ಸರ್ಕಾರದ ಜೊತೆ ಉದ್ಧವ್ ಠಾಕ್ರೆಯ ಪಕ್ಷವನ್ನೂ ವಶಪಡಿಸ್ಕೊಳ್ತಾರಾ ಏಕನಾಥ್ ಶಿಂಧೆ? ಹೀಗಿದೆ ನಿಯಮ
* ಮಹಾರಾಷ್ಟ್ರದಲ್ಲಿ ಏಕಾಏಕಿ ಹುಟ್ಟಿಕೊಂಡ ರಾಜಕೀಯ ಬಿಕ್ಕಟ್ಟು
* ಉದ್ಧವ್ ಠಾಕ್ರೆಗೆ ತಲೆನೋವಾದ ಏಕನಾಥ್ ಶಿಂಧೆ ಬಂಡಾಯ
* ಸರ್ಕಾರದ ಜೊತೆಗೆ ಪಕ್ಷದ ಮೇಲಿನ ಹಿಡಿತವನ್ನೂ ಕಳೆದುಕೊಳ್ತಾರಾ ಠಾಕ್ರೆ?
ಮುಂಬೈ(ಜೂ.22): ಮಹಾರಾಷ್ಟ್ರದಲ್ಲಿ ಏಕನಾಥ್ ಶಿಂಧೆ ಅವರ ಬಂಡಾಯದಿಂದ ಸಿಎಂ ಉದ್ಧವ್ ಠಾಕ್ರೆ ನೇತೃತ್ವದ ಸರ್ಕಾರಕ್ಕೆ ಮಾತ್ರವಲ್ಲದೆ ಶಿವಸೇನೆಗೂ ದೊಡ್ಡ ಬಿಕ್ಕಟ್ಟು ಸೃಷ್ಟಿಯಾಗಿದೆ. ಶಿವಸೇನೆ ಬಂಡಾಯಗಾರ ಏಕನಾಥ್ ಶಿಂಧೆ ಅವರೊಂದಿಗೆ 40 ಶಾಸಕರು ಅಸ್ಸಾಂನ ಗುವಾಹಟಿ ತಲುಪಿದ್ದಾರೆ. ಈ ಮೂಲಕ ಶಿವಸೇನೆಯ ಶಾಸಕರು ಉದ್ಧವ್‌ಗಿಂತ ಹೆಚ್ಚಾಗಿ ಏಕನಾಥ್ ಶಿಂಧೆ ಜೊತೆ ನಿಂತಿರುವುದು ಕಂಡು ಬಂದಿದೆ. ಇಂತಹ ಪರಿಸ್ಥಿತಿಯಲ್ಲಿ ಶಿವಸೇನೆ ಭಾಗವಾದರೆ ಪಕ್ಷಾಂತರ ಕಾನೂನಿನ ಬೆದರಿಕೆ ಇರುವುದಿಲ್ಲ. ಈ ಮೂಲಕ ಏಕನಾಥ್ ಶಿಂಧೆ ಉದ್ಧವ್ ಕೈಯಿಂದ ಮಹಾರಾಷ್ಟ್ರದ ಅಧಿಕಾರ ಹಾಗೂ ಶಿವಸೇನೆಯ ಅಧಿಕಾರವನ್ನು ಕಸಿದುಕೊಳ್ಳಬಹುದೇ? ಎಂಬ ಅನುಮಾನ ಹುಟ್ಟಿಕೊಂಡಿದೆ.
