ಮೆಟ್ರೋಗೆ ಸಿಕ್ಕ ಸೀರೆ: ಮಹಿಳೆಯನ್ನು ಎಳೆದೊಯ್ದ ರೈಲು!
ಮೆಟ್ರೋ ರೈಲಿನ ಬಾಗಿಲಿಗೆ ಸೀರೆ ಸಿಕ್ಕಿಹಾಕಿಕೊಂಡ ಪರಿಣಾಮ| ಮಹಿಳೆಯನ್ನು ಪ್ಲಾಟ್‌ಫಾರ್ಮ್‌ನಲ್ಲಿ ಎಳೆದುಕೊಂಡು ಹೋದ ರೈಲು| ಮೋತಿ ನಗರ ಮೆಟ್ರೊ ನಿಲ್ದಾಣದಿಂದ ಬ್ಲೂ ಲೈನ್ ಮೆಟ್ರೊ ನಿಲ್ದಾಣಕ್ಕೆ ಪ್ರಯಾಣಿಸುತ್ತಿದ್ದ ಮಹಿಳೆ| ತಲೆಗೆ ತೀವ್ರವಾಗಿ ಪೆಟ್ಟಾದ ಪರಿಣಾಮ ಆಸ್ಪತ್ರೆ ಸೇರಿದ ಗೀತಾ|
ನವದೆಹಲಿ(ಏ.16): ದೆಹಲಿ ಮೆಟ್ರೊ ರೈಲಿನ ಬಾಗಿಲಿಗೆ ಸೀರೆ ಸಿಕ್ಕಿಹಾಕಿಕೊಂಡ ಪರಿಣಾಮ, ಮಹಿಳೆಯೋರ್ವರನ್ನು ರೈಲು ತುಸು ದೂರ ಎಳೆದುಕೊಂಡು ಹೋದ ಘಟನೆ ದೆಹಲಿ ಮೆಟ್ರೋ ರೈಲು ನಿಲ್ದಾಣದಲ್ಲಿ ನಡೆದಿದೆ.
40 ವರ್ಷದ ಗೀತಾ ಎಂಬ ಮಹಿಳೆಯ ಸೀರೆ ರೈಲಿನ ಬಾಗಿಲಿಗೆ ಸಿಕ್ಕಿಹಾಕಿಕೊಂಡಿದೆ. ಇದೇ ವೇಳೆ ರೈಲು ಚಲಿಸಲು ಪ್ರಾರಂಭಿಸಿದ್ದು, ಪರಿಣಾಮ ಪ್ಲಾಟ್‌ಫಾರ್ಮ್‌ನಲ್ಲಿ ಬಿದ್ದು ಗೀತಾ ಗಾಯಗೊಂಡಿದ್ದಾರೆ.
ಗೀತಾ ತಮ್ಮ ಮಗಳೊಂದಿಗೆ ಮೋತಿ ನಗರ ಮೆಟ್ರೊ ನಿಲ್ದಾಣದಿಂದ ಬ್ಲೂ ಲೈನ್ ಮೆಟ್ರೊ ನಿಲ್ದಾಣಕ್ಕೆ ಪ್ರಯಾಣಿಸುತ್ತಿದ್ದರು ಎಂದು ಪತಿ ಜಗದೀಶ್ ಪ್ರಸಾದ್ ಮಾಹಿತಿ ನೀಡಿದ್ದಾರೆ.
ಕೂಡಲೇ ಎಚ್ಚೆತ್ತ ಚಾಲಕ ರೈಲನ್ನು ನಿಲ್ಲಿಸಿದ್ದು, ತಲೆಗೆ ಪೆಟ್ಟಾದ ಗೀತಾ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ದೆಹಲಿ ಮೆಟ್ರೊ ರೈಲು ನಿಗಮ ಸ್ಪಷ್ಟಪಡಿಸಿದೆ.
