Asianet Suvarna News

ಎಲ್ಲರೂ ಕಾರ್ ತಗೊಳ್ತಿದ್ರೆ ಕನ್ನಡಿಗರ ನೆಚ್ಚಿನ ಗಾಯಕಿ ತಗೊಂಡ್ರು ಎಲೆಕ್ಟ್ರಿಕ್ ಬೈಕ್: ಅರ್ಚನಾ ಉಡುಪ ಬಾಲ್ಯದ ಕನಸು ನನಸು!

Santosh Naik — Tue, 25 Aug 2026 18:24:07 +0530

ಬೆಂಗಳೂರು (ಆ.25): ಸಿನಿಮಾ, ಧಾರವಾಹಿಗಳಲ್ಲಿ ನಟಿಸಿ ಫೇಮಸ್‌ ಆಗಿರುವ ಹಲವು ಮಂದಿ ತಮ್ಮ ಗ್ಯಾರೇಜ್‌ಗೆ ಒಂದು ಕಾರ್‌ ಇರಬೇಕು ಎನ್ನುವ ಕಾರಣಕ್ಕೆ ಹೊಸ ಹೊಸ ಕಾರ್‌ ಖರೀದಿ ಮಾಡಲು ಉತ್ಸಾಹ ತೋರುತ್ತಿದ್ದಾರೆ. ಇದರ ನಡುವೆ ಗಾಯಕಿ ಅರ್ಚನಾ ಉಡುಪ ಡಿಫರೆಂಟ್‌ ಆಗಿರುವ ಸಾಹಸ ಮಾಡಿದ್ದಾರೆ. ಹೌದು, ಎಲ್ಲರೂ ಕಾರ್‌ ಖರೀದಿ ಮಾಡ್ತಿರೋ ಟೈಮ್‌ನಲ್ಲಿ ಅರ್ಚನಾ ಉಡುಪ, ರಾಯಲ್‌ ಎನ್‌ಫೀಲ್ಡ್‌ ಕಂಪನಿಯ ಮೊಟ್ಟಮೊದಲ ಎಲೆಕ್ಟ್ರಿಕ್‌ ಬೈಕ್‌ Flying Felaಅನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಈ ಕುರಿತಾದ ವಿಡಿಯೋವೊಂದನ್ನು ಕೂಡ ಅವರು ಹಂಚಿಕೊಂಡಿದ್ದಾರೆ.

'ಚಿಕ್ಕ ವಯಸ್ಸಿನಲ್ಲೇ ಬೈಕ್ ಎಂದರೆ ಅದೇನೋ ಆಸೆ..ನನ್ನ ಹುಟ್ಟೂರಿನಲ್ಲಿ ಇದ್ದಾಗ, ನನ್ನ ಕಾಲುಗಳು ನೆಲಕ್ಕೆ ತಾಗದೇ ಇರುವಷ್ಟು ಪುಟ್ಟ ಹುಡುಗಿಯಾಗಿದ್ದಾಗಲೇ ಬೈಕ್ ಓಡಿಸಲು ಕಲಿತುಬಿಟ್ಟಿದ್ದೆ. ನನ್ನ ತಂದೆಯ ಸ್ನೇಹಿತ ಅಜಯ್ ನನ್ನ ಕುತೂಹಲವನ್ನು ಗಮನಿಸಿ ಅದಕ್ಕೆ ನೀರೆರೆದು ನನಗೆ ಬೈಕ್ ಓಡಿಸುವ ವಿದ್ಯೆ ಕಲಿಸಿದರು, ಆಗ ತಾನೇ ಹೊಸದಾಗಿ ಪರಿಚಯಿಸಲಾಗಿದ್ದ ಮೊಟ್ಟ ಮೊದಲ 4 ಸ್ಟ್ರೋಕ್ ಬೈಕ್ ಮೂಲಕ. ಅಲ್ಲಿಂದ ನನಗೆ ಮುಂದೊಂದು ದಿನ ನಾನೂ ಒಂದು ಬೈಕ್ ಖರೀದಿ ಮಾಡಬೇಕು, ಎಲ್ಲಾ ಕಡೆ ತಿರುಗಬೇಕು ಅನ್ನುವ ಹಂಬಲ ಮನದಲ್ಲಿ ಮನೆ ಮಾಡಿತ್ತು. ಅಂತೂ ಇಂತೂ ಇಂದು ನಾನು Royal Enfield ನ ಮೊಟ್ಟ ಮೊದಲ ವಿದ್ಯುತ್ ಚಾಲಿತ ವಾಹನ "Flying Fela" ಯನ್ನು ನನ್ನದಾಗಿಸಿಕೊಂಡಿದ್ದೇನೆ' ಎಂದು ಬರೆದುಕೊಂಡಿದ್ದಾರೆ.

Flying Fela ಮೂಲಕ ಬುಲೆಟ್ ಪ್ರಿಯರ ನೆಚ್ಚಿನ ರಾಯಲ್ ಎನ್‌ಫೀಲ್ಡ್ (Royal Enfield) ಸಂಸ್ಥೆಯು ಇವಿ ಮಾರುಕಟ್ಟೆಗೆ ಅಧಿಕೃತವಾಗಿ ಕಾಲಿಟ್ಟಿದೆ. ಹಳೆಯ ಕ್ಲಾಸಿಕ್ ವಿನ್ಯಾಸದ ಜೊತೆಗೆ ಆಧುನಿಕ ಟೆಕ್ನಾಲಜಿಯನ್ನು ಮೇಳೈಸಿರುವ ಈ ಬೈಕ್, ಪ್ರೀಮಿಯಂ ಎಲೆಕ್ಟ್ರಿಕ್ ಶ್ರೇಣಿಯಲ್ಲಿ ಭಾರಿ ಗಮನ ಸೆಳೆಯುತ್ತಿದೆ. ಮಹಾಯುದ್ಧದ ಸಮಯದಲ್ಲಿ ಪ್ಯಾರಾಚೂಟ್ ಮೂಲಕ ರವಾನಿಸುತ್ತಿದ್ದ ರಾಯಲ್ ಎನ್‌ಫೀಲ್ಡ್‌ನ ಹಗುರವಾದ 'ಫ್ಲೈಯಿಂಗ್ ಫ್ಲೀ' ಬೈಕ್‌ನ ಹೆಸರನ್ನೇ ಈ ಇವಿ ಮಾದರಿಗೂ ಮರುನಾಮಕರಣ ಮಾಡಲಾಗಿದೆ.

ಬೆಲೆ ಮತ್ತು ಬಣ್ಣಗಳು

ಬೆಲೆ: ₹2.79 ಲಕ್ಷ (ಎಕ್ಸ್‌-ಷೋರೂಮ್ ಬೆಂಗಳೂರು),
ಬಣ್ಣಗಳು: ಫ್ಲೀ ಗ್ರೀನ್ (Flea Green) ಮತ್ತು ಸ್ಟಾರ್ಮ್ ಬ್ಲ್ಯಾಕ್ (Storm Black).
ಸ್ಥಾನಮಾನ: ನಗರ ಪ್ರದೇಶದ ಸವಾರಿಯನ್ನು ಗಮನದಲ್ಲಿಟ್ಟುಕೊಂಡು ಇದನ್ನು ಪ್ರೀಮಿಯಂ ಇವಿ ವಿಭಾಗದಲ್ಲಿ ಬಿಡುಗಡೆ ಮಾಡಲಾಗಿದೆ.

ಬ್ಯಾಟರಿ, ಚಾರ್ಜಿಂಗ್ ಮತ್ತು ರೇಂಜ್ (Range)

ಬ್ಯಾಟರಿ ಸಾಮರ್ಥ್ಯ: 3.91kWh ಲಿಥಿಯಂ-ಐಯಾನ್ ಬ್ಯಾಟರಿ ಪ್ಯಾಕ್.
ಚಾಲನಾ ವ್ಯಾಪ್ತಿ (Range): ಒಂದೇ ಚಾರ್ಜ್‌ನಲ್ಲಿ ಗರಿಷ್ಠ 154 ಕಿ.ಮೀ ರೇಂಜ್ (IDC ಪ್ರಕಾರ) ನೀಡುತ್ತದೆ.
ಚಾರ್ಜಿಂಗ್ ಸಮಯ: 20% ರಿಂದ 80% ಚಾರ್ಜ್ ಆಗಲು ಕೇವಲ 65 ನಿಮಿಷ ಸಾಕು. ಸಂಪೂರ್ಣ (0-100%) ಚಾರ್ಜ್ ಆಗಲು 2 ಗಂಟೆ 16 ನಿಮಿಷ ಸಮಯ ತೆಗೆದುಕೊಳ್ಳುತ್ತದೆ.

ವೇಗ ಮತ್ತು ಪವರ್ (Performance)

ಮೋಟರ್ ಪವರ್: 15.4kW ಪೀಕ್ ಪವರ್ ಮತ್ತು 60Nm ಟಾರ್ಕ್ ಉತ್ಪಾದಿಸುವ ಮೋಟರ್ ಹೊಂದಿದ್ದು, ಗರಿಷ್ಠ 115kmph ವೇಗದಲ್ಲಿ ಚಲಿಸುತ್ತದೆ.
ಪಿಕಪ್: ಕೇವಲ 3.7 ಸೆಕೆಂಡುಗಳಲ್ಲಿ 0-60kmph ವೇಗ ಪಡೆದುಕೊಳ್ಳುತ್ತದೆ.
ತೂಕ: ಅಲ್ಯೂಮಿನಿಯಂ ಹಾಗೂ ಮೆಗ್ನೀಸಿಯಮ್ ಭಾಗಗಳನ್ನು ಬಳಸಿರುವುದರಿಂದ ಬೈಕ್‌ನ ತೂಕ ಕೇವಲ 124 ಕೆಜಿ ಇರಲಿದ್ದು, ಸಿಟಿ ಟ್ರಾಫಿಕ್‌ನಲ್ಲಿ ಸುಲಭವಾಗಿ ಚಲಾಯಿಸಲು ನೆರವಾಗುತ್ತದೆ.

ವಿನ್ಯಾಸ ಮತ್ತು ಸ್ಮಾರ್ಟ್ ಫೀಚರ್‌ಗಳು

ಕ್ಲಾಸಿಕ್ ವಿನ್ಯಾಸ: ರೌಂಡ್ ಹೆಡ್‌ಲ್ಯಾಂಪ್, 19-ಇಂಚಿನ ವೀಲ್‌ಗಳು ಮತ್ತು ವಿಶಿಷ್ಟವಾದ 'ಗರ್ಡರ್-ಸ್ಟೈಲ್' (Girder-style) ಫ್ರಂಟ್ ಸಸ್ಪೆನ್ಷನ್ ಬೈಕ್‌ಗೆ ಅಲ್ಟ್ರಾ-ರೆಟ್ರೋ ಲುಕ್ ನೀಡಿದೆ.
ಡಿಜಿಟಲ್ ಡಿಸ್ಪ್ಲೇ: ನ್ಯಾವಿಗೇಷನ್ ಹಾಗೂ ಸ್ಮಾರ್ಟ್‌ಫೋನ್ ಕನೆಕ್ಟಿವಿಟಿ ಹೊಂದಿರುವ 3.5-ಇಂಚಿನ ವರ್ತುಲಾಕಾರದ TFT ಟಚ್‌ಸ್ಕ್ರೀನ್ ಡ್ಯಾಶ್‌ಬೋರ್ಡ್ ನೀಡಲಾಗಿದೆ.

ಸುರಕ್ಷತೆ & ಹೈಟೆಕ್ ಆಯ್ಕೆಗಳು

ಲೀನ್-ಆಂಗಲ್ ಸೆನ್ಸಿಟಿವ್ ABS ಮತ್ತು ಟ್ರ್ಯಾಕ್ಷನ್ ಕಂಟ್ರೋಲ್.
ಕ್ರೂಸ್ ಕಂಟ್ರೋಲ್ (Cruise Control) ಹಾಗೂ ಹಿಲ್-ಹೋಲ್ಡ್ ಅಸಿಸ್ಟ್.
ಕೀಲೆಸ್ ಆಪರೇಷನ್ (Keyless), ಎಲೆಕ್ಟ್ರಾನಿಕ್ ಹ್ಯಾಂಡಲ್‌ಬಾರ್ ಲಾಕ್ ಮತ್ತು USB-C ಚಾರ್ಜಿಂಗ್ ಪೋರ್ಟ್.
ವಿವಿಧ ಚಾಲನಾ ವಿಧಾನಗಳಿಗೆ ತಕ್ಕಂತೆ ರೈಡಿಂಗ್ ಮೋಡ್‌ಗಳು.

ಸಾಂಪ್ರದಾಯಿಕ ಪೆಟ್ರೋಲ್ ಬೈಕ್‌ಗಳಿಂದ ಸಂಪೂರ್ಣ ಭಿನ್ನ ಹಾದಿ ಹಿಡಿದಿರುವ ರಾಯಲ್ ಎನ್‌ಫೀಲ್ಡ್, ತನ್ನ ಹೊಸ 'ಫ್ಲೈಯಿಂಗ್ ಫ್ಲೀ' ಸರಣಿಯ ಮೂಲಕ ಭಾರತೀಯ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ಮಾರುಕಟ್ಟೆಯಲ್ಲಿ ಹೊಸ ಅಧ್ಯಾಯವನ್ನು ಆರಂಭಿಸಿದೆ.

Bikes: ಬಿಗ್‌ ಆಫರ್‌; ಬೈಕ್ ಖರೀದಿಸುವ ಪ್ಲ್ಯಾನ್ ಇದ್ರೆ ಒಮ್ಮೆ ನೋಡಿ! 65 ಕಿಮೀ ಮೈಲೇಜ್, ಬೆಲೆ ಮಾತ್ರ ₹65,642!

Bhimasi M Koleppanavar — Fri, 21 Aug 2026 17:29:04 +0530

ಪೆಟ್ರೋಲ್ ಏರಿಕೆ ನಡುವೆ ಬಜೆಟ್ ಸ್ನೇಹಿ ಬೈಕ್ ಹುಡುಕಾಟವೇ? ನಿಮಗಾಗಿ ಇಲ್ಲಿದೆ ಹೋಂಡಾದ ಟಾಪ್-4 ಕಮ್ಯೂಟರ್ ಬೈಕ್‌ಗಳು!

ದಿನೇ ದಿನೇ ಏರುತ್ತಿರುವ ಪೆಟ್ರೋಲ್ ದರ ಮತ್ತು ಸಿಟಿ ಟ್ರಾಫಿಕ್‌ನಲ್ಲಿ ಕಡಿಮೆ ಮೈಲೇಜ್ ನೀಡುವ ವಾಹನಗಳಿಂದ ಸವಾರರು ಪರ್ಯಾಯ ಮಾರ್ಗಗಳನ್ನು ಹುಡುಕುತ್ತಿದ್ದಾರೆ. ದೈನಂದಿನ ಪ್ರಯಾಣಕ್ಕಾಗಿ ಅತ್ಯುತ್ತಮ ಮೈಲೇಜ್, ಕೈಗೆಟುಕುವ ಬೆಲೆ ಮತ್ತು ಉತ್ತಮ ಕಾರ್ಯಕ್ಷಮತೆ ನೀಡುವ ಬೈಕ್ ಖರೀದಿಸಲು ಬಯಸುವವರಿಗೆ ಹೋಂಡಾ ಕಂಪನಿಯ 4 ಜನಪ್ರಿಯ ಬೈಕ್‌ಗಳ ವಿವರ ಇಲ್ಲಿದೆ:

1. ಹೋಂಡಾ ಶೈನ್ 100 (Honda Shine 100)!

ದೈನಂದಿನ ಪ್ರಯಾಣಕ್ಕೆ ಮತ್ತು ಕೆಲಸಕ್ಕೆ ಹೋಗುವ ವೃತ್ತಿಪರರಿಗೆ ಇದು ಅತ್ಯಂತ ಆರಾಮದಾಯಕ ಹಾಗೂ ಕೈಗೆಟುಕುವ ಬೆಲೆಯ ಬೈಕ್.

ಬೆಲೆ; ₹65,642 (ಎಕ್ಸ್-ಶೋರೂಂ)

ಎಂಜಿನ್ ಹಾಗೂ ಪವರ್; 98.98cc, ಏರ್-ಕೂಲ್ಡ್ ಎಂಜಿನ್ (7.28 bhp ಪವರ್, 8.05 Nm ಟಾರ್ಕ್, 4-ಸ್ಪೀಡ್ ಗೇರ್‌ಬಾಕ್ಸ್).

ವಿಶೇಷತೆಗಳು; 99 ಕೆಜಿ ತೂಕ, ಅನಲಾಗ್ ಕ್ಲಸ್ಟರ್, ಸೈಡ್-ಸ್ಟ್ಯಾಂಡ್ ಎಂಜಿನ್ ಕಟ್-ಆಫ್, ಸಿಬಿಎಸ್ ಬ್ರೇಕಿಂಗ್.

ಮೈಲೇಜ್; 60 ರಿಂದ 65 ಕಿಮೀ/ಲೀ.

ಹೋಂಡಾ ಲಿವೊ (Honda Livo)!

110 ಸಿಸಿ ವಿಭಾಗದಲ್ಲಿ ಸ್ಪೋರ್ಟಿ ಹಾಗೂ ಪ್ರೀಮಿಯಂ ಲುಕ್ ಬಯಸುವ ಯುವಜನತೆಗೆ ಇದು ಸೂಕ್ತ ಆಯ್ಕೆ.

ಬೆಲೆ; ₹78,500 - ₹82,500 (ಎಕ್ಸ್-ಶೋರೂಂ)

ಎಂಜಿನ್ ಹಾಗೂ ಪವರ್; 109.51cc eSP ಎಂಜಿನ್ (8.67 bhp ಪವರ್, 9.30 Nm ಟಾರ್ಕ್, 4-ಸ್ಪೀಡ್ ಗೇರ್‌ಬಾಕ್ಸ್).

ವಿಶೇಷತೆಗಳು; ಅಥ್ಲೆಟಿಕ್ ವಿನ್ಯಾಸ, ಸೆಮಿ-ಡಿಜಿಟಲ್ ಕ್ಲಸ್ಟರ್, ಸರ್ವಿಸ್ ಇಂಡಿಕೇಟರ್, ಎಂಜಿನ್ ಕಿಲ್ ಸ್ವಿಚ್, ಐಚ್ಛಿಕ ಡಿಸ್ಕ್ ಬ್ರೇಕ್.

ಮೈಲೇಜ್; 55 ರಿಂದ 60 ಕಿಮೀ/ಲೀ.

ಹೋಂಡಾ ಶೈನ್ 125 (Honda Shine 125)!

ದೇಶದಲ್ಲೇ ಅತ್ಯಂತ ಹೆಚ್ಚು ಮಾರಾಟವಾಗುವ 125 ಸಿಸಿ ಬೈಕ್ ಇದಾಗಿದ್ದು, ಕುಟುಂಬದೊಂದಿಗೆ ಸವಾರಿ ಮಾಡಲು ಪ್ರಶಸ್ತವಾಗಿದೆ.

ಬೆಲೆ; ₹80,000 - ₹84,000 (ಎಕ್ಸ್-ಶೋರೂಂ)

ಎಂಜಿನ್ ಹಾಗೂ ಪವರ್; 123.94cc SI ಎಂಜಿನ್ (10.59 bhp ಪವರ್, 11 Nm ಟಾರ್ಕ್, 5-ಸ್ಪೀಡ್ ಗೇರ್‌ಬಾಕ್ಸ್).

ವಿಶೇಷತೆಗಳು; 'ಸೈಲೆಂಟ್ ಸ್ಟಾರ್ಟ್' ತಂತ್ರಜ್ಞಾನ, ಕ್ರೋಮ್ ಫಿನಿಶಿಂಗ್, 3D ಲೋಗೋ, ಕಂಪನ-ಮುಕ್ತ ಸವಾರಿ.

ಮೈಲೇಜ್; 55 ರಿಂದ 60 ಕಿಮೀ/ಲೀ.

4. ಹೋಂಡಾ SP 125 (Honda SP 125)

ಸ್ಟೈಲಿಶ್ ಲುಕ್ ಜೊತೆಗೆ ಅತ್ಯಾಧುನಿಕ ಡಿಜಿಟಲ್ ತಂತ್ರಜ್ಞಾನ ಬಯಸುವ ಯುವಕರ ಮೊದಲ ಆಯ್ಕೆ.

ಬೆಲೆ; ₹86,000 - ₹90,500 (ಎಕ್ಸ್-ಶೋರೂಂ)

ಎಂಜಿನ್ ಹಾಗೂ ಪವರ್; 123.94cc PGM-FI ಎಂಜಿನ್ (10.72 bhp ಪವರ್, 10.9 Nm ಟಾರ್ಕ್, 5-ಸ್ಪೀಡ್ ಗೇರ್‌ಬಾಕ್ಸ್).

ವಿಶೇಷತೆಗಳು; ಫುಲ್ ಡಿಜಿಟಲ್ LCD ಕ್ಲಸ್ಟರ್ (ರಿಯಲ್-ಟೈಮ್ ಮೈಲೇಜ್ ತೋರಿಸುತ್ತದೆ), LED ಹೆಡ್‌ಲ್ಯಾಂಪ್, ಸ್ಪೋರ್ಟಿ ಲುಕ್.

ಮೈಲೇಜ್; 60 ರಿಂದ 65 ಕಿಮೀ/ಲೀ.

ನೀವು ಕಡಿಮೆ ಬೆಲೆಗೆ ಗರಿಷ್ಠ ಮೈಲೇಜ್ ಬಯಸಿದರೆ ಶೈನ್ 100, ಪ್ರೀಮಿಯಂ ಲುಕ್ ಮತ್ತು ಆಧುನಿಕ ಫೀಚರ್ಸ್ ಬೇಕಿದ್ದರೆ SP 125 ಸೂಕ್ತ.

Baleno Facelift: ಹೊಸ ಬಲೆನೋದಲ್ಲಿ ಏನೆಲ್ಲಾ ಬದಲಾವಣೆ? CNG ಜೊತೆ ಆಟೋಮ್ಯಾಟಿಕ್ ಗೇರ್ ಕೂಡ ಸಿಗುತ್ತಾ?

Naveen Kodase — Mon, 24 Aug 2026 18:33:00 +0530

ಮಾರುತಿ ಸುಜುಕಿಯ ಜನಪ್ರಿಯ ಪ್ರೀಮಿಯಂ ಹ್ಯಾಚ್‌ಬ್ಯಾಕ್ ಬಲೆನೋ, ಈಗ ಹೊಸ ರೂಪದಲ್ಲಿ ಮಾರುಕಟ್ಟೆಗೆ ಎಂಟ್ರಿ ಕೊಡಲು ಸಿದ್ಧವಾಗಿದೆ. ವರದಿಗಳ ಪ್ರಕಾರ, ಇದರ ಫೇಸ್‌ಲಿಫ್ಟ್ ಮಾಡೆಲ್ ಸೆಪ್ಟೆಂಬರ್ 5 ರಂದು ಬಿಡುಗಡೆಯಾಗಲಿದೆ. ಕಾರಿನ ಡಿಸೈನ್ ಜೊತೆಗೆ ಹಲವು ಹೊಸ ಫೀಚರ್‌ಗಳನ್ನೂ ಕಂಪನಿ ಇದರಲ್ಲಿ ನೀಡಲಿದೆ. 2022ರಲ್ಲಿ ಸದ್ಯದ ಜನರೇಷನ್ ಬಲೆನೋ ಲಾಂಚ್ ಆಗಿತ್ತು. ಈಗ ಬರುತ್ತಿರುವ ಫೇಸ್‌ಲಿಫ್ಟ್‌ನಲ್ಲಿ ಕಾರಿನ ಮುಂಭಾಗ ಮತ್ತು ಒಳಭಾಗದಲ್ಲಿ ಬದಲಾವಣೆಗಳನ್ನು ಮಾಡಲಾಗುವುದು ಎನ್ನಲಾಗಿದೆ. ಈ ಹೊಸ ಫೀಚರ್‌ಗಳ ಮೂಲಕ ಪ್ರೀಮಿಯಂ ಹ್ಯಾಚ್‌ಬ್ಯಾಕ್ ಸೆಗ್ಮೆಂಟ್‌ನಲ್ಲಿ ಸ್ಪರ್ಧೆಯನ್ನು ಮತ್ತಷ್ಟು ಹೆಚ್ಚಿಸಲು ಮಾರುತಿ ಪ್ಲ್ಯಾನ್ ಮಾಡಿದೆ.

1. ವೆಂಟಿಲೇಟೆಡ್ ಸೀಟ್‌ಗಳು

ಹೊಸ ಬಲೆನೋದಲ್ಲಿ ವೆಂಟಿಲೇಟೆಡ್ ಫ್ರಂಟ್ ಸೀಟ್‌ಗಳು ಸಿಗುವ ಸಾಧ್ಯತೆ ಇದೆ. ಬಿಸಿಲಿನ ವಾತಾವರಣದಲ್ಲಿ ಈ ಫೀಚರ್ ಸೀಟ್‌ಗಳ ಮೂಲಕ ಗಾಳಿಯಾಡುವಂತೆ ಮಾಡಿ, ಬೆನ್ನಿಗೆ ಆರಾಮ ನೀಡುತ್ತದೆ. ಭಾರತದ ಬೇಸಿಗೆಯಲ್ಲಿ ಈ ಫೀಚರ್ ಪ್ರಯಾಣವನ್ನು ಇನ್ನಷ್ಟು ಸುಖಕರವಾಗಿಸುತ್ತದೆ. ಇಲ್ಲಿಯವರೆಗೆ ದುಬಾರಿ ಕಾರುಗಳಲ್ಲಿ ಮಾತ್ರ ಕಾಣಸಿಗುತ್ತಿದ್ದ ಈ ಸೌಲಭ್ಯ, ಬಲೆನೋಗೆ ಪ್ರೀಮಿಯಂ ಅನುಭವವನ್ನು ನೀಡಲಿದೆ.

