Asianet Suvarna News Asianet Suvarna News

ಮಂಗಳೂರಿನ ಹುಡುಗಿ ಸರ್ಫಿಂಗ್ ಸ್ಟಾರ್ ಆಗಿದ್ದು ಹೇಗೆ?

ಅಜ್ಜ ಶ್ರೀಕರ ಕುಂದರ್‌ ವಿದೇಶದಲ್ಲಿ ಉದ್ಯೋಗದಲ್ಲಿದ್ದರು. ಅವರಿಗೆ ಸಮುದ್ರದ ಒಡನಾಟ ಇತ್ತು. ಅದು ತನ್ವಿಯನ್ನು ಕಡಲ ತಡಿಗೆ ಸೆಳೆದಿದ್ದರೂ ಮುಂದೊಂದು ದಿನ ಸಮುದ್ರವೇ ಬದುಕಾಗುತ್ತದೆ ಎಂದು ತಿಳಿದಿರಲಿಲ್ಲ. ಅಜ್ಜನ ಒತ್ತಾಯದ ಮೇರೆಗೆ 10 ವರ್ಷದವಳಿದ್ದಾಗ ಸಮುದ್ರ ಕಿನಾರೆಗೆ ಬಂದ ತನ್ವಿ ಎಲ್ಲಾ ಮಕ್ಕಳಂತೆ ಹೆದರಿದ್ದಳು. ಹೆದರಿಕೆಯಿಂದಲೇ ಕಡಲಿಗೆ ಇಳಿದಿದ್ದಳು. ಆಗ ಆಕೆಯ ನೆರವಿಗೆ ಬಂದಿದ್ದು ಮಂತ್ರ ಸರ್ಫಿಂಗ್‌ ಕ್ಲಬ್‌ ಸ್ಥಾಪಕ ಮತ್ತು ಗುರು ಸರ್ಫಿಂಗ್‌ ಸ್ವಾಮಿ ಮತ್ತು ಕೋಚ್‌ ಶಮಂತ್‌ ಕುಮಾರ್‌. ಅವರಲ್ಲಿ ಕೋಚಿಂಗ್‌ ಪಡೆದ ಬಳಿಕ ತನ್ವಿ ಹಿಂದಿರುಗಿ ನೋಡಿದ್ದೇ ಇಲ್ಲ.

This Is How A Girl From Mangalore Emerged As Surfing Star
  • Facebook
  • Twitter
  • Whatsapp

ಅಜ್ಜ ಶ್ರೀಕರ ಕುಂದರ್‌ ವಿದೇಶದಲ್ಲಿ ಉದ್ಯೋಗದಲ್ಲಿದ್ದರು. ಅವರಿಗೆ ಸಮುದ್ರದ ಒಡನಾಟ ಇತ್ತು. ಅದು ತನ್ವಿಯನ್ನು ಕಡಲ ತಡಿಗೆ ಸೆಳೆದಿದ್ದರೂ ಮುಂದೊಂದು ದಿನ ಸಮುದ್ರವೇ ಬದುಕಾಗುತ್ತದೆ ಎಂದು ತಿಳಿದಿರಲಿಲ್ಲ. ಅಜ್ಜನ ಒತ್ತಾಯದ ಮೇರೆಗೆ 10 ವರ್ಷದವಳಿದ್ದಾಗ ಸಮುದ್ರ ಕಿನಾರೆಗೆ ಬಂದ ತನ್ವಿ ಎಲ್ಲಾ ಮಕ್ಕಳಂತೆ ಹೆದರಿದ್ದಳು. ಹೆದರಿಕೆಯಿಂದಲೇ ಕಡಲಿಗೆ ಇಳಿದಿದ್ದಳು. ಆಗ ಆಕೆಯ ನೆರವಿಗೆ ಬಂದಿದ್ದು ಮಂತ್ರ ಸರ್ಫಿಂಗ್‌ ಕ್ಲಬ್‌ ಸ್ಥಾಪಕ ಮತ್ತು ಗುರು ಸರ್ಫಿಂಗ್‌ ಸ್ವಾಮಿ ಮತ್ತು ಕೋಚ್‌ ಶಮಂತ್‌ ಕುಮಾರ್‌. ಅವರಲ್ಲಿ ಕೋಚಿಂಗ್‌ ಪಡೆದ ಬಳಿಕ ತನ್ವಿ ಹಿಂದಿರುಗಿ ನೋಡಿದ್ದೇ ಇಲ್ಲ.

