ಸಂಶೋಧನೆ ಹೆಸರಲ್ಲಿ ಗರ್ಭಿಣಿ ಕೋತಿಗಳಿಗೆ ಟಾರ್ಚರ್: PETA ನಿದ್ದೆಗೆಡಿಸಿದ ಫೋಟೋಸ್!
ಸದ್ಯ ವಿಶ್ವದೆಲ್ಲೆಡೆ ಕೊರೋನಾ ತಡೆಗಟ್ಟುವ ಔಷಧಿ ಶೋಧ ನಡೆಸಲು ಕಸರತ್ತು ಮುಂದುವರೆದಿದೆ. ಈ ಮಹಾಮಾರಿ ಹೊಡೆದೋಡಿಸುವ ನಿಟ್ಟಿನಲ್ಲಿ ಹಲವಾರು ಲಸಿಕೆಗಳೂ ಅಭಿವೃದ್ಧಿಪಡಿಸಲಾಗುತ್ತಿವೆ. ಇವತ್ತಿಗೂ ಕೂಡಾ ವಿಜ್ಞಾನಿಗಳು ಯಾವುದೇ ಔಷಧಿ ಕಂಡು ಹಿಡಿದರೂ ಮನುಷ್ಯನಿಗೆ ಬಳಸುವ ಮುನ್ನ ಪ್ರಾಣಿಗಳ ಮೇಲೆ ಪ್ರಯೋಗಿಸಲಾಗುತ್ತದೆ. ಇವುಗಳಲ್ಲಿ ಇಲಿಗಳಿಂದ ಹಿಡಿದು ಕೋತಿ ಸೇರಿದಂತೆ ಅನೇಕ ಪ್ರಾಣಿಗಳ ಮೇಲೆ ಪ್ರಯೋಗಿಸಲಾಗುತ್ತದೆ. ಆದರೆ ಅನೇಕ ಬಾರಿ ಇಂತಹ ಪ್ರಯೋಗ ನಡೆಸುವ ಲ್ಯಾಬ್‌ನಲ್ಲಿ ಸಂಶೋಧನೆ ಹೆಸರಲ್ಲಿ ಪ್ರಾಣಿಗಳನ್ನು ಹಿಂಸಿಸುತ್ತಿರುವುದೂ ಗಮನಕ್ಕೆ ಬಂದಿದೆ. ಇತ್ತೀಚೆಗಷ್ಟೇ ಅಮೆರಿಕದ ಆರೆಗಾನ್‌ನ ಹಿಲ್ಸ್‌ಬೋರೋದಲ್ಲಿರುವ ನ್ಯಾಷನಲ್ ಪ್ರೈಮೆಟ್ ರಿಸರ್ಚ್ ಸೆಂಟರ್‌ನ ಕೆಲ ಶಾಕಿಂಗ್ ಫೋಟೋಗಳು ವೈರಲ್ ಆಗಿವೆ. ಇಲ್ಲಿನ ಲ್ಯಾಬ್‌ನಲ್ಲಿ ಪ್ರಯೋಗದ ಹೆಸರಲ್ಲಿ ಕೋತಿಗಳಿಗೆ ಟಾರ್ಚರ್ ನೀಡಲಾಗುತ್ತಿದೆ. ಅದರಲ್ಲೂ ವಿಶೇಷವಾಗಿ ಗರ್ಭಿಣಿ ಕೋತಿಗಳಿಗೆ. ಪೇಟಾ ಸದ್ಯ ಈ ಫೋಟೋಗಳ ಆಧಾರದ ಮೇರೆಗೆ ಸಂಶೋಧಕರ ವಿರುದ್ಧ ತನಿಖೆಗಿಳಿದಿದೆ.
Followಪ್ರಾಣಿಗಳ ಮೇಲಿನ ಟಾರ್ಚರ್‌ನಿಂದಲೇ ಫೇಮಸ್ ಆಗಿರುವ ಆರೆಗಾನ್‌ ಲ್ಯಾಬ್‌ನಲ್ಲಿ ಗರ್ಭಿಣಿ ಕೋತಿಗಳ ಮೇಲೆ ಕ್ರೂರ ಪ್ರಯೋಗ ನಡೆಸುತ್ತಿರುವ ಆರೋಪ ಕೇಳಿ ಬಂದಿದೆ. ಇಲ್ಲಿ ಪ್ರಾಣಿಗಳಿಗೆ ಹಂದಿಗಳ ಫ್ಯಾಟ್ ಹಾಗೂ ನಿಕೋಟಿನ್ ಹಾಗೂ ಮದ್ಯದ ನಶೆ ತಗುಲಿಸುತ್ತಿದ್ದಾರೆ.
