Asianet Suvarna News

ಬಿಡದಿ ಟೌನ್‌ಶಿಪ್: 2 ಗ್ರಾಮಗಳ 3271 ರೈತರ, 1883 ಎಕರೆ ಭೂ ಸ್ವಾಧೀನಕ್ಕೆ ಅಧಿಸೂಚನೆ

Kannadaprabha News — Sat, 31 Oct 2026 10:42:08 +0530

ರಾಮನಗರ : ಬಿಡದಿ ಟೌನ್‌ಶಿಪ್ Bidadi Township land acquisition (ಗ್ರೇಟರ್ ಬೆಂಗಳೂರು ಸಮಗ್ರ ಉಪನಗರ) ಯೋಜನೆಗೆ ರೈತರ ತೀವ್ರ ವಿರೋಧದ ನಡುವೆಯೂ ಸರ್ಕಾರ ಉಳಿದೆರಡು ಕಂದಾಯ ಗ್ರಾಮಗಳ ಭೂ ಸ್ವಾಧೀನ ಪ್ರಕ್ರಿಯೆಗೆ ಅಂತಿಮ ಅಧಿಸೂಚನೆ ಹೊರಡಿಸಿದೆ.

753 ಎಕರೆ ಭೂಮಿಗೆ ಅಧಿಸೂಚನೆ

ಯೋಜನಾ ವ್ಯಾಪ್ತಿಗೆ ಒಳಪಡುವ ಕಂಚುಗಾರನಹಳ್ಳಿ ಹಾಗೂ ಬೈರಮಂಗಲ ಗ್ರಾಮಗಳ ಭೂಸ್ವಾಧೀನಕ್ಕೆ ಫೈನಲ್ ನೋಟಿಫಿಕೇಷನ್ ಪ್ರಕಟಿಸಿದೆ. ಬೈರಮಂಗಲ ಗ್ರಾಮದ 1,866 ರೈತರಿಗೆ ಸೇರಿದ ಒಟ್ಟು 1,130 ಎಕರೆ ಭೂಮಿ ಹಾಗೂ ಕಂಚುಗಾರನಹಳ್ಳಿ ಗ್ರಾಮದ 1,405 ರೈತರಿಗೆ ಸೇರಿದ ಒಟ್ಟು 753 ಎಕರೆ ಭೂಮಿಗೆ ಅಧಿಸೂಚನೆ ಪ್ರಕಟಿಸಲಾಗಿದೆ.

ಬಿಡದಿ ಟೌನ್‌ಶಿಪ್ ಯೋಜನೆಗಾಗಿ ಒಟ್ಟು 9 ಕಂದಾಯ ಗ್ರಾಮಗಳ ಪೈಕಿ 7 ಗ್ರಾಮಗಳ ಭೂ ಸ್ವಾಧೀನಕ್ಕೆ ಅಧಿಸೂಚನೆ ಹೊರಡಿಸಿತ್ತು. ಮೊದಲಿಗೆ ಜೂನ್ 10ರಂದು ವಡೇರಹಳ್ಳಿ, ಮಂಡಲಹಳ್ಳಿ, ಕೆಂಪಯ್ಯನಪಾಳ್ಯ ಹಾಗೂ ಜುಲೈ 15ರಂದು ಅರಳಾಳುಸಂದ್ರ, ಬನ್ನಿಗಿರಿ, ಹೊಸೂರು, ಕೆ.ಜಿ.ಗೊಲ್ಲರಪಾಳ್ಯ ಗ್ರಾಮಗಳಲ್ಲಿ ಭೂ ಸ್ವಾಧೀನಕ್ಕೆ ಅಧಿಸೂಚನೆಯಾಗಿತ್ತು.

ಭೂಸ್ವಾಧೀನ ಪ್ರಕ್ರಿಯೆಗೆ ಚಾಲನೆ

ಆನಂತರ ರೈತರು ಮತ್ತು ವಿರೋಧ ಪಕ್ಷಗಳ ತೀವ್ರ ವಿರೋಧದ ಕಾರಣ ಬೈರಮಂಗಲ ಮತ್ತು ಕಂಚುಗಾರನಹಳ್ಳಿ ಗ್ರಾಮಗಳಿಗೆ ಅಂತಿಮ ಅಧಿಸೂಚನೆ ಹೊರಡಿಸಿರಲಿಲ್ಲ. ಇದೀಗ ಬಾಕಿ ಉಳಿದಿದ್ದ ಆ ಎರಡು ಗ್ರಾಮಗಳಿಗೂ ಅಂತಿಮ ಅಧಿಸೂಚನೆ ಹೊರಡಿಸುವ ಮೂಲಕ ಯೋಜನೆಯ ಭೂಸ್ವಾಧೀನ ಪ್ರಕ್ರಿಯೆಗೆ ಚಾಲನೆ ನೀಡಿದೆ.

ರಾಜ್ಯ ಸರ್ಕಾರದ ನಡೆ ವಿರುದ್ಧ ರೈತರ ಆಕ್ರೋಶ ಹೆಚ್ಚಾಗಿದ್ದು, ಹೋರಾಟ ಮತ್ತಷ್ಟು ತೀವ್ರಗೊಳ್ಳುವ ಸಾಧ್ಯತೆ ಇದೆ.

ಇದನ್ನೂ ಓದಿ: ನೈಸ್ ರಸ್ತೆಗೆ ಪರ್ಯಾಯವಾಗಿ ಬಿಡಿಎಯಿಂದ 'PRR-2' ಯೋಜನೆಗೆ ಮರುಜೀವ: 1,126 ಭೂಮಾಲೀಕರಿಗೆ ಆಸ್ತಿ ಕಳೆದುಕೊಳ್ಳುವ ಭೀತಿ!

ಇದನ್ನೂ ಓದಿ: ಬೆಂಗಳೂರಿನ ಭವಿಷ್ಯ ಬದಲಿಸಲು 13,500 ಎಕರೆಗಳ ಮೆಗಾ ಪ್ಲಾನ್! 9 ಕೈಗಾರಿಕಾ ಟೌನ್‌ಶಿಪ್, 1 ಟ್ರಿಲಿಯನ್ ಆರ್ಥಿಕತೆಯ ಗುರಿ

ಗ್ರಾಮ ಪ್ರದೇಶ	ಪ್ರದೇಶ (ಎಕರೆ)	ಖಾತೆದಾರರು
ಕೆಂಪಯ್ಯನಪಾಳ್ಯ	384	406
ಮಂಡಲಹಳ್ಳಿ	71	52
ವಡೇರಹಳ್ಳಿ	63	76
ಅರಳಾಳುಸಂದ್ರ	1460	1250
ಹೊಸರು	2390	1796
ಕೆ.ಜಿ.ಗೊಲ್ಲರಪಾಳ್ಯ	315	243
ಬನ್ನಿಗಿರಿ	775	641
ಕಂಚುಗಾರನಹಳ್ಳಿ	753	1405
ಬೈರಮಂಗಲ	1130	1866

ಬೆಂಗಳೂರಿನಲ್ಲಿದೆ ಒಂದು ಅದ್ಭುತ ಗ್ರಾಮ; ಇಲ್ಲಿ ಮನುಷ್ಯರಷ್ಟೇ ಅಲ್ಲ, ಮರಗಳೂ ನೃತ್ಯ ಮಾಡುತ್ತವೆ!

Chandrashekar GS — Sun, 01 Nov 2026 07:47:46 +0530

ಮರಗಳಿಗೂ ನೃತ್ಯದ ಲಯ ಕಲಿಸಿದ ನೃತ್ಯಗ್ರಾಮ: ಪ್ರಕೃತಿ, ವಾಸ್ತುಶಿಲ್ಪ ಮತ್ತು ಕಲೆಯ ಅಪೂರ್ವ ಸಂಗಮ

ನೃತ್ಯಕ್ಕೆಂದೇ ರೂಪುಗೊಂಡ ವಿಶಿಷ್ಟ ಗ್ರಾಮ

ಬೆಂಗಳೂರಿನಿಂದ ಸುಮಾರು 30 ಕಿಲೋಮೀಟರ್ ದೂರದಲ್ಲಿ, ಹೆಸರಘಟ್ಟದ ಬಳಿ ಇರುವ ನೃತ್ಯಗ್ರಾಮ (Nrityagram) ಭಾರತದ ವಿಶಿಷ್ಟ ಕಲಾ ಕೇಂದ್ರಗಳಲ್ಲಿ ಒಂದು. ಇಲ್ಲಿ ನೃತ್ಯವೆಂದರೆ ಕೇವಲ ವೇದಿಕೆಯ ಮೇಲೆ ಪ್ರದರ್ಶಿಸುವ ಕಲೆಯಲ್ಲ; ಇಲ್ಲಿನ ಕಟ್ಟಡಗಳು, ಮರಗಳು, ದಾರಿಗಳು, ನೆಲ ಮತ್ತು ಸುತ್ತಲಿನ ಪರಿಸರವೂ ನೃತ್ಯದ ಅನುಭವದ ಭಾಗವಾಗಿವೆ.

1990ರಲ್ಲಿ ಖ್ಯಾತ ಒಡಿಸ್ಸಿ ನೃತ್ಯಗಾರ್ತಿ ಪ್ರೋತಿಮಾ ಗೌರಿ ಬೇಡಿ ಈ ಗ್ರಾಮವನ್ನು ಸ್ಥಾಪಿಸಿದರು. ನೃತ್ಯ ಕಲಿಯುವವರು ಮತ್ತು ಕಲಾವಿದರು ತಮ್ಮ ಕಲೆಗೆ ಸಂಪೂರ್ಣವಾಗಿ ಸಮರ್ಪಿಸಿಕೊಳ್ಳಲು ಅನುಕೂಲವಾಗುವ ವಸತಿ ಗುರುಕುಲವನ್ನು ನಿರ್ಮಿಸುವುದು ಅವರ ಕನಸಾಗಿತ್ತು. ಅದಕ್ಕಾಗಿ ಹೆಸರಘಟ್ಟದ ಹತ್ತು ಎಕರೆ ಜಾಗವನ್ನು ಆಯ್ಕೆ ಮಾಡಿಕೊಂಡರು. ಅಲ್ಲಿ ರಸ್ತೆ ಸೌಲಭ್ಯವೂ ಇರಲಿಲ್ಲ. ಆದರೂ ಅವರು ಹಿಂದೆ ಸರಿಯಲಿಲ್ಲ. ಮರುದಿನವೇ ಸಸಿಗಳನ್ನು ತಂದು ನೆಡುವ ಮೂಲಕ ಗ್ರಾಮದ ಗಡಿಯನ್ನು ಕಲ್ಪಿಸಿಕೊಂಡರು.

ಕಟ್ಟಡಗಳಲ್ಲೂ ನೃತ್ಯದ ಹೆಜ್ಜೆಗುರುತು

ವಾಸ್ತುಶಿಲ್ಪಿ ಗೆರಾರ್ಡ್ ಡಾ ಕುನ್ಹಾ ಅವರ ಸಹಕಾರದಿಂದ ನೃತ್ಯಗ್ರಾಮದ ನಿರ್ಮಾಣ ಆರಂಭವಾಯಿತು. ಸ್ಥಳೀಯವಾಗಿ ದೊರೆಯುವ ಕಲ್ಲು, ಮಣ್ಣು ಮತ್ತು ಇತರ ಸಾಮಗ್ರಿಗಳನ್ನು ಬಳಸಿ ಕಟ್ಟಡಗಳನ್ನು ನಿರ್ಮಿಸಲಾಯಿತು. ಪ್ರತಿಯೊಂದು ನೃತ್ಯ ಪ್ರಕಾರಕ್ಕೂ ಅದರದೇ ಆದ ವಾಸ್ತುಶಿಲ್ಪದ ಪ್ರೇರಣೆ ನೀಡಲಾಗಿದೆ.

ಒಡಿಸ್ಸಿ ಗುರುಕುಲದ ಕಟ್ಟಡದಲ್ಲಿ ವಕ್ರಾಕೃತಿಗಳಿಗೆ ಆದ್ಯತೆ ನೀಡಲಾಗಿದೆ. ಮೊಹಿನಿಯಾಟ್ಟಂ ಗುರುಕುಲವು ಕೇರಳದ ದೇವಾಲಯಗಳ ವಿನ್ಯಾಸವನ್ನು ನೆನಪಿಸಿದರೆ, ಕಥಕ್ ಗುರುಕುಲದಲ್ಲಿ ಮೊಘಲ್ ವಾಸ್ತುಶಿಲ್ಪದ ಕಮಾನುಗಳ ಪ್ರಭಾವ ಕಾಣುತ್ತದೆ. ಹೀಗೆ ಕಟ್ಟಡಗಳ ವಿನ್ಯಾಸವೂ ಆಯಾ ನೃತ್ಯಶೈಲಿಯ ಸ್ವಭಾವವನ್ನು ಪ್ರತಿಬಿಂಬಿಸುತ್ತದೆ.

ಮರಗಳನ್ನೂ ನೃತ್ಯದ ಲಯದಲ್ಲಿ ನೆಟ್ಟ ಪ್ರೋತಿಮಾ

ನೃತ್ಯಗ್ರಾಮದ ಅತ್ಯಂತ ವಿಶೇಷ ಸಂಗತಿಯೆಂದರೆ ಮರಗಳ ನೆಡುವಿಕೆಯ ಹಿಂದಿರುವ ಕಲ್ಪನೆ. ಕಟ್ಟಡಗಳು ನಿರ್ಮಾಣವಾಗಬೇಕಿದ್ದ ಸ್ಥಳಗಳನ್ನು ಗುರುತಿಸಿದ ಬಳಿಕ, ಪ್ರೋತಿಮಾ ತೆರೆದ ಜಾಗದಲ್ಲಿ ಸಂಗೀತದೊಂದಿಗೆ ನೃತ್ಯ ಮಾಡುತ್ತಿದ್ದರು. ಅವರು ಒಂದೊಂದು ಭಂಗಿಯಲ್ಲಿ ನಿಂತಾಗ ಆ ಸ್ಥಳದಲ್ಲಿ ಕಲ್ಲು ಇಟ್ಟು, ಅಲ್ಲಿ ಮರವನ್ನು ನೆಡಲಾಗುತ್ತಿತ್ತು. ಹೀಗಾಗಿ ಮರಗಳ ಸಾಲುಗಳಲ್ಲೂ ಒಂದು ಲಯ ಮತ್ತು ವಿನ್ಯಾಸ ರೂಪುಗೊಂಡಿತು.

ಇಲ್ಲಿನ ನಾಗಪುಷ್ಪ ಮರಗಳ ತೋಪು ಈ ಕಲ್ಪನೆಗೆ ಸಾಕ್ಷಿಯಾಗಿದೆ. ಮರಗಳ ಬೆಳವಣಿಗೆಯಲ್ಲೂ ನೃತ್ಯದ ಚಲನೆ ಮತ್ತು ಲಯವನ್ನು ಕಾಣಬಹುದು ಎಂದು ನೃತ್ಯಗ್ರಾಮದ ಕಾರ್ಯನಿರ್ವಾಹಕ ನಿರ್ದೇಶಕಿ ಲಿನ್ ಫೆರ್ನಾಂಡಿಸ್ ವಿವರಿಸಿದ್ದಾರೆ.

ಕಲಾವಿದರ ದೇಹಕ್ಕೂ ಆದ್ಯತೆ ನೀಡುವ ವಿನ್ಯಾಸ

ನೃತ್ಯಗ್ರಾಮದ ಅಗ್ನಿ ದೇವಾಲಯವೂ ವಿಶೇಷ ಆಕರ್ಷಣೆ. 1998ರಲ್ಲಿ ನಿರ್ಮಿಸಲಾದ ಈ ಕಟ್ಟಡವನ್ನು ಅಪರೂಪದ ತಂತ್ರ ಬಳಸಿ ಮಣ್ಣಿನಿಂದಲೇ ಸುಟ್ಟು ಗಟ್ಟಿಗೊಳಿಸಲಾಗಿದೆ. ಅದರ ಗೋಡೆಗಳಲ್ಲಿ ಗೆಜ್ಜೆ ಮತ್ತು ನೃತ್ಯ ಉಡುಪುಗಳ ವಿನ್ಯಾಸಗಳನ್ನು ಕಾಣಬಹುದು. ದೇವಾಲಯದ ಕೇಂದ್ರದಲ್ಲಿ ನೀರು ಮತ್ತು ಹೂವುಗಳನ್ನು ಇರಿಸುವ ಕಲ್ಲಿನ ರಚನೆಯೂ ಇದೆ.

ನೃತ್ಯಗಾರರು ಪ್ರತಿದಿನ ಹಲವು ಗಂಟೆಗಳ ಕಾಲ ಅಭ್ಯಾಸ ಮಾಡುವುದರಿಂದ ಅವರ ದೇಹಕ್ಕೆ ಹಾನಿಯಾಗದಂತೆ ನೆಲವನ್ನೂ ರೂಪಿಸಲಾಗಿದೆ. ಹಳೆಯ ಬರ್ಮಾ ತೇಗದ ಮರದ ಹಲಗೆಗಳನ್ನು ಬಳಸಿ, ನೃತ್ಯದ ಹೊಡೆತಗಳನ್ನು ತಗ್ಗಿಸುವ ವಿಶೇಷ ನೆಲವನ್ನು ಸಿದ್ಧಪಡಿಸಲಾಗಿದೆ. ಕಲಾವಿದರ ದೇಹವೂ ದೇವಾಲಯದಷ್ಟೇ ಪವಿತ್ರ ಎಂಬ ದೃಷ್ಟಿಕೋನ ಇಲ್ಲಿನ ವಿನ್ಯಾಸದಲ್ಲಿದೆ.

ಮಣ್ಣಿನಿಂದಲೇ ಅರಳಿದ ಕಲೆಯ ಲೋಕ

ಇತ್ತೀಚಿನ ಸೇರ್ಪಡೆಯಾದ ‘ಕುಲ’ ಕಲಾವಿದರ ವಸತಿ ಕೇಂದ್ರವು ಕಲ್ಲು, ಇಟ್ಟಿಗೆ, ಮಣ್ಣು ಮತ್ತು ಮರದಂತಹ ಸ್ಥಳೀಯ ವಸ್ತುಗಳಿಂದ ನಿರ್ಮಾಣಗೊಂಡಿದೆ. ಸಂಗೀತದ ಸಂಯೋಜನೆಯಂತೆ ತೆರೆದ ಸ್ಥಳದಿಂದ ಹೆಚ್ಚು ಖಾಸಗಿ ಜಾಗಗಳತ್ತ ಸಾಗುವ ವಿನ್ಯಾಸ ಇದಕ್ಕಿದೆ.

ನಗರಗಳಲ್ಲಿ ನೃತ್ಯವನ್ನು ಒಂದು ನಿರ್ದಿಷ್ಟ ಜಾಗಕ್ಕೆ ಹೊಂದಿಸಬೇಕಾಗುತ್ತದೆ. ಆದರೆ ನೃತ್ಯಗ್ರಾಮದಲ್ಲಿ ಇಡೀ ಪರಿಸರವನ್ನೇ ನೃತ್ಯಕ್ಕೆ ಹೊಂದಿಸಲಾಗಿದೆ. ಇದೇ ಈ ಗ್ರಾಮದ ವಿಶಿಷ್ಟತೆ. ಪ್ರಕೃತಿ, ವಾಸ್ತುಶಿಲ್ಪ ಮತ್ತು ಭಾರತೀಯ ಶಾಸ್ತ್ರೀಯ ನೃತ್ಯ ಒಂದಕ್ಕೊಂದು ಬೆರೆತು ರೂಪಿಸಿರುವ ಈ ತಾಣ, ಕಲೆ ಬದುಕಿನ ಭಾಗವಾಗಬಹುದು ಎಂಬುದಕ್ಕೆ ಸುಂದರ ಉದಾಹರಣೆಯಾಗಿದೆ.

ಮೆಟ್ರೋ ಗುಲಾಬಿ ಮಾರ್ಗ ಆರಂಭಕ್ಕೆ ಕೇಂದ್ರದ ಉತ್ತರ ಬರಬೇಕು, 2027ರ ಜುಲೈನಲ್ಲಿ ಸಿಲ್ಕ್‌ಬೋರ್ಡ್-ಕೆ.ಆರ್.ಪುರ ಓಪನ್

Gowthami K — Fri, 23 Oct 2026 08:12:58 +0530

ಬೆಂಗಳೂರು: ಕಾಳೇನ ಅಗ್ರಹಾರದಿಂದ ತಾವರೆಕೆರೆವರೆಗಿನ ಮೆಟ್ರೋ ರೈಲು (ಗುಲಾಬಿ ಮಾರ್ಗ) ಸೇವೆ ಉದ್ಘಾಟನೆಗಾಗಿ ಕೇಂದ್ರ ಸರ್ಕಾರದ ಒಪ್ಪಿಗೆಗೆ ಕಾಯುತ್ತಿದ್ದೇವೆ ಎಂದು ಬೆಂಗಳೂರು ನಗರಾಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ತಿಳಿಸಿದ್ದಾರೆ. ಗುರುವಾರ ಮೆಟ್ರೋ ಕಾಮಗಾರಿಗಳ ಪ್ರಗತಿ ಪರಿಶೀಲನೆ ನಡೆಸಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಕಾಳೇನ ಅಗ್ರಹಾರದಿಂದ ತಾವರೆಕೆರೆವರೆಗಿನ 7.5 ಕಿ.ಮೀ ಮಾರ್ಗದ ಎಲ್ಲ ಪ್ರಯೋಗಿಕ ಪರೀಕ್ಷೆಗಳು ಮುಗಿದಿದ್ದು, ನಾಲ್ಕೈದು ದಿನಗಳಲ್ಲಿ ಕಾರ್ಯಾಚರಣೆಯ ಅನುಮತಿ ಸಿಗುವ ನಿರೀಕ್ಷೆ ಇದೆ. ಉದ್ಘಾಟಿಸಲು ದಿನಾಂಕ ನಿಗದಿಪಡಿಸುವಂತೆ ಕೋರಿ ಮುಖ್ಯಮಂತ್ರಿಯವರು ಪತ್ರ ಬರೆದಿದ್ದರೂ ಕೇಂದ್ರ ಸರ್ಕಾರದಿಂದ ಈವರೆಗೆ ಪ್ರತಿಕ್ರಿಯೆ ಬಂದಿಲ್ಲ. ಹೀಗಾಗಿ, ಮುಂದಿನ ವಾರ ಕೇಂದ್ರ ಸಚಿವರನ್ನು ನೇರವಾಗಿ ಭೇಟಿ ಮಾಡಿ ಮನವಿ ಮಾಡಲಾಗುವುದು ಎಂದರು.

2027ರ ಜುಲೈನಲ್ಲಿ ಸಿಲ್ಕ್‌ಬೋರ್ಡ್-ಕೆ.ಆರ್.ಪುರ ಮಾರ್ಗ:

ಬೆಂಗಳೂರು ಏರ್‌ಪೋರ್ಟ್‌ನಿಂದ ಸಿಲ್ಕ್‌ಬೋರ್ಡ್‌ವರೆಗಿನ 58 ಕಿ.ಮೀ ಮೆಟ್ರೋ ನೀಲಿ ಮಾರ್ಗದ ಪೈಕಿ ಕೆ.ಆರ್.ಪುರದಿಂದ ಸಿಲ್ಕ್ ಬೋರ್ಡ್‌ವರೆಗಿನ 19.75 ಕಿ.ಮೀ ಉದ್ದದ ಮಾರ್ಗದಲ್ಲಿ ಈ ತಿಂಗಳ ಅಂತ್ಯದ ವೇಳೆಗೆ ಪ್ರಾಯೋಗಿಕ ಸಂಚಾರ ಆರಂಭಿಸಲು ಸೂಚಿಸಲಾಗಿದೆ ಎಂದು ಅವರು ತಿಳಿಸಿದರು.

ಪರೀಕ್ಷಾರ್ಥ ಹಾರಾಟ, ತಾಂತ್ರಿಕ ಅನುಮತಿ ಸೇರಿದಂತೆ ಎಲ್ಲ ಪ್ರಕ್ರಿಯೆಗಳನ್ನು ಮುಗಿಸಿ ಮುಂದಿನ ವರ್ಷದ ಜುಲೈ ವೇಳೆಗೆ ಕೆ.ಆರ್.ಪುರದಿಂದ ಸೆಂಟ್ರಲ್ ಸಿಲ್ಕ್ ಬೋರ್ಡ್‌ವರೆಗಿನ ಮಾರ್ಗದಲ್ಲಿ ಪ್ರಯಾಣಿಕರ ಸಂಚಾರಕ್ಕೆ ಮುಕ್ತಗೊಳಿಸುವ ಗುರಿ ಹೊಂದಲಾಗಿದೆ. ಹೆಬ್ಬಾಳದಿಂದ ಏರ್‌ಪೋರ್ಟ್‌ವರೆಗಿನ ಮಾರ್ಗದಲ್ಲಿ 2027ರ ನವೆಂಬರ್ ವೇಳೆಗೆ ಪ್ರಾಯೋಗಿಕ ಸಂಚಾರ ಮಾಡಲೇಬೇಕೆಂದು ಸೂಚಿಸಲಾಗಿದೆ ಎಂದು ಸಚಿವರು ಹೇಳಿದರು.

ಅಕ್ಟೋಬರ್ ಕೊನೆಯೊಳಗೆ ಟ್ರಯಲ್ ರನ್

ಮೆಟ್ರೋ ಕಾಮಗಾರಿ ನಡೆಯುತ್ತಿರುವ ಮಾರ್ಗದಲ್ಲಿ ರಸ್ತೆ ಮತ್ತು ಫುಟ್‌ಪಾತ್‌ಗಳನ್ನು ಒತ್ತುವರಿ ಮಾಡಿಕೊಂಡು ವಾಹನಗಳ ಸುಗಮ ಸಂಚಾರಕ್ಕೆ ಅಡ್ಡಿಪಡಿಸುತ್ತಿರುವ ಗುತ್ತಿಗೆದಾರರು ಹಾಗೂ ಮೆಟ್ರೋ ಅಧಿಕಾರಿಗಳ ವಿರುದ್ಧ ಬೆಂಗಳೂರು ನಗರಾಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ತರಾಟೆಗೆ ತೆಗೆದುಕೊಂಡಿದ್ದಾರೆ.

