Asianet Suvarna News

ಕಡಿಮೆ ಬೆಲೆ, ಗರಿಷ್ಠ ಮೈಲೇಜ್, ಕೇವಲ 58 ಸಾವಿರ ರೂನಿಂದ ಲಭ್ಯವಿದೆ ಕೈಗೆಟುಕುವ ದರದ ಟಾಪ್ 5 ಬೈಕ್

Chethan Kumar — Fri, 10 Jul 2026 13:34:11 +0530

ಬೆಲೆ ಕಡಿಮೆ ಆದರೆ ಉತ್ತಮ ಮೈಲೇಜ್ ನೀಡಬಲ್ಲ ಬೈಕ್ ಲಭ್ಯವಿದೆ. ನಗರ, ಪಟ್ಟಣ, ಹಳ್ಳಿ ಸೇರಿದಂತೆ ಯಾವುದೇ ರಸ್ತೆಗೂ ಈ ಬೈಕ್ ಸೈ ಎನಿಸಿಕೊಂಡಿದೆ. ಹೀಗೆ ಕೇವಲ 58,000 ರೂ ಬೆಲೆಯಿಂದ ಆರಂಭಗೊಳ್ಳುವ ಟಾಪ್ 5 ಬೈಕ್ ಇಲ್ಲಿದೆ.

ಕರ್ನಾಟಕ ಸೇರಿದಂತೆ ಭಾರತದಲ್ಲಿ ದ್ವಿಚಕ್ರ ವಾಹನ ಅತೀ ದೊಡ್ಡ ಮಾರುಕಟ್ಟೆ. ಇತರ ದೇಶಗಳಿಗೆ ಹೋಲಿಸಿದರೆ ಭಾರತದಲ್ಲಿ ಅತೀ ಹೆಚ್ಚು ದ್ವಿಚಕ್ರ ವಾಹನಗಳ ಮಾರಾಟ ನಡೆಯುತ್ತದೆ. ನಗರ ಪ್ರದೇಶಗಳಲ್ಲಿ ಬಹುತೇಕರೂ ದ್ವಿಚಕ್ರವಾಹನವನ್ನೇ ಅವಲಂಬಿಸಿದ್ದಾರೆ. ಆದರೆ ಸದ್ಯದ ಪೆಟ್ರೋಲ್ ಬೆಲೆ, ನಿರ್ವಹಣೆಗಳ ವೆಚ್ಚದಿಂದ ಬೈಕ್ ಅಥವಾ ಸ್ಕೂಟರ್ ದುಬಾರಿಯಾಗುತ್ತದೆ. ಆದರೆ ಅತೀ ಕಡಿಮೆ ಬೆಲೆಯಲ್ಲಿ ಉತ್ತಮ ಮೈಲೇಜ್ ನೀಡಬಲ್ಲ ಹಲವು ಬೈಕ್‌ಗಳು ಲಭ್ಯವಿದೆ.

ಟಿವಿಎಸ್ ಸ್ಪೋರ್ಟ್ ನೋಡಲು 125 , 150 ಬೈಕ್ ರೀತಿ ಕಾಣುತ್ತದೆ. ವಿಶೇಷ ಅಂದರೆ ಈ ಬೈಕ್ ಬೆಲೆ 58,750 ರೂಪಾಯಿ. ಇನ್ನು ಸೆಲ್ಫ್ ಸ್ಟಾರ್ಟ್ ಬೈಕ್ ಬೆಲೆ 59,950 ರೂಪಾಯಿ (ಎಕ್ಸ್ ಶೋ ರೂಂ). ನಾಲ್ಕು ಬಣ್ಣಗಳಲ್ಲಿ ಈ ಬೈಕ್ ಲಭ್ಯವಿದೆ. 109.7cc ಎಂಜಿನ್ ಹೊಂದಿದೆ. ARAI ಪ್ರಕಾರ ಒಂದು ಲೀಟರ್ ಪೆಟ್ರೋಲ್‌ಗೆ 80 ಕಿಲೋಮೀಟರ್ ಮೈಲೇಜ್ ನೀಡಲಿದೆ.

ಭಾರತದಲ್ಲಿ ಲಭ್ಯವಿರುವ ಬೈಕ್ ಪೈಕಿ ಅತೀ ಕಡಿಮೆ ಬೆಲೆ ಅಂದರೆ ಸ್ಕೂಟರ್ ಬೆಲೆಗಿಂತಲೂ ಕಡಿಮೆ ದರದಲ್ಲಿ ಲಭ್ಯವಿರುವ ಬೈಕ್ ಹೀರೋ HF ಡಿಲಕ್ಸ್. 97.2cc ಎಂಜಿನ್ ಹೊಂದಿರುವ ಈ ಬೈಕ್ ಬೆಲೆ 58,977 ರೂಪಾಯಿಗಳಿಂದ ಆರಂಭಗೊಳ್ಳುತ್ತದೆ. ಗರಿಷ್ಠ ಬೆಲೆ 71,470 ರೂಪಾಯಿ. ಈ ಬೈಕ್ ತೂಕ 110-112kg ಹೊಂದಿದೆ. 1235mm ವ್ಹೀಲ್ ಬೇಸ್ ಹೊಂದಿದೆ. ಒಂದು ಲೀಟರ್ ಪೆಟ್ರೋಲ್‌ಗೆ 70 ಕಿಲೋಮೀಟರ್ ಮೈಲೇಜ್ ನೀಡುತ್ತೆ.

ಬಜಾಜ್ ಪ್ಲಾಟಿನಾ 100 ಬೈಕ್ 99.59cc ಎಂಜಿನ್ ಹೊಂದಿದೆ. ಈ ಬೈಕ್ ಆರಂಭಿಕ ಬೆಲೆ 68 711 ರೂಪಾಯಿ. 7.90hp ಪವರ್ ಹಾಗೂ 8.34Nm ಟಾರ್ಕ್ ಸಾಮರ್ಥ್ಯ ಹೊಂದಿರುವ ಪ್ಲಾಟಿನ 100, ಎಲೆಕ್ಟ್ರಿಕ್ ಸ್ಟಾರ್ಟ್ಸ, ಎಲ್ಇಡಿ ಡಿಆರ್‌ಎಲ್ ಹೊಂದಿದೆ. 200ಎಂಎ ಗ್ರೌಂಡ್ ಕ್ಲಿಯರೆನ್ಸ್ ಹೊಂದಿದೆ. ಬಜಾಜ್ ಪ್ಲಾಟಿನಾ 100 ಒಂದು ಲೀಟರ್ ಪೆಟ್ರೋಲ್‌ಗೆ 70 ಕಿಲೋಮೀಟರ್ ಮೈಲೇಜ್ ನೀಡಲಿದೆ.

ಟಿವಿಎಸ್ ರೆಡಿಯಾನ್ ಬೈಕ್ ಹೀರೋ ಸ್ಪ್ಲೆಂಡರ್ ಬೈಕ್‌ಗೆ ಪ್ರತಿಸ್ಪರ್ಧಿಯಾಗಿ ಬಿಡುಗಡೆಯಾದ ಬೈಕ್. ಇದರ ಬೆಲೆ 73346 ರೂಪಾಯಿಯಿಂದ 82897 ರೂಪಾಯಿ. ಒಂದು ಲೀಟರ್ ಪೆಟ್ರೋಲ್‌ಗೆ 73 ಕಿಲೋಮೀಟರ್ ಮೈಲೇಜ್ ನೀಡಲಿದೆ. ಅತ್ಯಂತ ಆಕರ್ಷಕವಾಗಿ ಕಾಣುವ ಈ ಬೈಕ್ ಹಲವು ಬಣ್ಣಗಳಲ್ಲಿ ಲಭ್ಯವಿದೆ. 109.7cc ಎಂಜಿನ್ ಹೊಂದಿದ್ದು, 18 ಇಂಚಿನ ವ್ಹೀಲ್ ನೀಡಲಾಗಿದೆ. ಇನ್ನು ಯುಎಸ್‌ಬಿ ಚಾರ್ಜಿಂಗ್ ಪೋರ್ಟ್ ಸೇರಿದಂತೆ ಇತರ ಕೆಲ ಫೀಚರ್ಸ್ ಇದರಲ್ಲಿದೆ.

ಟಿವಿಎಸ್ ಕಡಿಮೆ ಬೆಲೆಯಲ್ಲಿ ಹಲವು ಬೈಕ್ ನೀಡುತ್ತಿದೆ. ಈ ಪೈಕಿ ಸ್ಟಾರ್ ಸಿಟಿ ಪ್ಲಸ್ ಕೂಡ ಒಂದು. ಇದರ ಬೆಲೆ 72,500 ರೂಪಾಯಿ, ಇನ್ನು ಡಿಸ್ಕ್ ಬ್ರೇಕ್ ಬೈಕ್ ಬೆಲೆ 75,200 ರೂಪಾಯಿ (ಎಕ್ಸ್ ಶೋ ರೂಂ). 109.7cc ಸಿಸಿ ಎಂಜಿನ್ ಹೊಂದಿರುವ ಈ ಬೈಕ್ ಒಂದು ಲೀಟರ್ ಪೆಟ್ರೋಲ್‌ಗೆ 62.71 ಕಿಲೋಮೀಟರ್ ಮೈಲೇಜ್ ನೀಡಲಿದೆ.

ಬೆಂಗಳೂರಿನಲ್ಲಿ ಹೊಸ ಕ್ರಾಂತಿಗೆ ಮುಂದಾದ Yulu, ರಾಜಧಾನಿಯಲ್ಲಿ ಫ್ಲೀಟ್ ಹೆಚ್ಚಿಸಲು ಮುಂದಾದ ಎಲೆಕ್ಟ್ರಿಕ್ ಬೈಕ್!

Gowthami K — Thu, 16 Jul 2026 17:01:41 +0530

ಬೆಂಗಳೂರು: ದೇಶದ ಪ್ರಮುಖ ಎಲೆಕ್ಟ್ರಿಕ್ ಸ್ಕೂಟರ್ ಕಂಪೆನಿಯಾದ (Electric Mobility Platform) 'ಯುಲು' (Yulu), ಇ-ಕಾಮರ್ಸ್ ಮತ್ತು ಕ್ವಿಕ್ ಕಾಮರ್ಸ್ (ತ್ವರಿತ ಡೆಲಿವರಿ ಸೇವೆಗಳು) ವಲಯದಿಂದ ಬರುತ್ತಿರುವ ಭಾರಿ ಬೇಡಿಕೆಯಿಂದಾಗಿ ಅಭೂತಪೂರ್ವ ಪ್ರಗತಿ ಸಾಧಿಸುತ್ತಿದೆ. ಪ್ರಸ್ತುತ ಮಾರುಕಟ್ಟೆಯಲ್ಲಿನ ಬೇಡಿಕೆ ಮತ್ತು ಬೆಳವಣಿಗೆಯನ್ನು ಗಮನದಲ್ಲಿಟ್ಟುಕೊಂಡು, ಕಂಪನಿಯು ಮುಂಬರುವ ಹಣಕಾಸು ವರ್ಷ 2027ರ (FY27) ಅಂತ್ಯದ ವೇಳೆಗೆ ಕೇವಲ ಬೆಂಗಳೂರು ನಗರವೊಂದರಲ್ಲೇ ತನ್ನ ವಾಹನಗಳ ಸಂಖ್ಯೆಯನ್ನು (Fleet Size) 30,000 ದಿಂದ 35,000 ಕ್ಕೆ ವಿಸ್ತರಿಸುವ ಬೃಹತ್ ಗುರಿಯನ್ನು ಹೊಂದಿದೆ.

2 ಬಿಲಿಯನ್ ಕಿಲೋಮೀಟರ್‌ಗಳ ಐತಿಹಾಸಿಕ ಮೈಲಿಗಲ್ಲು

ಯುಲು ಸಂಸ್ಥೆಯು ಇತ್ತೀಚೆಗಷ್ಟೇ ತನ್ನ ಪ್ಲಾಟ್‌ಫಾರ್ಮ್‌ನಲ್ಲಿ ಒಟ್ಟು 2 ಬಿಲಿಯನ್ (200 ಕೋಟಿ) ಸಂಚಿತ ಕಿಲೋಮೀಟರ್‌ಗಳ ಪ್ರಯಾಣವನ್ನು ಪೂರ್ಣಗೊಳಿಸಿ ಹೊಸ ದಾಖಲೆ ಬರೆದಿದೆ. ವಿಶೇಷವೆಂದರೆ, ಇದರಲ್ಲಿ 1 ಬಿಲಿಯನ್ ಕಿಲೋಮೀಟರ್‌ಗಳಷ್ಟು ಪ್ರಯಾಣವು ಕಂಪನಿಯ ಅತಿ ದೊಡ್ಡ ಮಾರುಕಟ್ಟೆಯಾದ ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲೇ ದಾಖಲಾಗಿದೆ. ಪ್ರಸ್ತುತ ದೇಶದ 10 ಪ್ರಮುಖ ನಗರಗಳಲ್ಲಿ ಸುಮಾರು 48,000 ಎಲೆಕ್ಟ್ರಿಕ್ ವಾಹನಗಳನ್ನು ಯುಲು ನಿರ್ವಹಿಸುತ್ತಿದ್ದು, ಈ ಪೈಕಿ 21,000ಕ್ಕೂ ಹೆಚ್ಚು ಬೈಕ್‌ಗಳು ಬೆಂಗಳೂರಿನ ರಸ್ತೆಗಳಲ್ಲಿ ಸಂಚರಿಸುತ್ತಿವೆ.

13 ತಿಂಗಳಲ್ಲಿ ಹೊಸ ದಾಖಲೆ

ನಮ್ಮ ಮೊದಲ 1 ಬಿಲಿಯನ್ ಕಿಲೋಮೀಟರ್ ತಲುಪಲು ಸುಮಾರು 6 ವರ್ಷಗಳು ಬೇಕಾದವು. ಆದರೆ, ನಂತರದ 1 ಬಿಲಿಯನ್ ಕಿಲೋಮೀಟರ್‌ಗಳ ಮೈಲಿಗಲ್ಲು ಕೇವಲ 13 ರಿಂದ 14 ತಿಂಗಳುಗಳಲ್ಲಿ ಸಾಧ್ಯವಾಯ್ತು ಎಂದು ಯುಲು ಸಹ-ಸಂಸ್ಥಾಪಕ ಮತ್ತು ಸಿಇಒ ಅಮಿತ್ ಗುಪ್ತಾ ಸಂತಸ ಹಂಚಿಕೊಂಡಿದ್ದಾರೆ.

ಕ್ವಿಕ್ ಕಾಮರ್ಸ್‌ನಿಂದ ಹೆಚ್ಚಿದ ಬೇಡಿಕೆ

ಬ್ಲಿಂಕಿಟ್ (Blinkit), ಸ್ವಿಗ್ಗಿ ಇನ್‌ಸ್ಟಾಮಾರ್ಟ್ (Swiggy Instamart), ಜೆಪ್ಟೊ (Zepto), ಬಿಗ್‌ಬಾಸ್ಕೆಟ್, ಅಮೆಜಾನ್ ಮತ್ತು ಫ್ಲಿಪ್‌ಕಾರ್ಟ್‌ನಂತಹ ಪ್ರಮುಖ ಸಂಸ್ಥೆಗಳ ವಿತರಣಾ ಪಾಲುದಾರರಿಂದ (Delivery Partners) ಯುಲು ಬೈಕ್‌ಗಳಿಗೆ ಭಾರಿ ಬೇಡಿಕೆ ವ್ಯಕ್ತವಾಗುತ್ತಿದೆ. ಗಿಗ್ ಕಾರ್ಮಿಕರಿಗೆ (Gig Workers) ಹೊರೆಯಾಗದಂತೆ ದಿನಕ್ಕೆ ಕೇವಲ ₹220 ರೂಪಾಯಿಗಳ ಅತ್ಯಂತ ಕಡಿಮೆ ಬಾಡಿಗೆ ದರದಲ್ಲಿ ಯುಲು ಇ-ಬೈಕ್‌ಗಳನ್ನು ನೀಡುತ್ತಿದೆ. ಈ ದರದಲ್ಲೇ ಬ್ಯಾಟರಿ ವಿನಿಮಯ (Battery Swapping), ವಾಹನ ನಿರ್ವಹಣೆ (Maintenance), ವಿಮೆ ಮತ್ತು ತಾಂತ್ರಿಕ ಸೇವೆಗಳೂ ಸೇರಿವೆ.

ಮಾರುಕಟ್ಟೆಯಲ್ಲಿ ಇನ್ನೂ ಹೆಚ್ಚಿನ ಬೆಳವಣಿಗೆಗೆ ಅವಕಾಶವಿದೆ ಎಂದು ಅಮಿತ್ ಗುಪ್ತಾ ಅಭಿಪ್ರಾಯಪಟ್ಟಿದ್ದಾರೆ. ಉದಾಹರಣೆಗೆ, ಕೇವಲ ಜೆಪ್ಟೊ ಸಂಸ್ಥೆಯೊಂದರಲ್ಲೇ ದೇಶಾದ್ಯಂತ ಸುಮಾರು 2 ಲಕ್ಷಕ್ಕೂ ಹೆಚ್ಚು ಡೆಲಿವರಿ ಪಾಲುದಾರರಿದ್ದು, ಯುಲು ಕಂಪನಿಗೆ ತನ್ನ ವ್ಯಾಪ್ತಿಯನ್ನು ವಿಸ್ತರಿಸಲು ಅಪಾರ ಅವಕಾಶಗಳಿವೆ. ಸದ್ಯ ಬೆಂಗಳೂರು, ಮುಂಬೈ ಮತ್ತು ಹೈದರಾಬಾದ್ ಪ್ರಮುಖ ಮಾರುಕಟ್ಟೆಗಳಾಗಿದ್ದರೂ, ಈ ಹಣಕಾಸು ವರ್ಷದಲ್ಲಿ ದೆಹಲಿ-ಎನ್‌ಸಿಆರ್ (Delhi-NCR) ವಲಯದಲ್ಲಿ ಅತಿ ವೇಗದ ವಿಸ್ತರಣೆ ನಡೆಯಲಿದೆ.

ಆನ್‌ಲೈನ್ ಗೃಹ-ಸೇವೆಗಳತ್ತ (Home Services) ಯುಲು ಹೆಜ್ಜೆ

ಕೇವಲ ಸರಕುಗಳ ವಿತರಣೆಯಷ್ಟೇ ಅಲ್ಲದೆ, ಯುಲು ಈಗ ಆನ್‌ಲೈನ್ ಗೃಹ-ಸೇವೆಗಳ ವಿಭಾಗಕ್ಕೂ ಲಗ್ಗೆ ಇಟ್ಟಿದೆ. ಅರ್ಬನ್ ಕಂಪನಿ (Urban Company), ಸ್ನ್ಯಾಬಿಟ್ ಮತ್ತು ಪ್ರಾಂಟೊ ಸಂಸ್ಥೆಗಳ ಅಡಿಯಲ್ಲಿ ಕೆಲಸ ಮಾಡುವ 12 ನಗರಗಳ 12,000ಕ್ಕೂ ಹೆಚ್ಚು ಮಹಿಳಾ ಸೇವಾ ವೃತ್ತಿಪರರು ಇಂದು ಯುಲು ಪ್ಲಾಟ್‌ಫಾರ್ಮ್ ಬಳಸುತ್ತಿದ್ದಾರೆ.

ಕಡಿಮೆ ವೇಗದ (Low Speed) ಈ ಎಲೆಕ್ಟ್ರಿಕ್ ವಾಹನಗಳು ಮಹಿಳಾ ವೃತ್ತಿಪರರ ಪ್ರಯಾಣದ ಸಮಯವನ್ನು ಉಳಿಸುತ್ತಿದ್ದು, ಪ್ರತಿದಿನ ಶೇಕಡಾ 25 ರಿಂದ 30 ರಷ್ಟು ಹೆಚ್ಚಿನ ಆರ್ಡರ್‌ಗಳನ್ನು ಪೂರ್ಣಗೊಳಿಸಲು ನೆರವಾಗುತ್ತಿವೆ. ರೆಡ್‌ಸೀರ್ (RedSeer) ಸ್ಟ್ರಾಟಜಿ ಕನ್ಸಲ್ಟೆಂಟ್ಸ್ ವರದಿಯ ಪ್ರಕಾರ, ಭಾರತದ ಆನ್‌ಲೈನ್ ಗೃಹ-ಸೇವೆಗಳ ಮಾರುಕಟ್ಟೆಯು ಶೇ. 18-22ರಷ್ಟು ಪ್ರಗತಿ ಕಾಣುತ್ತಿದ್ದು, 2030ರ ವೇಳೆಗೆ ಸುಮಾರು $1 ಬಿಲಿಯನ್ ಡಾಲರ್ ಮೌಲ್ಯವನ್ನು ತಲುಪುವ ನಿರೀಕ್ಷೆಯಿದೆ.

ಲಾಭದಾಯಕತೆ ಮತ್ತು ಮುಂದಿನ ಹೂಡಿಕೆ ಯೋಜನೆ

ಕಳೆದ ಹಣಕಾಸು ವರ್ಷದ 12 ತಿಂಗಳುಗಳಲ್ಲಿ 11 ತಿಂಗಳು ಯುಲು ಕಂಪನಿಯು ಕಾರ್ಯಾಚರಣೆಯ ಮಟ್ಟದಲ್ಲಿ (EBITDA Profitability) ಲಾಭದಾಯಕತೆಯನ್ನು ಕಾಯ್ದುಕೊಂಡಿದೆ. ಈ ಹಣಕಾಸು ವರ್ಷದಲ್ಲಿ ಆದಾಯವು ಹಲವು ಪಟ್ಟು ಹೆಚ್ಚಾಗಲಿದ್ದು, ಪರೋಕ್ಷ ವೆಚ್ಚಗಳು ನಿಯಂತ್ರಣದಲ್ಲಿ ಇರಲಿವೆ. ಉದ್ಯಮದ ವಿಸ್ತರಣೆಗಾಗಿ ಯುಲು ಈ ವರ್ಷ ಈಕ್ವಿಟಿ, ಸಾಲ ಮತ್ತು ಗುತ್ತಿಗೆ ಹಣಕಾಸಿನ ಮಿಶ್ರಣದ ಮೂಲಕ ಸುಮಾರು $100 ಮಿಲಿಯನ್ ಡಾಲರ್ ಬಂಡವಾಳ ಸಂಗ್ರಹಿಸಲು ಯೋಜಿಸಿದೆ. ಕಂಪನಿಯು ಈಗಾಗಲೇ ಸುಮಾರು $250 ಮಿಲಿಯನ್ ಡಾಲರ್ ಸಾಲ ಸೌಲಭ್ಯಗಳಿಗೆ (Debt Facilities) ಪ್ರವೇಶ ಪಡೆದಿದೆ.

ದೂರದ ಪ್ರಯಾಣದ ಲಾಜಿಸ್ಟಿಕ್ಸ್ ಮತ್ತು ಬೈಕ್-ಟ್ಯಾಕ್ಸಿ ಸೇವೆಗಳಿಗಾಗಿ ಕಂಪನಿಯು ತನ್ನ ಹೆಚ್ಚಿನ ವೇಗದ ಎಲೆಕ್ಟ್ರಿಕ್ ವಾಹನ ಮಾದರಿಯಾದ 'ಯುಲು ಎಕ್ಸ್‌ಪ್ರೆಸ್' (Yulu Express) ಅನ್ನು ಅಭಿವೃದ್ಧಿಪಡಿಸುತ್ತಿದೆ. ಆದಾಗ್ಯೂ, ಹೆಚ್ಚಿನ ಲಾಭದಾಯಕತೆಯ ಗುರಿ ತಲುಪುವವರೆಗೂ ತನ್ನ ವೈಯಕ್ತಿಕ ಮೊಬಿಲಿಟಿ ಸ್ಕೂಟರ್‌ಗಳ (Personal Mobility Scooters) ವಾಣಿಜ್ಯ ಬಿಡುಗಡೆಯನ್ನು ಕಂಪನಿ ಸದ್ಯಕ್ಕೆ ಮುಂದೂಡಿದೆ.

'ಹೊಸ E20 ಕಾರು ನೀಡಿ, ಇಲ್ಲವೇ 21 ಲಕ್ಷ ವಾಪಾಸ್‌ ಮಾಡಿ..' ಗ್ರಾಹಕ ಕೋರ್ಟ್‌ ತೀರ್ಪಿಗೆ ಮಾರುತಿ ಸುಜುಕಿ ಕಂಗಾಲು!

Santosh Naik — Thu, 16 Jul 2026 22:00:59 +0530

ಹೊಸ ಮಾರುತಿ ಗ್ರಾಂಡ್ ವಿಟಾರಾ ಕಾರು ಇ-20 ಇಂಧನದಿಂದ ಪದೇ ಪದೇ ಕೈಕೊಟ್ಟ ಕಾರಣ, ಗ್ರಾಹಕನಿಗೆ ಹೊಸ ಕಾರು ನೀಡಿ ಅಥವಾ ₹20.50 ಲಕ್ಷ ಹಣವನ್ನು ಮರಳಿಸುವಂತೆ ರಾಯ್‌ಪುರ ಗ್ರಾಹಕ ನ್ಯಾಯಾಲಯ ಆದೇಶಿಸಿದೆ.