ಈವರೆಗೆ ಭಾರತದಲ್ಲಿ ನಡೆದ 5 ರಾಷ್ಟ್ರೀಯ ಸರ್ಫಿಂಗ್‌ ಸ್ಪರ್ಧೆಗಳಲ್ಲೂ ತನ್ವಿ ರಾಷ್ಟ್ರೀಯ ಚಾಂಪಿಯನ್‌ ಆಗಿದ್ದಾಳೆ. ಆಸ್ಪ್ರೇಲಿಯಾದ ಬಳಿ ಇರುವ ದ್ವೀಪ ಫಿಜಿ ಮತ್ತು ಅಮೆರಿಕದಲ್ಲಿ ನಡೆದ ಅಂತಾರಾಷ್ಟ್ರೀಯ ಸರ್ಫಿಂಗ್‌ ಉತ್ಸವದಲ್ಲೂ ತನ್ವಿ ಭಾರತವನ್ನು ಪ್ರತಿನಿಧಿಸಿ ಶಹಬ್ಬಾಸ್‌ ಎನಿಸಿದ್ದಾಳೆ. ಸ್ಟಾಂಡ್‌ ಅಪ್‌ ಪೆಡಲಿಂಗ್‌ನಲ್ಲಿ 18ರೊಳಗಿನ ವಿಭಾಗದಲ್ಲಿ ತನ್ವಿ ಗುರಿ ತಲುಪದ ಸ್ಪರ್ಧೆ ಇಲ್ಲ. ಅಂತಾರಾಷ್ಟ್ರೀಯ ಸರ್ಫಿಂಗ್‌ ಸ್ಪರ್ಧೆಯಲ್ಲಿ ತನ್ವಿ 18 ಕಿ.ಮೀ. ದೂರ ಪೆಡಲಿಂಗ್‌ ನಡೆಸಿ ಗೆದ್ದಿದ್ದಾರೆ. ಮೊನ್ನೆ ಮೂಲ್ಕಿಯಲ್ಲಿ ನಡೆದ ಅಂತಾರಾಷ್ಟ್ರೀಯ ಸರ್ಫಿಂಗ್‌ನಲ್ಲಿ ತನ್ನ ವಯೋಮಾನದ ಸ್ಪರ್ಧೆಯಲ್ಲಿ ತನ್ವಿ 5 ಕಿ.ಮೀ. ಪೆಡಲಿಂಗ್‌ನಲ್ಲಿ ಚಾಂಪಿಯನ್‌.

ಸರ್ಫಿಂಗ್‌ ಕ್ಷೇತ್ರದ ನಕ್ಷತ್ರ:

ಈಕೆಗೆ ಸೆಣಸಾಟ ಏನಿದ್ದರೂ ಸಮುದ್ರದ ನೀರಿನೊಂದಿಗೆ. ಸಮುದ್ರದ ನೀರಿನೊಂದಿಗೆ ಕಾದಾಡಲು ಅಬ್ಬರದ ಅಲೆಯೇ ಬೇಕು. ಅಲೆ ಇಲ್ಲದಿದ್ದರೆ ಸಪ್ಪೆ ಮೋರೆ ಹಾಕುತ್ತಾಳೆ. ಕಡಲ ತಡಿಗೆ ಇಳಿದರೆ ಈಕೆಗಾಗಿ ಸಮುದ್ರ ಭೋರ್ಗರೆಯುತ್ತದೆ. ಆಗಲೇ ಈಕೆ ಕಾಲಿಗೆ ಪೆಡಲ್‌ ಕಟ್ಟಿಕೊಂಡು ಸಮುದ್ರಕ್ಕೆ ಜಿಗಿಯುತ್ತಾಳೆ. ಅಲೆಗಳೊಂದಿಗೆ ಕಸರತ್ತನ್ನು ನಡೆಸುತ್ತಾಳೆ.