ಗುರುವಾರ ಮೆಟ್ರೋ ರೈಲು ಅಧಿಕಾರಿಗಳೊಂದಿಗೆ ಹೆಬ್ಬಾಳ-ಕೆ.ಆರ್.ಪುರ ನಡುವಿನ ನೀಲಿ ಮಾರ್ಗದ ಮೆಟ್ರೋ ಪ್ರಗತಿ ಪರಿಶೀಲನೆ ನಡೆಸಿದ ಅವರು, ನಾಗವಾರ ರಿಂಗ್ ರಸ್ತೆಯ ಮಾನ್ಯತಾ ಟೆಕ್ ಪಾರ್ಕ್ ಬಳಿ ರಸ್ತೆಯನ್ನು ಅತಿಕ್ರಮಿಸಿಕೊಂಡು ಅತಿಯಾಗಿ ಬ್ಯಾರಿಕೇಡ್ ಅಳವಡಿಸಿರುವುದಕ್ಕೆ ಸಚಿವರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು.

ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಕೆ.ಆರ್.ಪುರದಿಂದ ನಾಗವಾರ ಮತ್ತು ಅಲ್ಲಿಂದ ಹೆಬ್ಬಾಳದವರೆಗಿನ ಮಾರ್ಗವು ಅತ್ಯಂತ ಸಂಕೀರ್ಣವಾಗಿದೆ. ಹೀಗಾಗಿ, ಕಾಮಗಾರಿ ತಡವಾಗಿದೆ. ಕೆ.ಆರ್.ಪುರ ಬಳಿ ಕಾಮಗಾರಿ ಆರಂಭಿಸಲು ಮರಗಳನ್ನು ಕಡಿಯುವುದಕ್ಕೆ ನ್ಯಾಯಾಲಯದಿಂದ ಒಂದು ವರ್ಷ ಕಾಲ ತಡೆಯಾಜ್ಞೆ ಇದ್ದ ಕಾರಣ, ಕಾಮಗಾರಿ ನಿಗದಿತ ಅವಧಿಗಿಂತ ಕನಿಷ್ಠ ಒಂದು ವರ್ಷ ವಿಳಂಬವಾಗಿದೆ ಎಂದರು.

ಬೇರೆ ನಗರಗಳಲ್ಲಿ ಮೆಟ್ರೋ ಕಾಮಗಾರಿಗೆ ಮರ ಕಡಿಯಲು ಹೈಕೋರ್ಟ್ ಹೋಗುವ ಅಗತ್ಯವಿರುವುದಿಲ್ಲ. ಆದರೆ, ಬೆಂಗಳೂರಿನಲ್ಲಿ ಪಿಐಎಲ್ ಹಾಕಿ, ಟ್ರೀ ಕಮಿಟಿ ಮತ್ತು ಹೈಕೋರ್ಟ್ ಅನುಮತಿ ಪಡೆದು, ಪ್ರತಿಯೊಂದು ಮರ ಕಡಿಯುವುದಕ್ಕೂ ಕಠಿಣವಾದ ಪ್ರಕ್ರಿಯೆಯನ್ನು ಪಾಲಿಸಬೇಕಾಗಿದೆ. ಇದರ ಜೊತೆಗೆ, ಹಲವೆಡೆ ಕಾವೇರಿ ನೀರು ಸರಬರಾಜು ಪೈಪ್‌ಲೈನ್‌ಗಳು ಮತ್ತು ಒಳಚರಂಡಿ ಲೈನ್‌ಗಳು ಅಡ್ಡಿಯಾಗಿವೆ. ಇವುಗಳನ್ನು ತೆರವುಗೊಳಿಸಿ ಹೊಸ ಲೈನ್‌ಗಳನ್ನು ಹಾಕಲು ಸುಮಾರು 6 ರಿಂದ 8 ತಿಂಗಳು ಕಾಲ ವಿಳಂಬವಾಗಿದೆ ಎಂದು ಸಚಿವರು ತಿಳಿಸಿದರು.

ಹೊರವರ್ತುಲ ರಸ್ತೆಯಲ್ಲಿ ಅತಿಯಾದ ವಾಹನ ದಟ್ಟಣೆ ಇರುವುದರಿಂದ ಹಗಲಿನಲ್ಲಿ ಕೆಲಸ ಮಾಡಲು ಸಾಧ್ಯವಾಗದೆ ಕೇವಲ ರಾತ್ರಿ 7 ಗಂಟೆಯಿಂದ ಬೆಳಗಿನ ಜಾವದವರೆಗೆ ಮಾತ್ರ ಕೆಲಸ ಮಾಡಬೇಕಾಗಿರುವುದು ವಿಳಂಬಕ್ಕೆ ಕಾರಣವಾಗಿದೆ. ಇಂತಹ ಸಂಕೀರ್ಣವಾದ ಕಾಮಗಾರಿಗಳನ್ನು ಮಾಡುವಾಗ ಸಣ್ಣಪುಟ್ಟ ಸಮಸ್ಯೆಗಳು ಬರುವುದು ಸಹಜವಾದರೂ, ಸಂಬಂಧಪಟ್ಟ ಗುತ್ತಿಗೆದಾರರು ನಿರೀಕ್ಷಿತ ಮಟ್ಟದಲ್ಲಿ ಮತ್ತು ವೇಗವಾಗಿ ಸ್ಪಂದಿಸುತ್ತಿಲ್ಲ. ಈಗಾಗಲೇ ಒಂದು ವರ್ಷ ತಡವಾಗಿದ್ದು, ಇನ್ನೂ ವಿಳಂಬ ಮಾಡದೆ ಅಕ್ಟೋಬರ್ ಕೊನೆಯೊಳಗೆ ಟ್ರಯಲ್ ರನ್ ಮಾಡುವಂತೆ ತಾಕೀತು ಮಾಡಿದ್ದೇನೆ ಎಂದು ಕೃಷ್ಣಬೈರೇಗೌಡ ವಿವರಿಸಿದರು.

ಅನಗತ್ಯ ಬ್ಯಾರಿಕೇಡ್ :

ಹೊರವರ್ತುಲ ರಸ್ತೆಯಲ್ಲಿ ಮೆಟ್ರೋ ಕಾಮಗಾರಿ ಮುಗಿದಿದ್ದರೂ ಕೆಲವೆಡೆ ಅನಗತ್ಯವಾಗಿ ಬ್ಯಾರಿಕೇಡ್ ಹಾಕಿ ಟ್ರಾಫಿಕ್ ಸಮಸ್ಯೆಯನ್ನು ಉಲ್ಬಣಗೊಳಿಸಲಾಗುತ್ತಿದೆ. ಇದು ಸರಿಯಲ್ಲ. ಹೀಗಾಗಿ, ಬ್ಯಾರಿಕೇಡ್ ಗಳನ್ನು ತೆರವುಗೊಳಿಸಿ ವಾಹನ ಸಂಚಾರಕ್ಕೆ ಅನುವು ಮಾಡಿಕೊಡಿ ಎಂದು ಸಚಿವ ಕೃಷ್ಣ ಬೈರೇಗೌಡ ಅಧಿಕಾರಿಗಳಿಗೆ ಸೂಚಿಸಿದರು.

Dabaspet: ಬೋನಸ್, ಪ್ರೋತ್ಸಾಹಧನ ನೀಡದ ಹಿನ್ನೆಲೆ ರೈತರಿಂದ ಹಾಲು ಚೆಲ್ಲಿ ಪ್ರತಿಭಟನೆ

Kannadaprabha News — Tue, 20 Oct 2026 08:19:47 +0530

ಬೆಂಗಳೂರು ಗ್ರಾಮಾಂತರ: ದಾಬಸ್‍ಪೇಟೆ ಸೋಂಪುರ ಹೋಬಳಿಯ ಶಿವಗಂಗೆ ಗ್ರಾಪಂ ವ್ಯಾಪ್ತಿ ನಾರಾಯಣಪುರ ಗ್ರಾಮದಲ್ಲಿ ಹಾಲು ಉತ್ಪಾದಕ ರೈತರು ಹಾಲು ಉತ್ಪಾದಕರ ಸಹಕಾರ ಸಂಘದ ಆಡಳಿತ ಮಂಡಳಿಯ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿ ನೂರಾರು ಲೀಟರ್ ಹಾಲನ್ನು ಡೈರಿಯ ಒಳಗೆ ಮತ್ತು ರಸ್ತೆಯ ಮೇಲೆ ಚೆಲ್ಲಿ ಉಗ್ರವಾಗಿ ಪ್ರತಿಭಟನೆ ನಡೆಸಿದ್ದಾರೆ.

ದಸರಾ ಹಬ್ಬದ ಸಂದರ್ಭದಲ್ಲಿ ರೈತರಿಗೆ ಸಿಗಬೇಕಾದ ಬೋನಸ್ ಹಾಗೂ ಪ್ರೋತ್ಸಾಹಧನವನ್ನು ನೀಡದೆ ಆಡಳಿತ ಮಂಡಳಿ ವಂಚಿಸಿದ್ದಲ್ಲದೇ ಸಂಘದ ಅಧ್ಯಕ್ಷ ಮಂಜುನಾಥ್, ರೈತರ ಕಷ್ಟದ ದುಡ್ಡು ಹಾಗೂ ಉಳಿತಾಯ ಹಣದಲ್ಲಿ ಭಾರೀ ಪ್ರಮಾಣದ ಅವ್ಯವಹಾರ ಮತ್ತು ಅಕ್ರಮ ಎಸಗಿದ್ದಾರೆ. ರೈತರು ನೀಡುವ ಹಾಲಿಗೆ ಸೂಕ್ತ ಬೆಂಬಲ ಬೆಲೆ ಸಿಗುತ್ತಿಲ್ಲ ಎಂದು ಗಂಭೀರ ಆರೋಪ ಮಾಡಿದರು.

ನೂರಾರು ಲೀಟರ್ ಹಾಲು ಚೆಲ್ಲಿ ರೈತರ ಆಕ್ರೋಶ

ಪ್ರತಿದಿನ ಕಷ್ಟಪಟ್ಟು ಕರೆದ ಹಾಲನ್ನು ತಾವೇ ಸ್ವತಃ ನೂರಾರು ಲೀಟರ್ ಪ್ರಮಾಣದಲ್ಲಿ ಡೈರಿಯ ನೆಲದ ಮೇಲೆ ಹಾಗೂ ರಸ್ತೆಯ ಮೇಲೆ ಚೆಲ್ಲುವ ಮೂಲಕ ರೈತರು ಸರ್ಕಾರದ ಹಾಗೂ ಹಿರಿಯ ಅಧಿಕಾರಿಗಳ ವಿರುದ್ಧ ಪ್ರತಿಭಟನೆ ನಡೆಸಿದರು.

ರೈತರು ಆಕ್ರೋಶ ಹೊರಹಾಕಿದ್ದರಿಂದ ಸ್ಥಳದಲ್ಲಿ ಬಿಗುವಿನ ವಾತಾವರಣ ನಿರ್ಮಾಣವಾಗಿತ್ತು.

ಸಂಘದ ಅಧ್ಯಕ್ಷ ಮಂಜುನಾಥ್ ಹಾಗೂ ಕಾರ್ಯದರ್ಶಿ ನೇತೃತ್ವದಲ್ಲಿ ನಡೆದಿರುವ ಹಣಕಾಸಿನ ಅವ್ಯವಹಾರದ ಬಗ್ಗೆ ಸಹಕಾರ ಇಲಾಖೆಯ ಹಿರಿಯ ಅಧಿಕಾರಿಗಳು ತಕ್ಷಣವೇ ಸ್ಥಳಕ್ಕೆ ಬಂದು ಸೂಕ್ತ ತನಿಖೆ ನಡೆಸಬೇಕು. ತಡೆಹಿಡಿಯಲಾಗಿರುವ ದಸರಾ ಬೋನಸ್ ಮತ್ತು ಸರ್ಕಾರದ ಪ್ರೋತ್ಸಾಹಧನವನ್ನು ತಕ್ಷಣವೇ ರೈತರ ಖಾತೆಗಳಿಗೆ ಜಮಾ ಮಾಡಬೇಕು. ರೈತರ ಹಣ ದುರುಪಯೋಗಪಡಿಸಿಕೊಂಡಿರುವ ಪ್ರಸ್ತುತ ಆಡಳಿತ ಮಂಡಳಿಯನ್ನು ವಜಾಗೊಳಿಸಿ, ರೈತರ ಹಿತ ಕಾಯುವ ಹೊಸ ಸಮಿತಿಗೆ ಅವಕಾಶ ನೀಡಬೇಕು ಎಂದು ರೈತರು ಒತ್ತಾಯಿಸಿದರು.

Namma Metro ಹಳದಿ ಲೈನ್ಗೆ ಜಯಲಲಿತಾ, ಕರುಣಾನಿಧಿ ಹೆಸರಿಡ್ತೀರಾ? ಕನ್ನಡ ಸಂಘಟನೆಗಳಿಂದ ಭಾರಿ ವಿರೋಧ

Suchethana D — Sat, 24 Oct 2026 17:55:16 +0530

ಬೆಂಗಳೂರು: ನಮ್ಮ ಮೆಟ್ರೋ ಹಳದಿ ಮಾರ್ಗ (Yellow Line) ಬೆಂಗಳೂರಿನ ಆರ್‌ವಿ ರಸ್ತೆ (RV Road) ಯಿಂದ ಬೊಮ್ಮಸಂದ್ರದವರೆಗೆ ಸಂಪರ್ಕ ಕಲ್ಪಿಸುವ 19.15 ಕಿ.ಮೀ ಉದ್ದದ ಎತ್ತರಿಸಿದ (Elevated) ಮೆಟ್ರೋ ಮಾರ್ಗವಾಗಿದೆ. ಸದ್ಯ ಈ ಲೈನ್ ಅನ್ನು ಬೊಮ್ಮಸಂದ್ರದಿಂದ ತಮಿಳುನಾಡಿನ ಹೊಸೂರಿಗೆ ವಿಸ್ತರಿಸುವ ಯೋಜನೆ ಇದ್ದು, ಇದಕ್ಕೆ ಕನ್ನಡ ಪರ ಸಂಘಟನೆಗಳಿಂದ ತೀವ್ರ ಆಕ್ರೋಶ ವ್ಯಕ್ತವಾಗಿದೆ. ಬೊಮ್ಮಸಂದ್ರದಿಂದ ಅತ್ತಿಬೆಲೆವರೆಗೆ ಸುಮಾರು 10 ಕಿ.ಮೀ ವರೆಗೆ (ಹೊಸ 9 ನಿಲ್ದಾಣಗಳೊಂದಿಗೆ) ಹಳದಿ ಮಾರ್ಗವನ್ನು ವಿಸ್ತರಿಸಲು ಪ್ರಸ್ತಾವನೆ ಇದೆ. ಹೀಗೆ ಮಾಡುವುದು ಬೇಡ ಎನ್ನುವುದು ಕನ್ನಡಪರ ಹೋರಾಟಗಾರರಾದ ವಾಟಾಳ್ ನಾಗರಾಜ್ ಮತ್ತು ಕರವೇ ಮುಖಂಡ ಪ್ರವೀಣ್ ಶೆಟ್ಟಿ ಸೇರಿದಂತೆ ಇತರ ಕನ್ನಡಿಗರ ಆಗ್ರಹವಾಗಿದೆ.

ಏಕೆ ವಿರೋಧ?

ಹೊಸೂರಿನವರೆಗೆ ನಮ್ಮಮೆಟ್ರೊ ವಿಸ್ತರಿಸಿದರೆ, ತಮಿಳುನಾಡಿಗೆ ಕರ್ನಾಟಕದ ಮೆಟ್ರೋವನ್ನು ವಿಸ್ತರಿಸಿದಂತೆ ಆಗುತ್ತದೆ. ಇದಾಗಲೇ ಕಾವೇರಿ ನದಿ ನೀರಿನ ಹಂಚಿಕೆ ಕುರಿತು ಎರಡೂ ರಾಜ್ಯಗಳ ನಡುವೆ ಭಾರಿ ವಿವಾದ ಇದೆ. ಇಂಥ ಸಂದರ್ಭದಲ್ಲಿ, ಬೆಂಗಳೂರಿಗೆ ಸೀಮಿತವಾಗಿರುವ ನಮ್ಮೆ ಮೆಟ್ರೋ ತಮಿಳುನಾಡಿಗೆ ವಿಸ್ತರಿಸಬಾರದು ಎನ್ನುವುದು ಇವರ ಆಗ್ರಹ. ಒಂದು ವೇಳೆ ಹೀಗೆ ಮಾಡಿದರೆ, ಬೆಂಗಳೂರು ನಗರ ಮಿನಿ ತಮಿಳುನಾಡು ಆಗಿ ಪರಿವರ್ತನೆಯಾಗುವ ಅಪಾಯವಿದೆ ಎನ್ನುವುದು ಅವರ ಆಕ್ರೋಶ. ಇದಾಗಲೇ ಬೆಂಗಳೂರಿನಲ್ಲಿ ತಮಿಳರು ಹೆಚ್ಚಿನ ಸಂಖ್ಯೆಯಲ್ಲಿ ಇದ್ದಾರೆ. ಎರಡೂ ರಾಜ್ಯಗಳ ನಡುವೆ ಮೆಟ್ರೋ ಆದರೆ ಇದರ ಪರಿಸ್ಥಿತಿ ಇನ್ನಷ್ಟು ವಿಕೋಪಕ್ಕೆ ಹೋಗಲಿದೆ ಎನ್ನುವುದು ಕನ್ನಡ ಪರ ಸಂಘಟನೆಗಳ ಎಚ್ಚರಿಕೆ.

ಹೀಗೆನಾದರೂ ನಮ್ಮ ಮೆಟ್ರೋ ವಿಸ್ತರಿಸಿದರೆ ಉಗ್ರ ಹೋರಾಟ ಮಾಡುವುದಾಗಿ, ಸಂಘಟನೆ ಎಚ್ಚರಿಕೆ ಕೊಟ್ಟಿದೆ. ಈ ಕುರಿತು, ಕರ್ನಾಟಕ ರಕ್ಷಣಾ ವೇದಿಕೆಯ ಮುಖಂಡ ಪ್ರವೀಣ್ ಶೆಟ್ಟಿ, 'ಕಾವೇರಿ ನೀರನ್ನು ಬಿಡದ ಹಾಗೂ ಮೇಕೆದಾಟು ಯೋಜನೆಗೆ ಅನುಮತಿ ನೀಡದ ನೆರೆ ರಾಜ್ಯಕ್ಕೆ ನಮ್ಮ ಮೆಟ್ರೋ ಸಂಪರ್ಕ ಕಲ್ಪಿಸುವ ಅಗತ್ಯವಿಲ್ಲ.ಒಂದು ವೇಳೆ ಹೀಗೆ ಅನುಮತಿ ಕೊಟ್ಟರೆ, ನಮ್ಮ ಮೆಟ್ರೋ ನಿಲ್ದಾಣಗಳಿಗೆ ಜಯಲಲಿತಾ, ಕರುಣಾನಿಧಿ, ಎಂಜಿಆರ್ ಅವರ ಹೆಸರುಗಳನ್ನು ಇಡುವ ಪರಿಸ್ಥಿತಿಯೂ ಬರಬಹುದು. ಅದರಲ್ಲೂ, ಇದು ಯಾವುದೇ ಜನಾಂಗೀಯ ದ್ವೇಷದ ಪ್ರಶ್ನೆಯಲ್ಲ, ಬದಲಿಗೆ ಕರ್ನಾಟಕದ ಹಿತಾಸಕ್ತಿಯ ಹಿತದೃಷ್ಟಿಯಿಂದ ಕೈಗೊಂಡಿರುವ ನಿರ್ಧಾರ ಎಂದಿದ್ದಾರೆ. ಈ ಹಿನ್ನೆಲೆಯಲ್ಲಿ ಯಾವುದೇ ಕಾರಣಕ್ಕೂ ಮೆಟ್ರೋ ವಿಸ್ತರಣೆ ಆಗಬಾರದು. ಇದಕ್ಕಾಗಿ ಹೋರಾಟಕ್ಕೂ ಸಿದ್ಧ ಎಂದಿದ್ದಾರೆ.

ಏನಿದು ಯೋಜನೆಯ ಪ್ರಸ್ತಾವ?

ತಮಿಳುನಾಡು ಸರ್ಕಾರವು ಹೊಸೂರಿನಿಂದ ಬೊಮ್ಮಸಂದ್ರದವರೆಗೆ 23 ಕಿ.ಮೀ ಕಾರಿಡಾರ್ ನಿರ್ಮಿಸಲು ಆಸಕ್ತಿ ತೋರಿಸಿತ್ತು. ಅದರಂತೆ, ತಮಿಳುನಾಡು ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ಅವರು ಹೊಸೂರು-ಬೊಮ್ಮಸಂದ್ರ ಅಂತರರಾಜ್ಯ ಮೆಟ್ರೋ ಯೋಜನೆಗೆ ಶೀಘ್ರ ಅನುಮೋದನೆ ಮತ್ತು ಹಣಕಾಸು ನೆರವು ನೀಡುವಂತೆ ಕೇಂದ್ರ ಹಣಕಾಸು ಸಚಿವರಿಗೆ ಅಧಿಕೃತವಾಗಿ ಮನವಿ ಸಲ್ಲಿಸಿದ್ದಾರೆ. ಈ ಮೂಲಕ ಹೊಸೂರಿನ ಆರ್ಥಿಕ ಬೆಳವಣಿಗೆ ಮತ್ತು ಸಾವಿರಾರು ಕಾರ್ಮಿಕರ ಪ್ರಯಾಣಕ್ಕೆ ಇದು ಅಗತ್ಯ ಎಂದು ತಮಿಳುನಾಡು ವಾದ ಮಂಡಿಸಿದೆ. ಇದಕ್ಕೆ ಪೂರಕವಾಗಿ ಕರ್ನಾಟಕವು ಬೊಮ್ಮಸಂದ್ರದಿಂದ ಅತ್ತಿಬೆಲೆ ಕೈಗಾರಿಕಾ ಪ್ರದೇಶದ ಮೂಲಕ ಗಡಿಯವರೆಗೆ 9 ನಿಲ್ದಾಣಗಳಿರುವ ಮಾರ್ಗಕ್ಕೆ ಚಾಲನೆ ನೀಡಲು ಮುಂದಾಗಿತ್ತು. ಆದರೆ ತಾಂತ್ರಿಕ ವ್ಯತ್ಯಾಸಗಳು (BMRCL ನ 750V DC ವಿದ್ಯುತ್ ವ್ಯವಸ್ಥೆ vs ತಮಿಳುನಾಡಿನ 25kV AC ವ್ಯವಸ್ಥೆ) ಮತ್ತು ಪ್ರಸ್ತುತ ಸಾರ್ವಜನಿಕ ಆಕ್ರೋಶದಿಂದಾಗಿ ಈ ಯೋಜನೆಗೆ ದೊಡ್ಡ ವಿಘ್ನ ಎದುರಾಗಿದೆ.

ಬೆಂಗಳೂರು ಟ್ರಾಫಿಕ್ ಶಮನಕ್ಕೆ ಮಾಸ್ಟರ್ ಪ್ಲಾನ್: 1 ಲಕ್ಷ ಕೋಟಿ ರೂ. ಮೂಲಸೌಕರ್ಯ ಯೋಜನೆಗಳೊಂದಿಗೆ ಹೊಸ 'ಸಿಎಂಪಿ' ಸಿದ್ಧ

Gowthami K — Thu, 22 Oct 2026 15:24:30 +0530

ಬೆಂಗಳೂರು: ರಾಜಧಾನಿ ಬೆಂಗಳೂರಿನ ತೀವ್ರ ಸಂಚಾರ ದಟ್ಟಣೆ, ಮೂಲಸೌಕರ್ಯ ವ್ಯವಸ್ಥೆಗೆ ಶಮನ ನೀಡಲು ರಾಜ್ಯ ಸರಕಾರವು ಬೃಹತ್ ಯೋಜನೆಯೊಂದಕ್ಕೆ ಚಾಲನೆ ನೀಡಿದೆ. ನಗರ ಭೂ ಸಾರಿಗೆ ನಿರ್ದೇಶನಾಲಯ (DULT) ಮುಂಬರುವ ಒಂದು ವರ್ಷದೊಳಗೆ ಬೆಂಗಳೂರಿಗೆ ನೂತನ 'ಸಮಗ್ರ ಚಲನಶೀಲತಾ ಯೋಜನೆಯನ್ನು ಸಿದ್ಧಪಡಿಸಿ ಅನಾವರಣಗೊಳಿಸಲಿದೆ.

ಸುಮಾರು ₹1 ಲಕ್ಷ ಕೋಟಿ ಮೌಲ್ಯದ ಸುರಂಗ ರಸ್ತೆಗಳು ಹಾಗೂ 12ಕ್ಕೂ ಹೆಚ್ಚು ನೂತನ ಫ್ಲೈಓವರ್‌ಗಳು ಸೇರಿದಂತೆ ಹಲವು ಬೃಹತ್ ಯೋಜನೆಗಳು ಪ್ರಸ್ತುತ ಅನುಮೋದನೆಯ ವಿವಿಧ ಹಂತಗಳಲ್ಲಿದ್ದು, ಇವೆಲ್ಲವನ್ನೂ ನಗರದ ವಿಶಾಲವಾದ 'ಪರಿಷ್ಕೃತ ಮಾಸ್ಟರ್ ಪ್ಲಾನ್' ಜೊತೆ ಸಂಯೋಜಿಸಿ ಜಾರಿಗೊಳಿಸುವುದು ಈ ನೂತನ ಸಿಎಂಪಿಯ ಪ್ರಮುಖ ಉದ್ದೇಶವಾಗಿದೆ.

