* ಟ್ಯೂಬ್‌ನೊಳಗೆ ಶರವೇಗದಲ್ಲಿ ಚಲಿಸುವ ಸಾರಿಗೆ ವ್ಯವಸ್ಥೆ
* ಭಾರತ ಅಥವಾ ಸೌದಿಯಲ್ಲಿ ಮೊದಲು ಆರಂಭ ಸಾಧ್ಯತೆ
* ಯುಎಇನ ಡಿಪಿ ವಲ್ಡ್‌ರ್‍ ಸಿಇಒ ಸುಲ್ತಾನ್‌ ಅಹ್ಮದ್‌ ಹೇಳಿಕೆ
ದುಬೈ(ಅ.04): ನೆಲದ ಮೇಲಿನ ಸಾರಿಗೆಯ ವೇಗವನ್ನು ವಿಮಾನದ ವೇಗಕ್ಕೆ ಹೆಚ್ಚಿಸುವ ನಿರೀಕ್ಷೆಯಿರುವ ಕ್ರಾಂತಿಕಾರಿ ಹೈಪರ್‌ಲೂಪ್‌(Hyperloop), ಜಗತ್ತಿನಲ್ಲೇ ಮೊಟ್ಟಮೊದಲ ಬಾರಿ ಭಾರತದಲ್ಲಿ ಆರಂಭವಾಗುವ ಸಾಧ್ಯತೆಯಿದೆ. ವಿವಿಧ ಹೈಪರ್‌ಲೂಪ್‌(Hyperloop) ಕಂಪನಿಗಳು ಈ ಕುರಿತು ಬೇರೆ ಬೇರೆ ದೇಶಗಳಲ್ಲಿ ಅಧ್ಯಯನ ನಡೆಸುತ್ತಿವೆಯಾದರೂ ಅಂತಿಮವಾಗಿ ಭಾರತ(India) ಅಥವಾ ಸೌದಿ ಅರೇಬಿಯಾದಲ್ಲಿ(Saudi Arabia) ಈ ವ್ಯವಸ್ಥೆ ಮೊದಲು ಸಾಕಾರವಾಗಲಿದೆ ಎಂದು ವರ್ಜಿನ್‌ ಹೈಪರ್‌ಲೂಪ್‌ ಸಂಸ್ಥೆಯ ಮಾಲಿಕರಲ್ಲೊಬ್ಬರಾದ ಸುಲ್ತಾನ್‌ ಅಹ್ಮದ್‌ ಬಿನ್‌ ಸುಲೇಯಮ್‌ ಹೇಳಿದ್ದಾರೆ.
ಈ ಹಿಂದೆ 2018ರಲ್ಲೇ ವರ್ಜಿನ್‌ ಹೈಪರ್‌ಲೂಪ್‌ ಕಂಪನಿಯ ಚೇರ್ಮನ್‌ ರಿಚರ್ಡ್‌ ಬ್ರಾನ್ಸನ್‌ ಪುಣೆ(Pune) ಮತ್ತು ಮುಂಬೈ(Mumbai) ನಡುವೆ ಹೈಪರ್‌ಲೂಪ್‌ ಆರಂಭಿಸುವುದಾಗಿ ಪ್ರಕಟಿಸಿದ್ದರು. ಆದರೆ ಕೋವಿಡ್‌ನಿಂದಾಗಿ ಅದು ಮುಂದುವರೆಯಲಿಲ್ಲ. ನಂತರ ಬೆಂಗಳೂರು ನಗರದಿಂದ ವಿಮಾನ ನಿಲ್ದಾಣಕ್ಕೆ ಸಂಚಾರ ಕಲ್ಪಿಸುವ ಮಾರ್ಗದ ಸಮೀಕ್ಷೆಗೂ ಒಪ್ಪಂದ ಮಾಡಿಕೊಳ್ಳಲಾಗಿತ್ತು. ಈಗ ಅದೇ ಕಂಪನಿಯಲ್ಲಿ ಬಹುಪಾಲು ಷೇರು ಹೊಂದಿರುವ ಯುಎಇಯ ಬಹುರಾಷ್ಟ್ರೀಯ ಲಾಜಿಸ್ಟಿಕ್‌ ಕಂಪನಿ ಡಿಪಿ ವಲ್ಡ್‌ರ್‍ನ ಸಿಇಒ ಸುಲ್ತಾನ್‌ ಅಹ್ಮದ್‌ ಮತ್ತೊಮ್ಮೆ ಭಾರತದಲ್ಲೇ ಜಗತ್ತಿನಲ್ಲಿ ಮೊದಲ ಹೈಪರ್‌ಲೂಪ್‌ ಆರಂಭವಾಗುವ ಸುಳಿವು ನೀಡಿದ್ದಾರೆ.