2. ವೈರ್‌ಲೆಸ್ ಫೋನ್ ಚಾರ್ಜರ್

ಕ್ಯಾಬಿನ್‌ನಲ್ಲಿ ವೈರ್‌ಲೆಸ್ ಫೋನ್ ಚಾರ್ಜರ್ ಕೂಡ ಸಿಗುವ ಸಾಧ್ಯತೆ ಇದೆ. ಇದರಿಂದ ಫೋನ್‌ಗೆ ಕೇಬಲ್ ಹಾಕುವ ಕಿರಿಕಿರಿ ಇರುವುದಿಲ್ಲ ಮತ್ತು ಸೆಂಟರ್ ಕನ್ಸೋಲ್ ಕೂಡ ಕ್ಲೀನ್ ಆಗಿ ಕಾಣಿಸುತ್ತದೆ. ವೈರ್‌ಲೆಸ್ ಕನೆಕ್ಟಿವಿಟಿ ಇರುವ ಇನ್ಫೋಟೈನ್‌ಮೆಂಟ್ ಜೊತೆಗೆ ಈ ಫೀಚರ್ ಸಿಕ್ಕರೆ, ಪ್ರಯಾಣಿಕರಿಗೆ ಕ್ಯಾಬಿನ್ ಅನುಭವ ಇನ್ನಷ್ಟು ಉತ್ತಮವಾಗಲಿದೆ.

3. ದೊಡ್ಡ ಟಚ್‌ಸ್ಕ್ರೀನ್

ಸದ್ಯದ 9-ಇಂಚಿನ ಟಚ್‌ಸ್ಕ್ರೀನ್ ಬದಲು, ಹೊಸ ಬಲೆನೋದಲ್ಲಿ 10.1-ಇಂಚಿನ ದೊಡ್ಡ ಟಚ್‌ಸ್ಕ್ರೀನ್ ಇರಲಿದೆ ಎಂದು ವರದಿಗಳು ಹೇಳುತ್ತಿವೆ. ಇದರೊಂದಿಗೆ ವೈರ್‌ಲೆಸ್ ಆ್ಯಪಲ್ ಕಾರ್‌ಪ್ಲೇ ಮತ್ತು ಆಂಡ್ರಾಯ್ಡ್ ಆಟೋ ಸೌಲಭ್ಯಗಳೂ ಸಿಗುವ ನಿರೀಕ್ಷೆಯಿದೆ. ಮಾರುತಿಯ ಹೊಸ ಮಾಡೆಲ್‌ಗಳಲ್ಲಿ ಪರಿಚಯಿಸಲಾದ ಇನ್ಫೋಟೈನ್‌ಮೆಂಟ್ ಸಿಸ್ಟಮ್‌ನ ಸುಧಾರಿತ ಆವೃತ್ತಿ ಇದಾಗಿರಬಹುದು.

4. CNG ಜೊತೆಗೆ AMT ಗೇರ್‌ಬಾಕ್ಸ್?

ಹೊಸ ಬಲೆನೋ ಬಗ್ಗೆ ಕೇಳಿಬರುತ್ತಿರುವ ಅತ್ಯಂತ ಕುತೂಹಲಕಾರಿ ವರದಿ ಎಂದರೆ, CNG ಮಾಡೆಲ್ ಜೊತೆಗೆ AMT (ಆಟೋಮ್ಯಾಟಿಕ್) ಗೇರ್‌ಬಾಕ್ಸ್ ಸಿಗಬಹುದು ಎಂಬುದು. ಸದ್ಯಕ್ಕೆ ಮಾರುತಿಯ ಯಾವುದೇ CNG ಕಾರುಗಳಲ್ಲಿ ಆಟೋಮ್ಯಾಟಿಕ್ ಗೇರ್‌ಬಾಕ್ಸ್ ಆಯ್ಕೆ ಇಲ್ಲ. ಆದರೆ ಹೊಸ ಬಲೆನೋದಲ್ಲಿ CNG-AMT ಕಾಂಬಿನೇಷನ್ ಪರಿಚಯಿಸಲು ಕಂಪನಿ ಸಿದ್ಧತೆ ನಡೆಸಿದೆ ಎಂದು ಕೆಲವು ವರದಿಗಳು ಸೂಚಿಸುತ್ತವೆ. ಇದು ನಿಜವಾದರೆ, ಮಾರುತಿಯ ಫ್ಯಾಕ್ಟರಿ-ಫಿಟೆಡ್ CNG ಕಾರುಗಳಲ್ಲೇ ಇದೊಂದು ದೊಡ್ಡ ಬದಲಾವಣೆಯಾಗಲಿದೆ.

5. ADAS ಸುರಕ್ಷತಾ ವ್ಯವಸ್ಥೆ

ಹೊಸ ಬಲೆನೋದಲ್ಲಿನ ಅತ್ಯಂತ ಗಮನಾರ್ಹ ಬದಲಾವಣೆ ಎಂದರೆ ಲೆವೆಲ್ 1 ADAS (ಅಡ್ವಾನ್ಸ್ಡ್ ಡ್ರೈವರ್ ಅಸಿಸ್ಟೆನ್ಸ್ ಸಿಸ್ಟಮ್ಸ್). ಇದರಲ್ಲಿ ರಿಯರ್ ಕ್ರಾಸ್-ಟ್ರಾಫಿಕ್ ಅಲರ್ಟ್, ಬ್ಲೈಂಡ್-ಸ್ಪಾಟ್ ವಾರ್ನಿಂಗ್ ಮತ್ತು ಸೇಫ್-ಎಕ್ಸಿಟ್ ಅಲರ್ಟ್‌ನಂತಹ ಸುರಕ್ಷತಾ ಫೀಚರ್‌ಗಳು ಇರಲಿವೆ ಎಂದು ಹೇಳಲಾಗುತ್ತಿದೆ. ನಗರದ ದಟ್ಟಣೆಯ ರಸ್ತೆಗಳಲ್ಲಿ ಮತ್ತು ಪಾರ್ಕಿಂಗ್ ಸಮಯದಲ್ಲಿ ಇಂತಹ ಫೀಚರ್‌ಗಳು ಡ್ರೈವರ್‌ಗೆ ಹೆಚ್ಚಿನ ಸುರಕ್ಷತೆ ನೀಡಲು ಸಹಾಯ ಮಾಡುತ್ತವೆ. ಆದರೆ, ADAS ಯಾವ ವೇರಿಯೆಂಟ್‌ಗಳಲ್ಲಿ ಲಭ್ಯವಾಗಲಿದೆ ಎಂಬ ಬಗ್ಗೆ ಕಂಪನಿ ಇನ್ನೂ ಅಧಿಕೃತ ಮಾಹಿತಿ ನೀಡಿಲ್ಲ.

6. ಡಿಸೈನ್‌ನಲ್ಲೂ ಬದಲಾವಣೆ

ಹೊಸ ಬಲೆನೋದ ಮುಂಭಾಗದಲ್ಲಿ ಹೊಸ ಗ್ರಿಲ್, ಹೊಸ ಬಂಪರ್ ಮತ್ತು ಪರಿಷ್ಕೃತ ಹೆಡ್‌ಲ್ಯಾಂಪ್‌ಗಳು ಇರಲಿವೆ. ಹೊಸ ವಿನ್ಯಾಸದ ಅಲಾಯ್ ವೀಲ್‌ಗಳು ಕೂಡ ಕಾರಿನ ಲುಕ್ ಬದಲಿಸಲಿವೆ. ಹಿಂಭಾಗದ ಡಿಸೈನ್‌ನಲ್ಲಿ ದೊಡ್ಡ ಬದಲಾವಣೆಗಳ ಸಾಧ್ಯತೆ ಕಡಿಮೆ. ಆದರೆ, ರಿಯರ್ ಬಂಪರ್‌ನಲ್ಲಿ ಸಣ್ಣಪುಟ್ಟ ಬದಲಾವಣೆಗಳನ್ನು ನಿರೀಕ್ಷಿಸಬಹುದು. ಸೆಪ್ಟೆಂಬರ್ 5 ರಂದು ಕಾರು ಅಧಿಕೃತವಾಗಿ ಬಿಡುಗಡೆಯಾದಾಗ, ಹೊಸ ಬಲೆನೋದ ಫೀಚರ್‌ಗಳು, ವೇರಿಯೆಂಟ್‌ಗಳು, CNG-AMT ಆಯ್ಕೆ ಮತ್ತು ಬೆಲೆಯ ಬಗ್ಗೆ ಸ್ಪಷ್ಟ ಚಿತ್ರಣ ಸಿಗಲಿದೆ.

1,100 ಕಿ.ಮಿ ಮೈಲೇಜ್, JSW ಎಂಜಿ ಟೊಮಾಹಾಕ್ ಪ್ಲಗ್ ಇನ್ ಹೈಬ್ರಿಡ್ ಕಾರು ಭಾರತದಲ್ಲಿ ಲಾಂಚ್

Chethan Kumar — Wed, 26 Aug 2026 15:14:06 +0530

ನವದೆಹಲಿ (ಆ.26) JSW ಎಂಜಿ ಮೋಟಾರ್ ಹೊಚ್ಚ ಹೊಸ ಎಂಜಿ ಟೊಮಾಹಾಕ್ ಕಾರು ಭಾರತದಲ್ಲಿ ಲಾಂಚ್ ಮಾಡಿದೆ. ಹೊಸ ತಂತ್ರಜ್ಞಾನ ಬಳಸಿಕೊಂಡು ನೂತನ ಕಾರು ಭಾರತದಲ್ಲಿ ಮಾರುಕಟ್ಟೆಗೆ ಲಗ್ಗೆ ಇಟ್ಟಿದೆ. ಇದು ಪ್ಲಗ್ ಇನ್ ಹೈಬ್ರಿಡ್ ಕಾರಾಗಿದೆ. ವಿಶೇಷ ಇಂದರೆ ಒಂದು ಫುಲ್ ಟ್ಯಾಂಕ್‌ಗೆ ಈ ಕಾರು ಬರೋಬ್ಬರಿ 1,100 ಕಿಲೋಮೀಟರ್ ಮೈಲೇಜ್ ನೀಡಲಿದೆ. ಪವರ್‌ಫುಲ್ ಇಂಧನ ಎಂಜಿನ್ ಹಾಗೂ ಎಲೆಕ್ಟ್ರಿಕ್ ಮೋಟಾರ್ ಹೊಂದಿರುವ ಈ ಕಾರು ಅತ್ಯಾಧುನಿಕ ತಂತ್ರಜ್ಞಾನ ಹೊಂದಿದೆ.

ಹೊಚ್ಚ ಹೊಸ ಕಾರಿನ ಬೆಲೆ

ಟೊಮಾಹಾಕ್ PHEV ಕಾರಿನ ಆರಂಭಿಕ ಬೆಲೆ 21.79 ಲಕ್ಷ ರೂಪಾಯಿ (ಎಕ್ಸ್ ಶೋ ರೂಂ). ಇದು ಬ್ಯಾಟರಿ ಸಬ್‌ಸ್ಕ್ರಿಪ್ಶನ್ ಮೂಲಕ ಈ ಕಾರು ಖರೀದಿಸಿದರೆ ಈ ಬೆಲೆಗೆ ಲಭ್ಯವಾಗಲಿದೆ. ಬ್ಯಾಟರಿ ಆಸ್ ಎ ಸರ್ವಿಸ್ (BaaS) ಯೋಜನೆಯಡಿ, ಬ್ಯಾಟರಿ ಸಬ್‌ಸ್ಕ್ರಿಪ್ಷನ್ ವೆಚ್ಚ ₹3.2 ಪ್ರತಿ ಕಿಲೋಮೀಟರ್ ಆಗಿದೆ. ಖಾಯಂ ಬ್ಯಾಟರಿ ಇರೋ ಖಾರು ಖರೀದಿಸಿದರೆ 25.69 ಲಕ್ಷ ರೂಪಾಯಿ (ಎಕ್ಸ್ ಶೋ ರೂಂ). ವಿಶೇಷ ಅಂದರೆ JSW ಎಂಜಿ ಇದರಲ್ಲಿ BEV ಎಡಿಶನ್ ಕಾರು ಬಿಡುಗಡೆ ಮಾಡಿದೆ. ಈ ಕಾರಿನ ಆರಂಭಿಕ ಬೆಲೆ 13.99 ಲಕ್ಷ ರೂಪಾಯಿ (ಬ್ಯಾಟರಿ ಸಬ್‌ಸ್ಕ್ರಿಪ್ಶನ್),ಈ ಕಾರು 69.2 kWh ಬ್ಯಾಟರಿ ಪ್ಯಾಕ್ ಹೊಂದಿದೆ. ಈ ಎಡಿಶನ್ ಕಾರು 517 ಕಿಲೋಮೀಟರ್ ಮೈಲೇಜ್ ರೇಂಜ್ ನೀಡಲಿದೆ.

PHEV ಹಲವು ವೇರಿಯೆಂಟ್‌ನಲ್ಲಿ ಲಭ್ಯವಿದೆ. ಪ್ಲಗ್ ಇನ್ ಹೈಬ್ರಿಡ್ ಕಾರಿನಲ್ಲಿ ಗ್ಲಾಸಿ ಗ್ರಿಲ್ ನೀಡಲಾಗಿದೆ. ಟೊಮಾಹಾಕ್ ಐದು ಸೀಟರ್ ಹಾಗೂ 7 ಸೀಟರ್ ಆಯ್ಕೆ ಲಭ್ಯವಿದೆ. 5 ಸೀಟರ್ 610 ಲೀಟರ್ ಬೂಟ್ ಸ್ಪೇಸ್ ನೀಡಲಿದೆ. ಇನ್ನು 7 ಸೀಟರ್ ಕಾರಿನ ಬೂಟ್ ಸ್ಪೇಸ್ 192 ಲೀಟರ್. ಮೂರನೇ ರೋ ಸೀಟು ಮಡಟಿದರೆ 528 ಲೀಟರ್ ಬೂಟ್ ಸ್ಪೇಸ್ ಲಭ್ಯವಿದೆ. ಟೊಮಾಹಾಕ್ PHEVಯಲ್ಲಿ 1.5-ಲೀಟರ್ ಪೆಟ್ರೋಲ್ ಎಂಜಿನ್ ಹೊಂದಿದೆ. ಡೆಡಿಕೇಟೆಡ್ ಹೈಬ್ರಿಡ್ ಟ್ರಾನ್ಸ್‌ಮಿಷನ್ (DHT) ಮತ್ತು 20.5 kWh ಬ್ಯಾಟರಿ ಪ್ಯಾಕ್ ಹೊಂದಿದೆ. ಹೀಗಾಗಿ ಎಲೆಕ್ಟ್ರಿಕ್ ಮೋಟಾರ್ ಮೂಲಕ 115 ಕಿ.ಮೀ ಮೈಲೇಜ್ ರೇಂಜ್ ನೀಡಲಿದೆ. ಫುಲ್ ಟ್ಯಾಂಕ್ ಇಂಧನ ಹಾಗೂ ಬ್ಯಾಟರಿ ಸಂಪೂರ್ಣ ಚಾರ್ಜ್ ಆಗಿದ್ದರೆ 1100 ಕಿಲೋಮೀಟರ್ ಮೈಲೇಜ್ ನೀಡಲಿದೆ. 0-100 ಕಿ.ಮೀ ವೇಗವನ್ನು 9 ಸೆಕೆಂಡ್‌ಗಳಲ್ಲಿ ತಲುಪಲಿದೆ.

ಪೂರ್ಣ ಚಾರ್ಜ್ ಮತ್ತು ಪೂರ್ಣ ಟ್ಯಾಂಕ್‌ನಲ್ಲಿ ಸಿಸ್ಟಮ್‌ನ ಒಟ್ಟು ರೇಂಜ್ 1100 ಕಿ.ಮೀ. ಎಂದು ಕಂಪನಿ ಹೇಳಿಕೊಂಡಿದೆ. ಈ ಸಂಯೋಜನೆಯು 148 kW ಎಲೆಕ್ಟ್ರಿಕ್ ಮೋಟಾರ್‌ನಿಂದ ಬೆಂಬಲಿತವಾಗಿದೆ. ಇದರೊಂದಿಗೆ, ಕಾರು 0 ರಿಂದ 100 ಕಿ.ಮೀ.ಪ್ರತಿ ಗಂಟೆ ವೇಗವನ್ನು ಸುಮಾರು 9 ಸೆಕೆಂಡ್‌ಗಳಲ್ಲಿ ತಲುಪುತ್ತದೆ.

15.6-ಇಂಚಿನ ಟಚ್‌ಸ್ಕ್ರೀನ್ ಇನ್ಫೋಟೈನ್ಮೆಂಟ್‌ ಸಿಸ್ಟಮ್, 8.8-ಇಂಚಿನ ಡಿಜಿಟಲ್ ಇನ್‌ಸ್ಟ್ರುಮೆಂಟ್ ಕ್ಲಸ್ಟರ್, ವೈರ್‌ಲೆಸ್ ಆ್ಯಪಲ್ ಕಾರ್‌ಪ್ಲೇ ಮತ್ತು ಆ್ಯಂಡ್ರಾಯ್ಡ್ ಆಟೋ ಪ್ಲೇ, ವೈರ್‌ಲೆಸ್ ಫೋನ್ ಚಾರ್ಜರ್, ಎಂಜಿ ಮೋಟಾರ್ಸ್‌ನ i-SMART ಕನೆಕ್ಟೆಡ್ ಸಿಸ್ಟಮ್ ಹೊಂದಿದೆ. ಈ ಮೂಲಕ 90ಕ್ಕೂ ಹೆಚ್ಚು ಕನೆಕ್ಟೆಡ್ ಫೀಚರ್ಸ್ ನೀಡಲಿದೆ. ಪ್ಯಾನರೋಮಿಕ್ ಸನ್‌ಸೂಫ್, ವೆಂಟಿಲೇಟರ್ ಸನ್‌ರೂಫ್ ಸೇರಿದಂತೆ ಹಲವು ವಿಶೇಷತೆಗಳಿವೆ.

ಟ್ರಾನ್ಸ್‌ಫಾರ್ಮರ್ ಕದಿಯೋಕೆ ಹೋದ್ರು; ಕೆಸರು ‘ನೋ ಎಂಟ್ರಿ’ ಅಂದಿತು! ಕಳ್ಳರ ಕಾರು-ಟ್ರಕ್‌ ಎರಡೂ ಸಿಕ್ಕಿಬಿತ್ತು

Sushma Hegde — Mon, 24 Aug 2026 14:26:22 +0530

ಟ್ರಾನ್ಸ್‌ಫಾರ್ಮರ್ ಕಳ್ಳತನಕ್ಕೆ ಪಕ್ಕಾ ಪ್ಲ್ಯಾನ್ ಮಾಡಿಕೊಂಡು ಬಂದಿದ್ದ ಕಳ್ಳರಿಗೆ ಕೆಸರಿನ ಗದ್ದೆಯೇ ದೊಡ್ಡ ತಡೆಯಾಗಿ ಪರಿಣಮಿಸಿದೆ. ಮೊದಲು ಕಳ್ಳರ ಕಾರು ಕೆಸರಿನಲ್ಲಿ ಸಿಲುಕಿಕೊಂಡಿದ್ದು, ಅದನ್ನು ಹೊರತೆಗೆಯಲು ತಂದ ರಿಕವರಿ ಟ್ರಕ್‌ ಕೂಡ ಅದೇ ಜಾಗದಲ್ಲಿ ಸಿಕ್ಕಿಹಾಕಿಕೊಂಡಿದೆ. ಪಂಜಾಬ್‌ನ ಮೋಗಾ ಜಿಲ್ಲೆಯ ತಖ್ತುಪುರ ಗ್ರಾಮದಲ್ಲಿ ಈ ಘಟನೆ ನಡೆದಿದೆ. ವರದಿಗಳ ಪ್ರಕಾರ, ಶನಿವಾರ ತಡರಾತ್ರಿ ಮೂವರು ವ್ಯಕ್ತಿಗಳು ರೈತರೊಬ್ಬರ ಹೊಲದಲ್ಲಿದ್ದ ವಿದ್ಯುತ್ ಟ್ರಾನ್ಸ್‌ಫಾರ್ಮರ್‌ ಕದಿಯುವ ಉದ್ದೇಶದಿಂದ ಅಲ್ಲಿಗೆ ಬಂದಿದ್ದರು ಎನ್ನಲಾಗಿದೆ.

ಟ್ರಾನ್ಸ್‌ಫಾರ್ಮರ್ ಕದಿಯುವಾಗಲೇ ಸಿಲುಕಿದ ಕಾರು

ರೈತ ಹರ್ಜಿಂದರ್ ಸಿಂಗ್ ನೀಡಿದ ದೂರಿನ ಪ್ರಕಾರ, ಶಂಕಿತರು ಹೊಲದಲ್ಲಿದ್ದ ಟ್ರಾನ್ಸ್‌ಫಾರ್ಮರ್‌ ಅನ್ನು ಕಿತ್ತುಹಾಕಲು ಆರಂಭಿಸಿದ್ದರು. ಆದರೆ ಟ್ರಾನ್ಸ್‌ಫಾರ್ಮರ್‌ ಕದಿಯುವ ಮುನ್ನವೇ ಅವರ ಕಾರು ಮೃದುವಾದ, ನೀರು ತುಂಬಿದ ಕೆಸರಿನಲ್ಲಿ ಆಳವಾಗಿ ಸಿಲುಕಿಕೊಂಡಿದೆ. ಕಾರನ್ನು ಹೊರತೆಗೆಯಲು ಸಾಕಷ್ಟು ಪ್ರಯತ್ನಿಸಿದರೂ ಸಾಧ್ಯವಾಗದ ಹಿನ್ನೆಲೆಯಲ್ಲಿ ಆರೋಪಿಗಳು ಕಾರನ್ನು ಅಲ್ಲಿಯೇ ಬಿಟ್ಟು ಪರಾರಿಯಾಗಿದ್ದಾರೆ ಎನ್ನಲಾಗಿದೆ.

ಕಾರು ಬಿಡಿಸಲು ಬಂದ ರಿಕವರಿ ಟ್ರಕ್‌ಗೂ ಅದೇ ಗತಿ

ಆದರೆ ಕಳ್ಳರ ಪ್ರಯತ್ನ ಅಲ್ಲಿಗೇ ಮುಗಿದಿರಲಿಲ್ಲ. ಮರುದಿನ ಬೆಳಗ್ಗೆ ಸಿಲುಕಿಕೊಂಡಿದ್ದ ಕಾರನ್ನು ಹೊರತೆಗೆಯಲು ಅವರು ಭಾರೀ ರಿಕವರಿ ಟ್ರಕ್‌ನೊಂದಿಗೆ ಮತ್ತೆ ಹೊಲಕ್ಕೆ ಬಂದಿದ್ದಾರೆ. ಆದರೆ ವಿಧಿ ಬೇರೆಯೇ ಇತ್ತು. ಕಾರನ್ನು ಹೊರತೆಗೆಯಲು ಮುಂದಾದ ರಿಕವರಿ ಟ್ರಕ್‌ ಕೂಡ ಕೆಸರಿನಲ್ಲಿ ಸಿಲುಕಿಕೊಂಡಿದೆ. ಪರಿಣಾಮ, ಕಳ್ಳರ ಕಾರು ಹಾಗೂ ರಿಕವರಿ ಟ್ರಕ್‌ ಎರಡೂ ಹೊಲದಲ್ಲೇ ಸಿಕ್ಕಿಹಾಕಿಕೊಂಡಿವೆ.

ಗ್ರಾಮಸ್ಥರಿಗೆ ಅನುಮಾನ ಮೂಡಿಸಿತು ಎರಡು ವಾಹನಗಳ ದೃಶ್ಯ

ಹೊಲದಲ್ಲಿ ಎರಡು ವಾಹನಗಳು ಸಿಕ್ಕಿಹಾಕಿಕೊಂಡಿರುವುದನ್ನು ಕಂಡ ಸ್ಥಳೀಯ ಗ್ರಾಮಸ್ಥರಿಗೆ ಅನುಮಾನ ಮೂಡಿದೆ. ಶಂಕಿತರು ಅಲ್ಲಿಗೆ ಬಂದಿದ್ದಕ್ಕೆ ಬೇರೆ ಬೇರೆ ಕಾರಣಗಳನ್ನು ಹೇಳಲು ಪ್ರಯತ್ನಿಸಿದ್ದಾರೆ ಎನ್ನಲಾಗಿದೆ. ಆದರೆ ಗ್ರಾಮಸ್ಥರು ಅವರನ್ನು ವಿಚಾರಿಸಿದಾಗ ಟ್ರಾನ್ಸ್‌ಫಾರ್ಮರ್ ಕಳ್ಳತನದ ಯೋಜನೆ ಬಯಲಾಗಿದೆ ಎಂದು ವರದಿಯಾಗಿದೆ. ಈ ವೇಳೆ ಬರ್ನಾಲಾ ಜಿಲ್ಲೆಯ ಅಲ್ಕಾಡಾ ಗ್ರಾಮದ ಲವ್‌ಪ್ರೀತ್ ಸಿಂಗ್ ಎಂಬಾತನನ್ನು ಗ್ರಾಮಸ್ಥರು ಹಿಡಿದು ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಮೂವರ ವಿರುದ್ಧ ಪ್ರಕರಣ

ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಮೂವರು ಆರೋಪಿಗಳ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ. ಮೋಗಾ ಜಿಲ್ಲೆಯ ಖೋಟೆ ಗ್ರಾಮದ ಲವ್‌ಪ್ರೀತ್ ಸಿಂಗ್, ಜಸ್ದೀಪ್ ಸಿಂಗ್ ಹಾಗೂ ಬಟಿಂಡಾ ಜಿಲ್ಲೆಯ ಗೋನಿಯಾನಾದ ವಕೀಲ್ ಸಿಂಗ್ ವಿರುದ್ಧ ಪ್ರಕರಣ ದಾಖಲಾಗಿದೆ. ಲವ್‌ಪ್ರೀತ್ ಸಿಂಗ್‌ನನ್ನು ಪೊಲೀಸರು ವಶಕ್ಕೆ ಪಡೆದಿದ್ದು, ಕಾರು ಮತ್ತು ರಿಕವರಿ ಟ್ರಕ್ ಎರಡನ್ನೂ ವಶಪಡಿಸಿಕೊಂಡಿದ್ದಾರೆ. ಉಳಿದ ಇಬ್ಬರು ಆರೋಪಿಗಳು ತಲೆಮರೆಸಿಕೊಂಡಿದ್ದು, ಅವರಿಗಾಗಿ ಶೋಧ ಕಾರ್ಯ ಮುಂದುವರಿದಿದೆ.