6 ವರ್ಷಗಳ ನಂತರ ಬದಲಾಗುತ್ತಿರುವ ಯೋಜನೆ:

ಇದಕ್ಕೂ ಮೊದಲು 2020 ರಲ್ಲಿ DULT ನಗರದ ಮೊದಲ ಸಿಎಂಪಿಯನ್ನು ಸಿದ್ಧಪಡಿಸಿತ್ತು. ಅದರಲ್ಲಿ ಬಸ್ ಆದ್ಯತೆಯ ಕಾರಿಡಾರ್‌ಗಳು, ಮೆಟ್ರೋಲೈಟ್, 50 ಕಿ.ಮೀ. ಟೆಂಡರ್‌ಶ್ಯೂರ್ ರಸ್ತೆಗಳು, ಸೈಕಲ್ ಟ್ರ್ಯಾಕ್‌ಗಳು ಹಾಗೂ ಸಾರ್ವಜನಿಕ ಸಾರಿಗೆಯ ಬಳಕೆಯನ್ನು ಶೇ. 40 ರಿಂದ ಶೇ. 70 ಕ್ಕೆ ಹೆಚ್ಚಿಸುವ ಬೃಹತ್ ಗುರಿ ಹೊಂದಲಾಗಿತ್ತು. 2035 ರ ವೇಳೆಗೆ ಸುಮಾರು ₹2.30 ಲಕ್ಷ ಕೋಟಿ ವೆಚ್ಚದಲ್ಲಿ ಅನುಷ್ಠಾನಗೊಳಿಸಬೇಕಿದ್ದ ಈ ಯೋಜನೆಗಳು ಬಹುತೇಕ ಕಾಗದದ ಮೇಲೆಯೇ ಉಳಿದಿದ್ದವು.

ಪ್ರಸ್ತುತ ಗ್ರೇಟರ್ ಬೆಂಗಳೂರು ಪ್ರಾಧಿಕಾರ ರಚನೆಯಾಗಿ ನಗರದ ವಿಸ್ತೀರ್ಣವು ದ್ವಿಗುಣಗೊಂಡಿರುವುದರಿಂದ, ಹೊರವಲಯಗಳು, ಉಪಗ್ರಹ ನಗರಗಳು ಹಾಗೂ ಪ್ರಮುಖ ಸಾರಿಗೆ ಕಾರಿಡಾರ್‌ಗಳನ್ನು ಒಳಗೊಂಡಂತೆ ವಿಶಾಲ ದೃಷ್ಟಿಕೋನದಲ್ಲಿ ಹೊಸ ಸಿಎಂಪಿಯನ್ನು ರೂಪಿಸಲಾಗುತ್ತಿದೆ.

₹4.16 ಕೋಟಿ ವೆಚ್ಚದಲ್ಲಿ DULT ನಿಂದ ಹೊಸ ಸಮೀಕ್ಷೆ:

ನಮ್ಮ ಮೆಟ್ರೋ ಯೋಜನೆಗಳಿಗೆ ಕೇಂದ್ರ ಸರಕಾರದ ಅನುದಾನ ಹಾಗೂ ಅನುಮೋದನೆ ಪಡೆಯಲು 'ಸಿಎಂಪಿ' ವರದಿ ಕಡ್ಡಾಯವಾಗಿದೆ. ಈ ಹಿನ್ನೆಲೆಯಲ್ಲಿ ₹4.16 ಕೋಟಿ ವೆಚ್ಚದಲ್ಲಿ DULT ನೂತನ ಯೋಜನೆಗೆ ಚೌಕಟ್ಟು ಸಿದ್ಧಪಡಿಸುತ್ತಿದೆ. ಬಿಎಂಎಲ್‌ಟಿಎ ಸಂಸ್ಥೆಯು ಸಿಬ್ಬಂದಿ ಕೊರತೆಯಿಂದ ಸಂಪೂರ್ಣವಾಗಿ ಕಾರ್ಯಾಚರಿಸದ ಕಾರಣ, ಸಾರಿಗೆ ಇಲಾಖೆಯ ಹಿರಿಯ ಅಧಿಕಾರಿಗಳು ಮತ್ತು ಸಲಹೆಗಾರರು DULT ಉಸ್ತುವಾರಿಯಲ್ಲೇ ಸಮೀಕ್ಷೆಗಳನ್ನು ಪ್ರಾರಂಭಿಸಿದ್ದಾರೆ.

ಹೊಸ ಸಿಎಂಪಿಯು ಬೃಹತ್ ಸರಕು ಟ್ರಕ್ ಟರ್ಮಿನಲ್‌ಗಳು, ಅಂತರರಾಜ್ಯ ಬಸ್ ಸ್ಟ್ಯಾಂಡ್‌ಗಳು ಮತ್ತು ಹೆಚ್ಚು ದಟ್ಟಣೆ ಉಂಟುಮಾಡುವ ಪ್ರಮುಖ ಮೂಲಗಳನ್ನು ನಗರದ ಗಡಿಯಿಂದ ಹೊರಗೆ ಸ್ಥಳಾಂತರಿಸುವ ಕುರಿತು ಅಧ್ಯಯನ ನಡೆಸಲಿದೆ.

ಕುದುರೆಯ ಮುಂಭಾಗದಲ್ಲಿ ಬಂಡಿ ಕಟ್ಟಿದಂತೆ, ತಜ್ಞರ ಕಳವಳ

ಸರಕಾರದ ಈ ಹೊಸ ಯೋಜನೆಗೆ ನಗರ ಸಾರಿಗೆ ತಜ್ಞರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಅಧಿಕಾರಿ ಸತ್ಯ ಅರಿಕತುತರಂ ಪ್ರಕಾರ, ಸರಕಾರ ಈಗಾಗಲೇ ₹1.5 ಲಕ್ಷ ಕೋಟಿ ವೆಚ್ಚದ ಸುರಂಗ ರಸ್ತೆ ಹಾಗೂ ಮೇಲ್ಸೇತುವೆ ಯೋಜನೆಗಳನ್ನು ಸ್ವತಂತ್ರವಾಗಿ ಘೋಷಿಸಿ ಅನುಮೋದಿಸಿದೆ. ಈಗ ಸಿಎಂಪಿ ಸಿದ್ಧಪಡಿಸುತ್ತಿರುವುದು ಯೋಜನೆ ರೂಪಿಸಿ ಮೂಲಸೌಕರ್ಯ ತರುವುದಕ್ಕಿಂತ, ಈಗಾಗಲೇ ನಿರ್ಧರಿಸಿದ ಯೋಜನೆಗಳಿಗೆ ಸಿಎಂಪಿಯನ್ನು ಹೊಂದಿಕೊಳ್ಳುವಂತೆ ಮಾಡುವುದಾಗಿದೆ. ಇದು ಕುದುರೆಯ ಮುಂದೆ ಬಂಡಿಯನ್ನು ಕಟ್ಟಿದಂತೆ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ನಗರ ಯೋಜಕ ಅಶ್ವಿನ್ ಮಹೇಶ್ ಅವರ ಪ್ರಕಾರ, ಬೆಂಗಳೂರಿನ ರಸ್ತೆ ಜಾಲದಲ್ಲಿ ಸಂಪರ್ಕದ ಕೊರತೆಯಿದೆ. ಪ್ರಮುಖ ರಸ್ತೆಗಳು ಏಕಾಏಕಿ ಕಿರಿದಾಗುವುದು ಅಥವಾ ಅಂತ್ಯಗೊಳ್ಳುವುದರಿಂದ ಸಂಪೂರ್ಣ ಟ್ರಾಫಿಕ್ ಒತ್ತಡ ಪ್ರಮುಖ ಅಪಧಮನಿ ರಸ್ತೆಗಳ ಮೇಲೆಯೇ ಬೀಳುತ್ತಿದೆ.

ಅಂಕಿ-ಅಂಶಗಳಲ್ಲಿ ಬೆಂಗಳೂರಿನ ವಾಹನ ದಟ್ಟಣೆ:

ಬೆಂಗಳೂರು ಜಿಲ್ಲಾ ಉಸ್ತುವಾರಿ ಸಚಿವ ಕೃಷ್ಣ ಬೈರೇಗೌಡ ನೀಡಿರುವ ಮಾಹಿತಿಯಂತೆ, ನಗರಕ್ಕೆ ಅಗತ್ಯವಿರುವ ಶೇ. 15 ರಸ್ತೆ-ನಗರ ಅನುಪಾತಕ್ಕೆ ಹೋಲಿಸಿದರೆ ಪ್ರಸ್ತುತ ಬೆಂಗಳೂರಿನಲ್ಲಿ ಕೇವಲ ಶೇ. 8 ರಷ್ಟು ಮಾತ್ರ ರಸ್ತೆ ಜಾಲವಿದೆ. ನಗರದ ಜನಸಂಖ್ಯೆ ಸುಮಾರು 1.4 ಕೋಟಿಯಷ್ಟಿದ್ದರೆ, ನೋಂದಾಯಿತ ಒಟ್ಟು ವಾಹನಗಳ ಸಂಖ್ಯೆ 1.28 ಕೋಟಿಗೆ ತಲುಪಿದೆ. ಅಂದರೆ ಸರಾಸರಿ ಪ್ರತಿ ವ್ಯಕ್ತಿಗೆ ಬಹುತೇಕ ಒಂದು ವಾಹನ ರಸ್ತೆಯಲ್ಲಿದ್ದು, ಹೊಸ ಸಿಎಂಪಿ ಜಾರಿಯಾದಾಗ ಮಾತ್ರ ನಗರದ ಚಲನಶೀಲತೆಗೆ ಸ್ಪಷ್ಟ ದಾರಿ ಸಿಗಲಿದೆ.

ತಮಿಳುನಾಡು ಅಲ್ಲ, ಬೆಂಗಳೂರು ಏರ್ಪೂರ್ಟ್ ಸಂಪರ್ಕಿಸುವ ನೀಲಿ ಮೆಟ್ರೋ ಮಾರ್ಗ ಕಾಮಗಾರಿ ವಿಳಂಬಕ್ಕೆ ನಿಜವಾದ ಕಾರಣವೇನು?

Gowthami K — Sat, 31 Oct 2026 12:33:28 +0530

ಬೆಂಗಳೂರಿನ ಅತ್ಯಂತ ನಿರೀಕ್ಷಿತ ಸಾರಿಗೆ ಯೋಜನೆಗಳಲ್ಲಿ ಒಂದಾದ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ಸಂಪರ್ಕಿಸುವ ನಮ್ಮ ಮೆಟ್ರೋದ 58.19 ಕಿ.ಮೀ ಉದ್ದದ ಬ್ರ್ಯಾಂಡೆಡ್ ‘ಬ್ಲೂ ಲೈನ್’ ಕಾಮಗಾರಿಯು ತೀವ್ರ ವಿಳಂಭವಾಗುತ್ತಿದೆ. ಇದಕ್ಕೆ ಈಗ ತಮಿಳುನಾಡು ಇತರ ರಾಜ್ಯಗಳಿಗೆ ಸಿಮೆಂಟ್, ಕಲ್ಲು, ಜಲ್ಲಿ ರಫ್ತು ಬ್ಯಾನ್ ಮಾಡಿರುವುದು ಕಾರಣ ಎನ್ನಲಾಗುತ್ತಿದೆ. ಆದರೆ ಕಾರಣ ಇದೊಂದೇ ಅಲ್ಲ.

ಸೆಂಟ್ರಲ್ ಸಿಲ್ಕ್ ಬೋರ್ಡ್‌ನಿಂದ ಹೊರ ವರ್ತುಲ ರಸ್ತೆ ಮಾರ್ಗವಾಗಿ ಕೆಐಎ ಸಂಪರ್ಕಿಸುವ ಈ ಕಾರಿಡಾರ್, ಲಕ್ಷಾಂತರ ಪ್ರಯಾಣಿಕರಿಗೆ ಮತ್ತು ಐಟಿ ಉದ್ಯೋಗಿಗಳಿಗೆ ನೇರ ಹಾಗೂ ಸುಲಭ ಪ್ರಯಾಣದ ಆಯ್ಕೆಯಾಗಿದೆ. ಆದರೂ ಹಲವು ಕಾರಣಗಳಿಂದ ಈ ಯೋಜನೆ ಪೂರ್ಣಗೊಳ್ಳುವುದು ತೀವ್ರ ವಿಳಂಬವಾಗುತ್ತಿದೆ.

ನಿರ್ಮಾಣದ ಸವಾಲುಗಳೇನು?

ಬ್ಲೂ ಲೈನ್ ಯೋಜನೆಗೆ ಮುಖ್ಯವಾಗಿ ಸಮಸ್ಯೆ ಇರುವುದು ಔಟರ್‌ ರಿಂಗ್ ರೋಡ್ ಮತ್ತು ಹೆಬ್ಬಾಳ - ಕೆಂಪಾಪುರ ಮಾರ್ಗದಲ್ಲಿನ ಕಠಿಣ ಮೂಲಸೌಕರ್ಯ ಸವಾಲುಗಳು

ಮಾರ್ಗ ಮಾಡಲು ಬೇಕಾದ ವಿಶೇಷ ಪೋರ್ಟಲ್ ರಚನೆ: ಹೆಬ್ಬಾಳ ಮತ್ತು ಕೆಂಪಾಪುರ ನಡುವಿನ ಸುಮಾರು 1 ಕಿ.ಮೀ. ಭಾಗದಲ್ಲಿ 4 ಮೆಟ್ರೋ ಹಳಿಗಳನ್ನು ಅಳವಡಿಸುವಂತಹ ವಿಶೇಷ ‘ಮೂರು-ಪಿಯರ್ ಪೋರ್ಟಲ್’ ಸಂರಚನೆಯನ್ನು ಬಿಎಮ್‌ಆರ್‌ಸಿಎಲ್ ನಿರ್ಮಿಸುತ್ತಿದೆ. ಇದು ನಮ್ಮ ಮೆಟ್ರೋ ಜಾಲದಲ್ಲೇ ಮೊದಲ ಪ್ರಯೋಗವಾಗಿದೆ. ಭವಿಷ್ಯದಲ್ಲಿ ನಿರ್ಮಿಸಲು ಉದ್ದೇಶಿಸಲಾದ ‘ಆರೆಂಜ್ ಲೈನ್’ ಜೊತೆಗೆ ಬ್ಲೂ ಲೈನ್ ಅನ್ನು ಕನೆಕ್ಟ್ ಮಾಡಲು ಈ ತಾಂತ್ರಿಕ ಮಾದರಿಯನ್ನು ರೂಪಿಸಲಾಗಿದೆ. ಇದು ಸವಾಲಿನ ಕೆಲಸವಾಗಿದೆ

ಭಾರೀ ಸಂಚಾರ ಮತ್ತು ನೈಟ್ ಶಿಫ್ಟ್ ಕೆಲಸ: ಔಟರ್ ರಿಂಗ್‌ ರೋಡ್‌ ಪ್ರಮುಖ ಐಟಿ ಕಾರಿಡಾರ್ ಆಗಿರುವುದರಿಂದ, ಹಗಲು ವೇಳೆಯಲ್ಲಿ ಸಂಚಾರ ದಟ್ಟಣೆ ಜಾಸ್ತಿ ಇರುತ್ತದೆ. ಸಂಚಾರಕ್ಕೆ ತೊಂದರೆಯಾಗದಂತೆ ರಾತ್ರಿ ವೇಳೆ ಮಾತ್ರ ಪಿಲ್ಲರ್ ಮತ್ತು ಗರ್ಡರ್ ಅಳವಡಿಕೆ ಕಾಮಗಾರಿಗಳನ್ನು ನಡೆಸಲಾಗುತ್ತಿದೆ. ಇದು ಕೆಲಸದ ವೇಗವನ್ನು ಕಡಿಮೆ ಮಾಡುತ್ತದೆ.

ಏಕಕಾಲಿಕ ಮೂಲಸೌಕರ್ಯ ಅಭಿವೃದ್ಧಿ: ಸಿಲ್ಕ್ ಬೋರ್ಡ್ ಜಂಕ್ಷನ್‌ನಲ್ಲಿ ಸಿಗ್ನಲ್-ಫ್ರೀ ಫ್ಲೈಓವರ್, ರಸ್ತೆ ಅಗಲೀಕರಣ ಮತ್ತು ಮೆಟ್ರೋ ಪಿಲ್ಲರ್‌ಗಳನ್ನು ಒಂದೇ ಸಮಯದಲ್ಲಿ ನಿರ್ಮಿಸುವ ಸವಾಲು ಕೆಲಸದ ವೇಗವನ್ನು ತಗ್ಗಿಸಿದೆ. ಜಮೀನು ಅಭಾವ ಹಾಗೂ ಕಾರ್ಯನಿರತ ರಸ್ತೆಗಳ ನಡುವೆ ಮೆಟ್ರೋ ನಿಲ್ದಾಣಗಳನ್ನು ವಿನ್ಯಾಸಗೊಳಿಸುವುದು ಪ್ರಮುಖ ತೊಡಕಾಗಿತ್ತು.

ಯೋಜನೆ ವಿಳಂಬಕ್ಕೆ ಪ್ರಮುಖ ಕಾರಣಗಳು

ಯೋಜನೆ ಪ್ರಾರಂಭವಾದ ಹಂತದಿಂದಲೂ ಹಲವಾರು ಆಡಳಿತಾತ್ಮಕ ಮತ್ತು ತಾಂತ್ರಿಕ ಅಡೆತಡೆಗಳು ವೇಗದ ಕಾಮಗಾರಿಗೆ ಸಮಸ್ಯೆಯಾಗಿತ್ತು. ಆರಂಭಿಕ ಹಂತದಲ್ಲಿ ರಕ್ಷಣಾ ಸಚಿವಾಲಯ ಮತ್ತು ರೈಲ್ವೆ ಇಲಾಖೆಗೆ ಸೇರಿದ ಭೂಮಿಯನ್ನು ವಶಪಡಿಸಿಕೊಳ್ಳಲು ಬಿಎಮ್‌ಆರ್‌ಸಿಎಲ್‌ಗೆ ಬಹಳಷ್ಟು ಸಮಯ ಹಿಡಿಯಿತು.

ತದ ನಂತರ ಈ ಮಾರ್ಗ ಹಾದು ಹೋಗುವಲ್ಲಿ ಇದ್ದ ಮರಗಳನ್ನು ಕಡಿಯಲು ಸಂಬಂಧಿಸಿದ ಸಾರ್ವಜನಿಕ ಹಿತಾಸಕ್ತಿ ಮೊಕದ್ದಮೆಗಳು ಮತ್ತು ಹೈಕೋರ್ಟ್ ವಿಧಿಸಿದ್ದ ತಡೆಯಾಜ್ಞೆಗಳಿಂದಾಗಿ ಫೇಸ್ 2A (ಸಿಲ್ಕ್ ಬೋರ್ಡ್ - ಕೆ.ಆರ್. ಪುರಂ) ಕಾಮಗಾರಿಯು ಸುಮಾರು ಒಂದು ವರ್ಷಕ್ಕೂ ಹೆಚ್ಚು ಕಾಲ ಸ್ಥಗಿತಗೊಂಡಿತ್ತು.

ಇದಾದ ನಂತರ ಹೆಬ್ಬಾಳ, ಮಾರತಹಳ್ಳಿ ಮತ್ತು ನಾಗವಾರ ಭಾಗಗಳಲ್ಲಿ ಭೂಗತ ಕಾವೇರಿ ನೀರಿನ ಮುಖ್ಯ ಪೈಪ್‌ಲೈನ್‌ಗಳು, ಒಳಚರಂಡಿ ನಾಲಾಗಳು ಮತ್ತು ಹೈ-ಟೆನ್ಷನ್ ವಿದ್ಯುತ್ ಲೈನ್‌ಗಳನ್ನು ಸ್ಥಳಾಂತರಿಸುವ ಕೆಲಸವು ಸಾಕಷ್ಟು ಸಮಯ ತೆಗೆದುಕೊಂಡಿತು. ಜೊತೆಗೆ ಭೂಗತ ಮಾರ್ಗಕ್ಕೆ ಭೂಮಿಯನ್ನು ಕಿ.ಮೀಗಟ್ಟಲೆ ಕೊರೆಯಲು ಕೂಡ ಸಾಕಷ್ಟು ಸಮಯ ಬೇಕಿದೆ. ಇದರ ಜೊತೆಗೆ ಕೋವಿಡ್-19 ಮತ್ತು ಲಾಕ್‌ಡೌನ್ ಸಮಯದಲ್ಲಿ ತವರೂರುಗಳಿಗೆ ತೆರಳಿದ್ದ ವಲಸೆ ಕಾರ್ಮಿಕರ ಲಭ್ಯತೆಯಿಲ್ಲದೆ ಕಾಮಗಾರಿ ಸ್ಥಗಿತಗೊಂಡಿತ್ತು.

ಯೋಜನಾ ಹಂತಗಳು ಮತ್ತು ತೆರೆಯುವ ನೂತನ ವೇಳಾಪಟ್ಟಿ

ಪ್ರಸ್ತುತ ವೇಳಾಪಟ್ಟಿಯ ಪ್ರಕಾರ ಬ್ಲೂ ಲೈನ್ ಕಾರಿಡಾರ್ ಅನ್ನು ಹಂತ-ಹಂತವಾಗಿ ಸಾರ್ವಜನಿಕ ಸಂಚಾರಕ್ಕೆ ಮುಕ್ತಗೊಳಿಸಲು ಬಿಎಮ್‌ಆರ್‌ಸಿಎಲ್ ಗುರಿ ಹಾಕಿಕೊಂಡಿದೆ. ಫೇಸ್ 2A ಅಂದರೆ ಸೆಂಟ್ರಲ್ ಸಿಲ್ಕ್ ಬೋರ್ಡ್ – ಕೆ.ಆರ್. ಪುರಂ - 19.75 ಕಿ.ಮೀ ಈ ವಿಭಾಗದ ವಾಣಿಜ್ಯ ಕಾರ್ಯಾಚರಣೆಯು 2027 ರ ಮಧ್ಯಭಾಗದಲ್ಲಿ ಪ್ರಾರಂಭವಾಗುವ ನಿರೀಕ್ಷೆಯಿದೆ. ಫೇಸ್ 2B ಅಂದರೆ ಹೆಬ್ಬಾಳ ದಿಂದ ವಿಮಾನ ನಿಲ್ದಾಣ ಸಂಪರ್ಕ ಮಾರ್ಗವನ್ನು ಸೆಪ್ಟೆಂಬರ್ 2027 ರ ವೇಳೆಗೆ ತೆರೆಯುವ ಗುರಿಯನ್ನು ಇಟ್ಟುಕೊಳ್ಳಲಾಗಿದೆ. ಕೆ.ಆರ್. ಪುರಂ – ಹೆಬ್ಬಾಳ ಉಳಿದ ಭಾಗದ ಕಾಮಗಾರಿಯು ಡಿಸೆಂಬರ್ 2027 ರಿಂದ ಮಾರ್ಚ್ 2028 ರ ನಡುವೆ ಪೂರ್ಣಗೊಳ್ಳುವ ಸಾಧ್ಯತೆಯಿದೆ.

ಬ್ಲೂ ಲೈನ್ ಯೋಜನಾ ವೆಚ್ಚ ಮತ್ತು ಮೂಲ ಸೌಕರ್ಯಗಳ ಬೆಲೆ ಹೆಚ್ಚಳ!

ಬ್ಲೂ ಲೈನ್ ಮೂಲಸೌಕರ್ಯ ಯೋಜನೆಯ ಒಟ್ಟು ಅಂದಾಜು ವೆಚ್ಚ ₹14,788 ಕೋಟಿ ಆಗಿದ್ದು, ಫೇಸ್ 2A ಅಂದರೆ ಸಿಲ್ಕ್ ಬೋರ್ಡ್ – ಕೆ.ಆರ್. ಪುರಂ ನಿರ್ಮಾಣಕ್ಕೆ ₹5,994 ಕೋಟಿ (19.75 ಕಿ.ಮೀ). ಮತ್ತು ಫೇಸ್ 2B ಅಂದರೆ ಕೆ.ಆರ್. ಪುರಂ – ವಿಮಾನ ನಿಲ್ದಾಣಕ್ಕೆ ₹10,584 ಕೋಟಿ (38.44 ಕಿ.ಮೀ). ವೆಚ್ಚವಾಗಲಿದೆ. ಇದರಲ್ಲಿ ಕೇಂದ್ರ ಮತ್ತು ರಾಜ್ಯ ಸರ್ಕಾರದ ಈಕ್ವಿಟಿ ಪಾಲು ಸುಮಾರು ₹3,973 ಕೋಟಿ. ಆಗಿದೆ. ಜೊತೆಗೆ ಭೂಸ್ವಾಧೀನ ವೆಚ್ಚ ಸುಮಾರು ₹2,762 ಕೋಟಿ ಇದನ್ನು ಸಂಪೂರ್ಣವಾಗಿ ಕರ್ನಾಟಕ ಸರ್ಕಾರವೇ ಭರಿಸುತ್ತಿದೆ. ಉಳಿದ ಭಾಗದ ಮೊತ್ತವನ್ನು ಏಷ್ಯನ್ ಅಭಿವೃದ್ಧಿ ಬ್ಯಾಂಕ್ (ADB) ಮತ್ತು ಜಪಾನ್ ಇಂಟರ್ನ್ಯಾಷನಲ್ ಕೋಆಪರೇಷನ್ ಏಜೆನ್ಸಿ (JICA) ಸಂಸ್ಥೆಗಳ ಸಾಲದ ಮೂಲಕ ಕ್ರೋಡೀಕರಿಸಲಾಗಿದೆ. ಇದರ ಜೊತೆಗೆ ಈ ಯೋಜನಾ ವರದಿ ಸಿದ್ದವಾದಾಗ ಅಂದಾಜು ವೆಚ್ಚಕ್ಕೂ ಈಗ ಬೀಳುತ್ತಿರುವ ಅಂದಾಜು ವೆಚ್ಚಕ್ಕೂ ಅಜಗಜಾಂತರ ವ್ಯತ್ಯಾಸವಿದ್ದು ಇದೂ ಕೂಡ ಕಾಮಗಾರಿ ನಿಧಾನವಾಗುತ್ತಿರುವುದಕ್ಕೆ ಒಂದು ಕಾರಣವಾಗಿದೆ.

