ಆರ್ಮೇನಿಯಾಗೆ ತನ್ನ ಮೊದಲ ಆಕಾಶ್ ಬ್ಯಾಟರಿ ಎಕ್ಸ್‌ಫೋರ್ಟ್‌ ಮಾಡಿದ ಭಾರತ

ಅಜರ್‌ಬೈಜಾನ್‌ ಜೊತೆಗಿನ ತಿಕ್ಕಾಟದ ನಡುವೆ, ಆರ್ಮೇನಿಯದ ರಕ್ಷಣಾ ಸಾಮರ್ಥ್ಯ ಹೆಚ್ಚಿಸಲು ಭಾರತ ತನ್ನ ಮೊದಲ ಆಕಾಶ್ ಕ್ಷಿಪಣಿ ವ್ಯವಸ್ಥೆ ಬ್ಯಾಟರಿಯನ್ನ ಅಲ್ಲಿಗೆ ಕಳಿಸಿದೆ. ತನ್ನ ರಕ್ಷಣಾ ರಫ್ತು ಸಾಮರ್ಥ್ಯ ತೋರಿಸುತ್ತಾ, ಭಾರತ ನವೆಂಬರ್ 11 ರಂದು ಮೊದಲ ಆಕಾಶ್ ಕ್ಷಿಪಣಿ ವ್ಯವಸ್ಥೆ ಬ್ಯಾಟರಿಯನ್ನ ಆರ್ಮೇನಿಯಾಗೆ ಕಳಿಸಿದೆ. DRDO ಮತ್ತು BEL ಜಂಟಿಯಾಗಿ ಇದನ್ನ ತಯಾರಿಸಿವೆ. ಆಕಾಶ್ ಬ್ಯಾಟರಿಯಲ್ಲಿ ಒಂದು ರಾಜೇಂದ್ರ 3D ರಾಡಾರ್, ಮೂರು ಲಾಂಚರ್‌ಗಳು, ಮತ್ತು ನಾಲ್ಕು ಕ್ಷಿಪಣಿಗಳಿವೆ. ಆಕಾಶ್ ಕ್ಷಿಪಣಿ ವ್ಯವಸ್ಥೆಯು ಯುದ್ಧ ವಿಮಾನಗಳು, ಕ್ರೂಸ್ ಕ್ಷಿಪಣಿಗಳು ಮತ್ತು ಇತರ ವೈಮಾನಿಕ ದಾಳಿಗಳಿಂದ ರಕ್ಷಣೆ ಒದಗಿಸುತ್ತದೆ.

ಆರ್ಮೇನಿಯಾಗೆ ಆಕಾಶ್ ಬ್ಯಾಟರಿ: ರಕ್ಷಣಾ ಉತ್ಪಾದನಾ ಕಾರ್ಯದರ್ಶಿ ಸಂಜೀವ್ ಕುಮಾರ್, ಆರ್ಮೇನಿಯಾಗೆ ಮೊದಲ ಆಕಾಶ್ ಬ್ಯಾಟರಿ ಕಳಿಸುವ ವಾಹನಕ್ಕೆ ಚಾಲನೆ ನೀಡಿದರು. ಈ ಮಹತ್ವದ ಬೆಳವಣಿಗೆಯೂ ಭಾರತದ ರಕ್ಷಣಾ ತಂತ್ರಜ್ಞಾನ ಮತ್ತು ಉತ್ಪಾದನಾ ಸಾಮರ್ಥ್ಯವನ್ನ ತೋರಿಸುತ್ತದೆ ಎಂದು BEL ಹೇಳಿದೆ. 2022 ರಲ್ಲಿ, ಆರ್ಮೇನಿಯಾ ₹6,000 ಕೋಟಿ ಮೌಲ್ಯದ 15 ಆಕಾಶ್ ಕ್ಷಿಪಣಿ ವ್ಯವಸ್ಥೆಗಳನ್ನ ಖರೀದಿಸಲು ಒಪ್ಪಂದ ಮಾಡಿಕೊಂಡಿತ್ತು. ಭಾರತದಿಂದ ಈ ವ್ಯವಸ್ಥೆ ಖರೀದಿಸುತ್ತಿರುವ ಮೊದಲ ದೇಶ ಆರ್ಮೇನಿಯಾ. BEL ಮುಖ್ಯ ಉಪಕರಣಗಳಾದ ರಾಡಾರ್‌ಗಳು, ಕ್ಷಿಪಣಿ ಮಾರ್ಗದರ್ಶನ ವ್ಯವಸ್ಥೆ ಮತ್ತು C4I ವ್ಯವಸ್ಥೆಗಳನ್ನ ಪೂರೈಸಿದೆ.

ಆರ್ಮೇನಿಯಾ ಜೊತೆಗೆ, ವಿಯೆಟ್ನಾಂ, ಈಜಿಪ್ಟ್ ಮತ್ತು ಫಿಲಿಪ್ಪೀನ್ಸ್ ದೇಶಗಳು ಭಾರತದ ಆಕಾಶ್ ಕ್ಷಿಪಣಿ ವ್ಯವಸ್ಥೆಯನ್ನ ಖರೀದಿಸಲು ಆಸಕ್ತಿ ತೋರಿಸಿವೆ. ಭಾರತೀಯ ವಾಯುಪಡೆ ಮತ್ತು ಭಾರತೀಯ ಸೇನೆ ಈಗಾಗಲೇ ಆಕಾಶ್ ವ್ಯವಸ್ಥೆಯನ್ನ ಬಳಸುತ್ತಿವೆ.ಆರ್ಮೇನಿಯಾಗೆ ಶಸ್ತ್ರಾಸ್ತ್ರ ಪೂರೈಕೆಯಲ್ಲಿ ರಷ್ಯಾ ಪ್ರಮುಖ ಪಾತ್ರ ವಹಿಸುತ್ತದೆ. 2011 ರಿಂದ 2020 ರವರೆಗೆ ಆರ್ಮೇನಿಯಾದ ಶಸ್ತ್ರಾಸ್ತ್ರ ಆಮದಿನಲ್ಲಿ 94% ರಷ್ಯಾದಿಂದ ಬಂದಿದೆ. ಆರ್ಮೇನಿಯಾ-ಅಜರ್‌ಬೈಜಾನ್ ತಿಕ್ಕಾಟದ ನಡುವೆ, ಆರ್ಮೇನಿಯಾ ತನ್ನ ರಕ್ಷಣಾ ಸಾಮರ್ಥ್ಯವನ್ನ ಹೆಚ್ಚಿಸಿಕೊಳ್ಳಲು ಪ್ರಯತ್ನಿಸುತ್ತಿದೆ. ಉಕ್ರೇನ್ ಯುದ್ಧದಿಂದಾಗಿ ರಷ್ಯಾ ಜೊತೆಗಿನ ಸಂಬಂಧ ಹದಗೆಟ್ಟಿರುವುದರಿಂದ ಆರ್ಮೇನಿಯಾ ಬೇರೆ ದೇಶಗಳಿಂದ ಶಸ್ತ್ರಾಸ್ತ್ರ ಖರೀದಿಸುತ್ತಿದೆ.