ಸಮುದ್ರದ ಅಲೆಗಳೊಂದಿಗೆ ಸೆಣಸಾಡುತ್ತಿರುವ ಈಕೆ ಮಂಗಳೂರಿನ ಕುವರಿ, ತನ್ವಿ ಜಗದೀಶ್‌. 10 ವರ್ಷದಿಂದಲೇ ಸಮುದ್ರದ ನಂಟು ಬೆಳೆಸಿಕೊಂಡ ತನ್ವಿ ಈಗ ಜಗತ್ತು ಬೆರಗಾಗುವಂತೆ ಬೆಳೆದಿದ್ದಾಳೆ. ಅರ್ಥಾತ್‌ ಸರ್ಫಿಂಗ್‌ ಸ್ಪರ್ಧೆಯಲ್ಲಿ ಪ್ರಪಂಚಯೇ ಅಚ್ಚರಿ ಪಡುವ ಸಾಧನೆಯನ್ನು ಮಾಡುತ್ತಿದ್ದಾಳೆ. ಅಷ್ಟಕ್ಕೂ ಈಕೆ ಪದಕಗಳನ್ನು ಗೆಲ್ಲುವ ಮಹಿಳಾ ಕ್ರೀಡಾಪಟು. ಸರ್ಫಿಂಗ್‌ ಕ್ಷೇತ್ರದಲ್ಲಿ ಸದ್ಯಕ್ಕೆ ಮಿಂಚುತ್ತಿರುವ ಏಕೈಕ ಕ್ರೀಡಾ ಪ್ರತಿಭೆ.

ಇದೇ ಸೆಪ್ಟೆಂಬರ್‌ನಲ್ಲಿ ಡೆನ್ಮಾರ್ಕ್ನಲ್ಲಿ ನಡೆಯುವ ವಿಶ್ವ ಸರ್ಫಿಂಗ್‌ ಚಾಂಪಿಯನ್‌ಶಿಪ್‌ನಲ್ಲಿ ಭಾರತವನ್ನು ಪ್ರತಿನಿಧಿ​ಸಲಿ​ದ್ದಾರೆ. ವಿಶೇಷ ವೆಂದರೆ ಭಾರತವನ್ನು ಪ್ರತಿನಿಧಿಸುತ್ತಿರುವ ಏಕೈಕ ಸರ್ಫಿಂಗ್‌ ಪಟು ಈಕೆ. ಅದರಲ್ಲೂ ದೇಶದ ಮೊದಲ ಮಹಿಳಾ ಸರ್ಫರ್‌ ಎಂಬ ಹೆಗ್ಗಳಿಕೆ ಪಡೆ​ದಿದ್ದಾಳೆ. ತನ್ವಿ ಹುಟ್ಟಿದ್ದು ಮೂಲ್ಕಿಯಲ್ಲಿ. ಬೆಳೆದದ್ದು ಸರ್ಫಿಂಗ್‌ ನಡೆ​ಸುತ್ತಾ ಕಡಲ ಕಿನಾರೆಯಲ್ಲಿ. ಪಣಂಬೂರಿನ ಕೇಂದ್ರೀಯ ವಿದ್ಯಾ​ಲ​¿​ು​ದಲ್ಲಿ ಎಸ್‌ಎಸ್‌ಎಲ್‌ಸಿ ಪೂರೈಸಿದ ತನ್ವಿ ಈಗ ಮಂಗಳೂರು ಶಾರದಾ ವಿದ್ಯಾ​ಲ​ಯದಲ್ಲಿ ದ್ವಿತೀಯ ಪಿಯುಸಿ ವಿಜ್ಞಾನ ವಿಭಾಗದ ವಿದ್ಯಾರ್ಥಿನಿ. 

