ್ನೀಸಿಯಮ್ ಭಾಗಗಳನ್ನು ಬಳಸಿರುವುದರಿಂದ ಬೈಕ್‌ನ ತೂಕ ಕೇವಲ 124 ಕೆಜಿ ಇರಲಿದ್ದು, ಸಿಟಿ ಟ್ರಾಫಿಕ್‌ನಲ್ಲಿ ಸುಲಭವಾಗಿ ಚಲಾಯಿಸಲು ನೆರವಾಗುತ್ತದೆ.

ವಿನ್ಯಾಸ ಮತ್ತು ಸ್ಮಾರ್ಟ್ ಫೀಚರ್‌ಗಳು

ಕ್ಲಾಸಿಕ್ ವಿನ್ಯಾಸ: ರೌಂಡ್ ಹೆಡ್‌ಲ್ಯಾಂಪ್, 19-ಇಂಚಿನ ವೀಲ್‌ಗಳು ಮತ್ತು ವಿಶಿಷ್ಟವಾದ 'ಗರ್ಡರ್-ಸ್ಟೈಲ್' (Girder-style) ಫ್ರಂಟ್ ಸಸ್ಪೆನ್ಷನ್ ಬೈಕ್‌ಗೆ ಅಲ್ಟ್ರಾ-ರೆಟ್ರೋ ಲುಕ್ ನೀಡಿದೆ.
ಡಿಜಿಟಲ್ ಡಿಸ್ಪ್ಲೇ: ನ್ಯಾವಿಗೇಷನ್ ಹಾಗೂ ಸ್ಮಾರ್ಟ್‌ಫೋನ್ ಕನೆಕ್ಟಿವಿಟಿ ಹೊಂದಿರುವ 3.5-ಇಂಚಿನ ವರ್ತುಲಾಕಾರದ TFT ಟಚ್‌ಸ್ಕ್ರೀನ್ ಡ್ಯಾಶ್‌ಬೋರ್ಡ್ ನೀಡಲಾಗಿದೆ.

ಸುರಕ್ಷತೆ & ಹೈಟೆಕ್ ಆಯ್ಕೆಗಳು

ಲೀನ್-ಆಂಗಲ್ ಸೆನ್ಸಿಟಿವ್ ABS ಮತ್ತು ಟ್ರ್ಯಾಕ್ಷನ್ ಕಂಟ್ರೋಲ್.
ಕ್ರೂಸ್ ಕಂಟ್ರೋಲ್ (Cruise Control) ಹಾಗೂ ಹಿಲ್-ಹೋಲ್ಡ್ ಅಸಿಸ್ಟ್.
ಕೀಲೆಸ್ ಆಪರೇಷನ್ (Keyless), ಎಲೆಕ್ಟ್ರಾನಿಕ್ ಹ್ಯಾಂಡಲ್‌ಬಾರ್ ಲಾಕ್ ಮತ್ತು USB-C ಚಾರ್ಜಿಂಗ್ ಪೋರ್ಟ್.
ವಿವಿಧ ಚಾಲನಾ ವಿಧಾನಗಳಿಗೆ ತಕ್ಕಂತೆ ರೈಡಿಂಗ್ ಮೋಡ್‌ಗಳು.

ಸಾಂಪ್ರದಾಯಿಕ ಪೆಟ್ರೋಲ್ ಬೈಕ್‌ಗಳಿಂದ ಸಂಪೂರ್ಣ ಭಿನ್ನ ಹಾದಿ ಹಿಡಿದಿರುವ ರಾಯಲ್ ಎನ್‌ಫೀಲ್ಡ್, ತನ್ನ ಹೊಸ 'ಫ್ಲೈಯಿಂಗ್ ಫ್ಲೀ' ಸರಣಿಯ ಮೂಲಕ ಭಾರತೀಯ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ಮಾರುಕಟ್ಟೆಯಲ್ಲಿ ಹೊಸ ಅಧ್ಯಾಯವನ್ನು ಆರಂಭಿಸಿದೆ.

Bikes: ಬಿಗ್‌ ಆಫರ್‌; ಬೈಕ್ ಖರೀದಿಸುವ ಪ್ಲ್ಯಾನ್ ಇದ್ರೆ ಒಮ್ಮೆ ನೋಡಿ! 65 ಕಿಮೀ ಮೈಲೇಜ್, ಬೆಲೆ ಮಾತ್ರ ₹65,642!

Bhimasi M Koleppanavar — Fri, 21 Aug 2026 17:29:04 +0530

ಪೆಟ್ರೋಲ್ ಏರಿಕೆ ನಡುವೆ ಬಜೆಟ್ ಸ್ನೇಹಿ ಬೈಕ್ ಹುಡುಕಾಟವೇ? ನಿಮಗಾಗಿ ಇಲ್ಲಿದೆ ಹೋಂಡಾದ ಟಾಪ್-4 ಕಮ್ಯೂಟರ್ ಬೈಕ್‌ಗಳು!

ದಿನೇ ದಿನೇ ಏರುತ್ತಿರುವ ಪೆಟ್ರೋಲ್ ದರ ಮತ್ತು ಸಿಟಿ ಟ್ರಾಫಿಕ್‌ನಲ್ಲಿ ಕಡಿಮೆ ಮೈಲೇಜ್ ನೀಡುವ ವಾಹನಗಳಿಂದ ಸವಾರರು ಪರ್ಯಾಯ ಮಾರ್ಗಗಳನ್ನು ಹುಡುಕುತ್ತಿದ್ದಾರೆ. ದೈನಂದಿನ ಪ್ರಯಾಣಕ್ಕಾಗಿ ಅತ್ಯುತ್ತಮ ಮೈಲೇಜ್, ಕೈಗೆಟುಕುವ ಬೆಲೆ ಮತ್ತು ಉತ್ತಮ ಕಾರ್ಯಕ್ಷಮತೆ ನೀಡುವ ಬೈಕ್ ಖರೀದಿಸಲು ಬಯಸುವವರಿಗೆ ಹೋಂಡಾ ಕಂಪನಿಯ 4 ಜನಪ್ರಿಯ ಬೈಕ್‌ಗಳ ವಿವರ ಇಲ್ಲಿದೆ:

1. ಹೋಂಡಾ ಶೈನ್ 100 (Honda Shine 100)!

ದೈನಂದಿನ ಪ್ರಯಾಣಕ್ಕೆ ಮತ್ತು ಕೆಲಸಕ್ಕೆ ಹೋಗುವ ವೃತ್ತಿಪರರಿಗೆ ಇದು ಅತ್ಯಂತ ಆರಾಮದಾಯಕ ಹಾಗೂ ಕೈಗೆಟುಕುವ ಬೆಲೆಯ ಬೈಕ್.

ಬೆಲೆ; ₹65,642 (ಎಕ್ಸ್-ಶೋರೂಂ)

ಎಂಜಿನ್ ಹಾಗೂ ಪವರ್; 98.98cc, ಏರ್-ಕೂಲ್ಡ್ ಎಂಜಿನ್ (7.28 bhp ಪವರ್, 8.05 Nm ಟಾರ್ಕ್, 4-ಸ್ಪೀಡ್ ಗೇರ್‌ಬಾಕ್ಸ್).

ವಿಶೇಷತೆಗಳು; 99 ಕೆಜಿ ತೂಕ, ಅನಲಾಗ್ ಕ್ಲಸ್ಟರ್, ಸೈಡ್-ಸ್ಟ್ಯಾಂಡ್ ಎಂಜಿನ್ ಕಟ್-ಆಫ್, ಸಿಬಿಎಸ್ ಬ್ರೇಕಿಂಗ್.

ಮೈಲೇಜ್; 60 ರಿಂದ 65 ಕಿಮೀ/ಲೀ.

ಹೋಂಡಾ ಲಿವೊ (Honda Livo)!

110 ಸಿಸಿ ವಿಭಾಗದಲ್ಲಿ ಸ್ಪೋರ್ಟಿ ಹಾಗೂ ಪ್ರೀಮಿಯಂ ಲುಕ್ ಬಯಸುವ ಯುವಜನತೆಗೆ ಇದು ಸೂಕ್ತ ಆಯ್ಕೆ.

ಬೆಲೆ; ₹78,500 - ₹82,500 (ಎಕ್ಸ್-ಶೋರೂಂ)

ಎಂಜಿನ್ ಹಾಗೂ ಪವರ್; 109.51cc eSP ಎಂಜಿನ್ (8.67 bhp ಪವರ್, 9.30 Nm ಟಾರ್ಕ್, 4-ಸ್ಪೀಡ್ ಗೇರ್‌ಬಾಕ್ಸ್).

ವಿಶೇಷತೆಗಳು; ಅಥ್ಲೆಟಿಕ್ ವಿನ್ಯಾಸ, ಸೆಮಿ-ಡಿಜಿಟಲ್ ಕ್ಲಸ್ಟರ್, ಸರ್ವಿಸ್ ಇಂಡಿಕೇಟರ್, ಎಂಜಿನ್ ಕಿಲ್ ಸ್ವಿಚ್, ಐಚ್ಛಿಕ ಡಿಸ್ಕ್ ಬ್ರೇಕ್.

ಮೈಲೇಜ್; 55 ರಿಂದ 60 ಕಿಮೀ/ಲೀ.

ಹೋಂಡಾ ಶೈನ್ 125 (Honda Shine 125)!

ದೇಶದಲ್ಲೇ ಅತ್ಯಂತ ಹೆಚ್ಚು ಮಾರಾಟವಾಗುವ 125 ಸಿಸಿ ಬೈಕ್ ಇದಾಗಿದ್ದು, ಕುಟುಂಬದೊಂದಿಗೆ ಸವಾರಿ ಮಾಡಲು ಪ್ರಶಸ್ತವಾಗಿದೆ.

ಬೆಲೆ; ₹80,000 - ₹84,000 (ಎಕ್ಸ್-ಶೋರೂಂ)

ಎಂಜಿನ್ ಹಾಗೂ ಪವರ್; 123.94cc SI ಎಂಜಿನ್ (10.59 bhp ಪವರ್, 11 Nm ಟಾರ್ಕ್, 5-ಸ್ಪೀಡ್ ಗೇರ್‌ಬಾಕ್ಸ್).

ವಿಶೇಷತೆಗಳು; 'ಸೈಲೆಂಟ್ ಸ್ಟಾರ್ಟ್' ತಂತ್ರಜ್ಞಾನ, ಕ್ರೋಮ್ ಫಿನಿಶಿಂಗ್, 3D ಲೋಗೋ, ಕಂಪನ-ಮುಕ್ತ ಸವಾರಿ.

ಮೈಲೇಜ್; 55 ರಿಂದ 60 ಕಿಮೀ/ಲೀ.

4. ಹೋಂಡಾ SP 125 (Honda SP 125)

ಸ್ಟೈಲಿಶ್ ಲುಕ್ ಜೊತೆಗೆ ಅತ್ಯಾಧುನಿಕ ಡಿಜಿಟಲ್ ತಂತ್ರಜ್ಞಾನ ಬಯಸುವ ಯುವಕರ ಮೊದಲ ಆಯ್ಕೆ.

ಬೆಲೆ; ₹86,000 - ₹90,500 (ಎಕ್ಸ್-ಶೋರೂಂ)

ಎಂಜಿನ್ ಹಾಗೂ ಪವರ್; 123.94cc PGM-FI ಎಂಜಿನ್ (10.72 bhp ಪವರ್, 10.9 Nm ಟಾರ್ಕ್, 5-ಸ್ಪೀಡ್ ಗೇರ್‌ಬಾಕ್ಸ್).

ವಿಶೇಷತೆಗಳು; ಫುಲ್ ಡಿಜಿಟಲ್ LCD ಕ್ಲಸ್ಟರ್ (ರಿಯಲ್-ಟೈಮ್ ಮೈಲೇಜ್ ತೋರಿಸುತ್ತದೆ), LED ಹೆಡ್‌ಲ್ಯಾಂಪ್, ಸ್ಪೋರ್ಟಿ ಲುಕ್.

ಮೈಲೇಜ್; 60 ರಿಂದ 65 ಕಿಮೀ/ಲೀ.

ನೀವು ಕಡಿಮೆ ಬೆಲೆಗೆ ಗರಿಷ್ಠ ಮೈಲೇಜ್ ಬಯಸಿದರೆ ಶೈನ್ 100, ಪ್ರೀಮಿಯಂ ಲುಕ್ ಮತ್ತು ಆಧುನಿಕ ಫೀಚರ್ಸ್ ಬೇಕಿದ್ದರೆ SP 125 ಸೂಕ್ತ.

Continental GT 650: ಹೊಸ ಫೀಚರ್‌ಗಳೊಂದಿಗೆ ರಾಯಲ್ ಎನ್‌ಫೀಲ್ಡ್ GT 650 ಲಾಂಚ್! ಬೆಲೆ ಎಷ್ಟು? ಏನಿದರ ಸ್ಪೆಷಾಲಿಟಿ?

Naveen Kodase — Mon, 17 Aug 2026 09:50:38 +0530

ಭಾರತದ ಮಾರುಕಟ್ಟೆಯಲ್ಲಿ ಸಖತ್ ಜನಪ್ರಿಯವಾಗಿರುವ ಕೆಫೆ ರೇಸರ್ ಬೈಕ್, ರಾಯಲ್ ಎನ್‌ಫೀಲ್ಡ್ ಕಾಂಟಿನೆಂಟಲ್ GT 650 ಈಗ ಹೊಸ ರೂಪದಲ್ಲಿ ಬಂದಿದೆ. ಕಂಪನಿಯು ಇದರ ವಿನ್ಯಾಸ ಮತ್ತು ಫೀಚರ್‌ಗಳಲ್ಲಿ ಸಣ್ಣಪುಟ್ಟ ಬದಲಾವಣೆಗಳನ್ನು ಮಾಡಿ ಹೊಸ ಆವೃತ್ತಿಯನ್ನು ಲಾಂಚ್ ಮಾಡಿದೆ. ಹೊಸ ಕಾಂಟಿನೆಂಟಲ್ GT 650 ಬೈಕ್‌ನ ಎಕ್ಸ್-ಶೋರೂಂ ಬೆಲೆ ₹3,58,427 ರಿಂದ ಆರಂಭವಾಗುತ್ತದೆ.

ಈ ಹೊಸ ಮಾಡೆಲ್‌ನಲ್ಲಿ ಎಲ್‌ಇಡಿ ಟರ್ನ್ ಇಂಡಿಕೇಟರ್‌ಗಳನ್ನು ನೀಡಿರುವುದು ಪ್ರಮುಖ ಬದಲಾವಣೆಗಳಲ್ಲಿ ಒಂದು. ಜೊತೆಗೆ, ಪ್ರಯಾಣದ ವೇಳೆ ಮೊಬೈಲ್ ಚಾರ್ಜ್ ಮಾಡಲು ಅನುಕೂಲವಾಗುವಂತೆ ಯುಎಸ್‌ಬಿ ಟೈಪ್-ಸಿ ಚಾರ್ಜಿಂಗ್ ಪೋರ್ಟ್ ಅಳವಡಿಸಲಾಗಿದೆ. ಇನ್‌ಸ್ಟ್ರುಮೆಂಟ್ ಕನ್ಸೋಲ್ ಸುತ್ತ ಬ್ಲ್ಯಾಕ್ ಫಿನಿಶ್ ನೀಡಿರುವುದರಿಂದ ಬೈಕ್‌ಗೆ ಮತ್ತಷ್ಟು ಡಾರ್ಕ್ ಲುಕ್ ಸಿಕ್ಕಿದೆ.

ರಾಕರ್ ರೆಡ್‌ಗೆ ಡಾರ್ಕ್ ಲುಕ್

ರಾಕರ್ ರೆಡ್ ಬಣ್ಣದ ವೇರಿಯೆಂಟ್‌ನಲ್ಲಿ ಗಮನಾರ್ಹ ಬದಲಾವಣೆಗಳನ್ನು ಮಾಡಲಾಗಿದೆ. ಇದರ ಎಂಜಿನ್ ಮತ್ತು ಎಕ್ಸಾಸ್ಟ್‌ಗೆ ಕಪ್ಪು ಬಣ್ಣದ ಫಿನಿಶಿಂಗ್ ನೀಡಲಾಗಿದೆ. ಜೊತೆಗೆ, ಕಾಸ್ಟ್ ಅಲಾಯ್ ವೀಲ್‌ಗಳಿಗೂ ಕಪ್ಪು ಬಣ್ಣ ಬಳಿಯಲಾಗಿದೆ. ಇದರಿಂದಾಗಿ, ಅಪೆಕ್ಸ್ ಗ್ರೇ ಬಣ್ಣದಂತೆ ರಾಕರ್ ರೆಡ್ ಕೂಡ ಈಗ ಸಂಪೂರ್ಣ ಬ್ಲ್ಯಾಕ್-ಔಟ್ ಲುಕ್ ಪಡೆದಿದೆ. ಆದರೆ, ಬ್ರಿಟಿಷ್ ರೇಸಿಂಗ್ ಗ್ರೀನ್ ಮತ್ತು ಮಿಸ್ಟರ್ ಕ್ಲೀನ್ ಬಣ್ಣದ ವೇರಿಯೆಂಟ್‌ಗಳು ಪಾಲಿಶ್ ಮಾಡಿದ ಎಂಜಿನ್ ಫಿನಿಶ್ ಮತ್ತು ಹಳೆಯ ಮಾದರಿಯ ಸ್ಪೋಕ್ ವೀಲ್‌ಗಳನ್ನೇ ಉಳಿಸಿಕೊಂಡಿವೆ. ಅಪೆಕ್ಸ್ ಗ್ರೇ ವೇರಿಯೆಂಟ್ ರಾಕರ್ ರೆಡ್‌ಗಿಂತ ಮೇಲಿನ ಸ್ಥಾನದಲ್ಲಿದೆ. ಮಿಸ್ಟರ್ ಕ್ಲೀನ್ ಈ ಸರಣಿಯಲ್ಲೇ ಅತ್ಯಂತ ದುಬಾರಿ ಮಾಡೆಲ್ ಆಗಿದೆ.

ಎಂಜಿನ್‌ನಲ್ಲಿ ಯಾವುದೇ ಬದಲಾವಣೆ ಇಲ್ಲ

ತಾಂತ್ರಿಕವಾಗಿ ಈ ಬೈಕ್‌ನಲ್ಲಿ ಯಾವುದೇ ದೊಡ್ಡ ಬದಲಾವಣೆಗಳನ್ನು ಮಾಡಿಲ್ಲ. ಹೊಸ ಕಾಂಟಿನೆಂಟಲ್ GT 650 ಬೈಕ್‌ನಲ್ಲಿಯೂ ಹಳೆಯ 648cc ಪ್ಯಾರಲಲ್ ಟ್ವಿನ್, ಏರ್-ಆಯಿಲ್ ಕೂಲ್ಡ್ ಎಂಜಿನ್‌ ಅನ್ನೇ ಬಳಸಲಾಗಿದೆ. ಈ ಎಂಜಿನ್ 7,150 rpm ನಲ್ಲಿ 47 hp ಪವರ್ ಮತ್ತು 5,250 rpm ನಲ್ಲಿ 52.3 Nm ಟಾರ್ಕ್ ಉತ್ಪಾದಿಸುತ್ತದೆ. 6-ಸ್ಪೀಡ್ ಗೇರ್‌ಬಾಕ್ಸ್‌ ಇದರಲ್ಲಿದೆ. ಹ್ಯಾರಿಸ್ ಪರ್ಫಾರ್ಮೆನ್ಸ್ ಸಹಯೋಗದೊಂದಿಗೆ ಅಭಿವೃದ್ಧಿಪಡಿಸಿದ ಸ್ಟೀಲ್ ಟ್ಯೂಬ್ಯುಲರ್ ಡಬಲ್ ಕ್ರೇಡಲ್ ಫ್ರೇಮ್ ಅನ್ನು ಈ ಬೈಕ್ ಹೊಂದಿದೆ.

ಸಸ್ಪೆನ್ಷನ್ ಕೂಡ ಹಳೆಯದೇ

ಬೈಕ್‌ನ ಮುಂಭಾಗದಲ್ಲಿ ಟೆಲಿಸ್ಕೋಪಿಕ್ ಫೋರ್ಕ್ ಮತ್ತು ಹಿಂಭಾಗದಲ್ಲಿ ಗ್ಯಾಸ್-ಚಾರ್ಜ್ಡ್ ಟ್ವಿನ್ ಶಾಕ್ ಅಬ್ಸಾರ್ಬರ್‌ಗಳ ಸಸ್ಪೆನ್ಷನ್ ವ್ಯವಸ್ಥೆ ಇದೆ. ಆಕರ್ಷಕ ಫ್ಯೂಯಲ್ ಟ್ಯಾಂಕ್, ಕೆಫೆ ರೇಸರ್‌ಗೆ ತಕ್ಕಂತೆ ಕೆಳಮಟ್ಟದ ರೈಡಿಂಗ್ ಪೊಸಿಷನ್ ಮತ್ತು ಸ್ಪೋರ್ಟಿ ವಿನ್ಯಾಸವನ್ನು ಹೊಸ ಆವೃತ್ತಿಯಲ್ಲೂ ಮುಂದುವರಿಸಲಾಗಿದೆ.

ಬೆಲೆ ವಿವರ

ರಾಕರ್ ರೆಡ್ ಮತ್ತು ಬ್ರಿಟಿಷ್ ರೇಸಿಂಗ್ ಗ್ರೀನ್ ವೇರಿಯೆಂಟ್‌ಗಳ ಎಕ್ಸ್-ಶೋರೂಂ ಬೆಲೆ ₹3,58,427 ಆಗಿದೆ. ಅಪೆಕ್ಸ್ ಗ್ರೇ ಬಣ್ಣದ ಬೈಕ್‌ಗೆ ₹3,80,921 ಮತ್ತು ಮಿಸ್ಟರ್ ಕ್ಲೀನ್ ವೇರಿಯೆಂಟ್‌ಗೆ ₹3,87,667 ಬೆಲೆ ನಿಗದಿಪಡಿಸಲಾಗಿದೆ. 1950-60ರ ದಶಕದ ಕೆಫೆ ರೇಸರ್ ಬೈಕ್‌ಗಳಿಂದ ಸ್ಫೂರ್ತಿ ಪಡೆದು ಕಾಂಟಿನೆಂಟಲ್ GT 650 ಅನ್ನು ವಿನ್ಯಾಸಗೊಳಿಸಲಾಗಿದೆ. ರಾಯಲ್ ಎನ್‌ಫೀಲ್ಡ್ ಕಂಪನಿಯು ಹೊಸ ಫೀಚರ್‌ಗಳನ್ನು ಸೇರಿಸಿದ್ದರೂ, ಎಂಜಿನ್ ಮತ್ತು ಮೂಲಭೂತ ತಾಂತ್ರಿಕವಾಗಿ ಯಾವುದೇ ಬದಲಾವಣೆ ಮಾಡದೆ ಹೊಸ ಆವೃತ್ತಿಯನ್ನು ಮಾರುಕಟ್ಟೆಗೆ ತಂದಿದೆ.