ಹಿಂದಿನ ಕಳ್ಳತನಗಳ ಬಗ್ಗೆಯೂ ತನಿಖೆ

ಡಿಎಸ್‌ಪಿ ನಿಹಾಲ್ ಸಿಂಗ್ ವಾಲಾ ಅನ್ವರ್ ಅಲಿ ದೂರವಾಣಿ ಮೂಲಕ ಪ್ರಕರಣವನ್ನು ದೃಢಪಡಿಸಿದ್ದು, ಮೂವರ ವಿರುದ್ಧ ಪ್ರಕರಣ ದಾಖಲಾಗಿದ್ದು, ಒಬ್ಬ ಆರೋಪಿಯನ್ನು ಬಂಧಿಸಲಾಗಿದೆ ಎಂದು ತಿಳಿಸಿದ್ದಾರೆ. ಇದೇ ವೇಳೆ ಗ್ರಾಮೀಣ ಪ್ರದೇಶಗಳಲ್ಲಿ ನಡೆದಿರುವ ಟ್ರಾನ್ಸ್‌ಫಾರ್ಮರ್ ಮತ್ತು ವಿದ್ಯುತ್ ಉಪಕರಣಗಳ ಕಳ್ಳತನದ ಹಿಂದಿನ ಪ್ರಕರಣಗಳಲ್ಲೂ ಈ ಆರೋಪಿಗಳು ಭಾಗಿಯಾಗಿದ್ದಾರೆಯೇ ಎಂಬುದರ ಕುರಿತು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಒಟ್ಟಿನಲ್ಲಿ, ಟ್ರಾನ್ಸ್‌ಫಾರ್ಮರ್ ಕದಿಯಲು ಬಂದಿದ್ದ ಆರೋಪಿಗಳ ಕಾರು ಮೊದಲು ಕೆಸರಿನಲ್ಲಿ ಸಿಲುಕಿಕೊಂಡರೆ, ಅದನ್ನು ರಕ್ಷಿಸಲು ಬಂದ ರಿಕವರಿ ಟ್ರಕ್‌ಗೂ ಅದೇ ಗತಿ ಬಂದಿರುವುದು ಈ ಪ್ರಕರಣದ ಅಚ್ಚರಿಯ ತಿರುವಾಗಿದೆ.

Hyundai Price Hike: ಹ್ಯುಂಡೈ ಕಾರ್ ಬೆಲೆ ಮತ್ತೆ ಏರಿಕೆ! ಯಾವ ಮಾಡೆಲ್‌ಗೆ ಎಷ್ಟು ಬೆಲೆ ಏರಿಕೆ?

Naveen Kodase — Thu, 20 Aug 2026 18:17:23 +0530

ಹೊಸ ಹ್ಯುಂಡೈ ಕಾರ್ ಖರೀದಿಸುವ ಯೋಚನೆಯಲ್ಲಿದ್ದೀರಾ? ಹಾಗಿದ್ದರೆ ನಿಮಗೊಂದು ಪ್ರಮುಖ ಸುದ್ದಿ. ಹ್ಯುಂಡೈ ಮೋಟಾರ್ ಇಂಡಿಯಾ ತನ್ನೆಲ್ಲಾ ಕಾರುಗಳ ಬೆಲೆಯನ್ನು ಮತ್ತೆ ಹೆಚ್ಚಿಸಲು ನಿರ್ಧರಿಸಿದೆ. 2026ರ ಸೆಪ್ಟೆಂಬರ್‌ನಿಂದ ಕಂಪನಿಯ ಎಲ್ಲಾ ಮಾಡೆಲ್‌ಗಳ ಬೆಲೆಯಲ್ಲಿ ಶೇಕಡ 1ರಷ್ಟು ಏರಿಕೆಯಾಗಲಿದೆ.

ಕಚ್ಚಾ ವಸ್ತುಗಳ ಬೆಲೆ ಮತ್ತು ಸಾಗಾಟ ವೆಚ್ಚ ಹೆಚ್ಚಾಗುತ್ತಿರುವುದೇ ಈ ಬೆಲೆ ಏರಿಕೆಗೆ ಪ್ರಮುಖ ಕಾರಣ ಎಂದು ಕಂಪನಿ ಸ್ಪಷ್ಟಪಡಿಸಿದೆ. ಅಷ್ಟೇ ಅಲ್ಲ, ಜಾಗತಿಕ ಮಟ್ಟದಲ್ಲಿನ ರಾಜಕೀಯ ಮತ್ತು ಆರ್ಥಿಕ ಅಸ್ಥಿರತೆಗಳು ಕೂಡ ಕಂಪನಿಯ ಖರ್ಚುವೆಚ್ಚಗಳ ಮೇಲೆ ಒತ್ತಡ ಹೇರುತ್ತಿವೆ. ಹೆಚ್ಚುವರಿ ವೆಚ್ಚದ ಹೊರೆಯನ್ನು ಆದಷ್ಟು ತಾವೇ ಭರಿಸಲು ಕಂಪನಿ ಪ್ರಯತ್ನಿಸಿದೆ. ಆದರೆ, ವೆಚ್ಚ ನಿರಂತರವಾಗಿ ಏರುತ್ತಿರುವುದರಿಂದ, ಅದರ ಒಂದು ಭಾಗವನ್ನು ಗ್ರಾಹಕರಿಗೆ ವರ್ಗಾಯಿಸುವುದು ಅನಿವಾರ್ಯವಾಗಿದೆ ಎಂದು ಹ್ಯುಂಡೈ ತಿಳಿಸಿದೆ.

ಯಾವ ಮಾಡೆಲ್‌ಗೆ ಎಷ್ಟು ಬೆಲೆ ಏರಿಕೆ?

ಹ್ಯುಂಡೈ ಕಂಪನಿಯ ಆರಂಭಿಕ ಮಾಡೆಲ್ ಆದ ಗ್ರ್ಯಾಂಡ್ ಐ10 ನಿಯೋಸ್‌ನಿಂದ ಹಿಡಿದು ಪ್ರೀಮಿಯಂ ಎಲೆಕ್ಟ್ರಿಕ್ ಎಸ್‌ಯುವಿ ಅಯಾನಿಕ್ 5 ವರೆಗೆ, ಎಲ್ಲಾ ಕಾರುಗಳಿಗೂ ಈ ಹೊಸ ಬೆಲೆ ಏರಿಕೆ ಅನ್ವಯವಾಗಲಿದೆ. ಸದ್ಯಕ್ಕೆ ಹ್ಯುಂಡೈ ಕಾರುಗಳ ಬೆಲೆ ಅಂದಾಜು 5.60 ಲಕ್ಷ ರೂಪಾಯಿಯಿಂದ 55.70 ಲಕ್ಷ ರೂಪಾಯಿಗಳವರೆಗೆ ಇದೆ. ಆದರೆ, ಸೆಪ್ಟೆಂಬರ್‌ನಲ್ಲಿ ಯಾವ ಮಾಡೆಲ್‌ಗೆ, ಯಾವ ವೇರಿಯಂಟ್‌ಗೆ ನಿಖರವಾಗಿ ಎಷ್ಟು ರೂಪಾಯಿ ಹೆಚ್ಚಳವಾಗಲಿದೆ ಎಂಬುದನ್ನು ಕಂಪನಿ ಇನ್ನಷ್ಟೇ ತಿಳಿಸಬೇಕಿದೆ.

2026ರಲ್ಲಿ ಇದು ಮೂರನೇ ಬೆಲೆ ಏರಿಕೆ

ಹೌದು, 2026ರಲ್ಲಿ ಹ್ಯುಂಡೈ ತನ್ನ ಕಾರುಗಳ ಬೆಲೆ ಏರಿಕೆ ಮಾಡುತ್ತಿರುವುದು ಇದು ಮೂರನೇ ಬಾರಿ. ಈ ಹಿಂದೆ ಜನವರಿ 1ರಿಂದ ಜಾರಿಗೆ ಬರುವಂತೆ ಕಂಪನಿ ಸುಮಾರು 0.6% ದಷ್ಟು ಬೆಲೆ ಹೆಚ್ಚಿಸಿತ್ತು. ನಂತರ, ಏಪ್ರಿಲ್‌ನಲ್ಲಿ ಮತ್ತೆ 1% ಬೆಲೆ ಏರಿಕೆ ಘೋಷಿಸಿ, ಅದನ್ನು ಜೂನ್ 1ರಿಂದ ಜಾರಿಗೆ ತಂದಿತ್ತು. ಆಗ ಮಾಡೆಲ್ ಮತ್ತು ವೇರಿಯಂಟ್‌ಗೆ ಅನುಗುಣವಾಗಿ ಕಾರುಗಳ ಬೆಲೆ 12,800 ರೂಪಾಯಿವರೆಗೆ ಹೆಚ್ಚಾಗಿತ್ತು.

ರಫ್ತು ವಹಿವಾಟಿನಲ್ಲೂ ಇಳಿಕೆ

ಈ ವರ್ಷ ಹ್ಯುಂಡೈ ಕಂಪನಿಯ ವ್ಯವಹಾರ ಹಲವು ಸವಾಲುಗಳನ್ನು ಎದುರಿಸಿದೆ. 2026-27ರ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದಲ್ಲಿ (ಏಪ್ರಿಲ್-ಜೂನ್) ಕಂಪನಿಯ ರಫ್ತು ಪ್ರಮಾಣದಲ್ಲಿ ದೊಡ್ಡ ಕುಸಿತ ಕಂಡುಬಂದಿದೆ. ಪಶ್ಚಿಮ ಏಷ್ಯಾದಲ್ಲಿನ ಸಂಘರ್ಷ ಮತ್ತು ಕಂಪನಿಯ ಪ್ರಮುಖ ಬಿಡಿಭಾಗ ಪೂರೈಕೆದಾರ ಸಂಸ್ಥೆ 'ಮೋಬಿಸ್' ಫ್ಯಾಕ್ಟರಿಯಲ್ಲಿ ಸಂಭವಿಸಿದ ಅಗ್ನಿ ಅವಘಡದಿಂದಾಗಿ ಉತ್ಪಾದನೆ ಮೇಲೆ ತಾತ್ಕಾಲಿಕವಾಗಿ ಪರಿಣಾಮ ಬೀರಿತ್ತು. ಇದರ ನೇರ ಹೊಡೆತ ರಫ್ತಿನ ಮೇಲಾಗಿದೆ.

ರಫ್ತಿನಲ್ಲಿ 19.6% ಕುಸಿತ

ಕಳೆದ ಆರ್ಥಿಕ ವರ್ಷದ ಇದೇ ಅವಧಿಯಲ್ಲಿ ಹ್ಯುಂಡೈ 48,140 ವಾಹನಗಳನ್ನು ರಫ್ತು ಮಾಡಿತ್ತು. ಆದರೆ, 2026-27ರ ಮೊದಲ ತ್ರೈಮಾಸಿಕದಲ್ಲಿ ಈ ಸಂಖ್ಯೆ 38,708 ಯೂನಿಟ್‌ಗಳಿಗೆ ಇಳಿದಿದೆ. ಅಂದರೆ, ರಫ್ತಿನಲ್ಲಿ ಸುಮಾರು 19.6% ಕುಸಿತವಾಗಿದೆ. ಈ ಎಲ್ಲಾ ಕಾರಣಗಳಿಂದಾಗಿ ಸೆಪ್ಟೆಂಬರ್‌ನಿಂದ ಹೊಸ ಬೆಲೆ ಏರಿಕೆ ಅನಿವಾರ್ಯ ಎಂದು ಹ್ಯುಂಡೈ ಹೇಳಿದೆ.

30,000 ಸಂಬಳ! ನೀವೂ ಕಾರು ಖರೀದಿಸಬಹುದು.. 20-4-10 ಸೂತ್ರ ಫಾಲೋ ಮಾಡಿ..!

Ganesh Mabla Gowda — Tue, 25 Aug 2026 20:31:59 +0530

ಪ್ರತಿಯೊಬ್ಬ ಉದ್ಯೋಗಿಯ ಕನಸು ಒಂದು ಸ್ವಂತ ಮನೆ ಮತ್ತು ಒಂದು ಕಾರ್ ಖರೀದಿಸುವುದು. ಆದರೆ ತಿಂಗಳಿಗೆ 30 ಸಾವಿರ ರೂಪಾಯಿ ಸಂಬಳ ಪಡೆಯುವವರಿಗೆ ನನ್ನಿಂದ ಕಾರ್ ಖರೀದಿಸಲು ಸಾಧ್ಯವೇ? ಇಷ್ಟು ಕಡಿಮೆ ಸಂಬಳದಲ್ಲಿ ಇಎಂಐ (EMI) ಕಟ್ಟಲು ಸಾಧ್ಯವೇ? ಎಂಬ ಆತಂಕವಿರುತ್ತದೆ. ಆದರೆ ಸರಿಯಾದ ಆರ್ಥಿಕ ಯೋಜನೆ ಮತ್ತು ಪಕ್ಕಾ ಲೆಕ್ಕಾಚಾರವಿದ್ದರೆ 30 ಸಾವಿರ ಸಂಬಳದಲ್ಲೂ ನೀವು ಆರಾಮವಾಗಿ ಕಾರಿನ ಕನಸನ್ನು ನನಸು ಮಾಡಿಕೊಳ್ಳಬಹುದು. ಅದು ಹೇಗೆ? ಇಲ್ಲಿದೆ ಸಂಪೂರ್ಣ ವಿವರ.

ಕಾರ್ ಖರೀದಿಗೆ 20-4-10 ಸೂತ್ರ ಅನುಸರಿಸಿ

ಹಣಕಾಸು ತಜ್ಞರು ಕಾರ್ ಖರೀದಿಸುವವರಿಗೆ ಒಂದು ಅದ್ಭುತವಾದ ನಿಯಮವನ್ನು ಸೂಚಿಸುತ್ತಾರೆ. ಅದೇ 20-4-10 ರೂಲ್.

20 (ಡೌನ್ ಪೇಮೆಂಟ್): ಕಾರಿನ ಒಟ್ಟು ಬೆಲೆಯ ಕನಿಷ್ಠ 20 ಪ್ರತಿಶತ ಹಣವನ್ನು ಮುಂಗಡವಾಗಿ (Down Payment) ಪಾವತಿಸಿ. ಇದರಿಂದ ಸಾಲದ ಮೊತ್ತ ಕಡಿಮೆಯಾಗುತ್ತದೆ.
4 (ಸಾಲದ ಅವಧಿ): ಕಾರ್ ಲೋನ್ ಅವಧಿಯನ್ನು ಗರಿಷ್ಠ 4 ವರ್ಷಕ್ಕೆ (48 ತಿಂಗಳು) ಸೀಮಿತಗೊಳಿಸಿ. ಅವಧಿ ಹೆಚ್ಚಾದಷ್ಟೂ ನೀವು ಕಟ್ಟುವ ಬಡ್ಡಿ ಹೆಚ್ಚಾಗುತ್ತದೆ.
10 (ಇಎಂಐ ಮಿತಿ): ನಿಮ್ಮ ತಿಂಗಳ ಇಎಂಐ ನಿಮ್ಮ ಒಟ್ಟು ಸಂಬಳದ 10 ರಿಂದ 15 ಪ್ರತಿಶತಕ್ಕಿಂತ ಹೆಚ್ಚಿರಬಾರದು.

30 ಸಾವಿರ ಸಂಬಳದವರ ಲೆಕ್ಕಾಚಾರ ಹೀಗಿರಲಿ

ನಿಮ್ಮ ಸಂಬಳ 30,000 ರೂ. ಆಗಿದ್ದರೆ.. ನಿಮ್ಮ ತಿಂಗಳ ಇಎಂಐ ಸುಮಾರು 5 ರಿಂದ 7 ಸಾವಿರ ರೂಪಾಯಿಗಳ ಒಳಗೆ ಇರುವುದು ಸೂಕ್ತ. ಮಾರುಕಟ್ಟೆಯಲ್ಲಿ ಈಗ 4 ರಿಂದ 6 ಲಕ್ಷ ರೂಪಾಯಿ ಬೆಲೆಯ ಉತ್ತಮ ಬಜೆಟ್ ಕಾರುಗಳು (ಉದಾಹರಣೆಗೆ: ಮಾರುತಿ ಆಲ್ಟೊ, ಎಸ್-ಪ್ರೆಸ್ಸೊ, ಅಥವಾ ಸೆಲೆರಿಯೊ) ಲಭ್ಯವಿವೆ. ನೀವು 1.5 ರಿಂದ 2 ಲಕ್ಷ ರೂ. ಡೌನ್ ಪೇಮೆಂಟ್ ಮಾಡಿದರೆ, ಉಳಿದ ಹಣಕ್ಕೆ ಕಡಿಮೆ ಇಎಂಐನಲ್ಲಿ ಸಾಲ ಪಡೆಯಬಹುದು.

ಇಎಂಐ ಹೊರತುಪಡಿಸಿ ಈ ವೆಚ್ಚಗಳೂ ನೆನಪಿರಲಿ

ಕಾರ್ ಖರೀದಿಸುವಾಗ ಕೇವಲ ಇಎಂಐ ಮಾತ್ರವಲ್ಲದೆ, ಈ ಕೆಳಗಿನ ವೆಚ್ಚಗಳ ಬಗ್ಗೆಯೂ ಗಮನಹರಿಸಿ
ತಿಂಗಳಿಗೆ ಪೆಟ್ರೋಲ್ ಅಥವಾ ಡೀಸೆಲ್‌ಗೆ ಎಷ್ಟು ಖರ್ಚಾಗಬಹುದು ಎಂಬ ಅಂದಾಜಿರಲಿ
ಕಾರ್ ಸರ್ವಿಸ್ ಮತ್ತು ರಿಪೇರಿಗಾಗಿ ಸಣ್ಣ ಮೊತ್ತವನ್ನು ಮೀಸಲಿಡಿ.
ಪ್ರತಿ ವರ್ಷ ಕಟ್ಟಬೇಕಾದ ವಿಮಾ ಕಂತು ಕೂಡ ನಿಮ್ಮ ಬಜೆಟ್‌ನಲ್ಲಿರಲಿ.
ಬಾಡಿಗೆ, ಕರೆಂಟ್ ಬಿಲ್ ಮತ್ತು ಆಹಾರದ ಖರ್ಚುಗಳನ್ನು ನಿಭಾಯಿಸಿದ ನಂತರವೇ ಕಾರ್ ಖರೀದಿಯ ನಿರ್ಧಾರ ಮಾಡಿ

ಸಲಹೆಗಳು

ಸಾಲ ಪಡೆಯುವ ಮೊದಲು ವಿವಿಧ ಬ್ಯಾಂಕ್‌ಗಳ ಬಡ್ಡಿ ದರಗಳನ್ನು (Interest Rates) ಹೋಲಿಕೆ ಮಾಡಿ ನೋಡಿ.
ಕಡಿಮೆ ಬಡ್ಡಿ ದರ ಇರುವ ಬ್ಯಾಂಕ್ ಆಯ್ಕೆ ಮಾಡಿ.
ಸಾಧ್ಯವಾದಷ್ಟು ಹೆಚ್ಚು ಡೌನ್ ಪೇಮೆಂಟ್ ಮಾಡಲು ಪ್ರಯತ್ನಿಸಿ, ಇದರಿಂದ ಇಎಂಐ ಹೊರೆ ಕಡಿಮೆಯಾಗುತ್ತದೆ.
ಸರಿಯಾದ ಯೋಜನೆ ಇದ್ದರೆ, 30 ಸಾವಿರ ಸಂಬಳವೂ ಕಾರಿನ ಕನಸಿಗೆ ಅಡ್ಡಿಯಾಗುವುದಿಲ್ಲ!

ಬೆಂಗಳೂರಿನಲ್ಲಿ ಹೊಚ್ಚ ಹೊಸ ಆಡಿ ಕ್ಯೂ3 ಕಾರು ಅನಾವರಣ ಜೊತೆ ಎಕ್ಸ್‌ಪೀರಿಯೆನ್ಸ್‌ಗಾಗಿ ಸೆಂಟರ್ ಉದ್ಘಾಟನೆ

Chethan Kumar — Wed, 26 Aug 2026 17:43:14 +0530

ಬೆಂಗಳೂರು (ಆ.26) ಬೆಂಗಳೂರಿನ ಪ್ರತಿಷ್ಠಿತ ಲಾವೆಲ್ಲೆ ರಸ್ತೆಯಲ್ಲಿರುವ ಆಡಿ ಬೆಂಗಳೂರು ಸೆಂಟ್ರಲ್ ಇದೀಗ ಹೊಸ ಎಕ್ಸ್‌ಪೀರಿಯೆನ್ಸ್ ಸೆಂಟರ್ ಉದ್ಘಾಟನೆ ಮಾಡಿದೆ. ಗ್ರಾಹಕರಿಗೆ ಪ್ರೀಮಿಯಂ ಅನುಭವ ನೀಡಲು ಈ ಸೆಂಟರ್ ಆರಂಭಗೊಂಡಿದೆ. ಇದೇ ಸೆಂಟರ್‌ನಲ್ಲಿ ಹೊಚ್ಚ ಹೊಸ ಆಡಿ ಕ್ಯೂ3 ಕಾರು ಅನಾವರಣಗೊಂಡಿದೆ. ಭಾರತದಲ್ಲೇ ಮೊದಲ ಬಾರಿಗೆ ಈ ಹೊಸ ಐಷಾರಾಮಿ ಎಸ್‌ಯುವಿಯನ್ನು ಪ್ರದರ್ಶಿಸುವ ಮೊದಲ ಶೋರೂಮ್ ಎಂಬ ಹೆಗ್ಗಳಿಕೆಗೆ ಆಡಿ ಬೆಂಗಳೂರು ಸೆಂಟ್ರಲ್ ಪಾತ್ರವಾಗಿದೆ.

ಆಲ್-ನ್ಯೂ ಆಡಿ ಕ್ಯೂ3 ವಿಶೇಷತೆಗಳು

ಆಲ್-ನ್ಯೂ ಆಡಿ ಕ್ಯೂ3 ಆಡಿ ಸಂಸ್ಥೆಯ ಪ್ರೀಮಿಯಂ ಕಾಂಪ್ಯಾಕ್ಟ್ ಎಸ್‌ಯುವಿಯ ಮುಂದಿನ ಜನರೇಶನ್ ಪ್ರತಿನಿಧಿಸುತ್ತಿದೆ. ಹೊಸ ಡಿಸೈನ್, ಸುಧಾರಿತ ತಂತ್ರಜ್ಞಾನ, ಅತ್ಯುತ್ಕೃಷ್ಟ ಇಂಟಿರಿಯರ್ ಹಾಗೂ ಆಡಿ ಬ್ರಾಂಡ್‌ನ ವಿಶಿಷ್ಟ ಶೈಲಿಯನ್ನು ಒಂದೆಡೆ ತಂದಿದೆ. ಹೊಸತ ಆಡಿ ಬೆಂಗಳೂರು ಸೆಂಟ್ರಲ್ ಶೋರೂಮ್‌ನಲ್ಲೇ ಈ ಹೊಸ ಕಾರು ಪ್ರದರ್ಶನಗೊಳ್ಳುವ ಮೂಲಕ ಕಾರು ಪ್ರಿಯರ ಕುತೂಹಲ ತಣಿಸಿದೆ.

ಅತ್ಯಾಧುನಿಕ ಎಕ್ಸ್‌ಪೀರಿಯೆನ್ಸ್ ಸೆಂಟರ್

ಲಾವೆಲ್ಲೆ ರಸ್ತೆಯಲ್ಲಿರುವ ನವೀಕೃತ ಶೋರೂಮ್ ಗ್ರಾಹಕರಿಗೆ ಅತ್ಯಂತ ಆಕರ್ಷಕ ಮತ್ತು ಅತ್ಯಾಧುನಿಕ ಆಡಿ ಅನುಭವ ನೀಡುವಂತೆ ವಿನ್ಯಾಸಗೊಳಿಸಲಾಗಿದೆ. ಈ ಸುಸಜ್ಜಿತ ಕೇಂದ್ರವು ಆಡಿಯ ಪ್ರಗತಿಪರ ರೀಟೇಲ್ ಮಾರಾಟ ಪರಿಕಲ್ಪನೆ, ಆಧುನಿಕ ಗ್ರಾಹಕ ಸಂವಹನ ಸ್ಥಳಗಳು, ಪ್ರೀಮಿಯಂ ವಾಹನ ಪ್ರದರ್ಶನ ಪರಿಸರ ಮತ್ತು ಐಷಾರಾಮಿ ವಾಹನ ಪ್ರಿಯರಿಗೆ ಅತ್ಯುತ್ತಮ ಅನುಭವ ನೀಡುವ ವ್ಯವಸ್ಥೆಯನ್ನು ಒಳಗೊಂಡಿದೆ.