 

ನಿತ್ಯವೂ ಸರ್ಫಿಂಗ್ ಅಭ್ಯಾಸ:

ತನ್ವಿ ಎಷ್ಟರ ಮಟ್ಟಿಗೆ ಸರ್ಫಿಂಗ್‌ನಲ್ಲಿ ತಲ್ಲೀನರಾಗಿದ್ದಾರೆ ಎಂದರೆ, ಸರ್ಫಿಂಗ್‌ ಬಿಟ್ಟು ತನ್ವಿ ಇಲ್ಲ, ತನ್ವಿ ಇಲ್ಲದೆ ಸರ್ಫಿಂಗ್‌ ಬೋರ್ಡ್‌ ಇಲ್ಲ. ಪ್ರತಿದಿನವೂ ಬೆಳಗ್ಗಿನಿಂದ ಸಂಜೆವರೆಗೆ ಕಡಲ ತಡಿಯಲ್ಲೇ ತನ್ವಿ ಅಭ್ಯಾಸ ನಿರತರಾಗಿರುತ್ತಾರೆ. ನಸುಕಿನ ಜಾವ ನಾಲ್ಕು ಗಂಟೆಗೆ ತನ್ವಿ ಸರ್ಫಿಂಗ್‌ಗೆ ಸಿದ್ಧವಾಗುತ್ತಾರೆ. ಮೊದಲು ಪ್ರಾಣಾಯಾಮ, ಯೋಗದ ನಂತರ ಪೆಡಲಿಂಗ್‌. ಈಕೆಯ ತಂದೆ ಜಗದೀಶ್‌ ಕುಂದರ್‌ ಎಂಆರ್‌ಪಿಎಲ್‌ ಉದ್ಯೋಗಿ. ತಾಯಿ ಕವಿತಾ ಗೃಹಿಣಿ. ತಂದೆ, ತಾಯಿಯ ಒಬ್ಬಳೇ ಮಗಳು ತನ್ವಿ. ಹೆತ್ತವರು ಸುರತ್ಕಲ್‌ನ ಎನ್‌ಐಟಿಕೆ ಬಳಿ ವಾಸವಿದ್ದಾರೆ.

ತನ್ವಿ ನಿತ್ಯವೂ ಮೂಲ್ಕಿಯ ಕೊಳಚಿಕಂಬಳದಲ್ಲಿ ಇರುವ ಮಂತ್ರ ಸರ್ಫಿಂಗ್‌ ಕ್ಲಬ್‌ನಲ್ಲಿ ಸರ್ಫಿಂಗ್‌ ತರಬೇತಿ ಪಡೆಯುತ್ತಾರೆ. ಇದಕ್ಕಾಗಿ ಅಜ್ಜಿ ಮನೆ ಮೂಲ್ಕಿಯಲ್ಲಿ ತನ್ವಿ ವಾಸ. ಹೆತ್ತವರೊಂದಿಗೆ ಕಳೆಯಲು ಭಾನುವಾರ ಸರ್ಫಿಂಗ್‌ಗೆ ಬಿಡುವು ಮಾಡಿಕೊಂಡಿದ್ದಾರೆ. ತನ್ವಿ ಕಾಲೇಜಿಗೆ ಹೋಗುವುದು ಮಧ್ಯಾಹ್ನ. 12 ಗಂಟೆಯಿಂದ ಸಂಜೆ 4 ಗಂಟೆವರೆಗೆ ವಿಶೇಷ ತರಗತಿ. ಬಳಿಕ ಮತ್ತೆ ಸರ್ಫಿಂಗ್‌. ಬೆಳಗ್ಗೆ 7ರಿಂದ 11 ಗಂಟೆ ಹಾಗೂ ಸಂಜೆ 4ರಿಂದ 7 ಗಂಟೆವರೆಗೂ ಸರ್ಫಿಂಗ್‌ ತರಬೇತಿ ನಡೆಸುತ್ತಾರೆ. ಭವಿಷ್ಯದಲ್ಲಿ ಶಾಲಾ ಶಿಕ್ಷಕಿಯಾಗಬೇಕು ಎನ್ನುವುದು ತನ್ವಿಯ ಅಪೇಕ್ಷೆಯಂತೆ.

-ಆತ್ಮಭೂಷಣ್, ಮಂಗಳೂರು

Follow Us:
Download App:
  • android
  • ios