ಯೋಜನಾ ವರದಿ ಮತ್ತು ಅನುಮೋದನೆಯ ಕಾಲಕ್ರಮ:

2016 - 2017: ಫೇಸ್ 2A ಮೊದಲ DPR ಸಿದ್ಧಗೊಂಡು 2017 ರಲ್ಲಿ ರಾಜ್ಯ ಸರ್ಕಾರದ ಒಪ್ಪಿಗೆ ಪಡೆಯಿತು.

2019: ಹೆಬ್ಬಾಳ ಮಾರ್ಗವಾಗಿ ವಿಮಾನ ನಿಲ್ದಾಣಕ್ಕೆ ಹೋಗುವ ಫೇಸ್ 2B ಪರಿಷ್ಕೃತ DPR ಮತ್ತು ನಕ್ಷೆಯನ್ನು BMRCL ಅಂತಿಮಗೊಳಿಸಿತು.

2020: ಕರ್ನಾಟಕ ಸರ್ಕಾರವು ಫೇಸ್ 2A ಮತ್ತು 2B ಎರಡನ್ನೂ ಸಂಯೋಜಿತ ಬ್ಲೂ ಲೈನ್ ಆಗಿ ಅನುಮೋದಿಸಿತು.

ಏಪ್ರಿಲ್ 2021: ಕೇಂದ್ರ ಸಚಿವ ಸಂಪುಟವು ಯೋಜನೆಯ ಒಟ್ಟು ನಕ್ಷೆ ಮತ್ತು ₹14,788 ಕೋಟಿ ಮೊತ್ತಕ್ಕೆ ಅಂತಿಮ ಅನುಮೋದನೆ ನೀಡಿತು. ತದನಂತರ 2021-22 ರಲ್ಲಿ ಮುಖ್ಯ ಕಾಮಗಾರಿಗಳು ಚಾಲನೆ ಪಡೆದವು.

ಚಾಲಕರಹಿತ ತಂತ್ರಜ್ಞಾನ

ನಮ್ಮ ಮೆಟ್ರೋ ಬ್ಲೂ ಲೈನ್ ಕಾರಿಡಾರ್‌ನಲ್ಲಿ ಚಾಲಕರಹಿತ ತಂತ್ರಜ್ಞಾನವನ್ನು ಪರಿಚಯಿಸಲಾಗುತ್ತಿದೆ. ಈ ರೈಲುಗಳು ಅತ್ಯಾಧುನಿಕ ಸ್ವಯಂಚಾಲಿತ ರೈಲು ನಿಯಂತ್ರಣ (CBTC) ಮತ್ತು ಕಾರ್ಯಾಚರಣಾ ಸುರಕ್ಷತಾ ವ್ಯವಸ್ಥೆಗಳನ್ನು ಹೊಂದಿರುತ್ತವೆ. ಪ್ರಯಾಣಿಕರ ಸೇವೆ ಆರಂಭವಾಗುವ ಮುನ್ನ ಇವು ವ್ಯಾಪಕ ತಾಂತ್ರಿಕ ಪರೀಕ್ಷೆಗಳಿಗೆ ಒಳಗಾಗಲಿವೆ.

ಈ ಯೋಜನೆ ಪೂರ್ಣಗೊಂಡಾಗ, ಕೆಐಎ ವಿಮಾನ ನಿಲ್ದಾಣಕ್ಕೆ ತೆರಳುವ ಪ್ರಯಾಣಿಕರು ಖಾಸಗಿ ಟ್ಯಾಕ್ಸಿಗಳು ಹಾಗೂ ಕಾರುಗಳ ಮೇಲಿನ ಅವಲಂಬನೆಯನ್ನು ತಪ್ಪಿಸಿ, ಹೊರ ವರ್ತುಲ ರಸ್ತೆಯ ಭೀಕರ ಟ್ರಾಫಿಕ್‌ನಿಂದ ಮುಕ್ತಿ ಪಡೆಯಲಿದ್ದಾರೆ. 2027-28 ರ ವೇಳೆಗೆ ನಗರದ ವಿವಿಧ ಭಾಗಗಳಿಂದ ವಿಮಾನ ನಿಲ್ದಾಣಕ್ಕೆ ನೇರ ಮತ್ತು ಸುರಕ್ಷಿತ ಮೆಟ್ರೋ ಪ್ರಯಾಣ ಲಭ್ಯವಾಗಲಿದೆ.

ಬೆಂಗಳೂರಿನ ಎರಡು ಪ್ರಮುಖ ಎಲಿವೇಟೆಡ್ ಕಾರಿಡಾರ್ ಯೋಜನೆಗಳಿಗೆ ಬಿ-ಸ್ಮೈಲ್ ಮರು ಟೆಂಡರ್, ಅಂದಾಜು ವೆಚ್ಚ ಭಾರಿ ಕಡಿತ!

Gowthami K — Fri, 30 Oct 2026 16:47:30 +0530

ಬೆಂಗಳೂರು: ರಾಜಧಾನಿ ಬೆಂಗಳೂರಿನ ಟ್ರಾಫಿಕ್ ಸಮಸ್ಯೆಗೆ ಮುಕ್ತಿ ನೀಡಲು ಉದ್ದೇಶಿಸಲಾಗಿರುವ ಪ್ರಮುಖ ಎಲಿವೇಟೆಡ್ ಕಾರಿಡಾರ್ ಯೋಜನೆಗಳ ನಿರ್ಮಾಣ ವೆಚ್ಚವನ್ನು ಪರಿಷ್ಕರಿಸಿರುವ ಬೆಂಗಳೂರು ಸ್ಮಾರ್ಟ್ ಇನ್ಫ್ರಾಸ್ಟ್ರಕ್ಚರ್ ಲಿಮಿಟೆಡ್ (B-SMILE), ಎರಡು ಪ್ರಮುಖ ಯೋಜನೆಗಳಿಗೆ ಹೊಸದಾಗಿ ಟೆಂಡರ್ ಆಹ್ವಾನಿಸಿದೆ. ಅಕ್ಟೋಬರ್ 19 ರಂದು ರದ್ದುಗೊಳಿಸಲಾಗಿದ್ದ ಕಾಮಗಾರಿಗಳಿಗೆ ಈಗ ವೆಚ್ಚ ಕಡಿತಗೊಳಿಸಿ ಮರು ಟೆಂಡರ್ ಕರೆಯಲಾಗಿದೆ.

ಪರಿಷ್ಕೃತ ವೆಚ್ಚದಲ್ಲಿ ಹೊಸ ಟೆಂಡರ್ ಆಹ್ವಾನ:

ನಗರದ ಸಂಚಾರ ದಟ್ಟಣೆ ನಿರ್ವಹಣೆಯ ಭಾಗವಾಗಿ ಕೈಗೆತ್ತಿಕೊಳ್ಳಲಾಗಿರುವ 'ಮಿನರ್ವ ವೃತ್ತದಿಂದ ಹಡ್ಸನ್ ವೃತ್ತ' ಮತ್ತು 'ಹೊಸೂರು ರಸ್ತೆಯ ಶೂಲೇ ವೃತ್ತದಿಂದ ಸೇಂಟ್ ಜಾನ್ಸ್ ಆಸ್ಪತ್ರೆ ರಸ್ತೆ'ವರೆಗಿನ ಎತ್ತರಿಸಿದ ರಸ್ತೆ ಯೋಜನೆಗಳ ವೆಚ್ಚವನ್ನು ಕಡಿತಗೊಳಿಸಿ ಹೊಸ ಪ್ರಸ್ತಾವನೆ ರೆಡಿ ಮಾಡಲಾಗಿದೆ.

ಮಿನರ್ವ ವೃತ್ತದಿಂದ ಹಡ್ಸನ್ ವೃತ್ತದವರೆಗಿನ ಕಾರಿಡಾರ್ ಯೋಜನೆಗೆ ಹಿಂದೆ ₹540 ಕೋಟಿ ಅಂದಾಜಿಸಲಾಗಿತ್ತು. ಆದರೆ ಪರಿಷ್ಕೃತ ಟೆಂಡರ್‌ನಲ್ಲಿ ಇದರ ಅಂದಾಜು ವೆಚ್ಚವನ್ನು ₹511.4 ಕೋಟಿಗೆ ತಗ್ಗಿಸಲಾಗಿದೆ.

ಶೂಲೇ ವೃತ್ತದಿಂದ ಸೇಂಟ್ ಜಾನ್ಸ್ ಆಸ್ಪತ್ರೆ ರಸ್ತೆಯವರೆಗಿನ ಯೋಜನೆಗೆ ಮುಂಚೆ ₹564 ಕೋಟಿ ವೆಚ್ಚ ನಿಗದಿಪಡಿಸಲಾಗಿತ್ತು. ಈಗ ಇದನ್ನು ₹515 ಕೋಟಿಗೆ ಇಳಿಸಲಾಗಿದೆ. ಈ ಎರಡು ಯೋಜನೆಗಳಿಂದಲೇ ಸರ್ಕಾರಕ್ಕೆ ಸುಮಾರು ₹77.6 ಕೋಟಿಗೂ ಅಧಿಕ ವೆಚ್ಚ ಉಳಿತಾಯವಾಗಲಿದೆ.

ಒಂಬತ್ತು ಯೋಜನೆಗಳ ಪೈಕಿ ಆರು ಕಾಮಗಾರಿಗಳಿಗೆ ಹೊಸ ಚಾಲನೆ:

ಅಕ್ಟೋಬರ್ 19 ರಂದು ಬಿ-ಸ್ಮೈಲ್ ಸಂಸ್ಥೆಯು ನಗರದಾದ್ಯಂತ ಕೈಗೆತ್ತಿಕೊಳ್ಳಲು ಉದ್ದೇಶಿಸಿದ್ದ ಒಟ್ಟು 9 ಎಲಿವೇಟೆಡ್ ಕಾರಿಡಾರ್ ಹಾಗೂ ಫ್ಲೈಓವರ್ ಯೋಜನೆಗಳ ಟೆಂಡರ್‌ಗಳನ್ನು ತಾಂತ್ರಿಕ ಕಾರಣಗಳಿಂದ ರದ್ದುಗೊಳಿಸಿತ್ತು. ಅದರಲ್ಲಿ ಮೊದಲ ಹಂತವಾಗಿ 1,640.3 ಕೋಟಿ ರೂಪಾಯಿ ಅಂದಾಜು ವೆಚ್ಚದ 6 ಪ್ರಮುಖ ಯೋಜನೆಗಳಿಗೆ ಮರು ಬಿಡ್ ಕರೆದಿತ್ತು.

ಆ ಆರು ಯೋಜನೆಗಳ ವಿವರ ಹೀಗಿದೆ:

ಮಿನರ್ವ ವೃತ್ತದಿಂದ ಹಡ್ಸನ್ ವೃತ್ತದವರೆಗಿನ ಎಲಿವೇಟೆಡ್ ಕಾರಿಡಾರ್.
ಶೂಲೇ ವೃತ್ತದಿಂದ ಸೇಂಟ್ ಜಾನ್ಸ್ ಆಸ್ಪತ್ರೆ ರಸ್ತೆಯವರೆಗಿನ ಎಲಿವೇಟೆಡ್ ಕಾರಿಡಾರ್.
ದೊಡ್ಡಬಳ್ಳಾಪುರ ರಸ್ತೆಯಿಂದ ಹಳೆ ಯಲಹಂಕ ಮಾರ್ಗವಾಗಿ ಕೋಗಿಲು ವೃತ್ತಕ್ಕೆ ಸಂಪರ್ಕ ಕಲ್ಪಿಸುವ ಎಲಿವೇಟೆಡ್ ರಸ್ತೆ.
ಮಹಾಲಕ್ಷ್ಮಿ ಲೇಔಟ್‌ನ ಪೈಪ್‌ಲೈನ್ ರಸ್ತೆಯಲ್ಲಿ ನಿರ್ಮಿಸಲಾಗುವ ಗ್ರೇಡ್ ಸೆಪರೇಟರ್‌ಗಳು.
ತುಮಕೂರು ರಸ್ತೆಯ ಎಂಇಐ (MEI) ಜಂಕ್ಷನ್‌ನಲ್ಲಿ ಸ್ಪ್ಲಿಟ್ ಫ್ಲೈಓವರ್.
ಕನಕಪುರ ರಸ್ತೆಯ ಕೋಣನಕುಂಟೆ ಕ್ರಾಸ್ ಭಾಗದಲ್ಲಿ ಎಲಿವೇಟೆಡ್ ಕಾರಿಡಾರ್.

ಈ ಸರಣಿ ಮರು ಟೆಂಡರ್ ಕರೆಯುವ ಪ್ರಕ್ರಿಯೆಯ ಭಾಗವಾಗಿ, ಬಿ-ಸ್ಮೈಲ್ ಸಂಸ್ಥೆಯು ಈ ವಾರದ ಆರಂಭದಲ್ಲಷ್ಟೇ ಇತರ 3 ಎಲಿವೇಟೆಡ್ ಕಾರಿಡಾರ್ ಯೋಜನೆಗಳಿಗೂ ಹೊಸದಾಗಿ ಬಿಡ್ ಆಹ್ವಾನಿಸಿತ್ತು. ಈ ಪರಿಷ್ಕೃತ ವೆಚ್ಚದ ಯೋಜನೆಗಳಿಂದಾಗಿ ಸಾರ್ವಜನಿಕರ ತೆರಿಗೆ ಹಣ ಉಳಿತಾಯವಾಗುವುದರ ಜೊತೆಗೆ ಮೂಲಸೌಕರ್ಯ ಕಾಮಗಾರಿಗಳು ಹೆಚ್ಚು ಪಾರದರ್ಶಕವಾಗಿ ವೇಗ ಪಡೆಯಲಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಬೆಂಗಳೂರಿನ ಬೃಹತ್ ಫ್ಲೈಓವರ್ ಯೋಜನೆಗಳಿಗೆ ಬಿಗ್ ಟ್ವಿಸ್ಟ್, 6 ಕಾರಿಡಾರ್‌ಗಳಿಗೆ ಮರು ಟೆಂಡರ್, ಕಾರಣವೇನು?

Gowthami K — Thu, 22 Oct 2026 13:57:55 +0530

ಬೆಂಗಳೂರು: ರಾಜಧಾನಿ ಬೆಂಗಳೂರಿನ ಟ್ರಾಫಿಕ್ ದಟ್ಟಣೆ ನಿಯಂತ್ರಿಸಲು ರೂಪಿಸಲಾಗಿದ್ದ ಮೂಲಸೌಕರ್ಯ ಯೋಜನೆಗಳಲ್ಲಿ ಪ್ರಮುಖ ಮರುಪರಿಶೀಲನೆ ನಡೆದಿದೆ. ನಗರದಲ್ಲಿ ಸುಮಾರು ₹1,500 ಕೋಟಿ ವೆಚ್ಚದಲ್ಲಿ ನಿರ್ಮಿಸಲು ಉದ್ದೇಶಿಸಲಾಗಿದ್ದ 6 ಪ್ರಮುಖ ಫ್ಲೈಓವರ್ ಹಾಗೂ ಎಲಿವೇಟೆಡ್ ಕಾರಿಡಾರ್ ಯೋಜನೆಗಳಿಗೆ ‘ಬೆಂಗಳೂರು ಸ್ಮಾರ್ಟ್ ಇನ್ಫ್ರಾಸ್ಟ್ರಕ್ಚರ್ ಲಿಮಿಟೆಡ್’-ಬಿಸ್ಮೈಲ್ ನೂತನವಾಗಿ ಮರು ಟೆಂಡರ್ ಪ್ರಕ್ರಿಯೆಯನ್ನು ಆರಂಭಿಸಿದೆ.

ಮೊದಲು ಸಲ್ಲಿಕೆಯಾಗಿದ್ದ ಟೆಂಡರ್ ದಾಖಲೆಗಳು ನಗರಾಭಿವೃದ್ಧಿ ಇಲಾಖೆಯ ಪ್ರಮಾಣಿತ ಗುತ್ತಿಗೆ ನಿಯಮಗಳು ಮತ್ತು ಮಾನದಂಡಗಳಿಗೆ ಅನುಗುಣವಾಗಿಲ್ಲದ ಕಾರಣ, ಹಳೆಯ ಬಿಡ್‌ಗಳನ್ನು ರದ್ದುಗೊಳಿಸಿ ಹೊಸದಾಗಿ ಅರ್ಜಿ ಆಹ್ವಾನಿಸುವಂತೆ ಸರಕಾರದ ಉಪಸಮಿತಿಯು ಶಿಫಾರಸು ಮಾಡಿತ್ತು.

11 ಬೃಹತ್ ಯೋಜನೆಗಳ ಪೈಕಿ 6 ಯೋಜನೆಗಳಿಗೆ ಮರು ಜೀವ

ಗ್ರೇಟರ್ ಬೆಂಗಳೂರು ಪ್ರಾಧಿಕಾರ ವ್ಯಾಪ್ತಿಯ ಐದು ನಗರ ನಿಗಮಗಳಲ್ಲಿ ಒಟ್ಟು ₹13,262.70 ಕೋಟಿ ವೆಚ್ಚದಲ್ಲಿ 75.6 ಕಿ.ಮೀ. ಉದ್ದದ 11 ಎಲಿವೇಟೆಡ್ ಕಾರಿಡಾರ್‌ಗಳನ್ನು ನಿರ್ಮಿಸಲು ರಾಜ್ಯ ಸಚಿವ ಸಂಪುಟವು ಕಳೆದ ಏಪ್ರಿಲ್‌ನಲ್ಲಿ ಅನುಮೋದನೆ ನೀಡಿತ್ತು. ಈ ಬೃಹತ್ ಯೋಜನೆಯನ್ನು ಜಾರಿಗೊಳಿಸುವ ಹೊಣೆಯನ್ನು ‘ಬಿ-ಸ್ಮೈಲ್’ ಸಂಸ್ಥೆಗೆ ವಹಿಸಲಾಗಿತ್ತು. ಪ್ರಸ್ತುತ ಮತ್ತೆ ಟೆಂಡರ್ ಕರೆದಿರುವ 6 ಪ್ರಮುಖ ಯೋಜನೆಗಳ ವಿವರ ಹೀಗಿದೆ.

ಕೋಗಿಲು ಕ್ರಾಸ್ ಎಲಿವೇಟೆಡ್ ಕಾರಿಡಾರ್ (ದೊಡ್ಡಬಳ್ಳಾಪುರ ರಸ್ತೆ): ₹1,026.66 ಕೋಟಿ
ಶೋಲೆ ಸರ್ಕಲ್‌ನಿಂದ ಸೇಂಟ್ ಜಾನ್ಸ್ ಆಸ್ಪತ್ರೆ ರಸ್ತೆ ಕಾರಿಡಾರ್: ₹564 ಕೋಟಿ
ಮಿನರ್ವಾ ಸರ್ಕಲ್‌ನಿಂದ ಹಡ್ಸನ್ ಸರ್ಕಲ್ ಕಾರಿಡಾರ್: ₹539.94 ಕೋಟಿ
ಪೈಪ್‌ಲೈನ್ ರಸ್ತೆ ಗ್ರೇಡ್ ಸೆಪರೇಟರ್: ₹315.28 ಕೋಟಿ
ಕೋಣನಕುಂಟೆ ಕ್ರಾಸ್ ಫ್ಲೈಓವರ್ (ಕನಕಪುರ ರಸ್ತೆ): ₹76.76 ಕೋಟಿ
ಎಂಇಐ ಜಂಕ್ಷನ್ ಸ್ಪ್ಲಿಟ್ ಫ್ಲೈಓವರ್ (ತುಮಕೂರು ರಸ್ತೆ): ₹41.62 ಕೋಟಿ

ಮತ್ತೆ 3 ಯೋಜನೆಗಳಿಗೆ ಶೀಘ್ರವೇ ಬಿಡ್ಡಿಂಗ್, 2 ಕಾರಿಡಾರ್‌ಗಳಿಗೆ ಟೋಲ್ ವ್ಯವಸ್ಥೆ:

ಮುಂದಿನ ಒಂದು ವಾರದೊಳಗೆ ಇಂದಿರಾನಗರ 100 ಅಡಿ ರಸ್ತೆಯ ಫ್ಲೈಓವರ್, ಶಿರಸಿ ವೃತ್ತದಿಂದ ನಾಯಂಡಹಳ್ಳಿವರೆಗಿನ 5.2 ಕಿ.ಮೀ. ಉದ್ದದ ಫ್ಲೈಓವರ್ ಹಾಗೂ ಕನಕಪುರ ರಸ್ತೆಯ ಸಣ್ಣ ಫ್ಲೈಓವರ್ ಸೇರಿದಂತೆ ಮತ್ತ ಮೂರು ಯೋಜನೆಗಳಿಗೆ ಹೊಸ ಬಿಡ್‌ಗಳನ್ನು ಆಹ್ವಾನಿಸಲು ಅಧಿಕಾರಿಗಳು ಸಿದ್ಧತೆ ನಡೆಸಿದ್ದಾರೆ.

ಇದಲ್ಲದೆ, ರಾಗಿಗುಡ್ಡ ಜಂಕ್ಷನ್‌ನಿಂದ ಕನಕಪುರ ಮುಖ್ಯ ರಸ್ತೆಗೆ ಸಂಪರ್ಕ ಕಲ್ಪಿಸುವ ಮಾರ್ಗ ಹಾಗೂ ಯಶವಂತಪುರದ ಮೇಥಿಕೆರೆ ಕ್ರಾಸ್‌ನಿಂದ ಐಐಎಸ್‌ಸಿ, ಮೆಖ್ರಿ ವೃತ್ತ, ಜಯಮಹಲ್ ಮತ್ತು ಹಲಸೂರು ಸರೋವರದ ಮೂಲಕ ಓಲ್ಡ್ ಮದ್ರಾಸ್ ರಸ್ತೆಗೆ ಸಂಪರ್ಕಿಸುವ ಮತ್ತೊಂದು ಬೃಹತ್ ಕಾರಿಡಾರ್‌ಗೆ ಟೋಲ್ ಆಧಾರಿತ ಎಲಿವೇಟೆಡ್ ಯೋಜನೆಯಾಗಿ ಟೆಂಡರ್ ಪ್ರಕ್ರಿಯೆ ಮುಂದುವರಿದಿದೆ.

ಹೈಕೋರ್ಟ್ ಮೆಟ್ಟಿಲೇರಿದ ವಿವಾದ

ಒಂದೆಡೆ ಸರಕಾರವು ಟೆಂಡರ್ ಪ್ರಕ್ರಿಯೆಯನ್ನು ತೀವ್ರಗೊಳಿಸುತ್ತಿದ್ದರೆ, ಇನ್ನೊಂದೆಡೆ ಸ್ಥಳೀಯ ನಿವಾಸಿಗಳು ಹಾಗೂ ಪ್ರಜಾಸಂಘಟನೆಗಳಿಂದ ಯೋಜನೆಗಳಿಗೆ ತೀವ್ರ ವಿರೋಧ ವ್ಯಕ್ತವಾಗುತ್ತಿದೆ. ವಿಶೇ‍ಷವಾಗಿ ಇಂದಿರಾನಗರ 100 ಅಡಿ ರಸ್ತೆಯ ಫ್ಲೈಓವರ್ ಹಾಗೂ ರಾಗಿಗುಡ್ಡ-ಕನಕಪುರ ರಸ್ತೆ ಕಾರಿಡಾರ್ ಯೋಜನೆಗಳು ಪರಿಸರ ಮತ್ತು ವಸತಿ ಪ್ರದೇಶಗಳಿಗೆ ಧಕ್ಕೆ ತರುತ್ತವೆ ಎಂದು ಆರೋಪಿಸಿ ಸಾರ್ವಜನಿಕರು ಇತ್ತೀಚೆಗೆ ಬೃಹತ್ ಮಾನವ ಸರಪಳಿ ನಿರ್ಮಿಸಿ ಪ್ರತಿಭಟಿಸಿದ್ದರು. ಇಂದಿರಾನಗರ ಫ್ಲೈಓವರ್ ಯೋಜನೆಯನ್ನು ರದ್ದುಗೊಳಿಸುವಂತೆ ಕೋರಿ ಸ್ಥಳೀಯ ನಿವಾಸಿಗಳು ಈಗಾಗಲೇ ಕರ್ನಾಟಕ ಹೈಕೋರ್ಟ್ ಮೆಟ್ಟಿಲೇರಿದ್ದು, ಅರ್ಜಿ ವಿಚಾರಣೆ ಹಂತದಲ್ಲಿದೆ.

ಬೆಂಗಳೂರಿನಲ್ಲಿ ಟೊಮೆಟೊ ಬೆಲೆ ದಿಢೀರ್ ಕುಸಿತ, ಮಾರುಕಟ್ಟೆಯಿಂದ ಮಾರುಕಟ್ಟೆಗೆ ವ್ಯತ್ಯಾಸ!