ಕರ್ನಾಟಕದಲ್ಲೇ ಜುಬಿಲೆಂಟ್ ಮೋಟಾರ್ ವರ್ಕ್ಸ್ ಸಂಸ್ಥೆಯಿಂದ ನಿರ್ವಹಿಸಲ್ಪಡುವ ಏಕೈಕ ಆಡಿ ಶೋರೂಮ್ ಆಗಿದೆ. ಈ ಡೀಲರ್‌ಶಿಪ್ ಪ್ರೀಮಿಯಂ ವಾಹನ ಮಾರಾಟ, ಗ್ರಾಹಕರ ಅನುಭವ ಮತ್ತು ಉತ್ಪನ್ನದ ನಾವೀನ್ಯತೆಯನ್ನು ಒಂದೇ ಸೂರಿನಡಿ ತರುವ ಮೂಲಕ ಬೆಂಗಳೂರಿನಲ್ಲಿ ಆಡಿ ಬ್ರಾಂಡ್ ಉಪಸ್ಥಿತಿಯನ್ನು ಮತ್ತಷ್ಟು ಬಲಪಡಿಸುತ್ತಿದೆ.ನವೀಕರಿಸಿದ ಆಡಿ ಬೆಂಗಳೂರು ಸೆಂಟ್ರಲ್‌ನ ಉದ್ಘಾಟನೆಯು ನಮಗೆ ಅತ್ಯಂತ ಸಂತಸದ ಹೊಸ ಅಧ್ಯಾಯಕ್ಕೆ ಚಾಲನೆ ನೀಡಿದೆ. ಬೆಂಗಳೂರು ಪ್ರಗತಿಪರ ವಿನ್ಯಾಸ, ತಂತ್ರಜ್ಞಾನ ಮತ್ತು ನಾವೀನ್ಯತೆಯನ್ನು ಸದಾ ಪ್ರೋತ್ಸಾಹಿಸುವ ನಗರವಾಗಿದ್ದು, ನಮ್ಮ ಹೊಸ ಎಕ್ಸ್‌ಪೀರಿಯೆನ್ಸ್ ಸೆಂಟರ್ ಅನ್ನು ಸಹ ಅದನ್ನೇ ಬಿಂಬಿಸುವಂತೆ ರೂಪಿಸಲಾಗಿದೆ ಎಂದು ಜುಬಿಲೆಂಟ್ ಮೋಟಾರ್ ವರ್ಕ್ಸ್ ಪ್ರೈವೇಟ್ ಲಿಮಿಟೆಡ್ ಸಿಇಒ ಸುನಿಲ್ ಪೈ ಹೇಳಿದ್ದಾರೆ.

ಯೆಜ್ಡಿ ರೋಡ್‌ಸ್ಟರ್ ರೆಡ್ ವೋಲ್ಫ್ ಬೈಕ್ ಈಗ ಅಮೇಜಾನ್ , ಫ್ಲಿಪ್‌ಕಾರ್ಟ್‌ನಲ್ಲಿ ಲಭ್ಯ, ಭರ್ಜರಿ ಆಫರ್

Chethan Kumar — Sat, 22 Aug 2026 19:20:40 +0530

ಬೆಂಗಳೂರು (ಆ.22) ಜಾವಾ ಯೆಜ್ಡಿ ತನ್ನ ವ್ಯಾಪಾರ ವಹಿವಾಟನ್ನು ಆನ್‌ಲೈನ್ ಮೂಲಕ ಮತ್ತಷ್ಟು ವಿಸ್ತರಿಸುತ್ತಿದೆ. ಯೆಜ್ಡಿ ರೋಡ್‌ಸ್ಟರ್ ರೆಡ್ ವೋಲ್ಫ್ ಬೈಕ್ ಇದೀಗ ಅಮೇಜಾನ್ ಹಾಗೂ ಫ್ಲಿಪ್‌ಕಾರ್ಟ್‌ನಲ್ಲಿ ಲಭ್ಯವಿದೆ. ಎಲ್ಲಾ ಉತ್ಪನ್ನಗಳನ್ನು ಆನ್‌ಲೈನ್ ಮೂಲಕ ಖರೀದಿಸುವ ಗ್ರಾಹಕರಿಗೆ ಆಫರ್ ಇದ್ದೇ ಇರುತ್ತೆ. ಇದೀಗ ರೆಡ್ ವೋಲ್ಫ್ ಬೈಕ್ ಖರೀದಿ ವೇಳೆಯೂ ಗ್ರಾಹಕರಿಗೆ ಕೆಲ ಪ್ರಮುಖ ಆಫರ್ ನೀಡಲಾಗಿದೆ. ಈ ಸೌಲಭ್ಯಗಳು ಆನ್‌ಲೈನ್ ಮೂಲಕ ಖರೀದಿಸುವ ಗ್ರಾಹಕರಿಗೆ ಲಭ್ಯವಾಗಲಿದೆ.

ಯೆಜ್ಡಿ ರೋಡ್‌ಸ್ಟರ್ ರೆಡ್ ವೋಲ್ಫ್ ಆಫರ್

4 ವರ್ಷ ಅಥವಾ 50,000 ಕಿ.ಮೀ.ವರೆಗೆ ಸ್ಟ್ಯಾಂಡರ್ಡ್‌ ವಾರಂಟಿ
ವಿಸ್ತರಿತ ವಾರಂಟಿಯನ್ನು ಗರಿಷ್ಠ 6 ವರ್ಷಗಳವರೆಗೆ ಪಡೆಯುವ ಆಯ್ಕೆ
ಗರಿಷ್ಠ 8 ವರ್ಷಗಳವರೆಗೆ ರೋಡ್‌ಸೈಡ್‌ ಅಸಿಸ್ಟೆನ್ಸ್‌
ಗರಿಷ್ಠ 5 ವರ್ಷಗಳವರೆಗೆ ವಾರ್ಷಿಕ ನಿರ್ವಹಣಾ ಒಪ್ಪಂದದ ಆಯ್ಕೆ (ನಿಯಮಗಳು ಮತ್ತು ಷರತ್ತುಗಳಿಗೆ ಒಳಪಟ್ಟಿರುತ್ತವೆ)

ಬೈಕ್ ಬೆಲೆ ಎಷ್ಟು

ಯೆಜ್ಡಿ ರೋಡ್‌ಸ್ಟರ್ ರೆಡ್ ವೋಲ್ಫ್ ಬೈಕ್ ಬೆಲೆ 2.09 ಲಕ್ಷ ರೂಪಾಯಿ (ಎಕ್ಸ್ ಶೋ ರೂಂ). ಬೈಕ್ ಖರೀದಿಸುವ ಗ್ರಾಹಕರು ಅಮೇಜಾನ್ ಅಥವಾ ಪ್ಲಿಫ್‌ಕಾರ್ಟ್ ಮೂಲಕ ಬುಕಿಂಗ್ ಮಾಡಿಕೊಳ್ಳಬಹುದು. ಬುಕಿಂಗ್ ಮೊತ್ತವನ್ನು ಆನ್‌ಲೈನ್ ಮೂಲಕ ಪಾವತಿ ಮಾಡಿದ ಬಳಿಕ ಬೈಕ್ ಬುಕಿಂಗ್ ಖಚಿತಗೊಳ್ಳಲಿದೆ. ಬಳಿಕ ಉಳಿದ ಮೊತ್ತ ಹಾಗೂ ನೋಂದಣಿ ಪ್ರಕ್ರಿಯೆಗಳು ಹತ್ತಿರದ ಡೀಲರ್ ಮೂಲಕ ನಡೆಯಲಿದೆ.

ಆನ್‌ಲೈನ್ ಮೂಲಕ ಬೈಕ್ ಖರೀದಿ ಹೇಗೆ?

ಅಮೇಜಾನ್ ಅಥವ ಫ್ಲಿಪ್‌ಕಾರ್ಟ್‌ನಲ್ಲಿ ಯೆಜ್ಡಿ ರೋಡ್‌ಸ್ಟರ್ ರೆಡ್ ವೋಲ್ಫ್ ಬೈಕ್ ಆಯ್ಕೆ ಮಾಡಬೇಕು
ಎಕ್ಸ್‌-ಶೋರೂಂ ಬುಕ್ಕಿಂಗ್ ಮೊತ್ತವನ್ನು ಆನ್‌ಲೈನ್‌ನಲ್ಲಿ ಪಾವತಿಸಿ
ಈ ವೇಳೆ ಹತ್ತಿರದ ಅಧಿಕೃತ Yezdi ಡೀಲರ್‌ ಆರ್ಡರ್‌ ಖಚಿತಪಡಿಸುತ್ತಾರೆ
ಉಳಿದ ಆನ್‌-ರೋಡ್‌ ಮೊತ್ತವನ್ನು ಡೀಲರ್‌ಶಿಪ್‌ನಲ್ಲಿ ಪಾವತಿಸಬೇಕು
ಬೈಕ್‌ ನೋಂದಣಿ ಮತ್ತು ವಿಮೆ ಪ್ರಕ್ರಿಯೆ ಡೀಲರ್‌ಶಿಪ್‌ನಲ್ಲೇ ನಡೆಯಲಿದೆ
ನೋಂದಣಿ ಮತ್ತು ವಿಮೆ ಮುಗಿದ ಬಳಿಕ ಬೈಕ್‌ ಗ್ರಾಹಕರಿಗೆ ಹಸ್ತಾಂತರಿಸಲಾಗುತ್ತದೆ
ಆಕ್ಸೆಸರೀಸ್‌ ಮತ್ತು ಇತರ ಹೆಚ್ಚುವರಿ ವಸ್ತುಗಳನ್ನು ಸಹ ಡೀಲರ್‌ಶಿಪ್‌ ಮೂಲಕವೇ ಖರೀದಿಸಬೇಕು

ಹೊಚ್ಚ ಹೊಸ ಯೆಜ್ಡಿ ರೋಡ್‌ಸ್ಟರ್ ವೋಲ್ಫ್ ಬೈಕ್ 350 ಲಿಕ್ವಿಡ್ ಕೂಲ್ಡ್ ಎಂಜಿನ್ ಹೊಂದಿದೆ. 6 ಸ್ಪೀಡ್ ಗೇರ್‌ಬಾಕ್ಸ್, ಸ್ಲಿಪ್ಪರ್ ಕ್ಲಚ್ ಗೇರ್ ಹೊಂದಿದೆ. ವಿಶೇಷ ಅಂದರೆ ದೂರ ಪ್ರಯಾಣ, ಸಿಟಿ ರೈಡ್ ಸೇರಿದಂತೆ ಎಲ್ಲಾ ರಸ್ತೆಗೂ ಇದು ಸೈ ಎನಿಸಿಕೊಳ್ಳಲಿದೆ. ವಿಶೇಷವಾಗಿ ದೀರ್ಘ ಪ್ರಯಾಣಕ್ಕೆ ಅನುಗುಣವಾಗಿ ಬೈಕ್ ವಿನ್ಯಾಸಗೊಳಿಸಲಾಗಿದೆ. ಆರಾಮದಾಯಕ ರೈಡಿಂಗ್ ಹಾಗೂ ಅತ್ಯುತ್ತಮ ರೈಡಿಂಗ್ ಫೀಲ್ ಸಿಗಲಿದೆ.

ಬೆಲೆ ಏರಿಕೆ ಮೊದಲು ಭರ್ಜರಿ ಡಿಸ್ಕೌಂಟ್ ಘೋಷಿಸಿದ ಟಾಟಾ, ಗರಿಷ್ಠ 3.5 ಲಕ್ಷ ರೂ ರಿಯಾಯಿತಿ

Chethan Kumar — Fri, 21 Aug 2026 12:41:04 +0530

ನವದೆಹಲಿ (ಆ.21) ಟಾಟಾ ಮೋಟಾರ್ಸ್ ಸೆಪ್ಟೆಂಬರ್ ತಿಂಗಳಿನಿಂದ ವಾಹನಗಳ ಬೆಲೆ ಏರಿಕೆ ಮಾಡುತ್ತಿದೆ. ಉತ್ಪಾದನಾ ವೆಚ್ಚಗಳ ಏರಿಕೆಯಿಂದ ಅನಿವಾರ್ಯವಾಗಿ ಬೆಲೆ ಏರಿಕೆ ಮಾಡಲು ಮುಂದಾಗಿದೆ. ಅಧಿಕೃತ ಘೋಷಣೆ ಹೊರಬೀಳಬೇಕಿದೆ. ಇದಕ್ಕೂ ಮೊದಲು ಟಾಟಾ ಗ್ರಾಹಕರ ಕಾರು ನನಸು ಮಾಡಲು ಭರ್ಜರಿ ಡಿಸ್ಕೌಂಟ್ ಆಫರ್ ನೀಡಿದೆ. ವಿಶೇಷ ಅಂದರೆ ಇಂಧನ ಕಾರುಗಳು, ಸಿಎನ್‌ಜಿ ಹಾಗೂ ಎಲೆಕ್ಟ್ರಿಕ್ ಕಾರುಗಳ ಮೇಲೆ ಡಿಸ್ಕೌಂಟ್ ನೀಡಿದೆ. ಈ ಭರ್ಜರಿ ಆಫರ್‌ನಲ್ಲಿ ಕ್ಯಾಶ್ ಡಿಸ್ಕೌಂಟ್, ಎಕ್ಸ್‌ಚೇಂಜ್, ಸ್ಕ್ರಾಪ್ ಸೇರಿದಂತೆ ಹಲವು ಬೋನಸ್ ಒಳಗೊಂಡಿದೆ. ಗರಿಷ್ಠ 3.5 ಲಕ್ಷ ರೂಪಾಯಿವರೆಗೆ ಆಫರ್ ನೀಡಲಾಗಿದೆ.

ಹ್ಯಾರಿಯರ್, ಸಫಾರಿ ಕಾರುಗಳ ಮೇಲಿನ ಆಫರ್

ಟಾಟಾ ಹ್ಯಾರಿಯರ್ ಸಪಾಱಿ ಡೀಸೆಲ್ ಹಾಗೂ ಐಸಿಇ ಇಂಧನ ಕಾರುಗಳ ಮೇಲೆ 10 ಸಾವಿರ ರೂಪಾಯಿ ನಗದು ಡಿಸ್ಕೌಂಟ್, 25,000 ರೂಪಾಯಿ ಎಕ್ಸ್‌ಚೇಂಜ್ ಬೋನಸ್, 35,000 ರೂಪಾಯಿ ಸ್ಕ್ರಾಪೇಜ್ ಬೋನಸ್ ನೀಡಲಾಗಿದೆ. ಇದೇ ವೇಳೆ ಹ್ಯಾರಿಯರ್ ಎಲೆಕ್ಟ್ರಿಕ್ ಕಾರಿನ ಮೇಲೆ ಭರ್ಜರಿ ಆಫರ್ ನೀಡಲಾಗಿದೆ ಫ್ರೀಂ ಸೇಲ್ ಮೂಲಕ ಖರದಿ ಮಾಡುವ ಗ್ರಾಹಕರಿಗೆ 1 ಲಕ್ಷ ರೂಪಾಯಿವರೆಗೆ ಡಿಸ್ಕೌಂಟ್ ಆಫರ್ ನೀಡಲಾಗಿದೆ. ಈ ಪೈಕಿ 50 ಸಾವಿರ ರೂಪಾಯಿ ಎಕ್ಸ್‌ಚೇಂಜ್ ಬೋನಸ್, 75 ಸಾವಿರ ರೂಪಾಯಿ ಸ್ಕ್ರಾಪೇಜ್ ಆಫರ್ ಒಳಗೊಂಡಿದೆ. ಟಾಟಾ ಇವಿ ಗ್ರಾಹಕರಿಗೆ 1 ಲಕ್ಷ ರೂಪಾಯಿ ಲಾಯಲ್ಟಿ ಬೋನಸ್ ಸಿಗಲಿದೆ.

ಟಾಟಾ ಕರ್ವ್ ಹಾಗೂ ನೆಕ್ಸಾನ್ ರಿಯಾಯಿತಿ

ಟಾಟಾದ ಅತ್ಯಂತ ಆಕರ್ಷಕ ಕರ್ವ್ ಕಾರಿ ಮೇಲೆ ಆಫರ್ ನೀಡಲಾಗಿದೆ. ಕರ್ವ್ ಎಲೆಕ್ಟ್ಿಕ್ ಕಾರಿನ ಮೇಲೆ ಗರಿಷ್ಠ 3.5 ಲಕ್ಷ ರೂಪಾಯಿ ಡಿಸ್ಕೌಂಟ್ ನೀಡಲಾಗಿದೆ. ಇದೇ ವೇಳೆ ನೆಕ್ಸಾನ್ ಇಂಧನ ಕಾರು ಹಾಗೂ ನೆಕ್ಸಾನ್ ಎಲೆಕ್ಟ್ರಿಕ್ ಕಾರುಗಳ ಮೇಲೂ ಡಿಸ್ಕೌಂಟ್ ನೀಡಲಾಗಿದೆ.

ಟಾಟಾ ಟಿಯಾಗೋ ಹಾಗೂ ಟಿಗೋರ್ ಆಫರ್

ಟಾಟಾ ಕಾರುಗಳ ಪೈಕಿ ಅತೀ ಕಡಿಮೆ ಬೆಲೆಯಲ್ಲಿ ಹಾಗೂ ಎಂಟ್ರಿ ಲೆವೆಲ್ ಕಾರುಗಳಾಗಿ ಗುರುತಿಸಿಕೊಂಡಿರುವ ಟಾಟಾ ಟಿಯಾಗೋ ಹಾಗೂ ಟಿಗೋರ್ ಕಾರಿನ ಮೇಲೂ ಡಿಸ್ಕೌಂಟ್ ನೀಡಲಾಗಿದೆ. 15,000 ರೂಪಾಯಿ ನಗದು ಡಿಸ್ಕೌಂಟ್, 10 ಸಾವಿರ ಎಕ್ಸ್‌ಚೇಂಜ್ ಬೋನಸ್ ಹಾಗೂ 15,000 ರೂಪಾಯಿ ಸ್ಕ್ರಾಪೇಜ್ ಬೋನಸ್ ನೀಡಲಾಗಿದೆ, ಟಿಯಾಗೋ ಇವಿಗೆ 1.45 ಲಕ್ಷ ರೂಪಾಯಿ ಡಿಸ್ಕೌಂಟ್ ಸಿಗಲಿದೆ.

ವಿಶೇಷ ಸೂಚನೆ: ಈ ವಿಶೇಷ ಆಫರ್ ಶೋ ರೂಂ ಅಥವಾ ಡೀಲರ್ ಬಳಿ ಇರುವ ಸ್ಟಾಕ್ ಕಾರುಗಳು, ಉತ್ಪಾದನಾ ವರ್ಷ, ಎಂಜಿನ್ ಮಾದರಿ ಆಧರಿಸಿ ನೀಡಲಾಗುತ್ತದೆ. ಹೀಗಾಗಿ ಹತ್ತಿರದ ಡೀಲರ್ ಅಥವಾ ಶೋ ರೂಂ ಸಂಪರ್ಕಿಸಿ ಆಫರ್ ಕುರಿತು ಮಾಹಿತಿ ಖಚಿತಪಡಿಸಿ. ಆಫರ್ ರಾಜ್ಯದಿಂದ ರಾಜ್ಯಕ್ಕೆ ನಗರದಿಂದ ನಗರಕ್ಕೆ ವ್ಯತ್ಯಾಸಗೊಳ್ಳುವ ಸಾಧ್ಯತೆ ಇದೆ.

ಫ್ಯಾಮಿಲಿಗಾಗಿ ಬಂತು ಉದ್ದನೆಯ ಸೀಟಿನ ಹೊಸ ಏಥರ್ ಇವಿ ಸ್ಕೂಟರ್: ಮೆಟಲ್ ಬಾಡಿ, 200 ಕಿ.ಮೀ ರೇಂಜ್!

Sathish Kumar KH — Mon, 24 Aug 2026 20:43:51 +0530

ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ಮಾರುಕಟ್ಟೆಯಲ್ಲಿ ಏಥರ್‌ ಎನರ್ಜಿ ಹೊಸ ಸಂಚಲನ ಸೃಷ್ಟಿಸಲು ಸಜ್ಜಾಗಿದೆ. ಕಂಪನಿ ತನ್ನ ಹೊಚ್ಚ ಹೊಸ ಎಲೆಕ್ಟ್ರಿಕ್ ಸ್ಕೂಟರ್ 'ಕೊನಾರ್ಕ್' ಅನ್ನು ಆಗಸ್ಟ್ 29 ರಂದು ಅಧಿಕೃತವಾಗಿ ಪರಿಚಯಿಸಲಿದೆ. ಏಥರ್‌ ಕಮ್ಯೂನಿಟಿ ದಿನದ ಅಂಗವಾಗಿ ಈ ಹೊಸ ಸ್ಕೂಟರ್ ಮಾರುಕಟ್ಟೆಗೆ ಎಂಟ್ರಿ ಕೊಡಲಿದೆ. ಕಳೆದ ಕೆಲವು ತಿಂಗಳುಗಳಿಂದ 'ಕೊನಾರ್ಕ್' ಸ್ಕೂಟರ್‌ನ ಟೆಸ್ಟ್ ರೈಡ್ ಚಿತ್ರಗಳು ಹಲವು ಬಾರಿ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದವು. ಈಗ, ಏಥರ್‌ ಸಿಇಒ ತರುಣ್ ಮೆಹ್ತಾ ಅವರು ಹಂಚಿಕೊಂಡಿರುವ ಹೊಸ ಟೀಸರ್, ಈ ವಾಹನದ ಕೆಲವು ಪ್ರಮುಖ ಫೀಚರ್‌ಗಳ ಬಗ್ಗೆ ಇನ್ನಷ್ಟು ಕುತೂಹಲ ಮೂಡಿಸಿದೆ.

ಮೆಟಲ್ ಬಾಡಿ ಇರಲಿದೆಯೇ?

ಹೊಸ ಟೀಸರ್‌ನಲ್ಲಿ ಎಲ್ಲರ ಗಮನ ಸೆಳೆದಿದ್ದು ಸಿಇಒ ತರುಣ್ ಮೆಹ್ತಾ ಅವರು ಸ್ಕೂಟರ್‌ನ ಬಾಡಿ ಪ್ಯಾನೆಲ್‌ಗೆ ಮ್ಯಾಗ್ನೆಟ್ (ಕಾಂತ) ಅಂಟಿಸುವ ದೃಶ್ಯ. ಇದು ಸ್ಕೂಟರ್‌ನ ಕೆಲವು ಭಾಗಗಳನ್ನಾದರೂ ಮೆಟಲ್‌ನಿಂದ (ಲೋಹ) ಮಾಡಿರಬಹುದು ಎಂಬ ಸ್ಪಷ್ಟ ಸುಳಿವು ನೀಡುತ್ತಿದೆ. ಈ ಬಗ್ಗೆ ಏಥರ್‌ ಇನ್ನೂ ಅಧಿಕೃತವಾಗಿ ಏನೂ ಹೇಳಿಲ್ಲ. ಆದರೆ ಇದು ನಿಜವಾದರೆ, ಹೋಂಡಾ ಆಕ್ಟಿವಾ ಮತ್ತು ಬಜಾಜ್ ಚೇತಕ್‌ನಂತಹ ಮೆಟಲ್ ಬಾಡಿ ಸ್ಕೂಟರ್‌ಗಳ ಸಾಲಿಗೆ ಕೊನಾರ್ಕ್ ಕೂಡ ಸೇರಲಿದೆ.

ಕುಟುಂಬದ ಬಳಕೆಗೆಂದೇ ಹೊಸ ಸ್ಕೂಟರ್

ವರದಿಗಳ ಪ್ರಕಾರ, ಕೊನಾರ್ಕ್ ಸ್ಕೂಟರ್ ಅನ್ನು ಹೊಸ 'ಇಎಲ್' ಪ್ಲಾಟ್‌ಫಾರ್ಮ್ ಆಧಾರದ ಮೇಲೆ ನಿರ್ಮಿಸಲಾಗಿದೆ. ಪರ್ಫಾರ್ಮೆನ್ಸ್‌ಗೆ ಹೆಚ್ಚು ಒತ್ತು ನೀಡುವ 450 ಸೀರೀಸ್‌ಗಿಂತ ಭಿನ್ನವಾಗಿ, ಕೊನಾರ್ಕ್ ದೈನಂದಿನ ಬಳಕೆ, ಪ್ರಾಕ್ಟಿಕಾಲಿಟಿ ಮತ್ತು ಆರಾಮದಾಯಕ ಪ್ರಯಾಣಕ್ಕೆ ಹೆಚ್ಚು ಆದ್ಯತೆ ನೀಡಲಿದೆ. ಇದರಲ್ಲಿ ಮಲ್ಟಿಪಲ್ ರೈಡಿಂಗ್ ಮೋಡ್‌ಗಳು, ರಿವರ್ಸ್ ಅಸಿಸ್ಟ್, ಮತ್ತು ಹಿಲ್-ಹೋಲ್ಡ್ ಕಂಟ್ರೋಲ್‌ನಂತಹ ಫೀಚರ್‌ಗಳನ್ನು ನಿರೀಕ್ಷಿಸಲಾಗಿದೆ. ಒಟ್ಟಿನಲ್ಲಿ, ಇದು ಕುಟುಂಬ ಬಳಕೆದಾರರನ್ನು ಗುರಿಯಾಗಿಸಿಕೊಂಡ ಪ್ರಾಕ್ಟಿಕಲ್ ಎಲೆಕ್ಟ್ರಿಕ್ ಸ್ಕೂಟರ್ ಆಗಿರಲಿದೆ.