ಭಾರತದ ಮೊದಲ '2026 ಯೆಜ್ಡಿ ರೋಡ್‌ಸ್ಟರ್' ಬೈಕ್ ಒಡೆಯನಾದ ಒಲಿಂಪಿಕ್ ಹೀರೋ ಪಿ.ಆರ್. ಶ್ರೀಜೇಶ್!

Gowthami K — Wed, 12 Aug 2026 17:36:49 +0530

ಒಲಿಂಪಿಕ್ ಪದಕ ವಿಜೇತ ಹಾಗೂ ಭಾರತೀಯ ಹಾಕಿ ತಂಡದ ಮಾಜಿ ನಾಯಕ ಪಿ.ಆರ್. ಶ್ರೀಜೇಶ್ ಅವರು ಹೊಸದೊಂದು ಮೈಲಿಗಲ್ಲಿಗೆ ಸಾಕ್ಷಿಯಾಗಿದ್ದಾರೆ. ಜಾವಾ - ಯೆಜ್ಡಿ ಮೋಟಾರ್‌ಸೈಕಲ್ಸ್ ಇತ್ತೀಚೆಗೆ ಬಿಡುಗಡೆ ಮಾಡಿದ್ದ '2026 ಯೆಜ್ಡಿ ರೋಡ್‌ಸ್ಟರ್ʼ ಬೈಕ್ ಅನ್ನು ಖರೀದಿಸಿದ ಭಾರತದ ಮೊಟ್ಟಮೊದಲ ಗ್ರಾಹಕ ಎಂಬ ಹೆಗ್ಗಳಿಕೆಗೆ ಶ್ರೀಜೇಶ್ ಪಾತ್ರರಾಗಿದ್ದಾರೆ. ಅವರು ವಿಶಿಷ್ಟವಾದ 'ಯೆಜ್ಡಿ ಗ್ರೀನ್ ಮಾಂಬಾ ರೋಡ್‌ಸ್ಟರ್' ಬೈಕ್‌ನ ಡೆಲಿವರಿ ಪಡೆದುಕೊಂಡಿದ್ದಾರೆ.

ಇತ್ತೀಚೆಗೆ ಕೇರಳದಲ್ಲಿ ನಡೆದ ರಾಷ್ಟ್ರೀಯ ಬಿಡುಗಡೆ ಸಮಾರಂಭದಲ್ಲಿ ಈ ಬೈಕ್ ಅನ್ನು ನೋಡಿದ್ದ ಶ್ರೀಜೇಶ್, ಅದರ ವಿಶಿಷ್ಟ ಸ್ಟೈಲ್ ಮತ್ತು ರಾಯಲ್ ಲುಕ್‌ಗೆ ಮಾರುಹೋಗಿದ್ದರು. ಇದೀಗ ಅದೇ ಬೈಕ್‌ ಅನ್ನು ಖರೀದಿಸಿ, ಡೆಲಿವರಿ ಪಡೆದುಕೊಂಡಿದ್ದಾರೆ. ಆಟದ ಮೈದಾನದಲ್ಲಿ ಅಪಾರ ಆತ್ಮವಿಶ್ವಾಸ ಮತ್ತು ಛಲದಿಂದ ಎದುರಾಳಿಗಳನ್ನು ಎದುರಿಸುವ ʼಗೋಡೆʼ ಖ್ಯಾತಿಯ ಶ್ರೀಜೇಶ್ ಅವರ ವ್ಯಕ್ತಿತ್ವಕ್ಕೆ ಈ ಯೆಜ್ಡಿ ರೋಡ್‌ಸ್ಟರ್ ಬೈಕ್ ಹೇಳಿಮಾಡಿಸಿದಂತಿದೆ.

ಏನು ಈ ಗ್ರೀನ್ ಮಾಂಬಾ ರೋಡ್‌ಸ್ಟರ್‌ನ ವಿಶೇಷತೆ?

ರಸ್ತೆಯಲ್ಲಿ ಸಾಗುವಾಗ ಎಲ್ಲರೂ ಒಮ್ಮೆ ತಿರುಗಿ ನೋಡುವಂತಹ ಆಕರ್ಷಕ ವಿನ್ಯಾಸವನ್ನು ಇದು ಹೊಂದಿದೆ.

ಮ್ಯಾಟ್-ಗ್ರೀನ್ ಬಣ್ಣದ ಈ ಬೈಕ್‌ಗೆ, ಅರೇಬಿಕಾ-ಬ್ರೌನ್‌ ಬಣ್ಣದ ಕುಶನ್ ಸೀಟ್ ಹಾಗೂ ತಾಮ್ರದ ಬಣ್ಣದ ಡೀಕ್ಯಾಲ್‌ಗಳನ್ನು ನೀಡಲಾಗಿದ್ದು, ಇದು ಬೈಕ್‌ನ ಅಂದವನ್ನು ಮತ್ತಷ್ಟು ಹೆಚ್ಚಿಸಿದೆ.

ಇದು 334ಸಿಸಿ ಸಾಮರ್ಥ್ಯದ ಲಿಕ್ವಿಡ್-ಕೂಲ್ಡ್ ಆಲ್ಫಾ2 ಇಂಜಿನ್ ಹೊಂದಿದ್ದು, 6 ಸ್ಪೀಡ್ ಗೇರ್‌ಬಾಕ್ಸ್, ಅಸಿಸ್ಟ್ ಅಂಡ್ ಸ್ಲಿಪ್ಪರ್ ಕ್ಲಚ್, ಎಬಿಎಸ್ ಮತ್ತು ಮಾಡ್ಯುಲರ್ ಸೀಟಿಂಗ್‌ನಂತಹ ಅತ್ಯಾಧುನಿಕ ತಂತ್ರಜ್ಞಾನಗಳನ್ನು ಒಳಗೊಂಡಿದೆ.

ಸಂತಸ ಹಂಚಿಕೊಂಡ ಮಾಜಿ ನಾಯಕ ಶ್ರೀಜೇಶ್‌

ಬೈಕ್‌ ಖರೀದಿಯ ಸಂತಸ ಹಂಚಿಕೊಂಡ ಶ್ರೀಜೇಶ್‌, "ಆಟದ ಮೈದಾನದಷ್ಟೇ, ಮೈದಾನದ ಹೊರಗಿನ ಜೀವನವೂ ಬಹಳ ಮುಖ್ಯ ಎಂದು ನಾನು ನಂಬಿದ್ದೇನೆ. ಕೊಚ್ಚಿಯಲ್ಲಿ ನಡೆದ ಸಮಾರಂಭದಲ್ಲಿ ಈ ಬೈಕ್‌ನ ಡಿಸೈನ್ ಹಾಗೂ ಲುಕ್ ನನ್ನನ್ನು ಮೊದಲ ನೋಟದಲ್ಲೇ ಸೆಳೆದಿತ್ತು. ಯೆಜ್ಡಿ ಬೈಕ್‌ಗಳಿಗೆ ತಲೆಮಾರುಗಳು ಮೆಚ್ಚುವಂತಹ ದೊಡ್ಡ ಇತಿಹಾಸವಿದೆ. ಆ ಇತಿಹಾಸದ ಒಂದು ಭಾಗವಾಗಲು ನಾನು ಇಷ್ಟಪಟ್ಟೆ. ಆಟದ ಮೈದಾನವಿರಲಿ, ರಸ್ತೆಯಿರಲಿ ಅಥವಾ ಜೀವನವಿರಲಿ. ನಮಗೆ ಇಷ್ಟವಾದದ್ದನ್ನು ನಾವು ಬೆನ್ನಟ್ಟಬೇಕು ಎಂಬುದನ್ನೇ ಈ ಬೈಕ್ ನನಗೆ ನೆನಪಿಸುತ್ತದೆ" ಎಂದರು.

ಈ ಬಗ್ಗೆ ಮಾತನಾಡಿದ ಜಾವಾ - ಯೆಜ್ಡಿ ಬ್ರ್ಯಾಂಡ್‌ನ ಮಾತೃಸಂಸ್ಥೆಯಾದ ಕ್ಲಾಸಿಕ್ ಲೆಜೆಂಡ್ಸ್‌ನ ಸಹ ಸಂಸ್ಥಾಪಕ ಅನುಪಮ್ ಥರೇಜಾ, "ರೋಡ್‌ಸ್ಟರ್ ಬೈಕ್ ಎಂದರೆ ಧೈರ್ಯ, ಆತ್ಮವಿಶ್ವಾಸ ಮತ್ತು ಚಾಲೆಂಜರ್ ಸ್ಪಿರಿಟ್. ಇಂತಹ ಬೈಕ್‌ನ ಮೊದಲ ಗ್ರಾಹಕನಾಗಿ ಶ್ರೀಜೇಶ್ ಅವರಂತಹ ಕ್ರೀಡಾ ದಿಗ್ಗಜರು ಸೇರ್ಪಡೆಯಾಗಿರುವುದು ನಮಗೆ ಅತೀವ ಸಂತಸ ತಂದಿದೆ. ಅವರ ಛಲ ಮತ್ತು ಸಾಧನೆ ನಮ್ಮ ಬ್ರ್ಯಾಂಡ್‌ಗೆ ಕನ್ನಡಿಯಂತಿದೆ. ಶ್ರೀಜೇಶ್ ಅವರೊಂದಿಗೆ ನಮ್ಮ 2026ರ ಹೊಸ ಸರಣಿಯ ಬೈಕ್‌ಗಳ ಜರ್ನಿ ಶುರುವಾಗಿರುವುದು ರೋಮಾಂಚನಕಾರಿಯಾಗಿದೆ,” ಎಂದರು.

ಗ್ರೀನ್ ಮಾಂಬಾ ರೋಡ್‌ಸ್ಟರ್ ನಿಂದ ಡೆಲಿವರಿ

ಶ್ರೀಜೇಶ್ ಅವರಿಗೆ ಗ್ರೀನ್ ಮಾಂಬಾ ರೋಡ್‌ಸ್ಟರ್ ಡೆಲಿವರಿ ಮಾಡುವುದರೊಂದಿಗೆ ಯೆಜ್ಡಿಯ 2026ರ ಹೊಸ ಸರಣಿಯ ಬೈಕ್‌ಗಳ ಡೆಲಿವರಿ ಭಾರತದಾದ್ಯಂತ ಅಧಿಕೃತವಾಗಿ ಶುರುವಾಗಿದೆ.

ಜಾವಾ, ಯೆಜ್ಡಿ ಹಾಗೂ ಬಿಎಸ್‌ಎನಂತಹ ಐಕಾನಿಕ್ ಮೋಟಾರ್‌ಸೈಕಲ್ ಬ್ರ್ಯಾಂಡ್‌ಗಳಿಗೆ ಭಾರತ ಮತ್ತು ಜಾಗತಿಕ ಮಾರುಕಟ್ಟೆಯಲ್ಲಿ ಮರುಜೀವ ನೀಡುವ ದೃಷ್ಟಿಯಿಂದ ಕ್ಲಾಸಿಕ್ ಲೆಜೆಂಡ್ಸ್ ಸಂಸ್ಥೆ ಸ್ಥಾಪನೆಯಾಗಿದೆ. ಗ್ರಾಹಕರಿಗೆ ಅತ್ಯುತ್ತಮ ಮೋಟಾರ್‌ಸೈಕಲ್ ಅನುಭವವನ್ನು ನೀಡುವುದು ಈ ಕಂಪನಿಯ ಗುರಿಯಾಗಿದೆ.

ಹೊಸ ಅವತಾರ, ಆರು ಕಲರ್, ಆಕರ್ಷಕ ಲುಕ್‌ , ಹೆಚ್ಚುವರಿ ಫೀಚರ್ ಜಾವಾ 42 FJ ಬೈಕ್ ಲಾಂಚ್

Chethan Kumar — Thu, 27 Aug 2026 15:18:39 +0530

ಮುಂಬೈ (ಆ.27) ಜಾವಾ 42 ಎಫ್‌ಜೆ ಆಲ್ ಸ್ಟಾರ್ಸ್ ಎಡಿಶನ್ ಬೈಕ್ ಬಿಡುಗಡೆಯಾಗಿದೆ. ಸ್ಪೆಷಲ್ ಎಡಿಶನ್ ಬೈಕ್ ಇದಾಗಿದೆ. ಹೀಗಾಗಿ ಹೊಸ ಬಣ್ಣದಲ್ಲಿ ಲಭ್ಯವಿದೆ. ಆಕರ್ಷಕ ಲುಕ್‌ನಲ್ಲಿ ಬೈಕ್ ಬಿಡುಗಡೆಯಾಗಿದೆ. ಇನ್ನು ಎಂಜಿನ್, ಪವರ್ ಸೇರಿದಂತೆ ಇತರ ಪ್ರಮುಖ ವಿಚಾರಗಳಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ. ಹೊಚ್ಚ ಹೊಸ ಜಾವಾ 42 FJ ಆಲ್ ಸ್ಟಾರ್ಸ್ ಎಡಿಶನ್ ಬೈಕ್ ಬುಕಿಂಗ್ ಆರಂಭಗೊಂಡಿದ್ದು, ಅಧಿಕೃತ ಡೀಲರ್ ಮೂಲಕ ಗ್ರಾಹಕರು ಬುಕ್ ಮಾಡಿಕೊಳ್ಳಬಹುದು.

ಜಾವಾ 42 FJ ಆಲ್ ಸ್ಟಾರ್ಸ್ ಬೈಕ್ ಬೆಲೆ

ನೂತನ ಜಾವಾ 42 FJ ಆಲ್ ಸ್ಟಾರ್ಸ್ ಎಡಿಶನ್ ಬೈಕ್ ಆರಂಭಿಕ ಬೆಲೆ 2.02 ಲಕ್ಷ ರೂಪಾಯಿ (ಎಕ್ಸ್ ಶೋ ರೂಂ). ಜಾವಾ 42 FJ ಹಾಗೂ ಆಲ್ ಸ್ಟಾರ್ಸ್ ಬೈಕ್‌ನ ಎಂಜಿನ್, ಚಾಸಿಸ್, ಬ್ರೇಕ್‌ಗಳಲ್ಲಿ ಯಾವುದೇ ಬದಲಾವಣೆ ಇಲ್ಲ. ಕ್ರೋಮ್ ಫೀನಿಶಿಂಗ್ ಬೈಕ್ ಬೆಲೆ 2.16 ಲಕ್ಷ ರೂಪಾಯಿ (ಎಕ್ಸ್ ಶೋರೂಂ)ಬೆಲೆಯಲ್ಲಿ ಲಭ್ಯವಿದೆ. ಎರಡು ವರ್ಷ ಹಿಂದೆ ಜಾವಾ 42 FJ ಬೈಕ್ ಲಾಂಚ್ ಆಗಿತ್ತು. ಅಷ್ಟೇ ವೇಗದಲ್ಲಿ ಬೈಕ್ ಜಾವಾದ ಗರಿಷ್ಠ ಮಾರಾಟದ ಬೈಕ್ ಆಗಿ ಮಾರ್ಪಟ್ಟಿತ್ತು. ಎರಡು ವರ್ಷ ಹಿಂದೆ 1.99 ಲಕ್ಷ ರೂಪಾಯಿ (ಎಕ್ಸ್ ಶೋ ರೂಂ) ಬೆಲೆಯಲ್ಲಿ ಲಾಂಚ್ ಆಗಿತ್ತು.

ಜಾವಾ 42 FJ ಆಲ್ ಸ್ಟಾರ್ಸ್ ಎಡಿಶನ್ ಬೈಕ್ 334 ಸಿಸಿ ಸಿಂಗಲ್ ಸಿಲಿಂಡರ್ ಎಂಜಿನ್ ಹೊಂದಿದೆ. 30.64 BHP ಪವರ್ ಹಾಗೂ 29.5 nm ಪೀಕ್ ಟಾರ್ಕ್ ಸಾಮರ್ಥ್ಯ ಹೊಂದಿದೆ. 6 ಸ್ಪೀಡ್ ಗೇರ್ ಬಾಕ್ಸ್, ಡ್ಯುಯೆಲ್ ಚಾನೆಲ್ ಎಬಿಎಸ್ ಬ್ರೇಕ್, ಎಲ್ಇಡಿ ಹೆಡ್‌ಲ್ಯಾಂಪ್ಸ್, ಡಿಜಿಟಲ್-ಅನಲಾಗ್ ಇನ್‌ಸ್ಟ್ರುಮೆಂಟ್ ಕ್ಲಸ್ಟರ್, ಅಲಾಯ್ ವೀಲ್‌ಗಳು, ರೆಟ್ರೋ-ಮಾಡರ್ನ್ ಡಿಸೈನ್ ಸೇರಿದಂತೆ ಹಲವು ವಿಶೇಷತೆಗಳು ಇದರಲ್ಲಿದೆ.

ರೆಟ್ರೋ ಪ್ರಿಯರಿಗೆ ಇಷ್ಟ

ರೆಟ್ರೋ ಶೈಲಿಯ ಬೈಕ್ ಇಷ್ಟುಪಡುವ ಮಂದಿಗೆ ಜಾವಾ 42 FJ ಆಲ್ ಸ್ಟಾರ್ಸ್ ಅತ್ಯುತ್ತಮ ಆಯ್ಕೆಯಾಗಿದೆ. ಹೊಸ ಲುಕ್, ಹೊಸ ಬಣ್ಣ ಸೇರಿದಂತೆ ಹಲವು ವಿಶೇಷತೆಗಳ ಮೂಲಕ ಜಾವಾ 42 FJ ಆಲ್ ಸ್ಟಾರ್ಸ್ ಬೈಕ್ ಮಾರುಕಟ್ಟೆಗೆ ಲಗ್ಗೆ ಇಟ್ಟಿದೆ.

ಹೊಚ್ಚ ಹೊಸ ಅವತಾರದಲ್ಲಿ ಬಜಾಜ್ ಪಲ್ಸರ್ 150.. ಹೊಸ ಲುಕ್, ಹೈಟೆಕ್ ಫೀಚರ್ಸ್, ಬೆಲೆ ಎಷ್ಟು?

Ganesh Mabla Gowda — Thu, 27 Aug 2026 08:12:42 +0530

ಭಾರತೀಯ ರಸ್ತೆಗಳ ರಾಜ ಬಜಾಜ್ ಪಲ್ಸರ್ 150 ಈಗ ಹೊಸ ರೂಪದಲ್ಲಿ ಮಾರುಕಟ್ಟೆಗೆ ಲಗ್ಗೆ ಇಟ್ಟಿದೆ. ಬಜಾಜ್ ಕಂಪನಿಯು ತನ್ನ ಜನಪ್ರಿಯ 2026 ಪಲ್ಸರ್ 150 (2026 Pulsar 150) ಬೈಕನ್ನು ಅಧಿಕೃತವಾಗಿ ಬಿಡುಗಡೆ ಮಾಡಿದ್ದು ಇದರ ಆರಂಭಿಕ ಬೆಲೆ 1,15,233 ರೂ. (ಎಕ್ಸ್ ಶೋರೂಂ) ಆಗಿದೆ.

ಈ ಹೊಸ ಅಪ್‌ಡೇಟ್‌ನಲ್ಲಿ ಬೈಕ್ ಕೇವಲ ನೋಡಲು ಮಾತ್ರವಲ್ಲದೆ, ತಾಂತ್ರಿಕವಾಗಿಯೂ ಸಾಕಷ್ಟು ಬದಲಾವಣೆಗಳನ್ನು ಕಂಡಿದೆ. ಅವುಗಳ ಸಂಪೂರ್ಣ ಮಾಹಿತಿ ಇಲ್ಲಿದೆ

1. ಆಧುನಿಕ ವಿನ್ಯಾಸ (New Design)

ಹೊಸ ಪಲ್ಸರ್ 150 ಈಗ ಮೊದಲಿಗಿಂತ ಹೆಚ್ಚು ಶಾರ್ಪ್ ಮತ್ತು ಸ್ಪೋರ್ಟಿ ಆಗಿ ಕಾಣುತ್ತಿದೆ

LED ಹೆಡ್‌ಲ್ಯಾಂಪ್: ಮೊದಲ ಬಾರಿಗೆ ಹೆಚ್ಚು ಆಕರ್ಷಕವಾದ ಎಲ್‌ಇಡಿ ಹೆಡ್‌ಲ್ಯಾಂಪ್ ವಿಭಾಗವನ್ನು ನೀಡಲಾಗಿದೆ

ಸ್ಪೋರ್ಟಿ ಟ್ಯಾಂಕ್: ಬೈಕಿನ ಇಂಧನ ಟ್ಯಾಂಕ್ ಮತ್ತು ಅದರ ಎಕ್ಸ್‌ಟೆನ್ಶನ್‌ಗಳನ್ನು ಹೆಚ್ಚು ಅಗ್ರೆಸಿವ್ ಆಗಿ ವಿನ್ಯಾಸಗೊಳಿಸಲಾಗಿದೆ

ಆದಾಗ್ಯೂ, ಪಲ್ಸರ್‌ನ ಐಕಾನಿಕ್ ವಿನ್ಯಾಸವನ್ನು ಹಾಗೆಯೇ ಉಳಿಸಿಕೊಳ್ಳಲಾಗಿದ್ದು, ದೂರದಿಂದ ನೋಡಿದರೂ ಇದು ಪಲ್ಸರ್ ಎಂದು ಗುರುತಿಸುವಂತಿದೆ.

2. ಶಕ್ತಿಯುತ ಇಂಜಿನ್ ಮತ್ತು ಹೊಸ ಚಾಸಿಸ್ (New Engine & Chassis)

ಇಂಜಿನ್: ಈ ಬೈಕ್ 150cc ಏರ್-ಕೂಲ್ಡ್, ಸಿಂಗಲ್ ಸಿಲಿಂಡರ್ ಇಂಜಿನ್ ಹೊಂದಿದ್ದು, ಇದು 13.6bhp ಪವರ್ ಮತ್ತು 14.2Nm ಟಾರ್ಕ್ ಉತ್ಪಾದಿಸುತ್ತದೆ. ಇದಕ್ಕೆ 5-ಸ್ಪೀಡ್ ಗೇರ್‌ಬಾಕ್ಸ್ ಜೋಡಿಸಲಾಗಿದೆ. ಮೊನೊಶಾಕ್ ಸಸ್ಪೆನ್ಷನ್: ಹಳೆಯ ಮಾಡೆಲ್‌ನಲ್ಲಿ ಎರಡು ಶಾಕ್ ಅಬ್ಸಾರ್ಬರ್‌ಗಳಿದ್ದವು. ಆದರೆ ಹೊಸ ಮಾಡೆಲ್‌ನಲ್ಲಿ ಮೊನೊಶಾಕ್ (Monoshock) ಸೆಟಪ್ ನೀಡಲಾಗಿದೆ. ಇದು ಬೈಕಿನ ಹ್ಯಾಂಡ್ಲಿಂಗ್ ಅನ್ನು ಸುಧಾರಿಸುತ್ತದೆ. ಬೈಕಿಗೆ ಹೊಸ ಫ್ರೇಮ್ (Frame) ಕೂಡ ನೀಡಲಾಗಿದ್ದು, ಇದು ರೈಡಿಂಗ್ ಅನುಭವವನ್ನು ಉತ್ತಮಗೊಳಿಸುತ್ತದೆ.

