ಕಿವೀಸ್ ನೆಲದಲ್ಲಿ ಟೀಂ ಇಂಡಿಯಾದ ಟಿ20 ಸರಣಿ ಗೆಲುವು ಮರೀಚಿಕೆ
ನ್ಯೂಜಿಲೆಂಡ್ ನೀಡಿದ್ದ 213 ರನ್’ಗಳ ಕಠಿಣ ಗುರಿ ಬೆನ್ನತ್ತಿದ ಭಾರತ ಆರಂಭದಲ್ಲೇ ಮುಗ್ಗರಿಸಿತು. ಧವನ್ ಕೇವಲ 5 ರನ್ ಬಾರಿಸಿ ಸ್ಯಾಂಟ್ನರ್’ಗೆ ವಿಕೆಟ್ ಒಪ್ಪಿಸಿದರು.
ಹ್ಯಾಮಿಲ್ಟನ್[ಫೆ.10]: ಬ್ಯಾಟಿಂಗ್ ಹಾಗೂ ಬೌಲಿಂಗ್’ನಲ್ಲಿ ಸಂಘಟಿತ ಪ್ರದರ್ಶನ ತೋರಿದ ನ್ಯೂಜಿಲೆಂಡ್ ತಂಡವು ಭಾರತವನ್ನು 4 ರನ್’ಗಳಿಂದ ರೋಚಕವಾಗಿ ಮಣಿಸಿ ಟಿ20 ಸರಣಿಯನ್ನು 2-1 ಅಂತರದಲ್ಲಿ ಜಯಿಸಿದೆ. ಇದರೊಂದಿಗೆ ಕಿವೀಸ್ ನೆಲದಲ್ಲಿ ಭಾರತದ ಟಿ20 ಸರಣಿ ಗೆಲುವಿನ ಕನಸು ಮರೀಚಿಕೆಯಾಗಿಯೇ ಉಳಿದಿದೆ.
ನ್ಯೂಜಿಲೆಂಡ್ ನೀಡಿದ್ದ 213 ರನ್’ಗಳ ಕಠಿಣ ಗುರಿ ಬೆನ್ನತ್ತಿದ ಭಾರತ ಆರಂಭದಲ್ಲೇ ಮುಗ್ಗರಿಸಿತು. ಧವನ್ ಕೇವಲ 5 ರನ್ ಬಾರಿಸಿ ಸ್ಯಾಂಟ್ನರ್’ಗೆ ವಿಕೆಟ್ ಒಪ್ಪಿಸಿದರು. ಆ ಬಳಿಕ ವಿಜಯ್ ಶಂಕರ್-ರೋಹಿತ್ ಶರ್ಮಾ ಎರಡನೇ ವಿಕೆಟ್’ಗೆ 75 ರನ್’ಗಳ ಜತೆಯಾಟವಾಡುವ ಮೂಲಕ ತಂಡದ ಮೊತ್ತವನ್ನು ನೂರರ ಸಮೀಪ ಕೊಂಡ್ಯೊಯ್ದರು. ಕೇವಲ 28 ಎಸೆತಗಳಲ್ಲಿ ವಿಜಯ್ ಶಂಕರ್ 5 ಬೌಂಡರಿ ಹಾಗೂ 2 ಸಿಕ್ಸರ್ ನೆರವಿನಿಂದ 43 ರನ್ ಚಚ್ಚಿದರು. ನಾಯಕ ರೋಹಿತ್ 38 ರನ್ ಬಾರಿಸಿದರೆ, ರಿಷಭ್ ಪಂತ್ 28 ರನ್ ಸಿಡಿಸಿದರು. ಹಾರ್ದಿಕ್ ಪಾಂಡ್ಯ 21 ರನ್ ಬಾರಿಸಿದರೆ ಧೋನಿ ಆಟ ಕೇವಲ 2 ರನ್’ಗಳಿಗೆ ಸೀಮಿತವಾಯಿತು.
ಗೆಲುವಿನ ಆಸೆ ಮೂಡಿಸಿದ ಕೃನಾಲ್-ಕಾರ್ತಿಕ್: ಒಂದು ಹಂತದಲ್ಲಿ 15.2 ಓವರ್’ಗಳಿಗೆ 6 ವಿಕೆಟ್ ಕಳೆದುಕೊಂಡು 145 ರನ್ ಬಾರಿಸಿ ಸೋಲಿನತ್ತ ಮುಖ ಮಾಡಿದ್ದ ಭಾರತಕ್ಕೆ ದಿನೇಶ್ ಕಾರ್ತಿಕ್-ಕೃನಾಲ್ ಪಾಂಡ್ಯ ಆಸರೆಯಾದರು. ಸ್ಫೋಟಕ ಬ್ಯಾಟಿಂಗ್ ನಡೆಸಿದ ಈ ಜೋಡಿ ಏಳನೇ ವಿಕೆಟ್’ಗೆ ಮುರಿಯದ 63 ರನ್’ಗಳ ಜತೆಯಾಟವಾಡಿತಾದರೂ ತಂಡವನ್ನು ಗೆಲುವಿನ ದಡ ಸೇರಿಸಲು ವಿಫಲವಾಯಿತು.
ಇದಕ್ಕೂ ಮೊದಲು ಟಾಸ್ ಸೋತರೂ ಬ್ಯಾಟಿಂಗ್ ಮಾಡುವ ಅವಕಾಶ ಪಡೆದ ಕಿವೀಸ್ ಸಿಕ್ಕ ಅವಕಾಶವನ್ನು ಸಂಪೂರ್ಣವಾಗಿ ಬಳಸಿಕೊಂಡಿತು. ಕಾಲಿನ್ ಮನ್ರೋ[72] ಆಕರ್ಷಕ ಅರ್ಧಶತಕ, ಟಿಮ್ ಸೈಫರ್ಟ್, ರಾಸ್ ಟೇಲರ್ ಹಾಗೂ ಕಾಲಿನ್ ಡಿ ಗ್ರಾಂಡ್’ಹೋಂ ಸಿಡಿಲಬ್ಬರದ ಬ್ಯಾಟಿಂಗ್ ನೆರವಿನಿಂದ 212 ರನ್ ಸಿಡಿಸಿತ್ತು.
ಸಂಕ್ಷಿಪ್ತ ಸ್ಕೋರ್:
ನ್ಯೂಜಿಲೆಂಡ್: 212/4
ಕಾಲಿನ್ ಮನ್ರೊ: 72
ಕುಲ್ದೀಪ್: 26/2
ಭಾರತ: 208/6
ವಿಜಯ್ ಶಂಕರ್: 43
ಡೇರಲ್ ಮಿಚೆಲ್: 27/2
[* ನ್ಯೂಜಿಲೆಂಡ್ ತಂಡಕ್ಕೆ 4 ರನ್’ಗಳ ಜಯ]