ಉದ್ದದ ಸೀಟ್, ಫ್ಲಾಟ್ ಫ್ಲೋರ್‌ಬೋರ್ಡ್

ಹೊರಬಂದಿರುವ ಟೆಸ್ಟ್ ರೈಡ್ ಚಿತ್ರಗಳ ಪ್ರಕಾರ, ಈ ಸ್ಕೂಟರ್ ಹ್ಯಾಂಡಲ್‌ಬಾರ್‌ಗೆ ಜೋಡಿಸಲಾದ ಹೆಡ್‌ಲೈಟ್, ಉದ್ದವಾದ ಸೀಟ್ ಮತ್ತು ಸಮತಟ್ಟಾದ ಫ್ಲೋರ್‌ಬೋರ್ಡ್ ಹೊಂದಿರಲಿದೆ. ನಗರದ ಪ್ರಯಾಣಗಳಲ್ಲಿ ಇದು ಹೆಚ್ಚು ಅನುಕೂಲಕರವಾಗಿರುತ್ತದೆ. ಸಸ್ಪೆನ್ಷನ್ ವಿಚಾರಕ್ಕೆ ಬಂದರೆ, ಮುಂಭಾಗದಲ್ಲಿ ಟೆಲಿಸ್ಕೋಪಿಕ್ ಫೋರ್ಕ್‌ಗಳು, 14-ಇಂಚಿನ ಫ್ರಂಟ್ ವೀಲ್ ಮತ್ತು 12-ಇಂಚಿನ ರಿಯರ್ ವೀಲ್ ಇರಬಹುದು. ಹಾಗೆಯೇ, ಫ್ರಂಟ್ ಡಿಸ್ಕ್ ಬ್ರೇಕ್ ಮತ್ತು ರಿಯರ್ ಡ್ರಮ್ ಬ್ರೇಕ್ ಸಿಸ್ಟಮ್ ಅನ್ನು ನಿರೀಕ್ಷಿಸಲಾಗಿದೆ.

ಸ್ಮಾರ್ಟ್ ಫೀಚರ್‌ಗಳೂ ಇರಲಿವೆ

ಕೊನಾರ್ಕ್‌ನಲ್ಲಿ ಟಿಎಫ್‌ಟಿ ಇನ್‌ಸ್ಟ್ರುಮೆಂಟ್ ಕ್ಲಸ್ಟರ್ ಮತ್ತು ಸ್ಮಾರ್ಟ್‌ಫೋನ್ ಕನೆಕ್ಟಿವಿಟಿ ಸೌಲಭ್ಯಗಳು ಸಿಗುವ ಸಾಧ್ಯತೆಯಿದೆ. ವಾಯ್ಸ್ ಕಮಾಂಡ್, ರಸ್ತೆ ಗುಂಡಿಗಳ ಬಗ್ಗೆ ಎಚ್ಚರಿಕೆ, ಟೋ ಅಲರ್ಟ್, ಅಪಘಾತದ ಸಂದರ್ಭದಲ್ಲಿ ಮಾಹಿತಿ ನೀಡುವಂತಹ ಫೀಚರ್‌ಗಳಿರುವ ಏಥರ್‌‌ನ 'ಸ್ಟಾಕ್ 7.0' ಸಿಸ್ಟಮ್ ಕೂಡ ಇದರಲ್ಲಿರಬಹುದು. ಅಷ್ಟೇ ಅಲ್ಲ, ಸ್ಮಾರ್ಟ್‌ಫೋನ್ ಸಂಪರ್ಕವಿಲ್ಲದೆಯೇ ಕೆಲಸ ಮಾಡುವ ಆನ್‌ಬೋರ್ಡ್ ನ್ಯಾವಿಗೇಷನ್ ವ್ಯವಸ್ಥೆಯು ಕೊನಾರ್ಕ್‌ನ ಪ್ರಮುಖ ವಿಶೇಷತೆಗಳಲ್ಲಿ ಒಂದಾಗಬಹುದು.

200 ಕಿಲೋಮೀಟರ್‌ವರೆಗೂ ರೇಂಜ್?

ಲಭ್ಯವಿರುವ ಮಾಹಿತಿಯ ಪ್ರಕಾರ, ಕೊನಾರ್ಕ್ ಒಟ್ಟು 6 ವೇರಿಯೆಂಟ್‌ಗಳಲ್ಲಿ ಬರಬಹುದು. ಇದರಲ್ಲಿ 4 'ಎಸ್' ಟ್ರಿಮ್‌ಗಳು ಮತ್ತು 2 ಹೈ-ಸ್ಪೆಕ್ 'ಕ್ಯೂ' ವೇರಿಯೆಂಟ್‌ಗಳು ಇರಲಿವೆ ಎನ್ನಲಾಗಿದೆ. ವೇರಿಯೆಂಟ್‌ಗೆ ಅನುಗುಣವಾಗಿ 100 ಕಿ.ಮೀ.ನಿಂದ 200 ಕಿ.ಮೀ.ವರೆಗೂ ರೇಂಜ್ ನೀಡುವ ಮಾದರಿಗಳು ಲಭ್ಯವಾಗಬಹುದು. ಆದರೆ, ನಿಖರವಾದ ಬ್ಯಾಟರಿ ಸಾಮರ್ಥ್ಯ ಮತ್ತು ರೇಂಜ್ ಬಗ್ಗೆ ಏಥರ್‌ ಕಂಪನಿ ಆಗಸ್ಟ್ 29 ರಂದೇ ಖಚಿತಪಡಿಸಲಿದೆ.

ಬ್ಯಾಟರಿಯನ್ನು ಬಾಡಿಗೆಗೆ ಪಡೆಯಬಹುದೇ?

ಕೊನಾರ್ಕ್ ಜೊತೆಗೆ 'ಬ್ಯಾಟರಿ ಆಸ್ ಎ ಸರ್ವಿಸ್' (BaaS) ಎಂಬ ವ್ಯವಸ್ಥೆಯನ್ನು ಪರಿಚಯಿಸುವ ಬಗ್ಗೆಯೂ ವರದಿಗಳಿವೆ. ಈ ವ್ಯವಸ್ಥೆಯಲ್ಲಿ, ಗ್ರಾಹಕರು ಬ್ಯಾಟರಿ ಇಲ್ಲದೆ ಸ್ಕೂಟರ್ ಖರೀದಿಸಿ, ಬ್ಯಾಟರಿಗಾಗಿ ಮಾಸಿಕ ಬಾಡಿಗೆ ಪ್ಲಾನ್ ಆಯ್ಕೆ ಮಾಡಿಕೊಳ್ಳಬಹುದು. ಇದರಿಂದ ಸ್ಕೂಟರ್ ಖರೀದಿಸುವ ಆರಂಭಿಕ ವೆಚ್ಚ ಗಣನೀಯವಾಗಿ ಕಡಿಮೆಯಾಗಲಿದೆ. ಕೊನಾರ್ಕ್‌ನ ಬೆಲೆ, ಬ್ಯಾಟರಿ ಆಯ್ಕೆಗಳು, ರೇಂಜ್ ಮತ್ತು BaaS ವ್ಯವಸ್ಥೆಯ ಕುರಿತಾದ ಎಲ್ಲಾ ವಿವರಗಳು ಆಗಸ್ಟ್ 29 ರಂದು ನಡೆಯುವ ಏಥರ್‌ ಕಮ್ಯೂನಿಟಿ ದಿನದಂದು ಬಹಿರಂಗಗೊಳ್ಳಲಿವೆ.

ಇಲ್ಲಿ ಎಲ್ಲವೂ ಫ್ರೀ, ಫ್ರೀ: ಕಾರನ್ನೇ ಉಚಿತ ಸೂಪರ್ ಮಾರ್ಕೆಟ್ ಮಾಡಿದ ಟ್ಯಾಕ್ಸಿ ಡ್ರೈವರ್

Sushma Hegde — Wed, 26 Aug 2026 14:29:38 +0530

ಟ್ಯಾಕ್ಸಿ ಎಂದರೆ ಸಾಮಾನ್ಯವಾಗಿ ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ಪ್ರಯಾಣಿಕರನ್ನು ಕರೆದೊಯ್ಯುವ ವಾಹನ. ಆದರೆ ಬ್ಯಾಂಕಾಕ್‌ನ ಈ ಟ್ಯಾಕ್ಸಿ ಚಾಲಕನ ಕ್ಯಾಬ್ ಮಾತ್ರ ಇದಕ್ಕಿಂತ ಸಂಪೂರ್ಣ ಭಿನ್ನ. ಪ್ರಯಾಣಿಕರಿಗೆ ಅಗತ್ಯವಿರುವ ದಿನನಿತ್ಯದ ವಸ್ತುಗಳನ್ನು ಉಚಿತವಾಗಿ ತೆಗೆದುಕೊಂಡು ಹೋಗಲು ಅವಕಾಶ ನೀಡುವ ಮೂಲಕ ತಮ್ಮ ಟ್ಯಾಕ್ಸಿಯನ್ನೇ ‘ಮಿನಿ ಮಾರ್ಟ್’ ಆಗಿ ಪರಿವರ್ತಿಸಿದ್ದಾರೆ. ಹಲ್ಲುಜ್ಜುವ ಬ್ರಷ್‌, ಸಾಕ್ಸ್‌, ಕನ್ನಡಿ, ಬೇಬಿ ಪೌಡರ್‌, ಬೆಕ್ಕಿನ ಆಹಾರ ಸೇರಿದಂತೆ ಹಲವು ವಸ್ತುಗಳು ಕ್ಯಾಬ್‌ನೊಳಗೆ ಲಭ್ಯವಿವೆ. ಅಷ್ಟೇ ಅಲ್ಲ, ಪ್ರಯಾಣಿಕರಿಗೆ ನೀರು ಮತ್ತು ಕಾಫಿಯನ್ನೂ ಉಚಿತವಾಗಿ ನೀಡಲಾಗುತ್ತಿದೆ. ಈ ಅಪರೂಪದ ವ್ಯವಸ್ಥೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಚಾಲಕನ ಮಾನವೀಯ ಕಾರ್ಯಕ್ಕೆ ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.

ಟ್ಯಾಕ್ಸಿ ಒಳಗೆ ಏನಿದು ‘ಮಿನಿ ಮಾರ್ಟ್

Instagramನಲ್ಲಿ @floraandnote ಖಾತೆಯಿಂದ ಹಂಚಿಕೊಳ್ಳಲಾದ ವಿಡಿಯೋದಲ್ಲಿ, ಫ್ಲೋರಾ ಮತ್ತು ನೋಟ್ ಟ್ಯಾಕ್ಸಿಯೊಳಗಿನ ವ್ಯವಸ್ಥೆಯನ್ನು ನೋಡಿ ಅಚ್ಚರಿಗೊಳಗಾಗುತ್ತಾರೆ. ಕ್ಯಾಬ್‌ನೊಳಗೆ ಇಷ್ಟೊಂದು ವಸ್ತುಗಳನ್ನು ಜೋಡಿಸಿಟ್ಟಿರುವುದನ್ನು ಕಂಡು ಅವರು ಒಂದೊಂದೇ ವಸ್ತುವನ್ನು ತೋರಿಸುತ್ತಾ ಹೋಗುತ್ತಾರೆ. ಹಲ್ಲುಜ್ಜುವ ಬ್ರಷ್‌ಗಳು, ಸಾಕ್ಸ್‌, ಕನ್ನಡಿ, ಬೇಬಿ ಪೌಡರ್‌, ಬೆಕ್ಕಿನ ಆಹಾರ ಸೇರಿದಂತೆ ಹಲವು ದಿನನಿತ್ಯದ ಅಗತ್ಯ ವಸ್ತುಗಳು ಅಲ್ಲಿವೆ. ವಿಶೇಷವೆಂದರೆ ಇವುಗಳಿಗೆ ಪ್ರಯಾಣಿಕರು ಯಾವುದೇ ಬಹ್ತ್ ಹಣ ಪಾವತಿಸಬೇಕಿಲ್ಲ. ಪ್ರಯಾಣಿಕರಿಗೆ ಏನಾದರೂ ಅಗತ್ಯವಿದ್ದರೆ, ಬೇಕಾದ ವಸ್ತುವನ್ನು ತೆಗೆದುಕೊಂಡು ಹೋಗಬಹುದು. ಹೀಗಾಗಿ ಸಾಮಾನ್ಯ ಟ್ಯಾಕ್ಸಿ ಸವಾರಿ ಪ್ರಯಾಣಿಕರಿಗೆ ಅನಿರೀಕ್ಷಿತವಾಗಿ ಒಂದು ಸಣ್ಣ ಅಂಗಡಿಯ ಅನುಭವವನ್ನೇ ನೀಡುತ್ತಿದೆ.

ಸುಮಾರು 10 ವರ್ಷಗಳಿಂದ ಇದೇ ಸೇವೆ

ಈ ವಿಶೇಷ ಉಪಕ್ರಮವನ್ನು ಚಾಲಕ ಸುಮಾರು ಒಂದು ದಶಕದಿಂದ ನಡೆಸಿಕೊಂಡು ಬರುತ್ತಿದ್ದಾರೆ ಎಂದು @floraandnote ಹಂಚಿಕೊಂಡಿರುವ ಪೋಸ್ಟ್‌ನಲ್ಲಿ ತಿಳಿಸಲಾಗಿದೆ. ಇದು ಒಂದು ಸಾಂಪ್ರದಾಯಿಕ ವ್ಯಾಪಾರವಲ್ಲ. ಪ್ರಯಾಣಿಕರಿಗೆ ವಸ್ತುಗಳನ್ನು ಮಾರಾಟ ಮಾಡುವ ಬದಲು, ಅಗತ್ಯವಿರುವವರು ಉಚಿತವಾಗಿ ತೆಗೆದುಕೊಂಡು ಹೋಗುವಂತೆ ಚಾಲಕ ಅವುಗಳನ್ನು ಕ್ಯಾಬ್‌ನಲ್ಲೇ ಸಂಗ್ರಹಿಸಿಡುತ್ತಾರೆ.

ಪ್ರಯಾಣಿಕರ ಟಿಪ್ಸ್‌ನಿಂದಲೇ ಮತ್ತೆ ವಸ್ತು ಖರೀದಿ

ಈ ಮಿನಿ ಮಾರ್ಟ್‌ನ ಹಿಂದಿರುವ ಅಸಲಿ ವಿಶೇಷತೆ ಇಲ್ಲಿದೆ. ಪ್ರಯಾಣಿಕರು ಕ್ಯಾಬ್‌ನಲ್ಲಿರುವ ಉಚಿತ ವಸ್ತುಗಳನ್ನು ಕಂಡು ಸಂತೋಷಗೊಂಡು ಚಾಲಕನಿಗೆ ಉದಾರವಾಗಿ ಟಿಪ್ಸ್ ನೀಡುತ್ತಾರೆ. ಚಾಲಕ ಆ ಟಿಪ್ಸ್‌ ಹಣವನ್ನು ತಮ್ಮ ವೈಯಕ್ತಿಕ ಖರ್ಚಿಗೆ ಮಾತ್ರ ಬಳಸುವುದಿಲ್ಲ. ಬದಲಾಗಿ, ಮತ್ತಷ್ಟು ಅಗತ್ಯ ವಸ್ತುಗಳನ್ನು ಖರೀದಿಸಿ ಕ್ಯಾಬ್‌ನಲ್ಲಿರುವ ಸಂಗ್ರಹವನ್ನು ಮರುಪೂರಣ ಮಾಡುತ್ತಾರೆ. ಅಂದರೆ, ಒಬ್ಬ ಪ್ರಯಾಣಿಕ ನೀಡಿದ ಟಿಪ್ಸ್‌ನಿಂದ ಮತ್ತೊಬ್ಬ ಪ್ರಯಾಣಿಕನಿಗೆ ಅಗತ್ಯವಿರುವ ವಸ್ತು ಸಿಗುತ್ತದೆ. ಇದು ಸರಳವಾದ ‘ಪೇ ಇಟ್ ಫಾರ್ವರ್ಡ್’ ವ್ಯವಸ್ಥೆಯಾಗಿ ಕೆಲಸ ಮಾಡುತ್ತಿದೆ.

ನೀರು, ಕಾಫಿಯೂ ಉಚಿತ

ಟ್ಯಾಕ್ಸಿಯಲ್ಲಿರುವ ವಸ್ತುಗಳ ಪಟ್ಟಿ ಇಲ್ಲಿಗೇ ಮುಗಿಯುವುದಿಲ್ಲ. ಚಾಲಕ ಪ್ರಯಾಣಿಕರಿಗೆ ನೀರು ಮತ್ತು ಕಾಫಿಯನ್ನೂ ಒದಗಿಸುತ್ತಾರೆ. ಹೀಗಾಗಿ ಪ್ರಯಾಣಿಕರು ಇದನ್ನು ಸಾಮಾನ್ಯ ಟ್ಯಾಕ್ಸಿ ಎಂದು ನೋಡುವುದಕ್ಕಿಂತ, ಚಲಿಸುವ ಮಿನಿ ಮಾರ್ಟ್‌ನಂತೆ ಅನುಭವಿಸುತ್ತಿದ್ದಾರೆ.

ನೆಟ್ಟಿಗರು ಹೇಳಿದ್ದೇನು?

ವಿಡಿಯೋ ವೈರಲ್ ಆಗುತ್ತಿದ್ದಂತೆ ಚಾಲಕನ ಈ ವಿಭಿನ್ನ ಪ್ರಯತ್ನಕ್ಕೆ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಮೆಚ್ಚುಗೆ ವ್ಯಕ್ತವಾಗಿದೆ. ದಿನನಿತ್ಯದ ಟ್ಯಾಕ್ಸಿ ಪ್ರಯಾಣವನ್ನು ಇಷ್ಟು ಸುಂದರ ಮತ್ತು ಮಾನವೀಯ ಅನುಭವವನ್ನಾಗಿ ಮಾಡಿರುವುದಕ್ಕೆ ಹಲವರು ಚಾಲಕನನ್ನು ಶ್ಲಾಘಿಸಿದ್ದಾರೆ. ಒಬ್ಬ ಕಾಮೆಂಟರ್‌ ಹಾಸ್ಯಮಿಶ್ರಿತವಾಗಿ, “ಥಾಯ್ ಜನರು ತುಂಬಾ ಆರೋಗ್ಯಕರವಾಗಿ ಸೃಜನಶೀಲರು” ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಈ ಕಾರ್ಯದ ವಿಶೇಷತೆ ಎಂದರೆ ಯಾವುದೇ ದೊಡ್ಡ ಪ್ರಚಾರವಿಲ್ಲ, ಭರ್ಜರಿ ಘೋಷಣೆಗಳಿಲ್ಲ. ಒಬ್ಬ ಟ್ಯಾಕ್ಸಿ ಚಾಲಕ ವರ್ಷಗಳಿಂದ ತನ್ನ ಕ್ಯಾಬ್‌ನಲ್ಲಿ ಕೆಲವು ಅಗತ್ಯ ವಸ್ತುಗಳನ್ನು ಸಂಗ್ರಹಿಸಿ, ಅವು ಬೇಕಾಗಿರುವ ಅಪರಿಚಿತರಿಗೆ ಉಚಿತವಾಗಿ ನೀಡುತ್ತಿದ್ದಾರೆ.

ಟಿವಿಎಸ್ ಐಕ್ಯೂಬ್ ಮಿಲಿಯನ್ಆರ್ ಎಡಿಶನ್ ಎಲೆಕ್ಟ್ರಿಕ್ ಸ್ಕೂಟರ್ ಲಾಂಚ್, ಬೆಲೆ ಎಷ್ಟು?

Chethan Kumar — Wed, 26 Aug 2026 13:29:48 +0530

ಬೆಂಗಳೂರು (ಆ.26) ಭಾರತದಲ್ಲಿ ಹಲವು ಇವಿ ಸ್ಕೂಟರ್ ಲಭ್ಯವಿದೆ. ಜೊತೆಗೆ ಹೊಸ ಹೊಸ ಇವಿ ಸ್ಕೂಟರ್ ಬಿಡುಗಡೆಯಾಗುತ್ತಿದೆ. ಈ ಪೈಕಿ ಟಿವಿಎಸ್ ಬಿಡುಗಡೆ ಮಾಡಿರುವ ಐಕ್ಯೂಬ್ ಇದೀಗ ಹೊಸ ಅವತಾರದಲ್ಲಿ ಬಿಡುಗಡೆಯಾಗಿದೆ. ಟಿವಿಎಸ್ ಐಕ್ಯೂಬ್ ಮಿಲಿಯನ್ಆರ್ ಸ್ಕೂಟರ್ ಅತ್ಯಂತ ಆಕರ್ಷಕ ಬಣ್ಣ, ಆಕರ್ಷಕ ವಿನ್ಯಾಸ ಹಾಗೂ ಹೆಚ್ಚುವರಿ ಫೀಚರ್ಸ್ ಜೊತೆ ಬಿಡುಗಡೆಯಾಗಿದೆ.

ಹೊಸ ಸ್ಕೂಟರ್ ಬೆಲೆ

ಟಿವಿಎಸ್ ಮಿಲಿಯನ್ಆರ್ ಎಡಿಶನ್ ಸ್ಕೂಟರ್ ಬೆಲೆ 1.40 ಲಕ್ಷ ರೂಪಾಯಿ. ಈ ಸ್ಪೆಷಲ್ ಎಡಿಶನ್ ಸ್ಕೂಟರ್ ಮಾರುಕಟ್ಟೆಯಲ್ಲಿ ಲಭ್ಯವಿರುವ ಪ್ರಮಾಣಿತ 3.5kWh ವೇರಿಯೆಂಟ್‌ಗಿಂತ ಕೇವಲ 3,551 ರೂಪಾಯಿ ಹೆಚ್ಚಿನ ಬೆಲೆಯಲ್ಲಿ ಲಭ್ಯವಿದೆ. ಈ ಸಣ್ಣ ಹೆಚ್ಚುವರಿ ಮೊತ್ತಕ್ಕೆ ಗ್ರಾಹಕರು 3.5 ಲೀಟರ್‌ಗಳ ಹೆಚ್ಚುವರಿ ಸ್ಟೋರೇಜ್ ಸ್ಪೇಸ್ ಮತ್ತು USB Type-C ಪೋರ್ಟ್ ಪಡೆಯುತ್ತಾರೆ. ಹೆಚ್ಚಿನ ಪ್ರಾಯೋಗಿಕತೆ ಬಯಸುವ ಖರೀದಿದಾರರಿಗೆ ಇದು ಉತ್ತಮ ಆಯ್ಕೆಯಾಗಿದೆ.

10 ಲಕ್ಷ ಗ್ರಾಹಕರ ಮೈಲಿಗಲ್ಲು

TVS iQube ಸ್ಕೂಟರ್ 10 ಲಕ್ಷ ಗ್ರಾಹಕರನ್ನು ತಲುಪಿದ ಸಾಧನೆಯನ್ನು ಆಚರಿಸಲು ಈ MillionR ಎಡಿಷನ್ ಅನ್ನು ಪರಿಚಯಿಸಲಾಗಿದೆ. 2016ರಲ್ಲಿ TVS Jupiter ಸ್ಕೂಟರ್ 10 ಲಕ್ಷ ಮಾರಾಟವಾದಾಗ ಅದನ್ನು ಆಚರಿಸಲು MillionR ಬ್ಯಾಡ್ಜ್ ಅನ್ನು ನೀಡಲಾಗಿತ್ತು. ಅದೇ ರೀತಿ ಈಗ iQubeಗೂ ಈ ವಿಶೇಷ ಗೌರವ ನೀಡಲಾಗಿದೆ.

ಬ್ಯಾಟರಿ ಮತ್ತು ಪರ್ಫಾರ್ಮೆನ್ಸ್, ಹೊಸತನ

MillionR ಎಡಿಷನ್‌ನಲ್ಲಿ ಬ್ಯಾಟರಿ, ಮೋಟಾರ್ ಮತ್ತು ಪರ್ಫಾರ್ಮೆನ್ಸ್ ವಿವರಗಳು ಪ್ರಮಾಣಿತ ಮಾದರಿಯಂತೆಯೇ ಇವೆ. ಯಾವುದೇ ಬದಲಾವಣೆಗಳಿಲ್ಲ. 3.5 ಲೀಟರ್ ಹೆಚ್ಚುವರಿ ಸ್ಟೋರೇಜ್ ಸ್ಪೇಸ್ ನೀಡಲಾಗಿದೆ. USB Type-C ಪೋರ್ಟ್ ಸೇರಿದಂತೆ ಕೆಲ ಹೊತನಗಳೂ ಇದರಲ್ಲಿದೆ.

ಮಿಲಿಯನ್ ಆರ್ ಬ್ಯಾಡ್ಜಿಂಗ್ ನೀಡಲಾಗಿದೆ. ಹೊಸ ಸ್ಕೂಟರ್ ಬುಕಿಂಗ್ ಆರಂಭಗೊಂಡಿದ್ದು, ಗ್ರಾಹಕರು ಅಧಿಕೃತ ಡೀಲರ್‌ಗಳಲ್ಲಿ ಖರೀದಿಸಲು ಸಾಧ್ಯ

ಎಲೆಕ್ಟ್ರಿಕ್‌ ಜರ್ನಿ ಆರಂಭಿಸಿದ ಪುನೀತ್‌ ರಾಜ್‌ಕುಮಾರ್‌ ಮಿಲನ ಬ್ಯೂಟಿ ಪಾರ್ವತಿ, ಮಹೀಂದ್ರಾ ಕಾರ್‌ ಆಯ್ಕೆಯ ಹಿಂದಿದೆ ಈ ರಹಸ್ಯ!