3. ಹೈಟೆಕ್ ಫೀಚರ್ಸ್‌ಗಳು (New Features)

ಈ ಬಾರಿ ಬಜಾಜ್ ತಂತ್ರಜ್ಞಾನಕ್ಕೆ ಹೆಚ್ಚಿನ ಒತ್ತು ನೀಡಿದೆ. ಬೈಕಿನ ಟಾಪ್ ಎಂಡ್ ವೇರಿಯಂಟ್‌ನಲ್ಲಿ ಟಿಎಫ್ಟಿ (TFT) ಕನ್ಸೋಲ್ ನೀಡಲಾಗಿದೆ. ಇದರಲ್ಲಿ ಗೂಗಲ್ ಮ್ಯಾಪ್ಸ್ ಮಿರಿಂಗ್ (Google Maps Mirroring), ಕಾಲ್/SMS ಅಲರ್ಟ್ಸ್, ಮ್ಯೂಸಿಕ್ ಕಂಟ್ರೋಲ್ ಮತ್ತು ಡಾಕ್ಯುಮೆಂಟ್ ಸ್ಟೋರೇಜ್ ಸೌಲಭ್ಯವಿದೆ. ಮೊದಲ ಬಾರಿಗೆ ಈ ವಿಭಾಗದಲ್ಲಿ Rain (ಮಳೆ), Road (ರಸ್ತೆ) ಮತ್ತು Sport (ಸ್ಪೋರ್ಟ್) ಎಂಬ ಮೂರು ರೈಡಿಂಗ್ ಮೋಡ್‌ಗಳನ್ನು ನೀಡಲಾಗಿದೆ.

4. ಸುರಕ್ಷತೆ (Safety)

ಸುರಕ್ಷತೆಯ ದೃಷ್ಟಿಯಿಂದ ಈ ಬೈಕ್‌ನಲ್ಲಿ ಸಿಂಗಲ್ ಚಾನಲ್ ಎಬಿಎಸ್ (Single-channel ABS) ಅನ್ನು ಸ್ಟ್ಯಾಂಡರ್ಡ್ ಆಗಿ ನೀಡಲಾಗಿದೆ. ಇದು ತುರ್ತು ಸಂದರ್ಭದಲ್ಲಿ ಬೈಕ್ ಸ್ಕಿಡ್ ಆಗದಂತೆ ತಡೆಯುತ್ತದೆ. ಸಂಕ್ಷಿಪ್ತವಾಗಿ ಹೇಳುವುದಾದರೆ, ನೀವು ಸ್ಟೈಲಿಶ್ ಆಗಿರುವ, ಆಧುನಿಕ ತಂತ್ರಜ್ಞಾನ ಹೊಂದಿರುವ ಮತ್ತು ಬಜೆಟ್ ಸ್ನೇಹಿ 150cc ಬೈಕ್ ಹುಡುಕುತ್ತಿದ್ದರೆ, ಹೊಸ 2026 ಬಜಾಜ್ ಪಲ್ಸರ್ 150 ಅತ್ಯುತ್ತಮ ಆಯ್ಕೆಯಾಗಿದೆ.

ಭಾರತದಲ್ಲಿ ಅತಿ ಹೆಚ್ಚು ಮಾರಾಟವಾಯ್ತು 77,777 ರೂ.ಗೆ ಸಿಗ್ತಿರುವ ಈ ಬೈಕ್

Roopa Hegde — Mon, 17 Aug 2026 14:22:01 +0530

ಭಾರತದ ರಸ್ತೆಗಳಲ್ಲಿ ಕಾರ್, ಬೈಕಿನದ್ದೇ ಕಾರುಬಾರು. ಮುಂದಿನ ದಿನಗಳಲ್ಲಿ ಈ ಸಂಖ್ಯೆ ಮತ್ತಷ್ಟು ಹೆಚ್ಚಾಗ್ತಿದೆ. ಈ ವರ್ಷ ಜುಲೈನಲ್ಲಿ ಭಾರತದಲ್ಲಿ ದ್ವಿಚಕ್ರ ವಾಹನ ಮಾರಾಟ ದಾಖಲೆ ಮಟ್ಟದಲ್ಲಿ ಏರಿದೆ. ದೇಶೀಯ ದ್ವಿಚಕ್ರ ವಾಹನಗಳ ಮಾರಾಟವು 1.923 ಮಿಲಿಯನ್ ಯುನಿಟ್ ಮೀರಿದೆ. ಕಳೆದ ವರ್ಷ ಜುಲೈನಲ್ಲಿ ಮಾರಾಟವಾದ 1.569 ಮಿಲಿಯನ್ ಯುನಿಟ್ಗಳಿಗೆ ಹೋಲಿಸಿದರೆ, ಇದು ವರ್ಷದಿಂದ ವರ್ಷಕ್ಕೆ ಶೇ 22.6 ರಷ್ಟು ಹೆಚ್ಚಳ ಕಾಣ್ತಿದೆ.

ಜುಲೈ 2026 ರಲ್ಲಿ 2.477 ಮಿಲಿಯನ್ ಯುನಿಟ್ಗಳಿಗೂ ಹೆಚ್ಚು ಯುನಿಟ್ಗಳನ್ನು ಮಾರಾಟ ಮಾಡಲಾಗಿದೆ. ಇದು ವರ್ಷದಿಂದ ವರ್ಷಕ್ಕೆ ಶೇ 23.7 ರಷ್ಟು ಹೆಚ್ಚಳವನ್ನು ಸೂಚಿಸುತ್ತದೆ. ದೇಶದ ಅತಿದೊಡ್ಡ ದ್ವಿಚಕ್ರ ವಾಹನ ತಯಾರಕರಾದ ಹೀರೋ ಮೋಟೋಕಾರ್ಪ್ನ ಆರಂಭಿಕ ಹಂತದ ಬೈಕ್, ಸ್ಪ್ಲೆಂಡರ್, ಜುಲೈ 2026 ರಲ್ಲಿ ಟಾಪ್ 10 ದ್ವಿಚಕ್ರ ವಾಹನ ಮಾರಾಟದಲ್ಲಿ ಮತ್ತೊಮ್ಮೆ ಅಗ್ರ ಸ್ಥಾನವನ್ನು ಪಡೆದುಕೊಂಡಿತು.

ಅತಿ ಹೆಚ್ಚು ಮಾರಾಟ ಕಂಡ ಹೀರೋ ಸ್ಪ್ಲೆಂಡರ್

ಭಾರತದಲ್ಲಿ ಹೀರೋ ಸ್ಪ್ಲೆಂಡರ್ ನಂಬರ್ ಒನ್ ಸ್ಥಾನದಲ್ಲಿದೆ. ದೇಶದಲ್ಲಿ ಅತಿ ಹೆಚ್ಚು ಮಾರಾಟವಾದ ಬೈಕ್ ಇದಾಗಿದೆ. ಇದ್ರ ಬೆಲೆ 77,777 ರಿಂದ ಪ್ರಾರಂಭವಾಗುತ್ತದೆ. ಕಂಪನಿ ಶೀಘ್ರದಲ್ಲೇ ಹೊಸ ಅಪ್ಗ್ರೇಡ್ಗಳೊಂದಿಗೆ ಬೈಕನ್ನು ಮಾರುಕಟ್ಟೆಗೆ ಬಿಡುವ ತಯಾರಿಯಲ್ಲಿದೆ ಎಂದು ಮೂಲಗಳು ತಿಳಿಸಿವೆ.

ಹೀರೋ ಸ್ಪ್ಲೆಂಡರ್ ಮಾರಾಟದಲ್ಲಿ ಶೇ. 35.9 ರಷ್ಟು ಹೆಚ್ಚಳ

ಜುಲೈ 2026 ರಲ್ಲಿ ಹೀರೋ ಸ್ಪ್ಲೆಂಡರ್ ಅಸಾಧಾರಣವಾಗಿ ಉತ್ತಮ ಪ್ರದರ್ಶನ ನೀಡಿದೆ. ಜುಲೈ 2025 ರಲ್ಲಿ 246,715 ಯುನಿಟ್ಗಳಿಂದ ಜುಲೈ 2026 ರಲ್ಲಿ 335,346 ಯುನಿಟ್ಗಳಿಗೆ ಮಾರಾಟ ಹೆಚ್ಚಾಗಿದೆ. ಇದು ವರ್ಷದಿಂದ ವರ್ಷಕ್ಕೆ ಮಾರಾಟದಲ್ಲಿ ಶೇ. 35.9 ರಷ್ಟು ಹೆಚ್ಚಳವನ್ನು ಕಾಣ್ತಿದೆ. ಹೀರೋ ಸ್ಪ್ಲೆಂಡರ್ 97.2 ಸಿಸಿ ಎಂಜಿನ್ನಿಂದ ನಿಯಂತ್ರಿಸಲ್ಪಡುತ್ತದೆ.

ಹೋಂಡಾ ಆಕ್ಟಿವಾಗೆ ಎರಡನೇ ಸ್ಥಾನ

ಹೋಂಡಾ ಆಕ್ಟಿವಾ 206,170 ಯುನಿಟ್ಗಳ ಮಾರಾಟದೊಂದಿಗೆ ಎರಡನೇ ಸ್ಥಾನದಲ್ಲಿದೆ. ಇದರ ಮಾರಾಟವು ವರ್ಷದಿಂದ ವರ್ಷಕ್ಕೆ ಶೇ 13.1 ರಷ್ಟು ಕಡಿಮೆಯಾಗಿದೆ. ಜುಲೈ 2025 ರಲ್ಲಿ, ಆಕ್ಟಿವಾ 237,413 ಯುನಿಟ್ಗಳನ್ನು ಮಾರಾಟ ಮಾಡಿದೆ. ಮಾರಾಟದಲ್ಲಿ ಕುಸಿತದ ಹೊರತಾಗಿಯೂ, ಆಕ್ಟಿವಾ ಟಾಪ್ 10 ರಲ್ಲಿ ತನ್ನ ಎರಡನೇ ಸ್ಥಾನವನ್ನು ಕಾಯ್ದುಕೊಳ್ಳುವಲ್ಲಿ ಯಶಸ್ವಿಯಾಗಿದೆ.

ಹೋಂಡಾ ಶೈನ್ ಮಾರಾಟದಲ್ಲಿ ಹೆಚ್ಚಳ

ಹೋಂಡಾ ಶೈನ್ ಕೂಡ ಮೂರನೇ ಸ್ಥಾನದಲ್ಲಿ ತನ್ನ ಸ್ಥಾನವನ್ನು ಕಾಯ್ದುಕೊಂಡಿದೆ. ಜುಲೈ 2026 ರಲ್ಲಿ, 191,950 ಯುನಿಟ್ ಮಾರಾಟವಾಗಿತ್ತು. ಜುಲೈ 2025 ರಲ್ಲಿ 159,658 ಯುನಿಟ್ ಮಾರಾಟವಾಗಿತ್ತು. ಇದನ್ನು ನೋಡಿದ್ರೆ ಶೈನ್ ಮಾರಾಟವು ವರ್ಷದಿಂದ ವರ್ಷಕ್ಕೆ ಶೇ 20.2 ರಷ್ಟು ಹೆಚ್ಚಾಗಿದೆ. ಇದರ ನಂತರ, ಟಿವಿಎಸ್ ಜೂಪಿಟರ್ ನಾಲ್ಕನೇ ಸ್ಥಾನದಲ್ಲಿದೆ. ಸುಜುಕಿ ಆಕ್ಸೆಸ್ ಐದನೇ ಸ್ಥಾನವನ್ನು ಪಡೆದುಕೊಂಡಿದೆ. ಇನ್ನು ಬಜಾಜ್ ಪಲ್ಸರ್ 66,156 ಯುನಿಟ್ ಮಾರಾಟದೊಂದಿಗೆ ಆರನೇ ಸ್ಥಾನದಲ್ಲಿದೆ. ಟಿವಿಎಸ್ ಅಪಾಚೆ, ಏಳನೇ ಸ್ಥಾನದಲ್ಲಿದೆ.

ಸ್ಪೋರ್ಟ್ಸ್ ಲುಕ್, ಹೆಚ್ಚು ಸ್ಟೈಲೀಶ್ ಯಮಹಾ YZF R2 ಬೈಕ್ ಭಾರತದಲ್ಲಿ ಬಿಡುಗಡೆ, ಬೆಲೆ ಎಷ್ಟು?

Chethan Kumar — Fri, 28 Aug 2026 15:53:00 +0530

ಬೆಂಗಳೂರು (ಆ.28) ಯಮಹಾ ಇಂಡಿಯಾ ಭಾರತದಲ್ಲಿ ಆಕರ್ಷಕ ಹಾಗೂ ಹೆಚ್ಚು ಸ್ಟೈಲೀಶ್ ಬೈಕ್ YZF-R2 ಬಿಡುಗಡೆ ಮಾಡಿದೆ. ಇದೇ ಮೊದಲ ಬಾರಿಗೆ ಭಾರತದ ಮೂಲಕ ಜಾಗತಿಕ ಮಾರುಕಟ್ಟೆಗೆ ಬೈಕ್ ಬಿಡುಗಡೆಯಾಗಿದೆ. ಸೂಪರ್‌ಸ್ಪೋರ್ಟ್ ಶೈಲಿ, ಹಗುರವಾದ ಚಾಸಿಸ್, ಆಧುನಿಕ ತಂತ್ರಜ್ಞಾನ ಮತ್ತುಡೈಲಿ ಬಳಕೆಗೆ ಅನುಕೂಲವಾಗುವ ಪರ್ಫಾಮೆನ್ಸ್ ಸೇರಿದಂತೆ ಹಲವುವ ಆಕರ್ಷಣೆಳು ಇದರಲ್ಲಿದೆ. ಜಪಾನ್‌ನಲ್ಲಿ ಅಭಿವೃದ್ಧಿಪಡಿಸಲಾದ ಹೊಸ ಎಂಜಿನ್ ಮತ್ತು ಭಾರತದಲ್ಲಿನ ಎಂಜಿನಿಯರಿಂಗ್ ತಂಡದ ಸಹಕಾರದೊಂದಿಗೆ ಬೈಕ್ ನಿರ್ಮಿಸಲಾಗಿದೆ.

ಹೊಸ ಬೈಕ್ ಬೆಲೆ

ಸ್ಟ್ಯಾಂಡರ್ಡ್ YZF-R2 ಬೆಲೆ 2,30,500 ರೂಪಾಯಿ (ಎಕ್ಸ್ ಶೋ ರೂಂ) ಕ್ವಿಕ್ ಶಿಫ್ಟರ್ ವೆರಿಯೆಂಟ್ 2,39,500 ರೂಪಾಯಿ ಹಾಗೂ ಟಾಪ್ YZF-R2M ವೆರಿಯೆಂಟ್ 2,53,000 ರೂ ( ಎಕ್ಸ್-ಶೋರೂಂ). ಬೇಸ್ ವೆರಿಯೆಂಟ್ ಮೆಟಾಲಿಕ್ ಬ್ಲ್ಯಾಕ್ ಮತ್ತು ಡಾರ್ಕ್ ಬ್ಲೂಯಿಷ್ ಗ್ರೇ ಬಣ್ಣಗಳಲ್ಲಿ ಲಭ್ಯವಿದೆ. ಕ್ವಿಕ್ ಶಿಫ್ಟರ್ ವೆರಿಯೆಂಟ್ ಮ್ಯಾಟ್ ವೈಟ್ ಪರ್ಲ್ ಮತ್ತು ರೇಸಿಂಗ್ ಬ್ಲೂ ಬಣ್ಣಗಳಲ್ಲಿ, R2M ಮೆಟಾಲಿಕ್ ಗ್ರೇ ಬಣ್ಣದಲ್ಲಿ ಸಿಗಲಿದೆ.

ಬೈಕ್ ಎಂಜಿನ್ ಹಾಗೂ ಪವರ್

200 ಸಿಸಿ ವಿಭಾಗದಲ್ಲಿ ಯಮಹಾದ ಮೊದಲ ಬೈಕ್ ಆಗಿರುವ YZF-R2, ಹೊಸ ತಲೆಮಾರಿನ ಸವಾರರನ್ನು ಗಮನದಲ್ಲಿಟ್ಟುಕೊಂಡು ಅಭಿವೃದ್ಧಿಪಡಿಸಲಾಗಿದೆ. ಬೈಕ್‌ನಲ್ಲಿ ಹೊಸ 204 ಸಿಸಿ ಎಂಜಿನ್ ನೀಡಲಾಗಿದೆ. ಎಂಜಿನ್‌ನ ಗರಿಷ್ಠ ಪವರ್, ಟಾರ್ಕ್ ಮತ್ತು ಅಧಿಕೃತ ಮೈಲೇಜ್ ಅಂಕಿಅಂಶಗಳನ್ನು ಕಂಪನಿ ಇನ್ನೂ ಬಹಿರಂಗಪಡಿಸಿಲ್ಲ. ಆದರೆ ಹಗುರವಾದ ವಿನ್ಯಾಸದಿಂದ ಉತ್ತಮ ಕಾರ್ಯಕ್ಷಮತೆ ಮತ್ತು ಇಂಧನ ದಕ್ಷತೆ ನಿರೀಕ್ಷಿಸಲಾಗಿದೆ. YZF-R2 ಕೇವಲ 149 ಕೆಜಿ ತೂಕ ಹೊಂದಿದ್ದು, ತನ್ನ ವಿಭಾಗದಲ್ಲೇ ಅತ್ಯಂತ ಹಗುರವಾದ ಬೈಕ್ ಎಂದು ಯಮಹಾ ಹೇಳಿದೆ.

ಏನಿದರ ವಿಶೇಷತೆ

ಹೊಸ ಹೈ-ಟೆನ್ಸೈಲ್ ಸ್ಟೀಲ್ ಟ್ಯೂಬ್ ಡೈಮಂಡ್ ಫ್ರೇಮ್ ಬೈಕ್‌ಗೆ ಉತ್ತಮ ಸ್ಥಿರತೆ ಮತ್ತು ಹ್ಯಾಂಡ್ಲಿಂಗ್ ನೀಡುತ್ತದೆ. 37 ಎಂಎಂ ಅಪ್‌ಸೈಡ್-ಡೌನ್ ಫ್ರಂಟ್ ಫೋರ್ಕ್‌ಗಳು ಹಾಗೂ ಹಿಂಭಾಗದಲ್ಲಿ ಮೊನೋಶಾಕ್ ಸಸ್ಪೆನ್ಷನ್ ಅಳವಡಿಸಲಾಗಿದೆ. 17 ಇಂಚಿನ ಟೈಯರ್, ಟ್ರ್ಯಾಕ್ಷನ್ ಕಂಟ್ರೋಲ್ ಸಿಸ್ಟಂ, ಅಸಿಸ್ಟ್ ಮತ್ತು ಸ್ಲಿಪ್ಪರ್ ಕ್ಲಚ್, ಡ್ಯುಯಲ್-ಚಾನೆಲ್ ಎಬಿಎಸ್ ಹಾಗೂ ಆಯ್ಕೆಮಾಡಬಹುದಾದ ರೈಡಿಂಗ್ ಮೋಡ್‌ಗಳೂ ಇವೆ.

YZF-R2ರ ಕ್ವಿಕ್ ಶಿಫ್ಟರ್ ವೆರಿಯೆಂಟ್‌ನಲ್ಲಿ ಸೆಗ್ಮೆಂಟ್‌ನ ಮೊದಲ ಮೂರನೇ ತಲೆಮಾರಿನ ಬೈ-ಡೈರೆಕ್ಷನಲ್ ಕ್ವಿಕ್ ಶಿಫ್ಟರ್ ಸೌಲಭ್ಯವಿದೆ. ಇದು ಕ್ಲಚ್ ಬಳಸದೆ ಗೇರ್‌ಗಳನ್ನು ಮೇಲಕ್ಕೆ ಮತ್ತು ಕೆಳಕ್ಕೆ ಬದಲಾಯಿಸಲು ನೆರವಾಗುತ್ತದೆ. 5 ಇಂಚಿನ ಫುಲ್-ಕಲರ್ TFT ಡಿಸ್‌ಪ್ಲೇ, ಸ್ಮಾರ್ಟ್ ಕನೆಕ್ಟಿವಿಟಿ ಮತ್ತು ಸೌಂಡ್-ಟ್ಯೂನ್ಡ್ ಎಕ್ಸಾಸ್ಟ್ ಕೂಡ ಪ್ರಮುಖ ವೈಶಿಷ್ಟ್ಯಗಳಾಗಿವೆ. R2M ವೆರಿಯೆಂಟ್‌ನಲ್ಲಿ ಅಡ್ಜಸ್ಟಬಲ್ ಫ್ರಂಟ್ ಫೋರ್ಕ್, ರಿಯರ್ ಶಾಕರ್, ಕ್ಲಚ್ ಲಿವರ್ ಮತ್ತು ಬ್ರೇಕ್ ಲಿವರ್ ನೀಡಲಾಗಿದೆ. ಈ ಬೈಕ್ ಸೆಪ್ಟೆಂಬರ್ 2026ರ ಮಧ್ಯಭಾಗದಿಂದ ದೇಶದ ಎಲ್ಲ ಬ್ಲೂ ಸ್ಕ್ವೇರ್ ಡೀಲರ್‌ಶಿಪ್‌ಗಳಲ್ಲಿ ಲಭ್ಯವಾಗಲಿದೆ

ಕಾರು, ಬೈಕ್‌ಗಳಿಗೆ ಹೊಸ ನಿಯಮ: ಹೈ ಬೀಮ್ ಹೆಡ್‌ಲೈಟ್ ಲೈಟ್ ಬಳಸಿದರೆ ಗಾಡಿಯಲ್ಲಿ ಬಾರಿಸಲಿದೆ ಅಲಾರಾಂ!

