ಚಿಕನ್ ಸೇವನೆಯಿಂದ ಎಎಂಆರ್ ಕಾಯಿಲೆ, ಸ್ಪಷ್ಟನೆ ನೀಡಿದ ಪೌಲ್ಟ್ರಿ ಉದ್ಯಮ!
ಸಾರಾಂಶ
ಅತಿಯಾದ ಚಿಕನ್ ಸೇವೆನೆಯಿಂದ ವಿಶ್ವ ಆರೋಗ್ಯ ಸಂಸ್ಥೆ ಹೇಳಿರುವ 10ನೇ ಅತ್ಯಂತ ದೊಡ್ಡ ಕಾಯಿಲೆಯಾದ ಎಎಂಆರ್ ಅಪಾಯವಿದೆ ಎನ್ನುವ ಸುದ್ದಿಗೆ ಪೌಲ್ಟ್ರಿ ಉದ್ಯಮದ ಪಶುವೈದ್ಯರ ಸಂಸ್ಥೆ ತನ್ನ ಹೇಳಿಕೆಯನ್ನು ಪ್ರಕಟಿಸಿದೆ. ಈ ಸುದ್ದಿ ದಾರಿತಪ್ಪಿಸುವಂಥದ್ದು ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.
ಬೆಂಗಳೂರು (ಜೂ.10): ಅತಿಯಾದ ಚಿಕನ್ ಸೇವೆನೆಯಿಂದಾಗಿ ಆಂಟಿಮೈಕ್ರೊಬಿಯಲ್ ರೆಸಿಸ್ಟೆನ್ಸ್ ಅಥವಾ ಎಎಂಆರ್ ಎನ್ನುವ ಅಪಾಯಕಾರಿ ಕಾಯಿಲೆಗೆ ತುತ್ತಾಗಬಹುದು ಎನ್ನುವ ಸುದ್ದಿಯ ಕುರಿತಾಗಿ ಪೌಲ್ಟ್ರಿ ಉದ್ಯಮದ ಪಶುವೈದ್ಯರ ಸಂಸ್ಥೆ (ಐವಿಪಿಐ) ತನ್ನ ಹೇಳಿಕೆಯನ್ನು ಪ್ರಕಟಿಸಿದೆ. ಈ ಸುದ್ದಿಯಲ್ಲಿ ಸತ್ಯತೆ, ನಿಷ್ಪಕ್ಷಪಾತ ಸ್ವಭಾವ ಮತ್ತು ವೈಜ್ಞಾನಿಕ ಉಲ್ಲೇಖಗಳು ಬಹಳ ಕಡಿಮೆ ಇದ್ದು, ಸಸ್ಯಾಹಾರವನ್ನು ಉತ್ತೇಜಿಸುವ ನಿಟ್ಟಿನಲ್ಲಿನ ಪಕ್ಷಪಾತದ ವರದಿ ಎಂದು ಹೇಳಿದೆ. ವಿಶ್ವ ಆರೋಗ್ಯ ಸಂಸ್ಥೆ ನೀಡಿರುವ ಮಾಹಿತಿಯನ್ನು ಸಂಪೂರ್ಣವಾಗಿ ಅರ್ಥಮಾಡಿಕೊಳ್ಳದೇ ಸಂದರ್ಭವಿಲ್ಲದಂಥ ರೀತಿಯಲ್ಲಿ ವಿಶ್ವ ಆರೋಗ್ಯ ಸಂಸ್ಥೆಯ ಉಲ್ಲೇಖ ಮಾಡಲಾಗಿದೆ ಎಂದು ಐವಿಪಿಐ ಹೇಳಿದೆ. ವಿಶ್ವ ಆರೋಗ್ಯ ಸಂಸ್ಥೆ ಎಎಂಆರ್ ಅಥವಾ ಆಂಟಿಮೈಕ್ರೊಬಿಯಲ್ ರೆಸಿಸ್ಟೆನ್ಸ್ ಕುರಿತಾಗಿ ಎಚ್ಚರಿಕೆ ನೀಡಿದ್ದು ನಿಜ, ಇದು ವಿಶ್ವದ 10ನೇ ಅತಿದೊಡ್ಡ ಕಾಯಿಲೆ ಕೂಡ ಹೌದು, ಆದರೆ, ಅವರ ವರದಿಯಲ್ಲಿ 'ಚಿಕನ್' ಎನ್ನುವ ಪದದ ಉಲ್ಲೇಖವೇ ಇಲ್ಲ ಎಂದು ಹೇಳಿದೆ.