Santosh Naik — Mon, 24 Aug 2026 16:31:46 +0530

ಬೆಂಗಳೂರು (ಆ.24): ತಮ್ಮ ಅದ್ಭುತ ಅಭಿನಯದ ಮೂಲಕ ಮಲಯಾಳಂ ಚಿತ್ರರಂಗದ ಜನಪ್ರಿಯ ನಟಿಯಾಗಿ ಗುರುತಿಸಿಕೊಂಡಿರುವ ಪಾರ್ವತಿ ತಿರುವೋತ್ ತಮ್ಮ ಗ್ಯಾರೇಜ್‌ಗೆ ಹೊಸ ಐಷಾರಾಮಿ ಕಾರ್‌ ಖರೀದಿ ಮಾಡಿದ್ದಾರೆ. ಕನ್ನಡದಲ್ಲಿ ಪುನೀತ್‌ ರಾಜ್‌ಕುಮಾರ್‌ ಅವರೊಂದಿಗೆ ಸೂಪರ್‌ಹಿಟ್‌ ಸಿನಿಮಾ ಮಿಲನ ಹಾಗೂ ಪೃಥ್ವಿ ಚಿತ್ರದಲ್ಲಿ ನಟಿಸಿದ್ದ ಪಾರ್ವತಿ ಬಳಿಕ ಸ್ಯಾಂಡಲ್‌ವುಡ್‌ನಲ್ಲಿ ಕಾಣಿಸಿಕೊಂಡಿಲ್ಲ. ಪೃಥ್ವಿರಾಜ್ ಸುಕುಮಾರನ್ ಅಭಿನಯದ 'ಐ ನೋಬಡಿ' (I Nobody) ಸಿನಿಮಾದಲ್ಲಿ ಕೊನೆಯದಾಗಿ ತೆರೆಮೇಲೆ ಕಾಣಿಸಿಕೊಂಡು ಮೆಚ್ಚುಗೆ ಪಡೆದಿದ್ದ ನಟಿ, ಇದೀಗ ಹೊಸ ಇಂಟೆಲಿಜೆಂಟ್ ಎಲೆಕ್ಟ್ರಿಕ್ ಎಸ್‌ಯುವಿ ಒಂದಕ್ಕೆ ಒಡತಿಯಾಗಿದ್ದಾರೆ.

ಮಹೀಂದ್ರಾ ಸಂಸ್ಥೆಯ ಅತ್ಯಂತ ಆಧುನಿಕ ಇವಿ ಮಾಡೆಲ್ ಆಗಿರುವ 'ಮಹೀಂದ್ರಾ ಎಕ್ಸ್‌ಇವಿ 9e' (Mahindra XEV 9e) ಕಾರ್‌ ಅನ್ನು ಪಾರ್ವತಿ ಖರೀದಿಸಿದ್ದಾರೆ. ಕೊಚ್ಚಿಯ ಶೋರೂಂಗೆ ತಮ್ಮ ತಂದೆ ಮತ್ತು ತಾಯಿಯೊಂದಿಗೆ ಆಗಮಿಸಿ ಅವರು ಕಾರಿನ ಡೆಲಿವರಿ ಪಡೆದುಕೊಂಡಿದ್ದಾರೆ. ಈ ಸಂಭ್ರಮದ ಕ್ಷಣದ 'ರೀಲ್ಸ್' ವಿಡಿಯೋವನ್ನು 'ಆಟೋಬಾನ್ ಮಹೀಂದ್ರಾ' (Autobahn Mahindra) ತಮ್ಮ ಸೋಶಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದೆ.

'ನನ್ನ ಪಾಲಿಗೆ ಇದು ಬ್ರ್ಯಾಂಡ್ ನ್ಯೂ ಬೀಸ್ಟ್' - ನಟಿ ಪಾರ್ವತಿ

ಕಾರು ಡೆಲಿವರಿ ಪಡೆದ ಬಳಿಕ ಮಾತನಾಡಿದ ನಟಿ ಪಾರ್ವತಿ ತಿರುವೋತ್, "ಈ ವಾಹನವನ್ನು ನೋಡಿದರೆ ನನಗೆ ಇದು ಬೀಸ್ಟ್‌ ತರಹ ಅನಿಸುತ್ತದೆ. ಈ ಕಾರಿನಲ್ಲಿ ಮುಖ್ಯವಾಗಿ ಮೂರು ಸಂಗತಿಗಳು ನನಗೆ ಅವೆಲ್ಲವೂ ಇಷ್ಟವಾಗಿವೆ," ಎಂದು ಸಂತಸ ವ್ಯಕ್ತಪಡಿಸಿದರು:

ಡ್ರೈವಿಂಗ್ ಕಂಫರ್ಟ್: ಚಾಲನೆ ಮಾಡುವವರಿಗೆ ಅತ್ಯುತ್ತಮ ಕಂಫರ್ಟ್ ಹಾಗೂ ಮೋಜಿನ ಡ್ರೈವಿಂಗ್ ಅನುಭವ (Fun Joy Driving Experience) ನೀಡುತ್ತದೆ.

ದ್ವಿತೀಯ ಸಾಲಿನ ಆಸನ (Second Row Seats): ನನ್ನ ತಂದೆ-ತಾಯಿಗೆ ಅತ್ಯಂತ ಆರಾಮದಾಯಕ ಮತ್ತು ಸುಖಕರ ಪ್ರಯಾಣವನ್ನು ಖಾತರಿಪಡಿಸುವುದು ನನಗೆ ಮುಖ್ಯವಾಗಿತ್ತು. ಈ ಕಾರಿನ ಹಿಂಭಾಗದ ಸೀಟುಗಳು ಆ ಅಗತ್ಯವನ್ನು ಸಂಪೂರ್ಣವಾಗಿ ಪೂರೈಸುತ್ತವೆ.

ಮೌಲ್ಯಕ್ಕೆ ತಕ್ಕ ಸೌಲಭ್ಯ (Value for Money): ಈ ಬೆಲೆಗೆ ಅತ್ಯುತ್ತಮ ಹಾಗೂ ಆಧುನಿಕ ಸೌಲಭ್ಯಗಳನ್ನು ನೀಡಲಾಗಿದೆ. ಜೊತೆಗೆ ಇದು ಎಲೆಕ್ಟ್ರಿಕ್ ವಾಹನವಾಗಿರುವುದರಿಂದ ಪರಿಸರಕ್ಕೂ ಯಾವುದೇ ಹಾನಿಯಿಲ್ಲ.

ಎಕ್ಸ್‌ಇವಿ 9e ಕಾರಿನ ವೈಶಿಷ್ಟ್ಯಗಳು ಹಾಗೂ ಬೆಲೆ

ಆರಂಭಿಕ ಬೆಲೆ: ಈ ಕಾರಿನ ಶೋರೂಂ ಬೆಲೆ ₹21.90 ಲಕ್ಷದಿಂದ (Ex-showroom) ಪ್ರಾರಂಭವಾಗುತ್ತದೆ.

ಬ್ಯಾಟರಿ ಹಾಗೂ ಮೈಲೇಜ್: 59 kWh ಮತ್ತು 79 kWh ಬ್ಯಾಟರಿ ಆಯ್ಕೆಗಳಲ್ಲಿ ಲಭ್ಯವಿದ್ದು, ಒಮ್ಮೆ ಚಾರ್ಜ್ ಮಾಡಿದರೆ 500 ಕಿಲೋಮೀಟರ್‌ಗಿಂತಲೂ ಹೆಚ್ಚಿನ ಮೈಲೇಜ್ (Range) ನೀಡುತ್ತದೆ.

ವೇಗ: ಕೇವಲ 6.8 ಸೆಕೆಂಡುಗಳಲ್ಲಿ 0 ಯಿಂದ 100 ಕಿಮೀ ವೇಗ ಪಡೆದುಕೊಳ್ಳುವ ಸಾಮರ್ಥ್ಯ ಹೊಂದಿದೆ.

ಇತರ ಫೀಚರ್ಸ್‌: ಕಾರಿನೊಳಗೆ 31-ಇಂಚಿನ ವಿಶಾಲವಾದ 'ಸಿನಿಮಾಸ್ಕೋಪಿಕ್' ಇನ್ಫೋಟೈನ್‌ಮೆಂಟ್ ಡಿಸ್‌ಪ್ಲೇ (Cinemascopic Infotainment Display), ಪನೋರಮಿಕ್ ಸನ್‌ರೂಫ್ ಹಾಗೂ ವಿವಿಧ ಮಾದರಿಯ ಡ್ರೈವ್ ಮೋಡ್‌ಗಳು ಸೇರಿ ಹತ್ತಾರು ಪ್ರೀಮಿಯಂ ಫೀಚರ್‌ಗಳನ್ನು ಒದಗಿಸಲಾಗಿದೆ.

ಸ್ವಂತ ಮನೆ ಬೆನ್ನಲ್ಲೇ ಹೊಸ ಕಾರಿನ ಒಡತಿಯಾದ 'ಗೆಳತಿ ಗಾಯತ್ರಿ' ನಟಿ ಕೃತಿಕಾ ರವೀಂದ್ರ: ಕಾರಿನ ವಿಶೇಷತೆಗಳೇನು?

Santosh Naik — Fri, 21 Aug 2026 17:15:41 +0530

'ಗೆಳತಿ ಗಾಯತ್ರಿ' ಧಾರಾವಾಹಿ ಖ್ಯಾತಿಯ ನಟಿ ಕೃತ್ತಿಕಾ ರವೀಂದ್ರ, 13 ವರ್ಷಗಳ ಪರಿಶ್ರಮದ ನಂತರ ತಮ್ಮ ಮೊದಲ ಹೊಸ ಕಾರನ್ನು ಖರೀದಿಸಿದ್ದಾರೆ. ಟಾಟಾ ನೆಕ್ಸಾನ್ ಒಡತಿಯಾದ ಅವರು, ಈ ಯಶಸ್ಸನ್ನು ತಮ್ಮ ತಾಯಿಯೊಂದಿಗೆ ಸಂಭ್ರಮಿಸಿ, ಶ್ರಮಕ್ಕೆ ತಕ್ಕ ಫಲ ಸಿಕ್ಕಿದೆ ಎಂದು ಸಂತಸ ಹಂಚಿಕೊಂಡಿದ್ದಾರೆ.

'ರಾಧಾ ಕಲ್ಯಾಣ', 'ಭೂಮಿಗೆ ಬಂದ ಭಗವಂತ' ಹಾಗೂ ಪ್ರಸ್ತುತ 'ಗೆಳತಿ ಗಾಯತ್ರಿ' ಧಾರಾವಾಹಿ ಮೂಲಕ ಕಿರಿತೆರೆಯಲ್ಲಿ ಜನಪ್ರಿಯವಾಗಿರುವ ನಟಿ ಕೃತ್ತಿಕಾ ರವೀಂದ್ರ ಬರೋಬ್ಬರಿ 13 ವರ್ಷಗಳ ಕಾಯುವಿಕೆ ಮತ್ತು ನಿರಂತರ ಶ್ರಮದ ನಂತರ ತಮ್ಮ ಮೊದಲ ಬ್ರ್ಯಾಂಡ್ ನ್ಯೂ ಸ್ವಂತ ಕಾರನ್ನು ಖರೀದಿಸಿದ್ದಾರೆ. ಇತ್ತೀಚೆಗಷ್ಟೇ ಬೆಂಗಳೂರಿನಲ್ಲಿ ಸ್ವಂತ ಮನೆ ಮಾಡಿದ್ದ ನಟಿ, ಈಗ ಕಾರಿನ ಒಡತಿಯಾಗಿದ್ದಾರೆ.

ಹೊಸ ಕಾರನ್ನು ಮನೆಗೆ ತಂದ ಖುಷಿಯಲ್ಲಿ ಕೃತ್ತಿಕಾ ತಮ್ಮ ತಾಯಿಯೊಂದಿಗೆ ಕೇಕ್ ಕಟ್ ಮಾಡಿ ಸಂಭ್ರಮಿಸಿದ್ದಾರೆ. "ಶ್ರಮಕ್ಕೆ ಖಂಡಿತ ಫಲ ಸಿಗುತ್ತದೆ" ಎಂದು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿರುವ ಅವರು, ತಮ್ಮ ಈ ಯಶಸ್ಸಿಗೆ ಶಿವ-ಶಕ್ತಿಗೆ ಧನ್ಯವಾದ ಅರ್ಪಿಸಿದ್ದಾರೆ.

ಕೃತ್ತಿಕಾ ರವೀಂದ್ರ ಅವರು ಸುಮಾರು ₹12.55 ಲಕ್ಷ (ಎಕ್ಸ್‌-ಶೋರೂಮ್) ಮೌಲ್ಯದ 'ಟಾಟಾ ನೆಕ್ಸಾನ್ ಕ್ರಿಯೇಟಿವ್ ಪ್ಲಸ್ ಪಿಎಸ್ ಡಿಸಿಎ' (Tata Nexon Creative Plus PS DT DCA) ಮಾದರಿಯ ಬೂದು ಬಣ್ಣದ ಕಾಂಪ್ಯಾಕ್ಟ್ ಎಸ್‌ಯುವಿ ಕಾರನ್ನು ಆಯ್ಕೆ ಮಾಡಿಕೊಂಡಿದ್ದಾರೆ.

ಈ ಕಾರು 1.2-ಲೀಟರ್ ಟರ್ಬೊ-ಪೆಟ್ರೋಲ್ ಇಂಜಿನ್ ಹೊಂದಿದ್ದು, ಅತ್ಯಂತ ಸುಗಮ ಚಾಲನಾ ಅನುಭವ ನೀಡುವ 7-ಸ್ಪೀಡ್ ಡುಯಲ್-ಕ್ಲಚ್ ಆಟೋಮ್ಯಾಟಿಕ್ (DCA) ಟ್ರಾನ್ಸ್‌ಮಿಷನ್ ಸೌಲಭ್ಯವನ್ನು ಒಳಗೊಂಡಿದೆ.

ಕಾರಿನಲ್ಲಿ ವಾಯ್ಸ್-ಅಸಿಸ್ಟೆಡ್ ಎಲೆಕ್ಟ್ರಿಕ್ ಸನ್‌ರೂಫ್, 360-ಡಿಗ್ರಿ ಕ್ಯಾಮೆರಾ, ಪವರ್-ಅಡ್ಜಸ್ಟಬಲ್ ಫ್ರಂಟ್ ಸೀಟ್‌ಗಳು, ವೈರ್‌ಲೆಸ್ ಆಂಡ್ರಾಯ್ಡ್ ಆಟೋ ಮತ್ತು ಆಪಲ್ ಕಾರ್‌ಪ್ಲೇ ಹೊಂದಿರುವ ಟಚ್‌ಸ್ಕ್ರೀನ್ ಇನ್ಫೋಟೈನ್‌ಮೆಂಟ್ ಸಿಸ್ಟಮ್ ಹಾಗೂ ಆಟೋಮ್ಯಾಟಿಕ್ ಕ್ಲೈಮೇಟ್ ಕಂಟ್ರೋಲ್ ಫೀಚರ್‌ಗಳಿವೆ.

ಪ್ರಯಾಣಿಕರ ಸುರಕ್ಷತೆಗಾಗಿ ಈ ಕಾರಿನಲ್ಲಿ 6 ಏರ್‌ಬ್ಯಾಗ್‌ಗಳು, ಬ್ಲೈಂಡ್-ಸ್ಪಾಟ್ ಮಾನಿಟರ್, ಎಲೆಕ್ಟ್ರಾನಿಕ್ ಸ್ಟೆಬಿಲಿಟಿ ಪ್ರೋಗ್ರಾಂ (ESP), ಕ್ರೂಸ್ ಕಂಟ್ರೋಲ್, ರೈನ್-ಸೆನ್ಸಿಂಗ್ ವೈಪರ್‌ಗಳು ಮತ್ತು ISOFIX ಚೈಲ್ಡ್ ಸೀಟ್ ಮೌಂಟ್‌ಗಳನ್ನು ನೀಡಲಾಗಿದೆ.

ಚಲಿಸುತ್ತಿರುವ ಕಾರಿನ ಕಿಟಕಿಯಿಂದ ಬಿಳಿ ಬಟ್ಟೆ ಹೊರಗೆ ಹಾಕಿದ್ರೆ ಏನರ್ಥ? ಈ ಸಿಗ್ನಲ್ ಗೊತ್ತಿಲ್ಲದಿದ್ದರೆ ಅಪಾಯ

Sushma Hegde — Fri, 21 Aug 2026 14:05:12 +0530

ರಸ್ತೆಯಲ್ಲಿ ಕಾರೊಂದು ಸಾಗುತ್ತಿರುವಾಗ ಅದರ ಕಿಟಕಿಯಿಂದ ಬಿಳಿ ಬಟ್ಟೆ ಅಥವಾ ಬಿಳಿ ಕರವಸ್ತ್ರವೊಂದು ಹೊರಗೆ ನೇತಾಡುತ್ತಿರುವುದನ್ನು ನೋಡಿದರೆ, ಬಹುತೇಕ ಜನರಿಗೆ ಅದರ ಅರ್ಥವೇನು ಎಂಬುದು ಗೊತ್ತಿರುವುದಿಲ್ಲ. ಆದರೆ ಕೆಲವು ಸಂದರ್ಭಗಳಲ್ಲಿ ಇದು ಅತ್ಯಂತ ಮಹತ್ವದ ಸಂಕೇತವಾಗಿರಬಹುದು. ಬಿಳಿ ಬಟ್ಟೆಯನ್ನು ಕಾರಿನಿಂದ ಹೊರಗೆ ಪ್ರದರ್ಶಿಸುವುದು ಸಾಮಾನ್ಯವಾಗಿ ಸಹಾಯದ ಅಗತ್ಯವಿದೆ ಅಥವಾ ತುರ್ತು ಪರಿಸ್ಥಿತಿ ಎದುರಾಗಿದೆ ಎಂಬ ಸಂದೇಶವನ್ನು ನೀಡಲು ಬಳಸಲಾಗುತ್ತದೆ. ವಿಶೇಷವಾಗಿ ಕಾರು ಕೆಟ್ಟುಹೋಗಿದ್ದರೆ ಅಥವಾ ಪ್ರಯಾಣಿಕರಿಗೆ ತಕ್ಷಣದ ನೆರವು ಬೇಕಾಗಿದ್ದರೆ, ಈ ರೀತಿಯ ದೃಶ್ಯ ಸಂಕೇತವನ್ನು ಬಳಸಬಹುದು.

ಬಿಳಿ ಬಟ್ಟೆ ಯಾಕೆ ಬಳಸುತ್ತಾರೆ?

ರಸ್ತೆಯಲ್ಲಿ ವಾಹನ ಕೆಟ್ಟು ನಿಂತಾಗ ಚಾಲಕ ಅಥವಾ ಪ್ರಯಾಣಿಕರು ಇತರ ವಾಹನಗಳ ಗಮನ ಸೆಳೆಯುವುದು ಮುಖ್ಯ. ಅಂತಹ ಸಂದರ್ಭಗಳಲ್ಲಿ ಬಿಳಿ ಬಟ್ಟೆ ಸುಲಭವಾಗಿ ಕಾಣುವ ಕಾರಣ ‘ನಮಗೆ ಸಹಾಯ ಬೇಕು’ ಎಂಬ ಅನೌಪಚಾರಿಕ ಸಂಕೇತವಾಗಿ ಬಳಸಲಾಗುತ್ತದೆ. ಅಮೆರಿಕದ ಕೆಲವು ಚಾಲನಾ ಮಾರ್ಗಸೂಚಿಗಳಲ್ಲಿಯೂ ವಾಹನದ ಯಾಂತ್ರಿಕ ದೋಷದಿಂದಾಗಿ ಸಹಾಯ ಅಗತ್ಯವಿರುವ ಸಂದರ್ಭದಲ್ಲಿ ಬಿಳಿ ಬಟ್ಟೆಯನ್ನು ಬಳಸುವ ಬಗ್ಗೆ ಉಲ್ಲೇಖವಿದೆ. ಉದಾಹರಣೆಗೆ, North Carolina Driver Handbookನಲ್ಲಿ ಬಿಳಿ ಬಟ್ಟೆಯನ್ನು ವಾಹನದ ತೊಂದರೆಯನ್ನು ಸೂಚಿಸಲು ಬಳಸಬಹುದೆಂದು ತಿಳಿಸಲಾಗಿದೆ.

ಕಾರು ಚಲಿಸುತ್ತಿರುವಾಗ ಬಿಳಿ ಬಟ್ಟೆ ಕಂಡರೆ?

ಚಲಿಸುತ್ತಿರುವ ಕಾರಿನ ಕಿಟಕಿಯಿಂದ ಬಿಳಿ ಬಟ್ಟೆ ಹೊರಗೆ ಕಾಣಿಸುತ್ತಿದ್ದರೆ, ಕಾರಿನಲ್ಲಿರುವವರಿಗೆ ತುರ್ತು ವೈದ್ಯಕೀಯ ಪರಿಸ್ಥಿತಿ ಅಥವಾ ಮತ್ತಾವುದೇ ತಕ್ಷಣದ ನೆರವು ಬೇಕಾಗಿರಬಹುದು. ಆದರೆ ಬಿಳಿ ಬಟ್ಟೆ ಕಾಣಿಸಿಕೊಂಡಿದೆ ಎಂಬ ಕಾರಣಕ್ಕೆ ಮಾತ್ರ ಆ ವಾಹನಕ್ಕೆ ಯಾವುದೇ ವಿಶೇಷ ಹಕ್ಕು ಅಥವಾ ಆದ್ಯತೆ ಸಿಗುವುದಿಲ್ಲ. ಅಂತಹ ಸಂದರ್ಭದಲ್ಲಿ ಇತರ ಚಾಲಕರು ಸುರಕ್ಷಿತ ಅಂತರ ಕಾಯ್ದುಕೊಂಡು, ಪರಿಸ್ಥಿತಿ ಗಂಭೀರವಾಗಿ ಕಂಡರೆ ತುರ್ತು ಸೇವೆಗಳಿಗೆ ಮಾಹಿತಿ ನೀಡುವುದು ಸೂಕ್ತ.

ಕಾರು ಕೆಟ್ಟುಹೋದಾಗ ಈ ಸಂಕೇತ ಬಳಸಬಹುದು

ವಾಹನದ ಎಂಜಿನ್ ಸಮಸ್ಯೆ, ಟೈರ್ ಪಂಕ್ಚರ್ ಅಥವಾ ಇತರ ಯಾಂತ್ರಿಕ ದೋಷದಿಂದ ಕಾರು ರಸ್ತೆ ಬದಿಯಲ್ಲಿ ನಿಂತಿದ್ದರೆ, ಬಿಳಿ ಬಟ್ಟೆ ಸಹಾಯಕ್ಕಾಗಿ ಗಮನ ಸೆಳೆಯುವ ಒಂದು ಮಾರ್ಗವಾಗಬಹುದು. ಕೆಲವು ಮಾರ್ಗಸೂಚಿಗಳ ಪ್ರಕಾರ ಬಿಳಿ ಬಟ್ಟೆಯನ್ನು ಎಡಭಾಗದ ಬಾಗಿಲಿನ ಹ್ಯಾಂಡಲ್ ಅಥವಾ ವಾಹನದ ಆಂಟೆನಾಗೆ ಕಟ್ಟಬಹುದು. ಕಾರು ನಿಂತಿದ್ದರೆ ಬಾನೆಟ್ ತೆರೆಯುವುದರಿಂದಲೂ ವಾಹನಕ್ಕೆ ತೊಂದರೆ ಇದೆ ಎಂಬುದನ್ನು ಇತರ ಚಾಲಕರಿಗೆ ಸ್ಪಷ್ಟಪಡಿಸಬಹುದು.

ಬಿಳಿ ಬಟ್ಟೆ ಎಂದರೆ ಯಾವಾಗಲೂ ತುರ್ತು ಪರಿಸ್ಥಿತಿಯೇ?

ಇಲ್ಲ. ಇದೇ ಪ್ರಮುಖ ವಿಚಾರ. ಬಿಳಿ ಬಟ್ಟೆಗೆ ಒಂದೇ ಒಂದು ಸಾರ್ವತ್ರಿಕ ಅರ್ಥವಿಲ್ಲ. ದೇಶ, ಪ್ರದೇಶ ಮತ್ತು ಸಂದರ್ಭಕ್ಕೆ ಅನುಗುಣವಾಗಿ ಇದರ ಅರ್ಥ ಬದಲಾಗಬಹುದು. ಐತಿಹಾಸಿಕವಾಗಿ ಬಿಳಿ ಬಣ್ಣವನ್ನು ಶಾಂತಿ, ಕದನ ವಿರಾಮ ಅಥವಾ ಸಂಘರ್ಷ ಅಂತ್ಯಗೊಳಿಸುವ ಸಂಕೇತವಾಗಿ ಕೂಡ ಬಳಸಲಾಗಿದೆ. ಕೆಲವು ಸಮಾರಂಭಗಳು, ಪ್ರತಿಭಟನೆಗಳು ಅಥವಾ ಸಾಮಾಜಿಕ ಕಾರ್ಯಕ್ರಮಗಳಲ್ಲಿಯೂ ಬಿಳಿ ಬಟ್ಟೆ ವಿಭಿನ್ನ ಅರ್ಥಗಳನ್ನು ಹೊಂದಿರಬಹುದು. ಹೀಗಾಗಿ ಕಾರಿನ ಕಿಟಕಿಯಿಂದ ಬಿಳಿ ಬಟ್ಟೆ ಹೊರಗೆ ಕಾಣಿಸಿದ ಕೂಡಲೇ ಅದು ಖಂಡಿತವಾಗಿಯೂ ತುರ್ತು ಪರಿಸ್ಥಿತಿ ಎಂದು ನಿರ್ಧರಿಸಬಾರದು.