Santosh Naik — Wed, 26 Aug 2026 22:51:34 +0530

ನವದೆಹಲಿ (ಆ.26): ರಾತ್ರಿ ವೇಳೆಯಲ್ಲಿ ವಾಹನಗಳ ಹೈ ಬೀಮ್ ಹೆಡ್‌ಲೈಟ್‌ನಿಂದ (High Beam Headlight) ಎದುರಿಗೆ ಬರುವ ಚಾಲಕರ ಕಣ್ಣುಗಳು ಮಂಜಾಗುವುದನ್ನು ತಡೆಗಟ್ಟಲು ಹಾಗೂ ಸಂಭವಿಸುವ ಭೀಕರ ರಸ್ತೆ ಅಪಘಾತಗಳನ್ನು ನಿಯಂತ್ರಿಸಲು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ಹೆಡ್‌ಲೈಟ್ ನಿಯಮಗಳಲ್ಲಿ ಮಹತ್ವದ ಬದಲಾವಣೆಗೆ ಮುಂದಾಗಿದೆ. ಹೆಡ್‌ಲೈಟ್ ಬೆಳಕಿನ ತೀವ್ರತೆ ಮತ್ತು ಕಲರ್ ಟೆಂಪರೇಚರ್‌ಗೆ ಮಿತಿ ಹೇರಲು ಹೊಸ ಕಾನೂನು ಪ್ರಸ್ತಾವನೆಯನ್ನು ಸಿದ್ಧಪಡಿಸಲಾಗುತ್ತಿದೆ.

ಈ ಪ್ರಸ್ತಾವನೆಗೆ ಸಂಬಂಧಿಸಿದಂತೆ ಸಾರ್ವಜನಿಕ ಸಮಾಲೋಚನೆಗಾಗಿ 30 ದಿನಗಳ ಕಾಲಾವಕಾಶ ನೀಡಲಾಗಿದ್ದು, ಸಲಹೆ ಮತ್ತು ಆಕ್ಷೇಪಣೆಗಳನ್ನು ಆಹ್ವಾನಿಸಲಾಗಿದೆ. ಎಲ್ಲವೂ ಅಂದುಕೊಂಡಂತೆ ನಡೆದರೆ ಮುಂದಿನ ಏಪ್ರಿಲ್‌ನಿಂದ ಈ ನೂತನ ನಿಯಮಗಳು ಜಾರಿಗೆ ಬರಲಿವೆ. ಆಟೋ ಮೊಬೈಲ್ ತಜ್ಞ ಟೂಟೂ ಧವನ್ ಮತ್ತು ಹಿರಿಯ ಕಣ್ಣಿನ ತಜ್ಞ ಡಾ. (ಬ್ರಿಗೇಡಿಯರ್) ವಿಜಯ್ ಮಾಥುರ್ ಸರ್ಕಾರದ ಈ ನಿರ್ಧಾರವನ್ನು ಸ್ವಾಗತಿಸಿದ್ದು, ಇದು ಕಣ್ಣಿನ ಸುರಕ್ಷತೆ ಹಾಗೂ ಅಪಘಾತ ತಡೆಗೆ ಅತ್ಯಂತ ಅಗತ್ಯ ಹೆಜ್ಜೆ ಎಂದಿದ್ದಾರೆ.

ಹೊಸ ನೂತನ ಪ್ರಸ್ತಾವನೆಯಲ್ಲಿ ಏನಿದೆ?

ಗಾಡಿ ಸ್ಟಾರ್ಟ್ ಆಗುತ್ತಿದ್ದಂತೆ ಲೋ ಬೀಮ್: ಇನ್ಮುಂದೆ ಹೊಸದಾಗಿ ತಯಾರಾಗುವ ವಾಹನಗಳು (ವಿಶೇಷವಾಗಿ ದ್ವಿಚಕ್ರ ವಾಹನಗಳು) ಸ್ಟಾರ್ಟ್ ಆಗುತ್ತಿದ್ದಂತೆಯೇ ಹೆಡ್‌ಲೈಟ್ ಕೇವಲ 'ಲೋ ಬೀಮ್' (Low Beam) ಮೋಡ್‌ನಲ್ಲಿ ಮಾತ್ರ ಬೆಳಗಲಿದೆ. ಅಗತ್ಯಬಿದ್ದರೆ ಮಾತ್ರ ಚಾಲಕ ಅದನ್ನು 'ಹೈ ಬೀಮ್'ಗೆ ಬದಲಾಯಿಸಿಕೊಳ್ಳಬಹುದು. (ಈ ನಿಯಮ ಕೇವಲ ಹೊಸ ವಾಹನಗಳಿಗೆ ಅನ್ವಯಿಸಲಿದ್ದು, ಹಳೆಯ ವಾಹನಗಳಿಗೆ ಸದ್ಯಕ್ಕಿದ್ದ ವ್ಯವಸ್ಥೆಯೇ ಮುಂದುವರಿಯಲಿದೆ).

60 ಕಿ.ಮೀ ವೇಗದ ಮಿತಿಗೆ ಅಲಾರಾಂ ಬಿಪ್: ವಾಹನವು ಗಂಟೆಗೆ 60 ಕಿಲೋಮೀಟರ್‌ಗಿಂತ ಕಡಿಮೆ ವೇಗದಲ್ಲಿದ್ದಾಗ ಚಾಲಕ ಹೈ ಬೀಮ್ ಬಳಸಿದರೆ, ವಾಹನದಲ್ಲಿ ಸ್ಪೀಡ್ ವಾರ್ನಿಂಗ್ ಮಾದರಿಯಲ್ಲೇ ಅಲಾರಾಂ ಬಾರಿಸಲು ಶುರುವಾಗುತ್ತದೆ. ಆದರೆ, ಗಂಟೆಗೆ 60 ಕಿ.ಮೀ ಗಿಂತ ಹೆಚ್ಚಿನ ವೇಗದಲ್ಲಿ (ಹೆದ್ದಾರಿಗಳಲ್ಲಿ) ಈ ಅಲಾರಾಂ ನಿಯಮ ಅನ್ವಯಿಸುವುದಿಲ್ಲ.

ಬೆಳಕಿನ ತೀವ್ರತೆ (Intensity) ಕಡಿತ

ದ್ವಿಚಕ್ರ ವಾಹನಗಳ ಗರಿಷ್ಠ ಬೆಳಕಿನ ತೀವ್ರತೆಯನ್ನು 1.5 ಲಕ್ಷ ಕ್ಯಾಂಡಿಲಾದಿಂದ (Candela) 1 ಲಕ್ಷ ಕ್ಯಾಂಡಿಲಾಗೆ ಇಳಿಸಲು ಪ್ರಸ್ತಾಪಿಸಲಾಗಿದೆ. ಕಾರ್‌ಗಳ ತೀವ್ರತೆಯನ್ನು 2.25 ಲಕ್ಷ ಕ್ಯಾಂಡಿಲಾದಿಂದ 1.5 ಲಕ್ಷ ಕ್ಯಾಂಡಿಲಾಗೆ ಇಳಿಸಲು ಉದ್ದೇಶಿಸಲಾಗಿದೆ.

ಕಲರ್ ಟೆಂಪರೇಚರ್ ಮಿತಿ: ಅತಿಯಾದ ನೀಲಿ-ಬಿಳಿ ಬೆಳಕಿನಿಂದ ಕಣ್ಣು ಕೊರೈಸುವುದನ್ನು ತಡೆಯಲು ಹೆಡ್‌ಲೈಟ್ ಕಲರ್ ಟೆಂಪರೇಚರ್ ಅನ್ನು ಗರಿಷ್ಠ 6,500 ಕೆಲ್ವಿನ್ (Kelvin) ಗೆ ಸೀಮಿತಗೊಳಿಸಲಾಗುವುದು.

ಟ್ರಕ್-ಬಸ್‌ಗಳಿಗೆ ರಿಫ್ಲೆಕ್ಟಿವ್ ಟೇಪ್ ಕಡ್ಡಾಯ: ರಾತ್ರಿ ವಾತಾವರಣದಲ್ಲಿ ರಸ್ತೆಯಲ್ಲಿ ಸಾಗುವ ಬಸ್ ಮತ್ತು ಭಾರಿ ಸರಕು ಟ್ರಕ್‌ಗಳನ್ನು ಸ್ಪಷ್ಟವಾಗಿ ಗುರುತಿಸಲು ರಿಫ್ಲೆಕ್ಟಿವ್ ಸೇಫ್ಟಿ ಟೇಪ್ (Reflective Safety Tape) ಅಳವಡಿಸುವುದನ್ನು ಕಡ್ಡಾಯಗೊಳಿಸಲಾಗುವುದು.

ನಿಯಮ ಉಲ್ಲಂಘಿಸಿದರೆ ಭಾರಿ ದಂಡ ಮತ್ತು ಲೈಸೆನ್ಸ್ ರದ್ದು!

ಸಾರ್ವಜನಿಕ ರಸ್ತೆಗಳು ಮತ್ತು ಹೆದ್ದಾರಿಗಳಲ್ಲಿ ಅನಗತ್ಯವಾಗಿ ಹೈ ಬೀಮ್ ಹೆಡ್‌ಲೈಟ್ ಬಳಸಿ ಚಾಲನೆ ಮಾಡುವುದು ಕಂಡುಬಂದರೆ ಟ್ರಾಫಿಕ್ ಪೊಲೀಸರು ₹500 ರಿಂದ ₹1,500 ವರೆಗೆ ದಂಡ ವಿಧಿಸಲಿದ್ದಾರೆ. ಮೊದಲ ಬಾರಿಯ ಉಲ್ಲಂಘನೆ ₹500 ದಂಡ ವಿಧಿಸಲಾಗುತ್ತದೆ. ಮರುಕಳಿಸಿದರೆ, ₹1,500 ವರೆಗೆ ದಂಡ ವಿಧಿಸಲಾಗುತ್ತದೆ. ಪದೇ ಪದೇ ನಿಯಮ ಮುರಿಯುವುದು ಅಥವಾ ಹೈ ಬೀಮ್‌ನಿಂದಾಗಿ ರಸ್ತೆ ಅಪಘಾತ ಸಂಭವಿಸಿದರೆ ಚಾಲನಾ ಪರವಾನಗಿಯನ್ನು (Driving License) ಅಮಾನತುಗೊಳಿಸಲಾಗುತ್ತದೆ.

ಹೈ ಬೀಮ್ ಯಾವಾಗ ಬಳಸಬೇಕು? ಯಾವಾಗ ಬಳಸಬಾರದು?

ಯಾವಾಗ ಬಳಸಬಹುದು?:

ಬೆಳಕಿನ ವ್ಯವಸ್ಥೆ ಇಲ್ಲದ ಸಂಪೂರ್ಣ ಕತ್ತಲಾದ ಗ್ರಾಮೀಣ ಅಥವಾ ರಸ್ತೆಯ ಹೊರವಲಯದ ಭಾಗಗಳಲ್ಲಿ.
ಅಗಲವಾದ ಡಿವೈಡರ್ ಇರುವ ಹೆದ್ದಾರಿಗಳಲ್ಲಿ (ಎದುರಿನ ಚಾಲಕರ ಕಣ್ಣಿಗೆ ಲೈಟ್ ಬೀಳದಿದ್ದಾಗ).
ರಸ್ತೆಯಲ್ಲಿ ದೂರದಲ್ಲಿರುವ ಪ್ರಾಣಿಗಳು, ಗುಂಡಿಗಳು ಅಥವಾ ತಡೆಗೋಡೆಗಳನ್ನು ಸ್ಪಷ್ಟವಾಗಿ ವೀಕ್ಷಿಸಲು.

ಯಾವಾಗ ಬಳಸಬಾರದು?

ಎದುರಿನಿಂದ ವಾಹನ ಬಂದಾಗ: ಎದುರಿನಿಂದ ಯಾವುದೇ ವಾಹನ ಅಥವಾ ವ್ಯಕ್ತಿ ಬಂದ ತಕ್ಷಣ ತಕ್ಷಣವೇ ಹೆಡ್‌ಲೈಟ್ ಅನ್ನು 'ಲೋ ಬೀಮ್'ಗೆ ಬದಲಾಯಿಸಬೇಕು.
ನಗರ ಮತ್ತು ಜನನಿಬಿಡ ಪ್ರದೇಶಗಳಲ್ಲಿ: ನಗರದ ಒಳಗಿನ ರಸ್ತೆಗಳಲ್ಲಿ ಸದಾ ಲೋ ಬೀಮ್ ಹೆಡ್‌ಲೈಟ್‌ ಬಳಸಬೇಕು.
ಮಂಜು ಮತ್ತು ಮಳೆಯ ಸಮಯದಲ್ಲಿ: ದಟ್ಟವಾದ ಮಂಜು, ಭಾರಿ ಮಳೆ ಅಥವಾ ಹೊಗೆಯ ವಾತಾವರಣದಲ್ಲಿ ಹೈ ಬೀಮ್ ಹಾಕಬಾರದು. ಏಕೆಂದರೆ ಬೆಳಕು ಮಂಜಿಗೆ ಡಿಕ್ಕಿಯಾಗಿ ವಾಪಸ್ ನಿಮ್ಮ ಕಣ್ಣಿಗೇ ಪ್ರತಿಫಲಿಸಿ (Reflect) ರಸ್ತೆ ಕಾಣಿಸದಂತೆ ಮಾಡುತ್ತದೆ.

ಯೆಜ್ಡಿ ರೋಡ್‌ಸ್ಟರ್ ರೆಡ್ ವೋಲ್ಫ್ ಬೈಕ್ ಈಗ ಅಮೇಜಾನ್ , ಫ್ಲಿಪ್‌ಕಾರ್ಟ್‌ನಲ್ಲಿ ಲಭ್ಯ, ಭರ್ಜರಿ ಆಫರ್

Chethan Kumar — Sat, 22 Aug 2026 19:20:40 +0530

ಬೆಂಗಳೂರು (ಆ.22) ಜಾವಾ ಯೆಜ್ಡಿ ತನ್ನ ವ್ಯಾಪಾರ ವಹಿವಾಟನ್ನು ಆನ್‌ಲೈನ್ ಮೂಲಕ ಮತ್ತಷ್ಟು ವಿಸ್ತರಿಸುತ್ತಿದೆ. ಯೆಜ್ಡಿ ರೋಡ್‌ಸ್ಟರ್ ರೆಡ್ ವೋಲ್ಫ್ ಬೈಕ್ ಇದೀಗ ಅಮೇಜಾನ್ ಹಾಗೂ ಫ್ಲಿಪ್‌ಕಾರ್ಟ್‌ನಲ್ಲಿ ಲಭ್ಯವಿದೆ. ಎಲ್ಲಾ ಉತ್ಪನ್ನಗಳನ್ನು ಆನ್‌ಲೈನ್ ಮೂಲಕ ಖರೀದಿಸುವ ಗ್ರಾಹಕರಿಗೆ ಆಫರ್ ಇದ್ದೇ ಇರುತ್ತೆ. ಇದೀಗ ರೆಡ್ ವೋಲ್ಫ್ ಬೈಕ್ ಖರೀದಿ ವೇಳೆಯೂ ಗ್ರಾಹಕರಿಗೆ ಕೆಲ ಪ್ರಮುಖ ಆಫರ್ ನೀಡಲಾಗಿದೆ. ಈ ಸೌಲಭ್ಯಗಳು ಆನ್‌ಲೈನ್ ಮೂಲಕ ಖರೀದಿಸುವ ಗ್ರಾಹಕರಿಗೆ ಲಭ್ಯವಾಗಲಿದೆ.

ಯೆಜ್ಡಿ ರೋಡ್‌ಸ್ಟರ್ ರೆಡ್ ವೋಲ್ಫ್ ಆಫರ್

4 ವರ್ಷ ಅಥವಾ 50,000 ಕಿ.ಮೀ.ವರೆಗೆ ಸ್ಟ್ಯಾಂಡರ್ಡ್‌ ವಾರಂಟಿ
ವಿಸ್ತರಿತ ವಾರಂಟಿಯನ್ನು ಗರಿಷ್ಠ 6 ವರ್ಷಗಳವರೆಗೆ ಪಡೆಯುವ ಆಯ್ಕೆ
ಗರಿಷ್ಠ 8 ವರ್ಷಗಳವರೆಗೆ ರೋಡ್‌ಸೈಡ್‌ ಅಸಿಸ್ಟೆನ್ಸ್‌
ಗರಿಷ್ಠ 5 ವರ್ಷಗಳವರೆಗೆ ವಾರ್ಷಿಕ ನಿರ್ವಹಣಾ ಒಪ್ಪಂದದ ಆಯ್ಕೆ (ನಿಯಮಗಳು ಮತ್ತು ಷರತ್ತುಗಳಿಗೆ ಒಳಪಟ್ಟಿರುತ್ತವೆ)

ಬೈಕ್ ಬೆಲೆ ಎಷ್ಟು

ಯೆಜ್ಡಿ ರೋಡ್‌ಸ್ಟರ್ ರೆಡ್ ವೋಲ್ಫ್ ಬೈಕ್ ಬೆಲೆ 2.09 ಲಕ್ಷ ರೂಪಾಯಿ (ಎಕ್ಸ್ ಶೋ ರೂಂ). ಬೈಕ್ ಖರೀದಿಸುವ ಗ್ರಾಹಕರು ಅಮೇಜಾನ್ ಅಥವಾ ಪ್ಲಿಫ್‌ಕಾರ್ಟ್ ಮೂಲಕ ಬುಕಿಂಗ್ ಮಾಡಿಕೊಳ್ಳಬಹುದು. ಬುಕಿಂಗ್ ಮೊತ್ತವನ್ನು ಆನ್‌ಲೈನ್ ಮೂಲಕ ಪಾವತಿ ಮಾಡಿದ ಬಳಿಕ ಬೈಕ್ ಬುಕಿಂಗ್ ಖಚಿತಗೊಳ್ಳಲಿದೆ. ಬಳಿಕ ಉಳಿದ ಮೊತ್ತ ಹಾಗೂ ನೋಂದಣಿ ಪ್ರಕ್ರಿಯೆಗಳು ಹತ್ತಿರದ ಡೀಲರ್ ಮೂಲಕ ನಡೆಯಲಿದೆ.

ಆನ್‌ಲೈನ್ ಮೂಲಕ ಬೈಕ್ ಖರೀದಿ ಹೇಗೆ?

ಅಮೇಜಾನ್ ಅಥವ ಫ್ಲಿಪ್‌ಕಾರ್ಟ್‌ನಲ್ಲಿ ಯೆಜ್ಡಿ ರೋಡ್‌ಸ್ಟರ್ ರೆಡ್ ವೋಲ್ಫ್ ಬೈಕ್ ಆಯ್ಕೆ ಮಾಡಬೇಕು
ಎಕ್ಸ್‌-ಶೋರೂಂ ಬುಕ್ಕಿಂಗ್ ಮೊತ್ತವನ್ನು ಆನ್‌ಲೈನ್‌ನಲ್ಲಿ ಪಾವತಿಸಿ
ಈ ವೇಳೆ ಹತ್ತಿರದ ಅಧಿಕೃತ Yezdi ಡೀಲರ್‌ ಆರ್ಡರ್‌ ಖಚಿತಪಡಿಸುತ್ತಾರೆ
ಉಳಿದ ಆನ್‌-ರೋಡ್‌ ಮೊತ್ತವನ್ನು ಡೀಲರ್‌ಶಿಪ್‌ನಲ್ಲಿ ಪಾವತಿಸಬೇಕು
ಬೈಕ್‌ ನೋಂದಣಿ ಮತ್ತು ವಿಮೆ ಪ್ರಕ್ರಿಯೆ ಡೀಲರ್‌ಶಿಪ್‌ನಲ್ಲೇ ನಡೆಯಲಿದೆ
ನೋಂದಣಿ ಮತ್ತು ವಿಮೆ ಮುಗಿದ ಬಳಿಕ ಬೈಕ್‌ ಗ್ರಾಹಕರಿಗೆ ಹಸ್ತಾಂತರಿಸಲಾಗುತ್ತದೆ
ಆಕ್ಸೆಸರೀಸ್‌ ಮತ್ತು ಇತರ ಹೆಚ್ಚುವರಿ ವಸ್ತುಗಳನ್ನು ಸಹ ಡೀಲರ್‌ಶಿಪ್‌ ಮೂಲಕವೇ ಖರೀದಿಸಬೇಕು

ಹೊಚ್ಚ ಹೊಸ ಯೆಜ್ಡಿ ರೋಡ್‌ಸ್ಟರ್ ವೋಲ್ಫ್ ಬೈಕ್ 350 ಲಿಕ್ವಿಡ್ ಕೂಲ್ಡ್ ಎಂಜಿನ್ ಹೊಂದಿದೆ. 6 ಸ್ಪೀಡ್ ಗೇರ್‌ಬಾಕ್ಸ್, ಸ್ಲಿಪ್ಪರ್ ಕ್ಲಚ್ ಗೇರ್ ಹೊಂದಿದೆ. ವಿಶೇಷ ಅಂದರೆ ದೂರ ಪ್ರಯಾಣ, ಸಿಟಿ ರೈಡ್ ಸೇರಿದಂತೆ ಎಲ್ಲಾ ರಸ್ತೆಗೂ ಇದು ಸೈ ಎನಿಸಿಕೊಳ್ಳಲಿದೆ. ವಿಶೇಷವಾಗಿ ದೀರ್ಘ ಪ್ರಯಾಣಕ್ಕೆ ಅನುಗುಣವಾಗಿ ಬೈಕ್ ವಿನ್ಯಾಸಗೊಳಿಸಲಾಗಿದೆ. ಆರಾಮದಾಯಕ ರೈಡಿಂಗ್ ಹಾಗೂ ಅತ್ಯುತ್ತಮ ರೈಡಿಂಗ್ ಫೀಲ್ ಸಿಗಲಿದೆ.

ಫ್ಯಾಮಿಲಿಗಾಗಿ ಬಂತು ಉದ್ದನೆಯ ಸೀಟಿನ ಹೊಸ ಏಥರ್ ಇವಿ ಸ್ಕೂಟರ್: ಮೆಟಲ್ ಬಾಡಿ, 200 ಕಿ.ಮೀ ರೇಂಜ್!

Sathish Kumar KH — Mon, 24 Aug 2026 20:43:51 +0530

ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ಮಾರುಕಟ್ಟೆಯಲ್ಲಿ ಏಥರ್‌ ಎನರ್ಜಿ ಹೊಸ ಸಂಚಲನ ಸೃಷ್ಟಿಸಲು ಸಜ್ಜಾಗಿದೆ. ಕಂಪನಿ ತನ್ನ ಹೊಚ್ಚ ಹೊಸ ಎಲೆಕ್ಟ್ರಿಕ್ ಸ್ಕೂಟರ್ 'ಕೊನಾರ್ಕ್' ಅನ್ನು ಆಗಸ್ಟ್ 29 ರಂದು ಅಧಿಕೃತವಾಗಿ ಪರಿಚಯಿಸಲಿದೆ. ಏಥರ್‌ ಕಮ್ಯೂನಿಟಿ ದಿನದ ಅಂಗವಾಗಿ ಈ ಹೊಸ ಸ್ಕೂಟರ್ ಮಾರುಕಟ್ಟೆಗೆ ಎಂಟ್ರಿ ಕೊಡಲಿದೆ. ಕಳೆದ ಕೆಲವು ತಿಂಗಳುಗಳಿಂದ 'ಕೊನಾರ್ಕ್' ಸ್ಕೂಟರ್‌ನ ಟೆಸ್ಟ್ ರೈಡ್ ಚಿತ್ರಗಳು ಹಲವು ಬಾರಿ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದವು. ಈಗ, ಏಥರ್‌ ಸಿಇಒ ತರುಣ್ ಮೆಹ್ತಾ ಅವರು ಹಂಚಿಕೊಂಡಿರುವ ಹೊಸ ಟೀಸರ್, ಈ ವಾಹನದ ಕೆಲವು ಪ್ರಮುಖ ಫೀಚರ್‌ಗಳ ಬಗ್ಗೆ ಇನ್ನಷ್ಟು ಕುತೂಹಲ ಮೂಡಿಸಿದೆ.