ಶಿವಸೇನೆಯ ಬಂಡಾಯ ನಾಯಕ ಏಕನಾಥ್ ಶಿಂಧೆ ನೇತೃತ್ವದ ಬಣ ಉದ್ಧವ್ ಠಾಕ್ರೆ ವಿರುದ್ಧ ಬಂಡಾಯ ಎದ್ದಿರುವುದು ಸರ್ಕಾರಕ್ಕೆ ಮಾತ್ರವಲ್ಲದೆ ಪಕ್ಷಕ್ಕೂ ಅಪಾಯ ತಂದೊಡ್ಡಿದೆ. ಶಿವಸೇನೆಯ ಸುಮಾರು 40 ಶಾಸಕರು ಮಹಾರಾಷ್ಟ್ರಕ್ಕೂ ಮುನ್ನ ಗುಜರಾತ್‌ಗೆ ತೆರಳಿದ್ದು, ಈಗ ಅಸ್ಸಾಂನ ಗುವಾಹಟಿ ತಲುಪಿದ್ದಾರೆ. ಈ ಶಾಸಕರು ಉದ್ಧವ್ ಠಾಕ್ರೆ ಸರ್ಕಾರದ ವಿರುದ್ಧ ಕೋಪಗೊಂಡಿದ್ದಾರೆ.
ಅಂತಹ ಪರಿಸ್ಥಿತಿಯಲ್ಲಿ, ಈ ಬಂಡಾಯ ನಾಯಕರು ಮಹಾರಾಷ್ಟ್ರದ ಮಹಾ ವಿಕಾಸ್ ಅಘಾಡಿ ಸರ್ಕಾರವನ್ನು ಉರುಳಿಸಲು ಬಿಜೆಪಿಯನ್ನು ಬೆಂಬಲಿಸಬಹುದು. ಉದ್ಧವ್ ಸರ್ಕಾರ 'ಅಲ್ಪಮತ'ದಲ್ಲಿದೆ ಎಂದು ಬಿಜೆಪಿ ಹೇಳಿಕೊಂಡಿದೆ, ಆದರೆ ಪ್ರಸ್ತುತ ಸರ್ಕಾರ ರಚನೆಯ ವಿಷಯದ ಬಗ್ಗೆ ಕಾದು ನೋಡುತ್ತಿದೆ.
ಉದ್ಧವ್‌ಗಿಂತ ಶಿಂಧೆ ಜೊತೆ ಹೆಚ್ಚಿನ ಶಾಸಕರು
2019 ರ ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆಯಲ್ಲಿ, 56 ಶಿವಸೇನೆ ಶಾಸಕರು ಗೆದ್ದಿದ್ದರು, ಅದರಲ್ಲಿ ಒಬ್ಬ ಶಾಸಕ ನಿಧನರಾಗಿದ್ದಾರೆ. ಇದರಿಂದಾಗಿ ಪ್ರಸ್ತುತ 55 ಶಾಸಕರು ಶಿವಸೇನೆಯಲ್ಲಿದ್ದಾರೆ. ಏಕನಾಥ್ ಶಿಂಧೆ ತಮ್ಮೊಂದಿಗೆ 40 ಶಾಸಕರಿದ್ದಾರೆ ಎಂದು ಹೇಳಿಕೊಂಡಿದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ ಈ 40 ಶಾಸಕರು ಶಿವಸೇನೆಗೆ ಸೇರಿದರೆ ಉದ್ವವ್ ಠಾಕ್ರೆ ಅವರ ಬಿಕ್ಕಟ್ಟು ಮತ್ತಷ್ಟು ಹೆಚ್ಚುತ್ತದೆ. ಏಕನಾಥ್ ಶಿಂಧೆ ಈ ರೀತಿ ಹೆಜ್ಜೆ ಇಟ್ಟರೆ ಪಕ್ಷಾಂತರ ನಿಷೇಧ ಕಾಯ್ದೆಯಡಿ ಯಾವುದೇ ಕ್ರಮ ಕೈಗೊಳ್ಳಲು ಸಾಧ್ಯವಿಲ್ಲ.