ಇತರ ಚಾಲಕರು ಏನು ಮಾಡಬೇಕು?

ಬಿಳಿ ಬಟ್ಟೆ ನೇತಾಡುತ್ತಿರುವ ವಾಹನವನ್ನು ಗಮನಿಸಿದರೆ ಮೊದಲ ಆದ್ಯತೆ ರಸ್ತೆ ಸುರಕ್ಷತೆ. ವಾಹನದಿಂದ ಸುರಕ್ಷಿತ ಅಂತರ ಕಾಯ್ದುಕೊಳ್ಳಿ. ಅಪಾಯವಿಲ್ಲದಿದ್ದರೆ ಆ ವಾಹನಕ್ಕೆ ದಾರಿ ನೀಡಿ. ಪರಿಸ್ಥಿತಿ ತುರ್ತು ಎಂದು ಕಂಡರೆ ಸ್ಥಳೀಯ ತುರ್ತು ಸೇವೆಗಳಿಗೆ ಮಾಹಿತಿ ನೀಡಿ. ನಿಮ್ಮ ವಾಹನವನ್ನು ರಸ್ತೆ ಮಧ್ಯದಲ್ಲಿ ನಿಲ್ಲಿಸಿ ಸಹಾಯ ಮಾಡಲು ಹೋಗಬೇಡಿ. ರಾತ್ರಿ ವೇಳೆ ಅಪಾಯದ ದೀಪಗಳು ಅಥವಾ ಪಾರ್ಕಿಂಗ್ ಲೈಟ್‌ಗಳನ್ನು ಬಳಸುವುದು ಹೆಚ್ಚು ಪರಿಣಾಮಕಾರಿ.

ಕಾರು ಕೆಟ್ಟುಹೋದಾಗ ಸಾಧ್ಯವಾದಷ್ಟು ವಾಹನವನ್ನು ರಸ್ತೆ ಸಂಚಾರದಿಂದ ದೂರದ ಸುರಕ್ಷಿತ ಸ್ಥಳಕ್ಕೆ ಕೊಂಡೊಯ್ಯುವುದು, ಟ್ರಾಫಿಕ್‌ನಿಂದ ದೂರ ಉಳಿಯುವುದು ಮತ್ತು ಇತರ ವಾಹನಗಳಿಗೆ ವಾಹನದ ತೊಂದರೆ ಸ್ಪಷ್ಟವಾಗಿ ಕಾಣುವಂತೆ ಮಾಡುವುದು ಮುಖ್ಯ.

ಇದು ಅಧಿಕೃತ ಟ್ರಾಫಿಕ್ ಸಿಗ್ನಲ್ ಅಲ್ಲ

ಇಲ್ಲಿ ಮತ್ತೊಂದು ವಿಷಯವನ್ನು ನೆನಪಿನಲ್ಲಿಟ್ಟುಕೊಳ್ಳಬೇಕು. ಬಿಳಿ ಬಟ್ಟೆ ಎಲ್ಲ ದೇಶಗಳಲ್ಲೂ ಅಧಿಕೃತ ಟ್ರಾಫಿಕ್ ಕೋಡ್ ಅಲ್ಲ. ಇದು ಅನೌಪಚಾರಿಕ ಸಂಕೇತವಾಗಿದ್ದು, ಕೆಲವೆಡೆ ಚಾಲಕರು ತುರ್ತು ಪರಿಸ್ಥಿತಿಯಲ್ಲಿ ಪರಸ್ಪರ ಅರ್ಥಮಾಡಿಕೊಳ್ಳಲು ಬಳಸುತ್ತಾರೆ. ಆದ್ದರಿಂದ ಅಪಾಯದ ಸಂದರ್ಭದಲ್ಲಿ ಬಿಳಿ ಬಟ್ಟೆಯ ಮೇಲೆ ಮಾತ್ರ ಅವಲಂಬಿಸದೆ, ಲಭ್ಯವಿರುವ ಅಧಿಕೃತ ತುರ್ತು ಸಂಪರ್ಕ ವ್ಯವಸ್ಥೆ ಮತ್ತು ವಾಹನದ ಹ್ಯಾಜರ್ಡ್ ಲೈಟ್‌ಗಳನ್ನು ಬಳಸುವುದು ಉತ್ತಮ.

ಯಾಕೆ ಈ ಮಾಹಿತಿ ಮುಖ್ಯ?

ರಸ್ತೆಯಲ್ಲಿ ಪ್ರತಿದಿನ ಸಾವಿರಾರು ವಾಹನಗಳು ಸಂಚರಿಸುತ್ತವೆ. ಅಪಘಾತ, ವಾಹನ ಕೆಟ್ಟುಹೋಗುವುದು ಅಥವಾ ವೈದ್ಯಕೀಯ ತುರ್ತು ಪರಿಸ್ಥಿತಿಯಂತಹ ಸಂದರ್ಭಗಳಲ್ಲಿ ಸಂಕೇತಗಳನ್ನು ಸರಿಯಾಗಿ ಅರ್ಥಮಾಡಿಕೊಳ್ಳುವುದು ಕೆಲವೊಮ್ಮೆ ಅತ್ಯಂತ ಮುಖ್ಯವಾಗಬಹುದು. ಹೀಗಾಗಿ ಕಾರಿನ ಕಿಟಕಿಯಿಂದ ಬಿಳಿ ಬಟ್ಟೆ ಹೊರಗೆ ಕಾಣಿಸಿಕೊಂಡರೆ ಅದನ್ನು ಕೇವಲ ವಿಚಿತ್ರ ದೃಶ್ಯ ಎಂದು ನಿರ್ಲಕ್ಷಿಸದೆ, ಪರಿಸ್ಥಿತಿಯನ್ನು ಗಮನಿಸಿ ಸುರಕ್ಷಿತವಾಗಿ ಪ್ರತಿಕ್ರಿಯಿಸುವುದು ಉತ್ತಮ.

MG ಹೆಕ್ಟರ್ ಟೋಮಹಾಕ್ EV ಲಾಂಚ್‌ಗೆ ದಿನಾಂಕ ಫಿಕ್ಸ್: ಹೊಸ SUVಯ ವಿಶೇಷತೆಗಳೇನು?

Naveen Kodase — Tue, 25 Aug 2026 11:00:35 +0530

JSW MG ಮೋಟಾರ್ ಇಂಡಿಯಾ ಭಾರತದ ಎಲೆಕ್ಟ್ರಿಕ್ ವಾಹನ ಮಾರುಕಟ್ಟೆಗೆ ಹೊಸ ಮಾಡೆಲ್ ಒಂದನ್ನು ಪರಿಚಯಿಸುತ್ತಿದೆ. ಕಂಪನಿಯು ತನ್ನ ಹೊಚ್ಚ ಹೊಸ ಎಲೆಕ್ಟ್ರಿಕ್ SUV 'ಎಂಜಿ ಹೆಕ್ಟರ್ ಟೋಮಹಾಕ್' ಅನ್ನು ಆಗಸ್ಟ್ 26 ರಂದು ದೇಶದಲ್ಲಿ ಲಾಂಚ್ ಮಾಡಲಿದೆ. ಅಧಿಕೃತ ಬಿಡುಗಡೆಗೂ ಮುನ್ನ, ಕಂಪನಿಯು ಈ ಕಾರಿನ ಹೊಸ ಟೀಸರ್ ವಿಡಿಯೋವನ್ನು ಸಹ ರಿಲೀಸ್ ಮಾಡಿದೆ. ವಿಂಡ್ಸರ್ ಎಲೆಕ್ಟ್ರಿಕ್, ಕಾಮೆಟ್ ಎಲೆಕ್ಟ್ರಿಕ್, ಮತ್ತು ZS ಎಲೆಕ್ಟ್ರಿಕ್‌ನಂತಹ ಮಾಡೆಲ್‌ಗಳ ಮೂಲಕ ಎಂಜಿ ಕಂಪನಿಯು ಈಗಾಗಲೇ ಭಾರತದ EV ಮಾರುಕಟ್ಟೆಯಲ್ಲಿ ತನ್ನದೇ ಆದ ಸ್ಥಾನ ಪಡೆದಿದೆ. ಈಗ ಹೊಸ ಹೆಕ್ಟರ್ ಟೋಮಹಾಕ್ ಸೇರ್ಪಡೆಯೊಂದಿಗೆ, ಕಂಪನಿಯ ಎಲೆಕ್ಟ್ರಿಕ್ ಕಾರುಗಳ ಲೈನ್‌ಅಪ್ ಇನ್ನಷ್ಟು ಬಲಿಷ್ಠವಾಗಲಿದೆ.

ಹೊಸ ಪ್ಲಾಟ್‌ಫಾರ್ಮ್‌ನಲ್ಲಿ ಮೊದಲ ಎಲೆಕ್ಟ್ರಿಕ್ SUV

ಹೆಕ್ಟರ್ ಟೋಮಹಾಕ್, ಎಂಜಿ ಕಂಪನಿಯ ಹೊಸ 'ಅಡಾಪ್ಟ್' ಪ್ಲಾಟ್‌ಫಾರ್ಮ್ ಆಧಾರಿತ ಮೊದಲ ಸಂಪೂರ್ಣ ಎಲೆಕ್ಟ್ರಿಕ್ SUV ಆಗಲಿದೆ. ಇದು ಕೇವಲ ಎಲೆಕ್ಟ್ರಿಕ್ ವಾಹನಗಳಿಗೆ ಮಾತ್ರ ಸೀಮಿತವಾದ ಪ್ಲಾಟ್‌ಫಾರ್ಮ್ ಅಲ್ಲ. ಎಲೆಕ್ಟ್ರಿಕ್ ವಾಹನಗಳ ಜೊತೆಗೆ, ರೇಂಜ್ ಎಕ್ಸ್‌ಟೆಂಡರ್, ಪ್ಲಗ್-ಇನ್ ಹೈಬ್ರಿಡ್ ಮತ್ತು ಹೈಬ್ರಿಡ್ ವಾಹನಗಳನ್ನು ಸಹ ಈ ಪ್ಲಾಟ್‌ಫಾರ್ಮ್‌ನಲ್ಲಿ ನಿರ್ಮಿಸಬಹುದು ಎಂದು ಎಂಜಿ ಈ ಹಿಂದೆಯೇ ಸ್ಪಷ್ಟಪಡಿಸಿದೆ.

69.2 kWh ಬ್ಯಾಟರಿ; 530 ಕಿ.ಮೀ. ರೇಂಜ್?

ಹೆಕ್ಟರ್ ಟೋಮಹಾಕ್‌ನ ಎಲೆಕ್ಟ್ರಿಕ್ ಸಿಸ್ಟಮ್ ಬಗ್ಗೆ ಎಂಜಿ ಕಂಪನಿಯು ಇನ್ನೂ ಅಧಿಕೃತ ಮಾಹಿತಿ ನೀಡಿಲ್ಲ. ಆದರೆ, ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಮಾರಾಟವಾಗುವ 'ವುಲಿಂಗ್ ಸ್ಟಾರ್‌ಲೈಟ್ 560' ಆಧಾರದ ಮೇಲೆ ಭಾರತಕ್ಕಾಗಿ ಬದಲಾವಣೆ ಮಾಡಿದ ಮಾಡೆಲ್ ಇದಾಗಿರಬಹುದು ಎಂದು ವರದಿಗಳು ಹೇಳುತ್ತಿವೆ. ಅಂತರರಾಷ್ಟ್ರೀಯ ಮಾಡೆಲ್‌ನಲ್ಲಿ 69.2 kWh ಸಾಮರ್ಥ್ಯದ ಲಿಥಿಯಂ ಐಯಾನ್ ಫಾಸ್ಫೇಟ್ (LFP) ಬ್ಯಾಟರಿ ಬಳಸಲಾಗಿದೆ. ಮುಂಭಾಗದಲ್ಲಿರುವ ಎಲೆಕ್ಟ್ರಿಕ್ ಮೋಟಾರ್ ಸುಮಾರು 201 ಹಾರ್ಸ್‌ಪವರ್ ಮತ್ತು 310 Nm ಟಾರ್ಕ್ ಉತ್ಪಾದಿಸುತ್ತದೆ. ಒಂದೇ ಚಾರ್ಜ್‌ನಲ್ಲಿ 530 ಕಿ.ಮೀ. ವರೆಗೆ ಪ್ರಯಾಣಿಸಬಹುದು ಎಂದು ಅಂತರರಾಷ್ಟ್ರೀಯ ಮಾಡೆಲ್ ಬಗ್ಗೆ ಹೇಳಲಾಗಿದೆ. ಭಾರತದ ಮಾಡೆಲ್‌ನಲ್ಲೂ ಇದೇ ಬ್ಯಾಟರಿ ಮತ್ತು ಮೋಟಾರ್ ಇರುತ್ತದೆಯೇ ಎಂಬುದು ಆಗಸ್ಟ್ 26 ರಂದೇ ತಿಳಿಯಲಿದೆ.

ಟೀಸರ್‌ನಲ್ಲಿ ಕಂಡ ಹೊಸ ಡಿಸೈನ್

ಹೊಸ ಟೀಸರ್ ವಿಡಿಯೋದಲ್ಲಿ ಕಾರಿನ ಸಂಪೂರ್ಣ ಚಿತ್ರಣ ಸಿಕ್ಕಿಲ್ಲವಾದರೂ, SUVಯ ಹೊರಭಾಗದ ವಿನ್ಯಾಸದ ಬಗ್ಗೆ ಕೆಲವು ಸುಳಿವುಗಳು ಲಭ್ಯವಾಗಿವೆ. ಹೆಡ್‌ಲ್ಯಾಂಪ್‌ಗಳೊಂದಿಗೆ ಸೇರಿದ ಎರಡು ಹಂತದ LED ಡೇಟೈಮ್ ರನ್ನಿಂಗ್ ಲೈಟ್‌ಗಳು, LED ಟೇಲ್ ಲೈಟ್‌ಗಳು ಟೀಸರ್‌ನಲ್ಲಿ ಕಾಣಿಸುತ್ತವೆ. ಎಂಜಿ ಕಂಪನಿಯ ವಿಶೇಷ ವಿನ್ಯಾಸದ ಅಲಾಯ್ ವೀಲ್‌ಗಳು, ತೆಳುವಾದ ವಿಂಡೋ ಲೈನ್, ಬಾಡಿ ಕ್ಲಾಡಿಂಗ್ ಮತ್ತು ಡಿ-ಪಿಲ್ಲರ್ ಸುತ್ತ ಹೊಸ ಸ್ಟೈಲಿಂಗ್ ಅನ್ನು ಸಹ ನಿರೀಕ್ಷಿಸಬಹುದು.

ಯಾರಿಗೆಲ್ಲಾ ಪೈಪೋಟಿ?

ಮಾರುಕಟ್ಟೆಗೆ ಬಂದ ನಂತರ, ಈ ಹೊಸ ಎಂಜಿ ಮಾಡೆಲ್ ಮಹೀಂದ್ರಾ XUV900 ನಂತಹ ಎಲೆಕ್ಟ್ರಿಕ್ SUVಗಳಿಗೆ ಪೈಪೋಟಿ ನೀಡಲಿದೆ. ಮೂರು ಸಾಲಿನ ಸೀಟುಗಳಿರುವುದರಿಂದ, ದೊಡ್ಡ ಕುಟುಂಬಗಳು ಮತ್ತು ಹೆಚ್ಚು ಪ್ರಯಾಣದ ಸ್ಥಳಾವಕಾಶ ಬಯಸುವ ಗ್ರಾಹಕರನ್ನು ಈ ವಾಹನ ಮುಖ್ಯವಾಗಿ ಗುರಿಯಾಗಿಸಿಕೊಂಡಿದೆ.

ಮೂರು ಸಾಲಿನ ಸೀಟುಗಳಿರುವ ಒಳಾಂಗಣ

ಹೆಕ್ಟರ್ ಟೋಮಹಾಕ್‌ನ ಇಂಟೀರಿಯರ್‌ನಲ್ಲಿ ಮೂರು ಸಾಲಿನ ಸೀಟಿಂಗ್ ವ್ಯವಸ್ಥೆ ಇರಲಿದೆ. ಎರಡನೇ ಮತ್ತು ಮೂರನೇ ಸಾಲಿನಲ್ಲಿ ಬೆಂಚ್ ಸೀಟುಗಳು ಬರುವ ಸಾಧ್ಯತೆಯಿದೆ. ಕೆಲವು ವೇರಿಯೆಂಟ್‌ಗಳಲ್ಲಿ ಎರಡನೇ ಸಾಲಿನಲ್ಲಿ ಪ್ರತ್ಯೇಕ ಕ್ಯಾಪ್ಟನ್ ಸೀಟುಗಳು ಸಹ ಲಭ್ಯವಿರಬಹುದು. ದೊಡ್ಡ ಸೆಂಟ್ರಲ್ ಟಚ್‌ಸ್ಕ್ರೀನ್ ಇನ್ಫೋಟೈನ್‌ಮೆಂಟ್ ಸಿಸ್ಟಮ್ ಮತ್ತು ಕನೆಕ್ಟೆಡ್ ಕಾರ್ ಟೆಕ್ನಾಲಜಿ ಈ ಕಾರಿನ ಪ್ರಮುಖ ಫೀಚರ್‌ಗಳಾಗಿರಲಿವೆ.

ಬೆಲೆ ಮತ್ತು ಇತರ ವಿವರಗಳಿಗೆ ಕಾಯಬೇಕು

ಬೆಲೆ, ಬ್ಯಾಟರಿ ಸಾಮರ್ಥ್ಯ, ರೇಂಜ್, ಚಾರ್ಜಿಂಗ್ ಸಮಯ ಮತ್ತು ವೇರಿಯೆಂಟ್‌ಗಳಂತಹ ಪ್ರಮುಖ ವಿವರಗಳನ್ನು ಎಂಜಿ ಇನ್ನೂ ಸಂಪೂರ್ಣವಾಗಿ ಬಹಿರಂಗಪಡಿಸಿಲ್ಲ. ಆಗಸ್ಟ್ 26 ರಂದು ನಡೆಯುವ ಅಧಿಕೃತ ಲಾಂಚ್ ಕಾರ್ಯಕ್ರಮದಲ್ಲಿ ಹೆಕ್ಟರ್ ಟೋಮಹಾಕ್ ಬಗ್ಗೆ ಇನ್ನಷ್ಟು ಮಾಹಿತಿ ಹೊರಬೀಳಲಿದೆ. ಮೂರು ಸಾಲಿನ ಸೀಟುಗಳು, ಹೊಸ ತಂತ್ರಜ್ಞಾನ, ಉತ್ತಮ ರೇಂಜ್ ನಿರೀಕ್ಷೆ ಮತ್ತು ಆಧುನಿಕ ಸೌಲಭ್ಯಗಳೊಂದಿಗೆ ಬರುತ್ತಿರುವ ಈ ಹೊಸ SUV, ಭಾರತದ ಎಲೆಕ್ಟ್ರಿಕ್ ವಾಹನ ಮಾರುಕಟ್ಟೆಯಲ್ಲಿ ಎಂಜಿ ಕಂಪನಿಯ ಒಂದು ಮಹತ್ವದ ಹೆಜ್ಜೆಯಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.

ಭಾರತದಲ್ಲೇ ಉತ್ಪಾದನೆಗೊಂಡ ಹೊಸ BMW X1 ಲಾಂಗ್ ವ್ಹೀಲ್‌ಬೇಸ್ ಕಾರು ಬಿಡುಗಡೆ, ಏನಿದರ ವಿಶೇಷತೆ?

Chethan Kumar — Fri, 21 Aug 2026 14:53:30 +0530

ಬೆಂಗಳೂರು (ಆ.21) BMW ಗ್ರೂಪ್ ಇಂಡಿಯಾ ಜನಪ್ರಿಯ ಐಷಾರಾಮಿ SUV ಮಾದರಿಯಾದ ಹೊಸ BMW X1 ಲಾಂಗ್ ವೀಲ್‌ಬೇಸ್ (LWB) ಬಿಡುಗಡೆ ಮಾಡಿದೆ. ವಿಶಾಲವಾದ ಇಂಟಿರೀಯರ್, ಅತ್ಯಾಧುನಿಕ ಡಿಜಿಟಲ್ ಟೆಕ್ ಹಾಗೂ ಉತ್ತಮ ಡ್ರೈವಿಂಗ್ ಅನುಭವದೊಂದಿಗೆ ಈ ಹೊಸ ಮಾದರಿ ಭಾರತೀಯ ಮಾರುಕಟ್ಟೆಗೆ ಬಂದಿದೆ. ಹೊಸ BMW X1 LWB ಕಾರಿನ ಆರಂಭಿಕ ಎಕ್ಸ್‌ಶೋರೂಂ ಬೆಲೆ 49.90 ಲಕ್ಷ ರೂಪಾಯಿ.ಚೆನ್ನೈನ BMW ಗ್ರೂಪ್ ಪ್ಲಾಂಟ್‌ನಲ್ಲಿ ಸ್ಥಳೀಯವಾಗಿ ಪೆಟ್ರೋಲ್ ಮಾದರಿಯಲ್ಲಿ ಉತ್ಪಾದಿಸಲಾಗುತ್ತಿದ್ದು, ಇಂದಿನಿಂದ ದೇಶಾದ್ಯಂತ BMW ಡೀಲರ್‌ಶಿಪ್‌ಗಳಲ್ಲಿ ಬುಕ್ಕಿಂಗ್‌ಗೆ ಲಭ್ಯವಿದೆ.

ಆರಾಮದಾಯಕ ಪ್ರಯಾಣಕ್ಕೆ BMW X1

4,616 ಮಿ.ಮೀ. ಉದ್ದ, 2,104 ಮಿ.ಮೀ. ಅಗಲ, 1,641 ಮಿ.ಮೀ. ಎತ್ತರ ಹಾಗೂ 2,800 ಮಿ.ಮೀ. ವೀಲ್‌ಬೇಸ್ ಹೊಂದಿರುವ ಈ SUV ತನ್ನ ಸೆಗ್‌ಮೆಂಟ್‌ನಲ್ಲಿಯೇ ಅತ್ಯಂತ ಉದ್ದದ ಮಾದರಿಗಳಲ್ಲಿ ಒಂದಾಗಿದೆ. ಹೆಚ್ಚುವರಿ ವೀಲ್‌ಬೇಸ್‌ನಿಂದ ಹಿಂಭಾಗದ ಪ್ರಯಾಣಿಕರಿಗೆ 150 ಮಿ.ಮೀ. ಹೆಚ್ಚುವರಿ ಲೆಗ್‌ರೂಮ್ ಮತ್ತು 109 ಮಿ.ಮೀ. ಹೆಚ್ಚುವರಿ ಹೆಡ್‌ರೂಮ್ ದೊರೆಯಲಿದೆ.

ಹೊಸ ಕಾರಿನ ವಿಶೇಷತೆ ಏನು

ಹೊಸ X1 LWB ನಲ್ಲಿ ಅಡಾಪ್ಟಿವ್ LED ಹೆಡ್‌ಲೈಟ್‌ಗಳು, 18 ಇಂಚಿನ M ಲೈಟ್ ಅಲಾಯ್ ವೀಲ್‌ಗಳು, ಪನೋರಮಿಕ್ ಸನ್‌ರೂಫ್, ವೈಡ್‌ಸ್ಕ್ರೀನ್ ಕರ್ವ್ಡ್ ಡಿಸ್‌ಪ್ಲೇ, BMW ಆಪರೇಟಿಂಗ್ ಸಿಸ್ಟಮ್ 9 ಮತ್ತು 12 ಸ್ಪೀಕರ್‌ಗಳ ಹರ್ಮನ್ ಕಾರ್ಡನ್ ಸೌಂಡ್ ಸಿಸ್ಟಮ್ ಸೇರಿದಂತೆ ಹಲವು ಪ್ರೀಮಿಯಂ ವೈಶಿಷ್ಟ್ಯಗಳಿವೆ. 1.5 ಲೀಟರ್ BMW ಟ್ವಿನ್‌ಪವರ್ ಟರ್ಬೊ ಪೆಟ್ರೋಲ್ ಎಂಜಿನ್ 156 hp ಶಕ್ತಿ ಮತ್ತು 230 Nm ಗರಿಷ್ಠ ಟಾರ್ಕ್ ಉತ್ಪಾದಿಸುತ್ತದೆ. 7-ಸ್ಪೀಡ್ ಡ್ಯುಯಲ್ ಕ್ಲಚ್ ಟ್ರಾನ್ಸ್‌ಮಿಷನ್ ಉತ್ತಮ ನಿಯಂತ್ರಣ ಮತ್ತು ಕಂಫರ್ಟ್ ಡ್ರೈವಿಂಗ್ ಅನುಭವ ನೀಡುತ್ತದೆ.

BMW ಡಿಜಿಟಲ್ ಕೀ ಪ್ಲಸ್, ಕಂಫರ್ಟ್ ಆಕ್ಸೆಸ್ 2.0, MyBMW ಆ್ಯಪ್ ಹಾಗೂ NFC ಆಧಾರಿತ ಕೀ ಸೌಲಭ್ಯಗಳು ಬಳಕೆದಾರರಿಗೆ ಹೆಚ್ಚಿನ ಅನುಕೂಲ ಒದಗಿಸುತ್ತವೆ. ಪಾರ್ಕಿಂಗ್ ಅಸಿಸ್ಟೆಂಟ್, ರಿಯರ್ ವ್ಯೂ ಕ್ಯಾಮೆರಾ ಮತ್ತು 360 ಡಿಗ್ರಿ ಸರೌಂಡ್ ವ್ಯೂ ಹೊಂದಿರುವ ಪಾರ್ಕಿಂಗ್ ಅಸಿಸ್ಟೆಂಟ್ ಪ್ಲಸ್ ಸುರಕ್ಷತೆ ಮತ್ತು ಪಾರ್ಕಿಂಗ್ ಅನುಭವವನ್ನು ಮತ್ತಷ್ಟು ಸುಲಭಗೊಳಿಸುತ್ತದೆ.ಹೊಸ BMW X1 LWB ನೈಟ್‌ಡಸ್ಕ್ ಬ್ಲೂ, ಸ್ಕೈಸ್ಕ್ರೇಪರ್ ಗ್ರೇ, ಕಾರ್ಬನ್ ಬ್ಲ್ಯಾಕ್ ಮತ್ತು ಮಿನರಲ್ ವೈಟ್ ಸೇರಿದಂತೆ ನಾಲ್ಕು ಬಣ್ಣಗಳಲ್ಲಿ ಲಭ್ಯವಿದೆ.