ಮೆಟಲ್ ಬಾಡಿ ಇರಲಿದೆಯೇ?

ಹೊಸ ಟೀಸರ್‌ನಲ್ಲಿ ಎಲ್ಲರ ಗಮನ ಸೆಳೆದಿದ್ದು ಸಿಇಒ ತರುಣ್ ಮೆಹ್ತಾ ಅವರು ಸ್ಕೂಟರ್‌ನ ಬಾಡಿ ಪ್ಯಾನೆಲ್‌ಗೆ ಮ್ಯಾಗ್ನೆಟ್ (ಕಾಂತ) ಅಂಟಿಸುವ ದೃಶ್ಯ. ಇದು ಸ್ಕೂಟರ್‌ನ ಕೆಲವು ಭಾಗಗಳನ್ನಾದರೂ ಮೆಟಲ್‌ನಿಂದ (ಲೋಹ) ಮಾಡಿರಬಹುದು ಎಂಬ ಸ್ಪಷ್ಟ ಸುಳಿವು ನೀಡುತ್ತಿದೆ. ಈ ಬಗ್ಗೆ ಏಥರ್‌ ಇನ್ನೂ ಅಧಿಕೃತವಾಗಿ ಏನೂ ಹೇಳಿಲ್ಲ. ಆದರೆ ಇದು ನಿಜವಾದರೆ, ಹೋಂಡಾ ಆಕ್ಟಿವಾ ಮತ್ತು ಬಜಾಜ್ ಚೇತಕ್‌ನಂತಹ ಮೆಟಲ್ ಬಾಡಿ ಸ್ಕೂಟರ್‌ಗಳ ಸಾಲಿಗೆ ಕೊನಾರ್ಕ್ ಕೂಡ ಸೇರಲಿದೆ.

ಕುಟುಂಬದ ಬಳಕೆಗೆಂದೇ ಹೊಸ ಸ್ಕೂಟರ್

ವರದಿಗಳ ಪ್ರಕಾರ, ಕೊನಾರ್ಕ್ ಸ್ಕೂಟರ್ ಅನ್ನು ಹೊಸ 'ಇಎಲ್' ಪ್ಲಾಟ್‌ಫಾರ್ಮ್ ಆಧಾರದ ಮೇಲೆ ನಿರ್ಮಿಸಲಾಗಿದೆ. ಪರ್ಫಾರ್ಮೆನ್ಸ್‌ಗೆ ಹೆಚ್ಚು ಒತ್ತು ನೀಡುವ 450 ಸೀರೀಸ್‌ಗಿಂತ ಭಿನ್ನವಾಗಿ, ಕೊನಾರ್ಕ್ ದೈನಂದಿನ ಬಳಕೆ, ಪ್ರಾಕ್ಟಿಕಾಲಿಟಿ ಮತ್ತು ಆರಾಮದಾಯಕ ಪ್ರಯಾಣಕ್ಕೆ ಹೆಚ್ಚು ಆದ್ಯತೆ ನೀಡಲಿದೆ. ಇದರಲ್ಲಿ ಮಲ್ಟಿಪಲ್ ರೈಡಿಂಗ್ ಮೋಡ್‌ಗಳು, ರಿವರ್ಸ್ ಅಸಿಸ್ಟ್, ಮತ್ತು ಹಿಲ್-ಹೋಲ್ಡ್ ಕಂಟ್ರೋಲ್‌ನಂತಹ ಫೀಚರ್‌ಗಳನ್ನು ನಿರೀಕ್ಷಿಸಲಾಗಿದೆ. ಒಟ್ಟಿನಲ್ಲಿ, ಇದು ಕುಟುಂಬ ಬಳಕೆದಾರರನ್ನು ಗುರಿಯಾಗಿಸಿಕೊಂಡ ಪ್ರಾಕ್ಟಿಕಲ್ ಎಲೆಕ್ಟ್ರಿಕ್ ಸ್ಕೂಟರ್ ಆಗಿರಲಿದೆ.

ಉದ್ದದ ಸೀಟ್, ಫ್ಲಾಟ್ ಫ್ಲೋರ್‌ಬೋರ್ಡ್

ಹೊರಬಂದಿರುವ ಟೆಸ್ಟ್ ರೈಡ್ ಚಿತ್ರಗಳ ಪ್ರಕಾರ, ಈ ಸ್ಕೂಟರ್ ಹ್ಯಾಂಡಲ್‌ಬಾರ್‌ಗೆ ಜೋಡಿಸಲಾದ ಹೆಡ್‌ಲೈಟ್, ಉದ್ದವಾದ ಸೀಟ್ ಮತ್ತು ಸಮತಟ್ಟಾದ ಫ್ಲೋರ್‌ಬೋರ್ಡ್ ಹೊಂದಿರಲಿದೆ. ನಗರದ ಪ್ರಯಾಣಗಳಲ್ಲಿ ಇದು ಹೆಚ್ಚು ಅನುಕೂಲಕರವಾಗಿರುತ್ತದೆ. ಸಸ್ಪೆನ್ಷನ್ ವಿಚಾರಕ್ಕೆ ಬಂದರೆ, ಮುಂಭಾಗದಲ್ಲಿ ಟೆಲಿಸ್ಕೋಪಿಕ್ ಫೋರ್ಕ್‌ಗಳು, 14-ಇಂಚಿನ ಫ್ರಂಟ್ ವೀಲ್ ಮತ್ತು 12-ಇಂಚಿನ ರಿಯರ್ ವೀಲ್ ಇರಬಹುದು. ಹಾಗೆಯೇ, ಫ್ರಂಟ್ ಡಿಸ್ಕ್ ಬ್ರೇಕ್ ಮತ್ತು ರಿಯರ್ ಡ್ರಮ್ ಬ್ರೇಕ್ ಸಿಸ್ಟಮ್ ಅನ್ನು ನಿರೀಕ್ಷಿಸಲಾಗಿದೆ.

ಸ್ಮಾರ್ಟ್ ಫೀಚರ್‌ಗಳೂ ಇರಲಿವೆ

ಕೊನಾರ್ಕ್‌ನಲ್ಲಿ ಟಿಎಫ್‌ಟಿ ಇನ್‌ಸ್ಟ್ರುಮೆಂಟ್ ಕ್ಲಸ್ಟರ್ ಮತ್ತು ಸ್ಮಾರ್ಟ್‌ಫೋನ್ ಕನೆಕ್ಟಿವಿಟಿ ಸೌಲಭ್ಯಗಳು ಸಿಗುವ ಸಾಧ್ಯತೆಯಿದೆ. ವಾಯ್ಸ್ ಕಮಾಂಡ್, ರಸ್ತೆ ಗುಂಡಿಗಳ ಬಗ್ಗೆ ಎಚ್ಚರಿಕೆ, ಟೋ ಅಲರ್ಟ್, ಅಪಘಾತದ ಸಂದರ್ಭದಲ್ಲಿ ಮಾಹಿತಿ ನೀಡುವಂತಹ ಫೀಚರ್‌ಗಳಿರುವ ಏಥರ್‌‌ನ 'ಸ್ಟಾಕ್ 7.0' ಸಿಸ್ಟಮ್ ಕೂಡ ಇದರಲ್ಲಿರಬಹುದು. ಅಷ್ಟೇ ಅಲ್ಲ, ಸ್ಮಾರ್ಟ್‌ಫೋನ್ ಸಂಪರ್ಕವಿಲ್ಲದೆಯೇ ಕೆಲಸ ಮಾಡುವ ಆನ್‌ಬೋರ್ಡ್ ನ್ಯಾವಿಗೇಷನ್ ವ್ಯವಸ್ಥೆಯು ಕೊನಾರ್ಕ್‌ನ ಪ್ರಮುಖ ವಿಶೇಷತೆಗಳಲ್ಲಿ ಒಂದಾಗಬಹುದು.

200 ಕಿಲೋಮೀಟರ್‌ವರೆಗೂ ರೇಂಜ್?

ಲಭ್ಯವಿರುವ ಮಾಹಿತಿಯ ಪ್ರಕಾರ, ಕೊನಾರ್ಕ್ ಒಟ್ಟು 6 ವೇರಿಯೆಂಟ್‌ಗಳಲ್ಲಿ ಬರಬಹುದು. ಇದರಲ್ಲಿ 4 'ಎಸ್' ಟ್ರಿಮ್‌ಗಳು ಮತ್ತು 2 ಹೈ-ಸ್ಪೆಕ್ 'ಕ್ಯೂ' ವೇರಿಯೆಂಟ್‌ಗಳು ಇರಲಿವೆ ಎನ್ನಲಾಗಿದೆ. ವೇರಿಯೆಂಟ್‌ಗೆ ಅನುಗುಣವಾಗಿ 100 ಕಿ.ಮೀ.ನಿಂದ 200 ಕಿ.ಮೀ.ವರೆಗೂ ರೇಂಜ್ ನೀಡುವ ಮಾದರಿಗಳು ಲಭ್ಯವಾಗಬಹುದು. ಆದರೆ, ನಿಖರವಾದ ಬ್ಯಾಟರಿ ಸಾಮರ್ಥ್ಯ ಮತ್ತು ರೇಂಜ್ ಬಗ್ಗೆ ಏಥರ್‌ ಕಂಪನಿ ಆಗಸ್ಟ್ 29 ರಂದೇ ಖಚಿತಪಡಿಸಲಿದೆ.

ಬ್ಯಾಟರಿಯನ್ನು ಬಾಡಿಗೆಗೆ ಪಡೆಯಬಹುದೇ?

ಕೊನಾರ್ಕ್ ಜೊತೆಗೆ 'ಬ್ಯಾಟರಿ ಆಸ್ ಎ ಸರ್ವಿಸ್' (BaaS) ಎಂಬ ವ್ಯವಸ್ಥೆಯನ್ನು ಪರಿಚಯಿಸುವ ಬಗ್ಗೆಯೂ ವರದಿಗಳಿವೆ. ಈ ವ್ಯವಸ್ಥೆಯಲ್ಲಿ, ಗ್ರಾಹಕರು ಬ್ಯಾಟರಿ ಇಲ್ಲದೆ ಸ್ಕೂಟರ್ ಖರೀದಿಸಿ, ಬ್ಯಾಟರಿಗಾಗಿ ಮಾಸಿಕ ಬಾಡಿಗೆ ಪ್ಲಾನ್ ಆಯ್ಕೆ ಮಾಡಿಕೊಳ್ಳಬಹುದು. ಇದರಿಂದ ಸ್ಕೂಟರ್ ಖರೀದಿಸುವ ಆರಂಭಿಕ ವೆಚ್ಚ ಗಣನೀಯವಾಗಿ ಕಡಿಮೆಯಾಗಲಿದೆ. ಕೊನಾರ್ಕ್‌ನ ಬೆಲೆ, ಬ್ಯಾಟರಿ ಆಯ್ಕೆಗಳು, ರೇಂಜ್ ಮತ್ತು BaaS ವ್ಯವಸ್ಥೆಯ ಕುರಿತಾದ ಎಲ್ಲಾ ವಿವರಗಳು ಆಗಸ್ಟ್ 29 ರಂದು ನಡೆಯುವ ಏಥರ್‌ ಕಮ್ಯೂನಿಟಿ ದಿನದಂದು ಬಹಿರಂಗಗೊಳ್ಳಲಿವೆ.

ಟಿವಿಎಸ್ ಐಕ್ಯೂಬ್ ಮಿಲಿಯನ್ಆರ್ ಎಡಿಶನ್ ಎಲೆಕ್ಟ್ರಿಕ್ ಸ್ಕೂಟರ್ ಲಾಂಚ್, ಬೆಲೆ ಎಷ್ಟು?

Chethan Kumar — Wed, 26 Aug 2026 13:29:48 +0530

ಬೆಂಗಳೂರು (ಆ.26) ಭಾರತದಲ್ಲಿ ಹಲವು ಇವಿ ಸ್ಕೂಟರ್ ಲಭ್ಯವಿದೆ. ಜೊತೆಗೆ ಹೊಸ ಹೊಸ ಇವಿ ಸ್ಕೂಟರ್ ಬಿಡುಗಡೆಯಾಗುತ್ತಿದೆ. ಈ ಪೈಕಿ ಟಿವಿಎಸ್ ಬಿಡುಗಡೆ ಮಾಡಿರುವ ಐಕ್ಯೂಬ್ ಇದೀಗ ಹೊಸ ಅವತಾರದಲ್ಲಿ ಬಿಡುಗಡೆಯಾಗಿದೆ. ಟಿವಿಎಸ್ ಐಕ್ಯೂಬ್ ಮಿಲಿಯನ್ಆರ್ ಸ್ಕೂಟರ್ ಅತ್ಯಂತ ಆಕರ್ಷಕ ಬಣ್ಣ, ಆಕರ್ಷಕ ವಿನ್ಯಾಸ ಹಾಗೂ ಹೆಚ್ಚುವರಿ ಫೀಚರ್ಸ್ ಜೊತೆ ಬಿಡುಗಡೆಯಾಗಿದೆ.

ಹೊಸ ಸ್ಕೂಟರ್ ಬೆಲೆ

ಟಿವಿಎಸ್ ಮಿಲಿಯನ್ಆರ್ ಎಡಿಶನ್ ಸ್ಕೂಟರ್ ಬೆಲೆ 1.40 ಲಕ್ಷ ರೂಪಾಯಿ. ಈ ಸ್ಪೆಷಲ್ ಎಡಿಶನ್ ಸ್ಕೂಟರ್ ಮಾರುಕಟ್ಟೆಯಲ್ಲಿ ಲಭ್ಯವಿರುವ ಪ್ರಮಾಣಿತ 3.5kWh ವೇರಿಯೆಂಟ್‌ಗಿಂತ ಕೇವಲ 3,551 ರೂಪಾಯಿ ಹೆಚ್ಚಿನ ಬೆಲೆಯಲ್ಲಿ ಲಭ್ಯವಿದೆ. ಈ ಸಣ್ಣ ಹೆಚ್ಚುವರಿ ಮೊತ್ತಕ್ಕೆ ಗ್ರಾಹಕರು 3.5 ಲೀಟರ್‌ಗಳ ಹೆಚ್ಚುವರಿ ಸ್ಟೋರೇಜ್ ಸ್ಪೇಸ್ ಮತ್ತು USB Type-C ಪೋರ್ಟ್ ಪಡೆಯುತ್ತಾರೆ. ಹೆಚ್ಚಿನ ಪ್ರಾಯೋಗಿಕತೆ ಬಯಸುವ ಖರೀದಿದಾರರಿಗೆ ಇದು ಉತ್ತಮ ಆಯ್ಕೆಯಾಗಿದೆ.

10 ಲಕ್ಷ ಗ್ರಾಹಕರ ಮೈಲಿಗಲ್ಲು

TVS iQube ಸ್ಕೂಟರ್ 10 ಲಕ್ಷ ಗ್ರಾಹಕರನ್ನು ತಲುಪಿದ ಸಾಧನೆಯನ್ನು ಆಚರಿಸಲು ಈ MillionR ಎಡಿಷನ್ ಅನ್ನು ಪರಿಚಯಿಸಲಾಗಿದೆ. 2016ರಲ್ಲಿ TVS Jupiter ಸ್ಕೂಟರ್ 10 ಲಕ್ಷ ಮಾರಾಟವಾದಾಗ ಅದನ್ನು ಆಚರಿಸಲು MillionR ಬ್ಯಾಡ್ಜ್ ಅನ್ನು ನೀಡಲಾಗಿತ್ತು. ಅದೇ ರೀತಿ ಈಗ iQubeಗೂ ಈ ವಿಶೇಷ ಗೌರವ ನೀಡಲಾಗಿದೆ.

ಬ್ಯಾಟರಿ ಮತ್ತು ಪರ್ಫಾರ್ಮೆನ್ಸ್, ಹೊಸತನ

MillionR ಎಡಿಷನ್‌ನಲ್ಲಿ ಬ್ಯಾಟರಿ, ಮೋಟಾರ್ ಮತ್ತು ಪರ್ಫಾರ್ಮೆನ್ಸ್ ವಿವರಗಳು ಪ್ರಮಾಣಿತ ಮಾದರಿಯಂತೆಯೇ ಇವೆ. ಯಾವುದೇ ಬದಲಾವಣೆಗಳಿಲ್ಲ. 3.5 ಲೀಟರ್ ಹೆಚ್ಚುವರಿ ಸ್ಟೋರೇಜ್ ಸ್ಪೇಸ್ ನೀಡಲಾಗಿದೆ. USB Type-C ಪೋರ್ಟ್ ಸೇರಿದಂತೆ ಕೆಲ ಹೊತನಗಳೂ ಇದರಲ್ಲಿದೆ.

ಮಿಲಿಯನ್ ಆರ್ ಬ್ಯಾಡ್ಜಿಂಗ್ ನೀಡಲಾಗಿದೆ. ಹೊಸ ಸ್ಕೂಟರ್ ಬುಕಿಂಗ್ ಆರಂಭಗೊಂಡಿದ್ದು, ಗ್ರಾಹಕರು ಅಧಿಕೃತ ಡೀಲರ್‌ಗಳಲ್ಲಿ ಖರೀದಿಸಲು ಸಾಧ್ಯ

ಸೇನೆಯ ಗೂರ್ಖಾ ರಿಜಿಮೆಂಟ್ ಪ್ರೇರಿತ ರಾಯಲ್ ಎನ್‌ಫೀಲ್ಡ್ ಕ್ಲಾಸಿಕ್ 350 ಗೂರ್ಖಾ ಎಡಿಶನ್ ಬೈಕ್ ಲಾಂಚ್

Chethan Kumar — Tue, 18 Aug 2026 17:33:49 +0530

ಬೆಂಗಳೂರು (ಆ.18) ಭಾರತೀಯ ಸೇನೆಯ ಗೂರ್ಖಾ ರೆಜಿಮೆಂಟ್ ಶೌರ್ಯ, ಧೈರ್ಯ, ಸಾಹಸಕ್ಕೆ ಹೆಸರುವಾಸಿಯಾಗಿದೆ. ಈ ಗೂರ್ಖಾ ರೆಜಿಮೆಂಟ್‌ಗೆ ಗೌರವ ಸಲ್ಲಿಸಲು ರಾಯಲ್ ಎನ್‌ಫೀಲ್ಡ್ ಕ್ಲಾಸಿಕ್ 350 ಗೂರ್ಖಾ ಎಡಿಶನ್ ಬೈಕ್ ಲಾಂಚ್ ಆಗಿದೆ. ಮಿಲಿಟರಿ ಗ್ರೀನ್ ಬಣ್ಣದಲ್ಲಿ ಹೊಸ ಗೂರ್ಖಾ ಎಡಿಶನ್ ಬೈಕ್ ಲಾಂಚ್ ಆಗಿದೆ. ಇದರೊಂದಿಗೆ ಭಾರತೀಯ ಸೇನೆಯ ಗೂರ್ಖಾ ರೆಜಿಮೆಂಟ್‌ನಲ್ಲಿ ಸೇವ ಸಲ್ಲಿಸಿದ ಹಾಗೂ ಸಲ್ಲಿಸುತ್ತಿರುವ ಯೋಧರಿಗೆ ರಾಯಲ್ ಎನ್‌ಫೀಲ್ಡ್ ತನ್ನದೇ ರೀತಿಯಲ್ಲಿ ಗೌರವ ನೀಡಿದೆ. ವಿಶೇಷ ಅಂದರೆ ಈ ಬೈಕ್‌ನಲ್ಲಿ ಗೂರ್ಖಾ ರಿಜಿಮೆಂಟ್‌ನ ಖುಕ್ರಿ ಲೋಗೋ ನೀಡಲಾಗಿದೆ.

ಹೊಸ ಗೂರ್ಖಾ ಎಡಿಶನ್ ಬೈಕ್ ಬೆಲೆ

ಹೊಸ ರಾಯಲ್ ಎನ್‌ಫೀಲ್ಡ್ ಕ್ಲಾಸಿಕ್ 350 ಗೂರ್ಖಾ ಎಡಿಶನ್ ಬೈಕ್ ಬೆಲೆ 2,10,684 ರೂಪಾಯಿ (ಎಕ್ಸ್ ಶೋ ರೂಂ). ಗೂರ್ಖಾ ಎಡಿಶನ್ ಬೈಕ್ ಬುಕಿಂಗ್ ಕೂಡ ಆರಂಭಗೊಂಡಿದೆ. ಆಕರ್ಷಕ ಬೆಲೆಯಲ್ಲಿ ಹಾಗೂ ವಿಶೇಷ ಎಡಿಶನ್ ಬೈಕ್ ಲಭ್ಯವಿದ್ದು, ಬೈಕ್ ಪ್ರೀಯರು ಸ್ಪೆಷಲ್ ಎಡಿಶನ್ ಬೈಕ್ ಖರೀದಿಗೆ ಮುಂದಾಗಿದ್ದಾರೆ.

ಗೂರ್ಖಾ ಎಡಿಶನ್ ಬೈಕ್ ಜೆ ಸೀರಿಸ್ ಎಂಜಿನ್ ಹೊಂದಿದೆ. ಆ್ಯಸಿಸ್ಟ್ ಹಾಗೂ ಸ್ಲಿಪ್ಪರ್ ಕ್ಲಚ್ ನೀಡಲಾಗಿದೆ. ಇದರಿಂದ ಗೇರ್ ಬದಲಾವಣೆ ಸ್ಮೂತ್ ಆಗಿ ಮಾಡಲು ಸಾಧ್ಯವಿದೆ. ವೈಬ್ರೇಶನ್ ಸೇರಿದಂತೆ ಹಲವು ದೂರುಗಳಿಗೂ ಸ್ಪಂದಿಸಲಾಗಿತ್ತು. ರಾಯಲ್ ಎನ್‌ಫೀಲ್ಡ್ ಎಂಜಿನ್ ಹಾಗೂ ಫೀಚರ್‌ನಲ್ಲಿ ಭಾರಿ ಹೊಸತನ ನೀಡಲಾಗಿದೆ. ಮೊಬೈಲ್ ಚಾರ್ಜಿಂಗ್, ಫಾಸ್ಟ್ ಚಾರ್ಜಿಂಗ್ ಸೇರಿದಂತೆ ಹಲವು ವಿಶೇಷತೆಗಳನ್ನು ಈ ಬೈಕ್ ಹೊಂದಿದೆ.