ವಾಸ್ತವವಾಗಿ, ಪಕ್ಷಾಂತರ ವಿರೋಧಿ ಕಾನೂನು ಅನ್ವಯ, ಒಂದು ಪಕ್ಷದ ಬಂಡಾಯ ಶಾಸಕರ ಮೂರನೇ ಎರಡರಷ್ಟು ಕಡಿಮೆ ಇದ್ದರೆ, ಅವರನ್ನು ಅನರ್ಹಗೊಳಿಸಬಹುದು. ಈ ಅರ್ಥದಲ್ಲಿ, ಶಿವಸೇನೆ ಪ್ರಸ್ತುತ ವಿಧಾನಸಭೆಯಲ್ಲಿ 55 ಶಾಸಕರನ್ನು ಹೊಂದಿದೆ. ಇಂತಹ ಪರಿಸ್ಥಿತಿಯಲ್ಲಿ, ಬಂಡಾಯ ಬಣಕ್ಕೆ ಪಕ್ಷಾಂತರ ನಿಷೇಧ ಕಾನೂನಿನಿಂದ ಪಾರಾಗಲು ಕನಿಷ್ಠ 37 ಶಾಸಕರು (55 ರಲ್ಲಿ ಮೂರನೇ ಎರಡರಷ್ಟು) ಅಗತ್ಯವಿದೆ, ಆದರೆ ಶಿಂಧೆ ತಮ್ಮೊಂದಿಗೆ 40 ಶಾಸಕರು ಇದ್ದಾರೆ ಎಂದು ಹೇಳಿಕೊಳ್ಳುತ್ತಿದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ ಉದ್ಧವ್ ಠಾಕ್ರೆ ಬಳಿ ಉಳಿದಿರುವುದು ಕೇವಲ 15 ಶಾಸಕರು ಮಾತ್ರ. ಈ ಮೂಲಕ ಶಿವಸೇನೆಯ ಶಾಸಕರು ಉದ್ಧವ್‌ಗಿಂತ ಹೆಚ್ಚಾಗಿ ಶಿಂಧೆ ಅವರೊಂದಿಗೆ ನಿಂತಿರುವುದು ಕಂಡು ಬರುತ್ತಿದೆ.
ಪಕ್ಷಾಂತರ ವಿರೋಧಿ ಕಾನೂನು ಎಂದರೇನು?
1967 ರ ಸಾರ್ವತ್ರಿಕ ಚುನಾವಣೆಯ ನಂತರ, ಒಂದು ಪಕ್ಷದಿಂದ ಮತ್ತೊಂದು ಪಕ್ಷಕ್ಕೆ ಶಾಸಕರ ಚಲನೆಯಿಂದಾಗಿ ಅನೇಕ ರಾಜ್ಯಗಳ ಸರ್ಕಾರಗಳು ಬಿದ್ದವು. ಇಂತಹ ಪರಿಸ್ಥಿತಿಯಲ್ಲಿ 1985ರಲ್ಲಿ ರಾಜೀವ್ ಗಾಂಧಿ ನೇತೃತ್ವದ ಕಾಂಗ್ರೆಸ್ ಸರಕಾರ ಪಕ್ಷಾಂತರ ನಿಷೇಧ ಕಾಯಿದೆಯನ್ನು ತಂದಿತ್ತು. ಸಂವಿಧಾನ 1985ರಲ್ಲಿ ಸಂವಿಧಾನದ ಹತ್ತನೇ ಶೆಡ್ಯೂಲ್ ನಲ್ಲಿ ಸ್ಥಾನ ನೀಡಿತ್ತು. ಪಕ್ಷಾಂತರ ನಿಷೇಧ ಕಾನೂನಿನ ಮೂಲಕ ಶಾಸಕರು ಮತ್ತು ಸಂಸದರ ಪಕ್ಷ ಬದಲಾವಣೆಗೆ ಕಡಿವಾಣ ಹಾಕಲಾಗಿದೆ. ಪಕ್ಷಾಂತರದಿಂದಾಗಿ ಅವರ ಸದಸ್ಯತ್ವವೂ ರದ್ದಾಗಬಹುದು ಎಂದು ಹೇಳಲಾಗಿದೆ.
