ಅತ್ಯಾಚಾರ ಸಂತ್ರಸ್ತೆಯ ಮದ್ವೆ ಆಗಲು ಹೇಳಿಲ್ಲ: ಸುಪ್ರೀಂ ಕೋರ್ಟ್ ಸ್ಪಷ್ಟನೆ
ಅತ್ಯಾಚಾರ ಸಂತ್ರಸ್ತೆಯ ಮದ್ವೆ ಆಗಲು ಹೇಳಿಲ್ಲ| ಸುಪ್ರೀಂ ಕೋರ್ಟ್ ಸ್ಪಷ್ಟನೆ| ಅತ್ಯಾಚಾರದ ಆರೋಪಿಗೆ ಸಂತ್ರಸ್ತೆಯನ್ನು ಮದುವೆ ಆಗಲು ಹೇಳಿಲ್ಲ| ಸಂತ್ರಸ್ತೆಯನ್ನು ಮದುವೆಯಾಗುವೆಯಾ ಎಂದಷ್ಟೇ ಪ್ರಶ್ನೆ| ಈ ಬಗ್ಗೆ ತಪ್ಪಾಗಿ ಅರ್ಥೈಸಲಾಗಿದೆ: ಸುಪ್ರೀಂ ಕೋರ್ಟ್
ನವದೆಹಲಿ(ಮಾ.09): ಮಹಿಳೆಯರ ಕುರಿತಾಗಿ ಸರ್ವೋಚ್ಚ ನ್ಯಾಯಾಲಯಕ್ಕೆ ಅತಿಹೆಚ್ಚು ಮತ್ತು ವಿಶೇಷ ಗೌರವವಿದೆ. ಆದರೆ ಕಳೆದ ವಾರ ಅತ್ಯಾಚಾರಕ್ಕೆ ಸಂಬಂಧಿಸಿದ ವಿಚಾರಣೆ ವೇಳೆ ತನ್ನ ಹೇಳಿಕೆಯನ್ನು ತಪ್ಪಾಗಿ ಅರ್ಥೈಸಲಾಗಿದೆ ಸಿಜೆಐ ಎಸ್. ಎ. ಬೋಬ್ಡೆ ನೇತೃತ್ವದ ಸುಪ್ರೀಂ ಕೋರ್ಟ್ ಪೀಠ ಸ್ಪಷ್ಟಪಡಿಸಿದೆ.
‘ಸಂತ್ರಸ್ತೆಯನ್ನು ವಿವಾಹವಾಗು’ ಎಂದು ಅತ್ಯಾಚಾರವೆಸಗಿದ ಆರೋಪಿಗೆ ಸುಪ್ರೀಂ ಪೀಠ ಕೇಳಿದೆ ಎಂಬ ವರದಿಗಳು ಪ್ರಕಟವಾಗಿದ್ದವು. ಈ ಬಗ್ಗೆ ಭಾರೀ ಆಕ್ರೋಶ ವ್ಯಕ್ತವಾಗಿತ್ತು. ಈ ಹಿನ್ನೆಲೆಯಲ್ಲಿ ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆಯಾದ ಸೋಮವಾರವೇ ಸುಪ್ರೀಂ ಕೋರ್ಟ್ ತನ್ನ ಹೇಳಿಕೆ ಕುರಿತು ಸ್ಪಷ್ಟನೆ ನೀಡಿದೆ.
‘ಅತ್ಯಾಚಾರದಿಂದಾಗಿ ಗರ್ಭ ಧರಿಸಿದ 14 ವರ್ಷದ ಯುವತಿಯು ತನ್ನ ಗರ್ಭಕ್ಕೆ 26 ವಾರ ಆಗಿದ್ದರೂ, ಗರ್ಭಪಾತಕ್ಕೆ ಅನುಮತಿ ನೀಡಬೇಕೆಂಬ ಪ್ರಕರಣದ ಕುರಿತಾಗಿ ಸುಪ್ರೀಂಕೋರ್ಟ್ ವಿಚಾರಣೆ ನಡೆಸಿತು. ಈ ವೇಳೆ ಕಳೆದ ವಾರ ಅತ್ಯಾಚಾರದ ಸಂತ್ರಸ್ತೆಯನ್ನು ವಿವಾಹವಾಗುವೆಯಾ ಎಂದು ಆರೋಪಿಗೆ ಪ್ರಶ್ನಿಸಿದ್ದೇವೆ.
ಆದರೆ ಸಂತ್ರಸ್ತೆಯನ್ನು ವಿವಾಹವಾಗಬೇಕು ಎಂದು ಆದೇಶಿಸಿರಲಿಲ್ಲ. ದಾಖಲೆಗಳ ಅನ್ವಯ ಈ ಪ್ರಶ್ನೆ ಕೇಳಲಾಗಿತ್ತು. ಆದರೆ ಈ ಬಗ್ಗೆ ತಪ್ಪಾಗಿ ವರದಿಯಾಗಿದೆ. ಮಹಿಳೆಯರ ಬಗ್ಗೆ ನಮಗೂ ಹೆಚ್ಚು ಗೌರವವಿದೆ’ ಎಂದು ನ್ಯಾಯಪೀಠ ಹೇಳಿತು.