ಗೂರ್ಖಾ ಕಲೆಕ್ಷನ್

ಗೂರ್ಖಾ ಎಡಿಶನ್ ಬೈಕ್‌ನಲ್ಲಿ ರೈಡಿಂಗ್ ಅಪರೆಲ್ ಹಾಗೂ ಗೇರ್ ಕಲೆಕ್ಷನ್ ಅನಾವರಣ ಮಾಡಲಾಗಿದೆ. ಡ್ಯುಯೆಲ್ ಜೆಟ್ ಹಾಗೂ ಕ್ವೆಸ್ಟ್ ಹಲ್ಮೆಟ್, ಆ್ಯಂಕಲ್ ಲೆದರ್ ಬೂಟ್, ಹೆಡ್‌ಗೇರ್ಸ ಮಿಲಿಟರಿ ಶೈಲಿಯ ಜಾಕೆಟ್, ಉಡುಪುಗಳು ಸೇರಿವೆ. ಹಸಿರು, ಮ್ಯಾಟ್ ಬ್ಲಾಕ್ , ಕಂಚಿನ ಬಣ್ಣಗಳಲ್ಲಿ ರೈಡಿಂಗ್ ಗೇರ್ ಲಭ್ಯವಿದೆ. ಈ ಮೂಲಕ ಅತ್ಯಾಕರ್ಷಕ ಲುಕ್ ನೀಡಲಿದೆ.

ಗೂರ್ಖಾ ಪಡೆಯ ಸಾಹಸ ಮತ್ತು ನಿಷ್ಠೆಗೆ ಈ ಬೈಕ್ ಮೂಲಕ ನಾವು ನಮನ ಸಲ್ಲಿಸುತ್ತಿದ್ದೇವೆ ಎಂದು ರಾಯಲ್ ಎನ್‌ಫೀಲ್ಡ್ ಸಿಒಒ ಯದ್ವಿಂದರ್ ಸಿಂಗ್ ಗುಲೇರಿಯಾ ಹೇಳಿದ್ದಾರೆ. ಹಾಗೆಯೇ ಗೂರ್ಖಾ ಬ್ರಿಗೇಡ್ ಅಧ್ಯಕ್ಷ ಲೆಫ್ಟಿನೆಂಟ್ ಜನರಲ್ ಸಂಜೀವ್ ಚೌಹಾಣ್ ಮಾತನಾಡಿ, ನಮ್ಮ ಯೋಧರ ತ್ಯಾಗ ಮತ್ತು ಶಿಸ್ತನ್ನು ಗೌರವಿಸಿ ರಾಯಲ್ ಎನ್‌ಫೀಲ್ಡ್ ನಿರ್ಮಿಸಿರುವ ಈ ಬೈಕ್ ಗೂರ್ಖಾ ಪರಂಪರೆಗೆ ಸಂದ ಗೌರವ ಎಂದು ಸಂತಸ ವ್ಯಕ್ತಪಡಿಸಿದರು.

ಬಜಾಜ್ ಪಲ್ಸರ್ ಬೈಕ್‌ಗೆ 25 ವರ್ಷದ ಸಂಭ್ರಮದಲ್ಲಿ ಕೈಗೆಟುಕುವ ದರದಲ್ಲಿ ಹೊಸ ಪಲ್ಸರ್ ಲಾಂಚ್

Chethan Kumar — Fri, 28 Aug 2026 16:09:52 +0530

ಬೆಂಗಳೂರು (ಆ.28) ಭಾರತದಲ್ಲಿ ಬಜಾಜ್ ಪಲ್ಸರ್ ಮಾಡಿದ ಮೋಡಿ ಅಷ್ಟಿಷ್ಟಲ್ಲ. ಕಾಲೇಜು ಹುಡುಗರಿಂದ ಹಿಡಿದು ಎಲ್ಲರಿಗೂ ಪಲ್ಸರ್ ಬೈಕ್ ನೆಚ್ಚಿನ ಬೈಕ್ ಆಗಿ ಮಾರ್ಪಟ್ಟಿತ್ತು. ಭಾರತದ ಬೈಕ್ ಸವಾರರ ಬೇಡಿಕೆ, ಅಗತ್ಯತೆಗೆ ಅನುಗುಣವಾಗಿ ಪಲ್ಸರ್ ಬೈಕ್ ಬಿಡುಗಡೆಯಾಗಿತ್ತು. ಬಳಿಕ ಹಲವು ಅಪ್‌ಡೇಟ್ ಮೂಲಕ ಕಾಲಕ್ಕೆ ತಕ್ಕಂತೆ ಬದಲಾಗುತ್ತಾ ಪಲ್ಸರ್ ಬೈಕ್ ಮೋಡಿ ಮಾಡಿದೆ. ಇದೀಗ ಬಜಾಜ್ ಪಲ್ಸರ್ ಬೈಕ್‌ಗೆ 25 ವರ್ಷದ ಸಂಭ್ರಮ. ಈ ವೇಳೆ ಬಜಾಜ್ ಎರಡು ಪಲ್ಸರ್ ಬೈಕ್ ಬಿಡುಗಡೆ ಮಾಡಿದೆ. ಪಲ್ಸರ್ 125 ಹಾಗೂ ಪಲ್ಸರ್ 150 ಬೈಕ್ ಬಿಡುಗಡೆಯಾಗಿದೆ.

ನೂತನ ಪಲ್ಸರ್ ಬೈಕ್ ಬೆಲೆ

ಹೊಸ ಪಲ್ಸರ್ 125 ಬೈಕ್ 91 ಸಾವಿರ ರೂಪಾಯಿಗೆ ಲಭ್ಯವಿದೆ. 125 ಬೈಕ್ ಸೆಗ್ಮೆಂಟ್‌ನಲ್ಲಿ ಕೈಗೆಟುಕುವ ದರದಲ್ಲಿ ಬೈಕ್ ಬಿಡುಗಡೆಯಾಗಿದೆ. ಎರಡು ಬೈಕ್ ಬೆಲೆ ವಿವರ ಇಲ್ಲಿದೆ.

ಪಲ್ಸರ್ 150ರ ಆರಂಭಿಕ ಬೆಲೆ 1,15,050 ರೂ (ಎಕ್ಸ್-ಶೋರೂಂ)
ಪಲ್ಸರ್ 125ರ ಬೆಲೆ 91,910 ರೂ (ಎಕ್ಸ್-ಶೋರೂಂ)

ಐಕಾನಿಕ್ ಪಲ್ಸರ್‌ನ ಹೊಸ ಮಾಡೆಲ್

2001ರಲ್ಲಿ ಮೊದಲ ಬಾರಿಗೆ ಪಲ್ಸರ್ ಭಾರತದಲ್ಲಿ ಬಿಡುಗಡೆಯಾದಾಗಿನಿಂದ, ಇದು ಭಾರತೀಯ ಮೋಟಾರ್‌ಸೈಕಲ್ ಉದ್ಯಮದಲ್ಲಿ ಕ್ರಾಂತಿ ಸೃಷ್ಟಿಸಿದೆ. ಪರ್ಫಾರ್ಮೆನ್ಸ್, ತಂತ್ರಜ್ಞಾನ ಮತ್ತು ಶೈಲಿಯನ್ನು ಪರಿಚಯಿಸಿದ ಪಲ್ಸರ್, ಇಂದು 40ಕ್ಕೂ ಹೆಚ್ಚು ದೇಶಗಳಲ್ಲಿ 20 ಮಿಲಿಯನ್‌ಗೂ ಹೆಚ್ಚು ಬೈಕ್ ಮಾರಾಟ ಮಾಡಿದೆ. ಹೊಸ ಪಲ್ಸರ್ 150 ಮತ್ತು 125 ಮಾದರಿಗಳು ಪಲ್ಸರ್‌ನ ಐಕಾನಿಕ್ ಡಿಎನ್‌ಎಯನ್ನು ಉಳಿಸಿಕೊಂಡಿವೆ. ಮಸ್ಕುಲರ್ ಟ್ಯಾಂಕ್, ಕಮಾಂಡಿಂಗ್ ಸಿಲ್ಹೌಟ್, ಸಿಗ್ನೇಚರ್ ಗ್ರಂಟ್ ಮತ್ತು ಅನ್‌ಮ್ಯಾಚ್ಡ್ ಪಿಕ್‌ಅಪ್‌ನಂತಹ ವೈಶಿಷ್ಟ್ಯಗಳು ಇಂದಿಗೂ ಅಚ್ಚಳಿಯದೆ ಉಳಿದಿವೆ. ಆದರೆ ಎಂಜಿನ್, ತಂತ್ರಜ್ಞಾನ, ವಿನ್ಯಾಸ ಮತ್ತು ಫೀಚರ್‌ಗಳನ್ನು ಆಧುನಿಕಗೊಳಿಸಲಾಗಿದೆ.

ಹೊಸ ಪಲ್ಸರ್ ಬೈಕ್ ಎಂಜಿನ್

ಪಲ್ಸರ್ 150ರಲ್ಲಿ 149.5 ಸಿಸಿ ಎಂಜಿನ್ ಇದೆ, ಇದು 14 ಪಿಎಸ್ ಪವರ್ ಮತ್ತು 13.7 ಎನ್‌ಎಂ ಟಾರ್ಕ್ ಉತ್ಪಾದಿಸುತ್ತದೆ. ಪಲ್ಸರ್ 125 ಮಾರುಕಟ್ಟೆಯ ಅತ್ಯಂತ ಶಕ್ತಿಶಾಲಿ 125 ಸಿಸಿ ಬೈಕ್ ಆಗಿದ್ದು, 124.58 ಸಿಸಿ ಎಂಜಿನ್ 12 ಪಿಎಸ್ ಪವರ್ ಮತ್ತು 11 ಎನ್‌ಎಂ ಟಾರ್ಕ್ ನೀಡುತ್ತದೆ. ಹೊಸ ಗೇರ್‌ಬಾಕ್ಸ್ ಕಡಿಮೆ ಗೇರ್‌ಗಳಲ್ಲಿ ಉತ್ತಮ ಟ್ರಾಕ್ಟಿವ್ ಎಫರ್ಟ್ ಒದಗಿಸುತ್ತದೆ. ಹೊಸ ಡೈಮಂಡ್-ಟೈಪ್ ಫ್ರೇಮ್ ಹೆಚ್ಚು ಸ್ಟಿಫ್‌ನೆಸ್ ನೀಡಿ ಉತ್ತಮ ಹ್ಯಾಂಡ್ಲಿಂಗ್ ಒದಗಿಸುತ್ತದೆ. ನೈಟ್ರೋಜನ್ ಗ್ಯಾಸ್-ಚಾರ್ಜ್ಡ್ ಎಮಲ್ಷನ್ ಟೈಪ್ ಮೊನೋಶಾಕ್ ಸಸ್ಪೆನ್ಷನ್ ಸ್ಪೋರ್ಟಿ ಹ್ಯಾಂಡ್ಲಿಂಗ್ ಮತ್ತು ಸೂಪೀರಿಯರ್ ಸ್ಟ್ರೇಟ್-ಲೈನ್ ಸ್ಟೆಬಿಲಿಟಿ ನೀಡುತ್ತದೆ.

ಹೊಸ 5-ಇಂಚಿನ ಟಿಎಫ್ಟಿ ಡಿಸ್‌ಪ್ಲೇ ಗೂಗಲ್ ಮ್ಯಾಪ್ಸ್ ಮಿರರಿಂಗ್, ನ್ಯಾವಿಗೇಶನ್, ಕಾಲ್ ಮತ್ತು ಮೆಸೇಜ್ ಅಲರ್ಟ್‌ಗಳು, ಮ್ಯೂಸಿಕ್ ಕಂಟ್ರೋಲ್ ಮತ್ತು ವಾಹನದ ಆರ್‌ಸಿ, ಇನ್ಶೂರೆನ್ಸ್ ದಾಖಲೆಗಳನ್ನು ಸ್ಟೋರ್ ಮಾಡುವ ಸೌಲಭ್ಯ ನೀಡುತ್ತದೆ. ಸೆಗ್ಮೆಂಟ್‌ನಲ್ಲೇ ಮೊದಲ ಬಾರಿಗೆ 3 ರೈಡ್ ಮೋಡ್‌ಗಳು (ರೋಡ್, ರೈನ್, ಸ್ಪೋರ್ಟ್) ಮತ್ತು ಕ್ರಾಲ್ ಟೆಕ್ ಸೌಲಭ್ಯವಿದೆ. ಇದು ಕಡಿಮೆ ವೇಗದ ಟ್ರಾಫಿಕ್‌ನಲ್ಲಿ ಹೆಚ್ಚು ನಿಯಂತ್ರಣ ಮತ್ತು ಅನುಕೂಲ ಒದಗಿಸುತ್ತದೆ.

ಹೊಸ ವಿನ್ಯಾಸದ ವುಲ್ಫ್-ಐ ಹೆಡ್‌ಲ್ಯಾಂಪ್ ಹೆಚ್ಚು ತೀಕ್ಷ್ಣವಾದ ನೋಟ ಮತ್ತು ಉತ್ತಮ ಲೈಟಿಂಗ್ ನೀಡುತ್ತದೆ. ಪಲ್ಸರ್ 150ರ ಟಾಪ್ ವೆರಿಯೆಂಟ್‌ನಲ್ಲಿ ಬೆಸ್ಟ್-ಇನ್-ಕ್ಲಾಸ್ ಥ್ರೋ, ಸ್ಪ್ರೆಡ್ ಮತ್ತು ಇಂಟೆನ್ಸಿಟಿ ಇದೆ. ಪಲ್ಸರ್ 150 ಮತ್ತು 125ರ ಟಾಪ್ ಮೂರು ವೆರಿಯೆಂಟ್‌ಗಳಲ್ಲಿ ಐಎಸ್‌ಜಿ ಸೌಲಭ್ಯವಿದೆ. ಇದು ಇಂಧನ ದಕ್ಷತೆ ಹೆಚ್ಚಿಸುತ್ತದೆ ಮತ್ತು ಸ್ಮೂತ್ ರೈಡಿಂಗ್ ಅನುಭವ ನೀಡುತ್ತದೆ.

ಪ್ರತಿ 2000 ಕಿಲೋ ಮೀಟರ್‍‌ಗೆ ಯಾಕೆ ಬೈಕ್ ಸರ್ವೀಸ್ ಮಾಡಿಸಬೇಕು? ಲೇಟ್ ಆದ್ರೆ ಏನಾಗುತ್ತೆ? ತಿಳಿದುಕೊಳ್ಳಿ..!

Ganesh Mabla Gowda — Fri, 14 Aug 2026 22:11:28 +0530

ಬೈಕ್ ಓಡಿಸುವುದು ಎಂದರೆ ಎಲ್ಲರಿಗೂ ಇಷ್ಟ. ಆದರೆ ಅದರ ಆರೋಗ್ಯದ ಬಗ್ಗೆ ನಾವು ಎಷ್ಟು ಕಾಳಜಿ ವಹಿಸುತ್ತೇವೆ? ಅನೇಕರು ಬೈಕ್ ಚೆನ್ನಾಗಿಯೇ ಓಡುತ್ತಿದೆ ಅಂದುಕೊಂಡು ಸರ್ವೀಸ್ ಮಾಡಿಸುವುದನ್ನು ಮುಂದೂಡುತ್ತಾರೆ. ಈ ಒಂದು ಸಣ್ಣ ನಿರ್ಲಕ್ಷ್ಯ ನಿಮ್ಮ ಬೈಕ್‌ನ ಆಯಸ್ಸನ್ನು ಕಡಿಮೆ ಮಾಡುವುದಲ್ಲದೆ, ನಿಮ್ಮ ಜೇಬಿಗೆ ದೊಡ್ಡ ಮಟ್ಟದ ಹೊರೆ ನೀಡಬಹುದು.

ಸರ್ವೀಸ್ ಮಾಡಿಸಲು ಸರಿಯಾದ ಸಮಯ ಯಾವುದು?

ತಜ್ಞರ ಪ್ರಕಾರ, ಸಾಮಾನ್ಯ ಬಳಕೆಯ ಬೈಕ್‌ಗಳನ್ನು ಪ್ರತಿ 2000 ಕಿ.ಮೀ ಗೆ ಒಮ್ಮೆ ಸರ್ವೀಸ್ ಮಾಡಿಸುವುದು ಅತ್ಯಗತ್ಯ. ಒಂದು ವೇಳೆ ನಿಮಗೆ ಅನಿವಾರ್ಯ ಕಾರಣಗಳಿಂದ 2000 ಕಿ.ಮೀ ಗೆ ಸಾಧ್ಯವಾಗದಿದ್ದರೆ, ಗರಿಷ್ಠ ಅಂದರೆ 2500 ಕಿ.ಮೀ ಒಳಗಾದರೂ ಮಾಡಿಸಬೇಕು. ಆದರೆ ಯಾವುದೇ ಕಾರಣಕ್ಕೂ 2500 ಕಿ.ಮೀ ದಾಟಿಸಬೇಡಿ. ಇನ್ನು ಹೊಸ ಬೈಕ್ ಖರೀದಿಸಿದವರು ಮೊದಲ ಸರ್ವೀಸ್ ಅನ್ನು 500 ರಿಂದ 750 ಕಿ.ಮೀ ಒಳಗೇ ಮಾಡಿಸುವುದು ಕಡ್ಡಾಯ.

ಸರ್ವೀಸಿಂಗ್ ತಡವಾದರೆ ಏನಾಗುತ್ತದೆ?

ಎಂಜಿನ್ ಆಯಿಲ್ ಗುಣಮಟ್ಟ ಕಳೆದುಕೊಂಡಾಗ ಪಿಸ್ಟನ್ ಮತ್ತು ಕ್ಲಚ್ ಪ್ಲೇಟ್‌ಗಳ ಮೇಲೆ ತೀವ್ರ ಒತ್ತಡ ಬಿದ್ದು ಅವು ಬೇಗನೆ ಹಾಳಾಗುತ್ತವೆ.
ಸಮಯಕ್ಕೆ ಸರಿಯಾಗಿ ಆಯಿಲ್ ಬದಲಿಸದಿದ್ದರೆ ಎಂಜಿನ್ ಒಳಭಾಗದ ಭಾಗಗಳು ಸವೆಯುತ್ತವೆ.
ಸರ್ವೀಸ್ ಮಾಡಿಸದ ಬೈಕ್‌ಗಳು ಇಂಧನವನ್ನು ಹೆಚ್ಚು ಬಳಸುತ್ತವೆ, ಇದರಿಂದ ಮೈಲೇಜ್ ಗಣನೀಯವಾಗಿ ಕಡಿಮೆಯಾಗುತ್ತದೆ.
ಚೈನ್ ಡ್ರೈ ಆಗುವುದರಿಂದ ಚೈನ್ ಕಟ್ ಆಗುವ ಅಥವಾ ಬೇಗನೆ ಸವೆಯುವ ಸಾಧ್ಯತೆ ಇರುತ್ತದೆ.

ಸರ್ವೀಸ್ ಲೇಟ್ ಆದ್ರೆ ಎಷ್ಟು ಖರ್ಚಾಗಬಹುದು?

ಪಿಸ್ಟನ್ ರಿಪೇರಿ: ಅಂದಾಜು 3,000 ರೂ.
ಕ್ಲಚ್-ಪಿಸ್ಟನ್ ಸೆಟ್: ಅಂದಾಜು 4,500 ರೂ.
ಎಂಜಿನ್ ಸೀಜ್ ಅಥವಾ ಹಾನಿ: 6,000 ದಿಂದ 10,000 ರೂ. ವರೆಗೆ ಖರ್ಚು ಬರಬಹುದು (ಇದು ಬೈಕ್ ಮಾದರಿ ಮತ್ತು ಪ್ರದೇಶಕ್ಕೆ ಅನುಗುಣವಾಗಿ ಬದಲಾಗುತ್ತದೆ).

ಸರ್ವೀಸಿಂಗ್ ಮಾಡುವಾಗ ಏನೆಲ್ಲಾ ಪರಿಶೀಲಿಸಲಾಗುತ್ತದೆ?

ಎಂಜಿನ್ ಆಯಿಲ್ ಮತ್ತು ಆಯಿಲ್ ಫಿಲ್ಟರ್ ಬದಲಾವಣೆ
ಏರ್ ಫಿಲ್ಟರ್ ಕ್ಲೀನಿಂಗ್ ಅಥವಾ ಬದಲಾವಣೆ
ಚೈನ್ ಲೂಬ್ರಿಕೇಶನ್ ಮತ್ತು ಟೈಟ್ ಮಾಡುವುದು
ಬ್ರೇಕ್ ಮತ್ತು ಕೇಬಲ್‌ಗಳ ತಪಾಸಣೆ
ವೈರಿಂಗ್ ಮತ್ತು ಎಲೆಕ್ಟ್ರಿಕಲ್ ಸಿಸ್ಟಮ್ ಚೆಕಿಂಗ್

ಈ ಲಕ್ಷಣಗಳು ಕಂಡುಬಂದರೆ ತಕ್ಷಣ ಸರ್ವೀಸ್ ಮಾಡಿಸಿ

ಬೈಕ್ ಎಂಜಿನ್‌ನಿಂದ ವಿಚಿತ್ರ ಶಬ್ದ ಬರುತ್ತಿದ್ದರೆ..
ಬೈಕ್ ಅತಿಯಾಗಿ ಹೊಗೆ ಬಿಡುತ್ತಿದ್ದರೆ.
ಮೈಲೇಜ್ ದಿಢೀರ್ ಕಡಿಮೆಯಾಗಿದ್ದರೆ.
ಬೈಕ್ ಸ್ಟಾರ್ಟ್ ಆಗಲು ತೊಂದರೆ ನೀಡುತ್ತಿದ್ದರೆ..

ಸಮಯಕ್ಕೆ ಸರಿಯಾಗಿ ಸರ್ವೀಸ್ ಮಾಡಿಸುವುದು ಕೇವಲ ಬೈಕ್‌ನ ಆರೋಗ್ಯಕ್ಕಷ್ಟೇ ಅಲ್ಲ, ನಿಮ್ಮ ಸುರಕ್ಷತೆಗೂ ಅತೀ ಮುಖ್ಯ.