ಆದಾಗ್ಯೂ, ಸಂಸದರು/ಶಾಸಕರ ಗುಂಪಿಗೆ ಪಕ್ಷಾಂತರದ ದಂಡನೆಗೆ ಒಳಗಾಗದೆ ಮತ್ತೊಂದು ಪಕ್ಷವನ್ನು ಸೇರಲು (ವಿಲೀನಗೊಳಿಸಲು) ಅವಕಾಶವಿದೆ. ಇದಕ್ಕಾಗಿ, ಯಾವುದೇ ಪಕ್ಷದ ಮೂರನೇ ಎರಡರಷ್ಟು ಶಾಸಕರು ಅಥವಾ ಸಂಸದರು ಇತರ ಪಕ್ಷದೊಂದಿಗೆ ಹೋಗಲು ಬಯಸಿದರೆ, ಅವರ ಸದಸ್ಯತ್ವವು ಕೊನೆಗೊಳ್ಳುವುದಿಲ್ಲ. ಮಹಾರಾಷ್ಟ್ರದಲ್ಲೂ ಇದೇ ರೀತಿಯ ಪರಿಸ್ಥಿತಿ ಕಂಡುಬರುತ್ತಿದೆ. ಶಿವಸೇನೆಯ ಮೂರನೇ ಎರಡರಷ್ಟು ಶಾಸಕರು ಈಗ ಏಕನಾಥ್ ಶಿಂಧೆಯವರೊಂದಿಗೆ ಇದ್ದಾರೆ, ಇದರಿಂದಾಗಿ ಚೆಂಡು ಉದ್ಧವ್ ಠಾಕ್ರೆ ಅವರ ಕೈಯಿಂದ ಹೊರಬಿದ್ದಿದೆ. ಇಂತಹ ಪರಿಸ್ಥಿತಿಯಲ್ಲಿ ಉದ್ಧವ್ ಅವರ ಕೈಯಿಂದ ಸರ್ಕಾರ ಮಾತ್ರವಲ್ಲದೆ ಅವರ ಪಕ್ಷವೂ ಕೈ ಜಾರುವಂತಿದೆ.
ಏಕನಾಥ್ ಶಿಂಧೆ ಅವರ ಹೆಜ್ಜೆಗಳು
ಏಕನಾಥ್ ಶಿಂಧೆ 40 ಶಾಸಕರೊಂದಿಗೆ ಬಂಡಾಯವೆದ್ದ ನಂತರ ಉದ್ಧವ್ ಸರ್ಕಾರ ಅಲ್ಪಮತಕ್ಕೆ ಕುಸಿದಿದೆ. ಬಿಜೆಪಿ ಕೂಡ ಈ ವಿಷಯವನ್ನು ಮತ್ತೆ ಮತ್ತೆ ಹೇಳುತ್ತಿದೆ. ಶಿವಸೇನೆಯ 40 ಶಾಸಕರು ಇಲ್ಲಿ ತಮ್ಮೊಂದಿಗೆ ಇದ್ದಾರೆ ಎಂದು ಏಕನಾಥ್ ಶಿಂಧೆ ವಿಮಾನ ನಿಲ್ದಾಣದಲ್ಲಿಯೇ ಹೇಳಿಕೊಂಡಿದ್ದಾರೆ. ಬಾಳಾಸಾಹೇಬ್ ಠಾಕ್ರೆಯವರ ಹಿಂದುತ್ವವನ್ನು ಮುಂದೆ ಕೊಂಡೊಯ್ಯುತ್ತೇವೆ ಎಂದು ಹೇಳಿದರು. ಅದೇ ಸಮಯದಲ್ಲಿ, ರಾಜಕೀಯ ಗೊಂದಲದ ನಡುವೆ ಶಿವಸೇನೆ ನಾಯಕ ಸಂಜಯ್ ರಾವತ್ ವಿಧಾನಸಭೆಯನ್ನು ವಿಸರ್ಜಿಸಲು ಸೂಚಿಸಿದ್ದಾರೆ. ಆದರೆ, ಉದ್ಧವ್ ಸರ್ಕಾರ ವಿಧಾನಸಭೆ ವಿಸರ್ಜನೆಗೆ ಶಿಫಾರಸು ಮಾಡಿದರೆ, ರಾಜ್ಯಪಾಲರು ಅದನ್ನು ಒಪ್ಪಿಕೊಳ್ಳುವ ಅಗತ್ಯವಿಲ್ಲ.