‘ಯುಎಇಗಿಂತ ಮೊದಲು ಭಾರತ ಅಥವಾ ಸೌದಿ ಅರೇಬಿಯಾದಲ್ಲಿ ಮೊದಲ ಹೈಪರ್‌ಲೂಪ್‌ ಆರಂಭವಾಗಲಿದೆ. ಇದಕ್ಕೆ ದಶಕಗಳೇನೂ ಹಿಡಿಯುವುದಿಲ್ಲ. ಈ ದಶಕದ ಅಂತ್ಯದೊಳಗೇ ಜಗತ್ತಿನ ಹಲವು ಭಾಗಗಳಲ್ಲಿ ಹೈಪರ್‌ಲೂಪ್‌ನಲ್ಲಿ ಜನರು ಪ್ರಯಾಣಿಸಬಹುದು. ಹೈಪರ್‌ಲೂಪ್‌ನ ಆರ್ಥಿಕ ಲೆಕ್ಕಾಚಾರ ಕೂಡ ಆಕರ್ಷಕವಾಗಿದೆ. ಬಹುಶಃ ವಿಮಾನದ ವೇಗದಲ್ಲಿ ಜನರು ಟ್ರಕ್‌ನ ಹಣಕ್ಕೆ ಪ್ರಯಾಣಿಸಬಹುದು’ ಎಂದು ಭಾನುವಾರ ದುಬೈ ಎಕ್ಸ್‌ಪೋದಲ್ಲಿ ಸುದ್ದಿಗಾರರಿಗೆ ಅವರು ತಿಳಿಸಿದ್ದಾರೆ.
ದುಬೈ ಎಕ್ಸ್‌ಪೋದಲ್ಲಿ ವರ್ಜಿನ್‌ ಹೈಪರ್‌ಲೂಪ್‌ ಕಂಪನಿ ಪೂರ್ಣ ಪ್ರಮಾಣದ ಹೈಪರ್‌ಲೂಪ್‌ ಪಾಡ್‌ ಅನ್ನು ಪ್ರದರ್ಶನಕ್ಕಿರಿಸಿದೆ. ಕಳೆದ ವರ್ಷದ ನವೆಂಬರ್‌ನಲ್ಲಿ ಹೈಪರ್‌ಲೂಪ್‌ ಪಾಡ್‌ನೊಳಗೆ ಮನುಷ್ಯರು ಪ್ರಯಾಣಿಸಿ ಪರೀಕ್ಷೆ ನಡೆಸಿದ್ದು, ಯಶಸ್ವಿಯಾಗಿದೆ.
ಏನಿದು ಹೈಪರ್‌ಲೂಪ್‌?
ಒಂದು ಸ್ಥಳದಿಂದ ಇನ್ನೊಂದು ಸ್ಥಳಕ್ಕೆ ದೊಡ್ಡ ಗಾತ್ರದ ಟ್ಯೂಬ್‌ ಅಳವಡಿಸಿ, ಅದರೊಳಗೆ ಸಣ್ಣ ಸಣ್ಣ ಪೆಟ್ಟಿಗೆಯಂತಹ ‘ಪಾಡ್‌’ಗಳಲ್ಲಿ ಜನರು ಅಥವಾ ಸರಕುಗಳನ್ನು ಸಾಗಿಸುವುದೇ ಹೈಪರ್‌ಲೂಪ್‌. ಟ್ಯೂಬ್‌ನೊಳಗೆ ಗಾಳಿಯ ಒತ್ತಡ ಕಡಿಮೆಯಿರುವಂತೆ ನೋಡಿಕೊಳ್ಳಲಾಗುತ್ತದೆ. ಆಗ ಪಾಡ್‌ಗಳಿಗೆ ಪ್ರತಿರೋಧ ನಗಣ್ಯ ಪ್ರಮಾಣದಲ್ಲಿರುತ್ತದೆ. ಹೀಗಾಗಿ ಬಹಳ ವೇಗದಲ್ಲಿ ಚಲಿಸಲು ಸಾಧ್ಯವಿದೆ. ಇದು ಬುಲೆಟ್‌ ರೈಲಿಗಿಂತ ವೇಗದ ಸಾರಿಗೆ ಸಾಧನವಾಗಿದೆ.