Gowthami K — Tue, 20 Oct 2026 14:08:04 +0530

ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಟೊಮೆಟೊ ದರದಲ್ಲಿ ಭಾರಿ ಕುಸಿತ ಕಂಡುಬಂದಿದೆ. ಕಳೆದ ಒಂದು ವಾರದ ಅವಧಿಯಲ್ಲಿ ಪ್ರತಿ ಕೆಜಿ ಟೊಮೆಟೊ ಬೆಲೆ ₹50 ರಿಂದ ₹10 ರವರೆಗೂ ಕುಸಿದಿದ್ದು, ಗ್ರಾಹಕರಿಗೆ ದೊಡ್ಡ ನಿರಾಳತೆ ತಂದಿದೆ. ಆದರೆ ಟೊಮೆಟೋ ಬೆಳೆಗಾರರಿಗೆ ನಿರಾಸೆ ತಂದಿದೆ, ಈ ಬೆಲೆ ಇಳಿಕೆಯು ನಗರದ ಎಲ್ಲಾ ಪ್ರದೇಶಗಳು ಮತ್ತು ಎಲ್ಲಾ ತಳಿಯ ಟೊಮೆಟೊಗಳಿಗೆ ಏಕರೂಪವಾಗಿ ಅನ್ವಯಿಸುತ್ತಿಲ್ಲ ಎಂಬುದು ಮಾರುಕಟ್ಟೆ ಸಮೀಕ್ಷೆಯಿಂದ ತಿಳಿದುಬಂದಿದೆ.

ಬೆಲೆ ಕುಸಿತಕ್ಕೆ ಪ್ರಮುಖ ಕಾರಣಗಳೇನು?

ಮಾರುಕಟ್ಟೆಗೆ ಟೊಮೆಟೊ ಪೂರೈಕೆ ಹೆಚ್ಚಾಗಿರುವುದು, ಗ್ರಾಹಕರ ಖರೀದಿ ಪ್ರಮಾಣ ನಿಧಾನವಾಗಿರುವುದು ಹಾಗೂ ನಿರೀಕ್ಷಿತ ಮಟ್ಟದಲ್ಲಿ ಬೇಡಿಕೆ ಬಾರದಿರುವುದು ಈ ಬೆಲೆ ಕುಸಿತಕ್ಕೆ ಮೂಲ ಕಾರಣವಾಗಿದೆ.

ಬೆಂಗಳೂರು ನಗರಕ್ಕೆ ಪ್ರಮುಖವಾಗಿ ಕರ್ನಾಟಕದ ವಿವಿಧ ಜಿಲ್ಲೆಗಳು ಹಾಗೂ ನೆರೆ ರಾಜ್ಯವಾದ ತಮಿಳುನಾಡಿನಿಂದ ಟೊಮೆಟೊ ಸರಬರಾಜಾಗುತ್ತದೆ. ಕರ್ನಾಟಕದಲ್ಲಿ ಕೋಲಾರ ಜಿಲ್ಲೆಯು ಅತಿ ದೊಡ್ಡ ಟೊಮೆಟೊ ಉತ್ಪಾದನಾ ಕೇಂದ್ರವಾಗಿದ್ದು, ಸುಮಾರು 15,000 ಎಕರೆ ಪ್ರದೇಶದಲ್ಲಿ ಬೆಳೆ ಬೆಳೆಯಲಾಗುತ್ತದೆ. ಇಲ್ಲಿಂದ ಉತ್ತರ ಭಾರತದ ರಾಜ್ಯಗಳಿಗೆ ಹಾಗೂ ಬಾಂಗ್ಲಾದೇಶದಂತಹ ನೆರೆಯ ದೇಶಗಳಿಗೂ ಟೊಮೆಟೊ ರಫ್ತಾಗುತ್ತದೆ. ಪ್ರಸ್ತುತ ಸ್ಥಳೀಯ ಮಾರುಕಟ್ಟೆಯಲ್ಲಿ ಸಂಗ್ರಹ ಹೆಚ್ಚಿರುವುದರಿಂದ ದರದಲ್ಲಿ ಇಳಿತ ಕಂಡುಬಂದಿದೆ.

ವಿವಿಧ ಪ್ರದೇಶಗಳಲ್ಲಿ ಚಿಲ್ಲರೆ ದರ ವ್ಯತ್ಯಾಸ

ನಗರದ ಬೇರೆ ಬೇರೆ ಬಡಾವಣೆಗಳಲ್ಲಿ ಟೊಮೆಟೊ ತಳಿ, ಗಾತ್ರ ಮತ್ತು ಗುಣಮಟ್ಟಕ್ಕೆ ಅನುಗುಣವಾಗಿ ಮಾರಾಟಗಾರರು ವಿಭಿನ್ನ ದರಗಳನ್ನು ನಿಗದಿಪಡಿಸಿದ್ದಾರೆ:

ಸೌತ್ ಎಂಡ್ ಸರ್ಕಲ್: ಇಲ್ಲಿನ ವ್ಯಾಪಾರಿಗಳ ಪ್ರಕಾರ, ಕೇವಲ ನಾಲ್ಕು ದಿನಗಳ ಅಂತರದಲ್ಲಿ ಪ್ರತಿ ಕೆಜಿ ಟೊಮೆಟೊ ಬೆಲೆ ₹50 ರಿಂದ ₹30 ಕ್ಕೆ ಇಳಿಕೆಯಾಗಿದೆ. ಹಬ್ಬದ ಸೀಸನ್‌ನಲ್ಲೂ ಗ್ರಾಹಕರಿಂದ ನಿರೀಕ್ಷಿತ ಬೇಡಿಕೆ ಬಂದಿಲ್ಲ.

ಬಸವನಗುಡಿ: ಗುಣಮಟ್ಟಕ್ಕೆ ಅನುಗುಣವಾಗಿ ಪ್ರಸ್ತುತ ₹20, ₹30 ಮತ್ತು ₹40೦ ರಂತೆ ಮಾರಾಟವಾಗುತ್ತಿದೆ. ಇತ್ತೀಚೆಗೆ ಬಿದ್ದ ಮಳೆಯ ನಡುವೆಯೂ ಮಾರುಕಟ್ಟೆಯಲ್ಲಿ ಅಪಾರ ಪ್ರಮಾಣದ ಸ್ಟಾಕ್ ಉಳಿದುಕೊಂಡಿರುವುದು ದರ ಕುಸಿತಕ್ಕೆ ಕಾರಣವಾಗಿದೆ.

ಕೋರಮಂಗಲ: ಇಲ್ಲಿನ ಚಿಲ್ಲರೆ ವ್ಯಾಪಾರಿಗಳ ಪ್ರಕಾರ ಬೆಲೆಯಲ್ಲಿ ತಕ್ಷಣದ ಭಾರಿ ಕುಸಿತವೇನೂ ಕಂಡಿಲ್ಲ. ದರಗಳು ಕಳೆದ ಕೆಲವು ದಿನಗಳಿಂದ ₹25 ರಿಂದ ₹35 ರ ಗಡಿಯಲ್ಲೇ ಸ್ಥಿರವಾಗಿವೆ.

ಆನ್‌ಲೈನ್ ಡೆಲಿವರಿ ಆಪ್‌ಗಳು: ಬ್ಲಿಂಕಿಟ್, ಝೆಪ್ಟೋ ಮತ್ತು ಸ್ವಿಗ್ಗಿ ಇನ್‌ಸ್ಟಾಮಾರ್ಟ್‌ನಂತಹ ಆನ್‌ಲೈನ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಉತ್ತಮ ಗುಣಮಟ್ಟದ ಟೊಮೆಟೊ ಬೆಲೆ ಪ್ರತಿ ಕೆಜಿಗೆ ₹30 ರಿಂದ ₹40 ರ ವ್ಯಾಪ್ತಿಯಲ್ಲಿದೆ.

ಒಟ್ಟಾರೆಯಾಗಿ, ಹೋಲ್‌ಸೇಲ್ ಮಾರುಕಟ್ಟೆಗಳಲ್ಲಿ ದರ ಶೇಕಡಾ 80ರಷ್ಟು ಕುಸಿದಿದ್ದರೂ, ಸ್ಥಳೀಯ ಚಿಲ್ಲರೆ ಅಂಗಡಿಗಳು ಹಾಗೂ ಸೂಪರ್ ಮಾರ್ಕೆಟ್‌ಗಳಲ್ಲಿ ಗ್ರಾಹಕರು ಇಂದಿಗೂ ಸಣ್ಣಮಟ್ಟದ ವ್ಯತ್ಯಾಸದೊಂದಿಗೆ ಹಣ ಪಾವತಿಸಬೇಕಾಗಿದೆ.

ಜೈಲಿನಿಂದಲೇ ಹೆಂಡತಿ ರಕ್ಷಣೆಗೆ ನಿಂತ ದರ್ಶನ್, ಧನ್ವೀರ್ ವಿರುದ್ಧ ಕೋರ್ಟ್ ಮೆಟ್ಟಲೇರಿದ ಆರೋಪಿ ನಟ!

Gowthami K — Thu, 29 Oct 2026 16:43:53 +0530

ಬೆಂಗಳೂರು: ಚಿತ್ರದುರ್ಗದ ರೇಣುಕಾಸ್ವಾಮಿ ಪ್ರಕರಣದ ಆರೋಪಿಯಾಗಿರುವ ನಟ ದರ್ಶನ್ ಕುಟುಂಬ ಹಾಗೂ ನಟ ಧನ್ವೀರ್ ನಡುವಿನ ಗಲಾಟೆ ಈಗ ನ್ಯಾಯಾಲಯದ ಮೆಟ್ಟಿಲೇರಿದೆ. ತಮ್ಮ ಹಾಗೂ ತಮ್ಮ ಪತ್ನಿಯ ತೇಜೋವಧೆ ಮಾಡುತ್ತಿದ್ದಾರೆ ಎಂದು ಆರೋಪಿಸಿರುವ ನಟ ದರ್ಶನ್, ಪತ್ನಿ ವಿಜಯಲಕ್ಷ್ಮಿ ಆಗಲಿ ನನ್ನ ಕುಟುಂಬದ ವಿರುದ್ಧವಾಗಲಿ ಯಾವುದೇ ಹೇಳಿಕೆ ನೀಡಬಾರದೆಂದು ತಡೆ ಕೋರಿ ಧನ್ವೀರ್ ವಿರುದ್ಧ ಬೆಂಗಳೂರಿನ ಸಿಟಿ ಸಿವಿಲ್ ಮತ್ತು ಸೆಷನ್ಸ್ ನ್ಯಾಯಾಲಯದಲ್ಲಿ ಮಾನನಷ್ಟ ಮೊಕದ್ದಮೆ ಸಲ್ಲಿಕೆ ಮಾಡಿದ್ದಾರೆ.

ತಮ್ಮ ಪರ ವಕೀಲರಾದ ರಂಗನಾಥ ರೆಡ್ಡಿ ಅವರ ಮೂಲಕ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿರುವ ದರ್ಶನ್, ಧನ್ವೀರ್ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳುವಂತೆ ಹಾಗೂ ತಮ್ಮ ಕುಟುಂಬದ ಕುರಿತು ಯಾವುದೇ ಮಾಧ್ಯಮಗಳಲ್ಲಿ ಅಥವಾ ಸಾರ್ವಜನಿಕವಾಗಿ ಹೇಳಿಕೆ ನೀಡದಂತೆ ನಿರ್ಬಂಧ ವಿಧಿಸಬೇಕೆಂದು ಮನವಿ ಮಾಡಿದ್ದಾರೆ.

'ನನ್ನ ಬೆನ್ನಿಗೆ ಚೂರಿ ಹಾಕಿದ್ದಾನೆ': ದರ್ಶನ್ ಆಕ್ರೋಶ

ಅರ್ಜಿಯಲ್ಲಿ ನಟ ಧನ್ವೀರ್ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿರುವ ದರ್ಶನ್, ನನ್ನ ಅಭಿಮಾನಿಗಳ ಬೆಂಬಲದಿಂದ ಧನ್ವೀರ್ ಬೆಳೆದಿದ್ದಾನೆ. ಈಗ ನನ್ನ ಮತ್ತು ನನ್ನ ಪತ್ನಿಯ ಮರ್ಯಾದೆಯನ್ನು ಹರಾಜು ಹಾಕುತ್ತಿದ್ದಾನೆ. ನನ್ನ ಹೆಸರನ್ನು ಬಳಸಿಕೊಂಡು ಬೆಳೆದು, ಕೊನೆಗೆ ನನ್ನ ಕುಟುಂಬದ ಬೆನ್ನಿಗೇ ಚೂರಿ ಹಾಕುವ ಕೆಲಸ ಮಾಡಿದ್ದಾನೆ ಎಂದು ಗಂಭೀರ ಆರೋಪ ಮಾಡಿದ್ದಾರೆ.

ಪತ್ನಿಯ ತೇಜೋವಧೆ ಹಾಗೂ ಸುಳ್ಳು ಆರೋಪಗಳಿಗೆ ಖಂಡನೆ

ಪ್ರದೋಷ್ ವಿಷಯಕ್ಕೆ ಸಂಬಂಧಿಸಿದಂತೆ ತಮ್ಮ ಪತ್ನಿಯ ಮೇಲೆ ಧನ್ವೀರ್ ಮಾಡಿರುವ ಎಲ್ಲಾ ಆರೋಪಗಳು ಸಂಪೂರ್ಣವಾಗಿ ಆಧಾರರಹಿತ ಮತ್ತು ಸುಳ್ಳು ಎಂದು ದರ್ಶನ್ ತನ್ನ ಅರ್ಜಿಯಲ್ಲಿ ಉಲ್ಲೇಖಿಸಿದ್ದು. ಧನ್ವೀರ್ ನೀಡುತ್ತಿರುವ ಬೇಜವಾಬ್ದಾರಿ ಹೇಳಿಕೆಗಳಿಂದಾಗಿ ತಮ್ಮ ಪತ್ನಿಯ ಚಾರಿತ್ರ್ಯ ಹರಣವಾಗುತ್ತಿದ್ದು, ತೀವ್ರ ಮಾನಸಿಕ ನೆಮ್ಮದಿ ಹಾಳಾಗಿದೆ ಎಂದು ಕೋರ್ಟ್‌ಗೆ ತಿಳಿಸಿದ್ದಾರೆ.

ನ್ಯಾಯಾಲಯದಲ್ಲಿ ಮಾಡಲಾಗಿರುವ ಮುಖ್ಯ ಮನವಿಗಳು:

ನಟ ಧನ್ವೀರ್ , ದರ್ಶನ್ ಆಗಲಿ ಪತ್ನಿ, ಕುಟುಂಬದ ವಿರುದ್ಧವಾಗಲಿ ಯಾವುದೇ ರೀತಿಯ ಹೇಳಿಕೆಗಳನ್ನು ಮಾಧ್ಯಮಗಳಲ್ಲಾಗಲಿ, ಸಾಮಾಜಿಕ ಜಾಲತಾಣಗಳಲ್ಲಾಗಲಿ ನೀಡದಂತೆ ತಡೆಯಾಜ್ಞೆ ನೀಡಬೇಕು.

ಪ್ರದೋಷ್ ಹಾಗೂ ಕುಟುಂಬಕ್ಕೆ ಸಂಬಂಧಿಸಿದ ವಿಚಾರಗಳಲ್ಲಿ ಸುಳ್ಳು ಆರೋಪಗಳನ್ನು ಮಾಡಿ ತೇಜೋವಧೆ ಮಾಡುವುದನ್ನು ತಕ್ಷಣವೇ ತಡೆಯಬೇಕು.

ನಂಬಿಕೆದ್ರೋಹ ಎಸಗಿ, ಕುಟುಂಬದ ಗೌರವಕ್ಕೆ ಧಕ್ಕೆ ತಂದಿರುವುದಕ್ಕಾಗಿ ಮಾನನಷ್ಟ ಮೊಕದ್ದಮೆಯಡಿ ಕಾನೂನುಬದ್ಧ ಶಿಕ್ಷೆ ವಿಧಿಸಬೇಕು.

ವಕೀಲ ರಂಗನಾಥ ರೆಡ್ಡಿ ಅವರ ಮೂಲಕ ಸಲ್ಲಿಕೆಯಾಗಿರುವ ಈ ಅರ್ಜಿಯ ವಿಚಾರಣೆಯನ್ನು ನ್ಯಾಯಾಲಯ ಶೀಘ್ರದಲ್ಲೇ ಕೈಗೆತ್ತಿಕೊಳ್ಳುವ ನಿರೀಕ್ಷೆಯಿದೆ. ಈ ಬೆಳವಣಿಗೆಯಿಂದಾಗಿ ಕಳೆದ ಒಂದು ವಾರದಿಂದ ದರ್ಶನ್ ಪತ್ನಿ ಮತ್ತು ಧನ್ವೀರ್ ನಡುವಿನ ಜಗಳ ಎಲ್ಲಿಗೆ ಬಂದು ನಿಲ್ಲುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ.

ಕನ್ನಡ ಹಾಡೇ ಹಾಡಬೇಕು, ಸೋನು ನಿಗಮ್ ಯಲಹಂಕ ಕಾರ್ಯಕ್ರಮಕ್ಕೆ ವಾಟಾಳ್ ನಾಗರಾಜ್ ಎಚ್ಚರಿಕೆ

Chethan Kumar — Fri, 23 Oct 2026 19:10:13 +0530

ಬೆಂಗಳೂರು (ಅ.23) ಗಾಯಕ ಸೋನು ನಿಗಮ್ ಕನ್ನಡಿಗರ ವಿರುದ್ದ ನೀಡಿದ್ದ ವಿವಾದಾತ್ಮಕ ಹೇಳಿಕೆ ಹಲವು ಕೋಲಾಹಲ ಸೃಷ್ಟಿಸಿ ಕ್ಷಮೆಯಾಚನೆಯಿಂದ ತಣ್ಣಗಾಗಿತ್ತು. ಕನ್ನಡಿಗರ ನೋಯಿಸಿದ್ದ ಸಿಂಗರ್ ಸೋನು ಭೇಷರತ್ ಕ್ಷಮೆಯಾಚಿಸಿದ್ದರು. ಈ ಕ್ಷಮೆಯಾಚನೆ ಬಳಿಕ ಕರ್ನಾಟಕ ರಕ್ಷಣಾ ವೇದಿಕೆ ಗಾಯಕನ ಕ್ಷಮಿಸಿ ಕಾರ್ಯಕ್ರಮ ವಿರುದ್ದ ನೀಡಿದ್ದ ದೂರು ಹಿಂಪಡೆದಿತ್ತು. ಆದರೆ ಕನ್ನಡ ಪರ ಹೋರಾಟಗಾರ ವಾಟಾಳ್ ನಾಗರಾಜ್ ಮಹತ್ವದ ಎಚ್ಚರಿಕೆ ನೀಡಿದ್ದಾರೆ. ನಾಳೆ (ಅ.24) ಯಲಹಂಕದಲ್ಲಿ ನಡೆಯಲಿರುವ ಕಾರ್ಯಕ್ರಮದಲ್ಲಿ ಸೋನು ನಿಗಮ್ ಕನ್ನಡ ಹಾಡುಗಳನ್ನೇ ಹಾಡಬೇಕು ಎಂದು ಎಚ್ಚರಿಸಿದ್ದಾರೆ.

ಬೇರೆ ಭಾಷೆ ಹಾಡಬಾರದು, ವಾಟಾಳ್ ಎಚ್ಚರಿಕೆ

ಯಲಹಂಕಾ ಕಾರ್ಯಕ್ರಮದಲ್ಲಿ ಸೋನು ನಿಗಮ್ ಕನ್ನಡ ಭಾಷೆಯ ಹಾಡುಗಳನ್ನೇ ಹಾಡಬೇಕು. ಬೇರೆ ಭಾಷೆ ಹಾಡುಗಳನ್ನು ಹಾಡಲು ಅವಕಾಶ ನೀಡುವುದಿಲ್ಲ ಎಂದು ವಾಟಾಳ್ ನಾಗರಾಜ್ ಎಚ್ಚರಿಸಿದ್ದಾರೆ. ಯಲಹಂಕ ಕಾರ್ಯಕ್ರಮಕ್ಕೆ ನಾನು ಹೋಗುತ್ತೇನೆ. ನಾನು ಖುದ್ದಾಗಿ ಕಾರ್ಯಕ್ರಮದಲ್ಲಿದ್ದು ಈ ಕುರಿತು ಗಮನಿಸುತ್ತೇನೆ. ಇತರ ಭಾಷೆಯ ಹಾಡುಗಳಿಗೆ ಅವಕಾಶ ನೀಡುವುದಿಲ್ಲ ಎಂದು ವಾಟಾಳ್ ನಾಗರಾಜ್ ಎಚ್ಚರಿಸಿದ್ದಾರೆ.

ವಾಟಾಳ್ ನಾಗರಾಜ್ ಸ್ವತಃ ಸೋನು ನಿಮಗ್ ಕಾರ್ಯಕ್ರಮದಲ್ಲಿ ಹಾಜರಿರುವುದಾಗಿ ಹೇಳಿದ್ದಾರೆ. ಈ ಮೂಲಕ ಸೋನು ನಿಗಮ್ ಯಾವ ಹಾಡುಗಳನ್ನು ಹಾಡುತ್ತಾರೆ ಅನ್ನೋ ಕುರಿತು ಖುದ್ದಾಗಿ ಪರಿಶೀಲಿಸುವುದಾಗಿ ಹೇಳಿದ್ದಾರೆ. ಸಾಕಷ್ಟು ಅತ್ಯುತ್ತಮ ಕನ್ನಡ ಹಾಡುಗಳಿವೆ. ಅದನ್ನೇ ಹಾಡಲಿ ಎಂದು ವಾಟಾಳ್ ನಾಗರಾಜ್ ಸೂಚಿಸಿದ್ದಾರೆ.

ಸೋನು ನಿಗಮ್ ವಿವಾದ

2025ರ ಏಪ್ರಿಲ್‌ನಲ್ಲಿ ಈಸ್ಟ್ ಪಾಯಿಂಟ್ ಕಾಲೇಜಿನ ಕಾರ್ಯಕ್ರಮದಲ್ಲಿ ಸೋನು ನಿಗಮ್ ವಿವಾದಾತ್ಮಕ ಹೇಳಿಕೆ ನೀಡಿದ್ದರು. ಈ ಹೇಳಿಕೆ ಕುರಿತು ಸೋನು ನಿಗಮ್ ವಿರುದ್ಧ 2025ರ ಮೇ 2ರಂದು ಆವಲಹಳ್ಳಿ ಪೊಲೀಸ್ ಠಾಣೆಗೆ ದೂರು ಸಲ್ಲಿಕೆಯಾಗಿತ್ತು. ಈ ವಿವಾದಾತ್ಮಕ ಹೇಳಿಕೆ ಬಳಿಕ ಕನ್ನಡ ಪರ ಸಂಘಟನೆಗಳು ಭಾರಿ ಪ್ರತಿಭಟನೆ ನಡೆಸಿತ್ತು. ಈ ಪ್ರತಿಭಟನೆಯಿಂದ ಸೋನು ನಿಗಮ್ ಕನ್ನಡಿಗರಲ್ಲಿ ಕ್ಷಮೆಯಾಚಿಸಿದ್ದರು.

ಸೋನು ನಿಮಗ್ ಕ್ಷಮೆಯಾಚನೆ ಬೆನ್ನಲ್ಲೇ ಕರ್ನಾಟಕ ರಕ್ಷಣಾ ವೇದಿಕೆ ದೂರು ಹಿಂಪಡೆದಿತ್ತು. ಕ್ಷಮಿಸುವುದು ಕನ್ನಡಿಗರ ದೊಡ್ಡ ಗುಣ. ಹಲವು ಇತರ ಭಾಷೆ ಗಾಯಕರು ಕನ್ನಡವನ್ನು ಹಾಡಿನ ಮೂಲಕ ಶ್ರೀಮಂತಗೊಳಿಸಿದ್ದಾರೆ. ಈ ಸಾಲಿನಲ್ಲಿ ಸೋನು ನಿಗಮ್ ಕೂಡ ಸೇರಿದ್ದಾರೆ. ಆದರೆ ಕನ್ನಡಿಗರು, ಈ ಭಾಷೆ, ನೆಲ, ಜಲದ ಬಗ್ಗೆ ಅಗೌರವ ತೋರಿದರೆ ಕನ್ನಡಿಗರು ಸುಮ್ಮನಿರಲ್ಲ. ಈ ಪ್ರಕರಣ ಎಲ್ಲರಿಗೂ ಪಾಠ ಎಂದು ಕರವೇ ಅಧ್ಯಕ್ಷ ನಾರಾಯಣ ಗೌಡರು ಎಚ್ಚರಿಕೆ ನೀಡಿದ್ದರು.

ಬೆಂಗಳೂರು ಕೇಂದ್ರ ನಗರ ಪಾಲಿಕೆಯಿಂದ ಗುರಿ ಮುಟ್ಟದ ತೆರಿಗೆ ಸಂಗ್ರಹ, ಆಸ್ತಿ ತೆರಿಗೆ ಕಟ್ಟದಿದ್ದರೆ ಸ್ವತ್ತುಗಳಿಗೆ ಬೀಗ!

Gowthami K — Sat, 31 Oct 2026 09:45:39 +0530

ಬೆಂಗಳೂರು: ಕೇಂದ್ರ ನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಮಾಸಿಕ 75 ಕೋಟಿ ರು. ತೆರಿಗೆ ಸಂಗ್ರಹಿಸಬೇಕಿತ್ತು. ಆದರೆ, ಬರೀ 35 ಕೋಟಿ ರು. ಮಾತ್ರ ಸಂಗ್ರಹವಾಗುತ್ತಿದೆ. ತೆರಿಗೆ ಸಂಗ್ರಹಕ್ಕೆ ವೇಗ ನೀಡುವಂತೆ ಕೇಂದ್ರ ನಗರ ಪಾಲಿಕೆ ಆಯುಕ್ತ ಜಿ.ಜಗದೀಶ್ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.