ಆರೆಗಾನ್‌ನ ಹೆಲ್ತ್ ಆಂಡ್ ಸೈನ್ಸ್ ಯೂನಿವರ್ಸಿಟಿಯಲ್ಲಿರುವ ಹಿಲ್ಸ್‌ಬೋರೋದಲ್ಲಿರುವ ನ್ಯಾಷನಲ್ ಪ್ರೈಮೆಟ್ ರಿಸರ್ಚ್ ಸೆಂಟರ್‌ನಲ್ಲಿ ಜಪಾನ್‌ನ ಕೋತಿಗಳ ಮೇಲೆ ನಡೆಸುತ್ತಿರುವ ಸಂಶೋಧನೆ ಮೂಲಕ ಪ್ರಾಣಿಗಳ ಹಕ್ಕುಗಳನ್ನು ಕೊಲೆ ಮಾಡಲಾಗುತ್ತಿದೆ. ಇದಕ್ಕಾಗೇ ಪೇಟಾ ಇಲ್ಲಿನ ಸಂಶೋಧಕರ ವಿರುದ್ಧ ಸಮರ ಸಾರಿದೆ.
ಈ ಲ್ಯಾಬ್‌ ಮೇಲೆ ಕಳೆದೊಂದು ವರ್ಷದಲ್ಲಿ ಪ್ರಾಣಿಗಳ ಮೇಲೆ ನಡೆಯುತ್ತಿರುವ ಹಿಂಸೆ ಸಂಬಂಧ ಬರೋಬ್ಬರಿ ಮೂರು ಬಾರಿ ದೂರು ದಾಖಲಿಸಲಾಗಿದೆ. ಹೀಗಿದ್ದರೂ ಮತ್ತೊಂದು ಬಾರಿ ಈ ಲ್ಯಾಬ್‌ನಲ್ಲಿ ಇಂತಹ ಕ್ರೂರ ಕೃತ್ಯ ನಡೆದಿರುವುದು ಬೆಳಕಿಗೆ ಬಂದಿದೆ. ಈ ಸಂಶೋಧನೆ ವೇಳೆ ಹಲವು ಕೋತಿಗಳ ಪ್ರಾಣವೂ ಹಾರಿದೆ.
ವರದಿಗಳನ್ವಯ ಸದ್ಯ ಗರ್ಭಿಣಿ ಕೋತಿಯೊಂದಕ್ಕೆ ಈ ಲ್ಯಾಬ್‌ನಲ್ಲಿ ಹೈ ಫ್ಯಾಟ್ ಡಯಟ್ ನೀಡಲಾಗುತ್ತಿದೆ. ಈ ಡಯಟ್‌ನಿಂದ ಕೋತಿ ಹಾಗೂ ಮರಿಯ ಮೇಲೆ ಯಾವ ಪ್ರಭಾವ ಬೀರುತ್ತದೆ ಎಂಬ ಸಂಶೋಧನೆ ನಡೆಯುತ್ತಿದೆ.
ಜೊತೆಗೇ ಈ ಕೋತಿಗಳಿಗೆ ವಿಪರೀತ ಟಾರ್ಚರ್ ಕೂಡಾ ನೀಡಲಾಗುತ್ತಿದೆ. ಬಳಿಕ ಈ ಟಾರ್ಚರ್‌ನಿಂದ ಪ್ರಾಣಿಗಳ ಮೇಲೆ ಯಾವ ರೀತಿಯ ಪ್ರಭಾವವಿದೆ, ಪ್ರಾಣಿಗಳ ಮೇಲೆ ಒತ್ತಡ ಇರುತ್ತದೋ ಎಂದು ತಿಳಿಯುವ ಸಲುವಾಗಿ ಈ ಪ್ರಯೋಗ ನಡೆಸಲಾಗುತ್ತಿದೆ.
ಸಂಶೋಧನೆ ಹೆಸರಲ್ಲಿ ಈ ಲ್ಯಾಬ್‌ ಕ್ರೂರತೆಯ ಎಲ್ಲಾ ಮಿತಿ ಮೀರಿದೆ ಎಂದು ಪೇಟಾ ಆರೋಪಿಸಿದೆ. ಇಲ್ಲಿ ಪ್ರಾಣಿಗಳಿಗೆ ನೀಡಲಾಗುತ್ತಿರುವ ಫ್ಯಾಟ್‌ನಿಂದ ಕೋತಿಗಳು ಮಾತ್ರವಲ್ಲಿ ಮರಿಗಳ ಮೇಲೂ ಕೆಟ್ಟ ಪರಿಣಾಮ ಬೀರುತ್ತದೆ.
ಒಟ್ಟಾರೆಯಾಗಿ ಸಂಶೋಧನೆ ಹೆಸರಲ್ಲಿ ಈ ಮೂಕ ಪ್ರಾಣಿಗಳಿಗೆ ಹಿಂಸೆ ನಿಡಲಾಗುತ್ತಿದೆ. ಇನ್ನು ಕೊರೋನಾ ಲಸಿಕೆಯ ಮೊದಲ ಪ್ರಯೋಗ ಕೋತಿಗಳ ಮೇಲೆಯೇ ನಡೆದಿದ್ದು ಎಂಬುವುದು ಉಲ್ಲೇಖನೀಯ.