ಕೈಗೆಟುಕುವ ಬೆಲೆಯಲ್ಲಿ ಯಮಹಾ ಫ್ಯಾಸಿನೋ , 125ಸಿಸಿ Fi ಹೈಬ್ರಿಡ್ ಅಪ್‌ಗ್ರೇಡೆಡ್ ಸ್ಕೂಟರ್ ಲಾಂಚ್

Chethan Kumar — Tue, 18 Aug 2026 18:43:21 +0530

ಬೆಂಗಳೂರು (ಆ.18) ಹೊಸ ಬಣ್ಣಗ, ಬದಲಾದ ಸ್ಟೈಲಿಂಗ್, ಸುಧಾರಿತ ತಂತ್ರಜ್ಞಾನದ ಮೂಲಕ ಯಮಹಾ ತನ್ನ ಜನಪ್ರಿಯ 125cc Fi ಹೈಬ್ರಿಡ್ ಸ್ಕೂಟರ್‌ಗಳ ಸೀರಿಸ್ ನವೀಕರಿಸಿದೆ. ಫಾಸಿನೋ 125 Fi ಹೈಬ್ರಿಡ್ ಮತ್ತು ರೇಝಡ್‌ಆರ್ 125 Fi ಹೈಬ್ರಿಡ್ ಮಾದರಿಗಳು. ಕೈಗೆಟುಕುವ ಬೆಲೆಯಲ್ಲಿ ಭಾರತೀಯ ಗ್ರಾಹಕರಿಗೆ ಲಭ್ಯವಿದೆ.

ಕೇವಲ ಮೇಲ್ನೋಟದ ಬದಲಾವಣೆಯಲ್ಲ. ಯಮಹಾ ವಿನ್ಯಾಸ, ಕಾರ್ಯಕ್ಷಮತೆ ಮತ್ತು ಸಂಪರ್ಕದಲ್ಲಿ ಮಹತ್ವದ ಸುಧಾರಣೆಗಳನ್ನು ತಂದಿದೆ. ಚಾಲನಾ ಅನುಭವವನ್ನು ಉತ್ತಮಗೊಳಿಸುವ ಉದ್ದೇಶ ಹೊಂದಿದೆ. ಹೈಬ್ರಿಡ್ ತಂತ್ರಜ್ಞಾನದ ಸ್ಕೂಟರ್‌ಗಳನ್ನು ಸ್ಪರ್ಧಾತ್ಮಕ ಬೆಲೆಯಲ್ಲಿ ನೀಡಿ, ಮಾರುಕಟ್ಟೆಯಲ್ಲಿ ತನ್ನ ಹಿಡಿತ ಬಲಪಡಿಸಲು ಯಮಹಾ ಮುಂದಾಗಿದೆ. ಗ್ರಾಹಕರಿಗೆ ಇನ್ನಷ್ಟು ಸ್ಮಾರ್ಟ್, ಸ್ಟೈಲಿಶ್ ಹಾಗೂ ಕ್ರಿಯಾತ್ಮಕ ರೈಡಿಂಗ್ ನೀಡುತ್ತದೆ.

ಹೊಸ ವಿನ್ಯಾಸ ಮತ್ತು ಆಕರ್ಷಕ ಬಣ್ಣಗಳು

ಈ ಹೊಸ ಶ್ರೇಣಿಯ 125cc Fi ಹೈಬ್ರಿಡ್ ಸ್ಕೂಟರ್‌ಗಳು ಆಧುನಿಕ, ನಯವಾದ ರೂಪರೇಷೆಗಳನ್ನು ಪಡೆದಿವೆ. ಯಮಹಾ ಗಮನಾರ್ಹ ವಿನ್ಯಾಸ ಬದಲಾವಣೆಗಳನ್ನು ಮಾಡಿದೆ. ಈ ಹೊಸ ಸ್ಟೈಲಿಂಗ್ ಸ್ಕೂಟರ್‌ಗಳಿಗೆ ಡೈನಾಮಿಕ್ ಮತ್ತು ಪ್ರೀಮಿಯಂ ಲುಕ್ಟ ನೀಡುತ್ತದೆ. ಇದಲ್ಲದೆ, ಹಲವಾರು ಆಕರ್ಷಕ ಬಣ್ಣಗಳನ್ನು ಪರಿಚಯಿಸಲಾಗಿದೆ.

ಫಾಸಿನೋ ಎಸ್ 125 Fi ಹೈಬ್ರಿಡ್ ಈಗ ವಿಶೇಷವಾದ, ಸ್ಟೈಲಿಶ್ ಮ್ಯಾಟ್ ಗ್ರೇ ಬಣ್ಣದಲ್ಲಿ ಸಿಗುತ್ತದೆ. ಇದು ಸ್ಕೂಟರ್‌ಗೆ ಐಷಾರಾಮಿ, ಆಧುನಿಕ ಸ್ಪರ್ಶ ನೀಡಿದೆ. ಇದರ ಡಿಸ್ಕ್-ಬ್ರೇಕ್ ಮಾದರಿಯು ರಿಫ್ರೆಶ್ಡ್ ಮೆಟಾಲಿಕ್ ಲೈಟ್ ಗ್ರೀನ್ ಬಣ್ಣದೊಂದಿಗೆ ರಸ್ತೆಯಲ್ಲಿ ಗಮನ ಸೆಳೆಯುತ್ತದೆ. ಡ್ರಮ್-ಬ್ರೇಕ್ ಮಾದರಿ? ಅದು ಸೊಗಸಾದ ಮೆಟಾಲಿಕ್ ವೈಟ್ ಬಣ್ಣದಲ್ಲಿ ತನ್ನ ಕ್ಲಾಸಿಕ್ ಸೌಂದರ್ಯವನ್ನು ಉಳಿಸಿಕೊಂಡಿದೆ.

ರೇಝಡ್‌ಆರ್ 125 Fi ಹೈಬ್ರಿಡ್ ಸ್ಟ್ರೀಟ್ ರ್ಯಾಲಿ ಮಾದರಿ ರೋಮಾಂಚಕ ಮ್ಯಾಟ್ ಗ್ರೇ ಮೆಟಾಲಿಕ್ ಬಣ್ಣದಲ್ಲಿ ಲಭ್ಯ. ಡಿಸ್ಕ್ ಮಾದರಿಯು ಸ್ಪೋರ್ಟಿ ಸಿಲ್ವರ್ ವೈಟ್ ಕಾಕ್‌ಟೈಲ್ ಬಣ್ಣದಲ್ಲಿ ಸ್ಪೋರ್ಟೀವ್ ಲುಕ್‌ನಲ್ಲಿ ಲಭ್ಯವಿದೆ. ಗ್ರಾಹಕರು ತಮ್ಮ ವೈಯಕ್ತಿಕ ಶೈಲಿಗೆ ಸೂಕ್ತವಾದ ಸ್ಕೂಟರ್ ಆಯ್ಕೆ ಮಾಡಲು ಈ ಹೊಸ ಬಣ್ಣ ಆಯ್ಕೆಗಳು ಹೆಚ್ಚು ಅವಕಾಶ ನೀಡುತ್ತವೆ.

ಸುಧಾರಿತ ತಂತ್ರಜ್ಞಾನ ಮತ್ತು ಕಾರ್ಯಕ್ಷಮತೆ

ಸ್ಮಾರ್ಟ್ ಮತ್ತು ಪರಿಣಾಮಕಾರಿ ಅನುಭವ ನೀಡಲಿದೆ. ಯಮಹಾದ ಇತ್ತೀಚಿನ 125cc ಏರ್-ಕೂಲ್ಡ್, ಫ್ಯುಯಲ್-ಇಂಜೆಕ್ಟೆಡ್ ಬ್ಲೂ ಕೋರ್ ಎಂಜಿನ್ ಹೊಂದಿದೆ. ಇದು ಸ್ಮಾರ್ಟ್ ಮೋಟಾರ್ ಜನರೇಟರ್ (SMG) ಜೊತೆ ಸೇರಿ 8.2 PS ಪವರ್ ಮತ್ತು 10.3 Nm ಟಾರ್ಕ್ ಸಾಮರ್ಥ್ಯ ಹೊಂದಿದೆ. ವೇಗದ ಆಕ್ಸಿಲರೇಷನ್ ಮತ್ತು ಸುಧಾರಿತ ಇಂಧನ ದಕ್ಷತೆಯನ್ನು ಈ ತಂತ್ರಜ್ಞಾನ ಖಚಿತಪಡಿಸುತ್ತದೆ.

ವರ್ಧಿತ ಪವರ್ ಅಸಿಸ್ಟ್ ಕಾರ್ಯವು ಆರಂಭದಲ್ಲಿ, ಭಾರ ಹೊತ್ತಾಗ, ಅಥವಾ ಇಳಿಜಾರು ಏರುವಾಗ ಎಲೆಕ್ಟ್ರಿಕ್ ಟಾರ್ಕ್ ಬೂಸ್ಟ್ ನೀಡಲು ಸಹಾಯ ಮಾಡುತ್ತದೆ. ಸೈಲೆಂಟ್ ಸ್ಟಾರ್ಟ್ ಮತ್ತು ಸ್ಟಾಪ್ & ಸ್ಟಾರ್ಟ್ ಸಿಸ್ಟಮ್ (SSS) ಕೂಡ ಇಂಧನ ಉಳಿತಾಯಕ್ಕೆ ನೆರವಾಗುತ್ತವೆ. ಪ್ರೀಮಿಯಂ ಫಾಸಿನೋ ಎಸ್ ರೂಪಾಂತರ ಕಲರ್ TFT ಇನ್‌ಸ್ಟ್ರುಮೆಂಟ್ ಕ್ಲಸ್ಟರ್ ಹೊಂದಿದೆ. ಇದು Y-ಕನೆಕ್ಟ್ ಅಪ್ಲಿಕೇಶನ್ ಮೂಲಕ ಸ್ಮಾರ್ಟ್‌ಫೋನ್ ಸಂಪರ್ಕ ಮತ್ತು ಗೂಗಲ್ ಮ್ಯಾಪ್ಸ್‌ನೊಂದಿಗೆ ಟರ್ನ್-ಬೈ-ಟರ್ನ್ ನ್ಯಾವಿಗೇಶನ್ ನೀಡುತ್ತದೆ. ಈ ತಾಂತ್ರಿಕ ನಾವೀನ್ಯತೆಗಳು ಯಮಹಾದ ಸ್ಕೂಟರ್‌ಗಳನ್ನು ಕೇವಲ ಸಾರಿಗೆ ಸಾಧನಗಳಿಂದ, ಆಧುನಿಕ ಜೀವನಶೈಲಿಯ ಭಾಗವಾಗಿಸಿವೆ.

ಕೈಗೆಟುಕುವ ಬೆಲೆ ಮತ್ತು ಮೌಲ್ಯ

₹77,200 — ಇದು ಫಾಸಿನೋ 125 Fi ಹೈಬ್ರಿಡ್ ಆರಂಭಿಕ ಬೆಲೆ. ರೇಝಡ್‌ಆರ್ 125 Fi ಹೈಬ್ರಿಡ್ ಬೆಲೆ ₹92,515 ರಿಂದ ಶುರುವಾಗುತ್ತದೆ. ಭಾರತೀಯ ಮಾರುಕಟ್ಟೆಗೆ ಯಮಹಾ ತನ್ನ ಹೈಬ್ರಿಡ್ ಸ್ಕೂಟರ್‌ಗಳನ್ನು ಸ್ಪರ್ಧಾತ್ಮಕ ಬೆಲೆಯಲ್ಲಿ ನೀಡಿದೆ.

99 ಕೆಜಿ— ಇದು ಈ ಸ್ಕೂಟರ್‌ಗಳ ಕರ್ಬ್ ತೂಕ. ಹಗುರವಾಗಿವೆ, ನಗರ ಸಂಚಾರಕ್ಕೆ ಸೂಕ್ತ. ಈ ಬೆಲೆಯಲ್ಲಿ ಸ್ಮಾರ್ಟ್ ಹೈಬ್ರಿಡ್ ತಂತ್ರಜ್ಞಾನ, ಸುಧಾರಿತ ವೈಶಿಷ್ಟ್ಯಗಳು, ಇಂಧನ ದಕ್ಷತೆ ಮತ್ತು ಯಮಹಾದ ವಿಶ್ವಾಸಾರ್ಹತೆ ಸಿಗುತ್ತದೆ. ಇದು ಅತ್ಯುತ್ತಮ ಮೌಲ್ಯ!

ಈಗಲೇ ಗ್ರಾಹಕರು ಹೊಸ ಬಣ್ಣಗಳು ಮತ್ತು ತಾಂತ್ರಿಕ ವೈಶಿಷ್ಟ್ಯಗಳೊಂದಿಗೆ ತಮ್ಮ ಆದ್ಯತೆಯ ಮಾದರಿಗಳನ್ನು ಆರಿಸಿಕೊಳ್ಳಬಹುದು. ನವೀಕರಿಸಿದ ಯಮಹಾ 125cc Fi ಹೈಬ್ರಿಡ್ ಸ್ಕೂಟರ್‌ಗಳು ವಿತರಕರ ಬಳಿ ಲಭ್ಯವಿವೆ. ಸೌಂದರ್ಯ, ತಂತ್ರಜ್ಞಾನ, ಕಾರ್ಯಕ್ಷಮತೆ – ಎಲ್ಲದರ ಉತ್ತಮ ಸಮತೋಲನವನ್ನು ಇವು ಒದಗಿಸುತ್ತವೆ. ಮುಂದಿನ ದಿನಗಳಲ್ಲಿ ಮಾರುಕಟ್ಟೆಯಲ್ಲಿ ಇವು ಉತ್ತಮ ಪ್ರತಿಕ್ರಿಯೆ ಪಡೆಯಲಿವೆ.

ಫ್ಯಾನ್ಸಿ ನಂಬರ್‌ ಕ್ರೇಜ್‌ನಿಂದ ಸಾರಿಗೆ ಇಲಾಖೆಗೆ ಹರಿದುಬಂತು ಕೋಟಿ ಕೋಟಿ ಹಣ, ಯಾವ ನಂಬರ್‌ಗೆ ಎಷ್ಟು ದುಡ್ಡು? ಇಲ್ಲಿದೆ ಡೀಟೇಲ್ಸ್‌..

Santosh Naik — Mon, 17 Aug 2026 18:02:33 +0530

ಬೆಂಗಳೂರು (ಆ.17): ವಾಹನಗಳ ನೋಂದಣಿ ಸಂಖ್ಯೆ ಎನ್ನುವುದು ಇನ್ನು ಮುಂದೆ ಕೇವಲ ಒಂದು ಗುರುತು ಮಾತ್ರವಲ್ಲ. ಬದಲಿಗೆ, ಕಳೆದ ಕೆಲವು ವರ್ಷಗಳಿಂದ ಇದು ಪ್ರತಿಷ್ಠೆಯ ಪ್ರತೀಕವಾಗಿ, ಅದೃಷ್ಟದ ಸಂಕೇತವಾಗಿ ಮತ್ತು ವೈಯಕ್ತಿಕ ಪರಿಚಯದ ವಿಧಾನವಾಗಿ ರೂಪುಗೊಂಡಿದೆ. ರಾಜಕಾರಣಿಗಳು ಮತ್ತು ಸಿನಿಮಾ ಸ್ಟಾರ್‌ಗಳಿಂದ ಹಿಡಿದು ಉದ್ಯಮಿಗಳು ಹಾಗೂ ಯುವ ಲಕ್ಸುರಿ ಕಾರು ಮಾಲೀಕರವರೆಗೆ ವಿಶೇಷ 'ಫ್ಯಾನ್ಸಿ' ನೋಂದಣಿ ಸಂಖ್ಯೆಗಳನ್ನು ಸ್ವಂತವಾಗಿಸಿಕೊಳ್ಳಲು ನಡೆಯುತ್ತಿರುವ ಪೈಪೋಟಿಯು ಸಾರಿಗೆ ಇಲಾಖೆಗೆ ದಾಖಲೆ ಮಟ್ಟದ ಆದಾಯವನ್ನು ತಂದುಕೊಡುತ್ತಿದೆ. 2025-26ನೇ ಸಾಲಿನಲ್ಲಿ ಒಂದೇ ವರ್ಷದಲ್ಲಿ ಪ್ರೀಮಿಯಂ ನೋಂದಣಿ ಸಂಖ್ಯೆಗಳ ಇ-ಹರಾಜಿನ ಮೂಲಕ ಇಲಾಖೆಯು ಅತಿ ಹೆಚ್ಚು ಅಂದರೆ ಬರೋಬ್ಬರಿ 118.14 ಕೋಟಿ ರೂಪಾಯಿಗಳ ಭರ್ಜರಿ ಆದಾಯವನ್ನು ಗಳಿಸಿದೆ.

ಐದು ವರ್ಷಗಳಲ್ಲಿ ದಾಖಲೆ ಮಟ್ಟದ ಆದಾಯ ಏರಿಕೆ

0001, 0007, 9999, 1111 ಮತ್ತು 7777 ರಂತಹ ಜನಪ್ರಿಯ ಸಂಖ್ಯೆಗಳ ಮೇಲಿನ ಹೆಚ್ಚುತ್ತಿರುವ ವ್ಯಾಮೋಹವು, ವಾಹನ ಮಾಲೀಕರು ಲಕ್ಷಾಂತರ ರೂಪಾಯಿಗಳನ್ನು, ಕೆಲವೊಮ್ಮೆ ಕಾರಿನ ಬೆಲೆಗಿಂತಲೂ ಹೆಚ್ಚಿನ ಹಣವನ್ನು ತಮ್ಮಿಷ್ಟದ ನಂಬರ್‌ಗಾಗಿ ಖರ್ಚು ಮಾಡಲು ಸಿದ್ಧರಿರುವುದನ್ನು ತೋರಿಸುತ್ತದೆ. ಸಾರಿಗೆ ಇಲಾಖೆಯ ದತ್ತಾಂಶದ ಪ್ರಕಾರ, ಫ್ಯಾನ್ಸಿ ನಂಬರ್ ಹರಾಜಿನಿಂದ ಬರುವ ಆದಾಯವು ಕಳೆದ ಐದು ವರ್ಷಗಳಲ್ಲಿ ನಿರಂತರವಾಗಿ ಏರಿಕೆಯಾಗಿದೆ.

2021-22: 24.51 ಕೋಟಿ ರೂ.
2022-23: 66.34 ಕೋಟಿ ರೂ.
2023-24: 94.58 ಕೋಟಿ ರೂ.
2024-25: 89.20 ಕೋಟಿ ರೂ.
2025-26: ದಾಖಲೆಯ 118.14 ಕೋಟಿ ರೂ.

ಬೆಂಗಳೂರು ಮತ್ತು ಮೈಸೂರಿನಲ್ಲಿ ಮುಂಚೂಣಿ ಕ್ರೇಜ್

ಈ ಕ್ರೇಜ್ ವಿಶೇಷವಾಗಿ ಬೆಂಗಳೂರಿನಲ್ಲಿ ಹೆಚ್ಚಾಗಿ ಕಂಡುಬಂದಿದ್ದು, ಇಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಐಷಾರಾಮಿ ವಾಹನಗಳ ಮಾರಾಟದಲ್ಲಿ ಭಾರಿ ಏರಿಕೆಯಾಗಿದೆ. ಕೋರಮಂಗಲದ ಕೆಎ-01 (KA-01) ಪ್ರಾದೇಶಿಕ ಸಾರಿಗೆ ಕಚೇರಿಯು (RTO) ಪ್ರೀಮಿಯಂ ನೋಂದಣಿ ಸಂಖ್ಯೆಗಳಿಗೆ ಅತಿ ಹೆಚ್ಚು ಬಿಡ್‌ಗಳನ್ನು ದಾಖಲಿಸುವುದನ್ನು ಮುಂದುವರಿಸಿದೆ, ಇದರ ನಂತರದ ಸ್ಥಾನದಲ್ಲಿ ಮೈಸೂರು ಇದೆ.

ಅತಿ ಹೆಚ್ಚು ಮೊತ್ತಕ್ಕೆ ಹರಾಜಾದ ಪ್ರಮುಖ ಸಂಖ್ಯೆಗಳ ವಿವರ

'0001' ಸಂಖ್ಯೆಯು 28.60 ಲಕ್ಷ ರೂ.ಗಳಿಗೆ ಮಾರಾಟವಾಗಿದೆ. ಮತ್ತೊಂದು ವಾಹನಕ್ಕೆ '0001' ಸಂಖ್ಯೆಯು 22.85 ಲಕ್ಷ ರೂ.ಗಳಿಗೆ ಹರಾಜಾಗಿದೆ. ಇನ್ನುಳಿದಂತೆ 9999 ಸಂಖ್ಯೆ 21.75 ಲಕ್ಷ ರೂ., ಮತ್ತೊಂದು 0001 ಸಂಖ್ಯೆ 20.75 ಲಕ್ಷ ರೂ. ಹಾಗೂ 0081 ಸಂಖ್ಯೆಯು 21.15 ಲಕ್ಷ ರೂ.ಗಳ ಗರಿಷ್ಠ ಬಿಡ್ ಪಡೆದುಕೊಂಡಿದೆ.

ಅನಧಿಕೃತ ಮಾರ್ಗಗಳಿಗೆ ಅಂತ್ಯ ಹಾಡಿದ ಪಾರದರ್ಶಕ ಆನ್‌ಲೈನ್ ಹರಾಜು

ತಮ್ಮಿಷ್ಟದ ನೋಂದಣಿ ಸಂಖ್ಯೆಯನ್ನು ಪಡೆದುಕೊಳ್ಳುವುದು ಹಿಂದೆ ಅನಧಿಕೃತ ಮಾರ್ಗಗಳು ಅಥವಾ ಶಿಫಾರಸುಗಳನ್ನು ಅವಲಂಬಿಸಿತ್ತು. ಸಾರಿಗೆ ಇಲಾಖೆಯು ಪಾರದರ್ಶಕ ಇ-ಹರಾಜು (e-auction) ವ್ಯವಸ್ಥೆಯನ್ನು ಪರಿಚಯಿಸುವ ಮೊದಲು, ಅರ್ಜಿದಾರರು ವಿಐಪಿ ನಂಬರ್‌ಗಳನ್ನು ಮುಂಚಿತವಾಗಿ ಪಡೆದುಕೊಳ್ಳಲು ವೈಯಕ್ತಿಕ ಪ್ರಭಾವವನ್ನು ಬೀರುವುದು ಅಥವಾ ಅಧಿಕಾರಿಗಳಿಗೆ ಲಂಚ ನೀಡುವುದು ಸಾಮಾನ್ಯಾವಾಗಿತ್ತು.

ಆದರೆ, ಡಿಜಿಟಲ್ ಹರಾಜು ಪ್ರಕ್ರಿಯೆಯು ಪ್ರಸ್ತುತ ಮತ್ತು ಮುಂಗಡ ಸಿರೀಸ್‌ಗಳಲ್ಲಿ (running and advance series) ಲಭ್ಯವಿರುವ ಸಂಖ್ಯೆಗಳಿಗೆ ಯಾರು ಬೇಕಾದರೂ ಮುಕ್ತವಾಗಿ ಬಿಡ್ ಮಾಡಲು ಅವಕಾಶ ಕಲ್ಪಿಸುವ ಮೂಲಕ ಇಂತಹ ಅಕ್ರಮಗಳಿಗೆ ಬಹುತೇಕ ಕಡಿವಾಣ ಹಾಕಿದೆ. ಇಂದು ಬಿಡ್‌ದಾರರು ಸ್ಪರ್ಧಾತ್ಮಕ ಆನ್‌ಲೈನ್ ಹರಾಜಿನಲ್ಲಿ ಭಾಗವಹಿಸುವ ಮೊದಲು ಭದ್ರತಾ ಠೇವಣಿ (Earnest Money Deposit) ಯೊಂದಿಗೆ ನಿಗದಿತ ನೋಂದಣಿ ಶುಲ್ಕವನ್ನು ಪಾವತಿಸುತ್ತಿದ್ದಾರೆ.

ಪ್ರತಿಷ್ಠೆ, ಸಂಖ್ಯಾಶಾಸ್ತ್ರ ಮತ್ತು ಹೂಡಿಕೆ ಮೌಲ್ಯ

ಪ್ರತಿಷ್ಠೆ, ಸಂಖ್ಯಾಶಾಸ್ತ್ರ (Numerology) ಮತ್ತು ಹೂಡಿಕೆಯ ಮೌಲ್ಯದ ಸಂಯೋಜನೆಯೇ ಈ ಭಾರಿ ಬೇಡಿಕೆಗೆ ಕಾರಣ ಎಂದು ಅಧಿಕಾರಿಗಳು ವಿವರಿಸುತ್ತಾರೆ. ಅನೇಕ ಖರೀದಿದಾರರು ನಿರ್ದಿಷ್ಟ ಸಂಖ್ಯೆಗಳು ಸಮೃದ್ಧಿ ಅಥವಾ ಯಶಸ್ಸನ್ನು ತರುತ್ತವೆ ಎಂದು ನಂಬಿದರೆ, ಇತ್ತ ಕೆಲವರು ಪುನರಾವರ್ತಿತ ಅಂಕಿಅಂಶಗಳನ್ನು ನೆನಪಿಟ್ಟುಕೊಳ್ಳಲು ಸುಲಭವೆಂದು ಇಷ್ಟಪಡುತ್ತಾರೆ. ಐಷಾರಾಮಿ ವಾಹನಗಳ ಮರುಮಾರಾಟ ಮೌಲ್ಯವನ್ನು ಹೆಚ್ಚಿಸುವುದರ ಜೊತೆಗೆ, ಪ್ರೀಮಿಯಂ ನೋಂದಣಿ ಸಂಖ್ಯೆಗಳು ವ್ಯಾಪಾರ ಮಾಲೀಕರಿಗೆ ಮತ್ತು ಸೋಶಿಯಲ್‌ ಮೀಡಿಯಾ ಇನ್ಫ್ಲುಯೆನ್ಸರ್‌ಗಳಿಗೆ (influencers) ಒಂದು ಬ್ರ್ಯಾಂಡಿಂಗ್ ಸಾಧನವಾಗಿ ಮಾರ್ಪಟ್ಟಿವೆ.

"ವಾಹನ ಮಾಲೀಕರು ಆಕರ್ಷಕ ನೋಂದಣಿ ಸಂಖ್ಯೆಗಳನ್ನು ಪಡೆಯಲು ಲಕ್ಷಾಂತರ ರೂಪಾಯಿಗಳನ್ನು ಖರ್ಚು ಮಾಡುತ್ತಿದ್ದಾರೆ. ಕೇವಲ ಫ್ಯಾನ್ಸಿ ನಂಬರ್ ಹರಾಜಿನಿಂದಲೇ ಇಲಾಖೆಯು ಒಂದೇ ಹಣಕಾಸು ವರ್ಷದಲ್ಲಿ ಸುಮಾರು 118 ಕೋಟಿ ರೂ.ಗಳನ್ನು ಗಳಿಸಿದೆ" ಎಂದು ಸಾರಿಗೆ ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಮೂಲಗಳ ಪ್ರಕಾರ, ರಾಜಕೀಯ ನಾಯಕರು ಈ ವಿಚಾರದಲ್ಲಿ ಮುಂಚೂಣಿಯಲ್ಲಿದ್ದಾರೆ. ಅನೇಕರು ತಮ್ಮ ಜನ್ಮ ದಿನಾಂಕಗಳು, ಅದೃಷ್ಟದ ಸಂಖ್ಯೆಗಳು ಅಥವಾ ಸಂಖ್ಯಾಶಾಸ್ತ್ರದ ಆದ್ಯತೆಗಳಿಗೆ ಹೊಂದಿಕೆಯಾಗುವ ನೋಂದಣಿ ಸಂಖ್ಯೆಗಳನ್ನು ಆರಿಸಿಕೊಳ್ಳುತ್ತಾರೆ. ಚಲನಚಿತ್ರ ವ್ಯಕ್ತಿತ್ವಗಳು, ಉದ್ಯಮಿಗಳು ಮತ್ತು ಶ್ರೀಮಂತ ವ್ಯಕ್ತಿಗಳು (HNIs) ಕೂಡ ವಿಶೇಷ ಸಂಯೋಜನೆಗಳನ್ನು ಪಡೆದುಕೊಳ್ಳಲು ಉತ್ಸುಕರಾಗಿದ್ದು, ಬಿಡ್‌ಗಳನ್ನು ಸಲ್ಲಿಸುವ ಮೊದಲು ಹೆಚ್ಚಾಗಿ ಜ್ಯೋತಿಷಿಗಳನ್ನು ಸಂಪರ್ಕಿಸುತ್ತಾರೆ.

"ಈ ಬೆಳೆಯುತ್ತಿರುವ ಗೀಳು ಅನಿರೀಕ್ಷಿತ ಆರ್ಥಿಕ ಲಾಭವನ್ನು ತಂದುಕೊಟ್ಟಿದೆ. ಯಾವುದೇ ಹೆಚ್ಚುವರಿ ಮೂಲಸೌಕರ್ಯಗಳಲ್ಲಿ ಹೂಡಿಕೆ ಮಾಡದೆ, ಇಲಾಖೆಯು ಕೇವಲ ಸೀಮಿತ ಸಂಖ್ಯೆಯ ಅಪೇಕ್ಷಿತ ಸಂಖ್ಯೆಗಳನ್ನು ಹರಾಜು ಮಾಡುವ ಮೂಲಕ ಕೋಟ್ಯಂತರ ರೂಪಾಯಿಗಳ ತೆರಿಗೆಯೇತರ ಆದಾಯವನ್ನು (non-tax revenue) ಉತ್ಪಾದಿಸುತ್ತಿದೆ. ಪ್ರತಿವರ್ಷ ಹೆಚ್ಚಿನ ಐಷಾರಾಮಿ ವಾಹನಗಳು ರಸ್ತೆಗಿಳಿಯುತ್ತಿರುವುದರಿಂದ, ವಿಶೇಷ ನೋಂದಣಿ ಸಂಖ್ಯೆಗಳ ಸ್ಪರ್ಧೆಯು ಸದ್ಯಕ್ಕೆ ಕಡಿಮೆಯಾಗುವ ಲಕ್ಷಣಗಳು ಕಾಣುತ್ತಿಲ್ಲ" ಎಂದು ಮತ್ತೊಬ್ಬ ಅಧಿಕಾರಿ ತಿಳಿಸಿದ್ದಾರೆ.

ಶೇ.85ರಷ್ಟು ಎಥೆನಾಲ್‌ನಲ್ಲಿ ಚಲಿಸುವ ಹೋಂಡಾ ADV160 ಸ್ಕೂಟರ್ ಲಾಂಚ್, ಕೇವಲ 5000 ರೂ ಬುಕಿಂಗ್

Chethan Kumar — Thu, 27 Aug 2026 16:42:58 +0530

ಬೆಂಗಳೂರು (ಆ.27) ಭಾರತದಲ್ಲಿ ಈಗಾಗಲೇ ಶೇಕಡಾ 20ರಷ್ಟು ಎಥೆನಾಲ್ ಬ್ಲೆಂಡೆಡ್ ಪೆಟ್ರೋಲ್ ಮಾರಾಟವಾಗುತ್ತಿದೆ. ಭಾರತದ ನೀತಿಗೆ ಪೂರಕವಾಗಿ ಹಾಗೂ ಮುಂಬರುವ ಸಮಸ್ಯೆಗಳಿಗೆ ಉತ್ತರವಾಗಿ ಇದೀಗ ಹೋಂಡಾ ತನ್ನ ADV160 ಸ್ಕೂಟರ್ ಫ್ಲೆಕ್ಸ್ ಫ್ಯೂಯೆಲ್ ಎಂಜಿನ್‌ನಲ್ಲಿ ಬಿಡುಗಡೆ ಮಾಡಿದೆ. ವಿಶೇಷ ಅಂದರೆ ಹೋಂಡಾ ADV160 ಸ್ಕೂಟರ್ ಶೇಕಡಾ 85ರಷ್ಟು ಎಥೆನಾಲ್ ಇಂಧನದಲ್ಲಿ ಚಲಿಸಲಿದೆ. ಅಂದರೆ ಶೇಕಡಾ 85ರಷ್ಟು ಎಥೆನಾಲ್ ಹಾಗೂ ಶೇಕಡಾ 15ರಷ್ಟು ಪೆಟ್ರೋಲ್ ಮೂಲಕ ಈ ಸ್ಕೂಟರ್ ಚಲಿಸಲಿದೆ.

ಹೊಸ ಹೋಂಡಾ ADV160 ಸ್ಕೂಟರ್ ಬೆಲೆ

ಫ್ಲೆಕ್ಸ್ ಫ್ಯೂಯೆಲ್ ಹೋಂಡಾ ADV160 ಸ್ಕೂಟರ್ ಬೆಲೆ 1.70 ಲಕ್ಷ ರೂಪಾಯಿ (ಎಕ್ಸ್ ಶೋ ರೂಂ). ವಿಶೇಷ ಅಂದರೆ ಇದು ಭಾರತದ ಮೊದಲ ಫ್ಲೆಕ್ಸ್ ಫ್ಯೂಯೆಲ್ ಸ್ಕೂಟರ್ ಅನ್ನೋ ಹೆಗ್ಗಳಿಕೆಗೆ ಪಾತ್ರರಾಗಿದೆ. ಅಡ್ವೆಂಚರ್-ಸ್ಟೈಲ್ ಮ್ಯಾಕ್ಸಿ ಸ್ಕೂಟರ್ ADV160 ಸ್ಕೂಟರ್‌ನ್ನು ಫ್ಲೆಕ್ಸ್ ಫ್ಯೂಯೆಲ್ ರೂಪದಲ್ಲಿ ಬಿಡುಗಡೆ ಮಾಡಿ ಯಶಸ್ಸು ಕಂಡಿದೆ. ಕೇವಲ 5000 ರೂಪಾಯಿ ಪಾವತಿಸಿ ಸ್ಕೂಟರ್ ಬುಕಿಂಗ್ ಮಾಡಿಕೊಳ್ಳಬಹುದು.

ಹೋಂಡಾ ADV160 ಸ್ಕೂಟರ್ ಎಂಜಿನ್

ನೂತನ ಹೋಂಡಾ ADV160 ಸ್ಕೂಟರ್ ಇ85 ಸ್ಕೂಟರ್ 156.93 ಸಿಸಿ ಎಂಜಿನ್ ಹೊಂದಿದೆ. ಸಿಂಗಲ್ ಸಿಲಿಂಡರ್, ಲಿಕ್ವಿಡ್ ಕೂಲ್ಡ್ ಎಂಜಿನ್ ಹೊಂದಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಬಿಡುಗಡೆಯಾದ ಇದೇ ಸ್ಕೂಟರ್ ಪವರ್ 16.3BHP ಪವರ್ ಹಾಗೂ 14.9 NM ಟಾರ್ಕ್ ಸಾಮರ್ಥ್ಯ ಹೊಂದಿದೆ. ಆದರೆ ಭಾರತದಲ್ಲಿ ಇದೇ ಪವರ್ ಹಾಗೂ ಟಾರ್ಕ್ ನಿರೀಕ್ಷಿಸಲಾಗಿದೆ.

ಎಥೆನಾಲ್ ಸ್ಕೂಟರ್ ಮೈಲೇಜ್ ಎಷ್ಟು

ಶೇಕಡಾ 85ರಷ್ಟು ಎಥೆನಾಲ್ ಇಂಧನದಲ್ಲಿ ಚಲಿಸುವ ಈ ಸ್ಕೂಟರ್ ಮೈಲೇಜ್ ಎಲ್ಲರ ಕುತೂಹಲಕ್ಕೆ ಕಾರಣವಾಗಿದೆ. ಈ ಫ್ಲೆಕ್ಸ್ ಫ್ಯೂಯೆಲ್ ಸ್ಕೂಟರ್ ಒಂದು ಲೀಟರ್ ಇಂಧನದಲ್ಲಿ 40 ರಿಂದ 45 ಕಿಲೋಮೀಟರ್ ಮೈಲೇಜ್ ನೀಡಲಿದೆ ಎಂದು ಕಂಪನಿ ಹೇಳಿದೆ. ಈ ಮೂಲಕ ಪೆಟ್ರೋಲ್ ಎಂಜಿನ್ ಬೈಕ್‌ನಷ್ಟೇ ಮೈಲೇಜ್ ಸಾಮರ್ಥ್ಯ ನೀಡುವುದರಿಂದ ನಿರ್ವಹಣೆ ವೆಚ್ಚ ಕಡಿಮೆಯಾಗಲಿದೆ. ಕಾರಣ ಎಥೆನಾಲ್ 1 ಲೀಟರ್ ಬೆಲೆ ಸರಿಸುಮಾರು 60 ರೂಪಾಯಿ.

ಐದು ಇಂಚಿನ TFT ಡಿಸ್‌ಪ್ಲೇ, ಹೋಂಡಾ ರೋಡ್‌ಸಿಂಕ್ ಕನೆಕ್ಟಿವಿಟಿ (ಟರ್ನ್-ಬೈ-ಟರ್ನ್ ನ್ಯಾವಿಗೇಶನ್, SMS/ಕಾಲ್ ಅಲರ್ಟ್‌ಗಳು, ಮ್ಯೂಸಿಕ್ ಕಂಟ್ರೋಲ್), ಹೋಂಡಾ ಸೆಲೆಕ್ಟಬಲ್ ಟಾರ್ಕ್ ಕಂಟ್ರೋಲ್ (HSTC – ಟ್ರ್ಯಾಕ್ಷನ್ ಕಂಟ್ರೋಲ್), ಡ್ಯುಯಲ್ ಡಿಸ್ಕ್ ಬ್ರೇಕ್‌ಗಳು, ಸಿಂಗಲ್-ಚಾನೆಲ್ ABS, USB ಚಾರ್ಜಿಂಗ್, ಐಡಲ್ ಸ್ಟಾಪ್-ಸ್ಟಾರ್ಟ್ ಸಿಸ್ಟಮ್ ಸೇರಿದಂತೆ ಹಲವು ಫೀಚರ್ಸ್ ನೀಡಲಾಗಿದೆ. ಇನ್ನು ಸೀಟ್ ಸ್ಟೋರೇಜ್ 27 ಲೀಟರ್ ಹೊಂದಿದೆ. ಹೆಚ್ಚಿನ ಸ್ಟೋರೇಜ್ ಸ್ಪೇಸ್ ಕೂಡ ಲಭ್ಯವಾಗುವಂತೆ ವಿನ್ಯಾಸ ಮಾಡಲಾಗಿದೆ

ಹೀರೋ HF ಡಿಲಕ್ಸ್ ಈಗ ಅತೀ ಕಡಿಮೆ ಬೆಲೆಯಲ್ಲಿ ಲಭ್ಯ, ಕೇವಲ 59,999 ರೂಗೆ ಹೊಸ ಬೈಕ್

Chethan Kumar — Tue, 11 Aug 2026 11:45:09 +0530

ಬೆಂಗಳೂರು (ಆ.11) ಹೀರೋ ಮೋಟಾರ್ ಭಾರತದಲ್ಲಿ ಅಗ್ಗದ ಬೈಕ್‌ನಿಂದ ದುಬಾರಿ ಬೈಕ್‌ವೆರೆಗೂ ಮಾರುಕಟ್ಟೆ ಆಕ್ರಮಿಸಿಕೊಂಡಿದೆ. ಇದೀಗ ತನ್ನ ಜನಪ್ರಿಯ HF ಡಿಲಕ್ಸ್ ಬೈಕ್‌ ಬೆಲೆ ಕಡಿತಗೊಳಿಸಿ ಹೊಸ ಫೀಚರ್ ಜೊತೆ ನೀಡುತ್ತಿದೆ. HF ಡಿಲಕ್ಸ್ ಬೈಕ್ 66,782 ರೂಪಾಯಿ ಆರಂಭಿಕ ಬೆಲೆಯಲ್ಲಿ ಲಭ್ಯವಿದ್ದ ಬೈಕ್ ಇದೀಗ ಕೇವಲ 59,999 ರೂಪಾಯಿಗೆ ಲಭ್ಯವಿದೆ. ಭಾರಿ ಬೆಲೆ ಕಡಿತದ ಜೊತೆಗೆ ಹೀರೋ ಮೋಟಾರ್ ಭಾರತದ ಬೈಕ್ ಮಾರುಕಟ್ಟೆಯಲ್ಲಿ ಭಾರಿ ಸಂಚಲನ ಸೃಷ್ಟಿಸಿದೆ. ಬೈಕ್ ಹಾಗೂ ಸ್ಕೂಟರ್ ವಿಭಾಗದಲ್ಲಿ ಇದು ಅತ್ಯಂತ ಅಗ್ಗದ ದರವಾಗಿದೆ.

ಲಿಮಿಟೆಡ್ ಪಿರಿಯೆಡ್ ಆಫರ್

ಹೀರೋ HF ಡಿಲಕ್ಸ್ ಬೈಕ್ ಈ ಆಫರ್ ಲಿಮಿಟೆಡ್ ಪಿರಿಯೆಡ್ ಆಫರ್ ಆಗಿದೆ. ಇಷ್ಟೇ ಅಲ್ಲ ಸ್ಟಾಕ್ಸ್ ಕ್ಲಿಯರೆನ್ಸ್ ಆಫರ್ ಆಗಿದೆ. ಹೀಗಾಗಿ ಯಾವ ಡೀಲರ್ ಬಳಿ HF ಡಿಲಕ್ಸ್ ಸ್ಟಾಕ್ಸ್ ಲಭ್ಯವಿದೆಯೋ ಅಲ್ಲಿ ಕೇವಲ 59,999 ರೂಪಾಯಿ ಬೆಲೆಗೆ ಬೈಕ್ ಲಭ್ಯವಿದೆ. ಪ್ರತಿ ದಿನ ಕಚೇರಿ ಸೇರಿದಂತೆ ವಿವಿಧ ಕೆಲಸಗಳಿಗೆ ಬೈಕ್ ಬಳಸುವ ಮಂದಿಗೆ HF ಡಿಲಕ್ಸ್ ಅತ್ಯುತ್ತಮ ಆಯ್ಕೆಯಾಗಿದೆ. ಪ್ರಮುಖವಾಗಿ ಅತೀ ಕಡಿಮೆ ಬೆಲೆ ಜೊತೆಗೆ ಪ್ರಾಕ್ಟಿಲ್ ಆಗ 60 ರಿಂದ 70 ಕಿ.ಮೀಗೂ ಹೆಚ್ಚು ಮೈಲೇಜ್ ನೀಡಲಿದೆ. ಹೀಗಾಗಿ ಬೈಕ್ ಖರೀದಿ ಮಾತ್ರವಲ್ಲ ನಿರ್ವಹಣೆ ಕೂಡ ಅತೀ ಕಡಿಮೆ.

ಎಂಟ್ರಿ ಲೆವೆಲ್ ಬೈಕ್ ವಿಭಾಗದಲ್ಲಿ ಇದೀಗ HF ಡಿಲಕ್ಸ್ ಬೈಕ್ ಹಿಂದಿಕ್ಕಿಲು ಅಸಾಧ್ಯವಾಗಿದೆ. ಕಾರಣ ಕೈಗೆಟುಕುವ ಬೆಲೆಯ ಎಲ್ಲಾ ಸ್ಕೂಟರ್ ಅಥವಾ ಬೈಕ್ ಬೆಲೆ ಸರಿಸುಮಾರು 75 ರಿಂದ 1 ಲಕ್ಷ ರೂಪಾಯಿ ಇದೆ. ಆದರೆ HF ಡಿಲಕ್ಸ್ ಕೇವಲ 59,999 ರೂಪಾಯಿಗೆ ಲಭ್ಯವಿದೆ.

ಹೀರೋ HF ಡಿಲಕ್ಸ್ ಬೈಕ್ 97.2ಸಿಸಿ , ಸಿಂಗಲ್ ಸಿಲಿಂಡರ್ ಎಂಜಿನ್ ಹೊಂದಿದೆ. ಏರ್ ಕೂಲ್ಡ್ ಎಂಜಿನ್ 8.02 ಪಿಎಸ್ ಪವರ್ ಹಾಗೂ 8.056 ಎನ್ಎಂ ಟಾರ್ಕ್ ಸಾಮರ್ಥ್ಯ ಹೊಂದಿದೆ. ಸಿಟಿ ಹಾಗೂ ಹಳ್ಳಿಯ ಪ್ರತಿದಿನ ಸವಾರಿಗೆ ಇದು ಉತ್ತಮ ಬೈಕ್ ಆಗಿ ಹೊಹೊಮ್ಮಿದೆ. 4 ಸ್ಪೀಡ್ ಗೇರ್ ಬಾಕ್ಸ್ ಹೊಂದಿದೆ. i3S ತಂತ್ರಜ್ಞಾನ ಹೊಂದಿರುವ ಹೀರೋ ಟ್ರಾಫಿಕ್‌ನಲ್ಲೂ ಇಂಧನ ಉಳಿತಾಯ ಮಾಡಲು ನೆರವಾಗುತ್ತದೆ.

ಟೆಲಿಸ್ಕೋಪಿಕ್ ಫೋರ್ಕ್ ಹಾಗೂ ರೇರ್ 2 ಸ್ಟೆಪ್ ಅಡ್ಜಸ್ಟೇಬಲ್ ಹೆಡ್ರಾಲಿಕ್ ಶಾಕ್‌ಅಬ್ಸಾರ್ಬರ್ ಹೊಂದಿದೆ. ಹೀಗಾಗಿ ಗುಂಡಿಗಳ ರಸ್ತೆಯಲ್ಲಿ ಸುಗಮ ಸವಾರಿ ನೀಡಲಿದೆ. ಫ್ರಂಟ್ ಹಾಗೂ ರೇರ್ ಡ್ರೇಮ್ ಬ್ರೇಕ್ ನೀಡಲಾಗಿದೆ. ಹೆಚ್ಚಿನ ಸುರಕ್ಷತೆಗಾಗಿ ಇಂಟಿಗ್ರೇಟೆಡ್ ಬ್ರೇಕಿಂಗ್ ಸಿಸ್ಟಮ್ ವ್ಯವಸ್ಥೆ ನೀಡಲಾಗಿದೆ.