ಕೇಂದ್ರ ನಗರ ಪಾಲಿಕೆಗೆ ಪ್ರಸಕ್ತ ಸಾಲಿನಲ್ಲಿ ಅಸಾಧ್ಯ ಎನಿಸುವ 1,200 ಕೋಟಿ ರು. ತೆರಿಗೆ ಸಂಗ್ರಹದ ಗುರಿ ನೀಡಲಾಗಿದೆ. ಆದರೆ, ಈವರೆಗೆ ಸುಮಾರು ಶೇ.55ರಷ್ಟು ಮಾತ್ರ ಸಂಗ್ರಹವಾಗಿದೆ. ಎಸ್‌ಐಆರ್ ಪ್ರಕ್ರಿಯೆಯ ಹಿನ್ನೆಲೆಯಲ್ಲಿ ಅಧಿಕಾರಿಗಳು, ಸಿಬ್ಬಂದಿ ತೆರಿಗೆ ಸಂಗ್ರಹದ ಕಡೆ ಗಮನ ನೀಡಲು ಸಾಧ್ಯವಾಗಿರಲಿಲ್ಲ. ಹೀಗಾಗಿ, ಸಭೆ ನಡೆಸಿ ಅಧಿಕಾರಿಗಳಿಗೆ ಸೂಚನೆ ನೀಡಲಾಗಿದೆ. ಹಿಂದಿನ ವರ್ಷಗಳ ಸಾಲಿನ ತೆರಿಗೆ ಪಾವತಿ ಬಾಕಿ ಉಳಿಸಿಕೊಂಡವರು ಕೂಡಲೇ ಪಾವತಿಸಬೇಕು. ಇಲ್ಲದಿದ್ದರೆ ಸ್ವತ್ತುಗಳಿಗೆ ಬೀಗ ಹಾಕಲು 150 ಬೀಗಗಳನ್ನು ಕೊಡಿಸಲಾಗಿದೆ ಎಂದು ಜಗದೀಶ್ ತಿಳಿಸಿದರು.

ಮಲ್ಲೇಶ್ವರದಲ್ಲಿ ಪ್ರತಿಷ್ಠಿತ ಮಾಲ್‌ವೊಂದು ಸುಮಾರು 8 ಕೋಟಿ ರು. ತೆರಿಗೆ ಬಾಕಿ ಉ‍ಳಿಸಿಕೊಂಡಿದೆ. ಇದೇ ರೀತಿ ವಾಣಿಜ್ಯ ಕಟ್ಟಡಗಳು ಹಾಗೂ ವಸತಿ ಪ್ರದೇಶಗಳಿಂದ ಸಾಕಷ್ಟು ತೆರಿಗೆ ಸಂಗ್ರಹವಾಗಬೇಕಿದೆ. ಎಲ್ಲಾ ಸುಸ್ತಿದಾರರಿಗೆ 15 ದಿನಗಳ ಒಳಗೆ ನೋಟಿಸ್ ಜಾರಿ ಮಾಡಲು ಸೂಚಿಸಲಾಗಿದೆ. ನಂತರ ತೆರಿಗೆ ವಸೂಲಿಗೆ ಚಾಲನೆ ನೀಡಬೇಕು. ಹಿಂದಿನ ವರ್ಷಗಳಿಂದ ತೆರಿಗೆ ಬಾಕಿ ಉಳಿಸಿಕೊಂಡಿರುವ ಸುಮಾರು 15,000 ಸ್ವತ್ತುಗಳ ಆಸ್ತಿ ತೆರಿಗೆ ಪಾವತಿ ಬಾಕಿಯಿದೆ ಎಂದು ಆಯುಕ್ತ ಜಗದೀಶ್ ತಿಳಿಸಿದ್ದಾರೆ.

ನಾಳೆ 43 ವಾರ್ಡ್‌ಗಳಲ್ಲಿ ವಾರ್ಡ್ ಒನ್ ಅಭಿಯಾನ

ಜಿಬಿಎ ವ್ಯಾಪ್ತಿಯ ಐದು ನಗರ ಪಾಲಿಕೆಗಳ 43 ವಾರ್ಡ್‌ಗಳಲ್ಲಿ ನವೆಂಬರ್ 1ರಂದು ‘ವಾರ್ಡ್ ಒನ್’ ಅಭಿಯಾನ ಹಮ್ಮಿಕೊಳ್ಳುತ್ತಿದ್ದು, ವಿವಿಧ ಇಲಾಖೆಗಳ ಅಧಿಕಾರಿಗಳು ಸಮನ್ವಯದೊಂದಿಗೆ ಕಾರ್ಯನಿರ್ವಹಿಸುವಂತೆ ಗ್ರೇಟರ್ ಬೆಂಗಳೂರು ಅಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ಸೂಚನೆ ನೀಡಿದರು.

ಈ ಸಂಬಂಧ ಶುಕ್ರವಾರ ನಡೆದ ವರ್ಚುವಲ್ ಸಭೆ ಉದ್ದೇಶಿಸಿ ಮಾತನಾಡಿದ ಅವರು, ಆಯ್ಕೆಯಾದ 43 ವಾರ್ಡ್‌ಗಳಲ್ಲಿ ಸ್ವಚ್ಛತೆ ಕೈಗೊಳ್ಳಲು ಸಿದ್ಧತೆ ಮಾಡಿಕೊಳ್ಳಲಾಗಿದೆ. ಕೇಂದ್ರ ನಗರ ಪಾಲಿಕೆ 6 ವಾರ್ಡ್‌ಗಳು, ಉತ್ತರ ನಗರ ಪಾಲಿಕೆ 7ವಾರ್ಡ್‌ಗಳು, ದಕ್ಷಿಣ ನಗರ ಪಾಲಿಕೆ12 ವಾರ್ಡ್‌ಗಳು, ಪಶ್ಚಿಮ ನಗರ ಪಾಲಿಕೆ 10 ವಾರ್ಡ್‌ಗಳು, ಪೂರ್ವ ನಗರ ಪಾಲಿಕೆ 8 ವಾರ್ಡ್‌ಗಳಲ್ಲಿ ಸ್ವಚ್ಛತೆ ಅಭಿವೃದ್ಧಿ ನಡೆಯಲಿದೆ ಎಂದರು.

ಅಧಿಕಾರಿಗಳೊಂದಿಗೆ ಸಭೆ ನಡೆಸಿ, ಸಿದ್ಧಪಡಿಸಿರುವ ಚೆಕ್‌ಲಿಸ್ಟ್‌ಗೆ ಅನುಗುಣವಾಗಿ ಕಾರ್ಯಯೋಜನೆ ರೂಪಿಸಿಕೊಳ್ಳಬೇಕು. ಬಳಿಕ ಎಲ್ಲ ಅಧಿಕಾರಿಗಳ ನೇತೃತ್ವದಲ್ಲಿ ತಂಡ ರಚಿಸಿ, ಲಭ್ಯವಿರುವ ಸಂಪೂರ್ಣ ಸಿಬ್ಬಂದಿ ಸಮರ್ಪಕ ಬಳಸಿಕೊಂಡು ಅಭಿಯಾನ ಪರಿಣಾಮಕಾರಿಯಾಗಿ ಅನುಷ್ಠಾನಗೊಳಿಸಬೇಕು ಎಂದು ಸೂಚಿಸಿದರು.

ಸಭೆಯಲ್ಲಿ ನಗರ ಪಾಲಿಕೆ ಆಯುಕ್ತ ಪೊಮ್ಮಲ ಸುನೀಲ್ ಕುಮಾರ್, ರಮೇಶ್ ಕೆ.ಎನ್., ಜಿ. ಜಗದೀಶ್, ಅಪರ ಆಯುಕ್ತೆ ಕವಿತಾ ರಾಜಾರಾಂ, ಲೋಖಂಡೆ ಸ್ನೇಹಲ್ ಸುಧಾಕರ್, ಎಂಜಿನಿಯರ್‌ಗಳು, ಮೆಟ್ರೋ, ಬೆಸ್ಕಾಂ, ಕೆಎಸ್‌ಆರ್‌ಟಿಸಿ, ಜಲಮಂಡಳಿ ಅಧಿಕಾರಿಗಳು ಉಪಸ್ಥಿತರಿದ್ದರು.

40 ಕೋಟಿ ರೂ ಸರ್ಕಾರಿ ಆಸ್ತಿ ಕಬಳಿಕೆ; 10 ಲಕ್ಷ ಚಾಲೆಂಜ್ ಡಿಪಾಸಿಟ್ ಮಾಡಿದ ವ್ಯಕ್ತಿ

Kannadaprabha News — Fri, 30 Oct 2026 17:59:28 +0530

ನೆಲಮಂಗಲ/ದಾಬಸ್‍ಪೇಟೆ : ನೆಲಮಂಗಲ ನಗರದ ಪ್ರಮುಖ ಪಾರ್ಕ್ ಹಾಗೂ ಸಿಎ (ನಿವೇಶನ) ಜಾಗಗಳನ್ನು ಪ್ರಭಾವಿ ವ್ಯಕ್ತಿಗಳು ಅಕ್ರಮವಾಗಿ ಕಬಳಿಸಿದ್ದಾರೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಅಧಿಕಾರಿಗಳ ಶಾಮೀಲಾತಿಯೊಂದಿಗೆ ನಕಲಿ ದಾಖಲೆಗಳನ್ನು ಸೃಷ್ಟಿಸಿ, ಅಂದಾಜು 40 ಕೋಟಿ ರೂಪಾಯಿಗೂ ಹೆಚ್ಚು ಬೆಲೆಬಾಳುವ ಸರ್ಕಾರಿ ಭೂಮಿಯನ್ನು ಗುಳುಂ ಮಾಡಲಾಗಿದೆ ಎಂದು ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಆಕ್ರೋಶ ವ್ಯಕ್ತವಾಗಿದೆ.

ಈ ಹಗರಣದ ಕುರಿತು ವೆಂಕಟೇಶ್ ಎಂಬುವವರು ಬರೋಬ್ಬರಿ 10 ಲಕ್ಷ ರೂಪಾಯಿ ಹಣವನ್ನು ಚಾಲೆಂಜ್ ಡಿಪಾಸಿಟ್ ಮಾಡಿ, ಸರ್ಕಾರದ ಮುಖ್ಯ ಕಾರ್ಯದರ್ಶಿಗಳಿಗೆ, ನೆಲಮಂಗಲದ ಬಿನ್ನಮಂಗಲ ನರ್ಸರಿ ಮುಂಭಾಗದಲ್ಲಿರುವ ಸುಮಾರು 60 ಸಾವಿರ ಚದರ ಅಡಿಯಷ್ಟು ವಿಸ್ತೀರ್ಣದ ಸಿಎ ಜಾಗವನ್ನು ಅಕ್ರಮವಾಗಿ ಮಾರಾಟ ಮಾಡಲಾಗಿದ್ದು, ಅಲ್ಲಿ ನಿಯಮಬಾಹಿರವಾಗಿ ಮಾಲ್, ಶೋರೂಂ ಹಾಗೂ ಕಮರ್ಷಿಯಲ್ ಕಟ್ಟಡಗಳನ್ನು ನಿರ್ಮಿಸಲಾಗಿದೆ. ನಕಲಿ ದಾಖಲೆಗಳನ್ನು ಇಟ್ಟುಕೊಂಡು ಸರ್ಕಾರಿ ಜಾಗವನ್ನು ವಾಣಿಜ್ಯ ಉದ್ದೇಶಗಳಿಗೆ ಬಳಸಿಕೊಳ್ಳುತ್ತಿರುವುದರಿಂದ ಸರ್ಕಾರಕ್ಕೆ ಕೋಟ್ಯಾಂತರ ರೂಪಾಯಿ ನಷ್ಟ ಉಂಟಾಗಿದೆ ಎಂದು ಉಲ್ಲೇಖಿಸಿ ಅಧಿಕೃತವಾಗಿ ದೂರು ನೀಡಿದ್ದರು.

ಸರ್ಕಾರದ ಆದೇಶ, ತನಿಖಾ ಸಮಿತಿ ರಚನೆ

ದೂರಿನ ಗಾಂಭೀರ್ಯತೆಯನ್ನು ಪರಿಗಣಿಸಿದ ರಾಜ್ಯ ಸರ್ಕಾರವು ತಕ್ಷಣವೇ ತನಿಖೆ ನಡೆಸುವಂತೆ ಜಿಲ್ಲಾಡಳಿತಕ್ಕೆ ಆದೇಶಿಸಿದೆ. ಸರ್ಕಾರದ ಸೂಚನೆಯ ಮೇರೆಗೆ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಅಪರ ಜಿಲ್ಲಾಧಿಕಾರಿ (ಎಡಿಸಿ) ಸೈಯಿದಾ ಆಯಿಷಾ ಅವರ ಅಧ್ಯಕ್ಷತೆಯಲ್ಲಿ ವಿಶೇಷ ತನಿಖಾ ಸಮಿತಿಯನ್ನು ರಚಿಸಲಾಗಿದ್ದು. ಈಗಾಗಲೇ ಅಪರ ಜಿಲ್ಲಾಧಿಕಾರಿಗಳ ನೇತೃತ್ವದ ಅಧಿಕಾರಿಗಳ ತಂಡವು ಬಿನ್ನಮಂಗಲದ ವಿವಾದಿತ ಸ್ಥಳಕ್ಕೆ ಭೇಟಿ ನೀಡಿ, ಭೂಮಿಯ ನಕ್ಷೆ ಹಾಗೂ ಸಂಬಂಧಪಟ್ಟ ದಾಖಲೆಗಳ ಪರಿಶೀಲನೆ ನಡೆಸಿದೆ. ಮೇಲ್ನೋಟಕ್ಕೆ ಸರ್ಕಾರಿ ಜಾಗ ಕಬಳಿಕೆಯಾಗಿರುವುದು ಕಂಡುಬಂದಿದ್ದು, ಇದರ ಪೂರ್ಣ ವರದಿಯನ್ನು ಸದ್ಯದಲ್ಲೇ ಸರ್ಕಾರಕ್ಕೆ ರವಾನಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ದಾಖಲೆಗಳನ್ನು ಕೂಲಂಕಷವಾಗಿ ಪರಿಶೀಲಿಸಿ ಸೂಕ್ತ ಕ್ರಮ

ಈ ಕುರಿತು ಪ್ರತಿಕ್ರಿಯಿಸಿರುವ ಎಡಿಸಿ ಸೈಯಿದಾ ಆಯಿಷಾ ಅವರು, ಸರ್ಕಾರದ ಆಸ್ತಿಗೆ ಧಕ್ಕೆ ಬರಲು ಮತ್ತು ನಷ್ಟವಾಗಲು ಯಾವುದೇ ಕಾರಣಕ್ಕೂ ಬಿಡುವುದಿಲ್ಲ. ಸ್ಥಳದ ನಕ್ಷೆ ಹಾಗೂ ಎಲ್ಲಾ ದಾಖಲೆಗಳನ್ನು ಕೂಲಂಕಷವಾಗಿ ಪರಿಶೀಲಿಸಿ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು. ತನಿಖೆಯಿಂದ ಹೊರಬರುವ ಸತ್ಯಾಸತ್ಯತೆಯ ಆಧಾರದ ಮೇಲೆ ತಪ್ಪಿತಸ್ಥರ ವಿರುದ್ಧ ಕಠಿಣ ಕಾನೂನು ಕ್ರಮ ಜರುಗಿಸಲಾಗುವುದು ಎಂದರು.

Bengaluru: 50 ಕೋಟಿ ಮೌಲ್ಯದ 2 ನಿವೇಶನ ವಶಕ್ಕೆ ಪಡೆದ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ

Kannadaprabha News — Fri, 30 Oct 2026 16:38:53 +0530

₹50 ಕೋಟಿ ಮೌಲ್ಯದ ಸಿಎ ನಿವೇಶನ ವಶ

ಬೆಂಗಳೂರು: ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರವು ಅನಧಿಕೃತ ನಿರ್ಮಾಣಗಳನ್ನು ತೆರವುಗೊಳಿಸುವ ಕಾರ್ಯಾಚರಣೆಯನ್ನು ಮುಂದುವರಿಸಿದ್ದು, ಗುರುವಾರ ಕಾರ್ಯಾಚರಣೆ ನಡೆಸಿ ಅರಕೆರೆ ಗ್ರಾಮದಲ್ಲಿ ಸುಮಾರು ₹50 ಕೋಟಿ ಮೌಲ್ಯದ ನಾಗರಿಕ ಸೌಲಭ್ಯ ನಿವೇಶನಗಳನ್ನು ವಶಪಡಿಸಿಕೊಂಡಿದೆ.

1 ಎಕರೆ 10 ಗುಂಟೆ ವಿಸ್ತೀರ್ಣದ ಸಿ.ಎ.ನಿವೇಶನ

ಬೆಂಗಳೂರು ದಕ್ಷಿಣ ತಾಲೂಕು, ಬೇಗೂರು ಹೋಬಳಿ, ಅರಕೆರೆ ಗ್ರಾಮದಲ್ಲಿನ ಶಾಂತಿನಿಕೇತನ ಖಾಸಗಿ ಬಡಾವಣೆಯಲ್ಲಿನ ಒಟ್ಟು 1 ಎಕರೆ 10 ಗುಂಟೆ ವಿಸ್ತೀರ್ಣದ ಸಿ.ಎ.ನಿವೇಶನಗಳಲ್ಲಿ (2 ನಿವೇಶನಗಳು) ಇದ್ದ ಅನಧಿಕೃತ ನಿರ್ಮಾಣಗಳನ್ನು ತೆರವುಗೊಳಿಸಿ ವಶಕ್ಕೆ ಪಡೆದಿದೆ. ಕಾರ್ಯಾಚರಣೆಯಲ್ಲಿ ಬಿಡಿಎ ಕಾರ್ಯನಿರತ ಪಡೆಯ ಆರಕ್ಷಕ ಅಧೀಕ್ಷಕರು, ವಲಯ ಆಯುಕ್ತರು (ದಕ್ಷಿಣ ವಲಯ), ಅಭಿಯಂತರ ಅಧಿಕಾರಿ-3, ದಕ್ಷಿಣ ವಿಭಾಗದ ಕಾರ್ಯಪಾಲಕ ಅಭಿಯಂತರರು ಸೇರಿದಂತೆ ಇತರರು ಪಾಲ್ಗೊಂಡಿದ್ದರು.

₹16 ಕೋಟಿ ವೆಚ್ಚದಲ್ಲಿ ಜಿಐಎಸ್‌ ಆಧಾರಿತ ಮಾಸ್ಟರ್‌ ಪ್ಲಾನ್‌ ಸಿದ್ಧ

ಬೆಂಗಳೂರು: ಗ್ರೇಟರ್‌ ಬೆಂಗಳೂರು ಸ್ಥಳೀಯ ಯೋಜನಾ ಪ್ರದೇಶಕ್ಕೆ 16.60 ಕೋಟಿ ರು. ವೆಚ್ಚದಲ್ಲಿ ಜಿಐಎಸ್‌ ಆಧಾರಿತ ಮಾಸ್ಟರ್‌ ಪ್ಲಾನ್‌ ಸಿದ್ಧಪಡಿಸಲು ಸಂಪುಟ ಸಭೆ ಅನುಮೋದನೆ ನೀಡಿದೆ. ನಗರ ಪ್ರದೇಶದ ವ್ಯಾಪ್ತಿಗೆ ಸೀಮಿತವಾದಂತೆ ಹಳೆ ನಗರ ಪ್ರದೇಶಗಳ ಪುನರ್‌ ಅಭಿವೃದ್ಧಿ, ನಗರದ ಬೆಳವಣಿಗೆ, ರಸ್ತೆ, ಸಮೂಹ ಸಾರಿಗೆ ಉತ್ತಮಪಡಿಸುವ ಕುರಿತು ವಿಶ್ವಮಟ್ಟದ ಯೋಜನಾ ಸಂಸ್ಥೆಗಳ ಮೂಲಕ ಮಾಸ್ಟರ್‌ ಪ್ಲಾನ್‌ ಸಿದ್ಧಪಡಿಸಲು ತೀರ್ಮಾನಿಸಲಾಗಿದೆ.

ನಗರ ಮೂಲಸೌಕರ್ಯ ನಿರ್ಮಾಣ, ರಸ್ತೆಗಳ ಅಗಲೀಕರಣ, ಸಾರ್ವಜನಿಕ ಸಂಪರ್ಕ ಸುಧಾರಣೆಗೆ ಯೋಜನೆ ರೂಪಿಸಲಾಗಿದೆ. ಡಿಜಿಟಲ್ ನಕ್ಷೆಗಳು ಮತ್ತು ಉಪಗ್ರಹ ಚಿತ್ರಗಳನ್ನು ಬಳಸಿ ಸಿದ್ಧಪಡಿಸುವ ಸಮಗ್ರ ಮಾಸ್ಟರ್ ಪ್ಲಾನ್ ಇದಾಗಿದ್ದು, ಸಾಂಪ್ರದಾಯಿಕ ಮಾಸ್ಟರ್ ಪ್ಲಾನ್‌ಗಳನ್ನು ಕೇವಲ ಕಾಗದದ ನಕ್ಷೆಗಳು ಅಥವಾ ರೇಖಾಚಿತ್ರಗಳ ಮೂಲಕ ತಯಾರಿಸಲಾಗುತ್ತಿತ್ತು.

ನಿಖರವಾದ ಡಿಜಿಟಲ್ ಡೇಟಾ ಸಂಗ್ರಹ

ಜಿಐಎಸ್ ಆಧಾರಿತ ಯೋಜನೆಯಲ್ಲಿ, ಭೂಮಿಯ ಪ್ರತಿ ಇಂಚು ಜಾಗದ ನಿಖರವಾದ ಡಿಜಿಟಲ್ ಡೇಟಾವನ್ನು ಸಂಗ್ರಹಿಸಿ, ಕಂಪ್ಯೂಟರ್ ಸಾಫ್ಟ್‌ವೇರ್ ಮೂಲಕ ವಿಶ್ಲೇಷಿಸಿ ಯೋಜನೆಯನ್ನು ಸಿದ್ಧಪಡಿಸಲಾಗುತ್ತದೆ ಎಂದು ತಿಳಿದುಬಂದಿದೆ.

ಇದನ್ನೂ ಓದಿ: Mumbai: ರಸ್ತೆಯಲ್ಲಿ ಕಸ ಬಿಸಾಕಿದ್ರೆ ಕ್ಯಾಮೆರಾನೇ ಕೂಗಿ ಹೇಳುತ್ತೆ! ಮುಂಬೈನಲ್ಲಿ ಶುರುವಾದ ಈ ಹೈಟೆಕ್ ಟ್ರಿಕ್ ಬೆಂಗಳೂರಿಗೆ ಬರೋದು ಯಾವಾಗ?

ನಟ ದರ್ಶನ್ ಮತ್ತು ವಿಜಯಲಕ್ಷ್ಮಿ ಗೆಲುವು, ಭಂಟನಿಗೆ ಬಿಗ್ ಶಾಕ್, ಧನ್ವೀರ್‌ ಗೆ ಪ್ರತಿಬಂಧಕಾಜ್ಞೆ ಹೊರಡಿಸಿದ ಕೋರ್ಟ್

Gowthami K — Fri, 30 Oct 2026 16:14:27 +0530

ಬೆಂಗಳೂರು: ರೇಣುಕಾಸ್ವಾಮಿ ಪ್ರಕರಣ ಸೇರಿದಂತೆ ತಮ್ಮ ಹಾಗೂ ತಮ್ಮ ಕುಟುಂಬ ಸದಸ್ಯರ ವೈಯಕ್ತಿಕ, ಖಾಸಗಿ, ಹಣಕಾಸು ಮತ್ತು ನಿಭಾಯಿಸುತ್ತಿರುವ ಕಾನೂನು ಸಮಸ್ಯೆಗಳ ಬಗ್ಗೆ ಯಾವುದೇ ಸುಳ್ಳು ಹಾಗೂ ಮಾನಹಾನಿಕಾರ ಹೇಳಿಕೆಗಳನ್ನು ನೀಡದಂತೆ ನಟ ಧನ್ವೀರ್‌ ವಿರುದ್ಧ ಪ್ರತಿಬಂಧಕ ಆದೇಶ ಹೊರಡಿಸಬೇಕು ಎಂದು ಕೋರಿ ದರ್ಶನ್‌ ಹಾಗೂ ಅವರ ಪತ್ನಿ ವಿಜಯಲಕ್ಷ್ಮೀ ಅಕ್ಟೋಬರ್ 29ರಂದು ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ಸೆಷನ್ ಕೋರ್ಟ್ ಶುಕ್ರವಾರ ಆದೇಶ ಹೊರಡಿಸಿದೆ. ವಿಜಯಲಕ್ಷ್ಮಿ ಮತ್ತು ಅವರ ಕುಟುಂಬದ ವಿರುದ್ದ ಯಾವುದೇ ಹೇಳಿಕೆ ನೀಡಬಾರದು ಎಂದು ನಟ ಧನ್ವೀರ್ ವಿರುದ್ಧ ಪ್ರತಿಬಂಧಕಾಜ್ಞೆ ನೀಡಿದೆ. 12ನೇ ಸಿಸಿಹೆಚ್ ಸಿಸಿಹೆಚ್ ಕೋರ್ಟ್ ನಿಂದ ಆದೇಶ ಹೊರಬಿದ್ದಿದ್ದು, ರೇಣುಕಾಸ್ವಾಮಿ ಪ್ರಕರಣದ ಸಂಬಂದವೂ ಯಾವುದೇ ಹೇಳಿಕೆ ನೀಡುವಂತಿಲ್ಲ. ಮಾಧ್ಯಮ ಸೇರಿದಂತೆ ಎಲ್ಲಿಯೂ ವಿವಾದಾತ್ಮಕ ಹೇಳಿಕೆ ನೀಡದಂತೆ ಆದೇಶ ಹೊರಡಿಸಿದೆ. ದರ್ಶನ್ ಪರ ವಕೀಲ ರಂಗನಾಥ್ ರೆಡ್ಡಿ ಅರ್ಜಿ ಸಲ್ಲಿಸಿ ವಾದಿಸಿದ್ದರು.