ಕೋಳಿ ಉತ್ಪಾದನೆಯಲ್ಲಿ ಪ್ರತಿಜೀವಕಗಳ ಬಳಕೆಯ ಬಗ್ಗೆ ಐವಿಪಿಐ ಮಾಹಿತಿ ನೀಡಿದ್ದು, ಗ್ರಾಹಕರ ಮನಸ್ಸಿನಲ್ಲಿ ಅವರು ಖರೀದಿಸುವ ಆಹಾರದ ಸುರಕ್ಷತೆ ಮತ್ತು ಆರೋಗ್ಯಕರತೆಯ ಬಗ್ಗೆ ವಿಶ್ವಾಸವನ್ನು ತುಂಬುವುದು ಆಹಾರ ಸರಪಳಿಯಲ್ಲಿನ ಎಲ್ಲಾ ಪಾಲುದಾರರ ಪ್ರಾಥಮಿಕ ಜವಾಬ್ದಾರಿಯಾಗಿದೆ. ಆದರೆ, ಕೋಳಿ ಸುರಕ್ಷತೆಯ ಬಗ್ಗೆ ಗ್ರಾಹಕರ ಮನಸ್ಸಿನಲ್ಲಿ ಅನುಮಾನ / ಭಯವನ್ನು ಸೃಷ್ಟಿಸುತ್ತಿರುವುದು ದುರದೃಷ್ಟಕರ. ವಿವಿಧ ಪಶುವೈದ್ಯಕೀಯ ಸಂಘಗಳು ಸೇರಿದಂತೆ ಪೌಲ್ಟ್ರಿ ಪಾಲುದಾರರು, ವೈಜ್ಞಾನಿಕವಾಗಿ ಸುರಕ್ಷಿತ ಆಹಾರದ ಮೇಲ್ವಿಚಾರಣೆ ಮತ್ತು ಉತ್ಪಾದನೆಯಲ್ಲಿ ನೈತಿಕವಾಗಿ ಜವಾಬ್ದಾರಿಯುತ ಸಂಸ್ಥೆಗಳು, ಉತ್ತಮ ತಿಳುವಳಿಕೆ ಮತ್ತು ವಿಶ್ವಾಸಕ್ಕಾಗಿ ವಾಣಿಜ್ಯ ಕೋಳಿ ಉತ್ಪಾದನೆಯ ನಿಖರವಾದ ಚಿತ್ರವನ್ನು ನೀಡಲಿದ್ದೇವೆ ಎಂದು ತಿಳಿಸಿದೆ.