BMW X1 ಭಾರತದಲ್ಲಿ ಅತ್ಯಂತ ಯಶಸ್ವಿ ಐಷಾರಾಮಿ SUVಗಳಲ್ಲಿ ಒಂದಾಗಿದೆ. ಹೊಸ ಲಾಂಗ್ ವೀಲ್‌ಬೇಸ್ ಮಾದರಿಯು ಹೆಚ್ಚಿನ ಸ್ಥಳಾವಕಾಶ, ಸೌಕರ್ಯ, ತಂತ್ರಜ್ಞಾನ ಮತ್ತು ಕಾರ್ಯಕ್ಷಮತೆಯೊಂದಿಗೆ ಗ್ರಾಹಕರ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಲಿದೆ ಎಂದು BMW ಗ್ರೂಪ್ ಇಂಡಿಯಾ ಅಧ್ಯಕ್ಷ ಹಾಗೂ ಸಿಇಒ ಹರ್ದೀಪ್ ಸಿಂಗ್ ಬ್ರಾರ್ ಹೇಳಿದ್ದಾರೆ.

Cars: 6 ಏರ್‌ಬ್ಯಾಗ್‌, ಭರ್ಜರಿ ಮೈಲೇಜ್‌, ಆಟೋಮ್ಯಾಟಿಕ್ ಗೇರ್‌ಬಾಕ್ಸ್‌! ಆದರೆ ಇದರ ಬೆಲೆ ಕೇಳಿದ್ರೆ ನೀವು ನಂಬಲ್ಲ!

Bhimasi M Koleppanavar — Wed, 19 Aug 2026 22:32:02 +0530

ದಿನದಿಂದ ದಿನಕ್ಕೆ ನಗರ ಪ್ರದೇಶಗಳಲ್ಲಿ ವಾಹನ ದಟ್ಟಣೆ (ಟ್ರಾಫಿಕ್) ಹೆಚ್ಚಾಗುತ್ತಿದ್ದು, ಗೇರ್ ಬದಲಿಸುವ ಕಿರಿಕಿರಿಯಿಲ್ಲದೆ ಸುಲಭವಾಗಿ ಚಾಲನೆ ಮಾಡಬಹುದಾದ ಆಟೋಮ್ಯಾಟಿಕ್ ಕಾರುಗಳಿಗೆ ಮಾರುಕಟ್ಟೆಯಲ್ಲಿ ಬೇಡಿಕೆ ತೀವ್ರಗೊಂಡಿದೆ. ಭಾರತೀಯ ಕಾರು ಪ್ರಿಯರನ್ನು ಗಮನದಲ್ಲಿಟ್ಟುಕೊಂಡು ವಾಹನ ತಯಾರಕ ಸಂಸ್ಥೆಗಳು ₹7 ಲಕ್ಷಕ್ಕಿಂತ ಕಡಿಮೆ ಬೆಲೆಯಲ್ಲಿ ಅತ್ಯುತ್ತಮ ವೈಶಿಷ್ಟ್ಯ ಹಾಗೂ ಮೈಲೇಜ್ ನೀಡುವ 8 ಪ್ರಮುಖ ಆಟೋಮ್ಯಾಟಿಕ್ ಕಾರುಗಳನ್ನು ಪರಿಚಯಿಸಿವೆ.

1. ಮಾರುತಿ ಆಲ್ಟೊ ಕೆ10 AGS (ಬೆಲೆ: ₹4.95 ಲಕ್ಷ)

ಸಣ್ಣ ಮತ್ತು ಇಕ್ಕಟ್ಟಾದ ರಸ್ತೆಗಳಲ್ಲಿ ಸಂಚರಿಸಲು ಆಲ್ಟೊ ಕೆ10 ಅತ್ಯಂತ ಸೂಕ್ತ. 1.0-ಲೀಟರ್ K10C ಪೆಟ್ರೋಲ್ ಎಂಜಿನ್ ಹೊಂದಿರುವ ಈ ಕಾರು, 24.9 ಕಿಮೀ/ಲೀ ಪ್ರಭಾವಶಾಲಿ ಮೈಲೇಜ್ ನೀಡುತ್ತದೆ. ಕ್ಯಾಬಿನ್‌ನಲ್ಲಿ 7-ಇಂಚಿನ ಟಚ್‌ಸ್ಕ್ರೀನ್, ಕೀಲೆಸ್ ಎಂಟ್ರಿ ಹಾಗೂ ಸುರಕ್ಷತೆಗಾಗಿ 6 ಏರ್‌ಬ್ಯಾಗ್‌ಗಳು, ABS ಮತ್ತು ಇಬಿಡಿ ಸೌಲಭ್ಯಗಳಿವೆ.

2. ಮಾರುತಿ ಎಸ್-ಪ್ರೆಸ್ಸೊ AGS (ಬೆಲೆ: ₹5.20 ಲಕ್ಷ)

ಮಿನಿ-SUV ಮಾದರಿಯ ಎತ್ತರದ ಬಾಕ್ಸಿ ವಿನ್ಯಾಸ ಹೊಂದಿರುವ ಎಸ್-ಪ್ರೆಸ್ಸೊ, 180 mm ಗ್ರೌಂಡ್ ಕ್ಲಿಯರೆನ್ಸ್ ನೀಡುತ್ತದೆ. 1.0-ಲೀಟರ್ ಡ್ಯುಯಲ್‌ಜೆಟ್ ಎಂಜಿನ್ ಹೊಂದಿದ್ದು, ಸುಮಾರು 25.3 ಕಿಮೀ/ಲೀ ಅತ್ಯುತ್ತಮ ಇಂಧನ ದಕ್ಷತೆ ಹೊಂದಿದೆ. ಡ್ಯುಯಲ್ ಏರ್‌ಬ್ಯಾಗ್‌ಗಳು, ESP ಮತ್ತು ಹಿಲ್-ಹೋಲ್ಡ್ ಅಸಿಸ್ಟ್ ಇದರ ಪ್ರಮುಖ ಸುರಕ್ಷತಾ ಅಂಶಗಳು.

3. ಮಾರುತಿ ವ್ಯಾಗನ್ ಆರ್ AGS (ಬೆಲೆ: ₹5.54 ಲಕ್ಷ)

ವಿಶಾಲವಾದ ಕ್ಯಾಬಿನ್ ಮತ್ತು ಹೆಚ್ಚಿನ ಹೆಡ್‌ರೂಮ್ ಬಯಸುವ ಕುಟುಂಬಗಳಿಗೆ ವ್ಯಾಗನ್ ಆರ್ ಹೇಳಿ ಮಾಡಿಸಿದ ಕಾರು. 1.0-ಲೀಟರ್ ಮತ್ತು 1.2-ಲೀಟರ್ ಪೆಟ್ರೋಲ್ ಎಂಜಿನ್ ಆಯ್ಕೆಗಳಲ್ಲಿ ಲಭ್ಯವಿದ್ದು, 24.4 ರಿಂದ 25.1 ಕಿಮೀ/ಲೀ ಮೈಲೇಜ್ ನೀಡುತ್ತದೆ. 6 ಏರ್‌ಬ್ಯಾಗ್‌ಗಳು, ಹಿಂಭಾಗದ ಪಾರ್ಕಿಂಗ್ ಸೆನ್ಸರ್‌ಗಳು ಹಾಗೂ ದೊಡ್ಡ ಬೂಟ್ ಸ್ಪೇಸ್ ಇದರಲ್ಲಿದೆ.

4. ಮಾರುತಿ ಸೆಲೆರಿಯೊ AGS (ಬೆಲೆ: ₹5.60 ಲಕ್ಷ)

ಆಕರ್ಷಕ 3D ವಿನ್ಯಾಸದ ಸೆಲೆರಿಯೊ, ಭಾರತದಲ್ಲೇ ಅತ್ಯಧಿಕ ಪೆಟ್ರೋಲ್ ಮೈಲೇಜ್ ನೀಡುವ ಆಟೋಮ್ಯಾಟಿಕ್ ಕಾರು ಎನಿಸಿಕೊಂಡಿದೆ. 1.0-ಲೀಟರ್ K10C ಎಂಜಿನ್‌ನೊಂದಿಗೆ ಲಭ್ಯವಿರುವ ಈ ಕಾರು ಬರೋಬ್ಬರಿ 26.68 kmpl ಮೈಲೇಜ್ ನೀಡುತ್ತದೆ. ವಿಶಾಲ ಒಳಾಂಗಣ, ಪುಶ್ ಸ್ಟಾರ್ಟ್-ಸ್ಟಾಪ್ ಬಟನ್ ಹಾಗೂ ಹಿಲ್-ಹೋಲ್ಡ್ ಸೌಲಭ್ಯಗಳನ್ನು ಇದು ಹೊಂದಿದೆ.

5. ಟಾಟಾ ಟಿಯಾಗೊ AMT (ಬೆಲೆ: ₹5.65 ಲಕ್ಷ)

ಸುರಕ್ಷತೆಗೆ ಹೆಚ್ಚಿನ ಆದ್ಯತೆ ನೀಡುವ ಗ್ರಾಹಕರಿಗೆ 4-ಸ್ಟಾರ್ GNCAP ರೇಟಿಂಗ್ ಹೊಂದಿರುವ ಟಿಯಾಗೊ ಸೂಕ್ತ ಆಯ್ಕೆ. 1.2-ಲೀಟರ್ ರೆವೊಟ್ರಾನ್ ಎಂಜಿನ್ ಹೊಂದಿರುವ ಈ ಕಾರು 19.5 ರಿಂದ 20 ಕಿಮೀ/ಲೀ ಮೈಲೇಜ್ ನೀಡುತ್ತದೆ. 8-ಸ್ಪೀಕರ್ ಹರ್ಮನ್ ಸೌಂಡ್ ಸಿಸ್ಟಮ್ ಮತ್ತು ಆಟೋಮ್ಯಾಟಿಕ್ ಕ್ಲೈಮೇಟ್ ಕಂಟ್ರೋಲ್ ಇದರ ಪ್ಲಸ್ ಪಾಯಿಂಟ್.

6. ಹುಂಡೈ ಗ್ರ್ಯಾಂಡ್ ಐ10 ನಿಯೋಸ್ AMT (ಬೆಲೆ: ₹6.35 ಲಕ್ಷ)

ಸ್ಪೋರ್ಟಿ ಹಾಗೂ ಯುರೋಪಿಯನ್ ಶೈಲಿಯ ವಿನ್ಯಾಸ ಹೊಂದಿರುವ ಈ ಕಾರು ಪ್ರೀಮಿಯಂ ಅನುಭವ ನೀಡುತ್ತದೆ. 1.2-ಲೀಟರ್ ಕಪ್ಪಾ ಎಂಜಿನ್ ಹೊಂದಿದ್ದು, 20.1 ಕಿಮೀ/ಲೀ ಮೈಲೇಜ್ ನೀಡುತ್ತದೆ. 8-ಇಂಚಿನ ಟಚ್‌ಸ್ಕ್ರೀನ್, ವೈರ್‌ಲೆಸ್ ಚಾರ್ಜರ್, 6 ಏರ್‌ಬ್ಯಾಗ್‌ಗಳು ಮತ್ತು TPMS ಸೌಲಭ್ಯಗಳು ಇದರಲ್ಲವೆ.

7. ನಿಸ್ಸಾನ್ ಮ್ಯಾಗ್ನೈಟ್ EZ-Shift (ಬೆಲೆ: ₹6.60 ಲಕ್ಷ)

ಬೋಲ್ಡ್ SUV ಲುಕ್ ಬಯಸುವವರಿಗೆ 205 mm ಅತ್ಯಧಿಕ ಗ್ರೌಂಡ್ ಕ್ಲಿಯರೆನ್ಸ್ ಹೊಂದಿರುವ ಮ್ಯಾಗ್ನೈಟ್ ಉತ್ತಮ ಆಯ್ಕೆ. 1.0-ಲೀಟರ್ ಎಂಜಿನ್ ಹೊಂದಿರುವ ಈ ಕಾರು 19.7 ಕಿಮೀ/ಲೀ ಮೈಲೇಜ್ ನೀಡುತ್ತದೆ. ವೈರ್‌ಲೆಸ್ ಕಾರ್‌ಪ್ಲೇ, ಟ್ರಾಕ್ಷನ್ ಕಂಟ್ರೋಲ್ ಮತ್ತು ಹಿಲ್ ಸ್ಟಾರ್ಟ್ ಅಸಿಸ್ಟ್ ಪ್ರಮುಖ ಸೌಲಭ್ಯಗಳಾಗಿವೆ.

8. ಟಾಟಾ ಪಂಚ್ AMT (ಬೆಲೆ: ₹6.80 ಲಕ್ಷ)

5-ಸ್ಟಾರ್ GNCAP ಸುರಕ್ಷತಾ ರೇಟಿಂಗ್ ಪಡೆದಿರುವ ಅತ್ಯಂತ ಜನಪ್ರಿಯ ಮೈಕ್ರೋ SUV ಪಂಚ್. 1.2-ಲೀಟರ್ ಎಂಜಿನ್ ಹೊಂದಿದ್ದು, 18.8 ಕಿಮೀ/ಲೀ ಮೈಲೇಜ್ ನೀಡುತ್ತದೆ. 90-ಡಿಗ್ರಿ ತೆರೆಯುವ ಬಾಗಿಲುಗಳು, ಕೂಲ್ಡ್ ಗ್ಲೋವ್‌ಬಾಕ್ಸ್ ಹಾಗೂ ಕ್ರೂಸ್ ಕಂಟ್ರೋಲ್ ಸೌಲಭ್ಯಗಳು ಈ ಕಾರಿನಲ್ಲಿದ್ದು, ಸುರಕ್ಷಿತ ಪ್ರಯಾಣಕ್ಕೆ ಹೇಳಿ ಮಾಡಿಸಿದಂತಿದೆ.

ಸೆ.1ರ ಒಳಗಾಗಿ ಬುಕ್ ಮಾಡಿ; ಟಾಟಾ ನೆಕ್ಸಾನ್, ಪಂಚ್, ಹ್ಯಾರಿಯರ್ ಸೇರಿ ಎಲ್ಲಾ ಕಾರುಗಳ ದರ ಭಾರೀ ಏರಿಕೆ!

Santosh Naik — Fri, 21 Aug 2026 19:43:31 +0530

ಬೆಂಗಳೂರು (ಆ.21): ನೀವೇನಾದರೂ ಮುಂಬರುವ ಸಾಲು ಸಾಲು ಹಬ್ಬಗಳ ಹಿನ್ನೆಲೆಯಲ್ಲಿ ಹೊಸ ಕಾರು ಖರೀದಿಸಲು ಯೋಜನೆ ಹಾಕಿಕೊಂಡಿದ್ದರೆ, ಹಬ್ಬದ ಆಫರ್‌ಗಳಿಗಾಗಿ ಕಾಯದೆ ತಕ್ಷಣವೇ ಕಾರು ಬುಕ್ ಮಾಡುವುದು ಜಾಣತನ. ಏಕೆಂದರೆ, ಭಾರತದ ಪ್ರಮುಖ ಆಟೋಮೊಬೈಲ್ ದೈತ್ಯ ಸಂಸ್ಥೆಯಾದ 'ಟಾಟಾ ಮೋಟಾರ್ಸ್' (Tata Motors) ತನ್ನ ಎಲ್ಲಾ ಶೋರೂಮ್ ಮಾದರಿಗಳ ಕಾರು ಮತ್ತು ಎಸ್‌ಯುವಿಗಳ (SUV) ದರವನ್ನು ಹೆಚ್ಚಿಸಲು ನಿರ್ಧರಿಸಿದೆ. ಸೆಪ್ಟೆಂಬರ್ 1ರಿಂದಲೇ ಈ ನೂತನ ದರ ಏರಿಕೆ ಜಾರಿಗೆ ಬರಲಿದೆ. ಸಾಫ್ಟ್‌ವೇರ್ ಮತ್ತು ಕಚ್ಚಾ ವಸ್ತುಗಳ ಉತ್ಪಾದನಾ ವೆಚ್ಚ ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ, ಪ್ರಸ್ತುತ ಇರುವ ದರದಲ್ಲೇ ಕಾರು ಖರೀದಿಸಲು ಗ್ರಾಹಕರಿಗೆ ಇನ್ನು ಕೆಲವೇ ದಿನಗಳು ಮಾತ್ರ ಬಾಕಿ ಉಳಿದಿವೆ.

ಎಷ್ಟು ದರ ಏರಿಕೆಯಾಗಲಿದೆ?

ವರದಿಗಳ ಪ್ರಕಾರ, ಟಾಟಾ ಮೋಟಾರ್ಸ್ ಪ್ಯಾಸೆಂಜರ್ ವೆಹಿಕಲ್ಸ್ ಲಿಮಿಟೆಡ್ ತನ್ನ ಕಾರುಗಳ ಸಂಪೂರ್ಣ ಪೋರ್ಟ್‌ಫೋಲಿಯೋ ಮೇಲೆ ದರ ಏರಿಕೆಯನ್ನು ಪ್ರಕಟಿಸಿದೆ. 2026ರ ಸೆಪ್ಟೆಂಬರ್ 1ರಿಂದ ಜಾರಿಗೆ ಬರುವಂತೆ ಟಾಟಾ ಕಾರುಗಳು ಮಾದರಿಗಳಿಗೆ ಅನುಗುಣವಾಗಿ ಗರಿಷ್ಠ ₹25,000 ವರೆಗೆ ದುಬಾರಿಯಾಗಲಿವೆ. ಈ ದರ ಏರಿಕೆಯು ಇಂಧನ ಆಧಾರಿತ (ಪೆಟ್ರೋಲ್ ಮತ್ತು ಡೀಸೆಲ್) ಹಾಗೂ ಎಲೆಕ್ಟ್ರಿಕ್ (EV) ಎರಡೂ ವಿಭಾಗದ ವಾಹನಗಳಿಗೂ ಅನ್ವಯಿಸಲಿದೆ.

ಉತ್ಪಾದನಾ ವೆಚ್ಚ (Production Cost) ಮತ್ತು ಹಣದುಬ್ಬರದ (Inflation) ಹೊರೆ ಹೆಚ್ಚಾಗಿರುವುದರಿಂದ ಈ ನಿರ್ಧಾರ ಅನಿವಾರ್ಯವಾಗಿದೆ ಎಂದು ಕಂಪನಿ ತಿಳಿಸಿದೆ. ಆದರೆ, ವೆಚ್ಚದ ಸಿಂಹಪಾಲು ಹೊಣೆಯನ್ನು ಕಂಪನಿಯೇ ಭರಿಸುತ್ತಿದ್ದು, ಕೇವಲ ಸಣ್ಣ ಪ್ರಮಾಣದ ಹೊರೆಯನ್ನು ಮಾತ್ರ ಗ್ರಾಹಕರಿಗೆ ವರ್ಗಾಯಿಸಲಾಗುತ್ತಿದೆ ಎಂದಿದೆ.

ವರ್ಷದಲ್ಲೇ ಇದು 3ನೇ ದರ ಏರಿಕೆ

2026ರ ಪ್ರಸಕ್ತ ಸಾಲಿನಲ್ಲಿ ಟಾಟಾ ಮೋಟಾರ್ಸ್ ಪ್ರಯಾಣಿಕ ವಾಹನಗಳ ಬೆಲೆ ಹೆಚ್ಚಿಸುತ್ತಿರುವುದು ಇದು ಮೂರನೇ ಬಾರಿಯಾಗಿದೆ. ಏಪ್ರಿಲ್ 1 ರಂದು ಪೆಟ್ರೋಲ್-ಡೀಸೆಲ್ (ICE) ವಾಹನಗಳ ದರ ಸರಾಸರಿ ಶೇ. 0.5 ರಷ್ಟು ಏರಿಕೆಯಾಗಿತ್ತು. ಆ ಬಳಿಕ ಜುಲೈ 1 ರಂದು ಐಸಿಇ ಮತ್ತು ಇವಿ (EV) ಎರಡೂ ಪೋರ್ಟ್‌ಫೋಲಿಯೋ ಬೆಲೆ ಶೇ. 1.5 ರಷ್ಟು ಹೆಚ್ಚಳವಾಗಿತ್ತು. ಈಗ ಸೆಪ್ಟೆಂಬರ್ 1 ರಿಂದ ₹25,000 ವರೆಗೆ ನೇರ ದರ ಏರಿಕೆಯಾಗುತ್ತಿದೆ.

ಆಟೋಮೊಬೈಲ್ ಕ್ಷೇತ್ರಕ್ಕೆ ಜಾಗತಿಕ ಸಂಕಷ್ಟದ ಬಿಸಿ

ಕೇವಲ ಟಾಟಾ ಮೋಟಾರ್ಸ್ ಮಾತ್ರವಲ್ಲದೆ, ಇಡೀ ಆಟೋಮೊಬೈಲ್ ಕ್ಷೇತ್ರವೇ ಕಾರುಗಳ ಬೆಲೆ ಏರಿಕೆಗೆ ಮುಂದಾಗಿದೆ. ಮಾರುತಿ ಸುಜುಕಿ ಕಂಪನಿಯು ಆಗಸ್ಟ್‌ನಿಂದ ₹30,000 ವರೆಗೆ ಬೆಲೆ ಹೆಚ್ಚಿಸುವುದಾಗಿ ತಿಳಿಸಿದ್ದರೆ, ಹ್ಯುಂಡೈ ಮೋಟಾರ್ ಇಂಡಿಯಾ ಕೂಡ ಸೆಪ್ಟೆಂಬರ್ 1ರಿಂದ ದರ ಹೆಚ್ಚಿಸುವ ಸುಳಿವು ನೀಡಿದೆ. ಉತ್ಪಾದನಾ ವೆಚ್ಚ ಹೆಚ್ಚಳದ ಜೊತೆಗೆ, ಇರಾನ್ ಯುದ್ಧ ಹಾಗೂ ಜಾಗತಿಕ ಉದ್ವಿಗ್ನತೆಯಿಂದಾಗಿ ಇಂಧನ ಮಾರುಕಟ್ಟೆ ಮತ್ತು ಅಂತಾರಾಷ್ಟ್ರೀಯ ಸರಕು ಸಾಗಣೆಯಲ್ಲಿ ವ್ಯತ್ಯಯ ಉಂಟಾಗಿರುವುದು ಆಟೋ ರಂಗದ ಮೇಲಿನ ವೆಚ್ಚವನ್ನು ಭಾರಿ ಪ್ರಮಾಣದಲ್ಲಿ ಹೆಚ್ಚಿಸಿದೆ.

ಯಾವೆಲ್ಲಾ ಟಾಟಾ ಕಾರುಗಳು ದುಬಾರಿಯಾಗಲಿವೆ?

ಟಾಟಾ ಕಂಪನಿಯ ಪ್ರತಿಯೊಂದು ಪ್ರಮುಖ ಮಾದರಿಯ ಮೇಲೆಯೂ ಈ ದರ ಏರಿಕೆ ಅನ್ವಯವಾಗಲಿದೆ.

ಪೆಟ್ರೋಲ್/ಡೀಸೆಲ್/ಸಿಎನ್‌ಜಿ ಮಾದರಿಗಳು: ಟಿಯಾಗೋ (Tiago), ಆಲ್ಟ್ರೋಜ್ (Altroz), ಟಿಗೋರ್ (Tigor), ಪಂಚ್ (Punch), ನೆಕ್ಸಾನ್ (Nexon), ಕರ್ವ್ (Curvv), ಸಿಯೆರಾ (Sierra), ಹ್ಯಾರಿಯರ್ (Harrier) ಮತ್ತು ಸಫಾರಿ (Safari).

ಎಲೆಕ್ಟ್ರಿಕ್ (EV) ಮಾದರಿಗಳು: ಟಿಯಾಗೋ ಇವಿ, ಟಿಗೋರ್ ಇವಿ, ಪಂಚ್ ಇವಿ, ನೆಕ್ಸಾನ್ ಇವಿ, ಕರ್ವ್ ಇವಿ, ಸಿಯೆರಾ ಇವಿ ಮತ್ತು ಹ್ಯಾರಿಯರ್ ಇವಿ.

ಯಾವ ವೇರಿಯೆಂಟ್‌ಗೆ ಎಷ್ಟು ದರ ಹೆಚ್ಚಾಗಲಿದೆ ಎಂಬ ಪಟ್ಟಿಯನ್ನು ಕಂಪನಿ ಇನ್ನೂ ಪ್ರಕಟಿಸಿಲ್ಲ. ಆದರೆ, ಸೆಪ್ಟೆಂಬರ್ 1ರ ಒಳಗೆ ಬುಕಿಂಗ್ ಮಾಡುವ ಗ್ರಾಹಕರಿಗೆ ಡೀಲರ್‌ಶಿಪ್ ನಿಯಮಾವಳಿಗಳಿಗೆ ಒಳಪಟ್ಟು ಹಳೆಯ ದರದಲ್ಲೇ ಕಾರು ಸಿಗುವ ಅವಕಾಶವಿದೆ.