ದರ್ಶನ್‌ ಮತ್ತು ವಿಜಯಲಕ್ಷ್ಮಿ ಆಕ್ಷೇಪವೇನು?:

ರೇಣುಕಾಸ್ವಾಮಿ ಕೊಲೆ ಪ್ರಕರಣದಲ್ಲಿ ದರ್ಶನ್‌ ಜೈಲಿಗೆ ಹೋದ ನಂತರ ದರ್ಶನ್‌ ಎದುರಿಸುತ್ತಿರುವ ಕಾನೂನು ಸಮಸ್ಯೆಗಳನ್ನು ನಿಭಾಯಿಸಲು ಸಹಾಯ ಮಾಡುತ್ತೇನೆ ಎಂದು ಹೇಳಿದ್ದರು. ಅದನ್ನು ನಂಬಿ ಆರಂಭದಲ್ಲಿ ಧನ್ವೀರ್‌ ಮೇಲೆ ದರ್ಶನ್‌ ದಂಪತಿ ವಿಶ್ವಾಸ ಇಟ್ಟಿದ್ದರು. ಆದರೆ, ವಿಶ್ವಾಸ ಬೆಳೆಸಿಕೊಂಡ ನಂತರ ಧನ್ವೀರ್‌ ತಮ್ಮ ಮಾತುಗಳಿಗೆ ವಿರುದ್ಧವಾಗಿ ನಡೆದುಕೊಂಡಿದ್ದಾರೆ. ವಂಚನೆ ಮತ್ತು ಬೆನ್ನಿಗೆ ಚೂರಿ ಹಾಕಿದ್ದಾರೆ. ಇದರಿಂದ ವಿಜಯಲಕ್ಷ್ಮೀ ಅವರು ದರ್ಶನ್‌ ಎದುರಿಸುತ್ತಿರುವ ಕಾನೂನು ಸಮಸ್ಯೆಗಳನ್ನು ನೋಡಿಕೊಂಡರು ಎಂದು ದಾವೆಯಲ್ಲಿ ವಿವರಿಸಲಾಗಿತ್ತು.

ಧನ್ವೀರ್‌ ಹೇಳಿಕೆ ನೀಡದಂತೆ ತಡೆಹಿಡಿಯಲು ಮನವಿ ಮಾಡಿದ್ದ ದರ್ಶನ್

ನಂತರ 2026ರ ಅ.10 ಅಥವಾ ಆ ದಿನ ಆಸುಪಾಸಿನಲ್ಲಿ ವಿವಿಧ ಸುದ್ದಿವಾಹಿನಿ, ಡಿಜಿಟಲ್‌ ಮಾಧ್ಯಮ ಹಾಗೂ ಸಾಮಾಜಿಕ ಮಾಧ್ಯಮಗಳ ಮೂಲಕ ಧನ್ವೀರ್‌ ಹೇಳಿಕೆ ನೀಡಿ, ದರ್ಶನ್‌ ಅವರನ್ನು ಜೈಲಿನಿಂದ ಹೊರ ಕರೆತರಲು ವಿಜಯಲಕ್ಷ್ಮೀ ಅವರಿಗೆ ಇಷ್ಟವಿಲ್ಲ. ದರ್ಶನ್‌ ಶಾಶ್ವತವಾಗಿ ಜೈಲಿನಲ್ಲಿ ಸೊರಗಬೇಕು ಎಂದು ಬಯಸಿದ್ದಾರೆ. ರೇಣುಕಾಸ್ವಾಮಿ ಕೊಲೆ ಪ್ರಕರಣದಲ್ಲಿ ಮಾಫಿ ಸಾಕ್ಷಿಯಾಗಲು ಪ್ರದೂಷ್‌ ರಾವ್‌ ಅವರನ್ನು ವಿಜಯಲಕ್ಷ್ಮೀ ಮನವೊಲಿಸಿದ್ದಾರೆ ಮತ್ತು ಆತನ ಮೇಲೆ ಪ್ರಭಾವ ಬೀರಿದ್ದಾರೆ ಎಂದು ದ್ವೇಷಪೂರಿತ, ಮಾನಹಾನಿಕಾರಕ, ಆಧಾರರಹಿತ ಮತ್ತು ಸುಳ್ಳು ಹೇಳಿಕೆ ನೀಡಿದ್ದಾರೆ. ಇದು ಆಘಾತ ತರಿಸಿದೆ. ದರ್ಶನ್‌ ಮತ್ತು ಅವರ ಕುಟುಂಬದಲ್ಲಿ ಅವಿಶ್ವಾಸ ಮತ್ತು ಭಿನ್ನಾಭಿಪ್ರಾಯ ಮೂಡಿಸಬೇಕು ಎಂಬ ದುರುದ್ದೇಶದಿಂದಲೇ ಧನ್ವೀರ್‌ ಇಂತಹ ಹೇಳಿಕೆ ನೀಡುತ್ತಿದ್ದಾರೆ. ಇದರಿಂದ ತಮ್ಮ ಮಾನಹಾನಿಯಾಗುತ್ತಿದೆ ಎಂದು ದರ್ಶನ್‌ ಮತ್ತು ವಿಜಯಲಕ್ಷ್ಮೀ ದಾವೆಯಲ್ಲಿ ಆಕ್ಷೇಪಿಸಿದ್ದರು.

ಇದರಿಂದ ಧನ್ವೀರ್‌, ಅವರ ಏಜೆಂಟ್‌, ಪ್ರತಿನಿಧಿಗಳು, ಕೆಲಸಗಾರರು, ಬೆಂಬಲಿಗರು ಅಥವಾ ಅವರ ಮೂಲಕ ಇಲ್ಲವೇ ಅವರ ಅಧೀನದಲ್ಲಿ ಕಾರ್ಯನಿರ್ವಹಿಸುವ ಅಥವಾ ಹಕ್ಕು ಸಾಧಿಸುವ ಯಾವುದೇ ವ್ಯಕ್ತಿಯಾಗಲಿ, ಪತ್ರಿಕೆ, ಟಿವಿ ಅಥವಾ ಸಾಮಾಜಿಕ ಜಾಲತಾಣದಲ್ಲಿ ಮೂಲಕ ತಮ್ಮ ಹಾಗೂ ತಮ್ಮ ವೈಯಕ್ತಿಕ, ಖಾಸಗಿ, ವೈವಾಹಿಕ, ಕುಟುಂಬ ಸದಸ್ಯರು, ಹಣಕಾಸು ಮತ್ತು ಕಾನೂನು ಅಥವಾ ರೇಣುಕಾಸ್ವಾಮಿ ಕೊಲೆ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಯಾವುದೇ ಹೇಳಿಕೆ ನೀಡಬಾರದು. ಆ ಹೇಳಿಕೆಗಳನ್ನು ಪ್ರಸಾರ ಮಾಡಬಾರದು ಹಾಗೂ ಸಂದರ್ಶನ ನೀಡಬಾರದು ಎಂಬುದಾಗಿ ಪ್ರತಿಬಂಧಕ ಆದೇಶ ಮಾಡಬೇಕು ಎಂದು ದರ್ಶನ್‌ ಮತ್ತು ವಿಜಯಲಕ್ಷ್ಮೀ ದಾವೆಯಲ್ಲಿ ಕೋರಿದ್ದರು. ಇದಕ್ಕೆ ಬುಧವಾರ ಅಂದರೆ ಅಕ್ಟೋಬರ್ 30 ರಂದು ಕೋರ್ಟ್ ನಿಷೇಧ ತಂದಿದೆ.

ಬೆಂಗಳೂರಿನಲ್ಲಿ ಬೆಳ್ಳಂಬೆಳಗ್ಗೆ ನಡುಗಿದ ಭೂಮಿ: ನಿಮಗೂ ಭೂಕಂಪ ಅನುಭವ ಆಯ್ತಾ? ತೀವ್ರತೆ ಎಷ್ಟಿದೆ

Sathish Kumar KH — Fri, 23 Oct 2026 15:10:32 +0530

ಬೆಂಗಳೂರು (ಅ.23): ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ವ್ಯಾಪ್ತಿಯಲ್ಲಿ ಶುಕ್ರವಾರ ಬೆಳಿಗ್ಗೆ ಲಘು ಭೂಕಂಪನ ಸಂಭವಿಸಿದ್ದು, ಸ್ಥಳೀಯ ಜನರಲ್ಲಿ ಕೆಲಕಾಲ ಆತಂಕದ ವಾತಾವರಣ ಸೃಷ್ಟಿಯಾಗಿದೆ. ರಿಕ್ಟರ್ ಮಾಪಕದಲ್ಲಿ ಈ ಕಂಪನದ ತೀವ್ರತೆ 3.0 ರಷ್ಟು ದಾಖಲಾಗಿದೆ ಎಂದು ಕರ್ನಾಟಕ ರಾಜ್ಯ ನೈಸರ್ಗಿಕ ವಿಕೋಪ ಉಸ್ತುವಾರಿ ಕೇಂದ್ರ (KSNDMC) ಅಧಿಕೃತವಾಗಿ ದೃಢಪಡಿಸಿದೆ.

ಕಂದಾಯ ಇಲಾಖೆಯ (ವಿಪತ್ತು ನಿರ್ವಹಣೆ) ವ್ಯಾಪ್ತಿಗೆ ಒಳಪಡುವ ಕೆಎಸ್‌ಎನ್‌ಡಿಎಂಸಿ ಜಾಲದ ಸಿಸ್ಮೋಗ್ರಾಫ್‌ನಲ್ಲಿ ಅಕ್ಟೋಬರ್ 23 ರ ಬೆಳಿಗ್ಗೆ ಸರಿಯಾಗಿ 9:01:59 ಗಂಟೆಗೆ ಈ ಭೂಕಂಪನದ ತರಂಗಗಳು ದಾಖಲಾಗಿವೆ.

ಭೂಕಂಪನದ ಕೇಂದ್ರಬಿಂದು ಮತ್ತು ವಿವರಗಳು:

ಕೇಂದ್ರಬಿಂದು (Epicentre): ದೊಡ್ಡಬಳ್ಳಾಪುರ ತಾಲೂಕಿನ ತೂಬಗೆರೆ ಗ್ರಾಮ ಪಂಚಾಯತಿ ವ್ಯಾಪ್ತಿಯ ತಿಮ್ಮೋಜನಹಳ್ಳಿ ಗ್ರಾಮದ ಉತ್ತರಕ್ಕೆ 0.5 ಕಿ.ಮೀ ದೂರದಲ್ಲಿ.

ತೀವ್ರತೆ (Magnitude): ರಿಕ್ಟರ್ ಮಾಪಕದಲ್ಲಿ 3.0

ಆಳ (Depth): ಭೂಮಿಯ ಮೇಲ್ಮೈಯಿಂದ 10 ಕಿ.ಮೀ ಆಳದಲ್ಲಿ

ಸಮಯ: ಬೆಳಿಗ್ಗೆ 9 ಗಂಟೆ 1 ನಿಮಿಷ 59 ಸೆಕೆಂಡ್

ವ್ಯಾಪ್ತಿ: ಭೂಕಂಪನದ ಕೇಂದ್ರಬಿಂದುವಿನಿಂದ ಸುತ್ತಲಿನ ಸುಮಾರು 20 ರಿಂದ 30 ಕಿಲೋಮೀಟರ್ ವ್ಯಾಪ್ತಿಯ ಪ್ರದೇಶದಲ್ಲಿ ಭೂಮಿ ಅದುರಿದ ಅನುಭವವಾಗಿದೆ.

ಸಾರ್ವಜನಿಕರಿಗೆ ಯಾವುದೇ ಅಪಾಯವಿಲ್ಲ: KSNDMC ಸ್ಪಷ್ಟನೆ

ಈ ಕುರಿತು ಮಾಹಿತಿ ನೀಡಿರುವ ನೈಸರ್ಗಿಕ ವಿಕೋಪ ಉಸ್ತುವಾರಿ ಕೇಂದ್ರ, 'ದಾಖಲಾಗಿರುವ ಭೂಕಂಪನದ ತೀವ್ರತೆಯು ಅತ್ಯಂತ ಕಡಿಮೆಯ ಮಟ್ಟದ್ದಾಗಿದೆ (Low Seismic Intensity). ಇದರಿಂದ ಸ್ಥಳೀಯ ಜನವಸತಿ ಪ್ರದೇಶಗಳಿಗೆ, ಕಟ್ಟಡಗಳಿಗೆ ಅಥವಾ ಸಾರ್ವಜನಿಕ ಆಸ್ತಿಪಾಸ್ತಿಗೆ ಯಾವುದೇ ರೀತಿಯ ಹಾನಿಯಾಗುವ ಸಾಧ್ಯತೆಗಳಿಲ್ಲ' ಎಂದು ಸ್ಪಷ್ಟಪಡಿಸಿದೆ.

ಅಲ್ಲದೆ, ಸಾರ್ವಜನಿಕರು ಯಾವುದೇ ರೀತಿಯ ಸುಳ್ಳು ವದಂತಿಗಳನ್ನು ನಂಬದೆ ಶಾಂತರಾಗಿರಬೇಕು ಹಾಗೂ ಅನಗತ್ಯ ಭಯ ಅಥವಾ ಆತಂಕಕ್ಕೆ ಒಳಗಾಗಬಾರದು ಎಂದು ಅಧಿಕಾರಿಗಳು ಸಲಹೆ ನೀಡಿದ್ದಾರೆ.

ದರ್ಶನ್ ಪತ್ನಿ ವಿಜಯಲಕ್ಷ್ಮಿ- ಧನ್ವೀರ್ 10 ಕೋಟಿ ಡೀಲ್ ಗಲಾಟೆ, ಆಕ್ರಮ ಹಣದ ವ್ಯವಹಾರ ED IT ಗೆ ದೂರು

Gowthami K — Tue, 27 Oct 2026 14:55:30 +0530

ಬೆಂಗಳೂರು: ಸ್ಯಾಂಡಲ್‌ವುಡ್ ನಟ ದರ್ಶನ್ ತೂಗುದೀಪ ಅವರ ಪತ್ನಿ ವಿಜಯಲಕ್ಷ್ಮಿ ಮತ್ತು ನಟ ಧನ್ವೀರ್ ಗೌಡ ನಡುವೆ ₹10 ಕೋಟಿ ಹಣದ ವ್ಯವಹಾರದ ವಿವಾದ ತೀವ್ರ ಸ್ವರೂಪ ಪಡೆದುಕೊಂಡಿದೆ. ನಟ ಧನ್ವೀರ್ ಗೌಡ ವಿರುದ್ಧ ಒಂದೆಡೆ ಅಕ್ರಮ ಹಣಕಾಸು ವಹಿವಾಟಿನ ಭಾರಿ ಆರೋಪ ಕೇಳಿಬಂದಿದ್ದರೆ, ಇನ್ನೊಂದೆಡೆ ಸಚಿವ ಜಮೀರ್ ಅಹ್ಮದ್ ಖಾನ್ ಹಾಗೂ ನಟ ಜೈದ್ ಖಾನ್ ವಿರುದ್ಧ ಅವಾಚ್ಯ ಶಬ್ದಗಳಿಂದ ನಿಂದಿಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸ್ ದೂರು ದಾಖಲಾಗಿದೆ.

₹10 ಕೋಟಿ ಅಕ್ರಮ ನಗದು ವಹಿವಾಟು

ನಟ ದರ್ಶನ್ ವಿರುದ್ಧದ ಪ್ರಕರಣದ ಕಾನೂನು ಪ್ರಕ್ರಿಯೆ ಹಾಗೂ ವೆಚ್ಚಗಳಿಗಾಗಿ ನಟ ಧನ್ವೀರ್ ಮತ್ತು ದರ್ಶನ್ ಅವರ ಪತ್ನಿ ವಿಜಯಲಕ್ಷ್ಮಿ ನಡುವೆ ಸುಮಾರು 10 ಕೋಟಿ ರೂಪಾಯಿಗಳ ಅಕ್ರಮ ನಗದು ವ್ಯವಹಾರ ನಡೆದಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ನಟ ದರ್ಶನ್ ಜೈಲಿನಲ್ಲಿರುವ ಹಿನ್ನೆಲೆಯಲ್ಲಿ, ಅವರ ಕಾನೂನು ವೆಚ್ಚಗಳು ಮತ್ತು ಕೋರ್ಟ್ ಕೇಸ್‌ಗಳ ನಿರ್ವಹಣೆಗಾಗಿ ವಿಜಯಲಕ್ಷ್ಮಿ ಅವರು ಧನ್ವೀರ್ ಬಳಿ ₹10 ಕೋಟಿ ರೂಪಾಯಿ ನಗದನ್ನು ಸುರಕ್ಷಿತವಾಗಿ ಇಟ್ಟುಕೊಳ್ಳುವಂತೆ ನೀಡಿದ್ದರು ಎನ್ನಲಾಗಿದೆ.

ಮಾಜಿ ಕಾರ್ಪೊರೇಟರ್ ವೇಲು ನಾಯ್ಕರ್ ಹೇಳಿಕೆ ನೀಡಿರುವ ಪ್ರಕಾರ, ಜೈಲಿನ ಭೇಟಿಯ ಸಮಯದಲ್ಲಿ ನಟ ದರ್ಶನ್ ತನ್ನ ಭಂಟ ಧನ್ವೀರ್‌ಗೆ ಈ ಹಣವನ್ನು ಮರಳಿ ವಿಜಯಲಕ್ಷ್ಮಿಗೆ ಕೊಡು ಎಂದು ಸೂಚಿಸಿದ್ದರು. ಆದರೆ, ಧನ್ವೀರ್ ಈ ಹಣವನ್ನು ಹಿಂದಿರುಗಿಸದೆ ವಿಜಯಲಕ್ಷ್ಮಿ ಕರೆ ಮಾಡಿ ಕೇಳಿದಾಗ ಜಗಳ ಆರಂಭವಾಗಿದೆ ಎಂದು ಆರೋಪಿಸಲಾಗಿದೆ.

ಆದಾಯ ತೆರಿಗೆ ಕಾನೂನು ಏನು?

ಆದಾಯ ತೆರಿಗೆ ಕಾಯ್ದೆಯ ಪ್ರಕಾರ ಯಾವುದೇ ನಗದು ವಹಿವಾಟು ₹2 ಲಕ್ಷಕ್ಕಿಂತ ಹೆಚ್ಚಿರುವುದು ಕಾನೂನುಬಾಹಿರ. ಆದರೆ, ಇಷ್ಟೊಂದು ಬೃಹತ್ ಪ್ರಮಾಣದ ನಗದು ಹಣ ವಿನಿಮಯವಾಗಿರುವುದು ಆರ್ಥಿಕ ಅಪರಾಧಕ್ಕೆ ಸೇರುತ್ತದೆ ಎಂದು ಹೈಕೋರ್ಟ್ ಹಿರಿಯ ವಕೀಲ ಪ್ರಶಾಂತ್ ಮೇತಲ್ ಅವರು ಜಾರಿ ನಿರ್ದೇಶನಾಲಯ ಹಾಗೂ ಆದಾಯ ತೆರಿಗೆ ಇಲಾಖೆಯ ನಿರ್ದೇಶಕರಿಗೆ ದೂರು ನೀಡಿದ್ದಾರೆ.

ದೂರಿನಲ್ಲಿದ್ದ ಪ್ರಮುಖ ಅಂಶಗಳು:

ದೇಶದ ಕಾನೂನು ಸಾಮಾನ್ಯರಿಗೂ ಹಾಗೂ ಶ್ರೀಮಂತರಿಗೂ ಒಂದೇ ಆಗಿರುತ್ತದೆ. 10 ಕೋಟಿ ರೂಪಾಯಿ ನಗದು ಹಣದ ಮೂಲ ಯಾವುದು ಮತ್ತು ಈ ವಹಿವಾಟು ಯಾರ ನಡುವೆ ಹೇಗೆ ನಡೆದಿದೆ ಎಂಬುದರ ಬಗ್ಗೆ ವಿಸ್ತೃತ ತನಿಖೆಯಾಗಬೇಕು. ಈ ಅಕ್ರಮ ಹಣ ವರ್ಗಾವಣೆಯಲ್ಲಿ ಧನ್ವೀರ್ ಹಾಗೂ ವಿಜಯಲಕ್ಷ್ಮಿ ನಡುವೆ ನಡೆದಿದೆ ಎನ್ನಲಾದ ವ್ಯವಹಾರದ ಸತ್ಯಾಸತ್ಯತೆ ಹೊರಬರಬೇಕಾಗಿದೆ.

ಸಚಿವ ಜಮೀರ್ ಮತ್ತು ಜೈದ್ ಖಾನ್ ನಿಂದನೆ ಪ್ರಕರಣ

ಇನ್ನೊಂದೆಡೆ, ಸಚಿವ ಜಮೀರ್ ಅಹ್ಮದ್ ಖಾನ್ ಹಾಗೂ ಅವರ ಪುತ್ರ, ನಟ ಜೈದ್ ಖಾನ್ ವಿರುದ್ಧ ಧನ್ವೀರ್ ಆಡಿಯೋ ಒಂದರಲ್ಲಿ ಅತ್ಯಂತ ಅವಾಚ್ಯ ಪದಗಳಿಂದ ನಿಂದಿಸಿದ್ದಾರೆ ಎನ್ನಲಾದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಚಾಮರಾಜಪೇಟೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.

ಚಾಮರಾಜಪೇಟೆ ಬ್ಲಾಕ್ ಕಾಂಗ್ರೆಸ್ ಸಮಿತಿಯ ಎಂ. ವಿನಾಯಕ್ ಹಾಗೂ ಸಚಿವ ಜಮೀರ್ ಅಹ್ಮದ್ ಖಾನ್ ಅವರ ಅಭಿಮಾನಿಗಳು ಚಾಮರಾಜಪೇಟೆ ಪೊಲೀಸ್ ಠಾಣೆಗೆ ಆಗಮಿಸಿ ಪ್ರತಿಭಟನೆ ನಡೆಸಿದರು. ಧನ್ವೀರ್ ಅವರ ಭಾವಚಿತ್ರಕ್ಕೆ ಚಪ್ಪಲಿ ಹಾರ ಹಾಕಿ, ಮುಖಕ್ಕೆ ಮಸಿ ಬಳಿದು ಆಕ್ರೋಶ ವ್ಯಕ್ತಪಡಿಸಿದ ಪ್ರತಿಭಟನಾಕಾರರು, ಅವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದರು.

ವಿನಾಯಕ್ ನೀಡಿದ ದೂರಿನ ಆಧಾರದ ಮೇಲೆ ಚಾಮರಾಜಪೇಟೆ ಪೊಲೀಸರು ನಟ ಧನ್ವೀರ್ ವಿರುದ್ಧ ಎನ್‌ಸಿಆರ್ ದಾಖಲು ಮಾಡಿಕೊಂಡಿದ್ದಾರೆ. ಇದರೊಂದಿಗೆ ಧನ್ವೀರ್ ವಿರುದ್ಧ ವಿವಿಧ ಪೊಲೀಸ್ ಠಾಣೆಗಳಲ್ಲಿ ಒಟ್ಟು ನಾಲ್ಕು ದೂರುಗಳು ದಾಖಲಾದಂತಾಗಿದೆ.

ಮೆಟ್ರೋ ಪ್ರಯಾಣಿಕರಿಗೆ ರಾಜ್ಯದಲ್ಲೇ ಪ್ರಥಮ ಟ್ರಾವೆಲೇಟರ್, ₹55.48 ಕೋಟಿ ವೆಚ್ಚದಲ್ಲಿ ಹೈಟೆಕ್ ಮೆಟ್ರೋ ಲಿಂಕ್!

Gowthami K — Tue, 20 Oct 2026 13:17:46 +0530

ಬೆಂಗಳೂರಿನ ಸಾರಿಗೆ ಕಾರಿಡಾರ್‌ನ ಪ್ರಮುಖ ಕೇಂದ್ರವಾದ ಸೆಂಟ್ರಲ್ ಸಿಲ್ಕ್ ಬೋರ್ಡ್‌ನಲ್ಲಿ ನಮ್ಮ ಮೆಟ್ರೋ ಪ್ರಯಾಣಿಕರಿಗೆ ಅತ್ಯಾಧುನಿಕ ಸೌಲಭ್ಯವೊಂದು ಸಿಗಲಿದೆ. ಹಳದಿ ಮಾರ್ಗ ಮತ್ತು ನಿರ್ಮಾಣ ಹಂತದಲ್ಲಿರುವ ನೀಲಿ ಮಾರ್ಗದ ನಿಲ್ದಾಣಗಳನ್ನು ಪರಸ್ಪರ ಸಂಪರ್ಕಿಸಲು ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ ನಗರದ ಮೊದಲ 'ಟ್ರಾವೆಲೇಟರ್' ಸ್ಥಾಪಿಸಲು ಮುಂದಾಗಿದೆ. ಆಟೋಮ್ಯಾಟಿಕ್ ನಡಿಗೆ ಮಾರ್ಗ ಹಾಗೂ ಅದರ ಪಕ್ಕದ ಸಾಗಣೆ ಹಾದಿಯ ನಿರ್ಮಾಣಕ್ಕಾಗಿ ಬಿಎಂಆರ್‌ಸಿಎಲ್ ₹55.48 ಕೋಟಿ ಮೌಲ್ಯದ ಗುತ್ತಿಗೆಯನ್ನು 'ಮಿಲನ್ ರೋಡ್ ಬಿಲ್ಡ್‌ಟೆಕ್ ಎಲ್‌ಎಲ್‌ಪಿ' ಸಂಸ್ಥೆಗೆ ವಹಿಸಿದೆ.

ಸಂಕೀರ್ಣ ಸಿಲ್ಕ್ ಬೋರ್ಡ್ ಜಂಕ್ಷನ್‌ಗೆ ಅತ್ಯಾಧುನಿಕ ಪರಿಹಾರ

ಸೆಂಟ್ರಲ್ ಸಿಲ್ಕ್ ಬೋರ್ಡ್ ಜಂಕ್ಷನ್ ಬಳಿ ಹಳದಿ ಮತ್ತು ನೀಲಿ ಮಾರ್ಗದ ನಿಲ್ದಾಣಗಳು ಹೊರ ವರ್ತುಲ ರಸ್ತೆಯ ಎರಡೂ ಬದಿಗಳಲ್ಲಿ ಪ್ರತ್ಯೇಕವಾಗಿ ನೆಲೆಗೊಂಡಿವೆ. ಆರ್‌ವಿ ರಸ್ತೆಯಿಂದ ಬೊಮ್ಮಸಂದ್ರ ನಡುವಿನ ಹಳದಿ ಮಾರ್ಗವು ಈಗಾಗಲೇ ಕಾರ್ಯನಿರ್ವಹಣೆಗೆ ಸಿದ್ಧವಾಗುತ್ತಿದ್ದರೆ, ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುವ ನೀಲಿ ಮಾರ್ಗದ ಕಾಮಗಾರಿ ತೀವ್ರಗತಿಯಲ್ಲಿ ಸಾಗಿದೆ.

ಪ್ರಸ್ತುತ ಯೋಜಿಸಿರುವ 250 ಮೀಟರ್ ಎತ್ತರದ ಸ್ಕೈವಾಕ್ ಇಲ್ಲದಿದ್ದರೆ, ಒಂದು ಮಾರ್ಗದಿಂದ ಇನ್ನೊಂದು ಮಾರ್ಗಕ್ಕೆ ಮೆಟ್ರೋ ಬದಲಾಯಿಸುವ ಪ್ರಯಾಣಿಕರು ನಿಲ್ದಾಣದಿಂದ ಕೆಳಗಿಳಿದು, ಕಷ್ಟಕರವಾದ ರಸ್ತೆ ದಾಟಿ ಮತ್ತೊಂದು ನಿಲ್ದಾಣವನ್ನು ತಲುಪಬೇಕಾಗುತ್ತಿತ್ತು. ಈ ಸಂಚಾರದ ಗೊಂದಲ ಹಾಗೂ ಅಪಾಯವನ್ನು ತಪ್ಪಿಸಲು ಬಿಎಂಆರ್‌ಸಿಎಲ್ ರಸ್ತೆ ಮಟ್ಟಕ್ಕಿಂತ ಎತ್ತರದಲ್ಲಿ ನೇರ ಸಂಪರ್ಕ ನೀಡುವ ಸ್ಕೈವಾಕ್ ಶೈಲಿಯ ಟ್ರಾವೆಲೇಟರ್ ವಿನ್ಯಾಸಗೊಳಿಸಿದೆ.

ವಿಮಾನ ನಿಲ್ದಾಣ ಮಾದರಿಯ ಚಲಿಸುವ ಪ್ಲಾಟ್‌ಫಾರ್ಮ್

ಈ ಯೋಜನೆಗೆ ಅತ್ಯಾಧುನಿಕ 'ಟ್ರಾವೆಲೇಟರ್' ತಂತ್ರಜ್ಞಾನವನ್ನು ಬಳಸಲಾಗುತ್ತಿದೆ. ವಿಮಾನ ನಿಲ್ದಾಣಗಳು, ಬೃಹತ್ ಶಾಪಿಂಗ್ ಮಾಲ್‌ಗಳು ಮತ್ತು ಅಂತರರಾಷ್ಟ್ರೀಯ ರೈಲ್ವೆ ನಿಲ್ದಾಣಗಳಲ್ಲಿ ಸಾಮಾನ್ಯವಾಗಿ ಕಂಡುಬರುವ ಈ ವ್ಯವಸ್ಥೆಯಲ್ಲಿ, ಪ್ರಯಾಣಿಕರು ಚಲಿಸುವ ಪ್ಲಾಟ್‌ಫಾರ್ಮ್‌ ಮೇಲೆ ನಿಂತರೆ ಸಾಕು, ಅದು ಅವರನ್ನು ಒಂದೆಡೆಯಿಂದ ಮತ್ತೊಂದೆಡೆಗೆ ಸುರಕ್ಷಿತವಾಗಿ ಕರೆದೊಯ್ಯುತ್ತದೆ.

ಸಾಮಾನ್ಯವಾಗಿ ನಡೆದಾಡಲು ಬಯಸುವವರಿಗಾಗಿ ಟ್ರಾವೆಲೇಟರ್‌ನ ಪಕ್ಕದಲ್ಲೇ ಅಗಲವಾದ ಪಾದಚಾರಿ ಮಾರ್ಗವನ್ನೂ ರೂಪಿಸಲಾಗುತ್ತಿದೆ. ಎರಡು ನಿಲ್ದಾಣಗಳ ನಡುವಿನ ಅಂತರ ಹೆಚ್ಚಿರುವುದರಿಂದ ಮತ್ತು ನಡುವೆ ಪ್ರಮುಖ ರಸ್ತೆ ಹಾದುಹೋಗುವುದರಿಂದ ಈ ತಂತ್ರಜ್ಞಾನ ಅತ್ಯಗತ್ಯ ಎಂದು ಬಿಎಂಆರ್‌ಸಿಎಲ್ ಮುಖ್ಯ ಸಾರ್ವಜನಿಕ ಸಂಪರ್ಕಾಧಿಕಾರಿ ಯಶವಂತ್ ಚವಾಣ್ ತಿಳಿಸಿದ್ದಾರೆ.

ಬೆಂಗಳೂರಿನ ಇತರೆ ಇಂಟರ್‌ಚೇಂಜ್‌ಗಳಿಗಿಂತ ಸಂಪೂರ್ಣ ಭಿನ್ನ

ಸಿಲ್ಕ್ ಬೋರ್ಡ್‌ನ ಈ ಇಂಟರ್‌ಚೇಂಜ್ ವಿನ್ಯಾಸವು ನಗರದ ಇತರೆ ಪ್ರಮುಖ ಮೆಟ್ರೋ ಇಂಟರ್‌ಚೇಂಜ್‌ಗಳಿಗಿಂತ ವಿಭಿನ್ನವಾಗಿದೆ. ಮೆಜೆಸ್ಟಿಕ್ ನಲ್ಲಿ ನೇರಳೆ ಮತ್ತು ಹಸಿರು ಮಾರ್ಗಗಳು ಒಂದೇ ಭೂಗತ ನಿಲ್ದಾಣದ ವಿಭಿನ್ನ ಹಂತಗಳಲ್ಲಿ ಕಾರ್ಯನಿರ್ವಹಿಸುತ್ತವೆ. ಆರ್‌ವಿ ರಸ್ತೆಯಲ್ಲಿ ಹಸಿರು ಮತ್ತು ಹಳದಿ ಮಾರ್ಗದ ನಿಲ್ದಾಣಗಳು ಒಂದಕ್ಕೊಂದು ಪಕ್ಕದಲ್ಲೇ ನೆಲೆಗೊಂಡಿವೆ. ಎಂ.ಜಿ. ರಸ್ತೆಯಲ್ಲಿ ನೇರಳೆ ಮಾರ್ಗವು ಎತ್ತರಿಸಿದ ಮಾರ್ಗವಾಗಿದ್ದರೆ , ಪಿಂಕ್ ಲೈನ್ ಭೂಗತ ನಿಲ್ದಾಣವಾಗಿ ಸಂಪರ್ಕಗೊಳ್ಳುತ್ತದೆ. ಆದರೆ, ಸಿಲ್ಕ್ ಬೋರ್ಡ್‌ನಲ್ಲಿ ಎರಡು ಪ್ರತ್ಯೇಕ ಎತ್ತರಿಸಿದ ನಿಲ್ದಾಣಗಳ ನಡುವೆ ಬೃಹತ್ ಹೊರ ವರ್ತುಲ ರಸ್ತೆ ಇರುವುದರಿಂದ, ಮೇಲ್ಸೇತುವೆಯ ಮಾದರಿಯಲ್ಲಿ ದೃಶ್ಯ ಸೌಂದರ್ಯವನ್ನೂ ಹೆಚ್ಚಿಸುವಂತಹ ಟ್ರಾವೆಲೇಟರ್ ಸೌಲಭ್ಯ ಹೊಂದಿರುವ ಸ್ಕೈವಾಕ್ ಸಿದ್ಧಗೊಳ್ಳುತ್ತಿದೆ.

ಕಾರ್ಯಾಚರಣೆ ಯಾವಾಗ?

ನೀಲಿ ಮಾರ್ಗದ ನಿಲ್ದಾಣವು ಪ್ರಯಾಣಿಕರ ಸೇವೆಗೆ ಅಧಿಕೃತವಾಗಿ ಮುಕ್ತಗೊಂಡ ತಕ್ಷಣ ಈ ಟ್ರಾವೆಲೇಟರ್ ವ್ಯವಸ್ಥೆಯು ಸಾರ್ವಜನಿಕ ಬಳಕೆಗೆ ಸಿಗಲಿದೆ. ಅಲ್ಲಿಯವರೆಗೆ ಹಳದಿ ಮಾರ್ಗದ ನಿಲ್ದಾಣವು ಸಾಮಾನ್ಯ ರೀತಿಯಲ್ಲೇ ಕಾರ್ಯನಿರ್ವಹಿಸಲಿದ್ದು, ಒಪ್ಪಂದ ಪಡೆದಿರುವ ಮಿಲನ್ ರೋಡ್ ಬಿಲ್ಡ್‌ಟೆಕ್ ಸಂಸ್ಥೆಯು ನಿಗದಿತ ಸಮಯದೊಳಗೆ ನಿರ್ಮಾಣ ಕಾರ್ಯವನ್ನು ಪೂರ್ಣಗೊಳಿಸಲಿದೆ.

ಏನಿದು ಟ್ರಾವೆಲೇಟರ್ ?

ಟ್ರಾವೆಲೇಟರ್ ಎಂದರೆ ಚಲಿಸುವ ಪಾದಚಾರಿ ಮಾರ್ಗ . ಇದು ಸಮತಲವಾಗಿ ಜನರನ್ನು ಒಂದು ಕಡೆಯಿಂದ ಮತ್ತೊಂದು ಕಡೆಗೆ ಕರೆದೊಯ್ಯುವ ಯಾಂತ್ರಿಕ ಪಟ್ಟಿಯಾಗಿದೆ. ಎಸ್ಕಲೇಟರ್‌ನಲ್ಲಿ ಮೆಟ್ಟಿಲುಗಳಿರುತ್ತವೆ ಇದು ಮಹಿಡಿ ಹತ್ತಲು ಸಹಾಯವಾಗುತ್ತದೆ. ಟ್ರಾವೆಲೇಟರ್ ಸಂಪೂರ್ಣವಾಗಿ ಸಾಗುವ ಪಟ್ಟಿಯಂತೆ ನೆಲಕ್ಕೆ ಸಮಾನವಾಗಿರುತ್ತದೆ.ವಿಮಾನ ನಿಲ್ದಾಣಗಳು, ಬೃಹತ್ ರೈಲ್ವೆ ನಿಲ್ದಾಣಗಳು, ಶಾಪಿಂಗ್ ಮಾಲ್‌ಗಳು ಮತ್ತು ಮೆಟ್ರೋ ಇಂಟರ್‌ಚೇಂಜ್ ನಿಲ್ದಾಣಗಳಲ್ಲಿ ಹೆಚ್ಚಿನ ದೂರ ನಡೆಯುವುದನ್ನು ತಪ್ಪಿಸಲು ಇದನ್ನು ಬಳಸಲಾಗುತ್ತದೆ.

ತಮಿಳುನಾಡು ನಿಷೇಧ, ಬೆಂಗಳೂರು ಬ್ಲೂಲೈನ್ ಮೆಟ್ರೋ ಕಾಮಗಾರಿ ಮತ್ತಷ್ಟು ತಡ! ಏರ್‌ಪೋರ್ಟ್ ಸಂಪರ್ಕ ಕಥೆಯೇನು?

Gowthami K — Wed, 28 Oct 2026 11:53:41 +0530

ಬೆಂಗಳೂರು: ಸಿಲಿಕಾನ್ ಸಿಟಿಯ ಬಹುನಿರೀಕ್ಷಿತ ನಮ್ಮ ಮೆಟ್ರೋ ಯೋಜನೆಗಳ ಉದ್ಘಾಟನೆಗೆ ಈಗಾಗಲೇ ಕಾಲಮಿತಿ ಮೀರಿದ್ದು, ಇದೀಗ ಮತ್ತೊಂದು ಹೊಸ ಸಂಕಷ್ಟ ಎದುರಾಗಿದೆ. ತಮಿಳುನಾಡು ಸರ್ಕಾರವು ನೆರೆ ರಾಜ್ಯಗಳಿಗೆ ಕಲ್ಲು, ಜೆಲ್ಲಿ ಹಾಗೂ ಕ್ವಾರಿ ಡಸ್ಟ್ ಸೇರಿದಂತೆ ಪ್ರಮುಖ ನಿರ್ಮಾಣ ಸಾಮಗ್ರಿಗಳ ರಫ್ತನ್ನು ಸಂಪೂರ್ಣವಾಗಿ ನಿಷೇಧಿಸಿದೆ. ಇದರಿಂದಾಗಿ ಬೆಂಗಳೂರಿನ ಬ್ಲೂ ಲೈನ್ ಮೆಟ್ರೋ ಕಾಮಗಾರಿಗೆ ತೀವ್ರ ಹೊಡೆತ ಬಿದ್ದಿದ್ದು, ಮಂದಗತಿಯಲ್ಲಿ ಸಾಗುತ್ತಿದೆ. ಮೂಲಸೌಕರ್ಯ ವಸ್ತುಗಳ ಮುಕ್ಕಾಲು ಭಾಗ ತಮಿಳುನಾಡಿನಿಂದಲೇ ಬರುತ್ತಿತ್ತು.

ಸಿಲ್ಕ್ ಬೋರ್ಡ್‌ to ಬೆಂಗಳೂರು ವಿಮಾನ ನಿಲ್ದಾಣ ಸಂಪರ್ಕ ಕನಸಾಗೇ ಉಳಿಯುತ್ತಾ?

ಸಿಲ್ಕ್ ಬೋರ್ಡ್‌ನಿಂದ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುವ 58 ಕಿಲೋಮೀಟರ್ ಉದ್ದದ ಬ್ಲೂ ಲೈನ್ ಮಾರ್ಗವನ್ನು ನಿರ್ಮಿಸುತ್ತಿರುವ ಗುತ್ತಿಗೆದಾರರು ಕಚ್ಚಾ ಸಾಮಗ್ರಿಗಳ ಅಭಾವದಿಂದ ಪರದಾಡುತ್ತಿದ್ದಾರೆ ಎಂದು ಬೆಂಗಳೂರು ಮೆಟ್ರೋ ರೈಲು ನಿಗಮ ಲಿಮಿಟೆಡ್ (BMRCL) ಹಿರಿಯ ಅಧಿಕಾರಿಯೊಬ್ಬರು ಮಾಹಿತಿ ಬಹಿರಂಗಪಡಿಸುತ್ತಿದ್ದಾರೆ. ಸಿಲ್ಕ್ ಬೋರ್ಡ್‌ನಿಂದ ಕೆ.ಆರ್. ಪುರಂವರೆಗಿನ ಎತ್ತರಿಸಿದ ಮಾರ್ಗದ ಕಾಮಗಾರಿ ಅಂತಿಮ ಹಂತ ತಲುಪಿದ್ದರೂ, ಕೆ.ಆರ್. ಪುರಂನಿಂದ ವಿಮಾನ ನಿಲ್ದಾಣದವರೆಗಿನ ಮಾರ್ಗದ ಕೆಲಸಗಳು ಮಂದಗತಿಯಲ್ಲೇ ಮುಂದುವರೆದಿದೆ.

ಈ ನಿಷೇಧ ಜಾರಿಯಾಗುವ ಮುನ್ನ ಗುತ್ತಿಗೆದಾರರು ಶೇಕಡಾ 30 ರಿಂದ 40 ರಷ್ಟು ಕಲ್ಲು ಮತ್ತು ಜೆಲ್ಲಿ ಸಾಮಗ್ರಿಗಳನ್ನು ತಮಿಳುನಾಡಿನ ಕೃಷ್ಣಗಿರಿ ಜಿಲ್ಲೆಯ ಕ್ರಷರ್‌ಗಳಿಂದ ತರಿಸಿಕೊಳ್ಳುತ್ತಿದ್ದರು. ಪ್ರಸ್ತುತ ಗಣಿ ಧೂಳು, ಪುಡಿಮಾಡಿದ ಕಲ್ಲು ಮತ್ತು ಕಾಂಕ್ರೀಟ್ ಮಿಶ್ರಣ ಸಾಮಗ್ರಿಗಳ ಅಭಾವದಿಂದಾಗಿ ಕಾಂಕ್ರೀಟಿಂಗ್, ಕಂಬಗಳ ವಿನ್ಯಾಸ ಮತ್ತು ಇತರೆ ಪ್ರಮುಖ ಸಿವಿಲ್ ಕೆಲಸಗಳು ಸ್ಥಗಿತಗೊಳ್ಳುವ ಹಂತಕ್ಕೆ ಬಂದು ನಿಂತಿದೆ ಎಂದು ಬಿಎಮ್‌ಆರ್‌ಸಿಎಲ್ ಅಧಿಕಾರಿ ಹೇಳಿದ್ದಾರೆ.

ತಮಿಳುನಾಡು ನಿರ್ಧಾರದಿಂದ ಸಮಸ್ಯೆ ಎಷ್ಟು?

ಸಾಮಗ್ರಿಗಳ ಈ ತೀವ್ರ ಕೊರತೆಯು ಮೆಟ್ರೋ ಡಿಪೋ ನಿರ್ಮಾಣ ಮತ್ತು ಹಳಿಗಳ ಕೆಳಗೆ ಜೋಡಿಸಲಾಗುವ 'ರೈಲ್ವೆ ಬ್ಯಾಲಸ್ಟ್' (ಕಲ್ಲುಗಳು) ಪೂರೈಕೆಯ ಮೇಲೆಯೂ ತೀವ್ರ ಪರಿಣಾಮ ಬೀರಿದೆ. ಪ್ರಸ್ತುತ ಔಟರ್ ರಿಂಗ್ ರೋಡ್ ಪ್ರವೇಶ ಮತ್ತು ನಿರ್ಗಮನ ದ್ವಾರಗಳ ನಿರ್ಮಾಣ, ಟ್ರಾವೆಲೇಟರ್‌ಗಳ ಅಳವಡಿಕೆ ಸೇರಿದಂತೆ ಹಲವು ಪ್ರಮುಖ ಕಾಮಗಾರಿಗಳು ಅರ್ಧಕ್ಕೆ ನಿಂತಿವೆ.

ಹೊರ ವರ್ತುಲ ರಸ್ತೆಯ ಕಾಮಗಾರಿ ಉಸ್ತುವಾರಿ ವಹಿಸಿರುವ ನಿರ್ಮಾಣ ಸಂಸ್ಥೆಯ ಎಂಜಿನಿಯರ್ ಒಬ್ಬರು ಮಾತನಾಡಿ, "ಕಳೆದ ಮೂರು ತಿಂಗಳುಗಳಿಂದ ಈ ರಫ್ತು ನಿಷೇಧದಿಂದಾಗಿ ಕೆಲಸಗಳು ಸಂಪೂರ್ಣ ಅಸ್ತವ್ಯಸ್ತಗೊಂಡಿವೆ. ಹಿಂದೆ ನಾವು ಹೊಸೂರಿನ ಸುಮಾರು 14 ಕ್ವಾರಿ-ಕ್ರಷರ್ ಘಟಕಗಳಿಂದ ಕಚ್ಚಾ ವಸ್ತುಗಳನ್ನು ಸುಲಭವಾಗಿ ತರಿಸಿಕೊಳ್ಳುತ್ತಿದ್ದೆವು. ನಿಷೇಧದ ನಂತರ ಪೂರೈಕೆ ಸ್ಥಗಿತಗೊಂಡಿದ್ದು, ಈಗ ಬಿಡದಿಯಲ್ಲಿರುವ ಕೇವಲ 4-5 ಕ್ರಷರ್‌ಗಳನ್ನು ಮಾತ್ರ ನೆಚ್ಚಿಕೊಳ್ಳಬೇಕಾಗಿದೆ. ಇದರಿಂದಾಗಿ ಈ ಹಿಂದೆ ಪ್ರತಿ ಟನ್‌ಗೆ ₹800 ಇರುತ್ತಿದ್ದ ಕಲ್ಲಿನ ಬೆಲೆ ಈಗ ದ್ವಿಗುಣಗೊಂಡಿದೆ. ಈ ಅನಿರೀಕ್ಷಿತ ಬೆಳವಣಿಗೆ ಮತ್ತು ಬೆಲೆ ಏರಿಕೆಯು ಬೃಹತ್ ಯೋಜನೆ ಕೈಗೆತ್ತಿಕೊಂಡಿರುವ ಗುತ್ತಿಗೆದಾರರಿಗೆ ತೀವ್ರ ಆರ್ಥಿಕ ಸಂಕಷ್ಟ ತಂದಿಟ್ಟಿದೆ ಎಂದಿದ್ದಾರೆ.

ಕರ್ನಾಟಕ ಟ್ರಕ್ ಮಾಲೀಕರು ಮತ್ತು ಏಜೆಂಟ್‌ಗಳ ಸಂಘದ ಅಧ್ಯಕ್ಷ ಜಿ.ಆರ್. ಷಣ್ಮುಗಪ್ಪ ಅವರು ಪ್ರತಿಕ್ರಿಯಿಸಿ, ಈ ನಿರ್ಬಂಧಗಳು ಕೇವಲ ಮೆಟ್ರೋ ಯೋಜನೆಗೆ ಮಾತ್ರವಲ್ಲದೆ ಬೆಂಗಳೂರಿನಾದ್ಯಂತ ನಡೆಯುತ್ತಿರುವ ಅನೇಕ ಬೃಹತ್ ಮೂಲಸೌಕರ್ಯ ಯೋಜನೆಗಳ ಮೇಲೆಯೂ ಪ್ರಭಾವ ಬೀರಿದೆ ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ. ಈ ಹಿಂದೆ ದಿನವೊಂದಕ್ಕೆ ತಮಿಳುನಾಡಿನಿಂದ 40,000 ಟನ್‌ಗೂ ಹೆಚ್ಚು ಕಲ್ಲು ಮತ್ತು ಜೆಲ್ಲಿಗಳು ಬೆಂಗಳೂರಿಗೆ ಬರುತ್ತಿತ್ತು. ಈಗ ನಿಷೇಧದಿಂದಾಗಿ ಪ್ರಸ್ತುತ 600 ರಿಂದ 700 ಟ್ರಕ್ ಮಾಲೀಕರು ಮತ್ತು ಚಾಲಕರು ಜೀವನೋಪಾಯವಿಲ್ಲದೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ ಎಂದು ವಾಸ್ತವ ಸ್ಥಿತಿಯ ಚಿತ್ರಣವನ್ನು ಬಿಚ್ಚಿಟ್ಟಿದ್ದಾರೆ.

ತಮಿಳುನಾಡು ಸರ್ಕಾರ ನಿರ್ಬಂಧ ಹೇರಿರುವುದೇಕೆ?

ತನ್ನ ಸ್ವಂತ ರಾಜ್ಯದ ಆಂತರಿಕ ಅಭಿವೃದ್ಧಿ ಬೇಡಿಕೆ ಹೆಚ್ಚಿರುವುದರಿಂದ ಮತ್ತು ಸ್ಥಳೀಯವಾಗಿ ಸಾಮಗ್ರಿಗಳ ಅಭಾವ ಸೃಷ್ಟಿಯಾಗಿ ಬೆಲೆ ಏರಿಕೆಯಾಗುತ್ತಿರುವುದು ಮತ್ತು ಅನಧಿಕೃತ ಗಣಿಗಾರಿಕೆ ಹಾಗೂ ಅಕ್ರಮ ಕಲ್ಲು ಸಾಗಣೆಗೆಯನ್ನು ತಡೆ ಹಿಡಿಯುವ ಉದ್ದೇಶದಿಂದ ತಮಿಳುನಾಡು ಸರ್ಕಾರ ಈ ಕಟ್ಟುನಿಟ್ಟಿನ ಕ್ರಮ ಜಾರಿ ಮಾಡಿದೆ. ಜುಲೈ 27 ರಂದು ಆರಂಭದಲ್ಲಿ ಮೂರು ತಿಂಗಳ ಅವಧಿಗೆ ಜಾರಿಗೆ ತರಲಾಗಿದ್ದ ಈ ನಿಷೇಧವನ್ನು ಈಗ ಮುಂದುವರೆಸಲಾಗಿದ್ದು, ಬೆಂಗಳೂರಿನ ಪ್ರಮುಖ ಯೋಜನೆಗಳಿಗೆ ಇದು ಸಂಕಷ್ಟ ತಂದಿಟ್ಟಿದೆ. ತಕ್ಷಣವೇ ಈ ಬಗ್ಗೆ ಸರ್ಕಾರ ಚಿತ್ತ ಹರಿಸುವುದು ಮುಖ್ಯವಾಗಿದೆ.