ಹೊಸದಾಗಿ ಖರೀದಿಸಿದ ಮಾರುತಿ ಸುಜುಕಿ 'ಗ್ರಾಂಡ್ ವಿಟಾರಾ' ಕಾರು ಪದೇ ಪದೇ ಕೈಕೊಟ್ಟ ಹಿನ್ನೆಲೆಯಲ್ಲಿ, ಗ್ರಾಹಕನಿಗೆ ಹೊಸ ಇ-20 (E20) ಇಂಧನ ಸ್ನೇಹಿ ಕಾರು ನೀಡಬೇಕು ಅಥವಾ ಸಂಪೂರ್ಣ ಹಣ ಮರಳಿಸಬೇಕು ಎಂದು ರಾಯ್‌ಪುರ ಗ್ರಾಹಕ ನ್ಯಾಯಾಲಯ ಮಹತ್ವದ ತೀರ್ಪು ನೀಡಿದೆ. ಇ-20 ಇಂಧನ ಬಳಕೆಯಿಂದ ಕಾರು ಕೆಟ್ಟುಹೋದ ಪ್ರಕರಣದಲ್ಲಿ ಗ್ರಾಹಕನಿಗೆ ಇಷ್ಟು ದೊಡ್ಡ ಮೊತ್ತದ ಪರಿಹಾರ ನೀಡಲು ಆದೇಶಿಸಿರುವುದು ದೇಶದಲ್ಲೇ ಇದೇ ಮೊದಲ ಪ್ರಕರಣ ಎನ್ನಲಾಗಿದೆ. ಆದರೆ, ಈ ಆದೇಶದಲ್ಲಿ ಹಲವು ಪ್ರಮುಖ ತಾಂತ್ರಿಕ ಸತ್ಯಗಳನ್ನು ಕಡೆಗಣಿಸಲಾಗಿದೆ ಎಂದು ಆರೋಪಿಸಿರುವ ಮಾರುತಿ ಸುಜುಕಿ ಕಂಪನಿಯು, ಗ್ರಾಹಕ ನ್ಯಾಯಾಲಯದ ಈ ತೀರ್ಪನ್ನು ಮೇಲ್ಮನವಿ ನ್ಯಾಯಾಲಯದಲ್ಲಿ ಪ್ರಶ್ನಿಸಲು ನಿರ್ಧರಿಸಿದೆ.

ರಾಯ್‌ಪುರದ ಜಿಲ್ಲಾ ಗ್ರಾಹಕ ವಿವಾದಗಳ ಪರಿಹಾರ ಆಯೋಗವು ಪ್ರಕರಣದ ವಿಚಾರಣೆ ನಡೆಸಿ ಮಾರುತಿ ಸುಜುಕಿ ಕಂಪನಿಗೆ ಬಿಸಿ ಮುಟ್ಟಿಸಿದೆ. 45 ದಿನಗಳ ಒಳಗೆ ಗ್ರಾಹಕನಿಗೆ ಇ-20 ಇಂಧನಕ್ಕೆ ಸಂಪೂರ್ಣವಾಗಿ ಹೊಂದಿಕೊಳ್ಳುವ ಹೊಸ ಗ್ರಾಂಡ್ ವಿಟಾರಾ ಕಾರನ್ನು ಬದಲಾಯಿಸಿಕೊಡಬೇಕು ಎಂದು ಆದೇಶಿಸಿದೆ. ಒಂದು ವೇಳೆ ಕಾರು ಬದಲಾಯಿಸಿಕೊಡಲು ವಿಫಲವಾದರೆ, ಗ್ರಾಹಕ ಕಾರಿಗೆ ಪಾವತಿಸಿದ್ದ ನೋಂದಣಿ ಹಾಗೂ ವಿಮೆ ಸೇರಿದಂತೆ ಒಟ್ಟು ₹20.50 ಲಕ್ಷ ಹಣವನ್ನು ಸಂಪೂರ್ಣವಾಗಿ ಮರಳಿಸಬೇಕು ಎಂದು ಸ್ಪಷ್ಟಪಡಿಸಿದೆ. ಇದರೊಂದಿಗೆ ಗ್ರಾಹಕ ಅನುಭವಿಸಿದ ಮಾನಸಿಕ ಕಿರುಕುಳಕ್ಕೆ ₹1 ಲಕ್ಷ ಮತ್ತು ಕಾನೂನು ಹೋರಾಟದ ವೆಚ್ಚವಾಗಿ ₹10,000 ಪರಿಹಾರ ನೀಡುವಂತೆಯೂ ಆದೇಶದಲ್ಲಿ ಉಲ್ಲೇಖಿಸಲಾಗಿದೆ.

ರಾಯ್‌ಪುರ ನಿವಾಸಿಯಾದ ವೈದ್ಯ ಡಾ. ಪ್ರೇಮರಾಜ್ ಡೇಬ್ಟಾ ಅವರು ಜೂನ್ 2024 ರಲ್ಲಿ ಮಾರುತಿ ಸುಜುಕಿಯ ಅಧಿಕೃತ ನೆಕ್ಸಾ ಡೀಲರ್‌ಶಿಪ್‌ನಿಂದ 'ಗ್ರಾಂಡ್ ವಿಟಾರಾ ಸ್ಟ್ರಾಂಗ್ ಹೈಬ್ರಿಡ್ ಜೇಟಾ ಪ್ಲಸ್' ಕಾರನ್ನು ಖರೀದಿಸಿದ್ದರು. ಕಾರು ಡಿಸೆಂಬರ್ 2023 ರಲ್ಲಿ ತಯಾರಿಸಲ್ಪಟ್ಟಿದೆ ಎಂದು ಡೀಲರ್‌ಗಳು ಭರವಸೆ ನೀಡಿದ್ದರು. ಆದರೆ ಬಳಿಕ ಆರ್‌ಟಿಒ ಮತ್ತು ಗ್ರಾಹಕ ಆಯೋಗದ ದಾಖಲೆಗಳ ಮೂಲಕ ಈ ಕಾರು ಜನವರಿ 2023 ರಲ್ಲಿ ತಯಾರಾಗಿದ್ದ ಹಳೆಯ ಮಾಡೆಲ್ ಎನ್ನುವುದು ಬಯಲಿಗೆ ಬಂದಿತ್ತು. ಹೊಸ ಇ-20 ಇಂಧನ ನೀತಿ ಜಾರಿಗೆ ಬರುವ ಮುನ್ನ ತಯಾರಾದ ಈ ಕಾರು, ಶೇ.20 ರಷ್ಟು ಎಥನಾಲ್ ಮಿಶ್ರಿತ ಪೆಟ್ರೋಲ್‌ಗೆ ಪೂರಕವಾಗಿರಲಿಲ್ಲ ಎನ್ನಲಾಗಿದೆ.

ಕಾರು ಖರೀದಿಸಿದ ಕೆಲವೇ ತಿಂಗಳುಗಳಲ್ಲಿ (ನವೆಂಬರ್ 2024 ರಲ್ಲಿ) ಇಂಜಿನ್ ಮಾಲ್‌ಫಂಕ್ಷನ್ ಸೂಚನೆ ಡ್ಯಾಶ್‌ಬೋರ್ಡ್‌ನಲ್ಲಿ ಕಾಣಿಸಿಕೊಂಡು ಕಾರು ಹಾದಿ ಮಧ್ಯದಲ್ಲೇ ಆಫ್ ಆಗಲಾರಂಭಿಸಿತು. ಡೀಲರ್‌ಶಿಪ್‌ನವರು ಪೆಟ್ರೋಲ್‌ನಲ್ಲಿ ಕಲಬೆರಕೆ ಇರುವುದೇ ಇದಕ್ಕೆ ಕಾರಣ ಎಂದು ಹೇಳಿ ಇಡೀ ಟ್ಯಾಂಕ್ ಖಾಲಿ ಮಾಡಿ ಹೊಸ ಪೆಟ್ರೋಲ್ ತುಂಬಿಸಿಕೊಟ್ಟಿದ್ದರು. ಆದರೆ ಪೆಟ್ರೋಲ್ ಬಂಕ್ ಮಾಲೀಕರು ತಮ್ಮ ಇಂಧನದಲ್ಲಿ ಯಾವುದೇ ದೋಷವಿಲ್ಲ ಎಂದು ಲಿಖಿತವಾಗಿ ಸ್ಪಷ್ಟಪಡಿಸಿದ್ದರು. ಇದಾದ ಮೇಲೆಯೂ ಕಾರು ಪದೇ ಪದೇ ಕೆಟ್ಟುಹೋಗಿ ಸುಮಾರು ಒಂದು ತಿಂಗಳ ಕಾಲ ವರ್ಕ್‌ಶಾಪ್‌ನಲ್ಲೇ ಧೂಳು ಹಿಡಿಯುವಂತಾಯಿತು.

ಕಾರಿನ ಸಮಸ್ಯೆ ಮುಂದುವರಿದಾಗ ಡೀಲರ್‌ಗಳು ಗ್ರಾಹಕನಿಗೆ ಇಮೇಲ್ ಕಳುಹಿಸಿ, "ಕಲಬೆರಕೆ ಪೆಟ್ರೋಲ್ ಬಳಕೆಯಿಂದ ಇಂಜಿನ್ ಹಾಳಾಗಿದೆ. ಇದನ್ನು ವಾರಂಟಿ ಅಡಿಯಲ್ಲಿ ಉಚಿತವಾಗಿ ಸರಿಪಡಿಸಲು ಬರಲ್ಲ. ಇಂಜಿನ್ ಬದಲಾಯಿಸಲು ₹5.30 ಲಕ್ಷ ವೆಚ್ಚವಾಗುತ್ತದೆ, ಅದನ್ನು ಗ್ರಾಹಕರೇ ಭರಿಸಬೇಕು" ಎಂದು ತಿಳಿಸಿದ್ದರು. ಕಾರು ಕಂಪನಿಯ ಈ ಉದ್ಧಟತನದ ವರ್ತನೆಯಿಂದ ಬೇಸತ್ತ ವೈದ್ಯ ಗ್ರಾಹಕ ನ್ಯಾಯಾಲಯದ ಮೆಟ್ಟಿಲೇರಿದ್ದರು. ವಿಚಾರಣೆ ನಡೆಸಿದ ನ್ಯಾಯಾಲಯವು ಕಂಪನಿಯ ವಾದಗಳನ್ನು ಸಂಪೂರ್ಣವಾಗಿ ತಿರಸ್ಕರಿಸಿ ಗ್ರಾಹಕರ ಪರವಾಗಿ ತೀರ್ಪು ಪ್ರಕಟಿಸಿತು.

ಈಗ ಈ ಆದೇಶವನ್ನು ದೇಶದ ಉನ್ನತ ನ್ಯಾಯಾಲಯದಲ್ಲಿ ಪ್ರಶ್ನಿಸಲು ಮಾರುತಿ ಸುಜುಕಿ ನಿರ್ಧರಿಸಿದೆ. ಗ್ರಾಹಕನಿಗೆ ನೀಡಲಾದ ಕಾರು ಸಂಪೂರ್ಣವಾಗಿ ಇ-20 ಹೊಂದಾಣಿಕೆ (E20 Compliant) ಹೊಂದಿತ್ತು ಮತ್ತು ಈ ಬಗ್ಗೆ ಕಾರಿನ ಯೂಸರ್ ಮ್ಯಾನ್ಯುವಲ್‌ನಲ್ಲೇ ವಿವರಣೆ ನೀಡಲಾಗಿತ್ತು ಎಂದು ಕಂಪನಿ ಸಮರ್ಥಿಸಿಕೊಂಡಿದೆ. ತಾಂತ್ರಿಕ ತಪಾಸಣೆಯ ವೇಳೆ ಇಂಧನದಲ್ಲಿ ಕಲಬೆರಕೆ ದ್ರವ ಇರುವುದು ಪತ್ತೆಯಾಗಿತ್ತು. ನ್ಯಾಯಾಲಯವು ಈ ಪ್ರಮುಖ ವೈಜ್ಞಾನಿಕ ಸಾಕ್ಷ್ಯಗಳನ್ನು ಮತ್ತು ಪ್ರಮುಖ ವಾಸ್ತವಾಂಶಗಳನ್ನು ಆದೇಶದಲ್ಲಿ ಪರಿಗಣಿಸಿಲ್ಲ ಎಂದು ಮಾರುತಿ ಸುಜುಕಿ ಆರೋಪಿಸಿದೆ.

ಕೇವಲ 11 ಸಾವಿರ ರೂಗೆ ಬುಕ್ ಮಾಡಿ ಮಾರುತಿ ಸುಜುಕಿ ಬ್ರೆಜಾ ಫೇಸ್‌ಲಿಫ್ಟ್, ಹೊಸ ಕಾರು ಜುಲೈ 24ಕ್ಕೆ ಲಾಂಚ್

Chethan Kumar — Wed, 15 Jul 2026 12:04:10 +0530

ಭಾರಿ ಕುತೂಹಲ ಕೆರಳಿಸಿರುವ, ಹಲವು ಬದಲಾವಣೆ ಮೂಲಕ ಬಿಡುಗಡೆಯಾಗುತ್ತಿರುವ ಮಾರುತಿ ಸುಜುಕಿ ಬ್ರೆಜಾ ಫೇಸ್‌ಲಿಫ್ಟ್ ಕಾರಿನ ಬುಕಿಂಗ್ ಆರಂಭಗೊಂಡಿದೆ. ಕೇವಲ 11 ಸಾವಿರ ರೂಪಾಯಿಗೆ ಹೊಸ ಕಾರು ಬುಕಿಂಗ್ ಮಾಡಲು ಸಾಧ್ಯ.

ಮಾರುತಿ ಸುಜುಕಿಯ ಅತೀ ಹೆಚ್ಚು ಮಾರಾಟವಾಗಿರುವ ಕಾರುಗಳ ಪೈಕಿ ಬ್ರೆಜಾ ಇದೀಗ ಹೊಸ ಅವತಾರದಲ್ಲಿ ಬಿಡುಗಡೆಯಾಗುತ್ತಿದೆ. ಮಾರುತಿ ಸುಜುಕಿ ಬ್ರೆಜಾ ಫೇಸ್‌ಲಿಫ್ಟ್ ಕಾರು ಇದೇ ಜುಲೈ 24 ರಂದು ಬಿಡುಗಡೆಯಾಗುತ್ತಿದೆ. ಹೊಸ ವಿನ್ಯಾಸ, ಟರ್ಬೋ ಎಂಜಿನ್ ಸೇರಿದಂತೆ ಹಲವು ವಿಶೇಷತೆಗಳು ಈ ಕಾರಿನಲ್ಲಿದೆ. ಜೊತೆಗೆ ಕೈಗೆಟುಕುವ ದರದಲ್ಲಿ ಎಸ್‌‌ಯುವಿ ಕಾರು ಖರೀದಿಗೆ ಸಾಧ್ಯವಿದೆ. ವಿಶೇಷ ಅಂದರೆ ಬಿಡುಗಡೆಗೂ ಮೊದಲು ಇದೀಗ ಬ್ರೆಜಾ ಕಾರಿನ ಬುಕಿಂಗ್ ಆರಂಭಗೊಂಡಿದೆ.

ಮಾರುತಿ ಸುಜುಕಿ ಇದೀಗ ಬ್ರೆಜಾ ಫೇಸ್‌ಲಿಫ್ಟ್ ಕಾರಿನ ಬುಕಿಂಗ್ ಆರಂಭಿಸಿದ್ದು, ಭರ್ಜರು ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಕೇವಲ 11,000 ರೂಪಾಯಿಗೆ ಮಾರುತಿ ಸುಜುಕಿ ಬ್ರೆಜಾ ಫೇಸ್‌ಲಿಫ್ಟ್ ಕಾರು ಬುಕಿಂಗ್ ಮಾಡಿಕೊಳ್ಳಬಹುದು. ಹತ್ತಿರದ ಡೀಲರ್ ಅಥವಾ ಆನ್‌ಲೈನ್ ಮೂಲಕವೂ ಬುಕಿಂಗ್ ಮಾಡಿಕೊಳ್ಳಲು ಅವಕಾಶವಿದೆ.

ಹೊಸ ಬ್ರೆಜಾ ಫೇಸ್‌ಲಿಫ್ಟ್ ಕಾರಿನ ಬುಕಿಂಗ್ ಜೊತೆಗೆ ಟೀಸರ್ ಕೂಡ ಬಿಡುಗಡೆ ಮಾಡಲಾಗಿದೆ. ರಾಯಭಾರಿ ಬಾಲಿವುಡ್ ನಟ ಕಾರ್ತಿಕ್ ಆರ್ಯನ್ ಒಳಗೊಂಡ ಟೀಸರ್‌ಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಇದೇ ವೇಳೆ ಹೊಸ ಅನುಭವ ನಿಮ್ಮನ್ನು ಕಾರು ಖರೀದಿಸುವಂತೆ ಮಾಡಲಿದೆ ಎಂದು ಮಾರುತಿ ಸುಜುಕಿ ಆತ್ಮವಿಶ್ವಾಸದಿಂದ ಹೇಳುತ್ತಿದೆ.

ಮಾರುತಿ ಸುಜುಕಿ ಬ್ರೆಜಾ ಕಾರು ಪ್ರಮುಖವಾಗಿ ವಿನ್ಯಾಸ, ಗ್ರಿಲ್, ಟೈಲ್ ಟೈಲ್, ಡಿಆರ್‌ಎಲ್ ಸೇರಿದಂತೆ ಕೆಲ ಬದಲಾವಣೆ ಮಾಡಲಾಗಿದೆ. ಮುಖ್ಯವಾಗಿ 1.0 ಲೀಟರ್ ಟರ್ಬೋ ಬೂಸ್ಟರ್‌ಜೆಟ್ ಪೆಟ್ರೋಲ್ ಎಂಜಿನ್ ನೀಡಲಾಗಿದೆ. ಇದೇ ಎಂಜಿನ್ ಮಾರುತಿ ಸುಜುಕಿ ಫ್ರಾಂಕ್ಸ್ ಕಾರಿನಲ್ಲೂ ಬಳಸಲಾಗಿದೆ. 100 PS ಪವರ್ ಹಾಗೂ 147.6 Nm ಟಾರ್ಕ್ ಸಾಮರ್ಥ್ಯ ಹೊಂದಿದೆ.

1.0 ಲೀಟರ್ ಎಂಜಿನ್ ಲೋವರ್ ಕೆಚಗರಿಯಲ್ಲಿ ಬರುವ ಕಾರಣ ಬ್ರೆಜಾ ಫೇಸ್‌ಲಿಫ್ಟ್ ಕಾರು ಜಿಎಸ್‌ಟಿ ಯಲ್ಲೂ ಲಾಭವಾಗಲಿದೆ. ಹೀಗಾಗಿ ಕೈಗೆಟುಕುವ ಹಾಗೂ ಆಕರ್ಷಕ ಬೆಲೆಯಲ್ಲಿ ಕಾರು ಬಿಡುಗಡೆಯಾಗಲಿದೆ. ಎಲ್ಲೆಡೆ ಕಾರುಗಳ ಬೆಲೆ ಏರಿಕೆಯಾಗುತ್ತಿರುವ ಹಿನ್ನಲೆಯಲ್ಲಿ ಹೊಸ ಬ್ರೇಜಾ ಬೆಲೆ ಸ್ಪರ್ಧಾತ್ಮಕವಾಗಲಿದೆ. ಜುಲೈ 23ಕ್ಕೆ ಬ್ರೆಜಾ ಕಾರಿನ ಬೆಲೆ ಘೋಷಣೆಯಾಗಲಿದೆ.

ಬ್ರೆಜಾ ಫೇಸ್‌ಲಿಫ್ಟ್ ಕಾರು ಟಾಟಾ ನೆಕ್ಸಾನ್, ಮಹೀಂದ್ರ 3ಎಕ್ಸ್ಒ, ಕಿಯಾ ಸೋನೆಟ್, ಹ್ಯುಂಡೈ ವೆನ್ಯೂ, ಸ್ಕೋಡಾ ಕೈಲಾಕ್ ಸೇರಿದಂತೆ ಸಬ್ ಕಾಂಪಾಕ್ಟ್ ಎಸ್‌ಯುವಿ ಕಾರುಗಳಿಗೆ ಪ್ರತಿಸ್ಪರ್ಧಿಯಾಗಿದೆ. ಇನ್ನು ಬ್ರೆಜಾ ಫೇಸ್‌ಲಿಫ್ಟ್ 1.5 ಲೀಟರ್ ನ್ಯಾಚ್ಯುರಲ್ ಆಸ್ಪೈರ್ಡ್ ಹಾಗೂ ಸಿಎನ್‌ಜಿ ವರ್ಶನ್ ಬ್ರೆಜಾ ಫೇಸ್‌ಲಿಫ್ಟ್ ಕಾರು ಶೀಘ್ರದಲ್ಲೇ ಬಿಡುಗಡೆಯಾಗಲಿದೆ.

ರೆನಾಲ್ಟ್ ಇಂಡಿಯಾ ಜುಲೈ ಧಮಾಕಾ: ಕೈಗರ್, ಟ್ರೈಬರ್ ಮತ್ತು ಕ್ವಿಡ್ ಕಾರ್‌ಗಳ ಮೇಲೆ ಭಾರಿ ₹1.25 ಲಕ್ಷದವರೆಗೆ ಬಂಪರ್ ಡಿಸ್ಕೌಂಟ್!

Santosh Naik — Tue, 14 Jul 2026 22:41:54 +0530

ಬೆಂಗಳೂರು (ಜು.14): ನೀವು ಈ ಜುಲೈ ತಿಂಗಳಿನಲ್ಲಿ ಹೊಸ ಕಾರು ಖರೀದಿಸುವ ಆಲೋಚನೆಯಲ್ಲಿದ್ದೀರಾ? ಹಾಗಿದ್ದರೆ ನಿಮಗೊಂದು ಸಿಹಿ ಸುದ್ದಿ ಇದೆ. ಪ್ರಮುಖ ಕಾರು ತಯಾರಿಕಾ ಸಂಸ್ಥೆಯಾದ ರೆನಾಲ್ಟ್ ಇಂಡಿಯಾ (Renault India) ಜುಲೈ 2026 ರ ತಿಂಗಳಿಗಾಗಿ ತನ್ನ ಆಯ್ದ ಜನಪ್ರಿಯ ಕಾರ್ ಮಾಡೆಲ್‌ಗಳ ಮೇಲೆ ಆಕರ್ಷಕ ಆಫರ್‌ ಪ್ರಕಟಿಸಿದೆ. ಈ ಯೋಜನೆಯಡಿ ಕಂಪನಿಯ ಅತ್ಯಂತ ಜನಪ್ರಿಯ 'ರೆನಾಲ್ಟ್ ಕೈಗರ್' (Kiger) ಕಾರಿನ ಮೇಲೆ ಗ್ರಾಹಕರು ಗರಿಷ್ಠ ಎಂದರೆ ಬರೊಬ್ಬರಿ 1.25 ಲಕ್ಷ ರೂಪಾಯಿಗಳವರೆಗೆ ಒಟ್ಟು ಲಾಭವನ್ನು ಪಡೆಯಬಹುದಾಗಿದೆ. ಹೊಸ ಕಾರು ಖರೀದಿದಾರರಿಗೆ ಇದು ಅತ್ಯುತ್ತಮ ಸುರ್ಣಾವಕಾಶವಾಗಿದೆ.

ಮುಂಬರುವ ಹಬ್ಬದ ಸೀಸನ್‌ಗೂ ಮುನ್ನ ತನ್ನ ಪ್ರಮುಖ ಕಾರ್‌ಗಳ ಮಾರಾಟ ಪ್ರಮಾಣವನ್ನು (Volume) ಹೆಚ್ಚಿಸುವ ಉದ್ದೇಶದಿಂದ ರೆನಾಲ್ಟ್ ಈ ಬಂಪರ್ ಆಫರ್‌ ಪರಿಚಯಿಸಿದೆ. ಈ ವಿಶೇಷ ಕೊಡುಗೆಗಳಲ್ಲಿ ನಗದು ರಿಯಾಯಿತಿ (Cash Discount), ಎಕ್ಸ್‌ಚೇಂಜ್ ಬೋನಸ್, ಸ್ಕ್ರಾಪೇಜ್ ಬೆನಿಫಿಟ್ಸ್ ಮತ್ತು ಲಾಯಲ್ಟಿ ಆಫರ್‌ಗಳು ಸೇರಿವೆ. ಆದರೆ, ಇವು ಆಯಾ ರಾಜ್ಯಗಳು ಮತ್ತು ಡೀಲರ್‌ಶಿಪ್‌ಗಳಲ್ಲಿನ ಸ್ಟಾಕ್ ಲಭ್ಯತೆಗೆ ಅನುಗುಣವಾಗಿ ಬದಲಾಗಬಹುದು.

ಕೈಗರ್ ಮೇಲೆ ಸಿಗಲಿದೆ ಗರಿಷ್ಠ ₹1.25 ಲಕ್ಷದ ಆಫರ್

ರೆನಾಲ್ಟ್‌ನ ಜನಪ್ರಿಯ ಎಸ್‌ಯುವಿ ಮಾದರಿಯಾದ ಕೈಗರ್ (Kiger) ಮೇಲೆ ಈ ತಿಂಗಳು ಅತ್ಯಧಿಕ ಆಫರ್ ನೀಡಲಾಗುತ್ತಿದೆ. ಗ್ರಾಹಕರು ನಗದು ಸವಲತ್ತು, ಎಕ್ಸ್‌ಚೇಂಜ್ ಬೋನಸ್ ಹಾಗೂ ಸ್ಕ್ರಾಪೇಜ್ ಕೊಡುಗೆಗಳ ರೂಪದಲ್ಲಿ ಒಟ್ಟು 1.25 ಲಕ್ಷ ರೂಪಾಯಿಗಳವರೆಗೆ ಉಳಿತಾಯ ಮಾಡಬಹುದು. ಕಡಿಮೆ ವೆಚ್ಚದಲ್ಲಿ ಪ್ರೀಮಿಯಂ ಎಸ್‌ಯುವಿ ಮಾಲೀಕರಾಗಲು ಬಯಸುವವರಿಗೆ ಇದು ಸೂಕ್ತ ಸಮಯವಾಗಿದೆ.

ಟ್ರೈಬರ್ ಮತ್ತು ಕ್ವಿಡ್ ಮೇಲೆ ಎಷ್ಟು ಉಳಿತಾಯ ಮಾಡಬಹುದು?

ರೆನಾಲ್ಟ್‌ನ ಅತ್ಯಂತ ಯಶಸ್ವಿ 7 ಸೀಟರ್ ಕಾರು ಆಗಿರುವ ಟ್ರೈಬರ್ (Triber) ಎಂಪಿವಿ ಮೇಲೆ ಗ್ರಾಹಕರು ಒಟ್ಟು 60,000 ರೂಪಾಯಿಗಳವರೆಗೆ ಪ್ರಯೋಜನಗಳನ್ನು ಪಡೆಯಬಹುದಾಗಿದೆ.

ಮತ್ತೊಂದೆಡೆ, ಬಜೆಟ್ ಹ್ಯಾಚ್‌ಬ್ಯಾಕ್ ಕ್ವಿಡ್ (Kwid) ಕಾರಿನ ಹೊಸ ಮಾಡೆಲ್‌ಗಳ ಮೇಲೆ (2026 MY) 15,000 ರೂಪಾಯಿಗಳವರೆಗೆ ಮತ್ತು ಕಂಪನಿಯ ಬಳಿ ಇರುವ ಹಳೆಯ ಸ್ಟಾಕ್ (Old Stock) ಕ್ವಿಡ್ ಕಾರುಗಳ ಮೇಲೆ ಬರೋಬ್ಬರಿ 30,000 ರೂಪಾಯಿಗಳವರೆಗೆ ನಗದು ರಿಯಾಯಿತಿಯನ್ನು ಘೋಷಿಸಲಾಗಿದೆ.

ಹೊಸ ಡಸ್ಟರ್ ಕಾರಿಗೆ ಯಾವುದೇ ರಿಯಾಯಿತಿ ಇಲ್ಲ

ಗಮನಿಸಬೇಕಾದ ಪ್ರಮುಖ ಅಂಶವೆಂದರೆ, ಕಂಪನಿಯು ಇತ್ತೀಚೆಗಷ್ಟೇ ಮಾರುಕಟ್ಟೆಗೆ ಲಾಂಚ್ ಮಾಡಿರುವ ನ್ಯೂ ಜನರೇಷನ್ 'ರೆನಾಲ್ಟ್ ಡಸ್ಟರ್' (Duster) ಕಾರಿನ ಮೇಲೆ ಯಾವುದೇ ರೀತಿಯ ಅಧಿಕೃತ ರಿಯಾಯಿತಿ ಅಥವಾ ಆಫರ್‌ಗಳನ್ನು ಘೋಷಿಸಿಲ್ಲ.

ಜುಲೈ 31ರ ವರೆಗೆ ಮಾತ್ರ ಸುವರ್ಣಾವಕಾಶ

ರೆನಾಲ್ಟ್ ಇಂಡಿಯಾ ಪ್ರಕಟಿಸಿರುವ ಈ ಆಕರ್ಷಕ ಆಫರ್‌ಗಳು ಕೇವಲ ಜುಲೈ 31, 2026 ರವರೆಗೆ ಮಾತ್ರ ಚಾಲ್ತಿಯಲ್ಲಿರುತ್ತವೆ. ಹೀಗಾಗಿ, ಆಫರ್‌ಗಳ ಸಂಪೂರ್ಣ ವಿವರ ಹಾಗೂ ನಿಖರ ಮಾಹಿತಿ ಪಡೆಯಲು ಗ್ರಾಹಕರು ತಮ್ಮ ಹತ್ತಿರದ ಅಧಿಕೃತ ರೆನಾಲ್ಟ್ ಡೀಲರ್‌ಶಿಪ್‌ಗೆ ಭೇಟಿ ನೀಡಲು ಕೋರಲಾಗಿದೆ. ಹಬ್ಬದ ದಿನಗಳು ಹತ್ತಿರ ಬರುತ್ತಿರುವುದರಿಂದ ಬಜೆಟ್ ಸ್ನೇಹಿ ಎಸ್‌ಯುವಿ, ಎಂಪಿವಿ ಅಥವಾ ಹ್ಯಾಚ್‌ಬ್ಯಾಕ್ ಕಾರುಗಳನ್ನು ಮನೆಗೆ ತರಲು ಇದು ಅತ್ಯಂತ ಸೂಕ್ತ ಹಾಗೂ ಹಣ ಉಳಿಸುವ ಸಮಯವಾಗಿದೆ.

ಪ್ರಮುಖ ಮಾಡೆಲ್‌ಗಳ ಎಕ್ಸ್ ಶೋರೂಮ್ ಬೆಲೆ ವಿವರ

ರೆನಾಲ್ಟ್ ಕ್ವಿಡ್ (Kwid): ₹4.53 ಲಕ್ಷದಿಂದ ₹5.85 ಲಕ್ಷ ರೂಪಾಯಿಗಳು.
ರೆನಾಲ್ಟ್ ಟ್ರೈಬರ್ (Triber): ₹5.81 ಲಕ್ಷದಿಂದ ₹8.69 ಲಕ್ಷ ರೂಪಾಯಿಗಳು.
ರೆನಾಲ್ಟ್ ಕೈಗರ್ (Kiger): ₹5.81 ಲಕ್ಷದಿಂದ ₹10.35 ಲಕ್ಷ ರೂಪಾಯಿಗಳು.
ರೆನಾಲ್ಟ್ ಡಸ್ಟರ್ (Duster): ₹10.49 ಲಕ್ಷದಿಂದ ₹18.69 ಲಕ್ಷ ರೂಪಾಯಿಗಳು.

ಯಮಹಾ ಕ್ರಾಂತಿ, E20 ಯಿಂದ E85 ಎಥೆನಾಲ್‌ನಲ್ಲಿ ಓಡಬಲ್ಲ ಫ್ಲೆಕ್ಸ್ ಫ್ಯೂಯೆಲ್ FZ ಬ್ಲೂ ಬೈಕ್ ಲಾಂಚ್

Chethan Kumar — Fri, 10 Jul 2026 16:19:22 +0530

ಬೆಂಗಳೂರು (ಜು.10) ಪೆಟ್ರೋಲ್ ಆಮದು ಸಮಸ್ಯೆ, ವಿದೇಶಿ ವಿನಿಮಯ ಕೊರತೆಗಳಿಂದ ಭಾರತದಲ್ಲಿ ಎಥೆನಾಲ್ ಇಂಧನ ಭಾರಿ ಸದ್ದು ಮಾಡುತ್ತಿದೆ. ಸರ್ಕಾರ ಎಥೆನಾಲ್ ಇಂಧನಕ್ಕೆ ಹೆಚ್ಚಿನ ಉತ್ತೇಜನ ನೀಡುತ್ತಿದೆ. ಈಗಾಗಲೇ ಹಲವು ಫ್ಲೆಕ್ಸ್ ಫ್ಯೂಯೆಲ್ ವಾಹನಗಳು ಬಿಡುಗಡೆಯಾಗಿದೆ. ಇದೀಗ ಯಮಹಾ ಭಾರತದಲ್ಲಿ ಕ್ರಾಂತಿ ಮಾಡಿದೆ. ಫ್ಲೆಕ್ಸ್ ಫ್ಯೂಯೆಲ್ ಇಂಧನದ ಬೈಕ್ ಬಿಡುಗಡೆ ಮಾಡಿದೆ. ಇ20ಯಿಂದ ಇ85ವರೆಗಿನ ಎಥೆನಾಲ್ ಇಂಧನದಲ್ಲಿ ಚಲಿಸಬಲ್ಲ ಯಮಹಾ FZ ಬ್ಲೂ ಫ್ಲೆಕ್ಸ್ ಬೈಕ್ ಬಿಡುಗಡೆಯಾಗಿದೆ.

ಹೊಸ ಬೈಕ್ ಬೆಲೆ

ಅತ್ಯಾಧುನಿಕ ಫ್ಲೆಕ್ಸ್-ಫ್ಯೂಯಲ್ (Flex-Fuel) ತಂತ್ರಜ್ಞಾನದ ಹೊಸ FZ ಬ್ಲೂ ಫ್ಲೆಕ್ಸ್ ಬೈಕ್ ಭಾರತೀಯ ಮಾರುಕಟ್ಟೆಗೆ ಬಿಡುಗಡೆಯಾಗಿದೆ. ಭಾರತ ಸರ್ಕಾರದ 'ವಿಕ್ಷಿತ್ ಭಾರತ್' ದೂರದೃಷ್ಟಿ ಹಾಗೂ ಪರ್ಯಾಯ ಇಂಧನ ತಂತ್ರಜ್ಞಾನದ ಉತ್ತೇಜನಕ್ಕೆ ಪೂರಕವಾಗಿ ಈ ನೂತನ ಬೈಕ್ ಬಿಡುಗಡೆ ಮಾಡಲಾಗಿದೆ. ನೂತನ ಬೈಕ್ ಬೆಲೆ 1,24,240 ರೂಪಾಯಿ (ಎಕ್ಸ್ ಶೋ ಶೂ ರೂಂ ದೆಹಲಿ )

ನೂತನ FZ ಬ್ಲೂ ಫ್ಲೆಕ್ಸ್ ಬೈಕ್ 149 ಸಿಸಿ, ಏರ್ ಕೂಲ್ಡ್ ಫ್ಯುಯೆಲ್ ಇಂಜೆಕ್ಟ್ ಎಂಜಿನ್ ಹೊಂದಿದೆ. ಈ ಎಂಜಿನ್ ವಿಶೇಷವಾಗಿ ಎಥೆನಾಲ್ ಇಂಧನಕ್ಕೆ ಅನುಗುಣವಾಗಿ ಅಭಿವೃದ್ಧಿ ಮಾಡಲಾಗಿದೆ. ಹೀಗಾಗಿ ಶೇಕಡಾ 20 ರಿಂದ ಶೇಕಡಾ 85ರ ವರೆಗಿನ ಎಥೆನಾಲ್ ಇಂಧನದಲ್ಲಿ ಚಲಿಸುತ್ತದೆ. ಹೀಗಾಗಿ ಯಮಹಾ FZ ಬ್ಲೂ ಫ್ಲೆಕ್ಸ್ ಬೈಕ್ ಪೆಟ್ರೋಲ್ ಮೇಲಿನ ಅವಲಂಬನೆ ಕಡಿಮೆ ಮಾಡಲಿದೆ. ಜೊತೆಗೆ ಪರಿಸರಕ್ಕೂ ಪೂರಕವಾಗಿದ್ದು, ಮಾಲಿನ್ಯಗಳನ್ನು ತಗ್ಗಿಸಲಿದೆ.

ಹೊಚ್ಚ ಹೊಸ ಬೈಕ್ 8.6 kW ಪವರ್ ಮತ್ತು 12.8 Nm ಗರಿಷ್ಠ ಟಾರ್ಕ್ ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ. 5-ಸ್ಪೀಡ್ ಗೇರ್‌ಬಾಕ್ಸ್ ಹೊಂದಿದ್ದು, ಸುಲಭವಾಗಿ ಹಾಗೂ ಸ್ಟೆಡಿ ಹ್ಯಾಂಡ್ಲಿಂಗ್ ನೀಡಲಿದೆ. ಮುಂಭಾಗದಲ್ಲಿ ಟೆಲಿಸ್ಕೋಪಿಕ್ ಸಸ್ಪೆನ್ಷನ್ ಹಾಗೂ ಹಿಂಭಾಗದಲ್ಲಿ ಸ್ವಿಂಗ್‌ಆರ್ಮ್ ಸಸ್ಪೆನ್ಷನ್ ನೀಡಲಾಗಿದೆ. ಸುರಕ್ಷಿತ ಬ್ರೇಕಿಂಗ್‌ಗಾಗಿ ಸಿಂಗಲ್ ಚಾನೆಲ್ ಎಬಿಎಸ್ (ABS) ತಂತ್ರಜ್ಞಾನವನ್ನು ಅಳವಡಿಸಲಾಗಿದೆ. ಈ FZ ಬ್ಲೂ ಫ್ಲೆಕ್ಸ್ ಬೈಕ್ ಆಕರ್ಷಕ ಮೆಟಾಲಿಕ್ ಬ್ಲ್ಯಾಕ್ ಬಣ್ಣದಲ್ಲಿ ಲಭ್ಯವಿದೆ ಕರ್ನಾಟಕ ಸೇರಿದಂತೆ ದೇಶದ ಯಮಹಾ ಬ್ಲೂ ಸ್ಕ್ವೇರ್ ಪ್ರೀಮಿಯಂ ಶೋರೂಂನಲ್ಲಿ ಲಭ್ಯವಿದೆ.

FZ ಜನಪ್ರಿಯ ಬೈಕ್‌ನಿಂದ ಸ್ಪೂರ್ತಿ

ಯಮಹಾ ಬೈಕ್ ಪೈಕಿ FZ ಅತ್ಯಂತ ಜನಪ್ರಿಯ ಹಾಗೂ ಬೇಡಿಕೆಯ ಬೈಕ್. ಇದೇ FZ ಬೈಕ್‌ನಿಂದ ಸ್ಪೂರ್ತಿ ಪಡೆದು FZ ಬ್ಲೂ ಫ್ಲೆಕ್ಸ್ ಬೈಕ್ ಅಭಿವೃದ್ಧಿ ಮಾಡಲಾಗಿದೆ. ಬೋಲ್ಡ್ ಫುಲ್-ಎಲ್ಇಡಿ ಪ್ರೊಜೆಕ್ಟರ್ ಹೆಡ್‌ಲ್ಯಾಂಪ್ ಹಾಗೂ ಇಂಟಿಗ್ರೇಟೆಡ್ ಪೊಸಿಷನ್ ಲ್ಯಾಂಪ್‌ಗಳನ್ನು ಒಳಗೊಂಡಿದೆ. ಬೈಕಿನ ಮಸ್ಕುಲರ್ ಫ್ಯುಯಲ್ ಟ್ಯಾಂಕ್ ಏರೋಡೈನಾಮಿಕ್ ಶೈಲಿಯನ್ನು ಹೊಂದಿದ್ದು, ಫಾಕ್ಸ್ ಏರ್ ವೆಂಟ್‌ಗಳು ಮತ್ತು ಕಾಂಪ್ಯಾಕ್ಟ್ ಎಕ್ಸಾಸ್ಟ್ (ಸೈಲೆನ್ಸರ್) ವ್ಯವಸ್ಥೆಯನ್ನು ನೀಡಲಾಗಿದೆ. ಸವಾರರ ಅತ್ಯುತ್ತಮ ಕಂಫರ್ಟ್‌ಗಾಗಿ ಸಿಂಗಲ್-ಪೀಸ್ ಸೀಟ್ ಮತ್ತು ಸ್ಪೋರ್ಟಿ ಲುಕ್ ನೀಡಲು ಶಾರ್ಪ್ ಎಲ್ಇಡಿ ಟೇಲ್ ಲ್ಯಾಂಪ್‌ಗಳನ್ನು ಬಳಸಲಾಗಿದೆ.

526 ಕಿ.ಮೀ ಮೈಲೇಜ್, ಕೇವಲ 25 ಸಾವಿರ ರೂಗೆ ಬುಕ್ ಮಾಡಿ ಕಿಯಾ ಸೈರೋಸ್ ಎಲೆಕ್ಟ್ರಿಕ್ ಕಾರು

Chethan Kumar — Thu, 16 Jul 2026 14:36:52 +0530

ಕಿಯಾ ಸೈರೋಸ್ ಇದೀಗ ಎಲೆಕ್ಟ್ರಿಕ್ ರೂಪದಲ್ಲಿ ಬಿಡುಗಡಗೆ ಸಜ್ಜಾಗಿದೆ. ಒಂದು ಬಾರಿ ಚಾರ್ಜ್ ಮಾಡಿದರೆ 526 ಕಿಲೋಮೀಟರ್ ಮೈಲೇಜ್ ನೀಡಲಿದೆ. ಈ ಕಾರನ್ನು ಕೇವಲ 25,000 ರೂಗೆ ಬುಕ್ ಮಾಡಬಹುದು.

ಭಾರತದಲ್ಲಿ ಎಲೆಕ್ಟ್ರಿಕ್ ಕಾರು ಮಾರುಕಟ್ಟೆ ವಿಸ್ತರಣೆಗೊಳ್ಳುತ್ತಿದೆ. ಪೈಪೋಟಿ ತೀವ್ರಗೊಳ್ಳುತ್ತಿದೆ. ಇದೀಗ ಕಿಯಾ ತನ್ನ ಸೈರೋಸ್ ಕಾರನ್ನು ಇವಿ ಮಾರುಕಟ್ಟೆಗೆ ಬಿಡುಗಡೆ ಮಾಡುತ್ತಿದೆ. ಭಾರಿ ನಿರೀಕ್ಷೆ ಹುಟ್ಟು ಹಾಕಿರುವ ಕಿಯಾ ಸೈರೋಸ್ ಎಲೆಕ್ಟ್ರಿಕ್ ಕಾರಿನ ಬಿಡುಗಡಗೆ ಕೆಲ ದಿನಗಳಿರುವಾಗಲೇ ಬುಕಿಂಗ್ ಆರಂಭಗೊಂಡಿದೆ.

ಕಿಯಿ ಸೈರೋಸ್ ಎಲೆಕ್ಟ್ರಿಕ್ ಕಾರಿನ ಬುಕಿಂಗ್ ಬೆಲೆ ಕೇವಲ 25,000 ರೂಪಾಯಿ. ಹೊಸ ತಂತ್ರಜ್ಞಾನ ಸೇರಿದಂತೆ ಹಲವು ವಿಶೇಷತೆಗಳು ಈ ಕಾರಿನಲ್ಲಿದೆ. ಇನ್ನು ಕಾರಿನ ಬೆಲೆ ಶೀಘ್ರದಲ್ಲೇ ಬಹಿರಂಗವಾಗಲಿದೆ. ಸದ್ಯ ಬುಕಿಂಗ್‌ಗೆ ಉತ್ತಮ ಪ್ರತಿಕ್ರಿಯೆಗಳು ವ್ಯಕ್ತವಾಗುತ್ತಿದೆ ಎಂದು ಕಿಯಾ ಮೋಟಾರ್ಸ್ ಹೇಳಿದೆ.

ಕಿಯಾ ಸೈರೋಸ್ ಎರಡು ಬ್ಯಾಟರಿ ಪ್ಯಾಕ್ ವೇರಿಯೆಂಟ್‌ನಲ್ಲಿ ಲಭ್ಯವಿದೆ. 51.4 kWh ಬ್ಯಾಟರಿ ಕಾರು ಒಂದು ಬಾರಿ ಚಾರ್ಜ್ ಮಾಡಿದರೆ 526 ಕಿಲೋಮೀಟರ್ ಮೈಲೇಜ್ ನೀಡಲಿದೆ ಎಂದು ARAI ಸರ್ಟಿಫೈಡ್ ಮಾಡಿದೆ. 42 kWh ಬ್ಯಾಟರಿ ಪ್ಯಾಕ್ ಕಾರು ಒಂದು ಬಾರಿ ಚಾರ್ಜ್ ಮಾಡಿದರೆ 443 ಕಿಲೋಮೀಟರ್ ಮೈಲೇಜ್ ನೀಡಲಿದೆ. ಟಾಪ್ ಕಾರು 171 hp ಪವರ್ 255 Nm ಟಾರ್ಕ್ ಹೊಂದಿದೆ.

ಕಿಯಾ ಸೈರೋಸ್ ಕಾರು 7.4 kW ಹಾಗೂ 11 kW AC ಚಾರ್ಚಿಂಗ್ ಆಯ್ಕೆ ಹೊಂದಿದೆ. 100 kW DC ಫಾಸ್ಟ್ ಚಾರ್ಜಿಂಗ್‌ನಲ್ಲಿ ಕಾರು ಶೇಕಡಾ 10 ರಿಂದ 100ರಷ್ಟು ಚಾರ್ಜ್ ಆಗಲು 39 ನಿಮಿಷ ಬೇಕಿದೆ. ಇನ್ನು ನಾರ್ಮಲ್ ಚಾರ್ಜಿಂಗ್‌ನಲ್ಲಿ ಸಂಪೂರ್ಣ ಚಾರ್ಜ್ ಆಗಲು 7 ಗಂಟೆ 15 ನಿಮಿಷ ತೆಗೆದುಕೊಳ್ಳಲಿದೆ.

ಲೆವೆಲ್ 2 ಅಡಾಸ್ ಫೀಚರ್, 6 ಏರ್‌ಬ್ಯಾಗ್, 360 ಡಿಗ್ರಿ ಕ್ಯಾಮೆರಾ, ESC, ಹಿಲ್ ಅಸಿಸ್ಟ್, ಫ್ರಂಟ್ ಪಾರ್ಕಿಂಗ್ ಸೆನ್ಸಾರ್, ಎಲೆಕ್ಟ್ರಾನಿಕ್ ಪಾರ್ಕಿಂಗ್ ಬ್ರೇಕ್ ಸುರಕ್ಷತಾ ಫೀಚರ್ಸ್ ಹೊಂದಿದೆ. ಇನ್ನು ವೆಂಟಿಲೇಟೆಡ್ ರೇರ್ ಸೀಟ್, ಪನೋರಮಿಕ್ ಸನರೂಫ್, ರೇರ್ ಸನ್‌ಶೇಡ್, ಡ್ಯುಯೆಲ್ ಕ್ಯಾಮೆರಾ ಡ್ಯಾಶ್‌ಬೋರ್ಡ್ ಹೊಂದಿದೆ.

17 ಇಂಚಿನ ಅಲೋಯ್ ವ್ಹೀಲ್, 12.3 ಇಂಚಿನ ಇನ್‌ಸ್ಟ್ರುಮೆಂಟ್ ಕ್ಲಸ್ಟರ್, 5.0 ಇಂಚಿನ ಕ್ಲೈಮೇಟ್ ಕಂಟ್ರೋಲ್ ಡಿಸ್‌ಪ್ಲೇ, 12.3 ಇಂಚಿನ ಇನ್ಫೋಟೈನ್ಮೆಂಟ್ ಸ್ಕ್ರೀನ್, ವೈಯರ್‌ವೆಸ್ ಆ್ಯಪಲ್ ಹಾಗೂ ಆ್ಯಂಡ್ರಾಯ್ಡ್ ಕಾರ್ ಪ್ಲೇ, 8 ಹರ್ಮನ್ ಕಾರ್ಡನ್ ಆಡಿಯೋ ಸ್ಪೀಕರ್ ಈ ಕಾರಿನಲ್ಲಿದೆ.

ಕುಟುಂಬದ ಜೊತೆ ನಾಯಿಯ ಆರಾಮದಾಯಕ ಪ್ರಯಾಣಕ್ಕಾಗಿ ಹೊಸ ಕಾರು ಅನಾವರಣ, ಇದು ಡಾಗ್ ಎಡಿಶನ್

Chethan Kumar — Fri, 10 Jul 2026 18:34:59 +0530

ನಾಯಿ, ಬೆಕ್ಕುಗಳನ್ನು ಬಹುತೇಕರು ಹೆಚ್ಚಾಗಿ ಪ್ರೀತಿಸುತ್ತಾರೆ, ಅತೀವ ಆರೈಕೆ ಮಾಡುತ್ತಾರೆ. ಹಲವರು ಮಕ್ಕಳಿಗಿಂತ ಸಾಕು ಪ್ರಾಣಿಗಳೇ ಸಾಕು ಎಂದು ಜೀವನ ಸಾಗಿಸುವವರೂ ಇದ್ದಾರೆ. ಪ್ರವಾಸ ಸಂದರ್ಭ, ತುರ್ತು ಸಂದರ್ಭಗಳಲ್ಲಿ ಪ್ರಯಾಣ ಮಾಡುವಾಗ ಸಾಕು ಪ್ರಾಣಿಗಳನ್ನು ಮನೆಯಲ್ಲೇ ಬಿಟ್ಟು ಹೋಗಲು ಆಗದೆ ತಮ್ಮ ಕಾರಿನಲ್ಲೇ ಕರೆದೊಯ್ಯುತ್ತಾರೆ. ತಮ್ಮ ಕಾರುಗಳಲ್ಲಿ ಹಿಂಬದಿ ಆಸನದಲ್ಲಿ ನಾಯಿ ಅಥವಾ ಬೆಕ್ಕನ್ನು ಇಟ್ಟು ಪ್ರಯಾಣ ಮಾಡುತ್ತಾರೆ. ಈ ಸಾಕು ಪ್ರಾಣಿಗಳನ್ನು ಕಾರಿನಲ್ಲಿ ಕರೆದೊಯ್ಯಲು ಪ್ರತ್ಯೇಕ ಸೀಟಿನ ವ್ಯವಸ್ಥೆಯಾಗಲಿ, ಜಾಗವಾಗಲಿ ಇಲ್ಲ. ಇದೀಗ ಪ್ರಾಣಿ ಪ್ರಿಯರಿಗಾಗಿ ಹೊಸ ಕಾರು ಬಿಡುಗಡೆಯಾಗುತ್ತಿದೆ. ಈ ಕಾರಿನಲ್ಲಿ ಸಾಕು ಪ್ರಾಣಿಗಳಿಗೆ ವಿಶೇಷ ಆಸನದ ವ್ಯವಸ್ಥೆ ಇದೆ. ಪ್ರತ್ಯೇಕ ಜಾಗವಿದೆ. ಇದರಿಂದ ಸಾಕು ಪ್ರಾಣಿಗಳು ಆರಾಮದಾಯಕ ಪ್ರಯಾಣಕ್ಕೆ ನೆರವಾಗಲಿದೆ.

ವಿಶ್ವದ ಪ್ರಸಿದ್ಧ ಆಟೋಮೊಬೈಲ್ ಬ್ರ್ಯಾಂಡ್ ಪೆಜೊ(Peugeot) ನಾಯಿ ಪ್ರಿಯರಿಗಾಗಿ ಪೆಜೋ ಇ-5008 ಡಾಗ್ ಎಡಿಷನ್' (Peugeot E-5008 Dog Edition) ಕಾನ್ಸೆಪ್ಟ್ ಕಾರನ್ನು ಅನಾವರಣ ಮಾಡಿದೆ. ಇದು ಸಾಕು ನಾಯಿಗಳನ್ನು ಕುಟುಂಬದ ಜೊತೆಗೆ ಪ್ರಯಾಣ ಮಾಡಲು ಅನುಕೂಲವಾಗುವಂತೆ ವಿನ್ಯಾಸಗೊಳಿಸುವ ಕಾರು. ಸಾಮಾನ್ಯ ಕಾರುಗಳಲ್ಲಿ ನಾಯಿ ಜೊತೆ ಪ್ರಯಾಣ ಮಾಡುವ ಎದುರಾಗುವ ಸವಾಲುಗಳು, ಅಡಚಡೆಗಳನ್ನು ಮುಖ್ಯವಾಗಿಟ್ಟುಕೊಂಡು ಪರಿಹಾರ ರೂಪವಾಗಿ ಈ ಕಾರು ವಿನ್ಯಾಸ ಮಾಡಲಾಗಿದೆ. ಈ ಕಾರಿನಲ್ಲಿ ಸಾಕು ಪ್ರಾಣಿಗಳಿಗೆ ಹಲವು ಸೌಲಭ್ಯಗಳನ್ನು ಈ ಕಾರು ನೀಡುತ್ತದೆ.

ನಾಯಿಗಳ ಇಷ್ಟದ ಕಲರ್

ಈ ಕಾರಿನಲ್ಲಿ ನಾಯಿಗೆ ಪ್ರತ್ಯೇಕ ಕ್ಯಾಬಿನ್ ನೀಡಲಾಗಿದೆ.ಈ ಕ್ಯಾಬಿನ್ ನಾಯಿಯ ಇಷ್ಟದಂತೆ ಇದೆ. ನಾಯಿಗಳು ಬಣ್ಣಗಳನ್ನು ಗ್ರಹಿಸುವ ಹಾಗೂ ನೋಡುವ ವಿಧಾನ ಮನುಷ್ಯರಿಗಿಂತ ಬೇರೆ. ಅವುಗಳಿಗೆ ಆರಾಮವಾಗುವ, ಯಾವುದೇ ಆತಂಕ ನೀಡದ ಬಣ್ಣಗಳ ಮೂಲಕ ಒಳಾಂಗಣ ವಿನ್ಯಾಸ ಮಾಡಲಾಗಿದೆ. ಈ ಬಣ್ಣಗಳು ನಾಯಿಗೆ ಹೆಚ್ಚು ಸುರಕ್ಷಿತ ಅನುನಭವ ನೀಡಲಿದೆ. ಜೊತೆಗೆ ಈ ಬಣ್ಣ ನಾಯಿಗೆ ಯಾವುದೋ ಹೊಸ ಲೋಕಕ್ಕೆ ಬಂದ ಹಾಗೆ ಅನಿಸದೆ, ಪರಿಚಿತ ವಾತಾವರಣದ ಫೀಲ್ ನೀಡಲಿದೆ.ಕಾರು ಚಲಿಸುವಾಗ ಟರ್ನ್ ಮಾಡುವಾಗ ನಾಯಿ ಜಾರದಂತೆ ಕ್ಯಾಬಿನ್‌ನಲ್ಲಿ ನಾನ್ ಸ್ಲಿಪ್ ಮೆಟಿರಿಯಲ್ ಬಳಸಲಾಗಿದೆ.

ನಾಯಿಗಳ ಕೂದಲು ಹರಡದಂತೆ ವಿಧಾನ

ಈ ಕಾರಿನ ಪ್ರಮುಖ ಆಕರ್ಷಣೆಯೆಂದರೆ ಅದರ ಹಿಂಭಾಗದ ಸೀಟುಗಳು ಅಥವಾ ಲಗೇಜ್ ಜಾಗದಲ್ಲಿ ಅಳವಡಿಸಬಹುದಾದ 'ಮೋಡುಲರ್ ಮ್ಯಾಟ್ರೆಸ್' (Modular Mattress). ಇದು ಕೇವಲ ಸೀಟ್ ಪ್ರೊಟೆಕ್ಟರ್ ಆಗಿ ಮಾತ್ರವಲ್ಲದೆ, ನಾಯಿಗಳ ಮೈಮೇಲಿನ ಕೂದಲುಗಳು ಕಾರಿನ ಇತರೆಡೆ ಹರಡದಂತೆ ಸಂಗ್ರಹಿಸುವ ಹೇರ್ ಕಲೆಕ್ಟರ್ ಆಗಿಯೂ ಕೆಲಸ ಮಾಡುತ್ತದೆ. ಪ್ರಯಾಣ ಮುಗಿದ ನಂತರ ಇದನ್ನು ಸುಲಭವಾಗಿ ಹೊರಗೆ ತೆಗೆದು ನಾಯಿಯ ಬೆಡ್ ಆಗಿ ಮಾರ್ಪಡಿಸಬಹುದು. ಕಾರಿನಲ್ಲಿ ಪ್ರಯಾಣಿಸುವಾಗ ಕಿಟಕಿಯಿಂದ ಹೊರಗೆ ಮುಖ ಹಾಕಿ ಗಾಳಿ ಸವಿಯುವುದು ನಾಯಿಗಳಿಗೆ ಅತ್ಯಂತ ಇಷ್ಟವಾದ ಹವ್ಯಾಸ. ಇದಕ್ಕಾಗಿ ಕಿಟಕಿಯ ಗಾಜಿನ ಬಳಿ ಪ್ರತ್ಯೇಕವಾದ ಸಾಫ್ಟ್ ಹಳದಿ ಬಣ್ಣದ ಕುಶನ್ ಮಾದರಿಯ 'ವಿಂಡೋ ಹೆಡ್‌ರೆಸ್ಟ್' ನೀಡಲಾಗಿದ್ದು, ನಾಯಿಗಳು ಕಿಟಕಿಯ ಹೊರಗೆ ನೋಡುವಾಗ ತಮ್ಮ ತಲೆಯನ್ನು ಅದರ ಮೇಲೆ ಆರಾಮವಾಗಿ ಇಟ್ಟುಕೊಳ್ಳಬಹುದು.

ನಾಯಿ ಮಳೆಯಲ್ಲಿ ನೆನೆದರೂ ಇದೆ ಪರಿಹಾರ

ಕಾರಿನೊಳಗೆ ಇಂಟಿಗ್ರೇಟೆಡ್ ಆಹಾರದ ಪಾತ್ರೆಗಳು, ವೇಸ್ಟ್ ಬ್ಯಾಗ್‌ಗಳು, ಕನೆಕ್ಟೆಡ್ ಹಾರ್ನೆಸ್ ಮತ್ತು ಆಟಿಕೆಗಳನ್ನು ಇಡಲು ಪ್ರತ್ಯೇಕ ಜಾಗವನ್ನು ನೀಡಲಾಗಿದೆ. ವಾಹನದ ಬ್ಯಾಟರಿಯಿಂದಲೇ ಕಾರ್ಯನಿರ್ವಹಿಸುವ (V2L Powered) ಪ್ರೆಶರ್ ಪ್ರೆಸ್ಡ್ 'ಪೆಟ್ ಡ್ರೈಯರ್' (Pet Dryer) ಅನ್ನು ಸಹ ಲಗೇಜ್ ಫ್ಲೋರ್ ಅಡಿಯಲ್ಲಿ ಜೋಡಿಸಲಾಗಿದೆ. ನಾಯಿಗಳು ಮಳೆಯಲ್ಲಿ ಅಥವಾ ನೀರಿನಲ್ಲಿ ನೆನೆದಾಗ ಇದು ಅತ್ಯಂತ ಉಪಯುಕ್ತವಾಗುತ್ತದೆ.

ನ್ಯಾವಿಗೇಷನ್ ಸಿಸ್ಟಮ್ ಕೂಡ ಭಿನ್ನವಾಗಿದ್ದು, ಪ್ರಯಾಣದ ಹಾದಿಯಲ್ಲಿ ನಾಯಿಗಳನ್ನು ವಾಕಿಂಗ್ ಕರೆದೊಯ್ಯಲು ಸೂಕ್ತವಾದ ಪಾರ್ಕ್‌ಗಳು ಮತ್ತು ಆಟದ ಮೈದಾನಗಳಿರುವ ಜಾಗದ ಹತ್ತಿರದಲ್ಲೇ ಇವಿ (EV) ಚಾರ್ಜಿಂಗ್ ಸ್ಟೇಷನ್‌ಗಳನ್ನು ಹುಡುಕಿಕೊಡುತ್ತದೆ. ಕಾರಿನಲ್ಲಿ 'ಡಾಗ್ ಗಾರ್ಡಿಯನ್ ಮೋಡ್' (Dog Guardian Mode) ಸೌಲಭ್ಯವಿದ್ದು, ಮಾಲೀಕರು ಅಲ್ಪ ಸಮಯದವರೆಗೆ ಕಾರನ್ನು ಬಿಟ್ಟು ಹೊರಗೋದಾಗ ಕಾರಿನೊಳಗಿನ ತಾಪಮಾನವನ್ನು ನಾಯಿಗಳಿಗೆ ಪೂರಕವಾಗಿ ಕಾಯ್ದುಕೊಳ್ಳುತ್ತದೆ

ಇವಿ ಸ್ಕೂಟರ್‌ನಲ್ಲಿ 12,111 ಕಿ.ಮೀ. ಕ್ರಮಿಸಿ ಡಬ್ಬಲ್‌ ದಾಖಲೆ ಬರೆದ ಕುಡ್ಲದ ಕುವರ!

Kannadaprabha News — Sat, 11 Jul 2026 08:45:33 +0530

ಮಂಗಳೂರು: ಇವಿ(ಎಲೆಕ್ಟ್ರಿಕ್‌ ವೆಹಿಕಲ್) ಸ್ಕೂಟರ್ ಕೇವಲ ನಗರ ಸಂಚಾರಕ್ಕೆ ಮಾತ್ರ, ಬ್ಯಾಟರಿ ಸಮಸ್ಯೆ ತಪ್ಪುವುದಿಲ್ಲ ಎಂಬ ಭಾವನೆ ಜನಸಾಮಾನ್ಯರಲ್ಲಿದೆ. ಆದರೆ ಈ ಎಲ್ಲ ತಪ್ಪು ಕಲ್ಪನೆಯನ್ನು ಕುಡ್ಲದ ಈ ಕುವರ ಮುರಿದಿದ್ದಾರೆ‌. ‘ಇಂಡಿಯಾ ಬುಕ್ ಆಫ್ ರೆಕಾರ್ಡ್’ ಮಾತ್ರವಲ್ಲ ‘ಏಷ್ಯಾ ಬುಕ್‌ ಆಫ್‌ ರೆಕಾರ್ಡ್‌ನಲ್ಲಿ ದಾಖಲೆ ಬರೆದಿದ್ದಾರೆ.

ಮಂಗಳೂರಿನ ಬಿಜೈ ನಿವಾಸಿ, ಆಟೋಮೊಬೈಲ್ ಜರ್ನಲಿಸ್ಟ್ ಗಿರೀಶ್ ಶೇಟ್ ಈ ಅಪರೂಪದ ದಾಖಲೆ ಮಾಡಿದವರು.

53 ದಿನಗಳ ಇವಿ ಸ್ಕೂಟರ್ ರೈಡ್

ಭಾರತದ 16 ರಾಜ್ಯಗಳನ್ನು ಇವಿ ಸ್ಕೂಟರ್‌ನಲ್ಲೇ ಇವರು ಕ್ರಮಿಸಿದ್ದಾರೆ. ಬೆಂಗಳೂರಿನಿಂದ ಪ್ರಯಾಣ ಆರಂಭಿಸಿದ ಇವರು ಚೆನ್ನೈಗೆ ಹೋಗಿದ್ದಾರೆ. ಅಲ್ಲಿಂದ ಕೋಲ್ಕತ್ತಾ, ಕೋಲ್ಕತ್ತಾ ಟು ಲಕ್ನೋ, ಲಕ್ನೋ ಟು ಹೈದರಾಬಾದ್, ಹೈದರಾಬಾದ್‌ನಿಂದ ದೆಹಲಿ. ಅಲ್ಲಿಂದ ಮತ್ತೆ ಕೋಲ್ಕತ್ತಾ, ಕೋಲ್ಕತ್ತಾದಿಂದ ಅಹಮದಾಬಾದ್, ಅಲ್ಲಿಂದ ಮತ್ತೆ ದೆಹಲಿಗೆ ಹೋಗಿ ತಮ್ಮ 53 ದಿನಗಳ ಇವಿ ಸ್ಕೂಟರ್ ರೈಡ್ ಅನ್ನು ಪೂರೈಸಿದ್ದಾರೆ.

ಏ.12 ರಂದು ಸುಡು ಬೇಸಿಗೆಯಲ್ಲಿ ಪ್ರಯಾಣ ಆರಂಭಿಸಿದ ಅವರು ಜೂ.15 ರಂದು ಸಾಧನೆ ಪೂರೈಸಿದ್ದಾರೆ.

ಏಪ್ರಿಲ್‌ನ ಬಿರುಬಿಸಿಲ 45 ಡಿ.ಸೆ. ಸೆಕೆಯ ಧಗೆಯನ್ನು ತಡೆದುಕೊಳ್ಳಬೇಕಾಯಿತು ಬಿಟ್ಟರೆ, ನನಗೆ ಇವಿ ಸ್ಕೂಟರ್ ಬ್ಯಾಟರಿ ಎಲ್ಲೂ ಕೈಕೊಡಲಿಲ್ಲ. ಒಂದು ಕಡೆ ನಡೆದ ಆ್ಯಕ್ಸಿಡೆಂಟ್ ಸ್ವಲ್ಪ ಹೊತ್ತು ಆಸ್ಪತ್ರೆಗೆ ದಾಖಲಾಗಿದ್ದು ಬಿಟ್ಟರೆ ಇವಿ ಸ್ಕೂಟರ್ ಪ್ರಯಾಣ ತನಗೆ ತ್ರಾಸ ಎನಿಸಲೇ ಇಲ್ಲ ಎಂಬುದು ಗಿರೀಶ್ ಶೇಟ್ ಅನುಭವ.

ಒಂದು ಚಾರ್ಜ್‌ನಲ್ಲಿ 100 ಕಿ.ಮೀ. ಪ್ರಯಾಣ

ಹೀರೋ ವೀಡಾ ವಿಎಕ್ಸ್ 2 ಇವಿ ಸ್ಕೂಟರ್ ಅನ್ನು ಈ ಜರ್ನಿಗೆ ಅವರು ಬಳಸಿಕೊಂಡಿದ್ದಾರೆ. ಇದು ಒಂದು ಚಾರ್ಜ್‌ನಲ್ಲಿ 100 ಕಿ.ಮೀ.ಗೂ ಅಧಿಕ ಓಡುತ್ತಿತ್ತು. ಹಾಗಾಗಿ ಎಲ್ಲಾದರೂ ಚಾರ್ಜಿಂಗ್ ಸೌಲಭ್ಯ ಇರುವಲ್ಲಿ ನಿಲ್ಲಿಸುತ್ತಿದ್ದೆ. ಮೊದಲೇ ಪ್ಲಾನಿಂಗ್ ಮಾಡಿಕೊಂಡು ಫಾಸ್ಟ್‌ಚಾರ್ಜ್ ಇರುವಲ್ಲಿ ಒಂದೂವರೆ ಗಂಟೆಯಲ್ಲಿ ಚಾರ್ಜ್ ಆಗುತ್ತಿತ್ತು, ಇಲ್ಲದ ಕಡೆ ಚಾರ್ಜಿಂಗ್ ಸಮಯದಲ್ಲಿ ವಿಶ್ರಾಂತಿ ತೆಗೆದುಕೊಳ್ಳುತ್ತಿದ್ದೆ ಎನ್ನುತ್ತಾರೆ ಗಿರೀಶ್ ಶೇಟ್.

ಇದನ್ನೂ ಓದಿ: ಪೆಟ್ರೋಲ್‌ನಲ್ಲಿ ಎಥೆನಾಲ್‌ ಮಿಶ್ರಣ ಏಕೆ ಅಗತ್ಯ? ಕೇಂದ್ರದಿಂದ 6 ಅಂಶಗಳ ಸ್ಪಷ್ಟನೆ

ಕ್ರಿಕೆಟ್ ಪ್ರೇಮಿ ಗಿರೀಶ್ ಶೇಟ್, ಐಪಿಎಲ್‌ನ ಕೋಲ್ಕತ್ತಾ ನೈಟ್ ರೈಡರ್ಸ್(ಕೆಕೆಆರ್‌) ತಂಡದ ಅಧಿಕೃತ ಸ್ಪಾನ್ಸರ್ ಹೀರೋ ವೀಡಾ ಸಂಸ್ಥೆಯ ಬೆಂಬಲದಿಂದ ಈ ರೈಡ್ ನಡೆಸಿದ್ದರು. ಇವರ ಸಾಧನೆಯನ್ನು ಗೌರವಿಸಿ ಕೆಕೆಆರ್‌ ತಂಡ ಭಾರತಾದ್ಯಂತ ಮ್ಯಾಚ್ ವೀಕ್ಷಿಸಲು ಇವರಿಗೆ ‘ಗೋಲ್ಡನ್ ಟಿಕೆಟ್’ ನೀಡಿತ್ತು. ಆದ್ದರಿಂದ ಇಡೀ ಪ್ರಯಾಣದಲ್ಲಿ ಒಟ್ಟು 10 ಕೆಕೆಆರ್ ಐಪಿಎಲ್ ಪಂದ್ಯಗಳನ್ನು ವೀಕ್ಷಿಸಿದ್ದರು. ಜೊತೆಗೆ ಈ ವಿಶಿಷ್ಟ ಸಾಧನೆಯಿಂದ ‘ಇಂಡಿಯಾ’ ಹಾಗೂ ‘ಏಷ್ಯಾ’ ಬುಕ್ ಆಫ್ ರೆಕಾರ್ಡ್ಸ್ ದಾಖಲೆ ಬರೆದಿದ್ದಾರೆ.

ಇದನ್ನೂ ಓದಿ: ಇ20 ಪೆಟ್ರೋಲಿಂದ ಮೈಲೇಜ್‌ ಕುಸಿತ ನಿಜ, ಆದ್ರೆ ಎಥನಾಲ್‌ ರಹಿತ ಪೆಟ್ರೋಲ್‌ ಕೊಡಲ್ಲ: ಕೇಂದ್ರ ಸರ್ಕಾರ

ಮೊದಲ ನೋಟದಲ್ಲೇ ಲವ್ ಖಚಿತ, ಅದ್ಭುತ ಎರಡು ಎಲೆಕ್ಟ್ರಿಕ್ ಕಾನ್ಸೆಪ್ಟ್ ಕಾರು ಅನಾವರಣ ಮಾಡಿದ ಎಂಜಿ

Chethan Kumar — Fri, 10 Jul 2026 19:16:08 +0530

ನವದೆಹಲಿ (ಜು.10) ಎಂಜಿ ಮೋಟಾರ್ಸ್ ಭಾರತದಲ್ಲಿ ಮಾರುಕಟ್ಟೆ ವಿಸ್ತರಣೆ ಮಾಡುತ್ತಲೇ ಇದೆ. ಹೆಕ್ಟರ್ ಮೂಲಕ ಭಾರತಕ್ಕೆ ಕಾಲಿಟ್ಟ ಎಂಜಿ ಮೋಟಾರ್ಸ್ ಇದೀಗ ಗಟ್ಟಿಯಾಗಿ ನೆಲೆಯೂರಿದೆ. ಬ್ರಿಟಿಷ್ ಆಟೋಮೊಬೈಲ್ ಕಂಪನಿ ಎಂಜಿ ಇದೀಗ ಅತ್ಯಾಧುನಿಕ, ಹಾಗೂ ಅತ್ಯಂತ ಆಕರ್ಷಕ ಎರಡು ಎಲೆಕ್ಟ್ರಿಕ್ ಕಾನ್ಸೆಪ್ಟ್ ಕಾರು ಅನಾವರಣ ಮಾಡಿದೆ. ರೇಸಿಂಗ್ ಇತಿಹಾಸ ಹಾಗೂ ಅತ್ಯಾಧುನಿಕ ಇವಿ ಮಿಶ್ರಣದ ಕಾರು ಇದಾಗಿದೆ. ಎಂಜಿ ಗೋ ಹಾಗೂ ಎಂದಿ ಸೈಬರ್ ಕಾನ್ಸೆಪ್ಟ್ ಎಂಬ ಎರಡು ಕಾರುಗಳನ್ನು ಅನಾವರಣ ಮಾಡಲಾಗಿದೆ.

ಎಂಜಿ ಗೋ ಹಾಗೂ ಎಂದಿ ಸೈಬರ್ ಕಾನ್ಸೆಪ್ಟ್

ಎಲೆಕ್ಟ್ರಿಕ್ ಕಾರು ಮಾರುಕಟ್ಟೆಯಲ್ಲಿ ಹೊಸ ಅಲೆ ಸೃಷ್ಟಿಯಾಗಿದೆ. ಎಂಜಿ ಗೋ ಕಾರು ಬಿ ಸೆಗ್ಮೆಂಟ್ ಎಲೆಕ್ಟ್ರಿಕ್ ಹ್ಯಾಚ್‌ಬ್ಯಾಕ್ ಕಾರು. ದು 20ನೇ ಶತಮಾನದ ಮಧ್ಯಭಾಗದಲ್ಲಿ ಜಗತ್ತಿನ ಗಮನ ಸೆಳೆದಿದ್ದ ಎಂಜಿ ಸಂಸ್ಥೆಯ ಅತ್ಯಂತ ಸುಂದರ ಹಾಗೂ ಐಕಾನಿಕ್ ಕಾರು ಮಾದರಿಯಾದ 'ಎಂಜಿಬಿ ಜಿಟಿ' (MGB GT) ಇಂದ ಸ್ಫೂರ್ತಿ ಪಡೆದ ರೆಟ್ರೋ-ಫ್ಯೂಚರಿಸ್ಟಿಕ್ ವಿನ್ಯಾಸವನ್ನು ಹೊಂದಿದೆ. ಇನ್ನು ಎಂಜಿಯ ಕ್ರೀಡಾ ಪರಂಪರೆಯನ್ನು ಮತ್ತಷ್ಟು ಎತ್ತರಕ್ಕೆ ಕೊಂಡೊಯ್ಯಲು 'ಎಂಜಿ ಸೈಬರ್ ಕಾನ್ಸೆಪ್ಟ್' (MG Cyber Concept) ಎಂಬ ಬೃಹತ್ ಹಾಗೂ ಹೈ-ಪರ್ಫಾಮೆನ್ಸ್ ಎಲೆಕ್ಟ್ರಿಕ್ ಎಸ್‌ಯುವಿ (SUV) ಮಾದರಿಯನ್ನು ಅನಾವರಣಗೊಳಿಸಲಾಗಿದೆ.

ಕಾಂಪ್ಯಾಕ್ಟ್ ಇವಿ ಹ್ಯಾಚ್‌ಬ್ಯಾಕ್

ಕಾಂಪ್ಯಾಕ್ಟ್ ಬಿ-ಸೆಗ್ಮೆಂಟ್ ಬ್ಯಾಟರಿ ಎಲೆಕ್ಟ್ರಿಕ್ ಹ್ಯಾಚ್‌ಬ್ಯಾಕ್ ಮಾದರಿ ಎಂಜಿ ಗೋ ಕಾರು ಲಂಡನ್‌ನ ಎಂಜಿ ಡಿಸೈನ್ ಸೆಂಟರ್‌ನಲ್ಲಿ ವಿನ್ಯಾಸ ಮಾಡಲಾಗಿದೆ. ಇಂದಿನ ತೀವ್ರ ಪೈಪೋಟಿಯ ಮಾರುಕಟ್ಟೆಯಲ್ಲಿ ಎದ್ದು ಕಾಣುವಂತಹ ಅತ್ಯಾಧುನಿಕ ಹಾಗೂ ಭಾವನಾತ್ಮಕವಾಗಿ ಗ್ರಾಹಕರನ್ನು ಸೆಳೆಯುವ ಆಕರ್ಷಕ ಶೈಲಿಯನ್ನು ಇದಕ್ಕೆ ನೀಡಲಾಗಿದೆ.ಎಂಜಿ ಗೋ ಕಾನ್ಸೆಪ್ಟ್ ಕಾರು ಕೇವಲ ಹಳೆಯ ಶೈಲಿಯ ನಕಲಲ್ಲ, ಬದಲಿಗೆ ಇಂದಿನ ಆಧುನಿಕ ವಾಹನ ಲೋಕಕ್ಕೆ ಸಂಪೂರ್ಣವಾಗಿ ಹೊಂದಿಕೊಳ್ಳುವ ವಿಶಿಷ್ಟ ಗುರುತನ್ನು ಹೊಂದಿದೆ.

ಎಂಜಿ ಸೈಬರ್ ಕಾನ್ಸೆಪ್ಟ್

ಎಂಜಿ ಸಂಸ್ಥೆಯ ಫ್ಲ್ಯಾಗ್‌ಶಿಪ್ ಆವೃತ್ತಿಯಾಗಿ ಮೂಡಿಬಂದಿರುವ 'ಎಂಜಿ ಸೈಬರ್ ಕಾನ್ಸೆಪ್ಟ್', ಭವಿಷ್ಯದ ಡಿ-ಸೆಗ್ಮೆಂಟ್ (D-Segment) ಮಾದರಿಯ ಬೃಹತ್ ಎಲೆಕ್ಟ್ರಿಕ್ ಎಸ್‌ಯುವಿ ಕಾರಾಗಿದೆ. ಭೂಮಿಯ ಮೇಲೆ ಅತಿ ವೇಗದ ಮಿತಿಯನ್ನೇ ಧೂಳೀಪಟ ಮಾಡಿದ್ದ ಎಂಜಿಯ ಪೌರಾಣಿಕ ಲ್ಯಾಂಡ್ ಸ್ಪೀಡ್ ರೆಕಾರ್ಡ್ ಕಾರ್ 'EX181' ಮತ್ತು ಇಂದಿನ ಆಧುನಿಕ ಸುರಕ್ಷತಾ ತಂತ್ರಜ್ಞಾನ ಹಾಗೂ ಹೊಸ ಆವಿಷ್ಕಾರಗಳಿಂದ ಸ್ಫೂರ್ತಿ ಪಡೆದು ಇದನ್ನು ಸಿದ್ಧಪಡಿಸಲಾಗಿದೆ. ಇದು ಆಧುನಿಕ ಗ್ರಾಹಕರು ಬಯಸುವ ವಿಶಾಲವಾದ ಜಾಗ ಮತ್ತು ಪ್ರಾಯೋಗಿಕತೆಯೊಂದಿಗೆ ಸ್ಪೋರ್ಟ್ಸ್ ಕಾರುಗಳಲ್ಲಿ ಮಾತ್ರ ಸಿಗುವ ಅದ್ಭುತ ಡ್ರೈವಿಂಗ್ ಅನುಭವ ನೀಡಲಿದೆ.

ಭರ್ಜರಿ ಪರ್ಫಾಮೆನ್ಸ್ ನೀಡುವುದು ಈ ಸೈಬರ್ ಕಾನ್ಸೆಪ್ಟ್ ಕಾರಿನ ಮುಖ್ಯ ಉದ್ದೇಶವಾಗಿದೆ. ನಗರದ ಸಂಚಾರ, ಸುದೀರ್ಘ ಹೈವೇ ಪ್ರಯಾಣ ಸೇರಿದಂತೆ ಯಾವುದೇ ರಸ್ತೆಗೂ ಇದು ಸೈ ಎನಿಸಿಕೊಳ್ಳಲಿದೆ. ಇನ್ನು ಹೆಚ್ಚು ಸ್ಟೈಲೀಶ್ ಜೊತೆಗೆ ಐಷಾರಾಮಿತನ ನೀಡಲಿದೆ.

ಹ್ಯುಂಡೈ ಕ್ರೆಟಾ ಖರೀದಿ ಮಾಡೋ ಪ್ಲ್ಯಾನ್‌ ಇದ್ಯಾ? ಹಾಗಿದ್ರೆ ಸ್ವಲ್ಪ ಕಾಯಿರಿ!; ನೆಕ್ಸ್ಟ್ ಜನರೇಷನ್ ವೇರಿಯಂಟ್‌ನಲ್ಲಿದೆ ಭರ್ಜರಿ ಫೀಚರ್ಸ್‌

Santosh Naik — Thu, 16 Jul 2026 21:02:50 +0530

ಮುಂದಿನ ಪೀಳಿಗೆಯ ಹ್ಯುಂಡೈ ಕ್ರೆಟಾ 'SX3' 2027ರ ಭಾರತ್ ಮೊಬಿಲಿಟಿ ಶೋನಲ್ಲಿ ಅನಾವರಣಗೊಳ್ಳುವ ನಿರೀಕ್ಷೆಯಿದೆ. ಈ ಹೊಸ ಮಾದರಿಯು ಬಲಿಷ್ಠ ವಿನ್ಯಾಸ, ವಿಶಾಲವಾದ ಕ್ಯಾಬಿನ್, ಲೆವೆಲ್-2+ ಅಡಾಸ್ ಸುರಕ್ಷತೆ ಮತ್ತು ಮೊದಲ ಬಾರಿಗೆ ಹೈಬ್ರಿಡ್ ಎಂಜಿನ್ ಆಯ್ಕೆಯೊಂದಿಗೆ ಬರಲಿದೆ.

ಭಾರತೀಯ ವಾಹನ ಮಾರುಕಟ್ಟೆಯಲ್ಲಿ ಮಧ್ಯಮ ಗಾತ್ರದ ಎಸ್‌ಯುವಿ (Mid-Size SUV) ವಿಭಾಗದಲ್ಲಿ ಅಧಿಪತ್ಯ ಸಾಧಿಸಿರುವ ಹ್ಯುಂಡೈ ಕ್ರೆಟಾ (Hyundai Creta), ಈಗ ತನ್ನ ಮುಂದಿನ ಪೀಳಿಗೆಯ (Next-Gen) ಮಾದರಿಯೊಂದಿಗೆ ಮಾರುಕಟ್ಟೆಗೆ ಲಗ್ಗೆ ಇಡಲು ಸಜ್ಜಾಗುತ್ತಿದೆ. ಸದ್ಯ ಕಂಪನಿಯು ಈ ಹೊಸ ಕಾರಿನ ಫೇಸ್‌ಲಿಫ್ಟ್‌ನಲ್ಲಿ ಬ್ಯುಸಿಯಾಗಿದ್ದು, ಆಂತರಿಕವಾಗಿ ಇದಕ್ಕೆ 'SX3' ಎಂಬ ಕೋಡ್‌ನೇಮ್ ನೀಡಲಾಗಿದೆ. ಹೊಸ ಕ್ರೆಟಾವನ್ನು 2027ರ 'ಭಾರತ್ ಮೊಬಿಲಿಟಿ ಶೋ'ನಲ್ಲಿ (Bharat Mobility Show) ಮೊದಲ ಬಾರಿಗೆ ಜಗತ್ತಿಗೆ ಪರಿಚಯಿಸುವ ಸಾಧ್ಯತೆಯಿದೆ. ಆ ಬಳಿಕವಷ್ಟೇ ಭಾರತದಲ್ಲಿ ಇದು ಅಧಿಕೃತವಾಗಿ ಬಿಡುಗಡೆಯಾಗಲಿದೆ.

ಹೊಸ ತಲೆಮಾರಿನ ಹ್ಯುಂಡೈ ಕ್ರೆಟಾ ಪ್ರಸ್ತುತ ಮಾರುಕಟ್ಟೆಯಲ್ಲಿರುವ ಮಾದರಿಗಿಂತಲೂ ಹೆಚ್ಚು ಆಕರ್ಷಕ ಮತ್ತು ಪ್ರೀಮಿಯಂ ಲುಕ್ ಹೊಂದಿರಲಿದೆ. ಹ್ಯುಂಡೈನ ಅತ್ಯಾಧುನಿಕ ವಿನ್ಯಾಸ ಶೈಲಿಯಲ್ಲಿ (Design Language) ಇದನ್ನು ರೂಪಿಸಲಾಗುತ್ತಿದೆ. ಟೆಸ್ಟಿಂಗ್ ವೇಳೆ ಕಂಡುಬಂದಂತೆ ಕಾರಿನ ಹಿಂಭಾಗದಲ್ಲಿ ಹೊಸ ವಿನ್ಯಾಸದ ಎಲ್‌ಇಡಿ ಟೇಲ್‌ಲ್ಯಾಂಪ್‌ಗಳು, ಸಂಪೂರ್ಣ ಅಗಲದ ಲೈಟ್ ಬಾರ್ (Full-Width Light Bar) ಇರಲಿವೆ. ಇದರೊಂದಿಗೆ ಹೊಸ ರೂಫ್ ವಿನ್ಯಾಸ, ಪನೋರಮಿಕ್ ಸನ್‌ರೂಫ್ ಮತ್ತು ದೊಡ್ಡ ಗಾತ್ರದ ಹೊಸ ಅಲಾಯ್ ವೀಲ್‌ಗಳು ಈ ಕಾರಿನ ಅಂದವನ್ನು ಹೆಚ್ಚಿಸಲಿವೆ.

ಹೊಸ ಕ್ರೆಟಾವನ್ನು ಕಂಪನಿಯ ಅತ್ಯಾಧುನಿಕ 'K3' ಪ್ಲಾಟ್‌ಫಾರ್ಮ್ ಅಡಿಯಲ್ಲಿ ಸಿದ್ಧಪಡಿಸಲಾಗುತ್ತಿದೆ. ಈ ಪ್ಲಾಟ್‌ಫಾರ್ಮ್ ಅನ್ನು ಪೆಟ್ರೋಲ್, ಹೈಬ್ರಿಡ್ ಮತ್ತು ಎಲೆಕ್ಟ್ರಿಕ್ ಎಂಜಿನ್‌ಗಳಿಗೆ ಪೂರಕವಾಗಿ ವಿನ್ಯಾಸಗೊಳಿಸಲಾಗಿದೆ. ಹೊಸ ಎಸ್‌ಯುವಿಯ ಒಟ್ಟು ಉದ್ದ ಸುಮಾರು 4,500 ಮಿಮೀ ಇರಲಿದ್ದು, ಇದರಿಂದಾಗಿ ಕಾರಿನ ಒಳಗೆ ಪ್ರಯಾಣಿಕರಿಗೆ ಹೆಚ್ಚಿನ ಸ್ಥಳಾವಕಾಶ (Cabin Space) ಸಿಗಲಿದೆ. ಪ್ರಸ್ತುತ ಮಾದರಿಯಲ್ಲಿರುವ 433 ಲೀಟರ್ ಬೂಟ್ ಸ್ಪೇಸ್‌ಗಿಂತಲೂ ಹೆಚ್ಚಿನ ಲಗೇಜ್ ಸ್ಪೇಸ್ ಇದರಲ್ಲಿ ಇರಲಿದ್ದು, ಇದು ದೊಡ್ಡ ಕುಟುಂಬಗಳ ಪ್ರವಾಸಕ್ಕೆ ಹೆಚ್ಚು ಆರಾಮದಾಯಕವಾಗಲಿದೆ.

ತಂತ್ರಜ್ಞಾನದ ವಿಷಯದಲ್ಲಿ ಈ ಕಾರು ಅತ್ಯಂತ ಸ್ಮಾರ್ಟ್ ಆಗಿರಲಿದೆ. ಇದರಲ್ಲಿ ಹ್ಯುಂಡೈ ಕಂಪನಿಯ ಹೊಸ 'ಪ್ಲಿಯೋಸ್ ಕನೆಕ್ಟ್' (Pleos Connect) ಇನ್ಫೋಟೈನ್‌ಮೆಂಟ್ ಸಿಸ್ಟಮ್ ನೀಡಲಾಗುತ್ತಿದೆ. ಇದು ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಆಧಾರಿತ ಫೀಚರ್‌ಗಳು, ಹೊಸ ಅಪ್ಲಿಕೇಶನ್‌ಗಳು ಮತ್ತು ಓವರ್-ದಿ-ಏರ್ (OTA) ಅಪ್‌ಡೇಟ್ಸ್‌ ಸೌಲಭ್ಯವನ್ನು ಹೊಂದಿರಲಿದೆ. ಇದು ಕಾರನ್ನು ಚಾಲಕನೊಂದಿಗೆ ಹೆಚ್ಚು ಡಿಜಿಟಲ್ ಆಗಿ ಕನೆಕ್ಟ್ ಮಾಡಲಿದೆ.

ಹೊಸ ಕ್ರೆಟಾದಲ್ಲಿ ಸುರಕ್ಷತೆಗೆ ಅತಿ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿದೆ. ಇದಕ್ಕಾಗಿ ಅತ್ಯಾಧುನಿಕ 'ಲೆವೆಲ್-2+ ಅಡಾಸ್' (Level-2+ ADAS) ತಂತ್ರಜ್ಞಾನವನ್ನು ಅಳವಡಿಸಲಾಗುತ್ತಿದೆ. ಇದು ಪ್ರಸ್ತುತ ಇರುವ ಸುರಕ್ಷತಾ ಫೀಚರ್‌ಗಳಿಗಿಂತ ಹೆಚ್ಚು ಮುಂದುವರಿದ ಆವೃತ್ತಿಯಾಗಿದ್ದು, ಭಾರತೀಯ ರಸ್ತೆಗಳಲ್ಲಿ ಚಾಲನೆಯನ್ನು ಅತ್ಯಂತ ಸುರಕ್ಷಿತ ಹಾಗೂ ಸುಲಭವಾಗಿಸಲಿದೆ.

ಮುಂದಿನ ಪೀಳಿಗೆಯ ಕ್ರೆಟಾದಲ್ಲಿ ಆಗಲಿರುವ ಅತ್ಯಂತ ದೊಡ್ಡ ಬದಲಾವಣೆ ಎಂದರೆ ಅದರ ಎಂಜಿನ್ ಆಯ್ಕೆ. ಹ್ಯುಂಡೈ ಕಂಪನಿಯು ಇದರಲ್ಲಿ ಮೊದಲ ಬಾರಿಗೆ 1.2 ಲೀಟರ್ ಪೆಟ್ರೋಲ್ ಎಂಜಿನ್ ಆಧಾರಿತ ಹೈಬ್ರಿಡ್ (Hybrid) ತಂತ್ರಜ್ಞಾನವನ್ನು ಪರಿಚಯಿಸಲಿದೆ. ಇದು ಅತ್ಯುತ್ತಮ ಮೈಲೇಜ್ ನೀಡಲು ನೆರವಾಗಲಿದೆ. ಇದರೊಂದಿಗೆ ಪ್ರಸ್ತುತ ಚಾಲ್ತಿಯಲ್ಲಿರುವ 1.5 ಲೀಟರ್ ಪೆಟ್ರೋಲ್ ಮತ್ತು ಡೀಸೆಲ್ ಎಂಜಿನ್ ಆಯ್ಕೆಗಳೂ ಸಹ ಮುಂದುವರಿಯಲಿವೆ. ಈ ಮೂಲಕ ಮಾರುಕಟ್ಟೆಯಲ್ಲಿರುವ ಇತರೆ ಮಿಡ್-ಸೈಜ್ ಎಸ್‌ಯುವಿಗಳಿಗೆ ಹೊಸ ಕ್ರೆಟಾ ಭಾರಿ ಪೈಪೋಟಿ ನೀಡಲಿದೆ.

ಮೊಬೈಲ್ ಬಳಿಕ ಅತ್ಯಾಧುನಿಕ ತಂತ್ರಜ್ಞಾನದ ಶಓಮಿ ಹೊಸ SUV ಕಾರು ಅನಾವರಣ, ಅದ್ಭುತ ಫೀಚರ್

Chethan Kumar — Sat, 11 Jul 2026 15:02:53 +0530

ಕೈಗೆಟುಕುವ ಬೆಲೆಯಲ್ಲಿ ಅತ್ಯಾಧುನಿಕ ತಂತ್ರಜ್ಞಾನ, ಫೀಚರ್ಸ್ ಫೋನ್ ಮೂಲಕ ಭಾರತದ ಮಾರುಕಟ್ಟೆ ಆಕ್ರಮಿಸಿಕೊಂಡಿರುವ ಶಓಮಿ ಇದೀಗ ಹೊಸ ಎಸ್‌ಯುವಿ ಕಾರು ಅನಾವರಣ ಮಾಡಿದೆ. ಈ ಕಾರಿನ ಬೆಲೆ, ಫೀಚರ್ ಸೇರಿದಂತೆ ಇತರ ಮಾಹಿತಿ ಇಲ್ಲಿದೆ

ಚೀನಾ ಮೂಲಕ ಶಓಮಿ ಭಾರತದಲ್ಲೂ ಹೆಚ್ಚು ಜನಪ್ರಿಯ. ಭಾರತದಲ್ಲಿ ಮೊಬೈಲ್ ಕ್ರಾಂತಿ ಮಾಡಿದ ಬ್ರ್ಯಾಂಡ್‌ಗಳಲ್ಲಿ ಶಓಮಿ ಕೂಡ ಒಂದು. ಕಡಿಮೆ ಬೆಲೆಗೆ ಫೋನ್ ಬಿಡುಗಡೆ ಮಾಡಿದ್ದು ಮಾತ್ರವಲ್ಲ, ಎಲ್ಲಾ ಫೀಚರ್, ಸ್ಟೋರೇಜ್, ಕ್ಯಾಮೆರಾ ಸೇರಿದಂತೆ ದಿಗ್ಗಜ ಫೋನ್‌ಗಳಿಗೆ ಪೈಪೋಟಿ ನೀಡಿತ್ತು. ಅತೀ ಕಡಿಮೆ ಬೆಲೆಯಲ್ಲಿ ಫೋನ್ ಬಿಡುಗಡೆ ಮಾಡಿ ಕ್ರಾಂತಿ ಮಾಡಿದೆ. ಇದೀಗ ಶಓಮಿ ಹೊಚ್ಚ ಹೊಸ ಎಸ್‌ಯುವಿ ಕಾರಿನ ಫೋಟೋ ಅನಾವರಣ ಮಾಡಿದೆ.

ಶಓಮಿ ಅನಾವರಣ ಮಾಡಿದ ಹೊಸ ಎಸ್‌ಯುವಿ ಕಾರಿಗೆ ಸ್ಕೈನೊಮಡ್ ಎಂದು ಹೆಸರಿಡಲಾಗಿದೆ. ಇದು ಐಷಾರಾಮಿ ಹಾಗೂ ಹೆಚ್ಚಿನ ಸ್ಥಳವಕಾಶದ ಕಾರು. 7 ಸೀಟರ್ ಕಾರು ಇದಾಗಿದೆ. ಆದರೆ ಲಕ್ಷುರಿ, ಕಂಫರ್ಟ್, ಫೀಚರ್ಸ್, ಟೆಕ್ನಾಲಜಿ ವಿಚಾರದಲ್ಲಿ ಶಓಮಿ ದಿಗ್ಗಜರನ್ನೇ ಹಿಂದಿಕ್ಕುವ ಸೂಚನೆ ನೀಡಿದೆ. ಇಷ್ಟೇ ಕಡಿಮೆ ಬೆಲೆಗೆ ಈ ಕಾರು ಬಿಡುಗಡೆಯಾಗಲಿದೆ.

ಸ್ಕೈನೊಮಡ್ ಟೀಸರ್ ಫೋಟೋಗಳು ತೀವ್ರ ಕುತೂಹಲ ಕೆರಳಿಸಿದೆ. ದೊಡ್ಡ ಗಾತ್ರದ ಐಷಾರಾಮಿ ಎಸ್‌ಯುವಿ ಕಾರಿದು. ಕ್ಯಾಬಿನ್, ಸೀಟು, ಸ್ಟೋರೇಜ್ ಸ್ಪೇಸ್ ಸೇರಿದಂತೆ ಎಲ್ಲವನ್ನು ಅಚ್ಚುಕಟ್ಟಾಗಿ ಡಿಸೈನ್ ಮಾಡಲಾಗಿದೆ. ವಿಶೇಷ ಅಂದರೆ ಈ ಕಾರಿನ ಸೀಟುಗಳನ್ನು ಕೆಫೆ ರೀತಿ ಬದಲಾಯಿಸಲು ಸಾಧ್ಯವಿದೆ. ಅಗತ್ಯಕ್ಕೆ ತಕ್ಕಂತೆ ಸೀಟುಗಳನ್ನು ಅರೇಂಜ್‌ಮೆಂಟ್ ಮಾಡಲು ಸಾಧ್ಯವಿದೆ.

ದೂರ ಪ್ರಯಾಣದ ವೇಳೆ ಸೀಟು ಸಂಪೂರ್ಣ ಬೆಡ್ ರೀತಿ ಮಡಚಿ ಮಲಗಲು ಸಾಧ್ಯವಿದೆ. ಮೀಟಿಂಗ್, ಸಣ್ಣ ಮಾತುಕತೆಗಳು, ಚಹಾ ಹಾಗೂ ಮಾತುಕತೆ ಹೀಗೆ ಎಲ್ಲಾ ರೀತಿಯಲ್ಲಿ ಬಳಕೆ ಮಾಡಲು ಸಾಧ್ಯವಾಗುವಂತೆ ಕಾರಿನ ಒಳಾಂಗಣ ಹಾಗೂ ಸೀಟುಗಳ್ನು ಡಿಸೈನ್ ಮಾಡಲಾಗಿದೆ. ಇದರ ಪರಿಣಾಮ ಈ ಕಾರು ಹೊಸ ಸಂಚಲನ ಸೃಷ್ಟಿಸುವಲ್ಲಿ ಅನುಮಾನವಿಲ್ಲ.

ಹೊಸ ಶಓಮಿ ಕಾರು ಚೀನಾದಲ್ಲಿ ಈ ವರ್ಷದ ಅಂತ್ಯದಲ್ಲಿ ಬಿಡುಗಡೆಯಾಗಲಿದೆ. ವಿಶೇಷ ಅಂದರೆ ವಿದೇಶಗಳಲ್ಲಿ 2027ರಲ್ಲಿ ಬಿಡುಗಡೆಯಾಗಲಿದೆ. ಭಾರತದ ಮಾರುಕಟ್ಟೆಗೂ ಈ ಕಾರು ಪ್ರವೇಶಿಸುವ ಸಾಧ್ಯತೆ ಇದೆ. ಭಾರತದಲ್ಲಿ ಮೊಬೈಲ್ ಕ್ರಾಂತಿ ಮಾಡಿದ ರೀತಿ ಆಟೋಮೊಬೈಲ್ ಕ್ರಾಂತಿ ಮಾಡಲು ಶಓಮಿ ಪ್ಲಾನ್ ಮಾಡಿಕೊಂಡಿದೆ.

ಶಓಮಿಯ ಹೊಚ್ಚ ಹೊಸ ಸ್ಕೈನೊಮಡ್ ಕಾರಿನ ಬೆಲೆ ಸದ್ಯಕ್ಕೆ ಬಹಿರಂಗವಾಗಿಲ್ಲ. ಇಂಟಲಿಜೆಂಟ್ ಕಾರು ಎಂದೇ ಕಂಪನಿ ಹೇಳಿಕೊಂಡಿದೆ. ಹೆಚ್ಚುವರಿ ಫೀಚರ್, ಸುರಕ್ಷತಾ ಫೀಚರ್ಸ್ ಸೇರಿದಂತೆ ಇತರ ಮಾಹಿತಿಗಳು ಸದ್ಯಕ್ಕೆ ಬಹಿರಂಗವಾಗಲಿದೆ.

ಇ20 ಪೆಟ್ರೋಲ್‌ನಿಂದ ಮೈಲೇಜ್ ಕುಸಿತ, ಯೂಟ್ಯೂಬರ್ ಆರೋಪಕ್ಕೆ ಮರ್ಸಿಡೀಸ್ ಬೆಂಜ್ ಕೊಟ್ಟ ಉತ್ತರವೇನು?

Chethan Kumar — Mon, 13 Jul 2026 18:21:13 +0530

ನವದೆಹಲಿ (ಜು.13) ಭಾರತದಲ್ಲಿ ಪೆಟ್ರೋಲ್‌ನಲ್ಲಿ ಶೇಕಡಾ 20ರಷ್ಟು ಎಥೆನಾಲ್ ಮಿಶ್ರಣ ಮಾಡಲಾಗುತ್ತಿದೆ. ಇ20 ಪೆಟ್ರೋಲ್ ದೇಶದಲ್ಲಿ ಭಾರಿ ಕೋಲಾಹಲ ಸೃಷ್ಟಿಸಿದೆ. ಕೇಂದ್ರ ಸರ್ಕಾರದ ವಿರುದ್ದ ಆಕ್ರೋಶಗಳು ವ್ಯಕ್ತವಾಗುತ್ತಿದೆ. ಹಲವರು ತಮ್ಮ ವಾಹನಗಳ ಎಂಜಿನ್ ಸಮಸ್ಯೆಯಾಗುತ್ತಿದೆ, ಮೈಲೇಜ್ ಸಿಗುತ್ತಿಲ್ಲ, ವಿಮೆಗಳು ಅನ್ವಯವಾಗುತ್ತಿಲ್ಲ ಸೇರಿದಂತೆ ಹಲವು ಆರೋಪಗಳನ್ನು ಮಾಡಿದ್ದಾರೆ. ಇದರ ನಡುವೆ ಯೂಟ್ಯೂಬರ್ ಸೌರವ್ ಜೋಶಿ ಮಾಡಿದ ಗಂಭೀರ ಆರೋಪ ಭಾರಿ ಸದ್ದು ಮಾಡಿತ್ತು. ತನ್ನ ಬೆಂಜ್ ಕಾರು 16 ರಿಂದ 17 ಕಿಲೋಮೀಟರ್ ಮೈಲೇಜ್ ನೀಡುತ್ತಿತ್ತು. ಆದರೆ ಇ20 ಪೆಟ್ರೋಲ್‌ನಿಂದ 5ಕ್ಕೆ ಕುಸಿದಿದೆ ಎಂಬ ಆರೋಪ ಮಾಡಿದ್ದರು. ಈ ಆರೋಪ ಹಾಗೂ ಕೋಲಾಹಲಕ್ಕೆ ಖುದ್ದು ಮರ್ಸಿಡೀಸ್ ಬೆಂಜ್ ಸ್ಪಷ್ಟನೆ ನೀಡಿದೆ.

ಸೌರವ್ ಜೋಶಿ ಆರೋಪವೇನು?

ವ್ಲಾಗರ್ ಸೌರವ್ ಜೋಶಿ ಸೋಶಿಯಲ್ ಮೀಡಿಯಾ ಪ್ಲಾಟ್‌ಫಾರ್ಮ್ ಮೂಲಕ ಗಂಭೀರ ಆರೋಪ ಮಾಡಿದ್ದರು. ವಿಡಿಯೋ ಮಾಡಿ ತಮ್ಮ ಆಕ್ರೋಶ ಹೊರಹಾಕಿದ್ದರು. ನನ್ನ ಕಾರಿಗೆ ಎಥೆನಾಲ್ ಮಿಶ್ರಿತ ಪೆಟ್ರೋಲ್ ಹಾಕಲು ಭಯವಾಗುತ್ತಿದೆ. ಮೊದಲು ನನ್ನ ಮರ್ಸಿಡಿಸ್ ಬೆಂಜ್ ಕಾರು ಪ್ರತಿ ಲೀಟರ್ ಪೆಟ್ರೋಲ್‌ಗೆ 16 ರಿಂದ 17 ಕಿಲೋಮೀಟರ್ ಮೈಲೇಜ್ ನೀಡುತ್ತಿತ್ತು. ಇದೀಗ ಕೇವಲ 5 ಕಿಲೋಮೀಟರ್‌ಗೆ ಕುಸಿದಿದೆ. ನನ್ನ ಕಾರು ಶೀಘ್ರದಲ್ಲೇ ಸಂಪೂರ್ಣ ಹಾಳಾಗಲಿದೆ ಎಂದು ಆರೋಪಿಸಿದ್ದರು.

ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ವೈರಲ್ ಆಗಿತ್ತು. ಹಲವರು ಈ ವಿಡಿಯೋಗೆ ಪ್ರತಿಕ್ರಿಯಿಸಿದ್ದರು. ತಮ್ಮ ವಾಹನ ಕೂಡ ಮೈಲೇಜ್ ಡ್ರಾಪ್ ಆಗಿದೆ. ಕೇಂದ್ರ ಸರ್ಕಾರ ಎಥೆನಾಲ್ ಮಿಶ್ರಿತ ಪೆಟ್ರೋಲ್ ನೀಡಿ ಜನರ ವಾಹನಗಳನ್ನು ಹಾಳು ಮಾಡುತ್ತಿದೆ. ಅವೈಜ್ಞಾನಿಕ ಮಿಶ್ರಣದಿಂದ ವಾಹನದ ಎಂಜಿನ್ ಹಾಳಾಗುತ್ತಿದೆ. ಕೇಂದ್ರ ಸರ್ಕಾರ ಎಲೆಕ್ಟ್ರಿಕ್ ವಾಹನಗಳನ್ನು ಖರೀದಿ ಮಾಡುವಂತ ಮಾಡಲು ಈ ತಂತ್ರ ಪ್ರಯೋಗಿಸಿದೆ ಎಂದು ಹಲವರು ಆರೋಪ ಮಾಡಿದ್ದರು. ವಿಡಿಯೋ ಸದ್ದು ಮಾಡುತ್ತಿದ್ದಂತೆ ಇದೀಗ ಮರ್ಸಿಡೀಸ್ ಬೆಂಜ್ ಸ್ಪಷ್ಟನೆ ನೀಡಿದೆ.

ಮರ್ಸಿಡೀಸ್ ಬೆಂಜ್ ಕೊಟ್ಟ ಉತ್ತರವೇನು?

ಮರ್ಸಿಡೀಸ್ ಬೆಂಜ್ ತನ್ನ ಗ್ರಾಹಕರ ಸುರಕ್ಷತೆ, ವಾಹನಗಳ ಬಾಳಿಕೆ, ಪರ್ಫಾಮೆನ್ಸ್ ಬಗ್ಗೆ ಹೆಚ್ಚಿನ ಗಮನಕೇಂದ್ರಿರಿಸಿದೆ. ಇದು ಕಂಪನಿಯ ಅತ್ಯುನ್ನತ ಜವಾಬ್ದಾರಿಯಾಗಿದೆ. ಎಲ್ಲಾ ಮರ್ಸಿಡೀಸ್ ಬೆಂಜ್ ಬಿಎಸ್6 ವಾಹನ ಇ20 ಪೆಟ್ರೋಲ್ ಇಂಧನಕ್ಕೆ ಹೊಂದಿಕೆಯಾಗುವಂತ ಎಂಜಿನ್ ಹಾಗೂ ತಂತ್ರಜ್ಞಾನ ಬಳಸಲಾಗಿದೆ. ಸಂಬಂಧಪಟ್ಟ ಇಲಾಖೆ, ಪರಿಣಿತರಿಂದ ಪ್ರಮಾಣಪತ್ರವನ್ನೂ ಪಡೆದುಕೊಂಡಿದೆ. ಈ ಕುರಿತು ನಮ್ಮ ಗ್ರಾಹಕರ ಯಾವುದೇ ತಾಂತ್ರಿಕ ಸೇರಿದಂತೆ ಇತರ ಪ್ರಶ್ನೆಗಳಿಗೆ ಉತ್ತರಿಸಲು, ನೆರವು ನೀಡಲು ಬೆಂಜ್ ಸದಾ ಸಿದ್ಧವಾಗಿದೆ ಎಂದು ಬೆಂಜ್ ಸ್ಪಷ್ಟನೆ ನೀಡಿದೆ.

Customer Advisory pic.twitter.com/RxuTYl6Phz

— Mercedes-Benz India (@MercedesBenzInd) July 12, 2026

ಡಸ್ಟರ್, ಕ್ರೆಟಾ ಸೇರಿ SUV ಕಾರುಗಳಿಗೆ ನಡುಕ, ಹೊಸ ನಿಸಾನ್ ಟೆಕ್ಟಾನ್ ಖರೀದಿಗೆ ಇದೆ ಮೂರು ಕಾರಣ

Chethan Kumar — Fri, 10 Jul 2026 17:20:13 +0530

ಬೆಂಗಳೂರು (ಜು.10) ನಿಸಾನ್ ಹೊಚ್ಚ ಹೊಸ ಟೆಕ್ಟಾನ್ ಎಸ್‌ಯುವಿ ಕಾರು ಬಿಡುಗಡೆ ಮಾಡಿದೆ. ಭಾರತದ ಮಾರುಕಟ್ಟೆಯಲ್ಲಿ ಎಸ್‌ಯುವಿ ಕಾರುಗಳ ಬೇಡಿಕೆ ಹೆಚ್ಚಾಗುತ್ತಿದ್ದಂತೆ ಇದೀಗ ನಿಸಾನ್ ಟೆಕ್ಟಾನ್ ಮಾರುಕಟ್ಟೆಗೆ ಲಗ್ಗೆ ಇಟ್ಟಿದೆ. ಹೊಸ ಟೆಕ್ಟಾನ್ ಕಾರಿನ ಬೆಲೆ 10.40 ಲಕ್ಷ ರೂಪಾಯಿಯಿಂದ ಆರಂಭಗೊಳ್ಳಲಿದ್ದು, ಗರಿಷ್ಠ 14.99 ಲಕ್ಷ ರೂಪಾಯಿ (ಎಕ್ಸ್ ಶೋ ರೂಂ). ಭಾರತದಲ್ಲೇ ಉತ್ಪಾದನೆಗೊಂಡಿರುವ ನಿಸಾನ್ ಟೆಕ್ಟಾನ್ ಇದೀಗ ದಾಖಲೆ ಬರೆಯಲು ಸಜ್ಜಾಗಿದೆ.

ಟೆಕ್ಟಾನ್ ಕಾರಿನ ವಿಶೇಷತೆ

ಈ ಕಾರಿನ ಎಲ್ಲ ವೆರಿಯೆಂಟ್‌ಗಳಲ್ಲಿ ಟರ್ಬೊ ಎಂಜಿನ್‌ ಲಭ್ಯವಿದೆ. ಅಲ್ಲದೆ 280 ಎನ್‌ಎಂ ಟರ್ಬೊ ಸಾಮರ್ಥ್ಯ, ಗೂಗಲ್‌ನ ಬಿಲ್ಟ್‌-ಇನ್‌ ಸಂಪರ್ಕ, 700 ಲೀಟರ್‌ ಬೂಟ್‌ ಸಾಮರ್ಥ್ಯ ಹೊಂದಿದೆ. ವಿಶೇಷ ಅಂದರೆ ಟೆಕ್ಟಾನ್‌ ಕಾರನ್ನು ಭಾರತದಲ್ಲಿ ಉತ್ಪಾದನೆ ಮಾಡಲಾಗಿದ್ದು ಜಗತ್ತಿನ ಹಲವು ದೇಶಗಳಿಗೆ ಭಾರತದಿಂದಲೇ ರಫ್ತಾಗಲಿದೆ. ವಾಹನದ ಗ್ರೌಂಡ್‌ ಕ್ಲಿಯರೆನ್ಸ್ 212 ಎಂ.ಎಂ.ನಷ್ಟು ಇದೆ. ನಗರಗಳಲ್ಲಿ, ಹೆದ್ದಾರಿಗಳಲ್ಲಿ ಹಾಗೂ ಸವಾಲಿನ ರಸ್ತೆಗಳಲ್ಲಿ ವಿಶ್ವಾಸದಿಂದ ಚಾಲನೆ ಮಾಡಲು ಅನುಕೂಲವಾಗುವಂತ ಇದರ ವಿನ್ಯಾಸವನ್ನು ರೂಪಿಸಲಾಗಿದೆ. ಈ ವಾಹನವು ಈ ವರ್ಗದಲ್ಲೇ ಅತ್ಯಧಿಕ ಎನ್ನುವ 700 ಲೀಟರ್‌ ಬೂಟ್‌ ಸ್ಪೇಸ್‌ ಹೊಂದಿದೆ. ಗ್ರಾಹಕರು ಟರ್ಬೊ ಟಿ160 ಅಥವಾ ಟಿ280 ಎಂಜಿನ್‌ ಆಯ್ಕೆ ಪಡೆದುಕೊಳ್ಳಬಹುದು. ಟಿ280 ಎಂಜಿನ್‌ನಲ್ಲಿ 163 ಪಿಎಸ್‌ ಶಕ್ತಿ ಹಾಗೂ 280 ಎನ್‌ಎಂ ಟಾರ್ಕ್‌ ಸಿಗುತ್ತದೆ.

ಟೆಕ್ಟಾನ್ ಕಾರಿನ ಮೈಲೇಜ್

ಟಿ160 ಎಂಜಿನ್‌ ನಿತ್ಯದ ಬಳಕೆಗಳಿಗೆ ಉಪಯುಕ್ತ ಆಗಿರುವಂತೆ ರೂಪಿಸಲಾಗಿದೆ. ಈ ಕಾರು ಪ್ರತಿ ಲೀಟರಿಗೆ 19.4 ಕಿ.ಮೀ ಮೈಲೇಜ್ ನೀಡಲಿದೆ. ಟಿ280 ಎಂಜಿನ್‌ ಲೀಟರಿಗೆ 18.5 ಕಿ.ಮೀ ಮೈಲೇಜ್ ನೀಡಲಿದೆ. ಕಾರಿನ ಎರಡು ಡಿಜಿಟಲ್‌ ಸ್ಕ್ರೀನ್‌ ನೀಡಲಾಗಿದೆ. ಟೆಕ್‌-ಲಿಂಕ್‌ ಎಚ್‌ಡಿ ಇನ್ಫೋಟೇನ್ಮೆಂಟ್‌ ವ್ಯವಸ್ಥೆ ಇದೆ. ಮಾಹಿತಿ, ಮನರಂಜನೆ ಹಾಗೂ ವಾಹನ ಕುರಿತಾದ ಮಾಹಿತಿಗಳು ಒಂದೆಡೆ ಲಭಿಸುತ್ತವೆ. ಗೂಗಲ್‌ ಮ್ಯಾಪ್‌, ಗೂಗಲ್‌ ಅಸಿಸ್ಟೆಂಟ್‌ ಮತ್ತು ಗೂಗಲ್‌ ಪ್ಲೇ ಲಭ್ಯವಿದೆ. ನ್ಯಾವಿಗೇಷನ್‌, ಸಂಗೀತ, ಮನರಂಜನೆ ಸೇರಿದಂತೆ 200ಕ್ಕೂ ಹೆಚ್ಚು ಕನೆಕ್ಟೆಡ್ ಫೀಚರ್ಸ್ ಪಡೆಯಬಹುದು.ಕಾರಿನಲ್ಲಿ 360 ಡಿಗ್ರಿ ಪಾರ್ಕಿಂಗ್‌ ಕ್ಯಾಮೆರಾ ಸೌಲಭ್ಯವಿದೆ.

ಸುರಕ್ಷತೆ ಹಾಗೂ ಲಗೇಜ್ ಸ್ಪೇಸ್

ಪನೊರಾಮಿಕ್‌ ಸನ್‌ರೂಫ್‌, ಕ್ಲೈಮೇಟ್‌ ಕಂಟ್ರೋಲ್‌ ಮತ್ತು ಡ್ಯುಯಲ್‌-ಜೋನ್‌ ಹವಾನಿಯಂತ್ರಣ ವ್ಯವಸ್ಥೆ ಇದರಲ್ಲಿದೆ. ಕಾರಿನ ಹಿಂಬದಿಯಲ್ಲಿನ ಲಗೇಜ್‌ ಇಡುವ ಸ್ಥಳವು ಕಡಿಮೆ ಎತ್ತರದಲ್ಲಿದ್ದು, ವಸ್ತುಗಳನ್ನು ಇರಿಸಲು ಹಾಗೂ ಅಲ್ಲಿಂದ ತೆಗೆಯಲು ಸುಲಭವಾಗುವಂತಿದೆ. ಎಲ್ಲಾ ವೇರಿಯೆಂಟ್‌ಗಳಲ್ಲಿ ಆರು ಏರ್‌ಬ್ಯಾಗ್‌ಗಳು ಇರಲಿವೆ. ಅಲ್ಲದೆ ನಲವತ್ತಕ್ಕೂ ಹೆಚ್ಚು ಸುರಕ್ಷತಾ ವೈಶಿಷ್ಟ್ಯಗಳು ಇರಲಿವೆ. ಕಾರಿನ ಬುಕಿಂಗ್‌ ಆರಂಭಗೊಂಡಿದೆ.

ಈ ವಾಹನದ ಒಳಾಂಗಣ ವಿನ್ಯಾಸವು ಮೂರು ಬಣ್ಣ ಹೊಂದಿದೆ. ವೆಂಟಿಲೇಟೆಡ್‌ ಸೀಟ್‌ಗಳನ್ನು ನೀಡಲಾಗಿದೆ. ಪ್ರತಿ ಬಾರಿ ಪ್ರಯಾಣ ಹೆಚ್ಚಿನ ಆರಾಮದಾಯಕವಾಗಿರುತ್ತದೆ. ವಾಹನದ ಒಳಾಂಗಣವನ್ನು ಗ್ರಾಹಕರ ಮಹತ್ವಾಕಾಂಕ್ಷೆಗಳಿಗೆ ಸರಿಹೊಂದುವಂತೆ ಪ್ರೀಮಿಯಂ ಆಗಿ ರೂಪಿಸಲಾಗಿದೆ.

ಹೊಸ ಟೆಕ್ಟಾನ್‌ ಕಾರು ಕೇವಲ ಒಂದು ಕಾಂಪ್ಯಾಕ್ಟ್‌ ಎಸ್‌ಯುವಿ ಮಾತ್ರವೇ ಅಲ್ಲ. ಇದು ಕಂಪನಿಯ ಬ್ರ್ಯಾಂಡ್‌ ಹೆಸರನ್ನು ಬಲಪಡಿಸುವ ಕಾರಾಗಿದೆ ಎಂದು ನಿಸನ್ ಪ್ರಸಿಡೆಂಟ್ ಮಸ್ಸಿಮಿಲಿಯಾನೊ ಮೆಸ್ಸಿನಾ ಹೇಳಿದ್ದಾರೆ. ಗ್ರಾಹಕರಿಗೆ ಹೆಚ್ಚಿನ ವೈಶಿಷ್ಟ್ಯಗಳು ಇರುವ, ಪ್ರೀಮಿಯಂ ಗುಣಮಟ್ಟದ ಹಾಗೂ ತಂತ್ರಜ್ಞಾನ ಆಧಾರಿತವಾದ ವಾಹನವನ್ನು ಒದಗಿಸುವ ಉದ್ದೇಶದಿಂದ ಇದನ್ನು ತಯಾರು ಮಾಡಲಾಗಿದೆ. ಟೆಕ್ಟಾನ್‌ ವಾಹನವು ಬಹಳ ಬೋಲ್ಡ್‌ ಆಗಿರುವ ವಿನ್ಯಾಸವನ್ನು, ಪ್ರೀಮಿಯಂ ವೈಶಿಷ್ಟ್ಯಗಳನ್ನು, ಅತ್ಯಾಧುನಿಕವಾದ ತಂತ್ರಜ್ಞಾನವನ್ನು ಮತ್ತು ಎಸ್‌ಯುವಿ ಗುಣವನ್ನು ಹೊಂದಿದೆ ಎಂದಿದ್ದಾರೆ.

ಡಸ್ಟರ್‌, ಕ್ರೆಟಾ, ಸಿಯೆರಾಗೆ ಟಕ್ಕರ್‌ ನೀಡಲು ಬಂದಿರುವ ನಿಸ್ಸಾನ್‌ ಟೆಕ್ಟಾನ್‌ ಎಸ್‌ಯುವಿ ಕಾರ್‌ನ ಮೈಲೇಜ್‌ ಎಷ್ಟು?

Sathish Kumar KH — Fri, 10 Jul 2026 23:00:37 +0530

ಭಾರತೀಯ ವಾಹನ ಮಾರುಕಟ್ಟೆಯಲ್ಲಿ ಅತ್ಯಂತ ಪೈಪೋಟಿಯಿಂದ ಕೂಡಿದ ಮಿಡ್-ಸೈಜ್ ಎಸ್‌ಯುವಿ ವಿಭಾಗಕ್ಕೆ ನಿಸ್ಸಾನ್ ಕಂಪನಿಯು ತನ್ನ ಬಹುನಿರೀಕ್ಷಿತ 'ಟೆಕ್ಟಾನ್' (Tekton) ಮೂಲಕ ಭರ್ಜರಿ ಎಂಟ್ರಿ ನೀಡಿದೆ. ಆರಂಭಿಕ ಬೆಲೆಯಾಗಿ 10.49 ಲಕ್ಷ ರೂಪಾಯಿಗಳನ್ನು (ಎಕ್ಸ್-ಶೋರೂಂ) ನಿಗದಿಪಡಿಸಿರುವ ಈ ಕಾರು, ಸದ್ಯ ಮಾರುಕಟ್ಟೆಯಲ್ಲಿ ಅಧಿಪತ್ಯ ಸಾಧಿಸಿರುವ ಹ್ಯುಂಡೈ ಕ್ರೆಟಾ, ರೆನಾಲ್ಟ್ ಡಸ್ಟರ್ ಮತ್ತು ಕಿಯಾ ಸೆಲ್ಟೋಸ್‌ಗೆ ನೇರ ಪೈಪೋಟಿ ನೀಡಲು ಸಜ್ಜಾಗಿದೆ.

ಮೈಲೇಜ್ ವಿವರಗಳು:

ನಿಸ್ಸಾನ್ ಟೆಕ್ಟಾನ್ ಎರಡು ಟರ್ಬೊ-ಪೆಟ್ರೋಲ್ ಎಂಜಿನ್ ಆಯ್ಕೆಗಳಲ್ಲಿ ಲಭ್ಯವಿದೆ. ಇಂಧನ ದಕ್ಷತೆಯ ವಿಷಯದಲ್ಲಿ ಈ ಕಾರು ಉತ್ತಮ ಅಂಕಿಅಂಶಗಳನ್ನು ಹೊಂದಿದೆ:

1.0-ಲೀಟರ್ ಟರ್ಬೊ ಪೆಟ್ರೋಲ್ (ಮ್ಯಾನುಯಲ್): ಈ ಎಂಜಿನ್ 100bhp ಪವರ್ ಮತ್ತು 166Nm ಟಾರ್ಕ್ ಉತ್ಪಾದಿಸುತ್ತದೆ. ಇದು ಪ್ರತಿ ಲೀಟರ್‌ಗೆ 19.4 ಕಿ.ಮೀ ಮೈಲೇಜ್ ನೀಡುವ ಮೂಲಕ ಈ ಸರಣಿಯಲ್ಲೇ ಅತ್ಯಂತ ದಕ್ಷ ಎಂಜಿನ್ ಎನಿಸಿಕೊಂಡಿದೆ.
1.3-ಲೀಟರ್ ಟರ್ಬೊ ಪೆಟ್ರೋಲ್ (ಮ್ಯಾನುಯಲ್): ಈ ಶಕ್ತಿಯುತ ಎಂಜಿನ್ 163bhp ಪವರ್ ಮತ್ತು 280Nm ಟಾರ್ಕ್ ಉತ್ಪಾದಿಸುತ್ತದೆ. ಇದು ಪ್ರತಿ ಲೀಟರ್‌ಗೆ 17.8 ಕಿ.ಮೀ ಮೈಲೇಜ್ ನೀಡುತ್ತದೆ.
1.3-ಲೀಟರ್ ಟರ್ಬೊ ಪೆಟ್ರೋಲ್ (DCT ಆಟೋಮ್ಯಾಟಿಕ್): ಗಮನಾರ್ಹ ವಿಷಯವೆಂದರೆ, ಇದರ ಡ್ಯುಯಲ್ ಕ್ಲಚ್ ಆಟೋಮ್ಯಾಟಿಕ್ ಮಾದರಿಯು ಮ್ಯಾನುಯಲ್‌ಗಿಂತ ಹೆಚ್ಚಿನ ಮೈಲೇಜ್ ನೀಡುತ್ತಿದ್ದು, ಪ್ರತಿ ಲೀಟರ್‌ಗೆ 18.5 ಕಿ.ಮೀ ಚಲಿಸುತ್ತದೆ.

ವಿನ್ಯಾಸ ಮತ್ತು ಆಯಾಮಗಳು:

ನಿಸ್ಸಾನ್‌ನ ಪ್ರಸಿದ್ಧ 'ಪೆಟ್ರೋಲ್' ಎಸ್‌ಯುವಿಯಿಂದ ಸ್ಫೂರ್ತಿ ಪಡೆದ ವಿನ್ಯಾಸವನ್ನು ಟೆಕ್ಟಾನ್ ಹೊಂದಿದೆ. ಬೃಹತ್ ಕ್ರೋಮ್ ಗ್ರಿಲ್, ಸಿ-ಆಕಾರದ ಎಲ್‌ಇಡಿ ಡೇಟೈಮ್ ರನ್ನಿಂಗ್ ಲೈಟ್ಸ್ ಮತ್ತು 18-ಇಂಚಿನ ಅಲಾಯ್ ವೀಲ್‌ಗಳು ಈ ಕಾರಿಗೆ ಭವ್ಯ ನೋಟವನ್ನು ನೀಡಿವೆ. ಈ ಎಸ್‌ಯುವಿ 212 ಎಂಎಂನಷ್ಟು ಅತಿ ಹೆಚ್ಚಿನ ಗ್ರೌಂಡ್ ಕ್ಲಿಯರೆನ್ಸ್ ಹೊಂದಿದ್ದು, ಭಾರತೀಯ ರಸ್ತೆಗಳಿಗೆ ಸೂಕ್ತವಾಗಿದೆ.

ಒಳಾಂಗಣ ಮತ್ತು ಸುರಕ್ಷತೆ:

ಕಾರಿನ ಒಳಭಾಗದಲ್ಲಿ ಪ್ರೀಮಿಯಂ ಅನುಭವ ನೀಡಲು ನಿಸ್ಸಾನ್ ಶ್ರಮಿಸಿದೆ. 10.1-ಇಂಚಿನ ಟಚ್‌ಸ್ಕ್ರೀನ್ ಇನ್ಫೋಟೈನ್‌ಮೆಂಟ್ ಸಿಸ್ಟಮ್, 10.25-ಇಂಚಿನ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್, ಪ್ಯಾನೋರಮಿಕ್ ಸನ್‌ರೂಫ್, ಮತ್ತು ವೆಂಟಿಲೇಟೆಡ್ ಸೀಟ್‌ಗಳಂತಹ ಐಷಾರಾಮಿ ಸೌಲಭ್ಯಗಳಿವೆ.

ಸುರಕ್ಷತೆಗೆ ಹೆಚ್ಚಿನ ಆದ್ಯತೆ ನೀಡಲಾಗಿದ್ದು, 6 ಏರ್‌ಬ್ಯಾಗ್‌ಗಳು, ಲೆವೆಲ್ 2 ADAS (ಸುಧಾರಿತ ಚಾಲಕ ನೆರವು ವ್ಯವಸ್ಥೆ), 360-ಡಿಗ್ರಿ ಕ್ಯಾಮೆರಾ ಮತ್ತು ಬ್ಲೈಂಡ್-ಸ್ಪಾಟ್ ಅಸಿಸ್ಟ್ ವೈಶಿಷ್ಟ್ಯಗಳನ್ನು ಅಳವಡಿಸಲಾಗಿದೆ.

ನಿಸ್ಸಾನ್ ಟೆಕ್ಟಾನ್‌ಗೆ ಬುಕ್ಕಿಂಗ್‌ಗಳು ಈಗ ಆರಂಭವಾಗಿದ್ದು, ಜುಲೈ 20 ರಿಂದ ಗ್ರಾಹಕರಿಗೆ ವಿತರಣೆ ಪ್ರಾರಂಭವಾಗಲಿದೆ. ಟಾಟಾ ಸಿಯೆರಾ, ಮಾರುತಿ ಸುಜುಕಿ ಗ್ರ್ಯಾಂಡ್ ವಿಟಾರಾ ಮತ್ತು ಹೋಂಡಾ ಎಲಿವೇಟ್ ಅಂತಹ ಪ್ರಬಲ ಪ್ರತಿಸ್ಪರ್ಧಿಗಳ ನಡುವೆ ನಿಸ್ಸಾನ್ ತನ್ನ ಮೈಲೇಜ್ ಮ್ಯಾಜಿಕ್ ಮೂಲಕ ಹೇಗೆ ಯಶಸ್ಸು ಪಡೆಯುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ.

ಚೀನಾಗೆ ಸೆಡ್ಡು ಹೊಡೆದ ಬೆಂಗ್ಳೂರು ಸ್ಟಾರ್ಟಪ್‌; ಮ್ಯಾಗ್ನೆಟ್‌ ಇಲ್ಲದ EV ಮೋಟರ್‌ ಉತ್ಪಾದನೆ

Kannadaprabha News — Tue, 14 Jul 2026 05:56:26 +0530

ನವದೆಹಲಿ: ವಿದ್ಯುತ್‌ ಚಾಲಿತ ವಾಹನಗಳಿಗೆ ಬಳಸಲು ಅಯಸ್ಕಾಂತವೇ ಇಲ್ಲದ ಮೋಟರ್‌ಅನ್ನು ಬೆಂಗಳೂರು ಮೂಲದ ಸ್ಟಾರ್ಟಪ್‌ ‘ವಿಮಾಗ್‌ ಲ್ಯಾಬ್ಸ್‌’ ಅಭಿವೃದ್ಧಿಪಡಿಸಿದೆ. ಮ್ಯಾಗ್ನೆಟ್‌ಗಾಗಿ ಚೀನಾದ ಅಪರೂಪದ ಖನಿಜಗಳ ಮೇಲಿನ ಭಾರತದ ಅವಲಂಬನೆಯನ್ನು ತಗ್ಗಿಸಿ ಸ್ವಾವಲಂಬನೆ ಸಾಧಿಸುವುದು ಇದರ ಉದ್ದೇಶವಾಗಿದೆ. ಈ ತಂತ್ರಜ್ಞಾನಕ್ಕೆ ವಿಮಾಗ್‌ 5ನೇ ಭಾರತೀಯ ಪೇಟೆಂಟ್‌ ಪಡೆದಿದೆ.

ಯೋಚನೆ ಹುಟ್ಟಿದ್ದು ಹೇಗೆ?

ವಿಶ್ವದ ಶೇ.90ರಷ್ಟು ಅಪರೂಪದ ಖನಿಜಗಳು ಮತ್ತು ಶೇ.94ರಷ್ಟು ಅಯಸ್ಕಾಂತ ರಫ್ತಾಗುವುದು ಚೀನಾದಿಂದ. 2020ರ ಕೊರೋನಾ ಕಾಲದಲ್ಲಿ ಈ ವಸ್ತುಗಳನ್ನು ಹೊತ್ತು ಬರಬೇಕಿದ್ದ ನೌಕೆಗಳು ಚೀನಾದ ಬಂದರುಗಳಲ್ಲೇ ಲಂಗರು ಹಾಕಿ ನಿಂತು, ಭಾರತದ ಇವಿ ಉದ್ಯಮಕ್ಕೆ ಪೆಟ್ಟು ನೀಡಿದ್ದವು. ಇದರಿಂದ ಮನೀಶ್‌ ಸೇಥ್‌ ಆಗಷ್ಟೇ ಶುರು ಮಾಡಿದ್ದ ನವೋದ್ಯಮ ಕೂಡ ನರಳಿತ್ತು. 2025ರಲ್ಲಿ ವಿಮಾಗ್‌ ಲ್ಯಾಬ್ಸ್‌ ಸ್ಥಾಪಿಸಿದ ಅವರು, ಅಯಸ್ಕಾಂತವೇ ಇಲ್ಲದ ಮೋಟರ್‌ ಉತ್ಪಾದನೆಗಿಳಿಯುತ್ತಾರೆ.

ಹೇಗಿದೆ ಈ ಮೋಟರ್‌?

ಹೆಚ್ಚಿನ ವಿದ್ಯುತ್ ವಾಹನಗಳಲ್ಲಿ ನಿಯೋಡೈಮಿಯಂನಂತಹ ಅಪರೂಪದ ಖನಿಜದಿಂದ ತಯಾರಾದ ಶಾಶ್ವತ ಆಯಸ್ಕಾಂತಗಳನ್ನು ಬಳಸಲಾಗುತ್ತದೆ. ಇವು ಸೃಷ್ಟಿಸುವ ಕಾಂತೀಯ ಕ್ಷೇತ್ರದಿಂದ ಮೋಟಾರ್‌ ತಿರುಗಿ ವಾಹನ ಚಲಿಸುತ್ತವೆ. ಈ ವೇಳೆ ಬ್ರಷ್‌ ಮತ್ತು ಸ್ಲಿಪ್‌ ರಿಂಗ್‌ಗಳ ಮೂಲಕ ವಿದ್ಯುತ್‌ ಪ್ರವಹಿಸುತ್ತದೆ.

ಇದೀಗ ವಿಮಾಗ್‌ ಈ ಅಯಸ್ಕಾಂತದ ಬದಲು ತಾಮ್ರದ ಸುರುಳಿಗಳು, ಎಲೆಕ್ಟ್ರಾನಿಕ್ಸ್, ಸಾಫ್ಟ್‌ವೇರ್‌ ಬಳಸುತ್ತಿದೆ. ತಾಮ್ರದ ಮೂಲಕ ವಿದ್ಯುತ್‌ ಪ್ರವಹಿಸಿದಾಗ ಅದು ಮ್ಯಾಗ್ನೆಟ್‌ನಂತೆ ಕೆಲಸ ಮಾಡುತ್ತದೆ. ಇದನ್ನು ಸಾಫ್ಟ್‌ವೇರ್‌ ಮೂಲಕ ನಿಯಂತ್ರಿಸಲಾಗುತ್ತದೆ.

ಸಾಫ್ಟ್‌ವೇರ್‌ ಬಳಸಿ ವೇಗವನ್ನು ನಿಯಂತ್ರಿಸುವ ಮೂಲಕ ಮೋಟರ್‌ನ ಸಾಮರ್ಥ್ಯ ವೃದ್ಧಿಯಾಗುತ್ತದೆ. ಅಗತ್ಯವಿದ್ದಾಗ ಅದನ್ನು ಅಪ್‌ಡೇಟ್‌ ಕೂಡ ಮಾಡಬಹುದು.

ಲಾಭವೇನು?

ಸ್ವದೇಶಿಯಾಗಿ ಉತ್ಪಾದನೆಯಾಗುವ ಈ ಮೋಟರ್‌ಗಳಿಂದಾಗಿ ಅಪರೂಪದ ಖನಿಜಗಳಿಗಾಗಿ ಚೀನಾದ ಮೇಲಿನ ಅವಲಂಬನೆ ತಗ್ಗುತ್ತದೆ. ಜಾಗತಿಕ ಅಸ್ಥಿರತೆ ಉಂಟಾಗಿ ಅಂತಾರಾಷ್ಟ್ರೀಯ ವ್ಯಾಪಾರ ಸ್ಥಗಿತವಾದಾಗ ಇವಿ ಕ್ಷೇತ್ರಕ್ಕೆ ಪೆಟ್ಟು ಬೀಳದು.

ಅತ್ಯಾಕರ್ಷಕ ರಾಯಲ್ ಎನ್‌ಫೀಲ್ಡ್ ಶಾಟ್‌ಗನ್ ಕ್ರಾಫ್ಟ್ ಎಡಿಶನ್ ಅನಾವರಣ, ಭಾರತಕ್ಕೆ 25 ಬೈಕ್ ಮಾತ್ರ

Chethan Kumar — Wed, 15 Jul 2026 17:11:00 +0530

ಜನಪ್ರಿಯ ರಾಯಲ್ ಎನ್‌ಫೀಲ್ಡ್ ಶಾಟ್‌ಗನ್ ಕ್ರಾಫ್ಟ್ ಎಡಿಶನ್ ಬೈಕ್ ಅನಾವರಣ ಮಾಡಲಾಗಿದೆ. ವಿಶೇಷ ಅಂದರೆ ಇದು ಲಿಮಿಟೆಡ್ ಎಡಿಶನ್ ಬೈಕ್. ಮೊದಲು ಬುಕ್ ಮಾಡುವರಿಗೆ ಮಾತ್ರ ಬೈಕ್ ಸಿಗಲಿದೆ. ಕಾರಣ ಕೇವಲ 25 ಬೈಕ್ ಮಾತ್ರ ಲಭ್ಯವಿದೆ.

ರಾಯಲ್ ಎನ್‌ಫೀಲ್ಡ್ ಭಾರತದಲ್ಲಿ ಮಾತ್ರವಲ್ಲ ಹಲವು ದೇಶಗಳಲ್ಲಿ ಜನಪ್ರಿಯ ಬೈಕ್ ಆಗಿ ಹೊರಹೊಮ್ಮಿದೆ. ಯುವಕರಿಂದ ಹಿಡಿದು ವಯಸ್ಕರವರೆಗೆ ರಾಯಲ್ ಎನ್‌ಫೀಲ್ಡ್ ಬೈಕ್ ರೈಡ್ ಮಾಡಲು ಇಷ್ಟಪಡುತ್ತಾರೆ. ಇದೀಗ ರಾಯಲ್ ಎನ್‌ಫೀಲ್ಡ್ ತನ್ನ ಶಾಟ್‌ಗನ್ ಬೈಕ್ ಹೊಸ ಅವತಾರದಲ್ಲಿ ಬಿಡುಗಡೆ ಮಾಡುತ್ತಿದೆ. ರಾಯಲ್ ಎನ್‌ಫೀಲ್ಡ್ ಶಾಟ್‌ಗನ್ ರಫ್ ಕ್ರಾಫ್ಟ್ 650 ಎಡಿಶನ್ ಬೈಕ್ ಅನಾವರಣ ಮಾಡಿದೆ.

ರಾಯಲ್ ಎನ್‌ಫೀಲ್ಡ್ ಖರೀದಿಸಿ ಬಳಿಕ ಕಸ್ಟಮೈಸ್ ಮಾಡುವ ಗ್ರಾಹಕರಿಗೆ ಇದೀಗ ಸಿಹಿ ಸುದ್ದಿ ಕಾರಣ ರಫ್ ಕ್ರಾಫ್ಟ್ ಕಸ್ಟಮ್ಸ್ ಜೊತೆ ಒಪ್ಪಂದ ಮಾಡಿಕೊಂಡಿರುವ ರಾಯಲ್ ಎನ್‌ಫೀಲ್ಡ್ ಲಿಮಿಟೆಡ್ ಎಡಿಶನ್ ರಫ್ ಕ್ರಾಫ್ಟ್ ಬೈಕ್ ಅನಾವರಣ ಮಾಡಿದೆ. ಅತ್ಯಾಕರ್ಷಕ ಡಿಸೈನ್, ಸ್ಟೈಲಿಶ್ ಲುಕ್ ಸೇರಿದಂತೆ ಹಲವು ವಿಶೇಷತೆಗಳು ಬೈಕ್‌ನಲ್ಲಿದೆ.

ರಾಯಲ್ ಎನ್‌ಫೀಲ್ಡ್ ಶಾಟ್‌ಗನ್ 650 ರಫ್ ಕ್ರಾಫ್ಟ್ ಜಾಗತಿಕವಾಗಿ ಕೇವಲ 100 ಬೈಕ್ ಉತ್ಪಾದನೆ ಮಾಡಲಾಗುತ್ತದೆ. ಈ ಪೈಕಿ ಭಾರತಕ್ಕೆ ಕೇವಲ 25 ಬೈಕ್ ಮಾತ್ರ ಲಭ್ಯವಿದೆ. ಹೀಗಾಗಿ ಮೊದಲು ಬುಕಿಂಗ್ ಮಾಡಿದವರಿಗೆ ಈ ಬೈಕ್ ಲಭ್ಯವಾಗುತ್ತದೆ. ಬೈಕ್‌ನ ಇಂಧನ ಟ್ಯಾಂಕ್ ಮೇಲೆ ಸಿರೀಸ್ ನಂಬರ್ ಇರಲಿದೆ. ಹೀಗಾಗಿ ಭಾರತದಲ್ಲಿ ಈ ಬೈಕ್ ಖರೀದಿಸಿದ ಎಷ್ಟನೇ ವ್ಯಕ್ತಿ ಅನ್ನೋದು ಬೈಕ್ ಟ್ಯಾಂಕ್ ಮೇಲೆ ಗೊತ್ತಾಗಲಿದೆ.

ಕ್ಯಾಲಿಬರ್ ರಾಯಲ್‌ನಿಂದ ಪ್ರೇರಣೆ ಪಡೆದು ಈ ಡಿಸೈನ್ ಮಾಡಲಾಗಿದೆ. ಅತ್ಯಾಕರ್ಷಕ ಡ್ಯುಯಲ್ ಟೋನ್ ಕಪ್ಪು ಬಣ್ಣವನ್ನು ಹೊಂದಿದೆ. ಕೈಯಿಂದಲೇ ಪೂರ್ಣಗೊಳಿಸಲಾದ ಚಿನ್ನದ ಎಲೆಯಂತಹ ಅದ್ಭುತ ಗ್ರಾಫಿಕ್ಸ್ ಡಿಸೈನ್ ಇದರಲ್ಲಿದೆ. ಬೈಕ್‌ನ ಮೇಲೆ ಹಿತ್ತಾಳೆಯಿಂದ ಮಾಡಿದ ವಿಶೇಷ ಬ್ಯಾಡ್ಜ್ ನೀಡಲಾಗಿದೆ.

ಲಿಮಿಟೆಡ್ ಎಡಿಶನ್ ಬೈಕ್ ಲುಕ್ ಹೆಚ್ಚಿಸಲು ಬ್ಲ್ಯಾಕ್ ಬಾರ್ ಎಂಡ್ ಮಿರರ್ ನೀಡಲಾಗಿದೆ. ರಗದ್ ಕ್ವಿಲೆಡ್ ಲೆದರ್ ಸೀಟು, ಅಲಾಯ್ ವ್ಹೀಲ್, ಗೋಲ್ಡನ್ ಫಿನೀಶ್ ಪೋರ್ಕ್ ಟ್ಯೂಬ್ ಸೇರಿದಂತೆ ಹಲವು ವಿಶೇಷತೆಗಳು ಅತ್ಯಾಕರ್ಷಕ ಲುಕ್‌ನಿಂದ ರಫ್ ಕ್ರಾಫ್ಟ್ ಎಡಿಶನ್ ಎಲ್ಲರ ಗಮನಸಳೆಯುತ್ತಿದೆ.

ಶಾಟ್‌ಗನ್ ರಫ್ ಕ್ರಾಫ್ಟ್ 650 ರಫ್ ಕ್ರಾಫ್ಟ್ ಬೈಕ್ ಬೆಲೆ 5.75 ಲಕ್ಷ ರೂಪಾಯಿ (ಎಕ್ಸ್ ಶೋರೂಂ). ಸದ್ಯ ಮಾರುಕಟ್ಟೆಯಲ್ಲಿರುವ ಶಾಟ್‌ಗನ್ 650 ಬೈಕ್ ಬೆಲೆ 4.16 ಲಕ್ಷ ರೂಪಾಯಿ. ಜುಲೈ 30 ರಂದು ಸಂಜೆ 7 ಗಂಟೆಗೆ ಬುಕಿಂಗ್ ಆರಂಭಗೊಳ್ಳಲಿದೆ. ಅಧೀಕೃತ ವೆಬ್‌ಸೈಟ್ ಮೂಲಕ ಬುಕಿಂಗ್ ಅವಕಾಶ ನೀಡಲಾಗಿದೆ.

ಸರಿಸುಮಾರು 700 ಕಿ.ಮಿ ಮೈಲೇಜ್, 10 ನಿಮಿಷದಲ್ಲಿ ಚಾರ್ಜಿಂಗ್ ತಂತ್ರಜ್ಞಾನದ ಹೊಸ ಕಾರು ಅನಾವರಣ

Chethan Kumar — Sun, 12 Jul 2026 20:13:13 +0530

ಒಂದು ಬಾರಿ ಚಾರ್ಜ್ ಮಾಡಿದರೆ 670 ಕಿಲೋಮೀಟರ್ ಮೈಲೇಜ್. ವಿಶೇಷ ಅಂದರೆ ಕೇವಲ 10 ನಿಮಿಷ ಚಾರ್ಜ್ ಮಾಡಿದರೆ 270 ಕಿಲೋಮೀಟರ್ ಪ್ರಯಾಣ ಮಾಡಬಹುದು. ಈ ಅದ್ಭುತ ತಂತ್ರಜ್ಞಾನದ ಕಾರು ಅನಾವರಣಗೊಂಡಿದೆ.

ಎಲೆಕ್ಟ್ರಿಕ್ ಕಾರುಗಳು ಬೇಡಿಕೆ ಹೆಚ್ಚಾಗುತ್ತಿದೆ. ಸರ್ಕಾರ ಕೂಡ ಇವಿ ಮೇಲೆ ಹೆಚ್ಚಿನ ಒತ್ತು ನೀಡುತ್ತಿದೆ. ಹಲವು ಕಂಪನಿಗಳು ಹೊಸ ಹೊಸ ಎಲೆಕ್ಟ್ರಿಕ್ ಕಾರು ಬಿಡುಗಡೆ ಮಾಡುತ್ತಿದೆ. ಆದರೆ ಚಾರ್ಜಿಂಗ್ ಹಾಗೂ ಮೈಲೇಜ್ ತಲೆನೋವಾಗಿ ಪರಿಣಿಸುತ್ತದೆ. ಇದರ ನಡುವೆ ಹೊಸ ಕಾರು ಅನಾವರಣಗೊಂಡಿದೆ. ಒಂದು ಬಾರಿ ಚಾರ್ಜ್ ಮಾಡಿದರೆ 670 ಕಿಲೋಮೀಟರ್ ಮೈಲೇಜ್ ನೀಡಲಿದೆ. ಅತೀ ವೇಗದಲ್ಲಿ ಚಾರ್ಜಿಂಗ್ ತಂತ್ರಜ್ಞಾನದ ಇದರಲ್ಲಿದೆ. ಈ ಹೊಸ ಕಾರು ಮರ್ಸಿಡೀಸ್ ಬೆಂಜ್ ಎಎಂಜಿ CLA 45 ಇವಿ.

ಮರ್ಸಿಡೀಸ್ ಬೆಂಜ್ ಎಎಂಜಿ CLA 45 ಇವಿ ಕಾರಿನಲ್ಲಿ 94 kWh ಬ್ಯಾಟರಿ ಪ್ಯಾಕ್ ಬಳಸಲಾಗಿದೆ. ವಿಶೇಷ ಅಂದರೆ ಅತ್ಯಾಧುನಿಕ ಆಕ್ಸಿಯಲ್ ಫ್ಲಕ್ಸ್ ಎಲೆಕ್ಟ್ರಿಕ್ ಮೋಟಾರ್ ಹೊಂದಿದೆ. ಬರೋಬ್ಬರಿ 612 hp ಪವರ್ ಹಾಗೂ 500 ಎನ್ಎಂ ಟಾರ್ಕ್ ಸಾಮರ್ಥ್ಯ ಹೊಂದಿದೆ. 7 ಡ್ರೈವ್ ಮೂಡ್ ಹೊಂದಿದೆ.

WLTP ಸರ್ಟಿಫೈಡ್ ರೇಂಜ್ 670 ಕಿಲೋಮೀಟರ್. ಸರಿಸುಮಾರು 640 ಕಿಲೋಮೀಟರ್ ಮೈಲೇಜ್ ನೀಡಲಿದೆ ಎಂದು ಕಂಪನಿ ಹೇಳುತ್ತಿದೆ. 330 kW ಡಿಸಿ ಫಾಸ್ಟ್ ಚಾರ್ಜಿಂಗ್ ಬೆಂಬಲಿಸುವ ಕಾರಣ ಶೇಕಡಾ 10 ರಿಂದ 80ರಷ್ಟು ಚಾರ್ಜಿಂಗ್ ಸಮಯ ಕೇವಲ 22 ನಿಮಿಷ ಮಾತ್ರ. ಇನ್ನು 10 ನಿಮಿಷ ಚಾರ್ಜ್ ಮಾಡಿದರೆ 270 ಕಿಲೋಮೀಟರ್ ಪ್ರಯಾಣ ಮಾಡಲು ಸಾಧ್ಯ.

0-100 ಕಿಲೋಮೀಟರ್ ವೇಗಕ್ಕೆ ಕೇವಲ 3 ಸೆಕೆಂಡ್ ಸಾಕು. ಈ ಕಾರಿನ ಗರಿಷ್ಠ ವೇಗ 270 ಕಿಲೋಮೀಟರ್ ಪ್ರತಿ ಗಂಟೆಗೆ. 2.3 ಟನ್ ತೂಕದ ಈ ಕಾರು ಅಸಾಧಾರಣ ಪರ್ಫಾಮೆನ್ಸ್ ನೀಡಲಿದೆ. 19 ಇಂಚಿನ ಅಲೋಯ್ ವ್ಹೀಲ್ಸ್ ಹೊಂದಿದೆ. 20 ಇಂಚಿನ ವ್ಹೀಲ್ ಆಯ್ಕೆಯೂ ಇದೆ. ಜೊತೆಗೆ ಅತ್ಯಾಕರ್ಷಕ ಡಿಸೈನ್ ಹೊಂದಿದೆ.

ಕಾರಿನಲ್ಲಿ ಡ್ರಿಫ್ಟ್ ಮೋಡ್ ನೀಡಲಾಗಿದೆ. ಹೈವೇಯಲ್ಲಿ ಪ್ರಯಾಣ ಮಾಡುವಾಗ ಮುಂಭಾಗ ಮೋಟಾರ್ ಸಂಪೂರ್ಣವಾಗಿ ಸ್ಥಗಿತಗೊಂಡು, ರೇರ್ ಮೋಟಾರ್ ಮೂಲಕ ಚಲಿಸಲಿದೆ. AMGFORCE S+ ಮೋಡ್ ಪರಿಚಯಿಸಲಾಗಿದೆ. ಈ ಮೋಡ್‌ನಲ್ಲಿ ಕಾರು ಪೆಟ್ರೋಲ್ ಎಂಜಿನ್ AMG A 45 S ಕಾರಿನ ಸೌಂಡ್‌ನಲ್ಲಿ ಚಲಿಸಲಿದೆ. ಇದರಿಂದ ಪೆಟ್ರೋಲ್ ಕಾರಿನ ಫೀಲ್ ಸಿಗಲಿದೆ.

Hero Vida VX2 Plus ಲಾಂಚ್; 187 ಕಿಮೀ ರೇಂಜ್, ಸ್ಮಾರ್ಟ್ ಫೀಚರ್‌ ಇರುವ ಇ-ಸ್ಕೂಟರ್

Santosh Naik — Wed, 15 Jul 2026 23:12:59 +0530

ನವದೆಹಲಿ (ಜು.15): ಭಾರತೀಯ ಇವಿ ಮಾರುಕಟ್ಟೆಯಲ್ಲಿ ಮುಂಚೂಣಿಯಲ್ಲಿರುವ ಪ್ರಮುಖ ದ್ವಿಚಕ್ರ ವಾಹನ ತಯಾರಿಕಾ ಸಂಸ್ಥೆ 'ಹೀರೋ ಮೋಟೋಕಾರ್ಪ್', ತನ್ನ ಎಲೆಕ್ಟ್ರಿಕ್ ಬ್ರ್ಯಾಂಡ್ 'ವಿಡಾ' (Vida) ಅಡಿಯಲ್ಲಿ ನೂತನ 'ವಿಡಾ ವಿಎಕ್ಸ್2 ಪ್ಲಸ್ 4.4kWh' (Vida VX2 Plus 4.4kWh) ಎಲೆಕ್ಟ್ರಿಕ್ ಸ್ಕೂಟರ್ ಅನ್ನು ಅಧಿಕೃತವಾಗಿ ದೇಶೀಯ ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ. ಕಂಪನಿಯ ವಿಎಕ್ಸ್2 ಸರಣಿಯಲ್ಲಿ ಇದು ಹೊಸ 'ಟಾಪ್ ಎಂಡ್' ಮಾಡೆಲ್ ಆಗಿ ಹೊರಹೊಮ್ಮಿದೆ.

ದೆಹಲಿಯಲ್ಲಿ ಇದರ ಎಕ್ಸ್ ಶೋರೂಮ್ ಬೆಲೆಯನ್ನು 1.44 ಲಕ್ಷ ರೂಪಾಯಿ ಎಂದು ನಿಗದಿಪಡಿಸಲಾಗಿದೆ. ಆದರೆ, ಸರ್ಕಾರದ ಸಬ್ಸಿಡಿ ಮತ್ತು ಕಂಪನಿಯ ವಿಶೇಷ ರಿಯಾಯಿತಿಗಳ ನಂತರ ಇದರ ಪರಿಣಾಮಕಾರಿ ಆರಂಭಿಕ ಬೆಲೆ (Effective Price) ಸುಮಾರು 1.14 ಲಕ್ಷ ರೂಪಾಯಿ ಆಗಲಿದೆ. ಈ ಹೊಸ ಮಾಡೆಲ್ ಹಳೆಯ ವಿಎಕ್ಸ್2 ಪ್ಲಸ್ ಆವೃತ್ತಿಗಿಂತ ದೊಡ್ಡ ಬ್ಯಾಟರಿ ಪ್ಯಾಕ್ ಹೊಂದಿದ್ದು, ಚಾಲನಾ ವ್ಯಾಪ್ತಿಯನ್ನು (Driving Range) ಗಣನೀಯವಾಗಿ ಹೆಚ್ಚಿಸಿದೆ. ಇನ್ನುಳಿದಂತೆ ವಿನ್ಯಾಸ ಮತ್ತು ಪ್ರಮುಖ ಫೀಚರ್‌ಗಳನ್ನು ಹಳೆಯ ಮಾಡೆಲ್‌ನಂತೆಯೇ ಕಾಯ್ದುಕೊಳ್ಳಲಾಗಿದೆ.

ಸಿಂಗಲ್ ಚಾರ್ಜ್‌ನಲ್ಲಿ 187 ಕಿಲೋಮೀಟರ್ ಮೈಲೇಜ್!

ನೂತನ ವಿಡಾ ವಿಎಕ್ಸ್2 ಪ್ಲಸ್ ಇ-ಸ್ಕೂಟರ್‌ನ ಅತ್ಯಂತ ದೊಡ್ಡ ಆಕರ್ಷಣೆ ಎಂದರೆ ಇದರ 4.4kWh ಸಾಮರ್ಥ್ಯದ ಬೃಹತ್ ಬ್ಯಾಟರಿ ಪ್ಯಾಕ್. ಇದು ತಲಾ 2.2kWh ನ ಎರಡು 'ಕಳಚಬಹುದಾದ' (Removable Batteries) ಬ್ಯಾಟರಿಗಳಿಂದ ಮಾಡಲ್ಪಟ್ಟಿದೆ. ಈ ಬ್ಯಾಟರಿಗಳನ್ನು ಸ್ಕೂಟರ್‌ನಿಂದ ಅತ್ಯಂತ ಸುಲಭವಾಗಿ ಹೊರತೆಗೆದು ಮನೆ ಅಥವಾ ಕಚೇರಿಯಲ್ಲಿ ಸಾಮಾನ್ಯ ಪ್ಲಗ್ ಪಾಯಿಂಟ್ ಮೂಲಕವೇ ಚಾರ್ಜ್ ಮಾಡಿಕೊಳ್ಳಬಹುದು. ಈ ಸ್ಕೂಟರ್ ಅನ್ನು ಒಮ್ಮೆ ಪೂರ್ಣ ಚಾರ್ಜ್ ಮಾಡಿದರೆ ಬರೋಬ್ಬರಿ 187 ಕಿಲೋಮೀಟರ್‌ಗಳವರೆಗೆ ಐಡಿಸಿ (IDC) ರೇಂಜ್ ನೀಡುತ್ತದೆ ಎಂದು ಕಂಪನಿ ಹೇಳಿಕೊಂಡಿದೆ. ಇದು ಹಳೆಯ 3.4 kWh ಮಾಡೆಲ್‌ಗಿಂತ ಸುಮಾರು 41 ಕಿಮೀ ನಷ್ಟು ಹೆಚ್ಚಿನ ಮೈಲೇಜ್ ನೀಡಲಿದ್ದು, ಸುದೀರ್ಘ ಪ್ರಯಾಣವನ್ನು ಮತ್ತಷ್ಟು ಸುಲಭಗೊಳಿಸಲಿದೆ.

ಅತಿ ಕಡಿಮೆ ಅವಧಿಯಲ್ಲಿ ಸೂಪರ್ ಫಾಸ್ಟ್ ಚಾರ್ಜಿಂಗ್!

ಈ ಹೊಸ ಮಾಡೆಲ್‌ನೊಂದಿಗೆ ಕಂಪನಿಯು 1 ಕಿಲೋವ್ಯಾಟ್ (1 kW) ಸಾಮರ್ಥ್ಯದ ಫಾಸ್ಟ್ ಎಸಿ ಚಾರ್ಜರ್ ಅನ್ನು ನೀಡುತ್ತಿದೆ. ಇದರ ಸಹಾಯದಿಂದ ಬ್ಯಾಟರಿಯನ್ನು ಕೇವಲ 3 ಗಂಟೆ 17 ನಿಮಿಷಗಳಲ್ಲಿ ಶೂನ್ಯದಿಂದ ಶೇಕಡಾ 80 ರಷ್ಟು ಚಾರ್ಜ್ ಮಾಡಬಹುದು. ಇನ್ನು ಬ್ಯಾಟರಿ ಸಂಪೂರ್ಣವಾಗಿ (100%) ಚಾರ್ಜ್ ಆಗಲು ಸುಮಾರು 5 ಗಂಟೆ 8 ನಿಮಿಷಗಳು ಬೇಕಾಗುತ್ತದೆ. ಅದೇ ರೀತಿ ಗ್ರಾಹಕರು ಬ್ರ್ಯಾಂಡ್‌ನ 'ಡಿಸಿ ಫಾಸ್ಟ್ ಚಾರ್ಜರ್' (DC Fast Charger) ಬಳಸಿದರೆ, ಕೇವಲ 65 ನಿಮಿಷಗಳಲ್ಲಿ ಬ್ಯಾಟರಿಯನ್ನು ಶೇಕಡಾ 80 ರಷ್ಟು ಚಾರ್ಜ್ ಮಾಡಿಕೊಳ್ಳಬಹುದು. ಅಲ್ಲದೆ ಕೇವಲ ಎರಡೂವರೆ ಗಂಟೆಗಳಲ್ಲಿ ಬ್ಯಾಟರಿ ಸಂಪೂರ್ಣ ಚಾರ್ಜ್ ಆಗುತ್ತದೆ ಎಂದು ಕಂಪನಿ ಸ್ಪಷ್ಟಪಡಿಸಿದೆ.

ದಕ್ಷ ಕಾರ್ಯಕ್ಷಮತೆ ಮತ್ತು ಸುಲಭ ರೈಡಿಂಗ್

ವಿಡಾ ವಿಎಕ್ಸ್2 ಪ್ಲಸ್ ಎಲೆಕ್ಟ್ರಿಕ್ ಸ್ಕೂಟರ್‌ನಲ್ಲಿ 6kW ಸಾಮರ್ಥ್ಯದ ಬಲಿಷ್ಠ ಎಲೆಕ್ಟ್ರಿಕ್ ಮೋಟಾರ್ ಅಳವಡಿಸಲಾಗಿದೆ. ಇದು ಗಂಟೆಗೆ ಗರಿಷ್ಠ 90 ಕಿಲೋಮೀಟರ್ (Top Speed 90 km/h) ವೇಗದಲ್ಲಿ ಚಲಿಸುವ ಸಾಮರ್ಥ್ಯ ಹೊಂದಿದೆ. ಕಂಪನಿಯ ಅಧಿಕೃತ ಮಾಹಿತಿಯ ಪ್ರಕಾರ, ಈ ಸ್ಕೂಟರ್ ಕೇವಲ 3.1 ಸೆಕೆಂಡುಗಳಲ್ಲಿ ಶೂನ್ಯದಿಂದ 40 ಕಿಮೀ ವೇಗವನ್ನು ಪಡೆದುಕೊಳ್ಳುತ್ತದೆ. ಇ-ಸ್ಕೂಟರ್‌ನ ಒಟ್ಟು ತೂಕ 120 ಕೆಜಿ ಇದ್ದು, 777 ಎಂಎಂ ಎತ್ತರದ ಸೀಟ್ ಅನ್ನು ಅಳವಡಿಸಲಾಗಿದೆ. ಇದು ಎಲ್ಲಾ ಎತ್ತರದ ರೈಡರ್‌ಗಳಿಗೂ ಅತ್ಯಂತ ಸುಲಭ ಹಾಗೂ ಆರಾಮದಾಯಕ ಚಾಲನಾ ಅನುಭವ ನೀಡುತ್ತದೆ. ಇದರೊಂದಿಗೆ ಸೀಟಿನ ಕೆಳಗೆ 27.2 ಲೀಟರ್ ಬೂಟ್ ಸ್ಟೋರೇಜ್ ಮತ್ತು ಮುಂಭಾಗದಲ್ಲಿ ಹೆಚ್ಚುವರಿಯಾಗಿ 4.8 ಲೀಟರ್ ಸಂಗ್ರಹಣಾ ಸ್ಥಳಾವಕಾಶವನ್ನು ನೀಡಲಾಗಿದೆ.

ಹೈಟೆಕ್ ಹಾಗೂ ಸ್ಮಾರ್ಟ್ ಫೀಚರ್‌ಗಳ ಮಹಾಪೂರ

ಚಾಲಕನ ಸುರಕ್ಷತೆಗಾಗಿ ಸ್ಕೂಟರ್‌ನಲ್ಲಿ ಕಾಂಬಿ ಬ್ರೇಕಿಂಗ್ ಸಿಸ್ಟಮ್ (CBS) ತಂತ್ರಜ್ಞಾನವನ್ನು ನೀಡಲಾಗಿದ್ದು, ಮುಂಭಾಗದಲ್ಲಿ ಡಿಸ್ಕ್ ಬ್ರೇಕ್ ಮತ್ತು ಹಿಂಭಾಗದಲ್ಲಿ ಡ್ರಮ್ ಬ್ರೇಕ್‌ಗಳನ್ನು ಅಳವಡಿಸಲಾಗಿದೆ. ಇದರ ಜೊತೆಗೆ 12 ಇಂಚಿನ ಆಕರ್ಷಕ ಅಲಾಯ್ ವೀಲ್‌ಗಳು ಇವೆ. ಸುಲಭ ಪ್ರಯಾಣಕ್ಕಾಗಿ ಇಕೋ (Eco), ರೈಡ್ (Ride) ಮತ್ತು ಸ್ಪೋರ್ಟ್ (Sport) ಎಂಬ ಮೂರು ರೈಡಿಂಗ್ ಮೋಡ್‌ಗಳನ್ನು ನೀಡಲಾಗಿದೆ. ಇನ್ನುಳಿದಂತೆ 4.3 ಇಂಚಿನ ಟಿಎಫ್‌ಟಿ (TFT) ಡಿಸ್‌ಪ್ಲೇ, ಸ್ಮಾರ್ಟ್‌ಫೋನ್ ಕನೆಕ್ಟಿವಿಟಿ, ಟರ್ನ್-ಬೈ-ಟರ್ನ್ ನ್ಯಾವಿಗೇಷನ್ ಹಾಗೂ ಒಟಿಎ (OTA) ಅಪ್‌ಡೇಟ್‌ಗಳಂತಹ ಅತ್ಯಾಧುನಿಕ ಸ್ಮಾರ್ಟ್ ಫೀಚರ್‌ಗಳನ್ನು ಈ ಎಲೆಕ್ಟ್ರಿಕ್ ಸ್ಕೂಟರ್ ಒಳಗೊಂಡಿದೆ.

ಟಾಟಾ ಟಿಯಾಗೋ ಇವಿಗೆ ನಡುಕ ಹುಟ್ಟಿಸಲು ಬರ್ತಿದೆ ಮಾರುತಿ ಸುಜುಕಿಯ ಪುಟ್ಟ ಇವಿ; ಇದರ ಬೆಲೆ ತೀರಾ ಅಗ್ಗ!

Santosh Naik — Thu, 16 Jul 2026 22:28:34 +0530

ಮಾರುತಿ ಸುಜುಕಿ 'ವಿಷನ್ ಇ-ಸ್ಕೈ' ಎಂಬ ಹೊಸ, ಅಗ್ಗದ ಎಲೆಕ್ಟ್ರಿಕ್ ಕಾರನ್ನು ಪರಿಚಯಿಸಲು ಸಿದ್ಧತೆ ನಡೆಸಿದೆ. ಟಾಟಾ ಟಿಯಾಗೋ ಇವಿಗೆ ಪೈಪೋಟಿ ನೀಡಲಿರುವ ಈ ಕಾರು, ಒಂದೇ ಚಾರ್ಜ್‌ನಲ್ಲಿ 270 ಕಿ.ಮೀ ಮೈಲೇಜ್ ನೀಡುವ ನಿರೀಕ್ಷೆಯಿದೆ. ಜಾಗತಿಕ ಮಾರುಕಟ್ಟೆಯ ನಂತರ ಭಾರತದಲ್ಲೂ ಬಿಡುಗಡೆಯಾಗುವ ಸಾಧ್ಯತೆಗಳಿವೆ.

ಭಾರತೀಯ ವಾಹನ ಮಾರುಕಟ್ಟೆಯಲ್ಲಿ ಮಾರುತಿ ಸುಜುಕಿ ತನ್ನ ಮೊದಲ ಎಲೆಕ್ಟ್ರಿಕ್ ಕಾರು ‘ಇ-ವಿಟಾರಾ’ (e-Vitara) ಮಿಡ್‌ಸೈಜ್ ಎಸ್‌ಯುವಿಯನ್ನು ಬಿಡುಗಡೆ ಮಾಡಿದ್ದು, ಇದರ ಮಾರಾಟ ಪ್ರಕ್ರಿಯೆ ಹಂತಹಂತವಾಗಿ ವೇಗ ಪಡೆದುಕೊಳ್ಳುತ್ತಿದೆ. ಆದರೆ, ಮಧ್ಯಮ ವರ್ಗದ ಗ್ರಾಹಕರ ಬಜೆಟ್‌ಗೆ ಈ ಎಸ್‌ಯುವಿ ಕೊಂಚ ದುಬಾರಿಯಾಗಿದೆ. ಇದೇ ಕಾರಣಕ್ಕೆ ಸುಜುಕಿ ಕಂಪನಿಯು ಇದೀಗ ಸಾಮಾನ್ಯ ಜನರಿಗೂ ಕೈಗೆಟುಕುವ ದರದಲ್ಲಿ ಅತ್ಯಂತ ಅಗ್ಗದ ಎಂಟ್ರಿ ಲೆವೆಲ್ ಸಣ್ಣ ಎಲೆಕ್ಟ್ರಿಕ್ ಕಾರನ್ನು ಪರಿಚಯಿಸಲು ಭರ್ಜರಿಯಾಗಿ ಸಿದ್ಧತೆ ನಡೆಸುತ್ತಿದೆ.

ನಾವು ಮಾತನಾಡುತ್ತಿರುವುದು ಸುಜುಕಿ ಕಂಪನಿಯ ಮುಂಬರುವ ಹೊಸ ಪುಟ್ಟ ಎಲೆಕ್ಟ್ರಿಕ್ ಕಾರ್ ಆದ 'ವಿಷನ್ ಇ-ಸ್ಕೈ' (Vision e-Sky) ಕುರಿತು. ಈ ಕಾರು ಮಾರುಕಟ್ಟೆಯಲ್ಲಿ ಸದ್ಯ ಭಾರಿ ಸದ್ದು ಮಾಡುತ್ತಿರುವ ಟಾಟಾ ಟಿಯಾಗೋ ಇವಿ (Tiago EV) ಮತ್ತು ಎಂಜಿ ಕಾಮೆಟ್ ಇವಿ (MG Comet EV) ಕಾರುಗಳಿಗೆ ನೇರ ಪೈಪೋಟಿ ನೀಡಲಿದೆ. ಗಾತ್ರದಲ್ಲಿ ಇದು ಟಿಯಾಗೋ ಇವಿಗಿಂತ ಚಿಕ್ಕದಾಗಿದ್ದು, ಎಂಜಿ ಕಾಮೆಟ್‌ಗಿಂತ ದೊಡ್ಡದಾಗಿರಲಿದೆ. 2025ರ ಜಪಾನ್ ಮೊಬಿಲಿಟಿ ಶೋನಲ್ಲಿ ಸುಜುಕಿ ಕಂಪನಿಯು ಈ ಕಾರಿನ ಕಾನ್ಸೆಪ್ಟ್ ಮಾದರಿಯನ್ನು ಪ್ರದರ್ಶಿಸಿ ಈಗಾಗಲೇ ಎಲ್ಲರ ಗಮನ ಸೆಳೆದಿದೆ.

ಗಾತ್ರ ಮತ್ತು ವಿನ್ಯಾಸದ ದೃಷ್ಟಿಯಿಂದ ಈ ಕಾರು ಅತ್ಯಂತ ಪ್ರಾಯೋಗಿಕ ಹಾಗೂ ನಗರ ಪ್ರದೇಶದ ಬಳಕೆಗೆ ಸೂಕ್ತವಾಗಿರಲಿದೆ. ಈ ಕಾರು ಕೇವಲ 3395 ಎಂಎಂ ಉದ್ದ ಇರಲಿದ್ದರೆ, 1475 ಎಂಎಂ ಅಗಲ ಹೊಂದಿರಲಿದೆ. 1625 ಎಂಎಂ ಎತ್ತರ ಇರಲಿದೆ. ಅಂದರೆ, ಈ ಕಾರು ಸದ್ಯ ಮಾರುಕಟ್ಟೆಯಲ್ಲಿರುವ ಮಾರುತಿ ಸುಜುಕಿಯ ಸಣ್ಣ ಕಾರಾದ 'ಎಸ್-ಪ್ರೆಸೋ' (S-Presso) ಗಿಂತಲೂ ಗಾತ್ರದಲ್ಲಿ ಚಿಕ್ಕದಾಗಿರಲಿದೆ. ಇದು ಹೆವಿ ಟ್ರಾಫಿಕ್ ರಸ್ತೆಗಳಲ್ಲಿ ಸುಲಭವಾಗಿ ಚಲಿಸಲು ಮತ್ತು ಪಾರ್ಕಿಂಗ್ ಮಾಡಲು ಅತ್ಯಂತ ಸಹಕಾರಿಯಾಗಲಿದೆ.

ಈ ಸಣ್ಣ ಎಲೆಕ್ಟ್ರಿಕ್ ಕಾರು ಗಾತ್ರದಲ್ಲಿ ಕಿರಿದಾಗಿದ್ದರೂ ಮೈಲೇಜ್ ಸಾಮರ್ಥ್ಯದಲ್ಲಿ ಯಾವುದೇ ರಾಜಿ ಮಾಡಿಕೊಂಡಿಲ್ಲ. ಒಂದೇ ಚಾರ್ಜ್‌ನಲ್ಲಿ ಈ ಕಾರ್ ಬರೋಬ್ಬರಿ 270 ಕಿಲೋಮೀಟರ್ ಕ್ಲೈಮ್ಡ್ ರೇಂಜ್ (Claimed Range) ನೀಡಲಿದೆ ಎಂದು ವರದಿಗಳು ತಿಳಿಸಿವೆ. ಆರಂಭಿಕ ಹಂತದಲ್ಲಿ ಈ ಕಾರನ್ನು ಯುರೋಪ್ ಮಾರುಕಟ್ಟೆಯಲ್ಲಿ ಬಿಡುಗಡೆ ಮಾಡಲು ಕಂಪನಿ ಯೋಜಿಸುತ್ತಿದ್ದು, ಅಲ್ಲಿ ಇದು ಹೊಂಡಾ ಸೂಪರ್-ಎನ್ (Honda Super-N) ನಂತಹ ಕಾರುಗಳಿಗೆ ತೀವ್ರ ಪೈಪೋಟಿ ನೀಡಲಿದೆ.

ಸುಜುಕಿ ಕಂಪನಿಯು ಈ ಕಾರನ್ನು ಜಾಗತಿಕ ಮಾರುಕಟ್ಟೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ಸಿದ್ಧಪಡಿಸುತ್ತಿದೆ. ಸದ್ಯ ಲಭ್ಯವಿರುವ ವರದಿಗಳ ಪ್ರಕಾರ, ಸುಜುಕಿ ಬ್ರ್ಯಾಂಡ್ ಈ ಕಾರನ್ನು ಇದೇ ಆರ್ಥಿಕ ವರ್ಷದಲ್ಲಿ (Current Financial Year) ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಅಧಿಕೃತವಾಗಿ ಬಿಡುಗಡೆ ಮಾಡುವ ಸಾಧ್ಯತೆ ಇದೆ.

ಸದ್ಯಕ್ಕೆ ಸುಜುಕಿ ಕಂಪನಿಯು ಈ ಕಾರನ್ನು ಜಾಗತಿಕ ಮಾರುಕಟ್ಟೆಗಾಗಿ ವಿನ್ಯಾಸಗೊಳಿಸುತ್ತಿದೆ. ಆದರೆ, ಭಾರತದಲ್ಲಿ ಬಜೆಟ್ ಬೆಲೆಯ ಇವಿ ಕಾರುಗಳಿಗೆ ಇರುವ ಭಾರಿ ಬೇಡಿಕೆಯನ್ನು ಗಮನದಲ್ಲಿಟ್ಟುಕೊಂಡು, ಮಾರುತಿ ಸುಜುಕಿ ಈ ಕಾರಿನ ಭಾರತೀಯ ಆವೃತ್ತಿಯನ್ನು (Localized Version) ಇಲ್ಲಿ ಬಿಡುಗಡೆ ಮಾಡುವ ಸಾಧ್ಯತೆಗಳು ದಟ್ಟವಾಗಿವೆ. ಆದರೆ, ಮಾರುತಿ ಸುಜುಕಿ ಕಡೆಯಿಂದ ಈ ಬಗ್ಗೆ ಇನ್ನೂ ಯಾವುದೇ ಅಧಿಕೃತ ಪ್ರಕಟಣೆ ಹೊರಬಿದ್ದಿಲ್ಲ. ಗ್ರಾಹಕರು ಸದ್ಯ ಕಾಯ್ದು ನೋಡಬೇಕಾಗಿದೆ.