ದೇಶದಲ್ಲಿ ಹೆಚ್ಚಿನ ಕೋಳಿ ಮಾಂಸ ಮತ್ತು ಮೊಟ್ಟೆ ಉತ್ಪಾದನೆಯು ದಿನನಿತ್ಯದ ಆಧಾರದ ಮೇಲೆ ಅರ್ಹ ಪಶುವೈದ್ಯರ ಮೇಲ್ವಿಚಾರಣೆಯಲ್ಲಿದೆ ಇದಲ್ಲಿ ಯಾವುದೇ ಅನುಮಾನಗಳ ಅಗತ್ಯವಿಲ್ಲ. ಅದರೊಂದಿಗೆ ಆಧುನಿಕ ರೋಗ ಪತ್ತೆ ಮತ್ತು ಮೇಲ್ವಿಚಾರಣಾ ಸೌಲಭ್ಯಗಳು ಅವುಗಳ ಹರಡುವಿಕೆಯನ್ನು ಕಡಿಮೆ ಮಾಡಲು ರೋಗಗಳನ್ನು ಮೊದಲೇ ಪತ್ತೆಹಚ್ಚಲು ದೇಶದಾದ್ಯಂತ ಸೇವೆಗಳು ಲಭ್ಯವಿದೆ. ಇನ್ನು ವಾಣಿಜ್ಯ ಕೋಳಿ ಸಾಕಣೆ ಕೇಂದ್ರಗಳು ಹಿಂಡು ಆರೋಗ್ಯ ತಡೆಗಟ್ಟುವ ತಂತ್ರಗಳಾದ ಜೈವಿಕ ಭದ್ರತೆ, ಕೃಷಿಯಲ್ಲಿ ನೈರ್ಮಲ್ಯ ಅಭ್ಯಾಸಗಳು, ಪ್ರಮುಖ ಸಾಂಕ್ರಾಮಿಕ ರೋಗಗಳ ವಿರುದ್ಧ ಲಸಿಕೆಗಳು ಮತ್ತು ಪೌಷ್ಟಿಕಾಂಶದ ಸಮತೋಲಿತ ಆಹಾರದ ಬಳಕೆಯನ್ನು ಬಳಸುತ್ತವೆ.
ವಾಣಿಜ್ಯ ಸಾಕಣೆ ಕೇಂದ್ರಗಳಲ್ಲಿನ ಪಕ್ಷಿಗಳು ಸಾಕಷ್ಟು ಆಹಾರ, ನೀರು, ಗಾಳಿ ಮತ್ತು ಅವುಗಳ ಚಲನೆ ಮತ್ತು ಸಾಮಾಜಿಕ ನಡವಳಿಕೆಗೆ ಸಾಕಷ್ಟು ಸ್ಥಳಾವಕಾಶವನ್ನು ಒದಗಿಸುವ ಮೂಲಕ ವೈಜ್ಞಾನಿಕವಾಗಿ ಬೆಳೆಸಲಾಗುತ್ತದೆ. ಈ ಪ್ಯಾರಾಮೀಟರ್ಗಳು ವೈಜ್ಞಾನಿಕವಾಗಿ ಅಧ್ಯಯನ ಮಾಡಲಾಗಿದೆ ಮತ್ತು ಕಾಲಕಾಲಕ್ಕೆ ಮಾರ್ಪಡಿಸುವುದು ಮಾತ್ರವಲ್ಲದೇ ನವೀಕರಣವನ್ನೂ ಮಾಡಲಾಗುತ್ತದೆ.
ವಾಣಿಜ್ಯ ಸಾಕಣೆ ಕೇಂದ್ರಗಳಲ್ಲಿನ ಕೋಳಿಗಳಿಗೆ ನಿರ್ದಿಷ್ಟ ಅವಧಿಗೆ ಮಾತ್ರವೇ ಆಂಟಿಬಯೋಟಿಕ್ಗಳನ್ನು ನೀಡಲಾಗುತ್ತದೆ, ಪಕ್ಷಿಗಳು ಜ್ವರ ಅಥವಾ ಇತರ ರೋಗಗಳ ಸಂದರ್ಭಗಳಲ್ಲಿ ಕ್ಲಿನಿಕಲ್ ಚಿಹ್ನೆಗಳನ್ನು ತೋರಿಸಿದಾಗ ಮಾತ್ರವೇ ಇದನ್ನು ಬಳಸಲಾಗುತ್ತದೆ. ಪಕ್ಷಿಗಳು ಸಂಸ್ಕರಣೆಗೆ ಹೋಗುವ ಹತ್ತು ದಿನಗಳ ಮೊದಲು ಯಾವುದೇ ಆಂಟಿಬಯೋಟಿಕ್ಗಳನ್ನು ಬಳಸದಂತೆ ವಾಣಿಜ್ಯ ಕೋಳಿ ಉತ್ಪಾದಕರು ಅನುಸರಿಸುವ ಕಟ್ಟುನಿಟ್ಟಾದ ರೂಢಿಯಾಗಿದೆ. ವೈಜ್ಞಾನಿಕ ನಿರ್ವಹಣೆಯಿಂದಾಗಿ, ತಂತ್ರಜ್ಞಾನದಿಂದ ನಡೆಸಲ್ಪಡುವ ಮತ್ತು ಅಂತರಾಷ್ಟ್ರೀಯ ಮಟ್ಟದಲ್ಲಿ ಉತ್ತಮ ಉತ್ಪಾದಕತೆಯ ಮಟ್ಟಗಳ ಅತ್ಯುನ್ನತ ದಕ್ಷತೆಯಿಂದಾಗಿ, ನೆರೆಯ ರಾಷ್ಟ್ರಗಳು ಮತ್ತು ಪಾಶ್ಚಿಮಾತ್ಯ ದೇಶಗಳಲ್ಲಿ ಚಾಲ್ತಿಯಲ್ಲಿರುವ ಗ್ರಾಹಕ ಬೆಲೆಗಳಿಗಿಂತ ಕಡಿಮೆ ಬೆಲೆಯಲ್ಲಿ ಮೊಟ್ಟೆ ಮತ್ತು ಕೋಳಿ ಭಾರತದಲ್ಲಿ ಗ್ರಾಹಕರಿಗೆ ಲಭ್ಯವಿದೆ.
ಅತಿಯಾಗಿ ಚಿಕನ್ ತಿಂತೀರಾ? ಎಚ್ಚರ..ಇದು ವಿಶ್ವದ ಅಪಾಯಕಾರಿ ಕಾಯಿಲೆಗೂ ಕಾರಣವಾಗಬಹುದು!
ಆಂಟಿಮೈಕ್ರೊಬಿಯಲ್ ರೆಸಿಸ್ಟೆನ್ಸ್ ರಾಷ್ಟ್ರೀಯ ಕ್ರಿಯಾ ಯೋಜನೆಯ ಪ್ರಕಾರ (ಭಾರತ ಸರ್ಕಾರ), ಜಾಗತಿಕ ಬಳಕೆಯಲ್ಲಿ ಭಾರತವು ಕೇವಲ 3% ರಷ್ಟಿದೆ, ಆದರೆ, ಇದೇ ಪ್ರಮಾಣ ಚೀನಾದಲ್ಲಿ ಶೇ. 23, ಅಮೆರಿಕದದಲ್ಲಿ 13 ಹಾಗೂ ಬ್ರೆಜಿಲ್ನಲ್ಲಿ 9ರಷ್ಟಿದೆ. ಅದರೊಂದಿಗೆ ಎಫ್ಎಸ್ಎಸ್ಎಐ ಕೂಡ ಪಶುವೈದ್ಯರು ಬಳಸುವ ಡ್ರಗ್ಗಳಲ್ಲಿ ಬಹಳ ಎಚ್ಚರಿಕೆ ವಹಿಸುತ್ತದೆ. ಕೋಳಿಗಳು, ಮೊಟ್ಟೆಗಳು ಮಾತ್ರವಲ್ಲದೆ, ಸೀಫುಡ್ಗಳಾದ ಸಿಗಡಿ, ಚಟ್ಲಿ ಹಾಗೂ ಮೀನುಗಳಿಗೆ ಬಳಸುವ ಔಷಧಿಗಳ ಬಗ್ಗೆಯೂ ಕಟ್ಟುನಿಟ್ಟಾದ ಎಚ್ಚರಿಕೆ ವಹಿಸುತ್ತದೆ ಎಂದು ತಿಳಿಸಿದೆ.
ಹಾರ್ಟ್ಅಟ್ಯಾಕ್ ಆದ್ರೆ ಭಯ ಬೇಡ, ಈ ಬಯೋ ಜೆಲ್ ಹೃದಯ ಸರಿಪಡಿಸುತ್ತೆ
ಆರೋಗ್ಯ, ಸೌಂದರ್ಯ, ಫಿಟ್ನೆಸ್, ಕಿಚನ್ ಟಿಪ್ಸ್, ಸಂಬಂಧ, ಫ್ಯಾಷನ್, ರೆಸಿಪಿ ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ.